རྒྱལ་པོ་ཟླ་བ་བཟང་པོའི་རྣམ་འཕྲུལ་ཏའི་སི་ཏུ་ཆེན་པོ་རྣམ་རྒྱལ་གྲགས་པའི་དྲི་བའི་ལན།
རྒྱལ་པོ་ཟླ་བ་བཟང་པོའི་རྣམ་འཕྲུལ་ཏའི་སི་ཏུ་ཆེན་པོ་རྣམ་རྒྱལ་གྲགས་པའི་དྲི་བའི་ལན་བཞུགས་སོ། །
ཨོཾ་བདེ་ལེགས་སུ་གྱུར་ཅིག །བསོད་ནམས་ཆེན་པོའི་དཔུང་གིས་ཕྱོགས་ཀུན་ལས། །རྣམ་པར་རྒྱལ་བའི་རྒྱལ་མཚན་མི་གཡོ་ཡང་། །གྲགས་པའི་བ་དན་དཀར་པོ་ཕྱོགས་བཅུར་གཡོ། །རིགས་ལྡན་རྒྱལ་པའི་སྤྲུལ་པ་རྒྱལ་གྱུར་ཅིག །ཟབ་ཡངས་རྒྱ་མཚོ་ཆེན་པོ་ལས་འཁྲུངས་པའི། །ཆུ་འཛིན་དཀར་པོ་གློག་གི་འདུ་འགོད་ཅན། །འབྲུག་སྒྲ་སྙན་པར་སྒྲོག་པ་ཐོས་པ་ན། །རྨ་བྱ་མགྲིན་པ་བཏེག་ནས་གར་བགྱིད་དོ། །གང་ལ་ཐེ་ཚོམ་ཅུང་ཟད་མི་མངའ་ཡང་། །གང་གི་བློ་ཡི་ནུས་པ་བརྟག་པའི་ཕྱིར། །གང་ཚེ་དྲི་བའི་བཀའ་ཡིག་བསྒྲགས་པ་ན། །གང་གིས་ལན་ཐེབས་སྙམ་དུ་དཔྱོད་པ་ཞུགས། །བཀའ་དང་དགོངས་འགྲེལ་ཞིབ་ཏུ་མ་མཐོང་ཞིང་། །ཅུང་ཟད་མཐོང་ཡང་ངེས་པ་མ་རྙེད་པས། །དྲིས་ལན་རྒྱས་པར་བརྗོད་པ་མ་སྤོབས་པས། །མདོར་བསྡུས་ཅུང་ཟད་ཕུལ་བ་འདི་ལྟར་ལགས། །ཁྲིམས་གཉིས་ཀྱི་བདག་པོ་ཆེན་པོ་རྣམ་རྒྱལ་གྲགས་པ་བཟང་པོ་པའི་བཀའ་ལུང་གིས། མངོན་རྟོགས་རྒྱན་ལས། སྦྱངས་པ་ཡང་དག་སྡོམ་བསྟེན་དང་། །ཞེས་པའི་འགྲེལ་པ་སློབ་དཔོན་སེང་གེ་བཟང་པོས་མཛད་པ་
ལས་བསོད་སྙོམས་པ་ལ་སོགས་པ་ཞེས་སྦྱངས་པའི་ཡོན་ཏན་བཅུ་གཉིས་ལ་མཛད་བྱུང་། འདི་ལྟར་གཞུང་གི་དགོངས་པ་ཡིན་ན། ཡུམ་རྒྱས་འབྲིང་བསྡུས་གསུམ་དུ་སྦྱངས་པའི་ཡོན་ཏན་གསུང་བར་རིགས་པ་ལས། མ་བྱུང་བས་འདིའི་སྐབས་ཀྱི་སློབ་དཔོན་གྱི་འགྲེལ་པ་འདི་གཞུང་གི་དགོངས་པར་ཇི་ལྟར་གནས་ཞེས་དྲི་བ་མཛད་པའི་ལན་ནི། ཡུམ་རྒྱས་འབྲིང་ལས་སྦྱངས་པའི་ཡོན་ཏན་མ་བྱུང་བ་མ་གྲུབ་སྟེ། འདིའི་ཐད་ཀྱི་ཡུམ་རྒྱས་འབྲིང་ལས། སྦྱངས་པའི་ཡོན་ཏན་གྱི་སྡོམ་པ་མི་གཏོང་བ་དང་ཞེས་གསུངས་པའི་ཕྱིར། འོན་ཏེ་འདིའི་སྐབས་ཀྱི་འགྲེལ་པ་འདི་གཞུང་གི་དགོངས་པ་མ་ཡིན་ཏེ། དེ་ཡིན་ན། འདིའི་ཐད་ཀྱི་ཡུམ་རྒྱས་འབྲིང་བསྡུས་གསུམ་ག་ལས་སྦྱངས་པའི་ཡོན་ཏན་བཅུ་གཉིས་ཞེས་འབྱུང་རིགས་པ་གང་ཞིག །འདིའི་ཐད་ཀྱི་ཡུམ་རྒྱས་འབྲིང་བསྡུས་གསུམ་ག་ལས་སྦྱངས་པའི་ཡོན་ཏན་བཅུ་གཉིས་ཞེས་མི་འབྱུང་བའི་ཕྱིར་ཞེ་ན། གཞུང་གི་དོན་གང་ཡིན་ཐམས་ཅད་ཡུམ་གསུམ་ག་ལས་དངོས་སུ་འབྱུང་མི་དགོས་ཏེ། ཡུམ་རྒྱས་འབྲིང་བསྡུས་གསུམ་གྱི་དོན་ལ། དངོས་བསྟན་སྟོང་པ་ཉིད་ཀྱི་རིམ་པ་དང་། སྦས་དོན་མངོན་པར་རྟོགས་པའི་རིམ་པ་གཉིས་ལས། མངོན་
རྟོགས་རྒྱན་འགྲེལ་པ་དང་བཅས་པར་སྦས་དོན་མངོན་པར་རྟོགས་པའི་རིམ་པ་གཙོ་བོར་གཏན་ལ་འབེབས་པའི་ཕྱིར་རོ། ། གཞན་ཡང་སྦྱངས་པ་ཡང་དག་སྡོམ་བསྟེན་དང་། ཞེས་སོགས་ས་དགུའི་ཡོངས་སྦྱོང་སྟོན་པའི་གཞུང་འདི་རྣམས་བརྒྱད་སྟོང་པའི་དགོངས་པ་མ་ཡིན་པར་ཐལ། དེ་ལྟར་ཡིན་ན་འདིའི་ཐད་ཀྱི་བརྒྱད་སྟོང་པ་ལས་འབྱུང་དགོས་པ་གང་ཞིག །བརྒྱད་སྟོང་པ་ལས་མི་འབྱུང་བའི་ཕྱིར། རྟགས་དང་པོ་དང་ཁྱབ་པ་ཁས་བླངས། འདོད་ན། ཡུམ་གསུམ་དགོངས་པ་གཅིག་མ་ཡིན་པར་འགྱུར་བ་དང་། མངོན་རྟོགས་རྒྱན་ཡུམ་གསུམ་གའི་རྒྱན་མ་ཡིན་པ་འགྱུར་རོ། །འདོད་མི་ནུས་ཏེ། སློབ་དཔོན་ཕྱོགས་ཀྱི་གླང་པོས། དེ་ལྟར་ཇི་ལྟར་བཤད་རྣམས་ཀྱི། །བརྒྱད་སྟོང་འདིར་དོན་མ་ཚང་མེད། །འདིར་གཞུང་བསྡུས་པ་ཡིན་འདོད་དེ། །དོན་ནི་ཇི་སྐད་གསུངས་དེ་ཉིད། །ཅེས་གསུངས། དེར་མ་ཟད། སྦྱངས་པ་ཡང་དག་སྡོམ་བསྟེན་ཞེས་པའི་དོན་སྦྱངས་པའི་ཡོན་ཏན་བཅུ་གཉིས་ལ་བྱེད་པ་གཞུང་གི་དགོངས་པ་མིན་པའི་རྒྱུ་མཚན་དུ། ཡུམ་རྒྱས་འབྲིང་ལས་དེ་ལྟར་མ་གསུངས་པས་ཞེས་པ་ཙམ་ཞིག་བརྗོད་པས་ཆོག་མོད། ཡུམ་བསྡུས་པ་ལས་མ་གསུངས་པ་བཀོད་པས་ཅི་ཞིག་བྱ། རྣལ་མའི་ལན་བསྟན་པར་བྱ་སྟེ། སྦྱངས་པ་ཡང་དག་སྡོམ་བསྟེན་གྱི་དོན་བསོད་སྙོམས་པ་ཉིད་ལ་སོགས་པ་སྦྱངས་པའི་ཡོན་ཏན་ཡང་དག་པར་སྡོམ་པ་ལ་བཤད་པ་དགོངས་པ་དང་མི་འགལ་བའི་རྒྱུ་མཚན་ནི། ནགས་གནས་འདོད་ཆུང་ཆོག་ཤེས་དང་། །སྦྱངས་
པ་ཡང་དག་སྡོམ་བསྟེན་དང་། །ཞེས་སོགས་ས་བཞི་པའི་ཡོངས་སྦྱོང་ལ། ཐུན་མོང་དང་ཐུན་མོང་མ་ཡིན་པ་གཉིས་གཉིས་ཡོད་དེ། ནགས་ན་གནས་པའམ་དགོན་པར་གནས་པ་ལ། ཐུན་མོང་བ་གྲོང་ལས་རྒྱང་གྲགས་ཀྱིས་འཕགས་པར་གནས་དང་། ཐུན་མོང་མ་ཡིན་པ་ཐེག་དམན་ཡིད་བྱེད་ཀྱིས་དབེན་པར་གནས་པ་གཉིས། འདོད་པ་ཆུང་བ་ལ་ཐུན་མོང་བ་རྙེད་པ་མ་ཐོབ་པ་ལ་འདོད་པ་མེད་པ་དང་། ཐུན་མོང་མ་ཡིན་པ་རང་དོན་དུ་བླ་ན་མེད་པའི་བྱང་ཆུབ་ལ་འདོད་པ་མི་སྐྱེད་པ་གཉིས། ཆོག་ཤེས་པ་ལ་ཐུན་མོང་བ་བརྙེད་པ་ཐོབ་པ་ལ་ལྷག་པར་དོན་དུ་གཉེར་བ་མེད་པ་དང་། ཐུན་མོང་མ་ཡིན་པ་རྣམ་མཁྱེན་ཐོབ་ཀྱང་རློམ་སེམས་མེད་པ་གཉིས། སྦྱངས་པའི་ཡོན་ཏན་གྱི་སྡོམ་པ་མི་གཏོང་བ་ལ། ཐུན་མོང་བ་སྦྱངས་པའི་ཡོན་ཏན་བཅུ་གཉིས་ཀྱི་སྡོམ་པ་མི་གཏོང་བ་དང་། ཐུན་མོང་མ་ཡིན་པ་ཆོས་ཟབ་མོ་ལ་ངེས་པར་རྟོག་པའི་བཟོད་པ་མི་གཏོང་བ་གཉིས་ཡོད་པ་ལས། གཉིས་ཀའང་བྱང་སེམས་ཀྱིས་བསྟེན་དགོས་པ་ལ་དགོངས་ནས། སློབ་དཔོན་གྱི་འགྲེལ་པ་འདིར་ཐུན་མོང་བ་དང་། བརྒྱད་སྟོང་འགྲེལ་ཆེན་དུ་མདོ་ནས་འབྱུང་བ་བཞིན་དུ་ཐུན་མོང་མ་ཡིན་པ་རྣམས་བསྟན། བུདྡྷ་ཤྲཱིས་ཐུན་མོང་དང་ཐུན་མོང་མ་ཡིན་པ་གཉིས་ཀ་བསྡོམས་ནས་བསྟན་ཏོ། །འོན་ཀྱང་བྱང་སེམས་ཀྱིས་སྦྱངས་པའི་ཡོན་ཏན་ཐུན་མོང་མ་ཡིན་པ་བསྟེན་དགོས་མོད། ཐུན་མོང་བ་བསྟེན་མི་དགོས་ཏེ།
སྦྱངས་པའི་ཡོན་ཏན་བཅུ་གཉིས་ནི་ཟས་གོས་གནས་མལ་ལ་ཆགས་པའི་གཉེན་པོར་བསྟེན་པ་ཡིན་ལ། བྱང་སེམས་རྣམས་དེ་གསུམ་ག་ལ་མ་ཆགས་པའི་ཕྱིར་ཞེ་ན། བསྟེན་དགོས་ཏེ། སྦྱོར་ལམ་པ་ཕྱིར་མི་ལྡོག་པའི་རྟགས་ཀྱི་སྐབས་སུ། མདོ་ལས། རབ་འབྱོར་གཞན་ཡང་བྱང་ཆུབ་སེམས་དཔའ་ཆེན་པོ་ནི་ཁེ་དང་བཀུར་སྟི་དང་ཚིགས་སུ་བཅད་པ་ལྷུར་ལེན་པ་མ་ཡིན། བསོད་སྙོམས་ལྷུར་ལེན་པ་མ་ཡིན། ཆོས་གོས་གསུམ་པའི་བར་དུ་ལྷུར་ལེན་པ་མ་ཡིན་ཞིང་། དེ་སྦྱངས་པའི་ཡོན་ཏན་བཅུ་གཉིས་ཀྱང་ཡང་དག་པར་བླངས་ནས་སྤྱོད་དོ། །ཞེས་འབྱུང་བའི་ཕྱིར་རོ། །དེས་ན་རྗེ་བཙུན་ནས་བཟུང་སྟེ་མངོན་པར་རྟོགས་པའི་རྒྱན་གྱི་མན་ངག་བར་མ་ཆད་དུ་མངའ་བའི་སློབ་དཔོན་འདི་ཆ་དེ་ཙམ་ལ་འཁྲུལ་པ་ག་ལ་སྲིད། རྒྱ་གར་བ་དང་། བོད་སྔ་མ་ཁ་ཅིག་གིས་སློབ་དཔོན་སེང་གེ་བཟང་པོ་ལ་ནན་གྱིས་སྐྱོན་བཟུངས་པ་རྣམས་ནི་ཕྲག་དོག་གིས་ཀུན་ནས་བསླངས་པ་འབའ་ཞིག་གོ་ཞེས་བདག་གི་བླ་མ་དག་གསུང་ངོ་། །གཞན་ཡང་མདོ་ནས་དངོས་སུ་གསུངས་པ་བསྟན་བཅོས་སུ་མ་བསྡུས་པ་དང་། མདོ་ནས་དངོས་སུ་མ་གསུངས་པ་བསྟན་བཅོས་སུ་བསྡུས་པ་དུ་མ་ཞིག་སྣང་བས། མདོ་ནས་དངོས་སུ་མ་གསུངས་པ་རྒྱུ་མཚན་དུ་བཀོད་ནས། དགོངས་པ་མིན་ཞེས་སྨྲ་ན། རྗེ་བཙུན་ལ་ཡང་སྐུར་བ་གདབ་དགོས་པར་འགྱུར་རོ། །སྦྱངས་པའི་ཡོན་ཏན་བཅུ་གཉིས་ལ་ཡང་སློབ་དཔོན་སོ་སོའི་ཊཱིཀ་ཕལ་ཆེ་བར། གོས་ཀྱི་དབང་དུ་བྱས་པ་དང་། ཟས་ཀྱི་དབང་དུ་བྱས་པ་ཟེར་བ་སོགས་མདོར་བསྡུས་པ་ཙམ་ལས་མ་བྱུང་། དེ་དག་སོ་སོའི་ངོས་འཛིན་ནི་སླ་ལ། གང་གིས་ན་དེར་འཇོག །གང་གིས་འཇིག །སྐབས་དབྱེ། གནང་བ་ཇི་ལྟར་ཡོད་གྲང་ཞེ་ན། སྤྱིར་སྦྱངས་པའི་ཡོན་ཏན་ལ་བཅུ་གཉིས་ཡོད་དེ། ཟས་ཀྱི་དབང་དུ་བྱས་པ་གསུམ། གོས་ཀྱི་
དབང་དུ་བྱས་པ་གསུམ། གནས་མལ་གྱི་དབང་དུ་བྱས་པ་དྲུག་ཡོད་པས་སོ། །ཟས་ཀྱི་དབང་དུ་བྱས་པ་གསུམ་ནི། བསོད་སྙོམས་པ་དང་། སྟན་གཅིག་པ་དང་། ཟས་ཕྱིས་མི་ལེན་པའོ། དང་པོ་ལ། རྙེད་པས་ཆོག་པའི་བསོད་སྙོམས་པ་དང་། མཐར་གྱིས་སློང་བའི་བསོད་སྙོམས་པ་གཉིས་སུ་ཕྱེ་ན་སྦྱངས་པའི་ཡོན་ཏན་བཅུ་གསུམ་དུ་འགྱུར། གོས་ཀྱི་དབང་དུ་བྱས་པ་གསུམ་ནི། ཆོས་གོས་གསུམ་པ་དང་། ཕྱིང་པ་པ་དང་། ཕྱག་དར་ཁྲོད་པའོ། །གནས་མལ་གྱི་དབང་དུ་བྱས་པ་དྲུག་ནི། དགོན་པ་པ་དང་། ཤིང་དྲུང་པ་དང་། བླ་གབ་མེད་པ་དང་། དུར་ཁྲོད་པ་དང་། ཙོག་བུ་པ་དང་། གཞི་ཇི་བཞིན་པའོ། །ཁ་ཅིག་ཕྱི་མ་གཉིས་སྤྱོད་ལམ་གྱི་དབང་དུ་བྱས་པར་མཛད་ནས། གནས་མལ་གྱི་དབང་དུ་བྱས་པ་བཞི་ཡིན་ཞེས་ཟེར། དེ་དག་སོ་སོའི་ངོ་བོ་གང་ཞེ་ན། རྙེད་པས་ཆོག་པའི་བསོད་སྙོམས་པ་ནི། འདྲིས་པའི་ཁྱིམ་ནས་ཟས་ཇི་ཙམ་རྙེད་པ་ཟ་བར་བྱེད་པ་ཡིན་ལ། མཐར་གྱིས་སློང་བའི་བསོད་སྙོམས་པ་ནི། ཁྱིམ་རྣམས་སུ་རིམ་གྱིས་བརྒྱུས་ཏེ་བསོད་སྙོམས་ཇི་ཙམ་རྙེད་པ་ཟ་བར་བྱེད་ཀྱི། བདག་གིས་འདི་ནས་བཟའ་བ་དང་བཅའ་བ་བཟང་པོ་ཐོབ་བོ་སྙམ་ནས་མགོ་འཕངས་བསྟོད་དེ་མི་འགྲོ་བའོ། །སྟན་གཅིག་པ་ནི། སྟན་གཅིག་པོ་དེ་ལ་འདུག་ནས་ཇི་ཙམ་ཟ་བ་དེ་ཙམ་དུ་ཟ་བར་བྱེད་ཀྱི། དེ་ལས་ལངས་ནས་མི་ཟ་བའོ། །ཟས་ཕྱིས་མི་ལེན་པ་ནི། ཟས་ཀྱི་ཕྱིར་འདུག་ནས་ཇི་ཙམ་གྱིས་བདག་འཚོ་བའི་ཟས་ཐམས་ཅད་མ་བླངས་ཀྱི་བར་དུ་མི་ཟ་ཞིང་། འདིས་འཚོའོ་སྙམ་པ་དང་ཐམས་ཅད་ཅིག་ཅར་དུ་བླངས་ནས་ཟ་བའོ། །ཆོས་གོས་གསུམ་པ་ནི། སྣམ་སྦྱར། བླ་གོས། མཐང་གོས་གསུམ་གྱིས་འཚོ་བར་བྱེད་ཅིང་། དེ་ལས་ལྷག་པའི་གོས་མི་འཆང་བ་དང་། ཕྱིང་པ་པ་ནི།
