དོན་ཡོད་པའི་ཞགས་པ་ཆེན་པོའི་དཀྱིལ་འཁོར་གྱི་རིག་སྔགས་འཆང་གི་ཆོ་ག
འཕགས་པ་དོན་ཡོད་པའི་ཞགས་པའི་ཆོ་ག་ཞིབ་མོའི་རྒྱལ་པོ། བམ་པོ་བཅྭ་བརྒྱད་པ། དེ་ནས་དེའི་ཕྱིར་འགུགས་པ་ཆེན་པོ་དང་། ལག་ན་རྡོ་རྗེའི་གཟུགས་བསྟན་པའི་ཆོ་ག་བཤད་པར་བྱ་སྟེ། གང་གིས་ལྷ་རྣམས་མྱུར་དུ་འོང་བ་དང་། ཕྱག་ན་རྡོ་རྗེའི་གཟུགས་མྱུར་དུ་སྟོན་ཏོ། །རྡོ་རྗེའི་སྐུ་དང་སྟོབས་པོ་ཆེ། །རྟ་མགྲིན་དང་ནི་མགུལ་སྔོན་དང་། །དེ་བཞིན་རྟ་ནི་རྒོད་མའི་ཁ། །བདུད་རྩི་འཁྱིལ་ལྡན་གཟུགས་པོ་ཆེ། །ལོག་འདྲེན་རྣམས་ནི་རབ་འཇོམས་དང་། །ཁྲོ་རྒྱལ་དེ་བཞིན་འཇིགས་བྱེད་སྤྱན། །ཀི་ལི་ཀི་ལིའི་རྒྱལ་པོ་ཆེ། །ཁྲོ་བོ་ཆོལ་པ་སྟོབས་པོ་ཆེ། །དེ་བཞིན་རྡོ་རྗེས་འོག་གཟུགས། །རྡོ་རྗེ་རྩེ་མོ་དེ་ཉིད་དང་། །ཀླུ་ཆེན་རབ་འཇོམས་སྤྱན་ཡངས་དང་། །སོག་མ་མེད་ནི་འདུལ་བ་དང་། །དེ་བཞིན་ཐིགས་ཁྲོ་ཁྲོས་ཆེན་དང་། །དེ་བཞིན་མཆེ་བ་གཙིགས་མཛད་དང་། །རྒྱལ་པོ་ཆེན་པོ་རྡོ་རྗེའི་སྒྲོག །ཀླུ་ཡི་དབང་པོ་སྟོབས་ཀྱིས་གནོན། །མགོན་པོ་གོས་སྔོན་གྱོན་པ་དང་། །དབྱུག་སྔོན་དགྲ་ལས་རྒྱལ་བ་དང་། །འཇིག་རྟེན་དབང་ཕྱུག་པདྨའི་ལྟེ། །ཕྱག་ན་པདྨ་པདྨ་ཕྱུག །དེ་བཞིན་འཇིགས་པ་བརྒྱད་སེལ་དང་། །དེ་བཞིན་མཆོད་རྟེན་འཇིག་རྟེན་བླ། །སྣ་ཚོགས་གཟུགས་ཏེ་བཟང་པོ་དང་། །སྲེད་མེད་བུ་དང་ཚངས་པ་དང་། །དྲག་པོ་དང་ནི་དབང་ཕྱུག་དང་། །ནག་པོ་ཆེན་པོ་གཞོན་ནུ་དང་། །གཤིན་རྗེ་དང་ནི་ཆུ་ལྷ་ཉིད། །ཉི་མ་དང་ནི་ཟླ་བ་དང་། །རྒྱུ་སྐར་སྒྲ་གཅན་མཇུག་རིངས་དང་། །དེ་བཞིན་གཟའ་དང་ལྷ་མ་ཡིན། །ནམ་མཁའ་ལྡིང་དང་མི་འམ་ཅི། །གནོད་སྦྱིན་སྲིན་པོ་ལྟོ་འཕྱེ་ཆེ། །འབྱུང་པོ་དཔལ་ལྡན་རྣམ་ཐོས་བུ། །དེ་བཞིན་ཡུལ་སྐྱོང་མིག་མི་བཟང་། །འཕགས་སྐྱེས་དེ་
ཉིད་མཐོང་བ་དང་། །མིའུ་ཐུང་དང་ནི་དྲང་སྲོང་གཟུགས། །ནོར་བུ་བཟང་སྲས་གང་བ་དང་། །སྣ་ཚོགས་གཟུགས་ཅན་སྟོན་པ་དང་། །རྒྱལ་པོ་དང་ནི་དེད་དཔོན་དང་། །ཚོང་དཔོན་དེ་བཞིན་ཁྱིམ་བདག་དང་། །བྲམ་ཟེ་དང་ནི་རྒྱལ་རིགས་དང་། །དགེ་སྦྱོང་སྟག་དང་སེང་གེ་དང་། །ཁྱུ་མཆོག་དེ་བཞིན་ནགས་ཀྱི་ལྷ། །ཤིང་ལྷ་དེ་བཞིན་ལོ་ཏོག་ལྷ། །གང་གཱ་སི་ཏཱ་ཡ་མུ་ནཱ། །ཟླ་བ་སྐལ་ལྡན་རུ་སྦལ་ཉ། །ལག་འགྲོ་དང་ནི་ཐོད་པ་ཅན། །སྐལ་ཡོད་དེ་བཞིན་འབྲས་བུ་དང་། །མེ་ཏོག་རྒྱལ་རླབས་ཆེན་པོ་དང་། །སྣ་ཚོགས་གཟུགས་དང་རྣམ་སྣ་ཚོགས། །དེ་ལྟར་དགུག་པ་བསྟན་པ་དང་། །དེ་ལྟར་སླར་གཤེགས་གསོལ་བ་ཉིད། །སྦྱིན་སྲེག་དྲ་བ་འདི་ཉིད་ནི། །སྒྱུ་འཕྲུལ་རྨད་བྱུང་གསང་སྔགས་གྲུབ། །རྫས་གྲུབ་ནོར་བུ་ཏིལ་མར་གྲུབ། །དོན་ཡོད་ཞགས་པ་བསྒྲུབ་པའི་ཕྱིར། །དེ་ཉིད་དངོས་གྲུབ་རབ་སྟོན་པ། །མཆོད་རྟེན་དགོན་པ་གཙུག་ལག་ཁང་། །ལྷ་ཡི་གནས་དང་དེ་བཞིན་གྲོང་། །གྲོང་ཁྱེར་ཉིད་དང་འབབ་ཆུའི་དངོ་། །མཚེའུ་དང་ལྟེང་ཀ་ཆུ་བོ་དང་། །རྫིང་དང་དེ་བཞིན་ཆར་འབབ་དང་། །འབྲུག་སྒྲོགས་དང་ནི་གློག་འགྱུ་དང་། །གཞན་ཡང་མེ་ནི་འབར་བ་དང་། །དུད་པའི་ཕུང་པོ་བདེ་འགྱེད་དང་། །སྐྱེས་བུ་གོ་ཆ་གྱོན་པ་དང་། །དེ་བཞིན་མཚོན་ཆ་སྣ་ཚོགས་མཐོང་། །ཁྱུ་མཐོང་གྲུབ་པ་མཐོང་བ་དང་། །དེ་ཉིད་རྨད་དུ་བྱུང་བ་སྟེ། །རྫས་ཉུང་སྦྱར་བ་ཉུང་གྱུར་ཀྱང་། །དེ་ཉིད་དངོས་གྲུབ་བླ་ན་མེད། །སེམས་ཅན་རྣམས་ལ་ཕན་འཚལ་ནས། །བཅོམ་ལྡན་དེ་ཉིད་བདག་གིས་བཤད། །རིག་སྔགས་འཆང་རྣམས་བཀླགས་པས་འགྲུབ། །དབུལ་པོ་རྣམས་ནི་ནོར་འཐོབ་ཅིང་། །སྡང་བ་རྣམས་ནི་བྱམས་པར་བགྱིད། །མུ་སྟེགས་གཞན་རྣམས་དད་པར་བགྱིད། །མཁས་པ་རྣམས་ནི་དགའ་བར་བགྱིད། །གདུལ་དཀའ་རྣམས་ནི་ཐར་བར་འཚལ། །དགེ་སློང་རྣམས་ནི་བསམ་གཏན་ཐོབ། །ཏིང་འཛིན་བླ་ན་མེད་པ་ཐོབ། །ཆོས་འདོད་རྣམས་ནི་སངས་རྒྱས་མཐོང་། །སྡིག་པ་བྱེད་རྣམས་སྡིག་པ་འཇིག །མི་རིགས་བྱས་རྣམས་ཐར་པ་འཐོབ། །མཚམས་མེད་ལྔ་རྣམས་རྣམ་དག་
དོན། །དབུགས་མ་ཕྱིན་རྣམས་དབུགས་འབྱིན་མཆོག །མ་དུལ་བ་རྣམས་དེ་བཞིན་འདུལ། །མ་བརྒལ་བ་རྣམས་སྒྲོལ་བའི་གྲུ། །ཐར་པའི་ལམ་དུ་འགྲོ་བར་གནས། །མ་གྲོལ་ངན་འགྲོ་ཀུན་ལས་འགྲོལ། །སྡིག་པ་ཀུན་ལས་རྣམ་པར་གྲོལ། །ལུང་མ་བསྟན་པ་ལུང་སྟོན་བྱེད། །སྐྱོན་དང་དྲི་མ་སྡིག་པ་རྣམས། །ཐམས་ཅད་མོད་ལ་སྤོང་བགྱིད་དེ། །དེ་ལ་སོགས་པའི་ལས་རྣམས་ནི། །བཀླགས་པས་གྲུབ་པ་བགྱིད་པ་ལགས། །འཇིག་རྟེན་པ་དང་འཇིག་རྟེན་འདས། །དོན་གྱི་དངོས་གྲུབ་བླ་ན་མེད། །གང་དང་གང་དུ་སྦྱོར་བ་བགྱིད། །དགོས་པ་ཐམས་ཅད་འགྲུབ་པར་འགྱུར། །ཡིད་ལ་བསམས་པ་འགྲུབ་པར་འགྱུར། །འདིར་ནི་ཡིད་ཀྱིས་རྣམ་བསམས་པ། །ཇི་ལྟར་ཡིད་ལ་འདོད་པ་དང་། །ཇི་ལྟར་ངོ་བོ་ཀུན་བསམས་པ། །དེ་ལྟར་རྣམ་འཕྲུལ་སྟོན་པར་བགྱི། །ཚེས་གྲངས་རྒྱུ་སྐར་སྦྱར་མི་འཚལ། །སྨྱུང་བ་བགྱི་བ་མི་འཚལ་ཏེ། །ཆོ་ག་ཇི་བཞིན་དུས་ཅི་བཞིན། །ཆོ་ག་རིག་སྔགས་རྒྱལ་པོ་བཟླས། །རིག་སྔགས་འཆང་བ་གཙང་གྱུར་ཅིང་། །ལེགས་པར་ཁྲུས་བགྱིས་གོས་གཙང་དག །བགོས་པ་བདེན་པར་སྨྲ་བ་དང་། །བླ་མ་ལ་ནི་གུས་བྱེད་པ། །རྟག་ཏུ་བྱམས་པའི་སེམས་ལ་གནས། །སེམས་ཅན་ཀུན་ལ་བརྩེ་བའི་མཆོག །སྡོམ་ལ་གནས་ཤིང་ཚངས་པར་སྤྱོད། །ཆོས་མ་ཡིན་པ་སྤོང་བྱེད་པ། །གལ་ཏེ་དེ་ཉིད་གྲུབ་འདོད་ན། །ཆང་དང་ཤ་དང་ཀུན་དོང་དང་། །འདྲེས་དང་ཟ་འཕྲོ་སྦགས་པ་སྤང་། །སེམས་ཅན་ངན་པ་སུན་འབྱིན་པ། །རིག་སྔགས་རྐུ་དང་ཆོ་ག་རྐུ། །ཆོས་རྐུ་གསང་སྔགས་རྐུ་བ་དང་། །དེ་བཞིན་རྐུན་མོ་ཆོམ་རྐུན་དང་། །སེར་སྣ་རྟག་ཏུ་སྤང་བར་གྱིས། །དེ་དག་ལ་ནི་དངོས་གྲུབ་མེད། །མ་རུངས་པ་ཡིས་དམ་ཚིག་ཉམས། །ཡིད་གཅུགས་པ་ནི་མེད་པར་བྱེད། །སྡིག་པའི་ཆོས་ནི་ཀུན་དུ་སྤྱོད། །དེ་བཞིན་གཤེགས་པ་ཀུན་གྱིས་སྨད། །བྱང་ཆུབ་སེམས་དཔའ་རྣམས་ཀྱིས་སྨད། །རྟག་ཏུ་ཆོས་ཀྱི་སྡོང་དུམ་འགྱུར། །ཤི་ནས་སེམས་ཅན་དམྱལ་བར་གཞོལ། །རྟག་ཏུ་སྨད་པའི་གནས་སུ་འགྱུར། །དབུལ་པོ་ལུས་ནི་སྐམས་པ་དང་། །མཛེ་དང་ཁྱི་རྔོས་འདེབས་པ་
