མགོན་པོ་ལེགས་ལྡན་གྱི་གཏོར་ཆོག
མགོན་པོ་ལེགས་ལྡན་གྱི་གཏོར་ཆོག་བཞུགས་སོ། །
མགོན་པོ་ལེགས་ལྡན་གྱི་གཏོར་ཆོག་རྒྱས་པར་བྱེད་ན། བདག་ཉིད་འཕགས་པ་གདུགས་དཀར་མོ་ཅན་གྱི་རྣལ་འབྱོར་དུ་ལྡན་པས། རི་རབ་ལྷུན་པོ་བང་རིམ་བཞི་པ། ཅོག་བརྒྱད་དང་ལྡན་པའི་སྟེང་དུ། དུར་ཁྲོད་ཆེན་པོ་བརྒྱད་ན་རོ་དང་རོ་ལངས་གར་བྱེད་པ་དང་། ཧཱུཾ་སྒྲ་སྒྲོག་པ་དང་། ཕན་ཚུན་ཀུན་ཏུ་རྒྱུག་པ་དང་། འདྲེ་དང་སྲིན་པོ་དང་། མཁའ་འགྲོ་དང་། མཁའ་འགྲོ་མ་རོ་ལ་རྩེ་ཞིང་། ཤ་ཁྲག་ལ་རོལ་པ་དང་། ཀཾ་ཀ་དང་། བྱ་རྒོད་དང་། བྱ་རོག་སྣ་ཚོགས་པ་རོ་ལ་ཟ་ཞིང་། རྒྱུ་མ་དྲངས་ཏེ། ནམ་མཁའ་ལ་ལྡིང་བ་རྣམས་དང་། འུག་པ་ཧཱུཾ་སྒྲ་སྒྲོག་པ་དང་། སྦྲུལ་བ་ལང་གི་མགོ་ཅན་ཕྱོགས་ཀུན་ཏུ་རྣམ་པར་རྒྱུག་པ་དང་། རོ་ཕྱེད་ཚིག་པ་དང་། གསལ་ཤིང་ལ་བཏགས་པ་ལ་སོགས་པ་དུ་མ་ཡོངས་སུ་གང་བའི་ཁྲོད་ན་ཆོས་འབྱུང་མཐིང་ནག་གྲུ་གསུམ་རབ་ཏུ་འབར་བའི་ནང་དུ། སྣ་ཚོགས་པདྨ་དང་ཉི་མའི་གདན་གསུམ་བསྒྲིགས་པའི་སྟེང་དུ་དགྲ་བགེགས་གདུག་པ་ཅན་བསྒྲལ་བའི་རོ་ཁ་ནས་ཁྲག་སྐྱུག་བཞིན་པའི་སྙིང་ཁར་ཧཱུཾ་མཐིང་ནག་འབར་བ་རེ་རེ་དེ་རྣམས་ལས་འོད་འཕྲོས། གདུག་པ་ཅན་ཐམས་ཅད་ཚར་བཅད། རྒྱལ་བ་སྲས་དང་བཅས་པའི་མཐུ་ནུས་གཅིག་ཏུ་བསྡུས་ཏེ། ཧཱུཾ་ལ་ཐིམས་པས་མགོན་པོ་ལེགས་ལྡན་ནག་པོ་མཆེད་གསུམ། སྐུ་མདོག་མཐིང་ནག་རབ་ཏུ་ཁྲོས་པ་ཞལ་མཆེ་བ་རྣམ་པར་གཙིགས་ཤིང་། ལྗགས་འདྲིལ་བ། སྤྱན་གསུམ་གདངས་ཤིང་གློག་ལྟར་འཁྱུག་པ། སྨིན་མ་གཡོ་ཞིང་། ཁྲོ་གཉེར་བསྡུས་པ། ཕྱག་གཡས་