ཆོས་གོས་གསུམ་མམ། གོས་ལྷག་པ་གཅིག་འཆང་བ་ཐམས་ཅད་བལ་ལས་བྱས་པ་ཤ་སྟག་འཆང་གི །དེ་ལས་གཞན་མི་འཆང་བ་དང་། ཕྱག་དར་ཁྲོད་པ་ནི། ལམ་པོ་ཆེ་ལ་སོགས་པར་བོར་བའི་གོས་བཤང་གཅི་སོགས་ཀྱིས་རེག་པ་མི་གཙང་བ་རྣམས་བོར་ཏེ། རུང་བ་བླངས་ཏེ་བཀྲུས་དྲུབས་ཁ་དོག་བཟང་པོར་བསྒྱུར་ནས་འཆང་བར་བྱེད་པ་དང་། དགོན་པ་པ་ནི་གྲོང་དང་གྲོང་རྡལ་ལ་སོགས་པས་དབེན་པའི་དགོན་པ་དང་། ནགས་འདབས་ལ་སོགས་པར་གནས་པ་དང་། ཤིང་དྲུང་པ་ནི་ཤིང་ལྗོན་པའི་དྲུང་དུ་གནས་འཆའ་ཞིང་རྟེན་པར་བྱེད་པ་དང་། བླ་གབ་མེད་པ་ནི། སྟེང་གི་ཐོག་མ་བཀབ་ཅིང་མ་གཡོགས་པའི་ཕྱོགས་སུ་གནས་འཆའ་བར་བྱེད་པ་དང་། དུར་ཁྲོད་པ་ནི། གང་དུ་སྐྱེ་བོ་ཤིའོ་ཅོག་འདོར་བའི་དུར་ཁྲོད་དུ་གནས་འཆའ་བར་བྱེད་པ་དང་། ཙོག་པུ་པ་ནི། ཁྲིའམ། ཁྲིའུ་འམ། རྩྭའི་སྟེང་དུ་ཙོག་པུར་འདུག་སྟེ། ཁྲི་ལ་སོགས་པ་ལ་རྒྱབ་བམ། གློས་མི་རྟེན་པ་དང་། གཞི་ཇི་བཞིན་པ་ནི། རྩྭ་དང་ལོ་མ་ལ་སོགས་པ་བཏིངས་པ་ལ་མལ་འཆའ་ཞིང་། ལན་གཅིག་ཇི་ལྟར་བཏིངས་པ་ལ་མལ་འཆའ་བར་བྱེད་ཀྱི། ཡང་ཡང་དུ་བརྗེ་ཞིང་མི་འཆོས་པའོ། །དེ་དག་ནི་ཉན་ཐོས་ཀྱི་ས་ལས་ཇི་ལྟར་འབྱུང་བ་བཞིན་ཡིན་ནོ། །ཡང་ཕྱིང་པ་པ་མ་གཏོགས་པ་རྣམས་ལ་ཆུང་ངུ་འབྲིང་ཆེན་པོ་གསུམ་གསུམ་ཡོད་དེ། བསོད་སྙོམས་པ་ལ་གསུམ་ལས། ཆུང་ངུ་ནི། གྲོང་དུ་ཕྱིན་པ་ན་ཀུན་དགའ་ར་བར་རྙེད་པ་ལེན་པར་བྱེད་པ་དང་། འབྲིང་ནི། དེར་མི་ལེན་པར་ལམ་དུ་རྙེད་པ་ལེན་པར་བྱེད་པ་དང་། ཆེན་པོ་ནི། དེར་ཡང་མི་ལེན་པར་གྲོང་ཁྱེར་གྱི་ཉེ་སྐོར་དུ་ཕྱིན་ནས་རྙེད་པ་ལེན་པར་བྱེད་པའོ། །སྟན་གཅིག་པ་ཡང་གསུམ་ལས། ཆུང་ངུ་ནི། ཉན་ས་ལས་བཤད་པ་བཞིན་དང་། འབྲིང་ནི་སྟན་གཅིག་པོ་དེ་མ་སྤངས་
ཀྱི་བར་དུ་ཟོས་ནས་ཟས་བསོད་པ་བྱུང་ན་ལེན་པ་དང་། ཆེན་པོ་ནི། ཟོས་ནས་ཟས་བསོད་པ་ཡང་ལེན་པར་མི་བྱེད་པའོ། །ཟས་ཕྱིས་མི་ལེན་པ་ཡང་གསུམ་ལས། ཆུང་ངུ་ནི། ཁ་ལ་སོགས་པ་བཀྲུས་ཀྱི་བར་དུ་ལེན་པར་བྱེད་པ་དང་། འབྲིང་ནི། ཟས་ཟ་བཞིན་དུ་གཞན་གྱིས་བསྟབས་པ་ལེན་ལ། ཁ་ལ་སོགས་པ་བཀྲུས་ནས་མི་ལེན་པ་དང་། ཆེན་པོ་ནི། སྔར་ཟས་ཐམས་ཅད་ཅིག་ཅར་དུ་བླངས་ནས་ཟ་བཞིན་དུ་མི་ལེན་པའོ། །ཆོས་གོས་གསུམ་པ་ལ་ཡང་གསུམ་ལས། ཆུང་ངུ་ནི། ཆོས་གོས་གསུམ་དང་རས་ཆེན་དང་གཡན་པ་དགབ་པ་དང་སྟན་དང་གདིང་བ་འཆང་བར་བྱེད་པ་དང་། འབྲིང་ནི། རས་ཆེན་སོགས་བཞི་རང་གིས་བྱིན་གྱིས་བརླབས་པ་མི་འཆང་ལ། གཞན་གྱིས་བྱིན་གྱིས་བརླབས་པ་ལ་ལོངས་སྤྱོད་པར་བྱེད་པ་དང་། ཆེན་པོ་ནི། ཆོས་གོས་གསུམ་ཙམ་འཆང་གི །དེ་ལས་ལྷག་པ་མི་འཆང་བའོ། །ཕྱག་དར་ཁྲོད་པ་ལ་ཡང་གསུམ་ལས། ཆུང་ངུ་ནི། བྱི་བས་ཟོས་པ། ཚིག་པ། དུམ་བུར་བཅད་པ། གཞན་གྱིས་རང་གི་ཆེད་དུ་བྱས་པ་ལེན་པ་དང་། འབྲིང་ནི། རང་གི་ཆེད་དུ་བྱས་པ་མི་ལེན་པར་མ་ངེས་པ་བོར་བ་ལེན་པ་དང་། ཆེན་པོ་ནི། དེ་དག་མི་ལེན་པར། དུར་ཁྲོད་དང་། ཕྱག་དར་ཁྲོད་དང་། ལམ་པོ་ཆེར་ལྷུང་བ་ལེན་པའོ། །དགོན་པ་པ་ལ་ཡང་གསུམ་ལས། ཆུང་ངུ་ནི། གྲོང་ལས་གཞུ་འདོམ་ལྔ་བརྒྱས་བཅད་པའི་སར་གནས་པ་དང་། འབྲིང་ནི། གྲོང་ལས་གཞུ་འདོམ་སྟོང་ཕྲག་གཉིས་ཀྱིས་བཅད་པའི་སར་གནས་པ་དང་། ཆེན་པོ་ནི། གྲོང་ལས་གཞུ་འདོམ་སྟོང་ཕྲག་བརྒྱད་ཀྱིས་བཅད་པའི་སར་གནས་པའོ། །ཤིང་དྲུང་པ་ལ་ཡང་གསུམ་ལས། ཆུང་ངུ་ནི། ཤིང་དྲུང་དུ་ངོས་བཞི་པོ་ཐམས་
ཅད་སྐྱོར་བར་གནས་པ་དང་། འབྲིང་ནི། དེར་ངོས་ཅུང་ཟད་སྐྱོར་བ་གནས་པ་དང་། ཆེན་པོ་ནི། དེར་ངོས་ཐམས་ཅད་མ་སྐྱོར་བར་གནས་པའོ། །བླ་གབ་མེད་པ་ལ་ཡང་གསུམ་ལས། ཆུང་ངུ་ནི། སྟེང་གི་ངོས་གསུམ་གཡོགས་ལ་གཅིག་མ་གཡོགས་པར་གནས་པ་དང་། འབྲིང་ནི། སྟེང་གི་ངོས་གཅིག་གཡོགས་ལ་གསུམ་མ་གཡོགས་པར་གནས་པ་དང་། ཆེན་པོ་ནི། སྟེང་གི་ངོས་ཐམས་ཅད་མ་གཡོགས་པར་གནས་པའོ། །དུར་ཁྲོད་པ་ལ་ཡང་གསུམ་ལས། ཆུང་ངུ་ནི། སྔོན་དུར་ཁྲོད་ཡིན་པ་ལ་ད་ལྟ་དུར་ཁྲོད་མ་ཡིན་པར་གནས་པ་དང་། འབྲིང་ནི། རོ་ཅུང་ཟད་སྐྱེལ་བའི་སར་གནས་པ་དང་། ཆེན་པོ་ནི། སྐྱེ་བོ་ཤིའོ་ཅོག་སྐྱེལ་བའི་སར་གནས་པའོ། །ཙོག་བུ་པ་ལ་ཡང་གསུམ་ལས། ཆུང་ངུ་ནི། ངོས་གཉིས་སྙེས་ནས་གནས་པ་དང་། འབྲིང་ནི། ངོས་གཅིག་སྙེས་ནས་གནས་པ་དང་། ཆེན་པོ་ནི། ངོས་ཐམས་ཅད་མ་སྙེས་པར་གནས་པའོ། །གཞི་ཇི་བཞིན་པ་ལ་ཡང་གསུམ་ལས། ཆུང་ངུ་ནི། ལན་གསུམ་དུ་མལ་འཆའི་གཞན་མི་བྱེད་པ་དང་། འབྲིང་ནི། ལན་གཉིས་སུ་མལ་འཆའི་གཞན་མི་བྱེད་པ་དང་། ཆེན་པོ་ནི། ལག་གཅིག་སྟན་བཏིང་པ་ལ་མལ་འཆའི། ཡང་དང་ཡང་དུ་མི་བརྗེ་མི་འཆོས་པའོ། །དེ་དག་ལ་ཅིའི་ཕྱིར་སྦྱངས་པའི་ཡོན་ཏན་ཞེས་བྱ་ཞེ་ན། དཔེར་ན། བལ་ལ་རྨེལ་བ་དེའི་ཚེ་སྐུད་པ་མི་རུང་ལ། རྨེལ་ནས་རུང་བ་དེ་བཞིན་དུ། བསོད་སྙོམས་དང་། ཆོས་གོས་དང་། གནས་མལ་ལ་ཆགས་པའི་ཚེ་སེམས་ལས་སུ་མི་རུང་ལ། ཡོན་ཏན་འདི་དག་གིས་ཚངས་སྤྱོད་ལ་གནས་པར་བྱ་བའི་ཕྱིར། སེམས་ལས་རུང་དུ་སྦྱོང་བར་བྱེད་པས་དེ་སྐད་ཅེས་བྱའོ། །སྦྱངས་པའི་ཡོན་ཏན་བཅུ་གཉིས་པོ་འདི་དག་བསྟེན་པ་ལ་དགོས་པ་ཅི་ཡོད་ཅེ་ན། ཟས་ཀྱི་དབང་དུ་བྱས་པ་གསུམ་བསྟེན་པ་ལ་དགོས་པ་ཡོད་དེ། ཟས་བཟང་པོ་ལ་ཆགས་པ་སྤང་པའི་ཕྱིར་དུ་བསོད་སྙོམས་པ་དང་། ཟས་མང་པོ་ལ་ཆགས་པ་སྤང་བའི་ཕྱིར་དུ་སྟན་གཅིག་པ་དང་། ཟས་ཕྱིས་མི་ལེན་པ་གཉིས་བསྟེན་པར་བྱ་བ་
ཡིན་པའི་ཕྱིར། གོས་ཀྱི་དབང་དུ་བྱས་པ་གསུམ་བསྟེན་པ་ལ་དགོས་པ་ཡོད་དེ། གོས་མང་པོ་ལ་ཆགས་པ་སྤང་བའི་ཕྱིར་དུ་གོས་གསུམ་པ་དང་། གོས་འཇམ་ཞིང་རེག་ན་བདེ་བ་ལ་ཆགས་པ་སྤང་བའི་ཕྱིར་དུ་ཕྱིང་པ་པ་དང་། གོས་བཟང་པོ་ལ་ཞེན་པ་དགག་པའི་ཕྱིར་དུ། ཕྱག་དར་ཁྲོད་བསྟེན་པར་བྱ་བ་ཡིན་པའི་ཕྱིར། གནས་མལ་གྱི་དབང་དུ་བྱས་པ་དྲུག་བསྟེན་པ་ལ་དགོས་པ་ཡོད་དེ། འདུ་འཛི་ལ་ཆགས་པ་སྤང་བའི་ཕྱིར་དགོན་པ་དང་། གནས་ལ་ཆགས་པ་སྤང་པའི་ཕྱིར་ཤིང་དྲུང་པ་དང་། བླ་གབ་མེད་པ་དང་། དུར་ཁྲོད་པ་སྟེ་གསུམ་དང་། དུར་ཁྲོད་པ་ནི་འཁྲིག་པ་ལ་ཆགས་པ་སྤང་བའི་ཕྱིར་ཡང་ཡིན་ལ། གློས་འབེབས་པ་དང་ཉལ་བའི་བདེ་བ་ལ་ཆགས་པ་སྤང་བའི་ཕྱིར་ཙོག་བུ་པ་དང་། སྟན་དང་གདིང་བ་དང་དགབ་པ་ལ་ཆགས་པའི་གཉེན་པོར་གཞི་ཇི་བཞིན་པ་བསྟེན་པར་བྱ་བ་ཡིན་པའི་ཕྱིར་རོ། ། སྦྱངས་པའི་ཡོན་ཏན་བཅུ་གཉིས་པོ་འདི་དག་བསྟེན་པ་ཕན་ཡོན་ཅི་ཡོད་ཅེ་ན། འདི་ལ་སྤྱིར་བསྟན་པ་དང་། སོ་སོར་ཕྱེ་ནས་བསྟན་པ་གཉིས་ལས། དང་པོ་ནི། འདི་དག་བསྟེན་པ་ལ་ཕན་ཡོན་ཡོད་དེ། གྲགས་པ་དང་རྙེད་བཀུར། ཚུལ་འཆོས་དང་ཁ་གསག །ཆགས་སྡང་སོགས་རིམ་གྱིས་སྤོང་བར་འགྱུར་བ་དང་། བསོད་སྙོམས་དང་ཆོས་གོས་དང་གནས་མལ་ངན་ངོན་ཙམ་གྱིས་ཆོག་ཤེས་པ། འཕགས་པའི་རིགས་ལ་གནས་པར་འགྱུར་བ་དང་། ཡོ་བྱད་བསྙུངས་པར་འགྱུར་བ་དང་། སངས་རྒྱས་དང་ཉན་ཐོས་རྣམས་ཀྱིས་བསྔགས་པར་འགྱུར་བའི་ཕན་ཡོན་ཡོད་པའི་ཕྱིར་རོ། །གཉིས་པ་ནི། བསོད་སྙོམས་ལ་ནི་ང་རྒྱལ་མེད་ཅིང་། བརྙས་པ་བཟོད་པ་དང་། ཟས་ཀྱིས་འཕོངས་པ་མེད་པ་
དང་། ཟས་བཟང་པོ་དོན་དུ་གཉེར་བའི་སྡུག་བསྔལ་མི་འབྱུང་བའི་ཕན་ཡོན་ཡོད་དོ། །སྟན་གཅིག་པ་ལ་ཡང་ཟས་གཉིས་པ་ཚོལ་བ་དང་། བྱིན་ལེན་ཡང་དང་ཡང་དུ་བྱེད་པའི་གནོད་པ་མི་འབྱུང་བ་དང་། ཟོས་པ་འཇུ་ཞིང་གནོད་པ་ཆུང་བ་དང་། ལྡང་བ་ཡང་ཞིང་བདེ་བར་གནས་པའི་ཕན་ཡོན་ཡོད་དོ། །ཟ་ཕྱིས་མི་ལེན་པ་ལ་ཡང་། ཆོས་ཤེས་པ་དང་། ཟས་ལ་བརྐམ་ཆགས་མེད་པ་དང་། ཟས་ཡང་དང་ཡང་དུ་ཚོལ་བའི་གནོད་པ་མེད་པ་དང་། བསམ་གཏན་དང་ཀློག་པ་ལ་མི་གནོད་པའི་ཕན་ཡོན་ཡོད་དོ། །ཆོས་གོས་གསུམ་པ་ལ་ཡང་། ཆོས་གོས་ལྷག་པོ་ཚོལ་བའི་སྡུག་བསྔལ་མེད་པ་དང་། གོས་ཞག་བཅུ་འཆང་ཡང་ལྟུང་བ་མི་འབྱུང་བ་དང་། གོས་ལྷག་པ་བྱིན་གྱིས་རློབ་པའི་ལས་མི་འབྱུང་བ་དང་། ཡོ་བྱད་བསྙུངས་ཤིང་རྣལ་འབྱོར་དང་རྗེས་སུ་མཐུན་པའི་ཕན་ཡོན་ཡོད་དོ། ཕྱིང་པ་པ་ལ་ཡང་། གོས་བཟང་པོ་ལ་སྲེད་པ་མེད་པས། དེ་ཚོལ་བའི་སྡུག་བསྔལ་མེད་པ་དང་། དེ་ལ་བརྟེན་ནས་ཆར་དང་ཚ་གྲང་ལ་སོགས་པའི་གནོད་པ་བཟོད་པའི་ཕན་ཡོན་ཡོད་དོ། །ཕྱག་དར་ཁྲོད་པ་ལ་ཡང་། གོས་ཀྱི་ཕྱིར་ཁྱིམ་པ་རྣམས་དང་མི་འདྲེ་བ་དང་། ཆོམ་རྐུན་པས་གླགས་མི་ལྟ་ཞིང་། གོས་བསྲུང་བའི་ཕྱིར་སྡུག་བསྔལ་མེད་པ་དང་། ཕྱོགས་གང་དུ་ཕྱིན་ཀྱང་གོས་ཀྱིས་མི་བྲེལ་བ་དང་། ལོག་འཚོའི་སྐྱོན་གྱིས་མི་གོས་པའི་ཕན་ཡོན་ཡོད་དོ། དགོན་པ་པ་ལ་ཡང་། གྲོང་གི་འདུ་འཛི་ལ་གནས་པས། ཏིང་ངེ་འཛིན་ཐོབ་པ་དང་བསྲུང་བར་མི་ནུས་ལ། འདུ་འཛི་སྤངས་ནས་དགོན་པར་མཉམ་པར་བཞག་པས། ཏིང་ངེ་འཛིན་ཐོབ་པ་དང་བསྲུང་བར་ནུས་པ་དང་། དགེ་བ་ལ་མངོན་དུ་ཕྱོགས་པ་དང་། འགྱོད་པ་མེད་པར་འཆི་བའི་དུས་བྱེད་པའི་ཕན་ཡོན་ཡོད་དོ། ། ཤིང་དྲུང་
པ་ལ་ཡང་། གནས་མལ་ཚོལ་བའི་སྡུག་བསྔམ་མེད་པ་དང་། གཞན་དང་རྩོད་གཞི་མེད་པ་དང་། ཤིང་གི་ཡལ་ག་དང་ལོ་མའི་དུས་ཀྱི་འགྱུར་ལྡོག་ལ་བརྟེན་ནས་འདུས་བྱས་མི་རྟག་པར་རྟོགས་པ་དང་། གནས་མལ་ལ་ཆགས་པ་མེད་ཅིང་ཐོགས་མེད་དུ་རྒྱུ་བའི་ཕན་ཡོན་ཡོད་དོ། །བླ་གབ་མེད་པ་ལ་ཡང་། གནས་མལ་ཚོལ་བ་དང་སྦ་བ་དང་བྱི་དོར་བྱེད་པའི་སྡུག་བསྔལ་མེད་པ་དང་། རྒྱུ་སྐར་གྱི་འགྲོ་འདུག་ལ་བརྟེན་ནས་འདུས་བྱས་མི་རྟག་པར་རྟོགས་པ་ལ་སོགས་པའི་ཕན་ཡོན་ཡོད་དོ། །དུར་ཁྲོད་པ་ལ་ཡང་། དུར་ཁྲོད་དུ་མི་རྟག་པ་དང་། མི་གཙང་བ་བསྒོམས་པ་ལ་བརྟེན་ནས་འདོད་ཆགས་སོགས་བག་མེད་པ་མི་འབྱུང་བ་དང་། ལུས་སྲོག་ལ་ལྟ་བ་བསྲབས་པར་འགྱུར་བ་དང་། དེ་ལ་བརྟེན་པའི་རྒྱགས་པ་སྤོང་བའི་ཕན་ཡོན་ཡོད་དོ། །ཙོག་བུ་པ་ལ་ཡང་། སེམས་གཉིད་དང་གནས་མལ་བདེ་བའི་དབང་དུ་མི་འགྲོ་བ་དང་། ལུས་ལ་ཆགས་པ་བསྲབས་པར་འགྱུར་བ་དང་། ལྡང་བ་ཡང་ཞིང་རྨི་ལམ་ཉུང་བ་དང་། གནས་མལ་འཚོལ་བ་དང་འཆོས་པའི་བྱ་བ་ཉུང་བའི་ཕན་ཡོན་ཡོད་དོ། །གཞི་ཇི་བཞིན་པ་ལ་ཡང་། ལན་ཅིག་ཇི་ལྟར་སྟན་བཅས་པས་ཆོག་ཤེས་ནས། གནས་མལ་འཚོལ་བའི་སྡུག་བསྔལ་མེད་པ་དང་། དོན་ཉུང་བ་དང་བྱ་བ་ཉུང་བ་ལ་སོགས་པའི་ཕན་ཡོན་རྣམས་ཡོད་དོ། །འོ་ན། སྦྱངས་པའི་ཡོན་ཏན་འདི་དག་གང་ལས་འཐོབ་ཅེ་ན། མཛོད་ལས། ལྷག་མའི་རྣམ་རིག་མིན་ཞིང་དང་། །ལེན་དང་གུས་པར་བྱེད་ལས་འཐོབ། ཅེས་པ་ལྟར། དགེ་སློང་ལྟ་བུ་ལས་ལེན་པར་བྱེད་པ་ལས་འཐོབ་བོ། ། ཚུལ་ཇི་ལྟར་ན། ཡུལ་དེ་ཕྱག་འོས་ཡིན་ན་ཕྱག་བཙལ། མདུན་དུ་ཙོག་བུར་འདུག་སྟེ། ཐལ་མོ་སྦྱར་ནས། བཙུན་པ་དགོངས་སུ་གསོལ། བདག་མིང་འདི་
