དཔལ་གསང་བའི་སྙིང་པོ་དེ་ཁོ་ན་ཉིད་ངེས་པའི་རྒྱུད་ཀྱི་རྒྱལ་པོ་སྒྱུ་འཕྲུལ་དྲ་བ་སྤྱི་དོན་གྱི་སྒོ་ནས་གཏན་ལ་འབེབས་པར་བྱེད་པའི་ལེགས་བཤད་གསང་བདག་ཞལ་ལུང་ཞེས་བྱ་བ།
གསུམ་པ་ལས་ཀྱི་རིམ་པའི་ཏིང་ངེ་འཛིན་ལ། ཡེ་ཤེས་ཀྱི་དཀྱིལ་འཁོར་སྤྱན་དྲང་ཞིང་མཆོད་པ་དབུལ་བ་དང་། བཤགས་པ་བྱ་བ་དང་།དངོས་གྲུབ་གསོལ་བ། དམ་བཅའ་བ། འཛབ་བཟླ་བ་དང་ལྔ། དང་པོ་ལ།སྤྱན་དྲང་བ་སོགས་དང་། མཆོད་པ་དབུལ་བའོ། །དང་པོ་ལ། སྙན་གསན་དབབ་པ། སྤྱན་དྲང་བ་དངོས། རིག་པའི་མེ་ཏོག་དོར་བ། དངོས་གྲུབ་བསྐུལ་བ། བསྡིམ་པའོ། །དང་པོ་ནི། སྟོང་པ་ཤིན་ཏུའི་ཚིག་དང་ཨེ་ཧྱེ་ཧིའི་སྔགས་བརྗོད་ཅིང་། དམ་ཚིག་པའི་ཐུགས་ཀའི་ཧཱུཾ་གི་འོད་ཟེར་གྱིས་བསྐུལ་བས་རང་བཞིན་ལྷུན་གྱིས་གྲུབ་པའི་ཕོ་བྲང་ན་བཞུགས་པའི་ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱིས་དགོངས་ཏེ། ཆོས་ཀྱི་སྐུ་ལས་མ་གཡོས་བཞིན་དུ་གཟུགས་ཀྱི་སྐུ་བསྒོམས་པ་དང་འདྲ་བའི་རྣམ་པར་ངང་གིས་བཞེངས་ནས་འབྱོན་མ་རག་
བསྒོམ་པའོ། །དེའི་དགོས་པ་ནི། སློབ་དཔོན་བི་ཤྭ་མི་ཏྲས།མཉེས་དཀའ་མ་ཡིན་བཀུར་གནས་ཕྱིར། །འཇིག་རྟེན་དབང་པོའི་ཆོས་ལུགས་ཀྱིས། །ཞེས་པས་ཇི་ལྟར་འཇིག་རྟེན་ན་རྒྱལ་པོ་སྤྱན་དྲང་བའི་ཐོག་མར་སྙན་གསན་འབེབས་དགོས་པ་དང་ཚུལ་བསྟུན་པ་སྟེ། དེ་ལྟར་མ་བྱས་ན་རྒྱལ་པོ་ལ་བརྙས་པས་ཀོ་ལོང་གི་རྒྱུར་འགྱུར་མོད་ཀྱི། འདིར་དེ་ལྟ་བུ་མ་དམིགས་ཀྱང་།དམ་ཚིག་པས་ཡེ་ཤེས་ཀྱི་དཀྱིལ་འཁོར་བཀུར་གནས་སུ་བྱ་བའི་ཆེད་དུ་སྲི་ཞུ་གུས་པའི་སྒོ་ནས་ཚུལ་མཐུན་པའོ། །གཉིས་པ་ནི། ཐུགས་རྗེའི་ལྕགས་ཀྱུའི་ཚིག་བརྗོད་ཅིང་ཛཿཧཱུཾ་བཾ་ཧོཿའི་སྔགས་རྒྱ་དང་། དམ་ཚིག་པའི་ཐུགས་ཀ་ནས་ཕྱག་རྒྱའི་ལྷ་མོ་སྤྲོས་ཏེ། ལྕགས་ཀྱུ་མས་ཐུགས་དམ་བསྐུལ། ཞགས་པ་མས་གནས་ནས་སྤྱན་དྲངས། ལྕགས་སྒྲོག་མས་གནས་ནས་བསྐྱོད། དྲིལ་བུ་མས་དགྱེས་པ་བསྐྱེད་དེ། མདུན་གྱི་ནམ་མཁར་སྤྱན་དྲངས་ནས། དམ་ཚིག་གི་དཀྱིལ་འཁོར་དང་མེ་རི་འདབ་འབྱོར་ཙམ་དུ་སྟེང་གི་
ནམ་མཁའ་ལ་བཞུགས་པར་བསྒོམ་པའོ། །དེའང་གལ་ཕྲེང་ལས། བདག་ཉིད་ཆེན་པོའི་དཀྱིལ་འཁོར་ལ། །སྤྱན་འདྲེན་གཤེགས་གསོལ་མི་དམིགས་ཀྱང་། །རང་བཞིན་གྲུབ་པའི་དཀྱིལ་འཁོར་ལྷའི། །སྐུ་དང་ཡེ་ཤེས་འཐོབ་བྱའི་ཕྱིར། །ས་མཱ་ཛཿདང་ཨེ་ཧིས་དགུག །ཅེས་སོ། །གསུམ་པ་ནི། ཨོཾ་བཛྲ་ས་མ་ཡ་ཨོཾ། ཞེས་སོགས་ཀྱིས་རིག་པའི་མེ་ཏོག་དོར་བས། རང་བཞིན་མཐར་ཕྱིན་གྱི་དཀྱིལ་འཁོར་དང་། འདི་ལྟར་བསྒོམས་པའི་ལྷག་པ་ཏིང་དཀྱིལ་གྱི་སྐུ་གསུང་ཐུགས་ཡོན་ཏན་ཕྲིན་ལས་རྣམས་གཉིས་སུ་མེད་པར་བསམ་པ་སྟེ། དེ་ནི་དམ་ཡེ་གཉིས་ཀ་ཡང་རིག་པའི་རང་སྣང་ཡིན་པའི་ཕྱིར་སེམས་ཉིད་ཀྱི་ངང་དུ་དབྱེར་མེད་པར་རིག་པ་ལ་རིག་པའི་མེ་ཏོག་ཅེས་བྱ་བ་ལ། དེ་ཙམ་ན་ཕྱི་རྒྱུད་པ་ལྟར་བཟང་ངན་དང་ཐ་དད་དུ་འཛིན་པའི་རྟོག་པ་དོར་བས་ན་དོར་ཞེས་བྱའོ། །འདི་ལ་སོ་སོ་མ་ཡིན་པར་རིག་པ་འདུན་པའི་ཕྱག་དང་།རང་སྣང་གི་དཀྱིལ་འཁོར་དུ་འཇུག་པའི་ཚུལ་ཞེས་ཀྱང་གྲགས་སོ། །བཞི་པ་ནི།ཨོཾ། ཡེ་ཤེས་རྒྱལ་པོ་ཞེས་སོགས་ཀྱི་ཚིག་དང་། ཨོཾ་བཛྲ་ས་མ་ཡ་ཧཱུཾ། ཞེས་སོགས་ཀྱི་སྔགས་ཀྱིས་བསྐུལ་བས། ཡེ་ཤེས་ཀྱི་ལྷ་རྣམས་བདག་གི་སྒྲིབ་པ་སྦྱོང་བ་དང་། སྐུ་གསུང་ཐུགས་ཀྱི་དངོས་གྲུབ་སྩོལ་བ་ལ་ཕྱོགས་པར་བསམ་པའོ། །འདིར་དངོས་གྲུབ་སྐུལ་བ་ལ་ཚིག་གིས་བསྐུལ་བ་དང་། སྔགས་ཀྱིས་བསྐུལ་བ་གཉིས་བལྡབས་པོ་ཞེ་ན། རྗེ་སྒྲོ་ཕུག་པའི་ཞལ་ནས། དང་པོ་ནི་དངོས་གྲུབ་ཙམ་བསྐུལ་བའི་དོན་དང་། ཕྱི་མ་ནི་གནད་ལ་ཕབ་སྟེ་བསྐུལ་བའི་ཕྱིར་མི་ཟློས་གསུང་། ལྷ་རྗེ་ཉེ་སྟོན་ནི། སྤྱིར་གསང་སྔགས་ལུང་གི་སྒོ་བཞིར་བཞེད་དེ།དོན་རྣམས་གསལ་འདེབས་བརྗོད་པ་ཚིག་གི་སྒོ། །ཐུགས་དམ་གནད་བསྐུལ་གསང་བ་སྔགས་ཀྱི་སྒོ། །དམིགས་པ་རྩེ་གཅིག་ཏིང་འཛིན་ཡིད་
ཀྱི་སྒོ། །མཚོན་པ་བརྡར་བཏགས་ཕྱག་རྒྱ་གར་གྱི་སྒོ། །ཞེས་བྱ་བ་ལས། ཀུན་ལ་བཞི་ག་ཚང་བ་ཡང་ཡོད། གསུམ་གཉིས་གང་རུང་ཚང་བའང་ཡོད་པས་ཀུན་ལ་ཐམས་ཅད་ཚང་བར་མ་ངེས་པས། འདིར་ཚིག་སྔགས་ཏིང་འཛིན་གསུམ་གྱིས་བསྐུལ་བ་ཡིན་གསུངས་སོ། །ལྔ་པ་ནི། ཛཿཧཱུཾ་བཾ་ཧོཿཞེས་ཕྱག་རྒྱ་བཞིས་ཆུ་ལ་ཆུ་བཞག་པ་ལྟར་དབྱེར་མེད་དུ་བསྲེས་ཏེ། རིན་ཆེན་སེང་གེའི་གདན་ལ་ཞེས་སོགས་ཀྱིས་འགྲོ་དོན་མ་རྫོགས་ཀྱི་བར་དུ་བརྟན་པར་བཞུགས་སུ་གསོལ་བའོ། །འདི་དག་ནི་ཟུར་ལུགས་པ་སྤྱིའི་བཞེད་པ་སྟེ། བདག་གི་རྗེ་བླ་མ་ནི། ཚིག་གིས་བསྐུལ་བའི་རྗེས་ཀྱི་སྔགས་ཚན་གསུམ་པོས་རིམ་བཞིན་དམ་ཡེ་དབྱེར་མེད་དུ་བསྲེས་ནས་བརྟན་པ་དང་དབང་དུ་བྱས་ལ། ཕྱག་རྒྱ་བཞིས་ནི་ཤིན་ཏུ་བརྟན་ཅིང་གསལ་བར་བྱས་པ་ཉིད་ཡིན་པས་ས་བཅད་བཞི་པ་དང་ལྔ་པ་གཉིས་ཁོང་གཅིག་ཏུ་བསྡུས་ན་ལེགས་གསུངས་ཏེ། སྔགས་དོན་དང་ཤིན་ཏུ་འབྱོར་ཞིང་། ཚིག་དང་སྔགས་ཀྱིས་བསྐུལ་བའི་ཟློས་སྐྱོན་ཡང་སེལ་བས་མཁས་པས་བསྔགས་པར་འོས་པའོ། །གཉིས་པ་མཆོད་པ་ནི། ཕྱག་ནས་བརྩམས་ཏེ། གླུ་ཡེ་ཤེས་ཀྱི་བར་དུ་དབུལ་བར་བྱ་སྟེ་འོག་ནས་སྟོན་ནོ། །གཉིས་པ་ནི། རང་གཞན་གྱི་རྒྱུད་དག་པར་བྱ་བའི་ཕྱིར་སྤྲོས་པ་མེད་པའི་ཞེས་སོགས་སོ། །གསུམ་པ་ནི། འདོད་པའི་དོན་ཉེ་བར་འགྲུབ་པ་ལ་སྨོན་པའི་སྒོ་ནས་ཤེས་བྱ་ཐམས་ཅད་ཞེས་སོགས་ཀྱིས་གསོལ་ལོ། །བཞི་པ་ནི། ལྷག་པའི་བསམ་པ་རྩེ་གཅིག་པའི་སྒོ་ནས་བདེ་བར་གཤེགས་པ་ཞེས་སོགས་སོ། །ལྔ་པ་ནི། འཛབ་ཁང་ཕྱེ་སྟེ་འོད་ཟེར་སྤྲོ་བསྡུའི་དམིགས་གནད་ཀྱི་མན་ངག་དང་ལྡན་པའི་སྒོ་ནས་འཛབ་བསྐུལ་སྔོན་དུ་འགྲོ་བས་འཛབ་བཟླ་ཞིང་། རྗེས་ལ་བསྟོད་ནས་དཀྱིལ་འཁོར་གཉིས་དབྱེར་
མེད་དུ་བསྲེ་བའོ། །དེ་དག་ཀྱང་འོད་རིམ་ལས། རྣལ་འབྱོར་དབང་ཕྱུག་ཉམས་ཆག་བཤགས། །ལས་ལ་དོན་ཕྱིར་ཕྲིན་ལས་བཅོལ། །བསྒྲུབ་པའི་འདོད་དོན་གསོལ་བ་གདབ། །ཕྱི་དང་ནང་གི་འཕྲོ་འདུ་ཡིས། །རྣལ་འབྱོར་བསྒྲུབ་ཕྱིར་བཟླས་པ་བྱ། །ཞེས་སོ། །གཉིས་པ་རྗེས་ཀྱི་རིམ་པ་ལ་ལྔ་ལས། ཚོགས་དབུལ་བ། ལྷག་མ་གཏང་བ། བསྟན་མ་བསྐྱང་བ་རྣམས་འཆད་པར་འགྱུར་ལ། བཞི་པ་དཀྱིལ་འཁོར་བསྡུ་བ་ནི། རྩ་བའི་དཀྱིལ་འཁོར་གསལ་གདབ་སྟེ། གཏང་རག་མཆོད་བསྟོད་དང་ནོངས་པ་བཟོད་པར་གསོལ་ནས། རྟག་མཐའ་བསལ་ཕྱིར་དཀྱིལ་འཁོར་མི་དམིགས་པའི་དབྱིངས་སུ་བསྡུ། ཆད་མཐའ་བསལ་ཕྱིར་དེའི་ངང་ལས་ལྷར་རྫོགས་ཚུལ་དུ་ལྡང་། སྤྱི་བོར་ཧཾ་བཀོད་ལ་དེ་ཞུ་བའི་རྒྱ་གྲམ་གྱིས་གོ་བགོ། ཧཱུཾ་ཏྲུམ་གྱིས་མཛུབ་རྩེ་ལ་ཁྲོ་བོ་གཉིས་བསྐྱེད་ནས་ལུས་བསྲུང་། དབུ་རྒྱན་དང་ཅོད་པན་བཅིངས་ཏེ་ཤིན་ཏུ་བརྟན་པར་བྱས་ལ་བསྔོ་བ་བྱའོ། །དེ་ལྟར་ཡང་རིན་དྲ་ལས། རང་སྣང་དབྱེར་མེད་དཀྱིལ་འཁོར་ཀུན། །ཐུགས་ཀྱི་དཀྱིལ་འཁོར་ཉིད་དུ་བསྡུ། །ཧཱུཾ་ཧཱུཾ་ཞེས་ནི་རབ་བརྗོད་པས། །ཆོས་ཀྱི་དབྱིངས་སུ་ཐིམ་པར་འགྱུར། །དེ་ནས་སྙིང་པོ་དྲན་ཙམ་གྱིས། །ཕྱག་རྒྱ་ཆེན་པོ་གསལ་གྱུར་ནས། །གོ་བགོ་མཚམས་བཅད་ལུས་བསྲུང་སྟེ། །ཞེས་དང་། འོད་རིམ་ལས། རྟག་ཆད་མཐའ་ལས་གྲོལ་བྱའི་ཕྱིར། །དཀྱིལ་འཁོར་རིམ་བཞིན་སྙིང་ལ་བསྡུ། །མི་དམིགས་ངང་ལས་གཙོ་བོར་བསྐྱེད། །བསྐྱེད་པའི་རྫོགས་པ་བསྟན་པའོ། །བར་ཆོད་རྒྱུན་ལས་གྲོལ་བྱའི་ཕྱིར། །རྒྱ་གྲམ་གོ་དང་ཁྲོ་ལུས་བསྲུང་། །དེ་ཉིད་འགྲོ་དོན་ནུས་ལྡན་ཕྱིར། །དབང་བསྐུར་དབུ་རྒྱན་ཅོད་པན་ལྡན། །ཞེས་སོ། །ལྔ་པ་སྤྱོད་ལམ་རྒྱུན་ཏིང་ནི། །དེ་ལས། དེ་ནས་རྣལ་འབྱོར་
ཆེན་པོ་དེས། །འགྲོ་ཉལ་འདུག་སྡོད་བཞི་པོ་རྣམས། །སྲོག་གི་ཕྱིར་ཡང་མི་གཏོང་ཞིང་། །སྤྱོད་ལམ་ཀུན་ཏུ་མ་ཉམས་པར། །བདག་ཉིད་ཆེན་པོ་བརྟན་པར་བསྒོམ། །ཞེས་སོ། །གཉིས་པ་ཁྲོ་བོའི་མངོན་རྟོགས་ཀྱི་ལས་བསྡེབས་ལ། སྔོན་འགྲོ་ཐུན་མོང་དུ་སོང་ནས། འདིར་དངོས་གཞི་དང་།རྗེས་གཉིས། དང་པོ་ལ། ཏིང་ངེ་འཛིན་གྱི་དགོས་ཆེད་དང་། དེ་བསྒོམ་པ་དངོས་སོ། །དང་པོ་ནི། དམ་པ་རྒྱན་ལས། འཛིན་པའི་དབང་གིས་སྡུག་བསྔལ་ཞིང་། །གདུག་པ་སྲིད་གསུམ་འདུལ་བ་དང་། །ང་རྒྱལ་ཆེན་པོ་བརྟན་པའི་ཕྱིར། །སྒྱུ་འཕྲུལ་དྲ་བའི་ཏིང་འཛིན་བསྒོམ། །ཞེས་པས་སྔོན་བྱུང་རྒྱལ་བ་ཉིད་གདུག་པ་ཅན་གྱི་ཡུལ་ལ་ཐུགས་རྗེས་ཁྲོས་ཏེ་བཏུལ་བ་བཞིན་དུ། ད་ལྟར་རྗེས་འཇུག་དུའང་སྙིང་རྗེ་ཆེན་པོས་གདུལ་བྱ་གདུག་པ་ཅན་རྣམས་འདུལ་བའི་དོན་དུ་སངས་རྒྱས་ཀྱི་མཛད་པ་བསྒྲུབ་པར་བྱའོ་སྙམ་དུ་དམ་འཆའ་བ་སྟེ། འདི་ནི་ཐོག་མར་སེམས་བསྐྱེད་པའི་ཆོ་ག་ཡིན་ནོ། །གཉིས་པ་ལ། ཏིང་ངེ་འཛིན་གསུམ་དང་། དཀྱིལ་འཁོར་བསྒོམ་པའི་དང་། ལས་ཀྱི་རིམ་པའི་ཏིང་འཛིན་ནོ། །དང་པོ་ལ་གསུམ་ལས། དེ་ཏིང་ནི། ཨེ་མ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །སྐྱེ་བ་མེད་ལས་ཐམས་ཅད་སྐྱེས། །སྐྱེས་པ་ཉིད་ན་སྐྱེ་བ་མེད། །ཅེས་སོགས་སོ། །ཀུན་ཏིང་ནི། ཨེ་མའོ་ཀུན་ཏུ་བཟང་མོ་ནི། །བདེ་ཆེན་སྤྲོས་བྲལ་ཐིག་ལེ་ལས། །སྟོང་པ་ཉིད་དུ་རབ་གསལ་བའི། །སྙིང་རྗེའི་ཡུལ་ནི་བསྒོམ་པར་བྱ། །ཞེས་སོགས་སོ། །རྒྱུ་ཏིང་ནི། ཧཱུཾ། ངེས་པ་ལས་ནི་རྡོ་རྗེ་ཆེ། །དེ་ལས་དཔལ་ཆེན་ཧེ་རུ་ཀ །འབར་བ་ཆེན་པོ་གར་དགུ་ཡིས། །འཇིགས་པ་ཡི་ནི་དུས་ལྟར་དྲག །ཅེས་པས་རིག་པ་ཧཱུཾ་མཐིང་གསལ་བརྟན་གྱི་ཚད་བརྒྱད་ལྡན་ལས་འཕྲོ་འདུའི་སྦྱོར་བས། རྡོ་རྗེ་རྩེ་
དགུ་པ་མཐིང་ག །དེ་འཕྲོ་འདུས་འོད་དུ་ཞུ་བ་ལས་རྒྱུའི་ཧེ་རུ་ཀ་ཚོན་གང་བ་རྡོ་རྗེ་དང་ཐོད་ཁྲག་འཛིན་པར་བསྒོམ་པའོ། །འདིའི་སྐུ་མདོག་ལ་བཞེད་པ་མི་མཐུན་ཏེ། ལྷ་རྗེ་སྒྲོལ་མ་བ་དང་བླ་མ་གྲ་སྟག་པ་སོགས་སྔོན་པོར་མཛད། སྟ་སྟོན་གཟི་བརྗིད་སྨུག་ནག་ཏུ་བཞེད་ཅིང་། རྡོ་རྗེ་མཐིང་ག་ནི། ཐུགས་མི་འགྱུར་བ་དང་སྐུ་མདོག་སྨུག་ནག་ནི་ཅིར་ཡང་འགྱུར་བ་མཚོན་པ་ཡིན་པས་དེ་གཉིས་ཀྱི་ཁ་དོག་འགལ་བར་མི་བསམ་མོ་ཞེས་སྐྱོན་སྤང་ཡང་མཛད་དེ་རང་གི་རྗེ་བླ་མའི་དགོངས་པའང་ཕྱི་མའོ། །གཉིས་པ་ལ། རྟེན་དང་། བརྟེན་པ་བསྐྱེད་པའོ། །དང་པོ་ལ། འོག་གཞི་བསྐྱེད་པ། གཞལ་ཡས་ཁང་དངོས་བསྐྱེད་པ། གདན་བསྐྱེད་པའོ། །དང་པོ་ནི། བདག་རྒྱུའི་ཧེ་རུ་ཀའི་ཐུགས་ཀའི་ཧཱུཾ་ལས་ས་བོན་སྤྲོས་ཏེ། འཕྲོ་འདུའི་བྱ་བས་ཀྲོ་དྷཱི་ལྔའི་མཁའ་དབྱིངས་ཀྱི་རང་བཞིན། ནམ་མཁའ་དང་། རླུང་དང་།རཀྟ་དང་། ཞིང་ཆེན་གྱི་ས་གཞི་ཀེང་རུས་ཀྱི་རི་རབ་ཀྱིས་མཚན་པ་དང་། མེ་དཔུང་རྣམས་བསྒོམ་པ་སྟེ། དུར་ཁྲོད་ཆེན་པོར་དགྱེས་ནས། ཞེས་སོགས་དང་། དམ་པ་རྒྱན་ལས། དུར་ཁྲོད་ཆེན་པོ་རབ་འཇིགས་པ། །ཁྲག་གི་རྒྱ་མཚོ་འཁྲུགས་པའི་དཀྱིལ། །ཀེང་རུས་ཆེན་པོའི་རི་རབ་ཀྱི། །སྟེང་གི་འབར་བའི་ཀློང་དཀྱིལ་ན། །ཞེས་སོ། །གཉིས་པ་ནི། མེའི་དབུས་སུ་བྷྲཱུཾ་སྨུག་ནག་ཆད་པ་ལས་འཕྲོ་འདུའི་སྒོ་ནས་གཞལ་ཡས་ཁང་བསྒོམ་པའོ། །དེ་ལ་གསུམ། དབྱིབས། རྒྱུ། རྐྱེན་ནོ། །དང་པོ་ནི། འབར་བའི་འཁོར་ལོ་རྩིབས་བཞི་པ། །གྲུ་ཆད་བཞིས་ནི་རྣམ་པར་བརྒྱན། །གྲུ་བཞི་སྒོ་ཁྱུད་བཞི་དང་ལྡན། །ཞེས་སོགས་གསུངས་པའི་མཚོན་དོན་དང་། དེ་མཚོན་བྱེད་ཀྱི་མཚན་མར་གྱུར་པའི་དབྱིབས་ཕལ་ཆེར་ཞི་བ་དང་མཚུངས་ཤིང་། ཁ་དོག་གྲུ་ཆད་ལྗང་གུའི་དབུས་སུ་གསེར་འཁོར་རྩིབས་བཞི་པ་མུ་ཁྱུད་དང་ལྟེ་བ་མཐིང་གར་གནས་པ་དང་། ཁྱད་པར་དུ་བདེན་གཉིས་མཚོན་པའི་འབར་བའི་བར་ཁྱམས་གཉིས་ཀྱིས་མཛེས་པ་ནི་དགོས་ཆོས་ཏེ། ནང་མ་གསེར་ཁྱམས་དང་། ཕྱི་མ་ཁྲག་ཁྱམས། གློ་འབུར་
དང་སྒོ་རྣམས་ཕྱོགས་མདོག་གོ། །རྟ་བབས་ཀྱང་། རྡོ་རྗེ་མེ་ལོང་ལས། ཕྱི་ནང་རྒྱུ་འབྲས་གདུག་པ་དག །འདུལ་ཕྱིར་རྟ་བབས་བཞིར་བཤད་དོ། །ཞེས་པའི་དོན་ལ། གོང་མ་རྣམས། ཁྱམས་ཕྱི་ནང་གཉིས་ཀའི་སྒོ་བཞིར་རྟ་བབས་བརྒྱད་ཀྱིས་བརྒྱན་པར་བཞེད་ཀྱང་། ལུང་དོན་ནི་དེར་མ་ངེས་ཏེ། ཕྱི་ནང་གི་ཐེག་བརྒྱད་མཚོན་པའི་རྒྱུའི་རྟ་བབས་བརྒྱད་དང་། དེའི་ཡོན་ཏན་རྫོགས་པའི་འབྲས་བུའི་རྟ་བབས་བརྒྱད་བརྒྱད་སྒོ་བཞི་ཀ་ལ་ལྡན་པར་བཞེད་པའི་ཕྱིར་རོ། །དེ་བས་ན་འདིར་རང་གི་རྗེ་བླ་མའི་དགོངས་པས་ནང་སྒོ་ལ་རྟ་བབས་མི་བྱེད་པའི་ཕྱོགས་ལེགས་པ་ཡིན་ནོ། །གཉིས་པ་ནི། སྔ་རབས་པ་དག །གཞལ་ཡས་ཁང་ཕྱི་མ་རིན་པོ་ཆེ་དང་། ནང་མ་ཐོད་པ་ལས་གྲུབ་པར་བཞེད་མོད། དེ་ལ་རྡོ་རྗེ་ལས།གདུག་པ་འདུལ་བའི་དཀྱིལ་འཁོར་ལ། །ཐོད་པ་སྣ་ལྔ་སྣ་གསུམ་དང་། །ཐོད་སྐམ་རྩིག་པ་རིམ་པ་བཞིན། །ཞེས་ཕྱི་ནང་གཉིས་ཀ་ཐོད་རྩིགས་སུ་བཞེད་པས་གནོད་དོ། །རང་ལུགས་ནི། ཕྱི་མ་ཐོད་རྩིགས་རིམ་པ་ལྔ་དང་། ནང་མ་སྐམ་རློན་རྙིང་གསུམ་གྱིས་བརྩིགས་པའོ། །ཐོད་སྐམ་བརྩིགས་པ་ཞེས་པའི་ལུང་དོན་ནི། སྟ་སྟོན་གཟི་བརྗིད་བཞེད་པ་ལྟར་གྲུ་ཆད་ཀྱི་རྩིག་པ་སྟེ། དེའི་ཚུལ་ནི། གྲུ་ཆད་ཁྱམས་ལས་སྟེགས་བུ་གྲུ་བཞི་པའི་རྣམ་པར་ཐོད་རྩིགས་ཀྱིས་འཕགས་པ་ཡིན་གྱི། ཐོག་ལ་ཐུག་པའི་བརྩིག་པར་མི་བསམ་སྟེ། དེ་ལྟར་ན་སྒོ་སུམ་སྦྲག་ཏུ་འགྱུར་བའི་ཕྱིར་རོ། །ཐོད་པ་དེ་དག་ཀྱང་། ཁ་ནས་མེ་འབར་བ། མིག་ནས་ཁྲག་འཛག་པ། སྣ་ནས་དུད་པ་འཐུལ་བ། རཀྟས་སྤྱིན་ཐབས་སུ་སྦྱར་བ། གནམ་ལྕགས་ངུར་མོའི་གཟེར་བཏབ་པ། ལོགས་ལ་ཙིཏྟའི་ཕོ་ལོང་འཕྱང་བ། ཚངས་པའི་གདུང་། ལྷ་ཆེན་བརྒྱད་ཀྱི་ཀ་བ། རུས་སྦལ་གྱི་ཀ་གདན། ཀླུ་བདུད་ཀྱི་བྱ་མ། རྒྱུ་སྐར་གྱི་དྲལ་མ། ཞིང་ལྤགས་ཀྱི་ཐོག །ཉི་ཟླའི་མཐོངས་ཁུང་། གཟའ་བརྒྱད་ཀྱི་ཁ་བད། ཆུ་སྲིན་གྱི་ཐོད་པའི་རྟ་བབས་ལ་སོགས་པ་སྟེ། དེ་ལས། ཚངས་
དང་ལྷ་དབང་ལ་བརྟེན་པ། །མཆོག་ཆེན་བརྒྱད་ཀ་ཡིན་པར་འདོད། །ལྷག་མ་རྣམས་ནི་ཐོག་ཕུབ་སྟེ། །གཟའ་བརྒྱད་ཉི་ཟླའི་གློ་སྐར་ལྡན། །ཞེས་སོ། །གསུམ་པ་ལ། ལོགས་རྒྱན་ནི། ཐོད་སྦྲུལ་སྣ་ཚོགས་ཉི་མས་བརྗིད། །ཅེས་པས། རྩིག་སྟེང་ཐོད་པ་སྣ་ཚོགས་ཀྱི་ཕ་གུ་ལ་སྦྲུལ་ཆེན་གྱི་ཞགས་པས་མགུལ་ནས་དྲངས་པའི་དྲ་བ་འཕྱང་བ། མུན་པར་སྦྲུལ་དང་ཐོད་ཕྲེང་གི་དོ་ཤལ་དང་དོ་ཤལ་ཕྱེད་པ་དང་དེ་དག་གི་བར་བར་ནས་ཉི་མའི་འོད་ཟེར་འཕྲོ་བས་བརྗིད་ཅིང་། ཕྱིའི་འགྲམ་སྟེགས་ལ་ནང་གི་འདོད་ཡོན་ཐོགས་པས་བསྐོར་བ་སྟེ། དེ་ལས། སྦྲུལ་དང་ཐོད་པའི་ཕྲེང་བ་ཉིད། །དྲ་བ་དྲ་ཕྱེད་རྣམ་པར་སྤྲས། །ཞེས་དང་། ཁྲོ་བོ་ཤ་ལྔ་བདུད་རྩི་དང་། །དུར་ཁྲོད་འདོད་ཡོན་ལྡན་པའོ། །ཞེས་སོ། །སྟེང་རྒྱན་ནི་པུ་ཤུ་དང་རྟ་བབས་ཀྱི་རྩིའི་ཕྱོགས་ཀུན་ཏུ་ཞིང་འཕན་དང་། དབུས་འཕྱུར་བུའི་རྩེར་ལྷ་ཆེན་པོའི་ཐོད་པ་སྤུབ་པའི་སྟེང་ན་ཙིཏྟའི་ཏོག་དང་ལྡན་པའོ། །དེ་ལྟར་ཡང་སྔ་མ་ལས། ཞིང་འཕན་ཕྱོགས་མཚམས་བརྒྱད་དང་ལྡན། །ལྷ་ཆེན་ཐོད་པ་སྤུབ་སྟེང་ན། །ཙིཏྟའི་ཏོག་ལས་འོད་ཟེར་འཕྲོ། །ཞེས་སོ། །སྒོ་བཞིར་རུས་སྦལ་གྱི་མ་ཐེམ། ཆུ་སྲིན་གྱི་ཡ་ཐེམ། སྦྲུལ་ནག་གི་སྐྱེས་བུ། ཞིང་གི་སྒོ་གླེགས་སོགས་ཀྱིས་བརྒྱན་ཅིང་། ཞིང་སྨུག་པོའི་ཀ་བས་བཏེགས་པའི་སྒོ་ཁང་གི་སྟེང་ན། རྟ་བབས་ལ། སོར་ཕྲེང་དང་། ཐོད་པའི་ཕྲེང་བ་དང་། དབང་པོ་དང་། ཉི་ཟླའི་ཕྲེང་བས་བརྒྱན་པ་སྟེ། དེ་ལས། སོར་ཕྲེང་ཐོད་པའི་ཕྲེང་བ་དང་། །དབང་པོ་ཉི་ཟླའི་ཕྲེང་བས་སྤྲས། །ཞེས་སོ། །རྟ་བབས་ཀྱི་རྩེར་ཆོས་ཀྱི་འཁོར་ལོའི་གཡས་གཡོན་ན་ཆུ་སྲིན་ཕྲུ་གུ་དང་། སྟེང་ན་ཞིང་གི་གདུགས་ཕུབ་པའོ། །ཕྱིའི་རྒྱན་ནི། དེ་ལས། སྐྱེས་བུ་གསལ་ཤིང་ཕྱོགས་མཚམས་བརྒྱད། །རཀྟའི་མཚོ་བརྒྱད་རྦ་རླབས་འཁྱིལ། །ཞེས་སོགས་དང་། སྲུང་འཁོར་གྱི་ནང་གི་ཁོར་ཡུག་ལ་དུར་ཁྲོད་བརྒྱད་དང་། ཕྱི་ནང་ཐམས་ཅད་དུ་རྡོ་རྗེ་རྩེ་ལྔ་པའི་རྣམ་པ་ཅན་གྱི་མེ་རི་མེ་དཔུང་འབར་བའི་ཀློང་ནས་སྤྲུལ་པའི་ཁྲོ་ཆུང་གྲངས་མེད་པ་འཕྲོ་བའོ། །དེའང་ཆོས་དོན་ལས། ཁྲོ་བོ་རྣམས་ལ་དུར་ཁྲོད་ནི། །
འཁོར་བ་མ་སྤངས་གནས་དག་རྟགས། །ཞེས་དང་། འདི་ཉིད་ལས། འབར་བའི་འཕྲོ་བ་མང་པོ་འཁྲུགས། །ཞེས་སོ། །གསུམ་པ་ནི། ཁྱུ་མཆོག་མ་ཧེ་གཟིག་དང་སྟག །ཅེས་སོགས་ཀྱིས་བསྟན་ཏེ། དེའང་ཡོན་ཏན་གྱི་ཆེ་བས་རང་སྣང་བའི་ཕྱིར་ལྟེ་བ་དང་རྩིབས་བཞིར་པདྨ་ཟླ་ཉི་སུམ་བརྩེགས་སོ། །དེའི་སྟེང་ན་དྲེགས་པ་ཅན་ཟིལ་གྱིས་གནོན་པའི་ཕྱིར་དབུས་སུ་རུ་དྲ། ཤར་དུ་དྲི་ཟ། ལྷོར་གཤིན་རྗེ།ནུབ་ཏུ་སྲིན་པོ། བྱང་དུ་གནོད་སྦྱིན་ཕོ་མོའོ། །དེ་དག་ལས་ལ་ནན་ཏུར་དུ་བསྟན་པའི་ཕྱིར་ཕོ་ཁ་བུབ་ཀྱི་སོག་ཕྲག་དང་། མོ་གན་རྐྱལ་གྱི་ནུ་ཕྲག་ནས་དུག་ལྔ་གནས་སུ་དག་པའི་བརྡར་དུད་འགྲོ་གདུག་པ་ཅན་རྣམས་ཀྱི་སྤར་བས་བཟུང་བ་སྟེ། དེའང་། ཤར་དུ་ཁྱུ་མཆོག་གཏི་མུག །ལྷོར་མ་ཧེ་ང་རྒྱལ ། ནུབ་ཏུ་གཟིག་འདོད་ཆགས། བྱང་དུ་སྟག་ཕྲག་དོག །དབུས་ཞེ་སྡང་སུ་དོམ་སྟེ་སྤར་ཁབ་ཀྱི་ལུགས་སོ། །འགྲེལ་པ་ཉི་སེང་མར་ཁྱུ་མཆོག་ནི་ལྷ་ཆེན་གྱི་ཞོན་པ་སྟེ་དབུས། མ་ཧེ་གཤིན་རྗེའི་ཞོན་པ་སྟེ་ལྷོ། གཟིག་དྲི་ཟའི་སྟེ་ཤར། སྟག་ཀླུའི་སྟེ་ནུབ། དོམ་གནོད་སྦྱིན་གྱི་སྟེ་བྱང་དུ་འགོད་པར་བཤད། ལྷ་རྗེ་རོང་བ་ནི། ཁྱུས་འགྲོ་ཟིལ་གྱིས་གནོན་པའི་ཕྱིར་ཁྱུ་མཆོག་ནི་ཐུགས་ཀྱི་ཕྱག་རྒྱ། མ་ཧེ་གཟི་བརྗིད་ཆེ་བས་སྐུའི།གཟིག་གདུག་པ་ཆེ་བས་མི་གཏོང་བའི་ཕྱིར་ཡོན་ཏན་གྱི། སྟག་དཔའ་བརྟུལ་ཆེ་བས་ཐུགས་རྗེ་ཆེན་པོའི་མཚན་ཉིད་ཀྱང་མི་མཛད་པདྨའི། དོམ་གཏུམ་པའི་ཕྱིར་ལས་རིགས་ཀྱི་ཕྱག་རྒྱའོ་གསུང་བ་ལས། འདིར་ནི་བླ་མ་བརྒྱུད་པའི་བཀའ་སྲོལ་གྱིས་ལུགས་དང་པོའི་རྗེས་སུ་འབྲང་ངོ་། །ཡང་ཁྱུ་མཆོག་གི་ངོས་འཛིན་ལ། ཁ་ཅིག །པིཎྜཱ་རྠར་བཤད་པའི་ཕྱིར་སེང་གདན་མཆོག་གདུལ་དཀའ་མི་འཇིགས་ཁྱུ་མཆོག་དང་གེའོ་ཟེར།ཁ་ཅིག་ཉི་ཁྲི་ལས་གླང་པོར་ཁྱུ་མཆོག་གླང་པོ་ཆེའི་གནས་སུ་དམ་བཅའ། ཞེས་གསུངས་སོ། །བཤད་ཟེར། ཉང་ཊཱིཀ་པ་དེ་གཉིས་རོལ་པ་ལས་བྱུང་བར་བཞེད་ཀྱང་། འགྲེལ་པ་ཉི་སེང་དུ། གླང་ཁྱུ་པར་བཤད་ཅིང་འདུལ་བ་ལུང་ལས་ཀྱང་། བ་གླང་གི་ཕྲུ་གུ་སེང་གེ་མོའི་འོ་མས་གསོས་པ་ལས་བྱུང་བའི་རིགས་ཞེས་
སུ་བཤད་དོ། །གདན་འདི་དག་ཀྱང་། འགྲེལ་པ་མངོན་རྟོགས་ལས། ལྷ་ཆེན་པོ་རྣམས་ཀྱི་ཞོན་པ་ཕྲོགས་པའོ། །ཞེས་རྒྱལ་བྱེད་དཔའ་རྟགས་ཀྱི་རྟགས་སུ་བཤད་ཅིང་། ཉི་འོད་སེང་གེས་ཀྱང་། གུས་པས་རང་གི་གདན་སྟེང་དུ་ཕྱུང་སྟེ་ཕུལ་བར་བཤད།དོན་ལ་སྨོན་ལམ་གུས་པ་དང་། ཐུགས་རྗེ་མཐུན་འཇུག་གི་གདན་གཉིས་ཀར་མི་འགལ་ལོ་གསུངས། འཁོར་གྱི་གདན་ནི། ཁྲོ་མོ་ཉི་ཤུའི་གནས་སུ་རོ་དང་ཉི་གདན། དབང་མོ་ཉེར་བརྒྱད་ལ་ཞིང་སྐམ་གྱི་གདན་རེ་རེའོ། །གཉིས་པ་བརྟེན་པ་ལྷ་བསྐྱེད་པ་ལ། ཇི་ལྟར་བསྐྱེད་པའི་ཆོ་ག་དང་། བསྐྱེད་པ་ལྷའི་མཚན་ཉིད་གཉིས། དང་པོ་ལ། ཁང་པ་གྲུབ་ནས་བདག་པོ་བསྐྱེད་པ་ཕ་དྲིན་ཅན་གྱི་ཚུལ་དང་། བདག་པོ་གྲུབ་ནས་ཁང་པ་རྩིག་པ་སྒོ་དྲག་པོའི་ཚུལ་ལོ། །དང་པོ་ནི།ཏིང་འཛིན་གསུམ་གྱི་རྒྱུ་ཏིང་ཧཱུཾ་གི་ཁྱད་པར་ལས། འོག་གཞི་དང་གཞལ་ཡས་ཁང་བསྐྱེད་པའི་ནང་དུ་གཙོ་བོ་ཆོ་ག་གསུམ་གྱིས་བཛྲ་ཧེ་རུ་ཀར་བསྐྱེད་ནས་སྲས་གཉིས་བསྐྱེད་པའི་བྱ་བ་ལ་འཇུག་སྟེ། འགྲེལ་པ་སྤར་ཁབ་ཀྱི་རྗེས་སུ་འབྲངས་ནས་རོག་པ་སོགས་བཞེད་དོ། །གཉིས་པ་ནི། སྔར་བཤད་པ་ལྟར་རང་ལུགས་ཏེ། དམ་པ་རྒྱན་གྱི་རྗེས་སུ་འབྲངས་ནས་བླ་མ་གོང་མ་ཕལ་ཆེ་བའི་དགོངས་བཞེད་དོ། །དེའང་རྒྱུའི་ཏིང་འཛིན་ཧཱུཾ་ལས། ཆོ་ག་གསུམ་གྱིས་རྒྱུའི་ཧེ་རུ་ཀར་བསྐྱེད་པའི་རྗེས་སུ། འོག་གཞི་གཞལ་ཡས་ཁང་དང་བཅས་པ་བསྒོམ་ཞིང་། དེ་ནས་བདག་སྲས་གཞན་སྲས་ཀྱི་ཆོ་ག་ལ་འཇུག་གོ། །དེ་ལས། དང་པོ་བདག་སྲས་ལ། འཐད་པ་བརྗོད་པ་དང་། རྒྱུའི་ཧེ་རུ་ཀ་ཉིད་དཔལ་ཆེན་པོ་ཡབ་ཡུམ་དུ་བསྐྱེད་ནས་སྙོམས་པར་འཇུག་པའི་བྱ་བ་དང་། ངོ་མཚར་སྲས་ཀྱི་དཀྱིལ་འཁོར་བསྐྱེད་པའོ། །དང་པོ་ནི། དམ་པ་རྒྱན་ལས། བདག་ཉིད་སངས་རྒྱས་ཐམས་ཅད་ཀྱི། །སྐུ་གསུང་ཐུགས་ཀྱི་རྡོ་རྗེའི་བདག །ཁྲོ་རྒྱལ་ཡེ་ནས་ཡིན་པའི་ཕྱིར། །ཞེས་སོ། །གཉིས་པ་ནི། དེའི་ཕྱིར་རྒྱུ་ཧེ་རུ་ཀ་གདན་ཐོག་ཏུ་བབས་ཏེ་དཔལ་ཆེན་པོ་ཆེ་མཆོག་ཧེ་རུ་ཀ་སྐུ་སྨུག་ནག་ཅིར་ཡང་འགྱུར་བ་དབུ་དང་ཕྱག་ཞབས་ཆེ་ཆུང་སྟོང་གསུམ་
ཙམ་ལ། མང་ཉུང་གི་ཚད། དེའི་རྡུལ་སྙེད་དང་མཉམ་པ་མཚོན་ཆ་སྣ་ཚོགས་འཛིན་པར་བསྐྱེད་ལ། དེའི་ཐུགས་ནས་ཡུམ་དབྱིངས་ཕྱུག་མ་ཕྱུང་སྟེ་སྦྱོར་བ་མཛད་པའོ། །དེའང་སྔ་མའི་འཕྲོས་ལས། དེ་བཞིན་ཉིད་ཀྱི་དབྱིངས་ནས་ནི། །ཁྲོ་མོ་དབང་ཕྱུག་མངོན་ཕྱུང་སྟེ། །ཧི་ཧི་དགྱེས་པའི་གཟི་མདངས་ཀྱི། །རིན་ཆེན་པདྨ་རྒྱས་མཛད་དེ། །གཉིས་མེད་འཁྲིལ་བས་དགྱེས་པར་ཐིམ། །ཞེས་སོ། །འདིར་གཉོས་ནག །འགོས་རྩི་ལུང་པ། སྒྲོལ་མ་བ། གོང་མ་ཕལ་ཆེར། མཁའ་གསང་བྱིན་རླབས་དང་སྦྱོར་བའི་བརྡས་བསྐུལ་བ་སོགས་མཛད། དེ་ལས་མཁས་པ་དག་རྟ་སྟོན་གཟི་བརྗིད་ན་རེ། དེ་མི་རིགས་ཏེ།རྩ་བ་ལས་མ་གསུངས་ཤིང་རྒྱུད་དང་ཡང་མི་མཐུན་ནོ། །དེས་ན་སྣར་སྟོན་གྱི་བཞེད་པ་ལྟར་རྒྱུའི་ཧེ་རུ་ཀ་དེས་ཚིག་བརྗོད་པ་ཙམ་གྱིས་རང་བཞིན་ངང་གིས་བསྐྱེད་པ་འཐད་གསུང་། ཁོ་བོ་ཡང་འདི་ལེགས་པར་མངོན་ནོ། །གསུམ་པ་ལ། སྔགས་ཀྱིས་སྤྲུལ་པ་སྤྲོ་བ་དང་། དེ་རིགས་ལྔར་བསྡུ་བ་དང་། སྲས་མོ་ཉི་ཤུ་བསྐྱེད་པའོ། །དང་པོ་ནི། ཧཱུཾ་ཧཱུཾ་ཧཱུཾ་བི་ཤྭ་སོགས་བརྗོད་པའི་རྐྱེན་གྱིས་སྦྱོར་མཚམས་ནས་ཁྲོ་བོ་འཆིལ་པ་སྤྲོས་ཏེ་གདུག་པ་ཅན་རྣམས་བཏུལ་བར་བསྒོམ་པའོ། །གཉིས་པ་ནི། ཨོཾ་བཛྲ་ཤྲཱི་ཧེ་རུ་ཀ་སོགས་བརྗོད་པས། ཁྲོ་བོ་དེ་དག་ལས་ཆོས་དབྱིངས་ཡེ་ཤེས་ལས་འཕྲོས་པའི་ཁྲོ་བོ་ཐམས་ཅད་འདུས་ནས་གཞི་པོའི་ཧེ་རུ་ཀ་ལ་ཐིམ་པས་དེ་ཉིད་བཛྲ་ཧེ་རུ་ཀ་ཡབ་ཡུམ་དུ་གྱུར་པ་ནི་འབྲས་བུའི་ཧེ་རུ་ཀའོ། །དེ་བཞིན་དུ་སོ་སོའི་སྔགས་བརྗོད་པའི་རྐྱེན་གྱིས་ཡེ་ཤེས་གཞན་བཞི་ལས་འཕྲོས་པའི་ཁྲོ་བོ་ཐམས་ཅད་ཀྱང་སོ་སོར་འདུས་པ་ལས་རིགས་བཞི་ཧེ་རུ་ཀར་གྱུར་ནས་ཕྱོགས་ཀྱི་འཁོར་ལོའི་གདན་ལ་བཞུགས་པའོ། །གསུམ་པ་ནི། དེ་ནས་རིགས་ལྔའི་ཁྲག་འཐུང་སྦྱོར་བ་མཛད་པའི་དགྱེས་སྒྲ་ལས་རིམ་བཞིན་ཧ་བརྒྱད་དང་། ཧེ་བརྒྱད།ཕཊ་བཞི་བརྗོད་པའི་རྐྱེན་གྱིས་བསྐུལ་ནས། རྒྱུ་བྱང་ཆུབ་ཀྱི་སེམས་སྤྲིན་ལས་སྦྱོར་མཚམས་ནས་གནས་ཡུལ་སྒོ་མ་ཉི་ཤུ་པོ་རྣམས་རེ་རེ་ཡང་ལྔ་ལྔ་བཏོན་ལ་རང་
རང་གི་རིགས་རེ་རེར་བསྡུས་ནས་སོ་སོའི་གནས་སུ་དགོད་པ་ནི་བདག་སྲས་སོ། །འདིར་རོག་གི་མངོན་རྟོགས་ལས། སྦྱོར་མཚམས་ནས་བྱང་སེམས་ཀྱི་ཟེག་མ་ལས་ཧ་ཧེ་ཕཊ་དུ་གྱུར་པ་སོ་སོའི་གདན་ཁར་བཀོད་ནས། ཨོཾ་བཛྲ་གཽ་རཱི་ཧ་སོགས་བསྐྱེད་སྔགས་ཀྱིས་སྐུར་བསྐྱེད་པར་མཛད་ནའང་། རྒྱུད་དང་དམ་པ་རྒྱན་གཉིས་ཀ་ནས་གསུངས་པ་མ་མཐོང་ངོ་། །ཡང་སྟོན་པ་བླ་སྐྱབས་ན་རེ། རིགས་ལྔ་ནི་མཁའ་ནང་ནས་བྱུང་བའི་ཕྱིར་སྤྲུལ་པ་བསྡུས་པའི་སྲས་ཡིན་ལ། དེ་ལས་ཁྲོ་མོ་རྣམས་བསྐྱེད་པས་བདག་སྲས་སུ་མི་འགྱུར་ཏེ། ཚ་མོར་འགྲོ་བའི་སྐྱོན་ཡོད་པས་གཙོ་བོ་ཁོ་ན་ལས་གདོན་པར་རིགས་སོ་ཟེར། དེའི་ལན་དུ་རྟ་སྟོན་གྱི་ཞལ་ནས།རིགས་ལྔ་ལས་བྱུང་ཡང་ངོ་བོ་དབུས་ཀྱི་གཙོ་བོ་རྒྱུའི་ཧེ་རུ་ཀ་དང་གཉིས་སུ་མེད་པ་དེ་ཉིད་ལས་བྱུང་བའི་ཕྱིར་སྐྱོན་མེད་ཅེས་གསུངས་སོ། །གཉིས་པ་གཞན་སྲས་ནི་བདག་གཙོ་བོའི་ཐུགས་ནས་ཤར་དུ་ཐོན་ཏེ། ཨོཾ། སྔོན་གྱི་ཐུགས་དམ་ཆེན་པོ་ནི། །ཞེས་སོགས་ཀྱིས་གསོལ་བ་གདབ་པ་སོགས་ནས་ལྷ་ཚོགས་ཐམས་ཅད་འོད་དུ་ཞུ་སྟེ་འོད་ཕུང་གཅིག་ཏུ་གྱུར་པའི་བར་སྔར་ལྟར་ཏེ་བདག་དོན་ཆོས་སྐུའི་ཏིང་འཛིན་གྱིས་སྣང་བའི་ཞེན་པ་སྦྱང་བའོ། །དེ་ནས་གཞན་དོན་གཟུགས་སྐུའི་ཏིང་འཛིན་གྱིས་སྟོང་པར་འཛིན་པའི་ཞེན་པ་སྦྱང་བའི་ཕྱིར། ཧཱུཾ་ཧཱུཾ། ཞེས་དྲན་པ་ཙམ་གྱིས་གདན་སྟེང་གི་འོད་ཕུང་དེ་ཧཱུཾ་ཡིག་ཟུང་དུ་གྱུར་པ་ལས་ཆོ་ག་གསུམ་གྱིས་བཛྲ་ཧེ་རུ་ཀ་ཡབ་ཡུམ་དུ་བསྐྱེད་ནས། དམ་པ་རྒྱན་ལས་གསུངས་པའི་གོ་རིམ་ལྟར་སྐབས་འདིར་དབང་བསྐུར་དང་བྱིན་རློབས་བྱ་བའམ། ཞིབ་ལྟར་འོག་ཏུ་བྱ་བའང་རུང་སྟེ། གང་ལྟར་ཀྱང་། དེ་ནས་མཁའ་གསང་རློབ་པ་སོགས་སྔར་ལྟར་བྱས་ཏེ། ཡབ་ཡུམ་གྱི་མཁའ་ལས་ཁྲག་འཐུང་སུམ་ཅུ་ཐམ་པ་སོ་སོའི་སྔགས་ཀྱིས་བསྐྱེད་པ་ཕཊ་ཛཿས་ཕྱིར་བཏོན་ནས། བཛྲ་ཧེ་རུ་ཀ་རང་ལ་བསྡིམ། འཁོར་རྣམས་དཀྱིལ་འཁོར་ལ་དགོད་དོ། །དབང་ཕྱུག་མ་ཉེར་བརྒྱད་ནི། སྦྱོར་བའི་བྱི་མོ་ཡིན་གྱི། སྲས་མ་ཡིན་པའི་ཕྱིར་སྦྱོར་མཚམས་ནས་མི་
གདོན་ནོ། །འོ་ན་ཇི་ལྟར་བསྐྱེད་ཅེ་ན། ཁ་ཅིག་རོག་པ་སོགས་བྷྱོ་ཉེར་བརྒྱད་བརྗོད་པས་ཕྱི་ཁྱམས་ལ་ཀྲོང་བསྐྱེད་དུ་མཛད། ལ་རྟ་སྟོན་དང་། རྩི་ལུང་པ་སོགས་ལ་དག །རྡོ་རྗེ་མེ་ལོང་ནས་ འབྱུང་བའི་བསྐྱེད་སྔགས་ཀྱིས་ཀྲོང་བསྐྱེད་བྱེད་གསུང་། གོང་མ་གཉོས་ནགས་དང་།སྒྲོལ་གཡུང་སོགས་ཕལ་ཆེར། གཙོ་བོའི་ཐུགས་ཀ་ནས་བྷྱོ་ཉེར་བརྒྱད་རང་རང་གི་གནས་སུ་སྤྲོས་ཏེ་བསྐྱེད་སྔགས་ཀྱིས་ལྷར་བསྒོམ་པར་བཞེད་དོ། །གཉིས་པ་ལ།གཙོ་བོའི་བཞུགས་ཚུལ་དང་། འཁོར་གྱི་བཀོད་པའོ། །དང་པོ་ལ། སྐུ་མདོག་དང་། ཆ་བྱད་དང་། རྒྱན་ཆས་དང་། ཕྱག་མཚན་དང་། འཁྲིལ་ཚུལ་ལོ། །དང་པོ་ནི། སྨུག་ནག་སྔོ་ནག་སེར་ནག་དང་། དམར་ནག་ལྗང་ནག །ཅེས་པས་བསྟན་ཏེ། རིམ་བཞིན་བུཌྜྷ། བཛྲ། རཏྣ། པདྨ། ཀརྨ་ཧེ་རུ་ཀ་ལྔའི་སྐུ་མདོག་རྩ་ཞལ་དང་བཅས་པའོ། །ལྷོ་མ་གཏོགས་པའི་ཁྲོ་བོ་གཞན་བཞིའི་གཡས་ཞལ་དཀར་པོ་དང་། ལྷོའི་གཡས་ཞལ་སྔོན་པོ། དབུས་དང་ལྷོ་བྱང་གི་གཡོན་ཞལ་དམར་པོ། ཤར་ནུབ་གཉིས་ཀྱི་གཡོན་སེར་པོར་སྒྱུ་འཕྲུལ་བརྒྱད་པ་ལས་གསུངས་སོ། །དེའང་དུག་ལྔ་གནས་སུ་དག་ཅིང་ལས་བཞི་ལྷུན་གྲུབ་ཀྱི་མཛད་པ་མཚོན་པའི་བརྡར་རིགས་སོ་སོའི་ཁ་དོག་དང་། དེ་དག་ཀྱང་རིགས་མི་འགྱུར་ཞིང་ལས་བཞིའི་གཞི་དང་མཐར་ཕྱིན་པ་ནི་དྲག་པོ་ཁོ་ནས་མཛད་པའི་ཕྱིར་ཐམས་ཅད་ལ་ནག་པོའི་སྒྲས་སྨོས་སོ། །གཉིས་པ་ནི། གདུལ་བྱ་གདུག་པ་ཅན་འདུལ་བའི་ཕྱིར་ལྔ་ཀའང་ཤིན་ཏུ་འཇིགས་པའི་སྐུ་སྟེ། རྣམ་ཐར་གསུམ་དང་ཡེ་ཤེས་དྲུག་མཚོན་པའི་དབུ་གསུམ་ཕྱག་དྲུག་པ་དང་། རྫུ་འཕྲུལ་གྱི་རྐང་པ་བཞི་དང་བདུད་བཞི་འདུལ་བའི་ཞབས་བཞི་དོར་སྟབས་སུ་བགྲད་པ་སྟེ། འདི་ཉིད་ལས། དུར་ཁྲོད་ཀྱི་བདག་པོ་དྲེགས་པ་ཆེན་པོ་ཁྱོ་ཤུག་གི་གདན་ལ་བརྐྱང་བསྐུམ་དུ་བཞུགས་སོ། །ཞེས་སོ། །འདིའི་རྒྱ་དཔེར་བརྐྱང་བསྐུམ་གྱི་སྐད་དོད་ལ། ཨཱ་ལཱིཌྷ་པཱ་ད། ཞེས་ཡོད་པས་ཞབས་གཡས་བརྐྱང་ངོ་། །འདིར་དངོས་སུ་སྐུ་དང་། རྔམ་པའི་སྒྲ་ཆེན་སོགས་ཀྱིས་གསུང་གཉིས་ལས་མ་བྱུང་ཀྱང་། དོན་ལ་སྐུ་
གསུང་ཐུགས་ཀྱི་ཉམས་གསུམ་གསུམ་སྟེ་གར་དགུ་དང་ལྡན་པའོ། །དེ་ལྟར་ཡང་།གློག་གི་འཕྲེང་བ་ལས། སྒེག་པ་དཔའ་བ་མི་སྡུག་པ། །རྒོད་དང་དྲག་ཤུལ་འཇིགས་སུ་རུང་། །སྙིང་རྗེ་རྔམ་དང་ཞི་བ་དང་། །གར་དགུའི་ཉམས་དང་ལྡན་པའོ། །ཞེས་སོ། །གསུམ་པ་ནི། ཀོ་རློན་གོས་ནི་སྣ་ཚོགས་གྱོན། །སྦྲུལ་དང་ཐོད་ཕྲེང་ཉི་ཟླའི་ཆས། །ཞེས་པའི་སྐབས་སུ་རྒྱན་ལ། དུར་ཁྲོད་ཀྱི་ཆས་བརྒྱད། དཔལ་གྱི་ཆས་བརྒྱད། གསལ་བའི་རྒྱན་གཉིས་སོ། །དང་པོ་ནི། རྒྱལ་བྱེད་དཔའ་རྟགས་ཀྱི་རྒྱན་ཏེ། དེ་ལའང་བགོ་བའི་གོས་གསུམ། གདགས་པའི་རྒྱན་གཉིས། བྱུག་པའི་རྫས་གསུམ་སྟེ་བརྒྱད་ལས། གོས་གསུམ་ནི། ཞིང་གླང་གི་སྟོད་གཡོགས་དང་། སྟག་ཤམ་སྟེ། རྟོག་པ་ལྷ་རྒྱུད་ལས། ཞིང་ཆེན་གཡང་གཞི་བྱང་ཆུབ་སེམས་ཀྱི་རྒྱན། །གླང་ཆེན་ཀོ་རློན་སྟོབས་ཆེན་མཆོག་གི་རྒྱན། །སྟག་གི་ཤམ་ཐབས་དཔའ་བརྟུལ་ཟ་བྱེད་རྒྱན། །ཞེས་སོ། །གདགས་པའི་རྒྱན་ལ་སྦྲུལ་དང་། ཐོད་ཕྲེང་གཉིས་ལས། སྦྲུལ་རྒྱན་ནི། སྦྲུལ་དཀར་རྒྱལ་རིགས །སེར་རྗེ་རིགས ། དམར་བྲམ་ཟེ ། ནག་དམངས་རིགས ། ལྗང་གདོལ་པ ། གུ་ལྔས་རིམ་བཞིན།དབུ་རྒྱན། སྙན་ཆ། སེ་མོ་དོ་དང་མགུར་ཆུ། གདུ་བུ། སྐ་རགས་དང་།དོ་ཤལ་བྱས་པ་སྟེ། དེ་ལས་སྦྲུལ་ནག་ཆུན་པ་མཉེན་ལྕུག་འཁྲིལ་བའི་རྒྱན།ཞེས་སོ། །ཐོད་རྒྱན་ནི། སྐམ་པོའི་དབུ་རྒྱན། རློན་པའི་དོ་ཤལ། ཚལ་བུའི་དབུ་རྒྱན་ཏེ། དེ་ལས། ཐོད་པ་ཚར་གསུམ་སྐུ་གསུམ་བརྙེས་པའི་རྒྱན། །ཞེས་སོ། །རྫས་གསུམ་ནི། དཔྲལ་བར་ཐལ་ཆེན་གྱི་ཚོམ་བུ། སྨིན་མཚམས་སུ་རཀྟའི་ཐིག་ལེ། ཨོས་ཀོ་ལ་ཞག་གི་ཟོ་རིས་ཏེ། དེ་ལས། རཀྟ་ཐུགས་རྗེ་ཆགས་པའི་རྒྱན། །ཐལ་བ་འདུལ་བྱེད་ཕྲིན་ལས་རྒྱན། །ཞག་ཆེན་དོན་དམ་བཅུད་ཀྱི་རྒྱན། །ཞེས་སོ། །གཉིས་པ་ནི། དཔལ་ཆེན་པོའི་སྐུ་ལ་ཡེ་ནས་རང་ཆས་སུ་གནས་པའི་ཕྱིར་དཔལ་གྱི་ཆས་ཏེ། དབུ་སྐྲ་གྱེན་བརྫེས་འཁོར་བ་རུ་བཟློག་ཆས། །རྡོ་རྗེའི་ཁྱུང་གཤོག་ཐབས་དང་ཤེས་རབ་ཆས། །མཐིང་དམར་
ཅོད་པན་རྟག་ཆད་ཟིལ་གནོན་ཆས། །སྤྱི་གཙུག་རྡོ་རྗེ་ལྷག་པ་རིག་པའི་ཆས། །དབང་གི་བསེ་ཁྲབ་གཟི་འབར་བགྲོད་པའི་ཆས། །གཉིས་མེད་སྦྱོར་བ་ཤེས་རབ་ཡུམ་གྱི་ཆས། །གནོད་གདུག་ཟློག་བྱེད་དཔའ་བོ་ལྗགས་ཀྱི་ཆས། །ཉོན་མོངས་སྲེག་བྱེད་རྡོ་རྗེ་མེ་ཡི་ཆས། །ཞེས་སོ། །གསུམ་པ་ནི། བྱང་སེམས་བརྟན་པ་ཉིད་ཀྱི་སྙན་གོང་གཡས་གཡོན་ཉི་ཟླས་བརྒྱན་པའོ། །རྗེ་རོང་པ་ནི། ཉི་ཟླའི་ཕྲེང་བ་སེ་རལ་ཁར་བྱས་པར་བཞེད་དོ། །བཞི་པ་ནི། སྟོང་གི་འཇིག་རྟེན་འཁོར་ཡུག་བཅས། །ཞེས་སོགས་བསྟན་ཏེ། སྒྱུ་འཕྲུལ་བརྒྱད་པ་ལས། རྡོ་རྗེ་ཁྲོ་བོ་ཁྲག་འཐུང་མཐིང་། །ཁྲོ་མོ་དབྱིངས་ཕྱུག་འདུ་འབྲལ་མེད། །དཀར་དམར་ཞལ་དུ་ཉོན་མོངས་འདྲེན། །རྩེ་དགུ་རྩེ་ལྔ་ཏི་ར་དང་། །དྲིལ་བུ་དུང་དམར་འཇིག་རྟེན་འཆང་། །ཤེས་རབ་འཁྱུད་པས་ཆགས་པ་སྟོན། །བུཌྜྷ་ཁྲག་འཐུང་ཁྲོ་མོ་འཁྲིལ། །དཀར་སེར་སྨུག་ནག་གཏི་མུག་འདྲེན། །འཁོར་ལོ་རྡོ་རྗེ་ཏི་ར་དང་། །དྲིལ་བུ་དུང་དམར་ཏྲི་ཤཱུལ་འཆང་། །རཏྣ་ཁྲག་འཐུང་ཁྲོ་མོ་འཁྲིལ། །སྔོ་དམར་སེར་ནག་ང་རྒྱལ་གསོལ། །རིན་ཆེན་རྡོ་རྗེ་ཏི་ར་དང་། །དྲིལ་བུ་དུང་དམར་དགྲ་སྟྭ་རོལ། །པདྨ་ཁྲག་འཐུང་ཁྲོ་མོ་འཁྲིལ། །དཀར་སེར་དམར་ནག་བརྗིད་པ་ལ། །པདྨ་རྡོ་རྗེ་ཏི་ར་དང་། །དྲིལ་བུ་དུང་དམར་རྔེའུ་ཆུང་འཆང་། །ལས་རབ་ཁྲག་འཐུང་ཡུམ་དང་རོལ། །དཀར་དམར་ལྗང་ནག་འབར་བ་ལ། །རྒྱ་གྲམ་རྡོ་རྗེ་ཏི་ར་དང་། །དྲིལ་བུ་དུང་དམར་ཐོང་གཤོལ་རོལ། །ཞེས་པ་ནི་གར་མཆོད་དང་མཐུན་ཞིང་བཀའ་མཆིམས་ཕུ་བའི་ཕྱག་བཞེས་སོ། །གཞན་དུ་སྒྱུ་འཕྲུལ་རྡོ་རྗེ་དང་བླ་མ་ལ་སོགས་པར་སྐུ་མདོག་དང་ཕྱག་མཚན་འདི་དང་ཅུང་ཟད་མི་མཐུན་པར་བྱུང་ནའང་། ཐུགས་རྗེ་དང་མཛད་པ་ལ་ཕྱོགས་རིས་མེད་པས་གདུལ་བྱ་ཇི་ལྟར་མོས་པ་ལྟར་སྣང་བའོ། །འོ་ན་གཅིག་ཏུ་མ་ངེས་པའི་ཕྱིར། གང་ཟག་གིས་ཉམས་སུ་བླང་མི་བཏུབ་པའི་སྐྱོན་དུ་འགྱུར་རོ་ཞེ་ན། ཁྱབ་པ་མེད་དེ། རྒྱུད་གཞུང་རེ་རེའི་དབང་དུ་ངེས་པ་ཅན་དུ་གསུངས་པའི་ཕྱིར། དེ་ལྟར་ཉམས་སུ་ལེན་
ཞེས་གོང་མ་རྣམས་གསུངས་སོ། །ལྔ་པ་ནི། བཙུན་མོ་འཇིགས་པའི་ཚོགས་དང་འཁྲིལ། །ཞེས་པ་སྟེ། ཐམས་ཅད་ཀྱང་སྐུ་མདོག་ཡབ་དང་མཐུན་ཞིང་གཟིག་ཤམ་ཅན། གཡས་ཤེས་རབ་ཀྱི་རྟགས་དྲིལ་བུས་ཡབ་ལ་འཁྱུད་ཅིང་།གཡོན་དུང་ཁྲག་ཞལ་དུ་སྟོབ་པ་སྟེ། གཡས་པ་ཤེས་རབ་ཐབས་ལ་བརྟེན། །གཡོན་པ་དུང་དམར་གཙོ་ལ་སྟོབ། །ཞེས་སོ། །གཉིས་པ་འཁོར་གྱི་བཀོད་པ་ནི།གནས་དང་ཡུལ་གྱི་ཕྱག་རྒྱ་དང་། །ཞེས་པའི་སྐབས་གནས་ཡུལ་གྱི་མ་མོ་བརྒྱད་བརྒྱད་ལས། གནས་ཞེས་པ་ནི་དུར་ཁྲོད་ཀྱི་གནས་བརྒྱད་ལས་བཏགས་པ་སྟེ།དེ་ལ་ཕྱི་ནང་གསང་གསུམ་ལས། ཕྱི་ནི། བསིལ་བའི་ཚལ་ལ་སོགས་པ་བརྒྱད་དོ། །དེའང་གལ་པོ་ལས། ཡུལ་གྱི་མིང་ནི་རྒྱ་མ་གདྷའོ། །གར་ཡུལ་སིདྷ་མ། །དུར་ཁྲོད་ཆེན་པོ་བསིལ་པ་ཚལ་གཽ་རཱི། །ཡུལ་གྱི་མིང་ནི་སིཧྙའི་ཡུལ་ཀཱ་ཀ་མུ་ཁཱི། །དུར་ ཁྲོད་ཆེན་པོ་སྐུ་ལ་རྫོགས། །སྨ་ཤ་ནཱི། ཡུལ་གྱི་མིང་ནི་ཁ་ཆེའི་ཡུལ། །ཨཱུ་ལུ་མ། དུར་ཁྲོད་ཆེན་པོ་ཧེ་ཆེན་རོལ། །ཙཎྜ་ལཱི། ཡུལ་གྱི་མིང་ནི་ཐོ་གར་ཡུལ། །ཤྭ་ན། དུར་ཁྲོད་ཆེན་པོ་གསང་ཆེན་རོལ། །བཻཏྟ་ལཱི། ཡུལ་གྱི་མིང་ནི་ཨོ་རྒྱན་ཡུལ། །ཀངྈ་མུ་ཁཱི། དུར་ཁྲོད་ཆེན་པོ་པདྨ་བརྩེགས། །གྷ་སྨ་རཱི། ཡུལ་གྱི་མིང་ནི་བལ་པོའི་ཡུལ། །སྲྀ་གལ། དུར་ཁྲོད་ཆེན་པོ་ཡ་མ་ཁ། །པྲ་མོ་ཧེ། ཡུལ་གྱི་མིང་ནི་ཟ་ཧོར་ཡུལ། །གྷྲྀ་ཌྷ། དུར་ཁྲོད་ཆེན་པོ་ཁྱུ་བྱུག་ཀློང་། །པུཀྐ་སཱི། ཡུལ་གྱི་མིང་ནི་ལི་ཡི་ཡུལ། །བྱཱགྷྲ། དུར་ ཁྲོད་ཆེན་པོ་མངོན་རྫོགས་ཙཽ་རཱི་ཡིན། །ཞེས་སོ། །ནང་གི་དུར་ཁྲོད་བརྒྱད་ནི།ཡན་ལག་ལྔ། སྙིང་ཁོག་པ་དང་བཅས་པ། ནང་ཁྲོལ། མཚན་མའོ། །གསང་བའི་དུར་ཁྲོད་ནི། རྣམ་ཤེས་ཚོགས་བརྒྱད་དེ། ཀུན་གཞི་གཽ་རཱི། ཡིད་ཙཽ་རཱི། ཉོན་ཡིད་པྲ་མོ་ཧེ། རེག་ཤེས་བཻཏྟ་ལཱི། མིག་པུཀྐ་སཱི། ལྕེ་གྷསྨ་རཱི། རྣ་བ་སྨ་ཤ་ནཱི། སྣ་ཙཎྜ་ལཱིའོ། །ཡུལ་བརྒྱད་ནི། གོང་གི་དུར་ཁྲོད་བརྒྱད་དང་འདྲེལ་བའི་མ་ག་དྷ་ལ་སོགས་པའི་ཡུལ་བརྒྱད་དོ། །ཡང་ན་རྣམ་ཤེས་ཚོགས་བརྒྱད་ཀྱི་ཡུལ་བརྒྱད་དེ། ཀུན་གཞི་ལ་
ཡུལ་དོན་སེམས། སིངྷ་མ། ཡིད་ཡུལ་འདུས་བྱས་དང་འདུས་མ་བྱས་ཀྱི་ཆོས། བྱ་གྷྲ། ཉོན་ཡིད་ཀྱི་ཡུལ་ཀུན་གཞི། སྲྀ་ག་ལ། སྒོ་ལྔའི་ཡུལ། གཟུགས། གྲྀ་ཌྷ། སྒྲ། ཀངྈ་མ། དྲི། ཀཱ་ཀ ། རོ། ཨཱུ་ལུ། རེག་བྱའོ། །ཤྭ་ན། དེ་ལྟར་ན་ཡུལ་དང་རྣམ་ཤེས་མ་སྤངས་གནས་སུ་དག་པ་ལས། གཽ་རཱི་དང་ཕྲ་མེན་མ་སྟེ། དང་པོ། རྩིབས་མཆན་དང་། གྲུ་ཆད་ལ་བཞུགས་ཤིང་ཕྱི་མ་ནི།ནང་ཁྱམས་ཀྱི་ཕྱོགས་བཞིར་མཆེ་བ་ཅན་བཞི་དང་། མཚམས་བཞིར་གཤོག་པ་ཅན་བཞི་བཞུགས་སོ། །དེ་དག་གི་སྐུ་མདོག་དང་ཕྱག་མཚན་ནི། གཽ་རཱི་བྷན་དམར་ཞིང་དབྱུག་སྔོ། །ཞེས་སོགས་དང་། སིངྷ་ཁ་རོ་བསྣོལ་སེར་སེང་། །ཞེས་སོགས་སོ། །སྒོ་བཞི་ཕྱག་རྒྱ་ཞེས་སོགས་ནི། རྟག་ཆད་བདག་མཚན་ཏེ་ཕྱིན་ཅི་ལོག་གི་སྒོ་བཞི་ལ་ཡེ་ཤེས་ཀྱི་ཕྱག་རྒྱས་འདེབས་པར་བྱེད་པའི་ལྕགས་ཀྱུ་མ་ལ་སོགས་པ་སྟེ། རྟ་གདོང་སྔོན་མོ་ལྕགས་ཀྱུ་འཛིན། །ཞེས་སོགས་སོ། །སླས་དང་ཕྱི་མོ་སོགས་ཀྱིས་དབང་ཕྱུག་མ་ནི། གྲངས་ཉི་ཤུ་རྩ་བརྒྱད་དང་། གདན་ཞིང་སྐམ་རེ་རེ་དང་། སྐུ་མདོག་དང་ལག་ཆ་ནི། སྲིན་མོ་སྨུག་ནག་ཐོད་རློན་འཆང་། །ཞེས་སོགས་སོ། །འདིར་སྒྱུ་འཕྲུལ་སྙིང་པོ་བཀོད་པ་ལས། ཕྱི་ཡི་མཁའ་འགྲོ་རང་རྒྱུད་མ། །ནང་གི་མཁའ་འགྲོ་ཁྲོ་མོར་སྟོན། །གསང་བའི་སྤྲུལ་པ་མགོ་བརྙན་མ། །བཀའ་རྟགས་རྡོ་རྗེ་རང་རྟགས་འཆང་། །ཞེས་གསུངས་སོ། །གལ་ཏེ་གང་དུ་དབང་དང་བྱིན་རླབས་མ་བྱས་ན། སྐབས་འདིར་ཞི་བ་ལྟར་ཡེ་ཤེས་སེམས་དཔའ་བསྐྱེད་ནས་དབང་བསྐུར་བྱིན་གྱིས་རློབ་ཅིང་། རིགས་བདག་ནི་རིགས་ལྔ་ཡབ་ལ་ཡབ་ལྔ་དང་། ཡུམ་ལ་ཡུམ་ལྔས་བརྒྱན། ཁྲོ་མོ་ཉི་ཤུ་ལ་ཡེ་ཤེས་ལྔ་དང་ལྡན་པའི་རྟགས་སུ་གསེར་གྱི་རྡོ་རྗེ་རྩེ་ལྔ་པ་རེ་རེ་དང་། དབང་མོ་རྣམས་ལ་དྲག་པོའི་ལས་མཛད་པའི་རྟགས་སུ་ལྕགས་ཀྱི་རྡོ་རྗེ་རྩེ་གསུམ་པ་རེ་རེས་དབུ་བརྒྱན་པར་བཤད་དོ། །ཡན་ལག་གི་ལྷ་འདི་དག་ཀྱང་། གོང་མ་ཕལ་ཆེར་ཁྲོ་བོ་ཁོ་ན་བསྐྱེད་པར་མཛད། ལྷ་རྗེ་རྟ་
སྟོན་ནི། རྩ་ལྷ་ཁྲོ་བོ་ཡིན་པས་ཡེ་ཤེས་སེམས་དཔའ་སོགས་ཡན་ལག་གི་ལྷ་རྣམས་ཞི་བ་བསྒོམས་ཀྱང་འགལ་བ་མེད་དེ། འདི་ལྟར་ཞི་བ་ཁྲོ་བོའི་རྒྱན་རྣམས་གང་དུའང་མི་ཚུད་ལ། ཁྲོ་བོ་ལ་ཞི་བའི་རྒྱན་རྣམས་མ་བཀག་པའི་ཕྱིར། ཞི་ཁྲོ་གཉིས་གང་མོས་སུ་བསྐྱེད་པས་ཆོག་ཅིང་།ཞི་བ་ལྟར་ན་རིན་པོ་ཆེའི་དབུ་རྒྱན། ཁྲོ་བོ་ལ་ཐོད་པའི་དབུ་རྒྱན་གྱི་ཁང་བུ་ལ་བརྟེན་པར་བསྒོམ་མོ་གསུངས། རྗེ་བླ་མ་ཐམས་ཅད་མཁྱེན་པས་མཛད་པའི་དོང་སྤྲུག་དཀྱིལ་ཆོག་ཏུའང་། ཡེ་ཤེས་སེམས་དཔའ་མ་གཏོགས་པའི་ཡན་ལག་གི་ལྷ་གཞན་བརྒྱད་པོ་ཞི་ཁྲོ་ཐུན་མོང་དུ་ཞི་བས་མཛད་དོ། །གསུམ་པ་ལས་ཀྱི་རིམ་པའི་ཏིང་འཛིན་ནི། སྙན་གསན་དབབ་པ། སྤྱན་དྲང་པ། རིག་པའི་མེ་ཏོག་དོར་བ། དངོས་གྲུབ་བསྐུལ་ཏེ་བསྡིམ་པ། མཆོད་པ་དབུལ་བ་བཤགས་པ་བྱ་བ།དངོས་གྲུབ་གསོལ་བ། དམ་བཅའ་བ། འཛབ་བཟླ་བ་རྣམས་དང་། རྗེས་ཀྱི་རིམ་པའང་། ཚོགས་དང་། ལྷག་མ། བསྟན་མ་བསྐྱང་བ། དཀྱིལ་འཁོར་བསྡུ་བ་རྣམས་ཏེ་ལས་གཞུང་ལས་ཤེས་པར་བྱའོ། །སྤྱིར་དཀྱིལ་འཁོར་སྤྲོས་པའི་སྐབས་འདིར་ཞི་ཁྲོ་གཉིས་ཀ་ལ་རྒྱས་བསྡུས་གསུམ་ལས། ཞི་བ་ཞེ་གཉིས་ནི་འབྲིང་པོ་དང་། ཁྲོ་བོ་ང་བརྒྱད་ནི་བསྡུས་པའི་དཀྱིལ་འཁོར་ཏེ། གཞན་དུ་ཞི་བ་རྒྱས་པ་ནི། སྔར་བྲིས་པ་དང་མཐུན་པར་ལྟེ་བའི་འཁོར་ལོ་རྩིབས་བཞི་དབུས་དང་ལྔར། མི་བསྐྱོད་པ་ཡབ་ཡུམ་ལ་རང་གི་རིགས་ཆུང་གི་སེམས་དཔའ་ཡབ་ཡུམ་བརྒྱད་ཀྱིས་བསྐོར་བ། དེ་བཞིན་དུ་ཤར་རྩིབས་ཀྱི་འཁོར་ལོ་ལ་རྣམ་སྣང་གིས་གཙོ་བོ་བྱས་པ་བཅུ། ལྷོ་རྩིབས་ཀྱི་འཁོར་ལོ་ལ་རིན་འབྱུང་གིས་གཙོ་བོ་བྱས་པ་བཅུ། ནུབ་རྩིབས་ཀྱི་འཁོར་ལོ་ལ་མཐའ་ཡས་ཀྱིས་གཙོ་བོ་བྱས་པ་བཅུ།བྱང་རྩིབས་ཀྱི་འཁོར་ལོ་ལ་དོན་གྲུབ་ཀྱིས་གཙོ་བོ་བྱས་པ་བཅུ་སྟེ། འོད་རིམ་ལས། འཁོར་ལོ་དབུས་ལྔར་རྒྱལ་པོ་ཡུམ། །མདུན་རྒྱབ་གཡས་གཡོན་ཕྱོགས་བཞི་རུ། །སེམས་དཔའ་སེམས་མ་རིམ་བཞིན་
བསམ། །ཞེས་སོ། །དེ་ལྟར་ལྔ་བཅུའི་སྟེང་དུ་སེམས་དཔའ་སེམས་མ་བཅུ་དྲུག །སྒོ་བ་ཡབ་ཡུམ། བྱ་བྱེད། ཐུབ་དྲུག་སྟེ་བརྒྱད་ཅུ་རྩ་གཉིས་སོ། །དེའང་རིགས་ཆུང་གི་སེམས་དཔའ་ཡབ་ཡུམ་བཞི་བཅུའི་མཚན་གྱི་སྡོམ་ནི། དབུས་ཀྱི་རིགས་ཆུང་སེམས་དཔའ་རྡོ་རྗེ་དང་། །དེ་བཞིན་རིན་ཆེན་ཆོས་དང་ལས་བཞིའི་ཡུམ། །རིམ་བཞིན་བརྟན་འབར་སྡུད་བསྐྱོད་བཞི་པོ་སྦྱར། །སེམས་དཔའ་རྒྱལ་པོ་ཆགས་པ་ལེགས་བཞི་སྦྱར། །ཡུམ་ནི་སྒེག་མོ་བདུག་པ་ལྕགས་ཀྱུ་སྒྲོན། །རིན་ཆེན་ཉི་མ་རྒྱལ་མཚན་བཞད་བཞི་ལྷོ། །ཡུམ་ནི་མཱ་ལེ་མེ་ཏོག་ཞགས་བདེ་མ། །ཆོས་དང་རྣོན་པོ་འཁོར་ལོ་སྨྲ་བ་ནུབ། །ཡུམ་ནི་གླུ་སྒྲོན་ལྕགས་སྒྲོག་གསལ་བཀྲ་མ། །ལས་དང་བསྲུང་བ་གནོད་སྦྱིན་ཁུ་ཚུར་བྱང་། །གར་བྱུག་དྲིལ་འཁྲོལ་འབེབས་མ་ཡུམ་བཞི་སྟེ། །དང་གཅིག་མ་གཏོགས་ཡབ་ཡུམ་ཐམས་ཅད་ཀྱི། །མཚན་གྱི་ཐོག་མར་རྡོ་རྗེ་རེ་རེ་སྦྱར། །ཞེས་སོ། །བཞི་པ་བསྡུས་པ་ནི། རིགས་ལྔ་ཡབ་ཡུམ་བཅུ་དང་། སྒོ་བ་ཡབ་ཡུམ་བརྒྱད་དེ་ལྷ་ཚོགས་བཅོ་བརྒྱད་དོ། །ཁྲོ་བོའི་དཀྱིལ་འཁོར་འབྲིང་པོ་ནི། ཁྲག་འཐུང་ལྔ་བཅུ་ང་བརྒྱད་ཀྱི་སྟེང་དུ་ཁྲོ་བཅུ་ཡབ་ཡུམ་བསྣན་པས་ལྷ་བདུན་ཅུ་རྩ་བརྒྱད་དོ། །རྒྱས་པ་ནི། རིགས་ལྔའི་ཁྲག་འཐུང་ཡབ་ཡུམ་ཟུང་རེ་ལ་རིགས་ཆུང་གི་ཁྲག་འཐུང་ཡབ་ཡུམ་བརྒྱད་བརྒྱད་ཀྱིས་བསྐོར་བའི་ལྔ་བཅུའི་སྟེང་དུ། འབྲིང་པོའི་སྐབས་ཀྱི་འཁོར་དྲུག་ཅུ་རེ་བརྒྱད་པོ་བསྣན་པས་བརྒྱ་དང་བཅོ་བརྒྱད་དོ། །ཡང་། འདི་ཉིད་ལས། ཡན་ལག་བཞི་བཅུ་རྩ་གཉིས་ལྡན། །ཞེས་སོགས་ཀྱི་སྐབས་སུ་རྣམ་གྲངས་སྤྲོས་པ་སྟེ། སྣང་བ་རྣམ་འབྱེད་ཀྱི་ཏིང་ངེ་འཛིན་ལ་བསླབ་པའི་ཐབས་བསྟན་ནོ། །དེ་ལའང་གསུམ་སྟེ། སངས་རྒྱས་སྟོང་གི་དང་། ཉི་ཁྲི་བཞི་སྟོང་གི་དང་། བསམ་ཡས་ལྷུན་གྲུབ་ཀྱི་དཀྱིལ་འཁོར་ལ་བསླབ་པའོ། །དང་པོ་ལ།ཐབས་ཀྱི་ལྷ་བཞི་བཅུ། ཤེས་རབ་ཀྱི་ལྷ་བཞི་བཅུ། སྐུ་གསུང་ཐུགས་ཀྱི་ལྷ་བརྒྱ་དང་ཉི་ཤུ། དབུ་རྒྱན་གྱི་ལྷ་བརྒྱད་
བརྒྱའོ། །དང་པོ་ནི། ཡན་ལག་བཞི་བཅུ་རྩ་གཉིས་ལྡན། །ཞེས་པས་རྩ་བའི་ལྷ་ཡབ་ཡུམ་གཉིས་ལ་ཡན་ལག་གི་ལྷ་བཞི་བཅུ་བསྒོམ་པ་སྟེ། ཡབ་ཀྱི་རྟོག་པའི་གནས་སུ་ཡབ་བཅུ་བདུན་དང་ཐུབ་པ་དྲུག་སྟེ་ཉེར་གསུམ། ཡུམ་ལ་ཡུམ་བཅུ་བདུན་དགོད་དོ། །ཇི་ལྟར་འགོད་ཅེ་ན།བདག་ཉིད་མི་བསྐྱོད་པར་གསལ་བཏབ་པའི་དབུ་ལ་རྣམ་སྣང་། ལག་གཡས་སུ་ཀུན་བཟང་། གཡོན་ལ་རིན་འབྱུང་། རྐང་གཡས་དོན་གྲུབ། གཡོན་མཐའ་ཡས། མིག་རྣ་བ་སྣ་ལྕེ་བཞིའི་གཡས་ཀྱི་རྩ་ནང་དུ་ས་སྙིང་། ཕྱག་རྡོར། ནམ་སྙིང་། སྤྱན་རས་གཟིགས་དང་། གཡོན་གྱི་རྩའི་ཕྱི་རོལ་དུ་རིམ་པར། བྱམས་པ། སྒྲིབ་སེལ། ཀུན་བཟང་། འཇམ་དཔལ། ལག་མཐིལ་གཡས་སུ་གཤིན་རྗེ། གཡོན་དུ་སྟོབས་ཆེན། རྐང་མཐིལ་གཡས་པར་འཁྱིལ་པ། གཡོན་དུ་རྟ་མགྲིན། མཆོགས་མར་ལྷ། སྟ་ཟུར་ལ་ལྷ་མིན། སྙིང་གར་མི། ལྟེ་བར་བྱོལ་སོང་། མགྲིན་པར་ཡི་དྭགས། གསང་གནས་སུ་དམྱལ་བའི་ཐུབ་པ་རྣམས་དགོད་དོ། །དེ་བཞིན་དུ་ཡུམ་རྡོ་རྗེ་དབྱིངས་ཕྱུག་མ་ལ་ཡུམ་བཅུ་བདུན་འགོད་པའི་རིམ་པ་ཡབ་དང་མཚུངས་སོ། །དེ་ལྟར་ཡན་ལག་གི་ལྷ་བཞི་བཅུ་པོ་ནི་རགས་པའི་ཆ་ནས་ཐབས་ཀྱི་ལྷར་བཞག་གོ། །གཉིས་པ་ནི། ཐབས་ལྷ་བཞི་བཅུ་པོའི་ཐུགས་ཀར་རང་འདྲ་བའི་ཡེ་ཤེས་སེམས་དཔའ་རེ་རེ་བསྒོམ་པ་ནི། ཡན་ལག་སྤྲོས་པ་སྟེ་ཕྲ་བའི་ཆ་ནས་ཤེས་རབ་ཀྱི་ལྷར་བཞག་གོ། །གསུམ་པ་ནི། བཞི་བཅུ་རྩ་གཉིས་སུམ་འཕྲོར་འགྱུར། །ཞེས་པས་རྩ་ལྷ་ཡབ་ཡུམ་གཉིས་ལ་བཀོད་པའི་ཐབས་ཀྱི་ལྷ་བཞི་བཅུ་པོ་རེ་རེའི་ཡང་གནས་གསུམ་དུ་སྐུ་གསུང་ཐུགས་ཀྱི་ལྷ་རེ་རེ་འགོད་པ་ནི། སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོའི་ལྷ་བརྒྱ་ཉི་ཤུའོ། །བཞི་པ་ནི། བདག་སྟེ། ཞེས་པས། དེ་ལྟར་བརྒྱ་ཉི་ཤུ་པོའི་སྟེང་དུ་ཐབས་ཀྱི་ལྷ་བཞི་བཅུ་བསྣན་ཏེ་བརྒྱ་དྲུག་ཅུ་པོ་དེ་དག་ལ་སོ་སོའི་རིགས་བདག་གིས་གཙོ་བྱས་པའི་དབུ་རྒྱན་གྱི་ལྷ་ལྔ་ལྔ་སྟེ་བརྒྱད་བརྒྱའོ། །དེས་ན་ཐབས་ཤེས་བྱིན་རློབས་དབུ་རྒྱན་གྱི་ལྷ་རྣམས་ཀུན་དྲིལ་བས་རྩ་ལྷ་
ཡབ་ཡུམ་གཉིས་ལ་ཡན་ལག་དང་ལྷག་པའི་ལྷ་སྟོང་བསྒོམ་པ་ཡིན་ནོ། །འདིར་སྔ་རབས་ཀྱི་མཁས་རྩགས་ཆ། ཉང་། རོག་སོགས། པ་འགའ་ཞིག །ཐབས་ཀྱི་ལྷ་བཞི་བཅུ། ཤེས་རབ་ཀྱི་ལྷ་བཞི་བཅུ། སྐུ་གསུང་ཐུགས་ཀྱི་ལྷ་རེ་རེ་ཞིང་བཞི་བཅུ་རེ་སྟེ་ཉིས་བརྒྱ་ནི་གྲངས་ཀྱི་གཞི་མའོ། །ཉིས་བརྒྱ་པོ་རེ་རེ་ལ་དབུ་རྒྱན་ལྔ་ལྔ་བསྣན་པས་ལྔ་ཚན་ཉིས་བརྒྱ་ལ་སྟོང་ཡོད་དེ། དབུ་རྒྱན་ཁོ་ནའི་གྲངས་ཡིན་ལ། དེའི་སྟེང་དུ་གཞིའི་ལྷ་ཉིས་བརྒྱ་བསྣན་པས་རྣམ་གྲངས་བྱུང་ཚོགས་སུ་ལྷ་སྟོང་ཉིས་བརྒྱའོ། །ཞེས་གསུངས་ནའང་། རིགས་པར་མ་མཐོང་སྟེ། ལམ་རིམ་ལས། སྟངས་དཔྱལ་གཉིས་ཀྱི་ཕྱག་རྒྱ་དང་། །སངས་རྒྱས་སྟོང་གི་དཀྱིལ་འཁོར་ཡང་། །རི་རབ་ཏིལ་འབྲུའི་ཚུལ་བཞིན་དུ། །དཔེ་བྱད་མཚན་གྱིས་སྤྲས་པའོ། །ཞེས་རྩ་བའི་ལྷ་ལ་སངས་རྒྱས་སྟོང་བསྒོམ་པར་གསུངས་པའི་གྲངས་འཇིག་པའི་ཕྱིར་དང་། གཞན་ཡང་ཐུགས་ཀའི་ཡེ་ཤེས་སེམས་དཔའ་བཞི་བཅུ་ནི་ཤེས་རབ་ཀྱི་ལྷ་ཡིན་པའི་ཕྱིར་དང་། རྒྱན་སྤངས་པའི་ཕྱིར་དབུ་རྒྱན་བཅིང་བའང་རིགས་པ་མ་ཡིན་ནོ། །ཡང་དཀྱིལ་འཁོར་སྤྲོས་པའི་སྐབས་སུ་རིན་ཆེན་དྲ་བ་ལས། དབང་བསྐུར་བྱིན་རླབས་ཚུལ་བཞིན་བྱ། །ཞེས་པའི་གོ་རིམ་ལྟར་མཛད་མོད་ཀྱི། འོན་ཀྱང་རྣམ་གྲངས་སྤྲོས་པའི་སྐབས་འདིར།ལམ་རིམ་ལས། བྱིན་རླབས་རྡོ་རྗེ་གསུམ་དུ་བསྒོམ། །དབུ་ཡི་གནས་ལྔར་ཡེ་ཤེས་ལྔ། །ཞེས་གསུངས་པ་ལྟར་དབང་གི་གོང་དུ་བྱིན་རླབས་བྱ་དགོས་ཏེ། སྐུ་གསུང་ཐུགས་ཀྱི་ལྷ་བརྒྱ་ཉི་ཤུ་ལའང་དབུ་རྒྱན་གྱི་ལྷ་བསྒོམ་དགོས་པའི་ཕྱིར་རོ། །གཉིས་པ་ནི། དེ་ལྟར་ལྡན་པའི་གཙོ་མཆོག་གི། །ཞེས་སོགས་ཏེ། གཙོ་བོ་མི་བསྐྱོད་པ་ཡབ་ཡུམ་ལ་ཇི་ལྟར་བཀོད་པ་བཞིན་དུ་ལྷ་གཞན་རྣམས་ལའང་རིགས་འགྲེ་ཤེས་པར་བྱས་ནས། གང་རྩ་ལྷར་སོང་བའི་ཡབ་ཡུམ་གྱི་རྟོག་པའི་གནས་སུ་ཀུན་བཟང་ཡབ་ཡུམ་འགོད་པ་ཙམ་ཁྱད་པར་རོ། །དེ་ལྟར་ན་རྒྱལ་བ་རིགས་ལྔ་རྒྱལ་མཆོག་ཀུན་བཟང་སྟེ་ཡབ་ཡུམ་ཟུང་དྲུག་ལ་སྟོང་ཚོ་དྲུག །
སེམས་དཔའ་ཡབ་ཡུམ་བཅུ་དྲུག་སྒོ་བ་ཡབ་ཡུམ་བརྒྱད་དེ་ཉི་ཤུ་རྩ་བཞི་བ་ཟུང་བཅུ་གཉིས་ཡོད་པས་སྟོང་ཚོ་བཅུ་གཉིས། ཐུབ་དྲུག་ལ་ཡུམ་མེད་པ་ཁ་ཅིག་ན་རེ། དོན་གྱི་ཡུམ་ཆོས་ཀྱི་དབྱིངས་ལ། རྟགས་ཀྱི་ཡུམ་པདྨ་ཡིན་པས་གདན་པདྨ་ལ་འགོད་ཟེར་ནའང་།འདིར་བླ་མ་རྗེ་སྒྲོ་ཕུག་པ་སོགས། རྣམས། ཤེས་རབ་མཚོན་བྱེད་གཡོན་ཡིན་པས།གཡོན་ཕྱོགས་སུ་འགོད་ཅེས་གསུངས་པ་ལྟར། རྐང་ལག་གི་རིགས་བཞི་དང་།སྒོ་བ་ཡབ་ཡུམ་རྣམས་གཡས་གཡོན་གྱི་ཆ་འཛིན་པའི་རིམ་པའི་རྩའི་མདུན་རྒྱབ་དང་། ཕྱི་ནང་གི་སེམས་དཔའ་རྣམས་དབང་རྩའི་ཕྱི་དང་ནང་དུ་འགོད་ཚུལ་ཤེས་པར་བྱས་ནས་ཐུབ་དྲུག་རེ་རེ་ལའང་སྟོང་ཚང་བར་བསྒོམས་པས་སྟོང་ཚོ་དྲུག་སྟེ། མདོར་ན་སྟོང་ཚོ་ཉི་ཤུ་རྩ་བཞི་བསྒོམ་པ་ནི་ཉི་ཁྲི་བཞི་སྟོང་གི་དཀྱིལ་འཁོར་ལ་བསླབ་པའོ། །དེ་ལྟར་ཡང་ལམ་རིམ་ལས། དེ་ལྟར་གཙོ་མཆོག་ལྡན་བྱས་ནས། །བྱ་བྱེད་རིགས་བཞིའང་སྟོང་བསྒོམ་བྱ། །བཅུ་གཉིས་དྲུག་གི་འོད་འཕྲོ་འབར། །ཉི་ཁྲི་བཞི་སྟོང་དུས་གཅིག་གསལ། །ཞེས་སོ། །གསུམ་པ་ནི། དེ་ལ་སོགས་པ་བསམ་མི་ཁྱབ། །ཅེས་པས། སྟོང་དང་ཉི་ཁྲི་བཞི་སྟོང་པོ་དེ་དག་ལ་གོམས་པ་ལས་སུ་རུང་ནས། དངོས་པོ་ཐམས་ཅད་སྐུ་དང་ཡེ་ཤེས་ཀྱི་དཀྱིལ་འཁོར་དུ་བསྒོམ་པ་ནི་བསམ་ཡས་ལྷུན་གྲུབ་ཀྱི་དཀྱིལ་འཁོར་ལ་བསླབ་པ་སྟེ། ལམ་རིམ་ལས། ཕྱོགས་བཅུ་མ་ལུས་གཞལ་ཡས་ཁང་། །ཉི་ཟླ་གཟའ་སྐར་གདན་དང་རྒྱན། །བདེ་གཤེགས་དཀྱིལ་འཁོར་མ་ལུས་བསྒོམ། །བསམ་ཡས་ལྷུན་གྲུབ་ཉིད་ལ་བསླབ། །ཅེས་སོ། །ཁྲོ་བོའི་དཀྱིལ་འཁོར་ལ། རྒྱུད་འདིར་རྣམ་གྲངས་སྤྲོས་པ་ཚིག་ཟིན་ལ་དངོས་སུ་མ་བྱུང་ནའང་། ཞི་བའི་ཤུགས་ཀྱིས་ཤེས་པར་འགྱུར་བ་ལ་དགོངས་པའོ། །དེའང་ཇི་ལྟར་དགོད་ཅེ་ན། འདིའང་གསུམ་སྟེ་སྟོང་བཞི་བརྒྱ་ལྔ་བཅུའི་དང་། བདུན་ཁྲི་དྲུག་སྟོང་བརྒྱད་བརྒྱ་ལྔ་བཅུའི་དང་། བསམ་ཡས་ལྷུན་གྱིས་གྲུབ་པའི་དཀྱིལ་འཁོར་ལ་བསླབ་པའོ། །དང་པོ་ནི། ཐབས་ཀྱི་ལྷ་ང་བརྒྱད། ཤེས་རབ་ཀྱི་ལྷ་ང་བརྒྱད། སྐུ་
གསུང་ཐུགས་ཀྱི་གནས་གསུམ་དུ་བྱིན་རླབས་ཀྱི་ལྷ་ང་བརྒྱད་པོ་རེ་རེ་སྟེ། ང་བརྒྱད་པ་ཆ་ལྔ་པོའི་གྲངས་བསྡོམས་ན་ཉིས་བརྒྱ་དང་དགུ་བཅུ། དེ་ལས་ཤེས་རབ་ཀྱི་ལྷ་ང་བརྒྱད་མ་གཏོགས་པའི་ལྷ་ཉིས་བརྒྱ་པོ་གཉིས་ལ་རེ་རེ་ཞིང་དབང་བསྐུར་གྱི་ལྷ་ལྔ་ལྔའི་ཡན་ལག་དང་ལྡན་པའི་ཕྱིར་དབུ་རྒྱན་གྱི་ལྷ་སྟོང་ཆིག་བརྒྱ་དྲུག་ཅུའོ། །དེ་ཉིད་སྔར་གྱི་ཉིས་བརྒྱ་དགུ་བཅུ་ལ་བསྣན་པས་སྟོང་བཞི་བརྒྱ་ལྔ་བཅུ་སྟེ་གཙོ་བོ་ཡབ་ཡུམ་གཉིས་ལ་ཚང་བར་བསྒོམ་པའོ། །དེ་ཡང་ལམ་རིམ་ལས། ཡན་ལག་བཀོད་པ་ལྔ་བཅུ་བརྒྱད། །ཆ་ལྔའི་གྲངས་ནི་ཉིས་བརྒྱ་དང་། །དགུ་བཅུའི་ལྷ་རྣམས་ཡན་ལག་ལྡན། །ཞེས་སོ། །དེ་ལ་ཐབས་ཀྱི་ལྷ་ང་བརྒྱད་ནི། བཛྲ་ཧེ་རུ་ཀའི་དབུ་ལ་བུཌྜྷ། ལག་གཡས་སུ་བཛྲ། གཡོན་དུ་རཏྣ། རྐང་གཡས་ཀརྨ།གཡོན་པདྨ་ཧེ་རུ་ཀ །ཚོགས་བརྒྱད་ཀྱི་དབང་རྟེན་ནང་རྩར་གཽ་རཱི་མ་བརྒྱད།ཕྱི་རྩར་སིངྷ་མ་བརྒྱད། ཡན་ལག་བཞི་ལ་སྒོ་མ་བཞི། སྒལ་ཚིགས་ཉེར་བརྒྱད་ལ་དབང་མོ་སྟེ་ལྷ་ལྔ་བཅུ་ང་གསུམ་དང་། ཡུམ་བཛྲ་ཀྲོ་དྷཱི་མའི་ཡན་ལག་ལྔ་ལ་རིགས་ཀྱི་ཡུམ་ལྔ་དགོད་ཅིང་། ཤེས་རབ་བྱིན་དབང་གསུམ་གྱི་ལྷའི་འགོད་ཚུལ་ནི་གོ་སླ་བ་ཉིད་དོ། །གཉིས་པ་ནི། གང་རྩ་ལྷར་སོང་བའི་ཤུལ་དུ་བཛྲ་ཧེ་རུ་ཀ་འགོད་པའི་ཚུལ་གྱིས། གཙོ་བོ་ཡབ་ཡུམ་ལ་ཡན་ལག་གི་ལྷ་བཀོད་པ་བཞིན་དུ་གཞན་རྣམས་ལའང་སྦྱོར་ཏེ། ཁྲག་འཐུང་རིགས་ལྔ་ཟུང་རེ་རེ་དང་། འཁོར་གནས་ཡུལ་སྒོ་དབང་སྟེ་ལྷ་མོ་ཡང་ཞེ་བརྒྱད་པོ་རེ་རེ་ལ་སྟོང་བཞི་བརྒྱ་ལྔ་བཅུ་པ་རེ་རེ་སྟེ། མདོར་ན་སྟོང་བཞི་བརྒྱ་ལྔ་བཅུ་པ་ཚོ་ང་གསུམ་པ་བདུན་ཁྲི་དྲུག་སྟོང་བརྒྱད་བརྒྱ་ལྔ་བཅུའོ། །དེ་ལྟ་ནའང་འཁོར་གྱི་ལྷ་མོ་རྣམས་ལ་ཁྲག་འཐུང་ཡབ་ལྔ་གང་དུ་འགོད་ཅེ་ན། ལུས་ཀྱི་གཡས་ཕྱོགས་སུ་ཡབ་ལྔ་དང་ལྷ་གཞན་རྣམས་གཡོན་ཕྱོགས་སུ་དགོད་པ་ཙམ་ཁྱད་པར་ཏེ། དཔེར་ན་མགོ་བོའི་གཡས་སུ་བུཌྜྷ་ཁྲག་འཐུང་དང་། གཡོན་དུ་བུཌྜྷ་ཀྲོ་དྷཱ་མ། ལག་གཡས་ཀྱི་རྩའི་མདུན་དུ་བཛྲ་དང་རྒྱབ་ཏུ་རཏྣ་ཧེ་རུ་ཀ །གཡོན་གྱི་མདུན་རྒྱབ་ཏུ་དེ་གཉིས་ཀྱི་ཡུམ་དགོད་པ་སོགས་རིགས་འགྲེ་ཤེས་པར་བྱའོ། །
གསུམ་པ་བསམ་ཡས་ལྷུན་གྲུབ་ཀྱི་དཀྱིལ་འཁོར་ནི་ཞི་བ་ལྟར་རོ། །དྲུག་པ་བྱང་ཆུབ་སེམས་ཀྱི་དཀྱིལ་འཁོར་ནི། གང་རྩ་རླུང་ཐིག་ལེ་ལ་བརྟེན་ཏེ་བྱང་ཆུབ་ཀྱི་སེམས་བདེ་བ་ཆེན་པོ་ཉིད་རྟོགས་པ་དང་བསྒོམ་པའི་ཐབས་སྟོན་པ་སྟེ། སྤྱན་འགྲེལ་ལས། བྱང་སེམས་ཕྱི་ནང་གསང་བ་ཡང་། །གནས་བཞི་ཁམས་གསུམ་ཡེ་ཤེས་ཆེ། །ཞེས་པས་ཕྱི་བྱང་ཆུབ་ཀྱི་སེམས་རྩ་རླུང་། ནང་བྱང་ཆུབ་ཀྱི་སེམས་ཐིག་ལེ། གསང་བ་བྱང་ཆུབ་ཀྱི་སེམས་བདེ་བའི་ཡེ་ཤེས་སོ། །དེ་དག་ཀྱང་སྔ་མ་སྔ་མ་རྟེན་དང་ཕྱི་མ་ཕྱི་མ་བརྟེན་པ་སྟེ།ཁོག་གཞུང་ལས། ཟབ་ཕྱིར་བྱང་སེམས་དཀྱིལ་འཁོར་ནི། །རྟེན་དང་རྟེན་ཅན་ཐ་སྙད་གཉིས། །དབྱེ་བས་ཕྱི་ནང་མཐར་ཐུག་འགྱུར། །ཞེས་སོ། །དེ་ལ་དང་པོ་ཕྱི་བྱང་ཆུབ་སེམས་ཀྱི་དཀྱིལ་འཁོར་ལ་རྩ་དང་རླུང་གཉིས་ཀྱི། ཐོག་མར་རྩ་ནི།སྒྱུ་འཕྲུལ་སྙིང་པོ་བཀོད་པའི་རྒྱུད་ལས། སྲིད་གསུམ་སེམས་ཅན་ཐམས་ཅད་ལ། །སྲོག་ཤིང་གསུམ་དང་འཁོར་ལོ་བཞི། །ཞེས་པས། རྩ་གསུམ་དང་། འཁོར་ལོའོ། །དང་པོ་ནི། ལུས་ཀྱི་དབུས་གསང་གནས་ནས་གཙུག་ཏོར་གྱི་བར་དུ་རྩ་ཨ་བ་དྷཱུ་ཏཱི་སྲོག་ཤིང་གི་ཚུལ་དུ་ཡར་སྣ་སྨིན་མཚམས་སུ་ཟུག་པ། དེའི་གཡས་ན་རོ་མ་དང་། གཡོན་ན་བརྐྱང་མ་གཉིས་ཡར་སྣ་སྣ་སྦུག་ཏུ་ཟུག་སྟེ་སྨིན་མཚམས་ནས་སུམ་གཤིབས་ཀྱི་ཚུལ་དུ་སོང་བའི་འཁོར་ལོ་བཞིའི་ལྟེ་བར་སོ་སོར་མདུད་པའི་ཚུལ་གྱིས་ནང་ཁོང་འདྲེལ་བར་གནས་པ། ལྟེ་བ་སྤུ་ན་གུ་མེ་འཁོར་གྱི་ཐད་ནས་རྩ་གསུམ་འདྲེས་ཤིང་། དབུ་མ་ནི་གཡས་ངོས་སུ་སོང་སྟེ་ཁུ་བ། རྐྱང་མ་དབུས་སུ་སོང་སྟེ་དྲི་ཆུ། རོ་མ་གཡོན་དུ་སོང་སྟེ་ཁྲག་དང་དྲི་ཆེན་འབྱིན་སྡོམ་བྱེད་པར་བཤད་དོ། །གཉིས་པ་ནི། དངོས་གཞིའི་འཁོར་ལོ་བཞི། ཆ་རྐྱེན་གཉིས་དང་བཅས་པ་དྲུག་སྟེ། རྒྱ་མཚོ་ལས། འཁོར་ལོ་གསུམ་གཉིས། ཞེས་གསུངས་པའི་ཕྱིར་དེའང་སྤྱི་མགྲིན་སྙིང་ལྟེ་བའི་འཁོར་ལོ་བཞི་ཀའི་དབུས་ནས་ཕྱོགས་བཞིར་རྩ་བཞི་བཞི་གྱེས་པ། སྙིང་གར་དེ་བཞི་ལས་གཉིས་རེ་གྱེས་པས་བརྒྱད། མགྲིན་
པར་དེ་ལས་གཉིས་གཉིས་གྱེས་པས་བཅུ་དྲུག །སྤྱི་བོར་དེ་ལས་གཉིས་གཉིས་གྱེས་པས་སོ་གཉིས། ལྟེ་བར་སྙིང་ག་ལྟར་གྱེས་པ་བརྒྱད་ཀྱི་བཞི་ལས་གཉིས་རེ་གྱེས་པས་འཕོ་བའི་རྩ་བཅུ་གཉིས་དང་། དེའི་སྔར་གྱེས་པ་བརྒྱད་ལས་ལྔ་ལྔ་དང་།མ་གྱེས་པ་བཞི་ལས་དྲུག་རེ་གྱེས་པས་དྲུག་ཅུ་རྩ་བཞིའོ། །དེ་དག་ཀྱང་དཀའ་བ་གཅོད་པ་མན་ངག་སྙིང་པོ་ཞེས་བྱ་བ་ཁྲོ་བོ་སྟོབས་ཀྱི་རྒྱུད་རྒྱལ་ལས། སུམ་ཅུ་གཉིས་དང་བཅུ་དྲུག་དང་། །བརྒྱད་དང་དྲུག་ཅུ་རྩ་བཞི་ཡི། །དཀྱིལ་འཁོར་ལྡན་པའི་དཀྱིལ་འཁོར་ལ། །ཞེས་སོ། །དེའང་སྤྱི་བོའི་འཁོར་ལོ་ལ་སྐུའི་འཁོར་ལོའམ་བདེ་བ་ཆེན་པོའི་རྟེན་ཧཾ་ཡིག་བཞུགས་པས་བདེ་ཆེན་འཁོར་ལོ་གྲགས་ཏེ། རྒྱ་མཚོ་ལས། རང་བྱུང་འཁོར་ལོ་རྒྱུ་ཡི་བདག །ཀ་སོགས་སུམ་ཅུ་རྩ་གཉིས་ནི། །མ་ལུས་ཀུན་གྱི་དངོས་གཞི་སྟེ། །སྐུ་ཡི་འཁོར་ལོ་རང་སྣང་བའོ། །ཞེས་དང་།གསང་ཐིག་ལས། བཅུ་ཚན ། གསུམ་ཉག་མ ། གཉིས་ཀྱི་དཀྱིལ་འཁོར་དུ། །བདེ་བའི་ཐིག་ལེ་མཉམ་པའི་དབྱིངས། །ཞེས་སོ། །མགྲིན་པའི་རྩ་འདབ་ལ་གསུང་གི་འཁོར་ལོའམ་རོ་དྲུག་མྱོང་བའི་ཕྱིར་ལོངས་སྤྱོད་འཁོར་ལོར་གྲགས་ཏེ། རྒྱ་མཚོ་ལས། སྒྲ་དབྱངས་གསུང་གི་འཁོར་ལོ་ནི། །བརྗོད་པའི་སྒྲ་ནི་སྣ་ཚོགས་པ། །མ་ལུས་པར་ནི་རང་སྣང་བས། །གསུང་གི་ཕྱག་རྒྱར་ངེས་པའོ། །ཞེས་དང་།གསང་ཐིག་ལས། ལྔ་གཉིས་དྲུག་གི་དཀྱིལ་འཁོར་དུ། །བདེ་བ་ཆེན་པོའི་རོ་ཡིས་ནི། །དགྱེས་པ་ཆེན་པོ་སྟོབ་པར་བྱ། །ཞེས་སོ། །སྙིང་གའི་རྩ་འདབ་ཐུགས་སམ་ཆོས་ཀྱི་འཁོར་ལོར་གྲགས་ཏེ། རྒྱ་མཚོ་ལས། རིག་པ་ཐུགས་ཀྱི་འཁོར་ལོ་ནི། །ཟག་མེད་ཡེ་ཤེས་དྲུག་ལྡན་ཞིང་། །སྡེ་ཚན་བརྒྱད་ཀྱིས་བརྒྱན་པ་ནི། །སྙིང་པོ་དྭངས་མ་ལྔར་སྣང་བའོ། །ཞེས་དང་། དབང་གི་གལ་པོ་ལས།རྩ་བཞི་འོད་བཞི་ས་བོན་དྲུག །མདོར་བསྡུས་སྙིང་པོ་ཆོས་ཀྱི་སྐུ། །དེ་ཕྱིར་ཆོས་ཀྱི་འཁོར་ལོའོ། །ཞེས་སོ། །ལྟེ་བའི་འཁོར་ལོ་ནི་ལུས་ཐོག་མར་བསྐྱེད་པ་དང་སྤྲུལ་པའི་གནས་སམ་ཁམས་
གསུམ་ལ་ཁྱབ་པས་སྤྲུལ་པའི་འཁོར་ལོ་སྟེ། དབང་གི་གལ་པོ་ལས། བཅུ་ཚན་དྲུག་པ ། གཅིག་དང་བཞིར་གྱེས་པ། །ཁམས་གསུམ་ཁྱབ་པས་སྤྲུལ་སྐུའོ། །ཞེས་དང་། དེའི་རང་འགྲེལ་ལས། དེ་དག་ལྟེ་བ་ནས་ སྤྲོས་ཏེ་འདུས་ཀྱང་དེར་འདུས་ཏེ། དེ་ལུས་གཟུགས་ཁམས་ངག་འདོད་ཁམས།སེམས་གཟུགས་མེད་པའི་ཁམས་གསུམ་ལ་ཁྱབ་པས་སྤྲུལ་པའི་འཁོར་ལོ་སྟེ། ཞེས་སོ། །རྐྱེན་གྱི་འཁོར་ལོ་གཉིས་ནི། ལྟེ་འོག་སོར་བཞི་སྤུ་ན་གུའི་ཐད་ན་མེའི་འཁོར་ལོ་དབྱིབས་གྲུ་གསུམ་པ་རཾ་གྱིས་མཚན་པ་སྟེ། དེ་ལས། མེ་དང་རྡོ་རྗེ་དབྱིངས་ཕྱུག་གཉིས། །མཉམ་དུ་གནས་པས་དྲག་པོར་བཤད། །ཅེས་དང་།དེའི་འགྲེལ་པ་མི་འཇིགས་པའི་ཕྲེང་བ་ལས། གནས་ནི་སྤྲུལ་པའི་འོག་སོར་བཞི་ནའོ། །དབྱིངས་ཕྱུག་མའི་རྩ་དང་མཉམ་པོར་གནས་པས་ལས་ཀྱི་མཁའ་འགྲོ་མ་སྤོར་མ་ཞེས་བྱའོ། །དེའང་དབྱིབས་ཨེ་ལས་ལོགས་དང་ཟུར་དང་མཐའ་དབུས་ཀྱིས་ཕྱེ་བས་སྤོར་མ་བརྒྱད་དོ། །ཞེས་སོ། །དེ་འོག་བཤང་ཁ་རླུང་གི་འཁོར་ལོ་གཞུའི་དབྱིབས་ཅན་ཡཾ་གྱིས་མཚན་པ་སྟེ། དེ་ལས། རླུང་ནི་དགུག་པ་གཞུ་དབྱིབས་ཏེ། །ས་བོན་ཡཾ་གྱིས་གཡོ་བྱེད་པ། །ཞེས་སོ། །དེ་རྣམས་ལ་འཁོར་ལོ་ཞེས་བརྗོད་པའི་ངེས་པ་ཡང་། རྩིབས་ལ་སོགས་པ་དབྱིབས་མཚུངས་པ་དང་།དེ་དང་དེར་བྱེད་པ་བཅིངས་པ་ལས་རྟོག་པ་གཅོད་པའི་ཕྱིར་འཁོར་ལོ་དང་བྱེད་ལས་མཚུངས་པས་ཀྱང་དེ་སྐད་ཅེས་བྱའོ། །རྩ་དེ་དག་ལས་ཀྱང་ཕྱེ་ན་མངལ་དུ་ལུས་ཆགས་ཏེ་བདུན་ཕྲག་བཞི་འདས་ནས་མངལ་ཟླ་བརྒྱད་དང་ཕྱི་རོལ་གྱི་བཞི་སྟེ། ཟླ་བ་བཅུ་གཉིས་ཀྱི་བར་ཞག་རེ་ཞིང་རྩ་ཉིས་བརྒྱ་རེ་ཆགས་པས་རོ་རྐྱང་དབུ་གསུམ་གྱི་རིགས་འཛིན་པའི་རྩ་སྟོང་ཕྲག་ཉི་ཤུ་རྩ་བཞི་པ་ཚེ་གསུམ་ལ་སྟོང་ཕྲག་བདུན་ཅུ་རྩ་གཉིས་ཏེ། སྡོམ་འབྱུང་ལས། ལུས་ཀྱི་རྗེས་སུ་འགྲོ་བའི་རྩ། །སྟོང་ཕྲག་བདུན་ཅུ་རྩ་གཉིས་བརྗོད་ཅེས་སོ། །དེ་རྣམས་ལས་གྱེས་པ་ནི་བསམ་གྱིས་མི་ཁྱབ་པ་སྟེ། བ་སྤུའི་གྲངས་ཇི་སྙེད་པའི་རྩའི་གྲངས་ཀྱང་དེ་སྙེད་དོ། །
རྒྱུད་གཞན་དུ། དབུ་མའི་ཡར་སྣར་གཙུག་ཏོར་དང་། འོག་ཏུ་གསང་བའི་འཁོར་ལོ་བསྣན་པ་སོགས་མང་ཉུང་མཐའ་གཅིག་ཏུ་མ་ངེས་པར་གསུངས་ཤིང་། མདོར་ན་རྣལ་འབྱོར་པས་ཤེས་པར་བྱ་བའི་རྩ་སྟོང་ཕྲག་བདུན་ཅུ་རྩ་གཉིས་དང་། དེ་རྣམས་ཀྱི་གཙོ་བོར་གྱུར་པ་འཁོར་ལོའི་རྩ་དང་། དེ་རྣམས་ལས་ཀྱང་གཙོ་བོར་གྱུར་པའི་རྩ་སུམ་ཅུ་རྩ་གཉིས་ལ་སོགས་པ་བཤད་ལ། འཁོར་ལོ་དྲུག་གི་རླུང་སེམས་ཀྱི་དྭངས་མ་འཛིན་ཅིང་སྙིགས་མས་ནད་སྐྱེད་པར་བྱེད་སྟེ། གཙུག་ཏོར་དང་དཔྲལ་བས་བད་ཀན། མགྲིན་སྙིང་གིས་མཁྲིས་ནད། ལྟེ་གསང་གི་ཕྱི་སྐོར་གྱིས་རླུང་ནད། གསང་བའི་ནང་སྐོར་གྱིས་འདུས་པའི་ནད་བསྐྱེད་དོ་ཞེས་འབྱུང་ངོ་། །དེ་ཡང་ལུས་ལ་རགས་ཕྲ་ཤིན་ཏུ་ཕྲ་བ་གསུམ་ལས་འདི་ནི་ཕྲ་བའི་ལུས་ཏེ།ཤིན་ཕྲའི་ལུས་ནི་རྩ་ཐམས་ཅད་ཀྱི་གཤིས་ཟུང་འཇུག་ཡེ་ཤེས་ཀྱི་དབུ་མ་ཞེས་གྲགས་པ་གང་ཡིན་པ་དེའོ། །དེ་རྣམས་སུ་རྒྱུ་བའི་རླུང་ལ། ལས་དང་། ཡེ་ཤེས་ཀྱི་རླུང་གཉིས་ལས་ལས་རླུང་ནི། སྲོག་འཛིན། གྱེན་རྒྱུ། ཁྱབ་བྱེད། མེ་མཉམ། ཐུར་སེལ་ལྔ་ནི་རྩ་བ་ཕུང་པོའི་རླུང་སྟེ། བྱེད་ལས་ཀྱང་། སྲོག་གནས་པ་དང་།དབུགས་འབྱུང་རྔུབ་དང་། ལུས་གནས་པ་དང་། དྲོད་འབེབས་པ་དང་།འགྲོ་འདུག་བཤང་གཅི་ཁུ་གསུམ་འབྱིན་སྡོམ་དང་བཅས་པའི་བྱ་བ་བྱེད་ལ། གལ་ཏེ་ལོག་ན། བརྒྱལ་སྨྱོ་ཤི་བ་སོགས་དང་། སྟོད་ནད་དང་། ཞ་རེངས་ཀྱི་ནད་དང་། འཕོ་བའི་ནད་དང་། སྨད་ཀྱི་ནད་རྣམས་བསྐྱེད་ཅིང་། དེ་དག་ལུས་ཀྱི་དབུས་དང་། སྟོད་དང་། པགས་པའི་མཐར་ཐུག་པ་དང་། ཞུ་བའི་མཚམས་དང་། ལྟེ་བ་མན་ཆད་ན་གནས་སོ་ཞེས་ཁ་ཅིག་ནས་བཤད། འདིར་ནི། སྙིང་ག་དང་། ལྐོག་མ་དང་། ལུས་ཀྱི་ཚིགས་ཐམས་ཅད་དང་། ལྟེ་བ་དང་། གསང་གནས་རྣམས་སུ་གནས་པར་གསང་བའི་སྙིང་པོ་ཁྲོ་བོ་སྟོབས་ཀྱི་རྒྱུད་རྒྱལ་ལས་གསུངས་ཏེ། དེ་ཉིད་ལས། ཚིགས་ལ་ཁྱབ་བྱེད་རླུང་གནས་པ། །གཟུགས་ཀྱི་ཕུང་པོ་རྣམ་སྣང་སྐུ། །ཞེས་
སོགས་སོ། །རྒྱུ་བ་སོགས་ཡན་ལག་གི་རླུང་ལྔ་ནི། དབང་པོ་ལྔ་ལ་གནས་ཤིང་བསྐྱེད་པ་སོགས་ཀྱི་བྱ་བ་བྱེད་པ་སྟེ། དེ་ལས། རྒྱུ་བའི་གནས་ནི་སྤྱན་ཡིན་ཏེ། །རྣམ་པར་རྒྱུ་བ་རྣ་བ་ལ། །ཡང་དག་རྒྱུ་བ་སྣ་དང་ནི། །རབ་ཏུ་རྒྱུ་བ་ལྕེ་ལ་གནས། །ངེས་པར་རྒྱུ་བ་ལུས་ཉིད་དེ། །མིག་དང་རྣ་བ་སྣ་དང་ལྕེ། །ས་སྙིང་ལ་སོགས་སེམས་དཔའ་བརྒྱད། །རྣམ་ཤེས་དབང་པོ་ཕྱི་ནང་ཕྱེ། །ཞེས་སོགས་རྒྱ་ཆེར་གསུངས་སོ། །བྱེ་བྲག་ཏུ་སྣར་རྒྱུ་བའི་རླུང་ནི། ཁོ་བོ་སྟོབས་ཀྱི་རྣལ་འབྱོར་དབང་ཕྱུག་སྒྲུབ་པ་སྒྱུ་འཕྲུལ་དྲ་བའི་རྒྱུད་ལས་གྱེན་དུ་གཡས་གཡོན་གཉིས་ཀ་ནས་དཀྱིལ་འཁོར་རིམ་པར་རྒྱུ་བ་ནི། ཁྲི་ཕྲག་གཉིས་དང་སྟོང་ཕྲག་དང་། །དྲུག་བརྒྱ་ཉིན་མཚན་འབྱུང་བྱེད་པ། །ཞེས་པས་ཉིན་ཞག་ཕྲུགས་རེ་ལ་རླུང་ཉི་ཁྲི་ཆིག་སྟོང་དྲུག་བརྒྱ་རྒྱུ་ལ། དེ་ཡང་འཕོ་བ་བཅུ་གཉིས་པའི་དབང་དུ་བྱས་ན། ལྟེ་བའི་རྩ་འདབ་དྲུག་ཅུ་རེ་བཞི་ལས།སྔར་དྲུག་ཏུ་གྱེས་པའི་ཡ་གྱལ་བཞི་པོ་དབུ་མའི་འཕོ་བ་ཡིན་པའི་ཕྱིར། དཀྱིལ་འཁོར་མི་འབབས་པས་སྟོང་པའི་རྩ་བཞི་ཞེས་བྱའོ། །དེ་ལྷག་དྲུག་ཅུ་པོ་ནས་རྒྱུ་ཚུལ་ནི། བ་སྤུའི་མཐར་ཐུག་པའི་རྩ་ལམ་ནས་རྩ་འཁོར་གྱི་རླུང་རྣམས་ལྟེ་བའི་རླུང་དང་འདྲེས་ཏེ་རོ་རྐྱང་གི་ལམ་ལས་སྣ་སྒོར་འབབ་ལ། དེ་ཡང་འབྱུང་བ་ལྔ་གཡས་གཡོན་སྡུད་བསྐྱེད་ཀྱི་རིམ་པས་འཕོ་བ་རེ་ལ་དབྱུག་གུ་ལྔ་རེ། དབྱུག་གུ་རེ་ལ་དབུགས་སུམ་བརྒྱ་དྲུག་ཅུ་སྟེ། འཕོ་བ་རེ་ལ་དབུགས་སྟོང་བརྒྱད་བརྒྱ་པ་རེ་རྒྱུ་ནའང་། དེའི་སྟེང་ན་སྟོང་པའི་རྩ་བཞིའི་དབྱེ་བས་དབུགས་གཅིག་གི་ཕྱེད་བཅས་སོ་གཉིས་ཆ་རེ་ཡེ་ཤེས་ཀྱི་རླུང་ཡིན་ལ། དེ་བསགས་པས་དབྱུག་གུ་རེ་ལ་དབུགས་བཅུ་གཅིག་དང་བཞི་ཆ་གཅིག །འཕོ་བ་རེ་ལ་ང་དྲུག་རྐང་བཅས། ཉིན་ཞག་གཅིག་ལ་དྲུག་བརྒྱ་དོན་ལྔ་རྣམས་རྒྱུ་ཞིང་དེ་ཆུ་ཚོད་དུ་དྲིལ་ན། ཆུ་ཚོད་གཅིག །ཆུ་ཆུང་ང་གཉིས། དབུགས་གསུམ། དེ་ཟླ་བ་གཅིག་ཏུ་བསགས་པས་ཆུ་ཚོད་ང་དྲུག་དང་། ཆུ་ཆུང་བཅོ་ལྔ། དེ་བཅུ་གཉིས་སུ་ཟློས་པས་ཞག་བཅུ་གཅིག་དང་། ཆུ་ཚོད་བཅོ་ལྔ་རྣམས་ལོ་གཅིག་གི་ཡེ་རླུང་གི་གྲངས་ཏེ་ཕྱི་
རོལ་དུ་ཟླ་ཤོལ་གྱི་རྒྱུར་འགྱུར་ལ། སྐྱེས་བུ་ལོ་བརྒྱ་པའི་ཡེ་རླུང་བསྡོམས་པས་ལོ་གསུམ་ཕྱོགས་གསུམ་ཏུ་ལོངས་པ་སོགས་རྒྱུད་གཞན་ལས་རྒྱ་ཆེར་གསུངས་སོ། །ཁ་དོག་ནི། ས་རླུང་སེར་པོ། ཆུ་རླུང་དཀར་པོ། མེ་རླུང་དམར་པོ། རླུང་གི་རླུང་ནག་པོ། ནམ་མཁའི་རླུང་སྔོན་པོའོ། །ཚད་ཀྱང་ལྟེ་འོག་སོར་བཞི་ནས་བརྒྱུད་དེ་སྣ་རྩེ་ལས་སོར་བཅུ་གཉིས་ནས་བཅུ་དྲུག་གི་བར་དུ་འགྲོ་བ་ཡིན་ནོ། །ཡང་འཕོ་བ་བཅུ་དྲུག་པའི་དབང་དུ་བྱས་ན། སྔ་མ་ལས། ས་ཡི་རླུང་དང་ཆུ་དང་མེ། །རླུང་དག་རིམ་བཞིན་འབྱུང་བྱེད་པ། །གྱེན་དང་མཐུར་དུ་འབྱུང་བར་བྱེད། །གྱེན་དུ་གཡས་གཡོན་གཉིས་ཀ་ནས། །དཀྱིལ་འཁོར་རིམ་པར་རྒྱུ་བ་ནི། །ཞེས་སོགས་གསུངས་པའི་ཕྱིར་རྒྱུ་བའི་རླུང་ས་ཆུ་མེ་རླུང་བཞི་སྟེ། དེ་ཉིད་ཀྱང་གཡས་གཡོན་གྱི་དབྱེ་བས་ཞག་གཅིག་ལ་ཉི་ཁྲི་ཆིག་སྟོང་དྲུག་བརྒྱའང་ཐུན་བརྒྱད་དུ་འགྱུར་རོ། །འབྱུང་ཆེན་བཞི་པོ་རེ་རེ་ལ་འབྱུང་ཆུང་བཞི་བཞི་ཡོད་པས་འཕོ་བ་བཅུ་དྲུག །དེ་ཡང་གཡས་གཡོན་གྱི་དབྱེ་བས་ཆུ་ཚོད་སོ་གཉིས། འཕོ་བ་ལས་ཆ་བཞིར་ཕྱེ་བས་དབྱུག་གུ་རེ་བཞིའོ། །དབྱུག་གུའི་དོན་ཡང་། འདིར་སྐྱེས་བུའི་དབུགས་དྲུག་གི་ཆུ་ཆུང་གཅིག་དང་། བཞི་ཆ་གཅིག་དང་བཅས་པའི་ཆུ་ཆུང་ང་དྲུག་ནི་དབྱུག་གུ་སྟེ། དེ་རེ་བཞི་ལ་ཞག་གཅིག་གོ། །དེ་ཡང་ཞག་གཅིག་གི་ཡེ་རླུང་དྲུག་བརྒྱ་དོན་ལྔ་ལས། འཕོ་བ་བཅུ་དྲུག་གི་ཐོབ་སྐལ་བརྩིས་པས་འཕོ་བ་རེ་ལ་ཡེ་རླུང་བཞི་བཅུ་ཞེ་གཉིས་དང་། དྲུག་ཆ་རེ། དེའི་ཞེ་བརྒྱད་ཆ་རེ། ཆུ་ཚོད་སོ་གཉིས་ཀྱི་གཅིག་གིས་ཡེ་རླུང་ཉེར་གཅིག་དང་། བཅུ་གཉིས་ཆ་གཅིག་དང་། གོ་དྲུག་ཆ་གཅིག །དབྱུག་གུ་གཅིག་གིས་ཡེ་རླུང་ཕྱེད་དང་བཅུ་གཅིག་དང་། ཉེར་བཞི་ཆ་གཅིག །གོ་གཉིས་ཆ་གཅིག་ཐོབ་བོ། །དེ་ཕྱིར་དབུགས་སོ་གཉིས་ཕྱི་ནང་དུ་རྒྱུ་བའི་བར་ནས་ཡེ་ཤེས་ཀྱི་དབུགས་གཅིག་དབུ་མ་ལ་རྒྱུ་བ་ཡིན་ནོ། །དེ་ལྟ་བུའི་ཡེ་ཤེས་རླུང་དེ་ནི། ལུས་ཅན་རྣམས་ཀྱི་ངག་
གི་ཆོས་དང་ཕྱི་རོལ་དུ་དུས་ཀྱི་ཆོས་རྣམས་ཀྱི་རྟེན་ནམ་འཆར་གཞི་དང་། རྒྱུ་རྒྱུད་ཀྱི་རྟེན་དུ་གྱུར་པ་སྟེ། ཆོས་ཐམས་ཅད་ཀྱི་གཤིས་ལ་རྒྱུན་མི་འཆད་པར་གནས་པའི་སྲོག་ཆེན་པོའི་རླུང་ཞེས་བྱ་བ་དེ་ཉིད་དོ། །དེ་ཡང་འཇམ་དཔལ་སྒྱུ་དྲ་ལས། སྲོག་ཆེན་པོ་སྟེ་སྐྱེ་བ་མེད། །ཚིག་དུ་བརྗོད་པ་སྤངས་པ་སྟེ། །བརྗོད་པ་ཀུན་གྱི་རྒྱུ་ཡི་མཆོག །ཚིག་ཀུན་རབ་ཏུ་གསལ་བར་བྱེད། །ཅེས་སོ། །དེས་ན་རླུང་བཅིངས་པ་ལས་རགས་པའི་ལས་རླུང་ཉིད་ཀྱང་ཡེ་ཤེས་ཀྱི་རླུང་དུ་འགྱུར་ཏེ། དེ་དག་གི་གནད་ཀྱང་། ལྟ་སྟངས་ལ་བརྟེན་ཏེ་རྒྱ་ཡན་ལ་བསླབ་པ་དང་། འབྱིན་འདུག་བགྲངས་ཤིང་བརྩི་བ་དང་། འབྱུང་རླུང་གི་དབྱིབས་མདོག་ལ་བསླབ་པ་དང་། དགག་པའི་སྦྱོར་བས་བུམ་ཅན་བསྒོམ་པ་ལ་སོགས་པའི་ཐབས་ཀྱིས་དབུ་མར་བརྟན་པ་ལས་ཡོན་ཏན་འབྱུང་བ་སྟེ། རྣམ་བཀོད་ལས། རྟོག་རླུང་གཡོ་ལ་རླུང་བཟུང་ལ། །ཞི་བ་བུམ་པ་དྲག་པོ་སོགས། །སྒྲོལ་མ་བཟུང་བའི་ཐབས་རྣམས་ཀྱིས། །དམིགས་པས་རིག་པ་ཕུར་ལ་གདབ། །ཅེས་དང་། འདིའི་ཕྱི་མའི་རྒྱུད་ཨཱ་ནནྟའི་འགྱུར་ལས། རླུང་ནི་ཁྲི་ཕྲག་གཉིས་དག་དང་། །བརྒྱ་ཕྲག་བཅུ་དྲུག་དུས་ཞེས་བཤད། །དབུ་མའི་རྩ་ཡི་ནང་དུ་ནི། །དེ་བསྡུས་པས་ནི་དུས་ཞེས་བཤད། །ཅེས་སོ། །དེ་ཡང་ཐུན་བརྒྱད་དང་། དེ་རེ་རེ་ལ་གསུམ་དུ་ཕྱེ་བས་ཉེར་བཞི་དང་། དེ་དག་ལ་འབྱུང་བཞི་རིམ་པས་དུས་ཀྱི་ལྷ་མོ་བཞི་བཞི་སྟེ། ལྷ་མོ་དགུ་བཅུ་རྩ་དྲུག་ལ་སོགས་པའི་ཆ་བཟུང་ནས་བརྩི་བར་གསུངས་ཏེ། ཁྲོ་བོ་སྟོབས་ཀྱི་སྒྲུབ་རྒྱུད་ལས། ཐུན་གཅིག་ཐུན་གཉིས་ཐུན་ཕྲན་དང་། །དབྱུག་གུ་ལྷ་མོའི་ནུས་པ་གང་། །ནུས་པས་དབུགས་བགྲང་གྲངས་བཟུང་ནས། །ངལ་བ་མེད་པར་དབུགས་ལ་བརྟེན། །ཞེས་དང་། ཡང་། གཡས་པར་མེ་རླུང་དམར་ཞིང་འཚེར། །གཡོན་པ་རླུང་འབྱུང་གནག་ལ་དྭངས། །གཉིས་ཀར་དཀྱིལ་རྒྱུ་ཆུ་རླུང་དཀར། །གཉིས་ཀར་མཐུར་རྔུབ་ས་རླུང་སེར། །ལྷ་མོ་བདག་པོ་དང་ལྡན་པའི། །ཡེ་ཤེས་བཞི་ཉིད་འབྱུང་བར་བྱེད། །ཅེས་སོ། །རྒྱུད་གཞན་ལས། སྣ་གཉིས་
ཀྱི་དབུས་ནས་མཁའ་རླུང་དང་། སྟེང་ངོས་ནས་རླུང་། གཤོག་པ་ནས་མེ། ཀ་བའི་ངོས་གཉིས་ནས་ཆུ། འོག་གི་ཆ་ནས་ས་རླུང་སྟེ། ཕྱོགས་བཞི་དབུས་དང་བཅས་པ་ལས་འབྱུང་ལྔའི་རླུང་འབབ་པར་བཤད་དོ། །དེ་དག་ནི་ཕྱི་བྱང་ཆུབ་སེམས་ཀྱི་དཀྱིལ་འཁོར་ཏེ། རྩ་རླུང་ཐམས་ཅད་ཀྱི་བསྐྱེད་སྡུད་ཀྱི་གནས་སྙིང་གའི་རྩ་རླུང་གི་དྭངས་མ་ནི་དཀྱིལ་དང་། ཡན་ལག་གི་རྩ་རླུང་རྣམས་ནི་འཁོར་རོ། །གཉིས་པ་ནང་བྱང་སེམས་ཀྱི་དཀྱིལ་འཁོར་ལ། ཡེ་ཤེས་ཀྱི་དང་། རྣམ་ཤེས་ཀྱི་ཐིག་ལེའོ། །དང་པོ་ནི། ཐིག་ལེ་ཐམས་ཅད་ཀྱི་རྩ་བ་རྒྱུ་རྒྱུད་ཀྱི་རྟེན་དུ་གྱུར་པ་ཡེ་ཤེས་སྙིང་པོའི་ཐིག་ལེའམ་མི་ཤིགས་པའི་ཐིག་ལེ་ཞེས་བཤད་པ་གང་ཡིན་པ་སྟེ། སྟོང་གསལ་འགག་མེད་ཀྱི་ངོ་བོར་བཞུགས་པའོ། །གཉིས་པ་ལ། རྒྱུད་གཞན་གྱི་ལུགས་ཀྱིས་གོ་དོན་སྤྱིར་བསྟན་པ་དང་། རྒྱུད་འདིའི་དགོས་ཆོས་ཀྱི་ངེས་པ་བཤད་པ་གཉིས། དང་པོ་ནི། རླུང་སྔགས་རྫས་ཀྱི་ཐིག་ལེ་གསུམ་གསུངས་ཏེ།སྙིང་གའི་མི་ཤིགས་པའི་ཐིག་ལེའི་ངེས་པས། རླུང་གི་བྱེད་བཅིངས་ལས་གཟུང་འཛིན་གྱི་སྣང་བ་རང་གྲོལ་དུ་གྱུར་པ་ནི་རླུང་ཐིག །སྣ་རྩེར་ཐིག་ལེ་ལ་ལྷའི་མཚན་མ་བསྒོམས་པས་ཐ་མལ་གྱི་སྣང་ཞེན་ལས་ཡིད་སྐྱོབ་པའི་ཕྱིར་སྔགས་ཐིག །འོག་གི་སྣ་རྩེར་ཐིག་ལེ་བསྒོམ་པ་ལས་བདེ་བ་འཆར་བ་སོགས་རྫས་ཐིག་གོ། །དེའང་ཕྱི་མ་ཅུང་ཟད་བཤད་ན། ཁམས་དཀར་དམར་གཉིས་ལས་དྭངས་སྙིགས་གཉིས་སུ་གྱུར་ཏེ། སྤྱི་བོར་ཕ་ལས་ཐོབ་པའི་དཀར་ཆ་ཧཾ་གི་རང་བཞིན་དང་། ལྟེ་འོག་རྩ་གསུམ་འདུས་མདོར་མ་ལས་ཐོབ་པའི་དམར་ཆ་ཨ་ཐུང་གི་རང་བཞིན་ཏེ། ལུས་ཀྱི་དཀར་ཆ་དང་དམར་ཆ་ཐམས་ཅད་ཀྱི་བདག་པོར་གྱུར་པ། དབུ་མའི་ཆ་ལ་བརྟེན་པ། རྣམ་ཤེས་ཀྱི་རྟེན་བྱེད་པའོ། །དེ་ལས་ཀྱང་དྭངས་སྙིགས་གཉིས་སུ་འགྱུར་ཏེ། མངལ་དུ་མའི་རྩ་དང་འདྲེལ་པས་བསྐྱེད་ཅིང་། བཙས་ནས་བཟའ་བཏུང་རྣམས་འཕོ་བར་བད་ཀན་གྱིས་མྱགས་པར་བྱེད། མཁྲིས་པས་མདོག་འགྱུར། རླུང་མེ་མཉམ་སྟེ་མེ་དྲོད་
གསུམ་གྱིས་སྦར་བཞུ་མྱགས་པར་བྱས་པས།དྭངས་མ་མཆིན་པར་ཁྲག་ཏུ་གྱུར་ཏེ། རྩ་ལ་བརྒྱུད་ནས། དེ་ཤ །རིམ་པར་ཚིལ། རུས། རྐང་། བྱང་སེམས། དེས་སྟོབས་དང་མདངས་སུ་འགྱུར་ལ། དེ་རྣམས་ཀྱི་སྙིགས་མ་ནི་རིམ་བཞིན་དུ། དྲི་ཆེན་དང་། མཁྲིས་པ་དང་།པགས་པ་དང་། རྨེན་བུ་དང་། སོ་སེན་དང་། སྦུབས་ཀྱི་དྲི་མ་མཆིལ་སྣབས་ལ་སོགས་པ་དང་། དགའ་བའི་མཐར་འཛག་པ་སྟེ། ལུས་ཟུངས་བདུན་ཞེས་གྲགས་ཤིང་། དེ་དག་གི་རྣམ་དབྱེ་ཡང་། སྤྱི་བོ་མི་ཕྱེད་མ་ནས་སོ་སེན་འབབ་པ་སོགས་ཁམས་ཉི་ཤུ་རྩ་བཞི། དེ་རེ་རེ་ལའང་ཐིམ་ལོངས་བདག་པོ་གསུམ་དུ་ཕྱེ་བས་ཁམས་བདུན་ཅུ་རྩ་གཉིས། དེ་སྟོང་གིས་ཕྱེ་བས་སྟོང་ཕྲག་བདུན་ཅུ་རྩ་གཉིས། དེ་སྟོང་གིས་ཕྱེ་བས་བྱེ་བ་ཕྲག་བདུན་ཅུ་རྩ་གཉིས་སོགས་རྩ་ཇི་སྙེད་པར་རླུང་། རླུང་ཇི་སྙེད་པར་ཐིག་ལེས་ཁྱབ་པར་གསུངས་སོ། །རྣལ་འབྱོར་མའི་རྒྱུད་ལས་ཁམས་ཉེར་བཞིའི་སྟེང་དུ་རྩའི་གཙོ་མོ་གསུམ་དང་། སུམ་སྒྲིལ་མ་ལ་སོགས་ཏེ་ལྔ་བསྣན་ནས་སོ་གཉིས་སུ་གསུངས་ཏེ། ཧེ་རུ་ཀ་གལ་པོ་ལས། ལུས་ལ་བྱང་ཆུབ་སེམས་རྒྱུ་བའི། །རྩ་ནི་སུམ་ཅུ་རྩ་གཉིས་ཏེ། །ཞེས་སོ། །དེའི་སྟེང་དུ་རྩ་བའི་རླུང་ལྔ་རྒྱུ་བའི་སྲོག་ཆེན་པོ་མ་གཏོགས་པའི་བཞི་བསྣན་ནས་སུམ་ཅུ་རྩ་དྲུག་ཏུ་བཤད་པའང་སྣང་ངོ་། །དེ་དག་ཀྱང་འཁོར་ལོ་བཞིར་དགའ་བཞིའི་འགྲོས་ཀྱིས་ཡེ་ཤེས་དང་རྗེས་སུ་འདྲེལ་པར་འཕོ་བ་དང་། ལུས་ལ་ཟུངས་སམ་ནུས་པའམ་གནད་ཀྱི་ངོ་བོ་ཉིད་ཏུ་རྣམ་ཤེས་དང་རྗེས་སུ་འདྲེལ་པར་འཕོ་བ་བླ་གནས་ཞེས་གྲགས་པ་དག་སྟེ་གོ་དོན་སྤྱིར་བཤད་པའོ། །གཉིས་པ་ནི། རྒྱུད་འདིར་ཡང་། རླུང་སྔགས་རྫས་ཀྱི་ཐིག་ལེ་གསུམ་དོན་ལ་ཚང་མོད་ཀྱི། འོན་ཀྱང་ཐ་སྙད་འདྲེལ་ཆགས་སུ་གསུངས་པ་མི་སྣང་ངོ་། །དེས་ན་འདིར་ཐིག་ལེ་འཆིང་བའི་གཉེན་པོའི་མན་ངག་དང་འདྲེལ་པར་ཆེ་ལོང་ཙམ་གསུངས་པ་ལས་ཁྱད་པར་གྱི་དགོས་ཆོས་དག་འཆད་པར་འདོད་དོ། །དེ་ཡང་སྙིང་ལྟེ་མགྲིན་པ་སྤྱི་བོའི་ཐིག་ལེ་བཞི་
ལས། ཐོག་མར་ཡེ་ཤེས་ཀྱི་ཐིག་ལེའི་ངེས་པ་ལས་སྙིང་གར་དྭངས་མ་ལྔའི་དབུས་ན་ཡེ་ཤེས་སྙིང་པོའི་ཐིག་ལེ་ཡི་གེ་ཝཾ་གྱི་རང་བཞིན་དུ་བཞུགས་པ་ལྟར་བསྒོམ་པའོ། །དྭངས་མ་ལྔ་གང་ཞེ་ན། དབང་གི་གལ་པོ་ལས། རྩ་བཞི་འོད་བཞི་ས་བོན་དྲུག །མདོར་བསྡུས་སྙིང་པོ་ཆོས་ཀྱི་སྐུ། །ཞེས་པའི་རྩ་བཞི་ནི་གསང་ཐིག་གི་འགྲེལ་པ་ལས། གསུམ་ཆོས་ཉིད་ཀྱི་རྩ། གཅིག་ཡེ་ཤེས་ཀྱི་རྩ། གསུམ་རང་རྒྱུད་ཀྱི་རྩ། གཅིག་ཡོན་ཏན་གྱི་རྩ། དེ་ལྟར་བརྒྱད་དུ་ཤེས་པར་བྱའོ། །ཞེས་སྙིང་དབུས་ཀྱི་རྩ་བརྒྱད་པོ་རྩ་བཞིར་འདུ་ཞིང་། དེ་དག་འོད་བཞི་དང་དབྱིབས་བཞིར་གནས་པ་ལ། རྣམ་ཤེས་ཚོགས་བརྒྱད་དང་། སྦྱང་བྱ་རིགས་དྲུག་གི་ཡི་གེ་སྦྱོང་བྱེད་འབྲུ་གསུམ་གྱིས་མནན་ནས་གནས་པར་བཤད་དེ། དཔེ་ཆུང་རང་གནས་ལས། ཆོས་ཉིད་ལྷ་མིན་དུད་འགྲོ་ཟླུམ། །ཀུན་གཞི་ཨོཾ་གི་སྙིང་པོར་ལྡན། །ཡེ་ཤེས་ལྷ་མི་གྲུ་བཞི་ཡིད། །སྙིང་པོ་ཧཱུཾ་ནི་བདེ་གཤེགས་ཐུགས། །ཡོན་ཏན་དམྱལ་བ་ཡི་དྭགས་ཨཱཿ། །ཟླ་གམ་གསུང་གི་རང་བཞིན་ཡིན། །དམར་ནག་གདོང་ལ་ལྐོག་ཞོལ་དབྱིབས། །དེ་ནི་བླུན་རྨུགས་སྣོད་ཡིན་ཏེ། །ཤེས་པ་གསུམ་ལ་སྙོམས་པར་འགེབས། །དྲག་པོ་ཉིད་དུའང་བཤད་པར་བྱ། །ཞེས་དང་། དེའི་འགྲེལ་པར། ཆོས་ཉིད་ཡེ་ཤེས་ཡོན་ཏན་དང་། །རང་རྒྱུད་བཞི་ལ་ཡན་ལག་བརྒྱད། །ཅེས་པས་དང་པོ་མདུན་ན་ཡོད་དེ། སྐྱེ་བ་མེད་པར་རང་སྣང་བའི་ལས་བྱེད་དོ། །གཉིས་པ་གཡས་ན་ཡོད་དེ། ཡེ་ཤེས་འཆར་བའི་ལས་བྱེད་དོ། །གསུམ་པ་གཡོན་ན་ཡོད་དེ། དེས་མངོན་པར་ཤེས་པ་དང་། འབྲས་བུ་རྣམས་སྣང་བར་བྱེད་དོ། །བཞི་པ་རྒྱབ་ན་ཡོད་དེ། ཤེས་པ་རྣམས་རྨོངས་ཤིང་འཇོམས་པའི་ལས་བྱེད་དོ། །ཞེས་དང་། འོད་བཞིའང་དབྱིབས་དང་བསྟུན་ནས་རིམ་པར་སྦྱོར་ཏེ། དེ་ལས། འོད་དཀར་པོ་ཟླུམ་པོ་དང་། མཐིང་ག་གྲུ་བཞི་དང་། དམར་པོ་ཟླ་གམ་དང་། དམར་ནག་གྲུ་གསུམ། ཞེས་སོ། །རྩ་བཞིའི་དབུས་ན་འབྱུང་བ་ས་ཆུ་རླུང་མེ་མཁའ་ལྔའི་དྭངས་མ་རྩ་ཁྲག་དབུགས་དྲོད་འོད་ཀྱི་རྣམ་པར་གནས་ཏེ། དཔེ་ཆུང་
ལས། དར་བཀུད་མཚལ་ཁུ་གསེར་གྱི་རླངས། །ཉི་ལྡན་མེ་ལོང་ངད་དག་ནི། །འབྱུང་བ་བཞི་ཡི་དྭངས་མ་སྟེ། །བདེ་བའི་དྭངས་མ་ནམ་མཁའི་ཁམས། །ཞེས་སོ། །དེ་ལྟར་དྭངས་མ་ལྔ་འདུས་ཀྱི་དབུས་ན་ཡེ་ཤེས་སྙིང་པོའི་ཐིག་ལེ་ཡེ་ནས་གནས་པ་དེ། ཡུམ་ལྔ་སྐུ་ལྔ་ཡེ་ཤེས་ལྔའི་ངོ་བོར་ཡེ་ནས་རང་ཆས་སུ་ལྡན་པའོ། །དེའང་གསལ་སྒྲོན་མི་འཇིགས་ཕྲེང་བ་ལས། དེ་དབུས་སྤྲོས་མེད་ཐིག་ལེ་ནི། །ངོ་བོ་ཉིད་སྐུ་དེ་ཚུལ་ནི། །གསེར་སྦུབས་རིན་ཆེན་ཟེའུ་བཅུག་ལྟར། །ཕྱི་ནང་མེད་གསལ་རང་བྱུང་སྟེ། །ཞེས་གསུངས་སོ། །ཡང་ལྟེ་བའི་རྩ་འདབ་རེ་བཞིའི་དབུས་ན་དབྱིངས་ཕྱུག་ལྔའི་ཐིག་ལེ་ཞེས་བྱ་བ་ཀུན་ཏུ་བཟང་མོའི་རང་བཞིན་ཡི་གེ་ཨའི་རྣམ་པར་བཞུགས་ཏེ། གསང་ཐིག་ལས། གསང་བའི་ཤེས་རབ་ཐིག་ལེའི་དབྱིངས། །བཅུ་དྲུག་བཞི་ཡི་དཀྱིལ་ན་བཞུགས། །ཞེས་སོ། །མགྲིན་པའི་འཁོར་ལོའི་དབུས་ན་མཁའ་འགྲོ་མ་རྔམ་མ་ཞེས་བྱ་བ་ཡི་གེ་ཨཾ་གྱི་དབྱིབས་སུ་གནས་པ་སྟེ། དབང་གི་གལ་པོའི་རང་འགྲེལ་ལས། རང་བཞིན་གྱི་མཁའ་འགྲོ་མ་རྔམ་མ་ཞེས་བྱ་སྟེ། ཅིར་ཡང་གནས་པ་མེད་པར་ལོངས་སྤྱོད་ཐམས་ཅད་ལ་རོལ་པ་ནི་ལྕེ་སྟེ། ཕྱི་ནང་ཀུན་བརྡའ་སྤྲོད་པར་བྱེད་པས་ཁྱབ་མ་ཞེས་ཀྱང་གསུངས་སོ། །ཞེས་སོ། །སྤྱི་བོའི་འཁོར་ལོའི་དབུས་ན་ཀུན་ཏུ་བཟང་པོའི་ཐིག་ལེ་ཧཾ་ཡིག་དཀར་པོ་མགོ་མཐུར་བསྟན་གྱིས་གནས་པ་སྟེ། ཐལ་རྒྱུད་ལས། མི་འགྱུར་བརྟན་པའི་ཐིག་ལེ་ཉིད། །ཧཾ་ཡིག་སྙིང་པོ་བྱང་ཆུབ་སེམས། །ཞེས་སོ། །ལྟེ་འོག་ན་གཏུམ་མོ་མེའི་རང་བཞིན་རཾ་དང་། སྦར་བྱེད་རླུང་འཁོར་ལ་ཡཾ་ཡིག་དང་བཅས་པའོ། །ཁྱད་པར་ཁོག་གཞུང་ལས། ཟབ་ཕྱིར་བྱང་སེམས་དཀྱིལ་འཁོར་ནི། །ཞེས་སོགས་ནས། ངོ་བོ་གསང་བའི་ཁམས་གསུམ་མོ། །ཞེས་པའི་བར་དང་། རྡོ་རྗེ་ལས་རིམ་ལས།བཅོ་བརྒྱད་ཁམས་གསུམ་སྙིང་པོ་ཉིད། །ཞེས་པས་ཁམས་བཅོ་བརྒྱད་དང་།གསང་བའི་ཁམས་གསུམ་སྟེ་ཉི་ཤུ་རྩ་གཅིག་གོ། །དང་པོ་ནི། རྒྱུད་ཕྱི་མ་ལས། ཡུལ་དང་དབང་པོ་རྣམ་པར་ཤེས། །ཐམས་ཅད་གསུམ་དྲུག་འདྲ་དུ་ཕྱེ་བ་ཡིས། །ཁམས་ནི་བཅོ་བརྒྱད་དག་ཏུ་བཤད། །
ཅེས་སོ། །གཉིས་པ་ནི། ཡབ་ཡུམ་གྱི་གསང་བའི་སྙིང་པོ་དང་། གཉིས་སུ་མེད་པའི་ལྷག་པ་བྱང་ཆུབ་ཀྱི་སེམས་གསུམ་ནི། འཁོར་འདས་ཀྱི་ཆོས་ཀུན་གྱི་གཞིར་ལྡན་ཏེ། དེ་ཡང་ཟག་པ་དང་བཅས་པའི་སེམས་ནི་ལུས་ཀྱི་ས་བོན་ཅན་ཡིན་ལ། ལུས་ཀྱི་ཟག་པ་ས་བོན་བྱང་ཆུབ་ཀྱི་སེམས་ཡིན་ཏེ། དེའི་ཕྱིར་ཁུ་བའི་ཟག་པ་དང་བྲལ་བའི་ཉོན་མོངས་པའི་ཟག་པ་ཅན་ནི་མི་སྲིད་སྟེ། གཟུགས་མེད་ཀྱི་ཁམས་ནའང་། འབྱུང་ཆེན་ལྔ་དང་འདོད་ཡོན་ལྔའི་ཟག་པའི་ནང་ནས། སྟོང་པ་དང་སྒྲའི་ཟག་པ་གཉིས་མངོན་གྱུར་དང་།ལྷག་རྣམས་ས་བོན་དུ་ཡོད་པར་བཤད་པའི་འཁོར་བའི་གཞི་དང་། ཟག་མེད་ཀྱི་ཆོས་ནི། གཉིས་མེད་ཀྱི་ཡེ་ཤེས་སྐྱེ་བའི་གཞིར་གྱུར་པས་འདས་ཆོས་ཀྱི་ཡོན་ཏན་ཐམས་ཅད་རྫོགས་སུ་རུང་བའི་ཕྱིར་རོ། །དེའང་སྤྱན་འགྲེལ་ལས། གསང་སྔགས་ཕྱི་པ་གསུམ་དང་། བསྟན་བཅོས་ཀྱི་གཙུག་ལག་ལས་ཡུལ་དབང་པོ་ཤེས་པ་དྲུག་གསུམ་བཅོ་བརྒྱད་དུ་བསྟན་ནས་ཆེ་བ་འདོན་པའི་ཕྱིར་གཏན་ཚིགས་གཉིས་ཀྱིས་ཁམས་ཉི་ཤུ་རྩ་གཅིག་ཏུ་བསྟན་པ་ནི། གསང་བའི་གསུམ་བསྣན་པའོ། །ཞེས་དང་བཅོ་བརྒྱད་ཀྱི་རྩ་བ་ཕྱག་རྒྱའི་ཡོན་ཏན་རིལ་དང་བར་བྱེད་པའི་རྟེན་གྱི་ལས་ཅན་རྡོ་རྗེ་དང་། ཡོན་ཏན་གྱི་ཚོགས་དང་ལྡན་པའི་པདྨ་དང་། རླུང་གི་ཐབས་མཉམ་དུ་གྱུར་པ་ལས་སྐྱེས་པའི་ཡེ་ཤེས་ནི། རྟེན་དང་བརྟེན་ཅན་གྱི་སྒོ་ནས་ནང་དང་གསང་བའི་བྱང་ཆུབ་སེམས་ཀྱི་དཀྱིལ་འཁོར་ཏེ། ཞེས་སོ། །དེ་དག་ལ་ནང་བྱང་སེམས་ཀྱི་དཀྱིལ་འཁོར་ཞེས་གྲགས་ཏེ། སྔར་ཕྱིའི་སྐབས་སུ་བཤད་པ་ལྟར་དང་། ཁམས་གསུམ་སྙིང་པོ་དང་བཅོ་བརྒྱད་འཁོར་དུ་ལས་རིམ་ལས་གསུངས་སོ། །གསུམ་པ་གསང་བ་བྱང་སེམས་བདེ་བའི་ཡེ་ཤེས་ཀྱི་དཀྱིལ་འཁོར་ནི། སྟེང་སྒོ་འཁོར་ལོ་འཇུ་འདུལ་དང་། འོག་སྒོ་ཐིག་ལེ་དྲོད་དབབ་ཀྱི་གནད་ཀྱིས་འཕོ་མེད་དུ་བཅིངས་པ་ལས་བདེ་བའི་ཡེ་ཤེས་ཉམས་སུ་མྱོང་བའོ། །དེ་ཡང་དགྱེས་པ་རྡོ་རྗེ་ལས། དཀྱིལ་ནི་སྙིང་པོ་ཞེས་བརྗོད་དེ། །བྱང་ཆུབ་སེམས་ནི་བདེ་ཆེན་ནོ། །ལེན་པར་བྱེད་པས་དཀྱིལ་འཁོར་ཉིད། །འདུས་པ་དཀྱིལ་འཁོར་
ཉིད་དུ་བརྗོད། །ཅེས་གསུངས་པ་ལྟར་རོ། །བདུན་པ་ཚོམ་བུ་ཚོགས་ཀྱི་དཀྱིལ་འཁོར་ནི། གང་ཞིག་རྟེན་དང་གང་ཟག་དང་ཡོ་བྱད་ཁྱད་པར་ཅན་ཚོགས་པ་སྟེ། ཁོག་གཞུང་ལས། ཚོགས་ནི་འབྱོར་པ་རྣམ་པ་གསུམ། །ཚོམ་བུ་གཅིག་གསུམ་ལྔ་པའོ། །དེ་རེ་རེའང་སྐབས་ཀྱིས་གསུམ་གསུམ་སྟེ།སྐལ་ལྡན་མི་དང་དགྱེས་ལྡན་ལྷ། །འབྱོར་ལྡན་ཡོ་བྱད་ལྔ་སོགས་སོ། །ཞེས་པས་དབྱེ་ན་སྐལ་ལྡན་མིའི། འབྱོར་ལྡན་ཡོ་བྱད་ཀྱི། དགྱེས་ལྡན་ལྷའི་ཚོགས་གསུམ་གྱི་སྟེང་དུ་ཚོགས་ཆེན་པོ་བསྣན་པས་བཞིའོ། །དང་པོ་ནི། གང་ཐབས་ཤེས་ཟུང་དུ་འདྲེལ་པའི་སྐྱེ་བོ་དམ་པ་འདུས་པ་སྟེ། བཤད་རྒྱུད་རྡོ་རྗེ་ལས། སྐྱེ་བོ་མཛའ་བ་ཀུན་ཚོགས་པ། །རྣལ་འབྱོར་འདུས་པའི་ཚོགས་ཞེས་བྱ། །ཞེས་སོ། །གཉིས་པ་ནི། ཁྱད་པར་གྱི་ཡོ་བྱད་ལྔ་ལ་སོགས་པ་ཚོགས་པ་སྟེ། དེ་ལས།རྣལ་འབྱོར་ཡོ་བྱད་ཚང་བས་ན། །བདེ་བ་ལོངས་སྤྱོད་ཚོགས་སུ་བཤད། །ཅེས་སོ། །གསུམ་པ་ནི། རྟེན་དང་བརྟེན་པར་བཅས་པའི་ཡེ་ཤེས་ཀྱི་དཀྱིལ་འཁོར་སྲུང་མ་དང་བཅས་པ། དངོས་གྲུབ་ཀྱི་རྟེན་དུ་གཟུགས་བརྙན་བཀོད་ཅིང་བསྒོམ་པ་ལ་སོགས་པ་སྟེ། དེ་ལས། ལྷ་དང་དམ་ཅན་ཀུན་འདུས་པ། །འདུས་པ་ཆེན་པོའི་ཚོགས་སུ་བཤད། །ཅེས་སོ། །བཞི་པ་ནི། དེ་དག་ལ་མ་འགགས་པར་སྤྱད་པས་བསོད་ནམས་དང་། སྤྱོད་བཞིན་དུ་མི་དམིགས་པའི་ཤེས་རབ་ཀྱིས་ཟིན་པས་ཡེ་ཤེས་ཀྱི་ཚོགས་རྫོགས་པ་ནི་ཚོགས་ཆེན་པོ་སྟེ། དེ་ལས། ཐམས་ཅད་སྤྱོད་ལ་མི་འཛིན་པ། །ཚོགས་གཉིས་རྒྱུན་དུ་རྫོགས་བྱེད་པས། །ཚོགས་ཆེན་པོ་རུ་ངེས་པར་བཤད། །ཅེས་སོ། །དེ་དག་གི་ལས་ཀྱི་རིམ་པ་ནི། ལས་རིམ་ལས། གཞི་དང་གཞུང་གིས་རྫོགས་པར་འགྱུར། །ཕུན་སུམ་ཚོགས་པ་ལྔ་བཞི་ལ། །བསྙེན་སྒྲུབ་བཞི་ཡི་གཞུང་བསྲང་བའང་། །གང་དག་མོས་པའི་བཞིན་དུ། །ཞི་དང་ཁྲོ་བོས་བསྒྲུབ་པར་བྱ། །ཞེས་པས། ཕུན་སུམ་ཚོགས་པ་ལྔས་སྒྲུབ་པའི་གཞི་བཟུང་བ། བསྙེན་སྒྲུབ་བཞིས་གཞུང་བསྲང་བ། འབྲས་བུ་རིག་འཛིན་འགྲུབ་པའི་དུས་བཤད་པའོ། །དང་པོ་ནི། དེ་ལས།
དེ་ཡང་སྔ་མ་གནས་དང་དུས། །ཡོ་བྱད་སྟོན་འཁོར་སྒྲུབ་པ་པོ། །སྒྲུབ་ཐབས་ཕུན་སུམ་ཚོགས་པ་ཡི། །གཞི་དང་སྦྱར་བས་གཞུང་རྫོགས་བྱ། །ཞེས་པས། གང་དུ་སྒྲུབ་པའི་གནས། གང་གི་ཚེ་སྒྲུབ་པའི་དུས། གང་ལ་བརྟེན་ནས་སྒྲུབ་པའི་ཡོ་བྱད།གང་གིས་སྒྲུབ་པའི་སྒྲུབ་པ་པོ། གང་བསྒྲུབ་པར་བྱ་བའི་ཐབས་ཕུན་སུམ་ཚོགས་པའོ། །དང་པོ་ལ། གནས་བཙལ་བ་དང་། རྙེད་ནས་གནས་ཁང་བཅའ་བའོ། །དང་པོ་ནི། ལམ་རིམ་ལས། སྡེ་དཔུང་ཆེན་པོས་མི་ཚུགས་ཤིང་། །ས་དང་བར་སྣང་ཤིས་པ་དང་། །ལོ་རྒྱུས་རྣམ་གཉིས་ལྡན་པ་ཡི། །ཡིད་འོང་ས་བཙལ་རྒྱས་པར་བྱ། །ཞེས་སོ། །གཉིས་པ་ནི། དེའི་འཕྲོས་ལས། རྙེད་ནས་ཚོམ་བུའི་གྲངས་བཞིན་དུ། །ཆེ་ཆུང་རྐྱེན་དུ་འཚམས་པར་བྱ། །བསྐོར་ཁང་ཕྱི་ནང་བར་ལྡན་པ། །ཞེས་པས། དེར་ཁང་པ་སུམ་ཐོག་ཕྱི་ནང་རིམ་པ་གསུམ་པ་བརྩིགས་པའི་ཕྱིར་གཡོས་སྦྱོར། བར་དུ་སྒྲུབ་ཁང་། ནང་དུ་སྦྱོར་སྒྲོལ་བྱེད་པའོ། །གཉིས་པ་ནི། འདི་ཉིད་ལས། བསྒྲུབ་པའི་ཞག་དང་ཚེས་གྲངས་ནི། །རྒྱུད་ལས་སྨོས་པ་བཞིན་དུ་བཤད། །ཅེས་ཁ་འཕང་སྟེ། དེ་ཡང་སྒྲུབ་པ་ལ་འཇུག་པའི་དུས་ནི། རྒྱས་པ་ལས། ཚེས་གྲངས་ཡར་གྱི་བརྒྱད་ལ་བརྩམ། །ཤིན་ཏུ་སྐར་མ་རྒྱལ་རྣམས་ལ། །བྱང་ཆུབ་སྤྱད་པ་ཆེར་སྤྱོད་པ། །གསང་མཆོག་དངོས་གྲུབ་མྱུར་བའི་ཕྱིར། །གཟའ་སྐར་ཤིས་པ་བླང་བར་བྱ། །ཞེས་དང་། རྔམ་གློག་ལས་ཀྱང་། རིག་བྱེད་དག་གི་ཡན་ལག་ལས། །དུས་རྣམས་ཤེས་པར་བྱ་བ་ནི། །བཀྲ་ཤིས་ལྷ་ཡི་ཉི་མ་དང་། །འབྱོར་དང་དུས་ཚོད་བཟང་བ་ནི། །མཚན་མའི་རྟོག་པ་ཡིན་མོད་ཀྱང་། །བརྟགས་ན་དངོས་གྲུབ་མཚན་མ་འབྱུང་། །ཞེས་སོ། །འབྲས་བུ་འགྲུབ་པའི་དུས་ནི། འདི་ཉིད་ལས། ཞག་ནི་སུམ་ཅུ་ཕྲག་དྲུག་གམ། །ཞེས་སོགས་ཏེ་འོག་ཏུ་སྟོན་ནོ། །འདིར་ཁ་ཅིག་ན་རེ། ཁྱེད་ཀྱི་གསང་བ་སྙིང་པོ་འདི་རྒྱུད་མ་ཡིན་ཏེ། རྒྱུད་ལ་ཁ་འཕངས་པས་སོ་ཟེར། དེ་ལྟར་ན་ཁྱེད་རང་རྒྱུད་དུ་འདོད་པའི་འཇམ་དཔལ་སྒྱུ་དྲ་དང་། དགྱེས་རྡོར་དང་། མཁའ་
འགྲོ་མ་ཀུན་སྤྱོད་ཀྱི་རྒྱུད་ལ་སོགས་པའང་རྒྱུད་མ་ཡིན་པར་འགྱུར་ཏེ། རིམ་པ་ལྟར། རྒྱུད་ཆེན་སྒྱུ་འཕྲུལ་དྲ་བ་ལས། །ཞེས་དང་། ཇི་ལྟར་དེ་ཉིད་བསྡུས་པ་ཡི། །དཀྱིལ་འཁོར་ཆོ་ག་བཞིན་དུ་བྱ། །ཞེས་དང་། རྒྱུད་དུ་སྦས་པ་འདིར་བཤད་བྱ། །ཞེས་རྒྱུད་གཞན་ལ་ཁ་འཕངས་པའི་ཕྱིར་རོ། །གསུམ་པ་ནི། འཚོ་བ་ཟས་ཀྱིས། རྐྱེན་ཟློག་སྨན་གྱི། སྒྲུབ་པ་རྫས་ཀྱི། མཆོད་པ་རྫས་ཀྱི་ཡོ་བྱད་རྣམས་ཚང་བར་བསོག་པ་སྟེ། ལམ་རིམ་ལས། གོས་རྒྱན་བཟའ་བཏུང་གསང་བ་དང་། །སྒྲུབ་པའི་ཡོ་བྱད་ལྔ་རྣམས་དང་། །དཀྱིལ་འཁོར་ཡོ་བྱད་མཆོད་པའི་རྫས། །དངོས་གྲུབ་བརྟེན་དང་བར་ཆད་བཟློག །ཡོ་བྱད་དག་པ་བསྡུ་བྱ་སྟེ། །ཞེས་སོ། །དེ་ཡང་ཡོ་བྱད་ཚོ་གསུམ་དུ་བཅད་དེ། ཆ་གཅིག་གིས་སྔོན་དུ་མཆོད་སྦྱིན་བྱ། ཆ་གཅིག་མཇུག་ཏུ་དགའ་སྟོན་གྱི་ཕྱིར་བཞག །ཆ་གཅིག་རཾ་ཡཾ་ཁཾ་གིས་སྦྱངས་ལ་ཏྲཱཾ་ལས་འདོད་ཡོན་དུ་བྱིན་གྱིས་རློབས་ཏེ་སྒྲུབ་པའི་ཆ་རྐྱེན་དུ་བྱེད་པའོ། །དེའང་སྔ་མའི་འཕྲོས་ལས། ཚོ་གསུམ་བཅད་ལ་བྱིན་གྱིས་རློབས། །ཞེས་སོ། །བཞི་པ་ལ། གང་གིས་སྒྲུབ་པའི་སྟོན་པ་དང་། གང་དུ་ལྷན་ཅིག་ཏུ་སྒྲུབ་པའི་འཁོར་གཉིས། དང་པོ་ནི། ལམ་རིམ་ལས། སྟོན་པ་མཛོད་ལྡན་ཆུ་བོ་རྫོགས། །གཉེར་ལྡན་རྒྱུད་དང་ལས་ལ་མཁས། །མན་ངག་དྲོད་འཆང་བརྒྱད་འཆང་བ། །རྣལ་འབྱོར་མཐར་ལྡན་ཤིན་ཏུ་བསྟེན། །ཞེས་པའི་རང་བཞིན་བརྒྱད་ལྡན་ནོ། །གཉིས་པ་ནི། སྤྱིར་ཡོན་ཏན་དྲུག་དང་ལྡན་པའི་འཁོར་ཏེ། འདི་ཉིད་ལས། སྟོན་པ་སྒོ་གསུམ་གྱིས་མཆོད་བརྩོན་རྟོགས་པ་ནི་ བལྟ་བ་བསྒོམ་པ་གསལ། །དམ་ཚིག་སྔགས་དང་ཕྱག་རྒྱ་རྣམས། །མ་ཉམས་ཤེས་ ཤིང་ཡོ་བྱད་ལྡན། །ཞེས་སོ། །ཁྱད་པར་སློབ་དཔོན་དང་དགོངས་པ་མཉམ་པའི་རྡོ་རྗེ་རྒྱལ་ཚབ་དང་། སྐད་གདངས་ཆེ་ཞིང་ལས་ཁྲིགས་མཁས་པའི་རྡོ་རྗེ་ལས་མཁན་དང་། སྦྱོར་བའི་སྒྱུ་རྩལ་ཤེས་པའི་ལས་བཞིའི་གཟུངས་མ་དང་།མི་མ་ཡིན་མཐོང་བའི་མིག་རྣོན་གྱིས་ཉུལ་ལེ་མ་ཤེས་ཤིང་བཟློག་ནུས་པའི་རྡོ་རྗེ་སྤྱན་པ་དང་། དྲོད་འཛིན་པའི་རྡོ་རྗེ་བྱ་རོག་དང་། སྒྲོལ་
བའི་ལས་ལ་མཁས་པའི་ཀིཾ་ཀ་ར་དང་། གཡོས་ལ་མཁས་པའི་བྱན་པོ་དང་། ཕྱི་ནང་གི་བརྡ་སྦྱོར་མཁས་པའི་རྡུལ་ཕྱགས་སྐྱེས་བུ་སོགས་ཚོམ་བུར་འདྲེལ་པའི་འཁོར་ཕུན་སུམ་ཚོགས་པ་སྟེ། ལམ་རིམ་ལས། རྒྱལ་ཚབ་རྒྱལ་པོར་མཚུངས་པ་དང་། །ཀརྨ་གདངས་ཆེན་ཕྲེང་བར་ལྡན། །ལྗོན་ལྕུག་སྡོང་གཅིག་མེས་ཀྱང་རེག་མཚན་རྫོགས་དང་། །རྣལ་འབྱོར་མིང་སྲིང་བརྩེ་གདུང་ལྡན། །ཚོམ་བུ་ལྔའམ་ཟུང་གིས་སྒྲུབ། །ཅེས་དང་། ཚོགས་ཀྱིས་འཁོར་ལོ་ཐུགས་ཀྱི་སྒྲུབ་པ་ལས། མདོར་ན་ཚབ་ཀར་ཕྱག་རྒྱ་དང་། །ཉུལ་དང་བྱ་རོག་སྤྱན་པ་དང་། །རྡུལ་ཕྱགས་ལ་སོགས་ཡོན་ཏན་ལྡན། །ཞེས་སོ། །སྤྱིར་ཇི་ཙམ་འཚོགས་པའི་ཚད་ནི། རྣལ་འབྱོར་པ་ལྷ་གྲངས་དང་མཐུན་པར་འདུ་ནའང་། གྲངས་གཅིག་ཏུ་མ་ངེས་ཏེ། གསང་རྒྱུད་ལས། འདུས་པ་ཆུང་ལ་གཉིས་དྲུག་བཅུ། །འབྲིང་ལ་དཀྱིལ་འཁོར་གྲངས་ཡིན་ཏེ། །ཆེན་པོ་རབ་ཏུ་མང་པོའོ། །ཞེས་པས་འདུས་པ་ཆུང་ངུའི་ཚེ་ཚོམ་བུ་གཅིག་གསུམ་ལྔ་པའི་གཙོ་བོ་ཡབ་ཡུམ་ཙམ་འཚོགས་པ་སྟེ། གཉིས་དང་། དྲུག་དང་། བཅུ་ཚང་བའོ། །འབྲིང་ལ་ལྷ་གྲངས་དང་མཉམ་པ་སྟེ། བཅོ་བརྒྱད་དང་། ཞེ་བཞིའི་སྒོ་ནས་སྒྲུབ་པའི་ཐབས་ཕུན་སུམ་ཚོགས་པ་ཤེས་པར་བྱའོ། །དེས་ན་སྒྲུབ་པའི་མཐུན་རྐྱེན་གྱི་ཡན་ལག་ཐམས་ཅད་ཚོགས་པར་བྱས་ནས་བསྒྲུབས་ན་གདོན་མི་ཟ་བར་འགྲུབ་པ་ཉིད་དེ། འདི་ཉིད་ལས། གནས་དང་ལོངས་སྤྱོད་ཅི་བདེ་དང་། །མ་ཉམས་བློ་ནི་རབ་ལྡན་པས། །དང་པོར་དམ་ནོས་བཞིན་དུ་བྱ། །ལེ་ལོ་སྒྱིད་སྙོམས་མེད་པ་ཡིས། །ཐེ་ཚོམ་མེད་པར་བསྒྲུབ་བྱས་ན། །དཀྱིལ་འཁོར་ཐམས་ཅད་འགྲུབ་པར་འགྱུར། །རྡོ་རྗེ་གསང་མཆོག་དམ་པ་ཐོབ། །ཅེས་གསུངས་པའི་ཕྱིར་རོ། །གཉིས་པ་བསྙེན་སྒྲུབ་བཞིས་གཞུང་བསྲང་བ་ནི།
བསྙེན་པ་དང་ནི་ཉེ་བསྙེན་དང་། །སྒྲུབ་པ་དང་ནི་སྒྲུབ་ཆེན་པོ། །ཞེས་པའི་སྐབས་སུ། སྤྱིར་ལམ་རིམ་ལས། འདི་ཡང་ལམ་སྒྲུབ་སྦྱོར་བ་ཡི། །ཞེས་པས། ལམ་གྱི་དུས་ཀྱི། སྦྱོར་བའི་དུས་ཀྱི། བསྒྲུབ་པའི་དུས་ཀྱི་བསྙེན་བསྒྲུབ་ཡན་ལག་བཞིའོ། །དང་པོ་ནི། ལྟ་བ་རྟོགས་ནས་སྟོང་ཆེན་དང་ཀུན་ཏིང་ལ་གནས་པ་ནི་བསྙེན་པ། ཕྱག་རྒྱ་གཅིག་སྤྲོས་ནི་ཉེ་བསྙེན། ཡོ་བྱད་ལྔས་ཚོགས་སྒྲུབ་པ་ནི་སྒྲུབ་པ། དེ་འབྲས་ཟག་མེད་ཀྱི་རིག་འཛིན་ཐོབ་མ་རེག་པ་ནི་སྒྲུབ་ཆེན་ཏེ། ལམ་རིམ་ལས། བྱང་ཆུབ་སེམས་རྟོགས་འགྲུབ་པ་ནི། །བསྙེན་པའི་དམ་པ་ཡིན་པའི་ཕྱིར། །སེམས་ཆས་སྙིང་རྗེ་མན་ཆད་དོ། །ཕྱག་རྒྱ་གསལ་བ་ཉེ་བསྙེན་པ། །དེ་ཕྱིར་གཅིག་དང་སྤྲོས་པའོ། །སྒྲུབ་པ་ཉིད་ནི་བར་ཆད་མེད། །དུས་ཀྱི་ཚོགས་མཐས་སྒྲུབ་ཆེན་ལེན། །ཞེས་སོ། །གཉིས་པ་ནི། ཡུམ་བཙལ་ཏེ་ཆས་སུ་བཅུག་པ་བསྙེན་པ།དེ་བྱིན་གྱིས་རློབ་པ་ནི་ཉེ་བསྙེན། རོལ་ནས་དབབ་བཟུང་གི་དགོངས་པ་ནི་སྒྲུབ་པ། ཉི་ཟླ་རྡོ་རྗེའི་ལྕེས་ལོན་ཏེ་ལྡོག་དགྲམ་གྱི་དགོངས་པ་ནི་སྒྲུབ་ཆེན་ཏེ་ལག་ལེན་སྦྱོར་མཆོད་བཞིན་ནོ། །དེའང་ལམ་རིམ་ལས། གསུམ་པ་མཆོད་པའི་སྐབས་བཞིན་ཤེས། །ཞེས་སོ། །གསུམ་པ་ནི། ཟླ་བ་གཅིག་ལ་སྒྲུབ་པ་རྫོགས་པ་མ་ཡིན་པས་ཟླ་དྲུག་ལ་སོགས་པ་ཇི་ཙམ་བྱེད་པ་ལ་ཆ་བརྩི་བ་ཡིན་མོད་ཀྱི། འོན་ཀྱང་འདིར་ཟླ་བ་གཅིག་ལྟ་བུ་ལ་དཔེར་བྱས་ཏེ་བརྩི་ན། དེ་ལས། ཟླ་ཕྱེད་ཕྱེད་ཞལ་ཉེ་བསྙེན་པ། །ལྷ་གསལ་འཕྲོ་འདུས་སྣོད་དུ་རུང་། །བཅོ་ལྔ་མར་ཕྱེད་སྒྲུབ་པ་སྟེ། །འཕྲོ་འདུ་བསྣོལ་མས་བསྒྲུབ་པར་བྱ། །ཞག་གྲངས་ཚང་ནས་རྟགས་བྱུང་ན། །དངོས་གྲུབ་བཟླས་བླང་སྒྲུབ་ཆེན་པོ། །ཞེས་པས་ཆ་རྐྱེན་རྣམས་ཚོགས་ནས་སྒྲུབ་པ་ལ་འཇུག་པར་མ་ཐོགས་པ་ནི་བསྙེན་པ། ཞུགས་ནས་ཟླ་བ་ཕྱེད་ཡན་ཆད་ནི་ཉེ་བསྙེན། ཐ་མའི་ཞག་གཅིག་མ་གཏོགས་པའི་ཕྱེད་མན་ཆད་ནི་སྒྲུབ་པ། ནུབ་ཐ་མ་ལ་དངོས་གྲུབ་ལེན་པ་ནི་སྒྲུབ་པ་ཆེན་པོ་སྟེ། སྒྲུབ་བྱང་ལས། རིམ་པ་ཤོམ་དང་འདྲེལ་བའི་ཕྱིར། །བསྙེན་པ་ཞེས་སུ་བརྗོད་པ་ཡིན། །གསང་སྒོར་ཞུགས་ནས་བྱིན་ལྡན་པ། །ཉེ་བའི་བསྙེན་པ་
ཞེས་སུ་བརྗོད། །གང་ཡང་བར་ཆད་མི་གཡེལ་བར། །དམ་པའི་གཞུང་གཉིས་འཛིན་པས་ན། །སྒྲུབ་པ་ཞེས་སུ་བརྗོད་པ་ཡིན། །རྣལ་འབྱོར་དྲོད་ཀྱི་རྩལ་འཆང་བ། །སྒྲུབ་པ་ཆེན་པོར་དེ་བརྗོད་དོ། །ཞེས་སོ། །དེ་ལྟར་ལམ་སྒྲུབ་སྦྱོར་བ་གསུམ་ལས། འདིར་སྒྲུབ་པ་དུས་ཀྱི་བསྙེན་བསྒྲུབ་བཞིའོ། །དེ་ལས། དང་པོ་བསྙེན་པ་ལའང་།སྔོན་དུ་བྱ་བའི་དང་། བྱ་བ་ལས་ཀྱི་བསྙེན་པའོ། དང་པོ་ནི། ཚོགས་བསྒྲུབ་ཀྱི་སྔོན་དུ་ཞི་ཁྲོ་གང་བྱེད་ཀྱི་བསྙེན་པ་བྱེད་པ་སྟེ། འདིར་ལམ་མོས་བསྒོམ་མ་ཡིན་ངེས་རྫོགས་ཡིན་པའི་ཕྱིར། དང་པོར་ལྟ་བ་གཏན་ལ་ཕེབས་པར་བྱས་ནས་ཚོགས་ལམ་གྱི་རྣལ་འབྱོར་བཞི་ལ་བརྟན་པ་ཐོབ་པར་བྱ་དགོས་པ་སྟེ། ལམ་རིམ་ལས།དེ་ལ་སྤྲོས་པ་མཐར་ཕྱིན་པ། །ཆོ་ག་ལྔ་ནི་རྫོགས་བྱས་ཤིང་། །ཡོ་བྱད་ལྔ་ནི་རྫོགས་པར་ལྡན། །སྔགས་ཀྱི་ཡན་ལག་ལྔ་རྫོགས་པའི། །རྣལ་འབྱོར་ཚོགས་པའི་དཀྱིལ་འཁོར་གྱིས། །ངེས་པར་ལེགས་པའི་དགོས་པ་འགྲུབ། །ཅེས་གསུངས་པའི་ཕྱིར་རོ། །དེ་གསུམ་བཤད་ན། སྟོང་ཆེན། སྙིང་རྗེ་སྒྱུ་མ། རྒྱ་གཅིག །སྤྲོས་བཅས། ཚོམ་བུ་གཅིག་གསུམ་ལྔ་པའི་དཀྱིལ་འཁོར་འབྲིང་བསྡུས་གསུམ་གང་རུང་ལ་བརྟན་པ་ཐོབ་པར་བྱ་བ་སྟེ། ཕྱག་རྒྱ་གཅིག་པ་ལ་ཕྲ་རགས་གཉིས་སུ་ཕྱེ་བས་ཆོ་ག་ལྔའོ། །ཡོ་བྱད་ལྔ་ནི། དེ་ལས། དམ་ཚིག་ལྟ་བ་ཏིང་འཛིན་དང་། །བྱང་ཆུབ་སེམས་དང་སྙིང་རྗེ་སྟེ། །ལྷག་པའི་ཡོ་བྱད་ལྔ་རྫོགས་བྱ། །ཞེས་ལམ་གྱི་ཡོ་བྱད་ལྔའམ། ཡང་ན། ཨཱ་ལི་ཀཱ་ལིའི། རྒྱན་དང་བགོ་བའི། བཟའ་དང་བཏུང་བའི། བྲོ་གར་འདུ་འཕྲོའི། གླུ་ཚིག་སྒྲ་སྟེ་སྒྲུབ་པ་རྫས་ཀྱི་ཡོ་བྱད་ལྔའོ། །ཡན་ལག་གི་ལྷ་དགུའི་དབུ་རྒྱན་ནི་རིགས་ཀྱི་བདག་པོ་གཅིག་གིས་བསྡུས་པའི་ཕྱིར་གཅིག་ཏུ་བརྩིས་པས་སྔགས་ཀྱི་ཡན་ལག་ལྔ་སྟེ། སྤར་ཁབ་ལས། ཡིད་སྐྱོབ་པ་དང་བྱིན་གྱིས་རློབ་པའི་ཕྱིར་སྔགས་ཏེ་ལྷའོ། །ཞེས་སོ། །གལ་ཏེ་ཕྱག་རྒྱ་སྤྲོས་བཅས་ལ་བརྟན་པ་ཐོབ་དགོས་པ་ལྟར་ན། གོང་མའི་ཊི་ཀ་རྣམས་སུ། མཁའ་དཀྱིལ་དྭངས་པའི་དབྱིངས་ཉི་ཟླ། །ཞེས་སོགས་ཕྱག་རྒྱ་གཅིག་པ་བསྒོམ་པ་ལ་སྔོན་
དུ་བྱ་བའི་བསྙེན་པར་བཤད་པ་དང་འགལ་ལོ་ཞེ་ན། དེ་ནི་སྤར་ཁབ་ལས།རྫོགས་པའི་ལམ་དང་། ཉེ་བའི་ལྷ་བསྒོམ་པ་རྣམས་ཀྱི་དབང་དུ་གསུངས་ཞེས་པས་བསྐྱེད་རྫོགས་གཉིས་ཀའི་བསྡུས་དོན་ལྟ་བུར་སྟོན་པ་སྟེ། བསྐྱེད་རིམ་ལྟར་ན། ལྷ་ཡབ་ཡུམ་ཟུང་འདྲེལ་དུ་བསྒོམས་པས་སངས་རྒྱས་ཀྱི་དཀྱིལ་འཁོར་ཐམས་ཅད་མ་ལུས་པར་བསྒོམ་པར་འགྱུར་ཏེ་རྒྱལ་བ་ཐམས་ཅད་གཅིག་དང་དུ་མའི་མཐའ་ལས་གྲོལ་བའི་ཕྱིར། དེ་སྐད་དུའང་རྫོགས་ཆེན་གྱི་རྒྱུད་བཀྲ་ཤིས་བརྩེགས་པའི་དཔལ་ལས། བདེ་གཤེགས་གཅིག་བསྒོམས་རྒྱལ་བ་ཀུན་གྱི་ངང་། །ཞེས་སོ། །རྫོགས་རིམ་ལྟར་ན། དབྱིངས་ཡེ་ཟུང་འདྲེལ་དུ་བསྒོམས་པས་རྒྱལ་བའི་དཀྱིལ་འཁོར་མ་ལུས་པ་བསྒོམས་པར་འགྱུར་བ་སྟེ། སངས་རྒྱས་ཐམས་ཅད་ཀྱི་དགོངས་པ་དེར་འདུས་པའི་ཕྱིར། དེའང་དེ་མ་ཐག་པར། དུས་བཞི་ཕྱོགས་བཅུ་གང་ནས་ཀྱང་། །ཞེས་སོགས་རྐང་པ་དྲུག་གསུངས་པའི་ཕྱིར་རོ། །དེས་ན་སྔོན་དུ་བྱ་བའི་བསྙེན་པ་ཁོ་ན་འཆད་བྱེད་ཀྱི་གཞུང་ཡིན་པར་མ་ངེས་ཀྱང་། ཊཱི་ཀ་རྣམས་སུ་སྐབས་འདིར་འཆད་པ་ནི། སྙིང་རྗེ་སྒྱུ་མ་ནས་ཐོད་རྒལ་འབྱུང་མི་སྲིད་པ་ཚོགས་སྒྲུབ་ཀྱི་སྔོན་དུ་ཕྱག་རྒྱ་གཅིག་པ་འགྲོ་བས་ཁྱབ་པའི་ཕྱིར། འཆད་བདེ་བ་ལ་དགོངས་ནས་གོ་རིམ་བསྡེབས་པ་ཡིན་ནམ་སྙམ་དུ་སེམས་ཏེ། སྔ་རབས་པ་དག་གིས་དཔྱད་པ་མ་མཐོང་ངོ་། །གཉིས་པ་བྱ་བ་ལས་ཀྱི་བསྙེན་པ་ནི། ལྔ་དང་ལྔ་ཡི་སྦྱོར་བ་ཡིས། །ཞེས་སོགས་ཀྱིས་བསྟན་པར་བཞེད་དོ། །དེ་ཡང་སྒྲུབ་པ་ཕྱག་བཞེས་ཀྱིས་འཆད་དགོས་པའི་ཕྱིར་འདིར་ལས་ཁྲིགས་ཅུང་ཟད་བཤད་ན། ཧེ་རུ་ཀ་འདུས་པའི་རྒྱུད་ལས། དང་པོ་ས་ཡི་ཆོ་ག་སྟེ། །གཉིས་པ་ལ་ནི་སྟ་གོན་གནས། །གསུམ་པ་འཇུག་པའི་ཆོ་ག་བྱ། །འདི་དག་ཆོ་གར་འདུས་པ་ཡིན། །ཞེས་པས་ཕུན་སུམ་ཚོགས་པ་ལྔ་དང་ལྡན་པའི་སྒྲུབ་པ་པོས། ནུབ་དང་པོར་ས་གཞི་མཉམ་པའི་ཆོ་ག་ལས་ས་བསྲུང་བ་ཡན་ཆད་བྱ། གཉིས་པར། བུམ་པ་ལ་སོགས་པའི་ཡན་ལག་རབ་གནས་དང་། སྒྲུབ་ཆེན་དང་འདྲེལ་བར་སློབ་མ་ལ་དབང་བསྐུར་ན་དེའི་ལྷག་གནས་དང་། རྡོ་རྗེ་ལས་རིམ་དུ་ས་བཟུང་བ་ཞེས་ཐ་སྙད་མཛད་པའི་ལྷ་སྟ་
གོན་གྱི་ཆོ་ག་རྣམས་བྱའོ། །གསུམ་པ་ལ། བཤགས་པ་བྱ་ཞིང་མཚམས་གཅད་པ། མ་ཏྲཾ་གནན་པ། དཀྱིལ་འཁོར་བྲི་ཞིང་རྒྱན་དགྲམ་པ། ནུབ་དང་པོ་བསྙེན་པའི་བྱ་བ་ལ་འཇུག་པའོ། །དང་པོ་ལ་བཤགས་སྐོང་བྱ་བ་དང་། མཚམས་གཅོད་པ་གཉིས། དང་པོ་ལ་གསུམ་ལས། ཕྱི་བཤགས་སུ་དཀོན་མཆོག་མཆོད་པ། འབུམ་སྡེ་ལྔའམ་དབང་སྡུད་སོགས་བཀའ་ཀློག་པ།སཱཙྪ་གདབ་པ། གཏོར་མ་གཏང་བ། སྲོག་བསླུ། ལམ་འཕྲང་གསོ་བ་སོགས་རྒྱབ་རིམ་ཅི་འགྲུབ་བྱ། བར་བཤགས་སུ་དོང་སྤྲུག་འདོན། ནང་བཤགས་སུ་རུ་ཆེན་བཞིའི་བཤགས་པ་རྣམས་བྱེད་པའོ། །གཉིས་པ་ནི། ལམ་རིམ་ལས། ཕྱི་རོལ་མཆོད་པའི་ལས་རྫོགས་ཏེ། །ཕྱི་བཅད་བསྲུང་སྒོ་རིམ་བཞིན་བྱ། །ཞེས་དང་། ཡང་དག་རྩ་བ་ལས་ཀྱང་། འབྱུང་པོའི་གཏོར་མ་བཏང་ནས་ཀྱང་། །གསང་བའི་དོན་གྱི་ལས་རྣམས་བྱ། །ཞེས་པས་འབྱུང་པོ་རྣམས་ལ་གཏོར་མ་བྱིན་ཏེ་བསྐྲད་ནས་མཚམས་གཅད་པར་བྱའོ། །དེ་ཡང་ཕྱག་བཞེས་རྒྱས་པའི་ཚེ་མཚམས་དགུ་ཕྲུགས་སུ་གཅོད་པར་མཛད་ཀྱང་། འདིར་བསྡུས་པའི་དབང་དུ་བྱས་ཏེ། ཕྱི་དང་། ནང་དང་། གསང་བའི་མཚམས་བཅད་པའོ། །དང་པོ་ནི། སྒྲུབ་ཁང་གི་ཕྱི་རོལ་གོམ་པ་བདུན་ཅུའི་སར་རྒྱལ་ཆེན་བཞི་དང་ཕྱོགས་སྐྱོང་བཅུའི་ཐོ་གཟུག་པས་ཕྱོགས་སོ་སོའི་གནས་ནས་བར་མཚམས་མེད་པར་བསྲུང་བར་བསམ་པའོ། །དེ་ལྟར་ཡང་ཧེ་རུ་ཀ་གལ་པོ་ལས། ཕྱོགས་བཞིར་མཐོ་བཞི་བཙུགས་ནས་ཀྱང་། །རྒྱལ་པོ་ཆེན་པོ་སྡེ་བཞི་ལ། །ཕྱི་མཚམས་བཅད་པའི་ཕྲིན་ལས་བཅོལ། །ཕྱི་མཚམས་བསྲུང་བར་ཞལ་བཞེས་པའི། །མཐུ་ཆེན་ཕྱོགས་སྐྱོང་འཁོར་བཅས་ལ། །གཏོར་མ་ཆ་རེ་བྱིན་ནས་ཀྱང་། །ཕྱི་མཚམས་བསྲུང་བའི་ཕྲིན་ལས་བཅོལ། །ཞེས་སོ། །གཉིས་པ་ནང་མཚམས་ལ། དམ་སྲི་གནན་པ། སྒོ་བྱང་གདགས་པ། ཁྲོ་བཅུས་བགེགས་ལ་ཕུར་བུ་གདབ་པའོ། །དང་པོ་ནི། སྔོན་གསང་སྔགས་ཀྱི་སྒོར་ཞུགས་ཀྱང་བཀའ་བསྒོ་ལོག་པས་དམ་ཚིག་ཅན་ལ་གནོད་པའི་དམ་སྲིར་གྱུར་པ་སྟེ། དེ་
སྔོན་དམ་འདྲེས་ཟིན་པའི་ཕྱིར་མཚམས་ཀྱི་སྦྱོར་བ་གཞན་གྱིས་མི་ཐུབ་པས། ར་སོག་ལ་ལིངྒ་བྲིས་ཏེ་སྒྲུབ་ཁང་གི་ཐེམ་པའི་ཕྱི་རོལ་དུ་མནན་ཅིང་བྲོས་བརྡུངས་པས་བསྐལ་མཐའི་བར་དུ་ལྡང་མི་ནུས་པར་བསམ་པའོ། །དེའང་ཀུན་འདུས་ལས། རྐྱེན་གྱི་བར་ཆད་བསལ་བ་དང་། །གསང་བའི་མན་ངག་སྤྱད་པའི་ཕྱིར། །འཇུག་སྲིད་དམ་སྲི་གནན་པར་བྱ། །ཞེས་སོ། །གཉིས་པ་ནི། ར་སོག་ལ་བྲིས་པའི་བགེགས་ལིང་གི་སྙིང་གར་ཕུར་བུ་བཏབ་གཤིན་རྗེའི་གནས་སུ་བསྐྲད་པར་བསམ་ཞིང་། སྒོའི་འོག་ཏུ་མགོ་མཐུར་བསྟན་གྱིས་གདགས་སོ། །དེ་དང་ཐད་ཀའི་སྒོ་གོང་དུ་ཡེ་ཤེས་ལྷའི་སྒོ་བྱང་ནི།ལུག་གམ་རྐྱང་གི་སོག་པ་ལ། གཤིན་རྗེ་གཤེད་ཀྱི་སྐུ་བྲིས་པ་གདགས་པས་ཇི་སྲིད་སྒྲུབ་པ་མ་ཐོན་གྱི་བར་དུ་ཕྱིའི་བར་གཅོད་ནང་དང་། ནང་གི་དངོས་གྲུབ་ཕྱིར་མི་གཏོང་བའི་ཕྲིན་ལས་བྱེད་པར་བསམ་པའོ། །འདིར་ཧེ་རུ་ཀ་གལ་པོ་ལས།ཆོས་ཀྱི་རྒྱལ་པོ་བདུད་རྩི་ཡི། །ཕྱི་ནང་སྒོ་བྱང་གདགས་པར་བྱ། །ཞེས་གསུངས་པ་ལྟར་འཁྱིལ་པའི་སྒོ་བྱང་བཏགས་ཀྱང་འགལ་བར་མ་མཐོང་ངོ་། །གསུམ་པ་ནི། རྒྱལ་པོ་བཙོན་དུ་བཅུག་པས་དམངས་ཆམ་ལ་ཕེབས་པ་ལྟར། བགེགས་ཕྲན་རྣམས་ལྡང་མི་ནུས་པའི་ཆེད་དུ་བགེགས་ཀྱི་གཙོ་བོ་ཕྱོགས་སྐྱོང་བཅུ་ལ་ཕུར་བུ་གདབ་པར་བྱ་སྟེ། བྱུག་བདུག་གིས་ཕུར་བུ་གཟི་བྱིན་བསྐྱེད་ནས། བདག་ཉིད་ཞེ་སྡང་རྡོ་རྗེའི་ང་རྒྱལ་གྱིས་ཕུར་བུ་རྣམས་ཁྲོ་བཅུ་ཡབ་ཡུམ་དུ་བསྐྱེད་ལ། ཊ་ཀི་རཱ་ཛས་ཕྱོགས་སྐྱོང་བཅུ་བཀུག་ནས་གདན་དུ་བཏིང་བ་ལ་བགེགས་མཐར་བྱེད་ཀྱིས་ཕུར་བུ་བཏབ་པས་གསེར་གྱི་ས་གཞི་ལ་སྦྲགས་པར་བསམ་ཞིང་ཡེ་ཤེས་ཀྱི་ཁྲོ་བཅུ་ཕབ་ནས་མཆོད་བསྟོད་ཕྲིན་གསོལ་བྱ་བའོ། །དེ་ལྟར་ཡང་ལམ་རིམ་ལས།འཇིགས་བྱེད་དབང་དུ་བདག་ཞུགས་ནས། །ཁྲོ་བོ་ཁྲོ་མོ་འཁོར་དུ་བྱ། །གདན་དུ་གཟིར་ཞིང་ཕུར་བུས་གདབ། །རང་བཞིན་ཕབ་ལ་མཆོད་བསྟོད་དེ། །བར་ཆད་ཏིང་འཛིན་མཆོག་གིས་བཟློག །ཅེས་སོ། །གལ་ཏེ་ས་བསྲུང་བའི་ཚེ་ཕྱོགས་སྐྱོང་ཕུར་གདབ་བྱས་གྲུབ་པ་ཞིག་ན། འདིར་སྔར་བཏབ་པའི་ཕུར་བུ་རྣམས་ལ་ཕྲིན་ལས་བསྐུལ་བ་རིགས་པར་མཐོང་ཞེས་རྗེ་
བླ་མ་གསུང་པ་ལྟར་ལེགས་པས་བསྐྱར་ནས་གདབ་མི་དགོས་སོ། །གསུམ་པ་ནི། མཚན་མེད་རྣམ་པར་མི་རྟོག་པའི་མཚམས་ཏེ། མདོ་ལས། མཚམས་མེད་པ་ལ་མཚམས་བཅད་པ། །འདི་ནི་རྣལ་འབྱོར་ཅན་གྱི་ལས། །ཞེས་པ་ལྟ་བུའོ། །གཉིས་པ་ནི། ཕྱི་ནང་གསང་བའི་མཚམས་གཅོད་ཚར་བའི་རྗེས་ཐོག་ཏུ། གནན་པར་བྱ་སྟེ། ལམ་རིམ་ལས། ཕྱི་ནང་གསང་བ་བསྲུང་བྱ་སྟེ། །སྲིན་པོའི་རྒྱལ་པོ་ཚུལ་བཞིན་མནན། །ཞེས་གསུངས་པའི་ཕྱིར། དེ་ཡང་མ་ཏྲཾ་རཱུ་དྲའི་གཟུགས་བཅས་ཏེ། དགུག་བསྒྲལ་སྤར་ལ་རོལ་བའི་བྲོས་མནན་ཅིང་སྦྱངས་ཏེ་ཁོག་པ་གཞལ་ཡས་ཁང་དུ་བྱིན་གྱིས་རློབ་པའོ། །འདི་ཉིད་མཚམས་ཀྱི་དོན་དུའང་འགྱུར་ཏེ། རཱུ་དྲ་ནི་བགེགས་ཀྱི་རྒྱལ་པོ་ཡིན་ལ། དེ་བསྒྲལ་བས་བགེགས་ཕྲན་གཞན་རྣམས་ཀྱིས་བར་གཅོད་བྱ་བར་མི་ནུས་པའི་ཕྱིར། གསུམ་པ་དཀྱིལ་འཁོར་བྲི་ཞིང་རྒྱན་དགྲམ་པ་ནི། ཐིག་ཚོན་གྱི་ཆོ་ག་དང་ལྡན་པས་དཀྱིལ་འཁོར་ཚོམ་བུ་གང་བསྒོམ་གྱི་གཞུང་བཞིན་དུ་བྲིས་ནས་རབ་གནས་དང་། སྦྱིན་བསྲེག་བྱ། དེ་ནས་ཡོ་བྱད་རྣམས་བྱིན་གྱིས་རློབས་ཏེ་སྒྲུབ་རྫས་དང་། མཆོད་རྫས་དང་། དཀྱིལ་འཁོར་གྱི་རྒྱན་དགོད་རྣམས་བྱ་སྟེ། དེ་ལས། སོ་སོའི་མཚམས་པའི་གཟུགས་བརྙན་བྲི། །རྒྱན་དང་མཆོད་སོགས་འཁོར་བ་དང་། །ཞེས་སོ། །བཞི་པ་ནི། ཐོག་མར་གྲལ་ཕྱག་དང་ཚུལ་ཕྱག་བཙལ་ནས་ཁྲོ་བཅུ་རོལ་པས་མཚམས་གཅོད་དེ། དེ་ལས། ཐུན་མོང་སྲུང་བའི་འཁོར་ལོ་བྱ། །ཞེས་སོ། །འདིར་གང་དང་ཐུན་མོང་ཞེ་ན། རྗེ་སྒྲོ་ཕུག་པ་ནི་བསྙེན་བསྒྲུབ་བཞི་གའི་ཐུན་མོང་དང་། ལྷ་རྗེ་གླན་ཚོམ་བུ་གསུམ་ཀའི་ཐུན་མོང་གི་མཚམས་སུ་བཞེད། འདིར་ཞི་ཁྲོ་གཉིས་ཀའི་ཐུན་མོང་གི་མཚམས་སུ་བཤད་ཀྱང་མི་འགལ་ལོ། །དེ་ནས་བརྡ་སྒོ་དབྱེ་བ་སོགས་བྱ་སྟེ། དེ་ཡང་བརྡ་སྒོ་ནི། སྣོད་བཅུད་གཞལ་ཡས་ཁང་དང་ལྷའི་རང་བཞིན་དུ་གསལ་བཏབ་སྟེ། ཡེ་ཤེས་བཞིའི་སྒོ་ནས་ཞུགས་པར་བསམ་པའོ། །བརྡ་ཕྱག་ནི། ལྷ་དང་གཞལ་ཡས་ཁང་དེ་ཡང་ཡུལ་གུད་ན་ཡོད་པ་མ་ཡིན་ཏེ། རང་གི་རིག་པ་
ཉིད་དཀྱིལ་འཁོར་དུ་ཤར་བ་ལ་ཡུལ་རིག་གཉིས་སུ་མེད་པར་མཇལ་བ་བརྡའི་ཕྱག་གིས་མཚོན་ཅིང་ངོ་མཚར་བསྐྱེད་པའོ། །དེ་ནས་བཤགས་པ་བྱ། དམ་བཅའ།དཀྱིལ་འཁོར་ལ་བྱིན་དབབ། བདག་ཉིད་མ་མོ་དང་མཁའ་འགྲོ་རྣམས་ཀྱིས་དཔུང་གི་རུ་དར་ལྟར་རང་གི་སྡེ་ཚན་དུ་ཤེས་པར་འགྱུར་བ་ལ་སོགས་པའི་དགོས་པས་སྒྲུབ་པ་པོ་ཐམས་ཅད་ལ་བྱུགས་རྩི་གསུམ་གྱི་རྟགས་གདབ། མཆོད་པ་བྱིན་གྱི་རློབ། དེ་ནས་བསྙེན་པ་ལ་འཇུག་སྟེ། དང་པོ་ཏིང་ངེ་འཛིན་གསུམ་བསྒོམ། རྟེན་དང་བརྟེན་པའི་དཀྱིལ་འཁོར་ཚོམ་བུ་གང་བསྒོམ་དང་བསྟུན་པ་ལ་བསྒོམ། དེ་ཡང་། འདི་ཉིད་ལས། རྣལ་འབྱོར་ཐབས་དང་ཤེས་རབ་ཀྱིས། །དེ་བཞིན་གཤེགས་དང་ཡུམ་དུ་བསྒོམ། །སེམས་དཔའ་སེམས་མ་ཉིད་དུ་བསྒོམ། །སོ་སོའི་སྔགས་དང་ཕྱག་རྒྱ་དང་། །ཏིང་འཛིན་ཡང་དག་སོ་སོར་གསལ། །ཞེས་པས།རྣལ་འབྱོར་ཕོ་མོ་དང་ལྷ་ཡབ་ཡུམ་བྲང་སྤྲད་དེ་བྱེ་བྲག་ཏུ་བསྒོམ་པའམ། ཡང་ན་རྣལ་འབྱོར་པ་སྤྱིས་ཚོམ་བུ་སྤྱིར་བསྒོམ་པ་གང་མོས་སུ་བྱའོ། །དེ་ལྟར་ཡང་།ལམ་རིམ་ལས། སྤྱི་འམ་ཡང་ན་རེ་རེ་ཞིང་། །ཚོམ་བུའི་དཀྱིལ་འཁོར་རིམ་བཞིན་བསྒོམ། །ཞེས་སོ། །དེ་ནས་དབང་བསྐུར། བྱིན་གྱིས་རློབ། ཡེ་ཤེས་པ་དབབ་དྲང་བསྡིམ་ལ་མཆོད་ཅིང་བསྟོད་ནས་བསྙེན་པ་བྱ་སྟེ། དེ་ལས། བྱིན་རློབ་དབང་དང་ལྡན་བྱས་ནས། །རང་བཞིན་གནས་ནས་དབབ་བྱ་སྟེ། །གཞུག་བཅིང་བརྟན་བྱས་རིམ་པར་མཆོད། །རྫོགས་ནས་བསྟོད་དེ་བསྙེན་པ་བྱ། །ཞེས་སོ། །དེའང་ནུབ་དང་པོའི་བསྙེན་པ་ནི། དེ་ལས་ཡེ་ཤེས་མདུན་དུ་ལྷག་པ་ལ། །བཟླས་པ་གསལ་བ་གསུམ་གྱིས་བྱ། །ཞེས་པས། བདག་དམ་ཚིག་པ། ལྷ་ཡེ་ཤེས་པ། བར་གྱི་འཕྲོ་འདུ་སྟེ་གསལ་བ་གསུམ་གྱི་སྒོ་ནས་མན་ངག་བཞིན་བཟླ་བ་སྟེ། འཛབ་ཁང་ཕྱེ་ནས། འོད་ཟེར་དཀར་པོ་ཕར་འཕྲོས་པས་སྒྲིབ་པ་སྦྱོང་ཞིག་པར་བསྐུལ། ཚུར་འདུས་ནས་བདག་གི་སྒྲིབ་པ་སྦྱངས་ནས་དངོས་གྲུབ་ཀྱི་སྣོད་རུང་དུ་བྱས་པར་བསམས་ལ་འཛབ་བཟླ་ཞིང་། མཇུག་ཏུ་དཀྱིལ་འཁོར་ཕྱེ་བ་དེ་ཉིད་རང་ལ་བསྡིམ་པའོ། །
དེ་ལྟར་ཡང་སྔ་མ་ལས། དེ་སོགས་བཟླས་བསྙེན་འཕྲོ་འདུ་ཡིས། །འདུན་པར་བསྐུལ་དང་སྣོད་བྱེད་པ། །བསྐྱེད་པའི་དཀྱིལ་འཁོར་རྫོགས་པའོ། །ཞེས་སོ། །དེ་ལྟར་འཛབ་ཟིན་ནས། ཚོགས་དང་།ལྷག་ཆོག་བྱ། ཚེ་བསྡིམ། གཏོར་མ་བསག །མཆོད་པ་ཕྱི་མ་དང་མཚམས་སྦྱར་སྟན་བྱིན་གྱིས་བརླབས་ཏེ་འདུག །འགྲོ་ན་ཕྲེང་བ་ཁྲོ་ཞལ་དུ་བྱིན་གྱིས་རློབས་ལ་གདན་བསྲུང་། དུས་དྲུག་ཏུ་བར་ཆད་ཀྱི་ཉུལ་ལེ་མ་བརྟགས་ལ། དེ་དག་སོ་སོའི་གཉེན་པོ་བསྐུལ་བ་ལ་སོགས་པས་བཟློག་ཅིང་། དུས་རྟག་ཏུ་ལྷའི་ང་རྒྱལ་དང་མ་བྲལ་བ་བྱ་བ་སྟེ། དེ་ལས། ཟིན་ནས་སྡུད་དེ་རྣལ་འབྱོར་ཚོགས། །ཚུལ་བཞིན་མཆོད་པའི་ཕྲིན་ལས་བྱ། །ནང་ནུབ་མཁའ་འགྲོ་ལྷག་མ་སྦྱིན། །བར་ཆད་བཟློག་ཅིང་བསྙེན་པ་བྱ། །ཞེས་སོ། །འདིར་སྒྲོལ་གཡུང་གཉིས་ཀྱི་ཊཱི་ཀར། ཤོམ་ཡན་ལག་དང་འདྲེལ་པ་ཙམ་ལ་བསྙེན་པར་མཛད་ནས་ནུབ་དང་པོའི་བསྙེན་པ་མི་བཞེད་ཀྱང་། འདིར། འཁོར་ལོའི་ཚུལ་དུ་རྣམ་པར་བསྒོམ། །ཞེས་པའི་ལུང་ལྟར་མཁས་པ་རོག་སོགས་སྔ་རབས་དག་གི་ལས་ཐོ་ལས་འབྱུང་བ་ལྟར་བྱས་པ་སྟེ། གཞན་དུ་སྒྲུབ་པ་ཇི་ཙམ་བྱེད་པའི་འགོ་འཛིན་གྱི་ནུབ་དང་པོ་ནས་ཉེ་བསྙེན་ལ་བཞེད་པའི་ཕྱོགས་ཀྱང་མི་རིགས་པ་མ་ཡིན་ཏེ། ལམ་རིམ་གྱི་ཁྲོ་བོའི་སྐབས་སུ། དེ་ནས་གཉིས་པར་རྒྱན་རྣམས་དང་། །ཞེས་སོགས་དང་། སྒྲུབ་བྱང་དུ། རིམ་པ་ཤོམ་དང་འདྲེལ་པའི་ཕྱིར། །ཞེས་སོགས་ཀྱིས་འགྲུབ་བམ་སྙམ་སྟེ་དཔྱད་པར་བྱའོ། །གཉིས་པ་ཉེ་བསྙེན་ནི། ཆོ་གའི་རྣམ་གཞག་གཞན་རྣམས་སྔར་དང་མཐུན་པ་ལས། ཁྱད་པར་དུས་དྲུག་གམ་བཞིར་ཚོགས་དང་གཏོར་མ་གཏོང་། སྦྱིན་སྲེག་བྱ། འཛབ་ཀྱི་འཕྲོ་འདུའི་ཚེ། དཀར་པོ་ཕར་སྤྲོས་པས་བསྐུལ་བ་དང་། དམར་པོ་ཚུར་བསྡུ་བས་དངོས་གྲུབ་ཀྱི་སྣོད་རུང་དུ་བྱ་བའོ། །དུས་ནི་ཇི་ཙམ་བསྒྲུབ་པའི་ཕྱེད་དོ། །གསུམ་པ་སྒྲུབ་པ་ནི། ཆོ་ག་གཞན་ཉེ་བསྙེན་ལྟར་ལས། འཛབ་ཀྱི་འཕྲོ་འདུའི་དུས་སུ་འོད་ཟེར་དམར་པོ་སྤྲོས་པས་དངོས་གྲུབ་བསྐུལ་བ་དང་འདུས་པས་སྐུ་གསུང་ཐུགས་ཀྱི་
དངོས་གྲུབ་ཐོབ་པར་བསམ་སྟེ། འཕྲོ་འདུ་བསྣོལ་ནས་བྱེད་པའོ། །དེ་ལྟར་བསྙེན་བསྒྲུབ་ཀྱི་དུས་སུ་ཚོམ་བུའི་དཀྱིལ་འཁོར་སྒོམ་ཐབས་ལ། ཚོམ་བུ་གཅིག་པ། གསུམ་པ། ལྔ་པའོ། །དང་པོ་ནི། རྡོ་རྗེའི་རིགས་སུ་ཐམས་ཅད་དཀྱིལ། །ཞེས་སོགས་ཏེ།རྡོ་རྗེ་སེམས་དཔའ་ཡབ་ཡུམ་ལ་རང་གི་རིགས་ཆུང་གི་སེམས་དཔའ་ཡབ་ཡུམ་བཞི་དང་། སྒོ་བ་ཡབ་ཡུམ་བཞི་སྟེ་ལྷ་ཚོགས་ཟུང་དགུ་ཡ་བཅོ་བརྒྱད་དོ། །དེ་ལྟར་ན་དཀྱིལ་འཁོར་བསྡུས་པ་དང་ཁྱད་པར་མེད་པར་ཐལ་ལོ་ཞེ་ན། ལྷ་གྲངས་ལ་ཁྱད་པར་མེད་ཀྱང་ལྷ་ངོ་ལ་ཁྱད་པར་ཡོད་པའི་ཕྱིར་སྐྱོན་མེད་དེ། དཀྱིལ་འཁོར་བསྡུས་པ་ནི་རྡོར་སེམས་ཡབ་ཡུམ་ལ་རྒྱལ་བ་རིགས་བཞིས་བསྐོར་བ་ཡིན་ལ། འདིར་ནི་རིགས་ཆུང་གི་སེམས་དཔའ་བཞིས་བསྐོར་བའི་ཕྱིར་རོ། །གཉིས་པ་ནི།ཡང་ན་སྐུ་གསུང་ཐུགས་ཉིད་དེ། །ཞེས་སོགས་ཀྱིས་དབུས་སུ་རྡོ་རྗེ་སེམས་དཔའ། ཤར་དུ་རྣམ་སྣང་། ནུབ་ཏུ་མཐའ་ཡས་ཏེ་གཙོ་བོ་ཡབ་ཡུམ་ཟུང་གསུམ་ལ།རང་རང་གི་རིགས་ཆུང་གི་སེམས་དཔའ་ཡབ་ཡུམ་ཟུང་བཞི་བཞིས་བསྐོར་བས་ཟུང་ལྔ་ཚན་གསུམ་ལ་ཡ་སུམ་ཅུ། དེའི་སྟེང་དུ་མངོན་རྟོགས་ལས། སྒོ་བ་ཡབ་ཡུམ་བརྒྱད་བསྣན་ཏེ་སོ་བརྒྱད་དུ་བཤད། སྤར་ཁབ་ལས་ཞི་བ་སུམ་ཅུའི་སྟེང་དུ་སྟེང་འོག་མ་གཏོགས་པའི་ཁྲོ་བོ་ཡབ་ཡུམ་ཟུང་བརྒྱད་བསྣན་ཏེ་ཞེ་དྲུག་ཏུ་བཤད་དོ། །གསུམ་པ་ནི། སྔགས་འཆང་དངོས་གྲུབ་ཡང་དག་ནི། །ཞེས་སོགས་ཏེ།གཙོ་བོ་རིགས་ལྔ་ཡབ་ཡུམ་ལ་སོ་སོའི་རིགས་ཆུང་གི་སེམས་དཔའ་ཡབ་ཡུམ་བརྒྱད་བརྒྱད་ཀྱིས་བསྐོར་བས་ལྷ་ལྔ་བཅུ། ཁྲོ་བཅུ་ཡབ་ཡུམ་ཉི་ཤུ་སྟེ་བདུན་ཅུའོ། །དེ་བཞིན་དུ། ཁྲོ་བོ་ཁྲོ་མོའི་ཚོགས་ཆེན་པོ། །ཞེས་སོགས་ཀྱི་སྐབས་སུ་ཁྲོ་བོའི་དཀྱིལ་འཁོར་ལའང་ཚོམ་བུ་གསུམ་བསྒྲེས་ནས་སྟོན་ཏེ། ལམ་རིམ་ལས། དེ་ནས་འཁོར་ལོ་གཅིག་པའམ། །གསུམ་དང་ལྔ་རུ་བསྒོམ་པར་བྱ། །ཞེས་སོ། །དེ་ཡང་ཚོམ་བུ་གཅིག་པ་ལ་ལྷ་བདུན་ཅུ་རྩ་བརྒྱད་དེ། བཛྲ་ཧེ་རུ་ཀ་ཡབ་ཡུམ་ལ་རིགས་ཆུང་གི་ཁྲོ་བོ་ཡབ་ཡུམ་བརྒྱད་ཀྱིས་བསྐོར་བ་
བཅུ། ཕོ་ཉ་གཽ་རཱི་མ་བརྒྱད།ཕྱག་བརྙན་སིངྷ་མ་བརྒྱད། བཀའ་ཉན་སྒོ་མ་བཞི་སྟེ། ཁྲོ་མོ་ཉི་ཤུ། ཅི་བགྱིའི་དབང་མོ་ཉེར་བརྒྱད། སོགས་ཁོངས་ནས་ཁྲོ་བཅུ་ཡབ་ཡུམ་ཉི་ཤུ་རྣམས་སོ། །ཚོམ་བུ་གསུམ་པ་ལ་སྔར་གྱི་སྟེང་དུ། ཤར་དུ་བུཌྜྷ་ཧེ་རུ་ཀ་དང་། ནུབ་ཏུ་པདྨ་ཧེ་རུ་ཀ་གཉིས་ལ་རང་རང་གི་རིགས་ཆུང་དང་བཅས་པས་བཅུ་བཅུ་སྟེ་ཉི་ཤུ་བསྣན་པས་གོ་བརྒྱད་དོ། །ཚོམ་བུ་ལྔ་པ་ལ། དེ་དག་གི་ཁར་ལྷོ་བྱང་དུ་རཏྣ་དང་། ཀརྨ་ཧེ་རུ་ཀ་རིགས་ཆུང་དང་བཅས་པ་ཉི་ཤུ་བསྣན་པས་ལྷ་བརྒྱ་དང་བཅོ་བརྒྱད་དོ། །འདིར་ཁ་ཅིག་ན་རེ། འདིར་བསྟན་གྱི་ཚོམ་བུ་དང་སྔར་སྨོས་པའི་དཀྱིལ་འཁོར་གཉིས་ཀྱི་ཁྱད་པར་གང་ཞེ་ན། བཞེད་པ་མི་མཐུན་ཏེ་ཟུར་ཚོ་སྔ་རབས་པ་ཕལ་ཆེར་ན་རེ། མི་གྲངས་ངེས་མེད་ཀྱི་ལྷ་གྲངས་ངེས་མེད་བསྒོམ་པ་དཀྱིལ་འཁོར། མི་གྲངས་ངེས་ཅན་གྱིས་ལྷ་གྲངས་ངེས་ཅན་བསྒོམ་པ་ཚོམ་བུའོ་གསུངས་པ་མི་འཐད་དེ། ཚོམ་བུ་གཅིག་པ་ལ་བརྟན་པ་ཐོབ་ནས་གསུམ་པ་བསྒོམ་པའི་ཚེ་མི་གྲངས་མང་དུ་མ་སོང་ལ་ལྷ་གྲངས་མང་དུ་སོང་བའི་ཕྱིར། ཡང་དམ་པ་ཤཱཀྱ་རྒྱལ་ན་རེ། རིགས་ཆུང་གིས་རྒྱས་པའང་ཡོད་ལ། མ་རྒྱས་པའང་ཡོད་པ་དཀྱིལ་འཁོར། རང་རང་གི་རིགས་ཆུང་གིས་རྒྱས་པ་ཚོམ་བུའོ་གསུངས།དེ་ལྟར་ན། རིགས་ཆུང་གིས་རྒྱས་པ་ཡོད་པའི་དཀྱིལ་འཁོར་རྒྱས་པ་དང་།ཚོམ་བུ་ལྔ་པ་གཉིས་ཁྱད་པར་མི་ཕྱེད་དོ། །ཡང་ལྷ་རྗེ་སྐྱོ་ནི། གནས་སྐབས་སུ་གཙོ་བོ་ངེས་པ་ཚོམ་བུ། མ་ངེས་པ་དཀྱིལ་འཁོར་རོ་གསུང་། དེ་ལྟར་ན་ཚོམ་བུ་གཅིག་པ་ཉིད་དཀྱིལ་འཁོར་དུ་ཐལ། གནས་སྐབས་སུ་གཙོ་བོ་ངེས་པ་རྡོ་རྗེའི་རིགས་ཀྱིས་བྱེད་པའི་ཕྱིར། ཡང་རྗེ་སྒྲོ་ཕུག་པ་ནི། སྒོམ་བྱེད་རྣལ་འབྱོར་པ་དང་། བསྒོམ་བྱ་ལྷའི་ཁྱད་པར་གཉིས་སུ་བཞེད། དང་པོ་ནི། ལྷ་དང་རྣལ་འབྱོར་པ་བྲང་སྤྲད་དེ་བསྒོམ་པ་ཚོམ་བུ། རྣལ་འབྱོར་པ་ཕོ་མོ་གང་རུང་གཅིག་གིས་ལྷའི་དཀྱིལ་འཁོར་བྱུང་ཚོགས་སུ་བསྒོམ་པ་དཀྱིལ་འཁོར་རོ། །གཉིས་པ་ནི།ཚོམ་བུ་གཅིག་ན་གཙོ་བོ་གཅིག་ཡིན་པ་སོགས་གཙོ་བོ་དབྲི་བསྣན་
དུ་སྟོན་པ་ཚོམ་བུ། རྣམ་གྲངས་བྱུང་ཚོགས་སུ་སྟོན་པ་དཀྱིལ་འཁོར་རོ། །ཡང་ན་རིགས་འགྱུར་ཀྱང་ཡེ་ཤེས་མི་འགྱུར་བ་ཚོམ་བུ། རིགས་དང་ཡེ་ཤེས་གཉིས་ཀ་འགྱུར་བ་དཀྱིལ་འཁོར་རོ། །ཞེས་གསུངས་པ་རྣམས་ཀྱང་ཕྱོགས་རེ་ནས་གཞག་ཏུ་བཏུབ་མོད་ཀྱི།འོན་ཀྱང་འདིར་རང་ལུགས་ནི། གཉལ་སངས་རྒྱས་གྲགས་ཀྱི་བཞེད་པ་ལྟར།གཙོ་བོ་རིགས་ཆུང་དང་བཅས་པ་རང་གི་རིགས་སུ་ངེས་པ་ཚོམ་བུ། གཙོ་བོ་རིགས་ཆུང་ཡང་སྤྱིའི་རིགས་སུ་ངེས་པ་དཀྱིལ་འཁོར་ཞེས་གསུངས་པ་ཉིད་ལེགས་པར་མངོན་ཏེ། དཀྱིལ་འཁོར་ནི་རྣམ་སྣང་སོགས་རིགས་བཞིའི་གཙོ་བོ་རྡོ་རྗེའི་རིགས་གཅིག་གིས་བསྡུས་པས་རིགས་ཐ་དད་ཀྱི་གཙོ་བོ་གཅིག་ཏུ་གྱུར་པའི་ཕྱིར་དང་། ཚོམ་བུ་ནི་རང་གི་རིགས་ཆུང་གིས་བྱེ་བྲག་ཏུ་བསྐོར་བས་རིགས་ཐ་མི་དད་ཀྱི་གཙོ་བོ་སོ་སོས་བྱེད་པའི་ཕྱིར་རོ། །འོ་ན་རང་གི་རིགས་ཆུང་གིས་བྱེ་བྲག་ཏུ་བསྐོར་བ་ཡོད་པའི་ཕྱིར། དཀྱིལ་འཁོར་རྒྱས་པ་ཡང་ཚོམ་བུར་ཐལ་ཞེ་ན་ཁྱབ་པ་མེད་དེ། དཀྱིལ་འཁོར་རྒྱས་པ་ལ་སོ་སོའི་རིགས་ཆུང་གིས་བསྐོར་ཀྱང་སྤྱིའི་གཙོ་བོ་གཅིག་གིས་བྱེད་པའི་ཕྱིར་ཏེ། རྒྱས་པ་ལས། རྡོ་རྗེ་སེམས་དཔའ་དཀྱིལ་ཉིད་དེ། །རིགས་བཞི་ལྷ་དང་ལྷ་མོ་འཁོར། །ཞེས་སོ། །བཞི་པ་སྒྲུབ་ཆེན་ནི། དེ་ལྟར་བསྒྲུབས་པའི་ཞག་གྲངས་ཇི་སྐད་བཤད་པ་ལྟར་ཚང་ནས། བྲིས་སྐུ་བཞད་པ་དང་། མར་མེ་རང་འབར་བ་དང་། རྫས་ཞག་ཏུ་ཁོལ་བ་སོགས་གྲུབ་པའི་རྟགས་མཚན་ཡིད་ཆེས་པ་བྱུང་བ་དང་། ནུབ་ཐ་མ་ལ་དངོས་གྲུབ་བླང་བའི་ཆོ་ག་བྱ་སྟེ། དེའི་ལས་རིམ་ནི། ཕྱིར་རྒྱས་པའི་སྦྱིན་སྲེག་བྱ། ནང་དུ་དཀྱིལ་འཁོར་ཞལ་བསྒྱུར། དངོས་གྲུབ་ཀྱི་རྫས་བསག །རྒྱན་གོས་བཟང་པོ་གྱོན། ལས་གཞུང་བསྲང་། འཛབ་ཀྱི་དུས་སུ་འོད་ཟེར་ཕར་མི་སྤྲོ་བར་ཚུར་སྡུད་པ་ཁོ་ན་སྟེ།འོད་ཟེར་མཐིང་ག་དངོས་གྲུབ་ཀྱི་རང་བཞིན་ཅན་དུ་བསྡུས་ནས་དངོས་གྲུབ་ཀྱི་རྫས་དང་སྒྲུབ་པ་པོ་རྣམས་ཀྱི་རྒྱུད་ལ་བསྡིམ་པའོ། །དེ་རྗེས་སྒྲོལ་བ་དང་། སྦྱོར་མཆོད་བྱེད། དེ་ཡང་དངོས་གྲུབ་བླང་བ་དངོས་ལ། ལྷ་དང་། རྫས་དང་། ཡུམ་གྱི་མཁའ་
ནས་བླང་བའོ། །དང་པོ་ནི། ལྷ་སྤྱི་དང་བྱེ་བྲག་སོ་སོར་བསྐུལ་བའི་སྒོ་ནས་སྟོང་ཚིག་གི་མཆོད་པ་དང་འདྲེལ་པར་ལེན་པ་སྟེ། ལྷ་རྣམས་སྤྱན་དྲངས་ནས་མཆོད་ལ་དངོས་གྲུབ་བདག་ལ་བསྡིམ་པའོ། །གཉིས་པ་ནི། བསྐུལ་ཚིག་གི་སྒོ་ནས་བླང་ཞིང་དངོས་གྲུབ་ཀྱི་རྫས་ལ་རོལ་པའོ། །གསུམ་པ་ནི། སྦྱོར་མཆོད་དང་འདྲེལ་བར་བླ་མའི་མན་ངག་གིས་བླང་ངོ་། །དེ་ནས་བསྒྲུབ་དབང་བསྐུར། ལྷག་ཆོག་དང་། ཕྱི་རོལ་དུ་གཏོར་མ་གཏང་། ནང་དུ་དཀྱིལ་འཁོར་བསྡུ། སྤྱོད་ལམ་རྒྱུན་ཏིང་གིས་རྒྱས་གདབ། མཚམས་དགྲོལ། གནས་བསྲུང་བ་རྣམས་ཏེ། ཞིབ་པར་བླ་མ་དམ་པའི་ཞལ་དང་སྒྲུབ་བྱང་ལས་ཤེས་པར་འགྱུར་ལ། འདིར་གཞུང་འཆད་པའི་དབང་དུ་བྱས་ཏེ་སྦྱོར་སྒྲོལ་གྱི་མཆོད་པ་གཉིས་ཅུང་ཟད་བཤད་ན་གསུམ་སྟེ། ཨཱ་ལི་སྦྱོར་མཆོད། ཀཱ་ལི་སྒྲོལ་བའི་མཆོད་པ། དེ་གཉིས་སྤྱད་བྱར་སྒྲུབ་པའོ། །དང་པོ་ལའང་གང་ལ་སྦྱོར་བའི་ཡུལ། ཇི་ལྟར་སྦྱོར་བའི་ཐབས། ཅིའི་ཕྱིར་སྦྱར་བའི་དགོས་པ་དང་གསུམ། དང་པོ་ནི།སྤྱིར་ལྷ་མོ། ཀླུ་མོ། རིགས་ངན་མོ་གསུམ་སྟེ། རྣལ་འབྱོར་པ་དགོངས་སྤྱོད་སྟོབས་ཆེན་དང་པོ་གཉིས་དངོས་དང་། ཕྱི་མ་ནི། མིའི་བུ་མོ་ཡིན་ལ་སྟོབས་ཆུང་ན་གསུམ་ཀ་མིའི་བུ་མོའོ། །དེ་གསུམ་གྱི་ཁྱད་པར་རིམ་པ་ལྟར། ལོ་གྲངས་ཀྱི་སྒོ་ནས། བཅུ་གཉིས་མ་དང་། བཅུ་དྲུག་མ་དང་། ཉི་ཤུ་མའོ། །རྩ་བའི་སྒོ་ནས་རྩ་མདུང་ཅན་མ་དང་། མཉམ་པ་ཅན་དང་། ཞར་མ་ཅན་ཡོད་པའོ། །བྱང་སེམས་ཀྱི་སྒོ་ནས། ཉི་ཟླ་གཉིས་ཀ་འཛག་པ་དང་། ཉི་མ་འཛག་པ་དང་།གཉིས་ཀ་མི་འཛག་པའོ། །སྦྱོར་ཐབས་ཀྱི་སྒོ་ནས། གཉིས་ཀ་དང་། གཞན་དང་། རང་བདེ་བའི་སྦྱོར་ཐབས་ཤེས་པའོ། །བྱེ་བྲག་ཏུ་སློབ་དཔོན་སྒེག་པས་རིགས་བརྒྱད་དུ་བཤད་དེ། དམ་ཚིག་གསལ་བཀྲ་ལས། པད་ཅན་དུང་ཅན་རི་མོ་ཅན། །བ་གླང་ཅན་དང་ལྕུག་ཕྲན་དང་། །སྡོང་གཅིག་མེས་རེག་ཕྱལ་པ་བརྒྱད། །ཅེས་སོ། །དེ་རྣམས་ཀྱི་མཚན་ཀྱང་སྤྱི་ཙམ་དུ་སྔ་མ་
ལས། མཉེན་དྲང་སྐྱེད་རིང་སྟོད་སྨད་ཕྱེད། །ཡན་ལག་ཕྲ་འཇམ་ཚིགས་མིག་ཟླུམ། །དཔྲལ་བའི་དབྱེས་ཕྱེད་སྨིན་དཀྱུས་རིང་། །མིག་འབྲས་དཀྱིལ་ན་ཨུཏྤལ་མདོག །མཆུ་ཞེང་གཉིས་ཀ་འབྲིང་དུ་བཤད། །ལུས་ལ་ཆུ་ཀླུང་ག་པུར་དྲི། །གསང་ཐུབ་ཤེས་རབ་སྤྱོད་པ་དལ། །དད་ལྡན་འགྲོགས་ཤིང་དང་བ་ཆེ། །གསང་བའི་གནས་སུ་སྤྱད་པར་བྱ། །ཞེས་སོ། །འོ་ན་མཚན་བཟང་ངན་ཕྱེ་སྟེ། ངན་པ་ནི་རྣམ་པ་ཀུན་ཏུ་སྤང་བྱ་ཁོ་ནའོ་སྙམ་ན་མ་ཡིན་ཏེ། དབྱེའམ་ཡང་ན་མི་དབྱེ་བར། །ཞེས་པས་རྣལ་འབྱོར་པ་ནུས་པ་ཆུང་ན་དབྱེ་ལ་ཆེ་ན་མི་དབྱེ་བར་རོལ། ཞེས་གོང་མ་རྣམས་གསུངས། འགྲེལ་ཆུང་ལས། ཞི་རྒྱས་ལས། དབྱེ་བའམ་དབང་དྲག་མི་དབྱེ་བར། ཞེས་ལས་བཞིའི་གཟུངས་མའི་ཁྱད་པར་དུ་བཤད། དོན་ལ་སྒྲུབ་པ་དང་ཕྲིན་ལས་ཀྱི་གཟུངས་མ་ཇི་ལྟར་བཤད་པ་ལྟར་རིགས་དབྱེ་བའམ། ཡང་ན་མ་ཕྱེ་ཡང་རུང་སྟེ་དད་པས་ཆགས་ན་བུད་མེད་ཐམས་ཅད་སྙིང་རྗེའི་ཡུལ་དུ་མཉམ་པར་གཟུང་བྱ་ཡིན་པ་དང་། ཤེས་རབ་ཀྱི་རང་བཞིན་དང་གནས་སུའང་མཉམ་པར་གཞག་པའི་ཕྱིར། གཉིས་པ་ནི། གསལ་བཀྲ་ལས། དབང་བསྐུར་དམ་འབོག་ཆོས་གསུམ་བཤད། །ལུས་ལ་རིགས་ལྔའི་རྡུལ་ཚོན་དགྱེ། །ཐབས་ལ་མཁས་པས་སྐབས་ཀྱིས་སྦྱར། །ཞེས་པའི་དོན་སྦྱོར་བ་དུས་ཀྱི་བསྙེན་བསྒྲུབ་བཞིའི་སྒོ་ནས་ཉམས་སུ་བླང་སྟེ། རྡོ་རྗེ་སློབ་དཔོན་གྱིས་ཡུམ་མཚན་ལྡན་དེ་འཁོར་ཁང་ནང་མར་ཁྲིད་ལ། ཁྲུས་ནས་དབྱུང་། རྒྱན་གདགས། ཆོས་བཤད། དམ་དབོག །འདོད་པའི་བསྟན་བཅོས་ཀྱིས་བདེ་བ་རྒྱས་པར་བྱེད་པ་ནི་བསྙེན་པ།ཡབ་ཡུམ་ལྷར་བསྐྱེད་ལ་མཁའ་གསང་རྡོ་རྗེ་དང་པདྨོར་བྱིན་གྱིས་རློབ། ཡུམ་གྱི་པདྨའི་དབུས་སུ་ཚོམ་བུ་གང་ཡིན་གྱི་དཀྱིལ་འཁོར་བསྐྱེད། སྦྱོར་བའི་བརྡས་བསྐུལ་བ་ནི་ཉེ་བསྙེན། དེ་ནས་ཕྱག་རྒྱ་བཞིས་གཉིས་མེད་དུ་རོལ། འཁོར་ལོ་བཞིར་ཡེ་ཤེས་ངོས་བཟུང་། རྟོག་ཚོགས་སངས་རྒྱས་ཀྱི་དཀྱིལ་འཁོར་དུ་གནས་པ་ཉིད་བདེ་བའི་རོས་ཚིམ་པར་བྱ། བདེ་བའི་འོད་ཟེར་གྱིས་ཕྱོགས་བཅུའི་བདེ་
གཤེགས་མ་ལུས་པ་མཆོད་ཅིང་སྤྱན་དྲངས། དེ་རྣམས་ཀྱི་སྦྱོར་མཚམས་ནས་བབས་པའི་བྱང་སེམས་བདག་གི་སྤྱི་བོ་ནས་ཞུགས། འཁོར་ལོ་བཞི་བརྒྱུད་དེ་ཡུམ་གྱི་མཁའ་ལ་འབེབས་པ་ནི་སྒྲུབ་པ་སྟེ། ཡུམ་གྱི་པདྨའི་དཀྱིལ་འཁོར་དུ། །ཞེས་སོགས་ཤློ་ཀ་གཅིག་གསུངས་སོ། །དེ་ལ་བླ་མའི་མན་ངག་གིས་དངོས་གྲུབ་བླང་སྟེ། སྒྲུབ་པ་ཉི་ཟླའི་སྙིང་པོ་དེ། །དཀྱིལ་འཁོར་རྡོ་རྗེ་ལྕེ་ཡིས་བླང་། །ཞེས་པས་ནུབ་ཐ་མའི་ཐོ་རེངས་ཀྱི་དུས་སུ་ཡབ་ཀྱི་རྡོ་རྗེའི་ལྕེས་བླངས་ཏེ་ལྡོག་དགྲམ་གྱི་ཐབས་ཀྱིས་རང་གནས་སུ་སླེབ་པས་ཟག་མེད་རིག་འཛིན་ལ་སྦྱོར་བ་ནི་སྒྲུབ་ཆེན་ནོ། །གསུམ་པ་ནི། མཁའ་འགྲོ་གསལ་འབར་ཚེ་ལ་སོགས། །ཞེས་པས་ཐུན་མོང་དང་། ཡིད་བཞིན་སྤྲིན་གྱི་བདག་པོར་འགྱུར། །ཞེས་པས་མཆོག་གི་དངོས་གྲུབ་འགྲུབ་པར་བསྟན་ནོ། །དེ་གཉིས་ཀྱི་ཁྱད་པར་ལ་སྤར་ཁབ་ཏུ། སྔ་མ་ལྕེ་རྡོ་རྗེ་རྩེ་ལྔ་པར་བསྒོམས་ནས་བླངས་པའི་ཡོན་ཏན་དང་། ཕྱི་མ་གསང་བའི་རྡོ་རྗེས་བླངས་པའི་ཡོན་ཏན་དུ་གསུངས་སོ། །གཉིས་པ་སྒྲོལ་བ་ལ་གང་བསྒྲལ་བྱའི་ཡུལ། གང་དུ་བསྒྲལ་བའི་གནས། གང་གིས་སྒྲོལ་བའི་གང་ཟག །གང་གི་ཚེ་སྒྲོལ་བའི་དུས། ཇི་ལྟར་སྒྲོལ་བའི་ཐབས། ཅིའི་ཕྱིར་བསྒྲལ་བའི་དགོས་ཆེད་དོ། །དང་པོ་ནི། ཞིང་གྱུར་མཆོག་དང་མཆོག་ཕྲན་རྣམས། །ཞེས་པ་སྟེ་དེ་ལ་གཉིས།མཆོག་བཀྲ་ཤིས་དག་པའི་ཞིང་དང་། མཆོག་ཕྲན་ཐུགས་རྗེས་བཟུང་བའི་ཞིང་ངོ་། །དང་པོ་ནི། བྲམ་ཟེ་སྐྱེ་བ་བདུན་པ་སྟེ། དེའི་ལུས་དེ་དངོས་གྲུབ་ཀྱི་རྫས་ཁྱད་པར་ཅན་ཡིན་པའི་ཕྱིར། གཞན་ཕན་གྱི་བློས་གཏོང་བ་ལ་བསྐུལ་བ་ལྟ་བུའོ། །གཉིས་པ་ནི། གསལ་བཀྲ་ལས། དཀོན་མཆོག་སློབ་དཔོན་སྐུ་དགྲ་གཉིས། །དམ་ཉམས་ལོག་དང་འཁུས་པ་དང་། །འདུ་བར་འོང་དང་ཡོངས་ལ་གནོད། །དམ་དགྲ་ངན་པའི་ངང་ཚུལ་ཅན། །ངན་སོང་གསུམ་དང་བཅུ་པོ་ནི། །རྣལ་འབྱོར་ཀུན་གྱིས་དང་དུ་བླང་། །ཞེས་པའི་བསྒྲལ་བྱ་བཅུ་ནི་སྙིང་རྗེའི་ཞིང་སྟེ། རྗེ་
བླ་མའི་གཏེར་བྱོན་འཇོམས་བྱེད་ལས། ཨེ་མ་ཁམས་གསུམ་སེམས་ཅན་རྣམསཿ། །མ་རྟོགས་འཁྲུལ་པ་སྙིང་རེ་རྗེཿ། །སྙིང་རྗེས་བསྒྲལ་བའི་དམ་ཚིག་ནིཿ། །གསད་ཅིང་གནན་པ་མ་ཡིན་ཏེཿ། །ཞེས་སོ། །ཡང་ན་མཆོག་ནི་ཞིང་བཅུ་ལས་མི་བདུན་དང་། མཆོག་ཕྲན་ནི་ངན་སོང་གསུམ་མོ། །ཡང་མཆོག་ནི་བསྒྲལ་བྱ་གང་ཡིན་དང་། མཆོག་ཕྲན་ནི་ཙ་ར་དང་ཤེལ་ཆེན་ལ་བཀུག་ནས་སྒྲོལ་བའོ། །ཡང་གཉགས་ཊཱིཀ་ཏུ། མཆོག་ནི་གསོན་པོ་དང་། མཆོག་ཕྲན་ནི་བམ་ལ་སོགས་པའོ། །ཞེས་ཀྱང་བཤད་དོ། །གཉིས་པ་ནི། འཁོར་ཁང་ནང་མར་ཆོས་འབྱུང་གི་དབུས་སུ་ཉི་ཟླའི་དཀྱིལ་འཁོར་ལ་བཞག་ནས་བསྒྲལ་ཏེ། ཧེ་རུ་ཀ་གལ་པོ་ལས།ཁ་ཊྭཱཾ་བརྒྱབ་པས་ཨེ་ནང་དུ། །ཉི་ཟླའི་སྟེང་དུ་གན་རྐྱལ་བསྒྱེལ། །ཞེས་སོ། །གསུམ་པ་ནི། སྒྲོལ་བ་ལ་མཁས་པའི་སློབ་དཔོན་དང་ཀིང་གིས་སོ། །དེ་ལ་སློབ་དཔོན་ནི། རང་བཞིན་གྱིས་སྒྲོལ་བའི་ལྟ་བ་དང་། ཏིང་ངེ་འཛིན་གྱིས་སྒྲོལ་བའི་ཉམས་དང་། དབང་པོ་ཡུལ་དུས་ཀྱིས་སྒྲོལ་བའི་སྤྱོད་པ་དང་། ཐབས་ཆེན་པོས་སྒྲོལ་བའི་གདམས་ངག་དང་། མངོན་དུ་ཕྱུང་བས་སྒྲོལ་བའི་མཛད་སྤྱོད་ལ་མཁས་པའོ། །ཀིང་ཀ་ར་ལ་གསུམ་སྟེ། ཐུགས་རྗེའི་འཛིན་ཀིང་། ཁམས་གསུམ་སྒྲོལ་ཀིང་། ཡེ་ཤེས་སྟོབ་ཀིང་ངོ་། །དེ་གསུམ་རིམ་པ་ལྟར་བསྒྲལ་བྱ་འཛིན་པ་དང་། སྒྲོལ་བ་དང་། སྟོབ་པ་ལ་མཁས་པའོ། །བཞི་པ་ནི། ཚོགས་བསྒྲུབ་ཀྱི་ནུབ་མཐའ་མའི་ནམ་གུང་གི་དུས་སུའོ། །ལྔ་པ་ནི། ང་རྒྱལ་ལག་གི་འདུ་བྱེད་བསྒོམ། །ཞེས་སོགས་ཀྱིས་སྟོན་ཏེ། དེ་ལ་གཉིས། སྔོན་འགྲོ་དང་དངོས་གཞིའོ། །དང་པོ་ནི། ལས་གཞུང་གི་འཛབ་ཡན་ཆད་གྲུབ་པ་དང་།འཛིན་ཀིང་གིས་ལག་པར་དཔའ་བོ་འབྲུ་ལྔ་བཀོད་ནས་བསྒྲལ་བྱ་བཟུང་སྟེ། འཁོར་ཁང་ནང་མར་སློབ་དཔོན་གྱི་དྲུང་དུ་ཁྲིད་ནས་ལས་འཕྲིན་གདགས། སློབ་དཔོན་གྱིས་ལན་བཏབ། བི་ཤྭའི་སྔགས་ཀྱིས་བགེགས་བསྐྲད། བསྒྲལ་བྱའི་སྤྱི་བོར་ངན་སོང་སྦྱོང་བའི་ལྷ་བསྐྱེད། དེའི་སྔགས་ཀྱིས་བཏབ་པའི་ཡུངས་ཀར་གྱིས་སྤྱི་བོ་ནས་མར་བྲབས་པས་སྒྲིབ་པ་
སྦྱངས། བྷ་ག་བ་ཏིའི་སྔགས་ཀྱིས་འགྲོ་དྲུག་ཏུ་སྐྱེ་བའི་སྒོ་དགག་གོ། །གཉིས་པ་བསྒྲལ་བ་དངོས་ལ། སྐྱེ་བའི་རྒྱུན་གཅད་པ།འབྱུང་བའི་སྒོ་དགག་པ། ཤེས་པ་ཆོས་ཉིད་དུ་དང་། ཡུམ་གྱི་མཁའ་ལ་དང་།རྡོ་རྗེ་སེམས་དཔའ་མཚན་ཡོངས་སུ་རྫོགས་པའི་ས་ལ་དང་། འོག་མིན་དུ་དང་།ཕུང་པོ་དུར་ཁྲོད་དུ་བསྒྲལ་བ་དང་བདུན། དང་པོ་ནི། བདག་ཉིད་དཔལ་ཆེན་པོའི་ང་རྒྱལ་གྱིས། བསྒྲལ་བྱའི་ལུས་དེ་འདོད་ཆགས་ཁྲག་གི་རྒྱ་མཚོར་དམིགས་ལ་ཐོད་རློན་གྱི་རྒྱ་དང་མ་ཧཱ་རཀྟའི་སྔགས་ཀྱིས་ལྷག་མེད་དུ་གསོལ་བར་བསམ་པ་སྟེ། འཁོར་བ་སྐྱེ་བའི་རྒྱུ་སྤྱིར་དུག་ལྔ་དང་ཁྱད་པར་འདོད་ཆགས་ཡིན་པའི་ཕྱིར། གཉིས་པ་ནི། རིགས་དྲུག་གི་ས་བོན་དང་། གཉེན་པོ་བཀོད་ལ་འཇུ་འདུལ་གྱིས་ངན་འགྲོའི་སྒོ་བཀག་པ་སྟེ། གནས་ལྔར་རིགས་དྲུག་གི་ས་བོན་སྤྱི་བོར་གཉིས་དང་གཞན་རྣམས་སུ་རེ་རེ་དགོད། དེའང་ཕོ་མོའི་དབང་གི་ས་བོན་རེ་ རེའང་གཉིས་གཉིས་སོ། །གཉེན་པོ་ནི། གནས་ལྔར། ཨོཾ་ཨཱཿཧཱུཾ་སྭཱ་ཧཱ་ལྔ་པོ་རེ་རེའང་གཉིས་གཉིས་ས་བོན་སོ་སོའི་སྟེང་དུ་བསམ་པའོ། །དེ་ནས་འཇུ་འདུལ་ནི། མས་ནས་ཡར་ཞུ་སྟེ་རྐང་མཐིལ་གཉིས་ཀྱི་དུའི་སྟེང་གི་ཧཱ་གཉིས་མེར་འབར་བས་དུ་བསྲེག །དེའི་འོད་ཀྱིས་དམྱལ་བའི་འཇིག་རྟེན་ཁྱབ་པས། དེར་གནས་པའི་སེམས་ཅན་རྣམས་ཀྱི་ངག་སྒྲིབ་སྦྱངས། ཚུར་འདུས་པ་ལས་རལ་གྲི་དང་དྲིལ་བུར་གྱུར། དེའི་འོད་ཀྱིས་ཡིད་སྒྲིབ་སྦྱངས་ནས་འདུས་པས་དོན་གྲུབ་ཡབ་ཡུམ་གྱི་སྐུ་ཕྲ་མོར་གྱུར། དེ་ལས་ཀྱང་འཕྲོས་པའི་འོད་ཀྱིས་དམྱལ་བ་པའི་ལུས་སྒྲིབ་སྦྱངས། སླར་འདུས་པ་ལས་སྐུ་ཆེ་ཞིང་གཟི་བརྗིད་དང་ལྡན་པར་བསམས་ལ། འཛབ་བརྒྱ་རྩ་བརྒྱད་བཟླས་པས། ཞེ་སྡང་དག །དམྱལ་ཁམས་སྟོངས། དོན་གྲུབ་ཡབ་ཡུམ་མཉེས། ལས་རིགས་ཀྱི་ཐུགས་དམ་བསྐངས་ཤིང་། དངོས་གྲུབ་ཐོབ་པར་མོས་ལ། དོན་གྲུབ་ཡབ་ཡུམ་འོད་དུ་ཞུ་སྟེ་ལྟེ་བའི་སྭཱ་ལ་ཐིམ་པར་བསམ་པའོ། །དེ་བཞིན་དུ་བསྲེག་སྦྱང་གི་བྱ་བ་གཞན་རྣམས་ལའང་འགྲེ་ཤེས་པར་བྱས་ཏེ། ལྟེ་བར་རིན་འབྱུང་གིས་ཡི་དྭགས།
སྙིང་གར་མི་བསྐྱོད་པས་མི། མགྲིན་པར་མཐའ་ཡས་ཀྱིས་བྱོལ་སོང་། སྤྱི་བོར་རྣམ་སྣང་གིས་ལྷ་དང་ལྷ་མིན་སྦྱང་ངོ་། །གསུམ་པ་ནི། ཀིང་གིས་བསྒྲལ་བྱ་ལ་བདུད་རྩི་བླུད། གནོད་བྱེད་བཀུག་སྟེ་བསྡིམ། དཀྱིལ་འཁོར་གྱི་ལྷོ་ཕྱོགས་སུ་ཐལ་ཆེན་གྱིས་དྲག་པོའི་དཀྱིལ་འཁོར་གྲུ་གསུམ་པ་བྲི། ཨེ་རཾ་གྱིས་དྲག་པོའི་དཀྱིལ་འཁོར་བསྐྱེད་དེ། ཨ་མ་ལས་ཉི་ཟླའི་གདན་ལ། ཁ་ཊྭཱཾ་གའི་རྒྱས་འཁོར་བ་རུ་བཟློག་གི་ཚུལ་དུ། མགོ་ལྷོ་ནུབ་དང་།རྐང་པ་བྱང་ཤར་མཚམས་སུ་བསྟན་ཏེ་གན་རྐྱལ་དུ་བསྒྱེལ་བའི་སྙིང་གར་རྡོ་རྗེས་གནན་ལ་བཞག །དེ་ནས་ཀུན་བརྟགས་ཀྱི་རྟོག་པ་ཟིལ་གྱིས་གནོན་པའི་ཕྱིར་སྒྲོལ་བྱེད་སློབ་དཔོན་དཔལ་ཆེན་པོ། བདག་འཛིན་གསུམ་རྩད་ནས་གཅོད་པའི་ཕྱིར་བསྒྲལ་བྱ་དྲ། འཁོར་བའི་རུ་བཟློག་པའི་ཕྱིར་སྒྲོལ་ཀིང་ཊཱ་ཀྐི་རཱ་ཛར་ང་རྒྱལ་བྱས་ལ། ཀིང་གིས་གྲི་འཇམ་དཔལ་རྣོན་པོར་བསྐྱེད་པས་ཁོག་པ་བཤགས་ཏེ་མ་རིག་པའི་རྒྱ་དྲལ་བར་བསམ། ལག་སོར་ལ་དཔའ་བོ་འབྲུ་ལྔ་བཀོད་དེ་སྙིང་ཚིར་གྱིས་བཟུང་བས་རྩ་ཆེན་བཞི་ལ་གནས་པའི་ས་བོན་དྲུག་གཉིད་དང་བཅས་པ་འབྲུ་ལྔའི་འོད་ཀྱིས་བསྲེགས་པས་སྒྲིབ་པ་དག་སྟེ་ཧཱུཾ་ཡིག་དྲུག་ཏུ་བསྒྱུར། དེ་ཡང་རང་རིག་པའི་ཡེ་ཤེས་སུ་གཅིག་པའི་ཕྱིར་ཧཱུཾ་དཀར་པོ་གཅིག་ཏུ་གྱུར་པར་བསྒོམ་པ་ནི་ཤེས་པ་ཆོས་ཉིད་དུ་བསྒྲལ་བའོ། །བཞི་པ་ནི། དེ་དུང་ཕོར་དུ་བཅུག་ནས་སློབ་དཔོན་ལ་གཏད་པས། དཔལ་ཆེན་པོའི་ཤངས་བུག་གཡོན་ནས་རྔུབས་ཏེ་དྲངས།སྒལ་ཚིགས་ཀྱི་རྟ་བརྒྱུད། རྡོ་རྗེའི་ལམ་ནས་ཡུམ་གྱི་མཁའ་ལ་ཕབ་པས་གསང་བའི་དབྱིངས་སུ་ཐིམ་པར་བསམ་པའོ། །ལྔ་པ་ནི། ཧཱུཾ་ཡིག་དེ་ལས་ཆོ་ག་གསུམ་གྱིས་རྡོར་སེམས་སུ་བསྐྱེད་ལ། རིགས་བདག་གིས་དབུ་བརྒྱན་པར་བསམ་པའོ། །དྲུག་པ་ནི། དེ་ཨ་ལས་ཟླ་དཀྱིལ་གྱི་སྟེང་དུ་བཞག་ལ། ཡཾ་ལས་རླུང་དཀྱིལ་གྱིས་བཏེགས་ཏེ་འོག་མིན་དུ་རྡོ་རྗེ་སེམས་དཔའ་ཡབ་ཡུམ་གྱི་སྦྱོར་མཚམས་སུ་ཕཊ་ཀྱིས་འཕངས་ལ་བྱང་སེམས་ཀྱི་དབང་བསྐུར་ནས་རིགས་ངེས་པའི་སྲས་སུ་བསྐྱེད་པའོ། །བདུན་པ་ནི། ཕུང་པོ་ཆ་བཞིར་བགོས་ལ་བདུད་རྩིས་
བཀྲུ། དེ་ནས་པགས་པར་བསྡུས་ལ་དཀྱིལ་འཁོར་གྱི་སྟེང་དུ་བཞག་སྟེ་ཏྲཱཾ་ལས་རིན་པོ་ཆེའི་མཆོད་སྡོང་དུ་རློབ། སྟོབ་ཀིང་གིས་བཏེགས་ནས་ཞི་ཁྲོའི་ལྷ་ཚོགས་ལ་སྟོབ་པ་དང་བསྐང་གསོ་བྱ། དེ་ནས་བམ་ལ་ཐིག་བཏབ་སྟེ། ལྷའི་མཆོད་རྫས་དང་སྨན་གྱི་རྩ་བ་སོགས་བཀྲོས་ལ་ཕུང་པོ་བཤིག །ཚོགས་དང་ལྷག་མ་བྱ། སློབ་དཔོན་གྱིས་སྨོན་ལམ་གདབ།ཀིངྈ་རས་བཤགས་པ་བྱ། རྫས་སྦ། མཆེད་བྱིངས་ལ་གསངས་ཏེ་སྤྱད་པར་བྱའོ། །དེ་དག་ཀྱང་། གསལ་བཀྲ་ལས། ཏིང་འཛིན་སྔགས་དང་ཕྱག་རྒྱ་རྣམས། །ཤིན་ཏུ་གོམས་པར་དབང་བསྐུར་ཏེ། །བྱང་ཆུབ་ཞིང་དུ་དགོད་པར་བྱ། །ཏིང་འཛིན་སྔགས་རྒྱས་བག་ཆགས་སྦྱངས། །རྣམ་ཤེས་ལྷར་བསྐྱེད་དབང་བསྐུར་འཕང་། །ཡེ་ཤེས་ཚོགས་ཀྱང་རྫོགས་པར་འགྱུར། །ཕུང་པོ་བྱིན་རློབ་མཆོད་པར་བསྔོ། །བསོད་ནམས་མཆོག་ཏུ་འདི་འགྱུར་རོ། །ཞེས་དང་། འཇོམས་བྱེད་ཀྱི་ལུང་སྔ་མའི་འཕྲོས་ལས་ཀྱང་། ཐུགས་རྗེ་ཐབས་ཀྱི་སྦྱོར་བ་ཡིཿ། །ཕུང་པོ་བསྒྲལ་བའི་ཞིང་དུ་བྱཿ། །རྣམ་ཤེས་ཡུམ་གྱི་མཁའ་ལ་སྦཿ། །ཡེ་ཤེས་དཔའ་བོར་བྱིན་བརླབས་ཏེཿ། །རིག་པ་ཆོས་ཀྱི་དབྱིངས་སུ་འཕངཿ། །ཁྱོད་ནི་རྒྱལ་བའི་སྲས་སུ་བསྐྱེདཿ། །ཅེས་སོ། །དྲུག་པ་དགོས་པ་ནི། ངོ་མཚར་ངན་འགྲོ་ཐར་བའི་ཐབས། །ཞེས་པས་བསྒྲལ་བྱ་ལས་ངན་གྱི་འབྲས་བུས་ངན་སོང་དུ་འགྲོ་ངེས་ཤིང་དེར་གནས་པ་རྣམས་བདེ་བླག་ཏུ་དེ་ལས་སྒྲོལ་བའི་ཐབས་རྨད་དུ་བྱུང་བ་ལ་དམ་པ་སྟེ། གསལ་བཀྲ་ལས། བྱང་ཆུབ་སྤྱོད་འཕེལ་སེམས་ཅན་བདེ། །ལྷ་མཉེས་བདག་གི་དམ་སྐོངས་ཤིང་། །ལས་ངན་བར་ཆད་སྡུག་ཡུན་ཐུང་། །རང་གིས་བསག་མེད་ངན་སོང་ལས། །བདེ་ལམ་འདི་ལས་གཞན་མེད་དོ། །ཞེས་སོ། །གལ་ཏེ་མ་བསྒྲལ་བའི་ཉེས་དམིགས་ཀྱང་འཇོམས་བྱེད་ལས། གང་ཚེ་འདི་དག་མ་བསྒྲལ་ནཿ། །ལོག་རྟོག་མུན་པ་འཕེལ་བ་དངཿ། །བདེ་གཤེགས་བསྟན་པ་ཉམས་པར་འགྱུརཿ། །ཞེས་སོ། །གསུམ་པ་སྦྱོར་སྒྲོལ་གཉིས་སྤྱད་བྱར་སྒྲུབ་པ་ལ། སྒྲུབ་པ་དངོས་དང་།
དེ་ལ་རྩོད་པ་སྤང་བའོ། །དང་པོ་ནི། སྤྱད་བྱ་སྦྱོར་སྒྲོལ་གྱི་བྱ་བ་ཆོས་ཅན། སྤྱད་ཀྱང་སྤྱོད་དུས་ཉིད་ནས་ཉེས་པས་གོས་པར་མི་འགྱུར་ཏེ། རྟོགས་གོམས་ཀྱི་བློ་ལ་ལྟོས་ཏེ་དོན་ལ་རྡུལ་ཙམ་ཡང་བྱས་པ་མེད་པའི་ཕྱིར། དེ་མ་གྲུབ་ཞེ་ན། རྡུལ་ཆ་ཙམ་ཡང་བྱས་པ་མེད་དེ། ཆོས་ཐམས་ཅད་ཡེ་ནས་དག་ཅིང་སྒྱུ་མའི་རང་བཞིན་ཡིན་ལ། འདིར་དེ་མངོན་དུ་གྱུར་པས་འཛིན་ཞེན་མེད་པར་སྤྱད་པའི་ཕྱིར། དཔེར་ན་སྒྱུ་མའི་སྐྱེས་བུས་མིག་ཡོར་གྱི་གང་ཟག་ལ་སྦྱོར་སྒྲོལ་གྱི་ལས་བརྩམས་པ་བཞིན་ནོ། །དེ་ལྟར་ཡང་། ཡེ་ནས་སྐྱེ་མེད་དེ་བཞིན་ཉིད། །སྒྱུ་མར་སྣང་བ་མིག་ཡོར་ཚུལ། །སྦྱོར་སྒྲོལ་བྱ་བ་ཀུན་བྱས་ཀྱང་། །རྡུལ་ཆ་ཙམ་ཡང་བྱས་པ་མེད། །ཅེས་དང་། ཡེ་ཤེས་རྒྱས་པ་ལས་ཀྱང་། ཇི་ལྟར་སྒྱུ་མའི་མཁན་པོ་དག །རང་གི་སྤྲུལ་པའི་སྒྱུ་མ་ལ། །དགེ་དང་མི་དགེ་འདུ་བྱེད་པ། །ཉེས་པ་གང་གིས་མི་གོས་ལྟར། །ཐབས་ལ་མཁས་པས་རྣམ་པར་སྤྱོད། །ཅེས་སོ། །གཉིས་པ་ནི། ཁ་ཅིག་ན་རེ། སྦྱོར་སྒྲོལ་གཉིས་ཆོས་ཅན། སྤྱད་བྱ་མ་ཡིན་པར་ཐལ། འཁོར་བར་འཆིང་ཞིང་ངན་འགྲོར་ལྷུང་བྱེད་ཡིན་པའི་ཕྱིར་ཏེ། སྦྱོར་བའི་རྣམ་སྨིན་གྱིས་རོ་མྱགས་ཀྱི་དམྱལ་བ་དང་། རྒྱུ་མཐུན་མངལ་གྱི་སྲིན་བུ།སྒྲོལ་བའི་རྣམ་སྨིན་གྱིས་ཡང་སོས་དང་རྒྱུ་མཐུན་ལས་ཀྱི་སྲིན་པོར་སྐྱེ་བར་བཤད་པའི་ཕྱིར་ཞེ་ན། ཐམས་ཅད་ཀྱིས་ཐམས་ཅད་དུ་སྤྱད་བྱ་མ་ཡིན་པའམ་འགའ་ཞིག་གི་ཚེ་སྤྱད་བྱ་མ་ཡིན་ཏེ། འཁོར་བར་ལྷུང་བྱེད་ཡིན་པའི་ཕྱིར་ཟེར། དང་པོ་ལྟར་ན། བྱང་ཆུབ་སེམས་དཔའ་རྔོན་དང་སྨད་འཚོང་དུ་སྤྲུལ་པའི་ཐབས་མཁས་ཀྱི་མཛད་པའང་དེར་ཐལ། དེའི་ཕྱིར་ཏེ། གསལ་བཀྲ་ལས། ཐབས་ཀྱི་སྤྱོད་པས་འཆིང་འགྱུར་ན། །བྱང་ཆུབ་སེམས་དཔའ་འདུལ་དབང་གིས། །རྔོན་དང་སྨད་འཚོང་བསྟན་པའང་ལྟུང་། །ཞེས་པ་ལྟར་རོ། །གལ་ཏེ་སེམས་དཔའ་གཞན་དོན་དུ་དེ་སྤྱོད་ཀྱང་མི་ལྟུང་ན་ཅི་འགལ་ཏེ། ཁྱབ་པ་མ་གྲུབ་ཟེར་ན།ཐམས་ཅད་ཀྱིས་ཐམས་ཅད་དུ་སྤྱད་བྱ་མ་ཡིན་པའི་དམ་བཅའ་ཉམས་སོ། །གཉིས་པ་ལྟར་ན། ཐབས་ཀྱིས་མ་ཟིན་པས་གསོད་སྦྱོར་ཐ་མལ་དུ་སྤྱོད་དམ་སྤྱོད་དུ་
བཅུག་ན་འབྲས་བུ་དེ་ལྟར་འབྱུང་བ་བདེན་ཀྱང་འདིར་ཐབས་ཀྱིས་ཟིན་པའི་ཕྱིར་ཅི་འགལ་ཏེ། སྔ་མ་ལས། ཁེ་དྲེགས་སྤྱོད་པས་དེ་མིན་ཏེ། །ཐབས་ཆེན་ལམ་ལ་གནས་པ་ཡི། །སྐྱེས་བུ་ཀུན་གྱིས་བྱ་བར་གསུངས། །ཞེས་སོ། །མདོར་ན། འཛིན་ཞེན་མེད་པར་ཇི་ལྟར་སྤྱད་ཀྱང་། ལས་ཀྱིས་གོས་པར་མི་འགྱུར་བ་ནི་རྒྱལ་བའི་བསྟན་པ་སྤྱིའི་ཕྱག་རྒྱ་སྟེ། འདུལ་བ་མདོ་རྩ་ལས། རྨི་ལམ་ནི་མེད་པ་དང་འདྲའོ། །དེའི་འབྲས་བུ་ནི་མ་བྱས་པ་ཉིད་དོ། །ཞེས་དང་། སྡུད་པ་ལས།སྐྱེ་བོ་ཕལ་ཆེར་མགོ་མང་བྱེ་བ་གཅོད་བྱེད་ཀྱང་། །འགྲོ་ཀུན་སྤྲུལ་འདྲར་རབ་ཤེས་དེ་ལ་འཇིགས་པ་མེད། །ཅེས་སོ། །སྤྱིར་སྦྱོར་སྒྲོལ་ལ་ཆ་ལྔར་གསུངས་ཏེ། ལེ་ལག་ལས། འདིས་ནི་རང་བཞིན་སྦྱོར་སྒྲོལ་དང་། །དབང་པོ་ཡུལ་དུས་སྦྱོར་སྒྲོལ་དང་། །ཏིང་ངེ་འཛིན་གྱི་སྦྱོར་སྒྲོལ་དང་། །ཐབས་ཆེན་པོ་ཡི་སྦྱོར་སྒྲོལ་དང་། །མངོན་དུ་བྱུང་བའི་སྦྱོར་སྒྲོལ་ལོ། །ཞེས་སོ། །དེ་ལྟར་ལྔ་ལས། དང་པོ་ནི། ཆོས་ཐམས་ཅད་ཀྱི་རང་བཞིན་གཉིས་སུ་མེད་པར་རྟོགས་པ་ནི་སྦྱོར་ བ། དེས་གཉིས་འཛིན་གྱི་རྟོག་པ་ལས་སྒྲོལ་བ་ནི་སྒྲོལ་བ་སྟེ། ལམ་རིམ་ལས།གཉིས་མེད་དབྱིངས་སུ་སྦྱོར་བ་ཡིན། །ཞེས་དང་། བདག་ཉིད་ཆེན་པོ་རྟོགས་པ་ཡིས། །དབྱིངས་སུ་ཡང་ནི་བསྒྲལ་བར་བྱ། །ཞེས་སོ། །གཉིས་པ་ནི། ཡུལ་ཕས་སྣང་ཡུམ་དང་། དབང་པོ་ནང་ནས་འཆར་བ་ཡབ་སྟེ། ལྷ་ཡབ་ཡུམ་གཉིས་མེད་དུ་སྦྱོར་བ་ནི་སྦྱོར་བ། དེས་ཐ་མལ་གྱི་རྟོག་ཚོགས་རང་སར་དག་པས་སྒྲོལ་བ་སྟེ། འདི་ཉིད་ལས། དབང་པོ་ཡུལ་དུས་རིག་པ་རྣམས། །བྱང་ཆུབ་སེམས་ནི་རྡོ་རྗེའི་ཚོགས། །ཞེས་སོ། །གསུམ་པ་ནི། བསྐྱེད་རིམ་པས་བསྒོམ་བྱ་སྟེ། ལྷ་ཡབ་ཡུམ་དུ་བསྐྱེད་ནས་རོལ་པ་ནི་སྦྱོར་བ། བསྒྲལ་བྱའི་རྣམ་ཤེས་འོག་མིན་དུ་སྤོར་བའི་ཏིང་ངེ་འཛིན་ནི་སྒྲོལ་བའོ། །དེའང་ཐབས་ཞགས་ལས། རྣམ་ཤེས་ཧཱུཾ་གིས་བསྡུས་རྔུབས་ཏེ། །འོག་མིན་བླ་མེད་གནས་མཆོག་ཏུ། །གཙོ་བོ་དང་ནི་གཙོ་མོ་དང་། །སེམས་དཔའ་དང་ནི་སེམས་མ་རྣམས། །སྦྱོར་བའི་ལྷུམས་སུ་ཕཊ་ཀྱིས་
འཕང་། །ཞེས་སོ། །བཞི་པ་ནི། འདིའི་ལེའུ་བཅོ་ལྔ་པར་གསུངས་པ་ལྟར་སྔོན་བྱུང་དཔལ་ཆེན་པོའི་ཐབས་ཀྱི་མཛད་སྤྱོད་དེ། སྔ་མ་ལས།སྔོན་ཚེ་དཔལ་ཆེན་ཧེ་རུ་ཀས། །ཕོ་བསྒྲལ་དུར་ཁྲོད་བརྒྱད་དུ་བྱས། །མོ་རྣམས་སྦྱར་ཏེ་སླས་སུ་བྱས། །དེ་བཞིན་ཐབས་ཀྱི་མཛད་སྤྱོད་དོ། །ཞེས་སོ། །ལྔ་པ་ནི། ཚོགས་བསྒྲུབ་ཀྱི་དུས་སུ་སྦྱོར་སྒྲོལ་དངོས་སུ་བྱེད་པ་སྟེ། ལག་ལེན་སྔར་བཤད་གྲུབ་བོ། །དེ་གང་ཟག་ཇི་ལྟ་བུས་བྱ་ཞེ་ན། ལྟ་བ་རྟོགས་ཤིང་སྣང་བྱེད་ཀྱི་ཏིང་འཛིན་དང་རླུང་སེམས་ལ་དབང་ཐོབ་པའི་རྣལ་འབྱོར་པས་བྱ་བ་སྟེ། གསལ་བཀྲ་ལས། ལྟ་སྤྱོད་ཏིང་འཛིན་འདྲེལ་གོམས་པས། །ཞེས་སོ། །དེ་ལྟར་ཚོགས་བསྒྲུབ་ཀྱི་ཚེ་སྤྱད་བྱའི་ཡོ་བྱད་ལྔ་ལས། བཤད་མ་ཐག་པའི་ཨཱ་ལི་ཀཱ་ལི་དང་།གཞན་ཡང་ཞི་ཁྲོའི་གོས་རྒྱན་དང་། བཟའ་བཏུང་དང་། གླུ་ཚིག་དང་། བྲོ་གར་འདུ་འཕྲོའི་ཡོ་བྱད་རྣམས་རང་རིག་པའི་ཡེ་ཤེས་ཀྱི་རང་བཞིན་དུ་ཤེས་པར་བྱས་ནས་མ་ཆགས་པའི་ཚུལ་གྱིས་ལྷ་མཆོད་པ་དང་སྤྱོད་ལམ་གྱི་དུས་ཐམས་ཅད་དུ་སྤྱོད་པ་སྟེ། ལམ་རིམ་ལས། གསང་སོགས་ཡོ་བྱད་ལྔ་པོ་རྣམས། །རིག་ཕྱིར་མ་སྐྱེས་ཡེ་ཤེས་གསལ། །ཆོས་ཉིད་ཡེ་ཤེས་རོལ་པར་བསྒོམ། །ཞེས་དང་། མཆོད་པའམ་སྤྱོད་ལམ་ཐམས་ཅད་དུ། །ཆས་བརྒྱད་རྒྱན་རྣམས་བགོ་བྱ་སྟེ། །བཟའ་བཏུང་རྗེས་སུ་མཐུན་པར་སྤྱད། །བྲོ་གར་གླུ་ཚིག་ལྡན་པར་བྱ། །ཞེས་སོ། །གསུམ་པ་འབྲས་བུ་རིག་འཛིན་འགྲུབ་པའི་དུས་བཤད་པ་ནི། ཡང་རབ་ཀྱིས་ཟླ་བ་དྲུག །རབ་ཀྱིས་ལོ་གཅིག འབྲིང་ལོ་གཅིག་དང་ཟླ་བ་གཉིས། ཐ་མས་ཀྱང་ལོ་གཅིག་དང་ཟླ་བ་བཞི་ན། དབང་པོ་རྣོ་ན་ཚེ་དབང་དང་། །རྟུལ་ན་རྣམ་སྨིན་ལ་སྦྱོར་ཏེ། །འདི་ཉིད་ལས། ཞག་ནི་སུམ་ཅུ་ཕྲག་དྲུག་གམ། །བཅུ་གཉིས་བཅུ་བཞི་བཅུ་དྲུག་གིས། །དབང་བསྒྱུར་རིགས་ཀྱི་དམ་པ་འགྲུབ། །ཅེས་པ་སྟེ། ཞི་བའི་ཚོགས་བསྒྲུབ་ཀྱི་དུས་སོ། །ཁྲོ་བོ་ནི་དེ་ལས་སྒྲུབ་ཐག་ཉེ་བས་རབ་ཀྱིས་ཟླ་བ་གཉིས། འབྲིང་གིས་ཟླ་བ་གསུམ་དང་ཞག་དྲུག །ཐ་མས་ཀྱང་ཟླ་བ་དྲུག་ན་འགྲུབ་སྟེ། ལམ་རིམ་ལས། ཞག་ནི་སུམ་ཅུ་ཕྲག་དྲུག་གམ། །དྲུག་
ཅུ་དགུ་བཅུ་རྩ་དྲུག་ཏུ། །འཇིགས་བྱེད་ཆེན་པོའི་དཀྱིལ་འཁོར་བསྒོམ། །ཞེས་སོ། །འདིར་ཞི་བ་ལས་ཁྲོ་བོ་འགྲུབ་ཐག་ཉེ་བ་ཅིའི་ཕྱིར་ཞེ་ན། སྣར་སྟོན་ནི། ཁྲོ་བོ་བར་ཆད་ཉུང་ཞིང་སྤྱོད་པ་རླབས་ཆེ་བས་དུས་མྱུར་བ་ཡིན་གསུངས། གོང་མ་ཕལ་ཆེར། ཞི་བ་འཛབ་འཐོར་ཞིང་བར་ཆོད་མང་བས་འགོར་ལ་ཁྲོ་བོ་འཛབ་འདྲིལ་བ་དང་བར་ཆོད་ཉུང་བས་ཉེ་བ་ཡིན་གསུངས་སོ། །དེ་དག་ནི་བར་ཆད་མེད་པའི་ལམ་དུ་ཚོགས་སྒྲུབ་པ་སྟེ། སྨིན་པར་སློབ་པའི་ཚུལ་ལོ། །གཞན་དུ་མོས་སྒྲུབ་ཙམ་བྱེད་པར་སྤྲོ་ན། ཞག་བཅུ་གཅིག་གི་དབང་དུ་བྱས་ཏེ། ནུབ་དང་པོས་ཆོ་ག །གཉིས་པར་སྟ་གོན། གསུམ་པ་ལ་ཕྱི་ནང་གི་བཤགས་པ་དང་མཚམས་གཅོད་ནས་བཟུང་། དཀྱིལ་འཁོར་རབ་གནས་ཡན་ཆད་ཚར་བ་དང་། ལས་གཞུང་བསྲངས་ཏེ་བསྙེན་པའི་འཕྲོ་འདུ་བྱ། དེ་ནས་ཞག་དྲུག་གི་དང་པོ་གསུམ་ལ་ཉེ་བསྙེན་དང་། ཕྱི་མ་གསུམ་ལ་སྒྲུབ་པའི་འཕྲོ་འདུས་བཟླས་བརྗོད་བྱ།ཞག་བདུན་པ་ལ་དངོས་གྲུབ་ལེན་པའི་ལས་ལ་འབད་ཅིང་། ནམ་ལངས་པ་དང་དབང་བསྐུར་བ་ནི་སྒྲུབ་ཆེན་ཏེ། ཆོ་གའི་རྣམ་བཞག་གཞན་རྣམས་སྔར་བཤད་པ་ལྟར་ཤེས་པར་བྱའོ། །དེ་ཡང་དཀྱིལ་འཁོར་ནི་ལམ་གྱི་ཆ་རྐྱེན་གྱི་གཙོ་བོར་གྱུར་པའི་ཕྱིར་འདིར་རྒྱས་པར་བཤད་པ་ཡིན་ནོ། །ལྔ་པ་སྐྱོན་ནི་འཆད་འགྱུར་གྱི་ཡོན་ཏན་ལས་བཟློག་པ་སྟེ། ཐུགས་ཐིག་ལས། དེ་ལས་བཟློག་པའི་སྐྱོན་ཅན་བཞི། །ཞེས་སོ། །དྲུག་པ་ཡོན་ཏན་ནི། དཀྱིལ་འཁོར་ལ་བརྟེན་པས་རྟོགས་པའི་ཡེ་ཤེས་འཕེལ་བ་དང་། སྡིག་སྒྲིབ་འབྱང་ཞིང་མཚན་རྟོག་འགྲིབ་པ་དང་། ཚོགས་གཉིས་རྫོགས་པའི་ཕན་ཡོན་ཁྱད་པར་ཅན་གྱི་ཐབས་སུ་གྱུར་པ་དང་། མཐར་ཐུག་འབྲས་བུ་འགྲུབ་པའི་རྟེན་དུ་འགྱུར་བའི་ཕྱིར་ཏེ། དེ་ལས། འཕེལ་འགྲིབ་ཕན་ཡོན་ཐབས་འགྲུབ་བཞི། །ཞེས་སོ། །བཞི་པ་རིམ་པ་བགྲོད་པ་དབང་ལ་དྲུག་ལས། དང་པོ་དགོས་ཆེད་ནི། ཆོས་ཀྱི་རྒྱལ་པོའི་གོ་འཕང་རྒྱུད་ལ་ཐོབ་པའི་ཆེད་དུ་སྟེ། དེ་ཐོབ་པ་ལ་སྒྲིབ་པ་འཇོམས་ཤིང་ནུས་པ་འཇོག་པའི་ཐབས་འདིས་རིམ་པར་བགྲོད་དགོས་པའི་ཕྱིར། དེ་ལྟར་ཡང་
ཐུགས་ཐིག་ལས། བདག་གཞན་དོན་ནུས་ཚོགས་ལས་འགྲུབ། །དེ་ལ་དེ་ཡོད་ཕྱིར་ནོད་བྱ། །ཞེས་སོ། །གཉིས་པ་ངོ་བོ་ནི། རྒྱུ་གཉིས་རྐྱེན་བཞིའི་ཡན་ལག་གིས་ཐོབ་བྱའི་ནུས་པ་ཁྱད་པར་ཅན་དེ་ཉིད་རྒྱུད་ལ་འཇོག་པའི་ལས་ཀྱི་བདག་ཉིད་སྟེ། སྔ་མ་ལས། རྒྱུ་གཉིས་རྐྱེན་བཞི་ཡན་ལག་བསྙད། །དྲུག་ལ་གནས་པའི་ཐོབ་བྱ་དེ། །ངོ་བོ་ཉིད་ཅེས་རྣམ་པར་བཤད། །ཅེས་སོ། །དཔེར་ན་འཇིག་རྟེན་དུ་འཁོར་ལོས་སྒྱུར་བའི་རྒྱལ་པོ་བྱུང་བའི་ཚེ་གླང་ཆེན་ས་སྲུང་གི་བུས་བུམ་ཆུའི་རྒྱ་རྟགས་ཀྱི་དབང་བསྐུར་བ་བཞིན་ནོ། །གསུམ་པ་སྒྲ་དོན་ནི། ཨ་བྷི་ཥིཉྩའི་སྒྲ་ལས་མངོན་པར་གཏོར་བ་ཞེས་བྱ་སྟེ། དངོས་སུ་དྲི་མ་འཁྲུད་པ་ཙམ་ལ་འཇུག་ཅིང་། བརྒྱུད་ནས་དེས་འབྲས་བུ་ཡེ་ཤེས་ཀྱི་ནུས་པ་ཁྱད་པར་ཅན་འཇོག་པས་ན་དབང་སྟེ། ཧེ་རུ་ཀ་འདུས་པ་ལས། གང་གིས་གང་ལ་གང་བསྐུར་བས། །རྒྱུད་དག་ནུས་པ་ཐོབ་ཕྱིར་དབང་། །ཞེས་སོ། །བཞི་པ་རྣམ་གྲངས་ལ། དབྱེ་བ་དང་། ལས་ཀྱི་རིམ་པའོ། །དང་པོ་ལ། རིམ་པའི་སྒོ་ནས་དང་། རྟེན་གྱི་དཀྱིལ་འཁོར་གྱི་སྒོ་ནས་དང་། གང་གི་ཚེ་བསྐུར་བ་དུས་ཀྱི་སྒོ་ནས་དང་། མོས་པ་ཐ་དད་པའི་སྒོ་ནས་དབྱེ་བའོ། །དང་པོ་ནི། ཟག་བཅས་ཀྱི་ལམ་དུ་དབང་གསུམ་གྱི་ནུས་པ་ཙམ་འཇོག་པ་དང་། བར་ཆད་མེད་པའི་ལམ་དུ་ཕལ་ཆེར་འཇོག་པ་དང་།ཟག་མེད་ཀྱི་ལམ་དུ་དངོས་སུ་འཇོག་ཅིང་བསྐུར་བ་སྟེ། ལམ་གྱི་རིམ་པར་བཞེད་པ་དང་། ཡང་ན་ཐལ་རྒྱུད་ལས། གང་དུ་དད་དང་བརྩོན་འགྲུས་དང་། །བརྟུལ་ཞུགས་གསུམ་དང་ལྡན་པ་ལ། །ས་བོན་འཇུག་དང་ནུས་བསྐྱེད་ནས། །བདེ་བའི་དབང་ནི་རིམ་བཞིན་སྦྱིན། །ཞེས་པས་ནུས་པ་འཇོག་ཚུལ་གསུམ་པོ་ཕན་ནུས་ཟབ་དབང་གསུམ་གྱི་རིམ་པར་བཞེད་པའང་ཡོད་དེ། གང་ལྟར་ཀྱང་འགལ་བར་མ་མཐོང་ངོ་། །གཉིས་པ་ནི། རྒྱུད་ཚོད་དང་སྦྱར་བའི་དཀྱིལ་འཁོར་བཞིར་འགྱུར་ཏེ། རང་བཞིན་ཡེ་ཤེས་ཀྱི་དང་། ལྷག་པ་ཏིང་ངེ་འཛིན་གྱི་དང་། རིག་པ་ཉམས་ཀྱི་དང་། ལྷག་པ་གཟུགས་བརྙན་གྱི་དཀྱིལ་འཁོར་དུ་དབང་བསྐུར་བའོ། །དང་པོ་ནི། སློབ་དཔོན་རྫོགས་པའི་སངས་རྒྱས་ཀྱིས་སློབ་བུ་མཐར་ཕྱིན་
པའི་ལམ་པ་ལ་དབང་བསྐུར་བའི་ཚེ་ཡེ་ཤེས་ཀྱི་སྣང་བ་ལས་གྲུབ་པའི་རང་བཞིན་གྱི་དཀྱིལ་འཁོར་དང་ཡེ་ཤེས་ཀྱི་ལྷ་མོ་ལ་བརྟེན་པར་མཛད་དེ། སྔར་ལེའུ་གཉིས་པར་བསྟན་པའི་སྔོན་བྱུང་གི་དབང་བཞིན་ནོ། །དེ་ལྟར་ཡང་སྒྱུ་འཕྲུལ་རྡོ་རྗེ་ལས། རྒྱལ་བ་ཀུན་གྱི་སྤྱི་གཟུགས་དེས། །འཁོར་ཚོགས་ཡེ་ཤེས་རྒྱ་མཚོ་ལ། །རང་བཞིན་དཀྱིལ་འཁོར་ལྷན་ཅིག་ཏུ། །ཡེ་ཤེས་ལྷ་མོ་ལ་བརྟེན་ནས། །ཡེ་ཤེས་ཆེན་པོའི་དབང་བསྐུར་བས། །གསང་བདག་རྡོ་རྗེ་འཆང་ཆེན་གྱུར། །ཞེས་སོ། །གཉིས་པ་ནི། སློབ་དཔོན་མཐར་ཐུག་སངས་རྒྱས་ཀྱི་ས་ལ་ཉེ་བ་ལྷུན་གྲུབ་རིག་འཛིན་གྱིས་སློབ་མ་མཐོང་བསྒོམ་གཉིས་ཀྱི་རིག་འཛིན་ལ་ལྷག་པ་ཏིང་འཛིན་དང་རིག་པའི་ལྷ་མོ་ལ་བརྟེན་ནས་དབང་བསྐུར་ཏེ། དེ་ལས། དང་པོ་ནས་བཟུང་བཅུ་པའི་བར། །ཏིང་འཛིན་འབར་བའི་དཀྱིལ་འཁོར་དུ། །རིག་པའི་ལྷ་མོ་ལ་བརྟེན་ནས། །ཏིང་འཛིན་ཆུ་བོས་དབང་བསྐུར་བས། །ས་དང་ཡེ་ཤེས་ཞིང་ཁམས་དང་། །རྫུ་འཕྲུལ་མཛད་པའི་རིམ་པ་འཕེལ། །ཞེས་གསུངས་ཏེ། སྔོན་སློབ་དཔོན་སངས་རྒྱས་གསང་བས་མཚོ་མ་ཕམ་ལ་ཐིག་བཏབ་ནས་རྡོ་རྗེ་དབྱིངས་ཀྱི་དཀྱིལ་འཁོར་བསྟན་ཏེ། དབས་མཉྫུ་ཤྲཱི་སོགས་ལ་དབང་བསྐུར་བ་དང་། སློབ་དཔོན་ཆེན་པོ་པདྨས་སྟག་ཚང་སེང་ཕུག་ཏུ་འཚོ་རྒྱལ་ལ་ཕུར་པའི་དཀྱིལ་འཁོར་ནམ་མཁའ་དང་མཉམ་པ་བསྟན་ནས་དབང་བསྐུར་བ་ལྟ་བུའོ། །དེ་འདྲ་བའི་དཀྱིལ་འཁོར་དེ་ལ་གཞན་དུ་སྤྲུལ་པའི་དཀྱིལ་འཁོར་ཞེས་གྲགས་ཤིང་། འདིར་ལྷག་པ་ཏིང་ངེ་འཛིན་གྱི་གཟུགས་བརྙན་ཞེས་གསུངས་ཏེ། རྡོ་རྗེ་ལས་རིམ་ལས། སློབ་དཔོན་མཐར་ཉེ་ལམ་གནས་པས། །བཞི་བཅུ་རྩ་གཉིས་སུམ་འཕྲོ་ཞིང་། །སངས་རྒྱས་སྟོང་གི་དཀྱིལ་འཁོར་སོགས། །རྡོ་རྗེའི་ཐིག་ཚད་དོར་ཙམ་གྱིས། །རྒྱང་གྲགས་ལ་སོགས་མཚན་མ་ཡི། །དཀྱིལ་འཁོར་ཕྱག་རྒྱ་གསལ་ལྡན་པ། །རྒྱུའི་དབང་དུ་ལྷག་པ། ཏིང་འཛིན་ལྷག་པའི་བུའི་དབང་དུ་གཟུགས་བརྙན་ཡིན། །ཞེས་སོ། །གསུམ་པ་ནི། སློབ་དཔོན་མཐོང་ལམ་པས་སློབ་མ་གཅིག་སྤྲོས་ལས་སུ་རུང་བའི་ལམ་བྲོད་པ་ཅན་ལ་རིག་པ་ཉམས་ཀྱི་དཀྱིལ་འཁོར་དང་། རིག་པ་རྩལ་
གྱི་གཟུངས་མ་ལ་བརྟེན་ནས་དབང་བསྐུར་ཏེ། རྡོ་རྗེ་ལས། མཐོང་ལམ་རྡོ་རྗེའི་སྐུ་ཐོབ་པས། །ངེས་འབྱེད་རྣལ་འབྱོར་ཉམས་ལྡན་ལ། །རིག་པ་ཉམས་ཀྱི་དཀྱིལ་འཁོར་དུ། །རིག་པ་རྩལ་གྱི་གཟུངས་བརྟེན་ནས། །ཟག་མེད་རྡོ་རྗེའི་སྐུ་ལ་སྦྱོར། །ཞེས་སོ། །བཞི་པ་ནི། ཏིང་ངེ་འཛིན་ལ་བརྟན་པ་ཐོབ་པའི་སློབ་དཔོན་གྱིས་སྐལ་བ་དང་ལྡན་པའི་སློབ་མ་ལ་ལྷག་པ་གཟུགས་བརྙན་གྱི་དཀྱིལ་འཁོར་དང་ལས་རྒྱ་མཚན་ལྡན་ལ་བརྟེན་ནས་དབང་བསྐུར་ཏེ། དེ་ལས། རིག་པ་བརྟན་ཐོབ་རྣལ་འབྱོར་པས། །ལས་དང་སྐལ་ལྡན་རྣལ་འབྱོར་ལ། །ལྷག་པ་གཟུགས་བརྙན་དཀྱིལ་འཁོར་དུ། །རིག་མ་ཕྱག་རྒྱ་མཛེས་མ་ལ། །དབང་བསྐུར་བྱིན་རློབ་བརྟན་བྱས་ནས། །ཆོ་ག་ཐབས་ཀྱིས་དབང་བསྐུར་ཞིང་། །བརྒྱུད་པ་དབང་གི་མན་ངག་གིས། །སྦྱོར་བ་ཉམས་ལྡན་རྣལ་འབྱོར་འཐོབ། །ཞེས་སོ། །དེ་ལས་ལྷག་པ་གཟུགས་བརྙན་གྱི་དཀྱིལ་འཁོར་དུ་དབང་བསྐུར་བའི་དོན་འཆད་པའི་ཚེ། ཁ་ཅིག་ན་རེ། ད་ལྟ་གང་ཟག་རབ་འབྲིང་ཀུན་དབང་གི་དཀྱིལ་འཁོར་རྡུལ་ཚོན་ཁོ་ན་ལ་བརྟེན་དགོས་སོ་ཟེར་བ་མི་རིགས་ཏེ། བི་མ་ལས་ཐིག་གི་པིཎྜཱརྠར། བརྟན་ཞིང་ངོས་འཇམ་ཁང་བུ་དང་། །རས་སམ་གྲོ་གའམ་ཤིང་ཤུན་ནམ། །ཏཱ་ལའི་ལོ་མའམ་དུར་ཁྲོད་རས། །ཞིང་ཆེན་རས་ལ་སོགས་པ་ལ། །ཕྱག་རྒྱ་མཉམ་རྫོགས་བྲིས་པ་ནི། །མཚན་མ་འབྱུང་བའི་རྟེན་ཡིན་ནོ། །ཞེས་ཁང་བུའི་ལྡེབས་རིས་དང་རས་བྲིས་ལ་སོགས་པ་གསུངས་པ་དང་། ཁྱད་པར་ཨཱ་ཙརྱ་རྒྱལ་བའི་སྡེས། རྡུལ་ཚོན་བྲི་བར་མ་ནུས་ན། །དཀྱིལ་འཁོར་དང་མཉམ་རས་ལ་ནི། །ངེས་པར་བཅོམ་ལྡན་ཧེ་རུ་ཀ །ཕྱག་རྒྱའི་གཟུགས་དང་བཅས་པ་བྲི། །ཞེས་རས་བྲིས་ཀྱི་དཀྱིལ་འཁོར་གསུངས་ཤིང་། སྔོན་གྱི་སློབ་དཔོན་གྲུབ་པའི་དབང་ཕྱུག་རྣམས་དེར་དབང་བསྐུར་བ་ཉིད་བཞེད་པའི་ཕྱིར་རོ། །དེས་ན་དམན་པ་རྣམས་རས་བྲིས་ཀྱི་དཀྱིལ་འཁོར་དུ་འཇུག་རུང་བར་མ་ཟད། ལས་དང་པོ་པ་ཡིན་ཀྱང་དབང་པོའི་ཁྱད་པར་གྱིས། རྡུལ་ཚོན། རས་བྲིས། ཚོམ་བུའི་དཀྱིལ་འཁོར་གསུམ་གསུངས་པའི་དབྱེ་བས་རབ་མེ་ཏོག་གི་ཚོམ་བུའི་དཀྱིལ་
འཁོར་ལྟ་བུ་དམིགས་རྟེན་ཅུང་ཟད་ཙམ་ལ་བསྟེན་ནས་བསྐུར་རུང་བ་ཡོད་པའི་ཕྱིར་ཏེ། བདེ་འདུས་དབང་གི་རྩ་བ་ལས། དཀྱིལ་འཁོར་གང་དུ་དབང་བསྐུར་ན། །རབ་འབྲིང་ཐ་མར་གསུངས་པ་ཡིས། །མེ་ཏོག་བྲིས་སྐུ་རྡུལ་ཚོན་གསུམ། །དཀྱིལ་འཁོར་གསུམ་དུ་དབང་བསྐུར་རོ། །ཞེས་གསུངས་པའི་ཕྱིར་དང་། དེ་ལས་ཀྱང་སྐལ་ལྡན་མཆོག་ཁ་ཅིག་རྡོ་རྗེ་སློབ་དཔོན་གྱི་ལུས་དཀྱིལ་དུ་ཐོག་མ་ནས་འཇུག་རུང་བའང་ཡོད་དེ། ལུས་དཀྱིལ་ལ་དཀྱིལ་འཁོར་དུ་འདུ་ཤེས་པའི་གང་ཟག་མཁས་པ་དེས་ཕྱི་དཀྱིལ་ལ་བརྟེན་དགོས་པའི་རྒྱུ་མཚན་མེད་པའི་ཕྱིར། དེ་ལྟར་ཡང་སློབ་དཔོན་དྲིལ་བུ་བས། བཅོས་མ་གཉིས་ཀྱི་དཀྱིལ་འཁོར་གང་། །དེ་ནི་གདུལ་བྱའི་དབང་ལས་འདོད། །མཁས་པའི་བསྒྲུབ་བྱ་དེ་མ་ཡིན། །ཞེས་གསུངས་པའི་ཕྱིར། དེ་ལྟ་བུའི་མཁས་པ་དེས་ནི་སྔ་མ་ལས། འགྲོ་བ་འདི་ཀུན་རང་བཞིན་གྱིས། །གྲུབ་པའི་དཀྱིལ་འཁོར་གཉིས་མེད་པའོ། །ཞེས་དང་།འགྲེལ་ཆུང་ལས། སྲིད་གསུམ་འགྲོ་བ་ཐམས་ཅད་ཀྱི། །ཕུང་པོ་ཁམས་དང་སྐྱེ་མཆེད་དང་། །བརྗོད་མེད་བརྗོད་ཀྱིས་མི་ལང་བ། །དེ་སྙེད་འཁོར་ལོའི་དཀྱིལ་འཁོར་དུ། །མངོན་རྫོགས་རྒྱལ་པོར་དེ་ཉིད་ངེས། །གཉིས་མེད་ལྷུན་གྲུབ་དཀྱིལ་འཁོར་ན། །ཐམས་ཅད་བདག་ཉིད་རྟག་པར་བཞུགས། །ཞེས་དང་། དོང་སྤྲུག་གི་དབང་གི་མེ་ཏོག་དོར་བའི་སྐབས་སུའང་། སློབ་དཔོན་སྐུ་ཡི་དཀྱིལ་འཁོར་དུ། །ཞེས་སོགས་གསུངས་པའི་མཚན་ཉིད་ཅན་གྱི་དཀྱིལ་འཁོར་ལ་བརྟེན་ནས་བསྒྲུབ་ཅིང་དབང་ལེན་པར་བྱ་བ་ཉིད་དེ། དེ་ཉིད་ལས། བདེ་བ་ཆེན་པོའི་དཀྱིལ་འཁོར་ནི། །སྟངས་དཔྱལ་གཉིས་སམ་ཡང་ན་ལྔ། །བྱས་ཏེ་དད་ལྡན་རབ་ཞུགས་ན། །འདོད་པ་ཡིད་འོང་མཉམ་པར་འགྱུར། །ཞེས་པས་མཆོག་བདེ་བ་ཆེན་པོའི་དཀྱིལ་འཁོར་ཡབ་ཡུམ་གཉིས་ཀྱི་ལུས་དཀྱིལ་ལམ། དེ་ལས་བློ་དམན་ན་རྡུལ་ཚོན་རིགས་ལྔའི་དཀྱིལ་འཁོར་ཙམ་བྱས་ལ་ཞུགས་ནའང་སྔོན་གཞན་གྱིས་ཐོབ་པ་དང་མཉམ་པའི་དངོས་གྲུབ་དང་། ཡང་ན་དཀྱིལ་འཁོར་རྒྱས་པ་དང་མཉམ་པའི་དངོས་གྲུབ་ཐོབ་པར་འགྱུར་ཞེས་བཞེད་པའི་ཕྱིར་
དང་། གཞན་ཡང་ཕྱི་དཀྱིལ་དུ་མ་ཞུགས་པར་ཐོག་མ་ནས་ལུས་དཀྱིལ་དུ་འཇུག་རུང་བའི་སྐལ་ལྡན་ཡོད་དེ་དབང་གསུམ་པའི་ཡེ་ཤེས་ཀྱི་དཔེ་ཙམ་ལ་ལྟོས་མི་དགོས་པའི་བཞི་པའི་དབང་གི་སྣོད་ལྡན་དེས། ཐོག་མ་ནས་དོན་དམ་བྱང་ཆུབ་སེམས་ཀྱི་དཀྱིལ་འཁོར་དུ་འཇུག་པ་ཡོད་པའི་ཕྱིར། དཔེར་ན་མན་ངག་རྫོགས་པ་ཆེན་པོའི་རྩལ་དབང་བཞིན་ནོ། །དེ་འདྲ་བའི་སྐལ་ལྡན་དེ་ལ་དབང་ལོགས་སུ་མ་བསྐུར་ཀྱང་།གདམས་ངག་བཏབ་པ་ཉིད་ཀྱིས་དབང་དང་གོ་ཆུ་རུག་ཏུ་འགྱུར་བ་ཡོད་པ་ལ་དགོངས་ཏེ། མཉམ་སྦྱོར་ལས། དཀྱིལ་འཁོར་དུ་ནི་མ་ཞུགས་ཤིང་། །དབང་རྣམས་བསྐུར་བར་མ་བྱས་ཀྱང་། །དེ་ཁོ་ཉིད་ལ་འབད་ལྡན་ན། །བསོད་ནམས་དམན་ཡང་འགྲུབ་པར་འགྱུར། །ཞེས་གསུངས་པ་ལྟ་བུ་དང་། སློབ་དཔོན་འཇམ་དཔལ་བཤེས་གཉེན་གྱི་འཇམ་དཔལ་སྒྱུ་དྲའི་ཁོག་དོན་དུ་དབང་ལ་ཟབ་པ་དོན་དང་རྒྱ་ཆེ་བ་རྟགས་གཉིས་སུ་ཕྱེ་བའི་དང་པོའི་དབང་དུ་མཛད་དེ། ཟབ་པ་དོན་གྱི་དབང་མཆོག་ནི། །རིག་པའི་རྩལ་དབང་ཐོབ་པ་སྟེ། །ཆོས་ཉིད་རྟོགས་པས་དབང་ཞེས་བྱ། །ཡེ་ཤེས་དབང་བསྐུར་ཅོད་པན་ཅན། །ཞེས་གསུངས་པའི་ཕྱིར། དེའང་སྤྱིར་གང་ཟག་གི་ཁྱད་པར་གྱིས་ལྟོས་པ་གཉིས་ལ་ལྟོས་ནས་འཇུག་ཚུལ་གཉིས་སུ་འགྱུར་ཏེ། རྐྱེན་སང་ཚུལ་ལ་ལྟོས་ནས་གང་ལ་མོས་པ་དེར་ཐོག་མ་ནས་འཇུག་ཅིང་། དེ་དང་མཐུན་པའི་ལམ་བསྒོམ་པ་དང་། རྒྱུད་སྨིན་ཚུལ་ལ་ལྟོས་ནས་གང་ཟག་ཐམས་ཅད་རིམ་གྱིས་པ་ཡིན་ལ། དེ་ཡང་ཚེ་འདིར་དབང་གོང་མར་མོས་ཚེ་སྔ་མར་དབང་འོག་མ་ཐོབ་ཅིང་དེའི་ལམ་བསྒོམས་པས་ཁྱབ་པའི་ཕྱིར། རིམ་གྱིས་པ་དེའང་ཚེ་འདི་ཁོ་ན་ལ་བརྩེག་དགོས་པའི་ངེས་པ་མི་སྣང་ཡང་། འདིར་སྐལ་དམན་རིམ་འཇུག་གི་གང་ཟག་སྔར་རྒྱུད་མ་སྨིན་པ་གསར་དུ་སྨིན་བྱེད་ཀྱི་དབང་དུ་བྱས་ན། དཀྱིལ་འཁོར་སྔ་མ་སྔ་མར་མ་ཞུགས་པར་ཕྱི་མ་ཕྱི་མར་མི་འཇུག་སྟེ། ལམ་གྱི་དྲོད་རྟགས་ཀྱང་སྔ་མ་མ་ཐོབ་པར་ཕྱི་མར་མོས་ཤིང་འཇུག་པ་མི་སྲིད་པའི་ཕྱིར་རོ། །དེ་ལ་དགོངས་ནས་དབང་གི་གལ་པོ་ལས། དད་བརྩོན་ལྡན་པའི་སློབ་མ་ཡིས། །རི་མོའི་
དཀྱིལ་འཁོར་ཆེན་པོ་རུ། །ནུས་དང་ཕན་པའི་དབང་ཐོབ་ནས། །བརྟུལ་ཞུགས་ལྡན་པའི་བུ་མཆོག་ལ། །ཞེས་སོགས་དང་།ཁོག་གཞུང་ལས། ཕྱི་ནང་དཀྱིལ་འཁོར་རྣམ་གསུམ་དུ། །རིམ་པར་བསྐུར་བ།ཅེས་སོགས་འཇུག་པའི་རིམ་པ་གསུངས་སོ། །གསུམ་པ་ནི། ཐོག་མཐའ་བར་གསུམ་སྟེ། འདི་ལྟར་རྒྱུ་དུས་ཀྱི་དབང་ཐོག་མར་བསྐུར་ཏེ། མ་སྨིན་པ་སྨིན་བྱེད་ཀྱི་དབང་ཡིན་པས་ལམ་གྱི་སྔོན་དུ་འགྲོ་དགོས་པའི་ཕྱིར་དེ་གྲུབ་སྟེ། སྨིན་བྱེད་ཀྱི་གོ་དོན་སྒྲིབ་པ་སྤང་རུང་དང་འབྲས་བུ་ཐོབ་རུང་ལ་བཞག་དགོས་པའི་ཕྱིར་རོ། །ལམ་དུས་ཀྱི་དབང་ནི་དུས་ལ་ནམ་བབས་པའི་ཚེ་བསྐུར་ཏེ། ལམ་གྱི་བོགས་འདོན་ཡིན་པའི་ཕྱིར་རོ། །འབྲས་དུས་ཀྱི་དབང་ནི་ཐ་མར་བསྐུར་ཏེ།ལམ་མཐར་ཕྱིན་ནས་མཐར་ཐུག་སངས་རྒྱས་ཀྱི་ས་ལ་སྦྱོར་བྱེད་ཡིན་པའི་ཕྱིར་རོ། །དེས་ན་ཕྱི་མ་གཉིས་ནི་གྲོལ་བྱེད་ལམ་གྱི་དབང་ཡིན་ནོ། །བཞི་པ་ལ། ཞི་བ་དང་། ཁྲོ་བོའོ། །དང་པོ་ནི། ཐུགས་ཐིག་ལས། རྩ་བ་རྣམ་ལྔ་བཅོ་བརྒྱད་དང་། །ཞེས་པའི་རྩ་བ་ལྔ་ནི། རྡོ་རྗེ་ལས། དང་པོ་ས་བོན་འཇོག་པ་སྟེ། །གཉིས་པ་ནུས་པ་བསྐྱེད་པ་ཡིན། །གསུམ་པ་ཉམས་མྱོང་བསྐྱེད་པའོ། །བཞི་པ་དེ་ཉིད་བརྟན་པར་བྱེད། །ལྔ་པ་བརྟན་པས་ཉམས་བླངས་པས། །མཆོག་གི་དངོས་གྲུབ་ཚེ་འདིས་འགྲུབ། །ཅེས་པས་ཕན་ནུས་གཉིས་རེ་རེ་དང་། ཟབ་དབང་གསུམ་སོ་སོར་བགྲངས་པའོ། །ཡན་ལག་བཅོ་བརྒྱད་ནི། ཕན་དབང་ལ་བཅུ་དང་། ནུས་དབང་ལ་ལྔར་ཕྱེ་ཞིང་། ཟབ་དབང་གསུམ་དང་བཅས་པའོ། །གཉིས་པ་ནི། ཐུགས་ཐིག་ལས། བསྒྱུར་བ་ལྔ་ལ་སུམ་ཅུ་དྲུག །ཅེས་པས། རྩ་བའི་གྲངས་ཞི་བ་དང་མཚུངས་ལ། དེའི་ཡན་ལག་སོ་དྲུག་ལ་བཞེད་པ་མི་མཐུན་ཏེ། སྒྲོལ་མ་བའི་རིན་ཆེན་འབར་བའི་གུར་དུ། རྔམ་གློག་ལས། ཕྱི་ཡི་དབང་ནི་བཅུ་དང་གཅིག །ནང་གི་དབང་ནི་བཅུ་དང་གཉིས། །གསང་དབང་བཅུ་དང་སྒྲུབ་དབང་གསུམ། །ཞེས་དྲངས་པའི་ཕྱིར། ཕྱི་དབང་བཅུ་གཅིག །ནང་དབང་བཅུ་གཉིས། གསང་དབང་བཅུ། སྒྲུབ་དབང་
གསུམ་དུ་བཞེད་པར་མངོན་ནོ། །དེ་ནི་མི་རིགས་ཏེ། དབྱེ་གཞི་རྩ་བ་ལྔ་ལས་དབྱེ་ཆོས་སོ་དྲུག་ཏུ་དབྱེ་བ་བྱར་མེད་པ་དང་། ལུང་གི་དགོངས་པ་འདི་ལས་ལུགས་གཞན་ཡིན་པའི་ཕྱིར་རོ། །ཡང་ཉང་ཊིཀ་པ། ཕྱི་དབང་བཅུ། ནང་དབང་བཅུ་གཅིག །སྒྲུབ་དབང་བཅུ་གསུམ། ཟབ་དབང་གཉིས་ཏེ་སོ་དྲུག་ཏུ་འབྱེད་པའང་མི་རིགས་ཏེ།དེ་མདོ་དབང་གི་ལུགས་ཡིན་ལ། དེ་འདིར་བཀབ་པ་ལ་ཤེས་བྱེད་མེད་ཅིང་།ལུགས་ཐམས་ཅད་འདྲེས་པར་འགྱུར་བའི་སྐྱོན་གནས་སོ། །དེ་ཅིའི་ཕྱིར་མདོ་དབང་གི་ལུགས་སུ་འགྱུར་ཞེ་ན་དེ་ཡོད་དེ། རྩ་བའི་རྒྱུད་ཀུན་འདུས་རིག་པ་ལས། འདུས་པ་ཆེན་པོའི་རྣལ་འབྱོར་པས། །སྲིད་པ་གསུམ་གྱིས་ཕྱག་བྱས་པའི། །དབང་ཕྱུག་སུམ་ཅུ་རྩ་དྲུག་ཡིན། །ཕྱི་ཡི་དབང་དང་ནང་གི་དབང་། །སྒྲུབ་པའི་དབང་དང་གསང་བའི་དབང་། །བཅུ་དང་བཅུ་གཅིག་བཅུ་གསུམ་དང་། །རྣམ་པ་གཉིས་ཀྱིས་རྫོགས་པར་འགྱུར། །ཞེས་དང་། བདེ་བ་གསལ་མཛད་ཀྱི་དབང་དོན་རྒྱ་ཆེར་འབྱེད་པ་ལས། ཆུ་བོ་བཞི་ཡི་དབང་གི་རིམ་པ་ལ། དང་པོ་རྒྱུད་ཀྱི་ཆུ་བོའི་རྣམ་གྲངས་བཅུ། །ཞེས་སོགས་གསུངས་པའི་ཕྱིར། རང་ལུགས་ནི། ཁྲོ་བོ་ལས་རིམ་ལས། ལྷ་དབང་ཕྱག་མཚན་རྒྱན་ཆས་དང་། །ནུས་དབང་ལྔ་དང་གདན་གྱི་དབང་། །སྒྲུབ་རྫས་གསང་བ་རྣམ་གསུམ་མོ། །ཞེས་པའི་ནང་གསེས་ཀྱི་གྲངས་སོ་དྲུག་སྟེ། དེ་འདྲེན་ཚུལ་ནི། ཕྱག་རྒྱ་ལྷའི་དང་། བསྣམས་པ་ཕྱག་མཚན་གྱི་དང་། དྲེགས་པ་གདན་གྱི་དབང་གསུམ་ནི་རེ་རེ་དང་། དེ་ལས་གཞན་རྣམས་ཀྱི་བྱེ་བྲག་བགྲངས་པའི་སྡོམ་ཚིག་ནི། རྒྱན་ཆས་རྟགས་ལ་བཅུ་ཡིན་ཏེ། །དབུ་རྒྱན་བུམ་པ་སྙིང་པོ་ལྔ། །ཅོད་པན་གོ་ཆ་ཕྲེང་བ་རྒྱན། །གོས་གསུམ་དང་སྦྲུལ། ཐོད་ཕྲེང་རྟགས་གསུམ་མེ་དཔུང་ངོ་། །ནུས་པའི་དབང་ནི་ལྔར་ངེས་ཏེ། །ཉན་སྒོམ་འཆད་ལས་རབ་འབྱམས་དབང་། །སྒྲུབ་པའི་དབང་ལ་བཅོ་ལྔ་སྟེ། །བདུད་རྩི་ལྔ་དང་ཤ་ལྔ་དང་། །རཀྟ་རྒྱལ་མཚན་གདུགས་ཁ་ཊྭཱཾ། །ཕུར་པ་རྡོར་དྲིལ་རྔེའུ་ཆུང་། །ཡུངས་ཀར་གཟུངས་མ་ཕྲེང་བ་དང་། །རྡོ་རྗེ་ཚེ་དང་བཟའ་བཏུང་མིང་དབང་ངོ་། །ཟབ་དབང་གསུམ་སྟེ་གསང་
བ་དང་། །ཤེས་རབ་ཡེ་ཤེས་བདེ་ཆེན་པོ། །ཞེས་སོ། །དེ་ལྟར་ན་སྔར་གྱི་དབང་ཆོག་འགར་རྟགས་གསུམ་གྱི་རྗེས་སུ་རྡོ་རྗེའི་གཤོག་པ་དང་། རྡོར་དྲིལ་གྱི་རྗེས་སུ་མར་མེའི་དབང་འབྱུང་བའི་ཕྱིར་གྲངས་འཇིག་གོ་ཞེ་ན། འདིར་དེ་གཉིས་མ་བགྲངས་པ་ནི་ཆད་པར་མི་སེམས་ཏེ། ཡན་ལག་གི་དབང་སོགས་ལས་ཁ་བསྐང་བར་མངོན་གྱི།འདི་ཉིད་ཀྱི་དབང་རྩར་མ་གསུངས་པའི་ཕྱིར་རོ། །འོ་ན་སྙིང་པོ་ལྔ་དང་། གོ་ཆ་དང་། གདུགས་གསུམ་ཀྱང་རྩ་བར་མ་གསུངས་ལ། རྔ་དང་ཡུངས་ཀར་དང་། གཟུངས་མ་དང་། ཕྲེང་བ་བཞིའི་དབང་ཚིག་ཀྱང་མི་འབྱུང་བའི་ཕྱིར་མཚུངས་སོ་ཞེ་ན། སྐྱོན་མེད་དེ། དང་པོ་གསུམ་ནི་ཕན་དབང་གི་ནང་ཚན་དུ་རྒྱུད་ལས་གསུངས་པའི་ཕྱིར་བསྐུར་དགོས་པར་མ་ཟད། ཁྲོ་བོ་ལས་རིམ་ལས་བསྐུར་དུས་དཀྱུས་སུ་མ་གསུངས་ནའང་། གོང་དུ་དབང་གི་རྒྱུ་འཆད་པའི་ཚེ།ཕྱག་རྒྱ་དབུ་རྒྱན་སྙིང་པོ་དང་། །ཅོད་པན་གོ་ཆ་རུས་པའི་ཕྲེང་། །གཟི་མདངས་རྒྱལ་མཚན་ཞིང་གི་གདུགས། །ཞེས་གསུངས་པའི་ཕྱིར་དང་། ཕྱི་མ་བཞི་ནི་བསྐུར་ཚིག་མ་གསུངས་ཀྱང་མིང་དཀྱུས་སུ་སྨོས་པའི་ཕྱིར་བསྐུར་དགོས་ཏེ། གཞན་ཡང་རྔ་དང་ཉུང་དཀར་དང་། །གཟུངས་དང་ཕྲེང་བས་དབང་བསྐུར་ཏེ། །ཞེས་སོ། །འདིར་ཁ་ཅིག་ན་རེ། དེ་ལྟར་ན་ཡན་ལག་སོ་དྲུག་པོ་རྩ་བའི་དབང་ལྔར་འདུས་སམ་མ་འདུས། གཉིས་པ་ལྟར་ན་འདིར་ཡང་དབྱེ་གཞི་དང་དབྱེ་ཆོས་ཁ་གམ་པར་འགྱུར་ལ། དང་པོ་ལྟར་ན་ཇི་ལྟར་བསྡུ་ཞེ་ན། ཁྲོ་བོ་ལས་རིམ་གྱི་གོ་རིམ་རྣམས་འཁྲུགས་བསྡེབས་ཀྱི་དགོངས་པར་བླ་མ་རྣམས་བཞེད་པས། དེའི་ཕྱིར་ནུས་དབང་ལྔ་དང་ཟབ་དབང་གསུམ་མ་གཏོགས་པའི་དབང་ཉི་ཤུ་རྩ་བརྒྱད་པོ་ཐམས་ཅད་ཕན་དབང་དུ་བསྡུ་བར་བྱ་བ་སྟེ། ཕྱག་རྒྱ་ལྷ་དང་། རྒྱན་ཆས་ལས་དང་པོ་དྲུག་དང་། སྒྲུབ་རྫས་ལས་བཞི་པ་དང་། ལྔ་པ་དང་། བཅུ་བཞི་པ་རྣམས་ནི་དངོས་དང་། གཞན་རྣམས་ལྷ་དབང་ལ་སོགས་པའི་ཡན་ལག་ཏུ་བསྡུ་ཚུལ་དུ་ཤེས་པར་བྱས་ལ། ལས་ཁྲིགས་ཀྱི་སྡོམ་ནི། གདན་དང་ལྷ་དབང་ཕྱག་མཚན་དང་། །ཆས་བཅུ་སྒྲུབ་རྫས་བཅོ་ལྔ་སྟེ། །ཕྱི་དབང་ཉེར་
བརྒྱད་ཕན་པའི་དབང་། །ནང་གི་ནུས་པའི་དབང་ལྔ་སྟེ། །གསང་བ་ཟབ་དབང་རྣམ་གསུམ་མོ། །ཞེས་པ་སྟེ། དེ་དག་ཞར་ལས་འཕྲོས་པའོ། །གཉིས་པ་ལ།དཀྱིལ་འཁོར་གྱི་བྱ་བ། དེར་འཇུག་པའི་ཆོ་ག །དབང་བསྐུར་བའོ། །དང་པོ་ནི། སའི་ཆོ་ག །སྟ་གོན། དཀྱིལ་འཁོར་བྲི་བ། དེའི་རབ་གནས་ཡན་ཆད་ཚར་བ་དང་། ཕྱི་རོལ་དུ་སྦྱིན་སྲེག་བྱ། ནང་དུ་དབང་མཆོད་ཀྱི་རྫས་དང་རྒྱན་རྣམ་དགྲམ། དེ་ནས་ཞི་ཁྲོ་གང་ཡིན་གྱི་ལས་གཞུང་བསྲང་ཞིང་། ཚོགས་མཆོད་བྱ་བ་རྣམས་སོ། །གཉིས་པ་ནི། རྡོ་རྗེ་ལས་རིམ་ལས། དབང་ཕྱུག་འཇུག་དང་བཟོད་གསོལ་དང་། །ཁྲུས་དགབ་དྲི་དང་ལུས་དབུལ་དང་། །བགེགས་བསྐྲད་ལྷར་རློབ་དམ་ཚིག་སྦྱིན། །དེ་ཉིད་དབོག་དང་ཆུ་ནན་དང་། །བསྒྲག་དང་རིན་ཆེན་དོར་བ་དང་། །ལྷ་དབོག་པ་དང་ནན་ཏན་དང་། །མིག་དབྱེ་དཀྱིལ་འཁོར་ལེགས་བསྟན་དང་། །ཚོགས་མཆོག་ཡོན་དང་རྣམ་བཅོ་བརྒྱད། །འདི་ཡིས་ཡན་ལག་རྫོགས་པར་འགྱུར། །ཞེས་པའི་ཆོས་བཅོ་བརྒྱད་རིས་བསྡུས་ན་གཉིས་སུ་འགྱུར་ཏེ། སློབ་དཔོན་འཇུག་པའི་དང་། སློབ་མ་འཇུག་པའི་ཆོས་སོ། །དང་པོ་ལ། བདག་ཉིད་འཇུག་པ་དང་། སློབ་མ་འཇུག་པར་གསོལ་བ་གདབ་པ་གཉིས། དང་པོ་ནི། དཀྱིལ་འཁོར་གྱི་བྱ་བ་སྔོན་དུ་སོང་ནས་འཇུག་སྟེ། ཀུན་བྱས་དབང་ཕྱུག་རིག་པས་འཇུག །ཅེས་གསུངས་པའི་ཕྱིར། དེའང་སློབ་དཔོན་ཁྲུས་བྱས་དབང་གོས་གྱོན་ནས་དཀྱིལ་འཁོར་གྱི་ཤར་སྒོར་འདུག་སྟེ། རིག་པའི་མེ་ཏོག་དོར་ཞིང་དངོས་གྲུབ་བསྐུལ་བས། ལྷ་དང་གཉིས་སུ་མེད་པར་བསམ་པ་ནི་བདག་ཉིད་དཀྱིལ་འཁོར་དུ་རིག་པས་འཇུག་པ་སྟེ། ལམ་རིམ་ལས། དབང་གོས་ལྡན་པ་དབང་ཕྱུག་སྟེ། །གཞན་དག་གཞན་གྱིས་མཛེས་པར་བྱ། །ཤར་སྒོར་གུས་འདུག་དཀྱིལ་འཁོར་གྱི། །ལྷ་རྣམས་མངོན་བྱས་རིན་ཆེན་ལྡན། །འབྲུ་ལྔ་རྡོ་རྗེའི་དམ་ཚིག་གི། །སྔགས་ཀྱི་སྐུ་གསུང་ཐུགས་ཡོན་ཏན། །ཕྲིན་ལས་ཡེ་ཤེས་གཉིས་མེད་སྦྱར། །ཞེས་དང་། བསྐུལ་བའི་དམ་ཚིག་རྗེས་དྲན་པའི། །འོད་ཟེར་གཟི་བརྗིད་ལྡན་པར་བྱ། །རང་བཞིན་གཉིས་
མེད་གྱུར་པའོ། །ཞེས་སོ། །གཉིས་པ་ནི། རྡོ་རྗེ་ཡེ་ཤེས་འཐོབ་བྱེད་པའི། །ཞེས་སོགས་ཀྱིས་གསོལ་བ་བཏབ་ཅིང་བཟོད་པར་གསོལ་བས་དེ་བཞིན་གཤེགས་པ་རྣམས་དགྱེས་ནས་འཛུམ་པ་དང་བཅས་པས་གནང་བ་སྦྱིན་པར་བསམ་པའོ། །གཉིས་པ་ནི། སློབ་དཔོན་ཞུགས་པའི་རྗེས་སུ་འཇུག་སྟེ། དེ་ནས་སློབ་མ་གཞུག་པར་བྱ། །ཞེས་སོ། །དེ་ལ་ལས་རིམ་བཅུ་དྲུག་ལས། དང་པོ་ཁྲུས་ནི། ཕྱི་རོལ་དུ་དྲིའི་ཆུས་བཀྲུ་བར་བྱ་བ་སྟེ། ལས་རིམ་ལས། ཤིན་ཏུ་བཟང་པོར་འགྲོ་བ་རྣམས། །དྲི་ཡི་ཆུ་ཡིས་དག་པར་བྱ། །ཞེས་སོ། །གཉིས་པ་དགབ་པ་ནི། རས་དམར་པོས་གདོང་གཡོགས་ལ་སྙིམ་པ་མེ་ཏོག་དང་བཅས་ཏེ་དཀྱིལ་འཁོར་དུ་འཇུག་པར་གསོལ་བ་གདབ་ཏུ་གཞུག་པའོ། །གསུམ་པ་དྲི་བ་ནི། འདོད་དོན་དྲིས་ཤིང་ལན་གསོལ་ནས་ལས་ཀྱི་རྡོ་རྗེས་དཀྱིལ་འཁོར་ཁང་པའམ་ཡོལ་བའི་ནང་དུ་དྲང་བ་སྟེ། དེ་ལས། བུ་ཁྱོད་ཅི་ལ་དགའ་ཞེས་དྲི། །སྐལ་བཟང་བདག་དགའ་ལན་བླན་ལ། །འཁོར་ལོའི་དྲུང་དུ་བཀྲི་བར་བྱ། །ཞེས་སོ། །བཞི་པ་ལུས་དབུལ་བ་ནི། དེ་ལས། ཐལ་སྦྱར་གུས་དང་བཅས་པ་ཡིས། །ཕྱོགས་བཅུ་སྲས་དང་བཅས་པ་དང་། །དབང་ཕྱུག་སངས་རྒྱས་ད་ལྟར་བདག །མ་འོངས་རང་བཞིན་སེམས་ཅན་ལ། །དགོས་པ་གསུམ་ཕྱིར་ལུས་དབུལ་བྱ། །ཞེས་པས། འདས་པའི་སངས་རྒྱས་རྟོགས་པ་མངོན་དུ་གྱུར་པ་སྟེ་སརྦ་བུཌྜྷ་དང་། ད་ལྟར་གྱི་སངས་རྒྱས་ཨཱ་ཙཱརྱ་སྟེ་སློབ་དཔོན་དང་། མ་འོངས་པའི་སངས་རྒྱས་པ་ཀ་ལ་སཏྭ་ཞེས་སེམས་ཅན་མཐའ་དག་སྟེ། དེ་དག་ལ་རིམ་པ་བཞིན་དུ་སངས་རྒྱས་ཀྱི་ཡེ་ཤེས་ཐོབ་པར་བྱ་བའི་ཕྱིར་དང་། དེའི་སྣོད་རུང་དུ་བྱ་བའི་ཕྱིར་དང་། འགྲོ་དོན་མི་འདོར་ཞིང་མཐར་ཕྱིན་པར་བྱ་བའི་ཕྱིར་དང་། པཱུ་ཛོ་པ་སྠཱ་ནཱ་ཡ་ཨཱཏྨཱནཾ་ནིརྻཱ་ཏ་ཡཱ་མི་ཞེས་པས་ལུས་དབུལ་བར་དམིགས་ལ་ཕྱག་འཚལ་དུ་འཇུག་པའོ། །ལྔ་པ་བགེགས་བསྐྲད་པ་ནི། ཐོག་མར་ཚེ་མི་ཡར་བར་བྱ་བའི་ཆེད་དུ། སློབ་དཔོན་གྱི་སྦྱོར་མཚམས་ནས་བྷྲཱུྃ་བུའི་སྨིན་ཕྲག་ཏུ་སྤྲོས་པས་ཟླ་གམ་དམར་པོའི་
གཞལ་ཡས་ཁང་སྒོ་གཅིག་པ་བསྐྱེད། དེའི་དབུས་སུ་ཧཱུཾ་སྔོ་སྐྱ་ལ་བུའི་ཚེའི་དངོས་པོ་ཐམས་ཅད་བསྡུས་ཏེ་ཧཱུཾ་མཛད་དུ་བསྐྱེད་ལ། སྒོར་མི་གཡོ་བས་ཚེ་བསྲུང་བར་བསམ། དེ་ནས་བི་ཤྭ་བཛྲ་གྱིས་སྤྲུལ་པ་སྤྲོས་ནས་སུམྦྷའི་སྔགས་ཀྱིས་བགེགས་སྐྲོད་པ་སྟེ། དེ་ལས། ཚེ་བསྲུང་སྦྱོར་བའི་ཁྲོ་ཚོགས་ཀྱིས། །བར་གཅོད་བགེགས་བསྐྲད་མཚམས་བཅད་ལ། །ཞེས་སོ། །དྲུག་པ་ལྷར་རློབ་པ་ནི། ལག་སོར་ལ་དཔའ་བོ་འབྲུ་ལྔའི་ཡི་གེ་ཟུང་ལས་རིགས་ལྔ་ཡབ་ཡུམ་བསྐྱེད་ནས་བདེན་པ་བདར་ནས། ཕྱག་རྒྱ་བཅིངས་ཤིང་སྤྲུགས་པས་སྦྱོར་མཚམས་ནས་སྤྲོས་པའི་འོད་ཟེར་གྱིས་བུའི་སྒྲིབ་པ་བསྲེགས་ཏེ་འོད་དུ་ཞུ་བ་ལས་ཆོ་ག་གསུམ་གྱིས། ཞི་ཁྲོ་གང་ཡིན་གྱི་སྐབས་དང་བསྟུན་ནས་རྡོ་རྗེ་སེམས་དཔའ་འམ་བཛྲ་ཧེ་རུ་ཀར་བསྐྱེད་ལ། གོ་བགོ་ཞིང་ལུས་བསྲུང་བར་བྱ་བ་སྟེ། དེ་ལས། སྒྲིབ་སྦྱང་རྣམ་ཤེས་ཆོ་ག་ཡིས། །ཧཱུཾ་ལས་སེམས་དཔའ་འམ་གཞན་ཡང་རུང་། །ཞེས་སོ། །བདུན་པ་དམ་ཚིག་བྱིན་པ་ནི། བདུད་རྩི་སྐུ་གསུང་ཐུགས་སུ་རློབས་ལ། དཔལ་ལྡན་རྡོ་རྗེ་སྐུ་འཆང་ལ་སོགས་པའི་ཚིག་སྔགས་དང་། འབྲུ་གསུམ་གྱི་འཕྲོ་འདུས་དམ་ཚིག་གསུམ་སྟེར་བར་བྱ་སྟེ། དེ་ལས། དམ་ཚིག་ཆེན་པོའི་བདུད་རྩི་ལྔ། །རང་བཞིན་འབྲུ་གསུམ་སྐུ་གསུང་ཐུགས། །གཟི་བྱིན་ལྡན་པར་བྱིན་རློབ་ལ། །དམ་ཚིག་སྡོམ་པ་མཆོག་ཅེས་བྱ། །ཞེས་སོ། །བརྒྱད་པ་དབོག་པ་ནི། དམ་ཚིག་དེ་ཉིད་ཚིག་གིས་དབོག་པ་སྟེ། །རྡོ་རྗེ་སྙིང་གར་བཞག་པ་ལ། །སངས་རྒྱས་ཀུན་གྱི་གསང་བ་འདི། །ཞེས་སོགས་བརྗོད་པའོ། །དགུ་པ་ཆུ་ནན་ནི། དེ་ལས། ཙནྡན་དཀར་དམར་སྦྱར་བ་ལ། །རྡོ་རྗེ་འཛིན་པའི་རབ་གནས་བྱ། །ཞེས་པས་ཙནྡན་གྱི་ཆུ་རྡོ་རྗེ་གནོད་སྦྱིན་དུ་བསྐྱེད་ནས། འདི་ནི་ཁྱོད་ཀྱི་དམྱལ་བའི་ཆུ། །ཞེས་སོགས་མ་བསྲུངས་པའི་ཉེས་དམིགས་ཀྱི་གཡང་ས་བསྟན་ཏེ་ལྕེར་ལན་གསུམ་བཞག་པ་དང་། ཡང་ཆུ་རྡོ་རྗེ་སེམས་དཔར་བསྐྱེད་ནས་དེ་ལྟ་བས་ན་བུ་ཁྱོད་ཀྱི། ཞེས་སོགས་བསྲུངས་པའི་ཕན་ཡོན་གྱི་བྲོད་པ་བསྐྱེད་དེ་ལྕེར་ལན་གསུམ་བཞག་ལ་ཆུ་ནན་བྱེད་པའོ། །བཅུ་པ་བསྒྲག་པ་ནི། རྡོ་རྗེ་དང་བཅས་པའི་ཐལ་མོ་བུའི་སྤྱི་བོར་བཞག་ལ།
ཐབས་དང་ཤེས་རབ་སེམས་ཉིད་ཀྱིས། །ཞེས་བྱ་བ་ལ་སོགས་པས་ཐེག་པ་འདི། གཞུང་བཞིན་དུ་སྤྱོད་ཅིག་པར་བསྒྲག་པའོ། །བཅུ་གཅིག་པ་རིན་ཆེན་དོར་བ་ནི། ཕྱི་དཀྱིལ་ལམ་བླ་མའི་ལུས་དཀྱིལ་གང་རུང་ལ་མེ་ཏོག་དོར་ལ་ལྷ་གང་དང་ལས་འདྲེལ་ཡོད་བརྟག་པ་སྟེ། དེ་ལས། དཀྱིལ་འཁོར་ཡིད་ལ་མངོན་སྦྱར་ནས། །འདོད་པའམ་ཡང་ན་གཞན་ཡང་རུང་། །དོར་ཏེ་འདྲེལ་པ་ལེགས་པར་བརྟག །ཅེས་སོ། །བཅུ་གཉིས་པ་ལྷ་དབོག་པ་ལ་ཕྱི་ནང་གཉིས་ལས། ཕྱིའི་ལྷ་དབོག་པ་ནི། མེ་ཏོག་དེ་བུའི་སྤྱི་བོར་བཞག་སྟེ། ཡི་དམ་ལྷ་གང་ཡིན་པ་ཉིད་སྤྱན་དྲངས་ལ་བསྡིམས་པས་སྙིང་གར་ཆུ་ནན་གྱི་ཆུ་དང་གཉིས་སུ་མེད་པར་བསམ་པ་སྟེ། སྔ་མ་ལས། ལྕགས་ཀྱུ་ཧ་ཡིས་དགུག་བྱ་སྟེ། །ཉེས་ལེགས་ཕྲིན་ལས་གསལ་བྱས་ལ། །ཕྱག་རྒྱ་བསྡིམས་ལ་བརྟན་པར་བྱ། །ཞེས་སོ། །ནང་ནི།རིགས་དང་མཐུན་པའི་གསང་མཚན་གདགས་ཤིང་ལྷ་དེའི་བསྒོམ་བཟླས་དབོག་པའོ། །འདིར་སྔ་རབས་པ་ཁ་ཅིག །མོས་པའི་ལྷ། བབས་པའི་ལྷ། ལྷག་པའི་ལྷ་གསུམ་གང་རུང་ཞིག་དབོག་སྟེ། དང་པོ་ནི། གང་ལ་མོས་པའི་ལྷ་དེ་ལས་དང་ཐུགས་རྗེས་འདྲེལ་བར་གྲུབ་པའི་ཕྱིར་དེ་ཉིད་བསྒོམ་པའོ། །གཉིས་པ་ནི། ལས་འདྲེལ་ཟབ་པས་དངོས་གྲུབ་ཉེ་བའི་ཕྱིར་མེ་ཏོག་གང་ལ་བབས་པའི་ལྷ་དེ་བསྒོམ་པའོ། །གསུམ་པ་ནི། དཀྱིལ་འཁོར་གྱི་གཙོ་བོ་ཁོ་ན་བསྒོམ་པའོ་གསུང་། དེ་དག་ཀྱང་མི་རིགས་པ་མ་ཡིན་ཏེ། རྣམ་བཀོད་ལས། མཚན་མས་གྲོལ་ལ་བརྒྱ་བྱིན་པས། །དཀྱིལ་འཁོར་ཆེན་པོར་ཞུགས་པའི་ཚེ། །གང་ལ་བབས་པའི་ལྷ་དེ་ཉིད། །ཡང་ན་ལྷ་ཀུན་གཅིག་པའི་ཕྱིར། །གང་མོས་ལྷ་དེ་ཡི་དམ་བྱ། །ཞེས་གསུངས་པའི་ཕྱིར་རོ། །བཅུ་གསུམ་པ་ནན་ཏན་དུ་བྱ་བ་ནི།ཁེ་ཉེན་བསྟན་པའི་སྒོ་ནས་ལྷ་དེ་ཉིད་བསྒོམ་པར་གདམས་པ་སྟེ། འདི་ཉིད་ལས།སྐལ་བ་མཉམ་པའི་ཡེ་ཤེས་དེ། །གཉེར་ན་ཉེ་བར་འབྱུང་བ་ཡི། །ཡ་མཚན་ཆེན་པོ་འབྱུང་བར་ངེས། །དད་མེད་ཉམས་ན་ཕུང་བར་འགྱུར། །ཞེས་དང་། ལས་རིམ་ལས། ལྷ་སྤངས་དགེ་
སྤྱད་དོན་མེད་འགྱུར། །གང་ཞིག་ཕྱག་རྒྱ་འདི་སྤངས་ན། །ཉོན་མོངས་ངན་སོང་གསུམ་དུ་སྐྱེ། །བྱང་ཆུབ་འབྲས་བུ་འཐོབ་མི་འགྱུར། །ཞེས་དང་། བདག་ཉིད་ལྷ་དང་མཉམ་སྦྱོར་ནས། །ཡོན་ཏན་ཆུང་ཡང་འགྲུབ་པར་འགྱུར། །གཅིག་དང་དུ་མར་ཡོངས་བྲལ་ཕྱིར། །དཀྱིལ་འཁོར་ཐམས་ཅད་འགྲུབ་པར་འགྱུར། །ཞེས་སོ། །དེའང་བརྒྱུད་པའི་ཕྱག་བཞེས་སུ། ནང་གི་ལྷ་དབོག་པ་དང་ནན་ཏན་དུ་བྱ་བ་གཉིས་འོག་ཏུ་དཀྱིལ་འཁོར་བསྟན་པ་དང་སྦྲེལ་ནས་མཛད་དོ། །བཅུ་བཞི་པ་མིག་དབྱེ་བ་ནི། རུའི་ཐུགས་ཀ་ནས་སྤྲོས་པའི་འོད་ཟེར་ཐུར་མ་ལྟ་བུས་བུའི་མ་རིག་པའི་ལིང་ཏོག་བསལ་ཏེ་ཡེ་ཤེས་ཀྱི་དཀྱིལ་འཁོར་མཐོང་བར་བསམས་ལ། མིག་ཕྱེ་ཞིང་གདོང་གཡོགས་དགྲོལ་ཏེ། དེ་ལས། འོད་ཟེར་ཐུར་མས་དབྱེ་བྱས་ལ། །ཞེས་སོགས་སོ། །བཅོ་ལྔ་པ་དཀྱིལ་འཁོར་སྟོན་པ་ནི་གསེར་སོགས་མཚོན་བྱེད་ངེས་བླངས་ལ། ཞེས་པས་ཕྱག་ཤིང་སོགས་ཀྱིས་བསྟན་ཏེ། དཀྱིལ་འཁོར་གྱི་དོན་རྟགས་དང་ལྷའི་དེ་ཁོ་ན་ཉིད་རྒྱས་པར་བཤད་པའོ། །བཅུ་དྲུག་པ་ཡོན་དབུལ་བ་ནི། སྔ་མ་ལས། དབང་དང་དངོས་གྲུབ་འདོད་པ་ཡིས། །འདི་ལ་ཤིན་ཏུ་ནན་ཏན་བྱ། །ཞེས་པས་ཡོན་ཅི་འབྱོར་བ་དབུལ་ཏེ། འདི་ཉིད་ལས། དེ་ནས་རིགས་ཀྱི་བུ་མཆོག་དེས། །ཞེས་སོགས་དང་། དེའི་ཡོན་ཏན་ཀྱང་། དབང་ཕྱུག་ལོངས་སྤྱོད་ལྔས་མཆོད་ན། །ཞེས་སོགས་ཚིགས་སུ་བཅད་པ་གཅིག་གསུངས་སོ། །གལ་ཏེ་ཕོངས་པས་དངོས་སུ་མ་འབྱོར་ན་ཕྱིས་དབུལ་བར་ཁས་བླང་བ་དང་། ཡིད་ཀྱིས་ལུས་ལོངས་སྤྱོད་ཐམས་ཅད་ལྟོས་པ་མེད་པར་ཕུལ་བར་བསམ་ཞིང་། མཎྜལ་དབུལ་ལོ། །དེ་དག་ནི་འཇུག་པའི་ཆོ་གའོ། །དེར་ཞུགས་པས་ཐོབ་པའི་ཡོན་ཏན་གང་ཞེ་ན། བཞི་ལས། དང་པོ་དཀྱིལ་འཁོར་འདིར་ཞུགས་པས་དཀྱིལ་འཁོར་ཐམས་ཅད་དུ་ཞུགས་པར་འགྱུར་བའི་ཡོན་ཏན་ཡོད་དེ། ལས་རིམ་ལས། སྒྱུ་འཕྲུལ་དྲ་བར་ལེགས་ཞུགས་པས། །ཕྱོགས་བཅུ་དུས་བཞིར་གཤེགས་པ་ཡི། །དཀྱིལ་འཁོར་ཀུན་ཏུ་ཞུགས་པ་ཡིན། །ཞེས་སོ། །གཉིས་པ་ནི། འདིར་ཞུགས་པས་སྔོན་འོག་མིན་
དུ་མཐར་ལམ་པ་ཞུགས་པ་དང་སྐལ་བ་མཉམ་པར་འགྱུར་ཏེ། འདི་ཉིད་ལས། འདོད་པ་ཡིད་འོང་མཉམ་པར་འགྱུར། །ཞེས་དང་། མཉམ་སྦྱོར་ལས། རྡོ་རྗེ་སེམས་དཔའ་ལ་སོགས་པའི། །འཁོར་ལོ་མངོན་དུ་མཐོང་བ་ཡི། །བསོད་ནམས་བརྟག་པ་གང་ཡིན་པ། །ཕྱིས་བྱས་པའང་དེ་བཞིན་ནོ། །ཞེས་སོ། །གསུམ་པ་འདིར་མོས་པ་ཙམ་ལ་ཡང་རྒྱལ་བ་ཐམས་ཅད་ཀྱིས་ཉེ་བའི་སྲས་སུ་དགོངས་པར་འགྱུར་ཏེ། འདི་ཉིད་ལས། གང་ཞིག་འདི་ལ་མོས་གྱུར་པ། །ཞེས་སོགས་དྲང་ངོ་། །བཞི་པ། འདིར་ཞུགས་ན་དངོས་གྲུབ་ཐམས་ཅད་བདེ་བླག་ཏུ་ཐོབ་པར་འགྱུར་ཏེ། ལས་རིམ་ལས། རྡོ་རྗེ་འཛིན་པའི་རིགས་ངེས་ཤིང་། །གདོན་རྣམས་བཟློག་ཅིང་ངན་སོང་སྤོང་། །ལོངས་སྤྱོད་འདུ་བ་རྣམ་པ་གཉིས། །ཡེ་ཤེས་སྤྱན་གྱི་གཞི་རུ་ངེས། །དེ་ལ་སོགས་པ་བསམ་ཡས་མཆོག །ཅེས་གསུངས་སོ། །གསུམ་པ་དབང་བསྐུར་བ་ལ། མཚམས་སྦྱར་བ། བསྐུར་བ་དངོས། རྗེས་ཀྱི་རིམ་པའོ། །དང་པོ་ནི། བུས་ཕྱག་བྱས་ཏེ་གསོལ་བ་གདབ། རུས་གནང་བ་སྦྱིན་ལ་དཀྱིལ་འཁོར་བསྐོར་ཞིང་བསྟོད་ནས་ནམ་མཁར་བཏེག །དེ་བཞིན་གཤེགས་པ་མ་ལུས་པ་མདུན་མཁར་སྤྱན་དྲངས་ཏེ་གསོལ་བ་གདབ། དེ་ནས་དབུ་རྒྱན་གྱོན་ཏེ་དཀྱིལ་འཁོར་གྱི་སྟེང་དུའམ་དྲུང་དུ་དབང་ཁྲི་ལ་འདུག་པར་བྱའོ། །གཉིས་པ་ལ། སྣོད་རིམ་དང་སྦྱར་ཏེ་བསྐུར་བ་དངོས་དང་། དབང་གི་གྲངས་དང་རིམ་པ་ལ་དཔྱད་པ། དེ་དབང་བཞིར་བསྡུ་ཚུལ་ལོ། །དང་པོ་ནི།སྐལ་ལྡན་གྱི་སློབ་བུ་དད་བརྩོན་བརྟུལ་ཞུགས་ཅན་གསུམ་ལ་རིམ་པ་ལྟར་ཕན་ནུས་ཟབ་མོའི་དབང་རྣམས་སོ་སོའི་བློའི་ཐེག་ཚད་དང་སྦྱར་ནས་སྦྱིན་པར་བྱ་བ་སྟེ། གལ་ཏེ་མི་ཐེག་པ་ལ་སྦྱིན་ན་བུའི་རྒྱུད་ཆུད་ཟོས་པར་འགྱུར་བའི་ཕྱིར་ཉེས་པ་ཆེན་པོར་འགྱུར་རོ། །དེ་ལྟར་ཡང་། དད་བརྩོན་བརྟུལ་ཞུགས་རབ་རྟོགས་ན། །ཕན་པའི་དབང་སྦྱིན་ནུས་པའི་དབང་། །རིམ་པ་བཞིན་དུ་སྦྱིན་པར་བྱ། །སྙིང་རྗེས་ཆུད་མ་ཟོས་པར་བཟུང་། །ཞེས་སོ། །དེ་ཡང་ཇི་ལྟར་བསྐུར་བའི་ཚུལ་ལ། རྗེ་སྒྲོ་ཕུག་པའི་གསུང་རྒྱུན་སྔ་ཕྱི་
གཉིས་ལས། དང་པོ་ནི། དབང་ཐམས་ཅད་ལ་མཚུངས་ལྡན་དང་། དབང་རྫས་དང་། སྐུར་ཐབས་གསུམ་དུ་གསུང་ནའང་།ཕྱིས་དོན་བརྒྱད་བརྒྱད་དུ་བསྡུས་ནས་གསུང་ཞེས་བླ་མ་རྩགས་ཚ་གསུངས་པ་ལྟར། འདིར་ཡང་ཕྱི་མའི་རྗེས་སུ་འབྲང་ངོ་། །དེ་ལ་ཕན་དབང་བཅུ་ནི། དབུ་རྒྱན་ཅོད་པན་ཕྲེང་བ་དང་། །ཞེས་སོགས་ཀྱིས་བསྟན་ནོ། །དེ་རེ་རེ་ལ་ཡང་དོན་བརྒྱད་བརྒྱད་སྟེ། རྡོ་རྗེ་ལས་རིམ་ལས། རྒྱུ་རྐྱེན་ངོ་བོ་འབྲས་བུ་དང་། །རིམ་ལས་སྐྱོན་ཡོན་བརྒྱད་ཅེས་བྱ། །ཞེས་སོ། །དང་པོ་རྒྱུ་ལ། མཚུངས་ལྡན་དང་། ལྷན་ཅིག་བྱེད་པའི་རྒྱུ་གཉིས། དང་པོ་ནི། རྣམ་ཤེས་ཚོགས་བརྒྱད་ཡེ་ཤེས་ལྔར་ཡེ་ནས་གནས་པ་ནི་དབུ་རྒྱན་གྱི་མཚུངས་ལྡན་ནོ། །དེ་བཞིན་དུ་རྩ་རོ་རྐྱང་གཉིས་གཡས་གཡོན་ནས་འཕྱོ་བ་ཅོད་པན་གྱི། རྩ་དབུ་མའི་ནང་ན་ཐིག་ལེ་སོ་གཉིས་གནས་པ་ ཕྲེང་བའི། ལུས་རྩའི་དྲ་བས་ཁེབས་པ་གོ་ཆའི། ཕོ་མོའི་དབང་པོ་རྒྱལ་མཚན་གྱི། རྟོག་ཚོགས་ཡེ་ནས་ལྷར་གནས་པ་ཕྱག་རྒྱའི། བདེ་བ་ཆེན་པོ་སྤྱི་བོའི་འཁོར་ལོ་ གདུགས་ཀྱི། རྩ་གནས་ཐིག་ལེས་གང་བ་བུམ་པ། མགྲིན་པའི་ཐིག་ལེ་བཟའ་བཏུང་གི། ཁམས་ལྔའི་བཅུད་དམ་རྫས་ལྔ་ནི་སྙིང་པོ་ལྔའི་མཚུངས་ལྡན་གྱི་རྒྱུའོ། །དེ་ལྟར་ཡང་ཐལ་རྒྱུད་ལས། ཁམས་བཅུད་སྙིང་པོ་བདེ་བའི་ལམ་ཅོད་པན་གཉིས་ལས། །དབུ་མ་བཅུད་སྡུད་ཕྲེང་བ་མཚན་ལྡན་པ། །དྲ་བའི་རྩ་གོ་ཆ་དང་དབང་རྒྱལ་མཚན་པོ་དང་། །ཕུང་སོགས་ཕྱག་རྒྱ་ཡེ་ཤེས་བདེ་གདུགས་འཁོར་ལོ། །བཟའ་བཏུང་ཧཱུཾ་གི་བདེ་བའི་ཡེ་ཤེས་འབབ། །ཚོགས་བརྒྱད་དབུ་རྒྱན་རང་བཞིན་ཡེ་ཤེས་ལྔ། །སྔགས་རྫས་དགོངས་པས་གང་བླངས་པ། །ཀུན་ནས་ལྡང་ཞིང་སྐྱོབ་པ་ཡིས། །སྡུག་བསྔལ་ལས་གྲོལ་རིགས་སུ་ངེས། །ཞེས་སོ། །གཉིས་པ་ནི། དབང་རྫས་རབ་གནས་དང་ལྡན་པའོ། །དེའང་། དབུ་རྒྱན་དང་ཕྲེང་བ་ལ་རིན་འབྱུང་གི་རབ་གནས་བྱ་སྟེ། ལས་རིམ་ལས། རིན་ཆེན་རབ་གནས་ལས་བྱུང་བའི། །རིན་ཆེན་མཛེས་པའི་དབུ་རྒྱན་བཅིང་། །ཞེས་དང་། རིན་ཆེན་རབ་གནས་ཕྲེང་བས་བཅིང་། །ཞེས་སོ། །ཅོད་པན་མཐིང་དམར་གཉིས་ལ་ཁ་ཅིག་རྡོར་སེམས་དང་མཐའ་ཡས་གཉིས་ཀྱིས་སོ་སོར་མཛད་མོད་ཀྱི། འདིར་ནི་གཉིས་ཀ་ལ་མཐའ་ཡས་ཀྱིས་
བྱ་སྟེ། དེ་ལས། རབ་གནས་ཆོས་འབྱུང་ཡེ་ཤེས་དངོས། །ཁ་དོག་གཉིས་ལྡན་དབང་བསྐུར་བྱ། །ཞེས་དང་། ངེས་འབྱེད་ལས་ཀྱང་། ཕྲེང་བ་ཅོད་པན་རིན་ཆེན་པད། །ཞེས་གསུངས་པའི་ཕྱིར་རོ། །གོ་ཆ་ལ་ངེས་འབྱེད་དུ་རྡོར་སེམས་ཀྱིས་བྱ་བར་བཤད་ཀྱང་། འདིར་ལས་རིམ་ལས། ལས་མཆོག་རབ་གནས་རྡོ་རྗེའི་གོ། །ཞེས་པ་ལྟར་དོན་གྲུབ་ཀྱིས་མཛད་དོ། །རྒྱལ་མཚན་དང་གདུགས་ལ་མི་བསྐྱོད་པ་སྟེ། དེ་ལས། རྡོ་རྗེ་རབ་གནས་ལས་བྱུང་བའི། །རྒྱལ་མཚན་རིན་ཆེན་ཏོག་ལྡན་པ། །ཞེས་དང་། མི་བསྐྱོད་རབ་གནས་རིན་ཆེན་གདུགས། །ཞེས་སོ། །ཕྱག་རྒྱ་ལ་ལྷ་རང་རང་གིས་ཏེ། ངེས་འབྱེད་ལས།ཕྱག་རྒྱ་རང་གི་ལྷ་ཉིད་དང་། །ཞེས་སོ། །བུམ་ཆུ་ལ་རིགས་ལྔ་ཀར་འདུས་པའི་ལྷ་སྤྱིས་བྱ་སྟེ། དེ་ལས། བུམ་པ་རང་གི་ཡབ་ཡུམ་སེམས། །ཞེས་དང་། ལས་རིམ་ལས། རིགས་ལྔ་འདུས་པའི་བུམ་ཆུ་སྦྱིན། །ཞེས་སོ། །བཟའ་བཏུང་ལ་རྣམ་སྣང་གིས་བྱ་སྟེ། ངེས་འབྱེད་ལས། བཟའ་བཏུང་སྣང་མཛད་རབ་གནས་ལྡན། །ཞེས་སོ། །སྙིང་པོ་ཡིག་འབྲུ་ལྔ་ལ་འབྲས་བུ་ལྔས་རབ་གནས་བྱ་སྟེ།ལས་རིམ་ལས། སྐུ་གསུང་ཡོན་ཏན་ལས་བྱིན་བསྡུ། །ཞེས་སོ། །གཉིས་པ་རྐྱེན་ལ་བཞི་སྟེ། ཕན་དབང་བསྐུར་རུང་གི་སློབ་བུ་སྣོད་ལྡན་ནི་རྒྱུའི་རྐྱེན། སློབ་དཔོན་དགོངས་པ་ཅན་ནི་བདག་པོའི་རྐྱེན། ཏིང་འཛིན་སྔགས་རྒྱ་རྫས་སོགས་འཛོམ་པའི་ནུས་པ་ཁྱད་པར་ཅན་ནི་དམིགས་པའི་རྐྱེན། དབང་སྔ་མས་གོ་ཕྱེ་ནས་ཕྱི་མ་རིམ་པར་སྣང་བ་ནི་དེ་མ་ཐག་རྐྱེན་ནོ། །གསུམ་པ་ངོ་བོ་ནི། ལས་རིམ་ལས། ངོ་བོ་སྣོད་ཀྱི་མཚན་ཉིད་ཀྱིས། །དབྱེ་བ་རྣམ་པ་ལྔ་རུ་འགྱུར། །ཞེས་ཐོབ་བྱ་ལྔ་ལས་འདིར་ཕན་དབང་བཅུའོ། །བཞི་པ་འབྲས་བུ་ནི། བསྐུར་བས་ཐོབ་བྱ་རང་ལ་གནས་པའི་དོན་མངོན་དུ་འགྱུར་རུང་གི་ནུས་པའི་ས་བོན་ཙམ་བཞག་པ་སྟེ། ངེས་འབྱེད་ལས། དབང་ཐོབ་ཞེས་པའི་ཐ་སྙད་ནི། །སྤྱོད་རྒྱུན་མངོན་སུམ་ཐོབ་པ་ཡང་། །གོ་མི་འགོག་ཅིང་རིགས་ལ་སྣང་། །ཐ་མར་སངས་རྒྱས་འཐོབ་བྱེད་པའི། །ནུས་པ་གང་སྐྱེས་ཐོབ་པའི་ཚད། །ཆོས་ནི་སྐབས་ཀྱི་ཉན་བཤད་
དེ། །ཕྱི་རོལ་དྲང་དོན་མཉན་དུ་རུང་། །ཞེས་སོ། །ལྔ་པ་རིམ་པའི་སྡོམ་ནི། སྙིང་པོ་ལྔ་དང་དབུ་རྒྱན་དང་། །བུམ་པ་ཅོད་པན་ཕྲེང་བ་སྟེ། །གོ་ཆ་རྒྱལ་མཚན་གདུགས་ཕྱག་རྒྱ། །བཟའ་བཏུང་དབང་རྣམས་རིམ་པར་བསྐུར། །ཞེས་བརྒྱུད་པའི་ཕྱག་བཞེས་ཏེ་འགྲེལ་སྒྲོལ་ཊིཀ་ཆུང་གི་ལུགས་སུ་བཞེད་དོ། །གཉགས་འགྲེལ་ལས་བུམ་པ་སྔོན་དུ་བསྐུར་ཞེས་འབྱུང་། རྡོ་རྗེ་ལས་རིམ་དུ་གཞན་ལུགས་སྔ་མ་དང་འདྲ་བ་ལས། ཕྱག་རྒྱ་ཐོག་མར་སྨོས་ཤིང་། ཅོད་པན་དང་ཕྲེང་བ་གཉིས་གོ་བརྗེ་བ་ཙམ་ཁྱད་པར་དུ་སྣང་སྟེ། འདི་དག་ཞི་བའི་དབང་གི་གོ་རིམ་ཙམ་དུ་ཟད་དོ། །དྲུག་པ་བསྐུར་བའི་ལས་ལ། བསྐུར་གནས།དགོངས་པ། སྐུར་ཚིག །སྨོན་ལམ་དང་བཞི། དང་པོ་ནི། ངེས་འབྱེད་ལས། གནས་ནི་སྤྱི་དང་ཁྱད་པར་ཏེ། །ཞེས་པས། སྤྱིར་གཞག་གནས་དང་། ཁྱད་པར་བསྡིམ་གནས་གཉིས་ཏེ། དེ་ལས། གཞག་པའི་གནས་དང་བསྡིམ་པའི་གནས། །དེ་བཞིན་ཁོང་དུ་ཆུད་པ་གཅེས། །ཞེས་སོ། །དང་པོ་གཞག་གནས་ཀྱང་། དེ་ལས། སྤྱི་དབང་ལུས་ལ་བསྐུར་བ་སྟེ། འོ་ན་ལུས་ཀྱི་གང་དུ་བསྐུར་ཞེ་ན། ཁྱད་པར་སྙིང་པོ་དབུ་རྒྱན་བུམ། །གདུགས་དང་ཅོད་པན་ཕྲེང་བ་མགོ། །གོ་ཆ་ལུས་ཏེ་རྒྱལ་མཚན་ལག །བཟའ་བཏུང་དག་གི་ལམ་དུའོ། །ཕྱག་རྒྱ་སྤྱི་བོའམ་སྙིང་ག་སྟེ། །ཞེས་སོ། །བསྡིམ་གནས་ནི། རང་རང་གི་མཚུངས་ལྡན་གྱི་རྒྱུ་ལ་བསྡིམ་པའོ། །གཉིས་པ་དགོངས་པ་ནི། སློབ་བུ་ལྷར་གསལ་བའི་ལུས་ཀྱི་གནས་ལྔར་འབྲུ་ལྔ་བཀོད་ལ་བྱིན་བསྡུས་ཏེ་ཆོ་ག་གསུམ་གྱིས་རིགས་ལྔར་བསྐྱེད་པས་ཁམས་ལྔ་འབྲས་བུ་ལྔའི་ངོ་བོར་དག་པར་བསམ་པ་ནི་སྙིང་པོ་ལྔའི་དགོངས་པའོ། །དབུ་རྒྱན་མུ་ཀུ་ཊའི་སྔགས་ཀྱིས་བསྐོན་པ་རིན་པོ་ཆེའི་ཁང་བུ་ལྔར་གྱུར། རུའི་སོར་མོར་འབྲུ་བཅུ་བཀོད་ལ་དམ་རྒྱ་བཅས་ནས་མགོ་བོའི་གནས་ལྔར་བཞག་པས་རིགས་ལྔ་ཡབ་ཡུམ་སྦྱོར་བའི་སེམས་རྒྱུན་གནས་སོ་སོར་ཐིམ་སྟེ་རྟགས་རིགས་ལྔ། དོན་ཚོགས་བརྒྱད་ཡེ་ཤེས་ལྔའི་ངོ་བོར་དག་པར་བསམ་པ་ནི་དབུ་རྒྱན་གྱིའོ། །དེ་བཞིན་དུ། བུམ་པས་རིགས་ལྔའི་ཆུ་རྒྱུན་གྱིས་ཉོན་མོངས་པའི་དྲི་མ་དག་ནས་ཡེ་ཤེས་ལྔའི་དབང་ཐོབ་པར་དང་། ཅོད་པན་གྱིས་དམར་པོ་གྱེན་དུ་འབུར་བས་ཆོས་ཀྱི་རྒྱལ་སྲིད་
ལ་མངའ་བརྙེས་ཤིང་མཐིང་ག་མཐུར་དུ་འཕྱང་བས་གདུག་པ་ཅན་ཟིལ་གྱིས་ནོན་པར་དང་། མེ་ཏོག་གི་ཕྲེང་བས་གཟུངས་ཏིང་སོགས་འབྲས་ཆོས་ཐམས་ཅད་རྫོགས་པར་དང་། གོ་ཆས་ཕས་རྒོལ་གྱིས་མི་ཚུགས་པར་དང་། རྒྱལ་མཚན་གྱིས་བདུད་དང་མུ་སྟེགས་ལ་སོགས་པ་ལོག་ལྟ་ཟིལ་གྱིས་གནོན་པར་དང་། གདུགས་ཀྱིས་ཉོན་མོངས་པའི་ཚ་གདུང་ལས་སྐྱོབ་པར་དང་། ཕྱག་རྒྱས་རྟོག་པ་རང་ཁ་མ་ལྷའི་ངོ་བོར་དག་པར་དང་། བཟའ་བཏུང་གིས་འདོད་ཡོན་ལྔ་ལ་མ་འགགས་པར་ལོངས་སྤྱོད་པའི་དབང་ཐོབ་པར་བསམ་པའོ། །གསུམ་པ་ནི།ཚིགས་བཅད་དང་སྔགས་རྣམས་རྡོ་རྗེ་ལས་རིམ་ན་གསལ་ལོ། །བཞི་པ་ནི།བདུན་པའི་མཇུག་ཏུ། དགོངས་པ་དང་རྗེས་སུ་མཐུན་པར་ཐོབ་བྱ་གང་ཡིན་འགྲུབ་པའི་སྨོན་ལམ་བརྗོད་པའོ། །སྐྱོན་ཡོན་གཉིས་ནི་འོག་ཏུ་འཆད་དོ། །དེ་དག་ལ་ཕན་པའི་དབང་ཞེས་བྱ་སྟེ། འདི་ཕྱིར་ཕན་པའི་ས་བོན་ཙམ་ལས་ད་ལྟ་ཉིད་ནས་རང་གཞན་གྱི་དོན་སྒྲུབ་པའི་ནུས་པ་སོ་སོར་བཞག་པ་མེད་པའི་ཕྱིར། དེ་བསྐུར་བའི་དུས་ནི་འཇུག་པའི་ཆོས་བཅུ་དྲུག་གིས་དཀྱིལ་འཁོར་དུ་བཅུག་སྟེ་བསྐུར་བ་ཡིན་ནོ། །གལ་ཏེ་འཇུག་པ་དང་དངོས་གཞི་གཉིས་ཞག་གིས་བར་ཆོད་ན། སློབ་དཔོན་དབང་ཁྲིར་བཞུགས་པ་ཡན་ཚར་བ་དང་། བགེགས་བསྐྲད་དེ་བུ་རྣམས་ལྷར་བསྐྱེད་ལ་གོ་བགོ་ལུས་བསྲུང་བ་རྣམས་བྱ་ཞེས་བླ་མ་རྩགས་ཚ་དང་། འགོས་རྩི་ལུང་པའི་དབང་ཆོག་ལས་འབྱུང་ངོ་། །གཉིས་པ་ནུས་དབང་ལའང་སྔར་ལྟར་དོན་བརྒྱད་བརྒྱད་དེ། དང་པོ་མཚུངས་ལྡན་གྱི་རྒྱུ་ནི། བུའི་རྣ་བ་གཉིས་ཀྱི་རྩ་ནང་ན་སྒྲ་ཉན་བྱེད་ཀྱི་ཐིག་ལེ་ཤིན་ཏུ་དྭངས་པར་གནས་པ་ནི་ཉན་དབང་གི་མཚུངས་ལྡན་ནོ། །དེ་བཞིན་དུ་སྙིང་གའི་དྲན་བྱེད་ཀྱི་ཐིག་ལེ་བསྒོམ་དབང་གི་དང་། ལག་པའི་སྐྱོད་བྱེད་ཀྱི་ཐིག་ལེ་ལས་ཀྱི་དང་། ལྕེའི་སྨྲ་བྱེད་ཀྱི་ཐིག་ལེ་འཆད་པའི་དང་། ཡན་ལག་ལྔའི་སྐྱོད་བྱེད་ཀྱི་ཐིག་ལེ་ལྔ་ནི་རྡོ་རྗེ་རྒྱལ་པོའི་དབང་གི་མཚུངས་ལྡན་ནོ། །ལྷན་ཅིག་བྱེད་རྒྱུ་ནི། ངེས་འབྱེད་ལས། རྫས་ནི་གླེགས་བམ་རྒྱ་གྲམ་དང་། །འཁོར་ལོ་ཕྲེང་བ་རྡོ་རྗེ་དྲིལ། །འབྱུང་ལྡན་དོན་ཡོད་སྣང་
མཐའ་ཡས། །ཡི་དམ་རིགས་ལྔའི་རབ་གནས་ལྡན། །ཞེས་པས་གླེགས་བམ་རིན་འབྱུང་གི་རབ་གནས་ཅན་ནི་ཉན་དབང་གི་དང་། ཕྲེང་བ་ཡི་དམ་གང་ཡིན་གྱི་རབ་གནས་ཅན་གྱི་བསྒོམ་པ་དང་། རྒྱ་གྲམ་དོན་གྲུབ་ཀྱི་རབ་གནས་ཅན་ཕྲིན་ལས་ཀྱི་དང་། འཁོར་ལོ་མཐའ་ཕྱག་ལེན་ལ་དུང་དང་ཆག་ཤིང་ཀྱང་གཏོད་པར་མཛད་ཡས་ཀྱི་རབ་གནས་ཅན་འཆད་པའི་དང་། རྡོར་དྲིལ་རིགས་ལྔ་སྤྱི་འདུས་ཀྱི་རབ་གནས་ཅན་ནི་རྡོ་རྗེ་རྒྱལ་པོའི་དབང་གི་ལྷན་ཅིག་བྱེད་པའི་རྒྱུའོ། །གཉིས་པ་རྐྱེན་བཞི་ནི། ནུས་དབང་བསྐུར་རུང་གི་སློབ་བུ་རྒྱུའི་རྐྱེན་ཡིན་པ་ལ་སོགས་ཏེ་སྔར་ལྟར་རོ། །གསུམ་པ་ངོ་བོ་ནི། ཐོབ་བྱ་ནུས་པའི་དབང་ལྔའོ། །བཞི་པ་འབྲས་བུ་ནི། དབང་བསྐུར་བས་ནུས་པ་ཆེས་ཆེར་སྐྱེས་པ་སྟེ། ངེས་འབྱེད་ལས། ཐོབ་པའི་ཚད་ནི་ནུས་པ་ལྔ། །བདག་ཉན་བསྒོམ་དང་གཞན་འཆད་ཕྲིན་དང་གཉིས་རབ་འབྱམས་ཀའི་དོན། །ཐོགས་པ་མེད་པར་སྤྱོད་པའི་སྒོ་མ་འགགས་པ་ནི་ཐོབ་པའི་ཚད། །ཆོས་ནི་གྲོལ་ལམ་ངེས་དོན་གྱི་བཤད་རྣམས། །སྣང་བར་བྱེད་པའི་མན་ངག་སྦྱིན་དུ་རུང་། །ཞེས་སོ། །ལྔ་པ་རིམ་པ་ནི་གཞུང་གི་དཀྱུས་བཞིན་ནོ། །དྲུག་པ་ལས་ལ་བཞི་ལས། དང་པོ་གནས་ལ་གཉིས་ཏེ་སྤྱི་ནི། དབང་རྫས་ལྔ་ཀ་ལག་ཏུ་གཏོད་པའོ། །ཁྱད་པར་ནི་སོ་སོའི་མཚུངས་ལྡན་ལ་བསྡིམ་པ་སྟེ། དེ་ལས། གནས་ནི་རྣ་བ་སྙིང་དང་ལག །ལྕེ་དང་ཡན་ལག་རྣམ་ལྔའོ། །ཞེས་སོ། །གཉིས་པ་དགོངས་པ་ལའང་། སྤྱིའི་དོན་དང་། སོ་སོའི་དགོས་ཆོས་གཉིས། དང་པོ་ནི། སློབ་དཔོན་ཀུན་བཟང་ཡབ་ཡུམ་དུ་གསལ་བའི་སྦྱོར་མཚམས་ནས་བྷྲཱུཾ་ཡིག་དམར་སེར་ཞིག་ཆད། དེ་བུའི་མཚུངས་ལྡན་གྱི་རྟེན་སོ་སོ་ལ་ཕོག་པར་བསམ་ཞིང་། དེར་ལས་ཀྱི་རྡོ་རྗེས་བདུད་རྩིའི་ཐིག་ལེ་རེ་བྱས་པས། བྷྲཱུཾ་དེ་ཞུ་བ་ལས་རྟེན་གྱི་རྩ་གཞལ་ཡས་ཁང་དབུས་འཁོར་ལོ་རྩིབས་བཞི་པ་གྲུ་ཆད་ལ་སྒོ་བཏོད་པ་ཞིག་ཏུ་བསྐྱེད། དེར་རྩ་ནང་གི་བཅུད་འདུས་པའི་ཐིག་ལེ་མཚུངས་ལྡན་གྱི་རྒྱུ་དེ་དག་ལྷ་སོ་སོའི་ས་བོན་དུ་གསལ་བ་རྣམས་ཆོ་ག་གསུམ་བསྐྱེད་ཀྱིས་ལྷར་བསྐྱེད། སྤྲོ་ན་དབང་བསྐུར་བྱིན་བརླབ་བྱས་ཏེ་ཡན་ལག་གི་ལྷ་བསྒོམ་
པ་ཡང་ཐལ་བ་ཆུང་ངུ་ནས་བཤད་གསུངས་པ་ལྟར་བྱས་ན་ལེགས། གང་ལྟར་ཀྱང་ཡེ་ཤེས་པ་དྲངས་བསྡིམ་མཆོད་ནས། ལྷ་དེ་དག་སྙོམས་འཇུག་མཛད་པའི་སེམས་སྤྲིན་གྱིས་བྱིན་བསྡུས་ཏེ། རྗེས་ཆགས་ཀྱི་མེས་བཞུས་ནས་སློབ་བུ་ལ་ཐིམ་པས་ཉན་བསྒོམ་ལ་སོགས་པ་མི་ནུས་པའི་སྒྲིབ་པ་མཐའ་དག་སྦྱངས། སློབ་བུ་ཉིད་ཀྱང་འོད་དུ་ཞུ་བ་ལས་རིགས་གང་ཡིན་གྱི་ལྷར་བསྐྱེད། དེ་ལ་སྐུར་ཚིག་རྣམས་བརྗོད་བཞིན་པར་དབང་རྫས་གཏད་པས། ཉན་པ་ལ་སོགས་པའི་བྱ་བ་རྣམས་ཐོགས་མེད་དུ་བྱེད་ནུས་པའི་ནུས་པ་དངོས་སུ་སྐྱེས་པར་བསམ་པའོ། །དེ་ལྟར་ཡང་ལས་རིམ་ལས། སྦྱོར་བ་ལས་བྱུང་ལེ་བརྒན་བྷྲཱུཾ། །གང་ཡིན་གནས་སུ་འཁོར་ལོའི་ཁང་། །ཉི་ཟླའི་གདན་ལ་སེམས་བྱུང་འབྲུ། །ལྔ་གཉིས་ཟུང་ལས་འཁྲིལ་སྦྱོར་སྐུ། །ཡེ་ཤེས་སྤྱན་དྲངས་ཅུང་ཟད་མཆོད། །ཡོངས་གྱུར་དེ་ཡི་ཕྱག་རྒྱ་གསལ། །ཞེས་སོ། །གཉིས་པ་ནི། ཉན་བྱེད་འཁོར་ལོའི། ཞེས་སོགས་ཀྱི་ཉན་དབང་གི་དགོངས་པ་བསྟན་ཏེ། རྣ་རྩ་གཉིས་ཀྱི་གཞུང་དུ་ཉན་དབང་ནི། ཚིག་དོན་གྱི་གཟུངས་སོགས་ཡོན་ཏན་རིན་པོ་ཆེའི་གཏེར་འཛིན་པའི་ཕྱིར་ཏྲཱཾ་ཟུང་ལྔ་ལས་རིན་ཆེན་རིགས་ཀྱི་གཙོ་བོ་རང་གི་རིགས་ཆུང་གིས་བསྐོར་བའི་ཡབ་ཡུམ་བཅུ། དེའི་སྟེང་དུ་རང་རང་གི་ས་བོན་ལས་ཞི་བ་ལ་གཤིན་རྗེ་གཤེད་སོགས་སྒོ་བ་ཡབ་ཡུམ་རྐྱང་པ་བསྣན་པས་ལྷ་བཅོ་བརྒྱད། ཁྲོ་བོ་ལ་རྟ་གདོང་མ་སོགས་བཞི་བསྣན་པས་ལྷ་བཅུ་བཞིའོ། །གསལ་བའི་འཁོར་ལོའི་སོགས་ཀྱིས་སྒོམ་དབང་ནི་སྙིང་གའི་གཞལ་ཡས་ཁང་དུ། རབ་བབས་པའི་ལྷའམ། ཡང་ན་མོས་པའི་ཡི་དམ་གྱི་ལྷ་དེ་ཉིད་ཀྱི་ས་བོན་ཟུང་ལྔ་ལས་གཙོ་བོ་རིགས་ཆུང་སྒོ་སྐྱོང་དང་བཅས་པའི་ལྷ་བཅོ་བརྒྱད་དམ་བཅུ་བཞི་གོང་བཞིན་བསྐྱེད་པའོ། །ལག་པའི་འཁོར་ལོའི་སོགས་ཀྱིས་ཕྲིན་ལས་ཀྱི་དབང་ནི་ལས་ཀྱི་རིགས་ཀྱི་བདག་ཉིད་ཡིན་པའི་ཕྱིར་ལག་རྩའི་དཀྱིལ་འཁོར་ལ་ཧཱཾ་ཟུང་ལྔ་ལས་ལས་ཀྱི་རིགས་གཙོ་འཁོར་བཅོ་བརྒྱད་དམ་བཅུ་བཞི་བསྒོམ་པའོ། །སྨྲ་བྱེད་འཁོར་ལོའི་སོགས་ཀྱི་འཆད་དབང་ནི་པདྨའི་རིགས་ཆོས་ཀྱི་རྒྱལ་པོ་ཡིན་པའི་ཕྱིར་ལྕེའི་འཁོར་ལོ་ལ་ཧྲཱྀཿཟུང་ལྔ་ལས་
པད་རིགས་གཙོ་འཁོར་བཅོ་བརྒྱད་དམ་བཅུ་བཞི་བསྐྱེད་པའོ། །བསྐྱོད་ཆེན་འཁོར་ལོའི་སོགས་ཀྱིས་རྡོ་རྗེ་རྒྱལ་པོ་ནི་རིགས་ཐམས་ཅད་ཀྱི་བདག་པོ་ཡིན་པའི་ཕྱིར་རིགས་སྤྱི་ས་དང་བསྐུར་ཏེ། མགོ་ལ་སོགས་པ་རང་རང་གི་རིགས་ཀྱི་ཡན་ལག་ལྔའི་དཀྱིལ་འཁོར་ལ་ཧཱུཾ་སོགས་ས་བོན་ལས་རིགས་ལྔ་སོ་སོའི་རིགས་ཆུང་དང་བཅས་པའི་ལྷ་ལྔ་བཅུ་དང་། དེའི་སྟེང་དུ། སྤྱི་གཙུག་སྙིང་ནས་གཡས་བསྐོར་དུ། །ནུ་མ་དཔུང་མགོ་སོག་པའི་སྟེང་། །སོག་ཕྲག་སོག་སྟེང་དཔུང་མགོ་ནུ། །བཤང་ཁ་རྣམས་ལ་གོ་རིམ་བཞིན། །ཧཱུཾ་མཛད་རྣམ་རྒྱལ་དབྱུག་པ་སྔོ། །གཤིན་རྗེ་མི་གཡོ་རྟ་འདོད་རྒྱལ། །བདུད་རྩི་སུམ་རྒྱལ་སྟོབས་ཆེན་པོ། །ཞེས་པ་ལྟར་ཁྲོ་བཅུ་ཡུམ་དང་བཅས་པའི་ཁྲོ་ཕྲེང་བསྐྱེད་པའོ། །སྐབས་འདིར་ནི། ཞི་ཁྲོའི་དབང་ལ་ལྷ་གྲངས་མང་ཉུང་མེད་དེ། དེ་ལྟར་ཡོད་པ་དག་སྒོ་སྐྱོང་གིས་ཕྱེ་བ་ཙམ་དུ་ཟད་པའི་ཕྱིར་རོ། །གསུམ་པ་བསྐུར་ཚིག་ནི།ཏྲཱཾ། གསང་བ་གསང་ཆེན་གསང་མཆོག་དང་། །ཞེས་སོགས་དཀྱུས་བཞིན་ཏེ།ཉན་དབང་ཐོབ་པས་རང་ཐོས་བསམ་བྱ་བར་རྗེས་སུ་གནང་ཞིང་འཆད་དབང་མ་ཐོབ་པར་གཞན་ལ་མི་སྟོན་པར་དམ་བསྒྲག་པ་དང་། དེ་བཞིན་དུ་བསྒོམ་དབང་གིས་སྒོ་གསུམ་ལྷ་སྔགས་ཡེ་ཤེས་ཀྱི་ཏིང་འཛིན་བསྒོམ་པའི་ངང་ལས་སྒྲུབ་མཆོད་སོགས་བྱ་བར་གནང་བ་དང་། ཕྲིན་ལས་ཀྱི་དབང་གིས་ལས་རྣམ་པ་བཞིས་འགྲོ་བ་འདུལ་བར་དང་། འཆད་དབང་གིས་སྣོད་བརྟགས་ཏེ་བློ་དང་འཚམས་པར་ཆོས་སྟོན་ཅིག་བར་དང་། རྡོ་རྗེ་རྒྱལ་པོས་དབང་བསྐུར་བ་སོགས་དཀྱིལ་འཁོར་ཀུན་གྱི་བདག་པོར་རྗེས་སུ་གནང་བ་སྟེར་བའོ། །བཞི་པ་སྨོན་ལམ་ནི་སྔར་ལྟར་དང་། སྐྱོན་ཡོན་གཉིས་ནི་འོག་ཏུ་འཆད། དེ་དག་ལ་ནུས་པའི་དབང་ཞེས་བྱ་སྟེ། རང་གཞན་གྱི་དོན་ད་ལྟར་ཉིད་ནས་དངོས་སུ་བྱེད་ནུས་པའི་ཕྱིར་ཏེ།ངེས་འབྱེད་ལས། བདག་གཞན་དོན་ལ་སྦྱོར་ནུས་ཕྱིར། །ནུས་པའི་དབང་ཞེས་གསུངས་པ་ཡིན། །ཞེས་ནུས་ཚད་ལ་རག་ལུས་པས་དེ་སྐད་དུ་གསུངས་པའི་ཕྱིར། དེ་བསྐུར་བའི་དུས་ནི། ཕན་དབང་ཐོབ་ནས། བདག་དོན་ནུས་པའི་བརྩོན་འགྲུས་ཅན་ལ་ཉན་བསྒོམ་
གཉིས། གཞན་དོན་ནུས་པའི་བརྩོན་འགྲུས་ཅན་ལ་འཆད་ཕྲིན་གཉིས། གཉིས་གའི་དོན་ནུས་པའི་བརྩོན་འགྲུས་ཅན་ལ་རྡོ་རྗེ་རྒྱལ་པོ་བཀའ་རབ་འབྱམས་ཀྱི་དབང་བསྐུར་བ་ཡིན་ནོ། །གསུམ་པ་ཟབ་དབང་གསུམ་ལའང་དོན་བརྒྱད་བརྒྱད་སྟེ། དེ་ལ་མཚུངས་རྒྱུ་ནི། སློབ་བུའི་ལུས་ལ་ཐིག་ལེ་མི་རྟོག་པའི་ཡེ་ཤེས་དོན་དམ་བདེན་པའི་ངོ་བོར་ཡེ་ནས་རང་ཆས་སུ་གནས་པ་ནི་གསང་དབང་གི་དང་། དོན་དམ་འོད་གསལ་གྱི་ཡེ་ཤེས་རང་ཆས་སུ་གནས་པ་ཤེས་རབ་ཡེ་ཤེས་ཀྱི་དང་། དབྱེར་མེད་ཀྱི་ཡེ་ཤེས་རང་ཆས་སུ་གནས་པ་ནི་བདེ་བ་ཆེན་པོའི་མཚུངས་ལྡན་ནོ། །ལྷན་ཅིག་བྱེད་རྒྱུ་ནི། སློབ་དཔོན་གྱིས་ཡུམ་ལོ་ཉི་ཤུ་མ་དང་རོལ་པའི་ཉི་ཟླ་གཉིས་འདྲེས་ནི་གསང་དབང་གི་སྟེ། ངེས་འབྱེད་ལས། རྫས་ནི་དངོས་དང་ནུས་པ་སྟེ། །དངོས་ནི་ཉི་ཟླ་བྱང་ཆུབ་སེམས། །ཞེས་སོ། །བུ་ཉིད་ཀྱི་ཡུམ་ལོ་བཅུ་དྲུག་མ་ཟླ་བ་འཛག་པ་ནི་ཤེར་དབང་གི་སྟེ།དེ་ལས། རྫས་ནི་སྐབས་ཀྱི་ཕྱག་རྒྱ་མོ། །ཟླ་བ་འཛག་པ་གཏད་པའོ། །ཞེས་སོ། །ཡང་བུའི་ཡུམ་ལོ་བཅུ་གཉིས་མ་ཉི་མ་འཛག་པ་ནི་བདེ་བ་ཆེན་པོའི་དབང་གི་ལྷན་ཅིག་བྱེད་རྒྱུ་སྟེ། དེ་ལས། ཁྱད་པར་བཅུ་དེ་ཉི་ལྡན་མ། །ཞེས་སོ། །གཉིས་པ་རྐྱེན་བཞི་ནི། སྤྱོད་རིག་མཉམ་པའི་བརྟུལ་ཞུགས་གསུམ་ལྡན་གྱི་སློབ་བུ་ཟབ་དབང་གི་སྣོད་རུང་ནི་རྒྱུའི་རྐྱེན་ཡིན་པ་ལ་སོགས་པའོ། །གསུམ་པ་ངོ་བོ་ནི།ཐོབ་བྱ་ཟབ་དབང་གསུམ་མོ། །བཞི་པ་འབྲས་བུ་ནི། དཔེར་ན་རྣོ་ལ་ངར་བཏགས་པ་ལྟར་དབང་ཐོབ་པས་ནུས་པ་དངོས་སུ་སྐྱེས་པ་སྟེ། ཁོག་གཞུང་ལས། རྣོ་ལ་ངར་བཏགས་ནུས་པ་བཞིན། །ནུས་པ་སྐྱེས་པ་ཐོབ་པའི་ཚད། །ཅེས་སོ། །ལྔ་པ་རིམ་པ་ནི་གོ་སླ་བར་ཟད་དོ། །དྲུག་པ་ལས་ཁྲིགས་ནི། ཤེས་རབ་ཐབས་ཀྱི་ཕྱག་རྒྱ་ལས། །བདེ་བའི་འབྲུ་ཚོགས་གསལ་བའི་རྒྱུན། །རྡོ་རྗེའི་ལམ་ནས་པད་མོར་འཁྱིལ། །རྩེ་ནས་བསྡིམ་ཞིང་དཀྱིལ་འཁོར་བསྒྱུར། །ཞེས་པའི་གཞུང་རྡོ་རྗེའི་ཚིག་གཅིག་གི་སྟེང་དུ་ཟབ་དབང་གསུམ་ག་སྦྲགས་ཏེ་བཤད་རྒྱུད་ཐལ་བས་བཀྲལ་བ་ལྟར་འཆད་དོ། །དེ་ལ་དང་པོ་གསང་དབང་བསྐུར་ཐབས་
ནི། རྡོ་རྗེ་སློབ་དཔོན་ཡབ་ཡུམ་གཙོ་བོ་ཡབ་ཡུམ་དུ་བསྐྱེད་པའི་མཁའ་གསང་རློབ། སྦྱོར་བའི་བརྡས་བསྐུལ་ནས་ཕྱག་རྒྱ་བཞིས་རོལ་པས་ལྷན་སྐྱེས་བདེ་བའི་རང་བཞིན་བྱང་ཆུབ་སེམས་ཀྱི་ཆུ་རྒྱུན་ཧཱུཾ་ཡིག་གི་རྣམ་པར་ཡབ་ཀྱི་རྡོ་རྗེའི་ལམ་ནས་དཔའ་ཐབས་ཀྱིས་ཕབ་སྟེ། ཡུམ་གྱི་པད་མོར་བསྐྱིལ་བ་ལས། བསྐུར་ཐབས་གསུམ་པོ་གང་རུང་གིས་གསང་དབང་བསྐུར་ཏེ། འཇམ་དཔལ་དམར་པོའི་བང་མཛོད་ལས། བ་དང་བེའུའི་ཚུལ་དག་གམ། །དེ་བཞིན་བུང་བ་སྦྲང་རྩིའི་ཚུལ། །ཡང་ན་བྱ་དང་བྱེའུའི་ཚུལ། །ཞེས་པ་ལྟར། ཐབས་ཀྱི་གསང་དབང་ཡབ་ཀྱི་རྡོ་རྗེའི་རྩེ་ནས་བུས་ལེན་པ་བ་དང་བེའུའི་ཚུལ་དང་། ཤེས་རབ་ཀྱི་གསང་དབང་ཡུམ་གྱི་པདྨའི་སྣ་རྩེ་ནས་ལེན་པ་མེ་ཏོག་དང་བུང་བའི་ཚུལ་དང་། དེ་ལྟར་མི་ནུས་པའི་ཐབས་ཤེས་གཉིས་མེད་ཀྱི་གསང་དབང་ཡབ་ཀྱི་ལྕེས་པདྨ་ལས་བླངས་ཏེ་བུ་ལ་སྟེར་བ་བྱ་དང་བྱེའུའི་ཚུལ་དུ་བསྐུར་བའོ། །དེ་ཉིད་བཞག་གནས་སློབ་བུའི་ལྕེ་དང་།བསྡིམ་གནས་སྙིང་སྟེ། དབང་གི་གལ་པོ་ལས། སེམས་ཀྱི་དཀྱིལ་ནས་དྲངས་པའི་ཆུ། །ཁྱོད་ཀྱི་ལྕེ་ལ་བཞག་པ་འདི། །སྙིང་གི་དཀྱིལ་དུ་གཟུང་བར་བྱོས། །ཤེས་སོ། །ཇི་ལྟར་བསྡིམ་ན། བྱང་ཆུབ་ཀྱི་སེམས་རྒྱུན་ཧཱུཾ་གི་འབྲུ་ཚོགས་སུ་གསལ་བ་དེ་ཉིད་རྡོ་རྗེ་སེམས་དཔའ་ཡུངས་ཀར་གྱི་ཚད་ཙམ་པ་མང་པོར་གྱུར་ཏེ་སྙིང་ལ་ཐིམ་པས་ཆོས་ཀྱི་འཁོར་ལོའི་རྩ་ཆེན་བཞི་ལ་གནས་པའི་རིགས་དྲུག་གི་ས་བོན་གཉིད་དང་བཅས་པ་བསྲེགས་ནས་དོན་དམ་མི་རྟོག་པའི་ཡེ་ཤེས་སུ་བསྒྱུར་བ་སྟེ། ཐལ་རྒྱུད་ལས། མི་བསྐྱོད་ཡབ་ཡུམ་རོལ་པ་ཡི། །རྣམ་པ་བདེ་བ་གསལ་ཞིང་མི་ངོ་བོ་དམིགས་པ། །ཤེས་རབ་ཐབས་ཀྱི་ཕྱག་རྒྱའོ། །རྡོ་རྗེ་ཡེ་ཤེས་ཧཱུཾ་ཚོགས་ཀྱིས། །པད་མོའི་ཡེ་ཤེས་བསྡུས་འཁྱིལ་བའི། །ཡུངས་ཀར་ཚད་ཙམ་རྡོ་རྗེ་སེམས། །རྩེ་ནས་རྩེ་རུ་བསྡིམ་པ་ཡིས། །རང་བཞིན་ཆོས་ཀྱིས་གནས་པའི་སྙིང་ཁམས་དཀྱིལ་འཁོར་གྱི། །ས་བོན་ཟུང་གསུམ་གཉིད་དང་བཅས། །གནས་ངན་ལེན་པ་གསུམ་སྦྱངས་ཏེ། །དམིགས་མེད་སེམས་ཀྱི་ཡེ་ཤེས་ལྔ། །གསལ་བས་ས་བོན་ཚིག་པ་བཞིན། །གྱིས་འཁོར་བར་མི་སྐྱེ་སྟེ་དབང་གི་ཐབས་
ཀྱི་དབུགས་འཁོར་བའི་དུཿཁ་ལས་དབྱུང་བའོ། །ཞེས་སོ། །དེ་ལ་ཅིའི་ཕྱིར། གསང་དབང་ཞེས་བྱ་ཞེ་ན། རྟོག་མེད་ཀྱི་བདེ་བའི་ཡེ་ཤེས་ངོས་ཟིན་དཀའ་བའི་དོན་དེ་རྟེན་ཞུ་བ་ཡེ་ཤེས་ཀྱི་རོ་དང་ལྡན་པ་ལ་བརྟེན་ནས་ཐོབ་པའི་ཕྱིར་དང་། དེ་བྱིན་ཀྱང་ད་དུང་བླ་མ་ཡབ་ཡུམ་གྱིས་མྱོང་བ་ལྟར་སློབ་མ་ལ་མི་སྣང་བའི་ཕྱིར་དང་། གནས་སྐབས་སུ་ཐེག་པ་འོག་མ་ལ་གསང་བའི་སྤྱོད་པ་ཡིན་པའི་ཕྱིར་གསང་བའོ། །དེ་བསྐུར་བའི་དུས་ནི་ནུས་དབང་ཐོབ་ནས་སྟེང་སྒོ་རྣམ་པར་གྲོལ་བའི་རྫོགས་རིམ་ལ་སློབ་པའི་སྔོན་དུའོ། །གཉིས་པ་ཡེ་ཤེས་རང་གནས་ཀྱི་བསྐུར་ཐབས་ནི། ཤེས་རབ་མ་བཅུ་དྲུག་ལོན་པ་དང་བུ་ཉིད་སྔར་བཞིན་བྱིན་གྱིས་བརླབས་ནས་རོལ་པས་ཧཱུཾ་གི་རྣམ་པའི་ཉི་ཟླ་བྱང་ཆུབ་ཀྱི་སེམས་རྒྱུན་དགའ་བཞིའི་འགྲོས་ཀྱིས་རྡོ་རྗེ་ནས་པདྨའི་ལམ་དུ་དབབ་སྟེ་བཟུང་བའི་ཐབས་ཀྱིས་བསྐྱིལ་བ་དེ་ཉིད། གཞག་གནས་གསང་རྩ་ཕན་ཚུན་དུ་བསྣོལ་མར་བཀོད་པས་ཐིག་ལེ་གཉིས་རྩེ་ཕྲད་པའོ། །བསྡིམ་གནས་ནི་རིག་པའི་ཕོ་བྲང་སྟེ། ངེས་འབྱེད་ལས། གནས་ནི་རིག་པའི་ཕོ་བྲང་ངོ་། །ཞེས་སོ། །དེའི་ཚེ་མཚོན་བྱེད་དཔེའི་བདེ་བ་ནི་བྱང་སེམས་གཉིས་ཤོར་གཉིས་མཉམ་གྱི་ཚེ་ལྷན་སྐྱེས་ཀྱི་དགའ་བ་རྟོག་བཅས་སུ་མྱོང་ཞིང་། དེས་མཚོན་བྱ་སེམས་ཉིད་དོན་དམ་འོད་གསལ་གྱི་ཡེ་ཤེས་སུ་བསྒྱུར་བ་སྟེ། ཐལ་རྒྱུད་ལས། རྗེས་སུ་འཇུག་པའི་ཕྱག་རྒྱ་ཉིད། །ཟིལ་པའི་ཐིག་ལེ་སྔོན་རྡོ་རྗེའི་ལམ་བཞིན། །བཅུ་དྲུག་ཕྱེད་ཕྱེད་ཐིག་ལེ་གཅིག །ཕན་ཚུན་འགོད་པའི་སྟོབས་ཀྱིས་བསྡིམ། །བདེ་བ་གཉིས་པའི་ངོ་བོ་ཉིད། །གསུམ་པའི་ཡེ་ཤེས་དཀྱིལ་འཁོར་དུ། །གསལ་བར་ཤར་བས་དཀྱིལ་འཁོར་གྱུར་པའི་སྒྲ། །རང་བཞིན་འོད་གསལ་དཀྱིལ་འཁོར་རོ། །ཞེས་སོ། །དེ་ལ་ཡེ་ཤེས་རང་གནས་ཀྱི་དབང་ཞེས་བྱ་སྟེ། ཉམས་སུ་མྱོང་བྱའི་ཡེ་ཤེས་དེ་རང་ལ་གསལ་བའི་ཕྱིར་དང་། རང་གནས་མཚུངས་ལྡན་གྱི་རྒྱུད་དེ་ཤེས་རབ་མའི་ལྷན་ཅིག་བྱེད་རྒྱུ་ལ་བརྟེན་ནས་རྒྱུད་ལ་མྱོང་བའི་ཕྱིར་ཤེས་རབ་ཡེ་ཤེས་ཀྱི་དབང་ཞེས་ཀྱང་གྲགས་སོ། །དེ་བསྐུར་བའི་དུས་ནི། གསང་དབང་ཐོབ་ནས་འོག་སྒོ་བདེ་བ་ཆེན་པོའི་རྫོགས་