པ་ཙནྡན་གྱི་བེང་ཆེན་བསྣམས་པ། གཡོན་པ་དགྲ་བགེགས་ཀྱི་ཤ་ཁྲག་དང་། དོན་སྙིང་གིས་གང་བའི་ཐོད་པ་བསྣམས་ནས་ཞལ་དུ་གསོལ་བ། དར་ནག་གི་འཇོལ་བེར་སྐུ་ལ་གསོལ་བ། མི་མགོ་སྐམ་པོ་ལྔའི་དབུ་རྒྱན་དང་། རློན་པ་ཁྲག་འཛག་པ་ལྔ་བཅུའི་འཕྲེང་བ་མགུལ་དུ་འཕྱང་བ། སྦྲུལ་ནག་གི་ཆུན་འཕྱང་དང་། དར་གྱི་ལྷབ་ལྷུབ་དང་། སྟག་ལྤགས་ཀྱི་ཤམ་ཐབས་ཅན། ཞབས་གཉིས་གྱད་ཀྱི་དོར་སྟབས་ཀྱིས་འགྱིང་ཞིང་བརྗིད་པ། བྱང་ཕྱོགས་གནོད་སྦྱིན་གྱི་སྡེ་དཔོན་མང་པོ་ཁྱུང་དང་། ཀཾ་ཀ་དང་། བྱ་རྒོད་དང་། འུག་པ་དང་། ཁྲ་ལ་སོགས་པའི་འདབ་ཆགས་སུ་སྤྲུལ་ནས། ནམ་མཁའ་ལ་ལྡིང་ཞིང་། ཀླད་ལ་འཁོར་ནས་བར་སྣང་གི་གདོན་བགེགས་ཐམས་ཅད་ཚར་གཅོད་པ། ལྷོ་ཕྱོགས་གཤིན་རྗེའི་སྡེ་དཔོན་མང་པོ། སེང་གེ་དང་། སྟག་དང་། གཟིག་དང་། དོམ་དང་། ཅེ་སྤྱང་ལ་སོགས་པའི་གཅན་གཟན་དུ་སྤྲུལ་ནས། ས་སྟེང་དང་ས་འོག་གི་གདོན་བགེགས་ཐམས་ཅད་གནས་ནས་སྐྲོད་ཅིང་ཚར་གཅོད་པ། སྐུ་ལུས་སྤྲུལ་པའི་ཁྲོ་བ་ཉི་ཟླའི་ཟེར་དང་། སྐར་ཆེན་གྱི་འོད་ལྟར་དུ་འཕྲོས་པས། ཕྱོགས་མཚམས་ཀྱི་གདུག་པ་ཅན་ཐམས་ཅད་ཚར་གཅོད་པ། ལྷ་སྲིན་སྡེ་བརྒྱད་ཀྱི་དམག་དཔུང་ས་ཡ། འབུམ་སྡེ་དབྱར་གྱི་ཆར་སྤྲིན་ལྟར་གཏིབས་པ་ཧཱུཾ་ཕཊ་དང་། བྷྱོཿབཟློག་གི་སྒྲ་སྐད་འབྲུག་ལྟར་སྒྲོག་ཅིང་། མཚོན་ཆ་སྣ་ཚོགས་ཐོག་ལྟར་འཕེན་པས་བསྟན་པའི་དགྲ་བགེགས་ཚར་གཅོད་པའི་བདག་ཉིད་ཅན་དུ་གསལ་བར་བསྒོམས་ལ། གཙོ་འཁོར་རྣམས་
ཀྱི་སྤྱི་བོར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། དེ་དག་ལས་འོད་འཕྲོས་རྒྱལ་བ་སྲས་དང་བཅས་པའི་སྐུ་གསུང་ཐུགས་ཀྱི་མཐུ་ནུས་དང་། ཡོན་ཏན་བསྡུས་ཏེ་ཡིག་འབྲུ་གསུམ་ལ་ཐིམ། སླར་ཡང་འོད་ཟེར་འཕྲོས། འོག་མིན་གྱི་གནས་དང་། རི་རིབ་ཀྱི་སྟེང་དང་། དུར་ཁྲོད་ཆེན་པོ་སོ་ཤ་གླིང་ལ་སོགས་པ་ནས་ཡེ་ཤེས་ཀྱི་མགོན་པོ་འཁོར་དང་བཅས་པ་སྤྱན་དྲངས་ཤིང་། གུ་གུལ་དཀར་ནག་དང་། ཤ་ཆེན་དང་། ཤིང་ཀུན་དང་། དུག་དང་། སྒོག་སྐྱ་རྣམས་སྦྱར་བའི་བདུག་སྤོས་སྲེག་ཅིང་། ༈ མཐུ་ཆེན་མགོན་པོ་ནག་པོ་ནི། །མཆེད་གསུམ་འཁོར་དང་བཅས་པ་རྣམས། །མངོན་ཚེ་བསྐལ་པ་དང་པོ་ལ། །བཅོམ་ལྡན་ཤཱཀྱ་སེང་གེ་ཡི། །སྤྱན་སྔར་ཁས་བླངས་དམ་བཅས་བཞིན། །སངས་རྒྱས་བསྟན་པ་བསྲུང་བ་དང་། །རྣལ་འབྱོར་འཕྲིན་ལས་བསྒྲུབ་པའི་ཕྱིར། །དད་པ་དང་ནི་དམ་ཚིག་གིས། །གནས་འདིར་སྤྱན་འདྲེན་གཤེགས་སུ་གསོལ། །ཨོཾ་མཧཱ་ཀཱ་ལ་བྷ་ག་ཝ་ན་ས་པ་རི་ཝཱ་ར་ཨཱ་ཀརྵ་ཡ་ཛཿཛཿཞེས་པས་སྤྱན་དྲངས། པདྨ་ཀ་མ་ལ་ཡེ་སྟྭཾ། སཱུརྱ་མཎྜལ་ཧཱུཾ། ཞེས་པས་གདན་ལ་བཞུགས། ཛཿཧཱུཾ་བཾ་ཧོཿ གཉིས་སུ་མེད་པར་བསྟིམ། ཨོཾ་ཤྲཱི་མ་ཧཱ་ཀཱ་ལ་ཡེ་ས་པ་རི་ཝཱ་ར་ས་མ་ཡ། སྨ་ར་ས་མ་ཡ། མ་ཏི་ཀ་མ་ས་མ་ཡ། རཀྵནྟུ་དང་། ཐལ་མོ་ཟླུམ་པོར་སྦྱར་བ་མགོ་ཐམས་ཅད་ཀྱི་ཕྱག་རྒྱ་བཅས་ཏེ། མགོན་པོ་འཁོར་བཅསཀྱི་སྤྱི་བོར་དམ་ཚིག་རྡོ་རྗེ་བཞག་ནས་དམ་ལ་བཞག་པར་བསམ་ཞིང་། རྡོ་རྗེ་འདི་ནི་རྡོ་རྗེ་ཆེ། །སངས་རྒྱས་ཀུན་གྱི་བྱིན་གྱིས་བརླབས། །གལ་ཏེ་དམ་ཚིག་འདས་གྱུར་ན། །འཇིག་འགྱུར་འདི་ལ་ཐེ་ཚོམ་མེད། །རྗེ་བཙུན་རྩ་བ་དང་བརྒྱུད་པར་བཅས་པའི་བླ་མ་དམ་པ་རྣམས་དང་། རྫོགས་པའི་སངས་རྒྱས་གདུང་བདུན་དང་། ཕྱོགས་བཅུའི་རྒྱལ་བ་འཁོར་དང་བཅས་པ་རྣམས་དང་།
