ཆོས་ཐམས་ཅད་རྫོགས་པ་ཆེན་པོ་བྱང་ཆུབ་ཀྱི་སེམས་སུ་འདུས་པའི་མདོ།
རྒྱ་གར་སྐད་དུ། སརྦ་དྷརྨ་མ་ཧཱ་སནྟི་བོ་དྷི་ཙིཏྟ་ས་མུ་དཱ་ཡ་སཱུ་ཏྲ། བོད་སྐད་དུ། ཆོས་ཐམས་ཅད་རྫོགས་པ་ཆེན་པོ་བྱང་ཆུབ་ཀྱི་སེམས་སུ་འདུས་པའི་མདོ། བཅོམ་ལྡན་འདས་དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །སྔ་ཕྱི་མེད་པར་འདི་སྐད་བཤད་པའི་དུས་གཅིག་ན། བཅོམ་ལྡན་འདས་དེ་བཞིན་གཤེགས་པ། ཆོས་ཐམས་ཅད་ཀྱི་སྙིང་པོ་རྡོ་རྗེ་རྫོགས་པའི་བདག་ཉིད་ཆེན་པོ་དེ། འོག་མིན་ཆོས་ཉིད་ཀྱི་མཁའ་དབྱིངས་ཉིད་ཀྱི་ཀློང་། ཆོས་ཉིད་ཀྱི་གནས། རང་བྱུང་མ་བསྒྲིབས་པའི་གཞལ་ཡས་ཁང་ན། དུས་གསུམ་གཅིག་པའི་སངས་རྒྱས་དང་། མི་སྐྱེ་ལམ་ལ་བལྟ་བའི་རྣལ་འབྱོར་པ་རྣམས་དང་། ས་ལ་གནས་པའི་བྱང་ཆུབ་སེམས་དཔའ་རྣམས་དང་། ངེས་པ་མ་ཐོབ་པ་རྣམས་དང་། སྙིང་པོས་
བསྡུས་པའི་སྲིད་པ་གསུམ་ཡན་ཆད། འབྱེད་པ་མི་མངའ་བའི་ཐུགས་རྗེའི་དབང་གིས་ཐབས་ཅིག་གོ། །དེ་ནས་བཅོམ་ལྡན་འདས་དཔལ་ཀུན་ཏུ་བཟང་པོ་དེ་ལ་འཁོར་རྣམས་ཀྱིས་ཡོངས་སུ་འདུན་ཏོ། །དེ་ནས་བཅོམ་ལྡན་འདས་དཔལ་ཀུན་ཏུ་བཟང་པོ་དེས། འཁོར་རྣམས་ཡོངས་སུ་འདུན་པ་དེ་གཟིགས་ནས།ཡོངས་སུ་ཀུན་ཏུ་སྣང་བ་ཞེས་བྱ་བའི་ཆོས་ཉིད་ལ་གནས་པར་མཛད་དོ། །མཛད་ནས་འཁོར་རྣམས་ཡོངས་སུ་རྟོག་པ་སྐྱེས་ཏེ། ཡོངས་སུ་སེམས་འགྲོགས་སོ། །ཡོངས་སུ་སེམས་འགྲོགས་པར་གཟིགས་ནས། དེ་ནས་བཅོམ་ལྡན་འདས་དཔལ་ཀུན་ཏུ་བཟང་པོ་དེས། འཁོར་རྣམས་ལ་ཉིད་ཀྱི་རང་བཞིན་འདི་བསྟན་ཏོ། །ཨེ་མ་ཧོ་བྱང་ཆུབ་སེམས་འདི་ཀུན་ཏུ་བཟང་། །རྒྱུ་རྐྱེན་མེད་པའི་རང་བྱུང་སེམས། །ཐམས་ཅད་འབྱུང་བའི་སྙིང་པོ་དེས། །དགའ་མགུ་རངས་པ་ཀུན་འདོད་ན། །འདུན་པ་མ་སྐྱེས་སེམས་འགྲོགས་ནས། །ང་ཡི་
རང་བཞིན་མ་མཐོང་སྟེ། །ང་ནི་ཀུན་གྱི་རང་བཞིན་ཏེ། །ཆོས་ཀུན་སྙིང་པོ་མཐོང་བ་མེད། །ཅེས་གསུངས་སོ། །དེ་ནས་འཁོར་དེ་རྣམས་ཀྱང་སེམས་ཀྱི་བསམ་པ་སོ་སོར་མཐོང་སྟེ། ལ་ལ་ནི་ཉིད་ཀྱི་རང་བཞིན་དུ་གྱུར་ཏོ། །ལ་ལ་ནི་ཡེ་ཤེས་སྐྱེས་སོ། །ལ་ལ་ནི་དགའ་བས་འདུན་ཏོ། །ལ་ལ་ནི་སྨོན་པས་འདུན་ཏོ། །ལ་ལ་ནི་མ་དད་པའི་སེམས་བྱུང་ངོ་། །ལ་ལ་ནི་དགའ་བར་གྱུར་ན་ཡང་འགྱེད་པ་མི་མངའ་བའི་ཐུགས་རྗེས་ཐབས་ཅིག་གོ། །དེ་ནས་སེམས་དཔའ་རྡོ་རྗེ་ཉིད་ཀྱི་རང་བཞིན་དེས། ཀུན་ཏུ་བཟང་པོ་ལ་འདི་སྐད་ཅེས་གསོལ་ཏོ། །ཨེ་མ་རྡོ་རྗེ་སྙིང་པོ་ཁྱོད། །བྱང་ཆུབ་སེམས་ནི་ཀུན་ཏུ་བཟང་། །ཡིན་པར་བདག་ཅག་ཡོངས་མ་རྟོགས། །རྒྱུ་རྐྱེན་མེད་པར་འབྱུང་མི་སེམས། །ཞེས་ཞུས་སོ། །དེ་ནས་ཀུན་ཏུ་བཟང་པོ་དེ་ཉིད་ཀྱིས་མི་དམིགས་པའི་དོན་ལ་བཞུགས་ནས། ཐུགས་རྗེ་ཡེ་ཤེས་འོད་ཟེར་སྤྲུལ་པ་སྤྲོས་པས། དུས་གསུམ་གྱི་དེ་བཞིན་གཤེགས་པ་ཐམས་ཅད་མཉེས་ནས་སེམས་དཔའ་རྡོ་རྗེ་ལ་དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་འོད་ཟེར་བསྡུས་ཏེ་བསྐུལ་བ་མཛད་དོ། །དོན་གྱི་ཚིག་གིས་ཀྱང་འདི་སྐད་བསྐུལ་ཏེ། །རྡོ་རྗེ་སྙིང་པོའི་སེམས་དཔའ་ཁྱོད། །ཀུན་གྱི་རང་བཞིན་ཁྱོད་ཡིན་པས། །སེམས་ཉིད་ཀུན་ཏུ་བཟང་པོ་འདི། །ཁྱོད་ཀྱིས་ཀུན་ལ་བསྟན་དུ་གསོལ། །ཞེས་བསྐུལ་ཏོ། །དེ་ནས་སེམས་དཔའ་རྡོ་རྗེ་དེས། བདེ་བར་གཤེགས་པ་ཀུན་གྱིས་བསྐུལ་བར་རིག་ནས་མི་རྟོག་པའི་ཏིང་ངེ་འཛིན་གྱི་སྒོ་ནས། འོད་ཟེར་ཕྱོགས་བཅུར་བཀྱེ་ནས་སླར་བསྡུས་ཏེ། ཉིད་ཀྱི་སེམས་ཀྱི་སྐུ་བཞེངས་ནས་ཀུན་ལ་སྣང་བར་མཛད་དོ། །ཀུན་གྱི་རང་བཞིན་དུ་ཡང་བཞུགས་སོ། །རང་བཞིན་དེ་ཀུན་ལ་སྣང་ངོ་། །སེམས་ཀྱི་རང་བཞིན་ཡང་སྣང་བར་མཛད་དོ། །དེ་ནས་
འདུས་པའི་ཚོགས་ཀྱིས། སེམས་དཔའི་རང་བཞིན་ཀུན་ཏུ་རྡོ་རྗེ་ལ་ཞུས་པ། ཨེ་མ་ཧོ་རྡོ་རྗེ་སྙིང་པོ་ཁྱོད། །བྱང་ཆུབ་སེམས་ནི་ཀུན་བཟང་ན། །ཉོན་མོངས་ལྔ་ཡི་སྡུག་བསྔལ་གང་། །ཁམས་གསུམ་གནས་ཀྱི་སྡུག་བསྔལ་གང་། །རྒྱུད་དྲུག་འཁོར་བའི་སྡུག་བསྔལ་གང་། །མཐོ་རིས་ངན་སོང་སྡུག་བསྔལ་གང་། །ཞེས་ཞུས་སོ། །དེ་ནས་སེམས་དཔའི་རང་བཞིན་ཀུན་ཏུ་རྡོ་རྗེས་འདུས་པའི་ཚོགས་ལ། ཆོས་ཐམས་ཅད་རྩ་བ་གཅིག་པ་ལས་བྱུང་བའི་དོན་བསྡུས་པ་འདི་གསུངས་སོ། །ཆོས་ཀུན་རྩ་བ་སེམས་སུ་གཅིག །རྩ་བ་གཅིག་ལ་དོན་གཉིས་ནི། །བདེ་དང་སྡུག་བསྔལ་ཐེག་པ་གཉིས། །ཕུན་སུམ་ཚོགས་པ་གསུམ་ཚོགས་པས། །ཡོ་ག་བཞི་ཡིས་བྱེ་བྲག་འབྱེད། །ཁྱད་པར་འཕགས་པའི་ཆེ་ལྔ་སྟོན། །གོལ་སྒྲིབ་དྲུག་དྲུག་སྐྱོན་ཡོན་སེལ། །གཏན་ལ་རྣམ་པ་བདུན་གྱིས་འབེབས། །ངེས་པའི་མན་ངག་བརྒྱད་དུ་སྟོན། །བདེན་པའི་ཚིག་དགུ་མཐུན་སྨྲས་ནས། །ཡོངས་སུ་རྫོགས་པའི་མདོ་བཅུ་ནི། །གཅིག་གི་རང་བཞིན་སྟོན་པར་བྱེད། །གཅིག་དང་གཉིས་དང་གསུམ་དང་བཞི། །ལྔ་དང་དྲུག་དང་བདུན་དང་བརྒྱད། །དགུ་དང་བཅུ་ཡི་བར་གྱིས་ནི། །གཅིག་དོན་ཡོངས་སུ་རྫོགས་པར་བསྟན། །ཞེས་གསུངས་སོ། །བྱང་ཆུབ་སེམས་ཀྱི་འགྲེལ་པ་རྫོགས་པ་ཆེན་པོའི་མདོ་བཅུ་ལས། གླེང་གཞིའི་ལེའུ་སྟེ་དང་པོའོ།། །།དེ་ནས་འདུས་པའི་ཚོགས་ཐམས་ཅད་སེམས་དཔའ་རྡོ་རྗེའི་འཁོར་དུ་འཁོད་དེ། དད་པའི་སེམས་ཀྱི་འདུན་པས། སེམས་དཔའ་རྡོ་རྗེས་རྩ་བ་གཅིག་པའི་དོན་གསུངས་ཤིག་པར་རིག་ནས་བཀའ་སྩལ་པ། ཀྱེ་འདུས་པའི་ཚོགས་ཆེན་ད་ཉོན་ཅིག །བྱང་ཆུབ་སེམས་ཀྱི་མདོ་འདི་ལ། །གཅིག་ནི་ཀུན་གྱི་རང་བཞིན་ཏེ། །ཆོས་
ཀྱི་དབྱིངས་སམ་བྱང་ཆུབ་སེམས། །ཡིན་པས་རྩ་བའི་དོན་དུ་བཞག །གཅིག་པའི་དོན་ནི་འདི་ལྟ་སྟེ། །སངས་རྒྱས་སྐུ་དང་ཡེ་ཤེས་དང་། །སེམས་ཅན་ལུས་དང་བག་ཆགས་དང་། །སྣང་དང་སྲིད་པའི་ཆོས་རྣམས་ཀུན། །བྱང་ཆུབ་སེམས་དང་དབྱིངས་སུ་འདུས། །རྒྱུ་རུ་གཅིག་ལ་འབྲས་བུར་གཅིག །དཔེ་རུ་གཅིག་ལ་དོན་དུ་གཅིག །རྩ་བ་བྱང་ཆུབ་སེམས་སུ་གཅིག །རྟགས་དང་གཏན་ཚིགས་མཐུན་པར་གཅིག །སྤྲོས་པ་མེད་པའི་དོན་དུ་བསྟན། །རྒྱུ་གཅིག་བྱང་ཆུབ་སེམས་འདི་ནི། །དུས་གསུམ་སངས་རྒྱས་ཐམས་ཅད་ཀྱི། །མཚན་མར་མི་གནས་ཆོས་སྐུར་གཅིག །གསུང་སྟེ་འགག་པ་མེད་པར་གཅིག །མ་བསྒྲིབས་ཡེ་ཤེས་ཐུགས་སུ་གཅིག །སྤྲོས་པ་མེད་པའི་དོན་དུ་གཅིག །སེམས་དང་ལུས་དང་བག་ཆགས་དང་། །རྒྱུ་གཅིག་བྱང་ཆུབ་སེམས་ལས་བྱུང་། །རྒྱུ་དང་རྒྱུ་ཡི་རྣམ་པ་གཉིས། །རྒྱུ་ནི་འབྱུང་ཆེན་རྣམ་པ་ལྔ། །འབྱུང་ལྔ་རྒྱུ་ཉིད་བྱང་ཆུབ་སེམས། །འགྲོ་བའི་སྡུག་བསྔལ་བྱང་ཆུབ་སེམས། །སེམས་ལས་ངང་རྒྱུད་གྲུབ་བྱེད་པ། །བརྐམ་ཆགས་ལྔ་ལས་འབྱུང་ལྔ་གྲུབ། །འབྱུང་བ་ལྔ་ལས་རང་བྱུང་སྐྱེས། །སྣང་བའི་ཆོས་དང་སྲིད་པའི་ཆོས། །མི་རྟོག་པ་ཡི་རྒྱུ་རྐྱེན་གྱིས། །བསྐྱེད་ནས་ཇི་ལྟར་འབྱུང་ན་ཡང་། །དོན་དམ་སྐྱེ་བ་མེད་པས་ན། །སྤྲོས་པ་མེད་པའི་དོན་དུ་བསྟན། །འབྲས་བུ་གཅིག་པའི་དོན་འདི་ཡང་། །རྒྱུ་གཅིག་པ་ཡི་ཚུལ་བཞིན་དུ། །ཆོས་རྣམས་ཀུན་གྱི་འབྲས་བུར་གཅིག །དེ་ཡང་ཅི་ལྟ་བུ་ཞེ་ན། །དཔེར་ན་ཕྱི་ནང་ཆོས་རྣམས་ཀུན། །གང་རྒྱུ་དེ་ལ་གྲུབ་པ་ནི། །རྒྱུ་འབྲས་གཅིག་པའི་དོན་ཡིན་ཏེ། །འགྲོ་བའི་སེམས་ཀྱི་ཕྱིན་ཅི་ལོག །བརྐམ་ཆགས་ལྔ་ཡི་སྡུག་བསྔལ་རྒྱུས། །འབྲས་བུ་ཟད་མེད་རྒྱུད་ལྔར་འཁོར། །དེ་ལ་འབྲས་བུར་མིང་མི་གདགས། །སྡུག་བསྔལ་
ཀུན་འབྱུང་འགོག་པའི་ལམ། །སྤང་དང་འགེག་དང་སོལ་བ་དང་། །ལམ་ལ་མངོན་དུ་བྱེད་པ་ཡང་། །ཉོན་མོངས་ལྔ་བཅོམ་འབྲས་བུ་དེ། །མི་སྐྱེ་མི་འགག་འབྲས་བུ་མིན། །བདེན་པ་གཉིས་ཀྱི་རྟོག་དཔྱོད་ཀྱིས། །མི་རྟག་སྡུག་བསྔལ་སྟོང་བདག་མེད། །མདོ་ཆེན་བཞི་ཡི་དོན་རྟོགས་ཏེ། །ཆོས་ཉིད་སྟོང་པའི་འབྲས་བུ་དེ། །རྒྱུ་འབྲས་འདས་པའི་འབྲས་བུ་མིན། །ཕྱི་ཡི་ཏན་ཏྲ་སྡེ་གསུམ་ཡང་། །བྱང་ཆུབ་ཡན་ལག་ཀུན་བསྒོམས་ནས། །རྡོ་རྗེ་འཛིན་དང་སྟུག་པོ་བཀོད། །ཐོབ་པ་རྡོ་རྗེའི་འབྲས་བུ་སྟེ། །བླང་དོར་མེད་པའི་འབྲས་བུ་མིན། །ནང་བ་བསྐྱེད་དང་རྫོགས་པ་ནི། །རྣམ་པ་གསུམ་གྱི་དོན་སྦྱར་ན། །རང་རྒྱུད་དག་པའི་དཀྱིལ་འཁོར་ལ། །བསྙེན་བསྒྲུབ་བཞི་ཡི་ཆོ་གས་ནི། །བདག་ཉིད་ལྷུན་གྱིས་གྲུབ་བྱེད་པའང་། །རྩོལ་བསྒྲུབ་འདས་པའི་འབྲས་བུ་མིན། །མ་སྐྱེས་པ་ཡི་ཆོས་ཉིད་ནི། །མི་སྐྱེ་མི་འགག་འབྲས་བུ་ཡིན། །འབྱུང་བ་ལྔ་ལ་རག་མ་ལས། །སྐུ་གསུང་ཐུགས་ལ་མ་བརྟེན་པས། །རྒྱུ་འབྲས་འདས་པ་འབྲས་བུ་ཡིན། །མ་བསྒྲིབས་རང་བྱུང་ཡེ་ཤེས་ཀྱིས། །གང་ཡང་སྤང་བ་མེད་པར་སྤྱོད། །གཟུང་འཛིན་རྣམ་རྟོག་མི་མངའ་བས། །བླང་དོར་མེད་པའི་འབྲས་བུ་ཡིན། །སེམས་ཉིད་རང་བྱུང་ཡེ་ཤེས་ལ། །ཡེ་ནས་བཙལ་ཞིང་བསྒྲུབ་མེད་པས། །རྩོལ་བསྒྲུབ་གཉིས་ཀྱི་སྤྲོས་དང་བྲལ། །ལྷུན་གྱིས་གྲུབ་པའི་འབྲས་བུ་ཡིན། །སྒྲོ་སྐུར་འདས་པའི་བྱང་ཆུབ་སེམས། །སྤྲོས་པ་མེད་པའི་དོན་གྱིས་ནི། །ཀུན་གྱི་སྙིང་པོ་སངས་རྒྱས་སྐུ། །མ་བསྒྲིབས་ཡེ་ཤེས་ཆོས་ཀྱི་དབྱིངས། །མི་འགག་དབྱིངས་ཀྱི་བྱང་ཆུབ་སེམས། །མི་སྐྱེ་མི་འགག་ཡེ་ཤེས་ཐུགས། །རྒྱུ་དང་འབྲས་བུ་གཉིས་མ་མཆིས། །རྩ་བ་གཅིག་གི་བྱང་ཆུབ་སེམས། །ཐམས་ཅད་ཀུན་གྱི་རྒྱུ་རུ་སྣང་། །རྒྱུ་ཉིད་རང་བྱུང་སྐྱེ་མེད་པས། །མིང་ཙམ་མཚོན་
པའི་འབྲས་བུར་གཅིག །འབྲས་བུ་ཞེས་ནི་བཏགས་པ་མེད། །བཏགས་པ་དེ་ནི་མཚོན་པ་སྟེ། །མཚོན་པའི་དོན་གྱིས་གདགས་མེད་མཚོན། །དེ་ཡང་མཚོན་པར་བྱ་བའི་དོན། །མཚོན་དུ་མེད་པའི་དོན་དེ་ཡང་། །མ་མཚོན་གོ་བར་མི་འགྱུར་ཏེ། །མཚོན་དུ་མེད་པའི་དོན་ཚིག་གིས། །མཚོན་ཏེ་མཚོན་མེད་གོ་བར་བྱ། །ཐམས་ཅད་ཆོས་ནི་སྐྱེ་བ་མེད། །མ་སྐྱེས་པ་ཡི་ཆོས་ཉིད་ནི། །སྐྱེ་འགག་མེད་པའི་བྱང་ཆུབ་སེམས། །བྱང་ཆུབ་སེམས་ལ་སྐྱེ་མེད་པར། །མ་མཚོན་སྐྱེ་མེད་དེ་མི་མཐོང་། །སྐྱེ་བ་མེད་པའི་དོན་ཚིག་གིས། །སྐྱེ་མེད་དེ་མཚོན་མཐོང་བར་བྱ། །ཐམས་ཅད་ཆོས་ནི་སྒྲོ་སྐུར་བྲལ། །སྒྲོ་སྐུར་བྲལ་བའི་བྱང་ཆུབ་སེམས། །བརྗོད་དུ་མེད་པའི་བྱང་ཆུབ་སེམས། །བྱང་ཆུབ་སེམས་ལ་བརྗོད་མེད་པར། །མ་བརྗོད་རིག་པར་མི་འགྱུར་ཏེ། །བརྗོད་དུ་མེད་པའི་དོན་ཚིག་གིས། །བརྗོད་དང་བརྗོད་མེད་རིག་པར་བྱ། །ཐམས་ཅད་ཆོས་ལ་སྐྱེ་འགག་མེད། །སྐྱེ་འགག་མེད་པའི་ཆོས་ཉིད་ལ། །མཚོན་དུ་ཡོད་པར་མ་གསུངས་ཏེ། །མཚོན་དུ་མེད་པས་སྒྲོ་སྐུར་བྲལ། །སྒྲོ་སྐུར་བྲལ་བའི་བྱང་ཆུབ་སེམས། །བྱང་ཆུབ་སེམས་ལ་མཚོན་དུ་མེད། །བརྗོད་དུ་མེད་པའི་ཆོས་ཉིད་ལ། །སུས་ཀྱང་བརྗོད་པར་མི་ནུས་སོ། །ཞེས་གསུངས་སོ། །རྫོགས་པ་ཆེན་པོ་བྱང་ཆུབ་ཀྱི་སེམས་ཀྱི་མདོ་ལས། རྒྱུ་འབྲས་གཅིག་པའི་ལེའུ་སྟེ་གཉིས་པའོ།། །།དེ་ནས་ཡང་འདུས་པའི་ཚོགས་དེ་དག་ཐམས་ཅད། སེམས་དཔའ་རྡོ་རྗེའི་འཁོར་དུ་དད་པའི་སེམས་ཀྱིས་འཁོད་དེ་འདུན་པས། སེམས་དཔའ་རྡོ་རྗེས་རྩ་བ་གཅིག་པའི་དཔེ་དང་དོན་ལ་འདུན་པར་རིག་ནས་ཡང་གསུངས་པ། ཀྱེ་སེམས་དཔའི་ཚོགས་ཆེན་ད་ཉོན་ཅིག །རྩ་བ་གཅིག་གི་དོན་འདི་ལ། །དཔེ་ཡང་གཅིག་ལ་དོན་ཡང་གཅིག །དངོས་མེད་འདྲ་བ་དཔེ་རུ་བསྟན། །ཆོས་ཀུན་དཔེ་
ནི་ནམ་མཁའ་འདྲ། །ནམ་མཁའ་དག་ལས་ཐམས་ཅད་འབྱུང་། །ཆོས་ཀུན་སྙིང་པོ་བྱང་ཆུབ་སེམས། །ཐམས་ཅད་འབྱུང་བས་ནམ་མཁའ་འདྲ། །རྒྱུ་མེད་པ་ཡི་བྱང་ཆུབ་སེམས། །མ་སྐྱེས་པས་ན་ནམ་མཁའ་འདྲ། །རྐྱེན་མེད་པ་ཡི་བྱང་ཆུབ་སེམས། །མི་འཇིག་པས་ན་ནམ་མཁའ་འདྲ། །གཉེན་པོ་མེད་པའི་བྱང་ཆུབ་སེམས། །ཐམས་ཅད་འཇོམས་པས་ནམ་མཁའ་འདྲ། །མཚོན་དུ་མེད་པའི་བྱང་ཆུབ་སེམས། །བསྟན་དུ་མེད་པས་ནམ་མཁའ་འདྲ། །མ་བསྒྲིབས་པ་ཡི་བྱང་ཆུབ་སེམས། །ཀུན་ཏུ་གསལ་བས་ནམ་མཁའ་འདྲ། །ཐམས་ཅད་བསྐྱེད་པའི་བྱང་ཆུབ་སེམས། །སྣང་སྲིད་བསྐྱེད་པས་ནམ་མཁའ་འདྲ། །རང་བྱུང་ཟབ་མོའི་དོན་གཞིག་ན། །དོན་དམ་མ་སྐྱེས་ནམ་མཁའ་འདྲ། །སྣང་དང་སྲིད་དང་ཡོད་པ་དང་། །བཏགས་ཤིང་ཆགས་པའི་ཆོས་རྣམས་ཀུན། །དོན་དམ་རང་བཞིན་མ་སྐྱེས་པས། །སྐྱེ་མེད་དཔེ་ནི་ནམ་མཁའ་འདྲ། །ནམ་མཁའ་ལྟ་བུའི་ཆོས་ཀུན་བརྟགས། །དཔེ་དེ་འདྲ་བའི་དོན་ཆོས་ནི། །ཡིན་པ་དག་ལ་དོན་ཞེས་གདགས། །དོན་ནི་སྐྱེ་བ་མེད་པ་ཡིན། །སྐྱེ་བ་མེད་པའི་རང་བཞིན་ནི། །རྒྱུ་མེད་པ་ལས་སྐྱེ་མེད་པས། །སེམས་ལ་རྒྱུ་མེད་སྐྱེ་བ་མེད། །སྲིད་པའི་ཆོས་ལ་རྒྱུས་བསྐྱེད་ཀྱང་། །ཆོས་ཉིད་དབྱིངས་ལ་རྒྱུ་མེད་པས། །སྐྱེ་བ་མེད་པའི་དོན་ཡིན་ནོ། །ཐམས་ཅད་ཆོས་ནི་སྐྱེ་བ་མེད། །སྐྱེ་མེད་བྱང་ཆུབ་མངོན་སངས་རྒྱས། །སྣང་བའི་ཆོས་དང་སྲིད་པའི་ཆོས། །དེ་ཡང་སྣང་བའི་འབྱུང་ཆེན་ལྔ། །ནམ་མཁའ་སྣང་བྱེད་ཁྱབ་པ་དེ། །སེམས་ཉིད་མ་བསྒྲིབས་ཀུན་ལ་ཁྱབ། །དེ་བས་ནམ་མཁའ་བྱང་ཆུབ་སེམས། །སྣང་བྱེད་ཁྱབ་པས་མངོན་སངས་རྒྱས། །འདེགས་པར་བྱེད་པའི་འབྱུང་བ་རླུང་། །བྱང་ཆུབ་སེམས་ཀྱི་ཡེ་ཤེས་རླུང་། །ཡེ་ཤེས་རླུང་གིས་ཀུན་འདེགས་པས། །བྱང་ཆུབ་སེམས་སུ་མངོན་སངས་རྒྱས། །ཐམས་ཅད་སྡུད་པའི་འབྱུང་བ་ཆུ། །ཡེ་ཤེས་ཐུགས་
རྗེའི་རླན་གྱིས་སྡུད། །དེ་བས་བྱང་ཆུབ་སེམས་ཀྱི་ཆུ། །བྱང་ཆུབ་སེམས་སུ་མངོན་སངས་རྒྱས། །མངོན་སུམ་སྣང་བ་སྲ་བྱེད་པ། །ཐམས་ཅད་འདེགས་པའི་བྱང་ཆུབ་སེམས། །དེ་བས་སེམས་ཀྱི་ས་དེ་ལ། །བྱང་ཆུབ་སེམས་སུ་མངོན་སངས་རྒྱས། །ཐམས་ཅད་དྲོད་སྙོམས་ཚ་བའི་མེ། །པདྨ་རྣམ་དག་ཡེ་ཤེས་ཏེ། །དེ་བས་སེམས་ཉིད་རྣམ་དག་པས། །བྱང་ཆུབ་སེམས་སུ་མངོན་སངས་རྒྱས། །འབྱུང་ཆེན་ལྔ་ཡི་སངས་རྒྱས་ལྔ། །བྱང་ཆུབ་སེམས་སུ་མངོན་སངས་རྒྱས། །སྲིད་གསུམ་ལམ་ལྔའི་ཆོས་ལྔ་ཡང་། །བྱང་ཆུབ་སེམས་སུ་མངོན་སངས་རྒྱས། །དེ་ཡང་ཇི་ལྟ་བུ་ཞེ་ན། །བརྐམ་ཆགས་ལྔ་ཡི་རྣམ་སྨིན་གྱིས། །ལམ་སྒོ་ལྔ་རུ་ཞུགས་ཕྱིན་ན། །མི་བདེ་སྡུག་བསྔལ་ལྔ་ལ་སྦྱང་། །ཞེ་སྡང་ལམ་གྱི་སྒོར་ཞུགས་པས། །དམྱལ་བའི་གནས་སུ་ཚ་གྲང་སྤྱོད། །སྔ་ཕྱི་མེད་པའི་ཆོས་སྤྱོད་ཀྱང་། །སྔ་མའི་ལས་ཀྱི་རྣམ་སྨིན་གྱིས། །ཚ་དང་གྲང་བའི་ཉམས་མྱོང་སྟེ། །སྙིང་པོ་བྱང་ཆུབ་སེམས་དེ་ལ། །ཚ་གྲང་ཉམས་དེས་བསྐྱོད་པ་མེད། །དེ་བས་ཞེ་སྡང་མི་གནས་སྟོང་། །བྱང་ཆུབ་སེམས་སུ་མངོན་སངས་རྒྱས། །འདོད་ཆགས་ལམ་གྱི་སྒོར་ཞུགས་པས། །ཡི་དྭགས་གནས་ན་བཀྲེས་སྐོམ་སྤྱོད། །བསྔོས་པས་ཚིམ་པའི་ཆོས་ཡོད་ཀྱང་། །སྔ་མའི་ལས་ཀྱི་རྣམ་སྨིན་གྱིས། །བཀྲེས་དང་སྐོམ་པའི་ཉམས་མྱོང་སྟེ། །སྙིང་པོ་བྱང་ཆུབ་སེམས་དེ་ལ། །བཀྲེས་དང་སྐོམ་པས་བསྐྱོད་པ་མེད། །དེ་བས་འདོད་ཆགས་མི་གནས་སྟོང་། །བྱང་ཆུབ་སེམས་སུ་མངོན་སངས་རྒྱས། །གཏི་མུག་ལམ་གྱི་སྒོར་ཞུགས་པས། །བྱོལ་སོང་གནས་ན་གླེན་ལྐུགས་སྤྱོད། །རིག་པ་ཕྲ་མོའི་ཆོས་སྤྱོད་དེ། །སྔ་མའི་ལས་ཀྱི་རྣམ་སྨིན་གྱིས། །བླུན་ཞིང་ལྐུགས་པའི་ཉམས་མྱོང་སྟེ། །སྙིང་པོ་བྱང་ཆུབ་སེམས་དེ་ལ། །བླུན་ལྐུགས་ཉམས་དེས་བསྐྱོད་པ་མེད། །དེ་བས་གཏི་མུག་མི་གནས་སྟོང་། །བྱང་ཆུབ་སེམས་སུ་
མངོན་སངས་རྒྱས། །ཕྲག་དོག་ལམ་གྱི་སྒོར་ཞུགས་པས། །མི་ཡི་གནས་སུ་དགེ་སྡིག་སྤྱོད། །དགེ་སྡིག་ལས་ཀྱི་ཆོས་སྤྱོད་ཀྱང་། །མི་དགེ་ཤས་ཆུང་རྣམ་སྨིན་གྱིས། །མི་རྟག་འགྱུར་བའི་ཉམས་མྱོང་སྟེ། །སྙིང་པོ་བྱང་ཆུབ་སེམས་དེ་ལ། །མི་རྟག་ཉམས་དེས་བསྐྱོད་པ་མེད། །དེ་བས་ཕྲག་དོག་མི་གནས་སྟོང་། །བྱང་ཆུབ་སེམས་སུ་མངོན་སངས་རྒྱས། །ང་རྒྱལ་ལམ་གྱི་སྒོར་ཞུགས་པས། །ལྷ་ཡི་གནས་དང་ལོངས་སྤྱོད་ཀྱིས། །མ་རིག་ལྟུང་བའི་སྡུག་བསྔལ་མྱོང་། །བསམ་པས་འགྲུབ་པའི་ཆོས་སྤྱོད་ཀྱང་། །མ་རིག་ལེ་ལོའི་རྣམ་སྨིན་གྱིས། །ལྟུང་བའི་སྡུག་བསྔལ་ཉམས་མྱོང་སྟེ། །སྙིང་པོ་བྱང་ཆུབ་སེམས་དེ་ལ། །ལྟུང་བའི་ཉམས་ཀྱིས་མི་བསྐྱོད་དེ། །དེས་ན་ང་རྒྱལ་མི་གནས་སྟོང་། །བྱང་ཆུབ་སེམས་སུ་མངོན་སངས་རྒྱས། །སྣང་སྲིད་ཆོས་ནི་དེ་བས་ན། །ཁམས་གསུམ་གནས་ཀྱང་དེ་འདྲ་སྟེ། །འདོད་པའི་ཁམས་ནི་མ་རིག་པ། །ཕྱེ་བ་མེད་པར་ཀུན་ལ་རྨོངས། །མི་རྟོག་གཏི་མུག་ཆོས་ཀྱི་སྐུ། །གཟུགས་ཀྱི་ཁམས་ནི་ཆགས་པའི་གནས། །ང་རྒྱལ་ཆགས་པ་མངོན་འགྲུབ་པས། །གཟུགས་ལ་ང་རྒྱལ་བལྟ་མི་ངོམ། །ལྟུང་བ་ཆགས་མེད་ཡེ་ཤེས་སྐུ། །གཟུགས་མེད་ཁམས་ནི་དངོས་མ་གྲུབ། །ཡིད་ཡུལ་ཆོས་ལ་མུ་བཞིར་བལྟ། །གཟུང་འཛིན་མེད་པར་རིག་པའི་ཆོས། །མིང་དང་མཚན་མ་ཡུལ་འདས་ཐུགས། །དེ་བས་སྣང་སྲིད་སྣོད་བཅུད་ཀུན། །བྱང་ཆུབ་སྐུ་གསུང་ཐུགས་སུ་འདས། །འདས་པའི་དཔེ་ནི་ནམ་མཁའ་འདྲ། །ནམ་མཁའ་འདས་པ་ཀུན་གྱི་གནས། །སྣང་བའི་ཆོས་དང་སྲིད་པའི་ཆོས། །འདས་པའི་ངང་ན་མི་གནས་མེད། །སྣང་བ་ས་ཆུ་མེ་རླུང་བཞི། །འདས་པ་ནམ་མཁའི་ངང་ལ་གནས། །དེ་ཡང་སྣང་བའི་འབྱུང་བ་རླུང་། །ནམ་མཁའི་ངང་ན་ཡང་གཡོ་ཞིང་། །རང་གི་མཚན་ཉིད་རྡོ་རྗེའི་རྩལ། །རྩལ་ཆེན་དེ་ཡི་འབྱུང་ཆེན་ཆུ། །འདས་ལ་མི་ལྟུང་
འདེགས་པར་བྱེད། །དེ་ཡང་ནམ་མཁའི་ངང་ན་གནས། །འབྱུང་ཆེན་སྣང་བའི་སྡུད་བྱེད་ཆུ། །ནམ་མཁའི་ངང་ལས་རང་བཞིན་བརླན། །རང་གི་མཚན་ཉིད་རྡོ་རྗེའི་རྩལ། །རྩལ་ཆེན་དེ་ཡི་འབྱུང་ཆེན་ས། །འདས་ལ་མི་ལྟུང་འདེགས་པར་བྱེད། །དེ་ཡང་ནམ་མཁའི་ངང་ན་གནས། །འབྱུང་ཆེན་སྣང་བའི་ཆ་སྙོམས་མེ། །ནམ་མཁའི་ངང་ལས་རང་བཞིན་ཚ། །རང་གི་མཚན་ཉིད་རྡོ་རྗེའི་རྩལ། །རྩལ་ཆེན་དེ་ཡི་འབྱུང་ཆེན་བཞི། །འདས་ལ་མི་འཇིགས་སྙོམས་པར་བྱེད། །མི་འདས་འབྱུང་ཆེན་སྣང་བ་བཞི། །འདས་པའི་ནམ་མཁའི་ངང་ན་གནས། །སྲིད་པ་རྒྱུད་དྲུག་སྣང་བ་ཡང་། །འདས་པས་ནམ་མཁའི་ངང་ན་གནས། །ནམ་མཁའ་འདས་པའི་དཔེ་དེ་བཞིན། །སྣང་བ་འབྱུང་ཆེན་བཞི་པོ་ཡང་། །སེམས་ཉིད་འདས་པའི་ངང་ན་གནས། །སྲིད་པ་རྒྱུད་དྲུག་སྣང་བ་ཡང་། །འདས་པ་སེམས་ཀྱི་ངང་ན་སྤྱོད། །སྣང་སྲིད་སྣོད་བཅུད་ཐམས་ཅད་ཀུན། །སེམས་ཉིད་དབྱིངས་ཀྱི་ཡུལ་ཆེ་བས། །ཐམས་ཅད་སེམས་ཡུལ་དེ་ན་གནས། །ནམ་མཁའ་བཞིན་དུ་མི་གནས་མེད། །དེ་བས་ཀུན་གྱི་གནས་ཆེན་འདི། །བྱང་ཆུབ་སེམས་ཀྱི་ཀློང་ཆེན་ཡིན། །འདས་པའི་སེམས་ཀྱི་ཀློང་ཆེན་འདི། །སྣང་དང་སྲིད་པ་ཐམས་ཅད་ཀུན། །སྣོད་དང་བཅུད་ཀྱིས་བསྡུས་པ་དང་། །སངས་རྒྱས་སེམས་ཅན་ཐམས་ཅད་དང་། །བདེ་དང་སྡུག་བསྔལ་ཐམས་ཅད་དང་། །ཕྱི་ནང་སྨོས་པ་ཐམས་ཅད་ཀུན། །བྱང་ཆུབ་སེམས་ཀྱི་བདེ་ཆེན་ལས། །རྣམ་པར་དག་པའི་ཆོས་ཉིད་ལ། །སྣང་དང་སྲིད་པ་གཉིས་སུ་མེད། །སྣོད་དང་བཅུད་ཀྱང་གཉིས་སུ་མེད། །སངས་རྒྱས་སེམས་ཅན་གཉིས་ཀྱང་མེད། །བདེ་དང་སྡུག་བསྔལ་གཉིས་ཀྱང་མེད། །ཕྱི་ནང་སྨོས་པའི་ཆོས་ཀྱང་མེད། །མེད་པའི་དོན་གྱི་སྙིང་པོ་ལ། །ཡོད་པའི་སྒྲོ་སྐུར་གདབ་མི་བྱ། །གང་ཞིག་མེད་པའི་དོན་མ་མཐོང་། །འདི་ལ་ཡོད་པའི་སྒྲོ་འདོགས་པ། །དོན་གྱི་སྙིང་པོ་མི་ཤེས་པས། །མེད་པའི་བདེ་བ་ཡུལ་མ་མཐོང་། །དེ་ནི་མ་
སྐྱེས་ཆོས་མ་རྟོགས། །དེ་ཡིས་དབྱིངས་ཀྱི་ལམ་མ་མཐོང་། །དེ་ནི་གཅིག་པུ་མུན་འཐོམ་ནས། །སྤྲོས་མེད་གནས་ནི་མཐོང་མི་འགྱུར། །བྱང་ཆུབ་སེམས་ཀྱི་རང་བཞིན་ནི། །སྒྲོ་དང་སྐུར་པ་ཀུན་དང་བྲལ། །གང་གིས་སེམས་དེ་མ་མཐོང་བས། །བསྐལ་པ་དུ་མར་གྲངས་བགྲངས་ཀྱང་། །སྙིང་པོ་རང་བཞིན་སེམས་མ་མཐོང་། །བདེན་པའི་དོན་དང་འཕྲད་མི་འགྱུར། །ཞེས་གསུངས་སོ། །བྱང་ཆུབ་སེམས་ཀྱི་མདོ་ལས། དཔེ་དོན་གཅིག་པའི་ལེའུ་སྟེ་གསུམ་པའོ།། །།དེ་ནས་ཡང་འདུས་པའི་ཚོགས་དེ་དག་ཐམས་ཅད། སེམས་དཔའ་རྡོ་རྗེའི་འཁོར་དུ་དད་པའི་སེམས་ཀྱིས་འཁོད་དེ་མོས་པས་འདུན་ཏོ། །དེ་ནས་སེམས་དཔའ་རྡོ་རྗེ་དེས་འཁོར་འདུན་པ་དེ། རྩ་བ་བྱང་ཆུབ་སེམས་སུ་གཅིག་པ་དང་། །རྟགས་དང་གཏན་ཚིགས་ལ་འདུན་པར་རིགས་ནས། ཡང་གསུངས་པ། ཀྱེ་འདུས་པའི་ཚོགས་ཆེན་ད་ཉོན་ཅིག །རྩ་བ་གཅིག་པའི་ཆོས་འདི་ནི། །བྱང་ཆུབ་སེམས་ཀྱི་རང་བཞིན་ཏེ། །ཆོས་རྣམས་ཀུན་གྱི་རྩ་བ་ཡིན། །ཐམས་ཅད་འདུས་པའི་སྙིང་པོ་ཡིན། །དུས་གསུམ་སངས་རྒྱས་ཐམས་ཅད་ལ། །སྐུ་གསུང་ཐུགས་སུ་བདག་མེད་ཀྱང་། །བདག་ལ་སྙིང་པོ་འདི་ལ་འདུས། །སྣང་དང་སྲིད་པར་སྨོས་པའི་ཆོས། །ཐམས་ཅད་མངོན་དུ་སྣང་བ་ཡང་། །ཐམས་ཅད་འབྱུང་བ་འདི་ལ་འདུས། །འདི་ནི་སྣང་སྲིད་སྙིང་པོ་ཡིན། །སྙིང་པོ་བྱང་ཆུབ་སེམས་འདི་ལ། །ཐམས་ཅད་འདུས་ཤིང་འབྱུང་བས་ན། །དེ་ཕྱིར་སྙིང་པོ་བྱང་ཆུབ་སེམས། །བྱང་ཆུབ་སེམས་ཀྱི་རྣམ་གྲངས་ནི། །གཅིག་ཏུ་ཡོད་ལ་བགྲང་དུ་མེད། །བགྲངས་ན་མཐའ་ཡས་བརྗོད་མི་ལངས། །གཅིག་ལ་རྣམ་པ་བགྲང་དུ་མེད། །གཅིག་གིས་ཀུན་གྱི་རྣམ་པ་འཛིན། །ཐམས་ཅད་འདུས་པའི་སྙིང་པོ་ཡིན། །དེ་ཕྱིར་སྙིང་པོ་བྱང་ཆུབ་སེམས། །ཐམས་ཅད་འབྱུང་བ་རྒྱུ་རུ་སྣང་། །དེས་ན་རྒྱུ་གཅིག་བྱང་ཆུབ་
སེམས། །ཐམས་ཅད་བྱང་ཆུབ་སེམས་ལ་སྤྲོས། །འདུས་ཀྱང་བྱང་ཆུབ་སེམས་སུ་འདུས། །གནས་ཀྱང་བྱང་ཆུབ་སེམས་ལ་གནས། །བསྐྱེད་ཀྱང་བྱང་ཆུབ་སེམས་ལས་བསྐྱེད། །སངས་རྒྱས་སྐུ་དང་ཡེ་ཤེས་ཀྱང་། །སེམས་ཉིད་གཟུང་འཛིན་བྲལ་བ་ཡིན། །དེས་ན་བྱང་ཆུབ་སེམས་ཀྱི་སྐུ། །སེམས་ཅན་ལུས་དང་བག་ཆགས་ཀྱང་། །སེམས་ཀྱི་བརྐམ་ཆགས་ལྔ་ལས་བྱུང་། །དེས་ན་འབྱུང་བའི་བྱང་ཆུབ་སེམས། །བྱང་ཆུབ་སེམས་ནི་གཟུང་འཛིན་བྲལ། །བྱང་ཆུབ་སེམས་ནི་སྤྲོས་དང་བྲལ། །བྱང་ཆུབ་སེམས་ནི་རྣམ་པར་དག །བྱང་ཆུབ་སེམས་ལ་དབྱིབས་མ་མཆིས། །བྱང་ཆུབ་སེམས་ལ་ཁ་དོག་མེད། །བྱང་ཆུབ་སེམས་ནི་སྒྲོ་སྐུར་བྲལ། །ཐམས་ཅད་སྤང་བའི་བྱང་ཆུབ་སེམས། །ཆོས་རྣམས་ཀུན་གྱི་རྩ་བ་རུ། །གཅིག་པ་ཆོས་ཀུན་རྩ་བ་ཡིན། །རྩ་བ་བྱང་ཆུབ་སེམས་འདི་ནི། །ཀུན་གྱི་རང་བཞིན་འདིས་བྱས་པས། །ཐམས་ཅད་བྱེད་པའི་རྒྱལ་པོ་ཡིན། །བྱེད་པའི་རྒྱལ་པོས་ཀུན་བྱས་པས། །དངོས་སུ་གྲུབ་པ་གང་ཡང་མེད། །གང་ཞིག་དངོས་སུ་གྲུབ་འདོད་པས། །དེ་ཡིས་ཆོས་ཀུན་གང་མི་འགྲུབ། །དེ་བས་དངོས་མེད་ཀུན་གྱིས་གྲུབ། །དངོས་མེད་གང་གིས་གྲུབ་པ་དེ། །དེས་ནི་རྩ་བ་སེམས་གྲུབ་སྟེ། །ཆོས་རྣམས་ཀུན་གྱི་རྩ་བ་གྲུབ། །བྱེད་པའི་རྒྱལ་པོ་གྲུབ་པ་ཡིན། །དེ་བས་སུ་ཡང་རུང་བ་དེས། །དངོས་མེད་གང་གིས་མངོན་གསལ་བ། །དེས་ནི་ཐམས་ཅད་ཀུན་འགྲུབ་པས། །མི་གནས་དངོས་མེད་རྒྱལ་པོ་གྲུབ། །འདི་ཡིས་ཐམས་ཅད་བྱེད་པ་གྲུབ། །འདི་ཡིས་ཐམས་ཅད་བྱེད་པར་འགྱུར། །དེ་ལས་ཐམས་ཅད་འབྱུང་བར་འགྱུར། །དེ་ལས་འབྱུང་བ་ཐམས་ཅད་འབྱུང་། །དེ་ལས་སྲིད་པ་ཐམས་ཅད་འབྱུང་། །སྣང་བའི་ཆོས་ཀྱང་དེ་ལས་བྱུང་། །ཐམས་ཅད་ཐམས་ཅད་ཀུན་འབྱུང་བས། །དེ་ཕྱིར་སྙིང་པོ་བྱང་ཆུབ་སེམས། །ཆོས་རྣམས་ཀུན་གྱི་རྩ་བའོ། །ཞེས་གསུངས་སོ། །བྱང་ཆུབ་སེམས་ཀྱི་མདོ་ལས། རྩ་བ་བྱང་ཆུབ་སེམས་ཀྱི་ལེའུ་སྟེ་བཞི་པའོ།། །།
དེ་ནས་འདུས་པའི་ཚོགས་དེ་དག་ཐམས་ཅད། སྟོན་པ་ཀུན་ཏུ་བཟང་པོའི་སྤྱན་སྔར་རབ་ཏུ་ཤིན་ཏུ་འདུད་པའི་སྒོ་ནས་འཁོད་དེ། ཐམས་ཅད་མགྲིན་གཅིག་པའི་སྒོ་ནས་ཞུས་པ། སྟོན་པ་ཀུན་ཏུ་བཟང་པོ་ཡིས། །ཆོས་རྣམས་ཀུན་ཏུ་སྣང་བར་མཛད། །སྟོན་པ་རྡོ་རྗེ་སེམས་དཔའ་ཡིས། །དོན་དེ་རྩ་བ་གཅིག་ཏུ་བསྟན། །རྩ་བ་གཅིག་གི་དོན་བསྟན་ན། །ཆོས་རྣམས་ཀུན་གྱི་རྩ་བ་རྟོགས། །ཞེས་ཞུས་སོ། །དེ་ནས་སེམས་དཔའ་རྡོ་རྗེ་དེས། ཆོས་ཐམས་ཅད་རྩ་བ་གཅིག་པའི་མདོ་དང་འགྲེལ་པ་འདི་གསུངས་སོ། །ཆོས་ཀུན་རྩ་བ་གཅིག་པ་འདི་ལྟ་སྟེ། །ཆོས་ཉིད་སེམས་ཉིད་གཅིག་ཏུ་བསྟན་པ་ལ། །གྲངས་དང་རྣམ་པ་ཡོད་ཀྱིས་བགྲང་དུ་མེད། །མ་བཅོས་རྟོགས་པའི་རྣལ་འབྱོར་པ། །ཏི་བྱ་ནམ་མཁའི་ལམ་ལ་མཁས་པ་བཞིན། །མི་རྟོག་ནམ་མཁའ་ལྟ་བུར་གནས་པར་བྱ། །རྒྱུ་མེད་མ་བྱུང་རྐྱེན་མེད་མ་སྐྱེས་པ། །ཐམས་ཅད་འབྱུང་བའི་སྙིང་པོ་བྱང་ཆུབ་ལས། །ཡོད་པའི་སྒྲོ་དང་མེད་པའི་སྐུར་པ་དང་། །ཡོད་མེད་སྒྲོ་སྐུར་བཏགས་པ་ག་ལ་ཡོད། །ཅེས་གསུངས་སོ། །བྱང་ཆུབ་སེམས་ཀྱི་མདོའི་འགྲེལ་པ་རྫོགས་སོ།། །།དེ་ནས་འདུས་པའི་ཚོགས་ལ། སེམས་དཔའ་རྡོ་རྗེ་དེས། རྩ་བ་གཅིག་ལ་དོན་གཉིས་འབྱུང་བའི་རྣམ་པར་བགྲང་བའི་དོན་འདི་གསུངས་སོ། །འདུས་པའི་ཚོགས་ཆེན་ད་ཉོན་ཅིག །གཉིས་ནི་རྣམ་པའི་བྱེ་བྲག་སྟེ། །ཐེག་པ་རྣམ་པ་གཉིས་སུ་བསྟན། །འཇིག་རྟེན་པ་ཡི་ཐེག་པ་དང་། །མྱ་ངན་འདས་པའི་ཐེག་པ་གཉིས། །འཇིག་རྟེན་པ་ཡི་ཐེག་པ་ནི། །རྒྱུད་དྲུག་གནས་པའི་སེམས་ཅན་ཀུན། །ཁམས་གསུམ་འཁོར་བའི་གནས་བཟུང་ནས། །བརྐམ་ཆགས་ལྔ་ཡི་སྦྱོར་བ་ཡིས། །ཁམས་གསུམ་འཁོར་བའི་ཚོགས་སོགས་ཏེ། །བདེ་བའི་དོན་མེད་སྟོང་པར་འགྱུར། །དེ་ལ་དོན་འདི་བསྟན་པར་བྱ། །མུ་སྟེགས་རྟག་དང་ཆད་པ་གཉིས། །དགེ་སྡིག་
