རྡོ་རྗེ་སེམས་དཔའི་ཡི་གེ་བརྒྱ་པ་དབང་མཆོག་རྒྱལ་པོའི་རྒྱུད་ཅེས་བྱ་བ།
རྒྱ་གར་སྐད་དུ། བཛྲ་སཏྭ་ཤ་ཏཱཀྵ་རཱ་ཀ་ཨ་བྷི་ཥེ་ཀོཏྟ་མ་ཧཱ་རཱ་ཛ་ཏན་ཏྲ་ནཱ་མ། བོད་སྐད་དུ། རྡོ་རྗེ་སེམས་དཔའི་ཡི་གེ་བརྒྱ་པ་དབང་མཆོག་རྒྱལ་པོའི་རྒྱུད་ཅེས་བྱ་བ། བཅོམ་ལྡན་འདས་དཔལ་རྡོ་རྗེ་འཆང་ཆེན་པོ་ལ་ཕྱག་འཚལ་ལོ། །འདི་སྐད་བདག་གིས་ཐོས་པའི་དུས་གཅིག་ན། དེ་བཞིན་གཤེགས་པ་ཐམས་ཅད་འོག་མིན་རྡོ་རྗེའི་གནས་ཀྱི་དང་པོ་ན་བཞུགས་ཏེ། ཆོས་ཉིད་འབྱེད་པ་མེད་པའི་ངང་ལས། ཐུགས་རྗེ་བྱམས་པ་ཆེན་པོས་འགྲོ་བ་རྣམས་ལ་གཟིགས་པ་དང་། བྱང་ཆུབ་ཀྱི་མྱུ་གུ་སྐམས་པའི་
སེམས་ཅན་དག་མཐོང་སྟེ། དེའི་ཚེ་དེའི་དུས་ན། ཕྱོགས་བཅུ་ཀུན་ནས་རྒྱལ་བ་ཐམས་ཅད་འདུས་ནས་བཀའ་བགྲོས་ཏེ་ཐུགས་རྗེའི་དོན་བགྲོ་བ། ཀྱེ་མ་རྡོ་རྗེ་སེམས་དཔའ་རྡོ་རྗེ་འཛིན། །འཇིག་རྟེན་འདོད་ཁམས་དམ་ཚིག་སྐྱོན། །ཉེས་བྱས་རྣམ་སྨིན་རྒྱུ་ལས་བཟློག །དེ་ཡི་གཉེན་པོ་ཁྱོད་ཉིད་ཡིན། །ཞེས་བགྲོའོ། །རྡོ་རྗེ་འཆང་བ་རྡོ་རྗེ་འཛིན། །དེ་ཉིད་སྤྲུལ་པས་འདི་སྐད་གསུངས། །དུས་ལ་བབ་བམ་དེ་བཞིན་དུ། །ཉེས་བྱས་རྣམ་སྨིན་ལ་སྤྱོད་པའི། །ངན་སོང་ན་རཀ་གནས་ནས་འདྲེན། །ཞེས་པ་ཞལ་གྱིས་བཞེས་པ་དང་། །དེ་ནས་སྟོན་པ་ཀུན་བཟང་དང་། །ཀུན་རིག་རྣམ་པར་སྣང་མཛད་སོགས། །མི་གཡོ་མཉམ་པའི་ངང་ལ་བཞུགས། །ཕྱོགས་བཅུའི་ཞིང་ཁམས་དེ་བཞིན་ནོ། །དེ་ནས་སྟོན་པ་རྡོ་རྗེ་སེམས། །གནས་ཀྱི་དང་པོ་འོག་མིན་དུ། །ལག་ན་རྡོ་རྗེ་རྒྱལ་སྲས་འཁོད། །འཁོར་བ་ཐུགས་རྗེས་བཟུང་བའི་དུས། །འཁོར་བ་དོང་སྤྲུག་འགྱོད་ཚངས་གསུངས། །རྒྱུད་མཆོག་རྡོ་རྗེ་རྒྱལ་པོ་དང་། །དབང་མཆོག་རྒྱལ་པོའི་རྒྱུད་འདི་བསྟན། །སློབ་དཔོན་སློབ་མས་ཉེས་བྱས་པའི། །གཅེར་བུ་ལུས་སྲུལ་ན་ར་ཀ །པྲེ་ཏ་ཀ་དང་ཏིརྱ་ཀ །རིམ་པ་བཞིན་དུ་དོན་བྱེད་དེ། །ནྲྀ་དང་དེ་ཝ་ཨ་སུ་ར། །དྲུག་གི་གནས་ནས་འདོན་བྱེད་པའི། །དབང་མཆོག་རྒྱལ་པོའི་བསྟན་པ་འབྱུང་། །ཞེས་གསུངས་སོ། །རྡོ་རྗེ་སེམས་དཔའི་ཡི་གེ་བརྒྱ་པ་དབང་མཆོག་རྒྱལ་པོའི་རྒྱུད་ལས། གླེང་གཞི་ཕུན་སུམ་ཚོགས་པའི་ལེའུ་སྟེ་དང་པོའོ།། །།དེ་ནས་རྡོ་རྗེ་སེམས་དཔའ་དང་། །སྤྲུལ་པ་ལག་ན་རྡོ་རྗེ་ཡིས། །འཇིག་རྟེན་རྒྱལ་བ་རབ་འབྱམས་དང་། །རྒྱལ་སྲས་སྤྲུལ་པ་འདུས་རྣམས་ལ། །དམ་ཚིག་རྩ་བ་ཉམས་པ་ཡི། །སློབ་མས་སློབ་དཔོན་ཉེས་བྱས་ཏེ། །འདུལ་ཏེ་དྲང་བའི་དུས་བབས་སམ། །གདུལ་བྱར་ཐུགས་རྗེས་གཟིགས་པ་དང་། །ཉེས་སྐྱོན་སྔོན་བྱུང་ཅི་ཡི་རྒྱུ། །ཅེས་པ་མཁྱེན་བཞིན་སྨྲས་པ་དང་། །ཀུན་བཟང་རྡོ་རྗེ་རྣམ་སྣང་གིས། །སྤྲུལ་པ་ཉིད་ལ་བཀའ་སྩལ་པ། །རྒྱལ་སྲས་འཁོར་འདུས་སྔོན་བྱུང་ནི། །འཇིག་རྟེན་ཞིང་ཁམས་མི་མཇེད་འདིར། །བྲམ་ཟེ་དུང་གི་ཕྲེང་བ་ཅན། །རྒྱལ་བ་རྣམས་ལ་བསྙེན་བཀུར་བས། །རིག་པའི་གནས་ལྔ་ལ་མཁས་པ། །བྱང་ཆུབ་སེམས་དཔའི་རིགས་ཅན་
གཅིག །བས་མཐའི་དུར་ཁྲོད་གནས་ན་བསྒྲུབ། །མཁས་པ་ཀུན་གྱི་སེང་གེར་གྱུར། །དེ་ལྟ་བུ་ཡི་སློབ་དཔོན་ལ། །ཡུལ་ཁམས་སྐྱོང་བའི་རྒྱལ་པོའི་བུས། །བློ་སྦྱོང་རིག་པ་རྫོགས་བྱས་ནས། །རྒྱལ་པོའི་གོང་ན་བྲམ་ཟེ་གནས། །རྒྱལ་བུ་ཕྲག་དོག་ངན་སེམས་སྐྱེས། །བླ་མ་བྲམ་ཟེ་སྒྲུབ་པ་ལ། །མཁའ་འགྲོའི་ཚོགས་ཀྱིས་བརྡའ་བརྟན་པ། །རྣལ་འབྱོར་གསེར་སྣོད་ངན་དུག་གཡོ། །དུག་ཅན་སྣོད་ལ་བྲོས་པར་འོས། །མ་བྲོས་ཉེས་སྐྱོན་ལུས་སེམས་འབྲལ། །ཅེས་པ་དམ་ཚིག་བརྡའ་བསྟན་ཡང་། །རྣལ་འབྱོར་བས་ནི་བསམ་གཏན་མཛད། །དེ་ནས་རྒྱལ་བུས་བྲམ་ཟེ་བོས། །མྱོས་ཆང་བླུད་ནས་རྔན་བྱས་པ། །དབང་པོའི་དྭངས་མ་གསལ་བྱེད་མིག །ལྕགས་ཀྱི་ཐུར་མ་ཕྲ་མོས་གཙགས། །ཚིག་སྒོ་གསལ་བྱེད་སྨྲ་བའི་ལྕེ། །ལྕགས་ཀྱུས་དྲངས་ཏེ་སྤུ་གྲིས་བཅད། །ལུས་ལ་རུས་སྦལ་ཁྲག་གིས་བྱུགས། །མི་གཙང་དམེ་བའི་བུད་མེད་ཀྱིས། །ལུས་ལ་བརྫི་བཅག་མཉེ་བར་བྱས། །རྐང་པའི་སྒྱིད་པ་མཚོན་གྱིས་བཅད། །ལག་པའི་སྲན་ཚོ་དེ་བཞིན་དྲེགས། །དེ་ལྟར་རྔན་བྱས་བཞག་པ་ན། །བྲམ་ཟེ་དྲན་པ་སད་པ་ལས། །མིག་དབྱེར་མིག་མེད་ལྕེ་ཡང་མེད། །འགྲོ་བའི་རྐང་མེད་ལུས་སྟོབས་བྲལ། །བུད་མེད་ཀྱིས་བརྫིས་འགུལ་སྟོབས་མེད། །རུས་སྦལ་ཁྲག་བྱུགས་ཆུ་བུར་དང་། །རྐང་པ་ལ་སོགས་ནད་རྣམས་བྱུང་། །དྲན་པ་རང་ཡང་རབ་རིབ་འདུག །བརྟབས་ཏེ་བྲམ་ཟེས་བསམས་པ་ལ། །འདི་ལྟར་བདག་ལ་འདི་བྱུང་བ། །སྔོན་མའི་ལས་ཀྱི་རྣམ་སྨིན་ནམ། །འོན་ཏེ་གཞན་གྱིས་ཕྲག་དོག་བྱས། །མཉམ་པར་བཞག་སྟེ་བལྟས་པ་ལས། །རང་ལ་རྒྱལ་བུས་རྔན་བྱས་མཐོང་། །དེ་ནས་བྲམ་ཟེས་དམོད་པ་བོར། །ཀྱེ་མ་ཀྱི་ཧུད་རྒྱལ་བུ་ཁྱོད། །ལོ་དང་ཟླ་བར་བསླབས་སྦྱངས་ནས། །རིག་པའི་གནས་ལ་མཁས་བྱས་པས། །ལན་དུ་འདི་ལྟར་རྔན་བྱེད་པ། །ཁྱོད་ཀ་སྐྱེ་བ་གཅིག་གིས་སུ། །སེམས་ཅན་སྲུལ་པོ་གཅིག་ཏུ་སྐྱེས། །ཚེ་ཐུང་ནད་ཀྱིས་ལུས་གཟིར་བ། །དམུས་ལོང་ལྐུགས་པ་མཛེ་ལྷོག་དང་། །ཤ་བཀྲ་བས་ལྡག་ཆུ་བུར་དང་། །རྐང་ལག་ཞ་གྲུམ་དབུལ་པོ་དང་། །ལུས་ལ་ཤ་ཟས་ཚང་འཆའ་
ཤོག །ཚེ་འཕོས་ནས་ཀྱང་ན་རཀ་གནས། །ཁ་འཁོར་སྡུག་བསྔལ་ཐར་མེད་ཤོག །དེ་ལས་ཐར་ཡང་པྲེ་ཏ་ཀ །ཏིརྱ་ཀ་ཡི་ཁ་འཁོར་ཤོག །དུས་དང་ཚེ་རབས་ཐམས་ཅད་དུ། །འཕགས་པའི་ཞལ་ནི་མི་མཐོང་ཞིང་། །བྱང་ཆུབ་མྱུ་གུ་སྔོ་བསྐམ་ཤོག །ཅེས་པ་ངན་སེམས་དམོད་པ་བོར། །ཉེས་བྱས་དམ་ཉམས་རྒྱལ་བུ་དེ། །དེ་ནས་མྱུར་དུ་ལུས་དག་ལ། །ནད་རྣམས་ཀུན་ཕོག་ཚེ་དུས་བྱས། །རང་གི་ཉེས་བྱས་རྣམ་སྨིན་དང་། །བྲམ་ཟེའི་དམོད་པ་སྨོན་ལམ་གྱིས། །སེམས་ཅན་ལུས་སྲུལ་གཅེར་བུར་སྐྱེས། །ལུས་ལ་ནད་སྣ་སྣ་ཚོགས་བྱུང་། །ཤ་ཟ་སྟོང་གི་ཚང་ཡང་བཅས། །བྱང་ཆུབ་མྱུ་གུ་སྔོ་བསྐམས་ནས། །ན་རཀ་གནས་ན་སྡུག་བསྔལ་སྤྱོད། །ཚ་གྲང་གཤགས་གཏུབས་ལ་སོགས་མྱོང་། །དེ་བཞིན་པྲེ་ཏ་ཏིརྱ་འཁོར། །རྣམ་སྨིན་སྡུག་བསྔལ་དེ་སྤྱོད་པས། །རྡོ་རྗེ་སེམས་དཔའ་རྡོ་རྗེ་འཛིན། །ཐུགས་རྗེ་ཆེན་པོས་དེ་ལས་དྲོངས། །ཞེས་གསུངས་སོ། །རྡོ་རྗེ་སེམས་དཔའ་ཡི་གེ་བརྒྱ་པ་དབང་མཆོག་རྒྱལ་པོའི་རྒྱུད་ལས། སྔོན་བྱུང་རྒྱུ་རྐྱེན་གཏམ་རྒྱུད་ཀྱི་ལེའུ་སྟེ་གཉིས་པའོ།། །།དེ་ནས་རྡོ་རྗེ་སེམས་དཔའ་དང་། །ལག་ན་རྡོ་རྗེ་སྟོབས་ཆེན་གྱིས། །སྐད་མཐུན་ཚིག་སྒོ་གཅིག་པ་ཡིས། །རྒྱལ་བའི་ཚོགས་ལ་འདི་སྐད་བརྗོད། །དེ་ལྟར་འདུལ་བའི་དུས་ཡིན་ན། །ཐབས་མཆོག་གང་གིས་དྲང་བར་བྱ། །སླར་གསོལ་བ་དེ་བསྟན་དུ་གསོལ། །ཅེས་པ་རྒྱལ་བ་ལ་ཞུས་པས། །ཀུན་བཟང་རྡོ་རྗེ་རྣམ་སྣང་གིས། །སྤྲུལ་པ་ཉིད་ལ་བཀའ་སྩལ་པ། །ལེགས་སོ་སེམས་དཔའ་རྡོ་རྗེ་འཛིན། །མཁྱེན་པར་གྱུར་ཀྱང་ཞུས་པ་ལེགས། །རིག་པ་འཛིན་པ་རིགས་ཀྱི་བུ། །གསང་སྔགས་དམ་ཚིག་ཉམས་པ་ལ། །ན་རཀ་དོང་ནས་སྤྲུགས་པ་ཡིས། །འགྱོད་ཚངས་བཤགས་པའི་རྒྱལ་པོ་སྒྲོགས། །ཆོས་ཉིད་དོན་གྱི་སྒྲོན་མ་ཐེག །ལུས་ངག་ཡིད་གསུམ་བརྩོན་འགྲུས་ཕྱུང་། །སྐུ་གསུང་ཐུགས་ཀྱི་ཚངས་པ་ཐོབ། །ངན་སོང་དོང་སྤྲུགས་སྐུ་གསུམ་མཐོང་། །ཕྱི་ནང་གསང་བའི་དབང་བསྐུར་གྱིས། །རྒྱུད་དྲུག་གནས་ནས་ངེས་པར་དྲོངས། །ཡེ་ཤེས་ལྔ་ལྡན་ཆོས་སྐུ་ཐོབ། །ཡུལ་མེད་མིང་གི་སྒྲོ་འདོགས་