འཕགས་མ་གདུགས་དཀར་མོ་ཅན། ཕྱག་རྒྱའི་ཚོགས་དང་བཅས་པ་རྣམས་ཀྱིས་བཀའ་བསྒོས་ཤིང་དམ་ལ་བཞག་སྟེ། དེ་དག་གི་སྤྱན་སྔར་སྲོག་གི་སྙིང་པོ་ཕུལ་ནས་ཇི་ལྟར་ཁས་བླངས་ཤིང་། དམ་བཅས་པ་བཞིན་དུ་དཔལ་མགོན་ལེགས་ལྡན་ནག་པོ་འཁོར་དང་བཅས་པ་ཁྱེད་རྣམས་ཀྱིས་སངས་རྒྱས་ཀྱི་བསྟན་པ་སྲུངས་ཤིག །དཀོན་མཆོག་གི་དབུ་འཕང་བསྟོད་ཅིག །རྣལ་འབྱོར་པ་བདག་གིས་བཅོལ་བའི་འཕྲིན་ལས་མྱུར་དུ་སྒྲུབས་ཤིག །ཅེས་བརྗོད་པར་བྱའོ། །དེ་ནས། ནས་དང་སྲན་མ་ནག་པོའི་ཕྱེ་ལ་གཞི་བྱས་པའི་གཏོར་མ་ཤ་ཁྲག་དང་། དར་ནག་གིས་བརྒྱ་པ་ཆང་དང་བདུད་རྩིས་བྲན་ཏེ། ཨོཾ་ཨཱ་ཧཱུཾ་ཧོཿས་བྱིན་གྱིས་བྲལབས་ལ། ཨོཾ་མཧཱ་ཤི་ར་བྷྱོཿ མཧཱ་ཀཱ་ལ་དུ་ཏྲི་བྷྱོཿ མཧཱ་ཀ་ལ་དུཥྚཾ་བྷྱོཿ ཨི་དཾ་པ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཞེས་པ་གསུམ་གྱིས་ཕུལ། འཁོར་རྣམས་ལ་ཨ་ཀཱ་རོས་བསྔོས་ལ། ཨརྒྷཾ་ལ་སོགས་པས་མཆོད། སྲིན་པོའི་གཟུགས་ཀྱི་གདུག་པ་ཅན། །ཅེས་སོགས་དང་། ༈ ཧཱུཾ་བསྟན་པ་བསྲུང་བའི་མཐུ་སྟོབས་ཅན། །ལེགས་ལྡན་ནག་པོ་དཀའ་ཐུབ་ལས། །བཟློག་པར་བྱེད་པའི་བདག་པོ་དང་། །ལྷ་ཅིག་པ་ལ་ཕྱག་འཚལ་ལོ། །ནག་པོ་ཆེན་པོ་རྫུ་འཕྲུལ་ཅན། །ལེགས་ལྡན་ནག་པོ་སྲེད་མེད་བུ། །ཕྱག་རྒྱ་ཆེན་པོ་ལྔ་རྣམས་ཀྱིས། །ཕྱག་བྱས་པ་ལ་བདག་བསྟོད་དོ། །གྲོང་ཁྱེར་སུམ་བརྩེགས་འཇིག་བྱེད་པ། །ལེགས་ལྡན་ནག་པོ་དུར་ཁྲོད་ན། །གནས་པར་མོས་པ་མ་མོ་ཡི། །ཚོགས་ཀྱི་ཕྱག་བྱས་ཁྱོད་ལ་འདུད། །དཔལ་མགོན་མཆེད་གསུམ་ལྕམ་བྲལ་དང་། །ལྷ་སྲིན་སྡེ་བརྒྱད་འཁོར་དང་ཀུན། །ཤ་ཁྲག་དམར་གྱིས་བརྒྱན་པ་ཡི། །མཆོད་སྦྱིན་གཏོར་མ་འདི་བཞེས་ལ། །རྣལ་འབྱོར་བདག་ཅག་
