འཕགས་པ་ཡོངས་སུ་བསྔོ་བའི་རྒྱལ་པོ་ཆེན་པོ་སྔགས་དང་བཅས་པ།
རྒྱ་གར་སྐད་དུ། ཨཱཪྱ་མ་ཧཱ་པ་རི་ཎཱ་མ་རཱ་ཛ་སམནྟྲ་ཀ བོད་སྐད་དུ། འཕགས་པ་ཡོངས་སུ་བསྔོ་བའི་རྒྱལ་པོ་ཆེན་པོ་སྔགས་དང་བཅས་པ། བམ་པོ་དང་པོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །ཡོན་ཏན་རྒྱ་མཚོ་དཔག་མེད་པ། །སངས་རྒྱས་དམ་ཆོས་འཕགས་པ་ཡི། །དགེ་འདུན་དུས་གསུམ་བཞུགས་པ་རྣམས། །མ་ལུས་པ་ལ་སྐྱབས་སུ་མཆི། །མི་དགེ་ཐམས་ཅད་བཤགས་པར་བགྱི། །འགྲོ་བའི་དགེ་ལ་རྗེས་ཡི་རང་། །ཆོས་ཀྱི་འཁོར་ལོ་རབ་བསྐོར་བར། །རྫོགས་སངས་རྒྱས་ལ་བསྐུལ་མ་འཚལ། །ཀུན་མཁྱེན་སྤྱན་གྱིས་གཟིགས་པ་ཡི། །བདག་དགེ་ཆུང་ངུ་གང་མཆིས་པ། །དེས་ནི་གཏན་དུ་བྲལ་བ་དག །ཐམས་ཅད་ཉེ་བར་ཞི་གྱུར་ཅིག །རྣམ་པ་ཀུན་མཆོག་ལྡན་པ་ཡི། །སྟོང་པ་ཤེས་པའི་ཏིང་ངེ་འཛིན། །བྱང་ཆུབ་བར་གྱི་ཚེ་རབས་སུ། །རྟག་ཏུ་བདེ་དང་ལྡན་པར་ཤོག །རྣམ་པར་མི་རྟོག་ལྷུན་གྱིས་གྲུབ། །རྟག་ཏུ་མཉམ་པར་བཞག་གྱུར་ཅིང་། །ཟླ་ཉི་ནོར་བུ་རོལ་མོ་ལྟར། །སེམས་ཅན་དོན་ལ་འཇུག་པར་ཤོག །ཇི་ལྟར་རྒྱལ་བ་མཁས་པ་རྣམས། །ཤེས་རབ་ཕ་རོལ་ཕྱིན་ཐབས་བས་བསྔོ། །དེ་ལྟར་བདག་གིས་དཀར་པོ་རྣམས། །བྱང་ཆུབ་ཏུ་ནི་བསྔོ་བར་བགྱི། །དཀོན་མཆོག་གསུམ་ལ་
དམིགས་པ་ཡི། །བདག་གི་ལུས་ངག་ཡིད་དགེ་དང་། །སྦྱིན་པ་ཚུལ་ཁྲིམས་བཟོད་བརྩོན་འགྲུས། །བསམ་གཏན་ཤེས་རབ་ལས་བྱུང་གང་། །དེ་དག་ཀུན་གྱིས་བདག་ཉིད་ནི། །ཚངས་པར་སྤྱོད་པ་ལྡན་པ་དང་། །འཇིག་རྟེན་མགོན་གྱི་བསྟན་པ་ལ། །རབ་འབྱུང་མངོན་དགའ་དབང་ལྡན་ཞིང་། །སངས་རྒྱས་ཀུན་གྱིས་གསུང་རབ་ཀྱི། །གཞུང་དོན་ཚིག་ལ་མཁས་གྱུར་ནས། །དམ་ཆོས་ཡོངས་སུ་འཛིན་པ་དང་། །ལུས་དང་སྲོག་ལ་དགའ་མེད་ཤོག །བདག་ནི་འགུམ་པའི་དུས་བགྱིད་ཚེ། །ཕྱིན་ཅི་མ་ལོག་ཡིད་ཀྱིས་སུ། །སངས་རྒྱས་ཚེ་དཔག་མེད་མཐོང་ནས། །འདི་ནས་བདེ་བ་ཅན་དུ་མཆི། །བདུད་ཀྱི་སྤྱོད་ཡུལ་མངོན་གྱུར་ཚེ། །དྲང་སྲོང་ཆེན་པོ་ཚེ་དཔག་མེད། །རྟག་ཏུ་སྟོན་པ་མཛད་གྱུར་ཅིང་། །ས་བཅུ་ཐོབ་ནས་དེ་དག་གི། །རྣམ་པར་དག་པའི་རིམ་པ་ཡིས། །བྱང་ཆུབ་དམ་པ་ཐོབ་པར་ཤོག །སངས་རྒྱས་ཀུན་དུ་བཟང་པོ་ཉིད་ཐོབ་ནས། །བག་ཆགས་བཅས་པ་ཉེས་བསགས་རྩ་ནས་བཏོན། །ཡེ་ཤེས་སྒྲིབ་མེད་སྙིང་རྗེར་ལྡན་ནས་སུ། །འགྲོ་བ་རྣམས་ལ་སྨན་དང་བདེ་བ་བགྱི། །ཕྱོགས་བཅུ་མཐའ་ཡས་པ་ན་ཤེས་བྱའི་དོན་མ་ལུས་པར་ཁྱབ་པའི་བློ་མངའ་བ་ཕྱོགས་བཅུའི་སངས་རྒྱས་བཅོམ་ལྡན་འདས་དང་། བྱང་ཆུབ་སེམས་དཔའ་རྒྱ་མཚོ་སྙེད་ལ་ཕྱག་འཚལ་ལོ། །སེམས་ཀྱི་རྙོག་མ་ཡིད་གཉིས་བསལ་ནས་དང་པོར་ནི། །ཤཱཀྱའི་རྒྱལ་པོ་ཐུབ་ལ་སྤྱི་བོས་ཕྱག་འཚལ་ལོ། །བདེ་བ་ཅན་ན་བཞུགས་པའི་རྒྱལ་བ་འོད་དཔག་མེད། །བླ་མ་ལ་ཡང་དགའ་དང་གུས་པས་གདུང་བར་བགྱི། །གང་ཞིག་ཕྱོགས་ཀུན་དག་ན་ད་ལྟར་བྱུང་བ་ཡི། །འགྲོ་ལ་བྱམས་པའི་སངས་རྒྱས་ངེས་པར་བཞུགས་རྣམས་དང་། །འདས་དང་ཕྱིས་འབྱུང་བ་ཡི་རྒྱལ་བ་ཐམས་ཅད་ལ། །བདག་ནི་དགའ་བའི་ཡིད་ཀྱིས་ཡང་དག་མཆོད་པ་བགྱི། །འདི་ལྟ་སྟེ། ཡང་དག་པར་རྫོགས་པའི་སངས་རྒྱས་ཉི་ཟླ་སྒྲོན་མ་དང་། སྐུ་མཆོག་གསེར་འོད་དང་། བདེན་པའི་དབྱངས་དང་། ལྷུན་པོ་བཟང་པོ་དང་། ལྷུན་པོ་ཆེན་པོ་དང་། དབང་པོའི་འབྱུང་གནས་དང་། པདྨའི་དབྱངས་དང་། ཕྱག་བཟང་དང་། འོད་ཀྱི་ཏོག་དང་། མཆོག་གི་
འབྱུང་གནས་དང་། རིན་ཆེན་ཟླ་འོད་དང་། དཔའ་བོའི་སྡེ་དང་། ཀུན་ནས་སྣང་བ་དང་། རྣམ་དག་ཞལ་དང་། རིན་ཆེན་ཏོག་དང་། མདོག་བཟང་འབྱུང་གནས་དང་། །སཱ་ལའི་རྒྱལ་པོ་དང་། རྣམ་དག་འོད་དང་། བདེ་མཛད་རྒྱལ་པོ་དང་། ཀུན་ནས་སྣང་བ་དང་། ལྷུན་པོ་བཟང་པོ་གསལ་བ་དང་། འོད་ཀྱི་དཀྱིལ་འཁོར་དང་། དཀོན་མཆོག་བརྩེགས་དང་། ཀུན་ནས་འོད་དང་། དཔལ་བརྩེགས་དང་། བཀོད་པ་ཆེན་པོ་དང་། སྦྱངས་གསལ་བཻཌཱུཪྱ་དང་། དབང་པོའི་རྒྱལ་མཚན་དང་། ཐོབ་པའི་སྡེ་དང་། རབ་ཏུ་ལྷན་ནེ་དང་། འོད་མཛེས་དང་།མེ་ཏོག་ཚོམས་དང་། སྤྱན་བཟང་དང་། ཤིན་ཏུ་བཟང་པོ་དང་། འོད་བཟང་སྒྲོན་མ་དང་། དགོངས་པ་རྣམ་དག་དང་། ཆོས་ཀྱི་འོད་ཟེར་དང་། བརྩོན་འགྲུས་ཆེ་ལྡན་དང་། པདྨའི་སྙིང་པོ་དང་། ལྷག་པར་དགོངས་པ་བརྟན་པ་དང་། རྡོ་རྗེའི་སྡེ་དང་། ལེགས་པར་འཁྲུངས་དང་། ཚུལ་བཟང་དང་། དབྱངས་སྙན་དང་། ཡོན་ཏན་དཔལ་འོད་དང་། འཇིག་རྟེན་ཏོག་དང་། མདོག་བཟང་གསལ་བ་དང་། རྟག་ཏུ་བརྩོན་དང་། ཙནྣན་ཟླ་འོད་དང་། རྒྱས་པའི་དཔལ་དང་། རྒྱ་མཚོ་དང་། དབང་པོ་ཆེན་པོ་དང་། རྒྱལ་བའི་དབང་པོ་དང་། འོད་བཀོད་པ་དང་། བརྩོན་འགྲུས་སྦྱངས་པ་དང་། ཀུན་དུ་སྒྲོན་མ་དང་། གསུང་བ་ཆེན་པོ་དང་། རྡོ་རྗེའི་སྙིང་པོས་རབ་ཏུ་འཇོམས་པ་དང་། དྲང་སྲོང་ལྷ་དང་། མེའི་འོད་དང་། ཡིད་དུ་འོང་བ་དང་། རྣམ་འཇོམས་དང་། ཏོག་ཆེན་པོ་དང་། ཤིན་ཏུ་མཐོར་གཤེགས་དང་། ཕན་པར་བཞེད་དང་། དྲང་སྲོང་ཆེན་པོ་དང་། རྣམ་པར་གཟིགས་དང་། གཙུག་ཏོར་ཅན་དང་། ཐམས་ཅད་སྐྱོབ་དང་། འོད་སྲུང་དང་། གསེར་མདོག་དང་། གཟི་བརྗིད་མཆོག་དང་། མཐོ་བ་དང་། བཀྲ་ཤིས་དང་། རིན་ཆེན་གྲགས་པ་དང་། གཟི་བརྗིད་འོད་དང་། རྣམ་པར་སྣང་མཛད་དང་། དོན་ཡོད་གཟིགས་དང་། དབང་པོའི་ཏོག་དང་། གྲགས་པ་དང་། སྣང་མཛད་དང་། བིཥྞུ་བློ་གྲོས་དང་། སྐར་རྒྱལ་དང་། སྐག་དང་། འོད་འབབ་དང་། རིན་ཆེན་མཆོད་སྡོང་དང་། འབར་བའི་ཏོག་དང་། ཐུགས་གཞུངས་དང་། རབ་
ཞི་དབང་པོ་དང་། སྤྱན་དག་དང་། ཟླ་མཆོག་དང་། བདེན་པའི་ལྷ་དང་། དྲང་སྲོང་སྦས་པ་དང་། ཐུབ་པ་དང་། ཚངས་པའི་དབྱངས་དང་། ཀུན་དུ་ཞལ་དང་། མ་སྨད་པ་དང་། བདུད་འཇོམས་དང་། ལྷའི་རྒྱལ་པོ་དང་། ལེགས་སོན་དང་། གཟི་བརྗིད་བཟང་པོ་དང་། ཚོགས་ཀྱི་དབང་པོ་དང་། ཤིན་ཏུ་རྣམ་པར་གནོན་པས་གཤེགས་པདང་། བསམ་ཡས་འོད་དང་། ཟླ་བའི་རྒྱལ་པོ་དང་། བདེ་བ་ཆེ་ཐོབ་དང་། སྣང་བར་གྱུར་པ་དང་། རྒྱ་མཚོ་ཆེན་པོ་དང་། མི་འཁྲུགས་པ་དང་། དབང་པོའི་མཆོག་དང་། མེ་ཏོག་ཏོག་དང་། དེད་དཔོན་ཆེན་པོ་དང་། རྣམ་པར་རྒྱལ་བྱེད་དང་། མེ་ཏོག་བཟང་པོ་དང་། བཤེས་གཉེན་བཟང་པོ་དང་། རྒྱུ་སྐར་བཟང་པོ་དང་། ཉི་མའི་སྙིང་པོ་དང་། ཚོགས་ཀྱི་དཔལ་དང་། ནོར་གྱི་དཔལ་དང་། སྣང་བ་བཟང་པོ་དང་། འོད་དཔག་མེད་དང་།དཔལ་ཆེན་པོ་དང་། སྟོབས་མཆོག་དང་། སྒྲོན་མ་སྟེ། དེ་དག་ལ་སོགས་པ་སྔོན་བྱུང་བ་དང་། ཕྱིས་འབྱུང་བའི་རྒྱལ་བ་གང་དག་ཡོན་ཏན་གྱི་ཀླུང་དཔག་ཏུ་མེད་པར་གྱུར་པ། འཁོར་བའི་ཆུ་བོའི་འདམ་རྫབ་ལས་ཡང་དག་པར་རྒལ་བ། གཏོང་བ་དང་ལྡན་ཞིང་ཚུལ་ཁྲིམས་རྣམ་པར་དག་ལ་བཟོད་པ་ཆེན་པོའི་མཆོག་དང་ལྡན་པ། བརྩོན་འགྲུས་སྦྱངས་ཤིང་སྙིང་པོ་གཡོ་བ་མི་མངའ་བའི་བསམ་གཏན་ཆེན་པོ་དང་ལྡན་པ། མཁྱེན་རབ་རྣོ་བ་ཐོགས་པ་མེད་པ་དང་ལྡན་པ། སེམས་ཅན་ལ་ཐུགས་རྗེ་དང་། ཚོགས་དང་། རྫོགས་པའི་བྱང་ཆུབ་ཀྱི་ཐུགས་སྐྱེ་བ་རབ་ཏུ་འབྱུང་བ། འཇིག་རྟེན་ཐམས་ཅད་ལ་ཐུགས་བརྩེ་བ། དོན་ལ་མངོན་པར་བརྩོན་པ། སེམས་ཅན་གྱི་སྙིང་པོ། སྐྱེ་དགུ་ལ་བྱམས་པ། གཡོ་མི་མངའ་བ། དགའ་བ་མི་མངའ་བ། ཆགས་པ་མི་མངའ་བ།བྱམས་པའི་ཐུགས་ཀྱི་བདག་ཉིད་ཅན། ལྷའི་ཡང་ལྷ་དང་། མིའི་མཆོག་གིས་རྗེད་པ། ལྷའི་ཡང་ལྷ་སྟེ། རྒྱལ་བ་དེ་རྣམས་ལ་བདག་གི་ལུས་དང་། ངག་དང་། སེམས་གུས་པ་རྣམ་པ་དུ་མས་ཕྱག་འཚལ་ལོ། །རྒྱལ་བ་དེ་རྣམས་ཀྱིས་བདག་སྡིག་པ་ལས་རྣམ་པ་ཐམས་ཅད་དུ་བསྐྱབ་ཏུ་གསོལ། སྡུག་བསྔལ་དུ་མས་གདུངས་པའི་སེམས་ཅན་ཐམས་
ཅད་ཀྱང་རབ་ཏུ་བརྩོན་པས་དྲང་དུ་གསོལ། ཐུགས་རྗེ་ཆེན་པོ་དང་ལྡན་པས་བདག་ཀྱང་ངན་འགྲོ་དག་ལས་དྲང་ཞིང་དེ་བཞིན་དུ་རྫོགས་པའི་བྱང་ཆུབ་ཏུ་མྱུར་དུ་གཞག་ཏུ་གསོལ། དྲང་སྲོང་ཆེན་པོ་རྣམས་ཀྱི་མཚན་བརྗོད་པའི། དགེ་བ་བདག་གིས་བསྒྲུབས་པ་གང་ལགས་པ། །དེ་ཡིས་བདག་ནི་ཚེ་རབས་ཐམས་ཅད་དུ། །ཐུབ་དབང་དེ་དང་ལྷན་ཅིག་འགྲོགས་པར་ཤོག །ཆོས་དང་ཟང་ཟིང་མཆོདཔས་བདེ་བར་གཤེགས། །དེ་ལ་ཉོན་མོངས་མེད་པར་བདག་གིས་མཆོད། །མཆོད་པ་བགྱིས་ཤིང་ལམ་གཉིས་ལ་བརྟེན་ནས། །འགྲོ་བ་རྫོགས་པའི་སངས་རྒྱས་ཉིད་གྱུར་ཅིག །དེ་བཞིན་གཤེགས་པ་དེ་དག་གི་མཚན་ཐོས་པ་དང་། མོས་པ་དང་། འཛིན་པ་དང་། འཆང་བ་དང་། ཡོངས་སུ་བསྒྲགས་པས་སྒྲིབ་པ་ཐམས་ཅད་ཟད་པར་འགྱུར། ངན་འགྲོའི་འཇིགས་པ་ཐམས་ཅད་ལས་ཀྱང་ཐར་བར་འགྱུར། བླ་ན་མེད་པ་ཐམས་ཅད་མཁྱེན་པ་ཉིད་དུ་ཡང་ངེས་པར་འགྱུར་རོ། །ཆོས་ཀྱི་དབྱིངས་ཀྱིས་ཀླས་པ་ནམ་མཁའི་ཁམས་ཀྱི་མཐས་གཏུགས་པའི་ཕྱོགས་ཐམས་ཅད་ན་དུས་གསུམ་ལྷག་མ་མེད་ཅིང་ལུས་པ་མེད་ལ་མ་ལུས་པའི་སངས་རྒྱས་བཅོམ་ལྡན་འདས་དེ་བཞིན་གཤེགས་པའི་སྤྱན་ལྔས་ཐུགས་སུ་ཆུད་པ་དང་། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་བས་ཕྱག་འཚལ་ལོ། །སངས་རྒྱས་བཅོམ་ལྡན་འདས་དང་། བྱང་ཆུབ་སེམས་དཔའ་དེ་དག་ཐམས་ཅད་བདག་ལ་དགོངས་སུ་གསོལ། བདག་མིང་འདི་ཞེས་བགྱི་བ་བྱང་ཆུབ་ཀྱི་སྙིང་པོ་ལ་མཆིས་ཀྱིབར་དུ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཐུགས་རྗེ་དང་ལྡན་པ། བྱམས་པ་དང་ལྡན་པ། ཕན་པར་བཞེད་པ། ཐུགས་བརྩེ་བ་ཅན། སྐྱེ་བ་མེད་པ་དང་། འགག་པ་མེད་པའི་ཆོས་དང་ལྡན་པ་དེ་ལ་ལུས་ཐམས་ཅད་ཀྱིས་ཕྱག་འཚལ་ནས་བསམ་པ་དང་། ལྷག་པའི་བསམ་པ་རུས་པའི་ཁོང་ནས་དགའ་བ་དང་། རྐང་གི་ཁོང་ནས་དགའ་བའི་སེམས་ཐམས་ཅད་ཀྱིས་སྐྱབས་སུ་མཆིའོ། །དེ་བཞིན་དུ་བཅོམ་ལྡན་འདས་མྱ་ངན་མི་མངའ་བ་དེ་དང་། རྟག་ཏུ་མྱ་ངན་ལས་འདས་པ་དང་། སྲེག་
བླུགས་གསོལ་དང་། དེ་བཞིན་དུ་མཆོག་དགའ་དང་། མཆོག་གི་འབྱུང་གནས་དང་། དབང་པོའི་འབྱུང་གནས་དང་། མར་མེ་མཛད་དང་། སེང་གེ་སྒྲ་དང་། མདོག་བཟང་འབྱུང་གནས་དང་། རིན་ཆེན་འབྱུང་གནས་དང་། རིན་ཆེན་བླ་མ་དང་། རིན་ཆེན་ཟླ་བ་དང་། རིན་ཆེན་འབྱུང་དང་། རིན་ཆེན་སྣང་བ་དང་། རིན་ཆེན་ཏོག་དང་། རིན་ཆེན་འོད་གསལ་དང་། རིན་ཆེན་རབ་གསལ་དང་། རིན་ཆེན་མང་དང་། རིན་ཆེན་མུ་ཁྱུད་དང་། རིན་ཆེན་པདྨ་དང་། རིན་ཆེན་པདྨས་རྣམ་པར་གནོན་དང་། རིན་ཆེན་མེ་དང་། རིན་ཆེན་མེའི་འཁོར་དང་། རིན་ཆེན་ཀུན་གྱིས་སྐུ་བརྒྱན་ལྡན་པ་དང་། དགྲ་ལས་རྒྱལ་བ་དང་། སའི་སྟོབས་ཀྱི་ཤུགས་མངའ་བ་དང་། པདྨའི་མཆོག་དང་། སྐུ་མཆོག་དང་། ཟླ་མཆོག་དང་། ཆོས་མཆོག་དང་། བཅོམ་ལྡན་འདས་དེ་བཞིན་གཤེགས་པ་བརྗོད་ཀྱིས་མི་ལང་བ་དང་། རྣམ་པར་རྟོག་མེད་དང། དཔག་ཏུ་མེད་པ་དང་། རིན་ཆེན་མཐའ་ཡས་དང་། རིན་ཆེན་མཐའ་ཡས་དྲི་མ་མེད་པ་དང་། ཕྱག་མཐའ་ཡས་དང་། གྲགས་པ་མཐའ་ཡས་དང་། གྲགས་པ་ཆེན་པོ་དང་། བདེ་བྱེད་ཆེ་ཐོབ་དང་། མཐུ་ཆེན་བརྩོན་འགྲུས་ངེས་འབྱུང་དང་། ཡོན་ཏན་ཆེར་བགྲང་དང་། དཔག་མེད་དབྱངས་དང་། བདེན་པའི་དབྱངས་དང་། རྣམ་པར་རྒྱལ་བའི་དབྱངས་དང་། ཟླ་བའི་དབྱངས་དང་། པདྨའི་དབྱངས་དང་། སེང་གེའི་དབྱངས་དང་། སེང་གེའི་སྒྲ་སྒྲོགས་དང་། རྡོ་རྗེའི་སྒྲ་སྒྲོགས་དང་། རྡོ་རྗེའི་སྙིང་པོས་རབ་ཏུ་འཇོམས་པ་དང་། ཟླ་འོད་དང་། ཉི་འོད་དང་། སྐར་འོད་དང་། པདྨའི་འོད་དང་། བདུད་རྩིའི་འོད་དང་། སྤྲུལ་པའི་འོད་དང་། རིན་ཆེན་དཔག་མེད་སྤྲུལ་པའི་འོད་དང་། གྲོལ་བའི་འོད་དང་། ཡོངས་སུ་དག་པའི་འོད་དང་། རྣམ་པར་རྟོག་མེད་སྐར་འོད་དང་། སྐར་མ་སྒྲོན་མ་དང་། འཇིག་རྟེན་སྒྲོན་མ་དང་། ནམ་མཁའི་ཆོས་ཀྱི་སྒྲོན་མ་དང་། ཟླ་བའི་སྒྲོན་མ་དང་། ཟླ་འོད་དང་། དྲི་མེད་བླ་མ་དང་། དྲི་མེད་གསལ་བ་དང་། གསེར་མདོག་གསལ་བ་དང་། གསེར་མདོག་སྣང་བ་དང་། གསེར་མདོག་རིན་ཆེན་གསལ་བ་དང་། དཔག་མེད་སྤོས་སྣང་དང་། སྤོས་ཀྱི་ཞལ་དང་། ཀུན་
