གསང་བ་སྙིང་པོའི་རྒྱ་དཔེ་ཡིན་ངེས་སྙམ་ནས་ཡི་དམ་དུ་བཟུང་བདོག
རྒྱ་གར་སྐད་དུ། གུ་ཧྱ་གརྦྷ། བོད་ཀྱི་སྐད་དུ་གསང་བ་སྙིང་པོ་ཞེས་བྱ་བར་འགྲོའམ་ཟེར་བས། གསང་བ་སྙིང་པོའི་རྒྱ་དཔེ་ཡིན་ངེས་སྙམ་ནས་ཡི་དམ་དུ་བཟུང་བདོག་ཅེས་ཞུས་པས། དེ་མ་ཐག་པར་ལོང་ཞིག་པར་བསྒོས་ཤིང་། དེས་ཀྱང་རིངས་པའི་ཚུལ་གྱིས་བླངས་ཏེ་ཕུལ་བས་གཟིགས་ཏེ་མཉེས་ཤིང་། རྒྱ་དཔེ་ཏ་ལའི་ལོ་མ་ལ་ཡི་གེ་ཝརྟུ་ལ་ཤིན་ཏུ་ལེགས་པར་བྲིས་པ་སྔོན་རྒྱལ་པོ་སྔ་དར་གྱི་དུས་སུ་བྱོན་པས། རྙིངས་པས་ཡིག་འབྲུ་ལ་ལ་ཟུབས་ཤིང་། ལེའུ་དགུ་པའི་སྟོད་ནས་ཏ་ལའི་བྱང་བུ་གཅིག་ཆད་པ། མཇུག་ལེའུ་ཉི་ཤུ་པ་རྫོགས་སུ་ཉེ་བ་ནས་ཀྱང་མ་ཚང་བ་ཞིག་འདུག་པས། ཆེས་ཆེར་མཉེས་པ་ཆེན་པོ་ཐོབ་སྟེ། སླར་ཡང་རྒྱ་དཔེ་ཡར་འབྲོག་པ་ཤ་གད་ལོཙྪ་བ་ཤེས་རབ་བཟང་པོ་ཞེས་གྲགས་པ། སྔར་གྱི་སྦྱངས་པའི་ས་བོན་སད་པ། ཚེ་འདིར་ལོཙྪའི་ཚུལ་འབད་པ་ཆུང་ངུས་ཤེས་པ་ཞིག་བྱུང་བ་དེ་ལ་སྔོན་གྱི་རྒྱ་དཔེ་འདི་འདུག་པས་འབྲུ་ལེན་གྱིས་ལ་བསྐུར་ཞེས་བསྒོས་ཤིང་། དེས་ཀྱང་ཇི་ལྟར་གསུངས་པ་བཞིན་བྲིས། འགྱུར་མཆན་ཅི་རིགས་ཀྱང་བཏབ། ཕྱི་མོའི་གནས་ལ་མི་གསལ་བ་རྣམས་བུ་དཔེར་ཡང་དེ་ལྟར་བཏབ། བརྡ་སྤྲད་ཅིང་གྲུབ་པ་དང་། ན་མཿཤྲཱི་གུ་ར་ཝེ་རཏྣ་ཏྲ་ཡཱ་ཡ། བསིལ་ལྡན་འདི་ན་སྡེ་སྣོད་འཛིན་རྣམས་ཀྱི། །ནང་ན་རྒྱུ་སྐར་རྒྱལ་པོ་གང་བ་ལྟར། །ཀུན་ནས་ཐལ་ལེ་རབ་ཏུ་གསལ་བ་ཡི། །མཁས་མཆོག་བཅོམ་ལྡན་རལ་གྲི་རྒྱལ་གྱུར་ཅིག །སྤྱན་སྔར་ཞུ་བ། དཔལ་གསང་བ་སྙིང་པོའི་རྒྱ་དཔེ་འདྲ་ལེན་དུ་གྱིས་ལ་བྲིས་ལ་བསྐུར་གསུངས་པ་ལ། འབྲུ་ཐུག་བགྱིས་ནས་བྲིས་ཤིང་།མཚམས་སྦྱོར་མ་བྱས་པ་དང་། ཚིགས་བཅད་ལ་ཤད་མ་བྲིས་པ་རྣམས་རྒྱ་དཔེ་ན་ཇི་ལྟར་འདུག་པ་བཞིན་བྲིས་པ་ལགས་ཤིང་། སྔ་འགྱུར་དང་འབྲུ་ཐུག་བགྱིས་ན་ཟུབས་པ་