ཞེས་བགྱི་བ། དུས་འདི་ནས་བཟུང་སྟེ་ཇི་སྲིད་འཚོའི་བར་དུ། ཆོས་གོས་བཞི་པ་སྤངས་ཏེ། ཆོས་གོས་གསུམ་པ་ཡང་དག་པར་ལེན་ཏོ། །བདག་ཆོས་གོས་གསུམ་པའི་ཡི་དམ་དང་ལྡན་པར་བཙུན་པས་གཟུང་དུ་གསོལ། ཞེས་པ་ལན་གསུམ་དང་། མཇུག་ཏུ་ཐབས་ལེགས་བྱའོ། །དེ་བཞིན་དུ་གནས་རྣམས་ལ་ཡང་ཇི་ལྟར་རིགས་པ་ཤེས་པར་བྱའོ། །འོ་ན། སྦྱངས་པའི་ཡོན་ཏན་འདི་དག་གི་ཡི་དམ་འདི་གང་གིས་འཇིག་པའམ་གཏོང་བ་ཡིན་ཞེ་ན། མཛོད་ལས། བར་མ་ཤུགས་བླངས་བྱ་བ་དང་། །དོན་ཚེ་རྩ་བ་ཆད་པ་ལས། །ཞེས་བཤད་པ་ལྟར། འདི་ཙམ་དུ་ཞེས་བླངས་པ་ནི་ཆད་པ་དང་། བླངས་ཀྱང་བྱ་བ་ཇི་ལྟ་བ་བཞིན་མི་བྱེད་ན་བྱ་བ་ཆད་པ་དང་། ཚེ་ཆད་པ་དང་། དགེ་རྩ་ཆད་པས་གཏོང་བ་དང་། མིང་བརྡ་འཕྲོད་པའི་དྲུང་དུ་བསམ་པ་ཐག་པས་ཕུལ་བས་ཀྱང་གཏོང་ལ། འབུལ་ཚུལ་ནི། ཚེ་དང་ལྡན་པ་དགོངས་སུ་གསོལ། བདག་མིང་འདི་ཞེས་བྱ་བ་ཆོས་གོས་གསུམ་པའི་ཡི་དམ་ཡང་དག་པར་བླངས་པ་ལས། ཆེ་གེ་མོའི་རྐྱེན་གྱིས་དེ་ཉིད་སླར་འབུལ་ལོ། །ཚེ་དང་ལྡན་པས་བདག་ཆོས་གོས་གསུམ་པའི་ཡི་དམ་མ་མཆིས་བར་གཟུང་དུ་གསོལ། ཞེས་པ་ལྟ་བུའོ། །འོ་ན། འདི་དག་ལ་གནང་བ་ཡོད་དམ་མེད་ཅེ་ན། ཡོད་དེ། འདི་དག་ནི་གོས་དང་ཟས་དང་གནས་མལ་ལ་ལྷག་པར་ཆགས་པའི་གཉེན་པོར་གསུངས་པ་ཡིན་པས། སྦྱོར་བའི་དུས་སུ་འབད་རྩོལ་གྱིས་བསྒྲུབས་མི་དགོས་ཤིང་། དངོས་གཞིའི་དུས་སུ་ཆགས་ཞེན་མེད་ན། གོས་སྲང་འབུམ་རི་བ་དང་། ཁང་པ་བརྩེགས་པ་ལྔ་བརྒྱ་པ་དང་། ཟས་རོ་བརྒྱ་པ་ལ་ལོངས་སྤྱོད་པས་ཆོག་པར་གསུངས་པའི་ཕྱིར། དེ་ལྟར་ཡང་མདོ་རྩ་བ་ལས། མྱ་ངན་ལས་འདས་པའི་བསམ་པས་རབ་ཏུ་བྱུང་བ་ཚུལ་ཁྲིམས་དང་ལྡན་པ་ལ་ནི། གོས་
སྟོང་ཕྲག་བརྒྱ་པ་དང་། ཟས་རོ་བརྒྱ་པ་དང་། ཁང་པ་བརྩེགས་པ་ལྔ་བརྒྱ་པ་ཡང་འོས་སོ། །ཞེས་གསུངས་སོ། །དེ་ལྟ་བུའི་གནང་བཀག་འབྱུང་བའི་རྒྱུ་མཚན་ཡོད་དེ། རབ་ཏུ་བྱུང་བ་རྣམས་ཀྱིས་འདོད་པ་བསོད་ཉམས་ཀྱི་མཐའ་དང་། ངལ་ཞིང་དུབ་པའི་མཐའ་སྤངས་ནས་དབུ་མའི་ལམ་ལ་གནས་པར་བྱ་དགོས་པའི་ཕྱིར་རོ། །སོ་སོར་ཐར་པ་རིགས་བརྒྱད་ནི་ཡོངས་སུ་གྲགས་མོད་རིགས་བཅུར་བཤད་པ་ཡོད་དམ་མེད་ཅེ་ན། མདོ་རྒྱུད་བསྟན་བཅོས་ཕལ་ཆེ་བ་ལས། གཞི་ཐམས་ཅད་ཡོད་པར་སྨྲ་བའི་འདོད་པ་བཞིན་དུ། སོ་སོར་ཐར་པ་རིགས་བརྒྱད་ལས་གཞན་བཤད་པ་མ་མཐོང་ཞིང་། སྡེ་པ་གཞན་གྱི་ལུགས་ལ་སོ་སོར་ཐར་པ་རིགས་བཅུར་བཤད་པ་ཡོད་ཀྱང་། སོ་སོར་ཐར་པ་རིགས་བརྒྱད་ལས་གཞན་པའི་སོ་ཐར་ནོད་པ་ནི། ཇི་སྲིད་འཚོའི་བར་དུ་བླངས་ན་དགེ་བསྙེན་གྱི་སྡོམ་པ་དང་། ཉིན་ཞག་གཅིག་ཏུ་བླངས་ན་བར་མ་དགེ་བ་ལས་མ་འདས་པས། དེ་དག་འཐད་པར་མ་གོ་ལགས། །དགེ་སློང་རྡོ་རྗེ་འཛིན་པའི་རྒྱུད་ལ་ཉན་ཐོས་སོ་ཐར་གྱི་སྡོམ་པ་ཡོད་དམ་མེད། ཡོད་ན་སྒྲུབ་བྱེད་དང་། མེད་ན་དེའི་རྒྱུད་ལ་དེ་མེད་པ་ལུང་རིགས་ཀྱིས་ཇི་ལྟར་སྒྲུབ་ཅེ་ན། དགེ་སློང་རྡོ་རྗེ་འཛིན་པའི་རྒྱུད་ལ་སོ་སོར་ཐར་པའི་སྡོམ་པ་ཡོད་དེ། དེ་དགེ་སློང་དུ་འཇོག་བྱེད་ཡོད་པའི་ཕྱིར་དང་། དེའི་རྒྱུད་ལ་སྡོམ་པའི་ཚུལ་ཁྲིམས་དང་། དགེ་བ་ཆོས་སྡུད་ཀྱི་ཚུལ་ཁྲིམས་དང་། སེམས་ཅན་དོན་བྱེད་ཀྱི་ཚུལ་ཁྲིམས་དང་གསུམ་ཡོད་ལ། སྤྱིར་སྡོམ་པའི་ཚུལ་ཁྲིམས་དང་ལྡན་པ་ལ། སོ་སོར་ཐར་པའི་སྡོམ་པ་དང་ལྡན་པར་མ་ངེས་ཀྱང་། དགེ་སློང་རྡོ་རྗེ་འཛིན་པའི་སྡོམ་པའི་ཚུལ་ཁྲིམས་ནི་སོ་སོར་ཐར་པའི་སྡོམ་པ་ཉིད་ཡིན་པའི་ཕྱིར་ཏེ། ཚུལ་ཁྲིམས་ལེའུ་ལས།
བྱང་ཆུབ་སེམས་དཔའི་ཚུལ་ཁྲིམས་ནི་སོ་སོར་ཐར་པའི་སྡོམ་པ་ཡང་དག་པར་བླངས་པའི་རིགས་བདུན་པོ་དགེ་སློང་དང་དགེ་སློབ་མ་དང་དགེ་ཚུལ་དང་དགེ་ཚུལ་མ་དང་དགེ་བསྙེན་དང་དགེ་བསྙེན་མའི་ཚུལ་ཁྲིམས་གང་ཡིན་པ་སྟེ། ཞེས་གསུངས་པའི་ཕྱིར་རོ། །སྤྱིར་སྡོམ་པའི་ཚུལ་ཁྲིམས་དང་ལྡན་པ་ལ། སོ་སོར་ཐར་པའི་སྡོམ་པ་དང་ལྡན་པར་མ་ངེས་ཏེ། ལྷའི་རྟེན་ཅན་གྱི་བྱང་སེམས་འཕགས་པ་བཞིན། དེའི་སྡོམ་པའི་ཚུལ་ཁྲིམས་ནི་རང་བཞིན་གྱིས་ཁ་ན་མ་ཐོ་བ་སྤོང་བ་ཡིན་ནོ། །དེ་ལྟ་ན་ཡང་དགེ་སློང་རྡོ་རྗེ་འཛིན་པའི་རྒྱུད་ལ་ཉན་ཐོས་ཐེག་དམན་གྱི་སོ་ཐར་གྱི་སྡོམ་པ་ནི་མེད་དེ། དེའི་སྡོམ་པ་ཐམས་ཅད་ཐེག་ཆེན་སེམས་བསྐྱེད་ཀྱིས་ཟིན་པའི་ཕྱིར་རོ། །འོ་ན། དེའི་སྡོམ་པ་ཐམས་ཅད་བྱང་སེམས་ཀྱི་སྡོམ་པར་འགྱུར་ཏེ། ཐེག་ཆེན་སེམས་བསྐྱེད་ཀྱིས་ཟིན་པའི་ཕྱིར་ཞེ་ན། བྱང་སེམས་ཀྱི་རྒྱུད་ལ་ཡོད་པའི་སྡོམ་པར་ཐལ་ཟེར་ན་འདོད་ལ། སོ་ཐར་གྱི་སྡོམ་པ་དང་། བྱང་སེམས་ཀྱི་སྡོམ་པ་དང་། གསང་སྔགས་ཀྱི་སྡོམ་པ་གསུམ་དུ་བྱས་པའི་བྱང་སེམས་ཀྱི་སྡོམ་པར་ཐལ་ཟེར་ན་ཁྱབ་པ་མ་ངེས་སོ། ། གཞན་དག་སོ་ཐར་གྱི་སྡོམ་པ་གང་ཡིན་ཉན་ཐོས་ཀྱི་སྡོམ་པ་ཡིན་པར་མཐུན་སྣང་དུ་བྱས་ནས། ཁ་ཅིག་དགེ་སློང་རྡོ་རྗེ་འཛིན་པའི་རྒྱུད་ལ་སོ་ཐར་གྱི་སྡོམ་པ་ཡོད་ཟེར། ཁ་ཅིག་མེད་ཟེར་བ་གཉིས་ཀའང་མི་འཐད་དོ། །དེས་ན་སོ་ཐར་གྱི་སྡོམ་པ་གང་ཡིན་ཉན་ཐོས་ཀྱི་ཡིན་པར་བཟུངས་ནས། བྱང་སེམས་ཀྱིས་བསླབ་བྱ་གཞན་ཞིག་ལ་སློབ་པ་ལྟར་བྱེད་པ་ནི། བྱང་སེམས་ཀྱི་ཚུལ་ཁྲིམས་ནི་ཚུལ་ཁྲིམས་གཉིས་ཀྱི་རྟེན་གྱི་དོན་དུ་རིག་པར་བྱའོ། །ཞེས་དང་། གཏན་ལ་དབབ་པ་བསྡུ་བ་ལས། ཚུལ་ཁྲིམས་རྣམ་པ་གསུམ་པོ་
དེ་དག་ལས་འདི་ལྟ་སྟེ། སྡོམ་པའི་ཚུལ་ཁྲིམས་འདི་ནི་སྡུད་པར་བྱེད་པ་དང་འབྱོར་བར་བྱེད་པ་ཡིན་ཏེ། དེ་བསྡམས་ཤིང་བསྲུངས་ན་དེ་ལས་གཞན་པ་དག་ཀྱང་བསྡམས་ཤིང་བསྲུངས་པར་འགྱུར་ལ། དེ་མ་བསྡམས་ཤིང་མ་བསྲུངས་ན། དེ་ལས་གཞན་པ་དག་ཀྱང་མ་བསྡམས་ཤིང་མ་བསྲུངས་པར་འགྱུར་བས། དེའི་ཕྱིར་བྱང་ཆུབ་སེམས་དཔའི་ཚུལ་ཁྲིམས་ཉམས་ན། སྡོམ་པ་ཐམས་ཅད་ཉམས་པ་ཡིན་པར་བརྗོད་པར་བྱའོ། །ཞེས་གསུངས་པའི་ཕྱིར་རོ། །གལ་ཏེ་དགེ་སློང་རྡོ་རྗེ་འཛིན་པའི་རྒྱུད་ལ་སོ་ཐར་གྱི་སྡོམ་པ་མེད་དེ། སོ་ཐར་གྱི་སྡོམ་ལྡན་གྱིས་བྱང་སེམས་ཀྱི་སྡོམ་པ་ཐོབ་པ་ན་སོ་ཐར་གྱི་སྡོམ་པ་གནས་གྱུར་པའི་ཕྱིར་ཞེ་ན། གནས་གྱུར་པའི་དོན་སོ་ཐར་གྱི་སྡོམ་པ་ཁྱད་པར་ཅན་དུ་གྱུར་པ་ལ་འཇོག་ན། ཁྱབ་པ་འགལ་ལ། སོ་ཐར་གྱི་སྡོམ་པ་གཏོང་བ་ལ་འཇོག་ན་རྟགས་མི་འགྲུབ་པའི་ཕྱིར་ཏེ། སྡོམ་པ་ཕྱི་མ་བླངས་པ་སྔ་མའི་གཏོང་རྒྱུ་མ་ཡིན་པའི་ཕྱིར་རོ། ། ཞར་ལ་འདི་དཔྱད་པར་བྱ་སྟེ། དགེ་སློང་རྡོ་རྗེ་འཛིན་པའི་རྒྱུད་ཀྱི་སྡོམ་པ་གསུམ་པོ་དེ་ངོ་བོ་གཅིག་གམ། ཐ་དད་ཅེ་ན། ཁ་ཅིག་ངོ་བོ་ཐ་དད་ཡིན་ཏེ། རྒྱུ་ཚོགས་རིགས་མི་མཐུན་ངོ་བོ་ཐ་དད་ལས་སྐྱེས་པའི་ཕྱིར་དང་། གཏོང་རྒྱུ་ཡང་སོ་སོར་ངེས་པའི་ཕྱིར་ཞེས་ཟེར་རོ། །ཁོ་བོ་ནི་འདི་ལྟར་སེམས་ཏེ། གང་ཟག་གཅིག་གིས་སོ་ཐར་གྱི་སྡོམ་པ་བླངས། དེའི་འོག་ཏུ་བྱང་སེམས་ཀྱི་སྡོམ་པ་བླངས། དེའི་འོག་ཏུ་སྔགས་སྡོམ་བླངས་པའི་སྡོམ་པ་སྔ་ཕྱི་བར་གསུམ་པོ་དེ་ངོ་བོ་ཐ་དད་ཡིན་ཡང་། དགེ་སློང་རྡོ་རྗེ་འཛིན་པའི་རྒྱུད་ལ་དུས་མཉམ་དུ་ཡོད་པའི་སྡོམ་པ་གསུམ་པོ་ངོ་བོ་ཐ་དད་མ་ཡིན་ཏེ། སྡོམ་པའི་ངོ་བ་སྤོང་བའི་སེམས་པ་གཙོ་ཆེ་བ་ཡིན་ལ། གང་ཟག་གཅིག་
གི་རྒྱུད་ལ་སྤོང་བའི་སེམས་པ་རིགས་མཐུན་རྫས་ཐ་དད་པ་གསུམ་ཅིག་ཅར་མི་སྐྱེ་བའི་ཕྱིར་ཏེ། དེ་སྐྱེ་ན། གང་ཟག་གཅིག་གི་རྒྱུད་ལ་གཙོ་བོ་རྣམ་ཤེས་རིགས་མཐུན་རྫས་ཐ་དད་པ་གསུམ་ཅིག་ཅར་དུ་སྐྱེ་དགོས་ན། དེ་ཡང་མི་འཐད་དེ། སེམས་ཅན་རྣམས་ནི་རྣམ་པར་ཤེས་པའི་རྒྱུད་རེ་རེ་བ་ཡིན་པའི་ཕྱིར་རོ། །འོ་ན། སྡོམ་པ་གསུམ་པོ་གང་རུང་གཅིག་བཏང་བས་ཐམས་ཅད་གཏོང་བར་འགྱུར་རོ་ཞེ་ན། སྐྱོན་མེད་དེ། ཆོས་དེ་དང་དེ་ངོ་བོ་གཅིག་ཏུ་སྐྱེས་ཀྱང་། གཅིག་ལོག་པས་ཅིག་ཤོས་ལྡོག་པ་མིན་པ་དང་། ཅིག་ཤོས་ལོག་པས་གཅིག་ལྡོག་པར་མི་འགྱུར་བ་དུ་མ་སྣང་བའི་ཕྱིར་རོ། འདུལ་བ་མདོ་རྩའི་མ་བྱིན་ལེན་གྱི་ཚད་སྟོན་པའི་སྐབས་ཀྱི། ཀ་ཀ་ནི་དང་། མ་ཤ་ཀ་དང་། ཀར་ཤ་པ་ན། ཞེས་གསུངས་པ་འདི་གསུམ་དངོས་པོ་གང་གང་གི་མིང་ཡིན་ཞེ་ན། མ་བྱིན་ལེན་གྱི་བསླབ་པ་དང་པོར་འཆའ་བའི་ཚེ། ཀ་ཀ་ནི་དང་། མ་ཤ་ཀ་དང་། ཀར་ཤ་པ་ན་གསུམ་རིམ་པ་བཞིན་དུ། མགྲོན་བུ་ཉི་ཤུ་དང་། བརྒྱད་ཅུ་དང་། མགྲོན་བུ་སྟོང་དྲུག་བརྒྱའི་རིན་ཐང་མིང་ཡིན་ཏེ། རྣམ་འབྱེད་དུ་མ་བྱིན་ལེན་གྱི་རིན་ཐང་གི་ཚད་སྟོན་པ་ན། མ་ཤ་ཀ་ལྔ་ལ་སོགས་པ་ཞེས་གསུངས། དེའི་ཞུ་བར། ཀ་ཀ་ནི་བཞི་ལ་མ་ཤ་ཀའོ། །ལྔ་ཉིད་ནི་ཀར་ཤ་པ་ནའི་བཞི་ཆའི་དཔེའོ། །གང་ན་དེའི་ཚིགས་ཉིད་ཉི་ཤུ་ཡིན་པ་དེ་ལ་བརྟེན་ནས་ཞེས་གསུངས་པའི་རྒྱ་ཆེར་འགྲེལ་ལས། ཀ་ཀ་ནི་བཞི་ལ་མ་ཤ་ཀའོ། །ཞེས་བྱ་བ་ལ། ཀ་ཀ་ནི་ཞེས་བྱ་བ་ནི་བོན་ཊི་ཀ་ཞེས་བྱ་སྟེ། དེ་ཡང་མགྲོན་བུ་ཉི་ཤུའི་རིན་ཐང་གི་མིང་ཡིན་ནོ། །ཀ་ཀ་ནི་བཞི་ལ་ནི་མ་ཤ་ཀ་གཅིག་སྟེ་མགྲོན་བུ་བརྒྱད་ཅུའི་རིན་ཐང་གི་མིང་ཡིན་ནོ། །ཞེས་དང་། བམ་པོ་ལྔ་བཅུ་པ་ལས། ཀ་ཀ་ནི་བཞི་ལ་མ་ཤ་གཅིག་གོ །མ་ཤ་ཀ་ཉི་ཤུ་ལ་ཀར་ཤ་པ་ན་གཅིག་གོ །ཀ་ཀ་ནི་
གཅིག་ནི་མགྲོན་བུ་ཉི་ཤུའི་རིན་ཐང་གི་མིང་ཡིན་ནོ། །མ་ཤ་ཀ་གཅིག་ནི་མགྲོན་བུ་བརྒྱད་ཅུའི་རིན་ཐང་གི་མིང་ཡིན་ནོ། །ཀར་ཤ་པ་ན་གཅིག་ནི་མགྲོན་བུ་སྟོང་དྲུག་བརྒྱའི་རིན་ཐང་གི་མིང་ཡིན་ནོ། །ཀར་ཤ་པ་ནའི་བཞི་ཆ་ནི་མ་ཤ་ཀ་ལྔའི་རིན་ཐང་སྟེ་མགྲོན་བུ་བཞི་བརྒྱའི་རིན་ཐང་གི་མིང་ཡིན་ནོ། །མ་ཤ་ཀ་ལྔ་ཞེས་ལུང་ལས་གསུངས་པ་ནི། ཡུལ་དབུས་ན་ཀར་ཤ་པ་ན་གཅིག་ལ་མ་ཤ་ཀ་ཉི་ཤུར་རྩི་བས། དེའི་བཞི་ཆ་ལ་བརྟེན་པ་ཡིན་ནོ། །ཞེས་གསུངས་སོ། མ་ཤ་ཀའི་མིང་གི་རྣམ་གྲངས་ལ། པ་ན་ཞེས་པ་དང་། ཀར་ཤ་པ་ནའི་མིང་གི་རྣམ་གྲངས་ལ། ན་ན་ཀ་ཞེས་ཀྱང་བྱ་སྟེ། འོད་ལྡན་ལས། ཀར་ཤ་པ་ན་ཞེས་བྱ་བ་ནི། ན་ན་ཀ་ལ་བྱའོ། །ཞུ་བ་ལས་ནི། བཙུན་པ་བཅོམ་ལྡན་འདས་ཀྱིས་མ་ཤ་ཀ་ལྔ་བརྐུས་ན་མཐར་འགྱུར་རོ་ཞེས་གསུངས་པའི་མ་ཤ་ཀ་ལྔ་ཇི་ལྟ་བུ་ལགས། མ་ཤ་ཀ་ཉི་ཤུ་ལ་ན་ན་ཀ་ཡིན་ནོ། །མ་ཤ་ཀ་ཇི་ལྟ་བུ་ལགས། ཀ་ཀ་ནི་བཞི་ལ་བྱའོ། །ཞེས་དང་། མ་ཤ་ཀ་ཞེས་བྱ་བ་ནི་པ་ན་ལ་བྱའོ། །ཞེས་གསུངས་སོ། །ཀ་ཤ་པ་ནའི་ངོ་བོ་ནི། གཞུང་འགྲེལ་ལས། དངུལ་ལས་བྱས་པ། གཟུགས་སུ་དོད་པ། འཚོང་དུ་རུང་བ་སྟེ་རྒྱལ་པོ་རྨ་བྱ་ཞེས་བྱ་བའི་དུས་སུ་བྱུང་བར་བཤད་དོ། །དེ་ལྟར་ན་ཀ་ཀ་ནི་དང་། མ་ཤ་ཀ་དང་། ཀར་ཤ་པ་ན་རྣམས་ལ་རིན་ཐང་གི་ཆ་ནས་མིང་བཏགས་པ་དང་། ལྕིད་ཀྱི་ཚད་ཀྱི་ཆ་ནས་མིང་བཏགས་པ་དང་། དངོས་པོ་རང་གི་ངོ་བོ་གང་ཡིན་པ་དང་། མིང་གི་རྣམ་གྲངས་ཀྱི་སྒོ་ནས་ཤེས་པར་བྱའོ། །ཁ་ཅིག་ན་རེ། ཀ་ཀ་ནི་དང་། བོན་ཊི་ཀ་དང་། འོལ་མ་སི་དང་། ར་ཏི་རྣམས་མིང་གི་རྣམ་གྲངས་ཡིན་ལ། དེ་རྣམས་ཀྱི་ལྕིད་ཀྱི་ཚད་ནི། མ་རུ་མགོ་ནག་གི་ལྕིད་དང་མཉམ་པ་ཡིན་ནོ་ཞེས་ཟེར་རོ། །འོན་
