ངོ་སྤྲོད་རིན་པོ་ཆེ་སྤྲས་པའི་ཞིང་ཁམས་བསྟན་པའི་རྒྱུད་ཅེས་བྱ་བ། རྒྱ་གར་གྱི་མཁན་པོ་བི་མ་ལ། བོད་ཀྱི་ལོཙྪ་བ་སྐ་བ་དཔལ་བརྩེགས།

རྒྱ་གར་སྐད་དུ། དཪྴ་ནོ་པ་དེ་ཤ་རཏྣཱ་ཙི་ཏཀྵེ་ཏྲདྷཱ་ཏུ་ཤཱ་ས་ན་ཏནྟྲ་ནཱ་མ། བོད་སྐད་དུ། ངོ་སྤྲོད་རིན་པོ་ཆེ་སྤྲས་པའི་རང་གི་མཚན་ཉིད་ཞིང་ཁམས་བསྟན་པའི་རྒྱུད་ཅེས་བྱ་བ། བཅོམ་ལྡན་གཞོན་ནུ་རྡོ་རྗེ་མི་འཁྲུགས་པ་ལ་ཕྱག་འཚལ་ལོ། །འདི་སྐད་བདག་གིས་བསྟན་པའི་དུས་གཅིག་ན། ཐུན་མོང་མིན་པའི་གླེང་གཞི། ཆོས་ཐམས་ཅད་ཀྱི་དེ་བཞིན་ཉིད་རྒྱན་མ་བཀོད་པར་སྣང་བ་སྟེ། འོད་ཀྱི་ཡུལ། དབྱིངས། སྐུའི་མཁའ། རིག་པའི་སྐུ། གསུང་གི་ཟེར། རིག་པའི། ཐུགས་ཀྱི་གནས། དགོངས་པ། ཡེ་གདངས་ཆེན་པོའི་སྣང་བ། ཁྱབ་བརྡལ་དབྱིངས་ཆེན་པོའི་ཕོ་བྲང་། སྟོང་པ་ཡེ་རྫོགས་ཀྱི་གཞལ་ཡས་ན། གནས་ཐུན་མོང་མ་ཡིན་པ། རྒྱུད་གསང་བ་ཆེན་པོའི་དོན་རང་དག་ཏུ་བཀོད་པ་འདི་གསུངས་སོ། །བསྟན་པ་ཐུན་མོང་མ་ཡིན་པ། གསུང་ངོ་། །གསུང་བར་འགྱུར་རོ། །འདི་སྐད་བདག་གིས་ཐོས་ཐུན་མོང་བའི་གླེང་གཞི་པའི་དུས་གཅིག་ན། རང་བཞིན་རྫོགས་པ་ཆེན་པོའི་གནས། གནས་ཕུན་སུམ་ཚོགས་པ། ཤིན་ཏུ་རྒྱ་ཆེ་ལ་ཁྱབ་ཅིང་གསལ་བའི་གཞི། གཞི་གཞན་གྱིས་དཔག་པར་དཀའ་བ་ཆེན་པོ་ན། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་སྟོན་པ་དང་གསུང་བསྟན་པ་དང་ཐུགས་ཀྱི་རྡོ་རྗེ་གནས་མི་བསྐྱོད་པ་ཆེན་པོའི་འཁོར་བདག་ཉིད་དུ་བཞུགས་སོ། །དུས། དེ་ནས་སྡུད་པ་པོ་གསང་བའི་བདག་པོས། ཆོས་ཐམས་ཅད་ཡོངས་སུ་སྡུད་པ་ཞེས་བྱ་བའི་སེམས་བསྐྱེད་དེ། བཅོམ་ལྡན་འདས་ལ་ཕྱག་འཚལ་ཞིང་བསྐོར་ནས་འདི་དག་རྣམས་མངོན་དུ་ཞུ་བའི་ཚིག་རྡོ་རྗེ་མཛད་པ་ཞེས་བྱ་བ་རྣམས་ཀྱི་ཚིག་ཏུ་འདི་རྣམས་ཞུ་བ་ཉིད་རབ་ཏུ་ཞུས་སོ། །ཀྱེ་སྟོན་པ་ཆེན་པོ་ཉིད་ཀྱི་སྐུ་ཡི་ངོ་བོ་ཇི་ལྟ་བུ་ལགས། གསུང་བསྟན་པ་ནི་གང་། ཐུགས་དགོངས་པ་ནི་ཅི་ལྟ་བུ་ལགས། མཛད་པ་གདུལ་བྱའི་དོན་ནི་ཅི། སྔོན་འབྱུང་གི་ཡུལ་ནི་གང་ལགས། དེའི་ཚེ་འཁོར་ནི་ཇི་ལྟ་བུ། དེའི་ཚེ་ཏིང་ངེ་འཛིན་ནི་ཇི་ལྟ་བུ་ཞིག་མངའ། འདི་དག་ཇི་ལྟར་ཡོད་དམ་

སྙམ་བདག་ཐེ་ཚོམ་དུ་གྱུར་ཡིད་གཉིས་སུ་གྱུར། བློའི་རྟོག་པར་མ་ཚུད་ལགས་ན། དེ་དག་ཇི་ལྟར་ལགས་བསྟན་དུ་གསོལ། ཞེས་ཞུས་སོ། །དེ་ནས་ཉིད་ཀྱི་རང་བཞིན་གྱི་གནས་ནས་འདི་དག་ཐུགས་ཀྱི་དཀྱིལ་འཁོར་ནས་ཕྱུང་ངོ་། །ཀྱེ་གསང་བའི་བདག་པོ་ཉོན་ཅིག །ངའི་སྐུ་ནི་སངས་རྒྱས་ཐམས་ཅད་འདུས་པའི་སྐུ་རྡོ་རྗེ་སྙིང་པོ་མི་ཤིགས་པ་རྒྱན་གྱི་འཁོར་ལོ་ཞེས་བྱ་བ་ཡིན་ནོ། །ངའི་གསུང་ནི་རང་བཞིན་རྫོགས་པ་ཆེན་པོ་འབུམ་ཕྲག་དྲུག་ཅུ་རྩ་བཞིའི་བདག་ཉིད་དུ་གནས་སོ། །ཐུགས་ནི་མི་བསྐྱོད་པའི་རང་བཞིན་ཡེ་ཤེས་ཆེན་པོར་ཡེ་ནས་གནས་པ་ཡིན་ནོ། །ངའི་མཛད་པ་ནི་སྐྱེ་བ་བཞི་དུས་ཐམས་ཅད་དུ་འབྱུང་བའོ། །ངའི་ཡུལ་ནི་བཀོད་པ་ཡོངས་སུ་རྫོགས་པ་རྒྱ་ཆེ་བ་ཡིན་ཏེ། མཐའ་གང་དུ་ཡང་མ་ལྷུང་བ་ཉིད་ཡིན་ནོ། །ངའི་འཁོར་ནི་ཕྱི་དང་ནང་དང་གསང་བ་ལས་སྤྲུལ་པ་ཉིད་དོ། །ངའི་ཏིང་ངེ་འཛིན་ནི་འདི་ལྟ་སྟེ། མི་བརྗེད་པ་མངོན་དུ་སྦྱངས་པའི་རྒྱུན་གྱི་ཏིང་ངེ་འཛིན་དང་། ཡེ་ནས་རབ་ཏུ་གསལ་བ་རྒྱུན་གྱི་ཏིང་ངེ་འཛིན་དང་། ཉམས་སུ་བླངས་ནས་འབྱུང་བ་ཤིན་ཏུ་རྣམ་པར་དག་པ་རྡོ་རྗེ་ཆེན་པོ་ཞེས་བྱ་བའི་ཏིང་ངེ་འཛིན་དང་། བདུད་བཞི་འཇོམས་པའི་དགྲ་ཐམས་ཅད་རྣམ་པར་སེལ་བ་ཞེས་བྱ་བའི་ཏིང་ངེ་འཛིན་དང་། འཇིགས་པ་ངན་སོང་ཐམས་ཅད་ལས་ཡོངས་སུ་སྒྲོལ་བ་ཞེས་བྱ་བའི་ཏིང་ངེ་འཛིན་དང་། རྣམ་པར་མི་རྟོག་པའི་ཡེ་ཤེས་ཀྱི་སྙིང་པོ་ཞེས་བྱ་བའི་ཏིང་ངེ་འཛིན་ཏོ། །ཀྱེ་ལག་ན་རྡོ་རྗེ་འཆང་། ཁྱོད་ཀྱིས་འདི་དག་རྣམས་ཀྱི་དོན་དྲིས་པ་དེ་ལེགས་སོ། །འདི་དག་རྣམས་ཀྱི་ཚིག་འདི་ལ་དོན་དུ་སྐྱེལ་ས་བསམ་མི་ཁྱབ་སྟེ། ང་ནི་ལུང་ཀུན་གྱི་བདག་ཉིད་དུ་བྱུང་བའི་ཕྱིར་རོ། །དེ་ནས་འཁོར་དེ་དག་ཀྱང་ཤིན་ཏུ་དགའ་ཞིང་ཡིད་རབ་ཏུ་རངས་ཏེ། བཅོམ་ལྡན་འདས་ལ་བསྟོད་ཅིང་ལག་ན་རྡོ་རྗེ་ལ་རབ་ཏུ་སྙན་པའི་ཚིག་གིས་མཆོད་ཅིང་། སོ་སོའི་དོན་སྐུལ་བའི་ཚིག་འདི་དག་ཀྱང་བརྗོད་དོ། །ཨེ་མ་སྟོན་པ་ཐུགས་རྗེ་མཆོག་གིས་