རྣམས་གོའམ་སྙམ་པ་གདའ་སྟེ་མ་བགྱིས། དང་ཞུས་ཀྱང་དག་པར་བགྱིས་ལགས་ཤིང་། སྒྲོ་སྐུར་བསལ་ཕྱིར་ཀུན་ལ་སྤེལ་བ་ཞུ། །རྒྱུད་ཀུན་སྙིང་པོ་དཔལ་ལྡན་འདུས་པ་དང་། །དབྱེར་མེད་རྒྱུད་ཆེན་འདི་ལྟ་བུ་དང་གཞན། །ཟབ་མོའི་ཆོས་དང་ཐེག་ཆེན་ཆོས་
རྣམས་ལ། །མཇལ་ནས་བཀའ་བཞིན་སྒྲུབ་པ་བྱེད་པར་ཤོག །ཅེས་པའི་ཞུ་ཡིག་དང་རྒྱ་དཔེ་བཅོམ་ལྡན་པའི་ཕྱག་ཏུ་ཕུལ་ཞིང་། བཅོམ་ལྡན་པས་གང་གི་ཚེ་སྔགས་པའི་དགེ་བའི་བཤེས་གཉེན་མང་པོ་ཤ་བ་ཇོ་མོ་ལྷ་ཁང་དུ་ཆེར་འདུས་པ་དེའི་ཚེ། རྒྱུད་འདིའི་རྒྱ་དཔེ་བསྐུར་ནས། འདི་རིགས་འཛིན་ཆེན་པོ་པདྨ་སཾ་བྷ་ཝའི་ཕྱག་དཔེར་འདུག་ཅིང་། རྒྱུད་རྣམ་དག་ཡིན་པའི་རྒྱུ་མཚན་དང་བཅས་ཏེ་བསྙད་པས། ཁོང་རྣམས་ན་རེ་བོད་ན་རྒྱུད་འདི་ལ་ད་ལྟ་རྒྱ་དཔེ་ཡོད་དམ་མེད་ཀྱང་རུང་གི། ཁོ་བོ་ཅག་རྣམས་ལ་ནི་སྔར་ནས་ཀྱང་སོམ་ཉི་མེད་ཟེར་རོ། །དེ་ནས་རིང་ཞིག་ལོན་པའི་ཚེ། བྱང་རི་པ་ཤེས་རབ་རྒྱ་མཚོས་རྒྱ་དཔེ་དེ་བཅོམ་ལྡན་པའི་ཕྱག་ནས་ཞུས། ཐར་པ་ལོཙྪ་བའི་དྲུང་དུ་ཕྱིན་ཏེ།སྔོན་གྱི་དམ་པ་རྣམས་ཀྱིས་བསྒྱུར་བ་དང་། རྒྱ་དཔེའི་ནང་ན་མང་ཉུང་ལ་སོགས་པའི་དྲེགས་ཡོད་པར་འདུག་པ་དང་། འཆོང་དྲུག་གི་ཐེ་ཚོམ་བསལ་བའི་ཕྱིར་ཁྱེད་ཀྱིས་ཀྱང་བསྒྱུར་བར་ཞུ་ཞེས་བསྐུལ་བ་ལ་བརྟེན་ནས། ཉི་འོད་སེང་གེའི་འགྲེལ་ཆེན་དང་། སངས་རྒྱས་གསང་བའི་འགྲེལ་པ་དང་། སྒེག་པ་རྡོ་རྗེའི་འགྲེལ་པ་དང་། སྔ་འགྱུར་རྣམས་དཔང་པོར་བྱས་ནས། སྔ་འགྱུར་ན་མེད་ཅིང་རྒྱ་དཔེ་འདི་ན་ཡོད་པ་ཐམས་ཅད་བསྒྱུར། འདིར་བྱུང་འཐད་ཅིང་སྔ་འགྱུར་ན་ཡོད་པའི་ཚིག་ཅི་རིགས་རྣམས་སྔ་འགྱུར་བཞིན་བྲིས། སྔ་འགྱུར་སྔ་ཕྱི་ནས་རིང་པོ་ནས་བསྒྱུར་ཏེ། བསྒྱུར་བ་རྣམས་ཁོ་བོས་རྒྱ་དཔེ་ལྟར་བཀོད་དོ། །ཡང་ལེའུ་གསུམ་པ་ནས། བདག་དང་བདག་གི་གཞན་རྣམས་ནི། །དྲུག་པ་ནས། ཀུན་འབྱུང་དཀྱིལ་འཁོར་ཆེན་པོར་སྤྱོད། །ཅེས་དང་། བདུན་པ་ནས། དཔེར་ན་དེ་བཞིན་སྦྲིད་སངས་བཞིན། །ཞེས་དང་། དགུ་པ་ནས། སོ་སོ་ཐིག་ལེ་དེ་ཉིད་ལ། །ཞེས་དང་། བཅུ་བདུན་པ་ནས། འབར་བའི་ཁྲོ་བོ་མང་པོ་འཁྲུག །ཅེས་དང་། ཐ་མ་ནས། དེ་བཞིན་གཤེགས་པ་ཐམས་ཅད་དབྱེར་མེད་པར་དགྱེས་ནས་ཞེས་དང་། ཡང་འཕགས་པ་རྟོག་པའི་རྒྱལ་པོ་ཞེས་པ་ནས། འབྲས་བུའི་མཆོག་གི་བར་རྒྱ་དཔེ་འདི་ན་མི་སྣང་ལ། ལེའུ་དགུ་པའི་འགོ་ནས་
དེ་ནས་སློབ་མ་གཞུག་པར་བྱ། །ཞེས་པའི་རྒྱ་དཔེ་བྱང་བུ་གཅིག་ཆད་པའང་འགྱུར་རྙིང་ལས་བསབས་པ་ཡིན་ནོ། །ཡང་རྒྱ་དཔེ་འདིའི་ལེའུ་བཞི་པར། རྒྱ་གར་གྱི་ཡི་གེ་ལྔ་བཅུ་དང་། དེ་དག་གི་དོན་བཤད་ཀྱང་ཚང་བར་བྱུང་བ་དང་། བཅོ་ལྔ་པར་མཇུག་བསྡུ་བའི་ཚིགས་སུ་བཅད་པ་ལྔ་བྱུང་བ་དང་། འཆོང་དྲུག་ཀྱང་རྒྱ་དཔེ་འདི་ནས་ཚང་བར་བྱུང་ཞིང་། རྒྱ་འགྲེལ་ཉི་འོད་ལ་སོགས་པར་མ་བྱུང་བས།རྒྱ་དཔེ་ལ་ཡང་རྒྱས་བསྡུས་གཉིས་སུ་ཡོད་པར་གསལ་ཞིང་། བོད་དུ་དཔེ་མཁྱུད་བྱས་ཞེས་པ་མི་བདེན་ཅིང་། གཞུང་རྒྱས་བསྡུས་བསྟན་པ་ཡིན་ནོ། །དེ་བས་ན་གཟུ་ལུམས་དང་། རལ་ཆོད་དང་། མུན་སྤྲུལ་ལ་སོགས་པ་འཁོར་བའི་རྒྱུ་རྣམས་སྤངས་ནས་བསམ་པ་རྣམ་པར་དག་པས་བསྒྱུར་བ་ཡིན་ཏེ། དེ་བས་མཐོ་བ་ལ་ཕྲག་དོག་དང་། མཉམ་པ་ལ་འགྲན་སེམས་དང་། དམན་པ་ལ་བརྙས་པ་ལ་སོགས་པའི་བློ་སྤངས་ཏེ། ཁོ་བོས་འགྱུར་འདི་ལ་བལྟས་ན་ཚིག་དོན་གྱི་ཆ་འགའ་ཞིག་ལ་ཕན་པར་འགྱུར་སྲིད་པས་བློ་གསལ་ཞིང་གཟུ་བོར་གནས་པ་རྣམས་ཀྱིས་འདྲི་བ་དང་། འཆང་བ་དང་། བཀླག་པ་དང་། སྟོན་པ་དང་། ཀུན་ཆུབ་པར་མཛད་པ་ཞུ། དཔལ་གསང་བ་སྙིང་པོའི་དེ་ཁོ་ན་ཉིད་ངེས་པའི་རྒྱུད་ཀྱི་རྒྱལ་པོ་ཆེན་པོ་འདི། བྱང་རི་པ་དགེ་བའི་བཤེས་གཉེན་ཤེས་རབ་རྒྱ་མཚོས་བསྐུལ་བའི་ངོར། མང་དུ་ཐོས་པའི་ལོཙྪ་བ་གནས་བརྟན་ཉི་མ་རྒྱལ་མཚན་དཔལ་བཟང་པོས་ཐར་པའི་གླིང་དུ་བསྒྱུར་ཏེ་ལེགས་པར་གཏན་ལ་ཕབ་པའོ།། །།གསང་བའི་སྙིང་པོ་དེ་ཁོ་ན་ཉིད་རྣམ་པར་ངེས་པའི་རྒྱུད་ཆེན་པོ། །ཆེན་པོའི་ཆེན་པོ་ཀུན་དུ་བཟང་པོའི་གསུང་མཆོག་ཟབ་མོ་འདི། །འདི་ཉིད་སྟོན་པ་དགྱེས་པས་ཆེད་དུ་བརྗོད་ཅིང་བརྗོད་པས་གསུངས། །གསུང་བཞིན་གསུང་རབ་ཀུན་གྱི་མཆོག་གྱུར་འདི་ནི་འོག་མིན་དུ། །དང་པོ་བསྟན་ནས་སླར་ཡང་གསང་འཛིན་གསང་བའི་བདག་པོའི་མཐུས། །ཨིནྡྲ་བྷཱུ་ཏི་ཀུ་ཀུ་རཱ་ཛ་འབྱོར་པའི་དབང་པོ་མགོ་མ་ས། །ཕོ་བྲང་དམ་པ་ཨོ་དྱན་གནས་སུ་ཆོས་འདིའི་དབུ་བརྙེས་ཤིང་། །ཀུ་ཀུ་རཱ་ཛས་ཏན་ཏྲ་བཅོ་བརྒྱད་ལེགས་པར་བཀྲོལ་ནས་ནི། །སླར་ཡང་གངས་རིའི་ཁྲོད་འདིར་ལྷ་སྲས་ཁྲི་སྲོང་ལྡེའུ་བཙན་དུས། །པདྨ་དྲི་མེད་བཤེས་གཉེན་ལ་སོགས་དར་
བར་མཛད། །དེ་ནས་རིང་ཞིག་ལོན་པའི་དུས་ན་རྒྱ་དཔེ་འདི། །མང་ཐོས་བཅོམ་ལྡན་རལ་གྲིས་བརྩོན་པ་ཆེན་པོས་རྙེད། །དེ་ཡི་ཕྱག་དཔེ་ཤེས་རབ་རྒྱ་མཚོས་གུས་པས་ཞུས་ནས་ནི། །བསྒྱུར་ཅེས་བསྐུལ་ནས་ཁོ་བོས་ཚུལ་འདི་ལེགས་པར་བསྒྱུར། །དེ་ལས་བྱུང་བའི་དགེ་བས་སངས་རྒྱས་དགེ་བའི་ཆོས། །ས་མཆོག་རིགས་འཛིན་དབང་པོ་སྟེར་བའི་ལམ་གཅིག་པུ། །ཞི་ཁྲོ་རབ་འབྱམས་འཕྲིན་ལས་རྣམ་བཞི་འབྱུང་བའི་གནས། །ཡ་མཚན་ཆོ་འཕྲུལ་སྣ་ཚོགས་འབྱུང་བའི་གསང་སྔགས་དཔལ། །དཔལ་འདི་ཡི་ནི་དོན་རྟོགས་དཔལ་མཆོག་ཀུན་དུ་བཟང་པོ་ཡི། །ས་ལ་འཛེགས་ནས་ས་མཆོག་དབང་པོའི་གནས་ཐོབ་ནས། །ས་འོག་ས་སྟེང་ས་བླའི་འགྲོ་བ་ཐམས་ཅད་ལ། །ས་བཞིན་སྐྱོ་བ་མེད་པས་ཡང་ཡང་སྨིན་བྱེད་ཤོག། །།ཡང་འདིར་སྨྲས་པ། གསང་སྔགས་སྔ་འགྱུར་སྒྱུ་འཕྲུལ་དྲ་བ་ཡི། །རྒྱུད་རྒྱལ་དཔལ་ལྡན་གསང་བ་སྙིང་པོ་འདི། །འཛིན་པའི་སྔགས་འཆང་རྣམས་ལ་བཀའ་ཉིད་དུ། །རྩོད་པ་མེད་མོད་འོན་ཀྱང་སྔ་དུས་སུ། །སྐད་གཉིས་སྨྲ་བ་ལྷས་བཙས་ལ་སོགས་པས་ཟུར་བའི་སར་ཆོས་སློབ་ཏུ་བྱོན་པས་གཡོག་བཅོལ་བའི་སྙིང་ནད་ཡིན་པར་གྲགས ། །སྐྱོན་བཞི་ཡོད་ཅེས་རྒྱ་དཔེ་མ་མཐོང་ཕྱིར། །བོད་ཀྱིས་བྱས་ཞེས་གངས་ཅན་འདིར་བསྒྲགས་པས། །མཁས་རློམ་འགའ་ཡང་ཐེ་ཚོམ་གནས་སུ་གྱུར། །དུས་ཕྱིས་གངས་རིའི་ཁྲོད་འདིར་མཁས་པའི་མཆོག །ཟབ་དང་རྒྱ་ཆེའི་གསུང་རབ་རྣམ་འབྱེད་ཅིང་། །བསྟན་པའི་ཁུར་འཛིན་མཁས་པའི་འདུན་ས་ན། །རྒྱལ་མཚན་ལྟར་མཐོ་དཔལ་ལྡན་རལ་གྲི་ཡིས། །རྒྱ་དཔེ་ལེགས་རྙེད་རྩོད་བྲལ་ཉི་ཟླ་ལྟར། །ཀུན་ལ་གསལ་མཛད་གཙུག་གི་རྒྱན་དུ་མཆོད། །མ་ངེས་བསྐྱར་ནས་སྐྱོན་བཞིའི་གེགས་སེལ་བ། །དཔལ་ལྡན་གསང་བའི་སྙིང་པོ་སྒྲུབ་པའང་མཛད། །དེ་ཕྱིར་འདི་ན་རྟོག་གེ་སྨྲ་བ་རྣམས། །དོན་ལ་སྤྱོད་པའི་བློ་གྲོས་རིང་བྱས་ནས། །གསང་སྙིང་བོད་ཀྱིས་བྱས་ཞེས་བསྒྲགས་པ་རྣམས། །ཆུ་རླབས་བཞིན་དུ་ངལ་བ་དོན་མེད་གྱུར། །དེ་རྗེས་སྐད་གཉིས་སྨྲ་བ་མཁྱེན་པའི་དཔལ། །བློ་གྲོས་
ཉི་མ་གནས་ལྔའི་འོད་ཟེར་ཅན། །བརྟུལ་ཞུགས་རྒྱལ་མཚན་འཛིན་པ་ནོར་བུས་སྤུད། །འདོད་དགུ་དཔལ་འབྱུང་བཟང་པོའི་མཐུ་ཅན་ལ། །གཞུང་འདི་འཛིན་པ་བཤེས་གཉེན་མ་ཐོགས་པ། །ཤཱཀྱའི་དགེ་བསྙེན་པྲཛྙཱ་སཱ་ག་རས། །ལྷག་བསམ་དག་པས་རབ་བསྐུལ་གསོལ་བཏབ་ནས། །རྒྱུད་ཀུན་སྙིང་པོ་འདི་ཉིད་བསྒྱུར་བ་ཡིན། །འདི་ཡི་ཆེད་དུ་བྱ་བ་འགྱུར་རྙིང་ལ། །སྔོན་གྱི་འགྱུར་མཛད་མཁས་གྲུབ་བརྙེས་པ་པོ། །གཞན་ཕན་བྱམས་བརྩེའི་ཐུགས་ལྡན་དེ་དག་གིས། །དོན་འགྱུར་གཙོར་མཛད་རྒྱ་དཔེ་འདི་ཉིད་དང་། །མཐུན་དང་མི་མཐུན་བོད་སྐད་དག་མི་དག །ལ་ལ་སྐད་རྙིང་གིས་བསྒྲིབས་གོ་བ་དཀའ། །དཔེ་འདིར་སྔར་མེད་ཚིག་འགའ་ཡོད་སྐྱོང་ཞིང་། །འཆོང་དྲུག་ལ་སོགས་ཇི་ལྟར་ངེས་དཀའ་ཕྱིར། །སྒྲ་བསྒྱུར་གཙོར་བྱས་གཞུང་འདི་བསྒྱུར་མོད་ཀྱི། །འོན་ཀྱང་སྔ་འགྱུར་གཞུང་ན་མི་བཞུགས་པའི། །ཚིག་འགའ་འགྱུར་འདིའི་རྒྱ་དཔེ་འདི་ལ་མཐོང་། །དེ་ཕྱིར་རྒྱ་དཔེ་རྒྱས་བསྡུས་ཤེས་པར་གྱིས། །འདི་འདྲའི་ཚུལ་ལ་མཚར་དུ་འཛིན་པར་ངེས། །རྟོགས་དཔྱོད་མི་ལྡན་ཁ་ཅིག་འདི་སྐད་དུ། །འདི་ལ་སྔོན་ཆད་སྒྲོ་སྐུར་བྱུང་བས་ན། །ད་ལྟ་རྒྱ་དཔེ་ཡོད་དམ་མེད་ཀྱང་རུང་། །སྙིགས་དུས་སྐྱེ་བོ་སོམ་ཉི་སེལ་དཀའ་བས། །གསར་འགྱུར་འབད་པའང་ངལ་བ་དོན་མེད་དེ། །འདི་ལ་འཆད་ཉན་སྐྱོང་བའང་མི་འབྱུང་ལ། །གཞན་ཡང་སྔ་འགྱུར་གཞུང་གི་ཚིག་འདི་ལ། །འདི་ལྟར་བསྒྱུར་ཅེས་ག་ཤ་བྱེད་པའང་སྲིད། །དེ་དག་ཕལ་ཆེར་གང་ཟག་རྗེས་འབྲང་ཞིང་། །ཐོས་པའི་ནོར་བྲལ་ཆགས་སྡང་ཚེར་མ་ཡིས། །བློ་མིག་ལྐུགས་པས་ངེས་དོན་ཤེས་བྱའི་གསུང་། །ཇི་བཞིན་ལྟ་བར་མི་ནུས་ཁ་ནད་ཟད། །དེའི་ཕྱིར་བློ་གསལ་རྣམས་ཀྱིས་རྒྱུད་འདིའི་འགྱུར། །གསར་རྙིང་སྡེབས་ལ་གཟུར་གནས་བློ་ཡིས་སྤྱོད། །བསྟན་པའི་ཉི་མ་ཕན་བདེའི་འོད་ཟེར་ཅན། །ཤར་རིའི་རྩེ་ནས་ནུབ་རིའི་ས་འཛིན་རྩེར། །ཉེ་བའི་དུས་འདིར་འདི་འདྲའི་རྒྱུད་ཟབ་མོ། །འཆད་ཉན་བསྒོམ་པར་བརྩོན་པ་དེ་དག་གི། །བསོད་ནམས་ཚད་ཀྱིས་གཟུང་བར་མི་ནུས་པས། །ཚིག་དོན་མཁས་པས་
གཞན་ལའང་བསྙད་པར་བྱའོ། །དེ་ལྟར་རྣམ་དག་གསལ་བས་རབ་སྙམ་དགེ་བའི་ཤེས་བྱ་ཀུན། །ཀུན་ནས་གཟིགས་པའི་སྤྱན་ཡངས་རྒྱལ་བའི་སྤྱི་གཟུགས་རིགས་རྣམས་ཀུན་གྱི་བདག །བདག་གཞན་འགྲོ་བས་མྱུར་ཐོབ་བདེ་གཤེགས་ཀུན་གྱི་ཐུགས་རྗེའི་བཅུད། །གསང་བཅུད་མ་ནོར་ངེས་པའི་བཀའ་འདི་རབ་སྟོན་ཞི་བའང་བསྐུལ་བར་ཤོག །ཀུན་ཀྱང་ལམ་འདིས་གྲོལ་གྱུར་ཅིག །ཐར་པ་ལོ་ཙཱ་བའི་འགྱུར་བྱང་ངོ་།། །།རང་སེམས་དག་པའི་འོག་མིན་ཞིང་ཁམས་སུ། །རང་རིག་དཔལ་ལྡན་ཁྱབ་བདག་རྡོ་རྗེ་སེམས། །ཡེ་ཤེས་ལྔ་མདངས་ཤེལ་ལ་གཞའ་ཚོན་བཞིན། །མ་འདྲེས་གསལ་བར་འཆར་བའི་དཀྱིལ་འཁོར་ཆེར། ༡།སྟོན་པའི་དགོངས་པས་ཡོངས་བསྟན་རྒྱུད་ཀྱི་རྒྱལ། །རིགས་འཛིན་བརྡ་ལས་འོངས་ཏེ་རྒྱལ་པོ་ཛའི། །ཁང་སྟེང་གླེགས་བམ་ཆར་བབས་སྙན་ཁུང་ལས། །རིམ་བྱོན་འཕགས་བོད་ལས་ལྡན་རྣམས་ཀྱིས་རྙེད། ༢།རྒྱལ་དབང་པདྨས་སྒྲ་ལས་རབ་བསྒྱུར་ཅིང་། །དྲི་མེད་བཤེས་གཉེན་ལ་བརྟེན་གཉགས་དང་རྨས། །ཞུས་ཆེན་ལེགས་མཛད་སྒྱུ་འཕྲུལ་རྩ་བའི་རྒྱུད། །ངེས་གསང་ཐེག་པ་རིམ་བདུན་ཡང་རྩེར་སོན། ༣།དཀར་ཆག་འཕང་ཐང་མ་དང་ལྡན་དཀར་དུ། །གསང་སྔགས་ནང་གི་རྒྱུད་རྣམས་ཆེས་གཉན་པས། །འགོད་པར་མ་ལུས་ཞེས་པ་སྔ་འགྱུར་གྱི། །རྒྱུད་ལས་ངོས་འཛིན་གཞན་པ་བྱ་རྒྱུས་དབུལ། ༤།ཐམས་ཅད་མཁྱེན་པ་བུ་སྟོན་རིན་པོ་ཆེས། །ལ་ལར་ཞུས་དག་མཛད་བཞེད་རེ་ཞིག་བར། །བཏང་སྙོམས་བཞག་ལས་གཉིས་མེད་རྣམ་རྒྱལ་ཞེས། །བརྫུས་མའི་རྒྱུད་བཞིན་ཀུན་མཁྱེན་བུའི་འགྱུར་གསར་གྱི་གཉིས་མེད་རྣམ་རྒྱལ་མ་ཚང་བ་དེ་བསྒྱུར་བའི་རྒྱུ་མཚན་གཉིས་མེད་རྣམ་རྒྱལ་བརྫུས་མ་འདི་རྒྱུད་མིན་པ་ཤེས་པའི་དགོས་པ་ཡོད་ཚུལ་གསུངས་པས་སོ།། ངེས་པར་དབྱུང་བ་མིན། ༥།ས་ལོ་ཉིན་མོར་བྱེད་པས་གངས་ལྗོངས་ཀྱི། །ཆོས་ལོག་མུན་པ་མཐར་སྐྲོད་སྡོམ་གསུམ་དུ། །གསང་ཆེན་རྙིང་མའི་ཆོས་རྣམས་བཏང་སྙོམས་ལས། །ཕྱག་རྒྱ་བ་བཞིན་འབད་པས་བཀག་པ་མེད། ༦།མཁས་པའི་རྩེར་སོན་རིག་རལ་ཐར་ལོ་སོགས། །ཆོས་ཀྱི་སྤྱན་ལྡན་གཟུར་
གནས་མཁས་མང་པོས། །རྒྱ་དཔེ་རྙེད་ནས་ཆེར་བསྔགས་འགྱུར་བཅོས་རྣམས། །བསྟན་ལ་གཅེས་འཛིན་ཐུགས་ཀྱིས་འབད་པས་མཛད། ༧།གཡག་ཞར་རྩྭ་ལྟར་ཕྱོགས་རེར་མ་གྱུར་པའི། །ཐུབ་བསྟན་ཡོངས་རྫོགས་ཡིད་བཟང་རྩེ་བ་ཡིས། །སྒྲོལ་ཆེན་དྲིན་ལས་ཁོ་བོས་ཆོས་སྤོང་གི། །སྒྲིབ་པས་མ་སྤགས་ཞེས་གསུང་དགྱེས་རྩེར་སོན། ༨།རྡོ་རྗེ་འཆང་དབང་དཔལ་འབྱོར་ལྷུན་གྲུབ་ཀྱིས། །རྒྱུད་འདིའི་བཤད་བཀའ་ཡབ་