གསང་བའི་སྙིང་པོ་དེ་ཁོ་ན་ཉིད་ངེས་པའི་ཁྲོ་བོ་ཆེན་པོ་སྟོབས་ཀྱི་རྒྱུད་རྒྱལ།
རྒྱ་གར་སྐད་དུ། གྷུ་ཧྱ་གརྦྷ་ཏ་ཏྭ་བི་ནིཤྩ་ཡ་མ་ཧཱ་ཀྲོ་དྷ་བ་ལ་རཱ་ཛ་ཏནྟྲ། བོད་སྐད་དུ། གསང་བའི་སྙིང་པོ་དེ་ཁོ་ན་ཉིད་ངེས་པའི་ཁྲོ་བོ་ཆེན་པོ་སྟོབས་ཀྱི་རྒྱུད་རྒྱལ། དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །འདི་སྐད་བདག་གིས་ཐོས་པའི་དུས་གཅིག་ན། འོག་མིན་གྱི་གནས་ཀུན་ཏུ་བཟང་མོའི་བྷ་ག་ཡངས་པའི་ཀློང་ན། ཕྱོགས་བཅུ་དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་བདག་པོ་ཀུན་ཏུ་བཟང་པོ་ངེས་པར་འདྲེལ་ཏོ། །ཉིད་ཀྱི་སྐྱེས་བུ་ཆེན་པོ་རྡོ་རྗེ་སེམས་དཔའ་བཀའ་ནོད་དོ། །དེའི་ཚེ་དེའི་དུས་ན། འདུལ་བའི་དུས་ལ་བབས་པ་གསང་བདག་ཉིད་ཀྱིས་ཞུས་པ། རྒྱ་ཆེ་རབ་ཟབ་དཔག་དཀའ་བ། །རང་བཞིན་ཆེ་ལ་ངེས་དོན་ཅན། །རྒྱལ་བ་རྣམས་ཀྱི་སྤྱོད་ཡུལ་འདི། །གསང་བ་བཞིས་ཆོད་དོན་མཛད་པ། །རྟོག་ཚོགས་ལོག་པར་ཞེན་པ་རྣམས། །རྨང་དང་རྩ་བ་གང་གིས་སྤྱད། །ལོག་པའི་ལམ་དུ་ཞུགས་པ་རྣམས། །ཡང་དག་ལམ་དུ་ཇི་ལྟར་གཟུད། །ཤིན་ཏུ་གསང་བའི་མན་ངག་དོན། །སྣོད་ལྡན་ཀུན་ལ་
ཇི་ལྟར་སྦྱིན། །ཞེས་ཆེད་དུ་བརྗོད་དོ། །དེ་ནས་རྡོ་རྗེ་འཆང་ཆེན་པོས་དགོངས་པ་གསང་བའི་ཏིང་ངེ་འཛིན་གྱིས་འདི་གསུངས་སོ། །དཀྱིལ་འཁོར་བཞི་དང་སྲོག་ཤིང་གསུམ། །སུམ་ཅུ་གཉིས་དང་བཅུ་དྲུག་དང་། །བརྒྱད་དང་དྲུག་ཅུ་རྩ་བཞི་ཡི། །དཀྱིལ་འཁོར་ལྡན་པའི་དཀྱིལ་འཁོར་ལ། །ཐབས་དང་ཤེས་རབ་གཉིས་མེད་པས། །ཨཱ་ལི་ཀཱ་ལིའི་སྒྲ་དབྱངས་ལྡན། །རྒྱ་མཚོ་གཏིང་ནས་སྒྲོལ་མ་གཡོས། །མེ་ལྕེ་སྲིད་པ་གསུམ་ལ་ཁྱབ། །ནམ་མཁའི་བ་བཞོས་བདེ་བ་ཆེ། །འཕགས་པ་འགྲོ་དྲུག་མཆོད་སྦྱིན་ཕུལ། །བདེ་བ་ཡེ་ཤེས་རོལ་མོ་ཡིས། །དུས་གསུམ་དགྱེས་པའི་མཆོད་པ་འབུལ། །ཟག་པ་མེད་པའི་བསོད་ནམས་ཀྱིས། །ཡེ་ཤེས་སྒྱུ་མ་རང་སྣང་བའོ། །ཡིད་ཆོས་ཀུན་བཟང་ཡབ་ཡུམ་དང་། །ཉོན་མོངས་དབང་གིས་བསྐྱེད་པ་ནི། །རྩ་བ་ཕུང་པོའི་རླུང་ལྔ་དང་། །ཡན་ལག་སྐྱེ་མཆེད་རླུང་ལྔ་ཡིས། །ཕུང་སོགས་བཞི་བཅུ་རྩ་གཉིས་སྐུ། །ཚིག་ལ་ཁྱབ་བྱེད་རླུང་གནས་པ། །གཟུགས་ཀྱི་ཕུང་པོ་རྣམ་སྣང་སྐུ། །ནམ་མཁའ་ལ་བསྐྱོད་དབྱིངས་ཕྱུག་ཡུམ། །སྣང་ལྔ་ཁ་དོག་མཐིང་གའི་བདག །མཆེད་སྣང་རྣམ་ཤེས་ཉེར་ཐོབ་ཐིམ། །མཐར་ཕྱིན་ཡེ་ཤེས་ཆོས་ཀྱི་དབྱིངས། །སྲོག་འཛིན་རླུང་ནི་སྙིང་གར་གནས། །རྣམ་ཤེས་ཕུང་པོ་མི་བསྐྱོད་པ། །ས་ལ་སྤྱོད་པས་སངས་རྒྱས་སྤྱན། །དོ་ཞེས་རྒྱུ་བ་བུམ་པའི་བདག །དཀར་བའི་ས་ནི་ཆུ་ལ་ཐིམ། །མེ་ལོང་ཡེ་ཤེས་ངང་དུ་གནས། །ཐུར་སེལ་རླུང་ནི་གསང་བར་གནས། །ཚོར་བའི་ཕུང་པོ་རིན་འབྱུང་སྐུ། །ཆུ་ལ་སྤྱོད་པས་མཱ་མ་ཀཱི། །སེར་པོ་ཆུ་ཉིད་མེ་ལ་ཐིམ། །མཉམ་ཉིད་ཡེ་ཤེས་སྲོག་ཏུ་གནས། །གྱེན་དུ་རྒྱུ་བ་ལྐོག་མར་གནས། །འདུ་ཤེས་ཕུང་པོ་སྣང་མཐའ་ཡས། །མེ་ལ་སྤྱོད་པས་གོས་དཀར་མོ། །རྣ་བ་གཡས་ནས་རྒྱུ་བྱེད་པ། །མེ་ཉིད་རླུང་ལ་རྣམ་འདུ་ཞིང་། །སོ་སོར་ཀུན་རྟོག་ཡེ་ཤེས་ཉིད། །མི་མཉམ་རླུང་ནི་ལྟེ་བར་གནས། །འདུ་བྱེད་ཕུང་པོ་དོན་ཡོད་གྲུབ། །རླུང་ལ་སྤྱོད་པས་དམ་ཚིག་སྒྲོལ། །རྣ་བ་གཡོན་ནས་ངེས་འབྱུང་བ། །རླུང་ཉིད་རྣམ་པར་ཤེས་ལ་ཐིམ། །ལྗང་སེར་བྱ་བ་གྲུབ་པའི་ངང་། །ས་ཆུ་སྤྱན་
དང་མཱ་མ་ཀཱི། །མེ་རླུང་གོས་དཀར་སྒྲོལ་མ་ལྔ། །རྡོ་རྗེ་ཕུང་པོའི་ཡན་ལག་ཀུན། །རྫོགས་པའི་སངས་རྒྱས་ལྔ་རུ་གྲགས། །རྒྱུ་བའི་གནས་ནི་སྤྱན་ཡིན་ཏེ། །རྣམ་པར་རྒྱུ་བ་རྣ་བ་ལ། །ཡང་དག་རྒྱུ་བ་སྣ་དང་ནི། །རབ་ཏུ་རྒྱུ་བ་ལྕེ་ལ་གནས། །ངེས་པར་རྒྱུ་བ་ལུས་ཉིད་དེ། །མིག་དང་རྣ་བ་སྣ་དང་ལྕེ། །ས་སྙིང་ལ་སོགས་སེམས་དཔའ་བརྒྱད། །རྣམ་ཤེས་དབང་པོ་ཕྱི་ནང་ཕྱེ། །ཡུལ་བརྒྱད་འཛིན་པ་རྣམ་བཟུང་ལ། །ཕྱི་ནང་སེམས་མ་བརྒྱད་དུ་ཤར། །གཟུགས་སོགས་ཡུལ་ལ་རྣམ་པར་སྤྱོད། །ལུས་ཀྱི་རྣམ་ཤེས་རེག་བྱ་བཞི། །སྤྱོད་པའི་དུས་ནས་དགའ་བ་བཞི། །གདུལ་བྱ་འདུལ་ཕྱིར་ཁྲོ་བཞིར་ཤར། །སྤྱད་ཆ་ཞེན་པ་རྟག་ཆད་བཞི། །གྲོལ་བའི་དུས་ན་ཁྲོ་མོར་ཤེས། །ཐབས་ཀྱི་འཛིན་ལ་ཡུམ་ལ་སྤྱོད། །ཤེས་རབ་ཡུམ་ལ་ཐབས་གནས་ཕྱིར། །དྲ་བར་འདྲེལ་དང་ཉོན་མོངས་འདུལ། །དེ་ཕྱིར་ཐུབ་དྲུག་སྤྲུལ་པ་སྤྲོ། །རང་བཞིན་གསང་བའི་སྙིང་པོ་འདི། །འགྲོ་བའི་རྒྱུད་ལ་ཡོངས་གབ་པ། །ལམ་རྐྱེན་རྒྱུད་དུ་སྟོན་པས་སྦས། །སྐྱོན་ཡོད་མ་ཡིན་སྣོད་ངན་གསང་། །རང་བཞིན་བདེ་གཤེགས་གདུལ་བྱ་ཡིས། །འཁྲུལ་པའི་སྣང་བ་བསལ་བའི་ཕྱིར། །ཐབས་དང་ཤེས་རབ་མ་ནིང་རྒྱུད། །འདུལ་བ་མདོ་སྡེ་ཆོས་མངོན་དང་། །སྐུ་དང་གསུང་དང་ཐུགས་ཀྱི་རྒྱུད། །ཕྱོགས་བཅུའི་འཇིག་རྟེན་རྡུལ་སྙེད་དུ། །འགྲོ་བའི་ཆེད་དུ་སྤྲོས་པ་རྣམས། །འདི་ནས་འཕྲོས་ནས་འདིར་འདུ་བས། །སྡེ་སྣོད་ཀུན་གྱི་རྩ་བར་བཤད། །དེ་ཕྱིར་རྒྱུད་ལུང་མན་ངག་མཚན། །རབ་འབྲིང་ཐ་མ་འགྲོར་འཇུག་པ། །རྒྱལ་བ་ཀུན་གྱི་ངེས་པའི་དོན། །ཏན་གཎ་སྤྱོད་པ་རླབས་པོ་ཆེ། །ལྟ་སྤྱོད་དཀྱིལ་འཁོར་དབང་དམ་དང་། །ཕྲིན་ལས་སྒྲུབ་མཆོད་ཏིང་ངེ་འཛིན། །དབང་བཅུ་དབང་ལྡན་ཆེ་བ་པོ། །སེམས་དཔའ་སངས་རྒྱས་ཀུན་གྱི་དངོས། །ལོག་སེལ་དད་པའི་མཆོག་ལུས་ཅན། །འདུལ་བའི་དུས་དག་གསང་སྔགས་མེད། །ཅེས་བརྗོད་པས། དེ་བཞིན་གཤེགས་པའི་དགོངས་པ་ཟབ་མོ་ཐུགས་སུ་ཆུད་པར་གྱུར་ཏོ། །དེ་ནས་དེ་བཞིན་གཤེགས་པ་བཙུན་མོའི་