རིམ་ལ་བསླབ་པའི་སྔོན་དུའོ། །གསུམ་པ་དབྱེར་མེད་བདེ་ཆེན་གྱི་དབང་ནི། ཤེས་རབ་མ་ལོ་བཅུ་གཉིས་མ་དང་བུ་ཉིད་སྙོམས་པར་ཞུགས་པའི་ཡས་བབས་ཀྱི་དགའ་བཞིའི་འགྲོས་རེ་རེ་ལའང་། དགའ་བ་བཞི་བཞི་སྟེ་བཅུ་དྲུག་དང་། དེ་ལ་ཉི་ཟླ་ཟུང་འདྲེལ་གྱིས་མཚན་སོ་གཉིས་དང་། ཟླ་བའི་ཐིག་ལེ་རེ་རེའང་ཡེ་ཤེས་ལྔའི་རོ་དང་ལྡན་པའི་ཕྱིར་དཔེ་བྱད་བརྒྱད་ཅུ་རྫོགས་ཤིང་མངོན་ཤེས་དྲུག་ཀྱང་འཆར་རོ། །དེའི་ཚེ་རྟོག་མེད་ཡུམ་གྱི་མཁའ་གསང་བའི་འོག་མིན་དུ་འཁྱིལ་བ་ལས་རྩ་ཁ་ཁ་མུ་ཁའི་རྩེ་ནས་བཟློག་པའི་ཐབས་ཀྱིས་ལྡོག་སྟེ། འཁོར་ལོ་བཞིར་མས་བརྟན་གྱི་དགའ་བ་བཅུ་དྲུག་ཉམས་སུ་མྱོང་བའོ། །དེའི་དུས་ན་ལེ་ལག་ལས། ས་བཅུ་རིམ་གྱིས་བགྲོད་མེད་རྫོགས། །ཀུན་ཏུ་འོད་གསལ་པདྨ་ཅན་ཡང་རྫོགས། །ཡི་གེ་འཁོར་ལོ་ཚོགས་ཆེན་ཐབས་དང་ལྡན། །ཞེས་པས་དགའ་བ་བཅུ་དྲུག་གི་དགའ་བའི་དགའ་བ་སོགས་བཞི་ནི་ཚོགས་ལམ། མཆོག་དགའི་དགའ་བ་ནི་སྦྱོར་ལམ། མཆོག་དགའི་མཆོག་དགའ་ནི་མཐོང་ལམ།དེ་ནས་མཆོག་དགའི་དགའ་བྲལ་སོགས་དགུ་ནི་སྒོམ་ལམ་ས་དགུ། དགའ་བ་བཅུ་དྲུག་གི་མཐའི་ལྷན་ཅིག་སྐྱེས་དགའི་ལྷན་སྐྱེས་དགའ་བ་ནི་ཉི་ཟླ་བྱང་ཆུབ་ཀྱི་སེམས་ཟུང་དུ་འདྲེལ་བའི་བརྡས་སྣང་སྟོང་གི་མཐའ་མ་བསྒྲིབས་པར་གསལ་བའི་ཕྱིར་བཅུ་གཅིག་ཀུན་ཏུ་འོད་ཀྱི་སའོ། །དེའི་ཡོན་ཏན་གྱི་ཐིག་ལེས་ལུས་ཐམས་ཅད་དུ་ཁྱབ་ཅིང་བརྟན་པས་འཁོར་བའི་སྐྱོན་གྱིས་མ་གོས་པའི་ཕྱིར་བཅུ་གཉིས་པ་པདྨ་ཅན་གྱི་ས་དང་། རྟོག་ཚོགས་ཐམས་ཅད་སྐུ་དང་ཡེ་ཤེས་ཀྱི་དཀྱིལ་འཁོར་དུ་རང་སྣང་བའི་ཕྱིར་བཅུ་གསུམ་པ་ཡི་གེ་འཁོར་ལོའི་ས་རྫོགས་ནས་བདེན་པ་དབྱེར་མེད་བློའི་སྤྱོད་ཡུལ་དང་བྲལ་བའི་གནས་ལུགས་མངོན་དུ་བྱས་པ་ནི་བདེ་བ་ཆེན་པོའི་དབང་སྟེ། ཐལ་རྒྱུད་ལས། རྡོ་རྗེ་ཉི་མ་ཐབས་ཀྱི་རྒྱ། །ཕུང་སོགས་ཕྱག་རྒྱའི་ཚོགས་དང་ལྡན། །དེ་ཟླ་བསིལ་བྱེད་ཤེས་རབ་ཡེ་ཤེས་ཀྱི་དངོས། །ཡབ་ཡུམ་གྱི་བདེ་བ་དུས་གཅིག་རོ་མཉམ་ཐིག་ལེ་ཆེ། །སུམ་ཅུ་རྩ་གཉིས་མཚན་རྫོགས་ཤིང་། །ཟླ་བའི་ཡེ་ཤེས་ལྔ་བཅུ་དྲུག །དཔེ་བྱད་ལ་སོགས་དཔག་ཏུ་མེད། །
སེམས་ཤེས་མངོན་པར་ཤེས་དང་ལྡན། །སེམས་ལྔའི་མཐའ་མ་འགྲོ་འོང་ཤེས་པས་ན་རྫུ་འཕྲུལ་ཤེས་ཀྱི་བྱ་བ་ཤེས་པའི་མངོན། །ལྷན་ཅིག་སྐྱེས་དགའི་གནས་ནས་ལོག་པ་ཐིམ་པའི་སྒྲ། །མཐའ་གཉིས་མ་གོས་པདྨ་ཅན། །སྤྲུལ་པའི་གནས་ནས་བཀྱེ་བ་ཡིས། །བཞི་བཅུ་ལྔ་སོགས་མཐའ་ཡས་ཀུན། །རང་བཞིན་ཉིད་ལས་རང་གསལ་བ། །བཅུ་གསུམ་ཡེ་གེ་འཁོར་ལོར་བརྗོད། །ཅེས་སོ། །དེ་ལ་བདེ་བ་ཆེན་པོའི་དབང་ཞེས་བྱ་སྟེ། སྔར་གྱི་ལྷན་སྐྱེས་ཀྱི་བདེ་བའི་ཡེ་ཤེས་དེ་འདིར་རྒྱུད་ལ་ཤིན་ཏུ་བརྟན་བྱེད་ཀྱི་དབང་ཡིན་པའི་ཕྱིར། ངེས་འབྱེད་ལས། གཉིས་མེད་བདེ་བ་མཐའ་བྲལ་བ། །གྲུབ་དང་བདེ་བ་གཅིག་པས་བདེ། །ངོ་བོ་འགྱུར་མེད་བརྟན་པར་བརྗོད། །ཅེས་སོ། །དེ་བསྐུར་དུས་ཕྱི་ནི་ས་བཅུ་མཐར་ཕྱིན་པའི་དུས་དང་། ནང་ནི་མཐུར་དུ་རྒྱུ་བས་རླུང་གི་དུས་སུ་སྟེ། དེ་ལས། དུས་ནི་ཕྱི་དང་ནང་གཉིས་ཏེ།ཕྱི་རོལ་ས་བཅུ་མཐར་ཕྱིན་དུས། །ཤེས་རབ་ཡེ་ཤེས་ཐོབ་པ་སྟེ། །ནང་གི་ས་རླུང་རྒྱུ་བའི་དུས། །ཞེས་སོ། །འདིར་ཟབ་དབང་གསུམ་ནི་ཡེ་ཤེས་དངོས་སུ་རྒྱུད་ལ་སྐྱེ་བར་བྱེད་པ་མཐར་ཐུག་གི་དབང་ཡིན་པའི་ཕྱིར་བསམ་རྒྱུད་དང་བསྒྲག་ཚིག་ལ་ལྟོས་པ་ནི་མ་ཡིན་ནོ། །ཞེས་རྒྱལ་བ་གཡུང་གསུངས་པ་ལྟར་འདིར་ཡང་མ་བྲིས་མོད། འོན་ཀྱང་ལས་རྒྱ་ལ་བརྟེན་ཏེ་དངོས་དབང་བསྐུར་བ་དང་ལེན་པར་ནུས་པའི་བློ་སྟོབས་ཅན་ལ་དེ་ལྟར་ཡིན་ཀྱང་། དེ་མི་ནུས་པ་ཏིང་ངེ་འཛིན་དང་བྱང་སེམས་བདུད་རྩིའི་རིལ་བུ་ཙམ་ལ་བརྟེན་དགོས་པའི་གང་ཟག་ལ་ནི་ངེས་པར་བསམ་རྒྱུད་དང་བསྒྲག་ཚིག་དགོས་ཏེ། དེའི་ཕྱིར་དེ་དག་དབང་གི་གལ་པོར་ཤེས་པར་བྱའོ། །དེ་འདྲ་བའི་གང་ཟག་ལ་དབང་གི་དཀྱིལ་འཁོར་ཀྱང་ཡབ་ཡུམ་གྱི་མཁའ་གསང་མཚོན་བྱེད་སོར་བཞི་པའི་པདྨ་དང་། མཛུབ་གང་པའི་རྡོ་རྗེ་དང་།དེ་གཉིས་ལ་རིགས་ལྔ་ཡབ་ཡུམ་གྱི་མཚན་མ་དགོད་པར་གསུངས་ཏེ། འདི་ཉིད་ལས། ཤིན་ཏུ་ཕྲ་བའི་དམ་ཚིག་མཆོག །ཅེས་སོགས་དང་། དབང་གི་གལ་པོར། སོར་བཞི་པ་འམ་མཛུབ་གང་ཚད། །ཅེས་སོགས་གསུངས་པའི་ཕྱིར།ཡང་འདིར་གཡུང་གི་ཞི་བའི་དབང་མཆོག་ཏུ། དེང་སང་ཆོས་འདིའི་
ཟབ་དབང་གསུམ་དངོས་སུ་བསྐུར་བའི་བཀའ་ཆད་ནས་ཕྱག་ལེན་དུ་མི་མཛད། ཅེས་པའི་ཚིག་ཕྱིར་འདྲེང་སྟེ། ཕྱིས་ཀྱི་བླ་མ་འགའ་ཞིག །ཞི་བའི་ཟབ་དབང་གི་བཀའ་ཆད་པ་དང་། ཁྲོ་བོའི་མ་ཆད་པའི་རྣམ་དབྱེ་འབྱེད་པ་མི་རིགས་ཏེ། ད་ལྟའི་ཁྲོ་བོའི་དབང་མཆོག །ཟབ་དབང་གསུམ་འབྱུང་བ་ནི་གནུབས་རཏྣ་ཤྲཱིས་ཁ་སྐོང་གིས། སྒྲོལ་མ་པའི་ཡིག་ཆ་གཙང་མར་སྔར་དྲངས་པའི་ཚིག་དོན་དེ་ཁོ་ན་ཡོད་པའི་ཕྱིར་དང་། དངོས་སུ་ཞེས་པའི་ཚིག་གི་ནུས་པས་འདིར་དངོས་དབང་རྟེན་ཅན་དུ་བསྐུར་བའི་བཀའ་ཆད་གསུངས་པར་མངོན་པའི་ཕྱིར་རོ། །གལ་ཏེ་སྒྲོལ་གཡུང་གཉིས་ལ་རྒྱུན་མི་བཞུགས་པའི་དབང་དུ་བཏང་ནས། འདིར་བརྒྱུད་པར་སེ་སྟོན་བཞུགས་པའི་ཕྱིར་ཟབ་དབང་གཉིས་ཀའི་རྒྱུན་ཡོད་དགོས་ཏེ། དམ་པ་ཡ་སེས་སྐྱོ་བྱེ་མ་ལུང་པ་ལ་རྟེན་ཅན་དང་སྦས་དོན་རྣལ་འབྱོར་ལ་རྟེན་མེད་དུ་ནོད་པའི་རྒྱུན་ད་ལྟ་ཟབ་དབང་ཟུ་ལུང་ནས་བརྒྱུད་པ་འདི་ཁུངས་ཟབ་ཅེས་སེ་སྟོན་ཉིད་གཅེས་སྤྲས་སུ་མཛད་པའི་ཕྱིར་དང་། འདི་ཁུངས་ཟབ་ཅེས་པས་སྒྲོལ་མ་བའི་ལུགས་ལོ་ཆེན་དང་རོག་ཚང་དུ་གསན་པ་ལའང་རྒྱུན་ཡོད་པར་ཤུགས་ཀྱིས་འཕངས་པའི་ཕྱིར་སྙམ་མོ། །དེས་ན་ཚིག་རྐྱེན་དེས་ཕྱིས་ཀྱི་བླ་མ་དག་གིས་བྲོ་ལུང་པའི་ཞི་བའི་ཟབ་དབང་རྒྱུན་བཅད་པར་མངོན་ཏེ་བསྟན་པའི་སྐུ་ཆག་ཏུ་ཟད་དོ། །འོན་ཀྱང་བདག་གི་རྗེ་བླ་མ་ལ་ནི་གཙང་བརྒྱུད་ཆད་ཀྱང་མདོ་ཁམས་ཀྱི་བརྒྱུད་པ་རྣམ་པར་དག་པ་བཞུགས་སོ། །གཉིས་པ་ལ། གྲངས་ལ་དཔྱད་པ་དང་། རིམ་པ་ལ་དཔྱད་པའོ། །དང་པོ་ནི། སྔ་རབས་པ་ཁ་ཅིག་ན་རེ། ཟབ་དབང་ནི་ནུས་པ་དངོས་སུ་འཇོག་བྱེད་ཡིན་པའི་ཕྱིར་ནུས་དབང་དུ་འདུ་བས་གྲངས་བཅོ་ལྔ་ཁོ་ནའོ་ཟེར། དེ་ལྟར་ན་ཁོ་བོས་དབང་གཅིག་ཁོ་ན་སྟེ། ཟབ་ནུས་གཉིས་ཀ་ཕན་དབང་གི་ཁོངས་སུ་འདུ་བའི་ཕྱིར་ཏེ། བདག་གཞན་གྱི་དོན་དངོས་སུ་སྒྲུབ་པའི་སྒོ་ནས་ཕན་པར་བྱེད་པའི་དབང་ཡིན་པའི་ཕྱིར། འདོད་ན་རང་ཚིག་དང་འགལ་ཞིང་། ལུང་གིས་ཀྱང་གནོད་དོ། །གཉགས་ཊཱིཀ་པ་བུམ་དབང་དང་།གསང་དབང་གཉིས་སུ་འདུ་བར་འདོད་པ་དང་། ཁ་ཅིག །ཟབ་དབང་གསུམ་གཅིག་ཏུ་བྱས་ཏེ་བཅུ་དྲུག་ཏུ་འདོད་པ་གཉིས་ཀ་མི་རིགས་ཏེ། རྡོ་
རྗེ་ལས། དང་པོ་ས་བོན་འཇོག་པ་སྟེ། །ཞེས་སོགས་ཀྱིས་གནོད་པའི་ཕྱིར། རང་ལུགས་སྔར་བཤད་པ་ལྟར་རྩ་བ་ལྔ་ལས་ཕྱེ་བའི་དབང་བཅོ་བརྒྱད་དུ་ཤེས་པར་བྱའོ། །གཉིས་པ་ན། གཉགས་ཊཱིཀ་པ། ནུས་དབང་ལྔ་ཡང་གསང་དབང་གི་བྱེ་བྲག་ཏུ་བྱས་ཏེ། ཤེས་རབ་ཐབས་ཀྱི་ཕྱག་རྒྱ་ལས། །ཞེས་སོགས་ཀྱིས། བྱང་ཆུབ་སེམས་ཀྱི་ཐིག་ལེས་དབང་བསྐུར་བ་སྤྱིར་བསྟན་པ་དང་། དེའི་ཡན་ལག་ནུས་དབང་སོ་སོར་བསྐུར་བ་ནི། ཉན་བྱེད་འཁོར་ལོའི་ཞེས་སོགས་ཀྱིས་བསྟན་པའི་ཕྱིར་བསྐུར་བའི་རིམ་པའང་དེ་བཞིན་ནོ་གསུང་བ་མི་རིགས་ཏེ་ལུང་རིགས་མན་ངག་གསུམ་ཀས་གནོད་པའི་ཕྱིར། ལུང་ནི་དད་བརྩོན་བརྟུལ་ཞུགས་རབ་རྟོགས་ན། ཞེས་པའི་སྐབས་ཀྱི་ཐར་ལོ་འགྱུར་ལས། དད་དང་བརྩོན་འགྲུས་བརྟུལ་ཞུགས་ལ། །ཕན་དབང་ནུས་པའི་དབང་བསྐུར་བྱ། །ཤེས་རབ་དབང་བསྐུར་རིམ་པར་བཅས། །བརྩེ་བས་ཆུད་མ་ཟོས་པར་སྦྱིན། །ཞེས་དང་། དྲངས་མ་ཐག་པའི་བཤད་རྒྱུད་རྡོ་རྗེའི་ལུང་གིས་ཀྱང་གནོད་པའི་ཕྱིར། མན་ངག་ནི། རྡོ་རྗེ་ལས་རིམ་ལས། ངོ་བོ་སྣོད་ཀྱི་མཚན་ཉིད་ཀྱིས། །དབྱེ་བ་རྣམ་པ་ལྔ་རུ་འགྱུར། །བདག་ཕན་ནུས་པ་གཉིས་ཀའི་ལས། །ཉིང་ལག་ལྔ་ཕྲག་གཉིས་དང་གཅིག །དེ་དག་ཕྱི་རོལ་དོན་ཤེས་བྱ། །བདེ་སོགས་སྤྱོད་པ་གསང་བར་འགྱུར། །རང་གནས་རང་རིག་ཡེ་ཤེས་གསལ། །རང་བཞིན་ལྷུན་གྲུབ་དེ་བཞིན་ཉིད། །མངོན་བྱས་རྒྱུ་འབྲས་དབྱེར་མེད་པས། །ཡང་དག་རྫོགས་པའི་བདེ་ཆེན་པོ། །རྡོ་རྗེའི་སྐུ་ཕྱིར་བསྟན་པ་ཡིན། །ཞེས་དང་། ཁོག་གཞུང་ལས། དད་དང་བརྩོན་འགྲུས་གསུམ་ལྡན་དང་། །བརྟུལ་ཞུགས་གསུམ་ལྡན་སློབ་མ་ལ། །ཞེས་སྣོད་རིམ་གསུངས་པས་ཀྱང་གནོད་པའི་ཕྱིར་རོ། །རིགས་པ་ནི། རྒྱུད་དུ་གོ་རིམ་དེ་ལྟར་བྱུང་བར་བསྐུར་དགོས་ན། ཕན་དབང་ཀྱང་ནུས་དབང་གི་རྗེས་སུ་བསྐུར་དགོས་པར་འགྱུར་ཏེ། རྒྱུ་མཚན་མཚུངས་པའི་ཕྱིར་དང་། ཐོག་མར་གསང་བ་བྷ་གའི་དཀྱིལ་འཁོར་དུ་ཞུགས་རྗེས་ལུས་དཀྱིལ་དུ་ནུས་དབང་བསྐུར་བའི་གོ་རིམ་ཀྱང་མི་རིགས་པའི་ཕྱིར་རོ། །དེ་ལ་ཁོ་ན་རེ། འཇམ་དཔལ་དམར་པོའི་དབང་རྩར་
ཀྱང་། གསང་དབང་གི་བྱེ་བྲག་ཏུ་ནུས་དབང་བྱུང་བའི་ཕྱིར་སྐྱོན་མེད་དོ་ཞེ་ན། དེའང་མ་ཡིན་ཏེ། དེ་ནི་ཟབ་མོ་གསང་བའི་དབང་ལ་ནུས་དབང་རྫོགས་པར་སྟོན་པའི་ཆེ་བ་བརྗོད་ནས་དབུགས་དབྱུང་བ་སྟེ། དབང་གི་གལ་པོ་ལས།རིགས་ཀྱི་བུ་ཁྱོད་དེང་ཕན་ཆད། །ཕྱི་དང་ནང་དང་གསང་བ་ཡི། །ཞེས་སོགས་གསུངས་པ་དང་ཚིག་དོན་གཉིས་ཀ་གཅིག་པའི་ཕྱིར་དང་། གལ་པོར་བཤད་པ་དེ་དག་རྒྱུད་འདིར་དངོས་སུ་གསུངས་པའི་ཟབ་དབང་དུ་འཆད་རིགས་སོ་སྙམ་ན། དེའང་མ་ཡིན་ཏེ། དེ་ཉིད་ཀྱི་དབུར། ནུས་དང་ཕན་པའི་དབང་ཐོབ་ནས། །བརྟུལ་ཞུགས་ལྡན་པའི་བུ་མཆོག་ལ། །ཞེས་སོགས་ཀྱིས་གནོད་པའི་ཕྱིར་རོ། །དེས་ན་སངས་རྒྱས་གསང་བའི་ངེས་འབྱེད་དང་རྡོ་རྗེ་ལས་རིམ་སོགས་སུ་ཁྲིགས་རིམ་གསལ་བར་གསུངས་པ་རྣམས་དང་འགལ་བའི་ཕྱིར་ཁྱེད་ཀྱི་ལུགས་འདི་འཐད་པ་མ་ཡིན་ནོ། །གསུམ་པ་ནི། འོ་ན་དབང་བཅོ་བརྒྱད་པོ་དེ་དག་དབང་བཞིར་འདུས་སམ་མ་འདུས་ཅེ་ན། བྲོ་ལུང་པ་ན་རེ། འདིར་སྤྱིའི་སྡོམ་ནི་དབང་ལྔར་བསྡུ་སྟེ། ཉང་སྟོན་རིག་པའི་འབྱུང་གནས་ཀྱི་སྲས་པོའི་དབང་བཞི་སོ་སོར་བསྡུ་བའི་ཡིག་ཆ་ཡོད་ཀྱང་། དེ་ནི་གསར་མའི་བཞེད་པ་འདིར་བཀོད་པ་ཡིན་པས་མི་འཐད་དེ་ཟེར་ནའང་། ཁོ་བོ་ནི། དབང་བཞིར་འདུས་པ་འཐད་དེ། རྒྱུད་ཕྱི་མའི་དྲི་བ་བཅུ་གསུམ་པར། དབང་བསྐུར་བ་ཡི་དོན་ཡང་ཅི། །ཞེས་པའི་ལན་དུ། སློབ་དཔོན་གསང་བ་ཤེས་རབ་དང་། །དེ་མ་ཐག་པ་བཞི་པ་སྟེ། །རྣམ་རྟོག་དྲི་མ་དག་བྱའི་ཕྱིར། །དབང་བསྐུར་རྣམ་པ་བཞི་ཡིན་ནོ། །ཞེས་གསུངས་པའི་ཕྱིར། སྡུད་ཚུལ་ཡང་། ཕན་ནུས་ཀྱི་དབང་བཅོ་ལྔ་པོ་ནི་བུམ་པའི་དབང་དུ་བསྡུ་སྟེ། དེ་ཐོབ་པས་ལམ་བསྐྱེད་རིམ་བསྒོམ་པའི་སྣོད་རུང་དུ་བྱས་པའི་ཕྱིར།དེ་ལྟར་ཡང་ཁོག་གཞུང་ལས། ཕྱི་ནང་དཀྱིལ་འཁོར་རྣམ་གསུམ་དུ། །རིམ་པར་བསྐུར་བ་དང་པོ་རུ། །རི་མོ་བཞེངས་གསོལ་ཕན་ནུས་བསྐུར། །བསྐྱེད་པའི་རིམ་པ་བསླབ་པའི་དུས། །ཞེས་སོ། །དེ་ཡང་ཕན་དབང་ཐོབ་པས་ཕྱི་དཀྱིལ་ལ་བརྟེན་པའི་དྲང་དོན་གྱི་བསྐྱེད་རིམ་ཐུན་མོང་པའི་སྣོད་རུང་དུ་བྱས་པ་སྟེ་ངེས་འབྱེད་ལས། །
ཕྱི་རོལ་དྲང་དོན་མཉན་དུ་རུང་། །ཞེས་སོ། །དེའི་སྟེང་དུ་མཉན་བསྒོམ་གྱི་དབང་གཉིས་ཀྱིས་ནང་རང་བཞིན་གྱིས་གྲུབ་པའི་ལུས་དཀྱིལ་ལ་བརྟེན་པའི་ངེས་དོན་གྱི་བསྐྱེད་རིམ་མཉན་བསྒོམ་ནུས་པ་དང་། ལྷག་མ་གསུམ་ལས། རྡོ་རྗེ་རྒྱལ་པོ་ནི་རྡོ་རྗེ་སློབ་དཔོན་གྱི་དབང་དངོས་དང་། འཆད་ཕྲིན་གཉིས་དེའི་བྱེད་ལས་ཡིན་པས། དེ་ལྟར་ན་རྡོ་རྗེ་སློབ་དཔོན་གྱི་དབང་ཐོབ་ནས་བུམ་དབང་དང་རྗེས་སུ་འདྲེལ་བའི་ལམ་ཐམས་ཅད་ལ་སྤྱོད་པའི་བདག་པོར་གྱུར་པའོ། །ཟབ་དབང་གསུམ་ནི། རིམ་པ་ལྟར་གསང་དབང་དང་། ཤེས་རབ་ཡེ་ཤེས་དང་། ཚིག་དབང་རྣམས་སུ་དངོས་སུ་འདུས་པར་ཟད་ལ། དེ་གསུམ་ཐོབ་པས་རྫོགས་རིམ་སྟེང་འོག་གི་སྒོ་དང་བདེ་བ་ཆེན་པོ་དེ་ཁོ་ན་ཉིད་བསྒོམ་པའི་སྣོད་རུང་དུ་བྱས་པའོ། །དེ་ཡང་ཁོག་གཞུང་གི་ལུང་དེའི་འཕྲོས་ལས། རྫོགས་རིམ་གདམས་ངག་སྦྱོར་དུས་སུ། །གསང་དབང་བསྐུར་བ་སོར་བཞི་པ། །རོལ་པ་འཇུག་དུས་གསང་བ་ཡི། །དཀྱིལ་འཁོར་བརྟན་པ་ཤེས་རབ་སྦྱིན། །ཞེས་སོ། །གསུམ་པ་རྗེས་ཀྱི་རིམ་པ་ལ་བདུན་ཏེ། དབང་རྟགས་རྡོར་དྲིལ་བྱིན་ཞིང་རུའི་བཀའ་ཉན་པར་བསྒོ་བ་དང་། བུམ་ཆུ་བླུད་ཅིང་བརྟན་པར་བྱས་ལ་སྨོན་ལམ་གདབ་པ་དང་། དབང་རྫས་ཀྱི་རབ་གནས་བསྡུ་ཞིང་ཅི་འབྱོར་པའི་ཡོན་གྱིས་བུའི་ལུས་བསླུ་བ་དང་། རུ་མཆོད་ཅིང་ཡོན་དབུལ་བ་དང་། ལྷག་མ་དང་བརྟན་མ་བསྐྱང་བ་དང་། དཀྱིལ་འཁོར་བསྡུ་ཞིང་རྡུལ་ཚོན་གཤེགས་པ་དང་།ལས་རྗེས་ཤིས་པར་བྱ་བ་རྣམས་ཏེ་དབང་བྱང་ལས་ཤེས་པར་བྱའོ། །ལྔ་པ་དབང་མ་ཐོབ་པའི་སྐྱོན་ནི། འདི་ཉིད་ལས། སློབ་དཔོན་མཉེས་པར་མ་བྱས་ཤིང་། །དབང་རྣམས་ཐོབ་པར་མ་བྱས་པར། །ཉན་པ་ལ་སོགས་བརྩོན་པ་ནི། །འབྲས་བུ་མེད་ཅིང་བརླག་པར་འགྱུར། །ཞེས་དང་། མཉམ་སྦྱོར་ལས། དཀྱིལ་འཁོར་དུ་ནི་མ་ཞུགས་ཤིང་། །དམ་ཚིག་རྣམས་ནི་སྤངས་པ་དང་། །གསང་བའི་དེ་ཉིད་མི་ཤེས་པས། །བསྒྲུབས་ཀྱང་ཅི་ཡང་མི་འགྲུབ་པོ། །ཞེས་དང་།སངས་རྒྱས་ཐོད་པ་ལས། དཔེར་ན་བུ་ཚ་མེད་པའི་ཁྱིམ། །ཤི་བ་ཙམ་གྱིས་སྟོངས་པ་ཉིད། །དེ་
བཞིན་དབང་དང་བྲལ་བ་ནི། །ཡེ་ཤེས་ཀུན་གྱིས་སྟོང་པ་ཉིད། །ཅེས་དང་། ཐུགས་ཐིག་ལས། གསང་བ་ཉམས་ལས་ལྷུང་འཇིགས་པས། །སོ་མ་བཏང་བའི་རྫ་སྤྱོད་ལྟར། །འགྱུར་བ་གསང་བའི་རྒྱུད་ཀུན་ལྟོས། །ཞེས་སོ། །དྲུག་པ་ཡོན་ཏན་ནི། འདི་ཉིད་ལས། དུས་འདི་ཕྱིན་ཆད་རྒྱལ་བའི་སྲས། །ངན་སོང་ཐམས་ཅད་མེད་པ་དང་། །ཚེ་རིང་བདེ་བ་ཕུན་སུམ་ཚོགས། །མཐོ་རིས་ཐར་པའི་བདག་པོར་འགྱུར། །ཞེས་དང་། ཧེ་རུ་ཀ་མངོན་བྱུང་ལས།དཀྱིལ་འཁོར་བདག་པོ་མཐོང་ནས་ནི། །ཅུང་ཟད་དེ་ནི་མི་འགྲུབ་མེད། །སྡིག་པ་ཀུན་ལས་རྣམ་པར་གྲོལ། །དངོས་གྲུབ་མྱུར་དུ་ཐོབ་པར་འགྱུར། །ཞེས་གསུངས་སོ། །ལྔ་པ་མི་འདའ་བ་དམ་ཚིག་ལ་དྲུག་ལས། དང་པོ་དགོས་ཆེད་ནི། གཞན་སེལ་ངན་སོང་དང་ཐེག་དམན་དུ་མི་ལྷུང་ཞིང་། དོན་གཉེར་ཞིང་ས་གཤིན་པོ་ལ་ས་བོན་བཏབ་ན་འབྲས་སྨིན་པར་འགྱུར་བ་ལྟར་ལམ་དང་འབྲས་བུའི་གཞི་དམ་ཚིག་བཟུང་སྟེ། ལམ་གྱི་འབད་པ་དོན་ཅན་དུ་བྱེད་པའོ། །དེ་ལྟར་ཡང་། སྔགས་འཆང་རྣམས་དོན་ཡོད་པར་བྱ་བའི་ཕྱིར་དམ་ཚིག་ཆེན་པོ་འདི་ཆེད་དུ་བརྗོད་དོ། །ཞེས་སོ། །གཉིས་པ་ངོ་བོ་ནི། བསྲུང་བྱའི་དོན་ཁྱད་པར་ཅན་ལ་སེམས་པ་རྒྱུན་དང་བཅས་པ་སྟེ། ཐུགས་ཐིག་ལས། གསང་སྒོར་ཞུགས་པ་ཐམས་ཅད་ཀྱིས། །སྒོ་གསུམ་རང་གི་བསྲུང་བྱ་ལ། །རྒྱལ་པོའི་བཀའ་རྟགས་ཇི་ལྟ་བར། །མི་འབྲལ་སྡོམ་པ་དེ་ངོ་བོ། །ཞེས་སོ། །གསུམ་པ་སྒྲ་དོན་ནི། ས་མ་ཡའི་སྒྲ་ལས། ཡལ་གམ་བཅས་པའི་ཐ་ཚིག་དང་། མནའ་དང་། སྡོམ་པ་ལ་འཇུག་པས། དོན་ཇི་ལྟར་བཅས་པ་ལས་འདའ་བར་བྱ་བ་མ་ཡིན་པའི་ཕྱིར་དམ་ཚིག་སྟེ། ཀུན་འདུས་ལས། འདའ་དཀའ་རྡོ་རྗེ་དམ་ཚིག་གཏན་གྱི་གཉེར། །ཞེས་སོ། །དེ་ཡང་ཁོག་གཞུང་ལས། ངེས་ཚིག་སྐྱོན་ཡོན་སྐབས་ཀྱིས་བསྒྱུར། །ཞེས་པས་གཉིས་ལས། བསྲུངས་པའི་ཕན་ཡོན་གྱིས་དམ་ཚིག་ཏུ་བཞག་པ་ནི།རྡོ་རྗེ་ལས། དམ་པ་རྣམས་ཀྱི་དགོངས་པ་ལ། །དབང་དང་བྱིན་རླབས་ཐོབ་པ་ཡིས། །དམ་པའི་ཚུལ་བཞིན་ངེས་སྤྱད་ན། །མི་མཐུན་ཚོགས་རྣམས་ཚིག་
པར་འགྱུར། །ཞེས་སོ། །གལ་ཏེ་དེ་ལས་འདས་ན་ངན་སོང་གི་གནས་སུ་རྒྱུད་ཚིག་པར་འགྱུར་པའི་ཉེས་དམིགས་ཀྱིས་དམ་ཚིག་ཏུ་བཞག་པ་ནི། དེ་ལས། དམ་པ་འདི་ལས་གང་འདས་པ། །རྡོ་རྗེ་ཅན་ཡང་ཚིག་པར་འགྱུར། །ཞེས་དང་། ཧེ་རུ་ཀ་འདུས་པ་ལས། མི་འདའ་དམ་པ་མཆོག་གྱུར་པ། །འདས་པར་གྱུར་ན་ཚིག་པར་བཤད། །ཅེས་སོ། །བཞི་པ་རྣམ་གྲངས་ལ། ཐོབ་བྱེད་ཀྱི་ཆོ་ག་དང་དུས། ཐོབ་བྱའི་ངོ་བོ། ཉམས་ན་བསྐང་བའི་ཐབས་སོ། །དང་པོ་ནི། དེ་བཞིན་གཤེགས་པས་གསུངས་པའི་ཆོ་ག་ཁོ་ན་ལས་ཐོབ་ཀྱི་གཞན་ལས་ནི་དམ་ཚིག་དང་སྡོམ་པ་མེད་དེ། བརྟུལ་ཞུགས་ཙམ་དུ་ཟད་དོ། །ཐོབ་པའི་དུས་ལ་སྔོན་གྱི་མཁན་པོ་རྣམས་ཀྱིས་དབང་གི་སྔ་རོལ་དུ་སྡོམ་པ་བཟུང་བའི་ཚིག་ལན་གསུམ་བརྗོད་པའི་ཆ་ཐ་མའི་མཇུག་ཏུ་སྐྱེ་བར་བཞེད་དོ། །གལ་ཏེ་འདིའི་སྐབས་སུ་གང་བཟུང་བའི་སྡོམ་པ་དེ་ཉིད་མི་སྐྱེ་ཟེར་ན། འོ་ན་སོ་བྱང་གི་སྡོམ་ཆོག་ལས་ཀྱང་དེ་དག་མི་སྐྱེ་བར་མཚུངས་ཏེ། གཞན་གཉིས་ལ་སྐྱེ་བའི་ནུས་པ་ཡོད་པ་དང་།འདི་ལ་མེད་པའི་ལུང་རིགས་ཚད་མ་མེད་པའི་ཕྱིར་རོ། །འདི་ལ་སྐྱེ་བའི་ཚད་མ་ཡོད་དེ། སྡོམ་པ་ནི་སྐྱེ་མི་སྐྱེ་གཉིས་ལས་མི་འདའ་ལ། མི་སྐྱེ་བའི་ཚད་མ་མེད་པ་ཉིད་ཀྱིས་སྐྱེ་བར་གྲུབ་པའི་ཕྱིར་དང་། གཞན་དུ་ན། རྒྱལ་བས་ཆོ་ག་བཤད་པའང་ནུས་མེད་དུ་འགྱུར་བའི་ཕྱིར་རོ། །དེ་ལྟར་ཡང་། ལོ་ཙཱ་བ་ཆེན་པོ་རོང་ཟོམ་གྱིས་མཛད་པའི་སྡོམ་ཆོག་ལས། དང་པོ་ཐུན་མོང་གི་སྡོམ་པ་ནོས་ནས།དེ་ནས་ཁྱད་པར་གྱི་སྡོམ་པ་ནོས་ཏེ། དཀྱིལ་འཁོར་ལ་ཞུགས་ནས་དབང་ཐོབ་པར་བྱས་ལ། དངོས་གྲུབ་ཀྱི་སྣོད་དུ་འགྱུར་བར་བྱའོ། །ཞེས་སོ། །འོན་ཀྱང་། རྡོ་རྗེ་ཐེག་པའི་དམ་ཚིག་དང་སྡོམ་པ་ཐ་དག་བཟུང་གྲུབ་པ་ནི་མ་ཡིན་ཏེ། ད་དུང་དབང་དམ་ཚིག་དང་སྡོམ་པ་མི་འདྲ་བ་དུ་མ་འཛིན་དགོས་པའི་ཕྱིར།དཔེར་ན་དགེ་བསྙེན་གྱི་སྡོམ་པ་ཐོབ་པས་སོ་ཐར་གྱི་སྡོམ་པ་ཐོབ་པའི་གྲངས་སུ་འགྲོ་མེད་ཀྱང་། སོ་ཐར་གྱི་སྡོམ་པའི་ཡན་ལག་ཚང་བ་མ་ཡིན་ཏེ། ད་དུང་དགེ་ཚུལ་དང་དགེ་སློང་གི་སྡོམ་པ་བླང་དུ་ཡོད་པའི་ཕྱིར།
དེར་མ་ཟད། ཐུན་མོང་གི་སྡོམ་པ་ལེན་ལུགས་ལྟར་འཇུག་པའི་སྐབས་སུ་སྨིན་བྱེད་ཀྱི་རྟེན་སྡོམ་ལྡན་དུ་བྱ་བའི་ཕྱིར་ཁས་བླངས་ཀྱི་སྒོ་ནས་སྡོམ་པ་བཟུང་བ་དེ་ཉིད་ཀྱང་། སླར་དབང་བླངས་པའི་ཚེ་ན་སྡོམ་པའི་ནུས་པ་གོང་འཕེལ་དུ་འགྲོ་དགོས་ཏེ། ཀུན་མཁྱེན་ཆེན་པོའི་ཊཱི་ཀའི་དགོངས་པ་ལྟར་དམ་ཚིག་དང་སྡོམ་པ་གཉིས་ངོ་བོ་གཅིག་ལ་ལྡོག་པ་ཐ་དད་པའི་གནད་ཀྱིས་སོ། །དེ་ཡང་ཡིན་ཏེ། ཆོ་གས་སེམས་རྒྱུད་ཀྱི་ཡོན་ཏན་དགེ་བའི་ས་བོན་གསོས་བཏབ་པའི་ཆ་དེ་སངས་རྒྱས་ཀུན་གྱི་གསང་བའི་རྡོ་རྗེ་གསུམ་འཛིན་པའི་ཆ་ནས་དམ་ཚིག་ཀྱང་ཡིན་ལ། རང་གི་རྒྱུད་སྡོམ་པའི་ཆ་ནས་སྡོམ་པའང་ཡིན་པའི་ཕྱིར་ཏེ། དཔེར་ན་བུམ་པ་ཉིད་བྱས་པའང་ཡིན་ལ་མི་རྟག་པའང་ཡིན་པ་བཞིན་ནོ། །དེ་ལྟར་ཡང་རྒྱུད་ཕྱི་མ་ལས། གང་ཞིག་ནན་ཏན་ལས་མི་འགོང་། །རྨི་ལམ་དུའང་དམ་ཚིག་བརྗོད། །དམ་བཅའ་བ་ནི་སྡོམ་པར་འདོད། །ཅེས་དང་། ཕྲ་རྒྱས་ལས། དེ་ལྟར་སུམ་རྒྱ་དྲུག་ཅུ་རྣམས། །བདག་གི་རྡོ་རྗེ་མཆོག་གསུམ་པོས། །ལོག་པར་མི་གཏོང་སྡོམ་པའི་དངོས། །ས་གཞི་ལྟ་བུར་གསུངས་པ་ཡིན། །ཞེས་སོ། །འདིར་འཇུག་པའི་སྐབས་སུ་དབང་བྱང་ལས་སྡོམ་པ་སོ་སོར་དམིགས་ཕྱེ་ནས་གཟུང་བ་མ་བྱུང་ནའང་སྐུ་གསུང་ཐུགས་ཀྱི་དམ་ཚིག་བྱིན་པ་ཉིད་སྡོམ་པ་གཟུང་བ་ཡིན་ཏེ། ལས་རིམ་ལས། རང་བཞིན་འབྲུ་གསུམ་སྐུ་གསུང་ཐུགས། །གཟི་བྱིན་ལྡན་པར་བྱིན་བརླབས་ལ། །དམ་ཚིག་སྡོམ་པ་མཆོག་ཅེས་བཤད། །ཅེས་གསུངས་པའི་ཕྱིར། གཉིས་པ་ཐོབ་བྱའི་ངོ་བོ་ལ། དམ་ཚིག་གི་རང་བཞིན་དང་། ཆེ་བ་དང་། དབྱེ་ངོ་དངོས་གཏན་ལ་དབབ་པའོ། །དང་པོ་ནི། རྩ་བ་དང་ཡན་ལག་ལ་སོགས་པའི་དམ་ཚིག་ཇི་སྙེད་པ་ཐམས་ཅད་རང་སེམས་གཉིས་སུ་མེད་པའི་རང་བཞིན་ཏེ། དེའི་དོན་ལས་དེ་བཞིན་གཤེགས་པ་ཀུན་ཀྱང་འདའ་བར་མི་མཛད་པའི་བདག་ཉིད་ཡིན་པའི་ཕྱིར། དེ་ལྟར་ཡང་། དམ་ཚིག་རྣམས་ནི་རྡོ་རྗེ་ཆེ། །སངས་རྒྱས་ཀུན་གྱི་བདག་ཉིད་ཡིན། །ཞེས་དང་། རྒྱས་པ་ལས། དམ་ཚིག་དམ་ཚིག་ཅེས་བྱ་བ། །གུད་ན་ཡོད་པ་མ་ཡིན་ཏེ། །རང་གི་སེམས་ཉིད་དམ་ཚིག་ཡིན། །ཞེས་སོ། །
གཉིས་པ་ལ། སྤྱོད་སྒོ་ཡངས་པའི་ཆེ་བ་དང་། །འདུལ་སྡོམ་འདུས་པའི་ཆེ་བའོ། །དང་པོ་ནི། གནས་ལུགས་ལ་རྟོགས་གོམས་ཀྱི་གདེང་དང་ལྡན་ན་མཉམ་པ་ཆེན་པོའི་དམ་ཚིག་ལ་གནས་པའམ། བླ་ན་མེད་པའི་ཐེག་པར་ངེས་པ་ཞེས་བྱ་སྟེ། སྒོ་གསུམ་གྱི་སྤྱོད་པ་ཇི་ལྟར་སྤྱད་ཀྱང་ཕྱོགས་འཛིན་གྱི་བློ་མི་སྐྱེ་བའི་ཕྱིར། དེ་འདྲ་བའི་གདེངས་ཀྱིས་ཟིན་པའི་གང་ཟག་དེས། ལས་དང་ཉོན་མོངས་པ་གང་ལ་སྤྱད་ཀྱང་སྒྱུ་མའི་སྤྲུལ་པ་ལ་སྤྱོད་པ་ལྟར་མ་ཞེན་པའི་ཕྱིར། དེས་སྒྲིབ་པ་དང་བག་ཆགས་མི་གསོག་པའི་སྟེང་དུ་ཚོགས་གཉིས་རྫོགས་པར་འགྱུར་བ་དང་། སོ་བྱང་ཕྱི་རྒྱུད་ཀྱི་ཚུལ་ཁྲིམས་དང་སྡོམ་པ་ཐམས་ཅད་ཀྱང་རྣམ་པར་དག་པར་འགྱུར་བ་ཉིད་དེ། བླ་མེད་ཐེག་པར་རབ་ངེས་ན། །ཉོན་མོངས་ལས་རྣམས་ཀུན་སྤྱོད་ཀྱང་། །བྱས་ལ་མི་སོག་ཚོགས་འགྱུར་ཏེ། །ཚུལ་ཁྲིམས་སྡོམ་པ་ཕུན་སུམ་ཚོགས། །ཞེས་སོ། །གཉིས་པ་ནི། དེའི་ཕྱིར། བླ་མེད་མཆོག་གི་དམ་ཚིག་ཏུ། །ཞེས་སོགས་གསུངས་པའི་སྐབས་སུ་སྤྱིར་སྡོམ་པ་ལ། སོ་ཐར། བྱང་སེམས། རིག་པ་འཛིན་པའི་སྡོམ་པ་གསུམ་སྟེ། རྔམ་གློག་ལས། དགེ་སློང་བྱང་ཆུབ་སེམས་དཔའ་དང་། །རྣལ་འབྱོར་རྣལ་འབྱོར་ཆེན་པོ་ཡིན། །ཞེས་དང་། རྗེ་བླ་མའི་གཏེར་བྱོན་ཐུགས་ཐིག་གི་དབང་བྱང་ལས། སོ་སོ་ཐར་དང་བྱང་ཆུབ་སེམས། །རིག་འཛིན་ནང་གི་སྡོམ་པའི་ཚོགས། །ཞེས་སོ། །དེ་གསུམ་ཡང་། རྣམ་པ་འགལ་ལ་ངོ་བོ་ཚང་བ་དང་གནས་གྱུར་པའི་ཕྱིར་འདུས་ཤིང་རྣམ་པར་དག་པའོ། །རྣམ་པ་ཇི་ལྟར་འགལ་ཞེ་ན། བཞི་སྟེ། ཇི་སྲིད་དུས་ཀྱི་དང་། གང་གི་རྗེས་སུ་བསླབ་པའི་དང་། དངོས་གཞི་གཙོ་བོའི་དབང་དུ་བྱས་པའི་དང་། ཆེད་དུ་བྱ་བའི་ཁྱད་པར་རོ། །དང་པོ་ནི། སོ་ཐར་ཇི་སྲིད་འཚོའི་བར་དུ་དང་། བྱང་སྡོམ་སྙིང་པོ་བྱང་ཆུབ་ལ་ཐུག་གི་བར་དང་། སྔགས་སྡོམ་འཁོར་བ་མ་སྟོངས་ཀྱི་བར་དུ་ཁས་ལེན་པའི་ཁྱད་པར་རོ། །གཉིས་པ་ནི། འཕགས་པ་དགྲ་བཅོམ་པ་དང་། ས་ཆེན་པོ་ལ་ཞུགས་པའི་བྱང་ཆུབ་སེམས་དཔའ་དང་། དེ་བཞིན་གཤེགས་པའི་རྗེས་སུ་བསླབ་པའི་
ཁྱད་པར་རོ། །གསུམ་པ་ནི། ཕྱི་ལུས་ངག་གི་སྤང་བ་བདུན་ལ་བསླབ་པའི་སྦྱོར་བ་ནི་སོ་ཐར། ནང་ཡིད་ཀྱི་ལས་གསུམ་གཙོ་བོར་སྤང་བའི་སྙིང་རྗེ་ལ་བསླབ་པ་ནི་བྱང་སྡོམ། རྟོགས་གོམས་ཀྱི་གདེངས་ཀྱིས་མཉམ་པའི་དོན་ལས་མི་འདའ་བ་ནི་སྔགས་སྡོམ་མོ། །བཞི་པ་ནི། རང་གི་དོན་དང་། གཞན་གྱི་དོན་དང་། གཞན་དོན་རླབ་པོ་ཆེ་ལ་དམིགས་པ་སྟེ། རིམ་པ་བཞིན་སྦྱར་རོ། །གཉིས་པ་ངོ་བོ་ལ། ཚང་བ་དང་། གནས་གྱུར་པ་གཉིས་ལས། དང་པོ་ནི། སོ་ཐར་ནི་གཞན་ལ་གནོད་པའི་སྦྱོར་བ་ལས་ལོག་པ་དང་།བྱང་སྡོམ་ནི་དེའི་སྟེང་དུ་ཕན་འདོགས་པའི་སྦྱོར་བ་ལ་ཞུགས་པ་དང་། སྔགས་སྡོམ་ནི། དེ་གཉིས་ཀ་ལ་ཞུགས་པའི་སྟེང་དུ་སངས་རྒྱས་ཀྱི་མཛད་པ་ཉམས་སུ་བླངས་ཏེ་མཉམ་པ་ཆེན་པོའི་ངང་ནས་གཞན་དོན་རྩོལ་མེད་དུ་མཛད་པའི་ཐབས་ལ་མཁས་པས་ཐམས་ཅད་ཚང་བའི་ཕྱིར། རྒྱུ་མཚན་དེས་སྔགས་ཀྱི་དམ་ཚིག་མ་ཉམས་པར་ཐུབ་ན་འོག་མའི་འདུལ་སྡོམ་རྣམས་ཞར་ལ་ཐུབ་པས་ལོགས་སུ་བསྲུང་མི་དགོས་ཏེ། དྲེ་གསུམ་ཚང་ན་དེ་ནང་དུ་དོ་མི་ཚང་བའི་དོགས་པ་མེད་པ་ལྟར་ཡོན་ཏན་ཡར་ལྡན་དུ་འདུས་པའི་ཕྱིར། དེ་ལྟར་ཡང་གསལ་བཀྲ་ལས། ཐེག་ཆེན་དམ་ཚིག་ལ་གནས་ན། །འོག་མའི་འདུལ་སྡོམ་དམ་ཚིག་ཀུན། །བསྲུང་བ་མེད་པར་ཐུབ་པས་ན། །དགེ་སློང་བྱང་ཆུབ་སེམས་དཔའ་དང་། །རྣལ་འབྱོར་རྣལ་འབྱོར་ཆེན་པོ་ཡིན། །ཞེས་སོ། །གཉིས་པ་གནས་གྱུར་པས་རྣམ་པར་དག་པ་ནི། ཉོན་མོངས་པ་རང་ག་མས་སྤྱད་པའི་སྒོ་གསུམ་གྱི་ལས་ཀྱིས་འཁོར་བར་འཆིང་མོད། དེ་ཉིད་ཤེས་རབ་དང་སྙིང་རྗེ་ཕྱོགས་གཅིག་གི་རྩིས་བཟུང་སྟེ་བྱ་བ་མ་ཡིན་པ་སྤོང་བའི་སྡོམ་པ་ལ་ཞུགས་པ་ན་མཐོ་རིས་དང་ཐར་པའི་རྒྱུར་འགྱུར་ལ། དེ་ཉིད་ཐབས་དང་ཤེས་རབ་ཆེན་པོའི་རྩིས་ཟིན་པས་གཞན་དོན་གྱི་བྱ་བ་ལ་སྤྱད་པ་ན་བླ་ན་མེད་པའི་བྱང་ཆུབ་ཏུ་གྲོལ་བའི་རྒྱུར་འགྱུར་བ་དང་། དེ་ཉིད་ཀྱང་ཐབས་ཤེས་ཆེན་པོའི་ཡང་ཆེན་པོས་ཟིན་པར་སྤྱད་ན་རྫོགས་པའི་བྱང་ཆུབ་ཆེན་པོ་འབད་རྩོལ་མེད་པ་ལྷུན་གྱིས་འགྲུབ་པར་འགྱུར་ཏེ། དཔེར་ན་ཟངས་རྡོ་བཞུ་བས་ཟངས་དེ་ལ་རྩིས་བཏབ་ན་གསེར་དུ་འགྱུར་བ་བཞིན་སྒོ་གསུམ་གྱི་བྱ་བ་གཞི་གཅིག་
ལའང་ཐབས་ཆེ་ཆུང་གིས་གོང་མ་གོང་མར་གནས་འགྱུར་བ་ཡིན་ལ། དེ་བས་ན་སོ་ཐར་གྱི་གཞན་གནོད་གཞི་བཅས་སྤང་བ་དང་བྱང་སྡོམ་གྱིས་གཞན་ལ་ཕན་འདོགས་པའི་ལྡོག་ཆ་གཉིས་པོ་དེ་རྫས་གོང་འཕེལ་གྱི་ཚུལ་གྱིས་སྔགས་ཀྱི་སྡོམ་རྫས་སུ་ངོ་བོ་གནས་འགྱུར་ཞིང་། མཉམ་པ་ཆེན་པོའི་ཐབས་ཀྱིས་མ་ཟིན་པའི་ཐ་མལ་སྣང་ཞེན་གྱི་ལྡོག་ཆ་རེ་ཡོད་པ་དེ་རྩ་བ་ནས་བཏང་ནས་མཉམ་པ་ཆེན་པོའི་ཐབས་ཁྱད་པར་ཅན་དུ་འགྱུར་བ་ཡིན་ཏེ། སྣང་བས་མུན་པ་བཞིན་ནོ། །དེའི་ཚུལ་གྱིས་མཉམ་པ་ཆེན་པོའི་དམ་ཚིག་ཏུ་འོག་མའི་འདུལ་སྡོམ་རྣམས་འདུས་ཤིང་རྣམ་པར་དག་པ་ཡིན་ནོ། །འདིར་ཁ་ཅིག་འདི་སྙམ་དུ། སྡོམ་པ་འོག་མ་གཉིས་གོང་མར་འདུས་ཤིང་རྫོགས་པ་མི་འཐད་དེ། སོ་ཐར་གྱི་གཞན་གནོད་གཞི་བཅས་སྤོང་བ་དང་། བྱང་སྡོམ་གྱི་གཞན་ལ་ཕན་འདོགས་པའི་ལྡོག་ཆ་གཉིས་སྔགས་སྡོམ་གྱིས་མི་སྤང་བའི་དམ་ཚིག་དང་དངོས་སུ་འགལ་བར་སྣང་བའི་ཕྱིར་ཞེ་ན། མི་འགལ་བར་འདུས་ཚུལ་སྟོན་ཏེ། དེ་ལ་སོ་སོ་ཐར་པའི་སྡོམ་པ་ནི། ཕས་ཕམ་བཞི་བྱུང་ན་རྩ་བ་ཞིག་པར་གསུངས་པ་ལས། འདིར་གནས་ལུགས་རྟོགས་པའི་གདེངས་ཀྱིས་ཟིན་ན་ཇི་ལྟར་སྤྱད་ཀྱང་མི་གོས་པས་ངོ་བོ་ཡར་ལྡན་དང་སླར་ཚོགས་སུ་འགྱུར་བའི་ཕྱིར་ཡོན་ཏན་ཡར་ལྡན་ཏེ། སྤྱིར་བཤད་པའོ། །བྱེ་བྲག་ཏུ་སྲོག་གཅོད་པ་ནི། ཡོད་མེད་དབུ་མ་མི་དམིགས་ཤིང་། །ཞེས་སོགས་ཏེ། བདག་གཞན་གཉིས་ཀ་སེམས་ཉིད་དུ་གསལ་ཞིང་། དེ་དོན་དམ་པར་ཡོད་མེད་དབུ་མའི་མཐའ་གསུམ་དང་བྲལ་ལ། ཀུན་རྫོབ་ཏུ་སྣང་ཡང་རང་རྒྱུད་པས་སྟོང་པར་རྟོགས་ན། སྲོག་གཅོད་པ་ལྟར་སྣང་ཡང་གཅད་བྱ་གཅོད་བྱེད་མ་གྲུབ་ཅིང་གཅད་དོ་བའི་འདུ་ཤེས་མེད་པའི་ཕྱིར་ཉེས་པས་མི་གོས་ཤིང་། ཞིང་བཅུ་ལ་སོགས་པ་ལས་ངན་གྱི་རྒྱུན་གཅོད་པའི་ཕྱིར་བསྒྲལ་བས་ཚོགས་གཉིས་རྫོགས་པས་ན་སྲོག་གཅོད་སྤང་བའི་སྡོམ་པའི་ངོ་བོ་དང་ཡོན་ཏན་ཡར་ལྡན་དུ་འདུས་སོ། །དེ་ལྟར་ཡང་དཀོན་བརྩེགས་ཀྱི་ཉེ་བ་འཁོར་གྱིས་ཞུས་པའི་སྐབས་ལས། ཇི་ལྟར་སྒྱུ་མ་མཁན་གྱིས་འཇིག་རྟེན་ན། །སེམས་ཅན་བརྒྱ་ཕྲག་མང་པོ་སྤྲུལ་བྱས་ཏེ། །སྤྲུལ་པ་དེ་དག་
ཐམས་ཅད་བསད་གྱུར་ཀྱང་། །སྒྱུ་མ་དེ་དག་བསད་པ་ཡོད་མིན་ལྟར། །འགྲོ་བ་འདི་དག་སྒྱུ་མའི་རང་བཞིན་ཏེ། །འདི་ལ་མཐའ་ནི་ནམ་ཡང་དམིགས་སུ་མེད། །གང་དག་དེ་ལྟར་མཐའ་ཡས་མེད་བྱེད་པ། །དེ་དག་འཇིག་རྟེན་ན་ནི་ཚོར་བ་མེད། །གང་དག་རང་བཞིན་མེད་ཆོས་འདི་ཤེས་པས། །དཔའ་བོ་དེ་དག་འཇིག་རྟེན་མྱ་ངན་འདའ། །ཞེས་སོ། །མ་བྱིན་ལེན་ནི། བདེན་པ་གཉིས་ཀ་དབྱེར་མེད་པས། །ཞེས་སོགས་ཏེ། ཆོས་ཐམས་ཅད་ནི་སེམས་ཉིད་བདེན་པ་གཉིས་ཀྱི་རང་བཞིན་དུ་དབྱེར་མེད་པས་དོན་དམ་པར་མ་དམིགས་ཤིང་། ཐ་སྙད་ཀུན་རྫོབ་ཏུའང་མ་གྲུབ་པས་བདག་གཞན་ཐ་དད་མེད་པར་རྟོགས་པ་ལ། རྫས་དང་བདག་པོ་གཉིས་ཀ་གཞན་ན་མེད་པའི་ཕྱིར། འཕྲུལ་དགའི་ལྷ་རྣམས་རང་གིས་སྤྲུལ་པའི་ལོངས་སྤྱོད་ལེན་པ་ལྟར་ཅི་བླངས་ཀྱང་བདག་ཉིད་ལས་མི་འདའ་བར་ཤེས་པས་དོན་ལ་བླང་བ་མེད་པའི་ཕྱིར། ཉེས་པས་མི་གོས་པ་དང་།འཇུངས་པ་ལས་བླངས་ཏེ་བཀྲེན་པ་ལ་སྟེར་བ་སོགས་གཞན་དོན་དུ་འགྱུར་བའི་ཕྱིར་མ་བྱིན་ལེན་སྤང་བའི་སྡོམ་པ་འདུས་ཤིང་རྣམ་པར་དག་པ་སྟེ། དཀོན་བརྩེགས་ལས། ཇི་ལྟར་སྒྱུ་མས་སྒྱུ་མའི་ནོར་བླངས་ཏེ། །རྨི་ལམ་ནང་བཞིན་དགོས་པ་དེ་སྤྱད་ཀྱང་། །དེ་ལ་ལས་མེད་རྣམ་པར་སྨིན་པ་མེད། །དེ་བཞིན་ཆགས་མེད་ཡེ་ཤེས་འདིར་བསླབས་ཏེ། །མྱ་ངན་འདས་པ་དམ་པ་མཆོག་བཞིར་འགྲོ། །ཞེས་དང་། རྡོ་རྗེ་ལས། འཇུངས་པ་རྣམས་ལས་ནོར་བླངས་ཏེ། །སེམས་ཅན་བཀྲེན་ལ་བྱིན་པར་བྱ། །དེ་ཕྱིར་མི་ཡི་བདག་པོ་དང་། །ཕྱུག་པོ་རྣམས་ཀྱི་ནོར་འཕྲོག་གོ། །ཞེས་སོ། །རྫུན་སྨྲ་བ་ནི། ཆོས་རྣམས་སྒྱུ་མ་ལྟ་བུ་ལ། །ཞེས་སོགས་ཏེ། ཆོས་ཐམས་ཅད་མེད་བཞིན་དུ་ལོག་རྟོག་གིས་བརྟགས་པའི་ཞེན་བློ་ལ་སྣང་བ་ནི་ངོ་བོ་ཉིད་ཀྱི་རྫུན་ནོ། །ཞེས་པ་ཉིད་སྣང་བ་ལས་མིང་ཚིག་ཏུ་བརྟགས་ནས་དེ་ལ་བདེན་པར་འཛིན་པ་ནི་རྗེས་སུ་སྤྱོད་པའི་རྫུན་ཏེ། ཡུམ་བར་མ་ལས། རབ་འབྱོར་ཆོས་ཐམས་ཅད་ནི་རང་བཞིན་གྱིས་དངོས་པོ་མེད་པ་སྟེ།གང་བརྗོད་ཅིང་སྣང་ལ་བརྟགས་པ་དེ་དག་ནི་གློ་བུར་བ་ཡིན་པའི་ཕྱིར་རྫུན་པའོ། །ཞེས་སོ། །དེ་དག་ལས་ཀྱང་འགལ་བར་སྨྲ་བ་ནི་ལོག་པའི་
རྫུན་ནོ། །དེས་ན་བདེན་པ་ཉིད་མ་གྲུབ་ན་དེ་ལ་ལྟོས་པའི་རྫུན་པ་མ་གྲུབ་པའི་ཕྱིར། ཆོས་ཐམས་ཅད་ལ་བདེན་པར་འཛིན་པ་ཟད་དེ་རྫུན་པར་ཤེས་པས་རྫུན་སྨྲས་ནའང་། ཉེས་པས་མི་གོས་ཤིང་། ཇི་ལྟར་ཕན་པ་དེ་ལྟར་སྨྲས་པས་གཞན་དོན་དུའང་འགྱུར་བའི་ཕྱིར་རྫུན་སྨྲ་བ་སྤང་བའི་སྡོམ་པ་འདུས་ཤིང་རྣམ་པར་དག་སྟེ། དཀོན་བརྩེགས་ལས། ཇི་ལྟར་ཆད་པ་བཅངས་ཏེ་བྱིས་པ་ལ། །སྟོན་ཞིང་ངག་ཏུ་ཡོད་ཅེས་བརྗོད་བྱས་ནས། །དེ་ཡིས་ཆད་པ་སྟོང་པ་མཐོང་ནས་ནི། །བྱིས་པ་དེ་ནི་ཆོ་ངེས་ངུ་བ་ལྟར། །དེ་བཞིན་སངས་རྒྱས་བསམ་གྱིས་མི་ཁྱབ་པར། །སེམས་ཅན་ཚུལ་ལ་མཁས་ཤིང་མཁྱེན་པ་རྣམས། །ཆོས་རྣམས་འདི་ཀུན་གསོག་གསོབ་མཁྱེན་གྱུར་ནས། །འཇིག་རྟེན་དག་ལ་ཡོད་དང་མེད་ཅེས་སྟོན། །ཞེས་དང་།རྡོ་རྗེ་ལས། སེམས་ཅན་རྣམས་ལ་ཕན་སྤྱོད་པས། །རྟག་ཏུ་དམ་ཚིག་བླ་མའི་ནོར། །སེམས་ཅན་སྲོག་ནི་བསྲུང་བའི་ཕྱིར། །རྫུན་དུ་ཡང་ནི་སྨྲ་བར་བྱ། །ཞེས་སོ། །མི་ཚངས་སྤྱོད་ནི། མ་ཆགས་པ་ལ་ཆགས་པ་དང་། །ཞེས་སོགས་ཏེ། ཆོས་ཐམས་ཅད་སེམས་ཉིད་དུ་རང་སྣང་བས་ཡུལ་སེམས་གཉིས་མེད་དུ་གསལ་བ་ལ། གཉིས་སུ་ཞེན་ཅིང་ཆགས་པའི་དུས་ན། སེམས་ཉིད་ཀྱི་ངོ་བོར་ཤེས་པའི་ལྟ་བ་དང་། འདུ་ཤེས་གསུམ་ལྡན་གྱི་བསྒོམ་པ་དང་། ཐབས་ཀྱི་སྤྱོད་པ་གསུམ་གྱིས་ཟིན་ན་ཆགས་པའི་ངོ་ཡེ་ཤེས་སུ་གསལ་བའི་ཕྱིར་སྤྱད་ཀྱང་ཉེས་པས་མི་གོས་ལ། འཛག་མེད་ཀྱི་ཡེ་ཤེས་འགྲུབ་པ་སོགས་དོན་དུ་འགྱུར་བས། མི་ཚངས་སྤྱོད་སྤོང་བའི་སྡོམ་པ་འདུས་ལ་དག་པ་སྟེ། དཀོན་བརྩེགས་ལས། ཇི་ལྟར་རྨི་ལམ་སྒྱུ་མའི་རང་བཞིན་དུ། །སྐྱེས་བུ་འདོད་བསྟེན་དེ་ཡང་དེ་འདྲ་སྟེ། །ངོ་བོ་ཉིད་ཀྱིས་སྟོང་ལ་དངོས་པོ་མེད། །ལས་མེད་རྣམ་པར་སྨིན་པ་དེ་ཡོད་མིན། །ཞེས་དང་། རྗེ་བླ་མའི་གཏེར་བྱོན་བདེ་གཤེགས་ཀུན་འདུས་ལས། འདི་ནི་ཚངས་པར་སྤྱོད་པ་ཆེ། །དགེ་སློང་ཉིད་དུ་ཡང་དག་འགྱུར། །དེ་ལས་འཆིང་བ་ཀུན་ལྡན་པའི། །རྟགས་ཙམ་གྱི་ནི་མ་ཡིན་ཏེ། །གང་ཕྱིར་རྒྱལ་བས་ཆོས་བསྟན་པ། །
རྣམ་པའི་ཁྱད་པར་མ་གཏོགས་པ། །ཉོན་མོངས་སྤོང་བར་མཚུངས་པའི་ཕྱིར། །གཉེན་པོར་གྱུར་ན་ཐབས་ཤེས་བྱ། །ཞེས་དང་། རྡོ་རྗེ་ལས། སངས་རྒྱས་རྣམས་ནི་མཉེས་བྱ་དང་། །དམ་ཚིག་རྣམས་ནི་བསྲུང་བ་དང་། །གསང་སྔགས་རིག་པས་སྒྲུབ་པའི་ཕྱིར། །གཞན་གྱི་བུད་མེད་བསྟེན་པར་བྱ། །ཞེས་སོ། །གཉིས་པ་བྱང་སྡོམ་དང་མི་འགལ་བ་འདུས་ཚུལ་ནི། བཤད་མ་ཐག་པས་ཀྱང་གོ་བར་འགྱུར་མོད་ཀྱི། འོན་ཀྱང་ཅུང་ཟད་བརྗོད་ན། བྱང་སེམས་ཀྱི་སྡོམ་པ་ནི།ཉེས་སྤྱོད་སྡོམ་པའི་ཚུལ་ཁྲིམས་ཀྱིས་རྒྱུད་བསྡམ། གཉེན་པོ་ལེགས་སྤྱོད་དགེ་བའི་ཚོགས་བསྒྲུབ་པ་དགེ་བ་ཆོས་སྡུད་ཀྱིས་རྟོགས་པ་དང་ཡོན་ཏན་ཁྱད་པར་ཅན་བསྒྲུབ། སེམས་ཅན་དོན་བྱེད་ཀྱིས་དངོས་རྒྱུད་ཀྱི་སྒོ་ནས་གཞན་ལ་ཕན་འདོགས་པ་གསུམ་དུ་འདུ་བ་ལས། འདིར་ཡང་ལས་དང་ཉོན་མོངས་པ་ལ་སྤྱོད་པ་ལྟར་སྣང་ཡང་མ་ཞེན་པའི་ཕྱིར་དོན་གྱི་ངོ་བོ་ལ་ཅི་ཡང་བྱས་པ་མེད་པ་ནི་སྡོམ་པའི་ཚུལ་ཁྲིམས། གང་ལྟར་སྤྱོད་ཀྱང་སྒོ་གསུམ་རྡོ་རྗེ་གསུམ་གྱི་ཕྱག་རྒྱས་བཏབ་སྟེ་མི་འདའ་བ་ནི་དགེ་བ་ཆོས་སྡུད། གཞན་དོན་དུ་འགྱུར་ན་འཁོར་བའི་ཆོས་གང་ ཡང་མི་འདོར་བར་སྤྱོད་པ་ནི་སེམས་ཅན་དོན་བྱེད་སྟེ། འདུལ་སྡོམ་ཐམས་ཅད་འདུས་ཤིང་རྣམ་པར་དག་པའོ། །གསུམ་པ་དབྱེ་ངོ་དངོས་གཏན་ལ་དབབ་པ་ལ།བསྲུང་དུ་མེད་པ་ཅིག་ཅར་བའི་དམ་ཚིག་དང་། བསྲུང་མཚམས་ཅན་རིམ་གྱིས་པའི་དམ་ཚིག་གོ། །དང་པོ་ནི། མཉམ་པ་ཆེན་པོའི་དམ་ཚིག་ལ་གནས་པས་བླང་དོར་མེད་པའི་ཕྱིར་བསྲུང་དུ་མེད་པ་སྟེ། འདི་ཉིད་ལས། མཉམ་ལ་མཉམ་པར་སྦྱོར་བ་ཡིས། །མཉམ་པའི་དམ་ཚིག་ལ་གནས་ན། །མཉམ་རྫོགས་ཆེན་པོ་ཐོབ་པར་འགྱུར། །ཞེས་སོ། །གཉིས་པ་ལ། རྒྱུད་གཞུང་སྤྱིའི་ལུགས་ཀྱི་དམ་ཚིག་མདོར་བསྟན། འདི་ཉིད་ལས་གསུངས་པའི་དམ་ཚིག་རྒྱས་པར་བཤད་པའོ། །དང་པོ་ནི། བདེ་འདུས་ཞི་བ་འདུས་པ་རྩ་བའི་རྒྱུད་ལས། ཉོན་ཅིག་འདུས་པའི་འཁོར་ཚོགས་རྣམས། །དཀྱིལ་འཁོར་འདིར་ནི་གང་ཞུགས་པས། །བསྲུང་ཞིང་བསྡམ་པར་བྱ་བ་དག །སྤྱི་དང་ཁྱད་པར་ལྷག་པ་ཡི། །རྣམ་པར་དབྱེ་བས་གཟུང་
བྱ་སྟེ། །ཞེས་པས། སྤྱི་དང་། ཁྱད་པར་དང་། ལྷག་པའི་དམ་ཚིག་གསུམ། དང་པོ་ནི། སོ་ཐར་བྱང་སེམས་ཕྱི་རྒྱུད་གསུམ་གྱི་སྡོམ་པའི་བསྲུང་མཚམས་སུ་གྲགས་པའི་དམ་ཚིག་རྣམས་ཏེ། དེ་ལས། སོ་སོ་ཐར་དང་བྱང་ཆུབ་སེམས། །བྱ་སྤྱོད་རྣལ་འབྱོར་རྒྱུད་རྣམས་ལས། །བསྲུང་བར་བྱ་བ་གང་གསུངས་པ། །ཐུན་མོང་སྤྱི་ཡི་དམ་ཚིག་ཡིན། །ཞེས་སོ། །གཉིས་པ་ནི། དེ་ལས། རྩ་བར་གྱུར་པ་བཞི་དག་དང་། །ཡན་ལག་ཉི་ཤུ་རྩ་ལྔ་སྟེ། །ཞེས་པས་རྩ་བ་སྐུ་གསུང་ཐུགས་གསུམ་མམ་བྱང་སེམས་བསྣན་པས་བཞི་དང་། ཡན་ལག་གི་དམ་ཚིག་ལྔ་ཚན་ལྔ་ནི། གསལ་བཀྲ་ལས། སྤྱད་པ་ལྔ་དང་མི་སྤང་ལྔ། །དང་དུ་བླང་དང་སྒྲུབ་དེ་བཞིན། །ཤེས་བྱ་ལྔ་རྣམས་ཐུན་མིན་བཤད། །ཅེས་སོ། །གསུམ་པ་ནི། སྤྱི་དང་ཁྱད་པར་གྱི་དམ་ཚིག་ལ་གནས་པའི་རྣལ་འབྱོར་པས་སྒྲུབ་པ་ཆེན་པོ་ལ་སོགས་པའི་སྐབས་སུ་བསྲུང་བ་ལྷག་པར་བསྟན་པའི་དམ་ཚིག་ཉི་ཤུ་སྟེ། ཞི་བ་རྩ་རྒྱུད་ལས། གཞུང་དོན་ལྷག་པའི་དམ་ཚིག་ནི། །རབ་ཏུ་ལྷག་པར་བསྲུང་བར་བྱ། །གཅན་གཟན་རྒྱལ་པོའི་རྡོ་རྗེ་སློབ་དཔོན་གྱི་སྐུ་ལ་མི་འཚེ་ཁྲི་མིག་ཞིག །ཟ་མ་སློབ་དཔོན་གྱི་ཡུམ་ལ་མི་སྤྱད་ཏོག་ཏུ་དུག་མི་བླུག །རིན་ཆེན་ལྕུག་དད་པ་ཅན་གྱི་ཚོགས་མི་བཅག་ཕྲན་མི་འདྲེག་ཅིང་། །ཞུན་ཁོལ་ལྟ་བུ་མི་མཁས་པ་དང་དཀོན་མཆོག་གི་རྫས་ལ་མི་འབག་བཏུང་སྟེ། །པདྨའི་ཟེ་འབྲུ་ཁ་མི་མཆེད་ཀྱི་ཡུམ་ལ་མི་སྤྱད་གསེང་། །བུག་བརྡོལ་སྣོད་ངན་ལ་གསང་སྔགས་མི་སྟེར་སྣོད་དུ་བཅུད་མི་བླུག །དོན་དང་མི་ཐོད་ངན་སོགས་ལ་བརྟགས་ པའི་ལྡན་རྫས་མི་བརྟེན། །ཤེལ་སྒོང་འདམ་དུ་བསུབ་མཁས་པའི་ཡོན་ཏན་ལ་མི་སྨད་མི་བྱ། །མ་དག་སྣོད་དུ་དག་པ་གཟུངས་མ་མཚན་ངན་ལ་མི་སྤྱད་མིན། །ཡིད་བཞིན་མཚན་ལྡན་གྱི་གཟུངས་མ་དང་སློབ་མ་མི་སྤང་ནོར་བུ་མི་བསྲེག་སྟེ། །ཁྱུང་ཆེན་གཤོག་པ་ཡ་ཐབས་ཤེས་མི་བྲལ། །གནམ་ལྕགས་ངུར་མོའི་མཚོན་མཆེད་ནང་འཐབ་མི་གདབ། །གཅན་གཟན་རོལ་པའི་ལྷག་མི་གཞན་གྱིས་ཉམས་པའི་རྫས་ལ་མི་སྤྱད་སྤྱད། །རྡོ་རྗེ་བྲག་ཆེན་མི་གཞིག་གཞན་གྱི་དཀྱིལ་འཁོར་ལ་སློབ་དཔོན་གྱི་གདན་མི་གཞིག་ཅིང་། །གཞན་གྱི་ར་བ་དྲ་བའི་མཚམས་མི་ལོངས་དབྲལ། །སྒྲོན་མེ་རླུང་གིས་བསད་ཏིང་འཛིན་བྱིངས་རྨུགས་སུ་མི་གཏོང་པ་
མིན། །ཡེ་ཤེས་ཆུ་རྒྱུན་བཟླས་པའི་རྒྱུན་མི་བཅད་བཅད་པ་སྤང་། །བཀའ་རྟགས་ཕྱག་དབང་རྟགས་དང་བརྡར་མ་བརྗེད་པར་བྱ་རྒྱ་མི་འཕྱི་ཞིང་། །རྡོ་རྗེ་ཕ་ལམ་མཁར་མི་སྐྱེ་བོ་མཐུ་བྱེད་པ་མི་བཟློག་ལྡོག །གཙུག་གི་ནོར་བུ་སློབ་དཔོན་ལ་མི་སྨད་དམའ་མ་དབབ། །འདི་དག་བསྲུང་བར་བྱ་བ་སྟེ། །ལྷག་པར་གཅེས་པའི་དམ་ཚིག་ཡིན། །ཞེས་སོ། །གཉིས་པ་ལ། དབྱེ་གཞིའི་རྣམ་གྲངས་དང་། དེ་ལས་ཕྱེ་བའི་རྣམ་གྲངས་སོ། །དང་པོ་ལ། རྩ་བའི་དམ་ཚིག་ལྔ་དང་། ཡན་ལག་གི་དམ་ཚིག་བཅུའོ། །དང་པོ་ནི། བླ་མེད་མི་སྤང་བླ་མ་བཀུར། །ཞེས་སོགས་ཏེ། དེའི་དོན་གསལ་བཀྲ་ལས། བྱང་སེམས་རྣམ་གཉིས་སློབ་དཔོན་དྲུག །མཆེད་བཞི་སྔགས་གསུམ་ཕྱག་རྒྱ་བཞི། །གསང་བཅུ་རྩ་བར་ཤེས་པར་བྱ། །ཞེས་པས་རྩ་བ་ལྔའི་དང་པོ་བླ་མེད་མི་སྤང་བ་ནི། ཡུལ་ལྷག་པ་དོན་དམ་དང་ཀུན་རྫོབ་བྱང་སེམས་གཉིས་སོ། །དེ་མི་སྤང་བ་ནི་སྣང་སྟོང་གཉིས་སུ་མེད་པར་རྟོགས་ནས་སྒོ་གསུམ་ལྷའི་སྐུ་གསུང་ཐུགས་ཀྱི་ཕྱག་རྒྱ་ལས་མི་འདའ་བར་བྱེད་པ་སྟེ། གསལ་བཀྲ་ལས། རང་ལུས་རྒྱལ་བའི་ཕྱག་རྒྱ་ཆེ། །སེམས་ཅན་ཁམས་ཀྱང་དར་ཤེས་ཤིང་། །སྣང་སྟོང་གཉིས་མེད་རྡོ་རྗེའི་སྐུ། །བྱས་མཐོང་ཐོས་པ་ཐམས་ཅད་ཀྱང་། །སེམས་ཕྱིར་གང་ཡང་བྱས་སྣང་མེད། །དྲན་དང་ཤེས་བཞིན་སྔོན་བཏང་ལ། །དུས་གསུམ་རྒྱུན་དུ་མ་དྲན་ན། །ཐེག་ཆེན་སྔགས་པར་ཅི་ཡིས་ཆུད། །ཅེས་སོ། །གཉིས་པ་བླ་མ་བཀུར་བ་ལ། ཡུལ་གྱི་དབྱེ་བ་ནི། ཀུན་གྱིས་དམ་པར་བཀུར་ཤིང་བཀའ་དྲིན་ཅུང་ཟད་ཐོབ་པ་སྤྱིའི་དང་། རབ་བྱུང་གི་མཁན་པོ་ལྟ་བུ་ཆོས་སྒོར་འདྲེན་པའི་དང་། དམ་ཚིག་འབོགས་ཤིང་དབང་བསྐུར་བ་ནི་དམ་ཚིག་དབང་གི་དང་། བཤགས་ཡུལ་དུ་གྱུར་པ་ཉམས་ཆག་སྐོང་བའི་དང་། ཆོས་འཆད་པའི་སློབ་དཔོན་ལྟ་བུ་ཤེས་རྒྱུད་འགྲོལ་བའི་དང་། ཟབ་མོའི་མན་ངག་སྟོན་པའི་བླ་མ་དང་དྲུག་སྟེ། གསལ་བཀྲ་ལས། སྤྱི་དང་འདྲེན་དང་དམ་ཚིག་དབང་། །ཉམས་ཆགས་སྐོང་དང་ཤེས་རྒྱུད་འགྲོལ། །མན་ངག་ལུང་གི་སློབ་དཔོན་རྣམས། །ཞེས་སོ། །ཁྱད་པར་དུའང་རྒྱུད་འཆད་པ། དབང་བསྐུར་བ། མན་ངག་ནོད་པ་རྣམས་ནི་ལྷག་པར་ཡང་བཀུར་བའི་ཡུལ་
ཏེ། བདེ་འདུས་ཞི་རྒྱུད་ལས། རྒྱུད་འགྲོལ་དབང་བསྐུར་དེ་ཉིད་བསྟན། །ཞེས་སོ། །བཀུར་ལུགས་ནི། གསལ་བཀྲ་ལས། ཡུལ་ལ་དབང་བའི་རྒྱལ་པོ་དང་། །ཁུ་བོ་ཕ་དང་མ་དང་མིག །སྙིང་བས་ལྷག་པའི་ཚུལ་བལྟས་ཏེ། །ཞེས་པའི་བཀུར་ཚུལ་གྱི་དཔེ་སློབ་དཔོན་དྲུག་ལ་རིམ་བཞིན་སྦྱར་ལ། ཁྱད་པར་དུ་ལྷག་པའི་ཡུལ་གསུམ་ནི། སངས་རྒྱས་ལས་ལྷག་པའམ། མཉམ་པའམ། དཀོན་མཆོག་བཞི་པར་བལྟ་བ་གང་རུང་ཞིག་ནོས་ཏེ་སྒོ་གསུམ་ཟོལ་ཟོག་མེད་པས་ཅི་མཉེས་བྱེད་པའོ། །གསུམ་པ་སྔགས་རྒྱ་རྒྱུན་མི་གཅོད་པ་ལ། ཡུལ་སྔགས་གསུམ་དང་ཕྱག་རྒྱ་བཞི་སྟེ། གསལ་བཀྲ་ལས། རྩ་བ་བསྐྱེད་དང་ལས་སྔགས་དང་། །དམ་ཚིག་ལས་དང་ཆོས་དང་ནི། །སྐུ་ཉིད་ཕྱག་རྒྱ་ཆེན་པོ་བཞི། །ཞེས་སོ། །དེ་དག་རྒྱུན་མི་གཅད་པར་ཉམས་སུ་ལེན་པའི་ཚུལ་ནི། བརྩོན་པ་རབ་འབྲིང་ཐ་གསུམ་དུ་སྦྱར་ནས་གསུངས་ཏེ། དེ་ལས། རབ་ཀྱིས་ཆུ་བོའི་རྒྱུན་བཞིན་ནམ། །ཉིན་གསུམ་མཚན་གསུམ་གཉིས་གཅིག་ཏུ། །མ་ཡེངས་ཙམ་དུ་ངང་གིས་བཟླ། །འབྲིང་གིས་ཟླ་གཅིག་དུས་དྲུག་དང་། །དུས་བཞིའི་བར་དུ་མི་གཅད་ཅིང་། །ཐ་མ་བྱ་བའི་རྣལ་འབྱོར་པས། །ཟླ་རེའམ་ར་བའི་དུས་དག་ཏུ། །བརྩོན་པས་འབད་དེ་མི་བྱེད་པ། །བྱང་ཆུབ་ས་བོན་བརླག་པ་ཡིན། །ཚོགས་དང་གཏོར་མའང་དེ་བཞིན་དུ། །ཐ་ན་ལོ་ཟླར་མི་འདའ་འོ། །ཞེས་སོ། །བཞི་པ་མཆེད་ལ་བྱམས་པར་བྱ་བ་ལ། ཡུལ་ནི། སྤྱིའི་མཆེད་སེམས་ཅན་ཐམས་ཅད། རིང་བའི་མཆེད་སངས་རྒྱས་ཀྱི་བསྟན་པ་ལ་ཞུགས་སོ་ཅོག །ཉེ་བའི་མཆེད་སྔགས་ཀྱི་ཐེག་པར་ཞུགས་པ། དེ་ལས་ཀྱང་ཁྱད་པར་ནང་འདྲེས་པའི་མཆེད་བླ་མ་གཅིག་གིས་བསྡུས་པ་ནི་ཕ་གཅིག་གི་སྤུན་དང་། དེའི་ཤུགས་ཀྱིས་དཀྱིལ་འཁོར་གཅིག་གིས་བསྡུས་པ་ནི་མ་གཅིག་པའི་སྤུན་དུ་དོན་གྱིས་འགྱུར་ཏེ། དེ་གཉིས་ནི་ལྷག་པར་ཡང་བྱམས་པར་བྱ་བའི་ཡུལ་ལོ། །དེ་ལྟར་ཡང་གསལ་བཀྲ་ལས།མཐའ་ཡས་སེམས་ཅན་རང་རིག་ཕྱིར། །གང་ཡང་བདག་ལས་གཞན་མིན་དང་། །བདེ་གཤེགས་སྙིང་པོའི་སྤུན་ཡིན་ཕྱིར། །མ་འོངས་སངས་རྒྱས་རང་བཞིན་ནི། །སྤྱི་ཡི་མཆེད་དེ་ཕ་ཚན་
བཞིན། །སངས་རྒྱས་ཆོས་ཞུགས་རིང་བ་དང་། །བལྟ་སྤྱོད་མཐུན་པ་ཉེ་བར་བཤད། །ཕ་གཅིག་དམ་ཚིག་ནང་འདྲེས་པ། །ཞེས་སོ། །དེ་དག་ལ་བྱམས་པ་བྱ་ལུགས་ནི། སྙིང་པོ་བྱང་ཆུབ་ཀྱི་བར་དུ་མི་འབྲལ་བར་བྱ་བའི་བསམ་པས་རྟག་པར་བརྩེ་ཞིང་གདུང་བར་བྱ་བ་སྟེ། རྔམ་གློག་ལས། རྡོ་རྗེ་སྤུན་ལ་གདུང་སེམས་ཀྱང་། །འདྲེས་དང་མ་འདྲེས་ཡོངས་ཀྱི་སྤུན། །ཡང་དག་ལམ་དུ་ཞུགས་པ་ལ། །མངན་དང་བཅས་པའི་སེམས་ཙམ་ཡང་། །རྟག་ཏུ་སྤང་བར་བྱ་བ་ཡིན། །བརྩེ་ཞིང་གདུང་བའི་ཤུགས་ཕྱུང་ལ། །གཅིག་ལ་གཅིག་ནི་མིག་བཞིན་བལྟ། །ཞེས་སོ། །ལྔ་པ་གསང་སྒྲོགས་ལས། ཡུལ་ནི་ཕྲ་རྒྱས་ལས། དམ་ཉམས་དམ་ལས་ལོག་པ་དང་། །དམ་མེད་དཀྱིལ་འཁོར་མ་མཐོང་དང་། །འདྲེས་དང་མ་འདྲེས་ཐམས་ཅད་ལ། །ཞེས་སོ། །དེ་དག་ལ་གསང་བར་བྱ་བ་ནི། དེ་ལས། སྤྱི་དང་བར་གསང་བཞི་བཞི་དང་། །འོས་དང་གཉེར་གཏད་རྣམ་པ་བཅུ། །ཞེས་སོ། །དེ་ལ་སྤྱིར་གསང་བཞི་ནི། གསལ་བཀྲ་ལས། ལྟ་ཟབ་སྤྱོད་པ་བརླང་པོ་དང་། །ལྷ་མིང་གཟུངས་དང་གྲུབ་རྟགས་རྣམས། །ཞེས་པའི་ལྟ་ཟབ་ནི། ཐེག་དམན་སོགས་བློ་དམན་རྣམས་དང་།སྤྱོད་པ་ན་མ་འདྲེས་པ་ལ་གསང་ངོ་། །ཡི་དམ་གྱི་ལྷ་དང་སྔགས་དང་གྲུབ་རྟགས་གསུམ་ནི་མ་འདྲེས་པ་ལ་བསྟན་ན་དམ་ཚིག་ཉམས་ལ། འདྲེས་པ་ལ་བསྟན་ནའང་དངོས་གྲུབ་ཉམས་པར་གསུངས་པས་ཐམས་ཅད་དུ་གསང་བར་བྱའོ། །བར་གསང་བཞི་ནི། དེ་ལས། སྒྲུབ་པའི་གནས་དུས་གྲོགས་དང་རྫས། །བར་དུ་གསང་ལ་བསྒྲུབ་པར་བྱ། །ཞེས་པས། སྒྲུབ་པ་བྱེད་པའི་བར་དེ་སྲིད་དུ་ཁྱད་པར་དུ་གསང་བར་བྱ་བའོ། །གསང་བར་འོས་པ་ནི། མཆོད་རྫས་དང་གསང་བའི་སྤྱོད་པ་དང་མཆེད་ཀྱི་ངན་སྤྱོད་ལ་སོགས་པ་མཐོང་བ་དང་ཐོས་སུ་མི་རུང་བ་རྣམས་སོ། །གཉེར་གཏད་པ་ནི། བླ་མ་དང་མཆེད་ཀྱིས་འདི་དང་འདི་གསང་བར་གྱིས་ཤིག་ཅེས་གདམས་པ་རྣམས་སོ། །དེ་དག་ནི་ཆོས་ལ་སྐྱོན་ཡོད་པས་གསང་དགོས་པ་མ་ཡིན་ཏེ། དེ་ལས། གསང་སྔགས་སྐྱོན་ཡོད་མ་ཡིན་ཏེ། །སེམས་ཅན་དོན་ཕྱིར་རབ་ཏུ་གསང་། །གསང་ཐུབ་དངོས་གྲུབ་མི་ཡལ་བས། །གསང་ཕྱིར་བརྡ་དག་སྣ་ཚོགས་
གསུངས། །ཞེས་སོ། །དེ་ལྟར་ལྔ་པོ་དེ་ནི་ལམ་དང་འབྲས་བུའི་གཞིར་གྱུར་པས་ན་རྩ་བའི་དམ་ཚིག་ཅེས་བྱའོ། །དེ་དག་རྩ་བ་གསུམ་དུ་བསྡུ་ན། བླ་མ་དང་མཆེད་ལ་བསྲུང་བ་གཉིས་སྐུའི་དམ་ཚིག །སྔགས་རྒྱ་གསུང་གི་དམ་ཚིག །བྱང་སེམས་དང་གསང་བཅུ་ཐུགས་ཀྱི་དམ་ཚིག་གོ། །ཡང་གཉིས་སུ་བསྡུ་ན། བླ་མ་བཀུར་བ། མཆེད་ལ་བྱམས་པ། གསང་བ་མི་སྨྲ་བ་གསུམ་བསྲུང་བའི་དམ་ཚིག །བྱང་སེམས་དང་སྔགས་རྒྱ་གཉིས་སྒྲུབ་པའི་དམ་ཚིག་གོ། །འགའ་ཞིག །སྐུ་གསུང་ཐུགས་ཀྱི་བགྲང་ཚུལ་གཞན་སྔར་ལྟར་ལས་བླ་མེད་མི་སྤང་བ་ཟུར་དུ་བགྲངས་ཏེ་རྩ་བ་བཞིར་འདོད་ནའང་། ཁོ་བོ་ནི་བླ་མེད་མི་སྤང་བ་ཐུགས་སུ་བསྡུས་ན་ལེགས་པར་མངོན་ཏེ། བདེ་འདུས་ཞི་བའི་རྒྱུད་ལས། བྱང་ཆུབ་སེམས་གསུམ་བསྒོམ་པ་ནི། །རྡོ་རྗེ་ཐུགས་ཀྱི་དམ་ཚིག་གོ། །ཞེས་གསུངས་པའི་ཕྱིར། གཉིས་པ་ཡན་ལག་གི་དམ་ཚིག་ལ། མི་སྤང་བ་ལྔ་དང་། མི་འདོར་བ་ལྔའོ། །དང་པོ་ནི། གཏི་མུག་ཆགས་དང་ཞེ་སྡང་དང་། །ང་རྒྱལ་ཕྲག་དོག་མི་སྤང་ངོ་། །ཞེས་པའི་སྐབས་སུ། གསལ་བཀྲ་ལས། མི་སྤང་དམ་ཚིག་བཤད་བྱ་བ། །ཡང་དག་དུག་ལྔ་ལོག་དུག་ལྔ། །ཞེས་པས་སྤྱིར་ཡང་དག་པའི་དུག་ལྔ་དང་། ལོག་པའི་དུག་ལྔ་གཉིས། དང་པོ་ནི། འཁོར་འདས་ཀྱི་ཆོས་ཐམས་ཅད་མཉམ་པ་ཉིད་དུ་རྟོགས་པའི་དུས་ན། ལྟ་བས་ཕྱོགས་རིས་དང་སྤྱོད་པས་བླང་དང་དོར་བྱའི་ཆོས་འབྱེད་པ་མེད་པ་ནི་གཏི་མུག །དེ་ལྟར་མ་རྟོགས་པའི་འགྲོ་ལ་ཐུགས་རྗེས་ཆགས་པ་ནི་འདོད་ཆགས། རང་བྱུང་གི་ཡེ་ཤེས་ཀྱིས་ལོག་ལྟ་འཇོམས་པའི་ཞེ་སྡང་། མཉམ་ཉིད་རྟོགས་པའི་ལྟ་བ་གཤོངས་སུ་མི་འབེབས་པའི་ང་རྒྱལ། གཉིས་འཛིན་ཅན་གྱི་ལྟ་སྤྱོད་མཉམ་ཉིད་ཀྱི་ཀློང་དུ་མི་ཤོང་བའི་ཕྲག་དོག་རྣམས་ནི་བདག་གཞན་ཆོས་གསུམ་གྱི་དོན་གྱི་ཕྱིར་མི་སྤང་ངོ་། །གཉིས་པ་ནི། ཉོན་མོངས་པ་ལྔ་མི་སྤོང་བར་བཤད་པ་དེ་དག །གསང་བ་ཡིན་ནམ་བསྒྲག་པ་ཡིན་ཞེ་ན། སྣོད་མིན་ལ་གསང་ཞིང་། སྣོད་ལྡན་ལ་བསྒྲག་གོ། །དྲང་དོན་ཡིན་ནམ་ངེས་དོན་ཡིན་ཟེར་ན། ཉོན་མོངས་པ་མི་སྤང་བ་དྲང་དོན་དུ་བསྟན་པ་ལ་དགོས་པ་མེད་པའི་ཕྱིར། འདིར་བློ་ཆེན་
མཉམ་པའི་ལྟ་བས་ཟིན་པ་ལ་ངེས་དོན་དུ་བསྟན་ནོ། །ཅིའི་ཕྱིར་མི་སྤོང་ཞེ་ན། ལོག་པའི་དུག་ལྔ་ཆོས་ཅན། སྤང་བྱ་མ་ཡིན་ཏེ། སྤང་བྱའི་རྫས་མ་གྲུབ་པའི་ཕྱིར་དང་། ཐབས་ལ་མཁས་པའི་ལམ་ཡིན་པའི་ཕྱིར་དང་། རང་བཞིན་ཆེན་པོ་ཡིན་པའི་ཕྱིར་རོ། །དང་པོ་ནི། ཆོས་ཐམས་ཅད་རང་རང་གི་ངོ་བོས་སྟོང་པའི་ཕྱིར་སྤང་མི་དགོས་ཏེ། སྨིག་རྒྱུ་ལ་ཆུ་རགས་མི་དགོས་པ་བཞིན་ནོ། །དེ་ལྟར་ཡང་རྡོ་རྗེ་ལས། ཉོན་མོངས་རྣམས་ནི་སྒྱུ་འདྲ་ངོ་བོས་སྟོང་། །ཞེས་དང་། ཕྱིར་མི་ལྡོག་པ་འཁོར་ལོའི་མདོ་ལས། མ་རིག་ནམ་མཁའ་ཇི་བཞིན་ཏེ། །ཆོས་རྣམས་ཐམས་ཅད་མཚན་ཉིད་མེད། །འདོད་ཆགས་མེད་ཅིང་ཞེ་སྡང་མེད། །ང་རྒྱལ་དང་ནི་ཕྲག་དོག་ཀུན། །སྒྱུ་འདྲ་ངོ་བོ་ཉིད་མེད་དེ། །ཡོད་མེད་མི་དམིགས་རྟེན་དང་བྲལ། །ཞེས་སོ། །གཉིས་པ་ནི། ཐབས་ཀྱིས་ཟིན་ན་ཉོན་མོངས་པ་སྤྱད་ཀྱང་མི་འཆིང་བར་རྣམ་པར་གྲོལ་བའི་ལམ་དུ་འགྱུར་བའི་ཕྱིར། མི་སྤང་སྟེ། དུག་གི་སྨན་མར་གྱིས་དུག་ནད་འཇོམས་པ་བཞིན་ནོ། །དེ་ཡང་རྒྱ་མཚོ་ལས། ཉོན་མོངས་ལམ་ནི་དག་པ་ཆེ། །ཐབས་ཀྱི་འདོད་ཡོན་རྒྱན་གྱི་མཆོག །ཐམས་ཅད་ཐམས་ཅད་རོལ་པ་ཡིས། །མྱུར་དུ་ཧེ་རུ་ཀ་དཔལ་འགྱུར། །ཞེས་དང་། ཐེག་བསྡུས་ལས། ཐབས་ཆེན་རྣམས་དང་ལྡན་པ་ལ། །ཉོན་མོངས་བྱང་ཆུབ་ཡན་ལག་འགྱུར། །ཞེས་སོ། །གསུམ་པ་ནི། ཉོན་མོངས་པ་ལྔ་ཉིད་དོན་ཡེ་ཤེས་ལྔ་ཡིན་ལ། རྟགས་རྒྱལ་བ་རིགས་ལྔ་ཡིན་པའི་ཕྱིར། མི་སྤང་སྟེ། ཉོན་མོངས་པ་ལས་རྫས་གཞན་དུ་སྐུ་དང་ཡེ་ཤེས་མ་གྲུབ་པའི་ཕྱིར། བྱས་པ་རང་མི་རྟག་པ་བཞིན་ནོ། །དེ་ལྟར་ཡང་དམ་ཚིག་ཉེར་བརྒྱད་པ་ལས། ཕྲག་དོག་ལ་སོགས་ཉོན་མོངས་ལྔ་རྣམས་ནི། །ཡེ་ནས་རིགས་ལྔའི་རང་བཞིན་ཡིན་པའི་ཕྱིར། །ཞེས་སོ། །ཡང་མི་སྤོང་བའི་དགོས་པ་གང་ཞེ་ན། ཉོན་མོངས་པ་དུག་ལྔ་ཆོས་ཅན། སྤང་བར་མི་བྱ་སྟེ། དགོས་པ་གསུམ་དང་ལྡན་པའི་ཕྱིར། དེའང་དངོས་ཞེན་བཟློག་པའི་དགོས་པ་ཡོད་དེ། སྔོན་ཁྱིམ་བདག་མེས་ཉེན་པ་ཞིག་མེ་ནི་བསྲེག་པ་ཁོ་ནའོ་སྙམ་པ་ལ། ཕྱིས་དྲང་སྲོང་མེའི་གཙང་སྦྲ་ཅན་དང་རི་དྭགས་མེ་བྱི་ལའི་སྤྱོད་པ་མཐོང་བས་མེ་ཚ་བ་ཕྱོགས་གཅིག་པའི་མངོན་ཞེན་ལོག་
པ་ལྟར་ཐེག་པ་འོག་མ་བས་དུག་ལྔ་འཁོར་བའི་རྒྱུ་ཁོ་ནར་འཛིན་པའི་མངོན་ཞེན་བཟློག་པའི་ཕྱིར་རོ། །གཉིས་པ་བཀའ་ཟབ་མོ་ལ་གུས་པ་སྐྱེ་བའི་དགོས་པ་ཡོད་དེ།ཐེག་པ་འོག་མས་ཉོན་མོངས་པ་ལ་སྐྱོན་དུ་བལྟས་ཏེ་སྤང་འགེག་སྦྱོང་སྒྱུར་བྱེད་ལ། འདིར་སྤྱད་པས་གྲོལ་བ་ནི་ངོ་མཚར་རོ་སྙམ་དུ་བཀའ་ཟབ་མོ་ལ་ཡིད་ཆེས་ཀྱི་གུས་པ་སྐྱེ་བའོ། །གསུམ་པ་ཆོས་ཉིད་ཟབ་མོ་ལ་རྟོགས་པའི་བློ་མྱུར་བའི་དགོས་པ་ཡོད་དེ། ཉོན་མོངས་པ་ཆོས་ཉིད་དང་དབྱེར་མེད་དུ་རྟོགས་པས་ལམ་འབྲས་གཞན་ནས་བཙལ་མི་དགོས་པར་ཐག་ཆོད་པའི་ཕྱིར་རོ། །མདོར་ན་གཉེན་པོས་སྤངས་པ་དང་རང་ག་མར་སྤྱད་པ་གཉིས་གཉིས་པ་ལས་མི་འདའ་སྟེ། ཞེ་སྡང་སོགས་ཉོན་མོངས་པ་རྣམས་གཉེན་པོ་བྱམས་པ་སོགས་ཀྱིས་སྤངས་ན་རྒྱུའི་ཐེག་པར་གོལ་ཞིང་། རྩ་བ་ནས་འབྱིན་མི་ནུས་པའི་སྐྱོན་ཀྱང་ཡོད་ལ། གལ་ཏེ་ཐབས་ཀྱིས་མ་ཟིན་པ་རང་གར་སྤྱད་ན་རྒྱུད་ལྔར་ལྟུང་བའི་ཕྱིར་ཏེ། ལམ་རིམ་ལས། དེ་བས་མཉམ་ཉིད་མ་རྟོགས་པར། །དུག་ལྔ་འཇོལ་སྤྱོད་རྒྱུད་ལྔར་འཁོར། །ཞེས་སོ། །དེ་བས་ན་ལྟ་སྒོམ་གྱི་གདེང་དང་ལྡན་པས་ཉོན་མོངས་པ་སྤྱད་ཀྱང་མི་འཆིང་བ་རྨ་བྱ་དུག་གིས་འཚོ་བ་ལྟ་བུའི་རྣལ་འབྱོར་པས། ཉོན་མོངས་པ་སྐམས་ཀྱིས་སྐྱེས་པའི་དུས་ན་སྐྱེ་བོ་ཐ་མལ་པ་ལྟར་དེའི་དབང་དུ་མི་གཏོང་། ཐེག་པ་འོག་མ་བ་ལྟར་སྤང་འགེག་སྦྱང་བསྒྱུར་མི་བྱེད་པར་ཉ་ལམ་དུ་ཆུ་བདེ་བ་ལྟར་ལམ་དུ་བྱེད་དགོས་པའི་ཕྱིར། མི་སྤང་བའི་རྒྱུ་མཚན་འཐད་པ་དང་བཅས་པའོ། །གཉིས་པ་ནི། དཀར་རྩི་དམར་རྩི་དྲི་ཤ་ཆེན། །དག་པའི་སྣོད་ཆུ་མི་འདོར་རོ། །ཞེས་པས་དམ་རྫས་ལྔ་པོ་ནི། ཆོས་ཉིད་རང་བཞིན་དང་། རང་གི་ངོ་བོ་དང་།མཐུ་དང་། བྱིན་གྱིས་རླབས་ཀྱིས་གྲུབ་པའི་རྫས་ཁྱད་པར་ཅན་ཡིན་པའི་ཕྱིར་དོར་བར་མི་བྱའོ། །དེ་ལ་མི་དོར་བའི་རྒྱུ་མཚན་བཞི་སྟེ། ཡེ་ནས་བླང་དོར་མེད་པའི་ཆོས་ཉིད་ཀྱི་རོལ་པ་ཡིན་པའི་ཕྱིར་ཡང་མི་དོར་ཏེ། ལེ་ལག་ལས། བདུད་རྩི་ཡེ་ནས་དག་པའི་ཆོས། །བླང་དོར་མེད་པར་ཀུན་ལས་འདས། །ཡེ་བསྲུངས་ཆེན་པོའི་དམ་ཚིག་ཏུ། །མཁས་པས་དང་དུ་བླང་བར་བྱ། །ཞེས་སོ། །
རིགས་ལྔ་ཡེ་ཤེས་ལྔའི་ངོ་བོ་ཡིན་པས་ཀྱང་མི་དོར་ཏེ། ཐལ་བ་ལས། བདུད་རྩི་བྱང་སེམས་རྡོ་རྗེའི་རིགས་མེ་ལོང་ཡེ་ཤེས། དེ་བཞིན་དུ་དྲི་ཆེན་པོ་དེ་བཞིན་གཤེགས་པའི་ཆོས་དབྱིངས། ཤ་རིན་ཆེན་མཉམ་ཉིད། རཀྟ་པདྨ་སོར་རྟོག །དྲི་ཆུ་ལས་རིགས་བྱ་གྲུབ་པོ། །ལྔ་ནི་རིགས་ལྔའི་དངོས། །དྲི་ཆེན་དྲི་ཆུ་བྱང་ཆུབ་སེམས། །ཞེས་སོ། །ནད་ལྔ་སེལ་བའི་ཕྱིར་ཡང་མི་སྤང་སྟེ། བྱང་སེམས་དཀར་དམར་དྲི་ཆེ་ཆུང་ཤ་ཆེན་རྣམས་ཀྱིས་རིམ་བཞིན་ཚ་གྲང་དུག་ནད་གག་པ་མཛེ་ནད་རྣམས་སེལ་བའི་ཕྱིར། རང་བཞིན་གྱི་མཐུ་ལྔ་ཡོད་པའི་ཕྱིར་ཡང་མི་སྤང་སྟེ། སྔར་གྱི་རིམ་པས། མི་བརྗེད་པའི་གཟུངས་དང་། བཀྲག་གསལ་བ་དང་། ཚེ་རིང་བ་དང་། སྐད་སྙན་པ་དང་། མཐུ་ཆེ་བའི་ཡོན་ཏན་རྣམས་འཐོབ་པའི་ཕྱིར་རོ། །གཉིས་པ་ལ། དོན་དང་། རྣམ་གྲངས་སྤྲོས་པའོ། །དང་པོ་ནི། རྒྱས་པའི་ལེའུ་དོན་གཉིས་པར། སྤོང་བ་རྡོ་རྗེ་ཞེས་བྱ་བའི་དམ་ཚིག །ཅེས་པ་ནས། ཏིང་ངེ་འཛིན་གྱི་ཕྱག་རྒྱ་ཞེས་བྱ་བའི་བར་དམ་ཚིག་དགུ་བཅུ་རྩ་བདུན་གསུངས་ཏེ། ཕལ་ཆེར་ཤེས་པར་བྱ་བའི་དམ་ཚིག་སྟོན་པ་ལས།དེའང་མ་ཧཱ་ཡོ་གའི་གཞུང་གིས་ཤེས་བྱ་ཐམས་ཅད་ལ་ཇི་ལྟར་བལྟ་བ་རྣམས་དམ་ཚིག་རང་རང་གི་མིང་སོ་སོའི་སྒོ་ནས་དེ་ལྟར་ཤེས་པར་བྱ་བར་སྟོན་པའོ། །གཉིས་པ་ལ། སུམ་བརྒྱ་དྲུག་བཅུར་དང་། མཐའ་ཡས་པར་སྤྲོས་པའོ། །དང་པོ་ནི། ཕྲ་རྒྱས་ལས། ཕྱི་མ་རྩ་བ་ཡན་ལག་ལ། །ལྔ་བཅུ་བརྒྱ་དང་དྲུག་ཅུ་དང་། །ཉིས་བརྒྱའི་བསྲུང་བྱ་མ་ལུས་པ། །བཀའ་ལུང་གཉིས་ཀྱི་རྗེས་སུ་བསྙེག །ཅེས་པས་རྩ་བ་ལ་བརྒྱ་དྲུག་ཅུ་དང་། ཡན་ལག་ལ་ཉིས་བརྒྱར་དབྱེ་བ་ལས། དང་པོ་ནི།རྩ་བ་ལྔ་པོ་རེ་རེ་ལ་ཐབས་ཤེས་གཉིས་གཉིས་སུ་ཕྱེ་བས་བཅུ་དང་། སུམ་ཅུ་རེར་ཕྱེ་བས་བརྒྱ་ལྔ་བཅུ་སྟེ། བསྡོམས་པས་བརྒྱ་དང་དྲུག་ཅུར་འགྱུར་རོ། །དེ་ལྟར་ཡང་། རྩ་བའི་དམ་ཚིག་ལྔ་ལ་ནི། །གཅིག་ལའང་གཉིས་དང་བཅུ་ཕྲག་གསུམ། །ཞེས་དང་། ཕྲ་རྒྱས་ལས། པཉྩའི་ཉིང་ལག་ཅེས་པ་ཡང་། །དང་པོ་ཉིད་ནས་ཐབས་སྤྱོད་དང་། །ཤེས་རབ་ཉིད་ཀྱིས་ཉིས་འགྱུར་ཡིན། །རེ་རེའང་བསྲུང་བྱ་སུམ་ཅུ་སྟེ། །ཞེས་སོ། །དེའང་བླ་མེད་མི་སྤང་བ་ལ་སུམ་ཅུར་
དབྱེ་བ་ནི། དེ་ལས། བྱང་ཆུབ་སེམས་ནི་བླ་མེད་ལྷ། །ཞི་ཁྲོའི་ཡན་ལག་ལྷག་པའི་ལྷ་དགུ་ཉིད་དང་བཅུ། །བཅུ་སྟེ། བཅུ་ཚན་གཉིས་ལ་ཉི་ཤུ་བསམ་ལས་མི་འདའ་ཞིང་། །བྱམས་སྙིང་དགའ་བཏང་ཐུན་མོང་མཆོག་རྟོག་པ་ལྷ་རྒྱུད་ནས་གསུངས་པའི་གདུག་ཅན་རྗེས་སུ་འཛིན་པའི་བྱམས་པ་སོགས་གི་ཚད་མེད་བརྒྱད། །བདེན་གཉིས་དོན་ཀུན། བྱང་ཆུབ་རྣམ་པ་བཅུ། །བླ་མེད་གསལ་བས་ཉམས་མི་བྱ། །ཞེས་སོ། །བླ་མ་བཀུར་བ་ལའང་སྒོ་གསུམ་གྱི་བཅུ་བཅུ་སྟེ་སུམ་ཅུའོ། །དེ་ལྟར་ཡང་། ལུས་ཀྱི་སྒོ་ནས་བསྲུང་བ་ཉིད་བརྡེག་པ་སོགས། །ཐིང་སླད་ཙམ་དུའང་བྱ་བ་མིན། །འདོད་ཡོན་ལྔ་ཡིས་མཆོད་པ་དང་། །གསང་ཡུམ་ལ་བའི་སྣོད་དུ་དུག་མི་སྤྱོད། །འགྲོ་བ་དྲང་པོའི་ཕྱོགས་སྤང་དང་། །གདན་ས་གདན་སོགས་མི་བརླམ་དང་། །དུས་མ་ཡིན་པར་དྲུང་དུ་འགྲེང་འདུག་ངན་སྤྱན་སྔར་བཤང་འདོར་སོགས་ སྤྱོད་ལ་སོགས་སྤང་། །རྒྱན་སོགས་ཟེ་ལྡིར་དེ་བཞིན་ཏེ། །མ་རབས་སྤྱོད་པ་ཀུན་སྤངས་ལ། །སྤྱོད་ལམ་ཟིན་ཆགས་བསྡི་གནས་བྱ། །ངག་གི་སྒོ་ནས་རྫུན་དང་ཕྲ་མ་ཚིག་རྩུབ་དང་། །འཁྱལ་པ་ནམ་ཡང་མི་བྱ་སྟེ། །བེ་ཕོགས་མ་ཡིན་རྡབས་སྐད་དོར། །ལྐོག་ཏུ་སྐྱོན་ཚུལ་བརྗོད་ཉམས་པར་འགྱུར། །ཡོན་ཏན་བརྗོད་ཅིང་སྙན་པར་སྨྲ། །ཅ་ཅོ་ལ་སོགས་མ་ཡིན་པས། །སངས་རྒྱས་རྡོ་རྗེའི་གསུང་ཐོབ་འགྱུར། །དམ་ཡིད་ཀྱི་སྒོ་ནས་པ་སྟོན་པའི་བླ་མ་ལ། །བླ་མའི་རྫས་དང་ཡུམ་ལ། ཆགས་སྡང་བླ་མ་འཁོར་བཅས་ལ་གཏི་མུག་ཡོན་ཏན་ལ་རྨོངས་པའི་ང་རང་ཆེ་རྒྱལ་དང་། །ཕྲག་བླ་མའི་ཕུན་ཚོགས་ལ་དོག་དུག་ལྔའི་སེམས་མི་བྱ། །ངན་དུ་མི་སེམས་གསུང་ལྕི་བ ར་བསམ་པ་དང་། །ཕ་མ་དང་། ཡི་དམ་འདྲ་བར་བསམ། །རྟག་ཏུ་གདུང་བ་རྒྱུན་མི་གཅད། །ཅེས་སོ། །སྔགས་ཕྱག་ལའང་སུམ་ཅུ་སྟེ། །དེ་ལས། ཞི་ཁྲོའི་ལྷ་རེ་རེ་ལ་ཕྱག་རྒྱ་བདུན་རེ་སྟེ་གཉིས་ལ་བཅུ་བཞི་དང་། །ཕྱོགས་མཚམས་བཅིང་རྟེན་འོག་གཞི་དང་གཞལ་ཡས་ཁང་པའི་སྔགས། །རྩ་བསྐྱེད་ལས་བསྙེན་པ་རྣམ་བཞི་ཡི་སྔགས། །རེ་གྲངས་པས་དགུ། དབང་བསྐུར་བྱིན་བསྡུ་གསང་སྔགས་དང་། །སྤྱན་དྲང་བསྡིམ་བརྟན་ཕྱག་འཚལ་མཆོད། །ཅེས་སོ། །མཆེད་
ལ་བྱམས་པ་ལའང་སུམ་ཅུ་སྟེ། དེ་ལས། ལུས་ཀྱི་སྒོ་ནས་བསྣུན་དང་མ་བྱིན་བླང་མི་བྱ། །ཟླ་ཟེར་མ་ཡིན་མཆེད་ཀྱིས་མ་གནང་བའི་གཟུངས་མི་སྤྱད། །ལྟ་སྤྱོད་མཐོ་བའི་གོང་མི་གཅད། །དབང་ཐོབ་པ་དང་དམ་ཚིག་ཐོབ་པ་སྔ་བ་དང་རྫོགས་པ་གོང་དུ་བཀུར་དེ་བཞིན་ནོ། །ཀུན་ཏུ་ཡངས་བག་ཟོན་འཕྲིག་ཅན། །བཀུར་སྡིས་བྱ་བ་དང་མཆོད་པ་བྱེད་པ་དང་དགའ་བར་སྤྱོད། །ངག་གིས་རྫུན་སོགས་རྣམ་བཞི་སྤང་བ་དང་། །གསང་བྱ་མི་སྨྲ་ངན་པའི་ཚུལ་མི་བརྗོད། །སྙན་སྨྲ་ཞེ་ས་གསོང་པོར་སྨྲ། །བདེན་ཅི་སྨྲའང་ཚིག་སྲི་ཞུས་སྨྲ་བྱེད་པའོ། །ཡིད་ཀྱིས་སེམས་ཀྱིས་སྔོན་བཞིན་དུག་ལྔ་དོར། །མངོན་སེམས་དང་དཔྱ་སེམས་སྤང་བ་དང་། །མིག་འདྲར་བལྟ་ཞིང་གདུང་བར་བྱ། །གནོད་སེམས་སྤང་དང་རྣམ་བཅུའོ། །ཞེས་སོ། །གསང་བ་མི་བསྟན་པ་ལའང་སུམ་ཅུ་སྟེ། དེ་ལས། གསང་བའི་ཕྱིར་ན་མི་སྨྲ་བ། །ཕྱི་དང་བར་གསང་བཞི་བཞི་དང་། །འོས་དང་གཉེར་གཏད་རྣམ་པ་བཅུ། །སེམས་ཀྱིས་བསྟན་པར་མི་བསམ་ཞིང་། །ངག་གིས་བརྗོད་པར་ཡོངས་མི་བྱ། །ལུས་བརྡས་བསྟན་མིན་སུམ་ཅུའོ། །ཞེས་སོ། །གཉིས་པ་ནི། ཡན་ལག་གི་དམ་ཚིག་བཅུ་པོ་རེ་རེ་ལའང་ཉི་ཤུ་ཉི་ཤུར་ཕྱེ་བས་ཉིས་བརྒྱ་སྟེ། ཡན་ལག་དམ་ཚིག་ལྔ་གཉིས་ལ། །གཅིག་ལའང་བཅུ་ཕྲག་གཉིས་སུ་དབྱེ། །ཞེས་སོ། །དེ་ལ་མི་སྤང་བའི་དམ་ཚིག་ལ་བརྒྱར་དབྱེ་བ་ནི། ཞིང་བཅུ་ཐབས་ཀྱི་མཛད་སྤྱོད་ཀྱིས་དངོས་སུ་བསྒྲལ་བ་བཅུ་དང་ཤེས་རབ་རང་བཞིན་མེད་པར་ཤེས་པས་སྐྱེ་མེད་དུ་སྒྲོལ་བ་བཅུ་སྟེ་ཞེ་སྡང་ཉི་ཤུ། དེ་བཞིན་དུ་ཡན་ལག་གི་དམ་ཚིག་བཅུ་ལ། ཐབས་ཀྱིས་མི་འབྱེད་པར་སྤྱོད་པ་དང་ཤེས་རབ་ཀྱིས་མི་ཕྱེད་པ་སྟེ་གཏི་མུག་ཉི་ཤུ། དེ་ཡང་རྟོགས་པས་གདེང་དུ་གྱུར་པ་ནི་ང་རྒྱལ་ཉི་ཤུ། ཞིང་བཅུ་ཐུགས་རྗེས་མི་གཏོང་བ་བཅུ་དང་རིགས་ལྔའི་ཡབ་ཡུམ་ལ་ཐབས་ཀྱིས་རོལ་པ་ལྔ་དང་། ཏིང་ངེ་འཛིན་གྱི།ཐབས་ཆེན་གྱི། དབང་པོ་ཡུལ་གྱི། རང་བཞིན་གྱི། ཤེས་རབ་ཆོས་ཀྱི་དབྱིངས་སུ་སྦྱོར་བ་ལྔ་སྟེ་འདོད་ཆགས་ཉི་ཤུ། མ་རྟོགས་ལོག་རྟོག་བཞི་དང་མཚན་ཉིད་སྡེ་གསུམ་ཕྱི་རྒྱུད་སྡེ་གསུམ་སྟེ་བཅུ་པོའི་ལྟ་སྤྱོད་ཐབས་ཀྱི་སྤྱོད་པའི་ཀློང་དུ་མི་ཆུད་པ་བཅུ་དང་ཤེས་རབ་ལྟ་བའི་སྒོར་མི་ཆུད་པ་བཅུ་སྟེ་ཉི་ཤུའོ། །
དེ་དག་ཀྱང་ཕྲ་རྒྱས་ལས། མི་སྤང་ལྔ་ལ་བཅུ་གཉིས་ཏེ། །ཞིང་བཅུ་ཐབས་ཀྱིས་མཛད་པས་འཇོམས། །ཤེས་རབ་རང་བཞིན་མེད་པར་སྒྲོལ། །ཞེས་སོགས་གསུངས་སོ། །དང་དུ་བླང་བའི་དམ་ཚིག་བདུད་རྩི་ལྔ་རེ་རེ་ལའང་། མངོན་པ་ཕྱིའི་བཞི་དང་།སྦས་པ་ནང་གི་བཞི་སྟེ་རྩ་བ་བརྒྱད་བརྒྱད་དང་། དྭངས་སྙིགས་གཉིས་གཉིས་ཏེ་འགྲོ་བ་སྤྱིའི་དམ་རྫས་ལྔ་བཅུ་དང་། དེ་སྟེང་དུ་བྱེ་བྲག་ཞིང་བཅུའི་བདུད་རྩི་ལའང་དེ་བཞིན་དུ་སྦྱར་བས་ལྔ་བཅུ་སྟེ་བརྒྱའོ། །དེ་ལྟར་ན་རྩ་བའི་དམ་ཚིག་ བརྒྱ་དྲུག་ཅུ་དང་ཡན་ལག་གི་ཉིས་བརྒྱ་སྟེ་སུམ་བརྒྱ་དྲུག་ཅུའོ། །གཉིས་པ་ནི།སེམས་ཅན་གྱི་རྟོག་ཚོགས་ཇི་སྙེད་པའི་གཉེན་པོར་དམ་ཚིག་ཀྱང་དེ་སྙེད་དུ་སྤྲོས་པའི་ཕྱིར་བརྗོད་ཀྱིས་མི་ལང་སྟེ། འཇིག་རྟེན་དྲུག་གི་ཞེས་སོགས་སྲིད་གསུམ་རྟོག་འདུལ་གསུངས་པའི་ཕྱིར། གསུམ་པ་ནི། དགོངས་འདུས་ལས། ཀུན་ཏུ་ཉམས་པ་ཆེན་པོ་དང་། །རྩ་བ་ཉམས་དང་ཡན་ལག་ཉམས། །དེ་བཞིན་ཟླས་ཉམས་ཞར་ཉམས་ལྔ། །ཞེས་པ་ལྟར་ཉམས་ན། དེ་ཉིད་བསྐང་བས་རྫོགས་པར་འགྱུར་བའི་ཕྱིར། འོག་མ་པ་དག་ལས་འཕགས་སོ། །དེའང་ཉན་ཐོས་པ་ནི་ཕམ་པ་འཆབ་བཅས་བྱུང་ན་གསོར་མི་རུང་བས་རྫ་བེའུ་ཆག་པ་དང་འདྲ་ལ། བྱང་སེམས་ནི་གསེར་དངུལ་གྱི་སྣོད་ཆག་པ་ལ་མགར་བས་སྣོད་བྱར་རུང་བ་ལྟར་དགེ་བའི་བཤེས་གཉེན་ལ་བརྟེན་ནས་ཉམས་པ་གསོར་རུང་བར་བཞེད་དོ། །འདིར་ནི་གསེར་སྣོད་ཞོམ་པ། རང་གི་རྩོལ་བས་སྲོང་ཐུབ་པ་ལྟར་གཞན་ལ་མ་བརྟེན་པར་རང་སྟོབས་ཀྱིས་གསོར་རུང་སྟེ། དེའི་ཚུལ་ཡང་། སྔ་མ་ལས། གང་དེ་བསྐང་བར་བྱ་བ་ཡང་། །ལས་དང་རྫས་དང་འདུན་པ་དང་། །ཏིང་ངེ་འཛིན་དང་དེ་ཉིད་དོ། །ཞེས་གསུངས་པ་བཞིན་ནོ། །ལྔ་པ་ཉམས་པའི་སྐྱོན་ལ། རྩ་བ་དང་། ཡན་ལག་དང་། ཉམས་པ་དང་འགྲོགས་པའི་སྐྱོན་ནོ། །དང་པོ་ནི། འདི་ཉིད་ལས། རྩ་བའི་དམ་ཚིག་ཉམས་གྱུར་ན། །བསྒྲུབ་པ་ཐམས་ཅད་ལོག་པར་འགྱུར། །ཡིད་དུ་མི་འོང་སྣ་ཚོགས་པའི། །འབྲས་བུ་མི་འདོད་བཞིན་དུ་འདུ། །ཞེས་སོ། །གཉིས་པ་ནི། ཡན་ལག་
དམ་ཚིག་ཉམས་གྱུར་ན། །འབྲས་བུ་མེད་ཅིང་ངན་སོང་ལྟུང་། །ཞེས་སོ། །གསུམ་པ་ནི། རྩ་བ་ཉམས་པའི་ཕྱལ་བ་དག །ཅེས་སོགས་དང་། ཀུན་འདུས་ལས་ཀྱང་། ཇི་ལྟར་འོ་མ་རུལ་བ་དག །རུལ་བས་འོ་མ་ཀུན་རུལ་ལྟར། །རྣལ་འབྱོར་ཉམས་གྱུར་གཅིག་གིས་ནི། །རྣལ་འབྱོར་ཅན་ཀུན་མ་རུངས་བྱེད། །ཅེས་སོ། །དྲུག་པ་ཡོན་ཏན་ནི། རྒྱལ་བའི་རིག་པ་འཛིན་པ་དེ། །འཇིག་རྟེན་གཙོ་དང་འཁོར་གྱིས་བཀུར། །དམ་པ་མཆོག་དང་དམ་པ་ཡིས། །སྲས་དང་སྤུན་དགོངས་བྱིན་གྱིས་རློབ། །བདེ་གཤེགས་ཉིད་ཀྱི་ཡུལ་ལ་ཞུགས། །འཇིགས་མེད་ཀུན་ཏུ་བཟང་པོར་སྦྱོར། །ཞེས་སོ། །དེའི་ཕྱིར་དྲན་དང་ཤེས་བཞིན་བག་ཡོད་ཀྱི་སྒོ་ནས་བསྲུང་བ་ལ་འབད་པར་བྱ་དགོས་ཏེ། སྡོམ་འབྱུང་ལས། ཅི་སྟེ་དངོས་གྲུབ་མཆོག་འདོད་ན། །སྲོག་ནི་ཡོངས་སུ་གཏོང་ཡང་སླ། །འཆི་བའི་དུས་ལ་བབ་ཀྱང་སླའི། །རྟག་ཏུ་དམ་ཚིག་བསྲུང་བར་བྱ། །ཞེས་གསུངས་སོ། །དྲུག་པ་རོལ་པ་ཕྲིན་ལས་ལ་དྲུག་ལས། དང་པོ་དགོས་ཆེད་ནི། ཕན་གདགས་པ་དང་། ཚར་གཅོད་པའི་སྒོ་ནས་བདག་གཞན་གྱི་དོན་བསྒྲུབ་པའི་བྱ་བ་སྟེ། ཁོག་གཞུང་ལས། བདག་གཞན་དོན་བསྒྲུབ་ཕྲིན་ལས་ཏེ།ཞེས་སོ། །དེའང་ཞི་བས་ཕྱི་རུ་ནད་གདོན་དང་། ནང་དུ་མཚན་རྟོག་ཞི་བར་བྱེད། རྒྱས་པས་ཕྱི་རུ་འཁོར་དང་ལོངས་སྤྱོད་ནང་དུ་ཚེ་བསོད་ཉམས་རྟོགས་རྣམས་འཕེལ་ཞིང་རྒྱས་པར་བྱེད། དབང་གིས་ཕྱི་རུ་གང་དབང་དུ་སྡུད་པར་འདོད་པ་དང་། ནང་དུ་རང་སེམས་ལ་དབང་ཐོབ་པར་བྱེད། མངོན་སྤྱོད་ཀྱིས་ཕྱི་རུ་དགྲ་བགེགས་དང་ནང་དུ་ཉོན་མོངས་པ་ཕྲ་རགས་འཇོམས་པར་བྱེད་པའི་ཕྱིར་ཏེ། ཐུགས་ཐིག་ལས། ཟུག་རྔུ་ཕྱི་ནང་ཞི་ཕྱིར་དང་། །སྤེལ་བྱ་གཉིས་པོ་འཕེལ་ཕྱིར་དང་། །དགུག་དབང་བཞི་པོ་བསྡུ་ཕྱིར་དང་། །གདུག་པ་རྣམ་གཉིས་འཇོམས་ཕྱིར་དང་། །ཞེས་སོ། །གཉིས་པ་ངོ་བོ་ནི། གཙོ་བོར་
ཡུལ་གཞན་དོན་ལ་དམིགས་པའི་བྱེད་པ་གང་ཞིག །ཚད་མེད་པ་བཞིའི་རྒྱུ་ལས་བྱུང་ཞིང་། ཤེས་རབ་ཆེན་པོས་ཟིན་པའི་ཐབས་མཁས་ཀྱི་ཕྲིན་ལས་ཏེ། ཐུགས་ཐིག་ལས། ཕྱི་རོལ་ཚད་མེད་ཉིད་ལས་བཞི། །ལྷག་པ་གཟུགས་བརྙན་བྱ་ཐབས་གཉིས། །མཆོད་རྟེན་སྒོ་དང་སྦྱིན་སྲེག་སྟེ། །ཞེས་སོ། །གསུམ་པ་སྒྲ་དོན་ནི། ཀརྨ་ཞེས་པའི་སྒྲས་ཕྲིན་ལས་ཏེ། སྒོ་གསུམ་གྱི་བྱ་བའི་མཚན་ཉིད་ཅན་གྱི་བྱེད་པ་པོའི་འདོད་པའོ། །བཞི་པ་རྣམ་གྲངས་ནི། དེ་ལས། དོན་གྱིས་དམིགས་སུ་བཟུང་བའི་ཕྱིར། །རང་བཞིན་ལམ་དང་ཐུགས་རྗེ་ཆེ། །ཞེས་པས། སྤྱིར་གཞི་རང་བཞིན་གྱི། ལམ་ཐབས་ཀྱི། འབྲས་བུ་ཐུགས་རྗེའི་ཕྲིན་ལས་གསུམ་ལས།གཞི་འབྲས་གཉིས་ནི་རྒྱས་པའི་ལེའུ་ང་བཞི་པ་སོགས་ལས་ཤེས་པར་བྱ་ཞིང་། འདིར་ལམ་གྱི་ཕྲིན་ལས་ལ། དོན་བྱ་བའི་ཡུལ། བྱེད་པའི་ཕྲིན་ལས། བྱ་ཐབས་ཀྱི་རྣམ་གྲངས། བྱེད་ཚུལ་གྱི་ཁྱད་པར་རོ། །དང་པོ་ནི། ཁམས་གསུམ་གྱི་སེམས་ཅན་ཐམས་ཅད་ཡིན་ལ། དེ་ཡང་དམིགས་བསལ་གུད་དུ་དབྱེ་ན།གནོད་སྡིག་ཅན་དང་། དབུལ་ཕོངས་ཅན་དང་། ལོག་ལྟ་ཅན་དང་། གདུག་པ་ཅན་རྣམས་སོ། །གཉིས་པ་ནི། ཞི་རྒྱས་དབང་དྲག་ལྷུན་གྱིས་གྲུབ་པ་དང་ལྔའོ། །གསུམ་པ་ལ། རྣམ་གྲངས་དངོས་དང་། གཙོ་སེམས་གང་གིས་དང་།གཟུངས་མ་གང་ལ་བརྟེན་ཏེ་དང་། གང་གི་ཚེ་བྱ་བའི་དུས་སོ། །དང་པོ་ལ།མེའི་སྒོ་ནས་དང་། རྫས་ཀྱི་སྒོ་ནས་དང་། ལུ་གུ་རྒྱུད་ཀྱི་སྒོ་ནས་དང་། མཆོད་རྟེན་གྱི་སྒོ་ནས་དང་། ཕྱག་རྒྱའི་སྒོ་ནས་བྱ་བ་སྟེ། ཁོག་གཞུང་ལས། མཆོད་རྟེན་ཕྱག་རྒྱའི་སྒོ་དང་ནི། །ཧོམ་བྲོ་གླུ་དང་རྫས་ཀྱིས་བྱ། །ཞེས་པའོ། །དང་པོ་མེའི་སྒོ་ནས་བྱ་བ་ལ། ཕྱི་དང་། ནང་དང་། གསང་བའི་སྦྱིན་སྲེག་གོ། །དང་པོ་ནི། སྦྱིན་སྲེག་གི་རྩ་བ་ལས། གནས་རྫས་ཐབས་ཀྱི་རྣམ་པ་དང་། །གཟུངས་དང་གཙོ་སེམས་བསྒྲུབ་བྱ་དང་། །ཕུར་བུ་ལྷ་དུས་ལས་རིམ་དང་། །ལྷག་མ་བཅུ་གཅིག་ཤེས་པར་བྱ། །ཞེས་དོན་བཅུ་གཅིག་ལས། དང་པོ་གནས་ནི། སྤྱིར་ཞི་རྒྱས་གཉིས་བཀྲ་ཤིས་པའི་གནས་དང་། དབང་དྲག་གཉིས་གཉན་པའི་གནས་སུ་བྱ་ལ། བྱེ་བྲག་ཏུ་རྩ་བར། རི་བོ་འདུས་
པའི་རྩེ་དག་དང་། །ཆུ་གླིང་འཇམ་པའི་ས་ཕྱོགས་སུ། །དང་བར་བྱེད་པའི་ལས་རྣམས་བརྩམ། །ནགས་ཚལ་སྨན་ལྗོངས་མེ་ཏོག་ཚལ། །ལྷུན་སྟུག་རི་བོ་རྒྱས་པར་བཤད། །སུམ་མདོ་ཆུ་བོ་འདུས་པ་དང་། །གཞི་མདོ་ཁང་སྟོང་སྡུད་ཅེས་བྱ། །དུར་ཁྲོད་ངན་པའི་ས་ཕྱོགས་སུ། །ལྷག་པར་བརྩམས་ན་ངེས་པར་འགྲུབ། །ཅེས་དང་། འགྲེལ་ཆུང་ལས། ལྗོན་ཤིང་ཅན་དང་ལྕུག་ཕྲན་རྒྱས་པའི་ཚལ། །ཤིང་གཅིག་དྲུང་དང་མེས་ཚིག་ཕྱི་ཡི་གནས། །ཞེས་སོ། །གཉིས་པ་རྫས་ལ་ལྔ་ལས། སྲེག་ཤིང་ནི། རྩ་བ་ལས། རྩ་མོ་བཞི་བྱེད་ཡལ་ག་རྒྱས། །སྡོང་པོ་དབང་རྩ་མངོན་སྤྱོད་ལའོ། །ཁ་དོག་ལས་ཀྱིས་སྦྱར་བར་བྱ། །ཞེས་སོ། །ཡམ་ཤིང་ནི། ཤུག་པ་ཙནྡན་དཀར་པོ་དང་། །ཨུ་དུམ་བ་ར་འོ་མའི་ཤིང་། །ཞི་རྒྱས་ཡམ་ཤིང་ཤེས་པར་བྱ། །དམར་ལ་དྲི་ཞིམ་ཤིང་རྣམས་དང་། །དུག་ཤིང་ཚེར་མ་ཅན་དག་ལ། །ཚིལ་བྱུག་དབང་དྲག་མེ་སྦར་རོ། །ཞེས་སོ། །ལིངྒའི་རྒྱུ་ནི། བསྒྲུབ་བྱའི་དམ་རྫས་གོས་སོགས་དང་། །ལོངས་སྤྱོད་དེ་བཞིན་ཤེས་པར་བྱ། །དུག་དང་ཚ་བ་ས་གསུམ་དང་། །ཤ་ཆེན་ར་དང་བ་གླང་ཤ །མཆོག་ཏུ་གསོད་པར་བྱེད་པ་ཡིན། །སྐྱུར་བ་དབང་སྟེ་ལིངྒའི་རྫས། །ཞེས་སོ། །གཏོར་མའི་རྫས་ནི། འོ་མ་འབྲས་ཆན་དངུལ་ཕྱེ་དང་། །མེ་ཏོག་དཀར་པོའི་གཏོར་མས་ཞི། །ལྡོང་རོས་གྲོ་ཆན་ཞོ་དང་ཕྲུམ། །མེ་ཏོག་གསེར་ཕྱེ་རྒྱས་པ་ལའོ། །ཟངས་ཕྱེ་བུ་རམ་འབྲས་དམར་ཆན། །རམ་བུ་པདྨ་རཀྟར་སྦྱར། །ཐམས་ཅད་སྐུད་པའི་གཏོར་མ་ཡིན། །དུག་རྣམས་ལྕགས་ཕྱེ་རྡོ་ཕྱེ་དང་། །ར་ཁྱིའི་ཁྲག་དང་ཤ་ཆེན་དང་། །དུར་སོལ་མུངྒའི་སྲན་མ་ཆན་རྣམས་ནི། །གསོད་པར་བྱེད་པའི་གཏོར་མ་ཡིན། །ཞེས་སོ། །སྲེག་རྫས་ནི། མར་དཀར་ཏིལ་དཀར་འབྲས་ཆན་དཀར། །མངར་གསུམ་ཙནྡན་དཀར་པོའི་ཤིང་། །ཐམས་ཅད་ཡེ་ཤེས་བདུད་རྩི་སྟེ། །ཐ་མས་ཡེ་ཤེས་མེ་སྐྱེད་དོ། །ཞོ་དང་མར་རྙིང་བུ་རམ་སྦྲང་། །རྒུན་འབྲུམ་སྟར་ག་ཤ་ཆེན་དང་། །དྲི་ཞིམ་གསེར་ཤང་རྒྱས་པ་ལའོ། །ངན་ཏི་ལི་དང་ཤང་ཚེ་དང་། །སྐེ་ཚེ་ཚ་བའི་མར་དག་དང་། །དམར་པོའི་ཤིང་དང་རྩྭ་དག་གིས། །ཐམས་ཅད་འགུགས་པའི་མཆོག་ཏུ་གསུངས། །དུག་དང་ཚིལ་
ཆེན་སྐེ་ཚེའི་མར། །སྲན་ཆན་ཁྲག་སྣ་ཚོགས་པ་དང་། །ཚེར་མ་བ་གླང་ཤ་ཡིས་གསོད། །འབྲས་བུའི་དོན་ཕྱིར་ཚོགས་པར་བྱ། །ཞེས་སོ། །གསུམ་པ་ཐབ་ཀྱི་རྣམ་པ་ལ། །དབྱིབས་དང་ཁ་དོག་མཚན་ལྡན་པར། །ཞེས་པས་དབྱིབས་ནི། ཞི་བ་ལ་ཐབ་ཟླུམ་པོའམ། ཡང་ན་འཁོར་ལོའི་དབྱིབས། དེ་བཞིན་དུ་རྒྱས་པ་ལ་གྲུ་བཞིའམ་རིན་པོ་ཆེའི། དབང་ལ་ཟླ་གམ་མམ་པདྨའི། དྲག་པོ་ལ་གྲུ་གསུམ་མམ་ཁྲོ་ཞལ་གྱི་དབྱིབས་ཏེ། ལས་བཞི་ག་ལ་ཐབ་བྱ་ཐབ་གཉིས་གཉིས་སུ་རྒྱས་པའི་ལེའུ་ང་བདུན་པ་སོགས་ཀྱིས་རིམ་པར་སྟོན་པ་ལས། འདིར་འགྲེལ་ཆུང་ལས། ཟླུམ་པོ་གྲུ་བཞི་ཟླ་གམ་གྲུ་གསུམ་དབྱིབས། །ཞེས་པའི་རྗེས་སུ་འབྲངས་ནས་བྱ་ཐབས་སྔ་མ་ལྟར་བྱ་སྟེ། བླ་མ་བརྒྱུད་པའི་ཕྱག་བཞེས་ལས་དེ་ལྟར་བྱུང་བའི་ཕྱིར་རོ། །དེ་ཐམས་ཅད་ཀྱང་རྒྱར་ཁྲུ་གང་དང་དཔངས་སུ་ཁྲུ་ཕྱེད་པ་བང་རིམ་གསུམ་དང་ལྡན་པ། རིམ་པ་བཞིན་དུ་འཁོར་ལོ་རིན་པོ་ཆེ་པདྨ་རྒྱ་གྲམ་གྱི་ལྟེ་བ་ལ་རྫོགས་པར་བྱ་བའོ། །ཁ་དོག་ནི།ཞི་བ་དཀར། རྒྱས་པ་སེར། དབང་དམར། དྲག་པོ་མཐིང་ནག་གོ། །མཚན་མ་ནི། ཐབ་ཀྱི་དབུས་སུ་ཞི་བ་ལ་འཁོར་ལོ་ཨོཾ་གྱིས་མཚན་པ། དེ་བཞིན་དུ་རྒྱས་པ་ལ་རིན་པོ་ཆེ་ཏྲཱཾ། དབང་ལ་པདྨ་ཧྲཱྀཿ། དྲག་པོ་ལ་རྡོ་རྗེ་ཧཱུཾ་གིས་མཚན་པའོ། །བཞི་པ་གཟུངས་མ་ནི། ལས་མཐུན་གྱི་ཡུམ་ཆས་སུ་བཅུག་པའོ། །ལྔ་པ་གཙོ་སེམས་ནི། ལས་བརྩམས་ནས་མ་གྲུབ་ཀྱི་བར་དེ་སྲིད་དུ་ལས་གང་ཡིན་གྱི་སྟོངས་ཀྱི་སེམས་དང་མ་བྲལ་བར་བྱེད་པའོ། །དྲུག་པ་ལིངྒ་ནི། དོན་བྱ་བའི་ཡུལ་བཞི་པོ་གང་ཡིན་གྱི་དྲི་མ་སོགས་སྔར་གྱི་རྒྱུ་ལས་ལིངྒ་བྱས་པའི་དཔྲལ་བར་རུས། སྙིང་གར་སྲོག །ལྟེ་བར་མིང་། བརླ་ལ་བླ་དྭགས། འདོམས་སུ་ལས་གང་བྱེད་ཀྱི་སྔགས་སྤུ་གྲི་དང་བཅས་པ་བྲིས་ལ། ལས་དང་མཐུན་པའི་བྲུབ་ཁུང་དུ་གཞུག་གོ། །བདུན་པ་ཕུར་བུ་ནི། ཞི་བ་ལ་རྒྱུ་དངུལ་ལམ་ཤིང་དཀར་པོ་ལ་དབྱིབས་དབལ་ཟླུམ་པོར་བྱས་ལ། དེ་བཞིན་དུ་རྒྱས་པ་ལ་གསེར་རམ་ཤིང་སེར་པོ་ལ་དབལ་གྲུ་བཞི། དབང་ལ་ཟངས་སམ་ཤིང་དམར་པོ་ལ་དབལ་ཟླ་གམ། དྲག་པོ་ལ་ལྕགས་སམ་ཤིང་ནག་ལ་དབལ་གྲུ་གསུམ་དུ་བྱས་པ། ཐམས་ཅད་ཀྱང་ཚད་སོར་དྲུག་པ་མགོ་བོ་
དང་སྐེད་པ་རྒྱ་མདུད་ཅན། གྲངས་རིམ་བཞིན་དྲུག་དང་། བཞི་དང་།ལྔ་དང་། གསུམ་སྟེ། གྲུབ་ན་ལས་བྱེད་ཀྱི་ཕུར་པ་ཉི་ཤུ་གཅིག་རེ་དང་བཅས་བཤམས་པའོ། །བརྒྱད་པ་ལྷ་ལ། ལས་སྦྱོར་དང་། སྦྱིན་སྲེག་གི་ལྷའོ། །དང་པོ་ནི། ཞི་ཁྲོ་གང་ལ་བརྟེན་ནས་བྱ་བ་དེའི་གཞུང་བཞིན་ནོ། །གཉིས་པ་ལ།རྩ་བར་སྦྱིན་དང་སྲེག་པའི་ལྷ་གཉིས་ཏེ། །ཞེས་པས། མེ་ལྷ་དང་། སྲེག་ལྷའོ། །དང་པོ་ནི། ལས་བཞི་གང་ཡིན་གྱི་སྐུ་མདོག་ཕྱག་མཚན་ཅན་ཏེ། ཞི་བའི་གཡས་གུནྡྷེ། རྒྱས་པ་རིན་པོ་ཆེའི་སྒྲོམ། དབང་ལ་ཞགས་པ། དྲག་པོ་ལ་ཏྲི་ཤུལ། བཞི་ཀའི་གཡོན་བགྲང་ཕྲེང་། དྲང་སྲོང་གི་ཆས་ཅན་ར་སྐྱེས་ལ་གནས་པའོ། །གཉིས་པ་ནི། ཞི་བ་ལ་རྣམ་སྣང་དང་བུཌྜྷ་ཧེ་རུ་ཀས་གཙོ་བྱས་པའི་ཞི་ཁྲོ། དེ་བཞིན་དུ་རྒྱས་པ་ལ་རིན་འབྱུང་དང་རཏྣ་ཧེ་རུ་ཀ །དབང་ལ་མཐའ་ཡས་དང་པདྨ་ཧེ་རུ་ཀ །དྲག་པོ་ལ་རྡོར་སེམས་དང་བཛྲ་ཧེ་རུ་ཀས་གཙོ་བྱས་པའི་ཞི་ཁྲོ་སྟེ། ལྷ་ཀུན་ཀྱང་སྐུ་མདོག་དཀར་པོ་འཁོར་ལོ་བསྣམས་པ་ལ་སོགས་ལས་གང་ཡིན་གྱི་ཁ་དོག་དང་ཕྱག་མཚན་ཅན་དུ་བསྐྱེད་པའོ། །དགུ་པ་དུས་ནི་ལོ་དང་། ཞག་གཅིག་གི་དབང་དུ་བྱས་ཏེ་རིམ་བཞིན་དབྱར་རམ་སྔ་དྲོ་ཞི་བ།སྟོན་ནམ་ཉིན་ཕྱེད་རྒྱས་པ། དགུན་ནམ་དགོངས་ཀ་དབང་། དཔྱིད་དམ་ནམ་གུང་དྲག་པོའོ། །བཅུ་པ་ལས་རིམ་ལ། སྔོན་དུ་བྱ་བ་དང་། ལས་རིམ་དངོས་གཉིས། དང་པོ་ལ། བཤམ་པ་དང་། ཆོ་གའོ། །དང་པོ་ནི། རྫས་དང་ཡོ་བྱད་བསགས་ལ། ས་གཞི་སྦྱངས། ལས་བཞི་གང་ཡིན་གྱི་ཐབ་བརྩིག་པའམ་བྲིས་པའི་སྟེང་དུ་བསྲེག་ཤིང་བརྩིག །མེ་དར་རིགས་དང་མཐུན་པས་དགབ།མཆོད་གཏོར་དང་བསྲེག་རྫས་རྣམས་བཤམ། ལས་བཞི་གང་ཡིན་གྱི་བྲུབ་ཁུང་དུ་ལིངྒ་བཅུག་པའི་ཁ་ཁྱེར་ལ་སོ་སོའི་ཕུར་བུས་བསྐོར། གཉིས་པ་ནི། ཕྱིར་ཆ་གསུམ་བཏང་ལ། ནང་དུ་ཞུགས་ནས་ཞི་བ་ལ་ཤར་དུ་བལྟ་བ་སོགས་ལས་གང་བྱེད་ཀྱི་ཕྱོགས་སུ་ཁ་བལྟས་ཏེ། འདུག་སྟངས་ཞི་བ་ལ་རྡོར་སྐྱིལ། རྒྱས་པ་ལ་མཉམ་སྐྱིལ། དབང་ལ་པད་སྐྱིལ། དྲག་པོ་ལ་རུས་སྦལ་གྱི་སྟབས་ཀྱིས་འདུག་ནས། མཚམས་བཤགས་དམ་བཅའ་བྱིན་དབབ་མཆོད་པ་བྱིན་རློབ་རྣམས་བྱ། དེ་ནས་
བསྲེག་རྫས་རྣམས་ཉི་ཟླའི་ག་འུར་འབྲུ་ལྔ་བཀོད་ལ་བཞུ་བཏུལ་གྱི་བདུད་རྩིར་དང་། ལས་གཏོར་རྣམས་འབྲུ་གསུམ་མམ་ལྔས་ལས་གང་ཡིན་འགྲུབ་པའི་ནུས་པ་ཅན་དུ་རློབ་པའོ། །གཉིས་པ་ལ། ལས་སྦྱོར་གྱི་ཕྲིན་ལས། ལིངྒ་དགུག་གཞུག་བྱ་བ། སྦྱིན་སྲེག་གི་ལས་རིམ་མོ། །དང་པོ་ནི། འགྲེལ་ཆུང་ལས། ཞི་དང་རྒྱས་ལ་ཞི་བའི་ཚོགས་ལས་ཏེ། །དབང་དྲག་གཉིས་ལ་ཁྲོས་པའི་དཀྱིལ་འཁོར་བྱ། །ཞེས་པ་ལྟར་རམ། གོང་མ་རྣམས། ཞི་ཁྲོ་གང་རུང་རེས་ཀྱང་ལས་བཞི་ཀ་འགྲུབ་པར་བཞེད་པའི་ཕྱིར། གང་བྱེད་ཀྱི་གཞུང་བསྲང་། ལས་དང་མཐུན་པའི་བཟླས་པའི་འཕྲོ་འདུས་བསྐུལ་བའོ། །གཉིས་པ་ནི། ཚོགས་ཐ་མ་དང་། ལིངྒ་བྲུབ་ཁུང་དུ་བཅུག་ལ་དགུག་གཞུག །གཏོར་ཐུན། ཕུར་གདབ། མཚོན་ཆར་དབབ། གྲིས་གཏུབས་ཏེ་བསྲེག་རྫས་དང་བསྲེས་ལ་བཞག་གོ། །གསུམ་པ་ལ། མེ་ལྷ་དང་། སྲེག་ལྷ་གཉིས་ལས། དང་པོ་ནི། མེ་སྦར་ཏེ།ལས་བཞི་གང་བྱེད་ཀྱི་མེ་ལྷ་བསྐྱེད། སྤྱན་དྲང་མཆོད་བསྲེག་གི་རྫས་དང་།དགང་བླུག་ཕུལ་ལ་ཕྲིན་ལས་གཞོལ་བའོ། །དགོས་པ་ནི། དཔེར་ན་ཁ་ཟས་ཀྱིས་ལུས་ཀྱི་འབྱུང་བ་རྒྱས་པར་བྱས་པས། དེ་ལ་དེ་བརྟེན་གྱི་དབང་པོ་དང་རྣམ་ཤེས་རྒྱས་པར་འགྱུར་བ་ལྟར། མེའི་སྒོ་ནས་མེ་ལྷ་ཚིམ་པས། དེའི་སྒོ་ནས་དཀྱིལ་འཁོར་གྱི་ལྷ་རྣམས་ཚིམ་པར་འགྱུར་བའི་ཕྱིར། འདིར་མེ་ལྷ་ལ་མེའི་ཞལ་ཞེས་གསུངས་ཏེ། ཇི་སྐད་དུ། ཞལ་དུ་གྱུར་པའི་མེ་བོས་ལ། །བཟའ་བཏུང་བྲོ་བའི་ཚོགས་རྣམས་ཀྱིས། །ལས་བཞིའི་མཆོད་པ་རབ་ཏུ་སྦྱིན། །ཞེས་པའོ། །གཉིས་པ་ནི། གཞུང་སོ་སོའི་དགོངས་པས་བརྟག་པ་བཞི་སྟེ། མེ་ལྷ་འབར་བའི་རྣམ་པར་བྱས་ལ། དེར་ལྷ་རྣམས་སྤྱན་དྲངས་ཏེ་མཆོད་པ་དང་། དམ་ཚིག་པ་བསྐྱེད་ནས་སྤྱན་འདྲེན་པའི་ཕྱོགས་གཉིས། ཁ་ཅིག་ལས། མེ་ལྷ་ཤར་ལྷོ་མཚམས་སུ་དབང་པོའི་ཚུལ་དུ་བཞག་སྟེ་མེའི་དབུས་སུ་དམ་ཚིག་པ་བསྐྱེད་པ་དང་། ཡང་མེ་ལྷའི་ལྟོ་བར་བསྐྱེད་པ་རྣམས་ལས། འདིར་ཕྱི་མའི་ལུགས་སོ། །དེའང་ལས་བཞི་གང་ཡིན་གྱི་སྲེག་ལྷ་རྟེན་དང་བརྟེན་པར་བཅས་པ་བསྐྱེད་ཅིང་། དབང་བསྐུར། བྱིན་
གྱིས་རློབ། དབབ་དྲངས། བསྡིམ་པ། ཀུན་བཟང་སོགས་ཕྱི་ནང་གིས་མཆོད། རྩ་སྔགས་ལ་ལས་ཀྱི་ཤམ་བུ་བཏགས་ཏེ་དགང་བླུག་དང་བསྲེག་རྫས་དབུལ། བསྟོད་ཅིང་འདོད་དོན་གསོལ་བའོ། །ཚུལ་དེས་ཐོག་མར་ཞི་བའི་ལྷ་ཚོགས་རྣམས་མཆོད་ནས། སླར་ཁྲོ་དཀྱིལ་དུ་གནས་བསྒྱུར་ཏེ་མཆོད་པར་བྱའོ། །བཅུ་གཅིག་པ་ལྷག་མའི་ལས་ནི། ཚོགས་ལྷག་དང་བསྲེག་རྫས་ལྷག་རྣམས་བསྡུས་ཏེ། ལྷག་ཆད་རྒྱས་བསྡུས་གང་རུང་བྱས་པའི་མཇུག་ཏུ།སྔོན་ཚེ་དཔལ་ཆེན་ཧེ་རུ་ཀ །ཞེས་སོགས་ཀྱིས། ཕྲིན་ལས་འཆོལ་ཞིང་དམ་བསྒྲག་གོ། །དེ་ནས་བསྟན་མ་བསྐྱང་། ལྷག་ཆད་བསྐང་། སྲེག་ལྷ་དང་མེ་ལྷ་ཡེ་ཤེས་ལ་གཤེགས། དམ་ཚིག་པ་རང་ལ་བསྡུ། ལས་རྗེས་མི་མངོན་པར་བྱས་ལ་བསྔོ་བ་དང་ཤིས་བརྗོད་བྱ་བའོ། །དེ་དག་ཀྱང་དུས་གང་དང་གང་གི་ཚེ་བྱ་ཞེ་ན། ས་ཆོག་གི་དུས་སུ་ས་ངན་ན་ཞི་བའི། རབ་གནས་ཀྱི་དུས་སུ་རྒྱས་པའི།དབང་བསྐུར་བའི་གོང་དུ་དབང་གི། སློབ་བུ་སྟ་གོན་གྱི་ནུབ་མོ་ཀུན་རྨི་ལྟས་ངན་ན་དྲག་པོའི་སྦྱིན་སྲེག་བྱ་བ་ཡིན་ཏེ། རྡོ་རྗེ་ལས་རིམ་ལས། ས་དང་རབ་གནས་རྣམ་གཉིས་དང་། །བདེ་བ་སྦྱིན་པའི་དུས་ཉིད་དོ། །ཞེས་དང་། མཆོད་བཤགས་སོགས་སྐབས་སུ་བབས་པ་གཞན་གྱི་ཚེ་ཡང་བྱར་རུང་སྟེ། ཐུགས་ཐིག་ལས། སྐབས་ནི་དབང་དང་སྒྲུབ་པ་དང་། །མཆོད་བཤགས་ཚེ་དང་དུས་བབ་ཚེ། །ཞེས་གསུངས་པའི་ཕྱིར། གཉིས་པ་ནང་གི་སྦྱིན་སྲེག་ལ་གསུམ་སྟེ། རྩ་བར། ཏིང་འཛིན་ལྷག་པ་ལོངས་སྤྱོད་ནང་། །ཞེས་སོ། །དང་པོ་ཏིང་ངེ་འཛིན་ལའང་། དེ་ལས། དབུ་མའི་དང་པོ་གཉིས་ཡིན་ཏེ། ཞེས་པས་ཤེས་རབ་ཀྱི་ཧོམ་དང་ཏིང་འཛིན་གྱི་ཧོམ་གཉིས། དང་པོ་ནི། བདག་མེད་རྟོགས་པའི་ཡེ་ཤེས་ཀྱི་མེས་དངོས་མེད་ཀྱི་བག་ཆགས་བསྲེགས་ཤིང་། འཁོར་འདས་གཉིས་མེད་དུ་རྟོགས་པའི་ཤེས་རབ་སྦྱིན་པ་སྟེ། རྒྱས་པ་ལས། སྲིད་གསུམ་སྲེག་པའི་མེ་ཡིན་ཏེ། །ཡིད་ཀྱི་ཡེ་ཤེས་མེ་རུ་འབར། །ཞེས་སོ། །གཉིས་པ་ནི།མཚན་མེད་དེ་བཞིན་ཉིད་ཀྱི་ཏིང་ངེ་འཛིན་གྱི་མེས་སྤྱོད་ཡུལ་མཚན་རྟོག་གི་རྫས་རྣམས་བསྲེག་པ་སྟེ། དེ་ལས། དབང་པོ་དང་བའི་དཀྱིལ་འཁོར་དུ། །
སྤྱོད་ཡུལ་རྫས་རྣམས་བསྡུས་ནས་སུ། །ལྷན་ནེ་ལྷང་ངེའི་འོད་དུ་ཞུ། །ཞེས་སོ། །གཉིས་པ་ནི། མི་རྟོག་པའི་ངང་ལས་རྟོག་ཚོགས་ལྷའི་ཕྱག་རྒྱར་འབར་བའི་མེས་སྤྱོད་ཡུལ་སྦྱོང་བ་སྟེ། སྔ་མའི་འཕྲོས་ལས། ཞི་གྱུར་དབྱིངས་ནས་ཕྱག་རྒྱ་འབར། །ཞེས་སོ། །གསུམ་པ་ནི། བཟའ་བཏུང་ལ་ལས་བཞིའི་བསྒྲུབ་བྱ་བསྡིམས་ནས་བདུད་རྩིར་བསྒྱུར་ཏེ། རང་ལུས་གཞལ་ཡས་ཁང་། ཁ་ཐབ་ཁུང་། ལྕེ་མེ་ལྷ། རང་བཞིན་གྱིས་རྫོགས་པ་དང་ཏིང་ངེ་འཛིན་གྱིས་བཀོད་པའི་སྲེག་ལྷ་རྣམས་ལ། ལག་པའི་དགང་བླུགས་ཀྱིས་ཕུལ་བས། ལས་བཞི་དང་ཚོགས་གཉིས་རྫོགས་པའི་འབྲས་བུ་རྒྱུད་ལ་སྦྱིན་པར་བྱེད་ཅིང་། སྤྱོད་ཡུལ་ཡོངས་སུ་དག་པའི་ཕྱིར་བསྲེག་པ་སྟེ། རྩ་བ་ལས། རང་ལུས་འབྱུང་བའི་དཀྱིལ་འཁོར་ལ། །ཁམས་དང་རྩ་དང་དུར་ཁྲོད་ཀྱི། །གཞལ་ཡས་ཁང་ལ་གོམས་པར་བསྒོམ། །མྱོང་བྱེད་ཀུན་གྱི་ཞལ་བསམ་སྟེ། །རྫོགས་དང་བཀོད་པའི་ལྷ་རྣམས་ཀུན། །ཏིང་འཛིན་གསལ་བའི་ཡིད་ཀྱིས་སྦྱངས། །ཞེས་སོགས་གསུངས་སོ། །གསུམ་པ་གསང་བའི་སྦྱིན་སྲེག་ལ། དེ་ལས། ཁམས་བཞི་ཁམས་གསུམ་གསང་བར་བཤད། །ཅེས་པས།སྟེང་སྒོ་ཁམས་བཞི་དང་། འོག་སྒོ་ཁམས་གསུམ་གྱི་སྦྱིན་སྲེག་གོ། །དང་པོ་ནི།སྒྲོ་མདོ་རླུང་གི་འཁོར་ལོ་ཟླ་གམ་ནི་དབང་། སྙིང་ག་ཆུའི་འཁོར་ལོ་ཟླུམ་པོ་ཞི་བ།ལྐོག་མ་མེའི་འཁོར་ལོ་གྲུ་གསུམ་དྲག་པོ། ལྟེ་བ་ས་འཁོར་གྲུ་བཞི་རྒྱས་པ་སྟེ། དེ་དག་ལས་སོ་སོའི་ཁ་དོག་ཅན་དུ་གནས་པ་ནི་མེ་ཐབ། ཡེ་ཤེས་སྙིང་པོ་ནི་མེ་ལྷ།སྙིང་གའི་མེས་སྤྱི་བོའི་ཧཾ་ཡིག་བཞུ་བའི་འབར་འཛག་གིས་བདེ་ཆེན་ཡེ་ཤེས་རྒྱུད་ལ་སྦྱིན་ཞིང་མཚན་རྟོག་བསྲེག་པའི་ཕྱིར་སྦྱིན་སྲེག་སྟེ། དེ་ལས། སུམ་མདོ་སྙིང་ལྐོག་ལྟེ་འབྱུང་བཞི། །ཁ་དོག་ལས་བཞིའི་དཀྱིལ་འཁོར་ལ། །ཡེ་ཤེས་སྙིང་པོ་མ་ལུས་ཞལ། །ཐུགས་ལས་ཡེ་ཤེས་མེ་འབར་བས། །ལས་ཀྱི་མེ་བསྐུལ་བདེ་བ་དྲང་། །ངེས་པར་ཞལ་དུ་ཆུད་པས་ན། །མ་ལུས་མཉེས་པའི་དགྱེས་པ་ཡིས། །ཕྱོགས་བཅུ་ཀུན་ཏུ་ཁྱབ་པར་གྱུར། །མཚན་མ་རྣམ་རྟོག་ཀུན་སྦྱོང་ཞིང་། །རྟོགས་དཀའི་ཡེ་ཤེས་མངོན་དུ་འགྱུར། །ཞེས་
སོ། །ཡང་ན། གཡས་གཡོན་རོ་རྐྱང་གི་དགང་བླུགས་ཀྱིས་རླུང་དཀྱིལ་བསྐུལ་བས་ལྟེ་བའི་མེ་སྦར། དེས་ཐིག་ལེ་ཞུ་ནས་དྭངས་མ་རྩ་ལམ་དུ་ཆུད་པ་ནི་སྔར་ལྟར་སྦྱིན་སྲེག་སྟེ། ལམ་རིམ་ལས། རཾ་ཡཾ་གཡས་གཡོན་སྦྱིན་སྲེག་ལྡན། །ཞེས་སོ། །གཉིས་པ་ནི། ཡུམ་གྱི་མཁའ་ལས་བཞིའི་ཐབ་ཁུང་དུ་བདེ་བ་རྒྱས་པའི་ལས་ཀྱིས་བསྐྱེད་པ་དང་དབྱིངས་ནས་སྤྱན་དྲངས་པའི་མེ་ལྷའི་ཞལ་དུ། རྡོ་རྗེའི་དགང་བླུགས་ཀྱིས་བྱང་ཆུབ་སེམས་ཀྱི་མཆོད་པ་སྟོབ་པས་རྒྱུད་ལ་བདེ་བའི་ཡེ་ཤེས་སྟེར་ཞིང་ཆགས་རྟོག་རང་རྒྱུད་པ་བསྲེག་པའི་ཕྱིར་སྦྱིན་སྲེག་སྟེ། རྩ་བ་ལས། ཁམས་གསུམ་བཅོ་བརྒྱད་བདག་ཉིད་དེ། །མ་ལུས་རྩ་བར་འདི་ཤེས་བྱ། །གསལ་ལྡན་མའམ་བྱིན་རླབས་ལ། །ལས་བཞིའི་དབྱིབས་ལྡན་ཧོམ་ཁུང་དུ། །ལས་ཀྱི་བདེ་བའི་ལྷ་བསྐྱེད་ཅིང་། །སྟོང་གསུམ་ཡུངས་འབྲུར་འཇུག་ཚུལ་དུ། །དབྱིངས་ནས་མེ་ལྷ་སྤྱན་དྲངས་ཏེ། །ཡུངས་འབྲུ་མེ་ལྷའི་ཞལ་ཉིད་དུ། །རྡོ་རྗེ་དགང་བླུགས་བཅས་པ་ཡིས། །དཀར་ནག་དམར་གྱི་མཆོད་སྦྱར་བས། །རང་བཞིན་རྣམ་པ་གཉིས་ཀྱི་ལྷ། །མཉེས་དང་མགུ་བདེ་ཐོབ་པར་འགྱུར། །ཞེས་སོ། །གཉིས་པ་རྫས་ཀྱི་སྒོ་ནས་ལས་བྱ་བ་ལ། ལིངྒ་བཅའ་བ། དཀྱིལ་འཁོར་བསྐྱེད་པ། བསྒྲུབ་བྱའི་ལས། མཆོད་སྦྱིན་བྱ་བ་དང་ཡོན་ཏན་དང་བཅས་པའོ། །དང་པོ་ནི། བསྒྲུབ་བྱའི་བདུད་རྩི་ལྔ་སྟེ་ཟག་རྫས་སམ། ཉ་ཤ་ཏིལ་སྦྲང་བུ་རམ་སྟེ་ཟས་ལྔ་དང་། གཞན་ཡང་མི་ལ་རྐང་རྗེས་ཀྱི་ས་དང་། མི་མ་ཡིན་ལ་གནས་རྟེན་གྱི་ས་ལ་སོགས་པའི་རྒྱུར་ལིངྒ་ཕོ་མོ་གང་ཡིན་གྱི་མཚན་མ་ཅན་བྱས་ལ། གྲོ་ཤོག་ལ་གནས་ཡིག་སྔར་ལྟར་བྲིས་པ་སོ་སོར་གླན་པའམ། ཡང་ན་ལིངྒ་གནས་ཡིག་དང་བཅས་པ་བྲིས་ལ་བཤད་མ་ཐག་པའི་རྫས་དེ་རྣམས་བྱུགས་ཏེ། ལས་གང་ཡིན་གྱི་བྲུབ་ཁུང་དུ་བཅུག་ནས་དཀྱིལ་འཁོར་གྱི་ཕྱོགས་སོ་སོར་འཇོག །ཁྱད་པར་དྲག་པོ་ལ་ཐོད་པ་མཚན་ངན་ཤིས་པས་དེར་ལིངྒ་མགོ་ལྷོ་ནུབ་དུ་བསྟན་ནས་བཞག་ལ་བྲུབ་ཁུང་དུ་གཞུག་གོ། །དེ་དག་ཀྱང་།བདུད་རྩི་ལྔའམ་ཟས་ལྔ་ལ། །ཞེས་གསུངས་པའི་དོན་ནོ། །གཉིས་པ་ནི།སྔགས་འཆང་རྣམས་ལས་དང་མཐུན་པའི་འདུག་སྟངས་
དང་། སྔགས་ཀྱི་རིང་ཐུང་དྲག་ཞན། དབྱངས་ཀྱི་འགྱུར་སྟངས། སྟོངས་ཀྱི་སེམས་རྣམས་དང་ལྡན་པའི་སྒོ་ནས། ཕྱི་སྣོད་ཀྱི་འཇིག་རྟེན་ལས་བཞིའི་དཀྱིལ་འཁོར་ཡིག་འབྲུ་བཞིའི་དབྱིབས་ཅན་འབྱམས་ཀླས་པར་བསྐྱེད་པ་སྟེ། ཨེ་ཡི་ཚོགས་ཀྱི་དཀྱིལ་འཁོར་མཆོག །ཞེས་པའི་སྐབས་སུ་ཐར་ལོ་འགྱུར་དུ། ཨེ་ཡིག་རྣམ་པའི་འཁོར་ལོ་དང་། །སྡེ་ཚན་དཀྱིལ་འཁོར་གྱི་ནི་མཆོག །ཅེས་འབྱུང་བས་སོ། །དེའང་འདིར་ལས་བཞིའི་གོ་རིམ་འཁྲུགས་སྡེབས་ཀྱི་དབང་དུ་བྱས་ཏེ། ཡ་རཾ་ལ་སོགས་པའི་སྔགས་ཀྱིས་ཞི་བའི་དཀྱིལ་འཁོར་དཀར་པོ་ཟླུམ་པོ། མ་རཾ་གྱིས་རྒྱས་པའི་གྲུ་བཞི་སེར་པོ། བཾ་རཾ་གྱིས་དབང་དམར་པོ་ཟླ་གམ། ཨེ་རཾ་གྱིས་དྲག་པོ་མཐིང་ནག་གྲུ་གསུམ་པ་སྟེ། བཞི་ཀའང་ཡངས་ཤིང་མེ་འོད་འབར་བ་ཅན་ནོ། །འདིར་དབང་དང་ཞི་བ་གཉིས་ཡི་གེའི་དབྱིབས་དང་ཅུང་ཟད་མི་མཐུན་པར་བྱུང་ཡང་སྒྲའི་དོན་དང་སྦྱར་བར་རྗེ་རོང་ཟོམ་བཞེད་པ་ལྟར་སྟེ། ཝཾ་ནི་བནྡྷ་ན་སྡུད་པའམ་འཆིང་བ། ཡ་ནི་ར་ཡ་བ་ཏི་ནི་ཞི་བའི་དོན་ལ་འཇུག་པའི་དབང་གིས་སོ། །དེ་ནས་ཞི་བ་ལ། ཨོཾ་བུཌྜྷ་ཤྲི་ཧེ་རུ་ཀ་བུཌྜྷ་ཀྲོ་དྷཱི་ཤྭ་རཱི་སྟྭཾ་ཧཱུཾ་ཧ་ཧེ་ཕཊ་བྷྱོཿརཾ།ཞེས་བརྗོད་པས་ནང་བཅུད་ཀྱི་སེམས་ཅན་ཐམས་ཅད་བུཌྜྷ་ཧེ་རུ་ཀས་གཙོ་བྱས་པའི་ཁྲག་འཐུང་ང་བརྒྱད་དཀར་པོ་ཞི་ཚུལ་ཅན་འཁོར་ལོ་བསྣམས་ལ་ཤ་ཐག་ཏུ་བསྐྱེད། དེ་བཞིན་དུ་སྔགས་བུཌྜྷའི་གནས་སུ་རཏྣ་སོགས་དང་། ལྷ་རཏྣ་ཧེ་རུ་ཀས་གཙོ་བྱས་པ་སོགས་རིགས་འགྲེ་བར་འགྱུར་རོ། །གསུམ་པ་ནི། བ་ཧཱུའི་སྔགས་ཀྱིས་ལྷ་ལས་ལ་གཟུད། བི་ཤྭས་སྤྲུལ་པ་སྤྲོ། བསྒྲུབ་བྱ་བཀུག་སྟེ་ལིངྒ་ལ་བསྡིམ། དེ་ནས་ལས་གང་ཡིན་གྱི་ཕུར་བུ་རིགས་མཐུན་གྱི་ཀཱི་ལ་ཡར་བསྐྱེད་ནས་དབང་བསྐུར། བྱིན་གྱིས་རློབ། ཕུར་བསྐུལ་དང་། གྷ་ཏ་ཡའི་སྔགས་ཀྱི་མཇུག་ཏུ་ལས་བཞིའི་སྤུ་གྲི་བཏགས་ཏེ། ཞི་བ་ལ་ཡན་ལག་ལྔ། སྙིང་ག་དང་དྲུག །རྒྱས་པ་ལ་ཡན་ལག་བཞི། དབང་ལ་དབང་པོ་ལྔ། དྲག་པོ་ལ་གནས་གསུམ་དུ་གདབ་པའོ། །དེ་ནས་ཧྲཱྀཿཥྚཱིའི་སྔགས་ཀྱིས་གྲི་དང་། ཨོཾ་བྷྲཱུཾ་སོགས་ཀྱིས་མཚོན་ཆས་གཏུབས་ཏེ་ལིང་རོ་ཚོ་གསུམ་དུ་བཅད་ལ། གཅིག་ལ་སྟོབ་པ་བྱའོ། །བཞི་པ་ནི། ཚོ་གཅིག་བསྲེག་རྫས་
ལ་བསྲེས་ཏེ། ལས་བཞིའི་ཧོམ་དུ་སྟོངས་ཀྱི་སེམས་བཞིས་ཟིན་པའི་སྒོ་ནས། བདེ་བར་གཤེགས་པ་ལ་མཆོད་ཅིང་། མ་མོ་དང་མཁའ་འགྲོ་རྣམས་ལ་སྦྱིན་པས་གཏུམ་ཆེན་རྔམ་པའང་ལྷན་ནེར་འགྱུར་བ་སོགས་ལས་གང་བརྩམས་པའི་ཡོན་ཏན་རྣམས་ཐོབ་པར་འགྱུར་རོ། །གསུམ་པ་ལུ་གུ་རྒྱུད་ཀྱི་སྒོ་ནས་བྱ་བ་ནི། ལིང་རོ་ཚོ་གཅིག་དབུས་སུ་སྤུངས་པའི་མཐར།མཆེད་ཀུན་ལག་གཡས་སྟེང་དུ་བྱས་ནས་བསྣོལ་བའི་ཞི་རྒྱས་དབང་དྲག་བཞི་ལ་རིམ་པར་མཛུབ་གུང་སྲིན་ལག་མཐེ་ཆུང་རྣམས་ལུ་གུ་རྒྱུད་དུ་སྦྲེལ་ཞིང་། བྲོ་ར་ལས་གང་ཡིན་གྱི་དབྱིབས་དང་མཐུན་པར་བཅས་ནས། སྔར་བཞིན་ཡ་རཾ་སོགས་ཀྱིས་ལས་ཀྱི་དཀྱིལ་འཁོར་མེ་འབར་བ་དང་བཅས་པའི་ནང་དུ། ལས་གང་ཡིན་གྱི་ལྷ་ཚོགས་སུ་བདག་ཉིད་བསྐྱེད་ལ་གཏི་མུག་རྡོ་རྗེ་ཞེས་སོགས་ཀྱི་ཚིག་དང་སུམྦྷའི་སྔགས་ཀྱིས་བསྐུལ་ཏེ་བྲོ་བརྡུངས། ལྷ་རྣམས་ཀྱི་འོད་ཟེར་ལས་མཐུན་གྱི་ཁ་དོག་ཅན་སྒྲུབ་བྱ་ལ་ཐིམ་པས་ལས་གང་ཡིན་གྲུབ་པར་བསམ་པ་སྟེ། ལས་སོ་སོའི་སྤུ་གྲིའི་སྔགས་རྣམས་བརྗོད་ཅིང་ཕྱག་རྒྱ་སྤྲུགས་ཏེ་ཤིག་ནས། ལིང་རོ་དེ་ཉིད་ཞི་བ་ལ་ལམ་གྱི་དཀྱིལ་དང་། རྒྱས་པ་ལ་མཛོད། དབང་ལ་རང་གི་མལ་འོག །དྲག་པོ་ལ་མི་མ་ཡིན་གདུག་པ་ཅན་གནས་པའི་སར་ལས་མཐུན་གྱི་བྲུབ་ཁུང་བྲུས་ལ་ཚུལ་བཞིན་གནན་པར་བྱའོ། །དེའང་ཧོམ་དང་རྫས་ཀྱི་སྒོ་ནས་ལས་ཟིན་རྗེས་འདིས་མཐའ་བསྡུས་ན་ལས་བྱས་པ་གསོར་མི་རུང་བར་འགྱུར་བའི་ཕྱིར། ཁྲོ་བོ་སྒྲུབ་པའི་ལས་ཀྱི་གཙོ་བོ་ནི་འདི་ཡིན་ནོ། །ཞེས་བྲོ་གླུ་ལ་བསྔགས་པར་མཛད་དོ། །འོ་ན་འདིར་ཁྲག་འཐུང་གཞན་རྣམས་ལ་བྲོ་བྱུང་ནས་སྒོམ་ལ་མི་འབྱུང་བ་གང་ཞེ་ན། སྔ་རབས་པ་དག་ལས་གང་བྱེད་ཀྱང་སྒོམ་དགོས་པས་སྤྱི་ལ་ཁྱབ་པའི་ཕྱིར་དགོས་སུ་མ་སྨོས་སོ་གསུང་། ཁོ་བོ་ནི་དེ་ཡང་མི་སྤང་མོད་ཀྱི། འོན་ཀྱང་རྒྱུད་གཞན་གྱིས་ཁ་བསྐང་ན་ལེགས་པར་མཐོང་སྟེ། ཕྱི་ཐ་བཻ་རོའི་འགྱུར་ལས། རྟ་གདོང་ལ་སོགས་བྲོ་གར་གྱིས། །འགུགས་དང་འཆིང་བ་བསྡོམ་པ་དང་། །སྤེལ་བར་བྱེད་པའི་སྒྲ་འབྱིན་འགྲུབ། །ཅེས་གསུངས་པའི་ཕྱིར། བཞི་པ་མཆོད་རྟེན་གྱི་སྒོ་ནས་བྱ་བ་ནི། བདག་ཉིད་ཞི་བའི་ལས་ལ་སྣང་མཛད། རྒྱས་པ་ལ་རིན་འབྱུང་། དབང་ལ་རྟ་མགྲིན། དྲག་པོ་ལ་
བཛྲ་ཧེ་རུ་ཀར་བསྐྱེད་ནས་རིགས་སོ་སོའི་སྔགས་ཀྱིས་མཆོད་རྟེན་དཀར་པོ་ཟླུམ་པོ་སོགས་ལས་གང་ཡིན་གྱི་དབྱིབས་མདོག་ཅན་དུ་བཏབ་ལ། དེའི་ནང་དུ་རིགས་དང་མཐུན་པའི་ལྷ་བསམ་པའི་འོད་ཀྱིས་བསྒྲུབ་བྱ་བཀུག་ནས་མཆོད་རྟེན་གྱི་འོག་ཏུ་མནན་ལ། འོད་དེས་རིག་པས་ལས་གང་ཡིན་འགྲུབ་པར་བསམ་པ་སྟེ། རྒྱས་པ་ལས། དྲག་པོ་གཏུམ་པོ་འདུལ་བའི་ཕྱིར། །བདག་ཉིད་དྲག་པོར་བསྒོམས་ནས་ནི། །ཆོས་སྐུ་ནག་པོ་འོད་འབར་གྱིས། །བགེགས་ཀྱི་ལིངྒ་གནན་པར་བྱ། །ཞེས་སོགས་དང་། སྐུ་གདུང་ལས་ཕྲེང་ལས། ཞི་ལ་སྣང་མཛད་གསང་སྔགས་ལྡན། །ཤཱནྟིང་ཀུ་རུ་སྭཱ་ཧཱས་མཛེས། །ཆོས་སྐུ་ཐིག་ལེ་འོད་དཀར་གྱིས། །གཟས་བཀུག་གདན་བྱས་འོད་ཐིམ་ཞིང་། །ཞེས་སོགས་སོ། །དེའང་མཆོད་རྟེན་གྱི་རྒྱུ་ནི། ས་ལ་དངོས་སུའམ།འབྱུང་བ་གཞན་ལ་ཏིང་ངེ་འཛིན་གྱིས་འདེབས་པ་གང་ཡང་རུང་སྟེ། སྤྱན་འགྲེལ་ལས། མཆོད་རྟེན་འབྱུང་བ་གང་ལ་འདེབས་ཀྱང་། །ཞེས་དང་། འཇིམ་པ་ལ་དངོས་སུ་མི་འདོད་པ་མ་ཡིན་ཏེ། ཞེས་འདམ་ཁ་དང་། རྒྱུད་ཕྱི་མའི་ལུང་དྲངས་ལ་དངོས་སུ་བཞེངས་ལ་ཐབ་ཁུང་དུ་བྱས་ཏེ་ལས་བཞིའི་སྦྱིན་སྲེག་བྱ་བར་ཡང་བཤད་དོ། །ལྔ་པ་ལ། ཕྱག་རྒྱ་བཅས་པའི་དང་། བསྒྱུར་བའི་སྒོ་ནས་བྱའོ། །དང་པོ་ནི། དཔལ་ཧེ་རུ་ཀའི་ལས་བཞིའི་ཕྱག་རྒྱ་བཅའ་བ་སྟེ། རྒྱས་པ་ལས། ཡན་ལག་སྙིང་པོ་རྩེ་གཅིག་དང་། །རྩེ་ལྔ་རྩེ་དགུ་བཅུ་གཅིག་ཏུ། །ལས་རྣམས་སོ་སོར་རབ་ཏུ་བསྒོམ། །ཞེས་པའི་དོན་སྤྱན་འགྲེལ་ལས། ལས་ཀྱི་ཕྱག་རྒྱ་འདི་མགོན་པོ་རྡོ་རྗེ་རྩེ་གཅིག་པར་བསམ་པ་དང་བཅའ་བ་དང་། གཞན་སོར་མོ་གཡས་གཡོན་དབྲི་བསྣན་གྱིས་རྩེ་ལྔ་པ་དང་། དགུ་པ་དང་། བཅུ་གཅིག་པ་ནི། ཞི་རྒྱས་དབང་དྲག་གི་རིམ་པ་བཞིན་ནོ། །ཞེས་སོ། །གཉིས་པ་ནི། རྒྱས་པ་ལས། རྡོ་རྗེ་ལན་གསུམ་གསོར་བ་ཡིས། །ལྷ་མོ་ཀླུ་མོ་རིགས་ངན་མོ། །དམ་ཅན་རྣལ་འབྱོར་དབང་དུ་འགྱུར། །ཞེས་ཀུན་བཟང་ཡབ་ཡུམ་ཁྲོས་པའི་སྐུར་བསྐྱེད་ལ་གཟུངས་མ་དམ་ཅན་དབང་དུ་བྱ་བ་དང་། དེ་བཞིན་དུ་རིགས་ཀྱི་ཧེ་རུ་ཀ་བཞིར་
བསྐྱེད་ནས་སོ་སོའི་ཕྱག་རྒྱ་བསྒྱུར་བས་ལས་བཞི་བསྒྲུབ་པའོ། །གཉིས་པ་གཙོ་སེམས་ལ། དོན་གྱི་སེམས་དང་། སྟོངས་ཀྱི་སེམས་སོ། །དང་པོ་ནི། བདེན་པ་དབྱེར་མེད་སྤྱོད་ཡུལ་དང་བྲལ་བའི་དོན་ཁོང་དུ་ཆུད་ཅིང་བྱང་ཆུབ་ཀྱི་སེམས་དང་ལྡན་པ་ནི་ལས་བཞི་ཀ་ལ་ཁྱབ་བྱེད་དུ་དགོས་པ་རྒྱུའི་སེམས་ཏེ། སྦྱིན་སྲེག་རྩ་བ་ལས། རང་རིག་སངས་རྒྱས་ཀུན་གྱི་དངོས། །ཐམས་ཅད་རང་དབང་བསྒྱུར་བདག་ཕྱིར། །སྒྲུབ་པའི་གཙོ་བོར་འདི་གསུངས་སོ། །ཞེས་སོ། །འདི་ལྟར་ལྡན་ན་ལས་བཞི་ཀ་ལྷུན་གྲུབ་ཏུ་འགྲུབ་པར་གསུངས་ཏེ།སྤྱན་འགྲེལ་ལས། རང་རིག་པ་ཉིད་ཡེ་ཤེས་སྒྱུ་མར་རང་གསལ་བར་རྟོགས་པའི་རིག་པས། རིག་པ་མཉམ་པའི་དབྱིངས་ཉིད་ལས། གཞིའི་དངོས་གཞི་ཡིན་པར་རྟོགས་པས་མ་འདྲེས་ལ་ཡོངས་སུ་རྫོགས་པར་རིག་ནས་ལས་གང་བྱེད་ཀྱང་སྩོལ་བར་ཐལ་བ་མེད་དེ། བྱས་ལ་མི་འཛིན་པར་དོན་མཛད་པས་བཞི་ཀའི་འབྲས་བུ་འགྲུབ་པའང་བྱས་ནས་བྱུང་བ་མིན་ཏེ། ལྷུན་གྱིས་གྲུབ་པར་ཤར་པའོ། །དེ་བས་ན་ལས་གཅིག་གིས་འབྲས་བུ་བཞི་འགྲུབ་པའང་མི་འདོད་པ་མ་ཡིན་ནོ། །ཞེས་སོ། །གཞན་དུ་མཆོད་རྟེན་གྱི་སྒོ་ནས་ལས་བྱ་བའི་སྐབས་དོན་གྲུབ་ཀྱི་ཏིང་ངེ་འཛིན་གྱི་སྒོ་ནས་བཏབ་ཀྱང་ལས་བཞི་ཀ་འགྲུབ་པར་གསུངས་སོ། །གཉིས་པ་ནི།མཐུན་པའི་གྲོགས་བྱེད་པའི་ཕྱིར་རྐྱེན་གྱི་སེམས་ཏེ། ལས་བཞིའི་ཀུན་ཏུ་སློང་བའི་བསམ་པའོ། །དེ་ཡང་ཞི་བ་ལ་ཞི་ཞིང་དྭངས་པ། རྒྱས་པ་ལ་སྤྲོ་ཞིང་དགའ་བ།དབང་ལ་ཆགས་ཤིང་ཞེན་པ། དྲག་པོ་ལ་ཞེ་སྡང་ཁྲོས་པའི་སེམས་ཏེ། འདི་ཉིད་ལས། དང་བས་དགའ་བ་ཆགས་པ་དང་། །ཁྲོས་པས་ཀཱ་ལི་རབ་ཏུ་བྱ། །ཞེས་སོ། །གསུམ་པ་གཟུངས་མ་ནི། འདི་ཉིད་ལས། ལྗོན་པ་དང་ནི་ལྕུག་ཕྲན་ཚལ། །སྡོང་གཅིག་དང་ནི་མེས་རེག་དང་། །ཞེས་པའི་དོན་འགྲེལ་ཆུང་དུ།ཞི་རྒྱས་དབང་དྲག་ཕྱི་ནང་གསང་བའི་གནས། །ཞེས་གསུངས་པའི་སྐབས། ཕྱི་གནས་དང་། ནང་ཏིང་ངེ་འཛིན་བཞི་ལ་སྦྱར་ཞིང་། གསང་བའི་སྐབས་སུ་གཟུངས་མ་ལ་ངོས་བཟུང་སྟེ། དེ་ལས། མ་རྨས་པ་དང་པུ་ཏྲ་མང་འཕེལ་དང་། །སྐྱེ་བརྒྱུད་མེད་དང་བཀྲ་མི་ཤིས་གསང་བ། །ཞེས་གསུངས་པའི་
ཕྱིར། དེ་ཡང་ཞི་བའི་ཡུམ་ལྗོན་ཤིང་ལྟ་བུ་ནི། དུང་ཅན་མའི་རིགས་བཞིན་དང་ལུས་མཛེས་པ་ལ་སོགས་པའི་མཚན་ཉིད་ཅན་ཏེ། སྒྱུ་འཕྲུལ་རྡོ་རྗེ་ལས། མདོག་དཀར་མོ་བང་ ལུས་ཆུང་སྐད་ཆེ་ལ། །བཞིན་ལུས་གཙུག་མཛེས་ཤིང་ཕུད་གཡས་སུ་འཁྱིལ། །ཡན་ལག་ཕྲ་འཇམ་སྐད་གསལ་ཞིང་། །རླུང་དཀར་ཡིན་མི་སྐྱོ་བས་ལྕི་བས་ཞི་བ་བྱ། །ཞེས་སོ། །རྒྱས་པའི་ཡུམ་ལྕུག་ཕྲན་གྱི་ཚལ་ལྟ་བུ་ནི། བན་གླང་ཅན་གྱི་རིགས་ཤ་རྒྱས་ཤིང་། སྤུན་མང་བ་ལ་སོགས་པ་སྟེ། དེ་ལས། ཟླ་དང་ཡན་ལག་མང་བ་དང་། །ཕྲ་ཞིང་ཤད་ལ་ཟབས་སུ་རིང་། །བཞིན་ལུས་སེར་ཞིང་གྲུ་བཞིར་གནས། །རྣ་འཕྱང་ཤ་དང་ནུ་མ་རྒྱས། །འཕེལ་བའི་དུས་སུ་འདི་དག་གཟུང་། །དབང་གི་ཡུམ་སྡོང་གཅིག་ལྟ་བུ་ནི། པདྨ་ཅན་གྱི་ལུས་བཞིན་ལུས་མཛེས་ཤིང་སྤུན་ཟླ་མེད་པ་ལ་སོགས་པ་སྟེ། དེ་ལས། བཞིན་མདོག་པད་འདྲ་དབྱིབས་སོགས་ཀ་མ། །སྨིན་དཀྱིས་རིང་ལ་ལུས་སྟོད་སྨད་ཕྱེད། །ལུས་ལ་ཆུ་ཀླུང་དྲི་ཞིམ་ཞིང་། །བདེ་བ་བསྐྱེད་པའི་མར་ལྡན་ཞིང་ཡལ་སྤུན་དང་བུ་ག་མེད། །འདི་ནི་སྡུད་པའི་མཆོག་ཏུ་འགྱུར། །ཞེས་སོ། །དྲག་པོའི་ཡུམ་ཤིང་མེས་རེག་པ་ལྟ་བུ་ནི། རི་མོ་ཅན་གྱི་རིགས་མདོག་ནག་ཅིང་ངག་གཏུམ་པ་ལ་སོགས་པ་སྟེ། དེ་ལས། མདོག་ནག་མོ་གྲུ་བཞིན་དབྱིབས་ གསུམ་རྩིད་མགོ་སྐྲ་ནག་ཅིང་རྩུབ་མ། །ཁྲོ་གཉེར་དང་བྱིས་པའི་གྱོལ་བག་ཆགས་པ་སོགས་ལུས་ལྡན་ཞིང་། །གཏུམ་ཞིང་བརླང་ཚིག་འཛེམ་བག་མེད། །གཙང་སྨེའི་རྟོག་བྲལ་གསོད་པར་བཤད། །ཅེས་སོ། །བཞི་པ་གང་གི་ཚེ་བྱ་བའི་དུས་ནི། ལས་སོ་སོའི་ཕྱི་ནང་གི་གདུལ་བྱ་གང་དང་གང་འདུལ་བའི་དུས་ལ་ནམ་བབས་ན་བྱ་བ་སྟེ། ཐུགས་ཐིག་ལས། ངོ་བོ་རྗེས་སུ་ཞི་བ་གཉིས། །ཕྱི་ལ་ནད་བགེགས་དགྲ་ཞི་དང་། །ནང་ལ་ཉོན་མོངས་རྟོག་ཞི་བ། །རྒྱས་པ་གཉིས་པོ་གསོ་དང་འཕེལ། །ན་ཤི་ལོ་ཐོག་སྲིའུ་གསོ། །ཚེ་དང་ལོངས་སྤྱོད་རིགས་བརྒྱུད་དང་། །བསོད་ནམས་བཞི་པོ་ནང་འབྲས་བུ། །དབང་ནི་དགུག་དང་བསྡུ་བ་གཉིས། །ཕྱི་རོལ་དྷ་རའི་རྣམ་པ་དགུག །མི་མཐུན་རྣམ་གཉིས་དབང་པོ་བསྒྱུར། །
རང་སེམས་འབྲས་ལྔ་བསྡུ་བར་བྱ། །མངོན་སྤྱོད་བསྐྲད་དང་གནན་པ་དང་། །སྨྱོ་འབོག་བྱད་དང་བསྐམས་པ་དང་། །རྨོངས་དང་བརྟན་པོ་རྒྱུད་གཞན་ལའོ། །རང་གི་ཕྱི་ནང་དགྲ་བགེགས་འཇོམས། །ཞེས་སོ། །བཞི་པ་བྱེད་ཚུལ་གྱི་ཁྱད་པར་ནི། དེ་ལས། ཁྱད་པར་ཟག་བཅས་བར་ཆད་མེད། །མཐར་ཕྱིན་ལམ་གྱི་བྱེ་བ་འམ། །ཤེས་རབ་དབང་པོ་རྣམ་གསུམ་གྱིས། །ནུས་མཐུ་བྱིན་རླབས་ཡུལ་ངོ་བོ། །ཐབས་དང་གཞི་ཡི་ཁྱད་པར་ལ། །སྐས་ཀྱི་གདང་བུ་ཇི་ལྟ་བའོ། །ཞེས་སོ། །ལྔ་པ་སྐྱོན་ནི། དོན་གཉིས་མི་འགྲུབ་པ་ལ་སོགས་པ་སྟེ། དེ་ལས། མི་སྐོང་མི་འབྱོར་མི་རྫོགས་དང་། །དོན་གཉིས་མི་འགྲུབ་དེ་ཡི་སྐྱོན། །ཞེས་སོ། །དྲུག་པ་ཡོན་ཏན་ནི། དེ་ལས་བཟློག་པས་བདག་གཞན་གྱི་དོན་འགྲུབ་པ་སྟེ། འདི་ལྟར། བདེ་བ་དང་། ལོངས་སྤྱོད་པ་དང་། དབང་བསྒྱུར་བ་དང་། འདུལ་བའི་སྒོ་ནས་སོ། །དེ་ལྟར་ཡང་སྔ་མ་ལས། དེ་ལས་བཟློག་པའི་ཚུལ་ལྡན་པ། །ཡོན་ཏན་ཉིད་དུ་ཤེས་པར་བྱ། །ཞེས་སོ། །བདུན་པ་དོན་དུ་གཉེར་བ་སྒྲུབ་པ་ལ་དྲུག་ལས། དང་པོ་དགོས་ཆེད་ནི། གང་དོན་དུ་གཉེར་བའི་བསྒྲུབ་བྱ་གཉིས།མངོན་དུ་འགྱུར་བའི་ཆེད་དུ་སྟེ། ཐུགས་ཐིག་ལས། ཐུན་མོང་མཆོག་གི་དངོས་གྲུབ་རྣམས། །བདག་གཞན་དོན་ཐོབ་བཞི་ཡི་ཕྱིར། །ཞེས་སོ། །གཉིས་པ་ངོ་བོ་ནི། དམིགས་པའི་ཡུལ་ལ་འཇུག་པ་སྟེ། དེ་ལས། གང་གིས་གང་ཐོབ་འདོད་པ་དེ། །ཡན་ལག་ཀུན་ལྡན་གཉེར་བོད་པའོ། །ཞེས་སོ། །གསུམ་པ་སྒྲ་དོན་ནི། སིདྡྷིའི་སྒྲ་ལས་དངོས་གྲུབ་སྟེ་བསྒྲུབ་བྱའོ། །སཱ་དྷ་ནའི་སྒྲ་ལས་ཀུན་ཏུ་ལེན་པ་སྟེ། འདིས་འདོད་པའི་དོན་ལེན་ཅིང་ཐོབ་པར་བྱེད་པའམ་སྒྲུབ་པར་བྱེད་པའི་ཕྱིར་སྒྲུབ་པའོ། །དེ་སྐད་དུའང་ཧེ་རུ་ཀ་འདུས་པ་ལས། རིག་འཛིན་ལམ་དང་འབྲས་བུ་དང་། །ཚེ་དང་པྲ་དང་རོ་ལངས་དང་། །རྐང་མགྱོགས་མཁའ་འགྲོ་ལ་སོགས་པ། །བསྒྲུབས་པས་སྒྲུབ་པ་ཉིད་དུ་བཤད། །ཅེས་སོ། །བཞི་པ་རྣམ་གྲངས་ལ། དངོས་དང་། ཞོར་ལ་དུས་སོ། །དང་པོ་ལ། བསྒྲུབ་པ་དང་། དེའི་ཆ་རྐྱེན་ནོ། །དང་པོ་སྒྲུབ་པ་ལའང་། ཐུན་མཆོག་གཉིས་ཀྱི་ཁྱད་པར་དང་། ཁྱད་
པར་ཅན་གྱི་བསྒྲུབ་པ་བཤད་པའོ། །དང་པོ་ནི། གང་ཞིག་ལྷ་ཆེན་པོ་སོགས་འཇིག་རྟེན་འདིའི་དགོས་པ་གཙོ་བོར་བསྒྲུབ་པ་ནི་ཐུན་མོང་། རྡོ་རྗེ་སེམས་དཔའ་ལ་སོགས་པ་འདས་པ་གཙོ་བོར་བསྒྲུབ་ན་མཆོག་གི་བསྒྲུབ་པའོ། །ཡང་སྒྲུབ་ཐབས་འགའ་ཞིག་གི་སྒོར་ཞུགས་ནས་མཐར་ཕྱིན་པར་བསྒྲུབས་ཀྱང་དངོས་སུ་མྱང་འདས་མི་ཐོབ་ན་ཐུན་མོང་། ཡང་སྒྲུབ་ཐབས་འགའ་ཞིག་གི་སྒོར་ཞུགས་ནས་མཐར་ཕྱིན་པར་བསྒྲུབས་པས་དངོས་སུ་མྱང་འདས་ཐོབ་པ་ནི་མཆོག་གི་བསྒྲུབ་པའོ། །གཉིས་པ་ལ། ཐུན་མོང་དང་། མཆོག་གི་བསྒྲུབ་པ་བཤད་པའོ། །དང་པོ་ནི། སྤྱིར་རྒྱུད་རྣམས་སུ། ཐུན་མོང་གི་དངོས་གྲུབ་ལས་ཆེན་བརྒྱད་དང་། གྲུབ་ཆེན་བརྒྱད་གསུངས་ཏེ། དེ་ལ་ལས་བརྒྱད་ནི། ཧེ་བཛྲ་ལས། དབང་དང་། མངོན་སྤྱོད་དང་། དགྲའི་སྡེ་འཇིག་པ་དང་། བསྐྲད་པ་དང་། གསད་པ་དང་། དགུག་པ་དང་། ཞི་བ་དང་། རྒྱས་པར་ཡང་དག་པར་འགྲུབ་པར་འགྱུར་རོ། །ཞེས་སོ། །གྲུབ་པ་བརྒྱད་ནི། གུར་ལས།གང་ཕྱིར་དེ་ནི་དཀའ་བ་མིན། །མིག་སྨན་དང་ནི་རྐང་མགྱོགས་དང་། །རལ་གྲི་དང་ནི་ས་འོག་འགྲུབ། །རི་ལུ་དང་ནི་མཁའ་སྤྱོད་ཉིད། །མི་སྣང་བ་དང་བཅུད་ཀྱིས་ལེན། །གར་ཕྱིར་དེས་ནི་རྡོ་རྗེ་འཛིན། །མཉེས་པར་བྱས་ལས་མྱུར་དུ་འཐོབ། །ཅེས་གསུངས། ཁྱད་པར་གསང་བ་སྒྱུ་འཕྲུལ་པའི་ལུགས་ལ་བཤད་རྒྱུད་རྒྱས་པར་ཐུན་མོང་གི་དངོས་གྲུབ་མང་དུ་གསུངས་ཏེ། འདི་ལྟར་ཁོག་གཞུང་ལས། རོ་ལངས་ཚེ་དང་པྲ་བསྒྲུབ་དང་། །ལྷ་ཆེན་པོ་དང་རྒྱལ་པོ་བཞི། །གདུག་པ་ཀླུ་འདུལ་རྒྱལ་བློན་གྱི། །ཆུང་མ་དབང་དུ་བྱ་བ་གཉིས། །ཡུལ་ཁམས་ཅེ་སྤྱང་རྐང་མགྱོགས་བསྐྲད། །མི་སྣང་གཟུགས་བསྒྲུབ་ལྷ་ཀླུ་མོ། །རྒྱལ་བློན་དམག་དཔོན་ཞང་བློན་བསྒྲུབ། །ཚེ་འདིའི་ཆེད་ཕྱིར་འཇིག་རྟེན་པའོ། །ཞེས་གསུངས་ཀྱང་། རྩ་བའི་རྒྱུད་འདིར་ཐུན་མོང་གི་སྒྲུབ་པ་བཅུ་དགུ་གསུངས་ཏེ།གང་ཞེ་ན། ཡོན་ཏན་འབྱུང་བའི་དངོས་གྲུབ་དྲུག །འབྱུང་ལྔའི་དངོས་གྲུབ་ལྔ། ལས་ཕྲན་ཚེགས་ཀྱི་དངོས་གྲུབ་བརྒྱད་བསྒྲུབ་པའོ། །དང་པོ་ནི། བདུད་རྩིར་འགྱུར་ཞིང་འབྱུང་བ་དང་། །བཞི་བརྒྱ་
རྩ་བཞིའི་ནད་སེལ་ཞིང་། །ལོངས་སྤྱོད་འབྱུང་ཞིང་ངན་སོང་སྦྱང་། །ཅི་ཡང་གཞན་དུ་འགྱུར་བ་འགྲུབ། །ཅེས་པས།ཟས་དུག་ཅན་སོགས་བསྒྱུར་གཞི་ལ་ཡི་གེ་བཀོད་དེ་འཕྲོ་འདུའི་སྒོ་ནས། དུག་བདུད་རྩིར་བསྒྱུར་བ་དང་། འདོད་བྱ་གཞན་ཡང་ཇི་ལྟར་དམིགས་པ་བཞིན་འགྲུབ་པ་དང་། ནད་ཞི་བ་དང་། ལོངས་སྤྱོད་འབྱུང་བ་དང་། ངན་འགྲོའི་སྒྲིབ་པ་སྦྱོང་བ་དང་། བྱེ་མ་ལས་གསེར་དང་སོལ་བ་ལས་ལྗོན་པ་སོགས་སྣང་བ་མི་མཐུན་པ་གཞན་དུ་འགྱུར་བ་རྣམས་སོ། །གཞན་ཡང་བཤད་རྒྱུད་དང་སྦྱར་ཏེ་བཤད་ན། རྒྱས་པའི་ལེའུ་བདུན་ཅུ་པར་ཐུན་མོང་གི་བདུད་རྩི་རོ་ལངས་སྒྲུབ་པ་བསྟན་པ་ནི་རྐང་པ་དང་པོ་གཉིས་ཀྱི་དོན་དུ་བཞེད་ཅིང་། འདི་ཉིད་ལས།ཡིད་བཞིན་སྐུ་དང་བདུད་རྩི་འགྲུབ། །ཅེས་པའང་སྦྱར་དུ་རུང་ངོ་། །ཞེ་གཅིག་པར་རྡོ་རྗེ་རིགས་ཀྱི་རྐང་མགྱོགས་ཅེ་སྤྱང་དང་། སངས་རྒྱས་རིགས་ཀྱི་རྒྱལ་པོ།རིན་ཆེན་རིགས་ཀྱི་བློན་པོ་ནོར་མང་། པད་རིགས་ཀྱི་ཞང་བློན་དབང་ཆེན།ལས་རིགས་ཀྱི་དམག་དཔོན་སྒྲུབ་པ་རྣམས་གསུངས་པ་ལས། འདིར་རྐང་པ་གསུམ་པའི་ལོངས་སྤྱོད་འབྱུང་བ་ནི་གཙོ་བོར་རིན་ཆེན་རིགས་ཀྱི་སྒྲུབ་པ་དང་། ངན་སོང་སྦྱོང་བ་ནི་ཅེ་སྤྱང་སྒྲུབ་པའི་སྐབས་ཀྱི་ཨ་ལ་སེམས་སྦྱངས་ནས་ཧཱུཾ་དུ་བསྒོམས་ཏེ་བདག་ལུས་སྦྱང་བས་བསྟན་པར་བཞེད་དོ། ཅི་ཡང་གཞན་དུ་འགྱུར་བ་ནི། ལེའུ་སོ་བརྒྱད་པ་ནས་རྐང་མགྱོགས་དང་རི་ལུ་མི་སྣང་བསྒྲུབ་པ། རེ་བཞི་པ་ནས་ཚེ་སྒྲུབ་པ། རེ་ལྔ་པ་ནས་པྲ་སྒྲུབ་པ་སོགས་མང་དུ་གསུངས་པ་དང་།འདི་ཉིད་ལས། ཆོས་ཀྱི་དངོས་གྲུབ་ཐོབ་པར་འགྱུར། །ཞེས་དང་། ཐམས་ཅད་ཐམས་ཅད་འགྲུབ་པར་འགྱུར། །ཞེས་བྱ་བ་རྣམས་སོ། །གཉིས་པ་ནི།ནམ་མཁའ་རྡོ་རྗེ་སྲ་འབྱུང་ཞིང་། །འབར་ནས་མེ་ཡང་འཚིག་པ་དང་། །ཆུར་འགྱུར་འབབ་པའང་དེ་བཞིན་ཏེ། །འཇིག་རྟེན་ཁམས་ནི་འཐོར་བ་དང་། །ཐམས་ཅད་སྟོངས་ཤིང་ལྷུང་བར་འགྱུར། །ཞེས་སོ། །དེའི་དོན་འགྲེལ་བསྒྲུབ་ལྟར་ན། ནམ་མཁའ་ལ་རྡོ་རྗེའི་སྐས་བསྒོམ་པས་སྲ་བའི་སྐས་འབྱུང་བ་དང་།དེ་བཞིན་དུ་ལག་མཐིལ་ལ་ཡི་གེ་རཾ་ཡཾ་ཁཾ་བཀོད་པས་ཡེ་ཤེས་ཀྱི་མེ་ཆུ་རླུང་དུ་གྱུར་ཏེ། ཐ་མལ་གྱི་མེ་ཉིད་ཀྱང་སྲེག་པར་བྱེད་པ་
དང་། ཆུའང་དག་པར་བྱེད་པ་དང་། རླུང་ཡང་འཐོར་བར་བྱེད་ལ། ཡི་གེ་ཨེ་བཀོད་དེ་འཕྲོ་འདུས་སྦྱངས་ན་འཇིག་རྟེན་གྱི་ཁམས་ཀུན་སྟོངས་ཤིང་གཞོལ་ཕྱོགས་སུ་ལྷུང་བར་འགྱུར་བ་ཉིད་དོ། །གཞན་དུ་བཤད་རྒྱུད་དང་སྦྱར་ན། རྒྱས་པའི་སོ་བརྒྱད་པ་ལས། མི་གནས་ནམ་མཁའི་མཐའ་ཀླས་པར། །གོམ་པ་འདོར་བས་འགྲོ་བ་དང་། །ཆུ་ལ་ས་བཞིན་འགྲོ་བ་དང་། །བསྲེག་བྱ་འབར་བའི་དབུས་གནས་དང་། །ཚ་བ་རླུང་གིས་བཏེགས་ནས་ཀྱང་། །ཕྱོགས་བཅུ་ཀུན་ཏུ་ཕྱིན་པར་འགྱུར། །ཞེས་འབྱུང་བ་ལ་ཐོགས་མེད་དུ་སྤྱོད་པའི་རྫུ་འཕྲུལ་རྣམས་ཏེ། འདིར་ཡང་། འཛུལ་ལམ་ནམ་མཁར་འགྲོ་བར་འགྱུར། །ཞེས་མཚོན་ཙམ་ཞིག་བསྟན་ཏོ། །གསུམ་པ་ནི།དགུག་དང་གཏང་དང་བཅིང་དང་དགྲོལ། །གསོ་དང་གསད་དང་འཕམ་དང་རྒྱལ། །ཞེས་པ་སྟེ། དགྲ་བགེགས་དགུག་པ་དང་གླིང་ཁམས་གཞན་དུ་གཏང་བ་སོགས་ལས་བརྒྱད་པོ་འདི་དག་གཅིག་སྤྲོས་ལས་སུ་རུང་བའི་རྣལ་འབྱོར་པས་ཏིང་ངེ་འཛིན་གྱི་སྒོ་ནས་བྱ་བར་གསུངས་ཏེ། ཏིང་འཛིན་འདི་ཡིས་བྱེད་པར་འགྱུར། །ཞེས་སོ། །ཡང་ན། དགུག་དང་བཅིང་བ་ནི་དབང་གི་ལས་ཏེ། རྒྱས་པའི་སོ་བརྒྱད་པར་ཡུལ་ཁམས་དབང་དུ་བྱ་བ་དང་། ཞེ་ལྔ་པར་རྒྱལ་བློན་གྱི་ཆུང་མ་དང་ལྷ་ཆེན་པོ་གཞན་གྱི་ཆུང་མ་དབང་དུ་བྱ་བ་སོགས་རྒྱས་པར་བསྟན་པ་རྣམས་སོ། །གཏང་གསད་འཕམ་གསུམ་ནི་དྲག་པོའི་ལས་ཏེ། དེ་ལས་གཏང་བ་ནི། སོ་བརྒྱད་པར། དྲག་པོ་ལྕེ་ཡི་སྦྱོར་བ་ཡིས། །གླིང་ཁམས་གཞན་དུ་ཤིན་ཏུ་གཏང་། །ཞེས་དགྲ་བགེགས་བསྐྲད་པའི་ལས་དང་། ཞེ་དྲུག་པར་རང་གི་གནས་ན་ཀླུ་ཡོད་པ་བསྐྲད་པའི་ལས་གསུངས་པ་སོགས་སོ། །དགྲོལ་བ་ནི་ཞི་བའི་ལས་ཏེ། ལེའུ་དེ་ལས། གཟུངས་མ་ཀླུའི་བྱད་དུ་བཅུག་པ་འགྲོལ་ཐབས་བཤད་པ་སོགས་སོ། །གསོ་བ་དང་རྒྱལ་བ་ནི་རྒྱས་པའི་ལས་ཏེ། དེའང་ནད་གསོ་བ་ནི་འཁོར་ཀླུ་ནད་ཀྱིས་ཟིན་པ་གསོ་བ། །ཞེ་དྲུག་པར། རྫས་ལ་མེ་ནི་རབ་སྦར་ནས། །ང་ཡི་སྙིང་པོ་བརྗོད་ནས་དབྱུང་། །ཞེས་པ་དང་། ཤི་བ་གསོ་བ་ནི་རོ་ལངས་སྒྲུབ་པའི་ལེའུ་དང་། ཚེ་གསོ་བ་ནི་རེ་བཞི་པ་ལས་སོ། །གསད་པ་ནི། དགྲ་བགེགས་གསད་པ་ལེའུ་ང་དྲུག་
པར་བསྟན་པ་སྟེ། དམ་པའི་ཆོས་འཇིག་མ་རུངས་པ། །དཔའ་བོས་དགོས་པ་ཡོད་པའི་ཕྱིར། །ཀུན་ལ་ཕན་པ་དེ་གྱིས་ཤིག །ཅེས་པའོ། །འཕམ་པ་དང་རྒྱལ་བའི་ལས་ནི། གཞན་གྱི་གཡུལ་འཕམ་པ་དང་། རང་གི་གཡུལ་རྒྱལ་བར་བྱ་བ་སྟེ། ཞེ་གཅིག་པར་དམག་མང་མཐུ་ཆེན་བསྒྲུབ་པ་དང་།རེ་དྲུག་པར་མ་ཧཱ་དེ་བ་དང་རྒྱལ་པོ་སྡེ་བཞི་སྒྲུབ་པ་ལ་སོགས་པས་སྟོན་ཅིང་། འདིར་ཡང་། འབར་བའི་རྒྱལ་པོ་ཐུབ་མེད་འགྲུབ། །ཅེས་པ་ལ་ངོས་བཟུང་དུ་རུང་ངོ་། །གཉིས་པ་མཆོག་གི་བསྒྲུབ་པ་ནི། འདིར། སྒྱུ་འཕྲུལ་དཀྱིལ་འཁོར་བཞི་བཅུ་གཉིས། །དྲ་བའི་དཀྱིལ་འཁོར་མངོན་རྫོགས་པས། །ཕྱོགས་བཅུ་དུས་བཞི་རྫོགས་པ་ཡི། །དཀྱིལ་འཁོར་ཐམས་ཅད་འགྲུབ་པར་འགྱུར། །ཞེས་མཚོན་ཙམ་གསུངས་པ་བཤད་རྒྱུད་ཀྱིས་ཁ་བསྐང་སྟེ་བཤད་ན། ཁོག་གཞུང་ལས། ཡི་གེ་སྒྱུ་འཕྲུལ་ཚོགས་བསྒྲུབ་དང་། །རྡོ་རྗེ་སེམས་དང་སྨན་བསྒྲུབ་དང་། །རིགས་ལྔ་བསྒྲུབ་དང་ཡུམ་ལྔ་སེམས། །བྱིན་དབབ་བསྒྲུབ་པ་རྣམ་གཉིས་སོ། །ཞེས་སོ། །དེ་ལ་ཡི་གེ་སྒྱུ་འཕྲུལ་ནི། དཔེར་ན་རིན་པོ་ཆེའི་སྤྲིན་ལས་རིན་པོ་ཆེའི་ཆར་འབེབས་པ་ལྟར། ཡི་གེ་སྒྱུ་འཕྲུལ་གྱི་ཏིང་ངེ་འཛིན་གྱིས་དངོས་གྲུབ་སྣ་ཚོགས་སུ་འགྱུར་བ་སྟེ། སེམས་ཉིད་ཡི་གེའི་རང་བཞིན་ཏེ། །ཡི་གེ་ཡིད་བཞིན་རིན་ཆེན་སྤྲིན། །སྒྱུ་འཕྲུལ་དཀྱིལ་འཁོར་བཞི་བཅུ་གཉིས། །ཞེས་སོགས་སོ། །དེའང་ཡི་གེའི་ཏིང་ངེ་འཛིན་ལ་བརྟན་པ་ཐོབ་ནས་འདོད་དོན་སྣ་ཚོགས་སུ་བསྒྱུར་བས། དེ་ལྟར་བསྒྲུབ་པའི་ཕྱིར། འདི་ནི་དངོས་གྲུབ་ཐམས་ཅད་ཀྱི་གཞིར་གསུངས་སོ། །ཚོགས་བསྒྲུབ་ནི། ཚོགས་ཀྱི་དཀྱིལ་འཁོར་གྱི་སྒོ་ནས་ཨཱ་ལི་ཀཱ་ལི་ལ་སོགས་པའི་ཡོ་བྱད་ལ་རོལ་ཅིང་དངོས་གྲུབ་སྒྲུབ་པའི་ཐབས་གསུངས་པ་རྣམས་སོ། །རྡོར་སེམས་བསྒྲུབ་པ་ནི་རྒྱས་པའི་ཉེར་གཉིས་པ་དེ་སྒྲུབ་པའི་ལེའུ་དང་། དོན་བཞི་པ་ཞལ་མཐོང་གི་ལེའུ་ལའང་ངོས་གཟུང་དུ་རུང་ངོ་། །སྨན་བསྒྲུབ་ནི་ལེའུ་བཞི་བཅུ་པར། མཚམས་གཅད་ལ་དཀྱིལ་འཁོར་བྲི་བ་དང་། སྨན་བཀོད་ལ་རིགས་བརྒྱས་སྦྱང་བ་དང་། བཏག་བཙག་བྱས་ལ་རིགས་ལྔས་སྦྱང་བ་དང་། བུམ་པར་
གྲིལ་ལ་རིགས་གཅིག་གིས་སྦྱང་བ་སོགས་གསུངས་སོ། །རིགས་ལྔ་ཡབ་ཡུམ་བསྒྲུབ་པ་ནི་སོ་དགུ་པའི་སྟོད་དང་། དབབ་པ་ནི་ཞེ་གཉིས་པས་བསྟན། སེམས་མ་བསྒྲུབས་ཤིང་དབབ་པ་ནི་ཞེ་བཞི་པར་གསུངས་སོ། །མདོར་ན། མཆོག་དང་ཐུན་མོང་གི་དངོས་གྲུབ་དེ་དག་སྒྲུབ་པའི་ཚུལ་གཙོ་བོར་སྟོན་པ་ནི་ཚོགས་བསྒྲུབ་ཡིན་ལ། དེ་ཡང་གཞི་ཕུན་སུམ་ཚོགས་པ་ལྔས་བཟུང་ནས་བསྙེན་བསྒྲུབ་བཞིའི་ཐབས་ཀྱིས་བསྒྲུབ་བྱ་དོན་དུ་གཉེར་བ་ཞིག་སྟེ། སྔར་དཀྱིལ་འཁོར་གྱི་སྐབས་སུ་རྒྱས་པར་བཤད་གྲུབ་བོ། །གཞན་ཡང་བསྙེན་བསྒྲུབ་ཀྱི་ཆར་གཏོགས་པའི་ལས་དང་། བྱ་བ་དང་། ཏིང་ངེ་འཛིན་ལ་སོགས་པའི་ཐབས་དང་། དེ་དག་གི་ཆ་ཤས་ལ་བརྟེན་པའི་སྒོ་ནས་དངོས་གྲུབ་རྣམ་པ་གཉིས་སྒྲུབ་པའི་ཐབས་སོ་སོ་བྱེ་བྲག་ཏུ་གསུངས་པ་རྣམས་ནི་འདིར་ཡི་གེས་འཇིགས་ནས་མ་བཀོད་ཀྱི། སྤྲོ་ན་སྒྱུ་འཕྲུལ་རྒྱས་པ་དང་རྒྱ་མཚོ་སོགས་བཤད་རྒྱུད་རྣམས་དང་། བླ་མ་དམ་པའི་ཞལ་ལས་ཤེས་པར་བྱའོ། །གཉིས་པ་ཆ་རྐྱེན་ནི། རྒྱུད་དོན་གཞན་དགུ་ཀ་བསྒྲུབ་པའི་ཆ་རྐྱེན་དུ་འགྱུར་ཏེ། ཐམས་ཅད་ཀྱང་བདག་གཞན་གྱི་ཐར་པ་དང་བདེ་བ་སྒྲུབ་པའི་ཆེད་དུ་གསུངས་པའི་ཕྱིར། དེ་ལྟར་ཡང་། ཁོག་གཞུང་ལས། སྐབས་ཀྱི་གཙོ་དང་གྲོགས་པོ་བསྡུ། །དེ་ཡང་བདག་གཞན་དོན་དུའོ། །ཞེས་སོ། །གཉིས་པ་དུས་ནི། སྔགས་ཀྱི་ཡན་ལག་ལྔ་དང་ཕྱག་རྒྱ་གཅིག་སྤྲོས་ཀྱི་ཏིང་ངེ་འཛིན་ལ་བརྟན་པ་ཐོབ་པར་བྱས་ནས་བསྒྲུབ་པ་ལ་ཞུགས་ན་དངོས་གྲུབ་རྣམ་པ་གཉིས་གདོན་མི་ཟ་བར་འགྲུབ་པར་འགྱུར་ཏེ། འདི་ཉིད་ལས། སྔགས་དང་ཕྱག་རྒྱ་རབ་བརྟན་ན། །དངོས་གྲུབ་ཡ་མཚན་ཆེན་པོར་འགྱུར། །ཞེས་དང་། སྤྱན་འགྲེལ་ལས། བདག་ཕྱིར་དེ་བཞིན་གཞན་ཕྱིར་རུང་། །རྣལ་འབྱོར་རྗེས་མཐུན་སྐབས་སུ་བརྩམ། །སྤྲོས་བཅས་བརྟན་ན་ཐེ་ཚོམ་མེད། །དེ་ཚེ་ཚོམ་བུ་བསྒྲུབ་པར་བྱ། །ཞེས་སོ། །ལྔ་པ་སྐྱོན་ནི་སྒྲུབ་པའི་ཐབས་ཡལ་བར་དོར་ན་བསྒྲུབ་བྱའི་དོན་མི་འགྲུབ་སྟེ། ཐུགས་ཐིག་ལས། ཡལ་བས་མི་འགྱང་མི་ཐོབ་བཅུ། །བྱེ་བྲག་རྒྱས་པ་ཁོང་དུ་ཆུད། །ཅེས་སོ། །དྲུག་པ་ཡོན་ཏན་ནི། སྔ་མའི་འཕྲོས་ལས། དེ་
ལས་བཟློག་པ་འདི་ཕྱི་མར། །ལྔ་ལྔས་ཐོབ་པས་དོན་གཉེར་རྫོགས། །ཞེས་གསུངས་སོ། །གཞན་ཡང་འདི་ཉིད་ལས། དབང་བསྒྱུར་རིགས་ཀྱི་དམ་པ་འགྲུབ། །ཅེས་དང་། དེ་ཚེ་བཅུ་དྲུག་ཚུན་ཆད་ཀྱིས། །སྐུ་ལྔ་ལྷུན་གྱིས་རྫོགས་པ་ནི། །ཞེས་སོ། །བརྒྱད་པ་མི་གཡོ་བ་ཏིང་ངེ་འཛིན་ལ་དྲུག་ལས། དང་པོ་དགོས་ཆེད་ནི། རྟོགས་པའི་དོན་ལ་མ་ཡེངས་པར་དབང་བསྒྱུར་བས་སེམས་ལས་སུ་རུང་བར་བྱེད་པ་སྟེ། འདི་ཉིད་ལས། དངོས་རྣམས་ཉིད་ན་དངོས་མེད་པར། །རྟོགས་པའི་དབང་བསྒྱུར་ཏིང་འཛིན་ཡིན། །ཞེས་སོ། །གཉིས་པ་ངོ་བོ་ནི།བསྒོམ་ཐབས་ཀྱི་བསྒོམ་བྱ་ལས་མི་གཡོ་བར་གནས་པའི་སེམས་རྩེ་གཅིག་པའོ། །དེ་ལྟར་ཡང་། གང་གིས་གླང་ཆེན་མྱོས་འདྲའི་སེམས། །མཉམ་པར་བཞག་པས་བཏུལ་ནས་སུ། །ཞེས་སོ། །གསུམ་པ་སྒྲ་དོན་ནི། ས་མ་དྷཱིའི་སྒྲ་ལས་མཉམ་པའི་བློ་སྟེ། སེམས་རྩེ་གཅིག་ཏུ་ཟིན་པས་བསྒོམ་བྱ་མི་གཏོང་བའི་ཕྱིར། ཧེ་རུ་ཀ་འདུས་པ་ལས། གང་དང་གང་དུ་གསལ་བའི་ཡིད། །མ་ཡེངས་པ་ཉིད་ཏིང་འཛིན་ཏེ། །ཞེས་སོ། །བཞི་པ་རྣམ་གྲངས་ལ། བསྒོམ་བྱ་ངོས་བཟུང་བ། དེ་ཏིང་ངེ་འཛིན་གྱིས་ཇི་ལྟར་བསྒོམ་པའི་ཐབས་སོ། །དང་པོ་ནི། ཨིནྡྲ་བྷཱུ་ཏིའི་རིམ་གཉིས་ལས། སངས་རྒྱས་རྣམས་ཀྱིས་ཆོས་བསྟན་པ། །རིམ་པ་གཉིས་ལ་ཡང་དག་གནས། །བསྐྱེད་པ་ཡི་ནི་རིམ་པ་དང་། །རྫོགས་པ་ཡི་ནི་རིམ་པའོ། །ཞེས་པས་རིམ་པ་གཉིས་སོ། །དེ་ལྟར་ངེས་པའི་རྒྱུ་མཚན་ཡང་། ལམ་གྱི་བསྒྲུབ་གཞི་ནི། ཁམས་བདེ་བར་གཤེགས་པའི་སྙིང་པོ་ཡིན་ལ། དེ་ཉིད་ཡེ་ནས་དག་པ་ལྷའི་དཀྱིལ་འཁོར་དུ་གྲུབ་པ་ནི་དམ་ཚིག་སེམས་དཔའ་དང་། སངས་རྒྱས་ཐམས་ཅད་ཀྱི་སྐུ་ནི་ཡེ་ཤེས་སེམས་དཔའ་སྟེ། དེ་གཉིས་གདོད་ནས་དབྱེར་མེད་པ་ནི་དམ་ཡེ་གཉིས་མེད་དུ་བྱས་པའི་དོན་ནོ། །དེ་ལྟར་ཡིན་མོད་ཀྱང་མ་རྟོགས་ཏེ། ཐ་དད་དུ་འཁྲུལ་པའི་འཁྲུལ་པ་ལ་གློ་བུར་གྱི་ཆ་དང་། ས་བོན་གྱི་ཆ་གཉིས་ལས། དང་པོ་བསྐྱེད་རིམ་དང་། ཕྱི་མ་རྫོགས་རིམ་གྱི་ལམ་གྱི་སྦྱང་བྱར་གྱུར་པའོ། །དེའི་ཕྱིར། སྦྱང་གཞི་ཉིད་གློ་བུར་བག་ཆགས་ཀྱི་དབང་གིས་འཁོར་བར་སྣང་ཞིང་ཞེན་པ་འཆར་བ་འདི་
དག །ད་ལྟ་ཉིད་ནས་སྦྱོང་བྱེད་བསྐྱེད་རིམ་གྱི་ལམ་གྱིས་དག་པའི་སྣང་བར་སྒྱུར་བར་བྱེད་པའོ། །དེ་བས་ན་རྟེན་དང་བརྟེན་པའི་འཁོར་ལོ་བསྒོམས་པས་སྦྱང་བྱར་བྱེད་པའི་དྲི་མ་སྣོད་བཅུད་རང་བཞིན་སོགས་འཁོར་བའི་ཆོས་སྣ་ཚོགས་པར་སྣང་བ་འདི་དག་སྲིད་པར་སྐྱེ་བ་བླངས་པ་ལ་བརྟེན་ནས་འཆར་བའི་ཕྱིར། འཁོར་བའི་ཆོས་ཀྱི་གཙོ་བོ་ནི་སྐྱེ་གནས་བཞི་ཡིན་པས། དེ་བཞིའི་བག་ཆགས་སྦྱང་བ་དང་སྒོ་བསྟུན་ནས་བསྐྱེད་རིམ་བསྒོམ་ཚུལ་བཞིར་ཀུན་མཁྱེན་ཆོས་རྗེའི་མན་ངག་གི་ཡི་གེར་གསུངས་ཏེ། ཇི་སྐད་དུ། སྐྱེ་གནས་བཞི་པོ་དག་བྱའི་ཕྱིར། །བསྐྱེད་པའང་དེ་བཞིན་རྣམ་པ་བཞི། །སྤྲོས་ཅན་སྤྲོས་དང་སྤྲོས་པ་མེད། །ཤིན་ཏུ་སྤྲོས་པ་མེད་བཞིའོ། །ཞེས་གསུང་བའི་དགོངས་པའོ། །མན་ངག་ལམ་རིམ་ལས་ནི། སྲིད་པའི་འཁོར་ལོའི་ཚུལ་བཞིན་དུ། །ཞེས་པའི་སྐབས་སུ། སྦྱང་གཞི་སྲིད་པ་མངལ་སྐྱེས་དང་། །རྫུས་སྐྱེས་གཉིས་དང་སྒོ་བསྟུན་ཏེ། །རིམ་ཅིག་ཅར་གཉིས་སུ་བཞེད་དོ། །འདིར་ཕྱི་མ་ལྟར་བཤད་ན། དང་པོ་རིམ་གྱིས་པ་ནི། འཆི་སྲིད་གཅིག་ནས་འཆི་སྲིད་གཅིག་ལ་ཐུག་གི་བར་སྐྱེ་འཆི་བར་དོ་གསུམ་ཕྲུགས་གཅིག་པོ་ནི་སྦྱང་གཞི་དང་། དེ་ཏིང་ཀུན་སྣང་ཕྱག་རྒྱ་གཅིག་སྤྲོས་རྣམས་ནི་སྦྱོང་བྱེད་གཉེན་པོའི་རིམ་པ་སྟེ། དེ་ལས།ཤི་བ་དོན་དམ་བདེན་པ་སྟེ། །སྐྱེ་བ་བར་མ་ཀུན་རྫོབ་ཡིན། །སྐྱེས་པའི་རིམ་གསུམ་གཉིས་མེད་དོན། །ཞེས་སོ། །དེའང་ཤི་བའི་ཚེ་ན་ཕྱི་ནང་གི་རྟོག་པ་འགགས་ནས་སྤྲོས་བྲལ་དུ་གནས་པ་དང་གཅིག་འོང་སྟེ། དེ་ཉིད་ཆོས་སྐུར་ངོ་སྤྲད་ནས་དེ་ཏིང་སྤྲོས་བྲལ་དུ་བསྒོམ་པའི་དཔེ་དང་བསླབ་གཞིའོ། །དེ་ལྟར་ཡང་ཐལ་རྒྱུད་ལས། འགྲོ་བ་མ་ལུས་ཐམས་ཅད་དག །གནས་པའི་སྟོབས་ནི་ཟད་པ་ན། །འདུས་པ་ལྔ་ཡི་རིམ་པ་ཡིས། །བག་ཆགས་སྙིགས་མ་རང་ཟད་ནས། །འོད་གསལ་སྟོང་པར་སྣང་བ་ན། །རེ་དོགས་མེད་པ་ནམ་མཁའ་བཞིན། །ཞེས་སོ། །དེ་ནས་བར་དོའི་ཚེ་སྤྱོད་ཡུལ་ཐམས་ཅད་སྒྱུ་མ་ལྟར་མཐོང་བ་ནི་ཀུན་སྣང་ལོངས་སྐུར་ངོ་སྤྲད་ནས་སྙིང་རྗེ་སྒྱུ་མ་བསྒོམ་པའི་དཔེ་དང་བསླབ་གཞི་སྟེ། དེ་ལས། བར་མར་སྒྱུ་མའི་ལུས་ཐོབ་པས། །མ་
སྤངས་ལོངས་སྤྱོད་རྫོགས་པར་བཤད། །ཅེས་སོ། །དེ་ནས་བར་དོའི་རྣམ་ཤེས་དེ་མའི་མངལ་དུ་ཞུགས་ནས་སྐྱེས་པའི་རིམ་པ་གསུམ་ནི། ཕྱག་རྒྱ་གཅིག་སྤྲོས་ཚོགས་སྒྲུབ་གསུམ་སྟེ། སྐྱེ་སྲིད་སྤྲུལ་སྐུར་ངོ་སྤྲད་ནས་བསྒོམ་པའི་དཔེ་དང་བསླབ་གཞིའོ། །དེའང་སྔ་མ་ལས།ཉི་ཟླ་འདྲེས་ཤིང་ཟུང་འཇུག་པས། །སྤྲུལ་པ་གཟུགས་ཀྱི་སྐུར་འགྱུར་རོ། །ཞེས་སོ། །དེའང་ཅུང་ཟད་བཤད་ན། རིམ་དྲུག་ལས། རྣམ་ཤེས་ལྷུམས་སུ་ཞུགས་དང་སྦྱར། །ཞེས་པས་བར་དོའི་རྣམ་ཤེས་ཕ་མའི་ཁུ་ཁྲག་གི་དབུས་སུ་ཞུགས་པ་ལྟར་གསུང་ཡིག་འབྲུ་དང་། མེར་ནུར་ལྟར་མཁྲང་གི་གནས་སྐབས་ལྟར་ཐུགས་ཕྱག་མཚན་གྱི་ཆོ་ག་དང་། གོར་ཉ་རུས་སྦལ་ནས་ལུས་རྫོགས་ཏེ་བཙས་པ་ལྟར་སྐུ་ཡོངས་སུ་རྫོགས་པ་ཕྱག་རྒྱ་གཅིག་པའི་དཔེ་དང་བསླབ་གཞི་སྟེ། ཧེ་རུ་ཀ་གལ་པོ་ལས། བར་དོ་རང་རིག་བདེ་བའི་ཆ། །ཡི་གེ་ཧཱུཾ་དུ་གནས་པ་ཡིན། །ཕ་མའི་ཆ་ཤས་དུམ་བུ་ནི། །ཕྱག་མཚན་རྡོ་རྗེ་ཉིད་དུ་གྲུབ། །ཆེན་པོ་ལྔ་ལས་སྐུ་གྲུབ་པ། །ཡོངས་སུ་རྫོགས་པ་ཞེས་བྱའོ། །ཞེས་སོ། །དེའང་ཕ་མ་གཉིས་སྙོམས་པར་འཇུག་པ་ན། ཐོག་མར་རེག་པ་སྲ་བ་ས། །དེ་ནས་རིམ་པར་གཤེར་བ་ཆུ། །དྲོ་བ་མེ། བྱང་སེམས་གཡོ་བ་རླུང་། བདེ་བ་ནམ་མཁའི་ཁམས་ཉམས་སུ་མྱོང་སྟེ།དེ་ལྟར་འབྱུང་བ་ལྔ་དང་ཡེ་ཤེས་ཀྱི་ཁམས་དྲུག་འདུས་པ་ལས་གྲུབ་ཅིང་། ཕ་མའི་ཁུ་ཁྲག་བར་དོའི་རྣམ་ཤེས་རླུང་དང་བཅས་པ་སྐུ་གསུང་ཐུགས་ཀྱི་རང་བཞིན་ལས་ཆོ་ག་གསུམ་བསྐྱེད་དང་། གཞན་དུ་ཡེ་ཤེས་ལྔའི་རང་བཞིན་ལས་མངོན་བྱང་ལྔ་བསྐྱེད་སོགས་བླ་ན་མེད་པའི་རྒྱུད་སྡེ་རྣམས་སུ་རྒྱ་ཆེར་གསུངས་སོ། །དེ་ལྟར་བཙས་ནས་ལུས་རྫོགས་བུ་ཚ་འཁོར་འདབ་རྒྱས་པ་ནི་ཕྱག་རྒྱ་སྤྲོས་པ་དང་མཐུན་པ་སྟེ། རིམ་དྲུག་ལས། རྐྱེན་ལྡན་བུ་སོགས་རྒྱས་པ་སྟེ། །རིགས་ལ་སོགས་པ་རྒྱས་པར་བྱེད། །ཅེས་སོ། །དེ་ནས་ཡུལ་ནོར་གྱིས་བཅད་རིས་དང་ཁེ་གྲགས་བསྒྲུབ་པ་སོགས་ནི་ཚོགས་སྒྲུབ་ཀྱི་དཔེ་དང་བསླབ་གཞི་སྟེ། དེ་ལས། ཡུལ་ཟླ་ཟས་ནོར་དབང་བྱེད་པ། །ཆ་གཉིས་ལ་སོགས་འཇུག་པར་བྱེད། །ཅེས་སོ། །བཅུད་ཇི་ལྟ་བ་བཞིན་དུ་སྣོད་ཀྱི་འཇིག་རྟེན་ཆགས་
རིམ་དང་སྒོ་བསྟུན་ནས་རྟེན་གྱི་དཀྱིལ་འཁོར་རིམ་གྱིས་བསྒོམ་ཚུལ་ཀྱང་གསུངས་ཏེ། གལ་ཕྲེང་ལས། སྣོད་ཀྱི་རིམ་པ་བྱུང་ཚུལ་གྱིས། །རིམ་བརྩེགས་གཞལ་ཡས་གཞུང་བཞིན་བསྐྱེད། །ཅེས་སོ། །དེ་ལྟར་ན་སྲིད་པའི་འཁོར་ལོ་རིམ་གྱིས་ཆགས་པ་ནི་བསྐྱེད་པ་སྟེ། དེར་ཞེན་གྱི་ལས་དང་བག་ཆགས་སྦྱོང་བའི་ཕྱིར་ལམ་རྣལ་འབྱོར་གྱི་རིམ་པ་དེ་དང་མཐུན་པར་བསྒོམ་པ་ནི་སྦྱོང་བྱེད་དོ། །གཞན་དུ་སྲིད་པའི་འཁོར་ལོ་ཉིད་ལམ་ཏིང་འཛིན་ལ་བསླབ་པའི་གཞི་དང་། ཚུལ་འདྲ་བས་ན། བསླབ་གཞིའམ། དཔེ་དང་བསླབ་བྱར་འགྱུར་བའི་རྒྱུ་མཚན་ཡང་དེ་ཡིན་ཏེ། རིམ་དྲུག་ལས། རང་བཞིན་དག་པའི་སངས་རྒྱས་ཀྱང་། །ཐབས་དང་ལྷན་ཅིག་མི་གནས་ན། །གཟུང་འཛིན་འཆིང་བས་བཅིངས་པར་འགྱུར། །དེ་ཉིད་ཚུལ་གྱི་འཇུག་སོགས་ཀྱི། །རིམ་པ་ཡོངས་སུ་རྫོགས་པར་འགྱུར། །ལམ་གྱི་ཚུལ་ཡང་དེ་བཞིན་ཤེས། །ཞེས་སོ། །གཉིས་པ་གཅིག་ཅར་བ་ནི། རྫུས་སྐྱེས་སྐད་ཅིག་གིས་ལུས་འགྲུབ་པ་ལྟར་དྲན་རྫོགས་སུ་བསྐྱེད་པ་སྟེ། ལྷ་སྐུ་བསྒོམ་པའི་མན་ངག་ལས། །རིག་པ་ལྷ་རུ་རྫོགས་ཚུལ་གསལ། །ཞེས་སོ། །འདི་ལ་ཨིནྡྲ་བྷཱུ་ཏིས། བསྐྱེད་རིམ་པའི་རྫོགས་རིམ་དང་རྫོགས་རིམ་པའི་བསྐྱེད་རིམ་ཞེས་གསུངས་ཏེ། རིམ་གཉིས་ལས། དེ་ལྟར་ལྷ་རྣམས་བསྐྱེད་པ་ནི། །བསྐྱེད་པའི་རིམ་པར་གསུངས་པའོ། །ཏིང་འཛིན་དེ་ལ་ལེགས་གནས་ནས། །རྫོགས་པའི་རིམ་པ་འདོད་པ་ཡིས། །སྐད་ཅིག་ཉིད་ལ་ལྷ་རྣམས་གསལ། །རྫོགས་པའི་རིམ་པའི་བསྐྱེད་རིམ་སྟེ། །བསྐྱེད་པའི་རིམ་པའི་རྫོགས་པའོ། །ཞེས་སོ། །མདོར་ན་མ་དག་པའི་སྣང་བ་དག་པའི་སྣང་བར་བསྒྱུར་ཏེ་དཀྱིལ་འཁོར་གྱི་འཁོར་ལོ་བསྒོམ་པ་ནི་བསྐྱེད་རིམ། དེ་བདེ་སྟོང་གི་ཡེ་ཤེས་སུ་རྟོགས་པར་བྱ་བའི་ཕྱིར། མཚན་བཅས་རྩ་རླུང་ཐིག་ལེ་དང་། མཚན་མེད་དེ་ཁོ་ན་ཉིད་ཀྱི་ཏིང་ངེ་འཛིན་བསྒོམ་པ་ནི་རྫོགས་རིམ་སྟེ། ཀུན་མཁྱེན་ཆེན་པོས། བསྐྱེད་རིམ་སྣང་འདིའི་བདེན་ཞེན་འགོག་པ་སྟེ། །རྫོགས་རིམ་སྒྱུ་མར་ཞེན་པའི་རྟོག་པ་སྤང་། །གང་ལ་སྣང་སྟོང་བདེན་ཞེན་མེད་པ་ན། །བསྐྱེད་རྫོགས་གཉིས་མེད་རང་བཞིན་དག་པ་ཡིན། །
ཞེས་གསུངས་པ་ལྟར་སྔ་མས་སྣོད་བཅུད་རང་མཚན་པའི་བདེན་ཞེན་དང་། ཕྱི་མས་བསྐྱེད་རིམ་སོགས་སྒྱུ་མ་ལྟ་བུར་བསྒོམས་པའི་ཞེན་པ་ཅུང་ཟད་ཡོད་པ་སྦྱང་བ་ཡིན་ནོ། །གཉིས་པ་སྒོམ་ཐབས་ལ། གང་དུ་བསྒོམ་པའི་གནས། གང་ལ་བརྟེན་ནས་བསྒོམ་པའི་ཆ་རྐྱེན། གང་བསྒོམ་པའི་ཐབས་དངོས་གང་གི་ཚེ་བསྒོམ་པའི་དུས་སོ། །དང་པོ་ནི།ལམ་རིམ་ལས། སྐྱེས་བུ་སེང་གེ་བཞིན་རྒྱུ་བས། །ཞེས་པས་འཁོར་འདབ་དང་གཡེང་བ་སྤངས་ལ་ཡིད་དུ་འོང་བའི་གནས་དབེན་པར་བསྒོམ་དགོས་ཏེ། ནོར་བུའི་ཕྲེང་བ་ལས། བས་མཐའི་དགོན་པར་རབ་གནས་ཤིང་། །བདག་གིས་བདག་ཉིད་སྦ་བྱ་སྟེ། །རི་དྭགས་ཤི་བའི་རོ་བཞིན་དུ། །ཆགས་པ་མེད་པར་གནས་པར་བྱ། །ཞེས་དང་། བསམ་གཏན་ཆོས་དྲུག་ལས། མང་པོ་རྟག་ཏུ་འཐབ་འགྱུར་ཏེ། །གཉིས་པོ་དག་ཀྱང་འགྲན་ཟླར་འགྱུར། །གཞོན་ནུ་མ་ཡི་གདུབ་བུ་བཞིན། །བདག་ཉིད་གཅིག་པུར་གནས་པར་བྱ། །ཞེས་སོ། །གཉིས་པ་ནི། ལམ་རིམ་ལས། ཁམས་དང་ཏིང་འཛིན་རྐྱེན་བསྡུས་ལ། །ཞེས་པས་ཕུང་པོའི་ཆ་རྐྱེན་ཁམས་དང་མཐུན་པའི་སྨན་སོགས་དང་། ཏིང་ངེ་འཛིན་གྱི་ཆ་རྐྱེན་དུ་བླ་མའམ་མཆེད་དགོངས་ཉམས་ཅན་སོགས་མཐུན་པའི་གྲོགས་དང་། ཏིང་ངེ་འཛིན་ལ་ཕན་པའི་མན་ངག་སོགས་བསྡུས་ལ། ཆོས་བཅུ་ལྡན་གྱི་སྒོ་ནས་ཉམས་སུ་བླང་བར་བྱའོ། །བཅུ་གང་ཞེ་ན། ལྷ་རྗེ་ཟུར་ཆུང་བའི་མཛུབ་ཚུགས་ཀྱི་བསམ་གཏན་ལས། དད་པས་ཕུལ་བཏགས། བརྩོན་འགྲུས་ཀྱི་གཞུ་བདུངས་པ། འཁོར་བ་དཔྱིས་འབྱིན་པ། སེམས་རུས་ཀྱི་ཐང་གཅོད་པ། བླ་མ་ལྷ་ལྟར་བཀུར་བ། མན་ངག་སྙིང་ལྟར་འཚོ་བ། དམ་ཚིག་སོ་མཚམས་ཀྱི་མཁར་ལྟར་བསྲུང་བ། འདུ་འཛི་དུག་ལྟར་སྤོང་བ། དགོན་གནས་གྲོགས་ལྟར་བསྟེན་པ།བྱང་ཆུབ་ཀྱི་འབྲས་བུ་སྒྲུབ་པའི་མི་ཆེན་པོས་སྤྲོ་བ་བསྲིངས་ཏེ་བསྒྲུབ་པར་བྱའོ། །ཞེས་སོ། །གསུམ་པ་ལ་བསྐྱེད་རྫོགས་གཉིས་ལས། དང་པོ་ནི། ལྷའི་སྐུ་ཕྱག་རྒྱ་ཆེན་པོ་ལ་དམིགས་ནས་རྩེ་གཅིག་ཏུ་བསྒོམ་པ་རྟོག་བཅས་ལྷའི་རྣལ་འབྱོར་རོ། །དེ་ལ་སེམས་ཇི་ལྟར་འཇོགས་པའི་ཐབས་ཀྱང་། ལྷ་སྐུ་བསྒོམ་
པ་ལས། བསྒོམ་ཐབས་རིམ་པ་གཉིས་ཡོད་དེ། །ཐུན་མོང་ཁྱད་པར་དབྱེ་བའོ། །ཞེས་པས་ཐུན་ཁྱད་གཉིས་ལས། དང་པོ་ནི། བདེ་བའི་སྟན་ལ་ལུས་གནད་སྣང་མཛད་ཀྱི་ཆོས་བདུན་དང་ལྡན་པར་འདུག་ལ། མདུན་དུ་བྲིས་སྐུ་རབ་གནས་ཅན་དགྲམ་ཞིང་།ཡན་ལག་བརྒྱད་པ་འབུལ་བ་དང་། སེམས་རྣམ་པ་གཉིས་བསྐྱེད་པ་སྔོན་དུ་བཏང་སྟེ། མདུན་གྱི་བྲིས་སྐུའི་གཟུགས་བརྙན་ལ་མིག་རེངས་རེངས་སུ་བལྟས་པས་ཡིད་ལ་གསལ་སྣང་གི་རྣམ་པ་ཤར་བ་ན། དེ་ཉིད་ལ་རྩེ་གཅིག་པའི་ཞི་གནས་སྒྲུབ་པ་ཡིན་ལ། དེའང་ཐོག་མར་ལྷ་སྐུ་མདུན་དུ་བསྒོམ་ཞིང་། དེ་ལས་གོམས་པ་དང་བདག་ལྷར་བསྒོམ་པ་སྟེ། སྔ་མ་ལས། རབ་གནས་ལྡན་པའི་གཟུགས་བརྙན་ལ། །ཀུན་ཏུ་བརྟག་ཅིང་དམིགས་པ་བསྡུ། །མི་ཡི་མིག་གིས་བལྟར་ཡོད་པར། །ཤིན་ཏུ་འདྲིས་པ་ཉིད་དུ་བྱ། །ས་ཕྱོགས་སྟོང་པ་ཐམས་ཅད་དག །གཟུགས་བརྙན་ཡིད་དུ་གསལ་མཐོང་ན། །ཐུན་མོང་ཞི་གནས་གསལ་བའི་ཚད། །དམིགས་པ་བསྡུ་ཞིང་ཡུལ་ལ་བལྟ། །དེ་ལ་ཤིན་ཏུ་འདྲིས་པར་བྱ། །ཞེས་དང་།རྣམ་བཀོད་ལས། རབ་གནས་ལྡན་པ་མདུན་བཞག་ནས། །སྤྲོས་བཅད་ཞུགས་པ་སྔོན་བྱས་ལ། །གསལ་བར་སྤྱི་དང་བྱེ་བྲག་བརྟག །དེ་ཅི་འདྲ་བར་མདུན་དུ་བསམ། །ཤིན་ཏུ་གོམས་ནས་རྣམ་སྨིན་གཟུགས། །བསྒྱུར་ལ་དེ་བརྟན་ངེས་པར་བྱ། །ཞེས་སོ། །གཉིས་པ་ནི། བྲིས་སྐུ་སོགས་ལ་དམིགས་རྟེན་བྱེད་དམ་མི་བྱེད་ཀྱང་རུང་སྟེ། ཐོག་མ་ནས་བདག་ཉིད་ལྷར་བསྒོམ་པའོ། །དེ་ལའང་།ལམ་རིམ་ལས། བློ་ཡི་ཤེས་རབ་ཆེ་ཆུང་གིས། །ཞེས་དང་། ལྷ་སྐུ་སྒོམ་པ་ལས། བདག་ཉིད་ཕྱག་རྒྱ་ཉིད་དུ་བསྒོམ། །རིམ་གྱིས་པ་དང་ཅིག་ཅར་བའོ། །ཞེས་པས། རིམ་ཅིག་ཅར་གཉིས་ལས། དང་པོ་ནི། རྣམ་བཀོད་ལས། རིམ་དུ་སྐད་ཅིག་སྤྲོས་བཅད་ལ། །དེ་ནས་ཡི་གེ་ཕྱག་རྒྱ་དང་། །ཕྱག་རྒྱ་ཆེན་པོ་རིམ་པར་བསམ། །དབང་བསྐུར་ལ་སོགས་ལྷག་པའི་ལྷ། །དགུར་ལྡན་སྤྱན་དྲང་བསྡིམ་བརྟན་མཆོད། །ཟིན་ནས་བཅུ་སྤང་བཟླས་པ་བྱ། །གསལ་བ་གསུམ་ལྡན་དྲོད་རྙེད་འགྱུར། །ཞེས་སོ། །དེའང་།
བློ་ཆུང་ན། ཐོག་མར་རྟོག་པའི་སྐུ་དང་། དེ་ནས་སྒྱུ་མའི་སྐུ་དང་། དེ་ནས་གཉིས་མེད་ཀྱི་སྐུར་བསྒོམ་ལ། བློ་ཆེན་ཐོག་མ་ཉིད་ནས་གཉིས་སུ་མེད་པར་བསྒོམ་པར་བྱའོ། །དེ་དག་གསལ་བརྟན་གྱི་ཡན་ལག་ཏུ་རྣམ་པ་བྱེ་བྲག་པ་དང་། གྲངས་ཚད་མ་ངེས་པ་ལ་སེམས་གཟུང་བར་བྱ་སྟེ། ལྷ་སྐུ་སྒོམ་པ་ལས། དང་པོ་དབུ་ཡི་གཙུག་ཏོར་གསལ། །དེ་ནས་ཞལ་གྱི་མདངས་ལ་བསླབ། །དེ་ནས་ཐུགས་ཀྱི་དཔལ་བེའུ་ལ། །དེ་ནས་ཡན་ལག་གདན་ཁྲི་གསལ། །དེ་ནས་ལྷ་གྲངས་འཁྱུད་ཚད་བསྒོམ། །ཡུངས་འབྲུ་ཙམ་དང་རི་རབ་ཙམ། །གང་ལ་བཞག་པར་འཇུག་པ་ནི། །ཏིང་འཛིན་ཕྱོགས་གཅིག་གསལ་བའི་རྟགས། །ཞེས་སོ། །གཞན་ཡང་གཡོ་བ་སོགས་ཉམས་ལྔ་ཤེས་པར་བྱ་བ་དང་། བྱིང་རྒོད་ལ་སོགས་པའི་སྐྱོན་ངོས་བཟུང་སྟེ་བཅོས་པའི་སྒོ་ནས་ཀྱང་བརྟན་པར་བྱ་བའོ། །གཉིས་པ་ནི། ལྷ་སྐུ་སྐད་ཅིག་དྲན་རྫོགས་སུ་ཝལ་གྱིས་བསྒོམས་པ་ལ་མ་ཡེངས་པར་འཇོག་པ་སྟེ། ལམ་རིམ་ལས། ཡང་ན་ཕྱག་རྒྱ་ཆེན་པོ་སྟེ། །ཆུ་ལས་ཉ་ལྡང་ཇི་བཞིན་དུ། །ཞེས་སོ། །དེ་ཡང་རིམ་ཅིག་ཅར་གང་གི་སྒོ་ནས་བསྐྱེད་ཀྱང་རུང་སྟེ། རྫོགས་རིམ་གྱི་རྒྱས་བཏབ་ནས་དེར་འཛིན་མེད་ཀྱི་ལྷ་སྐུ་མེ་ལོང་ནང་གི་གཟུགས་བརྙན་ལྟར་བསྒོམ་པར་བྱའོ། །དེ་ལྟར་ཡང་རྣམ་བཀོད་ལས། ལྷ་ཡི་སྐུ་ནི་གསལ་བསྒོམས་ན། །བསོད་ནམས་ཚོགས་ཆེན་འཐོབ་པར་འགྱུར། །དེ་ཉིད་གཟུགས་བརྙན་ཚུལ་ཤེས་ན། །ཡེ་ཤེས་ཚོགས་ཆེན་འཐོབ་པར་འགྱུར། །ཞེས་སོ། །དེ་ལྟར་ཤེས་པར་བྱས་ལ། ལྷ་སྐུ་ཕྱག་རྒྱ་ཆེན་པོ་ཕྱག་རྒྱ་གཅིག་སྤྲོས་གང་རུང་བསྒོམ་ལ། བཟླས་བརྗོད་སོགས་ཀྱི་སྒོ་ནས་དངོས་གྲུབ་བསྒྲུབ་པ་ལ་འབད་པར་བྱའོ། །མདོར་བསྡུ་ན། མཚན་བཅས་ཀྱི་རྣལ་འབྱོར་དེ་དག་ཀྱང་། བྱིན་གྱིས་རློབ་པ། ཡོངས་སུ་བརྟག་པ་རྫོགས་པའི་རྣལ་འབྱོར་གསུམ་དུ་འདུས་སོ། །དང་པོ་ནི། བདག་གི་དེ་ཁོ་ན་ཉིད་ལ་ལྷའི་དེ་ཁོ་ན་ཉིད་ཀྱིས་བྱིན་གྱིས་བརླབས་ནས་བདག་ལུས་ལྷའི་སྐུ་ཕྱག་ཆེན་པོར་བསྒོམ་པ་སྟེ། ལྕགས་ལ་གསེར་འགྱུར་གྱི་རྩི་བཏང་བ་བཞིན་ནོ། །གཉིས་པ་ནི། གཉིས་སུ་མེད་པའི་བྱང་
ཆུབ་ཀྱི་སེམས་རང་རིག་པ་ཙམ་ལ་དམིགས་པ་མི་གཡོ་བ་ལས་ལྷར་བསྐྱེད་པ་སྟེ། གསེར་ལས་ལྷ་སྐུ་ལུགས་པ་བཞིན་ནོ། །གསུམ་པ་ནི། ཆོས་ཐམས་ཅད་སྤྲོས་བྲལ་དུ་རྟོགས་པ་ལས་སྐད་ཅིག་གིས་ལྷའི་ཏིང་འཛིན་རྫོགས་པར་བསྒོམ་པ་སྟེ། དཔེར་ན་ནམ་མཁའ་དྭངས་པ་ལས་སྤྲིན་རྩོལ་མེད་དུ་ལྡང་བ་བཞིན་ནོ། །འདི་གསུམ་གྱིས་གསང་སྔགས་ཐ་དག་བསྡུས་པར་མ་ཟད། འདིའི་གཞི་རྣམ་པ་གསུམ་གྱིས་མཚན་ཉིད་སྡེ་གསུམ་ཡང་བསྡུས་ཏེ།རྣམ་སྣང་སྒྱུ་དྲ་ལས། དམ་ཚིག་བྱིན་རླབས་དང་པོ་སྟེ། །བརྟག་པ་རྣལ་འབྱོར་སྤྱོད་པའི་འོ། །དབུ་མ་རྫོགས་པར་བྱ་བ་དག །འདི་ནི་རྣལ་འབྱོར་ཆོ་གར་བརྟག །ཅེས་རྣལ་འབྱོར་གསུམ་གྱི་གཞིས་རིམ་པ་ལྟར། ཉན་ཐོས་དང་།རྣལ་འབྱོར་སྤྱོད་པ་དང་། དབུ་མ་དང་མཐུན་པར་བསྟན་པའོ། །གཉིས་པ་ལ། མཚན་བཅས། མཚན་མེད་དོ། །དང་པོ་ལ། རིམ་གསུམ་ལས། གདམས་ངག་སྟེང་དང་འོག་གི་སྒོ། །ཞེས་པས། ཐབས་ལམ་རིམ་གྱིས་པ་དང་། གཅིག་ཅར་བའོ། །དང་པོ་ནི། སྟེང་སྒོ་འཇུ་འདུལ་གྱི་མན་ངག་ཉམས་སུ་བླངས་པས་བདེ་བའི་ཡེ་ཤེས་རིམ་གྱིས་སྐྱེ་བ་སྟེ། རྒྱ་མཚོ་ལས། འཁོར་ལོ་གསུམ་གཉིས་སྲོག་ཤིང་གསུམ། །མེ་རླུང་འགྲོ་བས་ནམ་མཁའི་བ། །བཞོ་བས་སྟེང་དུ་རྣམ་པར་གྲགས། །ཞེས་པའི་སྟེང་སྒོ་ཐུན་མོང་པ་ནི་སྤྱི་དང་འདྲ་ལ། འདིར་ཐུན་མོང་མ་ཡིན་པའི་ཟབ་ལམ་ནི། བདེ་བའི་ཡེ་ཤེས་རིམ་གྱིས་སྐྱེ་བའང་འཁོར་ལོ་བཞི་བསྒོམ་ཐབས་ཀྱི་མན་ངག་ལས་ཏེ། གང་ཞེ་ན། ཀུན་ཏུ་བཟང་པོའི་བདེ་ཆེན་ཐིག་ལེའི་སྦྱོར་བ་དག་པའི་ཁྱབ་གདལ་ཆེན་པོའི་མན་ངག་གོ། །དང་པོ་ནི།སྙིང་ག་ཆོས་ཀྱི་འཁོར་ལོའི་སྒོམ་ཐབས་ཏེ། དེར་རྩ་ཆེན་བཞི་ལ་སྦྱང་བྱ་སྦྱོང་བྱེད་ཀྱི་ས་བོན་གནས་པའི་དབུས་ན་དྭངས་མ་ལྔ་འདུས་དང་། དེའི་དཀྱིལ་ན་ཡེ་ཤེས་སྙིང་པོའི་ཐིག་ལེ་བཞུགས་ལ། བཞུགས་པ་ལྟར་བསྒོམས་ཏེ་འཇུ་འདུལ་བྱས་པ་ན། ཐིག་ལེ་ལས་སུ་རུང་ནས་འོད་དུ་གྱུར་པས་རིགས་དྲུག་གི་ས་བོན་གཉིད་དང་བཅས་པ་བསྲེགས། རྣམ་ཤེས་བག་ཆགས་དང་བཅས་པ་སྦྱངས། སླར་འོད་ཡེ་ཤེས་
སྙིང་པོའི་ཐིག་ལེ་ལ་འདུས་ཏེ། དེས་རྩ་ཁྲག་དབུགས་དྲོད་ཀྱི་དྭངས་མ་རྣམས་སྔ་མ་སྔར་ཞུ་བས་བསྐུལ་ཏེ་ཕྱི་མ་ཕྱི་མ་ཞུ་ནས་ཐིག་ལེ་སྟོང་པ་རང་བཞིན་མེད་པར་གསལ་བ་ནམ་མཁའི་གཟུགས་ཅན་སྐྱེས་པ་ནི་རྒྱུ་འབྲས་གཉིས་མེད་ཀུན་ཏུ་བཟང་པོའི་མན་ངག་གོ། །དེ་ལྟར་ཡང་། དཀྱིལ་འཁོར་ལྡན་པའི་དཀྱིལ་འཁོར་གྱིས། །དཀྱིལ་འཁོར་ལ་ནི་དཀྱིལ་འཁོར་བསྒོམ། །དཀྱིལ་འཁོར་དཀྱིལ་འཁོར་ལས་བྱུང་བའི། །ཐུགས་ཀྱི་དཀྱིལ་འཁོར་དཀྱིལ་འཁོར་མཆོག །ཅེས་སོ། །གཉིས་པ་ནི། ལྟེ་བའི་འཁོར་ལོ་སྒོམ་ཐབས་ཏེ། དེ་མན་ངག་བཞིན་དུ་བསྒོམས་པས་ཐིག་ལེ་ལས་སུ་རུང་ནས། བདེ་སྟོང་གཉིས་མེད་དུ་ཤར་བས་རྟོག་ཚོགས་སྐུ་དང་ཡེ་ཤེས་བཞི་བཅུ་རྩ་གཉིས་སུ་གསལ་ཞིང་། དེའི་ཚེ་ཆོས་ཀྱི་འཁོར་ལོའི་འོད་མར་བབས་ཏེ་ཀུན་ཏུ་བཟང་མོའི་ཐིག་ལེ་ལ་ཐིམ་པས་དྭངས་མའི་རྒྱུ་བ་ཆད་ནས་བདེ་སྟོང་གཉིས་མེད་ཡེ་ཤེས་ལྔའི་ངོ་བོར་གནས་པ་ནི་ཀུན་ཏུ་བཟང་མོའམ་བདེ་ཆེན་ཐིག་ལེའི་མན་ངག་གོ། །དེ་ལྟར་ཡང་། གསང་བའི་ཐིག་ལེ་དཀྱིལ་འཁོར་དབྱིངས། །ཞེས་སོགས་ཤློ་ཀ་གཉིས་སོ། །གསུམ་པ་ནི། མགྲིན་པའི་འཁོར་ལོའི་སྒོམ་ཐབས་ཏེ། སྙིང་གའི་དྭངས་མ་ཆེན་པོའི་འོད་གྱེན་དུ་སོང་བ་མགྲིན་པའི་འཁོར་ལོའི་ཐིག་ལེར་ཕོག་དེ་ཞུ་བ་ལས་འཁོར་ལོ་གཉིས་བདེ་བ་དུས་གཅིག་ཏུ་མཉམ་པར་སྦྱོར་ཞིང་། བདེ་བ་སྐྱེས་པས་ཡེ་ཤེས་ལྔའི་རོ་མྱང་བ་ན། མྱང་བྱ་མྱོང་བྱེད་མེད་པར་གནས་སུ་སྟོན་པ་ནི་སྦྱོར་བ་དག་པའི་མན་ངག་གོ། །དེ་ལྟར་ཡང་། སྙིང་པོའི་ཐིག་ལེ་མཉམ་སྦྱོར་བས། །བདེ་བའི་ཡེ་ཤེས་རོལ་མོ་ཡིས། །ཡེ་ཤེས་དགྱེས་པ་མཆོད་པར་འབུལ། །ཞེས་སོ། །བཞི་པ་ནི། བདེ་ཆེན་འཁོར་ལོའི་སྒོམ་ཐབས་ཏེ། མགྲིན་པའི་འོད་ཀྱིས་སྤྱི་བོའི་འཁོར་ལོ་ལ་ཕོག་པས་འོད་དུ་ཞུ་ནས་བདེ་སྟོང་དབྱེར་མེད་ནམ་མཁའི་གཟུགས་ཅན་ཀུན་གྱི་ཐུན་མོང་མ་ཡིན་པ་སྐྱེས་པ་དེ་ནི་རྒྱལ་བ་ཐམས་ཅད་ཀྱི་དགོངས་པ་ཡིན་ལ། དེ་ཉམས་སུ་མྱོང་བས་ནི་སངས་རྒྱས་ཀུན་གྱི་ཞལ་དུས་གཅིག་ལ་མཐོང་བ་ཡིན་ནོ། །དེ་ལྟར་ཡང་། ཟག་པ་མེད་པའི་བསོད་ནམས་ཀྱིས། །ཞེས་པ་ནས། དབང་བསྒྱུར་
