སོ་སོར་ཐར་པའི་མདོའི་རྣམ་བཤད་གཞུང་དོན་གསལ་བའི་ཉི་མ།
སོ་སོར་ཐར་པའི་མདོའི་རྣམ་བཤད་གཞུང་དོན་གསལ་བའི་ཉི་མ་བཞུགས།
གང་སྐུ་མཚན་དཔེའི་ཆ་ཤས་རབ་རྫོགས་དཀྱིལ་འཁོར་ནི། །གང་གསུང་འགྲོ་ལ་ཐར་ལམ་སྟོན་པའི་འོད་ཟེར་འཕྲོ། །གང་ཐུགས་ཤེས་བྱའི་ཆོས་ཀུན་ཇི་བཞིན་ལྷང་ངེར་གསལ། །ཐུབ་དབང་ཕྱག་འཚལ་བླ་མའི་གསུང་བཞིན་ངས་འདི་བྲི། །དེ་ལ་བདེ་བར་གཤེགས་པའི་བསྟན་པ་གསུང་རབ་ཡན་ལག་བཅུ་གཉིས་པོ་ཐམས་ཅད་སྡེ་སྣོད་གསུམ་དུ་འདུས་ལ། དེའི་ནང་ནས་འདུལ་བའི་སྡེ་སྣོད་ནི་བཅོམ་ལྡན་འདས་མྱ་ངན་ལས་འདས་པའི་འོག་ཏུ་འཕགས་པ་ཉེ་བར་འཁོར་གྱིས་བསྡུས་སོ། །འདུལ་བའི་སྡེ་སྣོད་ལའང་དུམ་བུ་བཞི་སྟེ། རྣམ་འབྱེད་དང་། གཞི་དང་། ཕྲན་ཚེགས་དང་། གཞུང་བླ་མའོ། །དེ་དག་གནས་པའི་སྙིང་དང་སྙིང་པོ་ནི་སོ་སོར་ཐར་པའི་མདོ་འདི་ཡིན་པས། འདི་འཆད་པ་ལ་བཞི་སྟེ། མཚན་དོན། འགྱུར་ཕྱག །གཞུང་དོན། མཇུག་གི་དོན་ནོ། མཚན་དོན། དང་པོ་ལ་གཉིས་ལས་བསྒྱུར་བ་ནི།
རྒྱ་གར་གྱི་སྐད་དུ་པྲ་ཏི་ནི་བོད་དུ་སྐད་དུ་སོ་སོར་དང་། མོཀྵ་ནི་ཐར་པ་དང་། སུ་ཏྲ་ནི་མདོའོ། །གཉིས་པ་བཤད་པ་ནི། པྲ་ཏིའི་སྒྲ་ནི་དང་པོ་དང་། སོ་སོ་དང་། ཐབས་གསུམ་ལ་འཇུག་པ་ལས། དང་པོར་སྡོམ་མིན་ལས་ཐར་པའི་ཕྱིར་དང་པོར་ཐར་པ་ཞེས་བྱ་བའམ། ཡང་ན་གང་གིས་བསླབ་པའི་གཞི་ཡང་དག་པར་བླངས་ནས་བསྲུངས་པས་དེ་ཐར་གྱི་གཞན་གྱིས་བསྲུངས་པས་གཞན་མི་ཐར་པའི་ཕྱིར་ན་སོ་སོར་ཐར་པ་ཞེས་པའམ། ཡང་ན་ཐར་པ་ནི་མྱ་ངན་ལས་འདས་པ་ཡིན་ལ་དེ་ཐོབ་པའི་ཐབས་ཡིན་པས་ན་སོ་སོར་ཐར་པ་སྟེ། ལྷག་པའི་ཚུལ་ཁྲིམས་ཀྱི་བསླབ་པ་ཡིན་ལ་དེ་བརྗོད་བྱར་བྱེད་པའི་དོན་གྱིས་ན་འདི་ལ་ཡང་སོ་སོར་ཐར་པ་ཞེས་བྱའོ། །དོན་མདོར་བསྡུས་པ་ཙམ་ཞིག་སྟོན་པས་ན་མདོའོ། །འགྱུར་གྱི་ཕྱག་གཉིས་པ་འགྱུར་གྱི་ཕྱག་ནི། ཐམས་ཅད་མཁྱེན་པ་ལ་ཕྱག་འཚལ་ལོ་ཞེས་པའོ། །གསུམ་པ་ལ་ལྔ་སྟེ། མཆོད་བརྗོད་དང་། གླེང་གླེང་བ། ཡང་དག་པར་བརྩམ་པ། གཞུང་རྒྱས་པའི་མཚན་ཉིད། བསྡུས་པའི་མཚན་ཉིད་དོ། །དང་པོ་ལ་གཉིས་ཏེ། མཆོད་བརྗོད་དངོས་དང་། བཤད་པར་དམ་བཅའ་བའོ། །དང་པོ་ལ་བསྟོད་པ་དང་།
ཕྱག་འཚལ་བའོ། །དང་པོ་ལ། གཞན་དོན་ཕུན་སུམ་ཚོགས་པའི་སྒོ་ནས་བསྟོད་པ་དང་། རང་དོན་ཕུན་སུམ་ཚོགས་པའི་སྒོ་ནས་བསྟོད་པའོ། །དང་པོ་ལ་ལྔ་ལས་གཞན་གྱི་རྒྱུ་ཕུན་སུམ་ཚོགས་པའི་སྒོ་ནས་བསྟོད་པ་ནི། བཅོམ་ལྡན་འདས་ཆོས་ཅན། གཞན་དོན་གྱི་རྒྱུ་ཕུན་སུམ་ཚོགས་པ་དང་ལྡན་ཏེ། བསྐལ་པ་གྲངས་མེད་གསུམ་དུ་ཚོགས་གཉིས་བསགས་པ་ལས་བརྟེན་ནས་མངོན་པར་རྫོགས་པར་སངས་རྒྱས་པའི་སྙན་པའི་བ་དན་འཇིག་རྟེན་ཁམས་གསུམ་ན་གྲགས་པས་སོ། །ཇི་ལྟར་གྲགས་ཤེ་ན། བཅོམ་ལྡན་འདས་མངོན་པར་རྫོགས་པར་སངས་རྒྱས་པའི་ཚེ་དང་པོར་ས་བླ་བ་རྣམས་ལ་གྲགས། དེ་ནས་བར་སྣང་གི་ལྷ་དང་། དེ་ནས་རྒྱལ་ཆེན་རིས་བཞི་དང་། དེ་ནས་རིམ་གྱིས་འོག་མིན་གྱི་བར་དུ་གྲགས་པས་སོ། །གཟུགས་མེད་དུ་གྲགས་པ་མི་འཐད་དེ། དེ་ནས་སྒྲ་ཐོས་པ་མེད་པའི་ཕྱིར་ཞེ་ན། སྐྱོན་མེད་དེ་གཟུགས་ཅན་གྱི་ཁམས་སུ་སྐྱེས་པའི་ཚེ་གྲགས་པས་གྲགས་པའི་ས་བོན་རྒྱུད་ལ་ཡོད་པ་ལ་གྲགས་ཞེས་བརྗོད་པའི་ཕྱིར་རོ། །གཉིས་པ་ཕན་འདོགས་ཕུན་སུམ་ཚོགས་པའི་སྒོ་ནས་བསྟོད་པ་ནི། ཆོས་ཅན། ཕན་འདོགས་ཕུན་སུམ་ཚོགས་པ་དང་ལྡན་ཏེ། དམ་པས་གསུངས་པའི་ཆོས་བདེན་བཞི་སྟོན་པའི་སྒྲ་སེང་གེའི་སྒྲ་དང་ལྡན་པ་བསྒྲགས་པར་མཛད་པའི་ཕྱིར་ཏེ། གདུལ་བྱ་ལ་ཆོས་ཀྱི་འཁོར་ལོ་བདེན་པ་བཞི་ལ་ལན་གསུམ་དུ་བཟླས་ཏེ་རྣམ་པ་བཅུ་གཉིས་སུ་བསྐོར་བའི་ཕྱིར། བདེན་བཞི་སྟོན་པའི་སྒྲ་དེ་ཇི་ལྟར་སེང་གེའི་སྒྲ་དང་འདྲ་ཞེ་ན། དེ་དང་འདྲ་བ་ཡིན་ཏེ། མུ་སྟེགས་བྱེད་གླང་པོ་ལྟ་བུ་སྐྲག་པར་མཛད་ཅིང་རིགས་ཀྱི་བུ་སེང་
གེའི་ཕྲུ་གུ་ལྟ་བུ་སྡུད་པར་མཛད་པའི་ཕྱིར། གསུམ་པ་ཤེས་རབ་ཕུན་སུམ་ཚོགས་པའི་སྒོ་ནས་བསྟོད་པ་ནི། ཆོས་ཅན། ཤེས་རབ་ཕུན་སུམ་ཚོགས་པ་དང་ལྡན་ཏེ། ཆོས་ཐམས་ཅད་མངོན་སུམ་དུ་མཁྱེན་པའི་ཕྱིར། བཞི་པ་ཐུགས་རྗེ་ཕུན་སུམ་ཚོགས་པའི་སྒོ་ནས་བསྟོད་པ་ནི། ཆོས་ཅན། ཐུགས་རྗེ་ཕུན་སུམ་ཚོགས་པ་དང་ལྡན་པ་ཡིན་ཏེ། ལུང་དང་རྟོགས་པའི་ཆོས་དཀོན་མཆོག་གི་མཛོད་འཕགས་པའི་དགེ་འདུན་འཁོར་དུ་བརྙེས་ནས་སྨིན་པར་མཛད་པའི་ཕྱིར། ལྔ་པ་འབྲས་བུའི་ཁྱད་པར་ཕུན་སུམ་ཚོགས་པའི་སྒོ་ནས་བསྟོད་པ་ནི། ཆོས་ཅན། འབྲས་བུའི་ཁྱད་པར་ཕུན་སུམ་ཚོགས་པ་དང་ལྡན་ཏེ། ཞབས་ལ་ཚངས་པ་དང་ལྷ་དབང་ལ་སོགས་པའི་གཙུག་གི་ནོར་བུས་གཏུགས་ཏེ་ཕྱག་བྱས་པའི་ཕྱིར་རོ། །གཉིས་པ་ལ་གཉིས་ལས་སྤངས་པ་ཕུན་སུམ་ཚོགས་པའི་སྒོ་ནས་བསྟོད་པ་ནི། ཆོས་ཅན། སྤངས་པ་ཕུན་སུམ་ཚོགས་པ་དང་ལྡན་ཏེ། སྡུག་བསྔལ་གྱི་རྒྱ་མཚོའི་གཏིང་དང་ཕ་རོལ་གྱི་མཐའ་དཔག་ཏུ་མེད་པ་ལས་བརྒལ་བས་སོ། །གཉིས་པ་ཡེ་ཤེས་ཕུན་སུམ་ཚོགས་པའི་སྒོ་ནས་བསྟོད་པ་ནི། ཆོས་ཅན། ཡེ་ཤེས་ཕུན་སུམ་ཚོགས་པ་དང་ལྡན་ཏེ། ཤེས་བྱ་ཐམས་ཅད་ལ་ཆགས་ཐོགས་མེད་པའི་ཡེ་ཤེས་བརྙེས་པས་འགྲོ་བའི་གཙོ་བོར་གྱུར་པའི་ཕྱིར། གཉིས་པ་ཕྱག་འཚལ་བ་ནི། དེ་ལྟ་བུའི་སྟོན་པ་ལ་སྤྱི་བོས་ཕྱག་འཚལ་བ་ཆོས་ཅན། དོན་ཡོད་དེ། གནས་སྐབས་དང་མཐར་ཐུག་གི་དོན་དུ་མ་འགྲུབ་པའི་ཆེད་ཡིན་པའི་ཕྱིར། གཉིས་པ་བཤད་པར་དམ་བཅའ་བ་ནི།
འོ་ན་ཕྱག་བཙལ་ཏེ་ལས་སུ་བྱ་བ་ཅི་ཞིག་བྱེད་ཅེ་ན། ཐམས་ཅད་མཁྱེན་པས་གསུངས་པའི་བསླབ་པའི་གཞི་ལུང་སྡེ་བཞི་ནི་དཀོན་མཆོག་ཡིན་ལ། དེའི་སྣོད་སོ་སོར་ཐར་པའི་མདོ་འདི་ཉན་ཐོས་འཕགས་པའི་ཚོགས་དགེ་འདུན་གྱི་དབུས་སུ་དབྱེ་བར་བྱའོ། །གཉིས་པ་གླེང་གླེང་བའི་མཚན་ཉིད་ལ་གསུམ། སོ་སོར་ཐར་པའི་ཆེ་བ་བརྗོད་པ། ཚོགས་གཉིས་ཀྱི་ལམ་འབྲས་བུ་དང་བཅས་པ། སོ་སོར་ཐར་པ་བསྒྲུབ་པར་གདམས་པའོ། །དང་པོ་ལ་གསུམ། ཚེ་འདིའི་འབྲས་བུ། ཕྱི་མའི་འབྲས་བུ། སོ་སོར་ཐར་པ་ལ་སྟོན་པ་དང་འདྲ་བར་བསྟོད་པའོ། །དང་པོ་ནི། སོ་སོར་ཐར་པའི་མདོ་དེ་འཕགས་པའི་ཚོགས་ཀྱི་དབུས་སུ་དབྱེ་བར་བྱའོ་ཞེས་བཤད་ན། དེ་ལ་ཆེ་བའི་ཡོན་ཏན་ཅི་ཞིག་ཡོད་ཅེ་ན། སོ་སོར་ཐར་པ་འདི་ཆོས་ཅན། ཁྱོད་གོམས་པར་བྱས་པ་ལ་རྟེན་ནས་ཚེ་འདིར་ཆེ་བའི་འབྲས་བུ་ཐོབ་པ་ཡིན་ཏེ། ཁྱོད་སངས་རྒྱས་ཀྱིས་གསུངས་པའི་འདུལ་བ་སྡེ་བཞི་པོ་གང་ཆེན་མཚོ་དང་འདྲ་བ་ཐམས་ཅད་ཀྱི་བརྗོད་བྱ་ལྟུང་བ་སྡེ་ལྔ་དང་གཞི་བཅུ་བདུན་ལ་སོགས་པའི་མཚན་ཉིད་རྣམ་པར་གནས་པའི་སྙིང་དང་སྙིང་པོ་ཡིན་པའི་ཕྱིར། འོ་ན་སངས་རྒྱས་ཀྱིས་གསུངས་པའི་འདུལ་བ་དེ་ཇི་ལྟར་གངས་ཆེན་མཚོ་དང་འདྲ་ཞེ་ན། དེ་ཆོས་ཅན། ཁྱོད་གངས་ཆེན་མཚོ་དང་འདྲ་བ་ཡིན་ཏེ། རྒྱ་མཚོ་ལ་གཞིའི་གཏིང་དང་ཕ་རོལ་གྱི་མཐའ་དཔག་ཏུ་མེད་པ་བཞིན་དུ་ཁྱོད་ཀྱི་ཀུན་སློང་གི་གཏིང་དང་འབྲས་བུའི་མཐའ་ཡང་དཔག་ཏུ་མེད་པའི་ཕྱིར། སོ་སོར་ཐར་པ་འདི་ཆོས་ཅན། ཁྱོད་དམ་པའི་ཆོས་ཀྱི་རྒྱལ་པོ་ཡི་མདོ་ལ་སོགས་པའི་ཆོས་ཀུན་གྱི་ནི་འདྲེན་པའི་མཆོག་ཡིན་ཏེ། ཁྱོད་ལ་བརྟེན་ནས་མདོ་ལ་སོགས་པའི་ཆོས་རྣམས་འབྱུང་བའི་ཕྱིར། སོ་སོ་ཐར་པ་འདི་ནི་ཆོས་ཅན། ཁྱོད་དགེ་སློང་མྱ་ངན་ལས་འདས་པའི་ནོར་བུ་དོན་དུ་གཉེར་
བའི་ཚོང་པའི་ཚོགས་ཀྱི་བསླབ་པའི་ཟོང་གི་ཚོང་ཁང་ཆེན་པོ་ཡིན་ཏེ། ཁྱོད་ཀྱི་ནང་དུ་བསླབ་པ་ཐམས་ཅད་ཆུད་པའི་ཕྱིར། སོ་སོར་ཐར་པ་འདི་ཆོས་ཅན། ཚུལ་ཁྲིམས་འཆལ་བ་སྦྲུལ་གདུག་པ་དང་འདྲ་བས་ཟིན་པའི་གང་ཟག་རྣམས་ཀྱི་སྦྲུལ་གྱི་གདུག་པ་དུག་དང་འདྲ་བའི་ལྷུང་བ་རྣམ་པར་སེལ་བའི་སྨན་ཡིན་ཏེ། ཁྱོད་ཀྱིས་ལྟུང་བ་ཞི་བར་བྱེད་པའི་ཕྱིར། སོ་སོར་ཐར་པ་འདི་ནི་ཆོས་ཅན། ཁྱོད་ལང་ཚོ་དང་བག་མེད་པ་སོགས་ཀྱིས་རྣམ་པར་འཁྲུལ་བའི་རྐང་གཉིས་གཞོན་ནུ་བྱ་བ་དང་བྱ་བ་མ་ཡིན་པ་མི་ཤེས་པ་རྣམས་ལ་གླང་ཆེན་གྱི་ལྕགས་ཀྱུ་ལྟ་བུ་ཡིན་ཏེ། ཁྱོད་ཀྱིས་བག་མེད་པའི་ཉེས་དམིགས་བསྟན་པའི་སྒོ་ནས་དེ་དག་སྐྲག་པར་བྱེད་པའི་ཕྱིར། གཉིས་པ་ནི། སོ་སོར་ཐར་པ་འདི་ཆོས་ཅན། ཁྱོད་མཚོ་བས་ཟབ་པའི་འཁོར་བ་ལས་སྒྲོལ་བའི་བརྒལ་ཐབས་ཡིན་ཏེ། ཁྱོད་ལ་བརྟེན་ནས་ཟག་མེད་ཀྱི་ལམ་འབྱུང་བའི་ཕྱིར། སོ་སོར་ཐར་པ་འདི་ནི་ཆོས་ཅན། ཁྱོད་བཟང་འགྲོ་ལྷ་མིན་འགྲོ་བའི་ངེས་པའི་ཆུ་ལོན་དང་ཟམ་པ་ཡིན་ཏེ། ཁྱོད་ངན་འགྲོའི་ཆུ་བོ་འགོག་བྱེད་པ་དང་། བདེ་འགྲོའི་རྒྱུ་ཡིན་པའི་ཕྱིར། སོ་སོར་ཐར་པ་འདི་ནི་ཆོས་ཅན། ཁྱོད་ཉོན་མོངས་པ་ཕམ་པར་བྱེད་པའི་འཕགས་པའི་ལམ་རྒྱལ་པོ་ཡི་ནི་འདྲེན་པ་མཆོག་བློན་པོ་ལྟ་བུ་ཡིན་ཏེ། ཁྱོད་ཀྱིས་འཕགས་ལམ་འདྲེན་པར་བྱེད་པའི་ཕྱིར། སོ་སོར་ཐར་པ་འདི་ནི་ཆོས་ཅན། ཁྱོད་ཐར་པའི་གྲོང་ཁྱེར་དུ་འཇུག་པའི་ཐེམ་སྐས་ཀྱི་གཞི་རྟེན་དང་འདྲ་བར་གནས་ཏེ། ཁྱོད་ལམ་ཀུན་གྱི་གཞིར་གྱུར་པའི་ཕྱིར། གསུམ་པ་ནི། ཤེས་བྱ་ཆོས་ཅན། བཅོམ་ལྡན་འདས་ང་ནི་ཕུང་པོ་ལྷག་མ་མེད་པའི་དབྱིངས་སུ་མྱ་ངན་ལས་འདས་པར་གྱུར་པ་ན་སོ་སོར་ཐར་པ་འདི་ནི་དགེ་སློང་ཁྱེད་རྣམས་ཀྱི་སྟོན་པ་ཡིན་ནོ་ཞེས་རང་བྱུང་སངས་རྒྱས་
ཉིད་ཀྱིས་གུས་པ་དང་བཅས་པར་ནན་ཏན་གྱིས་དགེ་སློང་གི་ཚོགས་དགེ་འདུན་གྱི་མདུན་དུ་སོ་སོར་ཐར་པ་ལ་བསྟོད་པའི་རྒྱུ་མཚན་ཡོད་དེ། སོ་སོར་ཐར་པ་དེས་གདུལ་བྱ་ལ་བྱ་བ་དང་བྱ་བ་མ་ཡིན་པ་སྟོན་པའི་ཕྱིར། གཉིས་པ་ལ་གསུམ། ཚོགས་ཀྱི་ལམ་དཀོན་པ། ཚོགས་ཀྱི་ལམ་རྙེད་པ། རྙེད་ནས་འབད་པར་བྱའོ། །དང་པོ་ནི། ཚོགས་ཀྱི་ལམ་དེ་ལ་བཅུ་གསུམ་ཡོད་དེ། གཞན་གྱི་འབྱོར་པ། རང་གི་འབྱོར་པ། དགེ་བའི་ཆོས་ལ་འདུན་པ། ཚུལ་ཁྲིམས་ཀྱི་སྡོམ་པ། དབང་པོ་སྡོམ་པ། ཟས་ཀྱི་ཚོད་རིག་པ། ནམ་གྱི་ཆ་སྟོད་དང་ཆ་སྨད་ལ་མི་ཉལ་བར་རྣལ་འབྱོར་ལ་བརྩོན་པ། ཤེས་བཞིན་དུ་སྤྱོད་པ། དགེ་བའི་བཤེས་གཉེན། ཆོས་ཉན་ཅིང་སེམས་པ། བར་ཆད་མེད་པ། གཏོང་བ་སྤེལ་བ། དགེ་སྦྱོང་གི་རྒྱན་ནོ། །འདི་དག་ལ་ཅིའི་ཕྱིར་ཚོགས་ཀྱི་ལམ་ཞེས་བྱ་ཞེ་ན། སྦྱོར་བའི་ལམ་ལ་སོགས་པའི་རྒྱུའི་ཚོགས་དང་གཞིར་གྱུར་པའི་ལམ་ཡིན་པའི་ཕྱིར་ཚོགས་ཀྱི་ལམ་ཞེས་བྱའོ། །ཤེས་བྱ་ཆོས་ཅན། སངས་རྒྱས་འཇིག་རྟེན་དུ་འབྱུང་བ་དང་། ཆོས་བསྟན་པ་དང་། བསྟན་པ་གནས་པ་དང་། དེའི་རྗེས་སུ་འཇུག་པ་དང་། གཞན་ཕྱིར་སྙིང་བརྩེ་བ་རྣམས་རྙེད་པ་ཤིན་ཏུ་དཀོན་ཏེ། སངས་རྒྱས་ཞེས་བྱ་བའི་སྒྲ་འདི་ཡང་འཇིག་རྟེན་དག་ན་རབ་ཏུ་དཀོན་པའི་ཕྱིར། འདིས་གཞན་གྱི་འབྱོར་པ་རྙེད་དཀའ་བར་བསྟན་ཏོ། །ཆོས་ཅན། ཡུལ་དབུས་སུ་སྐྱེས་པ། དབང་པོ་ཚང་བ། ལས་མཐའ་མ་ལོག་པ། གནས་ལ་དད་པ་རྣམས་ཤིན་ཏུ་དཀོན་ཏེ། མིའི་ལུས་ཉིད་ཀྱང་རྙེད་པ་ཤིན་ཏུ་དཀའ་བའི་ཕྱིར། འདིས་རང་འབྱོར་རྙེད་དཀའ་བར་བསྟན་ཏོ། །ཆོས་ཅན། སངས་རྒྱས་སམ་དེའི་ཉན་ཐོས་ལས་ཆོས་ཐོས་ཤིང་དད་པ་ཐོབ་ནས་རབ་ཏུ་བྱུང་སྟེ་ནན་ཏན་གྱིས་ཉམས་སུ་ལེན་པ་ཤིན་ཏུ་དཀོན་ཏེ། ཆོས་ཐོས་ཤིང་དད་པ་ཐོབ་སྟེ་རབ་ཏུ་འབྱུང་བ་
ཤིན་ཏུ་དཀོན་པའི་ཕྱིར། འདིས་དགེ་བའི་ཆོས་ལ་འདུན་པ་རྙེད་དཀའ་བར་བསྟན་ཏོ། །དེ་བཞིན་དུ་རབ་ཏུ་བྱུང་བ་རྣམས་ཀྱི་ཚུལ་ཁྲིམས་ཕུན་སུམ་ཚོགས་པར་རབ་ཏུ་དཀོན་ནོ། །འདིས་ཚུལ་ཁྲིམས་ཀྱི་སྡོམ་པ་ནས་ཤེས་བཞིན་དུ་སྤྱོད་པའི་བར་རྣམས་དཀོན་པར་བསྟན་ཏེ། ཚུལ་ཁྲིམས་ཀྱི་སྡོམ་པ་ཙམ་ཡང་རྙེད་དཀའ་བར་བསྟན་པའི་ཕྱིར། ཚུལ་ཁྲིམས་ཡོངས་སུ་དག་པར་གྱུར་ཀྱང་གྲོགས་བཟང་པོ་ཤིན་ཏུ་རྙེད་པར་དཀའོ། །འདིས་དགེ་བའི་བཤེས་གཉེན་ནས་དགེ་སྦྱོང་གི་རྒྱན་གྱི་བར་རྣམས་རྙེད་དཀའ་བར་བསྟན་ཏེ། ཚུལ་ཁྲིམས་རྣམ་པར་དག་ཀྱང་དགེ་བའི་བཤེས་གཉེན་ཤིན་ཏུ་རྙེད་དཀའ་བར་བསྟན་པའི་ཕྱིར་རོ། །གཉིས་པ་ནི། འཇིག་རྟེན་དུ་སངས་རྒྱས་འབྱུང་བ་དང་། མི་ལུས་ཐོབ་པ་དང་རབ་ཏུ་འབྱུང་བ་དང་ཚུལ་ཁྲིམས་ཕུན་སུམ་ཚོགས་པ་དང་གྲོགས་བཟང་པོ་རྙེད་པར་གྱུར་ནས་སོ་སོར་ཐར་པ་ལ་ནན་ཏན་བྱ་དགོས་ཏེ། སངས་རྒྱས་འཇིག་རྟེན་དུ་འབྱུང་བ་སོགས་རྙེད་དཀའ་བའི་ཕྱིར་རོ། །གསུམ་པ་ནི། སྒོ་གསུམ་གྱི་བྱ་བ་ལ་མཁས་པ་བདག་ལ་ལེགས་པ་འདོད་ཅིང་ཚོགས་ཀྱི་ལམ་དེ་དག་འབྲས་བུ་སྦྱོར་བའི་ལམ་སོགས་དང་བཅས་པར་བྱེད་འདོད་པའི་སྡོམ་བརྩོན་རྣམས་ཀྱིས་སོ་སོར་ཐར་པ་མཉན་པའི་ཕྱིར་ནི་འབད་པར་བྱ་བ་ཡིན་ཏེ། སོ་སོར་ཐར་པ་ལ་བརྟེན་ནས་ཚོགས་ཀྱི་ལམ་འབྲས་བུ་དང་བཅས་པར་འགྱུར་བའི་ཕྱིར་རོ། །གསུམ་པ་སོ་སོར་ཐར་པ་བསྒྲུབ་པར་གདམས་པ་ནི། དགེ་སློང་མིག་ལ་སོགས་པའི་དབང་པོ་དུལ་བ་སྟེ་བསྲུངས་པ་གནས་སྐབས་ཀུན་ཏུ་དབང་པོ་དུལ་ཞིང་སངས་རྒྱས་ཀྱི་ཕྱིར་དུ་མི་འགྱུར་བར་རབ་ཏུ་བྱུང་བ་ངེས་པར་ཐར་པ་འདོད་པ་རྣམས་ཀྱིས་སོ་སོར་ཐར་པ་རྟག་ཏུ་མི་ཉམས་པར་བསྲུངས་དགོས་ཏེ། ཚུལ་ཁྲིམས་ལ་བརྟེན་ནས་ཐར་པ་མྱ་ངན་ལས་འདས་པ་འཐོབ་
པའི་ཕྱིར། དེས་ན་རྐང་པ་དང་པོས་རང་དང་། གཉིས་པས་གཞན་དང་། གསུམ་པས་ཆོས་ཀྱི་དབང་དུ་བྱས་ནས་བསྒྲུབ་པ་བསྟན་ཅིང་། བཞི་པས་སྒྲུབ་པའི་མཚན་ཉིད་བསྟན་ཏོ། ། གསུམ་པ་ཡང་དག་པར་བརྩམས་པའི་མཚན་ཉིད་ལ་བདུན། སོ་སོར་ཐར་པ་རྙེད་དཀའ་བ། དཀོན་མཆོག་གསུམ་འབྱུང་བདེ་བ། དགེ་བའི་བཤེས་གཉེན་ལ་བརྟེན་པ་བདེ་བ། སྡིག་གྲོགས་སྤངས་པ་བདེ་བ། དགེ་བའི་བཤེས་གཉེན་གྱི་ཁྱད་པར་ལ་བརྟེན་པ་བདེ་བ། ཐོབ་པར་བྱ་བ་དང་སྒྲུབ་པར་བྱེད་པ་བདེ་བ། སྒྲུབ་པར་བྱེད་པ་སྦྱངས་པའི་ཡོན་ཏན་དང་ལྡན་པ་བདེའོ། །དང་པོ་ནི། ཤེས་བྱ་ཆོས་ཅན། བསྐལ་པ་ཆེན་པོ་བྱེ་བ་རྣམས་སུ་ཡང་ལུང་དང་རྟོགས་པའི་སོ་སོར་ཐར་པ་རྣ་བའི་ཤེས་པས་ཐོས་པ་དང་ཡིད་ཀྱི་ཤེས་པས་ཚིག་གཟུང་བ་དང་ཚིག་དོན་གཉིས་ཀ་འཛིན་པ་རྙེད་པར་དཀའ་སྟེ། བསྐལ་པ་བྱེ་བར་ཡང་རང་གི་འབྱོར་པ་དང་གཞན་གྱི་འབྱོར་པ་རྙེད་དཀའ་བའི་ཕྱིར། སྔ་མ་གསུམ་པས་ཀྱང་ནན་ཏན་གྱིས་བསྒྲུབ་པའང་ཤིན་ཏུ་རྙེད་པ་དཀའ་སྟེ། ཡང་དག་པར་སྒྲུབ་པ་ནི་མངོན་པར་བརྩོན་པ་ལ་རག་ལས་པའི་ཕྱིར། འདིས་སོ་སོར་ཐར་པ་ལུང་དང་རྟོགས་པའི་སྒོ་ནས་རྙེད་དཀའ་བར་བསྟན་ཏོ། །གཉིས་པ་ནི། སངས་རྒྱས་རྣམས་ནི་ཆོས་ཅན། ཁྱོད་འབྱུང་བ་བདེ་ཞེས་བརྗོད་པའི་རྒྱུ་མཚན་ཡོད་དེ། ཁྱོད་རྣམ་གྲོལ་གྱི་བདེ་བ་ཐོབ་པའི་རྒྱུ་ཡིན་པའི་ཕྱིར། གསུང་རབ་ཡན་ལག་བཅུ་གཉིས་ལ་སོགས་པའི་ཆོས་བསྟན་པ་ཡང་ཆོས་ཅན། བདེ་
བ་ཡིན་ཞེས་བརྗོད་པའི་རྒྱུ་མཚན་ཡོད་དེ། བདེ་བའི་རྒྱུ་ཡིན་པའི་ཕྱིར། དགེ་འདུན་ལྟ་བ་དང་ཆོ་ག་སོགས་མཐུན་པ་ཆོས་ཅན། བདེ་བ་ཡིན་ཞེས་བརྗོད་པའི་རྒྱུ་མཚན་ཡོད་དེ། བདེ་བའི་རྒྱུ་ཡིན་པའི་ཕྱིར། ལྟ་བ་སོགས་མཐུན་པའི་དགེ་འདུན་གྱི་བསླབ་པ་གསུམ་ཉམས་སུ་ལེན་པའི་དཀའ་ཐུབ་ཆོས་ཅན། བདེ་བ་ཞེས་བརྗོད་པའི་རྒྱུ་མཚན་ཡོད་དེ། བདེ་བའི་རྒྱུ་ཡིན་པའི་ཕྱིར། གསུམ་པ་ནི། དགྲ་བཅོམ་པ་ལ་སོགས་པའི་འཕགས་པ་རྣམས་ནི་ཆོས་ཅན། ཁྱོད་དགེ་བའི་བཤེས་གཉེན་དུ་མཐོང་བ་བདེ་བ་ཡིན་ཏེ། ཁྱོད་དེ་ལྟར་མཐོང་བ་དེ་འདི་དང་ཕྱི་མར་བདེ་བའི་ཕྱིར། སོ་སོར་སྐྱེ་བོའི་སྐྱེས་བུ་དམ་པ་བྱང་ཆུབ་སེམས་དཔའ་དག་ཆོས་ཅན། ཁྱོད་དང་འགྲོགས་པ་བདེ་བ་ཡིན་ཏེ། དེ་འདི་དང་ཕྱི་མར་བདེ་བའི་ཕྱིར། བཞི་པ་ནི། བྱིས་པ་སྡིག་པའི་གྲོགས་པོ་རྣམས་ནི་ཆོས་ཅན། ཁྱོད་མ་མཐོང་བ་སྟེ་སྤངས་ན་རྟག་ཏུ་བདེ་བ་ཉིད་དུ་འགྱུར་ཏེ། ཁྱོད་སྡུག་བསྔལ་གྱི་རྒྱུ་ཡིན་པའི་ཕྱིར། ལྔ་པ་ནི། དགེ་བའི་བཤེས་གཉེན་གྱི་ཁྱད་པར་ནི་གཉིས་ཏེ། བཏགས་པ་བ་དང་། དོན་དམ་པའོ། །བཏགས་པ་བ་ཡང་ཡིན་ཏེ། ཞི་གནས་ཀྱི་ཡན་ལག་ལ་གནས་པ་དང་། ལྷག་མཐོང་གི་ཡན་ལག་ལ་གནས་པའོ། །དང་པོ་ནི། ཚུལ་ཁྲིམས་ལྡན་པ་ཞེས་པས་བསྟན་ཏེ། ཚུལ་ཁྲིམས་ལ་གནས་ན་ཞི་གནས་ལ་སེམས་འཇོག་པར་འགྱུར་བའི་ཕྱིར། གཉིས་པ་ནི། མང་དུ་ཐོས་པ་ཞེས་པས་བསྟན་ཏེ། མང་དུ་ཐོས་པས་ལྷག་མཐོང་གི་ངོ་བོར་གྱུར་པའི་ཤེས་རབ་སྐྱེ་བའི་ཕྱིར། གཉིས་པ་དོན་དམ་པ་ནི། ཡང་སྲིད་རྣམ་པར་གྲོལ་བ་ཡི། དགྲ་བཅོམ་པ་ཞེས་པས་བསྟན་ཏོ། །དེས་ན་ཚུལ་ཁྲིམས་དང་ལྡན་པ་ཆོས་ཅན། ཁྱོད་མཐོང་བ་བདེ་ཞེས་བརྗོད་པའི་རྒྱུ་མཚན་ཡོད་དེ། ཁྱོད་གཞན་ལ་གནོད་པའི་བསམ་པ་ལས་ལོག་པའི་སྐྱེས་བུ་ཡིན་པའི་ཕྱིར། མང་དུ་ཐོས་པ་ཆོས་ཅན། ཁྱོད་མཐོང་བ་བདེ་ཞེས་བརྗོད་པའི་རྒྱུ་མཚན་ཡོད་དེ། ཁྱོད་ཀྱིས་ལྟ་ངན་དང་འགྱོད་པ་དང་ཐེ་ཚོམ་སེལ་ནུས་པའི་ཕྱིར། ཡང་སྲིད་པར་སྐྱེ་བ་ལས་རྣམ་པར་གྲོལ་བའི་དགྲ་བཅོམ་པ་དག་ཆོས་ཅན། ཁྱོད་མཐོང་བ་བདེ་ཞེས་བརྗོད་པའི་རྒྱུ་མཚན་ཡོད་དེ། ཁྱོད་
དགེ་ལེགས་ཀྱི་བསམ་པ་མཆོག་དང་ལྡན་པའི་ཕྱིར། དྲུག་པ་ནི། ཤེས་བྱ་ཆོས་ཅན། མཐའ་གཉིས་སྤངས་པའི་ལམ་བདེ་བ་ནས་རྣམ་གྲོལ་གྱི་འབྲས་བུ་འཐོབ་པ་བདེ་བ་ཡིན་ཏེ། འཇུག་ངོགས་བདེ་བའི་ཆུ་ཀླུང་ནས་ཆུ་བླང་བདེ་བའི་ཕྱིར། ཆོས་ལ་གོམས་པར་བྱེད་པའི་སྐྱེ་བོ་ཚོགས་སྦྱོར་བ་ཆོས་ཅན། ཁྱོད་བདེ་ཞེས་བརྗོད་པའི་རྒྱུ་མཚན་ཡོད་དེ། ཁྱོད་རྣམ་གྲོལ་གྱི་བདེ་བ་ཐོབ་པའི་རྒྱུ་ཡིན་པའི་ཕྱིར། ཟག་མེད་ཀྱི་ཤེས་རབ་ཐོབ་པར་གྱུར་པའི་མཐོང་སྒོམ་པ་ཆོས་ཅན། ཁྱོད་བདེ་ཞེས་བརྗོད་པའི་རྒྱུ་མཚན་ཡོད་དེ། ཁྱོད་ཀྱིས་མཐོང་ལམ་དང་སྒོམ་ལམ་གྱི་རྣམ་གྲོལ་གྱི་བདེ་བ་ཐོབ་པའི་ཕྱིར། ངའོ་སྙམ་པའི་ང་རྒྱལ་ཟད་པའི་དགྲ་བཅོམ་པ་ཆོས་ཅན། ཁྱོད་བདེ་བ་ཡིན་ཏེ། ཁྱོད་རྣམ་གྲོལ་གྱི་བདེ་བ་མངོན་སུམ་དུ་གྱུར་པ་ཡིན་པའི་ཕྱིར། བདུན་པ་ནི། ཤེས་བྱ་ཆོས་ཅན། བསླབ་པ་གསུམ་ངེས་པར་བྱས་ཤིང་དབང་པོ་ཐུལ་བ་དག་དགོན་པ་སྐྱེ་བོའི་འདུ་ལོང་ཞི་བ་རྣམས་སུ་ཚངས་སྤྱོད་ཀྱིས་ཚེ་མཐར་ཕྱིན་པའི་རྒས་པར་གྱུར་པ་དང་། སྡེ་སྣོད་གསུམ་མང་དུ་ཐོས་པ་ནགས་ཀྱི་ནང་དག་ཏུ་ལང་ཚོ་ཡོལ་བ་རྣམས་ཀྱིས་གནས་པ་བདེ་བ་ཡིན་ཏེ། འདི་དང་ཕྱི་མ་དང་རང་དག་གཞན་དང་། ཚངས་པར་སྤྱོད་པའི་མཐའ་བདེ་བ་ཡིན་པའི་ཕྱིར། བཞི་པ་གཞུང་རྒྱས་པའི་མཚན་ཉིད་ལ་གཉིས། དུས་དང་པོར་བྱ་བ་དང་། མདོ་གདོན་པའོ། །དང་པོ་ལ་དྲུག་སོ་སོར་ཐར་པ་ལ་རྣ་བ་མི་གཏོད་པའི་ཉེས་དམིགས་མི་འདུ་བ་དགག །མཆོད་ཅིང་ལུང་དབོག་པ་ཡང་དག་པར་བསྒྲུབ་ཏུ་བཞུག་པ། བསྒྲུབ་པའི་ཕན་ཡོན། མ་བསྒྲུབས་པའི་ཉེས་དམིགས་སོ། །དང་པོ་ནི། ཚེ་ཁྱད་པར་ཅན་དང་ལྡན་པས་ཚེ་དང་ལྡན་པ་དག་ཅེས་རྒན་གཞོན་དག་ལ་སྙན་པའི་ཚིག་གིས་འབོད་པའོ། །སོ་ག་ཞེས་པ་ནི་
གསོ་སྦྱོང་འདོན་པའི་དུས་མཚོན་པ་ཡིན་ཏེ། གསོ་སྦྱོང་མཚོན་པའི་དུས་དེ་ལ་དགུན། དགུན་སྨད། དཔྱིད། སོ་ག །དབྱར། སྟོན་དང་དྲུག་གོ །དྲུག་པོ་གང་གི་ཚེ་གསོ་སྦྱོང་འདོན་པ་དེའི་ཚེ་དེའི་མིང་སྨོས་པར་བྱ་བ་ཡིན་ནོ། །རྣམས་ཞེས་པའི་མང་ཚིག་སྨོས་པ་ནི་དྲུག་པོ་རེ་རེ་ལ་ཟླ་བ་གཉིས་གཉིས་ཟླ་བ་ཕྱེད་པ་བཞི་བཞི་ཡོད་པ་ཤེས་པའི་ཆེད་དུའོ། །དེ་ཡང་དགུན་གྱི་དུས་སུ་གསོ་སྦྱོང་འདོན་པའི་ཚེ་ནི་ཚེ་དང་ལྡན་པ་དག་དགུན་རྣམས་ཀྱི་ཞེས་འདོན་པར་བྱེད་པ་ཡིན་ལ། དེ་བཞིན་དུ་དགུན་སྨད་སོགས་ལའང་ཤེས་པར་བྱའོ། །འོ་ན་དུས་ཚིགས་དྲུག་པོ་གང་ཞེ་ན། སྟོན་ཟླ་ཐ་ཆུང་ཉ་ནས་དགུན་ཟླ་ར་བ་ཉའི་བར་དང་། དེ་ནས་དགུན་ཟླ་འབྲིང་པོ་ཉའི་བར་གྱི་ཟླ་བ་གཉིས་ནི་དགུན་གྱི་དུས་དང་། དགུན་འབྲིང་ཉ་ནས་ཐ་ཆུང་ཉ། དེ་ནས་དཔྱིད་ཟླ་ར་བ་ཉའི་བར་གྱི་ཟླ་བ་གཉིས་ནི་དགུན་སྨད་ཀྱི་དུས་དང་། དཔྱིད་ཟླ་ར་བ་ཉ་ནས་འབྲིང་པོ་ཉ། དེ་ནས་ཐ་ཆུང་ཉའི་བར་གྱི་ཟླ་བ་གཉིས་ནི་དཔྱིད་ཀྱི་དུས་དང་། དཔྱིད་ཟླ་ཐ་ཆུང་ཉ་ནས་དབྱར་ཟླ་ར་བ་ཉ། དེ་ནས་དབྱར་འབྲིང་ཉའི་བར་གྱི་ཟླ་བ་གཉིས་ནི་སོ་གའི་དུས་དང་། དབྱར་འབྲིང་ཉ་ནས་ཐ་ཆུང་ཉ། དེ་ནས་སྟོན་ར་ཉའི་བར་ནི་དབྱར་གྱི་དུས་དང་། སྟོན་ར་ཉ་ནས་འབྲིང་པོ་ཉ། དེ་ནས་ཐ་ཆུང་ཉའི་བར་ནི་སྟོན་གྱི་དུས་སོ། །འདས་པ་དང་ལྷག་མ་ཇི་ཙམ་པ་དེ་ཙམ་མོ་ཞེས་པ་ནི་ཟླ་བ་འདས་པ་དང་། ཟླ་བ་ལྷག་མ་ཇི་ཙམ་པ་དེ་བརྗོད་ཅེས་པའི་དོན་ནོ། །འོ་ན་ཇི་ལྟར་བརྗོད་ཅེ་ན། དགུན་གྱི་དུས་ལ་མདོ་འདོན་པའི་དུས་བཞི་ཡོད་དེ། སྟོན་ཟླ་ཐ་ཆུང་གི་གནམ་སྟོང་དང་། དགུན་ཟླ་ར་བའི་ཉ་དང་། དེའི་གནམ་སྟོང་དང་། དགུན་ཟླ་འབྲིང་པོའི་ཉའོ། །དེ་ཡང་ཐ་ཆུང་གི་གནམ་སྟོང་གི་ཚེ་ནི་ཚེ་དང་ལྡན་པ་དག་སང་གི་སྐྱ་རེངས་ཤར་བ་ན་དགུན་རྣམས་ཀྱི་ཟླ་བ་གཉིས་
ལས་ཕྱེད་ནི་འདས་ལ་ཕྱེད་དང་གཉིས་ནི་ལུས་སོ་ཞེས་བརྗོད་པར་བྱེད་པ་ཡིན་ལ། དགུན་ཟླ་ར་བའི་ཉ་ལ་ནི་ཚེ་དང་ལྡན་པ་དག་དགུན་རྣམས་ཀྱི་ཟླ་བ་གཉིས་ལས་གཅིག་ནི་འདས་ལ་གཅིག་ནི་ལུས་སོ་ཞེས་དང་། དགུན་ཟླ་ར་བའི་གནམ་སྟོང་ལ་ནི་ཚེ་དང་ལྡན་པ་དག་དགུན་རྣམས་ཀྱི་ཟླ་བ་གཉིས་ལས་ཕྱེད་དང་གཉིས་ནི་འདས་ལ་ཕྱེད་ནི་ལུས་སོ་ཞེས་དང་། དགུན་ཟླ་འབྲིང་པོའི་ཉ་ལ་ནི་ཚེ་དང་ལྡན་པ་དག་དགུན་རྣམས་ཀྱི་ཟླ་བ་གཉིས་ནི་འདས་ཏེ་ལྷག་མ་མ་ལུས་སོ་ཞེས་རྗོད་པར་བྱེད་པ་ཡིན་ནོ། །དེ་བཞིན་དུ་དགུན་སྨད་སོགས་ལའང་ཤེས་པར་བྱའོ། །འོ་ན་དུས་བརྗོད་པ་ལ་དགོས་པ་ཅི་ཡོད་ཅེ་ན། དགོས་པ་ཡོད་དེ། འཇིག་རྟེན་གྱི་ཐ་སྙད་ལ་མཁས་པར་བྱ་བ་དང་། ཚེ་འདས་པ་སེམས་ལ་བཞག་པ་དང་། འཁོར་བས་སྐྱོ་ཞིང་དགེ་བ་ལ་བརྩོན་པ་དང་། གསོ་སྦྱོང་གི་ཉི་མ་ཤེས་པར་བྱ་བའི་ཕྱིར། ཤེས་བྱ་ཆོས་ཅན། འཁོར་བ་ལས་སྐྱོ་ཞིང་དགེ་བ་ལ་བརྩོན་པར་བྱ་བའི་ཕྱིར་དུ་ཚེ་དང་ལྡན་པ་དག་གིས་བག་ཡོད་པས་རྣལ་འབྱོར་དུ་བྱ་སྟེ། ཚེ་དང་ལྡན་པ་དག་རྒ་བ་དང་འཆི་བ་མངོན་པར་འོང་ཞིང་སྟོན་པའི་བསྟན་པ་ཡང་འཇིག་པར་འགྱུར་བས་སོ། །ཁྱབ་སྟེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་བྱང་ཆུབ་ཟད་མི་སྐྱེ་ཤེས་པའི་ཡེ་ཤེས་དང་གཞན་ཡང་དགེ་བའི་ཆོས་གང་དག་བྱང་ཆུབ་དེ་ལྟ་བུ་དང་མཐུན་པའི་དགེ་བའི་ཆོས་བྱང་ཆུབ་ཀྱི་ཕྱོགས་དྲན་པ་ཉེར་གཞག་ལ་སོགས་པ་སོ་བདུན་པོ་རྣམས་ཀྱང་བག་ཡོད་པས་འཐོབ་པའི་ཕྱིར། འོ་ན་འཁོར་བས་སྐྱོ་ཞིང་དགེ་བ་ལ་བརྩོན་དགོས་པའི་རྒྱུ་མཚན་དུ་རྒ་བ་དང་འཆི་བ་མངོན་པར་འོང་བ་དང་སྟོན་པའི་བསྟན་པ་འཇིག་པར་འགྱུར་བ་ཅིའི་ཕྱིར་སྨོས་ཤེ་ན། དེ་ལྟར་སྨོས་པའི་རྒྱུ་མཚན་ཡོད་དེ། ཚངས་པར་སྤྱོད་པ་ལུས་དང་གནས་གཉིས་ཀྱིས་
འགྲུབ། རྒ་བ་དང་འཆི་བས་ལུས་དགེ་བ་ལ་སྦྱོར་བཟོད་པ་དང་རྒྱུན་མ་ཆད་པ་དེ་ཉམས་པར་བྱེད། སྟོན་པའི་བསྟན་པ་ཞིག་ན་ཚངས་པར་སྤྱོད་པ་སྐྱེ་བའི་གནས་མེད་པའི་ཕྱིར་རོ། །འོ་ན་མ་རིག་པ་ལ་སོགས་པའི་ཡན་ལག་གཞན་རྣམས་མི་སྟོན་པར་རྒ་ཤི་ཁོ་ན་སྟོན་པའི་རྒྱུ་མཚན་ཅི་ཞེ་ན། རྒྱུ་མཚན་ཡོད་དེ། དེ་ཚངས་སྤྱོད་ཉམས་པར་བྱེད་པའི་རྒྱུའི་གཙོ་བོ་ཡིན་པའི་ཕྱིར་ཏེ། ཚངས་སྤྱོད་ལུས་དར་ལ་བབ་པ་དང་རྒྱུན་མ་ཆད་པས་འགྲུབ་པ་གང་ཞིག །རྒ་བས་ལང་ཚོ་ཉམས་པར་བྱེད། འཆི་བས་ལུས་རྒྱུན་མ་ཆད་པ་ཉམས་པར་བྱེད་པའི་ཕྱིར། གཉིས་པ་ནི། གསོ་སྦྱོང་གི་གནས་སུ་འདུ་བ་ལས་གཞན་པའི་དགེ་འདུན་གྱིས་ཐོག་མར་བྱ་བ་ཅི་ཡོད་དེ་ཅི་ཡང་མེད་པ་ཡིན་ཏེ། བཅོམ་ལྡན་འདས་ཀྱི་ཉན་ཐོས་ཀྱི་དགེ་འདུན་ནི་ཡིད་ཀྱི་དོན་ཉུང་བ་ལུས་ངག་གི་བྱ་བ་ཉུང་བ་ཡིན་པས་སོ། །དེས་ན་ཚེ་དང་ལྡན་པ་དག་དགེ་སློང་མཚམས་ནང་ན་གནས་པ། ཁ་སྐོང་བར་འོས་པ་གསོ་སྦྱོང་གི་གནས་སུ་མ་ལྷགས་པ་རྣམས་ལ་འདུན་པ་དང་ཡོངས་སུ་དག་པ་དྲིས་ཤིག་དང་དྲིས་ནས་ཀྱང་དགེ་སློང་ལ་བརྗོད་པར་བྱའོ། །འདུན་པ་དང་ཡོངས་དག་ཕུལ་བ་ལ་དགོས་པ་ཅི་ཡོད་ཅེ་ན། འདུན་པ་ཕུལ་བ་ལ་དགོས་པ་ཡོད་དེ། དགེ་འདུན་གྱི་ལས་ལ་མ་འདུས་པས་མི་མཐུན་པའི་ཉེས་པ་མི་འབྱུང་བར་བྱ་བའི་ཕྱིར་རོ། །ཡོངས་དག་ཕུལ་བའི་དགོས་པ་ནི། འབུལ་བ་པོ་རང་ཉིད་ཀྱིས་ལས་བྱས་པར་འགྱུར་བའི་ཕྱིར་རོ། །གསུམ་པ་ནི་ཤཱཀྱ་སེང་གེ་དེ་ལ་ནི་སེན་མོས་མཚོན་པའི་སོར་མོ་བཅུ་ཡིས་ཐལ་མོ་སྦྱར་ཏེ་སོ་སོར་ཐར་པ་འདོན་པ་ལྔ་པོ་གདོན་པར་བྱ་ཡིས་སློབ་མ་གདུལ་བའི་དོན་དུ་བཀའ་སྡུད་པ་པོའམ་མདོ་འདོན་པ་པོ་ང་ལ་ཉོན་ཅིག །ཅེས་པའོ། །དེ་ཡང་ཤཱཀྱ་ཅེས་པ་གདུང་གི་མིང་ཡིན་ལ་དེས་རིགས་རྣམ་པར་དག་པ་བསྟན་ཏོ། །སེང་གེ་ཅེས་པས་