ནས་སྤོས་དང་། ཚངས་དབྱངས་རྒྱལ་པོ་དང་། །ཀླུའི་དབང་ཕྱུག་རྒྱལ་པོ་དང་། །དཔལ་གྱི་སྙིང་པོ་བརྩེགས་པ་སྒྲ་བསྒྲགས་རྒྱལ་པོ་དང་། །གློག་གི་སྒྲོན་མེ་ཏོག་གི་རྒྱལ་པོ་དང་། དགེ་བ་རབ་གནས་གཏེར་གྱི་རྒྱལ་པོ་དང་། བདུད་རྩི་དམ་པ་ལེགས་བྲལ་རྒྱལ་པོ་དང་། བཟང་པོ་ཏོག་གི་རྒྱལ་མཚན་གྱི་རྒྱལ་པོ་དང་། མེ་ཏོག་ཀུན་གྱི་དྲིའི་དབང་ཕྱུག་རྒྱལ་པོ་དང་། རྔ་སྒྲའི་རྒྱལ་པོ་དང་། སཱ་ལའི་རྒྱལ་པོ་དང་། དེ་བཞིན་དུ་བཅོམ་ལྡན་འདས་མི་འཁྲུགས་པ་དེ་དང་། འོད་ཆེན་དང་། སྙིང་པོ་ཟིལ་གྱིས་གནོན་དང་། མེ་ཏོག་ཟིལ་གྱིས་གནོན་དང་། ལྷུན་པོ་དང་། ལྷུན་པོ་ཆེན་པོ་དང་། ཤིན་ཏུ་ལྷུན་པོ་དང་། ལྷུན་པོ་བཟང་པོ་ལྟ་བུ་དང་། ལྷུན་པོ་བཟང་པོས་རྣམ་པར་གནོན་པ་དང་། ནམ་མཁའ་གསལ་པ་དང་། ཟླ་ཉི་གསལ་བ་དང་། མེ་གསལ་དང་། དཔལ་གྱི་སྙིང་པོ་ནོར་བུ་གསལ་བ་དང་། བདུད་རྩི་སྤྲོ་གསལ་དང་། ཟླ་མཆོག་དཔལ་དང་། མཐའ་ཡས་དཔལ་དང་། རིན་པོ་ཆེ་འདུས་པའི་དཔལ་དང་། རིན་པོ་ཆེའི་ཕྱིར་མི་ལྡོག་པའི་མཐུ་ལ་གནས་པའི་དཔལ་དང་། རིན་པོ་ཆེ་དག་པ་འབྱུང་བའི་དཔལ་དང་། བཻཌཱུཪྱའི་སྙིང་པོ་མཆོག་གི་དཔལ་དང་། ཁྲེལ་ཡོད་དཔག་མེད་གསེར་མཆོག་བཀོད་པའི་དཔལ་དང་། ཏ་ལའི་རྒྱལ་པོ་ལྟར་འཕགས་པའི་དཔལ་དང་། ལྗོན་པ་རྣམ་པར་འཕེལ་བའི་དཔལ་དང་། སྤྱོད་པ་གྲངས་མེད་པ་ལ་ཡང་དག་པར་གནས་པའི་དཔལ་དང་། དོན་ཡོད་དཔལ་དང་། དོན་ཀུན་གྲུབ་པའི་དཔལ་དང་། པདྨ་མཆོག་གིས་རྣམ་པར་འཕྲུལ་པའི་དཔལ་དང་། ཡེ་ཤེས་གཙང་སྤས་དཔལ་དང་། ཚེ་དཔག་མེད་དང་། དབྱངས་དཔག་མེད་དང་། པདྨའི་དབྱངས་དང་། པདྨའི་སྡེ་དང་། དཔའ་སྡེ་དང་། མཚོན་ཆ་དཔའ་བརྟན་པའི་སྡེ་དང་། ཉོན་མོངས་སྤོང་དང་། ཤིན་ཏུ་ཡོངས་དག་ཏོག་དང་། ཤིན་ཏུ་དྲི་མེད་འབར་བའི་ཏོག་དང་། ཐུགས་དམ་ཀུན་ཆུབ་ཐེ་ཚོམ་གཅོད་པ་དང་། ཀུན་དུ་རྣམ་པར་སྣང་མཛད་རྣམ་དག་བརྙེས་པ་དང་། ཀུན་དུ་ཡོན་ཏན་རྣམ་གནོན་དང་། ཀུན་དུ་ཡོན་ཏན་འབྱུང་བ་དང་། དེ་བཞིན་དུ་བཅོམ་ལྡན་འདས་རིན་པོ་ཆེ་སྣང་བ་རྣམ་པར་གནོན་པ་བསམ་གྱིས་མི་ཁྱབ་པ་དེ་
དང་། རིན་པོ་ཆེ་གསལ་བ་དང་། རིན་པོ་ཆེ་མང་པོ་དང་། དེ་ལ་སོགས་པ་སྐྱེ་བ་མེད་པ་དང་། འགག་པ་མེད་པའི་ཆོས་དང་ལྡན་པ། འདས་པ་དང་། མ་འོངས་པ་དང་། ད་ལྟར་བྱུང་བའི་ཡང་དག་པར་རྫོགས་པའི་སངས་རྒྱས་རྣམས་ལ་སེམས་ཅན་ཐམས་ཅད་ཀྱིས་བྱང་ཆུབ་ཀྱི་སྙིང་པོ་ལ་མཆིས་ཀྱི་བར་དུ་སྐྱབས་སུ་མཆིའོ། །དེ་བཞིན་དུ་བཅོམ་ལྡན་འདས་དེ་དག་གི་ཆོས་སྤྲོས་པ་མེད་པ། ཡི་གེ་མེད་པ། འཕགས་པ་རྣམས་ཀྱི་སོ་སོ་རང་རིག་པར་བྱ་བ། སེམས་ཅན་མེད་པ་དང་སེམས་ཅན་གྱི་རྡུལ་དང་བྲལ་བ། བདག་མེད་པ། འདོད་ཆགས་ཀྱི་རྡུལ་དང་བྲལ་བ། སྲོག་མེད་པ། སྐྱེ་བ་དང་འཆི་བ་དང་བྲལ་བ། གང་ཟག་མེད་པ་སྔོན་གྱི་མཐའ་དང་། ཕྱི་མའི་མཐའ་ཉེ་བར་ཞི་བའི་མཚན་ཉིད་དང་ལྡན་པ། འདོད་ཆགས་དང་བྲལ་བ། དམིགས་པ་མེད་པའི་ཚུལ་ཅན། ཡི་གེ་མ་ཡིན་པ། ངག་ཐམས་ཅད་ཆད་པ། བརྗོད་དུ་མེད་པ། དབའ་རླབས་ཐམས་ཅད་དང་བྲལ་བ། ཐམས་ཅད་ཀྱི་རྗེས་སུ་འགྲོ་བ། ནམ་མཁའ་དང་འདྲ་བ། ཁ་དོག་མེད་པ། རྟགས་དང་། དབྱིབས་དང་། རྒྱུ་བ་ཐམས་ཅད་དང་བྲལ་བ། བདག་མེད་པ། བདག་ཏུ་འཛིན་པ་དང་དྲལ་བ། རྣམ་པར་རིག་པ་མེད་པ་སེམས་དང་། ཡིད་དང་རྣམ་པར་ཤེས་པ་དང་བྲལ་བ། ཟླ་མེད་པའི་ཕྱིར་འདྲ་བ་མེད་པ། རྒྱུའི་མཚན་ཉིད་དང་བྲལ་བ། རྐྱེན་གྱིས་སྒྲོ་བཏགས་པ་མེད་པ། ཆོས་ཀྱི་དབྱིངས་དང་མཉམ་པ། ཆོས་ཐམས་ཅད་མཉམ་པར་བཞག་པ། འགྲོ་བ་མེད་པའི་ཚུལ་གྱིས་དེ་བཞིན་ཉིད་ཀྱི་རྗེས་སུ་སོང་བ། ཤིན་ཏུ་གཡོ་བ་མེད་པའི་ཕྱིར་ཡང་དག་པའི་མཐའ་ལ་གནས་པ། ཡུལ་དྲུག་ལ་གནས་པ་མེད་པའི་ཕྱིར་མ་གཡོས་པ། གནས་མེད་པའི་ཕྱིར་གར་ཡང་འོང་བ་དང་། འགྲོ་བ་མེད་པ། སྟོང་པ་ཉིད་ལ་མཉམ་པར་བཞག་པ། མཚན་མ་མེད་པས་རབ་ཏུ་ཕྱེ་བ། སྨོན་པ་མེད་པའི་མཚན་ཉིད་ཅན། རྟོག་པ་དང་སེལ་བ་དང་བྲལ་བ། གཞག་པ་དང་འདེག་པ་མེད་པ། སྐྱེ་བ་དང་འཇིག་པ་དང་བྲལ་བ། ཀུན་གཞི་མེད་པ། མིག་དང་། རྣ་བ་དང་། སྣ་དང་། ལྕེ་དང་། ལུས་དང་། ཡིད་ལས་ཡང་དག་པར་
འདས་པ། མཐོ་བ་མེད་ཅིང་དམའ་བ་མེད་པ། གཡོ་བ་མེད་པར་གནས་པ་བརྙེས་པ། སྤྱོད་པ་ཐམས་ཅད་དང་བྲལ་བ། མདོར་ན་ཡང་དག་པར་སྐྱེད་པ་མེད་པ། སྐྱེས་པ་མེད་པ། འགགས་པ་མེད་པ། འགག་པ་མེད་པ། འདུས་མ་བྱས་པའི་ཆོས་དེ་ལ་ལུས་ཐམས་ཅད་ཀྱིས་ཕྱག་འཚལ་ནས། བསམ་པ་དང་། ལྷག་པའི་བསམ་པ་རུས་པའི་ཁོང་ནས་དགའ་བ་དང་། རྐང་གི་ཁོང་ནས་དགའ་བའི་སེམས་ཐམས་ཅད་ཀྱིས་བྱང་ཆུབ་ཀྱི་སྙིང་པོ་ལ་མཆིས་ཀྱི་བར་དུ་སྐྱབས་སུ་མཆིའོ། །དེ་བཞིན་དུ་ཐོགས་པ་མེད་ཅིང་ཆད་པ་མེད་པའི་སྤོབས་པ་དང་ལྡན་པ། བཅོམ་ལྡན་འདས་དྲི་མ་མེད་པར་གྲགས་པ་དེ་ལ་སྐྱབས་སུ་མཆིའོ། །དེ་བཞིན་དུ་རྡོ་རྗེའི་ལྟེ་བ་དང་། རྡོ་རྗེའི་སྡེ་དང་། ལྷའི་དབུ་རྒྱན་ལྗོན་པ་དང་། སྤོས་ཀྱི་གླང་པོ་དང་། བདེན་པ་པོ་དང་། ཡེ་ཤེས་ཏོག་དང་། ཆོས་ཀྱི་ཏོག་དང་། ཟླ་བའི་ཏོག་དང་། ཉི་མའི་ཏོག་དང་། མཐའ་ཡས་ཏོག་དང་། ཚིག་མེད་པ་དང་། བརྗོད་དུ་མེད་པ་དང་། དམིགས་པ་མེད་པ་དང་། རྩོམ་པ་མེད་པ་དང་། བུད་མེད་འགྱུར་བ་དང་། སྐར་མའི་རྒྱལ་མཚན་དང་།རི་རབ་རྒྱལ་མཚན་དང་། མེ་ཏོག་རྒྱལ་མཚན་དང་། ཆགས་མེད་རྒྱལ་མཚན་དང་། དེ་དག་ལ་སོགས་པའིི་ཕྱིར་མི་ལྡོག་པའི་བྱང་ཆུབ་སེམས་དཔའི་ཚོགས་ཀྱི་མཆོག་ལ་ལུས་ཐམས་ཅད་ཀྱིས་ཕྱག་འཚལ་ནས་བསམ་པ་དང་། ལྷག་པའི་བསམ་པ་རུས་པའི་ཁོང་ནས་དགའ་བ་དང་། རྐང་པའི་ཁོང་ནས་དགའ་བའི་སེམས་ཐམས་ཅད་ཀྱིས་བྱང་ཆུབ་ཀྱི་སྙིང་པོ་ལ་མཆིས་ཀྱི་བར་དུ་སྐྱབས་སུ་མཆིའོ། །དེ་བཞིན་གཤེགས་པ་ཞི་བའི་རྒྱལ་པོ་ལ་ཕྱག་འཚལ་ལོ། །ཏདྱ་ཐཱ། ཤཱནྟེ་ཤཱནྟེ། རཱ་ག་ཀྵ་ཡཱ་ཡ། ཤཱནྟེ་ཤཱནྟེ། དྭེ་ཥཀྵ་ཡཱ་ཡ། ཤཱནྟེ་ཤཱནྟེ། མོ་ཧ་ཀྵ་ཡཱ་ཡ། དེ་ལྟར་ལན་གཉིས་ལན་གསུམ་དུའོ། །ཏདྱ་ཐཱ། མུ་རུ་ལུ། མུ་རུ་ལུ། ཨཱ་བ་ཧ། མུ་རུ་ལུ། བི་ཛ་ཡཱ་ཡ་སྭཱཧཱ། དེ་ལྟར་སངས་རྒྱས་དང་ཆོས་དང་དགེ་འདུན་ལ་སྐྱབས་སུ་མཆིས་ནས་སེམས་ཅན་ཐམས་ཅད་ལ་སྨན་པ་དང་། བདེ་བ་དང་། མགོན་མ་མཆིས་པ་རྣམས་ཀྱི་མགོན་དང་། སྐྱབས་མ་མཆིས་པ་རྣམས་ཀྱི་སྐྱབས་དང་། དཔུང་གཉེན་
མ་མཆིས་པ་རྣམས་ཀྱི་དཔུང་གཉེན་དང་། འདོད་ཆགས་དང་ཞེ་སྡང་དང་། གཏི་མུག་གི་མུན་པར་གྱུར་པ་རྣམས་ལ་སྣང་བ་བགྱི་བ་དང་། ལམ་ངན་པ་ལ་གནས་པ་རྣམས་ལ་ལམ་བསྟན་པ་ནས་ཁམས་གསུམ་གྱི་སེམས་ཅན་གྱི་ཁམས་ཐར་བར་བགྱི་བའི་སླད་དུ་བསམ་པ་དང་ལྷག་པའི་བསམ་པའི་སེམས་ཐམས་ཅད་ཀྱིས་སྙིང་རྗེ་ཆེན་པོ་མངོན་དུ་བགྱིས་ནས་བྱང་ཆུབ་ཀྱི་སེམས་བསྐྱེད་པར་བགྱིའོ། །ཇི་ལྟར་འདས་པ་དང་། མ་འོངས་པ་དང་། ད་ལྟར་བྱུང་བའི་སངས་རྒྱས་བཅོམ་ལྡན་འདས་དང་། བྱང་ཆུབ་སེམས་དཔའ་རྣམས་ཀྱིས་བསྐྱེད་པ་དང་། སྐྱེད་པར་འགྱུར་བ་དང་། སྐྱེད་པ་དེ་ལྟར་བདག་གིས་ཀྱང་བསྐྱེད་པར་བགྱི་སྟེ། བསམ་པ་དང་། ལྷག་པའི་བསམ་པའི་རྒྱུད་དེས་དེ་ལྟར་བསྐྱེད་པར་བགྱིའོ། །གང་འགོག་པ་མ་མཆིས་པ་དང་། བསགས་པ་མ་མཆིས་པ་དང་། བསགས་པ་མ་ལགས་པར་བསྟན་པ་དང་། བསྒྲུབ་པ་མ་མཆིས་པ་དང་། རྟོག་པ་མ་མཆིས་པ་དང་། རྣམ་པར་རྟོག་པ་མ་མཆིས་པ་དེ་ལྟར་བསྐྱེད་པར་བགྱིའོ། །གང་ན་ལུས་མ་མཆིས་པ་དང་། ལུས་སུ་གདགས་པ་མ་མཆིས་པ་དང་།ངག་མ་མཆིས་པ་དང་། ངག་ཏུ་གདགས་པ་མ་མཆིས་པ་དང་། སེམས་མ་མཆིས་པ་དང་། ཡིད་ཀྱི་རྣམ་པར་ཤེས་པ་མ་མཆིས་པ་དང་། རྣམ་པར་རིག་པ་མ་མཆིས་པ་དང་། དེ་བཞིན་ཉིད་དུ་མ་ལགས། ཆོས་ཀྱི་དབྱིངས་སུ་མ་ལགས། ཡང་དག་པའི་མཐར་མ་ལགས། སངས་རྒྱས་སུ་མ་ལགས། བྱང་ཆུབ་ཏུ་མ་ལགས་ཏེ། གང་དུ་འདི་དག་ཏུ་མངོན་པར་ཞེན་པ་མ་མཆིས་པ་དེ་ལྟར་བསྐྱེད་པར་བགྱིའོ། །ཀུན་རྫོབ་ལ་བརྟེན་ནས་སྡིག་པ་ཐམས་ཅད་བཤགས་སོ། །བསོད་ནམས་ཐམས་ཅད་ལ་རྗེས་སུ་ཡི་རང་ངོ་། །དེ་བཞིན་གཤེགས་པ་ཐམས་ཅད་ལ་བསྐུལ་མ་འདེབས་སོ། །སྡིག་པ་ཐམས་ཅད་བཤགས། བསོད་ནམས་ཐམས་ཅད་ལ་རྗེས་སུ་ཡི་རང་། དེ་བཞིན་གཤེགས་པ་ཐམས་ཅད་ལ་བསྐུལ་མ་བཏབ་ནས་གཟུངས་འདི་དག་བརྗོད་པར་བགྱིའོ། །སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །དེ་བཞིན་གཤེགས་པ་ཙནྡན་
གྱི་བསུང་ལ་ཕྱག་འཚལ་ལོ། །ཏདྱ་ཐཱ། ཙི་ར་ཏེ། མ་རཱི་ཙི་ཀེ། དུརྡ་མེ། ངུར་ཨ་ནུ་པྲ་བིཥྚེ། ཙནྡྲ་ནཱ་གནྡྷེ། བི་ཤུདྡྷ་ཤཱི་ཡེ། ཙ་རི་ཏྲ་བ་ཏི། སརྦྦ་ཏ་ཐཱ་ག་ཏ་ཨ་དྷིཥྵིཏེ་སྭཱཧཱ། ཕྱོགས་བཅུའི་འཇིག་རྟེན་གྱི་ཁམས་སུ་འདུས་པ་ཡང་དག་པར་རྫོགས་པའི་སངས་རྒྱས་དང་། བྱང་ཆུབ་སེམས་དཔའ་དེ་དག་བདག་ལ་དགོངས་སུ་གསོལ། གང་བདག་མི་ཤེས་པའི་རབ་རིབ་ཀྱིས་ཁེབས་ཏེ་མུན་པར་གྱུར་ནས། ཚེ་འདི་འམ། སྐྱེ་བ་གཞན་ནས་སྐྱེ་བ་ཐོག་མ་དང་ཐ་མ་མ་མཆིས་པའི་འཁོར་བ་ན་འཁོར་བའི་བར་དུ་སངས་རྒྱས་དང་། ཆོས་དང་། དགེ་འདུན་དང་། ཕ་མ་དང་། བླ་མ་དང་། ཡོན་གནས་དང་། མཁན་པོ་དང་། སློབ་དཔོན་དང་། ཚངས་པ་མཚུངས་པར་སྤྱོད་པ་རྣམས་ལུས་དང་། ངག་དང་། ཡིད་ཀྱིས་ཉེས་པར་སྤྱད་པ་བགྱིས་པ་དང་། བགྱིད་དུ་སྩལ་བ་དང་། བགྱིད་པ་ལ་རྗེས་སུ་ཡི་རང་བར་གྱུར་པ་དང་། སངས་རྒྱས་ཀྱིའམ། ཆོས་ཀྱིའམ། དགེ་འདུན་གྱིའམ། ཕྱོགས་བཞིའི་དགེ་འདུན་གྱི་འདུ་བའི་སྒོ་ཆེན་པོ་ཕྲོགས་པ་དང་། འཕྲོག་ཏུ་སྩལ་བ་དང་། འཕྲོག་པ་ལ་རྗེས་སུ་ཡི་རང་བར་གྱུར་པ་དང་། སོ་སོར་ཐར་པའི་སྡོམ་པའམ། བྱང་ཆུབ་སེམས་དཔའི་ཚུལ་ཁྲིམས་ཀྱི་སྡོམ་པ་ལས་ལྟུང་བ་ཆུང་ངུ་དང་།འབྲིང་དང་། ཆེན་པོ་བྱུང་བར་གྱུར་བ་བཤགས་པ་དང་། བཤགས་པར་འོས་པ་དེ་དག་ཕྱོགས་བཅུའི་འཇིག་རྟེན་གྱི་ཁམས་སུ་འདུས་པ། ས་ཆེན་པོར་ཆུད་པ་ཡེ་ཤེས་ཆེན་པོ་བརྙེས་པ། ཐུགས་རྗེ་དང་ལྡན་པ། བྱམས་པ་དང་ལྡན་པ་ཕན་པར་བཞེད་པ། ཐུགས་བརྩེ་བ་ཅན། ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ལ་སོགས་པ་དང་། དེ་བཞིན་དུ་རྣམ་པར་སྣང་མཛད་དང་། རྗེ་མཛད་དང་། དངོས་ཉིད་ཆོས་མཆོག་དང་། ངེས་པར་དྲི་མེད་འབྱུང་གནས་དང་། རིན་ཆེན་སྒྲོན་མ་འོད་ཟེར་དང་། ཟླ་བས་བརྒྱན་པ་དང་། གློག་གི་གཟི་བརྗིད་དང་། དབྱངས་ཀྱི་དབང་ཕྱུག་རྒྱལ་པོ་དང་། མེ་ཏོག་ཀུན་དུ་རྒྱས་པ་སཱ་ལའི་རྒྱལ་པོ་དང་། མེ་ཏོག་སྐར་འོད་དང་། མངོན་པར་མཁྱེན་པས་རྣམ་པར་རོལ་བ་དང་། ཟླ་དཀྱིལ་རྣམ་དག་དང་། ཤིན་ཏུ་རབ་ཞི་མཁས་པ་དང་། ཟླ་དབྱངས་དབང་