ཆོད། །གསང་སྔགས་བླ་མེད་རྡོ་རྗེ་ལ། །ཐབས་མཆོག་བླ་ན་མེད་པ་བཞུགས། །ཉན་ཐོས་རང་རྒྱལ་ལྟ་བུ་མིན། །དཔེར་ན་ཉན་ཐོས་འདུལ་ཁྲིམས་ནི། །རྫ་སོ་མ་བཏང་ཆག་པ་འདྲ། །ཆག་པར་གྱུར་ན་གསོ་ཐབས་མེད། །གསང་སྔགས་རྡོ་རྗེ་ཐེག་པ་ནི། །རིན་ཆེན་གསེར་འདྲ་རྒྱུ་མཆོག་བཟང་། །གསེར་དངུལ་སྣོད་འདྲ་ཞོམས་ཀྱང་བཅོས། །སྔ་མ་བཞིན་དུ་ལེགས་པར་སོས། །དེ་བཞིན་གསང་སྔགས་དམ་ཚིག་ནི། །ཉམས་ཆག་བྱུང་ཡང་གསོ་ཐབས་ཡོད། །སྦྱང་ཐབས་མང་ལ་ཐབས་སྒོ་མང་། །སྤྱི་ཁྲུས་ངན་སོང་དོང་སྤྲུགས་མཛོད། །དབང་མཆོག་རྒྱུད་དྲུག་སྐྱེ་སྒོ་ཆོད། །ཡུལ་མེད་སྒྲོ་འདོགས་གཉིས་མེད་ཆོད། །ཅེས་ལུང་བསྟན་ཏོ། །རྡོ་རྗེ་སེམས་དཔའ་ཡི་གེ་བརྒྱ་པ་དབང་མཆོག་རྒྱལ་པོའི་རྒྱུད་ལས། ཉམས་པ་གསོ་ཐབས་ལུང་བསྟན་པའི་ལེའུ་སྟེ་གསུམ་པའོ།། །།དེ་ནས་རྡོ་རྗེ་སེམས་དཔའ་དང་། །ལག་ན་རྡོ་རྗེ་འཛིན་པ་ཡིས། །སངས་རྒྱས་ཀུན་ལ་འདི་སྐད་གསོལ། །ཀྱེ་ཀྱེ་རྒྱལ་བ་རྒྱ་མཚོའི་ཚོགས། །གསང་སྔགས་བླ་མེད་རྡོ་རྗེ་ལ། །དམ་ཚིག་བསྡུས་རྒྱས་ཇི་ལྟར་ལགས། །སྲུང་སྡོམ་ཉམས་པ་ཇི་ལྟར་བསྐང་། །ཞེས་པ་མཁྱེན་བཞིན་དུ་ཞུས་པས། །རྒྱལ་བ་འདུས་པས་བཀའ་སྩལ་པ། །རྡོ་རྗེ་སེམས་དཔའ་རྡོ་རྗེ་འཛིན། །གསང་སྔགས་འབྲས་བུའི་ཐེག་པ་ལ། །དམ་ཚིག་རྩ་བ་རྣམ་པ་གསུམ། །སྐུ་དང་གསུང་དང་ཐུགས་གསུམ་མོ། །ཡན་ལག་དམ་ཚིག་ཉི་ཤུ་ལྔ། །མི་སྤང་ལྔ་དང་བླང་བ་ལྔ། །སྤྱད་བྱ་ལྔ་དང་བསྒྲུབ་བྱ་ལྔ། །གཞན་ཡང་ཉིང་ལག་བསམ་ལས་འདས། །འབུམ་སྡེ་ལ་སོགས་དམ་ཚིག་ཀྱང་། །རྩ་བ་ཡན་ལག་ཤེས་པར་བྱ། །བསྙེན་བསྒྲུབ་རྣམ་བཞིའི་སྒོར་ཞུགས་ནས། །དམ་ཚིག་དེ་དག་བསྲུང་བར་བྱ། །ལེགས་པར་བསྲུང་དང་བསྲུང་དུ་མེད། །ཡན་ལག་ཉི་ཤུ་རྩ་ལྔ་ཡང་། །རྩ་བའི་དམ་ཚིག་གསུམ་དུ་འདུས། །ལུས་ངག་ཡིད་གསུམ་བག་ཡོད་བྱ། །ཆག་ཉམས་ཐམས་ཅད་གསུམ་ལས་འབྱུང་། །སྐུ་གསུང་ཐུགས་
ཀྱིས་ལུས་ངག་ཡིད། །བྱིན་བརླབ་བཤགས་སྦྱང་སྤང་བསྒྲུབ་དང་། །རང་འཁྲུངས་རྡོ་རྗེ་གསེར་ཉིད་དོ། །ཡིད་ཀྱི་སྒོ་ནས་ཆག་ཉམས་བྱུང་། །ཐུགས་ཀྱི་ལྟ་བས་བཤགས་པར་བྱ། །ལྟ་བ་ལོག་པ་ཉམས་པ་ཆེ། །ཡིན་པ་མེད་པ་ལྟ་བའི་མཆོག །ཡིད་ཀྱི་བཤགས་ཐབས་ཆེན་པོ་ཡིན། །ལུས་ཀྱི་སྒོ་ནས་ཆག་ཉམས་ན། །ཕྱག་རྒྱ་སྐུ་ཡི་བསྒོམས་པས་བཤགས། །ཕྱོགས་སུ་འཛིན་པ་ཉམས་པ་ཆེ། །ཡེངས་པ་མེད་པ་སྒོམ་པའི་མཆོག །དེ་ནི་ལུས་ཀྱི་བཤགས་ཐབས་ཡིན། །ངག་གི་སྒོ་ནས་ཆག་ཉམས་ན། །སྔགས་དང་འདོན་བརྗོད་སྤྱོད་པས་བཤགས། །ཚུལ་འཆོས་སྤང་བླང་ཉམས་པ་ཆེ། །ཡིན་མིན་མེད་པ་སྤྱོད་པའི་མཆོག །མཛད་སྤྱོད་དག་གི་བཤགས་ཐབས་ཡིན། །དེ་ལྟར་དམ་ཚིག་གསུམ་བཤགས་ན། །ཉི་ཤུ་རྩ་ལྔ་མ་བྱུང་མ་སྐྱེས་ཏེ། །ཡན་ལག་དམ་ཚིག་བཤགས་སུ་མེད། །ཅི་སྟེ་བསྲུང་བྱ་སྲུང་བྱེད་མེད། །སྐྱེ་མེད་དམ་ཚིག་ཤེས་པར་གྱིས། །ཞེས་གསུངས་སོ། །དབང་མཆོག་རྒྱལ་པོའི་རྒྱུད་ལས། དམ་ཚིག་མཚོན་པའི་ལེའུ་སྟེ་བཞི་པའོ།། །།དེ་ནས་རྡོ་རྗེ་སེམས་དཔའ་དང་ལག་ན་རྡོ་རྗེས་སྲུལ་པོ་དེའི་གམ་དུ་བྱོན་ནས་མནར་མེད་ཉམ་ཐག་དེ་ལ་འདི་སྐད་ཅེས་བསྒྲགས་སོ། །ན་ར་ཀ་བྷུ་ཏ་ཙཀྵུ་པྲ་བེ་ཤ་ཡ་ཨ་ཞེས་བསྒྲགས་པས། དེ་ནས་ལས་ངན་སེམས་ཅན་དེས། །སྔོན་གྱི་ལས་ངན་དྲན་གྱུར་ཏེ། །སྡུག་བསྔལ་གནོང་ནས་འགྱོད་པ་སྐྱེས། །རྡོ་རྗེ་གཉིས་ལ་ངོ་སྨད་དེ། །ཀྱེ་མ་ཀྱེ་ཧུད་ཀྱི་ཧུད་ནོངས། །འགྲོ་མགོན་ཐུགས་རྗེས་བདག་སྐྱོབས་ཤིག །ཐབས་མཆོག་རྒྱལ་པོ་བསྒྲག་ཏུ་གསོལ། །སླད་ནས་མི་འཆབ་མི་བགྱིད་དོ། །ཞེས་སྨྲེ་སྔགས་ཕྱུང་བ་ལས། དེ་ནས་སངས་རྒྱས་རྡོ་རྗེ་སེམས་དཔས་སེམས་ཅན་ལས་ངན་དེའི་རྣ་ལམ་དུ་འགྱོད་ཚངས་ཀྱི་རྒྱལ་པོ་ན་རག་དོང་སྤྲུག་འདི་བཀའ་སྩལ་པ། ཉོན་ཅིག་ལས་ངན་སེམས་ཅན་ཁྱོད། །འགྱོད་སེམས་ཕྱུང་ལ་ཡིད་གཏོད་ཅིག །ངག་སྒོ་གསལ་བརྗོད་བརྐྱང་ཕྱག་འཚོལ། །ཞེས་གསུངས་ནས་འདི་བརྗོད་དོ། །དུས་གསུམ་འཇིག་རྟེན་རབ་འབྱམས་ཀྱི། །རྒྱལ་བ་
རྒྱ་མཚོ་རྣམས་ལ་ཕྱག་འཚལ་ལོ། །ཆོས་རྣམས་རྣམ་དག་ཡེ་ནས་ལྷུན་གྲུབ་ཅིང་། །བྱ་བ་བྱེད་དང་ཡིད་ཆོས་རྣམ་པར་དག །ཀུན་བཟང་ཡབ་ཡུམ་གཉིས་ལ་ཕྱག་འཚལ་ལོ། །ཆོས་སྐུ་ནམ་མཁའ་བཞིན་དུ་དབྱེར་མེད་ཀྱང་། །གཟུགས་སྐུ་འཇའ་ཚོན་བཞིན་དུ་སོ་སོར་གསལ། །ཐབས་དང་ཤེས་རབ་མཆོག་ལ་མངའ་བརྙེས་པ། །རིགས་ལྔ་བདེ་བར་གཤེགས་ལ་ཕྱག་འཚལ་ལོ། །ངོ་མཚར་ཕོ་བྲང་བདེ་བར་གཤེགས་པའི་ཡུམ། །དུས་གསུམ་རྒྱལ་བ་ཐམས་ཅད་བསྐྱེད་མཛད་མ། །རིགས་ལྔའི་ཡུམ་གྱུར་རྣམས་ལ་ཕྱག་འཚལ་ལོ། །རྣམ་ཤེས་དབང་པོ་དག་པའི་ཐུགས་དང་གསུང་། །བདེ་བར་གཤེགས་པ་ཀུན་གྱི་སྲས་མཆོག་སྟེ། །སེམས་དཔའ་ཆེན་པོ་བརྒྱད་ལ་ཕྱག་འཚལ་ལོ། །སྒེག་མོ་ཕྲེང་ཐོགས་རིན་ཆེན་གླུ་གར་ཅན། །མཁའ་མཉམ་མཆོད་པས་རྒྱལ་བ་རྒྱ་མཚོ་མཆོད། །བྱང་ཆུབ་ལྷ་མོའི་ཚོགས་ལ་ཕྱག་འཚལ་ལོ། །མེ་ཏོག་བདུག་པ་མར་མེ་དྲི་ཆབ་ཀྱིས། །རྒྱལ་བ་རྒྱ་མཚོ་རྣམས་ལ་མཆོད་འབུལ་མ། །མཆོད་པའི་ལྷ་མོ་རྣམས་ལ་ཕྱག་འཚལ་ལོ། །དྲག་ཤུལ་ཐབས་ཀྱིས་འགྲོ་བ་འདུལ་མཛད་པ། །ཚད་མེད་བཞི་ལྡན་སྒོ་བཞི་ཐུབ་པར་སྲུང་། །ཏ་ཀྲྀཏ་སྒོ་བ་བཞི་ལ་ཕྱག་འཚལ་ལོ། །རྟག་ཆད་མཐར་ཕྱིན་གསང་བ་ཡུམ་གྱི་ངང་། །ལྕགས་ཀྱུ་ཞགས་པ་ལྕགས་སྒྲོག་དྲིལ་བུ་མ། །རྡོ་རྗེ་སྒོ་མ་བཞི་ལ་ཕྱག་འཚལ་ལོ། །སྟེང་འོག་ཕྱོགས་བཞིའི་འཇིག་རྟེན་འདུལ་པའི་གཙོ། །ཉོན་མོངས་དྲུག་འཇོམས་རྒྱུད་དྲུག་དག་པར་སྦྱོང་། །བཅོམ་ལྡན་ཐུབ་པ་དྲུག་ལ་ཕྱག་འཚལ་ལོ། །གསལ་འཚེར་ལྷུན་སྡུག་གཟི་བརྗིད་འོད་ཟེར་འཕྲོ། །མཉེན་ལྕུགས་འཁྲིལ་ལྡེམ་གཞོན་ཚུལ་ཞི་བའི་ཚོགས། །རྒྱལ་བ་བཞི་བཅུ་གཉིས་ལ་ཕྱག་འཚལ་ལོ། །དེ་ལྟར་གུས་པས་ཕྱག་འཚོལ་ཞིག །རང་བཞིན་སྒྱུ་འཕྲུལ་ལྷ་ཚོགས་ལ། །གང་ཞིག་གུས་པས་ཕྱག་བཙལ་ན། །ཉམས་ཆག་ཀུན་ཀྱང་བྱང་བར་འགྱུར། །ཞེས་གསུངས་སོ། །དབང་མཆོག་རྒྱལ་པོའི་རྒྱུད་ལས། ཞི་བའི་ལེའུ་སྟེ་ལྔ་པའོ།། །།ཡང་བཀའ་སྩལ་པ། བརྩོན་འགྲུས་ཕྱུངས་ཤིག་ལས་ངན་སེམས་ཅན་ཁྱོད། །