འཁོར་བཅས་ལ། །ནད་མེད་ཚེ་དང་དབང་ཕྱུག་དང་། །དཔལ་དང་གྲགས་དང་སྐལ་བ་བཟང་། །ལོངས་སྤྱོད་རྒྱ་ཆེན་ཀུན་ཐོབ་ཅིང་། །ཞི་དང་རྒྱས་ལ་སོགས་པ་ཡི། །ལས་ཀྱི་དངོས་གྲུབ་བདག་ལ་སྩོལ། །དམ་ཚིག་ལྡན་པས་བདག་ལ་སྲུངས། །དངོས་གྲུབ་ཀུན་གྱི་གྲོགས་མཛོད་ཅིག །དུས་མིན་འཆི་དང་ནད་རྣམས་དང་། །གདོན་དང་བགེགས་རྣམས་མེད་པར་མཛོད། །རྨི་ལམ་ངན་དང་མཚན་མ་ངན། །བྱ་བྱེད་ངན་པ་མེད་པར་མཛོད། །འཇིག་རྟེན་བདེ་ཞིང་ལོ་ལེགས་དང་། །འབྲུ་རྣམས་རྒྱས་ཤིང་ཆོས་འཕེལ་དང་། །བདེ་ལེགས་ཕུན་སུམ་ཚོགས་པ་དང་། །ཡིད་ལ་འདོད་པ་ཀུན་འགྲུབ་ཤོག །ཅེས་བསྟོད་ལ་འཕྲིན་ལས་གཞོལ། མགོན་པོ་མཆེད་གསུམ་གྱི་ཐུགས་ཀར་པད་ཉིའི་སྟེང་དུ། ཧཱུཾ་མཐིང་ནག་ལ་རང་རང་གི་སྔགས་ཀྱིས་བསྐོར་བ་ལས་འཕྲིན་ལས་རྣམ་བཞི་ཇི་ལྟར་འདོད་པ་བཞིན་སྒྲུབ་པའི་འོད་ཟེར་གྱི་འཕྲོ་འདུ་ལ་དམིགས་ནས། དབུས་སུ་ཨོཾ་མཧཱ་ཀཱ་ལ་ཤ་རི་བྷྱོ་ཧཱུཾ་ཕཊ། གཡས་སུ་ཨོཾ་མཧཱ་ཀཱ་ལ་རུ་ཏྲི་བྷྱོ་ཧཱུཾ་ཕཊ། གཡོན་དུ་ཨོཾ་མཧཱ་ཀཱ་ལ་དུཥྚཾ་བྷྱོ་ཧཱུཾ་ཕཊ། ནག་པོ་ཆེན་པོ་སྤྱིའི་རྩ་སྔགས། ཨོཾ་མཧཱ་ཀཱ་ལ་ཤཱ་ས་ན། ཨུ་པ་ཧ་རི་ཎི་ཞེས་སོགས་ཅི་ནུས་བཟླས། ཐུན་གྱི་ཐ་མར། མཆོད་བསྟོད་གསོལ་བ་བཏབ་ནས་གཤེགས་སུ་གསོལ། ༈ ཧཱུཾ་དུས་གསུམ་རྒྱལ་བ་སྲས་བཅས་ཀྱི། །མཐུ་སྟོབས་གཅིག་ཏུ་བསྡུས་པའི་སྐུ། །ལེགས་ལྡན་ནག་པོ་དམ་ཚིག་ཅན། །གཏུམ་ཆེན་ཁྱེད་ལ་ཕྱག་འཚལ་ལོ། །དུར་ཁྲོད་ཆེན་པོའི་དཀྱིལ་འཁོར་དུ། །འཇིགས་སུ་རུང་བ་བསྐལ་པའི་མེ། །དམར་ནག་འབར་བའི་ཀློང་དཀྱིལ་ན། །བཞུགས་པ་ཁྱོད་ལ་ཕྱག་འཚལ་ལོ། །མཐིང་ནག་ཞལ་གཅིག་ཕྱག་གཉིས་པ། །ཞལ་གདམས་མཆེ་གཙིགས་ཧཱུཾ་སྒྲ་སྒྲོག །དྲག་པོའི་སྤྱན་གསུམ་གློག་ལྟར་གཡོ། །རྔམ་