དང་། །སྡུག་བསྔལ་རྐུན་མ་ཆོས་སུན་འབྱིན། །ཆོས་རྐུ་བ་ཡི་ལུས་ཅན་ནི། །འཇིག་རྟེན་འདིར་ནི་བདེར་མི་འགྱུར། །འཇིག་རྟེན་ཕ་རོལ་ག་ལ་བདེ། །སེམས་ཅན་དམྱལ་བར་གཞོལ་བ་ཡིན། །དེ་ལྟ་བས་ན་ཆེན་པོ་འདོད་པས་ནི་རྟག་ཏུ་དམ་པའི་ཆོས་ཀྱི་རྗེས་སུ་འབྲང་བར་བྱ་ཞིང་རྟག་ཏུ་དཀོན་མཆོག་གསུམ་དང་། །ཕ་དང་མ་དང་བླ་མ་དང་། སྟོན་པ་ནི་སྐྱོབ་པ་དང་། སྐྱབས་དང་། དཔུང་གཉེན་མཛད་པ། སྟོན་པ། མཆོག་སྦྱིན་པ། དངོས་གྲུབ་དང་། མི་འཇིགས་པ་སྦྱིན་པ། རྒ་ཤི་ལས་ཐར་བར་བྱེད་པ། དབང་ཕྱུག་སྦྱིན་པ། ནོར་སྦྱིན་པ། ལོངས་སྤྱོད་སྦྱིན་པ། དང་བ་མཆོག་བསྐྱེད་པ་དེ་ཉིད་འཇིག་རྟེན་གྱི་བླ་མ། མགོན་པོ་འཇིག་རྟེན་དབང་ཕྱུག་ཆེན་པོ་དབང་ཕྱུག་མགོན་པོ། མཆོག་སྦྱིན་པར་མཛད་པ། གཟུགས་སྣ་ཚོགས་སྟོན་པར་མཛད་པ། དངོས་གྲུབ་སྣ་ཚོགས་སྦྱིན་པར་བགྱིད་པ། མགོན་པོ་སྡུག་བསྔལ་སྣ་ཚོགས་ལས་ཡོངས་སུ་ཐར་བར་བགྱིད་པ། ནད་སྣ་ཚོགས་སྦྱོང་བར་གྲུབ་པ། རིན་པོ་སྣ་ཚོགས་རབ་ཏུ་སྦྱིན་པར་བགྱིད་པ། འཇིག་རྟེན་སྡིག་པ་སྣ་ཚོགས་སེལ་བར་བགྱིད་པ། བླ་མ་ལ་གུས་པ་སྣ་ཚོགས་བགྱིད་པ་ལགས་ཏེ། དེ་ལྟ་བས་ན་རྟག་ཏུ་འབད་པས་དགོས་པ་ཐམས་ཅད་རབ་ཏུ་སྦྱིན་པར་བགྱིད་པ། རྟག་ཏུ་འབད་པས་ཤིན་ཏུ་གུས་པར་བགྱིས་པ་ལགས་སོ། །དེ་ནས་རྫས་ཀྱི་སྨན་གྲུབ་པ་དང་། བཟླས་བརྗོད་ཀྱི་ཆོ་ག་བཤད་པར་བགྱི་སྟེ། སེང་གེའི་ལྕེ་དང་། སྙིང་དང་། མིག་དང་། དེ་བཞིན་དུ་ཉ་ཕྱིས་ཀྱི་ཕྱེ་དང་། ལྡོང་རོས་དང་། བྲཧྨའི་འོ་མ་དང་། གུ་གུལ་དང་། པདྨ་དང་། པདྨའི་ཟེ་བ་དང་། ཨུཏྤལ་སྔོན་པོ་དང་། ནཱ་ག་པུས་པ་དང་། ལི་ཤི་དང་། རྒྱ་སྤོས་དང་། དེ་བཞིན་དུ་གིའུ་ཝང་དང་། གླ་རྩི་དང་། ག་བུར་དང་། གུར་གུམ་དང་། ཙནྡན་དཀར་པོ་དང་། སྤྲྀ་ཀ་དང་། ཏེ་ཛ་བ་ཏི་སྟེ་དེ་ལྟར་ཆ་མཉམ་པར་བྱས་པ་དེ་དག་ཐམས་ཅད་ཕྱེ་མ་ཞིབ་མོར་བྱས་ལ་དངུལ་གྱི་སྣོད་བཀང་སྟེ་དར་གྱིས་གཡོགས། དོན་ཡོད་པའི་རྒྱལ་པོ་སྤྱན་རས་གཟིགས་དབང་ཕྱུག་གི་མདུན་དུ་དུས་གསུམ་དུ་ཁྲི་བཟླས་བརྗོད་བྱའོ། །དུས་གསུམ་དུ་ཁྲོ་བོའི་རྒྱལ་པོས་ལན་ཉི་ཤུ་རྩ་གཅིག་བཟླས་
བརྗོད་བྱས་པས་དབང་བསྐུར་ཞིང་ཕྱག་རྒྱས་ཀྱང་ཉི་ཤུ་རྩ་གཅིག་ཏུ་དབང་བསྐུར་རོ། །ཁྲི་ཚང་ནས་ཆ་ལྔ་བྱས་ཏེ་ཕྱེ་མ་དང་། ཏིལ་མར་དང་། ནོར་བུ་དང་། མིག་བསྐུ་བ་དང་། ཏིལ་མར་ཚོས་པ་དང་ཆ་ལྔའོ། །ཕྱེ་མའི་པདྨ་མུ་རུ་ཀའི་ཕྱེ་མ་དང་སྦྱར་ལ་བཟླས་བརྗོད་བྱའོ། །ཁྲོ་བོའི་རྒྱལ་པོས་ནི་ལྔ་སྟོང་ངོ་། །ཏིལ་མར་ནི་མ་ཧཱ་རུ་དྷི་རས་འགྲུབ་སྟེ་བརྒྱ་སྟོང་བཟླས་བརྗོད་བྱའོ། །ཁྲོ་བོའི་རྒྱལ་པོས་བཞི་སྟོང་ངོ་། །ནོར་བུ་ནི་སྦྲུལ་གྱི་ཁྲག་གིས་སྦྲུས་ཏེ་ཁྲི་ཆིག་སྟོང་བཟླས་བརྗོད་བྱའོ། །ཁྲོ་བོའི་རྒྱལ་པོས་ལྔ་སྟོང་ལྔ་བརྒྱའོ། །མིག་སྨན་ནི་རྨ་བྱའི་མིག་ཆུ་དང་། འུག་པའི་མིག་དང་། ཀླད་པ་དང་སྦྱར་ལ་ཁྲི་ཆིག་སྟོང་བཟླས་བརྗོད་བྱའོ། །ཁྲོ་བོའི་རྒྱལ་པོ་སྟོང་རྩ་བརྒྱད་དོ། །བྲཧྨ་ཏཻ་ལ་སྲང་ཉི་ཤུ། གན་དྷ་ར་བ་ཏཻ་ལ་སྲང་བརྒྱད། ཡུངས་མར་ལ་སྲང་བཅུ་དྲུག །འོ་མ་ལ་སྲང་བརྒྱ། བ་སེར་མོ་གྲུབ་པའི་འོ་མ་དང་། བའི་ལྕི་བ་དང་། བ་གཅིན་སྲང་བདུན། དུ་རུ་སྐའི་མར་ཁུ་སྲང་གཉིས་ཏེ་རྫས་འདི་རྣམས་ཆུ་དང་བསྲེས་ནས་པདྨའི་སྡོང་བུས་དཀྲུག་ཅིང་ཟངས་སྣོད་དུ་བཙོའོ། །མཉམ་པར་གཞག་པས་གསང་སྔགས་བཟླས། །ཆོ་ག་དག་གིས་བསྲུང་བར་བྱ། །ཆོ་ག་བཞིན་དུ་གཏོར་མ་སྦྱར། །མེ་ཏོག་བདུག་སྤོས་དག་གིས་བདུག །ཏིལ་མར་མཆོག་ནི་བསྒྲུབ་པར་བྱ། །ཆུང་ངུར་མེ་བུད་གྲུབ་པ་མཆོག །སྤོས་ཀྱི་ཤིང་གིས་བུད་པ་བཟང་། །འདི་ལྟར་གྲུབ་པར་ཤེས་པ་དང་། །ཁྲོ་བོའི་རྒྱལ་པོས་དབང་བསྐུར་བ། །ཉི་ཤུ་གཅིག་ཏུ་དབང་བསྐུར་རོ། །ཏིལ་མར་དེ་ནི་སྣོད་གཙང་མ། །ཟངས་སྣོད་ཡང་ན་དངུལ་སྣོད་བཟང་། །སྨྱིག་མའི་སྣོད་དུ་གཞག་པར་བྱ། །དེ་ནས་རིག་སྔགས་བརྒྱད་སྟོང་དང་། །ཁྲོ་བོའི་རྒྱལ་པོ་བརྒྱད་སྟོང་ཉིད། །སོ་སོ་དག་ཏུ་བཟླས་བརྗོད་བྱ། །དཀྱིལ་འཁོར་ཡོངས་སུ་རྫོགས་པ་དེར་གཞག་པར་བྱ་བ་ནི་ཇི་ལྟར་དཀྱིལ་འཁོར་གྱི་ཆོ་གར་བྱ་བ་དེ་ལྟར་བྱས་ནས་གཞག་ཅིང་སློབ་དཔོན་གྱི་ལས་ཀྱང་བྱ་སྟེ། ཇི་ལྟར་དཀྱིལ་འཁོར་བསྒྲུབ་པ་དང་། འཇུག་པ་དང་། དམ་ཚིག་དང་། ཕྱག་རྒྱ་དང་། དབང་བསྐུར་བ་དང་། མཆོད་པ་དང་། དཀྱིལ་འཁོར་བསྐོར་བ་དང་།
ཕྱག་བྱ་བ་དང་། སྤྱིའུ་གཙུག་བཅིང་བ་དང་། ཕྱག་རྒྱ་བཅིང་བ་དང་། སྲུང་བའི་ཆོ་ག་དང་། ཉེ་རེག་བྱ་བ་དང་། གོས་བགོ་བ་དང་། མཆོད་ཕྱིར་ཐོགས་པ་སྡེ་དཀྱིལ་འཁོར་གྱི་སློབ་དཔོན་ཀུན་གྱི་དེ་དག་ཐམས་ཅད་བསྟན་པར་བྱའོ། །དེ་ནས་དཀྱིལ་འཁོར་གྱི་དབུས་ཀྱི་སྙིང་པོར་བཞག་ལ་རིག་སྔགས་འཆང་སྦྱང་བའི་ཆོ་ག་བྱས་པས་འཕགས་པ་དོན་ཡོད་པའི་ཞགས་པའི་སྙིང་པོ་སྟོང་རྩ་བརྒྱད་བཟླས་བརྗོད་བྱ། ཁྲོ་བོའི་རྒྱལ་པོས་ཀྱང་སྟོང་རྩ་བརྒྱད་དུ་དབང་བསྐུར། ཕྱག་རྒྱས་ཀྱང་སྟོང་རྩ་བརྒྱད་དུ་དབང་བསྐུར་ལ། ཕྱག་རྒྱ་བཅིངས་ནས་རྣམ་པ་གསུམ་འདྲ་བར་དབང་བསྐུར་རོ། །དེ་ནས་ལས་ཐམས་ཅད་བྱས་ཏེ་ཡུངས་ཀར་དཀར་པོ་གྲུབ་པ་ལ་རིག་སྔགས་འཆང་གིས་བརྒྱད་སྟོང་བཟླས་བརྗོད་བྱས་ལ་པདྨའི་མཆོག་གཙོ་བོ་གཙང་བ། གཙང་མར་བྱས་པ། ལེགས་པར་བཀྲུས་པ། སྦྱངས་པ། ཕྱེ་མ་ཞིབ་ཏུ་བཏགས་པ་ཐལ་བ་ལྟ་བུ་ལ་བརྒྱད་སྟོང་བཟླས་བརྗོད་བྱས་ནས་སྣོད་དགང་། གུ་གུལ་དང་། ཙནྡན་དང་། ཨ་ག་རུ་དང་། སྤྲྀ་ཀ་ལ་བརྒྱ་རྩ་བརྒྱད་བཟླས་བརྗོད་བྱས་ནས་སྣོད་ཀྱི་ནང་དུ་བཀང་ལ། དབུས་ཀྱི་དཀྱིལ་འཁོར་དམ་པའི་སྟེང་དུ་སོ་སོར་གཞག་གོ། །དེ་ནས་ཁྲོ་བོའི་རྒྱལ་པོས་དབང་བསྐུར་ཅིང་ཕྱག་རྒྱས་ཀྱང་དབང་བསྐུར་བ་བྱས་ན། གང་གི་ཚེ་དོན་དུ་བྱ་བ་བྱུང་བའི་ཚེ་བྱ་བ་ཐམས་ཅད་བྱེད་དོ། །གསེར་རམ། ཡང་ན་དངུལ་ལམ། ཟངས་ལས་པདྨའི་ཚད་དུ་བྱས་པ་འདབ་མ་ཉི་ཤུ་རྩ་གཅིག་དང་། སྙིང་པོ་དང་། ཟེ་བ་ཅན་དང་། དེ་བཞིན་དུ་སོར་བཅུ་གཉིས་པའི་ཚད་ལ་སྡོང་བུ་སོར་བཅུ་དྲུག་པའི་ཚད་རྡོ་རྗེའི་རྣམ་པ་ཅན་དུ་བྱ། སྐུད་པ་དམར་པོའི་ཞགས་པ་པདྨའི་ཚོན་དམར་པོས་བཞེན་པ། གཞོན་ནུས་བཀལ་བ་གྲུབ་པ། དེ་དག་ལ་བརྒྱ་སྟོང་བཟླས་བརྗོད་བྱ། ཁྲོ་བོའི་རྒྱལ་པོས་དབང་བསྐུར་ཅིང་ཕྱག་རྒྱས་ཀྱང་དབང་བསྐུར་བ་བྱས་ལ་མཁས་པས་གསང་བའི་གནས་སུ་གཞག་གོ། །གང་གི་ཚེ་དོན་དུ་བྱ་བ་བྱུང་བ་དེའི་ཚེ་ལས་ཐམས་ཅད་གྲུབ་པ་སྟན་ཏོ། །