མཆོག་ཉིད་དམ་པ་ཡིན། །ཞེས་པའི་བར་རོ། །དེ་དག་བསྒོམ་པའི་ཕྱག་བཞེས་ནི། སྟེང་སྒོ་བསླབ་པར་འདོད་པའི་རྣལ་འབྱོར་པས། བསྐྱེད་རིམ་དང་། སྦྱོང་བ་གསུམ་སྔོན་དུ་བཏང་ནས། བདེ་བའི་སྟན་ལ་པུས་མཁྱུད་ཚད་དང་ལྡན་པ་བཅུག་སྟེ། རྩ་གསུམ་འཁོར་ལོ་དྲུག་ཐིག་ལེ་བཞི་དང་བཅས་པ་གསལ་གདབ། དེ་ནས་སྟེང་རླུང་མནན། འོག་རླུང་འཐེན་པའི་སྦྱོར་བས་རླུང་དཀྱིལ་བསྐུལ། དེས་གཏུམ་མོ་སྦར་བས་རྩ་ཨ་བ་བྷཱུ་ཏིའི་ནང་དུ་མེ་སྣ་ཞུགས་ནས། ལྟེ་བ། སྙིང་ག །མགྲིན་པ། སྤྱི་བོའི་འཁོར་ལོ་རྣམས་རིམ་པར་བསྲེགས་པས་ལུས་ལ་དྲོད་བསྐྱེད། དེ་ནས་སྤྱི་བོའི་ཧཾ་ལས་བྱང་ཆུབ་ཀྱི་སེམས་ཕབ། རྩ་གནས་ཀྱི་ཐིག་ལེ་རྟོག་པས་འཁྱགས་པ་རྣམས་ཀྱང་དྲོས་ཏེ་འབར་འཛག་གིས་འཇུ་འདུལ་བྱས་པ་ལས། ཐོག་མར་སྙིང་གའི་ཐིག་ལེ་ཞུ་ནས་འོད་དུ་འབར། དེའི་འོད་མར་བབས་པས་ལྟེ་བ་དང་། ཡར་ཞུགས་པས་མགྲིན་པ་ལ་ཕོག་སྟེ་གཉིས་ཀ་འོད་དུ་འབར། མགྲིན་པའི་འོད་ཡར་སོང་སྟེ་བདེ་ཆེན་འཁོར་ལོ་ལ་ཕོག་པས་ཀྱང་འོད་དུ་འབར། དེ་སྤྱི་བོ་ནས་ཐོན་ཏེ་ཕྱོགས་བཅུའི་དེ་བཞིན་གཤེགས་པ་ཐམས་ཅད་ལ་ཕོག་པས་འོད་དུ་ཞུ་ནས་བདེ་ཆེན་གྱི་འཁོར་ལོ་ཧཾ་ཡིག་དང་བཅས་པ་ལ་ཐིམ་པས་རྩ་འདབ་ཀྱི་ཐིག་ལེ་ཐམས་ཅད་འོད་དུ་ཞུ་ནས་བདེ་སྟོང་དབྱེར་མེད་ནམ་མཁའི་གཟུགས་ཅན་སྐྱེ་བ་སྟེ། དེ་ལྟར་ཐུན་བཞིར་ཉམས་སུ་བླང་བར་བྱའོ། །འདི་ནི་ཟུར་ལུགས་ཀྱི་མན་ངག་གཙོ་བོར་བརྗོད་པ་སྟེ། ཀུན་མཁྱེན་ཆེན་པོའི་མན་ངག་གི་ཡི་གེར། མགྲིན་པའི་འོད་ཀྱིས་སྤྱི་བོ་དང་། སྙིང་གས་མགྲིན་པ་དང་། ལྟེ་བས་སྙིང་ག་དང་། དེའི་འོད་ཀྱིས་ལྟེ་བའི་ཐིག་ལེ་རྣམས་ཞུ་བའི་རིམ་པ་ནི་ཡས་བརྟན་གྱི་ཡེ་ཤེས་དང་། དེ་ནས་སྙིང་གའི་འོད་ཟེར་གྱིས་རིམ་པར་ལྟེ་མགྲིན་སྤྱི་བོའི་ཐིག་ལེ་རྣམས་ཇེ་ཕྲ་ཇེ་ཆུང་དུ་སྙིང་གར་བསྡུས་ལ། དེ་ཡང་རིམ་གྱིས་བསྡུས་ཏེ། མཐར་ཀུན་ཏུ་བཟང་མོ་ཆོས་ཉིད་སྟོང་པ་ཆེན་པོའི་དབྱིངས་སུ་མཉམ་པར་འཇོག་པ་ནི་མས་བརྟན་གྱི་ཡེ་ཤེས་སུ་བཞེད་དོ། །དེ་ཡང་
དྭངས་མ་རྩ་འདབ་རྣམས་སུ་ཕར་འཕེལ་བ་ལ་བདེ་སྟོང་གི་ཡེ་ཤེས་སུ་འདོད་པ་དང་འདི་མི་གཅིག་སྟེ། འདིར་ནི་དྭངས་མ་གཡོ་བྱེད་དང་བྲལ་བས་འོད་གསལ་བ་ལ་རླུང་སེམས་ཚུར་ཐིམ་པ་ལ་ཡེ་ཤེས་ཆེན་པོར་འདོད་པ་ཡིན་གསུངས་སོ། །རྒྱས་པར་ལམ་རྣམ་བཀོད་ཀྱི་ཐིག་ལེ་དྲོད་འབབ་དང་སྒྲོལ་མ་རླུང་གི་མན་ངག་བི་མ་ལའི་གསང་ཐིག་རྩ་འགྲེལ་རྣམས་ལས་ཤེས་པར་བྱའོ། །གཉིས་པ་ནི། གཞན་ལུས་ལ་བརྟེན་པའི་འོག་སྒོ་ཁམས་གསུམ་རོལ་པའི་མན་ངག་ཉམས་སུ་བླངས་པས་བདེ་བའི་ཡེ་ཤེས་ཅིག་ཅར་དུ་སྐྱེ་བ་སྟེ། རྒྱ་མཚོ་ལས། བཀུག་པ་གསུམ་གྱིས་སེམས་ལྔ་རིམ། །སྐྱེས་པས་བཅུ་དྲུག་ས་ཐོབ་པ། །རང་བཞིན་ལྷན་ཅིག་སྐྱེས་པའི་ཕྱིར། །འཆིང་བ་ཉིད་ཀྱང་ཐར་པའི་ཐབས། །ཞེས་པས།གསང་བའི་དབང་པོ་དང་། ཡུལ་པདྨ་དང་། གསང་བའི་རྣམ་ཤེས་གསུམ་ནི་བཀུག་པ་གསུམ་མོ། །དེ་གསུམ་ལ་བརྟེན་ནས་སེམས་ལྔ་སྐྱེས་ཏེ་དགའ་བ་བཅུ་དྲུག་འཆར་བའི་ཕྱིར། རང་བཞིན་ལྷན་སྐྱེས་ཀྱི་ཡེ་ཤེས་ཉམས་སུ་མྱོང་བར་བྱེད་པའོ། །དེ་ཡང་བསྐྱེད་རིམ་དང་རྫོགས་རིམ་སྟེང་སྒོ་ལས་སུ་རུང་བའི་གང་ཟག་ཆགས་ལམ་པས། སྔར་སྦྱོར་མཆོད་དུ་བཤད་པ་ལྟར། བསྙེན་པ་དང་། ཉེ་བསྙེན་གྱི་བྱ་བ་སྔོན་དུ་རྫོགས་ནས། སྦྱོར་བ་གསུམ་གྱི་སྒོ་ནས་སྒྲུབ་པ་དང་།སྒྲུབ་པ་ཆེན་པོ་ཉམས་སུ་བླང་བའོ། །སྦྱོར་བ་གསུམ་ནི། ཐབས་ཉིད་ཤེས་རབ་ཏུ་དང་། ཤེས་རབ་ཉིད་ཐབས་སུ་དང་། ཐབས་ཤེས་གཉིས་མེད་དུ་སྦྱོར་བའོ། །དང་པོ་ནི། གཉིས་སུ་མེད་པར་རོལ་པ་ལས་ཐབས་ཀྱི་བྱང་སེམས་རྡོ་རྗེ་ནོར་བུའི་དཀྱིལ་འཁོར་དུ་སྣང་བའི་དུས་ན་ཁམས་ལྔའི་བཅུད་ཡེ་ཤེས་ལྔའི་དཀྱིལ་འཁོར་ཡེ་ནས་ཡིན་པ་ལྟར་ཉམས་སུ་མྱང་བ་སྟེ། དཀྱིལ་འཁོར་ལྡན་པའི་དཀྱིལ་འཁོར་གྱིས། །ཞེས་སོགས་ཚིགས་བཅད་གཅིག་གོ། །གཉིས་པ་ནི། དེའི་ཚེ་ཡུམ་གྱི་ཉི་མ་བྱང་སེམས་པདྨའི་ཟེའུ་འབྲུར་སྣང་བ་དེ་ཉིད་ལ་ཐིག་ལེ་ཐམས་ཅད་འདུས་པའི་ཕྱིར་ལྷའི་དཀྱིལ་འཁོར་མ་ལུས་པའི་རྒྱུར་འགྱུར་བས་ན། ཐབས་ཀྱིས་ཟིན་ན་རྟོག་ཚོགས་ཐམས་ཅད་སྐུ་དང་ཡེ་ཤེས་ཀྱི་དཀྱིལ་འཁོར་དུ་གསལ་
བར་བྱེད་པའི་མཐུ་དང་ལྡན་པ་སྟེ། གསང་བའི་ཐིག་ལེ་སོགས་ཚིགས་བཅད་གཉིས་སོ། །གསུམ་པ་ནི། ཡབ་ཡུམ་གྱི་རྩ་ཐམས་ཅད་ཀྱི་བཅུད་འདུས་པའི་ཉི་ཟླ་དུས་གཅིག་དུ་མཉམ་པར་སྦྱོར་བས་དངོས་པོ་ལྷན་ཅིག་སྐྱེས་པའི་ཡེ་ཤེས་ཉམས་སུ་མྱང་ཞིང་། སླར་ཡང་དགའ་བ་བཅུ་དྲུག་གི་རིམ་པ་ཡས་བཟློག་རང་བཞིན་ལྷན་སྐྱེས་ཀྱི་བདེ་བ་ཉམས་སུ་མྱོང་བའི་དུས་ན། རྟོག་ཚོགས་ལྷའི་རང་བཞིན་ཅན་དུ་བཞུགས་པ་རྣམས་བདེ་བའི་ཡེ་ཤེས་ཀྱིས་མཆོད་པས་དགྱེས་པ་བསྐྱེད་པ་སྟེ། སྙིང་པོ་ཐིག་ལེ་སོགས་རྐང་པ་གསུམ་མོ། །དེ་ལྟར་ཚོགས་དྲུག་གི་རྟེན་གྱི་དྭངས་མ་ཐམས་ཅད་དབབ་ཐབས་ཀྱིས་ཕབ་སྟེ། རྡོ་རྗེ་དང་པདྨའི་རྩེར་དྲང་བ་དང་བཟུང་བ་དང་ལྡོག་པའི་དུས་ན། ཚོགས་བརྒྱད་རྟོག་པའི་དངོས་པོ་ལྷན་སྐྱེས་ཀྱི་ཡེ་ཤེས་སུ་རང་གསལ་བས་ཟག་པ་དང་བྲལ་ཏེ། བདེ་བའི་ཡེ་ཤེས་སྣང་ལ་འཛིན་མེད་དུ་སྤྱོད་པས་ཚོགས་གཉིས་རྫོགས་པ་དང་། འདོད་ཆགས་ཉིད་བདེ་སྟོང་གི་ཡེ་ཤེས་སུ་གསལ་བར་ཉམས་སུ་མྱོང་བ་ནི་རྒྱལ་བ་ཐབས་ཅད་ཀྱི་ཞལ་མཐོང་བ་ཞེས་ཀྱང་བྱའོ། །དེ་ལྟར་ཡང་། ཟག་པ་མེད་པའི་བསོད་ནམས་ཀྱིས། །ཞེས་སོགས་གསུངས་སོ། །འདིར་ཉམས་སུ་མྱོང་བའི་དགའ་བ་བཞི་ནི། ཐིག་ལེ་གནས་ནས་གཡོ་བ་ནི་དགའ་བ། བདེ་བ་ཉམས་སུ་མྱོང་བ་ནི་མཆོག་དགའ། བདེ་བའི་ངོ་བོ་སྟོང་པར་གྲོལ་བ་ནི་དགའ་བྲལ། དབབ་བཟུང་བཟློག་པའི་ཐབས་ཀྱིས་རང་བཞིན་གསང་བའི་སྙིང་པོ་བདེ་སྟོང་དབྱེར་མེད་དུ་ཉམས་སུ་མྱོང་བ་ནི་ལྷན་སྐྱེས་ཀྱི་དགའ་བ་སྟེ། དེ་ལ་དགའ་བ་བཅུ་དྲུག་བརྩི་བ་དང་། དེ་ལ་ལམ་དང་སྦྱར་བ་ནི་སྔར་དབང་གི་སྐབས་དང་སེམས་ལྔ་བརྩི་ཚུལ་ནི་ལམ་གྱི་ངོ་བོ་ངོས་བཟུང་བའི་ཚེ་བཤད་ཟིན་ཏོ། །འདི་དག་ཀྱང་རྒྱས་པར་རྣམ་བཀོད་ཀྱི་ཁམས་གསུམ་རོལ་པའི་མན་ངག་སོགས་ལས་ཤེས་པར་བྱའོ། །གཉིས་པ་ནི། ཆོས་ཉིད་དེ་བཞིན་ཉིད་རྣམ་པར་མི་རྟོག་པའི་ཏིང་ངེ་འཛིན་བསྒོམ་པ་སྟེ། ཏིང་ངེ་འཛིན་ཐམས་ཅད་ཀྱི་མཐར་ཐུག་པའོ། །དེ་ལ་ཏིང་ངེ་འཛིན་གྱི་སྦྱོར་བ་ལ། སྤྱིར་རིལ་པོ་དང་། རྗེས་སུ་གཞིག་པའི་རྣལ་
འབྱོར་གཉིས། དང་པོ་ནི། བདག་གི་ཕུང་པོ་ལས་བརྩམ་སྟེ་བདག་མེད་པར་མོས་པའི་ལྟ་བ་དང་ཏིང་ངེ་འཛིན་གྱིས་བསྒོམ་ཞིང་ཆོས་ཐམས་ཅད་ཀྱང་དེ་དང་འདྲ་བར་མོས་ཏེ་བསྒོམ་པའོ། །གཉིས་པ་ནི། ཆོས་ཐམས་ཅད་ལ་མཚན་ཉིད་སོ་སོར་བརྟག་པ་ན། གང་གི་ཡང་ངོ་བོ་མ་གྲུབ་པར་ཡིད་ཆེས་པར་བྱས་ལ། བདག་ཉིད་ཀྱང་དེའི་ཁོངས་སུ་འདུ་བའི་ཕྱིར། དེ་ལྟར་མཚན་མ་མེད་པར་ཐག་བཅད་ནས་བསྒོམ་པའོ། །ཁྱད་པར་དེ་བཞིན་ཉིད་ཀྱི་དཀྱིལ་འཁོར་ངོས་བཟུང་ནས་དེ་ལ་འཇུག་པའི་ཚུལ་བསྟན་པར་བྱ་སྟེ། འདི་ལྟར་འཁོར་འདས་ཀྱི་ཆོས་ཐམས་ཅད་ལྷག་པ་བདེན་པ་དབྱེར་མེད་ཀྱི་གནས་ལུགས་ཡེ་ནས་སྐུ་གསུང་ཐུགས་ཀྱི་དཀྱིལ་འཁོར་དུ་སངས་རྒྱས་ཏེ་རང་བཞིན་གྱིས་རྣམ་པར་དག་པ་ལས་སྔར་མ་ཡིན་པར་ཕྱིས་ལམ་གྱིས་གསར་དུ་སངས་རྒྱས་སུ་བསྒྲུབས་པ་ལྟ་བུ་ནི་མ་ཡིན་མོད། དེ་ལྟར་ཡིན་དུ་ཟིན་ཀྱང་མ་རྟོགས་ན་ཡིན་པ་ཙམ་གྱིས་ཕན་མི་ཐོགས་པས་གཞི་དེ་ལྟར་ཡིན་པར་ཡིད་ཆེས་པར་བྱས་ལ་ཏིང་ངེ་འཛིན་གྱིས་བསྒྲུབས་པས། གཞི་ཇི་ལྟ་བ་བཞིན་མངོན་དུ་སྣང་བར་འགྱུར་བ་ཡིན་ནོ། །དེ་ལྟར་ཡང་། དཀྱིལ་འཁོར་ལྡན་པའི་དཀྱིལ་འཁོར་གྱིས། །ཞེས་སོགས་རྐང་པ་ལྔས་མདོར་བསྟན། འབྱུང་བ་ཤེས་རབ་རིགས་ཀྱི་ཡུམ། །ཞེས་སོགས་ཀྱིས།དེའི་དོན་ཡོན་ཏན་དང་བཅས་པ་རྒྱས་པར་བསྟན་ནས། ཇི་ལྟར་འཇུག་པའི་ཚུལ་ནི། ཡེ་ཤེས་རྫོགས་པའི་དཀྱིལ་འཁོར་ལ། །ཞེས་སོགས་རྐང་པ་ལྔས་གསུངས་སོ། །དེ་ལ་ཐོག་མར་ཐོས་བསམ་གྱིས་སྒྲོ་འདོགས་ཆོད་པར་བྱས་ལ། དེའི་འོག་ཏུ་བསྒོམ་པའི་ཤེས་རབ་ཀྱིས་གོམས་པར་བྱའོ། །དེའི་རིམ་པ་ནི། ལམ་རིམ་ལས།དེ་ཕྱིར་ལྷག་མའི་ལུས་ཆ་མཉམས་པའི་ཕྱིར། །བདེ་ལྡན་དྲོད་པས་ཆོས་བདུན་ཚུལ། །ལྡན་བྱས་རྗེ་བཙུན་རྣམ་སྣང་བཞིན། །འཛིན་རྩོལ་མེད་པའི་སེམས་ཀྱིས་འདུག །ཅེས་པ་ལྟར། བདེ་བའི་སྟན་ལ་ལུས་རྣམ་སྣང་གི་ཆོས་བདུན་དང་ལྡན་པས་འདུག་ལ། སེམས་རྟོག་པ་དང་ཕྲལ་ཏེ་མ་བཅོས་པར་འཇོག་པའོ། །དེ་བཞག་ཐབས་ལ། བློ་ཆེ་བ་ཤེས་རབ་ཀྱི་དང་། བློ་ཆུང་གདམས་ངག་གི་སྟོབས་ཀྱིས་གཉིས་ཏེ། སྔ་མ་ལས། དེ་ཡང་
གདམས་ངག་ཤེས་རབ་ཀྱི། །སྟོབས་ཀྱིས་བཞག་པས་གོམས་པར་བྱེད། །ཅེས་སོ། །དང་པོ་ལའང་། རིག་པ་སྤྱི་བླུགས་སུ་དང་། མཐོང་བའི་རྗེས་ལ་འཇོག་པའོ། །དང་པོ་ནི། ཆོས་ཉིད་སྤྲོས་བྲལ་དུ་བསྒོམ་མནོ་དྲན་ཙམ་གྱིས་རིག་པ་ཡུལ་མེད་དུ་སལ་ལེར་འཇོག་པ་སྟེ། རིམ་དྲུག་ལས། བསམ་བྱ་དམིགས་སུ་མེད་པས་ན། །གཟུང་འཛིན་བྲལ་བའི་རང་རིག་ཉིད། །དམིགས་མེད་ཚུལ་དུ་རང་སྣང་བ། །བསྒོམ་པའི་མཆོག་ཏུ་འདི་གསུངས་སོ། །ཞེས་སོ། །གཉིས་པ་ནི། དེས་གནས་སུ་མ་འདོད་ན། སྔར་རྟོགས་པའི་བལྟ་བ་དྲན་པར་བྱས་ནས། དེའི་ངང་ལ་གསལ་བ་སོ་མ་ཤོར་ཙམ་དུ་འཇོག་པ་སྟེ། དེ་ལས། རང་བཞིན་མཐོང་ལས་དོན་མེད་ཕྱིར། །རྗེས་མཐུན་ཏིང་འཛིན་གསལ་མཛད་པའང་། །ཐབས་ཀྱི་དམ་པར་དེ་བཤད་དེ། །ཞེས་སོ། །གཉིས་པ་ནི། སྔར་གྱི་འཇོག་ཐབས་གཉིས་པོ་གང་ལྟར་བཞག་ཀྱང་གནས་སུ་མ་འདོད་པའི་བློ་ཆུང་གིས། བླ་མ་ལས་གདམས་ངག་མཉན་ཏེ་གཞག་པར་བྱའོ། །གང་ཞེ་ན། བསྒོམ་པའི་ཚེ་བདག་ཉིད་ཀྱི་སེམས་ལ་ནང་དུ་བལྟས་པ་ན།སེམས་ཀྱི་རང་བཞིན་ཅིར་ཡང་མི་མཐོང་ངོ་། །ཅིར་ཡང་མ་མཐོང་བ་དེ་ཁོ་ན་ཆོས་ཉིད་མཐོང་བ་ཞེས་བྱ་སྟེ། རྩ་བ་མེད་པའི་སེམས་ཉིད་ནི། །ཞེས་པ་ནས།གནས་སུ་མ་ཡིན་གང་ཡང་མིན། །དེ་བཞིན་ཉིད་དབྱིངས་ཡེ་ཤེས་ཏེ། །ཞེས་པའི་བར་དུ་གསུངས་པའི་ཕྱིར་རོ། །དེ་ལྟར་བཞག་པའི་ཚེ་ཡིད་ལ་མི་བྱེད་པའི་སྟོང་པ་ནི་ཀུན་ཏུ་བཟང་མོ་ཆོས་ཉིད་དོན་གྱི་ཡེ་ཤེས་དང་། རང་རིག་གསལ་དང་ཕྱེད་པའི་སྣང་ཆ་ནི་ཀུན་བཟང་ཆོས་སྐུ་གཞིའི་ཡེ་ཤེས་ཏེ། དབྱིངས་ཡེ་ཟུང་འཇུག་གཉུག་མའི་ཡེ་ཤེས་སམ་ཀུན་ཏུ་བཟང་པོ་བསམ་གྱིས་མི་ཁྱབ་པའི་ཡེ་ཤེས་ཞེས་བྱའོ། །དེ་བས་ན། དེའི་ངང་ལས་སོ་མ་ཉམས་པར་བཞག་པས། གང་གིས་གླང་ཆེན་མྱོས་འདྲའི་སེམས། །མཉམ་པར་བཞག་པས་བཏུལ་ནས་སུ། །ཞེས་པ་ལྟར་འཁྲུལ་རྟོག་སྣ་ཚོགས་ཀྱིས་མྱོས་པའི་སེམས་དེ་བཞག་ཐབས་
གཉིས་གང་རུང་གི་སྒོ་ནས་བཏུལ་བས་རྒྱུ་བ་ཇེ་ཉུང་དང་བརྟན་པ་ཇེ་ཐོབ་ཏུ་གྱུར་ཏེ་རིག་པ་ཡུལ་མེད་གསལ་ལ་མི་གཡོ་བར་རྩོལ་མེད་དུ་གནས་པར་འགྱུར་རོ། །དེ་ལྟར་ཡང་། སློབ་དཔོན་གཉན་དཔལ་དབྱངས་ཀྱིས། བསྒྲུབ་པར་བྱ་བ་གང་ཡིན་དེ་ལ་ནི། །རྩོལ་བས་ཡང་ནས་ཡང་དུ་མཉམ་བཞག་སྟེ། །གོམས་པ་ཀླུང་དུ་གྱུར་ཅིང་ཁ་དཀྱིས་ནི། །རྩོལ་བ་མེད་པར་ལྷུན་གྱིས་གྲུབ་པར་འགྱུར། །ཞེས་སོ། །ཇི་ལྟར་གོམས་པའི་རིམ་པ་བྱང་ཆུབ་ཀྱི་སེམས་ལྔ་དང་ལྡན་པ་སྟེ། ཐོག་མར་བློ་ལ་དོན་མ་ནོར་བར་གཡོ་ཞིང་ལྡང་བ་དང་། དེ་ནས་རིམ་པར་དེ་ཐོབ་ཅིང་གསལ་བར་སྨོན་པ་དང་། དོན་དེ་ལ་འཇུག་པ་དང་། གནས་ཤིང་འདྲིས་པར་བྱེད་པ་དང་། མཐར་ཕྱིན་ཏེ་བཙལ་བ་མེད་པར་འབྱུང་བའོ། །དེ་ཡང་གནས་པ་དང་རང་བཞིན་མེད་པའི་དོན་རྟོགས་པའི་ལྡོག་ཆ་ནས་ཞི་ལྷག་གཉིས་ཏེ་ཟུང་དུ་འཇུག་པས་ཉོན་མོངས་པའི་མགོ་ནོན་པ་དང་རྩ་བ་འབྱིན་པར་བྱེད་པའོ། །དེ་ལྟར་ཡེ་ཤེས་རྒྱས་པ་ལས། ཞི་གནས་ཀྱིས་ནི་ཉོན་མོངས་མགོ་གནོན་ཞིང་། །ལྷག་མཐོང་དམ་པས་རྩ་བ་རབ་ཏུ་འབྱིན། །ཞེས་སོ། །དེ་ལྟར་ཏིང་ངེ་འཛིན་ལ་མཉམ་པར་འཇོག་པའི་ཚེ། བྱིང་རྒོད་ལ་སོགས་པའི་སྐྱོན་བྱུང་ན་མན་ངག་གིས་བསལ་ཏེ་བསྒོམས་པས། གཡོ་ཐོབ་གོམས་བརྟན་མཐར་ཕྱིན་པའི་ཉམས་ལྔ་དང་། ཕྱི་ནང་གསང་བའི་དྲོད་ཉམས་སུ་མྱོང་ནས། རྟགས་ཀྱི་རྣམ་པ་ཅིར་ཡང་སྣང་བར་འགྱུར་ཏེ། ལམ་རིམ་ལས། སྨིག་རྒྱུ་དུ་བ་སྲིན་མེ་ཁྱེར། །མར་མེ་ཉི་མའི་ཚུལ་དུ་སྦྱར། །ཞེས་པ་བསྐྱེད་རིམ་གྱི་ཚེ་ཉམས་རིམ་གྱི་དཔེར་བཞེད་ནའང་།འདིར་མཚན་མ་མཐོང་བའང་མི་འགལ་ཏེ། ཕྱི་མའི་ཕྱི་མ་རྟོག་པའི་དྲ་བ་གསལ་བའི་རྒྱུད་ལས། གསོལ་པ་བཅོམ་ལྡན་འདས། རྣལ་འབྱོར་པ་དེ་དག་རྟགས་ཇི་ལྟ་བུ་ལགས། བཀའ་སྩལ་པ། རིགས་ཀྱི་བུ་དང་པོ་རྣམས་ནི་བརྒྱུད་པ་སྟེ།འབྲས་བུའི་རྟགས་ཀྱང་རིམ་པ་སྟེ་ལྔའོ། །ལྔ་གང་ཞེ་ན། དུ་བ། སྨིག་སྒྱུ་དང་། མགལ་མེ་དང་། མར་མེ་དང་། ནམ་མཁའ་གསལ་བ་ལྟ་བུ་སྟེ། རིམ་པའི་རྟགས་ཀྱི་བྱེ་བྲག་གོ། །རིགས་
ཀྱི་བུ། གཉིས་པར་ནི་མངོན་སུམ་པ་སྟེ། འབྲས་བུའི་རིམ་པའང་མངོན་སུམ་པའོ། །ཞེས་སོ། །མདོར་ན་རྒྱས་པ་ལས། མཚན་མ་མེད་པའི་དོན་མཐོང་ན། །སངས་རྒྱས་ཀུན་གྱི་དཀྱིལ་འཁོར་མཐོང་། །ཞེས་གསུངས་སོ། །བཞི་པ་དུས་ནི། མཉམ་གཞག་ལས་ནམ་ལངས་པ་ན་རྗེས་སྤྱོད་ཀྱི་བྱ་བ་ལ་འཇུག་པའི་ཕྱིར། ཏིང་ངེ་འཛིན་ནི་མཉམ་གཞག་གི་དུས་ཁོ་ནར་བསྒོམ་པར་བྱ་བ་སྟེ། འདི་ཉིད་ལས། མཉམ་པར་བཞག་པས་བཏུལ་ནས་སུ། །ཞེས་སོ། །ལྔ་པ་སྐྱོན་ནི། ཏིང་ངེ་འཛིན་མེད་ན་ལྟ་བའི་གོ་ཡུལ་བཟང་ཡང་འགྲུབ་པར་མི་འགྱུར་ཏེ། ལམ་རིམ་ལས། གལ་ཏེ་ཏིང་འཛིན་འདི་མེད་ན། །རྒྱ་མཚོའི་འཇིང་གི་ཕ་བོང་ལྟར། །བསྐལ་པར་ལམ་ལ་འབད་བྱས་ཀྱང་། །དོན་མེད་སྙིང་པོ་བསྐམས་པ་ཡིན། །ཞེས་སོ། །དྲུག་པ་ཡོན་ཏན་ནི། བསྒྲུབ་བྱ་གང་ཡང་ཏིང་ངེ་འཛིན་གྱིས་འགྲུབ་པའི་ཕྱིར་ཏེ། རིན་ཆེན་དྲ་བ་ལས། བསྒྲུབ་པའི་གཙོར་ནི་ཏིང་འཛིན་པས། །ཏིང་འཛིན་འདི་ཡིས་བྱེད་པར་འགྱུར། །ཞེས་དང་། འདི་ཉིད་ལས། སྔགས་དང་ཕྱག་རྒྱ་རབ་བརྟན་ན། །དངོས་གྲུབ་ཡ་མཚན་ཆེན་པོར་འགྱུར། །ཞེས་སོ། །དགུ་པ་གནས་སུ་སྟོབ་པ་མཆོད་པ་ལ་དྲུག་ལས། དང་པོ་དགོས་ཆེད་ནི། གཞན་སེལ་སྒྲིབ་པ་འབྱང་ཞིང་ཉམས་ཆག་སྐོང་། དོན་གཉེར་ལྷ་མཉེས་པས་ཚོགས་རྫོགས་ཤིང་ལས་དང་དངོས་གྲུབ་བདག་གཞན་ གྱི་དོན་གྲུབ་པའི་ཕྱིར་ཏེ། ཐུགས་ཐིག་ལས། བདག་གཞན་དོན་རྫོགས་མཉེས་ སྐོང་བ། །ཞེས་དང་། ཁོག་གཞུང་ལས། ཚོགས་གཉིས་རྫོགས་ཕྱིར་མཆོད་པ་སྟེ། །ཞེས་སོ། །གཉིས་པ་ངོ་བོ་ནི། བཀུར་བྱའི་གནས་གང་ཞིག་སྒོ་གསུམ་ གྱིས་བཀུར་ཞིང་མཆོད་པ་དང་། རྫས་ཀྱི་སྒོ་ནས་ཀྱང་མཉེས་པར་བྱེད་པ་སྟེ།ཐུགས་ཐིག་ལས། བྱ་བྱེད་བྱ་བ་བྱེད་འདུག་པས། །དགྱེས་ཚིམ་འགྱུར་བའི་དངོས་པོ་ཉིད། །ཅེས་སོ། །གསུམ་པ་སྒྲ་དོན་ནི། པཱུ་ཛའི་སྒྲས་མཆོད་པ་སྟེ། དགེ་བའི་ལས་ཐམས་ཅད་ཀྱི་སྔོན་དུ་འགྲོ་བའི་ཕྱིར་བསྐྱེད་པར་
བྱེད་པའི་དོན་དང་། ཡང་དང་ཡང་དུ་དགྱེས་པ་བསྐྱེད་པ་དང་། བཀུར་བའི་དོན་གྱིས་གནས་སུ་སྟོབ་པའི་ཕྱིར་མཆོད་པའོ། །དེའང་ཁོག་གཞུང་ལས། གནས་སུ་སྟོབ་ཕྱིར་མཆོད་པ་སྟེ། །ཞེས་སོ། །བཞི་པ་རྣམ་གྲངས་ལ། དམིགས་ཡུལ་དུ་གྱུར་པའི་ཞིང་གི་དང་། ཡོངས་སུ་བསྔོ་བའི་དང་། འབྲས་བུ་ཐོབ་པར་འགྱུར་བའི་དང་།དངོས་པོའི་བྱེ་བྲག་གོ། །དང་པོ་གསུམ་ནི། རིམ་པར་འཕགས་པ་མཆོད་པ་དང་། བྱང་ཆུབ་ཀྱི་ཕྱིར་བསྔོས་པའི་མཆོད་པ་དང་། ཐར་པའི་རྒྱུར་འགྱུར་བའི་མཆོད་པ་རྣམས་ནི་འཇིག་རྟེན་ལས་འདས་པ་སྟེ། དེ་ལས་གཞན་པ་རྣམས་ནི་འཇིག་རྟེན་པའོ། །བཞི་པ་དངོས་པོའི་བྱེ་བྲག་ལ། སྤྱིར་རྒྱལ་བ་མཉེས་པའི་མཆོད་པར་འགྱུར་བ་དམ་པའི་ཆོས་སྟོན་པ་དང་། བསྒོམ་པ་སོགས་ནི་འཇིག་རྟེན་ལས་འདས་པ་དང་། འདོད་པའི་ཡོན་ཏན་ལྔ་ལ་སོགས་པ་འཇིག་རྟེན་པའོ། །ཡང་ན་རྣམ་པར་མི་རྟོག་པ་བསྒོམ་པ་དང་། དེ་ལས་གཞན་པའི་ཁྱད་པར་གྱིས་དོན་དམ་དང་ཀུན་རྫོབ་བམ། ཐུན་མོང་པ་ཕྱིའི་མཆོད་པ་དང་ཁྱད་པར་བ་ནང་གི་མཆོད་པ་སྟེ་བླ་ན་ཡོད་པ་དང་། གསང་བ་རྨད་དུ་བྱུང་བ་བླ་ན་མེད་པའི་མཆོད་པ་དང་། ཡང་ཏིང་ངེ་འཛིན་དང་། ཐབས་སྦྱོར་སྒྲོལ་དང་། རྫས་ཀྱི་མཆོད་པ་སོགས་རྣམ་གྲངས་དུ་མར་གྲགས་མོད་ཀྱི། རྒྱུད་གཞུང་འདི་ཉིད་ནས།ཕྱག་རྒྱའི་དང་། དུག་གསུམ་གྱི་དང་། ལྷག་པ་ཏིང་ངེ་འཛིན་གྱི་དང་། གླུ་ཡེ་ཤེས་ཀྱི་མཆོད་པ་ཙམ་དང་། ཁོག་གཞུང་ལས་ཀྱང་། ཏིང་འཛིན་སྦྱོར་སྒྲོལ་དམ་རྫས་དང་། །འདོད་ཡོན་གླུ་དང་སེམས་ཀྱི་སྤྲིན། །རོལ་མོ་ལ་སོགས་དབང་བསྒྱུར་དབུལ། །ཞེས་པ་ཙམ་ལས་རྐང་གྲངས་ཞིབ་པར་མ་སྨོས་ནའང་། སྒྲུབ་ཐབས་སུ་བཤད་རྒྱུད་དང་། ཡན་ལག་གི་རྒྱུད་ཀྱིས་ཁ་བསྐངས་ནས་ཞི་ཁྲོ་གཉིས་ཀ་ལ་བཅུ་གསུམ་མམ་བཅུ་བཞིར་གསུངས་སོ། །དེ་དག་འཆད་པ་ལ། རྣམ་གྲངས་དངོས་དང་། དགོངས་དགོངས་པའི་འང་པའི་ཁྱད་པར་གྱི་འབུལ་ཐབས་དང་། གང་གི་ཚེ་བྱ་བའི་དུས་དང་། ཞར་ལ་ཚོགས་ཀྱི་འཁོར་ལོ་བཤད་པའོ། །དང་པོ་ལ་བྱིན་རློབ་དང་། དབུལ་བའོ། །དང་པོ་ནི། སྟོང་པའི་
ངང་ལས་བདག་ཉིད་ལས་ཀྱི་ལྷའི་སྐུར་བསྒོམས་ནས་བྱིན་གྱིས་རློབ་སྟེ། ཕྱག་རྒྱ་བཞི་པའི་བསམ་གཏན་ལས། ཧཱུཾ་ཞེས་ལས་ཀྱི་སེམས་དཔར་བསྐྱེད། །དེ་ནས་བྱིན་གྱིས་རློབ་པར་བྱ། །ཞེས་སོ། །དེ་ལ་ཐུན་ཁྱད་གཉིས་ལས། ཐུན་མོང་པ་ཕྱི་མཆོད་ལྔ་ལ། ཐུགས་ཀ་ནས་སོ་སོའི་ས་བོན་སྤྲོས་ལ་བསྡིམ་སྟེ་འཕྲོ་འདུ་དང་། སྔགས་བརྗོད་པའི་སྦྱོར་བས་མཆོད་རྫས་ཐོགས་པའི་ལྷ་མོ་མཁའ་ཁྱབ་དུ་རློབ་པའོ། །ཁྱད་པར་གྱི་མཆོད་པ་སྨན་གཏོར་རཀྟ་གསུམ་ལས། སྨན་གྱི་སྣོད་གཞལ་ཡས་ཁང་ལྟེ་བ་རྩིབས་བཞི་དང་བཅས་པའི་ནང་དུ་ཤ་ལྔ་བདུད་རྩི་ལྔར་ཧཱུཾ་མཱུཾ་སོགས་ས་བོན་ཟུང་ལྔ་བཀོད། ཆོ་ག་གསུམ་གྱིས་རིགས་ལྔ་ཡབ་ཡུམ་དུ་བསྐྱེད། རྗེས་ཆགས་ཀྱི་སྦྱོར་བས་རྟེན་བརྟེན་པར་བཅས་པ་ཞུ་སྟེ་སྣོད་ཀ་པཱ་ལར་བཅུད་ཡེ་ཤེས་ཀྱི་བདུད་རྩི་ལ་ཨོཾ་དང་། ཁ་གཅོད་ཀྱི་རྡོ་རྗེ་རྒྱ་གྲམ་ལ་རྟ་མགྲིན་གསང་བའི་ཡུམ་བཞི་དང་བཅས་པ་བསྐྱེད། མཐེབ་སྲིན་གྱིས་རྡོ་རྗེ་བཟུང་བ་བདུད་རྩི་ལ་རེག་སྟེ། ཨ་མྲྀ་ཏའི་སྔགས་བཟླ་ཞིང་། ཨོཾ་གྱི་འོད་ཟེར་གྱིས་འཁོར་འདས་ཀྱི་བདུད་རྩི་བཀུག་ནས་དམ་ཚིག་གི་བདུད་རྩི་ལ་རོ་མཉམ་པར་བསམ་པ་སྟེ། ཕྱག་རྒྱ་བཞི་པ་ལས།མཐེབ་སྲིན་ཉི་ཟླས་བཟུང་བྱས་ལ། །དགུག་པའི་སྔགས་བརྒྱ་རྩ་བརྒྱད་དུ། །བཟླས་ཏེ་ནམ་མཁར་བདུད་རྩི་དགུག །ཅེས་སོ། །མཐར་རྡོ་རྗེས་གཡོན་དུ་དཀྲུགས་ཏེ་ཧཱུཾ་བརྗོད་པས་ཡུམ་བཞི་བདུད་རྩི་ལ་བསྡིམ་པའོ། །འདི་ནི་རྗེ་བླ་མས་མཛད་པའི་སྒྲུབ་ཐབས་ཀྱི་དགོངས་པ་སྟེ། གཞན་དུ་རྟ་མགྲིན་ཡུམ་བཞི་དང་དུས་གཅིག་ཏུ་རོལ་པས་བདུད་རྩི་བསྡུས་ལ་ཡབ་ཡུམ་ཞུ་བ་དང་། དྲུག་ཅུ་པ་ལས།རྣལ་འབྱོར་པ་ལས་གཏོར་བྱས་ན། །རྟོག་སྒྲིབ་ཉམས་ཆག་དག་པར་འགྱུར། །མཆོད་པའི་རྫས་ལ་གཏོར་བྱས་པས། །ཐམས་ཅད་བདུད་རྩི་ཉིད་དུ་འགྱུར། །མི་མཐུན་ཕྱོགས་ལ་གཏོར་བྱས་པས། །དྲག་པོ་གཏུམ་པོའང་འཇིག་པར་འགྱུར། །ཞེས་པ་ལྟར་བསང་གཏོར་གསུམ་ཡང་མཛད་དེ་སྤྲོས་པའི་ཡན་ལག་ཙམ་དུ་ཟད་དོ། །གཏོར་མ་ནི། སྣོད་ཀ་པཱ་ལར་བཅུད་གཏོར་རྫས་འདོད་པའི་ཡོན་ཏན་ཐམས་ཅད་པ་ལ་ཨོཾ་བཀོད་དེ་འཕྲོ་འདུ་དང་། སྔགས་
ལན་བདུན་བརྗོད་པས་དྲུག་གིས་འདོད་ཡོན་གྱི་ལྷ་མོ་དྲུག་རེ་རེ་ནས་བསྐྱེད་ཅིང་བདུན་པས་དེ་དག་རེ་རེ་ཡང་གྲངས་མེད་པར་སྤྲོས་ཏེ་མཁའ་ཁྱབ་ཏུ་སྤེལ་བའོ། །རཀྟ་ནི། སྣོད་དམར་གྱི་དུང་ཆེན་དུ་བཅུད་རཀྟ་ལ་ར་ཡིག་བཀོད་དེ་འཕྲོ་འདུ་དང་སྔགས་བརྗོད་པས་རྦ་རླབས་འཕྱོ་བའི་རཀྟའི་རྒྱ་མཚོར་བསམ་པའོ། །དེ་དག་ཀྱང་གལ་ཕྲེང་ལས།བསྒྲུབ་ལ་བརྩོན་པའི་རྣལ་འབྱོར་པས། །མཆོད་འབྲས་བསྒྲུབ་བྱ་དེ་ཡི་ཕྱིར། །གསང་སྔགས་ཕྱག་རྒྱ་ལྡན་པ་ཡིས། །བདུད་རྩི་ལྷ་མོར་བྱིན་གྱིས་རློབ། །ཅེས་སོ། གཉིས་པ་ལ། གང་གིས། གང་ལ། གང་ཇི་ལྟར་དབུལ་བའོ། །དང་པོ་ནི། དཀྱིལ་འཁོར་གྱི་གཙོ་བོ་ལས་མར་མེ་གཅིག་ལས་གཉིས་ཆད་ཀྱི་ཚུལ་དུ་ལས་ཀྱི་རྡོ་རྗེ་སེམས་དཔའི་རྣམ་པར་ཤར་སྒོར་ཐོན་པ་ངེས་སོ། །གཉིས་པ་ནི། དམ་ཡེ་གཉིས་སུ་མེད་པའི་དཀྱིལ་འཁོར་གྱི་ལྷ་ཚོགས་རྣམས་ལའོ། །གསུམ་པ་ལ། ཞི་བ་དང་། ཁྲོ་བོའི་མཆོད་པ་གཉིས་ལས། དང་པོ་ལ། གང་འབུལ་ན་བཅུ་བཞི་སྟེ། སྡོམ་ནི། གུས་པ་ཕྱག་དང་ཕྱག་རྒྱ་གར། །ཀུན་བཟང་ཞབས་བསིལ་བཞི་བསྣོལ་ཏེ། །བདུད་རྩི་གཏོར་མ་གསང་བསྣན་དང་། །ལྷག་པ་ཏིང་འཛིན་སྒྲོལ་དང་སྦྱོར། །འདོད་ཡོན་རོལ་མོ་གླུ་ཡེ་ཤེས། །དེ་རྣམས་ཇི་ལྟར་དབུལ་བ་ལ།ལས་རིམ་བཅུ་བཞི་ལས། དང་པོ་ཕྱག་ནི། ཡུལ་དང་འཚལ་མཁན་དབྱེར་མེད་པར་མཇལ་བ་ནི་ཕྱག་གི་དོན་ཡིན་ལ། བརྡ་ཙམ་དུ་ལྷ་རྣམས་ཀྱི་ཡོན་ཏན་དྲན་པས་མོས་པའི་སྒོ་ནས་འཚལ་བ་སྟེ། གལ་ཕྲེང་ལས། ལྷ་དང་བདག་ཏུ་མི་གཉིས་པའི། །དོན་ཉིད་རྟོགས་པར་བྱ་བའི་ཕྱིར། །ཇི་ལྟར་མར་ལ་མར་བཞིན་དུ། །གཉིས་མེད་རིག་པས་ཕྱག་འཚལ་ལོ། །ཞེས་སོ། །དེའང་མཇུག་ཏུ། ཨ་ཏི་པུ་ཧོ། ཞེས་བཙལ་བས་ལྷ་ཚོགས་རྣམས་ཀྱིས། །པྲ་ཏི་པུ་ཧོ། ཞེས་ལན་གནང་བར་བསམ་པའོ། །འདིར་རྗེ་བླ་མས་མཛད་པའི་སྒྲུབ་ཐབས་སུ་ཕྱག་དང་མཆོད་པ་སོ་སོར་དམིགས་ཕྱེ་ནས་མཆོད་པ་ལ་བཅུ་གསུམ་དུ་བཞེད་པ་ལྟར་བཅུ་གསུམ་ལས། དང་པོ་ཕྱག་རྒྱའི་མཆོད་པ་ནི། སྒོ་གསུམ་ལྷའི་སྐུ་གསུང་ཐུགས་ལས་མི་གཡོ་བར་རྒྱས་འདེབས་པ་སྟེ་འོག་ཏུ་འཆད་དོ། །གཉིས་པ་ནི།
བདེ་བར་གཤེགས་པའི་ཚིག་གིས་བསྐུལ་ནས་སྔགས་རྒྱས་འབུལ་ཏེ། ཆོས་ཐམས་ཅད་རིག་པ་རང་སྣང་མཉམ་པ་ཉིད་ལ་བཟང་ངན་དང་བླང་དོར་མ་གྲུབ་པའི་ཕྱིར། མཆོད་པར་མ་གྱུར་པའི་དངོས་པོ་རྡུལ་ཙམ་ཡང་མེད་དེ་སྤྱོད་ཡུལ་ཡོངས་སུ་དག་པ་ཀུན་བཟང་གི་མཆོད་པའོ། །དེ་ལྟར་ཡང་། ཧེ་རུ་ཀ་འདུས་པ་ལས། ཇི་ལྟར་འདོད་ཅིང་ཡིད་འོང་བའི། །ཡོ་བྱད་ནམ་མཁའ་ཁྱབ་པར་སྤྲུལ། །མོས་པ་དག་པའི་ཁྱད་པར་བཞིན། །འཁོར་གསུམ་དག་པའི་སྟོབས་ཀྱིས་དབུལ། །ཞེས་སོ། །གསུམ་པ་ནི། ཡང་དག་སོགས་ཀྱི་ཚིག་གིས་བསྐུལ་ཞིང་། དུང་ཞལ་གྱི་ཕྱག་རྒྱ་བཅས་ལ། ཨཱ་ཧ་རའི་སྔགས་གཅིག་ལ་ཏིང་ངེ་འཛིན་བསིལ་ཆབ་ཐོགས་པའི་ལྷ་མོས་ལན་གསུམ་དུ་ཕུལ་བས་རིམ་པར་ཕྱག་དང་ཞབས་བསིལ་ནས་ཞལ་དུ་གསོལ་བས་མཉེས་པར་བསམ་པ་སྟེ། དེ་ལས། རྡོ་རྗེ་ཐལ་མོ་ཁ་ཕྱེ་ཞིང་། །རཀྟ་སྒྲེང་བའི་ཚུལ་གྱིས་ནི། །ཕྱག་ཞབས་ཞལ་བསིལ་དབུལ་བར་བྱ། །ཞེས་སོ། །བཞི་པ་ནི། སྤོས་ཀྱི་སྤྲིན་ལྡིང་སོགས་ཀྱི་ཚིག་གིས་བསྐུལ་ཞིང་གླུ་ལྔ་སྔོན་དུ་འགྲོ་བའི་སོ་སོའི་སྔགས་རྒྱས་ལྷ་མོ་རྣམས་སྤྲོས་ལ། བདུག་ཤངས་ལ་སོགས་པའི་མེ་ཏོག་དབུ། མར་མེ་སྤྱན། དྲི་ཐུགས་གནས་རྣམས་སུ་དང་པོར་ཕྱག་མཚན་གྱིས་མཆོད་ནས་མཐར་ལྷ་མོ་ཉིད་ཀྱང་ཐིམ་པར་བསམ་པ་སྟེ། དེ་ལས། རྡོ་རྗེ་ལྷ་མོ་རབ་མཛེས་མ། །སོ་སོའི་ཡོ་བྱད་རབ་ཐོགས་ནས། །ནམ་མཁའ་ཁྱབ་པར་རབ་སྤྲུལ་ཞིང་། །ཡོ་བྱད་རང་ལུས་ཐིམ་པར་མཆོད། །ཅེས་སོ། །དེ་ནས་སྐྱེས་ལན་གྱི་ཚུལ་དུ། རབ་ཏུ་དགའ་བ་ཞེས་སོགས་བརྗོད་པ་ན། ལྷ་མོ་རྣམས་སླར་བྱུང་ནས་བདག་གི་ཤངས་ལ་སོགས་པའི་གནས་སུ་ཐིམ་པས་དངོས་གྲུབ་ཐོབ་པར་བསམ་པའོ། །འདིར་གླུ་ལྔ་གང་ཞེ་ན། ཨོཾ་པ་ན་པེཾ་སོགས་ཏེ། གཏོར་རྒྱུད་ལས། ཨོཾ་མུ་དང་ནི་ཧུ་མུ་དང་། །ཧཱུ་ཡི་ཁ་རྒྱན་དང་བཅས་པས། །ལྷ་མོ་བཞི་བསྣོལ་གསལ་བར་བྱེད། །དོན་དམ་གླུ་དང་ཆགས་ཆེན་གླུ། །ཏ་ཐཱའི་གླུ་དང་དམ་ཚིག་གླུ། །ཐམས་ཅད་བདེ་བ་ཆེན་པོའི་གླུ། །ཞེས་སོ། །སོ་སོའི་ཕྱག་རྒྱ་གང་
ཞེ་ན། མཉམ་སྦྱོར་ལས།གྱེན་དུ་འཐོར་ཞིང་མཐུར་དུ་འབེབས། །བསྐོར་ཞིང་དེ་བཞིན་ཉུག་པ་དག །མེ་ཏོག་བདུག་པ་མར་མེ་མཆོག །དྲི་ཡི་མཆོད་པ་འབྱུང་བའོ། །གང་བའམ་འོན་ཏེ་སྟོང་པའང་རུང་། །ཞེས་སོ། །ལྔ་པ་ལ། ཆེ་བ་བརྗོད་པ། དབུལ་བ།དངོས་གྲུབ་བླང་བའོ། །དང་པོ་ནི། སངས་རྒྱས་ཀུན་དང་ཞེས་སོགས་ཏེ། དེ་ལྟ་བུའི་ཡོན་ཏན་དང་ལྡན་པ་འདི་འབུལ་ན་བཞེས་ནས་དངོས་གྲུབ་སྩོལ་ཅིག་པར་བསྐུལ་བའོ། །གཉིས་པ་ནི། ཨོཾ་སརྦ་ཏ་ཐཱ་སོགས་ཀྱི་སྔགས་དང་། མཐེབ་སྲིན་ཉི་ཟླ་གའུ་ཁ་སྦྱོར་གྱི་ཕྱག་རྒྱས་གཏོར་བས་ཡེ་ཤེས་ཀྱི་བདུད་རྩིའི་ཟེགས་མ་མཁའ་ལ་སྤྲིན་ལྟར་ཆགས་པ་ལས་བདུད་རྩིའི་ཆར་བབས་པས་མཉེས་པར་བསམས་ནས་སྤྱི་དང་སྒོས་སུ་འབུལ་ཚུལ་ཤེས་པར་བྱའོ། །དེ་ཡང་ཧེ་རུ་ཀ་འདུས་པ་ལས།མཐེབ་སྲིན་རྩེ་མོས་རློབས་གཏོར་བས། །རྡུལ་སྙེད་བཞུགས་པའི་རྒྱལ་བ་རྣམས། །དགྱེས་ཤིང་གཟི་བརྗིད་ལྡན་པར་འགྱུར། །ཞེས་སོ། །གསུམ་པ་ནི། རང་གི་ལྕེ་ལ་ཧཱུཾ་དང་སྨན་ལ་འབྲུ་གསུམ་བཀོད་ལ། དེ་མཐེབ་སྲིན་གྱིས་བླངས་ནས་ལྕེར་བཞག་པས་གནས་གསུམ་དུ་ཆགས་ཏེ་འཕྲོ་འདུས་སྐུ་གསུང་ཐུགས་ཀྱི་དངོས་གྲུབ་ཐོབ་པར་བསམ་པའོ། །དེའང་ཕྱག་རྒྱ་བཞི་པ་ལས། འབྲུ་གསུམ་རིམ་པར་གནས་བླངས་ཏེ། །འཕྲོ་འདུ་རྡོ་རྗེ་གསུམ་ཐོབ་པའི། །ང་རྒྱལ་ཆེན་པོ་བསྐྱེད་པའི་ཕྱིར། །ཀཱ་ཡ་ཝཱཀ་སོགས་སྔགས་ཀྱིས་བསྐུལ། །ཞེས་སོ། །དྲུག་པ་ནི། བླ་མེད་མཆོག་གི་ཚིག་དང་སུ་ར་ཏོ་ལ་སོགས་པའི་སྔགས་ཀྱིས་གཏོར་མ་འདོད་ཡོན་གྱི་ལྷ་མོ་དྲུག་གི་རྣམ་པར་སྤྱན་སོགས་ལ་ཕུལ་བས་ཕྱག་མཚན་ལྷ་མོ་དང་བཅས་པ་དབང་པོ་སོ་སོ་ལ་ཐིམ་ནས་མཉེས་པར་བསམ་པའོ། །བདུན་པ་ནི། བདུད་རྩིའི་རྒྱུན་གཏོར་མར་ལན་གསུམ་དུ་སྦྲེང་སྟེ། མི་བསྐྱོད་ཡེ་ཤེས་སོགས་ཀྱིས་དང་པོ་སྦྲེང་བས་ལྷ་རྣམས་དགྱེས་པ་བསྐྱེད། བྱང་ཆུབ་སེམས་དཔའི་བདེ་མཆོག་སོགས་ཀྱིས་གཉིས་པ་སྦྲེང་བས་ཉན་ཐོས་རྣམས་འགོག་པ་ལས་བསླང་། མཆོག་ཏུ་གསང་བའི་སོགས་ཀྱིས་གསུམ་པ་སྦྲེང་བས་རྒྱལ་བ་རྣམས་གཞན་དོན་ལ་བསྐུལ་བའོ། །བརྒྱད་པ་ནི།
མཆོད་པའི་ཕྱག་རྒྱ་ཞེས་སོགས་སྣང་སྤྱོད་ཐམས་ཅད་མཆོད་པའི་ཡོ་བྱད་ལས་མི་འདའ་བ་ལྷག་པ་ཏིང་ངེ་འཛིན་གྱི་མཆོད་པ་སྟེ། བདག་གི་ཐུགས་ཀ་ནས་སྤྲོས་པའི་ཡི་གེས་མ་དག་པའི་ཁང་ཁྱིམ་སོགས་དག་པའི་གཞལ་ཡས་ཁང་ལ་སོགས་པར་བྱིན་གྱིས་བརླབས་ནས་རྣལ་འབྱོར་པའི་བློ་ཁྱད་ཀྱིས་རིམ་མམ་ཅིག་ཅར་དུ་འབུལ་བའོ། །དེའང་ཇི་ལྟར་སྤྲོས་ན། ཞིང་དང་གཞལ་ཡས་ཁང་རྣམས་བྷྲཱུཾ་ལས། རིན་པོ་ཆེའི་རྒྱན་དང་རྩི་ཤིང་ནགས་ཚལ་རྣམས་ཏྲཱཾ་ལས། ཆོས་སྒྲ་དང་བསྟོད་དབྱངས་སོགས་ཧྲཱྀཿལས། ཁྲུས་རྫིང་སོགས་ཨ་ལས། བདུད་རྩི་སོགས་ཞལ་ཟས་ཀྱི་བྱེ་བྲག་རྣམས་ཨོཾ་ལས། བླ་དྲེ་སོགས་ལྷབ་ལྷུབ་སྣ་ཚོགས་པའི་གོས་རྣམས་མཾ་ལས། བྲོ་དང་གར་གྱི་འདུ་འཕྲོ་རྣམས་ཧཾ་ལས་སྤྲོས་ཏེའོ། །དགུ་པ་ནི། ཐོག་མར་བདག་ཉིད་ཅེས་སོགས་ཏེ། དང་པོར་རྟོག་པས་བདག་བསྒྲལ་ནས་ཐུགས་རྗེས་གཞན་སྒྲོལ་བའི་ཕྱིར། བདག་གི་ཐུགས་ལས་སྤྲོས་པའི་རཾ་ཡིག་ཡེ་ཤེས་ཀྱི་མེ་འབར་བས་བསྒྲལ་བྱའི་སྙིང་ནང་གི་ས་བོན་དྲུག་བག་ཆགས་དང་བཅས་པ་བསྲེགས་ནས་རྣམ་ཤེས་ཆོས་དབྱིངས་སུ་སྒྲོལ་བའོ། །དེའང་རིན་དྲ་ལས། རི་རབ་ཆེན་པོའི་གླིང་བཞི་ལ། །གནས་པའི་སེམས་ཅན་མ་ལུས་ཀུན། །ཡེ་ཤེས་མེ་ཆེན་བསྒོམ་བྱ་སྟེ། །ཐམས་ཅད་མ་ལུས་བསྲེག་པར་བྱ། །ཞེས་པའི་དོན་ནོ། །བཅུ་པ་ནི། འཁྲིལ་བའི་མཆོད་ཆེན་སོགས་ཏེ། ལྷ་ཚོགས་རྣམས་རྗེས་ཆགས་ཀྱིས་སྙོམས་པར་ཞུགས་པའི་བདེ་བའི་འོད་ཟེར་སྤྲོ་བསྡུས་རྒྱལ་བ་རྣམས་མཆོད་ཅིང་གསང་བའི་དབང་ཐོབ་པར་བསམས་ལ། ཨ་ནུ་རཱ་ག་ཎའི་སྔགས་ཀྱིས་ང་རྒྱལ་བསྐྱེད་པའོ། །བཅུ་གཅིག་པ་ནི། བཟའ་དང་བཅའ་དང་ཞེས་སོགས་ཀྱིས་སྣང་སྲིད་ཀྱི་འདོད་ཡོན་ཐམས་ཅད་ལྷ་མོར་དག་པས། ལྷ་ལ་ལྷ་ཐིམ་པ་དང་།ཆོས་ཉིད་ལ་ཆོས་ཉིད་རོལ་པའི་ཚུལ་གྱིས་འབུལ་བ་ནི་འདོད་ཡོན་རོ་མཉམ་གྱི་མཆོད་པའོ། །བཅུ་གཉིས་པ་ནི། དབང་པོའི་སྤྱོད་ཡུལ་སོགས་ཀྱིས་ཇི་སྙེད་པའི་ཡོ་བྱད་ཐམས་ཅད་སེམས་ཉིད་ཡེ་ཤེས་ཀྱི་རོལ་པར་སྡུད་པ་རོལ་མོ་ཡེ་ཤེས་ཀྱི་མཆོད་པ་སྟེ། མ་ཧཱ་པཱུ་ཛའི་སྔགས་ཀྱིས་མངོན་དུ་བྱས་པར་ང་རྒྱལ་
བྱའོ། །བཅུ་གསུམ་པ་ནི། ཨོཾ། ཕྱོགས་བཅུ་དུས་བཞི་སོགས་ཤློ་ཀ་ལྔས། བསྟོད་ཡུལ་གྱི་སྐུ་སོགས་ལྔ་ལ་འབྲས་བུ་ཉེར་ལྔ་དང་ལྡན་པར་བསྟོད་ཅིང་། ཐམས་ཅད་མ་ལུས་ཀྱི་ཤློ་ཀ་གཅིག་པོ་ནི་སྤྱིར་བསྟོད་པ་སྟེ། ཆོས་ཅན་འཁོར་འདས་ཀྱིས་བསྡུས་པའི་ཆོས་ཐམས་ཅད་ཆོས་ཉིད་འབྲས་བུ་ལྔར་ཡེ་ནས་གནས་པའོ། །ཇི་ལྟར་ཞེ་ན།མཚོ་གཅིག་ཏུ་གངས་ལྔ་འཆར་བ་དང་གངས་གཅིག་མཚོ་ལྔར་འཆར་བའི་དཔེས་འབྲས་བུ་ལྔའི་སྣང་ཚུལ་ཀུན་གཅིག་གི་བདག་ཉིད་དུ་འདུས་པ་དང་། གཅིག་ཀུན་ཏུ་འཆར་བའི་ཕྱིར་གཅིག་དང་དུ་མའི་མཐའ་ལས་གྲོལ་བ་ཐིག་ལེ་ཆེན་པོའི་རང་བཞིན་ནོ་ཞེས་པའོ། །རྗེ་རོང་ཟོམ་ནི། རྐང་པ་བཞི་པོ་རེ་རེས་སྤྱིའི་སྤྱི་དང་། སྤྱིའི་སྐུ་གསུང་ཐུགས་ལ་བསྟོད་པར་གསུངས་སོ། །དེ་ལྟ་བུའི་ཆེ་བའི་ཡོན་ཏན་དྲན་པས་ཆོས་ཉིད་རང་སྒྲར་གྲགས་པར་མོས་ལ། རིགས་ལྔའི་ཕྱག་རྒྱ་དྲིལ་སྟབས་དང་བཅས་པས་བསྟོད་པར་བྱ་སྟེ། ཀརྨྨ་མཱ་ལེའི་རྒྱུད་ལས། དེ་ནས་དཀྱིལ་འཁོར་ལྷ་རྣམས་ལ། །བསྟོད་པ་མང་པོའི་གླུ་འདི་བླངས། །རྡོ་རྗེ་གསོར་ཞིང་དྲིལ་བུ་གསིལ། །རིགས་ལྔའི་ཕྱག་རྒྱའི་དྲིལ་སྟབས་བྱ། །ཨོཾ་ཕྱོགས་བཅུ་དུས་བཞི་རྫོགས་པ་ཡི། །ཞེས་སོགས་གསུངས་པའི་ཕྱིར་རོ། །གཉིས་པ་ལ། ཁ་ཅིག་སྔར་གྱི་སྟེང་དུ་རཀྟ་བསྣན་ཏེ་མཆོད་པ་བཅོ་ལྔ་དང་། ལ་ལས་དེའི་སྟེང་དུ་དམ་བཅའ་བཅུག་སྟེ་བཅུ་དྲུག་ཏུ་འདོད་པ་དང་། ལེགས་ལྡན་གྱི་རྒྱུད་ཀྱི་ལེའུ་ལྔ་བར་ཁྲག་འཐུང་བ་བརྒྱད་ཀྱི་དཀྱིལ་འཁོར་བསྟན་པའི་སྐབས་ལས། དང་པོ་ཐུན་མོང་རྫས་ལྔས་མཆོད། །དེ་ནས་ཁྱད་པར་རྫས་གསུམ་དབུལ། །སྨན་གྱིས་མཆོད་རྗེས་དངོས་གྲུབ་བླང་། །གཏོར་མ་དབུལ་ཞིང་གསང་བསྣན་སྦྲེང་། །རཀྟ་ཚར་གསུམ་ཕུལ་ནས་ཀྱང་། །མ་མོ་རྣམས་ཀྱིས་བསྟོད་ཚིག་དབུལ། །ཞེས་ཀྱང་འབྱུང་མོད་ཀྱི། འདིར་ནི་ཞི་བ་ལྟར་བཅུ་བཞི་སྟེ། ཕྱག་དང་ཕྱག་རྒྱ་ཀུན་བཟང་དང་། །ཞབས་བསིལ་བཞི་བསྣོལ་བདུད་རྩི་སྨན། །གཏོར་མ་གསང་བསྣན་རཀྟ་དང་། །སྒྲོལ་དང་སྦྱོར་བ་འདོད་ཡོན་ཏེ། །རོལ་མོ་ཡེ་ཤེས་གླུ་ཡེ་ཤེས། །ཞེས་པ་ནི་སྡོམ་མོ། །ཇི་ལྟར་དབུལ་ན།
སྔར་ལྟར་ཕྱག་མཆོད་སོ་སོར་དམིགས་ཕྱེ་བས་མཆོད་པ་བཅུ་གསུམ་གྱི། གཞན་རྣམས་ནི། ཚིག་སྔགས་ཀྱི་ཁྱད་པར་འགའ་ཞིག་མ་གཏོགས་ཞི་བ་དང་འདྲ་བ་ལས། བརྒྱད་པ་རཀྟ་ལ་ཚར་གསུམ་གྱི། དང་པོ་ནི། དཀྱིལ་འཁོར་གྱི་ལྷ་ཚོགས་རྣམས་མཉེས་པར་བྱ་བའི་ཕྱིར་རཀྟའི་དྭངས་མ་ཡེ་ཤེས་ཀྱི་བདུད་རྩིར་དམིགས་ལ། ཧེ་རུ་ཀ་ཡི་གནས་བཅུ་དང་། །ཞེས་པའི་ཚིག་སྔགས་བཅས་ཀྱིས་ཕུལ་བས་རཀྟའི་རྒྱ་མཚོ་ལས་སུམ་གཅིག་གསོལ་བར་བསམས་ལ་རཀྟ་སྦྲེང་ངོ་། །འདིར་ཧེ་རུ་ཀའི་གནས་བཅུ་གང་ཞེ་ན། ཧེ་རུ་ཀ་གལ་པོ་ལས། གནས་དང་ཉེ་བའི་གནས་གཉིས་དང་། །ཡུལ་ནི་རོལ་པ་ཉེ་ཡུལ་རོལ། །ཞིང་དང་ཉེ་བའི་ཞིང་དང་ནི། །འདུ་བ་ཉེ་བའི་འདུ་བ་དང་། །ཚནྡོ་ཉེ་བའི་ཚནྡོ་ཡིན། །ཞེས་སོ། །དུར་ཁྲོད་བརྒྱད་ནི་སྔར་བཤད་གྲུབ་བོ། །གཉིས་པ་ནི། བསྒྲལ་བའི་ཞིང་བཅུ་སོགས་གདུག་པ་ཅན་རྣམས་བརླག་པར་བྱ་བའི་ཕྱིར་རཀྟའི་ཁུ་བ་བསྒྲལ་བྱར་དམིགས་ཏེ། ང་ནི་ཁྲག་འཐུང་ཆེན་པོ་སྟེ། །ཞེས་སོགས་ཀྱིས་ཕུལ་བས་སུམ་གཉིས་ཟད་པར་གསོལ་བར་བསམས་ལ་རཀྟ་སྦྲེང་ངོ་། །གསུམ་པ་ནི། ཁམས་གསུམ་གྱི་གདུལ་དཀའི་འགྲོ་རྣམས་ཐུགས་རྗེས་སྒྲོལ་བའི་ཕྱིར་རཀྟའི་རྩིགས་མ་དུག་གསུམ་ཤ་ཁྲག་རུས་པའི་རྣམ་པར་དམིགས་ལ། ང་ནི་ཟ་བྱེད་སོགས་ཀྱིས་ཕུལ་བས་མ་ལུས་པར་གསོལ་བར་བསམས་ལ་རཀྟ་སྦྲེང་བའོ། །དབུལ་ཚིག་གི་གོ་རིམ་ལ་མི་འདྲ་བ་མང་དུ་སྣང་ཡང་།འདི་ནི་ཁྲོ་བོ་ལས་ཕྲེང་ལས་འབྱུང་བ་ཡིན་ནོ། །བཅུ་གསུམ་པ་ནི། ཧཱུཾ།གཏུམ་ཆེན་ཞེས་སོགས་ཤློ་ཀ་དྲུག་གིས་ཁྲོ་བོའི་དཀྱིལ་འཁོར་གྱི་སྐུ་གསུང་ཐུགས་ཡོན་ཏན་ཕྲིན་ལས་རྣམས་སོ་སོ་དང་སྤྱིར་བསྟོད་པར་རིམ་གྱིས་སྦྱོར་ཏེ། འགྲེལ་ཆུང་ལས། སྐུ་གསུང་ཐུགས་དང་ཡོན་ཏན་ཕྲིན་ལས་དང་། །རང་བཞིན་སྤྱིར་བསྟོད་པ་སྟེ་གླུ་དྲུག་ཡིན། །རེ་རེ་ལའང་དབྱེ་ན་བཞི་བཞི་སྟེ། །ཆེ་བ་ཉི་ཤུ་རྩ་བཞིར་ཤེས་པར་བྱ། །ཞེས་གསུངས། གཞན་དུ། རྡོ་རྗེ་བྲག་ཆེན་གྱི་ཤློ་ཀ་གཅིག་པོ་ནི། རྟེན་གཞལ་ཡས་ཁང་ལ་བསྟོད་པ་དང་། ཡང་ན་རྐང་པ་རེ་རེས་སྐུ་གསུང་ཐུགས་ཕྲིན་ལས་ལ་བསྟོད་པར་བཞེད་པ་སོགས་འགྲེལ་པ་རྣམས་དགོངས་པ་མི་མཐུན་ཏེ། བཤད་ཚུལ་མང་ངོ་། །
དེ་དག་ཀྱང་བསྟོད་ཡུལ་ལ་ཡོན་ཏན་ཡོད་ལ་ཡོད་པ་བཞིན་དུ་བསྟོད་པའི་ཕྱིར་བསྟོད་པ་སྟེ། གཞན་དུ་ཡོན་ཏན་མེད་པ་ལ་ཡོད་ཅེས་བརྗོད་ན་སྒྲོ་འདོགས་དང་། ཡོད་པ་ལ་མེད་ཅེས་བརྗོད་ན་སྐུར་འདེབས་སུ་འགྱུར་བའི་ཕྱིར་རོ། །གཉིས་པ་ནི། མཁའ་ཁྱབ་ཏུ་སྤྲོས་ནས་རྒྱལ་བའི་དཀྱིལ་འཁོར་ཐམས་ཅད་ལ་དབུལ་ཞིང་། དེའང་ལྟ་བ་དང་ཏིང་ངེ་འཛིན་གསལ་མི་གསལ་གྱི་བྱེ་བྲག་གིས་རིམ་གྱིས་སམ་ཡང་ན་ཅིག་ཅར་བའི་ཚུལ་གྱིས་དབུལ་བར་བྱ་བ་སྟེ། འདི་ཉིད་ལས། ཕྱོགས་བཅུ་ནམ་མཁའི་ཁམས་བསྐངས་ནས། །དཀྱིལ་འཁོར་ཀུན་ལ་རྒྱས་པར་འབུལ། །སྐལ་ལྡན་གསལ་བའི་ཁྱད་པར་གྱིས། །རིམ་གྱིས་ཡང་ན་ཅིག་ཅར་དུ། །ཞེས་གསུངས་པའི་ཕྱིར། འབུལ་བའི་ཚེ་ན། ལས་དང་པོ་པས་ཡུལ་དང་འབུལ་མཁན་སོ་སོར་དམིགས་ནའང་། རང་བཞིན་དབྱེར་མེད་པར་རྟོགས་པའམ་མི་ནུས་ན་མོས་པར་བྱས་ནས་དབུལ་བ་གནད་དོ། །གསུམ་པ་ནི། ཏིང་ངེ་འཛིན་ལ་གཙོ་བོར་བྱེད་པ་རྣམས་ཀྱིས་ནི་མཆོད་པ་ཐམས་ཅད་མ་གྲུབ་ན། དམ་པ་རྒྱན་གྱི་རྩ་བ་ལྟར་གླུ་ཡེ་ཤེས་ཀྱི་མཆོད་པ་ཙམ་གྱིས་ཀྱང་ཆོག་པར་བཞེད་ལ། གལ་ཏེ་དབང་དང་། ཕྲིན་ལས་དང་།སྐོང་དང་། སྒྲུབ་པ་དང་། ཚོགས་གཏོར་གཏོང་བ་ལ་སོགས་པའི་ཚེ་མཆོད་པ་གཙོ་བོར་བྱེད་པ་རྣམས་ཀྱིས་ནི། དེ་དང་དེ་དག་གི་དུས་སུ་མཆོད་པའི་རིམ་པ་ཚང་བར་དབུལ་བར་བྱ་བ་སྟེ། ཐུགས་ཐིག་ལས། ལས་སྤྱོད་སྒྲུབ་དབང་མཆོད་ཚེ་ནའོ། །ཞེས་སོ། །བཞི་པ་ལ། ཚོགས་འཁོར་བྱ་བའི་རིམ་པ་དང་། ཞི་ཁྲོ་གཉིས་ཀྱི་ཚོགས་ཀྱི་ཆོ་གའི་ཁྱད་པར་སོ་སོར་བཤད་པའོ། །དང་པོ་ནི། གང་དུ་ཚོགས་པའི་གནས་ཁང་། སུ་ཞིག་འཚོགས་པ་རྣལ་འབྱོར་པ་ཐབས་ཤེས་ཟུང་དུ་འདྲེལ་བའི་འདུས་པ། གང་གི་ཚེ་འཚོགས་པ་ཟླ་དྲུག་སོགས་བར་མ་ཆད་པའི་དུས་ཀྱི་སྒྲུབ་པ་དང་འདྲེལ་བའམ། ཉ་སོགས་ཀྱི་མཚན་མོའི་ཆའི་དུས་རེས་འགའ་བར་ཡང་རུང་སྟེ། དེ་དག་ནི་སྔར་ཚོགས་ཀྱི་དཀྱིལ་འཁོར་གྱི་དུས་སུ་བཤད་པ་ལྟར་ཤེས་པར་བྱ་ལ། འདིར་ཚོགས་པ་རྣམས་ཀྱིས་ཇི་ལྟར་བྱ་བའི་རིམ་པ་བཤད་ན། ཐོག་མར་ཀུན་འདུས་ལས། ཁ་ན་མ་ཐོར་བཅས་པ་དང་། །ཉམས་པ་ལས་བྱུང་ཉེས་དང་བཅས། །མ་དག་པ་ཡི་ཡོ་བྱད་
རྣམས། །གདུག་ཅན་འཕང་དུ་འོངས་པ་ལྟར། །ཝ་ཡི་བརྟུལ་བཞུགས་ཆེན་པོ་ཡིས། །སྐལ་བར་བཤུགས་ཏེ་སྤང་བར་བྱ། །ཞེས་པས་ཁ་ན་མ་ཐོ་བ་མེད་པའི་ཡོ་བྱད་ཅི་འབྱོར་བ་དྲང་བར་བྱ་སྟེ། ཧེ་རུ་ཀ་གལ་པོ་ལས། རྡོ་རྗེ་ཚེ་དང་གལ་ཕྱིས་དང་། །འཇམ་དེས་ཟླ་ཕྲོམ་ཟླ་རྒྱས་དང་། །ཚེ་ཁྲིད་ཛ་གད་ཛཀྟི་དང་། །བྲན་མོ་ཤམ་མོ་ཀུན་ཏུ་རྒྱུག །ཨ་མྲ་རྒུན་འབྲུམ་ཨ་ག་རུ། །ན་ལིང་གེ་རྒྱས་ལ་སོགས་དྲང་། །ཞེས་གསུངས་ལ།ཁྱད་པར་ཤ་ཆང་དང་བདུད་རྩི་ལྔ་མེད་དུ་མི་རུང་ཞིང་། ཤ་ལྔ་ཡང་ཅི་འབྱོར་བསག་པར་བྱའོ། །དེ་ནས་གནས་ཁང་ལ་ཕྱགས་བདར་དང་། ཆག་ཆག་གདབ། མེ་ཏོག་སིལ་མ་དགྲམ་ཞིང་། བླ་རེ་ལ་སོགས་པའི་རྒྱན་གྱིས་བརྒྱན། དཀྱིལ་འཁོར་བྲི་བའམ། ཡང་ན་དྲིའི་མཎྜལ་ལ་ལྷའི་སྐུ་བཞུགས་སུ་གསོལ། དེར་འདུ་བ་རྣམས། སྔ་མ་ལས། དབེན་པའི་གནས་སུ་མཚམས་བཅད་ནས། །ཚོགས་ཀྱི་ནང་དུ་འདུ་བ་ནི། །ཁྲོ་བོ་སྔོན་པོ་ཤིན་ཏུ་མཛེས། །ཞེས་སོགས་གསུངས་པ་ལྟར། ཚོགས་ཁང་གི་སྒོར་སྡོད་པའི་སྒོ་བ་རྣམས་ལ་གསོལ་བ་བཏབ་ཅིང་།སློབ་དཔོན་གྱི་བཀའ་ཐོབ་ནས་ནང་དུ་ཞུགས་ཏེ། བརྡ་དང་བརྡའི་ལན་བྱས་ལ།རྡོ་རྗེ་སློབ་དཔོན་ལ་ཕྱག་སྔོན་དུ་འགྲོ་བས་རང་རང་གི་ལྷའི་རིགས་དང་མཐུན་པའི་གོས་རྒྱན་བསྟར་ནས། རྣལ་འབྱོར་ཕོ་མོ་གྲལ་གཡས་གཡོན་གྱི་ཁྱད་པར་གྱིས་ཐམས་ཅད་སྟན་ལ་འདུག་པ་དང་། ལས་རྡོར་གྱིས་མཎྜལ་ཕུལ་ནས་རྣལ་འབྱོར་ལ་གནས་པར་གསོལ་བ་གདབ། དེ་ནས་བགེགས་ལ་གཏོར་མ་བྱིན་ནས་ཕྱིར་བསྐྲད་དེ་མཚམས་གཅད། ཐམས་ཅད་ཀྱིས་རང་རང་གི་ལྷའི་རྣལ་འབྱོར་བསྒོམ།བདེ་བར་གཤེགས་པ་རྣམས་སྤྱན་དྲངས་ཏེ་མཆོད། དེའང་དང་པོར་བདུད་རྩི་བྱིན་གྱིས་བརླབས་ནས་ལྷ་ལ་དབུལ་ཞིང་། བདག་ཉིད་ཀྱང་མྱང་། སློབ་མ་ལའང་བྱིན་ཏེ་དམ་བསྒྲག །དེ་ནས་སྦྱོར་སྒྲོལ་གྱི་མཆོད་པ་སོ་སོར་བྱ་བའམ་མི་ནུས་ན་སྦྱོར་བའི་བྱང་སེམས་ཡུམ་གྱི་མཁར་བསྐྱིལ་བའི་འོད་ཟེར་ལས་སྤྲུལ་པ་སྤྲོས་ཏེ་སྒྲོལ་བ་དང་སྦྱོར་བའི་མཆོད་པ་གོ་ཆུ་རུག་ཏུ་བྱ། དེའི་འོག་ཏུ་འདོད་ཡོན་གྱི་མཆོད་པ་དབུལ་བའི་ཕྱིར། དྲི་ཆབ་བྱིན་གྱིས་བརླབས་ནས་བསངས། དེ་ནས་ཛ་གད་བྱིན་གྱིས་བརླབས་ཏེ། རང་གིས་ལན་གསུམ་མྱོང་ནས་
ལྷ་མཆོད་ཅིང་།སློབ་མ་ལའང་བྱིན། དེ་ནས་ཞལ་ཟས་ཀྱི་ཡོ་བྱད་ཐམས་ཅད་སྤུངས་ལ་བྱིན་གྱིས་བརླབ། ཏིང་ངེ་འཛིན་གྱི་འདོད་ཡོན་ལྔ་དང་། སུ་ར་ཏོ་བཅུ་དྲུག་ལ་སོགས་པའི་གླུ་གར་དང་རོལ་མོ་སྣ་ཚོགས་ཀྱིས་མཆོད་ནས། ཞལ་ཟས་ལ་རོལ་བའི་ཕྱིར་གླུས་བསྐུལ་བ་དང་། བཤགས་པ་དང་། སྨོན་ལམ་དང་། ཚོགས་དབང་བསྐུར་བ་རྣམས་བྱས་ལ། དང་པོར་དཀྱིལ་འཁོར་ལ་དབུལ་ནས། འདུས་པའི་རྣམ་འབྱོར་བ་རྣམས་ལོངས་སྤྱོད། དེ་ནས་ཕྱིའི་ལས་བྱེད་རྣམས་བོས་ཏེ་བྱིན་ལ་མཚམས་གཅད། ལྷག་མ་དང་ཕྱགས་དར་རྣམས་བསྡུས་ཏེ་ལྷག་མའི་མཆོད་སྦྱིན་བྱ། གསང་བའི་མཆོད་པའི་སྒོ་ནས་དཀྱིལ་འཁོར་བསྡུ་བ་རྣམས་ཏེ་ཐོ་བྱང་ཙམ་མོ། །རྒྱས་པར་གོང་མའི་ཚོགས་ཡིག་རྣམས་ལས་ཤེས་པར་བྱའོ། །གཉིས་པ་ལ། སྡོམ་ནི། དྲང་ཞིང་བསངས་ལ་བྱིན་གྱིས་རློབ། །མཆོད་དབུལ་རོལ་ལ་ལྷ་མཆོད་བྱ། །ཞར་བྱུང་གཏོར་མ་བཏང་དང་བདུན། །དང་པོ་ནི། ཛ་གད་དང་མཱཾ་ས་གཙོ་བོར་གྱུར་པའི་ཡོ་བྱད་རྣམས་བཤམ་པའོ། །གཉིས་པ་ནི། དྲི་ཆབ་དང་བདུད་རྩི་བསངས་ལ་བགེགས་བསྐྲད་དེ་ཉེས་སྐྱོན་སྦྱང་བའོ། །གསུམ་པ་ནི།སྣོད་ཉི་མར་བཅུད་ཞལ་ཟས་ལ་འབྲུ་ལྔ་བཀོད་དེ་འབྲུ་གསུམ་གྱི་སྔགས་ཀྱིས་འདོད་ཡོན་གྱི་ལྷ་མོར་རློབ་པའོ། །བཞི་པ་ལ། ཚོགས་ཞིང་སྤྱན་དྲང་བ་དང་།དབུལ་བའོ། །དང་པོ་ནི། ཞི་ཁྲོ་གང་ཡིན་གྱི་སོ་སོའི་ཚིག་སྔགས་བརྗོད་པས་ཚོགས་ཞིང་ནམ་མཁའ་ལ་སྤྲིན་ཕུང་གཏིབས་པ་བཞིན་དུ་སད་པར་བསམ་པའོ། །གཉིས་པ་ལ་གཉིས་ཀྱི། དང་པོ་ཞི་བ་ལ། བླ་མེད་མཆོག་གི་ཚིག་སྔགས་དང་བཅས་པས་སྤྱིར་མཆོད་པ་དང་། ལྕགས་ཀྱུ་མ་སོགས་གསང་བ། སྒེག་སོགས་ནང་། དྷཱུ་བེ་མ་སོགས་ཕྱི་སྟེ་ལྷ་མོ་བཅུ་གཉིས་ཀྱིས་བྱེ་བྲག་ཏུ་མཆོད། ཁྱད་པར་ཚོགས་ཕུད་སྤྲོས་ཏེ་ཕུལ་བས་འདོད་ཡོན་གྱི་ལྷ་མོས་མཆོད་པར་བསམ་པའོ། །གཉིས་པ་ཁྲོ་བོ་ལ། སྤྱིར་མཆོད་པ་ཞི་བ་དང་འདྲ། བྱེ་བྲག་ལྷ་མོ་བཅུ་གཉིས་པ། སུ་ར་ཏོ་བཅུ་དྲུག་གིས་མཆོད་ཀྱང་མི་འགལ་གསུངས། ཁྱད་པར་སོ་སོར་མཆོད་པ་ནི། ཚོགས་ཕུད་ཆ་བཞིར་སྤྲོས་ཏེ། དང་པོ་འདོད་ཡོན་གྱི་ལྷ་མོར་བསམས་ལ་མཆོད། གཉིས་པ་དམ་རྫས་བདུད་རྩི་ལྔར་བསམས་ལ་བཤགས། །
གསུམ་པ་ལ། ལིངྒ་ཟུར་པ་མེད་ན་ཆ་གསུམ་པ་དེ་ཡི་འདོད་ཡོན་གྱི་ལྷ་མོ་རང་ལ་བསྡུས་ནས། ལེའུ་ཉི་ཤུ་བར་འབྱུང་བ་ལྟར་དྲག་པོའི་ཕྲིན་ལས་སྦྱར་ཏེ་ཚེ་ཁྲུས་ཀྱི་དགོངས་པས་བསྒྲལ་ལ་སྟོབ་པ་བྱའོ། །དེ་ཡང་ཧེ་རུ་ཀ་གལ་པོ་ལས། དང་པོ་འདོད་ཡོན་དྲུག་གིས་མཆོད། །གཉིས་པ་དམ་རྫས་བདུད་རྩིས་བཤགས། །གསུམ་པ་དགྲ་བགེགས་གཟུགས་ཕུང་སྟོབ། །ཞེས་དང་། ཚོགས་ཡིག་ཆེ་ཆུང་ལས་ཀྱང་། དང་པོར་ཕུད་ལས་བདེ་བར་གཤེགས་པ་མཆོད་ཅིང་བཤགས་པ་དང་སྟོབ་པ་དག་ཀྱང་བྱའོ། །ཞེས་པའི་དོན་ནོ། །ལྔ་པ་ནི། ཟ་ཚོགས་ལས། དེ་ནས་བདག་ཉིད་མཉམ་བཞག་སྟེ། །རྣམ་གསུམ་ཚུལ་གྱིས་རོལ་པར་བྱ། །བདག་ཉིད་ནང་གིས་ལྷ་མཉེས་པར། །མཆོད་སྦྱིན་ཡིན་ཏེ་དངོས་གྲུབ་པོ། །ཞེས་པས་རྒྱུད་ལུང་མན་ངག་གི་རོལ་ཚུལ་གསུམ་མམ། ཡང་ན་ནང་གི་སྦྱིན་བསྲེག་གིས་རོལ་པར་བྱའོ། །དྲུག་པ་ལ་གཉིས་ལས། ཞི་བའི་ལྷག་ཆོག་ནི། རྩའི་དཀྱིལ་འཁོར་གསལ་གདབ། ལྷག་མའི་དཀྱིལ་འཁོར་བསྒོམས་པའི་དབུས་ཀྱི་འཁོར་ལོ་ལ་རིགས་ལྔ་ཡབ་ལྔ་བསྐྱེད། གཏོར་མ་འབྲུ་གསུམ་གྱིས་དམ་ཚིག་གསང་བའི་ལོངས་སྤྱོད་དུ་བརླབས་ལ། མཁའ་འགྲོ་སོ་གཉིས་བཀུག་སྟེ་རིགས་ལྔའི་གཙོ་བོ་ལ་གཙོ་མོ་བདུན་དང་། དོན་གྲུབ་ལ་དྲུག །གཞན་གསུམ་ལ་ལྔ་ལྔ་འཁྲིལ་བའི་ཚུལ་དང་སྒོ་མ་བཞི་གཙོ་བོའི་ཞབས་འོག་ཏུ་གནས་པར་བསམས་ལ། མཆོད་ཅིང་ཕྲིན་ལས་གཞོལ་ནས་གཤེགས་གསོལ་བྱས་ཏེ་དཀྱིལ་འཁོར་བསྡུ་བའོ། །དེ་ཡང་ཧེ་ཆུང་ལས། ཟོས་པའི་ལྷག་མའི་གཏོར་མ་ཡིས། །བཙུན་མོའི་འཁོར་ལ་མཆོད་པར་བྱ། །ཞེས་དང་། ཁྱད་པར་ཕྱག་རྒྱ་བཞི་པའི་བསམ་གཏན་ལས། སྔོན་ཚེ་བཅོམ་ལྡན་རིགས་ལྔ་ཡིས། །མཁའ་འགྲོ་སུམ་ཅུ་རྩ་གཉིས་པོ། །སླས་སུ་མཛད་དེ་ཁས་བླངས་ཕྱིར། །ལྷག་མའི་མཆོད་སྦྱིན་བྱ་བ་གཅེས། །ཞེས་སོ། །གཉིས་པ་ཁྲོ་བོའི་ལྷག་ཆོག་ལ། དཀྱིལ་འཁོར་བཤམ་པ་དང་། མཆོད་པ་དངོས་སོ། །དང་པོ་ནི། སྒྱུ་འཕྲུལ་མཁན་པོ་ཕལ་ཆེར། དཀྱིལ་འཁོར་གྱི་ཤར་ལྷོར་དྲིའི་མཎྜལ་བཤམ་པར་བཞེད། ཧེ་རུ་ཀ་གལ་པོར། ལྷག་མའི་དཀྱིལ་འཁོར་བྱང་ཤར་མཚམས། །ཞིང་ལྤགས་
རཀྟས་ཟླ་གམ་ཨེ། །ཞེས་འབྱུང་ངོ་། །གཉིས་པ་ལ། འདི་ཉིད་ལས། སླས་དང་བྱི་མོ་བྲན་མོའི་ཚོགས། །ལྷག་མ་མཆོད་སྦྱིན་འདོད་པ་སྦྱིན། །རང་གི་དམ་ཚིག་རབ་བསྒྲགས་ནས། །གང་འདོད་ལས་དེ་བྱེད་པར་བསྒོམ། །ཞེས་དབང་ཕྱུག་མ་ལ་བྱིན་ཏེ་ལས་བཅོལ་བ་ཙམ་ལས་མ་གསུངས་ཀྱང་། སློབ་དཔོན་རྣམས་ཀྱིས་རྒྱུད་གཞན་ནས་ཁ་བསྐངས་ཏེ་རྒྱས་པར་མཛད། དེ་ལའང་བཞེད་པ་མི་མཐུན་ཏེ། ཁ་ཅིག །ཕུད་ལྷག་སོ་སོར་བཤམས་ལ་བྱིན་གྱིས་བརླབས་ནས། ཕུད་ཀྱིས་ཡར་གྱི་གནས་བདུན་མཆོད།དཔལ་ཆེན་པོ་དང་རྣལ་འབྱོར་པའི་ལྷག་གིས་མར་གྱི་གནས་བདུན་མཆོད་གསུངས། དེ་ལ་ཡར་གྱི་གནས་བདུན་ནི། གལ་པོ་ལས། དབྱིངས་ནས་རྣམ་པར་བསྐུལ་བ་དང་། །བྱིན་གྱིས་ཡང་དག་བརླབས་པ་དང་། །ཐབས་ཆེན་ཡབ་ཏུ་བསྟན་པ་དང་། །ཤེས་རབ་ཡུམ་དུ་གནས་པ་དང་། །ཁྲོ་མོ་གཽ་རཱི་བརྒྱད་རྣམས་དང་། །ཡུལ་གྱི་ཕྲ་མེན་ཆེན་མོ་དང་། །ཡེ་ཤེས་སྒོ་མ་བཞི་པོ་རྣམས། །ཡར་གྱི་གནས་བདུན་དཀྱིལ་འཁོར་ཏེ། །ཞེས་སོ། །མར་གྱི་གནས་བདུན་ཀྱང་། དེ་ལས།རྫུ་འཕྲུལ་མཁའ་ལ་འགྲོ་བ་སུམ་ཅུ་གཉིས། །སྦྱོར་དང་སྒྲོལ་ལ་དགའ་བའི་ཀིཾ་ཆེན་བརྒྱད། །ལངྈ་ཚར་གསུམ་རྟོགས་ཚད་འབུལ་བ་དང་། །ལུས་ངག་ཡིད་ཀྱིས་གནོད་པའི་འབར་མ་བརྒྱད། །བདུད་སྲིན་མ་མོ་བདུན་དང་སྲིང་མོ་བཞི། །དྲུག་ཅུ་རྩ་བཞི་ཕོ་ཉའི་གནས་རྣམས་ཏེ། །ལྷག་མ་དག་ལ་དབང་བའི་གནས་དྲུག་ཡིན། །ཉི་ཤུ་རྩ་བརྒྱད་ཕུད་ལྷག་གཉིས་ལ་དབང་། །ཞེས་སོ། །འདིར་བླ་མ་ཕལ་ཆེ་བའི་བཞེད་པ་ལྟར་ན་ཐོག་མར་ཕུད་ཤོད་དུ་ཕབ་ནས་དཀྱིལ་འཁོར་གྱི་སྟེང་དུ་ཕུད་ལྷག་སོ་སོར་བཤམས་ལ། རྩ་བའི་དཀྱིལ་འཁོར་གསལ་གདབ། ལྷག་མའི་དཀྱིལ་འཁོར་ཕྱི་ཁྱམས་མཐིང་ནག་གྲུ་གསུམ་འབྱམས་ཀླས་པའི་ནང་དུ་གཞལ་ཡས་ཁང་སྒོ་དང་བཅས་པར་རིགས་ལྔ་གནས་ཡུལ་སྒོམ་སྟེ། ངོ་མཚར་ཚོགས་ཀྱི་ལྷ་སུམ་ཅུ་བསྐྱེད། ལྷག་གཏོར་ཟླ་བ་ལ་གནས་པའི་ཨོཾ་གྱི་འཕྲོ་འདུས་བདུད་རྩིར་རློབ། དེ་ནས་སྙན་གསན་དབབ་ནས་སྤྱུགས་པའི་སྒྲ་དང་འདོད་རྒྱལ་གྱི་སྔགས་རྒྱས་མགྲོན་རྣམས་སྤྱན་དྲངས་པས་ཕྱི་ཁྱམས་གྲུ་གསུམ་པའི་ནང་དུ་བྱ་ནག་ཐང་ལ་བབས་པ་བཞིན་ཐབས་ཀྱིས་བྱོན་པར་བསམས་
ལ། ཧེ་རུ་ཀའི་རྡོ་རྗེ་ཁྱུང་གཤོག་གི་སྔགས་རྒྱས་ཟིལ་གྱིས་མནན། པདྨའི་སྔགས་རྒྱས་གདན་དབུལ། རྟ་གདོང་གི་སྔགས་རྒྱས་དབང་དུ་བྱ་བ་རྣམས་ཏེ། གལ་པོར། འདོད་པའི་རྒྱལ་པོས་ལྕགས་ཀྱུས་དགུག །རྟ་མགྲིན་གྱིས་དབང་བསྡུ་བར་བྱ། །ཧེ་རུ་ཀ་མི་ཟིལ་གྱིས་མནན། །ཞེས་པའི་དོན་ནོ། །དེ་ནས་མགྲོན་རིགས་ལྔར་ཕྱེ་ལ་མཆོད། དེའི་འོག་ཏུ་སྔ་མ་ལས། དཔལ་གྱི་ལྕེ་ལ་རྟ་མགྲིན་ཧྲཱྀཿ། །མཁའ་དབྱིངས་ཕྱག་རྒྱ་རབ་ལྡན་པས། །རྟོག་བསྲེག་བདུད་རྩིའི་སྦྱོར་མཆོད་དབུལ། །ཞེས་པ་ལྟར་ལྷག་གཏོར་ལ་བདུད་རྩིའི་ཁ་ཕྲུ་བཏབ། དེ་ནས་དང་པོ་ཕུད་ཀྱིས་མི་མཆོད་དུ། །ཞེས་སོགས་ཀྱིས་མགྲོན་རྣམས་ལ་རྒྱུ་རྐྱེན་བསྒྲགས་པས་ངེས་ཤེས་བསྐྱེད་དེ་ལྷག་ཕུད་མཚམས་སྦྱར་བ་རྣམས་ནི་སྤྱིའི་ལས་རིམ་མོ། །དེ་ནས་བྱེ་བྲག་ཏུ་མཁའ་འགྲོ་སོགས་རང་རང་གི་མཚན་ནས་སྨོས་ཏེ་མཆོད་ཅིང་ལས་བཅོལ་ལ་མགྲོན་རྣམས་བཀྱེ། གཏོར་མ་བསྐྱེལ་ལ་དཀྱིལ་འཁོར་བསྡུ་བའོ། །དེ་ཡང་ཇི་སྐད་དུ། ཕུད་ལ་འཚལ་སྐལ་མི་ལྡན་གྱིས། །ལྷག་མ་ཞལ་ཆབ་བྲོན་ལ་གསོལ། །ཞེས་པ་ལྟར་རོ། །བདུན་པ་ནི། སློབ་དཔོན་གྱིས་རྩ་བའི་དཀྱིལ་འཁོར་བཟུང་ཞིང་། ལས་རྡོར་གྱིས་གོམ་པ་བདུན་ཅུའི་ཕ་རོལ་ཏུ་ཕྱིན་ཏེ། དཔལ་ཆེན་པོའི་ང་རྒྱལ་གྱིས། བརྟན་གཏོར་རློབ།མགྲོན་དྲང་། མཚན་ནས་སྨོས་ཏེ་མཆོད་ཅིང་ཕྲིན་ལས་བཅོལ་ལ་གཤེགས་སོ། །ཞར་བྱུང་ཟ་ཚོགས་དང་། ཕྱག་རྒྱ་བསམ་གཏན་གྱི་ལས་བྱང་ལས་འབྱུང་བ་ལྟར་འགྲོ་དྲུག་ལ་གཏོར་མ་བསྔོ་བའང་མཛད་དེ་སྤྲོས་པའི་ཡན་ལག་གོ། །ལྔ་པ་སྐྱོན་ནི། འཆད་འགྱུར་གྱི་ཡོན་ཏན་ལས་བཟློག་པ་སྟེ། ཐུགས་ཐིག་ལས། དེ་ལས་བཟློག་དང་མི་སྐོང་གཡེལ། །ཉམས་ཆག་མཐུ་བྱིན་བྲལ་བར་འགྱུར། །ཞེས་སོ། །དྲུག་པ་ཡོན་ཏན་ནི། དགོས་ཆེད་དུ་བསྟན་པའི་རྗེས་སུ་འགྲོ་བ་སྟེ། ཁོག་གཞུང་ལས། ཐུན་མོང་ཁྱད་པར་ཡོན་ཏན་ལྡན། །ཞེས་སོ། །ཁྱད་པར་ཚོགས་ཀྱི་འཁོར་ལོའི་ཡོན་ཏན་ནི། ཟ་ཚོགས་ལས། དོན་དང་བྲལ་བའི་འཇིག་རྟེན་པས། །སྣང་སྲིད་བདེ་བའི་ལོངས་སྤྱོད་ལ། །ཆགས་པར་སྤྱད་པས་འཁྱམས་པ་རྣམས། །འདི་ལྟར་སྤྱད་ན་གྲོལ་ཞེས་བཤད། །ཅེས་དང་།
རྡོ་རྗེ་དྲ་བ་ལས། བསོད་ནམས་ནང་ན་ཚོགས་འཁོར་མཆོག །ཚེ་འདིར་བསམ་པ་ཀུན་འགྲུབ་ཅིང་། །བགེགས་དང་བར་ཆད་ཞི་བ་དང་། །ཕྱི་མ་རིག་འཛིན་རྒྱལ་བའི་ཞིང་། །ཀུན་ཏུ་བཟང་པོ་འཐོབ་པར་འགྱུར། །ཞེས་སོ། །བཅུ་པ་འཆིང་ཟློས་སྔགས་དང་ཕྱག་རྒྱ་ལ་དྲུག་ལས། དང་པོ་དགོས་ཆེད་ནི། སྒྲིབ་གཉིས་སྦྱོང་ཞིང་། ཏིང་ངེ་འཛིན་གྱི་སྟོངས་སུ་གྱུར་པས་ལས་དང་དངོས་གྲུབ་འཐོབ་པར་བྱེད་པའི་ནུས་པ་བསྐྱེད་པ་སྟེ། ཐུགས་ཐིག་ལས། སྦྱོང་ཞིང་ཉེ་བར་བསྐྱེད་པ་དང་། །ཐོབ་བྱ་ལྔ་པོ་རྫོགས་བྱའི་ཕྱིར། །ཞེས་སོ། །བྱེ་བྲག་ཏུ། སྔགས་ཀྱིས་ཐུགས་དམ་གནང་ནས་བསྐུལ་བའི་ཕྱིར་དང་། ཕྱག་རྒྱས་ཐུགས་རྣམ་པར་གྲོལ་བ་མཚོན་པ་སྟེ།ཇི་སྐད་དུ། ཐུགས་དམ་གནད་བསྐུལ་གསང་བ་སྔགས་ཀྱི་སྒོ། །ཞེས་དང་།རྣམ་པར་གྲོལ་བ་མཚོན་པའི་ཕྱིར། །ཞེས་སོ། །གཉིས་པ་ངོ་བོ་ལ་སྔགས་ཀྱི་ངོ་བོ་ནི། ཐབས་ཤེས་ཀྱི་ཡི་གེ་འདུས་ཤིང་བྱིན་གྱིས་རློབས་པའི་ནུས་མཐུ་ཅན་དུ་གྱུར་པའི་ཕྱིར་ཏེ། ཐུགས་ཐིག་ལས། ཡི་གེ་འདུས་པ་ཆོས་ཉིད་རང་བཞིན་གྱིས། ཆོས་ཅན་རང་གི་ངོ་བོས། མཐུས་བྱིན་གྱི་རླབས་ཀྱིས་གྲུབ་པ་བཞི། །མཐུ་ཅན་རེད་པ་གང་ཡིན་པ། །ཞེས་སོ། །ཕྱག་རྒྱའི་ངོ་བོ་ནི། རིག་པ་ཕྱག་རྒྱ་བཞི་རྫོགས་ཀྱི་ལྷའི་སྐུར་གསལ་བ་ལས་མི་འདའ་བ་སྟེ། དེ་ལས། བཞི་རྫོགས་ཉིད་ལས་མི་འདའ་བ། །གང་ལ་སྣང་བ་དེ་ངོ་བོ། །ཞེས་སོ། །གསུམ་པ་སྒྲ་དོན་ལ། སྔགས་ནི། མནྟྲའི་སྒྲ་ལས། མན་ནི་ཡི་དམ་ཤེས་པ་ཏྲ་ཡ་ནི་སྐྱོབ་པའམ་དཔུང་གཉེན་ལ་འཇུག་པས།ཡིད་ཤེས་བདེ་མྱུར་དུ་སྐྱོབ་ཅིང་བྱིན་རླབས་འབྱུང་བའི་ཕྱིར་སྔགས་ཏེ། ཡེ་ཤེས་སྙིང་པོ་ལས། མན་ནི་ཡིད་ཅེས་བྱ་བ་སྟེ། །ཏྲ་ནི་སྐྱོབ་པ་ཉིད་དུ་བཤད། །ཅེས་སོ། །ཕྱག་རྒྱ་ནི། མུ་དྲའི་སྒྲ་ལས་མཚན་མའི་དོན་ཏེ། འདེབས་ཤིང་མཚོན་པར་བྱེད་པའམ་རྒྱས་བཏབ་པ་ལས་འདའ་བར་དཀའ་བའི་ཕྱིར་ཕྱག་རྒྱ་ཞེས་བྱའོ། །དེའང་འདི་ཉིད་ལས། སྙིང་པོའི་ཕྱག་རྒྱ་འདའ་དཀའོ། །ཞེས་དང་། རྒྱས་པ་ལས། འདའ་ཀ་ཇི་བཞིན་མི་ཤིགས་པའི། །རྒྱལ་པོའི་ཕྱག་རྒྱ་མཆོག་གི་གནས། །བདག་ཉིད་ཆེན་པོ་མཚན་མའི་གཟུགས། །ཕྱག་རྒྱ་ཞེས་ནི་བསྒྲགས་པ་ཡིན། །ཞེས་སོ། །བཞི་པ་རྣམ་གྲངས་ལ། སྔགས་དང་། ཕྱག་རྒྱ་གཉིས། དང་པོ་ལ། སྤྱི་དང་བྱེ་བྲག་གོ། །དང་པོ་སྤྱིར་སྔགས་ལ། གསང་
སྔགས། རིག་སྔགས། གཟུངས་སྔགས་གསུམ། དེ་ཡང་ཐབས་ཤེས་ཀྱི་བདག་ཉིད། དེའི་སྒོ་ཡིག་འབྲུར་སྣང་བས་གསང་སྟེ་ངག་ཏུ་བརྗོད་པ་དང་བཅས་ཤིང་ཤས་སྐྱོབ་ཀྱི་ལས་ཀྱིས་ལོག་རྟོག་གི་གཉེན་པོར་གྱུར་པ་ནི་གསང་སྔགས། ཤེས་རབ་དང་ཡེ་ཤེས་ཀྱི་བདག་ཉིད་དངོས་པོའི་དོན་རིག་པར་བྱེད་པའི་ལས་ཀྱིས་མ་རྟོགས་པའི་གཉེན་པོར་གྱུར་པ་ནི་རིག་སྔགས། དྲན་པ་དང་ཤེས་རབ་ཀྱི་བདག་ཉིད་ཆོས་ཀྱི་ཚིག་དོན་མི་བརྗེད་པར་འཛིན་པའི་ལས་ཀྱིས་དྲན་ཉམས་ཀྱི་གཉེན་པོར་གྱུར་པ་ནི་གཟུངས་སྔགས་ཏེ། འདི་གསུམ་གྱི་རྟགས་ཀྱང་། དང་པོ་ལྷ་ཕོའི་དབྱིབས་དང་། ཕྱི་མ་གཉིས་ལྷ་མོའི་གཟུགས་སུ་བཞུགས་ཞེས་འབྱུང་ངོ་། །གཉིས་པ་བྱེ་བྲག་ཏུ།གསང་སྔགས་ཀྱི་སྒོར་གྱུར་པའི་སྔགས་ལ་རྩ་རྒྱུད་འདིར། རྟེན་དང་བརྟེན་པ་བསྐྱེད་པའི་སྔགས་དང་། ལས་ཀྱི་རིམ་པའི་སྔགས་གསུམ་དུ་གསུངས་པ་ལས།དང་པོ་ནི། བྷྲཱུཾ་གཞལ་ཡས་ཁང་གི་ས་བོན་དང་། བི་ཤྭ་བི་ཤུདྡྷེ། སྣ་ཚོགས་རྣམ་པར་དག་པ་ན་ཞེས་བྱ་བ་སྟེ། ཐལ་རྒྱུད་ལས། བྷྲཱུཾ་དབྱིངས་བྷ་གར་སྣ་ཚོགས་འདུས། །ལས་དང་ངོ་བོ་དག་པ་ཉིད། །སངས་རྒྱས་རིན་ཆེན་ཟ་མ་ཏོག །བྱིན་རློབ་སྐྱོབ་ཕྱིར་སྔགས་སུ་བརྗོད། །ཅེས་སོ། །གཉིས་པ་ལ། ཞི་བ་དང་། ཁྲོ་བོའི་སྔགས་གཉིས། དང་པོ་ལ། རྒྱུ་མ་ནོར་བ་རྩ་བའི། བསྐྱེད་པ་རྐྱེན་གྱི།བཟླས་པ་ལས་ཀྱི་སྔགས་སོ། །དང་པོ་ལའང་། ལྷ་བསྐྱེད་པ་འཕྲོ་གཞིའི་ས་བོན་དང་། རིགས་ཀྱི་ས་བོན་གཉིས། དང་པོ་ནི། ཨ། ཀ་ཁ་ག་གྷ་ང་། ཞེས་སོགས་ཡི་གེ་བཞི་བཅུ་རྩ་གསུམ་སྟེ། དེ་དག་ལྷ་སོ་སོ་དང་སྦྱར་ནས་ངོ་སྤྲོད་པ་ནི།ཨ་ནི་སྐྱེ་མེད་དེ་བཞིན་ཉིད། །ཋ་ནི་སྒྱུ་འཕྲུལ་རྡོ་རྗེ་ཉིད། །ཅེས་སོགས་ཨ་ཀུན་ཏུ་བཟང་མོ་དང་། ཋ་མི་བསྐྱོད་པ་སོགས་རིམ་གྱིས་སྦྱར་རོ། །དེ་ལྟར་ཡང་།རྒྱ་མཚོ་ལས། ས་དང་ནམ་མཁའ་སྤྱན་རྡོ་རྗེ། །སྟོབས་ཆེན་ལྔ་ནི་དང་པོ་ཀ །གཉིས་པ་ལྔ་པོ་རིམ་བཞིན་དུ། །སྒེག་མོ་ཕྲེང་ཐོགས་དབྱངས་དང་གར། །ཡ་མཱནྟ་ཀྲྀཏ་ཉིད་དུ་བཤད། །གསུམ་པ་ལྔ་པོ་རིམ་བཞིན་དུ། །སྣང་མཛད་རྡོ་རྗེ་རིན་ཆེན་དང་། །དཔག་མེད་དོན་གྲུབ་ཉིད་དུ་བཤད། །བཞི་པ་ལྔ་ནི་རིམ་བཞིན་དུ། །ནམ་མཁའ་སྤྱན་དང་ན་བཟའ་དཀར། །མཱ་མ་ཀཱི་དང་སྒྲོལ་མར་བཤད། །ལྔ་པ་ལྔ་པོ་
རིམ་བཞིན་དུ། །བྱམས་པ་སྒྲིབ་སེལ་ཀུན་བཟང་དཔལ། །རྟ་མགྲིན་རིམ་པར་འདོད་པ་ཡིན། །དྲུག་པ་བཞི་སྟེ་རིམ་པ་བཞིན། །བདུག་སྤོས་མར་མེ་མེ་ཏོག་དང་། །དྲི་ཆབ་ལྷ་མོ་ཞེས་སུ་བཤད། །བདུན་པ་བཞི་ནི་རིམ་པ་བཞིན། །རྟག་ཆད་མཚན་མ་དག་པ་དང་། །བདག་མེད་པ་སྟེ་རིམ་པ་བཞིན། །མཐར་ཟད་བྱེད་པ་རྡོ་རྗེ་ནི། །མ་ལུས་འདུས་པའི་ངོ་བོ་སྟེ། །སྐུ་གསུང་ཐུགས་ཀྱི་རོལ་པ་ལས། །རྣམ་པར་འཕྲུལ་པའི་སྤྲུལ་པ་དྲུག །བརྒྱད་པའི་ཡི་གེ་དྲུག་ཏུ་བཤད། །བཅུ་གཅིག་བཅུ་གཉིས་རྣམ་བཤད་པོ། །སྒྲིབ་པ་ཀུན་ཟད་ཡེ་ཤེས་ནི། །འཆི་བ་གསོ་བྱེད་ཡིན་པར་བཤད། །ཅེས་པའི་གཤིན་རྗེ་དང་སྟོབས་ཆེན་གཉིས་རྒྱུད་འདིར་གསུངས་པ་དང་མི་མཐུན་པར་བྱུང་བས་ཕན་ཚུན་གོ་བརྗེ་བར་བྱ་ལ། གཞན་ནི་དེ་ཁོ་ནའོ། །འོ་ན། མགོ། ཏིག །ཤད་གསུམ་མ་བྱུང་བས་གང་དང་སྦྱོར་ཞེ་ན། དེ་གསུམ་ལ་ཁྱབ་བྱེད་ཀྱི་ཡི་གེ་ཞེས་བྱ་སྟེ། རིམ་པ་ལྟར་ཐུགས་གསུང་སྐུའི་ལྷའི་རང་བཞིན་ཡིན་པས་ཐམས་ཅད་ལ་ཁྱབ་པར་སྦྱར་རོ། །གཉིས་པ་ལ། ཧཱུཾ་ཨོཾ་སྭཱ་ཨཾ་ཧཱཾ་རྣམས་ནི་ཐུགས་རྡོ་རྗེ་སོགས་མཚོན་པར་བྱེད་པའི་ཡི་གེ་སྟེ། དགོངས་འདུས་ལས། སྐུ་མཚོན་པར་བྱེད་པ་ལ་ནི་ཡི་གེ་ཨོཾ་ཞེས་ཐ་སྙད་དུ་བྱས་སོ། །ཞེས་སོགས་གསུངས་པ་ལྟར་རོ། །དེ་བཞིན་དུ་མཱུཾ་ལཱཾ་སོགས་འགའ་ཞིག་མིང་ཡིག་དང་པོ་དང་། ལ་ལ་དག་རིགས་ཀྱི་ས་བོན་ནོ། །གཉིས་པ་བསྐྱེད་སྔགས་ནི། བཛྲ་དྷྲིཀ་སོགས་རྒྱལ་བོ་ཡབ་ལྔའི་སྔགས་དོན་ནི།གསང་འདུས་ལས། བཛྲ་རྡོ་རྗེ་འཛིན་དང་དྷྲིཀ་རྒྱལ་བའི་ཛི་ན་རྒྱལ། །ཛི་ཀ་རིན་ཆེན་རཏྣ་འཛིན་དྷྲྀཀ་དང་ཆགས་ཆེན་ཨ་རོ་མཚོན། །ལི་ག་ཤེས་རབ་པྲཛྙཱ་འཛིན་ཀ་པ་ཞེས་བྱ་སྟེ། །ཞེས་དང་། ཐལ་རྒྱུད་ལས། ཙིཏྟ་ཁམས་ལྔའི་ཤི་ར་ལ། །རྡོ་རྗེ་བཛྲ་རྒྱལ་བ་ཛིཀ་རིན་ཆེན་རཏྣ་ཆོས། །ཤེས་རབ་པྲཛྙཱ་རིགས་ལྡན་བཅུད་ཀྱི་གཟུགས། །ངེས་པར་འཛིན་པ་གསང་བའི་སྔགས། །ཞེས་སོ། །ཡུམ་ལྔའི་མཱུཾ་དྷཱ་ཏཱི་ཤྭ་རི་དབྱིངས་ཀྱི་དབང་ཕྱུག་མ་དང་། གཞན་རྣམས་ཀྱི་དྭེ་ཥ་སོགས་ནི། ཞེ་དེ་ཥ་སྡང་། མོ་ཧ་གཏི་མུག ། རཱ་ག་འདོད་ཆགས་བཛྲ་རྡོ་རྗེ་དང་། ར་ཏི་ནི་དགའ་མ་སྟེ། དེ་ལས། དེ་ཉིད་དྭངས་མའི་ཡེ་ཤེས་ལྔ། །མ་
རིག་གཉིས་སོགས་བཞི་པོ་དང་། །མི་ཕྱེད་ཕྲག་དོག་རྡོ་རྗེའི་སྔགས། །ཞེས་སོ། །ཧཱི་རཱ་ཛཱ་ཡ་སོགས་ནི་ནང་སེམས་བཞིའི་མཚན་གྱི་ཁྱད་པར་རོ། །དེ་དག་གི་ཡུམ་བཞི་ནི་ལཱ་སྱེ་སོགས་མིང་མཐར་སྙོམས་འཇུག་གི་བརྡ་བཞི་སྦྱར་བ་སྟེ། དེ་ལས་ལས་ཀྱི་བདེ་བས་སྒེག་ལཱ་སྱེ་པ་ནི། །ཆགས་པའི་དམ་ཚིག་དུས་ཡིན་ས་མ་ཡ་སྟྭཾ་ནོ། །སླར་ཡང་ལན་གྱིས་འདྲེལ་བ་ནི། །གཉིས་ཀ་དགྱེས་པའི་མཆོག་ཏུ་བཤད། །ཧ་དང་སི་ཡི་བདེ་སྒྲ་དག །བདག་གི་ཆགས་པ་ཐོབ་པའོ། །ཤིན་ཏུ་བསྐྱོད་པའི་བདེ་བ་ཉིད། །ཀུན་ནས་བསྐྱོད་པ་རླུང་ཞེས་བྱ། །ཞེས་སོ། །དྷཱ་ར་ཎི་སོགས་ཕྱི་སེམས་བཞིའི་ཡོན་ཏན་ཁྱད་པར་ཅན་ལས་དང་སྦྱར་བའི་མིང་ངོ་། །དེ་དག་གི་ཡུམ་དྷཱུ་པེ་སོགས་རང་མིང་གི་མཐར་སྙོམས་འཇུག་གི་སྦྱོར་ཚད་བཞི་སྦྱར་བ་སྟེ། དེ་ལས། གཉིས་འདྲེས་འཛིན་ཛཿ པ་ཞེས་བྱ་སྟེ། །དེ་ཉིད་དྷཱུ་པེ་ཕྱེ་བ་པྲ་བེ་ཤ་ལས་བྱུང་བའོ། །ཧཱུཾ་མེ་ཏོག་ཏྲཱཾ། པུཥ྇་བསྡུས་པའི་ངོ་བོ་ཉིད། །བདག་པོའི་ཞལ་ཨཱ་བེ་ཤ་དུ་ཐིམ་པར་བཤད། །ཤིན་ཏུ་བསྡོམ་བཾ་པའི་རིམ་ལས་བྱུང་། །གསལ་དཱི་བ་བའི་ཡེ་ཤེས་བདེ་སུ་གིརྟཱི་བ་ཆེ། །ཀུན་ཧོཿ གསལ་བརྗོད་དང་འདྲ་བའི་སྒྲ། །གནྡྷེ་གཉིས་མེད་ཐུགས་ཙིཏྟ་སུ་ཤེས་པར་བྱ། །ཞེས་སོ། །ཡ་མཱནྟ་ཀྲིཏ་སོགས་སྒོ་ བ་ཡབ་ཡུམ་བརྒྱད་མིང་མཐར། ཕཊ་སྟེ་དྭགས་པར་གྱིས་ཞེས་པའི་སྐུལ་ཚིག་སྦྱར་བའོ། །བྱ་བྱེད་ཡབ་ཡུམ་གྱི་སྔགས་དོན་ཀྱང་། དེ་ལས། རྣམ་ཤེས་གསུམ་ཧཱུཾ་ཧཱུཾ་ཧཱུཾ་འདས་བཛྲ་རྡོ་རྗེ་ནི། །ཡེ་ཤེས་ཨོཾ་ལྔ་རྫོགས་ཐུགས་ཙིཏྟ་ཉིད་དོ། །དབྱིངས་གསུམ་ཨ་ཨ་ཨ་རྣམ་དག་འདུས་མ་བཛྲཱི་བྱས། །བྷ་དྲས་མཱནྟ་ཀུན་ཏུའང་དེ་བཞིན་ཨ་གནས་བྱེད་པའོ། །ཞེས་སོ། །མུ་ནེ་ཀྲིཾ་སོགས་ཀྱི་ཐུབ་དྲུག་གི་སྤྱིའི་མིང་མུ་ནེ་བྱེ་བྲག་གི་ཀྲིཾ་སོགས་ས་བོན་ལས་དང་སྭཱ་ཧཱ་སྦྱར་བའོ། །གསུམ་པ་ནི། རྩ་སྔགས་བསྐྱེད་སྔགས་བསྒྲིལ་ནས་འཛབ་ཏུ་བཟླ་བའོ། །གཉིས་པ་ཁྲོ་བོ་ལའང་གསུམ་ལས། དང་པོ་རྩ་སྔགས་ནི། ཧཱུཾ་ཟུང་ལྔ་དང་། ཧ་དང་ཧེ་བརྒྱད་རེ་དང་། ཕཊ་བཞི་དང་བྷྱོ་ཉི་ཤུ་རྩ་བརྒྱད་དོ། །གཉིས་པ་བསྐྱེད་སྔགས་ནི། ཁྲག་འཐུང་རིགས་ལྔའི་ཨོཾ་བཛྲ་མ་ཧཱ་ཤྲཱི་ཧེ་རུ་ཀ །ཞེས་སོགས་ཀྱི་ཧེ་རུ་ཀ་ཡན་ཆད་ནི་སོ་སོའི་སྐུ་བསྐྱེད་པའི་སྔགས་
དང་། མ་ཧཱ་ཙཎྜ་མན་ཆད་ལས་སྔགས་སོ། །རིགས་ཀྱི་ཡུམ་ལྔའི་སྔགས་ནི་སོ་སོའི་མཚན་གྱི་ཁྱད་པར་གྱི་མཐར་ལས་སྔགས་སྦྱར་བའོ། །གནས་ཡུལ་སྒོ་མ་ཉི་ཤུ་ནི། བཛྲ་སྟེ་དབང་རྟགས་རྡོ་རྗེ་མཚོན་པའི་མཐར་གཽ་རཱི་སོགས་སོ་སོའི་མིང་སྦྱར་བའོ། །དབང་ཕྱུག་མའི་བསྐྱེད་སྔགས་ནི་རྒྱུད་འདིར་མི་འབྱུང་ཀྱང་། མ་ནུ་རཀྵ་སཱི་བྷྱོ་ཞེས་སོགས་བཤད་རྒྱུད་རྡོ་རྗེ་ལས་ཁ་བསྐང་བར་བྱའོ། །གསུམ་པ་ནི། བསྐྱེད་སྔགས་ལ་ལས་སྔགས་བཏགས་ནས་བཟླ་བ་སྟེ། ཁྱད་པར་འཁོར་སྔགས་རྣམས་ལ། ཆེ་གེ་མོ་ཧཱུཾ་ཛཿ། ཞེས་སོགས་གང་འདོད་ཀྱི་ཤམ་བུ་གདགས་ན་ལས་ལ་སྐུལ་བའི་སྔགས་སུ་ཡང་འགྱུར་གསུངས་སོ། །གསུམ་པ་ལས་ཀྱི་རིམ་པའི་སྔགས་ནི། སྙན་གསན་དབབ་པ་དང་། སྤྱན་དྲང་བ། རིག་པའི་མེ་ཏོག་དོར་བ། སྐུལ་ཞིང་བསྡིམ་པའི་སྔགས་རྣམས་ནི་ཞི་ཁྲོ་གཉིས་ཀ་ལས་སོ་སོར་འབྱུང་ལ།དེའི་སྟེང་དུ་ཞི་ཁྲོ་ཐུན་མོང་གི་དབང་བསྐུར་བ་དང་། བྱིན་གྱིས་རློབ་པའི་སྔགས་གཉིས་ཞི་བའི་སྐབས་སུ་དང་། ཁྲོ་བོ་ལས་ཨ་ལི་ཨུ་ལི་སོགས་མཆོད་པའི་གླུ་བྱུང་སྟེ། འདི་ནི་ཨ་བ་བྷྲཾ་ཤའི་སྐད་དུ་ལོ་ཙཱ་བ་ཆེན་པོ་རོང་ཟོམ་བཞེད་དོ། །འདི་དག་གི་སྔགས་དོན་ཞིབ་པར་ཊཱི་ཀ་རྣམས་དང་རྒྱུད་ཀྱི་མཆན་བུ་ལས་ཤེས་པར་བྱའོ། །འཕྲོས་དོན་བཟླས་བརྗོད་ཇི་ལྟར་བྱ་བའི་ཐབས་བཤད་པ་ནི། ལམ་རིམ་ལས། སྐྱོན་བཅུ་སྤངས་ཏེ་རྣམ་གསུམ་གྱིས། །བཟླས་པ་གྲངས་བཞིན་རྫོགས་པར་བྱ། །ཞེས་པས། སྤང་བྱའི་སྐྱོན་བཅུ་ནི། ཧ་ཅང་སྒྲ་ཆེ་བ་དང་། ཆུང་བ་མ་ཡིན་པ་ལ་སོགས་པ་སྟེ། རྔམ་གློག་ལས། སྒྲ་ཆེན་མ་ཡིན་ཆུང་བ་མིན། །མགྱོགས་པར་མ་ཡིན་བུལ་བར་མིན། །དྲག་པོར་མ་ཡིན་ཞན་པར་མིན། །ཡིག་འབྲུ་ཡན་ལག་ཉམས་པ་མིན། །ཡེངས་པས་མ་ཡིན་སྒྲ་བཞིན་མིན། །གླལ་སོགས་པར་དུ་ཆོད་པས་མིན། །ཞེས་སོ། །རྣམ་པ་གསུམ་ནི་བཟླ་ཚུལ་ཏེ། །དེ་ལ་ཡང་གསལ་བ་གསུམ་དང་། ཕྱི་ནང་གསང་གསུམ་དང་། ཕྲ་མོ་གསུམ་གྱི་བཟླ་ལུགས་སོ། །དང་པོ་ནི། ལམ་རིམ་ལས། སྤྲོ་བསྡུས་བདག་དང་གཞན་དོན་རྫོགས། །ཞེས་
པས། གང་ལས་སྤྲོ་བསྡུའི་གནས་གང་ལ་སྤྲོ་བའི་ཡུལ། གང་སྤྲོ་བའི་བར་གྱི་འཕྲོ་འདུ་གསལ་བའོ། །དེའང་བཞེད་པ་མི་མཐུན་ཏེ། བཀའ་ཕྱོགས་སྐྱོང་བ་རྗེས་འབྲངས་དང་བཅས་པ་རྣམས་དམ་ཡེ་སོ་སོར་ཕྱེ་ནས་སྤྲོ་བསྡུ་མཛད། ལྷ་རྗེ་འགར་ནི། མཁའ་ཁྱབ་ཀྱི་རྒྱལ་བའི་ཞིང་ཁམས་དང་རིས་མེད་པའི་སེམས་ཅན་སྤྲོ་བསྡུའི་ཡུལ་ཡིན་གྱི་དམ་ཡེ་འབྱེད་མི་དགོས་གསུང་། རྗེ་རོང་ཟོམ་ནི་ཕྱི་མ་དོན་ཟབ་ཅིང་རྒྱ་ཆེ་བ་ཡིན་གསུང་མོད་ཀྱི། བདག་གི་རྗེ་བླ་མ་ཐམས་ཅད་མཁྱེན་པའི་ཞལ་སྔ་ནས། དེ་གཉིས་དོན་གྱི་གནད་གཅིག་ཅེས་གསུང་ཞིང་ཕྱག་བཞེས་སུ་ལུགས་སྔ་མ་ལྟར་མཛད་པ་ནི་ཤིན་ཏུ་ལེགས་པ་སྟེ། སྣོད་བཅུད་དཀྱིལ་འཁོར་དུ་རྒྱས་བཏབ་པས་རིས་མེད་པའི་སེམས་ཅན་རྣམས་ཀྱང་དམ་ཚིག་སེམས་དཔར་འདུ་ལ། ཡེ་ཤེས་སེམས་དཔའ་ནི་སངས་རྒྱས་ཐམས་ཅད་ཀྱི་སྐུ་ཡིན་པའི་ཕྱིར་མཁའ་ཁྱབ་ཀྱི་དེ་བཞིན་གཤེགས་པ་རྣམས་ཀྱང་དེར་འདུ་བས་གནད་གཅིག་པ་ཉིད། ཕྱག་བཞེས་སུ་ལུགས་སྔ་མ་ལྟར་མཛད་པ་ཡང་བརྒྱུད་པའི་བླ་མ་རྣམས་ཀྱིས་ཕྱག་ལེན་དུ་བཏབ་པའི་མན་ངག་བརྒྱུད་པ་ཅན་ཡིན་པར་མ་ཟད། ལམ་རིམ་གྱི་ཚོགས་སྒྲུབ་སྐབས་སུ། ཡེ་ཤེས་མདུན་དུ་ལྷགས་པ་ལ། །བཟླས་པ་གསལ་བ་གསུམ་གྱིས་བྱ། །ཞེས་དང་། ཕྱག་རྒྱ་བཞི་པའི་བསམ་གཏན་ལས་ཀྱང་། དེ་ནས་ཡེ་ཤེས་གནས་བཅས་པ། །མདུན་དུ་ཕྱེ་ལ་རང་སྔགས་ཀྱིས། །བཟླས་པ་སྐྱོན་བཅུ་སྤངས་པ་ཡིས། །གསལ་བ་གསུམ་དང་ལྡན་པར་བྱ། །ཞེས་གསུངས་པའི་ཕྱིར་འཐད་པ་དང་བཅས་པའོ། །དེ་ནས། ཕཊ་ཛཿས་མདུན་གྱི་ནམ་མཁར་ཡེ་ཤེས་སེམས་དཔའ་རྟེན་དང་བརྟེན་པར་བཅས་པ་ཕྱེ་ལ། བདག་དམ་ཚིག་སེམས་དཔའི་ཐུགས་ཀ་ནས་འོད་ཟེར་ཕར་སྤྲོ་བ་དང་ཚུར་སྡུད་པའི་འཕྲོ་འདུ་མགལ་མེའི་འཁོར་ལོ་ལྟ་བུ་དང་། སྔགས་ཀྱི་རང་སྒྲ་འབྲུག་སྟོང་ལྡིར་བ་ཙམ་དུ་བསམས་ལ། གྲག་སྟོང་དབྱེར་མེད་ཀྱི་ངང་ནས་བཟླས་པ་བྱ་བ་ཡིན་ནོ། །གཉིས་པ་ནི། ལམ་རིམ་ལས། ཕྱི་ནང་གསང་བ་གང་མོས་སུ། །
ཞེས་པས་གསུམ་ལས། དང་པོ་ཕྱི་ལྟར་ན། དམ་ཡེ་ཕྱེ་ནས་སྤྲོ་བསྡུ་ཞལ་ནས་ཞལ་དུ་ཞུགས་གསང་བའི་རྡོ་རྗེ་ནས་རྡོ་རྗེར་འཁོར་བའི་ཚུལ་གྱིས་བཟླ་བའམ། ཡང་ན་ཕར་གྱིས་སྒྲིབ་པ་སྦྱང་བར་བསྐུལ་ཞིང་ཚུར་འདུས་པས་སྒྲིབ་པ་སྦྱངས་ནས་དངོས་གྲུབ་ཀྱི་སྣོད་རུང་དུ་བྱ་བའོ། །གཉིས་པ་ནང་ལྟར་ན། ཡེ་ཤེས་སེམས་དཔའ་འབྱེད་དམ་མི་འབྱེད་ཀྱང་རུང་སྟེ། ཕར་འཕྲོས་པས་དངོས་གྲུབ་བསྐུལ་ནས།ཚུར་འདུས་པས་དངོས་གྲུབ་ཐོབ་པར་བསམ་པའོ། །གསུམ་པ་གསང་བ་ལྟར་ན།ཕར་མི་སྤྲོ་བར་ཚུར་དངོས་གྲུབ་སྡུད་པ་ཁོ་ནའམ། ཡང་ན་ཡབ་ཀྱི་ཞལ་ནས་ཡུམ་གྱི་ཞལ་དུ་ཞུགས་མཁའ་གསང་ནས་ཚུར་འཁོར་བ་ལ་དམིགས་པའོ། །འདི་ལ་འོད་རིམ་དུ་ནང་གི་བཟླས་པར་བཞེད་དེ། དེ་ལས། ནང་དུ་ཡབ་ཡུམ་ཞལ་སྤྲོད་དེ། །སྒྲ་ཅོ་མེད་པའི་བཟླས་པ་ཡིས། །དབུས་ཀྱི་རྩ་ཉིད་འཕྲོ་འདུའི་ལམ། །ཞལ་ནས་ཞལ་དང་མཁའ་ནས་མཁའ། །སྐོར་བ་དུག་ལོག་བདེ་མྱོང་འགྱུར། །ཞེས་སོ། །གསུམ་པ་ཕྲ་མོ་གསུམ་ནི། སྤྲོ་བསྡུའི་ཚེ། ཡིག་འབྲུ་དང་། ཕྱག་མཚན་དང་། སྐུ་ཕྲ་མོའི་འཕྲོ་འདུའམ། རྡོ་རྗེའི་བཟླས་པ་བྱེད་པ་སྟེ། ཕྱག་རྒྱ་བཞི་པ་ལས། དང་པོ་གསུང་དང་བར་ཐུགས་དང་། །ཐ་མ་ཕྲ་མོ་སྐུ་འཕྲོ་འདུས། །ཡང་ན་རྡོ་རྗེའི་བཟླས་པ་བྱ། །ཞེས་སོ། །དེ་ལྟར་གང་མོས་ཀྱི་སྒོ་ནས་རབ་མཚན་མའི། འབྲིང་དུས་ཀྱི། ཐ་མ་གྲངས་ཀྱི་བསྙེན་པ་གསུམ་གང་རུང་ཚད་དུ་ཕྱིན་པར་བྱ་བ་སྟེ། ལམ་རིམ་ལས། བཟླས་པ་ཚད་དུ་ཕྱིན་པར་བྱ། །ཞེས་དང་། འོད་རིམ་ལས། བསྙེན་པ་གྲངས་དུས་མཚན་མ་ཡི། །ཐབས་ཀྱི་མཆོག་ཏུ་དེ་གསུངས་སོ། །ཞེས་གསུངས་པའི་ཕྱིར། དེའང་མཚན་མའི་བསྙེན་པ་ནི།ཕྱག་རྒྱ་གཅིག་སྤྲོས་ཀྱི་གནས་སྐབས་གང་ཡིན་ཀྱང་རང་གི་ཉམས་ལྔ་མཐར་མ་ཕྱིན་གྱི་བར་དུ་བཟླ་བའོ། །གཉིས་པ་དུས་བསྙེན་ནི། དུས་དང་གྲངས་ལ་འདིར་མཐའ་གཅིག་ཏུ་ངེས་པར་མ་གསུངས་པའི་ཕྱིར། ལོ་གཅིག་གམ། ཟླ་