འདི་རྣམས་དབང་དུ་གསོལ་ལ་ཕྱག །ཚིག་གསལ་ལུས་གུས་མོས་པས་འཚོལ། །སྒྱུ་འཕྲུལ་ཆེན་པོའི་དཀྱིལ་འཁོར་ནི། །ཞི་བ་ཆོས་ཉིད་ངང་ལས་མ་གཡོས་ཀྱང་། །ཕྲིན་ལས་མཐར་ཕྱིན་ཐབས་མཆོག་ཁྲོ་བོའི་ཚུལ། །འབར་བ་ཁྲོ་བོའི་ཚོགས་ལ་ཕྱག་འཚལ་ལོ། །ཧོ་རང་རིག་ཐབས་ཀྱི་རྒྱལ་པོ་མཆོག །སངས་རྒྱས་སྤྱི་དཔལ་ཁྲོ་བོའི་རྗེ། །ཆེ་མཆོག་ཧེ་རུ་ཀ་ལ་ཕྱག་འཚལ་ལོ། །འཇིག་རྟེན་འདས་པའི་དུས་ན་མངོན་འབྱུང་བ། །གདུག་པ་འདུལ་ཕྱིར་དུས་ལས་མི་མདའ་བའི། །དཔལ་ཆེན་ཧེ་རུ་ཀ་ལ་ཕྱག་འཚལ་ལོ། །རང་བཞིན་དག་པའི་དབྱིངས་ཉིད་ལས། །དཔལ་འབར་རྔམ་པའི་ཆ་ལུགས་ཅན། །ཁྲོ་མོ་གནམ་ཞལ་མ་ལ་ཕྱག་འཚལ་ལོ། །ཁྲོ་མོ་དབང་ཕྱུག་སྐུ་ལ་འཁྲིལ་མཛད་ཅིང་། །མཁའ་འགྲོ་མི་བཟད་འབར་བའི་སྤྲིན་འཕྲོ་མ། །གདུག་པ་འདུལ་མཛད་ཁྲོ་མོ་རྣམས་ལ་ཕྱག་འཚལ་ལོ། །བསྐལ་པ་མེ་ལྟར་འབར་བའི་དཀྱིལ་འཁོར་ན། །ཡེ་ཤེས་སྐུ་མཆོག་འཇིགས་བྱེད་རྒྱན་གྱིས་བཞུགས། །ཁྲོ་མོ་ཆེན་མོ་བརྒྱད་ལ་ཕྱག་འཚལ་ལོ། །ནམ་མཁའི་ལུས་ཅན་གར་ཡང་ཐོགས་མེད་ཅིང་། །འདོད་དགུར་བསྒྱུར་བའི་གཟུགས་ཅན་འཕྲུལ་པ་མོ། །ཕྲ་མེན་ཆེན་མོ་བརྒྱད་ལ་ཕྱག་འཚལ་ལོ། །རྡོ་རྗེ་གདོང་མོ་ཕོ་ཉ་མགྱོགས་མ་བཞི། །ཤར་ལྷོ་ནུབ་བྱང་སྒོ་བཞི་ཐུབ་པར་སྲུང་། །སྒོ་སྐྱོང་ཁྲོ་མོ་བཞི་ལ་ཕྱག་འཚལ་ལོ། །དཔལ་གྱི་འཁོར་ཚོགས་བཛྲ་ཨ་རལླི། །མཁའ་ལ་ཤུགས་འགྲོ་མ་ཚོགས་དབང་ཕྱུག་མ། །རྣལ་འབྱོར་ཉི་ཤུ་བརྒྱད་ལ་ཕྱག་འཚལ་ལོ། །ཕྱོགས་བཅུའི་དྲེགས་པ་བསྣོལ་བའི་གདན་སྟེང་ན། །ཡེ་ཤེས་བསྐལ་པ་མེ་དཔུང་འབར་བའི་ཀློང་། །བདུད་འདུལ་ཁྲོ་བོའི་སྐུ་ལ་ཕྱག་འཚལ་ལོ། །ཁྲོ་རྒྱལ་སྐུ་ལ་གཉིས་མེད་ཚུལ་འཁྲིལ་མ། །ཕ་རོལ་ཕྱིན་བཅུ་ས་ལམ་དགེ་རྫོགས་མ། །འཇིགས་བྱེད་རྔམ་པའི་ཁྲོ་མོ་བཅུ་ལ་ཕྱག་འཚལ་ལོ། །དམིགས་མེད་ཐབས་ཀྱིས་ཁྲོ་བོའི་སྐུ་གཟུགས་སྟོན། །སྐུ་མདོག་ཕྱག་མཚན་ཅིར་ཡང་སྤྲུལ་ཞིང་བསྒྱུར། །རོལ་པ་ཁྲག་འཐུང་རྣམས་ལ་ཕྱག་འཚལ་ལོ། །ཞེས་གསུངས་སོ། །དབང་མཆོག་རྒྱལ་པོའི་རྒྱུད་ལས། ཐབས་མཆོག་ཁྲོ་བོའི་ལེའུ་སྟེ་
དྲུག་པའོ།། །།ཡང་བཀའ་སྩལ་པ། ལས་ངན་སེམས་ཅན་ཁྱོད། ལུས་ངག་ཡིད་གསུམ་བརྩོན་འགྲུས་ཕྱུང་། །དཀྱིལ་འཁོར་ལྷ་རྣམས་དབང་གསོལ་ལ། །གུས་པས་དཀྱིལ་འཁོར་ལྷ་ལ་མཐོལ། །དམིགས་མེད་ཆོས་ཀྱི་སྐུ་ལ་ཕྱག་འཚལ་ལོ། །ལོངས་སྤྱོད་རྫོགས་པའི་སྐུ་ལ་ཕྱག་འཚལ་ལོ། །ཅིར་ཡང་སྤྲུལ་པའི་སྐུ་ལ་ཕྱག་འཚལ་ལོ། །མི་འགྱུར་རྡོ་རྗེའི་སྐུ་ལ་ཕྱག་འཚལ་ལོ། །མངོན་པར་བྱང་ཆུབ་སྐུ་ལ་ཕྱག་འཚལ་ལོ། །ཐབས་མཆོག་འཇམ་དཔལ་དམར་ནག་སྐུ་ལ་ཕྱག་འཚལ་ལོ། །སྐྱོན་མེད་སྒྲ་སྒྲོག་པདྨའི་གསུང་ལ་ཕྱག་འཚལ་ལོ། །ཉེས་པའི་ནད་སེལ་བདུད་རྩི་སྨན་ལ་ཕྱག་འཚལ་ལོ། །དུས་གསུམ་རྒྱལ་བ་ཀུན་གྱིས་བསྒྲུབས་པ་ཡི། །ཚོགས་གཉིས་རྫོགས་ནས་ཡོན་ཏན་མཐར་ཕྱིན་པའི། །སྐུ་དང་ཡེ་ཤེས་ཚོགས་ལ་ཕྱག་འཚལ་ལོ། །འབྱུང་བ་ལྔ་ལ་མངའ་བརྙེས་པ། །རྟག་པའི་རྒྱལ་མོ་ལྔ་ལ་ཕྱག་འཚལ་ལོ། །རང་བཞིན་དབྱིངས་ནས་གྲུབ་པ་མོ། །དབྱིངས་ཕྱུག་ལྔ་ལ་ཕྱག་འཚལ་ལོ། །རྒྱུ་འབྲས་བྱང་ཆུབ་སེམས་དཔའི་སྤྲུལ་པ་སྟེ། །མཁའ་འགྲོ་སུམ་ཅུ་གཉིས་ལ་ཕྱག་འཚལ་ལོ། །ག་ཎ་པ་ཏིའི་སྤྲུལ་པ་སྟེ། །གིང་ཕོ་རྣམས་ལ་ཕྱག་འཚལ་ལོ། །ལྷ་མོ་དཔལ་མོའི་སྤྲུལ་པ་སྟེ། །གིང་མོ་རྣམས་ལ་ཕྱག་འཚལ་ལོ། །འཇིག་རྟེན་ཁམས་ལ་མངའ་མཛད་མ། །འཇིགས་བྱེད་དཔལ་འབར་རལ་བ་ཅན། །འདོད་པའི་རོ་ལ་ཆགས་པ་མོ། །མ་མོའི་ཚོགས་ལ་ཕྱག་འཚལ་ལོ། །ལེགས་ཉེས་ལྟང་འཛིན་དམ་ཚིག་རྗེས་གཅོད་ཅིང་། །བཀའ་བཞིན་སྒྲུབ་པའི་གྲོགས་མཛད་པ། །དམ་ཅན་རྒྱ་མཚོའི་ཚོགས་ལ་ཕྱག་འཚལ་ལོ། །ཞེས་གསུངས་སོ། །དབང་མཆོག་རྒྱལ་པོའི་རྒྱུད་ལས། ནོངས་པ་དཔང་གསོལ་ཕྱག་གི་སྐབས་ལས། དཀྱིལ་འཁོར་འདུས་པའི་ལེའུ་སྟེ་བདུན་པའོ།། །།བཀའ་སྩལ་པ། གང་གིས་སྒྱུ་འཕྲུལ་ཁྲོ་བོ་ཡི། །དཀྱིལ་འཁོར་ལྷ་ལ་ཕྱག་འཚལ་ན། །ཉམས་ཆག་ཀུན་ཀྱང་བྱང་འགྱུར་ཏེ། །མཚམས་མེད་ལྔ་ཡི་སྡིག་ཀྱང་བྱང་། །ན་རག་གནས་ཀྱང་དོང་སྤྲུགས་ཏེ། །རིག་འཛིན་རྒྱལ་བའི་ཞིང་དུ་གྲགས། །དེ་སྐད་
ཅེས་བསྒྲགས་པ་དང་། །དམྱལ་བའི་གནས་ཀྱི་སེམས་ཅན་དེ། །དྲན་པ་སླར་ནི་རྙེད་པར་གྱུར། །སྡུག་བསྔལ་སྐབས་དེ་ཞི་བ་ལས། །རྡོ་རྗེ་སེམས་དཔས་འདི་སྐད་གསུངས། །ཞིང་ཁམས་རྒྱལ་བ་རྒྱ་མཚོ་དགོངས། །དུས་གསུམ་སངས་རྒྱས་ཐམས་ཅད་ཀྱི། །མཚམས་མེད་ཉེས་བྱས་རྣམ་སྨིན་བྱང་། །གསང་སྔགས་དམ་ཚིག་སོ་རུ་ཆུད། །མི་དགེ་ཕལ་པ་སྨོས་ཅི་དགོས། །གང་ཞིག་ནད་ཀྱིས་ཉེན་གྱུར་ཀྱང་། །སྡུག་བསྔལ་དེ་ལས་ངེས་པར་གྲོལ། །འགོ་བའི་ནད་རིམས་བྱུང་བའི་ཚེ། །བདག་ཉིད་ཡི་དམ་གསལ་བ་ཡིས། །སྙིང་པོ་འདི་བརྗོད་དེས་མི་ཚུགས། །གང་ཞིག་ངན་སྔགས་མཚོན་བརྡེག་ཀྱང་། །སྙིང་པོ་འདི་བརྗོད་རང་ལ་ལྡོག །དོན་གཉེར་ལམ་འགྲོ་འདི་བརྗོད་ན། །འཇིགས་པའི་དགྲ་ལས་ངེས་པར་གྲོལ། །གདོན་འཇིགས་བགེགས་ཀྱིས་འཚེ་བའི་ཕྱིར། །རིག་པ་འདི་བརྗོད་གདོན་དེ་འཇིལ། །སེམས་ཅན་གང་ཞིག་བུ་འདོད་ཀྱང་། །རིག་པ་འདི་ལས་རབས་དེ་ཟིན། །ཉོན་མོངས་དབུལ་ཞིང་ཕོངས་པས་ཀྱང་། །སྙིང་པོ་འདི་བརྗོད་རིན་ཆེན་རྙེད། །གང་ཞིག་འཁོར་སྡུད་འདི་བརྗོད་ན། །སྲིད་པ་གསུམ་ཡང་འཁོར་དུ་འདུ། །ཕྲིན་ལས་རྣམ་བཞི་ངེས་པར་འགྲུབ། །ཉམས་སྒྲིབ་ཐམས་ཅད་འདག་བྱེད་པའི། །ཡི་གེ་བརྒྱ་བ་བདག་གིས་བརྗོད། །ཆག་ཉམས་ཐམས་ཅད་འདི་ཡིས་བསྐངས། །ཞེས་སྨྲས་ཏེ། ངན་སོང་དོང་ནས་སྤྲུགས་པ་འདི་བརྗོད་དོ། །ཨོཾ་ཨཱཿཧཱུཾ་སྭཱ་ཧཱ། ཨོཾ་བཛྲ་སཏྭ་ས་མ་ཡ། མ་ནུ་པཱ་ལ་ཡ། བཛྲ་སཏྭ། ཏྭེ་ནོ་པ་ཏིཥྛ། དྲྀ་ཌྷོ་མེ་བྷ་བ། སུ་ཏོཥྱོ་མེ་བྷ་བ། ཨ་ནུ་རཀྟོ་མེ་བྷ་བ། སུ་པོཥྱོ་མེ་བྷ་བ། སརྦ་སིདྡྷིམྨེ་པྲ་ཡཙྪ། སརྦ་ཀརྨ་སུ་ཙ་མེ། ཙིཏྟཾ་ཤྲེ་ཡཿཀུ་རུ་ཧཱུཾ། ཧ་ཧ་ཧ་ཧ་ཧོ། བྷ་ག་བཱན། སརྦ་ཏ་ཐཱ་ག་ཏ་བཛྲ་མཱ་མེ་མུཉྩ་བཛྲཱི་བྷ་བ། མ་ཧཱ་ས་མ་ཡ་སཏྭ་ཨ། འདི་ནི་དུས་ལ་བབ་པའི་ཚེ། །གསུམ་མམ་བདུན་ནམ་བཅུ་བཞི་འམ། །ཉི་ཤུ་རྩ་གཅིག་བརྒྱ་རྩ་བརྒྱད། །ལྷ་བསྒོམ་གསལ་བས་བརྗོད་བྱས་ན། །ཆག་ཉམས་ཐམས་ཅད་བསྐང་བར་བྱེད། །ངན་སོང་གསུམ་ལས་ཐར་བར་འགྱུར། །ཡི་དམ་དག་ཏུ་འདི་བརྗོད་ན། །དུས་གསུམ་རྒྱལ་བའི་སྲས་སུ་འགྱུར། །ཞེས་གསུངས་པས། ལས་ངན་སེམས་ཅན་དམྱལ་བ་པ་རྣམས་ཀྱིས། མགོན་པོ་སེམས་དཔའ་