ཤིན་ཏུ་གཙང་ཞིང་གཙང་བར་བྱ་སྟེ། སུ་ལ་ཡང་མི་སྦྱིན་ནོ། །སངས་རྒྱས་རྣམས་ལ་སྐུ་བརྙས་པར་གྱུར་པ།དམ་ཚིག་ཉམས་པ་ལ་བགེགས་འཇུག་པར་འགྱུར་ཞིང་། འཕྲལ་དུ་མཚམས་མེད་པ་ལྔ་བྱེད་པ་རྨོངས་པའི་དྲ་བ་དེ་ལ་དངོས་གྲུབ་རྣམས་ཀྱང་ཤེས་པར་མི་འགྱུར་རོ། །གཞན་ནི་བླ་མ་ལ་གུས་ཤིང་། །སངས་རྒྱས་ཆོས་ལ་རྟེན་བྱེད་པ། །འཕགས་པའི་ཚོགས་ལ་དང་བ་དང་། །བྱམས་སེམས་སྙིང་རྗེའི་བདག་ཉིད་ཅན། །དེ་ཡི་ལག་ཏུ་རབ་ཏུ་སྦྱིན། །བདག་གི་སྲོག་བཞིན་གཏད་པར་བྱ། །དེ་དག་དངོས་གྲུབ་མཆོག་སྦྱིན་ཏེ། །བཀླགས་དང་མཐོང་བ་ཙམ་གྱིས་ནི། །ཇི་ལྟར་ཡིད་ལ་བྱས་པ་བཞིན། །རྗེས་སུ་མཐུན་པའི་ལས་བྱེད་དོ། །འཇིག་རྟེན་འདིར་ནི་རྟག་ཏུ་བདེ། །འཇིག་རྟེན་ཕ་རོལ་བདེ་བ་ཡིན། །འགྲོ་བ་ལམ་ནི་བདེ་བར་འགྲོ། །གང་ན་འོད་དཔག་མེད་པ་བཞུགས། །བདེ་བ་ཅན་དུ་རྟག་ཏུ་འགྲོ། །བརྫུས་ཏེ་སྐྱེ་བའི་པདྨ་ལས། །རྒྱན་རྟགས་ཀུན་གྱིས་རྣམ་པར་བརྒྱན། །ཚེ་རབས་དག་ནི་དྲན་འགྱུར་ཏེ། །སྔོན་གྱི་ཚེ་རབས་དྲན་པར་འགྱུར། །དེ་ནས་རིག་སྔགས་འཆང་རྨོངས་པ་ཆེན་པོའི་དམ་ཚིག་སྟོན་པར་འདོད་པ་གཙང་མས་ལེགས་པར་ཁྲུས་བྱ། གོས་གཙང་མ་བགོས་ནས་ཉིན་ཞག་གཅིག་སྨྱུང་བ་བྱས་པས་ལག་ན་རྡོ་རྗེ་དང་། འཕགས་པ་སྤྱན་རས་གཟིགས་དབང་ཕྱུག་ཞལ་མངོན་དུ་བཞག་སྟེ། མེ་ཏོག་དང་བདུག་སྤོས་དབུལ་ཞིང་འཕགས་པ་སྤྱན་རས་གཟིགས་དབང་ཕྱུག་གི་སྐུ་གཟུགས་དང་། ཕྱག་ན་རྡོ་རྗེའི་སྐུ་གཟུགས་ལ་མཆོད་པ་ཡང་བྱ། འཕགས་པ་སྤྱན་རས་གཟིགས་དབང་ཕྱུག་ལ་ཨ་ག་རུའི་བདུག་སྤོས་ཀྱིས་བདུག །ལག་ན་རྡོ་རྗེ་ལ་གུ་གུལ་གྱི་བདུག་སྤོས་ཀྱིས་བདུག །འཕགས་པ་སྤྱན་རས་གཟིགས་དབང་ཕྱུག་ལ་ལྷ་བཤོས་དཀར་པོ་འབུལ། ལག་ན་རྡོ་རྗེ་ལ་རོ་སྣ་ཚོགས་དང་ལྡན་པའི་ལྷ་བཤོས་ཕུལ་ལ། ཉིན་པར་དོན་ཡོད་པའི་རྒྱལ་པོ་བཟླས་བརྗོད་བྱ། མཚན་མོ་ཁྲོ་བོའི་རྒྱལ་པོ་ངལ་བ་མེད་པར་བཟླས་བརྗོད་བྱ་སྟེ། ཁ་གདོང་ཁྲོ་གཉེར་མེད་པ་དང་། དྲི་མ་
དང་སེར་སྣ་མེད་པས་ནམ་ལངས་ཀྱི་བར་དུ་བཟླས་བརྗོད་བྱས་པ་དང་། འཕགས་པ་སྤྱན་རས་གཟིགས་དབང་ཕྱུག་འབར་བར་འགྱུར་ལ། ལག་ན་རྡོ་རྗེ་ཡང་པུས་མོ་འཛུགས་པར་འགྱུར་ཏེ། དེ་གཉིས་ཀྱི་མིག་ནས་འཛག་པ། རིག་སྔགས་འཆང་གིས་བླངས་ནས་ཐིག་ལེ་བྱས་ན་མི་སྣང་བར་འགྱུར་རོ། །མིག་ལ་བསྐུས་ན་ནམ་མཁའ་ལ་འགྲོའོ། །ཁར་བཅུག་ན་རིག་སྔགས་དང་ཆོ་ག་ཞིབ་མོ་དང་། གསང་སྔགས་དང་། དཀྱིལ་འཁོར་མངོན་དུ་འགྱུར་རོ། །ལག་ན་རྡོ་རྗེའི་སྟོབས་དང་། ཤུགས་དང་། བརྩོན་འགྲུས་ཀྱིས་ཕ་རོལ་གནོན་པར་འགྱུར། ལག་ན་རྡོ་རྗེའི་རང་གི་གཟུགས་ཀྱིས་མདུན་ན་ཉེ་བར་འདུག་ཅིང་འདོད་པ་ཐམས་ཅད་ཀྱི་མཆོག་རྗེས་སུ་སྦྱིན་པར་བྱེད་ལ། རང་གི་གཟུགས་ཀྱིས་སྤྱོད་པར་བྱེད། ལག་ན་རྡོ་རྗེའི་སྟོབས་དང་། ཤུགས་དང་། བརྩོན་འགྲུས་ཀྱིས་ཕ་རོལ་གནོན་པ་རྗེས་སུ་སྦྱིན་པར་བྱེད། དེ་ལྟར་ལག་ན་རྡོ་རྗེས་འགུགས་པར་འགྱུར་རོ། །ཉི་མ་འཆར་བའི་དུས་སུ་ཏིལ་མར་ཆེན་པོ་རན་པར་བདག་ཉིད་ལ་བསྐུ། མིག་སྨན་གྱིས་མིག་བྱུག །ཕྱེ་མས་གཏོར་ཞིང་བདག་ཉིད་ཐིག་ལེ་བྱ། ནོར་བུ་མགོ་ལ་བཞག་ནས་གུ་གུལ་གྱིས་བདུག །བདག་ཉིད་གོས་ངུར་སྨྲིག་བགོས་ནས་སངས་རྒྱས་ཡིད་ལ་བྱ་བ་སྒོམ་ཞིང་། ཞི་བ་དང་དུལ་བའི་ཡིད་ཀྱིས་སྡེ་ཅན་གྱི་ནང་ངམ་དགེ་འདུན་གྱི་ནང་དུ་འཇུག་པར་བྱའོ། །དེ་ནས་དགེ་སློང་དེ་དག་གི་སྡེ་ཅན་གྱི་ནང་དུ་ཞུགས་སམ། དགེ་འདུན་གྱི་ནང་དུ་ཞུགས་པའི་རིག་སྔགས་འཆང་དེ་བཅོམ་ལྡན་འདས་ཀྱི་སྐུ་དང་། མདོག་དང་། རྟགས་དང་། སྤྱོད་ལམ་དུ་མཐོང་སྟེ། མཚན་ཉི་ཤུ་རྩ་བརྒྱད་ཡོད་པ་འོད་འདོམ་གང་བ། སྟན་པདྨ། བརྒྱ་བྱིན་དང་། ཚངས་པའི་མདུན་གྱི་བདར་བའི་ལྷ་ཚོགས་སྣ་ཚོགས་ཀྱིས་གཟུགས་མཐོང་བར་སྟོན་ཏོ། །དགེ་སློང་དེ་དག་གིས་ཀྱང་དེ་བཞིན་གཤེགས་པའི་སྐུ་དང་། མདོག་ཏུ་མཐོང་ནས་ཐམས་ཅད་ཞབས་གཉིས་ལ་འདུད་པར་བྱེད་དོ། །རིག་སྔགས་འཆང་དེས་བརྙས་པར་མི་བྱ་ཞིང་། བདག་ལ་བསྟོད་པར་ཡང་མི་བྱ། བརྙས་པ་ཙམ་གྱིས་ཁྱོད་ཀྱི་བསོད་ནམས་
ཡོངས་སུ་ཉམས་པར་མི་འགྱུར་བར་བྱའོ། །འཕགས་པའི་དགེ་སློང་གི་དགེ་འདུན་རྫུ་འཕྲུལ་ཆེན་པོས་སྟོབས་བཅུ་དང་ལྡན་པར་དབུགས་དབྱུང་བར་བྱ་སྟེ། རྒྱུ་དེས་ན་བརྙས་པར་མི་བྱའོ། །དེ་ནས་གྲོང་ཁྱེར་དང་། རྒྱལ་པོའི་ཕོ་བྲང་དུ་འཇུག་པར་བྱ། དེ་ནས་འདུས་པའི་ནང་དུ་འཇུག་པར་བྱ། དེ་ནས་གྲོང་དང་། ཚང་ཚིང་དང་། ཡུལ་དང་། རི་བྲགས་ཀྱི་ནང་དུ་འཇུག་པར་བྱ། དེ་ནས་བཙུན་མོའི་ནང་དུ་འཇུག་པར་བྱ་སྟེ། ཡུལ་གྱི་སྐྱེས་པ་དང་། བུད་མེད་དང་། ཁྱེའུ་དང་། བུ་མོ་དེ་དག་ཐམས་ཅད་ཀྱིས་ཀྱང་སངས་རྒྱས་ཀྱི་སྐུ་དང་། མདོག་དང་། རྟགས་དང། དབྱིབས་སུ་མཐོང་ཞིང་མཆོད་པ་ཆེན་པོ་དང། རིམ་གྲོ་སྣ་ཚོགས་བྱེད་པར་འགྱུར་ལ། དེ་བཞིན་གཤེགས་པ་སངས་རྒྱས་ཡིན་ནོ་ཞེས་སྨྲ་སྟེ། དེ་བཞིན་གཤེགས་པའི་ཆོ་ག་འཐོབ་བོ། །ཡུངས་ཀར་དང་། ཏིལ་མར་གྱིས་རང་གི་འཁོར་གྱི་