དྲུག །ཟླ་གཅིག་སོགས་ཇི་ཙམ་བཟླ་བར་དམ་བཅས་པ་དེ་སྲིད་དུ་རྫོགས་པར་བཟླ་བའོ། །གསུམ་པ་གྲངས་བསྙེན་ཀྱང་། འདི་ཙམ་ཞིག་བཟླ་སྙམ་དུ་ཇི་ལྟར་དམ་བཅས་པ་དེ་སྲིད་དུ་བཟླ་བ་ཡིན་ལ། འོན་ཀྱང་ཀུན་མཁྱེན་ཆེན་པོའི་ཊཱི་ཀར། སྤྱིར་གཙོ་བོ་ལ་བྱེ་བ། འཁོར་རྣམས་ལ་ཁྲི་ཕྲག་རེ་རེས་གྲངས་ཀྱི་བསྙེན་པ་གྲུབ་པར་བཞེད་པས་འདིར་དེའི་རྗེས་སུ་འབྲང་བར་བྱའོ། །ཞེས་གསུངས་པ་ལྟར་ཤེས་པར་བྱའོ། །མདོར་ན་བཟླས་བརྗོད་ཀྱི་བྱ་བ་ནི། སངས་རྒྱས་ཀྱི་མཛད་པོ་འགྲུབ་པར་འགྱུར་ཏེ། དམ་ཚིག་གསལ་བཀྲ་ལས། རང་གི་སྒོ་གསུམ་ཡི་དམ་གྱི། །སྐུ་གསུང་ཐུགས་སུ་མངོན་སྦྱར་ལ། །རྟག་ཏུ་བཟླས་པ་བྱེད་པ་ནི། །བྱང་ཆུབ་གཟུངས་ལ་ཞུགས་པ་ཡིན། །ཞེས་སོ། །གཉིས་པ་ཕྱག་རྒྱ་ལ། རང་བཞིན་གྱི་ལྟ་བའི།ལྷག་པ་ཏིང་ངེ་འཛིན་གྱི་ཕྱག་རྒྱ་གསུམ། དང་པོ་ནི། རྟོག་ཚོགས་ཐམས་ཅད་སྒྱུ་དྲའི་དཀྱིལ་འཁོར་དུ་ཡེ་ནས་རྫོགས་པའོ། །དེ་ལྟར་ཡང་། སྒྱུ་འཕྲུལ་དྲ་བས་མངོན་རྫོགས་པའི། །ཐམས་ཅད་བྱང་ཆུབ་མཆོག་གི་རྒྱ། །ཞེས་དང་། རྒྱས་པ་ལས། རང་བཞིན་ཕྱག་རྒྱ་ཆེན་པོ་ནི། །ཕྱི་ནང་སྣོད་བཅུད་ཐམས་ཅད་ཀུན། །རིགས་ལྔ་བདེ་གཤེགས་ཡབ་ཡུམ་གྱི། །ཕྱག་རྒྱ་ཆེན་པོའི་ངང་དུ་གནས། །ཞེས་སོ། །དེ་ལྟར་གནས། རྟོགས། མངོན་དུ་བྱས་པའི་གནས་སྐབས་གསུམ་ལས། རང་བཞིན་དང་། ལྟ་བ་དང་། འབྲས་བུའི་ཕྱག་རྒྱ་ཞེས་ཀྱང་གདགས་སོ། །གཉིས་པ་ནི། དེའི་ཚེ་རྟོག་ཚོགས་ལྷའི་རང་བཞིན་དུ་གནས་པ་ལྟར་རྟོགས་པའི་ཚེ་ཅི་བྱས་ཕྱག་རྒྱ་ཆེན་པོ་ལས་མི་འདའ་བས་ཐ་མལ་གྱི་རྟོག་པ་ལ་རྒྱས་འདེབས་པར་བྱེད་པ་སྟེ། ཕྱག་རྒྱ་
ཆེན་པོའི་ཚོགས་མཆོག་ནི། །ཐབས་དང་ཤེས་རབ་ལྡན་འབྱོར་ན། །མ་བསྐྱོད་མ་བསྐུལ་ཐམས་ཅད་ཀུན། །ཕྱག་རྒྱ་ཆེན་པོའི་ངང་དུ་གནས། །ཞེས་སོ། །གསུམ་པ་ནི། ཞི་ཁྲོའི་ལྷ་ཚོགས་གང་བསྒོམ་ཡང་། ཕྱག་རྒྱ་བཞི་ལྡན་ནམ། བདུན་ལྡན་དུ་བསྒོམ་པ་སྟེ། དང་པོ་ནི། གསལ་བཀྲ་ལས། དམ་ཚིག་ལས་དང་ཆོས་དང་ནི། །སྐུ་ཉིད་ཕྱག་རྒྱ་ཆེན་པོ་བཞི། །ཞེས་སོ། །གཉིས་པ་ནི། དང་པོ་གཉིས་ལ་བཅའ་བ་དང་བསམ་པ། གསུམ་པ་ལ་བསམ་པ་དང་བརྗོད་པ་གཉིས་སུ་ཕྱེ་བ་ཙམ་དུ་ཟད་དོ། །དེ་ཡང་ཞི་ཁྲོ་གཉིས་ལས། དང་པོ་ཞི་བའི་ཕྱག་རྒྱ་ལ། ཕྱག་རྒྱའི་རྒྱུ། རིགས་ལྔ་སྤྱིའི་དམ་རྒྱ། ལྷ་སོ་སོའི་ཕྱག་རྒྱའོ། །དང་པོ་ནི། འགྲེལ་ཆུང་ལས། དབུ་ནི་བདེ་གཤེགས་རིགས་ཉིད་དེ། །ལག་གཡས་རྡོ་རྗེ་མི་བསྐྱོད་པ། །ལག་གཡོན་རིན་ཆེན་སེམས་དཔའི་རིགས། །རྐང་གཡོན་ཆོས་ཀྱི་སེམས་དཔའ་སྟེ། །རྐང་གཡས་ལས་ཀྱི་སེམས་དཔའོ། །ཞེས་ལུས་ཀྱི་ཡན་ལག་ལྔ་རིགས་ལྔའི་དཀྱིལ་འཁོར་དུ་ལྷུན་གྱིས་གྲུབ་པར་གསུངས་པ་ལ་གོ་བ་རྙེད་པར་བྱས་ནས། མི་བསྐྱོད་ཉི་མའི་དཀྱིལ་ཡི་གེ། །རིན་ཆེན་ཟླ་བའི་དཀྱིལ་ཡི་གེ། །ཞེས་པས་མི་བསྐྱོད་པ་སྟེ་ལག་གཡས་པའི་སོར་མོའི་དྲེ་ཁ་ལ་ཉི་དཀྱིལ་རེའི་སྟེང་དུ་ཡི་གེ་ཧཱུཾ་ཨོཾ་སྭཱ་ཨཾ་ཧཱུཾ་ལྔ་གུང་མཛུབ་སྲིན་ལག་མཐེ་བོང་མཐེའུ་ཆུང་རྣམས་ལ་རིམ་པར་དགོད། དེ་བཞིན་དུ་རིན་ཆེན་ཏེ་གཡོན་གྱི་སོར་མོ་ཟླ་དཀྱིལ་གྱིས་མཚན་པ་ལྔ་ལ་མཱུཾ་ལཱཾ་མཱཾ་པཱཾ་ཏཱཾ་རྣམས་གོ་རིམ་སྔར་བཞིན་བཀོད་ལ། དེ་ནས་ཐལ་མོ་སྦྱར་བ་ནི་ཕྱག་རྒྱ་འབྱུང་བའི་རྒྱུ་སྟེ། ཐལ་རྒྱུད་ལས། མི་བསྐྱོད་རྡོ་རྗེ་རྩེ་ལྔ་ལས། །ཉི་མའི་ཐིག་ལེ་ཡི་གེ་ལྔ། །རཏྣ་པར་བུའི་ཉི་ལྔ་ལ། །ཟླ་བའི་ཐིག་ལེ་ཡི་གེ་དངོས། །ཐིག་ལེ་ཐབས་ཤེས་ལྔ་གཉིས་རྣམས། །ཕྲད་པའི་དུས་ན་རང་བྱུང་བ། ཕྱག་རྒྱ་ཆེན་པོའི་དངོས་གྲུབ་འབྱུང་། །ཞེས་སོ། །གཉིས་པ་ནི། ཨོཾ་དང་མཱུཾ་གཉིས་རྩེ་སྦྱར་ཏེ། །འབྲུ་བརྒྱད་བསྣོལ་ནས་རྩེ་སྤྲད་པ། །ཞེས་པ་སྟེ། རྔམ་གློག་ལས། ཨོཾ་དང་མཱུཾ་དུ་རྩེ་སྦྱར་ཏེ། །དེ་བཞིན་ཧཱུྃ་དང་ལཾ་དུ་སྦྱར། །ཧཱཾ་དང་པཱཾ་ཡང་དེ་བཞིན་ཏེ། །ཨོཾ་དང་ཏཱཾ་དུ་སྦྱར་བ་ལས། །རྒྱབ་སྦྱར་དང་མཱཾ་བསྒྲེང་བ། །འདི་ནི་ཡབ་ཀྱི་སྤྱི་
རྒྱ་ཡིན། །ལག་པ་ཐལ་མོ་སྦྱར་བ་ལས། །ཨོཾ་དང་མཱུཾ་སྦྱར་ཧཱུཾ་དང་ནི། །ལཱཾ་སྦྱར་དང་པཱཾ་དུ་སྦྱར། །ཨོཾ་དང་མཱཾ་སྦྱར་ཧཱཾ་ཏཱཾ་སྒྲེང་། །ཡུམ་གྱི་སྤྱི་རྒྱ་ཡིན་པར་བཤད། །ཅེས་དང་། ཐབས་ཞགས་ལས།སོར་མོ་ནང་དུ་བསྣོལ་ནས་བཀན། །གུང་མཛུབ་མཐེ་བོང་མཐེའུ་ཆུང་རྣམས། །སོ་སོར་རྩེ་སྤྲད་ཕྱིར་བཀྱེད་དེ། །སྲིན་ལག་གཤིབས་བསྒྲེང་དམ་ཚིག་རྒྱ། །ཞེས་པ་དང་རྔམ་གློག་གི་ཡབ་ཀྱི་སྤྱི་རྒྱ་གཉིས་བསྟུན་པས་སྔར་གྱི་སོར་མོའི་ཡིག་འབྲུ་བཀོད་ཚུལ་ལ་གོ་བ་རྙེད་པར་འགྱུར་ཞིང་། གཞན་དུ་འགྲེལ་ཆུང་ལས་མཐེ་བོང་དང་མཐེའུ་ཆུང་། འོད་རིམ་དུ་མཐེ་བོང་དང་སྲིན་ལག་གི་ཡིག་འབྲུ་གོ་ལྡོག་ཏུ་བཀོད་མོད་ཀྱི། འདིར་རང་གི་རྗེ་བླ་མའི་དགོངས་པ་ནི་ཐབས་ཞགས་ལྟར་དཀྱུས་སུ་བཀོད་པ་ཉིད་དོ། །དེ་ལྟར་བཅས་པའི་ཡོན་ཏན་ནི། །རྒྱལ་བ་ཀུན་དང་མཉམ་སྦྱོར་བའི། །བདེ་བ་ཆེན་པོ་སྦྱིན་པའི་རྒྱ། །ཞེས་སོ། །གསུམ་པ་ལ།རིགས་ལྔ་ཡབ་ཡུམ་གྱི་དང་། སེམས་དཔའ་ལ་སོགས་པའི་ཕྱག་རྒྱའོ། །དང་པོ་ནི་བདག་མི་བསྐྱོད་པའི་སྐུར་བསྒོམ་པ་ནི་ཕྱག་རྒྱ་ཆེན་པོ། ལག་གཡས་པའི་འབྲུ་བཞི་སྦས་ནས་གུང་མོ་ཐུགས་ཀར་བཀན་ཐབས་སུ་བསྒྲིང་བ་ནི་བཅའ་བ་དམ་རྒྱ། དེའི་རྩེ་མོར་ཧཱུཾ་མཐིང་ག་བསམ་པ་ནི་བསམ་པ་ཆོས་རྒྱ། དེ་ཡོངས་སུ་གྱུར་པ་ལས་རྡོ་རྗེ་རྩེ་ལྔ་པ་འོད་འབར་བ་བསམ་པ་ནི་བསམ་པ་དམ་རྒྱ། གཡོན་པའི་འབྲུ་ལྔ་སྦས་ནས་དྲིལ་བུ་གསིལ་ཞིང་ཡུམ་ལ་འཁྲིལ་བའི་ཚུལ་གྱིས་ཞབས་གཡོན་པ་པདྨའི་རིགས་ལ་བསྟེན་ཐབས་སུ་བཅའ་བ་ནི་བཅའ་བ་ལས་རྒྱ། དེ་ལྟར་བསམ་པ་ནི་བསམ་པ་ལས་རྒྱ། དེ་ནས་ཕྱག་རྒྱ་གཡས་ནས་བཅས་ཏེ་མདུན་དུ་བསྒྱུར་ནས་གཡོན་དུ་ཡུམ་གྱི་ཐུགས་ཀར་དགྲོལ་བ་དང་ལྷན་ཅིག་ཏུ་ངག་ཏུ་ཧཱུཾ་བཛྲ་དྷྲྀཀ་ཅེས་བརྗོད་པ་ནི་ཆོས་རྒྱ་སྟེ་ཤེས་རབ་ལ་ཐབས་ཀྱིས་རྒྱས་འདེབས་པའོ། །དེ་ལྟར་ཡང་། འབྲུ་བཞི་སྦས་ནས་ཐུགས་ཀར་བཀན། །ཧཱུཾ་བསྒྲེང་རྩེ་མོར་རྡོ་རྗེ་འབར། །ཟླ་བརྟུལ་འབྲུ་སྦས་དྲིལ་གསིལ་ཞིང་། །འཁྲིལ་བའི་ཚུལ་གྱིས་ཆོས་ལ་བརྟེན། །ཞེས་སོ། །དེའི་གཡོན་ཕྱོགས་
སུ་ཡུམ་དབྱིངས་ཕྱུག་མ་བསྒོམ་པ་ནི་ཕྱག་ཆེན།གཡོན་གྱི་གུང་མོ་ཐུགས་ཀར་བཀན་ཐབས་སུ་བསྒྲེང་བ་ནི་བཅའ་བ་དམ་རྒྱ། དེའི་རྩེར་མཱུཾ་བསམ་པ་ནི་བསམ་པ་ཆོས་རྒྱ། དེ་ཡོངས་སུ་གྱུར་པ་ལས་དྲིལ་བུ་གསིལ་བའི་སྒྲ་ཅན་འོད་འབར་བར་བསམ་པ་ནི་བསམ་པ་དམ་རྒྱ། ལག་གཡས་ཉི་མ་འབྲུ་ལྔ་དང་བཅས་པ་མ་བཅིངས་པའི་བསྣོལ་མས་ཡབ་ཀྱི་བརླ་གཡས་པའི་སྟེང་དུ་བཞག་པས་འཁྱུད་ཅིང་དབུ་ཡབ་ལ་ཅུང་ཟད་བཏུད་དེ་འཛུམ་ཞལ་གྱིས་བལྟ་བའི་ཚུལ་དུ་བཅའ་བ་ནི་བཅའ་བ་ལས་རྒྱ། དེ་ལྟ་བུར་བསམ་པ་ནི་བསམ་པ་ལས་རྒྱ། ཕྱག་རྒྱ་གཡོན་ནས་བཅས་ཤིང་། མདུན་དུ་བསྒྱུར་ཏེ་གཡས་སུ་ཡབ་ཀྱི་ཐུགས་ཀར་དགྲོལ་བ་དང་། མཱུཾ་དྷཱ་ཏཱི་ཤྭ་རཱི་ཞེས་བརྗོད་པ་ནི་བརྗོད་པ་ཆོས་རྒྱ་སྟེ་ཐབས་ལ་ཤེས་རབ་ཀྱི་རྒྱས་འདེབས་པའོ། །དེ་ལྟར་ཡང་། འབྲུ་བཞི་སྦས་ནས་ཐུགས་ཀར་བཀན། །མཱུཾ་བསྒྲེང་རྩེ་མོར་དྲིལ་གསིལ་འབར། །ཉི་མ་འབྲུ་ལྔ་ལས་སུ་འཁྲིལ། །བཏུད་དེ་འཛུམ་པའི་མདངས་ཀྱིས་བལྟ། །ཞེས་སོ། །དེ་བཞིན་དུ་རྣམ་སྣང་སོགས་རིགས་གཞན་བཞི་ལའང་དེས་འགྲེ་ཤེས་པར་བྱའོ། །གཉིས་པ་ནི། ལག་གཡས་པའི་མཐེ་བོང་མ་གཏོགས་པའི་སོར་མོ་གཞན་བཞི་ལ་ཉི་དཀྱིལ་རེ་རེའི་སྟེང་དུ་མཛུབ་མོ་ནས་བརྩམས་ཏེ་ཐུགས་ཀྱི་སེམས་དཔའ་བཞིའི་ས་བོན་ཀྵཱི་ཏྲཾ་ཧྲིཾ་ཛྲིཾ་བཞི་དང་། གཡོན་གྱི་སོར་མོ་བཞི་ལ་ཟླ་དཀྱིལ་རེ་རེར་ཡུམ་བཞིའི་ས་བོན་ཧཱུཾ་ཏྲཾ་ཧྲཱྀཿཨ་བཞི་བཀོད་ནས་སྔར་བཞིན་ཕྱག་རྒྱ་བདུན་ལྡན་དུ་སེམས་དཔའ་དང་སྒོ་སྐྱོང་ཡབ་ཡུམ་ཐམས་ཅད་ལ་ཤེས་པར་བྱ་སྟེ། གོང་གི་ཕྱག་རྒྱ་ཆེན་པོ་བཞིན། །ཞེས་དང་། འདུད་ཚུལ་འཁྲིལ་བ་གོང་མ་བཞིན། །ཞེས་གསུངས་པའི་ཕྱིར། ཐུབ་དྲུག་ནི། དོན་གྱི་ཡུམ་ཆོས་ཀྱི་དབྱིངས་དང་འདུ་འབྲལ་མེད་ཀྱང་། གཟུགས་ཀྱི་སྐུར་བསྟན་པའི་རྟགས་ཀྱི་ཡུམ་མེད་པའི་ཕྱིར།འཁྲིལ་སྐྱོར་སོགས་ཀྱི་ཕྱག་རྒྱ་བཅའ་མི་དགོས་ལ། འོན་ཀྱང་མོས་པ་སྣ་ཚོགས་པས་བསྡུས་པའི་འགྲོ་འདུལ་གྱི་ཕྱག་རྒྱ་སྣ་ཚོགས་ལས་བསྡུ་ན་དྲུག་སྟེ། སྒྲུབ་ཐབས་ལས། པི་ཝང་དང་ནི་གསེག་པར་དང་། །
གོ་ཆ་པུ་སྡི་རིན་ཆེན་སྒྲོམ། །མེ་དང་ཆུ་ནི་རབ་ཏུ་བསྟན། །ཞེས་སོ། །བྱ་བྱེད་ཡབ་ཡུམ་གྱི་ཕན་ཚུན་ཕྱག་གཡས་གཡོན་སྟེང་འོག་འགྱུར་བའི་མཉམ་གཞག་དང་ཁྱད་པར་བཟང་མོ་པད་སྐྱིལ་ལོ། །མདོར་ན་དེ་དག་ལ་སོགས་ཏེ་གདུལ་བྱའི་དབང་གིས་ཕྱག་རྒྱ་གྲངས་མ་ངེས་མོད་ཀྱང་། བསྡུས་པ་ལ་དགའ་བས། དེ་བཞིན་གཤེགས་པ་ལྔ་སོ་སོའི་ཕྱག་རྒྱ་ཙམ་མམ། ཡང་ན་སྤྱིའི་དམ་རྒྱ་རྡོ་རྗེ་ཐལ་མོ་བསྣོལ་ཏེ་སྦྱར་བ་ཙམ་གྱིས་ཀྱང་རུང་བར་བསྟན་ཏེ། ཇི་སྐད་དུ། གཞན་ཡང་ཕྱག་རྒྱ་སྣ་ཚོགས་ཏེ། །ཡང་ན་དེ་བཞིན་གཤེགས་ཉིད་དམ། །ཡང་ན་རྡོ་རྗེ་ཐལ་མོ་ཉིད། །ཅེས་སོ། །གཉིས་པ་ཁྲོ་བོ་ལ། གཙོ་བོ་རིགས་ལྔའི་དང་། འཁོར་གྱི་ཕྱག་རྒྱའོ། །དང་པོ་ནི། རྒྱས་པའི་སོ་གཅིག་པར། དབུས་ཀྱི་ཧེ་རུ་ཀའི་ཕྱག་རྒྱ་ནི། ཞེས་སོགས་གསུངས་པ་སྤྱན་འགྲེལ་དུ་བཤད་རྒྱུད་རྡོ་རྗེས་རྒྱས་པར་བཀྲལ་མོད། དེ་ལྟ་ནའང་ཕྱག་བཞེས་སུ་གལ་པོར་སྦྱར་ཏེ་མཛད་པས། དེ་ལ་གཉིས། ཁུངས་དང་དགོས་ཆེད་བསྟན་པ་དང་། སོ་སོའི་ཕྱག་རྒྱ་མཆོད་ཅིང་གསོལ་བ་གདབ་པའོ། །དང་པོ་ནི། ཧེ་རུ་ཀ་ཡི་གལ་པོ་དང་། །གསང་བ་སྙིང་པོའི་རྒྱུད་དག་ལས། །རྣམ་པར་གྲོལ་བ་མཚོན་པའི་ཕྱིར། །ཞེས་སོ། །གཉིས་པ་ནི། བཛྲ་ཧེ་རུ་ཀའི་ཕྱག་རྒྱ་ནི། ཞེས་སོགས་སོ། །གཉིས་པ་ལ། རྒྱས་པ་ལས། གནས་དང་ཡུལ་གྱི་ཕྱག་རྒྱ་ནི། །རྒྱུད་གཞན་དག་དང་མཐུན་པར་བཤད། །མ་མོ་རྣམས་ཀྱི་ཕྱག་རྒྱ་ནི། །འཇིག་རྟེན་འདས་མདོ་ཆེ་ལས་བཤད། །ཅེས་ཞལ་འཕངས་པ་ལྟར། གནས་ཡུལ་སྒོ་མ་ཉི་ཤུའི་ཕྱག་རྒྱ་ནི་སྒྱུ་དྲ་དང་གལ་པོ་སོགས་དང་། དབང་ཕྱུག་མའི་ཕྱག་རྒྱ་འཇིག་རྟེན་འདས་མདོ་ལས་ཁ་བསྐང་བ་ཡིན་ནོ། །མདོར་ན་ལྷ་གང་དང་གང་གི་ཕྱག་རྒྱ་བསྒྱུར་བ་དེའི་ཚེ་དེ་ཉིད་ཀྱི་སྐུར་གསལ་བ་ཕྱག་རྒྱ་ཆེན་པོ། དེའི་ཐུགས་ཀར་རང་རང་གི་ས་བོན་གྱི་ཡི་གེ་བསམ་ཞིང་ངག་ནས་ཚིག་བརྗོད་པ་ནི་ཆོས་རྒྱ། ཕྱག་མཚན་འཛིན་པའི་ཕྱག་རྒྱ་བཅའ་ཞིང་བསམ་པ་ནི་དམ་རྒྱ། གཡོན་ཕྱོགས་ནས་
བཅས་ལ་རང་རང་གི་ཕྱག་རྒྱ་མདུན་དུ་བསྒྱུར་ཏེ་འགྲོལ་བ་ནི་ལས་རྒྱའོ། །དེའང་ཧེ་རུ་ཀ་གལ་པོ་ལས། སྐུ་ནི་ཕྱག་རྒྱ་ཆེན་པོ་དང་། །གསུང་ནི་ཆོས་ཀྱི་ཕྱག་རྒྱ་དང་། །ཕྲིན་ལས་ལས་ཀྱི་ཕྱག་རྒྱ་དང་། །ཐུགས་ནི་དམ་ཚིག་ཕྱག་རྒྱའོ། །ཞེས་སོ། །དེ་ལྟར་ཕྱག་རྒྱ་བཞིའི་སྒོ་ནས་ཕུལ་བས་མཉེས་ནས་དབང་དང་དངོས་གྲུབ་སྩོལ་བར་བསམ་པའོ། །ལྔ་པ་སྐྱོན་ནི། སྔགས་དང་ཕྱག་རྒྱ་སྤངས་ན་གསུང་གི་དམ་ཚིག་ཉམས་པས་ཕུང་ཞིང་། འབྲས་བུ་མེད་པར་འགྱུར་ཏེ། ཐུགས་ཐིག་ལས། རལ་གྲིའི་སོ་ལ་བཟུང་ཉེས་ལྟར། །ནན་ཏན་མེད་པའི་གསང་སྔགས་པ། །ཕུང་ཞིང་འབྲས་བུ་མེད་པར་འགྱུར། །ཞེས་སོ། །དྲུག་པ་ཡོན་ཏན་ནི། དེ་ལས། སྔགས་དང་ཕྱག་རྒྱ་རབ་བརྟན་ན། །དངོས་གྲུབ་ཡ་མཚན་ཆེན་པོར་འགྱུར། །ཡིད་ལ་བསམ་པ་ཐམས་ཅད་འགྲུབ། །ཅེས་གསུངས་སོ། །ལམ་གྱི་ཆ་རྐྱེན་དངོས་པོ་བཅུ་བཤད་ཟིན་ཏོ།། །།གཉིས་པ་ལམ་གྱི་ངོ་བོ་ལ། གྲོལ་ལམ་དང་། ཐབས་ལམ་གཉིས། དང་པོ་ལ། དབྱེ་བ། ཁྱད་པར། གཏན་ལ་དབབ་པའོ། །དང་པོ་ནི། གྲོལ་ལམ་ལ་ཕྱེ་ན་རིམ་གྱིས་པ་དང་ཅིག་ཅར་བ་གཉིས་ཏེ། འདི་ཉིད་ལས། རིམ་གྱིས་ཡང་ན་ཅིག་ཅར་དུ། །ཞེས་དང་། ལམ་རིམ་ལས། རིང་བའང་རིམ་དང་ཅིག་ཅར་བའོ། །ཞེས་སོ། །གཉིས་པ་ལ། དགག །གཞག །སྤང་གསུམ། དང་པོ་ནི། ལྷ་རྗེ་མེ་ཉག་པ་ན་རེ། སྔོན་དུ་ལྟ་བ་རྟོགས་ནས། ཏིང་ངེ་འཛིན་ལ་ཁ་སྤོས་ནས་བསྒོམ་པ་རིམ་གྱིས། མ་སྤོས་པར་བསྒོམ་པ་ཅིག་ཅར་བའོ་ཟེར། དེ་ལྟར་ན། མཚན་བཅས་ལྷ་སྐུ་བསྒོམ་པའི་ཅིག་ཅར་བ་འདི་ཅིག་ཅར་བ་མ་ཡིན་པར་འགྱུར་ཏེ། ལྟ་བའི་སྐབས་སུ་ལྷ་སྐུ་མི་བསྒོམ་ལ། ཏིང་འཛིན་གྱི་སྐབས་སུ་ལྷ་སྐུ་བསྒོམས་པས་ཁ་སྤོས་འདུག་པའི་ཕྱིར་རོ། །གཉིས་པ་ནི། ལྟ་བ་གཏན་ལ་འབེབས་པའི་དུས་སུ་དབྱེར་མེད་ཆིག་ཆོད་དུ་རྟོགས། བསྒོམ་པ་ཉམས་སུ་ལེན་པའི་དུས་སུ་དབྱེར་མེད་ཆིག་ཆོད་དུ་གོམས། འབྲས་བུ་མཐར་ཕྱིན་པའི་དུས་སུ་དབྱེར་མེད་ཆིག་ཆོད་དུ་མཐར་
ཕྱིན་པར་བྱེད་པ་ནི་ཅིག་ཅར་བ། དབྱེར་མེད་དུ་རིམ་གྱིས་རྟོགས། རིམ་གྱིས་གོམས། རིམ་གྱིས་མཐར་ཕྱིན་པར་བྱེད་པ་ནི་རིམ་གྱིས་པའོ་ཞེས་བླ་མ་བདེ་གཤེགས་ཆེན་པོ་དང་རྗེ་སྒྲོལ་གཡུང་གཉིས་གསུངས་ཏེ་ལེགས་སོ། །གསུམ་པ་ནི། དེ་ལྟར་ན། ཅིག་ཅར་བ་སེམས་ལྔ་རིམ་གྱིས་སྐྱེའམ་མི་སྐྱེ། དང་པོ་ལྟར་ན། ཅིག་ཅར་བ་མ་ཡིན་པར་འགྱུར་ལ། གཉིས་པ་ལྟར་ན། ཅིག་ཅར་བའི་ལམ་དེ་ལམ་གྱི་ངོ་བོ་ཡིན་པར་འགྱུར་ཏེ། སེམས་ལྔ་མི་སྐྱེ་བའི་ཕྱིར་ཞེ་ན། སྐྱེ་བས་སྐྱོན་ཕྱི་མ་མེད་ལ། སྐྱེ་ལུགས་རིམ་ཐོད་རྒལ་བ་ལ་ལྟོས་ནས་དུས་ཤིན་ཏུ་མྱུར་བར་སྐྱེ་བས་སྐྱོན་དང་པོའང་མེད་དེ། ཤོ་མངས་འདབ་མ་ལྔ་སྦྲགས་ལ་ཁབ་ཀྱིས་འབུགས་པ་བཞིན་ནོ། །དེས་ན་རིམ་གྱིས་པའི་དཔེ་ནི་ཤིང་ལེབ་ལྔ་སྦྲགས་ལ་གསོར་གྱིས་འབིགས་པ་བཞིན་ནོ་ཞེས་བླ་མ་གོང་མ་རྣམས་གསུངས་སོ། །གསུམ་པ་ལ་གཉིས་ལས། དང་པོ་རིམ་གྱིས་པ་གཏན་ལ་དབབ་པ་ལ། ལམ་མཚན་ཉིད་གསུམ་དུ་བཅིངས་ཏེ་བཤད་པ་དང་། དེ་ལ་ཐར་ཆགས་དང་ཐོད་རྒལ་དུ་བརྟག་པ་དང་། དེ་དག་ལ་ཟག་ལྡོག་ཡོད་མེད་ཀྱི་ཁྱད་པར་བསམ་པའོ། །དང་པོ་ལ། ཟག་བཅས་ཟག་མེད་དམ། ལྟ་བ་དང་ཏིང་ངེ་འཛིན་གཉིས་སུའང་འཆིང་དུ་རུང་མོད་ཀྱི། འོན་ཀྱང་སྐབས་འདིར། ཇི་སྐད་དུ། ཤེས་འཇུག་མཚན་ཉིད་འབྱོར་པའི་གཟུངས། །འབྲས་བུ་སྨིན་བྱེད་རྒྱུ་དང་རྐྱེན། །ནུས་མཐུ་ཅན་དུ་གང་གྱུར་པ། །རིག་འཛིན་རྒྱལ་བའི་ཞིང་དུ་གྲགས། །ཞེས་དང་། སློབ་དཔོན་སངས་རྒྱས་གཉིས་པའི་མན་ངག་ལྟ་བའི་ཕྲེང་བ་ལས།དེ་ལ་མཚན་ཉིད་གསུམ་གྱིས་དོན་མཐར་ཕྱིན་པར་འགྱུར་ཏེ། རྟོགས་པ་རྣམ་པ་བཞིའི་ཚུལ་རིག་པ་ནི་ཤེས་པའི་མཚན་ཉིད་དོ། །ཡང་ནས་ཡང་དུ་གོམས་པར་བྱེད་པ་ནི་འཇུག་པའི་མཚན་ཉིད་དོ། །གོམས་པའི་མཐུས་མངོན་དུ་གྱུར་པ་ནི་འབྲས་བུའི་མཚན་ཉིད་དོ། །ཞེས་གསུངས་པའི་རྗེས་སུ་འབྲངས་ནས་མཚན་ཉིད་གསུམ་གྱིས་ཁོག་འཆིང་སྟེ། རྒྱུ་ཤེས་པའི་མཚན་ཉིད་ལྟ་བ། རྐྱེན་འཇུག་པའི་མཚན་ཉིད་ཏིང་ངེ་འཛིན། ལམ་དུ་གྱུར་པའི་འབྲས་བུ་རིག་འཛིན་ནོ། །དང་པོ་ལ། རྟོགས་བྱ་ལྟ་བའི་རང་བཞིན། རྟོགས་བྱེད་བློའི་ངོ་བོ། དེས་ཇི་ལྟར་རྟོགས་
ཚུལ་ལོ། །དང་པོ་ནི། ཆོས་ཐམས་ཅད་ཀྱི་རང་བཞིན་ཇི་ལྟར་གནས་པ་དེ་ཡིན་ཏེ། རྒྱས་པ་ལས། ཆོས་ཀྱི་རང་བཞིན་ཇི་ལྟ་བུ། །བདག་གི་ཡང་དག་རྟོགས་བྱ་བ། །ཞེས་སོ། །གཉིས་པ་ནི། ཐོས་བསམ་ལས་བྱུང་བའི་སོ་སོར་རྟོག་པའི་ཤེས་རབ་ཀྱི་དབང་པོ་སྟེ། ལམ་རིམ་ལས། རྒྱུ་ཡི་དཀྱིལ་འཁོར་མཐོང་བྱའི་ཕྱིར། །ཐོས་བསམ་དམ་པས་འཚོལ་བར་བྱེད། །ཅེས་སོ། །གསུམ་པ་ལ། ཤེས་རབ་སྤྱན་འབྱེད་ལས། མཐོང་བྱེད་ཐབས་ཀྱང་བརྒྱུད་པ་དང་། །རྟགས་ཀྱིས་མཚོན་ཅིང་གཏན་ལ་དབབ། །ཅེས་པ་གསུམ་སྟེ། དབང་རྟུལ་ལ་བརྒྱུད་དེ་རྟོགས་པར་བྱ་བ། དབང་འབྲིང་ལ་རྟགས་ལ་བརྟེན་ཏེ་རྟོགས་པར་བྱ་བ།དབང་རབ་ལ་གཏན་ཚིགས་ཀྱིས་རྟོགས་པར་བྱ་བའོ། །དང་པོ་ལའང་། ཉེ་རིང་གཉིས་ལས། ཉེ་བ་ནི། བསམ་བྱུང་གི་ཤེས་རབ་ཀྱིས་རྟོགས་པར་མི་ནུས་པ་རྣམས་ལ་ཐབས་མེད་པ་མ་ཡིན་ཏེ། ལྷའི་ཕྱག་རྒྱ་བསྒོམ་པ་ལ་སོགས་པའི་ཏིང་ངེ་འཛིན་གྱི་སྒོ་ནས་བརྒྱུད་དེ་རྟོགས་པར་བྱར་ཡོད་པའི་ཕྱིར། དེ་སྐད་དུའང་སྔ་མ་ལས། དམན་ལ་རྒྱ་གསུམ་གོམས་པ་ཡིས། །བརྟན་ནས་བརྟག་དཔྱད་ཀླུང་ཞུགས་མཐོང་། །བསྒོམ་པའི་ལམ་དུ་བརྟན་པར་བྱ། །རིམ་པར་སྐྱེ་ལ་ཐེ་ཚོམ་མེད། །ཅེས་སོ། །རིང་བ་ནི། ཚེ་འདིར་དངོས་སུ་སྤྱོད་པའི་སྐལ་བ་མེད་ན།རྟེན་འདྲེལ་སྙིང་པོའི་གཟུངས་མཆོད་རྟེན་དུ་བཅུག་ནས་དེ་ཟློས་ཤིང་བསྐོར་ལ་སྨོན་ལམ་བཏབ་ན་ཚེ་རབས་གཞན་དུ་རྟོགས་པར་འགྱུར་ཏེ། རྣམ་བཀོད་ལས།དེ་མིན་རྒྱུ་ཙམ་སོགས་བྱེད་པ། །རྒྱུད་ལས་འདི་སྐད་གསུངས་པ་སྟེ། །ཆོས་ཉིད་རྟེན་ཅིང་འདྲེལ་བྲིས་ན། །ཆོས་ཉིད་དོན་དམ་རྟོགས་འགྱུར་ཏེ། །ཞེས་སོ། །གཉིས་པ་ལ། སྤྱན་འབྱེད་ལས། ཤེས་བྱ་དམ་པ་བརྟག་པའང་། །རང་བཞིན་དང་ནི་འབྲས་བུའི་རྟགས། །ཞེས་པས་གཉིས་ཀྱི། དང་པོ་རང་བཞིན་གྱི་རྟགས་ནི། འབྱུང་བ་ལྔ་དང་། ཁ་དོག་ལྔ་དང་། ཕྱོགས་ལྔ་ལ་སོགས་པས་ཡེ་ཤེས་ལྔའི་དོན་མཚོན་ནས་ཆོས་ཉིད་རྟོགས་པར་བྱེད་པ་སྟེ། དེ་ལས། དང་པོ་རང་གི་རིག་པ་ཡི། །ཆོ་འཕྲུལ་སྣང་བའི་འབྱུང་བ་དང་། །ཕྱོགས་དང་ཁ་དོག་ལ་སོགས་ཀྱིས། །མཚོན་ནས་ཇི་བཞིན་ཉིད་རྟོགས་བྱེད། །ཅེས་སོ། །གཉིས་པ་འབྲས་རྟགས་ནི།
རྟེན་དང་བརྟེན་པའི་དཀྱིལ་འཁོར་གྱི་རྟགས་ལ་བརྟེན་ནས་དོན་མཚོན་རྟོགས་པར་བྱེད་པ་སྟེ། དེ་ལས། གཅིག་ཤོས་མཐར་ཕྱིན་ཡེ་ཤེས་ཀྱི། །དཀྱིལ་འཁོར་རྟེན་དང་བརྟེན་ཅན་ལྟར། །ཞེས་སོ། །གསུམ་པ་ནི། སྔོན་བྱུང་དངོས་ལྔའི་གཏན་ཚིགས་དང་། རྗེས་འཇུག་ཚུལ་ལྔ་དང་ཚིག་ལྔའི་གཏན་ཚིགས་རྣམས་ཀྱིས་གཞལ་བས་ཞེན་སྣང་དེ་བཞིན་ཉིད་དུ་གཏན་ལ་དབབ་པར་བྱེད་པ་ཞིག་སྟེ། དེ་ཁོ་ན་ཉིད་ལྟ་བའི་རྒྱུད་ཀྱི་སྐབས་སུ་རྒྱས་པར་བཤད་ཟིན་ཏོ། །མདོར་ན། བདེན་པ་དབྱེར་མེད་ཀྱི་དོན་རང་རིག་པའི་མངོན་སུམ་གྱིས་ཡུལ་མེད་དུ་རྗེན་ཅེར་གྱིས་ཡིད་ཆེས་པར་མཐོང་བ་ལ་ལྟ་བ་རྟོགས་པ་ཞེས་བྱ་སྟེ། རྣམ་བཀོད་ལས། དེ་ལྟར་ཚུལ་གསུམ་བརྗོད་པ་ཡིས། །མཐོང་བ་གང་ཡིན་ཤེས་རབ་སྤྱན། །དེ་ཡང་མངོན་སུམ་གཞན་སྤངས་ཏེ། །སྒྲ་ཚིག་རྟེན་བྲལ་ཞེན་ཙམ་མིན། །ཡུལ་མིན་རང་རིག་བདེན་དབྱེར་མེད། །བློའི་གཏིང་གོ་བ་མངོན་སུམ་ཡུལ། །ཞེས་སོ། །དེའང་ལྟ་བ་ནི་ལམ་བསྒོམ་པའི་སྔོན་དུ་འགྲོ་དགོས་ཏེ། མ་རྟོགས་པར་བསྒོམས་ཀྱང་ལྟུང་བར་བཤད་པའི་ཕྱིར། དེ་ལྟར་ཡང་ལམ་རིམ་ལས།བསམ་གྱིས་མི་ཁྱབ་མ་མཐོང་བར། །བསམ་མེད་དཀྱིལ་འཁོར་འཇུག་བྱེད་པར། །བླུན་པོ་མུན་སྤྲུལ་བློ་ཅན་དེ། །ལོང་བའི་གྲོང་ཁྱེར་ཆེན་པོར་འགྲོ། །ཞེས་སོ། །གཉིས་པ་རྐྱེན་འཇུག་པའི་མཚན་ཉིད་ཏིང་ངེ་འཛིན་ལ། མོས་པས་བསྒོམ་པ་དང་། ངེས་པ་ཡོངས་རྫོགས་སུ་བསྒོམ་པའོ། །དང་པོ་ལ། གོ་དོན། བསླབ་ཚུལ། དགོས་པ་གསུམ། དང་པོ་ནི། ཏིང་ངེ་འཛིན་ལ་གོམས་པ་མ་ཐོབ་ཀྱང་མོས་པའམ་སྤྱིའི་རྣམ་པ་ཙམ་བསྒོམ་པ་སྟེ། ལམ་རིམ་ལས། ལམ་ཀུན་སྐད་ཅིག་ཆས་བསྒོམས་ན། །སྤྲོས་པའི་འཁོར་ལོ་མོས་བསྒོམ་ཞིང་། །ཞེས་སོ། །གཉིས་པ་ནི། ཐུན་གཅིག་གི་ནང་དུ་སྲུང་འཁོར་ནས་བརྩམས་ཏེ་མཇུག་གོ་བགོ་ལུས་བསྲུང་ཡན་ཆད་མོས་པ་ཙམ་རེ་རྫོགས་པར་ལག་ཏུ་ལེན་པའོ། །གསུམ་པ་ནི།རང་དོན་དུ་བསོད་ནམས་ཀྱི་ཚོགས་རྫོགས་པའི་ཐབས་སུ་གྱུར་པའི་ནུས་པས་བརྒྱུད་ནས་ལམ་ངེས་རྫོགས་རྒྱུད་ལ་སྐྱེ་ཞིང་། གཞན་དོན་དུ་ཕྲིན་ལས་ཀྱི་ནུས་པ་མི་བསླུ་བར་འབྱུང་བའི་ཕྱིར་ཏེ། སྔ་མའི་
འཕྲོས་ལས། རང་བཞིན་ཕན་རྫོགས་མཆོད་བསྙེན་ནས། །ནུས་པའི་དབང་རབ་ལ་སོགས་པའི་བྱིན་ལྡན་རྫོགས་པར་བྱེད། །ཅེས་སོ།། ༈ །།གཉིས་པ་ངེས་རྫོགས་ལ། གོ་དོན། བསླབ་ཚུལ་གྱི་རིམ་པ། སོ་སོར་དབྱེ་པའི་དོན་ནོ། །དང་པོ་ནི། ལམ་སོ་སོའི་ཏིང་ངེ་འཛིན་མཐར་ཕྱིན་པར་སློབ་པ་སྟེ། དེ་བཞིན་ཉིད་ལྟ་བུ་ལ་མཚོན་ན། ལམ་རིམ་ལས། དེ་བཞིན་ཉིད་དུ་མཐོང་གོམས་ན། །དགེ་དང་མི་དགེ་གཉིས་སུ་མེད། །རྣམ་རྟོག་མཚན་མ་ཡོངས་མི་འཛིན། །ཞེས་སོགས་གསུངས་པ་ལྟར་རོ། །གཉིས་པ་ནི། དེ་ཏིང་ལྟ་བུ་ལ་མཐར་ཕྱིན་པའི་ཉམས་མ་སྐྱེས་ཀྱི་བར་དུ་བསྒོམས་ནས་མཐར་ཕྱིན་པ་དང་། ལམ་ཕྱི་མ་སྙིང་རྗེ་སྒྱུ་མ་ལ་སྦྱོར་ཏེ། དེ་ལས། སྔོན་དུ་སྟོང་གོམས་རྣལ་འབྱོར་པས། །ཁམས་གསུམ་ཐུགས་རྗེས་གཟུང་བའི་ཕྱིར། །ཡན་ལག་བརྒྱད་སྔོན་བཞིན་བྱས་ནས། །ཡེ་ཤེས་སྒྱུ་མའི་སྙིང་རྗེ་བསྒོམ། །ཞེས་པ་ལྟར་རིམ་པ་བཞིན་སྦྱར་རོ། །གསུམ་པ་ནི། ལམ་རིམ་ལས། སྲིད་པ་རིམ་པར་སྨིན་ཚུལ་གྱིས། །འཇུག་པའི་ཡན་ལག་ལྔ་རུ་བཞག །ཅེས་པས་ཟག་བཅས་ཀྱི་ལམ་ལ་རྣལ་འབྱོར་ལྔ་སྟེ། སྟོང་པ་ཆེན་པོ། སྙིང་རྗེ་སྒྱུ་མ། ཕྱག་རྒྱ་གཅིག་པ། ཕྱག་རྒྱ་སྤྲོས་བཅས་ཏེ་ཚོགས་ལམ་གྱི་རྣལ་འབྱོར་བཞི་དང་། སྦྱོར་ལམ་ཚོམ་བུ་ཚོགས་ཀྱི་རྣལ་འབྱོར་རོ། །འདི་དག་ལ་སྔ་རབས་པ་རྣམས་ཆོས་བདུན་བདུན་གྱི་སྒོ་ནས་འཆད་ནའང་། གཞི་གང་དང་སྦྱར་བ་དང་། སོ་སོའི་སྤྱོད་པ་གཉིས་ནི་སྔར་བཤད་གྲུབ་ལ། ཡིད་ཆེས་པའི་ཁུངས་ནི་ཞར་ལ་འབྱུང་བའི་ཕྱིར། འདིར་རེ་རེ་ཡང་ཆོས་བཞི་བཞིས་སྟོན་ནོ། །དེ་ལ། དང་པོ་དེ་ཏིང་ལ། ཁྱད་པར་གྱི་དགོས་ཆེད། བསྒོམ་བྱའི་ངོ་བོ། ཏིང་ངེ་འཛིན་གྱི་རྣམ་གྲངས་རང་གི་འབྲས་བུའོ། །དང་པོ་ནི། སྣང་བ་ལ་རང་རྒྱུད་དུ་ཞེན་པའི་རྟོག་པ་དག་པར་བྱེད་ཅིང་ཆོས་སྐུའི་རྟོག་པ་རྒྱུ་མཐུན་དུ་བསྒྲུབ་པ་སྟེ། ལམ་རིམ་ལས། མུན་སྣང་དུག་རྩིའི་ཚུལ་བཞིན་དུ། །རྟོག་པའི་དབང་བསྒྱུར་ཏིང་འཛིན་ཡིན། །དོན་དུ་གཉེར་བ་གང་དག་ཀུན། །ཏིང་འཛིན་འདི་ཡིས་བྱེད་པར་འགྱུར། །ཞེས་སོ། །གཉིས་པ་ངོ་བོ་ནི། མི་དམིགས་པ་སྟོང་པ་ཉིད་ལ་བློ་གནས་པར་བྱེད་པ་སྟེ།
ཁོག་གཞུང་ལས། དངོས་གྲུབ་མྱུར་དུ་འགྲུབ་འདོད་ན། །ཤིན་ཏུ་མི་དམིགས་དབྱིངས་སུ་བསྒོམ། །ཞེས་སོ། །གསུམ་པ་རྣམ་གྲངས་ནི། སྣང་སྟོང་གཉིས་སུ་མེད་པའི། ལྷུན་གྱིས་གྲུབ་པའི་མཉམ་པ་ཉིད་ཀྱི་དེ་བཞིན་ཉིད་དེ། ལམ་རིམ་ལས། གཉིས་མེད་ལྷུན་མཉམ་དེ་བཞིན་ཉིད། །ཅེས་སོ། །བཞི་པ་འབྲས་བུ་ནི། དོན་དམ་མངོན་དུ་བྱེད་པས་མཚན་རྟོག་ལས་གྲོལ་བའོ། །ཞར་བྱུང་སྐབས་འཕྲོས་ཀྱི་བརྩད་སྤོང་ནི། ཁ་ཅིག །ལམ་གོང་འོག་ལ་བཟང་ངན་ཡོད་དམ་མེད་ཟེར་ན།བསྒོམ་བྱ་ཆོས་ཉིད་ལ་བཟང་ངན་མེད་མོད། འོན་ཀྱང་ལམ་པའི་སེམས་ལ་བོགས་དབྱུང་བའི་ཆ་ནས་ལམ་སྔ་མ་ལས་ཕྱི་མ་བཟང་བར་འདོད་དོ། །དེར་ཁོ་ན་རེ།དེ་མི་འཐད་དེ། རྒྱུ་ཤེས་པའི་དུས་སུ་དབྱེར་མེད་དུ་རྟོགས་ནས་འདིར་དོན་དམ་རྐྱང་པར་བསྒོམ་པའི་ཕྱིར། འབྲས་ཟན་དོར་ནས་ལོ་མའི་ཚོད་མ་ལ་སྤྱོད་པ་ལྟར་ངན་དུ་སོང་བར་གསལ་ལོ་ཟེར། ལན་དུ་ལྷ་རྗེ་ཉེ་སྟོན་ནི། ལྟ་བ་དབྱེར་མེད་རྟོགས་པའི་སྟེང་དུ་སྟོང་པ་ཆོས་ཉིད་ལ་གཅེས་པར་བྱེད་པས་ན། དེ་ཏིང་ལས་རྒྱུ་ཤེས་པ་བཟང་བའི་སྐྱོན་མེད་དོ་གསུང་། རང་ལུགས་རིམ་གྱིས་པ་དབང་བཙན་དུ་ལྟ་བ་དོན་སྤྱིར་རྟོགས་པ་དེ་ཉིད་རང་མཚན་དུ་རྟོགས་པར་བྱེད་པའི་ཐབས་ཏིང་ངེ་འཛིན་ལ་རིམ་གྱིས་ཞུགས་ནས་གོམས་པ་རྒྱུད་ལ་བརྟེན་དགོས་པའི་ཕྱིར་ཡར་ལྡན་ཡིན་པར་སྐྱོན་མེད་དོ། །གཉིས་པ་སྙིང་རྗེ་སྒྱུ་མ་ལ་ཆོས་བཞི་ལས། དང་པོ་དགོས་ཆེད་ནི། སྟོང་འཛིན་གྱི་འཆིང་བ་དགྲོལ་བ་དང་། བདེན་པ་ཕྱོགས་གཅིག་པར་མི་གཏང་ཞིང་། རྒྱ་གཅིག་པའི་རྒྱུ་དང་སེམས་ཅན་གྱི་དོན་མི་འགོག་པའི་ཕྱིར་ཏེ། ལམ་རིམ་ལས། སྟོང་པའི་མདུད་པ་གཞིག་པ་དང་། །གདུལ་བྱ་ས་ལ་འགོད་པ་དང་། །ཕྱག་རྒྱ་གཅིག་པའི་རྒྱུ་བྱ་ཞིང་། །རྣལ་འབྱོར་འདི་ཉིད་གཉེར་བ་དང་། །བདེན་པ་གཉིས་སུ་མི་གཏང་ཕྱིར། །ཞེས་སོ། །གཉིས་པ་ངོ་བོ་ནི། རང་རིག་སྒྱུ་མ་ལྟར་གསལ་བའི་སྙིང་རྗེ་བསྐྱེད་པ་སྟེ། ལམ་རིམ་ལས།རང་རིག་ཡེ་ཤེས་སྙིང་རྗེས་གཟིགས། །ཞེས་སོ། །གསུམ་པ་རྣམ་གྲངས་ནི། འཁོར་བའི་ཆོས་
ལ་ལྟོས་ནས། ལོག་རྟོག །རྟེན་འདྲེལ། དངོས་པོ་སྒྱུ་མ་གསུམ་དང་། འདས་པའི་ཆོས་ལ་ལྟོས་ནས། ཐབས། ཡེ་ཤེས་ཕྱག་རྒྱ་སྒྱུ་མ་གསུམ་དུ་ཕྱེ་བས་དྲུག་གོ། །བཞི་པ་འབྲས་བུ་ནི། ཀུན་རྫོབ་ཡེ་ཤེས་སུ་གསལ་བས་འཛིན་པ་ལས་གྲོལ་བའོ། །ཞར་བྱུང་བརྩད་སྤོང་ནི། འདིར་ཡང་ལམ་སྔ་མ་དོན་དམ་ལས་ཕྱི་མ་ཀུན་རྫོབ་ཏུ་ཁ་སྤོས་པས་ངན་དུ་སོང་བའི་ཕྱིར། ལམ་གོང་དུ་བགྲོད་པ་དོན་མེད་དུ་ཐལ་ཞེ་ན། ཀུན་རྫོབ་ཙམ་གྱི་དབང་དུ་བྱས་ན་བདེན་མོད་ཀྱི། འདིར་ལྷག་པའི་ཀུན་རྫོབ་ཀྱི་དབང་དུ་བྱས་པའི་ཕྱིར་སྐྱོན་མེད་དོ། །དེ་ལྟར་ན་ཐེག་པ་སྤྱི་ལུགས་དང་འགལ་ལོ་ཞེ་ན། མ་ཡིན་ཏེ། ཐེག་པ་སྤྱི་ལུགས་ཀྱི་སེམས་ཅན་རྣམས་བདག་ཏུ་འཛིན་པའི་དངོས་ཞེན་སྤོང་བའི་གཉེན་པོ་དོན་དམ་སྟོང་པ་ཉིད་ཡིན་པའི་ཕྱིར་བཟང་བར་བཞེད་མོད་ཀྱི། འདིར་སྟོང་ཉིད་ཕྱོགས་གཅིག་པའི་རྟེན་རྟོག་འཇིག་པར་བྱེད་པ་ལྷག་པའི་ཀུན་རྫོབ་ཡིན་པའི་ཕྱིར། དེ་བས་ཀྱང་བཟང་བ་ཉིད་དོ། །དེར་མ་ཟད། དེ་ཏིང་རྒྱུད་ལྡན་གྱི་སྟེང་དུ་ཀུན་སྣང་བསྒོམ་ནུས་པའི་ཕྱིར། ཡར་ལྡན་ཏེ། སྔ་མ་སྔ་མ་རྒྱུད་ལྡན་པས། །ཕྱི་མ་ཕྱི་མ་གསལ་བར་བྱེད། །ཅེས་གསུངས་པའི་ཕྱིར། ཡང་། སྒྱུ་མའི་ཆོས་དྲུག་ལས། ལོག་རྟོག་དང་རྟེན་འདྲེལ་སྒྱུ་མ་བསྒོམ་མམ་མི་བསྒོམ། མི་བསྒོམ་ན།སྒྱུ་མའི་ཆོས་དྲུག་བསྒོམ་པར་གསུངས་པ་དང་འགལ་ཞིང་། སྙིང་རྗེ་སྒྱུ་མའི་ཁྱབ་བྱ་མ་ཡིན་པར་ཡང་འགྱུར་རོ། །གལ་ཏེ་བསྒོམ་ན། དེས་གྲོལ་ལམ་མི་གྲོལ།མི་གྲོལ་ན་བསྒོམ་པ་དོན་མེད་དུ་འགྱུར་ལ། གྲོལ་ན་སེམས་ཅན་ཐམས་ཅད་འབད་མེད་དུ་གྲོལ་བར་འགྱུར་ཏེ། ལོག་རྟོག་དང་རྟེན་འདྲེལ་བསྒོམ་པའི་ཕྱིར་ཟེར་ན། རང་རྒྱུད་དུ་བསྒོམ་པའི་ཕྱིར་རམ། སྒྱུ་མར་བསྒོམ་པའི་ཕྱིར་ཟེར།དང་པོ་རྟགས་མ་གྲུབ་ཅིང་། གཉིས་པ་ལ་ཁྱབ་པ་མེད་དོ། །ཡང་སྔ་མ་དེ་ཏིང་བསྒོམ་པའི་སྟེང་དུ་སྙིང་རྗེ་སྒྱུ་མ་བསྒོམས་པས་རྒྱུད་གཅིག་ལ་ཏིང་ངེ་འཛིན་གཉིས་ཆར་མཚུངས་པའི་ཕྱིར། ཆུ་དང་འོ་མ་འདྲེས་པ་བཞིན་དབྱེར་མེད་དང་ཁྱད་ཅི་ཡོད་ཅེ་ན། འདིར་དེ་ཏིང་སྤངས་ཀྱང་གཙོ་བོར་ཀུན་སྣང་ལ་དམིགས་ནས་སློབ་པའི་ཕྱིར་དངོས་
ཤུགས་ཀྱིས་གོམས་པ་ལས་མངོན་གྱུར་དབྱེར་མེད་དུ་རྟོགས་པ་མེད་ཅིང་། དེ་ཙམ་གྱི་ཕྱག་རྒྱ་གཅིག་པ་དང་ཁྱད་མེད་དུ་མི་འགྱུར་ཏེ། ད་དུང་རྟོག་པ་ལྷར་མ་བསྐྱེད་པའི་ཕྱིར་གསུངས། ཡང་འདིར་ཕྱག་རྒྱ་སྒྱུ་མ་བསྒོམ་མམ་མི་བསྒོམ། བསྒོམས་ན་ཕྱག་རྒྱ་གཅིག་པ་དང་ཁྱད་མེད་དུ་ཐལ། མི་བསྒོམ་ན་སྒྱུ་མའི་ཆོས་དྲུག་བསྒོམ་པར་གསུངས་པ་དང་འགལ་ཞིང་། ལྷག་པའི་ཀུན་རྫོབ་འདིའི་འཇུག་ཡུལ་མ་ཡིན་པར་ཐལ་ཞེ་ན། ལྷར་སྣང་བ་འགག་མེད་དུ་བསྒོམ་པའི་ཕྱིར་སྐྱོན་ཕྱི་མ་མེད་ལ། ད་དུང་གཉིས་མེད་ཀྱི་ལྷ་སྐུར་བསྒོམ་མི་ནུས་པའི་ཕྱིར་ཕྱག་རྒྱ་གཅིག་པ་དང་ཁྱད་མེད་དུ་མི་འགྱུར་རོ། །གསུམ་པ་ཕྱག་རྒྱ་གཅིག་པ་ལ་ཆོས་བཞི་ལས། དང་པོ་དགོས་ཆེད་ནི། སྣང་སྟོང་ཐ་དད་དུ་ཞེན་པ་དགག་ཅིང་གཉིས་མེད་དུ་བྱ་བ་དང་། རྟོག་ཚོགས་གནས་བསྒྱུར་ཞིང་སྤྲོས་བཅས་ཀྱི་རྒྱུར་བྱ་བའི་ཆེད་དེ། ལམ་རིམ་ལས། འབྲས་བུ་ཡོངས་སུ་རྫོགས་བྱ་དང་། །སྤྲོས་པའི་རྒྱུ་ཡིས་ཐོབ་བྱ་དང་། །སྒྱུ་སྟོང་རྟོག་ཞེན་དབང་དུ་བྱ། །རྟོག་པའི་ཕུང་སོགས་གནས་བསྒྱུར་ཅིང་། །གཞན་དག་སྨིན་པར་བྱ་བའི་ཕྱིར། །ཞེས་སོ། །གཉིས་པ་ངོ་བོ་ནི། ཕྱག་རྒྱ་བཞི་ལྡན་གྱི་སྐུ་སྣང་སྟོང་དབྱེར་མེད་དུ་གསལ་བ་སྟེ།འདི་ཉིད་ལས། མཁའ་དཀྱིལ་དྭངས་པའི་དབྱིངས་ཉི་ཟླ། །ཡེ་ཤེས་རྒྱལ་པོ་སྟངས་དཔྱལ་བསྒོམ། །ཞེས་སོ། །གསུམ་པ་རྣམ་གྲངས་ལ། དོན་གྱི་རྒྱ་གཅིག་དང་། རྟགས་ཀྱི་རྒྱ་གཅིག་གོ། །དང་པོ་ནི། བདེན་པ་དབྱེར་མེད་རང་གི་མཚན་ཉིད་དུ་རྟོགས་པའོ། །གཉིས་པ་ཕྲ་རགས་གཉིས་ལས། ཕྲ་བ་ནི། ཡིག་འབྲུ་ལ་བསླབ་པ་སྟེ། རྒྱས་པ་ལས། ཕྱི་ནང་སྣོད་བཅུད་ཧཱུཾ་དུ་བསྡུ། །ཞེས་སོ། །རགས་པ་ནི། ལྷའི་སྐུ་ཕྱག་རྒྱ་གཅིག་པ་བསྒོམ་པ་སྟེ། ཞི་བ་རྒྱན་གཅིག་པ་དང་། ཁྲོ་བོ་རྒྱན་གཅིག་པའོ། །བཞི་པ་འབྲས་བུ་ནི། རྟོག་ཚོགས་སྐུ་དང་ཡེ་ཤེས་སུ་གསལ་བ་ལ་བརྟན་པ་ཐོབ་པའོ། །ཞར་བྱུང་བརྩད་སྤོང་ནི། ཕྱག་རྒྱ་གཅིག་པའི་སྐབས་སུ་ལྷག་པའི་ལྷ་དགུ་བསྒོམ་མམ་མི་བསྒོམ། མི་བསྒོམ་
ན། ལམ་རིམ་ལས། གནས་གཅིག་ཡེ་ཤེས་སེམས་དཔའ་བསྒོམ། །སྤྱི་མགྲིན་ཙིཏྟའི་གནས་གསུམ་དུ། །བྱིན་བརླབས་རྡོ་རྗེ་གསུམ་བསྒོམ་བྱ། །དབུ་ཡི་གནས་ལྔར་ཡེ་ཤེས་ལྔ། །ཡེ་ཤེས་ལྔ་དབང་པས་བརྒྱན། །ཞེས་བསྒོམ་པར་གསུངས་པ་དང་འགལ་ལ། བསྒོམས་ན་ཕྱག་རྒྱ་གཅིག་པ་མ་ཡིན་པར་འགྱུར་ཏེ། ལྷག་པའི་ལྷ་དགུ་རྩ་ལྷ་དང་བཅུ་བསྒོམ་པའི་ཕྱིར་ཟེར་ན། ལན་དུ་ལྷག་པའི་ལྷ་དགུ་བསྒོམ་མོད།འོ་ན་ཕྱག་རྒྱ་གཅིག་པ་མ་ཡིན་པར་ཐལ་ཟེར་ན། ཁྱབ་པ་མེད་དེ། ཡན་ལག་གི་ལྷ་དགུ་བསྒོམས་ཀྱང་རྩ་ལྷ་གཅིག་ལས་མི་བསྒོམ་པའི་ཕྱིར། ཤིང་གི་སྡོང་པོ་བཞིན་ནོ། །ཡང་ཆོས་གཅིག་གི་དེ་བཞིན་ཉིད་ཤེས་ན་ཆོས་ཐམས་ཅད་ཀྱི་མདོ་དང་རྒྱས་པ་ཤེས་སམ་མི་ཤེས། མི་ཤེས་ན། ཡུམ་ལས། གཟུགས་ཀྱི་དེ་བཞིན་ཉིད་ཤེས་ན་ཆོས་ཐམས་ཅད་ཀྱི་མདོ་དང་རྒྱས་པར་ཤེས་པར་འགྱུར་རོ། །ཞེས་དང་། ལམ་རིམ་ལས། རིག་ཕྱིར་ཀུན་ཀྱང་དེ་ལྟར་ཤེས། །ཞེས་པ་དང་འགལ་ལ། ཤེས་ན། རྒྱ་གཅིག་གི་ལྷ་སྐུ་སྣང་སྟོང་དབྱེར་མེད་དུ་ཤེས་པས་ལྷ་གཞན་གྱི་ཤེས་སམ་མི་ཤེས། ཕྱི་མ་ལྟར་ན་གཅིག་ཤེས་པས་ཀུན་ཤེས་པའི་དམ་བཅའ་ཉམས། དང་པོ་ལྟར་ན་སྤྲོས་བཅས་བསྒོམ་པ་དོན་མེད་དུ་ཐལ་ཞེ་ན། ལན་ནི་ལྷ་གཅིག་གི་མཚན་ཉིད་ཤེས་པས་ལྷ་ཀུན་གྱི་མཚན་ཉིད། ངེས་པའི་བློས་ཤེས་མོད། དེ་ལྟ་ནའང་སྤྲོས་བཅས་བསྒོམ་པ་དོན་མེད་དུ་མི་འགྱུར་ཏེ། མཚན་ཉིད་ངེས་པའི་བློས་ཤེས་ཀྱང་ཤེས་ཚད་ལ་གོམས་པས་མ་ཁྱབ་པའི་ཕྱིར་རོ། །དེ་བས་ན་དངོས་པོ་ངེས་པའི་བློས་བསྒོམ་དགོས་པ་ཡིན་ཏེ། དཔེར་ན་གསེར་གྱི་རང་བཞིན་དང་བཟོའི་བྱེ་བྲག་བཞིན་ནོ། །ཡང་ཕྱག་རྒྱ་གཅིག་པའི་ལྷ་སྐུ་དེ་སྣང་བར་བསྒོམ་མམ་སྣང་ལ་རང་བཞིན་མེད་པར་བསྒོམས། དང་པོ་ལྟར་ན་ཀུན་རྫོབ་དང་ཁྱད་མེད་དུ་འགྱུར་ལ། གཉིས་པ་ལྟར་ན་ལྷ་སྐུ་བསྒོམ་པའི་ཅིག་ཅར་བ་དང་ཁྱད་མེད་པར་ཐལ་ཞེ་ན། སྐྱོན་མེད་དེ། འདིར་དབྱེར་མེད་དུ་བསྒོམ་ནའང་སྔོན་དུ་ཏིང་ངེ་འཛིན་གཞན་ལ་བསླབ་པ། ཅིག་ཅར་བ་གཞན་ལ་མི་སློབ་པས་ཁྱད་པར་ཤིན་ཏུ་ཆེ་བའི་ཕྱིར་རོ། །བཞི་པ་ཕྱག་རྒྱ་སྤྲོས་བཅས་ལ་བཞི་ལས། དང་པོ་དགོས་ཆེད་ནི། ལྷ་
གཅིག་ཏུ་ཞེན་པའི་རྟོག་པ་དགྲོལ་ཞིང་། བྱེ་བྲག་གི་རྟོག་པ་བཟློག་པ་དང་། ཕྱག་རྒྱ་སྤྲོས་བཅས་ལས་སུ་རུང་བས་ཚོགས་སྒྲུབ་ཀྱི་རྒྱུར་འགྱུར་ཞིང་དངོས་གྲུབ་རྣམ་གཉིས་འགྲུབ་པར་བྱེད་པ་སྟེ། ལམ་རིམ་ལས། བསོད་ནམས་ཡོངས་སུ་རྫོགས་བྱ་ཞིང་། །སྤྱོད་ཡུལ་བྱིན་གྱིས་རློབ་པ་དང་། །འཁོར་ལོའི་ས་མཐར་ཕྱུང་བ་དང་། །ཚོགས་ལ་དུས་ཀྱི་བསྒྲུབ་ཕྱིར་བསྒོམ། །དགུག་གཏང་བཅིང་དགྲོལ་གསོད་དང་བསང་། །འཕམ་རྒྱལ་ཏིང་འཛིན་འདིས་བྱེད་ཕྱིར། །ཞེས་སོ། །གཉིས་པ་ངོ་བོ་ནི། རྟོག་ཚོགས་མཐའ་དག་རིག་པ་གཉིས་མེད་ཀྱི་ལྷའི་དཀྱིལ་འཁོར་དུ་གསལ་བར་བསྒོམ་པ་སྟེ། རིམ་དྲུག་ལས། དེ་ཕྱིར་བདེན་གཉིས་དབྱེ་བ་མེད། །ཕྱི་ནང་སྣོད་བཅུད་ཡེ་ནས་དག །ཅེས་སོ། །གསུམ་པ་རྣམ་གྲངས་ལ། ལམ་འབྲས་བུ། ཕྱག་རྒྱ་སྤྲོས་པ་དང་གསུམ་ལས། དང་པོ་ནི། རྟོག་ཚོགས་ཐམས་ཅད་ཡེ་ནས་ལྷའི་དཀྱིལ་འཁོར་དུ་གནས་པའོ། །ཕྱི་མ་ནི་འོག་མིན་ན་འཁོར་ལོ་ཚོགས་ཆེན་གྱི་སངས་རྒྱས་དུ་མ་སྙེད་བཞུགས་པ་དེའོ། །ལམ་ཕྱག་རྒྱ་སྤྲོས་པ་ལ། ཞི་བ་དང་། ཁྲོ་བོ་གཉིས། དེ་གཉིས་ཀ་ལ་དཀྱིལ་འཁོར་སྤྲོས་པ། ཚོམ་བུ་སྤྲོས་པ། ཞལ་ཕྱག་སྤྲོས་པ། རྣམ་གྲངས་སྤྲོས་པ་བཞི་ལས།དང་པོ་ལ། རྒྱས་འབྲིང་བསྡུས་གསུམ་མོ། །གཉིས་པ་ལ། གཅིག་གསུམ་ལྔ་པའོ། །གསུམ་པ་ལ། ཞལ་གཅིག་ཕྱག་གཉིས་པ་དང་། ཞལ་གསུམ་ཕྱག་དྲུག་པ། ཁྱད་པར་ཁྲོ་བོ་ལ་དབུ་དགུ་ཕྱག་བཅོ་བརྒྱད་པ་ནས། དབུ་ཕྱག་གྲངས་མེད་པའི་བར་རོ། །བཞི་པ་ནི། ཞི་བ་ལ་སངས་རྒྱས་སྟོང་དང་། ཉི་ཁྲི་བཞི་སྟོང་དང་། བསམ་ཡས་ལྷུན་གྲུབ་གསུམ། ཁྲོ་བོ་ལ་སྟོང་བཞི་བརྒྱ་ལྔ་བཅུ་དང་།བདུན་ཁྲི་དྲུག་སྟོང་བརྒྱད་བརྒྱ་ལྔ་བཅུ་བསམ་ཡས་ལྷུན་གྲུབ་གསུམ་མོ། །བཞི་པ་འབྲས་བུ་ནི། སྣང་བ་ཕྱག་རྒྱར་གསལ་བ་ལ་བརྟན་པ་རྒྱ་ཆེར་ཐོབ་པའོ། །ཞར་བྱུང་བརྩད་སྤོང་ནི། ལྷ་བཞི་བཅུ་རྩ་གཉིས་བསྒོམ་པ་དཀྱིལ་འཁོར་སྤྲོས་པ་ཡིན་ན། དེ་ཏིང་ཡང་སྤྲོས་བཅས་སུ་
ཐལ། དེར་དབང་རབ་སོགས་གཞན་དོན་གྱི་ཕྲིན་ལས་སུ་དེ་ལྟར་བསྒོམ་པའི་ཕྱིར་ཏེ། སྤྲོས་པའི་འཁོར་ལོ་མོས་བསྒོམ་ཞིང་། །ཞེས་གསུངས་པའི་ཕྱིར་ཟེར་ན། མོས་པ་ཙམ་དུ་བསྒོམ་ཡང་དངོས་སུ་བསྒོམ་མི་ནུས་པའི་ཕྱིར། དེ་ཏིང་སྤྲོས་བཅས་སུ་ཐལ་བའི་སྐྱོན་མེད་དོ། །ཁོ་ན་རེ། དེ་ལྟར་ན། དཀྱིལ་འཁོར་ཚོམ་བུ་རྣམ་གྲངས་ཞལ་ཕྱག་སྤྲོས་པ་ཐམས་ཅད་འདིར་དངོས་སུ་བསྒོམ་ནུས་དགོས་པར་ཐལ། འདོད་ན། རིག་འཛིན་གསུམ་ལས་སྤྲོས་བཅས་བཟང་བར་འགྱུར་ཏེ། འདིར་དངོས་སུ་སྤྲོས་བཅས་བསྒོམ་ནུས་པའི་ཕྱིར་ཞེ་ན། སྐྱོན་མེད་དེ། འདིར་སྤྲོས་པའི་སྐབས་དངོས་སུ་གསལ་བ་བཞི་བཅུ་རྩ་གཉིས་ཡིན་པ་ལ་བསམ་ནས་དེ་སྐད་བརྗོད་ཀྱི། གཞན་རྣམས་ནི་འདིར་མོས་པའི་ཡུལ་དུ་བསྒོམས་ལ། དེ་ནས་ལམ་གོང་མ་རྣམས་སུ་རིམ་གྱིས་མངོན་དུ་གྱུར་ནས་མཐར་ལམ་དུ་བསམ་ཡས་ལྷུན་གྲུབ་དངོས་སུ་གསལ་ཞིང་། ཞལ་ཕྱག་སྤྲོས་པའི་རིམ་པའང་དེ་བཞིན་ཏེ། ལམ་རིམ་ལས། རིམ་བརྗོད་བརྟན་པའི་སྤྱོད་ཡུལ་ནི། །ཉི་ཤུ་གཅིག་དང་དགུ་བརྒྱ་དང་། །གྲངས་མེད་མཐར་ལམ་རིམ་པར་བསྒོམ། །ཞེས་སོ། །ལྔ་པ་བར་ཆད་མེད་པའི་ལམ་དུ་ཚོགས་བསྒྲུབ་ལ་ཆོས་བཞི་ལས།དང་པོ་དགོས་ཆེད་ནི། རྟེན་འདིས་ལམ་གཞན་གྱིས་བར་མ་ཆོད་པར་ཟག་མེད་ཀྱི་བདེན་པ་ཆོས་ཉིད་རང་མཚན་མཐོང་བ་ལ་དངོས་སུ་སྦྱོར་བར་བྱེད་པ་སྟེ། འདི་ཉིད་ལས། རྣལ་འབྱོར་ཚོགས་པའི་དཀྱིལ་འཁོར་གྱིས། །ངེས་པར་ལེགས་པའི་དགོས་པ་འགྲུབ། །ཅེས་དང་། ལམ་རིམ་ལས། བར་ཆད་མེད་པར་སྦྱོར་བ་ཡི། །སྒྲུབ་པ་དུས་ཀྱི་ཚོགས་བཤད་བྱ། །ཞེས་སོ། །གཉིས་པ་ངོ་བོ་ནི།རྟོག་ཚོགས་ཐམས་ཅད་སྣང་སྟོང་གཉིས་མེད་ལྷའི་དཀྱིལ་འཁོར་དུ་དངོས་སུ་གསལ་བ་ལ་བློ་གནས་པའོ། །དེ་ལྟར་ན་སྤྲོས་བཅས་དང་ཁྱད་མེད་པར་འགྱུར་རོ་ཞེ་ན།སྤྲོས་བཅས་ནི་གསལ་ཞིང་ཉེ་བ་ཙམ་ཡིན་ལ། འདིར་ནི་ཤིན་ཏུ་གསལ་བརྟན་དུ་གྱུར་ཞིང་ཉེ་བ་ཡིན་ཏེ། འདི་ཉིད་ལས། སྒྱུ་འཕྲུལ་དྲ་བས་མངོན་རྫོགས་པའི། །
དཀྱིལ་འཁོར་བརྟན་པའི་ཏིང་ངེ་འཛིན། །ཞེས་དང་། རིམ་དྲུག་ལས། དེ་ཡང་མཐུ་དང་ནུས་པ་ཡི། །ལྟ་སྤྱོད་འདྲེལ་པས་བརྟན་པ་ཡིན། །ཞེས་གསུངས་པའི་ཕྱིར། གསུམ་པ་རྣམ་གྲངས་ལ། ཞི་བ་དང་། ཁྲོ་བོའི་ཚོགས་སྒྲུབ་གཉིས། དེ་གཉིས་ཀའང་ཉམས་སུ་ལེན་པའི་དུས་སུ། ཕུན་སུམ་ཚོགས་པ་ལྔས་གཞི་བཟུང་། བསྙེན་བསྒྲུབ་བཞིས་གཞུང་བསྲང་། རིག་འཛིན་འགྲུབ་པའི་དུས་གསུམ་དུ་འཆིང་སྟེ་སྔར་བཤད་གྲུབ་པོ། །བཞི་པ་འབྲས་བུ་ནི། ཟག་མེད་ལ་དངོས་སུ་སྦྱོར་ནུས་པའོ། །ཞར་བྱུང་ངེས་ཚིག་ལ་དོགས་པ་བཅད་པ་ནི། བར་ཆད་མེད་པའི་ལམ། ཞེས་པའི་དོན་ལ། ལྷ་རྗེ་མདའ་ཏིག །ཟག་བཅས་ནས་ཟག་མེད་དུ་སྦྱོར་བ་ལ་རྟེན་དང་ལམ་གཞན་གྱིས་བར་མ་ཆོད་པའི་ཕྱིར་གསུང་། ལྷ་རྗེ་གླན། ལམ་གཞན་གྱིས་བར་མ་ཆོད་པ་ཕལ་ཆེ་བ་ལ་དགོངས་གསུང་། བླ་མ་བདེ་གཤེགས་ཆེན་པོ་ནི། སྤྲོས་པ་མན་ཆོད་དམ་ཚིག་ཉམས་པའི་ཉེས་པས་འཁོར་བར་ལྡོག་ཉན་ཡོད་ལ། ཚོགས་བསྒྲུབ་ཡན་ཆོད་ལ་དེའི་བར་ཆད་མེད་པས་སྤྱི་སྒྲ་བྱེ་བྲག་ལ་ཞུགས་ཏེ་ཚོགས་བསྒྲུབ་ལ་བཏགས་གསུང་། རང་ལུགས་མདའ་ལྟར་འཐད་དེ། ཚོགས་བསྒྲུབ་ནས་ཟག་མེད་ལ་རྟེན་སྐྱེ་བ་གཞན་དང་ལམ་བགྲོད་བྱ་གཞན་གྱིས་བར་མ་ཆོད་པར་སྦྱོར་བའི་ཕྱིར་ཏེ། བར་ཆད་མེད་པར་སྦྱོར་བ་ཡི། །ཞེས་གསུངས་པས་སོ། །ཡང་། ཚོགས་སྦྱོར་གྱི་ལམ་ལྔའི་འབྲས་བུ་ལ་ལོག་རྟོག་བསལ་བ་ནི། དེ་ཏིང་གི་སྐབས་སུ། ལམ་རིམ་ལས། སྣང་སྟོང་དབྱེར་མེད་རྣལ་འབྱོར་མཐའ། །མངོན་བྱས་ལྷག་པའི་ཆོས་སྐུར་སྦྱོར། །ཞེས་པས་ཆོས་སྐུ་དང་། སྙིང་རྗེ་སྒྱུ་མའི་སྐབས་སུ། ལམ་འདིར་ཆ་རྐྱེན་རྫོགས་བསྒྲུབས་ན། །མཚན་དང་དཔེ་བྱད་ཀུན་དང་ལྡན། །དབང་ཕྱུག་ཆེན་པོའི་གནས་ཉིད་དུ། །མངོན་དུ་འབྱུང་བར་ཐེ་ཚོམ་མེད། །ཅེས་པས་ལོངས་སྐུ་དང་། ཕྱག་རྒྱ་གཅིག་སྤྲོས་ཚོགས་བསྒྲུབ་གསུམ་གྱི་སྐབས་སུ། འདི་ཉིད་ལས། རྣལ་འབྱོར་ལས་སུ་རུང་རྣམས་ཀྱིས། །
ཕྱག་རྒྱ་ཆེན་པོ་རྫོགས་འགྱུར་ཞིང་། །གསལ་ལ་ཡང་གཉིས་མེད་པས་ན། །དཀྱིལ་འཁོར་ཆེན་པོ་འབར་བར་འགྱུར། །ཞེས་པས་སྤྲུལ་སྐུ་སྟེ། ངེས་པར་ཏིང་ངེ་འཛིན་དེ་དང་དེས་སྐུ་གསུམ་སོ་སོར་དངོས་སུ་འཐོབ་ཟེར་བ་མི་འཐད་དེ། དེ་ཏིང་གིས་ཆོས་སྐུ་འཐོབ་ན་སྙིང་རྗེ་སྒྱུ་མ་མན་ཆད་བསྒོམ་པ་དོན་མེད་དུ་འགྱུར་ཞིང་། ལམ་རིམ་ལས་ཀྱང་། ཕྱོགས་མཐུན་བརྗོད་ཀྱིས་རིགས་མ་ཡིན། །ཞེས་པ་དང་ཡང་འགལ་ལོ། །དེས་ན་འདི་དག་ཆོས་མཐུན་བརྩིས་པའམ་སྐུ་གསུམ་གྱི་བརྒྱུད་རྒྱུ་ཙམ་དུ་ཁས་བླང་བར་བྱའོ།། །།གསུམ་པ་ལམ་གྱུར་གྱི་འབྲས་བུའམ་ཟག་མེད་ཀྱི་ལམ་ལ། དབྱེ་བ་དང་།དེ་གཏན་ལ་དབབ་པའོ། །དང་པོ་ལ། མཐོང་ལམ། བསྒོམ་ལམ། མཐར་ལམ་རིག་འཛིན་ནོ། །མཐོང་ལམ་ལ་ཡང་ནང་གསེས་ཀྱིས་དབྱེ་ན་གཉིས་སུ་འགྱུར་ཏེ། ལྷག་མེད་མྱང་འདས་རྣམ་སྨིན་དང་། ལྷག་བཅས་མྱང་འདས་ཚེ་དབང་གཉིས་སུ་ངེས་པའི་ཕྱིར། དེ་ལྟར་ཡང་རྡོ་རྗེ་ལས། གསང་བའི་ཡོ་བྱད་ལྔར་ལྡན་པས། །བརྩོན་པས་ཚུལ་བཞིན་རབ་བསྒྲུབས་ན། །རྡོ་རྗེའི་ལུས་དང་རྣམ་སྨིན་དུ། །ཞེས་དང་། ལམ་རིམ་ལས། དུས་ཚོགས་བར་ཆད་མེད་པ་ནས། །ལྷག་མ་མེད་དང་ཡོད་པ་ཡི། །མྱ་ངན་འདས་པས་མཐར་སྦྱོར་བ། །ཐུན་མོང་ལྟ་བུར་ཟུང་དུ་འགྱུར། །ཞེས་རིག་འཛིན་དེ་གཉིས་མཐོང་ལམ་དུ་ཁད་མཉམ་པར་བཤད་དོ། །དེའི་ཕྱིར། ན་རག་བསྐང་བཤགས་ལས། རྣམ་སྨིན་ཚེ་དབང་ཕྱག་རྒྱ་ལྷུན་གྱིས་གྲུབ། །ཅེས་པ་ལྟར་རིག་འཛིན་བཞིའོ། །གཉིས་པ་ལ། རྣམ་སྨིན་རིག་འཛིན། ཚེ་དབང་རིག་འཛིན། བསྒོམ་ལམ་ཕྱག་རྒྱ་ཆེན་པོའི་རིག་འཛིན། མཐར་ལམ་ལྷུན་གྲུབ་རིག་འཛིན་བཤད་པའོ། །འདི་དག་ལ་ཆོས་བདུན་བདུན་གྱི་སྒོ་ནས་འཆང་བའི་བཀའ་སྲོལ་ཡོད་ནའང་། བཞི་གའི་སྤྱོད་པ་མཐུན་པར་རྫུ་འཕྲུལ་གྱི་སྤྱོད་པ་སྟེ། སོ་སོའི་ཁྱད་པར་སྔར་རྒྱུད་ཀྱི་དངོས་པོའི་སྤྱོད་པ་འཆད་པའི་སྐབས་སུ་བཤད་གྲུབ་པས། འདིར་ཆོས་དྲུག་དྲུག་གི་སྒོ་ནས་འཆད་པར་བྱའོ། །དེ་ཡང་དང་པོ་རྣམ་སྨིན་ལ། གང་གི་ཚེ་ཐོབ་པའི་རྒྱུ་དུས། གང་གི་རིག་
འཛིན་རང་གི་ངོ་བོ། ཇི་སྙེད་བསྟན་པའི་རྣམ་གྲངས། ཇི་ལྟར་བཞུགས་པའི་ཆ་ལུགས། མངོན་པར་ཤེས་པའི་ཡུལ་དོན། འབྲས་བུ་ལ་ཇི་ལྟར་སྦྱོར་ཚུལ་ལོ། །དང་པོ་ཐོབ་པའི་རྒྱུ་དུས་ནི། གཅིག་སྤྲོས་ཀྱི་ཏིང་ངེ་འཛིན་ལ་བརྟན་པ་ཐོབ་པས་རབ་ཟླ་བ་དྲུག་དང་། མཐའ་ནའང་ཟླ་བ་བཅུ་དྲུག་གི་བར་དུ་ཚོགས་བསྒྲུབས་པས་ལྷག་མེད་ཀྱི་མྱང་འདས་ལ་སྦྱར་བ་སྟེ། ལམ་རིམ་ལས།གཅིག་དང་དུ་མའི་རྣལ་འབྱོར་ལ། །བརྟན་བྱས་ཉིད་པའམ་དེ་ཐོབ་ནས། །ཟླ་དྲུག་བཅུ་དྲུག་བསྙེན་བསྒྲུབ་ཚེ། །རྡོ་རྗེའི་ལུས་སུ་མ་གྱུར་པར། །ཞེས་སོ། །གཉིས་པ་རང་གི་ངོ་བོ་ནི། མཚན་ཉིད་གསུམ་ལྡན་ཏེ། ཡིད་ལྷའི་སྐུར་གསལ་ཞིང་རྫོགས་པར་སྨིན་པ། ལུས་རྣམ་སྨིན་ཤ་ཁྲག་གི་ཕུང་པོ་དང་མ་བྲལ་བ།ལུས་རྒྱ་དང་བྲལ་མ་ཐག་ཏུ་ཕྱག་རྒྱ་ཆེན་པོའི་རིག་འཛིན་ལ་སྦྱོར་བ་སྟེ། ཆོས་ཉིད་ཀྱི་བདེན་པ་མཐོང་ཡང་བློ་ཆུང་བའི་སྟོབས་ཀྱིས་འབྱུང་བ་སྙིགས་མའི་ལུས་ཡེ་ཤེས་ཀྱི་མེས་སྦྱོང་བར་མ་ནུས་པའོ། །དེ་ཡང་ལམ་རིམ་ལས། ཡིད་ཀྱི་ལྷ་ཡི་གཟུགས་བཟུང་ཞིང་། །ལུས་ཀྱི་རྒྱ་མདུད་གྲོལ་གྱུར་ནས། །ཕྱག་རྒྱའི་སྐུ་ཉིད་གསལ་གྱུར་པ། །རྣམ་པར་སྨིན་ཞེས་དེ་ལ་བརྗོད། །ཅེས་སོ། །གསུམ་པ་རྣམ་གྲངས་ནི། རྣམ་སྨིན་གྱི་ལུས་འདི་རྒྱ་ཆེན་གྱི་སར་མི་འཁྱེར་བས་ན་ལྷག་མེད་མྱང་འདས་དང་། འབྱུང་བའི་ལུས་མེད་པར་དང་། ལས་ཀྱི་ལུས་མེད་པ་ཞེས་བྱ། རང་དོན་དུ་སྲིད་པའི་མངལ་ཕྱི་མ་མི་ལེན་པས་སྲིད་པ་ཐ་མ་པ་ཞེས་ཀྱང་བྱ། ཡིད་ལྷའི་སྐུར་རྣམ་པར་སྨིན་པའམ་རྣམ་སྨིན་གྱི་ལུས་མ་དོར་བས་རྣམ་སྨིན་རིག་འཛིན་ཞེས་ཀྱང་བྱ་སྟེ། དེ་ལས། ལྷག་མེད་འབྱུང་མེད་ལས་ལུས་མེད། །མྱ་ངན་འདས་པའམ་སྨིན་ཆས་བརྗོད། །ཅེས་སོ། །བཞི་པ་ཆ་ལུགས་ནི། ལུས་སྔོན་གང་ཡིན་དང་ཡིད་རྩ་བའི་ལྷ་གང་ཡིན་གྱི་ཆ་ལུགས་འཛིན་པ་སྟེ། ཡིད་ཀྱི་ལྷ་ཡི་གཟུགས་བཟུང་ཞིང་། །ཞེས་སོ། །ལྔ་པ་མངོན་ཤེས་ཀྱི་ཡུལ་དོན་ནི། བར་ཆད་མེད་པ་ལས་ངོ་བོ་གསལ་བརྟན་གྱི་ཁྱད་པར་དུ་བྱས་པའི་
ཟག་མེད་ལྷའི་སྤྱན་རྣམ་པར་དག་པ་ལ་སོགས་པས་གླིང་བཞི་པའི་འཇིག་རྟེན་ཙམ་ཡུལ་དུ་གྱུར་ཅིང་། དེ་དག་གི་དོན་བྱེད་ནུས་པ་སྟེ། དེ་ལས། བར་ཆད་མེད་པའམ་སྨིན་པ་ཡི། །མངོན་པར་ཤེས་པ་དེ་མིང་ཅན། །མི་འགྱུར་བས་བར་འགྱུར་བའང་། །དཔག་ཚད་གླིང་ཁམས་ཡུལ་ལ་སྦྱོར། །ཞེས་སོ། །དྲུག་པ་འབྲས་བུ་ནི། རྣམ་སྨིན་གྱི་ལུས་རྒྱ་དང་བྲལ་མ་ཐག་ཏུ་ཕྱག་ཆེན་འོད་ཀྱི་ལུས་ལ་སྦྱོར་བ་སྟེ། དེ་ལས། གང་དེ་བྲལ་མ་ཐག་པ་རུ། །རྒྱ་བཞི་རྫོགས་པར་བདག་གྱུར་པ། །རྡོ་རྗེ་ལྔ་སོགས་རིག་པ་འཛིན། །ཕྱག་རྒྱ་ཆེན་པོའི་རིགས་འབྲས་བུ། །ཞེས་སོ། །ཞར་བྱུང་འཕྲོས་དོན་དོགས་པ་བཅད་པ་ལ། ཐོབ་དུས་དང་། ངོ་བོ་ལ་དཔྱད་པའོ། །དང་པོ་ནི། རྣམ་སྨིན་ལ་སྦྱོར་བའི་དུས་ལས། ལམ་རིམ་ལས། དེ་དེའང་འདི་དང་ཕྱི་མ་དང་། །ལན་གྲངས་གཞན་དུ་རབ་འབྲིང་གིས། །ཐོབ་ཀྱི་བསྐལ་པར་མི་འགྱངས་ཏེ། །དགོངས་སྤྱོད་བརྩོན་པ་གཙོ་ཕྱིར་རོ། །ཞེས་པ་ལ་གསུམ་སྟེ། རབ་ཚེ་འདི།འབྲིང་བར་དོར། ཐ་མ་ལན་གྲངས་གཞན་ལ་སྦྱོར་ཟེར་བ་ལ། ཁ་ཅིག་ན་རེ།དེ་ལྟར་ན། བར་དོ་ལ་འབྱུང་ལུས་རགས་པ་ཡོད་པར་ཐལ། རྟེན་དེ་ལ་རྣམ་སྨིན་ཐོབ་པ་གང་ཞིག །རྣམ་སྨིན་ནི་ཚེ་སྔ་མའི་ལས་ཀྱི་རྣམ་སྨིན་ལས་གྲུབ་པའི་ལྷག་མའི་ལུས་འདི་དང་མ་བྲལ་བ་ལ་ཟེར་བའི་ཕྱིར། ཞེ་ན། ཉང་ཇོ་མདོ་ན་རེ། བར་དོ་ལ་ཐོབ་པའི་རྣམ་སྨིན་དེ་ལུས་ཀྱི་བག་ཆགས་ཀྱི་ཚུལ་དུ་ཡོད་གསུངས་ཀྱང་། བག་ཆགས་ཀྱི་ཡིད་ལུས་རྣམ་སྨིན་ཤ་ཁྲག་གི་ལུས་མ་ཡིན་པའི་ཕྱིར་ངེས་ཚིག་ཉམས་སོ། །བླ་མ་བདེ་གཤེགས་ཆེན་པོ་ནི། ཚེ་འདིར་ཚོགས་བསྒྲུབས་ཀྱང་རྣམ་སྨིན་མ་ཐོབ་པས། རང་ལུས་དང་བྲལ་མ་ཐག་ཏུ་འཆི་ཁའི་འོད་གསལ་ལ་བརྟེན་ནས་བདེན་པ་མཐོང་སྟེ་རྣམ་སྨིན་འཐོབ། འབྲིང་དེ་ངོ་མ་ཤེས་པས་བར་དོ་དངོས་ཀྱི་སྣང་བ་ཤར་བའི་དུས་སུ་སྤྱོད་ཡུལ་སྒྱུ་མར་མཐོང་བ་ལ་བརྟེན་ནས་ཐོབ། ཐ་མ་ནི་བར་དོའི་སྣང་བ་ནུབ་སྟེ་ལུས་ལེན་པར་བདེན་པ་མཐོང་བས་རྣམ་སྨིན་གྱི་ལུས་སུ་འགྱུར་ནས་དགོངས་པ་ལྷའི་སྐུར་གསལ་བའོ། །དེ་ལས་དང་པོ་གཉིས་ལ་འབྱུང་ལུས་
རགས་པ་མེད་པས་རྣམ་སྨིན་བཏགས་པ་བ་སྟེ། བདེན་པ་མཐོང་བའི་ཆ་ནས་འཇོག འོ་ན་ཚེ་དབང་དང་འདྲ་མོད་ཟེར་ན། མི་འདྲ་སྟེ། དེ་ནི་འབྱུང་བ་དྭངས་མའི་ལུས་སུ་ཡོད་ལ། འདི་ནི་བག་ཆགས་ཀྱི་ལུས་སོ། །རྒྱ་ཆེན་དང་ཁྱད་ཡོད་དམ་ཞེ་ན། ཡོད་དེ། དེ་ནི་ལྷའི་སྐུའི་ཆ་ལུགས་སུ་ཡོད་པའི་ཕྱིར་གསུངས། རང་ལུགས་ནི། སྔ་རབས་པ་སྤྱིའི་རྗེས་སུ་འབྲངས་ཏེ། རྣམ་སྨིན་ཚེ་འདི་ལ་མ་ཐོབ་ན། འབྲིང་སྐྱེ་བ་ཕྱི་མ་དང་། ཐ་མ་སྐྱེ་བའི་ལན་གྲངས་བརྒྱུད་པའི་རྣམ་སྨིན་གྱི་ལུས་གཞན་དུ་ཐོབ་པར་བཞེད་པའི་ལུང་ཡིན་གྱི། བར་དོར་ཐོབ་པར་འདོད་པ་ནི་མི་རིགས་ཏེ། རྣམ་སྨིན་གྱི་ཆོས་མ་ཚང་པའི་ཕྱིར་དང་། ཚོགས་སྒྲུབ་ནས་ཟག་མེད་དུ་སྦྱོར་བ་ལ་རྣམ་སྨིན་མཚན་ཉིད་པ་ལས་བློ་ཆུང་བ་མ་བཤད་པའི་ཕྱིར་དང་། འདི་ཉིད་རྒྱ་ཆེན་ལ་སྦྱོར་བའི་སྲིད་པ་ཐ་མ་བ་ཡིན་པའི་ཕྱིར་རོ། །དང་པོ་གྲུབ་སྟེ། ལམ་རིམ་ལས། ལྷ་ཡི་རྣལ་འབྱོར་གསལ་རྫོགས་སྨིན། །ལུས་ཀྱི་དྲ་བས་བསྒྲིབས་གྱུར་པ། །ཀ་ལ་པིངྈ་མི་འཇིགས་བཞིན། །བྲལ་ནས་སྣང་བྱེད་དེ་རྣམ་སྨིན། །གཉིས་པ་གྲུབ་སྟེ། ལམ་ཆུང་ལས། སྟོབས་ཆུང་རྐྱེན་སྨོན་ཞན་པའི་ཕྱིར། །རྣམ་རྟོག་འབྱུང་བའི་ལྷག་ལུས་བཞག །ཞེས་སོ། །གསུམ་པ་གྲུབ་སྟེ། ལམ་རིམ་ལས། རྒྱ་མིག་རྒྱ་ས་ཇི་ལྟ་བུར། །ཕྱག་རྒྱ་ཐོབ་ལ་མ་རིག་པའི། །གཟུགས་རྫོགས་སྟོབས་ཆེན་དེ་ཁོ་ནའོ། །ཞེས་དང་། གང་དེ་བྲལ་མ་ཐག་པ་རུ། །རྒྱ་བཞི་རྫོགས་པར་བདག་གྱུར་པ། །ཞེས་སོ། །གཉིས་པ་ངོ་བོ་ལ་དོགས་པ་དཔྱད་པ་ནི། སྔ་རབས་པ་ཁ་ཅིག་ན་རེ། རྣམ་སྨིན་གྱི་ངོ་བོ་ལུས་འདི་དང་བྲལ་ནས། ཕྱག་ཆེན་དུ་འགྲོ་བའི་སྐབས་ཀྱི་སྐད་ཅིག་མ་དེ་ལ་འཇོག་ཟེར། དེ་ལ་རྗེ་དྲི་ངས་པའི་ཞལ་ནས། དེ་མི་འཐད་དེ། སྐྱོན་གཉིས་གནས་པའི་ཕྱིར། དང་པོ་ནི། རྣམ་སྨིན་དེས་གཞན་དོན་བྱེད་དམ་མི་བྱེད།མི་བྱེད་ན། མི་འདོར་འགོད་པ་གཞན་གྱིའོ། །ཞེས་པ་དང་འགལ། བྱེད་ན། སྐད་ཅིག་གིས་གཞན་དོན་རྫོགས་པས་སངས་རྒྱས་དང་ཁྱད་པར་མེད་པར་ཐལ་ལོ། །
སྐྱོན་གཉིས་པ་ནི། སྐད་ཅིག་ལས་ཕྱག་རྒྱ་ཆེན་པོ་ལ་སྦྱོར་བའི་ཕྱིར། རྣམ་སྨིན་དེ་ཚེ་དབང་ལས་བཟང་བར་ཐལ་ལོ་གསུངས། གཉིས་པ་ཚེ་དབང་རིག་འཛིན་ལ་ཆོས་དྲུག་ལས། དང་པོ་ཐོབ་པའི་རྒྱུ་དུས་ནི། ཤེས་རབ་གསུམ་གྱིས་ལྟ་བ་དང་ཏིང་ངེ་འཛིན་ལ་རྟོགས་གོམས་ཁྱད་པར་དུ་གྱུར་པའི་བློ་ཆེན་གྱིས་ཚོགས་བསྒྲུབ་ཟླ་དྲུག་གམ་ཐ་ནའང་ཟླ་བ་བཅུ་དྲུག་ལས་མི་འགྱངས་པར་ལྷག་བཅས་ཚེ་དབང་ལ་སྦྱོར་ཏེ། ལམ་རིམ་ལས། ཤེས་རབ་རྣམ་གསུམ་གོམས་བྱས་པས། །ཏིང་འཛིན་མཉམ་པའི་དོན་རྟོགས་ཏེ། །ཀུན་ཏུ་ཡངས་པ་ཆེན་པོར་བསྒོམ། །ཤེས་འཇུག་ལྔ་རྟོགས་གོམས་པས་ནི། །ཟླ་ཞག་རྒྱུད་བཞིན་བསྒྲུབ་བྱེད་པས། །རྡོ་རྗེའི་ལུས་སུ་ཐེ་ཚོམ་མེད། །ཅེས་སོ། །གཉིས་པ་རང་གི་ངོ་བོ་ནི། ཆོས་ཉིད་རང་མཚན་གསལ་བའི་ངོ་བོར་བསྐྱེད་དུ་བྱར་མེད་པར་མཐོང་ཞིང་ཟག་པ་ཀུན་ཟད་དེ་སྐྱེ་འཇིག་མེད་པ་རྡོ་རྗེའི་ལུས་སུ་གྱུར་པའོ། །དེ་ཡང་སྔ་མ་ལས། དོན་མཐོང་འཇུག་པ་མཐར་ཕྱིན་པའི། །ཚོགས་སྤྱོད་བསྒྲུབས་པའི་དངོས་གྲུབ་ཀྱིས། །ལུས་ཁམས་སྐྱེ་གནས་ཟག་པ་ཟད། །རྡོ་རྗེའི་ལུས་གྱུར་ཚེ་ཡི་རིག །ཅེས་སོ། །འཕྲོས་དོན་ཚེ་ཚད་ནི། བདག་དོན་དུ་ལམ་སྦྱང་བའི་ཕྱིར་ལོ་སྟོང་དྲུག་བརྒྱའི་བར་དུ་གནས་ཤིང་། གཞན་དོན་དུ་ཚེ་ལ་རང་དབང་ཐོབ་པས་ཇི་ལྟར་འདོད་བཞིན་དུ་ཕྱིར་བསྣུར་ནས་བགྲེས་རྒུད་མེད་པར་བཞུགས་པ་སློབ་དཔོན་ཆེན་པོ་པདྨ་བཞིན་ཏེ། དེ་ལས། བདག་ཕྱིར་དོན་དུ་གཉེར་བས་ནི། །བརྒྱ་ཕྲག་བཅུ་དྲུག་ཚེ་ཡིས་རྫོགས། །གཞན་དུ་རང་དབང་ཐོབ་པའི་ཕྱིར། །བསྐལ་པ་གྲངས་མེད་གནས་འགྱུར་ཡང་། །སྐུ་ནི་ཤིན་ཏུ་གཞོན་ནུའི་ཚུལ། །འདུལ་བའི་ཚུལ་གྱིས་འཕོ་འདུ་བྱེད། །ཅེས་སོ། །གསུམ་པ་རྣམ་གྲངས་ནི། སྨན་གྱི་བཅུད་ལེན་ལ་བརྟེན་ནས་གྲུབ་པའི་དང་། ཐིག་ལེ་དབབ་བཟུང་སོགས་སྦྱོར་བའི་ཐབས་ལ་བརྟེན་ནས་གྲུབ་པའི་དང་། སྒྲོལ་མ་རླུང་གི་སྦྱོར་བ་ལ་བརྟེན་ནས་གྲུབ་པའི་དང་། ལམ་མཆོག་ཡོངས་སུ་རྫོགས་པའི་ཚེ་དབང་དང་བཞི་སྟེ། དེ་ལས། ངོ་
བོ་ཐབས་དང་སྨན་རིག་འཛིན། །རྣལ་འབྱོར་སྒྲོལ་མའི་རིག་འཛིན་དང་། །ལམ་མཆོག་རྫོགས་པའི་རིམ་པ་བཞི། །ཞེས་སོ། །དེ་ཡང་དང་པོ་གསུམ་རྟོགས་གོམས་ཀྱི་མཐུ་མེད་པས་རྫས་དང་ཐབས་རྐྱང་པ་ལ་བརྟེན་པའི་ཕྱིར་ཚེ་ལ་དབང་བར་འདྲ་ནའང་ཟག་བཅས་དང་། ཕྱི་མ་ནི་ཟག་མེད་དོ། །བཞི་པ་ཆ་ལུགས་ནི། མི་དང་འདོད་གཟུགས་ཀྱི་ལྷའི་གཙོ་བོའི་ཆ་བྱད་དུ་སྟོན་ཏེ། དེ་ལས། ལྷ་མིའི་རྒྱལ་པོའི་སྐྱེ་བ་འཛིན། །ཞེས་སོ། །དེ་ལྟ་ནའང་ལྷ་མི་གཞན་དང་ཁྱད་པར་ཆེ་སྟེ། སྐྱེ་བ་རང་དབང་ཅན་ཡིན་པའི་ཕྱིར། དེའང་སྔ་མའི་འཕྲོས་ལས། མི་དང་ལྷ་དང་ཚངས་པ་ཡི། །སྐྱེ་བ་རྣམ་དག་འཛིན་མོད་ཀྱང་། །ཁྱད་པར་ས་ལ་གནས་འགྱུར་ཡིན། །ཆ་བྱད་དེ་ཉིད་ཀྱིས་ཆོས་སྟོན། །ཞེས་སོ། །དེ་དག་ཀྱང་སྤྲུལ་པའི་ཆ་ལུགས་ཡིན་ལ། རང་གི་ངོ་བོ་ནི། ད་ལྟའི་ལུས་འདི་རྡོ་རྗེའི་ལུས་སུ་ཁྱེར་བས་ཚེ་གཅིག་གི་འབྲས་བུ་ཡིན་པའི་ཕྱིར་སྔོན་གང་ཡིན་པའི་རྣམ་པ་ཅན་ནོ། །ལྔ་པ་མངོན་ཤེས་ཀྱི་ཡུལ་དང་ནི། སྤྱིའི་མངོན་ཤེས་དྲུག་དང་། བྱེ་བྲག་དུ་སྒོ་ལྔའི་དབང་ཤེས་ཉི་ཤུ་རྩ་ལྔས་གླིང་བཞི་བྱེ་བ་ཕྲག་བརྒྱ་པའི་ཞིང་ཁམས་དང་མཉམ་པ་ཡུལ་དུ་གྱུར་ཅིང་། དེ་སྙེད་ཀྱི་དོན་བྱེད་ནུས་པ་སྟེ། དེ་ལས། སྔོན་བཞིན་ཡུལ་ཁྱོན་འདུལ་བར་བྱེད། །སྐྱེ་མཆེད་རང་བཞིན་ཡེ་ཤེས་ཕྱིར། །དེ་ཉིད་གཅིག་དང་དུ་མའི་མཐའ། །གཉིས་སུ་མེད་པའི་མངོན་རྟོགས་གོམས། །མཐོང་བས་དྲི་མ་དྲུག་སྦྱང་ཕྱིར། །དེ་སྙེད་གཟུགས་སྒྲ་དྲི་རོ་རེག །ཤེས་པའི་བྱེ་བྲག་རྩ་ལྔར་ཤར། །གཅིག་གིས་ཡུལ་ལྔ་གཅོད་པར་བྱེད། །ཚང་དང་མ་ཚང་འཇིག་དོགས་མེད། །གཞན་དུ་ལྷ་ཡི་རྣ་བ་དང་། །སྤྱན་གྱི་མངོན་པར་ཤེས་པ་དང་། །སྔོན་གནས་རྗེས་སུ་དྲན་པ་དང་། །ཕ་རོལ་གནས་ཀྱི་སེམས་ཤེས་དང་། །འཆི་འཕོ་སྐྱེ་བ་མཁྱེན་པ་དང་། །རྫུ་འཕྲུལ་ཤེས་པའང་ཟག་ཟད་ཤེས། །དེ་སྙེད་ཚུན་ཆད་ཡུལ་ཤེས་པས། །གང་དང་གང་རྣམས་འདུལ་བར་མཛད། །དེ་མིང་མི་ལྡོག་ཟས་མེད་དང་། །དབང་བསྒྱུར་རིགས་ཀྱི་མཚན་ལས་བརྗོད། །ཅེས་སོ། །དྲུག་པ་འབྲས་
བུ་ནི། རིམ་གྱིས་སམ་ཐོད་རྒལ་བའི་ཚུལ་གྱིས་ཕྱག་རྒྱ་ཆེན་པོ་དང་ལྷུན་གྲུབ་རིག་འཛིན་ཅི་རིགས་སུ་སྦྱོར་བའམ། དེ་བས་ཀྱང་བློ་ཆེན་མཐར་ཐུག་སངས་རྒྱས་ཀྱི་ས་ལ་སྦྱོར་བའང་ཡོད་དེ། རིམ་པ་བཞིན་དུ། ལམ་རིམ་ལས།བདག་གམ་གཞན་ཕྱིར་དབང་ཅན་དེ། །སྐུ་ཚེའི་ཚད་དམ་ཇི་སྙེད་པར། །བཞུགས་མཐར་རང་གི་སྒྲུབ་སྦྱོར་བ། །སྔོན་བཞིན་རིམ་དང་ཅིག་ཅར་བའོ། །ཞེས་དང་། རྒྱས་པ་ལས། ཚེ་ནི་བཅུ་དང་དྲུག་པ་ཡིས། །བརྒྱ་བརྒྱ་དག་ཏུ་བསྣུར་ཞིང་གནས། །ལུས་མ་བོར་བར་སངས་རྒྱས་སོ། །ཞེས་སོ། །ཞར་བྱུང་བརྩད་པ་སྤོང་པ་ནི། ཚེ་དབང་དེ་ཕྱག་ཆེན་ལ་སྦྱོར་བའི་ཚེ། རྡོ་རྗེའི་ལུས་དེ་བོར་རམ་དེ་ཀ་འཁྱེར། དང་པོ་ལྟར་ན། ལྷག་བཅས་ཀྱི་ངེས་ཚིག་ཉམས་ལ།གཉིས་པ་ལྟར་ན་ཕྱག་ཆེན་ཡེ་ཤེས་སྒྱུ་མའི་ཆ་ལུགས་སུ་ཡོད་པའི་ཕྱིར། རྡོ་རྗེའི་ལུས་ཐ་མལ་གྱི་ཆ་ལུགས་དང་མཚུངས་པ་མ་ཡིན་ནོ་ཞེ་ན། འབོར་ཡང་མི་འབོར་ལ། དེ་ཁོ་ན་ལྟར་དུའང་མི་འཁྱེར་ཏེ། རྡོ་རྗེའི་ལུས་དེ་ཉིད་ཡེ་ཤེས་སྒྱུ་མའི་སྐུར་གནས་འགྱུར་བའི་ཕྱིར། དཔེར་ན་གསེར་འགྱུར་གྱི་རྩིས་ཐེབས་པའི་ལྕགས་ཉིད་ལོགས་སུ་མ་སྤངས་པར་གསེར་དུ་འགྱུར་བ་བཞིན་ནོ། །ཡང་། ཚེ་དབང་དེ་དག་དོན་དུ་ལོ་སྟོང་དྲུག་བརྒྱ་སྡོད་དམ་མི་སྡོད། མི་སྡོད་ན་ལུང་དང་འགལ་ལ།སྡོད་ན་ཚེ་དབང་ལས་རྣམ་སྨིན་བློ་ཆེ་བར་ཐལ། ཕྱག་ཆེན་ལ་སྦྱོར་བ་རྣམ་སྨིན་མྱུར་བའི་ཕྱིར། འདོད་མི་ནུས་ཏེ། སྟོབས་ཆུང་རྐྱེན་སྨོན་ཞན་པའི་ཕྱིར། །ཞེས་པས་གསལ་ལོ་ཞེ་ན། རྗེ་དྲི་ངས་པ་ནི། སྟོང་དྲུག་བརྒྱའི་བར་དུ་ཕྱག་ཆེན་དང་ལྷུན་གྲུབ་རིག་འཛིན་བགྲོད་པར་བཞེད་དེ། གེགས་སེལ་སྒྲོན་མ་ལས། ཚེ་དབང་གིས་སངས་རྒྱས་འགྲུབ་པའི་དུས་ནི། དབང་པོ་རབ་འབྲིང་ལ་ངེས་པ་མེད། དབང་པོ་ཐ་མའི་དབང་དུ་ལོ་སྟོང་དྲུག་བརྒྱ་ཚུན་ཆད་ཀྱིས་སངས་རྒྱས་ཉིད་ལ་སྦྱོར་རོ། །དེའི་བར་དུ་ཕྱག་རྒྱ་ཆེན་པོ་དང་། ལྷུན་གྱིས་གྲུབ་པའི་རིག་འཛིན་ལ་བགྲོད་དོ། །ཞེས་གསུངས། དེ་ལྟར་ན། སྐུ་ཚེའི་ཚད་དམ་ཇི་སྙེད་པར་བཞུགས་མཐར། ཞེས་པས་གནོད་དམ་ཞེ་ན། མི་གནོད་དེ། མཐའི་སྒྲ་ཟད་མཐའ་ཁོ་ན་ལ་སྦྱོར་དགོས་པའི་ངེས་པ་མེད་པའི་
ཕྱིར་ཏེ། ཇི་སྐད་དུ། མཐའ་ནི་ཟད་དང་མཇུག་ཆ་དང་། །ཞེས་གསུངས་པའི་ཕྱིར་སྙམ་སྟེ་ད་དུང་དཔྱད་པར་བྱའོ། །ཡམ་ཤུད་དངོས་གྲུབ་ནི་རང་དོན་དུ་ཕྱག་རྒྱ་ཆེན་པོ་ལ་ནམ་སྦྱོར་ཀྱང་རང་དབང་ཡོད་དེ། ཚེ་ལ་དབང་བ་ཡིན་པའི་ཕྱིར། དེ་ལྟར་ཡང་། བདག་གམ་གཞན་ཕྱིར་དབང་ཅན་ཏེ། །ཞེས་པས་མངོན་གསུངས་སོ། །གསུམ་པ་ཕྱག་རྒྱ་ཆེན་པོའི་རིག་འཛིན་ལ་དྲུག་ལས། དང་པོ་ཐོབ་པའི་རྒྱུ་དུས་ནི། གཅིག་སྤྲོས་ཀྱི་ཏིང་འཛིན་ལ་གོམས་པའི་རྒྱུན་དང་། ལྟ་བ་ལ་ཆེད་དུ་འཛིན་པའི་ཀུན་འགྲོའི་སྒྲིབ་པ་དག་པ་ནི་ངོ་བོའི་རྒྱུ་སྟེ། ཚེ་ལ་དབང་ཐོབ་པའི་ཕྱིར་ཚེ་དབང་ནས་ཕྱག་ཆེན་དུ་འགྱུར་བའི་དུས་ལ་ངེས་པ་ཕྱོགས་གཅིག་ཏུ་གཞག་ཏུ་མེད་དོ། །དེ་ལྟར་འང་ལམ་རིམ་ལས། གཅིག་དང་དུ་མའི་རྣལ་འབྱོར་པས། །འབྱུང་ལུས་སེམས་ཕྱིར་རང་བཞིན་ལྷ། །མཐོང་གོམས་བསགས་པའི་མཐར་བསྒྲུབས་པས། །ཀུན་འགྲོའི་སྒྲིབ་དག་ངོ་བོའི་རྒྱུ། །ཞེས་དང་། ལྷག་མར་བཅས་པ་བསྣུར་བསྒྲུབས་མཐའ། །དེ་ཉིད་གྱུར་པས་ངེས་པ་མེད། །ཅེས་སོ། །གཉིས་པ་རང་གི་ངོ་བོ་ནི། བསྒོམ་བྱ་མངོན་དུ་གྱུར་པས་སྔོན་གང་བསྒོམས་ཀྱི་ལྷའི་ཆ་ལུགས་རང་མཚན་པ་འཛིན་ཅིང་མི་གཡོ་བའི་ཏིང་ངེ་འཛིན་གྱིས་ལྷན་ཅིག་གནས་པའི་དྲི་མ་སྦྱང་བ་ལ་ཞུགས་པ་སྟེ། དེ་ལས། རང་སེམས་ཕྱག་རྒྱ་ཆེན་པོ་སྟེ། །བསྒོམ་པ་གང་ཡིན་མངོན་གྱུར་སྐུ། །ཐུན་མོང་མཆོག་གི་མཚན་དཔེར་ལྡན། །ལོངས་སྤྱོད་གཉིས་པ་ཕྱག་རྒྱའི་རིགས། །ཞེས་དང་། ཡེ་ཤེས་སྐུ་ཡི་ཆ་ལུགས་ཅན། །འབྱུང་བ་རྡོ་རྗེའི་ལུས་ལས་གྲོལ། །ཞེས་སོ། །གསུམ་པ་རྣམ་གྲངས་ནི། ཀྲི་ཡའི་རིགས་གསུམ། ཨུ་པ་ཡའི་རིགས་བཞི། ཡོ་གའི་རིགས་ལྔ། མ་ཧཱ་ཡོ་གའི་མཆོག་ལྔ་སྟེ། དེ་ལས། དེ་ཉིད་རིགས་གསུམ་རིགས་བཞི་དང་། །ལྔ་དང་མཆོག་ལྔའི་རིགས་འཛིན་པས། །ཞེས་སོ། །བཞི་པ་ཆ་ལུགས་ནི། ལྷ་སྐུ་ཕྱག་རྒྱ་ཆེན་པོ་ལས་མི་གཡོ་ཞིང་། གཞན་དོན་སྤྲུལ་པའི་ཆ་བྱད་ལ་ངེས་པ་མེད་དེ།རྔོན་དང་སྨད་འཚོང་ལ་སོགས་པར་བསྟན་ནས་དོན་བྱེད་པའི་ཕྱིར། དེ་ལས། མཉམ་གཞག་ངང་ལས་མ་གཡོས་བཞིན། །
ཞེས་དང་། །རྔོན་དང་སྨད་འཚོང་ལ་སོགས་པ། །སྤྲུལ་པའི་ལུས་ཀྱིས་འདུལ་བར་བྱེད། །ཅེས་སོ། །ལྔ་པ་མངོན་ཤེས་ཀྱི་ཡུལ་དོན་ནི། མངོན་ཤེས་དྲུག་གི་བྱེ་བྲག་ཉེར་ལྔ་དང་བཅས་པ་ཚེ་དབང་དང་འདྲ་ནའང་། འདིར་གསལ་བརྟན་གྱི་ཁྱད་པར་དུ་བྱས་ཤིང་། ཡུལ་ལོངས་སྐུའི་ཞིང་དང་མཉམ་པས་དོན་ཡང་དེ་སྙེད་དུ་བྱེད་པར་ནུས་པ་སྟེ། དེ་ལས།དྲུག་དང་ལྔ་ཡི་ཡན་ལག་བཅས། །ཤེས་པའང་འདྲ་མོད་བཞི་ཆོ་འཕྲུལ་སོགས་ཀུན། །དེ་སྙེད་ཡུལ་གྱི་ཁྱད་པར་དང་། །དོན་རྫོགས་མཐུ་དང་གདུལ་བྱས་སྦགས། །ཞེས་སོ། །དྲུག་པ་འབྲས་བུ་ནི། རང་གི་དགོངས་པ་མི་གཡོ་བའི་དོན་ལྟ་སྒོམ་གྱིས་གོམས་པར་བྱས་པས་ལྷན་ཅིག་གནས་པ་ཕྲ་མོའི་དྲི་མ་དག་ནས་འབད་རྩོལ་མེད་པར་ལྷུན་གྲུབ་རིག་འཛིན་ནམ། བློ་ཆེན་སངས་རྒྱས་ཀྱི་སར་སྦྱོར་ཏེ། དེ་ལས། རང་གི་མི་གཡོ་མཐོང་གོམས་དང་། །དོན་དུ་གཉེར་རིམ་རྩོལ་བ་ཡིས། །ལམ་ཀུན་རྫོགས་པའི་བྱིན་སྟོབས་ཀྱིས། །རྣལ་འབྱོར་བྲལ་ནས་ལྷུན་གྱིས་གྲུབ། །ལྷན་ཅིག་གནས་པའི་དྲི་མ་དག །རྩོལ་བ་མེད་པར་ལྷུན་གྲུབ་འཐོབ། །ཅེས་དང་། ལམ་ཆུང་ལས། ཁ་ཅིག་ཕྱག་རྒྱ་ཆེན་པོ་ནས། །བླ་མེད་ཀུན་ཏུ་བཟང་པོར་འགྱུར། །ཞེས་སོ། །བཞི་པ་ལྷུན་གྲུབ་རིག་འཛིན་ལ་དྲུག་ལས། དང་པོ་ཐོབ་པའི་རྒྱུ་དུས་ནི། བསྒོམ་ལམ་གྱི་རིགས་ལ་མཐོང་གོམས་ཀྱི་མཐུ་རྫོགས་པས་ཤེས་རབ་གསུམ་གྱིས་ལྷན་ཅིག་གནས་པའི་དྲི་མ་དག་པའི་དུས་ཏེ། ལམ་རིམ་ལས། སྔ་མའི་རིགས་ལ་མཐུ་རྫོགས་པས། །བཤད་པ་བཞིན་དུ་དྲི་མ་སྦྱངས། །སངས་རྒྱས་གཉིས་པའི་ཤེས་རབ་གསུམ། །ལྷུན་གྱིས་གྲུབ་པའི་རིགས་སུ་འགྱུར། །གནས་དེར་སྔོན་བཞིན་གསུམ་རྫོགས་པ། །ལོངས་སྤྱོད་གསང་བའི་ལུང་ཐོབ་ཅིང་། །རང་གི་དགོངས་སྤྱོད་ནུས་པ་ཅན། །ས་མཐར་དབྱུང་བའི་དུས་ལ་བབ། །ཅེས་སོ། །གཉིས་པ་རང་གི་ངོ་བོ་ནི། དབྱེར་མེད་ལམ་གྱི་རྟོགས་པ་མཐར་ཕྱིན་པའི་རང་བཞིན་ཅན་རྫོགས་སངས་རྒྱས་ཀྱི་ས་ཐོབ་ལ་མ་རེག་པ་སྟེ། དེ་ལས། དེ་ལྟར་དག་པའི་ཤེས་པ་ཉིད། །སྐུ་ལྔ་ལྷུན་གྲུབ་རྡོ་རྗེ་འཛིན། །ལྷུན་མཉམ་ངང་ལས་མི་གཡོ་ཞིང་། །མི་རྟོག་ཉིད་དུ་བཞུགས་པའང་། །བག་
ལ་ཉལ་བ་འཇོམས་བྱེད་ཅིང་། །སྐད་ཅིག་རག་ལས་རིག་འཛིན་མཐའའོ། །ཞེས་སོ། །གསུམ་པ་རྣམ་གྲངས་ནི། བྱ་རྒྱུད་ཀྱི་རིགས་གསུམ། རྣལ་འབྱོར་རྒྱུད་ཀྱི་རིགས་ལྔ།རྣལ་འབྱོར་བླ་ན་མེད་པའི་སྐུ་ལྔ་ལྷུན་གྲུབ་ཀྱི་རྒྱལ་ཚབ་རྣམ་པ་གསུམ་སྟེ། དེ་ལས། བྱ་བ་ལྷུན་གྲུབ་རྣལ་འབྱོར་གྱི། །རིག་འཛིན་ཆེན་པོ་ནང་རིག་འཛིན། །ཞེས་སོ། །བཞི་པ་ཆ་ལུགས་ནི། སྐུ་ལྔ་ལྷུན་གྲུབ་རྡོ་རྗེ་འཆང་ཆེན་པོའི་ཚུལ་འཛིན་པ་སྟེ།དེ་ལས། ཆ་བྱད་རྒྱལ་བ་ཉིད་དུ་སྟེ། །ལྔ་པོ་ལྷུན་གྱིས་གྲུབ་ཕྱིར་ན། །དེ་འདྲ་དེ་ཉིད་རྒྱལ་ཚབ་སྟོན། །ཞེས་སོ། །ལྔ་པ་མངོན་ཤེས་ཀྱི་ཡུལ་དོན་ནི། ཇི་སྙེད་མཁྱེན་པའི་ཡུལ་རྒྱལ་བ་ཉིད་དང་ཤས་ཆེར་འདྲ་ཞིང་ནམ་མཁས་ཁྱབ་ཚད་ཀྱི་དོན་ཡང་ཅི་རིགས་པར་མཛད་དེ། དེ་ལས། ཀུན་མཁྱེན་ཡེ་ཤེས་མངའ་བའི་ཕྱིར། །ཡུལ་ནི་ཚད་མེད་རྒྱལ་བ་ཉིད། །ཇི་ལྟར་མེ་ལོང་ལྟ་བུའི་ཚུལ། །ཞེས་སོ། །དྲུག་པ་འབྲས་བུ་ནི། མཐར་ལམ་གྱི་སྐད་ཅིག་རྒྱུན་མཐའ་ལ་རྡོ་རྗེ་ལྟ་བུའི་ཏིང་ངེ་འཛིན་གྱིས་བདག་ཏུ་རྟོག་པ་བཟང་ངན་གྱི་མཚན་མ་བག་ལ་ཉལ་ཆ་ཕྲ་བ་ཡང་བཅོམ་སྟེ་རྫོགས་སངས་རྒྱས་ཀྱི་སར་སྦྱོར་བ་ཉིད་དོ། །དེ་ལྟར་ཡང་སྔ་མ་ལས། རྡོ་རྗེ་ལྟ་བུའི་ཏིང་འཛིན་གྱིས། །བདག་རྟོག་མཚན་མ་ཀུན་བཅོམ་ནས། །རྡོ་རྗེ་དབྱིངས་སུ་ཐིམ་པར་བྱེད། །ཅེས་སོ། །ཞར་བྱུང་དོགས་པ་དཔྱད་པ་ནི། ཟུར་ཚོ་སྔ་རབས་པ་ཕལ་ཆེར། མཐར་ལམ་རིག་འཛིན་དེ་མཉམ་པར་བཞག་ཙམ་ན་སངས་རྒྱས་དང་ཁྱད་པར་མེད་ལ། མ་བཞག་ན་ཡོད་པའི་ཕྱིར། མཉམ་པར་བཞག་འཇོག་ཡོད་པ་ཙམ་གྱིས་སངས་རྒྱས་དང་ཁྱད་པར་དུ་བྱས་སོ་གསུངས། ལྷ་རྗེ་རོག །དེ་མི་འཐད་དེ། མཉམ་པར་མ་བཞག་པའི་དུས་སུ་ཁྱད་ཡོད་ན་བཞག་པའི་དུས་སུའང་ཁྱད་ཡོད་དགོས་ཏེ། དེར་ཡང་ཤེས་སྒྲིབ་ཆ་ཕྲ་བ་དེ་ཡོད་པའི་ཕྱིར་ཏེ། གཉེན་པོ་རྡོ་རྗེ་ལྟ་བུའི་ཏིང་ངེ་འཛིན་གྱིས་བཅོམ་ནས་སངས་རྒྱས་ཀྱི་ས་ལ་འགྲོ་བའི་ཕྱིར་གསུངས། ཡང་འདིར། རྡོ་རྗེ་ལྟ་བུའི་ཏིང་འཛིན་གྱིས་ཤེས་སྒྲིབ་སྤང་བའི་ཚེ། གཉེན་པོས་སྤང་བྱ་སྤང་ངམ། སྤང་བྱ་དག་པའི་ཤུལ་དུ་གཉེན་པོ་སྐྱེ། དང་པོ་ལྟར་ན། རྡོ་རྗེ་ལྟ་བུའི་ཏིང་འཛིན་སྐྱེས་ཙམ་ན་སྤང་བྱའི་ཤེས་སྒྲིབ་ཐ་མ་དེ་ཡོད་དམ་
མེད། ཡོད་ན་སྤང་གཉེན་དངོས་འགལ་མ་ཡིན་པར་ཐལ། ཤེས་རྒྱུན་གཅིག་པ་ལྷན་ཅིག་ཏུ་འཚོགས་པའི་ཕྱིར། འདོད་ན།གཉེན་པོ་དོན་མེད་པར་ཐལ་ལོ། །ཡང་། གཉེན་པོ་སྐྱེས་ཙ་ན་སྤང་བྱ་མེད་པའམ་དག་པའི་ཤུལ་དུ་གཉེན་པོ་སྐྱེ་ནའང་དོན་མེད་པར་འགྱུར་ཏེ། སྤང་བྱ་མེད་པའི་ཕྱིར། མུན་པ་སངས་ཤུལ་གྱི་སྣང་བྱེད་བཞིན་ནོ་ཞེ་ན། ལན་དུ་གཉེན་པོ་རྫོགས་པར་སྐྱེ་བ་ལ་ཕྱོགས་པ་ན་སྤང་བྱ་འགག་པ་ལ་ཕྱོགས་པས་དུས་མཉམ་པ་སྟེ། སྤང་གཉེན་ལྷན་ཅིག་རིང་དུ་མི་གནས་པའི་འགལ་སྟོབས་ཀྱིས་སྤང་བྱ་སྤང་བ་ཡིན་པའི་ཕྱིར། དཔེར་ན་སྣང་བས་མུན་པ་སྤང་བ་བཞིན། །ཞེས་གསུངས་སོ། །གཉིས་པ་ལ། ཐར་ཆག་ཏུ་དང་། ཐོད་རྒལ་དུ་བརྟག་པའོ། །དང་པོ་ནི། ལྷ་རྗེ་ཁ་རག་པ་སོགས་ན་རེ། ཟག་བཅས་ཟག་མེད་ཀྱི་ལམ་དགུ་པོ་འདི་དག་ལ་རྒྱུའི་ཐེག་པའི་ས་ལམ་དང་གུང་སྦྱོར་ཏེ། དེ་ཏིང་ཚོགས་ལམ་ཆུང་ངུ་ལུས། ཚོར། སེམས། ཆོས་དྲན་པ་ཉེར་བཞག་བཞི་དང་། ཀུན་སྣང་ཚོགས་ལམ་ འབྲིང་པོ་ཡང་འདུན། འབད། རྩོལ། བརྩོན་འགྲུས་དག་སྤང་བཞི་དང་། ཕྱག་རྒྱ་གཅིག་ལ་ཚོགས་ལམ་ཆེན་པོ་འདུན། སེམས། དཔྱོད། དྲན་པ་རྫུ་འཕྲུལ་རྐང་བཞི་དང་། སྤྲོས་བཅས་སྦྱོར་ལམ་ཆུང་ངུ་དད་པ། བརྩོན། དྲན། ཏིང་། ཤེས་རབ་ཀྱི་དབང་ལྔ་དྲོད་རྩེ་ གཉིས་དང་། ཚོགས་སྒྲུབ་སྦྱོར་ལམ་ཆེན་པོ་སྟོབས་ལྔ་བཟོད་པ་ཆོས་མཆོག་གཉིས་ དང་། རྣམ་སྨིན་མཐོང་ལམ་དང་པོ་དང་། ཚེ་དབང་བ་དང་པོའི་བདེན་པ་མཐོང་བ་དང་། ཕྱག་ཆེན་ས་གཉིས་པ་ནས་དགུ་པའི་བར་དང་། ལྷུན་གྲུབ་རིག་འཛིན་ས་བཅུ་ཆོས་ཀྱི་སྤྲིན་དང་ལོ་ཚོད་མཉམ་པ་ཡིན་གསུངས། དེ་ལ་ཉང་ཊཱིཀ་པ་ན་རེ། དེ་སྐད་དུ་རྒྱུའི་ཐེག་པ་དང་གུང་སྦྱོར་བ་ནི་འཐད་པ་མ་ཡིན་ཏེ།ལམ་ལ་བགྲོད་ཚུལ་ཐ་དད་པ་ཙམ་ལས་ཐུན་མིན་གྱི་ཁྱད་པར་མེད་པར་འགྱུར་ཞིང་། གཞན་ཡང་འདིར་སེམས་སྐྱེ་བའི་སྐྱེ་སར་བཤད་པ་དང་ཡང་འགལ་བས་རྡོ་རྗེ་ཐེག་པ་ན་བབ་ཀྱིས་བཤད་པའི་སྐྱོན་དུ་འགྱུར་བའི་ཕྱིར་རོ་གསུངས། ཁོ་བོ་ནི། རྒྱུ་འབྲས་ཀྱི་ས་རྣམས་དགོངས་པ་མཉམ་པར་བཤད་ན་སྐྱོན་དུ་འགྱུར་གྱི།ལོ་ཚོད་བསྟུན་པ་ཙམ་ལ་སྐྱོན་མེད་དམ་སྙམ་མོ། །གཉིས་པ་ཐོད་རྒལ་གྱི་ལམ་ལ། གང་ནས་