བཀའ་སྩལ་པའི། །དོན་གྱི་སྙིང་པོ་དེ་དག་སོ་སོའི་སྙིང་ལ་ཞུགས། །ཇི་ལྟར་བརྗོད་པའི་སྒྲ་ཡིས་རང་རང་ཡིད་ཀུན་ཚིམ། །བཅོམ་ལྡན་འཇིག་རྟེན་གསུམ་གྱི་གཙོ་བོ་ཁྱོད། །བདག་ཅག་རྣམས་ཀྱི་ཡིད་རྣམས་ཁྱེད་ཀྱིས་ཅི་བཞིན་མཁྱེན། །འཇིག་རྟེན་མགོན་པོ་མ་རིག་དམག་དཔུང་འཇོམས། །དཔའ་བོ་ཉོན་མོངས་དྲི་མེད་ཉི་མའི་འོད་ལྟ་བུ། །བསྟན་པ་མི་ནུབ་གཏེར་འཛིན་རྡོ་རྗེ་སྙིང་པོའི་གདུང་། །ཡེ་ཤེས་སྟོང་བདག་མེད་ལ་ཕྱག་འཚལ་ལོ། །ཞེས་ཚིག་རྣམས་ཀྱིས་ཀྱང་རབ་ཏུ་བསྟོད་ཅིང་། སོ་སོའི་ཏིང་ངེ་འཛིན་རང་བཞིན་རྣམས་དང་ལྡན་པར་གྱུར་ཏེ། སངས་རྒྱས་ཀྱི་མཐུས་བདེན་པའི་དོན་གྱིས་རང་གི་རྒྱུད་ཚིམ་པར་བྱས་ཏེ། ཀུན་ཀྱང་འོད་ཟེར་གྱི་ཕུང་པོ་སྣ་ཚོགས་དང་ལྡན་ནས། སངས་རྒྱས་རྣམས་ཀྱི་བཀའི་དེ་བཞིན་ཉིད་ཡོངས་སུ་འཛིན་པར་གྱུར་ཏེ། སེམས་རངས་པ་དང་ལྡན་པར་གྱུར་ཏོ། །ཞེས་ངོ་སྤྲོད་རིན་པོ་ཆེ་སྤྲས་པའི་རྒྱུད་ལས། གླེང་གཞི་རང་བསྟོད་ཀྱི་ལེའུ་སྟེ་དང་པོའོ།། །།དེ་ནས་རྡོ་རྗེ་འཆང་ཆེན་པོ་དེ་ཉིད་ཀྱིས་སྐུ་དང་གསུང་དང་ཐུགས་དང་ཡོན་ཏན་དང་ཕྲིན་ལས་ལས་འདི་དག་རྣམ་པར་ཕྱུང་སྟེ། ཆེད་དུ་བརྗོད་པ་འདི་དག་རྣམ་པར་བརྗོད་དོ། །ལག་ན་རྡོ་རྗེ་འཛིན་པ་ཁྱོད་ཉོན་ཅིག །སྐུ་གསུམ་འབྲས་བུ་མངོན་དུ་འདི་ཉིད་ལ་བལྟ་འདོད་པས། །བཅུད་ཀྱི་སྙིང་པོ་དཔེ་ཡི་ཡེ་ཤེས་འདི་དག་ལྟོས། །རིན་ཆེན་སྙིང་པོ་རྒྱ་མཚོ་ལས་བྱུང་བའི་ནོར་བུ་འོད་འབར་རམ། འོད་དམར་པོ་ཤར་བའི་ནོར་བུ་མརྒད་སྔོན་པོ་ཆུ་ཤེལ་ལམ། །ས་ཡི་སྙིང་པོ་རིན་ཆེན་མིག་མ་ཕུག། སའི་འོག་ནས་བྱུང་བའི་མུ་ཏིག་ཕྱག་གང་བ། རྡོ་ཡི་སྙིང་པོ་རིན་ཆེན་རིའམ་རྒྱ་མཚོའི་གཡའ་ལས་བྱུང་བའི་མན་ཤེལ་གྱིས། །སངས་རྒྱས་རྣམས་ཀྱི་གནས་ལུགས་དཔེ་དོན་རྟགས་ཀྱི་གཏན་ལ་འབེབས། །དེ་ཡི་ཕྱིར་ན་འདི་ལྟ་བུ་གཉིས་ནས་གསུམ་ཙམ་བཙལ་ལ་འདི་དག་མཁས་པས་བཙལ། །སྙིང་པོ་ལྟ་བའི་དོན་དུ་འདི་རྣམས་ནན་ཏན་བཅང་བར་བྱ། །སྐྱེས་བུ་རྣམས་ཀྱི་ངོ་སྤྲོད་པའི་དོན་ལ་འཇུག་པའི་

ཐབས། །དཔེ་ཡི་ཡེ་ཤེས་བལྟ་བར་གང་འདོད་པ། །དོན་ནི་ངོ་སྤྲོད་འདི་ལྟར་སྐྱེས་བུས་རིག་པར་གྱིས། །དཔེ་ཡི་མན་ཤེལ་གྱི་འོད་ཀྱིས་ཕྱི་ཡི་དབྱིངས་རྣམས་བསྟན། །དཔེ་ཡི་ཐབས་ཀྱིས་རྟེན་འདྲེལ་དུ་མས་སྐུ་ཡི་ངོ་བོ་བསྟན། །དཔེ་ཡི་ཚད་འོད་དང་སྐུ་དང་ཐིག་ལེ་གསུམ་ཀྱིས་ཡེ་ཤེས་ལམ་ཡང་བསྟན། །དཔེ་ཡི་མཐོང་བས་རང་གི་གནས་ལུགས་བསྟན། །འོད་ཀྱི་ངོ་སྤྲོད་དང་ཐིག་ལེ་ངོ་སྤྲོད་སྐུ་དང་ཡེ་ཤེས་ཀྱི་ངོ་སྤྲོད་དང་། །རིག་པ་ངོ་སྤྲོད་དང་ནི་དབྱིངས་ཀྱི་ངོ་སྤྲོད་ཚད་འཛིན་པ། །རྣལ་འབྱོར་རྣམས་ཀྱིས་དཔེ་ཉི་ཤུ་རྩ་གཅིག་སྟེར་བ་བདུན་འབྲིང་བདུན་ཐ་མ་བདུན་ལ་མཁས་པར་བྱ། །གང་ཟག་རྣམས་ཀྱི་དབང་པོའི་བྱེ་བྲག་གིས། །རང་ངོ་དང་རྣལ་འབྱོར་ཤེས་པ་སྤྲད་པའི་ཕྱིར། །རང་ངོ་མཐོང་བར་འདོད་ན་དཔེ་འདི་དག་ལྟོས། །རྡོ་རྗེ་སེམས་དཔའི་གསལ་བྱེད་ལ། །མན་ཤེལ། དང་པོ་མཆོད་པ་དག་ནི་རབ་མཆོད་ནས། །ཤེལ་དེ་རང་གི་བླ་མའི་སྐུར་བསམ་སྟེ། །དེ་ལ་ཇི་ལྟར་རིགས་པའི་ཚོགས་རྣམས་བསག །དེ་ནས་སྐལ་ལྡན་རྗེས་འཇུག་རྣམས། །རང་གི་ངོ་བོ་བལྟ་བའི་ཕྱིར། །གནས་ཁང་ཕྱོགས་ནི་ཕྱེད་པར་ནི། །བུ་ག་ཉི་མའི་ཟེར་ལྡན་དག་ལ་ཡང་། །ཤར་ནས་གཅིག་གིས་ཤེལ་ཕྱར་བའི་ཤེལ། གསལ་བར་བྱེད་པའི་ཟེར་དེ་ལ་མེ་ལོང་ཕྱར་བ་ཡིས། །འོད་ཀྱི་སྣང་བ་ཕྱིར་ཐལ་མར་འབྱུང་མཐོང་བ་ཡིན། །མིག་གི་སྟེང་དུ་མཁས་པས་དེ་ཤེལ་མིག་ཕབ་པའི་སྟེང་དུ་བཞག་ན། །ནང་འོད་གསལ་བའི་ཆ་ཟང་ཐལ་དུ་ཡང་མཐོང་བའོ། །རྗེས་འཇུག་གཡོན་པའི་ཟུར་གྱིས་གཅིག་བལྟས་ན། །བར་གྱི་འདྲེལ་ཐག་འོད་ཀྱི་ཟེར་གྱི་སྣང་བ་མཐོང་། །ཡང་ནི་མིག་གི་སྟེང་དུ་འོད་ཤེལ་དེ་མེད་པར་སློབ་ན་མིག་ལ་འོད་བཞག་ནས། །ཡང་ནི་གོང་གི་ཤེལ་ལ་གཅིག་གིས་གཅིག་ལ་བལྟས་པ་ན། །སྐུ་གསུམ་གཅིག་ཏུ་འདྲེལ་བའི་ཚུལ་ཡང་མཐོང་། །མར་མེའི་སྙིང་པོ་ལ་ནི་དེ་ཉིད་ཀྱིས་ཤེལ་མིག་ལ་ཕྱར་ནས་བལྟས་ན། །ཡེ་ཤེས་སྣང་གསལ་རང་གི་ངོ་ཡང་མར་མེ་ལ་བལྟས་ན་འཕྲད། །