སྤྱི་བོར་གཏོར་ཅིང་བྱུགས་ན། ཐམས་ཅད་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོའི་གཟུགས་སུ་སྟོན་ཏོ། །རྐང་པ་ཏིལ་མར་གྱིས་བསྐུས་ན་སའི་སྟེང་ནས་སོར་བརྒྱད་ཙམ་གྱིས་སྤགས་ཏེ་ནམ་མཁའ་ལ་འགྲོ་སྟེ། ཇི་སྲིད་དུ་མ་བཀྲུས་པ་དེ་སྲིད་དུ་སངས་རྒྱས་ཀྱི་ཆ་བྱད་དུ་སྟོན་ཏོ། །མགོན་པོ་སྤྱན་རས་གཟིགས་མཐོང་བར་འདོད་པའི་རིག་སྔགས་འཆང་དེ་ནང་པར་སྔར་ལངས་ནས་གཙང་མ་ཁྲུས་བྱས་ཏེ། གོས་གཙང་མ་བགོས་ནས་ཁང་སྟེང་དུ་འདུག་ལ་ཡུངས་ཀར་ལ་ཏིལ་མར་གྱིས་བྱུགས་ནས་ཕྱོགས་བཞིར་གཏོར་ན། རྒྱལ་པོ་དང་། བློན་པོ་དང་། རྒྱལ་རིགས་དང་། བྲམ་ཟེ་དང་། བཙུན་མོ་དང་། སྐྱེས་པ་དང་། བུད་མེད་དང་། ཁྱེའུ་དང་། བུ་མོ་ཐམས་ཅད་སྒྱུ་མ་ཆེན་པོས་རྨོངས་པར་འགྱུར་རོ། །དེ་ནས་རིག་སྔགས་འཆང་དེས་ནོར་བུ་བཞིས་དབུ་རྒྱན་དང་ཕྲེང་བ་བྱས་ལ་མགོ་ལ་གདགས་སོ། །ཏིལ་མར་གྱིས་ཡན་ལག་ཙམ་ལ་བསྐུ་བར་བྱ། དཔྲལ་བར་ཐིག་ལེ་བྱ། མིག་སྨན་གྱིས་མིག་བསྐུ། ཕྱེ་མས་བདག་ཉིད་ལ་གདབ། རས་བཟང་པོ་ཡུག་གཅིག་བགོ། །བྱང་ཆུབ་སེམས་དཔའི་ཆ་བྱད་དུ་བགྱི་བ་དང་། ནོར་བུ་དང་།
གདུ་བུ་དང་། དཔུང་རྒྱན་དང་། གསེར་སྐུད་ཀྱིས་བཅིངས་ན་དེ་དག་ཐམས་ཅད་རྒྱན་དང་། སྤུད་པ་དང་། ནོར་བུ་དང་། དངུལ་དང་། རྡོ་རྗེ་དང་། བཻ་དཱུརྱ་སྣ་ཚོགས་ཀྱིས་ལུས་བརྒྱན་པར་སྣང་ངོ་། །ལག་ན་པདྨ་ཐོགས་ན། འཕགས་པ་སྤྱན་རས་གཟིགས་དབང་ཕྱུག་གི་གཟུགས་སུ་སྣང་ངོ་། །ཡིད་ལ་ཇི་ལྟར་བསམས་པ་དོན་ཡོད་པའི་ཞགས་པའི་ཚུལ་དང་། འཇིགས་པ་བརྒྱད་དང་། ཚངས་པའི་ཚུལ་དང་། ཡིད་བཞིན་ནོར་བུ་དང་། རྒོད་མའི་ཁ་དང་། མགུལ་སྔོན་དང་། རྟ་མགྲིན་དུ་སྟོན་ཏོ། །ཇི་ལྟར་གཟུགས་ཡིད་ལ་བྱས་པ་དེ་ལྟར་སྟོན་ཏེ། ཇི་སྲིད་དུ་ཐིག་ལེ་ཡོད་ཅིང་དབུ་རྒྱན་ཐོགས་པ་དེ་སྲིད་དུ་ཚུལ་སྣ་ཚོགས་སྟོན་པར་བྱེད་དོ། །ཏིལ་མར་དང་། ཡུངས་ཀར་དང་བསྲེས་ན། ཀིང་ཀུཥྛ་དང་ལྷན་ཅིག་སྦྲུས་ནས་ལག་པ་གཡས་ན་རྡོ་རྗེ། དཔྲལ་བར་དབང་ཕྱུག་ཆེན་པོའི་ཐིག་ལེ་བྱས་ནས་པདྨའི་ཕྱེ་མས་གཏོར་ལ། ནོར་བུ་སྤྱི་གཙུག་ཏུ་བཅིང་། མིག་སྨན་གྱིས་མིག་བསྐུ། གུ་གུལ་གྱིས་བདུགས་ལ་ཤེས་རབ་ཅན་ཁྲོ་བོའི་ལྟ་བའི་ཚུལ་བྱས་ན་མངོན་སུམ་དུ་རྡོ་རྗེ་འཆང་གི་གཟུགས་སུ་སྣང་སྟེ། དེ་ལ་ཐེ་ཚོམ་མི་བྱའོ། །ཇི་སྲིད་དུ་བདག་ཁྲུས་མ་བྱས་པ་དེ་སྲིད་དུ་རྡོ་རྗེའི་གཟུགས་ཅན་དུ་སྣང་ལ་ལས་སྣ་ཚོགས་བྱེད་ཅིང་མི་དང་། འཇིག་རྟེན་ཐམས་ཅད་ཀྱིས་རྡོ་རྗེ་འཆང་ཉིད་དུ་སེམས་ཏེ། དེ་ལ་ཐེ་ཚོམ་མི་བྱའོ། །སེང་གེའི་ཁྲག་གིས་ཏིལ་མར་དང་ནོར་བུ་སྦྲུས་ནས་ལུས་ལ་བསྐུས་ན་མིའི་སེང་གེ་ཆེན་པོའི་གཟུགས་སུ་སྟོན་ཏོ། །ཕག་གི་ཁྲག་གིས་སྦྲུས་ནས་ལུས་ལ་བསྐུས་ན་ཕག་གི་གཟུགས་ཆེན་པོར་སྟོན་ཏོ། །ཏིལ་མར་དང་། ཕྱེ་མ་ལྷན་ཅིག་སྦྲུས་ནས་ཡུང་བ་དང་། ཤིང་པ་ལ་ཤའི་མདོག་ཏུ་བྱས་ལ་ལུས་ལ་བསྐུས་ན་སྲེད་མེད་ཀྱི་བུའི་གཟུགས་སུ་སྟོན་ཏོ། །རིག་སྔགས་འཆང་གིས་པདྨ་དང་། ཏིལ་མར་ལྷན་ཅིག་སྦྲུས་ལ་ལུས་ལ་བསྐུས་ན་དབང་ཕྱུག་ཆེན་པོའི་གཟུགས་སུ་སྟོན་ཏོ། །ཤིང་ཨརྐའི་འོ་མ་དང་། ཏིལ་མར་དང་། མཉམ་པར་སྦྱར་ལ་ལུས་ལ་བསྐུས་ན་ཚངས་པའི་གཟུགས་སུ་སྟོན་ཏོ། །གླང་པོ་ཆེའི་ཁྲག་དང་ཏིལ་མར་སྦྱར་ནས་ལུས་ལ་བསྐུས་ན་ཚོགས་ཀྱི་དབང་ཕྱུག་ཆེན་པོའི་གཟུགས་སུ་སྟོན་ཏོ། །རའི་ཁྲག་
དང་སྦྲུས་ནས་ལུས་ལ་བྱུགས་ན་རའི་གཟུགས་སུ་སྟོན་ཏོ། །ཏིལ་མར་དང་། ཐིང་ཤིང་དང་། པདྨའི་ཕྱེ་མ་དང་།གླང་པོ་ཆེའི་ཁྲག་དང་ལྷན་ཅིག་སྦྱར་ནས་ལུས་ལ་བསྐུས་ན་ནག་པོ་ཆེན་པོའི་གཟུགས་མངོན་སུམ་དུ་རང་གི་གཟུགས་སུ་སྟོན་ལ། གང་དང་གང་དག་ལ་ཐིག་ལེ་བྱས་ན་མ་མོའི་ཚོགས་ཀྱི་གཟུགས་སུ་སྟོན་ཏོ། །སྦྲུལ་གྱི་ཁྲག་དང་། པགས་པ་དང་། ཏིལ་མར་གྱི་རྒྱལ་པོ་དང་ལྷན་ཅིག་སྦྲུས་ལ་སྒལ་ཚིགས་སུ་བསྐུ་ཞིང་། དཔུང་པ་གཡོན་པར་ཡང་བསྐུས་ན་ཀླུའི་རྒྱལ་པོ་ཆེན་པོའི་གཟུགས་སུ་སྟོན་ཏེ། ཇི་ལྟར་ཇི་ལྟར་ཁྲག་དང་སྦྱར་ཞིང་ཇི་ལྟ་ཇི་ལྟར་ཡིད་ལ་བསམས་པ་དེ་ལྟ་དེ་ལྟར་གཟུགས་སྟོན་ཏོ། །དེ་ནས་གཞལ་མེད་ཁང་ལྟ་བར་འདོད་ན་ཡུངས་ཀར་ལ་ཏིལ་མར་གྱིས་བསྐུས་ནས་དགེ་འདུན་གྱི་ནང་དུ་སྟེང་འོག་ཏུ་གཏོར། ཕྱེ་མས་ནོར་བུ་རྒྱལ་མཚན་གྱི་རྩེ་མོ་ཀུན་ཏུ་བསྐུས་ན་དགེ་འདུན་རྒན་རིམས་སུ་བཀོད་པའི་དབུས་སུ་གཞལ་མེད་ཁང་ཆེན་པོ་རྒྱན་གྱིས་བརྒྱན་པ་སྟོན། དགེ་སློང་རྣམས་ཀྱི་སྟེང་དུ་གཏོར་ན་དགེ་སློང་ཐམས་ཅད་གཟུགས་སྣ་ཚོགས་ཡིད་ལ་ཇི་ལྟར་བྱས་པ་བཞིན་རྒྱལ་པོའི་གཟུགས་སུ་སྣང་བ་དང་། གཞན་དག་བློན་པོ་དང་། གཞན་དག་བཀྲབས་པ་དང་། གཞན་དག་མདུན་ན་འདོན་པ་དང་། གཞན་དག་ཡོངས་སུ་སྤྱོད་པའི་གཟུགས་སུ་སྟོན་ལ། ཡུངས་ཀར་ལ་བསྐུས་པས་གཏོར་ན་སླར་ཡང་དགེ་སློང་རྣམས་སུ་སྣང་ངོ་། །ཤིང་ཨརྐའི་འོ་མ་ཡུངས་ཀར་ལ་བསྐུས་ནས་དགེ་འདུན་གྱི་དབུས་སུ་དགེ་སློང་རྣམས་ཀྱིས་མལ་སྟན་གྱི་སྟེང་དུ་གཏོར་ན། ཇི་ལྟར་དགེ་སློང་ཐམས་ཅད་འཁོད་པ་ལྟར་སྣང་ངོ་། །རལ་པའི་ཐོར་ཚུགས་ཀྱིས་བརྒྱན་པ་ལ་གཏོར་ན་རྒན་པོ་འཁར་བ་ཐོགས་པ་སྒུར་པོ་ལྟག་དགྱེ་སྐྲ་དཀར་ཅན་ཉམ་ཆུང་བར་སྣང་ངོ་། །མལ་སྟན་གྱི་སྟེང་དུ་ཡུངས་ཀར་གཏོར་བ་གལ་ཏེ་མཚན་ཐོག་ཐག་བཞག་ན་གཟུགས་གཞན་དུ་མི་འགྱུར་རོ། །ལུག་གི་སྟེང་ན་སྣོད་ཡོད་པ་ལ་གཏོར་ན་དེ་ཐུར་མའི་གཟེབ་དང། སྦྲུལ་ནག་པོ་སྣང་ངོ་། །སྣོད་ཀྱི་སྟེང་དུ་གཏོར་ན་ཁམ་ཕོར་དུ་སྣང་བར་འགྱུར་རོ། །བཏུང་བའི་སྣོད་སྦྲང་རྩིས་བྱུགས་པའི་སྟེང་དུ་གཏོར་ན་ཕྱག་དར་གྱི་ཕུང་པོར་སྣང་ངོ་།