རབ་ཏུ་བྱུང་བའི་ཡོན་ཏན་རྣམ་པར་དག་པ་བསྟན་ཏོ། །བཞི་པ་ནི། སོ་སོར་ཐར་པ་ཉན་ནས་ཇི་ལྟར་བྱ་ཞེ་ན། སོ་སོར་ཐར་པ་ཐོས་ནས་དྲང་སྲོང་ཆེན་པོ་རྫོགས་པའི་སངས་རྒྱས་ཀྱིས་ཇི་སྐད་དུ་གསུངས་པ་བཞིན་དུ་བསྒྲུབ་པར་བྱ་ཞིང་རང་བཞིན་གྱི་ཁ་ན་མ་ཐོ་བར་མ་ཟད་བཅས་པའི་ཁ་ན་མ་ཐོ་བ་ཕྲ་མོ་རྣམས་སྤོང་བ་ལ་ཡང་བརྟུལ་ཅིང་འབད་པས་ལྷུར་བྱེད་པ་ཉིད་དུ་གྱིས་ཤིག་སྟེ། དགེ་བའི་ཕྱོགས་ལ་འཇུག་པའི་ཚེ་རྟག་ཏུ་འབད་པས་བརྩོན་འགྲུས་ཀྱི་ལྕག་གིས་བདའ་བར་བྱ་བ་ཡི་སེམས་རྟ་རྨུ་རྒོད་དང་འདྲ་བ་མི་དགེ་བའི་ཕྱོགས་ལས་ཁ་ཕྱིར་ཀླན་པར་དཀའ་བ་ལ་མཐུན་པ་རྐྱེན་དུ་འཚམ་པ་གཟེར་རྣོན་བརྒྱ་པ་ཡི་སྲབ་ནི་སོ་སོར་ཐར་པའི་མདོ་འདི་ཡིན་ནོ། །ལྔ་པ་ནི། སོ་སོར་ཐར་པའི་སྒྲུབ་པ་ཕན་ཡོན་ཆེ་སྟེ། བསླབ་པ་འདོད་པའི་ཆེ་བའི་བདག་ཉིད་དག་ཆད་ལས་ལ་མི་ལྟོས་པ་ངག་ཙམ་གྱིས་བྱ་བ་མ་ཡིན་པ་ལས་ལྡོག་ཅིང་བསླབ་པའི་མཚམས་ལས་མི་འདའ་བའི་མི་དག་ནི་རྟ་བཟང་པོ་དང་འདྲ་བར་ཉོན་མོངས་པའི་གཡུལ་ལས་ངེས་པར་རྒྱལ་བར་འགྱུར་རོ། །དྲུག་པ་ནི། སོ་སོར་ཐར་པ་མ་བསྒྲུབས་ན་ཉེས་པ་ཆེ་སྟེ། མུ་སྟེགས་ལྟ་བུ་སུ་ལ་སོ་སོར་ཐར་པའི་སྲབ་འདི་མེད་པ་དང་། དེར་མ་ཟད་འདོད་པ་ལ་སྤྱོད་པ་ནམ་དུ་ཡང་བསླབ་པ་འདོད་པར་མི་འགྱུར་བ་དེ་དག་ཉོན་མོངས་པའི་གཡུལ་གྱིས་དཀྲུགས་ཤིང་སེམས་ཞི་བར་འཇོག་པ་དང་བྲལ་ནས་འཁོར་(༩ན)བར་རྣམ་པར་འཁྱམ་པར་འགྱུར་བས་སོ། །གཉིས་པ་མདོ་གདོན་པ་ལ་གཉིས། དགེ་འདུན་ཐུགས་བསྟུན་པའི་ཕྱིར་དུ་གསོལ་བའི་ལས་བྱ་བ་དང་། མདོ་གདོན་པ་དངོས་སོ། །དང་པོ་ནི། དགེ་འདུན་བཙུན་པ་རྣམས་གསན་པ་སྟེ་སྙན་གཏད་དུ་གསོལ། བསླབ་པ་གསུམ་གསོ་ཞིང་སྡིག་པ་སྦྱོང་བས་ན་གསོ་སྦྱོང་སྟེ་མཐུན་པའི་གསོ་སྦྱོང་དང་། ཞི་གནས་ཀྱི་གསོ་སྦྱོང་ངོ་། །མཐུན་པའི་གསོ་སྦྱོང་ལ་
ལྔ་སྟེ། གསོ་སྦྱོང་བཅུ་བཞི་པ། བཅོ་ལྔ་པ། བཀྲ་ཤིས་ཀྱི་གསོ་སྦྱོང་། གནོད་པ་བྱུང་བ་ཟློག་པའི་གསོ་སྦྱོང་། དགེ་འདུན་བྱེ་བ་བསྡུམ་པའི་གསོ་སྦྱོང་ངོ་། །དེ་དག་ལས་དེང་དགེ་འདུན་གྱི་གསོ་སྦྱོང་བཅུ་བཞི་པའམ་བཅོ་ལྔ་པ་སྟེ། གལ་ཏེ་དགེ་འདུན་གྱིས་གསོ་སྦྱོང་གི་དུས་ལ་བབ་ཅིང་གསོ་སྦྱོང་བྱ་བར་བཟོད་ན། དགེ་འདུན་གྱིས་ཚིག་ཅང་མི་སྨྲ་བས་གནང་བར་མཛོད་ཅིག་དང་། དེང་དགེ་འདུན་གསོ་སྦྱོང་མཛད་དེ་སོ་སོར་ཐར་པའི་མདོ་འདོན་པ་ལྔ་པོ་གླེང་གཞི་དང་། ཕམ་པ་དང་། དགེ་འདུན་ལྷག་མ་དང་། མ་ངེས་པ་དང་། རིལ་གྱིས་འདོན་པ་དག་གདོན་ཏོ། །སྤྱིར་ལས་བརྒྱ་རྩ་གཅིག་པོ་ལས་གསུམ་གྱིས་བསྡུས་ཏེ། གསོལ་བའི་ལས་དང་། གསོལ་བ་དང་གཉིས་ཀྱི་ལས་དང་། གསོལ་བ་དང་བཞིའི་ལས་སོ། །དེ་ཡང་གསོལ་བའི་ལས་ཉི་ཤུ་རྩ་བཞི། གསོལ་གཉིས་ཀྱི་ལས་བཞི་བཅུ་རྩ་བདུན། གསོལ་བཞིའི་ལས་སུམ་ཅུའོ། །འདི་ནི་གསོལ་བ་འབའ་ཞིག་པའི་ལས་ཉི་ཤུ་རྩ་བཞིའི་ནང་ནས་གསོལ་བའི་ལས་གཅིག་ཡིན་ཞེས་པའོ། །གཉིས་པ་ལ་གཉིས། རྒྱས་པར་བཤད་པ་དང་། མཇུག་བསྡུ་བའོ། །དང་པོ་ལ་ལྔ་སྟེ། གླེང་གཞི་གདོན་པ། ཕམ་པ་གདོན་པ། ལྷག་མ་གདོན་པ། མ་ངེས་པ་གདོན་པ། རིལ་གྱིས་གདོན་པའོ། །དང་པོ་ལ་དྲུག་གླེང་གཞི་རྣམ་པར་གཞག་པའི་ལུང་དབོག །གླེང་གཞི་རྣམ་པར་གཞག་པའི་ཐབས་བསྟན། མ་དག་པའི་ཉེས་དམིགས། དག་པའི་ཕན་ཡོན། མཇུག་བསྡུ་བ། རྣམ་གཞག་བསྒྲག་པའོ། །དང་པོ་ནི། ཚེ་དང་ལྡན་པ་དག་བདག་ཅག་མཐུན་པའི་གསོ་སྦྱོང་བྱ་སྟེ། རྣམ་པ་གང་གིས་བྱ་ཞེ་ན། སོ་སོར་ཐར་པའི་མདོ་གདོན་པ་ལྔ་པོ་གདོན་པས་བྱ་བ་ཡིན་ནོ། །དེས་ན་ཉན་པ་པོའི་འཁོར་ཁྱེད་ཅག་སུ་ལ་བཤགས་བྱའི་ལྟུང་བ་ཡོད་པར་བཤགས་པ་དང་། བསྡམ་བྱའི་ལྟུང་
བ་བསྡམ་པ་དང་། བྱིན་གྱིས་བརླབ་པར་བྱ་བའི་ལྟུང་བ་བྱིན་གྱིས་བརླབ་པའི་ཐབས་དེས་མཐོལ་ཞིག །བཤགས་པར་བྱ་བ་ལ་སོགས་པའི་ལྟུང་བ་མེད་ན་བཤགས་པའི་ཚིག་ཅང་མ་སྨྲ་ཞིག །ཅང་མི་སྨྲ་ན། བདག་གིས་ཚེ་དང་ལྡན་པ་དག་རྒྱུད་ཡོངས་སུ་དག་པས་གསོ་སྦྱོང་གི་སྣོད་དུ་རིག་པར་བྱའོ། །གཉིས་པ་ནི། ཇི་ལྟར་ཏེ་དཔེར་ན། དགེ་སློང་ཞིག་གིས་གསོ་སྦྱོང་གི་མདུན་རོལ་དུ་ལྟུང་བ་དྲན་ཅིང་མཐོང་བ་ཡུལ་དགེ་སློང་གི་མདུན་དུ་བཤགས་པ་ན། ཡུལ་གྱི་དགེ་སློང་གིས་ལྟུང་བ་མཐོང་ངམ་ཞེས་དང་ཕྱིན་ཆད་སྡོམ་མམ་ཞེས་སོ་སོར་དྲིས་ནས་རྟེན་གྱི་དགེ་སློང་གིས་མཐོང་ཞེས་དང་། སྡོམ་ཞེས་ལན་གསུམ་གྱི་བར་དུ་ལན་བཏབ་པ་དེ་བཞིན་དུ། གསོ་སྦྱོང་ཉན་པའི་དགེ་སློང་གི་འཁོར་འདི་ལྟ་བུར་ཡང་ཅི་འདི་ལ་ཁྱེད་ཡོངས་སུ་དག་གམ་ཞེས་ལན་གསུམ་གྱི་བར་དུ་བསྒྲག་པར་བྱ་བ་ཡིན་ནོ། །གསུམ་པ་ནི། ཡང་དགེ་སློང་གསོ་སྦྱོང་ཉན་པའི་དགེ་སློང་གི་འཁོར་འདི་ལྟ་བུ་ཅི་འདི་ལ་ཁྱེད་ཡོངས་སུ་དག་གམ་ཞེས་ལན་གསུམ་གྱི་བར་དུ་བསྒྲགས་པ་ན། ལྟུང་བ་བཤགས་པ་སོགས་ཀྱིས་ཕྱིར་མ་བཅོས་པར་ཡོད་ལ་དྲན་བཞིན་དུ་མི་མཐོལ་ན་ལྟུང་བར་འགྱུར་ཏེ། དེ་ཤེས་བཞིན་དུ་རྫུན་དུ་སྨྲ་བ་ཡིན་པའི་ཕྱིར་རོ། །ཤེས་བཞིན་དུ་རྫུན་དུ་སྨྲ་ན་ཉེས་པ་འགྱུར་ཏེ། ཚེ་དང་ལྡན་པ་དག་ཤེས་བཞིན་དུ་རྫུན་སྨྲ་བ་ནི་བཅོམ་ལྡན་འདས་ཀྱིས་མངོན་མཐོ་དང་ངེས་ལེགས་ལ་བར་དུ་གཅོད་པའི་ཆོས་སུ་གསུངས་སོ། །དེས་ན་སྤྱིར་རྫུན་རྣམ་པ་ལྔ་ཡོད་དེ། ཕམ་པ་དང་། དགེ་འདུན་ལྷག་མ་དང་། སྦོམ་པོ་དང་། ལྟུང་བྱེད་དང་། ཉེས་བྱས་སུ་འགྱུར་བའོ། །འདིར་ནི་ཉེས་བྱས་སུ་འགྱུར་བའི་རྫུན་ཡིན་ཏེ། གསོ་སྦྱོང་ལ་ཅི་འདི་ལ་ཁྱེད་ཡོངས་སུ་དག་གམ་ཞེས་དྲིས་པ་ན་མ་དག་པར་ཤེས་བཞིན་དུ་ཅང་མི་སྨྲ་བས་འདའ་བར་བྱེད་ན་ཉེས་བྱས་སོ། །ཞེས་གསུངས་པའི་
ཕྱིར། དེ་ཡང་ཉེས་བྱས་ཡོངས་སུ་རྫོགས་པ་ཡིན་གྱི་ཡིད་ཀྱི་མ་ཡིན་ཏེ་ཁ་རྣམ་པར་འགྱུར་བ་ལ་སོགས་པའི་རྣམ་པར་རིག་བྱེད་ཡོད་པའི་ཕྱིར། ཞེས་གསུངས་སོ། །བཞི་པ་ནི། ཤེས་བཞིན་དུ་རྫུན་སྨྲས་ན་མངོན་མཐོ་དང་ངེས་ལེགས་ལ་བར་དུ་གཅོད་པ་དེ་བས་ན་དགེ་སློང་ལྟུང་བ་བྱུང་བ་རྣམ་པར་དག་པར་འདོད་པས། རང་རྒྱུད་ལ་ལྟུང་བ་ཕྱིར་མ་བཅོས་པར་ཡོད་ལ་དྲན་ཞིང་མཐོང་བ་བཤགས་པ་ལ་སོགས་པའི་སྒོ་ནས་མཐོལ་བར་བྱའོ། །དེ་ལྟར་མཐོང་ན་ནི་ཕན་ཡོན་ཆེ་སྟེ། མངོན་མཐོ་ངེས་ལེགས་ཀྱི་བདེ་བ་ལ་རེག་པར་གནས་པ་འགྱུར་རོ། །མ་མཐོལ་མ་བཤགས་ན་ནི་དེ་ལྟར་མི་འགྱུར་རོ། །ལྔ་པ་ནི། ཚེ་དང་ལྡན་པ་དག་བདག་གིས་སོ་སོར་ཐར་པའི་མདོ་གདོན་པའི་རྒྱུ་གླེང་གཞི་བཏོན་ཟིན་ཏོ། །མཇུག་བསྡུ་འདི་ལྟར་བྱས་པ་ཆོས་ཅན། དགོས་པ་ཡོད་དེ། སྔར་སོ་སོར་ཐར་པའི་མདོ་འདོན་པ་གདོན་ཏོ་ཞེས་དམ་བཅས་པ་དེ་མཐར་ཕྱིན་པར་རྟོགས་པའི་ཕྱིར་དང་། ཉན་པ་པོ་རྣམས་སྤྲོ་བ་བསྐྱེད་པའི་ཆེད་ཡིན་པའི་ཕྱིར་རོ། །དྲུག་པ་ནི། གླེང་གཞི་བཏོན་པ་དེ་ལ་མདོ་འདོན་པ་པོ་བདག་གིས་ཚེ་དང་ལྡན་པ་དག་ལ་ཅི་གསོ་སྦྱོང་འདི་ལ་ཉན་པ་པོའི་འཁོར་ཁྱེད་ལྟུང་བ་མ་བྱུང་ཞིང་མ་བཅབ་པས་ཡོངས་སུ་དག་གམ་ཞེས་དྲིའོ། །འདི་ནི་དྲི་བ་དང་པོའོ། །ཅི་འདི་ལ་ཁྱེད་ཡོངས་སུ་དག་གམ་ཞེས་ལན་གཉིས་ལན་གསུམ་དུ་དྲིའོ། །ལན་གསུམ་ཁོ་ནར་འདྲི་བའི་རྒྱུ་མཚན་ཅི་ཞེ་ན། ཤེས་བྱ་ཆོས་ཅན། དེ་ལྟར་འདྲི་བའི་རྒྱུ་མཚན་ཡོད་དེ། གསུམ་ཁོ་ན་རན་པར་དགོངས་པའི་ཕྱིར་ཏེ། གསུམ་ལས་ཉུང་ན་འགའ་ཞིག་གིས་མ་ཐོས་པ་དང་མངས་ན་དུས་ཡོལ་བ་ལ་སོགས་པའི་ཉེས་དམིགས་ཡོད་པའི་ཕྱིར་རོ། །འདི་ལ་ཚེ་དང་ལྡན་པ་དག་ལྟུང་བས་ཡོངས་སུ་དག་ན་འདི་ལྟར་ཅང་མ་
སྨྲ་བས་དག་པ་དེ་དེ་བཞིན་དུ་འཛིན་ཏོ། །གཉིས་པ་ཕམ་པ་གདོན་པ་ལ་དྲུག་སྡོམ་གྱིས་མདོར་བསྟན། ཕམ་པ་གདོན་པའི་ལུང་དབོག །སོ་སོའི་མཚན་ཉིད་རྒྱས་པར་བཤད། མཇུག་བསྡུ། མ་དག་པའི་ཉེས་དམིགས། རྣམ་གཞག་བསྒྲགས་པའོ། །དང་པོ་ནི། དེ་ཡང་འཕགས་པ་ཉེ་བར་འཁོར་གྱིས་འདུལ་བའི་སྡེ་སྣོད་ཀྱི་བཀའ་སྡུད་པར་བྱེད་པའི་ཚེ་ན་སྡོམ་གསུམ་གྱི་སྒོ་ནས་བསྡུས་ཏེ། སྤྱི་སྡོམ། དངོས་ཀྱི་སྡོམ། བར་གྱི་སྡོམ་གསུམ་དུ་བསྡུས་པའི་ཕྱིར་རོ། །དེ་ཡང་སྤྱི་སྡོམ་ནི། སྤྱིའི་དོན་ཚིགས་བཅད་དུ་བསྡུས་པ་སྟེ། དཔེར་ན་ལྟུང་བྱེད་ཀྱི་སྤྱིའི་དོན་ཚིགས་བཅད་དུ་བསྡུས་པའི་སྤྱི་སྡོམ་ལ། ཤེས་བཞིན་དང་ནི་ས་བོན་དང་། ཞེས་པ་ལྟ་བུའོ། །དངོས་ཀྱི་སྡོམ་ནི། དངོས་དོན་ཚིགས་བཅད་དུ་བསྡུས་པ་སྟེ། དཔེར་ན་དགེ་འདུན་ལྷག་མའི་དངོས་ཀྱི་དོན་ཚིགས་བཅད་དུ་བསྡུས་པ། ཁུ་བ་འཛིན་པ་འཁྲིག་ཚིག་བསྙེན་བཀུར་སྨྱན། །ཞེས་པ་ལྟ་བུའོ། །བར་གྱི་སྡོམ་ནི། འཕྲོས་དོན་ཚིགས་བཅད་དུ་བསྡུས་པའོ། །དེ་ལྟར་སྡོམ་གསུམ་གྱི་ནང་ནས་ཕམ་པར་འགྱུར་བ་བཞིའི་དངོས་ཀྱི་དོན་སྡོམ་དུ་བསྡུས་པ་ལ། མི་ཚངས་པར་སྤྱད་པར་མི་བྱ་བ་དང་། བརྐུ་བར་མི་བྱ་བ་དང་། མི་ལ་གསད་པར་མི་བྱ་བ་དང་། རྫུན་དུ་སྨྲ་བ་དང་བཅས་པ་མི་བྱ་བའི་ཆོས་བཞི་ཕམ་པ་འདོན་པའི་སྐབས་འདིར་ནི་སངས་རྒྱས་བཅོམ་ལྡན་འདས་ཀྱིས་གསུངས་པ་ཡིན་ནོ། །དེས་ན། ཕམ་པ་བཞི་སྡོམ་དུ་བསྡུས་ནས་བསྟན་པ་ཆོས་ཅན། དགོས་པ་ཡོད་དེ། མ་འོངས་པ་ན་སྐྱེ་བོ་ལུང་དང་རྟོགས་པའི་ཡོན་ཏན་མེད་པ་དག་ཡན་ལག་ལ་སྒྲོ་འདོགས་པ་དང་། སྐུར་བ་འདེབས་པ་སྤང་བྱའི་ཕྱིར་དང་། ཚིག་ཉུང་ངུས་དོན་གྱི་སྤྱི་ཙམ་བདེ་བླག་ཏུ་རྟོགས་པར་འདོད་པ་དག་རྗེས་སུ་གཟུང་བར་བྱ་བའི་ཆེད་ཡིན་པའི་ཕྱིར། གཉིས་པ་ནི། འོ་ན་འདུལ་བའི་སྡེ་སྣོད་ཡི་གེར་མི་འབྲི་བ་ཡིན་ན།
ཅིའི་ཕྱིར་ཕམ་པར་འགྱུར་བ་བཞི་ཡོད་པར་ཤེས་ཤེ་ན་མི་ཤེས་པའི་སྐྱོན་མེད་དེ། ཚེ་དང་ལྡན་པ་དག་མི་ཚངས་པར་སྤྱོད་པ་དང་། མ་བྱིན་པར་ལེན་པ་དང་། སྲོག་གཅོད་པ་དང་། རྫུན་དུ་སྨྲ་བ་སྟེ་ཕམ་པར་གྱུར་པའི་ཆོས་བཞི་པོ་འདི་དག་ནི། ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་གདོན་པའི་ཚེ་འདུལ་བ་འཛིན་པའི་ངག་ལས་བྱུང་བའི་ཕྱིར་རོ། །གསུམ་པ་ལ་བཞི་སྟེ་རང་གཞན་གཉིས་ཀའི་ཚངས་སྤྱོད་ལ་གནོད་པ་མི་ཚངས་པར་སྤྱོད་པའི་ཕམ་པ། གཞན་གྱི་ལོངས་སྤྱོད་ལ་གནོད་པ་མ་བྱིན་པར་ལེན་པའི་ཕམ་པ། གཞན་གྱི་སྲོག་ལ་གནོད་པ་སྲོག་གཅོད་པའི་ཕམ་པ། གཞན་གྱི་དོན་འགྲུབ་པ་ལ་གནོད་པ་རྫུན་དུ་སྨྲ་བའི་ཕམ་པའོ། །དང་པོ་ནི། གང་བྱས་པས་མི་ཚངས་པར་སྤྱོད་པའི་ཕམ་པར་འགྱུར་ཞེ་ན། ལས་དང་པོ་ལ་ལྟུང་བ་མེད་པས་ཡང་ཕྱིན་ཆད་མིང་གི་དགེ་སློང་། ཁས་འཆེ་བའི་དགེ་སློང་། སློང་བའི་དགེ་སློང་། ཉོན་མོངས་པ་བཅོམ་པའི་དགེ་སློང་མ་གཏོགས་པ་གསོལ་བ་དང་བཞིའི་ལས་ཀྱིས་བསྙེན་པར་རྫོགས་པའི་དགེ་སློང་བཟང་སྦྱིན་ལྟ་བུ་གང་ཡང་རུང་བ་དགེ་སློང་རང་བཞིན་དུ་གནས་པ་རྣམས་དང་ལྷན་ཅིག་ཚུལ་ཁྲིམས་དང་། བསླབ་པ་དང་། སོ་སོར་ཐར་པའི་མདོ་འདོན་པ་མཉམ་པའི་སྒོ་ནས་བསླབ་པ་མཚུངས་པར་གྱུར་པས། བསླབ་པ་ཕུལ་ན་ལྟུང་བ་མེད་པས་བསླབ་པ་མ་ཕུལ། བསླབ་པ་ཉམས་པར་བྱས་ན་ལྟུང་བ་མེད་པས་བསླབ་པ་ཉམས་པར་མ་བྱས་པར། གཉིས་ཀྱིས་གཉིས་སྤྲོད་པའི་མི་ཚངས་པར་སྤྱོད་པ་འཁྲིག་པ་ལས་བྱུང་བའི་ཆོས་བསྟན་ན། མིར་མ་ཟད་ཐ་ན་སྤྲ་མོ་ལྟ་བུ་དུད་འགྲོའི་སྐྱེ་གནས་སུ་སྐྱེས་པ་དང་ལྷན་ཅིག་ཀྱང་རུང་སྟེ། བཟང་སྦྱིན་ལྟ་བུའི་དགེ་སློང་དེ་ཕམ་པར་གྱུར་པ་ཡིན་གྱི། དགེ་སློང་རྣམས་ཀྱིས་
དེ་དང་ཆོས་དང་ཟང་ཟིང་གི་ལོངས་སྤྱོད་ལ་ལྷན་ཅིག་གནས་པར་མི་བྱའོ། །འོ་ན་བསླབ་པ་ཕུལ་བ་དང་། བསླབ་པ་ཉམས་པ་ཅི་ལྟ་བུ་ཞེ་ན། དེ་ཡང་མིའི་འགྲོ་བ་ཡིན་པ། རང་བཞིན་དུ་གནས་པ། སྨྲ་ཤེས་དོན་གོ་བ་ཞིག་གི་དྲུང་དུ་ཕྱིན་ནས། ཚེ་དང་ལྡན་པ་དགོངས་སུ་གསོལ། བདག་མིང་འདི་ཞེས་བྱ་བ་བསླབ་པ་འབུལ་ལོ་ཞེས་བྱ་བ་ལ་སོགས་པའམ། བདག་ཁྱིམ་པར་ཡང་བཟུང་དུ་གསོལ་ཞེས་བྱ་བ་ལ་སོགས་པའམ། བདག་ཚངས་པ་མཚུངས་པར་སྤྱོད་པ་ཁྱེད་ཅག་དང་ལྷན་ཅིག་གནས་པས་ཆོག་གོ་ཞེས་བརྗོད་ན། བསླབ་པ་ཕུལ་བ་ཡིན་ལ། ཡང་བདག་མིང་འདི་ཞེས་བགྱི་བ་སོགས་སྔར་དང་འདྲ་བ་ལ། ཚངས་པར་སྤྱོད་པ་ནི་དཀའོ། །ཞེས་པ་ལྟ་བུ་བརྗོད་ནས་བསླབ་པ་ཉམས་པ་ཡིན་ནོ། །བསླབ་པ་ཕུལ་ཉམས་གཉིས་སྡོམ་པ་མེད་པར་ནི་འདྲ་སྟེ། ཕུལ་བས་ནི་བསླབ་པ་བཏང་བའི་སྒོ་ནས་སྡོམ་པ་མེད་པར་བྱས་ལ། ཉམས་པས་ནི་བསླབ་པའི་ཡུལ་མཐུ་མེད་པར་བྱས་པའི་སྒོ་ནས་སྡོམ་པ་མེད་པར་བྱས་པའི་ཕྱིར་རོ། །དེས་ན་ཕུལ་ཉམས་གཉིས་ལ་མུ་བཞི་ལས་འདིར་ནི་གཉིས་ཀ་མིན་པ་གཟུང་བར་བྱའོ། །གཉིས་པ་ནི། གང་བྱས་པས་མ་བྱིན་པར་ལེན་པའི་ཕམ་པར་འགྱུར་ཞེ་ན། ལས་དང་པོ་པ་ལ་ལྟུང་བ་མེད་པས་ཡང་ཕྱིན་ཆད་ནོར་ཅན་ལྟ་བུའི་དགེ་སློང་གང་ཡང་རུང་བ་མིའི་འགྲོ་བ་གཞན་གྱི་གྲོང་ལྟེ་བའི་གནས་ན་འདུག་པའམ། དགོན་པ་སྟེ་ར་བའི་ཕྱི་ན་འདུག་པ་སྐྱེས་པ་ལ་སོགས་པ་མ་བྱིན་པར་རྐུ་བའི་གྲངས་སུ་གཏོགས་པ་མ་ཤ་ཀ་ལྔ་ལྟ་བུ་བླངས་ན། ཇི་ཙམ་མ་བྱིན་པ་བླངས་པས་དགེ་སློང་དེ་རྒྱལ་པོའམ། བློན་པོ་ཆེན་པོས་བཟུང་ནས། དགེ་སློང་དེ་ལ་འདི་སྐད་ཅེས་ཀྱེ་མི་ཁྱོད་ནི་འཇལ་བུས་རྐུན་མའོ། །རང་གི་མི་ཤེས་པས་བྱིས་པའོ། །ལུང་ཕོག་པ་མི་ཤེས་པའི་བླུན་པོའོ། །མཐུས་རྐུ་བའོ་ཞེས་ཟེར་ཞིང་། གསོད་དམ། ལྕགས་སྒྲོག་ལ་
སོགས་པས་འཆིང་ངམ། ཡུལ་གཞན་དུ་སྤྱུག་ཀྱང་རུང་སྟེ། དགེ་སློང་དེ་ལྟར་མ་བྱིན་པར་ལེན་ན། ནོར་ཅན་ལྟ་བུའི་དགེ་སློང་དེ་ཡང་ཕམ་པར་གྱུར་པ་ཡིན་གྱིས་དགེ་སློང་རྣམས་ཀྱིས་དེ་དང་ལྷན་ཅིག་གནས་པར་མི་བྱའོ། །གསུམ་པ་ནི། གང་བྱས་ནས་སྲོག་གཅོད་པའི་ཕམ་པར་འགྱུར་ཞེ་ན། ཡང་ཕྱིན་ཆད་དགེ་སློང་གང་ཡང་རུང་བས་མ་ཡི་མངལ་དུ་སྐྱེ་མཆེད་དྲུག་དོད་ཚུན་ཆད་ཀྱི་མིའམ། མངལ་དུ་ལུས་སྲོག་ཡིད་ཀྱི་དབང་པོ་ཙམ་ཞིག་ཐོབ་པའི་མིར་ཆགས་པ་ལ་གསོད་པར་བསམས་བཞིན་དུ་རང་གིས་ལག་དར་ཏེ་སྲོག་བཅད་དམ། མི་དེ་ལ་རལ་གྲི་ལ་སོགས་པའི་མཚོན་བྱིན་ཏམ། མི་དེ་ལ་གཞན་མཚོན་ཐོགས་པ་གཉེར་ཏམ། ལྷུང་བཟེད་སོགས་ཐོབ་པའི་བསམ་པས་ཚུལ་ཁྲིམས་དང་ལྡན་པ་དང་། ཚུལ་ཁྲིམས་འཆལ་པ་དང་། ནད་པ་ལྟ་བུ་དེ་འཆིར་བཅུག་གམ། དེ་ལ་འཆི་བའི་བསྔགས་པ་བརྗོད་ཀྱང་རུང་སྟེ། མི་དེ་ལ་འདི་སྐད་ཅེས། ཀྱེ་མི་ཁྱོད་འཚོ་བ་སྟེ་གསོན་པ་སྡིག་པའི་རྒྱུའམ་འབྲས་བུ་ལ་གནས་པ་ལུས་མི་གཙང་བ་ངན་པ་འདིས་ཅི་ཞིག་བྱ་སྟེ་དོར་ཅིག །ཀྱེ་མི་ཁྱོད་གསོན་པ་བས་ཤི་བ་བླའོ་ཞེས་ཟེར་ཞིང་། འཆི་བར་འདོད་པའི་སེམས་ཀྱི་འདོད་པ་དང་། ཆོས་གོས་ལ་སོགས་པ་ཐོབ་དུ་རེ་བའི་སེམས་ཀྱི་ཀུན་ཏུ་རྟོག་པ་དག་གིས་རྣམ་གྲངས་དུ་མས་མི་དེ་འཆིར་བཅུག་གམ། མི་དེ་ལ་འཆི་བའི་བསྔགས་པ་བརྗོད་དེ་དེ་ཡང་གོང་དུ་བཤད་པའི་རྩོམ་པ་དེས་འཆི་བའི་དུས་ན། དགེ་སློང་དེ་ཡང་ཕམ་པར་གྱུར་པ་ཡིན་གྱིས་དགེ་སློང་རྣམས་ཀྱིས་དེ་དང་ལྷན་ཅིག་གནས་པར་མི་བྱའོ། །བཞི་པ་ནི། གང་བྱས་པས་རྫུན་དུ་སྨྲ་བའི་ཕམ་པར་འགྱུར་ཞེ་ན། ཡང་ཕྱིན་ཆད་དགེ་སློང་གང་ཡང་རུང་བས་ཟག་པ་དང་བཅས་པའི་བསམ་གཏན་ནམ་གཟུགས་མེད་ཀྱིས་བསྡུས་པའི་ཤེས་པས་ཕུང་པོ་
ལྔ་མངོན་པར་མི་ཤེས་ཤིང་། ཟག་མེད་ཀྱིས་བསྡུས་པའི་ཤེས་པས་ཡོངས་སུ་མི་ཤེས་ལ། མིའི་ཆོས་ནི་མྱ་ངན་ལས་འདས་པ་ཡིན་ཏེ། དེ་མི་རྣམས་ཀྱིས་ཐོབ་པར་བྱ་བ་ཡིན་གྱིས། མ་ནིང་དང་མཚན་གཉིས་པ་ལ་སོགས་པས་ཀྱང་མི་ཐོབ་ན་ངན་སོང་བ་རྣམས་ཀྱིས་ལྟ་ཅི་སྨོས། བླ་མ་ནི་འདོད་ཁམས་ལས་གཟུགས་ཁམས་བླ་མ་ཡིན་ལ། དེ་ལས་གཟུགས་མེད་ཁམས་བླ་མ་ཡིན་ནོ། །ཡང་ན་མིའི་ཆོས་ནི་སྒྲིབ་པ་ལྔ་ཡིན་ལ་དེ་སྤངས་པ་ནི་བླ་མ་ཡིན་ནོ། །མཐའ་མྱ་ངན་ལས་འདས་པ་དང་། སངས་རྒྱས་དང་ཉན་ཐོས་འཕགས་པ་དང་། བྱེ་བྲག་འབྲས་བུ་བཞི་ཐོབ་པ་དང་། བདེན་པ་བཞི་མངོན་སུམ་དུ་ཤེས་པ་དང་། དེ་མངོན་སུམ་དུ་མཐོང་བ་དང་། བསམ་གཏན་དང་གཟུགས་མེད་ཀྱི་བདེ་བ་ལ་དངོས་སུ་རེག་པར་སྤྱོད་པ་མེད་ལ། དེ་ལྟར་མེད་བཞིན་དུ་འདུ་ཤེས་བསྒྱུར་ཏེ་བདེན་པ་བཞི་པོ་འདི་མངོན་སུམ་དུ་ཤེས་སོ། །ལྷ་ལ་སོགས་པ་འདི་རྣམས་མངོན་སུམ་དུ་མཐོང་ངོ་ཞེས་ཁས་འཆེས་པ་ལས། དགེ་སློང་དེ་ལྟ་བུ་ལྟུང་བ་བྱུང་བ་དེ་རྣམ་པར་དག་པ་འདོད་ནས་དུས་གཞན་ཞིག་ན་དགེ་སློང་གཞན་གྱིས་དྲིས་ཀྱང་རུང་། གཞན་གྱིས་མ་དྲིས་པར་རང་ཉིད་འགྱོད་ཀྱང་རུང་སྟེ། འདི་སྐད་ཅེས་ཚེ་དང་ལྡན་པ་དག་བདག་གིས་ནི་ཡིད་ཀྱི་རྣམ་པར་ཤེས་པས་མི་ཤེས་པར་ཤེས་སོ་ཞེས་སྨྲས། མིག་གི་རྣམ་པར་ཤེས་པས་མ་མཐོང་བར་མཐོང་ངོ་ཞེས་སྨྲས་ཏེ། དོན་དེ་བདེན་པས་སྟོང་པས་ན་གསོབ། ས་བོན་ཙམ་གྱིས་སྟོང་པས་གསོབ་རྫུན་དུ་སྨྲས་སོ་ཞེས་ཟེར་ན། དགེ་སློང་དེ་ཡང་ཕམ་པར་གྱུར་པ་ཡིན་གྱིས་དགེ་སློང་རང་བཞིན་དུ་གནས་པ་རྣམས་ཀྱིས་དེ་དང་ལྷན་ཅིག་གནས་པར་མི་བྱའོ། །ཐམས་ཅད་དུ་རྫུན་དུ་སྨྲས་པ་ལ་ཕམ་པར་འགྱུར་རམ་ཞེ་ན། མི་འགྱུར་ཏེ། མངོན་པའི་ང་རྒྱལ་གྱིས་རྫུན་དུ་སྨྲས་པ་མ་གཏོགས་པའི་ཕྱིར། བཞི་པ་ནི།
ཚེ་དང་ལྡན་པ་ནས་བཏོན་ཟིན་ཏོའི་བར་རོ། །ངག་དོན་སོགས་བཤད་ཟིན་པ་ལས་ཤེས་པར་བྱའོ། །ལྔ་པ་ནི། དགེ་སློང་གིས་ཕམ་པ་བཞི་པོ་དེ་དག་ལས་ལྟུང་བ་གང་ཡང་རུང་བ་ཞིག་བྱས་ན། ཐོག་མ་ཁྱིམ་པའི་གནས་སྐབས་ན་སྡོམ་པ་མེད་པ་ཇི་ལྟ་བར་ཕྱིས་ཀྱང་དེ་བཞིན་ཕམ་པར་གྱུར་པ་ཡིན་ཏེ། དགེ་སློང་རྣམས་དང་ལྷན་ཅིག་ཏུ་གནས་པ་དང་ཆོས་དང་དང་ཟང་ཟིང་གི་ལོངས་སྤྱོད་ལྷན་ཅིག་ལོངས་སྤྱོད་དུ་མི་དབང་གིས་གནས་པར་མི་བྱའོ། །ཐོག་མ་ཇི་ལྟ་བར་ཕྱིས་ཀྱང་དེ་བཞིན་ཅེས་པ་སྡོམ་པ་ཉམས་ཆུང་བ་ལ་བྱའི་གཏན་ནས་མེད་པ་མ་ཡིན་ཏེ། འཕགས་པ་གཞི་ཐམས་ཅད་ཡོད་པར་སྨྲ་བའི་འདུལ་བའི་སྡེ་སྣོད་ལས། བུ་ལོན་ནོར་བཞིན་ཁ་ཆེ་དག །བྱུང་བ་ལ་ནི་གཉིས་སུ་འདོད། །ཅེས་གསུངས་པའི་ཕྱིར། དྲུག་པ་ནི། ཕམ་པ་བཏོན་པ་དེ་ལ་བདག་གིས་ཞེས་སོགས་སྔར་བཞིན་ནོ། །གསུམ་པ་ལྷག་མ་གདོན་པ་ལ་བདུན། སྡོམ་གྱི་མདོར་བསྟན། ལྷག་མ་གདོན་པའི་ལུང་དབོག །སོ་སོའི་མཚན་ཉིད། མཇུག་བསྡུ་བ། རྣམ་གཞག་བསྟན་པ། ཕྱིར་འཆོས་པའི་ཚུལ། རྣམ་གཞག་བསྒྲག་པའོ། །དང་པོ་ནི། དགེ་འདུན་ལྷག་མའི་ཆོས་སྡོམ་དུ་བསྡུས་པ་ལ་བཅུ་གསུམ་དུ་ཡོད་དེ། ཁུ་བ་འབྱིན་པ་དང་། འཛིན་པ་སྟེ་རེག་པ་དང་། འཁྲིག་ཚིག་སྨྲ་བ་དག་བསྙེན་བཀུར་བསྔགས་པ་དང་། སྨྱན་བྱེད་པ་དང་། ཁང་པ་དང་། ཁང་ཆེན་དང་། གཞི་མེད་དང་། བག་ཙམ་དང་། དགེ་འདུན་དབྱེན་དང་། དེའི་རྗེས་སུ་ཕྱོགས་པ་དང་། ཁྱིམ་སུན་འབྱིན་པ་དང་། བཀའ་བློ་མི་བདེ་བའི་དགེ་འདུན་ལྷག་མ་རྣམས་སུ་ཡོད་པའི་ཕྱིར། གཉིས་པ་ནི། འདུལ་བའི་སྡེ་སྣོད་ཡི་གེར་མི་འབྲི་བ་ཡིན་ན། ཞེས་སོགས་སྔར་བཞིན་ནོ། །ཅིའི་ཕྱིར་དགེ་འདུན་ལྷག་མ་ཞེས་བྱ་ཞེ་ན། ཕམ་པ་ལ་ཕྱིར་བཅོས་ཀྱི་ལྷག་མ་མེད་ལ། འདི་ལ་ཕྱིར་བཅོས་པའི་ལྷག་མ་ཡོད་
ཅིང་གསོ་བ་དགེ་འདུན་ལ་རག་ལས་པའི་ཕྱིར་དགེ་འདུན་ལྷག་མ་ཞེས་བྱའོ། །གསུམ་པ་ལ་གཉིས། དངོས་པོས་གྱུར་པ་དང་། བསོ་བ་ལས་གྱུར་པའོ། །དང་པོ་ལ་གཉིས། འདོད་པས་ཀུན་ནས་བསླངས་པ་དང་། གནོད་པས་ཀུན་ནས་བསླངས་པའོ། །དང་པོ་ལ་གཉིས། ནང་སེམས་ཅན་ལ་ཆགས་པས་ཀུན་ནས་བསླངས་པ་དང་། ཕྱི་ཡོ་བྱད་ལ་ཆགས་པས་ཀུན་ནས་བསླངས་པའོ། །དང་པོ་ལ་གཉིས། རང་འདོད་པ་སྟེན་པ། གཞན་འདོད་པ་སྟེན་དུ་འཇུག་པའོ། །དང་པོ་ལ་གཉིས། ལུས་ཀྱི་རེག་པའི་བདེ་བ་ལ་ཆགས་པས་ཀུན་ནས་བསླངས་པ་དང་། སྨྲ་བའི་བདེ་བ་ལ་ཆགས་པས་ཀུན་ནས་བསླངས་པའོ། །དང་པོ་ལ། རང་གི་ལུས་ཀྱི་རེག་པའི་བདེ་བ་ལ་ཆགས་པ་དང་། གཞན་གྱི་ལུས་ཀྱི་རེག་པའི་བདེ་བ་ལ་ཆགས་པས་ཀུན་ནས་བསླངས་པའོ། །དང་པོ་ནི། གང་བྱས་པས་ཁུ་བ་འབྱིན་པའི་དགེ་འདུན་ལྷག་མར་འགྱུར་ཞེ་ན། ཁུ་བ་འབྱིན་པར་བསམས་བཞིན་དུ་རང་གི་ཁུ་བ་ཕྱུང་ན་དགེ་འདུན་ལྷག་མར་འགྱུར་རོ། །ཐམས་ཅད་དུ་འགྱུར་རམ་ཞེ་ན། རྨི་ལམ་གྱི་གནས་སྐབས་ནི་མ་གཏོགས་ཏེ། རྨི་ལམ་དུ་ཁུ་བ་ཕྱུང་བ་དེ་མ་ཕྱུང་བ་དང་འདྲ་བའི་ཕྱིར། དེས་ན་ཁུ་བ་ནི་ལྔ་སྟེ། སྔོན་པོ་དང་། སེར་པོ་དང་། དམར་པོ་དང་། སྐ་བ་དང་། སླ་བའོ། །སྔོན་པོ་ནི་འཁོར་ལོ་བསྒྱུར་རྒྱལ་གྱི་ཁུ་བའོ། །སེར་པོ་ནི་དེའི་བུ་དབང་སྒྱུར་བར་འོས་པ་ལས་གཞན་པའི་ཁུ་བའོ། །དམར་པོ་ནི་སྣ་ཆེན་པོར་གཏོགས་པའི་བློན་པོ་ཆེན་པོའི་ཁུ་བའོ། །སྐ་བ་ནི་དབང་པོ་སྨིན་པའི་ཁུ་བའོ། །སླ་བ་ནི་དབང་པོ་མ་སྨིན་པའི་ཁུ་བའོ། །གཉིས་པ་ནི། གང་བྱས་པས་རེག་པའི་དགེ་འདུན་ལྷག་མར་འགྱུར་ཞེ་ན། ལས་དང་པོ་བ་ལ་ལྟུང་བ་མེད་པས་ཡང་ཕྱིན་ཆད་འཆར་ཀ་ལྟ་བུའི་དགེ་སློང་གང་ཡང་རུང་བ་(༡༤ན)འདོད་ཆགས་ཀྱིས་ངོ་ཚ་བའི་ཆོས་ལས་དྲལ་ཅིང་བུད་མེད་ལ་འབྲེལ་འདོད་པར་གྱུར་པའི་སེམས་ཀྱིས་བུད་
མེད་དམ། གཞོན་ནུ་མ་འཁྲིག་པ་སྟོན་ནུས་པ་དང་ལྷན་ཅིག་ལུས་ཀྱིས་ལུས་ལ་རེག་པར་བྱེད་དམ་འཁྲིག་མ་མན་ཆད་ཀྱི་ལག་པ་ནས་བཟུང་ངམ། འཁྲིག་མ་ཡན་ཆད་ཀྱི་དཔུང་པ་ནས་བཟུང་ངམ། འཁྲིག་མ་མན་ཆད་སྐྲ་བསྡུས་པའི་ལན་བུ་ནས་བཟུང་ངམ། འཁྲིག་མ་མན་ཆད་ཀྱི་ལག་པ་དང་། འཁྲིག་མ་ཡན་ཆད་ཀྱི་དཔུང་པ་ལས་གཞན་པའི་ཡན་ལག་ལུས་དང་ཉིང་ལག་རྐང་པ་ལྟ་བུ་གང་ཡང་རུང་བ་ལ། ནོམ་པ་ཅུང་ཟད་རེག་པ་དང་། ཉུག་པ་ཕྱོགས་ཐམས་ཅད་དུ་རེག་པ་བདག་གིར་བྱེད་ན་རེག་པའི་དགེ་འདུན་ལྷག་མར་འགྱུར་རོ། །གཉིས་པ་སྨྲ་བའི་བདེ་བ་ལ་ཆགས་པས་ཀུན་ནས་བསླངས་པ་ལ་གཉིས། འཁྲིག་ཚིག་སྨྲ་བ། བསྙེན་བཀུར་བསྔགས་པའོ། །དང་པོ་ནི། གང་བྱས་པས་འཁྲིག་པ་སྨྲ་བའི་དགེ་འདུན་ལྷག་མར་འགྱུར་ཞེ་ན། ཡང་དགེ་སློང་དྲལ་ཅིང་གྱུར་པའི་སེམས་ཀྱིས་བུད་མེད་དམ་གཞོན་ནུ་མ་ལེགས་པར་སྨྲས་པ་དང་། ཉེས་པར་སྨྲས་པའི་དོན་གོ་བ་ལ་གནས་ངན་ལེན་གྱི་ཚིག་སྡིག་པ་ཅན་ཚོགས་པར་མི་དབྱུང་བ་གཉིས་ཀྱིས་གཉིས་སྤྲོད་པའི་འཁྲིག་པ་དང་ལྡན་པ་དག་སྐྱེས་བུས་ན་ཆུང་སྟེ་བུད་མེད་ལ་རྗོད་པ་ཇི་ལྟ་བ་བཞིན་དུ་བུད་མེད་ཀྱི་རྗེས་སུ་སྨྲས་པའམ། བུད་མེད་ཀྱིས་མ་སྨྲས་པར་སྨྲས་ན་དོན་གོ་བའི་ཚེ་ན་དགེ་འདུན་ལྷག་མར་འགྱུར་རོ། །གཉིས་པ་ནི། གང་བྱས་པས་བསྙེན་བཀུར་བསྔགས་པའི་དགེ་འདུན་ལྷག་མར་འགྱུར་ཞེ་ན། ཡང་དགེ་སློང་དྲལ་ཅིང་གྱུར་པའི་སེམས་ཀྱིས། བུད་མེད་ཀྱི་མདུན་དུ་བདག་ཉིད་ཀྱི་ལུས་ཀྱིས་བསྙེན་བཀུར་བྱ་བའི་ཕྱིར། འདི་ལྟ་སྟེ། ཇི་ལྟ་བུའི་དགེ་སློང་ཚུལ་ཁྲིམས་ཀྱི་ཕུང་པོ་དང་ལྡན་པ། དགེ་བའི་ཆོས་ཆེན་པོ་ཏིང་ངེ་འཛིན་གྱི་ཕུང་པོ་དང་ལྡན་པ། ཚངས་པར་སྤྱོད་པའི་ཤེས་རབ་ཀྱི་ཕུང་པོ་དང་ལྡན་པ་ལ་འདི་ལྟར་འཁྲིག་པ་དང་ལྡན་པའི་ཆོས་འདིས་བསྙེན་བཀུར་བྱས་ན།
སུ་འདི་ནི་བསྙེན་བཀུར་བྱས་པ་རྣམས་ཀྱི་མཆོག་ཡིན་ནོ་ཞེས་བསྔགས་པ་སྟེ་བསྟོད་ར་བརྗོད་ན་དོན་གོ་བའི་ཚེ་ན་དགེ་འདུན་ལྷག་མར་འགྱུར་རོ། །གཉིས་པ་གཞན་འདོད་པ་སྟེན་དུ་འཇུག་པ་ནི། གང་བྱས་པས་སྨྱན་བྱེད་པའི་དགེ་འདུན་ལྷག་མར་འགྱུར་ཞེ་ན། ཡང་དྲུག་སྡེ་ལྟ་བུའི་དགེ་སློང་གང་རུང་བ་བུད་མེད་ལ་སྐྱེས་པའི་ཀུན་དུ་སྤྱོད་པ་བསམ་པའི་ཚིག་དང་། སྐྱེས་པ་ལ་བུད་མེད་ཀྱི་ཀུན་དུ་སྤྱོད་པ་བསམ་པའི་ཚིག་དང་། སྐྱེས་པ་ལ་བུད་མེད་ཀྱི་ཀུན་དུ་སྤྱོད་པ་བསམ་པའི་ཚིག་གིས་ཆུང་མ་བདུན་ཉིད་དམ། མཛའ་ན་མོ་བཅུ་ཉིད་དུ་སྨྱན་བྱེད་ན་ཐ་ན་ཐང་འགའ་ཕྲད་པ་ལ་ཡང་རུང་སྟེ། དེའི་དབང་གིས་ཕྲད་པའི་ཚེ་ན་དགེ་འདུན་ལྷག་མར་འགྱུར་རོ། །ཆུང་མ་བདུན་ནི། ཆུ་ཚིགས་ཀྱིས་བྱིན་པ། རིན་ཆས་ཀྱིས་ཉོས་པ། བཙན་ཕྲོགས་སུ་ཐོབ་པ། དངས་མ་འདུས་པ། གོས་ཟས་ཀྱིས་འཚོ་བ། ཁ་དུམ་པ། ཐང་འགའ་ཕྲད་པའོ། །མཛའ་ན་མོ་བཅུ་ནི། མས་བསྲུངས་པ། ཕས་བསྲུངས་པ། མིང་པོས་བསྲུངས་པ། ཕུ་ནུ་མོས་བསྲུངས་པ། སྒྱུག་མོས་བསྲུངས་པ། གྱོང་པོས་བསྲུངས་པ། ཉེ་དུས་བསྲུངས་པ། རིགས་ཀྱིས་བསྲུངས་པ། རུས་ཆགས་ཀྱིས་བསྲུངས་པ། རྣམ་པར་འཁྲུག་པ་མེད་པའོ། །གཉིས་པ་ཕྱི་ཡོ་བྱད་ལ་ཆགས་པས་ཀུན་ནས་བསླངས་པ་ལ་གཉིས། ཁང་པ་དང་། ཁང་ཆེན་གྱི་དགེ་འདུན་ལྷག་མའོ། །དང་པོ་ནི། གང་བྱས་པས་ཁང་པའི་དགེ་འདུན་ལྷག་མར་འགྱུར་ཞེ་ན། ཆོས་འདི་པའི་དགེ་སློང་གིས་དགེ་སློང་བདག་གིས་ཤིང་ལ་སོགས་པ་བསླངས་པ་ཡིན་པ་སྐྱེས་པ་ལ་སོགས་པའི་བདག་པོ་མེད་པ། དགེ་སློང་བདག་གམ་མིའི་འགྲོ་བ་པའི་གང་ཟག་གཅིག་ཡན་ཆད་ཀྱི་ཕྱིར་དུ་འགྲེང་བ་དང་འཆག་པ་དང་ཉལ་བར་འདུག་པའི་སྤྱོད་ལམ་བཞི་ཤོང་བའི་ཁང་པ་རང་གིས་རྩིག་གམ་གཞན་རྩིག་ཏུ་འཇུག་ན། དགེ་སློང་དེས་ཁང་པ་ཚད་བཞིན་དུ་རྩིག་ཏུ་ཆུག་ཅིག །འོ་ན་ཁང་པའི་ཚད་ཇི་ལྟ་བུ་ཞེ་ན། དེ་ལ་ཁང་པའི་ཚད་ནི་