མཁས་པས་རྡུལ་ཚོན་དཀྱིལ་འཁོར་ཕར་འགྲམ་ཚུར་འགྲམ་དུ་མེ་ལོང་གཉིས། །གསལ་བྱེད་ཤེལ་གྱི་མིག་གིས་ཐབས་མཆོག་ཉིད་ནམ་མཁར་བལྟས་ན། །རིག་པ་མ་བུའི་ཚད་རྣམས་ངོ་འཕྲད་ནས། །ཆོས་ཉིད་མ་ཡི་ཚད་རྣམས་ཤེས་པ་ཡིན། །ཁམས་སའི་གཟུགས་བརྙན་ཁོང་སྟོང་དབང་སྒོ་དོད། །བུ་ག་དགུ་བཏོད་ལ་བཞག་ནས་མིག་ཏུ་སྣང་བ་འོང་བར་བྱ། ནང་དུ་མར་མེ་བཅུག་སྟེ་ཡེ་ཤེས་སྒོ་ངེས་བཟུང་། །འཁར་ཕོར་ཆུས་གཏམས་ལེགས་པའི་ནང་ཉིད་བལྟ། །ཤེལ་གྱིས་བལྟས་ན། ཐིག་ལེ་ཉིད་ཀྱི་རང་ངོ་འཕྲོད་པ་ཡིན། །རས་ཀྱི་སྣམ་བུ་དཀར་དམར་རྣམས་ནམ་དྭངས་པའི་ཚེ་ཐང་ལ་བཀྲམ་ནས། །ཤེལ་གྱི་གསལ་བྱེད་ལྡན་པའི་མིག་གིས་བལྟས་གྱུར་ན། །ཡེ་ཤེས་རྣམས་ཀྱི་འོད་རྣམས་རང་ངོ་འཕྲོད། །ཤར་ཕྱོགས་ན་ཡོད་པའི་རྒྱ་མཚོའམ་ལྟེང་ཀ་རྫིང་ངམ་འཁྱིལ་ཆུའི་འགྲམ། །གསལ་བྱེད་ལྡན་པའི་མིག་གིས་དེ་བལྟས་ན། །ནུབ་ནས་བལྟས་ནས་ནམ་མཁའ་ལ་བསྟན་ནས། འོད་ཀྱི་གང་བུ་ནམ་མཁའ་གང་བ་ཡིས། །བར་དོ་དང་པོའི་སྣང་བ་གཏན་ལ་ཕེབས། །རྨ་བྱ་མེ་ལོང་ཉིད་ཀྱི་འཕྲེང་ལྔའམ་དྲུག་གི་བར་ལ་རྨ་བྱ་ཡང་བརྒྱུས་ལ། །གསལ་བྱེད་ལྡན་པའི་མིག་གིས་བལྟས་ན་ནི། །ཐིག་ལེ་འོད་གསལ་ལྡན་པ་མཐོང་བ་ནི། །ཡེ་ཤེས་དགོངས་པ་ཉིད་ཀྱི་ངོ་ཡང་འཕྲོད། །དབྱུག་པ་ལ་ནི་འཁར་དབུ་ཞབས་ལ་ལ་ཆས་སྦྱར་ལ་བཙོད་ཆུས་བཀང་ལ། འཁར་ཕོར་བརྒྱ་བསྒྲིགས་དེ་མགོ་ལ། ཡང་བྱུང་། ཕོར་བཏགས་བསྒྲིགས་སྟེང་འོག་ལ། །གསལ་བྱེད་ལྡན་པས་དེ་ཉིད་བལྟས་པ་ན། །ཐིག་ལེ་དགུ་བརྩེགས་ཐེག་པའི་དོན་ཡང་བྱུང་ཐིག་ལེའི་དོན་ངོ་སྤྲད། །རིགས་ལྔའི་འདྲ་འབག་ཚོན་བཀྲག་ཆེ་བ་ཐང་ལ་བཞག་ནས་ནི། །ཤེལ་གསལ་བྱེད་ལྡན་པས་གོང་བཞིན་བལྟས་པ་ན། །ནམ་མཁའ་ཉིད་ལ་གཟུགས་ཀྱི་སྐུར་མཐོང་སྟེ། །ལོངས་སྐུའི་ཞིང་ཁམས་རང་ངོ་སྤྲད་པ་ཡིན། །གཟུགས་ཀྱི་སྐུ་ཉིད་ཉམས་ཀྱི་དགོངས་པའོ། །སྐྱེས་བུ་རྒྱན་དང་ལྡན་པ་རང་གི་མདུན་མི་གཅིག་ལ་གོས་གསར་བ་གོན་བཅུག་ཕྲེང་བའི་རྒྱན་བཏགས་ལ་བཞག་སྟེ། །གསལ་བྱེད་ལྡན་པའི་མིག་གིས་

ཡང་བལྟས་ན། །དེ་ཕར་འགྲོ་ཚུར་འགྲོ་ཡང་བྱ་འོད་ཀྱི་སྐུ་ནི་འགྲོ་འོང་ཟེར་དང་ལྡན། །དེ་ཉིད་མཐོང་བས་ལོངས་སྐུ་རང་རྐྱང་སྣང་། །རིག་པ་གཞོན་ནུ་བུམ་པའི་སྐུ་ཞེས་བྱ། །ཡང་ནི་སྣང་བ་མེད་པའི་མུན་པ་ནག་པོའི་སྒོ་མཐོངས་མེད་པ་ཁྱིམ་དག་ཏུ། །སྐྱེས་བུ་གོས་ཁ་དོག་ནག་པ་རུས་པའི་རྒྱན་ལྡན་པ། །བྱང་ནས་རང་གི་མདུན་དུ་གོང་བཞིན་བཞག་ནས་ནི། །གསལ་བྱེད་ལྡན་པའི་མིག་གིས་བལྟས་ན་ནི། །ཁྲོ་སྐུ་འཇིགས་པའི་གཟུགས་བརྙན་ནམ་མཁར་ནི། །འགྲོ་དང་འོང་དང་སྟབས་དང་བཅས་པ་མཐོང་། །ལོངས་སྤྱོད་ཁྲོ་བོའི་སྐུ་ཡི་ངོ་བསྟན་པས། །རིག་པ་ཉིད་ནི་གཞོན་ནུ་ཁྲོ་གཉེར་ཅན། །དཔའ་བོ་ཉིད་ནི་སྟོབས་དང་ལྡན་པར་བསྟན། །ཁང་པ་ཕྱེད་ཕུག་ཏུ་སྐྱེས་བུ་རྒྱན་དང་ལྡན་པ་ལྟེ་བ་མན་ཆད་མི་མངོན་པར་བྱས་ལ་ཕྱེད་སྣང་མཚམས་འདུག་སྟེ། །གསལ་བྱེད་ལྡན་པས་མིག་ཡ་གཅིག་བཙུམས་པས་བལྟས་ལ་གོང་བཞིན་བལྟས་པ་ན། །སེམས་དཔའ་ཉིད་ཀྱི་བཞུགས་ཚུལ་ངོ་འཕྲོད་ནས། །སྐུ་ཕྱེད་བསྟན་པས་འདྲ་འབག་ཉིད་ལ་སྤྲད། །ཤེལ་ལས་བྱས་པའི་ལུགས་སྐུ་ཕྱག་གང་བ། །རྣལ་འབྱོར་ལྡན་པའི་གཡོན་པས་བཟུང་ནས་ནི། །གསལ་བྱེད་ལྡན་པས་ཡང་ནི་དེ་བལྟས་ན། །ཤིན་ཏུ་འོད་དང་ལྡན་པའི་སྐུ་མཐོང་བར། །སྐུ་ཕྱེད་ཉིད་དེས་སེམས་དཔའི་རང་ངོ་སྤྲད། །གསལ་བྱེད་སྣང་བ་མཉམ་སྦྱོར་སྐུ་ཞེས་བྱ། །སྐལ་ལྡན་རང་དང་གཞན་གཉིས་ཀ་རྒྱན་གྱིས་རབ་བརྒྱན་ཏེ། །གསལ་བྱེད་ཤེལ་རེ་རེ་ལྡན་པའི་མིག་གིས་ཕན་ཚུན་བལྟ། །ཡབ་དང་ཡུམ་གྱི་ངོ་བསྟན་ཡེ་ཤེས་བཟུང་། །མཉམ་ཉིད་ཁ་སྦྱོར་དགོངས་པ་ཞེས་བྱའོ། །དེ་དག་གཉིས་ཀྱི་བར་དུ་དེ་མིན་པའི་སྐྱེས་བུ་རྒྱན་དང་ལྡན། །རང་དང་གཞན་དབུས་མ་གསུམ་གཉིས་གཅིག་ལ་བལྟས་པས་སྐུ་གསུམ་རང་ངོ་འཕྲོད། །སྐུ་གསུམ་རང་འཇུག་དགོངས་པ་ཞེས་ནི་བྱ། །ཡང་ནི་སྐྱེས་བུ་རྒྱན་ལྡན་རང་དང་གཞན་གཉིས་ཀྱི་བར། །རྟ་རྔ་དག་ལ་སྒོ་ང་གཉིས་བརྒྱུས་ཏེ། །