འབྱུང་བའི་ས། གང་ལྟར་བྱུང་བའི་གོ་བ། དེ་ལྟར་འབྱུང་མི་འབྱུང་གི་རྒྱུ་མཚན། ཇི་ལྟར་འབྱུང་བའི་ཚུལ། ཞར་ལ་ལོག་རྟོག་བསལ་བའོ། །དང་པོ་ནི། ཟག་བཅས་ཀྱི་ལམ་གྱི་ཕྱག་རྒྱ་གཅིག་སྤྲོས་གཉིས་དང་། ཟག་མེད་ཀྱི་ཚེ་དབང་དང་། ཕྱག་ཆེན་གཉིས་ནས་འབྱུང་སྲིད་ཀྱི། ཁྱབ་པ་ནི་མེད་དོ། །གཉིས་པ་ནི། ལམ་བར་ནས་བོར་ཏེ་གོང་མ་ལ་མཆོངས་ནས་སྦྱོར་བ་ཞིག་གོ། །གསུམ་པ་ནི། ཐོད་རྒལ་འབྱུང་བ་ལ་ལམ་རིམ་གྱིས་པ་གང་ཞིག །ཆོས་གསུམ་དང་ལྡན་དགོས་ཏེ། དེ་ལས་གཞན་དུ་མི་འབྱུང་ངོ་། །ཆོས་གསུམ་གང་ཞེ་ན།ལམ་གཞན་བར་ནས་བོར་དུ་ཡོད་པ། རང་གི་བློ་ཆེ་བ། སྟོང་ཉིད་སྙིང་རྗེ་དབྱེར་མེད་དུ་བསྒོམ་ནུས་པ་དང་གསུམ་གཞི་གཅིག་ལ་ཚོགས་པའོ། །བཞི་པ་ནི།རྒྱུ་མཚན་དེའི་ཕྱིར། དེ་བཞིན་ཉིད་དང་། ཀུན་སྣང་བསྒོམ་པའི་རྣལ་འབྱོར་པ་བློ་ཆེ་བ་ཞིག །ལམ་གཅིག་སྤྲོས་ཚོགས་གསུམ་བར་ནས་བོར་དུ་ཡོད་ཀྱང་།དབྱེར་མེད་བསྒོམ་པའི་ལམ་པ་མ་ཡིན་པའི་ཕྱིར་ཐོད་རྒལ་མི་འབྱུང་ལ། ཟག་བཅས་ཚོགས་བསྒྲུབ་བློ་ཆེ་ཤོས་དང་། ཟག་མེད་ལྷུན་གྲུབ་རིག་འཛིན་བློ་ཆེ་ཤོས་གཉིས་ནི་ངང་གིས་བློ་ཆེ་བ་དང་། དབྱེར་མེད་བསྒོམ་པའི་ལམ་པ་ཡིན་ཀྱང་།ལམ་བར་ནས་བོར་དུ་མེད་པའི་ཕྱིར། ཐོད་རྒལ་མི་འབྱུང་། རྣམ་སྨིན་ནི་དབྱེར་མེད་བསྒོམ་པའི་ལམ་པའང་ཡིན། ལམ་བར་ནས་བོར་རྒྱུའང་རྒྱ་ཆེན་ལྷུན་གྲུབ་གཉིས་ཡོད་ཀྱང་། ངང་གིས་བློ་ཆུང་བའི་ཕྱིར་ཐོད་རྒལ་མི་འབྱུང་ངོ་། །ལྔ་པ་ནི། ཁ་ཅིག་ན་རེ། ཚོགས་བསྒྲུབ་ནས་ཀྱང་ཐོད་རྒལ་འབྱུང་སྟེ། རྒྱུད་ལས། གཉིས་མེད་གྱུར་ནས་ཕྱག་རྒྱ་ཆེ། །ཞེས་ཚོམ་བུ་གཅིག་པ་ནས་ཕྱག་ཆེན་ལ་སྦྱོར་བ་དང་། རིག་འཛིན་དངོས་གྲུབ་མཆོག་ཐོབ་འགྱུར། །ཞེས་ཚོམ་བུ་གསུམ་པ་ནས་ལྷུན་གྲུབ་ལ་སྦྱོར་བ་དང་། དངོས་གྲུབ་མཆོག་གི་སྙིང་པོ་འགྲུབ་ཅེས་ཚོམ་བུ་ལྔ་པ་ནས་སངས་རྒྱས་སར་སྦྱོར་བར་བཤད་པའི་ཕྱིར་དང་། ལམ་ཆུང་ལས་ཀྱང་།ཕྱག་རྒྱ་གཅིག་བརྟན་འཕོ་བ་ཡང་། །ཁྱུང་དང་སེང་གེ་ཇི་བཞིན་ནོ། །སྤྲོས་ཚོགས་སྐབས་ནས་སྨོས་ཅི་དགོས། །ཞེས་གསུངས་པའི་ཕྱིར་ཟེར་བ་ནི། མི་འཐད་དེ། རྒྱུད་ཀྱི་
ལུང་ཚན་གསུམ་ནི། ཚོགས་བསྒྲུབ་ཀྱི་དུས་ཚོམ་བུ་གཅིག་གསུམ་ལྔ་པ་བསྒྲུབས་པས་ཐོབ་པའི་ཚེ་དབང་དེ་རིམ་པ་ལྟར། རྒྱ་ཆེན། མཐར་ལམ། སངས་རྒྱས་ལ་སྦྱོར་བའི་ལུང་དང་། ལམ་ཆུང་གི་ལུང་དོན་ཀྱང་། ཕྱག་རྒྱ་གཅིག་པ་བརྟེན་ནས་རྣམ་སྨིན་དུ་ཐོད་རྒལ་གྱི་འཕོ་བའང་དཔེ་དེ་བཞིན་ཡིན་ན། སྤྲོས་བཅས་དང་ཚོགས་བསྒྲུབ་ནས་སྦྱོར་བ་ནི་ལྟ་སྨོས་ཀྱང་ཅི་དགོས་ཞེས་པའི་དོན་ཡིན་གྱི། ཚོགས་བསྒྲུབ་ནས་ཐོད་རྒལ་འབྱུང་བའི་ལུང་མ་ཡིན་ཏེ། གལ་ཏེ་ཡིན་ན། ཟག་མེད་ཀྱི་ལམ་གྱི་འདུ་ས་དང་དབྱེ་བ་མཐོང་ལམ་མ་ཡིན་པར་ཐལ།ཚོགས་བསྒྲུབ་ན་ཐོད་རྒལ་འབྱུང་བའི་ཕྱིར། འདོད་མི་ནུས་ཏེ། ལམ་རིམ་ལས།ལམ་མཆོག་དབྱེ་ས་གཅིག་ཡིན་ནོ། །ཞེས་གསུངས་པ་དང་འགལ་བའི་ཕྱིར། འོ་ན་ཚེ་དབང་གི་འབྲས་བུ་ལ་བཟང་ངན་ཡོད་པར་ཐལ་ཟེར་ན། ལྷ་ལ་བཟང་ངན་མེད་ཀྱང་ལམ་པའི་བློ་ལ་ཆེ་ཆུང་ཡོད་པས་རྒྱུ་ཚོགས་བསྒྲུབ་པའི་དུས་ཀྱི་ལྷ་མང་ཉུང་གི་བྱེད་པས་འབྲས་བུ་ལམ་གོང་མ་ལ་སྦྱོར་བའི་དུས་སུ་མཐོ་དམན་བྱུང་བ་ཡིན་ནོ། །འོ་ན་ཚོམ་བུ་གཅིག་གསུམ་ལྔ་པས་བསྒྲུབས་པའི་རྣམ་སྨིན་ལའང་བློ་རབ་འབྲིང་ཐ་གསུམ་ཡོད་པར་འགྱུར་ལ། དེ་ཡོད་ན་རྣམ་སྨིན་ནས་ཀྱང་ཐོད་རྒལ་འབྱུང་བར་ཐལ་ཞེ་ན། ཟུར་བྱམས་པ་སེང་གེའི་ཞལ་ནས། རྣམ་སྨིན་རིག་འཛིན་གྱིས་དངོས་འབྲས་ཕྱག་ཆེན་ཁོ་ན་ལས་མི་འཐོབ་ཀྱང་། བརྒྱུད་འབྲས་ལམ་གོང་མ་ལ་སྦྱོར་བ་ལ་དུས་མྱུར་བུལ་གྱི་བློ་ཁྱད་ཡོད་པའི་ཕྱིར། ཅི་འགལ་ཏེ་ཁྱབ་པ་མེད་དོ་གསུངས། རྒྱ་གབ་གོང་བ་ན་རེ། ཚོགས་བསྒྲུབ་མཚན་ཉིད་པ་བློ་ཆེན་ནས་ཐོད་རྒལ་འབྱུང་བ་མི་སྐྱོན་ཏེ། ལམ་ཆུང་ལས། ནུས་པ་ཐོབ་དང་མ་ཐོབ་པའི། །མཐོང་ལམ་གཉིས་སུ་འགྱུར་བ་ཡིན། །ཞེས་པས་ཚོགས་བསྒྲུབ་བློ་ཆེ་ཤོས་ཀྱིས་ཟག་བཅས་སུ་ཆོས་ཉིད་བདེན་པ་མཐོང་ནས་ཟག་མེད་མཐོང་ལམ། རྣམ་སྨིན་དང་། ཚེ་དབང་གཉིས་ཀ་ལ་ལྟོས་མི་དགོས་པ་ཡོད་གསུངས་པའང་མི་རིགས་ཏེ། ལམ་ཆུང་གི་ལུང་ནི་ནུས་པ་མ་ཐོབ་པ་རྣམ་སྨིན་དང་ནུས་ཐོབ་ཚེ་དབང་ཡིན་པ་འོག་ཏུ་འཆད་ལ། ཟག་བཅས་སུ་ཆོས་ཉིད་ཀྱི་བདེན་པ་མཐོང་བའང་རང་མཚན་མཐོང་བ་ལ་དགོངས་པ་ཡིན་ན་དེའང་རིགས་པ་མ་ཡིན་ཏེ་སྔར་བཤད་
གྲུབ་བོ། །གསུམ་པ་ལ། ཟག་བཅས་ཟག་མེད་ཀྱི་བྱ་བར་སྤྱིར་བཤད།དེ་དང་རྗེས་སུ་འདྲེལ་བའི་དོན་ཟག་ལྡོག་ཡོད་མེད་ཀྱིས་མཚམས་བྱེ་བྲག་ཏུ་བཤད་པའོ། །དང་པོ་ནི། ཀུན་ནས་ཉོན་མོངས་པ་དང་བཅས་པའི་ལས་ཀྱིས་ཀུན་ནས་བསླངས་ཏེ་ཁམས་གསུམ་དུ་ཟག་ཅིང་འཕོ་བའི་ཕྱིར་ཟག་བཅས། དེ་ལས་ལྡོག་པ་ནི་ཟག་མེད་དེ། སྤར་ཁབ་ལས། དེ་དག་འཇིག་རྟེན་པ་ལ་ཡོད་པ་ནི་འཛིན་པའི་ཕྱིར་ཟག་པར་འགྱུར་ལ། ཞེས་སོ། །བྱེ་བྲག་ཏུ། ཞེན་པ་ཕྱིན་ཅི་ལོག་གི་སྒྲོ་བཏགས་ཉོན་མོངས་པའི་དང་། ལུས་དང་དབང་མེད་པར་འདོར་བ་ལུས་ཀྱི་དང་། དེ་མི་བདེ་རང་དབང་མེད་པར་མྱོང་བ་ཁམས་ཀྱི་དང་། ལས་ཀྱི་སྟོབས་ཀྱིས་རང་དབང་མེད་པར་ལུས་ལེན་པ་སྐྱེ་གནས་ཀྱི་ཟག་པའོ། །དེའང་ཉོན་མོངས་པའི་འཛིན་པ་ནི་གཙོ་བོ་སྟེ། དེས་འཁོར་བར་ཟག་པའི་རྒྱུའི་ས་བོན་གྲུང་བོར་འགྱུར་བའི་ཕྱིར། བྲན་ནི་ཕྱི་མ་གསུམ་སྟེ། དེ་ཙམ་གྱིས་འཁོར་བར་འཆིང་མི་ནུས་པའི་ཕྱིར་རོ། །གཉིས་པ་ལ། སྤྱིར་ཟག་ལྡོག་ཡོད་མེད་ཀྱི་མུ་བཞི་སྟེ། ཟག་པ་མེད་ལ་ལྡོག་པ་ཡོད་པའི་ལམ། ཟག་ལྡོག་གཉིས་ཀ་ཡོད་པའི་ལམ།ཟག་པ་ཡོད་ལ་ལྡོག་པ་མེད་པའི་ལམ། ཟག་ལྡོག་གཉིས་ཀ་མེད་པའི་ལམ་མོ། །དང་པོ་ནི། ཐེག་པ་ཆུང་ངུའི་མཐར་ཐུག་གི་འབྲས་བུ་ཟག་མེད་དགྲ་བཅོམ་ཐོབ་པ་གང་ཞིག །སྔགས་ཀྱི་ཐེག་པ་ལ་ཞུགས་ནས་ཚོགས་སྦྱོར་གྱི་ལམ་ལ་གནས་པ་དེའོ། །གཉིས་པ་ནི། ཚོགས་ལམ་གྱི་རྣལ་འབྱོར་བཞི་སྟེ། ལམ་རིམ་ལས།རྡོ་རྗེ་སེམས་དཔའི་བཀས་བཤད་པའི། །སྡོམ་པའི་རྩ་བ་ཐམས་ཅད་ཀུན། །དེ་བཞིན་ཉིད་དུ་མ་བསྲུངས་ན། །ཡཀྵ་ཁྲོ་བོ་མེ་དབལ་གྱིས། །སྙིང་ནས་དྲངས་ཏེ་ཁྲག་འཐུང་བས། །དེ་ཡི་སྡུག་བསྔལ་བཟོད་བརླག་ཆད། །དེ་ཕྱིར་ལམ་བཞིར་ཟག་ལྡོག་ཡོད། །ཅེས་སོ། །དེ་ལྟར་ན། ལྟ་བའི་སྐབས་སུ། དངོས་གྲུབ་མཆོག་གི་སྙིང་པོ་དེ། །ཆུ་སྲིན་ཕྱག་རྒྱ་ཇི་བཞིན་དུ། །དང་པོ་དོན་རྟོགས་མཐའ་མི་གཏོར། །ཞེས་ལྟ་བ་རྟོགས་ནས་འཁོར་བར་མི་ལྡོག་པར་བཤད་ན། འདིར་སྤྲོས་པ་ནས་ལྡོག་པར་བཤད་པ་ནང་འགལ་ལོ་ཞེ་ན། སྐྱོན་མེད་དེ། སྔ་མ་ནི་ཅིག་ཅར་བས་དང་པོ་ཉིད་
ནས། དབྱེར་མེད་ཆིག་ཆོད་དུ་རྟོགས་པའི་ཡོན་ཏན་བརྗོད་པ་ཡིན་ལ། ཕྱི་མ་ནི་རིམ་གྱིས་པས་ད་དུང་ལྟ་བ་རང་མཚན་མ་རྟོགས་པས་ཉེས་པ་ཡིན་ནོ། །གསུམ་པ་ནི། ཚོམ་བུ་ཚོགས་བསྒྲུབ་སྟེ། རྟོགས་གོམས་དང་ལྡན་པས་འབྲས་བུ་དུས་གྲངས་བཞིན་དུ་ཟག་མེད་དུ་སྦྱོར་བ་ལ་སྐད་ཅིག་གཞན་གྱིས་བར་མ་ཆོད་པའི་ཕྱིར། ད་ལྟ་ཟག་བཅས་ཡིན་ཀྱང་དེས་ཕྱི་མའི་རིགས་མཐུན་གྱི་འབྲས་བུ་མི་བསྐྱེད་པས་ལྡོག་པ་མེད་དེ། བར་ཆད་མེད་པར་སྦྱོར་བ་ཡི། །ཞེས་སོ། །ཡང་ན་འདིའང་བར་དོར་ཟག་མེད་མ་ཐོབ་ཀྱང་ཚོགས་བསྒྲུབ་ཀྱི་ཡོན་ཏན་གྱིས་ངན་འགྲོར་མི་ལྡོག་པ་སྟེ། ཐུན་མོང་གི་སྦྱོར་ལམ་བཟོད་ཐོབ་པ་བཞིན་ནོ། །བཞི་པ་ནི། རིག་འཛིན་བཞི་སྟེ། རྣམ་སྨིན། ལམ་མཆོག་ཡོངས་རྫོགས་ཀྱི་ཚེ་དབང་། ཕྱག་ཆེན། ལྷུན་གྲུབ་རིག་འཛིན་ཏེ། ཐུགས་ཐིག་ལས། དེ་ནས་བཞི་ཡིས་ཟག་དང་བྲལ། །ཞེས་དང་། ལམ་རིམ་ལས། ཟག་ཀུན་ཟད་པའི་རིགས་ཆེན་འདི། །ཇི་ལྟར་སྤྱད་ཀྱང་ལྡོག་པ་མེད། །ཅེས་སོ། །འདིར་ཁ་ཅིག་ན་རེ། རྣམ་སྨིན་རིག་འཛིན་ཟག་མེད་དུ་མི་འཐད་དེ། ལུས་ཁམས་སྐྱེ་གནས་ཀྱི་ཟག་པ་མ་སྤངས་པའི་ཕྱིར་ཟེར་བ་ལ། ལན་དུ་ལྷ་རྗེ་ཡང་ཁྱེད་ན་རེ།ཟག་བཅས་ཡིན་ཡང་ཟག་མེད་ཀྱི་ཁོངས་སུ་གདབ་སྟེ། དཔེར་ན་སྐྱེས་བུའི་གནད་དུ་མཚོན་བསྣུན་པ་བཞིན་གསུངས་པ་མི་འཐད་དེ། ཟག་པ་དང་མ་བྲལ་བར་དུ་ཟག་མེད་དུ་བགྲང་མི་རིགས་པས་སོ། །ཟག་མེད་དུ་འགྱུར་ངེས་པའི་ཕྱིར་ཞེ་ན།ཚོགས་བསྒྲུབ་སྐད་ཅིག་རྒྱུན་མཐའ་ཡང་དེར་ཐལ་ལོ། །དཔེའང་མ་གྲུབ་སྟེ།སྐྱེས་བུ་མ་ཤིའི་བར་དུ་གཤིན་པོའི་ཁོངས་སུ་ཅིའི་ཕྱིར་འདེབས། འཆི་ངེས་པའི་ཕྱིར་ཞེ་ན། སེམས་ཅན་ཐམས་ཅད་དེར་ཐལ་ལོ། །ཁྱབ་པ་མེད་དེ། མྱུར་དུ་འཆི་བའི་ཕྱིར་ཟེར་ན། སྲིན་བུའི་རིགས་ཀྱི་ཉི་ཚེ་བའི་སེམས་ཅན་ཡང་དེར་ཐལ་ལོ། །ལྷ་རྗེ་མདའ་ཏིག་ན་རེ། ཟག་བཅས་སུ་འགྲོ་བ་ལ་ཟག་པ་གསུམ་ཀ་ཚང་མི་དགོས་པས་ལུས་ཀྱི་ཟག་པ་འདུག་པའི་ཕྱིར་ཟག་བཅས་སུ་བདེ་བས་གསུངས། འོ་ན། རྣམ་སྨིན་མྱང་འདས་ཡིན་ནམ་མིན། མ་ཡིན་ན། མྱ་ངན་འདས་པར་སྨིན་ཞེས་བརྗོད། །ཅེས་པ་དང་འགལ། ཡིན་ན་མྱང་འདས་ཟག་བཅས་སུ་ཐལ་ལོ། །
འདོད་མི་ནུས་ཏེ། ཟག་པ་ཟད་ནས་མྱ་ངན་འདས། །ཞེས་པས་གསལ་ལོ། །དེ་བས་ན། རང་ལུགས་ནི། རོག་བདེ་གཤེགས་ཆེན་པོའི་རྗེས་སུ་འབྲངས་ཏེ། རྣམ་སྨིན་ལ་མྱ་ངན་འདས་ཀྱི་དང་པོ་མཐོང་ལམ་གྱིས་ཁྱབ་ཅིང་།མཐོང་ལམ་ལ་ཉོན་སྒྲིབ་སྤངས་པས་ཁྱབ་པའི་ཕྱིར། ཟག་མེད་དུ་གཞག་པར་བྱ་སྟེ། མྱ་ངན་འདས་པར་སྨིན་ཞེས་བརྗོད། །ཅེས་གསུངས་པའི་ཕྱིར་རོ། །དེ་ལྟར་ན་ཚེ་དབང་རིག་འཛིན་དང་ལམ་གཅིག་ལ་གནས་པའི་ཕྱིར། སོ་སོར་ཕྱེ་བ་ལ་དོན་མེད་དོ་ཞེ་ན། དེ་ནི་རྣམ་སྨིན་གྱིས་ཀྱང་ཆོས་ཉིད་ཀྱི་བདེན་པ་མཐོང་མོད་ཀྱི། འོན་ཀྱང་འབྱུང་ལུས་རགས་པ་འབྱུང་བ་དྭངས་མའི་ལུས་སུ་བསྒྱུར་མ་ནུས་པའི་ཕྱིར། ཚེ་དབང་དང་བདེན་པའི་མཐོང་ཚུལ་ལ་ནུས་སྟོབས་ཆེ་ཆུང་ཡོད་པར་མངོན་ཏེ། ལམ་ཆུང་ལས། ནུས་པ་ཐོབ་དང་མ་ཐོབ་པའི། །མཐོང་ལམ་གཉིས་སུ་འགྱུར་བ་ཡིན། །ཞེས་སོ། །དེའི་ཕྱིར་ནུས་པ་མ་ཐོབ་པའི་མཐོང་ལམ་ནི། རྣམ་སྨིན་ཡིན་ཏེ། ལུས་རང་དབང་མེད་པར་འདོར་བའི་ཕྱིར་རོ། །དེའང་ལམ་ཆུང་ལས། སྟོབས་ཆུང་རྐྱེན་སྨོན་ཞན་པའི་ཕྱིར། །རྣམ་རྟོག་འབྱུང་བའི་ལྷག་ལུས་བཞག །ཅེས་དང་། རྡོ་རྗེ་ལས་ཀྱང་། བྲོ་གླུ་གར་དང་ཏིང་འཛིན་ཐབས། །བར་ཆད་མེད་པས་བསྒྲུབ་པར་བྱ། །གལ་ཏེ་འདོད་པ་མ་རྫོགས་པར། །སྒྱུ་མའི་ལུས་དེ་མ་བརྟན་ན། །ཡིད་ཀྱིས་རྡོ་རྗེ་གསུམ་གནས་པས། །རྣམ་པར་སྨིན་པའི་རིག་འཛིན་ཏེ། །ཕྱིན་ཆད་འཇིགས་བྲལ་ཁྱུང་བཞིན་ནོ། །ཞེས་སོ། །ནུས་ཐོབ་ཀྱི་མཐོང་ལམ་ནི་ཚེ་དབང་སྟེ། རྡོ་རྗེའི་ལུས་སུ་གྱུར་པའི་ཕྱིར། །ལམ་རིམ་ལས། རྡོ་རྗེའི་ལུས་འགྱུར་ཚེ་ཡི་རིག །མཐོང་བའི་ཆོས་ལ་མྱ་ངན་འདའ། །ལུས་མ་བོར་བར་རྒྱལ་བའི་ས། །འཇིགས་པ་ཀུན་བྲལ་ཆོ་འཕྲུལ་རྫོགས། །ཞེས་སོ། །འདིར་རྒྱལ་བ་གཡུང་ནི། དུས་འཁོར་ལས་མཚན་མ་གསུམ་མཐོང་བར་བཤད་པའི་མཚན་མ་དང་པོ་ལས་རླུང་ཉི་ཁྲི་ཆིག་སྟོང་དྲུག་བརྒྱའི་ཡ་གྱལ་གཅིག་འགགས་པ་ན་མཆོག་ཏུ་མི་འགྱུར་པའི་བདེ་བ་ཐོབ་པ་ཆོས་ཉིད་བདེན་པའི་ཆ་ཤས་མཐོང་བ་ཡིན་ལ། མཚན་མ་བར་པ་ནི་ལས་རླུང་གཅིག་འགགས་གཉིས་འགགས་ཀྱིས་སྟོང་བརྒྱད་བརྒྱ་འགགས་པ་ན་གསང་གནས་ཀྱི་རྩ་མདུད་གཅིག་གྲོལ་བ་དང་ཆོས་ཉིད་བདེན་པ་མངོན་སུམ་དུ་མཐོང་བས་ས་དང་པོ་ནོན་པར་བཤད་པ་
ལྟར། འདིར་ཡང་རྣམ་སྨིན་བདེན་པའི་ཆ་ཤས་དང་། ཚེ་དབང་རང་མཚན་མཐོང་བ་ཡིན་ཞེས་གསུངས་སོ། །དེས་ན་སྔགས་ཀྱི་ལུགས་ཀྱི་ནུས་པ་མ་ཐོབ་པའི་མཐོང་ལམ་རྣམ་སྨིན་དང་། མཚན་ཉིད་ཐེག་པའི་རབ་དགའ་གཉིས་དགོངས་པ་མཉམ་པར་ངེས་ཏེ། ནུས་ཐོབ་ཀྱི་ཚེ་དབང་ནི་ཕར་ཕྱིན་ཐེག་པའི་ས་དང་པོ་དང་མཐོང་ལམ་ཙམ་དུ་སྐལ་བ་མཉམ་ཀྱང་དགོངས་པ་ས་བརྒྱད་པའི་བྱང་སེམས་དང་མཉམ་པར་བཞེད་པའི་ཕྱིར་རོ། །དེས་མཚོན་ནས་རྒྱུའི་ཐེག་པའི་ས་བརྒྱད་པ་དང་ཕྱག་རྒྱ་ཆེན་པོ་གཉིས། བསྒོམ་ལམ་ཙམ་དུ་སྐལ་བ་མཉམ་ཀྱང་དགོངས་པ་རྒྱུའི་མཐར་ལམ་དང་མཉམ་པ་དང་། རྒྱུའི་ཐེག་པའི་ས་བཅུ་པའི་བྱང་སེམས་དང་ལྷུན་གྲུབ་རིག་འཛིན་གཉིས་མཐར་ལམ་དུ་སྐལ་བ་མཉམ་ཡང་དགོངས་པ་ཀུན་ཏུ་འོད་དང་མཉམ་པ་སྟེ། དགོངས་འདུས་ལས།རྒྱུ་ཡི་དང་པོར་སྐལ་མཉམ་ཡང་། །དགོངས་སྤྱོད་རྒྱ་མཚོའི་ཁྱད་པར་གྱིས། །ཞེས་སོགས་དང་། ལམ་ཆུང་ལས་ཀྱང་། དེ་ཡང་དང་པོ་དང་པོ་དང་། །སྐལ་མཉམ་གཉིས་པའི་རིགས་མཆོག་དེ། །བརྒྱད་པའི་སེམས་དཔར་སྐལ་བ་མཉམ། །གསུམ་པ་བཅུ་དང་སྐལ་མཉམ་མོད། །དགོངས་སྤྱོད་རྒྱ་མཚོས་ཁྱད་པར་འཕགས། །ཞེས་སོ། །དོན་འདི་ལ་དགོངས་ནས་གནུབས་ཆེན་གྱིས། ཀུན་ཏུ་འོད་བསྡི་གནས་ཀྱི་སའོ། །དེ་ནི་འདིར་ལྷུན་གྱིས་གྲུབ་པའི་རིག་འཛིན་དངོས་སོ། །ཞེས་གསུངས་སོ། །མདོར་ན་འདི་དག་གིས་རྡོ་རྗེ་ཐེག་པའི་ཁྱད་པར་གྱི་ས་བཅུ་བསྡུས་པར་མ་ཟད། མཚན་ཉིད་ཐེག་པའི་སའི་ཡོན་ཏན་རྣམས་ཀྱང་བསྡུས་པར་ཤེས་པར་བྱ་སྟེ། དེ་ཡང་རྒྱུའི་ཐེག་པ་སྤྱི་ལ་གྲགས་པར་ཕ་རོལ་ཏུ་ཕྱིན་པ་བཅུའི་སྒོ་ནས་ས་བཅུ་རིམ་གྱིས་བགྲོད་པར་བཞེད་པ་ལྟར། འདི་ཉིད་ལས། ཕ་རོལ་ ཕྱིན་པ་ཀུན་ཏུ་རྫོགས། །ཞེས་པས་འདིའི་ལྟ་སྤྱོད་ལ་དུས་གཅིག་ཏུ་རྫོགས་ཏེ།དེའང་ལྟ་བ་ལ་རྫོགས་ཚུལ་ནི། གཉིས་སུ་མེད་པའི་དོན་མཐར་ཕྱིན་པའི་དུས་ན།གང་ལ་ཡང་མི་འཛིན་པས་སྦྱིན་པ། ཅི་ལའང་མ་ཆགས་པས་ཚུལ་ཁྲིམས།གཉིས་མེད་ཀྱི་དོན་ལ་མི་སྐྲག་པས་བཟོད་པ། དེའི་ངང་ལས་མི་གཡོ་བས་བསམ་གཏན། དེ་ཉིད་ལས་དུས་ཐམས་ཅད་དུ་མ་ཡེངས་པས་བརྩོན་འགྲུས། རང་རིག་ཏུ་གསལ་བས་ཤེས་
རབ། དེ་མངོན་དུ་གྱུར་པས་སྨོན་ལམ། འབྲས་བུ་གཞན་ནས་མི་འཚོལ་བས་ཐབས། ལྟ་ངན་ཟིལ་གྱིས་གནོན་པས་སྟོབས། ཡེ་ཇི་བཞིན་པའི་དོན་མངོན་དུ་གསལ་བས་ཡེ་ཤེས་ཀྱི་ཕ་རོལ་ཏུ་ཕྱིན་པའོ། །སྤྱོད་པ་ལ་རྫོགས་ཚུལ་ནི། ཕ་རོལ་ཏུ་ཕྱིན་པ་བཅུ་སྤྱོད་ལ་མི་འཛིན་པས་གཉིས་མེད་དོ། །གཞན་ཡང་། ས་ཡི་ཁྱད་པར་བཅུ་དང་གསུམ། །རྒྱུ་འབྲས་ཁྱད་པར་ལྷུན་གྱིས་གྲུབ། །ཅེས་པའི་གསུམ་ནི་སྔགས་རང་གཞུང་གི་འབྲས་བུའི་ས་གསུམ་ཡིན་ལ།དེ་ལྷག་རྒྱུ་འབྲས་ཀྱི་ཐེག་པའི་ས་བཅུ་ཆ་གཉིས་སུ་དོན་གྱིས་འགྱུར་པ་ལས། རྒྱུའི་ཐེག་པའི་ས་བཅུ་ག་ཡང་རྩོལ་བ་མེད་པར་ལྷུན་གྱིས་གྲུབ་པའི་ཡེ་ཤེས་གཅིག་ལ་རྫོགས་པར་འགྱུར་ཏེ། མཉམ་པ་ཉིད་རང་མཚན་མཐོང་བས་དང་པོ་རབ་ཏུ་དགའ་བ། མཐའི་ལྟ་ངན་དག་པས་གཉིས་པ་དྲི་མ་མེད་པ། སེམས་ཉིད་རང་གསལ་བས་འགྲོ་དོན་མི་འགོག་པས་གསུམ་པ་འོད་བྱེད། རང་རིག་ཐམས་ཅད་དུ་སྣང་བས་བཞི་པ་འོད་འཕྲོ། དོན་གཉིས་དུས་གཅིག་ཏུ་བྱེད་པས་ལྔ་པ་སྦྱང་དཀའ། སེམས་ཉིད་ཡུལ་མེད་དུ་རང་གསལ་བས་དྲུག་པ་མངོན་དུ་གྱུར་པ།མཐའི་ལྟ་བ་ལས་རིང་དུ་སོང་བས་བདུན་པ་རིང་དུ་སོང་བ། གཡེང་བའི་ཡུལ་མ་དམིགས་པས་བརྒྱད་པ་མི་གཡོ་བ། ཡོན་ཏན་ལྷུན་གྱིས་གྲུབ་པའི་ཡེ་ཤེས་མངའ་བས་དགུ་པ་ལེགས་པའི་བློ་གྲོས། ཡོན་ཏན་དེ་དག་གི་འབྱུང་གནས་སུ་གྱུར་པས་ས་བཅུ་པ་ཆོས་ཀྱི་སྤྲིན་ཞེས་བྱའོ། །དེ་དག་ནི་འཕྲོས་དོན་དུ་བརྗོད་པ་སྟེ་སྤྲོས་པས་ཆོག་གོ། །གཉིས་པ་གྲོལ་ལམ་ཅིག་ཅར་བ་ལ། དགོས་ཆེད། ངོ་བོ།རྣམ་གྲངས་རྣམ་པར་དབྱེ་བས་གཏན་ལ་དབབ་པའོ། །དང་པོ་ནི། དབང་པོ་ཡང་རབ་ཀྱིས་འབྲས་བུ་མྱུར་དུ་ཐོབ་པའི་ཆེད་དུའོ། །གཉིས་པ་ནི། རྟོགས་གོམས་ཆིག་ཆོད་དུ་མཐར་ཕྱིན་པར་བྱེད་པའོ། །གསུམ་པ་ལ། སྔར་ལྟར་མཚན་ཉིད་གསུམ་ལས། དང་པོ་ལྟ་བ་ནི། ཆོས་ཐམས་ཅད་ཀྱི་གནས་ལུགས་དབྱེར་མེད་ཆིག་ཆོད་དུ་རྟོགས་པས་གཞལ་བྱ་དང་གཏན་ཚིགས་ལ་སོགས་པའི་ཐ་སྙད་ཀྱིས་སྟོངས་པ་སྟེ། ལམ་རིམ་ལས། ཆོས་དང་ཆོས་ཅན་ཀུན་བྲལ་བར། །འཁོར་འདས་རང་སྤྱི་
དབྱེར་མེད་དུ། །མི་ཕྱེད་རྡོ་རྗེ་ཐུགས་མཆོག་གོ། །ཞེས་སོ། །གཉིས་པ་ཏིང་ངེ་འཛིན་ལ། མཚན་མེད་དེ་བཞིན་ཉིད་བསྒོམ་པའི་དང་།མཚན་བཅས་ལྷ་བསྒོམ་པའི་ཅིག་ཅར་བའོ། །དང་པོ་ནི། ཞི་གནས་ལྷག་མཐོང་དབྱེར་མེད་ཡོངས་རྫོགས་སུ་གསལ་བ་སྟེ། བླ་མ་ལས། ཐིག་ལེ་ཆེན་པོའི་རང་བཞིན་ལ། །བསྒོམ་པ་རྣམ་གསུམ་དུས་གཅིག་རྫོགས། །ཞེས་དང་། ཁོག་གཞུང་ལས། བསྒོམ་པའི་རིམ་པ་བསླབ་བྱ་བྲལ། །མ་བཅོས་ཇི་བཞིན་ངང་བཞག་དང་། །ལྷུན་གྲུབ་དཀྱིལ་འཁོར་འབྱུང་བའི་ཕྱིར། །མི་གནས་གནས་ལ་གནས་པར་བསྒོམ། །ཞེས་སོ། །གཉིས་པ་ནི། ཆོ་གའི་ཡན་ལག་ལ་མ་ལྟོས་པར་སྐད་ཅིག་དྲན་རྫོགས་སུ་བསྐྱེད་ཅིང་གསལ་བ་སྟེ། རྒྱས་པ་ལས། སྐད་ཅིག་སྐུར་གསལ་འོད་དུ་འབར། །སྙིང་པོ་བརྗོད་པས་འཁོར་ལོར་ཤར། །ཞེས་སོ། །གསུམ་པ་འབྲས་བུ་ནི། རིག་འཛིན་བཞིའི་ཆར་གཏོགས་པའི་ཡེ་ཤེས་ཆིག་ཆོད་དུ་མངོན་དུ་གྱུར་པ་སྟེ། འདི་ཉིད་ལས། མཉམ་པའི་དམ་ཚིག་ལ་གནས་ན། །མཉམ་རྫོགས་ཆེན་པོ་ཐོབ་པར་འགྱུར། །ཞེས་དང་། བྱེ་བྲག་བསྟན་པ་ལས།རིམ་བྲལ་དེ་ཉིད་གསལ་གྱུར་འདྲེལ། །སྐབས་ཀྱི་རྫོགས་པ་ཆེན་པོར་བརྗོད། །ཅེས་གསུངས་སོ། །གཉིས་པ་ཐབས་ལམ་ལས། གདམས་ངག་སྟེང་དང་འོག་གི་སྒོ། །ཞེས་པས་གཉིས་ཏེ། རིམ་གྱིས་པ་སྟེང་སྒོ་དང་། ཅིག་ཅར་བ་འོག་སྒོའོ། །དང་པོ་ནི། འཁོར་ལོ་དྲུག་ལ་བརྟེན་ནས་རྔུབ་དགང་བསྐྱིལ་དབབ་ལ་སོགས་ཏེ་གཏུམ་མོ་ཡེ་ཤེས་ཀྱི་མེ་དང་། ཐིག་ལེ་བྱང་ཆུབ་ཀྱི་སེམས་འབར་འཛག་གི་སྦྱོར་བས་འཁོར་ལོ་བཞིར་བདེ་བའི་ཡེ་ཤེས་རིམ་གྱིས་བསྐྱེད་པའི་ཕྱིར་སྟེང་སྒོ་སྟེ། རྒྱ་མཚོ་ལས། འཁོར་ལོ་གསུམ་གཉིས་སྲོག་ཤིང་གསུམ། ཞེས་སོགས་གསུངས་སོ། །དེ་ལྟར་བསྒོམ་པའི་འབྲས་བུ་ནི། དངོས་སུ་རླུང་སེམས་ལ་དབང་ཐོབ་པས་འོག་སྒོ་ཉམས་སུ་བླང་དུ་རུང་ཞིང་། བརྒྱུད་འབྲས་ནི་འོག་སྒོ་དང་ཐུན་མོང་དུའོ། །གཉིས་པ་ནི། མཁའ་གསང་གཉིས་ལ་བརྟེན་ནས་དབབ་བཟུང་ལྡོག་དགྲམ་ལ་སོགས་པའི་མན་ངག་གིས་བདེ་སྟོང་གཉིས་མེད་ཀྱི་ཡེ་ཤེས་ཅིག་ཅར་དུ་ཉམས་སུ་མྱོང་བར་བྱེད་པ་སྟེ། འདི་ཉིད་ལས། ལྷ་མོ་ཀླུ་མོ་རིགས་
ངན་མོ། །དབྱེའམ་ཡང་ན་མི་དབྱེ་བར། །བསྙེན་པ་དང་ནི་ཉེ་བསྙེན་དང་། །བསྒྲུབ་པ་དང་ནི་བསྒྲུབ་ཆེན་པོ། །ཡུམ་གྱི་པདྨའི་དཀྱིལ་འཁོར་དུ། །བདེ་བ་ཐུགས་ཀྱི་དཀྱིལ་འཁོར་སྤྲོ། །སངས་རྒྱས་སྤྲིན་ཚོགས་མ་ལུས་པ། །དགྱེས་མཉམ་མཆོག་གི་སྦྱིན་པས་བསྡིམ། །བསྒྲུབ་པ་ཉི་ཟླའི་སྙིང་པོ་དེ། །དཀྱིལ་འཁོར་རྡོ་རྗེ་ལྕེ་ཡིས་བླང་། །ཞེས་སོ། །དེ་ལྟར་ཉམས་སུ་བླངས་པའི་འབྲས་བུ་ནི། སྔ་མའི་འཕྲོས་ལས།མཁའ་འགྲོ་གསལ་འབར་ཚེ་ལ་སོགས། །ཡིད་བཞིན་སྤྲིན་གྱི་བདག་པོར་འགྱུར། །ཞེས་པའི་རྐང་པ་སྔ་མས་ཐུན་མོང་དང་། ཕྱི་མས་མཆོག་གི་དངོས་གྲུབ་བསྟན་ཅིང་། རྒྱས་པ་ལས། ཕུན་སུམ་ཚོགས་པ་ལྷུན་གྲུབ་རྣམས། །གསང་དབང་མཆོག་གིས་སྦྱིན་པར་བྱེད། །ཅེས་སོ། །ཞར་བྱུང་དོགས་པ་བསལ་བ་ནི། དེ་ལྟར་ན་ཐབས་ལམ་དང་གྲོལ་ལམ་གཉིས་ཀས་འབྲས་བུ་ལ་སྦྱོར་ནུས་པར་གསུངས་པའི་ཕྱིར་ལམ་རིས་སུ་ཆད་པ་ཐ་དད་པ་ཞིག་གམ་སྙམ་ན་མ་ཡིན་ཏེ། གྲོལ་ལམ་ཚོགས་བསྒྲུབ་ཀྱི་དུས་སུ་ཡོ་བྱད་ཀྱི་གཙོ་བོ་ཐབས་ཀྱི་ལམ་ཨཱ་ལི་ཀཱ་ལི་གཉིས་ཡིན་ལ། དེ་གཉིས་ཉམས་སུ་ལེན་པ་ལའང་ལྟ་བའི་རྩིས་ཟིན་དགོས་པའི་ཕྱིར། དངོས་སུ་འདྲེལ་བ་ཡིན་ནོ། །བཞི་པ་གདམས་ཤིང་བསྟན་ལ་གཏད་པ་ལ། དགོས་ཆེད། ངོ་བོ། སྒྲ་དོན། རྣམ་གྲངས་སོ། །དང་པོ་ནི། བསྟན་པའི་སྙིང་པོ་དར་ཞིང་མི་ནུབ་པར་བྱ་བའི་ཆེད་དུའོ། །གཉིས་པ་ནི། འཁོར་རྣམས་ལ་ཟབ་མོའི་རྒྱུད་གཅེས་སྤྲས་ཀྱི་སྒོ་ནས་གདམས་ཤིང་གཏད་པའོ། །གསུམ་པ་ནི། གདམས་པའང་ཡིན་ལ་གཏད་པའང་ཡིན་པ་དེའི་ཕྱིར་རོ། །བཞི་པ་ལ། གདམས་པ་དང་། གཏད་པའོ། །དང་པོ་ནི། རྒྱུད་དབུ་ཞབས་ཀྱི་བརྗོད་བྱ་སྣང་བཞིར་འདུས་པའི་ཕྱིར་གདམས་པ་བཞི་ལས། རང་བཞིན་གྱི་སྣང་བ་རྟོགས་བྱར་གདམས་པ་ནི། ཀྱེ་ཕྱོགས་བཅུ་དུས་བཞིའི་རང་བཞིན་འདི། །དེ་བཞིན་གཤེགས་པའི་ངོ་བོ་ཉིད། །ཅེས་སོ། །དེ་ལྟར་ཡིན་ཡང་ལོག་རྟོག་འཁྲུལ་པའི་སྣང་བས་བཅིངས་ཏེ་མ་རྟོགས་པའི་ཕྱིར། དེ་དག་བྱར་གདམས་པ་ནི། གཟུང་འཛིན་སྤྲོས་ལ་འཆེལ་བ་ཡི། །རྣམ་རྟོག་ཞགས་པས་སོ་སོར་འཛིན། །ཞེས་སོ། །དེ་དག་བྱེད་ཀྱི་གཉེན་པོ་ནི་ལམ་ཡིན་པའི་
ཕྱིར། ལམ་གྱི་སྣང་བ་བགྲོད་བྱར་གདམས་པ་སྟེ། ས་རྣམས་ཁྱད་པར་བཀོད་པ་ཡང་། །གསང་བའི་སྙིང་པོར་འགྲོ་བའི་ལམ། །ཞེས་སོ། །དེ་ཉམས་སུ་བླངས་པས་འཁྲུལ་སྣང་གི་ཞེན་པ་དག་པ་ལས་གཞི་ཇི་ལྟ་བར་རྟོགས་པ་ནི་འབྲས་བུ་ཡིན་པའི་ཕྱིར། འབྲས་བུ་བདེ་གཤེགས་ཀྱི་སྣང་བ་ཐོབ་བྱར་གདམས་པ་སྟེ། ཡེ་ཤེས་ངོ་མཚར་རབ་འབྱམས་ཀྱིས། །དོན་དུ་མི་འགྱུར་ཡོངས་མ་གསུངས། །ཞེས་པའོ། །མདོར་ན་གཞི་ལམ་འབྲས་བུ་གསུམ་ཡང་རང་བཞིན་གྱི་རྒྱུད་འདུས་ཏེ། ཡེ་ནས་སངས་རྒྱས་པ་ལས་མི་འགྱུར་བར་གདམས་པ་གཉིས་པ་གཏད་པ་ནི། ཐུགས་ཐིག་ལས། སྟོན་པ་གང་གིས་གང་ཞིག་ལ། །གཏད་པ་གང་དེ་ཅི་ཡི་ཕྱིར། །ཞེས་པས་བཞི་སྟེ། གང་གིས། གང་ལ། གང་གི་ཕྱིར། ཇི་ལྟར་གཏད་པའོ། །དང་པོ་ནི། སྐུ་ལྔ་ལྷུན་གྱིས་གྲུབ་པའི་སྟོན་པ་ཀུན་ཏུ་བཟང་པོ་དང་། རྒྱལ་ཚབ་རྒྱུད་ཀྱི་སྟོན་པ་རིགས་ལྔས་གཏད་དེ། དེ་ལས། སྟོན་པ་གང་རུང་རྡོ་རྗེ་འཛིན། །རྒྱལ་ཚབ་རྒྱུད་ཀྱི་སྐྱེས་བུ་གཉིས། །ཞེས་སོ། །གཉིས་པ་ནི། གཏད་པའི་ཡུལ་གསུམ་སྟེ། སྡུད་པ་པོ་དང་། ཕྱི་རབས་ཀྱི་གང་ཟག་ཆོས་མིག་ཅན་དང་། མ་མོ་མཁའ་འགྲོ་ལ་གཏད་དེ། ཁོག་གཞུང་ལས། སྡུད་པ་པོ་དང་བུད་མེད་དང་། །རྣལ་འབྱོར་མིག་ལྡན་ལ་སོགས་པའོ། །ཞེས་སོ། །གསུམ་པ་ནི། རྒྱལ་ཚབ་རྒྱུད་ཀྱི་སྟོན་པར་དབྱུང་བར་བྱ་བའི་ཕྱིར་སྡུད་པ་པོ་ལ་གཏད། མི་ནུབ་པར་བྱ་བའི་ཕྱིར་གང་ཟག་ཆོས་མིག་ཅན་ལ་གཏད། ཕྱོགས་བཅུར་སྤེལ་ཞིང་བྱིན་ཆེ་བར་བྱ་བའི་ཕྱིར་མ་མོ་དང་མཁའ་འགྲོ་ལ་གཏད་པའོ། །བཞི་པ་ནི། གཏད་བྱའི་ཡུལ་གསུམ་ལས། སྡུད་པ་པོ་ལ་གཏད་པ་ནི། འདི་ཉིད་ལས། དེ་བཞིན་གཤེགས་པ་ཐམས་ཅད་ལ། །ཞེས་སོགས་རྐང་པ་ལྔའོ། །གཉིས་པ་གང་ཟག་ཆོས་མིག་ཅན་ལ་གཏད་པ་ནི། དེ་བཞིན་གཤེགས་པ་ཐམས་ཅད་ཀྱི། །ཕྱག་རྒྱ་གསང་ཆེན་སྙིང་པོ་འདི། །ཞེས་སོགས་རྐང་པ་བདུན་ནོ། །གསུམ་པ་མ་མོ་དང་མཁའ་འགྲོ་ལ་གཏད་པ་ནི། རྒྱས་པ་ལས། ང་ཡི་ཐུགས་ཀྱི་སྙིང་པོ་འདི། །ཕྱོགས་བཅུ་ཀུན་ཏུ་སྤེལ་བ་དང་། །དེ་ཡི་གཟུངས་ལ་གཏད་པ་ནི། །ཡིད་བཞིན་
མཛོད་འབྱོར་བཀའ་ཡི་གནས། །ཞེས་སོགས་གསུངས་སོ། །ལམ་གྱི་དོན་རྒྱས་པར་བཤད་ཟིན་ཏོ།། །།གསུམ་པ་ཤེས་བྱ་འབྲས་བུའི་རྒྱུད་ལ། བདག་དོན་གྲུབ་པ་དང་། གཞན་དོན་མཛད་པའོ། །དང་པོ་ལ། ཐོབ་ཚུལ་མཚན་ཉིད། རྣམ་གྲངས་སོ། །དང་པོ་ལའང་། ཐེག་པ་ཐུན་མོང་གི་དང་། མཆོག་གི་ཐོབ་ཚུལ་ལོ། །དང་པོ་ནི། འདི་ཉིད་ལས། དེ་ནས་ས་བཅུ་རིམ་གྱིས་འབྱང་། །བླ་མེད་བྱང་ཆུབ་ཡང་དག་འཐོབ། །ཅེས་སོ། །གཉིས་པ་ལ། དངོས་དང་། བརྩད་པ་སྤང་བའོ། །དང་པོ་ནི། གཞི་ཇི་ལྟ་བ་བཞིན་མངོན་དུ་བྱས་པས་སྤང་ཐོབ་མེད་པར་སྐུ་དང་ཡེ་ཤེས་ཀྱི་དཀྱིལ་འཁོར་དུ་རང་སྣང་བའོ། །དེ་ལྟར་ཡང་འདི་ཉིད་ལས།ངོ་མཚར་ཆོ་འཕྲུལ་རྨད་ཀྱི་ཆོས། །གཞན་ན་ཡོད་འོང་མ་ཡིན་ཏེ། །ཐབས་ལ་བརྟེན་པའི་ཤེས་རབ་ཉིད། །དེ་ལྟ་བུ་ཡི་ངང་དུ་བྱུང་། །ཞེས་དང་། བསམ་གཏན་མིག་སྒྲོན་གྱི་རང་འགྲེལ་ལས། དོན་དུ་རང་རིག་པ་དེ་བཞིན་ཉིད་དུ་སོན་པ་ཉིད་སངས་རྒྱས་ཀྱི་འབྲས་བུ་ཐོབ་ཅེས་བྱ་སྟེ། དེ་ཡང་རེ་ཞིག་རྟོག་པ་དང་བསྒྲུབ་པའི་ངོ་བོར་བསྟན་གྱི། དོན་དུ་བདག་ཉིད་དུ་གྱུར་པ་ལས། ཐོབ་པ་མེད་དེ། ཞེན་པ་དག་པ་ཙམ་མོ། །ཞེས་སོ། །གཉིས་པ་ནི། ཁ་ཅིག་ན་རེ། འབྲས་བུ་ཐོབ་པའི་ཚེ་གཞི་དུས་ཀྱི་མ་རིག་པ་སྤངས་སམ་མ་སྤངས། དང་པོ་ལྟར་ན། གཞི་ཇི་ལྟ་བ་བཞིན་མངོན་དུ་བྱས་པ་མ་ཡིན་པར་ཐལ། གཞིའི་དུས་ན་མ་རིག་པ་དང་དབྱེར་མེད་དུ་ཡོད་པའི་ཕྱིར། འདོད་ན། གཞི་ཇི་ལྟ་བ་བཞིན་མངོན་དུ་བྱས་པའི་དམ་བཅའ་ཉམས། གཉིས་པ་ལྟར་ན། སེམས་ཅན་དང་ཁྱད་པར་མེད་པར་ཐལ། མ་རིག་པ་མ་སྤངས་པའི་ཕྱིར། འདོད་ན་ལམ་རྒྱུད་ལ་བརྟེན་པ་དོན་མེད་དོ་ཞེ་ན། ལན་ནི། སངས་རྒྱས་པའི་ཚེ་དྲི་མ་རང་བཞིན་པ་སྔར་ཡོད་གསར་དུ་སྤངས་པའམ། ཡོན་ཏན་སྔར་མེད་གསར་དུ་བསྒྲུབས་པ་ནི་ཅི་ཡང་མེད་པའི་ཕྱིར་སྐྱོན་སྔ་མ་མེད་ལ། འཆིང་གྲོལ་མེད་ཀྱང་མེད་པའི་རང་བཞིན་མ་ཤེས་པས་ཁྱད་པར་ཡོད་ན་ཅི་འགལ་ཏེ་སྐྱོན་ཕྱི་མའང་མེད་དེ། ཡང་ཁ་ཅིག །མདོ་སྔགས་ཀྱི་འབྲས་བུ་ལ་ཁྱད་པར་ཡོད་དམ་མེད། ཁྱད་པར་མེད་ན། རྒྱུའི་
ཐེག་པའི་འབྲས་བུ་ཀུན་ཏུ་འོད་དེ་གསང་སྔགས་ཀྱི་ཡང་མཐར་ཐུག་གི་འབྲས་བུར་འགྱུར་པས། དེ་ནས་གསང་སྔགས་ལ་བགྲོད་མི་དགོས་པར་ཐལ། གཅིག་པའི་ཕྱིར། འདོད་ན། ཐབས་ཞགས་ལས། ཀུན་ཏུ་འོད་ལས་འདས་ནས་སུ། །པདྨ་ཅན་དུ་གྱུར་པ་ན། །ཞེས་དང་། དབྱིག་གི་སྒྲོན་མ་ལས། ཁྱོད་ཀྱི་མཐར་ཕྱིན་ཀུན་ཏུ་འོད། །ཐབས་ཆེན་ཐེག་པའི་བསྡི་གནས་ས། །ཞེས་ད་གདོད་གསང་སྔགས་སུ་བགྲོད་དགོས་པར་བཤད་པ་དང་འགལ་ལོ། །དང་པོ་ལྟར་ན།གསང་སྔགས་ཉིད་རིང་ལམ་དུ་ཐལ། ཐུན་མོང་གི་འབྲས་བུ་ཐོབ་ཟིན་ནས་ཀྱང་བགྲོད་དགོས་པའི་ཕྱིར་ཞེ་ན། ལན་དུ། རོག་བདེ་གཤེགས་ཆེན་པོ་ན་རེ།འདོད་པས་བསྒྲུབས་པའི་འབྲས་བུ་རེ་རེ་ཐུན་མོང་གི་ཐེག་པ་ཀུན་གྱིས་ཀྱང་མི་བསླུ་བར་ཐོབ་པས་ཐ་དད་པར་བཤད་པ་དང་ཡང་མི་འགལ་ཏེ། ནོར་བུ་ཕལ་པའི་གླིང་དོན་གྲུབ་པ་བཞིན་ནོ། །མཐར་ཐུག་བླ་ན་མེད་པའི་འབྲས་བུ་གཅིག་ཏུ་གྱུར་པས་གཅིག་པར་བཤད་པ་དང་ཡང་མི་འགལ་ཏེ། ཡིད་བཞིན་གྱི་ནོར་བུའི་གླིང་དོན་གྲུབ་པ་བཞིན་ནོ། །ཞེས་གསུང་བ་ནི་བསྔགས་པར་འོས་པའོ། །ཁ་ཅིག །གསང་སྔགས་ཀྱི་ལམ་བདེ་ཞིང་མྱུར་བའི་ཐབས་ཀྱིས་ཁྱད་པར་དུ་བྱས་ཀྱི། དམིགས་ཡུལ་མཐར་ཐུག་གི་འབྲས་བུ་ལ་ཁྱད་པར་མེད་དོ། །ཞེས་ཟེར། དེ་མི་རིགས་ཏེ། མདོ་སྔགས་གཉིས་ལ། དབང་དང་ཤེས་འཇུག་རྟོགས་གོམས་ཀྱི་ལམ་ལ་ཁྱད་པར་ཡོད་པ་ལྟར་མཐར་ཐུག་གི་འབྲས་བུ་ལའང་ཡོད་དགོས་ཏེ། གསང་སྔགས་ཀྱི་དབང་སོགས་ཀྱི་རྒྱུ་མེད་པའི་གསང་སྔགས་ཀྱི་མཐར་ཐུག་གི་འབྲས་བུ་ཐོབ་པ་མི་སྲིད་པའི་ཕྱིར། རྒྱུའི་ཁྱད་པར་གྱིས་ངེས་པར་འབྲས་བུའི་ཁྱད་པར་བསྐྱེད་པས་ཁྱབ་པའི་ཕྱིར་དང་། མདོ་སྔགས་གཉིས་རྒྱུ་འབྲས་ཀྱི་ཐེག་པ་ཡིན་པས་སྔགས་ཀྱི་སློབ་ལམ་རྫོགས་པ་ན། དེའི་སྔ་ལོགས་སུ་མདོའི་བསླབ་ལམ་རྫོགས་པས་ཁྱབ་པའི་ཕྱིར་རོ། །ཡང་ཁ་ཅིག །ལམ་གོམས་པའི་རྒྱུ་རྐྱེན་ལས་བྱུང་བའི་ཕྱིར་འབྲས་བུ་འདུས་བྱས་སུ་འགྱུར་རོ་ཞེ་ན། མ་ཡིན་ཏེ། རང་གི་སེམས་ཉིད་སྐུ་དང་ཡེ་ཤེས་ཀྱི་དཀྱིལ་འཁོར་དུ་ཡེ་ནས་བཞུགས་པ་ཉིད། ལམ་གྱིས་ཞེན་པ་དག་པའི་དོན་དེར་གསལ་བའི་ཕྱིར། དཔེར་ན་སྤྲིན་དེངས་པས་ཉི་
མའི་དཀྱིལ་འཁོར་སྣང་བ་བཞིན་ནོ། །དེའང་འདི་ཉིད་ལས། ཤེས་རབ་དབྱིངས་ཀྱི་དེ་བཞིན་ཉིད། །ཐབས་ཀྱི་ཕྱག་རྒྱར་གྱུར་པའི་ཕྱིར། །ཞེས་སོ། །དེ་ལྟར་ན་མཚན་མ་ཅན་དུ་འགྱུར་ཏེ། འབྲས་བུ་ཀུན་རྫོབ་སྐུ་དང་ཡེ་ཤེས་སུ་སྣང་བའི་ཕྱིར་ཟེར་ན། མ་གྲུབ་སྟེ། དེ་ལྟར་སྣང་ཡང་དེའི་ངོ་བོ་ཅིར་ཡང་གཟུང་དུ་མེད་པས་ན་ཡོད་པའི་མཚན་མར་མི་འགྱུར་ཞིང་། དེས་དོན་བྱེད་མི་ནུས་པའང་མ་ཡིན་ཏེ་གཞན་སྣང་གཟུགས་སྐུ་གཉིས་ཀྱང་རང་སྣང་ཡིན་པའི་ཕྱིར་སྒྱུ་མ་ལྟ་བུ་འཕྲིན་ལས་ཀྱི་དོན་མཛད་ལ། དེའི་དུས་ནའང་ངོ་བོ་ཉིད་གཞན་དུ་འགྱུར་བ་མ་ཡིན་ཏེ།འདུས་མ་བྱས་ཤིང་སྐྱེ་འཇིག་དང་བྲལ་བ་ཆོས་ཀྱི་སྐུ་ལས་མི་གཡོ་བའི་ཕྱིར་རོ། །དེ་ལྟར་ཡང་། ཡེ་ཤེས་རོལ་པ་ཉིད་ཀྱང་གསོག །རྒྱལ་བ་མངོན་བྱུང་སྐྱོབ་པ་དང་། །བྱིན་བརླབས་སྟོན་པའང་དེ་བཞིན་ཏེ། །བྱ་བྱེད་ནུས་པའི་གཟི་བྱིན་གྱིས། །སྒྱུ་མ་རྡོ་རྗེ་བཙན་པོ་མཆོག །ཅེས་སོ། །གཉིས་པ་མཚན་ཉིད་ནི།རྒྱུད་དག་པའི་སངས་རྒྱས་ཐམས་ཅད་ཀྱི་དགོངས་པ་ཆུ་ལ་ཆུ་བླུགས་པ་ལྟར་རོ་གཅིག་ཏུ་གྱུར་པའམ། ཤིང་སྤུངས་པའི་མེ་དཔུང་ལྟར་རྒྱུད་ཐ་དད་པའང་མ་ཡིན་ཏེ། གཅིག་དང་དུ་མ་ལ་སོགས་པའི་མཐའ་ཐམས་ཅད་མ་སྤངས་ལ་བྲལ་བའི་ཕྱིར། བརྗོད་དུ་མེད་པའི་དོན་མངོན་དུ་གྱུར་པས་གཟུང་ཡུལ་ལས་གྲོལ་བའོ། །དེའང་རིམ་གསུམ་ལས། མཚན་ཉིད་གཞི་དང་ལྡན་པའི་ཕྱིར། །མ་ལུས་གཅིག་མིན་ཐ་དད་མིན། །ཞེས་དང་། ཁོག་གཞུང་ལས། མཚན་ཉིད་གཅིག་དང་དུ་མ་མེད། །ཅེས་སོ། །དེའང་གང་ཞེ་ན། སངས་རྒྱས་རྣམས་ལ་ཆོས་སྐུས་ཁྱབ་པ་གཅིག་ལས་མ་གཡོས་པར་གཟུགས་སྐུ་ཐ་དད་དུ་སྣང་བའི་ཕྱིར་གཅིག་དང་བྲལ་ལ། ཁྱབ་བྱ་གཟུགས་སྐུ་ཐ་དད་ཀྱི་རང་བཞིན་ཆོས་ཀྱི་སྐུ་ལས་མ་གཡོས་པས་རྒྱུད་ཐ་དད་མེད་པའི་ཕྱིར་དུ་མ་དང་བྲལ་ལོ། །དེ་ལ་ལྟོས་པའི་གཉིས་ཀ་དང་གཉིས་ཀ་མ་ཡིན་པའི་མུ་ཡང་མེད་དོ། །གཅིག་དང་དུ་མ་མ་གྲུབ་པས་དེའི་མུ་ཁེགས་པའི་ཕྱིར། དེ་ལས་གཞན་དུ་སངས་རྒྱས་ཀྱིས་ཀྱང་གཟིགས་པར་མི་འགྱུར་ཏེ།གཟིགས་བྱ་གཟིགས་བྱེད་ཀྱི་ཡུལ་ལས་འདས་པའི་ཕྱིར། དེ་བས་ན་དགོངས་པ་ཡུལ་དང་ཡུལ་ཅན་
མེད་པར་རང་གསལ་བའོ། །དེ་ལྟར་ཡང་། གཅིག་དང་དུ་མ་བྲལ་བ་ཡི། །མཐའ་དང་དབུས་མེད་དེ་བཞིན་ཉིད། །སངས་རྒྱས་ཀྱིས་ཀྱང་མི་གཟིགས་ཏེ། །རང་བྱུང་ཡེ་ཤེས་གནས་མེད་སྣང་། །ཞེས་སོ། །གསུམ་པ་རྣམ་གྲངས་ལ། མིང་གི། ངོ་བོའི། སའི་རྣམ་གྲངས་སོ། །དང་པོ་ནི། ལམ་རིམ་ལས། ཐུན་མོང་མིན་པའི་རྒྱལ་མིང་གྲངས། །བདེ་གཤེགས་དེ་བཞིན་གཤེགས་པ་སྟེ། །བཅོམ་ལྡན་འདས་དང་སངས་རྒྱས་དང་། །དགྱེས་ཆེན་བརྗོད་སོགས་བསམ་མི་ཁྱབ། །ཅེས་སོ། །གཉིས་པ་ལ། ཐུན་མོང་གི་དང་། མཆོག་གིའོ། །དང་པོ་ལ། རྟེན་དང་། བརྟེན་པ་གཉིས་ལས། དང་པོ་ནི། སྐུ་གསུམ་སྟེ། འདི་ཉིད་ལས། ཆོས་སྐུ་དཔག་མེད་བརྗོད་དུ་མེད། །ལོངས་སྤྱོད་ཟག་མེད་རིན་ཆེན་གཏེར། །སྤྲུལ་པ་བྱེ་བ་བསམ་མི་ཁྱབ། །ཅེས་སོ། །གཉིས་པ་ནི། ཡེ་ཤེས་བཞི་སྟེ། མདོ་སྡེ་རྒྱན་ལས། མེ་ལོང་ཡེ་ཤེས་མི་གཡོ་སྟེ། །ཡེ་ཤེས་གསུམ་ནི་དེ་ལ་བརྟེན། །མཉམ་པ་ཉིད་དང་སོ་སོར་རྟོག །བྱ་བ་གྲུབ་པ་ཁོ་ནའོ། །ཞེས་སོ། །གཉིས་པ་ལ། མ་འདྲེས་རྣམ་གྲངས་སུ་སྣང་བ་དང་།དབྱེར་མེད་ལྷུན་གྲུབ་ཀྱི་ངོ་བོའོ། །དང་པོ་ལ། རྒྱས་འབྲིང་བསྡུས་གསུམ་ལས།དང་པོ་རྒྱས་པ་ནི། སྐུ་གསུང་ཐུགས་ཡོན་ཏན་ཕྲིན་ལས་ལྔ་པོ་རེ་རེ་ལའང་བསམ་གྱིས་མི་ཁྱབ་པ་སྟེ། དེ་ལ་སྐུ་ནི། འདི་ཉིད་ལས། ཀུན་ཏུ་སྐུ་བསམ་གྱིས་མི་ཁྱབ་པ་དང་། ཞེས་སོ། །གསུང་ནི། ཀུན་ཏུ་གསུང་བསམ་གྱིས་མི་ཁྱབ་པ་དང་། ཞེས་སོ། །ཐུགས་ནི། ཀུན་ཏུ་ཐུགས་བསམ་གྱིས་མི་ཁྱབ་པ་དང་།ཞེས་སོ། །ཡོན་ཏན་ནི། རྒྱས་པ་ལས། ཡེ་ཤེས་སྤྱན་གྱིས་སྤྲས་པའི་ཕྱིར། །ཞིང་དང་ཡོན་ཏན་བསམ་མི་ཁྱབ། །ཅེས་སོ། །ཕྲིན་ལས་ནི། འདི་ཉིད་ལས།ཕྱོགས་བཅུའི་འཇིག་རྟེན་རྡུལ་སྙེད་དུ། །རྒྱལ་བའི་དོན་རྣམས་རྡུལ་ཕྲན་སྙེད། །སྤྲུལ་པ་རྡུལ་ཕྲན་བསམ་ཡས་ཀྱིས། །སྐད་ཅིག་ཡུད་ལ་ལྷུན་གྱིས་གྲུབ། །ཅེས་སོ། །གཉིས་པ་འབྲིང་དུ་དབྱེ་ན། ཁོག་གཞུང་ལས། དེ་ཡང་སྐབས་ཀྱིས་ལྔ་ལྔ་སྟེ། །ཞེས་པས་རེ་རེ་ཡང་ལྔ་ལྔའོ། །དེ་ལས། དང་པོ་སྐུ་ལྔ་ནི། རང་
དོན་རྟོགས་པ་མཐར་ཕྱིན་པའི་ངོ་བོ་དབྱིངས་ཐོག་ཏུ་རིག་པའི་ཡེ་ཤེས་གྲོལ་བ་ནི་ཆོས་ཀྱི་སྐུ་སྟེ། འདི་ཉིད་ལས། དེ་བཞིན་ཉིད་ལས་མ་གཡོས་ཀྱང་། །ཞེས་དང་། སྐྱེ་ཤི་མེད་པའི་གཡུང་དྲུང་སྐུ། །ཞེས་སོ། །དེ་ལས་མ་གཡོས་པར་གདུལ་བྱ་ལས་དག་པ་ས་བཅུ་པའི་ངོར་རྟེན་ལུས་ཉིད་ཟག་མེད་དུ་གྱུར་པའི་བརྒྱུད་འབྲས་ཐུན་མིན་གྱི་མཚན་དཔེ་དང་ལྡན་པར་སྣང་བ་ལོངས་སྐུ་སྟེ། འདི་ཉིད་ལས། ཡང་དག་ཐར་པའི་གཟུགས་སྐུ་དང་། །ཞེས་སོ། །གདུལ་བྱ་མ་དག་པ་འགྲོ་དྲུག་ལ་མོས་པ་དང་། མཐུན་པར་སྣ་ཚོགས་སུ་སྣང་ནས་དོན་མཛད་པ་ནི་སྤྲུལ་པའི་སྐུ་སྟེ།འདི་ཉིད་ལས། འགྲོ་བ་མ་ལུས་གདུལ་བའི་ཕྱིར། །མཐུན་བྱས་སྐུ་ནི་སྣ་ཚོགས་སྟོན། །ཞེས་སོ། །དེ་ལྟར་གཟུགས་སྐུ་གཉིས་སུ་སྣང་ཡང་རང་རྒྱུད་པ་མེད་དེ། ཆོས་ཀྱི་སྐུ་ལས་མ་གཡོས་པའམ། ཆོས་སྐུ་དང་གཟུགས་སྐུ་དབྱེར་མི་ཕྱེད་པ་ནི་རྡོ་རྗེའི་སྐུ་སྟེ། འདི་ཉིད་ལས། སྟོན་ཉིད་སྒྱུ་མ་མིག་ཡོར་ཚུལ། །ཚུལ་ཉིད་དབྱིངས་ལས་གཡོས་པ་མེད། །ཅེས་སོ། །དེ་དག་རིག་པའི་ཡེ་ཤེས་ལ་ལྷུན་གྱིས་རྫོགས་པས་ཆོས་སྐུ་ལས་མ་གཡོས་བཞིན་དུ་གདུལ་བྱའི་ལས་དང་མཐུན་པར་སྣ་ཚོགས་སུ་སྣང་བ་ནི་མངོན་པར་བྱང་ཆུབ་པའི་སྐུ་སྟེ། འདི་ཉིད་ལས། མ་གཡོས་བཞིན་དུ་སྣ་ཚོགས་པའི། །དེ་ཚེ་མི་མཐུན་སྣ་ཚོགས་ལ། །སོ་སོ་འདྲ་བར་སྣང་བ་ནི། །དེ་བཞིན་ཉིད་ལས་མ་གཡོས་ཀྱང་། །ལས་འཕྲོའི་དབང་གིས་སོ་སོར་སྣང་། །ཞེས་སོ། །གཉིས་པ་གསུང་ལྔ་ནི། སྟོན་པ་སྐུ་ལྔས་རང་རང་གི་འཁོར་ལ་བརྡའ་སྤྲོད་པའི་བདག་ཉིད་ཅན་ཏེ། དེའང་ཆོས་ཉིད་སྨྲ་བརྗོད་དང་བྲལ་བ་ཉིད་བརྗོད་བྱ་ཀུན་གྱི་གཞིར་གྱུར་པའི་ཆ་ནས་ཆོས་སྐུ་སྐྱེ་མེད་དོན་གྱི་གསུང་སྟེ། འདི་ཉིད་ལས། སྒྲ་དང་མིང་ཚིག་ཀུན་ལས་འདས། །སྣ་ཚོགས་སྒྲ་རྣམས་གསལ་བར་འབྱུང་། །ཞེས་སོ། །མེ་ལོང་གིས་བྱད་ཀྱི་དྲི་མ་ངོས་ཟིན་ནས་སེལ་བར་བྱེད་པ་ལྟར་སྐུའི་བརྡས་འཁོར་གྱི་བློ་ལ་དོན་འཇལ་བར་སྟོན་པ་ནི་ལོངས་སྐུ་དགོངས་པ་བརྡའི་གསུང་སྟེ། དེ་བཞིན་གསུང་མཆོག་མི་སྨྲ་སྟེ། །སྐུ་ཡིས་ཆོས་རྣམས་འཇལ་བར་སྟོན། །ཞེས་སོ། །
གང་ལ་གང་འདུལ་གྱི་སྒྲ་སྐད་དང་མཐུན་པར་དུས་གཅིག་ཏུ་ཆོས་སྟོན་པ་ནི་སྤྲུལ་སྐུ་བརྗོད་པ་ཚིག་གི་གསུང་སྟེ། བརྗོད་མེད་དེ་ཉིད་སྣ་ཚོགས་སྒྲ། །ཀུན་ལ་གྲགས་ཤིང་སོ་སོར་འཇལ། །ཞེས་སོ། །སྒྲ་སྐད་ཐམས་ཅད་གྲག་སྟོང་གཉིས་སུ་མེད་པས་མཐའ་གཉིས་ལས་གྲོལ་བ་ནི་དབྱེར་མེད་རྡོ་རྗེའི་གསུང་སྟེ། སྒྲ་ཉིད་མ་ཆགས་ངང་དུ་གསུངས། །གསུངས་པ་ཉིད་ན་བརྗོད་དུ་མེད། །ཅེས་སོ། །སྒྲ་ཐམས་ཅད་རང་རིག་པའི་ངང་དུ་ལྷུན་གྱིས་གྲུབ་པས་ཅིར་ཡང་མི་འགག་པ་རིག་པ་བྱིན་རློབས་ཀྱི་གསུང་ནི་མངོན་བྱང་གི་གསུང་སྟེ། གྲོལ་ཐར་ལམ་དང་འཁོར་བའི་སྒྲ། །ཇི་སྐད་བརྗོད་ཀྱང་གསུང་མཆོག་སྟེ། །ཞེས་སོ། །གསུམ་པ་ཐུགས་ལྔ་ནི། ཡེ་ཤེས་ལྔ་ལ་བྱ་སྟེ། སྟོང་པ་ཉིད་ཀྱི་ཡེ་ཤེས་ནི་ཆོས་སྐུ་རྣམ་པར་མི་རྟོག་པའི་ཐུགས་ཏེ། ལམ་རིམ་ལས།དངོས་པོ་གཉིས་ཆོས་ཡན་ལག་བཅས། །སེམས་ཅན་ཕྱིར་ན་སྟོང་ཆེན་པོའི། །ཡེ་ཤེས་ཟུག་རྔུ་ལྡན་བྲལ་བའི། །བདེ་བ་ཆེན་པོ་མཆོག་གི་ཐུགས། །ནམ་མཁའ་ལྟ་བུར་ཡེ་གསལ་སྟོང་། །ཞེས་སོ། །མཉམ་པ་ཉིད་ཀྱི་ཡེ་ཤེས་ནི་ལོངས་སྐུ་མཉམ་པ་ཆེན་པོའི་ཐུགས་ཏེ། དེ་ལས། ཆེན་པོ་ལྟ་བུར་ཐམས་ཅད་ལ། །མི་ཕྱེད་བླང་དོར་མེད་མཉམ་ཞིང་། །མཉམ་པ་ཉིད་ལས་མི་གཡོ་བ། །མཉམ་པ་ཆེན་པོ་མཆོག་གི་ཐུགས། །ཞེས་སོ། །བྱ་གྲུབ་ཡེ་ཤེས་ནི་སྤྲུལ་སྐུ་འགྲོ་བ་སྒྲོལ་བའི་ཐུགས་ཏེ། དེ་ལས། ཐུགས་རྗེ་ཆེན་པོས་འདྲེལ་བ་དང་། །ཉིད་ཀྱི་དབྱིངས་ལས་མི་གཞན་ཕྱིར། །བྱ་བྱེད་མེད་པར་རྣམ་བཞི་ཡིས། །འགྲོ་བ་ཀུན་སྒྲོལ་ཐུགས་ཆེན་ཡིན། །ཞེས་སོ། །སོ་སོར་རྟོག་པའི་ཡེ་ཤེས་ནི་མི་ཕྱེད་རྡོ་རྗེའི་ཐུགས་ཏེ། དེ་ལས། ཆོས་དང་ཆོས་ཅན་ཀུན་བྲལ་བ། །རང་སྤྱི་དབྱེར་མེད་དུས་གཅིག་ཏུ། །མཁའ་ལ་འཇའ་ལྟར་གསལ་བ་ནི། །མི་ཕྱེད་རྡོ་རྗེའི་ཐུགས་མཆོག་གོ། །ཞེས་སོ། །མེ་ལོང་ལྟ་བུའི་ཡེ་ཤེས་ནི་མངོན་བྱང་གི་ཅིར་ཡང་སལ་ལེར་མཁྱེན་པའི་ཐུགས་ཏེ། དེ་ལས། ཆོས་སྤྱི་རང་མཚན་དབྱེར་མེད་ཀུན། །ཡུལ་མེད་མེ་ལོང་ལྟར་གསལ་བ། །མངོན་སུམ་ཀུན་གྱི་མཆོག་ཡིན་ཏེ། །རྣམ་པར་མི་རྟོག་མཆོག་གི་ཐུགས། །ཞེས་སོ། །བཞི་པ་ཡོན་ཏན་ལ་ལྔ་ལས། རྣམ་པར་
དག་པའི་ཞིང་ཁམས་ནི། འདི་ཉིད་ལས། ཕྱོགས་བཅུ་ཐམས་ཅད་སངས་རྒྱས་ཞིང་། །ཞེས་དང་། ཞིང་ཁམས་རྣམ་དག་བསམ་ཡས་དང་། །ཞེས་སོ། །རྒྱ་ཚད་བྲལ་བའི་གཞལ་ཡས་ཁང་ནི། རྒྱ་དང་བྲལ་བའི་གཞལ་ཡས་ཁང་། །ཞེས་སོ། །གསལ་ཞིང་དག་པའི་འོད་ཟེར་ནི། །འོད་ཟེར་འཕྲོ་བའི་ཚོགས་ཆེན་པོ། །ཞེས་སོ། །ཁྱད་པར་དུ་འཕགས་པའི་གདན་ཁྲི་ནི། སེང་གེ་གླང་ཆེན་རྟ་རྨ་བྱ། །ནམ་མཁའ་ལྡིང་གི་ཁྲི་ཆེན་ལ། །ཉི་ཟླ་པདྨ་རིན་པོ་ཆེ། །ཞེས་སོ། །དགྱེས་དགུར་སྤྱོད་པའི་ལོངས་སྤྱོད་ནི། །རོལ་མོ་སྣ་ཚོགས་སྤྲིན་ཕུང་བཞིན། །ཞེས་སོ། །ལྔ་པ་ཕྲིན་ལས་ལྔ་ནི། ཞི་བ་དང་། རྒྱས་པ་དང་། དབང་དང་། དྲག་པོ་དང་། ལྷུན་གྱིས་གྲུབ་པ་སྟེ། རྒྱས་པ་ལས། ཐུགས་རྗེ་ཆེན་པོའི་བྱིན་རློབས་ཀྱིས། །བྱ་བྱེད་མེད་ལས་རྣམ་བཞིར་མཛད། །མཛད་དང་མཛད་པར་བྱ་བ་མེད། །ཅེས་སོ། །གསུམ་པ་ལ། ཅུང་ཟད་བསྡུས་པ་དང་། ཤིན་ཏུ་བསྡུས་པའོ། །དང་པོ་ནི། འདི་ཉིད་ལས། སྐུ་གསུང་ཐུགས་ཀྱི་རྫོགས་པ་ཆེ། །ཡོན་ཏན་ཕྲིན་ལས་ཀུན་ཏུ་རྫོགས། །ཞེས་པས་ལྔ་སྟེ། ཆེ་བའི་ཡོན་ཏན་མ་ལུས་པའི་རྟེན་བྱེད་པས་ན་སྐུ། གདུལ་བྱ་ལ་བརྡའ་སྤྲོད་པས་ན་གསུང་། ཤེས་བྱ་ཐམས་ཅད་མཁྱེན་པས་ན་ཐུགས། མངའ་ཐང་རྫོགས་པས་ན་ཡོན་ཏན། གདུལ་བྱ་འདུལ་བས་ན་ཕྲིན་ལས་ཏེ། དགོངས་འདུས་ལས། རྟེན་བྱེད་པས་ན་སྐུ་ཉིད་དོ། །གོ་བརྡའ་སྤྲོད་པས་ན་གསུང་ཉིད་དོ། །རིག་ཅིང་མཁྱེན་པས་ན་ཐུགས་ཉིད་དོ། །འདོད་རྒུ་འབྱུང་བས་ན་ཡོན་ཏན་ཉིད་དོ། །བྱ་བ་བྱེད་པས་ན་ཕྲིན་ལས་ཉིད་དོ། །ཞེས་སོ། །གཉིས་པ་ནི། རྟེན་སྐུ་དང་། བརྟེན་པ་ཡེ་ཤེས་སོ། །དང་པོ་ནི། སྒྲིབ་བྲལ་གྱི་དགོངས་པ་དབྱིངས་ཡེ་ཟུང་དུ་འཇུག་པའི་ཆོས་སྐུ། དེ་ཉིད་འཁོར་སྨིན་པ་རྒྱ་མཚོ་ལ་ངེས་པ་ལྔ་ལྡན་དུ་སྣང་བ་ལོངས་སྐུ། འཁོར་མོས་པ་རྒྱ་མཚོ་ལ་སྣང་བ་སྤྲུལ་སྐུ། དེ་གསུམ་སྣང་ཆ་མ་འདྲེས་པའི་ཆ་ནས་མངོན་བྱང་། དབྱེར་མི་ཕྱེད་པའི་ངོས་ནས་རྡོ་རྗེའི་སྐུ་སྟེ་ལྔའོ། །དེ་དག་གཅིག་གམ་ཐ་དད་ཅེ་ན། སྐུ་ལྔ་ལྷུན་གྲུབ་ཀྱི་བདག་ཉིད་དུ་ངོ་བོ་གཅིག་
ལ། དེ་ཉིད་ཡོན་ཏན་གྱི་ལྡོག་ཆ་ནས་སྐུ་ལྔར་སྣང་བས་ཐ་དད་སྟེ། མཁའ་ཟླ་དང་ཆུ་ཟླ་བཞིན་ནོ། །དེ་ལྟར་ཡང་འདི་ཉིད་ལས། སྐྱེ་ཤི་མེད་པའི་གཡུང་དྲུང་སྐུ། །ཞེས་པ་ནས། དེ་ཚེ་སྐུ་ལྔ་ཀུན་ཀྱང་རྫོགས། །ཞེས་པའི་བར་གསུངས་སོ། །དེ་ལས་ཀྱང་མངོན་བྱང་དང་རྡོ་རྗེའི་སྐུ་ནི་ཡོན་ཏན་གྱི་ལྡོག་ཆ་ནས་བཏགས་པ་ཙམ་ཡིན་པའི་ཕྱིར་སྐུ་བཏགས་པ་བ་སྟེ། སྐུ་མཚན་ཉིད་པ་ནི་གསུམ་དུ་ངེས་སོ། །གསུམ་ཡང་ཆོས་སྐུ་ནི་བདག་དོན་དགོངས་པའི་ཆ་དང་། གཟུགས་སྐུ་གཉིས་ནི་གཞན་དོན་མཛད་པའི་ཆ་ནས་བཞག་པར་ཤེས་པར་བྱའོ། །གཉིས་པ་ལ། དངོས་དང་། རྩོད་པ་སྤང་བའོ། །དང་པོ་ནི། གློ་བུར་གྱི་སྒྲིབ་པ་མཐའ་དག་མ་སྤངས་བྲལ་བའི་རང་བཞིན་རྟོགས་པའི་ཚེ། གཞི་དོན་གྱི་ཀུན་གཞི་མངོན་དུ་གྱུར་པ་ནི། ཅིར་ཡང་མི་དམིགས་པ་ཆོས་ཀྱི་དབྱིངས་ཀྱི་ཡེ་ཤེས་ཏེ། ལེ་ལག་ལས། རྣམ་རྟོག་ཀུན་གཞི་མ་ཡིན་པ། །རང་བཞིན་མེད་པ་དོན་གྱི་གཞི། །འདི་ནི་ཆོས་ཀྱི་དབྱིངས་ཞེས་བྱ། །དེ་བཞིན་ཉིད་ཀྱི་ཡེ་ཤེས་སོ། །ཞེས་སོ། །དེའི་ཚེ་སྦྱོར་བ་དོན་གྱི་ཀུན་གཞི་གནས་འགྱུར་གསལ་ལ་མི་རྟོག་པས་ཡེ་ཤེས་ལྷག་མ་གསུམ་གྱི་འཆར་གཞིར་གྱུར་པ་ནི་མེ་ལོང་ལྟ་བུའི་ཡེ་ཤེས། ཉོན་ཡིད་གནས་འགྱུར་བཟང་ངན་བླང་དོར་མེད་པ་མཉམ་ཉིད་ཡེ་ཤེས། ཡིད་གནས་འགྱུར་ཤེས་བྱའི་ཡུལ་དུས་གསུམ་གྱི་ཆོས་ཐམས་ཅད་པདྨའི་འདབ་མ་ལྟར་གསལ་ལ་མ་འདྲེས་པར་མཁྱེན་པ་ནི་སོ་སོར་རྟོག་པའི་ཡེ་ཤེས། སྒོ་ལྔ་གནས་འགྱུར་འགྲོ་དོན་མཛད་པ་ལ་ཐོགས་པ་མེད་པ་ལ་བྱ་བ་གྲུབ་པའི་ཡེ་ཤེས་ཏེ། རྣམ་བཀོད་ལས། སྟོང་པའི་ཡེ་ཤེས་དངོས་པོ་མེད། །མེ་ལོང་ཡེ་ཤེས་རྟོག་པ་མེད། །མཉམ་ཉིད་ཡེ་ཤེས་བཟང་ངན་མེད། །ཀུན་རྟོག་ཡེ་ཤེས་མ་འདྲེས་གསལ། །བྱ་བ་ནན་ཏན་མཐར་ཕྱིན་པའོ། །ཞེས་དང་། མདོ་དགོངས་འདུས་ལས། སེམས་ཀྱི་ཆོས་ཉིད་དེ་ཁོ་ན་ཉིད་ལས་ཆོས་ཀྱི་དབྱིངས་ཀྱི་ཡེ་ཤེས་སུ་སྣང་ངོ་། །རྩ་བའི་རྣམ་པར་ཤེས་པ་ལས་ནི་མེ་ལོང་ལྟ་བུའི་ཡེ་ཤེས་སུ་སྣང་ངོ་། །དམིགས་པའི་རྣམ་པར་ཤེས་པ་ལས་མཉམ་པ་ཉིད་ཀྱི་ཡེ་ཤེས་སུ་སྣང་ངོ་། །ཀུན་ཏུ་སྣང་བའི་རྣམ་པར་ཤེས་པ་
ལས་སོ་སོར་རྟོག་པའི་ཡེ་ཤེས་སུ་སྣང་ངོ་། །འཇུག་པའི་རྣམ་པར་ཤེས་པ་ལས་བྱ་བ་གྲུབ་པའི་ཡེ་ཤེས་སུ་སྣང་ངོ་། །ཞེས་དང་།ཐུན་མོང་གི་གཞུང་ལས་ཀྱང་དེ་ལྟར་འབྱུང་སྟེ། ཙནྡྲ་གོ་མིའི་སངས་རྒྱས་ཀྱི་ས་ལས། ཀུན་གཞིའི་རྣམ་ཤེས་གང་ཡིན་པ། །དེ་ནི་མེ་ལོང་ཡེ་ཤེས་འགྱུར། །དེ་ཡང་ཆོས་ཀྱི་དབྱིངས་ཉིད་ཀྱི། །ངོ་བོ་ཉིད་དུ་ཡང་དག་གསལ། །ཉོན་མོངས་ཅན་ཡིད་གནས་གྱུར་པ། །མཉམ་ཉིད་ཡེ་ཤེས་དག་ཏུ་འདོད། །ཡིད་ཀྱི་རྣམ་ཤེས་གནས་གྱུར་པ། །སོ་སོར་རྟོག་པ་ཅན་ཞེས་བྱ། །སྒོ་ལྔའི་རྣམ་ཤེས་གནས་གྱུར་པ། །དེ་ནི་དོན་ཀུན་གྲུབ་པ་ཉིད། །ཅེས་སོ། །གཉིས་པ་ནི། ཁ་ཅིག་ན་རེ། མཁྱེན་པའི་ཡེ་ཤེས་སྐད་ཅིག་ལ་འདས་མ་འོངས་གཉིས་ཀྱི་ཆོས་སྣང་ངམ་མི་སྣང་། གཉིས་པ་ལྟར་ན། བདེན་གཉིས་ལས། མཁྱེན་པའི་སྐད་ཅིག་གཅིག་ཉིད་ཀྱིས། །ཤེས་བྱའི་དཀྱིལ་འཁོར་ཀུན་ཁྱབ་པར། །ཞེས་པ་དང་འགལ།དང་པོ་ལྟར་ན། འགགས་པ་དང་མ་སྐྱེས་པའི་མེད་ཆོས་མངོན་སུམ་དུ་མཁྱེན་པའི་ཕྱིར། གཟུང་དོན་ལ་འཁྲུལ་པའི་ལོག་ཤེས་སུ་ཐལ་ལོ་ཟེར་ན། མ་ཡིན་ཏེ།འདས་པ་བྱུང་ཟིན། མ་འོངས་པ་འབྱུང་རུང་། ད་ལྟར་བ་སྐྱེས་ལ་མ་འགགས་པར་རང་གསལ་འཛིན་མེད་དུ་མཁྱེན་པའི་ཕྱིར། སྐྱོན་མེད་དོ། །ཡང་མཁྱེན་པའི་ཡེ་ཤེས་ཀྱིས་ལམ་མ་སྦྱངས་པར་གྲོལ་བ་མཁྱེན་ནམ་མི་མཁྱེན་ཞེ་ན། མི་མཁྱེན་ཞེས་བྱའོ། །དེ་ལྟར་ན་ཀུན་མཁྱེན་མ་ཡིན་པར་ཐལ་ཞེ་ན། མཁྱེན་པར་འོས་པའམ་སྲིད་པ་མ་ལུས་པ་ཀུན་མཁྱེན་མོད་ཀྱི། ལམ་མ་སྦྱངས་པར་གྲོལ་བ་མི་འོས་ཤིང་སྲིད་པ་མ་ཡིན་པའི་ཕྱིར་མི་མཁྱེན་པས། མཁྱེན་པ་མ་ཡིན་པར་མི་འགྱུར་ན་ཅི་འགལ་ཏེ་ཁྱབ་པ་མེད་དོ། །དཔེར་ན་ལྷའི་བཟོ་བོ་བི་ཤྭ་ཀརྨས་བཟོ་གནས་ཀུན་ཤེས་ནའང་། རྐྱེན་གྱིས་མ་བཅོས་པའི་བཟོ་སྲིད་པ་མ་ཡིན་པའི་ཕྱིར་མི་ཤེས་པ་བཞིན་ནོ། །དེའི་ཕྱིར་ལམ་མ་སྦྱངས་པར་གྲོལ་བ་མི་མཁྱེན་མོད། ལམ་སྦྱངས་ནས་དབང་པོའི་རིམ་པས་ཉེ་འགྱངས་ཅི་རིགས་སུ་གྲོལ་བ་
མཁྱེན་པ་ཡིན་ནོ། །གཉིས་པ་དབྱེར་མེད་ལྷུན་གྲུབ་ཀྱི་ངོ་བོ་ནི། འབྲས་བུ་ཉེར་ལྔ་པོ་དེ་དག་ཀྱང་སྐུ་ལྔའི་བདག་ཉིད་རྒྱལ་བ་དྲུག་པའི་ཡོན་ཏན་གྱི་ལྡོག་པ་ནས་ཤར་ཞིང་། དེའི་ཡོན་ཏན་དུ་འདུ་བའི་ཕྱིར། གཅིག་དང་དུ་མ་ལས་གྲོལ་བའི་བདག་ཉིད་དོ། །དེའང་དགོངས་འདུས་ལས། སངས་རྒྱས་མཉམ་དང་དབྱིངས་སུ་གྲོལ། །དེ་ཉིད་ཆེན་པོར་ལྷུན་གྱིས་གྲུབ། །ཅེས་དང་། རིམ་གསུམ་ལས། འབྲས་བུ་ཡོན་ཏན་ལྷུན་གྲུབ་པས། །ཡིད་བཞིན་ནོར་བུ་ལྟར་སྣང་བའོ། །ཞེས་སོ། །གསུམ་པ་སའི་རྣམ་གྲངས་ནི། འདི་ཉིད་ལས། ས་ཡི་ཁྱད་པར་བཅུ་དང་གསུམ། །ཞེས་པའི་སྐབས་ཀྱི་ས་བཅུ་པ་མན་ཆད་ནི་མཚན་ཉིད་པ་སྟེ། སྤང་བྱ་སྤང་བ་དང་གཉེན་པོ་སྐྱེ་བའི་ས་ཡིན་པའི་ཕྱིར། གསུམ་པོ་ནི་བཏགས་པ་བ་སྟེ། མཐར་ཐུག་འབྲས་བུ་སངས་རྒྱས་ཀྱི་ས་གཅིག་གི་ངོ་བོ་ལ་སྐུ་གསུམ་གྱི་ཆ་ལས་ས་གསུམ་དུ་མིང་གདགས་པའི་ཕྱིར། དེའང་ལམ་རིམ་ལས། མཐར་ཐུག་ས་གསུམ་ཆ་ལས་བརྗོད། །ཅེས་དང་། ཧེ་རུ་ཀ་གལ་པོ་ལས། དབྱིངས་ལ་ཡེ་ཤེས་ཤར་བ་ཀུན་ཏུ་འོད། །པདྨའི་སྤྱན་འདྲ་མི་འགག་ལོངས་སྤྱོད་སྐུ། །ཡི་གེ་འཁོར་ལོ་གདུལ་བྱར་སྤྲུལ་པ་འགྱེད། །དེ་བཞིན་གཤེགས་པའི་ས་ཞེས་བྱའོ། །ཞེས་སོ། །དེས་ན་ངོ་བོ་ལ་ཁྱད་པར་མེད་ཀྱང་མཚོན་ཚུལ་ལ་ཁྱད་པར་ཡོད་དེ། དུས་ཐམས་ཅད་དུ་ཆོས་ཉིད་མཐའ་མ་བསྒྲིབས་པར་གསལ་བའི་དོན་མངོན་དུ་བྱས་པས་ན་ཀུན་དུ་འོད་དེ་ཡེ་ཤེས་བླ་མའི་ས་ཞེས་ཀྱང་བྱའོ། །དེའི་ཚེ་ཐབས་སྙིང་རྗེ་ཆེན་པོས་གཞན་དོན་མཛད་ཀྱང་དམིགས་པ་མེད་པའི་ཤེས་རབ་ཀྱི་གདེང་གིས་ཉེས་པའི་སྐྱོན་གྱིས་མ་གོས་པར་མཁྱེན་པས་པདྨ་ཅན། དེའི་ཚེ་སྤྱོད་ཡུལ་ཐམས་ཅད་སྐུ་དང་ཡེ་ཤེས་ཀྱི་དཀྱིལ་འཁོར་དུ་སྣང་ལ་མ་ཞེན་པས་ཡི་གེ་འཁོར་ལོ་ཚོགས་ཆེན་གྱི་ས་སྟེ། འདི་ཉིད་ལས། ཐབས་དང་ཤེས་རབ་ས་ཡི་མཆོག །ཅེས་པས་པདྨ་ཅན་དང་།མཚན་དང་དཔེ་བྱད་ཐམས་ཅད་རྫོགས། །སྤྱོད་ཡུལ་ཀུན་ཏུ་མཎྜ་ལ། །ཚོགས་ཆེན་གཉིས་ཀྱང་རྫོགས་
པར་རོལ། །ཞེས་པས་འཁོར་ལོ་ཚོགས་ཆེན་ཏེ་ཐུན་མོང་དུ་མ་གྲགས་པའི་ས་གཉིས་བསྟན་ནོ། །འོ་ན། བླ་མ་གོང་མ་དག་ཀུན་ཏུ་འོད་ཕར་ཕྱིན་ཐེག་པའི་སངས་རྒྱས་ཀྱི་ས། པདྨ་ཅན་མ་ཧཱ་ཡོ་གའི། ཡི་གེ་འཁོར་ལོ་ཨ་ནུ་ཡོ་གའི་ས་ཞེས་བཤད་པ་དང་འགལ་ལོ་ཞེ་ན། སྐྱོན་མེད་དེ། དེ་དག་ནི་སའི་དབྱེ་ཚུལ་འདི་དང་ཐ་དད་པ་གཞན་ཏེ། འདིར་བཤད་པར་བྱ་བ་མ་ཡིན་ནོ། །གལ་ཏེ་ཡིན་ན། མཐར་ཐུག་ས་གསུམ་ཆ་ལས་བརྗོད། །ཅེས་པའི་སྐབས་ནས་བསྟན་པའི་ཆོས་སྐུའི་ས་ཡེ་ཤེས་བླ་མའམ་ཀུན་ཏུ་འོད་དང་། ཕར་ཕྱིན་ཐེག་པའི་བཅུ་གཅིག་པ་ཀུན་ཏུ་འོད་གཉིས་གཅིག་པར་འགྱུར་ལ། དེ་ལྟར་ན། ལམ་རིམ་ལས། ལམ་གྱི་རྩོལ་བས་ངལ་བ་རྣམས། །བྲོད་པ་བསྐྱེད་ཕྱིར་ཀུན་ཏུ་འོད། །རྡོ་རྗེ་འཛིན་སྟུག་བཀོད་པར་བསྟན། །མཐར་ཐུག་ས་གསུམ་ཆ་ལས་བརྗོད། །ཅེས་པའི་རྒྱུའི་ཐེག་པའི་ཀུན་ཏུ་འོད་དང་། མཐར་ཐུག་གི་ས་གསུམ་གྱི་ནང་ཚན་གྱི་ཀུན་ཏུ་འོད་གཅིག་པར་ཐལ་ཞིང་། དེ་ལྟར་འདོད་ནུས་པའང་མ་ཡིན་ཏེ།སྔ་མའི་འཕྲོས་ལས། དེ་ཕྱིར་སྐས་ཀ་ལྟ་བུ་སྟེ། །ཐབས་མཁས་འདི་ཡིས་གཞན་པ་ཡི། །ཐབས་ལ་བརྟེན་ནས་མོས་བཅུག་ཅིང་། །བསྒྱུར་བས་འདི་གྲུབ་རང་ཐབས་ཀྱིས། །རང་ས་ཐོབ་ལས་ངོ་བོ་ཉིད། །གཅིག་པར་སྨྲ་བ་མུན་སྤྲུལ་ལོ། །ཞེས་རྒྱུའི་ཀུན་འོད། ཀྲི་ཡའི་རྡོ་རྗེ་འཛིན་པའི་ས། ཡོ་གའི་སྟུག་པོ་བཀོད་པ།མཐར་ཐུག་མ་ཧཱ་ཡོ་གའི་ས་རྣམས་ཀྱི་འབྲས་བུ་ལ་ཁྱད་ཆེ་བས། གཞན་དག་ཁྱད་མེད་ཅེས་སྨྲ་བ་ནི་མུན་སྤྲུལ་ལོ་ཞེས་བཞེད་པའི་ཕྱིར་རོ། །དེ་བས་ན་རྒྱུའི་ཐེག་པའི་ཀུན་ཏུ་འོད་སྔགས་ལམ་གྱི་ལྷུན་གྲུབ་རིག་འཛིན་གྱི་ས་ཡིན་པས་ལམ་གྱི་ཆོས་སྐུ་ཞེས་ཀྱང་མིང་དུ་བཏགས་ཏེ། དབུ་མའི་མཁན་པོ་ཨཱརྱ་དེ་བས། རྒྱུ་ཡིས་བགྲོད་པའི་ཀུན་ཏུ་འོད། །ཐབས་ཆེན་ལམ་གྱི་ཆོས་སྐུ་སྟེ། །ཡང་དག་རྫོགས་པའི་སངས་རྒྱས་ལ། །རྒྱ་མཚོ་རླབས་བཞིན་ཤུགས་ཀྱིས་འཆར། །ཆུ་ཟླའི་གཟུགས་ལྟར་འགྲོ་འོང་མེད། །སྨོན་ལམ་སྟོབས་ལ་རག་མ་ལུས། །ཞེས་དང་།
བསམ་གཏན་མིག་སྒྲོན་གྱི་རང་འགྲེལ་ལས་ཀྱང་། དབུ་མས་བསྐལ་པར་སྦྱངས་པས་གྲུབ་པའི་ཀུན་ཏུ་འོད་སྨོན་ལམ་སྙིང་རྗེའི་སྟོབས་ཀྱིས་གཟུགས་སྐུ་འཆར་བ་དང་། ཐབས་ཆེན་པོ་གཉིས་མེད་ཀྱི་སྐུ་ལྔ་མ་བཙལ་རྫོགས་པ་ནི་འཁོར་བ་དང་མྱ་ངན་ལས་འདས་པའི་ཆོས་རིམ་གྱི་བདག་ཉིད་དུ་བཞུགས་པས་རྒྱ་མཚོའི་རླབས་བཞིན་སྤྲུལ་པ་རང་ལ་འཆར་བས་གང་ལ་བརྔོ་སྟེ། ཀུན་ཏུ་འོད་ནི་བསྡི་གནས་ཀྱི་སའོ། །དེ་ནི་འདིར་ལྷུན་གྱིས་གྲུབ་པའི་རིག་འཛིན་དངོས་སོ། །ཞེས་གསུངས་པས་སོ། །གཉིས་པ་གཞན་དོན་མཛད་པ་ལ། གདུལ་བྱ་ལ་ཐུགས་རྗེས་གཟིགས་ཚུལ། གཟིགས་ནས་ཐུགས་རྗེ་སྐྱེ་ཚུལ། སྐྱེས་ནས་འགྲོ་དོན་མཛད་ཚུལ་ལོ། །དང་པོ་ལ། ཡེ་ཤེས་རྒྱུན་ཆད་ནས་མི་གཟིགས་པར་འདོད་པའི་ལུགས་དང་།མ་ཆད་ཅིང་གཟིགས་པར་འདོད་པའི་ལུགས་དང་། མཐའ་གཉིས་དང་བྲལ་བས་ཡུལ་མེད་རང་གསལ་དུ་གཟིགས་པར་འདོད་པའི་ལུགས་སོ། །དང་པོ་ལ།འདོད་པ་བརྗོད་པ་དང་། དེ་དགག་པའོ། །དང་པོ་ནི། སྤྱིར་སངས་རྒྱས་ལ་མཚན་ཉིད་པ་དང་། བཏགས་པ་བ་གཉིས་ལས། མཚན་ཉིད་པ་ནི་ཆོས་སྐུ་སྟེ། དཔེར་ན་བསྲེག་བྱ་བུད་ཤིང་ཟད་པས་སྲེག་བྱེད་མེའི་རྒྱུན་མི་གནས་པ་ལྟར། སྒྲིབ་པ་ཕྲ་རགས་ཐམས་ཅད་སྤངས་པའི་ཤུལ་དུ། སྤོང་བྱེད་གཉེན་པོའི་ཡེ་ཤེས་ཀྱང་དབྱིངས་སུ་ཞི་སྟེ། རྟེན་དང་བརྟེན་པའི་ཡེ་ཤེས་རྒྱུན་ཆད་པའི་ཕྱིར་གཟིགས་བྱ་གཟིགས་བྱེད་ཀྱི་ཐ་སྙད་ལས་གྲོལ་བས་མི་གཟིགས་ལ་བཏགས་པ་གཟུགས་སྐུ་གཉིས་ནི། སྔོན་གྱི་བསོད་ནམས་ཀྱི་ཚོགས་མི་འགག་པའི་འབྲས་བུའམ་སྨོན་ལམ་གྱི་འཕེན་པ་ཙམ་གྱིས་གདུལ་བྱ་ལ་སྣང་བའོ་ཞེས་ཟེར་རོ། །གཉིས་པ་ནི། དེ་ལྟར་ན། ཡེ་ཤེས་དེ་ཉིད་རང་ལྡོག་ནས་རྒྱུན་ཆད་དམ། གཉེན་པོ་གཞན་ཞིག་གིས་ཆད། རང་ལྡོག་ནས་ཆད་ན་མི་འཐད་དེ། སྒྲིབ་པ་སྤངས་པའི་རིག་ཙམ་གྱི་ཡེ་ཤེས་ཀྱང་མཐའ་ཐུག་མེད་དུ་ཡོད་པའི་ཕྱིར། གལ་ཏེ་སངས་རྒྱས་ཀྱི་ས་ན་རིག་ཙམ་ཡང་མེད་དོ་ཞེ་ན། སངས་རྒྱས་
དེ་བེམ་དངོས་སུ་ཐལ་ལོ། །གཉེན་པོ་གཞན་གྱིས་ཆད་དོ་ཞེ་ནའང་མ་ཡིན་ཏེ། རྡོ་རྗེ་ལྟ་བུའི་ཏིང་ངེ་འཛིན་གྱི་གཉེན་པོར་གྱུར་པའི་ཆོས་གཞན་མི་སྲིད་པའི་ཕྱིར། རྟགས་མ་གྲུབ་ན་གཉེན་པོ་ཐུག་མེད་དུ་འགྱུར་བའི་ཕྱིར་ཧ་ཅང་ཐལ་ལོ། །དེ་ལྟར་ཡང་སྡུད་པ་ལས། ཡེ་ཤེས་མེད་ན་བྱང་ཆུབ་འཕེལ་མེད་འགྲིབ་པ་མེད། །རྒྱ་མཚོ་འདྲ་བའི་སངས་རྒྱས་ཆོས་ཀྱང་མེད་པར་འགྱུར། །ཞེས་སོགས་ལུང་དུ་མས་གནོད་དོ། །གཉིས་པ་ལ།འདོད་པ་བརྗོད་པ་དང་། དེ་དགག་པའོ། །དང་པོ་ནི། སངས་རྒྱས་ཀྱི་ས་ན་རྡོ་རྗེ་ལྟ་བུའི་ཏིང་འཛིན་གྱིས་སྒྲིབ་པ་སྤངས་པའི་ལག་རྗེས་སུ་ཡེ་ཤེས་རྒྱུན་དང་བཅས་པ་ཡོད་དེ། དེ་ལས་ཀྱང་ཀུན་རྫོབ་མཁྱེན་པའི་ཡེ་ཤེས་ཀྱིས་ཡུལ་དང་ཡུལ་ཅན་དུ་གཟིགས་ཏེ། སྔར་རྒྱུན་ཆད་པ་བཀག་པའི་ལུང་གིས་འགྲུབ་བོ་ཟེར།གཉིས་པ་ནི། དེ་ལྟར་ན་སངས་རྒྱས་ཀྱི་སའི་ཡེ་ཤེས་དེ་ཉིད་འཁྲུལ་ཤེས་སུ་ཐལ།ཀུན་རྫོབ་ཡུལ་དུ་བྱེད་པའི་ཕྱིར། སོ་སྐྱེའི་ཤེས་པ་བཞིན་ནོ་བྱས་པ་ལ། ཁོ་ན་རེ། ཁྱབ་པ་མེད་དེ། སྣང་ཙམ་ཡུལ་དུ་བྱེད་ཀྱང་ཞེན་ཡུལ་དུ་མི་འཛིན་པས་སོ་ཟེར།འོ་ན་སངས་རྒྱས་ཀྱི་ཡེ་ཤེས་དེ་སྤངས་པ་ཕྱོགས་གཅིག་པར་ཐལ། ཞེ་ན་ཡུལ་ལ་འཁྲུལ་པའི་ལོག་ཤེས་སྤངས་ཀྱང་། སྣང་ཡུལ་ལ་འཁྲུལ་པའི་ལོག་ཤེས་མ་སྤངས་པའི་ཕྱིར། འདོད་ན། མདོ་ལས། ཡེ་ཤེས་དམ་པ་བདག་མེད་པས། །སྣང་བ་མེད་པས་མ་གཟིགས་སོ། །ཞེས་གསུངས་པ་དང་འགལ་ལོ། །གསུམ་པ་ལ།དངོས་དང་། རྩོད་པ་སྤང་བའོ། །དང་པོ་ནི། ཡེ་ཤེས་རྒྱུན་ཆད་ཅེས་སྐུར་པ་མི་འདེབས། མ་ཆད་ཅེས་སྒྲོ་མི་འདོགས། དེ་གཉིས་ཆར་གྱི་མཐའ་དང་བྲལ་བའི་ངོ་བོ་ཉིད་ཀྱི་ཚུལ་གྱིས་རྟོག་མེད་རང་གསལ་དུ་གཟིགས་ཏེ། འདི་ཉིད་ལས།སྟོང་ཉིད་བདག་མེད་ཡེ་མཁྱེན་རང་རིག་ཐུགས། །དམིགས་བྱ་དམིགས་བྱེད་མེད་པར་དྲན་དབང་བསྒྱུར། །ཞེས་དང་། ཏིང་འཛིན་རྒྱལ་པོ་ལས། མྱ་ངན་འདས་པའི་ཆོས་ལ་ཆོས་མེད་དེ། །གང་ཕྱིར་དེ་མེད་ནམ་ཡང་མེད་མི་འགྱུར། །རྟོག་ཅན་དག་ནི་ཡོད་དང་མེད་ཅེས་བྱ། །དེ་ལྟར་བརྟགས་པས་སྡུག་བསྔལ་ཞི་མི་འགྱུར། །
ཞེས་སོ། །གཉིས་པ་ནི། ཡུལ་ཡོད་མེད་དབྱེར་མེད་ཀྱི་བརྟག་པ་གསུམ་ལས། ཡུལ་དུ་བྱས་ནས་གཟིགས་ན། སངས་རྒྱས་ཀྱི་ཡེ་ཤེས་གཟུང་འཛིན་ཅན་དུ་འགྱུར་ཏེ། ཡུལ་དང་ཡུལ་ཅན་བྱུང་བའི་ཕྱིར། འདོད་ན།རྒྱུད་དག་མ་ཡིན་པར་ཐལ། གཟུང་འཛིན་ཡོད་པའི་ཕྱིར། སེམས་ཅན་བཞིན་ནོ། །ཡང་ཡུལ་དུ་མ་བྱས་པར་གཟིགས་ན། མིག་གིས་ཀྱང་སྒྲ་ཐོས་པར་ཐལ།དེའི་ཕྱིར། འདོད་ན་གསལ་ལོ། །གཞན་ཡང་སངས་རྒྱས་ཉིད་འཁྲུལ་པར་ཐལ། མེད་པ་གཟིགས་པའི་ཕྱིར། མིག་སེར་ཅན་གྱི་དུང་གི་ཁ་དོག་བཞིན་ནོ། །དབྱེར་མེད་དུ་གཟིགས་ཟེར་ནའང་མི་འཐད་དེ། གཟིགས་བྱ་གཟིགས་བྱེད་དུ་འགལ་བའི་ཕྱིར། མིག་གིས་མིག་བཞིན་ནོ་ཟེར། ལན་དུ་བླ་མ་གོང་མ་རྣམས་དགོངས་པ་ཐ་དད་སྟེ། ལྷ་རྗེ་མདའ་ཏིག །ཡུལ་དུ་བྱས་ཞེས་སྒྲོ་མི་འདོགས།མ་བྱས་ཞེས་སྐུར་པ་མི་འདེབས་ཏེ། ཡུལ་དང་ཡུལ་ཅན་དབྱེར་མེད་དུ་གཟིགས་གསུངས། འོ་ན་གཟིགས་བྱ་གཟིགས་བྱེད་དུ་འགལ་ཞེ་ན། དེ་གཉིས་ཐ་དད་དུ་བསྒྲུབ་པར་མི་འདོད་དེ། དབྱེར་མེད་དུ་ལྷངས་ཀྱིས་རྟོགས་པ་དེ་ཁོ་ན་ཐུགས་རྗེ་ཆེན་པོ་སྐྱེས་པ་ཡིན་ཏེ། ཕན་པ་ཐམས་ཅད་ཀྱི་གཞིར་གྱུར་པའི་ཕྱིར། དེའང་རྫོགས་ཆེན་སྒོམ་པ་དོན་དྲུག་པ་ལས། སངས་རྒྱས་སེམས་ཅན་གཉིས་སུ་མེད་རྟོགས་ན། །ཐུགས་རྗེ་ཆེན་པོ་སྐྱེས་ཞེས་དེ་ལ་བྱ། །ཞེས་སོ། །འོ་ན་ཐུགས་རྗེ་དང་ཡེ་ཤེས་ལ་ཁྱད་པར་ཅི་ཡོད་ཟེར་ན། དབྱེར་མེད་དུ་ལྷངས་ཀྱིས་རྟོགས་པ་ནི་ཡེ་ཤེས། དེ་ཀ་ཕན་པ་ཐམས་ཅད་ཀྱི་གཞིར་གྱུར་པའི་ཆ་ནས་ཐུགས་རྗེའོ་གསུངས། རྗེ་སྒྲོ་ཕུག་པའི་ཞལ་ནས། སྐད་དོག་སར་ཁྱེར་ན། ཡུལ་ཡོད་མེད་ཀྱི་སྒྲོ་སྐུར་སྤངས་ནས་ཆོས་ཐམས་ཅད་མེ་ལོང་ནང་གི་གཟུགས་བརྙན་ལྟར་རྟོག་མེད་རང་གསལ་དུ་གཟིགས་ཏེ། རྒྱས་པ་ལས། རྣམ་རྟོག་མི་མངའ་ཅིར་ཡང་སལ་ལེ་མཁྱེན། །ཞེས་གསུངས་པའི་ཕྱིར། སྐད་ཡངས་སར་ཁྱེར་ན། ཡུལ་དུ་བྱས་ནས་ཀྱང་གཟིགས་ཏེ། དུས་གསུམ་གྱིས་བསྡུས་པའི་ཁམས་
གསུམ་པའི་སེམས་དང་སེམས་ལས་བྱུང་བ་ཐམས་ཅད། ལག་མཐིལ་དུ་སྐྱུ་རུ་ར་བཞག་པ་བཞིན་དུ་གསལ་མཁྱེན་མ་འགགས་པར་སྣང་བའི་ཕྱིར། ཡང་ཡུལ་མེད་དུའང་གཟིགས་ཏེ། ཇི་ལྟར་སྣང་ཡང་བདེན་པའི་ངོ་བོས་སྟོངས་པའི་ཕྱིར་དབྱེར་མེད་དུའང་གཟིགས་ཏེ། ཤེས་བྱའི་གཤིས་ལ་ཐུགས་རྗེ་སྐྱེ་བའི་ཡུལ་སེམས་ཅན་དང་།སྐྱེ་མཁན་རྣམ་མཁྱེན་གྱི་སངས་རྒྱས་གཉིས་དམིགས་སུ་མེད་པའི་ཕྱིར། དེ་ཐུགས་རྗེར་ཅིས་འགྱུར་ཞེ་ན། དེ་ནི་དམིགས་པ་མེད་པའི་སྙིང་རྗེ་སྟེ། སྡུག་བསྔལ་མཐའ་དག་ལས་སྐྱོབ་པའི་ཕྱིར་གསུངས། འོ་ན་ཐུགས་རྗེས་གང་ལ། གང་གིས།གང་ལྟར་གཟིགས་ཏེ། གཟིགས་པའི་ཐ་སྙད་མི་འཐད་དོ་ཟེར་ན། ལན་ནི།འཁྲུལ་པ་ཅན་གྱི་བློ་ངོ་ལ་སྣང་བ་ལྟར་མ་འགགས་པར་གཟིགས་པས་སྐྱོན་གཉིས་པ་མེད་ཅིང་། ཇི་ལྟར་སྣང་ཡང་གཤིས་ལ་མ་གྲུབ་པར་མཁྱེན་པས་སྐྱོན་དང་པོ་ལས་གྲོལ་ལོ། །དེ་གཉིས་པོས་རྩོད་པ་གསུམ་པའང་ཞོར་ལ་སེལ་ཏེ། གཤིས་ལ་གདུལ་བྱ་འདུལ་བྱེད་དབྱེར་མེད་དུ་གཟིགས་ལ། དེ་ལྟར་མ་རྟོགས་པ་རྣམས་འཁོར་བའི་ཆུ་བོ་བཞིས་རྒྱུན་ཕྱོགས་སུ་ཁྱེར་བས་སྡུག་བསྔལ་བའང་གཟིགས་ཤིང་། དེ་ལས་གྲོལ་བའི་ཐབས་ཀྱང་མཁྱེན་ནས་སྟོན་པར་མཛད་པ་ཡིན་ཏེ། དཔེར་ན་སྐྱེས་བུ་མངོན་ཤེས་ཅན་གཅིག་གི་དྲུང་ན། སྐྱེས་བུ་གཞན་ཞིག་གཉིད་དུ་སོང་བའི་རྨི་ལམ་དུ་སྡུག་བསྔལ་ཉམས་སུ་མྱོང་བ་རྨི་བ་ན། མངོན་ཤེས་མཁན་དེས་མཁྱེན་ནའང་རང་རྒྱུད་ལ་བདེན་ཞེན་མི་འབྱུང་ཞིང་། གཉིད་སད་ན་སྡུག་བསྔལ་དེ་ལས་གྲོལ་བ་ཡང་མཁྱེན་པ་བཞིན་ནོ། །གཟིགས་ལུགས་ཀྱང་། རྗེ་སྒྲོ་ཕུག་པའི་དགོངས་པས་གསུམ་སྟེ། དབྱིངས་ལས་མི་གཞན་པའམ་ཇི་ལྟ་བ་མཁྱེན་པའི་ཡེ་ཤེས་ཀྱིས་གཟིགས་ཚུལ། ཡེ་ཤེས་ལས་མི་གཞན་པའམ་ཇི་སྙེད་པ་མཁྱེན་པའི་ཡེ་ཤེས་ཀྱིས་གཟིགས། དབྱིངས་ཡེ་ཤེས་དབྱེར་མེད་དམ་ཇི་ལྟ་ཇི་སྙེད་དབྱེར་མེད་དུ་མཁྱེན་པའི་ཡེ་ཤེས་ཀྱིས་གཟིགས་ཚུལ་གསུམ་དུ་བཞེད་དོ། །གཉིས་པ་གཟིགས་ནས་ཐུགས་རྗེ་སྐྱེ་ཚུལ་ནི། རིམ་གསུམ་ལས། རྟག་རྒྱུན་རང་བཞིན་
ཤུགས་གསོལ་དང་། །ཡུལ་དང་ཕྲད་ནས་བྱུང་བར་སྣང་། །ཞེས་པས་བཞི་སྟེ། རྟག་པ་རྒྱུན་གྱི་ཐུགས་རྗེ་ཆུ་བོའི་རྒྱུན་ལྟ་བུ་དང་། རང་བཞིན་ཤུགས་ཀྱི་ཐུགས་རྗེ་ཉི་མ་དང་འོད་ཟེར་ལྟ་བུ་དང་། བསྐུལ་ཞིང་གསོལ་བ་བཏབ་པའི་ཐུགས་རྗེ་སྙིང་རྗེ་ཅན་ལ་དབུལ་པོས་སློང་བ་ལྟ་བུ་དང་། ཡུལ་དང་ཕྲད་པའི་ཐུགས་རྗེ་མཛངས་པ་སྤྱོད་ལོག་བྱེད་པ་མཐོང་བ་ལྟ་བུའོ། །གསུམ་པ་སྐྱེས་ནས་འགྲོ་དོན་མཛད་ཚུལ་ལ། རྟེན་ཅན་གྱིས་དོན་བྱེད་པར་འདོད་པ། རྟེན་མེད་ཀྱིས་དོན་བྱེད་པར་འདོད་པ།གནས་ལུགས་ངོ་བོ་ཉིད་ཀྱིས་དོན་བྱེད་པར་འདོད་པའོ། །དང་པོ་ནི། བྲམ་ཟེ་མཆོད་སྡོང་བསྒྲུབ་པ་ལྟ་བུ་སྟེ། དཔེར་ན་རིག་སྔགས་གྲུབ་པའི་བྲམ་ཟེ་ཞིག་གིས་རིན་པོ་ཆེའི་མཆོད་སྡོང་བསྒྲུབས་ནས་བཞག་པས་རང་ཉིད་ཚེའི་དུས་བྱས་ཀྱང་རྗེས་འཇུག་རྣམས་ཀྱི་འདོད་པ་མཆོད་སྡོང་གིས་སྐོང་བར་བྱེད་པ་ལྟར། སྔོན་ལམ་དུ་ཚོགས་བསགས་པའི་འབྲས་བུས་མཐར་ཐུག་སངས་རྒྱས་ཀྱི་དགོངས་པ་ཆོས་སྐུ་སྒྲིབ་བྲལ་གྱི་ཡེ་ཤེས་དེ་ཉིད་ལ་བརྟེན་ནས། གདུལ་བྱ་ལས་དག་མ་དག་ལ་མཛད་པ་གཟུགས་སྐུ་གཉིས་སུ་སྣང་ནས་དོན་མཛད་པར་བཞེད་པ་ནི། རྒྱ་གར་ན་སློབ་དཔོན་སེང་གེ་བཟང་པོ་དང་། བོད་ན་འབྲིང་མཚམས་ཀྱི་ཞང་ཤེས་རབ་བླ་མ་ལ་སོགས་པའི་དགོངས་པའོ། །གཉིས་པ་ནི། དྲང་སྲོང་དམོད་པ་གྲུབ་པ་ལྟ་བུ་སྟེ།དཔེར་ན་དམོད་པ་གྲུབ་པའི་དྲང་སྲོང་གིས་དམོད་པ་བསྒྲུབས་ནས་བཞག་པས་རང་ཚེའི་དུས་བྱས་ཀྱང་གཞན་སྣང་དུ་ཁོའི་དམོད་པ་ཇི་ལྟར་འབྱུང་བ་བཞིན་དུ་མཐར་ཐུག་སངས་རྒྱས་ཀྱི་ས་ན་ཆོས་ཀྱི་དབྱིངས་རྣམ་པར་དག་པ་ཙམ་ལས་རང་རྒྱུད་ཀྱིས་བསྡུས་པའི་ཡེ་ཤེས་མ་གྲུབ་ཀྱང་སྔོན་ལམ་དུ་ཚོགས་བསགས་ཤིང་སྨོན་ལམ་བཏབ་པའི་མཐུས། གདུལ་བྱ་རང་གི་བློ་སྣང་དུ་གཟུགས་སྐུ་གཉིས་སུ་སྣང་ནས་དོན་བྱེད་པར་བཞེད་པ་ནི། རྒྱ་གར་ན་སློབ་དཔོན་ཀླུ་སྒྲུབ་དང་། བོད་ན་རོང་ཟོམ་ཆོས་ཀྱི་བཟང་པོའི་དགོངས་པའོ། །གསུམ་པ་ནི། ཡིད་བཞིན་གྱི་ནོར་བུ་རིན་པོ་ཆེ་ལྟ་བུ་སྟེ། དཔེར་ན་ནོར་བུ་རིན་པོ་ཆེ་བྱི་དོར་བྱས་ཤིང་མཆོད་ན་རང་རང་གི་བསོད་ནམས་དང་འཚམས་པའི་དགོས་འདོད་འབྱུང་མོད་ཀྱི། འོན་ཀྱང་རིན་པོ་ཆེ་ལ་རྩོལ་
རྟོག་དང་ཉེ་རིང་མེད་པ་ལྟར། མཐར་ཐུག་རྒྱལ་བའི་དགོངས་པ་ཡོད་མེད་ཀྱི་མཐའ་ལས་གྲོལ་བའི་ཕྱིར། མཐའི་སྒྲོ་སྐུར་དང་བྲལ་བའི་ངོ་བོ་ཉིད་ཀྱི་སྐུ་དེ་ཉིད་གདུལ་བྱའི་བློ་དང་འཚམས་པར་སྣ་ཚོགས་སུ་སྣང་ནས་དོན་མཛད་པར་བཞེད་པ་ནི་རྒྱའི་མཁས་པ་ཆེན་པོ་ཤྲཱི་སིངྷ་དང་། བོད་ན་ཟུར་ཆུང་ཤེས་རབ་གྲགས་པ་ལ་སོགས་པའི་དགོངས་པའོ། །མདོར་ན་རྒྱས་པ་ལས།ཐུགས་རྗེ་ཆེན་པོའི་བྱིན་རླབས་ཀྱིས། །ཕྱོགས་བཅུའི་འཇིག་རྟེན་རྡུལ་སྙེད་དུ། །འགྲོ་བའི་ཕྲིན་ལས་བསམ་མི་ཁྱབ། །སྐུ་གསུང་ཐུགས་དང་ཡོན་ཏན་དང་། །ལྷུན་གྱིས་གྲུབ་པའི་ཕྲིན་ལས་ཀྱིས། །གདུལ་བྱ་རྣམས་ནི་ཆུད་མ་ཟོས། །ངན་སོང་སྦྱོང་ཞིང་བྱང་ཆུབ་ཞིང་། །ཡེ་ཤེས་ཚོགས་རྫོགས་ཀུན་ཏུ་སྟོན། །ཞེས་གསུངས་སོ། །འབྲས་བུའི་དོན་བཤད་ཟིན་ཏོ།། །།དཔལ་ལྡན་རྒྱུད་རྒྱལ་རྒྱུད་རྣམས་ཀུན་གྱི་གསང་བའི་གསང་བ་བླ་ན་མེད། །མཐའ་དག་བསྡུས་པའི་སྙིང་པོར་གྱུར་འདི་མཁས་གྲུབ་རྣམས་ཀྱིས་གསལ་བར་མཛད། །དེ་ལྟ་མོད་ཀྱི་གསང་བདག་དཔའ་བོ་གཏེར་ཆེན་ཆོས་རྗེའི་ཞལ་ལུང་གི། །ཕྱི་བཞིན་འབྲངས་ནས་བློ་དམན་བདག་གིའང་དྲི་མེད་རྒྱུད་དོན་རྣམ་པར་ཕྱེ། །གང་ཞིག་ཐོས་པའི་ལང་ཚོ་རབ་རྒྱགས་པའི། །སྟོན་ཆེན་རྣམས་ཀྱི་དོན་དུ་འགྱུར་མིན་ཡང་། །ཐར་པའི་ལམ་ལ་དད་བརྩོན་རབ་གཞོལ་བའི། །ཐོས་ཆུང་གསར་བུའི་ཤེས་རབ་བསྐྱེད་པའི་ཕྱིར། །ཡིད་ཆེས་བཀའ་དང་དཔལ་ལྡན་བླ་མའི་གསུང་། །སྔོན་བྱོན་མཁས་པའི་རྣམ་འགྲེལ་ལ་བརྟེན་ནས། །ལེགས་པར་སྦྱར་མོད་འཕགས་བློ་མ་ཐོབ་ཕྱིར། །ཉེས་གྱུར་དམ་པ་རྣམས་ཀྱིས་བཟོད་པར་བཞེས། །འདི་ལས་དྲི་མེད་སྟོན་ཀའི་ཟླ་བ་ལྟའི། །རབ་དཀར་དགེ་བའི་དངོས་པོ་གང་ཐོབ་པ། །མཐའ་ཡས་འགྲོ་བ་ཀུན་དང་ཐུན་མོང་སྟེ། །མ་ལུས་པ་ཡིས་དེ་ཉིད་རྟོགས་གྱུར་ཅིག །བདག་ཀྱང་རང་བཞིན་རྒྱུད་ཀྱི་ཕྱག་རྒྱ་ཡིས། །བཏང་ལས་རྟོག་གེའི་གཡང་སར་མི་འཕྱན་པར། །ཐེག་མཆོག་མྱུར་བདེའི་ལམ་ལས་འབྲས་བུའི་རྒྱུད། །སྤང་ཐོབ་མེད་པར་མྱུར་དུ་རྟོགས་པར་ཤོག །ཚུལ་འདིར་ཡིད་རབ་སྤྲོ་བས་སྦྱོང་བྱེད་རྣམས། །ཤེས་རབ་གསུམ་གྱི་དབང་པོ་རབ་རྒྱས་ཏེ། །རྣམ་གྲོལ་ཆོས་ཀྱི་དགའ་སྟོན་འགྱེད་པ་དང་། །བསྟན་
པ་དྲི་མེད་ཡུན་རིང་གནས་གྱུར་ཅིག །དཔལ་གསང་བའི་སྙིང་པོ་དེ་ཁོ་ན་ཉིད་ངེས་པའི་རྒྱུད་ཀྱི་རྒྱལ་པོ་སྒྱུ་འཕྲུལ་དྲ་བ་སྤྱི་དོན་གྱི་སྒོ་ནས་གཏན་ལ་འབེབས་པར་བྱེད་པའི་ལེགས་བཤད་གསང་བདག་ཞལ་ལུང་ཞེས་བྱ་བ་འདི་ནི། ཤེས་འདོད་དང་ལྡན་པའི་བློ་གསར་རྣམས་ལ་ཕན་པའི་ཆེད་དུ། སྔོན་གྱི་ཊཱི་ཀ་དང་། ཁོག་དབུབ་ལ་སོགས་པའི་དོན་འཐོར་བ་རྣམས་བཏུས་ཤིང་གོ་བདེ་བར་བྱས་ཏེ་དཔལ་ལྡན་ཟུར་པའི་བཤད་སྲོལ་གཙོ་བོར་བཟུང་ནས། དཀྱིལ་འཁོར་རྒྱ་མཚོའི་ཁྱབ་བདག་རྒྱལ་བ་རིགས་དྲུག་པ་དང་དབྱེར་མ་མཆིས་པ་ཐམས་ཅད་མཁྱེན་ཅིང་ཐམས་ཅད་གཟིགས་པ་དཔལ་ཕྱོགས་ཐམས་ཅད་ལས་རྣམ་པར་རྒྱལ་བ་གཏེར་ཆེན་ཆོས་ཀྱི་རྗེ་གཏེར་བདག་གླིང་པའི་ཞབས་བརྟེན་པདྨའི་ཟེའུ་འབྲུ་ལ་སྤྱི་བོས་རེག་པ་སྨྱོས་ཀྱི་བན་ཆུང་དྷརྨ་ཤྲཱིས་རྗེ་བླ་མའི་བཀའི་གནང་བ་ཐོབ་པར་བྱས་ཏེ། ལྕགས་ཕོ་རྟའི་ལོ་སྟོན་ཟླ་ར་བའི་མར་ངོའི་ཚེས་བཅུ་རྒྱལ་ཕུར་གྱི་འགྲུབ་སྦྱོར་བཟང་པོ་ལ་འོག་མིན་ཨོ་རྒྱན་སྨིན་གྲོལ་གླིང་ངེས་པ་དོན་གྱི་དགའ་བའི་ཚལ་ཆེན་པོའི་ཆོས་གྲྭར་ཟིན་ཐུན་སུག་བྲིས་སུ་བགྱིས་པའོ།། །།འདིས་ཀྱང་བསྟན་པ་དང་སེམས་ཅན་ལ་ཕན་ཐོགས་པར་གྱུར་ཅིག །དགེའོ། །དགེའོ། །དགེའོ།། །། ཡང་སྨྲས་པ། ཚུལ་འདི་ཀུན་ཚང་བློར་ཚུད་རྒྱས་པ་སྟེ། །གཞན་དུ་བློ་དམན་བསྡུས་ལ་དགའ་བ་རྣམས། །ལྔ་པ་ལམ་གྱི་ངོ་བོ་གཏན་འབེབས་པའི། །ས་དམིགས་ཁོངས་སུ་ལམ་གྱི་ངོ་བོ་བླང་། །དྲུག་པ་སྔོན་དུ་གང་འགྲོ་དཔྱད་པའི་རྗེས། །ལམ་རྐྱེན་དངོས་བཅུ་སྡོམ་ཚིག་ཙམ་བཀོད་ནས། །འབྲས་རྒྱུད་སྦྱར་བ་སྤྱི་དོན་བསྡུས་པ་ཡིན། །འབྲིང་པོར་འདོད་ན་དེ་སྟེང་ལྟ་བ་ལ། །རྟོགས་ཚུལ་དབང་པོ་རབ་འབྲིང་ཐ་གསུམ་གྱི། །དབང་རབ་གཏན་ཚིགས་ཀྱིས་རྟོགས་ས་ཁོངས་སུ། །རྒྱུད་ཀྱི་དངོས་བཅུའི་ནང་ཚན་ལྟ་བ་ལས། །གཞལ་བྱ་འཇལ་བྱེད་གཞལ་བའི་གྲུབ་མཐའ་སྟེ། །རྣམ་གསུམ་སྟོན་པའི་ངག་རྣམས་བླངས་བྱས་ནས། །འབྲིང་པོར་འགྱུར་མོད་རྒྱས་པར་སྤྱི་མ་ཊཱིཀ །བསྡུས་འབྲིང་གཉིས་པོ་སྤྱི་དོན་རྐྱང་པ་སྟེ། །ཆེ་ཆུང་བློ་དང་བསྟུན་ནས་ཉམས་སུ་ལོང་། །ཞེས་ཀྱང་གདམས་སོ།། །།