ལས་ཀྱི་ཆོས་རྣམས་ལ། །འབྲས་བུ་ཡོད་པར་མ་རྟོགས་ཏེ། །ཆད་པའི་མཐའ་རུ་ལྟུང་བ་སྟེ། །རྫོགས་ཆེན་འདི་ཡི་བྱིན་བརླབས་ཀྱིས། །སྙིང་པོ་བྱང་ཆུབ་སེམས་ཆེན་ལ། །གཟུང་འཛིན་མཚན་མ་མི་མངའ་བས། །ཆད་པའི་མཐའ་རུ་ལྟུང་མི་འགྱུར། །རྟག་པར་བལྟ་བར་སེམས་རྣམས་ཀྱིས། །ཡོད་པ་རྣམ་པ་བཞི་མཐོང་སྟེ། །ང་གཙང་སྐྱིད་རྟག་བཞི་མཐོང་ནས། །བླང་དོར་མེད་པའི་དོན་མ་ཤེས། །སྐྱེ་ཤི་མེད་པའི་དོན་མ་མཐོང་། །རྟག་པའི་མཐའ་རུ་ལྟུང་བ་དེ། །རྫོགས་ཆེན་འདི་ཡི་བྱིན་བརླབས་ཀྱིས། །སྙིང་པོ་བྱང་ཆུབ་སེམས་ཉིད་ལ། །གཟུང་འཛིན་མཚན་མ་མི་མངའ་བས། །རྟག་པའི་མཐའ་རུ་ལྟུང་མི་འགྱུར། །ཞེས་གསུངས་སོ། །རྣམ་པར་བགྲང་བའི་མདོ་ལས། འཇིག་རྟེན་གྱི་ཐེག་པ་བསྟན་པའི་ལེའུ་སྟེ་དང་པོའོ།། །།དེ་ནས་འདུས་པའི་ཚོགས་རྣམས་ལ། འཇིག་རྟེན་ལས་འདས་པའི་ཐེག་པ་འདི་བསྟན་ཏོ། །མྱ་ངན་འདས་པའི་ཐེག་པ་ལ། །རྣམ་པ་གཉིས་སུ་དབྱེ་བར་བྱ། །མཚན་ཉིད་རྒྱུ་ཡི་ཐེག་པ་དང་། །འབྲས་བུ་རྡོ་རྗེའི་ཐེག་པའོ། །མཚན་ཉིད་རྒྱུ་ལ་རྣམ་པ་གསུམ། །སྡུག་བསྔལ་སྤོང་བའི་ཉན་ཐོས་དང་། །ཤེས་པ་འགེགས་པའི་རང་རྒྱལ་དང་། །རྣམ་རྟོག་སྦྱོང་བའི་མདོ་སྡེ་གསུམ། །སྡུག་བསྔལ་སྤོང་བའི་ཉན་ཐོས་ནི། །བརྟུལ་ཞུགས་དག་གིས་སྤོང་བར་བྱེད། །ཤེས་པ་འགེགས་པའི་རང་རྒྱལ་ནི། །མ་རིག་རྟེན་འདྲེལ་བཅུ་གཉིས་འགགས། །རྣམ་རྟོག་སྦྱོང་བའི་མདོ་སྡེ་ནི། །ཆོས་ཉིད་སྟོང་པ་ནམ་མཁའ་སྟེ། །ཇི་ལྟར་དམིགས་པ་བཞིན་འགྲུབ་པས། །སྒྱུ་མའི་དཔེ་བརྒྱད་ལྟ་བུར་འདོད། །འབྲས་བུའི་ཐེག་པ་ལ་ཡང་གསུམ། །བྱ་བའི་སྡེ་དང་གཉིས་ཀའི་སྡེ། །རྣལ་འབྱོར་རྒྱུད་དང་རྣམ་པ་གསུམ། །བྱ་བ་བྱེད་པའི་ཀྲི་ཡཱ་ནི། །ཡན་ལག་བཅུ་གཅིག་ཆོ་ག་ཡིས། །རྒྱལ་བའི་སྐུ་གསུང་ཡེ་ཤེས་འདོད། །གཉིས་ཀ་སྤྱོད་པའི་ཨུ་པ་ཡ། །ཀྲི་ཡཱ་སྤྱོད་ཅིང་ཡོ་ག་བསྒྲུབ། །འདྲེལ་མེད་སྒོ་ནས་བསྒྲུབ་པར་འདོད། །རྣལ་འབྱོར་
པ་ལ་རྣམ་པ་གཉིས། །ཕྱི་པ་དང་ནི་ནང་པ་གཉིས། །ཕྱི་པ་ཐུབ་པ་ཡོ་ག་ནི། །བྱང་ཆུབ་ལྔ་དང་ཆོ་འཕྲུལ་བཞི། །ཆུ་ཟླ་བཞིན་དུ་གྲུབ་པར་འདོད། །ནང་པའི་རྣལ་འབྱོར་རྣམ་པ་གསུམ། །བསྐྱེད་དང་རྫོགས་དང་རྫོགས་ཆེན་གསུམ། །བསྐྱེད་པ་མ་ཧཱ་ཡོ་ག་ནི། །རྣམ་པ་གསུམ་ནི་རིམ་བསྐྱེད་དེ། །ཡོ་བྱད་མ་ཉམས་འཇུག་བརྩོན་ན། །རྒྱལ་བའི་སྐུ་གསུང་ཡེ་ཤེས་འདོད། །རྫོགས་པ་ཨ་ནུ་ཡོ་ག་ནི། །རྒྱུ་རྐྱེན་དག་པའི་རང་བཞིན་གྱིས། །སྙིང་པོ་ཙམ་ལ་རག་ལས་པ། །བརྗོད་པས་ཡེ་ཤེས་དཀྱིལ་འཁོར་རྫོགས། །རྫོགས་ཆེན་ཨ་ཏི་ཡོ་ག་ནི། །རྒྱུ་རྐྱེན་དག་ལ་རག་མ་ལས། །རྩོལ་བ་དག་གིས་སྒྲུབ་མི་བྱེད། །རྫོགས་ཆེན་གང་ལ་མ་བརྟེན་འདིས། །རྣམ་པར་བགྲང་བའི་ཆོས་རྣམས་ཀུན། །ཡོངས་སུ་བྱིན་གྱིས་རློབ་པར་བྱེད། །ཀུན་ཀྱང་བདེ་བ་སྤོང་བར་བྱེད། །ཡོངས་སུ་བྱིན་གྱིས་རློབ་པར་བྱེད། །དེ་ཡང་ཇི་ལྟ་བུ་ཞེ་ན། སྡུག་བསྔལ་སྤོང་བའི་ཉན་ཐོས་དེ། །བདེན་པ་བཞི་ཡི་སྒོར་ཞུགས་ནས། །ཡེ་ཤེས་ཡུལ་མེད་བཅུ་དྲུག་གིས། །གང་ཟག་མཚན་མའི་ཡུལ་འདི་ལ། །བདག་རྟག་བྱས་པ་མེད་པར་བལྟ། །ཆོས་ལ་མེད་པའི་དོན་མ་རྟོགས། །སྙིང་པོ་བྱང་ཆུབ་སེམས་དེ་ནི། །སྤྲོས་དང་བྲལ་བའི་བདག་ཉིད་ཡིན། །མཐའ་ཡོད་མཐའ་རུ་ལྟུང་མི་འགྱུར། །ཤེས་པ་འགེག་པའི་རང་རྒྱལ་ནི། །རྟེན་འདྲེལ་བཅུ་གཉིས་སྒོར་ཞུགས་ནས། །ཆོས་ནི་རྣམ་པ་བཅོ་ལྔ་ལ། །གཅིག་ལ་བདག་ཡོད་མ་རྟོགས་ཏེ། །གཞན་ལ་བདག་མེད་ཡོངས་མ་རྟོགས། །སྙིང་པོ་བྱང་ཆུབ་སེམས་འདི་ནི། །ཐམས་ཅད་མེད་པའི་སྙིང་པོ་ཡིན། །ཡོད་པའི་མཐའ་རུ་ལྟུང་མི་འགྱུར། །རྣམ་རྟོག་སྦྱོང་བའི་མདོ་སྡེ་ནི། །བདེན་པ་གཉིས་ཀྱི་རྟོག་དཔྱོད་ཀྱིས། །ཆོས་ཉིད་སྤྲོས་དང་བྲལ་བ་དེ། །རང་བཞིན་མེད་པར་རྟོགས་པ་དང་། །ཆོས་དང་གང་ཟག་གཉིས་ཀ་ལ། །བདག་མེད་པར་ནི་རྟོགས་པ་ཡིས། །བདེན་དང་ངེས་པའི་ས་ནི་ཐོབ། །རྟོག་དཔྱོད་འདས་པའི་ས་འདི་ལ། །
བསྐལ་གསུམ་བར་དུ་བརྟག་ཅིང་སྤྱོད། །བྱ་བ་རྒྱུད་ཀྱི་ཀྲི་ཡཱ་ནི། །གཟའ་དང་རྒྱུ་སྐར་དུས་ཚིགས་དང་། །དག་པ་རྣམ་གསུམ་སྒོར་ཞུགས་ནས། །གཟུང་དང་འཛིན་པའི་ཏིང་འཛིན་གྱིས། །རྡོ་རྗེ་འཛིན་དང་རིགས་གསུམ་ས། །མི་མཉམ་ཚུལ་དུ་ལམ་ཞུགས་ནས། །མི་ཚེ་བདུན་གྱིས་རིག་འཛིན་ས། །གཟུང་འཛིན་འདས་པའི་ས་འདི་ལ། །མི་ཚེ་བདུན་གྱིས་རིག་འཛིན་ཏིང་ཡང་སྦྱང་། །གཉིས་ཀ་སྤྱོད་པའི་ཨུ་པ་ཡ། །ཀྲི་ཡཱར་སྤྱོད་ཅིང་ཡོ་ག་བསྒྲུབ། །རྣམ་པ་གཉིས་ཀྱི་དོན་སྤྱོད་པས། །རིགས་དང་ཁ་དོག་ཁྱད་པར་ནི། །ཇི་ལྟར་འདོད་པ་གསལ་གྱུར་ཀྱང་། །གཉིས་སུ་མེད་པའི་ས་འདི་ལ། །མ་ནོར་ལམ་གྱི་ཚུལ་ཞུགས་ཀྱང་། །མི་ཚེ་བདུན་དུ་ལྟ་སྤྱོད་སྦྱང་། །ཕྱི་པ་ཐུབ་པ་ཡོ་ག་ནི། །བྱང་ཆུབ་ལྔ་དང་ཆོ་འཕྲུལ་བཞི། །སྐུ་དང་ཡེ་ཤེས་འདོད་པའི་ཕྱིར། །ཡན་ལག་རྫོགས་པར་སྒོམ་བྱེད་པ། །ཕྱག་རྒྱ་བཞི་ལ་གཙོར་བྱས་ཏེ། །ལྷ་ཡི་སྐུ་དང་ཐུགས་མཚན་དང་། །དམ་ཚིག་ཕྲིན་ལས་རྣམ་པ་བཞིས། །སེམས་དང་ཏིང་འཛིན་དབང་བསྒྱུར་ཏེ། །མཚན་མ་ཡོད་མེད་གཉིས་སྤྱོད་པ། །བླང་དོར་འདས་པའི་སར་མ་ཕྱིན། །བླང་དོར་འདས་པའི་ས་འདི་ལ། །མ་ནོར་ཚུལ་གྱིས་ལམ་ཞུགས་པ། །མི་ཚེ་བདུན་དུ་མཚན་མ་སྦྱོང་། །ནང་པའི་མ་ཧཱ་ཡོ་ག་ནི། །ཐབས་དང་ཤེས་རབ་སྒོར་ཞུགས་ནས། །བདག་ཉིད་ཆེན་པོའི་དཀྱིལ་འཁོར་དུ། །ཕྱི་ནང་གསང་བས་བསྡུས་པ་དང་། །སྲིད་པ་གསུམ་གྱིས་བསྡུས་པ་དང་། །དབང་པོའི་སྤྱོད་ཡུལ་གྱུར་པ་དང་། །དུས་གསུམ་མ་ངེས་རྣམ་བཞི་དང་། །སྤྱོད་པའི་ཕྲིན་ལས་ཐམས་ཅད་ནི། །བདག་ཉིད་ཆེན་པོ་གཅིག་བསྡུས་ཀྱང་། །ཡེ་ནས་ཡིན་ལ་གདོད་བསྒྲུབ་རྩོལ། །རྩོལ་བསྒྲུབ་འདས་པའི་ས་འདི་ལ། །མ་ནོར་ཚུལ་གྱིས་ལམ་ཞུགས་ཀྱང་། །ཞག་ནི་བཅུ་པ་གསུམ་ཕྲག་དྲུག །བཅུ་པ་གསུམ་ཕྲག་བཅུ་དྲུག་ཏུ། །རྩོལ་ཞིང་བསྒྲུབ་པའི་ཏིང་
འཛིན་སྦྱོང་། །རྫོགས་པ་ཨ་ནུ་ཡོ་ག་ནི། །དབྱིངས་དང་ཡེ་ཤེས་སྒོར་ཞུགས་ནས། །བསྙེན་བསྒྲུབ་བཞི་ཡི་ལས་སྤྱོད་པས། །སྣང་བའི་ཆོས་ནི་དག་པའི་རྒྱུ། །བསོད་ནམས་ཚོགས་སུ་སྒྲུབ་པར་བྱེད། །སེམས་དང་སེམས་བྱུང་ཐམས་ཅད་ཀུན། །ཡེ་ཤེས་ཚོགས་སུ་སྒྲུབ་པར་བྱེད། །རང་རྒྱུད་དག་པའི་ལྷ་བསྙེན་ནས། །ལྟོས་པའི་ཚིག་གིས་རྗོད་པར་བྱེད། །ཏིང་འཛིན་ཡེ་ཤེས་རྩལ་ཆེ་ན། །ཡེ་ཤེས་ཚོགས་སུ་འགྱུར་མོད་ཀྱིས། །བསམ་པའི་ཡེ་ཤེས་ཐམས་ཅད་ཀུན། །རྩོལ་བསྒྲུབ་མ་འདས་བདེ་ཆེན་སྤང་། །རྩོལ་བསྒྲུབ་འདས་པའི་ས་འདི་ལ། །མ་ནོར་ཚུལ་ལམ་ཞུགས་ནས་ཀྱང་། །ཡིད་ཆེས་མངོན་དུ་གྱུར་པ་རུ། །ལྟོས་པའི་ཆོས་ལ་གནས་ཤིང་རྩོལ། །དེས་ན་བདེ་ཆེན་སྤང་ཞེས་བྱ། །རྫོགས་པ་ཆེན་པོའི་རང་བཞིན་ཡང་བསམ་གཏན་ནི། །རྩོལ་བསྒྲུབ་འདས་པའི་བདེ་བ་ཆེ། །འདི་ཡི་དོན་གྱི་རང་བཞིན་ལས། །རྟོགས་ནས་བྱིན་རླབས་འབྱུང་བ་ནི། །རྫོགས་པ་ཆེན་པོའི་རང་བཞིན་ནི། །སངས་རྒྱས་རྫོགས་ལ་སེམས་ཅན་རྫོགས། །འཇིག་རྟེན་རྫོགས་ལ་འདས་པ་རྫོགས། །བདེ་དང་སྡུག་བསྔལ་གཉིས་མེད་རྫོགས། །ཐེག་པ་རྫོགས་ལ་ཆོས་ཉིད་རྫོགས། །ཡོད་པའི་མཐའ་རྫོགས་མེད་མཐའ་རྫོགས། །གཅིག་རྫོགས་ཀུན་རྫོགས་ཐམས་ཅད་རྫོགས། །ཡོངས་སུ་རྫོགས་པའི་མདོ་འདི་ནི། །དུས་གསུམ་སངས་རྒྱས་ཐམས་ཅད་ཀྱིས། །སྔར་གྲུབ་དགོངས་པ་འདི་ཡིས་གྲུབ། །ད་ལྟར་བཞུགས་པའི་རྣལ་འབྱོར་པ། །མི་ཡེངས་དགོངས་ལམ་འདི་ལ་གནས། །སླད་ནས་བྱོན་པའི་གདུང་འཚོབ་རྣམས། །དགོངས་པའི་ལུང་བསྟན་འདི་ཡིས་མཛད། །གང་སུ་འདི་ལ་གནས་པ་ཡི། །དེ་ནི་རྣལ་འབྱོར་ཆེན་པོ་ཡིན། །ལུས་ནི་གང་ཟག་འཇིག་རྟེན་ཡང་། །སེམས་དགོངས་རྫོགས་ཆེན་སངས་རྒྱས་ཡིན། །འདི་ཡིས་སེམས་ཅན་དོན་བྱས་ཀྱང་། །དོན་ལ་ནོར་བ་ངེས་མི་འབྱུང་། །ཡིན་
པ་དག་ལ་ནོར་བ་མེད། །ངེས་པ་དག་ལ་ཐེ་ཚོམ་མེད། །རྫོགས་པ་ཆེན་པོའི་ལུང་འདི་ལ། །ཡོད་མེད་ཚིག་དང་མ་ངེས་པའི། །དོན་ལ་འདའ་བ་མི་མངའ་བས། །བརྗོད་པའི་ཚིག་ལས་འདའ་མི་མངའ། །ཞེས་གསུངས་སོ། །རྣམ་པར་བགྲང་བའི་མདོ་ལས། འཇིག་རྟེན་ལས་འདས་པའི་ལེའུ་སྟེ་གཉིས་པའོ།། །།དེ་ནས་སེམས་དཔའ་རྡོ་རྗེ་དེས། འདུས་པའི་ཚོགས་ལ་རྣམ་པ་གཉིས་སུ་བགྲང་བའི་དོན་གྱི་མདོའི་འགྲེལ་པ་འདི་གསུངས་སོ། །ཀྱེ་འདུས་པའི་ཚོགས་ཆེན་ད་ཉོན་ཅིག །ཕྱི་ནང་སྣོད་བཅུད་གཉིས་ཀ་སྣང་བའི་ཕྱིར། །དོན་དམ་སྐྱེ་བ་མེད་པས་ཕྱི་དང་ནང་། །མ་སྐྱེས་ཟབ་མོ་དེ་ཡི་ཆ་ཤས་ནི། །དམིགས་པའི་ཡུལ་དུ་མ་གྱུར་རྟོག་ཡུལ་མེད། །སྲིད་པའི་ཕྱི་ནང་འདི་ནི་མིང་ཙམ་སྟེ། །དོན་དམ་མ་ཡིན་ལོག་པའི་སྟོབས་སུ་སྣང་། །དེས་ན་ཕྱི་ནང་རྟོག་པའི་ཏིང་འཛིན་ནི། །ཆ་ཤས་རྟོགས་པའི་ཡུལ་མེད་མཉམ་དང་བྲལ། །ཏིང་འཛིན་སྤྲོས་དང་བྲལ་བའི་ཆོས་ཉིད་ལ། །ཐ་ཚིག་ཕྱི་དང་ནང་དུ་བགྲང་བྱ་མེད། །ཆོས་ཉིད་བགྲང་དུ་མེད་པའི་ཕུང་པོ་འདི། །ནམ་མཁའ་བགྲང་དུ་མེད་པའི་ཁམས་བཞིན་གནས། །སྔ་མ་ད་ལྟ་ཕྱི་མ་དུས་གསུམ་དུ། །ནམ་མཁའ་ལྟ་བུ་འདི་དང་མི་འབྲལ་བས། །ཕྱི་ནི་འདི་ཡིན་ནང་ནི་འདི་ཡིན་ཞེས། །ཀུན་རྫོབ་མིང་ཙམ་ངེས་པར་བརྟག་པ་མེད། །ཅེས་གསུངས་སོ། །རྣམ་པར་བགྲང་བའི་མདོ་ལས། དོན་གྱི་འགྲེལ་པའི་ལེའུ་སྟེ་གསུམ་པ་རྫོགས་སོ།། །།དེ་ནས་སེམས་དཔའ་ཆེན་པོ་དེས། འདུས་པའི་ཚོགས་ལ་ཕུན་སུམ་ཚོགས་པ་ལ་གནས་ནས་བཤད་པའི་ཕྱིར། ཕུན་སུམ་ཚོགས་པའི་མདོ་འདི་བཤད་དོ། །ཀྱེ་འདུས་པའི་ཚོགས་ཆེན་ད་ཉོན་ཅིག །ཀུན་བཟང་རྒྱལ་བ་མཆོག་གི་ལྟ། །བྱང་ཆུབ་སེམས་ཀྱི་སྙིང་པོ་ཡིན། །ཀུན་གྱི་སྟོན་པ་བྱང་ཆུབ་སེམས། །སྟོན་པས་བསྟན་པའི་འཁོར་ཚོགས་པས། །དུས་དང་གནས་ནི་རང་བཞིན་འདུས། །སྟོན་པ་བྱང་ཆུབ་སྙིང་པོ་ནི། །ཆོས་
ཉིད་དབྱིངས་ཀྱི་གནས་ཆེན་དུ། །སངས་རྒྱས་སེམས་ཅན་འཁོར་ཚོགས་ནས། །སྔ་ཕྱི་མེད་པའི་བསྟན་པ་ནི། །རང་རིག་ཡེ་ཤེས་རིག་པའི་རྒྱལ། །རང་བཞིན་རྣམ་པ་གསུམ་སྣང་སྟེ། །མི་གནས་སེམས་ཀྱི་རང་བཞིན་དང་། །རང་བྱུང་ཡེ་ཤེས་རང་བཞིན་དང་། །ཐུགས་རྗེ་སྤྲུལ་པའི་རང་བཞིན་ནོ། །བྱང་ཆུབ་སེམས་ཀྱི་རང་བཞིན་ནི། །མི་གནས་ཆོས་ཀྱི་སྐུ་རུ་བཞུགས། །རང་བྱུང་ཡེ་ཤེས་རང་བཞིན་ནི། །རྫོགས་པའི་ལོངས་སྤྱོད་སྐུ་རུ་བཞུགས། །ཐུགས་རྗེ་སྤྲུལ་པའི་རང་བཞིན་ནི། །རྣམ་པ་ཅིར་ཡང་སྤྲུལ་ཏེ་བཞུགས། །མི་གནས་ཆོས་སྐུར་བཞུགས་ཙམ་ན། །འཁོར་ཡང་བྱང་ཆུབ་སེམས་སུ་བཞུགས། །བྱང་ཆུབ་སེམས་ཀྱི་འཁོར་རྣམས་ལ། །སྤྲོས་པ་མེད་པའི་དོན་ཡང་སྟོན། །ལོངས་སྤྱོད་རྫོགས་སྐུར་བཞུགས་ཙམ་ན། །འཁོར་ཡང་བྱང་ཆུབ་སེམས་དཔའི་འཁོར། །བྱང་ཆུབ་སེམས་དཔའི་འཁོར་རྣམས་ལ། །སྐུ་དང་ཡེ་ཤེས་རྫོགས་པར་སྟོན། །སྣ་ཚོགས་སྤྲུལ་སྐུར་བཞུགས་ཙམ་ན། །འཁོར་ཡང་རྒྱུད་དྲུག་སེམས་ཅན་འཁོར། །རྒྱུད་དྲུག་སེམས་ཅན་འཁོར་རྣམས་ལ། །ཡིད་བཞིན་དབང་པོ་གང་འཐད་སྟོན། །ཞེས་གསུངས་སོ། །ཕུན་སུམ་ཚོགས་པའི་མདོ་ལས། སྟོན་པ་ཕུན་སུམ་ཚོགས་པ་བསྟན་པའོ།། །།དེ་ནས་སེམས་དཔའ་རྡོ་རྗེ་དེས། འདུས་པའི་ཚོགས་ལ་འཁོར་ཕུན་སུམ་ཚོགས་པའི་རང་བཞིན་འདི་བསྟན་ཏོ། །ཀྱེ་འདུས་པའི་ཚོགས་ཆེན་ད་ཉོན་ཅིག །གང་ལ་འདུ་ཞིང་འཕེལ་བ་དག །དེ་ལ་འཁོར་ཞེས་བཏགས་པ་ཡིན། །དཔེར་ན་སྲིད་པའི་ཆོས་ལ་ཡང་། །འཁོར་དང་སྟོན་པ་རང་བཞིན་ཚང་། །ནམ་མཁའ་ལྟ་བུའི་སྟོན་པ་ལ། །འབྱུང་ཆེན་བཞི་དང་སྣང་སྲིད་འཁོར། །རང་བཞིན་ཆོས་ཀྱིས་འདྲེལ་བས་ནི། །དེས་ན་སྣང་སྲིད་འཁོར་ཕུན་ཚོགས། །དཔེར་ན་ཆོས་ཉིད་ཀུན་བཟང་ལ། །འཁོར་དང་སྟོན་པ་རང་བཞིན་ཚང་། །ཆོས་ཉིད་རྫོགས་པ་ཆེན་པོ་ལ། །བརྒྱད་
ཁྲི་བཞི་སྟོང་ཐེག་པའི་འཁོར། །རྒྱུ་དང་འབྲས་བུར་འདྲེལ་བས་ན། །དེས་ན་ཐེག་འཁོར་ཕུན་སུམ་ཚོགས། །དཔེར་ན་བྱང་ཆུབ་སེམས་ཉིད་ལ། །འཁོར་དང་སྟོན་པ་རང་བཞིན་ཚང་། །བྱང་ཆུབ་སེམས་ཀྱི་སྙིང་པོ་ལ། །རྣམ་ཤེས་འཁོར་དང་སྐྱེ་མཆེད་འཁོར། །ཡུལ་དང་དབང་པོ་འདུས་པས་ན། །དེས་ན་ཁམས་དང་སྐྱེ་མཆེད་འཁོར། །དེ་འཁོར་ཕུན་སུམ་ཚོགས་པ་བཞིན། །སྟོན་པའི་འཁོར་ཡང་དེ་འདྲ་སྟེ། །སྟོན་པ་ཆོས་ཀྱི་སྐུའི་འཁོར་ནི། །དུས་གསུམ་སངས་རྒྱས་བཞུགས་པ་དང་། །ཁམས་གསུམ་རྒྱུད་དྲུག་སེམས་ཅན་དེ། །འཕགས་པའི་ཐུགས་རྗེས་སེམས་ཅན་ལ། །འདྲེལ་བ་ཕུན་སུམ་ཚོགས་པར་བཤད། །སྟོན་པ་ལོངས་སྤྱོད་སྐུའི་འཁོར་ནི། །མི་རྟོག་ཏིང་འཛིན་བཅུ་སྦྱངས་པའི། །ས་ལ་གནས་པའི་བྱང་ཆུབ་པ། །ཉོན་མོངས་མི་གནས་ཤེས་བྱ་སྦྱངས། །ཡེ་ཤེས་ཚོགས་དང་ཐུགས་རྗེ་འདྲེལ། །དེས་ན་ཕུན་སུམ་ཚོགས་ཞེས་བྱ། །སྟོན་པ་སྤྲུལ་པའི་སྐུའི་འཁོར་ནི། །སྐུ་སྤྲུལ་ཐུགས་རྗེ་དྲུག་སྣང་བས། །འཁོར་ཡང་རྒྱུད་དྲུག་སེམས་ཅན་ནོ། །ལས་དང་ཐུགས་རྗེས་འདྲེལ་བ་ན། །འཁོར་ནི་ཕུན་སུམ་ཚོགས་ཞེས་བྱ། །ཞེས་གསུངས་སོ། །ཕུན་སུམ་ཚོགས་པའི་མདོ་ལས། འཁོར་ཕུན་སུམ་ཚོགས་པ་བསྟན་པའོ།། །།དེ་ནས་སེམས་དཔའ་ཆེན་པོ་དེས། འདུས་པའི་ཚོགས་ལ་བསྟན་པ་ཕུན་སུམ་ཚོགས་པ་འདི་བསྟན་ཏོ། །ཀྱེ་འདུས་པའི་ཚོགས་ཆེན་ད་ཉོན་ཅིག །དུས་གསུམ་སྟོན་པ་གང་གིས་ཀྱང་། །བསྟན་པའི་རང་བཞིན་འདི་ཡིན་ཞེས། །ཚིག་དང་ཡི་གེར་བརྗོད་པ་མེད། །མ་གསུངས་མི་གསུང་གསུང་མི་འགྱུར། །ཁྱེད་ཀྱི་རང་བཞིན་བསྟན་པའོ། །ཡེ་ཤེས་ཐུགས་ཀྱི་རིག་པ་ཡིས། །རང་གི་རང་བཞིན་ངོ་བསྟན་ཏེ། །དེ་མཐོང་བསྟན་པས་དེ་འདུས་པས། །དེ་ལ་དེ་བསྟན་དེ་ཡང་མཐོང་། །དེ་ནི་བསྟན་པ་ཞེས་སུ་བཤད། །སྟོན་པ་ཆོས་ཀྱི་སྐུ་ཡིས་ནི། །རང་བཞིན་གཟུང་འཛིན་བྲལ་བར་བསྟན། །བྱང་ཆུབ་སེམས་
ཀྱི་འཁོར་རྣམས་དང་། །དུས་གསུམ་སངས་རྒྱས་ཐམས་ཅད་ཀྱིས། །སྤྲོས་པ་མེད་པའི་དོན་དུ་རྟོགས། །རྒྱུད་དྲུག་གནས་པའི་སེམས་ཅན་གྱིས། །རང་གི་རང་བཞིན་མཐོང་བ་མེད། །སྒྲིབ་པ་ཐག་རིང་རྩོལ་མི་བྱེད། །སྟོན་པ་ཡང་ནི་རྣམ་པ་གསུམ། །བསྟན་པ་གསང་བ་རྣམ་གསུམ་ནི། །སྤྲོས་པ་མེད་པའི་རྡོ་རྗེ་སྟེ། །གསང་བ་རང་རྒྱུད་དག་པར་ཡང་། །སྤྲོས་པ་མེད་པས་རྡོ་རྗེར་བཤད། །གསང་བ་རྒྱུ་འབྲས་དག་པར་ཡང་། །སྤྲོས་མེད་ཡེ་ཤེས་རྡོ་རྗེར་ཆེན་པོ་ཡང་བཤད། །རྫོགས་པ་ཆེན་པོ་གསང་བ་ཡང་། །སྤྲོས་བྲལ་རྩོལ་བསྒྲུབ་བྲལ་བར་བཤད། །སྟོན་པ་ལོངས་སྤྱོད་རྫོགས་པ་ཡིས། །ཡེ་ཤེས་སྐུ་ཡི་རང་བཞིན་གྱིས། །ཆུ་ཟླ་སྣང་ཤེལ་མེ་ལོང་བཞིན། །མ་བསྒྲིབས་སྟོན་པའི་ངོ་བོ་ལ། །སྣང་བའི་སྐུ་མཐོང་ཡཱ་ན་གསུམ། །གཟུང་འཛིན་བླང་དང་དོར་བྱེད་པ། །ཕྱི་པ་རྣམ་པ་གསུམ་དུ་བསྟན། །བྱ་བ་དག་གི་ཀྲི་ཡཱ་ནི། །ཕྱི་ནང་རྟོག་པ་གསུམ་དག་པར། །གཟུང་འཛིན་རྡོ་རྗེ་འཛིན་དུ་བསྟན། །གཉིས་ཀ་བྱ་བའི་ལྟ་སྤྱོད་ནི། །གཉིས་སུ་མེད་པར་གྲུབ་འདོད་པས། །ངེས་པ་མེད་པས་བེམ་ཡང་ཁེ་བམ་འདྲ། །དང་དུ་མི་ལེན་ཕྱི་པ་ནི། །མཚན་མ་མེད་པའི་གཏན་ཚིགས་དང་། །གཞུང་ཆེན་ཕྱག་རྒྱ་བཞི་གསལ་ནས། །རིགས་ཆེན་བཞི་དང་སྟུག་པོར་བཤད། །སྟོན་པ་སྤྲུལ་སྐུར་བཞུགས་ཙམ་ན། །སེམས་ཅན་འདོད་པའི་རང་བཞིན་གྱིས། །ཇི་ལྟར་འདོད་པ་ཐུགས་རྗེ་འབྱུང་། །བརྐམ་ཆགས་ལྔ་ཡི་རྣམ་སྨིན་དེ། །རྒྱུད་དྲུག་གནས་སུ་ངེས་པར་སྟོན། །ལྷ་དང་ལྷ་མིན་གནས་རིས་སུ། །ཆེ་བའི་ང་རྒྱལ་འཇོམས་པར་བསྟན། །ཤེས་པ་མི་ཡི་གནས་རིས་སུ། །དགེ་སྡིག་རྒྱུ་འབྲས་སྡེ་སྣོད་བཤད། །གཏི་མུག་བྱོལ་སོང་གནས་རིས་སུ། །རིག་པ་ཤེས་པའི་ཆོས་ཀྱང་བཤད། །སེར་སྣ་ཡི་དྭགས་གནས་རིས་སུ། །མ་ཆགས་ཚིམ་པའི་ཆོས་ཀྱང་བཤད། །སྡུག་བསྔལ་དམྱལ་བའི་གནས་རིས་སུ། །སྔ་ཕྱི་དྲན་པའི་ཞེན་པ་བཟློག །ཇི་ལྟར་འདོད་པ་མོས་པ་བྱིན། །དེས་ན་བསྟན་པ་ཕུན་སུམ་ཚོགས། །དེ་ནས་སེམས་དཔའ་རྡོ་རྗེ་
དེས། །འདུས་པའི་ཚོགས་ཀྱི་འཁོར་རྣམས་ལ། །གནས་ཀྱི་རང་བཞིན་བསྟན་པ་ནི། །སེམས་དཔའ་བདག་གིས་བརྗོད་པར་བྱ། །སྟོན་པ་ཆོས་སྐུར་བཞུགས་ཙམ་ན། །ནམ་མཁའི་མཐའ་ཀླས་ཆོས་ཀྱི་དབྱིངས། །མཐའ་དང་དབུས་མེད་གནས་ཀྱི་མཆོག །སྤྲོས་མེད་གནས་ཀྱིས་ཀུན་ཏུ་ཁྱབ། །ཀུན་བཟང་ཆོས་སྐུའི་གནས་ཆེན་ནོ། །སྟོན་པ་ལོངས་སྤྱོད་གནས་ཆེན་ནི། །འོག་མིན་འོག་མིན་གནས་འོག་མིན། །རིན་ཆེན་གཞལ་ཡས་བཀོད་པ་ན། །རིན་ཆེན་ཁང་བུ་བརྩེགས་གནས་སོ། །སྟོན་པ་སྤྲུལ་སྐུའི་གནས་ཆེན་ནི། །རྒྱུད་ལྔའི་ལམ་དང་འགྲོ་དྲུག་གནས། །ཁམས་གསུམ་ཐུགས་རྗེ་སྤྲུལ་པའི་གནས། །ཐུགས་རྗེ་ནམ་མཁའི་མཐའ་དང་མཉམ། །གནས་ལ་འདི་ཞེས་ངེས་པ་མེད་པ་བསྟན། །དེ་ནས་འདུས་པའི་ཚོགས་རྣམས་ཀུན། །དུས་ཀྱི་རང་བཞིན་འདི་བསྟན་ཏོ། །སྔ་མ་ཕྱི་མ་ད་ལྟར་གསུམ། །ཁྱད་པར་མེད་པའི་དོན་འདི་བསྟན། །དུས་གསུམ་མེད་དེ་ཁྱབ་པར་གཅིག །ཀུན་བཟང་ཡེ་ཤེས་མཆོག་ཐུགས་ལ། །སྔ་མ་མི་འགག་ཕྱི་མི་འགྲིབ། །རྣམ་པའི་ཁྱད་པར་དུས་གཅིག་ཏུ། །ཡེ་ཤེས་སོ་སོར་གསལ་ཁྱབ་མེད། །སྐྱེ་འགག་མེད་པར་ཁྱད་པར་གཅིག །དུས་གསུམ་ཡོད་པར་བལྟ་བ་ནི། །མ་བྱང་བསྒྲིབས་པའི་སེམས་ཅན་རྣམས། །སེམས་ནི་སྒྲིབ་པ་བག་ཆགས་ཏེ། །མེད་པའི་ཡུལ་ལ་རྣམ་རྟོག་པས། །སྔ་མ་འགགས་ལ་དེ་མི་གནས། །ཕྱི་མ་མ་བྱུང་སྒྲིབ་མི་མཐོང་། །དུས་གསུམ་གཅིག་ལ་གསུམ་དུ་མཐོང་། །འདས་དང་མ་བྱོན་ད་ལྟར་ཞེས། །མེད་པའི་ཡུལ་ལ་རྣམ་རྟོག་པས། །ཐ་སྙད་མིང་ལ་ངེས་པ་མེད། །ཅེས་གསུངས་སོ། །ཕུན་སུམ་ཚོགས་པའི་མདོ་ལས། བསྟན་པ་གནས་དུས་ཕུན་སུམ་ཚོགས་པ་བསྟན་པའི་ལེའུའོ།། །།དེ་ནས་སེམས་དཔའ་ཆེན་པོ་དེས། ངེས་པའི་ཚོགས་ལ་ཕུན་སུམ་ཚོགས་པ།ངེས་པའི་མདོ་དོན་གྱི་འགྲེལ་པ་འདི་བཤད་དོ། །སྐྱེ་མེད་རྡོ་རྗེ་འགྱུར་མེད་སེམས་དཔའ་དེ། །མ་བསྒྲིབས་ཀུན་ལ་ཁྱབ་པས་ནམ་
མཁའ་འདྲ། །རང་བྱུང་ཡེ་ཤེས་གཉེན་པོ་མེད་པས་ཆེ། །བླང་དོར་མེད་པའི་ཆོས་ཉིད་ཀུན་བཟང་འདི། །བཀག་པ་མེད་པའི་མཛད་སྤྱོད་བག་ཡངས་ཀྱིས། །ཐམས་ཅད་འདུ་ཞིང་འབྱུང་བའི་དབྱིངས་ན་སྤྱོད། །ཡངས་པས་ཐམས་ཅད་འདུ་ཞིང་ཚོགས་ན་སྤྱོད། །ཐམས་ཅད་འདུ་ཞིང་འབྱུང་བ་ཆོས་ཀྱི་དབྱིངས། །རྣམ་དག་ཀློང་ལམ་ཆེན་པོ་དེར། །སངས་རྒྱས་སེམས་ཅན་ཁམས་གསུམ་ཀུན་བསྒྲལ་བས། །བྱང་ཆུབ་སེམས་ལ་དངོས་པོ་ཡུལ་མི་སྐྱེ། །རང་བྱུང་ཡེ་ཤེས་དེ་ལ་འགག་པ་མེད། །སྐྱེ་འགག་ཅིར་ཡང་ཏིང་འཛིན་དགོངས་པ་མེད། །སྟོན་པ་ཀུན་བཟང་བསྟན་པ་བྱང་ཆུབ་སེམས། །རྫོགས་ཆེན་དག་ལ་ལྷག་མ་མེད་པར་བསྟན། །བྱང་ཆུབ་སེམས་ནི་ཀུན་གྱི་སྙིང་པོ་སྟེ། །ཆོས་ཀུན་ལྷག་མ་མེད་པས་ཡོངས་སུ་རྫོགས། །གཉེན་པོ་མེད་པས་གཞན་གྱི་དབང་མི་འགྱུར། །འགྱུར་བ་མེད་པའི་རང་བཞིན་དྲང་པོར་གནས། །དཔེ་ནི་ནམ་མཁའ་བཞིན་ཏེ་ཀུན་ལ་ཁྱབ། །རྒྱུ་རྐྱེན་མེད་པས་གཞན་ལ་རག་མ་ལུས། །ཞེས་བསྟན། ཀུན་བཟང་རྡོ་རྗེ་ང་ཡི་འཁོར་འདུས་པས། །གང་ཞིག་སུ་ཡང་རུང་བ་དེ་ཡིས་ནི། །སེམས་ཉིད་སངས་རྒྱས་ཡིན་པར་གོ་བའོ། །རིག་པའི་ཡུལ་ན་སེམས་ཉིད་བདེ་བ་ཆེ། །གང་ཞིག་འདི་ལྟར་རིག་ཅིང་རྟོགས་པ་ནི། །རྣམ་པར་དག་པའི་འཇིག་རྟེན་ཡིན་པར་བཤད། །གང་སུས་རེག་ཅིང་རྟོགས་པ་དེ་ལ་ནི། །ཆོས་རྣམས་ཐམས་ཅད་རིག་པའི་འོད་འདུས་པས། །ཕྱོགས་བཞི་མཚམས་བརྒྱད་བླ་འོག་གྲུབ་པ་ནི། །སྣང་སྲིད་སེམས་ཅན་ལྷ་དང་སེམས་སུ་གྲུབ། །ཅེས་གསུངས་སོ། །ཕུན་སུམ་ཚོགས་པའི་མདོ་དང་དོན་གྱི་འགྲེལ་པ་རྫོགས་སོ།། །།དེ་ནས་སེམས་དཔའ་ཆེན་པོ་དེས། ཡོངས་སུ་འདུས་པའི་ཚོགས་ལ།རྫོགས་པ་ཆེན་པོའི་དོན་ཡོ་གར་འདུས་པའི་ཕྱིར། བྱེ་བྲག་འབྱེད་པའི་མདོ་འདི་གསུངས་
སོ། །ཀྱེ་འདུས་པའི་ཚོགས་ཆེན་ད་ཉོན་ཅིག །ཆོས་ཀུན་ཡོ་ག་བཞིར་འདུས་ཏེ། །ཡོ་གའི་མ་ཧཱ་ཡོ་ག་དང་། །ཨ་ནུ་ཨ་ཏི་ཡོ་ག་བཞིའོ། །རེ་རེ་ལ་ཡང་བཞི་བཞིར་དབྱེ། །དེ་ཡང་གང་དང་གང་ཞེ་ན། །ཡོ་ག་ཡི་ནི་ཡོ་ག་དང་། །ཡོ་གའི་མ་ཧཱ་ཡོ་ག་དང་། །ཡོ་གའི་ཨ་ནུ་ཡོ་ག་དང་། །ཡོ་གའི་ཨ་ཏི་ཡོ་ག་བཞིའོ། །མ་ཧཱ་ལ་ཡང་བཞིར་དབྱེ་སྟེ། །མ་ཧཱ་ཡོ་གའི་ཡོ་ག་དང་། །མ་ཧཱ་ཡོ་གའི་མ་ཧཱ་དང་། །མ་ཧཱ་ཡོ་གའི་ཨ་ནུ་དང་། །མ་ཧཱ་ཡོ་གའི་ཨ་ཏི་བཞིའོ། །ཨ་ནུ་ལ་ཡང་བཞིར་ཕྱེ་སྟེ། །ཨ་ནུ་ཡོ་གའི་ཡོ་ག་དང་། །ཨ་ནུ་ཡོ་གའི་མ་ཧཱ་དང་། །ཨ་ནུ་ཡོ་གའི་ཨ་ནུ་དང་། །ཨ་ནུ་ཡོ་གའི་ཨ་ཏི་བཞིའོ། །ཨ་ཏི་ལ་ཡང་བཞིར་དབྱེ་སྟེ། །ཨ་ཏི་ཡོ་གའི་ཡོ་ག་དང་། །ཨ་ཏི་ཡོ་གའི་མ་ཧཱ་དང་། །ཨ་ཏི་ཡོ་གའི་ཨ་ནུ་དང་། །ཨ་ཏི་ཡོ་གའི་ཨ་ཏི་བཞིའོ། །དེ་ཡང་གང་གིས་དབྱེ་ཞེ་ན། །ཡོ་ག་རྣམ་པ་རེ་རེ་ལ། །ཆེ་བ་རྣམ་པ་ལྔ་ལྔ་སྟེ། །ཆེ་བ་ཉི་ཤུར་ཕྱེ་བ་ནི། །ཡོ་ག་བཞི་ལས་ཕྱེ་བ་ཡིན། །དེ་ཡང་ཇི་ལྟར་བསྟན་ཞེ་ན། །སངས་རྒྱས་མེད་པའི་ཆེ་བ་བཞི། །ཡོ་ག་བཞི་ཡིས་ལ་བཟླའོ། །མངོན་པར་སངས་རྒྱས་ཆེ་བཞི་ནི། །ཡོ་ག་བཞི་ཡི་ཨ་ཏི་བཞི། །ཆོས་དབྱིངས་སངས་རྒྱས་ཆེ་བཞི་ནི། །ཡོ་ག་བཞི་ཡི་ཨ་ནུ་བཞི། །བདག་ཉིད་སངས་རྒྱས་ཆེ་བཞི་ནི། །ཡོ་ག་བཞི་ཡི་མ་ཧཱ་བཞི། །དེ་ཡིན་སངས་རྒྱས་ཆེ་བཞི་ནི། །ཡོ་ག་བཞི་ཡི་ཡོ་ག་བཞིའོ། །ཆེ་བ་རྣམ་ལྔ་སྤྱིར་བསྟན་ན། །བཞིས་ནི་རང་ཁར་འཛིན་པར་བྱེད། །སངས་རྒྱས་མེད་པའི་ཆེ་བཞི་ནི། །ཡོ་ག་བཞི་པོར་ལ་བཟླ་བའོ། །ཡོ་ག་བཞི་ཡི་བྱེ་བྲག་ནི། །ཨ་ཏི་ཡོ་གའི་ཨ་ཏི་ནི། །འདུས་མ་བྱས་ཀྱི་ཆོས་ཉིད་དེ། །སྐྱེ་བ་མེད་པའི་རང་བཞིན་གྱིས། །མཚན་མའི་ཡུལ་དང་བྲལ་བའོ། །ཨ་ཏི་ཡོ་གའི་ཨ་ནུ་ནི། །རང་བཞིན་མ་བཅོས་ཆོས་ཉིད་དེ། །སྒྲིབ་པ་མེད་པའི་རང་བཞིན་གྱིས། །དབྱིངས་དང་
ཡེ་ཤེས་རང་བྱུང་བའོ། །ཨ་ཏི་ཡོ་གའི་མ་ཧཱ་ནི། །འབྱུང་ཆེན་ལྔ་ཡི་ཆོས་ཉིད་དེ། །ཀུན་ལ་ཁྱབ་པའི་རང་བཞིན་ཏེ། །ཐབས་དང་ཤེས་རབ་རང་བྱུང་བའོ། །ཨ་ཏི་ཡོ་གའི་ཡོ་ག་ནི། །མ་བཙལ་གྲུབ་པའི་ཆོས་ཉིད་དེ། །ཟབ་མོ་རྟོགས་པའི་རང་བཞིན་གྱིས། །ཡུལ་དང་དབང་པོར་རང་བྱུང་བའོ། །ཨ་ཏི་ཡོ་གའི་ལ་བཟླས་ནི། །བརྗོད་དུ་མེད་པའི་ཆོས་ཉིད་དེ། །སྒྲོ་སྐུར་བྲལ་བའི་རང་བཞིན་གྱིས། །བདེ་བ་ཆེན་པོར་རང་བྱུང་བའོ། །ཨ་ནུ་ཡོ་གའི་ཨ་ཏི་ནི། །བྱང་ཆུབ་སེམས་ཀྱི་ཆོས་ཉིད་དེ། །རྒྱུ་རྐྱེན་བྲལ་བའི་རང་བཞིན་གྱིས། །གསང་བའི་ཡེ་ཤེས་རང་བྱུང་བའོ། །ཨ་ནུ་ཡོ་གའི་ཨ་ནུ་ནི། །དབྱིངས་དང་ཡེ་ཤེས་ཆོས་ཉིད་དེ། །ཐམས་ཅད་འབྱུང་བའི་རང་བཞིན་གྱིས། །ཆོས་ཀུན་ཡེ་ཤེས་རང་བྱུང་བའོ། །ཨ་ནུ་ཡོ་གའི་མ་ཧཱ་ནི། །ཐབས་དང་ཤེས་རབ་ཆོས་ཉིད་དེ། །འདུ་འབྲལ་མེད་པའི་རང་བཞིན་གྱིས། །གཉིས་མེད་བདེ་བ་རང་བྱུང་བའོ། །ཨ་ནུ་ཡོ་གའི་ཡོ་ག་ནི། །སེམས་ལ་རྫོགས་པའི་ཆོས་ཉིད་དེ། །བླང་དོར་མེད་པའི་རང་བཞིན་གྱིས། །ལུང་ཆེན་སྟོན་པར་རང་བྱུང་བའོ། །ཨ་ནུ་ཡོ་གའི་ལ་བཟླས་ནི། །འདུ་འབྲལ་མེད་པའི་ཆོས་ཉིད་དེ། །གཟུང་འཛིན་བྲལ་བའི་རང་བཞིན་གྱིས། །ཆོས་ཉིད་ཟབ་མོ་རང་བྱུང་བའོ། །མ་ཧཱ་ཡོ་གའི་ཨ་ཏི་ནི། །ཆགས་པ་མེད་པའི་ཆོས་ཉིད་དེ། །གཟུང་འཛིན་བྲལ་བའི་རང་བཞིན་གྱིས། །བདེ་བའི་ཡེ་ཤེས་རང་བྱུང་བའོ། །མ་ཧཱ་ཡོ་གའི་ཨ་ནུ་ནི། །དུས་གསུམ་གཅིག་པའི་ཆོས་ཉིད་དེ། །ཆོས་སྐུ་གཅིག་པའི་རང་བཞིན་གྱིས། །ཆེ་བའི་བདེ་བ་རང་བྱུང་བའོ། །མ་ཧཱ་ཡོ་གའི་མ་ཧཱ་ནི། །བླང་དོར་མེད་པའི་ཆོས་ཉིད་དེ། །མི་གཡོ་མི་བསྐྱོད་རང་བཞིན་གྱིས། །མཉམ་པའི་བདེ་བ་རང་བྱུང་བའོ། །མ་ཧཱ་ཡོ་གའི་ཡོ་ག་ནི། །གཅིག་ཏུ་འདས་པའི་ཆོས་ཉིད་དེ། །མ་བྱུང་མ་སྐྱེས་རང་བཞིན་གྱིས། །སྒྲོ་སྐུར་བྲལ་བར་རང་བྱུང་