གསང་བའི་མཚན་མའི་ཐད་ཀར་བཟུང་ལ་མཁའ་ཡི་ཐད་ཀར་གཉིས་ཀས་རབ་བཟུང་ནས། །གསལ་བྱེད་ལྡན་པའི་མིག་གིས་བལྟས་ནས་ནི། །བར་དུ་ཐིག་ལེ་ཟེར་དང་ལྡན་པ་ཉིད་མཐོང་སྟེ། །ཡབ་ཡུམ་སྦྱོར་བའི་བྱང་ཆུབ་སེམས་ངོས་བཟུང་། །གཉིས་མེད་གསང་སྦྱོར་ཞེས་བྱའི་དགོངས་པའོ། །དབྱུག་པ་ཡང་ནི་ཕྱི་ནང་མཚམས་སུ། མི་དང་མཚམས་སུ་ཡང་བྱུང་། ནམ་མཁར་བསླང་བྱས་ཏེ། །ཡང་ན་ཤར་དུ་ཁ་དོག་མི་མཐུན་དཀར་དམར་དར་གྱི་འཕུར་ལྕེ་འཕྱར། །གསལ་བྱེད་ལྡན་པས་ཡང་ནི་བལྟས་པ་ན། །ཡེ་ཤེས་བསྐྱོད་པའི་ནང་རླུང་རང་ངོ་འཕྲོད། །གནས་པ་རླུང་འཛིན་ཞེས་བྱའི་དགོངས་པའོ། །སྐུ་ནི་ལུགས་མའམ་ཁ་དོག་དཀར་དམར་སེར་ལྗང་མཐིང་། །རས་དེའི་ཁ་དོག་ལ་མཐུན་པའི་སྟེང་དུ་བཞག་ནས་རེ་རེའི་ཁ་དོག་སྣམ་བུ་རྣམས་བལྟས་ན། །རིགས་ལྔ་སོ་སོའི་སྐུ་ཡང་རང་ངོ་འཕྲོད། །རིགས་རྣམས་འབྱེད་པ་ཞེས་བྱའི་ངོ་སྤྲོད་དོ། །ཤིང་ནི་བར་སྣང་ཕྱོགས་བཞི་སྟེང་འོག་ཏུ། །གྱེན་དུ་བཙུག་ལ། མུ་ཏིག་སོགས་པའི་སྒོ་ངའམ་རང་གི་ཕྲེང་བས་སྦྲེལ་བ་ཕྲེང་བས་ཡོངས་བསྐོར་ཏེ། །གསལ་བྱེད་ལྡན་པའི་མིག་གིས་ཕྲེང་བ་ལ་ཡང་བལྟས་ན། །དྲ་བ་དང་ནི་དྲ་བ་ཕྱེད་པ་ཡང་། །ཤིན་ཏུ་གསལ་བའི་འོད་ཀྱིས་རྣམ་སྤྲས་ཏེ། །སྟེང་འོག་ཕྱོགས་མཚམས་རྣམས་ནི་གསལ་བར་མཐོང་། །རིགས་ལྔའི་དྲ་བ་ཉིད་ལ་ངོ་སྤྲད་པས། །གཞལ་ལས་རང་སྟོན་ཞེས་བྱའི་ངོ་སྤྲོད་དོ། །ཡང་ནི་གནས་ཁང་གྲུ་བཞི་ཕྱོགས་ནི་ཕྱེད་པ་རུ། །ཤར་ལ་སོགས་པར་ཕྱོགས་བཞིའི་སྐར་ཁུང་དབུས་ཀྱི་མཐོངས་དང་བཅས། །རང་འདོད་ལྷ་ཡི་ཡི་དམ་གཟུགས་བརྙན་ལེགས་བྲིས་ལ། །ལོགས་ལ་བྲིས་ལ་གྱང་གི་དབུས་སུ་དམར་པོའི་ཆུ། །བཅོད་ཆུས་ཟངས་བཀང་། འོད་དང་ལྡན་པའི་རྫས་རྣམས་བཀྲམ་ནས་ནི། །དེ་ཡི་འོད་རྣམས་རང་འདོད་ལྷ་དེ་དག་གི་འོད་ཐད་ཀ་ལ་ཕོག་པར་བྱས་ལ་དང་སྦྱར། །ཐང་ཀ་དེ་ཉིད་བལྟ་ཞིང་བློ་ལ་གོམས་པར་བྱ། །

དེ་ལྟར་བྱས་ན་རྟག་ཏུ་ལྷ་དང་མཉམ་པར་གནས། །མེ་ཏོག་སྣོད་བཀང་འཁར་ཕོར་འོ་མས་བཀང་དེའི་ནང་དུ་མེ་ཏོག་དཀར་དམར་རང་གི་མདུན་དུ་བཞག །གསལ་བྱེད་ལྡན་པའི་མིག་གིས་ཡང་བལྟས་ན། །ཚོམ་བུ་རྣམས་དང་རང་ངོ་འཕྲད་པ་ཡིན། །དེ་ཡི་ཕྱིར་ན་འདི་ལ་སུ་གོམས་པ། །བར་དོ་ལས་ནི་སྣང་བར་ང་ལོག་གོ། །དེ་སྐད་ཅེས་བཀའ་སྩལ་པས། གསང་བའི་བདག་པོ་ལ་སོགས་པའི་འཁོར་དེ་དག་རབ་ཏུ་དགའ་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཀྱེ་བཅོམ་ལྡན་འདས་ངོ་སྤྲོད་པའི་ཚིག་ཉི་ཤུ་རྩ་གཅིག་དེ་དག་རྣམས་གསུངས་པས། བདག་ཅག་རྣམས་ཡིད་རབ་ཏུ་དད་པར་གྱུར་ཏེ། སེམས་ཀྱི་ནུས་པ་རྙེད་ལགས་སོ། །ཉི་ཤུ་རྩ་གཅིག་དེ་དག་ནི་དབང་པོ་རྒྱ་ཆེ་བ་རྣམས་ཀྱི་དོན་དུ་གསུངས་ན། དབང་པོ་རྒྱ་ཆུང་བ་རྣམས་ཀྱིས་ཇི་ལྟར་སྤྱད་པར་བགྱི། བཅོམ་ལྡན་འདས་ཀྱིས་བདག་ཅག་ལ་གསུང་དུ་གསོལ། ཞེས་ཞུས་སོ། །དེ་ནས་བཅོམ་ལྡན་འདས་ཀྱིས་ལག་ན་རྡོ་རྗེ་ལ་སོགས་པའི་འཁོར་དེ་དག་གི་རྟོག་པ་བསལ་བའི་ཕྱིར། ཡང་འདི་དག་རྣམས་ཐུགས་ཀྱི་དཀྱིལ་འཁོར་ནས་ཕྱུང་ངོ་། །དེ་ནས་རྣལ་འབྱོར་བློ་རབ་ཅན། །དོན་འདི་ཉིད་ལ་རབ་ཏུ་དད་པས་ནི། །འདི་དག་རྣམས་སུ་བསྟན་གྱིས་ཉོན། །དཔེ་ཡིས་དཔེ་རྣམས་ཉི་ཤུ་རྩ་གཅིག་གྲངས་བསྟན་པས། །ཕྱི་ཡི་ཡུལ་རྣམས་སྙིང་པོར་གྲོལ། །འདི་ལྟར་མིག་གི་ཨ་འབྲས་རྟགས་ཕུག། རང་གི་ཚོན་ཐེབ་ཀྱིས་ནི་དེ་བཙིར་ན། །འོད་ནི་དམར་པོ་ཐིག་ལེ་སྟོང་པའི་སྒྲོན་མ་ཚོན་གང་ཆ། །ཐིག་ལེ་ཉིད་ནི་ལུས་གནས་རྟགས། །ངེས་པའི་སྙིང་པོར་གཏན་ལ་དབབ། །མགྲིན་པ་ཡི་ནི་ཕྱི་རོལ་རྩ། །གཉིད་ལོག། རང་གི་མཛུབ་དང་སྲིན་ལག་གིས། །རྩེ་མོས། ནང་དུ་དབུགས་ནི་རྔུབས་ཏེ་དེ་བཙིར་ན། །བར་སྣང་ལ་འོད་ལྔའི་དུམ་བུ་ཉིད་སྣང་བ། །ལུས་ལ་དེ་བཞིན་གནས་པའི་རྟགས། །དེས་ནི་འབྱུང་བ་རང་སར་གྲོལ། །ནང་དུ་དབུགས་

རྔུབ་གློ་དང་སྦྲིད་དྲག་ཏུ་བྱས་ན། །རང་བཞིན་གྱིས་ནི་མེ་སྟག་བཞིན། །རྣམ་པར་འཕྲོ་བའི་འོད་རྣམས་ནི། །ཤེས་རབ་ཀྱི་ནི་རྟགས་སུའོ། །རྩོལ་བས་འབད་བཅས་རྟགས་ནི་དེ་དག་གིས། །འབད་བཅས་གྲོལ་བའི་ངེས་དོན་ཐོབ། །དབྱིངས་སྨིན་མ་ཡི་ནི་ཡར་མཚམས་དང་། །མིག་གཡོན་པ་དག་གི་ཟུར་གྱི་ཆ། །མཐིང་ག་ཁྱབ་ཆེན་མི་འགྱུར་གཉིས་དག་ནི། །དབྱིངས་ཀྱི་རྟགས་ཏེ་གོམས་པའི་གནས། །རིག་པ་ལུ་གུ་རྒྱུད་ནི་འདྲེལ་ཆགས་པས། །སངས་རྒྱས་ཡུལ་ནི་མངོན་སུམ་དུ། །རྣམ་འབྱོར་རྣམས་ཀྱིས་འབད་མེད་ཅི་དགར་རོལ། །རང་བཞིན་རྫོགས་ཆེན་རྣལ་འབྱོར་པས། །གཞན་གྱི་འབད་པ་མ་ཡིན་པར། །འདི་ཉིད་དུ་ནི་མངོན་སུམ་དུ། །ཡུལ་རྣམས་ཀུན་ཀྱང་དབྱིངས་རིག་གོ། །གང་གི་རྣལ་འབྱོར་ཉིད་ལྡན་པས། །འདི་ལ་གནས་ན། འབྱུང་བ་རྣམས་ནི་རང་དེངས་སུ། །རྣལ་འབྱོར་ལྡན་པ་དེ་ཉིད་འགྱུར། །དེ་ལྟར་འབད་པ་མེད་པའི་རྟགས། །རྣལ་འབྱོར་ལུས་ལ་དེ་འཆང་བས། །དོན་གྱི་སྙིང་པོ་གཏན་ལ་ཕེབས། །དོན་ནི་རང་གི་ལུས་དཀྱིལ་ན། །སྙིང་ན་ཡེ་ཤེས་སྙིང་པོ་སྐུ་ཡུངས་འབྲུ་ཙམ་ལ་སྤྱན་ཕུལ་ཐག་ཙམ་གནས། །མ་འཁྲུལ་པ་ཡི་ཡེ་ཤེས་ཏེ། །འཁྲུལ་པ་ཀུན་གྱི་བདག་ཉིད་དོ། །སྣང་བ་ཉིད་ནི་འདི་དག་ལ། །རྩོལ་མེད་ཉིད་ལ་རབ་གོམས་ན། །དོན་དེ་ངོ་སྤྲད་པས་ཆོས་ཉིད་བར་དོ་ལ། །སྔར་འདྲིས་མི་བཞིན་མཐོང་བའི་སྟོབས་ཀྱིས་ཤེས་པར་འགྱུར། །ངོ་སྤྲད་པའི་དེ་ཡི་དོན་རྣམས་དེར་སྣང་ངོ་། །གསང་བའི་བདག་པོས་ཡང་གསོལ་པ། །ཀྱེ་མ་བཅོམ་ལྡན་ཐུགས་རྗེ་ཅན། །རྒྱ་ཆུང་སེམས་ཅན་བློ་གསུམ་རྣམས་ལ། །མཆོག་ཏུ་བསྡུས་པ་དེ་ལྟར་ན། །དེ་དག་རྣམས་ཀྱི་བྱེ་བྲག་རྣམས། །རིམ་པ་ཇི་ལྟར་བདག་ལ་གསུངས། །རྡོ་རྗེ་འཆང་གིས་བཀའ་སྩལ་པ། །གསང་བའི་བདག་པོ་ཡང་ཉོན་ཅིག །སྤྱི་རྣམས་སྤྲོས་པ་ཅན་གྱི་དོན། །རྒྱ་ཆེ་ལས་ནི་རྣམ་བསྡུས་པ། །

