འཇམ་དཔལ་འདུས་པའི་རྒྱུད།
རྒྱ་གར་སྐད་དུ། ཤྲཱི་མཉྫུ་ས་མུ་དཱ་ཡ་ཏནྟྲ། བོད་སྐད་དུ། འཇམ་དཔལ་འདུས་པའི་རྒྱུད། འཇམ་དཔལ་ཡེ་ཤེས་སེམས་དཔའ་ལ་ཕྱག་འཚལ་ལོ། །འདི་སྐད་བདག་གིས་ཐོས་པའི་དུས་གཅིག་ན། །འོག་མིན་དུ་ནི་བཞུགས་ནས་ནི། །སངས་རྒྱས་སེམས་ཅན་རྒྱབ་གྱེས་དུས། །འཁོར་གྱི་རྡོ་རྗེ་སེམས་དཔའ་ལ། །ཡང་ཏི་ནག་པོའི་བསྟན་པ་ཤར། །སྡུད་བྱེད་རོ་ལངས་བདེ་བས་བསྡུས། །འཇམ་དཔལ་འདུས་པའི་རྒྱུད་ལས། གླེང་གཞིའི་ལེའུ་སྟེ་དང་པོའོ།། །།དེ་ནས་རྡོ་རྗེ་སེམས་དཔའ་ཡིས། །ཀྱེ་ཀྱེ་སྟོན་པ་ཀུན་ཏུ་བཟང་པོ་ལགས། །རྫོགས་པ་ཆེན་པོའི་དོན་ཆེན་ལ། །དབང་ལ་བསྐུར་བའི་དོན་རྣམས་དང་། །ལམ་སྦྱངས་བགྲོད་ཚོགས་བསགས་པ་དང་། །སྒྲིབ་སྦྱང་དམ་ཚིག་དཀྱིལ་འཁོར་དང་། །ལྷ་བསྒོམ་སྔགས་བཟླས་ཏིང་འཛིན་དང་། །སྦྱིན་དང་ཚུལ་ཁྲིམས་སྨོན་ལམ་དང་། །དེ་རྣམས་དོན་ཀྱང་བཤད་དུ་གསོལ། །ཞེས་ཞུས་སོ། །འཇམ་དཔལ་འདུས་པའི་རྒྱུད་ལས། ཞུས་པའི་ལེའུ་སྟེ་གཉིས་པའོ།། །།ཀུན་ཏུ་བཟང་པོས་བཀའ་སྩལ་པ། །ཉོན་ཅིག་རྡོ་རྗེ་སེམས་དཔའ་ཆེ། །དབང་ལ་བསྐུར་མི་དགོས་པ་ནི། །བུམ་པ་ཐབས་དང་གསང་དབང་དང་། །ཚིག་གི་དབང་དུ་ཐམས་ཅད་འདུས། །རང་ལུས་བུམ་པར་ཤེས་པ་ནི། །དེ་ནི་དབང་བསྐུར་དང་པོ་ཡིན། །རིག་སྣང་གཉིས་སུ་སྦྱོར་བ་ནི། །དེ་ནི་དབང་མཆོག་གཉིས་པ་ཡིན། །ཡེ་ཤེས་སྐུ་ཡི་དོན་མཆོད་པས། །དེ་ནི་དབང་བསྐུར་གསུམ་པ་ཡིན། །ཚིག་རྣམས་ཐམས་ཅད་དོན་ལ་བསྡུས། །དེ་ནི་དབང་བསྐུར་བཞི་པ་ཡིན། །དབང་རྫས་རང་ལ་རབ་རྫོགས་པས། །སྣང་བ་རྫས་ཀྱི་ཁར་མ་ལུས། །