ཨ་ལ་ལ་ཧོ། ཞེས་སྨྲས་སོ། །དེ་ནས་དུས་གསུམ་གྱི་སངས་རྒྱས་རྣམས་ཀྱིས། རྡོ་རྗེ་སེམས་དཔའ་ལ། ཐུགས་ཀྱི་ཡང་སྙིང་བརྗོད་པ་ཁྱོད། ཤིན་ཏུ་ལེགས་སོ། །བཤགས་པའི་རྒྱལ་པོ་བརྗོད་པ་ལེགས་སོ་ལེགས་སོ། །ཞེས་གནང་བ་བྱིན་ནོ། །དབང་མཆོག་རྒྱལ་པོའི་རྒྱུད་ལས། ཡང་སྙིང་གསང་སྔགས་བཤགས་པའི་ལེའུ་སྟེ་བརྒྱད་པའོ།། །།དེ་ནས་ཕྱག་ན་རྡོ་རྗེ་ཡིས། །ལས་ངན་སེམས་ཅན་དེ་ལ་ནི། །སྔགས་ཀྱི་སྣོད་དུ་རུང་བྱའི་ཕྱིར། །དང་པོ་སེམས་བསྐྱེད་དད་བྱས་ནས། །བུམ་པའི་ལྷ་ཡི་དབང་བསྐུར་དང་། །ན་རཀ་གནས་ནས་དྲང་བ་ཡི། །གསང་བ་སྔགས་ཀྱི་དབང་བསྐུར་རོ། །བུམ་པ་རྫས་དང་ལྡན་ཐོགས་ནས། །ལས་ངན་དེ་ཡི་གཙུག་ཏུ་བཞག །རིག་པའི་ཚིགས་བཅད་འདི་བརྗོད་དོ། །ཧཱུཾ་ཀུན་བཟང་ཡབ་ཡུམ་བུམ་པ་ན། །རྒྱལ་བ་ཞི་ཁྲོའི་ལྷ་ཚོགས་བཞུགས། །སེམས་ཅན་ཁྱོད་ལ་དབང་བསྐུར་བས། །ན་རཀ་སྡུག་བསྔལ་བྲལ་བར་ཤོག །དུ་ད་ཧ་ད་ཧ་སརྦ་ན་རཀ་གཏེ་ཧེ་ཧཱུཾ་ཧཱུཾ་ཕཊཿ། ཧཱུཾ་བཛྲ་སཏྭ་ས་མ་ཡ། མ་ནུ་པཱ་ལ་ཡ། བཛྲ་སཏྭ་ཏྭེ་ནོ་པ་ཏིཥྛ་དྲྀ་ཌྷོ་མེ་བྷ་བ། སུ་ཏོཥྱོ་མེ་བྷ་བ། ཨ་ནུ་རཀྟོ་མེ་བྷ་བ། སུ་པོཥྱོ་མེ་བྷ་བ། སརྦ་སིདྡྷིམྨེ་པྲ་ཡཙྪ། སརྦ་ཀརྨ་སུ་ཙ་མེ། ཙིཏྟཾ་ཤྲེ་ཡཾ་ཀུ་རུ་ཧཱུཾ། ཧ་ཧ་ཧ་ཧ་ཧོ། བྷ་ག་བཱན། སརྦ་ཏ་ཐཱ་ག་ཏ། བཛྲ་མཱ་མེ་མུཉྩ། བཛྲཱི་བྷ་བ་མ་ཧཱ་ས་མ་ཡ། བཛྲ་སཏྭ་ཨ། ཧཱུཾ་བཛྲ་ཨ་བྷི་ཥིཉྩ་ཧཱུཾ། ཞེས་དབང་བསྐུར་བས། དུས་དེར་ན་རཀ་གི་གནས་དེ་སྤྲུགས་པར་འགྱུར་རོ། །དབང་མཆོག་རྒྱལ་པོའི་རྒྱུད་ལས། ན་རཀ་དོང་སྤྲུགས་ཀྱི་ལེའུ་སྟེ་དགུ་པའོ།། །།དེ་ནས་སེམས་ཅན་ལས་ངན་དེ། །ཡི་དྭགས་གནས་སུ་ཡང་སྐྱེས་ཏེ། །ཕྱི་ནང་གཉིས་ཀའི་སྡུག་བསྔལ་མྱོང་། །རྣམ་སྨིན་ཡི་དྭགས་ཆེན་པོར་གནས། །དེ་ནས་ལག་ན་རྡོ་རྗེ་ཡིས། །ཡི་དྭགས་དེ་ཡི་རྩར་ཕྱིན་ནས། །ལས་ངན་དེ་ལ་འདི་སྐད་བསྒྲགས། །པྲེ་ཏ་ཀ་ཙཀྵུ་པྲ་བེ་ཤ་ཡ་ཨ། དེ་སྐད་རྣ་བར་བསྒྲགས་པ་ཡིས། །སྔོན་གྱི་ལས་ངན་ཡོངས་སུ་དྲན། །ཀྱེ་མ་ཀྱེ་ཧུད་མགོན་པོ་ཡིས། །ཐུགས་རྗེས་ཟུངས་ལ་བདག་སྐྱོབས་ཤིག །བདག་ལུས་སྒྲོལ་ལ་བདེ་ལ་འཁོད། །
མགོན་པོས་མྱུར་དུ་མགོན་སྐྱབས་མཛོད། །ཅེས་གསོལ་བ་བཏབ་པོ། དེ་ནས་ལག་ན་རྡོ་རྗེ་ཡིས། །རིན་ཆེན་སྒྲོམ་བུ་ཕྱག་ཐོགས་ནས། །ལས་ངན་དེ་ཡི་གཙུག་ཏུ་བཞག །རིག་པའི་ཚིགས་བཅད་འདི་བརྗོད་དོ། །ཨོཾ་རིན་ཆེན་སྒྲོམ་བུའི་བུམ་པ་ན། །སངས་རྒྱས་ཞི་ཁྲོའི་ལྷ་ཚོགས་བཞུགས། །སེམས་ཅན་ཁྱེད་ལ་དབང་བསྐུར་བས། །པྲེ་ཏའི་སྡུག་བསྔལ་བྲལ་བར་ཤོག །དྲེ་པ་ཙ་པ་ཙ་སརྦ་པྲེ་ཏ་ཀ་ག་ཏེ་ཧེ་ཧཱུཾ་ཧཱུཾ་ཕཊ། ཨཱཿཔདྨ་སཏྭ་ས་མ་ཡ། མ་ནུ་པཱ་ལ་ཡ། བཱཀྶཏྭ་ཏྭེ་ནོ་པ་ཏིཥྛ། དྲྀ་ཌྷོ་མེ་བྷ་བ། སུ་ཏོཥྱོ་མི་བྷ་བ། ཨ་ནུ་རཀྟོ་མེ་བྷ་བ། སུ་པོཥྱོ་མེ་བྷ་བ། སརྦ་སིདྡྷིམྨེ་པྲཻ་ཡཙྪ། སརྦ་ཀརྨ་སུ་ཙ་མེ། པདྨ་ཤྲེ་ཡཾ་ཀུ་རུ་ཧཱུཾ་ཧཱུཾ། ཨཾ་ཨཾ། ཨ་ཨ། ཧཱུཾ་ཧོ་ཧེ། བྷ་ག་བཱན། སརྦ་ཏ་ཐཱ་ག་ཏ། པཱདྨཱ་མེ་མུཉྩ། བཱ་བ། མ་ཧཱ་ས་མ་ཡ་བཱ་ག་སཏྭ་ཨ། ཨཱཾ་ཨ་བྷི་ཥིཉྩ་ཨཱ། ཞེས་དབང་བསྐུར་བས། དུས་དེར་ཡང་ཡི་དྭགས་རིགས་གསུམ་ལས། རྒྱུ་བ་གནས་པ་རྣམ་པར་སྨིན། །ཕྱི་ནང་གཉིས་ཀའི་སྒྲིབ་པ་ཅན། །ཡི་དྭགས་གནས་དེ་ཉིད་ལས་ཐར། །མཐོང་ལོག་སྡུག་བསྔལ་ལས་གྲོལ་ལོ། །དབང་མཆོག་རྒྱལ་པོའི་རྒྱུད་ལས། པྲེ་ཏ་དོང་སྤྲུགས་ཀྱི་ལེའུ་སྟེ་བཅུ་པའོ།། །།དེ་ནས་ལས་ངན་སེམས་ཅན་དེ། །བྱོལ་སོང་གནས་སུ་ཡང་སྐྱེས་སོ། །བྱོལ་སོང་རིགས་བཞིར་ཡོད་པ་ལས། །གོར་མ་རྡོ་ཡི་འབུ་རུ་སྐྱེས། །སྔོན་གྱི་ཡན་ལག་བཅད་ལ་སོགས། །དེ་ཡི་རྣམ་པར་སྨིན་ལས་བྱུང་། །རིགས་བཞིའི་མིང་ལ་དཔག་ཏུ་མེད། །བསྡུས་པས་སུམ་འབུམ་ཉི་ཁྲི་ཡོད། །ཤིན་ཏུ་བསྡུས་པ་རིགས་བཞི་ཡིན། །དེ་དག་ཀུན་ཏུ་སྐྱེ་བ་ན། །དེ་ནས་ལག་ན་རྡོ་རྗེ་ཡིས། །སེམས་ཅན་དེ་ཡི་གམ་དུ་བྱོན། །ལས་ངན་དེ་ལ་འདི་སྐད་བསྒྲགས། །ཏིརྱ་ཀ་ཙཀྵུ་པྲ་བེ་ཤ་ཡ་ཨཱ། དེ་སྐད་སེམས་ཅན་ངེས་ཐོས་བས། །སྔོན་གྱི་ལས་ངན་དེ་དྲན་ནས། །ཀྱེ་མ་ཀྱེ་ཧུད་བདག་འདྲ་ཞིག །ལས་ཀྱི་རྣམ་སྨིན་རང་ལ་སྨིན། །མགོན་པོའི་ཐུགས་རྗེས་བདག་སྒྲོལ་ཅིག །ཞེས་གསོལ་བ་བཏབ་པ་དང་། །དེ་ནས་ལག་ན་རྡོ་རྗེ་ཡིས། །ལས་ངན་སེམས་ཅན་བྱོལ་སོང་ལ། །ཤེས་རབ་པོ་ཏི་ལག་ཐོགས་ཏེ། །ལས་ངན་དེ་ཡི་གཙུག་ཏུ་བཞག །རིག་པའི་བདེན་ཚིག་འདི་བརྗོད་དོ། །ཨོཾ་ཤེས་རབ་རིགས་
པའི་པོ་ཏི་འདི། །དུས་གསུམ་སངས་རྒྱས་ཞི་ཁྲོའི་གསུང་། །སེམས་ཅན་ཁྱོད་ལ་དབང་བསྐུར་བས། །ཏིརྱའི་སྡུག་བསྔལ་གྲོལ་བར་ཤོག །སུ་མ་ཐ་མ་ཐ་སརྦ་ཏིརྻ་ཀ་ག་ཏེ་ཧེ་ཏུཾ་ཧཱུཾ་ཕཊཿ། ཨོཾ་བུཌྜྷ་སཏྭ་ས་མ་ཡ། མ་ནུ་པཱ་ལ་ཡ། བུཌྜྷ་སཏྭ་ཏྭེ་ནོ་པ་ཏིཥྛ། དྲྀ་ཌྷོ་མེ་བྷ་བ། སུ་ཏོཥྱོ་མེ་བྷ་བ། ཨ་ནུ་རཀྟོ་མེ་བྷ་བ། སུ་པོཥྱོ་མེ་བྷ་བ། སརྦ་སིདྡྷིམྨེ་པྲ་ཡཙྪ། སརྦ་ཀརྨ་སུ་ཙ་མེ། ཀརྨ་ཤྲེ་ཡཾ་ཀུ་རུ་ཧཱུཾ། ཧ་ཧ་ཧ་ཧ་ཧོ། བྷ་ག་བཱན། སརྦ་ཏ་ཐཱ་ག་ཏ། བྷུཌྜྷ་མཱ་མེ་མུཉྩ། བུཌྜྷ་བྷ་བ། མ་ཧཱ་ས་མ་ཡ། བུཌྜྷ་སཏྭ་ཨ། ཨོཾ་ཨ་བྷི་ཥིཉྩ་ཨ། ཞེས་དབང་བསྐུར་བ་དང་། ཡང་དེའི་དུས་སུ་བྱོལ་སོང་གི་གླེན་ལྐུགས་བསད་བཅད་དང་། ཉིང་ཤ་ཉིང་གིས་ཟ་བ་ལས་ཐར་ཏེ། འཁོར་བྱོལ་སོང་ཁྲི་སུམ་སྟོང་གིས་བདེ་བ་རྙེད་དོ། །ལས་ངན་སེམས་ཅན་དེ་ཡང་། རྡོ་རང་ཞིག་སྟེ་བྱོལ་སོང་གི་མུན་པ་ལས་ཐར་རོ། །དབང་མཆོག་རྒྱལ་པོའི་རྒྱུད་ལས། ཏིརྱ་ཀ་ངན་སོང་དོང་སྤྲུགས་ཀྱི་ལེའུ་སྟེ་བཅུ་གཅིག་པའོ།། །།དེ་ནས་ལས་ངན་སེམས་ཅན་དེ། །ལྷ་མིན་གནས་སུ་སྐྱེས་ཏེ་ཡང་། །འགྲོ་ལ་གནོད་སེམས་མཐོ་རིས་འཁྲུག །འཐབ་རྩོད་ལས་ལ་དགའ་ཞིང་ནད་རིམས་གཏོང་། །མི་དགེའི་ལས་ངན་བར་གཅོད་གཏོང་། །སྒྲ་གཅན་ནག་པོ་བྱ་བར་སྐྱེས། །ལྷ་ལ་ཁོང་ཁྲོ་འཁྲུག་པ་བྱེད། །དཔུང་གི་སྟོབས་ཀྱིས་ཐམས་ཅད་དྲེད། །ལྷ་ཡུལ་དམག་འདྲེན་བསམ་གཏན་འཁྲུགས། །དེ་ནས་ལག་ན་རྡོ་རྗེ་ཡིས། །ལས་ངན་དེ་ལ་འདི་སྐད་བསྒྲགས། །ཨ་སུ་ར་ཙཀྵུ་པྲ་བེ་ཤ་ཡ་ཨ། སྒྲ་གཅན་ནག་པོས་དེ་ཐོས་ནས། །སྔོན་གྱི་ལས་ངན་དུས་དེར་དྲན། །མགོན་པོ་ཉིད་ལ་ངོ་དམའ་ཞིང་། །གདུང་བའི་སྨྲེ་སྔགས་འདི་སྨྲས་སོ། །ཨེ་མ་བདག་འདྲའི་སེམས་ཅན་ཞིག །སྔོན་གྱི་ལས་ངན་དུས་འདིར་བྱུང་། །ཀྱེ་མ་ཀྱི་ཧུད་མགོན་པོ་ཡིས། །བདག་ལུས་ངན་པ་བསྒྲལ་དུ་གསོལ། །སྔར་བྱས་འགྱོད་དོ་མཐོལ་བཤགས་བསྡམ། །ཐུགས་རྗེས་ཟུང་ལ་དབང་བསྐུར་སྦྱོངས། །སླད་ནས་བྱང་ཆུབ་མཆོག་ཐོབ་མཛོད། །ཅེས་གསོལ་བ་ཡང་བཏབ་བོ། །དེ་ནས་ཕྱག་ན་རྡོ་རྗེ་ཡིས། །ཕྱག་ན་གོ་མཚོན་ཐོགས་ནས་ནི། །ལས་ངན་དེ་ལ་
དབང་བསྐུར་བསྒྲལ། །རིག་པའི་བདེན་ཚིག་འདི་བརྗོད་དོ། །ཧཱ་ཤེས་རབ་དོན་མཚོན་རལ་གྲི་དང་། །བདུད་ཀྱི་མཚོན་རྡུགས་གོ་ཆ་ནི། །དུས་གསུམ་སངས་རྒྱས་རྣམས་ཀྱི་སྦྱོར་སྒྲོལ་ཏེ། །ཞི་ཁྲོ་རྒྱལ་བ་རྣམས་ཀྱི་ཕྱག་མཚན་འདིས། །སེམས་ཅན་ཁྱོད་ལ་དབང་བསྐུར་བསྒྲལ། །ཨ་སུ་ར་ཡི་སྡུག་བསྔལ་བྲལ་བར་བྱ། །ཏྲི་སརྦ་དུ་ག་སརྦ་ཀརྨ་པྲ་བེ་ཤ་ཧཱུཾ་ཕཊཿ། ཧཱ་ཀརྨ་སཏྭ་ས་མ་ཡ། མ་ནུ་པཱ་ལ་ཡ། ཀརྨ་སཏྭ། ཏྭེ་ནོ་པ་ཏིཥྛ། དྲྀ་ཌྷོ་མེ་བ། སུ་ཏོཥྱོ་མེ་བྷ་བ། ཨ་ནུ་རཀྟོ་མེ་བྷ་བ། སུ་པོཥྱོ་མེ་བྷ་བ། སརྦ་སིདྡྷིམྨེ་པྲ་ཡཙྪ། སརྦ་ཀརྨ་སུ་ཙ་མེ། ཀརྨ་ཤྲེ་ཡཾ་ཀུ་རུ་ཧཱུཾ། ཧ་ཧ་ཧ་ཧ་ཧོ། བྷ་ག་ཝཱན། སརྦ་ཏ་ཐཱ་ག་ཏ། ཀརྨ་མཱ་མེ་མུཉྩ། ཀརྨ་བྷ་བ། མ་ཧཱ་ས་མ་ཡ་ཀརྨ་སཏྭ་ཨ། ཧཱ་ཀརྨཱ་ཨ་བྷི་ཥིཉྩ་ཨ། ཞེས་དབང་བསྐུར་བས་ལྷ་མ་ཡིན་གཞན་རྣམས་ཀྱང་བྱམས་པའི་སེམས་རང་སྐྱེས། སྙིང་རྗེ་ཚད་མེད་པ་ལ་གནས་སོ། །འཐབ་རྩོད་ཐམས་ཅད་དུས་དེར་ཞིའོ། །སྒྲ་གཅན་ནག་པོ་དུས་དེར་ལག་ན་རྡོ་རྗེས་བསྒྲལ་ལོ། །ལྷ་མ་ཡིན་གཞན་རྣམས་ཀྱང་དགའ་བའི་སེམས་ལ་གནས་ཏེ། སྐྱེ་བ་གཉིས་པ་དང་གཅིག་པ་ཤ་སྟག་ཏུ་གྱུར་ཏོ། །དབང་མཆོག་རྒྱལ་པོའི་རྒྱུད་ལས། སྒྲ་གཅན་ནག་པོའི་ལེའུ་སྟེ་བཅུ་གཉིས་པའོ།། །།དེ་ནས་སྔར་གྱི་སེམས་ཅན་དེ། །ལྷ་ཡི་གནས་སུ་སྐྱེ་བ་བླངས། །ལྷ་གནས་རྣམ་པ་གསུམ་ལས་ནི། །འདོད་ཁམས་སུམ་ཅུ་རྩ་གསུམ་གྱི། །དགེ་བའི་ངང་ཚུལ་བྱ་བར་སྐྱེས། །ལྷ་མོ་བདུན་དང་ལྷན་ཅིག་འགྲོགས། །འདོད་ཡོན་ཆགས་པ་ཅན་དེ་ལ། །ལག་ན་རྡོ་རྗེས་འདི་སྐད་བསྒྲགས། །དེ་བ་ཙཀྵུ་པྲ་བེ་ཤ་ཡ་ཨ། དགེ་བའི་ངང་ཚུལ་དེ་ཐོས་ནས། །སྔོན་གྱི་ལས་ངན་སྐྱེ་བ་དྲན། །རང་གི་རྒྱན་བཀྲོལ་ལག་ན་ཐོགས། །འགྲོ་མགོན་ཉིད་ལ་ངོ་དམའ་ཞིང་། །ཀྱེ་མ་ཀྱེ་ཧུད་ཐུགས་རྗེ་ཆེ། །བདག་འདྲ་རྨོངས་པའི་འདུ་འཛི་ཅན། །དམ་ཚིག་རྩ་བ་ཉམས་པའི་སྐྱོན། །ངན་སོང་མཐོ་རིས་གནས་ན་འཁོར། །མི་འཆབ་འཐོལ་བཤགས་མེ་ཏོག་བཞེས། །དབང་བསྐུར་ལྷ་ཡི་གནས་ལས་སྒྲོལ། །ཞེས་རང་གི་རྒྱན་ཕུལ་ལོ། །དེ་ནས་ལག་ན་རྡོ་རྗེ་ཡིས། །ང་རྒྱལ་ཕྲག་དོག་འཇོམས་བྱེད་པའི། །པི་ཝང་ལག་ཏུ་ཐོགས་ནས་ནི། །དགེ་བའི་ངང་ལ་དབང་བསྐུར་
ནས། །རིག་པའི་བདེན་ཚིག་འདི་བརྗོད་དོ། །ཨ་ལོངས་སྤྱོད་འདུ་འཛི་གཡེང་འཇོམས་པའི། །པི་ཝང་སྙན་པའི་དོན་བྱེད་འདིས། །དེ་བ་ཁྱོད་ལ་དབང་བསྐུར་བས། །སྐྱེ་བ་གཅིག་གི་ལས་རྫོགས་ཤོག །ཨ་སརྦ་ཏ་ཐཱ་ག་ཏ་བི་དྷྭནྶ་ན་ཁཌྒ་ཙྪིན་དྷ་ཙྪིནྡྷ་ཧཱུཾ་ཕཊཿ། སྭཱ་རནྟ་སཏྭ་ས་མ་ཡ། མ་ནུ་པཱ་ལ་ཡ། རཏྣ་སཏྭ་ཏྭེ་ནོ་པ་ཏིཥྛ། དྲྀ་ཌྷོ་མེ་བྷ་བ། སུ་ཏོཥྱོ་མེ་བྷ་བ། ཨ་ནུ་རཀྟོ་མེ་བྷ་བ། སུ་པོཥྱོ་མེ་བྷ་བ། སརྦ་སིདྡྷིམྨེ་པྲ་ཡཙྪ། སརྦ་ཀརྨ་སུ་ཙ་མེ། རཏྣ་ཤྲེ་ཡཾ་ཀུ་རུ་ཧཱུཾ། ཧ་ཧ་ཧ་ཧ་ཧོ། བྷ་ག་བཱན། སརྦ་ཏ་ཐཱ་ག་ཏ། རཏྣ་མཱ་མེ་མུཉྩ། རཏྣ་བྷ་བ་མ་ཧཱ་ས་མ་ཡ། རཏྣ་སཏྭ་ཨ། ཨཱ་ཨ་བྷི་ཥིཉྩ་ཨ། ཞེས་དབང་བསྐུར་བས། ལྷ་རྣམས་གཞན་ཡང་དགེ་བ་ལ་བརྩོན་འགྲུས་དང་ལྡན་པར་གྱུར་ཏེ། སྐྱེ་བ་གཅིག་པ་ཤ་སྟག་བྱུང་བར་གྱུར་ཏོ། །དགེ་བའི་ངང་ཚུལ་ལྷའི་འཕོ་ལྟུང་ལས་དུས་དེར་གྲོལ་བར་གྱུར་ཏོ། །དབང་མཆོག་རྒྱལ་པོའི་རྒྱུད་ལས། ལྷའི་བུའི་ལེའུ་སྟེ་བཅུ་གསུམ་པའོ།། །།དེ་ནས་ལས་ངན་སེམས་ཅན་དེ། །གླིང་མཆོག་འཛམ་གླིང་མི་རུ་སྐྱེས། །སྐྱེ་བ་གཅིག་པའི་བྱང་ཆུབ་སེམས། །རིག་འཛིན་གསང་སྤྱོད་རྣལ་འབྱོར་ཏེ། །སྔར་བྱས་ལས་ཀུན་དྲན་པ་ཅན། །རིག་པའི་བློ་ཅན་སྔོན་སྦྱངས་སྟོབས། །འགྱོད་སེམས་དྲག་པོས་དཀའ་ཐུབ་སྤྱོད། །འཕགས་པ་བླ་མ་མཉེས་པར་བྱེད། །གསང་བདག་ལག་ན་རྡོ་རྗེས་ཀྱང་། །ངན་སོང་སྦྱོང་བའི་རྒྱུད་དབང་བསྐུར། །བུམ་པ་ཐབས་ཤེས་གསང་ཚིག་གིས། །དབང་མཆོག་བསྒྲུབ་པ་དེ་ལ་བསྐུར། །འགྲོ་དྲུག་སྐྱེ་སྒོ་བཅད་པའི་ཕྱིར། །རང་རྒྱུད་སྦྱོང་བའི་སྔགས་བརྗོད་པ། །ཧཱུཾ་ནི་བི་ཤ་མུ་ཙལ་ཙྪིནྡ་ཙྪིནྡ་ཧཱུཾ་ཕཊ། དེ་ནས་དམ་ཚིག་ཉམས་པ་གསོ་བྱའི་ཕྱིར། །བཤགས་པའི་རྒྱལ་པོ་ཡི་གེ་བརྒྱ་པ་བཤད། །ཡི་དམ་ལྷ་ནི་གསལ་བྱས་ལ། །འཕྲོ་འདུས་འགྱོད་སྦྱང་ཚར་བཅད་བྱ། །རྒྱལ་བ་ཞི་ཁྲོ་དཔང་གསོལ་ནས། །ཕྱག་འཚལ་མོས་གུས་བཤགས་བྱས་ལ། །གསང་སྔགས་འབྲུ་བརྒྱའི་བཤགས་པ་བཤད་དོ། །ཧཱུཾ་བཛྲ་སཏྭ་ས་མ་ཡ། མ་ནུ་བཱ་ལ་ཡ། བཛྲ་སཏྭ། ཏྭེ་ནོ་པ་ཏིཥྛ། དྲྀ་ཌྷོ་མེ་བྷ་བ། སུ་ཏོཥྱོ་མེ་བྷ་བ། ཨ་ནུ་རཀྟོ་མེ་བྷ་བ། སུ་པོཥྱོ་མེ་བྷ་བ། སརྦ་སིདྡྷིམྨེ་པྲ་ཡ་ཙྪ། སརྦ་ཀརྨ་སུ་