ཉི་ཤུ་རྩ་གཅིག་བློ་རིམ་བཞིན། །འོད་དང་ཡེ་ཤེས་ཉིད་ལ་ནི། །ངོ་སྤྲོད་རྣམ་པ་བདུན་དག་གིས། །བློ་ཆུང་རིམ་པ་བདུན་རྣམས་གྲོལ། །སྐུ་དང་ཐིག་ལེ་ཉིད་ལ་ཡང་། །ངོ་སྤྲོད་ཉིད་ནི་རྣམ་བདུན་གྱིས། །འབྲིང་པོ་བདུན་པོའི་དོན་དུའོ། །རིག་པ་དང་ནི་དབྱིངས་ལ་བདུན། །ཆེན་པོ་རྣམས་ཀྱི་དོན་དུའོ། །དེ་ནི་ཕྱི་ལས་ནང་དུ་བསྡུས། །ཡང་བསྡུས་པ་ནི་འདི་དག་གོ། །འོད་ལ་ཕྱི་དང་ནང་གཉིས་ཏེ་ཡེ་ཤེས་ཀྱི་འོད་དང་ངོ་བོ་དང་ལམ་དུའོ། །གསུམ། །སྐུ་ལ་ཆོས་ལོངས་སྤྲུལ་གསུམ་བསྟན་ཐིག་ལེ་རྩའི་དང་མིག་གི་དང་བར་དོའོ། །གསུམ། །རིག་པ་གཉིས་ཏེ་གཞི་འཛིན་པ་དང་མཚན་ཉིད་འཛིན་པ་དབྱིངས་ལ་གཉིས། །དེ་དག་བསྡུས་པའི་དོན་དུའོ། །ཤིན་ཏུ་བསྡུས་པ་འདི་དག་ཉིད། །དཔེ་ཤེལ་ལས་བྱུང་བའི་འོད་དང་རྟགས་མིག་ནས་དང་དོན་སྙིང་ན་གསུམ་གྱིས། །རང་བཞིན་གནས་པའི་འབྲས་བུ་ཐོབ། །གལ་ཏེ་དེ་ལ་མ་མོས་ན་ལྷ་བསྒོམ་པ་ལ་བསླབ་ཕྱག་རྒྱ་ལྷ་ཡི་རྣལ་འབྱོར་འཇུག །མཚན་མ་ཅན་གྱི་དོན་དུའོ། །སྤྲོས་བྲལ་དབྱིངས་རིག་པ་ཉག་གཅིག་དགོངས་པ་ནི། །དེ་དག་རྣམས་ཀྱི་འཛིན་པ་བྲལ། །སྨིན་པས་སྨིན་པ་ལམ་དུ་བྱེད། །མངོན་གསུམ་རྒྱུན་དུ་གནས་པ་ལ། །སྙིང་པོ་རང་གིས་རང་མཐོང་བས། །གཞན་རྩོལ་རྣམས་ཀྱིས་ཅི་ཞིག་བྱ། །འདི་ཉིད་ལ་ནི་གོམས་པར་བྱའོ། །ཞེས་ངོ་སྤྲོད་རིན་པོ་ཆེ་སྤྲས་པའི་རྒྱུད་ལས། གསང་བ་ནང་གི་ངོ་སྤྲོད་བསྟན་པའི་ལེའུ་སྟེ་གཉིས་པའོ།། །།དེ་ནས་ཕྱིའི་དཔེ་རྣམ་པར་སྤྲོས་པ་ཞེས་བྱ་བའི་ཏིང་ངེ་འཛིན་ལས་བཞེངས་ནས་གསང་བའི་བདག་པོ་ལ་སོགས་པ་རྣམས་ལ་བོས་ནས་འདི་སྐད་ཅེས་གསུངས་སོ། །ཀྱེ་ལག་ན་རྡོ་རྗེ་འཛིན་པ་འདི་དག་རྣམས་ཁྱོད་ཀྱིས་ཟུང་ཞིག །ཕྱི་ཡུལ་གྱི་སེམས་སྦྱང་བ་དང་གཞིལ་བ་དང་བཏུལ་བ་ལ་སོགས་པའི་གནད་ཀྱིས་ནང་སེམས་གཏན་ལ་དབབ་པར་བྱ། དེ་ལྟར་སེམས་སྤྲོས་པ་ཆོད་ནས་ནང་སེམས་ཀྱི་གནད་ཀྱིས་གསང་བ་དབྱིངས་གཏན་ལ་དབབ་པར་བྱའོ། །གསང་བ་དབྱིངས་ཀྱི་གནད་ཀྱིས་གསང་བ་བླ་ན་མེད་པའི་རིག་པ་ཉིད་མངོན་སུམ་དུ་གཏན་ལ་དབབ་པར་བྱའོ། །དེའི་ཕྱིར་ན་སངས་རྒྱས་ཀུན་གྱི་ཚད་འཛིན་པ། །ཤེལ་དཔེའི་

ཡེ་ཤེས་རྣམས་ལ་བརྟག །རྟགས་ཀྱི་ཡེ་ཤེས་ཚད་འཛིན་པ། །མིག་ནས་ཐིག་ལེ་སྟོང་པའི་སྒྲོན་མ་བརྟག །དོན་གྱི་ཡེ་ཤེས་ཚད་འཛིན་པ། །མངོན་སུམ་རྡོ་རྗེ་ལུ་གུ་རྒྱུད་གསལ་བའི་སྣང་བས་བརྟག །སྒྲ་ཚིག་མིང་གི་ཚད་འཛིན་པ། །ཕྱི་ཡི་ཡུལ་དང་སྣང་བ་འབྱུང་བ་ཡང་བརྟག །མི་རྟོག་བསམ་གཏན་ཚད་འཛིན་པ། །ལག་གི་འདུ་བྱེད་མདུང་ཁྱིམ་དང་སྒོ་ང་ལ་སོགས་པ་ཉིད་ལ་བརྟག །སྒྲ་དོན་ཤེས་པའི་ཚད་འཛིན་པ། །འབྱུང་བའི་ཆོ་འཕྲུལ་ཉིད་སྣ་ཚོགས་པ་ལ་བརྟག །ཨཱ་ལི་ཀཱ་ལིའི་ཚད་འཛིན་པ། །གནས་དང་འབྱུང་བ་ཉིད་ལ་བརྟག །འཁྲུལ་པ་རྣམས་ཀྱི་ཚད་འཛིན་པ། །རྨི་ལམ་བྱ་བྱེད་ཉིད་ལ་བརྟག །བག་ཆགས་འཐུག་པོའི་ཚད་འཛིན་པ། །གང་ཞེན་ཡུལ་གྱི་རྐྱེན་ལ་བརྟག །མ་འཁྲུལ་ཡེ་ཤེས་ཚད་འཛིན་པ། །སྤྲིན་དང་བྲལ་བའི་ནམ་མཁར་བརྟག །ཡེ་ཤེས་འོད་ཀྱི་ཚད་འཛིན་པ། །མན་ཤེལ་སྙིང་པོ་དོད་ཉིད་ལ་བརྟག །ཐིག་ལེ་རྣམས་ཀྱི་ཚད་འཛིན་པ། །དྲ་བ་མིག་ཚགས་ལུ་གུ་རྒྱུད་ཀྱི་བར་ལ་བརྟག །རྣལ་འབྱོར་གོམས་པའི་ཚད་འཛིན་པ། །རིག་པ་ཚད་ལ་ཕེབས་ཐིག་ལེ་ལས་སྐུ་ལ་བརྟག །སྤྲོས་མེད་རང་དག་ཚད་འཛིན་པ། །བསྒྲུབ་རྒྱུ་རྣམས་དང་བྲལ་བར་ཟད་པ་བརྟག །བདེ་བ་རང་གནས་ཚད་འཛིན་པ། །ཡུབ་ཡུམ་གྱི་སྙོམས་འཇུག་མཁའ་མཉམ་དག་ཏུ་བརྟག །ཕྱག་རྒྱ་ཆེན་པོའི་ཚད་འཛིན་པ། །སྣང་སྲིད་ཕྱག་རྒྱའི་ཞིང་ལ་བརྟག །རིག་པ་རྩལ་དབང་ཚད་འཛིན་པ། །གཞི་སྤྱོད་ལུས་ངག་སེམས་ཀྱི་བརྡའ་ལ་བརྟག །སྲོག་ཤིང་དམ་ཚིག་ཚད་འཛིན་པ། །གདེངས་ལྡན་མི་འདའ་རྒྱུན་དུ་ཡེ་བསྲུངས་རང་བཞིན་མེད་པ་ཉིད་ལ་བརྟག །ཐ་སྙད་གྲུབ་མཐའི་ཚད་འཛིན་པ། །ཐིག་ལེ་ཉག་གཅིག་སྤྲོས་དང་བྲལ་ལ་བརྟག །ཐིག་ལེ་ཕྱི་ནང་ཐེག་པ་སྤྱིར་དང་ཡང་བྱུང་ཚད་འཛིན་པ། །རིག་པ་མཁའ་ལྡིང་དབྱིངས་རིག་འདྲེས་པ་ཉིད་ལ་བརྟག །དྲན་པ་རྣམས་ཀྱི་ཚད་འཛིན་པ། །སྒོ་ལྔའི་ཤེས་པ་ཡུལ་འཛིན་པ་ཉིད་ལ་བརྟག །གསལ་བ་རྣམས་ཀྱི་ཚད་འཛིན་པ། །ཡུལ་རྐྱེན་གཟུགས་ལ་ཞེ་སྡང་སོགས་བྲལ་བའི་མཚམས་སུ་བརྟག །རྟག་པ་ཉིད་ཀྱི་ཚད་འཛིན་པ། །མ་རྟོགས་པའི་དྲན་པ་སངས་