ཞེས་གསུངས་སོ། །འཇམ་དཔལ་འདུས་པའི་རྒྱུད་ལས། དབང་གི་ལེའུ་སྟེ་གསུམ་པའོ།། །།ལམ་སྦྱང་མི་དགོས་པའི་དོན་འདིའོ། །འབྱུང་བ་ལྔ་ལ་ལོངས་སྤྱད་པས། །དེ་ནི་ཚོགས་ཀྱི་ལམ་པའོ། །དེ་ཉིད་འོད་གསལ་ཉིད་དུ་ཤར། །དེ་ནི་སྦྱོར་བའི་ལམ་པ་ཡིན། །གཉིས་སྣང་མེད་པའི་ཡེ་ཤེས་གསལ། །དེ་ནི་མཐོང་བའི་ལམ་པའོ། །དེ་རྣམས་གཉིས་སུ་མེད་པར་གནས། །དེ་ནི་མཐར་ཕྱིན་ལམ་པའོ། །ཞེས་གསུངས་སོ། །འཇམ་དཔལ་འདུས་པའི་རྒྱུད་ལས། ལམ་གྱི་ལེའུ་སྟེ་བཞི་པའོ།། །།ས་ལམ་མི་བགྲོད་དོན་འདིའོ། །ས་རྣམས་མི་བགྲོད་རང་ལ་རྫོགས། །མཉམ་པར་ཤེས་ནས་ས་རྣམས་ཀུན་དང་མཉམ། །བགྲོད་མེད་དོན་ལ་གང་གནས་པ། །དེ་ནི་ས་རྣམས་ནོན་པ་སྟེ། །གང་ཞིག་ས་རྣམས་བགྲོད་འདོད་པ། །ཕྱིན་པའི་དུས་མེད་ནོན་པའི་ཐབས་མེད་དེ། །དཔེར་ན་རི་དྭགས་སྨིག་རྒྱུ་བསྙེགས་དང་མཚུངས། །ཞེས་གསུངས་སོ། །འཇམ་དཔལ་འདུས་པའི་རྒྱུད་ལས། སའི་ལེའུ་སྟེ་ལྔ་པའོ།། །།ཚོགས་རྣམས་མི་གསོག་དོན་འདིའོ། །ཚོགས་བསག་དོན་ལ་རྣམ་གཉིས་ཏེ། །རྒྱུ་ཡི་ཚོགས་དང་འབྲས་བུའི་འོ། །རྒྱུ་ནི་ཐིག་ལེ་ལྷུན་གྲུབ་ལ། །འབྲས་བུ་ཐམས་ཅད་མཁྱེན་པའི་ཡེ་ཤེས་སོ། །གཉིས་སུ་མེད་པའི་ཆོས་སྐུ་ལ། །ཚོགས་གཉིས་རྣམ་པ་གཉིས་རྫོགས་པས། །ཚོགས་རྣམས་མི་གསོག་ཡེ་ནས་རྫོགས། །གཉིས་སྣང་མེད་པས་བསག་ཏུ་མེད། །ཅེས་གསུངས་སོ། །འཇམ་དཔལ་འདུས་པའི་རྒྱུད་ལས། ཚོགས་ཀྱི་ལེའུ་སྟེ་དྲུག་པའོ།། །།སྒྲིབ་པ་སྦྱང་བའི་དོན་འདིའོ། །སྒྲིབ་པ་ལ་ཡང་རྣམ་བཞི་སྟེ། །རིག་པ་སྤྲུལ་པའི་སྐུར་གྲུབ་པས། །ཤེས་བྱའི་སྒྲིབ་པ་དེ་ལ་མེད། །སྣང་བ་རང་སྣང་ལོངས་སྐུ་ལ། །ཉོན་མོངས་སྒྲིབ་པ་སྦྱང་དུ་མེད། །གཉིས་སྣང་མེད་པའི་ཐིག་ལེ་ལ། །ལས་ཀྱི་སྒྲིབ་པ་སྦྱང་དུ་མེད། །ཆགས་པ་རང་བྱུང་ཡེ་ཤེས་ལ། །བག་ཆགས་སྒྲིབ་པ་སྦྱང་དུ་མེད། །ཐམས་ཅད་ཐིག་ལེ་ཆོས་སྐུ་ལ། །