ཀྱང་ཀ་ཀ་ནི་བཞི་ལ་མ་ཤ་ཀའོ་ཞེས་དང་། རྣམ་འགྲེལ་གྱི་འགྲེལ་པ་རྒྱན་ལས། ཡུངས་ཀར་ནི་འོལ་མ་སིའི་བཞི་ཆ་སྟེ་ཞེས་འབྱུང་བས། ཡུངས་ཀར་བཞིའི་ལྕིད་ལ་མ་རུ་མགོ་ནག་གཅིག་དང་། མ་རུ་མགོ་ནག་བཞིའི་ལྕིད་ལ་མ་ཤ་ཀ་འོང་མི་འོང་བརྟག་པར་བྱ་དགོས་སོ། །འདུལ་བ་ལུང་ལས། རྣམ་གསུམ་དག་པའི་ཤ་གནང་བ་ནི་རྩོད་པ་མེད་ལ། མདོ་གཞན་ལས་ཉན་ཐོས་པ་ལ་ཡང་ཤ་བཀག་སྟེ། རྗེས་བཅས་སུ་གོ་བ་ཁྱེད་ཇི་ལྟར་འདོད་ཅེ་ན། འདུལ་བར། རྣམ་གསུམ་དག་པའི་ཤ་གནང་ནས། དེའི་རྗེས་སུ་མདོ་གཞན་ནས་རྣམ་གསུམ་དག་པའི་ཤ་ཡང་བཀག་པ་ལྟར་སྣང་སྟེ། མྱ་ངན་ལས་འདས་པའི་མདོ་ལས། རིགས་ཀྱི་བུ་ད་ཕྱིན་ཆད་ངའི་ཉན་ཐོས་རྣམས་ཤ་ཟ་བར་མི་གནང་ངོ་། །ཡུལ་འཁོར་གྱི་བསོད་སྙོམས་ནི་བུའི་ཤ་དང་འདྲའོ་ཞེས་བྱ་ན། ཤ་ཟ་བར་ཇི་ལྟར་གནང་། ཤ་ཟ་བ་ནི་བྱམས་པ་ཆེན་པོ་ཆད་པར་འགྱུར་རོ་ཞེས་ངས་བསྟན་ཏོ། །གསོལ་པ། བཅོམ་ལྡན་འདས་འོ་ན་ཇི་ལྟར་མུ་གསུམ་ཡོངས་སུ་དག་པའི་ཤ་ཟ་བར་གནང་ལགས། བཀའ་སྩལ་པ། མུ་གསུམ་ཡོངས་སུ་དག་པ་འདི་ནི་ངས་རིམ་གྱིས་བསླབ་པའི་གཞི་བསྡམ་པའི་ཕྱིར་དེང་ངས་བོར་རོ། །གསོལ་པ། བཅོམ་ལྡན་འདས་ཅི་ལ་དགོངས་ཏེ་དོན་ཆེན་མུ་དགུ་དང་ཤ་རྣམ་པ་བཅུ་སྤང་བ་གསུངས། བཀའ་སྩལ་པ། ཚིགས་བཞག་པ་དེ་དག་ཀྱང་ཤ་མི་ཟ་བར་བསྡམ་པའི་ཕྱིར་བཅད་དོ། །གསོལ་པ། བཅོམ་ལྡན་འདས་ཅི་ལ་དགོངས་ཏེ་ཤ་དང་ཉ་ཤ་ཟ་བ་ཡང་ཁ་ཟས་བཟང་པོར་གསུངས་ལགས། བཀའ་སྩལ་པ། ངས་ནི་ཤ་དང་ཉ་ཤ་ཁ་ཟས་བཟང་པོར་མ་གསུངས་ཀྱི། ངས་ནི་བུ་རམ་ཤིང་དང་། འབྲས་ས་ལུ་དང་། འབྲུ་དང་། གྲོ་དང་། ནས་དང་། མོན་སྲན་རྡེའུ་དང་། མོན་སྲན་གྲེའུ་རྣམས་
དང་། མངར་བག་ཀ་ར་དང་། ལི་ཁ་ར་དང་། སྦྲང་རྩི་དང་། མར་དང་། འོ་མ་དང་། འབྲུ་མར་རྣམས་ཁ་ཟས་བཟང་པོར་གསུངས་སོ། ། ངས་ནི་ལུས་གཡོག་པའི་ཕྱིར་གོས་སྣ་ཚོགས་ཀྱང་ཁ་དོག་ངན་པར་བསྒྱུར་བར་བྱའོ་ཞེས་བསྟན་ན། ཤ་ཟ་བའི་རོ་ལ་ཆགས་པ་ལྟ་ཅི་སྨོས། ཞེས་སོགས་དང་། ཤ་ཟ་བ་ལ་ལྟུང་བྱེད་འབྱུང་བར་གསུངས་པའི་ཕྱིར་རོ། །དེ་ལྟར་གསུངས་མོད་ཀྱང་། ཉན་ཐོས་རྣམས་ལ་དང་པོར་རྣམ་གསུམ་དག་པའི་ཤ་གནང་ནས། དེའི་རྗེས་སུ་ཤ་གཏན་ནས་བཀག་པ་ནི་མ་ཡིན་ཏེ། དེ་ལྟར་བཀག་པ་ཡིན་ན། འདུལ་བ་ལུང་སྡེ་བཞི་གང་རུང་ནས་དགག་དགོས་པ་གང་ཞིག །ལུང་སྡེ་བཞི་གང་རུང་ནས་ཉན་ཐོས་རྣམས་ཀྱིས་ཤ་ཟ་བ་བཀག་པ་མེད་པའི་ཕྱིར། རྟགས་དང་པོ་གྲུབ་སྟེ། ཉན་ཐོས་རབ་བྱུང་རྣམས་ཀྱི་དགག་སྒྲུབ་གནང་གསུམ་གྱི་བཅས་པ་དང་རྗེས་སུ་བཅས་པའི་བསླབ་པའི་མཚམས་རྣམས། བཅོམ་ལྡན་འདས་མངོན་པར་རྫོགས་པར་སངས་རྒྱས་ནས་རིང་པོ་མ་ལོན་པ་ནས་བཟུང་སྟེ། མྱ་ངན་ལས་འདའ་བའི་བར་དུ་ཡུལ་སོ་སོར་གང་ཟག་སོ་སོ་ལ་ཇི་ལྟར་འོས་པ་བཞིན་དུ་བཅའ་བ་མཛད་པའི་ཕྱིར། འོ་ན་མྱ་ངན་ལས་འདས་པའི་མདོ་དེའི་དོན་གང་ཡིན་ཞེ་ན། ཉན་ཐོས་རབ་བྱུང་རྣམས་ལ་དང་པོར་ཤ་གནང་ནས་རྗེས་སུ་ཤ་བཀག་པ་མ་ཡིན་ཏེ། དྲི་བའི་དབང་གིས། སུ་ལ་ཡང་ཅི་ཡང་མ་བྱིན་པར་འཇིག་རྟེན་དུ་སྦྱིན་པ་པོར་གྲགས་པའི་གཏམ་སྙན་པ་ཐོབ་པར་འགྱུར་རམ་ཞེ་ན། ཤ་གཏན་ནས་མི་ཟ་བ་ལ་ཤ་ཟར་ཆུག་ཅིག །དེ་ལྟར་བྱས་ན་སྦྱིན་བདག་གི་གྲགས་པ་ཆེན་པོ་ཐོབ་པར་འགྱུར་ཏེ། བསོད་ནམས་འཕེལ་བར་ནི་མི་འགྱུར་རོ། །འོ་ན་ཤ་མ་ཟ་བ་ལ་ཤ་བྱིན་ན་ཉེས་པར་མི་འགྱུར་
རམ་ཞེ་ན། ཉེས་པར་འགྱུར་ཏེ། ངའི་ཉན་ཐོས་རྣམས་ཀྱིས་ཤ་གཏན་ནས་མི་ཟ་བར་དམ་བཅས་པ་ལ། ཕྱིན་ཆད་ཤ་ཟ་བར་མི་གནང་ཞིང་། དེ་ལ་ཤ་སྦྱིན་དུ་ཡང་མི་རུང་ཞེས་བྱ་བའི་དོན་ཡིན་པའི་ཕྱིར་རོ། །དེ་སྐད་དུ་ཡང་མྱ་ངན་ལས་འདས་པའི་མདོ་ལས། འདྲི་བའི་དབང་ཞེས་བྱ་བ་ནི། འདི་ན་ལ་ལ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཞུ་བར་བྱེད་དེ། བཅོམ་ལྡན་འདས་ཇི་ལྟར་བགྱིས་ན་བདག་གིས་སུ་ལ་ཡང་ཅི་ཡང་མ་སྩལ་བར་འཇིག་རྟེན་དུ་སྦྱིན་པ་པོར་གྲགས་པའི་གཏམ་སྙན་པ་ཐོབ་པར་འགྱུར་ལགས། དེ་བཞིན་གཤེགས་པས་དེ་ལ་འདི་སྐད་ཅེས་བཀའ་སྩལ་ཏོ། ། ཆགས་པ་མེད་པ་ལ་བྲན་དང་བྲན་མོ་མ་བསླངས་པར་སྟོབས་ཤིག །གཏན་དུ་ཚངས་པར་སྤྱོད་པ་ལ་བུ་མོའི་སྦྱིན་པ་གྱིས་ཤིག །ཤ་མི་ཟ་བ་ལ་ཤ་ཟར་ཆུག་ཅིག །ཆང་མི་འཐུང་བ་ལ་ཆང་འཐུང་དུ་ཆུག་ཅིག །དུས་སུ་ཟ་བ་ལ་དུས་མ་ཡིན་པར་ཟས་བྱིན་ཅིག །མེ་ཏོག་ཕྲེང་དང་རྒྱན་མི་འདོགས་པ་ལ། ཕྱེ་མ་དང་སྤོས་དང་མེ་ཏོག་དང་བདུག་པ་རྣམས་བྱིན་ཅིག །དེ་དག་གི་དུས་ཤེས་པར་གྱིས་ལ་མགྲོན་དུ་བོས་ཤིག་དང་། ཁྱོད་ཀྱིས་དེ་ལྟར་བྱས་ན་འཇིག་རྟེན་འདིར་སྦྱིན་བདག་གི་རྒྱལ་པོ་ཡིན་ནོ་ཞེས་གྲགས་པ་ཆེན་པོར་འགྱུར་ཏེ། བསོད་ནམས་འཕེལ་བར་ནི་མི་འགྱུར་རོ། །དེ་ནས་འོད་སྲུངས་ཆེན་པོ་དང་རུས་གཅིག་པས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཤ་མི་འཚལ་བ་ལ་གཟུད་པ་ནི་ཆེད་ཆེར་བགྱི་བ་ལགས་ན། ཤ་མི་འཚལ་བ་ལ་ཤ་འཚལ་དུ་སྩལ་ན་ནོངས་པར་མི་འགྱུར་ལགས་སམ། བཀའ་སྩལ་པ། རིགས་ཀྱི་བུ་ལེགས་སོ་ལེགས་སོ། །ཁྱོད་ཀྱིས་ངའི་དགོངས་པ་རིག་སྟེ། དམ་པའི་ཆོས་སྲུང་བ་ནི་དེ་ལྟར་བྱ་དགོས་སོ། །རིགས་ཀྱི་བུ་ད་
ཕྱིན་ཆད་ངའི་ཉན་ཐོས་རྣམས་ཤ་ཟ་བར་མི་གནང་ངོ་། །ཞེས་སོགས་གསུངས་པའི་ཕྱིར་རོ། །ཡུལ་འཁོར་གྱི་བསོད་སྙོམས་ནི་བུའི་ཤ་དང་འདྲའོ་ཞེས་བྱ་ན། ཤ་ཟ་བར་ངས་ཇི་ལྟར་གནང་ཞེས་པ་ཙམ་གྱིས་ཀྱང་། ཉན་ཐོས་པ་ལ་ཤ་ཟ་བ་བཀག་པ་མ་ཡིན་ཏེ། དེ་ལྟར་ན་བསོད་སྙོམས་ཀྱི་ཟས་ཀྱང་བཟའ་བར་མི་རུང་བར་ཐལ་བའི་ཕྱིར་རོ། །ཤ་ཟ་བ་ནི་བྱམས་པ་ཆེན་པོ་ཆད་པར་འགྱུར་རོ། །ཞེས་པས་ཀྱང་ཉན་ཐོས་པས་ཤ་ཟ་བ་བཀག་པ་མ་ཡིན་ཏེ། བྱམས་པ་ཆེན་པོ་རྒྱུན་ཆད་པ་ཉན་ཐོས་པ་ལ་དགག་བྱའི་གཙོ་བོ་མ་ཡིན་པའི་ཕྱིར་རོ། །མུ་གསུམ་ཡོངས་སུ་དག་པ་འདི་ནི་ངས་རིམ་གྱིས་བསླབ་པའི་གཞི་བསྡམ་པའི་ཕྱིར་ཞེས་སོགས་ཀྱིས་ཀྱང་། ཉན་ཐོས་པས་ཤ་ཟ་བ་བཀག་པ་མ་ཡིན་ཏེ། དཔེར་ན་བསྟན་པ་ལ་རིམ་གྱིས་གཞུག་པའི་ཕྱིར་དུ། ཐེག་པ་གསུམ་གསུངས་པས་ཉན་ཐོས་པ་ལ་རང་དོན་དོན་གཉེར་གྱི་བསམ་པ་མ་བཀག་པ་བཞིན་ནོ། ། དེས་ན་མདོ་དེ་དག་གིས་བྱང་སེམས་ལས་དང་པོ་པ་ཤ་ལ་སྲེད་པའི་དབང་གིས་བྱམས་པ་ཆེན་པོ་རྒྱུན་ཆད་པར་འགྱུར་བ་ཤ་སྲེད་པས་ཟ་བ་བཀག་པ་ཡིན་ཏེ། ཤ་ཟ་བ་ནི་བྱམས་པ་ཆེན་པོ་ཆད་པར་འགྱུར་རོ། །ཞེས་དང་། ངས་ནི་ལུས་གཡོག་པའི་ཕྱིར་གོས་སྣ་ཚོགས་ཀྱང་ཁ་དོག་ངན་པར་བསྒྱུར་བར་བྱའོ་ཞེས་བསྟན་ན། ཤ་ཟ་བའི་རོ་ལ་ཆགས་པ་ལྟ་ཅི་སྨོས། ཞེས་སོགས་དང་། རྒྱུ་དེ་དག་གིས་ན་བྱང་ཆུབ་སེམས་དཔའ་ཆེན་པོ་རྣམས་ཤ་མི་ཟའོ། །ཞེས་གསུངས་པའི་ཕྱིར་རོ། །ངའི་ཉན་ཐོས་རྣམས་ཤ་ཟ་བར་མི་གནང་ངོ་ཞེས་པས་ཀྱང་མི་གནོད་དེ། བྱང་ཆུབ་ཏུ་བགྲོད་པའི་ལམ་སངས་རྒྱས་ལས་ཉན་ནས། དོན་དེ་གཞན་ལ་ཐོས་པར་བྱེད་པས་ན། ཉན་ཐོས་ཀྱི་སྒྲ་བྱང་སེམས་
ལ་ཡང་བཤད་དུ་ཡོད་པའི་ཕྱིར་རོ། །གལ་ཏེ་འདུལ་བ་ནས་རབ་བྱུང་གིས་རྣམ་གསུམ་དག་པའི་ཤ་ཟ་བ་གནང་ཡང་། ཕྱིས་མདོ་གཞན་ནས་རབ་བྱུང་གིས་ཤ་ཟ་བ་བཀག་པས། འདུལ་བ་ནས་རབ་བྱུང་གིས་ཤ་ཟ་བར་གནང་བ་ནི། དགོངས་པ་ཅན་ཡིན་གྱི་སྒྲ་ཇི་བཞིན་པ་ནི་མ་ཡིན་ནོ་སྙམ་ན། དེ་ཡང་མི་འཐད་དེ། དེ་ལྟར་དགོངས་པ་ཅན་ཡིན་ན། ལུང་སྡེ་བཞིའི་ཚིག་དང་དོན་གྱི་འགྲེལ་པ་མཛད་པའི་སྐྱེས་བུ་ཆེན་པོ་རྣམས་ཀྱིས་འདུལ་བ་ནས་ཤ་གནང་བ་དགོངས་པ་ཅན་དུ་འགྲེལ་དགོས་པ་ལ། དགོངས་པ་ཅན་དུ་མ་བཀྲལ་བར་སྒྲ་སོར་བཞག་ཏུ་བཀྲལ་བའི་ཕྱིར་རོ། །འདི་རྣམས་ལ་བརྗོད་པར་བྱ་བ་མང་དུ་ཡོད་མོད། མཁས་པ་དག་གིས་དཔྱད་ཟིན་པས་བརྟགས་ཟིན་བརྟག་པས་ཅི་ཞིག་བྱ། ཆོ་འཕྲུལ་ཆེན་པོ་བསྟན་པའི་ཟླ་བའི་ངོས་འཛིན་མཆུ་དང་དབོའི་ཟླ་བ་ལ་བྱེད་པ་ལུགས་གཉིས་བྱུང་བ་ཁྱེད་གང་འདོད། འཐད་པའི་ཕྱོགས་ལ་སྒྲུབ་བྱེད་དང་། མི་འཐད་པའི་ཕྱོགས་ལ་གནོད་བྱེད་ཇི་ལྟར་བརྗོད་ཅེ་ན། ཁ་ཅིག་མདོ་ལས། དགུན་ཟླ་ཐ་ཆུང་གི་ཚེས་གཅིག་གི་ཉིན་མོ་སངས་རྒྱས་ཆོ་འཕྲུལ་འགྲན་པའི་གནས་སུ་ཞེས་གསུངས་ཤིང་། འབྲོམ་སྟོན་པའི་ཞལ་ནས། སྐར་མ་རྟ་རྒྱུ་བའི་ཟླ་བ་ལ་ཆོ་འཕྲུལ་ཆེན་པོའི་དུས་མཆོད་གྱིས་ཤིག །ཅེས་གསུངས་པས། མཆུའི་ཟླ་བ་འདི་ཉིད་ཆོ་འཕྲུལ་ཆེན་པོའི་དུས་མཆོད་ཀྱི་ཟླ་བ་ཡིན་ཟེར། གཞན་དག་ན་རེ། མཛངས་བླུན་རྒྱ་ནག་ནས་འགྱུར་བ་ལས། དཔྱིད་ཟླ་ར་བའི་ཚེས་གཅིག་ནས་བཅོ་ལྔའི་བར་ལ་ཆོ་འཕྲུལ་ཆེན་པོ་བསྟན་པར་གསུངས་ཤིང་། མདོ་སྡེ་ཉི་མའི་སྙིང་པོ་དང་། འདུལ་བ་དང་། དུས་འཁོར་བ་རྣམས་ཀྱི་ལུགས་ལ། དབོའི་ཟླ་བ་འདི་ཉིད་དཔྱིད་ཟླ་ར་བ་ཡིན་པས། དབོའི་ཟླ་བ་འདི་ཉིད་ཆོ་འཕྲུལ་ཆེན་པོའི་དུས་མཆོད་ཀྱི་ཟླ་བ་ཡིན་ནོ། །འོ་ན། རྒྱ་གར་དུ་དུས་ཕྱིས་མཆུའི་ཟླ་