པའི་གནས་སུ་བརྟག །འཛིན་པ་ཀུན་གྱི་ཚད་འཛིན་པ། །འདོད་པའི་ཡོན་ཏན་གཟུགས་སྒྲ་ལ་སོགས་པ་ལྔ་ལ་བརྟག །མ་རིག་རྩ་བའི་ཚད་འཛིན་པ། །ཡོད་མེད་རྟག་ཆད་གཉིས་ཀྱི་མཚམས་སུ་བརྟག །ཉོན་མོངས་རྣམས་ཀྱི་ཚད་འཛིན་པ། །གློ་བུར་དགྲའི་ཡུལ་ངན་པ་རྐྱེན་གྱི་དུས་སུ་བརྟག །འགྱུ་བྱེད་ཡིད་ཀྱི་ཚད་འཛིན་པ། །གང་བསམ་པར་ཤེས་པས་ཕྱིན་པའི་ཚན་ཡུལ་གྱི་སྣང་བ་བརྟག །བདག་འཛིན་བློ་ཡི་ཚད་འཛིན་པ། །འགྱུ་བྱེད་འགྱུ་བའི་བློ་ཡང་ཡང་འབྱུང་བའི་མཚམས་སུ་བརྟག །ཤེས་རབ་ཆེན་པོའི་ཚད་འཛིན་པ། །ཡུལ་རྐྱེན་ཆོད་པའི་སྒོ་ལྔ་རང་ཡིན་པའི་བར་དུ་བརྟག །རྟོག་མེད་རང་ས་ཚད་འཛིན་པ། །ཕྲ་རགས་བྲལ་བའི་འབྱུང་བའི་རླུང་ཟད་པ་མཚམས་སུ་བརྟག །དྭངས་མ་ལྔ་ཡི་ཚད་འཛིན་པ། །འབྱུང་བ་མི་སྣང་འོད་དུ་དག་པའི་དུས་ན་བརྟག །ཡེ་ཤེས་རྣམས་ཀྱི་ཚད་འཛིན་པ། །རང་གདངས་ཡུལ་འོད་དུ་ཡུལ་སྣང་ཚེ་ན་བརྟག །ཆོས་ཀྱི་སྐུ་ཡི་ཚད་འཛིན་པ། །གནོད་པ་བྲལ་བའི་དུས་སུ་བརྟག །ལོངས་སྐུ་ཉིད་ཀྱི་ཚད་འཛིན་པ། །རིག་པ་མ་བུ་འཕྲད་པའི་ཚེ་ན་བརྟག །སྤྲུལ་པ་སྐུ་ཡི་ཚད་འཛིན་པ། །ཕྱེད་ཕྱེད་ཉིད་ཀྱི་གཉིས་ཀྱི། ཡང་བྱུང་། རང་བཞིན་གྱི་ཞིང་ཁམས་མཚམས་སུ་བརྟག །བླ་མའི་མན་ངག་ཚད་འཛིན་པ། །ཕུང་པོ་མེད་པར་འབྱུང་བ་དེངས་པའི་དུས་སུ་བརྟག །སྙིང་པོ་རྣམས་ཀྱི་ཚད་འཛིན་པ། །ཐིག་ལེ་འདུས་པའི་དུས་སུ་བརྟག །ལུས་རྟགས་དྲོད་ཀྱི་ཚད་འཛིན་པ། །རྟག་ཏུ་རེས་འཇོག་བྲལ་བའི་དུས་ན་བརྟག །གསུང་གི་སྒྲ་ཡི་ཚད་འཛིན་པ། །སྲིད་པ་གཞིར་བཞེངས་སྔར་མི་ཤེས་པའི་ཆོས་རྣམས་ཤེས་པ་དུས་སུ་བརྟག། རིག་པ་རང་གནས་མི་འགྱུར་སྐུ་ཡི་ཚད། །འབྱུང་བ་ཟད་མི་ལུས་མི་སྣང་པའི་དུས་ན་བརྟག །ཡེ་ཤེས་ཐུགས་ཀྱི་ཚད་འཛིན་པ། །སྣང་བ་བློ་ལ་སྐྱེ་མི་སྲིད་གཞིར་བཞག་དུས་སུ་བརྟག །དགོངས་པ་རྣམས་ཀྱི་ཚད་འཛིན་པ། །རིག་པ་གོང་ནས་གོང་དུ་སྲང་ལ་ཐེབ་པར་བརྟག །ཏིང་ངེ་འཛིན་གྱི་ཚད་འཛིན་པ། །ཟས་གོས་དང་བདག་མེད་པ་འདུ་ཤེས་གསུམ་དང་བྲལ་བར་བརྟག །ཆོས་ཉིད་མི་གཡོའི་ཚད་འཛིན་པ། །གང་ཡང་མི་བྱེད་མཉམ་པ་ཉིད་ཀྱི་དུས་ན་བརྟག །ལྷག་མཐོང་ཉིད་ཀྱི་ཚད་འཛིན་པ། །བླ་མའི་གདམས་ངག་འཁོར་འདས་རུ་ཤན་ལ་སོགས་པ་ཉིད་ལ་

བརྟག །འབད་མེད་རང་གྲོལ་ཚད་མི་སྐྱེ་བ་འཛིན་པ། །ཁྲེགས་ཆོད་ཐོད་རྒལ་རང་རྒྱས་བཏབ་པ་མཚམས་སུ་བརྟག །ལུས་གནས་ཡེ་ཤེས་ཚད་འཛིན་པ། །འདུག་སྟངས་སྣང་བ་མི་འདྲ་བ་སེང་གེ་དང་དྲང་སྲོང་ལ་སོགས་པ་རྣམས་ཀྱི་དུས་ན་བརྟག །ཡིད་ཆེས་གོམས་པའི་ཚད་འཛིན་པ། །ཉམས་མྱོང་གོམས་པའི་དུས་ན་བརྟག །སྐུ་གསུམ་འབྲས་བུའི་ཚད་འཛིན་པ། །ཆོས་རྣམས་ཅི་ཡང་མ་ཡིན་པར་ཤེས་ཟད་པའི་དུས་ན་བརྟག །ཐུགས་རྗེས་དོན་བྱེད་ཚད་འཛིན་པ། །ཡེ་ཤེས་མཁྱེན་པའི་རྣམ་པ་ཐམས་ཅད་མཁྱེན་པའི་ཆ་ཙམ་དུ་ཡོད་དུས་ན་བརྟག །ཁ་དོག་དབྱིབས་ཟད་ཚད་འཛིན་པ། །རང་ལུས་ལ་འབྱུང་བའི་གནོད་བྲལ་དུས་ན་བརྟག །འབྱུང་བ་རྣམས་ཀྱི་ཚད་འཛིན་པ། །འོད་དང་འབྱུང་བ་ཕྱི་ནང་གཉིས་ཀྱི་མཚམས་སུ་བརྟག །དེ་ལྟར་ཚད་རྣམས་བརྟགས་པ་ཡིས། །དོན་གྱི་ཡིད་ཆེས་ངོ་སྤྲོད་པའོ། །ཞེས་གསུངས་པས་གསང་བའི་བདག་པོ་ལ་སོགས་པའི་འཁོར་དེ་དག་རབ་ཏུ་དང་བ་སྐྱེས་ཏེ། བློའི་དྲི་མ་ཐམས་ཅད་ཀྱང་རང་བཞིན་གྱིས་དག་ནས། དེ་དག་གི་ཚད་རྣམས་དུས་གཅིག་ལ་ཟིན་པར་གྱུར་ཏེ། མགྲིན་གཅིག་ཏུ་ཐལ་མོ་སྦྱར་ཏེ། བཅོམ་ལྡན་འདས་ཀྱི་མདུན་དུ་འདུག་སྟེ། འདི་སྐད་ཅེས་གསོལ་ཏོ། །ཀྱེ་ བཅོམ་ལྡན་འདས་ཆོས་ཐམས་ཅད་ཀྱི་ཚད་བཀའ་སྩལ་པ། བདག་ཅག་རྣམས་ཀྱིས ་ཀྱང་དེ་རྣམས་ཀྱི་ཚད་འདི་ལྟར་གཏན་ལ་ཕེབས་པ་ལགས་ན། །མ་འོངས་པའི་སེམས་ཅན་རྣམས་ཀྱིས་ཀྱང་།དེ་བཞིན་དུ་འགྱུར་བ་ལགས་པས། བདག་ཅག་དང་མ་འོངས་པའི་སེམས་ཅན་རྣམས་ཀྱི་སྤྲོས་པའི་གདུང་བ་གང་གིས་ཆོད་པ་ལགས། ཐུགས་རྗེ་ཆེན་པོས་བདག་ཅག་རྣམས་ལ་བཀའ་སྩོལ་ཅིག །ཅེས་ཞུས་སོ། །དེ་ནས་རྡོ་རྗེ་འཆང་ཆེན་པོ་དེས། འདི་སྐད་ཅེས་བཀའ་སྩལ་ཏོ། །ཀྱེ་གསང་བའི་བདག་པོ་ཁྱོད་ཉོན་ཅིག །མ་འོངས་པའི་སེམས་ཅན་རྣམས་ཀྱི་སྤྲོས་པ་འདི་དག་རྣམས་ཀྱིས་ཆོད་པར་འགྱུར་རོ། །ཕྱི་སྣང་བ་ཐམས་ཅད་ལ་ངོ་སྤྲད་པས། ནང་དུ་ལྟ་བ་ཡིད་ལ་གསལ་བར་སྐྱེ་བ་ཡིན་ནོ། །དེ་ཡང་སྣང་བ་ཐམས་ཅད་སེམས་སུ་ངོ་སྤྲད་པས། སེམས་ཉིད་སྣ་ཚོགས་སུ་གོ་བའོ། །དེའི་ཚེ་ཆོས་ཐམས་ཅད་ཀྱི་འདུ་བྱེད་ལ་