ཆེན་ཁྱོད་ལ་ཕྱག་འཚལ་ལོ། །ཕྱག་གཡས་ཙན་དན་བེང་ཆེན་གྱིས། །སྲིད་གསུམ་གདུག་པ་འདུལ་བྱེད་ཅིང་། །ལྷ་ཆེན་མ་ལུས་ཟིལ་གྱིས་གནོན། །འཇོམ་མཛད་ཁྱོད་ལ་ཕྱག་འཚལ་ལོ། །གཡོན་པ་དགྲ་བགེགས་དོན་སྙིང་དང་། །ཁྲག་གིས་ང་བའི་ཐོད་པ་བསྣམས། །མི་དང་མི་མིན་གདུག་པ་ཅན། །གསོད་བྱེད་ཁྱེད་ལ་ཕྱག་འཚལ་ལོ། །ཞབས་གཉིས་གྱད་ཀྱི་དོར་སྟབས་ཀྱིས། །ས་གཞི་རི་རབ་ཁོར་ཡུག་དང་། །རྒྱ་མཚོར་བཅས་པའི་འཇིག་རྟེན་ཀུན། །གཡོ་བྱེད་ཁྱེད་ལ་ཕྱག་འཚལ་ལོ། །སྐུ་ལ་དར་ནག་བེར་ཆེན་དང་། །དུག་སྦྲུལ་ཁྲོས་པའི་ཆུན་འཕྱང་དང་། །དགྲ་བགེགས་བསྒྲལ་བའི་མགོ་འཕྲེང་གིས། །བརྗིད་པ་ཁྱོད་ལ་ཕྱག་འཚལ་ལོ། །རླུང་ལྟར་མགྱོགས་ཤིང་གཡོ་བ་ཡི། །རྫུ་འཕྲུལ་ཞབས་ཀྱིས་ཕྱོགས་ཀུན་ཏུ། །དམ་ཚིག་ཀུན་རྗེས་གཅོད་པ་ཡི། །མྱུར་མགྱོགས་ཁྱོད་ལ་ཕྱག་འཚལ་ལོ། །སྒྲིབ་མེད་ཕྱོགས་བཅུར་གཟིགས་པ་ཡི། །ཡེ་ཤེས་སྤྱན་ནི་རྣོན་པོ་ཡིས། །འཇིག་རྟེན་ལེགས་ཉེས་ཀུན་གྱི་སྟངས། །གཟིགས་པ་ཁྱོད་ལ་ཕྱག་འཚལ་ལོ། །ཞི་རྒྱས་དབང་དང་དྲག་པོ་ཡི། །འཕྲིན་ལས་ཀུན་ལ་ཐོགས་མེད་པས། །སངས་རྒྱས་བསྟན་པ་ཕྱོགས་བཅུ་རུ། །སྐྱོང་བ་ཁྱོད་ལ་ཕྱག་འཚལ་ལོ། །བསྟན་པ་འཛིན་པའི་སྐྱེས་བུ་རྣམས། །ཡིད་ལ་ཇི་ལྟར་བསམས་པ་བཞིན། །མཆོག་དང་ཐུན་མོང་དངོས་གྲུབ་ཀུན། །སྟེར་བ་ཁྱོད་ལ་ཕྱག་འཚལ་ལོ། །རྫོགས་སངས་རྒྱས་ཀྱི་སྤྱན་སྔ་རུ། །ཇི་ལྟར་ཁས་བླངས་དམ་བཅས་བཞིན། །རྣལ་འབྱོར་བདག་གིས་བཅོལ་བ་ཡི། །འཕྲིན་ལས་མྱུར་དུ་འགྲུབ་པར་མཛོད། །ཅེས་པས་བསྟོད་ལ། ལེགས་ལྡན་ནག་པོ་མཆེད་གསུམ་འཁོར་བཅས་ཀུན། །བསྟན་པ་བསྲུང་དང་འགྲོ་བའི་དོན་མཛད་ཕྱིར། །དཔལ་ཆེན་བཀའ་སྡོད་ཡིད་ལྟར་མགྱོགས་པ་ཡི། །འཇིགས་པའི་གཟུགས་ཅན་དྲག་གཏུམ་མི་བཟད་པ། །གདུག་པ་