ལ་ཉེར་གསན་ནས། །རྒྱ་ཆེར་སྤེལ་མཛད་ཐེག་པ་མཆོག་གི་བསྟན། །མི་ནུབ་རིང་པོར་གནས་པའི་སྲོག་ཤིང་གྱུར། ༩།ཡིད་སྲུབས་མདའ་ཡིས་སྙིང་ག་ཕུག་མིན་པ། །བཟང་པོའི་བག་ཆགས་སད་པའི་བློ་ལྡན་ལ། །ཕན་ཕྱིར་པར་གྱི་ཆོས་སྦྱིན་འདི་སྤེལ་བའི། །སྲུང་མ་ལེགས་ལྡན་ཚོགས་ཀྱི་བདག་པོས་མཛོད། ༡༠།ཕྱོགས་བཅུ་དུས་བཞིའི་སངས་རྒྱས་ཀུན་འབྱུང་གནས། །ཚོགས་བསགས་སྒྲིབ་སྦྱངས་བྱས་མིན་གདོད་མ་ནས། །ལུས་ཅན་ཡོངས་ལ་ལྷུན་གྲུབ་ཀུན་དུ་བཟང་། །རང་ཞལ་རང་ངོ་འཕྲོད་པར་བདག་བྱིན་རློབས། ༡༡།ཞེས་ཐེག་པ་མཆོག་གི་བསྟན་པའི་བཙས་སུ་སྒྱུ་འཕྲུལ་རྩ་རྒྱུད་དགའ་ལྡན་ཕུན་ཚོགས་གླིང་དུ་པར་དུ་བརྐོས་པའི་ཚེ། ཟ་ཧོར་གྱི་བནྡིས་སྦྱར་བའི་ཡི་གེ་པ་ནི་ཆང་ཁྱིམ་པ་ངག་དབང་མཁྱེན་བརྩེའོ།། །།དེ་ལྟར་རྡོ་རྗེ་འཆང་བ་བོད་ཁ་བའི་བྱིན་རླབས་སྙིང་ལ་ཞུགས་ཤིང་ཁྱབ་བདག་ཟུར་ཆེན་དང་ཁྲ་ཚངས་པ་རྣམ་གཉིས་ཀྱིས་སྨིན་གྲོལ་གྱི་རིམ་པ་སྩལ་བས་ཆོས་སྤོང་གི་སྒྲིབ་པས་སྤགས་པར་མ་གྱུར་པའི་བཀའ་དྲིན་བྱང་ཆུབ་སྙིང་པོའི་མཐའ་ཅན་དུ་གཞལ་བར་མ་ནུས་པ་ནི་ཀུན་བཟང་གདོད་མའི་ཡེ་ཤེས་མངོན་དུ་གྱུར་ནས་ཀྱང་མཇལ་བར་སྤྲོ་བ་ཡིན་ནོ། །རྒྱུད་ཀྱི་རྒྱལ་པོ་འདིའི་པར་སྔ་སོར་བསྐྲུན་པར་ཡིག་ནོར་སོགས་ཀྱི་མ་དག་པ་འགའ་ཞིག་བྱུང་བ་སྔགས་རྣམས་རྒྱ་དཔེ་ལ་བརྟེན་ནས་ཁྲུས་ཁང་ལོ་ཙཱ་བ་བསོད་ནམས་རྒྱ་མཚོའི་སྡེས་ཞུས་དག་ནན་ཏན་མཛད་པའི་དཔེ་ཁུངས་བཙུན་དང་། བོད་སྐད་ལ་རྒྱ་འགྲེལ་པར་བཀབ། བོད་འགྲེལ་གཡུང་ཊཱིཀ་གཉིས་ལ་ལེགས་པར་གཏུགས་ནས། རྡོ་རྗེ་བྲག་སྤྲུལ་པའི་སྐུ་མཆོག །འདར་བ་ལོ་ཙཱ་བ་ངག་དབང་ཕུན་ཚོགས་ལྷུན་གྲུབ། རྣམ་གླིང་པཎ་ཆེན་དཀོན་ཅོག་ཆོས་གྲགས་གསུམ་གྱིས་ཞུས་དག་བགྱིས་སྐབས་དོགས་གནས་རྣམས་འདི་གར་མིག་ལམ་དུ་ཕབ་སྟེ་དཔྱད་གཟོད་པའི་ལུགས་སུ་བྱས་པའོ།། །།