གྲོང་ཁྱེར་གྱི་སྒོ་དང་གྲོང་ཁྱེར་ཀུན་ཏུ་གཏོར་ན་གྲོང་ཁྱེར་ཀུན་ནས་མི་སྣང་བར་འགྱུར་རོ། །གྲོང་ཁྱེར་ཀུན་ལ་ཡུངས་ཀར་དང་པདྨའི་ཕྱེ་མ་གཏོར་ན་སྐྱེས་པ་དང་། བུད་མེད་དང་། ཁྱེའུ་དང་། བུ་མོ་མི་སྣང་བ་ཐམས་ཅད་སྣང་བར་འགྱུར་རོ། །སེང་གེའི་ཁྲག་དང་སྦྱར་ནས་དུད་འགྲོའི་སྐྱེ་གནས་ཀྱི་སྟེང་དུ་གཏོར་ན་ལམ་གྱི་བཞི་མདོ་ཐམས་ཅད་དུ་སེང་གེའི་གཟུགས་སུ་སྟོན་ཏོ། །སྡེ་དྲག་ཅིང་གཏུམ་ལ་ཡན་ལག་མཆོག་གི་གཟུགས་དང་ལྡན་པའི་སྟེང་དུ་གཏོར་ན་ཐམས་ཅད་ཝའི་གཟུགས་སུ་སྣང་ལ་ཕྱོགས་བཅུར་རྒྱུག་གོ། །གཡུལ་འགྱེད་སར་གཏོར་ན་ཐམས་ཅད་གཉིད་ལོག་པར་བྱས་པར་འགྱུར་ལ་མཚོན་ཆ་ཐམས་ཅད་དང་། གོ་ཆ་ཐམས་ཅད་མི་སྣང་བར་འགྱུར་རོ། །མེའི་ནང་དུ་གཏོར་ན་མི་སྣང་བ་རྣམས་སྣང་བར་འགྱུར་རོ། །ཏིལ་མར་དང་སྦྱར་ནས་མེའི་ནང་དུ་གཏོར་ན་རྟག་ཏུ་འབར་བར་འགྱུར་རོ། །ཆུའི་ནང་དུ་གཏོར་ན་ཆུ་མི་མངོན་པར་འགྱུར་རོ། །བུམ་པ་ཆུས་བཀང་བ་ལ་གཏོར་ན་སྲོག་ཆགས་ཆུའི་ནང་ན་གནས་པ་ཐམས་ཅད་ཆུའི་ནང་ནས་འབྱུང་ཞིང་ཐང་ལ་གནས་སོ། །ཚལ་གྱི་ནང་དུ་ཡུངས་ཀར་གྱིས་གཏོར་ན་མེ་ཏོག་དང་འབྲས་བུ་མི་སྣང་བར་འགྱུར་པ་ཐམས་ཅད་སྣང་ཞིང་ཤིང་སྐམ་པོ་དང་། ཚལ་གྱི་མཐར་མེ་ཏོག་དང་འབྲས་བུ་ཐམས་ཅད་སྟོན་ཏོ། །ནམ་མཁའ་ལ་གཏོར་ན་ཕྱོགས་བཞིའི་དགེ་འདུན་གྱི་ནང་ངམ། འདུས་པའི་ནང་ངམ། སྐྱེ་བོ་མང་པོའི་ནང་དུ་མེ་ཏོག་གི་ཆར་རྣམ་པ་སྣ་ཚོགས་དག་འབབ་སྟེ། ལྷའི་དྲི་ལེགས་པར་སྨིན་པ་ཡིད་དགའ་བ་སིམ་པར་བྱེད་པ་འབབ་བོ། །ལས་དང་ལྡན་པའམ། བཟོའི་གནས་ཀྱི་ལས་ཏེ། ལས་ཀྱི་སྣོད་ཐམས་ཅད་ལ་ཏིལ་མར་གྱི་རྒྱལ་པོས་བྱུགས་ལ་ཕྱེ་མས་བསྐུ། པདྨ་ཆེན་པོའི་ཕྱེ་མས་འཁོར་གྱི་གནས་བསྐུ། ཡུངས་ཀར་གྱིས་ཕྱོགས་བཞིར་གཏོར་ལ། དེ་ནས་ལས་ཀྱི་བཟོ་བཟང་པོ་ཇི་ལྟ་བ་བཞིན་སྟོན་པར་འདོད་ན་ལས་ཀྱི་སྣོད་དེ་དང་དེ་དག་ཉིད་གཡོ་ལ། ལས་ཀྱི་བཟོའི་ཚུལ་བཟང་པོས་མཐར་ཕྱིན་པ་རྣམ་པ་དུ་མ་དག་སྟོན་པར་བྱེད་ལ་ཉོ་ཚོང་བྱེད་པར་འབྱུང་སྟེ། གལ་ཏེ་ཕྱིར་བཟློག་པ་མ་བྱས་ན་རིན་ཇི་ལྟ་ཇི་ལྟ་བ་དེ་ལྟ་དེ་ལྟར་ཉོ་ཚོང་བྱེད་དོ། །
ཆུ་དང་ཡུངས་ཀར་གྱིས་བཟློག་པ་བྱས་ན་མི་སྣང་བར་འགྱུར་ལ་དཔག་ཚད་བརྒྱ་སྟོང་ཙམ་གྱི་བར་དུ་ཁྲིད་ན་དེ་དང་དེ་ཉིད་དུ་མི་སྣང་བར་འགྱུར་རོ། །རྫ་མཁན་གྱི་འཁོར་ལོ་ལ་ཕྱེ་མས་བྱུག་ཅིང་ཡུངས་ཀར་ཆགས་པར་བྱས་ལ། པདྨ་ཆེན་པོའི་ཕྱེ་མས་གཏོར་ནས་འཇིམ་པ་བཞག་ལ་སྣོད་ཀྱི་ངོ་བོ་ཇི་ལྟར་འདོད་པ་བཞིན་བྱ་སྟེ། སྣོད་ཀྱི་ངོ་བོ་དངུལ་ལས་བྱས་པའམ། གསེར་ལས་བྱས་པའམ། ཟངས་ལས་བྱས་པའམ། ལྕགས་ལས་བྱས་པའམ། ལྕགས་ལྔ་ལས་བྱས་པ་རིན་པོ་ཆེ་བཟང་པོ་སྣ་ཚོགས་ཀྱིས་སྤྲས་པ་ཇི་ལྟ་བ་དེ་ལྟ་བུའི་སྣོད་བཀྲ་བ་རྣམ་པ་སྣ་ཚོགས་དག་འབྱུང་བར་འགྱུར་ལ། ཉོ་ཚོང་བྱེད་པ་ཡང་འབྱུང་སྟེ། རིན་ཆེན་པོས་ཚོང་བྱེད་དོ། །ཡུངས་ཀར་གྱི་ཕྱེ་མ་དང་། པདྨའི་ཕྱེ་མ་ལྷན་ཅིག་སྦྱར་ནས་ཚོང་དུས་ཀྱི་དབུས་སུ་གཏོར་ན་ཀུན་ཏུ་ཟོང་བཀྲམ་པའི་སྣོད་མི་སྣང་བར་བྱས་པ་ཐམས་ཅད་སྣང་བར་བྱེད་དོ། །ཐག་པའི་སྟེང་དུ་གཏོར་ན་སྦྲུལ་ཆེན་པོ་སྟོན་ཏོ། །ཁྱིམ་དང་། ར་བའི་ངོས་དང་། སྒོ་དང་། ཤིང་སྦྱར་བ་དང་། ཀ་བའི་སྟེང་དུ་གཏོར་ན་ཁང་པ་དང་། ར་བ་དང་། འཁོར་གྱི་ཁྱམས་རྣམས་སྦྲུལ་དུ་སྟོན་ཏོ། །ཇི་སྲིད་དུ་ཆུ་དང་ཡུངས་ཀར་གྱིས་བཟློག་པ་མ་བྱས་པ། དེ་སྲིད་དུ་སྦྲུལ་རྣམས་འདུག་གོ། །བཟློག་པ་བྱས་ན་མི་སྣང་བར་འགྱུར་རོ། །གཙུག་ལག་ཁང་ངམ། ལྷའི་གནས་སམ། ཁང་བཟངས་ཀྱི་ངོས་ལ་གཏོར་ན་སྦྲུལ་ཆེན་པོར་སྣང་ངོ་། །ལྷའི་སྟེང་དུ་གཏོར་ལ་མིག་སྨན་གྱིས་བསྐུ། རིལ་བུས་ཐིག་ལེ་བྱས་ན་ལྷའི་གཟུགས་བརྙན་དེ་ཀུ་ཅོ་འདོན་ཅིང་འགྲོ་སྟེ། གར་འདོད་པ་དེར་འགྲོའོ། །བཟློག་པ་བྱས་ན་ཕྱིར་འདུག་གོ། །སངས་རྒྱས་ཀྱི་སྐུ་གཟུགས་ཀྱི་ཞབས་ལ་བྱུགས་ལ་ཕྱེ་མས་གཏོར་ན་སངས་རྒྱས་ཀྱི་སྐུ་གཟུགས་གཡོ་བར་མཛད། བཞུད་པར་མཛད་དོ། །འཇུག་པར་མཛད་དོ། །འཆག་པར་མཛད་དོ། །ཙནྡན་ལ་བཟླས་བརྗོད་བྱས་ནས་བདུགས་ན་ཕྱིར་བཞུགས་སོ། །བུམ་པ་སྦྲང་རྩིས་བསྐུས་པ་རྣམས་ལ་གཏོར་ན་གཡོ་བར་བྱེད་དོ། །ཇི་ཙམ་དུ་ཕྱིར་བཟློག་པ་མ་བྱས་པ་དེ་ཙམ་དུ་གཡོའོ། །ཆུ་དང་ཡུངས་ཀར་
གྱིས་བཟློག་ན་ཕྱིར་འདུག་གོ། །དེ་ནས་རྡོ་རྗེ་བསྐྱོད་པར་འདོད་ན་སྤོས་ཀྱི་དཀྱིལ་འཁོར་བྱས་ལ་མེ་ཏོག་བཀྲམ་སྟེ། གུ་གུལ་གྱི་བདུག་པས་བདུག །དེ་ཡང་ཡུངས་ཀར་དང་། ཕྱེ་མ་དང་བཅས་པས་གཏོར་ལ་དོན་ཡོད་པའི་རྒྱལ་པོ་ལན་བདུན་བཟླས་བརྗོད་བྱས་ན། རྡོ་རྗེ་དཀྱིལ་འཁོར་ལས་ལངས་ནས་ནམ་མཁའ་ལ་འགྲོ་བར་བྱེད། འཕར་བར་བྱེད། འདུག་པར་བྱེད། འབར་བར་བྱེད་ཅིང་། ཕན་ཚུན་འགྲོ་བར་བྱེད། མཐོ་བར་འགྲོ་བར་བྱེད། དམའ་བར་འགྲོ་བར་བྱེད། རྣམ་པར་འགྲོ་བར་བྱེད། འབར་བ་ཆེན་པོས་འབར་བར་བྱེད་དེ་ཇི་སྲིད་དུ་བཟློག་པ་མ་བྱས་པ་དེ་སྲིད་དུ་ནམ་མཁའ་ལ་འགྲོའོ། །ཆུ་དང་ཡུངས་ཀར་གྱིས་བཟློག་པ་བྱས་ན་དེ་ཉིད་དུ་སྣང་ངོ་། །དེ་ནས་འཁོར་ལོ་བསྐྱོད་པར་འདོད་ན་དཀྱིལ་འཁོར་གྲུ་བཞི་པ་བྱས་ལ་སྤོས་སྣ་ཚོགས་ཀྱིས་བྲིས་ནས་མེ་ཏོག་སྣ་ཚོགས་དགྲམ་པའང་བྱ། གུ་གུལ་གྱི་བདུག་པས་ཀྱང་བདུགས་ནས་འཁོར་ལོ་ལ་ལན་ཉི་ཤུ་རྩ་གཅིག་བཟླས་བརྗོད་བྱས་ལ་ཏིལ་མར་གྱི་རྒྱལ་པོས་བསྐུ། ལྟེ་བའི་དབུས་སུ་ཐིག་ལེ་བྱས་ནས་དཀྱིལ་འཁོར་གྱི་དབུས་སུ་གཞག་པར་བྱ། དེ་ལ་ཡང་ཡུངས་ཀར་དང་། པདྨ་ཆེན་པོའི་ཕྱེ་མས་གདབ་པར་བྱ། འཁོར་ལོ་ཀུན་ནས་གུ་གུལ་གྱི་བདུག་པས་བདུག་ཅིང་སེ་གོལ་གྱི་སྒྲ་ཡང་བྱས་ན་འཁོར་ལོ་དེ་དཀྱིལ་འཁོར་ལས་ལངས་ནས་ནམ་མཁའ་ལ་འཕར་ཞིང་སྡང་བ་ཐམས་ཅད་ལ་འབབ་པར་བྱེད་དེ། གལ་ཏེ་གཡུལ་འགྱེད་པར་འབབ་ན། དེའི་ཚེ་དགྲ་ཐམས་ཅད་ཀྱི་མགོ་གཅོད་པར་བྱེད། སྡང་བ་ཐམས་ཅད་དང་ཕྱིར་རྒོལ་བ་ཐམས་ཅད་ལ་བབ་ན་འཇིག་པར་བྱེད། བགེགས་ཐམས་ཅད་ལ་འབབ་པ་དང་། གནོད་སྦྱིན་དང་། སྲིན་པོ་དང་། འབྱུང་པོ་དང་། ཤ་ཟ་དང་། བརྗེད་བྱེད་དང་། གདོན་རྣམས་ལ་འབབ་པ་དང་། ཀླུ་སྡང་བ་ཐམས་ཅད་ལ་བབ་ན་འཇིག་པར་བྱེད་དེ། ཇི་སྲིད་དུ་བཟློག་པ་མ་བྱས་པ་དེ་སྲིད་དུ་འཕར་རོ། །ཆུ་དང་ཡུངས་ཀར་གྱིས་བཟློག་པ་བྱས་ན་སླར་དཀྱིལ་འཁོར་ལ་འདུག་གོ། །མདུང་རྩེ་གསུམ་པ་བསྐྱོད་པར་འདོད་ན་དཀྱིལ་འཁོར་བྱས་ལ་ཐོད་པ་གཞག་པར་བྱ། མེ་ཏོག་