འདི་ཡིན་ཏེ། ཁང་པའི་ནང་སྲིད་དུ་བདེ་བར་གཤེགས་པའི་མཐོའི་མཐོ་བཅུ་གཉིས་ཏེ་ཚད་དང་ལྡན་པའི་ཁྲུ་བཅོ་བརྒྱད། ཁང་པའི་ནང་གི་ཞེང་དུ་བདེ་བར་གཤེགས་པའི་མཐོའི་མཐོ་བདུན་ཏེ་ཚད་དང་ལྡན་པའི་ཁྲུ་ཕྱེད་དང་བཅུ་གཅིག་ཡིན་ནོ། །ཁང་པའི་གཞི་རུང་བ་རྩོད་མེད་བརྩམ་རུང་བལྟ་བའི་ཕྱིར་དགེ་སློང་དག་གིས་དགེ་སློང་གཞན་དག་བཀྲི་བར་བྱའོ། །ཁྲིད་པའི་དགེ་སློང་དག་གིས་ཀྱང་སྡིག་སྦྲུལ་ལ་སོགས་པའི་གནས་མེད་པའི་གཞི་རུང་བ་དང་། ཤིང་ལྗོན་པ་གཅད་པར་བྱ་བ་མ་ཡིན་པ་སོགས་མེད་པའི་རྩོད་པ་མེད་པ་དང་། ཉེ་འཁོར་འདོམ་གང་གི་ཁོ་ར་ཁོར་ཡུག་ཏུ་ངམ་གྲོག་སོགས་མེད་པའི་བརྩམ་དུ་རུང་བ་བལྟ་བར་བྱའོ། །གལ་ཏེ་དགེ་སློང་གིས་སྡིག་སྦྲུལ་སོགས་ཡོད་པའི་གཞི་མི་རུང་བའམ། ཤིང་ལྗོན་པ་སོགས་ཡོད་པའི་རྩོད་པ་དང་བཅས་པའམ། འདོམ་གང་ཚུན་ན་ཁྲོན་པ་ལ་སོགས་པ་ཡོད་པའི་བརྩམ་དུ་མི་རུང་བར་དགེ་སློང་བདག་གིས་ས་ཕྱོགས་ལ་སོགས་པ་བསླངས་པ་བུད་མེད་ལ་སོགས་པའི་བདག་པོ་མེད་པ། དགེ་སློང་བདག་གམ་གང་ཟག་གཅིག་ཡན་གྱི་ཕྱིར་དུ་སྤྱོད་ལམ་བཞི་ཤོང་བའི་ཁང་པ་རང་གིས་རྩིག་གམ་གཞན་རྩིག་ཏུ་འཇུག་གམ། གཞི་རུང་མི་རུང་བལྟ་བའི་ཕྱིར་དགེ་སློང་དག་ཀྱང་མི་འཁྲིད་དམ། དགེ་སློང་ཁྲིད་པ་དག་ལ་གཞི་མི་སྟོན་ནམ། ཚད་ལས་འདས་པར་རྩིག་ན་དགེ་འདུན་ལྷག་པར་འགྱུར་རོ། །གཉིས་པ་ནི། གང་བྱས་པས་ཁང་ཆེན་གྱི་དགེ་འདུན་ལྷག་མར་འགྱུར་ཞེ་ན། དགེ་སློང་གིས་སྐྱེས་པ་ལ་སོགས་པའི་བདག་པོ་ཡོད་པ་ཉན་ཐོས་ཀྱི་དགེ་འདུན་ནམ་གང་ཟག་བཞི་ཡན་གྱི་ཕྱིར་སྤྱོད་ལམ་བཞི་ཤོང་བའི་གཙུག་ལག་ཁང་ཞེས་སོགས་སོ། །གཉིས་པ་གནོད་པས་ཀུན་ནས་བསླངས་པ་ལ་གཉིས། གཞི་མེད་པ་དང་། བག་ཙམ་གྱི་
ལྷག་མའོ། །དང་པོ་ནི། ཡང་མཛའ་བོ་དང་ས་ལས་སྐྱེས་ལྟ་བུའི་དགེ་སློང་གང་ཡང་རུང་བ་ཁྲོས་པ་སྟེ་འཁྲུགས་ཤིང་ཞེ་སྡང་བ་ཡིད་མི་དགའ་བར་གྱུར་ནས། ཅི་ནས་ཀྱང་གྱད་བུ་ནོར་ལྟ་བུའི་དགེ་སློང་འདི་ཚངས་པར་སྤྱོད་པ་དང་དབྲལ་ལོ་སྙམ་ནས། གྱད་བུ་ནོར་ལྟ་བུའི་དགེ་སློང་དག་པ་གཞི་དེའི་ལྟུང་བ་མེད་པ་ལ། གླེང་བའི་གཞི་མེད་པར་ཕམ་པར་གྱུར་པ་གང་ཡང་རུང་བའི་ཆོས་ཀྱིས་སྐུར་པ་བཏབ་པ་ལས་མཛའ་བོ་དང་ས་ལས་སྐྱེས་ལྟ་བུའི་དགེ་སློང་དུས་གཞན་ཞིག་ན་གཞན་གྱིས་དྲིས་ཀྱང་རུང་གཞན་གྱིས་མི་དྲིས་པར་རང་ཉིད་འགྱོད་ཀྱང་རུང་སྟེ་རྩོད་པ་དེ་ཡང་གཞི་མེད་པ་ཡིན་ལ། དགེ་སློང་ཡང་ཞེ་སྡང་ལ་གནས་པས། ཞེ་སྡང་གིས་ཀུན་ནས་བསླངས་ཏེ་སྨྲས་སོ་ཞེ་ན་དགེ་འདུན་ལྷག་མར་འགྱུར་རོ། །གཉིས་པ་ནི། གང་བྱས་པས་བག་ཙམ་གྱི་དགེ་འདུན་ལྷག་མར་འགྱུར་ཞེ་ན། ཡང་མཛའ་བོ་དང་ས་ལས་སྐྱེས་ལྟ་བུའི་དགེ་སློང་གང་ཁྲོས་པ་སྟེ་འཁྲུགས་ཤིང་ཞེ་སྡང་བ་ཡིད་མི་དགའ་བར་གྱུར་ནས། ཅི་ནས་ཀྱང་གྱད་བུ་ནོར་ལྟ་བུའི་དགེ་སློང་འདི་ཚངས་པར་སྤྱོད་པ་དང་དབྲལ་ལོ་སྙམ་ནས། གྱད་བུ་ནོར་ལྟ་བུའི་དགེ་སློང་དག་པ་གཞི་དེའི་ལྟུང་བ་མེད་པ་ལ་གཞན་མྱ་ངན་ལས་འདས་པའི་ཆ་མ་ཡིན་པ་དང་མཐུན་པ་ཕམ་པར་གྱུར་པའི་ཆོས་ཀྱིས་སྐུར་བ་ལས། མཛའ་བོ་དང་ས་ལས་སྐྱེས་ལྟ་བུའི་དགེ་སློང་དེ་དུས་གཞན་ཞིག་ན་གང་ཟག་གཞན་གྱིས་དྲིས་ཀྱང་རུང་། གཞན་གྱིས་མ་དྲིས་པར་འགྱོད་ཀྱང་རུང་སྟེ། རྩོད་པ་དེ་ཡང་གཞན་མྱ་ངན་ལས་འདས་པའི་ཆ་མ་ཡིན་པ་དང་མཐུན་པ་ཡིན་ལ། རྩོད་པ་དེ་གཞན་མྱ་ངན་ལས་འདས་པའི་ཆ་མ་ཡིན་པ་དང་མཐུན་པ་ཡིན་པས། དགེ་སློང་གྱད་བུ་ནོར་དང་། དགེ་སློང་མ་ཨུཏྤ་ལའི་མདོག་དང་། རི་དྭགས་ཕོ་མོ་མི་ཚངས་པར་སྤྱོད་པ་མཐོང་བ་ལྟ་བུའི་བག་ཙམ་ལས་བསམས་པ་ཙམ་གྱིས་
ཆོས་འགའ་ཞིག་བླངས་པར་འགྱུར་ལ། དགེ་སློང་ཡང་ཞེ་སྡང་ལ་གནས་པས་ཞེ་སྡང་གིས་སྨྲས་སོ་ཞེ་ན་དགེ་འདུན་ལྷག་མར་འགྱུར་རོ། །གཉིས་པ་བསྒོ་བ་ལས་གྱུར་པ་ལ་བཞི། དགེ་འདུན་དབྱེན། དེའི་རྗེས་སུ་ཕྱོགས་པ། ཁྱིམ་སུན་འབྱིན་པ། བཀའ་བློ་མི་བདེ་བའོ། །དང་པོ་ནི། གང་བྱས་པས་དགེ་འདུན་དབྱེན་གྱི་ལྷག་མར་འགྱུར་ཞེ་ན། ཡང་ལྷས་བྱིན་ལྟ་བུའི་དགེ་སློང་གང་ཡང་རུང་བ་སངས་རྒྱས་ཀྱི་ཉན་ཐོས་ཀྱི་དགེ་འདུན་ལམ་གཅིག་ཏུ་ཞུགས་པས་མཐུན་པ་ཕྱོགས་གཉིས་སུ་བྱེ་བའི་ཕྱིར་བརྟུལ་བ་བརྩོན་པར་བྱེད་ཅིང་། དབྱེན་བྱེད་པར་འགྱུར་བའི་རྩོད་པ་ཡང་དག་པར་བླངས་ནས་རབ་ཏུ་སྟེ་དམ་དུ་བཟུང་སྟེ་འདུག་ན། ལྷས་བྱིན་ལྟ་བུའི་དགེ་སློང་དེ་ལ་ཆོས་འདི་པའི་དགེ་སློང་རྣམས་ཀྱིས་ཚིག་འཇམ་པོས་འདི་སྐད་ཅེས་བཞམས་ཏེ་བསྒོ་བར་བྱའོ། །ཚེ་དང་ལྡན་པ་ལྷས་བྱིན་ཁྱོད་དགེ་འདུན་ལྟ་བ་སོགས་མཐུན་པ་ཕྱོགས་གཉིས་སུ་བྱེ་བའི་ཕྱིར་བརྟུལ་བར་མ་བྱེད་ཅིག །དགེ་འདུན་གྱི་དབྱེན་བྱེད་པ་འགྱུར་བའི་རྩོད་པ་ཡང་དག་པར་བླངས་ནས་རབ་ཏུ་བཟུང་སྟེ་མ་འདུག་ཅིག །ཚེ་དང་ལྡན་པ་དགེ་འདུན་དང་ཚུལ་ཁྲིམས་དང་ལྟ་བ་དང་འཚོ་བ་དང་སྤྱོད་ལམ་མཐུན་པར་གྱིས་ཤིག །དགེ་འདུན་ལམ་གཅིག་ཏུ་ཞུགས་པས་མཐུན་པ་གཞན་གྱིས་མི་ཕྱེད། ཕན་ཚུན་གཅིག་གིས་གཅིག་གི་ཡོན་ཏན་བརྗོད་པས་ཀུན་ཏུ་དགའ་ཞིང་མི་རྩོད་འབྲས་བུ་མྱ་ངན་ལས་འདས་པ་འདོད་པར་མཆོག་གཅིག །གསོ་སྦྱོང་ལ་སོ་སོར་ཐར་པའི་མདོ་འདོན་པ་གཅིག་ཅིང་ཆུ་དང་འོ་མ་གཅིག་ཏུ་འདྲེས་པ་ལྟ་བུར་གྱུར་ལ། སྟོན་པའི་བསྟན་པ་སྡེ་སྣོད་གསུམ་པོ་ཁ་ཏོན་བྱེད་པ་ལ་སོགས་པས་གསལ་བར་བྱེད་ན་མཐོང་བའི་ཆོས་ལ་བདེ་བ་ལ་རེག་པར་གནས་པ་ལ་བརྟེན་ནས་མྱ་ངན་ལས་
འདས་པར་ཐོབ་པར་འགྱུར་གྱིས། ཚེ་དང་ལྡན་པ་ཁྱོད་དགེ་འདུན་འབྱེད་པར་བྱེད་པའི་གཞི་འདི་ལྟ་བུ་འདི་ཐོང་ཞིག་ཅེས་བསྒོ་བར་བྱའོ། །ལྷས་བྱིན་ལྟ་བུའི་དགེ་སློང་དེ་ལ་ཆོས་འདི་པའི་དགེ་སློང་རྣམས་ཀྱིས་དེ་སྐད་ཅེས་བསྒོ་བ་ན། གལ་ཏེ་དབྱེན་གྱི་གཞི་དེ་གཏོང་ན་དེ་ལྟ་ན་ལེགས་ཏེ་སྔར་ཉེས་བྱས་ཙམ་ལས་མ་བྱུང་བའི་ཕྱིར་གལ་ཏེ་བཞམས་བསྒོའི་མཐའ་ལ་མ་གཏོང་ན་ཉེས་པ་སྦོམ་པོར་འགྱུར་རོ། །འོ་ན་དེའི་འོག་ཏུ་ཇི་ལྟར་བྱ་ཞེ་ན། དབྱེན་གྱི་གཞི་དེ་གཏོང་བར་བྱ་བའི་ཕྱིར། གསོལ་བ་དང་བཞིའི་ལས་ཀྱིས་ལན་གཉིས་སམ་གསུམ་དུ་ཡང་དག་པར་བསྒོ་བ་སྟེ་ཀུན་དུ་དྲི་བར་བྱ། ཡང་དག་པར་བསྟན་པས་བཟློག་པར་བྱའོ། །ལན་གཉིས་ལན་གསུམ་དུ་ཡང་དག་པར་བསྒོ། ཡང་དག་པར་བསྟན་པ་ན་དབྱེན་གྱི་གཞི་དེ་གཏོང་ན་དེ་ལྟ་ན་ལེགས་ཏེ། ཉེས་པ་སྦོམ་པོ་ཙམ་ལས་མི་འབྱུང་བའི་ཕྱིར། གལ་ཏེ་བརྗོད་པའི་མཐའ་ལ་མི་གཏོང་ན་དགེ་འདུན་ལྷག་མའི་དངོས་གཞིར་འགྱུར་རོ། །གཉིས་པ་ནི། ལྷས་བྱིན་ལྟ་བུའི་དགེ་སློང་དེའི་གྲོགས་བྱེད་པའི་ཀོ་ཀ་ལི་ཀ་ལ་སོགས་པའི་དགེ་སློང་མི་མཐུན་པར་སྨྲ་བ་དབྱེན་ཉིད་ཀྱི་རྗེས་སུ་ཕྱོགས་པའི་དགེ་སློང་གཅིག་གམ་གཉིས་སམ་གསུམ་ཡན་ཆད་ཀྱི་མང་པོ་དག་ཡོད་ཅིང་། གལ་ཏེ་ཀོ་ཀ་ལི་ཀ་ལ་སོགས་པའི་དགེ་སློང་དེ་དག་ཆོས་འདི་པའི་དགེ་སློང་རྣམས་ལ་འདི་སྐད་ཅེས། ཚེ་དང་ལྡན་པ་དག་ཁྱེད་ཅག་དགེ་བ་ལ་སྦྱོར་ཡང་རུང་། སྡིག་པ་ལས་ཟློག་ཀྱང་རུང་། དགེ་སློང་ལྷས་བྱིན་འདི་ལ་དགེ་བ་ལ་སྦྱོར་བ་དང་སྡིག་པ་ལས་ལྡོག་པའི་ཚིག་ཅི་ཡང་མ་སྨྲ་ཞིག །དེ་ཅིའི་ཕྱིར་ཞེ་ན། ཚེ་དང་ལྡན་པ་དག་དགེ་སློང་ལྷས་བྱིན་འདི་ནི་ཆོས་རིགས་པ་སྨྲ་བ། འདུལ་བ་ལུང་སྨྲ་བ། ཡང་ན་ཆོས་འཕགས་ལམ་ཡན་ལག་བརྒྱད་ཀྱི་ནང་ནས་ཡང་དག་པའི་ལྟ་བ་དང་། རྟོག་པ་དང་།
རྩོལ་བ་དང་། དྲན་པ་དང་། ཏིང་ངེ་འཛིན་སྨྲ་བ། འདུལ་བ་ཡང་དག་པའི་ངག་དང་ལས་ཀྱི་མཐའ་དང་འཚོ་བ་སྨྲ་བ། ཡང་ཆོས་དོན་དང་ལྡན་པ་སྨྲ་བ། འདུལ་བ་འཇམ་ཞིང་མཛའ་བ་ལྟར་སྨྲ་བའོ། །དགེ་སློང་ལྷས་བྱིན་འདི་ནི་ཆོས་རིགས་པ་དང་འདུལ་བ་ལུང་ཇི་ལྟ་བ་བཞིན་ཡང་དག་པར་བླངས་ནས་རབ་ཏུ་བཟུང་སྟེ། སྟོན་པའི་བསྟན་པའི་རྗེས་སུ་ཐ་སྙད་འདོགས་པར་བྱེད་པ། དགེ་སློང་ལྷས་བྱིན་འདི་ནི་དོན་ཤེས་བཞིན་དུ་སྨྲའི། དོན་མི་ཤེས་པར་སྨྲ་བ་མ་ཡིན་པའི་ཕྱིར་ཏེ། དགེ་སློང་ལྷས་བྱིན་འདི་ནི་དབྱེན་གྱི་གཞི་གང་ལ་ཡིད་དང་མཐུན་པས་འདོད་ཅིང་རིགས་པར་རྟོགས་པས་བཟོད་པ་དེ་ལ། བདག་ཅག་ཀྱང་ཡིད་དང་མཐུན་པས་འདོད་ཅིང་རིགས་པས་རྟོགས་པ་བཟོད་དོ་ཞེས་ཟེར་ན། ཀོ་ཀ་ལི་ཀ་ལ་སོགས་པའི་དགེ་སློང་དེ་དག་ལ་ཆོས་འདི་པའི་དགེ་སློང་རྣམས་ཀྱིས་བཞམས་ཏེ་བསྒོ་བའི་ཚིག་འདི་སྐད། ཚེ་དང་ལྡན་པ་དག་ཁྱེད་ཅག་དེ་སྐད་ཅེས། ཚེ་དང་ལྡན་པ་དག་ཁྱེད་ཅག་དགེ་བ་ལ་སྦྱོར་ཡང་རུང་། སྡིག་པ་ལས་ལྡོག་ཀྱང་རུང་། དགེ་སློང་ལྷས་བྱིན་འདི་ལ་ཚིག་ཅི་ཡང་མ་སྨྲ་ཞིག །དེ་ཅིའི་ཕྱིར་ཞེ་ན། ཚེ་དང་ལྡན་པ་དག་དགེ་སློང་ལྷས་བྱིན་འདི་ནི་ཆོས་རིགས་པ་སྨྲ་བ། འདུལ་བ་ལུང་སྨྲ་བ། དགེ་སློང་ལྷས་བྱིན་འདི་ནི་ཆོས་རིགས་པ་དང་འདུལ་བ་ལུང་ཇི་ལྟ་བ་བཞིན་ཡང་དག་པར་བླངས་ནས་རབ་ཏུ་བཟུང་སྟེ། སྟོན་པའི་བསྟན་པའི་རྗེས་སུ་ཐ་སྙད་འདོགས་པར་བྱེད་པ། དགེ་སློང་ལྷས་བྱིན་འདི་ནི་དོན་ཤེས་བཞིན་དུ་སྨྲའི། དོན་མི་ཤེས་པར་སྨྲ་བ་མ་ཡིན་པའི་ཕྱིར་ཏེ། དགེ་སློང་ལྷས་བྱིན་འདི་ནི་དབྱེན་གྱི་གཞི་གང་ལ་ཡིད་དང་མཐུན་པས་འདོད་ཅིང་རྟོགས་པས་བཟོད་པ་དེ་ལ་བདག་ཀྱང་ཡིད་དང་མཐུན་པས་འདོད་ཅིང་རྟོགས་པས་བཟོད་དོ་ཞེས་མ་ཟེར་ཞིག །དེ་ཅིའི་ཕྱིར་ཞེ་
ན། ཚེ་དང་ལྡན་པ་དག་དགེ་སློང་ལྷས་བྱིན་འདི་ནི་ཆོས་རིགས་པ་སྨྲ་བ་མ་ཡིན་འདུལ་བ་ལུང་སྨྲ་བ་མ་ཡིན་གྱི། ཚེ་དང་ལྡན་པ་དག་དགེ་སློང་ལྷས་བྱིན་འདི་ནི་རིགས་པ་མ་ཡིན་པ་སྨྲ་བ་འདུལ་བ་ལུང་མ་ཡིན་པ་སྨྲ་བ། དགེ་སློང་ལྷས་བྱིན་འདི་ནི་ཆོས་རིགས་པ་མ་ཡིན་པ་དང་། འདུལ་བ་ལུང་མ་ཡིན་པ་ཡང་དག་པར་བླངས་ནས་རབ་ཏུ་བཟུང་སྟེ། རྗེས་སུ་ཐ་སྙད་འདོགས་པར་བྱེད་པ། དགེ་སློང་ལྷས་བྱིན་འདི་ནི་དོན་མི་ཤེས་བཞིན་དུ་སྨྲའི། དོན་ཤེས་པར་སྨྲ་བ་མ་ཡིན་པའི་ཕྱིར་ཏེ། དགེ་སློང་ལྷས་བྱིན་འདི་གང་ལ་འདོད་ཅིང་བཟོད་པ་དེ་ལ་ཚེ་དང་ལྡན་པ་དག་འདོད་ཅིང་བཟོད་པར་མ་བྱེད་ཅིག །ཚེ་དང་ལྡན་པ་དག་ཁྱེད་དགེ་འདུན་འབྱེད་འདོད་པར་མ་བྱེད་པར། ཚེ་དང་ལྡན་པ་དག་ཁྱེད་དགེ་འདུན་མཐུན་པ་ཉིད་དུ་འདོད་པར་གྱིས་ཤིག །ཚེ་དང་ལྡན་པ་དག་དགེ་འདུན་དང་མཐུན་པར་གྱིས་ཤིག །དེ་ལྟར་བྱས་པ་ལ་ཡོན་ཏན་ནི། དགེ་འདུན་མཐུན་མི་བྱེད། ཀུན་ཏུ་དགའ་མི་རྩོད། མཆོག་གཅིག་འདོན་པ་གཅིག་ཅིང་ཆུ་དང་འོ་མ་གཅིག་ཏུ་འདྲེས་པ་ལྟ་བུར་གྱུར་ལ། སྟོན་པའི་བསྟན་པ་གསལ་བར་བྱེད་ན། བདེ་བ་ལ་རེག་པ་གནས་པར་འགྱུར་གྱིས། ཚེ་དང་ལྡན་པ་དག་དགེ་འདུན་འབྱེད་པའི་རྗེས་སུ་ཕྱོགས་ཤིང་། མི་མཐུན་པའི་སྨྲ་བ་འདི་ལྟ་བུ་འདི་མཐོང་ཞིག་ཅེས་བསྒོ་བར་བྱའོ། །ཀོ་ཀ་ལི་ཀ་ལ་སོགས་པའི་དགེ་སློང་དེ་དག་ལ་ཆོས་འདི་པའི་དགེ་སློང་རྣམས་ཀྱིས་དེ་སྐད་བསྒོ་བ་ན། གལ་ཏེ་རྗེས་སུ་ཕྱོགས་པའི་གཞི་(༡༧ན)ཞེས་སོགས་སོ། །གསུམ་པ་ནི། གང་བྱས་པས་ཁྱིམ་སུན་འབྱིན་པའི་ལྷག་མར་འགྱུར་ཞེ་ན། ནབས་སོ་དང་འགྲོ་མགྱོགས་ལྟ་བུའི་དགེ་སློང་རབ་ཏུ་མང་པོ་དག་རེ་ལྡེའི་རི་ལྟ་བུའི་གྲོང་ངམ་གྲོལ་རྡལ་ཞིག་ན་ཆོས་དང་ཟང་ཟིང་གི་ལོངས་སྤྱོད་ལ་ཉེ་བར་བརྟེན་ཅིང་གནས་པར་གྱུར་ལ། ནབས་སོ་དང་འགྲོ་མགྱོགས་ལྟ་བུའི་དགེ་
སློང་དེ་དག་ཀྱང་འགྲོགས་པ་དང་ལོངས་སྤྱོད་པའི་སྒོ་ནས་ཁྱིམ་པའི་ཁྱིམ་སུན་འབྱིན་པར་བྱེད་པ། སྡིག་པའི་ཆོས་གནས་ངན་ལེན་ཀུན་ཏུ་སྤྱོད་པར་གྱུར་ཅིང་། ནབས་སོ་དང་འགྲོ་མགྱོགས་ལྟ་བུ་དེ་དག་གིས་ཁྱིམ་དག་སུན་ཕྱུང་བར་མིག་གི་ཤེས་པས་མཐོང་ངམ། རྣ་བའི་ཤེས་པས་ཐོས་སམ། མིག་རྣ་ལས་གཞན་པའི་ཤེས་པས་རབ་ཏུ་ཤེས་སམ། དེ་དག་སྡིག་པ་ཀུན་ཏུ་སྤྱོད་པ་མཐོང་ངམ། ཐོས་སམ། རབ་ཏུ་ཤེས་ན། ནབས་སོ་དང་འགྲོ་མགྱོགས་ལྟ་བུའི་དགེ་སློང་དེ་དག་ལ་ཆོས་འདི་པའི་དགེ་སློང་རྣམས་ཀྱིས་སྐྲོད་པའི་ཚིག་འདི་སྐད་ཅེས། ཚེ་དང་ལྡན་པ་དག་ཁྱེད་ཁྱིམ་སུན་འབྱིན་པ་སྡིག་པའི་ཆོས་ཀུན་ཏུ་སྤྱོད་པ་དག་ཡིན་ཏེ། ཁྱེད་ཀྱིས་ཁྱིམ་དག་སུན་ཕྱུང་བར་མཐོང་ཞིང་ཐོས་ལ་རབ་ཏུ་ཤེས། ཁྱེད་སྡིག་པ་ཀུན་ཏུ་སྤྱོད་པར་མཐོང་ཞིང་ཐོས་ལ་རབ་ཏུ་ཤེས་ཀྱིས། ཚེ་དང་ལྡན་པ་དག་ཁྱེད་གནས་འདི་ན་གནས་པས་ཆོག་གིས། གཞན་འདི་ནས་གཞན་དུ་དེངས་ཤིག་ཅེས་བསྒོ་ནས་བསྐྲད་པར་བྱའོ། །དེ་ལྟར་བསྐྲད་པ་ན། གལ་ཏེ་ནབས་སོ་དང་འགྲོ་མགྱོགས་ལྟ་བུའི་དགེ་སློང་དེ་དག་ཆོས་འདི་པའི་དགེ་སློང་རྣམས་ལ་འདི་སྐད་ཅེས། ཚེ་དང་ལྡན་པ་དག་འདི་ན་དགེ་སློང་ཁ་ཅིག་འདུན་པས་འགྲོ་བ། ཞེ་སྡང་གིས་འགྲོ་བ། གཏི་མུག་གིས་འགྲོ་བ། འཇིགས་པས་འགྲོ་བ་དག་ཡིན་ཏེ། རྒྱུ་མཚན་འདི་ལྟར་ལྟུང་བ་འདྲ་བ་ཁོ་ན་ལས། ནབས་སོ་དང་འགྲོ་མགྱོགས་ལྟ་བུའི་དགེ་སློང་ཁ་ཅིག་ནི་སྐྲོད་པར་བྱེད་ལ། དམར་སེར་ཅན་ལྟ་བུའི་དགེ་སློང་ཁ་ཅིག་ནི་སྐྲོད་པར་མི་བྱེད་དོ་ཞེས་རྫུན་ཟེར་ན། ནབས་སོ་དང་འགྲོ་མགྱོགས་ལྟ་བུའི་དགེ་སློང་དེ་དག་ལ་ཆོས་འདི་པའི་དགེ་སློང་རྣམས་ཀྱིས་བཞམས་ཏེ་བསྒོ་བའི་ཚིག་འདི་སྐད་ཅེས། ཚེ་དང་ལྡན་པ་དག་
འདི་ན་དགེ་སློང་ཁ་ཅིག་འདུན་པས་འགྲོ་བ། ཞེ་སྡང་གིས་འགྲོ་བ། གཏི་མུག་གིས་འགྲོ་བ། འཇིགས་པས་འགྲོ་བ་དག་ཡིན་ཏེ། འདི་ལྟར་ལྟུང་བ་འདྲ་བ་ཁོ་ན་ལས། དགེ་སློང་ཁ་ཅིག་ནི་སྐྲོད་པར་བྱེད། ཁ་ཅིག་ནི་སྐྲོད་པར་མི་བྱེད་དོ་ཞེས་རྫུན་མ་ཟེར་ཞིག །དེ་ཅིའི་ཕྱིར་ཞེ་ན། དགེ་སློང་འདི་དག་ནི་འདུན་པས་འགྲོ་བ་མ་ཡིན། ཞེ་སྡང་གིས་འགྲོ་བ་མ་ཡིན། གཏི་མུག་གིས་འགྲོ་བ་མ་ཡིན། འཇིགས་པས་འགྲོ་བ་མ་ཡིན་གྱི། འདི་ལྟར་ཚེ་དང་ལྡན་པ་དག་ཉིད་ཁྱིམ་སུན་འབྱིན་པ་སྡིག་པའི་ཆོས་ཀུན་ཏུ་སྤྱོད་པ་དག་ཡིན་ཏེ། ཁྱེད་ཉིད་ཀྱིས་ཁྱིམ་དག་སུན་ཕྱུང་བར་མཐོང་ཞིང་ཐོས་ལ་རབ་ཏུ་ཤེས། ཁྱེད་སྡིག་པ་ཀུན་ཏུ་སྤྱོད་པར་མཐོང་ཞིང་ཐོས་ལ་རབ་ཏུ་ཤེས་པའི་ཕྱིར་ཏེ། ཚེ་དང་ལྡན་པ་དག་འདུན་པས་འགྲོ་བ་ཞེས་བྱ་བའི་ཚིག་གི་ལམ་དང་། ཞེ་སྡང་གིས་འགྲོ་བ། གཏི་མུག་གིས་འགྲོ་བ། འཇིགས་པས་འགྲོ་བ་ཞེས་བྱ་བའི་ཚིག་གི་ལམ་འདི་ལྟ་བུ་འདི་ཐོང་ཞིག་ཅེས་བསྒོ་བར་བྱའོ། །ནབས་སོ་དང་འགྲོ་མགྱོགས་ལྟ་བུའི་དགེ་སློང་དེ་དག་ལ་ཆོས་འདི་པའི་དགེ་སློང་རྣམས་ཀྱིས་དེ་སྐད་ཅེས་བཞམས་ཏེ་བསྒོ་བ་ན། གལ་ཏེ་འདུན་པས་འགྲོ་བ་ཞེས་སོགས་ཀྱི་ཚིག་གི་གཞི་དེ་གཏོང་ན་ཞེས་སོགས་སོ། །བཞི་པ་ནི། གང་བྱས་པས་བཀའ་བློ་མི་བདེ་བའི་ལྷག་མར་འགྱུར་ཞེ་ན། འདི་ན་འདུན་པ་ལྟ་བུའི་དགེ་སློང་འགའ་ཞིག་བཀའ་བློ་མི་བདེ་བ་ཚིག་བརྣག་མི་བཟོད་པའི་རང་བཞིན་ཅན་དུ་གྱུར་ལ། འདུན་པ་ལྟ་བུའི་དགེ་སློང་དེ་ལ་ཆོས་འདི་པའི་དགེ་སློང་རྣམས་ཀྱིས་སོ་སོར་ཐར་པའི་མདོ་ཕམ་པ་དང་། ལྷག་མ་དང་། མ་ངེས་པ་དང་། རིལ་གྱིས་གདོན་པར་གཏོགས་པའི་བསླབ་པའི་གཞི་རྣམས་དང་། བདེ་བར་གཤེགས་པའི་སོ་སོར་ཐར་པའི་མདོ་རིལ་གྱིས་གདོན་པར་གཏོགས་པ་རྣམས་
ཀྱིས། ཆོས་མདོ་སྡེ་དང་མངོན་པའི་སྡེ་སྣོད་དང་མཐུན་པ་དང་། འདུལ་བའི་སྡེ་སྣོད་དང་མཐུན་པར་སྨྲས་པ་ན། ཚེ་དང་ལྡན་པ་དག་ཁྱེད་ཅག་དགེ་བ་ལ་སྦྱོར་ཡང་རུང་། སྡིག་པ་ལས་ལྡོག་ཀྱང་རུང་། བདག་ལ་ཚིག་ཅི་ཡང་མ་སྨྲས་ཤིག །བདག་ཀྱང་དགེ་བ་ལ་འཇུག་ཀྱང་རུང་། སྡིག་པ་ལས་ལྡོག་ཀྱང་རུང་། ཚེ་དང་ལྡན་པ་དག་ལ་ཚིག་ཅི་ཡང་མི་སྨྲའོ། །ཚེ་དང་ལྡན་པ་དག་གིས་བདག་ལ་དགེ་བ་ལ་འཇུག་པ་དང་། སྡིག་པ་ལས་ལྡོག་པའི་ཚིག་གི་ལམ་མཐོང་ཞིག །ཁྱེད་ལ་ཡང་བདག་གིས་དགེ་བ་ལ་འཇུག་པ་དང་། སྡིག་པ་ལས་ལྡོག་པའི་ཚིག་སྨྲས་པས་ཅི་ཞིག་བྱ་ཞེས། བདག་ཉིད་ལྟུང་བ་བརྗོད་པར་བྱ་བ་མ་ཡིན་པར་བརྗོད་ན། འདུན་པ་ལྟ་བུའི་དགེ་སློང་དེ་ལ་ཆོས་འདི་པའི་དགེ་སློང་རྣམས་ཀྱིས་བཞམས་ཏེ་བསྒོ་བའི་ཚིག་འདི་སྐད་ཅེས། ཚེ་དང་ལྡན་པ་འདུན་པ་ལྟ་བུ་ཁྱོད་དགེ་སློང་རྣམས་ཀྱིས་སོ་སོར་ཐར་པའི་མདོ་ཕམ་པ་དང་། ལྷག་མ་དང་། མ་ངེས་པ་དང་། རིལ་གྱིས་གདོན་པར་གཏོགས་པ་བསླབ་པའི་གཞི་རྣམས་དང་། བདེ་བར་གཤེགས་པའི་སོ་སོར་ཐར་པའི་མདོ་རིལ་གྱིས་གདོན་པར་གཏོགས་པ་རྣམས་ཀྱིས་ཆོས་མདོ་སྡེ་དང་མངོན་པའི་སྡེ་སྣོད་དང་མཐུན་པ་དང་། འདུལ་བའི་སྡེ་སྣོད་དང་མཐུན་པར་སྨྲས་པ་ན། བདག་ཉིད་ལྟུང་བ་བརྗོད་པར་བྱ་བ་མ་ཡིན་པར་མ་བྱེད་པར་ཚེ་དང་ལྡན་པས་བདག་ཉིད་ལྟུང་བ་བརྗོད་པར་བྱ་བ་ཁོ་ནར་གྱིས་ཤིག །དགེ་སློང་རྣམས་ཚེ་དང་ལྡན་པ་ལ་ཆོས་མདོ་སྡེ་དང་མངོན་པའི་སྡེ་སྣོད་དང་མཐུན་པ་དང་། འདུལ་བའི་སྡེ་སྣོད་དང་མཐུན་པར་སྨྲ་བ་ན། ཚེ་དང་ལྡན་པ་ཡང་དགེ་སློང་རྣམས་ལ་ཆོས་མདོ་སྡེ་དང་མངོན་པའི་སྡེ་སྣོད་དང་མཐུན་པ་དང་། འདུལ་བའི་སྡེ་སྣོད་དང་མཐུན་པར་སྨྲོས་ཤིག །དེ་ལྟར་སྨྲས་པ་ལ་ཕན་ཡོན་འདི་ལྟ་སྟེ། གཅིག་ལ་
གཅིག་ལྟུང་བ་བརྗོད་པར་བྱ་བ་གླེང་བ་ཉིད་དུ་བྱེད་པ་དང་། གཅིག་ལ་གཅིག་གདམ་ངག་འདོམས་ཤིང་རྗེས་སུ་སྟོན་པ་དང་། གཅིག་གིས་གཅིག་ལ་ལྟུང་བ་ལས་སློང་བ་ཉིད་དེ་ལྟ་བུས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེའི་ཉན་ཐོས་ཀྱི་དགེ་འདུན་གྱི་འཁོར་འདི་འཕེལ་བར་འགྱུར་གྱིས། ཚེ་དང་ལྡན་པ་ཁྱོད་བདག་ཉིད་དུ་ལྟུང་བ་བརྗོད་པར་བྱ་བ་མ་ཡིན་པར་བྱེད་པའི་ལས་ཀྱི་མཐའ་འདི་ལྟ་བུ་ཐོང་ཞིག་ཞེས་བསྒོ་བར་བྱའོ། །འདུན་པ་ལྟ་བུའི་དགེ་སློང་དེ་ལ་ཆོས་འདི་པའི་དགེ་སློང་རྣམས་ཀྱིས་དེ་སྐད་བཞམས་ཏེ་བསྒོ་བ་ན། གལ་ཏེ་བརྗོད་པར་བྱ་བ་མ་ཡིན་པར་བྱེད་པའི་གཞི་དེ་གཏོང་ན་ཞེས་སོགས་སོ། །བཞི་པ་ནི། ཚེ་དང་ལྡན་པ་ཞེས་སོགས་སོ། །ལྔ་པ་ནི། དགེ་འདུན་ལྷག་མའི་ཆོས་བཅུ་གསུམ་པོ་དེ་དག་ལས་ཁུ་བ་འབྱིན་པ་ལ་སོགས་པ་དང་པོ་དགུ་ནི་ཆོས་ཅན། དངོས་པོས་གྱུར་པ་ཞེས་བྱ་སྟེ། བཞམས་བསྒོ་ལ་མི་ལྟོས་པར་སྦྱོར་བའི་སྦྱོར་བ་དང་། སྦྱོར་བ་དང་། དངོས་གཞིའི་ལྟུང་བ་དང་པོ་དག་ནས་རིམ་པ་བཞིན་འབྱུང་བ་ཉིད་ཡིན་པའི་ཕྱིར་རོ། །དགེ་འདུན་དབྱེན་ལ་སོགས་པ་ཕྱི་མ་བཞི་ནི་ཆོས་ཅན། བསྒོ་བ་ལས་གྱུར་པ་ཞེས་བྱ་སྟེ། བཞམས་བསྒོ་དང་། གསོལ་བ་དང་། རྗོད་པ་ལན་གསུམ་གྱི་བར་གྱི་མཐའ་ལ་མ་བཏང་བས་དངོས་གཞིའི་ལྟུང་བར་འགྱུར་བའི་ཕྱིར། དྲུག་པ་ནི། ལྟུང་བ་འབྱིན་པར་བྱེད་པའི་དགེ་སློང་གིས་དགེ་འདུན་ལྷག་མ་བཅུ་གསུམ་པོ་དེ་དག་ལས་ལྟ་བ་གང་ཡང་རུང་བ་ཞིག་བྱས་ལ། ཇི་སྲིད་དུ་རང་རྒྱུད་ལ་ལྟུང་བ་བྱུང་བར་ཤེས་བཞིན་དུ་ཞག་ཏུ་འཆབ་པར་བྱེད་པ་དེ་སྲིད་དུ་ལྟུང་བ་འབྱིན་པའི་དགེ་སློང་དེས་མི་འདོད་བཞིན་དུ་སྤོ་བ་སྤྱད་པར་བྱའོ། །ལྟུང་བ་འབྱིན་པའི་དགེ་སློང་གིས་མི་འདོད་བཞིན་དུ་སྤོ་བ་སྤྱད་པར་བྱས་ནས། དེའི་
འོག་ཏུ་ཞག་དྲུག་གི་བར་དུ་དགེ་འདུན་ལ་ཐུགས་མགུ་བ་བྱ་བ་སྤྱད་པར་བྱའོ། །དགེ་སློང་གིས་དགེ་འདུན་གྱི་ཐུགས་མགུ་བར་བྱ་བ་སྤྱད་ནས། ལྷག་མ་ལས་དབྱུང་བར་བྱ་བ་ལ་ཐོགས་ཏེ་ཆོས་དང་མཐུན་པར་གཎྜི་བརྡུང་བ་དང་གནས་མལ་བཤམ་པ་སོགས་བྱས་ལ། དགེ་འདུན་འདུས་པ་ན་རྒན་པའི་མཐའ་ལོགས་ནས་མཆིལ་ལྷམ་གཉིས་ཕུད་ཕྱག་འཚལ་ཏེ་ཐལ་མོ་སྦྱར། ཙོག་པུར་འདུག་སྟེ་ལྷག་མ་ལས་དབྱུང་བའི་དོན་དུ་གསོལ་བ་ལན་གསུམ་བཏབ་ནས། དགེ་སློང་གིས་དགེ་འདུན་གྱི་སེམས་མགུ་བར་བྱས་ན། གནས་གང་ན་དགེ་སློང་ཉི་ཤུའི་ཚོགས་ཀྱི་དགེ་འདུན་ཡོད་པ་དེར། ལྟུང་བ་འབྱིན་པའི་དགེ་སློང་དེ་དབྱུང་བར་བྱའོ། །དགེ་སློང་ཉི་ཤུར་གཅིག་གིས་མ་ཚང་བའི་ཚོགས་ཀྱི་དགེ་འདུན་གྱིས། དགེ་སློང་དེ་ལ་ལྷག་མ་ལས་འབྱིན་པར་བྱེད་ན། དགེ་སློང་དེ་ཡང་ལྷག་མ་ལས་མ་བྱིན་ལ། འབྱིན་པར་བྱེད་པའི་དགེ་སློང་དེ་དག་ཀྱང་སྨད་པར་བྱ་བ་ཡིན་ཏེ། ལྷག་མ་ཕྱིར་འཆོས་པ་དེ་ལ་དེ་ནི་ཆོ་ག་སྟེ་ཐབས་ཡིན་ནོ། །བདུན་པ་ནི། དགེ་འདུན་ལྷག་མ་བཏོན་པ་དེ་ལ་ཞེས་སོ། །བཞི་པ་ངེས་པ་འདོན་པ་ལ་ལྔ། སྡོམ་གྱིས་མདོར་བསྟན། མ་ངེས་པ་འདོན་པའི་ལུང་དབོག །སོ་སོའི་མཚན་ཉིད། མཇུག་བསྡུ་བ། རྣམ་གཞག་བསྒྲག་པའོ། །དང་པོ་ནི། མ་ངེས་པའི་ཆོས་སྡོམ་དུ་བསྡུས་པ་ཆོས་ཅན་ཁྱོད་ལ་གཉིས་ཡོད་དེ། ཁྱོད་ལ་དབེན་པ་སྐྱབས་ཡོད་པ་ན་འདོད་པ་བྱར་རུང་བར་འདུག་པའི་མ་ངེས་པ་དང་། དབེན་པ་སྐྱབས་ཡོད་པ་ན་འདོད་པ་བྱ་མི་རུང་བར་འདུག་པའི་མ་ངེས་པ་གཉིས་ཡོད་པའི་ཕྱིར། དང་པོ་ནི། ཕམ་ལྷག་ལྟུང་བྱེད་གསུམ་གང་རུང་དུ་ཡང་མ་ངེས་པ་དང་། གཉིས་པ་ནི། ལྷག་མ་དང་ལྟུང་བྱེད་གང་དུ་ཡང་མ་ངེས་པའོ། །གཉིས་པ་ནི། འདུལ་བའི་སྡེ་སྣོད་ཡི་གེར་མི་འབྲི་བ་ཡིན་ན། མ་ངེས་པ་གཉིས་འདོན་པར་
གང་ལས་ཤེས་ཞེ་ན། མི་ཤེས་པའི་སྐྱོན་མེད་དེ། ཚེ་དང་ལྡན་པ་དག་ཕམ་ལྷག་ལྟུང་བྱེད་གསུམ་གང་དུ་ཡང་མ་ངེས་པ་དང་། ལྷག་མ་དང་ལྟུང་བྱེད་གཉིས་གང་དུ་ཡང་མ་ངེས་པའི་ཆོས་གཉིས་པོ་འདི་དག་ནི་ཟླ་བ་ཕྱེད་ཕྱེད་ཅིང་། སོ་སོར་ཐར་པའི་མདོ་འདོན་པའི་ཚེ་ན་འདུལ་བ་འཛིན་པའི་ཁ་ཏོན་ལས་འབྱུང་བའི་ཕྱིར་རོ། །གསུམ་པ་ལ་གཉིས་ལས། མ་ངེས་པ་དང་པོ་ནི། ཡང་འཆར་ཀ་ལྟ་བུའི་དགེ་སློང་གང་ཡང་རུང་བ་སྦེད་མ་ལྟ་བུའི་བུད་མེད་མི་ཚངས་པར་སྤྱོད་པ་འཁྲིག་པའི་ཆོས་བསྟེན་ནུས་པ་དང་ལྷན་ཅིག་དགེ་སློང་གཅིག་པུ་བུད་མེད་གཅིག་དང་སྐྱེས་པ་དང་བུད་མེད་དང་མ་ནིང་མེད་པའི་དབེན་པ་རྩིག་པ་དང་ཡོལ་བ་དང་། རིབ་མ་དང་། ཐིབས་པོ་དང་། མཚན་མོའི་སྐྱབས་གང་རུང་ཡོད་པ་ན། འདོད་པ་མི་ཚངས་པར་སྤྱོད་པར་བྱར་རུང་བར་ཁྲི་དང་ཁྲིའུ་ལྟ་བུའི་སྟན་ལ་འདུག་པར་བྱེད་ཅིང་། འཆར་ཀ་ལྟ་བུའི་དགེ་སློང་དེ་ལ་གལ་ཏེ་དགེ་བསྙེན་མ་རི་དྭགས་འཛིན་གྱི་མ་ས་ག་ལྟ་བུ་དཀོན་མཆོག་གསུམ་ལ་ཡིད་ཆེས་པ་སྲོག་ལ་བབ་ཀྱང་རྫུན་མི་སྨྲ་བའི་ཚིག་དང་ལྡན་པས་ཆོས་གསུམ་པོ་ཕམ་པར་གྱུར་པ་བཞི་ལས་གང་ཡང་རུང་བའམ། དགེ་འདུན་ལྷག་མ་བཅུ་གསུམ་ལས་གང་ཡང་རུང་བའམ། ལྟུང་བྱེད་དགུ་བཅུ་ལས་ཆོས་གང་ཡང་རུང་བས་སྨྲས་པར་གྱུར་ལ། འཆར་ཀ་ལྟ་བུའི་དགེ་སློང་གིས་འདུག་པ་དྲང་པོར་ཁས་བླངས་ན་ཆོས་གསུམ་པོ་ཕམ་པར་གྱུར་པའམ། དགེ་འདུན་ལྷག་མའམ། ལྟུང་བྱེད་ལས་ཆོས་གང་ཡང་རུང་བས་བཤགས་པ་བྱེད་དུ་གཞུག་ཅིང་། འཆར་ཀ་ལྟ་བུའི་དགེ་སློང་དེ་ལ་དགེ་བསྙེན་མ་ས་ག་ལྟ་བུ་དཀོན་མཆོག་གསུམ་ལ་ཡིད་ཆེས་པའི་ཚིག་དང་ལྡན་པས་ཆོས་གསུམ་པོ་གང་དང་གང་གིས་སྨྲས་པར་གྱུར་པའི་ཆོས་དེ་དང་དེས་འཆར་ཀ་ལྟ་བུའི་དགེ་སློང་དེ་བཤགས་པ་བྱེད་དུ་གཞུག་སྟེ་དེ་ནི་མ་ངེས་པའི་
ཆོས་དང་པོ་ཡིན་ནོ། །མ་ངེས་པའི་ཆོས་གཉིས་པ་ནི། ཡང་ཤི་རི་ཀ་ལྟ་བུའི་དགེ་སློང་གང་ཁྱིམ་བདག་གི་ཆུང་མ་གསོ་སྦྱོང་འཕགས་ལྟ་བུའི་བུད་མེད་འཁྲིག་པ་བསྟེན་ནུས་དང་ལྷན་ཅིག་དགེ་སློང་གཅིག་པུ་བུད་མེད་གཅིག་དང་སྐྱེས་པ་སོགས་མེད་པའི་དབེན་པ་རྩིག་པ་ལ་སོགས་པའི་སྐྱབས་ལྔ་པོ་གང་རུང་ཡོད་པ་ན། འདོད་པ་མི་ཚངས་པར་སྤྱོད་པ་བྱར་མི་རུང་བར་ཁྲིའམ་ཁྲིའུ་ལྟ་བུའི་སྟན་ལ་འདུག་པར་བྱེད་ཅིང་། ཤི་རི་ཀ་ལྟ་བུའི་དགེ་སློང་དེ་ལ་གལ་ཏེ་དགེ་བསྙེན་མ་ལེགས་སྐྱེས་ལྟ་བུ་དཀོན་མཆོག་གསུམ་ལ་ཡིད་ཆེས་པའི་ཚིག་དང་ལྡན་པས་ཆོས་གཉིས་པོ་དགེ་འདུན་ལྷག་མ་བཅུ་གསུམ་ལས་གང་རུང་ངམ། ལྟུང་བྱེད་དགུ་བཅུ་ལས་གང་ཡང་རུང་བས་སྨྲས་པར་གྱུར་ལ། ཤི་རི་ཀ་ལྟ་བུའི་དགེ་སློང་གིས་འདུག་པ་དྲང་པོར་ཁས་བླངས་ན་ཆོས་གཉིས་པོ་དགེ་འདུན་ལྷག་མའམ། ལྟུང་བྱེད་ལས་གང་ཡང་རུང་བས་བཤགས་པ་བྱེད་དུ་གཞུག་ཅིང་། ཤི་རི་ཀ་ལྟ་བུའི་དགེ་སློང་དེ་ལ་དགེ་བསྙེན་མ་ལེགས་སྐྱེས་ལྟ་བུ་དཀོན་མཆོག་གསུམ། ཡིད་ཆེས་པའི་ཚིག་དང་ལྡན་པས་ཆོས་གཉིས་པོ་གང་དང་གང་གིས་སྨྲས་པར་གྱུར་པའི་ཆོས་དེ་དང་དེས་དགེ་སློང་བཤགས་པ་བྱེད་དུ་གཞུག་སྟེ། དེ་ཡང་མ་ངེས་པའི་ཆོས་སོ། ། བཞི་པ་ནི། ཚེ་དང་ལྡན་པ་ཞེས་སོ། །ལྔ་པ་ནི། མ་ངེས་པ་བཏོན་པ་དེ་ལ་ཞེས་སོགས་སོ། །ལྔ་པ་རིལ་གྱིས་གདོན་པ་ལ་ལྔ། སྤང་བའི་ལྟུང་བྱེད་ཀྱི་ཆོས་སུམ་ཅུ། ལྟུང་བྱེད་འབའ་ཞིག་པའི་ཆོས་དགུ་བཅུ། སོ་སོར་བཤགས་པར་བྱ་བའི་ཆོས་བཞི། བསླབ་པར་བྱ་བའི་ཆོས་མང་པོ། རྩོད་པ་ཞི་བ་བྱ་བའི་ཆོས་བདུན་གདོན་པའོ། །དང་པོ་ལ་གསུམ་དངོས། མཇུག་བསྡུ། རྣམ་གཞག་བསྒྲག་པའོ། །དང་པོ་ལ་གསུམ། བཅུ་ཚན་དང་པོ། གཉིས་པ། གསུམ་པའོ། །