མཁས་པ་ཞེས་བྱ་སྟེ། མིག་དང་། མིག་གི་རྣམ་པར་ཤེས་པ་དང་། རྣ་བ་དང་། རྣ་བའི་རྣམ་པར་ཤེས་པ་དང་། སྣ་དང་། སྣའི་རྣམ་པར་ཤེས་པ་དང་། ལྕེ་དང་། ལྕེའི་རྣམ་པར་ཤེས་པ་དང་། ལུས་དང་། ལུས་ཀྱི་རྣམ་པར་ཤེས་པ་རྣམས་ཀྱི་དེ་བཞིན་ཉིད་ཤེས་པས་ལུས་ཡོངས་སུ་མྱ་ངན་ལས་འདས་ཏེ། གཟུགས་ཀྱི་ཕུང་པོ་རྣམ་པར་དག །ནམ་མཁའ་ཡོངས་སུ་མྱ་ངན་ལས་འདས་ཏེ། འདུ་ཤེས་ཀྱི་ཕུང་པོ་རྣམ་པར་དག །ས་ཡོངས་སུ་མྱ་ངན་ལས་འདས་ཏེ། ཚོར་བའི་ཕུང་པོ་རྣམ་པར་དག །མེ་ཡོངས་སུ་མྱ་ངན་ལས་འདས་ཏེ། རྣམ་ཤེས་ཀྱི་ཕུང་པོ་རྣམ་པར་དག །རླུང་ཡོངས་སུ་མྱ་ངན་ལས་འདས་ཏེ། འདུ་བྱེད་ཀྱི་ཕུང་པོ་རྣམ་པར་དག་པས། སྣང་བ་ཐམས་ཅད་རྟེན་གཞལ་ཡས་ཁང་དུ་ངོ་སྤྲད་པས། སངས་རྒྱས་ཐམས་ཅད་ཀྱི་གནས་ལ་ལོངས་སྤྱོད་པ་ཞེས་བྱ་བ་ཡིན་ནོ། །ཀྱེ་རྡོ་རྗེ་སེམས་དཔའ་སེམས་ཉིད་སྐུའི་རང་བཞིན་དུ་ངོ་སྤྲད་པས། སྐུ་ཉིད་གསལ་བ་ཐམས་ཅད་ཀྱི་བདག་ཉིད་དམ་པར་གོ་བས། སངས་རྒྱས་རྣམས་དང་གདན་གཅིག་ལ་གནས་པ་ཡིན་ཏེ། གཟུགས་སྐུ་ཐམས་ཅད་ཀྱི་བདག་ཉིད་དུ་རང་བྱུང་། སྒྲ་སྐུ་ཐམས་ཅད་ཀྱི་བདག་ཉིད་དུ་རང་བྱུང་། དྲི་སྐུ་ཐམས་ཅད་ཀྱི་བདག་ཉིད་དུ་རང་བྱུང་། རོ་སྐུ་ཐམས་ཅད་ཀྱི་བདག་ཉིད་དུ་རང་བྱུང་། རེག་སྐུ་ཐམས་ཅད་ཀྱི་བདག་ཉིད་དུ་རང་བྱུང་སྟེ་སྣང་བ་ཐམས་ཅད་སྐུར་ངོ་སྤྲད་པས། བརྟེན་པ་ལྷའི་སྐུ་ངོ་སྤྲད་པས། སངས་རྒྱས་ཐམས་ཅད་ཀྱི་བདག་ཉིད་གཅིག་ཏུ་གྱུར་པ་ཞེས་བྱའོ། །ཀྱེ་གསང་བའི་བདག་པོ་ཉོན་ཅིག །རྡོ་རྗེ་སྐུ་ཡི་རང་བཞིན་པས། །མི་འགྱུར་མི་ཤིགས་ངང་དུ་གནས། །པདྨ་གསུང་གི་རང་བཞིན་པས། །མ་འགགས་འགག་མེད་སྙིང་པོར་གནས། །འཁོར་ལོ་ཐུགས་ཀྱི་རང་བཞིན་པས། །མི་རྟོག་བསམ་གཏན་ཆེན་པོར་གནས། །སྐུ་གསུམ་མི་འབྱེད་དཀྱིལ་འཁོར་ནས། །སངས་རྒྱས་རྣམས་ཀྱི་ཐབས་ཤར་བས། །ཞེན་པ་བློ་ཡི་ཐག་པ་བཅད། །འགྲོ་བ་དྲུག་གི་གཡང་ས་ཟླུམ། །སྣང་བ་བདེ་བའི་ཞིང་དུ་ཤར། །ཞེས་པ་རྣམས་ངམས་པའི་ཚིག་ཏུ་བསྒྲགས་ནས་གསང་བའི་བདག་པོ་ལ་འདི་སྐད་ཅེས་བཀའ་སྩལ་ཏོ། །ཀྱེ་གསང་བའི་བདག་པོ། སྣང་བ་ཉིད་སྟོང་པར་ངོ་སྤྲད་པས།

སྣང་བ་ཕུང་པོ་རྣམས་དང་གཉིས་སུ་མི་འབྱེད་པར་གྱུར་ནས་ཆོས་ཀྱི་དབྱིངས་ཀྱི་དབང་དུ་གྱུར་ཏེ། ཡུལ་ཐམས་ཅད་གཅེར་གྲོལ་དུ་ངོ་སྤྲད་པའོ། །སྟོང་པས་སྟོང་པའི་ཚད་ཟིན་ཏེ།གྲུབ་པའི་མཐའི་ཞེན་པ་ཐམས་ཅད་དུས་གཅིག་ལ་ཆོད་ནས་སྟོང་པ་ཉིད་སྐུའི་ཀློང་དུ་ཀུན་ཆུབ་པར་གྱུར་ནས། འཁོར་འདས་གཉིས་སུ་མེད་པའི་གདེང་རྙེད་པའོ། །ཀྱེ་གསང་བའི་བདག་པོ་ཉོན་ཅིག །ཆུའི་སྣང་བ་མེད་པས་ཀུན་ཁྱབ་ཆེན་པོའི་སྣང་བ་རྙེད། སའི་སྣང་བ་རང་བྱུང་བས། ཁྱབ་བརྡལ་ཆེན་པོའི་སྟོང་པ་རྙེད། །མེའི་སྣང་བ་ཡེ་རྫོགས་པས། །རང་གསལ་ཆེན་པོའི་སྟོང་པ་རྙེད། །རླུང་གི་སྣང་བ་རང་སངས་པས། །བསྐྱོད་པ་ཆེན་པོའི་སྟོང་པ་རྙེད། །ནམ་མཁའི་སྣང་བ་ཡེ་དྭངས་པས། །དག་པ་ཡུལ་གྱི་སྟོང་པ་རྙེད། །ཅེས་ངམས་པའི་ཚིག་ཏུ་བརྗོད་ནས། ཡང་གསང་བའི་བདག་པོ་ལ་འདི་སྐད་ཅེས་བཀའ་སྩལ་ཏོ། །ཀྱེ་གསང་པའི་བདག་པོ་རྡོ་རྗེ་འཛིན། སྟོང་པ་ཉིད་གསལ་བར་ངོ་སྤྲད་པས་སྟོང་པ་ཉིད་བལྟ་བ་རྣམས་དང་མི་ཕྱེད་པར་གྱུར་ནས། ཡུལ་ནས་འཛིན་པ་ཐམས་ཅད་རང་སར་དག་སྟེ། མི་གནས་པའི་ཀློང་མཁའ་མཉམ་དག་པའི་གནས་སུ། རྡོ་རྗེ་སྙིང་རང་གི་སྣང་བ་པོ་དང་དུ་ལེན་པ་ཟད་པ་གསལ་བའི་ཡུལ་ཞེས་བྱ་བའི་དོན་སྐྱེས་ཏེ། ཆོས་ཐམས་ཅད་ཀྱི་འབྲས་བུ་ལ་དབང་ཐོབ་ནས་རང་བཞིན་རྫོགས་པ་ཆེན་པོའི་དོན་ལ་གནས་པའོ། །ཀྱེ་མ་གསང་བའི་བདག་པོ་ཉོན་ཅིག། གཞི་ཡེ་ནས་མེད་པའི་སྟོང་པ་ཡིས། །ཉམས་བླངས་ཙམ་འབྱུང་བ་རང་ཟད་འོད་སྣང་རྙེད། །བྱ་བྱེད་རྩོལ་མེད་བྲལ་བའི་སྟོང་པ་ཡིས། །སྐུ་གསུམ་མཚོན་པའི་འོད་སྣང་རྙེད། །འབྱུང་བ་ཟད་པའི་སྟོང་པ་ཡིས། །རྣལ་འབྱོར་བརྟན་པའི་འོད་སྣང་རྙེད། །ཏིང་འཛིན་རྒྱུན་དུ་གནས་པའི་སྟོང་པ་ཡིས། །རང་གསལ་བཞག་པའི་འོད་སྣང་རྙེད། །རྟག་ཆད་མཐའ་ལ་མི་གནས་སྟོང་པ་ཡིས། །རང་རིག་སྒྲིབ་བྲལ་འོད་སྣང་རྙེད། །ཅེས་ངམས་པའི་ཚིག་ཏུ་བརྗོད་ནས། ཡང་གསང་བའི་བདག་པོ་ལ་འདི་སྐད་ཅེས་བཀའ་སྩལ་ཏོ། །ཀྱེ་གསང་བའི་བདག་པོ། གསལ་བ་རིག་པར་ངོ་སྤྲད་པས། གསལ་བ་ཉིད་མཐའ་ཐམས་ཅད་རྣམ་པར་འབྱེད་པའི་རང་སྣང་དུ་ཤར་ནས། དྲི་མ་ཐམས་ཅད་ལས་འདས་པའི་དཀར་པོ་རང་བྱུང་། ཡོན་ཏན་ཐམས་ཅད་རྫོགས་པའི་སེར་པོ་རང་བྱུང་། མ་བཙལ་བཞག་པའི་དམར་པོ་རང་བྱུང་། བྱ་བཙལ་རྫོགས་པའི་ལྗང་གུ་རང་བྱུང་། མི་འགྱུར་ཁྱབ་པའི་མཐིང་གར་རང་བྱུང་བའོ། །གསང་བའི་