དགྲམ་པ་འང་བྱ། གུ་གུལ་གྱི་བདུག་པས་ཀྱང་བདུགས་ལ། མདུང་རྩེ་གསུམ་པ་ལ་ཏིལ་མར་གྱི་རྒྱལ་པོས་བསྐུ། ཕྱེ་མས་གདབ་ཅིང་ཐིག་ལེ་བྱ། རྩེའི་རྒྱུན་གསུམ་ལ་པདྨ་ཆེན་པོའི་ཕྱེ་མས་གཏོར་ནས་ཐོད་པའི་སྟེང་དུ་གཞག་པར་བྱ། ཡུངས་ཀར་གྱིས་གཏོར་ཞིང་ཧཱུྃ་ཞེས་སེ་གོལ་བྱས་ན་མདུང་རྩེ་གསུམ་པ་འབར་བར་བྱེད། ལྡང་བར་བྱེད། ནམ་མཁའ་ལ་འགྲོ་བར་བྱེད། ཀུན་དུ་འབར་བར་བྱེད། འགྲོ་བར་བྱེད། ཕྱོགས་བཅུར་འཕར་བར་བྱེད་དེ། ཇི་སྲིད་དུ་བཟློག་པ་མ་བྱས་པ་དེ་སྲིད་དུ་འཕར་བར་བྱེད་དོ། །ཆུ་དང་ཡུངས་ཀར་གྱིས་བཟློག་པ་བྱས་ན་སླར་དཀྱིལ་འཁོར་ལ་འདུག་གོ། །དུང་ལ་ཏིལ་མར་གྱིས་བྱུགས་ལ་ཕྱེ་མས་གཏོར་ལ་ཐིག་ལེ་བྱ། ཡུངས་ཀར་གྱིས་ཀྱང་ཕྱི་ནང་གཏོར་ལ་བུས་ན་ཇི་སྲིད་དུ་སྒྲ་ཐོས་པ་དེ་སྲིད་ཀྱི་སྐྱེས་པ་དང་། བུད་མེད་དང་། ཁྱེའུ་དང་། བུ་མོ་ཐམས་ཅད་བྲོ་རྡུང་བར་བྱེད། རྒྱུག་པར་བྱེད། མཆོད་པར་བྱེད་ཅིང་ཕྱོགས་བཅུར་རབ་ཏུ་རྒྱུ་པར་བྱེད་དོ། །གཡུལ་ངོར་བུས་ན་འགྱེད་པའི་མི་ཐམས་ཅད་དང་། མཚོན་ཆ་ཐམས་ཅད་དང་། གོ་ཆ་ཐམས་ཅད་བཏང་ནས་བྲོ་རྡུང་བར་བྱེད་དེ། གཅེར་བུར་འགྱུར་བར་བྱེད། ཕྱོགས་བཅུར་རྒྱུག་པར་བྱེད་དོ། །གལ་ཏེ་དུང་ལན་བདུན་བུས་ན་ཕྱིར་རྒོལ་བ་དང་། ཕ་རོལ་གྱི་དམག་ཚོགས་དེས་ཉོན་མོངས་པ་སྐྱེད་པར་འགྱུར་ཏེ། །ཇི་སྲིད་དུ་བཟློག་པ་མ་བྱས་པ་དེ་སྲིད་དུ་མཆོད་ཞིང་ཕྱོགས་བཅུར་རྒྱུག་གོ། །སྤོས་ཆུས་བཟློག་ཅིང་ཁྲུས་བྱས་ན་ཕྱིར་བདེ་བར་གནས་པར་འགྱུར་ལ། རྟག་ཏུ་རྒྱལ་བ་དང་། དཔལ་གྱི་མཆོག་སྦྱིན་པར་འགྱུར་རོ། །དེ་ནས་སྒྱུ་མ་དེ་ཁོ་ན་ཉིད་སྒྲུབ་པའི་གསང་སྔགས་དང་། རྣམ་པར་འཕྲུལ་པའི་དངོས་གྲུབ་ཀྱི་དཀྱིལ་འཁོར་བཤད་པར་བྱ་སྟེ། སྒྱུ་འཕྲུལ་གྱི་དྲ་བ་རྣམ་པར་འཕྲུལ་པའི་དཀྱིལ་འཁོར་གང་དུ་དཀྱིལ་འཁོར་ཡོངས་སུ་རྫོགས་ཤིང་། ཀུན་ནས་བརྒྱན་པར་ཡུངས་ཀར་དང་ཏིལ་མར་གྱི་རྒྱལ་པོ་དང་། ཕྱེ་མར་བསྲེས་པས་བྱུག་པ་དང་། ཐིག་ལེས་ཀྱང་དབང་བསྐུར་ཅིང་པདྨ་ཆེན་པོའི་ཕྱེ་མས་བྱུགས་ལ་ལག་པ་པདྨའི་ཕྱག་རྒྱ་དང་། ཧཱུྃ་ཞེས་བྱ་བའི་སྒྲ་
བརྗོད་ན་བརྗོད་པ་ཙམ་དང་། ཡུངས་ཀར་གྱིས་གཏོར་བའི་མོད་ལ། གཏོར་མའི་སྣོད་དང་། སྣོད་རྫ་མ་དང་། བུམ་པ་དང་། བུམ་པ་བཀང་བ་ཐམས་ཅད་དང་། མཚོན་ཐམས་ཅད་དང་། དཀྱིལ་འཁོར་གྱི་སྟེང་ནས་ནམ་མཁའ་ལ་སོར་བཞི་ཙམ་གྱིས་སྤགས་ཏེ། འདུག་ལ་ཇི་སྲིད་དུ་དཀྱིལ་འཁོར་གྱི་ལས་སུ་བྱ་བ་ཐམས་ཅད་རྫོགས་རྫོགས་ཀྱི་བར་དུ་ནམ་མཁའ་ལ་འདུག་གོ། །རིག་སྔགས་འཆང་བ་སའི་སྟེང་གི་སོར་བཞི་ཙམ་གྱི་ཚད་ཀྱི་སྟེང་གི་ནམ་མཁའ་ལ་འདུག་གོ། །ལས་སུ་བྱ་བ་ཐམས་ཅད་ཟིན་ནས་དཀྱིལ་འཁོར་གྱི་ཡོད་བྱད་དྲི་ཆབ་ཀྱི་ཆོ་གས་དབང་བསྐུར་ན་གཏོར་མ་དང་། སྣོད་རྫ་མ་དང་། བུམ་པ་དང་། བུམ་པ་ཐམས་ཅད་རང་ཉིད་འཕར་བར་བྱེད་ལ། སླར་ཡང་རང་གི་གནས་སུ་འདུག་གོ། །གོ་ཆ་དེ་ལྟ་བུ་ནི་དཀྱིལ་འཁོར་ཐམས་ཅད་ལ་བྱ་སྟེ། ཐམས་ཅད་དུ་ཡོན་ཏན་སྟོན་པར་སྣང་ལ། བྱས་པ་ཙམ་གྱིས་ལས་ཐམས་ཅད་སྒྲུབ་པར་འགྱུར་ཏེ། ཐེ་ཙོམ་མི་བྱའོ་ཞེས་བཤད་དོ། །དེའི་ཕྱིར་པདྨའི་དངོས་གྲུབ་བཤད་པར་བྱ་སྟེ། གསེར་རམ་དངུལ་ལམ་ཟངས་ལས་ཤིན་ཏུ་ལེགས་ཤིང་མཛེས་པ་སྙིང་པོ་དང་། ཟེ་བ་དང་བཅས་ཤིང་སྡོང་བུ་ཚད་དང་ལྡན་པར་བྱས་ལ། འདབ་མ་ཕྱེད་ཁ་ཕྱེ་བ་འཁོར་བར་འདབ་མ་དྲུག་ཅུ་རྩ་བཞི་ཡོད་པ་ཁྲུ་གང་ཙམ་གྱི་ཚད་སྡོང་བུ་དང་། སྙིང་པོ་དང་། ཟེ་བའི་ཚད་སོར་བཞི་ཙམ་དུ་བྱས་པ་ལ་ཏིལ་མར་གྱི་རྒྱལ་པོས་བསྐུ། པདྨའི་ཕྱེ་མ་དང་། མིག་སྨན་དང་། མིག་བསྐུ་བ་དང་། ཐིག་ལེར་བྱས་པ་དང་བཅས་པས་ཀུན་ལེགས་པར་བསྐུས་ལ། པདྨའི་སྡོང་བུའི་བར་དུ་ནོར་བུ་རིན་པོ་ཆེ་བཞག་ནས་ལན་སྟོང་རྩ་བརྒྱད་བཟླས་བརྗོད་བྱ། ཁྲོ་བོའི་རྒྱལ་པོས་ལན་བདུན་གྱི་བར་དུ་དབང་བསྐུར་ནས་རིག་སྔགས་འཆང་གཙང་མ་ལེགས་པར་ཁྲུས་བྱས་ལ། གོས་གཙང་མ་བགོས་པས་ཏིལ་མར་གྱིས་བདག་ཉིད་ལ་བསྐུ་བར་བྱ། མིག་བསྐུ་བ་དང་། ཐིག་ལེ་དང་། བདུག་པས་བདག་ཉིད་ཀྱི་ལུས་ལ་བདུག་པར་བྱའོ། །ལག་པ་གཡས་པ་ལ་ནོར་བུ་གདགས། ལག་པ་གཡོན་པ་པདྨ་གཟུང་ལ་བཅོམ་ལྡན་འདས་ཀྱི་སྤྱན་སྔར་
འདུག་སྟེ། འཁོར་གྱི་ནང་དུ་བཅོམ་ལྡན་འདས་ལ་པདྨའི་མཆོད་པ་འབུམ་བྱ་སྟེ། པདྨ་འབུམ་འབྱུང་བར་འགྱུར་རོ། །མཆོད་པའི་ཆོ་ག་བྱས་ནས་ཆུ་དང་ཡུངས་ཀར་གྱིས་བཏབ་ན་ཡང་འབྱུང་བར་འགྱུར་རོ། །པདྨ་སྤྲུལ་པ་གང་ཡིན་པ་དེ་དག་ཐམས་ཅད་ཆུའི་ནང་དུ་བོར་ན་པདྨ་མགལ་མེ་བསྐོར་བ་ལྟར་འཁོར་བར་འགྱུར་ལ། པདྨ་འབུམ་རྣམས་ཆར་དུ་འབབ་པར་འགྱུར་རོ། །པདྨའི་ཆུའི་ནང་དུ་གཞག་པར་བྱ་བ་ནི་མཚོ་བྲན་ནམ། ལྟེང་ཀའམ། ཆུ་བོའམ། ཆུ་བོ་ཆེན་པོའམ། འོབས་སམ། རྫིང་ངམ། མཚོའི་ནང་གང་ཡང་རུང་བའི་གནས་སུ་བཞག་ན་གནས་དེ་དང་དེ་ཐམས་ཅད་དུ་པདྨའི་མཚོ་ཆེན་པོ་འབྱུང་སྟེ། ཇི་སྲིད་དུ་པདྨ་མ་ཕྱུང་བ་དེ་སྲིད་དུ། དུས་རྟག་ཏུ་པདྨའི་མཚོར་འདུག་སྟེ། སྟོན་ཀའམ། དགུན་ནམ། དཔྱིད་དམ། སོས་ཀ་ཚ་བའི་དུས་སུ་རྟག་ཏུ་པདྨའི་མཚོར་འདུག་གོ། །ཚལ་གྱི་འགྲམ་དུ་ཞུགས་ནས་ཡུངས་ཀར་ལ་ཏིལ་མར་གྱིས་བསྐུས་པ་ཕྱེ་མ་དང་སྦྱར་ནས་མེ་ཏོག་གང་ཡང་རུང་བ་ཞིག་ལག་གིས་བཟུང་སྟེ་བསྐོར་ལ་ཡུངས་ཀར་གྱིས་གཏོར་ན། ཚལ་གྱི་མཐའི་ཤིང་ཐམས་ཅད་ལ་མེ་ཏོག་རྒྱས་པར་སྣང་ངོ་། །དགེ་འདུན་གྱི་ནང་ངམ། ཚོགས་པའི་ནང་ངམ། རྒྱལ་པོའི་ཕ་བྲང་འཁོར་རམ། སྐྱེ་བོའི་ནང་དུ་མེ་ཏོག་ཇི་སྙེད་པ་ལག་གིས་བསྐོར་ལ། ཡུངས་ཀར་གྱིས་གཏོར་ན་མེ་ཏོག་མང་པོ་འབྱུང་བར་འགྱུར་རོ། །ཆུ་དང་ཡུངས་ཀར་གྱིས་ཐམས་ཅད་དུ་ཟློག་པར་བྱེད་པ་ཡིན་ནོ། །འབྲས་བུ་ཇི་སྙེད་པ་ལག་གིས་བཟུང་ནས་ཡུང་ཀར་གྱིས་གཏོར་ན་འབྲང་བུའི་ཆར་འབབ་པར་འགྱུར་རོ། །གོས་ལག་པས་བཟུང་ནས་ཡུངས་ཀར་གྱིས་གཏོར་ཏེ་བསྐོར་ན་གོས་དང་བླ་རེ་སྣ་ཚོགས་སྟོན་པར་བྱེད་དོ། །རྒྱན་ལག་པས་བཟུང་ནས་ཡུངས་ཀར་གྱིས་གཏོར་ན། །ལྷའི་རྒྱན་བཟང་པོ་སྣ་ཚོགས་པ་ལག་ཏུ་འབྱུང་བར་འགྱུར་ཞིང་སྐྱེ་བོ་འདུས་པ་ཐམས་ཅད་ཀྱི་རྒྱུན་དུ་བྱེད་ལ་ཐམས་ཅད་ལ་རྒྱན་བཏགས་པར་འགྱུར་རོ། །ཡུངས་ཀར་དང་ཆུས་བཟློག་པར་བྱའོ། ཡུངས་ཀར་ལ་ཏིལ་མར་གྱིས་བསྐུས་ཕྱེ་མས་བསྒོ། །གིའུ་ཝང་དང་། གུར་གུམ་དང་། ཤིང་ཀུན་དང་། སྣུ་ཧའི་འོ་མས་ཀྱང་བསྒོས་ལ་དེ་དག་གཅིག་ཏུ་བྱས་ནས་གྲིབ་མ་ལ་བསྐམ་མོ། །དེ་ནས་འབྲས་བུ་གཅིག་ཁར་བཅུག་ལ་ཕྱོགས་བཞིར་གཏོར་ན་ཁ་ནས་མེ་འབར་
བར་སྣང་ཞིང་ལུས་ལས་འབར་བ་སྣ་ཚོགས་འབྱུང་བར་སྣང་སྟེ། ཇི་སྲིད་དུ་ཡུངས་ཀར་ཁ་ན་ཡོད་པའི་བར་དུ་ལུས་ལས་འོད་ཟེར་འབར་བ་ཁ་དོག་རྣམ་པ་སྣ་ཚོགས་འབྱུང་ངོ་། །ཏིལ་མར་དང་ལྷན་ཅིག་བཏགས་པའི་སྙིང་པོར་བྱ། ཀོང་བུར་ཏིལ་མར་གྱི་རྒྱལ་པོས་བཀང་སྟེ་མར་མེ་འབུམ་སྟོན་པར་བྱེད་དོ། །མེ་ཐབ་ཁང་བུའི་ནང་དུ་བཅུག་ན་ཇི་སྲིད་དུ་མ་ཕྱུང་བ་དེ་སྲིད་དུ་མ་ཕྱུང་བ་དེ་སྲིད་དུ་མེ་འབར་བར་སྟོན་ཏོ། །མར་མེའི་སྡོང་བུའི་ནང་དུ་བཅུག་ལ་མ་ཕྱུང་ན་རྟག་ཏུ་འབར་རོ། །མགལ་མེ་འབར་བའི་ནང་དུ་བཅུག་ན་འབར་བའི་ཕྲེང་བ་འབུམ་སྙེད་དུ་སྣང་ངོ་། །གཏོར་མའི་རྫ་མ་དང་། བུམ་པའི་ནང་དུ་གཏོར་ན་གཏོར་མའི་རྫ་མ་དང་། བུམ་པ་ཐམས་ཅད་འབར་བར་སྣང་ངོ་། །ལག་ཆ་དང་། མཚོན་ཆ་ཐམས་ཅད་ལ་བྱུགས་ན་གཅིག་ཏུ་འབར་བར་འགྱུར་རོ། །བདག་ཉིད་ཀྱི་ལུས་ལ་བྱུགས་ལ་རིལ་བུ་གཙང་མ་སྤྱི་བོར་བཞག་ན་ལུས་ཐམས་ཅད་གཅིག་ཏུ་འབར་བར་སྣང་བ་ནས་ལུས་རིལ་བསྲེགས་པ་ལྟར་སྣང་ངོ་། །འོ་མ་དང་ཡུངས་ཀར་གྱིས་གཏོར་ན་ལུས་སླར་སྣང་བར་འགྱུར་རོ། །ལག་པ་དང་རྐང་པ་ལ་བསྐུས་ལ། རིལ་བུ་གཙང་མ་འབར་བ་ལག་པ་གཡས་པས་གཟུང་བའམ། །རྐང་པའི་མཐེ་བོས་བཟུང་ན་ལག་པ་དང་། །རྐང་པ་གཅིག་པུ་འབར་བ་དང་། འབྲེལ་བར་སྣང་ངོ་། །འདུས་པའི་ནང་ངམ། སྐྱེ་བོ་འདུས་པ་མང་པོའམ།རྒྱལ་པོའི་འཁོར་རམ། སྡེ་ཅན་གྱི་ནང་ངམ། རིག་བྱེད་བཞིའི་ནང་ཐམས་ཅད་དུ་ཡན་ལག་ཉམས་པར་སྣང་ངོ་། །དྲི་ཆབ་དང་། ཡུངས་ཀར་གྱིས་གཏོར་ན་ལུས་སླར་རྫོགས་པར་འགྱུར་རོ། །མཚན་མོ་མར་མེའི་རིལ་བུ་བསྲེགས་པ་ལམ་གྱི་བཞི་མདོར་བཞག་ནས་ཡུངས་ཀར་གྱིས་ཕྱོགས་བཞིར་གཏོར་ན་མར་མེ་འབུམ་ཕྲག་བྱེ་བ་སྣང་ངོ་། །ཀུན་ནས་ཕྱོགས་བཞིར་ཆུ་དང་ཡུངས་ཀར་གྱིས་བཟློག་པར་བྱ་བ་ཡིན་ནོ། །ཚལ་ཆེན་པོའི་མཐའ་དང་། ནང་དུ་གཏོར་ལ་ཤིང་གཅིག་ལ་རིལ་བུ་གཙང་མ་བཞག་ན་ཤིང་དང་། རྩྭ་དང་། ཤིང་གེལ་པ་དང་། འདབ་མ་དང་། ལོ་མ་ཐམས་ཅད་གཅིག་ཏུ་འབར་བར་སྣང་ངོ་། །རིའི་རྩེ་མོར་མར་མེ་བུས་ནས་རི་ཀུན་ཏུ་གཏོར་ན་རི་ཀུན་ནས་གཅིག་ཏུ་འབར་ཞིང་མཆེད་པར་སྣང་
ལ་སེམས་ཅན་ཐམས་ཅད་ཀུན་ནས་ངོ་མཚར་དུ་འཛིན་པར་འགྱུར་རོ། །རྐུན་མ་དང་། གཡོན་ཅན་དང་། གནོད་བྱེད་དང་། ཕ་རོལ་གྱི་དམག་ཚོགས་དང་། སྡང་བ་དང་། ཕྱིར་རྒོལ་བ་དང་། ཕས་ཀྱི་དགྲ་ཐམས་ཅད་དང་། སྡང་སེམས་ཅན་ནས་རི་དགས་གཏུམ་པོ་དང་། བྱ་ལ་སོགས་པའི་བར་རིལ་གནས་པ་རྣམས་དེའི་མཚན་མོ་ཉིད་ཕྱོགས་བཅུ་ཀུན་དུ་བྲོས་ཤིང་ཧ་ཧ་ཞེས་བྱ་བའི་སྒྲ་འབྱིན་ཏོ། །སྤོས་ཆབ་ཀྱིས་བཟློག་པར་འགྱུར་རོ། །གཟུགས་བརྙན་གྱི་སྟེང་དུ་གཏོར་ལ། གཙང་མའི་རིལ་བུ་འབར་བར་བཞག་ན་གཟུགས་བརྙན་ཐམས་ཅད་གཅིག་ཏུ་འབར་བར་འགྱུར་ཏེ། སྤོས་ཆུ་དང་། ཡུངས་ཀར་གྱིས་བཟློག་པར་འགྱུར་རོ། །མར་མེའི་རིལ་བུ་གྲོང་ཁྱེར་གྱི་ཤར་ཕྱོགས་ཀྱི་སྤོར་སྤར་ཏེ་གནས་གཙང་མར་གཞག་དཀྱིལ་འཁོར་གཅིག་བྱས་ནས་གཏོར་མའི་ཆོ་ག་བུམ་པ་བཀང་བ་གཞག། གྲོང་ཁྱེར་ཀུན་ཏུ་ཡུངས་ཀར་གྱིས་གཏོར་ཞིང་དོན་ཡོད་པའི་རྒྱལ་པོ་ཡང་དྲན་པར་བྱས་ན་གྲོང་ཁྱེར་ཀུན་ནས་མར་མེའི་ཕྲེང་བ་འབར་བ་གཅིག་ཏུ་སྣང་ངོ་། །གྲོང་ཁྱེར་གྱི་སྒོ་བཞིར་དཀྱིལ་འཁོར་གྱི་ཆོ་ག་བྱས་ལ་ཤར་ཕྱོགས་ཀྱི་སྒོ་ནས་ཞུགས་ན་གང་གྲོང་ཁྱེར་ན་གནས་པ་སྐྱེས་པ་དང་། བུད་མེད་དང་། ཁྱེའུ་དང་། བུ་མོ་དེ་དག་ཐམས་ཅད་དགའ་བ་ཆེན་པོ་རྒྱ་ཆེ་བས་ཚིམ་པར་འགྱུར་རོ། །གྲོང་ཁྱེར་དེ་ན་གང་སྡང་བའི་སེམས་ཅན་ཕྱིར་རྒོལ་བ་དང་། ཕས་ཀྱི་དགྲ་དང་། ཆོམ་རྐུན་དང་། གཡོན་ཅན་དང་། གནོད་བྱེད་དང་། གླགས་ཚོལ་བར་གྱུར་པ། གནོད་སྦྱིན་དང་། སྲིན་པོ་དང་། ཡི་དགས་དང་། ཤ་ཟ་དང་། བརྗེད་བྱེད་དང་། མི་མ་ཡིན་པ་གང་ཡང་རུང་བ་གྲོང་ཁྱེར་དེ་ན་གནས་པ་དེ་དག་ལང་ལོང་དུ་གྱུར་ཅིང་གདུགས་ལ་ངུ་ཞིང་ཧ་ཧ་ཞེས་སྒྲ་འབྱིན་ཅིང་གྲོང་ཁྱེར་གྱི་སྒོར་བྱུང་ནས་ཕྱོགས་བཅུར་རབ་ཏུ་འབྲོས་སོ། །གྲོང་ཁྱེར་དེ་ཡང་ཀུན་ནས་གནོད་པ་མེད་ཅིང་འཁྲུགས་པ་མེད་པར་འགྱུར། འཇིགས་པ་དང་། གནོད་པ་དང་། ནད་འགོ་བ་དང་། འཁྲུག་པ་ཐམས་ཅད་དང་། ནད་ཐམས་ཅད་རབ་ཏུ་ཞི་བར་འགྱུར། མཚན་མོ་འདས་ནས་སྤོས་ཆུ་དང་། ཡུངས་ཀར་གྱིས་གྲོང་ཁྱེར་གྱི་སྒོར་གཏོར་ཞིང་དབང་བསྐུར་ན་བཟློག་པར་འགྱུར་རོ།། །།
