རྒྱུད་ཀྱི་རྒྱལ་པོ་ཆེན་པོ་ལས་ཀྱི་ཕྲེང་བ་ཞེས་བྱ་བ།
རྒྱ་གར་སྐད་དུ། ཏནྟྲ་རཱ་ཛ་མ་ཧཱ་ཀརྨ་མཱ་ལ་ནཱ་མ། བོད་སྐད་དུ། རྒྱུད་ཀྱི་རྒྱལ་པོ་ཆེན་པོ་ལས་ཀྱི་ཕྲེང་བ་ཞེས་བྱ་བ། བཅོམ་ལྡན་འདས་དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་དང་།གསུང་དང་། ཐུགས་དང་། ཡོན་ཏན་ཕྲིན་ལས་མ་ལུས་པའི་བདག་ཉིད།ཡང་དག་པར་རྫོགས་པའི་སངས་རྒྱས་ལོངས་སྤྱོད་ཆེན་པོའི་བདག་པོ། དཔལ་རྡོ་རྗེ་འཆང་ཆེན་དེ་ནི། འགྱུར་བ་མེད་པ་རྡོ་རྗེའི་སྐུ། དེ་བཞིན་གཤེགས་པ་ཐམས་ཅད་དབྱེར་མེད་པའི་བདག་ཉིད་ཅན་དེ། འདི་ལྟར་རྡོ་རྗེ་བཙུན་མོའི་བྷ་ག་རྣམ་པར་དག་པ་བདེ་སྟོང་ཆེན་པོའི་ངང་ན་སྙོམས་པར་ཞུགས་ཤིང་། བྱང་ཆུབ་སེམས་དཔའ་སེམས་དཔའ་ཆེན་པོའི་འཁོར་རྡུལ་སྙེད་དང་བཅས་པ་ནི། འདི་ལྟ་སྟེ། དམ་ཚིག་རྡོ་རྗེ་དང་། ལུས་རྡོ་རྗེ་དང་། ངག་རྡོ་རྗེ་དང་།སེམས་རྡོ་རྗེ་དང་། ཏིང་ངེ་འཛིན་རྡོ་རྗེ་དང་། རྒྱལ་བའི་རྡོ་རྗེ་དང་། ས་རྡོ་རྗེ་དང་། ཆུ་རྡོ་རྗེ་དང་། མེ་རྡོ་རྗེ་དང་། རླུང་རྡོ་རྗེ་དང་། ནམ་མཁའ་རྡོ་རྗེ་དང་། གཟུགས་རྡོ་རྗེ་དང་། སྒྲ་རྡོ་རྗེ་དང་། དྲི་རྡོ་རྗེ་དང་། རོ་རྡོ་རྗེ་དང་། རེག་བྱ་རྡོ་རྗེ་དང་། ཆོས་རྡོ་རྗེ་ལ་སོགས་པ་ཐམས་ཅད་དང་ཐབས་ཅིག་ཏུ་བཞུགས་སོ། །གཞན་ཡང་དེ་བཞིན་གཤེགས་པའི་འཁོར་རྡུལ་སྙེད་དང་བཅས་པ་ནི། འདི་ལྟ་སྟེ། རྣམ་པར་སྣང་མཛད་དང་། མི་བསྐྱོད་པ་དང་དཀོན་མཆོག་དཔལ་དང་། ཚེ་དཔག་མེད་དང་། དོན་ཡོད་གྲུབ་པ་དང་། དེ་བཞིན་གཤེགས་པ་ཐམས་ཅད་དང་། ཐབས་ཅིག་ཏུ་བཞུགས་སོ། །དེ་ནས་བཅོམ་ལྡན་འདས་དཔལ་རྡོ་རྗེ་འཆང་ཆེན་པོ་དེ་ཉིད། འདོད་ཆགས་ཆེན་པོའི་ཏིང་ངེ་འཛིན་ལ་སྙོམས་པར་ཞུགས་ནས། རྡོ་རྗེ་བཙུན་མོའི་ཚོགས་དང་འཁྲིལ་བ་ནི། འདི་ལྟ་སྟེ། སངས་རྒྱས་སྤྱན་དང་། མཱ་མ་ཀཱི་དང་། གོས་དཀར་མོ་དང་། སྒྲོལ་མ་དང་བཅས་པ་ལ་བདེ་བ་དང་མཆོག་ཏུ་བདེ་བ་དང་། བདེ་བྲལ་གྱི་བདེ་བ་དང་། ལྷན་ཅིག་ཏུ་སྐྱེས་པའི་བདེ་བས་