ཙ་མེ། ཙིཏྟཾ་ཤྲེ་ཡཾ་ཀུ་རུ་ཧཱུཾ་ཧཱུཾ། ཧ་ཧ་ཧ་ཧ་ཧོ། བྷ་ག་བཱན། སརྦ་ཏ་ཐཱ་ག་ཏ། བཛྲ་མཱ་མེ་མུཉྩ། བཛྲཱི་བྷ་བ། མ་ཧཱ་ས་མ་ཡ། བཛྲ་སཏྭ་ཨ། ཧཱུཾ་བཛྲ་ཨ་བྷི་ཥིཉྩ་ཨ། ཨོཾ་བུཌྜྷ་མ་བྷི་ཥིཉྩ་ཨ། སྭཱ་རཏྣ་ཨ་བྷི་ཥིཉྩ་ཨ། ཨཱཾ་པདྨ་ཨ་བྷི་ཥིཉྩ་ཨ། ཧཱ་ཀརྨ་ཨ་བྷི་ཥིཉྩ་ཨ། ཞེས་ཕྱག་མཚན་དུ་རིན་ཆེན་པར་བུ་དང་། གསེག་ཤང་དང་། རྡོ་རྗེ་དང་། འཁོར་ལོ་དང་། རིན་པོ་ཆེ་དང་། པདྨ་དང་། རྒྱ་གྲམ་དང་། རལ་གྲི་ལ་སོགས་པས་དབང་བསྐུར་རོ། །བདེན་པའི་ཚིགས་བཅད་འདིའོ། །ཧཱུཾ་རིན་ཆེན་པར་བུའི་བུམ་པ་ན། །རྒྱལ་བ་ཞི་ཁྲོའི་ལྷ་ཚོགས་བཞུགས། །རིགས་ཀྱི་བུ་ལ་དབང་བསྐུར་བས། །ལྷ་དབང་ལུས་ལ་ཐོབ་པར་ཤོག །ཧཱུཾ་གསེག་ཤང་སིལ་ཁྲོལ་སྒྲ་སྒྲོག་འདི། །ཐུགས་རྟགས་ཞི་ཁྲོའི་ལྷའི་བརྡའ། །རིགས་ཀྱི་བུ་ལ་དབང་བསྐུར་བས། །ཨ་བ་དྷཱུ་ཏཱིའི་དབང་ཐོབ་ཤོག །རྡོ་རྗེ་འཁོར་ལོ་རིན་ཆེན་དང་། །པདྨ་རྒྱ་གྲམ་ཐུགས་ཀྱི་རྟགས། །རིགས་ཀྱི་བུ་ལ་དབང་བསྐུར་བས། །འཁོར་ལོ་ལྔ་ཡི་ལྷ་རྫོགས་ཤོག །ཅེས་སྔགས་དང་ཏིང་འཛིན་ཚིགས་བཅད་ཀྱིས། །རིག་འཛིན་དེ་ལ་དབང་བསྐུར་བས། །ལྷ་དབང་ལུས་ལ་ཐོབ་པར་གྱུར། །རང་ལུས་རྒྱལ་བའི་སྐུར་རྫོགས་ཀྱང་། །མྱ་ངན་འདས་པའི་དོན་མ་རྟོགས། །རྟོག་བཅས་ལྷ་ཡི་དབང་ཞེས་བྱ། །ཞེས་གསུངས་སོ། །དབང་མཆོག་རྒྱལ་པོའི་རྒྱུད་ལས། ལྷ་དབང་ལུས་ལ་བསྐུར་བའི་ལེའུ་སྟེ་བཅུ་བཞི་པའོ།། །།དེ་ནས་རྡོ་རྗེ་འཛིན་པ་ཡིས། །སྣོད་ལྡན་སློབ་བུ་དེ་ལ་ནི། །ཐབས་ཀྱི་དབང་བསྐུར་བརྡའ་རུ་བསྟན། །ཤེས་རབ་དབང་བསྐུར་ཤེས་སམ་བལྟས། །གསང་བའི་དབང་བསྐུར་རང་ཉམས་བསྟན། །ཚིག་གི་དབང་བསྐུར་མེད་པར་བསྟན། །ཐབས་ཀྱི་དབང་བསྐུར་བསྟན་པ་ནི། །ཕྱི་ནང་སྣོད་བཅུད་ཐམས་ཅད་ཀྱི། །སྣང་བ་ཡོད་མེད་བརྡའ་རུ་བསྟན། །གཅིག་ལས་སྣ་ཚོགས་བསྒྱུར་བྱས་པ། །སྣང་བ་ཡོད་མེད་བསྟན་པ་ཡིན། །ཤེས་རབ་དབང་བསྐུར་བསྟན་པ་ནི། །སྣ་ཚོགས་བསྒྱུར་བའི་མིང་གིས་མཚོན། །རི་རབ་གླིང་བཞིའི་དཀྱིལ་འཁོར་དང་། །བུམ་པ་སྐུ་དང་ཡེ་ཤེས་དང་། །འཁོར་ལོ་རིན་ཆེན་པདྨ་དང་། །རྒྱ་གྲམ་རལ་གྲི་རྩེ་གསུམ་དང་། །ཕུར་པ་མདའ་དང་གཞུ་དང་ནི། །མེ་ལོང་དབྱིབས་དང་ཁ་དོག་ཏུ། །
བླ་མས་མིང་དུ་བཏགས་པ་ནི། །སློབ་མའི་ཤེས་རབ་ལྟ་བ་མིན། །དཔེ་ཡི་དོན་དེ་ཤེས་ན་ཤེས་རབ་ཡིན། །གསང་བའི་དབང་བསྐུར་བསྟན་པ་ནི། །རང་ལ་རང་གསང་སྨྲས་པ་ཡིན། །རང་ངོ་ཤེས་ན་གསང་བ་ཐོས། །གཅིག་ངོ་ཤེས་ན་ཐམས་ཅད་དེ། །མཉམ་པ་ཉིད་ནི་ངོ་མཚར་ཆེ། །ཡོད་ན་ཡོད་པར་ཡེ་ནས་མཉམ། །མེད་ན་མེད་པར་ཡེ་ནས་མཉམ། །བདེ་ན་བདེ་བར་ཡེ་ནས་མཉམ། །རྫུན་ན་རྫུན་པར་ཡེ་ནས་མཉམ། །སྟོངས་ན་སྟོང་པར་ཡེ་ནས་མཉམ། །དངོས་ན་དངོས་པོར་ཡེ་ནས་མཉམ། །མཉམ་པ་ཉིད་དུ་ཤེས་པ་ནི། །གསང་བའི་དབང་བསྐུར་ཐོབ་པ་ཡིན། །ཚིག་གི་དབང་བསྐུར་རང་མེད་བསྟན། །ང་བདག་འདུག་ན་ནམས་ཀྱང་འཁོར། །རང་མེད་རོ་དང་བྲལ་བ་ནི། །ཚིག་གཅིག་ཚིག་མེད་དབང་གི་མཆོག །ང་མེད་བདག་མེད་སྣང་བ་མེད། །ཅེས་གསུངས་པས། རིག་འཛིན་དགེ་མཐོང་དང་། འཁོར་དུ་འདུས་པའི་ལས་དང་པོ་པ་རྣམས་དང་། ཐེག་པ་བརྒྱད་པ་རྣམས་བརྒྱལ་ནས། ས་ལ་འགྱེལ་བར་གྱུར་ཏེ། ལ་ལ་ནི་ངུ་ཞིང་སྨྲེ་སྔགས་འདོན། ལ་ལ་ནི་སྐྲག་སྟེ་སྔངས་བར་གྱུར་ནས་སྐུར་པ་འདེབས། ལ་ལ་དག་མོས་པ་ལོག་སྟེ་ཁ་ན་མ་ཐོ་བ་སྨྲ། ལ་ལ་ཡི་ཆད་དེ་བྱས་པ་དོན་མེད་པ། ཀྱེ་མ་ཀྱི་ཧུད་གསང་བདག་རྡོ་རྗེ་མ་གསུངས་ཞེས་གླེང་ངོ་། །ཡིད་གཉིས་པ་རྣམས་ནི་དེ་བས་ན་མུ་སྟེགས་པ་བདེན་ནོ་ཞེས་སྨྲའོ། །དེ་ནས་ལག་ན་རྡོ་རྗེས་འཁོར་དེ་དག་ཡང་དག་ལ་ཡིད་ཆེས་པར་བྱ་བའི་ཕྱིར། བོས་ཤིང་བསྡུས་ཏེ་འདི་སྐད་ཅེས་གསུངས་སོ། །འདུས་པ་རྣམས་ཐེ་ཚོམ་གཅད་པར་བྱའོ། །རྡོ་རྗེ་སེམས་དཔའི་ཞལ་དང་ཕྲད་ཀྱིས་ལོངས་ཤིག །ཆོས་སྐུ་དང་མཇལ་དུ་འོང་ངོ་ཞེས་གསུངས་སོ། །འཁོར་རྣམས་སླར་འདུས་ཏེ། རྡོ་རྗེ་སེམས་དཔའི་དྲུང་དུ་བསྐོར་བ་དང་མཆོད་པའི་ཚོགས་ཀྱིས་མཆོད་དེ་འཁོད་དོ། །དབང་མཆོག་རྒྱལ་པོའི་རྒྱུད་ལས། གསང་བ་ཆོས་ཉིད་ལ་ཡིད་མ་ཆེས་པའི་ལེའུ་སྟེ་བཅོ་ལྔ་པའོ།། །།དེ་ནས་ལག་ན་རྡོ་རྗེ་ཡིས། །རྡོ་རྗེ་འཆང་ལ་འདི་སྐད་གསོལ། །ཀྱེ་ཀྱེ་རྡོ་རྗེ་སེམས་དཔའ་མཆོག །གསང་སྔགས་གསང་བ་མཉམ་མི་མཉམ། །ང་བདག་རང་དབང་ཡོད་དམ་མེད། །ཆོས་སྐུ་དངོས་མེད་བདེན་ནམ་རྫུན། །བག་ཆགས་རོ་དང་འབྲལ་མི་
འབྲལ། །ཞེས་ཞུས་པས། རྡོ་རྗེ་སེམས་དཔས་བཀའ་སྩལ་པ། །སྟོབས་ཆེན་རྡོ་རྗེའི་འཁོར་ཀུན་ཉོན། །ཆོས་ཉིད་ཆོས་སྐུའི་དགོངས་ཚད་ནི། །མཉམ་པ་ཉིད་དུ་མཁྱེན་པ་མིན། །མཉམ་པ་ཉིད་ལ་གཉིས་མེད་དེ། །དཔེར་ན་ཆོས་ཅན་དངོས་པོ་གཅིག །ཕྱི་རོལ་ཀ་བ་བུམ་པ་དང་། །དཔེར་ན་རྡོ་རྗེ་ལྟ་བུ་འདི། །མིང་གིས་ཡིན་ནམ་གཟུགས་ཀྱིས་ཡིན། །མཚོན་པས་ཡིན་ནམ་ལས་ཀྱིས་ཡིན། །འདུས་པས་ཡིན་ནམ་འབྲལ་བས་ཡིན། །མདོག་གིས་ཡིན་ནམ་དབྱིབས་ཀྱིས་ཡིན། །བསམ་པས་ཡིན་ནམ་གང་གིས་ཡིན། །རྡོ་རྗེ་འཛིན་པའི་འཁོར་ཚོགས་ཀུན། །རྡོ་རྗེའི་མིང་གིས་ཡིན་པས་ན། །མིང་དུ་གང་གྲགས་རྡོ་རྗེ་འམ། །གཟུགས་ཀྱིས་རྡོ་རྗེ་ཡིན་པ་ན། །གཟུགས་སུ་གང་སྣང་རྡོ་རྗེ་འམ། །འདུས་པས་རྡོ་རྗེ་ཡིན་པ་ན། །སེམས་ཅན་ཐམས་ཅད་རྡོ་རྗེ་འམ། །མདོག་གིས་རྡོ་རྗེ་ཡིན་པ་ན། །དཀར་དམར་ལ་སོགས་རྡོ་རྗེ་འམ། །དབྱིབས་ཀྱིས་རྡོ་རྗེ་ཡིན་པ་ན། །ཟླུམ་པོ་ལ་སོགས་རྡོ་རྗེ་འམ། །བསམ་པས་རྡོ་རྗེ་ཡིན་པ་ན། །ཡིད་སྨོན་ཐམས་ཅད་རྡོ་རྗེ་འམ། །དེ་ལྟར་རྒྱུ་ཡིས་ཡིན་པ་མེད། །རྡོ་རྗེ་བྱ་བ་གང་ལ་ཟེར། །ཉོན་ཅིག་བློ་རྟོག་སྐྱེས་པ་རྣམས། །དཔེར་ན་ཆོས་ཅན་རྡོ་རྗེ་འདི། །མིང་གིས་ཡིན་ནོ་ངེས་པར་འཇུག །གཟུགས་ཀྱིས་ཡིན་ནོ་སྒོ་ང་རལ། །མཚོན་པས་ཡིན་ནོ་ཆོས་ཅན་འདི། །ལས་ཀྱིས་ཡིན་ནོ་ཆོས་བདུན་ལྡན། །འདུས་པས་ཡིན་ནོ་འབྲལ་བ་ཡིས། །མདོག་གིས་ཡིན་ནོ་ཞི་རྒྱས་ཀྱིས། །དབྱིབས་ཀྱིས་ཡིན་ནོ་དེ་བཞིན་ནོ། །བསམ་པས་ཡིན་ནོ་ཆོས་ཅན་དངོས། །དེ་ལྟར་དགུ་ཡིས་ཡིན་པ་སྟེ། །སྣང་སྲིད་ཐམས་ཅད་རྡོ་རྗེ་ཡིན། །རྡོ་རྗེར་མ་གྱུར་གང་ཡང་མེད། །དེ་ལྟར་རྡོ་རྗེའི་མཚོན་པ་འདི། །ཡིན་ན་ཡིན་པར་ཡེ་ནས་མཉམ། །མིན་ན་མིན་པར་ཡེ་ནས་མཉམ། །ཆོས་ཅན་ཡོད་ན་ཡོད་པར་ཡེ་ནས་མཉམ། །མེད་ན་མེད་པར་ཡེ་ནས་མཉམ། །བདེན་ན་བདེན་པར་ཡེ་ནས་མཉམ། །རྫུན་ན་རྫུན་པར་ཡེ་ནས་མཉམ། །སྟོང་ན་སྟོང་པར་ཡེ་ནས་མཉམ། །དངོས་ན་དངོས་པོར་ཡེ་ནས་མཉམ། །སྣང་ན་སྣང་མཉམ་མཉམ་པ་ཉིད། །མཉམ་ཉིད་ནམ་མཁའ་འདྲའོ་གུད་ན་མེད། །དཔེར་ན་གསེར་གཟུགས་ཆུ་ཡི་རོ། །དུག་མཆོག་ཧ་ལ་འབར་བ་དང་། །སྨན་མཆོག་ག་བུར་དཀར་