དང་པོ་ལ་གསུམ། སྡོམ་གྱིས་མདོར་བསྟན། སྤང་བའི་ལྟུང་བྱེད་གདོན་པའི་ལུང་དབོག །སོ་སོའི་མཚན་ཉིད་བཤད་པའོ། །དང་པོ་ནི། སྤང་བའི་ལྟུང་བྱེད་ཀྱི་བཅུ་ཚན་དང་པོ་སྡོམ་དུ་བསྡུས་པ་ཆོས་ཅན། བཅུ་ཡོད་དེ། འཆང་བའི་སྤང་བ། འབྲལ་བའི་སྤང་བ། འཇོག་པའི་སྤང་བ། འཁྲུར་འཇུག་པའི་སྤང་བ། གོས་ལེན་པའི་སྤང་བ། སྟོད་གཡོགས་དང་སྨད་གཡོགས་དང་བཅས་པ་སློང་བར་རིགས་པའི་སྤང་བ། གོས་ཀྱི་རིན་ཐང་དཔགས་པ་སློང་བའི་སྤང་བ། སོ་སོ་ནས་དཔགས་པ་སློང་པའི་སྤང་བ། བསྐུར་བའི་སྤང་བ་རྣམས་སུ་ཡོད་པའི་ཕྱིར། གཉིས་པ་ནི། འདུལ་བའི་སྡེ་སྣོད་ཡི་གེར་མི་འབྲི་བ་ཡིན་པས། སྤང་བའི་ལྟུང་བྱེད་ཀྱི་ཆོས་སུམ་ཅུ་འདོན་པ་གང་ལས་ཤེས་ཤེ་ན། མི་ཤེས་པའི་སྐྱོན་མེད་དེ། ཚེ་དང་ལྡན་པ་དག་སྤང་བའི་ལྟུང་བྱེད་ཀྱི་ཆོས་སུམ་ཅུ་པོ་འདི་དག་ནི་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་གདོན་པའི་ཚེ་ན་འདུལ་བ་འཛིན་པའི་ངག་ལས་འབྱུང་བའི་ཕྱིར་རོ། །ཅིའི་ཕྱིར་སྤང་བའི་ལྟུང་བྱེད་ཅེས་བྱ་ཞེ་ན། ལྟུང་བ་བཤགས་པ་བྱེད་པའི་ཚེ་ལྟུང་བའི་རྒྱུར་གྱུར་པའི་དངོས་པོ་དེ་དག་དགེ་སློང་གཞན་ལ་ཞག་གཅིག་སྤང་དགོས་པའི་དོན་གྱིས་ན་སྤང་བའི་ལྟུང་བྱེད་ཅེས་བྱའོ། །གསུམ་པ་ལ་བཅུ་ལས། དང་པོ་འཆང་བའི་སྤང་བ་ནི། གང་བྱས་པས་གོས་འཆང་བའི་སྤང་བར་འགྱུར་ཞེ་ན། ཆོས་འདི་པའི་དགེ་སློང་ཆོས་གོས་དྲ་བ་དང་དྲུབ་པ་དང་། ཁ་བསྒྱུར་བ་ཟིན་པས་དགེ་འདུན་གྱི་དབྱར་སྔ་མ་ཁས་བླངས་པས་སྲ་བརྐྱང་བཏིང་བ་དཔྱིད་ཟླ་ར་བ་ཉ་ལ་ཕྱུང་བའམ། དབྱར་ཕྱི་མ་ཁས་བླངས་པས་སྲ་བརྐྱང་བཏིང་བ་དཔྱིད་ཟླ་འབྲིང་པོའི་ཉ་ལ་ཕྱུང་ན། ཞག་བཅུའི་བར་དུ་གོས་ལྷག་པ་སྣམ་སྦྱར་མ་གཏོགས་པ་རུང་བ་མ་བྱས་པ་བཅང་བར་བྱའོ། །དེ་ལས་འདས་པར་འཆང་ན་ཞག་བཅུ་གཅིག་པའི་སྐྱ་རེངས་ཤར་བའི་ཚེ་ན་སྤང་བའི་ལྟུང་བྱེད་དུ་
འགྱུར་རོ། །གཉིས་པ་འབྲལ་བའི་སྤང་བ་ནི། གང་བྱས་པས་ཆོས་གོས་དང་འབྲལ་བའི་སྤང་བར་འགྱུར་ཞེ་ན། དགེ་སློང་ཆོས་གོས་ཟིན་པས་སྲ་བརྐྱང་ཕྱུང་ན་གལ་ཏེ་ནུབ་གཅིག་ཀྱང་ཆོས་གོས་བླ་གོས་དང་མཐང་གོས་དང་སྣམ་སྦྱར་གསུམ་ལས་རང་གི་བྱིན་རླབས་ཅན་གྱི་ཆོས་གོས་གསུམ་ལས་གང་ཡང་རུང་བ་དང་ཆོས་གོས་ཡོད་པའི་མཚམས་ཀྱི་ཕྱི་རོལ་ཏུ་སྐྱ་རེངས་ཤར་གྱི་བར་དུ་འབྲལ་བར་བྱེད་ན་སྤང་བའི་ལྟུང་བྱེད་དུ་འགྱུར་རོ། །ཐམས་ཅད་དུ་འགྱུར་རམ་ཞེ་ན། དགེ་འདུན་གྱིས་མི་འབྲལ་བའི་གནང་བ་བྱིན་པ་མ་གཏོགས་སོ། །གསུམ་པ་འཇོག་པའི་སྤང་བ་ནི། གང་བྱས་པས་གོས་ཟླ་བར་འཇོག་པའི་སྤང་བར་འགྱུར་ཞེ་ན། དགེ་སློང་ཆོས་གོས་ཟིན་པས་སྲ་བརྐྱང་ཕྱུང་ན། དུས་མ་ཡིན་པའི་གོས་ཤིག་རྙེད་ལ་འདོད་པ་དོན་དུ་གཉེར་ན་དགེ་སློང་གིས་གོས་བདུན་པོ་སྲིན་བལ་གྱི་གོས་དང་། བལ་གྱི་གོས་དང་། ཤ་ནའི་གོས་དང་། ཟར་མའི་གོས་དང་། དུ་གུ་ལའི་གོས་དང་། ཀོ་ཤམ་པའི་གོས་དང་། ཉི་འོག་པའི་གོས་ལས་གང་ཡང་རུང་བ་དེ་བླངས་ནས་བདག་གིར་བྱའོ། །བླངས་ནས་གལ་ཏེ་ལངས་པ་སྟེ་ལྡང་ན་མྱུར་བ་ཁོ་ནར་གོས་སུ་བྱས་ལ་བྱིན་གྱིས་བརླབས་ཏེ་བཅང་བར་བྱའོ། །གལ་ཏེ་མི་ལངས་པ་སྟེ་མི་ལྡང་ལ་ཁམ་ལངས་པ་ཁ་སྐོང་བའི་གོས་གཞན་ལ་རེ་བ་ཡོད་ན། དགེ་སློང་དེས་གོས་དེ་ཟླ་བ་གཅིག་གི་མཐར་རུང་བ་མ་བྱས་པར་གཞག་པར་བྱའོ། །དེ་ལས་འདས་པར་འཇོག་ན་ཞགས་སོ་གཅིག་པའི་སྐྱ་རེངས་ཤར་བ་ན་སྤང་བའི་ལྟུང་བྱེད་དུ་འགྱུར་རོ། །བཞི་པ་འཁྲུར་འཇུག་པའི་སྤང་བ་ནི། གང་བྱས་པས་གོས་འཁྲུར་འཇུག་པའི་སྤང་བར་འགྱུར་ཞེ་ན། ཡང་འཆར་ཀ་ལྟ་བུའི་དགེ་སློང་གང་ཡང་རུང་བ་དགེ་སློང་མ་བདུན་བརྒྱུད་ཚུན་ཆད་ཀྱི་ཉེ་དུ་མ་ཡིན་པ་ལ་རང་གི་བྱིན་རླབས་ཅན་གྱི་ཆོས་གོས་དང་གདིང་བ་
དུས་ཚིགས་གསུམ་པོ་གང་རུང་དུ་ལོངས་སྤྱད་པའི་རྙིང་པ་ཆུ་ལ་འཁྲུར་འཇུག་གམ། ཚོན་གྱིས་འཚེད་དུ་འཇུག་གམ། ཐལ་མོས་རྡེབ་པ་ལྟ་བུས་འཆག་ཏུ་འཇུག་ན་སྤང་བའི་ལྟུང་བྱེད་དུ་འགྱུར་རོ། །ལྔ་པ་ལེན་པའི་སྤང་བ་ནི། གང་བྱས་པས་གོས་ལེན་པའི་སྤང་བར་འགྱུར་ཞེ་ན། ཡང་ཉེ་དགའ་ལྟ་བུའི་དགེ་སློང་གང་དགེ་སློང་མ་བདུན་བརྒྱུད་ཚུན་ཆད་ཀྱི་ཉེ་དུ་མ་ཡིན་པ་ལས་བལ་གྱི་གོས་ལ་སོགས་པ་ལེན་ན་གོས་ལག་ཏུ་ཐོབ་པའི་ཚེ་ན་སྤང་བའི་ལྟུང་བྱེད་དུ་འགྱུར་རོ། །ཐམས་ཅད་དུ་འགྱུར་རམ་ཞེ་ན། གོས་བཟང་ངན་བརྗེས་པ་ནི་མ་གཏོགས་སོ། །དྲུག་པ་སློང་བའི་སྤང་བ་ནི། གང་བྱས་པས་གོས་སློང་བའི་སྤང་བར་འགྱུར་ཞེ་ན། ཡང་ཉེར་དགའ་ལྟ་བུའི་དགེ་སློང་གང་ཁྱིམ་བདག་སྐྱེས་པའམ། ཁྱིམ་བདག་གི་ཆུང་མ་བུད་མེད་བདུན་བརྒྱུད་ཚུན་ཆད་ཀྱི་ཉེ་དུ་མ་ཡིན་པའི་གན་དུ་སོང་སྟེ། བལ་ལ་སོགས་པའི་གོས་སློང་ན་གནང་བའི་དུས་མ་གཏོགས་དེ་སྤང་བའི་ལྟུང་བྱེད་དོ། །འོ་ན་གནང་བའི་དུས་གང་ཞེ་ན། བསླབ་པའི་གཞི་དེ་ལ་གནང་བའི་དུས་ནི་འདི་ཡིན་ཏེ། དགེ་སློང་ཆོས་གོས་ཆོམ་རྐུན་པས་ཕྲོགས་སམ། གོས་བོར་བ་ལྟ་བུས་བརླག་གམ། གོས་མེས་ཚིག་གམ། གོས་རླུང་གིས་ཁྱེར་རམ། གོས་ཆུས་ཁྱེར་ན་བསླབ་པའི་གཞི་དེ་ནི་གནང་བའི་དུས་ཡིན་ནོ། །བདུན་པ་སློང་བར་རིགས་པའི་སྤང་བ་ནི། གང་བྱས་པས་སློང་བར་རིགས་པའི་སྤང་བར་འགྱུར་ཞེ་ན། དྲུག་སྡེ་ལྟ་བུའི་དགེ་སློང་ཆོམ་རྐུན་པས་གོས་ཕྲོགས་སམ། གོས་བརླག་གམ། གོས་མེས་ཚིག་གམ། གོས་རླུང་གིས་ཁྱེར་བས། གོས་ཆུས་ཁྱེར་ན། ཁྱིམ་བདག་སྐྱེས་པའམ། ཁྱིམ་བདག་གི་ཆུང་མ་བུད་མེད་བདུན་བརྒྱུད་ཚུན་ཆད་ཀྱི་ཉེ་དུ་མ་ཡིན་པའི་གན་དུ་སོང་བ་བལ་ལ་སོགས་པའི་གོས་བསླང་
བར་བྱའོ། །དགེ་སློང་དེ་ལ་གལ་ཏེ་བྲམ་ཟེ་ལྟ་བུའམ། ཁྱིམ་བདག་དད་པ་ཅན་ཞིག་གིས་དུས་ཀྱིས་གོས་མང་པོ་སྟོབ་པ་སྟེ་འབུལ་འདོད་ན་དགེ་སློང་དེས་བྲམ་ཟེ་ལྟ་བུ་དེ་ལ་གོས་སྟོད་གཡོགས་དང་སྨད་གཡོགས་དང་བཅས་པའི་མཐར་ཐུག་པ་བླང་བར་བྱའོ། །དེ་ལས་ལྷག་པར་ལེན་ན་སྤང་བའི་ལྟུང་བྱེད་དོ། །བརྒྱད་པ་དཔགས་པ་སློང་བའི་སྤང་བ་ནི། གང་བྱས་པས་དཔགས་པ་སློང་བའི་སྤང་བར་འགྱུར་ཞེ་ན། ཉེར་དགའ་ལྟ་བུའི་དགེ་སློང་གི་ཕྱིར། ཁྱིམ་བདག་གམ་ཁྱིམ་བདག་གི་ཆུང་མ་ཉེ་དུ་མ་ཡིན་པས་གོས་ཀྱི་རིན་གསེར་ལ་སོགས་པ་དག་དཔགས་པ་སྟེ་སྟ་གོན་བྱས་ནས། བདག་གི་གོས་ཀྱི་རིན་གསེར་ལ་སོགས་པ་འདི་དག་གིས་བལ་ལ་སོགས་པ་འདི་དང་འདི་ལྟ་བུ་ཞིག་ཉོས་ལ། ཉེར་དགའ་ལྟ་བུའི་དགེ་སློང་མིང་འདི་ཞེས་བྱ་བ་འོངས་པ་དང་། དེ་ལ་བདག་གི་གོས་རུང་བ་ལོངས་སྤྱད་པར་འོས་པ་དུས་སུ་བསྐོན་ནོ་སྙམ་པ་ལས། དེ་ན་གལ་ཏེ་དགེ་སློང་དེ་ལ་སྔར་མ་བསྟབས་པ་མགྲོན་དུ་མ་བོས་པར་རྣམ་པར་རྟོག་པ་འགའ་ཞིག་བྱུང་སྟེ། གོས་བཟང་པོ་འདོད་པའི་ཕྱིར་ཁྱིམ་བདག་གམ། ཁྱིམ་བདག་གི་ཆུང་མ་ཉེ་དུ་མ་ཡིན་པའི་གན་དུ་སོང་ནས་འདི་སྐད་ཅེས། ཚེ་དང་ལྡན་པས་བདག་གི་ཕྱིར་གོས་ཀྱི་རིན་གསེར་ལ་སོགས་པ་གང་བདག་གི་དཔགས་པའི་གོས་ཀྱི་རིན་དེ་དག་གིས། ཚེ་དང་ལྡན་པ་བལ་ལ་སོགས་པའི་གོས་འདི་དང་འདི་ལྟ་བུ་ཞིག་ཉོས་ལ་བདག་ལ་གོས་རུང་བ་དུས་སུ་ལེགས་པར་སྐོན་ཅིག་ཅེས་སྨྲས་ཏེ། གོས་ལག་ཏུ་གྲུབ་པའི་ཚེ་ན་སྤང་བའི་ལྟུང་བྱེད་དོ། །དགུ་པ་སོ་སོ་ནས་དཔགས་པ་སློང་བའི་སྤང་བ་ནི། གང་བྱས་པས་སོ་སོ་ནས་དཔགས་པ་སློང་བའི་སྤང་བར་འགྱུར་ཞེ་ན། ཉེར་དགའ་ལྟ་བུའི་དགེ་སློང་གི་ཕྱིར་ཁྱིམ་བདག་གམ་ཁྱིམ་བདག་གི་ཆུང་མ་ཉེ་དུ་མ་
ཡིན་པས་གོས་ཀྱི་རིན་གསེར་ལྟ་བུ་སོ་སོ་ཐ་དད་པ་དག་གོས་དཔགས་པ་སྟ་གོན་བྱས་ནས། བདག་ཅག་གཉིས་ཀྱི་གོས་ཀྱི་རིན་སོ་སོ་བ་འདི་དག་གིས། བལ་ལ་སོགས་པའི་གོས་འདི་དང་འདི་ལྟ་བུ་ཞིག་ཉོས་ལ། དགེ་སློང་མིང་འདི་ཞེས་བྱ་བ་འོངས་པ་དང་། བདག་ཅག་གཉིས་ཀྱིས་སོ་སོ་ནས་དེ་ལ་གོས་རུང་བ་དུས་སུ་བསྐོན་ནོ་སྙམ་པ་ལས། དེ་ན་གལ་ཏེ་དགེ་སློང་དེ་ལ་སྔར་མ་བསྟབས་པར་རྣམ་པར་རྟོག་པ་འགའ་ཞིག་བྱུང་སྟེ་ཞེས་སོགས་སོ། །བཅུ་པ་བསྐུར་བའི་སྤང་བ་ནི། གང་བྱས་པས་བསྐུར་བའི་སྤང་བར་འགྱུར་ཞེ་ན། ཉེར་དགའ་ལྟ་བུའི་དགེ་སློང་གི་ཕྱིར་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བའམ། རྒྱལ་པོའི་བློན་པོ་ཆེན་པོའམ། བྲམ་ཟེ་གཙང་སྦྲ་ཅན་ནམ། ཁྱིམ་བདག་ཕྱུག་པོའམ། གྲོང་རྡལ་གྲོང་ཁྱེར་གྱི་མིའམ། ཡུལ་མིའམ། ནོར་བྱེ་བས་ཕྱུག་པའི་ནོར་ཅན་ནམ། ཅོད་པན་བཅིངས་པའི་ཚོང་དཔོན་ནམ། དོན་མཐུན་ལན་གཉིས་སམ་གསུམ་དུ་འདས་པའི་དེད་དཔོན་གྱིས་མིའི་འགྲོ་བ་པའི་ཕོ་ཉའི་ལག་ཏུ་གོས་ཀྱི་རིན་གསེར་ལྟ་བུ་བསྐུར་བར་གྱུར་ལ། དེ་ནས་ཕོ་ཉ་དེས་གོས་ཀྱི་རིན་གསེར་ལྟ་བུ་དེ་དག་ཁྱེར་ཏེ། ཉེར་དགའ་ལྟ་བུའི་དགེ་སློང་དེ་ག་ལ་བ་དེར་སོང་སྟེ་ཕྱིན་ནས། དགེ་སློང་དེ་ལ་འདི་སྐད་ཅེས། འཕགས་པ་མཁྱེན་པར་མཛོད་ཅིག །ཁྱོད་ལ་རྒྱལ་པོའམ། བློན་པོ་ཆེན་པོའམ། བྲམ་ཟེའམ། ཁྱིམ་བདག་གམ། གྲོང་རྡལ་གྱི་མིའམ། ཡུལ་མིའམ། ནོར་ཅན་ནམ། ཚོང་དཔོན་ནམ། དེད་དཔོན་ཆེ་གེ་མོས་གོས་ཀྱི་རིན་འདི་དག་བསྐུར་གྱིས། འཕགས་པ་ཐུགས་བརྩེ་བའི་སླད་དུ་འདི་དག་བཞེས་ཤིག་ཅེས་འབུལ་བར་བྱེད་ན། དགེ་སློང་དེས་ཕོ་ཉ་དེ་ལ་འདི་སྐད་ཅེས། ཚེ་དང་ལྡན་པ་ཕོ་ཉ་བདག་ཅག་དགེ་སློང་དག་ནི་གོས་ཀྱི་རིན་གསེར་ལྟ་བུ་དག་ལེན་དུ་མི་རུང་སྟེ། བདག་ཅག་གོས་ལོངས་སྤྱད་པར་འོས་པ་རུང་བ་དུས་སུ་རྙེད་
ན་ནི་ལེན་ཏོ་ཞེས་བརྗོད་པར་བྱའོ། །གལ་ཏེ་ཕོ་ཉ་དེས་དགེ་སློང་དེ་ལ་འདི་སྐད་ཅེས། འཕགས་པ་རྣམས་ཀྱི་ཞལ་ཏ་བགྱིད་པ། འཕགས་པ་རྣམས་ཀྱི་ཞལ་ཏ་ཉམས་སུ་ལེན་པ་རུང་བ་བྱེད་པ་གང་ལགས་པ་འགའ་མཆིས་སམ་ཞེས་ཟེར་ན། དགེ་སློང་གོས་འདོད་པས་ཕོ་ཉ་འདི་ནི་དགེ་སློང་ཞལ་ཏ་བྱེད་པ་སྟེ། འདི་ནི་ཞལ་ཏ་ཉམས་སུ་ལེན་པའོ་ཞེས། རྩེ་རྒོད་དང་། ལྷ་འབངས་ལྟ་བུའི་ཀུན་དགའ་ར་བ་པའམ། བསླབ་པའི་གཞི་ལྔ་བླངས་པའི་དགེ་བསྙེན་ཞལ་ཏ་བ་རུང་བ་བྱེད་པ་བསྟན་པར་བྱའོ། །དེ་ནས་ཕོ་ཉ་དེས་གོས་ཀྱི་རིན་དེ་དག་ཁྱེར་ནས་ཞལ་ཏ་བྱེད་པ་ག་ལ་བ་དེར་འགྲོ་བར་བྱ་ཞིང་། ཕྱིན་ནས་ཞལ་ཏ་བྱེད་པ་དེ་ལ་འདི་སྐད་ཅེས། ཚེ་དང་ལྡན་པ་ཞལ་ཏ་བྱེད་པ་ཤེས་པར་གྱིས་ཤིག །ཁྱོད་ཀྱིས་གོས་ཀྱི་རིན་འདི་དག་གིས་བལ་ལ་སོགས་པའི་གོས་འདི་དང་འདི་ལྟ་བུ་ཞིག་ཉོས་ལ། དགེ་སློང་མིང་འདི་ཞེས་བྱ་བ་འོངས་པ་དང་། དེ་ལ་གོས་རུང་བ་དུས་སུ་སྐོན་ཅིག་ཅེས་བརྗོད་པར་བྱའོ། །དེ་ནས་ཕོ་ཉ་དེས་ཞལ་ཏ་བྱེད་པ་དེ་ལ་ཤིན་ཏུ་ལེགས་པར་ཡང་དག་པར་བསྒོ་ཞིང་། ཡང་དག་པར་བསྟན་ནས། དགེ་སློང་དེ་ག་ལ་བ་དེར་འགྲོ་བར་བྱ་ཞིང་ཕྱིན་ནས། དགེ་སློང་དེ་ལ་འདི་སྐད་ཅེས། འཕགས་པས་ཞལ་ཏ་བགྱིད་པ་བསྟན་པ་གང་ལགས་པ་དེ་ལ་བདག་གིས་ཡང་དག་པར་བསྟན་ལགས་ཀྱིས། དེའི་གན་དུ་བཞུད་ཅིག་དང་། དེས་ཁྱོད་ལ་གོས་རུང་བ་དུས་སུ་སྐོན་པར་འགྱུར་རོ་ཞེས་བརྗོད་པར་བྱའོ། །དགེ་སློང་གོས་འདོད་པས་ཞལ་ཏ་བྱེད་པའི་གན་དུ་སོང་ལ། ཚེ་དང་ལྡན་པ་ཞལ་ཏ་བྱེད་པ་བདག་གོས་འདོད་དོ། །ཚེ་དང་ལྡན་པ་ཞལ་ཏ་བྱེད་པ་བདག་གོས་འདོད་དོ་ཞེས་ལན་གསུམ་དུ་བསྐུལ་བར་བྱ། དྲན་པར་བྱའོ། །དེ་ཡང་ལན་གཅིག་བསྐུལ་བས་གྲུབ་ན། གཉིས་པ་མ་བྱ། གཉིས་པ་ལ་གྲུབ་ན་གསུམ་པ་མི་བྱའོ། །ལན་གཉིས་ལན་གསུམ་
དུ་བསྐུལ་ཞིང་དྲན་པར་བྱས་པ་ན། གལ་ཏེ་གོས་བདུན་ལས་གང་རུང་དེ་ལག་ཏུ་གྲུབ་ན་དེ་ལྟ་ན་ལགས་ཏེ། ཕོ་ཉ་ཞལ་ཏ་བ་དང་བཅས་པ་ལ་ཡང་བཏང་བ་དང་ལོངས་སྤྱོད་པའི་རྒྱུ་ལས་བྱུང་བའི་བསོད་ནམས་འབྱུང་ལ། དགེ་སློང་ལ་ཡང་འཇིག་རྟེན་དང་འགལ་བ་དང་། འདུལ་བ་དང་འགལ་བའི་ཉེས་པ་མ་བྱུང་བའི་ཕྱིར། གལ་ཏེ་གོས་ལག་ཏུ་མ་གྲུབ་ན། དེའི་འོག་ཏུ་ལན་བཞི་ལན་ལྔ་ལན་དྲུག་གི་བར་དུ་ཞལ་ཏ་བྱེད་པའི་ཕྱོགས་སུ་ཅང་མི་སྨྲ་བར་བསྡད་པར་བྱའོ། །ལན་བཞི་ལན་ལྔ་ལན་དྲུག་གི་བར་དུ་ཕྱོགས་སུ་ཅང་མི་སྨྲ་བར་བསྡད་པ་ན། གལ་ཏེ་གོས་དེ་གྲུབ་ན་དེ་ལྟ་ན་ལགས་ཏེ། སྦྱིན་བདག །ཕོ་ཉ་ཞལ་ཏ་དང་བཅས་པ་ལ་བཏང་བ་དང་ལོངས་སྤྱད་པའི་རྒྱུ་ལས་བྱུང་བའི་བསོད་ནམས་འབྱུང་། དགེ་སློང་ལ་འདུལ་བ་དང་འགལ་བའི་སྦྱོར་དངོས་ཀྱི་ལྟུང་བ་མ་བྱུང་བའི་ཕྱིར་རོ། །གལ་ཏེ་བསྐུལ་བསྡད་ལན་དྲུག་གིས་མ་གྲུབ་ན། དེའི་འོག་ཏུ་གོས་བསྒྲུབ་པའི་ཕྱིར་བཙལ་ཏེ་གོས་ལག་ཏུ་གྲུབ་ན་སྤང་བའི་ལྟུང་བྱེད་དོ། །གལ་ཏེ་བསྐུལ་བསྡད་ལན་དྲུག་གིས་མ་གྲུབ་ན་ཕྱོགས་གང་ནས་གོས་ཀྱི་རིན་འོངས་པ་དེར་དགེ་སློང་བདག་ཉིད་འགྲོ་བར་བྱའོ། །ཡང་ན་ཡིད་བརྟན་པའི་ཕོ་ཉས། ཚེ་དང་ལྡན་པ་དག་གིས་དགེ་སློང་ཆེ་གེ་མོའི་ཕྱིར་གོས་ཀྱི་རིན་གང་དག་བསྐུར་བ་དེ་དག་ནི་དགེ་སློང་དེའི་དོན་ཅིར་ཡང་མ་གྲུབ་ཀྱིས་ཤེས་པར་གྱིས་ཤིག །ཚེ་དང་ལྡན་པ་དག་གིས་རང་གི་ནོར་ཆུད་མ་གསན་ཞིག་ཅེས་སྤྲིང་བར་བྱ་སྟེ། བསླབ་པའི་གཞི་དེ་ལ་ད་ནི་ཆོ་ག་སྟེ་རྗེས་སུ་མཐུན་པའི་ཐབས་ཡིན་ནོ། །བཅུ་ཚན་གཉིས་པ་ལ་གཉིས། སྡོམ་གྱིས་མདོར་བསྟན། སོ་སོའི་ངོ་བོ་རྒྱས་པར་བཤད་པའོ། །དང་པོ་ནི། སྤང་བའི་ལྟུང་བྱེད་བཅུ་ཚན་གཉིས་པ་སྡོམ་དུ་བསྡུས་པ་ཆོས་ཅན། བཅུ་ཡོད་དེ། སྲིན་བལ་དང་། བལ་ནག་པོ་འབའ་ཞིག་པ་དང་། ཆ་གཉིས་བསྲེ་བ་དང་། ལོ་དྲུག་གི་ནང་དུ་སྟན་
གཉིས་པ་དང་། མཐོ་གང་དང་། ལམ་དུ་བལ་ཐོགས་པ་དང་། འཁྲུ་བ་རྨེལ་དུ་འཇུག་པ་དང་། གསེར་དངུལ་ལ་རེག་པ་དང་། མངོན་མཚན་ཅན་གྱི་སྤྱོད་པ་དང་། ཉོ་ཚོང་བྱེད་པའི་སྤང་བ་རྣམས་སུ་ཡོད་པའི་ཕྱིར། གཉིས་པ་ལ་བཅུ་ལས། དང་པོ་སྲིན་བལ་གྱི་སྤང་བ་ནི། གང་བྱས་པས་སྲིན་བལ་གྱི་སྟན་བྱེད་པའི་སྤང་བར་འགྱུར་ཞེ་ན། ཡང་ཆོས་འདི་པའི་དགེ་སློང་གང་ཡང་རུང་བ་སྲིན་བལ་གྱི་སྟན་གསར་པས་གསར་པ་དང་གསར་དུ་རྙེད་པས་གསར་པ་གཉིས་ལས་གསར་པའི་གསར་པ་བྱེད་ན་བཀྲམ་པའི་ཚེ་ན་སྤང་བའི་ལྟུང་བྱེད་དོ། །གཉིས་པ་བལ་ནག་པོ་འབའ་ཞིག་པའི་སྤང་བ་ནི། གང་བྱས་པས་ལུག་བལ་ནག་པོ་འབའ་ཞིག་གི་སྟན་བྱེད་པའི་སྤང་བར་འགྱུར་ཞེ་ན། ཡང་ཆོས་འདི་པའི་དགེ་སློང་གང་ཡང་རུང་བ་ལུག་གི་བལ་རང་བཞིན་གྱིས་ནག་པ་དང་སྔོ་བས་ནག་པ་དང་ཁམ་པས་ནག་པ་དང་འདམ་ཁས་ནག་པོ་འབའ་ཞིག་གི་སྟན་གསར་པ་བྱེད་ན་བཀྲམ་པའི་ཚེ་ན་སྤང་བའི་ལྟུང་བྱེད་དོ། །གསུམ་པ་ཆ་གཉིས་བསྲེ་བའི་སྤང་བ་ནི། གང་བྱས་པས་ཆ་གཉིས་བསྲེ་བའི་སྤང་བར་འགྱུར་ཞེ་ན། ཆོས་འདི་པའི་དགེ་སློང་གིས་སྟན་གསར་པ་བྱེད་ན། བཞི་ཆ་གཉིས་ནི་ལུག་བལ་ནག་པོ་འབའ་ཞིག་ལས་གཞུག་པ་སྟེ་བསྲེ་བར་བྱ། བཞི་ཆ་གསུམ་པ་ནི་གློ་དང་རྒྱབ་དང་གཉའ་བ་ནས་སྐྱེས་པའི་དཀར་པོ་ལས་བསྲེ་བར་བྱ། བཞི་ཆ་བཞི་པ་ནི། རྐང་པ་དང་ལྟེ་བ་དང་མགོ་བོ་ནས་སྐྱེས་པའི་འཁོབ་བལ་ལས་གཞུག་པ་སྟེ་བསྲེ་བར་བྱའོ། །གལ་ཏེ་དགེ་སློང་གིས་ཆ་གཉིས་ལུག་བལ་ནག་པོ་འབའ་ཞིག་ལས་མ་བཅུག་གམ། གསུམ་པ་དཀར་པོ་ལས། བཞི་པ་འཁོབ་བལ་ལས་མ་བཅུག་པར་སྟན་གསར་པ་བྱེད་ན་བཀྲམ་པའི་ཚེ་ན་སྤང་བའི་ལྟུང་བྱེད་དོ། །བཞི་པ་ལོ་དྲུག་གི་ནང་དུ་སྟན་གཉིས་པ་བྱེད་པའི་སྤང་བ་ནི། གང་བྱས་པས་
ལོ་དྲུག་གི་ནང་སྟན་གཉིས་པ་བྱེད་པའི་སྤང་བར་འགྱུར་ཞེ་ན། ཆོས་འདི་པའི་དགེ་སློང་གིས་གླིངས་པའི་སྟན་གསར་པ་བྱེད་ན་མི་འདོད་བཞིན་དུ་ལོ་དྲུག་གི་བར་དུ་བཅང་བར་བྱའོ། །གལ་ཏེ་དགེ་སློང་གིས་ལོ་དྲུག་ཚུན་ཆད་དུ་སྟན་རྙིང་པ་དེ་གཞན་ལ་སྤངས་ཀྱང་རུང་མ་སྤངས་ཀྱང་རུང་། སྟན་གསར་པ་བྱེད་ན་དགེ་འདུན་གྱིས་གནང་བྱིན་པ་མ་གཏོགས་ཏེ་སྤང་བའི་ལྟུང་བྱེད་དོ། །ལྔ་པ་མཐོ་གང་གི་སྤང་བ་ནི། གང་བྱས་པས་མཐོ་གང་གི་སྤང་བར་འགྱུར་ཞེ་ན། ཆོས་འདི་པའི་དགེ་སློང་གིས་གདིང་བ་གསར་པ་བྱེད་ན། གདིང་བ་གསར་པ་ཁ་དོག་མི་སྡུག་པར་བྱ་བའི་ཕྱིར། གདིང་རྙིང་པ་བདེ་བར་གཤེགས་པའི་མཐོ་གང་སྟེ་ཚད་དང་ལྡན་པའི་ཁྲུ་ཕྱེད་དང་དོ་ཀུན་ནས་འཁོར་བས་གླན་པར་བྱའོ། །གལ་ཏེ་དགེ་སློང་གིས་གདིང་བ་གསར་པ་ཁ་དོག་མི་སྡུག་པར་བྱ་བའི་ཕྱིར་གདིང་བ་རྙིང་པ་བདེ་བར་གཤེགས་པའི་མཐོ་གང་འཁོར་བར་མ་གླན་པར་གདིང་བ་གསར་པ་སྤྱོད་ན་སྤང་བའི་ལྟུང་བྱེད་དོ། །དྲུག་པ་བལ་ཐོགས་པའི་སྤང་བ་ནི། གས་བྱས་པས་བལ་ཐོགས་པའི་སྤང་བར་འགྱུར་ཞེ་ན། དྲུག་སྡེ་ལྟ་བུའི་དགེ་སློང་དགོན་པའི་ལམ་དུ་ཞུགས་པས་ལུག་བལ་དག་གཞན་ལས་རྙེད་ལ་འདོད་ན་དགེ་སློང་དེས་བལ་དེ་བླང་བར་བྱའོ། །བླངས་ནས་གཞན་ཁུར་འཁྱེར་བ་མེད་ན་དཔག་ཚད་གསུམ་གྱི་མཐའི་བར་དུ་དགེ་སློང་བདག་ཉིད་ཀྱིས་བཀུར་བར་བྱའོ། །དེ་ལས་འདས་པ་ཁྱེར་ན་སྤང་བའི་ལྟུང་བྱེད་དོ། །དེ་ཡང་རྒྱང་གྲགས་རེ་འདས་པ་ན་དངོས་གཞི་དང་། རྒྱང་གྲགས་ཕྱེད་ན་ཉེས་བྱས་སོ། །བདུན་པ་བལ་རྨེལ་དུ་འཇུག་པའི་སྤང་བ་ནི། གང་བྱས་པས་བལ་རྨེལ་དུ་འཇུག་པའི་སྤང་བར་འགྱུར་ཞེས། ཡང་འཆར་ཀ་ལྟ་བུའི་དགེ་སློང་གང་ཡང་རུང་བ་དགེ་(༢༦ན)སློང་མ་བདུན་བརྒྱུད་ཚུན་ཆད་ཀྱི་ཉེ་དུ་མ་ཡིན་པ་ལ་ལུག་བལ་ཆུ་ལ་འཁྲུར་འཇུག་གམ། ཚོན་གྱིས་འཚེད་དུ་འཇུག་གམ། བལ་གྱི་
འདབ་མ་རྨེལ་དུ་འཇུག་ན་སྤང་བའི་ལྟུང་བྱེད་དོ། །བརྒྱད་པ་གསེར་དངུལ་ལ་རེག་པའི་སྤང་བ་ནི། གང་བྱས་པས་གསེར་དངུལ་ལ་རེག་པའི་སྤང་བར་འགྱུར་ཞེ་ན། ཡང་དྲུག་སྡེ་ལྟ་བུའི་དགེ་སློང་གང་ཡང་རུང་བ་རང་གི་ལག་གིས་གསེར་དང་། དངུལ་ལ་སོགས་པའི་རིན་པོ་ཆེ་ལེན་ནམ་ལེན་དུ་འཇུག་ན་སྤང་བའི་ལྟུང་བྱེད་དོ། །དགུ་པ་མངོན་མཚན་ཅན་གྱི་སྤྱོད་པའི་སྤང་བ་ནི། གང་བྱས་པས་མངོན་མཚན་ཅན་གྱི་སྤྱོད་པའི་སྤང་བར་འགྱུར་ཞེ་ན། ཡང་ཆོས་འདི་པའི་དགེ་སློང་གང་ཡང་རུང་བ་པ་ནའམ་རིན་པོ་ཆེ་མངོན་མཚན་ཅན་གྱི་སྤྱོད་པ་རྣམ་པ་སྣ་ཚོགས་བྱེད་ན་བསྐྱེད་ཕྱིན་པའི་ཚེ་ན་སྤང་བའི་ལྟུང་བྱེད་དོ། །བཅུ་པ་ཉོ་ཚོང་གི་སྤང་བ་ནི། གང་བྱས་པས་ཉོ་ཚོང་བྱེད་པའི་སྤང་བར་འགྱུར་ཞེ་ན། ཡང་ཆོས་འདི་པའི་དགེ་སློང་གང་ཡང་རུང་བ་པ་ན་དང་རིན་པོ་ཆེ་ལས་གཞན་པའི་ཉོ་ཚོང་རྣམ་པ་སྣ་ཚོགས་བྱེད་ན་སྤང་བའི་ལྟུང་བྱེད་དོ། །བཅུ་ཚན་གསུམ་པ་ལ། སྡོམ་གྱིས་མདོར་བསྟན། སོ་སོའི་ངོ་བོ་རྒྱས་པར་བཤད་པའོ། །དང་པོ་ནི། སྤང་བའི་ལྟུང་བྱེད་བཅུ་ཚན་གསུམ་པ་སྡོམ་དུ་བསྡུས་པ་ཆོས་ཅན། བཅུ་ཡོད་དེ། ལྷུང་བཟེད་འཆང་བ་དང་། ཚོལ་བ་གཉིས་དང་། ཐག་པ་སྟེ་འཐག་ཏུ་འཇུག་པ། འཐག་པ་བསྐྱེད་པ་གཉིས་དང་། གོས་བྱིན་པ་འཕྲོག་པ་དང་། སྟོན་ཟླ་ཐ་ཆུང་སྟེ་བརྟད་པ་ལས་བྱུང་བ་དང་། དགོན་པ་པའི་འབྲལ་བ་དང་། དབྱར་གྱི་རས་ཆེན་ལས་གྱུར་པ་དང་། བསྔོས་པ་གཞན་དུ་བསྒྱུར་པ་དང་། སོག་འཇོག་གི་སྤང་བ་རྣམས་སུ་ཡོད་པའི་ཕྱིར། གཉིས་པ་ལ་བཅུ་ལས། ལྷུང་བཟེད་འཆང་བའི་སྤང་བ་ནི། གང་བྱས་པས་ལྷུང་བཟེད་འཆང་བའི་སྤང་བར་འགྱུར་ཞེ་ན། ཡང་ཆོས་འདི་པའི་དགེ་སློང་གིས་རང་གི་བྱིན་རླབས་ཅན་གྱི་ལྷུང་བཟེད་མ་གཏོགས་པའི་ལྷུང་བཟེད་ལྷག་པོ་ཞག་བཅུར་བཅང་བར་བྱའོ། །དེ་ལས་འདས་པར་
འཆང་ན་ཞག་བཅུ་གཅིག་པའི་སྐྱ་རེངས་ཤར་བའི་ཚེ་ན་སྤང་བའི་ལྟུང་བྱེད་དོ། །གཉིས་པ་ལྷུང་བཟེད་ཚོལ་བའི་སྤང་བ་ནི། གང་བྱས་པས་ལྷུང་བཟེད་ཚོལ་བའི་སྤང་བར་འགྱུར་ཞེ་ན། ཉེར་དགའ་ལྟ་བུའི་དགེ་སློང་གང་ཡང་རུང་བ་ལྷུང་བཟེད་ལྷན་པ་ལྔ་མེད་པ་ལོངས་སྤྱད་པར་བཟོད་པ་ཡོད་བཞིན་དུ་བཟང་པོ་འདོད་པའི་ཕྱིར་ལྷུང་བཟེད་གསར་པ་གཞན་འཚོལ་བར་བྱེད་ཅིང་ལྷུང་བཟེད་ལག་ཏུ་གྲུབ་པའི་ཚེ་ན་སྤང་བའི་ལྟུང་བྱེད་དོ། །འོ་ན་ལྟུང་བ་ཕྱིར་བཅོས་པའི་ཚུལ་དེ་ཇི་ལྟ་བུ་ཞེ་ན། ལྟུང་བ་འབྱིན་པའི་དགེ་སློང་དེས་ལྷུང་བཟེད་ལྷག་པོ་དེ་དགེ་སློང་གི་འཁོར་ལ་དབུལ་བར་བྱའོ། །དགེ་སློང་གི་འཁོར་དེའི་ལྷུང་བཟེད་ཐ་མར་གྱུར་པ་གང་ཡིན་པ་དེ་དགེ་སློང་དེ་ལ་སྦྱིན་པར་བྱའོ། །ཇི་ལྟར་སྦྱིན་ཞེ་ན། དགེ་སློང་ཁྱོད་ཀྱིས་ལྷུང་བཟེད་འདི་བྱིན་གྱིས་བརླབ་པར་མི་བྱ། གཞན་ལ་བཏང་བར་མི་བྱ། གཞན་ལ་སྦྱིན་པར་མི་བྱ་བར། ཆག་པའི་མཐར་ཐུག་གི་བར་དུ་ཁད་ཀྱིས་དལ་བུ་དལ་བུས་སྤྱད་པར་བྱའོ་ཞེས་སྦྱིན་པར་བྱ་སྟེ། བསླབ་པའི་གཞི་དེ་ནི་ཆོ་ག་སྟེ་རྗེས་སུ་མཐུན་པའི་ཐབས་ཡིན་ནོ། །གསུམ་པ་གོས་འཐག་ཏུ་འཇུག་པའི་སྤང་བ་ནི། གང་བྱས་པས་གོས་འཐག་ཏུ་འཇུག་པའི་སྤང་བར་འགྱུར་ཞེ་ན། ཡང་ཉེར་དགའ་ལྟ་བུའི་དགེ་སློང་གང་ཡང་རུང་བ་རང་གིས་བསླངས་པའི་དོག་པ་ཐག་པ་སྟེ་ཐག་མཁན་བདུན་བརྒྱུད་ཚུན་ཆད་ཀྱི་ཉེ་དུ་མ་ཡིན་པ་ལ་བལ་ལ་སོགས་པའི་གོས་འཐག་ཏུ་འཇུག་ན་གོས་ལག་ཏུ་གྲུབ་པའི་ཚེ་ན་སྤང་བའི་ལྟུང་བྱེད་དོ། །བཞི་པ་འཐག་པ་བསྐྱེད་པའི་སྤང་བ་ནི། གང་བྱས་པས་འཐག་པ་བསྐྱེད་པའི་སྤང་བར་འགྱུར་ཞེ་ན། ཉེར་དགའ་ལྟ་བུའི་དགེ་སློང་གི་ཕྱིར། ཁྱིམ་བདག་གམ། ཁྱིམ་བདག་གི་ཆུང་མ་ཉེ་དུ་མ་ཡིན་པ་ལ། གོས་འཐག་ཏུ་བཅུག་པ་ལས། དེ་ན་དགེ་སློང་དེ་ལ་སྔར་བསྟབས་པར་རྣམ་པར་རྟོག་པ་འགའ་ཞིག་
བྱུང་ནས་ཐག་པ་ཉེ་དུ་མ་ཡིན་པའི་གན་དུ་སོང་སྟེ། འཐག་པ་བསྐྱེད་པའི་ཚིག་འདི་སྐད་ཅེས། ཚེ་དང་ལྡན་པ་ཐ་ག་པ་ཤེས་པར་གྱིས་ཤིག །ཁྱོད་འཐག་པའི་གོས་འདི་ནི་ཁོ་བའི་ཕྱིར་འཐག་གིས། ཚེ་དང་ལྡན་པ་ཐ་ག་པ་གོས་འདི་ཞེང་རྒྱ་ཆེ་བ་དང་། ཁྲུན་མཆུ་རིང་བ་དང་། ཐར་གྱིས་ཞག་པ་བྱེར་ཟུག་སྙོམས་པ་དང་། ཐགས་རན་བཟང་བ་སེང་སེང་སོགས་མེད་པར་ལེགས་པར་གྱིས་ཤིག །ཚེ་དང་ལྡན་པ་ཐ་ག་པ་འདི་ལྟར་ཁོ་བོས་ཁྱོད་ལ་གླ་རྔན་འདི་ལྟ་སྟེ། བཟའ་ལྔའམ། བཅའ་བ་ལྔའམ། བཟའ་རྒྱུ་ཅུང་ཟད་ཅིག་སྦྱིན་ནོ་ཞེས་སྨྲས་ནས། ཐ་ག་པ་དེ་ལ་དགེ་སློང་དེས་གོས་བསྒྲུབ་པའི་ཕྱིར་གླ་རྔན་འདི་ལྟ་སྟེ། བཟའ་བའམ། བཅའ་བའམ། བཟའ་རྒྱུ་ཅུང་ཟད་ཅིག་བྱིན་ཞིང་གོས་གྲུབ་ན་སྤང་བའི་ལྟུང་བྱེད་དོ། །ལྔ་པ་འཕྲོག་པའི་སྤང་བ་ནི། གང་བྱས་པས་འཕྲོག་པའི་སྤང་བར་འགྱུར་ཞེ་ན། ཡང་དགའ་བོ་ལྟ་བུའི་དགེ་སློང་གང་ཡང་རུང་བ་ཆོས་འདི་པའི་དགེ་སློང་ལ་གོས་ཕྱིར་བླང་དུ་མེད་པར་བྱིན་ནས་དེའི་འོག་ཏུ་ཁྲོས་འཁྲུགས་རྔམས་པར་གྱུར་ཏེ། ཡིད་མ་རངས་ནས། གོས་རང་གིས་འཕྲོག་གམ། གཞན་འཕྲོག་ཏུ་འཇུག་ཅིང་། དགེ་སློང་དེ་ལ་གོས་འཕྲོག་པའི་ཚིག་འདི་སྐད་ཅེས། དགེ་སློང་ཁྱོད་ལ་གོས་མི་སྦྱིན་གྱིས། གོས་ཕྱིར་བྱིན་ཅིག་ཟེར་ན་དགེ་སློང་དེས་གོས་ལྷག་མ་ཡོད་པ་ཕྱིར་སྦྱིན་པར་བྱ་ཞིང་བཏང་ན་ལུས་དང་བྲལ་བའི་ཚེ་ན་སྤང་བའི་ལྟུང་བྱེད་དོ། །དྲུག་པ་བརྟད་པ་ལས་བྱུང་བའི་སྤང་བ་ནི། གང་བྱས་པས་བརྟད་པ་ལས་བྱུང་བའི་སྤང་བར་འགྱུར་ཞེ་ན། ཆོས་འདི་པའི་དགེ་སློང་གིས་སྟོན་ཟླ་ཐ་ཆུང་ཉ་ལ་དགག་དབྱེ་བྱེད་པའི་ཞག་བཅུས་མ་ཚང་བ་ཚུན་ཆད་དུ་ནད་པ་ལ་སྦྱིན་པ་ལྟ་བུའི་བརྟད་པ་གློ་བུར་བ་ལས་བྱུང་བའི་གོས་ཞིག་གཞན་ལས་རྙེད་ལ་འདོད་ན་དགེ་སློང་དེས་གོས་དེ་བླང་བར་བྱའོ། །དེ་ལས་