བའོ། །མ་ཧཱ་ཡོ་གའི་ལ་བཟླས་ནི། །སྲིད་གསུམ་སངས་རྒྱས་ཆོས་ཉིད་དེ། །སྒྱུ་མར་སྣང་བའི་ཆོས་ཉིད་ཀྱིས། །ཆོས་ཉིད་དག་ཏུ་རང་བྱུང་བའོ། །ཡོ་གའི་ཨ་ཏི་ཡོ་ག་ནི། །མཚན་མ་མེད་པའི་ཆོས་ཉིད་དེ། །མཚན་མ་མེད་པའི་རང་བཞིན་གྱིས། །མི་རྟོག་འབྲས་བུ་རང་བྱུང་བའོ། །ཡོ་གའི་ཨ་ནུ་ཡོ་ག་ནི། །ཡོངས་སུ་རྫོགས་པའི་ཆོས་ཉིད་དེ། །ལྷུན་གྱིས་གྲུབ་པའི་ཆོས་ཉིད་ཀྱིས། །བདེ་ཆེན་ཆོས་ཉིད་རང་བྱུང་བའོ། །ཡོ་གའི་མ་ཧཱ་ཡོ་ག་ནི། །རྨད་དུ་བྱུང་བའི་ཆོས་ཉིད་དེ། །ནམ་མཁའ་ལྟ་བུའི་ཆོས་ཉིད་ཀྱིས། །རྨད་བྱུང་རོལ་པའི་རང་བྱུང་བའོ། །ཡོ་ག་ཉིད་ཀྱི་ཡོ་ག་ནི། །ཀུན་ཀྱང་སངས་རྒྱས་ཆོས་ཉིད་དེ། །སྙིང་པོ་གཅིག་པའི་རང་བཞིན་གྱིས། །རྣམ་པར་དག་པར་རང་བྱུང་བའོ། །ཡོ་ག་བཞི་ཡི་ལ་བཟླས་པ། །རྩོལ་དང་བྲལ་བའི་ཆོས་ཉིད་དེ། །བསྒྲུབ་ཏུ་མེད་པའི་རང་བཞིན་གྱིས། །སྒྱུ་མ་ལྷུན་གྲུབ་རང་བྱུང་བའོ། །ཞེས་གསུངས་སོ། །བྱེ་བྲག་འབྱེད་པའི་མདོ་ལས། ) ཡོ་ག་རྣམ་པ་བཞི་བྱེ་བྲག་ཏུ་འབྱེད་པའི་ལེའུའོ།། །།དེ་ནས་ཡང་སེམས་དཔའ་ཆེན་པོ་དེ་ཡིས། འདུས་པའི་ཚོགས་ལ་ཡོ་ག་རྣམ་པ་བཞིའི་དོན་མདོའི་འགྲེལ་པ་འདི་གསུངས་སོ། །ཀྱེ་འདུས་པའི་ཚོགས་ཆེན་ད་ཉོན་ཅིག །ཡང་ནི་ཡོ་ག་རྣམ་པ་བཞི་པོ་ལས། །རྫོགས་ཆེན་ཨ་ཏི་ཡོ་ག་ལ། །དོན་གྱི་འགྲེལ་པ་འདི་གསུངས་སོ། །རྫོགས་ཆེན་ཨ་ཏི་ཡོ་གའི་ཆོས་འདི་ནི། །ཡེ་ནས་ལྷུན་གྱིས་གྲུབ་པའི་ཆོས་ཉིད་དེ། །གཞན་ལ་རག་མ་ལས་པའི་བྱང་ཆུབ་སེམས། །དངོས་པོ་མཚན་མ་གང་ཡང་མཚུངས་མེད་པའི། །རྒྱུ་རྐྱེན་བྲལ་བའི་རང་བྱུང་ཡེ་ཤེས་ཀྱིས། །མངོན་དུ་གྱུར་པའི་མཐུ་ཡིན་རིག་པ་ལས། །བདེ་ཆེན་ཆོས་ནི་གཞན་ནས་འབྱུང་མི་འགྱུར། །ཞེས་བསྟན། རྫོགས་པ་ཨ་ནུ་ཡོ་གའི་ཆོས་ཉིད་ནི། །རྡོ་རྗེ་སྐྱེ་མེད་འབྱུང་བའི་ཆོས་ཉིད་དེ། །ནམ་མཁའི་རྟོག་པ་སྤྲིན་དང་ཁུ་རླངས་འདྲ། །རྟོག་པ་དེ་ལ་མཚན་མ་སྐྱེ་མེད་ཅིང་། །
སེམས་རྟོག་མཚན་མ་མེད་པ་དེ་ཉིད་ནི། །དུས་གསུམ་རྟོག་པ་སྐུ་གསུམ་ནམ་མཁའ་འདྲ། །འདོད་ཡོན་ལྔ་ལ་མི་ཆགས་ནམ་མཁར་བསྔོ། །ནམ་མཁའ་ཆག་མེད་ལྟ་བུར་བསྔོ་བའོ། །ཆོས་ཉིད་ནམ་མཁའ་ལྟ་བུར་ཀུན་བསམ་ན། །རང་དོན་ནམ་མཁའ་ལྟ་བུར་འབྱུང་བར་ངེས། །ཞེས་བྱ། བསྐྱེད་པ་མ་ཧཱ་ཡོ་གའི་ཆོས་ཉིད་ནི། །སེམས་ཀྱི་དཀྱིལ་ན་རྣམ་ཤེས་འཁོར་གྱིས་བསྐོར། །ལྷ་ཡི་སྐུ་ཡི་ཁྲོ་གཉེར་ཆ་ལུགས་བཞིན། །ཐམས་ཅད་འཇོམས་པའི་ཁྲོ་བོ་ཆེན་པོ་ཡིས། །གཙོ་བོར་ཁྲོ་བདག་ཅི་འདྲར་ལུས་བསྒོམས་ཏེ། །ཡང་ནས་ཡང་དུ་བསྒོམས་པས་མངོན་གྱུར་ནས། །བག་ཆགས་བརྟས་པའི་ཡི་གེ་མངོན་ཕྱུང་ནས། །མ་བཅོས་པ་ཡི་ཆོས་ཉིད་ཞི་བ་དེ། །དབང་པོའི་མངོན་སུམ་དག་གིས་མཐོང་བ་མིན། །ཞེས་སོ། །ཡོ་ག་ཕྱི་པའི་ཆོས་ཉིད་བསྟན་པ་ནི། །བྱང་ཆུབ་བསྒྲུབ་པའི་ཡན་ལག་བཅུ་གཅིག་དགུས། །ཀུན་གྱི་སྒོ་ནས་ཞུགས་ནས་བསྒོམ་པ་ཡང་། །སྐུ་མདོག་ཕྱག་མཚན་ཕྱག་རྒྱ་རྫོགས་པ་རུ། །སྐུ་ཡི་ཆ་ལུགས་ཡིད་ལ་ཏིང་འཛིན་བསྒོམ། །ཆུ་ཟླ་བཞིན་དུ་གསལ་བ་ཡིས། །གཟུང་འཛིན་མཚན་མ་དག་གིས་ཚུར་མ་གོས། །ཡེ་ཤེས་སེམས་དཔའ་དག་ལ་བདག་མ་ཆགས། །ཆགས་པ་མེད་པ་ཅི་ལྟར་འབྱུང་འགྱུར་ཡང་། །དཔེར་ན་བྱིས་པས་འདག་ཁང་བརྩེགས་པ་བཞིན། །ཡང་བསྒོམ་ཡང་བཤིག་འདག་ཁང་བཤིག་པ་འདྲ། །ཞེས་གསུངས་སོ། །བྱེ་བྲག་འབྱེད་པའི་མདོ་ལས། ཡོ་ག་རྣམ་པ་བཞིའི་དོན་གྱི་འགྲེལ་པ་བྱེ་བྲག་འབྱེད་པའི་མདོ་རྫོགས་སོ།། །།དེ་ནས་ཡང་སེམས་དཔའ་ཆེན་པོ་དེས། འདུས་པའི་ཚོགས་ལ་ཁྱད་པར་འཕགས་པའི་མདོ་འདི་བསྟན་ཏོ། །ཀྱེ་འདུས་པའི་ཚོགས་ཆེན་ད་ཉོན་ཅིག །ཁྱད་པར་འཕགས་པའི་དོན་འདི་ལས། །ཁྱད་པར་འཕགས་པའི་ཆེ་ལྔ་རུ། །ཆོས་རྣམས་ཐམས་ཅད་འདུས་པར་བཤད། །ཁྱད་པར་འཕགས་པའི་ཆེ་ལྔ་ནི། །མངོན་
པར་སངས་རྒྱས་ཆེ་བ་དང་། །ཆོས་དབྱིངས་སངས་རྒྱས་ཆེ་བ་དང་། །བདག་ཉིད་སངས་རྒྱས་ཆེ་བ་དང་། །དེ་ཡིན་སངས་རྒྱས་ཆེ་བ་དང་། །ཐམས་ཅད་སངས་རྒྱས་ཆེ་བའོ། །དེ་ཡང་ཇི་ལྟར་འཕགས་ཞེ་ན། །ཆེ་བ་ལྔ་ཡི་བྱང་ཆུབ་སེམས། །སེམས་ཉིད་ཆེ་བ་ལྔས་འཕགས་ཏེ། །མངོན་པར་སངས་རྒྱས་ཆེ་བ་ནི། །འདུས་མ་བྱས་པའི་བྱང་ཆུབ་སེམས། །སྣང་སྲིད་ཀུན་ལས་ཁྱད་པར་འཕགས། །ཨ་ཏི་ཡོ་གའི་ཆེ་བར་བཤད། །ཆོས་དབྱིངས་སངས་རྒྱས་ཆེ་བ་ནི། །ཐམས་ཅད་འབྱུང་བའི་བྱང་ཆུབ་སེམས། །འབྱུང་གནས་ཀུན་ལས་ཁྱད་པར་འཕགས། །ཨ་ནུ་ཡོ་གའི་ཆེ་བར་བཤད། །བདག་ཉིད་སངས་རྒྱས་ཆེ་བ་ནི། །ལྷུན་གྱིས་གྲུབ་པའི་བྱང་ཆུབ་སེམས། །རྩོལ་ཞིང་བསྒྲུབ་ལས་ཁྱད་པར་འཕགས། །མ་ཧཱ་ཡོ་གའི་ཆེ་བར་བཤད། །དེ་ཡིན་སངས་རྒྱས་ཆེ་བ་ནི། །མ་ནོར་བ་ཡི་བྱང་ཆུབ་སེམས། །གཏན་ཚིགས་ཀུན་ལས་ཁྱད་པར་འཕགས། །ཡོ་ག་དག་གིས་ཆེ་བར་བཤད། །ཐམས་ཅད་སངས་རྒྱས་ཆེ་བ་ནི། །སྒྲོ་སྐུར་འདས་པའི་བྱང་ཆུབ་སེམས། །བསམ་སྦྱོར་ཀུན་ལས་ཁྱད་པར་འཕགས། །ལ་ཟློས་པ་ཡི་ཆེ་བར་བཤད། །ཁྱད་པར་འཕགས་པ་རྣམ་པ་ལྔ། །ཆེ་བ་རྣམ་པ་ལྔ་བསྟན་ཏེ། །སྟོན་པ་བསྟན་པ་འཁོར་གནས་དུས། །ཕུན་སུམ་ཚོགས་པ་རྣམ་པ་ལྔས། །སྐྱེ་འགག་མེད་པའི་ཁྱད་པར་གྱིས། །སྣང་སྲིད་ཀུན་ལས་ཁྱད་པར་འཕགས། །མངོན་པར་སངས་རྒྱས་ཡིན་པར་བཤད། །བྱང་ཆུབ་སེམས་དཔའི་འབྱུང་ཆེན་ལྔ། །ནམ་མཁའ་ས་ཆུ་མེ་རླུང་སེམས། །ཐམས་ཅད་འབྱུང་བའི་རང་བཞིན་གྱིས། །འབྱུང་གནས་ཀུན་ལས་ཁྱད་པར་འཕགས། །ཆོས་དབྱིངས་སངས་རྒྱས་ཡིན་པར་བཤད། །བདག་ཉིད་སངས་རྒྱས་ཆེ་བ་ནི། །ཕུང་པོ་འབྱུང་བའི་རྣམ་ཤེས་ཡུལ། །རང་ལས་བྱུང་བའི་ཆོས་ཡིན་ཏེ། །གཞན་ལ་མི་ལྟོས་རང་བཞིན་གྱིས། །རྩོལ་བསྒྲུབ་ཀུན་ལས་ཁྱད་པར་འཕགས། །བདག་ཉིད་སངས་རྒྱས་ཆེ་བར་བཤད། །
དེ་ཡིན་སངས་རྒྱས་ཆེ་བ་ནི། །དཔེ་དང་དོན་དང་རྟགས་དང་ནི། །ངེས་པ་དང་ནི་གཏན་ཚིགས་ལྔས། །མ་ནོར་བ་ཡི་རང་བཞིན་གྱིས། །གཏན་ཚིགས་ཀུན་ལས་ཁྱད་པར་འཕགས། །དེ་ཡིན་སངས་རྒྱས་ཆེ་བར་བཤད། །ཐམས་ཅད་སངས་རྒྱས་ཆེ་བ་ནི། །འདུས་མ་བྱས་དང་དམིགས་སུ་མེད། །བསམ་དུ་མེད་དང་སྤྲོས་དང་བྲལ། །མཚོན་དུ་མེད་པའི་བྱང་ཆུབ་སེམས། །གཟུང་འཛིན་བྲལ་བའི་རང་བཞིན་གྱིས། །བསམ་སྤྱོད་ཀུན་ལས་ཁྱད་པར་འཕགས། །ཐམས་ཅད་སངས་རྒྱས་ཆེ་བར་བཤད། །མངོན་པར་སངས་རྒྱས་ཆེ་བ་ནི། །ཕུན་སུམ་ཚོགས་པ་རྣམ་ལྔ་སྟེ། །སྟོན་པ་ཀུན་ཏུ་བཟང་པོ་ནི། །སངས་རྒྱས་ཀུན་གྱི་སྤྱི་མེས་པོ། །བླང་དོར་མེད་པའི་རང་བཞིན་གྱིས། །སྟོན་པ་ཀུན་ལས་ཁྱད་པར་འཕགས། །དེས་ན་མངོན་པར་ཆེ་བར་བཤད། །སྡུད་པ་སེམས་དཔའ་ཆེན་པོ་ནི། །སངས་རྒྱས་སེམས་ཅན་འཁོར་རྣམས་ལ། །སྐྱེ་འཇིག་མེད་པས་ཁྱད་པར་འཁོར། །སྡུད་པ་ཀུན་ལས་ཁྱད་པར་འཕགས། །འཁོར་དེ་མངོན་པར་ཆེ་བར་བཤད། །བསྟན་པ་བལྟ་བ་རྫོགས་ཆེན་འདི། །ཆོས་ཉིད་ཀུན་གྱི་སྙིང་པོ་སྟེ། །ཐམས་ཅད་ཀུན་གྱི་རང་བཞིན་གྱིས། །ཐེག་པ་ཀུན་ལས་ཁྱད་པར་འཕགས། །དེས་ན་བསྟན་པ་མངོན་པར་ཆེ། །དུས་ནི་དུས་གསུམ་ཁྱད་པར་གཅིག །དུས་ལ་སྐྱེ་འཇིག་མེད་པས་ན། །གཅིག་ཏུ་གསལ་བའི་རང་བཞིན་གྱིས། །སྔ་ཕྱི་ཀུན་ལས་ཁྱད་པར་འཕགས། །དུས་དེ་མངོན་པར་ཆེ་བ་བཤད། །ཡངས་པ་ཆོས་དབྱིངས་ཀུན་བཟང་གནས། །ཐམས་ཅད་འདུས་པའི་གནས་ཆེན་དེ། །མཐའ་དབུས་མེད་པའི་རང་བཞིན་གྱིས། །བཞུགས་གནས་ཀུན་ལས་ཁྱད་པར་འཕགས། །གནས་དེ་མངོན་པར་ཆེ་བ་བཤད། །དེས་ན་ཕུན་སུམ་ཚོགས་པ་ལྔས། །མངོན་པར་སངས་རྒྱས་ཆེ་བར་བཤད། །ཆོས་དབྱིངས་སངས་རྒྱས་ཆེ་བ་ནི། །བྱང་ཆུབ་སེམས་ལྔ་འབྱུང་བ་ཆེན་པོ་ལྔ། །ཆོས་
ཉིད་ལྔ་རུ་སངས་རྒྱས་ཏེ། །ནམ་མཁའ་སྣང་བྱེད་ཁྱབ་པའི་དབྱིངས། །མ་བསྒྲིབས་པ་ཡི་བྱང་ཆུབ་སེམས། །སྒྲིབ་པ་མེད་པའི་ཁྱད་པར་གྱིས། །ཀུན་ལ་ཁྱབ་པའི་བདག་ཉིད་དོ། །ས་ནི་སྲ་བྱེད་རྡོ་རྗེ་དབྱིངས། །སྐྱེ་བ་མེད་པའི་བྱང་ཆུབ་སེམས། །འཇིག་པ་མེད་པའི་ཁྱད་པར་གྱིས། །འགྱུར་བ་མེད་པའི་ཆོས་ཉིད་དོ། །ཆུ་ནི་རིན་ཆེན་གཏེར་གྱི་དབྱིངས། །ཐམས་ཅད་སྣུམ་པའི་བྱང་ཆུབ་སེམས། །ཐམས་ཅད་སྡུད་པའི་ཁྱད་པར་གྱིས། །འབྱེད་པར་བྱེད་པའི་ཆོས་ཉིད་དོ། །མེ་ནི་རྣམ་དག་པདྨའི་དབྱིངས། །གཟུང་འཛིན་དག་པའི་བྱང་ཆུབ་སེམས། །རྣམ་པར་དག་པའི་རང་བཞིན་གྱིས། །སྐྱོན་དང་བྲལ་བའི་ཆོས་ཉིད་དོ། །རླུང་ནི་བརྩོན་འགྲུས་ཡངས་པའི་དབྱིངས། །ཐོགས་པ་མེད་པའི་བྱང་ཆུབ་སེམས། །ཡང་ཞིང་གཡོ་བའི་ཁྱད་པར་གྱིས། །འགག་པ་མེད་པའི་ཆོས་ཉིད་དོ། །ས་ཆུ་མེ་རླུང་ནམ་མཁའ་ལྔས། །ཐམས་ཅད་སྐྱེད་པར་བྱེད་པས་ན། །འབྱུང་གནས་ཀུན་ལས་ཁྱད་པར་འཕགས། །དེས་ན་ཆོས་དབྱིངས་ཆེ་བར་བསྟན། །བདག་ཉིད་སངས་རྒྱས་ཆེ་བ་ནི། །བདག་ཉིད་ལྔ་རུ་ཤེས་པར་བྱ། །ཕུང་པོ་འབྱུང་བ་རྣམ་ཤེས་ཡུལ། །རང་ལས་འབྱུང་བའི་ཆོས་ཡིན་ཏེ། །རྩོལ་བསྒྲུབ་འདས་ཏེ་རང་ལ་རྫོགས། །འབྱུང་བ་ལྔ་ཡི་སངས་རྒྱས་ནི། །ཆོས་ཉིད་རང་གི་བྱང་ཆུབ་སེམས། །གཟུང་འཛིན་བྲལ་བའི་ཁྱད་པར་གྱིས། །བཙལ་དུ་མེད་པའི་བདག་ཉིད་ཆེ། །ཕུང་པོ་ལྔ་ནི་རིགས་ལྔ་རུ། །རྩོལ་བསྒྲུབ་འདས་ཏེ་རང་ལ་རྫོགས། །ལྷུན་གྱིས་གྲུབ་པའི་ཁྱད་པར་གྱིས། །བཙལ་དུ་མེད་པའི་བདག་ཉིད་ཆེ། །རྣམ་ཤེས་བརྒྱད་ནི་སེམས་དཔའ་རུ། །རྩོལ་བསྒྲུབ་འདས་ཏེ་རང་ལ་རྫོགས། །སེམས་སུ་འདུས་པ་དམ་པ་སྟེ། །བཙལ་དུ་མེད་པའི་ཁྱད་པར་གྱིས། །བསྒྲུབ་ཏུ་མེད་པས་བདག་ཉིད་ཆེ། །རྣམ་ཤེས་བརྒྱད་ཀྱི་ཡུལ་བརྒྱད་ནི། །སེམས་མ་བརྒྱད་དུ་རང་ལ་རྫོགས། །རྟོག་དང་བྲལ་བའི་ཁྱད་པར་གྱིས། །སྦྱང་དུ་
མེད་པས་བདག་ཉིད་ཆེ། །རང་ལས་བྱུང་བའི་ཆོས་རྣམས་ནི། །དམིགས་པ་མེད་པའི་བྱང་ཆུབ་སེམས། །མི་དམིགས་པ་ཡིས་ཁྱད་པར་གྱིས། །བགྲོད་དུ་མེད་པའི་བདག་ཉིད་ཆེ། །དེས་ན་བདག་ཉིད་ཆེ་བར་བཤད། །དེ་ཡིན་སངས་རྒྱས་ཆེ་བ་ནི། །དཔེ་དང་དོན་དང་རྟགས་དང་ནི། །ངེས་པ་དང་ནི་གཏན་ཚིགས་ལྔ། །ཁྱད་པར་ལྔ་ཡི་ཡིན་པ་ལྔའོ། །ཆོས་རྣམས་ཐམས་ཅད་མ་ལུས་པའི། །དཔེ་ནི་ནམ་མཁའ་ཡིན་པ་སྟེ། །ནམ་མཁའ་སྤྱོད་ཡུལ་ཀུན་ལས་འདས། །མཚོན་དུ་མེད་པའི་ཁྱད་པར་གྱིས། །ནམ་མཁའི་དཔེ་ནི་ཁྱད་པར་ཆེ། །དོན་ནི་ཆོས་ཉིད་ཡིན་པ་སྟེ། །ཆོས་ཉིད་དོན་ནི་སྐྱེ་མེད་ལས། །སྐྱེ་བའི་ཆོ་འཕྲུལ་སངས་རྒྱས་ཀྱི། །དོན་ནི་ཆོས་ཉིད་དེ་ཡིན་ཏེ། །རྟགས་ནི་སེམས་ཉིད་འགག་མེད་ཡིན། །འགག་པ་མེད་པའི་བྱང་ཆུབ་སེམས། །མི་འགག་པ་ཡིས་ཁྱད་པར་གྱིས། །རྟགས་ནི་ཆེ་བ་ཡིན་པར་བཤད། །ངེས་པ་དག་ལ་རྣམ་པ་གསུམ། །དཔེ་ནི་ནམ་མཁའ་ཡིན་པར་ངེས། །དོན་ནི་ཆོས་ཉིད་ཡིན་པར་ངེས། །རྟགས་ནི་སེམས་ཉིད་ཡིན་པར་ངེས། །ངེས་པ་དག་གིས་ཆེ་བར་བཤད། །གཏན་ཚིགས་དག་གིས་ཆེ་བ་ནི། །རྣམ་པ་ལྔ་རུ་ཤེས་པར་བྱ། །ཕུན་སུམ་ཚོགས་པ་རྣམ་པ་ལྔ། །མངོན་པར་ཆེ་བའི་གཏན་ཚིགས་སོ། །འབྱུང་ཆེན་ལྔ་དང་བྱང་ཆུབ་སེམས། །ཆོས་ཉིད་ཆེ་བའི་གཏན་ཚིགས་སོ། །ཕུང་པོ་འབྱུང་བ་རྣམ་ཤེས་ཡུལ། །གཞན་ལ་རག་མ་ལས་པ་ཡིན། །བདག་ཉིད་ཆེ་བའི་གཏན་ཚིགས་སོ། །དཔེ་དོན་རྟགས་དང་ངེས་པ་ནི། །ཡིན་པ་དག་གིས་གཏན་ཚིགས་སོ། །བསམ་མེད་དམིགས་མེད་སྤྲོས་པ་མེད། །འདུས་མ་བྱས་པས་མཚོན་མེད་པས། །ཐམས་ཅད་སངས་རྒྱས་གཏན་ཚིགས་སོ། །གཏན་ཚིགས་ཆེ་བ་ཡིན་པར་བཤད། །ཐམས་ཅད་སངས་རྒྱས་ཆེ་བ་ཡང་། །བསམ་མེད་དམིགས་མེད་སྤྲོས་པ་མེད། །མཚོན་དུ་
མེད་དང་འདུས་པ་མེད། །རྣམ་པ་ལྔ་རུ་ཤེས་པར་བྱ། །ཆོས་ཉིད་བྱང་ཆུབ་སེམས་དེ་ལ། །གཟུང་འཛིན་མེད་པས་བསམ་དུ་མེད། །བསམ་མེད་ཁྱད་པར་འཕགས་ཏེ་ཆེ། །ཆོས་ཉིད་བྱང་ཆུབ་སེམས་དེ་ལ། །ཡུལ་མ་མཆིས་པས་དམིགས་སུ་མེད། །དམིགས་མེད་ཁྱད་པར་འཕགས་ཏེ་མཆི། །ཆོས་ཉིད་བྱང་ཆུབ་སེམས་དེ་ལ། །མཚན་མ་མེད་པས་སྤྲོས་པ་མེད། །སྤྲོས་མེད་ཁྱད་པར་འཕགས་ཏེ་ཆེ། །ཆོས་ཉིད་བྱང་ཆུབ་སེམས་དེ་ལ། །དཔེ་མ་མཆིས་པས་མཚོན་དུ་མེད། །མཚོན་མེད་ཁྱད་པར་འཕགས་ཏེ་ཆེ། །ཆོས་ཉིད་བྱང་ཆུབ་སེམས་དེ་ལ། །གཉིས་སུ་མེད་པས་འདུས་བྱས་མེད། །འདུས་མེད་ཁྱད་པར་འཕགས་ཏེ་མཆི། །ཐམས་ཅད་སངས་རྒྱས་ཆེ་བར་བཤད། །ཅེས་གསུངས་སོ། །ཁྱད་པར་འཕགས་པའི་མདོ་ལས། ཁྱད་པར་འཕགས་པའི་ཆེ་བ་ལྔ་བསྟན་པའི་མདོའོ།། །།དེ་ནས་ཡང་འདུས་པའི་ཚོགས་ལ། ཁྱད་པར་དུ་འཕགས་པའི་མདོའི་འགྲེལ་པ་འདི་བསྟན་ཏེ། ཀྱེ་འདུས་པའི་ཚོགས་ཆེན་ད་ཉོན་ཅིག །རྡོ་རྗེ་སེམས་དཔའ་མངོན་པར་སངས་རྒྱས་ཆེ། །སེམས་ཀྱིས་ཀུན་ལ་ཁྱབ་པས་བྱམས་པའི་ས། །ཆོས་ཉིད་སྐྱེ་བ་མེད་པར་སྦྱངས་པའི་ཕྱིར། །ཐུགས་རྗེའི་རང་བཞིན་ཆོས་ཉིད་སྟོན་པའི་བཀའ། །འགྲོ་ལ་དམིགས་ནས་ཐུགས་རྗེས་དོན་མི་མཛད། །རང་བྱུང་ཡེ་ཤེས་གཉེན་པོ་མེད་པས་ཆེ། །ཆེ་བའི་ཟབ་མོ་གཟུང་འཛིན་བྲལ་བས་ཟབ། །ཟབ་མོ་དམིགས་སུ་མེད་པ་དེ་ལ་ནི། །སྐྱོན་ལ་དོར་དུ་མེད་ལ་ཡོན་ཏན་བསྔགས་སུ་མེད། །ཅེས་བྱ། རྡོ་རྗེ་སེམས་དཔའ་ཆོས་ཉིད་བྱང་ཆུབ་སེམས། །བྱང་ཆུབ་སེམས་ཀྱི་སྐུ་གསུང་ཐུགས། །སྙིང་པོ་བྱང་ཆུབ་སེམས་ཀྱི་ལམ་ལས་བྱུང་། །དུས་གསུམ་སངས་རྒྱས་ཁམས་གསུམ་སེམས་ཅན་ཀུན། །འདོད་པའི་ཡོན་ཏན་ལྔ་ལ་ཀུན་སྤྱོད་ཀྱང་། །སངས་རྒྱས་སྐུ་དང་ཡེ་ཤེས་ལྔ་རུ་སྤྱོད། །སེམས་ཅན་ཆགས་སྡང་ལྔ་ལ་རང་ཁར་སྤྱོད། །ཆོས་ཉིད་
དབྱིངས་ཀྱི་རྒྱན་ནི་འདོད་ཡོན་ལྔ། །བྱང་ཆུབ་སེམས་ཀྱི་རྒྱན་དུ་སེམས་དཔས་གསུངས། །དེས་ན་ཆོས་ཉིད་དབྱིངས་ཀྱི་ཆེ་བར་བཤད། །བྱང་ཆུབ་སེམས་ཀྱི་རང་བཞིན་བདག་ཉིད་ཆེ། །སངས་རྒྱས་སེམས་ཅན་མཐོ་རིས་ངན་སོང་གང་། །གང་གི་ལས་དང་གང་གི་གནས་སྐྱེས་ནས། །རྒྱུད་དྲུག་འཁོར་ཞིང་ལས་དྲུག་སྤྱོད་པ་ནི། །བདག་ཉིད་བྱང་ཆུབ་སེམས་ལས་འབྱུང་བར་ངེས། །ཀུན་གྱི་སྙིང་པོ་བྱང་ཆུབ་སེམས་འདི་ལ། །འདི་ནི་སྐྱེས་པ་ཡིན་ལ་འདི་ནི་བུད་མེད་ཅེས། །ཀུན་བྱེད་མཉམ་པའི་རྒྱལ་པོས་ཡོངས་མ་གསུངས། །དེས་ན་བདག་ཉིད་ཆེན་པོ་ཡིན་པར་བཤད། །བྱང་ཆུབ་སེམས་འདི་ཡིན་པའི་ཆེ་བ་སྟེ། །སྒྲོ་སྐུར་འདས་པའི་ཆོས་ཉིད་བྱང་ཆུབ་སེམས། །བརྗོད་མེད་གླེང་བྲལ་འདི་ལ་གནས་པ་ཡིས། །མ་བཅོས་ཆོས་ཉིད་རྟོགས་པའི་རྣལ་འབྱོར་དེ། །ལས་དང་ཐུགས་རྗེ་འདུས་པས་སྐལ་བ་བཟང་། །གླེང་བྲལ་བརྗོད་མེད་དོན་ལ་གནས་པ་ཡིས། །སྐྱེ་བ་མེད་པས་བདག་དོན་བྱ་མི་དགོས། །བརྗོད་དུ་མེད་པས་གཞན་དོན་མི་བྱེད་ཅིང་། །ཆོས་ཉིད་སྒྱུ་མ་མ་བཙལ་ལྷུན་གྲུབ་པས། །རང་བཞིན་གནས་པའི་ཆོས་ཉིད་ཡུལ་ལ་རོལ། །དེས་ན་དེ་ཡིན་ཆེ་བའི་གཏན་ཚིགས་སོ། །སངས་རྒྱས་ཞེས་བྱ་མེད་པའི་ཆེ་བ་ནི། །དུས་གསུམ་སངས་རྒྱས་ཁམས་གསུམ་སེམས་ཅན་ལ། །མ་བསྟན་མཆོག་ཏུ་གསང་བའི་བྱང་ཆུབ་སེམས། །བདེ་གཤེགས་ཡེ་ཤེས་སྙན་གྱིས་སྔར་མ་གསན། །སེམས་ཅན་རྣ་བའི་དབང་པོས་སྔར་མ་ཐོས། །དེ་བཞིན་སྟོན་པའི་ལྗགས་ཀྱི་དབང་པོས་ཀྱང་། །བདེར་གཤེགས་རྣམས་ལ་གསུང་གིས་བསྒྲགས་པ་མེད། །དེ་བཞིན་གང་ཟག་ལྕེ་ཡི་དབང་པོས་ཀྱང་། །སེམས་ཅན་རྣམས་ལ་ཚིག་ཏུ་བརྗོད་པ་མེད། །དེས་ན་སངས་རྒྱས་མེད་པའི་ཆེ་བར་བཤད། །ཅེས་གསུངས་སོ། །ཁྱད་པར་འཕགས་པའི་མདོ་ལས། དོན་གྱི་འགྲེལ་པ་བསྟན་པ་སྟེ་ཁྱད་པར་འཕགས་པའི་མདོ་རྫོགས་སོ།། །།
དེ་ནས་ཡང་སེམས་དཔའ་ཆེན་པོ་དེས། །འདུས་པའི་འཁོར་ཚོགས་རྣམས་ཀྱིས། །རྫོགས་པ་ཆེན་པོའི་དོན་མ་ཐོས་པ་རྣམས་ཀྱིས་སྐྱོན་ཡོན་བསལ་བའི་ཕྱིར། གོལ་སྒྲིབ་བསྟན་པའི་མདོ་འདི་གསུངས་སོ། །ཀྱེ་འདུས་པའི་ཚོགས་ཆེན་ད་ཉོན་ཅིག །ངེས་པ་ཐོབ་པའི་ཐེག་པ་དྲུག །རྫོགས་པ་ཆེན་པོའི་གོལ་ས་སྟེ། །རྫོགས་ཆེན་ངེས་ཐོབ་སྒྲིབ་པར་བཤད། །མདོ་སྡེ་དང་ནི་ཀྲི་ཡཱ་དང་། །ཨུ་པ་ཡ་དང་ཡོ་ག་དང་། །མ་ཧཱ་ཡོ་ག་ཨ་ནུ་དྲུག །རྫོགས་པ་ཆེན་པོའི་གོལ་ས་སྟེ། །དེ་ཡང་ཇི་ལྟར་གོལ་ཞེ་ན། །མདོ་སྡེ་བྱང་ཆུབ་སེམས་དཔའ་ནི། །ཀུན་ཏུ་འོད་ཀྱི་ས་འདོད་པས། །བདེན་པ་གཉིས་ཀྱིས་རྟོག་དཔྱོད་པས། །ཆོས་ཉིད་སྟོང་པ་ནམ་མཁར་རྟོགས། །ཨ་ཏི་ཡོ་གའི་བདེ་ཆེན་ནི། །རྟོག་དཔྱོད་འདས་པའི་བྱང་ཆུབ་སེམས། །རྟོག་དཔྱོད་འདས་ལ་མདོ་སྡེས་བསྒྲིབས། །རྫོགས་ཆེན་རྟོག་དང་དཔྱོད་པ་ནི། །མདོ་སྡེ་དག་ཏུ་གོལ་བར་བཤད། །ཀྲི་ཡཱ་རྡོ་རྗེ་འཛིན་འདོད་པ། །དག་པ་རྣམ་གསུམ་སྒོར་ཞུགས་ནས། །ཆོས་ཉིད་དག་པ་འཛིན་པ་སྟེ། །གཟུང་འཛིན་དག་པའི་ཡུལ་ལ་གནས། །ཨ་ཏི་ཡོ་གའི་བདེ་ཆེན་ནི། །གཟུང་འཛིན་འདས་པའི་བྱང་ཆུབ་སེམས། །གཟུང་འཛིན་འདས་ལ་ཀྲི་ཡཱས་བསྒྲིབས། །རྫོགས་ཆེན་གཟུང་དང་འཛིན་བྱེད་པ། །ཀྲི་ཡཱ་དག་ཏུ་གོལ་བར་བཤད། །ཨུ་པ་ཡ་ཡི་ལྟ་སྤྱོད་ནི། །ཀྲི་ཡཱ་སྤྱོད་ཅིང་ཡོ་ག་བསྒྲུབ། །ལྟ་སྤྱོད་འདྲེལ་བའི་དོན་མེད་པས། །གཉིས་སུ་མེད་པའི་དོན་མ་རྟོགས། །ཨ་ཏི་ཡོ་གའི་བདེ་ཆེན་ནི། །གཉིས་སུ་མེད་པའི་བྱང་ཆུབ་སེམས། །གཉིས་སུ་མེད་ལ་ཨུ་པས་བསྒྲིབས། །རྫོགས་ཆེན་གཉིས་སུ་འབྱེད་པ་ནི། །ཨུ་པ་ཡ་རུ་གོལ་བར་བཤད། །ཡོ་ག་སྟུག་པོ་བཀོད་འདོད་པས། །མཚན་མ་ཡོད་མེད་སྒོར་ཞུགས་ནས། །ཕྱག་རྒྱ་བཞི་ལ་གཙོར་བྱེད་པ། །བླང་དོར་མེད་ལ་འཇུག་མ་ནུས། །ཨ་ཏི་ཡོ་གའི་བདེ་ཆེན་ནི། །བླང་དོར་མེད་པའི་བྱང་ཆུབ་སེམས། །བླང་དོར་མེད་ལ་ཡོ་གས་བསྒྲིབས། །
རྫོགས་ཆེན་བླང་དང་དོར་བྱེད་པ། །ཡོ་ག་དག་ཏུ་གོལ་བར་བཤད། །མ་ཧཱ་རྡོ་རྗེ་འཆང་འདོད་པ། །ཏིང་འཛིན་རྣམ་གསུམ་སྒོར་ཞུགས་ནས། །རང་རྒྱུད་དག་པའི་དཀྱིལ་འཁོར་ལ། །བསྙེན་བསྒྲུབ་རྣམ་བཞིས་སྒྲུབ་པར་བྱེད། །ཨ་ཏི་ཡོ་གའི་བདེ་ཆེན་ནི། །རྩོལ་བསྒྲུབ་འདས་པའི་བྱང་ཆུབ་སེམས། །རྩོལ་བསྒྲུབ་འདས་ལ་མ་ཧཱས་བསྒྲིབས། །རྫོགས་ཆེན་རྩོལ་སྒྲུབ་བྱེད་པ་ནི། །མ་ཧཱ་ཡོ་གར་གོལ་བར་བཤད། །ཨ་ནུ་དབྱེར་མེད་ས་འདོད་པས། །དབྱིངས་དང་ཡེ་ཤེས་སྒོར་ཞུགས་ནས། །རྒྱུ་ནི་དག་པའི་དབྱིངས་སུ་བལྟ། །འབྲས་བུ་ཡེ་ཤེས་དཀྱིལ་འཁོར་བལྟ། །ཨ་ཏི་ཡོ་གའི་བྱང་ཆུབ་སེམས། །རྒྱུ་འབྲས་དག་པའི་བྱང་ཆུབ་སེམས། །རྒྱུ་འབྲས་འདས་ལ་ཨ་ནུས་བསྒྲིབས། །རྫོགས་ཆེན་རྒྱུ་འབྲས་གཉིས་བལྟ་ན། །ཨ་ནུ་ཡོ་གར་གོལ་བར་བཤད། །ཐེག་པ་དག་གི་གོལ་སྒྲིབ་བོ། །ཐེག་པ་གཅིག་གི་ལྟ་བ་ལ། །གོལ་ས་སྒྲིབ་པ་བཅུ་ཡོད་དེ། །བལྟ་བ་དག་གི་གོལ་སྒྲིབ་དང་། །དམ་ཚིག་དག་གི་གོལ་སྒྲིབ་དང་། །ཕྲིན་ལས་དག་གི་གོལ་སྒྲིབ་དང་། །ཡེ་ཤེས་དག་གི་གོལ་སྒྲིབ་དང་། །ས་དང་ཕ་རོལ་གོལ་སྒྲིབ་དང་། །ལམ་ལ་གནས་པའི་གོལ་སྒྲིབ་དང་། །ཕྲ་བ་དག་གི་གོལ་སྒྲིབ་དང་། །རྒྱུད་ཀྱི་གོལ་ས་སྒྲིབ་པ་དང་། །ལུང་གི་གོལ་ས་སྒྲིབ་པ་དང་། །མན་ངག་གོལ་ས་སྒྲིབ་པ་བཅུའོ། །དེ་ཡང་གང་དང་གང་ཞེ་ན། །བལྟ་བ་དག་གི་རང་བཞིན་ནི། །བསྒོམ་དུ་མེད་དེ་སངས་རྒྱས་བལྟ། །བསྒོམ་མེད་སངས་རྒྱས་མ་རིག་ན། །བལྟ་བ་དག་གིས་སྒྲིབ་པར་བཤད། །ཡེ་ནས་སངས་རྒྱས་ཡིན་པ་ལ། །སངས་རྒྱས་ཡིན་པར་མི་བལྟ་སྟེ། །བསྒོམས་ནས་སངས་རྒྱས་བལྟ་བ་ནི། །བལྟ་བ་དག་གི་གོལ་ས་ཡིན། །དམ་ཚིག་དག་ནི་བསྲུང་དུ་མེད། །བསྲུང་དུ་མེད་པའི་དམ་ཚིག་ལ། །བསྲུང་དུ་མེད་པར་མ་རིག་ན། །དམ་ཚིག་སྒྲིབ་པ་ཡིན་པར་བཤད། །བསྲུང་དུ་མེད་པའི་དམ་ཚིག་ལ། །བསྲུང་དུ་མེད་
པར་མ་ཤེས་ན། །ཕྱོགས་མཚམས་དམ་ཚིག་བསྲུང་བ་ནི། །དམ་ཚིག་གོལ་ས་ཡིན་པར་བཤད། །ཕྲིན་ལས་རང་བཞིན་བཙལ་དུ་མེད་པ་ལ། །རྩོལ་བསྒྲུབ་འདས་པའི་ཕྲིན་ལས་ལ། །བཙལ་དུ་མེད་པར་མ་རིག་ན། །ཕྲིན་ལས་སྒྲིབ་པ་ཡིན་པར་བཤད། །བཙལ་དུ་མེད་པའི་རང་བཞིན་ལ། །བཙལ་དུ་མེད་པར་མ་རྟོགས་ཏེ། །ཕྲིན་ལས་རྩོལ་བར་བྱེད་པ་ནི། །ཕྲིན་ལས་གོལ་ས་ཡིན་པར་བཤད། །ཡེ་ཤེས་དག་གི་རང་བཞིན་ནི། །ཡེ་ནས་སྒྲིབ་པ་མེད་པར་གསལ། །ཡེ་ནས་སྒྲིབ་པ་མེད་པ་ལ། །སྒྲིབ་པ་མེད་པར་མ་རིག་ན། །ཡེ་ཤེས་དག་གི་སྒྲིབ་པར་བཤད། །སྒྲིབ་པ་མེད་པའི་ཡེ་ཤེས་ལ། །སྒྲིབ་པ་མེད་པར་མ་རྟོགས་ཏེ། །མི་བསྐྱོད་གསལ་བར་མ་ཤེས་ན། །ཡེ་ཤེས་ཆེན་པོ་གོལ་སར་བཤད། །ས་དང་ཕ་རོལ་རང་བཞིན་ནི། །སྦྱངས་ཤིང་བགྲོད་དུ་མེད་པ་ཡིན། །སྦྱང་བགྲོད་མེད་པར་མ་རིག་ན། །ས་དང་ཕ་རོལ་སྒྲིབ་པར་བཤད། །སྦྱང་བགྲོད་མི་དགོས་ས་ལམ་ལ། །སྦྱང་བགྲོད་མི་དགོས་མ་རྟོགས་ཏེ། །སྦྱངས་ཤིང་བགྲོད་པར་བྱེད་པ་ནི། །ས་དང་ཕ་རོལ་གོལ་སར་བཤད། །ཕྲ་བ་དག་གི་རང་བཞིན་ནི། །གཟུང་འཛིན་བྲལ་བའི་ཆོས་ཉིད་ཡིན། །གཟུང་འཛིན་བྲལ་བར་མ་རིག་ན། །ཕྲ་བ་དག་གི་སྒྲིབ་པར་བཤད། །གཟུང་འཛིན་བྲལ་བའི་ཕྲ་བ་ལ། །གཟུང་འཛིན་བྲལ་བར་མ་རིག་སྟེ། །ཕྲ་བ་རྡུལ་དུ་ཡོད་བལྟ་ན། །ཕྲ་བའི་གོལ་ས་ཡིན་པར་བཤད། །རྒྱུད་ཀྱི་རང་བཞིན་བསྟན་པ་ནི། །སེམས་ཆོས་གཉིས་སུ་མེད་པར་འདྲེལ། །གཉིས་མེད་འདྲེལ་བར་མ་རིག་ན། །རྒྱུད་ཀྱི་སྒྲིབ་པ་ཡིན་པར་བཤད། །གཉིས་སུ་མེད་པའི་འདྲེལ་བ་ལ། །གཉིས་མེད་འདྲེལ་བར་མ་རྟོགས་ཏེ། །སེམས་ཆོས་གཉིས་སུ་མཐོང་བ་ནི། །རྒྱུད་ཀྱི་གོལ་ས་ཡིན་པར་བཤད། །ལུང་གི་རང་བཞིན་བསྟན་པ་ནི། །གཏན་ལ་འབེབས་ཤིང་ངེས་པར་བསྟན། །གཏན་ལ་འབེབས་པར་མ་ཤེས་ན། །ལུང་གི་སྒྲིབ་པ་ཡིན་པར་བཤད། །གཏན་ལ་འབེབས་པའི་ལུང་དེ་ལ། །ཐོག་ཏུ་འབེབས་
པར་མ་རྟོགས་ཏེ། །གཏན་ལ་མི་འབེབས་ཟེར་བ་ནི། །ལུང་གི་གོལ་ས་ཡིན་པར་བཤད། །མན་ངག་རང་བཞིན་བསྟན་པ་ནི། །སྤྲོས་པ་མེད་པར་ལ་བཟླའ་བའོ། །སྤྲོས་པ་མེད་པར་མ་རིག་ན། །མན་ངག་གི་ནི་སྒྲིབ་པར་བཤད། །སྒྲོ་སྐུར་བྲལ་བའི་མན་ངག་ལ། །སྤྲོས་པ་མེད་པར་མ་རྟོགས་ཏེ། །སྒྲོ་སྐུར་ཡོད་པར་འདོགས་པ་ནི། །མན་ངག་དག་གི་གོལ་སར་བཤད། །གོལ་ས་སྒྲིབ་པ་སུམ་ཅུ་འི། །ཡོ་ག་བཞི་ཡི་རང་བཞིན་ལ། །གོང་འོག་བལྟ་བའི་ཁྱད་པར་གྱིས། །གོལ་སྒྲིབ་སུམ་ཅུ་བྱུང་བ་ཡིན། །སྒྲིབ་པ་སྒྲིབ་པ་ཞེས་བྱ་བ། །རིག་ཤེས་བྱ་བའི་ཡུལ་དེ་ལ། །མ་རིག་མ་ཤེས་མ་རྟོགས་པས། །སྒྲིབ་པ་སྒྲིབ་པ་ཞེས་སུ་བཤད། །གོལ་ས་གོལ་ས་ཞེས་བྱ་བ། །དཔེར་ན་དོན་ཡོད་ལམ་ཞུགས་པས། །ཤར་གྱི་དོན་ཡོད་ནུབ་ལམ་ཕྱིན། །ནུབ་ཕྱིན་ཤར་གྱི་དོན་མི་འགྲུབ། །སྤྲོས་པ་མེད་པའི་དོན་བཤོར་བས། །མཚན་མ་དག་གི་ལམ་ལ་བགྲོད། །སྒྲོ་སྐུར་བྲལ་བའི་ཆོས་ཉིད་ལ། །ཚིག་དང་ཡི་གེ་བརྗོད་པས་གོལ། །བརྗོད་ཡོད་རྟོག་པ་སྒྲིབ་པ་ཡིན། །སྣང་བ་དང་ནི་སྲིད་པའི་ཆོས། །སྣང་སྲིད་རྒྱུད་དྲུག་དབང་པོ་ལ། །སེམས་འཐད་ཡཱ་ན་རིམ་པ་དགུ། །མི་མཐུན་བལྟ་སྤྱོད་སོ་སོར་བཤད། །དེས་ན་གོལ་ས་སྒྲིབ་པ་བྱུང་། །ཆོས་ཉིད་ཇི་བཞིན་བྱང་ཆུབ་སེམས། །བྱང་ཆུབ་སེམས་ཀྱི་ཐེག་པ་ལ། །གཅིག་དང་གཉིས་སུ་བགྲང་དུ་མེད། །བགྲངས་ན་མཐའ་ཡས་བརྗོད་མི་ལངས། །ཐེག་གཅིག་བྱང་ཆུབ་སྙིང་པོ་ལ། །བཟང་ངན་བླང་དོར་མ་མཆིས་པས། །གོལ་ས་སྒྲིབ་པ་དབྱེར་མ་མཆིས། །བདེ་དང་སྡུག་བསྔལ་དབྱེར་མ་མཆིས། །སྒྲོ་སྐུར་བྲལ་བའི་སྙིང་པོ་སེམས། །གོལ་སྒྲིབ་ཉིད་ནི་བྱང་ཆུབ་ལུང་། །ཐམས་ཅད་ལུང་ནི་བྱང་ཆུབ་སེམས། །སེམས་ཀྱི་ལུང་ལ་ཐམས་ཅད་བསྟན། །སེམས་ཀྱི་རང་བཞིན་རྣམ་བཞི་པོ། །རྣལ་འབྱོར་རྣམ་པ་བཞིར་བསྟན་
ཏེ། །སེམས་ཉིད་རྫོགས་པ་ཆེན་པོ་ནི། །ཤིན་ཏུ་རྣལ་འབྱོར་དོན་དུ་བསྟན། །སེམས་ཉིད་རྫོགས་པའི་རང་བཞིན་ནི། །ཡོངས་སུ་རྣལ་འབྱོར་དོན་དུ་བསྟན། །སེམས་ཉིད་བསྐྱེད་པའི་རྣམ་པ་ནི། །རྣལ་འབྱོར་ཆེན་པོའི་དོན་དུ་བསྟན། །སེམས་ཉིད་ཕྱི་ནང་རིམ་པ་དེ་ཕྱི་པའི་རྣམ་པ་དེ། །སེམས་པའི་རྣལ་འབྱོར་དོན་དུ་བསྟན། །རྣལ་འབྱོར་རྣམ་བཞིའི་དོན་དེ་ལ། །གཅིག་ལའང་གོལ་སྒྲིབ་བཅུ་ཡོད་དེ། །བལྟ་བ་དང་ནི་དམ་ཚིག་དང་། །ཕྲིན་ལས་དང་ནི་ཡེ་ཤེས་དང་། །ས་དང་ལམ་གྱི་རིམ་པ་དང་། །ཕྲ་བ་དང་ནི་རྒྱུད་དང་ནི། །ལུང་དང་མན་ངག་རྣམ་པ་བཅུའོ། །རེ་རེ་ལ་ཡང་བཅུ་བཅུ་སྟེ། །གོལ་ས་སྒྲིབ་པ་གཉིས་ཡོད་པས། །གོལ་ས་བཅུ་ཕྲག་བཞི་བསྟན་ལ། །སྒྲིབ་པ་བཅུ་ཚན་རྣམ་པ་གསུམ། །རྫོགས་ཆེན་ཤིན་ཏུ་རྣལ་འབྱོར་ལ། །སྒྲིབ་པ་ཡོད་པར་ངས་མ་གསུངས། །རྣལ་འབྱོར་རྣམ་པ་གསུམ་པོ་ལ། །གོལ་ས་སྒྲིབ་པ་གཉིས་གཉིས་ཡོད། །དེས་ན་བལྟ་བའི་གོལ་སྒྲིབ་ནི། །བདུན་ཅུ་ཐམ་པར་བགྲང་བར་བྱ། །རྫོགས་ཆེན་ཤིན་ཏུ་རྣལ་འབྱོར་ལ། །སྒྲིབ་པ་དག་གིས་ཡོངས་མ་གོས། །རྣལ་འབྱོར་རྣམ་པ་དྲུག་པོ་ཡིས། །སེམས་ཉིད་རྫོགས་ཆེན་སྒོར་བལྟས་པས། །སྒྲིབ་པ་དང་ནི་གོལ་ས་བྱུང་། །སྟོན་པའི་ལུང་ལ་གོལ་སྒྲིབ་མེད། །གང་ཟག་བློ་ལ་གོལ་སྒྲིབ་བྱུང་། །སེམས་ཀྱི་རང་བཞིན་འདི་ལྟ་སྟེ། །ལུང་ཆེན་རྣམ་པ་བཅུར་སྣང་སྟེ། །རྫོགས་ཆེན་ཤིན་ཏུ་རྣལ་འབྱོར་གྱི། །ལྟ་བ་བསྒོམ་དུ་མེད་པ་ཡིན། །དམ་ཚིག་བསྲུང་དུ་མེད་པ་ཡིན། །ཕྲིན་ལས་བཙལ་དུ་མེད་པ་ཡིན། །ཡེ་ཤེས་སྒྲིབ་པ་མེད་པ་ཡིན། །ས་ལ་སྦྱང་དུ་མེད་པ་ཡིན། །ལམ་ལ་བགྲོད་དུ་མེད་པ་ཡིན། །ཕྲ་བ་གཟུང་འཛིན་བྲལ་བ་ཡིན། །རྒྱུད་ཀྱི་རང་བཞིན་འདྲེལ་བ་ཡིན། །ལུང་གི་རང་བཞིན་ཐོག་ཏུ་འབེབས། །མན་ངག་དག་གིས་ལ་ཡང་བཟླའོ། །རྫོགས་ཆེན་ཤིན་ཏུ་རྣལ་འབྱོར་གྱི། །རང་བཞིན་བཅུ་ནི་དེ་ལྟར་རོ། །རྫོགས་པ་ཡོངས་སུ་རྣལ་འབྱོར་གྱིས། །རང་བཞིན་བཅུ་བཅུ་འདི་ལྟ་སྟེ། །
