བྱང་སེམས་མྱུ་གུ།
བྱང་སེམས་མྱུ་གུ། བཅོམ་ལྡན་འདས་དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །རྒྱུ་རྐྱེན་ཚོགས་པའི་སྡོང་བུ་ལ། །མྱུ་གུ་དོན་གྱིས་འབྱུང་བ་ལྟར། །མ་བཅོས་ངང་དུ་རང་བཞིན་གནས། །གནས་པས་དམིགས་མེད་མྱུ་གུ་འབྱུང་། །སྤྲོས་མེད་བྱང་ཆུབ་སེམས་ལ་མྱུ་གུ་འབྱུང་། །རྒྱུ་ལ་ལྟོས་པ་མེད་པས་རྐྱེན་གྱིས་གཞིག་ཏུ་མེད། །སྐྱེ་འགག་མེད་པའི་མྱུ་གུ་དེ། །ཡུལ་ལ་དམིགས་པ་མེད་པས་སེམས་ལ་འཕོ་འགྱུར་མེད། །ཡུལ་སེམས་འདུ་འབྲལ་མེད་པའི་སྦྱོར་བས་མྱུ་གུ་འབྱུང་། །དེ་ལ་འགག་པ་མེད་པས་སྒྲོལ་བ་ཆེན་པོར་བརྟགས། །དུས་གསུམ་འགྱུར་བ་མེད་པས་བྱང་ཆུབ་སེམས། །མ་ལྟོས་ལྷུན་གྱིས་གྲུབ་པས་སྣང་སྲིད་ཡེ་སངས་རྒྱས། །བསྲུང་དུ་མེད་པའི་དམ་ཚིག་ཆེན་པོ་ལ། །ཡེ་བསྲུངས་གདེང་གིས་ཆོད་པའི་མྱུ་གུ་འབྱུང་། །བསྒོམ་དུ་མེད་པའི་དམིགས་པ་ཆེན་པོ་ལས། །ངང་ལས་མ་ཡེངས་མཉམ་པ་ཆེན་པོར་བཞག །རྣམ་རྟོག་སྤྲོས་བྲལ་བྱང་ཆུབ་ཆེན་པོ་ལ། །གཟུང་འཛིན་མེད་པའི་བླ་མེད་མྱུ་གུ་འབྱུང་། །རྒྱུ་ལ་རག་མ་ལུས་པའི་མྱུ་གུ་ཆེན་པོ་ལ། །རྐྱེན་དུ་བྲལ་བའི་ཡོན་ཏན་མྱུ་གུ་འབྱུང་། །འབྱུང་བ་ལྔ་ཉིད་ཡེ་ནས་སངས་རྒྱས་ལ། །སྣང་སྲིད་ལྷ་ཡི་འཁོར་ལོའི་མྱུ་གུ་འབྱུང་། །བྱང་ཆུབ་སེམས་ཅན་མན་ངག་རྒྱལ་པོ་འདི། །ཐམས་ཅད་ཡེ་ནས་སངས་རྒྱས་པའི། །རྒྱུད་དྲུག་གནས་སུ་དག་པས་བཙལ་བའི་བསམ་པ་དེ། །ལུང་ལ་སྒྲིབ་པ་མེད་པས་མན་ངག་མྱུ་གུ་ཡིན། །སེམས་ལ་དོགས་པ་མེད་པས་སངས་རྒྱས་ཀུན་གྱི་གཞི། །དུག་གསུམ་རྩད་ནས་བཅད་པས་བྱང་ཆུབ་སེམས། །འཁོར་བ་ཐམས་ཅད་སྒྲོལ་བའོ། །བྱང་ཆུབ་སེམས་ཀྱི་མྱུ་གུ་རྫོགས་སོ།། །།