བ་ལ་དུས་མཆོད་དར་བ་ཅི་ཡིན་ཞེ་ན། རྒྱ་གར་བའི་རྒྱལ་པོ་ཞིག་ཡུལ་གཞན་དུ་དམག་འདྲེན་པའི་དུས་ཀྱིས་ཐུག་ནས། མཆུའི་ཟླ་བ་ལ་སྔ་སྣུར་དུ་དུས་མཆོད་བྱས་ཏེ་ཡུལ་གཞན་དུ་དམག་དྲངས་པ་ལེགས་པ་ལ་བརྟེན་ནས། ཕྱིན་ཆད་མཆུའི་ཟླ་བ་ལ་དུས་མཆོད་དར་བ་ཡིན་ནོ་ཞེས་ཟེར། མདོ་ནས་མི་མཐུན་པ་གཉིས་བྱུང་བ་དེ་ཡང་འགྱུར་ཀྱི་ཁྱད་ཡིན་ལ། རྒྱུ་མཚན་ཡང་དག་མ་མཐོང་བར་ཕྱོགས་གཅིག་མཐོང་བ་རྒྱུ་མཚན་དུ་བྱས་ནས། ཅིག་ཤོས་འགོག་པ་མི་འཐད་ཅིང་། རང་རང་གི་ཡིད་ཆེས་པའི་སྟེང་ནས་དུས་མཆོད་བསྒྲུབས་པས། བསོད་ནམས་དཔག་ཏུ་མེད་པ་འབྱུང་བའང་ཡིན་མོད། ཁོ་བོ་ནི་དཔའ་ལྡན་བླ་མའི་རྗེས་སུ་འབྲང་ངོ་། ། དབུ་མ་རྩ་ཤེའི་འགྲེལ་པ་ག་ལས་འཇིགས་མེད་རང་འགྲེལ་ཡིན་པ་སྔོན་ནས་རྩོལ་མེད་ཡིན་པ་ལ། དིང་སང་རང་འགྲེལ་མ་ཡིན་པར་འདོད་པ་མང་བ་ཞིག་བྱུང་བ། རང་འགྲེལ་མ་ཡིན་ན་འགྲེལ་པ་འདིའི་མཛད་པ་པོ་སུ་ཡིན། རང་འགྲེལ་མ་ཡིན་པ་ལ་སྒྲུབ་བྱེད་ལྟར་སྣང་མིན་པ་བཀོད་པར་རིགས་སོ་ཞེ་ན། རང་འགྲེལ་ཡིན་པར་སྔོན་ནས་རྩོད་པ་མེད་པར་གྲུབ་ན། འདི་རང་འགྲེལ་ཡིན་པར་རྩ་ཤེའི་དགོངས་པ་འགྲེལ་བའི་སྐྱེས་བུ་ཆེན་པོ། ཨཱརྱ་དེ་བ། སངས་རྒྱས་བསྐྱངས། ལེགས་ལྡན། ཟླ་གྲགས། ཞི་བ་འཚོ། ཡེ་ཤེས་སྙིང་པོ་གང་གིས་འདི་རང་འགྲེལ་ཡིན་པར་བཤད་སྨྲ་དགོས་སོ། །འདི་རང་འགྲེལ་མ་ཡིན་ཏེ། རང་འགྲེལ་ཡིན་ན། རྩ་ཤེའི་ཚིག་དང་དོན་གྱི་འགྲེལ་ཚད་ཚད་ལྡན་རྣམས་ཀྱིས་འདི་ཁུངས་སུ་འདྲེན་རིགས་པ་གང་ཞིག །འགྲེལ་མཛད་ཚད་ལྡན་རྣམས་ཀྱིས་འདི་ཁུངས་སུ་དྲངས་པ་ཙམ་དུ་མ་ཟད། རབ་བྱེད་དང་པོའི་གཞུང་འདི་རྣམས་ལ་ག་ལས་འཇིགས་མེད་དང་
འགྲེལ་པ་གཞན་རྣམས་འཆད་ཚུལ་དང་འཆད་པའི་གོ་རིམས་ཀྱང་ཤིན་ཏུ་མི་མཐུན་པའི་ཕྱིར། གཞན་ཡང་འདི་རང་འགྲེལ་མ་ཡིན་ཏེ། འགྲེལ་པ་བུདྡྷ་པཱ་ལི་ཏ་ནི་སངས་རྒྱས་བསྐྱངས་ཀྱིས་མཛད་པར། ལེགས་ལྡན་དང་ཟླ་བའི་ཞབས་གཉིས་ཀས་མཐུན་པར་བཞེད་ལ། རབ་བྱེད་ཐ་མ་བཞི་གའི་འགྲེལ་པ་ག་ལས་འཇིགས་མེད་ལས། བམ་གྲངས་ཀྱི་མིང་མི་མཐུན་པ་ཙམ་ལས་བུདྡྷ་པཱ་ལི་ཏའི་རབ་བྱེད་ཐ་མ་བཞིའི་འགྲེལ་པའི་ཚིག་རིགས་ཇི་ལྟ་བ་བཞིན་བྲིས་པ་མ་གཏོགས། ནུས་པ་ལྷག་པོ་ཏིལ་ཙམ་ཡང་མི་འདུག་པའི་ཕྱིར་རོ། །འདི་རང་འགྲེལ་ཡིན་ན། རྩ་ཤེའི་ཚིག་དང་དོན་འགྲེལ་མཛད་རྣམས་ཀྱིས་འདི་ཁུངས་སུ་འདྲེན་རིགས་པ་ཡིན་ཏེ། དཔལ་ལྡན་ཟླ་བས། བཞི་བརྒྱ་པ་དང་། བུདྡྷ་པཱ་ལི་ཏ་དང་། ལེགས་ལྡན་གྱིས་ལེགས་པར་བཤད་པའི་ཆ་དང་། རྩོད་ཟློག་གི་རང་འགྲེལ་སོགས་ནས་ལུང་དྲངས་པའི་ཕྱིར་རོ། །འཆད་ཚུལ་དང་འཆད་པའི་གོ་རིམས་ཀྱང་མི་མཐུན་ཏེ། མཆོད་བརྗོད་ཀྱི་སྐབས་སུ། སྐྱེ་བ་མེད་པ་འགག་མེད་པ། ཞེས་སྨོས་རིགས་པ་ལ། འགག་པ་མེད་པ་སྐྱེ་མེད་པ། །ཞེས་སྨོས་པ་ཅི་ཡིན་ཞེས་པའི་ལན་དུ་སངས་རྒྱས་བསྐྱངས་དང་། ལེགས་ལྡན་དང་། ཟླ་བས། གལ་ཏེ་སྐྱེ་བ་སྔ་གྱུར་ལ། །རྒ་ཤི་ཕྱི་བ་ཡིན་ན་ནི། །སྐྱེ་བ་རྒ་ཤི་མེད་པ་དང་། །མ་ཤི་བར་ཡང་སྐྱེ་བར་འགྱུར། །ཞེས་འཆད་པར་འགྱུར་བ་བཞིན་དུ། འཁོར་བ་སྤྱི་ཙམ་གྱི་སྐྱེ་འཆི་ལ་གོ་རིམ་མཐའ་གཅིག་ཏུ་མ་ངེས་པར་བསྟན་པའི་ཕྱིར་དུ། འགག་པ་མེད་པ་སྐྱེ་མེད་པ། །ཞེས་སྨོས་པའི་ལན་མཛད་ལ། ག་ལས་འཇིགས་མེད་ཀྱིས་སྐྱེ་བ་སྔར་སྨོས་པར་རིགས་མོད། སྡེབ་སྦྱོར་གྱི་དབང་གིས་འགག་པ་མེད་པ་སྔར་སྨོད་ཞེས་ལན་བཏབ་པའི་ཕྱིར་དང་། གཞན་ཡང་།
འགག་པ་མེད་པ་ཞེས་པའི་བཤད་པའི་རྣམ་གྲངས་འགྲེལ་པ་གཞན་དང་མི་མཐུན་པ་མང་པོ་མཛད་པར་སྣང་། བཤད་པའི་གོ་རིམ་ཡང་མི་མཐུན་ཏེ། ག་ལས་འཇིགས་མེད་ལས། འགག་པ་མེད་དེ། སྐྱེ་བ་མེད་པའི་ཕྱིར་རོ། །སྐྱེ་བ་མེད་དེ། འགག་པ་མེད་པའི་ཕྱིར་རོ། ། སྐྱེ་བ་མེད་པའི་རྒྱུ་མཚན། བདག་ལས་མ་ཡིན་གཞན་ལས་མིན། །གཉིས་ལས་མ་ཡིན་རྒྱུ་མེད་མིན། །དངོས་པོ་གང་དག་གང་ན་ཡང་། །སྐྱེ་བ་ནམ་ཡང་ཡོད་མ་ཡིན། །དེའི་རྟགས་སྒྲུབ་པ་ལ། དངོས་པོ་རྣམས་ཀྱི་རང་བཞིན་ནི། །རྐྱེན་ལ་སོགས་ལ་ཡོད་མ་ཡིན། །ཞེས་པས་བདག་སྐྱེ་མེད་པར་སྒྲུབ་ལ། བདག་གི་དངོས་པོ་ཡོད་མིན་ན། །གཞན་དངོས་ཡོད་པར་ག་ལ་འགྱུར། །ཞེས་པས་གཞན་སྐྱེ་མེད་པར་སྒྲུབ་ཅིང་། བདག་གཞན་རེ་རེ་ལས་སྐྱེ་བ་མེད་པས། གཉིས་ཀ་ལས་སྐྱེ་བ་མེད་པར་གྲུབ་ལ། རྒྱུ་མེད་ལས་སྐྱེ་བ་ནི་ཐ་ཆད་པས། མཐའ་བཞིའི་སྐྱེ་བ་མེད་པར་བསྟན་པ་ལ། རྐྱེན་རྣམས་བཞི་སྟེ། ཞེས་སོགས་ཀྱི་རྩོད་པ་བཀོད་ནས། དེའི་ལན་དུ། བྱ་བ་རྐྱེན་དང་ལྡན་མ་ཡིན། །རྐྱེན་དང་མི་ལྡན་བྱ་བ་མེད། །ཅེས་པས་རྐྱེན་བཞིས་རྣམ་ཤེས་སྐྱེས་པའི་བྱ་བ་ལ་རྐྱེན་དང་ལྡན་མི་ལྡན་བཀག །བྱ་བ་མི་ལྡན་རྐྱེན་མ་ཡིན། །བྱ་ལྡན་ཡོད་འོན་ཏེ་ན། །ཤེས་པས་རྐྱེན་ལ་ཡང་བྱ་བ་ལྡན་མི་ལྡན་དང་། གཉིས་ཀ་དང་གཉིས་ཀ་མིན་པ་བཀག་ཅེས་སོགས་འཆད་པར་བྱེད་དོ། །དེས་ན་འགྲེལ་པ་འདི་ནི་སློབ་དཔོན་ལ་ཁ་གཡར་བྱས་པ་ཡིན་ནོ། །འོ་ན་འདིའི་མཛད་པ་པོ་གང་ཞེ་ན། ཁ་ཅིག་ན་རེ་ག་ལས་འཇིགས་མེད་འགྲེལ་པ་བྱེད་པ་པོའི་མིང་ཡིན་ཏེ། བུདྡྷ་པཱ་ལི་ཏ་བཞིན་ཞེས་ཟེར་རོ། །ཁ་ཅིག་ན་རེ། ག་ལས་འཇིགས་མེད་རང་འགྲེལ་ཡིན་ཏེ། སངས་རྒྱས་བསྐྱངས་ཀྱིས་བདག་སྐྱེ་འགོག་པ་ན། དངོས་པོ་རྣམས་
བདག་གི་བདག་ཉིད་ལས་སྐྱེ་བ་མེད་དེ། དེ་དག་གི་སྐྱེ་བ་དོན་མེད་པ་ཉིད་དུ་འགྱུར་བའི་ཕྱིར་དང་། སྐྱེ་བ་ཐུག་པ་མེད་པར་འགྱུར་པའི་ཕྱིར། ཞེས་གསུངས་པ་ལ། ལེགས་ལྡན་གྱིས་འདི་ལ་གཞན་ནི་དངོས་པོ་རྣམས། བདག་གི་བདག་ཉིད་ལས་སྐྱེ་བ་མེད་དེ། དེ་དག་གི་སྐྱེ་བ་དོན་མེད་པ་ཉིད་དུ་འགྱུར་བའི་ཕྱིར་དང་། སྐྱེ་བ་ཐུག་པ་མེད་པར་འགྱུར་བའི་ཕྱིར་རོ། །ཞེས་འདོད་པ་བཀོད་ནས། དེ་འགོག་པའི་སྐབས་སུ། སྤྱན་རས་གཟིགས་ཀྱི་བརྟུལ་ཞུགས་ལས། འདི་ལ་ཞེས་བྱ་བ་ནི་བདག་སྐྱེ་འགོག་པ་འདི་ལའོ། །གཞན་ནི་ཞེས་བྱ་བ་ནི། བསྟན་བཅོས་འདིའི་འགྲེལ་པ་བྱེད་པ་ནི་མང་སྟེ། འདི་ལྟ་སྟེ། སློབ་དཔོན་གྱི་ཞལ་མངའ་ནས་དང་། གནས་བརྟན་བུདྡྷ་པཱ་ལི་ཏ་དང་། ཙནྡྲ་ཀཱིརྟི་དང་། དེ་བ་ཤྲ་མ་དང་། གུ་ན་ཤྲི་དང་། གུ་ན་མི་ཏྲ་དང་། སྠི་ར་མ་ཏི་དང་། སློབ་དཔོན་ལེགས་ལྡན་འབྱེད་ཉིད་ལ་ཐུག་པའི་བར་དག་ཡོད་པ་ལས། གཞན་པ་སྟེ་གནས་བརྟན་བུདྡྷ་པཱ་ལི་ཏ་དང་སྦྱར་རོ་ཞེས་བཤད་ལ། ག་ལས་འཇིགས་མེད་མ་གཏོགས་པ་སློབ་དཔོན་གྱིས་མཛད་པའི་རྩ་ཤེའི་འགྲེལ་པ་མེད་པའི་ཕྱིར་ཞེས་ཟེར་རོ། །སྤྱན་རས་གཟིགས་ཀྱི་བརྟུལ་ཞུགས་ལས་དེ་སྐད་དུ་བཤད་མོད། འདི་ནི་མི་ཤེས་པ་ཞིག་གིས་འགྲེལ་པ་དེར་བཅུག་པར་སྣང་ངོ་། ། སྔ་རབས་པ་རྣམས་ཀྱིས། རིགས་ཚོགས་དྲུག་ལ་ཐ་སྙད་གྲུབ་པ་བགྲངས་ཤིང དིང་སང་རིགས་ཚོགས་དྲུག་ལ་དབུ་མ་རིན་ཆེན་ཕྲེང་བ་བགྲོད་པ་ཇི་ལྟར་རིགས་ཞེ་ན། སྤྱིར་སློབ་དཔོན་ཀླུ་སྒྲུབ་ཀྱིས་མཛད་པའི་བསྟོན་བཅོས་ལ། རིག་གནས་ཐུན་མོང་བ་དང་ཐུན་མོང་མ་ཡིན་པ་གཉིས། ཐུན་མོང་མིན་པ་ལ་ཡང་། སྔགས་དང་ཕ་རོལ་ཏུ་ཕྱིན་པ་ལ་བརྟེན་པ་གཉིས། ཕྱི་མ་ལ། དོན་དམ་པའི་རྣམ་གཞག་དང་། ཐ་སྙད་ཀྱི་རྣམ་གཞག་གཙོ་བོར་སྟོན་པ་གཉིས། དོན་དམ་པའི་
རྣམ་གཞག་སྟོན་པ་ལ་ཡང་། ལུང་གིས་སྟོན་པ་དང་། རིགས་པས་གཏན་ལ་འབེབས་པ་གཉིས། རིགས་པས་གཏན་ལ་འབེབས་པ་ལ་དབུ་མ་རིགས་པའི་ཚོགས་དྲུག་མཛད་དོ། །དབུ་མ་རིགས་པའི་ཚོགས་ཞེས་པའི་དོན་ནི། ཡུམ་གྱི་མདོ་ལས་བསྟན་པ་བཞིན། རྟག་ཆད་ཀྱི་མཐའ་དང་བྲལ་བའི་དབུ་མའམ། སྟོང་ཉིད་རིགས་པར་རྒྱས་པར་གཏན་ལ་འབེབས་པའི་གཞུང་ལ་དབུ་མ་རིགས་པའི་ཚོགས་ཞེས་བྱ་ལ། དེ་ལྟར་ན་རིན་ཆེན་ཕྲེང་བ་ནི་དབུ་མ་རིགས་པའི་ཚོགས་སུ་བགྲང་རིགས་ཏེ། འདིས་འཁོར་བའི་རྩ་བ་བདག་འཛིན་དུ་བསྟན་ནས། བདག་འཛིན་སྤང་བའི་ཕྱིར་དུ་བདག་འཛིན་གྱི་ཡུལ་གང་ཟག་གི་བདག་མེད་པར་རིགས་པས་རྒྱས་པར་གཏན་ལ་འབེབས་པ་ཡིན་པའི་ཕྱིར། ཐ་སྙད་གྲུབ་པ་ནི་དབུ་མ་རིགས་པའི་ཚོགས་སུ་བགྲང་མི་རིགས་ཏེ། དེས་སྟོང་ཉིད་རིགས་པས་རྒྱས་པར་གཏན་ལ་འབེབས་པ་མིན་གྱི། རང་བཞིན་གྱིས་མེད་ན་བོང་བུའི་རྭ་བཞིན་དུ། ཐ་སྣད་ཀྱི་རྣམ་གཞག་མི་འཐད་པར་རྒོལ་བ་ལ། རང་བཞིན་གྱིས་མེད་པ་ལ་རྟེན་འབྲེལ་དུ་རུང་བས། ཐ་སྙད་ཀྱི་རྣམ་གཞག་ཤིན་ཏུ་འཐད་པར་གྲུབ་པ་ཡིན་ནོ་ཞེས་སྟོན་པའི་ཕྱིར་རོ། །ཐ་སྙད་གྲུབ་པ་ཞེས་པའི་མིང་ཉིད་ཀྱིས་ཀྱང་སྟོང་ཉིད་རྒྱས་པར་མི༌སྟོན་པར་གོའོ། །གཞན་ཡང་ག་ལས་འཇིགས་མེད་རང་འགྲེལ་ཡིན་པ་དང་། ཐ་སྙད་གྲུབ་པ་དབུ་མ་རིགས་པའི་ཚོགས་ལ་བགྲང་བ་དཔལ་ལྡན་ཟླ་བ་གྲགས་པའི་བཞེད་པ་མ་ཡིན་ཏེ། ཚིག་གསལ་གྱི་མཇུག་ཏུ། མདོ་སྡེ་ཀུན་ལས་བཏུས་དང་གཏམ་བྱ་རིན་ཆེན་ཕྲེང་དང་ཡང་དག་བསྟོད་པ་དང་། འབད་པས་ཤིན་ཏུ་ཡུན་རིང་འཕགས་པའི་བསྟན་བཅོས་ཚིག་ལེར་བྱས་དེ་དང་། རིགས་པ་དྲུག་ཅུ་ཞེས་བྱ་རྣམ་པར་
འཐག་བཅས་སྟོང་ཉིད་བདུན་ཅུ་པ་དེ་དང་། །གང་ཡང་རྩོད་པ་རྣམ་པར་ཟློག་པ་བཀོད་པ་དེ་དག་ཀྱང་ནི་མཐོང་གྱུར་ཅིང་། །བརྒྱ་པ་ལ་སོགས་དེ་དག་ཀྱང་ནི་དེ་བཞིན་མདོ་སྡེ་ཟབ་མོ་རྣམ་མང་དང་། །སངས་རྒྱས་བསྐྱངས་ཀྱིས་མཛད་པའི་འགྲེལ་པ་མཐོང་ནས་ལེགས་ལྡན་འབྱེད་ཀྱི་ལེགས་བཤད་གང་། །གཅིག་ནས་གཅིག་ཏུ་བརྒྱུད་ནས་འོངས་དང་བདག་གིས་རྣམ་པར་ཕྱེ་ལས་རྙེད་གང་ཡང་། །དེ་དག་བསྡོམས་ཏེ་བློ་ཆེན་ལྡན་རྣམས་མགུ་བར་བྱ་ཕྱིར་ཡང་དག་བསྟན་པ་ཡིན། །ཞེས་ཟབ་མོའི་མདོ་དང་། སློབ་དཔོན་གྱིས་མཛད་པའི་དེ་ཁོ་ན་ཉིད་སྟོན་པའི་བསྟན་བཅོས་དང་། དེའི་དགོངས་པ་འགྲེལ་པའི་བསྟན་བཅོས་འདི་དང་། འདི་མཐོང་བ་ལ་བརྟེན་ནས་ཚིག་གསལ་བརྩམས། ཞེས་གསུངས་ཀྱི། ག་ལས་འཇིགས་མེད་དང་ཐ་སྙད་གྲུབ་པ་མཐོང་ནས་ཞེས་མ་གསུངས་པའི་ཕྱིར་རོ། །དིང་སང་གི་དབུ་མ་པ་ཕལ་ཆེར་འདོད་པ་ལྟར་གཞི་གྲུབ་ན། རྟེན་ཅིང་འབྲེལ་འབྱུང་ཡིན་པས་ཁྱབ་བམ་ཇི་ལྟར་འདོད་ཅེ་ན། གང་གིས་རྟེན་ཅིང་འབྲེལ་པར་འབྱུང་། །འགག་པ་མེད་པ་སྐྱེ་མེད་པ། །ཞེས་པའི་སྐབས་ནས་བསྟན་པའི་ཁྱད་གཞིའི་རྟེན་འབྲེལ་ནི་འདུས་བྱས་སུ་བཞེད་དེ། ཚིག་གསལ་ལས། དངོས་པོ་རྣམས་ཀྱི་འབྱུང་བ་རྒྱུ་དང་རྐྱེན་ལ་ལྟོས་པ་ནི་རྟེན་ཅིང་འབྲེལ་པར་འབྱུང་བའི་དོན་ཏོ། །ཞེས་གསུངས། དེ་ལྟར་བསྟན་པའི་དགོས་པ་ཡང་། དངོས་པོ་རྣམས་རྒྱུ་མེད་དང་། རྒྱུ་གཅིག་བུ་དང་། མི་མཐུན་པའི་རྒྱུ་དང་། བདག་གཞན་གཉིས་ཀ་ལས་སྐྱེ་བ་བཀག་ནས། རྒྱུ་དང་རྐྱེན་ལས་སྐྱེས་པར་གྲུབ་པས། ཀུན་རྫོབ་ཀྱི་བདེན་པ་གྲུབ་ལ། དེ་ཉིད་རང་བཞིན་གྱིས་སྐྱེ་བ་མེད་པ་ལ་སོགས་པར་བསྟན་པས་དོན་དམ་པའི་བདེན་པ་གྲུབ་ཅིང་། རང་བཞིན་གྱིས་གྲུབ་པ་རྡུལ་ཙམ་ཡང་མེདཔའི་