སྒྲིབ་པ་བཞི་པོ་གང་དུ་སྦྱང་། །སྦྱང་བའི་ས་དང་སྦྱོང་བའི་རྒྱུ། །གཉིས་སྤྱོད་ཕྱིར་ན་ཡང་ཏི་མིན། །ཇི་སྙེད་ཐེག་པ་འོག་མར་གོལ། །གོལ་ས་བཅད་ཕྱིར་དོན་འདི་བསྟན། །ཞེས་གསུངས་སོ། །འཇམ་དཔལ་འདུས་པའི་རྒྱུད་ལས། སྒྲིབ་པ་སྦྱང་བའི་ལེའུ་སྟེ་བདུན་པའོ།། །།དམ་ཚིག་བསྲུང་དུ་མེད་པའི་དོན་འདིའོ། །ཆོས་སྐུས་ཁྱབ་པས་གཅིག་པའི་ཕྱིར། །སྲུང་བའི་དམ་ཚིག་ས་མ་ཡ། །འབུམ་སྡེ་བཀོད་པ་ཚིག་ཡིན་ཏེ། །ཚིག་ལ་མི་བརྟེན་རང་བྱུང་བས། །དེ་རྣམས་ཐིག་ལེར་འདུས་པས་ན། །ཐམས་ཅད་བསྲུང་བྱ་གང་ཡང་མེད། །བསྲུང་བྱ་སྲུང་བྱེད་གཉིས་བྱུང་ན། །དེ་ནི་ཡང་ཏི་ནག་པོ་མིན། །ཡུལ་དང་ཡུལ་ཅན་ཡིན་པའི་ཕྱིར། །ཐེག་པ་འོག་མའི་ཁྱུ་རུ་གོལ། །དེ་ཕྱིར་ཡེ་བསྲུངས་དོན་འདི་བསྟན། །ཞེས་གསུངས་སོ། །འཇམ་དཔལ་འདུས་པའི་རྒྱུད་ལས། དམ་ཚིག་བསྲུང་བའི་ལེའུ་སྟེ་བརྒྱད་པའོ།། །།དཀྱིལ་འཁོར་བསྐྱེད་དུ་མེད་པའི་དོན་འདིའོ། །ལྟེ་བ་མུ་ཁྱུད་འཁོར་ལོ་འཕགས། །ཟླ་གམ་རིན་ཆེན་ཟུར་གསུམ་རྣམས། །རང་ལས་སྣང་བ་ཕྱི་རུ་ཤར། །དེ་ལ་དམ་པར་འཛིན་པ་ནི། །ཐེག་པ་འོག་མའི་འདོད་གཞུང་ངོ་། །ཡང་ཏི་ནག་པོ་འདི་ལྟར་འདོད། །ཕྱི་ཡི་དཀྱིལ་འཁོར་རང་སྣང་ཡིན། །ནང་གི་དཀྱིལ་འཁོར་རང་བྱུང་ཡིན། །གསང་བའི་དཀྱིལ་འཁོར་གཉིས་མེད་ཡིན། །ཡང་ཏིའི་དཀྱིལ་འཁོར་བསྟན་པ་ནི། །ཐམས་ཅད་ཡེ་ནས་སངས་རྒྱས་ཡིན། །ཡིན་པར་ཤེས་པས་བསྐྱེད་དུ་མེད། །ཅེས་གསུངས་སོ། །འཇམ་དཔལ་འདུས་པའི་རྒྱུད་ལས། ཡང་ཏི་ནག་པོའི་དཀྱིལ་འཁོར་གྱི་ལེའུ་སྟེ་དགུ་པའོ།། །།ལྷ་ལ་བསྒོམ་དུ་མེད་པའི་དོན་བསྟན་པ། །དབྱིངས་ཕྱུག་ལ་སོགས་ཡུམ་རྣམས་ནི། །རང་སྣང་ཡུལ་དུ་གཟུང་བས་འཁྲུལ། །ཧེ་རུ་ཀ་སོགས་ཡབ་རྣམས་ནི། །རང་ཤར་བརྟག་སྟེ་ཡབ་ཏུ་གཟུང་། །ཐུགས་ལས་སྐྱེས་པའི་སྲས་མཆོག་ནི། །ཡབ་ཀྱི་རང་བྱུང་ཆ་ལས་གཟུང་། །ད་ཡི་ཡུམ་རྣམས་ཐམས་ཅད་ཀྱིས། །