ཕྱུག་རྒྱལ་པོ་དང་། བརྩོན་འགྲུས་གྲངས་མེད་དང་། ཡང་དག་རབ་གནས་དཔལ་དང་། བདག་ཉིད་ཐམས་ཅད་ཡོངས་གཏོང་དང་། ཐུགས་རྗེ་ཆེར་དགོངས་དང་། ཕྱག་ན་རིན་ཆེན་ཕྱག་རྒྱ་དང་། ཕྱག་ན་རིན་པོ་ཆེ་དང་། ཐུགས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བ་དང་། ཐུབ་དཀའ་དང་། ཆུ་ལྷ་དང་། དྲི་མ་མེད་པ་དང་། ངན་སོང་སྤོང་བ་ལ་སོགས་པ་དེ་རྣམས་ཀྱི་སྤྱན་སྔར་ནོངས་པར་ནོངས་པར་མཐོལ་ལོ། །བཤགས་སོ། །རྣམ་པར་གཞིག་གོ། །རབ་ཏུ་གཞོམ་མོ། །སྨད་དོ། །བྱིས་པ་བླུན་པོ་ལྟ་བ་ལོག་པར་ཞུགས་པ། འཁོར་བར་བྱིང་བའི་ནོངས་པ་ནོངས་པར་གཟུང་དུ་གསོལ། དེ་བཞིན་གཤེགས་པ་བདེན་པའི་བློ་གྲོས་ཏོག་གི་རྒྱལ་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་གསེར་བསགས་སྟུག་པོ་དགེ་བ་རྒྱས་པའི་སྙིང་པོའི་རྒྱལ་པོ་ལ་ཕྱག་འཚལ་ལོ། །ཏདྱ་ཐཱ། ས་ཏྱེ་ས་ཏྱེ། ས་ཏྱ་བི་ཤོ་དྷ་ནི། སཏྱ་ཨཾ་བུ་ཛ། བི་ལོ་ཙ་ནི། སརྦ་ཨཱ་བར་ཎ་ནི་བར་ཎ་བི་ཤོ་དྷ་ནི་སྭཱཧཱ། སངས་རྒྱས་བཅོམ་ལྡན་འདས་དང་བྱང་ཆུབ་སེམས་དཔའ་དེ་དག་ཐུགས་རྗེ་ཆེན་པོ་སྐྱེད་ནས་བདག་ལ་དགོངས་སུ་གསོལ། གང་བདག་གིས་ཚེ་འདིའམ་ཚེ་རྗེས་པ་དེ་དང་དེ་དག་ཏུ་བྱང་ཆུབ་སེམས་དཔའ་བྱང་ཆུབ་ཀྱི་སེམས་བསྐྱེད་པ་རྣམས་དང་། བྱང་ཆུབ་ཀྱི་སེམས་མ་བསྐྱེད་པ་རྣམས་དང་། མངོན་པར་འདོད་པ་རྣམས་དང་། ཐེག་པ་ལ་གསར་དུ་ཞུགས་པ་རྣམས་དང་། སེམས་དང་པོ་བསྐྱེད་པ་རྣམས་དང་། སྤྱོད་པ་དང་འབྲེལ་པ་རྣམས་དང་། མི་སྐྱེ་བའི་ཆོས་ལ་བཟོད་པ་ཐོབ་པ་རྣམས་དང་། ཕྱིར་མི་ལྡོག་པ་རྣམས་དང་། སྐྱེ་བ་གཅིག་གིས་ཐོགས་པ་རྣམས་དང་། ས་བཅུར་ཞུགས་པ་རྣམས་དང་། དབང་མ་བསྐུར་བ་རྣམས་དང་། དབང་བསྐུར་བ་ཐོབ་པ་རྣམས་དང་། དབང་བསྐུར་བ་རྣམས་དང་། དགེ་བའི་ཕྱོགས་ལ་བརྩོན་པ་རྣམས་དང་། སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་དང་། དེ་ལས་གཞན་པའི་བྱང་ཆུབ་ཀྱི་ཕྱོགས་ཀྱི་ཆོས་ལ་བརྩོན་པ་དེ་དག་ལ་ལུས་དང་། ངག་དང་། ཡིད་ཀྱིས་ཉེས་པར་སྤྱོད་པར་བགྱིས་པ་དང་། བགྱིད་དུ་སྩལ་བ་དང་།
བགྱིད་པ་ལ་རྗེས་སུ་ཡི་རང་བ་དང་། དེ་བཞིན་དུ་འཕགས་པ་རང་རྒྱལ་བ་རྣམས་དང་། དེའི་ལམ་ལ་རབ་ཏུ་གནས་པ་རྣམས་དང་། འཕགས་པ་རྒྱུན་དུ་ཞུགས་པ་རྣམས་དང་། ལན་ཅིག་ཕྱིར་འོང་བ་རྣམས་དང་། ཕྱིར་མི་འོང་བ་རྣམས་དང་། དགྲ་བཅོམ་པ་རྣམས་དང་། ཕྱི་རོལ་གྱི་མངོན་པར་ཤེས་པ་ལྔ་ཐོབ་པ་རྣམས་དང་། དེ་ལས་གཞན་པ་འདོད་ཆགས་དང་བྲལ་བ་རྣམས་དང་། དྲང་སྲོང་རྣམས་དང་། དེ་ལས་གཞན་པ་ལམ་ཡང་དག་པའམ། ལམ་ལོག་པ་ལ་ཞུགས་པ་ནས་དེ་བཞིན་གཤེགས་པའི་སྙིང་པོ་དང་ལྡན་པའི་བར་རྣམས་དང་། ཆོས་ཀྱི་དབྱིངས་ཀྱི་ཁོངས་སུ་གཏོགས་པ་དེ་རྣམས་ལ་ལུས་དང་། ངག་དང་། ཡིད་རྣམ་པ་བཅུས་ཉེས་པར་སྤྱད་པ་བགྱིས་པ་དང་། བགྱིད་དུ་སྩལ་བ་དང་། བགྱིད་པ་ལ་རྗེས་སུ་ཡི་རང་བར་གྱུར་པ་དེ་དག་ཕྱོགས་བཅུའི་འཇིག་རྟེན་གྱི་ཁམས་སུ་འདུས་པས་ཆེན་པོར་ཆུད་པ། ཡེ་ཤེས་ཆེན་པོ་བརྙེས་པ། འདས་པ་དང་། མ་འོངས་པ་དང་། ད་ལྟར་བྱུང་བའི་ཉན་ཐོས་དང་། རང་སངས་རྒྱས་དང་། བྱང་ཆུབ་སེམས་དཔའ་དང་། ཡང་དག་པར་རྫོགས་པའི་སངས་རྒྱས་དང་བཅས་པ་དེ་རྣམས་ཀྱིསྤྱན་སྔར་ནོངས་པ་ནོངས་པར་མཐོལ་ལོ། །བཤགས་སོ། །རྣམ་པར་གཞིག་གོ། །རབ་ཏུ་གཞོམ་མོ། །སྨད་དོ། །བྱིས་པ་བླུན་པོ་ལྟ་བ་ལོག་པར་ཞུགས་པ། འཁོར་བར་བྱིང་བའི་ནོངས་པ་ནོངས་པར་གཟུང་དུ་གསོལ། ཟླ་འོད་གཞོན་ནུར་གྱུར་པ་ལ་ཕྱག་འཚལ་ལོ། །ཏདྱ་ཐཱ། པྲ་བྷེ་པྲ་བྷ་ཨཱ་ཀ་རེ། པྲ་བྷ་བ་ཏི། དྷརྨཱ་བི་ཤུདྡྷེ། ཀརྨྨ་བི་ཤུདྡྷིརྦྷ་བ་ཏུ་མེ་སྭཱ་ཧཱ། སངས་རྒྱས་དང་བྱང་ཆུབ་སེམས་དཔའ་དེ་དག་བདག་ལ་དགོངས་སུ་གསོལ། གང་བདག་གིས་ཚེ་འདིའམ། སྐྱེ་བ་གཞན་དུ་སྐྱེ་བ་བརྒྱའམ། སྐྱེ་བ་སྟོང་ངམ། སྐྱེ་བ་ཁྲིའམ། སྐྱེ་བ་ཐོག་མ་དང་ཐ་མ་མ་མཆིས་པའི་འཁོར་བ་ན་འཁོར་བའི་ཚེ་སངས་རྒྱས་འབྱུང་བ་མ་རུང་བར་བགྱིས་པའམ། དམ་པའི་ཆོས་སྤངས་པའམ། མཚམས་མ་མཆིས་པ་ལྔ་བགྱིས་པ་དང་། བགྱིད་དུ་སྩལ་བ་དང་། བགྱིད་པ་ལ་རྗེས་སུ་ཡི་རང་བར་གྱུར་པ་དང་། ཆོས་ཆོས་མ་ལགས་པར་བསྟན་པ་དང་། ཆོས་མ་ལགས་པ་ཆོས་
སུ་བསྟན་པ་དང་། བྱང་ཆུབ་ཀྱི་སེམས་བཏང་བ་དང་། དགེ་བའི་བཤེས་གཉེན་མ་རུང་བར་བགྱིས་པ་ནས་དུད་འགྲོའི་སྐྱེ་གནས་སུ་གཏོགས་པའི་བར་གྱི་སེམས་ཅན་གྱི་ཡིད་དང་ཐང་ཅིག་ཙམ་ཡང་འགལ་བར་བགྱིས་པ་དང་། བགྱིད་དུ་སྩལ་བ་དང་། བགྱིད་པ་ལ་རྗེས་སུ་ཡི་རང་བར་གྱུར་བ་དང་། སྒྲིབ་པ་གང་གིས་བསྒྲིབས་ནས་སའི་རྒྱུ་མི་འབྱུང་བ་དང་། ཏིང་ངེ་འཛིན་གྱི་རྒྱུ་དང་། གཟུངས་ཀྱི་རྒྱུ་དང་། མངོན་པར་ཤེས་པའི་རྒྱུ་དང་། སོ་སོ་ཡང་དག་པར་རིག་པའི་རྒྱུ་དང་། རྫུ་འཕྲུལ་གྱི་རྐང་པའི་རྒྱུ་དང་། དབང་གི་རྒྱུ་དང་། ཕ་རོལ་ཏུ་ཕྱིན་པའི་རྒྱུ་དང་། དེ་ལས་གཞན་པ་བྱང་ཆུབ་ཀྱི་ཕྱོགས་ཀྱི་ཆོས་ནས་སྣང་བའི་བར་གྱི་རྒྱུ་མི་འབྱུང་བའི་ལས་ཀྱི་སྒྲིབ་པ་དང་། རྣམ་པར་སྨིན་པའི་སྒྲིབ་པ་དང་། ཤེས་བྱའི་སྒྲིབ་པ་དང་། ཉོན་མོངས་པའི་སྒྲིབ་པ་དེ་དག་ཐམས་ཅད་ཕྱོགས་བཅུའི་འཇིག་རྟེན་གྱི་ཁམས་སུ་འདུས་པ། ས་ཆེན་པོར་ཆུད་པ། ཡེ་ཤེས་ཆེན་པོ་བརྙེས་པ། ཐུགས་རྗེ་དང་ལྡན་པ། བྱམས་པ་དང་ལྡན་པ། ཕན་པར་བཞེད་པ། ཐུགས་བརྩེ་བ་ཅན་ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་ཤཱཀྱ་ཐུབ་པ་ལ་སོགས་པ་དང་། དེ་བཞིན་དུ་དྲི་མེད་སྣང་གསལ་དང་། སྤོབས་པའི་རྒྱན་དགོངས་པ་དང་། དྲི་མེད་ཟླ་བ་དང་། མེ་ཏོག་གྲགས་དང་། མེ་ཏོག་བཀོད་པ་དང་། སྣང་མཛད་དང་། གསལ་མཛད་དང་། རིན་ཆེན་མཆོག་དང་། འཇིགས་མེད་གཟིགས་དང་། འཇིགས་པ་དང་། བག་ཚ་བ་དང་། སྤུ་ཟིང་མི་མངའ་བ་དང་། སེང་ག་བསྒྱིངས་བའི་སྟོབས་དང་། ཡང་དག་པར་རྫོགས་པའི་སངས་རྒྱས་གསེར་འོད་གཟི་བརྗིད་རྒྱལ་པོ་ལ་སོགས་པ་དང་། དེ་བཞིན་དུ་བྱང་ཆུབ་སེམས་དཔའ་འཕགས་པ་ཀུན་ནས་འོད་ཟེར་དང་། དྲི་མེད་རྣམ་གནོན་དང་། སྒྲ་འབྱིན་དང་། ཆོས་ཀྱི་འཁོར་ལོ་ཐོགས་པ་མེད་པར་བསྐོར་བ་དང་། སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བ་དང་། སྒྲིབ་པ་མེད་པར་ཆོས་ཀྱི་འཁོར་ལོ་བསྐོར་བ་དང་། དྲི་མེད་གཙང་མ་དང་། མིག་ཡོངས་སུ་སྦྱོང་བ་དང་། སེམས་ཅན་ཀུན་ལ་སླུ་བ་མེད་པའི་བློ་དང་། སྒྲ་སྙན་ངེས་བསྒྲགས་དབྱངས་དང་། རྒྱལ་བའི་
བློ་གྲོས་དང་། བཟང་པོ་སྔོན་འབྱུང་དང་། སྤྲིན་སྒྲ་དང་། མཆོག་དགའ་རྒྱལ་པོ་དང་། དགའ་སྟོན་དང་། རྟག་ཏུ་བརྩོན་དང་། ལྷུན་པོ་རྩེ་འཛིན་ལ་སོགས་པ་སྐྱེ་བ་མེད་པ་དང་། འགག་པ་མེད་པའི་ཆོས་དང་ལྡན་པ། འདས་པ་དང་། མ་འོངས་པ་དང་། ད་ལྟར་བྱུང་བ་དེ་རྣམས་ཀྱི་སྤྱན་སྔར་ནོངས་པ་ནོངས་པར་མཐོལ་ལོ། །བཤགས་སོ། །རྣམ་པར་གཞིག་གོ། །རབ་ཏུ་གཞོམ་མོ། །སྨོད་དོ། །བྱིས་པ་བླུན་པོ་ལྟ་བ་ལོག་པར་ཞུགས་པ། འཁོར་བར་བྱིང་བའི་ནོངས་པ་ནོངས་པར་གཟུང་དུ་གསོལ། །ཏདྱ་ཐཱ། ས་མ་ཡོ་གེ། ཙིཏྟ་བི་བར་ཏེ། ཨཁེ་མ་ཁེ། མ་ད་ནེ། བི་བྷ་ག་ཏེ། ས་མནྟ་གུ་ཎེ། སཏྱ་ར་མེ་མུཀྟེ། པྲ་མུཀྟེ། ཧི་ལེ། ཨ་སི་ལི། ཨ་ཙ་མེ་ཙ་མེ། ཨ་ཙི་ཊེ། མ་ཙི་ཊེ། ཧ་རེ། མོ་ཙེ་མ་ཡོ། གྲ་ཧེ། ཧེ་མ་བ་ཏེ། ཙོང་པ་དེ། དྷརྨྨ་ཙིཏྟེ། ཨ་བིཀྵ་བེ་སྭཱ་ཧཱ། སངས་རྒྱས་བཅོམ་ལྡན་འདས་དང་། བྱང་ཆུབ་སེམས་དཔའ་དེ་དག་གིས་བདག་ཁམས་གསུམ་དུ་བྱིང་བ་ལས་མངོན་པར་དབྱུང་དུ་གསོལ། སངས་རྒྱས་བཅོམ་ལྡན་འདས་དང་བྱང་ཆུབ་སེམས་དཔའ་དེ་དག་གིས་བདག་གཡང་ས་ཆེན་པོར་ལྷུང་བ་ལས་གདེག་ཏུ་གསོལ། སངས་རྒྱས་བཅོམ་ལྡན་འདས་དང་བྱང་ཆུབ་སེམས་དཔའ་དེ་དག་གིས་བདག་ཁྲོན་པ་ཆེན་པོ་ཐིབས་པོ་ན་མཆིས་པ་ལས་དྲང་དུ་གསོལ། སངས་རྒྱས་བཅོམ་ལྡན་འདས་དང་། བྱང་ཆུབ་སེམས་དཔའ་དེ་དག་གིས་བདག་འབྲོག་དགོན་པ་ཆེན་པོའི་ནང་དུ་ལྷུང་བ་ལས་བསྐྱབ་ཏུ་གསོལ། སངས་རྒྱས་བཅོམ་ལྡན་འདས་དང་།བྱང་ཆུབ་སེམས་དཔའ་དེ་དག་གིས་བདག་ཉོན་མོངས་པའི་རྒྱ་མཚོ་ཆེན་པོས་བདས་པ་ནས་བསྒྲལ་དུ་གསོལ། སངས་རྒྱས་བཅོམ་ལྡན་འདས་དང་བྱང་ཆུབ་སེམས་དཔའ་དེ་དག་གིས་བདག་འཁོར་བའི་རྒྱས་ཟིན་པ་ལས་དགྲོལ་དུ་གསོལ། སངས་རྒྱས་བཅོམ་ལྡན་འདས་དང་བྱང་ཆུབ་སེམས་དཔའ་དེ་དག་གིས་བདག་སྲས་གཅིག་དང་འདྲ་བར་བསྟན་དུ་གསོལ། སངས་རྒྱས་བཅོམ་ལྡན་འདས་དང་བྱང་ཆུབ་སེམས་དཔའ་དེ་དག་གིས་བདག་སྲས་གཅིག་དང་འདྲ་བར་བསྟན་དུ་གསོལ། སངས་རྒྱས་བཅོམ་ལྡན་འདས་དང་བྱང་
ཆུབ་སེམས་དཔའ་དེ་དག་གིས་བདག་སློབ་མ་སྡུག་པ་དང་འདྲ་བར་བསླབ་ཏུ་གསོལ། སངས་རྒྱས་བཅོམ་ལྡན་འདས་དང་བྱང་ཆུབ་སེམས་དཔའ་དེ་དག་གིས་དཀའ་བ་བརྒྱ་སྟོང་དེ་དག་མངོན་དུ་མཛད་ནས་བདག་ལ་ཐུགས་དགོངས་སུ་གསོལ། སངས་རྒྱས་བཅོམ་ལྡན་འདས་དང་བྱང་ཆུབ་སེམས་དཔའ་དེ་དག་གིས་སྨོན་ལམ་ཆེན་པོ་བཅུ་པོ་ཁྲི་ཕྲག་གྲངས་མེད་པ་དེ་དག་མངོན་དུ་མཛད་ནས་བདག་ལ་གྲུབ་པར་མཛད་དུ་གསོལ། སངས་རྒྱས་བཅོམ་ལྡན་འདས་དང་བྱང་ཆུབ་སེམས་དཔའ་དེ་དག་གིས་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པའི་ཏིང་ངེ་འཛིན་མངོན་དུ་མཛད་ནས་བདག་ལ་སྐྱེད་དུ་གསོལ། སངས་རྒྱས་བཅོམ་ལྡན་འདས་དང་བྱང་ཆུབ་སེམས་དཔའ་དེ་དག་གིས་བདག་མཆོག་ཏུ་ཟག་པ་མེད་པའི་ཆོས་འདུལ་བ་ལ་གཞག་ཏུ་གསོལ། སངས་རྒྱས་བཅོམ་ལྡན་འདས་དང་བྱང་ཆུབ་སེམས་དཔའ་དེ་དག་གིས་ཐུགས་རྗེ་ཆེན་པོའི་ཆབ་ཀྱིས་བདག་བཀྲུར་གསོལ། སངས་རྒྱས་བཅོམ་ལྡན་འདས་དང་བྱང་ཆུབ་སེམས་དཔའ་དེ་དག་གིས་སྟོབས་བཅུ་པོ་རྣམས་ཀྱིས་བདག་ལ་བྱུག་ཏུ་གསོལ། སངས་རྒྱས་བཅོམ་ལྡན་འདས་དང་བྱང་ཆུབ་སེམས་དཔའ་དེ་དག་གིས་ངོ་ཚ་མཁྱེན་པའི་ན་བཟས་བདག་ལ་དགབ་ཏུ་གསོལ། སངས་རྒྱས་བཅོམ་ལྡན་འདས་དང་བྱང་ཆུབ་སེམས་དཔའ་དེ་དག་གིས་བྱང་ཆུབ་ཀྱི་ཡན་ལག་གི་མེ་ཏོག་རྣམས་ཀྱིས་བདག་ལ་གཏོར་དུ་གསོལ། སངས་རྒྱས་བཅོམ་ལྡན་འདས་དང་བྱང་ཆུབ་སེམས་དཔའ་དེ་དག་གིས་རྒྱལ་ཚབ་ཏུ་དབང་བསྐུར་བས་བདག་ལ་དབང་བསྐུར་དུ་གསོལ། སངས་རྒྱས་བཅོམ་ལྡན་འདས་དང་བྱང་ཆུབ་སེམས་དཔའ་དེ་དག་གིས་སེང་གེའི་སྒྲ་ཆེན་པོས་བདག་ལ་ལུང་བསྟན་དུ་གསོལ། དེ་བཞིན་གཤེགས་པ་ཟླ་མཆོག་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་འཇིགས་མེད་འབྱུང་གནས་ལ་ཕྱག་འཚལ་ལོ། །ཏདྱ་ཐཱ། དྷ་རེ་དྷ་རེ། དྷ་ར་ཎི། ནི་དྷ་ནེ། ཨ་བྷ་ཡ། ཀལྤེ་ཀལྤེ། བིཀྵེ། ཨསྨྲྀ་ཏ་ཀལྤ། ཧུ་ཏ་ཤ་ནེ། ཨ་ནནྟ་མུ་ཁེ། ཨ་ནནྟ་ཙཀྵུཿཨུངྒ་ཏེ། ཨོྃ་བྷྲཱུཾ་སྭཱ་ཧཱ། སངས་རྒྱས་བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་དང་། བྱང་ཆུབ་སེམས་དཔའ་དེ་དག་བདག་