དོན་དམ་དང་། དེ་ཉིད་ལ་བྱ་བྱེད་ཐམས་ཅད་འཐད་པའི་བདེན་པ་གཉིས་པོ་འདི་རྩ་བ་ཤེས་རབ་ཀྱི་བརྗོད་བྱ་ཡིན་ཞེས་གོ་བར་འགྱུར་རོ། །སྤྱིར་རྟེན་འབྲེལ་ལ་འདུས་བྱས་ཡིན་པས་མ་ཁྱབ་སྟེ། ཚིག་གསལ་ལས། ཕྲད་བལྟོས་རྟེན་གསུམ་རྣམ་གྲངས་པར་གསུངས་པས། བརྟེན་པའི་དོན་ཤེས་བྱ་ཐམས་ཅད་ལ་ཡོད་ལ། འབྱུང་བ་སྐྱེ་བ་ལ་བྱས་ན་འདུས་བྱས་ཁོ་ན་ཡིན་ཡང་། དེ་ལ་བརྟེན་ནས་གྲུབ་པ་ཡང་དེ་ལ་བརྟེན་ནས་འབྱུང་བའི་དོན་དུ་གསུངས་པ་ཡོད་དེ། བྱེད་པོ་ལས་ལ་བརྟེན་བྱས་ཤིང་། །ལས་ཀྱང་བྱེད་པོ་དེ་ཉིད་ལ། །བརྟེན་ནས་འབྱུང་བ་མ་གཏོགས་པ། །འགྲུབ་པའི་རྒྱུ་ནི་མ་མཐོང་ངོ་། །ཞེས་ལས་དང་བྱེད་པ་པོ་ཕན་ཚུན་བརྟེན་ནས་འབྱུང་བར་གསུངས་ཀྱང་། ཕན་ཚུན་སྐྱེད་བྱེད་མིན་པ་དང་། དེ་བཞིན་དུ་ཚད་མ་དང་གཞལ་བྱ་བསྒྲུབ་བྱ་སྒྲུབ་བྱེད་ཕན་ཚུན་བརྟེན་ནས་འབྱུང་བར་གསུངས་ཀྱང་། ཕན་ཚུན་སྐྱེད་བྱེད་མིན་པ་དང་། འདི་ཡོད་ན་ནི་འདི་འབྱུང་སྟེ། །ཐུང་ངུ་ཡོད་ན་རིང་པོ་བཞིན། །ཞེས་ཐུང་ངུ་ལ་བརྟེན་ནས་རིང་པོར་འབྱུང་ཡང་། ཐུང་ངུ་རིང་པོའི་སྐྱེ་བྱེད་མིན་པ་བཞིན་ནོ། །དེས་ན་ཆོས་ཐམས་ཅད་རྟེན་འབྱུང་ཡིན་ཏེ། རང་གི་ལྟོས་ས་ལ་བརྟེན་ནས་འབྱུང་བའི་ཕྱིར་ཏེ། དེ་ལ་བརྟེན་ནས་གྲུབ་པའི་ཕྱིར། ཁྱབ་པ་བསྒྲུབས་ཟིན། དེ་ལ་དགོངས་ནས། གང་ཕྱིར་རྟེན་འབྱུང་མ་ཡིན་པའི། །ཆོས་འགའ་ཡོད་པ་མ་ཡིན་པ། །དེ་ཕྱིར་སྟོང་པ་མ་ཡིན་པའི། །ཆོས་འགའ་ཡོད་པ་མ་ཡིན་ནོ། །ཞེས་གསུངས་ལ། འདིའི་མཚམས་སྦྱོར་དུ། སྟོང་པ་ཉིད་དང་བརྟེན་ནས་བཏགས་པ་དང་དབུ་མའི་ལམ་ཞེས་བྱ་བ་འདི་དག་ནི། རྟེན་ཅིང་འབྲེལ་པར་འབྱུང་བ་ཉིད་ཀྱི་མིང་གི་རྣམ་གྲངས་སོ། །
ཞེས་དང་། ཕྱི་འགྲེལ་དུ། རྟེན་ཅིང་འབྲེལ་པར་འབྲུང་བ་མིན་པའི་ཆོས་འགའ་ཡོད་པ་མ་ཡིན་ལ། རྟེན་ཅིང་འབྲེལ་པར་འབྱུང་བ་ཡང་སྟོང་པ་ཡིན་པའི་ཕྱིར། སྟོང་པ་མ་ཡིན་པའི་ཆོས་ཡོད་པ་མ་ཡིན་ནོ། །ཞེས་གསུངས་སོ། ། ཁ་ཅིག་ན་རེ། སློབ་དཔོན་ལེགས་ལྡན་ནི་རྟེན་འབྱུང་ཡིན་ན། འདུས་བྱས་ཡིན་པས་ཁྱབ་པར་བཞེད་དེ། གང་ཕྱིར་རྟེན་འབྱུང་མ་ཡིན་པའི། །ཆོས་འགའ་ཡོད་པ་མ་ཡིན་པ། །དེ་ཕྱིར་སྟོང་པ་མ་ཡིན་པའི། །ཆོས་འགའ་ཡོད་པ་མ་ཡིན་ནོ། །ཞེས་པའི་དོན། ཕྱི་ནང་གི་ཆོས་རྣམས་ཆོས་ཅན། ངོ་བོ་ཉིད་མེད་དེ། རྟེན་ཅིང་འབྲེལ་པར་འབྱུང་བ་ཡིན་པའི་ཕྱིར། སྒྱུ་མའི་སྐྱེས་བུ་བཞིན་ཞེས་བཀོད་ནས། དེ་རྟགས་ཡང་དག་མ་ཡིན་ཏེ། མཐུན་པའི་ཕྱོགས་ནམ་མཁའ་སོགས་ལ་རྟེན་འབྱུང་ཡིན་པ་མ་གྲུབ་པའི་ཕྱིར། ཞེས་རྩོད་པ་བཀོད་ནས། དེ་ལ་རྟགས་མ་གྲུབ་ཀྱི་ལན་མ་བཏབ་པར། ཁྱབ་པ་མ་གྲུབ་སྟེ། དུང་སྒྲ་མི་རྟག་པར་སྒྲུབ་པ་ལ་རྩོལ་བྱུང་རྟགས་སུ་བཀོད་པའི་ཚེ། རྩོལ་བྱུང་དེ་མཐུན་ཕྱོགས་གློག་ལ་སོགས་པ་ལ་མེད་ཀྱང་། དུང་སྒྲ་མི་རྟག་པར་སྒྲུབ་པའི་རྟགས་ཡང་དག་ཡིན་པ་བཞིན་ཞེས་ལན་བཏབ་པའི་ཕྱིར་དང་། མཆོད་བརྗོད་ཀྱི་སྐབས་སུ། རྟེན་ཅིང་འབྲེལ་བར་འབྱུང་བ་འདུས་མ་བྱས་ཡོད་པ་ཉིད་དུ་སྟོན་པ་ལ་ནི་རྗེས་སུ་དཔག་པ་མེད་པའི་ཕྱིར་རོ་ཞེས་བཤད་པའི་ཕྱིར་ཞེས་ཟེར་རོ། ། བྱང་ཆུབ་སེམས་དཔའི་སྤྱོད་པ་ལ་འཇུག་པ་ལས། ཁོང་ཁྲོས་བསྐལ་པ་སྟོང་དུ་བསགས་པའི་དགེ་རྩ་འཇོམས་པར་གསུངས་པ་དང་། དབུ་མ་འཇུག་པ་ལས། བསྐལ་པ་བརྒྱར་བསགས་པའི་དགེ་རྩ་འཇོམས་པར་གསུངས་པ། བསྐལ་པ་སྟོང་དང་བརྒྱར་གསུངས་པ་གང་གང་ལ་དགོངས་ཞེ་ན། འཇུག་
པར། གང་ཕྱིར་རྒྱལ་སྲས་རྣམས་ལ་ཁྲོས་པ་ཡིས། །སྦྱིན་དང་ཁྲིམས་བྱུང་དགེ་བ་བསྐལ་པ་བརྒྱར། །བསགས་པ་སྐད་ཅིག་གིས་འཇོམས་དེ་ཡི་ཕྱིར། །མི་བཟོད་ལས་གཞན་སྡིག་པ་ཡོད་མ་ཡིན། །ཞེས་པའི་འགྲེལ་པར། བྱང་སེམས་བདག་ཉིད་ཆེན་པོས་བྱང་ཆུབ་ཏུ་སེམས་བསྐྱེད་པ་ལ། ཡུལ་དེ་བྱང་སེམས་སུ་ངེས་སམ་མ་ངེས་ཀྱང་རུང་སྟེ། བདེན་པ་དང་མི་བདེན་པའི་ཉེས་པ་ལྷག་པར་སྒྲོ་བཏགས་ནས། ཁོང་ཁྲོའི་བསམ་པ་སྐད་ཅིག་ཙམ་བསྐྱེད་ན་ཡང་། བསྐལ་པ་བརྒྱར་བསགས་པའི་བསོད་ནམས་ཀྱི་ཚོགས་སྦྱིན་པ་དང་ཚུལ་ཁྲིམས་གོམས་པ་འཇོམས་ན། བྱང་སེམས་མིན་པས་བྱང་སེམས་ལ་ཁྲོས་པ་ལྟ་ཅི་སྨོས། ཞེས་གསུངས་ལ། དེའི་ཤེས་བྱེད་དུ། འཇམ་དཔལ་རྣམ་པར་རོལ་བའི་མདོ་ལས། འཇམ་དཔལ་ཁོང་ཁྲོ་བ་ཁོང་ཁྲོ་བ་ཞེས་བྱ་བ་ནི་བསྐལ་པ་བརྒྱར་བསགས་པའི་དགེ་བ་ཉེ་བར་འཇོམས་པར་བྱེད་པ་དེའི་ཕྱིར་ཁོང་ཁྲོ་བ་ཞེས་བྱའོ། །ཞེས་གསུངས་པ་དྲངས། འདིར་བྱང་སེམས་བདག་ཉིད་ཆེན་པོས་བྱང་སེམས་ལ་ཁྲོས་ན་ཞེས་གསུངས་པས། སོ་སྐྱེའི་བྱང་སེམས་སྟོབས་ཆེ་བས་ཆུང་བ་ལ་ཁྲོས་ན། བསྐལ་པ་བརྒྱར་བསགས་པའི་སྦྱིན་དང་ཚུལ་ཁྲིམས་ལས་བྱུང་བའི་དགེ་རྩ་འཇོམས། སྤྱོད་འཇུག་གི་དགོངས་པ་ནི། བྱང་སེམས་མིན་པས་བྱང་ཆུབ་ཏུ་སེམས་བསྐྱེད་པ་ལ་ཁྲོས་ན། བསྐལ་པ་སྟོང་དུ་བསགས་པའི་དགེ་རྩ་འཇོམས་པར་མངོན་ནོ། །འོན་ཀྱང་འདི་ལྟ་བུ་དངོས་སྟོབས་ཀྱི་རིགས་པས་མི་འགྲུབ་པས། དཔྱད་གསུམ་གྱིས་དག་པའི་ལུང་ལ་བརྟེན་ནས་ཤེས་པར་བྱའོ། །དགེ་རྩ་གཅོད་པར་གསུངས་པ་རྣམ་སྨིན་རྒྱང་བསྲིངས་པ་ལ་དགོངས་སམ། དགེ་བའི་ས་བོན་གཅོད་པ་གང་ཡིན་
ཞེ་ན། མཁས་པ་ཁ་ཅིག་ན་རེ། ཁོང་ཁྲོས་དགེ་རྩ་གཅོད་པའི་དོན་ནི་དགེ་རྩ་དེའི་འབྲས་བུ་འབྱིན་པ་ཡིན་གྱི། ད་གཟོད་རྐྱེན་དང་ཕྲད་ན་རང་རང་གི་འབྲས་བུ་མི་འབྱིན་པ་ནི་མ་ཡིན་ཏེ། ཁོང་ཁྲོས་དགེ་བའི་ས་བོན་སྤོང་བ་མི་སྲིད་པའི་ཕྱིར་ཞེས་ཟེར་རོ། །དེ་ནི་ཁྱབ་པ་མ་ངེས་ཏེ། སོ་སྐྱེས་གཉེན་པོ་སྟོབས་བཞིས་མི་དགེ་བ་སྦྱངས་པའི་དག་པ་དེ། མི་དགེ་བ་དེའི་ས་བོན་སྤངས་པ་མིན་ཡང་གང་སྤངས་པའི་མི་དགེ་བ་དེ་ད་གཟོད་རྐྱེན་དང་ཕྲད་ཀྱང་རྣམ་སྨིན་མི་འབྱིན་པའི་ཕྱིར་དང་སྦྱོར་ལམ་བཟོད་པ་ཐོབ་པའི་ཚེ་ལས་ཉན་གྱི་དབང་གིས་ངན་སོང་དུ་སྐྱེ་བའི་ས་བོན་མ་སྤངས་ཀྱང་། རྐྱེན་དང་ཕྲད་ན་ཡང་ལས་ཉོན་གྱི་དབང་གིས་ངན་སོང་དུ་སྐྱེ་མི་སྲིད་པའི་ཕྱིར། དགེ་བའི་རྣམ་སྨིན་རྐྱང་བསྲིངས་པ་ཙམ་གྱིས་དགེ་རྩ་འཇོམས་པར་འཇོག་ན། དགེ་བའི་ལས་སྟོབས་ཆེ་བ་རྣམས་དགེ་རྩ་སྟོབས་ཆུང་བ་འཇོམས་བྱེད་དང་། མི་དགེ་བ་སྟོབས་ཆེ་བ་རྣམས་མི་དགེ་བ་སྟོབས་ཆུང་བ་འཇོམས་བྱེད་དུ་འགྱུར་ཏེ། སྟོབས་ཆེ་བ་དེས་སྟོབས་ཆུང་བ་དེ་རྣམ་སྨིན་འབྱིན་པ་རྒྱང་བསྲིངས་ནས། སྔོན་ལ་སྟོབས་ཆེ་བ་དེའི་འབྲས་བུ་འབྱིན་པའི་ཕྱིར་ཏེ། ལས་ཀྱིས་འཁོར་བར་ལྕི་གང་དང་། །ཉེ་བ་གང་དང་གོམས་པ་གང་། །སྔོན་བྱས་གང་ཡིན་དེ་དག་ལས། །སྔ་མ་སྔ་མ་རྣམ་སྨིན་འགྱུར། །ཞེས་གསུངས་པའི་ཕྱིར་རོ། །ཁོང་ཁྲོས་དགེ་བའི་ས་བོན་གཅོད་པ་ཡང་མ་ཡིན་ཏེ། དགེ་བའི་ས་བོན་མེད་པའི་སེམས་ཅན་མི་སྲིད་པའི་ཕྱིར་ཏེ། སེམས་ཅན་ཐམས་ཅད་ལ་རང་བཞིན་གྱིས་རྣམ་པར་དག་པའི་རིགས་ཡོད་པའི་ཕྱིར་རོ། །སྤྱོད་འཇུག་དང་འཇུག་པ་ལས། ཁོང་ཁྲོས་དགེ་རྩ་འཇོམས་ཞེས་གསུངས་ཀྱི། དགེ་རྩ་གཅོད་ཅེས་གསུངས་པ་མེད་དོ། །འོ་ན། ཁོང་ཁྲོས་དགེ་རྩ་འཇོམས་པའི་དོན་
གང་ཡིན་ཞེ་ན། རྟོག་གེ་འབར་བ་ལས། གང་གི་ཚེ་དགེ་བ་ཡང་ལྟ་བ་ལོག་པ་དང་གནོད་སེམས་ཀྱིས་ཉམས་པར་གྱུར་པའམ། མི་དགེ་བ་ཡང་སྨོད་པ་དང་། སྡོམ་པ་དང་། འཆགས་པ་ལ་སོགས་པའི་གཉེན་པོས་སྟོབས་ཉམས་པར་གྱུར་པ་དེ་དག་ནི་རྐྱེན་ཚོགས་པ་ཡོད་དུ་ཟིན་ཀྱང་། དགེ་བ་དང་མི་དགེ་བའི་ས་བོན་གྱི་ནུས་པ་ཉམས་པ་གང་ལས་འབྲས་བུ་གང་ཞིག་འབྱུང་བར་འགྱུར། ཞེས་གསུངས་པ་ལྟར། ས་བོན་ཉམས་པ་རྐྱེན་དང་ཕྲད་ཀྱང་མྱུ་གུ་མི་འབྱུང་བ་བཞིན་དུ། ཁོང་ཁྲོས་གང་བཅོམ་པའི་དགེ་བ་དེ་ད་གཟོད་རྐྱེན་དང་ཕྲད་ཀྱང་རྣམ་སྨིན་འབྱིན་མི་ནུས་པ་ཡིན་ནོ། །ཁོང་ཁྲོས་དགེ་རྩ་འཇོམས་པའི་དོན་དེ་ལྟར་ཡིན་གྱི། ལོག་ལྟས་དགེ་རྩ་ཆད་པའི་གང་ཟག་གི་རྒྱུད་ལ་རེ་ཤིག་དགེ་བའི་སེམས་མངོན་གྱུར་མེད་པར་འགྱུར་བ་བཞིན་དུ། ཁོང་ཁྲོ་སྐྱེས་མ་ཐག་ནས་རྒྱུད་ལ་དགེ་བ་མེད་པར་འགྱུར་བ་མིན་ནོ། ། འོ་ན། གཉེན་པོ་སྟོབས་ཞིས་སྦྱངས་པའི་མི་དགེ་བས་རྣམ་སྨིན་མི་འབྱིན་པ་དང་། ཁོང་ཁྲོས་བཅོམ་པའི་དགེ་བས་རྣམ་སྨིན་མི་འབྱིན་ན། ལུས་ཅན་རྣམས་ཀྱི་ལས་འདི་ནི། །བསྐལ་པ་བརྒྱར་ཡང་ཆུད་མི་ཟ། །ཚོགས་ཤིང་དུས་ལ་བབ་པ་ན། །འབྲས་བུ་ཉིད་དུ་སྨིན་པར་འགྱུར། ཞེས་དང་། མྱོང་ངེས་ཀྱི་ལས་ཞེས་གསུངས་པ་དང་འགལ་ལོ་ཞེ་ན། མི་འགལ་ཏེ། དེ་ནི་གཉེན་ཕྱོགས་དང་མ་འབྲེལ་བ་ལ་དགོངས་ཞེས་བརྒྱད་སྟོང་འགྲེལ་ཆེན་ལས་གསུངས་པའི་ཕྱིར་རོ། །ལས་ཀྱི་རྣམ་པར་སྨིན་པ་ནི་གང་ལ་ཡང་མ་གཏོགས་སོ། །ཞེས་གསུངས་པ་དང་ཡང་མི་འགལ་ཏེ། དེ་ནི་དམུས་ལོང་ལ་སོགས་པ་ལས་ཀྱི་རྣམ་སྨིན་གྲུབ་ཟིན་གཉེན་པོས་མི་སྤོང་བ་ཙམ་ལ་དགོངས་པའི་ཕྱིར་རོ། །བསྔོ་བས་ཟིན་པའི་དགེ་རྩ་གཅོད་དམ་
མི་གཅོད་ཇི་ལྟར་བཞེད་ཅེ་ན། བསྔོ་བས་ཟིན་པའི་དགེ་རྩ་འཇོམས་པ་ཡང་ཡོད་དེ། འཇུག་འགྲེལ་ལས། བྱང་སེམས་བདག་ཉིད་ཆེན་པོའི་དགེ་རྩ་ཁོང་ཁྲོས་འཇོམས་པར་གསུངས་པའི་ཕྱིར་རོ། །འོ་ན་མདོ་ལས། ཇི་ལྟར་རྒྱ་མཚོ་ཆེ་ནང་ཆུ་ཐིགས་ལྷུང་། །རྒྱ་མཚོ་མ་ཟད་བར་དུ་དེ་མི་འཛད། །དེ་བཞིན་བྱང་ཆུབ་རྒྱུར་བསྔོས་དགེ་བ་ཡང་། །བྱང་ཆུབ་མ་ཐོབ་བར་དུ་དེ་མི་འཛད། །ཅེས་སུངས་པ་དང་འགལ་ལོ་ཞེ་ན། རྣམ་སྨིན་ཕྱུང་བས་མི་འཛད་པ་ཡིན་གྱི། ཁོང་ཁྲོས་མི་འཛད་པ་མ་ཡིན་ནོ། །དེས་ན་ཁོང་ཁྲོ་ལ་དེ་ལྟ་བུའི་ཉེས་དམིགས་དང་། གཞན་ཡང་ཤིན་ཏུ་མང་པོ་གསུངས་ཤིང་། ཁོང་ཁྲོའི་ཡུལ་དེ་བྱང་སེམས་སུ་ངེས་མ་ངེས་དང་། ཁོང་ཁྲོ་བའི་རྒྱུ་མཚན་བདེན་མི་བདེན་འདྲ་བར་གསུངས་ལ། བྱང་སེམས་ཀྱང་གང་ན་ཡོད་རྟོགས་དཀའ་བས། ཁོང་ཁྲོ་སྤྱི་དང་ཁྱད་པར་དུ་བྱང་སེམས་དམིགས་པའི་ཁོང་ཁྲོ་འགོག་པ་ལ་འབད་པར་བྱའོ། ། མཛོད་ནས་གསུངས་པའི་རི་གླིང་མཚོ་སོགས་ཀྱིས། །འོག་བཞིའི་ཆུ་གསེར་ཁྱབ་པར་མ་ནོན་པར། །ཆུ་གསེར་ལྷག་པ་འདི་ལ་རྒྱུ་མཚན་ཅི་ཡོད་ཅེ་ན། །མཛོད་ལས། ཆུ་དང་གསེར་གྱི་དཀྱིལ་འཁོར་གྱི། །ཐད་ཀར་འབུམ་ཕྲག་བཅུ་གཉིས་དང་། །སྟོང་ཕྲག་གསུམ་དང་བརྒྱ་ཕྲག་ནི། །ཕྱེད་དང་ལྔ་རྣམས་ཁོ་ནའོ། །ཞེས་གླིང་བཞི་པ་ཕྲག་གཅིག་གི་འོག་བཞིའི་ཚད་བཤད་པ་ལ། རི་དགུ། རོལ་མཚོ་བདུན་ཕྱིའི་རྒྱ་མཚོ་རྣམས་ཀྱི་ཚད་བསྡོམས་ཀྱང་། དཔག་ཚད་ཉིས་སྟོང་ལྔ་བརྒྱ་བདུན་ཅུ་དོན་ལྔས་མ་ནོན་པ་ལྟར་སྣང་ཡང་སྐྱོན་མེད་དེ། ཆུ་མཚམས་ཡན་གྱི་ཁོར་ཡུག་གི་འཐུག་རྔམས་ལ་དཔག་ཚད་གསུམ་བརྒྱ་དང་ཕྱེད་དང་བཅུ་གསུམ་ལས་མེད་ཀྱང་། ཁོར་ཡུག་གི་རང་བཞིན་བྱིན་གྱིས་གཞོལ་བས་ཞབས་རྒྱ་ཆེ་བས། ཆུ་གསེར་ཕལ་ཆེར་ནོན་