པོ་གཉིས། །སྨན་དང་དུག་ཏུ་གཉིས་ཀ་མཉམ། །ཞེས་གསུངས་སོ། །དབང་མཆོག་རྒྱལ་པོའི་རྒྱུད་ལས། ཆོས་ཉིད་མཉམ་པ་ཆོས་སྐུའི་ལེའུ་སྟེ་བཅུ་དྲུག་པའོ།། །།དེ་ནས་ལག་ན་རྡོ་རྗེས་འདི་སྐད་གསོལ། །ཀྱེ་ཀྱེ་རྡོ་རྗེ་སེམས་དཔའ་ཆེ། །ང་བདག་སྣང་བ་ལ་སོགས་ཡོད་དམ་མེད། །ཆོས་ཅན་སྣང་བ་བདེན་ནམ་རྫུན། །མི་དགེ་སྤང་དུ་ཡོད་དམ་མེད། །ཞེས་ཞུས་པས། རྡོ་རྗེ་སེམས་དཔས་བཀའ་སྩལ་པ། །ཉོན་ཅིག་རྡོ་རྗེ་འཛིན་པ་སོགས། །རང་མེད་རོ་དང་ཕྲོལ་ཅིག་འཁོར་ཚོགས་ཁྱེད། །ང་དང་སྣང་བ་གཉིས་པ་མེད། །ང་མེད་ང་གཅིག་སུ་ལ་འདུག །སྣང་མེད་སྣང་བ་སུ་ལ་བདེན། །ཆོས་ཅན་དངོས་པོ་གང་ལ་འདུས། །དགེ་དང་མི་དགེ་མཉམ་པ་ཉིད། །ང་མེད་བདག་མེད་ང་བདག་གང་། །སུ་ལ་ང་བདག་ཡོད་ལ་འཁོར། །གང་ཞིག་ཐེ་ཚོམ་སུས་ཟ་བ། །ང་བདག་ཚོལ་ཅིག་ང་ལ་ལྟོས། །བཙལ་ཀྱང་འདུག་ན་ད་རུང་ཚོལ། །ཚོལ་མཁན་ཚོལ་ཅིག་ཚོལ་མཁན་མེད། །བལྟས་ཀྱང་མ་མཐོང་ལྟ་མཁན་ལྟོས། །ལྟ་མཁན་ལྟོས་ཤིག་ལྟ་མཁན་མེད། །དཔེར་ན་ཆོས་ཅན་རྡོ་རྗེ་དེ། །རྡོ་རྗེ་དངོས་པོ་གང་གིས་བྱེད། །བུམ་པས་བྱེད་དམ་པདྨས་བྱེད། །སྟེང་རྭས་བྱེད་དམ་འོག་རྭས་བྱེད། །འདུས་པས་བྱེད་དམ་རྡོ་རྗེ་གང་། །དེ་བཞིན་ང་བདག་དངོས་པོ་ཡང་། །ལུས་ཀྱིས་བྱེད་དམ་སེམས་ཀྱིས་བྱེད། །ལུས་ཀྱིས་བྱེད་ན་ལུས་པོ་གང་། །མགོ་དང་རྐང་ལག་དབང་པོ་དང་། །དོན་སྙིང་ནང་ཁྲོལ་ཤ་ལྤགས་རུས། །རྩ་དང་བ་སྤུ་སྐྲ་སེན་གང་། །དེས་ན་ལུས་ཀྱི་དངོས་པོ་མེད། །སེམས་ཀྱིས་བྱེད་ན་གསལ་སྟོང་དང་། །འགྱུས་དྲན་འཛིན་ཆགས་དག་གིས་བྱེད། །ལུས་སེམས་དངོས་པོ་འདི་ཞེས་པ། །རྡོ་རྗེ་སེམས་དཔའ་ངས་མ་རྙེད། །མཚོན་པ་ཙམ་དུ་ང་ཞེས་བྱ། །མིང་ཙམ་འདི་ཞེས་བསྟན་པ་ནི། །ཀུན་ཏུ་བཟང་པོས་བསྟན་དུ་མེད། །རྡོ་རྗེ་སེམས་དཔས་མཚོན་དུ་མེད། །སྣང་བ་མེད་དོ་སྣང་བ་གང་། །སྣང་བ་ཡུལ་གཅིག་སུ་ལ་བདེན། །ཡུལ་དུ་བདེན་རྫུན་གཅིག་ལ་ལྟོས། །དཔེར་ན་འབྱུང་བ་ཆུ་ལྟ་བུར། །འགྲོ་དྲུག་མུ་སྟེགས་རྟག་ཆད་དང་། །རིམ་དགུ་མཐོང་སྣང་ཐ་དད་པ། །མིང་དུ་བདེན་པ་གཅིག་ཀྱང་མེད། །དཔེར་ན་རྒྱ་བོད་ཞང་ཞུང་འདྲ། །
མིང་དུ་བདེན་པ་གཅིག་ཀྱང་མེད། །མིང་ཙམ་འདི་ཞེས་བསྟན་པ་ནི། །རྡོ་རྗེ་སེམས་དཔས་མཚོན་དུ་མེད། །སྣང་བ་ཡོད་མེད་འཁྲུལ་མ་འཁྲུལ། །འཁྲུལ་ན་འཁྲུལ་པ་བདེན་ནམ་རྫུན། །བདེན་ན་འཁྲུལ་པ་སུ་ལ་བདེན། །འཁྲུལ་པ་བརྫུན་ན་དེ་ཀས་མེད། །མ་འཁྲུལ་པ་ལ་སྣང་ཟེར་སུ། །ཟེར་ན་ཟེར་མཁན་འཁྲུལ་པ་ཡིན། །དེས་ན་ཆོས་ཅན་དངོས་པོ་མེད། །ཡོད་ན་དངོས་པོ་གཏན་ལ་ཕོབ། །གཏན་ལ་ཕབས་ནས་དངོས་པོ་གང་། །དངོས་པོར་འདོད་པ་བློ་ཕུགས་ཅན། །བློ་ཕུགས་གང་ལྟར་བྱས་ཀྱང་འཁྲུལ། །བློ་ཕུགས་གཏིབ་ཅིག་སྐལ་ལྡན་བུ། །དགེ་དང་སྡིག་པ་ཡེ་ནས་མཉམ། །ཅི་ཕྱིར་བློ་ཕུགས་གྲོལ་ཕྱིར་རོ། །བློ་བཟང་དགེ་བས་གཏོང་དུ་མེད། །སྡིག་པས་གནོད་པ་སྐྱེལ་བ་མེད། །ཅི་སྟེ་མཚན་མ་མེད་པས་སྨོན་པ་མེད། །སྟོང་པ་ཉིད་ལ་ཕན་གནོད་མེད། །བག་ཆགས་བཟང་རྟོག་ངན་རྟོག་ཡིན། །རྟོག་པས་ནམས་ཀྱང་འཁོར་བར་བྱེད། །འཁོར་བའི་ནང་ནས་ཁྱད་པར་ཆེ། །དགེ་བ་སྤྱོད་ཅིག་རིགས་ཀྱི་བུ། །བག་ཆགས་རོ་དང་བྲལ་བར་གྱིས། །བག་ཆགས་རོ་དང་མ་བྲལ་ན། །འཁོར་བའི་གཟུངས་ཐག་མི་ཆོད་དོ། །སྐྱེ་བའི་རྟེན་ཕུར་ཕྱུང་རེ་ཀན། །ཞེས་གསུངས་སོ། །དབང་མཆོག་རྒྱལ་པོའི་རྒྱུད་ལས། རྟོག་པ་ཐེ་ཚོམ་གྱི་གེགས་བསལ་བས་ཆོས་སྐུའི་ཞལ་མཐོང་བའི་ལེའུ་སྟེ་བཅུ་བདུན་པའོ།། །།དེ་ནས་ཡང་བཀའ་སྩལ་པ། ཉོན་ཅིག་རྡོ་རྗེ་འཛིན་པའི་འཁོར། །དཔེར་ན་སྣང་བ་སྣ་ཚོགས་ཀྱང་། །སྒྱུ་མའི་ཆོ་འཕྲུལ་ཇི་བཞིན་ནོ། །སྒྱུ་མའི་དངོས་པོ་གང་གིས་བྱེད། །སྒྱུ་མ་རྟེན་འདྲེལ་སྐྱེ་བ་མེད། །དཔེར་ན་སྐྱེས་བུ་གཉིད་ལོག་ན། །རྨི་ལམ་དགེ་སྡིག་ཆོ་འཕྲུལ་ནི། །དངོས་པོར་སྣང་བ་ཇི་བཞིན་རྨི། །ཉིན་པར་བག་ཆགས་མཚན་བྱུང་བ། །དེ་ལ་དངོས་པོ་ཡོད་དམ་མེད། །དཔེར་ན་གོང་གི་རྨི་ལམ་ན། །སྐྱེས་བུ་མཚོན་ཐོགས་མང་པོ་ཡིས། །བདག་གསོད་འཐབ་མཁོན་རི་ལ་དེད། །དྲེད་སྔངས་ངལ་ཆད་ཤི་ཉེར་བྲོས། །སད་པར་གྱུར་ན་དེ་ཅིར་སྣང་། །དེ་ཕྱིར་སྣང་བའི་དངོས་པོ་འདི། །རི་རབ་གླིང་བཞི་འབྱུང་བ་ཀུན། །དགྲ་གཉེན་ཆགས་སྡང་སྡུག་བསྔལ་ཀུན། །སྒྱུ་མའམ་རྨི་ལམ་ཇི་བཞིན་ནོ། །ཡོད་ནས་
མི་སྣང་མེད་ནས་སྣང་། །མཐོང་བའི་ཆོས་ཀུན་ཡོད་པ་མེད། །མེད་པས་ཡོད་བཟུང་འཁྲུལ་པ་ཡིན། །འཁྲུལ་པའི་དུས་ན་ཡོད་པ་མེད། །ཀུན་རྫོབ་ཙམ་དུ་ཡོད་ཟེར་ན། །ཀུན་རྫོབ་ཙམ་དུ་སུ་ལ་བདེན། །བདེན་ནམ་བདེན་ན་འགྲོ་བ་ཀུན། །ཐམས་ཅད་སྣང་བ་མཐུན་པར་རིགས། །དེ་བས་ཕྱོགས་མཐུན་ཙམ་ཡང་མེད། །དཔེར་ན་དངོས་པོ་ཆུ་ལྟ་བུར། །རིགས་དྲུག་རྟག་ཆད་ཐེག་པ་རྣམས། །ཕྱོགས་མཐུན་ཙམ་ཡང་མི་སྣང་ཕྱིར། །དེས་ན་མེད་པ་སྣང་བ་ཡིན། །ཞེས་གསུངས་སོ། །དབང་མཆོག་རྒྱལ་པོའི་རྒྱུད་ལས། སྣང་བའི་གནད་བསལ་བའི་ལེའུ་སྟེ་བཅོ་བརྒྱད་པའོ།། །།དེ་ནས་ལག་ན་རྡོ་རྗེ་ཡིས། །སྟོན་པ་ལ་འདི་སྐད་ཅེས་གསོལ་ཏོ། །ཀྱེ་ཀྱེ་སྟོན་པ་རྡོ་རྗེ་འཆང་། །མེད་ནས་སྣང་བའི་དཔེ་དོན་གསུངས། །འཁོར་རྣམས་ཚིག་ཆེན་དེས་སྐྲག་ནས། །ཡང་དག་གནས་ལ་ལོག་ལྟ་འབྱུང་། །ཞེས་ཞུས་པས། སྟོན་པ་རྡོ་རྗེ་ཆོས་སྐུ་ཡིས། །རྡོ་རྗེ་འཛིན་ལ་བཀའ་སྩལ་པ། །ཉོན་ཅིག་འདུས་པའི་འཁོར་ཚོགས་ཁྱོད། །འཁྲུལ་པའི་སྣང་བ་སྣ་ཚོགས་འདི། །ཡོད་ནས་མི་སྣང་མེད་ནས་སྣང་། །དཔེར་ན་སྒྱུ་མའི་དཔེ་བརྒྱད་འདྲ། །སྐྱེས་བུ་གཉིད་ལོག་རྨི་ལམ་ན། །བུ་དང་ཆུང་མ་ནོར་ཕྱུགས་ཀུན། །ཤིན་ཏུ་ལོངས་སྤྱོད་སྐྱིད་ལྡན་ལ། །གོ་མཚོན་དམག་མང་དགྲ་དག་གིས། །བུ་བསད་ནོར་བཅོམ་སྡུག་བསྔལ་རྨི། །སྐྱེས་བུ་དེ་ཡི་རྨི་ལམ་དེ། །ཡོད་ནས་སྣང་ངམ་མེད་ནས་སྣང་། །སད་པར་གྱུར་ནས་ཇི་སྙམ་སེམས། །འཁྲུལ་པའི་ཆོས་དེ་བདེན་ནམ་བརྫུན། །བདེན་ན་བདེན་པར་ཀྲི་ལེ་མཉམ། །བརྫུན་ན་བརྫུན་པར་ཀྲི་ལེ་མཉམ། །དེ་བཞིན་སྒྱུ་མའི་མཁན་པོ་ཡི། །སྒྱུ་མའི་སྐྱེས་པ་བུད་མེད་དང་། །ཁང་ཁྱིམ་རོལ་མོ་གཅན་གཟན་ཀུན། །ཡོད་ནས་མི་སྣང་མེད་ནས་སྣང་། །སྒྱུ་མ་ཤེས་པས་སྒྱུ་མ་མེད། །སྒྱུ་མ་བདེན་རྫུན་སྒྱུ་མས་ཤེས། །དེ་བཞིན་འཁྲུལ་པའི་དངོས་པོ་འདི། །འཁྲུལ་པ་བདེན་རྫུན་འཁྲུལ་པས་ཤེས། །སྒྱུ་མའི་ཆོས་དང་ཀྲི་ལེ་མཉམ། །དངོས་པོ་འཁྲུལ་པས་བདེན་པ་མེད། །དེ་བཞིན་སྤྲུལ་པས་སྤྲུལ་པ་རྣམས། །ཡོད་ནས་མི་སྤྲུལ་མེད་ནས་སྤྲུལ། །སྤྲུལ་པ་ཡིན་པས་ཡོད་པ་མེད། །དེ་བཞིན་འཁྲུལ་པའི་ལས་རྣམས་