ལ་དགོངས་སུ་གསོལ། གང་བདག་གིས་ཚེ་འདིའམ། སྐྱེ་བ་གཞན་རྣམས་སུ་སྐྱེ་བ་བརྒྱའམ། སྐྱེ་བ་སྟོང་ངམ། སྐྱེ་བ་ཐོག་མ་དང་ཐ་མ་མ་མཆིས་པའི་འཁོར་བ་ན་འཁོར་བའི་ཚེ་སངས་རྒྱས་དང་། ཆོས་དང་། དགེ་འདུན་དང་། ཕ་མ་དང་། བླ་མ་དང་། ཡོན་གནས་དང་། མཁན་པོ་དང་། སློབ་དཔོན་དང་། ཚངས་པ་མཚུངས་པར་སྤྱོད་པ་དང་། དེ་ལས་གཞན་པ་ཡང་དག་པ་དང་། ལོག་པའི་ལམ་ལ་ཞུགས་པ་ནས། དེ་བཞིན་གཤེགས་པའི་སྙིང་པོ་དང་ལྡན་པའི་བར་དང་། ཆོས་ཀྱི་དབྱིངས་ཀྱི་ཁོངས་སུ་གཏོགས་པ་རྣམས་ལ་ཟས་ཁམ་གཅིག་ཙམ་སྩལ་བའམ། བྱམས་པ་བསྒོམས་པའམ། ལུས་དང་། ངག་དང་། ཡིད་ཀྱིས་ཕྱི་དང་ནང་གི་ལེགས་པར་སྤྱོད་པ་དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བར་བགྱི་སྟེ། ཇི་ལྟར་འདས་པ་དང་། མ་འོངས་པ་དང་། ད་ལྟར་བྱུང་བའི་སངས་རྒྱས་བཅོམ་ལྡན་འདས་དང་། བྱང་ཆུབ་སེམས་དཔའ་དེ་རྣམས་ཀྱིས་ཆོས་ཉིད་དེ་མངོན་དུ་མཛད་ནས་ཡོངས་སུ་བསྔོས་པ་དང་། ཡོངས་སུ་བསྔོ་བར་འགྱུར་བ་དང་། ཡོངས་སུ་བསྔོ་བ་དེ་ལྟར་བདག་གིས་ཀྱང་ཡོངས་སུ་བསྔོ་བར་བགྱིའོ། །ཇི་ལྟར་ཆོས་ཉིད་དེ་དང་། ཇི་ལྟར་དེ་བཞིན་ཉིད་དེ་དང་། ཇི་ལྟར་ཡང་དག་པའི་མཐའ་དེ་དང་། ཇི་ལྟར་ཆོས་ཀྱི་དབྱིངས་དེ་དང་། ཇི་ལྟར་སྟོང་པ་ཉིད་དེ་དང་། ཇི་ལྟར་རྣམ་པ་ཐམས་ཅད་མཁྱེན་པ་ཉིད་དེ་དང་ལྡན་པ། དེ་ལྟར་ཡོངས་སུ་བསྔོ་བར་བགྱིའོ། །དེ་བཞིན་གཤེགས་པ་མེ་ཏོག་མན་དཱ་ར་བའི་བསུང་ལ་ཕྱག་འཚལ་ལོ། །ཏདྱ་ཐཱ། བི་ཛི་རི་མྦྷ། ཨུ་ཏྤཱ་ད་བྱ་ཡ། བི་ཛི་རི་མྦྷ། སྟཾ་བྷ་ཧ་ར། སྟཾ་བྷ་ཧ་ར། ཨ་ནཱུ་ན། ཏ་ཐཱ་ག་ཏ། བྷཱུ་ཏ་ཀོ་ཊི། བི་ཛི་རིམྦྷསྭཱ་ཧཱ། འདས་པ་དང་། མ་འོངས་པ་དང་། ད་ལྟར་བྱུང་བ་ཡང་དག་པར་རྫོགས་པའི་སངས་རྒྱས་དང་བྱང་ཆུབ་སེམས་དཔའ་གང་ལགས་པ་དེ་དག་དང་པོ་བདག་གིས་ཇི་ལྟར་སེམས་ཅན་མ་རྒལ་བ་རྣམས་བསྒྲལ་བ་དང་། མ་གྲོལ་བ་རྣམས་དགྲོལ་བ་དང་། དབུགས་མ་ཕྱིན་པ་རྣམས་དབུགས་དབྱུང་བ་དང་། ཡོངས་སུ་མྱ་ངན་ལས་མ་འདས་པ་རྣམས་
ཡོངས་སུ་མྱ་ངན་ལས་བཟླའོ་སྙམ་དུ་ཐུགས་བསྐྱེད་པ་དང་། དེ་དག་ལས་གཞན་པ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་གནས་པ་དང་། ཡང་དག་པར་ལྡན་པའི་ཐུགས་བསྐྱེད་པ་དེ་རྣམས་ལ་བདག་མཆོག་དང་། གཙོ་བོ་དང་། དམ་པ་དང་། རབ་དང་། ཕུལ་དང་། བླ་ན་མ་མཆིས་པ་དང་། གོང་ན་མ་མཆིས་པ་དང་། གོང་མའི་ཡང་གོང་མ་དང་། མཉམ་པ་མ་མཆིས་པ་དང་། མི་མཉམ་པ་དང་མཉམ་པ་དང་། དམིགས་པ་མ་མཆིས་པ་དང་། རྣམ་པར་རྟོག་པ་མ་མཆིས་པ་དང་། མཚན་མ་མ་མཆིས་པ་དང་། སྤྲོས་པ་མ་མཆིས་པ་དང་། ཡི་གེ་མ་མཆིས་པ་དང་། ཉོན་མོངས་པ་མ་མཆིས་པ་དང་། ཆགས་པ་མ་མཆིས་པ་དང་། ནམ་མཁའ་ལྟར་མཉམ་པ་དང་། ལུས་དང་སེམས་གྲོལ་བ་དང་། རྣམ་པ་ཐམས་ཅད་ཀྱི་མཆོག་དང་ལྡན་པའི་སྟོང་པ་ཉིད་ཀྱི་རྗེས་སུ་ཡི་རང་བས་རྗེས་སུ་ཡི་རང་ངོ་། །འདས་པ་དང་། མ་འོངས་པ་དང་། ད་ལྟར་བྱུང་བའི་ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་ཤཱཀྱ་ཐུབ་པ་དང་། བློ་གྲོས་མི་ཟད་པ་དང་། རིན་ཆེན་རྒྱལ་མཚན་འོད་དང་། དྲི་མ་མེད་པའི་སྙིང་པོ་དང་། ཆུང་འབྲིང་ཆེན་པོ་དང་། མངོན་མཁྱེན་རྣམ་རོལ་དང་། རྣམ་འཕྲུལ་དང་བ་དང་། གྲགས་པ་སྤྲིན་སྦས་དང་། སེང་གེ་རྣམ་པར་རོལ་པའི་རྒྱལ་པོ་དང་། ལྷུན་པོ་མངོན་འཕགས་རྒྱལ་པོ་དང་། དམ་ཆོས་ཀུན་སྲུང་ཏོག་གྱུར་རྒྱལ་པོ་ལ་སོགས་པ་གང་ལགས་པ་དེ་དག་དང་པོ་བྱང་ཆུབ་ཏུ་ཐུགས་བསྐྱེད་པ་ནས་བཟུང་སྟེ། ཇི་ཙམ་དུ་དམ་པའི་ཆོས་གནས་པའི་འཕགས་པ་ཡོངས་སུ་བསྔོ་བའི་རྒྱལ་པོ་ཆེན་པོ་སྔགས་དང་བཅས་པ།དེའི་བར་དུ་སྦྱིན་པ་ལས་བྱུང་བའི་བསོད་ནམས་བྱ་བའི་དངོས་པོ་དང་། ཚུལ་ཁྲིམས་ལས་བྱུང་བ་དང་། བསྒོམས་པ་ལས་བྱུང་བ་དང་། སྨོན་ལམ་ཆེན་པོ་བཅུ་པོ་ཁྲི་ཕྲག་གྲངས་མེད་པ་བསྒྲུབས་པ་གང་ལགས་པ་དང་། སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་ཡང་དག་པར་བླངས་པ་གང་ལགས་པ་དང་། བག་ཆགས་དང་མཚམས་སྦྱོར་བའི་ཉོན་མོངས་པ་ཐམས་ཅད་སྤངས་པ་གང་ལགས་པ་དང་། ཐམས་ཅད་མཁྱེན་པའི་ཡེ་ཤེས་བསགས་པ་གང་
ལགས་པ་ནས། སྐུ་དང་། གསུང་དང་། ཐུགས་ཀྱིས་ཕྱི་དང་ནང་གི་ལེགས་པར་སྤྱད་པ་གང་ལགས་པ་དེ་དག་ཐམས་ཅད་ལ་མཆོག་དང་། གཙོ་བོ་དང་། དམ་པ་དང་། རབ་དང་། ཕུལ་དང་། བླ་ན་མ་མཆིས་པ་དང་། གོང་ན་མ་མཆིས་པ་དང་།྄གོང་མའི་ཡང་གོང་མ་དང་། མཉམ་པ་མ་མཆིས་པ་དང་། མི་མཉམ་པ་དང་མཉམ་པ་དང་། དམིགས་པ་མ་མཆིས་པ་དང་། རྣམ་པར་རྟོག་པ་མ་མཆིས་པ་དང་། མཚན་མ་མ་མཆིས་པ་དང་། སྤྲོས་པ་མ་མཆིས་པ་དང་། ཡི་གེ་མ་མཆིས་པ་དང་། ཉོན་མོངས་པ་མ་མཆིས་པ་དང་། ཆགས་པ་མ་མཆིས་པ་དང་། ནམ་མཁའ་ལྟར་མཉམ་པ་དང་། ལུས་དང་སེམས་གྲོལ་བ་དང་། རྣམ་པ་ཐམས་ཅད་ཀྱི་མཆོག་དང་ལྡན་པའི་སྟོང་པ་ཉིད་ཀྱི་རྗེས་སུ་ཡི་རང་བས་རྗེས་སུ་ཡི་རང་ངོ་། །འདས་པ་དང་། མ་འོངས་པ་དང་། ད་ལྟར་བྱུང་བའི་བྱང་ཆུབ་སེམས་དཔའ་འཕགས་པ་སེང་གེའི་རྣམ་པར་རོལ་པ་དང་། སེང་གེ་བསྒྱིངས་པ་དང་། སེང་གེ་ཏོག་དང་། རིན་པོ་ཆེ་ཏོག་དང་། སེང་གེ་རྣམ་འཕྲུལ་ཏོག་དང་། པདྨ་བཀོད་པ་དང་། བརྩོན་པ་མི་གཏོང་བ་ལ་སོགས་པ་གང་ལགས་པ་དེ་དག་དང་པོ་ཐུགས་བསྐྱེད་པ་ནས་བཟུང་ནས། ཇི་ཙམ་དུས་བཅུའི་བར་དེར་སྦྱིན་པ་ལས་བྱུང་བའི་བསོད་ནམས་བྱ་བའི་དངོས་པོ་དང་། ཚུལ་ཁྲིམས་ལས་བྱུང་བ་དང་། བསྒོམས་པ་ལས་བྱུང་བ་དང་། སྨོན་ལམ་ཆེན་པོ་བཅུ་པོ་ཁྲི་ཕྲག་གྲངས་མེད་པ་བསྒྲུབས་པ་གང་ལགས་པ་དང་། ཕ་རོལ་ཏུ་ཕྱིན་པ་དྲུག་བསྒྲུབས་པ་གང་ལགས་པ་དང་། སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་ཡང་དག་པར་བླངས་པ་གང་ལགས་པ་དང་། བྱང་ཆུབ་ཆེན་པོ་བསགས་པ་གང་ལགས་པ་ནས། ལུས་དང་། ང་ག་དང་། ཡིད་ཀྱིས་ཕྱི་དང་ནང་གི་ལེགས་པར་སྤྱད་པ་གང་ལགས་པ་དེ་དག་ཐམས་ཅད་ལ་མཆོག་དང་། གཙོ་བོ་དང་། དམ་པ་དང་། རབ་དང། ཕུལ་དང་། བླ་ན་མ་མཆིས་པ་དང་། གོང་ན་མ་མཆིས་པ་དང་། གོང་མའི་ཡང་གོང་མ་དང་། མཉམ་པ་མ་མཆིས་པ་དང་། མི་མཉམ་པ་དང་
མཉམ་པ་དང་། དམིགས་པ་མ་མཆིས་པ་དང་། རྣམ་པར་རྟོག་པ་མ་མཆིས་པ་དང་། མཚན་མ་མ་མཆིས་པ་དང་། སྤྲོས་པ་མ་མཆིས་པ་དང་། ཡི་གེ་མ་མཆིས་པ་དང་། ཉོན་མོངས་པ་མ་མཆིས་པ་དང་། ཆགས་པ་མ་མཆིས་པ་དང་། ནམ་མཁའ་ལྟར་མཉམ་པ་དང་། ལུས་དང་སེམས་གྲོལ་བ་དང་། རྣམ་པ་ཐམས་ཅད་ཀྱི་མཆོག་དང་ལྡན་པའི་སྟོང་པ་ཉིད་ཀྱི་རྗེས་སུ་ཡི་རང་བས་རྗེས་སུ་ཡི་རང་ངོ་། །འདས་པ་དང་། མ་འོངས་པ་དང་། ད་ལྟར་བྱུང་བའི་འཕགས་པ་རང་རྒྱལ་བ་ཉོན་མོངས་འདུལ་དང་། དགེ་འབེབས་དང་། རྒྱ་སྤོས་གཙུག་དང་། ས་འཛིན་ལ་སོགས་པ་གང་ལགས་པ་དེ་དག་དང་པོ་སེམས་བསྐྱེད་པ་ནས་བཟུང་ནས། ཇི་ཙམ་དུ་ཐེག་པ་གཅིག་གིས་ཕུང་པོ་ལྷག་མ་མེད་པའི་མྱ་ངན་ལས་འདས་པའི་བར་དེར་སྦྱིན་པ་ལས་བྱུང་བའི་བསོད་ནམས་བྱ་བའི་དངོས་པོ་དང་། ཚུལ་ཁྲིམས་ལས་བྱུང་བ་དང་། བསྒོམས་པ་ལས་བྱུང་བ་དང་། ཤེས་རབ་ཕྱི་ཕ་རོལ་ཏུ་ཕྱིན་པ་ལ་གནས་པ་དང་ཡང་དག་པར་ལྡན་པ་གང་ལགས་པ་དང་། སྟོང་བ་ཉིད་དང་། མཚན་མ་མེད་པ་དང་། སྨོན་པ་མེད་པ་ཡང་དག་པར་བླངས་པ་གང་ལགས་པ་དང་། རང་བྱང་ཆུབ་བསགས་པ་གང་ལགས་པ་ནས། ལུས་དང་། ངག་དང་། ཡིད་ཀྱིས་ཕྱི་དང་ནང་གི་ལེགས་པར་སྤྱད་པ་གང་ལགས་པ་དེ་དག་ཐམས་ཅད་ལ་མཆོག་པ་དང་། གཙོ་བོ་དང་། དམ་པ་དང་། རབ་དང་། ཕུལ་དང་། བླ་ན་མ་མཆིས་པ་དང་། གོང་ན་མ་མཆིས་པ་དང་། གོང་མའི་ཡང་གོང་མ་དང་། མཉམ་པ་མ་མཆིས་པ་དང་། མི་མཉམ་པ་དང་མཉམ་པ་དང་། དམིགས་པ་མ་མཆིས་པ་དང་། རྣམ་པར་རྟོག་པ་མ་མཆིས་པ་དང་། མཚན་མ་མ་མཆིས་པ་དང་། སྤྲོས་པ་མ་མཆིས་པ་དང་།ཡི་གེ་མ་མཆིས་པ་དང་། ཉོན་མོངས་པ་མ་མཆིས་པ་དང་། ཆགས་པ་མ་མཆིས་པ་དང་། ནམ་མཁའ་ལྟར་མཉམ་པ་དང་། ལུས་དང་སེམས་གྲོལ་བ་དང་། རྣམ་པ་ཐམས་ཅད་ཀྱི་མཆོག་དང་ལྡན་པའི་སྟོང་པ་ཉིད་ཀྱི་རྗེས་སུ་ཡི་རང་བས་རྗེས་སུ་ཡི་རང་ངོ་། །འདས་པ་དང་། མ་འོངས་པ་དང་། ད་ལྟར་བྱུང་བའི་འཕགས་པ་རྒྱུན་དུ་ཞུགས་
པ་དང་། ལན་ཅིག་ཕྱིར་འོང་བ་དང་། ཕྱིར་མི་འོང་བ་དང་། དགྲ་བཅོམ་པ་འཕགས་པ་ཤཱ་རིའི་བུ་དང་། མཽད་གལ་གྱི་བུ་དང་། ཀཏྱའི་བུ་དང་། ཤེས་རབ་སྒྲོན་མ་དང་། རབ་འབྱོར་ལ་སོགས་པ་གང་ལགས་པ་དེ་དག་དང་པོ་སེམས་བསྐྱེད་པ་ནས་བཟུང་ནས། ཇི་ཙམ་དུ་ཐེག་པ་གཅིག་གིས་ཕུང་པོ་ལྷག་མ་མེད་པའི་མྱ་ངན་ལས་འདས་པའི་བར་དེར་སྦྱིན་པ་ལས་བྱུང་བའི་བསོད་ནམས་བྱ་བའི་དངོས་པོ་དང་། ཚུལ་ཁྲིམས་ལས་བྱུང་བ་དང་། བསྒོམས་པ་ལས་བྱུང་བ་དང་། ཤེས་རབ་ཀྱི་ཕ་རོལ་ཏུ་ཕྱིན་པ་ལ་གནས་པ་དང་། ཡང་དག་པར་ལྡན་པའི་གང་ལགས་པ་དང་། སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་ཡང་དག་པར་བླངས་པ་གང་ལགས་པ་དང་། ཉན་ཐོས་ཀྱི་བྱང་ཆུབ་ཏུ་བསགས་པ་གང་ལགས་པ་ནས། ལུས་དང་། ངག་དང་། ཡིད་ཀྱིས་ཕྱི་དང་ནང་གི་ལེགས་པར་སྦྱད་པའི་བར་གང་ལགས་པ་དེ་དག་ཐམས་ཅད་ལ་མཆོག་དང་། གཙོ་བོ་དང་། དམ་པ་དང་། རབ་དང་། ཕུལ་དང་། བླ་ན་མ་མཆིས་པ་དང་། གོང་ན་མ་མཆིས་པ་དང་། གོང་མའི་ཡང་གོང་མ་དང་། མཉམ་པ་མ་མཆིས་པ་དང་། མི་མཉམས་པ་དང་མཉམ་པ་དང་། དམིགས་པ་མ་མཆིས་པ་དང་།རྣམ་པར་རྟོག་པ་མ་མཆིས་པ་དང་། མཚན་མ་མ་མཆིས་པ་དང་། སྨོན་པ་མ་མཆིས་པ་དང་། ཡི་གེ་མ་མཆིས་པ་དང་། ཉོན་མོངས་པ་མ་མཆིས་པ་དང་། ཆགས་པ་མ་མཆིས་པ་དང་། ནམ་མཁས་ལྟར་མཉམ་པ་དང་། ལུས་དང་སེམས་གྲོལ་བ་དང་། རྣམ་པ་ཐམས་ཅད་ཀྱི་མཆོག་དང་ལྡན་པའི་སྟོང་པ་ཉིད་ཀྱི་རྗེས་སུ་ཡི་རང་པས་རྗེས་སུ་ཡི་རང་ངོ་། །ཁམས་གསུམ་དུ་སྐྱེས་པའི་སེམས་ཅན་ཀྱི་ཁམས་སུ་གཏོགས་པ་གང་ལགས་པའི་སྦྱིན་པ་ལས་བྱུང་བའི་བསོད་ནམས་བྱ་བའི་དངོས་པོ་དང་། ཚུལ་ཁྲིམས་ལས་བྱུང་བ་དང་། བསྒོམས་པ་ལས་བྱུང་བ་དང་། དགེ་བ་བཅུའི་ལས་ཀྱི་ལམ་ཡང་དག་པར་བླངས་པ་གང་ལགས་པ་ནས། ལུས་དང་། ངག་དང་། ཡིད་ཀྱིས་ཕྱི་དང་ནང་གི་ལེགས་པར་སྤྱད་པ་གང་ལགས་པ་དང་། མ་འོངས་པ་ན་ཤེས་རབ་
ཀྱི་ཕ་རོལ་ཏུ་ཕྱིན་པ་ལ་གནས་པ་དང་ཡང་དག་པར་ལྡན་པ་གང་ལགས་པ་དེ་དག་ཐམས་ཅད་ལ་མཆོག་དང་། གཙོ་བོ་དང་། དམ་པ་དང་། རབ་དང་། ཕུལ་དང་། བླ་ན་མ་མཆིས་པ་དང་། གོང་ན་མ་མཆིས་པ་དང་། གོང་མའི་ཡང་གོང་མ་དང་། མཉམ་པ་མ་མཆིས་པ་དང་། མི་མཉམ་པ་དང་མཉམ་པ་དང་། དམིགས་པ་མ་མཆིས་པ་དང་། རྣམ་པར་རྟོག་པ་མ་མཆིས་པ་དང་། མཚན་མ་མ་མཆིས་པ་དང་། སྨོན་པ་མ་མཆིས་པ་དང་། ཡི་གེ་མ་མཆིས་པ་དང་། ཉོན་མོངས་པ་མ་མཆིས་པ་དང་། ཆགས་པ་མ་མཆིས་པ་དང་། ནམ་མཁའ་ལྟར་མཉམ་པ་དང་། ལུས་དང་སེམས་གྲོལ་བ་དང་། རྣམ་པ་ཐམས་ཅད་ཀྱི་མཆོག་དང་ལྡན་པའི་སྟོང་པ་ཉིད་ཀྱི་རྗེས་སུ་ཡི་རང་བས་རྗེས་སུ་ཡི་རང་ངོ་། །དེ་བཞིན་གཤེགས་པ་གསུང་མཆོག་ཞལ་ལ་ཕྱག་འཚལ་ལོ། །ཏ་དྱཐཱ། ཙནྡ་ནེ། ཙནྡ་ནེ། ཙནྡནཨང་གེ །ཙནྡ་ནེ་པྲ་བ་རེ། ཙནྡན་ཨ་བྷ་ཡེ། ཙནྡན་སིདྡྷེ། ཙནྡནཨ་བ་ལོ་ཀི་ཏེ། ཙནྡན་ཡ་ཤ་ཨུངྒ་ཏེ་སྭཱ་ཧཱ། རྗེས་སུ་ཡི་རང་བ་དང་ལྡན་པ་དང་། ཡོངས་སུ་བསྔོ་བ་དང་ལྡན་པའི་དགེ་བའི་རྩ་བ་དེ་དག་དང་། སྐྱེ་བ་ཐོག་མ་དང་ཐ་མ་མ་མཆིས་པའི་འཁོར་བ་ན་བསགས་པ་གང་ལགས་པ་དང་། མ་འོངས་པ་ན་མྱ་ངན་ལས་འདས་པའི་མཐའ་གང་ལགས་པ་དེ་དག་ཐམས་ཅད་ཡོངས་སུ་བསྡུས་ནས་བདག་དགེ་བ་ལ་བརྩོན་པའི་ལྷ་རྟག་ཏུ་འབྲང་བ་གང་ལགས་པ་དེ་དག་ལ་དབུལ་བར་བགྱིའོ། །དགེ་བའི་རྩ་བ་དེས་གཟི་བྱིན་དང་ལྡན་པ་དང་། སྟོབས་དང་ལྡན་པ་དང་། དབང་ཆེ་བ་དང་། ཐུབ་པར་དཀའ་བར་གྱུར་ཏེ། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་ཆོས་ཀྱི་འཁོར་ལོ་རབ་ཏུ་བསྐོར་བར་གྱུར་ཅིག །བདུད་བཞི་ཚར་གཅོད་པར་གྱུར་ཅིག །སེམས་ཅན་ཡོངས་སུ་སྨིན་པར་བྱེད་པར་གྱུར་ཅིག །བདག་ཀྱང་དགེ་བའི་ཕྱོགས་ལ་མངོན་པར་བརྩོན་པའི་སྙིང་རྗེ་ཆེན་པོ་མངོན་དུ་བགྱིས་ནས། དྲན་པ་ཉེ་བར་སྒྲུབ་པར་གྱུར་ཅིག །ལེ་ལོ་སེལ་བར་གྱུར་ཅིག །ལམ་ཉེ་བར་སྟོན་པར་གྱུར་ཅིག །མི་དགེ་བའི་ལས་ཟློག་པར་གྱུར་ཅིག །དགེ་བ་ལ་སྦྱོར་བར་གྱུར་ཅིག །ལུས་ལ་གཟི་བྱིན་འཇུག་པར་