འདས་པར་འཆང་ན་སྤང་བའི་ལྟུང་བྱེད་དོ། །འོ་ན་གོས་སྦྱིན་པའི་དུས་དང་དུས་མ་ཡིན་པ་ཇི་ལྟ་བུ་ཞེ་ན། དབྱར་ཁས་མ་བླངས་པའི་གནས་སུ་ནི་སྟོན་ཟླ་ཐ་ཆུང་ཉ་ཚུན་ཆད་དུས་ཡིན་ལ། ལྷག་མ་ནི་དུས་མ་ཡིན་ནོ། །དབྱར་ཁས་བླངས་པའི་གནས་སུ་ནི། སྟོན་ཟླ་འབྲིང་པོ་ཉ་ནས་དཔྱིད་ཟླ་ར་བ་ཉའི་བར་ནི་དུས་ཡིན་ལ། ལྷག་མ་དུས་མ་ཡིན་ནོ། །བདུན་པ་དགོན་པ་བའི་སྤང་བ་ནི། གང་བྱས་པས་ཞག་བདུན་ན་འབྲལ་བའི་སྤང་བར་འགྱུར་ཞེ་ན། ཆོས་འདི་པའི་དགེ་སློང་གཉིས་ཡན་ཆད་ཀྱི་རབ་ཏུ་མང་པོ་དག་གནས་མལ་ཏེ་གཙུག་ལག་ཁང་གྲོང་ལས་རྒྱང་གྲགས་གཅིག་གིས་འཕགས་པའི་དགོན་པ་ཆོམ་རྐུན་པས་བཅོམ་པའི་དོགས་པ་དང་བཅས་པར་གྲགས་པ་སེང་གེ་ལ་སོགས་པའི་འཇིགས་པ་དང་བཅས་པར་གྲགས་པ། སྦྲང་བུ་ལ་སོགས་པའི་འཇིགས་པ་ཐ་དད་པས་འཇིགས་སུ་རུང་བ་དང་བཅས་པར་གྲགས་པ་དག་ཏུ་དབྱར་གཞན་ཕྱི་མ་གནས་པར་ཁས་བླངས་པར་གྱུར་ལ། དགེ་སློང་དགོན་པ་པས་འདོད་ན་ཆོས་གོས་སྣམ་སྦྱར་བླ་གོས་མཐང་གོས་གསུམ་ལས་ཆོས་གོས་གང་ཡང་རུང་བ་ཁྱིམ་གཞན་དུ་གཞག་པར་བྱའོ། །དགེ་སློང་དགོན་པ་པ་ལ་དགེ་འདུན་གྱི་བྱ་བ་ལ་སོགས་པའི་ཕྱིར་དུ་མཚམས་ཀྱི་ཕྱི་རོལ་ཏུ་འགྲོ་དགོས་པ་དེ་ལྟ་བུའི་རྐྱེན་ཞིག་བྱུང་ན་དགེ་སློང་དགོན་པ་པ་དེས་ཞག་དྲུག་གི་མཐའ་ཚུན་ཆད་དུ་ཆོས་གོས་ཁྱིམ་གཞན་དུ་བཞག་པ་དེ་དག་འབྲལ་བར་བྱའོ། །དེ་ལས་འདས་པར་འབྲལ་ན་སྤང་བའི་ལྟུང་བྱེད་དོ། །དེ་ཡང་དབྱར་ཕྱི་མར་གྱུར་ལ་བཅས་པ་དགེ་སློང་བཞིའི་དབང་གིས་ཡིན་གྱིས་ལྟུང་བ་བསྐྱེད་པའི་ཡན་ལག་ཏུ་ངེས་པར་དགོས་པ་མ་ཡིན་ནོ། །བརྒྱད་པ་དབྱར་གྱི་གོས་རས་ཆེན་གྱི་སྤང་བ་ནི། གང་བྱས་པས་དབྱར་གྱི་གོས་རས་ཆེན་གྱི་སྤང་བར་འགྱུར་ཞེ་ན། ཆོས་འདི་པའི་དགེ་སློང་གིས་སོ་ག་རྣམས་ཀྱི་ཟླ་བ་གཅིག་ལུས་པ་དབྱར་ཟླ་ར་བ་ཉ་ནས་དབྱར་
གྱི་གོས་རས་ཆེན་བཙལ་བར་བྱའོ། །དབྱར་ཟད་ནས་འོག་ཏུ་ཟླ་བ་ཕྱེད་དེ་སྟོན་ཟླ་འབྲིང་པོའི་གནམ་སྟོང་གི་བར་དུ་བཅང་བར་བྱའོ། །གལ་ཏེ་དགེ་སློང་གིས་སོ་ག་རྣམས་ཀྱིས་ཟླ་བ་གཅིག་ལུས་པའི་སྔ་རོལ་ཏུ་དབྱར་གྱི་གོས་རས་ཆེན་ཚོལ་བར་བྱེད་དམ། དབྱར་ཟད་ནས་འོག་ཏུ་ཟླ་བ་ཕྱེད་ལས་ལྷག་པ་འཆང་ན་སྤང་བའི་ལྟུང་བྱེད་དོ། །དགུ་པ་བསྔོས་བསྒྱུར་ནི། གང་བྱས་པས་གོས་ཀྱི་སྤང་བར་འགྱུར་ཞེ་ན། ཡང་ཉེར་དགའ་ལྟ་བུའི་དགེ་སློང་གང་ཡང་རུང་བ་སངས་རྒྱས་ཀྱི་ཉན་ཐོས་ཀྱི་དགེ་འདུན་ལ་བསྔོས་པའི་གོས་ཀྱི་རྙེད་པ་ཤེས་བཞིན་གང་ཟག་བདག་ལ་བསྒྱུར་དུ་འཇུག་ན་སྤང་བའི་ལྟུང་བྱེད་དོ། །བཅུ་པ་གསོག་འཇོག་གི་སྤང་བ་ནི། གང་བྱས་པས་གསོག་འཇོག་གི་སྤང་བར་འགྱུར་ཞེ་ན། བཅོམ་ལྡན་འདས་ཀྱིས་དགེ་སློང་ན་བ་རྣམས་ལ་ཕན་པ་སོ་སོར་བསྟེན་པར་བྱ་བའི་སྨན་གང་དག་བཀའ་སྩལ་བ་འདི་ལྟ་སྟེ། མར་བཞུ་བའི་ཞུན་མར་དང་། འབྲུ་མར་དང་། སྦྲང་རྩི་དང་། བུ་རམ་གྱི་དབུ་བ་དེ་དག་ལས། དགེ་སློང་ན་བས་འདོད་ན་རང་གིས་སྨན་ཞག་བདུན་བར་བྱིན་གྱིས་བརླབས་ཏེ། གསོག་འཇོག་གི་ཡོངས་སུ་ལོངས་སྤྱད་པས་ཡོངས་སུ་སྤྱད་པར་བྱའོ། །དེ་ལས་འདས་པར་ཡོངས་སུ་ལོངས་སྤྱོད་པར་བྱེད་ན་ཞག་བརྒྱད་པའི་སྐྱ་རེངས་ཤར་བའི་ཚེ་ན་སྤང་བའི་ལྟུང་བྱེད་དོ། །གཉིས་པ་མཇུག་བསྡུ་བ་ནི། ཚེ་དང་ལྡན་པ་ཞེས་སོགས་སོ། །གསུམ་པ་རྣམ་གཞག་བསྒྲག་པ་ནི། སྤང་བའི་ལྟུང་བྱེད་ཀྱི་ཆོས་སུམ་ཅུ་བཏོན་པ་དེ་ལ་ཞེས་སོགས་སོ། །གཉིས་པ་ལྟུང་བྱེད་འབའ་ཞིག་པ་གདོན་པ་ལ་བཞི། སྤྱི་སྡོམ་གྱིས་མདོར་བསྟན། སོ་སོའི་ངོ་བོ་རྒྱས་པར་བཤད་པ། མཇུག་བསྡུ། རྣམ་གཞག་བསྒྲག་པའོ། །དང་པོ་ནི། ལྟུང་བྱེད་འབའ་ཞིག་པ་སྤྱི་སྡོམ་དུ་བསྡུས་པ་ཆོས་ཅན། བཅུ་ཚན་དགུ་ཡོད་དེ། ཤེས་བཞིན་དུ་རྫུན་དུ་
སྨྲ་བ་སོགས་དང་། ས་བོན་དང་སྐྱེ་བ་འཇིག་པ་སོགས་དང་། དགེ་སློང་མ་ལ་མ་བསྐོས་པར་ཆོས་སྟོན་པ་སོགས་དང་། ཡང་ཡང་ཟ་བ་སོགས་དང་། སྲོག་ཆགས་དང་བཅས་པའི་ཆུ་ལོངས་སྤྱོད་པ་སོགས་དང་། ཁྱིམ་དུ་ཟས་གཅོད་པ་སོགས་དང་། བསམས་བཞིན་དུ་དུད་འགྲོ་གསོད་པ་སོགས་དང་། རྐུན་མ་དང་ལྷན་ཅིག་འགྲོ་ན་ལམ་དུ་འགྲོ་བ་སོགས་དང་། མཆོད་སྟོན་ཏེ་ཁྱིམ་པ་འདུག་པ་ལ་མི་བསྒོ་བར་འགྲོ་བ་ལ་སོགས་པའི་བཅུ་ཚན་རྣམས་སུ་ཡོད་པའི་ཕྱིར། གཉིས་པ་ལ་བཅུ་ཚན་དགུ་ལས། བཅུ་ཚན་དང་པོ་ལ་གསུམ། སྡོམ་གྱིས་མདོར་བསྟན། ལྟུང་བྱེད་གདོན་པའི་ལུང་དབོག །སོ་སོའི་ངོ་བོ་རྒྱས་པར་བཤད་པའོ། །དང་པོ་ནི། ལྟུང་བྱེད་འབའ་ཞིག་པ་བཅུ་ཚན་དང་པོ་སྡོམ་དུ་བསྡུས་པ་ཆོས་ཅན། བཅུ་ཡོད་དེ། རྫུན་དུ་སྨྲ་དང་། སྐྱོན་ནས་སྨྲ་བ་དང་། དགེ་སློང་ལ་ཕྲ་མ་བྱེད་པ་དང་། སྐྱོ་སྔོགས་བྱེད་པ་དང་། ཆོས་སྟོན་པ་དང་། ཆོས་འདོན་པ་དང་། གནས་ངན་ལེན་བརྗོད་པ་དང་། མིའི་ཆོས་བླ་མ་བདེན་པ་སྨྲ་བ་དང་། བཤེས་ངོར་བྱེད་པ་དང་། ཁྱད་དུ་གསོད་པའི་ལྟུང་བྱེད་རྣམས་སུ་ཡོད་པའི་ཕྱིར། གཉིས་པ་ནི། འདུལ་བའི་སྡེ་སྣོད་ཡི་གེར་མི་འབྲི་བ་ཡིན་ན། ལྟུང་བྱེད་འབའ་ཞིག་པ་དགུ་བཅུ་འདོན་པ་གང་ལས་ཞེས་ཤེ་ན། མི་ཤེས་པའི་སྐྱོན་མེད་དེ། ཚེ་དང་ལྡན་པ་དག་ལྟུང་བྱེད་ཀྱི་ཆོས་དགུ་བཅུ་པོ་འདི་དག་ནི་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་འདོན་པའི་ཚེ་འདུལ་བ་འཛིན་པའི་ཁ་ཏོན་ལས་འབྱུང་བའི་ཕྱིར་རོ། །གསུམ་པ་ལ་བཅུ་ལས། དང་པོ་ནི། གང་བྱས་པས་རྫུན་དུ་སྨྲ་བའི་ལྟུང་བྱེད་དུ་འགྱུར་ཞེ་ན། ཤེས་བཞིན་དུ་འདུ་ཤེས་བསྒྱུར་ནས་རྫུན་དུ་སྨྲས་ན་དོན་གོ་བའི་ཚེ་ན་ལྟུང་བྱེད་དོ། །འོ་ན་ཅིའི་ཕྱིར་ན་ལྟུང་བྱེད་ཅེས་བྱ་ཞེ་ན། དམྱལ་བ། དུད་འགྲོ། ཡི་དྭགས་ངན་སོང་ངན་འགྲོ་ལོག་པར་ལྟུང་བ་དག་ཏུ་སྲེག་པར་བྱེད་འཚེད་
པར་བྱེད་ལྟུང་བར་བྱེད་ཅེས་བྱའོ། །ཡང་ན་ལྟུང་བ་དེ་མ་བཤགས་པ་དེ་སྲིད་དུ་དགེ་བའི་ཆོས་རྣམས་ལ་སྒྲིབ་པར་བྱེད་པར་ལྟུང་བྱེད་ཅེས་བྱའོ། །གཉིས་པ་ནི། གང་བྱས་པས་སྐྱོན་ནས་སྨྲ་བའི་ལྟུང་བྱེད་དུ་འགྱུར་ཞེ་ན། མིའི་སྐྱོན་ནས་སྨྲ་བའི་བསམ་པས་ཀུན་ནས་བསླངས་ནས་ཕ་རོལ་པོའི་སྐྱོན་སྨྲས་ན་ཚིག་འཇམ་པོས་ཀྱང་རུང་། རྩུབ་པོས་ཀྱང་རུང་། ཕ་རོལ་པོ་མི་དགའ་བར་མ་གྱུར་ན་ཡང་དོན་གོ་བ་ན་ལྟུང་བྱེད་དོ། །གསུམ་པ་ནི། གང་བྱས་པས་ཕྲ་མ་བྱེད་པའི་ལྟུང་བྱེད་དུ་འགྱུར་ཞེ་ན། དགེ་སློང་དེ་ལ་ཕྲ་མ་བྱེད་འདོད་པས་ཀུན་ནས་བསླངས་ཏེ་དགེ་སློང་ཆེ་གེ་མོ་འདི་སྐད་ཟེར་རོ་ཞེས་ཕྲ་མ་བྱེད་ན་དོན་གོ་བའི་ཚེ་ན་ལྟུང་བྱེད་དོ། །བཞི་པ་སྐྱོ་སྔོགས་བྱེད་པ་ནི། གང་བྱས་པས་སྐྱོ་སྔོགས་བྱེད་པའི་ལྟུང་བྱེད་དུ་འགྱུར་ཞེ་ན། ཡང་དྲུག་སྡེ་ལྟ་བུའི་དགེ་སློང་གང་ཡང་རུང་བ་སངས་རྒྱས་ཀྱི་ཉན་ཐོས་ཀྱི་དགེ་འདུན་བློ་མཐུན་པས་ཆོས་དང་འདུལ་བ་དང་སྟོན་པའི་བསྟན་པ་ཇི་ལྟ་བ་བཞིན་དུ་རྩོད་པ་བཞི་པོ་གང་ཡང་རུང་བ་སྦྱངས་ནས་ཞི་བར་ཤེས་བཞིན་དུ་ཡང་ལས་ཀྱི་སྐྱོ་སྔོགས་བྱེད་ན་ལྟུང་བྱེད་དོ། །ལྔ་པ་ནི། གང་བྱས་པས་སྟོན་པའི་ལྟུང་བྱེད་དུ་འགྱུར་ཞེ་ན། ཡང་འཆར་ཀ་ལྟ་བུའི་དགེ་སློང་གང་ཡང་རུང་བ་བུད་མེད་དམ་གཞོན་ནུ་མ་ལེགས་པར་སྨྲས་པ་དང་ཉེས་པར་སྨྲས་པའི་དོན་གོ་བ་ལ་ཚིག་ལྔ་པོའི་ཆོས་སྟོན་པའི་ཚེ་ཤེས་བཞིན་དུ་ཚིག་ལྔ་པོ་ལས་ལྷག་པ་དང་། ཚིག་དྲུག་པའི་ཆོས་སྟོན་པའི་ཚེ་ཤེས་བཞིན་དུ་ཚིག་དྲུག་པོ་ལས་ལྷག་པར་སངས་རྒྱས་ཀྱིས་གསུངས་པའི་ཆོས་སྟོན་ན་ལྟུང་བྱེད་དོ། །ཐམས་ཅད་དུའམ་ཞེ་ན། ལེགས་པར་སྨྲས་པ་དང་ཉེས་པར་སྨྲས་པའི་དོན་རིག་པའི་སྐྱེས་པ་ཁྲིམས་གྲོགས་སུ་ཡོད་པ་མ་གཏོགས་སོ། །དྲུག་པ་ནི། གང་བྱས་པས་འདོན་པའི་ལྟུང་བྱེད་དུ་འགྱུར་
ཞེ་ན། ཡང་འཆར་ཀ་ལྟ་བུའི་དགེ་སློང་གང་ཡང་རུང་བ་དགེ་སློང་དང་དགེ་སློང་མ་ལས་གཞན་པའི་གང་ཟག་བསྙེན་པར་མ་རྫོགས་པ་དང་། མཉམ་པ་དང་སྔ་པའི་ཚིག་གིས་ཆོས་དང་ཡི་གེ་འདོན་ན་ལྟུང་བྱེད་དོ། །དེ་ཡང་ཆོས་ཚིག་མཉམ་པས་འདོན་པ་ནི། སློབ་དཔོན་གྱིས་སྡིག་པ་ཐམས་ཅད་མི་བྱ་སྟེ་ཞེས་འདོན་པ་ན། སློབ་མས་ཀྱང་དེ་དང་དུས་མཉམ་དུ་སྡིག་པ་ཐམས་ཅད་མི་བྱ་སྟེ་ཞེས་འདོན་པ་ལྟ་བུ་ཡིན་ལ། སྔ་བས་འདོན་པ་ནི། སློབ་དཔོན་གྱིས་སྡིག་པ་ཐམས་ཅད་མི་བྱ་སྟེ་ཞེས་བཏོན་པ་ན། སློབ་མས་དགེ་བ་ཕུན་སུམ་ཚོགས་པར་སྤྱད་ཅེས་འདོན་པ་ལྟ་བུའོ། །ཡི་གེ་མཉམ་པས་འདོན་པ་ནི། སློབ་དཔོན་གྱིས། ཨ་ཞེས་འདོན་པ་ན། དེ་དང་དུས་མཉམ་དུ་སློབ་མས་ཀྱང་ཨ་ཞེས་འདོན་པ་ལྟ་བུ་ཡིན་ལ། སྔ་བས་འདོན་པ་ནི། སློབ་དཔོན་གྱིས་ཨ་ཞེས་འདོན་པ་ན། སློབ་མས་ཨཱ་ཞེས་འདོན་པ་ལྟ་བུ་ཡིན་ནོ། །བདུན་པ་ནི། གང་བྱས་པས་གནས་ངན་ལེན་བརྗོད་པའི་ལྟུང་བྱེད་དུ་འགྱུར་ཞེ་ན། ཡང་དྲུག་སྡེ་ལྟ་བུའི་དགེ་སློང་གང་ཡང་རུང་བ་གང་ཟག་བསྙེན་པར་མ་རྫོགས་པ་ལ་དགེ་སློང་ཕ་རོལ་པོའི་ཕམ་པ་དང་། ལྷག་མའི་ལྟུང་བ་ཀུན་ནས་སློང་བའི་གནས་ངན་ལེན་གྱི་ལྷུང་བ་བརྗོད་པར་བྱེད་ན་གསོལ་བ་འབའ་ཞིག་གི་ལས་ཀྱིས་དགེ་འདུན་གྱིས་གནང་བ་སྦྱིན་པ་ནི་མ་གཏོགས་ཏེ་ལྟུང་བྱེད་དོ། །བརྒྱད་པ་ནི། གང་བྱས་པས་མིའི་ཆོས་བླ་མ་བདེན་པ་སྨྲ་བའི་ལྟུང་བྱེད་དུ་འགྱུར་ཞེ་ན། ཡང་ཆོས་འདི་པའི་དགེ་སློང་གང་ཡང་རུང་བ་གང་ཟག་བསྙེན་པ་མ་རྫོགས་པ་ལ་མིའི་ཆོས་བླ་མ་བདེན་པར་སྨྲ་ན་དོན་གོ་བའི་ཚེ་ན་ལྟུང་བྱེད་དོ། །དགུ་པ་ནི། གང་བྱས་པས་བཤེས་ངོར་བྱེད་པའི་ལྟུང་བྱེད་དུ་འགྱུར་ཞེ་ན། ཡང་མཛའ་བོ་དང་ས་ལས་སྐྱེས་ལྟ་བུའི་དགེ་སློང་གང་ཡང་རུང་བ་སྔར་ལེགས་པར་རུང་བ་བྱས་པ་སྟེ་སྔར་དད་པས་ཕུལ་ནས་དེའི་འོག་ཏུ་དུས་གཞན་གྱི་
ཚེ་ན་འདི་སྐད་ཅེས། ཚེ་དང་ལྡན་པ་དག་གིས་འདི་ལྟར་བཤེས་ངོར་བྱས་ཏེ་དེ་བཞིན་གཤེགས་པའི་ཉན་ཐོས་ཀྱི་དགེ་འདུན་གྱི་གོས་རྙེད་པ་དགེ་འདུན་གྱི་ནང་དུ་གྲུབ་པར་བསྔོས་པ་བདག་གི་དོན་དུ་གང་ཟག་ལ་བསྔོས་སོ་ཞེས་ཟེར་ན་ལྟུང་བྱེད་དོ། །བཅུ་པ་ནི། གང་བྱས་པས་ཁྱད་དུ་གསོད་པའི་ལྟུང་བྱེད་དུ་འགྱུར་ཞེ་ན། ཡང་དྲུག་སྡེ་ལྟ་བུའི་དགེ་སློང་གང་ཡང་རུང་བ་གསོ་སྦྱོང་གི་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་གདོན་པ་ལྔ་པོ་འདོན་པ་ན་བསླབ་པ་ཁྱད་དུ་གསོད་པའི་བསམ་པས་འདི་སྐད་ཅེས་ཚེ་དང་ལྡན་པ་དག་གང་དག་གིས་དགེ་སློང་རྣམས་འགྱོད་པ་དང་། ཡིད་ལ་བཅགས་པ་དང་། གནོད་པར་འགྱུར་བའི་བསླབ་པའི་གཞི་ཕྲན་ཚེགས་རབ་ཏུ་ཕྲ་བ་འདི་དག་གིས་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་འདོན་པ་བཏོན་པ་དག་གིས་ཅི་ཞིག་བྱ་ཞེས་ཟེར་ཞིང་བསླབ་པ་ཁྱད་དུ་གསོད་ན་ལྟུང་བྱེད་དོ། །བཅུ་ཚན་གཉིས་པ་ལ། སྡོམ་གྱི་སྒོ་ནས་མདོར་བསྟན། སོ་སོའི་མཚན་ཉིད་གཉིས་ལས། དང་པོ་ནི། ལྟུང་བྱེད་བཅུ་ཚན་གཉིས་པ་སྡོམ་དུ་བསྡུས་པ་ཆོས་ཅན། བཅུ་ཡོད་དེ། ས་བོན་དང་སྐྱེ་བ་འཇིག་པ་དང་། འཕྱ་བ་དང་། བསྒོ་བ་རྣ་ལ་གཟོན་པ་དང་། ཁྲི་སྟེ་གནས་མལ་དང་། གདིང་བ་དང་། སྐྲོད་པ་དང་། ཕྱིས་གནོན་པ་དང་། རྩ་བ་འབྱུང་བ་ལ་འདུག་པ་དང་། སྲོག་ཆགས་དང་བཅས་པའི་ཆུས་འདེབས་པ་དང་། ཕ་གུ་རིམ་པ་གཉིས་སུ་རྩིག་པ་གཙུག་ལག་ཁང་གི་ལྟུང་བྱེད་རྣམས་སུ་ཡོད་པའི་ཕྱིར། གཉིས་པ་ལ་བཅུ་ལས། དང་པོ་ནི། གང་བྱས་པས་ས་བོན་དང་སྐྱེ་བ་འཇིག་པའི་ལྟུང་བྱེད་དུ་འགྱུར་ཞེ་ན། ས་བོན་གྱི་ཚོགས་དང་། གྲོག་སྦུར་ལ་སོགས་པའི་འབྱུང་པོའི་ཚོགས་གནས་པའི་ཤིང་ལྗོན་པ་རང་གིས་འབྱིན་པ་ལ་སོགས་པས་འཇིག་གམ་གཞན་འཇིག་པར་བྱེད་དུ་འཇུག་ན་ལྟུང་བྱེད་དོ། །ས་བོན་ནི་ལྔ་སྟེ། རྩ་བའི་ས་
བོན། སྡོང་བུའི་ས་བོན། ཐོ་གུའི་ས་བོན། འགས་པའི་ས་བོན། ས་བོན་གྱི་ས་བོན་ནོ། །རྩ་བའི་ས་བོན་ནི་གླ་སྒང་ལ་སོགས་པའོ། །སྡོང་བུའི་ས་བོན་ནི་ཨ་ཤྭད་ཐ་ལ་སོགས་པའོ། །ཐོ་གུའི་ས་བོན་ནི་བུ་རམ་ཤིང་ལ་སོགས་པའོ། །འགས་པའི་ས་བོན་ནི་ཨ་རྫ་ཀ་ལ་སོགས་པའོ། །ས་བོན་གྱི་ས་བོན་ནི། ནས་ལ་སོགས་པའོ། །གཉིས་པ་ནི། གང་བྱས་པས་འཕྱ་བའི་ལྟུང་བྱེད་དུ་འགྱུར་ཞེ་ན། འཕྱ་བའི་བསམ་པས་ཀུན་ནས་བསླངས་ཏེ་འཕྱ་བའམ་ཟུར་གྱིས་གཞོགས་འཕྱས་བྱེད་ན་ལྟུང་བྱེད་དོ། །གསུམ་པ་ནི། གང་བྱས་པས་བསྒོ་བ་རྣ་ལ་གཟོན་པའི་ལྟུང་བྱེད་དུ་འགྱུར་ཞེ་ན། བསྒོ་བ་རྣ་བ་གཟོན་པའི་བསམ་པས་ངག་ལ་སོགས་པའི་རྣམ་པ་རིག་བྱེད་བརྗོད་ན་ལྟུང་བྱེད་དོ། །བཞི་པ་ནི། གང་བྱས་པས་གནས་མལ་གྱི་ལྟུང་བྱེད་དུ་འགྱུར་ཞེ་ན། ཡང་ཆོས་འདི་པའི་དགེ་སློང་གང་ཡང་རུང་བ་དེ་བཞིན་གཤེགས་པའི་ཉན་ཐོས་ཀྱི་དགེ་འདུན་གྱི་ཁྲིའམ་ཁྲིའུའམ། སྟན་ནང་ཚངས་ཅན་ནམ། ལྭ་བའམ། སྔས་སམ། གོར་བུ་གྲུ་བཞི་བླ་གམ་མེད་པར་རང་གིས་བཏིངས་སམ་གཞན་འདིང་དུ་བཅུག་ནས་མ་བསྡུས་སམ། གཞན་སྡུད་དུ་མ་བཅུག་གམ། དགེ་སློང་འཁོད་པ་ལ་མ་བཅོལ་བར་འདོམ་བཞི་བཅུ་རྩ་དགུ་ཚུན་ཆད་ཀྱི་ཉེ་འཁོར་ལས་འདས་པར་སོང་ན་ལྟུང་བྱེད་དོ། །ཐམས་ཅད་དུ་འགྱུར་རམ་ཞེ་ན། ཆོམ་རྐུན་པས་འཇོམས་པ་དེ་འདྲ་བའི་རྐྱེན་ནི་མ་གཏོགས་སོ། །ལྔ་པ་ནི། གང་བྱས་པས་གདིང་བའི་ལྟུང་བྱེད་དུ་འགྱུར་ཞེ་ན། ཡང་ཆོས་འདི་པའི་དགེ་སློང་དེ་བཞིན་གཤེགས་པའི་ཉན་ཐོས་ཀྱི་དགེ་འདུན་གྱི་སྤྱོད་ལམ་བཞི་ཤོང་བའི་གཙུག་ལག་ཁང་དུ་རྩྭའི་གདིང་བའམ། ལོ་མའི་གདིང་བ་རང་གིས་བཏིངས་སམ། གཞན་པ་འདིང་དུ་བཅུག་ནས་རང་གིས་མ་བསྡུས་སམ། གཞན་སྡུད་དུ་མ་བཅུག་གམ། དགེ་སློང་འཁོད་པ་ལ་མ་བཅོལ་བར་
དེ་ནས་སོང་ན་ཉེ་འཁོར་འདོམ་བཞི་བཅུ་རྩ་དགུ་འདྲ་བ་ན་ལྟུང་བྱེད་དོ། །ཐམས་ཅད་དུ་འགྱུར་རམ་ཞེ་ན། ཆོམ་རྐུན་པས་འཇོམས་པ་ལ་སོགས་པ་དེ་འདྲ་བའི་རྐྱེན་ནི་མ་གཏོགས་སོ། །དྲུག་པ་ནི། གང་བྱས་པས་སྐྲོད་པའི་ལྟུང་བྱེད་དུ་འགྱུར་ཞེ་ན། ཡང་འཆར་ཀ་ལྟ་བུའི་དགེ་སློང་གང་ཡང་རུང་བ་ཁྲོས་ཤིང་ཁྲོ་བས་ཟིལ་གྱིས་ནོན་ནས་ཁྲོས་འཁྲུགས་རྔམས་པར་གྱུར་ཏེ་ཡིད་མ་རངས་ནས་སངས་རྒྱས་ཀྱི་ཉན་ཐོས་ཀྱི་དགེ་འདུན་གྱི་སྤྱོད་ལམ་བཞི་ཤོང་བའི་གཙུག་ལག་ཁང་ནས་ཆོས་འདི་པའི་དགེ་སློང་རང་གིས་སྐྲོད་དམ། གཞན་སྐྲོད་དུ་འཇུག་ན་སྲོག་གི་བར་ཆད་ལ་སོགས་པ་དེ་འདྲ་བའི་རྐྱེན་མ་གཏོགས་ཏེ་ལྟུང་བྱེད་དོ། །བདུན་པ་ནི། གང་བྱས་པས་ཕྱིས་གནོན་བྱེད་པའི་ལྟུང་བྱེད་དུ་འགྱུར་ཞེ་ན། ཡང་འཆར་ཀ་ལྟ་བུའི་དགེ་སློང་གང་ཡང་རུང་བ་སངས་རྒྱས་ཀྱི་ཉན་ཐོས་ཀྱི་དགེ་འདུན་གྱི་སྤྱོད་ལམ་བཞི་ཤོང་བའི་གཙུག་ལག་ཁང་ན་ཆོས་འདི་པའི་དགེ་སློང་དག་སྔ་ན་འཁོད་པར་རང་གིས་ཤེས་བཞིན་དུ་དེའི་འོག་ཏུ་ཕྱིས་འོངས་ནས་སུ་ལ་གནོད་པ་བདེ་བ་ལ་རེག་པར་མི་འགྱུར་བ་དེ་ཉིད་དེ་ལས་གཞན་དུ་འགྲོ་བར་འགྱུར་སྙམ་པ་དེ་ཉིད་རྐྱེན་དུ་བྱས་ཏེ་གནོད་པས་ཟིལ་གྱིས་མནན་པའི་ཕྱིས་གནོན་བྱས་ནས་སྟན་ལ་ཉལ་ལམ་འདུག་ན་ལྟུང་བྱེད་དོ། །བརྒྱད་པ་ནི། གང་བྱས་པས་རྩ་བ་འབྱུང་བ་ལ་འདུག་པའི་ལྟུང་བྱེད་དུ་འགྱུར་ཞེ་ན། ཡང་ཉེར་དགའ་ལྟ་བུའི་དགེ་སློང་གང་ཡང་རུང་བས་སངས་རྒྱས་ཀྱི་ཉན་ཐོས་ཀྱི་དགེ་འདུན་གྱི་སྤྱོད་ལམ་བཞི་ཤོང་བའི་གཙུག་ལག་ཁང་གི་སྟེང་གི་ནམ་མཁའ་ལ་རྩྭའམ་ལོ་མའི་ཐོག་བོར་བ་ཁྲིའམ་ཁྲིའུ་རྩ་བ་འབྱུང་བར་རང་གིས་ཤེས་བཞིན་དུ་མཐུས་མནན་པའི་ལྕིད་ཀྱིས་ཕབ་སྟེ་ཉལ་ལམ་འདུག་ན་ལྟུང་བྱེད་དོ། །དགུ་པ་ནི། གང་བྱས་པས་སྲོག་ཆགས་དང་བཅས་པའི་ཆུ་ལ་སྤྱོད་པའི་ལྟུང་བྱེད་དུ་
འགྱུར་ཞེ་ན། ཡང་འདུན་པ་ལྟ་བུའི་དགེ་སློང་གང་ཡང་རུང་བ་རང་གིས་ཤེས་བཞིན་དུ་ཐ་མལ་པའི་མིག་གིས་མཐོང་བའི་སྲོག་ཆགས་དང་བཅས་པའི་ཆུས་རྩྭའམ་ལྕི་བའམ་ས་ལ་རང་གིས་འདེབས་སམ་གཞན་འདེབས་སུ་འཇུག་ན་ལྟུང་བྱེད་དོ། །བཅུ་པ་ནི། གང་བྱས་པས་གཙུག་ལག་ཁང་གིས་ལྟུང་བྱེད་དུ་འགྱུར་ཞེ་ན། དྲུག་སྡེ་ལྟ་བུའི་དགེ་སློང་གིས་སྤྱོད་ལམ་བཞི་ཤོང་བའི་གཙུག་ལག་ཁང་སྦྱིན་པར་བྱ་བ་དང་ཚད་ལས་ཆེན་པོ་ཞིག་རང་གིས་རྩིག་གམ། གཞན་རྩིག་ཏུ་འཇུག་ན། སྒོའི་སྦུབས་དང་གཏན་པ་དང་། སྐར་ཁུང་དང་ཆུ་ཁུང་གི་སྣང་བ་ཇི་ཙམ་གདོད་པར་བྱ་བའི་འདུ་ཤེས་ཀྱིས་ས་བརྟག་པ་ནས་བཟུང་སྟེ། ཕ་གུའི་རིམ་པ་འཇིམ་པ་དང་བཅས་པ་ཉི་མ་གཅིག་ལ་གཉིས་སམ་གསུམ་བརྩིག་པར་བྱའོ། །དེ་ལས་ལྷག་པར་རྩིག་པ་ལྟུང་བྱེད་དོ། །བཅུ་ཚན་གསུམ་པ་ལ་གཉིས། སྡོམ་གྱི་སྒོ་ནས་མདོར་བསྟན། སོ་སོའི་མཚན་ཉིད་རྒྱས་པར་བཤད་པའོ། །དང་པོ་ནི་ལྟུང་བྱེད་བཅུ་ཚན་གསུམ་པ་སྡོམ་དུ་བསྡུས་པ་ཆོས་ཅན། བཅུ་ཡོད་དེ། མ་བསྐོས་པར་སྟོན་པ་དང་། ཉི་མ་ནུབ་ཀྱི་བར་དུ་སྟོན་པ་དང་། ཟས་ཅུང་ཟད་ཙམ་གྱི་ཕྱིར་སྟོན་པ་དང་། ཆོས་གོས་སྦྱིན་པ་དང་། བྱེད་པ་གཉིས་དག་དང་། དགེ་སློང་མའི་དོན་མཐུན་དང་ལྷན་ཅིག་འགྲོན་ལམ་དུ་འཇུག་པ་དང་། དགེ་སློང་མ་དང་ལྷན་ཅིག་གྲུར་འཇུག་པ་དང་། བུད་མེད་དང་དབེན་པ་སྐྱབས་ཡོད་པར་འདུག་པ་དང་། དགེ་སློང་མ་དང་འགྲེང་བ་གཉིས་དང་། དགེ་སློང་མ་ཡིས་སྦྱོར་དུ་བཅུག་པ་ཟ་བའི་ལྟུང་བྱེད་རྣམས་སུ་ཡོད་པའི་ཕྱིར་རོ། །གཉིས་པ་ལ་བཅུ་ལས་དང་པོ་ནི། གང་བྱས་པས་མ་བསྐོས་པར་སྟོན་པའི་ལྟུང་བྱེད་དུ་འགྱུར་ཞེ་ན། ཡང་དྲུག་སྡེ་ལྟ་བུའི་དགེ་སློང་གང་ཡང་རུང་བ་སངས་རྒྱས་ཀྱི་ཉན་ཐོས་ཀྱི་དགེ་འདུན་གྱིས་གསོལ་གཉིས་ཀྱི་ལས་ཀྱིས་མ་བསྐོས་པར་ཆོས་འདི་པའི་དགེ་སློང་མ་ལ་བསླབ་པ་གསུམ་སྟོན་ན་
ལྟུང་བྱེད་དོ། །ཐམས་ཅད་དུ་འགྱུར་རམ་ཞེ་ན། འཕགས་པའི་ལམ་ཆོས་འདི་ལྟ་བུ་དང་ལྡན་པ་མ་གཏོགས་སོ། །གཉིས་པ་ནི། གང་བྱས་པས་ཉི་མ་ནུབ་ཀྱི་བར་དུ་སྟོན་པའི་ལྟུང་བྱེད་དུ་འགྱུར་ཞེ་ན། ཆོས་འདི་པའི་དགེ་སློང་གང་ཡང་རུང་བ་སངས་རྒྱས་ཀྱི་ཉན་ཐོས་ཀྱི་དགེ་འདུན་གྱིས་གསོལ་བ་དང་གཉིས་ཀྱི་ལས་ཀྱིས་བསྐོས་ཀྱང་ཉི་མ་ནུབ་པའི་དུས་ལ་བབ་ཀྱི་བར་དུ་ཆོས་འདི་པའི་དགེ་སློང་མ་ལ་ཆོས་བསླབ་གསུམ་སྟོན་ན་ལྟུང་བྱེད་དོ། །གསུམ་པ་ནི། གང་བྱས་པས་ཟས་ཅུང་ཟད་ཙམ་གྱི་ཕྱིར་སྟོན་པའི་ལྟུང་བྱེད་དུ་འགྱུར་ཞེ་ན། ཡང་ཉེར་དགའ་ལྟ་བུའི་དགེ་སློང་གང་ཡང་རུང་བ་ཆོས་འདི་པའི་དགེ་སློང་རྣམས་ལ་ཚིག་འདི་སྐད་ཅེས་ཆོས་འདི་པའི་དགེ་སློང་དག་བཅའ་བ་དང་བཟའ་བའི་ཟས་ཅུང་ཟད་ཙམ་གྱི་ཕྱིར་ཆོས་འདི་པའི་དགེ་སློང་མ་ལ་བསླབ་པ་གསུམ་སྟོན་ཏོ་ཞེས་ཟེར་ན་ལྟུང་བྱེད་དོ། །བཞི་པ་ནི། གང་བྱས་པས་གོས་སྦྱིན་པའི་ལྟུང་བྱེད་དུ་འགྱུར་ཞེ་ན། ཡང་ཆོས་འདི་པའི་དགེ་སློང་གང་ཡང་རུང་བ་ཆོས་འདི་པའི་དགེ་སློང་མ་བདུན་བརྒྱུད་ཚུན་གྱི་ཉེ་དུ་མ་ཡིན་པ་ལ་ཆོས་གོས་ཕྱིར་བླང་དུ་མེད་པར་བྱིན་ན་ལྟུང་བྱེད་དོ། །ལྔ་པ་ནི། གང་བྱས་པས་གོས་བྱེད་པའི་ལྟུང་བྱེད་དུ་འགྱུར་ཞེ་ན། ཡང་འཆར་ཀ་ལྟ་བུའི་དགེ་སློང་གང་ཡང་རུང་བ་ཆོས་འདི་པའི་དགེ་སློང་མ་བདུན་བརྒྱུད་ཚུན་གྱི་ཉེ་དུ་མ་ཡིན་པའི་ཆོས་གོས་བཟོ་བར་བྱེད་ན་ལྟུང་བྱེད་དོ། །དྲུག་པ་ནི། གང་བྱས་པས་དགེ་སློང་མ་དང་འགྲོན་ལམ་དུ་འཇུག་པའི་ལྟུང་བྱེད་དུ་འགྱུར་ཞེ་ན། ཡང་དྲུག་སྡེ་ལྟ་བུའི་དགེ་སློང་གང་ཡང་རུང་བ་ཆོས་འདི་པའི་དགེ་སློང་མའི་དོན་མཐུན་དང་ལྷན་ཅིག་འཐམས་པ་སྟེ་བརྡ་བྱས་ནས་དགོན་པའི་འགྲོན་ལམ་དུ་འཇུག་ན་རྒྱང་གྲགས་གཅིག་འདས་པ་ན་ལྟུང་བྱེད་དོ། །ཐམས་ཅད་དུ་ཡིན་ནམ་ཞེ་ན། གནང་བའི་དུས་མ་གཏོགས་སོ། །
འོ་ན་གནང་བའི་དུས་གང་ཞེ་ན། བསླབ་པའི་གཞི་དེ་ལ་གནང་བའི་དུས་ནི་འདི་ཡིན་ཏེ། དོན་མཐུན་མེད་པར་འགྲོ་མི་ནུས་པས་ལམ་དོན་མཐུན་གྱིས་བགྲོད་པར་བྱ་བ་ཆོམ་རྐུན་པ་ལ་སོགས་པའི་དོགས་པ་དང་བཅས་པར་གྲགས་པ། སེང་གེ་ལ་སོགས་པའི་འཇིགས་པ་དང་བཅས་པར་གྲགས་པ། སྡིག་སྦྲུལ་ལ་སོགས་པའི་འཇིགས་པ་ཐ་དད་པས་འཇིགས་སུ་རུང་བ་དང་བཅས་པར་གྲགས་པ་ཞིག་ན་བསླབ་པའི་གཞི་དེ་ལ་དེ་ནི་གནང་བའི་དུས་ཡིན་ནོ། །བདུན་པ་ནི། གང་བྱས་པས་གྲུ་གཅིག་ཏུ་འཇུག་པའི་ལྟུང་བྱེད་འགྱུར་ཞེ་ན། ཡང་དྲུག་སྡེ་ལྟ་བུའི་དགེ་སློང་གང་ཡང་རུང་བ་དང་དགེ་སློང་མའི་དོན་མཐུན་དང་ལྷན་ཅིག་འཐམས་པ་སྟེ་བརྡ་བྱས་ནས་གྲུ་གཅིག་ཏུ་འཇུག་ཅིང་ཆུ་བོའི་རྒྱུན་ལས་བཟློག་སྟེ་གྱེན་དུ་འགྲོའམ་རྒྱུན་ཕྱོགས་སུ་འཐུར་དུ་འགྲོ་ན་རྒྱང་གྲགས་གཅིག་འདས་ན་ལྟུང་བྱེད་དང་ཕྱེད་དུ་ཕྱིན་པ་ན་ཉེས་བྱས་སོ། །ཐམས་ཅད་དུ་ངེས་སམ་ཞེ་ན། ཐད་ཀར་ཕ་རོལ་ཏུ་འགྲོ་བ་མ་གཏོགས་སོ། །བརྒྱད་པ་ནི། གང་བྱས་པས་སྟན་ལ་འདུག་པའི་ལྟུང་བྱེད་དུ་འགྱུར་ཞེ་ན། ཡང་འཆར་ཀ་ལྟ་བུའི་དགེ་སློང་གང་ཡང་རུང་བ་དགེ་སློང་མའི་དོན་མཐུན་བུད་མེད་དམ་གཞོན་ནུ་མ་འཁྲིག་པ་སྟེན་ནུས་པ་དང་ལྷན་ཅིག་དགེ་སློང་གཅིག་པུ་བུད་མེད་གཅིག་དང་སྐྱེས་པ་སོགས་མེད་པའི་དབེན་པ་སྐྱབས་ལྔ་པོ་གང་རུང་ཡོད་པ་ན་སྟན་གཅིག་ལ་འདུག་ན་ལྟུང་བྱེད་དོ། །དགུ་པ་ནི། གང་བྱས་པས་འགྲེང་བའི་ལྟུང་བྱེད་དུ་འགྱུར་ཞེ་ན། ཡང་འཆར་ཀ་ལྟ་བུའི་དགེ་སློང་གང་ཡང་རུང་བ་ཆོས་འདི་པའི་དགེ་སློང་མ་དང་ཞེས་སོགས་ཤེས་པར་བྱའོ། །བཅུ་པ་ནི། གང་བྱས་པས་དགེ་སློང་མས་སྦྱོར་དུ་བཅུག་པ་ཟ་བའི་ལྟུང་བྱེད་དུ་འགྱུར་ཞེ་ན། ཡང་དྲུག་སྡེ་ལྟ་བུའི་དགེ་སློང་གང་ཤེས་བཞིན་དུ་ཚུལ་ཁྲིམས་དང་ཐོས་པའི་ཡོན་ཏན་གྱིས་དགེ་སློང་མས་སྦྱོར་དུ་བཅུག་པའི་
ཟས་བཅའ་བ་འཆའ་འམ་བཟའ་བ་ཟ་ན་སྔར་ཁྱིམ་དུ་བོས་པ་མ་གཏོགས་ཏེ་ལྟུང་བྱེད་དོ། །བཅུ་ཚན་བཞི་པ་ལ་ནི། སྡོམ་གྱིས་མདོར་བསྟན་པ་དང་། སོ་སོའི་མཚན་ཉིད་བཤད་པའོ། །དང་པོ་ནི། ལྟུང་བྱེད་བཅུ་ཚན་བཞི་པ་སྡོམ་དུ་བསྡུས་པ་ཆོས་ཅན། བཅུ་ཡོད་དེ། ཡང་ཡང་ཟ་བ། འདུག་གནས་གཅིག་ཏུ་ཟ་བ། ཕྱེ་ལྷུང་བཟེད་དོ་གསུམ་ཙམ་ལས་ལྷག་པ་ལེན་པ་དང་། བཅའ་བ་སྟན་གཅིག་པ་དང་། སྤངས་པ་སྟོབ་པ་དང་། འདུས་ཤིང་ཟ་བ་དང་། དུས་མ་ཡིན་པར་ཟ་བ་དང་། སོག་འཇོག་བྱས་པ་ཟ་བ་དང་། ཁ་ནས་མིད་པ་བྱིན་ལེན་མ་བྱས་པར་ཟ་བ་དང་། ཟས་བསོད་པ་བླངས་ནས་ཟ་བའི་ལྟུང་བྱེད་རྣམས་སུ་ཡོད་པའི་ཕྱིར། གཉིས་པ་ལ་བཅུ་ལས། དང་པོ་ནི། གང་བྱས་པས་ཡང་ཡང་ཟ་བའི་ལྟུང་བྱེད་དུ་འགྱུར་ཞེ་ན། བཟའ་བ་ལྔ་པོ་ཡང་ཡང་ཟ་ན་གནང་བའི་དུས་མ་གཏོགས་ཏེ་ལྟུང་བྱེད་དོ། །འོ་ན་གནང་བའི་དུས་གང་ཞེ་ན། བསླབ་པའི་གཞི་དེ་ལ་གནང་བའི་དུས་ནི་འདི་ཡིན་ཏེ། ཟས་གཅིག་གིས་འཚོ་བར་མི་ནུས་པའི་ན་བ་དུས་སོ་མཆོད་རྟེན་ནམ་དགེ་འདུན་གྱི་ཆེད་དུ་ཕྱག་དར་རེ་ལྡེ་ཙམ་མམ་དཀྱིལ་འཁོར་བ་མལ་ཙམ་བྱས་པའི་ལས་དུས་སོ། །དཔག་ཚད་ཕྱེད་དུ་ཕྱིན་པའི་ལམ་དུས་སོ། །དགེ་སྦྱོང་གི་གོས་སྦྱིན་པའི་ཚེ་དུས་ཏེ་བསླབ་པའི་གཞི་དེ་ལ་དེ་ནི་གནང་བའི་དུས་ཡིན་ནོ། །གཉིས་པ་ནི། གང་བྱས་པས་འདུག་གནས་གཅིག་ཏུ་ཟ་བའི་ལྟུང་བྱེད་དུ་འགྱུར་ཞེ་ན། ཕྱི་རོལ་པའི་འདུག་གནས་གཅིག་ཏུ་ཞག་ལོན་པའི་ཆོས་འདི་པའི་དགེ་སློང་ན་བ་ལ་ལྟུང་བ་མེད་པས་མིན་པས་བསོད་སྙོམས་གཅིག་བཟའ་བར་བྱའོ། །དེ་ལས་ལྷག་པར་ཟ་ན་ལྟུང་བྱེད་དོ། །གསུམ་པ་ནི། གང་བྱས་པས་ལྟུང་བཟེད་དོ་གསུམ་ཙམ་ལས་ལྷག་པར་ལེན་པའི་ལྟུང་བར་འགྱུར་ཞེ་ན། དྲུག་སྡེ་ལྟ་
བུའི་དགེ་སློང་རབ་ཏུ་མང་པོ་དག་བྲམ་ཟེ་དང་ཁྱིམ་བདག་གི་ཁྱིམ་རྣམས་སུ་དོང་བ་ལས། གལ་ཏེ་དགེ་སློང་དེ་དག་ལ་བྲམ་ཟེ་དང་། ཁྱིམ་བདག་དཀོན་མཆོག་གསུམ་ལ་དད་པ་ཅན་དག་གིས་ཕྱེ་དང་ཁུར་བ་དུས་ཀྱིས་ཡང་ཡང་སྟོབ་པར་གྱུར་ལ་འདོད་པ་སྟེ་དོན་དུ་གཉེར་ན་དགེ་སློང་དེ་དག་གིས་ལྷུང་བཟེད་འབྲིང་ཚད་གང་བ་གཉིས་སམ་གསུམ་བླང་བར་བྱའོ། །དེ་ལས་ལྷག་པར་ལེན་ན་ལྟུང་བྱེད་དོ། །ལྷུང་བཟེད་གང་བ་གཉིས་སམ་གསུམ་བླངས་ནས་རང་ཟ་བ་ལས་ལྷག་པ་ཕྱི་རོལ་ཀུན་དགའ་ར་བར་སོང་ལ་ཆོས་འདི་པའི་དགེ་སློང་འཁོད་པ་རྣམས་ལ་ཡང་བགོ་བཤའ་བྱ། བདག་ཅག་ཀྱང་བཟའ་བར་བྱ་སྟེ། སྐབས་དེ་ལ་དེ་ནི་ཆོ་ག་སྟེ་ཐབས་ཡིན་ནོ། །བཞི་པ་ནི། གང་བྱས་པས་སྟན་གཅིག་པའི་ལྟུང་བྱེད་དུ་འགྱུར་ཞེ་ན། ཡང་དྲུག་སྡེ་ལྟ་བུའི་དགེ་སློང་གང་ཟས་ཟོས་ཟིན་ཅིང་སྤངས་པ་ལས་ལྷག་པར་བྱས་ནས་བོར་བའི་དོན་གྱིས་ན་ལྷག་པོར་མ་བྱས་པར་བཅའ་བ་འཆའ་འམ་བཟའ་བ་ལྔ་ཟ་ན་ལྟུང་བྱེད་དོ། །ལྔ་པ་ནི། གང་བྱས་པས་སྤངས་པ་སྟོབ་པའི་ལྟུང་བྱེད་དུ་འགྱུར་ཞེ་ན། ཡང་ཆོས་འདི་པའི་དགེ་སློང་གང་ཤེས་བཞིན་དུ་དགེ་སློང་ཟས་ཟོས་ཟིན་ཅིང་ཟས་སྤངས་པ་ལ་ཀླན་ཀའི་སྐབས་ཚོལ་ཞིང་ཅི་ནས་ཀྱང་དགེ་སློང་འདི་ལ་ལྟུང་བའི་ཉེས་པ་འབྱུང་བར་བྱའོ་སྙམ་པ་དེ་ཉིད་རྐྱེན་དུ་བྱས་ནས་ཚེ་དང་ལྡན་པ་བཅའ་བ་འདི་འཚེད་ཅིག །བཟའ་བ་དང་འདི་ཟོ་ཞིག་ལྷག་པོར་མ་བྱས་པའི་བཅའ་བ་དང་བཟའ་བ་དུས་ཀྱིས་ཡང་ཡང་སྟོབ་ན་ལྟུང་བྱེད་དོ། །དྲུག་པ་ནི། གང་བྱས་པས་འདུས་ཤིང་ཟ་བའི་ལྟུང་བྱེད་དུ་འགྱུར་ཞེ་ན། དགེ་འདུན་དང་མི་མཐུན་པར་འདུས་ཤིང་ཟ་ན་གནང་བའི་དུས་མ་གཏོགས་ཏེ་ལྟུང་བྱེད་དོ། །འོ་ན་གནང་བའི་དུས་གང་ཞེ་ན། བསླབ་པའི་གཞི་དེ་ལ་གནང་བའི་དུས་ནི་འདི་ཡིན་ཏེ། ན་བ་དུས་སོ། །ལས་དུས་
སོ། །གྲུར་ཞུགས་པ་དུས་དང་། འདུས་པ་ཆེན་པོའི་ཚེ་དུས་དང་། ཕྱི་རོལ་པའི་གསོ་སྦྱོང་གི་ཟས་དུས་ཏེ། བསླབ་པའི་གཞི་དེ་ལ་དེ་ནི་གནང་བའི་དུས་ཡིན་ནོ། །བདུན་པ་ནི། གང་བྱས་པས་དུས་མ་ཡིན་པར་ཟ་བའི་ལྟུང་བྱེད་དུ་འགྱུར་ཞེ་ན། ཡང་བཅུ་བདུན་སྡེ་ལྟ་བུའི་དགེ་སློང་གང་དུས་མ་ཡིན་པར་བཅའ་བ་ལྔ་འཆའ་འམ་བཟའ་བ་ལྔ་ཟ་ན་ལྟུང་བྱེད་དོ། །འོ་ན་དུས་དང་དུས་མ་ཡིན་པ་དེ་གང་ཞེ་ན། རང་གང་ན་གནས་པའི་གླིང་དེའི་སྐྱ་རེངས་དང་པོ་ཤར་ནས་ཕྱེད་མ་ཡོལ་བའི་བར་ནི་དུས་ཡིན་ལ། ཕྱེད་ཡོལ་ནས་སྐྱ་རེངས་དང་པོ་མ་ཤར་བའི་བར་ནི་དུས་མ་ཡིན་ནོ། །བརྒྱད་པ་ནི། གང་བྱས་པས་སོག་འཇོག་བྱས་པ་ཟ་བའི་སྤང་བར་འགྱུར་ཞེ་ན། ཡང་ཆོས་འདི་པའི་དགེ་སློང་གང་ཡང་རུང་བ་བཅའ་བ་ལྔ་དང་བཟའ་བ་ལྔ་སོག་འཇོག་བྱས་པ་འཆའ་འམ་ཟ་ན་མགུལ་དུ་མིད་པ་ན་ལྟུང་བྱེད་དོ། །དེ་ཡང་སོག་འཇོག་ནི་གཉིས་ཏེ། སྔ་དྲོ་བྱིན་ལེན་བྱས་པ་ཕྱི་དྲོའི་བར་དུ་སོག་འཇོག་བྱས་པ་དང་། ཕྱི་དྲོ་བྱིན་ལེན་བྱས་པ་ཐུན་ཚོད་ཡོལ་གྱི་བར་དུ་གསོག་འཇོག་བྱས་པའོ། །དགུ་པ་ནི། གང་བྱས་པས་བྱིན་ལེན་མ་བྱས་པ་ཟ་བའི་ལྟུང་བྱེད་དུ་འགྱུར་ཞེ་ན། ཡང་ཆོས་འདི་པའི་དགེ་སློང་གང་ཡང་རུང་བ་སྐྱེས་པ་དང་བུད་མེད་དང་མ་ནིང་གིས་མ་བྱིན་པར་ཁ་ནས་མིད་པ་བྱིན་ལེན་མ་བྱས་པའི་ཟས་ཟ་ན་མགུལ་དུ་མིད་པའི་ཚེ་ན་ལྟུང་བྱེད་དོ། །ཐམས་ཅད་དུ་འགྱུར་རམ་ཞེ་ན། ཆུ་དང་སོ་ཤིང་མ་གཏོགས་སོ། །དེ་ཡང་བྱིན་ལེན་ནི་ལྔ་སྟེ། ལུས་ཀྱིས་ལུས་ལ་བྱིན་པ་དང་། ལུས་ཀྱིས་ལུས་དང་འབྲེལ་བ་ལ་བྱིན་པ་དང་། ལུས་དང་འབྲེལ་བས་ལུས་དང་འབྲེལ་བ་ལ་བྱིན་པ་དང་། ལུས་དང་འབྲེལ་བས་ལུས་སུ་བྱིན་པ་དང་། དཀྱིལ་འཁོར་གྱི་སྟེང་དུ་བཞག་པའོ། །བཅུ་པ་ནི། གང་བྱས་པས་ཟས་བསོད་པ་སློང་བའི་ལྟུང་བྱེད་
དུ་འགྱུར་ཞེ་ན། བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་ཀྱིས་ཆོས་འདི་པའི་དགེ་སློང་རྣམས་ཀྱི་ཟས་བསོད་པ་གང་དག་གསུངས་པ་འདི་ལྟ་སྟེ། འོ་མ་དང་ཞོ་དང་མར་དང་ཉ་ཤ་དང་ཤ་བསྐམས་དག་སྟེ། དྲུག་སྡེ་ལྟ་བུའི་དགེ་སློང་གང་ཡང་རུང་བ་དེ་ཡང་ནད་པ་ལ་ལྟུང་བ་མེད་པས་མི་ན་བར་བདག་ཉིད་ཀྱིས་ཕྱིར་འོ་མ་ལ་སོགས་པའི་ཟས་བསོད་པ་དེ་ལྟ་བུ་དག་བྲམ་ཟེ་དང་ཁྱིམ་བདག་གཞན་གྱི་ཁྱིམ་དག་ནས་བསླངས་ཏེ་འཆའ་འམ་ཟ་ན་མིད་པའི་ཚེ་ལྟུང་བྱེད་དོ། །བཅུ་ཚན་ལྔ་པ་ལ། སྡོམ་གྱི་སྒོ་ནས་མདོར་བསྟན་པ། སོ་སོའི་མཚན་ཉིད་རྒྱས་པར་བཤད་པའོ། །དང་པོ་ནི། ལྟུང་བྱེད་བཅུ་ཚན་ལྔ་པ་སྡོམ་དུ་བསྡུས་པ་ཆོས་ཅན། བཅུ་ཡོད་དེ། སྲོག་ཆགས་དང་བཅས་པའི་ཆུ་ལ་སྤྱོད་པ་དང་། ཉལ་པོ་བྱེད་པར་གཤོམ་པའི་ཁྱིམ་དུ་སྟན་ལ་འདུག་པ་དང་། དེར་འགྲེང་བ་དང་། གཅེར་བུ་མོ་ལ་ཟས་སྦྱིན་པ་དང་། དམག་ལ་ལྟ་བ་དང་། ཞག་གཉིས་ལས་ལྷག་པར་དམག་ནང་དུ་གནས་པ་དང་། གཡུལ་བཤམ་པ་དཀྲུག་ཏུ་འགྲོ་བ་དང་། རྡེག་པ་དང་། རྡེག་པར་གཟས་པ་དང་། གནས་ངན་ལེན་འཆབ་པའི་ལྟུང་བྱེད་རྣམས་སུ་ཡོད་པའི་ཕྱིར། གཉིས་པ་ལ་བཅུ་ལས། དང་པོ་ནི། གང་བྱས་པས་སྲོག་ཆགས་དང་བཅས་པའི་ཆུ་ལ་སྤྱོད་པའི་ལྟུང་བྱེད་དུ་འགྱུར་ཞེ་ན། ཡང་འདུན་པ་ལྟ་བུའི་དགེ་སློང་གང་ཡང་རུང་བ་སྲོག་ཆགས་དང་བཅས་པར་ཤེས་བཞིན་དུ་ཐ་མལ་པའི་མིག་ཤེས་ལ་སྣང་བ་དང་། ཆུ་ཚགས་ཀྱིས་ཟིན་པའི་སྲོག་ཆགས་དང་བཅས་པའི་ཆུ་ལ་ནང་དུ་སྤྱོད་པ་འཐུང་བ་ལ་སོགས་པ་དང་། ཕྱི་རོལ་ཏུ་སྤྱོད་པ་ལྷུང་བཟེད་དང་ཆོས་གོས་འཁྲུ་བ་ལ་སོགས་པའི་སྒོ་ནས་སྤྱོད་ན་སྲོག་ཆགས་ཤི་བའི་ཚེ་ན་ལྟུང་བྱེད་དོ། །གཉིས་པ་ནི། གང་བྱས་པས་ཉལ་པོ་བྱེད་པའི་ཁྱིམ་དུ་འདུག་པའི་ལྟུང་བྱེད་དུ་འགྱུར་ཞེ་ན། ཡང་འཆར་ཀ་ལྟ་བུའི་དགེ་
སློང་གང་ཡང་རུང་བ་ཉལ་པོ་བྱེད་པར་ཤེས་བཞིན་དུ་བུད་མེད་སྐྱེས་པའི་ཉལ་པོ་བྱ་བ་དང་། སྐྱེས་པ་བུད་མེད་ཀྱི་ཉལ་པོ་བྱེད་པ་ཡིན་པས། ཉལ་པོ་བྱེད་པར་གཤོམ་པའི་བྲམ་ཟེ་དང་ཁྱིམ་བདག་གི་ཁྱིམ་དུ་ཕྱིས་གནོན་བྱས་པ་སྟེ་སྟན་ལ་འདུག་ན་ལྟུང་བྱེད་དོ། །གསུམ་པ་ནི། གང་བྱས་པས་ཉལ་པོ་བྱེད་པའི་ཁྱིམ་དུ་འགྲེང་བའི་ལྟུང་བྱེད་དུ་འགྱུར་ཞེ་ན། ཡང་འཆར་ཀ་ལྟ་བུའི་དགེ་སློང་གང་ཡང་རུང་བ་ཤེས་བཞིན་དུ་ཉལ་པོ་བྱེད་པར་གཤོམ་པའི་ཁྱིམ་དུ་སྐྱེས་པ་ལ་སོགས་པའི་དབེན་པ་རྩིག་པ་ལ་སོགས་པའི་སྐྱབས་ལྔ་པོ་གང་རུང་ཡོད་པར་འདོམ་གང་ཚུན་ལ་འགྲེང་ན་ཉལ་པ་བྱེད་པར་གཤོམ་པ་གཉིས་ཀྱིས་ཚོར་ན་ལྟུང་བྱེད་དོ། །བཞི་པ་ནི། གང་བྱས་པས་གཅེར་བུ་མོ་ལ་ཟས་སྦྱིན་པའི་ལྟུང་བྱེད་དུ་འགྱུར་ཞེ་ན། ཡང་ཆོས་འདི་པའི་དགེ་སློང་གང་ཡང་རུང་བ་གཅེར་བུའམ་གཅེར་བུ་མ་ཀུན་ཏུ་རྒྱུ་བའམ། ཀུན་ཏུ་རྒྱུ་མོ་ལ་རང་གི་ལག་ནས་བཅའ་བ་ལྔའམ། བཟའ་བ་ལྔ་གང་རུང་བྱིན་ན་ལྟུང་བྱེད་དོ། །ཐམས་ཅད་དུ་ཡིན་ནམ་ཞེ་ན། ཉེ་དུ་དང་རབ་ཏུ་བྱུང་བ་ལ་ལྟོས་པ་དང་། ན་བ་དང་། སྡིག་པ་ཅན་གྱི་ལྟ་བ་དང་བྲལ་བའི་དོན་དུ་སྦྱིན་པ་མ་གཏོགས་སོ། །ལྔ་པ་ནི། གང་བྱས་པས་དམག་ལ་ལྟ་བའི་ལྟུང་བྱེད་དུ་འགྱུར་ཞེ་ན། ཡང་དྲུག་སྡེའམ་དགེ་སློང་གཞན་གང་ཡང་རུང་བ་དམག་དཔུང་གི་ཚོགས་ཡན་ལག་གཅིག་པ་དང་། གཉིས་པ་དང་། གསུམ་པ་དང་། བཞི་པ་གཡུལ་འགྱེད་པར་ཆས་པ་ལྟད་མོ་ལྟར་འགྲོ་ན་ཉེ་འཁོར་ལས་འདས་པ་ན་ལྟུང་བྱེད་དོ། །ཐམས་ཅད་དུ་ངེས་སམ་ཞེ་ན། རྒྱལ་པོས་བཀུག་པ་ལ་སོགས་པའི་བར་ཆད་ཀྱི་དབང་ནི་མ་གཏོགས་སོ། །དྲུག་པ་ནི། གང་བྱས་པས་དམག་ནང་དུ་གནས་པའི་ལྟུང་བྱེད་དུ་འགྱུར་ཞེ་ན། ཡང་དྲུག་སྡེ་ལྟ་བུའི་དགེ་སློང་གང་དམག་དཔུང་ཚོགས་བཞི་
གཡུལ་འགྱེད་པར་ཆས་པ་ལ་རྒྱལ་པོས་བཀུག་པ་ལ་སོགས་པའི་དབང་གིས་ལྟ་བར་འགྲོ་བ་དེ་ལྟ་བུའི་རྐྱེན་ཞིག་བྱུང་ན། དགེ་སློང་དེས་དམག་དེའི་ནང་དུ་ཞག་གཉིས་ཚུན་ཆད་གནས་པར་བྱའོ། །དེ་ལས་ལྷག་པར་གནས་ན་ཞག་གསུམ་པའི་སྐྱ་རེངས་ཤར་བའི་ཚེ་ན་ལྟུང་བྱེད་དོ། །རྒྱལ་པོས་བཀུག་པ་ལ་སོགས་པ་མིན་ན་ཞག་དང་པོ་ལ་ཡང་ལྟུང་བར་འགྱུར་རོ། །བདུན་པ་ནི། གང་བྱས་པས་དཔུང་གི་ཡན་ལག་ཉམས་སུ་མྱོང་བའི་ལྟུང་བར་འགྱུར་ཞེ་ན། དྲུག་སྡེ་ལྟ་བུའི་དགེ་སློང་རྒྱལ་པོས་བཀུག་པ་ལ་སོགས་པའི་དབང་གིས་ཞག་གཉིས་དམག་དེའི་ནང་ན་གནས་པའི་ཚེ་ཡང་། གལ་ཏེ་གཡུལ་བཤམ་པ་དཀྲུག་ཏུ་འགྲོ་བའམ། རྒྱལ་མཚན་གྱི་མཆོག་གམ། དཔུང་གི་མཆོག་གམ། གཡུལ་བཤམ་པའི་དམག་ལ་ལྟ་བ་ཉམས་སུ་མྱོང་བར་བྱེད་ན་ལྟུང་བྱེད་དོ། །དེ་ཡང་རྒྱལ་མཚན་གྱི་མཆོག་ནི་བཞི་སྟེ། ཁྱུ་མཆོག་དང་། ཆུ་སྲིན་དང་། སེང་གེ་དང་། ཀླུའི་རྒྱལ་མཚན་ནོ། །དཔུང་གི་མཆོག་ཀྱང་བཞི་སྟེ། གླང་པོ་ཆེ་དང་། རྟ་དང་། ཤིང་རྟ་དང་། དཔུང་བུ་ཆུང་གི་ཚོགས་སོ། །གཡུལ་བཤམ་པ་ཡང་བཞི་སྟེ། འབྲུ་ཡི་ཁ་ལྟ་བུ་དང་། ཤིང་རྟའི་དབྱིབས་ལྟ་བུ་དང་། ཟླ་གམ་གྱི་རྣམ་པ་ལྟ་བུ་དང་། ནམ་མཁའ་ལྡིང་གི་འདབ་མ་ལྟ་བུའོ། །བརྒྱད་པ་ནི། གང་བྱས་པས་རྡེག་པའི་ལྟུང་བྱེད་དུ་འགྱུར་ཞེ་ན། ཡང་འཆར་ཀ་ལྟ་བུའི་དགེ་སློང་གང་ཁྲོས་འཁྲུགས་རྔམས་པར་གྱུར་ཏེ། ཡིད་མ་རངས་ནས་ཆོས་འདི་པའི་དགེ་སློང་ལ་རྡེག་པར་བྱེད་ན་ལུས་ལ་ཕོག་པའི་ཚེ་ན་རྡེག་དཔྱད་རེ་རེ་ལས་ལྟུང་བྱེད་རེ་རེའོ། །དགུ་པ་ནི། གང་བྱས་པས་རྡེག་པར་གཟས་པའི་ལྟུང་བྱེད་དུ་འགྱུར་ཞེ་ན། ཡང་འཆར་ཀ་ལྟ་བུའི་དགེ་སློང་གང་ཁྲོས་འཁྲུགས་རྔམས་པར་གྱུར་ཏེ་ཡིད་མ་རངས་ནས་ཆོས་འདི་པའི་དགེ་སློང་ལ་རྡེག་པར་གཟས་ན་ཐ་ན་ཐལ་མོས་ཀྱང་རུང་སྟེ་རྡེག་དཔྱད་རེ་རེ་ལ་ལྟུང་བྱེད་དོ། །བཅུ་པ་ནི།
གང་བྱས་པས་གནས་ངན་ལེན་འཆབ་པའི་ལྟུང་བྱེད་དུ་འགྱུར་ཞེ་ན། ཡང་ཉེར་དགའ་ལྟ་བུའི་དགེ་སློང་གང་དགེ་སློང་གཞན་གྱི་གནས་ངན་ལེན་གྱི་ལྟུང་བ་ཤེས་བཞིན་དུ་ཆོས་འདི་པའི་དགེ་སློང་གི་གནས་ངན་ལེན་གྱི་ལྟུང་བ་འཆབ་པ་སྟེ་འཁྱུད་ན་དགེ་འདུན་བདེ་བ་ལ་རེག་པར་མི་འགྱུར་བ་ལ་སོགས་པའི་དབང་ཉིད་མ་གཏོགས་པ་ལྟུང་བྱེད་དོ། །བཅུ་ཚན་དྲུག་པ་ལ། སྡོམ་གྱིས་མདོར་བསྟན་པ་དང་། སོ་སོའི་མཚན་ཉིད་རྒྱས་པར་བཤད་པའོ། །དང་པོ་ནི། ལྟུང་བྱེད་བཅུ་ཚན་དྲུག་པ་སྡོམ་དུ་བསྡུས་པ་ཆོས་ཅན། བཅུ་ཡོད་དེ། བདེ་བ་ཟན་གཅོད་པ་དང་། མེ་ལ་རེག་པ་དང་། འདུན་པ་ཕྱིར་བསྒྱུར་བ་དང་། བསྙེན་པར་མ་རྫོགས་པ་དང་ལྷན་ཅིག་ཉལ་བ་དང་། ཆོས་ལྟ་བའི་རྣམ་པ་མི་གཏོང་བ་དང་། སྨྲ་བ་སྤངས་པའི་རྗེས་སུ་ཕྱོགས་པ་དང་། དགེ་ཚུལ་བསྙིལ་བ་སྡུད་པ་དང་། ཁ་དོག་མ་བསྒྱུར་བའི་གོས་གྱོན་པ་དང་། རིན་པོ་ཆེ་ལ་རེག་པ་དང་། ཚ་བའི་དུས་ཏེ་ཁྲུས་ཀྱི་ལྟུང་བྱེད་རྣམས་སུ་ཡོད་པའི་ཕྱིར། གཉིས་པ་ལ་བཅུ་ལས། དང་པོ་ནི་གང་བྱས་པས་ཟན་གཅོད་པའི་ལྟུང་བྱེད་དུ་འགྱུར་ཞེ་ན། ཡང་ཉེར་དགའམ་དགེ་སློང་གཞན་གང་ཡང་རུང་བ་ཀླན་ཀ་ཚོལ་ཞིང་ཅི་ནས་ཆོས་ལྟར་དགེ་སློང་འདི་ལ་ཀླན་ཀ་བཙལ་བར་འགྱུར་རོ་སྙམ་པ་དེ་ཉིད་རྐྱེན་དུ་བྱས་ཏེ། ནད་ཀྱི་གཉེན་པོའི་ཕྱིར་མ་ཡིན་པར་ཆེད་དུ་བསམས་ནས་ཆོས་འདི་པའི་དགེ་སློང་ལ་འདི་སྐད་ཅེས། ཚེ་དང་ལྡན་པ་ཚུར་ཤོག་བྲམ་ཟེ་དང་ཁྱིམ་བདག་གི་ཁྱིམ་དག་ཏུ་འདོང་དང་དེར་ཁྱོད་ལ་བཅའ་བ་ལྔ་དང་བཟའ་བ་ལྔ་བསོད་པ་ཇི་ཙམ་འདོད་པ་སྦྱིན་དུ་གཞུག་གོ་ཞེས་སྨྲས་ཏེ། ཚིག་གིས་ཟན་གཅད་ནས་དེས་དེ་ལ་སྦྱིན་དུ་མ་བཅུག་པར་དེའི་འོག་ཏུ་འདི་སྐད་ཅེས་ཚེ་དང་ལྡན་པ་ཁོ་བོ་ཁྱོད་དང་ལྷན་ཅིག་སྨྲ་བའམ་འདུག་པར་བདེ་བ་མ་ཡིན་གྱིས། འདི་ལྟར་ཁོ་བོ་གཅིག་པུ་ཁོ་ན་
སྨྲ་བའམ་འདུག་ན་བདེ་ཡིས་ཁྱོད་སོང་ཞིག་ཅེས་ཟེར་ན་ལྟུང་བྱེད་དོ། །གཉིས་པ་ནི། གང་བྱས་པས་མེ་ལ་རེག་པའི་ལྟུང་བྱེད་དུ་འགྱུར་ཞེ་ན། ཡང་དྲུག་སྡེ་ལྟ་བུའི་དགེ་སློང་གང་ན་བ་ལ་ལྟུང་བ་མེད་པས་མི་ན་བར་བདག་ཉིད་ཀྱི་ཕྱིར་དུས་བྱིན་གྱིས་མ་བརླབས་པར་མེ་ལ་རང་གིས་རེག་གམ་གཞན་རེག་ཏུ་འཇུག་ན་ལྟུང་བྱེད་དོ། །གསུམ་པ་ནི། གང་བྱས་པས་འདུན་པ་ཕྱིར་བསྒྱུར་བའི་ལྟུང་བྱེད་དུ་འགྱུར་ཞེ་ན། ཡང་དགའ་བོ་ལྟ་བུའི་དགེ་སློང་གང་སངས་རྒྱས་ཀྱི་ཉན་ཐོས་བྱ་བ་ལས་ཆོས་དང་ལྡན་པ་ལས་ཆོས་འདི་པའི་དགེ་སློང་ལ་འདུན་པ་ཕུལ་བ་སྟེ་འདུན་པ་བྱིན་ནས། དེའི་འོག་ཏུ་དུས་གཞན་ཞིག་ན་ཁྲོས་འཁྲུགས་རྔམས་པར་གྱུར་ཏེ། ཡི་མ་རངས་ནས་སྔར་འདུན་པ་ཕུལ་བ་སྤོང་བའི་ཆོས་སུ་བྱེད་ཅིང་། ཚིག་འདི་སྐད་ཅེས་དགེ་སློང་འདུན་པ་ཕྱིར་བྱིན་ཅིག །ཁྱོད་ལ་འདུན་པ་མི་སྦྱིན་ནོ་ཞེས་ཟེར་ན་ལྟུང་བྱེད་དོ། །བཞི་པ་ནི། གང་བྱས་པས་བསྙེན་པར་མ་རྫོགས་པ་དང་ལྷན་ཅིག་ཉལ་བའི་ལྟུང་བྱེད་དུ་འགྱུར་ཞེ་ན། ཡང་། ཉེར་དགའ་ལྟ་བུའི་དགེ་སློང་གང་ཟག་བསྙེན་པར་མ་རྫོགས་པ་ཁྱིམ་པ་དང་དགེ་ཚུལ་ཕ་མ་ལ་སོགས་པ་དང་ལྷན་ཅིག་ནུབ་གཉིས་ལས་ལྷག་པར་གནས་བཞི་པོ་གང་ཡང་རུང་བ་གཅིག་ཏུ་ཉལ་ན་ནུབ་གསུམ་པའི་སྐྱ་རེངས་ཤར་བ་ན་ལྟུང་བྱེད་དོ། །དེ་ཡང་གནས་བཞི་ནི། ཐམས་ཅད་གསོགས་ཤིང་ཐམས་ཅད་བསྐོར་བ་དང་། ཐམས་ཅད་གཡོགས་ཤིང་ཕལ་ཆེར་བསྐོར་བ་དང་། ཕལ་ཆེར་གཡོགས་ཤིང་ཕལ་ཆེར་བསྐོར་བ་དང་། ཕལ་ཆེར་གཡོགས་ཤིང་ཐམས་ཅད་བསྐོར་བའོ། །ལྔ་པ་ནི། གང་བྱས་པས་ལྟ་བའི་རྣམ་པ་མི་གཏོང་བའི་ལྟུང་བྱེད་དུ་འགྱུར་ཞེ་ན། ཡང་འཆི་ལྟས་སམ་དགེ་སློང་གང་ཡང་རུང་བ་ཚིག་འདི་སྐད་ཅེས། ཇི་ལྟར་སངས་རྒྱས་བཅོམ་ལྡན་འདས་ཀྱིས་མཐོ་རིས་དང་། ཐར་པ་ལ་བར་དུ་གཅོད་པའི་
ཆོས་སུ་གསུངས་པ་ཕམ་པར་འགྱུར་བ་བཞི། ལྷག་མ་བཅུ་གསུམ། མ་ངེས་པ་གཉིས། སྤང་ལྟུང་སུམ་ཅུ། ལྟུང་བྱེད་དགུ་བཅུ། སོར་བཤགས་བཞི། བསླབ་པར་བྱ་བའི་ཆོས་མང་པོ། རྩོད་པ་ཞི་བར་བྱེད་པའི་ཆོས་བདུན་པོ་གང་དག་ཡིན་པ་དེ་དག་བསྟེན་པ་སྟེ་སྤྱད་ཀྱང་མཐོ་རིས་དང་ཐར་པ་ལ་བར་དུ་གཅོད་པར་མི་འགྱུར་ཏེ། དེ་ལྟར་བཅོམ་ལྡན་འདས་ཀྱིས་ཆོས་བསྟན་པ་བདག་གིས་ཤེས་སོ་ཞེས་ཟེར་ན། འཆི་ལྟས་ལྟ་བུའི་དགེ་སློང་དེ་ལ་ཆོས་འདི་པའི་དགེ་སློང་རྣམས་ཀྱིས་བཞམས་ཏེ་བསྒོ་བའི་ཚིག་འདི་སྐད་ཅེས། ཚེ་དང་ལྡན་པ་ཁྱོད། ཇི་ལྟར་བཅོམ་ལྡན་འདས་ཀྱིས་བར་དུ་གཅོད་པའི་ཆོས་སུ་གསུངས་པ་གང་དག་ཡིན་པ་དེ་དག་བསྟེན་ཀྱང་བར་དུ་གཅོད་པར་མི་འགྱུར་ཏེ། དེ་ལྟར་བཅོམ་ལྡན་འདས་ཀྱིས་ཆོས་བསྟན་པ་བདག་གིས་ཤེས་སོ་ཞེས་མ་ཟེར་ཞིག་བཅོམ་ལྡན་འདས་ལ་སྐུར་བ་མ་འདེབས་ཤིག །བཅོམ་ལྡན་འདས་ལ་སྐུར་བ་འདེབས་པར་མི་འགྱུར་རོ། །བཅོམ་ལྡན་འདས་ནི་དེ་སྐད་མི་གསུང་ངོ་། །ཚེ་དང་ལྡན་པ་བར་དུ་གཅོད་པའི་ཆོས་རྣམས་ནི་བར་དུ་གཅོད་པ་ཉིད་དོ་ཞེས། བཅོམ་ལྡན་འདས་ཀྱིས་རྣམ་གྲངས་དུ་མར་གསུངས་ཏེ། དེ་དག་བསྟེན་ན་བར་དུ་གཅོད་པར་འགྱུར་གྱིས་ཚེ་དང་ལྡན་པ་ཁྱོད་སྡིག་པ་ཅན་གྱི་ལྟ་བའི་རྣམ་པ་འདི་ལྟ་བུ་ཐོང་ཞིག་ཅེས་ཚིག་འཇམ་པོས་བསྒོ་བར་བྱའོ། །འཆི་ལྟས་ལྟ་བུའི་དགེ་སློང་དེ་ལ་ཆོས་འདི་པའི་དགེ་སློང་རྣམས་ཀྱིས་དེ་སྐད་བཞམས་ཏེ་བསྒོ་བ་ན་གལ་ཏེ་ལྟ་བའི་རྣམ་གཞི་དེ་གཏོང་བར་བྱ་བའི་ཕྱིར། གསོལ་བ་དང་བཞིའི་ལས་ཀྱིས་ལན་གཉིས་ལན་གསུམ་དུ་ཡང་དག་པར་བསྒོ། ཡང་དག་པར་བསྟན་པ་ན་བཞི་དེ་གཏོང་ན་ལེགས་ཏེ། དངོས་གཞིའི་ལྟུང་བ་མ་བྱུང་བའི་ཕྱིར། རྗོད་པ་
གསུམ་པའི་མཐའ་ལ་མི་གཏོང་ན་ལྟུང་བྱེད་དོ། །དྲུག་པ་ནི། གང་བྱས་པས་སྤངས་པའི་རྗེས་སུ་ཕྱོགས་པའི་ལྟུང་བར་འགྱུར་ཞེ་ན། ཡང་ཉེར་དགའ་ལྟ་བུའི་དགེ་སློང་གང་ཡང་རུང་བ་ཤེས་བཞིན་དུ་བཅོམ་ལྡན་འདས་ཀྱིས་བར་དུ་གཅོད་པའི་ཆོས་སུ་གསུངས་པ་དེ་དག་བསྟན་ཀྱང་བར་དུ་གཅོད་པའི་ཆོས་སུ་མི་འགྱུར་བར་བདག་གིས་ཤེས་སོ་ཞེས་དེ་སྐད་ཟེར་བའི་གང་ཟག་དགེ་སློང་འཆི་ལྟས་ལྟ་བུ་ཆོས་བཞིན་དུ་མ་བྱས་པ་སྡིག་པ་ཅན་གྱི་ལྟ་བའི་རྣམ་པ་དེ་མ་སྤངས་པ་དང་། གཏམ་འདྲེ་བ་ལུང་འབོགས་པ་དང་། ཕེབས་པར་སྨྲ་བ་དམིགས་ཀྱིས་འདྲི་བ་དང་། ཀུན་ཏུ་གནས་པ་གནས་སྦྱིན་པར་བྱེད་པ་དང་། ཀུན་ཏུ་སྤྱོད་པ་དེའི་ལོངས་སྤྱོད་ལ་ལོངས་སྤྱོད་པར་བྱེད་ཅིང་། དེ་དང་ལྷན་ཅིག་གནས་བཞི་པོ་གང་རུང་གཅིག་ཏུ་ཉལ་ན་ནད་དང་ལྟ་བ་དང་དབྲལ་བའི་ཆེད་མ་གཏོགས་པ་མཚན་མཐར་ལྟུང་བྱེད་དོ། །བདུན་པ་ནི། གང་བྱས་པས་བསྙིལ་བ་སྡུད་པའི་ལྟུང་བྱེད་དུ་འགྱུར་ཞེ་ན། ཚེར་མ་དང་ཆེན་པོ་ལྟ་བུའི་དགེ་ཚུལ་ཞིག་ཀྱང་འདི་སྐད་ཅེས། ཇི་ལྟར་བཅོམ་ལྡན་འདས་ཀྱིས་འདོད་པའི་ཡོན་ཏན་ལྔ་པོ་དག་སྤྱོད་པ་ནི་དགེ་ཚུལ་ལ་བར་དུ་གཅོད་པ་ཞེས་གང་གསུངས་པ་དེ་དག་བསྟེན་ཀྱང་དགེ་སྦྱོང་གི་ཚུལ་ལ་བར་དུ་གཅོད་པར་མི་འགྱུར་ཏེ། དེ་ལྟར་བཅོམ་ལྡན་འདས་ཀྱིས་ཆོས་བསྟན་པ་ཀུན་བདག་གིས་ཤེས་སོ་ཞེས་ཟེར་ན། ཚེར་མ་དང་ཆེན་པོ་ལྟ་བུའི་དགེ་ཚུལ་དེ་ལ་ཆོས་འདི་པའི་དགེ་སློང་རྣམས་ཀྱིས་བཞམས་ཏེ་བསྒོ་བའི་ཚིག་འདི་སྐད་ཅེས། དགེ་ཚུལ་ཁྱོད་ཇི་ལྟར་བཅོམ་ལྡན་འདས་ཀྱིས་འདོད་པ་དག་ནི་བར་དུ་གཅོད་པའོ་ཞེས་གསུངས་པ་གང་ཡིན་པ་དེ་དག་བསྟེན་ཀྱང་བར་དུ་གཅོད་པར་མི་འགྱུར་ཏེ། དེ་ལྟར་བཅོམ་ལྡན་འདས་ཀྱིས་ཆོས་བསྟན་པ་བདག་གིས་ཤེས་སོ་ཞེས་དེ་སྐད་མ་ཟེར་ཞིག་བཅོམ་ལྡན་འདས་ལ། སྐུར་བ་མ་འདེབས་ཤིག །
བཅོམ་ལྡན་འདས་ལ་སྐུར་བ་མ་འདེབས་ཤིག །བཅོམ་ལྡན་འདས་ལ་སྐུར་བ་བཏབ་པས་ལེགས་པར་མི་འགྱུར་རོ། །བཅོམ་ལྡན་འདས་ནི་དེ་སྐད་མི་གསུང་ངོ་། །ཚེ་དང་ལྡན་པ་དགེ་ཚུལ་འདོད་པ་བར་དུ་གཅོད་པའི་ཆོས་རྣམས་ནི་བར་དུ་གཅོད་པ་ཉིད་དོ་ཞེས། བཅོམ་ལྡན་འདས་ཀྱིས་རྣམ་གྲངས་དུ་མར་གསུངས་ཏེ། དེ་དག་བསྟན་ན་བར་དུ་གཅོད་པར་འགྱུར་གྱིས། དགེ་ཚུལ་དང་ཁྱོད་སྡིག་པ་ཅན་གྱི་ལྟ་བའི་རྣམ་པ་འདི་ཐོང་ཞིག་ཅེས་བཞམས་ཏེ་བསྒོ་བར་བྱའོ། །ཚེར་མ་དང་ཆེན་པོ་ལྟ་བུའི་དགེ་ཚུལ་དེ་ལ་ཆོས་འདི་པའི་དགེ་སློང་རྣམས་ཀྱིས་དེ་སྐད་བསྒོ་བ་ན། གལ་ཏེ་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་གཞི་དེ་གཏོང་བར་བྱ་བའི་ཕྱིར། གསོལ་བ་དང་བཞིའི་ལས་ཀྱིས་ལན་གཉིས་ལན་གསུམ་དུ་ཡང་དག་པར་བསྒོ་བར་བྱ། ཡང་དག་པར་བསྟན་པར་བྱའོ། །ལན་གཉིས་ལན་གསུམ་དུ་ཡང་དག་པར་བསྒོ། ཡང་དག་པར་བསྟན་པ་ན། གཞི་དེ་གཏོང་བ་དེ་ལྟ་ན་ལེགས། གལ་ཏེ་མི་གཏོང་ན། ཚེར་མ་དང་ཆེན་པོ་ལྟ་བུའི་དགེ་ཚུལ་དེ་ལ་ཆོས་འདི་པའི་དགེ་སློང་རྣམས་ཀྱིས་དེང་ཕྱིན་ཆད་དགེ་ཚུལ་ཁྱོད། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་ལ་སྟོན་པའོ་ཞེས་མ་ཟེར་ཞིག །ཚངས་པ་མཚུངས་པར་སྤྱོད་པ་མཁས་པ་བླ་མའི་གནས་ལྟ་བུ་གང་ཡང་རུང་བའི་ཕྱི་བཞིན་དུ་ཡང་མ་འགྲོ་ཞིག །དགེ་སློང་རྣམས་དང་དགེ་ཚུལ་ལྷན་ཅིག་ནུབ་གཉིས་ཚུན་ཆད་གནས་གཅིག་ཏུ་ཉལ་དུ་དབང་བ་གང་ཡིན་པ་དེ་ཡང་དེང་ཕྱིན་ཆད་ཁྱོད་ལ་མེད་དེ། མི་གཏི་མུག་ཅན་ཁྱོད་བསྙིལ་གྱིས་གཞན་དུ་སོང་ཞིག་ཅེས་བསྒོ་བར་བྱའོ། །ཡང་ཉེར་དགའ་ལྟ་བུའི་དགེ་སློང་གང་དགེ་ཚུལ་བསྙིལ་བར་ཤེས་བཞིན་དུ་དེ་ལྟར་བསྙིལ་བའི་དགེ་ཚུལ་ཉེ་བར་འཇོག་པ་གནས་སྦྱིན་པར་བྱེད་དམ། ཉེ་བར་སྟོན་པ་ལུང་
འབོགས་པ་སོགས་བྱེད་དམ། དེ་དང་ལྷན་ཅིག་གནས་བཞི་པོ་གང་རུང་གཅིག་ཏུ་ཉལ་ན་ལྟུང་བྱེད་དོ། །བརྒྱད་པ་ནི། གང་བྱས་པས་ཁ་མ་བསྒྱུར་བའི་གོས་གྱོན་པའི་ལྟུང་བྱེད་དུ་འགྱུར་ཞེ་ན། དྲུག་སྡེ་ལྟ་བུའི་དགེ་སློང་གིས་བལ་གྱིས་གོས་ལ་སོགས་པའི་གོས་བདུན་པོ་གང་ཡང་རུང་བ་གསར་པ་ཞིག་རྙེད་ན་ཁ་བསྒྱུར་བ་གསུམ་པོ་སྔོན་པོ་རམས་ལྟ་བུའམ། དམར་པོ་བཙག་ལྟ་བུའམ། ངུར་སྨྲིག་ཤིང་ཤུན་ལས་གང་ཡང་རུང་བས་ཁ་བསྒྱུར་བར་བྱའོ། །གལ་ཏེ་དྲུག་སྡེ་ལྟ་བུའི་དགེ་སློང་གིས་བལ་ལ་སོགས་པའི་གོས་གསར་པ་ཁ་བསྒྱུར་བ་གསུམ་པོ། སྔོན་པོ་རམས་ལྟ་བུའམ། དམར་པོ་བཙག་ལྟ་བུའམ། ངུར་སྨྲིག་ཤིང་ཤུན་ལས་གང་ཡང་རུང་བས་ཁ་མ་བསྒྱུར་བར་སྤྱོད་ན་ལྟུང་བྱེད་དོ། །དགུ་པ་ནི། གང་བྱས་པས་ལོངས་པའི་གཞིར་གཏོགས་པའི་སྤང་བར་འགྱུར་ཞེ་ན། ཡང་དྲུག་སྡེ་ལྟ་བུའི་དགེ་སློང་གང་ནོར་བུ་དང་མུ་ཏིག་ལ་སོགས་པའི་རིན་པོ་ཆེའམ། གཡུལ་ངོར་སྤྱད་པའི་མཚོན་ཆའམ། རོལ་མོར་སྤྱད་པའི་ཡོ་བྱད་རིན་པོ་ཆེར་སྨོས་པ་རང་གི་ལག་གིས་ལེན་ཏམ། གཞན་ལེན་དུ་འཇུག་ན་ཀུན་དགའ་ར་བར་གཏོགས་པ་ཀུན་དགའ་ར་བའི་ནང་ན་འདུག་པ་མ་ཏོགས་ཏེ་ལྟུང་བྱེད་དོ། །དྲུག་སྡེ་ལྟ་བུའི་དགེ་སློང་གིས་ཀུན་དགའ་ར་བར་གཏོགས་པ་ཕྱི་རོལ་ན་འདུག་པའམ། གནས་ཁང་དུ་གཏོགས་པ་ནང་ན་ནོར་བུ་ལ་སོགས་པའི་རིན་པོ་ཆེའམ། གཡུལ་ངོར་སྤྱད་པའི་མཚོན་ཆ་ལ་སོགས་པའི་རིན་པོ་ཆེར་སྨོས་པ་འདུག་པ་ལ་འདི་བདག་པོ་སུའི་ཡིན་པ་དེ་ལེན་པར་འགྱུར་གྲང་སྙམ་པ་དེ་ལྟ་བུའི་སེམས་ཀྱིས་བླང་བར་བྱ་སྟེ། བསླབ་པའི་གཞི་བཅས་པ་དེ་ལ་དེ་ནི་ཆོ་ག་སྟེ་ཐབས་ཡིན་ནོ། །བཅུ་པ་ནི། གང་བྱས་པས་ཁྲུས་བྱེད་པའི་ལྟུང་བྱེད་དུ་འགྱུར་
ཞེ་ན། སངས་རྒྱས་བཅོམ་ལྡན་འདས་ཀྱིས་ཟླ་བ་ཕྱེད་ཕྱེད་ཅིང་ཁྲུས་བྱ་བར་གསུངས་པ་དེ་ལས་འདུམས་པར་ཁྲུས་བྱེད་ན་གནང་བའི་དུས་མ་གཏོགས་ཏེ་ལྟུང་བྱེད་དོ། །འོ་ན་གནང་བའི་དུས་གང་ཞེ་ན། བསླབ་པའི་གཞི་དེ་ལ་གནང་བའི་དུས་ནི་འདི་ཡིན་ཏེ། སོ་ག་རྣམས་ཀྱི་ཟླ་བ་ལྷག་མ་ཕྱེད་དང་གཉིས་པོ་དབྱར་ཟླ་ར་བའི་ཚེས་གཅིག་ནས་དབྱར་ཟླ་འབྲིང་པོའི་ཉའི་བར་དང་། དབྱར་རྣམས་ཀྱི་དང་པོ་དབྱར་ཟླ་འབྲིང་པོའི་ཚེས་བཅུ་དྲུག་ནས། དབྱར་ཟླ་ཐ་ཆུང་གི་ཉའི་བར་དང་། ཟླ་བ་ཕྱེད་དང་གསུམ་པ་འདི་དག་ནི་ཚ་བའི་དུས་སོ། །ལྷག་མ་ནི། ན་བ་དུས་སོ། །ལུས་དུས་སོ། །ལམ་དུས་སོ། །རླུང་གིས་ཆོས་ཀྱི་སྒྲ་བསྐུལ་བའི་རླུང་དུས་སོ། །ལུས་ལ་ཆར་གྱི་ཐིགས་པ་གཉིས་ཡན་ཆད་ཕོག་པའི་ཆར་དུས་སོ། །ལུས་ལ་ཆར་གྱི་ཐིགས་པ་གཉིས་ཡན་ཆད་ཕོག་པའི་ཆར་དུས་སོ། །རྫི་ཆར་དུས་ཏེ་བསླབ་པའི་གཞི་དེ་ལ་དེ་ནི་གནང་བའི་དུས་ཡིན་ནོ། །བཅུ་ཚན་བདུན་པ་ལ། སྡོམ་གྱིས་མདོར་བསྟན། སོ་སོའི་མཚན་ཉིད་གཉིས་ལས། དང་པོ་ནི། ལྟུང་བྱེད་བཅུ་ཚན་བདུན་པ་སྡོམ་དུ་བསྡུས་པ་ཆོས་ཅན། བཅུ་ཡོད་དེ། དུད་འགྲོ་གསོད་པ་དང་། འགྱོད་པ་སྐྱེད་པ་དང་། སོར་མོ་ག་ག་ཚིལ་དང་། ཆུ་ལ་རྩེ་བ་དང་། བུད་མེད་དང་ལྷན་ཅིག་ཉལ་བ་དང་། སྔངས་པར་བྱེད་པ་དང་། གོས་སྦེད་པ་དང་། གདེང་མེད་པ་བྱིན་པས་འཚོ་བ་དང་། གཞི་མེད་པར་སྐུར་བ་འདེབས་པ་དང་། སྐྱེས་པ་མེད་པར་བུད་མེད་དང་ལྷན་ཅིག་ལམ་དུ་འགྲོ་བའི་ལྟུང་བྱེད་རྣམས་སུ་ཡོད་པའི་ཕྱིར་རོ། །གཉིས་པ་ལ་བཅུ་ལས། དང་པོ་ནི། གང་བྱས་པས་དུད་འགྲོ་གསོད་པའི་ལྟུང་བྱེད་དུ་འགྱུར་ཞེ་ན། ཡང་འཆར་ཀ་ལྟ་བུའི་དགེ་སློང་གང་ཡང་རུང་བ་སྲོག་གཅོད་པར་བསམས་བཞིན་དུ་གསོད་པའི་འདུ་ཤེས་ཀྱིས་དུད་འགྲོའི་སྐྱེ་གནས་སུ་གཏོགས་པའི་སྲོག་ཆགས་མཚོན་ལ་སོགས་པ་བསྣུན་པའི་སྒོ་ནས་གསོད་ན་དེའི་རྐྱེན་གྱིས་ཤིའམ།
གཞན་གྱི་ཚེ་ཤི་ན་ལྟུང་བྱེད་དོ། །གཉིས་པ་ནི། གང་བྱས་པས་འགྱོད་པ་སྐྱེད་པའི་ལྟུང་བྱེད་དུ་འགྱུར་ཞེ་ན། ཡང་འཆར་ཀ་ལྟ་བའི་དགེ་སློང་གང་འགྱོད་པ་སྐྱེད་པར་བསམས་བཞིན་དུ་ཅི་ནས་དགེ་སློང་འདི་ཐ་ན་ཡུད་ཙམ་ཞིག་ཀྱང་བདེ་བ་ལ་རེག་པར་མི་བྱའོ་སྙམ་པ་དེ་ཉིད་རྐྱེན་དུ་བྱས་ཏེ་རྐྱེན་གཞན་མེད་པར་ཆོས་འདི་པའི་དགེ་སློང་ལ་ཁྱེད་བསྙེན་པར་རྫོགས་པ་མ་ཡིན་ནོ་ཞེས་བྱ་བ་ལ་སོགས་པས་འགྱོད་པ་སྐྱེད་ན་འགྱོད་པ་མ་སྐྱེས་ཀྱང་རུང་སྟེ་དོན་གོ་ན་ལྟུང་བྱེད་དོ། །གསུམ་པ་ནི། གང་བྱས་པས་ག་ག་ཚིལ་བྱེད་པའི་ལྟུང་བྱེད་དུ་འགྱུར་ཞེ་ན། དགེ་སློང་ལ་སོར་མོའམ་ཁུ་ཚུར་ལ་སོགས་པས་ག་ག་ཚིལ་སྐྱི་གཡའ་བར་བྱེད་ན་རེག་བྱེད་དུ་མ་ལ་ཡང་ལྟུང་བ་གཅིག་ཏུ་འགྱུར་རོ། །བཞི་པ་ནི། གང་བྱས་པས་ཆུ་ལ་རྩེ་བའི་ལྟུང་བྱེད་དུ་འགྱུར་ཞེ་ན། སིམ་པར་འདོད་པ་དང་། རྐྱལ་སློབ་པ་ལ་ལྟུང་བ་མེད་པས་རྩེ་བའི་བསམ་པས་ཆུ་ལ་རྩེ་ན་ལྟུང་བྱེད་དོ། །ལྔ་པ་ནི། གང་བྱས་པས་བུད་མེད་དང་ལྷན་ཅིག་ཉལ་བའི་ལྟུང་བྱེད་དུ་འགྱུར་ཞེ་ན། ཡང་ཆོས་འདི་པའི་དགེ་སློང་གང་ཡང་རུང་བ་བུད་མེད་དམ་གཞོན་ནུ་མ་མི་ཚངས་པར་སྤྱོད་པ་འཁྲིག་པ་སྟོན་ནུས་པ་དང་ལྷན་ཅིག་གནས་བཞི་པོ་གང་རུང་ཞིག་ཏུ་གློས་ཕབ་སྟེ་ཉལ་ན་ལྟུང་བྱེད་དོ། །དྲུག་པ་ནི། གང་བྱས་པས་སྔངས་པར་བྱེད་པའི་ལྟུང་བྱེད་དུ་འགྱུར་ཞེ་ན། ཡང་འཆར་ཀ་ལྟ་བུའི་དགེ་སློང་གང་ཆོས་འདི་པའི་དགེ་སློང་ལ་སྔངས་པར་རང་གིས་བྱེད་དམ། གཞན་སྔངས་པར་བྱེད་དུ་འཇུག་ན་བཞད་གད་དེ་ཀུ་རེ་བྱ་བར་བསམས་ཀྱང་རུང་སྟོབས་རོལ་པ་སྐྱོ་བར་བྱ་བའི་ཆེད་མ་གཏོགས་ཏེ་ལྟུང་བྱེད་དོ། །བདུན་པ་ནི། གང་བྱས་པས་སྦེད་པའི་ལྟུང་བྱེད་དུ་འགྱུར་ཞེ་ན། ཡང་དྲུག་སྡེ་ལྟ་བུའི་དགེ་སློང་གང་། ཆོས་འདི་པའི་དགེ་སློང་ངམ། དགེ་སློབ་མའམ། དགེ་ཚུལ་ལམ། དགེ་ཚུལ་མའི་ལྷུང་བཟེད་དམ། ཆོས་གོས་སམ།
དྲ་བ་ལྷུང་བཟེད་ཀྱི་སྣོད་དམ། ཕོར་བུའམ། སྐ་རགས་སམ། དེ་དག་ལས་གཞན་པའི་དགེ་ཚུལ་གྱི་འཚོ་བའི་ཡོ་བྱད་གང་ཡང་རུང་བ་རང་གི་སྦེད་དམ། གཞན་སྦེད་དུ་འཇུག་ན་ཕན་པར་འདོད་པ་དེ་འདྲ་བའི་རྐྱེན་མ་གཏོགས་ཏེ་ལྟུང་བྱེད་དོ། །བརྒྱད་པ་ནི། གང་བྱས་པས་བྱིན་པས་ཉེ་བར་འཚོ་བའི་ལྟུང་བྱེད་དུ་འགྱུར་ཞེ་ན། ཡང་ཉེར་དགའ་ལྟ་བུའི་དགེ་སློང་གང་ཡང་རུང་བ་ཆོས་འདི་པའི་དགེ་སློང་ལ་ཆོས་གོས་བླང་བ་མེད་པར་བྱིན་ནས་དེའི་འོག་ཏུ་གདེང་མེད་པར་ལོངས་སྤྱོད་ན་ལྟུང་བྱེད་དོ། །དགུ་པ་ནི། གང་བྱས་པས་སྐུར་བ་འདེབས་པའི་ལྟུང་བྱེད་དུ་འགྱུར་ཞེ་ན། ཡང་མཛའ་བོ་དང་ས་ལས་སྐྱེས་ལྟ་བུའི་དགེ་སློང་གང་ཡང་རུང་བ་ཁྲོས་ཤིང་ཞེ་སྡང་བ་ཡིད་མི་དགའ་བར་གྱུར་ནས་གྱད་བུ་ནོར་ལྟ་བུའི་དགེ་སློང་དག་པ་གླེང་བའི་གཞི་དེའི་ལྟུང་བ་མེད་པ་ལ་གཞི་མེད་པར་དགེ་འདུན་ལྷག་མའི་ཆོས་བཅུ་གསུམ་ལས་གང་ཡང་རུང་བས་སྐུར་བ་འདེབས་ན་ལྟུང་བྱེད་དོ། །བཅུ་པ་ནི། གང་བྱས་པས་བུད་མེད་དང་ལྷན་ཅིག་ལ་ལམ་དུ་འགྲོ་བའི་ལྟུང་བྱེད་དུ་འགྱུར་ཞེ་ན། ཡང་ཆོས་འདི་པའི་དགེ་སློང་གང་ཡང་རུང་བ་རིག་པའི་སྐྱེས་པ་མེད་པར་བུད་མེད་དམ་གཞོན་ནུ་མ་འཁྲིག་པ་སྟེན་ནུས་པ་དང་ལྷན་ཅིག་དགོན་པའི་འགྲོན་ལམ་དུ་འགྲོ་ན་ཐ་ན་གྲོང་བར་དུ་ཡང་རུང་སྟེ། རྒྱང་གྲགས་གཅིག་འདས་པ་ན་ལྟུང་བྱེད་དོ། །ཐམས་ཅད་དུ་དེ་ལྟར་འགྱུར་རམ་ཞེ་ན། དེས་བསིལ་བྱེད་པ་དང་། ལམ་སྟོན་པ་དང་། མི་ནུས་པ་འཁྲིད་པ་ནི་མ་གཏོགས་སོ། །བཅུ་ཚན་བརྒྱད་པ་ལ། སྡོམ་གྱིས་མདོར་བསྟན་པ་དང་། སོ་སོའི་མཚན་ཉིད་རྒྱས་པར་བཤད་པའོ། །དང་པོ་ནི། ལྟུང་བྱེད་བཅུ་ཚན་བརྒྱད་པ་སྡོམ་དུ་བསྡུས་པ་ཆོས་ཅན། བཅུ་ཡོད་དེ། རྐུན་མ་དང་ལྷན་ཅིག་ལམ་དུ་འགྲོ་བ་དང་། ལོ་ཉི་ཤུ་མ་ལོན་པ་བསྙེན་པར་རྫོགས་པར་བྱེད་པ་དང་།