འཕགས་པ་དོན་ཡོད་པའི་ཞགས་པའི་ཆོ་ག་ཞིབ་མོའི་རྒྱལ་པོ། བམ་པོ་བཅུ་དགུ་པ། ལྡོང་རོས་དང་། ཐིང་ཤུན་གྱི་ཕྱེ་མ་དང་། ཡུངས་ཀར་དང་། མ་ཧཱ་ཏཻ་ལ་དང་། ཨ་རྐའི་འོ་མ་དང་། ཕ་གུའི་འོ་མ་དང་། གཅིག་ཏུ་སྦྱར་རོ། །ཉའི་མིག་མཁྲིས་པ་དང་བཅས་པ་དང་། ནཱ་ག་པུས་པ་དང་། པདྨའི་ཆུ་བ་རྣམས་ཀྱང་ལྷན་ཅིག་ཏུ་ཕྱེ་མ་ཞིབ་མོར་བྱའོ། །ཕྱེ་མ་སྔ་མ་ལེགས་པར་སྦྱར་ལ་ཆུས་རིལ་བུར་བྱས་པ་དང་། ཕྱེ་མས་གཞན་ཡང་བཅང་ངོ་། །ཕྱེ་མས་འདི་དང་པདྨ་ཆེན་པོའི་ཕྱེ་མ་བཅང་བ་ལྷན་ཅིག་ཏུ་བསྲེས་པའི་ཕྱེ་མས་ལུས་བསྐུས་ལ་ཕྱོགས་བཞིར་ཡུངས་ཀར་གཏོར་ཏེ། རིལ་བུ་ཁར་བཅུག་ལ་ཧཱུྃ་ཞེས་བྱ་བ་བསྡམས་ཏེ་བརྗོད་ན་དེའི་ལུས་ལས་ཆུ་འཛག་ཅིང་། དེ་ཁོ་ན་བཞིན་དུ་རྣ་བ་གཉིས་ཀྱང་ལྷ་རྫས་ཀྱི་ཆུ་འབྱུང་བར་སྣང་། ལུས་ལས་སྤོས་ཀྱི་རིགས་ཡིད་དུ་འོང་བ་རབ་ཏུ་སིམ་པར་བྱེད་པ་འབྱུང་བ་ནི་ནད་ཐམས་ཅད་གྲུབ་པར་སྣང་སྟེ། རྒྱལ་བའི་ཕྱག་བཞིན་ནོ། །ཡུངས་ཀར་གྱི་ཕྱེ་མ་བླངས་ཏེ་ནམ་མཁའ་ལ་གཏོར་ལ་རིལ་བུ་ལག་པས་བསྐོར་ན་ཆར་ཆེན་པོ་འབབ་པར་འགྱུར་རོ། །རིལ་བུ་ནམ་མཁའ་ལ་འཕངས་ན་མི་འབབ་བོ། །གཡུལ་ཆེན་པོ་འགྱེད་པའི་ནང་དུ་ཕྱེ་མ་དེ་ཡུངས་ཀར་དང་བསྲེས་ཏེ་ནམ་མཁའ་ལ་གཏོར་ལ་རིལ་བུ་དེ་ཡང་ཁར་བཅུག་སྟེ། སྟེང་དུ་བལྟས་ལ་ཧཱུྃ་ཞེས་བྱ་བའི་སྒྲས་བོས་ལ། གནམ་ལྕགས་ཆེན་པོ་འབབ་སྟེ་ཡིད་མི་འཆད་པ་དང་སྡུག་བསྔལ་བསྐྱེད་པར་འགྱུར་རོ། །ཆུའི་ནང་དུ་ཞུགས་ཏེ་ཕྱེ་མ་དེ་གཏོར་ལ་ཡུངས་ཀར་དང་། རིལ་བུ་ཆུའི་ནང་དུ་གདབ་པར་བྱ། ཕྱོགས་བཞིར་ཡུངས་ཀར་གཏོར་ཏེ། ཏཻ་ལས་ལུས་ལ་བསྐུས་ན་ཀླུ་ཆེན་པོའི་གཟུགས་སུ་སྣང་ངོ་། །རིལ་བུ་དང་ཡུངས་ཀར་མེའི་མདོག་ལྟ་བུ་ཆུ་དང་བསྲེས་པའི་ཡུངས་ཀར་ནམ་མཁའ་ལ་གཏོར་ན་འབྲུག་སྒྲ་ཆེན་པོ་འབྱུང་ཞིང་གློག་ཆེན་པོ་གསལ་བ་སྣང་བར་འགྱུར་རོ། །ཆུའི་ནང་ནས་བྱུང་ན་མི་སྣང་བར་འགྱུར་རོ། །ཁྲོན་པའི་ནང་དུ་བཏབ་ན་ཆུ་ལུད་ནས་ཕྱོགས་ཀུན་ཏུ་ཆུ་འབབ་པར་འགྱུར་རོ། །རྫ་མའམ། བུམ་པའམ། རྫེའུའམ། རིལ་བ་བྷྲྀངྒ་རའམ། རིལ་བ་ལ་ཕྱེ་མས་བྱུགས་ཏེ། དེའི་སྟེང་དུ་ཡུངས་ཀར་གྱིས་
གཏོར་ན་ཆུས་བཀང་སྟེ་ཁྲུས་བྱས་ན་དེ་ཆུ་འབབ་པར་སྣང་ཞིང་དེའི་སྣོད་ནི་མི་སྣང་བར་འགྱུར་རོ། །གཞན་ཡང་དགོས་པ་མང་པོ་བྱེད་དེ་མཆོག་ཏུ་གྲུབ་པ་ཡིན་ནོ། །དེ་ནས་རིན་པོ་ཆེའི་ཆེད་དུ་འབྲུ་མར་གྱི་རྒྱལ་པོ་བྱས་ཏེ་འབྲུ་མར་གཞན་དང་། དེ་བཞིན་དུ་ཏིལ་ལས་འབྲུ་མར་གྱི་རྒྱལ་པོ་དེ་བཞིན་དུ་སྦྱར་རོ། །ལག་པ་དང་རྐང་པ་བཞག་ལ་འདིར་ཉམ་དྲོད་ཀྱང་ཤེས་པར་བྱའོ། །གཞག་པ་ཐམས་ཅད་ཉམ་དྲོད་ཤེས་པར་བྱ་བ་ནི་མར་སར་བཞིན་དུ་འཇམ་པར་འགྱུར་ཞིང་སྐད་ཅིག་དེ་ཉིད་ལ་མཐོ་བ་དང་། དམའ་བ་ཇི་ལྟར་ཡིད་ལ་འདོད་པ་བཞིན་དུ་རི་ཡང་འགྱུར་རོ། །སྙིང་པོ་ཐུར་མ་འདྲ་བ་དང་། ཟླུམ་པོ་འམ། ཡང་ན་ལྕུག་མ་ལྟ་བུར་བྱས་པས་ཀ་བ་ཡང་འདུད་པ་དང་། རི་ཡང་དམའ་བའམ། ཡང་ན་མཐོན་པོར་འགྱུར་བར་བྱེད་དོ། །ཡུངས་ཀར་དང་པདྨ་ཆེན་པོའི་ཕྱེ་མ་ལྷན་ཅིག་བསྲེས་པ་འབྲུ་མར་གྱི་རྒྱལ་པོས་བསྒོས་པ་ཕྱོགས་བཞིར་ཀུན་ཏུ་གཏོར་ན་རི་ཐམས་ཅད་མི་སྣང་ཞིང་འབྲོག་དགོན་པར་སྣང་བར་འགྱུར་རོ། །ཡང་རི་བོར་སྣང་བར་འགྱུར་རོ། །ཡང་ན་མི་བགྲོད་པར་མི་ནུས་པའི་རིའི་རྩེ་མོ་ན་སེང་གེ་དང་། སྟག་གིས་གང་བ་ལྕུག་མ་དང་ཚེར་མ་ཅན་གྱི་ཤིང་ལྗོན་པ་སྣ་ཚོགས་ཀྱིས་གང་བའམ། རྩུབ་པའམ། དུབ་བུའམ་ཁོང་སྟོང་དུ་སྣང་བར་འགྱུར་རོ། །ཅི་སྟེ་རིག་སྔགས་འཆང་འཕགས་པ་སྤྱན་རས་གཟིགས་དབང་ཕྱུག་གི་ཕོ་བྲང་རི་པོ་ཊ་ལའི་གཞལ་མེད་ཁང་མཐོང་བར་འདོད་ན་དེ་ནས་རིག་སྔགས་འཆང་གིས་ཞག་བདུན་གྱི་བར་དུ་ནས་ཀྱི་འོ་ཐུག་གི་ཟས་ཟོས་ཏེ་གཙང་མ་ཤིན་ཏུ་ཁྲུས་བྱས་པ་གོས་གཙང་མ་བགོས་པས་རིའི་གསེབ་ཏུ་ཞུགས་ལ། ས་ཕྱོགས་གཙང་མའི་གནས་དེར་ཤིང་དྲི་ཞིམ་པོའི་མེ་སྦར་བ་ལ་ཡུངས་ཀར་ཕྱེ་མ་དང་བསྲེས་པ་འབྲུ་མར་གྱི་རྒྱལ་པོ་དང་སྦྱར་ལ་འབྲས་སོ་བ་དང་བསྲེས་པ་སྟོང་རྩ་བརྒྱད་ཞག་བདུན་དུ་དུས་གསུམ་དུ་སྦྱིན་སྲེག་བྱའོ། །ལྷ་བཤོས་དང་གཏོར་མ་དཀར་པོ་འབུལ་ལོ། །དེ་ནས་རིག་སྔགས་འཆང་གིས་ཚེས་བརྒྱད་ལ་ཉིན་ཞག་གཅིག་སྨྱུང་བ་བྱས་ལ་ཤིན་ཏུ་ཁྲུས་བྱས་པ་གཙང་མས་སྤོས་སྣ་ཚོགས་ཀྱིས་ལུས་བསྐུས་གོས་བཟང་པོ་གཙང་མ་བགོས་ཏེ། འབྲུ་མར་གྱི་རྒྱལ་པོས་རང་གི་ལུས་བསྐུས་ཕྱེ་མས་ལུས་བྱུགས་མིག་སྨན་
གྱིས་མིག་བསྐུས། ཐིག་ལེ་བྱས་ལ་ནོར་བུས་མགོ་བཅིང་ཞིང་མགུལ་པ་དང་། ལག་པ་དང་། དཔུང་པ་དང་། རྐེད་པར་ཡང་བཅིངས་ལ་ཡུངས་ཀར་དང་མཚལ་བསྲེས་པས་རིའི་ཕྱོགས་བཞིར་གཏོར་བར་བྱ། པདྨ་ཆེན་པོའི་ཕྱེ་མ་དེ་ཡང་ཕྱོགས་བཞིར་གཏོར། རང་གི་ལག་པ་གཡོན་པས་ཞགས་པ་དང་། པདྨ་གཟུང་ཞིང་གཡས་པས་རྣམ་པར་ལྟ་བ་སྣང་བ་དང་། དོན་ཡོད་པ་ཆེན་པོས་དྲི་མ་མེད་པའི་ཕྱག་རྒྱ་བཟུང་སྟེ། དོན་ཡོད་པའི་ཞགས་པའི་མདོ་ལན་ཅིག་བཟླས་བརྗོད་བྱས་ན་ཇི་ལྟར་དོན་ཡོད་པའི་ཞགས་པའི་མདོ་སྡེ་བཤད་པ་ལས་བསྟན་པ་དེ་ལྟར་རི་པོ་ཊ་ལའི་གཞལ་མེད་ཁང་མཐོང་བར་འགྱུར་རོ། །རིག་སྔགས་འཆང་དེ་ཡང་འཕགས་པ་སྤྱན་རས་གཟིགས་དབང་ཕྱུག་གི་གཟུགས་སུ་སྣང་བར་འགྱུར་རོ། །ཇི་ལྟར་རི་པོ་ཊ་ལའི་གཞལ་མེད་ཁང་བཞིན་དུ་རི་དེ་ལ་ཡང་གཞལ་མེད་ཁང་སྣང་སྟེ། རི་དེ་ལ་རིན་པོ་ཆེའི་ཤིང་ལྗོན་པ་སྣ་ཚོགས་སྣང་ངོ་། །མེ་ཏོག་སྣ་ཚོགས་ཀྱི་གཞལ་མེད་ཁང་སྣང་ངོ་། །སཱ་ལ་དང་། ཏཱ་ལ་དང་། ཏ་མ་ལ་དང་། ཙམ་པ་ཀ་དང་། ཨ་ཤོ་ཀ་དང་། ཨ་དྷི་མུཀྟི་ཀ་དང་། བ་རི་ཤ་ཀ་དང་། ཀ་དམྦ་དང་། ནཱི་ལ་དང་། པཱ་ཊ་ལ་དང་། པཱ་ལཱ་ཤ་དང་། ཨུ་དུམ་བཱ་ར་དང་། དོང་ཀཱའི་མེ་ཏོག་སྣ་ཚོགས་དང་། སྣ་མའི་མེ་ཏོག་དང་། ཏ་ར་ཎ་དང་། ན་བ་མ་ལི་ཀ་དང་། ཀུ་པ་པྱ་ཀ་སྣ་ཚོགས་སྣང་བར་འགྱུར་རོ། །བྱའི་ཚོགས་སྣ་ཚོགས་ཀྱིས་ལེགས་པར་བརྒྱན་པ་དང་། རི་དགས་ཀྱི་ཚོགས་སྣ་ཚོགས་ཀྱིས་གང་བ་སྣང་བར་འགྱུར་རོ། །གང་གི་ཚེ་ཕྱིར་བསྡུ་བ་བྱེད་པར་འདོད་པ་དེའི་ཚེ་གནས་གཞན་དུ་འགྲོ་བར་བྱའོ། །གཞན་ཡང་དགོས་པ་སྣ་ཚོགས་ལ་རང་གི་བློ་གྲོས་ལ་ཇི་ལྟར་སྣང་བ་བཞིན་བྱའོ། །དགོས་པ་ཐམས་ཅད་ལ་རབ་ཏུ་སྦྱར་བ་ནི་བཀླགས་པ་ཙམ་གྱིས་འགྲུབ་པར་འགྱུར་རོ། །དོན་ཡོད་པའི་ཞགས་པ་ཆེན་པོའི་དཀྱིལ་འཁོར་གྱི་རིག་སྔགས་འཆང་གི་ཆོ་ག་གསང་བའོ།། །།