གྱུར་ཅིག །མཐུ་དང་སྟོབས་ཡང་དག་པར་སྐྱེད་པར་གྱུར་ཅིག །སྒྲིབ་པ་ཆེན་པོ་སྟུག་པོར་གྱུར་པ་འདི་ལས་རྣམ་པར་གྲོལ་བར་གྱུར་ཅིག །སེམས་ཅན་གྱི་ཁམས་དང་། ལས་ཀྱི་ཁམས་དང་། ཉོན་མོངས་པའི་ཁམས་དང་། ནམ་མཁའི་ཁམས་ཇི་ཙམ་པ་དེ་ཙམ་དུ་སེམས་ཅན་ལ་ཕན་པའི་ཕྱིར་གནས་པར་གྱུར་ཅིག །དགེ་བའི་རྩ་བ་དེ་ལས་དགེ་བའི་རྩ་བ་བྱུང་བ་གང་ལགས་པའི་དགེ་བ་དེས་གཙུག་ལག་ཁང་འདི་ན་གནས་པའི་ལྷ་འཕགས་པ་རྣམ་ཐོས་ཀྱི་བུ་དང་། ཡུལ་འཁོར་སྲུང་དང་། འཕགས་སྐྱེས་པོ་དང་། མིག་མི་བཟང་དང་། ལྔས་རྩེན་དང་། ལྔ་ལེན་དང་། ནོར་བུ་བཟང་པོ་དང་། གང་བ་བཟང་པོ་དང་། ལྷ་མོ་ཆེན་པོ་དཔལ་དང་། ལྗང་སྔོའི་བུ་འཁོར་དང་བཅས་པ་ལ་སོགས་པ་དང་། བྱང་ཆུབ་གོས་ལ་སོགས་པ་གཞི་པ་རྣམས་དང་། དགའ་བོ་དང་། ཉེ་དགའ་ལ་སོགས་པ་ཀླུའི་བདག་པོ་རྣམས་དང་། འབྲོག་གནས་ལ་སོགས་པ་གནོད་སྦྱིན་གྱི་བདག་པོ་རྣམས་དང་། གང་གཞན་ཡང་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་། མི་མ་ཡིན་པ་གང་ལགས་པ་དེ་དག་ལ་དགེ་བའི་རྩ་བ་དེ་འབུལ་བར་བགྱིའོ། །དགེ་བའི་རྩ་བ་དེས་གཟི་བྱིན་དང་ལྡན་པ་དང་། སྟོབས་དང་ལྡན་པ་དང་། དབང་ཆེ་བ་དང་། ཐུབ་པར་དཀའ་བར་འགྱུར་ཏེ། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་ཆོས་ཀྱི་འཁོར་ལོ་རབ་ཏུ་བསྐོར་བར་གྱུར་ཅིག །བདུད་བཞི་ཚར་གཅོད་པར་གྱུར་ཅིག །སེམས་ཅན་ཡོངས་སུ་སྨིན་པར་བགྱིད་པར་གྱུར་ཅིག །བདག་ཀྱང་དགེ་བ་ལ་བརྩོན་པའི་སྙིང་རྗེ་ཆེན་པོ་མངོན་དུ་བགྱིས་ནས་དྲན་པ་ཉེ་བར་སྒྲུབ་པར་གྱུར་ཅིག །ལེ་ལོ་སེལ་བར་གྱུར་ཅིག །ལམ་ཉེ་བར་སྟོན་པར་གྱུར་ཅིག །མི་དགེ་བ་ལས་ཟློག་པར་གྱུར་ཅིག །དགེ་བ་ལ་སྦྱོར་བར་གྱུར་ཅིག །ལུས་ལ་གཟི་བྱིན་འཇུག་པར་གྱུར་ཅིག །མཐུ་དང་སྟོབས་ཡང་དག་པར་སྐྱེད་པར་གྱུར་ཅིག །སྒྲིབ་པ་ཆེན་པོ་སྟུག་པོར་གྱུར་པ་འདི་ལས་རྣམ་པར་གྲོལ་བར་གྱུར་
ཅིག །སེམས་ཅན་གྱི་ཁམས་དང་། ལས་ཀྱི་ཁམས་དང་། ཉོན་མོངས་པའི་ཁམས་དང་། ནམ་མཁའི་ཁམས་ཇི་ཙམ་པ་དེ་ཙམ་དུ་སེམས་ཅན་ལ་ཕན་པའི་ཕྱིར་གནས་པར་གྱུར་ཅིག །དགེ་བའི་རྩ་བ་དེ་ལས་དགེ་བའི་རྩ་བ་བྱུང་བ་གང་ལགས་པའི་དགེ་བའི་རྩ་བ་དེས་སེམས་ཅན་དམྱལ་བ་དང་། དུད་འགྲོ་དང་། ཡི་དགས་དང་། གཤིན་རྗེའི་འཇིག་རྟེན་དུ་སྐྱེས་པའི་སེམས་ཅན་གང་ལགས་པ་རྣམས་དང་། མི་ཁོམ་པར་སྐྱེས་པ་གང་ལགས་པ་དང་། སངས་རྒྱས་དང་། ཆོས་དང་། དགེ་འདུན་དང་། བྲལ་བ་གང་ལགས་པ་དང་། བཅོམ་ལྡན་འདས་ཀྱི་བསྟན་པ་འདི་ལས་ཕྱི་རོལ་པ་དང་། དེ་ལས་གཞན་པ་མུ་སྟེགས་རྣམས་ལ་གནས་པ་ནས། ལོག་པ་ཉིད་དུ་ངེས་པའི་བར་གང་ལགས་པ་དེ་དག་ལ་དགེ་བའི་རྩ་བ་དེ་བསྔོ་བར་བགྱིའོ། །དགེ་བའི་རྩ་བ་དེས་ཕུང་པོ་འདི་དག་ཉིད་ཀྱིས་སངས་རྒྱས་ཀྱི་ཞིང་ཡོངས་སུ་དག་པ་རྣམས་སུ་སྐྱེ་བ་འཛིན་པར་འགྱུར་བ་ནས། བྱང་ཆུབ་མངོན་པར་རྫོགས་པར་སངས་རྒྱས་པའི་བར་དུ་གྱུར་ཏེ། ཆོས་ཀྱི་འཁོར་ལོ་རབ་ཏུ་བསྐོར་བར་གྱུར་ཅིག །བདུད་བཞི་ཚར་གཅོད་པར་གྱུར་ཅིག །སེམས་ཅན་ཡོངས་སུ་སྨིན་པར་བྱེད་པར་གྱུར་ཅིག །བདག་ཀྱང་དགེ་བའི་ཕྱོགས་ལ་མངོན་པར་བརྩོན་པའི་སྙིང་རྗེ་ཆེན་པོ་མངོན་སུམ་དུ་བགྱིས་ནས་དྲན་པ་ཉེ་བར་སྒྲུབ་པར་གྱུར་ཅིག །ལེ་ལོ་སེལ་བར་གྱུར་ཅིག །ལམ་ཉེ་བར་སྟོན་པར་གྱུར་ཅིག །མི་དགེ་བ་ལས་ཟློག་པར་གྱུར་ཅིག །དགེ་བ་ལ་སྦྱོར་བར་གྱུར་ཅིག །ལུས་ལ་གཟི་བྱིན་འཇུག་པར་གྱུར་ཅིག །མཐུ་དང་སྟོབས་ཡང་དག་པར་སྐྱེད་པར་གྱུར་ཅིག །སྒྲིབ་པ་ཆེན་པོ་སྟུག་པོར་གྱུར་པ་འདི་ལས་རྣམ་པར་གྲོལ་བར་གྱུར་ཅིག །སེམས་ཅན་གྱི་ཁམས་དང་། ལས་ཀྱི་ཁམས་དང་། ཉོན་མོངས་པའི་ཁམས་དང་། ནམ་མཁའི་ཁམས་ཇི་ཙམ་པ་དེ་ཙམ་དུ་སེམས་ཅན་ལ་ཕན་པའི་ཕྱིར་གནས་པར་གྱུར་ཅིག །དགེ་བའི་རྩ་བ་དེ་ལས་དགེ་བའི་རྩ་བ་བྱུང་བ་གང་ལགས་པའི་དགེ་བའི་རྩ་བ་དེས་ཉན་ཐོས་ཀྱི་ཐེག་པ་ལ་མོས་ཤིང་ཉན་ཐོས་ཀྱི་ཐེག་པས་ངེས་པར་འབྱུང་བར་འདོད་པའི་སེམས་ཅན་གང་ལགས་པ་དེ་དག་ལ་དགེ་བའི་རྩ་བ་དེ་དབུལ་བར་
བགྱིའོ། །དགེ་བའི་རྩ་བ་དེས་ལམ་བཞི་ལ་དམིགས་ཤིང་འཕགས་པའི་བདེན་པ་བཞིའི་ཆོས་ཉིད་དང་ཡང་དག་པར་ལྡན་པ་མངོན་དུ་བགྱིས་ནས། ཉན་ཐོས་ཀྱི་བྱང་ཆུབ་མངོན་པར་རྫོགས་པར་སངས་རྒྱས་ཤིང་མངོན་པར་རྫོགས་པར་སངས་རྒྱས་ནས། ཐེག་པ་གཅིག་གིས་ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་ཀྱི་བར་དུ་ཡོངས་སུ་མྱ་ངན་ལས་འདའ་བར་གྱུར་ཅིག །དགེ་བའི་རྩ་བ་དེ་ལས་དགེ་བའི་རྩ་བ་བྱུང་བ་གང་ལགས་པའི་དགེ་བའི་རྩ་བ་དེས་རང་སངས་རྒྱས་ཀྱི་ཐེག་པ་ལ་མོས་ཤིང་རང་སངས་རྒྱས་ཀྱི་ཐེག་པས་ངེས་པར་འབྱུང་བར་འདོད་པའི་སེམས་ཅན་གང་ལགས་པ་དེ་དག་ལ་དགེ་བའི་རྩ་བ་དེ་དབུལ་བར་བགྱིའོ། །དགེ་བའི་རྩ་བ་དེས་རྟེན་ཅིང་འབྲེལ་བར་འབྱུང་བའི་ཆོས་ཉིད་སྐྱེ་བ་དང་། འཇིག་པ་མངོན་དུ་བགྱིས་ནས། རང་བྱང་ཆུབ་མངོན་པར་རྫོགས་པར་སངས་རྒྱས་ཤིང་མངོན་པར་རྫོགས་པར་སངས་རྒྱས་ནས། ཐེག་པ་གཅིག་གིས་ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་ཀྱི་བར་དུ་ཡོངས་སུ་མྱ་ངན་ལས་འདའ་བར་གྱུར་ཅིག །དགེ་བའི་རྩ་བ་དེ་ལས་དགེ་བའི་རྩ་བ་བྱུང་བ་གང་ལགས་པའི་དགེ་བའི་རྩ་བ་དེས་སེམས་ཅན་ཐེག་པ་ཆེན་པོ་ལ་མོས་ཤིང་ཐེག་པ་ཆེན་པོས་ངེས་པར་འབྱུང་བར་འདོད་ལ། སེམས་ཅན་ཐམས་ཅད་བསྒྲལ་བར་འདོད་པ་གང་ལགས་པ་དེ་དག་ལ་དགེ་བའི་རྩ་བ་དེ་དབུལ་བར་བགྱིའོ། །དགེ་བའི་རྩ་བ་དེས་ཚོགས་ཤིན་ཏུ་བསགས་ཤིང་དགེ་བའི་རྩ་བར་ཉེ་བར་བསགས་པ། སྐྱེ་བ་མེད་པ། འགག་པ་མེད་པའི་ཆོས་ཉིད་མངོན་དུ་བགྱིས་ནས་བྱང་ཆུབ་ཆེན་པོར་མངོན་པར་རྫོགས་པར་སངས་རྒྱས་པར་གྱུར་ཅིག །དགེ་བའི་རྩ་བ་དེ་ལས་དགེ་བའི་རྩ་བ་བྱུང་བ་གང་ལགས་པའི་དགེ་བའི་རྩ་བ་དེས་ཁམས་གསུམ་དུ་སྐྱེས་པའི་སེམས་ཅན་གྱི་ཁམས་ལ་དབུལ་བར་བགྱིའོ། །དེ་ཁམས་གསུམ་དུ་ཞེས་པའི་སེམས་ཅན་ཐམས་ཅད་བྱང་ཆུབ་ཆེན་པོར་མངོན་པར་རྫོགས་པར་སངས་རྒྱས་པ་ནས་ཆོས་ཀྱི་འཁོར་ལོ་རབ་ཏུ་བསྐོར་བར་གྱུར་ཅིག །བདུད་བཞི་ཚར་གཅོད་པར་གྱུར་ཅིག །སེམས་ཅན་ཡོངས་སུ་སྨིན་པར་བགྱིད་པར་གྱུར་ཅིག །བདག་ཀྱང་དགེ་བའི་ཕྱོགས་
ལ་བརྩོན་པའི་སྙིང་རྗེ་ཆེན་པོ་མངོན་དུ་བགྱིས་ནས་དྲན་པ་ཉེ་བར་སྒྲུབ་པར་གྱུར་ཅིག །ལེ་ལོ་སེལ་བར་གྱུར་ཅིག །ལམ་ཉེ་བར་སྟོན་པར་གྱུར་ཅིག །མི་དགེ་བ་ལས་ཟློག་པར་གྱུར་ཅིག །དགེ་བ་ལ་སྦྱོར་བ་གྱུར་ཅིག །ལུས་ལ་གཟི་བྱིན་འདུག་པར་གྱུར་ཅིག །མཐུ་དང་སྟོབས་ཡང་དག་པར་སྐྱེད་པར་གྱུར་ཅིག །སྒྲིབ་པ་ཆེན་པོ་ལྟུག་པོར་གྱུར་བ་འདི་ལས་རྣམ་པར་གྲོལ་བར་གྱུར་ཅིག །སེམས་ཅན་གྱི་ཁམས་དང་། ལས་ཀྱི་ཁམས་དང་། ཉོན་མོངས་པའི་ཁམས་དང་། ནམ་མཁའི་ཁམས་ཇི་ཙམ་པ་དེ་ཙམ་དུ་སེམས་ཅན་ལ་ཕན་པའི་ཕྱིར་གནས་པར་གྱུར་ཅིག །བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །ཏདྱ་ཐཱ། ཨ་བ་ལོ་ཀེ། ལོ་ཀ །བི་ལོ་ཀེ །ལོ་ཀ་བི་ལོ་ཀི་ནི། ཨ་བ་ལོ་ཀ་ཡ་ཧྲི་མེ། སརྦྦ་ཀརྨྨ་ཨཱ་བ་ར་ཆེ་བྷྱཿསྭཱ་ཧཱ། གང་དག་ཕྱོགས་བཅུའི་འཇིག་རྟེན་གྱི་ཁམས་ན་བཞུགས་པའི་སངས་རྒྱས་བཅོམ་ལྡན་འདས་ཐུགས་རྗེ་ཐུགས་ཁྱབ་པ། སྔོན་གྱི་སྨོན་ལམ་གྱི་བྱིན་གྱི་རླབས་ཀྱིས་བཞུགས་ཤིང་འཚོ་ལ་གཞེས་པ་འདི་ལྟ་སྟེ། བཟང་པོ་དཔལ་དང་། ཙནྡན་དཔལ་དང་། ཏོག་གི་དཔལ་དང་། མྱ་ངན་མེད་པའི་དཔལ་དང་། ཏོག་དཔལ་དང་། མེ་ཏོག་དཔལ་དང་། སྣང་བའི་དཔལ་དང་། ནོར་དཔལ་དང་། རྒྱ་མཚོ་དཔལ་དང་། རིན་ཆེན་མཆོད་སྡོང་ཀུན་ནས་སྣང་པ་དང་། དེ་ལ་སོགས་པ་ལ་བདག་གི་བསམ་པ་དང་། ལྷག་པའི་བསམ་པ་རུས་པའི་ཁོང་ནས་དགའ་བ་དང་། རྐང་གི་ཁོང་ནས་དགའ་བའི་སེམས་ཐམས་ཅད་དང་། ལུས་ཐམས་ཅད་ལ་བཏུད་ནས་ཕྱག་འཚལ་ལོ། །དེ་དག་ཡོངས་སུ་མྱ་ངན་ལས་འདས་པའི་སྐུའི་མཆོད་རྟེན་དང་། གཞལ་མེད་ཁང་དང་། དྲི་གཙང་ཁང་དང་། ཆོས་ཉིད་གང་ལགས་པ་དེ་དང་། ཆོས་ཉིད་གང་ལགས་པ་དེས་སངས་རྒྱས་བཅོམ་ལྡན་འདས་དེ་དག་རབ་དུ་འབྱེད་པའི་ཆོས་ཉིད་དེ་དང་། དེ་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་བསྒོམས་པའི་སྐུ་གདུང་གང་ལགས་པ་དེ་དག་ལ་བདག་གིས་བསམ་པ་དང་། ལྷག་པའི་
བསམ་པས་སེམས་ཐམས་ཅད་དང་ལུས་ཐམས་ཅད་བཏུད་ནས་ཕྱག་འཚལ་ལོ། །གང་དག་འདས་པའི་ཡང་དག་པར་རྫོགས་པའི་སངས་རྒྱས་རྣམས་དང་། དེ་དག་གི་ཡོངས་སུ་མྱ་ངམན་ལས་འདས་པའི་སྐུའི་མཆོད་རྟེན་དང་། གཞལ་མེད་ཁང་དང་། དྲི་གཙང་ཁང་དང་། ཆོས་ཉིད་གང་ལགས་པ་དེ་དང་། ཆོས་ཉིད་གང་ལགས་པ་དེས་སངས་རྒྱས་བཅོམ་ལྡན་འདས་དེ་དག་རབ་ཏུ་འབྱེད་པའི་ཆོས་ཉིད་དེ་དང་དེ་ཡང་ཤེས་རབ་གྱི་ཕ་རོལ་གྱི་ཕྱིན་པ་ཡོངས་སུ་བསྒོམས་པའི་སྐུ་གདུང་གང་ལགས་པ་དེ་དག་ལ་བདག་གི་བསམ་པ་དང་། ལྷག་པ་བསམ་པས་སེམས་ཐམས་ཅད་དང་། ལུས་ཐམས་ཅད་བཏུད་ནས་ཕྱག་འཚལ་ལོ། །གང་དག་མ་འོངས་པའི་ཡང་དག་པར་རྫོགས་པའི་སངས་རྒྱས་རྣམས་དང་། དེ་དག་ཡོངས་སུ་མྱ་ངན་ལས་འདས་པའི་སྐུའི་མཆོད་རྟེན་དང་། གཞལ་མེད་ཁང་དང་། དྲི་གཙང་ཁང་དང་། ཆོས་ཉིད་གང་ལགས་པ་དེ་དང་། ཆོས་ཉིད་གང་ལགས་པ་དེས་སངས་རྒྱས་བཅོམ་ལྡན་འདས་དེ་དག་རབ་ཏུ་འབྱེད་པའི་ཆོས་ཉིད་དེ་དང་། དེ་ཡང་ཤེས་རབ་གྱི་ཀྱི་ཕ་རོལ་ཏུ་ཕྱིན་པ་ཡོངས་སུ་བསྒོམས་པའི་སྐུ་གདུང་གང་ལགས་པ་དེ་དག་ལ་བདག་གི་བསམ་པ་དང་། ལྷག་པའི་བསམ་པས་སེམས་ཐམས་ཅད་དང་། ལུས་ཐམས་ཅད་བཏུད་ནས་ཕྱག་འཚལ་ལོ། །ཕྱོགས་བཅུའི་འཇིག་རྟེན་གྱི་ཁམས་ན་བཞུགས་པའི་བྱང་ཆུབ་སེམས་དཔའ་རྟག་ཏུ་བརྩོན་པ་དང་། རབ་ཏུ་བརྩོན་པ་དང་། བརྩོན་པ་མི་འདོར་བ་རྣམས་ལ་འདི་ལྟ་སྟེ། ཆུ་ལྷ་བློ་གྲོས་དང་།སྣང་བའི་བློ་གྲོས་དང་། ནམ་མཁའི་བློ་གྲོས་དང་། གློག་གི་བློ་གྲོས་དང་། དོན་འགྲུབ་བློ་གྲོས་དང་། རབ་ཏུ་ཞི་སྤྱོད་བློ་གྲོས་དང་། སོ་སོ་ཡང་དག་རིག་ཐོབ་དང་། རྟག་ཏུ་བརྩོན་པ་དང་། རབ་ཏུ་བརྩོན་པ་ལ་སོགས་པ་དེ་དག་ལ་བདག་གི་བསམ་པ་དང་། ལྷག་པའི་བསམ་པས་སེམས་ཐམས་ཅད་དང་། ལུས་ཐམས་ཅད་བཏུད་ནས་ཕྱག་འཚལ་ལོ། །དེ་དག་ཡོངས་སུ་མྱ་ངན་ལས་འདས་པའི་སྐུའི་མཆོད་རྟེན་དང་། གཞལ་མེད་ཁང་དང་། དྲི་གཙང་ཁང་དང་། ཆོས་ཉིད་གང་ལགས་པ་དེ་དང་། ཆོས་ཉིད་གང་ལགས་པ་དེས་བྱང་ཆུབ་སེམས་