པ་ལ་འགལ་བ་མེད་པའི་ཕྱིར། དཔེར་ན། འཛམ་བུའི་གླིང་གི་ཆུ་མཚམས་ཡན་ཆད་ལ། འཛམ་བུའི་གླིང་སྟེ་ངོས་གསུམ་ལ། །སྟོང་ཕྲག་གཉིས་སོ་ཤིང་རྟའི་དབྱིབས། །གཅིག་ལ་དཔག་ཚད་ཕྱེ་དང་བཞི། །ཞེས་བཤད་ཀྱང་གླིང་འབྲུའི་ཕུང་པོ་ལྟར་ཞབས་རྒྱ་ཆེ་བ་ལ་དགོངས་ནས། འདི་འོག་སྟོང་ཕྲག་ཉི་ཤུ་ན། །མནར་མེད་པའོ་དེ་ཙམ་མོ། །ཞེས་འཛམ་བུའི་གླིང་འདིའི་འོག་དཔག་ཚད་ཉི་ཁྲི་ན་མནར་མེད་དང་། དེའི་ངོས་རེ་རེ་ལའང་དཔག་ཚད་ཉི་ཁྲི་རེ་ཡོད་པར་བཤད་པ་བཞིན་ནོ། །ཁོར་ཡུག་གི་ཞབས་ཀྱིས་ཆུ་གསེར་ཅུང་ཟད་མ་ནོན་ཀྱང་སྐྱོན་མེད་དེ། བརྟེན་པ་རྒྱ་ཆེ་ན་སྐྱོན་ཡོད་དུ་ཆུག་ཀྱང་རྟེན་རྒྱ་ཆེ་བ་ལ་སྐྱོན་མེད་པའི་ཕྱིར། དཔེར་ན། བརྟེན་པ་ཆུ་གསེར་གྱིས་རྟེན་རླུང་གི་དཀྱིལ་འཁོར་མ་ནོན་པ་བཞིན་ནོ། །འཇིག་རྟེན་འཆགས་པའི་དུས་ཀྱི་རླུང་གི་དཀྱིལ་འཁོར་གྱི་སྟེང་དུ། ཆུའི་རྒྱུན་མཐའ་ཡས་པ་འབབ་པར་གསུངས་པ་ཕྱི་རོལ་ཏུ་མི་འབོ་བ་ནི། སྔ་རབས་པ་འགའ་ཞིག་ལས་ཀྱི་མཐུ་ཡིས་ཡིན་པར་འདོད་ཅིང་། ལ་ལས་ནི་ཟས་མ་ཞུ་བ་ལོང་དུ་མི་ལྟུང་བ་བཞིན། རྟེན་འབྲེལ་གྱི་དབང་གིས་ཡིན་ཞེས་ཟེར་བ་ལ། ཁྱེད་འདི་གཉིས་གང་འདོད་ཅེ་ན། ཁོ་བོས་ནི་འདི་གཉིས་འདོད་པ་མི་མཐུན་པ་སོ་སོ་བ་ཡིན་པར་མ་གོ་སྟེ། མཛོད་འགྲེལ་ལས། ཇི་ལྟར་ན་ཆུ་དེ་དག་ཐད་ཀར་མི་འབོ་ཞེ་ན། ཁ་ཅིག་ན་རེ། སེམས་ཅན་གྱི་ལས་ཀྱི་དབང་གིས་ཏེ། དཔེར་ན། བཟའ་བ་དང་བཏུང་བ་ཟོས་པ་དང་འཐུངས་པ་མ་ཞུ་བ་ལོང་ཁར་མི་ལྟུང་བ་བཞིན་ནོ་ཞེས་ཟེར་རོ་ཞེས་པ་དང་འདི་གཉིས་ཀ་དོན་གཅིག་ཏུ་སྣང་བའི་ཕྱིར་རོ། །དེ་ནི་ཐད་ཀར་མི་འབོ་བར་བྱེད་པའི་རླུང་གི་དཀྱིལ་འཁོར་མེད་ཀྱང་། ཐད་ཀར་མི་འབོ་བར་འདོད་པའི་ལུགས་སུ་སྣང་བས་དེ་མི་
འདོད་དོ། །འོ་ན། དེ་ལས་གཞན་པའི་སྒྲུབ་བྱེད་ཡོད་དམ་མེད་སྙམ་ན། མཛོད་འགྲེལ་ལས། སྡེ་པ་གཞན་དག་ན་རེ། རྗང་གི་ཚུལ་དུ་རླུང་གིས་འཛིན་ཏོ་ཞེས་ཟེར་རོ་ཞེས་དང་། སློབ་དཔོན་འཕགས་པས། རླུང་དེ་ཡང་རྣམ་པ་གཉིས་ཏེ་འོག་གཞི་ན་གནས་པ་དང་གློ་ན་གནས་པའོ། །དེས་ཆུ་དེ་དག་ཐད་ཀར་ཡང་མི་འབོ་ལ་འཐུར་དུ་ཡང་མི་འཛག་གོ །ཞེས་གསུངས་པ་གཉིས་དོན་གཅིག་པས་འདི་ཉིད་ཁས་ལེན་ཏོ། །རླུང་རྐྱང་པ་ལ་དེ་ཙམ་གྱི་ནུས་པ་འབྱུང་བ་ཅི་ཡིན་ཞེ་ན། རླུང་ཤས་ཆེ་བས་རླུང་གི་དཀྱིལ་འཁོར་ཞེས་བརྗོད་ཀྱི། འབྱུང་བ་བཞི་དང་འབྱུང་འགྱུར་བཞི་ཚང་བར་ངེས་པར་ཁས་བླང་དགོས་ཏེ། འདོད་ན་དབང་པོ་མེད་པ་དང་། །སྒྲ་མེད་ཕྲ་རབ་རྡུལ་རྫས་བརྒྱད། ཅེས་སོགས་གསུངས་པའི་ཕྱིར་རོ། །སྟོང་གསུམ་གྱི་ཁོར་ཡུག་ཆེན་པོའི་དཔངས་ཚད་ཇི་ཙམ་ཡོད་པར་རིགས་ཞེ་ན། ཁོར་ཡུག་ཆེན་པོ་དཔངས་ཚད་ཚངས་པའི་འཇིག་རྟེན་ཙམ་ཡོད་ལ། དེས་འཐོར་རླུང་ལ་སོགས་པའི་གནོད་པ་སྲུང་བ་ཡིན་ནོ་ཞེས་ཟེར་རོ།། །། གཟུགས་མེད་ཁམས་པ་ལ་དུས་འཁོར་ནས་གནས་གཞན་ལོགས་པ་གསལ་བར་གསུངས། ཕར་ཕྱིན་ཐེག་པ་ནས་གཟུགས་མེད་ཁམས་པ་ལ་གནས་གཞན་ལོགས་པ་ཨེ་གསུངས་ཞེ་ན། འགྲེལ་ཆེན་དྲི་མེད་འོད་ལས། རི་རབ་ཀྱི་གཙུག་ཏོར་གྱི་འོག་སྐྲའི་གནས་ཏེ། ཟད་པར་སྟོང་པ་རྣམ་པ་བཞི་བསྒོམས་པ་རྣམས་ཀྱིའོ། །ཞེས་གསུངས་མོད། དེ་ཙམ་གྱི་གཟུགས་མེད་ཁམས་པ་ལ་གནས་གཞན་ལོགས་པ་ཡོད་པར་མི་འགྲུབ་སྟེ། ཇི་ལྟར་ཕྱི་རོལ་དེ་བཞིན་ལུས། །ཞེས་གསུངས་པ་བཞིན་དུ་མནར་མེད་པའི་དམྱལ་བ་ནས་སྲིད་རྩེའི་བར་གྱི་སེམས་ཅན་རྣམས་ཀྱི་སྐྱེ་བ་ལ། བཟང་
ངན་ནམ་མཐོ་དམན་གྱི་ཁྱད་པར་ཡོད་པ་བཞིན་དུ་གང་དུ་སྐྱེ་བའི་གནས་ལ་ཡང་གནས་གཞན་གོང་འོག་གི་རིམ་པ་ཡོད་པའི་དབང་དུ་བྱས་ནས་འདི་ལྟ་བུ་ཞིག་འཐོབ་ཅེས་ཕྱི་ནང་སྦྱོར་བའི་དགོས་པའི་དབང་གིས་གསུངས་པ་ཡིན་གྱི། དངོས་གནས་ལ་གཟུགས་མེད་ཁམས་པ་ལ་གནས་གཞན་ལོགས་པ་མེད་པའི་ཕྱིར་ཏེ། གཟུགས་མེད་ཀྱི་སྙོམས་འཇུག་ཐོབ་ལ་མ་ཉམས་པའི་གང་ཟག་དེ་གང་དུ་ཤི་འཕོས་པ་དེ་ཉིད་དུ། གཟུགས་མེད་ཀྱི་མིང་གཞིའི་ཕུང་པོ་གྲུབ་སྟེ་གནས་པའི་ཕྱིར། གལ་ཏེ་མ་གྲུབ་སྟེ། དེ་ལ་གནས་གཞན་(༢༣ན)ལོགས་པ་ཡོད་དོ་ཞེ་ན། དེ་ལྟ་ན་འདོད་པ་ནས་གཟུགས་མེད་ཁམས་སུ་སྐྱེ་བ་ལ་བར་དོ་ཡོད་པར་ཐལ། གཟུགས་མེད་ཁམས་ལ་གནས་གཞན་ལོག་པ་ཡོད་པའི་ཕྱིར། དེ་ལྟ་མིན་པར་གཟུགས་མེད་ཁམསཔ་ལ་དངོས་གནས་ལ། གནས་གཞན་ལོགས་པ་ཡོད་པའི་དབང་དུ་བྱས་ནས་བསྟན་པ་ཡིན་ན། གནས་གཞན་ལོགས་པ་ཡོད་པའི་གྱ་ནོམ་སྣང་ལ། སྐབས་འདིར་གནས་གཞན་ལོགས་པ་མི་སྟོན་པར་གཟུགས་མེད་ཁམས་པ་ལ་གནས་གཞན་ལོགས་པ་བསྟན་པས་ཅི་ཞིག་བྱ། ཕར་ཕྱིན་ཐེག་པ་ནས་གནས་གཞན་ལོགས་པ་གསུངས་པ་ཡོད་མེད་ལ། གཟུགས་མེད་ཁམས་ན་གཟུགས་མེད་དོ། །ཞེས་པའི་འགྲེལ་པར། ཁ་ཅིག་ན་རེ། གཟུགས་དང་བ་དང་བོང་ཚོད་ཆུང་བས་གཟུགས་མེད་ཅེས་བཤད་ཀྱི། གཏན་མེད་པ་ནི་མ་ཡིན་ཏེ། མདོ་ལས། ཚེ་དང་ཀྡན་པ་གསོས་པོ་ཆེ་ཚེ་གང་ཡིན་པ་དང་དྲོད་གང་ཡིན་པའི་ཆོས་འདི་དག་ནི་འདྲེས་པ་སྟེ་མ་འདྲེས་པ་མིན་ནོ། །ཞེས་དང་། ཤཱ་རིའི་བུ་འདམ་བུའི་གཤོག་གཉིས་གནམ་དུ་བསྒྲེངས་ཏེ་ཕན་ཚུན་བརྟེན་ཅིང་འདུག་པ་དེ་བཞིན་དུ། མིང་
དང་གཟུགས་ཀྱང་ཕན་ཚུན་བརྟེན་ཅིང་གནས་སོ། །ཞེས་དང་། རྣམ་པར་ཤེས་པའི་རྐྱེན་གྱིས་མིང་དང་གཟུགས་ཞེས་ཏེ་གཟུགས་མེད་པ་ནའང་ཚེ་དང་མིང་དང་རྣམ་ཤེས་ཡོད་པའི་ཕྱིར་གཟུགས་ཡོད་དོ་ཞེས་ཟེར་རོ། །ཞེས་བཤད་ལ། འདི་ཕལ་ཆེན་པ་དང་གོས་དམར་སྡེ་པའི་ལུགས་ཡིན་པས། དེ་གཉིས་ཀྱི་ལུགས་ལ་གཟུགས་མེད་ཁམས་ན་གནས་གཞན་ལོགས་པ་ཡོད་པར་འདོད་པ་ཡིན་ནོ་ཞེས་ལ་ལ་ཟེར་མོད། གཟུགས་མེད་ཁམས་ན་གཟུགས་ཡོད་པར་འདོད་ན། གཟུགས་མེད་ཁམས་ན་གནས་གཞན་ལོགས་པ་ཡོད་པར་འདོད་པས་མ་ཁྱབ་སྙམ་མོ། །ཁ་ཅིག་ན་རེ། ཕ་རོལ་ཏུ་ཕྱིན་པའི་ཐེག་པ་ནས་གཟུགས་མེད་ཁམས་ན་གནས་གཞན་ལོགས་པ་ཡོད་པར་བསྟན་པ་ཡོད་དེ། ཕལ་པོ་ཆེ་ལས། ཀྱེ་རྒྱལ་བའི་སྲས་འདི་ལྟ་སྟེ། དཔེར་ན། རི་མོའི་གཞི་ཆེན་པོ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཙམ་ཞིག་ཡོད་པར་གྱུར་ལ། རི་མོའི་གཞི་ཆེན་པོ་དེ་ལ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རིལ་གྱིས་རྫོགས་པར་བྲིས་ཏེ། འདི་ལྟར་ཁོར་ཡུག་ཆེན་པོའི་ཚད་དུ་ནི་ཁོར་ཡུག་ཆེན་པོ་བྲིས། ས་ཆེན་པོའི་ཚད་དུ་ནི་ས་ཆེན་པོ་བྲིས། སྟོང་གཉིས་པའི་འཇིག་རྟེན་གྱི་ཁམས་ཀྱི་ཚད་དུ་ནི་སྟོང་གཉིས་པའི་འཇིག་རྟེན་གྱི་ཁམས་བྲིས། སྟོང་གི་འཇིག་རྟེན་གྱི་ཁམས་ཀྱི་ཚད་དུ་ནི་སྟོང་གི་འཇིག་རྟེན་གྱི་ཁམས་བྲིས། གླིང་བཞི་པའི་འཇིག་རྟེན་གྱི་ཁམས་ཀྱི་ཚད་དུ་ནི་གླིང་བཞི་པའི་འཇིག་རྟེན་གྱི་ཁམས་བྲིས། རྒྱ་མཚོ་ཆེན་པོའི་ཚད་དུ་ནི་རྒྱ་མཚོ་ཆེན་པོ་བྲིས། འཛམ་བུའི་གླིང་གི་ཚད་དུ་ནི་འཛམ་བུའི་གླིང་བྲིས། ཤར་གྱི་ལུས་འཕགས་གླིང་གི་ཚད་དུ་ནི་ཤར་གྱི་ལུས་འཕགས་གླིང་བྲིས། ནུབ་བ་ལང་སྤྱོད་ཀྱི་གླིང་གི་ཚད་དུ་ནི་ནུབ་ཀྱི་བ་ལང་སྤྱོད་
ཀྱི་གླིང་བྲིས། བྱང་གི་སྒྲ་མི་སྙན་གྱི་གླིང་གི་ཚད་དུ་ནི་བྱང་གི་སྒྲ་མི་སྙན་གྱི་གླིང་བྲིས། རི་རབ་ཀྱི་ཚད་དུ་ནི་རི་རབ་བྲིས། ས་བླ་ན་སྤྱོད་པའི་ལྷ་རྣམས་ཀྱི་གཞལ་མེད་ཁང་གི་ཚད་དུ་ནི་ས་བླ་ན་སྤྱོད་པའི་ལྷ་རྣམས་ཀྱི་གཞལ་མེད་ཁང་རྣམས་བྲིས། འདོད་པ་ལ་སྤྱོད་པའི་ལྷའི་གཞལ་མེད་ཁང་གི་ཚད་དུ་ནི་འདོད་པ་ལ་སྤྱོད་པའི་ལྷའི་གཞལ་མེད་ཁང་རྣམས་བྲིས། གཟུགས་ལ་སྤྱོད་པའི་ལྷའི་གཞལ་མེད་ཁང་གི་ཚད་དུ་ནི་གཟུགས་ལ་སྤྱོད་པའི་ལྷའི་གཞལ་མེད་ཁང་རྣམས་བྲིས། གཟུགས་མེད་པ་ལ་སྤྱོད་པའི་ལྷའི་གཞལ་མེད་ཁང་གི་ཚད་དུ་ནི་གཟུགས་མེད་པ་ལ་སྤྱོད་པའི་ལྷའི་གཞལ་མེད་ཁང་རྣམས་བྲིས་པར་གྱུར་ལ། རི་མོའི་གཞི་ཆུ་ཞེང་དུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཙམ་ཡོད་པ་དེ་རྡུལ་ཤིན་ཏུ་ཕྲ་བ་གཅིག་གི་ནང་དུ་བཅུག་པར་གྱུར་ལ། རྡུལ་གཅིག་ལ་ཇི་ལྟ་བ་དེ་བཞིན་དུ་ཤིན་ཏུ་ཕྲ་བ་མ་ལུས་པ་ཐམས་ཅད་རེ་རེ་ལ་ཡང་དེ་ཙམ་གྱི་རི་མོའི་གཞི་ཆེན་པོ་རེ་ཡོད་པར་གྱུར་ཏེ། ཞེས་སོགས་དང་། སངས་རྒྱས་རྗེས་སུ་དྲན་པའི་ཏིང་ངེ་འཛིན་རྒྱ་མཚོ་ཞེས་བྱ་བའི་མདོ་ལས། གཟུགས་མེད་པའི་ཁམས་ཀྱི་བར་གྱི་ལྷ་རྣམས་ཀྱིས་ཀྱང་མཚན་དེ་དག་མངོན་སུམ་དུ་འཁྲུལ་པ་མེད་པར་མཐོང་ངོ་། །གཟུགས་མེད་པའི་ཁམས་ཀྱི་བར་གྱི་ལྷ་དག་ཀྱང་མྱ་ངན་ལས་འདའ་བ་ལ་མི་སྐུར་ཞིང་བྱང་ཆུབ་ཏུ་སེམས་བསྐྱེད་པར་གྱུར་ཏོ། །ཞེས་གཟུགས་མེད་ཁམས་པས་སངས་རྒྱས་ཀྱི་མཚན་རྣམས་མངོན་སུམ་དུ་མཐོང་བར་གསུངས་པ་དང་། །མདོ་གཞན་ལས། གཟུགས་མེད་ཁམས་པས་སངས་རྒྱས་ལ་ཆོས་ཉན་པ་དང་མཆོད་པའི་ཕྱིར་དུ་འོངས་པར་བཤད་པའི་ཕྱིར་རོ། །འོ་ན་གཟུགས་མེད་ཁམས་པ་ལ་གཟུགས་