རྒྱུ་ནི་དག་པའི་དབྱིངས་ལ་བལྟ། །འབྲས་བུ་ཡེ་ཤེས་དཀྱིལ་འཁོར་བལྟ། །དམ་ཚིག་དག་གི་རང་བཞིན་ཏེ། །ཆོས་ཡུལ་སྙིང་རྗེ་སྐུ་གསུང་ཐུགས། །སྦྱོར་བ་རྣམ་པ་བཞི་རུ་བསྐྲུན། །ཕྲིན་ལས་དག་གི་རང་བཞིན་ནི། །ཞི་རྒྱས་དབང་དང་མངོན་སྤྱོད་བཞི། །ཡེ་ཤེས་དག་གི་རང་བཞིན་ནི། །གཉིས་སུ་མེད་པའི་རང་བཞིན་ཡིན། །ས་ཡི་རང་བཞིན་བསྟན་པ་ནི། །ཀུན་བཟང་དབྱེ་བ་མེད་པའི་ས། །ལམ་གྱི་རང་བཞིན་བསྟན་པ་ནི། །དབྱིངས་དང་ཡེ་ཤེས་གཉིས་མེད་ལམ། །ཕྲ་བ་དག་ཟབ་མོའི་ཡང་གི་རང་བཞིན་ནི། །སྣང་ལ་རང་བཞིན་མེད་པ་ཡིན། །འདྲེལ་བ་རྒྱུད་ཀྱི་རང་བཞིན་དེ། །རྒྱུ་དང་འབྲས་བུ་གཉིས་མེད་འདྲེལ། །ལུང་གི་རང་བཞིན་བསྟན་པ་ནི། །དབྱིངས་ནི་རྒྱུ་ཡི་ལུང་ཡིན་པས། །ཡེ་ཤེས་འབྲས་བུའི་ལུང་དུ་བསྟན། །མན་ངག་དག་གི་རང་བཞིན་ནི། །རྒྱུ་ནི་དབྱིངས་སུ་དག་པར་བཟླས། །འབྲས་བུ་ཡེ་ཤེས་ལ་ཡང་བཟླས། །རྣལ་འབྱོར་ཆེན་པོ་བསྐྱེད་པ་ཡི། །རང་བཞིན་བཅུ་ནི་འདི་ལྟ་སྟེ། །ལྟ་བ་དག་གི་རང་བཞིན་ནི། །རང་རྒྱུད་དག་པའི་ངོ་བོ་དེ། །བདག་ཉིད་ཆེན་པོའི་དཀྱིལ་འཁོར་ལྷ། །དམ་ཚིག་དག་གི་རང་བཞིན་ནི། །རྩ་བ་གསུམ་དང་ཡན་ལག་ལྔ། །ཕྲིན་ལས་དག་གི་རང་བཞིན་ནི། །ཏ་ན་དང་ནི་གྷ་ན་དང་། །དམ་རྫས་ལྔ་ལ་སྤྱོད་པར་བྱེད། །ཡེ་ཤེས་དག་གི་རང་བཞིན་ནི། །དུག་ལྔ་གནས་དག་ཡེ་ཤེས་ལྔ། །ས་ཡི་རང་བཞིན་བསྟན་པ་ནི། །ལུས་དང་ངག་དང་ཡིད་དང་གསུམ། །སྐུ་གསུམ་རྡོ་རྗེ་འཆང་གི་ས། །ལམ་གྱི་རང་བཞིན་བསྟན་པ་ནི། །ཐབས་དང་ཤེས་རབ་ལམ་བསྒོམ་དང་། །ཏིང་འཛིན་རྣམ་གསུམ་སྐུ་གསུམ་ལམ། །ཕྲ་བ་ཆོས་ཀྱི་རང་བཞིན་ནི། །ཐབས་དང་ཤེས་རབ་མ་སྐྱེས་པས། །སྐྱེ་བ་མེད་པའི་ཕྲ་བར་བཤད། །འདྲེལ་བའི་རང་བཞིན་བསྟན་པ་ནི། །ཡབ་ཡུམ་ཐབས་དང་ཤེས་རབ་གཉིས། །བདག་ཉིད་ཆེན་པོའི་གཟུངས་ཀྱིས་འདྲེལ། །ལུང་ཆེན་ཐོག་
ཏུ་འབེབས་པ་ནི། །ཕུང་པོ་ལྔ་དང་འབྱུང་བ་ལྔ། །ཁམས་དང་སྐྱེ་མཆེད་སེམས་ཆོས་རྣམས། །བདག་ཉིད་ཆེན་པོར་ཐོག་ཏུ་འབེབས། །ལ་ཟློ་བ་ཡི་མན་ངག་ནི། །སྣང་ཞིང་སྲིད་པའི་ཆོས་རྣམས་ནི། །བདག་ཡིན་གཞན་དུ་རག་མ་ལུས། །ལྟོས་པ་མ་མཆིས་ལ་བཟླའ་འོ། །ཡཱ་ན་སེམས་དཔའི་རྣལ་འབྱོར་གྱིས། །རང་བཞིན་བཅུ་ནི་འདི་ལྟ་སྟེ། །བལྟ་བ་དག་གི་རང་བཞིན་ནི། །བྱིན་རླབས་དག་ལས་བྱུང་བ་ཡིན། །ཆོས་ལ་མཚན་མ་མེད་པར་བལྟ། །རང་དང་འདྲ་བའི་ལྷ་ཉིད་དོ། །དམ་ཚིག་དག་གི་རང་བཞིན་ནི། །རྩ་བ་བདུན་དང་དགེ་སྡིག་བཅུ། །སྤང་ཞིང་དང་དུ་བླང་བར་བྱེད། །ཕྲིན་ལས་དག་གི་རང་བཞིན་ནི། །སེམས་དང་ཏིང་འཛིན་ལས་ལ་སྤྱོད། །ཡེ་ཤེས་དག་གི་རང་བཞིན་ནི། །རིགས་ཆེན་དག་གི་ཡེ་ཤེས་བཞི། །ས་ཡི་རང་བཞིན་བསྟན་པ་ནི། །ཆོས་དབྱིངས་སྟུག་པོ་བཀོད་པ་ཡིན། །བགྲོད་པ་ལམ་གྱི་རང་བཞིན་ནི། །མཚན་མ་མེད་པའི་ལམ་དུ་འཇུག །ཕྲ་བ་ཆོས་ཀྱི་ཟབ་མོ་ནི། །མཚན་མ་མེད་པའི་ཆོས་ཀྱི་དབྱིངས། །འདྲེལ་བ་རྒྱུན་གྱི་རང་བཞིན་ནི། །ཡུལ་དང་དབང་པོ་གཉིས་སུ་འདྲེལ། །ལུང་ཆེན་ཐོག་ཏུ་འབེབས་པ་ནི། །ཆགས་པ་མེད་པར་ཐོག་ཏུ་འབེབས། །མན་ངག་དག་གི་ལ་ཟློ་བ། །ཆུ་ཟླ་ལྟ་བུའི་རང་བཞིན་དུ། །གཟུང་དུ་མེད་པར་ལ་བཟླའ་བའོ། །ཡང་ན་གཉིས་ཀ་རྒྱུད་འདི་ལ། །རང་བཞིན་བཅུ་ནི་འདི་ལྟ་སྟེ། །བལྟ་བ་དག་གི་རང་བཞིན་ནི། །དམིགས་པ་དག་གི་ཏིང་འཛིན་གྱིས། །རང་བཞིན་ཆོས་ལ་ལྷར་བྱས་ནས། །ལྷ་དཔོན་བདག་གཡོག་ལྟ་བར་བྱེད། །དམ་ཚིག་དག་གི་རང་བཞིན་ནི། །རྩ་བ་བདུན་ནི་ཡན་ལག་སྟེ། །ཉམས་པ་མེད་པར་སྲུང་བར་བྱེད། །ཕྲིན་ལས་དག་གི་རང་བཞིན་ནི། །ལས་སུ་ཁྲུས་དང་མཆོད་པ་བྱེད། །ཡེ་ཤེས་དག་གི་རང་བཞིན་ནི། །རིགས་བཞི་ཕྱག་རྒྱ་བཞི་རུ་གསལ། །ས་ཡི་རང་བཞིན་བསྟན་པ་ནི། །ལྟ་སྤྱོད་སོ་
སོར་སྤྱོད་པ་ཡིས། །དེ་བགྲོད་ལམ་གྱི་རང་བཞིན་ནི། །དག་པ་གསུམ་གྱིས་ལམ་ལ་བགྲོད། །ཕྲ་བ་ཆོས་ཀྱི་རང་བཞིན་ནི། །རྣམ་པར་མི་རྟོག་སྟོང་པས་ཕྲ། །འདྲེལ་བ་རྒྱུད་ཀྱི་རང་བཞིན་ནི། །གཉིས་ཀ་སྤྱོད་ཀྱིས་འདྲེལ་བ་ལས། །གཉིས་སུ་མེད་པར་འདྲེལ་བ་མེད། །ཐོག་ཏུ་འབེབས་པའི་ལུང་ཆེན་ནི། །ངེས་པ་མེད་པར་བསྟན་པ་ཡིན། །ལ་བཟླའ་བ་ཡི་མན་ངག་ནི། །འདི་སྤྱོད་ངེས་པ་མ་མཆིས་པས། །སེམས་དཔའ་ང་ཡིས་ལུང་མ་བསྟན། །བྱ་བ་ཀྲི་ཡཱའི་ཡཱ་ན་ནི། །རང་བཞིན་བཅུ་ནི་འདི་ལྟ་སྟེ། །ལྟ་བ་དག་གི་རང་བཞིན་ནི། །རྣམ་པར་མི་རྟོག་ཏིང་འཛིན་གྱིས། །དམིགས་གསུམ་ཡན་ལག་བཞི་བལྟ་སྟེ། །རྗེ་དང་ཁོལ་དུ་ལྟ་བར་བྱེད། །དམ་ཚིག་དག་གི་རང་བཞིན་ནི། །རྩ་བ་ལྔ་དང་ཡན་ལག་དྲུག །མི་ཉམས་བསྲུང་བའི་དམ་ཚིག་གོ། །ཕྲིན་ལས་དག་གི་རང་བཞིན་ནི། །དུས་སུ་ཁྲུས་དང་གཙང་སྦྲ་སྤྱོད། །ཡེ་ཤེས་རང་བཞིན་བསྟན་པ་ནི། །སོ་སོར་རྟོག་པའི་རང་བཞིན་ནི། །རིགས་གསུམ་སོ་སོར་འབྱེད་པར་བྱེད། །ས་ཡི་རང་བཞིན་བསྟན་པ་ནི། །ཐུགས་ནི་ཡེ་ཤེས་བཞི་ལྡན་པའི། །ཏིང་འཛིན་རྡོ་རྗེ་འཛིན་པའི་ས། །ལམ་གྱི་རང་བཞིན་བསྟན་པ་ནི། །གཟའ་སྐར་དུས་ཚིགས་བཟང་སྒོ་ནས། །དག་པ་རྣམ་གསུམ་ལམ་དུ་བལྟ། །ཕྲ་བ་ཆོས་ཀྱི་རང་བཞིན་ནི། །ཆོས་ཉིད་རྣམ་པར་མི་རྟོག་པ། །གཟུང་འཛིན་ཤིན་ཏུ་ཕྲ་བར་བལྟ། །འདྲེལ་བ་རྒྱུད་ཀྱི་རང་བཞིན་ནི། །ཡན་ལག་བཅུ་གཅིག་རིམ་པར་འདྲེལ། །ལུང་ཆེན་ཐོག་ཏུ་འབེབས་པ་ནི། །ཏིང་འཛིན་གཟུང་འཛིན་བྱེད་པ་ཡིས། །ཐོག་ཏུ་འབེབས་པ་ངས་མ་བསྟན། །ལ་ཟློ་བ་ཡི་མན་ངག་ནི། །ཆོས་དང་གཟུང་འཛིན་ས་ཕྱེད་པས། །ཏིང་འཛིན་རྟོག་པས་ལ་ཡང་ཟློས། །མཚན་ཉིད་བྱང་ཆུབ་སེམས་དཔའ་ཡི། །རང་བཞིན་བཅུ་ནི་འདི་ལྟ་སྟེ། །ལྟ་བའི་རང་བཞིན་བསྟན་པ་ནི། །བདེན་པ་གཉིས་ཀྱི་རྟོག་དཔྱོད་
ཀྱིས། །ཆོས་ཀྱི་རང་བཞིན་སྟོང་པར་བལྟ། །དམ་ཚིག་རང་བཞིན་སྡོམ་པ་སྟེ། །སྤྱོད་ལ་འཇུག་དང་སྡོམ་པ་ནི། །གྲངས་མཐའ་ཡས་ཏེ་རྒྱ་མཚོ་འདྲ། །སྤྱོད་པའི་ཕྲིན་ལས་བསྟན་པ་ནི། །ཕ་རོལ་ཕྱིན་པ་བཅུ་ལ་སྤྱོད། །ཡེ་ཤེས་རང་བཞིན་བསྟན་པ་ནི། །བརྒྱད་ཁྲི་བཞི་སྟོང་རྣམ་གྲངས་ཀྱང་། །ཐམས་ཅད་མཁྱེན་པའི་ཡེ་ཤེས་སོ། །ས་ཡི་རང་བཞིན་བསྟན་པ་ནི། དང་པོ་ས་དང་རིམ་པ་བཅུ། །ཀུན་ཏུ་འོད་ཀྱི་ས་ལ་གནས། །ལམ་གྱི་རང་བཞིན་ངེས་འབྱུང་བ། །ཚོགས་དང་སྦྱོར་བ་མཐོང་བ་དང་། །ས་བཅུའི་བསྒོམ་པ་མཐར་ཕྱིན་ལྔའོ། །ཆོས་ཀྱི་རང་བཞིན་ཕྲ་བ་ནི། །ཆོས་སྐུ་གཟུང་འཛིན་བྲལ་བར་འཛིན། །འདྲེལ་བའི་རང་བཞིན་བསྟན་པ་ནི། །ལས་དང་ཐུགས་རྗེ་བདེན་གཉིས་འདྲེལ། །ལུང་ཆེན་ཐོག་ཏུ་འབེབས་པ་ནི། །དོན་དམ་ཀུན་རྫོབ་བདེན་པས་འབེབས། །མན་ངག་དག་གིས་ལ་བཟླ་རུ། །འབྲས་བུ་ལམ་གྱི་སྒོར་མ་ཞུགས། །སྤང་གཞི་འགེག་པ་རྣམ་གཉིས་ལ། །རང་བཞིན་འདི་བཅུའི་མིང་མ་བསྟན། །ངེས་ཐོབ་མིང་གྲགས་རྣམ་གསུམ་ནི། །རྣལ་འབྱོར་བཞི་ཡི་གོལ་སར་བསྟན། །རྣལ་འབྱོར་བཞི་ཡི་རིམ་པ་ལ། །ལ་ལ་གོལ་ས་གྲངས་མང་ལ། །ལ་ལ་སྒྲིབ་པ་གྲངས་མང་ལ། །ལ་ལ་གོལ་སྒྲིབ་གྲངས་སུ་མཉམ། །ཡོ་ག་བཞི་ཡི་རྣལ་འབྱོར་ལ། །གོལ་སྒྲིབ་གྲངས་སུ་བསྟན་པ་ཡིན། །གོལ་ས་བརྒྱ་དང་བརྒྱད་ཅུ་ལ། །སྒྲིབ་པ་བཅུ་པ་དྲུག་ཏུ་དབྱེ། །རང་བཞིན་བཅུ་ཡི་གོལ་སྒྲིབ་ནི། །རྣལ་འབྱོར་བཞི་ལས་ཕྱེ་བ་ནི། །ཉིས་བརྒྱ་བཞི་བཅུ་གྲངས་སུ་འབྱུང་། །ཡང་ན་བདུན་གྱིས་ཕྱེ་བའི་ཚེ། །རང་བཞིན་རྣམ་པ་བཅུ་པོ་ལ། །བཞི་བརྒྱ་དང་ནི་བཅུ་ཚན་གཉིས། །རང་བཞིན་བཅུ་པོའི་ངོ་བོ་ནི། །སྙིང་པོ་བྱང་ཆུབ་སེམས་ཡིན་ཏེ། །ཡང་ན་བདུན་གྱི་གོ་སྐབས་སུ། །རང་གི་རང་བཞིན་མ་ཤེས་ན། །སྒྲིབ་པ་སྒྲིབ་པ་ཞེས་སུ་བཤད། །རང་གི་རང་བཞིན་མ་ཤེས་ནས། །འོག་མ་འོག་མ་ཡིན་སྨྲ་ན། །གོལ་ས་གོལ་ས་ཞེས་སུ་བཤད། །རང་བཞིན་བཅུ་ཡི་རང་བཞིན་ནི། །སྙིང་པོ་བྱང་ཆུབ་སེམས་ཡིན་ཏེ། །སྙིང་པོ་
བྱང་ཆུབ་རང་བཞིན་ལ། །གཞན་དུ་བལྟ་བའི་ཡུལ་མེད་པས། །ལྟ་བ་བསྒོམ་དུ་མེད་པ་ཡིན། །སྙིང་པོ་བྱང་ཆུབ་སེམས་དེ་ལ། །གཟུང་འཛིན་མེད་པའི་རང་བཞིན་གྱིས། །དམ་ཚིག་བསྲུང་དུ་མེད་པ་ཡིན། །སྙིང་པོ་བྱང་ཆུབ་སེམས་འདི་ནི། །ལྷུན་གྱིས་གྲུབ་པའི་རང་བཞིན་གྱིས། །ཕྲིན་ལས་བཙལ་དུ་མེད་པ་ཡིན། །སྙིང་པོ་བྱང་ཆུབ་སེམས་འདི་ལ། །སྒྲིབ་པ་མེད་པའི་རང་བཞིན་གྱིས། །ཡེ་ནས་རང་བྱུང་ཡེ་ཤེས་ཡིན། །སྙིང་པོ་བྱང་ཆུབ་སེམས་འདི་ལ། །ཐམས་ཅད་འདི་ལ་གནས་པའི་ཕྱིར། །ས་ཞེས་བྱ་བ་སྦྱང་དུ་མེད། །སྙིང་པོ་བྱང་ཆུབ་སེམས་འདི་ལ། །གཞན་དུ་བགྲོད་དུ་མེད་པའི་ཕྱིར། །ལམ་ལ་བགྲོད་དུ་མེད་པ་ཡིན། །སྙིང་པོ་བྱང་ཆུབ་སེམས་འདི་ནི། །ཡེ་ནས་ཆོས་ཉིད་ཡིན་པའི་ཕྱིར། །ཕྲ་བ་དག་གི་རང་བཞིན་ཡིན། །སྙིང་པོ་བྱང་ཆུབ་སེམས་འདི་ལ། །སངས་རྒྱས་སེམས་ཅན་གཉིས་སྣང་བ། །འདྲེལ་བ་རྒྱུད་ཀྱི་རང་བཞིན་ཡིན། །རང་བྱུང་ཡེ་ཤེས་སྙིང་པོ་འདིས། །ཆོས་ཀུན་གཏན་ལ་འབེབས་པའི་ཕྱིར། །ལུང་གི་ཐོག་ཏུ་འབེབས་པ་ཡིན། །རང་བྱུང་ཡེ་ཤེས་སྙིང་པོ་འདི། །སྒྲོ་སྐུར་ཀུན་དང་བྲལ་བའི་ཕྱིར། །ལ་ཟློ་བ་ཡི་མན་ངག་ཡིན། །བྱང་ཆུབ་སེམས་ཀྱི་རང་བཞིན་འདི། །ཡེ་ནས་རང་བྱུང་ཡེ་ཤེས་སྐུ། །ཡེ་ནས་ཀུན་བཟང་ཡེ་ཤེས་སྐུ། །ཡེ་ནས་སྐྱེ་མེད་རྡོ་རྗེའི་སྐུ། །སྐུ་ཚད་འདས་པས་བྱང་ཆུབ་སེམས། །འདས་པ་ཀུན་གྱི་སྙིང་པོ་ལ། །རང་བཞིན་མ་བཅོས་བཅུ་བགྲངས་པ། །བགྲངས་པ་མ་ཡིན་ངོ་བོར་གཅིག །ངོ་བོ་གཅིག་ལ་རང་བཞིན་བཅུ། །བྱང་ཆུབ་སེམས་ཀྱི་ཆེ་བར་བགྲངས། །ཡོན་ཏན་བཅུ་རུ་སྣང་མོད་ཀྱི། །སྙིང་པོ་བྱང་ཆུབ་སེམས་འདི་ལ། །དུས་གསུམ་བཞུགས་པའི་སངས་རྒྱས་ཀྱིས། །སྔ་རབས་འདས་པས་སྔར་མ་བགྲངས། །ད་ལྟར་བཞུགས་པས་བགྲང་མི་བྱེད། །སླད་ཀྱིས་བྱོན་པའི་སངས་རྒྱས་རྣམས། །སེམས་ཉིད་འདི་ལ་བགྲང་མི་བྱེད། །
བགྲང་མེད་སེམས་ཀྱི་རང་བཞིན་ལ། །གཅིག་སྟེ་རྣམ་པ་བགྲང་དུ་མེད། །བགྲང་དུ་མེད་པའི་སྙིང་པོ་ལ། གོལ་ས་སྒྲིབ་པ་གཉིས་མེད་དེ། །སེམས་ལ་བགྲང་དུ་མེད་པའོ། །རང་བཞིན་བཅུ་རུ་བགྲངས་པ་ནི། །སེམས་ཀྱི་ཆ་ཡི་བྱེ་བྲག་སྟེ། །སེམས་ཅན་བློ་ལ་སྣང་བས་བགྲང་། །སེམས་ལ་བགྲངས་པས་གོལ་སྒྲིབ་འབྱུང་། །བགྲང་དུ་མེད་ལ་གོལ་སྒྲིབ་མེད། །བགྲངས་ཏེ་མ་ཤེས་གོལ་སྒྲིབ་ཡིན། །བགྲང་ཡོད་མཐོང་བའི་གོལ་སྒྲིབ་ཡིན། །སེམས་གཅིག་བྱང་ཆུབ་སྙིང་པོ་ལ། །བལྟ་བའི་ཁྱད་པར་དགུ་བགྲངས་ནོར། །དམ་ཚིག་ཕྱོགས་མཚམས་བསྲུངས་པས་ཉམས། །ཕྲིན་ལས་བཙལ་བས་གྲུབ་པ་མེད། །ཡེ་ཤེས་བལྟས་པས་ཡུལ་མ་མཐོང་། །ས་ཞེས་སྦྱངས་པས་གནས་མ་རྙེད། །བགྲོད་པའི་ལམ་ལ་ཕྱིན་པ་མེད། །ཕྲ་བ་གཟུང་འཛིན་ཆོས་ཉིད་བྲལ། །འདྲེལ་བ་གཅིག་ལ་གཉིས་སུ་མཐོང་། །ལུང་ཆེན་རྒྱུད་ལས་འབྱུང་འདོད་པས། །དེ་ལུང་ངེས་པར་ཡོད་མ་ཡིན། །ལ་ཟློ་བ་ཡི་མན་ངག་འདིར། །ཚིག་དང་ཡི་གེ་སྒྲོ་སྐུར་བཏགས། །གདགས་སུ་མེད་ལ་མིང་བཏགས་པས། །མིང་བཏགས་ཡོད་པའི་སྒྲོས་བྱུང་ལ། །མེད་ཅེས་བརྗོད་པ་སྐུར་པ་བཏབ། །ཡོད་མེད་བརྗོད་པས་བསྒྲིབས་ཤིང་གོལ། །མེད་ཅེས་དོན་ལ་བསྒྲིབས་པ་ཡིན། །ཡོད་ཅེས་གང་དུ་བརྗོད་པ་དེས། །བརྗོད་ཡོད་ཚིག་དང་ཡི་གེར་གོལ། །དེས་ན་སྒྲོ་སྐུར་གོལ་སྒྲིབ་འདི། །ཡོད་རྟོག་གང་ཟག་བློ་ལ་སྣང་། །རྟོག་འདས་ཏིང་འཛིན་བསམ་བྲལ་ལ། །གོལ་སྒྲིབ་ཡོད་པར་ངས་མ་གསུངས། །ཞེས་གོལ་སྒྲིབ་བསྟན་པའི་མདོ་བསྟན་པའོ།། །།དེ་ནས་སེམས་དཔའ་རྡོ་རྗེ་དེས། འདུས་པའི་ཚོགས་ལ་གོལ་སྒྲིབ་བསྟན་པའི་དོན་གྱི་འགྲེལ་པ་འདི་གསུངས་སོ། །ཀྱེ་འདུས་པའི་ཚོགས་ཆེན་ད་ཉོན་ཅིག །རྫོགས་པ་ཆེན་པོའི་རྣལ་འབྱོར་ལམ་འདི་ལ། །སངས་རྒྱས་ལམ་ལ་གོང་འོག་རིམ་པ་མེད། །མ་རྟོགས་བགྲོད་པས་འཇིག་རྟེན་ཚངས་པའི་ལམ། །མ་བཙལ་ལྷུན་གྱིས་གྲུབ་དང་མཐུན་པ་མེད། །ཆོས་ཉིད་ལྷུན་གྱིས་གྲུབ་ལ་བགྲོད་
འགྱུར་ན། །ནམ་མཁའི་མཐའ་ལ་ཐུག་པ་མེད་པ་བཞིན། །བགྲོད་མེད་ལམ་ལ་བགྲོད་པས་ཐུག་པ་མེད། །དེས་ན་ལམ་གྱི་གོལ་ས་ཞེས་སུ་བཤད། །རྫོགས་པ་ཆེན་པོ་རྩོལ་བསྒྲུབ་ལས་གྲོལ་བ། །སངས་རྒྱས་སྤྱོད་ཡུལ་སྐུ་དང་ཡེ་ཤེས་འདི། །བཙལ་བས་མི་རྙེད་རང་བྱུང་ཡེ་ཤེས་ཡིན། །དབང་པོ་དྲུག་ལ་ཡུལ་དྲུག་ཡོད་པ་བཞིན། །སྐུ་དང་ཡེ་ཤེས་རང་བྱུང་རྒྱུ་མེད་པས། །བཙལ་ན་ལོང་བས་ནམ་མཁར་བསྙེག་པ་འདྲ། །དེ་ཡང་ལམ་གྱི་གོལ་སར་བཤད། །རྫོགས་ཆེན་ཕྲིན་ལས་བཙལ་དུ་མེད་པ་ལ། །བླ་མ་གསུམ་མཆོད་འགྲོ་ལ་སྦྱིན་གཏོང་བ། །དེ་བཞིན་ཚོགས་གཉིས་འདོད་པའི་བསོད་ནམས་ཀྱང་། །ཏིང་འཛིན་མ་ཆགས་མི་གཡོའི་སྟོབས་མེད་ན། །ཡུལ་ལ་ཆགས་ཤིང་ཏིང་འཛིན་གཡོ་བ་ཡིས། །མཆོད་སྦྱིན་བྱས་ན་འཆིང་བ་ཆེན་པོར་འགྱུར། །དེ་ཡང་ལས་ཀྱི་གོལ་སར་ང་ཡིས་བཤད། །རྫོགས་ཆེན་ལྟ་སྤྱོད་རྒྱུ་འབྲས་འདས་པ་ལ། །རྒྱུ་ལས་འབྲས་བུ་འབྱུང་བར་མིང་བཏགས་ན། །དགེ་བའི་རྒྱུ་ཡིས་འབྲས་བུ་མཐོ་རིས་ལ། །སྡིག་པའི་རྒྱུ་ཡིས་འབྲས་བུ་ངན་སོང་དུ། །འཇིག་རྟེན་འདི་ལས་སྤྱད་པས་འབྱུང་ངོ་ཞེས། །དགེ་བ་དང་ལེན་སྡིག་པ་ཕར་འདོར་བ། །འབྲས་བུ་འབྱུང་ཟེར་བྲོད་པ་མཆོག་ཏུ་བསྐྱེད། །དེ་ཡང་ལྟ་སྤྱོད་རྒྱུ་འབྲས་གོལ་སར་བཤད། །རྫོགས་ཆེན་གཟུང་འཛིན་བྲལ་བའི་ཕྲ་བ་ལ། །གཟུང་འཛིན་བྱེད་པའི་ཤེས་པ་དེ་དག་གིས། །བྱང་ཆུབ་སེམས་ནི་ཆོས་ཀྱི་སྒོ་མོ་ལ། །ཕྲ་རབ་རྡུལ་གྱི་ཡང་འདུག །ཕྲ་རགས་སྡུག་བསྔལ་སྒོ་མོར་མིང་བཏགས་ཏེ། །སེམས་ཀྱི་དབེན་པས་ལམ་བཙལ་དགོན་པའི་གནས། །ཡུལ་དབེན་སེམས་དབེན་ཕྲ་མོ་བསྒོམ། །རིག་པ་མངོན་དུ་གྱུར་པས་རབ་བརྟགས་ན། །ཕྲ་མོ་གསུམ་བསྒོམ་རྣམ་པར་རྟོག་འགྱུར་བསྒོམ། །ཕྲ་བ་ཆོས་ཀྱི་གོལ་སར་ང་ཡིས་བཤད། །རྫོགས་ཆེན་སྐྱོན་ཡོན་བྲལ་བའི་བསྒོམ་པ་དེ། །གཟུང་འཛིན་རྣམ་རྟོག་བྲལ་བའི་ཆོས་ཉིད་ལ། །ཡོན་ཏན་བཅུ་ཡིས་བསམ་གཏན་བསྒོམ་པ་ནི། །བསམ་
གཏན་བཅུ་ནི་སྒྲིབ་པ་བཅུ་ཡིན་པས། །ཡོན་ཏན་བཅུ་པོ་དག་ལ་བསམ་མེད་དོ། །སྤྲོས་པ་མེད་པའི་ཆོས་ཉིད་མ་བསམས་ཤིང་། །གཟུང་འཛིན་བྲལ་བའི་རིག་པ་མ་སྦྱངས་པས། །སྟོན་མིན་ཙེན་མིན་དག་གི་ཆོས་ཉིད་བཞིན། །རང་གི་རྣམ་རྟོག་དེ་ཉིད་ཡེ་ཤེས་འདོད། །བསམ་གཏན་བསྒོམ་པའི་གོལ་སར་ང་ཡིས་བཤད། །ཡོན་ཏན་བཅུ་ནི་སྒྲིབ་པ་བཅུ་ཡིན་ཏེ། །སྒྲིབ་པ་བཅུ་ནི་གང་དང་གང་ཞེ་ན། །མི་གཡོ་བ་དང་གསལ་བ་དང་། །ཐིམ་པ་དང་ནི་བདེ་བ་དང་། །ལྷན་ནེ་བ་དང་ལྷང་ངེ་བ། །སེམས་ལས་ཡེ་ཤེས་སྐྱེ་བ་དང་། །གཞན་གྱི་ལྟ་བ་ཁྱད་གསོད་དང་། །རང་གི་ལྟ་བ་ངོམ་སྐྱོན་དང་། །མངོན་པར་ཤེས་དང་ལྡན་དུ་རེ། །འདི་ནི་བླ་མེད་ཡིན་ཟེར་ནས། །ཆོག་ཤེས་འཛིན་པ་འདི་བཅུ་ནི། །གོལ་ས་སྒྲིབ་པ་ཡིན་པར་བཤད། །ཡོན་ཏན་བརྒྱད་ནི་གང་ཞེ་ན། །འགྲོ་དང་འདུག་དང་ལྡང་དང་ཉལ། །ལྟ་སྤྱོད་ལམ་བཞི་ཉམས་པ་མེད། །གནས་གཅིག་གཡོ་བ་མེད་པ་དང་། །སངས་རྒྱས་སྤྱོད་པ་མངོན་གྱུར་ཀྱང་། །དེ་ལ་རེ་བ་མི་འཇོག་དང་། །ཕྱོགས་བཅུའི་ཞིང་ཁམས་ཐམས་ཅད་ཀུན། །སྐྱུ་རུ་ར་བཞིན་མངོན་གསལ་ཡང་། །དེ་ལ་གཟུང་འཛིན་མེད་པ་དང་། །བདུད་ཀྱི་རྒྱལ་པོས་མི་འཇིགས་དང་། །ལྷ་མོ་རྣམས་ལ་མ་ཆགས་དང་། །ཡང་དག་ཆོས་ལས་མ་ཉམས་དང་། །ཆོས་ཉིད་དབྱིངས་ནི་མངོན་རྟོགས་ཀྱང་། །འདུས་བྱས་དགེ་རྩ་རྒྱུན་མི་གཅོད། །ཡོན་ཏན་ཆེན་པོ་འདི་བརྒྱད་ནི། །བསམ་གཏན་གྱི་ནི་ཡོན་ཏན་ནོ། །ཞེས་གོལ་སྒྲིབ་བསྟན་པའི་མདོ་རྫོགས་སྷོ།། །།དེ་ནས་སེམས་དཔའ་རྡོ་རྗེའི་ཞལ་དུ་འདུས་པའི་ཚོགས་ཐམས་ཅད་ཀྱིས་བལྟས་ཏེ་ཀུན་གྱིས་ཞུས་པ། ཀྱེ་ཀུན་བཟང་རྡོ་རྗེའི་སྙིང་པོ་ཁྱོད། །ཁྱོད་ནི་གསུང་གི་སེང་གེ་སྟེ། །རྫོགས་ཆེན་དོན་འདི་མ་མཐོང་ན། །གོལ་ས་སྒྲིབ་པ་སྐྱོན་ཡོད་ཅེས། །གསུང་གི་སེང་གེས་བསྟན་པ་དེ། །འདུས་པ་ངེད་ཀྱིས་མ་རིག་པས། །གསུང་གི་སེང་གེ་ཁྱོད་ཀྱིས་ནི། །ངེས་པར་གཏན་ལ་དབབ་ཏུ་གསོལ། །ཞེས་ཞུས་སོ། །དེ་ནས་སེམས་དཔའ་རྡོ་རྗེ་དེས།
ཆོས་ཐམས་ཅད་གཏན་ལ་དབབ་པའི་ཕྱིར། གཏན་ལ་འབེབས་པའི་མདོ་འདི་གསུངས་སོ། །ཀྱེ་འདུས་པའི་ཚོགས་ཆེན་ད་ཉོན་ཅིག །ལུང་གསུམ་མན་ངག་བཞི་བདུན་གྱིས། །ངེས་པར་གཏན་ལ་འབེབས་པ་བཤད། །དེ་ཡང་ལུང་གསུམ་གང་ཞེ་ན། །སྙན་ཁུང་བརྒྱུད་པའི་ལུང་དང་གཅིག །མངོན་དུ་ཕྱུང་བའི་ལུང་དང་གཉིས། །གཏན་ལ་འབེབས་པའི་ལུང་གསུམ་མོ། །མན་ངག་རྣམ་བཞི་གང་ཞེ་ན། །ངེས་པ་བཞི་ཡི་མན་ངག་དང་། །མི་རིགས་རིགས་པར་བཤད་པ་གསུམ། །སྐབས་དང་ཕྱག་རྒྱའི་མན་ངག་གཉིས། །དེ་ཉིད་ལམ་གྱི་མན་ངག་གོ། །སྙན་ཁུང་བརྒྱུད་པའི་ལུང་ལ་ཡང་། །རྣམ་པ་གཉིས་སུ་དབྱེ་བར་བྱ། །འཕགས་པའི་ཡེ་ཤེས་སྙན་ཁུང་བརྒྱུད། །གང་ཟག་རྣ་བའི་དབང་པོ་བརྒྱུད། །འཕགས་པའི་ཡེ་ཤེས་སྙན་བརྒྱུད་པ། །རང་བཞིན་ཆོས་ཉིད་གཞལ་ཡས་སུ། །སྟོན་པ་ཀུན་ཏུ་བཟང་པོ་ཡིས། །ཚིག་གི་རྡོ་རྗེ་ང་ཉིད་ལ། །ཆོས་ཉིད་རང་བཞིན་སེམས་ཉིད་དེ། །སེམས་ཉིད་རྫོགས་པ་ཆེན་པོའི་ལུང་། །རྡོ་རྗེ་ཡེ་ཤེས་སྙན་ཁུང་བརྒྱུད། །གང་ཟག་རྣ་བར་བརྒྱུད་པ་ནི། །ང་ལས་སྤྲུལ་པ་རབས་བདུན་དང་། །ཡང་སྤྲུལ་གང་ཟག་ཐུགས་ཀྱི་སྲས། །འཁོར་གྱི་གང་ཟག་དབང་པོ་ལ། །འཛམ་གླིང་རྡོ་རྗེའི་གདན་སྟེངས་སུ། །སྡེ་སྣོད་གསུམ་པའི་རིམ་པ་དྲུག །གང་ཟག་བློ་ལ་འཐད་ཕྱོགས་སུ། །འདུལ་བའི་དབང་གིས་བསྟན་པ་ཡང་། །དེ་ཡང་ང་ཡིས་བསྟན་པ་ཡིན། །གང་ཟག་རྣ་བའི་དབང་པོ་བརྒྱུད། །སྙན་ཁུང་བརྒྱུད་པའི་ལུང་འདི་ལ། །ལོ་རྒྱུས་དོན་ཞེས་བཤད་པ་ཡིན། །ལོ་རྒྱུས་དོན་ལ་རྣམ་གསུམ་སྟེ། །བྱིན་གྱིས་རླབས་ཀྱིས་བཤད་པ་དང་། །རང་གི་ངོ་བོས་བཤད་པ་དང་། །ཚིག་སྡེབས་ལེགས་པར་བཤད་པའོ། །བྱིན་གྱིས་རླབས་ཀྱིས་བཤད་པ་ནི། །རང་བཞིན་ཆོས་ཀྱི་གཞལ་ཡས་ན། །སྟོན་པ་ཀུན་ཏུ་བཟང་པོ་ངས། །མཚན་མའི་སྐུ་
གསུང་མི་མངའ་ཡང་། །ཆོས་ཉིད་སྐྱེ་བ་མེད་པ་དེ། །བཟང་ངན་བླང་དོར་མེད་པ་རུ། །ཀུན་བཟང་ཉིད་དུ་བྱིན་བརླབས་ནས། །རྡོ་རྗེ་སེམས་དཔའི་ཐུགས་ལ་བརྒྱུད། །བྱིན་གྱིས་རླབས་ཀྱིས་བཤད་ཅེས་བྱ། །རང་གི་ངོ་བོས་བཤད་པ་ནི། །སྐྱེ་མེད་དབྱིངས་ཀྱི་ཕོ་བྲང་ནས། །སྟོན་པ་རྡོ་རྗེ་སེམས་དཔའ་ཡང་། །མཚན་མའི་སྐུ་གསུང་མི་མངའ་བར། །ཆོས་ཉིད་སྐྱེ་བ་མེད་པ་དེ། །སྐྱེ་འཇིག་མེད་པའི་ངོ་བོ་དང་། །རྡོ་རྗེ་ཡི་ནི་ངོ་བོ་རུ། །སྤྲུལ་པ་གང་ཟག་སྐལ་ལྡན་ལ། །རིག་པའི་འོག་མིན་གནས་སུ་བཤད། །རང་གི་ངོ་བོས་བཤད་ཅེས་བྱ། །ཚིག་སྡེབས་ལེགས་པར་བཤད་པ་ནི། །འཛམ་གླིང་རྒྱུད་དྲུག་གནས་འདི་ན། །སྤྲུལ་པའི་གང་ཟག་སྐལ་ལྡན་དེར། །ཆོས་ཉིད་སྐྱེ་བ་མེད་པ་དེ། །སྐྱེ་བ་མེད་པའི་ཚིག་བརྗོད་པས། །སྐྱེ་བ་མེད་པའི་དོན་རྟགས་སུ། །རིན་ཆེན་གསེར་གྱི་གླེགས་བམ་ལ། །བཻ་ཌཱུར་ཞུན་མའི་རང་ནན་གྱིས། །ཚིག་དང་ཡི་གེར་བསྡེབས་བྲིས་ནས། །ཕྱི་རབས་རྣམས་ཀྱི་དོན་དུ་བཤད། །ཚིག་སྡེབས་ལེགས་པར་བཤད་ཅེས་བྱ། །དེས་ན་སྙན་ཁུང་བརྒྱུད་པའི་ལུང་ཞེས་བྱ། །མངོན་དུ་ཕྱུང་བའི་ལུང་ལ་ཡང་། །རྣམ་པ་གཉིས་སུ་དབྱེ་བར་བྱ། །དེ་ཡང་གང་དང་གང་ཞེ་ན། །དྲང་བའི་ལུང་དང་ངེས་པའི་ལུང་། །དྲང་བའི་ལུང་ཡང་གང་ཞེ་ན། །རྣམ་པ་བདུན་དུ་ཤེས་པར་བྱ། །མོས་སྤྱོད་བཟོད་ཐོབ་སར་འདྲེན་དང་། །འོད་ཟེར་འཕྲོ་བའི་སར་འདྲེན་དང་། །རྡོ་རྗེ་འཛིན་པའི་སར་འདྲེན་དང་། །སྟུག་པོ་ཆོས་ཉིད་སར་འདྲེན་དང་། །སྐུ་གསུང་རྡོ་རྗེའི་སར་འདྲེན་དང་། །དབྱེར་མེད་ས་རུ་འདྲེན་པའི་ལུང་། །རྩོལ་བསྒྲུབ་འདས་པར་འདྲེན་པའི་ལུང་། །རྣམ་པ་བདུན་དུ་ཤེས་པར་བྱ། །དེ་ཡི་དོན་ནི་འདི་ལྟ་སྟེ། །མོས་སྤྱོད་ས་རུ་འདྲེན་ལུང་ནི། །བདེན་པ་བཞི་ཡི་ལམ་དྲངས་ནས། །སྤང་དང་འགེག་པའི་ལུང་བསྟན་ཏེ། །བཟོད་ཐོབ་དང་པོའི་ས་རུ་འདྲེན། །འོད་ཟེར་འཕྲོ་སར་འདྲེན་ལུང་ནི། །ས་བཅུ་དག་གི་ལམ་
དྲངས་ནས། །ཕ་རོལ་ཕྱིན་བཅུ་ལུང་བསྟན་ཏེ། །རྟོག་འདས་ཀུན་ཏུ་འོད་སར་འདྲེན། །རྡོ་རྗེ་འཛིན་སར་འདྲེན་ལུང་ནི། །དག་པ་གསུམ་གྱི་ལམ་དྲངས་ནས། །ཡན་ལག་བཅུ་གཅིག་ལམ་དྲངས་ཏེ། །རྡོ་རྗེ་འཛིན་པའི་ས་རུ་འདྲེན། །སྟུག་པོའི་ས་རུ་འདྲེན་ལུང་ནི། །མཚན་མ་མེད་པའི་ལམ་དྲངས་ནས། །ཕྱག་རྒྱ་བཞི་ཡི་ལུང་བསྟན་ཏེ། །སྟུག་པོ་ཆོས་ཉིད་ས་རུ་འདྲེན། །སྐུ་གསུང་རྡོ་རྗེར་འདྲེན་ལུང་ནི། །ཏིང་འཛིན་རྣམ་གསུམ་ལམ་དྲངས་ནས། །རང་རྒྱུད་དག་པར་ལུང་བསྟན་ཏེ། །སྐུ་གསུང་རྡོ་རྗེའི་ས་རུ་འདྲེན། །དབྱེར་མེད་ས་རུ་འདྲེན་ལུང་ནི། །དབྱིངས་དང་ཡེ་ཤེས་ལམ་དྲངས་ཏེ། །སྣང་ལ་རང་བཞིན་ལུང་བསྟན་ཏེ། །དབྱེ་བ་མེད་པའི་ས་རུ་འདྲེན། །རྩོལ་བསྒྲུབ་འདས་པར་འདྲེན་ལུང་ནི། །དབྱེ་བ་མེད་པའི་ལམ་དྲངས་ནས། །ཡེ་ཤེས་ལྷུན་གྲུབ་ལུང་བསྟན་ཏེ། །རྩོལ་བསྒྲུབ་འདས་པའི་ས་རུ་འདྲེན། །རིམ་པ་དགུ་ཡི་དོན་བདུན་ནི། །ཚིག་དང་ཡི་གེ་ཡོད་བསྟན་པས། །དྲང་བའི་ལུང་ཞེས་ང་ཡིས་བཤད། །ངེས་པའི་ལུང་གི་དོན་འདི་ནི། །བྱང་ཆུབ་སེམས་ཀྱི་ཆོས་ཉིད་ལ། །རྡོ་རྗེ་སེམས་དཔའ་ང་ཡིས་བཤད། །ཡང་དག་ངེས་པ་འདི་ཡིན་ཞེས། །ཚིག་དང་ཡི་གེས་མཚོན་དུ་མེད། །སྒྲ་དང་ཐ་སྙད་རིལ་ལས་འདས། །སྒྲོ་དང་སྐུར་པ་ཀུན་དང་བྲལ། །ཀུན་ལ་འདས་པའི་དོན་འདི་ལ། །འདི་ཉིད་མཚོན་དུ་མེད་པས་ན། །ངེས་པའི་ལུང་ཞེས་མིང་ཙམ་བཏགས། །ངེས་པར་གདགས་སུ་ཡོད་པ་མིན། །ཞེས་གསུངས་སོ། །གཏན་ལ་འབེབས་པའི་ལུང་འདི་ལ། །བྱེ་བྲག་གཉིས་སུ་དབྱེ་བར་བྱ། །སེམས་ཅན་དབང་པོ་རིམ་དགུ་ལ། །སེམས་འཐད་ཐེག་པ་རིམ་པ་དགུ། །གཏན་ལ་འབེབས་ཏེ་བསྟན་པ་ཡང་། །སེམས་དང་ཆོས་ལ་དབྱེར་མེད་དེ། །ཐམས་ཅད་སེམས་སུ་གཅིག་པའི་ཕྱིར། །དགུ་ཡིས་གཏན་ལ་འབེབས་པ་ཡིན། །ཐམས་ཅད་སེམས་སུ་
འདུས་པའི་ཕྱིར། །སེམས་ཉིད་རྫོགས་པར་གཏན་ལ་འབེབས། །སེམས་འཐད་ཐེག་པ་རིམ་པ་དགུ། །གཏན་ལ་འབེབས་པ་མེད་པ་ནི། །ཉན་ཐོས་དང་ནི་རང་རྒྱལ་གཉིས། །བདེན་པ་བཞི་ཡི་གཏན་ཚིགས་ཀྱིས། །རང་ལས་བྱུང་བའི་ཆོས་ཉིད་ལ། །སྤང་ཞིང་འགེག་པས་གཏན་ལ་འབེབས། །རང་ལས་བྱུང་བ་སྤང་འགེག་པས། །གཏན་ལ་འབེབས་པར་མ་གསུངས་སོ། །ཐེག་ཆེན་བྱང་ཆུབ་སེམས་དཔའ་ནི། །བདེན་པ་གཉིས་ཀྱི་གཏན་ཚིགས་ཀྱིས། །རང་ལས་བྱུང་བའི་ཆོས་ཉིད་ནི། །མི་རྟག་སྡུག་བསྔལ་སྟོང་བདག་མེད། །སྦྱངས་ཤིང་བགྲོད་པས་གཏན་ལ་འབེབས། །རང་ལས་བྱུང་བའི་ཆོས་སྤྱོད་པས། །གཏན་ལ་འབེབས་པར་ཡོངས་མ་གསུངས། །འབྲས་བུ་ངེས་ཐོབ་བྱ་བ་ནི། །དག་པ་གསུམ་གྱི་གཏན་ཚིགས་ཀྱིས། །རང་ལས་བྱུང་བའི་ཆོས་ཉིད་ནི། །གཟུགས་སྒྲ་དྲི་རོ་རེག་ལ་སོགས། །སྤང་དང་བསྲུང་དང་དག་པ་ཡིས། །ཆོས་དེ་གཏན་ལ་འབེབས་པར་བྱེད། །རང་ཆོས་སྲུང་བར་བྱེད་པས་ན། །གཏན་ལ་འབེབས་པར་ཡོངས་མ་གསུངས། །ཕྱི་པ་ཐུབ་པའི་སེམས་ལ་ནི། །མཚན་མ་མེད་པའི་གཏན་ཚིགས་ཀྱིས། །རང་ལས་བྱུང་བའི་ཆོས་ཉིད་འདི། །དམ་རྫས་ལྔ་ལ་སྤང་ལེན་གྱིས། །སེམས་ཉིད་གཏན་ལ་འབེབས་འདོད་པ། །རང་ལས་བྱུང་བའི་ཆོས་ལྔ་ལ། །སྤང་ལེན་བྱེད་པའི་རང་བཞིན་གྱིས། །གཏན་ལ་འབེབས་པར་ཡོངས་མ་གསུངས། །བསྐྱེད་པ་རྣལ་འབྱོར་ཆེན་པོས་ནི། །ཐབས་དང་ཤེས་རབ་གཏན་ཚིགས་ཀྱིས། །རང་ལས་བྱུང་བའི་ཆོས་ཉིད་ནི། །ཕུང་པོ་འབྱུང་བ་རྣམ་ཤེས་ཡུལ། །དུས་རྣམས་ཀུན་ལ་སྒྲུབ་བྱེད་པས། །རྣལ་འབྱོར་གཏན་ལ་འབེབས་བྱེད་པ། །རང་བྱུང་ཆོས་ལ་སྒྲུབ་བྱེད་པས། །གཏན་ལ་འབེབས་པར་ཡོངས་མ་གསུངས། །རྫོགས་པའི་རྣལ་འབྱོར་ཆེན་པོས་ནི། །དབྱིངས་དང་ཡེ་ཤེས་གཏན་ཚིགས་ཀྱིས། །རང་ལ་བྱུང་བའི་ཆོས་ཉིད་ནི། །སེམས་དང་ཆོས་དང་རིག་