འདུལ་མཛད་ནག་པོའི་ཕྱོགས་འཇོམས་མཛད། །རྣལ་འབྱོར་ལས་ལ་འབྲས་བུ་སྟེར་མཛད་པའི། །མཐུ་སྟོབས་བྱིན་རླབས་བསམ་གྱིས་མི་ཁྱབ་པ། །སྡེ་བརྒྱད་བཙུན་མོ་སྲས་དང་གཡོག་བཅས་ལ། །དམར་ཆེན་གཏོར་མ་དར་ནག་ཅོད་པན་ཅན། །ཤ་ཁྲག་ཆང་ཕུད་བཅས་པའི་དམ་རྫས་འདི། །ཏིང་འཛིན་སྔགས་དང་ཕྱག་རྒྱས་བྱིན་བརླབས་ནས། །རི་དང་རྒྱ་མཚོར་མཉམ་པ་དམིགས་ཏེ་འབུལ། །དར་ནག་རྒྱལ་མཚན་རྐང་དུང་ཐོད་རྔ་དང་། །བསུར་ཆེན་དུད་པ་བདུད་རྩིའི་རོ་མཆོག་དང་། །སྟག་ལྤགས་ན་བཟའ་ཐེར་ཆེན་ནག་པོ་དང་། །འདོད་ཡོན་རྣམ་ལྔས་ཁྱེད་ཀྱི་ཐུགས་དམ་བསྐང་། །གཡག་ནག་ཞོལ་ཆེན་སྤྲིན་ལྟར་འཐིབས་པ་དང་། །ལུག་ནག་སྤྱི་དཀར་ཤེལ་དཀར་ལྟར་འཚེར་བ་དང་། །ཁྱི་ནག་སྙིང་དཀར་དོམ་ལྟར་མཆོང་བ་ཡིས། །ལེགས་ལྡན་འཁོར་དང་བཅས་པའི་ཐུགས་དམ་བསྐང་། །བྱ་ནག་གསོབ་དང་འུག་པའི་རྒྱལ་མཚན་དང་། །དམ་ཉམས་དགྲ་བགེགས་བསྒྲལ་བའི་ཤ་ཁྲག་དང་། །གཡང་གཞིའི་བླ་བྲེ་རྒྱུ་མའི་ལྡ་ལྡི་ཡིས། །ལེགས་ལྡན་འཁོར་དང་བཅས་པའི་ཐུགས་དམ་བསྐངས། །འགྲོ་མགྱོགས་ཡིད་ལྟར་གཡོ་བའི་རྫུ་འཕྲུལ་ཅན། །ཆར་སྤྲིན་ལྟ་བུའི་ཟེ་རྔོག་ཀུན་ཏུ་གཡོ། །རྟ་ནག་མཛེས་པའི་རྒྱན་གྱིས་བརྒྱན་པ་འདིས། །ལེགས་ལྡན་འཁོར་དང་བཅས་པའི་ཐུགས་དམ་བསྐངས། །མགོན་མེད་འགྲོ་ལ་ཕན་པའི་བསམ་སྦྱོར་དང་། །ཐུབ་དབང་བསྟན་པ་རྒྱས་ཤིང་གནས་པའི་ཕྱིར། །བསྙེན་སྒྲུབ་མཆོད་གཏོར་སྒོ་གསུམ་དགེ་བ་ཡི། །འབད་པ་ཅི་བགྱིས་དེ་ཡི་ཐུགས་དམ་བསྐངས། །སྒོ་གསུམ་ལས་དང་ཉོན་མོངས་དབང་གྱུར་པས། །སོ་སོ་ཐར་དང་བྱང་སེམས་གསང་སྔགས་ཀྱི། །བསླབ་གསུམ་ཉམས་པའི་ཉེས་ལྟུང་ཅི་མཆིས་པ། །དམིགས་མེད་ཐུགས་རྗེའི་ངང་ནས་བཟོད་པར་གསོལ། །བག་མེད་དབང་གིས་ཐུབ་པའི་