ཀྱང་། །སྤྲུལ་པ་ཉིད་དང་ཀྲི་ལེ་མཉམ། །དེ་ཕྱིར་འཁྲུལ་པ་ཟེར་བས་ཆོག །དེ་བཞིན་གཟུགས་བརྙན་ཆུ་ཟླ་འདྲ། །ཀློང་དེ་འདུག་ཀྱང་ཟླ་བ་མེད། །དེ་བཞིན་དངོས་པོར་སྣང་བ་འདི། །ཀྲོང་དེ་འདུག་སྟེ་སྣང་བ་མེད། །ཡོད་ན་སྣང་བ་མཐུན་ནམ་ཅི། །སྣང་བ་གཅིག་ལ་མཐུན་པ་མེད། །གཟུགས་བརྙན་ཉིད་དང་ཀྲི་ལེ་མཉམ། །དེ་བཞིན་སྒྲ་བརྙན་ལྟ་བུ་སྟེ། །ཡོད་ནས་མ་བཏགས་མེད་ནས་བཏགས། །ཡོད་ན་མིང་བཏགས་གཅིག་པར་རིགས། །གཅིག་ལ་མིང་བཏགས་དོན་མཐུན་མེད། །སྒྲ་བརྙན་ཉིད་དང་ཀྲི་ལེ་མཉམ། །དེས་ན་བྲག་ཆ་ཉིད་དང་ཁྱད་པར་མེད། །ཡོད་པས་མི་སྣང་མེད་པས་སྣང་། །དཔེར་ན་དྲི་ཟའི་གྲོང་ཁྱེར་འདྲ། །ཀྲོང་ངེ་འདུག་པའི་དུས་ན་མེད། །སྣང་བ་རང་གིས་མེད་པ་ཡིན། །མེད་ན་སེམས་ཀྱི་ཆོ་འཕྲུལ་ལྟོས། །སྒྱུ་མའི་ཆོས་ཉིད་མཐོང་ན་ལྟ་བ་ཡིན། །མཐོང་མེད་མཐོང་ན་ཡིན་པ་མེད། །ལྟ་བ་ཡིན་པ་མེད་པ་ཡིན། །ཅེས་གསུངས་སོ། །དབང་མཆོག་རྒྱལ་པོའི་རྒྱུད་ལས། སྒྱུ་མའི་ཆོས་བདུན་གྱི་སྣང་བ་མེད་པར་ཐག་བཅད་པས་བལྟ་བ་རྟོགས་པའི་ལེའུ་སྟེ་བཅུ་དགུ་པའོ།། །།དེ་ནས་ཡང་བཀའ་སྩལ་པ། །རྡོ་རྗེ་འཛིན་པའི་འཁོར་འདུས་ཉོན། །མཐོང་ངམ་མཐོང་ངམ་མཐོང་བར་ལྟོས། །མ་མཐོང་བ་ན་ཅི་ཞིག་བསྒོམ། །དཔེར་ན་དམུས་ལོང་འགའ་དག་གིས། །གླང་ཆེན་རྩལ་ལྡན་ལ་གནོམས་ནས། །སྣ་དང་མཇུག་མ་རྐང་ལག་རྒྱབ། །དང་པོར་གང་རེག་བསྒོམ་པ་འདྲ། །དེ་བས་མཁས་པས་ལེགས་པར་ལྟོས། །རྨི་ལམ་ལྟོས་ཤིག་མཐོང་བ་ན། །རྨི་ལམ་བསྒོམ་པས་བསྒོམ་པ་ཡིན། །རྨི་ལམ་ཤེས་ནས་རྨི་ལམ་བསྒོམ། །སྒྱུ་མ་མཐོང་ནས་སྒྱུ་མ་བསྒོམ། །སྒྱུ་མའི་གཟུགས་དང་སྒྱུ་མའི་སྒྲ། །སྒྱུ་མའི་དྲི་དང་སྒྱུ་མའི་རོ། །སྒྱུ་མའི་རེག་དང་སྒྱུ་མའི་ཆོས། །སྒྱུ་མ་ལེགས་པར་མཐོང་བ་ན། །སྒྱུ་མ་འདྲིས་པ་བསྒོམ་པ་ཡིན། །གོམས་པར་གྱིས་ཤིག་སྒྱུ་མ་ལས། །སྒྱུ་མར་སྤྱོད་ཤེས་སྒྱུ་མ་ཡིན། །སྒྱུ་མ་འབྲས་མེད་འབྲས་བུ་ཡིན། །དེ་བཞིན་རྨི་ལམ་སྨིག་རྒྱུ་རྣམས། །དེ་ལྟར་མཁས་པས་ལེགས་པར་ལྟོས། །མཐོང་མེད་མཐོང་ན་བལྟ་བ་ཡིན། །དེ་དག་གོམས་ན་བསྒོམ་པའོ། །གཉིས་མེད་
སྤྱོད་པས་སྤྱོད་པ་ཡིན། །འདུ་འབྲལ་མེད་ན་འབྲས་བུའོ། །ཞེས་གསུངས་སོ། །དེ་ནས་རིག་འཛིན་རྒྱལ་པོ་དགེ་མཐོང་དེས། །སངས་རྒྱས་རྡོ་རྗེ་སེམས་དཔའ་དང་། །མགོན་པོ་རྡོ་རྗེ་འཛིན་པ་ལ། །འཛུམ་པའི་མདངས་ཕྱུང་གུས་བཏུད་ནས། །རྒྱལ་བའི་ཚོགས་ལ་འདི་སྐད་གསོལ། །དྲུག་གི་དཀྱིལ་འཁོར་གཉིས་འདུས་ལྷར། །བདག་འདྲ་མ་རིག་དྲེགས་པ་ཡིས། །ཡང་དག་ཉིད་ལ་ལོག་བལྟས་ནས། །རྩ་བའི་དམ་ཚིག་ཉམས་པ་སོགས། །མི་འཆབ་མི་སྦེད་མཐོལ་ལོ་བཤགས། །སླན་ཆད་བསྡམ་མོ་དཔང་མཛོད་ཅིག །སྔ་རབས་གོང་དུ་ཅི་བགྱིས་པ། །ལུས་ངག་ཡིད་གསུམ་འབད་རྩོལ་གྱིས། །ཕ་རོལ་ཕྱིན་དྲུག་ཉམས་བླངས་ལ། །འགྱོད་ཚངས་དཔང་གསོལ་ཞི་ཁྲོའི་ལྷར། །ལུས་ངག་ཡིད་གསུམ་མོས་ནས་བཤགས། །བྱིན་རླབས་སྔགས་མཆོག་བརྒྱ་པ་ནི། །བདུན་གསུམ་ཉི་ཤུ་རྩ་གཅིག་གམ། །བརྒྱ་རྩ་བརྒྱད་དུ་བཤགས་པར་བྱ། །སྨྲེ་འགྱོད་མཐོལ་ལོ་གདུང་བའི་ཚིག །བརྐྱང་ཕྱག་གུས་བྱས་ཚིག་གིས་བཤགས། །སེམས་བསྐྱེད་ལས་བརྩོན་འགྲོ་བའི་དོན། །སྨོན་ལམ་བཀྲ་ཤིས་དགེ་བ་བཤགས། །ཐམས་ཅད་ཡུལ་མེད་མིང་བྲལ་མཐོང་། །རྟོགས་པ་མཉམ་ཉིད་ལྟ་བས་བཤགས། །ཨེ་མ་བདག་གི་ཕུང་པོའི་ཁམས་དང་སྐྱེ་མཆེད་རྣམས། །འདོད་པའི་ཡོན་ཏན་ལྔར་གྱུར་ཏེ། །ཕྱི་ནང་གསང་བའི་མཆོད་པར་བཞེས། །བ་སྤུ་རྡུལ་ཕྲན་རེ་རེས་ཀྱང་། །འགྲོ་བའི་དོན་རྣམས་བྱེད་པར་ཤོག །ཅེས་ཕྱི་ནང་གསང་བ་གསུམ་གྱི་མཆོད་པ་ཕུལ་ལོ། །དབང་མཆོག་རྒྱལ་པོའི་རྒྱུད་ལས། སྒྱུ་མ་བཤགས་མཆོད་སྨོན་ལམ་གྱི་ལེའུ་སྟེ་ཉི་ཤུ་པའོ།། །།དེ་ནས་འཁོར་འདུས་པ་དེ་དག་གིས། རྡོ་རྗེ་སེམས་དཔའ་དཔལ་མགོན་ལགས། །རྒྱུད་ཆེན་འདི་ཡི་དཔེ་མཚོན་ཅི། །གང་གི་དུས་སུ་དར་བར་བགྱི། །ཞེས་ཞུས་པས། །རྡོ་རྗེ་སེམས་དཔས་བཀའ་སྩལ་པ། །ཉོན་ཅིག་ལག་ན་རྡོ་རྗེ་སོགས། །ང་ཡིས་རྒྱུད་ཆེན་རྒྱལ་པོ་འདི། །དཔེར་ན་ཉི་མས་མུན་པ་འདྲ། །མུན་ཁུང་སྒྲོན་མེའི་རྒྱུད་དུ་ཟུང་། །དཔེར་ན་ནད་དང་སྨན་ལྟ་བུ། །སྨན་མཆོག་རྒྱལ་པོའི་རྒྱུད་དུ་ཟུང་། །དཔེར་ན་རྩི་ཤིང་མེ་ལྟ་བུ། །བསྐལ་པའི་
མེ་ཆེན་རྒྱུད་དུ་ཟུང་། །དམ་པ་རིགས་བརྒྱའི་ལྷ་གསལ་བས། །གསང་ཆེན་རིགས་བརྒྱའི་རྒྱུད་དུ་ཟུང་། །དེ་ཉིད་རིགས་ལྔའི་ལྷར་བསྡུས་ནས། །ཡི་གེ་བརྒྱ་པའི་སྔགས་བརྗོད་པས། །ཡི་གེ་བརྒྱ་པའི་རྒྱུད་དུ་ཟུང་། །ཉམས་ཆག་ཐམས་ཅད་འདིས་སྐོང་བས། །བཤགས་པ་ཆེན་པོའི་རྒྱུད་དུ་ཟུང་། །འགྲོ་དྲུག་གནས་ནས་འདིས་དྲངས་པས། །འཁོར་བ་དོང་སྤྲུགས་རྒྱུད་དུ་ཟུང་། །ཐམས་ཅད་སྒྱུ་མར་མ་ཟློས་པས། །སྒྱུ་མ་མཉམ་ཉིད་རྒྱུད་དུ་ཟུང་། །སྣང་སྲིད་ལྷ་དང་དཀྱིལ་འཁོར་དུ། །བསྙེན་བསྒྲུབ་བསྐྱེད་རྫོགས་དམ་ཚིག་སྔགས། །ཕྱག་རྒྱ་དབང་དང་རྒྱུད་ལུང་དང་། །འཁོར་འདས་ཐམས་ཅད་བལྟས་པས་མཐོང་། །ལྟ་བ་དབང་མཆོག་རྒྱུད་དུ་ཟུང་། །མཐོང་ནས་བསྒོམ་དུ་མེད་པས་ན། །སྒོམ་པ་དབང་མཆོག་རྒྱུད་དུ་ཟུང་། །སྤྱོད་ནས་སྤྱད་དུ་མེད་སྤྱོད་པས། །སྤྱོད་པ་རྒྱལ་པོའི་རྒྱུད་དུ་ཟུང་། །མཐོང་བས་འདུ་འབྲལ་མེད་མཐོང་བས། །འབྲས་བུ་དབང་མཆོག་རྒྱུད་དུ་ཟུང་། །ཉམས་སྒྲིབ་ཐམས་ཅད་འདིས་འདག་པས། །དམ་ཚིག་ཁྲུས་ལུང་རྒྱུད་དུ་ཟུང་། །འཁོར་ཚོགས་འདུས་པ་ཁྱེད་རྣམས་ཀྱིས། །དབང་མཆོག་རྒྱལ་པོའི་རྒྱུད་འདི་ནི། །དུས་ངན་ཐ་མའི་དུས་དག་ཏུ། །སྔགས་པས་དམ་ཚིག་མི་བསྲུང་བས། །ལས་ཀྱི་འབྲས་བུ་ངན་སོང་འཁོར། །ཟང་ཟིང་ནོར་གྱིས་མིག་བྲིད་ནས། །ན་རག་གནས་སུ་འཁོར་བྱེད་པས། །དེ་དུས་ང་ཡིས་རྒྱུད་འདི་འབྱུང་། །དཔེར་ན་ནོར་བུ་རིན་ཆེན་འདྲ། །དབུལ་དང་ནད་དང་འཇིགས་པ་མེད། །ཐར་པའི་ལམ་སྐས་བྱེད་པར་ངེས། །དཔེར་ན་མཁའ་ལ་ཉི་ཤར་འདྲ། །མུན་པའི་སྨག་ལ་གསལ་བའི་རྐྱེན། །ཉི་ཟླ་ལྟ་བུ་རྟོགས་བྱེད་ངེས། །དཔེར་ན་མེ་དང་ཤིང་ལྟ་བུ། །ཤིང་ཉིད་མེ་ཡི་གྲོགས་སུ་ངེས། །ཀྱེ་ཧོ་ནམ་མཁའི་མཐོང་ན་འབྱུང་བ་གནས། །ས་ཆུ་མེ་རླུང་གང་ཡང་སྣང་། །ཐམས་ཅད་ནམ་མཁའི་ངང་དུ་ཐིམ། །ཞེས་གསུངས་ནས་མི་སྣང་བར་གྱུར་ཏོ། །རིག་འཛིན་རྒྱལ་པོ་དགེ་མཐོང་ལ་སོགས་པའི་འཁོར་རྣམས་ཀྱིས་མངོན་པར་བསྟོད་དེ་རྗེས་སུ་ཡི་རང་ངོ་། །སྤྲུལ་པ་རྣམས་ནི་མངོན་པར་བསྡུས་ཏེ། རྡོ་རྗེའི་སྤྲུལ་སྐུ་ལ་གཏད་དོ། །ཡི་གེ་བརྒྱ་པ་དབང་མཆོག་རྒྱལ་པོའི་རྒྱུད་ཅེས་བྱ་བ་ལེའུ་ཉེར་
གཅིག་པ་རྫོགས་སོ།། །།དགེ་ལེགས་སོ།། །།