པ་ལ། །རྒྱུ་དང་འབྲས་བུ་གཉིས་འབྱེད་པས། །ཆོས་དེ་གཏན་ལ་འབེབས་པར་བྱེད། །རང་ལས་བྱུང་བའི་སེམས་རིག་ལ། །རྒྱུ་དང་འབྲས་བུར་འབྱེད་པ་ཡིས། །གཏན་ལ་འབེབས་པར་ཡོངས་མ་གསུངས། །གཏན་ལ་འབེབས་པར་གསུངས་པ་ནི། །སེམས་ཉིད་རྫོགས་པ་ཆེན་པོ་ལ། །ཆོས་ཀུན་འདུས་ཤིང་གསལ་བ་ཡིས། །ཐམས་ཅད་གཏན་ལ་འབེབས་པར་བསྟན། །དེ་ཡང་ཇི་ལྟ་བུ་ཞེ་ན། །སེམས་ཉིད་རྫོགས་པ་ཆེན་པོ་ཡིས། །ཆོས་ཀུན་ཡོངས་སུ་བྱས་པའི་ཕྱིར། །གཏན་ལ་འབེབས་པའི་ངོ་བོ་དེ། །ཆོས་ཀུན་གཏན་ལ་འབེབས་པར་བཤད། །སེམས་ཉིད་རྫོགས་པ་ཆེན་པོ་ཡིས། །རང་ལས་བྱུང་བའི་ཆོས་རྣམས་ནི། །སེམས་ཉིད་གཅིག་གི་རང་བཞིན་གྱིས། །སེམས་ལས་གཏན་ལ་དབབ་ཏུ་མེད། །སོ་སོར་གཏན་ལ་འབེབས་པ་ནི། །མ་རྟོགས་ཐེག་པ་དགུ་ལས་བྱུང་། །སེམས་ལས་བྱུང་བའི་ཆོས་ཉིད་ལ། །སྡུག་བསྔལ་ཀུན་འབྱུང་ཡིན་ཟེར་བ། །གཏན་ལ་འབེབས་པའི་ཆོས་མ་ཡིན། །སྡུག་བསྔལ་བདེན་པའི་ཆོས་ཉིད་ལ། །སེམས་ཉིད་རྫོགས་པས་གཏན་ལ་འབེབས། །སྤང་ཞིང་འགེག་པས་ཡོངས་མ་རྟོགས། །སེམས་ལས་བྱུང་བའི་ཆོས་ཉིད་ལ། །མི་རྟག་སྡུག་བསྔལ་ཡིན་ཟེར་བ། །མདོ་སྡེས་གཏན་ལ་འབེབས་པ་མིན། །མི་རྟག་སྡུག་བསྔལ་ཆོས་ཉིད་དེ། །འགྱུར་མེད་བདེ་ཆེན་ཆོས་ཉིད་དུ། །སེམས་ཉིད་རྫོགས་པས་གཏན་ལ་དབབ། །སེམས་ལས་བྱུང་བའི་ཆོས་ཉིད་ལ། །མཚན་མ་གཟུང་འཛིན་ཡིན་ཟེར་བས། །ཀྲི་ཡཱས་གཏན་ལ་འབེབས་པ་མིན། །འགེག་སྤང་དྲི་རོ་ཆོས་ཉིད་དེ། །ཡེ་ནས་དག་པའི་ཆོས་ཉིད་དུ། །སེམས་ལ་རྫོགས་པར་གཏན་ལ་འབེབས། །སེམས་ལས་བྱུང་བའི་ཆོས་ཉིད་ལ། །དམ་རྫས་གཙང་བཙོག་ཡིན་ཟེར་བས། །ཡོ་གས་གཏན་ལ་མི་ཕེབས་ཏེ། །དམ་རྫས་ལྔ་ཡི་ཆོས་ཉིད་དེ། །རང་རྒྱུད་དག་པའི་ཆོས་ཉིད་དུ། །སེམས་ཉིད་རྫོགས་པས་གཏན་ལ་འབེབས། །སེམས་ལས་བྱུང་བའི་ཆོས་
ཉིད་དེ། །ཕུང་པོ་འབྱུང་བ་རྣམ་ཤེས་ལ། །བཙལ་ཞིང་བསྒྲུབ་པ་དགོས་ཟེར་བ། །མ་ཧཱས་གཏན་ལ་ཕེབས་པ་མིན། །ཕུང་པོ་རྣམ་ཤེས་ཆོས་ཉིད་དེ། །མ་འགགས་པ་ཡི་ཡེ་ཤེས་སུ། །སེམས་ཉིད་རྫོགས་པས་གཏན་ལ་འབེབས། །སེམས་ལས་བྱུང་བའི་ཆོས་ཉིད་ནི། །སེམས་རིག་རྒྱུ་འབྲས་ཡིན་ཟེར་བས། །ཨ་ནུས་གཏན་ལ་ཕེབས་པ་མིན། །དབྱིངས་དང་ཡེ་ཤེས་ཆོས་ཉིད་དེ། །རྩོལ་བསྒྲུབ་འདས་པའི་ཆོས་ཉིད་དུ། །སེམས་ཉིད་རྫོགས་པས་གཏན་ལ་ཕབ། །སེམས་ཉིད་རྫོགས་པ་ཆེན་པོ་འདིས། །ཐམས་ཅད་གཏན་ལ་འབེབས་པ་ནི། །ཆོས་ཀུན་སེམས་སུ་འདུས་པས་ནི། །སེམས་ཀྱི་རང་བཞིན་བསྟན་པ་ཡིན། །སེམས་ཀྱི་རང་བཞིན་བསྟན་པ་ལ། །ཆོས་ཀུན་གཏན་ལ་ཕབ་ཅེས་བྱ། །གཏན་ལ་འབེབས་པའི་ལུང་གསུམ་བསྟན་ཏོ། །མན་ངག་བཞི་ནི་གང་ཞེ་ན། །རྣམ་པ་གཉིས་སུ་དབྱེ་བར་བྱ། །དེ་ཡང་གང་དང་གང་ཞེ་ན། །བཞི་པ་གཉིས་ཀྱི་རྣམ་པ་སྟེ། །ངེས་པ་བཞི་ཡི་མན་ངག་དང་། །མི་རིགས་རིགས་པར་བཤད་པ་གསུམ། །སྐབས་དང་ཕྱག་རྒྱའི་མན་ངག་གཉིས། །དེ་ཉིད་ལམ་གྱི་མན་ངག་གོ། །ངེས་པ་བཞི་ཡི་མན་ངག་ཀྱང་། །ཡེ་ཤེས་སྤང་ལེན་མེད་པར་ངེས། །སྙིང་རྗེ་ཕྱོགས་རིས་མེད་པར་ངེས། །འབྱུང་ལྔ་ཡེ་ནས་སངས་རྒྱས་ངེས། །སེམས་ལ་གཉེན་པོ་མེད་པར་ངེས། །མི་རིགས་རིགས་པར་བཤད་གསུམ་ནི། །སེམས་ལས་མ་བྱུང་སངས་རྒྱས་ནི། །མི་རིགས་རིག་པར་བཤད་པ་དང་། །རྒྱུ་ལས་མ་བྱུང་འབྲས་བུ་ཡང་། །མི་རིགས་རིགས་པར་བཤད་པ་དང་། །རྒྱུད་ལས་མ་བྱུང་མན་ངག་ཀྱང་། །མི་རིགས་རིགས་པར་བཤད་པ་ཡིན། །སྐབས་དང་ཕྱག་རྒྱའི་མན་ངག་ནི། །སྐབས་ནི་བཅུ་གཉིས་བདུན་བསྟན་ལ། །ཕྱག་རྒྱ་བཅུ་གཉིས་ལྔ་ཡིས་བསྟན། །དེ་ཉིད་ལམ་གྱི་མན་ངག་ནི། །ཆོས་ཉིད་སེམས་དེ་སུས་མཐོང་བ། །ངེས་པ་ལམ་གྱི་མན་ངག་གོ། །རྣམ་གཅིག་མན་ངག་རྣམ་བཞི་ནི། །ངོ་བོ་བཞི་ནི་བསྟན་པ་སྟེ། །བྱང་
ཆུབ་སེམས་ཀྱི་མན་ངག་དང་། །སྦྱོར་བ་མེད་པའི་མན་ངག་དང་། །དུས་གསུམ་གཏན་ཚིགས་མན་ངག་དང་། །ལུང་ཆེན་ཁུངས་ཀྱི་མན་ངག་གོ། །ཡེ་ཤེས་སྤང་ལེན་མེད་པ་ནི། །སེམས་ཉིད་རྫོགས་པའི་ཡེ་ཤེས་ཏེ། །ཡེ་ནས་རང་བྱུང་ཡེ་ཤེས་ལ། །ཆོས་ལ་དུས་གསུམ་སྒྲིབ་མེད་པས། །སྤང་དང་ལེན་པ་མི་མངའ་སྟེ། །རང་བྱུང་ཡེ་ཤེས་འགྱུར་མེད་ལ། །སྤང་དང་འགེག་པ་ཡོངས་མི་མངའ། །སྦྱང་ཞིང་བགྲོད་པ་ཡོངས་མི་མངའ། །གཟུང་ཞིང་འཛིན་པ་ཡོངས་མི་མངའ། །བླང་ཞིང་དོར་བ་ཡོངས་མི་མངའ། །བཙལ་ཞིང་བསྒྲུབ་པ་ཡོངས་མི་མངའ། །རྒྱུ་དང་འབྲས་བུ་ཡོངས་མི་མངའ། །དེས་ན་རང་བྱུང་ཡེ་ཤེས་ལ། །སྤང་ལེན་མེད་པར་བསྟན་པ་ཡིན། །ཡང་ན་རྣམ་པ་བརྒྱད་པོ་ལ། །རང་བྱུང་ཡེ་ཤེས་ཡོད་མ་ཡིན། །སོ་སོར་རྟོགས་པའི་ཡེ་ཤེས་ཀྱིས། །ཐེག་པ་སོ་སོར་རྟོགས་པར་བྱེད། །དེས་ན་ཡེ་ཤེས་གྲངས་སུ་འབྱུང་། །གྲངས་ཀྱི་ཡེ་ཤེས་རྣམ་པ་ནི། །ཤེས་དང་ཆོས་ཤེས་རྗེས་སུ་ཤེས། །ཇི་མི་སྙམ་པའི་ཡེ་ཤེས་ནི། །བདེན་པ་བཞི་པོ་གཅིག་པ་ལའང་། །རྣམ་པ་བཞི་བཞིར་དབྱེ་བ་ནི། །གྲངས་ཀྱི་ཡེ་ཤེས་བཅུ་དྲུག་ཏུ། །བདེན་པ་བཞི་ལས་བྱུང་བ་ཡིན། །དེས་ཀྱང་སྤང་ཞིང་འགེག་པས་ན། །སྤང་ལེན་མེད་པའི་ཡེ་ཤེས་མིན། །མི་རྟག་པ་དང་སྡུག་བསྔལ་དང་། །སྟོང་པ་དང་ནི་བདག་མེད་པ། །ཐམས་ཅད་མཁྱེན་པའི་ཡེ་ཤེས་ནི། །དོན་དམ་ཀུན་རྫོབ་ཤེས་པ་སྟེ། །དེས་ཀྱང་སྦྱངས་ཤིང་བགྲོད་དགོས་པས། །སྦྱང་བགྲོད་མེད་པའི་ཡེ་ཤེས་མིན། །དག་པ་གསུམ་གྱི་ཏིང་འཛིན་གྱིས། །དྲི་རོ་སྤངས་ཤིང་རིགས་གསུམ་རྟོག །ངེས་ཀྱང་གཟུང་འཛིན་སྤངས་ནས་ཀྱང་། །གཟུང་འཛིན་འདས་པའི་ཡེ་ཤེས་མིན། །ཕྱག་རྒྱ་བཞི་འཛིན་རིག་པ་ཡིས། །རང་རྒྱུད་དག་པའི་ཆོས་ལྔ་ལ། །རྟོག་པས་བླང་ཞིང་དོར་བྱེད་པས། །བླང་དོར་མེད་པའི་ཡེ་ཤེས་
མིན། །ཐབས་དང་ཤེས་རབ་ཆོས་ཉིད་ལ། །སྐུ་གསུང་རིགས་དང་ཁ་དོག་གསལ། །རང་རྒྱུད་དག་པར་སྒྲུབ་བྱེད་པས། །རྩལ་བསྒྲུབ་འདས་པའི་ཡེ་ཤེས་མིན། །དབྱིངས་དང་ཡེ་ཤེས་ཆོས་ཉིད་ལ། །རྒྱུ་འབྲས་དག་པའི་རིག་པ་ཡིས། །དེ་ཡིས་བཙལ་ཞིང་སྒྲུབ་བྱེད་པས། །རྒྱུ་འབྲས་འདས་པའི་ཡེ་ཤེས་མིན། །རང་བྱུང་ཡེ་ཤེས་སྐུ་གཅིག་ལ། །ཐེག་པ་གྲངས་ཀྱི་ཡེ་ཤེས་ཀྱིས། །གསལ་བར་བསྐྱེད་པར་མི་ནུས་སོ། །སེམས་ཉིད་རྫོགས་པ་ཆེན་པོ་ཡི། །འགྱུར་མེད་རང་བྱུང་ཡེ་ཤེས་ལ། །ཡེ་ནས་སྒྲིབ་པ་མི་མངའ་བས། །སྤང་ལེན་མེད་པའི་ཡེ་ཤེས་སོ། །དེས་ན་སྤང་ལེན་མེད་པར་ངེས། །ཞེས་བསྟན།སྙིང་རྗེ་ཕྱོགས་རིས་མེད་པ་ནི། །རྣམ་པ་གསུམ་དུ་ཤེས་པར་བྱ། །ཅིར་མི་མཛད་པའི་སྙིང་རྗེ་དང་། །ཀུན་ལ་ཁྱབ་པའི་སྙིང་རྗེ་དང་། །ཕྱོགས་མཚམས་འཛིན་པའི་སྙིང་རྗེའོ། །གཉིས་ལ་ཕྱོགས་རིས་མེད་པ་སྟེ། །ཕྱོགས་མཚམས་འཛིན་ལ་ཕྱོགས་ཡོད་དེ། །དེ་ཡང་གང་དང་གང་ཞེ་ན། །རྣམ་པ་གསུམ་དུ་ཤེས་པར་བྱ། །ཅིར་ཡང་མི་མཛད་པ་ཡི་སྙིང་རྗེ་ནི། །སེམས་ཉིད་རྫོགས་པའི་བྱང་ཆུབ་སེམས། །སྤྲོས་དང་བྲལ་བའི་རང་བཞིན་གྱིས། །དངོས་པོ་མཚན་མ་ཅིར་མི་མཛད། །དེས་ན་སྙིང་རྗེ་ཕྱོགས་རིས་མེད། །ཀུན་ལ་ཁྱབ་པའི་སྙིང་རྗེ་ནི། །སེམས་ཉིད་རྫོགས་པའི་བྱང་ཆུབ་སེམས། །བླང་དོར་མེད་པའི་རང་བཞིན་གྱིས། །སངས་རྒྱས་སེམས་ཅན་ཀུན་ལ་ཁྱབ། །དེས་ན་སྙིང་རྗེ་ཕྱོགས་རིས་མེད། །ཕྱོགས་མཚམས་འཛིན་པའི་སྙིང་རྗེ་ནི། །ཐེག་པ་བརྒྱད་ཀྱི་ཆོས་ཉིད་དེ། །རྒྱུ་དང་འབྲས་བུར་ཕྱོགས་མཚམས་འཛིན། །རྩོལ་བསྒྲུབ་ཡོད་པར་ཕྱོགས་མཚམས་འཛིན། །ལྷ་དང་བདག་ཏུ་ཕྱོགས་མཚམས་འཛིན། །ཡུལ་དང་དབང་པོར་ཕྱོགས་མཚམས་འཛིན། །ཀུན་རྫོབ་དོན་དམ་ཕྱོགས་མཚམས་འཛིན། །ཕྱོགས་མཚམས་འཛིན་པའི་སྙིང་རྗེ་དེ། །སྙིང་རྗེ་ཆེན་པོ་མ་ཡིན་ཏེ། །སྙིང་རྗེ་ཆུང་ངུ་ཡིན་
པར་བཤད། །སེམས་ཉིད་རྫོགས་པའི་བྱང་ཆུབ་སེམས། །ཐམས་ཅད་རྫོགས་པའི་རང་བཞིན་གྱིས། །སྙིང་རྗེ་ཕྱོགས་རིས་མེད་པར་ངེས། །ཞེས་བསྟན། འབྱུང་ལྔ་ཡེ་ནས་སངས་རྒྱས་ནི། །ཟབ་མོ་ལྔ་ཡི་སངས་རྒྱས་ཏེ། །དེ་ཡང་གང་དང་གང་ཞེ་ན། །ས་ཆུ་མེ་རླུང་ནམ་མཁའ་ལྔ། །གཅིག་ལ་རང་བཞིན་ལྔ་ལྔ་སྟེ། །ཉི་ཤུ་རྩ་ལྔ་འབྱུང་བའོ། །དེ་ཡང་རང་བཞིན་རྣམ་ལྔ་ནི། །སྣང་བ་ས་ཡི་རང་བཞིན་ལ། །སྡུད་པ་ཆུ་ཡི་རང་བཞིན་ཡིན། །ཡང་བ་རླུང་གི་རང་བཞིན་ཡིན། །སྙོམས་པ་མེ་ཡི་རང་བཞིན་ལ། །གསལ་བ་ནམ་མཁའི་རང་བཞིན་ཡིན། །དེ་ཡང་ཡེ་ནས་སངས་རྒྱས་ཏེ། །ས་ནི་སྲ་བྱེད་རྡོ་རྗེའི་དབྱིངས། །སྐྱེ་འཇིག་མེད་པའི་སངས་རྒྱས་ཡིན། །ཆུ་ནི་རིན་ཆེན་གཏེར་གྱི་དབྱིངས། །ཐམས་ཅད་འདུས་པའི་སངས་རྒྱས་ཡིན། །མེ་ནི་པདྨ་དག་པའི་དབྱིངས། །གཟུང་འཛིན་སྲེག་པའི་སངས་རྒྱས་སོ། །རླུང་ནི་ཡང་ཞིང་གཡོ་བའི་དབྱིངས། །ཀུན་ཏུ་བསྐྱོད་པའི་སངས་རྒྱས་སོ། །ནམ་མཁའ་སྣང་བྱེད་ཁྱབ་པའི་དབྱིངས། །མ་བསྒྲིབས་གསལ་བའི་སངས་རྒྱས་སོ། །དེས་ན་འབྱུང་ཆེན་རྣམ་པ་ལྔ། །ཡེ་ནས་སངས་རྒྱས་ཡིན་པ་རུ། །སེམས་ཉིད་རྫོགས་པའི་ལུང་གིས་བཤད། །ཅེས་བསྟན། སེམས་ལ་གཉེན་པོ་མེད་ངེས་ནི། །རྣམ་པ་གསུམ་གྱི་གཏན་ཚིགས་ཀྱིས། །གཉེན་པོ་མེད་པར་བསྟན་པ་ཡིན། །དེ་ཡང་གང་དང་གང་ཞེ་ན། །དཔེ་ལ་གཉེན་པོ་མེད་པ་དང་། །དོན་ལ་གཉེན་པོ་མེད་པ་དང་། །རྟགས་ལ་གཉེན་པོ་མེད་པའོ། །དཔེ་ལ་གཉེན་པོ་མེད་པ་ནི། །ནམ་མཁའི་དཔེ་ལ་གཉེན་པོ་མེད། །དོན་ལ་གཉེན་པོ་མེད་པ་ནི། །ཆོས་ཉིད་དོན་ལ་གཉེན་པོ་མེད། །རྟགས་ལ་གཉེན་པོ་མེད་པ་ནི། །བྱང་ཆུབ་སེམས་ལ་གཉེན་པོ་མེད། །དེ་ཡང་ཇི་ལྟ་བུ་ཞེ་ན། །དཔེ་དང་དོན་རྟགས་གསུམ་པོ་ལ། །རྒྱུ་དང་ས་བོན་མ་མཆིས་པས། །རྐྱེན་དང་གཉེན་པོ་ཀུན་དང་བྲལ། །དེས་ན་སེམས་ཉིད་རྫོགས་པ་ལ། །གཉེན་
པོ་མེད་པ་ཞེས་བྱའོ། །ངེས་པ་བཞི་ཡི་མན་ངག་གོ། །མི་རིགས་རིགས་པར་བཤད་གསུམ་ནི། །སེམས་ལས་མ་བྱུང་སངས་རྒྱས་ནི། །མི་རིགས་རིགས་པར་བཤད་པ་ཡིན། །རྒྱུ་ལས་མ་བྱུང་འབྲས་བུ་ཡང་། །མི་རིགས་རིགས་པར་བཤད་པ་ཡིན། །ལུང་ལས་མ་བྱུང་མན་ངག་ཀྱང་། །མི་རིགས་རིགས་པར་བཤད་པ་ཡིན། །དེ་ཡང་ཇི་ལྟ་བུ་ཞེ་ན། །སེམས་ལས་མ་བྱུང་སངས་རྒྱས་ནི། །ཆོས་ཉིད་མཁའ་ལ་དབྱིངས་ཉིད་ཀློང་། །སེམས་ལས་མ་བྱུང་སངས་རྒྱས་ཡིན། །རྒྱུ་ལས་མ་བྱུང་འབྲས་བུ་དང་། །བྱང་ཆུབ་སེམས་ཀྱི་འབྲས་བུ་ནི། །རྒྱུ་ལས་མ་བྱུང་འབྲས་བུ་ཡིན། །ལུང་ལས་མ་བྱུང་མན་ངག་ནི། །ཆོས་ཉིད་བྱང་ཆུབ་སེམས་ཀྱི་དོན། །སྤྲུལ་པའི་གང་ཟག་སྐལ་ལྡན་གྱིས། །ཇི་ལྟར་རྟོགས་ཤིང་རིག་པ་དེ། །ལུང་ལས་མ་བྱུང་མན་ངག་ཡིན། །མི་རིགས་རིགས་པ་འདི་གསུམ་ཡང་། །མན་ངག་དག་གི་རིག་པས་བཤད། །མི་རིགས་རིགས་པར་བཤད་པའོ། །སྐབས་དང་ཕྱག་རྒྱའི་མན་ངག་ནི། །རྣམ་པ་གཉིས་སུ་གསུམ་དུ་ཡང་འདུག་དབྱེ་བར་བྱ། །སྐབས་ནི་བཅུ་པ་གཉིས་དང་བདུན། །ཕྱག་རྒྱ་བཅུ་གཉིས་ལྔ་ལས་མེད། །གཉིས་ནི་རྩོལ་ཞིང་སྒྲུབ་པར་བྱེད། །སྐབས་ཞེས་བྱ་བའི་མན་ངག་ནི། །སེམས་ཉིད་རྫོགས་པའི་སྙིང་པོ་དེ། །སྒྲིབ་མེད་རང་བྱུང་ཡེ་ཤེས་ལ། །ཆོས་ཀུན་དུས་གསུམ་སྒྲིབ་མེད་པས། །ཆོས་ཉིད་དོན་ལ་འགག་པ་མེད། །སོ་སོ་དག་གིས་གོ་སྐབས་འབྱེད། །དེས་ན་སྐབས་ཞེས་བསྟན་པ་ཡིན། །ཕྱག་རྒྱ་དག་གི་ངེས་པ་ནི། །སེམས་ཉིད་རྫོགས་པའི་སྙིང་པོ་དེ། །ཡེ་ནས་བྱང་ཆུབ་སྐུ་ཡིན་པས། །སྐྱེ་བ་མེད་ཅིང་འགྱུར་བ་མེད། །ཡེ་ནས་ཡེ་ཤེས་ཆེན་པོའི་སྐུ། །འགྱུར་བ་མེད་པའི་རང་བཞིན་ལ། །ཕྱག་རྒྱ་ཞེས་ནི་བསྟན་པ་ཡིན། །སེམས་ཉིད་རྫོགས་པ་ཆེན་པོ་ལ། །ཡེ་ཤེས་དོན་གྱི་བྱེ་བྲག་ནི། །སྐབས་དང་ཕྱག་རྒྱ་ཉི་ཤུ་ལྔས། །སོ་སོ་དག་གིས་སྐབས་ཕྱེ་ནས། །ཡོ་ག་བཞི་ཡིས་དོན་ཕྱུང་སྟེ། །ཆེ་བ་ལྔ་ཡི་ཁྱད་པར་གྱིས། །རིམ་པ་དགུ་དང་འཇིག་རྟེན་
པ། །རང་རེ་དག་གི་བདེན་པ་དེས། །ངེས་པར་གཏན་ལ་མ་ཕེབས་པ། །ལོང་བ་དམིགས་བུ་ཟིན་པ་ལྟར། །ཡེ་ཤེས་དོན་གྱི་བྱེ་བྲག་འདིས། །ངེས་པར་གཏན་ལ་འབེབས་པར་བྱེད། །དེ་ཡང་ཇི་ལྟ་བུ་ཞེ་ན། །ཅི་ལྟར་སྣང་བའི་ཆོས་རྣམས་ཀུན། །ཡེ་ནས་འདུས་བྱས་མ་ཡིན་པས། །ཆོས་ཉིད་དག་ཏུ་གནས་པ་དེ། །ཆོས་ཉིད་སྐབས་ཞེས་བསྟན་པ་ཡིན། །འདུས་མ་བྱས་པའི་ཆོས་ཉིད་དེ། །འགྲོ་བ་རྣམས་ལ་རང་བཞིན་གྱིས། །ཡེ་ནས་མ་ཕྱེ་གནས་པའི་ཕྱིར། །རང་བཞིན་གནས་པའི་སྐབས་ཞེས་བྱ། །འདུས་མ་བྱས་པའི་ཆོས་ཉིད་དེ། །མ་བཅོས་ངང་ལ་གནས་པ་ཡིས། །སངས་རྒྱས་ཆེ་བ་ཐོབ་པའི་ཕྱིར། །རང་བཞིན་ཆེ་བ་སྐབས་ཀྱིས་བསྟན། །འདུས་མ་བྱས་པའི་ཆོས་ཉིད་དེ། །བཙལ་བ་མེད་པར་གྲུབ་པའི་ཕྱིར། །བཙལ་དང་བྲལ་བའི་སྐབས་ཀྱིས་བསྟན། །འདུས་མ་བྱས་པའི་ཆོས་ཉིད་དེ། །ཚིག་དང་ཡི་གེས་བརྗོད་མེད་ཕྱིར། །བརྗོད་དང་བྲལ་བའི་སྐབས་ཀྱིས་བསྟན། །འདུས་མ་བྱས་པའི་ཆོས་ཉིད་དེ། །སྐྱེ་བ་མེད་པའི་རང་བཞིན་གྱིས། །ཁམས་གསུམ་དག་ཏུ་མི་འཁོར་བས། །ལས་ཀྱིས་མི་འཁོར་སྐབས་ཞེས་བྱ། །འདུས་མ་བྱས་པའི་ཆོས་ཉིད་དེ། །བྱང་ཆུབ་སེམས་སུ་གཅིག་པའི་ཕྱིར། །གཉིས་མེད་སྐྱོན་བྲལ་སྐབས་ཞེས་བྱ། །ཆོས་ཀུན་རང་གི་སེམས་ལ་འདུས། །སེམས་ཀྱི་རྟོགས་པ་བཤད་པའི་ཕྱིར། །ཡེ་ཤེས་རང་བྱུང་སྐབས་ཞེས་བྱ། །ཆོས་ཀུན་རང་གི་སེམས་ལ་འདུས། །སེམས་དང་བྲལ་བ་མེད་པའི་ཕྱིར། །གཟུངས་ཀྱི་སྦྱོར་ཐབས་སྐབས་ཞེས་བྱ། །ཆོས་ཀུན་རང་གི་སེམས་ལ་འདུས། །སེམས་ལ་ཆོས་ཀུན་རྫོགས་པའི་ཕྱིར། །ཡོངས་སུ་རྫོགས་པའི་སྐབས་ཞེས་བྱ། །ཆོས་ཀུན་རང་གི་སེམས་ལ་རྫོགས། །སེམས་ལ་གཟུང་འཛིན་མེད་པའི་ཕྱིར། །ཆགས་དང་བྲལ་བའི་སྐབས་ཞེས་བྱ། །ཆོས་ཀུན་བྱང་ཆུབ་སེམས་ལ་འདུས། །སེམས་
ཉིད་ཡེ་ནས་ཆེ་བའི་ཕྱིར། །གདོད་ནས་ཆེ་བའི་སྐབས་ཞེས་བྱ། །ཆོས་ཀུན་བྱང་ཆུབ་སེམས་སུ་འདུས། །སེམས་ལ་སྐྱོན་ཡོན་མེད་པའི་ཕྱིར། །སྨོན་ལམ་བྲལ་བའི་སྐབས་ཞེས་བྱ། །ཆོས་ཀུན་བྱང་ཆུབ་སེམས་སུ་འདུས། །སེམས་ལ་ཐམས་ཅད་རྫོགས་པའི་ཕྱིར། །ལུང་ཆེན་སྟོན་པའི་སྐབས་ཞེས་བྱ། །ཆོས་ཀུན་བྱང་ཆུབ་སེམས་སུ་འདུས། །སེམས་ལ་བཟང་ངན་མེད་པའི་ཕྱིར། །མཉམ་པ་ཉིད་ཀྱི་སྐབས་ཞེས་བྱ། །ཆོས་ཀུན་བྱང་ཆུབ་སེམས་སུ་འདུས། །བླང་དོར་མེད་པར་མ་རྟོགས་ཕྱིར། །བདེ་བ་སྤང་བའི་སྐབས་ཞེས་བྱ། །ཆོས་ཀུན་བྱང་ཆུབ་སེམས་སུ་འདུས། །སེམས་ལ་བཙལ་དུ་མེད་པའི་ཕྱིར། །རྩོལ་དང་བྲལ་བའི་སྐབས་ཞེས་བྱ། །ཆོས་ཀུན་བྱང་ཆུབ་སེམས་སུ་འདུས། །སེམས་ལ་འགྱུར་བ་མེད་པའི་ཕྱིར། །ཆོས་ཉིད་མི་འགྱུར་སྐབས་ཞེས་བྱ། །ཆོས་ཀུན་བྱང་ཆུབ་སེམས་སུ་འདུས། །སེམས་ལ་གཉེན་པོ་མེད་པའི་ཕྱིར། །རྒྱུ་རྐྱེན་བྲལ་བའི་སྐབས་ཞེས་བྱ། །ཆོས་ཀུན་བྱང་ཆུབ་སེམས་སུ་གཅིག །རྒྱུད་དྲུག་སྙིང་པོ་སེམས་གཅིག་ཕྱིར། །འགྲོ་ཀུན་སངས་རྒྱས་སྐབས་ཞེས་བྱ། །ཆོས་ཀུན་བྱང་ཆུབ་སེམས་སུ་འདུས། །སེམས་ལ་ཚོགས་ཀུན་འདུས་པའི་ཕྱིར། །ཡེ་ཤེས་དག་པའི་ཚོགས་ཆེན་པོས། །ཚོགས་ཆེན་དབུལ་བའི་སྐབས་ཞེས་བྱ། །ཆོས་ཀུན་བྱང་ཆུབ་སེམས་སུ་འདུས། །སེམས་དེ་ཡེ་ཤེས་ཤར་བའི་ཕྱིར། །ཚོགས་རྒྱན་ལྷུན་གྱིས་གྲུབ་པའི་སྐབས། །ཆོས་ཀུན་བྱང་ཆུབ་སེམས་སུ་འདུས། །སེམས་ཉིད་ལྷུན་གྱིས་གྲུབ་པའི་ཕྱིར། །ལྷུན་གྱིས་གྲུབ་པའི་སྐབས་ཞེས་བྱ། །ཆོས་ཀུན་བྱང་ཆུབ་སེམས་སུ་འདུས། །སེམས་ལ་རྩོལ་བསྒྲུབ་མེད་པའི་ཕྱིར། །ཕྲིན་ལས་རྒྱ་མཚོའི་སྐབས་ཞེས་བྱ། །ཆོས་ཀུན་བྱང་ཆུབ་སེམས་སུ་འདུས། །སེམས་ཉིད་ཆོས་ཀྱི་ཁུངས་ཡིན་ཕྱིར། །ལུང་ཆེན་འདྲེལ་བའི་སྐབས་ཞེས་བྱ། །ཆོས་ཀུན་བྱང་ཆུབ་སེམས་སུ་འདུས། །སེམས་ཉིད་བཙལ་བ་མེད་པ་ལ། །བཙལ་བའི་གོལ་
སྒྲིབ་བསྟན་པའི་ཕྱིར། །བཙལ་དང་མ་བྲལ་སྐབས་ཞེས་བྱ། །ཆོས་ཀུན་བྱང་ཆུབ་སེམས་འདུས་ལ། །སེམས་ཉིད་ཆགས་ཤིང་གཡོས་མེད་ལ། །མ་ཆགས་མ་གཡོའི་སེམས་མེད་པས། །འཆིང་བ་ཆེན་པོའི་སྐབས་ཞེས་བྱ། །སེམས་ཀྱི་ཆོས་ཉིད་དེ་རྣམས་ལ། །མ་འགགས་པ་ཡི་སྐབས་ཞེས་བྱ། །ཕྱག་རྒྱ་ཉི་ཤུ་རྩ་ལྔ་ནི། །ཡི་གེ་ཨཱ་ལི་ཀཱ་ལི་གཉིས། །གཅིག་ཏུ་བསྡུས་ཏེ་ཉི་ཤུ་ལྔ། །བགྲང་བའི་དོན་ནི་འདི་ལྟ་སྟེ། །རྒྱུད་དྲུག་སེམས་ཅན་ཐམས་ཅད་ཀུན། །སྙིང་པོ་བྱང་ཆུབ་ཞིང་ཡིན་པས། །ཆོས་ཉིད་དོན་དེ་ཤེས་པ་དང་། །དོན་དེ་ཡིད་ཆེས་བྱ་བའི་ཕྱིར། །ཉི་ཤུ་རྩ་ལྔར་བགྲངས་མོད་ཀྱིས། །ཡང་དག་བྱང་ཆུབ་སེམས་ལ་ནི། །ཚིག་ཏུ་བགྲངས་ན་མཐའ་ཡས་ཏེ། །ངེས་པར་སེམས་ལ་བགྲང་དུ་མེད། །ཉི་ཤུ་རྩ་ལྔ་འདི་ལྟ་སྟེ། །མཚན་མའི་ཡུལ་ལ་མི་གནས་ཏེ། །ཡེ་ཤེས་ཆེན་པོའི་ཕྱག་རྒྱ་ཡིན། །ཐབས་དང་ཤེས་རབ་གཉིས་མེད་པ། །ཡེ་ཤེས་ཆེན་པོའི་ཕྱག་རྒྱ་ཡིན། །དབྱིངས་དང་ཡེ་ཤེས་གཉིས་མེད་པས། །ཡེ་ཤེས་ཆེན་པོའི་ཕྱག་རྒྱ་ཡིན། །ཡུལ་དང་དབང་པོ་གཉིས་མེད་པས། །ཡེ་ཤེས་ཆེན་པོའི་ཕྱག་རྒྱ་ཡིན། །སེམས་ཉིད་བདེ་བ་ཆེན་པོ་དེ། །ཡེ་ཤེས་ཆེན་པོའི་ཕྱག་རྒྱ་ཡིན། །ཆོས་ཉིད་གསལ་བའི་བྱང་ཆུབ་སེམས། །ཡེ་ཤེས་ཆེན་པོའི་ཕྱག་རྒྱ་ཡིན། །ཐབས་དང་ཤེས་རབ་འདུ་འབྲལ་མེད། །ཡེ་ཤེས་ཆེན་པོའི་ཕྱག་རྒྱ་ཡིན། །ཆོས་ཉིད་དག་ལས་ཡེ་ཤེས་འབྱུང་། །ཡེ་ཤེས་ཆེན་པོའི་ཕྱག་རྒྱ་ཡིན། །ཀུན་བཟང་ཡབ་ཡུམ་གཉིས་མེད་པས། །ཡེ་ཤེས་ཆེན་པོའི་ཕྱག་རྒྱ་ཡིན། །ཐམས་ཅད་རང་ལ་རྫོགས་པ་ཡང་། །ཡེ་ཤེས་ཆེན་པོའི་ཕྱག་རྒྱ་ཡིན། །ཆོས་ཉིད་དག་ལ་རོལ་པ་དེ། །ཡེ་ཤེས་ཆེན་པོའི་ཕྱག་རྒྱ་ཡིན། །སེམས་ལ་དུས་གསུམ་མེད་པའི་ཕྱིར། །ཡེ་ཤེས་ཆེན་པོའི་ཕྱག་རྒྱ་ཡིན། །སེམས་ཉིད་འདུ་འབྲལ་མེད་པ་དེ། །ཡེ་
ཤེས་ཆེན་པོའི་ཕྱག་རྒྱ་ཡིན། །ཐམས་ཅད་གཅིག་ཏུ་འདུས་པ་ནི། །ཡེ་ཤེས་ཆེན་པོའི་ཕྱག་རྒྱ་ཡིན། །བྱང་ཆུབ་སེམས་ལས་གཡོས་པ་མེད། །ཡེ་ཤེས་ཆེན་པོའི་ཕྱག་རྒྱ་ཡིན། །ཆོས་ཉིད་དག་ལ་འགྱུར་བ་མེད། །ཡེ་ཤེས་ཆེན་པོའི་ཕྱག་རྒྱ་ཡིན། །བརྗོད་དུ་མེད་པའི་ཡུལ་ལ་རོལ། །ཡེ་ཤེས་ཆེན་པོའི་ཕྱག་རྒྱ་ཡིན། །དབྱིངས་དང་ཡེ་ཤེས་འདུ་འབྲལ་མེད། །ཡེ་ཤེས་ཆེན་པོའི་ཕྱག་རྒྱ་ཡིན། །བྱང་ཆུབ་སེམས་ལས་ཀུན་སྤྲུལ་པས། །ཡེ་ཤེས་ཆེན་པོའི་ཕྱག་རྒྱ་ཡིན། །གང་གིས་ཆོས་ཉིད་རིག་པ་དེ། །ཡེ་ཤེས་ཆེན་པོའི་ཕྱག་རྒྱ་ཡིན། །ཆོས་ཉིད་རྒྱན་དུ་རིག་པ་དེ། །ཡེ་ཤེས་ཆེན་པོའི་ཕྱག་རྒྱ་ཡིན། །ཇི་ལྟར་རྟོགས་པའི་རིག་པ་དེ། །ཡེ་ཤེས་ཆེན་པོའི་ཕྱག་རྒྱ་ཡིན། །ཐམས་ཅད་སངས་རྒྱས་ཤེས་པ་དེ། །ཡེ་ཤེས་ཆེན་པོའི་ཕྱག་རྒྱ་ཡིན། །ཕྲིན་ལས་ལྷུན་གྱིས་གྲུབ་པ་དེ། །ཡེ་ཤེས་ཆེན་པོའི་ཕྱག་རྒྱ་ཡིན། །ངེས་པར་གཏན་ལ་དབབ་པ་ཡང་། །ཡེ་ཤེས་ཆེན་པོའི་ཕྱག་རྒྱ་ཡིན། །ཕྱག་རྒྱ་ཉི་ཤུ་རྩ་ལྔ་སྟེ། །ལྟོས་པའི་ཆོས་ནི་ཐམས་ཅད་ཀུན། །ལོང་བས་དམིག་བུ་ཟིན་པ་ལྟར། །བསྟན་པ་རྒྱུད་ཀྱི་སྤྱི་འགྲེལ་ཞེས། །རྫོགས་པ་ཆེན་པོས་བཤད་པ་ཡིན། །ཕྱག་རྒྱ་འདི་ཡི་རང་བཞིན་ནི། །རྣམ་པ་གསུམ་དུ་ཤེས་པར་བྱ། །མིང་དང་རང་བཞིན་དཔེ་གསུམ་སྟེ། །མིང་ནི་ཕྱག་རྒྱར་བཤད་པ་ཡིན། །རང་བཞིན་འགྱུར་བ་མེད་པ་སྟེ། །རྡོ་རྗེའི་སེམས་ལ་འགྱུར་བ་མེད། །དཔེ་ནི་ནམ་མཁའ་ལྟ་བུ་སྟེ། །ནམ་མཁའི་དཔེ་ལ་མཚོན་དུ་མེད། །ཅེས་བསྟན། སྐབས་དང་ཕྱག་རྒྱའི་མན་ངག་གོ། །དེ་ཉིད་ལམ་གྱི་མན་ངག་ནི། །རྣམ་པ་བཅུ་དང་དྲུག་ཏུ་བགྲང་། །དེ་ཡང་གང་དང་གང་ཞེ་ན། །ཡོ་ག་རྣམ་བཞི་རེ་རེ་ལ། །དེ་ཉིད་རྣམ་པ་བཞི་བཞི་སྟེ། །རྣམ་པ་བཅུ་དང་དྲུག་ཏུ་བགྲང་། །དེ་ཉིད་རྣམ་པ་བཅུ་དྲུག་ནི། །བྱང་ཆུབ་སེམས་ཀྱི་དེ་ཉིད་དེ། །སེམས་དང་ཆོས་དང་ཡེ་ཤེས་དེ། །ངོ་བོ་དག་གི་དེ་ཉིད་དོ། །སྔོན་དང་ད་ལྟར་ཕྱི་མ་དང་། །དེ་དང་འདྲ་བ་ཀུན་
གྱིའོ། །ཤིན་ཏུ་རྣལ་འབྱོར་དེ་ཉིད་ནི། །རྣམ་པ་བཞི་རུ་བགྲང་བར་བྱ། །སངས་རྒྱས་སེམས་ཅན་རྒྱུད་དྲུག་ཀུན། །མ་བཅོས་སེམས་ཀྱི་དེ་ཉིད་དེ། །སྣང་སྲིད་སྣོད་བཅུད་ཐམས་ཅད་ཀུན། །མ་བྱས་ཆོས་ནི་དེ་ཉིད་དོ། །དུས་གསུམ་བསྐྱོད་པ་མེད་པ་ནི། །མ་བསྒྲིབས་ཡེ་ཤེས་དེ་ཉིད་དོ། །ཐམས་ཅད་ཡོངས་སུ་རྫོགས་པ་ནི། །ངོ་བོ་དག་གི་དེ་ཉིད་དོ། །ཀུན་ཏུ་རྣལ་འབྱོར་དེ་ཉིད་ནི། །རྣམ་པ་བཞི་རུ་བགྲང་བར་བྱ། །ཆོས་དབྱིངས་ཇི་ལྟར་རིག་པ་དེ། །དེ་ནི་སེམས་ཀྱི་དེ་ཉིད་ཡིན། །དབྱིངས་ཉིད་ཅིར་ཡང་བཅོས་མེད་པས། །དེ་ནི་ཆོས་ཀྱི་དེ་ཉིད་ཡིན། །དབྱིངས་དང་ཡེ་ཤེས་གསལ་བ་ནི། །དེ་ནི་ཡེ་ཤེས་དེ་ཉིད་ཡིན། །དབྱིངས་དང་ཡེ་ཤེས་གཉིས་མེད་པས། །དེ་ནི་ངོ་བོ་དེ་ཉིད་ཡིན། །རྣལ་འབྱོར་ཆེན་པོའི་དེ་ཉིད་ཀྱང་། །རྣམ་པ་བཞི་རུ་ཤེས་པར་བྱ། །ཡི་གེ་ཧཱུྃ་ལ་སོགས་པ་ནི། །དེ་ལས་ཐམས་ཅད་བསྐྱེད་པ་ནི། །སེམས་ཀྱི་དེ་ཉིད་ཡིན་པར་བཤད། །ཕུང་པོ་འབྱུང་བ་རྣམ་ཤེས་ཡུལ། །སྣང་ལ་རང་བཞིན་མེད་པས་ནི། །ཡེ་ནས་ཆོས་ཉིད་དེ་ཉིད་ཡིན། །དེ་ལྟར་མ་བསྒྲིབས་གསལ་བ་ནི། །ཡེ་ཤེས་དག་གི་དེ་ཉིད་ཡིན། །བདག་ཉིད་ཆེན་པོ་གྲུབ་པ་ནི། །ངོ་བོ་དག་གི་དེ་ཉིད་དོ། །སེམས་དཔའི་རྣལ་འབྱོར་དེ་ཉིད་ཀྱང་། །རྣམ་པ་བཞི་རུ་བགྲང་བར་བྱ། །གང་ཞིག་ཏིང་འཛིན་སྡོམ་གནས་ནས། །སྡོམ་དེ་ཡིད་ལ་གང་གནས་པ། །སེམས་ཀྱི་དེ་ཉིད་ཡིན་པར་བཤད། །ཏིང་འཛིན་ཆགས་པ་མེད་པ་ནི། །ཆོས་ཀྱི་དེ་ཉིད་ཡིན་པར་བཤད། །རིགས་དང་ཁ་དོག་སོ་སོར་གསལ། །ཡེ་ཤེས་དག་གི་དེ་ཉིད་ཡིན། །རིགས་བཞི་ཕྱག་རྒྱ་ཆེན་པོ་བཞི། །ངོ་བོ་དག་གི་དེ་ཉིད་ཡིན། །དེ་ཉིད་རྣམ་པ་བཅུ་དྲུག་ནི། །ལམ་གྱི་ལུང་དུ་ཤེས་པར་བྱ། །ངོ་བོ་བཞི་ཡི་མན་ངག་ལ། །བྱང་ཆུབ་སེམས་ཀྱི་མན་ངག་ནི། །དུས་གསུམ་སངས་རྒྱས་ཐམས་ཅད་དང་། །ཁམས་
གསུམ་སེམས་ཅན་ཐམས་ཅད་ཀུན། །བྱང་ཆུབ་སེམས་ལས་ཀུན་འབྱུང་སྟེ། །སངས་རྒྱས་སྐུ་དང་ཡེ་ཤེས་དང་། །སེམས་ཅན་ལུས་དང་བག་ཆགས་དང་། །སྣང་ཞིང་སྲིད་པ་ཐམས་ཅད་ཀུན། །བྱང་ཆུབ་སེམས་ལ་བླང་དོར་མེད། །སངས་རྒྱས་ཡེ་ཤེས་ཐུགས་རྗེས་ཀྱང་། །དབྲི་བཀོལ་བླང་དོར་ཡོངས་མི་མངའ། །སེམས་ཅན་འགྲོ་བའི་སྡུག་བསྔལ་ཡང་། །བྱང་ཆུབ་སེམས་ཀྱི་རང་བཞིན་ཏེ། །སྣང་སྲིད་སྣོད་བཅུད་ཀུན་ལ་ཁྱབ། །གཉེན་པོ་དག་གིས་བསྐྱོད་དུ་མེད། །ནམ་མཁའི་མཐའ་ལྟར་མཉམ་པར་གནས། །དེ་ནི་སྙིང་པོ་བྱང་ཆུབ་སྟེ། །གཟུང་འཛིན་སྤྲོས་པ་ཀུན་དང་བྲལ། །སྒྲ་དང་ཐ་སྙད་རིལ་ལས་འདས། །ཚིག་དང་ཡི་གེར་བརྗོད་པ་མེད། །བསྟན་དུ་མཚན་མའི་དངོས་པོ་མེད། །མངོན་དུ་དམིགས་པའི་ཡུལ་དང་བྲལ། །རྒྱུ་ལས་མ་བྱུང་སྙིང་པོ་འདི། །སྒྲོས་ཀྱིས་བཏགས་པ་ཀུན་དང་བྲལ། །ཞེས་བསྟན། སྦྱོར་བ་བྱར་མེད་མན་ངག་ནི། །བྱང་ཆུབ་སེམས་ཀྱི་སྐུ་མཆོག་འདིས། །ཆོས་ཀུན་ཡོངས་སུ་ཁྱབ་པའི་ཕྱིར། །གཅིག་དང་གཉིས་སུ་བྱར་མེད་པས། །དེ་ལ་གཉིས་ཀྱིས་སྦྱོར་བ་མེད། །ཆོས་ཀུན་སེམས་ལས་བྱུང་བའི་ཕྱིར། །ཆོས་སེམས་གཉིས་སུ་སྦྱར་དུ་མེད། །རྒྱུ་ལས་འབྲས་བུ་བཙལ་མེད་པས། །རྒྱུ་འབྲས་གཉིས་སུ་སྦྱར་དུ་མེད། །ཐབས་དང་ཤེས་རབ་ཡུལ་བྱུང་བས། །ཐབས་དང་ཤེས་རབ་སྦྱར་དུ་མེད། །ཡེ་ཤེས་རིག་ལ་དབྱིངས་གསལ་བས། །དབྱིངས་དང་ཡེ་ཤེས་སྦྱར་དུ་མེད། །དབང་པོ་དག་ལ་ཡུལ་སྣང་བས། །ཡུལ་དང་དབང་པོ་སྦྱར་དུ་མེད། །ཆོས་ཀུན་སེམས་སུ་གཅིག་པའི་ཕྱིར། །གཅིག་ལ་གཉིས་སྦྱར་མེད་པར་གསུངས། །ཞེས་བྱ། དུས་གསུམ་གཏན་ཚིགས་མན་ངག་ནི། །སེམས་ཉིད་རྫོགས་པ་ཆེན་པོ་འདི། །སྐྱེ་དང་འགག་པ་མེད་པས་ན། །དུས་གསུམ་མེད་པའི་གཏན་ཚིགས་ཏེ། །འདས་དང་མ་འོངས་ད་ལྟར་གྱི། །ཐ་སྙད་མིང་ལ་མི་གནས་ཏེ། །འདས་པའི་དུས་ལ་འགག་པ་མེད། །
མ་འོངས་པ་ལ་སྐྱེ་བ་མེད། །ད་ལྟར་དུས་ཞེས་གནས་མེད་པས། །དུས་གསུམ་གཅིག་པའི་མན་ངག་གོ། །ཞེས་བསྟན། ལུང་ཆེན་ཁུངས་ཀྱི་མན་ངག་ནི། །སེམས་ཉིད་རྫོགས་པ་ཆེན་པོ་འདིས། །ཆོས་ཀུན་གཏན་ལ་འབེབས་པའི་ཕྱིར། །ལུང་ཆེན་ཁུངས་ཀྱི་མན་ངག་གོ། །ཞེས་གསུངས་སོ། །ལུང་གསུམ་མན་ངག་བཞིར་གཏན་ལ་ཕེབས་པའི་མདོའི་ལེའུའོ།། །།དེ་ནས་ཡང་སེམས་དཔའ་ཆེན་པོ་དེས། འདུས་པའི་ཚོགས་ལ་ལུང་གསུམ་མན་ངག་བཞིས་གཏན་ལ་ཕེབས་པའི་མདོ་དོན་གྱི་འགྲེལ་པ་འདི་གསུངས་སོ། །ཀྱེ་འདུས་པའི་ཚོགས་ཆེན་ད་ཉོན་ཅིག །སྙན་ཁུང་བརྒྱུད་པའི་ལུང་འདི་ནི། །གང་གིས་ཇི་ལྟར་སྙན་ཁུང་གང་བརྒྱུད་པ། །ཀུན་བཟང་རྡོ་རྗེ་ཆོས་ཉིད་བགྲོད་མེད་དོ། །བགྲོད་དུ་མེད་པའི་དོན་ནི་དེ་ལྟར་ལ། །དེ་བཞིན་ཆོས་ཉིད་གཅིག་ཏུ་གནས་པའི་ཕྱིར། །གང་ཞིག་སུ་ཡང་རུང་བ་དེ་ལ་ནི། །ཆོས་ཉིད་བགྲོད་དུ་མེད་དེ་བསྟན་པ་དེ་ཡང་ཐོབ། །བྱང་ཆུབ་སེམས་ཀྱི་སྙིང་པོ་དེ་ཉིད་ནི། །ཆོས་ཀུན་འབྱུང་བའི་སྙིང་པོ་ཡིན་པས་ན། །སྤྲོས་དང་བྲལ་བའི་སྙིང་པོ་དེ་ལས་ནི། །ཆོས་ཉིད་སྤྲོས་བྲལ་དེ་བྱུང་ངོ་མཚར་ཆེ། །ཞེས་སྙན་ཁུང་བརྒྱུད་དོ། །གང་གིས་ཇི་ལྟར་མངོན་དུ་ཕྱུང་ཞེ་ན། །ཆོས་ཉིད་སེམས་ཉིད་མངོན་དུ་བསྟན་པ་ནི། །ཨ་དང་མཛེས་པའི་ཏ་ནི་ཆོས་སྐུར་བཤད། །སྙིང་པོ་བྱང་ཆུབ་སེམས་ནི་ཆོས་སྐུ་ལས། །ཆོ་འཕྲུལ་ཕུང་པོ་ལྔ་པོ་དག་དང་ནི། །རྣམ་ཤེས་བརྒྱད་ཀྱི་ཡན་ལག་སྤྲོས་པ་བཞིན། །ཁམས་གསུམ་འཇིག་རྟེན་ཡོངས་ཀྱི་སྤྱོད་ཡུལ་ལ། །ཉོན་མོངས་ལྔ་ནི་འདོད་ཡོན་རྣམ་པ་ལྔ། །དུས་གསུམ་སངས་རྒྱས་གསུང་གི་ཟབ་མོ་ནི། །སྐྱེ་བ་མེད་པའི་ཆོས་ཉིད་གཟུགས་སྒྲ་དྲི། །སྐྱེ་བ་མེད་པའི་ཟབ་མོ་སངས་རྒྱས་གསུངས། །ཞེས་བསྟན། དེ་བཞིན་གཏན་ལ་འབེབས་པའི་མན་ངག་ནི། །སངས་རྒྱས་སེམས་ཅན་ཀུན་གྱི་དོན་རྣམས་ནི། །ཇི་བཞིན་མི་བསྐྱོད་པ་ཡི་ཆོས་ཉིད་དེ། །བྱ་བ་མེད་པས་གྲོལ་བའི་རྫོགས་ཆེན་པོ། །བྱ་བྱེད་