ཚོགས་དང་བཅས་པས་འདི་བརྗོད་དོ། །ཨེ་མ་ཧོ། ཨེ་བཾ་མ་ཡ་དགྱེས་པ་ཆེ། །སྐྱེ་མཆེད་ཁམས་རྣམས་མང་པོ་ཀུན། །བྱང་ཆུབ་སེམས་དཔའི་དཀྱིལ་འཁོར་ཉིད། །ཕྱོགས་བཅུའི་རྡུལ་སྙེད་སྤྲུལ་པ་སྤྲོ། །སྤྲོས་མེད་བསྡུ་མེད་སྤྲོས་པ་ཉིད། །ཐུགས་དྲུག་ཡེ་ཤེས་ངང་དུ་འུབ། །ཅེས་བརྗོད་པས། དེ་དག་འདུས་པར་དེ་བཞིན་གཤེགས་པ་ཉིད་ཀྱིས་མཁྱེན་ཏོ། །དེ་ནས་གསང་བའི་བདག་པོས། བསྟོད་དེ་རྗེས་སུ་ཡི་རང་ནས་བསྡུས་ཏེ་གཏད་པ། ཕྱོགས་བཅུ་དུས་གསུམ་བདེ་གཤེགས་བདག །གཏི་མུག་ཆེན་པོའི་རང་བཞིན་ཅན། །འདོད་ཆགས་ཆེན་པོའི་བདག་པོ་སྟེ། །ཞེ་སྡང་ཆེན་པོའི་ངོ་བོ་ཉིད། །དག་པ་རྣམ་དག་སྐུ་གསུང་བདག །གསལ་བར་བདེ་བ་དགྱེས་པ་ཧོ། །ཞེས་བརྗོད་དོ། །དེ་ནས་དག་ཏུ་འདི་བརྗོད་དོ། །ལོག་ལྟ་ཡོངས་སུ་གཏད་དེ་བསྐྲད་པ་ནི། ཨོཾ་སུམྦྷ་ནི་སུམྦྷ་ཧཱུྃ། གྲྀ་ཧྞ་གྲྀ་ཧྞ་ཧཱུྃ། གྲྀ་ཧྞཱ་པ་ཡ་གྲྀ་ཧྞཱ་པ་ཡ་ཧཱུཾ། ཨཱ་ན་ཡ་ཧོ། བྷ་ག་ཝཱན་བྱིདྱཱ་རཱ་ཛ་ཧཱུྃ་ཕཊ། ཨོཾ་གྷ་གྷ་གྷཱ་ཏ་ཡ་གྷཱ་ཏ་ཡ། སརྦ་དུཥྚཱན་ཕཊ། ཀཱི་ལི་ཀཱི་ལ་ཡ། སརྦ་པཱ་པཾ་ཕཊ། ཕཊ་ཕཊ་ཧཱུྃ་ཧཱུྃ་བཛྲ་ཀཱི་ལ་ཡ། བཛྲ་དྷ་རོ་ཨཱ་ཛྙཱ་པ་ཡ་ཏི་ཀཱ་ཡ་ཝཱ་ཀ་ཙིཏྟ་བཛྲ་ཀཱི་ལ་ཡ་ཧཱུྃ་ཕཊ། ཅེས་སྣོད་མ་ཡིན་རྣམས་བསྐྲད་ཅིང་མི་ལྡང་བར་བྱས་ཏེ། བུད་མེད་ཀྱི་ཚོགས་གང་ཡིན་པ་ལ་ཡོངས་སུ་གཏད་ཅིང་ཆོས་ཀྱི་མིག་ཅན་ལ་སྤྲོ་བར་གྱུར་ཏོ། །སྟོབས་ཀྱི་དབང་ཕྱུག་བསྒྲུབ་པ། དཀའ་བ་སྤྱོད་པ་མན་ངག་གི་སྙིང་པོ་ཞེས་བྱ་བའི་རྒྱུད་རྫོགས་སོ།། །།