འཕགས་པ་གདོན་མི་ཟ་བ་ཞེས་བྱ་བའི་གཟུངས།
རྒྱ་གར་སྐད་དུ། ཨཱརྱ་ནི་ཤྩ་ཡ་ནཱ་མ་དྷཱ་ར་ཎཱི། བོད་སྐད་དུ། འཕགས་པ་གདོན་མི་ཟ་བ་ཞེས་བྱ་བའི་གཟུངས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་བེ་ཤ་ལིའི་སྤྲེའུ་རྫིང་གི་འགྲམ་གྱི་ཁང་བུ་བརྩེགས་པ་ན་བཞུགས་ཏེ། དེའི་ཚེ་བརྒྱ་བྱིན་ལྷའི་དབང་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ལྷ་མ་ཡིན་རྣམས་ཀྱིས་རྒོལ་ཞིང་གཙེས་ཏེ། བདག་དང་ལྷ་མ་ཡིན་དུས་ཡུན་རིང་པོར་མི་མཛའ་ཞིང་དགྲར་གྱུར་ན། བཅོམ་ལྡན་འདས་ཀྱིས་བདག་ལ་ཅི་ནས་ཀྱང་ཡུན་རིང་བོར་ཕན་པ་དང་། བདེ་བར་འགྱུར་བའི་ཕྱིར་དེ་ལྟ་བུའི་ཆོས་བདག་ལ་བཤད་དུ་གསོལ། དེ་སྐད་ཅེས་གསོལ་བ་དང་། བཅོམ་ལྡན་འདས་ཀྱིས་བརྒྱ་བྱིན་ལྷའི་དབང་པོ་ལ་འདི་སྐད་ཅེས་བཀའ་སྩལ་ཏོ། །དེའི་ཕྱིར་ཀཽ་ཤི་ཀ་ཁྱོད་ཀྱིས་ངའི་སྙིང་པོ་གདོན་མི་ཟ་བ་ཞེས་བྱ་བའི་རིག་སྔགས་འདི་ལོང་ཤིག །ཏདྱ་ཐཱ། ཨུརྦ་བ། ནི་རྦི་སིརྦི། ཨུརྦུ་རྦུ་རེ། ཧཱུ་ལེ་ཧཱུ་མེ། དི་ཁུ་མེ། པྲ་ཏྱྃ་ག་མ་ཨཱ་གཙྪ་མ་ཧཱ་མ་ཡཱུ་རི་ནཱ་མ། བདག་འཇིགས་པ་ཐམས་ཅད་དང་། འཚེ་བ་ཐམས་ཅད་དང་། འཁོར་ཐམས་ཅད་དང་བཅས་པ་ལ་སྲུངས་ཤིག་སྲུངས་ཤིག །སརྦ་ཀཱ་ཡ་བཱ་ག་མ་ན་ཤྩ་རི་ཏེ་སྭཱ་ཧཱ། བཅོམ་ལྡན་འདས་དགྱེས་ཤིང་དེ་སྐད་ཅེས་བཀའ་སྩལ་པ་དང་། བརྒྱ་བྱིན་ལྷའི་དབང་པོ་ཡིད་དགའ་སྟེ། བཅོམ་ལྡན་འདས་ཀྱིས་བཀའ་སྩལ་པ་ལ་རྗེས་སུ་ཡི་རངས་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་དེ་ཉིད་དུ་མི་སྣང་བར་གྱུར་ཏོ། །འཕགས་པ་གདོན་མི་ཟ་བ་ཞེས་བྱ་བའི་གཟུངས་རྫོགས་སྷོ།།