རྫོགས་ཆེན་བདེ་འབྱམས།
རྫོགས་ཆེན་བདེ་འབྱམས། བདེ་འབྱམས་དབྱིངས་ཕྱུག་བྷ་ག་ལ། །དབྱེར་མེད་ལྷུན་རྫོགས་ཐིག་ལེའི་དབྱིངས་ཉིད་ཆེ། །བསྐྱེད་པ་མི་མངའ་ཡེ་ཤེས་རིན་པོ་ཆེ། །བྱ་བ་མེད་པ་ལྷུན་རྫོགས་ཐིག་ལེ་ཆེ། །ཐམས་ཅད་མ་བཀག་དབྱེར་མེད་བདག་ཉིད་ཆེ། །སྐྱེ་མེད་དབྱིངས་ལས་ཐམས་ཅད་སྐྱེས། །དོན་དམ་ཉིད་དུ་སེམས་དཔའ་ཆེ། །བསྒྲུབ་ཏུ་མེད་པས་ཡེ་ནས་གནས། །བཙལ་དུ་མེད་པས་མངོན་སུམ་དབྱིངས། །སྨོན་དུ་མེད་པས་རང་ལ་རྫོགས། །ཐ་སྙད་མེད་པས་རྣལ་འབྱོར་བདག །གོ་འཕང་གཅོད་པས་ཀུན་གྱི་དབྱིངས། །
ལམ་རྣམས་ཐམས་ཅད་ཅི་སྤྱད་ཀྱང་། །ཐིག་ལེ་ཉིད་ལས་སྤང་དུ་མེད། །འདོད་ཆགས་ཞེ་སྡང་གཏི་མུག་ཀྱང་། །སྤང་དུ་མེད་པས་བདག་གི་རྒྱུ། །གཏི་མུག་མེད་པས་བསམ་དུ་མེད། །རྣམ་གྲངས་མེད་པས་དབྱིངས་ཉིད་ཀློང་། །གཟུགས་རྣམས་མེད་པས་བྱང་ཆུབ་སྐུ། །ཐིག་ལེ་མེད་པས་ཡེ་ནས་དམ་ཚིག་པས། །དམ་ཚིག་མིང་དུ་བཏགས་པ་མེད། །འཆི་བ་མེད་པས་བདུད་རྩིའི་དབྱིངས། །ཁྱད་པར་ཉིད་ལས་ཡེ་ཤེས་ཆེ། །རི་རབ་རྩེ་ལ་ཉི་མ་སྟོང་ཤར་བས། །ཡེ་ཤེས་ཐུགས་ཀྱི་ཉི་མ་གཅིག་ཤར་དྲོ། །ཤར་བ་ཉིད་ནས་ནུབ་པ་མེད། །བསྒོམ་པ་ཉིད་ནས་བསྒོམ་དུ་མེད། །བསྒོམ་པའི་དམིགས་པ་མེད་པའོ། །བསྒྲུབས་པས་གཞན་ནས་ཆོས་མི་རྙེད། །རྡོ་རྗེ་རིན་ཆེན་འབར་བ་ལྟར། །ཐམས་ཅད་ཀུན་ཀྱང་དེ་བཞིན་ནོ། །འགྱུར་བ་མེད་པས་བལ་ནག་བཞིན། །འགྱུར་དུ་བཏུབ་པ་བལ་དཀར་བཞིན། །བརྟགས་པ་བལ་ནག་ཉིད་ཀྱི་དབྱིངས། །ལྷུན་གྱིས་གནས་པས་གོ་འཕང་གཅོད། །གདོད་ནས་དག་པས་པདྨ་བཞིན། །འགྱུར་བ་མེད་པ་ཐིག་ལེ་བདེ། །བྱ་བ་མེད་པས་ཐིག་ལེ་བདེ། །དུས་གསུམ་མེད་པས་ཐིག་ལེ་བདེ། །བཙལ་དུ་མེད་པས་ཐིག་ལེ་བདེ། །རྩོལ་བར་འདོད་པས་དབྱིངས་མི་བསྐྱོད། །དྲ་བ་མེད་པས་མུ་ཁྱུད་མེད། །ཐིག་ལེ་མེད་པས་ཐིག་ཕྲན་བདེ། །རྩེ་རྒྱལ་རྟོགས་ན་གནས་ཆེན་བདེ། །ཐོགས་མེད་ཡོངས་སུ་སྦྱངས་པའི་བྷ་ག་ལ། །དབྱེར་མེད་ལྷུན་རྫོགས་ཐིག་ལེའི་དབྱིངས་ཉིད་ཆེ། །སྐུ་གསུང་ཐུགས་ཤར་མུ་ཁྱུད་འཁྱིལ། །རྣམ་པར་དག་པས་བྱང་ཆུབ་སྐུ། །འགྲོ་བའི་ལམ་ཆེན་བྱང་ཆུབ་སྐུ། །ཐིག་ལེ་ཡེ་ནས་རྡོ་རྗེ་དབྱིངས། །རྡོ་རྗེ་ཉིད་ལ་འདུ་འབྲལ་མེད། །དེ་ལས་ཐིག་ལེ་བརྡལ་བའི་དབྱིངས། །བརྡལ་བ་ཉིད་ལ་ནུབ་པ་མེད། །བྱང་ཆུབ་ཀྱི་སེམས་ཀློང་ཡངས་པའི་དཀྱིལ་འཁོར་རྫོགས་སོ།། །།