དཔའ་དེ་དག་རབ་ཏུ་འབྱེད་པའི་ཆོས་ཉིད་དེ་དང་། དེ་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་རབ་ཏུ་བསྒོམས་པའི་སྐུ་གདུང་གང་ལགས་པ་དེ་དག་ལ་བདག་གི་བསམ་པ་དང་། ལྷག་པའི་བསམ་པས་སེམས་ཐམས་ཅད་དང་། ལུས་ཐམས་ཅད་ཀྱང་བཏུད་ནས་ཕྱག་འཚལ་ལོ། །གང་དག་འདས་པའི་བྱང་ཆུབ་སེམས་དཔའ་རྣམས་དང་། དེ་དག་ཡོངས་སུ་མྱ་ངན་ལས་འདས་པའི་སྐུའི་མཆོད་རྟེན་དང་། གཞལ་མེད་ཁང་དང་། དྲི་གཙང་ཁང་དང་། ཆོས་ཉིད་གང་ལགས་པ་དེ་དང་།ཆོས་ཉིད་གང་ལགས་པ་དེས་བྱང་ཆུབ་སེམས་དཔའ་དེ་དག་རབ་ཏུ་འབྱེད་པའི་ཆོས་ཉིད་དེ་དང་། དེ་ཡང་ཤེས་རབ་ཀྱི་ཕ་རོལ་གྱི་ཕྱིན་པ་ཡོངས་སུ་བསྒོམས་པའི་སྐུ་གདུང་གང་ལགས་པ་དེ་དག་ལ་བདག་གི་བསམ་པ་དང་། ལྷག་པས་བསམ་པས་སེམས་ཐམས་ཅན་དང་། ལུས་ཐམས་ཅད་བཏུད་ནས་ཕྱག་འཚལ་ལོ། །གང་དག་མ་འོངས་པའི་བྱང་ཆུབ་སེམས་དཔའ་རྣམས་དང་། དེ་དག་ཡོངས་སུ་མྱ་ངན་ལས་འདས་པའི་སྐུའི་མཆོད་རྟེན་དང་། གཞལ་མེད་ཁང་དང་། དྲི་གཙང་ཁང་དང་། ཆོས་ཉིད་གང་ལགས་པ་དེ་དང་། ཆོས་ཉིད་གང་ལགས་པ་དེས་བྱང་ཆུབ་སེམས་དཔའ་དེ་དག་རབ་ཏུ་འབྱེད་པའི་ཆོས་ཉིད་དེ་དང་། དེ་ཡང་ཤེས་རབ་ཀྱི་ཕ་རོལ་གྱི་ཕྱིན་པ་ཡོངས་སུ་བསྒོམས་པའི་སྐུ་གདུང་གང་ལགས་པ་དེ་དག་ལ་བདག་གི་བསམ་པ་དང་། ལྷག་པས་བསམ་པས་སེམས་ཐམས་ཅན་དང་། ལུས་ཐམས་ཅད་བཏུད་ནས་ཕྱག་འཚལ་ལོ། །བྱང་ཆུབ་སེམས་དཔའ་འདོད་ཆེན་པོ་དགའ་ལྡན་གྱི་གནས་ནས་མངལ་དུ་འཇུག་པ་དང་། གནས་དང་ས་སྟོན་པ་དང་། བྱང་ཆུབ་གྱི་སྙིང་པོར་གཤེགས་པ་དང་། བྱང་ཆུབ་མངོན་པར་རྫོགས་པར་བྱང་ཆུབ་པ་དང་། བདུད་འདུལ་བ་དང་། ཆོས་ཀྱི་འཁོར་ལོ་བསྐོར་བ་ནས་ཡོངས་སུ་མྱ་ངན་ལས་འདས་པ་ཆེན་པོའི་བར་སྟོན་པ་གང་ལགས་པ་དེ་དག་ལ་བདག་གི་བསམ་པ་དང་། ལྷག་པའི་བསམ་པས་བདག་ཉིད་ཐམས་ཅད་ཀྱིས་བསམ་པ་ཐམས་ཅད་དང་། ལུས་ཐམས་ཅད་བཏུད་ནས་ཕྱག་འཚལ་ལོ། །དེ་དག་ཐབས་ཀྱི་ཡོངས་སུ་མྱ་ངན་ལས་འདས་པའི་སྐུའི་
མཆོད་རྟེན་དང་། གཞལ་མེད་ཁང་དང་། དྲི་གཙང་ཁང་དང་། ཆོས་ཉིད་དེ་གང་ལགས་པ་དེ་དང་། ཆོས་ཉིད་གང་ལགས་པ་འཕགས་པ་དེས་སངས་རྒྱས་བཅོམ་ལྡན་འདས་དེ་དག་རབ་ཏུ་འབྱེད་པའི་ཆོས་ཉིད་དེ་དང་། དེ་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་བསྒོམས་པའི་སྐུ་གདུང་གང་ལགས་པ་དེ་དག་ལ་བདག་གི་བསམ་པ་དང་། ལྷག་པའི་བསམ་པས་སེམས་ཐམས་ཅད་དང་། ལུས་ཐམས་ཅད་བཏུད་ནས་ཕྱག་འཚལ་ལོ། །གང་དག་ཕྱོགས་བཅུའི་འཇིག་རྟེན་གྱི་ཁམས་ན་བཞུགས་པའི་འཕགས་པ་རང་རྒྱལ་བ་ཕུང་པོ་དང་། ཁམས་དང་། སྐྱེ་མཆེད་ལ་མཁས་པ། སྐྱེ་བ་དང་འཇིག་པ་རྟོགས་པ་རྣམས་ཀྱི་མཚན་ལ་འདི་ལྟ་སྟེ། བསེ་རུ་ལྟར་སྤྱོད་པ་དང་། ཚོགས་དང་སྤྱོད་པ་གང་ལགས་པ་དེ་དག་ལ་བདག་གི་བསམ་པ་དང་། ལྷག་པའི་བསམ་པས་སེམས་ཐམས་ཅད་དང་། ལུས་ཐམས་ཅད་བཏུད་ནས་ཕྱག་འཚལ་ལོ། །དེ་དག་གི་ཡོངས་སུ་མྱ་ངན་ལས་འདས་པའི་སྐུའི་མཆོད་རྟེན་དང་། གཞལ་མེད་ཁང་དང་། དྲི་གཙང་ཁང་དང་། ཆོས་ཉིད་གང་ལགས་པ་དེ་དེ་དང་། ཆོས་ཉིད་གང་ལགས་པ་དེས་རང་རྒྱལ་བ་དེ་དག་རབ་ཏུ་འབྱེད་པའི་ཆོས་ཉིད་དེ་དང་། དེ་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་བསྒོམས་པའི་སྐུ་གདུང་གང་ལགས་པ་དེ་དག་ལ་བདག་གི་བསམ་པ་དང་ལྷག་པའི་བསམ་པས་སེམས་ཐམས་ཅད་དང་། ལུས་ཐམས་ཅད་བཏུད་ནས་ཕྱག་འཚལ་ལོ། །གང་དག་འདས་པའི་རང་རྒྱལ་བ་རྣམས་དང་། དེ་དག་ཡོངས་སུ་མྱ་ངན་ལས་འདས་པའི་སྐུའི་མཆོད་རྟེན་དང་། གཞལ་མེད་ཁང་དང་། དྲི་གཙང་ཁང་དང་། ཆོས་ཉིད་གང་ལགས་པ་དེ་དང་། ཆོས་ཉིད་གང་ལགས་པ་དེས་རང་རྒྱལ་བ་དེ་དག་རབ་ཏུ་འབྱེད་པའི་ཆོས་ཉིད་དེ་དང་། དེ་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་བསྒོམས་པའི་སྐུ་གདུང་གང་ལགས་པ་དེ་དག་ལ་བདག་གི་བསམ་པ་དང་། ལྷག་པའི་བསམ་པས་སེམས་ཐམས་ཅད་དང་། ལུས་ཐམས་ཅད་བཏུད་ནས་ཕྱག་འཚལ་ལོ། །གང་དག་མ་འོངས་པའི་རང་རྒྱལ་བ་རྣམས་དང་། དེ་དག་ཡོངས་སུ་མྱ་ངན་
འདས་པའི་སྐུའི་མཆོད་རྟེན་དང་། གཞལ་མེད་ཁང་དང་། དྲི་གཙང་ཁང་དང་། ཆོས་ཉིད་གང་ལགས་པ་དེ་དང་། ཆོས་ཉིད་གང་ལགས་པ་དེས་བྱང་ཆུབ་སེམས་དཔའ་དེ་དག་རབ་ཏུ་འབྱེད་པའི་ཆོས་ཉིད་དེ་དང་། དེ་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་རབ་ཏུ་བསྒོམས་པའི་སྐུ་གདུང་གང་ལགས་པ་དེ་དག་ལ་བདག་གི་བསམ་པ་དང་། །ལྷག་པའི་བསམ་པས་སེམས་ཐམས་ཅད་དང་། ལུས་ཐམས་ཅད་ཀྱང་བཏུད་ནས་ཕྱག་འཚལ་ལོ། །གང་དག་གང་དག་ཕྱོགས་བཅུའི་འཇིག་རྟེན་གྱི་ཁམས་ན་བཞུགས་པའི་འཕགས་པ་རྒྱུན་དུ་བཞུགས་པ་རྣམས་དང་། ལན་ཅིག་ཕྱིར་འོང་བ་རྣམས་དང་།ཕྱིར་མི་འོང་བ་རྣམས་དང་། དགྲ་བཅོམ་པ་རྣམས་དང་། དེ་དག་ལ་འཇུག་པ་གང་ལགས་པ་དང་། དེ་དག་ཡོངས་སུ་མྱ་ངན་ལས་འདས་པའི་སྐུ་གདུང་གི་མཆོད་རྟེན་དང་། གཞལ་མེད་ཁང་དང་། དྲི་གཙང་ཁང་དང་། ཆོས་ཉིད་གང་ལགས་པ་དེ་དང་། ཆོས་ཉིད་གང་ལགས་པ་དེས་འཕགས་པ་རྒྱུན་དུ་བཞུགས་པ་རྣམས་དང་། ལན་ཅིག་ཕྱིར་འོང་བ་རྣམས་དང་། ཕྱིར་མི་འོང་བ་རྣམས་དང་། དགྲ་བཅོམ་པ་རྣམས་དང་། དེ་དག་ལ་འཇུག་པ་གང་ལགས་པ་དང་དེ་དག་གི་རབ་ཏུ་འབྱེད་པའི་ཆོས་ཉིད་གང་ལགས་པ་དེ་དང་། དེ་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་བསྒོམས་པའི་སྐུ་གདུང་གང་ལགས་པ་དེ་དག་ལ་བདག་གི་བསམ་པ་དང་། ལྷག་པའི་བསམ་པས་སེམས་ཐམས་ཅད་དང་། ལུས་ཐམས་ཅད་བཏུད་ནས་ཕྱག་འཚལ་ལོ། །གང་དག་འདས་པའི་འཕགས་པ་ཉན་ཐོས་རྣམས་དང་། དེ་དག་ཡོངས་སུ་མྱ་ངན་ལས་འདས་པའི་སྐུའི་མཆོད་རྟེན་དང་། གཞལ་མེད་ཁང་དང་། དྲི་གཙང་ཁང་དང་། ཆོས་ཉིད་གང་ལགས་པ་དེ་དང་། ཆོས་ཉིད་གང་ལགས་པ་དེས་འཕགས་པ་ཉན་ཐོས་དེ་དག་རབ་ཏུ་འབྱེད་པའི་ཆོས་ཉིད་དེ་དང་། དེ་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་བསྒོམས་པའི་སྐུ་གདུང་གང་ལགས་པ་དེ་དག་ལ་བདག་གི་བསམ་པ་དང་། ལྷག་པའི་བསམ་པས་སེམས་ཐམས་ཅད་དང་། ལུས་ཐམས་ཅད་བཏུད་ནས་ཕྱག་འཚལ་ལོ། །གང་དག་མ་འོངས་པའི་འཕགས་པ་ཉན་ཐོས་རྣམས་དང་།
དེ་དག་མྱ་ངན་ལས་འདས་པའི་སྐུའི་མཆོད་རྟེན་དང་། གཞལ་མེད་ཁང་དང་། དྲི་གཙང་ཁང་དང་། ཆོས་ཉིད་གང་ལགས་པ་དེ་དང་། ཆོས་ཉིད་གང་ལགས་པ་དེས་འཕགས་པ་ཉན་ཐོས་དེ་དག་རབ་ཏུ་འབྱེད་པའི་ཆོས་ཉིད་དེ་དང་། དེ་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་བསྒོམས་པའི་སྐུ་གདུང་གང་ལགས་པ་དེ་དག་ལ་བདག་གི་བསམ་པ་དང་། ལྷག་པའི་བསམ་པས་སེམས་ཐམས་ཅད་དང་ལུས་ཐམས་ཅད་བཏུད་ནས་ཕྱག་འཚལ་ལོ། །གང་དག་ཁམས་གསུམ་འདིའི་གླིང་བཞི་དག་ན་འཕགས་པ་ཉན་ཐོས་དང་རང་སངས་རྒྱས་དང་། བྱང་ཆུབ་སེམས་དཔའ་དང་། དེ་བཞིན་གཤེགས་པའི་སྐུ་མདོར་ན་འཇིག་རྟེན་གྱི་ཁམས་འདིའམ། འཇིག་རྟེན་གྱི་ཁམས་གཞན་དག་ན་མངོན་པར་འདུས་བྱས་པ་དང་། མངོན་པར་འདུ་བྱེད་པ་དང་། མངོན་པར་འདུ་བྱེད་པར་གྱུར་བ་དང་། མཆོད་པ་བྱས་པ་དང་། མཆོད་པ་བྱེད་པ་དང་། མཆོད་པ་བྱེད་པར་འགྱུར་བ་དང་། འཕགས་པ་ཉན་ཐོས་དང་། རང་སངས་རྒྱས་དང་། བྱང་ཆུབ་སེམས་དཔའ་དང་། དེ་བཞིན་གཤེགས་པའི་སྐུ་གདུང་གི་མཆོད་རྟེན་དང་། གཞལ་མེད་ཁང་དང་། དྲི་གཙང་ཁང་དང་། ཆོས་ཉིད་གང་ལགས་པ་དེ་དང་།ཆོས་ཉིད་གང་ལགས་པ་དེ་དག་རབ་ཏུ་འབྱེད་པའི་ཆོས་ཉིད་དེ་དང་། དེ་ཡང་ཤེས་རབ་ཀྱི་ཕ་རོལ་གྱི་ཏུ་ཕྱིན་པ་ཡོངས་སུ་བསྒོམས་པའི་སྐུ་གདུང་གང་ལགས་པ་དེ་དག་ལ་བདག་གི་བསམ་པ་དང་། ལྷག་པའི་བསམ་པས་སེམས་ཐམས་ཅད་དང་ལུས་ཐམས་ཅད་བཏུད་ནས་ཕྱག་འཚལ་ལོ། །སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །ཏདྱ་ཐཱ། ཙནྡྲ་པྲ་བྷེ། ཙནྡན་ཙཱརྞ་ཀི་ལ་ས་བ་ཏི། སརྦ་ཏ་ཐཱ་ག་ཏ། ཨངྷིཥྛིཏ་ཨ་ནུ་མོ་དི་སྭཱ་ཧཱ། ཇི་ལྟར་འདས་པ་དང་། མ་འོངས་པ་དང་། ད་ལྟར་བྱུང་བའི་སངས་རྒྱས་བཅོམ་ལྡན་འདས་དང་། བྱང་ཆུབ་སེམས་དཔའ་དེ་རྣམས་ཀྱིས་རྒྱ་ཆེན་པོ་དང་ཟབ་མོས་ཕ་རོལ་ཏུ་ཕྱིན་པ་དྲུག་ལས་དེས་བར་འབྱུང་བ་སྣ་ཚོགས་ཚད་མེད་པའི་མཆོད་པ་དང་། མངོན་པར་འདུ་མཛད་པ་བསྒྲུབས་པ་དང་། སྒྲུབ་པ་དང་། སྒྲུབ་
པར་འགྱུར་བ་དེ་དག་ལས་བདག་གི་སྐལ་བར་འགྱུར་བ་གང་ལགས་པ་དེ་དག་ཐམས་ཅད་ཀྱང་བདག་གི་ལགས་སོ་པར་བཟུང་ནས་བདག་གི་བསམ་པ་དང་། ལྷག་པའི་བསམ་པས་སེམས་ཐམས་ཅད་དང་ལུས་ཐམས་ཅད་བཏུད་ནས་ཕྱོགས་བཅུའི་འཇིག་རྟེན་གྱི་ཁམས་ཀྱི་རྡུལ་ཕྲ་མོ་སྙེད་ཀྱི་ཉན་ཐོས་དང་། རང་སངས་རྒྱས་དང་། བྱང་ཆུབ་སེམས་དཔའ་དང་། ཡང་དག་པར་རྫོགས་པའི་སངས་རྒྱས་དང་བཅས་པ་དེ་རྣམས་ལ་དབུལ་བར་བགྱིའོ། །དགེ་བའི་རྩ་བ་དེས་སེམས་ཅན་ཐམས་ཅད་ཀྱི་ཕ་རོལ་ཏུ་ཕྱིན་པ་ཐམས་ཅད་དང་། ས་ཐམས་ཅད་དང་། ཏིང་ངེ་འཛིན་ཐམས་ཅད་དང་། གཟུངས་ཀྱི་སྒོ་ཐམས་ཅད་དག་བྱང་ཆུབ་ཀྱི་ཕྱོགས་ཀྱི་ཆོས་ཐམས་ཅད་མངོན་དུ་གྱུར་ཅིག །དེ་བཞིན་གཤེགས་པ་རྔ་སྒྲའི་རྒྱལ་པོ་ལ་ཕྱག་འཚལ་ལོ། །ཏདྱ་ཐཱ། ཊཀེ་ཊ་ཀེ། ཊ་ཀེ་ཊ་ཀེ། ཊ་ཀེ་སྭཱ་ཧཱ།། །།བམ་པོ་གཉིས་པ། གང་དག་སྲིད་པ་གསུམ་པོ་འདི་ན་ལྷ་དང་མིའི་དྲི་དང་། བདུག་སྤོས་ཀྱི་རྣམ་པ་དང་། མེ་ཏོག་དང་། འབྲས་བུ་དང་། རོ་བྲོ་བ་དང་བཅས་པ་དང་། ལོ་ཏོག་གི་རྣམ་པ་དང་། གསེར་དང་། དངུལ་དང་། ནོར་བུ་དང་། མུ་ཏིག་དང་། བཻཌཱུ་ཪྱ་དང་། རྡོའི་སྙིང་པོ་ལ་སོགས་པ་བདག་གི་བ་མེད་ཅིང་ཡོངས་སུ་བཟུང་བ་མེད་པ་གང་ལགས་པ་དེ་དག་བདག་དང་སེམས་ཅན་ཐམས་ཅད་ཐུན་མོང་དུ་བགྱིས་ནས་ཕྱོགས་བཅུའི་འཇིག་རྟེན་གྱི་ཁམས་ཀྱི་རྡུལ་ཕྲ་མོ་སྙེད་ཀྱི་འདས་པ་དང་། མ་འོངས་པ་དང་། ད་ལྟར་བྱུང་བའི་ཡང་དག་པར་རྫོགས་པའི་སངས་རྒྱས་དང་། བྱང་ཆུབ་སེམས་དཔའ་དང་། ཉན་ཐོས་དང་། རང་རྒྱལ་བ་དང་བཅས་པ་དེ་རྣམས་ལ་དབུལ་བར་བགྱིའོ། །དགེ་བའི་རྩ་བ་དེས་སེམས་ཅན་ཐམས་ཅད་ལ་རྣམ་པ་ཐམས་ཅད་ཀྱི་མཆོག་དང་ལྡན་པའི་སྟོང་པ་ཉིད་མངོན་དུ་གྱུར་ཅིག །བཅོམ་ལྡན་འདས་དེ་བཞིན་གཤེགས་པ་བློ་ཡངས་ཟབ་མོ་སྒྲོགས་པའི་རྒྱལ་པོ་ལ་ཕྱག་འཚལ་ལོ། །ཏདྱ་ཐཱ། བི་བུ་ལ་སྭ་རེ། བི་པུ་ལ་ཡོ་ནི་ཤེ། ཨ་ན་ལ་སེ། ཨ་ན་ལ་ས། སཾ་བྷ་བེ། ཨ་ན་ལས། ག་ཏིང་ག་ཏེ་སྭཱ་ཧཱ། བདག་ཉིན་མོ་དང་། མཚན་མོ་གཉིད་ལོག་པ་དང་། སད་པ་དང་། འོང་བ་དང་།
འགྲོ་བ་དང་། འདུག་པ་དང་། ལངས་པ་ནས་དབང་པོ་འགག་པར་འགྱུར་བའི་བར་དུ་ཡང་ལུང་བསྟན་པ་དང་། ལུང་མ་བསྟན་པ་དང་། ལུས་དང་། ངག་དང་། ཡིད་ཀྱིས་ཕྱི་དང་ནང་གི་ལེགས་པར་སྤྱད་པ་གང་ལགས་པ་དང་། སྐྱེ་བ་ཐོག་མ་དང་ཐ་མ་མ་མཆིས་པའི་འཁོར་བར་བསགས་པ་གང་ལགས་པ་དང་། བྱང་ཆུབ་ཀྱི་སྙིང་པོ་ལ་མཆིས་ཀྱི་བར་དུ་དགེ་བའི་རྩ་བ་གང་ལགས་པ་དེ་དག་ཐམས་ཅད་སེམས་ཅན་ཐམས་ཅད་དང་ཐུན་མོང་དུ་བགྱིས་ནས་གཉིས་སུ་མེད་པའི་ཚུལ་གྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བར་བགྱི་སྟེ། ཇི་ལྟར་འདས་པ་དང་། མ་འོངས་པ་དང་། ད་ལྟར་བྱུང་བའི་སངས་རྒྱས་བཅོམ་ལྡན་འདས་དང་། བྱང་ཆུབ་སེམས་དཔའ་དེ་རྣམས་ཀྱིས་ཡོངས་སུ་བསྔོས་པ་དེ་བཞིན་དུ་བདག་གིས་ཀྱང་ཡོངས་སུ་བསྔོ་བར་བགྱིའོ། །ཡང་དག་པར་རྫོགས་པའི་སངས་རྒྱས་བདུན་པོ་རྣམས་ལ་ཕྱག་འཚལ་ལོ། །རྣམ་པར་གཟིགས་ཀྱི་གཟི་བརྗིད་དང་། །ཤཱཀྱ་སེང་གེའི་བརྩོན་འགྲུས་ཀྱིས། །འདོད་ཆགས་ཞེ་སྡང་གཏི་མུག་དག །ནམ་ཡང་གཡོ་བར་མ་གྱུར་ཅིག །ཏདྱ་ཐཱ། ཛ་ཡནྟི། བི་ཛ་ཡནྟི། ཨ་པ་རཱ་ཛི་ཏེ། མཱ་ར་སཻནྱ་པྲ་མ་རྡ་ནི་ཡེ་སྭཱ་ཧཱ། དགེ་བའི་རྩ་བ་དེས་སེམས་ཅན་འགྲོ་བ་དྲུག་ལ་བརྟེན་པ་གང་ལགས་པ་དེ་དག་ཐམས་ཅད་སྦྱིན་པའི་ཕ་རོལ་ཏུ་ཕྱིན་པ་ལ་དགོད་པར་བགྱིའོ། །དེ་བཞིན་དུ་ཚུལ་ཁྲིམས་དང་། བཟོད་པ་དང་། བརྩོན་འགྲུས་དང་། བསམ་གཏན་དང་། ཤེས་རབ་དང་། ཐབས་དང་། སྨོན་ལམ་དང་། སྟོབས་དང་། ཡེ་ཤེས་ཀྱི་ཕ་རོལ་ཏུ་ཕྱིན་པ་ལ་དགོད་པར་བགྱིའོ། །དེ་བཞིན་དུ་ས་རབ་ཏུ་དགའ་བ་དང་། དེ་བཞིན་དུ་དྲི་མ་མེད་པ་དང་། འོད་བྱེད་པ་དང་། འོད་འཕྲོ་བ་ཅན་དང་། ཤིན་ཏུ་སྦྱང་དཀའ་བ་དང་། མངོན་དུ་གྱུར་པ་དང་། རིང་དུ་སོང་བ་དང་། མི་གཡོ་བ་དང་། ལེགས་པའི་བློ་གྲོས་དང་། ས་ཆོས་ཀྱི་སྤྲིན་ལ་དགོད་པར་བགྱིའོ། །དེ་བཞིན་དུ་རྡོ་རྗེ་ལྟ་བུའི་ཏིང་ངེ་འཛིན་དང་། དེ་བཞིན་དུ་བརྟན་པར་གནས་པའི་ཐབས་ལ་མངོན་པར་བརྩོན་པ་མངོན་དུ་འགྲོ་བ་
ཡོངས་སུ་བསགས་པའི་ཏིང་ངེ་འཛིན་དང་། ངེས་པར་འབྱུང་བའི་ཏིང་ངེ་འཛིན་དང་། ཀུན་དུ་གསལ་བའི་ཏིང་ངེ་འཛིན་དང་། ཀུན་དུ་སྣང་བའི་ཏིང་ངེ་འཛིན་དང་། རིན་ཆེན་ཏོག་གི་ཏིང་ངེ་འཛིན་དང་། རིན་ཆེན་ཟླ་བའི་ཏིང་ངེ་འཛིན་དང་། རྒྱལ་མཚན་རྩེ་མོའི་ཏོག་གི་ཏིང་ངེ་འཛིན་དང་། སྙིང་རྗེ་བསགས་པའི་ཏིང་ངེ་འཛིན་དང་། ཆོས་ཐམས་ཅད་ཀྱི་ཚིག་རབ་ཏུ་དབྱེ་བ་བསྟན་པ་ཤེས་པ་ལ་མཁས་པའི་ཏིང་ངེ་འཛིན་ལ་དགོད་པར་བགྱིའོ། །དེ་བཞིན་དུ་རྒྱ་མཚོའི་ཕྱག་རྒྱ་མི་ཟད་པར་སྒྲུབ་པའི་གཟུངས་དང་། དེ་བཞིན་དུ་སེམས་ཅན་གྱི་སྤྱོད་པ་ལ་འཇུག་པའི་གཟུངས་དང་། ཉི་མའི་ཏོག་སྣང་བ་མཐའ་ཡས་པའི་གཟུངས་དང་། ཟླ་བ་དྲི་མ་མེད་པའི་གཟི་བརྗིད་མངོན་པར་འཕགས་པའི་གཟུངས་དང་། ཀུན་ནས་དཀྲིས་པ་ཐམས་ཅད་རྣམ་པར་སེལ་བ་དང་། རྡོ་རྗེའི་སྙིང་པོ་བསྟན་པས་ཉོན་མོངས་པ་མཐའ་ཡས་པ་རྣམ་པར་འཐོར་བ་དང་། བརྗོད་དུ་མེད་པའི་དོན་སྟོན་པ་དོན་དམ་པར་ཡང་དག་པར་འདུ་བ་དང་། ལྡེམ་པོའི་ཚིག་ཏུ་སྨྲ་བའི་སྒྲ་འཇུག་པ་དང་། ནམ་མཁའི་དཀྱིལ་ལྟར་དྲི་མ་མེད་པར་སྒྲུབ་པ་དང་། ཟད་མི་ཤེས་པའི་ཕྱག་རྒྱས་བཏབ་པ་དང་། སངས་རྒྱས་ཀྱི་སྐུ་མཐའ་ཡས་པ་ཡོངས་སུ་འགྲུབ་པ་སྒྲུབ་པའི་གཟུངས་ལ་དགོད་པར་བགྱིའོ། །དེ་བཞིན་དུ་ཕ་རོལ་ཏུ་ཕྱིན་པ་བཅུ་པོ་དེ་དག་ནས་གཟུངས་ཀྱི་སྒོ་བཅུའི་བར་དག་ལ་བཀོད་ནས་དེ་རྣམས་དང་ལྷན་ཅིག་འདི་ནས་འགུམ་པའི་འོག་ཏུ་འཇིག་རྟེན་གྱི་ཁམས་བདེ་བ་ཅན་དུ་སྐྱེ་བར་འགྱུར་ཞིང་། གང་ན་བཅོམ་ལྡན་འདས་དེ་བཞིན་གཤེགས་པ་འོད་དཔག་མེད་དེ་དང་། བཅོམ་ལྡན་འདས་འཇིག་རྟེན་དབང་ཕྱུག་དེ་དང་། བཅོམ་ལྡན་འདས་མཐུ་ཆེན་ཐོབ་པ་དེ་དང་། བྱང་ཆུབ་སེམས་དཔའ་དེ་དག་དང་འཁོར་དེ་རྣམས་མཉེས་པར་བྱེད་པར་གྱུར་ཅིག །བཅོམ་ལྡན་འདས་འཁོར་དང་བཅས་པ་དེ་དག་མི་མཉེས་པར་བྱེད་པར་མ་བྱེད་ཅིག །དེ་བཞིན་གཤེགས་པ་འོད་དཔག་མེད་ལ་ཕྱག་འཚལ་ལོ། །ཏདྱ་ཐཱ། པདྨེ་པདྨེ་ནི། པདྨ་ལོ་ཙ་ནེ། པདྨ་སྃ་བྷ་བེ་སྭཱ་ཧཱ། དེ་བཞིན་གཤེགས་པ་འོད་དཔག་མེད་ལ་ཕྱག་འཚལ་ལོ། །
ཏདྱ་ཐཱ། ཨ་མི་ཏ། ཨུད་བྷ་བེ། ཨ་མི་ཏ་སཾ་བྷ་བེ། ཨ་མི་ཏ་བིཀྲཱ་ནྟི། ག་ག་ན་ཀིརྟི་ཀ་རེ། སརྦྦ་ཀརྨྨ་ཀླེ་ཤཀྵ་ཡཾ་ཀ་རི་སྭཱ་ཧཱ། དགེ་བའི་རྩ་བ་དེས་འཕགས་པ་བྱམས་པ་མངོན་པར་རྫོགས་པར་སངས་རྒྱས་མ་ཐག་ཏུ་བདག་མངོན་དུ་ལུང་སྟོན་པས་ལུང་སྟོན་ཅིང་མངོན་སུམ་དུ་ལུང་སྟོན་པ་དང་། ཡང་དག་པའི་ལུང་སྟོན་པ་དང་། ལྐོག་མ་ཡིན་པར་ལུང་སྟོན་པ་དང་། དེ་བཞིན་ཉིད་དུ་ལུང་སྟོན་པ་དང་། ཡང་དག་པའི་མཐར་ལུང་སྟོན་པ་དང་། ཆོས་ཀྱི་དབྱིངས་སུ་ལུང་སྟོན་པ་ནས་དེ་ཁོ་ན་ཉིད་མཐོང་བའི་བར་ལུང་སྟོན་པས་ལུང་སྟོན་པར་གྱུར་ཅིག །ལུང་བསྟན་ནས་བཅོམ་ལྡན་འདས་དེ་དང་བྱང་ཆུབ་སེམས་དཔའ་དང་། ཉན་ཐོས་ཀྱི་དགེ་འདུན་དང་བཅས་པ་མཉེས་པར་བྱེད་པར་གྱུར་ཅིག །ན་བཟའ་དང་། ཞལ་ཟས་དང་། གཟིམས་ཆ་དང་། བསྙུན་པའི་གསོས་སྨན་གྱི་རྐྱེན་གྱི་ཡོ་བྱད་རྣམས་དང་། དེ་ལས་གཞན་པ་དེ་བཞིན་གཤེགས་པ་དག་གི་ཟག་པ་མེད་པའི་མཆོད་པ་རྣམས་ཀྱིས་མཆོད་ནས་དེའི་དྲུང་དུ་བུས་པའི་རབ་ཏུ་འབྱུང་བ་འཐོབ་ཅིང་། གཞོན་ནུའི་རབ་ཏུ་འབྱུང་བ་དང་། ལྐོག་མ་ཡིན་པར་རབ་ཏུ་འབྱུང་བ་དང་། དེ་བཞིན་ཉིད་དུ་རབ་ཏུ་འབྱུང་བ་དང་། ཡང་དག་པའི་མཐར་རབ་ཏུ་འབྱུང་བ་ནས་དེ་ཁོ་ན་ཉིད་མཐོང་བའི་བར་དུ་རབ་ཏུ་འབྱུང་བ་ཐོབ་པར་གྱུར་ཅིག །དེ་ཡང་འཇིག་རྟེན་དང་འཇིག་རྟེན་ལས་འདས་པའི་ཁྱད་པར་དུ་འཕགས་པ། སྐྱོན་མེད་པ། མ་འདྲེས་པ། རྙོག་པ་མེད་པ། ལྷ་དང་མི་དག་མངོན་པར་དགའ་བ། སངས་རྒྱས་དང་བྱང་ཆུབ་སེམས་དཔས་བསྔགས་པ། སེམས་ཅན་ལ་སྨན་པའི་སླད་དུ་བདག་རབ་ཏུ་འབྱུང་བར་གྱུར་ཅིག །དེ་ནས་བསྐལ་པ་བཟང་པོའི་ཡང་དག་པར་རྫོགས་པའི་སངས་རྒྱས་དང་བྱང་ཆུབ་སེམས་དཔའ་དང་ཉན་ཐོས་ཀྱི་དགེ་འདུན་ཐམས་ཅད་ལ་བྱིས་པ་ནས། ན་བཟའ་དང་། ཞལ་ཟས་དང་། གཟིམས་ཆ་དང་། བསྙུན་པའི་གསོས་སྨན་གྱི་རྐྱེན་གྱི་ཡོ་བྱད་རྣམས་ཀྱིས་མཉེས་པར་བགྱིས་ནས་དེ་དག་གི་དྲུང་དུ་བུས་པའི་རབ་ཏུ་འབྱུང་བ་ཐོབ་ཅིང་། གཞོན་ནུའི་རབ་ཏུ་འབྱུང་བ་དང་། མངོན་སུམ་དུ་རབ་ཏུ་འབྱུང་བ་དང་། ལྐོག་མ་ཡིན་པར་རབ་ཏུ་འབྱུང་པོ་དང་། དེ་བཞིན་ཉིད་
དུ་རབ་ཏུ་འབྱུང་བ་དང་། ཡང་དག་པའི་མཐར་རབ་ཏུ་འབྱུང་བ་ནས་དེ་བཞིན་ཉིད་མཐོང་བའི་བར་དུ་རབ་ཏུ་འབྱུང་བ་ཐོབ་པར་གྱུར་ཅིག །དེ་ཡང་འཇིག་རྟེན་དང་འཇིག་རྟེན་ལས་འདས་པའི་ཁྱད་པར་དུ་འཕགས་པ། སྐྱོན་མེད་པ། མ་འདྲེས་པ། རྙོག་པ་མེད་པ། ལྷ་དང་མི་དག་མངོན་པར་དགའ་བ་དང་། སངས་རྒྱས་དང་བྱང་ཆུབ་སེམས་དཔས་བསྔགས་པ། སེམས་ཅན་ལ་སྨན་པའི་སླད་དུ་བདག་རབ་ཏུ་འབྱུང་བར་གྱུར་ཅིག །དེ་ནས་ཕྱོགས་བཅུའི་འཇིག་རྟེན་གྱི་ཁམས་ན་བཞུགས་པའི་ཡང་དག་པར་རྫོགས་པའི་སངས་རྒྱས་དང་བྱང་ཆུབ་སེམས་དཔའ་དང་། ཉན་ཐོས་ཀྱི་དགེ་འདུན་དང་བཅས་པ་གང་ལགས་པ་དེ་དག་བདག་གིས་མཉེས་པར་བགྱིད་པར་གྱུར་ཅིག །དེ་དག་གི་དྲུང་དུ་སྐད་ཅིག་མ་གཅིག་ལ་མིང་དང་སངས་རྒྱས་ཀྱི་ཞིང་ལུང་བསྟན་པ་ཐོབ་ཅིང་བུས་པའི་རབ་ཏུ་འབྱུང་བ་དང་། གཞོན་ནུའི་རབ་ཏུ་འབྱུང་བ་དང་། མངོན་སུམ་དུ་རབ་ཏུ་འབྱུང་བ་དང་། ལྐོག་མ་ཡིན་པར་རབ་ཏུ་འབྱུང་བ་དང་། དེ་བཞིན་ཉིད་དུ་རབ་ཏུ་འབྱུང་བ་དང་། ཡང་དག་པའི་མཐར་རབ་ཏུ་འབྱུང་བ་ནས་དེ་ཁོ་ན་ཉིད་མཐོང་བའི་བར་དུ་རབ་ཏུ་འབྱུང་བ་ཐོབ་པར་གྱུར་ཅིག་དེ་ཡང་འཇིག་རྟེན་དང་འཇིག་རྟེན་ལས་འདས་པའི་ཁྱད་པར་དུ་འཕགས་པ། སྐྱོན་མེད་པ། མ་འདྲེས་པ། རྙོག་པ་མེད་པ། ལྷ་དང་མི་དག་མངོན་པར་དགའ་བ། སངས་རྒྱས་དང་བྱང་ཆུབ་སེམས་དཔས་བསྔགས་པ། སེམས་ཅན་ལ་སྨན་པའི་སླད་དུ་བདག་རབ་ཏུ་འབྱུང་བར་གྱུར་ཅིག །བྱང་ཆུབ་སེམས་དཔའ་སེམས་དཔའ་ཆེན་པོ་སྙིང་རྗེ་ཆེན་པོ་དང་ལྡན་པ་འཕགས་པ་བྱམས་པ་ལ་ཕྱག་འཚལ་ལོ། །ཏ་དྱ་ཐཱ། མ་ཏྲི་མ་ཏྲི། མ་ཏྲི། ས་མ་ཙིཏྟེ་སྭཱ་ཧཱ། དེ་ནས་ཕ་རོལ་ཏུ་ཕྱིན་པ་དྲུག་ལ་མངོན་པར་བརྩོན་པར་གྱུར་ཅིག །ཤེས་རབ་ཀྱི་ཕ་རོལ་ཏུ་ཕྱིན་པ་ལ་གནས་པ་དང་། སྟོང་ཉིད་དང་། མཚན་མ་མེད་པ་དང་། སྨོན་པ་མེད་པ་ལ་གནས་པ་དང་། ནམ་མཁའ་མཛོད་དང་། ལག་ན་རིན་པོ་ཆེ་དང་། མངོན་པར་ཤེས་པ་ལྔ་དང་། དབང་ཐོབ་པ་དང་། སོ་སོ་ཡང་དག་པར་རིག་པ་ཐོབ་པ་དང་། ནམས་ཀྱང་དབང་པོ་ཞན་ཅིང་དབང་པོ་
དང་བྲལ་བར་མི་འགྱུར་བ་དང་། ལྟ་བ་ངན་པར་ལྟུང་བར་མི་འགྱུར་བ་དང་། ནམས་ཀྱང་ཡུལ་འཁོར་ངན་པ་དང་། སྐྱེ་བོ་ངན་པའི་ནང་དུ་སྐྱེ་བར་མ་གྱུར་ཅིག །ནམས་ཀྱང་མི་ཁོམ་པར་སྐྱེ་བར་མ་གྱུར་ཅིག །ནམས་ཀྱང་སངས་རྒྱས་དང་། ཆོས་དང་། དགེ་འདུན་མཐོང་བ་དང་། ཐོས་པ་དང་། མཆོད་པ་དང་། རིམ་གྲོ་བགྱིད་པ་དང་བྲལ་བར་མ་གྱུར་ཅིག །ནམས་ཀྱང་ཚུལ་ཁྲིམས་འཆལ་བར་མི་འགྱུར་བ་ནས་རྨི་ལམ་དུ་ཡང་ཉན་ཐོས་དང་། རང་བྱང་ཆུབ་འདོད་པའི་ཕྱིར་ནམས་ཀྱང་བྱང་ཆུབ་ཀྱི་སེམས་དང་བྲལ་བར་མ་གྱུར་ཅིག །ནམས་ཀྱང་སེམས་ཅན་ཡོངས་སུ་སྨིན་པར་བགྱིད་པ་དང་བྲལ་བར་མ་གྱུར་ཅིག །ནམས་ཀྱང་དགེ་བའི་བཤེས་གཉེན་དང་བྲལ་བར་མ་གྱུར་ཅིག །ནམས་ཀྱང་སྐད་ཅིག་ཏུ་ཡང་ཐབས་དང་ཤེས་རབ་དང་བྲལ་བར་མ་གྱུར་ཅིག །ནམས་ཀྱང་རིགས་དམན་པ་དང་བརྩོན་འགྲུས་ཞན་པ་དང་། ལེ་ལོ་ཅན་དུ་མ་གྱུར་ཅིག །བདག་ཚེ་རབས་ནས་ཚེ་རབས་སུ་སངས་རྒྱས་ཀྱི་ཆོས་རྣམས་ལ་བརྩོན་འགྲུས་སྦྱངས་པ་སྐྱེ་བར་གྱུར་ཅིག །སེམས་ཅན་ལ་སྨན་པའི་སླད་དུ་བདག་རྫུས་ཏེ་སྐྱེ་བར་གྱུར་ཅིག །ཇི་ལྟར་སངས་རྒྱས་བཅོམ་ལྡན་འདས་དང་། བྱང་ཆུབ་སེམས་དཔའ་དེ་དག་འཁྲུངས་པ་དེ་ལྟར་བདག་སངས་རྒྱས་ཀྱི་རིགས་སུ་སྐྱེ་བར་གྱུར་ཅིག །དེ་ནས་བསྟན་བཅོས་ཐམས་ཅད་དང་། བཟོ་ཐམས་ཅད་དང་། ཏིང་ངེ་འཛིན་ཐམས་ཅད་དང་། གཟུངས་ཀྱི་སྒོ་ཐམས་ཅད་དང་། བྱང་ཆུབ་ཀྱི་ཕྱོགས་ཀྱི་ཆོས་ཐམས་ཅད་མངོན་དུ་གྱུར་ཅིག །བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་དྲི་མ་མེད་པར་གྲགས་པ་ལ་ཕྱག་འཚལ་ལོ། །ཏ་དྱ་ཐཱ། ཀིརྟི་ཏེ། སརྦ་ཛི་ནེ་བྷིཿ། ཨ་ཏི་ཀིརྟི་ཏ། སརྦ་ཛི་ནེ་བྷིཿ། བཛྲ་ཨཱ་ཀ་རེ། བཛྲ་སཾ་བྷ་བེ། བཛྲ་བྷེ་ད་ཀ་རེ་སྭཱ་ཧཱ། ས་དང་། ཆུ་དང་། མེ་དང་། རླུང་དང་། ནམ་མཁས་ཉེ་བར་འཚོ་བ་ལྟར་དགེ་བ་བཅུའི་ལས་ཀྱི་ལམ་འདི་དག་གིས་ཡང་དག་པར་བསྒྲུབས་པའི་ཕུང་པོ་ལྔ་པོ་གང་ལགས་པ་དེ་དག་ཐམས་ཅད་སེམས་ཅན་ཐམས་ཅད་དང་ཐུན་མོང་དུ་བགྱིས་ནས། སངས་
རྒྱས་དང་། ཆོས་དང་། དགེ་འདུན་ཡོངས་སུ་སྤྱོད་པ་དག་ལ་དབུལ་བར་བགྱིའོ། །ནམ་གུམ་ནས་ཀྱང་བྱ་རྒོད་དང་། སྤྱང་ཀི་དང་། ཁྱི་དང་། ཝ་དང་། གཅན་གཟན་དང་། བྱ་རྣམས་ཀྱིས་པགས་པ་དང་། ཤ་དང་། རྒྱུས་པ་དང་། རུས་པ་དང་། རྐང་དང་། ཁྲག་རྣམས་ཡོངས་སུ་ཟ་བར་གྱུར་ཅིག །དེ་དག་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་གྱུར་ཅིག །དེ་ནས་ཁམས་གསུམ་ན་རྡུལ་ཕྲ་མོ་ཇི་སྙེདཔའི་སེམས་ཅན་དེ་སྙེད་སེམས་ཀྱི་སྐད་ཅིག་ལ་རྣམ་པར་ཐར་བར་བགྱིད་པར་གྱུར་ཅིག །རྣམ་པར་ཐར་བར་བགྱིས་ནས་ཕྱིར་མི་ལྡོག་པའི་ས་དག་ལ་རབ་ཏུ་འགོད་པར་གྱུར་ཅིག །དེ་ནས་མཐོང་བས་ཀྱང་སེམས་ཅན་རྣམས་ཡོངས་སུ་སྨིན་པར་བགྱིད་པར་གྱུར་ཅིག །ཐོས་པ་དང་། དྲན་པས་ཀྱང་སེམས་ཅན་རྣམས་ཡོངས་སུ་སྨིན་པར་བགྱིད་པར་གྱུར་ཅིག །བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོ་ལ་ཕྱག་འཚལ་ལོ། །ཏདྱ་ཐཱ། གརྦྷེ་གརྦྷེ། གརྦྷ་བི་ཤོ་དྷ་ནི་སྭཱ་ཧཱ། །ཕྱོགས་བཅུའི་འཇིག་རྟེན་གྱི་ཁམས་ན་བཞུགས་པའི་སངས་རྒྱས་བཅོམ་ལྡན་འདས་ཡོངས་སུ་མྱ་ངན་ལས་འདའ་བར་བཞེད་པ་གང་ལགས་པ་དེ་དག་ལ་བདག་གི་བསམ་པ་དང་། ལྷག་པའི་བསམ་པས་རུས་པའི་ཁོང་ནས་དགའ་བ་དང་། རྐང་གི་ཁོང་ནས་དགའ་བས་སེམས་ཐམས་ཅད་དང་། ལུས་ཐམས་ཅད་བཏུད་ནས་སེམས་ཅན་ལ་སྨན་པའི་སླད་དུ་སེམས་ཅན་གྱི་ཁམས་དང་། ལས་ཀྱི་ཁམས་དང་། ཉོན་མོངས་པའི་ཁམས་དང་། ནམ་མཁའི་ཁམས་ཇི་ཙམ་བདེ་ཙམ་དུ་མྱ་ངན་ལས་མི་འདའ་ཞིང་བཞུགས་པར་གསོལ་བར་འཚལ་ལོ། །དེ་བཞིན་གཤེགས་པ་ཡོན་ཏན་འབྱུང་གནས་ལ་ཕྱག་འཚལ་ལོ། །ཏདྱ་ཐཱ། ག་ག་ན་ཨཱ་ཀ་རེ། ག་ག་ན་སཾ་བྷ་བེ། ག་ག་ན་ཀཱི་རྟིཀ་རེ་སྭཱ་ཧཱ། ཕྱོགས་བཅུའི་འཇིག་རྟེན་གྱི་ཁམས་ན་བཞུགས་པའི་བྱང་ཆུབ་སེམས་དཔའ་ཚོགས་ཤིན་ཏུ་བསགས་པ་གང་ལགས་པ་རྣམས་དང་། །ཚོགས་ཆུང་ངུ་གང་ལགས་པ་རྣམས་དང་། བྱང་ཆུབ་ཏུ་སེམས་བསྐྱེད་པ་གང་ལགས་པ་རྣམས་དང་། །བྱང་ཆུབ་