ས་རྐོ་བ་དང་། མགྲོན་དུ་གཉེར་བ་ལས་རིང་དུ་འདུག་པ་དང་། བསླབ་པ་ལ་ཉེ་བར་འཇོག་པ་སྤོང་བ་དང་། འཐབ་པ་ཉན་རྣ་ལས་གྱུར་པ་དང་། མི་སྨྲ་བར་འགྲོ་བ་དང་། མི་གུས་པ་མ་གུས་པའི་ཚུལ་གྱིས་དང་། ཆང་འཐུང་བ་དང་། དུས་མ་ཡིན་པར་འགྲོ་བའི་ལྟུང་བྱེད་རྣམས་སུ་ཡོད་པའི་ཕྱིར། གཉིས་པ་ལ་བཅུ་ལས། དང་པོ་ནི་གང་བྱས་པས་རྐུན་མ་དང་ལྷན་ཅིག་ལམ་དུ་འགྲོ་བའི་ལྟུང་བྱེད་དུ་འགྱུར་ཞེ་ན། ཡང་ཆོས་འདི་པའི་དགེ་སློང་གང་ཡང་རུང་བ་དོན་མཐུན་རྐུན་མ་གྲོང་འཇོམ་པར་བྱེད་པའི་ཆོམ་རྐུན་དང་། ཤོ་གམ་འབྲལ་བར་བྱེད་པའི་ཚོང་པ་དང་ལྷན་ཅིག་དགོན་པའི་འགྲོན་ལམ་དུ་འགྲོ་ན་གྲོང་བར་དུ་ཡང་རུང་སྟེ་རྒྱང་གྲགས་གཅིག་འདས་པ་ན་ལྟུང་བྱེད་དོ། །ཐམས་ཅད་དུ་ཡིན་ནམ་ཞེ་ན། དེས་བསིལ་བྱེད་པ་སོགས་ནི་མ་གཏོགས་སོ། །གཉིས་པ་ནི། གང་བྱས་པས་ལོ་ཉི་ཤུ་མ་ལོན་པ་བསྙེན་པར་རྫོགས་པར་བྱེད་པའི་ལྟུང་བྱེད་དུ་འགྱུར་ཞེ་ན། ཡང་ཆོས་འདི་པའི་དགེ་སློང་གང་ཡང་རུང་བ། གང་ཟག་ལོ་ཉི་ཤུ་མ་ལོན་པ་མཁན་པོའི་སྒོ་ནས་དགེ་སློང་གི་དངོས་པོར་བསྙེན་པར་རྫོགས་པར་བྱེད་ན་ལྟུང་བྱེད་དོ། །དེ་ལྟར་བྱེད་ན་གང་ཟག་དེ་ཡང་བསྙེན་པར་རྫོགས་པར་མི་འགྱུར་ལ། དགེ་སློང་དེ་དག་ཀྱང་བསླད་པར་འགྱུར་ཏེ། བསླབ་པའི་གཞི་དེ་ལ་དེ་ནི་ཆོ་ག་ཡིན་ནོ། །གསུམ་པ་ནི། གང་བྱས་པས་ས་རྐོ་བའི་ལྟུང་བྱེད་དུ་འགྱུར་ཞེ་ན། ཡང་དྲུག་སྡེ་ལྟ་བུའི་དགེ་སློང་གང་ཡང་རུང་བ་རང་གི་ལག་གིས་རང་བཞིན་ཅན་དང་རང་བཞིན་ཅན་མ་ཡིན་པ་གཉིས་ལས་འཐས་པའི་རང་བཞིན་ཅན་གྱི་ས་རྐོའམ་རྐོར་འཇུག་ན་ལག་གི་བླས་རྒྱུ་སྐར་གྱི་སྦྱོར་བས་རུང་བར་བྱེད་པ་མེད་ན་ཐུར་མ་སོར་བཞི་ཙམ་འཛུགས་པ་མ་གཏོགས་ལྟུང་བྱེད་དོ། །བཞི་པ་ནི། གང་བྱས་པས་མགྲོན་དུ་གཉེར་བ་ལས་རིང་དུ་འདུག་པའི་ལྟུང་བྱེད་དུ་འགྱུར་ཞེ་ན། དྲུག་སྡེ་ལྟ་བུའི་
དགེ་སློང་གིས་ཟླ་བ་བཞི་ཚུན་ཆད་དུ་མགྲོན་དུ་བོས་པ་བདག་གིར་བྱ་བ་སྟེ་ཁས་བླང་བར་བྱའོ། །ཟླ་བ་བཞི་པོ་དེ་ལས་ལྷག་པར་བདག་གིར་བྱེད་ན་ལྟུང་བྱེད་དོ། །ཐམས་ཅད་དུ་ཡིན་ནམ་ཞེ་ན། དགེ་སློང་སོ་སོར་ཏེ་ཐ་དད་དུ་མགྲོན་དུ་བོས་པ་དང་། དགེ་སློང་ཡང་དང་ཡང་དུ་མགྲོན་དུ་བོས་པ་དང་། དགེ་སློང་དུས་ཀྱིས་ཏེ་ནན་ཏན་གྱིས་མགྲོན་དུ་བོས་པ་དང་། དགེ་སློང་རྟག་ཏུ་སྟེ་ཇི་སྲིད་འཚོའི་བར་དུ་མགྲོན་དུ་བོས་པ་མ་གཏོགས་ཏེ་བསླབ་པའི་གཞི་དེ་ལ་དེ་ནི་དུས་ཡིན་ནོ། །ལྔ་པ་ནི། གང་བྱས་པས་བསླབ་པ་ལ་ཉེ་བར་འཇོག་པ་སྤོང་བའི་ལྟུང་བྱེད་དུ་འགྱུར་ཞེ་ན། ཡང་དྲུག་སྡེ་ལྟ་བུའི་དགེ་སློང་གང་ཆོས་འདི་པའི་དགེ་སློང་རྣམས་ཀྱིས་ཚེ་དང་ལྡན་པ་ཁྱེད་ཀྱིས་བསླབ་པ་གང་ཡིན་པ་འདི་ལ་བསླབ་པར་བྱའོ་ཞེས་བསྒོ་བ་ན། དེ་དག་འདི་སྐད་ཅེས། བདག་དགེ་སློང་མདོ་སྡེ་མཐའ་དག་འཛིན་པ་དང་། འདུལ་བ་མཐའ་དག་འཛིན་པ་དང་། མ་མོ་མཐའ་དག་འཛིན་པ་རྣམས་ལ་འདྲི་བའི་བར་དུ། ལུས་ངག་ཡིད་གསུམ་གྱི་བྱ་བ་མ་ཡིན་པར་བྱེད་པ་བྱིས་པ། སྡེ་སྣོད་གསུམ་མི་འཛིན་པས་རྨོངས་པ། སྡེ་སྣོད་གསུམ་ལ་མི་གསལ་བ། སྡེ་སྣོད་གསུམ་ལ་མི་མཁས་པ་ཁྱོད་ཀྱི་ཚིག་གིས་བསླབ་པ་འདི་ལ་མི་སློབ་པོ་ཞེས་ཟེར་ན་ལྟུང་བྱེད་དོ། །དགེ་སློང་ཀུན་ཤེས་པར་འདོད་པས་ཀྱང་བསླབ་པ་དེ་ལ་བསླབ་པར་བྱའོ། །དགེ་སློང་མདོ་སྡེ་འཛིན་པ་དང་། འདུལ་བ་འཛིན་པ་དང་། མ་མོ་(༤༢ན)འཛིན་པ་རྣམས་ལ་ཡང་དྲི་བར་བྱ་སྟེ་བསླབ་པའི་གཞི་དེ་ལ་དེ་ནི་ཆོ་ག་ཡིན་ནོ། །དྲུག་པ་ནི། གང་བྱས་པས་ཉན་རྣ་ལས་གྱུར་པའི་ལྟུང་བྱེད་དུ་འགྱུར་ཞེ་ན། ཡང་ཉེར་དགའ་ལྟ་བུའི་དགེ་སློང་གང་ཆོས་འདི་པའི་དགེ་སློང་རྣམས་འཐབ་པར་འགྱུར། མཚང་འབྲུ་བར་འགྱུར། མི་མཐུན་པར་འགྱུར། རྩོད་པར་གྱུར་ཅིང་འཁོད་པ་ལ། དགེ་སློང་འདི་དག་ཇི་སྐད་
ཟེར་བ་དེ་བདག་གིས་མཉན་ཏེ། དེ་དེ་ལྟར་རྗེས་སུ་ཐ་སྙད་གདགས་པ་སྟེ་ཟིལ་གྱིས་གནན་པར་བྱའོ་སྙམ་པ་དེ་ཉིད་རྐྱེན་དུ་བྱས་ཏེ། ཅང་མི་སྨྲ་བར་ཉན་ནས་འདུག་ན་ལྟུང་བྱེད་དོ། །ཐམས་ཅད་དུ་ངེས་སམ་ཞེ་ན། ཞི་བར་འདོད་པ་ནི་མ་གཏོགས་སོ། །བདུན་པ་ནི། གང་བྱས་པས་མི་སྨྲ་བར་འགྲོ་བའི་ལྟུང་བྱེད་དུ་འགྱུར་ཞེ་ན། ཡང་དགའ་བོ་ལྟ་བུའི་དགེ་སློང་གཞན་དག་ཡང་རུང་བ། དེ་བཞིན་གཤེགས་པའི་ཉན་ཐོས་ཀྱི་དགེ་འདུན་གྱི་ཆོས་དང་ལྡན་པའི་གཏམ་རྣམ་པར་གཏན་ལ་འབེབ་པ་གསོལ་བ་འབའ་ཞིག་གི་ལས་དང་། གསོལ་བ་དང་གཉིས་ཀྱི་ལས་དང་། གསོལ་བ་དང་བཞིའི་ལས་བྱུང་བ་ན། ཐོས་པའི་ཉེ་འཁོར་ལས་འདས་པར་འགྲོ་ཞིང་། དགེ་སློང་འདུག་པ་ལ་མི་སྨྲ་ན་ལྟུང་བྱེད་དོ། །ཐམས་ཅད་དུ་ངེས་སམ་ཞེ་ན། ལྷུང་བཟེད་དང་ཆོས་གོས་མེས་འཇིག་པ་ལ་སོགས་པ་དེ་འདྲའི་རྐྱེན་མ་གཏོགས་སོ། །བརྒྱད་པ་ནི། གང་བྱས་པས་མི་གུས་པའི་ལྟུང་བྱེད་དུ་འགྱུར་ཞེ་ན། སངས་རྒྱས་ཀྱི་ཉན་ཐོས་ཀྱི་དགེ་འདུན་དང་། དགེ་སྐོས་དང་། སངས་རྒྱས་ཀྱི་ཚིག་ལ་གུས་པར་མི་བྱེད་ན་ལྟུང་བྱེད་དོ། །དགུ་པ་ནི། གང་བྱས་པས་ཆང་འཐུང་བའི་ལྟུང་བྱེད་དུ་འགྱུར་ཞེ་ན། ནས་དང་གྲོ་ལ་སོགས་པ་ལས་བྱས་པ་འབྲུའི་ཆང་དང་། རྩ་བ་དང་སྡོང་བུ་ལ་སོགས་པ་ལས་བྱས་པ་བཅོས་པའི་ཆང་། དེ་ཡང་མྱོས་པར་མི་འགྱུར་བ་ལ་ལྟུང་བྱེད་མེད་པས། མྱོས་པར་འགྱུར་བ་འཐུང་ན་མགུལ་དུ་མིད་པ་ན་ལྟུང་བྱེད་དོ། །བཅུ་པ་ནི། གང་བྱས་པས་དུས་མ་ཡིན་པར་གྲོང་དུ་འཇུག་པའི་ལྟུང་བྱེད་དུ་འགྱུར་ཞེ་ན། ཡང་ཆོས་འདི་པའི་དགེ་སློང་གང་ཡང་རུང་བ་ཉི་མ་ཕྱེད་ཡོལ་ནས་སྐྱ་རེངས་མ་ཤར་བའི་དུས་མ་ཡིན་པར་གྲོང་གསུམ་མདོ་དང་བཞི་མདོ་ལ་སོགས་པར་འཇུག་ཅིང་དགེ་སློང་འདུག་པ་ལ་མི་སྨྲ་ན་ལྷུང་བཟེད་མེས་འཚིག་པ་ལ་སོགས་པ་དེ་འདྲ་བའི་རྐྱེན་མ་གཏོགས་
ཏེ་ལྟུང་བྱེད་དོ། །བཅུ་ཚན་དགུ་པ་སྡོམ་གྱི་སྒོ་ནས་མདོར་བསྟན་པ་དང་། སོ་སོའི་མཚན་ཉིད་རྒྱས་པར་བཤད་པའོ། །དང་པོ་ནི། ལྟུང་བྱེད་བཅུ་ཚན་དགུ་པ་སྡོམ་དུ་བསྡུས་པ་ཆོས་ཅན། བཅུ་ཡོད་དེ། ཟས་བཅས་ཁྱིམ་དུ་རྒྱུ་བ་དང་། སྐྱ་རེངས་མ་ཤར་བར་མཚན་མོ་རྒྱལ་པོའི་ཕོ་བྲང་དུ་འགྲོ་བ་དང་། ད་གདོད་དེ་བསླབ་པ་ཁྱད་དུ་གསོད་པ་དང་། ཁབ་རལ་འཆོས་པ་དང་། ཁྲི་རྐང་འཆོས་པ་དང་། ཤིང་བལ་བདལ་བ་དང་། གདིང་བ་དང་། གཡན་པ་དགབ་པ་དང་། དབྱར་གྱི་རས་ཆེན་དང་། བདེ་བར་གཤེགས་པའི་ཆོས་གོས་ཀྱི་ཚད་ལས་གྱུར་པའི་ལྟུང་བྱེད་རྣམས་སུ་ཡོད་པའི་ཕྱིར། གཉིས་པ་ལ་བཅུ་ལས། དང་པོ་ནི། གང་བྱས་པས་ཁྱིམ་དུ་རྒྱུ་བའི་ལྟུང་བྱེད་དུ་འགྱུར་ཞེ་ན། ཡང་ཉེར་དགའམ་དགེ་སློང་གཞན་གང་ཡང་རུང་བ་ཟས་དང་བཅས་པའི་བྲམ་ཟེ་དང་ཁྱིམ་བདག་གི་ཁྱིམ་དག་ཏུ་མགྲོན་དུ་བོས་ནས་སྔ་དྲོ་ཁྱིམ་གསུམ་ལས་ལྷག་པ་དང་། ཕྱི་དྲོ་ཁྱིམ་བཞི་ལས་ལྷག་པར་རྒྱུ་ཞིང་། ཁྱིམ་པ་འདུག་པ་ལ་ཁོ་བོ་མ་འོངས་པའི་དབང་གིས་ཟན་ཡོལ་བར་མ་བྱེད་ཅིག་ཅེས་མི་བསྒོ་ན་ལྷུང་བཟེད་དང་ཆོས་གོས་མེས་འཇིག་པ་ལ་སོགས་པ་དེ་འདྲ་བའི་རྐྱེན་མ་གཏོགས་ཏེ་ལྟུང་བྱེད་དོ། །གཉིས་པ་ནི། གང་བྱས་པས་རྒྱལ་པོའི་ཕོ་བྲང་དུ་ནུབ་མོ་འགྲོ་བའི་ལྟུང་བྱེད་དུ་འགྱུར་ཞེ་ན། ཡང་འཆར་ཀ་ལྟ་བུའི་དགེ་སློང་གང་ཡང་རུང་བ་ནམ་མ་ལངས་པ་སྟེ་སྐྱ་རེངས་གསུམ་ལས་སྐྱ་རེངས་ཐ་མ་མ་ཤར་བར་ནོར་བུ་ལ་སོགས་པའི་རིན་པོ་ཆེ་དག་གམ་གཡུལ་ངོར་སྤྱད་པའི་མཚོན་ཆ་ལ་སོགས་པའི་རིན་པོ་ཆེར་སྨོས་པ་དག་མ་བསྡུས་པར། རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བའི་སྒོ་གཏན་ནམ། སྒོ་གཏན་གྱི་ཉེ་འཁོར་ལས་འདས་པར་འགྲོ་ན་ཇི་སྙེད་ཕྱིན་པ་དེ་སྙེད་
ཀྱི་ལྟུང་བར་འགྱུར་རོ། །ཐམས་ཅད་དུ་ངེས་སམ་ཞེ་ན། རྒྱལ་པོས་བཀུག་པ་དང་གདུལ་བྱ་འདུལ་བ་སོགས་དེ་འདྲའི་རྐྱེན་མ་གཏོགས་སོ། །གསུམ་པ་ནི། གང་བྱས་པས་བསླབ་པའི་གཞི་ཁྱད་དུ་གསོད་པའི་ལྟུང་བྱེད་དུ་འགྱུར་ཞེ་ན། ཡང་དྲུག་སྡེ་ལྟ་བུའི་དགེ་སློང་གང་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་ཕམ་པ་བཞི། ལྷག་མ་བཅུ་གསུམ། མ་ངེས་པ་གཉིས། སྤང་ལྟུང་སུམ་ཅུ། ལྟུང་བྱེད་འབའ་ཞིག་པ་དགུ་བཅུ། སོར་བཤགས་བཞི། བསླབ་པར་བྱ་བ་མང་པོ། རྩོད་པར་ཞི་བར་བྱེད་པ་བདུན་པོ་འདོན་པ་གདོན་པའི་ཚེ་ན། འདི་སྐད་ཅེས་ཚེ་དང་ལྡན་པ་དག་འདི་ལྟར་བཅོམ་ལྡན་འདས་ཀྱིས་གསུངས་པའི་ཆོས་འདི་ཡང་མདོའི་ནང་དུ་གཏོགས། མདོའི་ནང་དུ་འདུས་པར་བདག་གིས་ད་གདོད་ཤེས་ཞེས་ཟེར་ན། དགེ་སློང་དེ་ལ་གལ་ཏེ་ཆོས་འདི་པའི་དགེ་སློང་གང་འཁོད་པ་རྣམས་ཀྱིས་ཚེ་དང་ལྡན་པ་འདི། སྔར་གསོ་སྦྱོང་གི་ལས་གཉིས་སམ་གསུམ་གྱི་ཚེ་གྲལ་ན་འདུག་པར་ཤེས་ཤིང་དེ་ལས་ལན་མང་དུ་ལྟ་ཅི་སྨོས་ན་ཚེ་དང་ལྡན་པ་དེ་མི་ཤེས་པས་ལྟུང་བ་ལས་མི་གྲོལ་བས་ལྟུང་བ་དང་བཅས་པ་ཡིན་པ་དེ་ལྟུང་བ་གང་བྱུང་བ་དེ་ཆོས་བཞིན་དུ་ཕྱིར་བཅོས་བྱེད་དུ་གཞུག་གི་སྟེང་དུ་ཁྱོད་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་འདོན་པའི་ཚེ། གུས་པར་བྱས་ཏེ་ཆོས་ཉན་པར་མི་བྱེད། བླ་མར་བྱས་ཏེ་མི་བྱེད། རུ་ཤིང་ལྟར་བྱས་ཏེ་མི་བྱེད། ཡིད་ལ་བྱས་ཏེ་མི་བྱེད། སེམས་རྩེ་གཅིག་ཏུ་མི་བྱེད། རྣ་བླགས་ཏེ་མི་བྱེད། སེམས་ཅན་ཐམས་ཅད་ཀྱིས་བསམས་ཏེ་ཉན་པར་མི་བྱེད་པས་ཚེ་དང་ལྡན་པ་ཁྱོད་ཀྱིས་མ་རྙེད་དེ། རྙེད་པ་མིན་ཞིང་། ཉེས་པ་རྙེད་དེ་ལེགས་པ་རྙེད་པ་མ་ཡིན་ནོ་ཞེས་འགྱོད་པར་བྱའོ། །ཚེ་དང་ལྡན་པ་དེ་ལ་འགྱོད་པར་བྱ་བ་ནི་འདི་ཡིན་ཏེ་ལྟུང་བྱེད་དོ། །བཞི་པ་ནི། གང་བྱས་པས་ཁབ་རལ་འཆོས་པའི་
ལྟུང་བྱེད་དུ་འགྱུར་ཞེ་ན། བ་སོའམ། རུས་པའམ། རྭའི་ཁབ་རལ་སྦུ་གུ་ཅན་ནམ། ཆང་བ་ལྟ་བུ་རང་གིས་སམ། གཞན་བྱེད་དུ་འཇུག་ན་ལྟུང་བྱེད་དོ། །དེ་ཡང་ལྟུང་བ་བཤགས་པའི་ཚེ་ཁབ་རལ་བཅག་ནས་བཤགས་དགོས་སོ། །ལྔ་པ་ནི། གང་བྱས་པས་ཁྲི་རྐང་འཆོས་པའི་ལྟུང་བྱེད་དུ་འགྱུར་ཞེ་ན། ཡང་དྲུག་སྡེ་ལྟ་བུའི་དགེ་སློང་གིས་སངས་རྒྱས་ཀྱི་ཉན་ཐོས་ཀྱི་དགེ་འདུན་གྱི་ཁྲིའམ་ཁྲིའུ་རང་གིས་སམ་གཞན་བྱེད་དུ་འཇུག་ན་རྩ་བ་བུ་གར་གཞུག་པ་མ་གཏོགས་པ་བདེ་བར་གཤེགས་པའི་སོར་བརྒྱད་ཀྱི་ཚད་དེ་ཚད་དང་ལྡན་པའི་ཁྲུ་གང་བྱེད་དུ་གཞུག་པར་བྱའོ། །དེ་ལས་ལྷག་པར་བྱེད་དུ་འཇུག་ན་ལྟུང་བྱེད་དོ། །དེ་ཡང་ལྟུང་བ་བཤགས་པའི་ཚེ་ན་གང་ལྷག་པའི་ཆ་དེ་བཅད་ནས་བཤགས་དགོས་སོ། །དྲུག་པ་ནི། གང་བྱས་པས་ཤིང་བལ་གྱི་གོས་བྱེད་པའི་ལྟུང་བྱེད་དུ་འགྱུར་ཞེ་ན། ཡང་ཉེར་དགའ་ལྟ་བུའི་དགེ་སློང་གང་ཡང་རུང་བ་སངས་རྒྱས་ཀྱི་ཉན་ཐོས་ཀྱི་དགེ་འདུན་གྱི་ཁྲིའམ་ཁྲིའུ་ལ་ཤིང་བལ་ལྔ་ལས་གང་ཡང་རུང་བ་རང་གིས་བདལ་ལམ་གཞན་བདལ་དུ་འཇུག་ན་ལྟུང་བྱེད་དོ། །དེ་ཡང་ལྟུང་བ་བཤགས་པའི་ཚེ་ན་ཤིང་བལ་གང་བདལ་བ་དེ་བསྡུས་ནས་བཤགས་དགོས་སོ། །བདུན་པ་ནི། གང་བྱས་པས་གདིང་བ་ལས་གྱུར་པའི་ལྟུང་བྱེད་དུ་འགྱུར་ཞེ་ན། ཆོས་འདི་པའི་དགེ་སློང་གིས་གནས་མལ་གྱི་སྟེང་དུ་འདིང་བའི་གདིང་བ་རང་གིས་སམ་གཞན་བྱེད་དུ་འཇུག་ན་ཚད་གང་ཡིན་པ་བཞིན་དུ་བྱེད་དུ་ཆུག་ཅིག །འོ་ན་ཚད་གང་ཞེ་ན། བསླབ་པའི་གཞི་བཅས་པ་དེ་ལ་གདིང་བའི་ཚད་ནི་འདི་ཡིན་ཏེ། སྲིད་དུ་བདེ་བར་གཤེགས་པའི་མཐོའི་མཐོ་དོ་སྟེ་ཚད་དང་ལྡན་པའི་ཁྲུ་གསུམ། ཞེང་དུ་བདེ་བར་གཤེགས་པའི་མཐོ་ཕྱེད་དང་དོ་སྟེ། ཚད་དང་ལྡན་པའི་ཁྲུ་དོ་སོར་དྲུག་གོ །མི་ཆོག་ན་
སྲིད་དུ་བདེ་བར་གཤེགས་པའི་མཐོ་གང་སྟེ་ཚད་དང་ལྡན་པའི་ཁྲུ་ཕྱེད་དང་དོ་བསྲིངས་ཤིག །དེ་ལས་ལྷག་པར་བྱེད་དུ་འཇུག་ན་ལྟུང་བྱེད་དོ། །དེ་ཡང་ལྟུང་བ་བཤགས་པའི་ཚེ་དང་གང་ལྷག་པའི་ཆ་དེ་བཅད་ནས་བཤགས་དགོས་སོ། །བརྒྱད་པ་ནི། གང་བྱས་པས་གཡན་པ་དགབ་པ་ལས་གྱུར་པའི་ལྟུང་བྱེད་དུ་འགྱུར་ཞེ་ན། ཡང་ཆོས་འདི་པའི་དགེ་སློང་གིས་གཡན་པ་དགབ་པའི་གོས་རང་གིས་སམ་གཞན་བྱེད་དུ་འཇུག་ན་ཚད་གང་ཡིན་པ་བཞིན་དུ་བྱེད་དུ་ཆུག་ཅིག །ཚད་གང་ཞེ་ན། བསླབ་པའི་གཞི་དེ་ལ་གཡན་པ་དགབ་པའི་གོས་ཀྱི་ཚད་ནི་འདི་ཡིན་ཏེ། སྲིད་དུ་བདེ་བར་གཤེགས་པའི་མཐོའི་མཐོ་བཞི་སྟེ་ཚད་དང་ལྡན་པའི་ཁྲུ་དྲུག །ཞེང་དུ་བདེ་བར་གཤེགས་པའི་མཐོ་དོ་སྟེ་ཚད་དང་ལྡན་པའི་ཁྲུ་གསུམ་མོ། །དེ་ལས་ལྷག་པར་བྱེད་དུ་འཇུག་ན་ལྟུང་བྱེད་དོ། །དེ་ཡང་ལྟུང་བ་བཤགས་པའི་ཚེ་ལྷག་པའི་ཆ་བཅད་ནས་བཤགས་དགོས་སོ། །དགུ་པ་ནི། གང་བྱས་པས་དབྱར་གྱི་རས་ཆེན་གྱི་ལྟུང་བར་འགྱུར་ཞེ་ན། ཡང་ཆོས་འདི་པའི་དགེ་སློང་གིས་དབྱར་ཆར་སྐྱོབ་པའི་གོས་རས་ཆེན་རང་གིས་སམ་གཞན་བྱེད་དུ་འཇུག་ན་ཚད་གང་ཡིན་པ་བཞིན་དུ་བྱེད་དུ་ཆུག་ཅིག །འོ་ན་ཚད་གང་ཞེ་ན། བསླབ་པའི་གཞི་བཅས་པ་དེ་ལ་དབྱར་གྱི་གོས་རས་ཆེན་གྱི་ཚད་ནི་འདི་ཡིན་ཏེ། སྲིད་དུ་བདེ་བར་གཤེགས་པའི་མཐོའི་མཐོ་དྲུག་སྟེ་ཚད་དང་ལྡན་པའི་ཁྲུ་དགུ། ཞེང་དུ་བདེ་བར་གཤེགས་པའི་མཐོ་ཕྱེད་དང་གསུམ་སྟེ་ཚད་དང་ལྡན་པའི་ཁྲུ་གསུམ་དང་སོར་བཅོ་བརྒྱད་དོ། །དེ་ལས་ལྷག་པར་བྱེད་དུ་འཇུག་ན་ལྟུང་བྱེད་དོ། །དེ་ཡང་ལྟུང་བ་བཤགས་པའི་ཚེ་ན་གང་ལྷག་པའི་ཆ་དེ་བཅད་ནས་བཤགས་དགོས་སོ། །བཅུ་པ་ནི། གང་བྱས་པས་བདེ་བར་གཤེགས་པའི་ཆོས་གོས་ཀྱི་ཚད་ལས་གྱུར་པའི་ལྟུང་བྱེད་དུ་འགྱུར་ཞེ་ན། ཡང་ཉེར་དགའ་ལྟ་བུའི་དགེ་སློང་གང་བདེ་བར་
གཤེགས་པའི་ལུས་ཙམ་མེད་པར་བདེ་བར་གཤེགས་པའི་ཆོས་གོས་ཀྱི་ཚད་ཀྱིས་ཆོས་གོས་རང་གིས་སམ་གཞན་བྱེད་དུ་འཇུག་གམ། བདེ་བར་གཤེགས་པའི་ཆོས་གོས་ཀྱི་ཚད་ལས་ལྷག་པར་བྱེད་དུ་འཇུག་ན་ལྟུང་བྱེད་དོ། །འོ་ན་ཚད་དེ་རང་གང་ཞེ་ན། བསླབ་པའི་གཞི་བཅས་པ་དེ་ལ་བདེ་བར་གཤེགས་པའི་ཆོས་གོས་ཀྱི་ཚད་ནི་འདི་ཡིན་ཏེ། སྲིད་དུ་བདེ་བར་གཤེགས་པའི་མཐོའི་མཐོ་བཅུ་སྟེ་རང་ཁྲུ་ལྔ། ཞེང་དུ་མཐོ་དྲུག་སྟེ་རང་ཁྲུ་གསུམ་མོ། །བསླབ་པའི་གཞི་བཅས་པ་དེ་ལ་འདི་ནི་བདེ་བར་གཤེགས་པའི་ཆོས་གོས་ཀྱི་ཚད་དོ། །གསུམ་པ་མཇུག་བསྡུ་བ་ནི། ཚེ་དང་ལྡན་པ་དག་བདག་གིས་ལྟུང་བྱེད་ཀྱི་ཆོས་བཅུ་པོ་དག་བཏོན་ཟིན་ཏོ་ཞེས་མཇུག་བསྡུ་བྱས་པ་ཆོས་ཅན། དགོས་པ་ཡོད་དེ། དམ་བཅའ་མཐར་ཕྱིན་པ་དང་། ཉན་པ་པོ་སྤྲོ་བ་བསྐྱེད་པའི་ཆེད་ཡིན་པའི་ཕྱིར། བཞི་པ་རྣམ་གཞག་བསྒྲག་པ་ནི། ལྟུང་བྱེད་འབའ་ཞིག་པ་བཏོན་པ་དེ་ལ་ཞེས་སོ། །གསུམ་པ་སོ་སོར་བཤགས་པ་གདོན་པ་ལ་ལྔ་སྟེ་སྡོམ་གྱིས་མདོར་བསྟན། སོར་བཤགས་གདོན་པའི་ལུང་དབོག །སོ་སོའི་མཚན་ཉིད། མཇུག་བསྡུ་བ། རྣམ་གཞག་བསྒྲག་པའོ། །དང་པོ་ནི། སོར་བཤགས་སྡོམ་དུ་བསྡུས་པ་ཆོས་ཅན། རྣམ་པ་བཞི་ཡོད་དེ། སངས་རྒྱས་ཕན་པ་གསུང་བ་ཡིས་སོ་སོར་བཤགས་པར་བྱ་བར་གསུངས་པ་གྲོང་དུ་དགེ་སློང་མ་ལ་ཟས་ལེན་པ་དང་། ཁྱིམ་གཞན་ཉིད་དེ་གྲལ་རིམས་སུ་མ་ཕེབས་པར་འབྲིམ་དུ་འཇུག་པ་མ་བཟློག་པར་ཟ་བ་དང་། བསླབ་པ་རྣམས་ཏེ་བསླབ་པ་དྲལ་ཏེ་ཁྱིམ་དུ་འཇུག་པའི་སོར་བཤགས་དང་། དགོན་པ་སྟེ་ནགས་བརྟག་པ་ལས་བྱུང་བའི་སོར་བཤགས་རྣམས་སུ་ཡོད་པའི་ཕྱིར། གཉིས་པ་ནི། འདུལ་བའི་སྡེ་སྣོད་ཡི་གེར་མི་འབྲི་བ་ཡིན་ན། སོར་བཤགས་བཞི་འདོན་པ་
གང་ལས་ཤེས་ཤེ་ན། སྐྱོན་མེད་དེ། ཚེ་དང་ལྡན་པ་དག་སྨྲེ་སྔགས་འདོན་པའི་སྒོ་ནས་སོ་སོར་བཤགས་པར་བྱ་བའི་ཆོས་འོག་ནས་འབྱུང་བ་བཞི་པོ་འདི་དག་ནི་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་འདོན་པའི་ཚེ་འདུལ་བ་འཛིན་པའི་ངག་ལས་འབྱུང་བའི་ཕྱིར་རོ། །གསུམ་པ་ལ་བཞི་ལས། དང་པོ་ནི། གང་བྱས་པས་དགེ་སློང་མ་ལ་ཟས་ལེན་པའི་སོར་བཤགས་སུ་འགྱུར་ཞེ་ན། ཡང་ཉེར་དགའ་ལྟ་བུའི་དགེ་སློང་གང་ཆོས་འདི་པའི་དགེ་སློང་མ་བདུན་བརྒྱུད་ཚུན་ཆད་ཀྱི་ཉེ་དུ་མ་ཡིན་པ་ལམ་པོ་ཆེ་ན་འདུག་པ་བསོད་སྙོམས་ཀྱི་ཕྱིར་ལམ་པོ་ཆེ་དང་སྲང་དང་། བཞི་མདོ་དང་། གསུམ་མདོ་ལ་སོགས་པའི་གྲོང་དུ་འགྲོ་བ་སྟེ་གནས་པ་ལས་དགེ་སློང་བཅའ་བ་ལྔ་པོ་རྩ་བ་དང་། སྡོང་བུ་དང་། འདབ་མ་དང་། མེ་ཏོག་དང་། འབྲས་བུ་དང་། བཟའ་བ་ལྔ་པོ། འབྲས་ཆན་དང་། ཟན་དྲོན་དང་། ལྡེ་གུ་དང་། ཤ་དང་། སྣུམ་ཁུར་རང་གི་ལག་གིས་བླངས་ཏེ་འཆའམ་ཟ་ན་མགུལ་དུ་མིད་པའི་ཚེ་ན་སོར་བཤགས་སུ་འགྱུར་རོ། །དེ་ཡང་མཐོལ་བའི་ཚུལ་ནི། སོར་བཤགས་བྱུང་བའི་དགེ་སློང་དེས་གྲོང་གི་ཕྱི་རོལ་ཀུན་དགའ་ར་བ་གཙུག་ལག་ཁང་དུ་སོང་སྟེ། དགེ་སློང་གང་འཁོད་པ་རྣམས་ལ་ཚེ་དང་ལྡན་པ་དག་བདག་ལ་སྨད་པའི་གནས་ཚུལ་དང་མི་མཐུན་པས་མི་རིགས་པ་སྨྲེ་སྔགས་འདོན་པའི་སྒོ་ནས་སོ་སོར་བཤགས་པར་བྱ་བ་བྱུང་གིས་ཆོས་དེ་ཚེ་དང་ལྡན་པའི་མདུན་དུ་སོ་སོར་འཆགས་སོ་ཞེས་སོ་སོར་བཤགས་པར་བྱ་སྟེ། ཆོས་འདི་ནི་སོ་སོར་བཤགས་པར་བྱ་བའོ། །གཉིས་པ་ནི། གང་བྱས་པས་གྲལ་རིམས་སུ་མ་ཕེབས་པར་འབྲིམ་དུ་འཇུག་པ་མ་བཟློག་པར་ཟ་བའི་སོར་བཤགས་སུ་འགྱུར་ཞེ་ན། ཆོས་འདི་པའི་དགེ་སློང་གསུམ་ཡན་ཆད་ཀྱི་རབ་ཏུ་མང་པོ་བྲམ་ཟེ་དང་ཁྱིམ་བདག་གི་ཁྱིམ་རྣམས་སུ་ཟན་གྱི་ཕྱིར་མགྲོན་
དུ་བོས་ནས་ཟན་བཟའ་བ་ལྔ་དང་བཅའ་བ་ལྔ་ཟ་ཚེ་ན་གལ་ཏེ་སྦོམ་དགའ་མོ་ལྟ་བུའི་དགེ་སློང་མ་ཞིག་དགེ་སློང་འདི་ལ་ནི་བཅའ་བྱིན་ཅིག །འདི་ལ་ནི་འབྲས་ཆན་བྱིན་ཅིག །འདི་ལ་ནི་སྲན་ཚོད་བྱིན་ཅིག །འདི་ལ་ནི་ཡང་བྱིན་ཅིག་ཅེས་བསྒོ་ཞིང་འདུག་ན། སྦོམ་དགའ་མོ་ལྟ་བུའི་དགེ་སློང་མ་དེ་ལ་ཆོས་འདི་པའི་དགེ་སློང་རྣམས་ཀྱིས། སྲིང་མོ་ཁྱོད་དང་དགེ་སློང་རྣམས་ཟན་ཟ་བའི་བར་དུ་རེ་ཞིག་ཙ་བ་ཙ་བ་མ་བྱེད་པར་སྡོད་ཅིག་ཅེས་བསྒོ་བར་བྱའོ། །གལ་ཏེ་དགེ་སློང་གཅིག་གིས་ཀྱང་དགེ་སློང་མ་དེ་ལ་སྡོད་ཅིག་ཅེས་དེ་སྐད་སྨྲ་བ་སྤོབས་ན་ཟས་མགུལ་དུ་མིད་པའི་ཚེ་ན་སོ་སོར་བཤགས་སུ་འགྱུར་རོ། །མཐོལ་བའི་ཚུལ་ནི། སོར་བཤགས་བྱུང་བའི་དགེ་སློང་དེ་དག་ཐམས་ཅད་ཀྱིས་ཞེས་སོགས་ཤེས་པར་བྱའོ། །གསུམ་པ་ནི། གང་བྱས་པས་བསླབ་པ་དྲལ་ཏེ་ཁྱིམ་དུ་འཇུག་པའི་སོར་བཤགས་སུ་འགྱུར་ཞེ་ན། རྒྱུན་ཞུགས་དང་། ཕྱིར་འོང་དང་། ཕྱིར་མི་འོང་ལྟ་བུའི་སློབ་མ་དག་གི་ཁྱིམ་གང་དག་སངས་རྒྱས་ཀྱི་ཉན་ཐོས་ཀྱིས་དགེ་འདུན་གྱི་ཁྱིམ་གྱི་བསླབ་པའི་སྡོམ་པས་བསྡམས་པར་གྱུར་ལ། ཡང་དྲུག་སྡེ་ལྟ་བུའི་དགེ་སློང་གང་རྒྱུན་ཞུགས་ལྟ་བུའི་སློབ་པ་དག་གི་ཁྱིམ་གང་དག་སངས་རྒྱས་ཀྱི་ཉན་ཐོས་ཀྱིས་དགེ་འདུན་གྱི་ཁྱིམ་གྱི་བསླབ་པའི་སྡོམ་པས་བསྡམས་པར་ལྟ་བུ་དག་ཏུ་ཁྱིམ་གྱི་བསླབ་པའི་སྡོམ་པ་མ་བྱིན་པའི་སྔར་མགྲོན་དུ་མ་བོས་པར་ཁྱིམ་དུ་སོང་སྟེ། དགེ་སློང་རང་གི་ལག་གིས་བཅའ་བ་དང་བཟའ་བ་བྱིན་ལེན་བླངས་ནས། འཆའ་འམ་ཟན་མིད་པ་ན་སོར་བཤགས་སུ་འགྱུར་རོ། །སོར་བཤགས་བྱུང་བའི་དགེ་སློང་དེས་ཞེས་སོགས་སྔར་བཞིན་ནོ། །བཞི་པ་ནི། གང་བྱས་པས་ནགས་བརྟག་པ་ལས་གྱུར་པའི་སོར་བཤགས་སུ་འགྱུར་ཞེ་
ན། སངས་རྒྱས་ཀྱི་ཉན་ཐོས་ཀྱི་དགེ་འདུན་གྱི་གནས་མལ་ཏེ་གཙུག་ལག་ཁང་གྲོང་ལས་རྒྱང་གྲགས་ཀྱིས་འཕགས་པའི་དགོན་པ་གང་དག་ཆོམ་རྐུན་དང་གཡོ་ཅན་ལ་སོགས་པའི་དོགས་པ་དང་བཅས་པར་གྲགས་པ་དང་། སེང་གེ་ལ་སོགས་པའི་འཇིགས་པ་དང་བཅས་པར་གྲགས་པ་དང་། སྦྲང་བུ་དང་ཤ་སྦྲང་ལ་སོགས་པའི་འཇིགས་པ་ཐ་དད་པས་འཇིགས་སུ་རུང་བ་དང་བཅས་པར་གྱུར་ལ། ཡང་དྲུག་སྡེ་ལྟ་བུའི་དགེ་སློང་གང་དགེ་འདུན་གྱི་གནས་མལ་དགོན་པ་དག་དོགས་པ་དང་བཅས་པར་གྲགས་པ། འཇིགས་པ་དང་བཅས་པར་གྲགས་པ། འཇིགས་པ་ཐ་དད་པས་འཇིགས་སུ་རུང་བ་དང་བཅས་པར་གྲགས་པ་དེ་ལྟ་བུ་དག་ཏུ་སྔར་ནགས་མ་མྱུལ་བར་ཀུན་དགའ་ར་བའི་ཕྱི་རོལ་གྱི་དགོན་པར་བཟའ་བ་ལྔ་དང་། བཅའ་བ་ལྔ་བྱིན་ལེན་བླངས་ཏེ་འཆའམ་ཟན་མགུལ་དུ་མིད་པ་ན་སོར་བཤགས་སུ་འགྱུར་རོ། །དགེ་སློང་དེས་ཞེས་སོ། །བཞི་པ་ནི། ཚེ་དང་ལྡན་པ་ཞེས་སོ། །ལྔ་པ་ནི། སོ་སོར་བཤགས་པ་བཏོན་པ་དེ་ལ་ཞེས་སོ། །བཞི་པ་བསླབ་པར་བྱ་བ་མང་པོ་གདོན་པ་ལ། སོ་སོར་བཤད། མཇུག་བསྡུ། རྣམ་གཞག་བསྒྲག་པའོ། །དང་པོ་ལ་དགུ་སྟེ། གོས་ལས་གྱུར་པའི་སྡེ། ཁྱིམ་དུ་འགྲོ་བའི་སྡེ། ཁྱིམ་དུ་འདུག་པའི་སྡེ། ཟས་བླང་བའི་སྡེ། ཟས་ཟ་བའི་སྡེ། ལྷུང་བཟེད་ལ་སྤྱོད་པའི་སྡེ། ཆོས་བསྟན་པའི་སྡེ། བསྒྲུབ་པའི་སྡེ། རྒྱུ་བའི་སྡེའོ། །དང་པོ་ལ་སྡོམ་གྱིས་མདོར་བསྟན། བསླབ་པར་བྱ་བ་གདོན་པའི་ལུང་དབོག །སོ་སོའི་མཚན་ཉིད་དོ། །དང་པོ་ནི་གོས་ལས་གྱུར་པའི་བསླབ་པར་བྱ་བ་སྡོམ་དུ་བསྡུས་པ་ཆོས་ཅན། བཅུ་ཡོད་དེ། ཤམ་ཐབས་ལ་ནི་རྣམ་པ་བདུན་དང་། སྟོད་གཡོགས་ཆོས་གོས་ལ་ཡང་རྣམ་པ་གསུམ་རྣམས་སུ་ཡོད་པའི་ཕྱིར། གཉིས་པ་ནི། འདུལ་
བའི་སྡེ་སྣོད་ཡི་གེར་མི་འབྲི་བ་ཡིན་ན་བསླབ་པར་བྱ་བ་མང་པོ་འདོན་པ་གང་ལས་ཤེས་ཤེ་ན། སྐྱོན་མེད་དེ། ཚེ་དང་ལྡན་པ་དག་འཇིག་རྟེན་དང་མི་འགལ་བ་དང་། འདུལ་བ་དང་མི་འགལ་བར་བསླབ་པར་བྱ་བའི་ཆོས་མང་པོ་བརྒྱ་དང་བཅུ་གཉིས་པོ་འདི་དག་ནི་ཟླ་བ་ཕྱེད་ཅིང་སོ་སོར་ཐར་པའི་མདོ་གདོན་པའི་ཚེ་འདུལ་བ་འཛིན་པའི་ཁ་ཏོན་ལས་འབྱུང་བའི་ཕྱིར་རོ། །གསུམ་པ་ནི། ཤམ་ཐབས་ཀྱི་མ་མཐའ་ཁ་མཉམ་པོར་འདུག་པའི་ཟླུམ་པོར་བགོ་བར་བསླབ་པར་བྱའོ། །དེ་ཡང་ཤམ་ཐབས་ཧ་ཅང་བརྩེངས་པ་པུས་གོང་དུ་སླེབ་པ་མ་ཡིན་པ་དང་། ཤམ་ཐབས་ཧ་ཅང་འཇོལ་བ་ལོང་བུར་སླེབ་པ་མ་ཡིན་པ་དང་། ཤམ་ཐབས་ཀྱི་སྣ་ཕྱོགས་གཅིག་འཕྱང་བའི་གླང་པོ་ཆེའི་སྣ་ལྟར་ནར་བ་མ་ཡིན་པ་དང་། ཤམ་ཐབས་ཏ་ལའི་ལོ་མ་ལྟར་ལྟེ་བའི་གོང་དུ་བལྟབ་པ་མ་ཡིན་པ་དང་། ཤམ་ཐབས་འབྲུའི་ཕུར་མ་ལྟར་སྐ་རགས་ཀྱི་བར་དུ་ཐུམ་བུར་འདུག་པ་མ་ཡིན་པ་དང་། ཤམ་ཐབས་ལྟེ་བའི་འོག་ཏུ་སྦྲུལ་མགོའི་གདེངས་ཀ་ལྟར་ཕྱིར་བྱུང་བ་མ་ཡིན་པར་བགོ་བར་བསླབ་པར་བྱའོ། །འདི་དག་ལས་འདས་ན་ཉེས་བྱས་ཀྱི་དངོས་གཞིར་འགྱུར་རོ། །ཆོས་གོས་བླ་གོས་དང་སྣམ་སྦྱར་མ་མཐའི་ཁ་མཉམ་པའི་ཟླུམ་པོར་བགོ་བར་བསླབ་པར་བྱའོ། །དེ་ཡང་ཆོས་གོས་ཧ་ཅང་བརྩེངས་པ་པུས་གོང་དུ་སླེབ་པ་མ་ཡིན་པ་དང་། ཆོས་གོས་ཧ་ཅང་འཇོལ་བ་ལོང་བུར་སླེབ་པ་མ་ཡིན་པར་བགོ་བར་བསླབ་པར་བྱའོ། །དེ་ལས་འདས་ན་ཉེས་བྱས་སོ། །གཉིས་པ་ལ་གཉིས་ལས། དང་པོ་སྡོམ་གྱི་སྒོ་ནས་མདོར་བསྟན་པ་ནི། ཁྱིམ་དུ་འགྲོ་བའི་སྡེ་སྡོམ་དུ་བསྡུས་པ་ཆོས་ཅན། ཉི་ཤུ་ཡོད་དེ། ཤིན་ཏུ་བསྡམས་པ་ལ་སོགས་ལྔ། མགོ་གཡོགས་ལ་སོགས་རྣམ་པ་ལྔ། མཆོང་ལ་སོགས་པ་རྣམ་པ་ལྔ་དང་། ལུས་ལ་སོགས་པ་རྣམ་པ་ལྔ་
རྣམས་སུ་ཡོད་པའི་ཕྱིར། གཉིས་པ་སོ་སོའི་མཚན་ཉིད་ནི། ཁྱིམ་པའི་ཁྱིམ་དུ་འགྲོ་བའི་ཚེ་ལུས་ངག་མ་ཡེངས་པར་དྲན་ཤེས་བཞིན་གྱིས་ཤིན་ཏུ་བསྡམས་ཤིང་འགྲོ་བར་བསླབ་པར་བྱའོ། །ཤམ་ཐབས་དང་ཆོས་གོས་ལེགས་པར་བགོས་པ་དང་། ཅ་ཅོའི་སྒྲ་བསྐྱུངས་པ་དང་། མིག་གཡེང་བར་མི་བྱ་བ་དང་། མིག་གཉའ་ཤིང་གང་ཙམ་དུ་བལྟ་ཞིང་ཁྱིམ་གཞན་དུ་འགྲོ་བར་བསླབ་པར་བྱའོ། །མགོ་རས་ལ་སོགས་པས་མི་གཡོག་པ་དང་། ཆར་ལ་སོགས་པའི་གནོད་པར་བྱུང་ཡང་འདོམས་སྣང་བའི་གོས་མི་རྫེ་བ་དང་། གོས་ཕྲག་པ་གཉིས་ཀར་མི་གཟར་བ་དང་ལག་པ་གཡས་པ་མདུན་ནས་དཔུང་མགོ་གཡོན་པར་བཞག །དེ་བཞིན་གཡོན་པའང་བྱས་པའི་ལག་པ་གཉའ་གོང་དུ་མི་བསྣོལ་བ་དང་། ལག་པ་གཉིས་ཐད་ཀར་བརྐྱང་སྟེ་སོར་མོ་གཉིས་ལྟག་པར་མི་བསྣོལ་བར་ཁྱིམ་གཞན་དུ་འགྲོ་བར་བསླབ་པར་བྱའོ། །ཁྱིམ་པའི་ཁྱིམ་དུ་འགྲོ་བའི་ཚེ་རང་དགར་མི་མཆོང་བ་དང་། རྐང་པ་བརྐྱང་བསྐུམ་དུ་འདུག་པའི་མི་བརྐྱང་པ་དང་། ཙོག་བུས་མ་ཡིན་པ་དང་། རྐང་པའི་བྲང་བས་མ་ཡིན་པ་དང་། ལག་པ་གཉིས་རྐེད་པར་བཞག་སྟེ་གྲུ་མོ་སྙུང་པོར་བྱས་པའི་དཀུར་མི་བརྟན་པར་ཁྱིམ་གཞན་དུ་འགྲོ་བར་བསླབ་པར་བྱའོ། །ཁྱིམ་པའི་ཁྱིམ་དུ་འགྲོ་བའི་ཚེ་ལུས་མི་བསྒྱུར་བ་དང་། ལག་པ་མི་སྐྱོག་པ་དང་། ཕྲག་པ་གང་ཟག་གཞན་དང་མི་སྤྲད་པ་དང་། ལག་པ་གཞན་དང་མི་སྦྲེལ་བར་ཁྱིམ་གཞན་དུ་འགྲོ་བར་བསླབ་པར་བྱའོ། །གསུམ་པ་ལ་གཉིས་ལས། དང་པོ་ནི། ཁྱིམ་དུ་འདུག་པ་ལ་བསླབ་པར་བྱ་བར་སྡོམ་དུ་བསྡུས་པ་ཆོས་ཅན། དགུ་ཡོད་དེ། མ་བསྒོ་བར་སྟན་ལ་འདུག་པར་མི་བྱ་བ་ལ་སོགས་པ་རྣམས་སུ་ཡོད་པའི་ཕྱིར། གཉིས་པ་སོ་སོའི་མཚན་ཉིད་ནི། ཁྱིམ་བདག་ལ་སོགས་པས་མ་བསྒོ་བར་ཁྱིམ་གཞན་དུ་སྟན་ལ་མི་འདུག་པར་