ཡུམ་གྱི་སྣང་བའི་ཆ་ལས་གཟུང་། །གཉིས་མེད་ཟེར་གྱིས་གཉིས་སུ་བསྒྲུབ། །དེས་ན་བསྒྲུབ་པའི་གོལ་ས་ཡིན། །ཡང་ཏི་ནག་པོའི་ལྷ་བསྒོམ་ནི། །རིག་པའི་ཡེ་ཤེས་ཐམས་ཅད་ལྷ། །རིག་པའི་ལྷ་ལ་མདུན་རྒྱབ་མེད། །ཡབ་ཡུམ་གཉིས་སུ་ཕྱི་ནང་མེད། །ཕྱི་ནང་མེད་པའི་ཐིག་ལེའོ། །དེ་ནི་དོན་གྱི་དཀྱིལ་འཁོར་ཡིན། །ཞེས་གསུངས་སོ། །འཇམ་དཔལ་འདུས་པའི་རྒྱུད་ལས། ལྷ་བསྒོམ་པའི་ལེའུ་སྟེ་བཅུ་པའོ།། །།གསང་སྔགས་བཟླའ་རུ་མེད་པ་ནི། །མི་གསུང་མཉམ་པར་ཤེས་པ་ནི། །དེ་ནི་སྔགས་ཀྱི་ཏིང་འཛིན་ཡིན། །ཐིག་ལེ་གཅིག་ཏུ་གནས་པ་ནི། །དེ་ནི་སྔགས་ཀྱི་འཕྲོ་འདུའོ། །ཐམས་ཅད་མཁྱེན་པའི་ཡེ་ཤེས་ཤར། །དེ་ནི་སྔགས་ཀྱི་གྲངས་ཚད་དོ། །ལྷུན་གྱིས་གྲུབ་ནས་རང་ལ་རྫོགས། །དེ་ནི་སྔགས་ཀྱི་འབྲས་བུའོ། །བཟླས་པའི་དུས་དང་གྲངས་རྣམས་དང་། །དངོས་གྲུབ་གཞན་ནས་རེ་བ་ནི། །དེ་ནི་ཡང་ཏི་ནག་པོ་མིན། །བརྗོད་མེད་དོན་ལ་གང་གནས་པ། །གསང་སྔགས་ཀུན་གྱི་བདག་པོའི་མཆོག །ཅེས་གསུངས་སོ། །འཇམ་དཔལ་འདུས་པའི་རྒྱུད་ལས། སྔགས་བཟླས་པའི་ལེའུ་སྟེ་བཅུ་གཅིག་པའོ།། །།སྨོན་ལམ་གདབ་ཏུ་མེད་པ་ནི། །ཐམས་ཅད་ཡང་ཏི་ནག་པོ་ལ། །ཤིས་པའི་ཡུལ་བརྗོད་ག་ལ་ཡོད། །ཐམས་ཅད་བཀྲ་ཤིས་ཆེན་པོ་ཡིན། །ཡེ་ནས་ཤིས་པའི་འདུག་ཚུལ་ལ། །ད་གདོད་ཤིས་པ་བརྗོད་མི་དགོས། །ཡེ་ནས་ལྷུན་གྲུབ་ཆོས་སྐུ་ལ། །ད་ལྟ་སྨོན་ལམ་གདབ་ཏུ་མེད། །ཡིན་ཕྱིར་སྨོན་ལམ་གདབ་མི་དགོས། །མིན་པར་བཏབ་པས་དགོས་པ་མེད། །ཅི་སྟེ་ནམ་མཁའི་མེ་ཏོག་འདྲ། །ཞེས་གསུངས་སོ། །འཇམ་དཔལ་འདུས་པའི་རྒྱུད་ལས། སྨོན་ལམ་དང་ཤིས་པ་བརྗོད་མེད་བསྟན་པའི་ལེའུ་སྟེ་བཅུ་གཉིས་པའོ།། །།ཚུལ་ཁྲིམས་བསྲུང་དུ་མེད་པའི་དོན་བསྟན་པ། །ཚུལ་ཁྲིམས་དུས་རྣམས་ཐམས་ཅད་དུ། །མ་བསྲུངས་མ་ཉམས་ཡེ་ནས་བསྲུངས། །ཡེ་བསྲུངས་གདེང་དང་ལྡན་པ་ལ། །དེ་བསྲུང་ཞེས་ནི་གང་འཆད་པ། །དེ་ནི་ཉན་ཐོས་
སྡེ་བར་གོལ། །ཡང་ཏི་ནག་པོའི་ཚུལ་ཁྲིམས་ནི། །ལྷུན་གྲུབ་ཐིག་ལེ་ཆོས་སྐུ་ལ། །བསྲུང་དུ་མེད་སྣང་མེད་པའི་ཕྱིར། །ཐམས་ཅད་ཡེ་བསྲུངས་ཆེན་པོར་འདུས། །དེ་ནི་ཚུལ་ཁྲིམས་ཆེན་པོ་ཡིན། །ཞེས་གསུངས་སོ། །འཇམ་དཔལ་འདུས་པའི་རྒྱུད་ལས། ཚུལ་ཁྲིམས་དང་དམ་ཚིག་བསྲུང་བའི་ལེའུ་སྟེ་བཅུ་གསུམ་པའོ།། །།སྦྱིན་པ་མེད་པར་བསྟན་པ་ནི། །སྦྱིན་པ་ཀུན་གྱི་རྩ་བ་ནི། །སྣང་བ་འོད་གསལ་དོན་རྟོགས་པས། །ལོངས་སྐུའི་སྦྱིན་པ་ཆེན་པོ་ཐོངས། །རིག་པ་རང་བྱུང་སྤྲུལ་སྐུ་ལ། །སྦྱིན་པ་ལེན་པའི་ཡུལ་ཀྱང་རྫོགས། །སྣང་བ་མེད་པའི་ཆོས་སྐུ་ལ། །རང་གི་རིག་པའི་སྦྱིན་པ་རྫོགས། །སྣང་བྱ་སྣང་བྱེད་གཉིས་མེད་ཅིང་། །གཏང་བྱ་གཏོང་བྱེད་གཉིས་མེད་པས། །ཡང་ཏི་ནག་པོའི་སྦྱིན་པ་རྫོགས། །གྲགས་སྣང་གཞན་གྱི་སྦྱིན་པ་རྫོགས། །ཡུལ་དང་ཡུལ་ཅན་སྦྱིན་པ་གཏང་། །གཉིས་མེད་གཉིས་སུ་བཏང་བས་གོལ། །ཞེས་གསུངས་སོ། །འཇམ་དཔལ་འདུས་པའི་རྒྱུད་ལས། སྦྱིན་པ་ཡོངས་སུ་གཏོང་བར་བསྟན་པའི་ལེའུ་སྟེ་བཅུ་བཞི་པའོ།། །།དེ་ནས་རྡོ་རྗེ་སེམས་དཔའ་ཡིས། །དངོས་པོའི་གནས་ལས་བྱུང་བ་ཡི། །ཡང་ཏི་ནག་པོའི་དོན་རྫོགས་ཀྱང་། །སེམས་ཅན་དབང་པོ་དམན་པ་དང་། །ངང་གིས་ཤེས་རབ་ཆུང་བ་དག །གྲོལ་བའི་ཐབས་ཆེན་བསྟན་དུ་གསོལ། །ཞེས་ཞུས་སོ། །ཀུན་ཏུ་བཟང་པོས་བཀའ་སྩལ་པ། །སེམས་ཅན་དབང་པོ་ཞན་པ་ལ། །ངོ་སྤྲོད་བཞི་ཡང་སྐྱོར་དུ་ཆུག་ངོ་སྤྲོད་དང་པོ་ཡོད་དམ ། འཁྲུལ་པའི་རྩ་བ་གཏིང་ནས་ཐོན། །ལྷག་མཐོང་རིག་པའི་འཁོར་ལོ་བསྐོར། །དེ་ནི་ངོ་སྤྲོད་གཉིས་པའོ་ངོ་སྤྲོད་གསུམ་པ་ཡོད་དམ ། །ཡིད་ཕུང་ཐག་པ་ནག་པོ་རྩད་ནས་ཆོད། །རིག་པ་གོས་དང་དབྲལ་བའོ། །དེ་ནི་ངོ་སྤྲོད་བཞི་པའོ། །ཡང་ནི་བར་དོའི་རྐྱེན་གསུམ་བསྟན། །སྣང་བ་ངོ་སྤྲོད་བླ་མའི་ངག །རིག་པ་གཅེར་བུར་བཟུང་བ་དང་། །རིག་པ་གོས་དང་དབྲལ་བ་དང་། །གཟུང་འཛིན་ཞགས་པ་བཅད་པའོ། །འབྲིང་དང་ཐ་མའི་མན་ངག་གོ། །རབ་ཀྱི་དཔེ་ཡང་རྣམ་
གསུམ་སྟེ། །རྒྱ་མཚོའི་ལྦུ་བ་ནམ་མཁའི་སྤྲིན། །ཨུཏྤ་ལ་ཡི་མདོག་བཞིན་ནོ། །ཡང་ན་དཔེ་གཅིག་འདི་ལྟ་སྟེ། །པ་ན་ས་ཡི་འབྲས་བུ་བཞིན། །གཞི་ལས་འདས་པ་མེད་པའོ། །ཞེས་གསུངས་སོ། །འཇམ་དཔལ་འདུས་པའི་རྒྱུད་ལས། གནས་ལུགས་ལ་ངོ་སྤྲད་པ་དང་མ་གྲོལ་བ་གྲོལ་བར་བྱ་བའི་ལེའུ་སྟེ་བཅོ་ལྔ་པའོ།། །།དེ་ནས་རྡོ་རྗེ་སེམས་དཔའ་ཡིས། །བཅོམ་ལྡན་ཀུན་ཏུ་བཟང་པོ་ལ། །ལེགས་སོ་ཞེས་ནི་རབ་བསྟོད་ནས། །བདག་ཅག་ཤིན་ཏུ་ཡི་རང་སྟེ། །རྒྱུད་ཆེན་འདི་ལ་མིང་འདོགས་ཞུ། །ཞེས་གསུངས་སོ། །ཀུན་ཏུ་བཟང་པོས་བཀའ་སྩལ་པ། །ང་ཡི་བྱིན་བཤད་རྒྱུད་ཆེན་འདི། །འཇམ་དཔལ་ཡེ་ཤེས་འདུས་པར་ཟུང་། །ཐམས་ཅད་གང་ཡང་མ་ལུས་རྫོགས། །ཐམས་ཅད་འདུས་པའི་རྒྱུད་དུ་ཟུང་། །སངས་རྒྱས་རང་འཁྲུངས་བསྟན་པས་ན། །སངས་རྒྱས་འདུས་པའི་རྒྱུད་དུ་ཟུང་། །ཡེ་ཤེས་རང་ལ་སྟོན་པས་ན། །ཡེ་ཤེས་ཁོང་ཤར་རྒྱུད་དུ་ཟུང་། །ལྟ་སྒོམ་སྤྱོད་པ་སུན་འདོན་པས། །ལྷུན་གྲུབ་རང་ཆས་རྒྱུད་དུ་ཟུང་། །ཞེས་གསུངས་སོ། །ཞུ་བ་པོ་རྡོ་རྗེ་སེམས་དཔས་ཞུས། སྡུད་པ་པོ་རོ་ལངས་བདེ་བས་བསྡུས་སོ། འཇམ་དཔལ་འདུས་པའི་རྒྱུད་ལས། མཚན་གྱི་ལེའུ་སྟེ་བཅུ་དྲུག་པའོ།། །།ཡང་ཏི་ནག་པོ་འབྲུ་གཅིག་པ་རྫོགས་སོ།། །།