ཏུ་སེམས་མ་བསྐྱེད་པ་གང་ལགས་པ་དེ་རྣམས་ལ་བདག་བསྐུལ་མ་འདེབས་ཏེ།་དེ་རྣམས་ལ་བདག་གི་ལུས་དང་། ངག་དང་། ཡིད་ཀྱིས་ལེགས་པར་སྤྱད་པ་དེ་དབུལ་བར་བགྱིའོ། །དགེ་བའི་རྩ་བ་དེས་ཚོགས་རྣམས་ཤིན་ཏུ་བསགས་ཤིང་དགེ་བའི་རྩ་བ་རྣམས་ལེགས་པར་བསགས་ནས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། ཆོས་ཀྱི་འཁོར་ལོ་རབ་ཏུ་བསྐོར་བར་གྱུར་ཅིག །བདུད་བཞི་ཚར་གཅོད་པར་གྱུར་ཅིག །སེམས་ཅན་ཡོངས་སུ་སྨིན་པར་བགྱིད་པར་གྱུར་ཅིག །སེམས་ཅན་ལ་སྨན་པའི་སླད་དུ་སེམས་ཅན་གྱི་ཁམས་དང་། ལས་ཀྱི་ཁམས་དང་། ཉོན་མོངས་པའི་ཁམས་དང་། ནམ་མཁའི་ཁམས་ཇི་ཙམ་པ་དེ་ཙམ་དུ་བཞུགས་པར་གསོལ་བར་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་བློ་གྲོས་མི་ཟད་པ་ལ་ཕྱག་འཚལ་ལོ། །ཏདྱ་ཐཱ། ཨ་ཀྵ་ཡེ་ཨ་ཀྵ་ཡེ། ཨཀྵ་ཡ་བི་ཤོ་དྷ་ནི་སྭཱ་ཧཱ། ཕྱོགས་བཅུའི་འཇིག་རྟེན་གྱི་ཁམས་ན་རྡུལ་ཕྲ་མོ་སྙེད་ཀྱི་འདས་པ་དང་། མ་འོངས་པ་དང་། ད་ལྟར་བྱུང་བའི་ཡང་དག་པར་རྫོགས་པའི་སངས་རྒྱས་དང་བྱང་ཆུབ་སེམས་དཔའ་དེ་རྣམས་ཀྱི་སྨོན་ལམ་ཆེན་པོ་བཅུ་པོ་ཁྲི་ཕྲག་གྲངས་མེད་པ་གང་ལགས་པ་དེ་དག་མཛད་པ་རྣམས་ལ་ལྷུན་གྱིས་གྲུབ་པར་འཇུག་པ་དེ་བཞིན་དུ་བདག་ཚེ་རབས་ཚེ་རབས་སུ་འཇུག་པར་གྱུར་ཅིག །དེ་ནས་སངས་རྒྱས་ཀྱི་ཞིང་ཡོངས་སུ་དག་པར་འགྱུར་བ་ནི་ཇི་ལྟར་བཅོམ་ལྡན་འདས་དེ་བཞིན་གཤེགས་པ་འོད་དཔག་མེད་དེའི་འཇིག་རྟེན་གྱི་ཁམས་བདེ་བ་ཅན་དང་། ཇི་ལྟར་བཅོམ་ལྡན་འདས་དེ་བཞིན་གཤེགས་པ་མི་འཁྲུགས་པ་དེའི་འཇིག་རྟེན་གྱི་ཁམས་མངོན་པར་དགའ་བ་དང་། ཇི་ལྟར་བཅོམ་ལྡན་འདས་དེ་བཞིན་གཤེགས་པ་པདྨའི་སྤྱན་དེའི་འཇིག་རྟེན་གྱི་ཁམས་པདྨ་ཅན་དང་། ཇི་ལྟར་བཅོམ་ལྡན་འདས་དེ་བཞིན་གཤེགས་པ་ཀུན་དུ་བཟང་པོ་དེའི་འཇིག་རྟེན་གྱི་ཁམས་མིག་མི་འཛུམས་དང་། ཇི་ལྟར་བཅོམ་ལྡན་འདས་དེ་བཞིན་གཤེགས་པ་རིན་པོ་ཆེའི་ཏོག་དེའི་འཇིག་རྟེན་གྱི་ཁམས་རིན་ཆེན་ལྡན་པ་དང་། ཇི་ལྟར་བཅོམ་ལྡན་འདས་
དེ་བཞིན་གཤེགས་པ་སྤོས་བརྩེགས་དེའི་འཇིག་རྟེན་གྱི་ཁམས་དྲི་བསུང་ཞིམ་པ་དང་། ཇི་ལྟར་བཅོམ་ལྡན་འདས་དེ་བཞིན་གཤེགས་པ་རིན་པོ་ཆེ་བཀོད་པ་དེའི་འཇིག་རྟེན་གྱི་ཁམས་རིན་ཆེན་བཀོད་པ་དང་། ཇི་ལྟར་མ་འོངས་པའི་བཅོམ་ལྡན་འདས་དེ་བཞིན་གཤེགས་པ་བདེན་པའི་བློ་གྲོས་ཏོག་གི་རྒྱལ་པོ་དེའི་སངས་རྒྱས་ཀྱི་ཞིང་དང་། ཇི་ལྟར་བཅོམ་ལྡན་འདས་དེ་བཞིན་གཤེགས་པ་གསེར་གྱི་མེ་ཏོག་དེའི་སངས་རྒྱས་ཀྱི་ཞིང་དང་། ཇི་ལྟར་བཅོམ་ལྡན་འདས་དེ་བཞིན་གཤེགས་པ་རིན་ཆེན་སྦྱིན་པ་དེའི་སངས་རྒྱས་ཀྱི་ཞིང་དང་། ཇི་ལྟར་བཅོམ་ལྡན་འདས་དེ་བཞིན་གཤེགས་པ་དྲ་བ་ཅན་གྱི་འོད་དེའི་སངས་རྒྱས་ཀྱི་ཞིང་དང་། ཇི་ལྟར་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པས་ཤེས་རབ་ཀྱི་ཕ་རོལ་ཏུ་ཕྱིན་པར་བྱང་ཆུབ་སེམས་དཔའ་རྣམས་ཀྱི་སངས་རྒྱས་ཀྱི་ཞིང་ལེགས་པར་བསྟན་པ་དང་། ཇི་ལྟར་བཅོམ་ལྡན་འདས་ཀྱིས་སངས་རྒྱས་ཐམས་ཅད་ཀྱི་ཡུལ་ལ་འཇུག་པ་ཡེ་ཤེས་སྣང་བརྒྱན་གྱི་གླེང་གཞིར་སངས་རྒྱས་ཀྱི་ཞིང་རིན་པོ་ཆེ་ཆེན་པོའི་པདྨའི་སྙིང་པོ་བྱུང་བ་མངོན་པར་བསྒྲུབས་པ་དེ་ལྟ་བུའི་སངས་རྒྱས་ཀྱི་ཞིང་དེར་བྱང་ཆུབ་སེམས་དཔའ་དེ་རྣམས་ཀྱི་མཐུས་རབ་ཏུ་འབྱུང་ཞིང་། དེར་དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པར་གྱུར་ཅིག །ཇི་ལྟར་འདས་པ་དང་། མ་འོངས་པ་དང་། ད་ལྟར་བྱུང་བའི་སངས་རྒྱས་བཅོམ་ལྡན་འདས་དང་། བྱང་ཆུབ་སེམས་དཔའ་དེ་རྣམས་ཀྱིས་སྨོན་ལམ་ཆེན་པོ་ཤིན་ཏུ་ཡོངས་སུ་དག་པས་བསྒྲུབས་པ། རང་གི་བསོད་ནམས་ལས་ངེས་པར་སྐྱེས་པ། ཤེས་རབ་ཀྱི་ཕ་རོལ་ཏུ་ཕྱིན་པར་སངས་རྒྱས་ཀྱི་ཞིང་བསྟན་པ་དེ་དག་ཡོངས་སུ་བཟུང་བ་དང་། ཡོངས་སུ་འཛིན་པ་དང་། ཡོངས་སུ་འཛིན་པར་འགྱུར་བ་དེ་ལྟ་བུ་བདག་གི་སངས་རྒྱས་ཀྱི་ཞིང་གཅིག་ཏུ་འགྱུར་ཞིང་ཆུ་ཞེང་དཔག་ཏུ་མེད་པ་དང་། ཡོན་ཏན་གྱི་རྒྱན་དཔག་ཏུ་མེད་པའི་མིང་དང་། སངས་རྒྱས་ཐམས་ཅད་ཀྱི་ཞིང་ཁྱད་པར་དུ་འཕགས་པ་མངོན་པར་མཐོ་བའི་རྒྱན་བཀོད་
པར་མཐོང་བ་དང་། རེག་པ་དང་། ཐོས་པ་དང་། དྲན་པས་ལྷན་ཅིག་མངོན་པར་རྫོགས་པར་བྱང་ཆུབ་པར་གྱུར་ཅིག །སངས་རྒྱས་ཀྱི་ཞིང་དེར་སེམས་ཅན་གང་དག་སངས་རྒྱས་ཐམས་ཅད་དང་། བྱང་ཆུབ་སེམས་དཔའ་ཐམས་ཅད་ཀྱིས་ཡོངས་སུ་བཏང་བ། མར་མི་འཛིན་པ། ཕར་མི་འཛིན་པ། དགེ་སྦྱོང་དུ་མི་འཛིན་པ། བྲམ་ཟེར་མི་འཛིན་པ། རིགས་ཀྱི་རྒན་རབས་ཀྱི་རྗེས་མི་སྙེགས་པ། ངང་ཚུལ་ངན་པ། སྡིག་པའི་ཆོས་ཡང་དག་པར་སྤྱོད་པ། རྒྱུད་བསྲེགས་པ། བསམ་པ་བསྲེགས་པ། ས་བོན་བསྲེགས་པ། དགེ་བའི་རྩ་བ་ཆད་པ། ངན་སོང་ལ་མངོན་པར་ཕྱོགས་པ། མཚམས་མེད་པ་ལྔ་དང་ལྡན་པ། བྱང་ཆུབ་སེམས་དཔའ་གཏུམ་པོ་དམ་པའི་ཆོས་སྤོང་བ་དེ་རྣམས་སངས་རྒྱས་ཀྱི་ཞིང་དེར་འདུས་པ་དང་པོར་འབྱུང་བར་འགྱུར་ཞིང་། བདག་གིས་དེ་དག་ཐམས་ཅད་ཞི་བའི་ལམ་བླ་ན་མེད་པའི་སངས་རྒྱས་ཉིད་ལ་འགོད་པར་གྱུར་ཅིག །དེ་ནས་ཇི་ཙམ་དུ་ཁམས་གསུམ་དུ་སྐྱེས་པའི་སེམས་ཅན་དེ་རྣམས་ཞིང་དེར་འདུས་པ་གཉིས་པ་ལས་འབྱུང་བར་འགྱུར་ཞིང་བདག་གིས་དེ་དག་ཐམས་ཅད་བག་ཆགས་དང་མཚམས་སྦྱོར་བའི་ཉོན་མོངས་པ་ཐམས་ཅད་སྤངས་པ་ཐམས་ཅད་མཁྱེན་པའི་ཡེ་ཤེས་ལ་འགོད་པར་གྱུར་ཅིག །དེ་བཞིན་གཤེགས་པ་དུང་གི་འོད་ཀྱི་རྒྱལ་པོ་ལ་ཕྱག་འཚལ་ལོ། །ཏདྱ་ཐཱ། ཤྃ་ཁེ། ཤྃ་ཁེ། ཤང་ཁ་པཱཎྜ་རེ་སྭཱ་ཧཱ། ཕྱོགས་བཅུའི་འཇིག་རྟེན་གྱི་ཁམས་སུ་འདུས་པའི་ཡང་དག་པར་རྫོགས་པའི་སངས་རྒྱས་དང་། བྱང་ཆུབ་སེམས་དཔའ་དེ་རྣམས་ཀྱི་སངས་རྒྱས་ཀྱི་མཛད་པ་དང་། བྱང་ཆུབ་སེམས་དཔའི་མཛད་པ་གང་ལགས་པ་དེ་དག་ཐམས་ཅད་བདག་གཅིག་བུ་གཉིས་སུ་མ་མཆིས་པས་རིམ་གྱིས་སངས་རྒྱས་ཀྱི་ཆོས་རྣམས་ལ་འཕེལ་བར་བགྱི་བར་སྤྲོ་བས། སངས་རྒྱས་བཅོམ་ལྡན་འདས་དང་བྱང་ཆུབ་སེམས་དཔའ་དེ་དག་སྟོང་པ་ཉིད་དང་། མཚན་མ་མེད་པ་དང་། སྨན་པ་མེད་པ་དང་། སྐྱེ་བ་མེད་པ་དང་། འགག་པ་མེད་པའི་ཆོས་ཉིད་མངོན་དུ་མཛད་ཅིང་། དེ་ལས་གཞན་པ་བྱང་ཆུབ་ཀྱེ་ཕྱོགས་ཀྱི་ཆོས་རྣམས་
ཀྱང་མངོན་དུ་མཛད་ནས། བདེ་བར་བཞུགས་པ་ཚེགས་ཆུང་ངུས་བཞུགས་སུ་གསོལ། དེ་བཞིན་གཤེགས་པ་ལྷུན་པོའི་རྩེ་མོའི་འོད་ཀྱི་རྒྱལ་པོ་ལ་ཕྱག་འཚལ་ལོ། །ཏདྱ་ཐཱ། ཤི་ཁེ། ཤི་ཁ་བནྡྷེ་སྭཱ་ཧཱ། དེའི་འོག་ཏུ་བདག་ཚོགས་ཤིན་ཏུ་བསགས། གནག་པ་ཡོངས་སུ་རྫོགས། བསམ་པ་ཡོངས་སུ་རྫོགས། སངས་རྒྱས་ཀྱི་བྱ་བ་ཡོངས་སུ་རྫོགས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པར་གྱུར་ཅིག །མངོན་པར་རྫོགས་པར་སངས་རྒྱས་ནས་ཆོས་ཀྱི་འཁོར་ལོ་རབ་ཏུ་བསྐོར་བར་བགྱི་བ་དེ་བཞིན་ཉིད་ཀྱི་འཁོར་ལོ་དང་། ཡང་དག་པའི་མཐའི་འཁོར་ལོ་དང་། ཇི་ལྟ་བ་བཞིན་གྱི་འཁོར་ལོ་དང་། སྐྱེ་བ་མེད་པ་དང་། འགག་པ་མེད་པའི་འཁོར་ལོ་དང་། སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པའི་འཁོར་ལོ་དང་། ངེས་པར་འབྱུང་བའི་འཁོར་ལོ་དང་། ངེས་པར་འབྱེད་པའི་འཁོར་ལོ་དང་། ཕུང་པོ་དང་། ཁམས་དང་། སྐྱེ་མཆེད་མི་དམིགས་པའི་འཁོར་ལོ་དང་། ནམ་མཁའ་ལྟ་བུའི་འཁོར་ལོ་དང་། ཆོས་ཀྱི་དབྱིངས་དབྱེར་མེད་པའི་འཁོར་ལོ་དང་། བག་ཆགས་དང་མཚམས་སྦྱོར་བའི་ཉོན་མོངས་པ་ཐམས་ཅད་སྤང་པའི་འཁོར་ལོ་དང་། ང་དང་། བདག་དང་། རྟག་པ་དང་། ཆད་པ་དང་། བདག་དང་བདག་གིར་འཛིན་པ་ནས་ཉན་ཐོས་དང་། རང་སངས་རྒྱས་དང་། བྱང་ཆུབ་སེམས་དཔའ་དང་། ཡང་དག་པར་རྫོགས་པའི་སངས་རྒྱས་སུ་མངོན་པར་ཞེན་པའི་བར་མི་དམིགས་པའི་འཁོར་ལོ་དང་། མདོར་ན་གང་ན་འཁོར་ལོ་མེད་པ། བསྐོར་བ་མེད་པ་དེ་ལྟ་བུའི་ཆོས་ཀྱི་འཁོར་ལོ་རབ་ཏུ་བསྐོར་བར་གྱུར་ཅིག །རབ་ཏུ་བསྐོར་ནས་སེམས་ཅན་རྣམས་ཡོངས་སུ་སྨིན་པར་བགྱིད་པར་གྱུར་ཅིག །ཡོངས་སུ་སྨིན་པར་བགྱིས་ནས་སེམས་ཅན་ལ་སྨན་པའི་སླད་དུ་སེམས་ཅན་གྱི་ཁམས་དང་། ལས་ཀྱི་ཁམས་དང་། ཉོན་མོངས་པའི་ཁམས་དང་། ནམ་མཁའི་ཁམས་ཇི་ཙམ་པ་དེ་ཙམ་དུ་གནས་པར་གྱུར་ཅིག །འཕགས་པ་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །ཏདྱ་ཐཱ། མ་ནྱེ། མ་ནྱེ།
སརྦྦ་མ་ནྱ་པྲ་ཧཱ་ཎེ་སྭཱ་ཧཱ། དགེ་བའི་རྩ་བ་དེ་དག་དང་། སངས་རྒྱས་ཀྱི་ཞིང་གི་ཡོན་ཏན་ཡོངས་སུ་སྦྱོང་བ་དང་། དེ་བཞིན་དུ་སེམས་ཅན་ཡོངས་སུ་སྨིན་པར་བགྱིས་པའི་དགེ་བའི་རྩ་བ་དང་། རབ་ཏུ་འབྱུང་བའི་དགེ་བའི་རྩ་བ་དང་། དེ་བཞིན་གཤེགས་པ་ལ་མཆོད་པ་དང་། རིམ་གྲོ་དང་། བསྙེན་བཀུར་བགྱིས་པའི་དགེ་བའི་རྩ་བ་དང་། ཕ་མ་དང་། བླ་མ་དང་། ཡོན་གནས་དང་། མཁན་པོ་དང་། སློབ་དཔོན་དང་། དམན་པ་དང་། བཀྲེན་པ་དང་། སྡུག་ཕོངས་པ་ལས་བསྒྲུབས་པའི་དགེ་བའི་རྩ་བ་དང་། དམ་པའི་ཆོས་རྣམ་པར་འབྱེད་པའི་དགེ་བའི་རྩ་བ་དང་། རྗེས་སུ་ཡི་རང་བ་དང་། མཐོལ་བ་དང་། བཤགས་པ་དང་ལྡན་པ་དང་། ཕྱག་འཚལ་བ་དང་མཆོད་པ་དང་ལྡན་པ་དང་། བྱིས་པ་ནས་བཟུང་ནས་ད་ལྟར་རམ། སྐྱེ་བ་ཐོག་མ་དང་ཐ་མ་མ་་མཆིས་པའི་འཁོར་བ་ན་འཁོར་བའི་སྐྱེ་བ་གཞན་དག་ཏུ་བསགས་པ་ནས་ཕུང་པོ་ལྷག་མ་མེད་པའི་མྱ་ངན་ལས་འདས་པའི་མཐའི་བར་གང་ལགས་པ་དེ་དག་སེམས་ཅན་ཐམས་ཅད་དང་ཐུན་མོང་དུ་བགྱིས་ནས། མཆོག་དང་། གཙོ་བོ་དང་། གྱ་ནོམ་པ་དང་། རབ་དང་། ཕུལ་དང་། བླ་ན་མ་མཆིས་པ་དང་། གོང་ན་མ་མཆིས་པ་དང་། གོང་མའི་ཡང་གོང་མ་དང་། མཉམ་པ་མ་མཆིས་པ་དང་། མི་མཉམ་པ་དང་མཉམ་པ་དང་། དམིགས་པ་མ་མཆིས་པ་དང་། རྣམ་པར་རྟོག་པ་མ་མཆིས་པ་དང་། མཚན་མ་མ་མཆིས་པ་དང་། སྤྲོས་པ་མ་མཆིས་པ་དང་། ཡི་གེ་མ་མཆིས་པ་དང་། ཉོན་མོངས་པ་མ་མཆིས་པ་དང་། ཆགས་པ་མ་མཆིས་པ་དང་། ནམ་མཁའ་ལྟར་མཉམ་པ་དང་། ལུས་དང་སེམས་གྲོལ་བ་དང་། རྣམ་པ་ཐམས་ཅད་ཀྱི་མཆོག་དང་ལྡན་པའི་སྟོང་པ་ཉིད་ཀྱི་ཡོངས་སུ་བསྔོ་བས་ཡོངས་སུ་བསྔོ་བར་བགྱིའོ། །ཇི་ལྟར་འདས་པ་དང་། མ་འོངས་པ་དང་། ད་ལྟར་བྱུང་བའི་སངས་རྒྱས་བཅོམ་ལྡན་འདས་དང་། བྱང་ཆུབ་སེམས་དཔའ་དེ་རྣམས་ཀྱིས་གཉིས་སུ་མེད་པའི་ཆོས་ཉིད་མངོན་དུ་མཛད་ནས་ཡོངས་སུ་བསྔོས་པ་དང་། ཡོངས་སུ་བསྡོ་བ་དང་། ཡོངས་སུ་བསྡོ་
བར་འགྱུར་བ་དེ་ལྟར་བདག་གིས་ཀྱང་ཡོངས་སུ་བསྔོ་བར་བགྱིའོ། །ཇི་ལྟར་ཆོས་ཉིད་དེ་དང་། ཇི་ལྟར་དེ་བཞིན་ཉིད་དེ་དང་། ཇི་ལྟར་ཡང་དག་པའི་མཐའ་དེ་དང་། ཇི་ལྟར་ཆོས་ཀྱི་དབྱིངས་དེ་དང་། ཇི་ལྟར་སྟོང་པ་ཉིད་དེ་དང་། ཇི་ལྟར་རྣམ་པ་ཐམས་ཅད་མཁྱེན་པ་ཉིད་ང་ནས་ཇི་ལྟར་དེ་ཁོ་ན་ཉིད་མཐོང་བའི་བར་གང་ལ་གཉིས་མེད་ཅིང་གཉིས་མ་ཡིན་པ་མེད་པ་དེ་ལྟར་ཡོངས་སུ་བསྔོ་བར་བགྱིའོ། །སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །ཏདྱ་ཐཱ། བུདྡྷེ་བུདྡྷེ། སརྦ་བུདྡྷ་བི་ཥ་ཡ་བི་ཤོ་དྷ་ནི་སྭཱ་ཧཱ། འཕགས་པ་ཡོངས་སུ་བསྔོ་བའི་རྒྱལ་པོ་སྔགས་དང་བཅས་པ་ཇི་སྙེད་པ་རྫོགས་སྷོ།། །།པཎྜི་ཏ་བིདྱཱ་ཀ་ར་པྲ་བྷ་དང་། ཞུ་ཆེན་གྱི་ལོ་ཙྪ་བ་ཡེ་ཤེས་སྙིང་པོ་དང་། དཔལ་བརྩེགས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པ།། །།