མེད་པར་བཤད་པ་དང་འགལ་ལོ་ཞེ་ན། མི་འགལ་ཏེ། གཟུགས་མེད་ཁམས་པ་ལ་རྣམ་སྨིན་གྱི་ལུས་མེད། སྤྲུལ་པའི་ལུས་ཡོད་པའི་ཕྱིར་ཏེ། དོན་གསང་རྣམ་པར་ཕྱེ་བ་བསྡུས་པ་ལས། དེ་ལ་དབང་པོ་གཟུགས་ཅན་ཐམས་ཅད་ཉེ་བར་ལེན་པར་བྱེད་པ་ཉིད་ནི་འདོད་པ་དང་གཟུགས་ཀྱི་ཁམས་དག་ཏུ་ཡིན་པར་རིག་པར་བྱའོ། །གཟུགས་མེད་པའི་སེམས་ཅན་རྣམས་ལ་ཡང་དབང་པོ་གཟུགས་ཅན་སྲིད་ན། ཅིའི་ཕྱིར་འདོད་པ་དང་གཟུགས་ཀྱི་ཁམས་དག་ཏུ་བྱ་ཞེས་བྱ་སྟེ། འདི་ལྟར་གཟུགས་མེད་པའི་སེམས་ཅན་རྣམས་ཀྱི་གཞལ་མེད་ཁང་དག་དང་། བཅོམ་ལྡན་འདས་ལ་ཡང་ཆོས་ཉན་པ་དང་། བལྟ་བ་དང་། རིམ་གྲོ་བྱ་བའི་ཕྱིར་འོངས་པར་མདོ་གཞན་དག་ལས་འབྱུང་ངོ་ཞེ་ན། ལས་ལས་སྐྱེས་པའི་དབང་པོ་གཟུགས་ཅན་ཉེ་བར་ལེན་པར་བྱེད་པ་ཉིད་ལས་བརྩམས་ཏེ་སྨྲས་པའི་ཕྱིར་ཉེས་པ་མེད་དོ། །གཟུགས་མེད་པ་སྤྱོད་པ་རྣམས་ཀྱི་མིག་ལ་སོགས་པ་ནི་ཏིང་ངེ་འཛིན་ལས་སྐྱེས་པ་ཡིན་ནོ། །ཞེས་གསུངས་པའི་ཕྱིར་ཞེས་འཆད་དོ། །སྟོང་གསུམ་དར་ཡུག་གི་མདོ་དེས་གཟུགས་མེད་ཁམས་པ་ལ་གནས་གཞན་ལོགས་པ་ཡོད་པར་མི་འགྲུབ་སྟེ། སྟོང་གསུམ་གྱི་ཚད་དང་མཉམ་པའི་དར་ཡུག་དང་། དེ་ལ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རིལ་གྱིས་རྫོགས་པར་བྲིས་པ་ནས། གཟུགས་མེད་ཁམས་པའི་ལྷའི་གཞལ་མེད་ཁང་བྲིས་པའི་བར་དང་། དར་ཡུག་དེ་རྡུལ་ཕྲ་རབ་མ་ལུས་པ་རེ་རེའི་ནང་དུ་བཅུག་པ་དང་། ལྷའི་མིག་དང་ལྡན་པ་ཞིག་གིས་རྡུལ་ཕྲ་རབ་རྣམས་ཀྱི་ནང་ནས་དར་ཡུག་དེ་བཏོན་ནས། སེམས་ཅན་རྣམས་ཀྱི་ཉེ་བར་འཚོ་བར་བྱེད་པ་རྣམས་ནི་བརྟག་པ་མཐའ་བཟུང་འབའ་ཞིག་ཡིན་པའི་
ཕྱིར། དཔེར་ན། རི་བོང་རྭ་འདོམ་བཅོ་བརྒྱད་ཡོད་པ་ཞིག་གིས་ཁམས་གསུམ་གྱི་སེམས་ཅན་རྣམས་དང་། མོ་གཤམ་གྱི་བུའི་ལུས་ཕུག་པར་གྱུར་ན་ཞེས་པས། མོ་གཤམ་གྱི་བུའི་ལུས་ཕུག་པར་མི་འགྲུབ་པ་བཞིན་ནོ།། །། བསྐལ་ཆེན་ལ་མི་ལོའི་གྲངས་ཇི་ཙམ་ཡོད་པ། དུས་འཁོར་ནས་བརྩི་བའི་ཚུལ་གསལ་བར་གསུངས་མོད། ཕར་ཕྱིན་ཐེག་པ་ལས་བསྐལ་ཆེན་ལ་མི་ལོའི་གྲངས་ཇི་ཙམ་ཡོད་པ་བཤད་དམ་མ་བཤད་ཅེ་ན། དྲི་མེད་འོད་ལས། བསྐལ་པ་ཆུང་ངུའི་ཚད་ནི་མཆུ་དང་ཞེང་ལ་དཔག་ཚད་གཅིག་པའི་དོང་སྟེ། དེ་ཡང་སྐྲའི་རྩེ་མོ་ཕྲ་མོ་རྣམས་ཀྱིས་ཡོངས་སུ་བཀང་བ་ལས། ལོ་བརྒྱ་ན་སྐྲའི་རྩེ་མོ་རེ་རེ་ཕྱུང་བས། གང་གི་ཚེ་སྟོངས་པར་གྱུར་པ་དེའི་ཚེ་བསྐལ་པ་ཆུང་ངུའི་ཉིན་ཞག་གཅིག་གོ །ཉིན་ཞག་དེ་སུམ་ཅུའི་ཚད་ཀྱིས་ཟླ་བའོ། །ཟླ་བ་ཆུ་གཉིས་ཀྱིས་ལོའོ། །ལོ་བརྒྱ་ལ་བསྐལ་པ་ཞེས་བརྗོད་དོ། །དེ་བཞིན་དུ་དེའི་སྡེ་ནི་བསྐལ་པ་བར་མ་སྟེ། བསྐལ་པ་བར་མའི་སྡེས་མཆོག་གི་བསྐལ་པའོ། །ཞེས་གསལ་བར་གསུངས་མོད། དེ་ཙམ་གྱིས་བསྐལ་ཆེན་ལ་མི་ལོའི་གྲངས་འདི་ཙམ་ཡོད་ཅེས་བདེ་བླག་ཏུ་རྟོགས་དཀའ་སྟེ། དེ་བཞིན་དུ་དེའི་སྡེ་ཞེས་པ་དང་བསྐལ་པ་བར་མའི་སྡེས་ཞེས་པའི་དོན་ལ་འཆད་པ་པོ་རྣམས་ཤིན་ཏུ་མི་མཐུན་པར་སྣང་བའི་ཕྱིར་རོ། །སྤྱིར་དུས་འཁོར་དང་། མི་འཁྲུགས་པའི་ཞིང་བཀོད་དང་། ཕལ་པོ་ཆེ་དང་། གདགས་པའི་དགོངས་པ་མངོན་པ་མཛོད་ནས་གསུངས་པ་སོགས་ཀྱི་བསྐལ་ཆེན་རྣམས་དོན་མི་མཐུན་པར་སྣང་ལ། འདིར་གདགས་པའི་དགོངས་པ་མངོན་པ་མཛོད་ནས་གསུངས་པའི་བསྐལ་ཆེན་ལ་མི་ལོའི་གྲངས་ཇི་ཙམ་ཡོད་
པ་བརྩི་བའི་ཚུལ་ནི། མཛོད་ལས། མི་རྣམས་ཀྱི་ལོ་ལྔ་བཅུ་ལ། །འདོད་པ་དག་གི་ལྷ་རྣམས་ལས། །འོག་མ་དག་གི་ཉིན་ཞག་གཅིག །དེས་ན་ཚེ་ལོ་ལྔ་བརྒྱའོ། །འོག་མ་གཉིས་ཀ་ཉིས་འགྱུར་བསྐྱེད། །ཅེས་དང་། ཡང་སོས་ལ་སོགས་དྲུག་རིམ་བཞིན། །འདོད་ལྷའི་ཚེ་དང་འདྲ་བ་ཡིན། །རབ་ཏུ་ཚ་ཕྱེད་མནར་མེད་ནི། །བར་གྱི་བསྐལ་པའོ། །ཞེས་དང་། དེ་དག་བརྒྱད་ཅུ་ལ་བསྐལ་ཆེན། ཞེས་གསུངས་པ་ལྟར། ཚ་བའི་སེམས་ཅན་དམྱལ་བའི་ཚེ་ལོ་ཁྲི་དྲུག་སྟོང་ལ། མིའི་ལོ་བྱེ་བ་ཕྲག་ལྔ་བརྒྱ་དང་། ལོ་བྱེ་བ་ཕྲག་བྱེ་བ་སུམ་ཅུ་དང་། ལོ་བྱེ་བ་ཕྲག་ས་ཡ་བརྒྱད་དང་། ལོ་བྱེ་བ་ཕྲག་བྱེ་བ་སུམ་ཅུ་དང་། ལོ་བྱེ་བ་ཕྲག་ས་ཡ་བརྒྱད་དང་། བྱེ་བ་ཕྲག་བཞི་འབུམ་དང་། ལོ་བྱེ་བ་ཁྲག་ཁྲིག་དྲུག་སྟོང་ཡོད་པར་གདགས་པ་ནས་བཤད་ལ། ཡང་སོས་ནས་ཚ་བའི་བར་དྲུག་སྔ་མ་སྔ་མ་ལས་ཕྱི་མ་ཕྱི་མ་བརྒྱད་འགྱུར་གྱིས་མང་བ་བྱུང་བའི་ཤུགས་ཀྱིས། ཚ་བའི་ཚེ་ཚད་བརྒྱད་འགྱུར་དུ་བསྒྱུར་བ་རབ་ཏུ་ཚ་བའི་ཚེ་ཚད་དུ་འགྱུར་ཞིང་། རབ་ཏུ་ཚ་བའི་ཚེ་ཚད་བར་བསྐལ་ཕྱེད་ད་ཡང་བཤད་པས། དེ་ཉིད་གཉིས་ཀྱིས་བསྒྱུར་བས་བར་བསྐལ་བཅིག །དེ་བརྒྱད་ཅུ་ལ་བསྐལ་ཆེན་དུ་བཤད་དོ། །དེ་ལྟར་བརྩིས་པས་ཚ་བའི་དམྱལ་བའི་ཚེ་ཚད། མི་ལོ་གཏམས་ཆེན་པོ་ལྔ། གཏམས་གསུམ། རབ་བཀྲམ་བརྒྱད། ཁྲག་ཁྲིག་ཆེན་པོ་བཞི། ཁྲག་ཁྲིག་གཅིག །ཐེར་འབུམ་ཆེན་པོ་དྲུག །རབ་ཏུ་ཚ་བའི་ཚེ་ཚད་མི་ལོ་དཀྲིགས་བཞི། གཏམས་ཆེན་པོ་གཉིས། གཏམས་བཞི། རབ་བཀྲམ་ཆེན་པོ་བདུན། རབ་བཀྲམ་གཅིག །ཁྲག་ཁྲིག་ཆེན་པོ་གསུམ། ཁྲག་ཁྲིག་གཉིས། ཐེར་འབུམ་ཆེན་པོ་བརྒྱད། མནར་མེད་ཀྱི་ཚེ་ཚད་མི་ལོ་དཀྲིགས་ཆེན་པོ་གསུམ། དཀྲིགས་གསུམ། གཏམས་ཆེན་པོ་དགུ། གཏམས་བདུན། རབ་བཀྲམ་
ཆེན་པོ་བདུན། ཁྲག་ཁྲིག་ཆེན་པོ་དྲུག །ཁྲག་ཁྲིག་གཉིས། ཐེར་འབུམ་ཆེན་པོ་བཞི། བསྐལ་ཆེན་ལ་མི་ལོ་མི་འཁྲུགས་ཆེན་པོ་གཉིས། མི་འཁྲུགས་བདུན། དཀྲིགས་ཆེན་པོ་གཅིག །དཀྲིགས་བརྒྱད། གཏམས་ཆེན་པོ་གཅིག །གཏམས་དྲུག །རབ་བཀྲམ་ཆེན་པོ་བཞི། རབ་བཀྲམ་དགུ། ཁྲག་ཁྲིག་ཆེན་པོ་དགུ། ཁྲག་ཁྲིག་གཉིས་རྣམས་ཡོད་པ་ཡིན་ནོ།། །།མདོ་ལས། འདི་ནས་ཤར་ཕྱོགས་ལོགས་སུ་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་འདས་པ་ན་འཇིག་རྟེན་གྱི་ཁམས་འདི་ཞེས་བྱ་བ་ཡོད་དེ། ཞེས་བྱ་བ་ལ་སོགས་པ་གངྒཱའི་ཀླུང་གི་བྱེ་མ་སྙེད་ཀྱི་གྲངས་ཀྱིས་གསུངས་པ་ཤིན་ཏུ་མང་བར་བྱུང་བ། གངྒཱའི་ཀླུང་གི་བྱེ་མ་སྙེད་དེ་གྲངས་ཀྱི་གནས་གཞན་ཇི་ཙམ་ཞིག་ལ་དགོངས་པ་ཡིན་ཞེ་ན། གངྒཱའི་ཀླུང་ནི་ཆུ་བོ་བཞིའི་ཡ་གྱལ་གྱི་ཆུ་བོ་གངྒཱ་མིན་གྱི། ཆུ་ཀླུང་ཆེན་པོ་རྒྱ་མཚོ་ཡིན་ལ། དེའི་བྱེ་མ་ནི་ཆུ་དེའི་རྡུལ་དང་། ཆུ་རྡུལ་དེ་རེ་རེ་ནས་བགྲངས་པ་ལ་གྲངས་ཇི་ཙམ་ཡོད་པ་ནི། གངྒཱའི་ཀླུང་གི་བྱེ་མ་སྙེད་ཅེས་བྱའོ། །འོ་ན་རྒྱ་མཚོ་ལ་ཆུ་ཀླུང་ཞེས་བཤད་པ་ཡོད་དམ་མེད་ཅེ་ན། ཡོད་དེ། མྱ་ངན་ལས་འདས་པའི་མདོ་ལས། ཆུ་ཀླུང་ཞེས་བྱ་བ་ནི་རྒྱ་མཚོ་ལ་བྱ་སྟེ། ཆུ་ཀླུང་ཐམས་ཅད་ཀྱི་ནང་ན་རྒྱ་མཚོ་འབའ་ཞིག་ཆུ་ཀླུང་ཡིན་པས་ན། རྒྱ་མཚོ་ནི་ཆུ་ཀླུང་ཞེས་བྱ་བའི་གྲངས་སུ་གཏོགས་སོ། །ཞེས་གསུངས་སོ།། །། གངྒཱའི་ཀླུང་གི་བྱེ་མ་སྙེད་ལ་གྲངས་ཀྱི་གནས་གཞན་དུ་ཡོད་པ་ནི། རྒྱ་ཆེར་རོལ་པ་ལས། བྱེ་བ་ཕྲག་བརྒྱ་ན་ཐེར་འབུམ་ཞེས་བྱའོ། །ཐེར་འབུམ་ཕྲག་བརྒྱ་ན་ཁྲག་ཁྲིག་ཅེས་བྱའོ། །ཁྲག་ཁྲིག་ཁྲག་བརྒྱ་ན་གཏམས་ཞེས་བྱའོ། །གཏམས་པ་ཕྲག་བརྒྱ་ན་དཀྲིགས་པ་
ཞེས་བྱའོ། །དཀྲིགས་པ་ཕྲག་བརྒྱ་ན་མི་འཁྲུགས་པ་ཞེས་བྱའོ། །མི་འཁྲུགས་པ་ཕྲག་བརྒྱ་ན་ཁྱད་ཕྱིན་ཞེས་བྱའོ། །ཁྱད་ཕྱིན་ཕྲག་བརྒྱ་ན་པང་སྟེང་ཞེས་བྱའོ། །པང་སྟེང་ཕྲག་བརྒྱ་ན་མང་འཛིན་ཞེས་བྱའོ། །མང་འཛིན་ཕྲག་བརྒྱ་ན་གླང་པོ་ཆེའི་སྟོབས་ཞེས་བྱའོ། །གླང་པོའི་སྟོབས་ཕྲག་བརྒྱ་ན་ངོགས་འཐོབ་ཅེས་བྱའོ། །ངོགས་འཐོབ་ཕྲག་བརྒྱ་ན་རྣམ་པར་བཞག་པ་གདགས་པ་ཞེས་བྱའོ། །རྣམ་པར་བཞག་པ་གདགས་པ་ཕྲག་བརྒྱ་ན་རྒྱུ་རིག་ཅེས་བྱའོ། །རྒྱུ་རིག་ཕྲག་བརྒྱ་ན་ལག་སྦྱིན་ཞེས་བྱའོ། །ལག་སྦྱིན་ཕྲག་བརྒྱ་ན་རྒྱུ་དབང་ཞེས་བྱའོ། །རྒྱུ་དབང་ཕྲག་བརྒྱ་ན་རྫོགས་ཐོབ་ཅེས་བྱའོ། །རྫོགས་ཐོབ་ཕྲག་བརྒྱ་ན་བགྲང་རྟོགས་ཞེས་བྱ་བའོ། །བགྲང་རྟོགས་ཕྲག་བརྒྱ་ན་སྒྲིབ་པ་ཞེས་བྱའོ། །སྒྲིབ་པ་ཕྲག་བརྒྱ་ན་སྟོབས་ཞེས་བྱའོ། །སྟོབས་ཕྲག་བརྒྱ་ན་ཀུན་སྟོབས་ཞེས་བྱའོ། །ཀུན་སྟོབས་ཕྲག་བརྒྱ་ན་རྣམ་པར་བརྡ་ཤེས་ལྡན་ཞེས་བྱའོ། །རྣམ་པར་བརྡ་ཤེས་ལྡན་ཕྲག་བརྒྱ་ན་བརྡ་ཤེས་ཀུན་ཞེས་བྱའོ། །བརྡ་ཤེས་ཀུན་ཕྲག་བརྒྱ་ན་རྣམ་འབྱུང་ཞེས་བྱའོ། །རྣམ་འབྱུང་ཕྲག་བརྒྱ་ན་དེའི་མཚན་ཉིད་ཅེས་བྱའོ། །འདི་ལྟར་དེའི་མཚན་ཉིད་ཅེས་བྱ་བའི་རྩིས་ཀྱིས་ནི། རིའི་རྒྱལ་པོ་རི་རབ་བརྩི་བའི་གཞིར་བྱས་ཀྱང་ཆོད་པར་རུང་ངོ་། །དེའི་ཡང་གོང་ན་རྒྱལ་མཚན་གྱི་རྩེ་མོའི་ནོར་བུ་ཞེས་བྱ་བའི་གྲངས་ཡོད་དེ། གྲངས་དེས་ནི་གངྒཱའི་ཀླུང་གི་བྱེ་མ་སྙེད་བརྩི་བའི་གཞིར་བྱས་ཀྱང་ཆོད་པར་རུང་ངོ་། །ཞེས་སོགས་རྒྱ་ཆེ་གསུངས་སོ། །(༢༧ན) བསྐལ་ཆེན་ལ་མི་ལོའི་གྲངས་སུ་ཡོད་པ་དང་། གངྒཱའི་ཀླུང་གི་བྱེ་མ་སྙེད་ཀྱི་གྲངས་ལ་སོགས་པ་མཐའ་ཡས་པ་རྣམས་ཀྱང་ཤེས་བྱ་ཡིན་མོད། ཧ་ཅང་སྤྲོས་པ་ལ་མི་དགའ་བར་གྲོལ་དོན་དུ་གཉེར་བ་རྣམས་ཀྱིས་རེ་ཤིག་བཏང་སྙོམས་སུ་གཞག་པར་བྱ་སྟེ། རིགས་པའི་དབང་ཕྱུག་གིས། དེ་ཕྱིར་དེ་ཡི་བསྒྲུབ་
བྱ་རུ། །གྱུར་པའི་ཡེ་ཤེས་རྣམ་དཔྱད་བྱའི། །འདི་ཡིས་སྲིན་བུའི་གྲངས་མཁྱེན་པ། །ངེས་ལ་འགར་ཡང་ཉེར་མཁོ་མེད། །བླང་དང་དོར་བྱའི་དེ་ཉིད་ནི། །ཐབས་དང་བཅས་པ་རིགས་མཛད་པ། །གང་དེ་ཚད་མ་ཉིད་འདོད་ཀྱི། །ཞེས་སོགས་གསུངས་པའི་ཕྱིར་རོ། །རྒྱལ་པོ་ཟླ་བ་བཟང་པོའི་རྣམ་འཕྲུལ་ཏའི་སི་ཏུ་ཆེན་པོ་རྣམ་རྒྱལ་གྲགས་པའི་ཞལ་སྔ་ནས་ཀྱི་དྲི་བའི་ལན་མདོར་བསྡུས་པ་རྣམས་བརྗོད་ཟིན་ཏོ། །ནམ་མཁའ་མཐོན་པོར་གནས་པའི་ཉི་མའི་འོད། །ས་ཕྱོགས་དམའ་བའི་ཚད་ལ་དུ་ཤར་བ་ལས། །ཆུ་སྐྱེས་དཀར་པོའི་ཟེའུ་འབྲུ་རྒོད་པ་ལ། །རྐང་དྲུག་ལྡན་རྣམས་དགའ་བས་གར་བྱོས་ཤིག །ཞུ་ཡིག་མཚམས་སྦྱོར་ཕོ་ཉ་གཞོན་ནུ་ཁྱོད། །མི་ཡི་དབང་པོའི་དྲུང་དུ་མྱུར་སོང་ལ། །དགེས་པའི་ཕྱག་གིས་བཟུང་ཚེ་མ་ཞུམ་པར། །ཆོས་དང་མཐུན་པའི་བཀའ་མཆིད་འདི་དག་ཕུལ། །དགེ་བ་འདི་ཡིས་མར་གྱུར་འགྲོ་བ་རྣམས། །དྲི་བ་ཀུན་ལན་ཅིག་ཅར་འདེབས་པ་ལ། །སོ་སོ་ཡང་དག་རིག་བཞི་མཐར་ཕྱིན་པའི། །རྒྱལ་བའི་གོ་འཕང་བདེ་བླག་ཐོབ་གྱུར་ཅིག །ཅེས་ཆོས་སྨྲ་བའི་བཙུན་པ་དགེ་འདུན་གྲུབ་པ་དཔལ་བཟང་པོས། བཀྲ་ཤིས་ལྷུན་པོ་དཔལ་གྱི་བདེ་ཆེན་ཕྱོགས་ཐམས་ཅད་ལས་རྣམ་པར་རྒྱལ་བའི་གླིང་ནས་ཕུལ་བ་དགེ་ལེགས་འཕེལ་གྱུར་ཅིག །ཅེས་ཆོས་སྦྱིན་རྒྱ་ཆེར་སྤེལ་ཕྱིར་བཀྲ་ཤིས་ལྷུན་པོར་ཕར་དུ་བསྒྲུབས། མངྒལཾ།། །།
ཤོག་སྟོང་།