གསུང་རབ་ལ། །མ་གུས་ཤེས་བཞིན་ཁྱད་དུ་བསད་པ་དང་། །རྡོ་རྗེ་ཐེག་པའི་དམ་ཚིག་བསྲུང་མཚམས་ལས། །འགལ་ཞིང་ནོངས་པར་སྤྱད་པ་བཟོད་པར་གསོལ། །ཐེག་མཆོག་བྱང་ཆུབ་ཆེན་པོར་སེམས་བསྐྱེད་ནས། །འགྲོ་ལ་ཕན་བདེའི་བསམ་སྦྱོར་ཞན་པ་དང་། །རང་ཉིད་ཞི་བདེ་དོན་དུ་གཉེར་བ་ཡི། །རྒྱལ་བའི་ཐུགས་ཀྱིས་ཁྲེལ་བ་བཟོད་པར་གསོལ། །རྣམ་དག་ལྟ་བའི་རང་བཞིན་མ་ཤེས་བཞིན། །བླང་དོར་སྤྱོད་པའི་ཚུལ་ལ་མི་མཁས་པས། །གསུང་རབ་ལུང་གི་དགོངས་དོན་ཟབ་མོ་ལ། །རང་བཟོ་འཁྲུལ་པས་སྤྱད་པ་བཟོད་པར་གསོལ། །ལྟ་བ་ཡོད་མེད་ཕྱོགས་སུ་ལྷུང་བ་དང་། །སྒོམ་པ་རྣམ་གཡེང་དབང་དུ་གྱུར་པ་དང་། །སྤྱོད་པ་ངོ་ལྐོག་ཚུལ་འཆོས་ཆེས་པ་ཡི། །རྒྱལ་བའི་གསུང་དང་འགལ་བཟོད་པར་གསོལ། །རྣམ་གཡེང་དབང་གིས་བསྙེན་སྒྲུབ་གཡེལ་བ་དང་། །སེར་སྣའི་དབང་གིས་མཆོད་གཏོར་ཞན་པ་དང་། །རྨོངས་པའི་དབང་གིས་བླང་དོར་མི་ཤེས་པས། །སྒོ་གསུམ་ཉེས་པའི་ཚོགས་རྣམས་བཟོད་པར་གསོལ། །མདོར་ན་སྤྱི་དང་ཁྱད་པར་དམ་ཚིག་ལས། །འདས་ཤིང་འཁྲུལ་པར་གྱུར་པ་ཅི་མཆིས་པ། །ནོངས་ཤིང་འགྱོད་པའི་སེམས་ཀྱིས་བཤགས་པར་བགྱི། །དམིགས་མེད་ཐུགས་རྗེའི་ངང་དུ་བཟོད་པར་གསོལ། །ཉེས་ལྟུང་འཁྲུལ་པའི་རྣམ་སྨིན་མ་ལུས་པ། །ནམ་མཁའི་སྤྲིན་ཚོགས་རླུང་གིས་གཏོར་བ་དང་། །བར་སྣང་འཇའ་ཚོན་རང་སར་ཡལ་བ་ལྟར། །སྟོང་གསལ་གདོད་ནས་དག་པའི་རང་བཞིན་དུ། །རྣམ་པར་དག་ཅིང་རྒྱ་མཚོའི་རྦ་རླབས་ལྟར། །འོད་གསལ་ཆོས་སྐུའི་ངང་དུ་ཞི་གྱུར་ཅིག །ཅེས་པ་འདི་ཡང་། པཎ་ཆེན་དགེ་འདུན་གྲུབ་པ་དཔལ་བཟང་པོས་མཛད་པའོ།། །། སརྦ་མངྒ་ལཾ།
ཤོག་སྟོང་།