བདག་པོ་རྡོ་རྗེ་འཛིན་པ་ཆེ། །སྐུ་ཡི་གསལ་ཆས་རིག་པ་དྲི་མེད་མཐོང་། །ཐིག་ལེའི་གསལ་ཆས་རིག་པ་ཉག་གཅིག་མཐོང་། །ཡེ་ཤེས་གསལ་ཆས་རིག་པ་ཡེ་དྭངས་མཐོང་། །དབྱིངས་ཀྱི་གསལ་ཆས་རིག་པའི་རང་ཡུལ་མཐོང་། །སྒྲོན་མའི་གསལ་ཆས་རིག་པའི་རང་ངོ་མཐོང་། །འོད་ལྔའི་གསལ་ཆས་རིག་པའི་ཁ་དོག་མཐོང་། །སྣང་བའི་གསལ་ཆས་རིག་པའི་རང་བཞིན་མཐོང་། །ཤེས་རབ་གསལ་ཆས་རིག་པའི་འདུག་ཚུལ་ཤེས། །ཞེས་བརྗོད་ནས་ཡང་གསང་བའི་བདག་པོ་ལ་འདི་སྐད་ཅེས་བཀའ་སྩལ་ཏོ། །ཀྱེ་གསང་བའི་བདག་པོ་ཁྱོད། ཡིད་གཞན་དུ་མ་ཡེངས་པར་ཉོན་ཅིག །རིག་པ་དང་དབྱིངས་ངོ་སྤྲད་པས་རིག་པ་ཉིད་ཡུལ་ཐམས་ཅད་ཀྱི་བདག་ཉིད་དུ་བྱུང་སྟེ། དེ་ཉིད་གནས་ཀུན་ལ་ལོངས་སྤྱོད་པ་ཞེས་བྱ་བར་རྡོ་རྗེ་སྙིང་པོའི་ཚིག་ཏུ་ངས་བསྟན་ཏོ། །དེའི་ཕྱིར་ན། སྔོན་དུ་རིག་པ་སྣང་བའི་ཡུལ་ལ་མཁས་པས། དྲན་པ་ཐམས་ཅད་ཀྱི་སྒོ་བཀག་པ་ཞེས་བྱ་སྟེ། དེ་ཉིད་ཀྱིས་དེ་ཉིད་གྲོལ་བའི་མན་ངག་གཞི་རྣམ་པར་དག་པས་ལམ་མངོན་དུ་ཤར་བ་སྟེ། སངས་རྒྱས་ཐམས་ཅད་ཀྱི་མཛད་པའི་དོན་ལ་མཁས་པ་ཞེས་བྱ་བར་རང་བྱུང་བ་ཡིན་པས། བདག་ཉིད་ལུང་ཐམས་ཅད་ཀྱི་ལུང་དུ་རིག་པ་ཉིད་བྱུང་བའོ། །ཀྱེ་གསང་བའི་བདག་པོ་ཉོན་ཅིག །གཞི་ལ་གནས་པའི་རིག་པ་ཡིས། །ཆོས་ཉིད་འདུས་པའི་དབྱིངས་དང་འཕྲད། །མཚན་ཉིད་འཛིན་པའི་རིག་པ་ཡིས། །རྣམ་པར་དག་པའི་དབྱིངས་དང་འཕྲད། །ལུ་གུ་རྒྱུད་ཀྱི་རིག་པ་ཡིས། །རང་བཞིན་འོད་ཀྱི་དབྱིངས་དང་འཕྲད། །ཅེས་ངམ་པའི་ཚིག་རང་བྱུང་ངོ་། །དེ་ནས་ཡང་ལག་ན་རྡོ་རྗེས་འདི་སྐད་ཅེས་གསོལ་ཏོ། །ཀྱེ་བཅོམ་ལྡན་འདས་དེ་རྣམས་ཀྱི་དོན་བསྡུས་ནས་གང་ཟག་གཅིག་ལ་སྟོན་ན་ཅི་ལྟར་བགྱི། སྟོན་པ་ཉིད་ཀྱིས་བདག་ལ་གསུངས། དེ་ནས་རྡོ་རྗེ་འཆང་ཆེན་པོ་དེས། འདི་དག་ཚིག་ཏུ་བརྗོད་དོ། །ཨེ་མ་ཧོ། སྣང་བ་ཐམས་ཅད་སེམས་སུ་ངོ་སྤྲད་པས་སེམས་ལ་བྱན་ཚུད། སེམས་སྟོང་པར་ངོ་སྤྲད་པས་སྟོང་པར་བདེ་བའི་རྒྱས་གདབ། སྟོང་པ་རིག་པར་ངོ་སྤྲད་པས་རིག་པ་ཉིད་དབྱིངས་དང་ཡེ་ཤེས་གཉིས་སུ་མེད་པའོ། །དེའི་ཕྱིར་ན། འཁྲུལ་པ་རྣམས་སྤྲུལ་སྐུ་ལ་ངོ་སྤྲད་པས་སྣང་བ་འདི་གཏན་ལ་ཕེབས། ལོངས་ཚོམ་བུ་སྤྱོད་རྫོགས་པའི་སྐུ་ལ་ངོ་སྤྲད་པས་

བར་དོའི་སྣང་བ་གཏན་ལ་ཕེབས། ཆོས་ཀྱི་སྐུ་ལ་ངོ་སྤྲད་པས་ཆོས་ཉིད་ཀ་ནས་དག་པའི་སྣང་བ་གཏན་ལ་ཕེབས་པའོ། །དེ་ལྟར་ན་སྤྲུལ་སྐུ་དང་ངོ་སྤྲད་པས་ལུས་ངག་གི་ཞེན་པ་བྱ་བ་བྲལ་བར་བྱ་བའི་སྤྱོད་པ་ལུས་ཀྱི་གནད་གཅུན་པས་སྔོན་དུ་འགྲོ་བའི་ལས་ལ་མཁས་པར་བྱས། དེ་ལྟར་ན་ལོངས་སྐུ་དང་ངོ་སྤྲད་པས་ཡུལ་ནམ་མཁའ་དང་སྒོ་མིག་དང་ངོ་བོ་རིག་པ་གསུམ་ལ་མཁས་པར་བྱས་ནས་ཉམས་མྱོང་རྒྱུད་ལ་བརྟེན། ཆོས་སྐུ་དང་ངོ་སྤྲད་པས་རིག་པ་ཉིད་ཚད་ལ་ཕབ་སྟེ། ལུ་གུ་རྒྱུད་མངོན་སུམ་དུ་སྣང་བར་བྱས་པའོ། །ཨེ་མ་ཧོ། ནམ་མཁའ་རིག་པ་དག་ལ་སུས་འཛིན་པ། །འདིས་ནི་རང་གི་དང་པོའི་གནས་ལུགས་འགྲོ་ས་ཤེས། །ཙཀྵུ་ཉིད་ལ་མིག་གི་དེ་བཞིན་ཉིད་གང་སྤྱོད་པ། །འདིས་ནི་ཞིང་ཁམས་གཏན་ལ་ཕེབས། །རིག་པ་ཉིད་ལ་རྡོ་རྗེ་ལུ་གུ་རྒྱུད་ལ་སུ་གོམས་པ། །འདིས་ནི་རང་འབྱུང་ཕུང་པོ་ལྷག་མེད་དུ་རང་སར་དེངས། །དེ་ཡི་ཚད་ལ་གང་གནས་པ། །ཆོས་ཉིད་ཀུན་ཀྱང་ཟད་པའི་སའོ། །ཞེས་ངོ་སྤྲོད་རིན་པོ་ཆེ་སྤྲས་པ་གསལ་བའི་རྒྱུད་ཆེན་པོ་ལས། ཕྱི་ཡུལ་ལ་སྤྲད་ པ་བསྟན་པའི་ལེའུ་སྟེ་གསུམ་པའོ།། །།བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ ་པས། གསང་བའི་བདག་པོ་ལ་སོགས་པའི་འཁོར་དེ་དག་དགའ་མགུ་ཡི་རངས་ནས། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།། །།གསང་བ་ངོ་སྤྲོད་རིན་པོ་ཆེ་སྤྲས་པའི་རྒྱུད་ཅེས་བྱ་བ། རང་བཞིན་རྫོགས་པ་ཆེན་པོ་རྒྱུད་འབུམ་ཕྲག་དྲུག་ཅུ་རྩ་བཞིའི་བཅུད་དུ་ཕྱུང་བ་རྫོགས་སོ། །རྒྱ་གར་གྱི་མཁན་པོ་བི་མ་ལ་དང་། བོད་ཀྱི་ལོཙྪ་བ་སྐ་བ་དཔལ་བརྩེགས་ཀྱིས་བསྒྱུར་བའོ།། །།དཔལ་སྔགས་ཀྱི་སྲུང་མས་སྲུངས་ཤིག །ངོ་སྤྲོད་སྤྲས་པའི་རྒྱུད་ལ་འགྲེལ་པ་རིན་པོ་ཆེ་བསྟར་བརྒྱུས་བྱ་བ་ཡོད། ངོ་སྤྲོད་སྤྲས་པའི་རྒྱུད་ལ་མ་བུ་བཅོ་ལྔ།