བསླབ་པར་བྱའོ། །སྟན་ལ་སྲོག་ཆགས་སོགས་ཡོད་མེད་མ་བརྟག་པར་སྟན་ལ་མི་འདུག་པ་དང་། གྱ་ཚོམ་དུ་ལུས་ཐམས་ཅད་ལྕིད་ཀྱིས་མི་དབབ་པ་དང་། རྐང་པའི་སྟེང་དུ་རྐང་པ་བཞག་པའི་རྐང་པ་མི་བསྣོལ་བ་དང་། བརླའི་སྟེང་དུ་བརླ་བཞག་པའི་མི་བསྣོལ་བ་དང་། རྐང་པའི་ལོང་བུའི་སྟེང་དུ་ལོང་བུ་མི་བཞག་པ་དང་། ཁྲི་ལ་སོགས་པའི་སྟེང་དུ་རྐང་པ་མི་དགུག་པ་དང་། བརླ་གཉིས་གཤིབས་ཏེ་རྐང་པ་སོ་སོར་བཀྱེད་པའི་རྐང་པ་མི་གདང་བ་དང་། འདོམས་མི་སྣང་བར་ཁྱིམ་གཞན་དུ་སྟན་ལ་འདུག་པར་བསླབ་པར་བྱའོ། །བཞི་པ་ལ་གཉིས་ལས། དང་པོ་སྡོམ་ནི། ཟས་བླང་བའི་བསླབ་བྱ་སྡོམ་དུ་བསྡུས་པ་ཆོས་ཅན། བརྒྱད་ཡོད་དེ། བྱིན་ལེན་བྱ་བ་སོགས་བརྒྱད་རྣམས་སུ་ཡོད་པའི་ཕྱིར། གཉིས་པ་སོ་སོའི་མཚན་ཉིད་ནི། ལེགས་པར་བྱིན་ལེན་བྱས་ནས་ཟས་བླང་བར་བསླབ་པར་བྱའོ། །མུ་དང་ཁ་ད་ཆད་དེ་ལྷུང་བཟེད་ཀྱི་ཁ་དང་མཉམ་དུ་མ་ཡིན་པ་དང་། ཚོད་མ་བྱན་དང་ཟན་མཉམ་པར་མ་ཡིན་པ་དང་། གྲལ་ཐར་ཆགས་སུ་དང་། ལྷུང་བཟེད་ལ་མིག་ལྟ་བ་དང་། བཅའ་བ་དང་བཟའ་བ་མ་འོངས་པར་ལྷུང་བཟེད་མི་བཟེད་པ་དང་། ཡང་ཟན་འདོད་པའི་ཕྱིར་འབྲས་ཆན་གྱིས་ཚོད་མ་བྱ་ན་མི་དགབ་པ་དང་། ཚོད་མས་འབྲས་ཆན་མི་དགབ་པ་དང་། བཅའ་བ་དང་བཟའ་བའི་ལྷུང་བཟེད་མི་བཟུང་བར་བསླབ་པར་བྱའོ། །ལྔ་པ་ལ་གཉིས་ལས། དང་པོ་སྡོམ་གྱི་སྒོ་ནས་མདོར་བསྟན་པ་ནི། ཟས་ལ་སྤྱོད་པའི་སྡེ་སྡོམ་དུ་བསྡུས་པ་ཆོས་ཅན། ཉེར་གཅིག་ཡོད་དེ། ཟས་ལ་ལེགས་པར་བྱ་བ་དྲུག་ཙུག་ཙུག་ལ་སོགས་རྣམ་པ་ལྔ། འབྲུ་ནས་ཐ་དད་བྱེད་པ་ལྔ། ལག་པ་བལྡག་ལ་སོགས་པ་ལྔ་རྣམས་སུ་ཡོད་པའི་ཕྱིར། གཉིས་པ་སོ་སོའི་མཚན་ཉིད་ནི། གནས་ཐམས་ཅད་དུ་ལེགས་པར་ཟས་པ་བཟའ་བར་བསླབ་པར་བྱའོ། །ཁམ་
ཧ་ཅང་ཆུང་བ་མ་ཡིན་པ་དང་། ཁམ་ཧ་ཅང་ཆེན་པོ་མ་ཡིན་པ་དང་། ཁམ་རན་པ་དང་། ཁམ་མ་གཟས་པར་ཁ་མི་གདང་བ་དང་། ཁ་ཁམ་གྱིས་བཀང་སྟེ་མི་སྨྲ་བར་བསླབ་པར་བྱའོ། །ཟས་ཟ་བ་ཙུག་ཙུག་མི་བྱ་བ་དང་། ཅག་ཅག་མི་བྱ་བ་དང་། ཧུ་ཧུ་མི་བྱ་བ་དང་། ཕུ་ཕུ་མི་བྱ་བ་དང་། ལྕེ་ཕྱིར་ཕྱུང་སྟེ་ཟས་མི་ཟ་བར་བསླབ་པར་བྱའོ། །ཟས་ཟ་བ་ན་འབྲས་ལ་སོགས་པའི་འབྲུ་རེ་རེ་ནས་ཐ་དད་དུ་མི་བྱ་བ་དང་། ཟས་འདི་ཁའོ་ཞེས་པ་ལྟ་བུའི་འཕྱས་མི་གདགས་པ་དང་། མཁུར་བ་གཡས་གཡོན་མི་སྤོ་བ་དང་། ལྕེས་རྐན་མི་གཏོགས་པ་དང་། ཁམ་འཕྲོ་སོས་མི་གཅད་པར་ཟས་བཟའ་བར་བསླབ་པར་བྱའོ། །ཟས་བཟའ་བའི་ཚེ་ལག་པ་ལ་ཟས་ཆགས་པ་མི་བལྡག་པ་དང་། ལྷུང་བཟེད་ལ་ཟས་ཆགས་པ་ལྕེ་ལ་སོགས་པས་མི་འབྱོག་པ་དང་། ལག་པ་ལ་ཟས་ཆགས་པ་མི་སྤྲུག་པ་དང་། ཟས་དང་བཅས་པའི་ལྷུང་བཟེད་མི་བསྐྱམ་པ་དང་། ཟས་མཆོད་རྟེན་འདྲ་བར་བྱས་ནས་བཅོམ་སྟེ་ཟས་མི་ཟ་བར་བསླབ་པར་བྱའོ། །དྲུག་པ་ལ་གཉིས་ལས་དང་པོ་སྡོམ་གྱིས་མདོར་བསྟན་པ་ནི། ལྷུང་བཟེད་ལ་སྤྱོད་པའི་སྡེ་སྡོམ་དུ་བསྡུས་པ་ཆོས་ཅན། བཅུ་བཞི་ཡོད་དེ། འཕྱ་ལ་སོགས་པ་རྣམ་པ་བཞི། ལྷུང་བཟེད་ལ་ཡང་རྣམ་པ་བཅུ་རྣམས་སུ་ཡོད་པའི་ཕྱིར་རོ། །གཉིས་པ་སོ་སོའི་མཚན་ཉིད་ནི། དྲུང་ན་འདུག་པའི་དགེ་སློང་གཞན་གྱི་ལྷུང་བཟེད་ལ་འཕྱས་གདགས་པའི་ཕྱིར་མི་ལྟ་བར་བསླབ་པར་བྱ། ལག་པ་ཟས་དང་འབགས་པས་ཆུ་སྣོད་མི་བཟུང་བར་བསླབ་པར་བྱ། དྲུང་ན་འདུག་པའི་དགེ་སློང་གཞན་ལ་ཟས་དང་འབགས་པའི་ཆུས་མི་གཏོར་བར་བསླབ་པར་བྱ། ཁྱིམ་པ་འདུག་པ་ལ་མི་བསྒོ་བར་ཆུ་ཟས་དང་འབགས་པ་ཁྱིམ་གཞན་དུ་མི་དབོ་བར་བསླབ་པར་བྱའོ། །ལྷུང་བཟེད་ཀྱི་ནང་དུ་ཟས་ཀྱི་ལྷག་མ་ངན་པ་བླུགས་ཏེ་མི་དོར་བར་བསླབ་པར་བྱ། ལོ་མ་ཡན་ཆད་སོགས་ཀྱི་འོག་གཞི་མེད་པའི་ས་
ཕྱོགས་སུ་ལྷུང་བཟེད་མི་བཞག་པར་བསླབ་པར་བྱའོ། །ངོས་ཆད་པའི་གད་ཁ་མ་ཡིན་པ་དང་། བྱིན་གྱིས་གཞོལ་པའི་གཡང་ས་མ་ཡིན་པ་དང་། བར་རིམ་ལྟ་བུའི་དཀན་གཟར་པོ་མ་ཡིན་པར་ལྷུང་བཟེད་གཞག་པར་བསླབ་པར་བྱ། ཆག་པ་སྤང་བའི་ཕྱིར་འགྲེང་སྟེ་ལྷུང་བཟེད་མི་བཀྲུ་བར་བསླབ་པར་བྱའོ། །གད་ཁ་མ་ཡིན་པ་དང་། གཡང་ས་མ་ཡིན་པ་དང་། དཀན་གཟར་པོ་མ་ཡིན་པར་ལྷུང་བཟེད་བཀྲུ་བར་བསླབ་པར་བྱ། འབབ་ཆུ་དྲག་པོའི་རྒྱུན་ལས་བཟློག་སྟེ། ལྷུང་བཟེད་ཀྱིས་ཆུ་མི་བཅུ་བར་བསླབ་པར་བྱའོ། །བདུན་པ་ལ་གཉིས་ལས། དང་པོ་སྡོམ་ནི་ཉེར་དྲུག་ཡོད་དེ། འགྲེང་བར་བྱེད་ལ་སོགས་པ་ལྔ། མགོ་གཡོགས་ལ་སོགས་རྣམ་པ་ལྔ། །དོ་ཀེར་ཅན་ལ་སོགས་པ་ལྔ། །གླང་ཆེན་ལ་སོགས་ཞོན་པ་ལྔ། །ལག་ན་འཁར་བ་ལ་སོགས་དྲུག་རྣམས་སུ་ཡོད་པའི་ཕྱིར། གཉིས་པ་སོ་སོའི་མཚན་ཉིད་ནི། ཉན་པ་པོ་མི་ན་བར་འདུག་པ་ལ་འཆད་པ་པོ་འགྲེང་སྟེ་ཆོས་མི་བཤད་པར་བསླབ་པར་བྱའོ། །ཉན་པ་པོ་མི་ན་བར་ཉལ་བ་ལ་འཆད་པ་པོ་འདུག་སྟེ་ཆོས་མི་བཤད་པར་བསླབ་པར་བྱའོ། །ཉན་པ་པོ་མི་ན་བར་སྟན་མཐོན་པོ་དང་བཟང་པོ་ལ་འདུག་པ་ལ། འཆད་པ་པོ་སྟན་དམའ་བ་དང་། ངན་པ་ལ་འདུག་སྟེ་ཆོས་མི་བཤད་པར་བསླབ་པར་བྱའོ། །ཉན་པ་པོ་མི་ན་བར་མདུན་དུ་འགྲོ་བ་ལ་འཆད་པ་པོ་ཕྱི་ནས་འགྲོ་ཞིང་ཆོས་མི་བཤད་པར་བསླབ་པར་བྱའོ། །ཉན་པ་པོ་མི་ན་བར་ལམ་ནས་འགྲོ་བ་ལ་འཆད་པ་པོ་ལམ་གྱི་འགྲམ་ནས་འགྲོ་ཞིང་ཆོས་མི་བཤད་པར་བསླབ་པར་བྱའོ། །ཉན་པ་པོ་མི་ན་བར་རས་ལ་སོགས་པས་མགོ་གཡོགས་པ་དང་། གོས་བརྫེས་པ་དང་། གོས་ཕྲག་པ་གཉིས་ཀ་ལ་གཟར་བ་དང་། ལག་པ་གཉིས་གཉའ་གོང་དུ་བསྣོལ་བ་དང་། ལག་པ་གཉིས་ལྟག་པར་བསྣོལ་བ་ལ་ཆོས་མི་བཤད་པར་བསླབ་པར་བྱའོ། །ཉན་པ་པོ་མི་ན་བར་རལ་པའི་ཐོར་ཅོག་བྱས་
པའི་སྐྲ་དོ་ཀེར་ཅན་དང་། ཞྭ་གྱོན་པ་དང་། མགོ་ལ་དར་གྱི་ཅོད་པན་ཅན་དང་། མགོ་ལ་མེ་ཏོག་ཕྲེང་བ་ཅན་དང་། མགོ་ལ་ཕྲེང་བ་ལ་སོགས་པས་དཀྲིས་པ་ལ་ཆོས་མི་བཤད་པར་བསླབ་པར་བྱའོ། །ཉན་པ་པོ་མི་ན་བར་གླང་པོ་ཆེ་ལ་ཞོན་པ་དང་། རྟ་ཞོན་པ་དང་། འདོ་ལེ་ལྟ་བུའི་ཁྱོགས་ན་འདུག་པ་དང་། གཡག་ལྟ་བུའི་བཞོན་པའི་སྟེང་དུ་འདུག་པ་དང་། མཆིལ་ལྷམ་གྱོན་པ་ལ་ཆོས་མི་བཤད་པར་བསླབ་པར་བྱའོ། །ཉན་པ་པོ་མི་ན་བར་ལག་ན་འཁར་བ་ཐོགས་པ་དང་། ལག་ན་མཚོན་ན་ཐོགས་པ་དང་། ལག་ན་རལ་གྲི་ཐོགས་པ་དང་། ལག་ན་དགྲ་ཆ་ཐོགས་པ་དང་། གོ་ཆ་ལུས་ལ་གྱོན་པ་ལ་ཆོས་མི་བཤད་པར་བསླབ་པར་བྱའོ། །བརྒྱད་པ་ལ་གཉིས་ལས། དང་པོ་སྡོམ་ནི། བསྒྲུབ་པའི་སྡེ་ལ་བཞི་ཡོད་དེ། ན་བ་རྣམ་པ་བཞི་རྣམས་སོ། །གཉིས་པ་སོ་སོའི་མཚན་ཉིད་ནི། དགེ་སློང་མི་ན་བར་འགྲེང་སྟེ་བཤང་གཅི་མི་བྱ་བར་བསླབ་པར་བྱའོ། །མི་ན་བར་ཆུས་ཐམས་ཅད་ཁྱབ་པ་མ་གཏོགས་ཆུའི་ནང་དུ་བཤང་གཅི་དང་། མཆིལ་མ་དང་། སྣབས་དང་། སྐྱུགས་པ་དང་། རླུགས་པ་མི་དོར་བར་བསླབ་པར་བྱའོ། །རྩྭ་སྔོན་གྱིས་ཐམས་ཅད་ཁྱབ་པ་མ་གཏོགས་མི་ན་བར་རྩྭ་སྔོན་པོ་ཡོད་པའི་ཕྱོགས་སུ་བཤང་གཅི་དང་། མཆིལ་མ་དང་། སྣབས་དང་། སྐྱུགས་པ་དང་། རླུགས་པ་མི་དོར་བར་བསླབ་པར་བྱའོ། །ནད་པ་ལ་ཉེས་པ་མེད་དོ། །དགུ་པ་རྒྱུ་བའི་ཚེ་ནི། སྲོག་ལ་གནོད་པ་བྱུང་བ་མ་གཏོགས་པར་ཤིང་ལ་མི་གང་ཙམ་ལས་མཐོ་བར་མི་འཛེག་པར་བསླབ་པར་བྱའོ། །གཉིས་པ་མཇུག་བསྡུ་བ་ནི། ཚེ་དང་ལྡན་པ་ཞེས་སོ། །གསུམ་པ་རྣམ་གཞག་བསྒྲག་པ་ནི། བསླབ་པར་བྱ་བའི་ཆོས་མང་པོ་བཏོན་པ་ལ་ཞེས་སོ། །ལྔ་པ་ལ་སྡོམ་གྱིས་མདོར་བསྟན། རྩོད་པ་ཉེར་ཞི་གདོན་པའི་ལུང་དབོག །སོ་སོའི་མཚན་ཉིད་རྒྱས་པར་བཤད། མཇུག་བསྡུ་བ། རྣམ་གཞག་བསྒྲག་པའོ། །དང་པོ་ནི། རྩོད་
པ་ཞི་བར་བྱ་བའི་ཆོས་སྡོམ་དུ་བསྡུས་པ་ཆོས་ཅན། བདུན་ཡོད་དེ། མངོན་སུམ་གྱིས་འདུལ་བ་དང་། དྲན་པས་འདུལ་བ་དང་། མ་མྱོས་པས་འདུལ་བ་དང་། དེ་བཞིན་དུ་གང་ཚུལ་ཤིང་མང་པོ་སྦྱིན་པ་དང་། དེའི་ངོ་བོ་ཉིད་ཚོལ་དུ་གཞུག་པ་དང་། རྩྭ་བཀྲམ་པ་ལྟ་བུ་དང་། ཁས་བླང་བར་ཡང་བྱ་བ་རྣམས་སུ་ཡོད་པའི་ཕྱིར། གཉིས་པ་ནི། འདུལ་བའི་སྡེ་སྣོད་ཡི་གེར་མི་འབྲི་བ་ཡིན་ན། རྩོད་པ་ཞི་བར་བྱ་བའི་ཆོས་བདུན་པོ་གདོན་པ་གང་ལས་ཤེས་ཤེ་ན། སྐྱོན་མེད་དེ། ཚེ་དང་ལྡན་པ་དག་འཁྲུག་ལོང་གི་རྩོད་པ་བཞི་པོ་ཞི་བར་བྱ་བའི་ཆོས་འོག་ནས་འབྱུང་བ་བདུན་པོ་འདི་དག་ནི་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་གདོན་པའི་ཚེ་འདུལ་བ་འཛིན་པའི་ཁ་ཏོན་ལས་བྱུང་བའི་ཕྱིར། གསུམ་པ་ནི། འཁྲུག་ལོང་གི་རྒྱུ་བཞི་ལས་བྱུང་བའི་རྩོད་པ་བཞི་པོ་ཞི་བར་བྱ་བའི་ཆོས་བདུན་གྱིས་ཞི་བར་བྱེད་ལ། འཁྲུག་ལོང་གི་རྒྱུ་བཞི་ནི། དངོས་པོའི་དེ་བཞིན་ཉིད་ལ་ལོག་པར་སྒྲུབ་པ་དང་། གདམས་ངག་སོགས་འཇོག་པས་གཞན་སྤོང་བ་དང་། ལྟུང་བ་དང་བཅས་པ་ཉིད་དང་། ལས་ལ་མཐུན་པ་མི་སྦྱིན་པའོ། །རྩོད་པ་བཞི་ནི། འགྱེད་ཕྱིར་རྩོད་པ་དང་། མི་གདམས་པའི་ཕྱིར་རྩོད་པ་དང་། ལྟུང་ཕྱིར་རྩོད་པ་དང་། བྱ་བའི་ཕྱིར་རྩོད་པའོ། །ཞི་བར་བྱ་བའི་ཆོས་བདུན་ནི། མངོན་སུམ་གྱིས་འདུལ་བ་དང་། མ་མྱོས་པས་འདུལ་བ་དང་། དྲན་པས་འདུལ་བ་དང་། ཚུལ་ཤིང་མང་པོ་སྦྱིན་པ་དང་། དེའི་ངོ་བོ་ཉིད་འཚོལ་དུ་གཞུག་པ་དང་། རྩྭ་བཀྲམ་པ་ལྟ་བུ་དང་། ཁས་བླང་བར་བྱའོ། །ཞི་བར་བྱེད་པའི་ཚུལ་ནི། འཁྲུག་ལོང་གི་རྒྱུ་དང་པོ་ལས་བྱུང་བའི་འབྱེད་ཕྱིར་རྩོད་པ་ལ་ནི་མངོན་སུམ་གྱིས་འདུལ་བར་འོས་པ་ལ་མངོན་སུམ་དུ་འདུལ་བ་སྦྱིན་པ་དང་། གང་ཚུལ་ཤིང་མང་པོ་སྦྱིན་པར་འོས་པ་ལ་ཚུལ་ཤིང་མང་པོ་སྦྱིན་པས་རྒྱུ་གཅིག་ཏུ་བྱ་བས་ཉེ་བར་ཞི་བར་བྱའོ། །འཁྲུག་ལོང་
གི་རྒྱུ་གཉིས་པ་ལས་བྱུང་བའི་རྩོད་པ་ལ་ནི་རྒྱུ་བཅས་མངོན་སུམ་དང་གང་མང་གི་རྒྱུ་གཅིག་ཏུ་བྱ་བ་དང་། རྒྱུ་མེད་པ་ལ་དྲན་པས་འདུལ་བར་འོས་པ་ལ་དྲན་པས་འདུལ་བ་སྦྱིན་པ་དང་། མ་མྱོས་པས་འདུལ་བར་འོས་པ་ལ་མ་མྱོས་པས་འདུལ་བས་དག་པ་སྦྱིན་པས་ཞི་བར་བྱའོ། །འཁྲུག་ལོང་གི་རྒྱུ་གསུམ་པ་ལས་བྱུང་བའི་ལྟུང་ཕྱིར་རྩོད་པ་ནི། ངོ་མི་ཤེས་པ་ལ་དེའི་ངོ་བོ་ཉིད་འཚལ་དུ་གཞུག་པར་འོས་པ་ལ་དེའི་ངོ་བོ་ཉིད་བརྩལ་བ་སྦྱིན་པ་དང་། ལྟུང་བ་ངོ་ཤེས་པ་ལ་ཕྱིར་འཕྲོས་པ་མེད་པ་ལ་ནི་གང་ཁས་བླང་བར་འོས་པ་ལ་ཁས་བླང་བར་བྱ་བ་དང་། ཕྱིར་འཕྲོས་པ་ལ་ཉི་ཚེ་བ་དང་འབྲེལ་བ་ལ་མངོན་སུམ་གྱིས་འདུལ་བ་དང་། དགེ་འདུན་མཐའ་དག་འབྲེལ་བ་རྩྭ་བཀྲམ་པ་ལྟ་བུར་འོས་པ་ལ་རྩྭ་བཀྲམ་པ་ལྟ་བུར་སྦྱིན་ནས་ཕྱིར་བཅོས་སོ། །འཁྲུག་ལོང་གི་རྒྱུ་བཞི་པ་ལས་བྱུང་བའི་བྱ་ཕྱིར་རྩོད་པ་ནི། ཞི་བར་བྱ་བའི་ཆོས་བདུན་པོ་ཐམས་ཅད་ཀྱིས་ཅི་རིགས་པར་རྒྱུད་གཅིག་ཏུ་བྱ་བ་དང་། དག་པ་སྦྱིན་པ་དང་། ཕྱིར་བཅོས་པ་དང་། ངེས་པར་འཛིན་པ་ལ་སྦྱར་བ་ཉིད་སྦྱིན་པས་ལས་ལམ་མཐུན་པ་ཉིད་སྦྱིན་དུ་གཞུག་པས་ཞི་བར་བྱའོ། །དེ་ལྟར་འཁྲུག་ལོང་གི་རྒྱུ་བཞི་བྱུང་བ་རྩོད་པ་བཞི་པོ་བྱུང་བར་གྱུར་པ་རྣམས་རྩོད་པ་ཞི་བར་བྱ་བའི་ཆོས་བདུན་པོ་འདི་དག་གིས་ཤེས་བྱ་རྣམ་པར་གཞག་པའི་ཆོས་དང་། ཚུལ་ཁྲིམས་རྣམ་པར་གཞག་པའི་འདུལ་བ་དང་། སྟོན་པའི་བསྟན་པ་བཞིན་དུ། ཆུང་འབྲིང་ཆེ་གསུམ་མམ། སྦྱོར་དངོས་མཇུག་གསུམ་མམ། ཡང་ན་ཆོས་དང་། འདུལ་བ་དང་། སྟོན་པའི་བསྟན་པའི་གནས་སྐབས་ཀྱིས་རིམ་པ་བཞིན་དུ་དུལ་བར་བྱ། ཞི་བར་བྱ། རྣམ་པར་ཞི་བར་བྱའོ། །བཞི་པ་ནི། ཚེ་དང་ལྡན་པ་ཞེས་སོ། །ལྔ་པ་ནི། རྩོད་པ་ཞི་བར་བྱ་བའི་ཆོས་བདུན་པོ་བཏོན་པ་དེ་ལ་ཞེས་སོ། །གཉིས་པ་མཇུག་བསྡུ་བ་ལ། སོ་སོར་ཐར་པའི་མདོ་
གདོན་པ་ལྔ་པོ་བཏོན་ཟིན་པར་བསྟན་པ་དང་། ཚུལ་ཁྲིམས་ཀྱི་རྒྱུ་དང་འབྲས་བུ་ལ་ནན་ཏན་བྱ་བར་གདམ་པའོ། །དང་པོ་ནི། ཚེ་དང་ལྡན་པ་དག་སོ་སོར་ཐར་པའི་མདོ་འདོན་པ་པོ་བདག་གིས་སོ་སོར་ཐར་པའི་མདོ་གདོན་པ་ལྔ་ལས་གླེང་གཞི་བཏོན་ཟིན་ཏོ། །ཕམ་པར་གྱུར་པའི་ཆོས་བཞི་དང་། དགེ་འདུན་ལྷག་མའི་ཆོས་བཅུ་གསུམ་དང་། མ་ངེས་པའི་ཆོས་གཉིས་དང་། སྤང་བའི་ལྟུང་བྱེད་ཀྱི་ཆོས་སུམ་ཅུ་དང་། ལྟུང་བྱེད་འབའ་ཞིག་པའི་ཆོས་དགུ་བཅུ་དང་། སོ་སོར་བཤགས་པར་བྱ་བའི་ཆོས་བཞི་དང་། བསླབ་པར་བྱ་བའི་ཆོས་མང་པོ་བརྒྱ་དང་བཅུ་གཉིས་དང་། རྩོད་པ་ཞི་བར་བྱ་བའི་ཆོས་བདུན་པོ་དག་བཏོན་ཟིན་ཏོ། །གཉིས་པ་ནི། བདུད་བཞི་བཅོམ་ཞིང་ལེགས་པ་དྲུག་དང་ལྡན་པས་བཅོམ་ལྡན་འདས། དེ་ཁོ་ན་ཉིད་མངོན་སུམ་དུ་རྟོགས་པས་ན་དེ་བཞིན་གཤེགས་པ། ཉོན་མོངས་པའི་དགྲ་བཅོམ་ཞིང་ཆགས་བཅས་རྣམས་ཀྱིས་མཆོད་པར་འོས་པས་དགྲ་བཅོམ་པ། ཇི་ལྟ་བ་དང་། ཇི་སྙེད་པ་མ་ལུས་པ་མངོན་སུམ་དུ་མཁྱེན་པས་ཡང་དག་པར་རྫོགས་པའི་སངས་རྒྱས་དེའི་འདུལ་བའི་མདོ་སྤྱིར་གཏོགས་ཤིང་། སོ་སོར་ཐར་པའི་མདོར་བསྡུས་པ་ནི་ལྟུང་བ་སྡེ་ཚན་ལྔ་པོ་འདི་དག་གོ །གང་སྡེ་སྣོད་གཞན་ནས་འབྱུང་བ་ཆོས་མྱ་ངན་ལས་འདས་པ་དང་རྗེས་སུ་མཐུན་པའི་ཆོས་བསླབ་པ་གསུམ་པ་དེ་ལ་ཡང་དགེ་སློང་ཁྱེད་རྣམས་སྦྱོར་བས་འདུམ་པ་དང་། དངོས་གཞིས་མཐུན་པ་དང་། མཇུག་དགའ་བ་དང་། མི་རྩོད་པ་འཇིག་རྟེན་དང་མི་འགལ་བར་སེམས་ཀུན་དུ་བསྲུང་བ་དང་། འདུལ་བ་དང་མི་འགལ་བར་དྲན་པ་དང་བག་ཡོད་པས་ངེས་པར་ལེགས་པའི་ལམ་ལ་རྣལ་འབྱོར་དུ་བྱའོ། །ལྔ་པ་བསྡུས་པའི་མཚན་ཉིད་ལ། དེ་བཞིན་གཤེགས་པ་བདུན་གྱི་གསོ་སྦྱོང་། འཁོར་བ་སྤང་བ། ཚུལ་ཁྲིམས་བསྲུང་བ། དགེ་
བ་བསྔོ་བའོ། །དང་པོ་ལ་སོ་སོའི་ངོ་བོ་དེ་ལ་ནན་ཏན་བྱ་བར་གདམས་པའོ། །དང་པོ་ལ་བདུན་ལས། སངས་རྒྱས་རྣམ་གཟིགས་ཀྱི་གསོ་སྦྱོང་ནི། སངས་རྒྱས་རྣམ་གཟིགས་ཀྱི་ཉན་ཐོས་རྣམས་ནི་ཉེས་པ་ཆུང་བར་གྱུར་ལ། འོན་ཀྱང་ཆོས་ལ་དགའ་བའི་འདོད་ཆགས་དང་། ཆོས་མ་ཡིན་པ་ལ་ཞུགས་པའི་མུ་སྟེགས་ལ་རྣམ་པར་འཚེ་བའི་ཉེས་པ་ཙམ་ཞིག་ཡོད་པས། དེ་སྤང་བའི་ཕྱིར་དུ་བཅོམ་ལྡན་འདས་དེ་ཉིད་ཀྱིས་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་འདོན་པའི་ཚེ། བཟོད་པ་དཀའ་ཐུབ་དམ་པ་བཟོད་པ་ཡི། །ཞེས་པའི་ཚིགས་བཅད་འདོན་པར་བྱེད་ལ། བཟོད་པ་ནི་དཀའ་ཐུབ་ཀྱི་དམ་པ་ཡིན་ཏེ། ཞེ་སྡང་སྦྱོང་ཞིང་སྙིང་རྗེ་སྐྱེད་པའི་ཕྱིར། བཟོད་པ་དམ་པ་སྡུག་བསྔལ་ལ་ཆོས་ཤེས་པའི་བཟོད་པ་ཡིས་ཐོབ་པའི་མྱ་ངན་ལས་འདས་པ་ནི་དངོས་པོ་ཐམས་ཅད་ཀྱི་མཆོག་ཅེས་སངས་རྒྱས་གསུང་སྟེ། འཇིག་རྟེན་པའི་ལམ་གྱིས་ཐོབ་པའི་མྱང་འདས་ནི་གཏན་དུ་བ་མ་ཡིན་ལ། འཇིག་རྟེན་ལས་འདས་པའི་ལམ་གྱིས་ཐོབ་པའི་མྱང་འདས་ནི་གཏན་དུ་བ་ཡིན་པའི་ཕྱིར། ཇི་ལྟར་ན་བཟོད་པ་དཀའ་ཐུབ་ཀྱི་དམ་པ་ཡིན་ཞེ་ན། དེ་ལྟར་ཡིན་ཏེ། རབ་ཏུ་བྱུང་བ་གཞན་ལ་ཡིད་ཀྱིས་གནོད་པ་དང་། གཞན་ལ་ལུས་ངག་གིས་འཚེ་བ་དགེ་སྦྱོང་རྫོགས་པ་མ་ཡིན་པའི་ཕྱིར། དེས་ན་རབ་ཏུ་བྱུང་བས་བཟོད་པ་བསྟེན་པར་བྱའོ། །གཉིས་པ་སངས་རྒྱས་གཙུག་ཏོར་ཅན་གྱི་གསོ་སྦྱོང་ནི། སངས་རྒྱས་གཙུག་ཏོར་ཅན་གྱི་ཉན་ཐོས་རྣམས་ནི་ཉེས་པ་ཆུང་བར་གྱུར་ལ། འོན་ཀྱང་གཞན་གྱི་ཉེས་པར་སྒྲོག་པ་མང་བའི་ཉེས་པ་ཙམ་ཞིག་ཡོད་པས་དེ་སྤང་བའི་ཕྱིར་དུ་བཅོམ་ལྡན་འདས་དེས་ཟླ་བ་ཕྱེད་ཕྱེད་ཅིང་གསོ་སྦྱོང་འདོན་པའི་ཚེ། མིག་ལྡན་འགྲོ་བ་ཡོད་པ་ཡིས་ཞེས་སོགས་ཚིགས་བཅད་ཕྱེད་དང་གསུམ་འདོན་པར་བྱེད་ལ། དཔེར་ན་མིག་དང་ལྡན་པ་འགྲོ་བ་ཡོད་པ་སྟེ་ཤེས་པ་ཡིས་ངམ་གྲོག་
དང་ཚེར་མ་སོགས་ཉམ་ང་བ་དག་སྤོང་བ་ཇི་ལྟ་བ་བཞིན་དུ་མཁས་པ་ཡང་འཚོ་བའི་འཇིག་རྟེན་འདིར་སྡིག་པ་གང་ཡིན་པ་དག་ནི་ཡོངས་སུ་སྤང་བར་བྱའོ། །ཇི་ལྟར་སྡིག་པ་སྤང་ཞེ་ན། གཞན་ལ་ཡང་དག་པ་དང་ཡང་དག་པ་མ་ཡིན་པས་སྐུར་པ་མི་གདབ་རྡེག་པ་དང་ཚིག་རྩུབ་སོགས་ཀྱིས་གནོད་པ་མི་བྱ་ཞིང་སོ་སོར་ཐར་པ་སྤོང་བ་བདུན་གྱིས་བསྡམས་པ་སྟེ་བསྲུང་བར་བྱའོ། །ལུས་ལྕི་བ་ལ་སོགས་པར་མི་འགྱུར་བའི་ཟས་ཀྱི་ཚོད་ཀྱང་རིག་པར་བྱའོ། །བས་མཐའ་སྟེ་དབེན་པའི་གནས་སུ་གནས་པར་བྱའོ། །སྒྲིབ་པ་སྤང་བའི་ཕྱིར་ལྷག་པའི་སེམས་བསམ་གཏན་བཞི་དང་། ལྷག་པའི་ཤེས་རབ་ཡང་དག་པར་སྦྱོར་བ་སྟེ་རྣལ་འབྱོར་དུ་བྱའོ། །མདོར་བསྡུས་པ་འདི་ནི་སངས་རྒྱས་ཀྱི་བསྟན་པ་ཡིན་ནོ། །གསུམ་པ་སངས་རྒྱས་ཐམས་ཅད་སྐྱོབ་ཀྱི་གསོ་སྦྱོང་ནི། སངས་རྒྱས་ཐམས་ཅད་སྐྱོབ་ཀྱི་ཉན་ཐོས་རྣམས་ནི་ཉེས་པ་ཆུང་བར་གྱུར་ལ། འོན་ཀྱང་ཁྱིམ་པ་དང་འགོགས་པ་ལ་དགའ་བའི་ཉེས་པ་ཙམ་ཞིག་ཡོད་པས། དེ་སྤང་བའི་ཕྱིར་བཅོམ་ལྡན་འདས་དེ་ཉིད་ཀྱིས་ཟླ་བ་ཕྱེད་ཕྱེད་ཅིང་གསོ་སྦྱོང་འདོན་པའི་ཚེ། ཇི་ལྟར་བུང་བ་མེ་ཏོག་ལས་ཞེས་པའི་ཚིགས་བཅད་གཅིག་འདོན་པར་བྱེད་ལ། ཇི་ལྟར་ཏེ་དཔེར་ན་སྲོག་ཆགས་བུང་བ་དེ་མེ་ཏོག་ལས་ཁ་དོག་དང་དྲི་ལ་མི་གནོད་པར་ཁུ་བ་བཞིབས་ནས་ནམ་མཁའ་ལ་འཕུར་བ་དེ་བཞིན་དུ་ཐུབ་པ་ཉན་ཐོས་རྣམས་ཀྱང་བསོད་སྙོམས་ཀྱི་ཕྱིར་གྲོང་དུ་རྒྱུ་བ་ན་ཁ་དོག་དང་དྲི་ལྟ་བུའི་སེམས་དང་ཚུལ་ཁྲིམས་ལ་མི་གནོད་པར་ཁུ་བ་ལྟ་བུའི་ཟས་ཙམ་ཞིག་བླངས་ནས་འགྲོ་བར་བྱའོ། །བཞི་པ་འཁོར་བ་འཇིག་གི་གསོ་སྦྱོང་ནི། སངས་རྒྱས་འཁོར་བ་འཇིག་གི་ཉན་ཐོས་རྣམས་ནི་ཉེས་པ་ཆུང་བར་གྱུར་ལ། འོན་ཀྱང་གཞན་གྱི་སྐྱོན་ཡོན་ལ་རྟོག་པའི་ཉེས་པ་
ཙམ་ཞིག་ཡོད་པས། དེ་སྤང་བའི་ཕྱིར་བཅོམ་ལྡན་འདས་དེ་ཉིད་ཀྱིས་ཟླ་བ་ཕྱེད་ཕྱེད་ཅིང་གསོ་སྦྱོང་འདོན་པའི་ཚེ། བདག་གི་རིགས་དང་མི་རིགས་ལ་ཞེས་པའི་ཚིགས་བཅད་གཅིག་འདོན་པར་བྱེད་ལ། བདག་གི་རིགས་པ་ལེགས་པར་བྱས་པ་དང་། མི་རིགས་པ་ཉེས་པ་བྱས་པ་ལ་བརྟག་པར་བྱ་སྟེ། གཞན་རྣམས་ཀྱི་མི་མཐུན་པ་མི་རིགས་པ་དང་། གཞན་དག་གི་རྫོགས་པར་བྱས་པ་དང་། རྫོགས་པར་མ་བྱས་པ་རྣམས་ལ་བརྟག་པར་བྱ་བ་མ་ཡིན་ཏེ། རྗེས་སུ་ཆགས་པ་དང་། ཁོང་ཁྲོ་བ་སྐྱེ་བའི་ཕྱིར། ལྔ་པ་གསེར་ཐུབ་ཀྱི་གསོ་སྦྱོང་ནི། སངས་རྒྱས་གསེར་ཐུབ་ཀྱི་ཉན་ཐོས་རྣམས་ནི་ཉེས་པ་ཆུང་བར་གྱུར་ལ། འོན་ཀྱང་སྲེད་པ་དང་བཅས་པའི་སེམས་བསམ་གཏན་བཞི་སྐྱེད་པ་ལ་དགའ་བའི་ཉེས་པ་ཙམ་ཞིག་ཡོད་པས་དེ་སྤང་བའི་ཕྱིར་དུ་བཅོམ་ལྡན་འདས་དེ་ཉིད་ཀྱིས་ཟླ་བ་ཕྱེད་ཕྱེད་ཅིང་གསོ་སྦྱོང་འདོན་པའི་ཚེ། ལྷག་པའི་སེམས་ལ་བག་བྱ་སྟེ་ཞེས་པའི་ཚིགས་བཅད་གཅིག་འདོན་པར་བྱེད་ལ། སྲེད་པ་དང་ལྷག་པའི་སེམས་བསམ་གཏན་བཞི་ལ་བག་བྱ་བ་སྟེ་མཆོག་འཛིན་གྱི་ལྟ་བ་དང་། ང་རྒྱལ་ཤས་ཆེ་བ་རྣམས་སྤང་བར་བྱའོ། །འོ་ན་བསླབ་པར་བྱ་བ་གང་ཞེ་ན། ཐུབ་པ་སངས་རྒྱས་བཅོམ་ལྡན་འདས་ཀྱི། ཐུབ་པ་སྐྱེད་པའི་གཞི་བདེན་པ་བཞི་པོ་རྣམས་ལ་བསླབ་པར་བྱ་སྟེ། དེ་ལྟར་བསླབས་པས་སྡུག་བསྔལ་ཉེ་བར་ཞི་བ་དྲན་པ་དང་ལྡན་པའི་རང་གི་སེམས་སྐྱོབ་པ་མྱ་ངན་མེད་པ་སྟེ་མྱང་འདས་འཐོབ་པའི་ཕྱིར་རོ། །དྲུག་པ་སངས་རྒྱས་འོད་སྲུང་གི་གསོ་སྦྱོང་ནི། སངས་རྒྱས་འོད་སྲུང་གི་ཉན་ཐོས་རྣམས་ནི་ཉེས་པ་ཆུང་བར་གྱུར་ལ། འོན་ཀྱང་སྦྱིན་པ་ལ་དགའ་བའི་དང་། དགྲ་མང་བའི་ཉེས་པ་ཙམ་ཞིག་ཡོད་པས། དེ་སྤང་བའི་ཕྱིར་དུ་བཅོམ་ལྡན་འདས་དེ་ཉིད་ཀྱིས་ཟླ་བ་ཕྱེད་ཕྱེད་ཅིང་གསོ་སྦྱོང་འདོན་པའི་ཚེ། སྦྱིན་པས་བསོད་ནམས་རབ་ཏུ་འཕེལ་ཞེས་
པའི་ཚིགས་བཅད་གཅིག་འདོན་པར་བྱེད་ལ། ཉན་ཐོས་རྣམས་ཀྱིས་སྦྱིན་པ་ཙམ་ལ་དགའ་བ་དང་། དགྲ་མང་བ་སྤང་དགོས་ཏེ། སྦྱིན་པས་འཁོར་བར་ལོངས་སྤྱོད་ཀྱི་འབྲས་བུ་བསོད་ནམས་ཀྱི་ལས་ཙམ་ཞིག་རབ་ཏུ་འཕེལ་ལ། ཚུལ་ཁྲིམས་ཀྱིས་ལུས་ངག་ལེགས་པར་བསྡམས་པས་དགྲའི་རྒྱུ་གསོད་པ་དང་། རྐུ་བའི་བློ་སོགས་སྐྱེ་བར་མི་འགྱུར་ལ། བསམ་གཏན་བཞི་པའི་དགེ་བ་དང་ལྡན་པས་ཁོང་ཁྲོ་ལ་སོགས་པའི་སྡིག་པ་སྤོང་ཞིང་། ཟག་པ་མེད་པའི་ལམ་གྱིས་ཉོན་མོངས་ཟད་པས་ལྷག་མ་དང་བཅས་པ་དང་། ལྷག་མ་མེད་པའི་མྱ་ངན་ལས་འདས་པ་གཉིས་འཐོབ་པའི་ཕྱིར་རོ། །བདུན་པ་ཤཱཀྱ་ཐུབ་པའི་གསོ་སྦྱོང་ནི། སྟོན་པ་མངོན་པར་རྫོགས་པར་སངས་རྒྱས་ནས་ལོ་བཅུ་གཉིས་ཀྱི་བར་ལ་ནི་བསྟན་པ་སྐྱོན་མེད་པར་གནས་པས་དེའི་ཚེ་ཟླ་བ་ཕྱེད་ཕྱེད་ཅིང་གསོ་སྦྱོང་འདོན་པའི་ཚེ། སྡིག་པ་ཐམས་ཅད་མི་བྱ་སྟེ་ཞེས་སོགས་ཀྱི་ཚིགས་བཅད་ཕྱེད་དང་བཞི་འདོན་པར་བྱེད་ལ། དེ་ཡང་སྡིག་པ་ཐམས་ཅད་མི་བྱ་སྟེ། །ཞེས་པས་ལྷག་པའི་ཚུལ་ཁྲིམས་ཀྱི་བསླབ་པ་དང་། དགེ་བ་ཕུན་སུམ་ཚོགས་པར་སྤྱད། །ཅེས་པས་ལྷག་པའི་ཤེས་རབ་ཀྱི་བསླབ་པ་དང་། རང་གི་སེམས་ནི་ཡོངས་སུ་འདུལ། །ཞེས་པས་ལྷག་པའི་སེམས་ཀྱི་བསླབ་པ་སྟེ། བསླབ་པ་གསུམ་པོ་འདི་ནི་སངས་རྒྱས་བཅོམ་ལྡན་འདས་ཀྱི་བསྟན་པ་ཡིན་ནོ། །ལུས་ཀྱི་སྡོམ་པ་ལེགས་པ་སྟེ། །ངག་གི་སྡོམ་པ་ལེགས་པ་ཡིན། །ཡིད་ཀྱི་སྡོམ་པ་ལེགས་པ་སྟེ། །ཐམས་ཅད་དུ་ནི་སྡོམ་པ་ལེགས། །ཀུན་ཏུ་བསྡམས་པའི་དགེ་སློང་ནི། །སྡུག་བསྔལ་ཀུན་ལས་རབ་ཏུ་གྲོལ། །ཞེས་པས་ཚུལ་ཁྲིམས་ཀྱི་འབྲས་བུ་བསྟན་ཏོ། །ཇི་ལྟར་ཚུལ་ཁྲིམས་ཀྱིས་སྡུག་བསྔལ་ལས་གྲོལ་ཞེ་ན། ངག་རྣམས་སྲུང་ཞིང་ཡིད་ཀྱིས་རབ་བསྡམས་ཏེ། །
ལུས་ཀྱིས་མི་དགེ་བ་དག་མི་བྱེད་ཅིང་། །ལས་ལམ་གསུམ་པོ་འདི་དག་རབ་སྦྱངས་ནས། །དྲང་སྲོང་གསུངས་པའི་ལམ་ནི་ཐོབ་པར་འགྱུར། །གཉིས་པ་ནི་སངས་རྒྱས་རྣམ་གཟིགས་དང་། གཙུག་ཏོར་ཅན་དང་། ཐམས་ཅད་སྐྱོབ་དང་། འཁོར་བ་འཇིག་དང་། གསེར་ཐུབ་དང་། འོད་སྲུང་དང་། ཤཱཀྱ་ཐུབ་པ་དྲང་སྲོང་གོའུ་ཏ་མའི་རྒྱུད་དུ་འཁྲུངས་པས་གོའུ་ཏ་མ། ལྷ་རྣམས་ཀྱིས་ཕྱག་བྱས་པས་ལྷའི་ལྷ། མི་ལ་སོགས་པའི་གདུལ་བྱ་འདུལ་ཞིང་ཁ་ལོ་བསྒྱུར་བ་བླ་ན་མེད་པ་འཇིག་རྟེན་སྲིད་པ་གསུམ་གྱི་མགོན་པོ་གདུལ་བྱ་དུས་ལས་མ་ཡོལ་བར་སྐྱོབ་པས་སྐྱོབ་པ་མཆོག །སངས་རྒྱས་དཔའ་བོ་བདུན་པོ་དག་སྙན་པའི་གྲགས་པ་དང་ལྡན་(༥༣བ)པ་རྣམས་ཀྱིས་སོ་སོར་ཐར་པ་འདི་ནི་དུས་དང་པོར་བྱ་བ་དང་གསོལ་བ་བྱས་ནས་གདོན་པ་ལྔ་པོ་རབ་ཏུ་རྒྱས་པར་བཏོན་པ་འདི་ལ་སངས་རྒྱས་རྣམས་དང་གང་སངས་རྒྱས་ཀྱི་ཉན་ཐོས་རྣམས་ཀྱང་གུས་ལ། འདུལ་བ་འདི་ལ་གུས་པ་དང་བཅས་པས་འཇུག་པར་འགྱུར་བས་འདུས་མ་བྱས་པ་མྱ་ངན་ལ་འདས་པ་ཐོབ་པར་འགྱུར་རོ། །གཉིས་པ་ནི། བརྩོན་འགྲུས་བརྩམས་ཤིང་འཁོར་བ་ལས་ངེས་པར་འབྱུང་བར་བྱ་ལ་སངས་རྒྱས་ཀྱི་བསྟན་པ་བདེན་པ་བཞི་ལ་འཇུག་པར་བྱ་སྟེ། འདམ་བུའི་ཁྱིམ་གླང་ཆེན་གྱིས་འཇོམས་པ་བཞིན་དུ། འཆི་བདག་གི་སྡེ་སྲིད་པ་སོགས་ནི་གཞོམ་པར་བྱའོ། །གང་ཞིག་རབ་ཏུ་བག་ཡོད་པར། འཕགས་ལམ་ཡན་ལག་བརྒྱད་ཀྱིས་བསྡུས་པའི་ཆོས་འདུལ་བ་འདི་ལ་སྤྱོད་པར་གྱུར་པ་ནི། སྐྱེ་བའི་འཁོར་བ་རབ་ཏུ་སྤངས་ནས་སྡུག་བསྔལ་ཐ་མར་རྒྱུན་ཆད་པར་འགྱུར་རོ། །གསུམ་པ་ནི། སོ་སོར་ཐར་པ་འདི་བཏོན་པས་དགེ་འདུན་གྱིས་ནི་མཐུན་པའི་གསོ་སྦྱོང་བྱས་པ་ཆོས་ཅན། དགོས་པ་ཡོད་དེ། གཅིག་ལ་གཅིག་འདོམས་ཤིང་རྗེས་སུ་སྟོན་པ་དང་། ལྟུང་བ་ལས་སློང་བས་ཕན་ཚུན་
ཚུལ་ཁྲིམས་བསྲུང་བ་དང་། བསྟན་པ་དང་འཁོར་རྣམ་བཞི་འཕེལ་བར་བྱ་བའི་ཕྱིར། ཚུལ་ཁྲིམས་བསྲུང་བ་ལ་སོགས་པ་གང་གི་ཕྱིར་ནི་མདོ་འདོན་པ་ལྔ་པོ་བཏོན་པ་དང་། གང་གི་ཕྱིར་མཐུན་པའི་གསོ་སྦྱོང་བྱས་པར་གྱུར་པའི་ཚུལ་ཁྲིམས་དེ་ནི་བསྲུང་བར་བྱ་སྟེ། དཔེར་ན་བསིལ་རུམ་གངས་ཁྲོད་ན་གནས་པའི་གཡག་རྔ་མའི་རྩེ་མོ་བག་ཡོད་པས་སྲུང་བ་ཇི་ལྟར་བཞིན་ནོ། །བཞི་པ་ནི། སོ་སོར་ཐར་པ་བཏོན་པ་ཡི། །བསོད་ནམས་གྲུབ་པ་གང་ཡོད་པ། །དེས་ནི་འཇིག་རྟེན་མ་ལུས་པ། །ཐུབ་དབང་གོ་འཕང་ཐོབ་པར་ཤོག །བཞི་པ་མཇུག་གི་དོན་ནི། སོ་སོར་ཐར་པའི་མདོ་རྫོགས་སོ།། །།ཁ་ཆེ་བྱེ་བྲག་ཏུ་སྨྲ་བའི་སློབ་དཔོན་ཛི་ན་མི་ཏྲ་དང་། ཞུ་ཆེན་གྱི་ལོཙྪ་བ་བནྡྷེ་ཅོག་རོ་ཀླུའི་རྒྱལ་མཚན་གྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། །།
ཤོག་སྟོང་།