རྩོལ་བསྒྲུབ་མེད་པས་གྲོལ་བར་བཤད། །རྒྱུ་རྐྱེན་མེད་པའི་རང་བྱུང་ཡེ་ཤེས་ཏེ། །མ་བཙལ་རང་བཞིན་གནས་པས་བདག་གྲོལ་ལ། །བཙལ་དུ་མེད་པས་གྲོལ་བར་གཞན་ལ་སྟོན། །ཅེས་བསྟན། དེ་བཞིན་མན་ངག་རྣམ་བཞི་ནི། །བྱང་ཆུབ་སེམས་ཀྱི་མན་ངག་ནི། །འགྲོ་བ་རིགས་དྲུག་ཉོན་མོངས་ལྔ། །སྙིང་པོ་བྱང་ཆུབ་སེམས་ཀྱི་རང་བཞིན་ཡིན། །སངས་རྒྱས་རྣམས་ཀྱི་སྐུ་གསུང་ཐུགས་ལ་ཆུབ། །སེམས་ཅན་རྣམས་ཀྱི་ལུས་ངག་ཡིད་ལ་ཁྱབ། །དུས་གསུམ་སངས་རྒྱས་སྐུ་དང་ཡེ་ཤེས་རོལ། །ཁམས་གསུམ་སེམས་ཅན་དུག་ལྔ་རང་ཁར་སྤྱོད། །བྱང་ཆུབ་སེམས་ཀྱི་སྙིང་པོ་དེ་ལ་ནི། །དངོས་པོ་མཚན་མར་སྤྱོད་པ་མེད་བཞིན་དུ། །དཔེ་ནི་ནམ་མཁའ་ལྟ་བུའི་རང་བཞིན་དུ། །ཀུན་ལ་ཁྱབ་པས་ནམ་མཁའི་མཐའ་ལྟར་གནས། །ཞེས་བྱང་ཆུབ་སེམས་ཀྱི་མན་ངག་གོ། །དེ་བཞིན་སྦྱོར་བ་དག་གི་མན་ངག་ནི། །ཆོས་ཉིད་སྐད་ཅིག་གཉིས་མེད་བཟུང་བས་ནི། །གཉིས་སུ་མེད་པའི་སྦྱོར་བ་ཆེན་པོ་ཡིན། །རྒྱུ་རྐྱེན་མེད་པས་བདེ་ཆེན་དག་པ་སྟེ། །སྐྱེ་བ་མེད་པས་དམ་ཚིག་ཡིན་པར་བཤད། །ཤེས་རབ་ཡུལ་དེ་རིག་པར་མངོན་གྱུར་ནས། །ཐབས་ཀྱི་གར་ཐབས་རིག་པ་བསྐྱོད་པ་ཡིས། །ཆོས་རྣམས་མ་སྐྱེས་དག་དང་གཉིས་མེད་སྦྱོར། །སྐྱེ་བ་མེད་པའི་མཆོད་པ་ཕུལ་བ་ཡིན། །ཅེས་སྦྱོར་བའི་མན་ངག་གོ། །དུས་གསུམ་གཏན་ཚིགས་མན་ངག་ནི། །སྔ་མ་འདས་དང་ད་ལྟར་གནས་པ་དང་། །ཕྱི་མ་མ་འོངས་དུས་གསུམ་ཐ་སྙད་འདི། །གསུམ་དུ་མི་གནས་སྔ་ཕྱི་ཐ་སྙད་ཡིན། །ད་ལྟར་མི་གནས་སྔ་ཕྱི་སྐྱེ་འགག་མེད། །དུས་གསུམ་སྐྱེ་འགག་མེད་པའི་དོན་འདི་ནི། །སྔ་ཕྱི་མེད་པས་དུས་གསུམ་མཉམ་པར་སྦྱོར། །ཞེས་དུས་གསུམ་གྱི་མན་ངག་གོ། །ལུང་ཆེན་ཁུངས་ཀྱི་མན་ངག་ནི། །བཙལ་ན་འཆིང་བར་འགྱུར་བ་དེ་བས་ན། །ཐམས་ཅད་ཡོངས་སུ་རྫོགས་པའི་ལུང་འདི་ལས། །བཙལ་དུ་མེད་པ་དེ་ལས་བཙལ་འགྱུར་ན། །ཚི་ཆད་པ་ཡིས་ནད་དེས་སྒྲིབ་པར་འགྱུར། །བྱ་རུ་མེད་པ་དེ་ལ་དེ་རྟོགས་ན། །ཆོས་ཉིད་ལ་ནི་ཆོས་ཉིད་འགྲུབ་པ་མེད། །ཅེས་གསུངས་སོ། །གཏན་ལ་འབེབས་པའི་མདོ་ཡི་འགྲེལ་པ་རྫོགས་སོ།། །།
དེ་ནས་སེམས་དཔའ་ཆེན་པོ་དེས་འདུས་པའི་ཚོགས་རྣམས་ལ་ངེས་པར་བསྟན་པའི་མདོ་འདི་བསྟན་ཏེ་བློ་ངེས་པར་བཞག་གོ། །ཀྱེ་འདུས་པའི་ཚོགས་ཆེན་ད་ཉོན་ཅིག །ངེས་པར་བསྟན་པའི་མདོ་འདི་ལས། །མེད་པའི་མན་ངག་རྣམ་པ་བརྒྱད། །ངེས་པ་ལྔ་དང་མ་ངེས་གསུམ། །བརྒྱད་པ་གཉིས་ཀྱི་མན་ངག་གིས། །ཁྱོད་བློ་ངེས་པར་གཞག་པར་བྱ། །དེ་ཡང་གང་དང་གང་ཞེ་ན། །སེམས་ལ་སྐྱེ་འཇིག་མེད་པ་དང་། །དོན་ལ་བསྒོམ་དུ་མེད་པ་དང་། །སྤྱོད་པ་བླང་དོར་མེད་པ་དང་། །ལམ་ལ་བགྲོད་དུ་མེད་པ་དང་། །རྣམ་པར་བགྲང་དུ་མེད་པ་དང་། །སེམས་ལ་ངོ་བོ་མེད་པ་དང་། །ཆོས་ཉིད་མཚོན་དུ་མེད་པ་དང་། །སྒྲོ་སྐུར་གདགས་སུ་མེད་པ་བརྒྱད། །ངེས་པ་ལྔ་ནི་གང་ཞེ་ན། །དུས་ལ་ཁྱད་པར་མེད་པར་ངས། །བླ་མ་མཆོད་པར་མཉམ་པར་ངེས། །མཆོད་པ་བསྔོ་རུ་མེད་པར་ངེས། །དཀའ་སླ་མཚོན་དུ་མེད་པར་ངེས། །བདེ་དང་སྡུག་བསྔལ་རྒྱུ་མཐུན་ངེས། །ཆོས་ཀྱི་རང་བཞིན་མ་ངེས་དང་། །བློ་ཡི་རང་བཞིན་མ་ངེས་དང་། །ཡེ་ཤེས་རང་བཞིན་མ་ངེས་གསུམ། །སེམས་ལ་སྐྱེ་འཇིག་མེད་པ་དང་། །སྙིང་པོ་བྱང་ཆུབ་སེམས་འདི་ལ། །ཕ་ཞེས་བྱ་བའི་རྒྱུ་མ་མཆིས། །མ་ཞེས་བྱ་བའི་རྐྱེན་མ་མཆིས། །རྒྱུ་མ་མཆིས་པས་སྐྱེ་བ་མེད། །རྐྱེན་མ་མཆིས་པས་འཇིག་པ་མེད། །དེས་ན་སྐྱེ་འཇིག་མེད་ཅེས་བྱ། །དོན་ལ་བསྒོམ་དུ་མེད་པ་ནི། །དོན་ནི་ཆོས་ཉིད་སྐྱེ་མེད་དེ། །དཔེ་ཡིས་བསྒོམ་དུ་མེད་པ་དང་། །དོན་གྱིས་བསྒོམ་དུ་མེད་པ་དང་། །རྟགས་ཀྱིས་བསྒོམ་དུ་མེད་པའོ། །དེ་ཡང་ཇི་ལྟ་བུ་ཞེ་ན། །དཔེ་ཡིས་བསྒོམ་དུ་མེད་པ་ནི། །ཆོས་ཀུན་དཔེ་ནི་ནམ་མཁའ་སྟེ། །ནམ་མཁའ་སྟོང་ཞིང་བདག་མེད་པས། །དེ་བཞིན་དཔེ་ལ་བསྒོམ་དུ་མེད། །དོན་གྱིས་བསྒོམ་དུ་མེད་པ་ནི། །ཆོས་ཀུན་དོན་དམ་སྐྱེ་བ་མེད། །སྐྱེ་བ་མེད་པའི་ཆོས་ཉིད་ནི། །བསྒོམ་དུ་ཡོད་པར་མ་གསུངས་སོ། །རྟགས་ཀྱིས་བསྒོམ་དུ་མེད་པ་ནི། །རང་བྱུང་ཡེ་ཤེས་འགག་མེད་དེ། །ཡེ་ནས་ཡེ་ཤེས་རང་གསལ་བས། །མཚན་མའི་ཡུལ་ལ་མི་གནས་པས། །བསྒོམ་དུ་ཡོད་པར་མ་གསུངས་སོ། །
སྤྱོད་པ་བླང་དོར་མེད་པ་ནི། །སེམས་ཉིད་རྫོགས་པ་ཆེན་པོ་ལ། །སྣང་བའི་ཆོས་དང་སྲིད་པའི་ཆོས། །ཐམས་ཅད་བྱང་ཆུབ་སེམས་ཡིན་པས། །སེམས་ཉིད་ཡེ་ཤེས་སྤྱོད་པ་ལ། །འདི་བླང་འདི་དོར་ཡོངས་མ་མཆིས། །ལམ་ལ་བགྲོད་དུ་མེད་པ་ནི། །ལམ་ལ་རྣམ་པ་གཉིས་ཡོད་དེ། །དོན་གྱི་ལམ་དང་ཚིག་ལམ་མོ། །གང་ཟག་བློ་ཡི་རིམ་པ་ལས། །ཐེག་པའི་རྣམ་གྲངས་དགུར་བསྟན་ལས། །ཐེག་པ་འོག་མའི་རྣམ་གྲངས་ལ། །ལམ་ལ་བགྲོད་དུ་ཡོད་པར་བསྟན། །དེ་ཡང་ཇི་ལྟར་བགྲོད་ཅེ་ན། །ཉན་ཐོས་དང་ནི་རང་རྒྱལ་གཉིས། །སྤང་ཞིང་འགེགས་པས་ལམ་ལ་བགྲོད། །བྱང་ཆུབ་སེམས་དཔའི་མདོ་སྡེ་ཡིས། །སྦྱང་ཞིང་བགྲོད་པས་ལམ་ལ་བགྲོད། །བྱ་བ་རྣམ་གསུམ་ཡོ་ག་ཡིས། །གཟུང་འཛིན་དག་པའི་སྒོ་ནས་བགྲོད། །རྣལ་འབྱོར་ཆེན་པོ་རྣམ་པ་གཉིས། །ཏིང་འཛིན་རྣམ་གསུམ་རང་བཞིན་གྱིས། །སྐུ་གསུང་ཐུགས་ཀྱི་ལམ་ལ་བགྲོད། །སེམས་ཉིད་རྫོགས་པ་ཆེན་པོ་ནི། །རྫོགས་པ་ཆེན་པོའི་རང་བཞིན་གྱིས། །ཆོས་སྐུ་སེམས་ལ་བགྲོད་མེད་ཕྱིར། །སེམས་ཉིད་ལམ་ལ་བགྲོད་མེད་པས། །བགྲོད་དུ་མེད་པའི་ལམ་ཞེས་བྱ། །རྣམ་པ་བགྲང་དུ་མེད་པ་ནི། །ཆོས་ཀུན་རྩ་བ་གཅིག་འདུས་ཕྱིར། །རྣམ་པ་བགྲང་དུ་ཡོངས་ཀྱིས་མེད། །གང་ཟག་དབང་པོ་རིམ་དགུ་ལ། །ཡུལ་དགུ་བྱུང་བས་རྣམ་པར་བགྲང་། །སེམས་ཉིད་རྫོགས་པ་ཆེན་པོ་ལ། །ཡུལ་ཞེས་བྱ་བ་སེམས་ཡིན་ཏེ། །སེམས་དང་ཡུལ་གཉིས་དབྱེ་རུ་མེད། །ཆོས་ཀུན་སེམས་སུ་འདུས་པའི་ཕྱིར། །སེམས་ཉིད་སྙིང་པོར་གཅིག་པ་སྟེ། །འདུས་མ་བྱས་པའི་སྙིང་པོ་ལ། །རྣམ་པ་བགྲང་དུ་ག་ལ་ཡོད། །སེམས་ལ་ངོ་བོ་མེད་པ་ནི། །དུས་གསུམ་སངས་རྒྱས་ཐམས་ཅད་ཀྱིས། །སེམས་ཀྱི་ངོ་བོ་འདི་ཡིན་ཞེས། །ཆེ་ཆུང་མཚན་མའི་ངོ་བོ་དང་། །དབྱིབས་དང་ཁ་དོག་སྤྱོད་ཡུལ་དུ། །སྟོན་པ་ང་ཡིས་བསྟན་པ་མེད། །ངོ་བོ་ཡོད་པར་མི་མཐོང་བས། །དེས་ན་ངོ་བོ་མེད་ཅེས་བྱ། །ཆོས་ཉིད་མཚོན་དུ་མེད་པ་ནི། །ཆོས་ཉིད་རང་བཞིན་སེམས་ཉིད་དེ། །སེམས་ཉིད་
རང་བཞིན་ཆོས་ཉིད་ལ། །སེམས་ཉིད་བཅོས་པ་མེད་པ་ནི། །དེ་ལ་ཆོས་ཞེས་བཏགས་པ་ཡིན། །བཅོས་པ་མེད་པར་རང་རིག་པས། །དེ་ལ་སེམས་ཞེས་བཏགས་པ་ཡིན། །དེ་བཞིན་སེམས་ལ་དངོས་མེད་བཞིན། །ཆོས་ཉིད་དེ་ཡང་སེམས་ཡིན་པས། །སེམས་བཞིན་ཆོས་ལ་མཚོན་མེད་དོ། །སྒྲོ་སྐུར་གདགས་སུ་མེད་པ་ནི། །སེམས་ཉིད་རྫོགས་པ་ཆེན་པོ་ཡིས། །མེད་པ་བདུན་གྱི་རང་བཞིན་གྱིས། །ཆོས་ཀུན་སྒྲོ་དང་སྐུར་བྲལ་ཏེ། །ཡོད་པའི་སྒྲོ་དང་མེད་པའི་སྐུར། །ཚིག་དང་ཡི་གེར་བརྗོད་དང་བྲལ། །དེ་ལ་སྒྲོ་སྐུར་བྲལ་ཞེས་བྱ། །ངེས་པ་ལྔ་ནི་གང་ཞེ་ན། །དུས་ལས་ཁྱད་པར་མེད་པ་ནི། །འདས་དང་ད་ལྟར་མ་འོངས་ལ། །སྐྱེ་འགག་མེད་པའི་གཏན་ཚིགས་ཀྱིས། །དུས་ལ་ཁྱད་པར་མེད་པར་ངེས། །བླ་མ་མཆོད་དང་མཉམ་པ་ནི། །བླང་དོར་མེད་པའི་སེམས་ཉིད་ཀྱིས། །ཐམས་ཅད་ཆོས་ཉིད་གཅིག་པའི་ཕྱིར། །མཉམ་པས་གོང་འོག་རིམ་པ་མེད། །གཅིག་ལ་གཉིས་སུ་བྱ་རུ་མེད། །སེམས་ལ་བླང་དོར་བྱ་རུ་མེད། །སངས་རྒྱས་སེམས་ཅན་གཉིས་མེད་ལ། །བླ་མ་མཆོད་པ་གཉིས་མེད་མཉམ། །དེས་ན་བླ་མ་མཆོད་པར་མཉམ། །མཆོད་པ་བསྔོ་རུ་མེད་པ་ནི། །སེམས་ཉིད་རྫོགས་པ་ཆེན་པོ་ལ། །ཐམས་ཅད་ལྷུན་གྱིས་གྲུབ་པའི་ཕྱིར། །བསྔོ་བར་བྱ་བ་ཡོད་མ་ཡིན། །ཡེ་ནས་བདུད་རྩིའི་རང་བཞིན་ལ། །ཏིང་འཛིན་དབང་བ་པོས་ཀྱང་སྦྱང་དུ་མེད། །དཀའ་སླ་མཚོན་དུ་མེད་པ་ནི། །ཆོས་ཉིད་བྱང་ཆུབ་སེམས་འདི་ལ། །ངོ་བོ་ཡེ་ནས་མེད་པའི་ཕྱིར། །མིང་ཙམ་འདི་ཞེས་བསྟན་པ་ནི། །དུས་གསུམ་སངས་རྒྱས་ཐམས་ཅད་དང་། །རྡོ་རྗེ་སེམས་དཔས་མཚོན་དུ་མེད། །བདེ་དང་སྡུག་བསྔལ་རྒྱུ་མཐུན་ནི། །སྙིང་པོ་བྱང་ཆུབ་སེམས་འདིས་ནི། །རྒྱུ་གཉིས་ཡེ་ནས་བྱས་པའི་ཕྱིར། །བདེ་དང་སྡུག་བསྔལ་རྒྱུ་མཐུན་ངེས། །ཞེས་བསྟན། ངེས་པ་ལྔ་ཞེས་བྱ་བར་བཤད། །མ་ངེས་པ་ནི་རྣམ་གསུམ་སྟེ། །དེ་ཡང་གང་དང་གང་ཞེ་ན། །ཆོས་ཀྱི་རང་བཞིན་གཅིག་པ་ལ། །ཇི་ལྟར་བལྟས་པ་དེར་སྣང་བས། །དེ་ལ་འདི་ཞེས་ངེས་པ་མེད། །བྱིས་པའི་བློ་ལ་ངེས་མེད་པས། །རང་སེམས་
གཞན་དུ་ཚོལ་བར་བྱེད། །དེས་ན་ངེས་པ་མེད་པ་ཡིན། །ཡེ་ཤེས་རང་བཞིན་མ་ངེས་པས། །ཡཱ་ན་རྣམ་པ་རེ་རེ་ལ། །གྲངས་དང་རྣམ་པའི་ཡེ་ཤེས་ཀྱིས། །སེམས་གཅིག་ཡུལ་ལ་སོ་སོར་རྟོགས། །དེས་ན་ཡེ་ཤེས་ངེས་པ་མེད། །ཅེས་གསུངས་སོ། །ངེས་པར་སྟོན་པའི་མདོར་བསྟན་པའི་ལེའུའོ།། །།དེ་ནས་ཡང་འདུས་པའི་ཚོགས་ཆེན་དེ་རྣམས་ལ། སེམས་དཔའ་ཆེན་པོ་དེས། ངེས་པའི་མདོ་དོན་གྱི་འགྲེལ་པ་འདི་གསུངས་སོ། །ཀྱེ་འདུས་པའི་ཚོགས་ཆེན་ད་ཉོན་ཅིག །སེམས་ལ་སྐྱེ་འཇིག་མེད་པས་ན། །དོན་ལ་བསྒོམ་དུ་མ་མཆིས་ཏེ། །སྙིང་པོ་བྱང་ཆུབ་སེམས་འདི་ལ། །ཏིང་འཛིན་བསམ་པའི་ཡུལ་ལས་འདས། །བརྗོད་དུ་མེད་པའི་ངང་ལ་གནས། །དེ་ལྟར་སྙིང་པོ་བྱང་ཆུབ་སེམས། །སྟོན་པའི་སྒྲོན་མར་གྱུར་པས་ན། །སངས་རྒྱས་ཀུན་གྱིས་རབ་ཏུ་བསྔགས། །ཆོས་རྣམས་ཀུན་གྱི་སྙིང་པོ་བས། །མཁྱེན་རབ་འཇམ་དཔལ་གཞོན་ནུ་ཉིད། །བྱ་བྱེད་རྩོལ་བསྒྲུབ་མི་མངའ་བར། །བདེ་ཆེན་ཀློང་ན་ཇི་བཞིན་གནས། །ལམ་ལ་བགྲོད་དུ་མེད་པ་ནི། །ཚུལ་ཁྲིམས་སྡོམ་པ་དམ་ཚིག་དང་། །སྤྱོད་པ་རྒྱ་མཚོའི་གཞིར་གྱུར་བས་ཀྱང་། །ཇི་སྙེད་རྣམ་པར་གྲོལ་བའི་ལམ། །དེ་ནི་བདེ་བར་གཤེགས་པའི་ཡུམ། །འགྲོ་བ་ཀུན་དང་མཚུངས་པའི་ལམ། །ཚུལ་ཁྲིམས་སྡོམ་པ་དེ་མེད་པས། །བདེ་གཤེགས་ཡུལ་ཡང་ཡོད་མ་ཡིན། །དེ་ཕྱིར་རྣམ་གྲོལ་མཆོག་གི་ལམ། །ཚུལ་ཁྲིམས་སྡོམ་པ་མེད་པར་བཤད། །སེམས་ལ་ངོ་བོ་མེད་པ་ནི། །ཕྲ་ཞིང་ཤེས་དཀའ་ཀུན་གྱི་ལམ། །མི་རྟོག་དེ་ནི་རྟོག་ལས་འདས། །དངོས་པོ་མཚན་མ་དམིགས་སུ་མེད། །སྤྲོས་མེད་བསམ་པ་ཀུན་དང་བྲལ། །ཚིག་གིས་གཏན་ལ་མི་ཕེབ་སྟེ། །དབྱིབས་དང་ཁ་དོག་སྤྱོད་ཡུལ་མིན། །བསྟན་ཅིང་བརྟགས་པར་དཀའ་ལ་བརྗོད་དུ་རྡུལ་ཙམ་མེད། །ཆོས་ཉིད་མཚོན་དུ་མེད་པ་ནི། །སྔོན་གྱི་དྲང་སྲོང་འགྲུབ་ལམ་དེར། །ད་ལྟར་གང་དུ་འཇུག་པ་ནི། །བསྒོམ་ཆགས་ལམ་གྱི་ནད་ཀྱིས་ཟིན། །སྟོན་པའི་ལུང་གི་ཚིག་རྣམས་ལ། །ལམ་དུ་དེ་མཐོང་
འཇུག་པ་ནི། །རྟོག་པའི་ལམ་ཞུགས་སྨིག་རྒྱུར་བསྙེགས། །ཡང་དག་ལམ་ནི་འདི་ཡིན་ཞེས། །ཚིག་དང་ཡི་གེས་མཚོན་དུ་མེད། །ཡང་དག་འདི་ཡིན་སྟོན་པ་ནི། །རྡོ་རྗེ་སེམས་དཔའ་ང་ཉིད་འཁྲུལ། །དག་པ་དང་ནི་མ་དག་པ། །ཡེ་ནས་གཉིས་མེད་འདྲེས་ཤིང་མཚུངས། །སེམས་ཉིད་ཀུན་གྱི་གནས་སུའོ། །དག་མ་དག་ནི་རྣམ་པ་ནི། །དབྱེར་མེད་ཡེ་ཤེས་གཏི་མུག་དང་། །ཐོགས་པ་མེད་པའི་ཡེ་ཤེས་ནི། །བསམ་པ་ཀུན་དང་བྲལ་བ་ཡིན། །ངང་གིས་མི་གཡོ་རྨུགས་པ་དེ། །ཏིང་འཛིན་དག་གི་རྒྱལ་པོར་གནས། །ཏིང་འཛིན་ཡེ་ཤེས་མངོན་སུམ་སྤྱན། །མཐོང་བས་དམིགས་པའི་ཡུལ་དང་བྲལ། །ཐམས་ཅད་མཁྱེན་པའི་སྤྱན་ཞེས་བྱ། །མཐའ་དང་དབུས་མེད་ཡངས་པ་ནི། །རང་བཞིན་ཆོས་ཀྱི་གཞལ་ཡས་སོ། །སྒྲོ་སྐུར་གདགས་སུ་མེད་པ་ནི། །བླང་དོར་མེད་པའི་རྒྱལ་པོ་ནི། །ཐམས་ཅད་སྙིང་པོ་བྱང་ཆུབ་སེམས། །སེམས་དང་བག་ཆགས་འདྲེས་མཚུངས་ལ། །སེམས་ཀྱི་དབང་པོ་སྒོ་ལྔ་ཡིས། །སྣང་བའི་ཆོས་ནི་རྣམ་པ་ལྔ། །དབང་པོ་སྒོ་ལྔ་རང་རྐྱེན་གྱིས། །སྤང་ཞིང་དོར་བར་ཡོངས་མི་བྱེད། །ཅི་ཡང་མི་དགོངས་ཐབས་ཀྱིས་རོལ། །ཀུན་དང་མི་མཐུན་སྤང་བའི་ཆོས། །ཉོན་མོངས་ལྔ་དང་མཚུངས་མེད་ལྔ། །དེ་ནི་རྣམ་དག་ཆེན་པོ་སྟེ། །གར་བཞུགས་མཉམ་པའི་རྒྱལ་པོ་ཐོབ། །བུད་མེད་ལ་སོགས་ཆགས་པའི་གནས། །ཀུན་ཀྱང་སྤང་བར་མི་བྱེད་དོ། །ལོ་རྒྱུས་ཚད་མའི་བློར་བཞག་ནས། །ཏིང་འཛིན་རྣམ་པ་གསུམ་པོ་དེ། །བརྟན་ནས་གྲུབ་པའི་མཐའ་སྤྱོད་པ། །རྩོལ་བྲལ་ལུང་ལས་གོལ་ཞེས་བཤད། །བྱ་བྲལ་བདེ་བའི་ལྷུན་ལ་གནས། །ཡེ་ནས་རང་བྱུང་སྙིང་པོ་ཉིད། །ཡེ་ནས་བྱས་ཟིན་བདུད་རྩི་ཡིས། །རྩོལ་བ་དག་གི་སྡུག་བསྔལ་འཇོམས། །ཡེ་ནས་མི་གཡོ་མི་འགྱུར་ཏེ། །འགྱུར་མེད་རྙེད་པ་ཀུན་དང་བྲལ། །
བྱ་བྲལ་ཟིན་པའི་ཡུལ་དེ་ལ། །བཅོས་པ་མེད་པ་ཇི་བཞིན་གནས། །བརྟགས་པས་ཆོས་ནི་ཐམས་ཅད་ཀུན། །ཐིག་ལེ་ཆེན་པོའི་རང་བཞིན་པས། །སྤྲོ་བ་མེད་ཅིང་བསྡུ་བ་མེད། །སྐྱེ་བ་མེད་ཅིང་འགག་པ་མེད། །འགོག་པ་མེད་པ་དེ་བཞིན་གནས། །རྣམ་པར་མི་རྟོག་སྙིང་པོ་འདི། །དངོས་མེད་མཚན་མ་ཅིར་མི་གནས། །ནམ་མཁའ་བཞིན་དུ་ཡེ་གནས་པས། །རྟོག་པའི་སྨྲ་བསམ་ཡུལ་ལས་འདས། །ཀུན་ལས་འདས་པའི་ཐིག་ལེ་དྲུག །སྒྲོ་དང་སྐུར་པ་ཀུན་དང་བྲལ། །སྐྱེ་འཇིག་མེད་པའི་རང་བཞིན་གྱིས། །བསྒོམ་དུ་མེད་པའི་དོན་བསྟན་ཏོ། །དེ་ནས་ཡང་སྤྱོད་པ་བླང་དོར་མེད་པ་འདི་བསྟན་ཏོ། །ཀྱེ་འདུས་པའི་ཚོགས་ཆེན་ད་ཉོན་ཅིག །སྣང་བའི་ཆོས་ནི་སྣ་ཚོགས་ཏེ། །ཆོས་ཉིད་དག་ལ་མི་གཉིས་ཀྱང་། །སྙིང་པོ་བྱང་ཆུབ་ཆོས་གཞིག་པས། །མཚོན་དུ་མེད་དེ་སྤྲོས་དང་བྲལ། །མ་བཅོས་པ་ཡི་ཆོས་ཉིད་དུ། །ཇི་བཞིན་པ་ཞེས་མི་རྟོག་ཀྱང་། །སྣ་ཚོགས་རྣམ་པར་སྣང་མཛད་ལ། །བླང་དོར་མེད་པས་ཀུན་ཏུ་བཟང་། །ཡེ་ནས་རྩོལ་བསྒྲུབ་འདས་པ་ན། །བྱས་ཟིན་རྩོལ་བའི་ནད་སྤངས་ཏེ། །ལྷུན་གྱི་གནས་ལ་བཞག་པ་ཡིན། །ཞེས་བསྟན། ཀྱེ་འདུས་པའི་ཚོགས་ཆེན་ད་ཉོན་ཅིག །ལམ་ལ་བགྲོད་དུ་མེད་པ་དང་། །རྣམ་པར་བགྲང་དུ་མེད་པ་ནི། །བྱང་ཆུབ་སེམས་སམ་ཆོས་དབྱིངས་ལ། །རྣམ་པར་བགྲང་དུ་མེད་པར་ཡོད། །ཕྱི་དང་ནང་གི་ཆོས་ཉིད་འདི། །འབྱུང་ཆེན་ལྔ་དང་སྣང་སྲིད་ཕྱི། །བྱང་ཆུབ་སེམས་དང་ཆོས་ཉིད་དང་། །དབྱེ་བ་མེད་པར་ཆོས་ཀྱི་དབྱིངས། །ཡེ་ནས་རྣམ་དག་སྤྱོད་ཡུལ་ལ། །སངས་རྒྱས་སེམས་ཅན་གཉིས་མེད་པས། །དེ་ལ་རྣམ་པར་བགྲང་དུ་མེད། །ཡེ་ནས་རྫོགས་པའི་བྱང་ཆུབ་ལ། །བསྒྲུབ་ཏུ་མེད་པས་སྨོན་དུ་མེད། །ཡེ་ནས་ལྷུན་རྫོགས་བྱ་རུ་མེད། །སྔ་མ་བཞིན་ཏེ་རྩོལ་བསྒྲུབ་མེད། །རྟོག་པ་དང་ནི་དཔྱོད་པ་དང་། །གཟུང་འཛིན་རྣམ་པར་དག་པ་གཉིས། །ཡེ་ནས་གཉིས་མེད་ཆོས་དབྱིངས་ལ། །ལོག་རྟོག་བྱིས་པས་བསླུ་བ་མེད། །འཁྲུལ་པས་
ནོར་བའི་ལམ་བསྟན་ཀྱང་། །གོང་གི་ཆོས་དབྱིངས་ལམ་དེ་གཉིས། །ཡེ་ནས་གཉིས་མེད་གཅིག་ཡིན་ཏེ། །ལམ་གཉིས་མཉམ་པར་ཤེས་པ་ནི། །དུས་གསུམ་སངས་རྒྱས་ཀུན་གྱི་རྗེ། །ང་དང་བདག་ཏུ་གང་སྟོན་པ། །དེ་ནི་མུ་སྟེགས་འཁྲུལ་པའི་ལམ། །ཆ་མེད་བྱིས་པས་བསླུས་པ་ནི། །རྟོག་པའི་ལམ་ལ་བཙུད་པ་སྟེ། །བགྲོད་པས་ཕྱིན་པའི་དུས་མེད་ལ། །བརྟགས་པས་རྟོགས་པའི་ཡུལ་མེད་པས། །ཆོས་ཉིད་ཆོས་ཚོལ་རྙེད་མི་འགྱུར། །སེམས་ཉིད་མངོན་དུ་མ་མཐོང་བའི། །ཚད་མར་མ་གྱུར་སྤྲེ་འདྲ་ཡིས། །སྟོན་པའི་ལུང་བསྟན་བཀའ་བོར་བས། །ལམ་ནོར་རྟོག་པས་ཟིན་ཏ་རེ། །སེམས་ཉིད་མངོན་དུ་གྱུར་མཐོང་བའི། །ཕྱི་རབས་དེས་ལུང་སྟོན་པ་ནི། །གསེར་ལ་ནག་མཚུར་བཏང་བས་ན། །དེ་ལ་དབང་མེད་ཡོན་གྱིས་བསླུའོ། །ཞེས་བསྟན། དེ་ནས་སེམས་དཔའ་ཆེན་པོ་དེས། །འདུས་པའི་ཚོགས་ལ་བཀའ་སྩལ་པ། །ཀྱེ་འདུས་པའི་ཚོགས་ཆེན་ད་ཉོན་ཅིག །སེམས་ལ་ངོ་བོ་མེད་པ་དང་། །ལམ་ལ་བགྲོད་དུ་མེད་པ་དང་། །ཆོས་ཉིད་མཚོན་དུ་མེད་པ་དང་། །སྒྲོ་སྐུར་གདགས་སུ་མེད་པ་དང་། །བྱང་ཆུབ་སེམས་སམ་ཆོས་དབྱིངས་ལ། །ཅིར་ཡང་མི་གནས་གཟུང་འཛིན་དམིགས་པའི་ཡུལ་མེད་པས། །རྣམ་པར་མི་རྟོག་ཆོས་ཉིད་བགྲང་དུ་མེད་པའི་ལམ། །གཞན་དུ་བསྔོ་བའི་གཟུང་འཛིན་ཆ་ཤས་ཕྲ་མོ་བྲལ། །ཡུལ་མེད་རྟོག་ལས་འདས་པས་རང་ཉིད་འབྱུང་བ་སྟེ། །རྣམ་རྟོག་བསྒོམ་པའི་ཆོས་སྐུ་ཁྱད་པར་བཅས་པའི་དོན་མེད་པས། །རང་བྱུང་ཡེ་ཤེས་རྣམ་པར་མི་རྟོག་ཆོས་སྐུའི་རང་བཞིན་གནས། །རྩོལ་བའི་བྱ་བྲལ་ཆོས་ཉིད་ཡུལ་ལ་མི་གནས་པས། །གཉེན་པོ་གཞན་ལ་ལྟོས་ཤིང་བཅོས་སུ་མེད། །རྟེན་འདྲེལ་ཡན་ལག་ཆོས་ཀྱི་བདག་ཉིད་ཀྱིས། །བྱང་ཆུབ་སྙིང་པོ་ཆོས་ཀྱི་ཡུལ་ཚོལ་ཞིང་། །ཆོས་ཉིད་རྣམ་པ་ཅིར་ཡང་རྟོག་བྲལ་བས། །ཐབས་ཆེན་ཟབ་མོའི་ངང་ལ་བདག་ཉིད་རོལ། །བྱང་ཆུབ་སྙིང་པོ་མ་བཅོས་རང་བཞིན་འབྱུང་བས་ན། །ཆོས་སྐུ་
བཙལ་མེད་གཞན་ནས་ཐོབ་པ་མེད། །རྡུལ་ཕྲན་དོན་དམ་རང་བཞིན་གཅིག་པ་ལ། །ཐ་དད་བརྩེགས་ཤིང་ཕྱོགས་ཆ་རྣམས་དང་བྲལ། །གར་མི་གནས་པའི་དོན་ཉིད་ཡེ་ཤེས་ལེགས་པ་ཆེ། །འདུས་མ་བྱས་པའི་ཡེ་ཤེས་ངང་ལས་འབྱུང་བ་སྟེ། །མངོན་སུམ་རྣམ་པར་མི་རྟོག་ཡངས་པའི་སྙིང་པོ་འབྱུང་། །རྣམ་པར་དག་པའི་ལམ་ཆེན་འདིར་ཞུགས་པས། །ཆོས་ཉིད་མཉམ་པའི་རྒྱལ་པོ་བཙལ་བ་མེད་པས་ཐོབ། །མི་འགྱུར་འགྱུར་བ་མེད་པ་ཡེ་ནས་གནས། །བདེ་བས་ཆགས་པའི་གནས་ལ་ཞེན་མེད་དེ། །དེ་བཞིན་ཉིད་ལ་གཟུང་བའི་ཡུལ་ནི་ཡེ་ནས་མེད། །སེམས་ཀྱི་གནས་ཉིད་ཡེ་ནས་མེད་ཀྱང་བླ། །རང་རིག་མངོན་སུམ་ལམ་གྱིས་ཐོབ་འདོད་ན། །སྒྱུ་མར་རྟག་ཏུ་གནས་ཤིང་བསྒོམ་པར་བྱ། །བསྒོམ་པའི་རོ་ལ་ཆགས་པའི་ངང་ནི་བདེ་བའི་ནད། །དེ་ལྟ་བུ་ལ་མཉམ་པའི་དོན་ཆེན་ཡེ་མི་འབྱུང་། །བྱང་ཆུབ་སེམས་ཀྱི་སྐུ་གཅིག་ཁྱབ་གནས་པས། །གཞན་ནས་བསྣན་པའི་ཆོས་སྐུ་ཡེ་ནས་མེད། །རང་བྱུང་ཡེ་ཤེས་མཐའ་ལ་ཐུག་པ་མེད་པས་ན། །ཆོས་ཀྱི་དབྱིངས་ལ་དབྲི་བ་དང་ནི་འཕེལ་བ་མེད། །ཆོས་ཉིད་བདེ་བའི་རོ་ལ་ཉམས་བག་མེད། །དེ་བས་ལྷག་པའི་བདེ་བ་གནས་པའི་བརྟེན་མེད་ལ། །རང་བྱུང་ཆེ་བའི་ཡུལ་ལ་མ་བཅོས་པས། །དུས་གསུམ་ཀུན་ཏུ་ཇི་བཞིན་ཡེ་ནས་ལྷན་ནེ་གནས། །ངོ་མཚར་མཐོང་བའི་ཡུལ་མེད་དེ་ལ་ལྷག་པར་ཆགས་དང་བྲལ། །དེ་ཕྱིར་མཐོང་བར་བྱ་བའི་ཆོས་མེད་དོ། །གང་ལའང་ཐོབ་པར་མི་རིགས་དེ་ཉིད་ཡིན་པས་སོ། །བརྗོད་པ་ཐ་སྙད་སྤྲོས་པ་ཀུན་དང་བྲལ། །ཆོས་ནི་སྣང་བའི་ཆོས་མེད་དེ་ཉིད་མིན། །རྟག་ཏུ་འདྲེས་པས་དབྱེར་མེད་ཅེས་ནི་བརྗོད་པ་ལ། །དོན་དམ་སྟོང་པའི་ཆོས་ཞེས་ལྷག་པར་སྨྲ་བ་དེ། །གང་ལྟར་བཤད་པ་ལྟར་ནི་དབྱིངས་ལ་གྲུབ་པ་མེད། །འཁྲུལ་པར་གྱུར་པའི་བྱང་ཆུབ་ལམ་དེ་ནི། །རྟོགས་པར་གྱུར་པས་འབྲས་བུ་ཐོབ་པ་མེད། །རང་བྱུང་རྒྱུ་རྐྱེན་མ་བསྐྱེད་སེམས་ཉིད་ཀྱང་། །
ཚིག་གི་བརྗོད་པས་མི་ཕེབས་མཐའ་དང་བྲལ། །ཡེ་ནས་བྱ་བཙལ་བྲལ་བས་བདག་ཉིད་ལ། །རང་རིག་མངོན་སུམ་ངང་གིས་བཙལ་མེད་གནས་ཕྱིར་རོ། །གྲིབ་མ་ལས་བྱུང་གཟུགས་ཀྱི་དཔེ་བཞིན་དུ། །མི་རྟོག་ཡེ་ཤེས་དེ་ལས་རྟོག་པ་འབྱུང་བར་ཟད། །མེད་དེ་ཞེས་ནི་མེད་པའི་མཐར་མ་ཡིན། །མཐར་མ་ཡིན་ཞེས་མེད་པའི་སྙིང་པོ་འབྱུང་། །སྟོང་པ་ཉིད་དེ་སྟོང་པའི་མཐར་མ་ཡིན། །སྟོང་པའི་ཡུལ་ཞེས་སྣང་བའི་སྲོག་ལ་གནས། །དཔེར་ན་ནམ་མཁའི་རང་བཞིན་དེ་ཉིད་ལས། །ནམ་མཁའ་དེ་ལས་ཡིན་ནོ་ཞེས་པའི་དྲན་པ་བསྐྱེད། །རྩོལ་བའི་བྱ་བྲལ་ཡེ་ནས་ཟིན་པའི་བདེ་བ་སྟེ། །ད་དུང་འདོད་པ་མེད་པའི་ཚུལ་གྱིས་ལེན་པར་བྱེད། །གཟའ་གཏད་བྲལ་བའི་ཡེ་ཤེས་ཡུལ་མེད་དེ། །དེ་ཉིད་ལས་ནི་ཡེ་ཤེས་གསལ་བ་འབྱུང་བར་རྩོམ། །མངོན་དུ་ཕྱུང་བའི་དྲང་སྲོང་བལྟ་བའི་རྗེས་སུ་དམིགས། །དེ་ལ་བསྒོམ་པའི་དམིགས་པའི་ཡིད་ཀྱང་འཇོག་པར་བྱེད། །རྣམ་རྩོལ་འབད་པའི་གདུང་བས་ཀུན་ནས་ཟིན་ཏ་རེ། །དེ་ནི་རང་བཞིན་ལམ་དུ་མ་རྟོགས་དེ་འཁྲུལ་པས། །ཐམས་ཅད་མཁྱེན་པའི་ཡེ་ཤེས་སྤང་ལེན་ངང་གིས་མེད། །ཇི་བཞིན་པ་ལ་ཡིན་ཞེས་རྣམ་རྟོག་བྱེད་པ་དེ། །ཕྱིར་ཞིང་རྟོག་པ་འཕེལ་ཏེ་བསྒོམ་པ་མེད། །བདེ་བ་ཆེན་པོ་ཞེས་ནི་གཞན་ནས་ཚོལ་འདོད་པས། །དེ་ཉིད་ཆགས་པའི་གཅོང་རྙིང་ནད་ཡིན་ཏེ། །མི་གཡོ་བ་ཡི་རང་བཞིན་བཙལ་མེད་གནས་པས་ན། །དེ་ཉིད་སྨན་ཆེན་ཡིན་ཞེས་རྟོགས་པར་མ་བྱས་ན། །མཐོ་རིས་ལྷ་མི་ཙམ་དུ་བགྲོད་པའི་དགེ་བཅུའི་རྒྱུ་དེས་ནི། །ཉོན་མོངས་གཅོང་རྙིང་ཟིན་པས་ཕྱིན་པར་མི་འགྱུར་རོ། །དེ་བས་བགྲོད་ལམ་མེད་དེས་ཕྱིན་པ་མེད་པས་ན། །ལམ་དེ་གང་ཟག་རྣམས་ཀྱི་ནད་དུ་ཆེ་བས་ན། །དེ་ཉིད་མྱ་ངན་འདས་པར་ཕྱིན་པར་འདོད་པ་དེས། །རི་དྭགས་སྨིག་རྒྱུ་ཆུ་རུ་འདུ་ཤེས་བསྙེགས་པ་འདྲ། །དེ་བས་གང་ཡང་རྙེད་པར་འགྱུར་བའི་ཡུལ་མེད་དེ། །དེ་བཞིན་གང་ལྟར་བགྲོད་ཀྱང་ཁམས་གསུམ་དེ་ལས་ཡོངས་མི་འབྱུང་། །ས་བཅུ་གོང་ནས་
གོང་དུ་ལྟོས་པའི་རྟེན་བཅས་ཀྱང་། །བྱང་ཆུབ་ཆེན་པོ་དག་ལ་སྒྲིབ་པར་འགྱུར་བ་ཡིན། །དེ་བས་ཤིན་ཏུ་ཐོགས་མེད་གྱུར་པའི་ཡེ་ཤེས་ལ། །བསམ་པའི་རྣམ་རྟོག་བརྗོད་པ་ཀུན་དང་བྲལ། །དེ་ཕྱིར་བཤེས་གཉེན་ཡོན་ཏན་ཀུན་གྱི་འབྱུང་གནས་ཏེ། །ནོར་བུ་རིན་ཆེན་བཞིན་དུ་སྤྱི་བོའི་གཙུག་ཏུ་བཀུར། །ཆོས་ཉིད་དམིགས་པར་བྱ་བའི་ཡུལ་དེ་མི་བྱེད་ཅིང་། །རང་བཞིན་འགྱུར་བ་མེད་པའི་གནས་ལ་མི་ལྟོས་པར། །རིག་པ་ནང་ནས་རང་བཞིན་ལེགས་པར་འཆར། །རེ་བ་ཐམས་ཅད་བྲལ་ཏེ་དེ་ཉིད་སྐོང་བའོ། །བརྟགས་ན་འདི་འདྲ་མེད་ཅིང་བཞག་ན་སྣ་ཚོགས་འབྱུང་བ་ཡིས། །ཡོན་ཏན་སྣ་ཚོགས་འབྱུང་བའི་ལེགས་པ་ཆེན་པོ་འདི། །དངོས་སུ་མི་སྣང་བ་ལྟར་ཆགས་པའི་ཆ་ལུགས་འཆང་། །ཐེག་ཆེན་སྣོད་གྱུར་ཀུན་ལ་དེ་ལྟར་སྟོན་ཅིང་རྟོགས། །བདག་གཞན་གཟུང་འཛིན་བྲལ་བའི་སྟོན་པ་དེ། །མཁན་པོ་ཞེས་ནི་རིན་ཆེན་མཛོད་དང་འདྲ། །བདག་དོན་ཐམས་ཅད་འགྲུབ་པའི་བླ་མ་ཡུལ་ཡིན་ཞེས། །བདག་འཛིན་བྲལ་བའི་སྙིང་རྗེས་ཐེག་ཆེན་བསྟན། །ནང་ནས་ཕྱི་མོ་ཉིད་ནས་མ་གཡོས་པས། །ནང་དུ་འདིའོ་ཞེས་ནི་བཙལ་བའི་གནས་མེད་དོ། །དམིགས་པའི་ཡུལ་ཕྱིར་ཆགས་ཤིང་ཡུལ་ལ་འཛིན། །དེ་ཕྱིར་གཞན་དུ་བསྔོ་བར་བྱ་བའི་དམིགས་པ་མེད། །མཉམ་པ་དེ་ལས་མི་འབྱུང་དེ་ལ་མི་འཇུག་ཅིང་། །དེ་ཉིད་བདག་ཉིད་ཆེན་པོ་སྙིང་རྗེ་དེ་ཡིན་ན། །གཞན་ནས་བཙལ་བ་འཕགས་པའི་ནོར་མེད་མི་འོང་བས། །ཡེ་ནས་བདག་ཉིད་ལ་ནི་གནས་པ་ཡིན་ཞེས་བསྟན། །བདེ་བ་ཐོབ་པར་འདོད་པས་རེ་བ་དག་དང་བཅས། །དེ་ཕྱིར་འདི་ཡིས་བདེ་ལ་རྒྱབ་ཀྱིས་ཕྱོགས་པར་འདོད། །བདེ་ལ་ཆགས་པའི་ནད་ཀྱིས་ཟིན་ཏེ་བདེ་བས་བདེ་བ་འཚོལ། །བྱང་ཆུབ་ལོགས་ནས་འདོད་པའི་འཁྲུལ་པའི་ལམ་ལ་གནས། །དེས་ན་ཡེ་རྔམ་ཆོས་ལ་ཟ་ཞིང་འཆེལ། །དེ་ལྟའི་ཡུལ་ཅན་གཟུང་འཛིན་བཅས་པས་ན། །སངས་རྒྱས་ཞེས་ནི་ལོགས་ནས་མཐོང་བ་མེད། །སངས་རྒྱས་ཞེས་ནི་
ངང་གིས་གནས་པ་མེད། །དེ་ཕྱིར་སངས་རྒྱས་མིང་དུ་སྨོས་པ་བྲལ། །སངས་རྒྱས་ཞེས་ནི་སྟོན་པས་མིང་བཏགས་ནོར། །སངས་རྒྱས་ཞེས་ནི་གཞན་ནས་ཐོབ་བྱེད་པ། །དེ་ཉིད་སྨིག་རྒྱུ་བཞིན་ཏེ་ནོར་བའི་ལམ། །ཁ་དོག་དབྱིབས་ཀྱི་གཟུགས་ནི་ཡོད་མིན་པས། །ཆོས་ཀུན་བཤད་པ་རྡུལ་ཆ་ཙམ་ཡང་མེད། །ཟིན་པའི་ནད་དང་ཆགས་པའི་སྡུག་བསྔལ་ཡེ་ནས་ཞི། །དངོས་པོ་མེད་ལ་ཞེན་པ་ཡེ་ནས་སྤངས། །གཉིས་མེད་བདུད་རྩི་ཆེན་པོའི་རང་བཞིན་ལ། །བཟའ་བའི་ཐབས་ལ་ཡེ་ནས་རག་པ་མེད། །ཐམས་ཅད་མ་བཀག་ཡངས་པ་ཆེ། །དེ་བས་འོག་མ་རྣམས་ཀྱི་གཉེན་པོ་ཡིན། །གཉིས་མེད་ངང་ལ་མི་དམིགས་མཉམ་པའི་ངང་། །ཆེ་ཆུང་འདུ་ཤེས་དམིགས་པ་དག་དང་བྲལ། །ལུང་ལས་གསུངས་པའི་མན་ངག་དག་གི་རྒྱལ། །དཔེར་ན་སྒྱུ་མཁན་རི་མོའི་རྣམ་པ་འདྲ། །མཉམ་ལ་འབྱུང་འཇུག་ཡེ་ཤེས་བྱིངས་རྨུགས་བྲལ། །དེ་ཡི་དབང་ལས་ཡེ་ཤེས་སྐྱེ་བར་འགྱུར། །རྟེན་དང་བྲལ་བས་བཏང་ཞིང་མཉམ་པའི་ངང་ལ་གནས། །བདེ་བ་ཆེན་པོ་དག་ལ་བྲོད་པ་གདུང་མི་སྐྱེ། །དཔེར་ན་ནམ་མཁའ་གཡང་ས་དག་ལ་མཁའ་ལྡིང་ཉམ་མི་ང་། །དེ་ཕྱིར་སྤྲོ་བསྡུ་བྱེད་ཅིང་མཉམ་པའི་ངང་ལ་གནས། །དེ་ལ་སྟོང་པར་མི་ལྟུང་གཟའ་གཏད་བྲལ། །རྒྱ་མཚོ་བཞིན་ཏེ་ཐམས་ཅད་མཉམ་པར་གནས། །ཆོས་རྣམས་སྣ་ཚོགས་ངང་གིས་འབྱུང་བར་བྱེད། །ཡོན་ཏན་ཚད་ནི་ནམ་མཁའི་མཐའ་དང་མཉམ། །བསྡུ་བའི་གནས་ནི་འདི་ཞེས་ངེས་པ་མེད། །བྱང་ཆུབ་སྙིང་པོར་རྟོགས་པ་དེ་མ་ཐག །ཏིང་ངེ་འཛིན་གྱི་རྒྱལ་པོ་ཆེན་པོ་འབྱུང་། །དཔེར་ན་ནམ་མཁའ་འམ་རྒྱ་མཚོ་ཆེན་པོ་བཞིན། །མི་རྟོག་མཉམ་པའི་ངང་སྟེ་མཁའ་ལྟར་ཡངས། །ཀུན་ཏུ་བཟང་པོ་མཉམ་པའི་སྤྱོད་ཡུལ་ལ། །སྐྱེ་ཤི་བྲལ་བས་འཕོ་འགྱུར་ཡེ་ནས་མེད། །འཛིན་པ་དེ་ཉིད་རྒྱུ་རྐྱེན་བཅུ་གཉིས་ཡིན། །མེད་པས་སྐུར་པ་ཡིན་ཏེ་སྣང་བས་བརྟགས་པ་ཡིན། །འཁྲུལ་པ་
སྣང་བ་ཞུགས་པའི་སྒོ་ཙམ་དུ། །དེ་ཉིད་རྟོགས་པ་མཁའ་ལྟར་ཤེས་པར་གྱིས། །འགྲོ་བ་རིགས་དྲུག་འཁྲུལ་པར་སྣང་བ་ཡང་། །དང་པོའི་ལས་ཅན་དག་ཏུ་ཤེས་པར་བྱ། །འདོད་ཡོན་ལྔ་སྤྱོད་གཞན་ལ་ཐུགས་རྗེས་བརླན། །དེས་ན་གང་ལྟར་སྤྱོད་ཀྱང་བྱང་ཆུབ་སྤྱོད་པ་ཡིན། །ཤན་པ་སྨད་འཚོང་མཚམས་མེད་བྱེད་པ་དེ། །འཇིག་རྟེན་ཁ་ན་མ་ཐོ་སྤངས་པ་ཡིན། །དེ་ཉིད་ཡོངས་སུ་རྫོགས་པའི་བདུད་རྩི་སྟེ། །བདེ་བ་ཆེན་པོ་ཉིད་དང་དབྱེར་མེད་ཕྱིར། །རྣམ་པར་མི་རྟོག་སྙིང་པོ་ཞེས་ཀྱང་བྱ། །དེ་ནི་ཐམས་ཅད་རྒྱུད་ལ་སྦས་པ་མེད། །བླང་དོར་མེད་པ་ཉིད་དུ་སྤྱོད་རྣམས་ལ། །དེ་ཉིད་བཙལ་བ་མེད་པ་ཉིད་དུ་རང་བཞིན་གནས། །ཆོས་ཉིད་ཡུལ་ལ་འཇུག་པའི་བསམ་གཏན་འདི། །རྣམ་པར་མི་རྟོག་ཆོས་རྣམས་སྙིང་པོ་ཡིན། །སེམས་ཉིད་ཆོས་ཉིད་རྟོགས་པ་རྣམས་ལ་རྒྱུད། །ཅེས་བསྟན་ཏོ། །ཀྱེ་འདུས་པའི་ཚོགས་ཆེན་ད་ཉོན་ཅིག །དུས་ལ་ཁྱད་པར་མེད་ངེས་པ། །སྔ་བ་ད་ལྟ་ཕྱི་བ་དུས་གསུམ་ནི། །བདེར་གཤེགས་ཡེ་ཤེས་ཐུགས་ལ་གཅིག་ཏུ་གསལ། །སེམས་ཅན་བག་ཆགས་བསགས་པས་གསུམ་དུ་གནས། །གཅིག་པར་སྔ་ཕྱི་མེད་པར་གདོད་ནས་བྱུང་། །ཆོས་སྐུ་དུས་གསུམ་གཅིག་ཏུ་ཁྱབ་པའི་ཕྱིར། །ཆེ་བ་ཆོས་ཉིད་ཆེན་པོ་ཡེ་ཤེས་ནི། །མ་བཅོས་བདེ་བ་ཆེན་པོར་རང་བཞིན་གནས། །དེས་ན་དུས་ལ་ཁྱད་པར་མེད་པར་ངེས། །ཞེས་བྱ། བླ་མ་མཆོད་པར་ངེས་པ་ནི། །ཚོགས་དང་ཡེ་ཤེས་གང་ཟག་རྣམ་པ་གསུམ། །སྔ་ཕྱི་མཉམ་པས་རིམ་པར་བཀོད་པ་མེད། །ཆོས་ཀུན་ཡོངས་སུ་གཅིག་པའི་གཏན་ཚིགས་ཀྱིས། །ཚོགས་དང་སངས་རྒྱས་གཅིག་པའི་བསྔོ་དང་བྲལ། །ཚོགས་ཀྱི་རྒྱན་ནི་འདོད་ཡོན་རྣམ་པ་ལྔ། །བཀོད་པ་མེད་པར་རང་བཞིན་བཀྲམ་པ་ཡང་། །ཡེ་ནས་རང་བཞིན་གནས་པས་དྲི་མ་མེད། །ཅེས་བྱ། མཆོད་པ་བསྔོ་རུ་མེད་པ་ནི། །ཡེ་ནས་རང་བཞིན་གནས་པའི་ཚོགས་ཆེན་ཏེ། །ཡེ་ནས་ལྷུན་གྱིས་གྲུབ་པས་མི་བསྔོ་ཞིང་། །གཟུང་འཛིན་གདོད་
ནས་དག་པའི་བདུད་རྩི་ཡིན། །དབང་པོ་དྲུག་སྡུད་རྣམ་ཤེས་དྲུག་ལ་མཆོད། །དབང་པོ་རྣམ་ཤེས་བཅུ་གཉིས་ཁྱད་པར་དུ། །ལྷག་པའི་ཏིང་འཛིན་དག་གི་བསམ་པ་ཡིས། །བྱིན་གྱིས་བརླབས་ཤིང་ཤེས་པས་གཟུང་དུ་མེད། །ཅེས་བསྟན། དཀའ་སླ་མཚོན་དུ་མེད་པར་ངེས་པ་ནི། །བྱང་ཆུབ་སེམས་ལ་རྒྱུ་རྐྱེན་མི་དགོས་སླ། །མཚོན་དུ་མེད་པས་རྟོགས་པ་ཤིན་ཏུ་དཀའ། །རྒྱུ་ལས་མ་བྱུང་བས་ན་སླ་བའི་ཕྱིར། །དམིགས་པའི་ཡུལ་དུ་མ་གྱུར་དཀའ་བར་བཤད། །བྱང་ཆུབ་སེམས་ནི་མངོན་སུམ་ཡུལ་མི་གནས། །སྣང་སྲིད་ཀུན་ལ་ཁྱབ་པས་ནམ་མཁའ་འདྲ། །སེམས་ལ་མིང་དང་ཚིག་གིས་མཚོན་པ་ནི། །རྡོ་རྗེ་སེམས་དཔའ་ངས་ཀྱང་མཚོན་དུ་མེད། །ཅེས་བསྟན། བདེ་དང་སྡུག་བསྔལ་རྒྱུ་མཐུན་ངེས་པ་ནི། །དབང་པོ་དྲུག་ནི་ཡུལ་ལ་ཆགས་པ་སྟེ། །ཡུལ་ལ་རང་བཞིན་མེད་པས་ཆགས་པ་མེད། །གཉིས་ཀར་མ་ཡིན་ཚིག་གི་ལམ་ལ་གནས། །བརྟགས་ན་ཇི་ལྟར་བརྟགས་པ་འབྱུང་བ་ནི། །དབུ་མ་བཞིན་ཏེ་བྲག་ཅའི་སྒྲ་དང་འདྲ། །བདེ་བ་ཆོས་ཉིད་སྡུག་བསྔལ་ཉོན་མོངས་ལྔ། །སྙིང་པོ་བྱང་ཆུབ་སེམས་སུ་རྒྱུ་མཐུན་ཞེས། །འགྲོ་བའི་མགོན་པོ་རྡོ་རྗེ་སེམས་དཔས་གསུངས། །ཞེས་བསྟན། དེ་ནས་མ་ངེས་རྣམ་པ་གསུམ་པོ་བསྟན་པ་ནི། ཆོས་ཀྱི་རང་བཞིན་མ་ངེས་ནི།མདོ་སྡེའི་ཆོས་ལ་ངེས་པ་མེད་པར་བསྟན་པ་ནི། །སྒྱུ་མ་ལྟ་བུ་བརྒྱད་དུ་སྣང་བ་ནི། །ཇི་ལྟར་བལྟས་པ་དེ་ལྟར་སྣང་བ་དེ། །སེམས་ཀྱི་བག་ཆགས་སུ་ཡང་ངེས་མེད་པར། །སྣང་བ་དེ་འདོད་རྩོལ་སེམས་བྱེད་པ་ནི། །དེ་ལ་སེམས་ཉིད་བདེ་བ་ཡོད་མ་ཡིན། །སྣང་བ་འདོད་ཅིང་རྩོལ་སེམས་བྱས་པ་ནི། །དེ་ནི་མ་རྟོགས་སྒྲིབ་དང་གོལ་སྐྱོན་ཡིན། །ཞེས་བསྟན། བློ་ལ་ངེས་པ་མེད་པ་ནི། །བྱང་ཆུབ་སེམས་ནི་རྒྱུད་དྲུག་ཀུན་དང་མཚུངས། །སེམས་རྟོག་ཆོས་ཉིད་པ་ལ་འགྲོ་བའི་ལམ། །འགྲོ་བ་རིགས་དྲུག་ཀུན་གྱི་ལམ་ཡིན་པས། །བྱིས་པའི་བློ་ལ་ངེས་པ་མ་མཆིས་པས། །མ་རིག་མ་རྟོགས་བསླད་པས་འཁྲུལ་པའི་ཕྱིར། །རང་
སེམས་སྨན་གྱིས་སློབ་དཔོན་སྨན་པ་ཚོལ། །རང་སེམས་སངས་རྒྱས་མ་རྟོགས་གཞན་དུ་ཚོལ། །ཞེས་བསྟན། ཡེ་ཤེས་མ་ངེས་བསྟན་པ་ནི། །ད་ལྟར་བདེ་བ་མདུན་གྱི་ཡེ་ཤེས་བལྟ། །ཕྱི་མ་བདེ་བ་རྒྱབ་ནས་ཡེ་ཤེས་འདོད། །སྣང་བ་མངོན་སུམ་དག་གི་ཡེ་ཤེས་དང་། །རྒྱབ་ནས་འབྱུང་བའི་ཡེ་ཤེས་གྲངས་བྱུང་བས། །དེ་ཡང་ཡེ་ཤེས་རྣམ་པའི་སྐྱོན་ཡིན་པས། །རང་བྱུང་ཡེ་ཤེས་དེ་ལ་བརྟེན་མི་བྱ། །ཞེས་བྱའོ། །ངེས་པར་བསྟན་པའི་མདོ་ལས། མན་ངག་རྣམ་པ་བརྒྱད་བསྟན་པ་དང་། ངེས་པ་དོན་གྱི་འགྲེལ་པའོ།། །།དེ་ནས་སེམས་དཔའ་ཆེན་པོ་དེས། འདུས་པའི་འཁོར་ཚོགས་དེ་རྣམས་ལ།ཆོས་ཐམས་ཅད་རྫོགས་པ་ཆེན་པོའི་བྱིན་བརླབ་ལས་བྱུང་བའི་ཕྱིར། ཐེག་པ་ཡས་འབུབས་ཐེག་པ་དགུའི་མདོ་འདི་གསུངས་སོ། །ཀྱེ་འདུས་པའི་ཚོགས་ཆེན་ད་ཉོན་ཅིག །ཆོས་ཉིད་རང་བཞིན་སེམས་ཉིད་དེ། །སེམས་ཉིད་རང་བཞིན་རྫོགས་པ་ཆེ། །རྫོགས་ཆེན་ཆོས་ཉིད་སྐྱེ་མེད་ལས། །སྐྱེ་བའི་ཆོ་འཕྲུལ་འབྱུང་བའི་ཕྱིར། །ལོངས་སྤྱོད་རྫོགས་སྐུ་སྤྲུལ་པའི་སྐུ། །སུམ་བརྒྱུད་དགུ་ཕྲུག་རྣམ་སྤྲུལ་པ། །ཚིག་དང་ཡི་གེ་དགུར་གྲགས་ཏེ། །ཐེག་པ་རྣམ་པ་དགུ་རུ་བསྟན། །དེ་ཡང་གང་དང་གང་ཞེ་ན། །ཉན་ཐོས་རང་རྒྱལ་ཐེག་ཆེན་གསུམ། །སྤྲུལ་པའི་སྐུ་ཡི་གསུང་དུ་བསྟན། །ཀྲི་ཡ་ཡོ་ག་ཕྱི་པ་གསུམ། །ལོངས་སྤྱོད་རྫོགས་སྐུའི་བསྟན་པར་གྲགས། །བསྐྱེད་དང་རྫོགས་དང་རྫོགས་ཆེན་གསུམ། །ཆོས་ཀྱི་སྐུ་ཡི་གསུང་དུ་བསྟན། །སྐུ་གསུམ་ཡཱ་ན་རྣམ་པ་དགུ། །རྫོགས་པ་ཆེན་པོས་བྱིན་གྱིས་རློབས། །དེ་ཡང་ཇི་ལྟ་བུ་ཞེ་ན། །སེམས་ཉིད་སྐུ་གསུང་ཐུགས་འདི་ཡིས། །སྐུ་གཅིག་སྐུ་གསུང་ཐུགས་སྟོན་ཏེ། །དེ་ཡང་ཇི་ལྟ་བུ་ཞེ་ན། །སྤྲུལ་པ་སྐུ་ཡི་རང་བཞིན་ནི། །བདེན་པ་བཞི་ཡི་ཆོས་ཉིད་ལ། །དབུ་ཟླུམ་ཞབས་རྗེན་བརྟུལ་ཞུགས་ཀྱིས། །འདུལ་བ་དགྲ་བཅོམ་ཤཱཀྱ་ཐུབ། །སྤྲུལ་པ་སྐུ་ཡི་རང་བཞིན་ནོ། །སྤྲུལ་པ་གསུང་གི་རང་བཞིན་ནི། །
བརྒྱད་ཁྲི་བཞི་སྟོང་གསུངས་པ་དང་། །དབྱེ་བསྡུ་རྒྱུ་འབྲས་གཉེན་པོ་ལ། །དགོངས་ཏེ་སྡེ་སྣོད་གསུམ་གསུངས་པ། །སྤྲུལ་པ་གསུང་གི་རང་བཞིན་ནོ། །སྤྲུལ་པ་ཐུགས་ཀྱི་རང་བཞིན་ནི། །ཆོས་ཉིད་སྟོང་པ་བདེན་གཉིས་ཀྱི། །རྟོག་པ་ཀུན་ཏུ་འོད་ཀྱི་ས། །མི་དམིགས་ཡེ་ཤེས་མངོན་པ་ཐུགས། །སྤྲུལ་པ་ཐུགས་ཀྱི་རང་བཞིན་ནོ། །ལོངས་སྤྱོད་རྫོགས་སྐུའི་རང་བཞིན་ནི། །གཟའ་སྐར་དུས་ཚིགས་བཟང་སྒོ་ནས། །དག་པ་གསུམ་སྤྱོད་རིགས་གསུམ་བསྒྲུབ། །རྒྱན་དང་ཆ་ལུགས་རྡོ་རྗེ་འཛིན། །ལོངས་སྤྱོད་སྐུ་ཡི་རང་བཞིན་ནོ། །ལོངས་སྤྱོད་གསུང་གི་རང་བཞིན་ནི། །ཀྲི་ཡ་ཡོ་ག་ཕྱི་ནང་གསང་ཡང་གསུམ། །དམ་ཚིག་བསྒྲུབ་དང་གྲུབ་པ་ཡིས། །ཏནྟྲ་སྡེ་གསུམ་གསུངས་པ་ནི། །ལོངས་སྤྱོད་གསུང་གི་རང་བཞིན་ནོ། །ལོངས་སྤྱོད་ཐུགས་ཀྱི་རང་བཞིན་ནི། །མཚན་མེད་བསྒོམས་ནས་སྟུག་པོ་བཀོད། །ཕྱག་རྒྱ་བཞི་ལྡན་དཔལ་བེའུ་ནི། །ལོངས་སྤྱོད་ཐུགས་ཀྱི་རང་བཞིན་ནོ། །ཆོས་ཀྱི་སྐུ་ཡི་རང་བཞིན་ནི། །སྐུ་གསུམ་པ་ཡི་ལམ་སྦྱངས་ནས། །སྣང་ཞིང་སྲིད་པའི་ཆོས་རྣམས་ཀུན། །བདག་ཉིད་ཆེན་པོ་ཆོས་སྐུར་འདོད། །ཆོས་ཀྱི་སྐུ་ཡི་རང་བཞིན་ནོ། །ཆོས་ཉིད་གསུང་གི་རང་བཞིན་ནི། །བསྐྱེད་དང་རྫོགས་དང་རྫོགས་ཆེན་གསུམ། །སྐུ་དང་གསུང་དང་ཐུགས་ཀྱི་རྒྱུད། །ཆོས་ཉིད་གསུང་གི་རང་བཞིན་ནོ། །ཆོས་ཉིད་ཐུགས་ཀྱི་རང་བཞིན་ནི། །གཟུང་འཛིན་མེད་པའི་བྱང་ཆུབ་སེམས། །སྒྲོ་སྐུར་བྲལ་བའི་ཡེ་ཤེས་ཐུགས། །ཡེ་ནས་རང་བྱུང་ཡེ་ཤེས་སོ། །ཆོས་སྐུ་ཐུགས་ཀྱི་རང་བཞིན་ནོ། །ཆོས་སྐུའི་རང་བཞིན་བྱང་ཆུབ་སེམས། །བྱང་ཆུབ་སེམས་ཀྱི་འབྱུང་གནས་འདི། །ཐེག་པ་དགུ་ཡི་སྙིང་པོ་སྟེ། །ང་ལས་མ་བྱུང་གཅིག་ཀྱང་མེད། །ད་ནི་ཀུན་གྱི་རང་བཞིན་སྟོན། །ཐམས་ཅད་ང་ཡིན་ཤེས་པར་བྱ། །སེམས་ཉིད་རྫོགས་པ་ཆེན་པོ་ནི། །ཐམས་ཅད་འབྱུང་བའི་སྙིང་པོ་སྟེ། །རང་ལས་བྱུང་བའི་
ཆོས་ཉིད་ནི། །རྒྱུར་ཡང་དག་ལ་འབྲས་བུར་དག །རྒྱུ་འབྲས་དག་པའི་ཆོས་ཉིད་ནི། །དབྱིངས་དང་ཡེ་ཤེས་ཡིན་པའི་ཕྱིར། །ཨ་ཏི་ཡོ་ག་བཀོད་པ་ཡིན། །སེམས་ལས་བྱུང་བའི་ཆོས་ཉིད་ནི། །ཕུང་པོ་ཁམས་དང་སྐྱེ་མཆེད་དེ། །ཡེ་ནས་རང་རྒྱུད་དག་པ་སྟེ། །བདག་ཉིད་ཆེན་པོ་ཡིན་པའི་ཕྱིར། །མ་ཧཱ་ཡོ་གར་བཀོད་པ་ཡིན། །སེམས་ལས་བྱུང་བའི་ཆོས་ཉིད་ནི། །ནང་རྫས་ལྔ་སྤང་ཕྱི་ལྔ་སྤྱད། །མཚན་མེད་མ་གོས་མ་ཆགས་ཀྱང་། །ཡེ་ཤེས་གྲོགས་སུ་བལྟ་བའི་ཕྱིར། །ཡོ་ག་ཞེས་སུ་བཤད་པ་ཡིན། །སེམས་ལས་བྱུང་བའི་ཆོས་ཉིད་ནི། །ཡུལ་དང་དབང་པོ་ཕྱི་སྤངས་ཏེ། །ཡ་ང་དྲི་སྤངས་དག་གསུམ་གྱིས། །ཡེ་ཤེས་སེམས་དཔའ་རྗེར་བལྟ་ཕྱིར། །ཀྲི་ཡ་ཞེས་སུ་བཀོད་པ་ཡིན། །སེམས་ལས་བྱུང་བའི་ཆོས་ཉིད་ནི། །མི་རྟག་སྡུག་བསྔལ་སྟོང་བདག་མེད། །དོན་དམ་ཀུན་རྫོབ་བདེན་པ་ཡིས། །སྦྱངས་བགྲོད་རྣམ་པ་བཅུ་སྤྱོད་ཕྱིར། །བྱང་ཆུབ་སེམས་དཔའི་མདོ་སྡེར་བཀོད། །སེམས་ལས་བྱུང་བའི་ཆོས་ཉིད་ནི། །སྡུག་བསྔལ་ཀུན་འབྱུང་འགོག་ལམ་སྟེ། །སྤང་ཞིང་འགེགས་པའི་ཤེས་པ་ཡི། །བཟོད་པ་གཟུང་འཛིན་སྤང་འཇོམས་ཕྱིར། །ཉན་ཐོས་རང་རྒྱལ་ཞེས་སུ་བཀོད། །སེམས་ལས་བྱུང་བའི་ཆོས་ཉིད་ལས། །ཆེ་བའི་ཡེ་ཤེས་འབྱུང་བའི་ཕྱིར། །སེམས་ཉིད་ཨ་ནུ་ཡོ་གར་བཤད། །སེམས་ལས་བྱུང་བའི་ཆོས་ཉིད་ལས། །སངས་རྒྱས་ལྔ་རུ་འབྱུང་བའི་ཕྱིར། །སེམས་ཉིད་མ་ཧཱ་ཡོ་གར་བཤད། །སེམས་ལས་བྱུང་བའི་ཆོས་ཉིད་ལས། །ཕྱག་རྒྱ་ཆེན་པོ་བཞི་འབྱུང་ཕྱིར། །སེམས་ཉིད་རྣལ་འབྱོར་རྒྱུད་ཅེས་བཤད། །སེམས་ལས་བྱུང་བའི་ཆོས་ཉིད་ལས། །སྐུ་གསུམ་རིགས་གསུམ་འབྱུང་བའི་ཕྱིར། །སེམས་ཉིད་བྱ་བའི་རྒྱུད་ཅེས་བཤད། །སེམས་ལས་བྱུང་བའི་ཆོས་ཉིད་ལས། །ཆོས་ཀྱི་སྐུ་རུ་འབྱུང་བའི་ཕྱིར། །སེམས་ཉིད་རྫོགས་པ་ཆེན་པོར་བཤད། །སེམས་ལས་བྱུང་བའི་ཆོས་ཉིད་ལས། །
དགྲ་ལྔ་འཇོམས་པར་འབྱུང་བའི་ཕྱིར། །སེམས་ཉིད་ཉན་ཐོས་རང་རྒྱལ་བཤད། །དེས་ན་སེམས་ཉིད་རྫོགས་ཆེན་འདིས། །ཐེག་པ་དགུ་ནི་ཡས་ཕུབ་སྟེ། །རྫོགས་པས་རྫོགས་པ་ཆེན་པོར་བཤད། །ཅེས་སེམས་ཀྱི་མདོ་འགྲེལ་ཆེན་པོ་བཅུ་ལས། ཐེག་པ་ཡས་འབུབས་ཀྱི་མདོ་སྡེ་དགུ་པའོ།། །།དེ་ནས་འདུས་པའི་ཚོགས་རྣམས་ལ། །སེམས་དཔའ་ཆེན་པོ་རྡོ་རྗེ་དེས། །ཐེག་པ་ཡས་འབུབས་པའི་མདོ་སྡེའི་དོན་གྱི་འགྲེལ་པ་འདི་གསུངས་སོ། །ཀྱེ་འདུས་པའི་ཚོགས་ཆེན་ད་ཉོན་ཅིག །ཐེག་པ་དགུ་ཡི་སྙིང་པོ་འདིར། །སེམས་ཉིད་རྫོགས་པ་ཆེན་པོ་སྟེ། །སེམས་ཀྱིས་མ་བྱས་ཆོས་མེད་དེ། །ཐམས་ཅད་སེམས་ཀྱིས་བྱས་པར་བསྟན། །གཉེན་པོ་མེད་པའི་རང་བྱུང་ཡེ་ཤེས་ནི། །དམིགས་སུ་མེད་པས་ཤིན་ཏུ་རྙེད་པར་དཀའ། །ཤེས་རབ་ཆོས་ཉིད་རིག་པ་ཐབས་ཀྱིས་རྟོགས། །ཆོས་ཉིད་རིག་པ་གཉིས་སུ་མེད་པས་འགྲུབ། །དོན་དམ་མ་ཡིན་བཏགས་པའི་མིང་ཙམ་དུ། །ཐབས་དང་ཤེས་རབ་གཉིས་ལ་བརྟེན་འདྲ་ཡང་། །ཆེ་བའི་ཡེ་ཤེས་མངོན་སུམ་བདེ་བ་དེ། །རྒྱུ་རྐྱེན་མེད་པའི་བྱང་ཆུབ་སེམས་ལས་བྱུང་། །རྫོགས་ཆེན་དག་གིས་ཡོངས་སུ་རྣལ་འབྱོར་བསྟན། །ཐམས་ཅད་བསྐྱེད་པའི་སངས་རྒྱས་ལྔ་པོ་འདིས། །རྒྱུད་དྲུག་གནས་པའི་སེམས་ཅན་ཀུན་ལ་ཁྱབ། །དེ་ལ་གཟུང་འཛིན་ལོག་པས་རྣམ་བརྟགས་ཀྱང་། །སངས་རྒྱས་ལྔ་རུ་གྲོལ་བ་གཞན་ལས་མིན། །རང་རྒྱུད་དག་པ་ཡིན་པར་རྫོགས་ཆེན་གྱི། །རྣལ་འབྱོར་ཆེན་པོ་དག་ཏུ་བསྟན་པ་ཡིན། །མ་སྐྱེས་སྐྱེ་བའི་ཆོ་འཕྲུལ་འབྱུང་བ་ཡང་། །སྐྱེ་མེད་རྟོགས་ན་ཆོ་འཕྲུལ་དཀའ་བ་མིན། །སྐུ་དང་ཡེ་ཤེས་སྟོབས་དང་མི་འཇིགས་པས། །དུས་གསུམ་སངས་རྒྱས་ཆེ་བའི་ཡོན་ཏན་ནི། །ཆོས་ཉིད་མ་བཅོས་ཇི་བཞིན་རྟོགས་པ་ལས། །ཐོགས་མེད་དཀའ་བ་མེད་པར་ཐམས་ཅད་འབྱུང་། །སེམས་དཔའ་རྣལ་འབྱོར་དེ་ལ་རྫོགས་པར་བཤད། །སྣང་སྲིད་རིག་པས་མེ་འཛིན་ཡོངས་སུ་གཏོང་། །གཟུང་འཛིན་མེད་པའི་གཏོར་མ་ཡིན་པར་བཤད། །
རྫོགས་ཆེན་རྩོལ་བསྒྲུབ་འདས་པའི་ལམ་འདི་ཡིས། །མཚམས་ཀྱི་རྒྱལ་པོ་མི་རྟོག་ཡེ་ཤེས་ཀྱིས། །བགེགས་ཀྱི་རྒྱལ་པོ་རང་གི་རྟོག་བསལ་ནས། །བྱ་བ་མེད་པའི་ལས་ཀྱི་རྒྱལ་པོ་འདི། །མི་རྟོག་ཏིང་འཛིན་མཉམ་བཞག་སྔགས་ཚིག་གོ། །བྱ་བ་མེད་པའི་ཏིང་འཛིན་ཀྲི་ཡཱ་ལ། །རྩོལ་བསྒྲུབ་འདས་པའི་སེམས་ཉིད་རྫོགས་པར་བཤད། །གཅིག་ཏུ་མ་ངེས་ཁ་དོག་རིགས་ལྔ་དང་། །སེམས་ཀྱི་བྱེ་བྲག་ཕུང་པོ་ལྔ་རྣམས་ལ། །རིགས་ལྔ་རྣམ་ཤེས་ཁྱད་པར་སྣང་བ་ཡང་། །དེ་བཞིན་སེམས་ཉིད་རྡུལ་ཡང་གཡོ་བ་མེད། །རང་བྱུང་ཡེ་ཤེས་ཆེན་པོ་སྣང་བས་ན། །འདི་ནི་འབྱུང་བ་ལྔ་ལས་རྩོལ་ཆེན་ཡིན། །མ་ངེས་གཉིས་ཀ་དེ་ལ་རྫོགས་པར་བཤད། །རིམ་པ་དགུ་དང་བརྒྱད་ཁྲི་བཞི་སྟོང་ནི། །སེམས་ཅན་སངས་རྒྱས་ལམ་ལ་འགྲོ་བའི་ལམ། །གང་ནས་སྤྱད་ཀྱང་རང་རང་འབྲས་བུ་སྐྱེ། །ཆོས་ཉིད་རྫོགས་ཆེན་མཚན་མ་མེད་དབང་གིས། །འཇིག་རྟེན་བདེ་བ་འདོད་པའི་བསྡི་གནས་ནི། །ཆོས་ཉིད་མཚན་མ་མེད་པ་འབྱུང་མི་འགྱུར། །སེམས་ཉིད་རྫོགས་པ་དག་གིས་ཕུབ་སྟེ་བཤད། །སངས་རྒྱས་བདེ་བ་ཆེན་པོའི་ཡེ་ཤེས་ནི། །སེམས་ཅན་ཉོན་མོངས་སྡུག་བསྔལ་རྣམ་པ་ལྔ། །སྙིང་པོ་བྱང་ཆུབ་སེམས་སུ་མཚུངས་པ་ལ། །ལས་ཀྱི་དབང་གིས་ཁྱད་པར་འབྱུང་ངོ་ཞེས། །ངེས་མེད་བློ་ཡིས་རྣམ་པར་བརྟགས་པ་ལ། །ཅི་སྟེ་ལས་དེའི་དབང་དུ་གྱུར་པ་ན། །རྐྱེན་མེད་རང་བྱུང་ཡེ་ཤེས་ཡོད་མ་ཡིན། །ཞེས་གསུངས་སོ། །རྫོགས་པ་ལས་ཀྱི་དབང་དུ་མི་འགྱུར་བསྟན། །བྱང་ཆུབ་སེམས་ནི་ཀུན་གྱི་རྒྱུ་ཡིན་ཏེ། །ཐམས་ཅད་འཇོམས་པའི་རྡོ་རྗེ་རྐྱེན་དང་འདྲ། །རྒྱུ་དང་ས་བོན་མེད་པས་མ་སྐྱེས་ལ། །རྐྱེན་དང་གཉེན་པོ་མེད་པས་འཇིག་པ་མེད། །གདོད་ནས་མ་སྐྱེས་སྙིང་པོ་བྱང་ཆུབ་ལ། །ད་བཙལ་བསམ་པས་བྱང་ཆུབ་སེམས་མི་བསྐྱོད། །རྫོགས་པས་གཉེན་པོའི་དབང་དུ་མི་འགྱུར་བསྟན། །ཉོན་མོངས་བརྐམ་ཆགས་ལྔ་ཡི་དབང་གིས་ནི། །ཉན་ཐོས་རང་རྒྱལ་ཐེག་ཆེན་མདོ་སྡེ་གསུམ། །འདུལ་ཁྲིམས་སྡོམ་པ་མ་
ཐུབ་ཉམས་པ་ཡིས། །ཏ་ལའི་མགོ་བཅད་ལྗོན་ཤིང་མི་སྐྱེ་དང་། །རྡོ་རྗེ་ཐེག་པའི་དམ་ཚིག་ཉམས་པ་ཡིས། །ས་བོན་མེས་བསྲེགས་འབྲས་བུ་གཏན་ཚིག་ཀྱང་། །རྫོགས་ཆེན་བསྲུང་དུ་མེད་པའི་དམ་ཚིག་གིས། །གཞན་དབང་མི་གཏོང་འབྲས་བུ་ཡོད་པར་སྟོན། །རྫོགས་པས་ཉམས་པའི་དབང་དུ་མི་འགྱུར་བསྟན། །བྱང་ཆུབ་སེམས་ཀྱི་མདོ་འགྲེལ་ཆེན་པོ་བཅུ་ལས། ཐེག་པ་ཡས་འབུབས་ཀྱི་མདོ་དང་དོན་གྱི་འགྲེལ་པ་དགུ་པ་རྫོགས་སོ།། །།དེ་ནས་ཡང་སེམས་དཔའ་ཆེན་པོ་དེས། འདུས་པའི་ཚོགས་ཐམས་ཅད་ལ་ཆོས་ཐམས་ཅད་ནི་བྱང་ཆུབ་ཀྱི་སེམས་རྫོགས་པ་ཆེན་པོ་ཁོ་ནར་རྫོགས་པའི་ཕྱིར། ཡོངས་སུ་རྫོགས་པའི་མདོ་འདི་གསུངས་སོ། །ཀྱེ་འདུས་པའི་ཚོགས་ཆེན་ད་ཉོན་ཅིག །ཅི་ལྟར་སྣང་བའི་ཆོས་རྣམས་ནི། །བྱང་ཆུབ་སེམས་ལ་རྫོགས་པའི་ཕྱིར། །བྱང་ཆུབ་སེམས་འདི་ཤེས་པར་གྱིས། །བྱང་ཆུབ་སེམས་འདི་ཤེས་པ་དང་། །ཆོས་ཀུན་རང་ལ་རྫོགས་པར་ཤེས། །རང་ལས་བྱུང་བའི་ཆོས་རྣམས་ཀུན། །རང་བྱུང་ཡེ་ཤེས་སེམས་སུ་ཤེས། །རང་བྱུང་བྱང་ཆུབ་སེམས་འདི་ལས། །མ་ཡིན་པ་ཡི་ཆོས་མེད་པས། །སེམས་མ་ཡིན་གྱི་ཆོས་ཡོད་མིན། །ཞེས་གསུངས་པས། འདུས་པའི་ཚོགས་རྣམས་རབ་ཏུ་ཡི་རང་སྟེ། ཀུན་འདུས་པའི་ཚོགས་ཀྱིས་ཞུས་པ། ཨེ་མ་ཧོ། སེམས་དཔའ་རྡོ་རྗེ་ཀུན་ཏུ་བཟང་། །ཇི་ལྟར་སྣང་བའི་ཆོས་རྣམས་ཀུན། །སེམས་ཡིན་སེམས་མིན་ཆོས་མེད་ན། །བདག་ཅག་འདུས་པའི་ཚོགས་ཀྱི་སེམས་སུ་ཡང་། །ཆོས་ཀུན་རབ་ཏུ་འདུས་ལགས་སམ། །ཞེས་ཞུས་སོ། །དེ་ནས་སེམས་དཔའ་ཆེན་པོས་དོན་འདི་གསུངས་སོ། །ཀྱེ་འདུས་པའི་ཚོགས་ཆེན་འདི་རྟོགས་ལ། །འདི་ཡི་དོན་ཀུན་རིག་པར་གྱིས། །སྣང་ཆོས་རྒྱུ་ནི་འབྱུང་ཆེན་ལྔ། །འབྱུང་ལྔ་རྒྱུ་ནི་བྱང་ཆུབ་སེམས། །སེམས་ཀྱིས་ཆོས་རྣམས་སྣང་བར་བྱེད། །སེམས་མི་སྣང་ལ་ཆོས་མི་སྣང་། །དེས་ན་ཆོས་རྣམས་སེམས་
སུ་འདུས། །སེམས་ལ་གཅིག་ལས་ཡོད་མ་ཡིན། །སེམས་གཅིག་ཀུན་ཏུ་ཁྱབ་པའི་ཕྱིར། །སངས་རྒྱས་ཡེ་ཤེས་ཐུགས་ཀྱང་སེམས། །སེམས་ཅན་བག་ཆགས་ཡིད་ཀྱང་སེམས། །སངས་རྒྱས་ཉིད་ལ་མི་རྟོག་རྒྱས། །སེམས་ཅན་རང་རྟོག་བག་ཆགས་བསྒྲིབ། །རང་བྱུང་སེམས་དེ་མི་གཉིས་གཅིག །གཅིག་ཕྱིར་དུས་གསུམ་སངས་རྒྱས་དང་། །འདུས་ཚོགས་ཁྱེད་སེམས་དབྱེར་མེད་པས། །སེམས་ཉིད་རྫོགས་པ་ཆེན་པོ་ནི། །ཡོངས་སུ་རྫོགས་པའི་མདོ་ཞེས་བྱ། །ཀྱེ་འདུས་པའི་ཚོགས་ཆེན་ད་ཉོན་ཅིག །ཅི་ལྟར་སྣང་བའི་ཆོས་རྣམས་ལ། །ཡོངས་སུ་རྫོགས་པའི་མདོ་འདི་ལ། །དོན་གྱི་རྣམ་པ་གཉིས་རྫོགས་ཏེ། །འཇིག་རྟེན་ཡོངས་སུ་རྫོགས་པ་དང་། །འདས་པ་ཡོངས་སུ་རྫོགས་པའོ། །འཇིག་རྟེན་ཡོངས་སུ་རྫོགས་པ་ནི། །སྲིད་གསུམ་འཁོར་བའི་སེམས་ཅན་རྣམས། །བརྐམ་ཆགས་ལྔ་ཡིས་ལམ་སྦྱོར་ཞིང་། །ཁམས་གསུམ་འཁོར་བའི་ཚོགས་བསྐྱེད་དེ། །བདེ་བའི་དོན་མེད་རྒྱུད་ལྔར་འཁོར། །ཀྱེ་འདུས་པའི་ཚོགས་ཆེན་ད་ཉོན་ཅིག །འདས་པ་ཡོངས་སུ་རྫོགས་པ་ནི། །མན་ངག་བཅུ་ཚན་གསུམ་བསྟན་ཏེ། །མདོ་དགུ་སེམས་ཉིད་རྫོགས་དང་བཅུ། །ལུང་དགུ་མན་ངག་བསྡུས་དང་བཅུ། །ཚིག་དགུ་བྱང་ཆུབ་སེམས་དང་བཅུ། །དེ་ཡང་མདོ་དགུ་གང་ཞེ་ན། །གཅིག་གི་མདོ་དང་གཉིས་ཀྱི་མདོ། །གསུམ་གྱི་མདོ་དང་བཞི་ཡི་མདོ། །ལྔ་ཡི་མདོ་དང་དྲུག་གི་མདོ། །བདུན་གྱི་མདོ་དང་བརྒྱད་ཀྱི་མདོ། །དགུ་ཡི་མདོ་དང་བཅུ་ཡི་མདོ། །ཐམས་ཅད་རྫོགས་པར་བསྟན་པ་ནི། །གཅིག་དང་གཉིས་དང་བཅུ་བར་དུ། །གྲངས་ལ་མཐུན་པའི་གྲངས་ཀྱིས་བསྟན། །དེ་ཡང་ཇི་ལྟར་བསྟན་ཞེ་ན། །གཅིག་ལ་གཅིག་བསྟན་གཉིས་ལ་གཉིས། །གསུམ་ལ་གསུམ་བསྟན་བཞི་ལ་བཞི། །ལྔ་ལ་ལྔ་བསྟན་དྲུག་ལ་དྲུག །བདུན་ལ་བདུན་བསྟན་བརྒྱད་ལ་བརྒྱད། །དགུ་ལ་དགུ་བསྟན་བཅུ་ལ་བཅུ། །ལྔ་བཅུ་རྩ་ལྔའི་བྱེ་
བྲག་འདིས། །ཀུན་བཟང་རྡོ་རྗེ་སེམས་དཔའི་བཀའ། །མདོ་ཡི་ཚིག་བཞི་ལྔ་བཅུ་ལྔས། །འཁོར་བ་མྱ་ངན་འདས་པའི་ཆོས། །ཐམས་ཅད་ཡོངས་སུ་རྫོགས་པར་བསྟན། །མདོ་དགུ་སེམས་ཉིད་རྫོགས་དང་བཅུ། །དེ་ཡང་གང་དང་གང་ཞེ་ན། །གཅིག་མདོ་བྱང་ཆུབ་སེམས་ཀྱི་མདོ། །གཉིས་མདོ་རྣམ་པར་བགྲང་བའི་མདོ། །གསུམ་མདོ་ཕུན་སུམ་ཚོགས་པའི་མདོ། །བཞི་མདོ་བྱེ་བྲག་འབྱེད་པའི་མདོ། །ལྔ་མདོ་ཁྱད་པར་འཕགས་པའི་མདོ། །དྲུག་མདོ་གོལ་སྒྲིབ་བསྟན་པའི་མདོ། །བདུན་མདོ་གཏན་ལ་འབེབས་པའི་མདོ། །བརྒྱད་མདོ་ངེས་པར་བསྟན་པའི་མདོ། །དགུ་མདོ་ཐེག་པ་ཡས་ཕུབ་མདོ། །བཅུ་པ་སེམས་ཉིད་རྫོགས་ཆེན་འདིས། །ལྔ་བཅུ་རྩ་ལྔའི་བྱེ་བྲག་སྟོན། །དེ་ཡང་ཇི་ལྟ་བུ་ཞེ་ན། །གཅིག་ནི་བྱང་ཆུབ་སེམས་ཡིན་ཏེ། །བྱང་ཆུབ་སེམས་ལ་བགྲང་དུ་མེད། །རྩ་བའི་དོན་དུ་ཤེས་པར་གྱིས། །གཉིས་ནི་རྣམ་པར་བགྲང་བ་སྟེ། །བྱང་ཆུབ་སེམས་ལ་གཉིས་བགྲང་བས། །འཁོར་བ་མྱ་ངན་འདས་པ་སྟེ། །སངས་རྒྱས་སེམས་ཅན་གཉིས་སུ་བགྲང་། །གསུམ་ལ་དོན་གསུམ་བསྟན་པ་ནི། །སྟོན་པ་བསྟན་པ་འཁོར་ཚོགས་ནི། །དུས་དང་གནས་ནི་རང་བཞིན་ཚང་། །ཕུན་སུམ་ཚོགས་པ་གསུམ་དུ་བསྟན། །བཞི་ཡི་མདོ་ལ་དོན་བཞི་སྟེ། །ཡོ་ག་བཞི་ཡི་རྣམ་པ་ལ། །རེ་རེ་ལ་ཡང་བཞི་བཞི་སྟེ། །ཡོ་ག་བཞི་ཡི་བྱེ་བྲག་འབྱེད། །ལྔ་ཡི་མདོ་ལ་དོན་ལྔ་སྟེ། །ཁྱད་པར་འཕགས་པའི་མདོ་དག་ལས། །ཁྱད་པར་འཕགས་པའི་ཆེ་ལྔ་སྟོན། །དྲུག་པའི་མདོ་ལ་དོན་དྲུག་སྟེ། །གོལ་སྒྲིབ་བསྟན་པའི་མདོ་དག་ལས། །ངེས་པ་ཐོབ་པའི་ཐེག་པ་དྲུག །རྫོགས་པ་ཆེན་པོའི་གོལ་སར་བསྟན། །གོལ་ས་དྲུག་དང་སྒྲིབ་དྲུག་གོ། །བདུན་པའི་མདོ་ལ་དོན་བདུན་ཏེ། །གཏན་ལ་འབེབས་པའི་མདོ་དག་ལས། །ལུང་ཆེན་གསུམ་དང་མན་ངག་བཞི། །རྣམ་པ་བདུན་གྱིས་གཏན་
ལ་འབེབས། །བརྒྱད་པའི་མདོ་ལ་དོན་བརྒྱད་སྟེ། །ངེས་པར་སྟོན་པའི་མདོ་དག་ལས། །ངེས་པ་དག་ནི་རྣམ་བརྒྱད་ཀྱིས། །མེད་པ་བརྒྱད་དང་ངེས་པ་ལྔ། །མ་ངེས་རྣམ་པ་གསུམ་དང་བརྒྱད། །བརྒྱད་པ་གཉིས་ཀྱི་རྣམ་པ་བསྟན། །དགུ་པའི་མདོ་ལ་དོན་དགུ་སྟེ། །ཐེག་པ་ཡས་འབུབས་མདོ་དག་ལས། །བདེན་པ་དགུ་ཡི་ཚིག་དགུ་ནི། །ཡས་འབུབས་ཐེག་པ་དགུ་རུ་བསྟན། །བཅུ་པའི་མདོ་ལ་དོན་བཅུ་སྟེ། །ཡོངས་སུ་རྫོགས་པའི་མདོ་དག་ལས། །ལུང་དགུ་མན་ངག་བསྡུས་དང་བཅུའོ། །དེ་ལ་མདོ་དགུ་སེམས་དང་བཅུར། །སེམས་དཔའ་ང་ཡིས་བཤད་པ་ཡིན། །ལུས་དགུ་མན་ངག་བསྡུས་དང་བཅུ། །དེ་དོན་གང་དང་གང་ཞེ་ན། །རྩ་བ་བཞི་ཡི་རྩིས་འགོ་དང་། །སྡུད་པར་བྱེད་པའི་ཐིག་ལེ་དང་། །འགྱུར་བ་མེད་པའི་ཕྱག་རྒྱ་དང་། །བགྲོད་ལམ་ནོར་བའི་གོལ་ས་དང་། །མ་ཤེས་པ་ཡི་སྒྲིབ་པ་དང་། །འདྲེལ་བ་རྒྱུད་ཏུ་བསྟན་པ་དང་། །གཏན་ལ་འབེབས་པའི་ལུང་ཆེན་དང་། །ལ་བཟླའ་བ་ཡི་མན་ངག་དང་། །ངེས་པ་དག་གིས་ཡིན་པ་དང་། །དོན་བསྡུས་པ་ཡི་གཏན་ཚིགས་བཅུའོ། །དེ་ཡང་གང་དང་གང་ཞེ་ན། །རྩ་བ་བཞི་ཡི་རྩིས་འགོ་ནི། །བྱང་ཆུབ་སེམས་ཀྱི་རང་བཞིན་ནི། །སྟོན་པ་རྡོ་རྗེ་ང་ཡིན་ཏེ། །སྟོན་པ་རྡོ་རྗེ་སེམས་དཔའ་ལ། །མིང་དང་དོན་དང་དཔེ་དང་ནི། །རང་བཞིན་དག་གི་ཆེ་བ་བསྟན། །དེ་ཡང་ཇི་ལྟ་བུ་ཞེ་ན། །མིང་ནི་རྡོ་རྗེ་སེམས་དཔའ་ལ། །དོན་གྱི་རང་བཞིན་སྐྱེ་བ་མེད། །དཔེ་ནི་ནམ་མཁའ་ལྟ་བུ་སྟེ། །ཆེ་བ་ལྔ་ནི་ཁྱད་པར་འཕགས། །དེས་ན་རྩ་བ་བཞི་ཞེས་བྱ། །སྡུད་པར་བྱེད་པའི་ཐིག་ལེ་ནི། །བྱང་ཆུབ་སེམས་ཀྱི་ངོ་བོ་ནི། །སྤྲོས་པ་མེད་པའི་རང་བཞིན་གྱིས། །སྡུད་པར་ཕྱེད་པའི་ཐིག་ལེ་སྟེ། །སྤྲོས་མེད་ཐིག་ལེ་ཆེན་པོ་དྲུག །ཆེ་བའི་ཡོན་ཏན་རྣམ་གྲངས་ཏེ། །ཆོས་ཉིད་བྱང་ཆུབ་སེམས་ལ་བགྲང་། །དེ་ཡང་ཇི་ལྟར་སྡུད་ཅེ་ན། །སྤྲོས་མེད་ཆོས་ཉིད་ཐིག་ལེ་ནི། །མ་བཅོས་པ་ཡི་བྱང་ཆུབ་སེམས། །རང་བཞིན་གནས་པའི་ཐིག་ལེར་བཤད། །བྱང་ཆུབ་སེམས་ཀྱི་ཆེ་བ་
ཡིན། །སྤྲོས་མེད་དབྱིངས་ཀྱི་ཐིག་ལེ་ནི། །ཐམས་ཅད་སྡུད་པའི་བྱང་ཆུབ་སེམས། །འབྱེད་པར་བྱེད་པའི་ཐིག་ལེར་སྡུད། །བྱང་ཆུབ་སེམས་ཀྱི་ཆེ་བ་ཡིན། །དབྱིངས་ཉིད་རྣམ་དག་ཐིག་ལེ་ནི། །གཟུང་འཛིན་དག་པའི་བྱང་ཆུབ་སེམས། །སྤྲོས་པ་མེད་པའི་ཐིག་ལེར་སྡུད། །བྱང་ཆུབ་སེམས་ཀྱི་ཆེ་བ་ཡིན། །ཡེ་ཤེས་ཆེན་པོའི་ཐིག་ལེ་ནི། །མ་བསྒྲིབས་པ་ཡི་བྱང་ཆུབ་སེམས། །འགག་པ་མེད་པའི་ཐིག་ལེར་སྡུད། །བྱང་ཆུབ་སེམས་ཀྱི་ཆེ་བ་ཡིན། །སྤྲོས་མེད་ཀུན་བཟང་ཐིག་ལེ་ནི། །བླང་དོར་མེད་པའི་བྱང་ཆུབ་སེམས། །མཉམ་པ་ཆེན་པོའི་ཐིག་ལེར་སྡུད། །བྱང་ཆུབ་སེམས་ཀྱི་ཆེ་བ་ཡིན། །སྤྲོས་མེད་ལྷུན་གནས་ཐིག་ལེ་ནི། །རྩོལ་བསྒྲུབ་འདས་པའི་བྱང་ཆུབ་སེམས། །མ་གཡོས་པ་ཡི་ཐིག་ལེར་སྡུད། །བྱང་ཆུབ་སེམས་ཀྱི་ཆེ་བ་ཡིན། །ཐིག་ལེ་ཐིག་ལེ་ཞེས་བྱ་བ། །སྤྲོས་པ་མེད་པའི་དོན་ཡིན་ཏེ། །བྱང་ཆུབ་སེམས་ཀྱི་རང་བཞིན་ནོ། །འགྱུར་བ་མེད་པའི་ཕྱག་རྒྱ་ནི། །རང་བྱུང་ཡེ་ཤེས་སྦྱོར་མེད་པས། །བཅུ་གཉིས་ལྔ་རུ་ཤེས་པར་བྱ། །ཡེ་ཤེས་དོན་གྱི་བྱེ་བྲག་ཡིན། །གཏན་ལ་འབེབས་པའི་མདོ་ཡིས་བསྟན། །བགྲོད་ལམ་ནོར་བའི་གོལ་ས་དང་། །མ་ཤེས་པ་ཡི་སྒྲིབ་པ་གཉིས་ཀྱང་དང་། །རང་བཞིན་འདི་བཅུ་མ་ཤེས་པས། །གོལ་ས་དང་ནི་སྒྲིབ་པར་འགྱུར། །རང་བཞིན་བཅུ་ནི་འདི་ལྟ་སྟེ། །བལྟ་བ་དང་ནི་དམ་ཚིག་དང་། །ཕྲིན་ལས་དང་ནི་ཡེ་ཤེས་དང་། །ས་དང་ལམ་གྱི་རིམ་པ་དང་། །ཕྲ་བ་ཆོས་ཉིད་རང་བཞིན་དང་། །འདྲེལ་བ་རྒྱུད་ཀྱི་རང་བཞིན་དང་། །ཐོག་ཏུ་འབེབས་པའི་ལུང་ཆེན་དང་། །ལ་ཟློ་བ་ཡི་མན་ངག་གོ། །ངེས་པ་ཐོབ་པའི་ཐེག་པ་དྲུག །སེམས་ཉིད་རྫོགས་པ་ཆེན་པོ་ལ། །རང་བཞིན་འདི་བཅུས་ཁྱབ་པའི་ཕྱིར། །རང་བཞིན་འདི་བཅུ་ཤེས་པར་བྱ། །དེ་ཡང་གང་དང་གང་ཞེ་ན། །བལྟ་བ་བདུན་དང་དམ་ཚིག་བདུན། །ཕྲིན་ལས་བདུན་དང་ཡེ་ཤེས་བདུན། །ས་བདུན་དང་ནི་བགྲོད་
ལམ་བདུན། །ཕྲ་བ་ཆོས་བདུན་རྒྱུད་འགྲེལ་བདུན། །ཐོག་ཏུ་འབེབས་པའི་ལུང་བདུན་དང་། །ལ་ཟློ་བ་ཡི་མན་ངག་བདུན། །བཅུ་ཚན་བདུན་གྱི་རང་བཞིན་འདི། །ཐེག་པ་བདུན་གྱི་ངོ་བོ་ཡིས། །གོང་མ་མ་ཤེས་བསྒྲིབ་པར་བཤད། །འོག་མའི་ལམ་ནོར་གོལ་ས་སྟེ། །གོལ་ས་བཅུ་ཚན་དྲུག་དང་ནི། །སྒྲིབ་པ་བཅུ་ཚན་དྲུག་ཡོད་དོ། །སུམ་བརྒྱ་དྲུག་ཅུའི་གོལ་སྒྲིབ་བགྲང་། །དེ་ཡང་གང་ཟག་བློ་ལ་སྣང་། །རྣལ་འབྱོར་བཞི་ལས་ཕྱེ་བ་ནི། །གོལ་ས་བརྒྱ་དང་བརྒྱད་ཅུ་ལ། །སྒྲིབ་པ་སུམ་ཅུ་བཅུ་གཉིས་བཅུ། །ཉིས་བརྒྱ་བཞི་བཅུའི་གོལ་སྒྲིབ་བགྲང་། །སུམ་ཅུ་ཐམ་པ་བགྲང་བ་ནི། །རྣལ་འབྱོར་བཞི་ལས་བགྲང་བ་སྟེ། །རང་བཞིན་བཅུ་ཡི་གོལ་སྒྲིབ་ལ། །གང་གོལ་གང་སྒྲིབ་ངོས་མ་བཟུང་། །འདི་གོལ་འདི་སྒྲིབ་བསྟན་པ་མེད། །འདི་གོལ་འདི་སྒྲིབ་བསྟན་པ་ནི། །རང་བཞིན་བཅུ་པོ་གཅིག་ལ་ཡང་། །ལ་ལ་གོལ་ས་ལ་ལ་སྒྲིབ། །ཐེག་པ་བདུན་གྱི་ངོ་ལ་སྣང་། །དེས་ན་གོལ་སྒྲིབ་བཅུ་གཉིས་སོ། །རང་བཞིན་བཅུ་པོ་གཅིག་ལ་ཡང་། །ཡཱ་ན་བདུན་གྱི་གོལ་བགྲངས་ན། །གོལ་ས་བཅུ་དང་སྒྲིབ་པ་བཅུ། །གཅིག་ལ་སྒྲིབ་པ་མི་གནས་ལ། །གཅིག་ལ་གཅིག་གོལ་ཡོད་པ་མིན། །དེ་ཡང་ཇི་ལྟ་བུ་ཞེ་ན། །རྫོགས་ཆེན་ཨ་ཏི་ཡོ་ག་ལ། །སྒྲིབ་པ་བཅུ་ཡིས་བསྒྲིབ་པ་མེད། །གོལ་ས་དྲུག་ཅུ་ཐམ་པ་ཡོད། །ཐེག་ཆེན་བྱང་ཆུབ་སེམས་དཔའ་ལ། །གོལ་ས་བཅུ་པོ་བགྲང་དུ་མེད། །སྒྲིབ་པ་དྲུག་ཅུ་ཐམ་པ་ཡོད། །རྫོགས་ཆེན་ཤིན་ཏུ་རྣལ་འབྱོར་ལ། །གོལ་ས་བསྟན་པ་དེ་བཞིན་དུ། །ཡོངས་སུ་རྫོགས་པའི་རྣལ་འབྱོར་ལ། །སྒྲིབ་པ་རྣམ་པ་བཅུ་བསྟན་ཏེ། །རང་བཞིན་བཅུ་ཡིས་སྒྲིབ་པའོ། །གོལ་ས་བཅུ་ཚན་ལྔ་བསྟན་ཏོ། །རང་བཞིན་བཅུ་ཡིས་གོལ་སའོ། །རྣལ་འབྱོར་ཆེན་པོ་བསྐྱེད་པ་ལ། །སྒྲིབ་པ་བཅུ་ཚན་གཉིས་བསྟན་ལ། །གོལ་ས་བཅུ་ཚན་བཞི་བསྟན་ཏེ། །རང་བཞིན་བཅུ་ཡི་གོལ་
སྒྲིབ་བོ། །སེམས་དཔའ་ཆེན་པོའི་རྣལ་འབྱོར་ལ། །གོལ་སྒྲིབ་བཅུ་ཚན་གསུམ་གསུམ་སྟེ། །དེ་ཡང་རང་བཞིན་གོལ་སྒྲིབ་བོ། །གཉིས་ཀ་སྤྱོད་པའི་ཨུ་པ་ཡ། །སྒྲིབ་པ་བཅུ་ཚན་བཞིས་བསྒྲིབས་པས། །གོལ་ས་བཅུ་ཚན་གཉིས་སུ་བསྟན། །དེ་ཡང་རང་བཞིན་བཅུ་ལས་བསྟན། །བྱ་བ་དག་གི་ཀྲི་ཡཱ་ལ། །སྒྲིབ་པ་བཅུ་ཚན་ལྔས་བསྒྲིབས་ལ། །གོལ་ས་བཅུ་ཚན་གཅིག་གིས་བསྟན། །དེས་ན་སུམ་བརྒྱ་དྲུག་ཅུར་བཤད། །ཐེག་པ་རྣམ་པ་དྲུག་པོ་ཡིས། །རང་གི་རང་བཞིན་མ་ཤེས་ན། །གོལ་སྒྲིབ་གོང་དུ་བསྟན་པ་འབྱུང་། །རྣལ་འབྱོར་རྣམ་པ་བཞི་པོ་ལ། །གོལ་སྒྲིབ་ཉིས་བརྒྱ་བཞི་བཅུ་བྱུང་། །གོལ་སྒྲིབ་གྲངས་དེ་འབྱུང་བ་ནི། །ཡཱ་ན་རྣམ་པ་བདུན་པོ་ལ། །ལྟ་བ་རེ་དང་དམ་ཚིག་རེ། །ཕྲིན་ལས་རེ་དང་ཡེ་ཤེས་རེ། །ས་རེ་ལམ་རེ་ཕྲ་བ་རེ། །རྒྱུད་རེ་ལུང་རེ་མན་ངག་རེ། །ཡཱ་ན་རེ་ལ་ཡོད་པའི་ཕྱིར། །དེས་ན་གོལ་སྒྲིབ་གྲངས་སུ་འབྱུང་། །འདི་རུ་མདོ་ཙམ་བསྟན་པ་ཡིན། །གོལ་སྒྲིབ་བསྟན་པའི་མདོ་ཡིས་བསྟན། །འདྲེལ་བ་རྒྱུད་ཀྱི་རང་བཞིན་ནི། །རྣམ་པ་བཅུ་རུ་ཤེས་པར་བྱ། །སྣང་བ་དང་ནི་སྲིད་པར་འདྲེལ། །སྣོད་དང་བཅུད་དུ་ཡེ་ནས་འདྲེལ། །འཁོར་བ་མྱང་འདས་ཡེ་ནས་འདྲེལ། །རྒྱུ་དང་འབྲས་བུ་ཡེ་ནས་འདྲེལ། །ཡུལ་དང་དབང་པོ་ཡེ་ནས་འདྲེལ། །ཐབས་དང་ཤེས་རབ་ཡེ་ནས་འདྲེལ། །དབྱིངས་དང་ཡེ་ཤེས་ཡེ་ནས་འདྲེལ། །དོན་དམ་ཀུན་རྫོབ་ཡེ་ནས་འདྲེལ། །སེམས་དང་ཆོས་སུ་ཡེ་ནས་འདྲེལ། །དེས་ན་སངས་རྒྱས་སེམས་ཅན་འདྲེལ། །རྒྱུད་ཀྱི་རང་བཞིན་འདྲེལ་བར་བཤད། །དེ་ཡང་ཅི་ལྟ་བུ་ཞེ་ན། །ཇི་ལྟར་སྣང་བའི་ཆོས་རྣམས་ནི། །སྲིད་པ་སྣང་བར་འབྱུང་བའི་ཕྱིར། །འདྲེལ་བ་ཞེས་སུ་བཤད་པ་ཡིན། །སྣོད་ན་ཡེ་ནས་བཅུད་གནས་ཏེ། །སྣོད་ཅེས་བྱ་བ་བཅུད་ཀྱི་སྣོད། །དེས་ན་སྣོད་བཅུད་ཡེ་ནས་འདྲེལ། །རྒྱུད་དྲུག་འཁོར་བའི་སེམས་ཅན་རྣམས། །ཡེ་ནས་མྱ་ངན་འདས་
པའི་རྒྱུ། །དེས་ན་ཡེ་ནས་རྒྱུ་ཡིས་འདྲེལ། །གང་རྒྱུ་ས་བོན་དེ་ལས་ནི། །གང་གི་འབྲས་བུ་དེ་འབྱུང་བས། །རྒྱུ་དང་འབྲས་བུར་ཡེ་ནས་འདྲེལ། །དབང་པོ་དག་ལ་ཡུལ་གསལ་བས། །མ་འགགས་རང་རྐྱེན་དག་གིས་གསལ། །དེས་ན་ཡུལ་དང་དབང་པོར་འདྲེལ། །གང་ཞིག་སྐྱེ་མེད་ཡུལ་དེ་ནི། །རིག་པ་ཐབས་ཀྱི་རྒྱལ་པོར་པོས་རྟོགས། །དེས་ན་ཐབས་དང་ཤེས་རབ་འདྲེལ། །སྤྲོས་དང་བྲལ་བའི་ཆོས་དབྱིངས་དེ། །མ་བསྒྲིབས་པ་ཡི་ཡེ་ཤེས་ཡིན། །དེས་ན་དབྱིངས་དང་ཡེ་ཤེས་འདྲེལ། །ཀུན་རྫོབ་ཚིག་དང་ཡི་གེ་ཡིས། །དོན་དམ་བརྗོད་དུ་མེད་པར་རྟོགས། །དེས་ན་ཀུན་རྫོབ་དོན་དམ་འདྲེལ། །སེམས་དང་ཆོས་སུ་འདྲེལ་བ་ནི། །སེམས་དེ་ཆོས་ཀྱི་ཡུལ་ལ་གནས། །ཆོས་ཡུལ་སེམས་སུ་ཡེ་གསལ་བས། །དེས་ན་སེམས་དང་ཆོས་སུ་འདྲེལ། །སངས་རྒྱས་སེམས་ཅན་འདྲེལ་བ་ནི། །སངས་རྒྱས་ཐུགས་རྗེ་སེམས་ཅན་ལ། །སྨོན་ལམ་གཅིག་ལ་ཡེ་ནས་འདྲེལ། །དེས་ན་འདྲེལ་བ་བཅུ་ཞེས་བཤད། །གཏན་ལ་འབེབས་པའི་ལུང་ཆེན་ནི། །དཔེར་ན་བློན་པོས་གཏམ་སྨྲས་ལ། །བཀའ་ལུང་ཞེས་ནི་སྒྲོགས་པ་མེད། །རྒྱལ་པོ་དག་གིས་བཀའ་སྩལ་པ། །དེ་ལ་བཀའ་ལུང་ཞེས་སུ་གདགས། །དེ་བཞིན་གང་ཟག་དོན་བསྟན་ཡང་། །ལུང་ཞེས་བྱ་བར་མིང་མི་འདོགས། །དེ་བཞིན་སྟོན་པ་རྣམ་གསུམ་གྱིས། །གང་ཟག་དབང་པོ་རིམ་དགུ་ལ། །བདེན་པའི་ཚིག་དགུ་སྨྲས་པ་ནི། །སྟོན་པའི་ལུང་དགུ་ཞེས་སུ་གདགས། །ལ་ཟློ་བ་ཡི་མན་ངག་ནི། །རྣམ་པ་བཅུ་རུ་ཤེས་པར་བྱ། །དེ་ཡང་གང་དང་གང་ཞེ་ན། །བལྟ་བ་དང་ནི་དམ་ཚིག་དང་། །ཕྲིན་ལས་དང་ནི་ཡེ་ཤེས་དང་། །ས་དང་ལམ་གྱི་རིམ་པ་དང་། །ཕྲ་བ་ཆོས་དང་རྒྱུད་དང་ལུང་། །མན་ངག་རང་བཞིན་བཅུ་པོ་དེ། །སེམས་ཉིད་རྫོགས་པར་བསྟན་པ་བཞིན། །མན་ངག་ཏུ་ནི་ཤེས་པར་བྱ། །ངེས་པ་དག་
གིས་ཡིན་པ་ནི། །རྣམ་པ་དྲུག་ཏུ་ཤེས་པར་བྱ། །བྱང་ཆུབ་སེམས་ཀྱི་རང་བཞིན་ཏེ། །ཡེ་ནས་ཡིན་པའི་དོན་བཤད་དེ། །ཀུན་ཏུ་བཟང་པོ་ཡིན་པ་དང་། །ཀུན་ཏུ་བཟང་མོ་ཡིན་པ་དང་། །གཉིས་སུ་མེད་པ་ཡིན་པ་དང་། །རྒྱུད་ཡིན་ལུང་ཡིན་མན་ངག་ཡིན། །རྣམ་པ་དྲུག་ཏུ་ཤེས་པར་བྱ། །ཆོས་ཉིད་བྱང་ཆུབ་སེམས་དེ་ལ། །བཟང་ངན་བླང་དོར་མེད་པའི་ཕྱིར། །ཀུན་ཏུ་བཟང་པོ་ཡིན་པར་བཤད། །ཆོས་ཉིད་བྱང་ཆུབ་སེམས་དེ་ལ། །ཐམས་ཅད་འདུས་ཤིང་འབྱུང་བའི་ཕྱིར། །ཀུན་ཏུ་བཟང་མོ་ཡིན་པར་བཤད། །ཆོས་ཉིད་བྱང་ཆུབ་སེམས་དེ་ལ། །གཟུང་འཛིན་སྤྲོས་པ་མེད་པའི་ཕྱིར། །གཉིས་སུ་མེད་པ་ཡིན་པར་བཤད། །རྒྱུད་ལུང་མན་ངག་གསུམ་ཡིན་པས། །ཆོས་ཉིད་བྱང་ཆུབ་སེམས་དེ་ལ། །ཐམས་ཅད་འདུས་ཤིང་འཚོགས་པའི་ཕྱིར། །ཕུན་སུམ་ཚོགས་པའི་རྒྱུད་ཅེས་བྱ། །ཆོས་ཉིད་བྱང་ཆུབ་སེམས་དེ་ཡིས། །ཆོས་ཀུན་གཏན་ལ་འབེབས་པའི་ཕྱིར། །ལུང་ཆེན་གཏན་ལ་འབེབས་པར་བཤད། །བྱང་ཆུབ་སེམས་ཀྱི་ལུང་ཞེས་བཤད། །སེམས་ཉིད་རྫོགས་པ་ཆེན་པོ་འདིའི། །མན་ངག་རང་བཞིན་བཅུ་པོ་འདིས། །སྒྲོ་སྐུར་འདས་པར་ལ་ཟློའི་ཕྱིར། །མན་ངག་ཀྱང་ནི་ཡིན་པར་བཤད། །དོན་བསྡུས་པ་ཡི་གཏན་ཚིགས་ནི། །རྣམ་པ་ལྔ་རུ་བསྟན་པ་ཏེ། །དགོས་དོན་ལྔ་དང་མན་ངག་བརྒྱད། །རྣལ་འབྱོར་སྲོག་བཞི་དམ་ཚིག་བཞི། །ལྔ་གཅིག་གསུམ་གྱིས་འཕགས་པ་དང་། །གདགས་སུ་ཡོད་མེད་བསྟན་པའོ། །དགོས་དོན་ལྔ་ནི་གང་ཞེ་ན། །བྱང་ཆུབ་སེམས་ཀྱི་རང་བཞིན་དང་། །སེམས་ཀྱི་རྡོ་རྗེ་སྐྱེ་མཆེད་དང་། །བཙལ་དུ་མེད་པའི་ཆོས་ཉིད་དང་། །ཀུན་བཟང་རོལ་པར་འབྱུང་བའི་ཕྱིར། །ཏིང་འཛིན་བསྐྱེད་རྫོགས་མི་དགོས་དང་། །ཅི་ལྟར་བྱས་པའི་མཛད་སྤྱོད་ནི། །མན་ངག་དམ་པ་ཡིན་པར་བཤད། །མན་ངག་བརྒྱད་ནི་གང་ཞེ་ན། །ས་དང་ལམ་གྱི་དཀྱིལ་འཁོར་དང་། །ལས་དང་
སྦྱོར་བ་དག་པ་དང་། །འབྱེད་པ་མེད་དང་སྒྲོལ་བ་དང་། །རྫོགས་པ་ཆེན་པོའི་མན་ངག་གོ། །དེ་ཡང་ཇི་ལྟ་བུ་ཞེ་ན། །ས་ལ་སྦྱང་དུ་མེད་པ་ཡིན། །ལམ་ལ་བགྲོད་དུ་མེད་པ་ཡིན། །དཀྱིལ་འཁོར་མཐའ་དབུས་མེད་པ་ཡིན། །ལས་ལ་བཙལ་དུ་མེད་པ་ཡིན། །སྦྱོར་བ་གཉིས་སུ་མེད་པ་ཡིན། །གཅིག་ལ་དབྱེ་རུ་མེད་པ་ཡིན། །རྒྱུ་རྐྱེན་མ་བྱས་སྐྱེ་མེད་བསྒྲལ། །རྫོགས་པ་ཆེན་པོའི་མན་ངག་ནི། །སེམས་ཉིད་རྫོགས་པ་ཆེན་པོ་རུ། །ཆོས་ཀུན་འདི་རུ་རྫོགས་པའོ། །སྲོག་བཞི་མན་ངག་གང་ཞེ་ན། །རྣལ་འབྱོར་སྲོག་ནི་དམ་ཚིག་ཡིན། །དམ་ཚིག་བཞི་ནི་གང་ཞེ་ན། །བསྲུང་དུ་མེད་པ་རྣམ་བཞི་སྟེ། །མེད་པ་དང་ནི་ཕྱལ་པ་དང་། །གཅིག་པུ་དང་ནི་ལྷུན་གྲུབ་བོ། །དམ་ཚིག་སྲོག་ནི་བལྟ་བ་ཡིན། །བལྟ་བའི་སྲོག་ནི་སྟོན་པའི་ལུང་། །ལུང་གི་སྲོག་ནི་མན་ངག་གོ། །དེ་ཡི་སྲོག་ནི་གསང་བའོ། །ལྔ་གཅིག་གསུམ་གྱིས་འཕགས་པ་ནི། །དེ་ཡང་གང་དང་གང་ཞེ་ན། །ཁྱད་པར་འཕགས་པའི་མདོ་དག་ལས། །ཁྱད་པར་འཕགས་པའི་ཆེ་ལྔས་འཕགས། །གསུམ་འཕགས་ཕུན་སུམ་ཚོགས་མདོ་ལས། །ཕུན་སུམ་ཚོགས་པ་གསུམ་གྱིས་འཕགས། །གཅིག་འཕགས་བྱང་ཆུབ་སེམས་མདོས་འཕགས། །དེས་ན་ཐེག་པ་ཀུན་ལས་འཕགས། །གདགས་སུ་ཡོད་མེད་བསྟན་པ་ནི། །གདགས་སུ་ཡོད་པར་བསྟན་པ་དང་། །གདགས་སུ་མེད་པར་བསྟན་པའོ། །གདགས་སུ་ཡོད་པར་བསྟན་པ་ནི། །རྣམ་པར་བགྲང་བའི་མདོ་དག་དང་། །ཐེག་པ་ཡས་ཕུབ་མདོ་དག་ལས། །བདེན་པ་ཚིག་ཏུ་གདགས་སུ་ཡོད། །ཚིག་དགུ་སྟོན་པའི་སྟོན་པ་ཡང་། །གདགས་སུ་ཡོད་པར་བཤད་པ་ཡིན། །གདགས་སུ་མེད་པར་བསྟན་པ་ནི། །ངེས་པ་སྟོན་པའི་མདོ་དག་ལས། །གདགས་སུ་མེད་པ་བརྒྱད་བསྟན་པ། །བྱང་ཆུབ་སེམས་ཀྱི་མདོ་དག་ལས། །བྱང་ཆུབ་
སེམས་ལ་མཚོན་དུ་མེད། །དེས་ན་གདགས་སུ་མེད་ཅེས་བྱ། །དོན་བསྡུས་པ་ཡི་གཏན་ཚིགས་སོ། །དེ་ནས་སེམས་དཔའ་ཆེན་པོ་དེས། འདུས་པའི་ཚོགས་ཆེན་ལ་ཆོས་ཐམས་ཅད་ཚིག་དགུར་འདུས་ལ། ཚིག་དགུ་བྱང་ཆུབ་ཀྱི་སེམས་གཅིག་ལ་སྨྲས་པ། བྱང་ཆུབ་སེམས་ནི་སེམས་དཔའ་ང་ཉིད་ཡིན་པར་སྨྲས་པ་འདི་གསུངས་སོ། །ཀྱེ་འདུས་པའི་ཚོགས་ཆེན་ད་ཉོན་ཅིག །ཚིག་དགུ་བྱང་ཆུབ་སེམས་བཅུ་ནི། །ཚིག་དགུ་སྨྲས་པ་སེམས་ཀྱིས་སྨྲས། །སེམས་དེ་བསྟན་ཕྱིར་ཚིག་དགུ་བྱུང་། །ང་ནི་སེམས་ཀྱི་ཆོས་ཉིད་དེ། །སེམས་ཉིད་ཡེ་ནས་འདུས་མ་བྱས། །ང་ནི་སེམས་དཔའ་རྡོ་རྗེ་ཞེས། །ཀུན་བཟང་བྱང་ཆུབ་སེམས་ཀྱིས་བཏགས། །བྱང་ཆུབ་སེམས་ཀྱི་ཆོས་ཉིད་ལ། །རང་བྱུང་ཡེ་ཤེས་རྒྱུ་མེད་པས། །རང་བྱུང་ཡེ་ཤེས་གཉེན་པོ་མེད། །བཙལ་དུ་མེད་པའི་བྱང་ཆུབ་སེམས། །སྦྱང་དུ་མེད་པའི་བྱང་ཆུབ་སེམས། །བསམ་དུ་མེད་པའི་བྱང་ཆུབ་སེམས། །དངོས་པོ་བྲལ་བའི་བྱང་ཆུབ་སེམས། །བསྟན་དུ་མེད་པའི་བྱང་ཆུབ་སེམས། །སྤྲོས་པ་མེད་པའི་བྱང་ཆུབ་སེམས། །བརྟག་ཏུ་མེད་པའི་བྱང་ཆུབ་སེམས། །སྒྲོ་སྐུར་བྲལ་བའི་བྱང་ཆུབ་སེམས། །ཀུན་ལས་འདས་པའི་སེམས་ཉིད་འདིར། །ཆོས་ཀུན་ཡེ་ནས་འདུས་ཤིང་གནས། །སེམས་ཉིད་ནམ་མཁའ་ལྟ་བུར་གནས། །ནམ་མཁའ་ཅི་ལའང་མི་གནས་བཞིན། །སེམས་ཉིད་ཅི་ལའང་གནས་པ་མེད། །སེམས་དཔའ་ཆེན་པོ་ང་ཡིས་ནི། །ང་ཡི་རང་བཞིན་བསྟན་པ་དགུ། །ཁྱེད་ལ་ཚིག་དགུ་བསྟན་པ་འདིས། །ང་ཡི་རང་བཞིན་ཤེས་པར་གྱིས། །ང་ཡི་རང་བཞིན་འདི་ཤེས་ན། །ཁྱེད་ཀྱང་ང་ཡི་རང་བཞིན་ཡིན། །ང་ཡི་ཆོས་རྣམས་ཐམས་ཅད་ཀྱང་། །སྤྱོད་ཡུལ་ཀུན་ལས་འདས་པའི་ཕྱིར། །སྒྲོ་སྐུར་ཀུན་དང་ང་བྲལ་ལོ། །ཞེས་ཡོངས་སུ་རྫོགས་པའི་མདོའོ།། །།དེ་ནས་སེམས་དཔའ་ཆེན་པོ་རྡོ་རྗེ་དེས། འདུས་པའི་ཚོགས་
ལ་ཡོངས་སུ་རྫོགས་པའི་མདོ་ལས་དོན་གྱི་མདོའི་འགྲེལ་པ་བཅུ་པོ་འདི་གསུངས་སོ། །ཀྱེ་འདུས་པའི་ཚོགས་ཆེན་ད་ཉོན་ཅིག །ཡོངས་སུ་རྫོགས་པའི་མདོ་འདི་ནི། །རྫོགས་པ་རྣམ་པ་གཉིས་སུ་རྫོགས། །འཇིག་རྟེན་ཡོངས་སུ་རྫོགས་པ་དང་། །འདས་པ་ཡོངས་སུ་རྫོགས་པའོ། །འཇིག་རྟེན་རྣམ་པ་གཉིས་བསྟན་ལ། །འདས་པ་རྣམ་པ་བརྒྱད་ཀྱིས་བསྟན། །འཇིག་རྟེན་ལས་དང་བསམ་པ་གཉིས། །འཇིག་རྟེན་ཁམས་གསུམ་ལས་ཀྱི་སྦྱོར་བ་ཡང་། །དོན་དམ་མེད་པའི་སྒྱུ་མར་སྣང་བ་སྟེ། །དོན་དམ་མ་ཡིན་ཚིག་ཙམ་སྣང་བ་སྟེ། །འཇིག་རྟེན་འདི་ན་བསོད་ནམས་ཚོགས་པ་ཡིས། །འཁོར་བའི་འཁོར་ལོ་བསྒྱུར་བའི་གནས་ཐོབ་ཀྱང་། །མི་རྟག་སྒྱུ་མ་འདྲ་བའི་བསྡི་གནས་ཡིན། །འཇིག་རྟེན་འདི་ཡི་བསམ་པ་དེ་ལྟའོ། །སྣ་ཚོགས་སྤྱོད་ཅིང་མེད་པའི་དུས་ལ་ལྟོས། །ལས་ཀྱི་དུས་དེར་འབྱུང་བར་མི་འགྱུར་ཏེ། །ཆགས་དང་མ་བྲལ་སྨོན་ལམ་འདེབས་པས་ན། །འབྲས་བུ་མེད་ཅིང་སྟོང་པར་གསུངས་པ་ཡིན། །དེས་ནི་འཇིག་རྟེན་ལྟ་བ་བསྟན་པ་ཡིན། །དེ་ལས་འདས་པ་ཡོངས་སུ་རྫོགས་པ་ལ་བརྒྱད་དེ། ཉན་ཐོས་དག་གི་རང་བཞིན་དང་། །རྫོགས་པ་ཆེན་པོ་བསྟན་པ་དང་། །ལམ་བསྟན་པ་དང་ལམ་གྱི་དཔེ། །ཡིད་ལ་མ་བསགས་ཚོགས་ཆེན་དང་། །སྐུ་དང་ཡེ་ཤེས་བསྟན་པ་དང་། །བསྒོམ་དུ་མེད་པར་བསྟན་པ་དང་། །རོལ་པ་རང་ལས་བྱུང་བར་བསྟན་པའོ། །དེ་ལ་ཉན་ཐོས་བསྟན་པ་ནི། །བཙལ་དུ་མེད་པའི་ཆོས་ཉིད་དེ་ལ་ནི། །དབང་པོ་དྲུག་བརྟུལ་འདུལ་བའི་ཁྲིམས་ཞུགས་རྩོལ། །སྡུག་བསྔལ་ལུས་ཀྱི་སྤྱོད་དྲག་གིས། །སྤྱད་ཀྱང་ངེས་པའི་གནས་ནི་མིང་མེད་དེ། །ལུང་གི་ཨ་དང་སྟོན་པའི་བར་ལྡན་ན། །སྐད་ཅིག་སྒྱུ་མའི་བདེ་བ་འབྱུང་བར་འདོད། །ཅེས་བསྟན། རྫོགས་པ་ཆེན་པོའི་རོལ་པ་བསྟན་པ་ནི། །ཆོས་ཉིད་བྱང་ཆུབ་སེམས་ནི་ནམ་མཁའ་འདྲ། །སེམས་ལ་རྟོག་པ་མེད་པ་ཆོས་ཀྱི་སྐུ། །དངོས་
པོ་མཚན་མ་མེད་པས་བཟུང་མི་ཟིན། །དཔེ་ནི་ཆུ་ལ་སྣང་བའི་ཟླ་བ་འདྲ། །ཆོས་སྐུ་མ་སྐྱེས་ཀུན་ཏུ་བཟང་པོ་ལས། །རོལ་པ་སྐྱེ་བའི་ཆོ་འཕྲུལ་འབྱུང་བ་ནི། །སྣང་སྲིད་མངོན་དུ་འབྱུང་བའི་ཆོས་ཉིད་དེ། །དོན་དམ་སྐྱེ་བ་མེད་པས་ཨཱ་ལིར་བཤད། །རིག་པ་མངོན་དུ་གྱུར་པའི་སེམས་ཉིད་ནི། །ཆོས་ལ་འགགས་པ་མེད་པ་ཀཱ་ལིར་བཤད། །དེ་ནི་རྫོགས་པ་ཆེན་པོའི་རོལ་པར་བཤད། །ཆོས་ཉིད་ལམ་གྱི་རང་བཞིན་བསྟན་པ་ནི། །སྔོན་གྱི་ལམ་ཡང་ཆོས་ཉིད་བྱང་ཆུབ་སེམས། །ད་ལྟའི་ལམ་ཡང་ཆོས་ཉིད་ཆོས་ཀྱི་དབྱིངས། །སྔ་མ་རྣམས་ནི་ལམ་གྱི་དཔེ་བཞིན་དུ། །ཆོས་ཉིད་དེ་ནི་ཕྱི་ལམ་གནས་སུ་ཆེ། །དེ་ལྟར་སྔ་མ་སངས་རྒྱས་སྔ་མའི་ལམ་བཞིན་དུ། །ཆོས་ཉིད་སྐྱེ་བ་མེད་པ་དེ་བཞིན་དུ། །ཕྱི་མ་ཀུན་གྱི་ལམ་གྱི་རང་བཞིན་ནོ། །ཀུན་གྱི་ལམ་ཉིད་ཡིན་པར་བསྟན་པ་ནི། །གོང་མ་ཀུན་གྱི་ལམ་དང་འདྲ་བར་ནི། །འགྲོ་བ་ཡོངས་ཀྱི་ལམ་ནི་ཆོས་ཉིད་དོ། །ཆོས་ཉིད་ནམ་མཁའི་ཟླ་བ་འདྲ་བ་ལ། །ཚིག་བརྗོད་མཛུབ་མོས་བསྟན་དང་བཅས་པ་འདྲ། །སངས་རྒྱས་སེམས་ཅན་ཀུན་གྱི་མཉམ་པ་ནི། །ཆོས་ཉིད་བདེ་བ་ཆེན་པོ་དེ་ཡིན་ལ། །སྣང་བ་མེད་པའི་ཆོས་ཉིད་དེ་ལ་ནི། །དབང་པོས་བལྟས་པས་ཆོས་ཉིད་འགྲུབ་པ་མེད། །ཅེས་བསྟན། ཡིད་ཀྱི་ཚོགས་ཆེན་བསྟན་པ་ནི། །སྣང་སྲིད་ཡིད་ཀྱིས་ཚོགས་བསྔོས་ཡོན་བདག་སྟེ། །དབང་པོས་བལྟས་པས་འདོད་ཡོན་བཀྲམ་པའོ། །དབང་པོའི་མིག་གིས་ཚོགས་སུ་མཐོང་བ་ནི། །འདོད་ཡོན་ལྔ་རུ་གསལ་བས་དངོས་གྲུབ་པོ། །དེ་ལ་ཏིང་འཛིན་མཉམ་པར་བཞག་པ་ནི། །རྒྱུ་དང་ཡེ་ཤེས་ཚོགས་གཉིས་རྫོགས་པའོ། །ཞེས་བསྟན་ཏོ། །སྐུ་དང་ཡེ་ཤེས་བསྟན་པ་ནི། །བྱང་ཆུབ་སེམས་ནི་དངོས་པོ་ཅིར་མི་གཡོ། །གཟུང་འཛིན་མི་མངའ་ཆོས་སྐུ་ཕྱག་རྒྱ་ཡིན། །ཏིང་འཛིན་མི་བསྐྱོད་རང་བྱུང་ཡེ་ཤེས་ཏེ། །ཆོས་ཉིད་མཚན་
མར་མི་ལེན་བདག་མེད་ཅིང་། །སེམས་ཀྱིས་གང་ཡང་མི་སྤང་དོར་བ་མེད། །མི་གཡོ་མི་བསྐྱོད་མི་ལེན་མི་འདོར་བས། །འདི་ཞེས་བརྗོད་མེད་ཚིག་བྲལ་མཉམ་ཉིད་དོ། །ཞེས་བསྟན། བསྒོམ་དུ་མེད་པ་བསྟན་པ་ནི། །སྲིད་པ་འབྱུང་བ་སྣང་བ་ཡོད་པའི་ཆོས། །ཆོས་ཉིད་བྱང་ཆུབ་སེམས་ལ་སྣང་བ་མེད། །མ་བཙལ་རང་བཞིན་བཞག་པས་བསྒོམ་པའི་མཆོག །བཙལ་མེད་ཆོས་ལ་ཡོད་པར་རྣམ་བཙལ་ན། །ནམ་མཁའ་དག་ལ་ཁང་པ་ཕུབ་པ་འདྲ། །མེད་པར་ཡོད་པའི་འབྲས་བུ་ཡོངས་མི་འབྱུང་། །ཞེས་བསྟན། རོལ་པ་རང་ལས་འབྱུང་བར་བསྟན་པ་ནི། །རྒྱུ་མེད་རང་བྱུང་སེམས་ནི་ངོ་མཚར་ཆེ། །དེ་ལས་རྐྱེན་མེད་ཡེ་ཤེས་རྨད་བྱུང་འདི། །བཀག་པ་མེད་པར་སྤྱོད་པས་རོལ་པ་འདི། །བྱར་མེད་རྩོལ་བསྒྲུབ་མི་མངའ་ནམ་མཁའ་བཞིན། །དངོས་པོ་ཅིར་ཡང་མི་དམིགས་གཏི་མུག་ལས། །ཐོགས་མེད་རྨད་དུ་བྱུང་བ་དེ་མ་ཐག །རྒྱུ་མེད་རང་བྱུང་ཡེ་ཤེས་རོལ་པ་འབྱུང་། །ཞེས་བྱང་ཆུབ་སེམས་ཀྱི་མདོ་ཡི་འགྲེལ་པ་ལས། ) ཡོངས་སུ་རྫོགས་པའི་དོན་གྱི་འགྲེལ་པ་བཅུ་པ་རྫོགས་སོ།། །།དེ་ནས་སེམས་དཔའ་ཆེན་པོ་དེས། འདུས་པའི་ཚོགས་ལ་ཆོས་ཐམས་ཅད་ཚིག་དང་ཡི་གེས་གཏན་ལ་དབབ་ཏུ་མེད་པ་དེ། ཚིག་དང་ཡི་གེས་འདྲེལ་བའི་སྒོ་ནས། གང་ཟག་གི་བློ་ཡིས་རྟོགས་པར་བྱ་བའི་ཕྱིར། དོན་གྱི་འགྲེལ་པ་ལྔ་པོ་འདི་གསུངས་སོ། །ཀྱེ་འདུས་པའི་ཚོགས་ཆེན་ད་ཉོན་ཅིག །སྔ་རབས་འདས་པའི་སངས་རྒྱས་ཀྱང་། །དོན་གྱི་འགྲེལ་པ་ལྔ་པོ་འདི། །རྟོགས་ནས་སྐྱེ་མེད་ས་ལ་གཤེགས། །ད་ལྟར་བཞུགས་པའི་རྣལ་འབྱོར་ཡང་། །དོན་གྱི་འགྲེལ་པ་ལྔ་པོ་འདིས། །ང་ཡི་ལུང་ཆེན་དོན་རྟོགས་ནས། །དགོངས་པ་འདི་ཡིས་གནས་པར་བྱེད། །སླད་ནས་བྱོན་པའི་གདུང་འཚོབ་རྣམས། །དོན་གྱི་འགྲེལ་པ་ལྔ་པོ་འདི། །གཏན་ལ་
ཕེབས་པས་རྟོགས་པར་འགྱུར། །འགྲེལ་ལྔ་གང་དང་གང་ཞེ་ན། །ཚེག་བར་འབྲུ་ཡི་འགྲེལ་པ་དང་། །དཔེ་དོན་རྒྱུ་འབྲས་འགྲེལ་པ་དང་། །གཏན་ཚིགས་དོན་གྱི་འགྲེལ་པ་དང་། །འབྱེད་པར་བྱེད་པའི་འགྲེལ་པ་དང་། །སྡུད་པར་བྱེད་པའི་འགྲེལ་པའོ། །ཚེག་བར་འབྲུ་ཡི་འགྲེལ་པ་ནི། །ཡི་གེའི་དོན་དང་རང་བཞིན་དང་། །ཚེག་དང་ཡིག་ཤུགས་ཡན་ལག་བརྟགས། །དེ་ཡང་ཇི་ལྟ་བུ་ཞེ་ན། །ཡི་གེ་འབྲུ་གཅིག་ལུས་པོ་ལ། །དགོས་པའི་ཡན་ལག་བདུན་ཚང་སྟེ། །མགོ་དང་ཡན་ལག་ཚེག་ཤད་བདུན། །མགོ་ནི་མ་ནོར་ལམ་འདྲེན་ལ། །ཚེག་མིག་བལྟ་ཞིང་ཤད་རྟ་ཞོན། །ཡན་ལག་ཤུགས་ཀྱིས་འགྲོ་བར་བྱེད། །ཡན་ལག་ཤུགས་ཀྱིས་འགྲོས་བསླངས་ནས། །མགོ་ནི་དོན་གྱི་ལམ་དུ་ཞུགས། །ཚེག་གིས་ཆོས་རྣམས་མིང་དུ་སྨྲ། །ཤད་ཀྱིས་སྡེ་བ་ཚིགས་སུ་གཅོད། །ཡི་གེས་དོན་དང་རང་བཞིན་བསྟན། །ཚེག་བར་འབྲུ་ཡི་ཚིག་དོན་ནི། །ཐབས་དང་ཤེས་རབ་འདྲེལ་བ་དང་། །བྱ་བ་ཀུན་ལྡན་བྱ་མེད་པ། །སྟོང་པ་ཆེན་པོ་རྣམ་ཀུན་བཅས། །དམིགས་མེད་ལུས་དང་བཅས་པའི་ཚིག །ཚིག་བར་ཚིགས་ཀྱིས་བཅད་པ་ནི། །སྟོན་པ་ང་ཡི་གསུང་དུ་ངེས་པར་གསུངས། །ཚིག་དོན་བཟློག་སྟེ་སྦྱོར་བ་འཁྲུགས། །ལྷུག་པར་བཤར་བ་སིལ་བུ་རྣམས། །སྐབས་ཀྱི་དོན་དང་མ་འདྲེལ་བ། །འདྲེས་པ་གང་ཟག་མི་ཡི་ཚིག །ང་ཡིས་གསུངས་པའི་དོན་ལ་སྨྲས། །ཚེག་བར་འབྲུ་ཡི་ཚིག་དོན་ནོ། །ཚེག་བར་འབྲུ་ཡི་ཡིག་ཤུགས་ནི། །གོང་མའི་ཤུགས་དང་འོག་མའི་ཤུགས། །བར་མ་འདྲེལ་བ་བདག་ཤུགས་ཀྱིས། །གང་ཡིན་པར་ནི་བརྟག་པར་བྱ། །ཚེག་བར་འབྲུ་ཡི་ཡན་ལག་ནི། །ཡིག་འབྲུ་གཅིག་ལ་ཡན་ལག་བདུན། །སྒྲ་ཡིས་བོད་པ་ལྔ་གཉིས་གཅིག །ཡན་ལག་ཤུགས་ཀྱི་ཡིག་འབྲུ་དེ། །ཡིག་འབྲུ་གར་འགྲོ་ཡན་ལག་དབང་། །ཡན་ལག་འགྲོས་ཏེ་བརྟག་པར་བྱ། །ཚེག་བར་འབྲུ་ཡི་འདྲེལ་བར་བཤད། །དཔེ་དོན་རྒྱུ་འབྲས་འགྲེལ་པ་ནི། །དོན་གྱི་ཚིག་དང་ཡི་གེའི་ཚིག །རྒྱུ་ཡི་ཚིག་དང་དཔེ་ཡི་ཚིག །རྒྱུ་ཡི་ཚིག་དང་འབྲས་བུའི་ཚིག །གང་ཡིན་འབྲུ་ལ་བརྟག་བྱ་སྟེ། །ཡན་ལག་འབྲུ་ཡིས་སྟོན་པར་བྱེད། །དེ་འདྲ་དེ་བཞིན་དེ་ལྟར་
གསུམ། །དཔེ་རུ་བསྟན་པའི་འགྲེལ་པའོ། །དེ་བས་དེ་ཕྱིར་དེས་ན་གསུམ། །གང་ཡིན་དོན་དེ་དེ་མཐོང་ན། །གཏན་ཚིགས་བསྟན་པའི་འགྲེལ་པའོ། །དེ་ནས་དེ་ཡང་དེ་ལས་གསུམ། །རྒྱུ་འབྲས་བསྟན་པའི་འགྲེལ་པའོ། །དེ་ཡིན་དེ་མིན་ཡིད་ཆེས་ན། །དོན་གྱི་འགྲེལ་པ་ཡིན་པར་བཤད། །འབྲུ་དང་ཡན་ལག་གཅིག་ལ་ཡང་། །དཔེ་དོན་དེ་ལྟར་ཡོད་པས་ན། །དེ་བཞིན་འབྲུ་ལག་ཀུན་ལ་བརྟག །དཔེ་དོན་རྒྱུ་འབྲས་འགྲེལ་པར་བཤད། །གཏན་ཚིགས་དོན་གྱི་འགྲེལ་པ་ནི། །ཡན་ལག་གང་གི་དོན་འབྱུང་བ། །ཚིག་འབྲུ་ལས་ནི་དོན་དབྱུང་བྱ། །རྒྱུ་ཡི་ཚིག་དང་འབྲས་བུའི་ཚིག །དཔེ་ཡི་ཚིག་གམ་དོན་གྱི་ཚིག །རྟགས་སམ་གཏན་ཚིགས་གང་ཡིན་ཚིག །བརྟགས་ཏེ་དོན་དེ་དབྱུང་བར་བྱ། །གཏན་ཚིགས་དག་གི་འགྲེལ་པར་བཤད། །འབྱེད་པར་བྱེད་པའི་འགྲེལ་པ་ནི། །སོ་སོ་དག་གི་ངོ་བསྟན་ནས། །སྡེ་དང་ཚན་དང་རིས་སུ་ཕྱེ། །འབྱེད་པར་བྱེད་པའི་འགྲེལ་པ་ཡིན། །ཆོས་ཀུན་རྩ་བ་གཅིག་བསྡུས་ནས། །སྤྲོས་པ་མེད་པའི་དོན་སྟོན་ན། །སྡུད་པར་བྱེད་པའི་འགྲེལ་པ་ཡིན། །ཚིག་དང་འབྲུ་ཡི་དོན་འདི་ནི། །ཚིག་བར་འབྲུ་ཡི་འགྲེལ་པར་བཤད། །འདྲ་དང་ཡོད་མིན་དོན་འདི་ནི། །དཔེ་དོན་རྒྱུ་འབྲས་འགྲེལ་པར་བཤད། །བརྟགས་ཏེ་གཏན་ཚིགས་དོན་འབྱིན་ན། །གཏན་ཚིགས་ངག་གི་འགྲེལ་པར་བཤད། །སོ་སོའི་སྡེ་ཚན་རིས་འབྱེད་ན། །ས་གཅོད་པ་ཡི་འགྲེལ་པར་བཤད། །རྩ་བ་གཅིག་ཏུ་དོན་སྟོན་ན། །སྡུད་པར་བྱེད་པའི་འགྲེལ་པར་བཤད། །ཚེག་བར་འབྲུ་ཡི་འགྲེལ་པ་ཡིས། །ཚིག་དང་འབྲུ་དང་ཚིག་མི་མིང་ལས་ཀྱང་འདས། །འབྲུ་ལ་ལྷག་མ་མི་ལས་ཏེ། །འབྲུ་འཇོམས་པ་ཡི་འགྲེལ་པར་བཤད། །དཔེ་དོན་རྒྱུ་འབྲས་འགྲེལ་པ་འདིས། །འདྲ་དང་ཡིན་མིན་དོན་བསྟན་ནས། །ཆོས་ལ་དེ་ནི་མིང་དུ་འདོགས། །ངོ་བོ་བསྟན་པའི་འགྲེལ་པར་བཤད། །གཏན་ཚིགས་དོན་གྱི་འགྲེལ་
པ་ནི། །མ་ནོར་པ་ཡི་སྙིང་པོ་འབྱིན། །ངེས་པར་གཏན་ལ་འབེབས་པས་ན། །དོན་འབྱིན་པ་ཡི་འགྲེལ་པར་བཤད། །འབྱེད་པར་བྱེད་པའི་འགྲེལ་པ་འདིར་སྐོར་ཚིག་རྐང་དྲུག་བདུན་གོང་དང་ཟློས་པས་དཔྱད་ནི། །སོ་སོ་དག་གི་ངོ་བསྟན་ནས། །སྡེ་དང་ཚན་དང་རིས་འབྱེད་པས། །ས་གཅོད་པ་ཡི་འགྲེལ་པར་བཤད། །སྡུད་པར་བྱེད་པའི་འགྲེལ་པ་ནི། །ཆོས་ཀུན་རྩ་བ་གཅིག་བསྡུས་ནས། །སྤྲོས་པ་མེད་པའི་དོན་དུ་སྟོན། །དོན་བསྡུས་པ་ཡི་འགྲེལ་པར་བཤད། །དོན་གྱི་འགྲེལ་པ་ལྔ་པོ་འདིས། །མ་བཤད་སྐྱོན་ཡང་ལྔ་ཡོད་དེ། །ཚེག་བར་འབྲུ་ཡི་འགྲེལ་མེད་ན། །ཚེག་བར་འབྲུ་དེས་ཚིག་མི་སྡེབས། །འབྲུ་མི་ཆོམས་པའི་སྐྱོན་དུ་འགྱུར། །དཔེ་དོན་རྒྱུ་འབྲས་འགྲེལ་མེད་ན། །ཆོས་ལ་མིང་གིས་མི་ཐོགས་ཏེ། །མཚོན་དུ་མེད་པའི་སྐྱོན་དུ་འགྱུར། །གཏན་ཚིགས་དག་གི་འགྲེལ་མེད་ན། །དོན་གྱི་རྩ་བ་མི་རྙེད་དེ། །དོན་མི་ཕྱིན་པའི་སྐྱོན་དུ་འགྱུར། །འབྱེད་པར་བྱེད་པའི་འགྲེལ་མེད་ན། །ཐ་དད་འཛིན་བློ་དེ་སྐྱེས་ཏེ། །སོ་སོར་བྱེ་བྲག་མི་ཕྱེད་དེ། །ས་མི་ཆོད་པའི་སྐྱོན་དུ་འགྱུར། །སྡུད་པར་བྱེད་པའི་འགྲེལ་མེད་ན། །རྩ་བ་གཅིག་ཏུ་མི་འགྱུར་ཏེ། །མཐའ་ཡས་པ་ཡི་སྐྱོན་དུ་འགྱུར། །དེས་ན་འགྲེལ་པ་ལྔ་པོ་འདི། །དུས་གསུམ་བཞུགས་པའི་སངས་རྒྱས་ཀྱིས། །གསུང་གི་ཚིག་ཏུ་ངས་སྨྲས་པ། །འདུས་པའི་འཁོར་ཚོགས་ཁྱེད་རྣམས་ཀྱིས། །ཀུན་བཟང་རྡོ་རྗེ་ང་ཡི་ལུང་། །བྱང་ཆུབ་སེམས་ཀྱི་རང་བཞིན་ནི། །རྟོགས་ཕྱིར་འགྲེལ་པ་ལྔ་པོ་འདི། །ང་ཡིས་ཁྱེད་ལ་བསྟན་པ་ཡིན། །ཞེས་གསུངས་སོ། །ཡོངས་སུ་རྫོགས་པའི་མདོ་དང་དོན་གྱི་འགྲེལ་པ་ལྔ་པ་རྫོགས་སོ།། །།དེ་ནས་སེམས་དཔའ་ཆེན་པོ་དེས། བྱང་ཆུབ་སེམས་ཀྱི་བསྟན་པ་གཏད་པ་འདི་གསུངས་སོ། །ཀྱེ་འདུས་པའི་ཚོགས་ཆེན་འདི་ཟུང་ཞིག །བྱང་ཆུབ་སེམས་ཀྱི་མདོ་བཅུ་འདི། །སྣང་སྲིད་སྣོད་བཅུད་
ཐམས་ཅད་དང་། །འཁོར་འདས་སངས་རྒྱས་སེམས་ཅན་དང་། །སྟོན་པ་ཀུན་བཟང་བྱང་ཆུབ་དང་། །སྟོན་པ་སེམས་ཉིད་རྫོགས་ཆེན་རྣམས། །ཡེ་ནས་གཉིས་མེད་གཅིག་པའི་ཕྱིར། །གཅིག་ལ་གཉིས་སུ་བགྲང་དུ་མེད། །བགྲང་དུ་མེད་པའི་བདེན་ཚིག་དགུ། །གཅིག་དོན་སྤྲོས་པ་མེད་པ་འདི། །ང་ཡིས་ཁྱོད་ལ་བསྟན་པ་ཡང་། །སྤང་འགེག་སྦྱང་ཞིང་བགྲོད་པ་དང་། །གཟུང་འཛིན་བླང་དོར་བྱ་བ་དང་། །ལྟ་སྤྱོད་རྩོལ་བསྒྲུབ་བྱར་མེད་དེ། །ལམ་དང་གཉེན་པོས་བཅོས་མེད་པར། །བྱང་སེམས་ཀུན་བཟང་རང་བཞིན་དུ། །ང་ཡིས་བསྟན་པའི་དོན་འདི་ནི། །བྱང་ཆུབ་སེམས་ཀྱི་ལུང་ཆེན་ཡིན། །རྒྱུད་དང་མདོ་སྡེའི་སྤྱི་འགྲེལ་ཡིན། །མན་ངག་ཀུན་གྱི་རྩ་བ་ཡིན། །གསུང་རབ་ཀུན་གྱི་སྙིང་པོ་ཡིན། །བསྟན་པ་ཀུན་གྱི་ཡང་རྩེ་ཡིན། །ཐེག་པ་ཀུན་གྱི་ཉིང་ཁུ་ཡིན། །མ་རིག་པ་ཡི་མུན་སེལ་ཡིན། །རྟོག་པའི་དྲ་བ་འདི་ཡིས་སེལ། །ཉོན་མོངས་འཕྲེང་ཐག་འདི་ཡིས་གཅོད། །ཡེ་ཤེས་ཆེན་པོའི་སྣང་བ་འདིས། །ལྷག་མ་མེད་པའི་རྫོགས་ཆེན་ཏེ། །སྣང་སྲིད་སྣོད་བཅུད་ཐམས་ཅད་དང་། །སངས་རྒྱས་སེམས་ཅན་ཐམས་ཅད་དང་། །བསྟན་པའི་ཐེག་པ་ཐམས་ཅད་ཀུན། །སེམས་ཉིད་རྫོགས་ཆེན་འདི་ལ་འདུས། །འདི་ལ་གནས་ཤིང་འདི་དོན་སྟོན། །འདི་ནི་ཀུན་བཟང་ང་ཡིན་ཏེ། །སངས་རྒྱས་ཀུན་གྱི་སྟོན་པ་ཡིན། །འདུས་པའི་ཚོགས་ལ་འདི་གཏད་དོ། །ཞེས་བཀའ་སྩལ་ཏོ། །བསྟན་པ་ཡོངས་སུ་གཏད་པའི་ལེའུའོ།། །།བྱང་ཆུབ་སེམས་ཀྱི་མདོ་ཐེག་པ་ཀུན་གྱི་འགྲེལ་པ་འབུམ་སྡེ་བཞུགས་པ་ལས་བྱང་ཆུབ་སེམས་ཀྱི་མདོ་འགྲེལ་ཆེན་པོ་བཅུ་པ་རྫོགས་སྷོ། །བར་འདིར་ལ་ཟློ་གསང་བའི་འཁོར་ལོ་འཛུད །།