འཁོར་བ་དང་མྱ་ངན་འདས་པའི་ཁམས་ཐམས་ཅད་ལ་ཁྱབ་པར་མཛད་དོ། །ཁྱབ་པར་མཛད་ནས་ཡུམ་གྱི་བྷ་གར་འདུས་པར་གྱུར་པ་ལས། བཅོམ་ལྡན་འདས་དཔལ་རྡོ་རྗེ་སེམས་དཔའི་སྐུར་ཤར་བ་ནི་འདི་ལྟ་སྟེ། དཀར་པོ་དང་། མཐིང་ག་དང་། དམར་པོའི་ཞལ་དང་། རྡོ་རྗེ་དང་། འཁོར་ལོ་དག་རིན་ཆེན་དང་། དྲིལ་བུ་དང་། པདྨ་དང་། རལ་གྲི་ཕྱག་དྲུག་ན་འཛིན་པ། ཞབས་རྡོ་རྗེ་སྐྱིལ་ཀྲུང་དུ་བཞུགས་པར་གྱུར་ཏོ། །དེ་ནས་གཞན་ཡང་བྱང་ཆུབ་སེམས་དཔའི་བདེ་བ་ལས་གྱུར་པའི་ཁྲོ་བོ་ཨཀྵོ་བྷྱའི་སྐུར་ཤར་བ་ནི་འདི་ལྟ་སྟེ། དཀར་པོ་དང་། མཐིང་ནག་དང་། དམར་བའི་ཞལ་དང་། རྡོ་རྗེ་དང་། ཁ་ཊྭཱཾ་ག་དང་། རྔེའུ་ཆུང་དང་། དུང་དམར་དང་། རྒྱུ་ཞགས་དང་། ཁྱུང་གི་ཁྲ་ཕྱག་དྲུག་ན་འཛིན་པ། ཞབས་བརྐྱང་བསྐུམ་དུ་བཞུགས་པར་གྱུར་ཏོ། །དེ་ནས་བཅོམ་ལྡན་འདས་རྡོ་རྗེ་འཆང་ཆེན་པོས་གསང་བའི་སྔགས་འདི་ཉིད་ཀྱི་སྐུ་གསུང་ཐུགས་རྡོ་རྗེ་ལས་ཕྱུང་ངོ་། །བཛྲ་དྷྲྀཀ །བཛྲ་ཨཀྵོ་བྷྱ་ཧཱུཾ་ཤྲཱིཿབཛྲ་དྷྲྀཀ །ཅེས་བརྗོད་པས་ཁྲོ་བོ་ཨཀྵོ་བྷྱ་དཔལ་རྡོ་རྗེ་སེམས་དཔའ་ལ་ཐིམ་པར་གྱུར་པ་ལས། སངས་རྒྱས་ཐམས་ཅད་ཀྱི་དཀྱིལ་འཁོར་གྱི་བདག་པོ།བཅོམ་ལྡན་འདས་ཞེ་སྡང་རྡོ་རྗེའི་སྐུར་ཡོངས་སུ་རྫོགས་པ་ནི་འདི་ལྟ་སྟེ། དཀར་པོ་དང་། མཐིང་ཤུན་དང་། དམར་པོའི་ཞལ་ཅན། གཡས་ན་རྡོ་རྗེ་དང་།ཞགས་པ་དང་། ལྕགས་སྒྲོག་དང་། གཡོན་ན་བྷན་དྷ་དང་། དགྲ་སྟྭ་དང་།ལྕགས་ཀྱུ་བསྣམས་པ་ཞི་ཁྲོ་འདྲེས་པའི་སྐུར་གྱུར་ཏོ། །དེ་ནས་དེ་བཞིན་གཤེགས་པ་ཐམས་ཅད་ཀྱི་ཡུམ་རྡོ་རྗེ་དབྱིངས་ཕྱུག་མ་ཡང་སྟོན་པ། ཞེ་སྡང་རྡོ་རྗེ་དང་གཉིས་སུ་མེད་པར་སྐུ་ལ་འཁྲིལ་ཏོ། །དེ་ནས་ཡུམ་རྡོ་རྗེ་དབྱིངས་ཕྱུག་མས་འདི་སྐད་ཅེས་གསོལ་ཏོ། །ཆོས་དང་གང་ཟག་བདག་མེད་མཁྱེན། །གཟུང་འཛིན་སྒྲིབ་པ་གཉིས་སྤངས་ཤིང་། །བྱམས་པས་འགྲོ་ལ་ཐུགས་རྟག་རྗེ། །གདོད་ནས་དོན་མཛད་མཐར་ཕྱིན་པ། །པད་ལྟར་འདམ་སྐྱེས་སྐྱོན་མི་གོས། །མི་གནས་དབྱིངས་ལ་ཕྱག་འཚལ་ལོ། །
བདག་དང་མཐའ་ཡས་སེམས་ཅན་རྣམས། །ཡེ་ནས་སངས་རྒྱས་ཡིན་མོད་ཀྱང་། །རྟོག་པའི་དབང་གིས་འཁོར་བ་ལ། །བྱང་ཆུབ་མཆོག་ཏུ་སེམས་བསྐྱེད་དོ། །སྟོང་གསུམ་འཇིག་རྟེན་ཀུན་གནས་པའི། །སེམས་ཅན་ཉོན་མོངས་སྣང་བ་དང་། །ཐེག་པའི་རིམ་པ་ལམ་ཞུགས་པའི། །རྣལ་འབྱོར་ཉམས་ཀྱི་སྣང་བ་དང་། །བདེ་གཤེགས་སྣང་བ་སྐུ་གསུང་ཐུགས། །མི་ཟད་རྒྱན་གྱི་འཁོར་ལོར་ཤར། །སྣང་བ་གསུམ་པོ་དབྱེར་མེད་ཏུ། །ཟུང་འཇུག་བསྒྲུབ་པའི་ཞི་ཁྲོ་ཡི། །མཆོད་པ་ཚོགས་ཀྱི་འཁོར་ལོ་ཡི། །ཀརྨ་མཱ་ལེའི་རྒྱུད་ཆེན་གསུངས། །ཞེས་གསོལ་ཏོ། །དེ་ནས་སངས་རྒྱས་ཐམས་ཅད་ཀྱི་དཀྱིལ་འཁོར་གྱི་བདག་པོ། བཅོམ་ལྡན་འདས་ཞེ་སྡང་རྡོ་རྗེས་འདི་སྐད་ཅེས་གསུངས་སོ། །ཚོགས་ཀྱི་མཆོད་པས་དམ་སྐོང་སྒྲིབ་སྦྱངས་ཤིང་། །དེ་ཉིད་ལྷ་ཡང་འདུག་ལྔ་འགོ་བགེགས་གཉིས་འཇིལ་བའི་རྒྱུ། །སྐུ་གསུམ་མཐར་ཕྱིན་འགྲོ་བའི་དོན་མཛད་པ། །འགྲོ་བའི་དོན་ཕྱིར་རིམ་པར་བཤད་པར་བྱ། །དེ་ལ་དཀྱིལ་འཁོར་འདི་དུས་སུ། །དཀྱིལ་འཁོར་རྣམ་པ་དྲུག་དང་ནི། །ལས་རྣམས་བསྡུས་པའི་ཕྱི་མ་དང་། །བདུད་ཀྱི་མཆོད་པ་བཤད་པར་བྱ། །དེ་ཡང་དཀྱིལ་འཁོར་དྲུག་ཅེས་པ། །དུས་སུ་ཚོགས་དང་གསལ་བཀྲ་རྣོན་པོ་བསྐྱེད། །འབར་བའི་ཕྲིན་ལས་ཚོགས་ཏེ་མཆོད་པས་ཐིམ། །དུས་ཀྱི་དུས་ཉུལ་ཚོགས་ཀྱི་བསྐོས་ཉུལ་དང་། །ཏིང་འཛིན་དྲོད་ཉུལ་ཏི་རའི་གནས་འཕྲོག་དང་། །དུར་ཁྲོད་གནས་ཉུལ་མཆོད་པའི་ཕུད་ཉུལ་དྲུག །དེ་དྲུག་དཀྱིལ་འཁོར་དྲུག་ཏུ་ཤེས་པར་བྱ། །ཞེས་གསུངས་སོ། །ཀརྨ་མཱ་ལེའི་རྒྱུད་ལས། རྒྱུད་འབྱུང་བའི་རྒྱུ་གླེང་གཞི་དང་། གླེང་བསླང་བའི་ལེའུ་སྟེ་དང་པོའོ།། །།དེ་ནས་བཅོམ་ལྡན་འདས་ཚོགས་ཀྱི་འཁོར་ལོ་ཆེན་པོ་ལས་དུས་ཀྱི་དཀྱིལ་འཁོར་འདི་གསུངས་སོ། །དེ་ལ་དུས་ཀྱི་དཀྱིལ་འཁོར་ནི། །དུས་ཆེན་བྱིན་གྱིས་བརླབས་པ་སྟེ། །དུས་ཆེན་དྲུག་ལ་མི་
གཡོ་བར། །ཚོགས་ཀྱི་མཆོད་པ་དབུལ་བའོ། །ཁྱད་པར་ལོ་འམ་ཟླ་བ་འམ། །རྒྱུན་ནམ་ཡང་ན་དུས་དྲུག་ལ། །དུས་དང་ཁྱད་པར་ཤེས་པར་བྱ། །དེ་ལ་དུས་ཀྱི་རྟགས་ཉུལ་མས། །གཟའ་སྐར་དུས་ཚིགས་བཟང་པོ་ལ། །འདུས་མ་འདུས་དང་ཡོན་ཏན་སྐྱོན། །དེ་ཕྱིར་དུས་འདིར་རབ་ཏུ་གཅེས། །རྒྱུན་དུའམ་ཡང་ན་ཟླ་གཅིག་གམ། །དེ་བཞིན་ལོ་གཅིག་ཁྱུད་སྐོར་རམ། །བཅུ་བཞི་དང་ནི་བཅོ་ལྔ་དང་། །བརྒྱད་རྣམས་སུ་ནི་ཁྱད་པར་སྦྱིན། །དེ་ཡང་ཇི་ལྟ་བུ་ཞེ་ན། འཇིག་རྟེན་རྣམས་ནི་དགེ་སྡིག་གཉིས་ལ་སྤྱོད། །ལེགས་ཉེས་ཞལ་ལྕེ་གཅོད་པའི་ཁ་ཟིན་གཉིས། །དུས་འདིར་མཁའ་ལ་དགེ་སྡིག་ཁྲམ་གྱིས་ལེན། །དགེ་སྤྱོད་རྣམས་ལ་དུས་འདིར་གཅིག་ཏུ་གཅེས། །ཕྱི་ཡི་དུས་འདིར་མཁས་པས་ཚོགས་འཁོར་བྱ། །ཀུན་གཞི་རྒྱུ་ཡི་རྒྱུད་དུ་ཤེས་པའི་དུས། །དེ་ལ་འཁོར་འདས་ཚང་བས་རྩ་བའི་རྒྱུད། །ལུས་ནི་ཐབས་ཀྱི་རྒྱུད་དུ་ཤེས་པའི་དུས། །ཕུང་པོ་ཁམས་དང་སྐྱེ་མཆེད་དཀྱིལ་འཁོར་ལྷ། །སངས་རྒྱས་རིག་མ་བྱང་ཆུབ་ལྕམ་དྲལ་དང་། །སྤྲུལ་པ་སྒོ་བ་སྒོ་མའི་ཚོགས་རྣམས་སམ། །ལུས་ལ་བརྟེན་ནས་དབང་ལམ་ཐུན་བཞིར་བསྒོམ། །སྒྲིབ་འགག་སངས་རྒྱས་གསལ་བར་བཤད་པའི་རྒྱུད། །ཕྱག་རྒྱ་ཆེན་པོ་འབྲས་བུའི་རྒྱུད་ཉིད་ལ། །རིགས་འཛིན་སྐུ་ལྔ་ལྷུན་གྱིས་གྲུབ་པའི་དུས། །གཞི་ལམ་འབྲས་བུའི་དུས་ཤེས་རྣལ་འབྱོར་པས། །རྒྱུན་ཏུ་ཚོགས་ཀྱི་འཁོར་ལོས་སངས་རྒྱས་མཆོད། །བླ་མའི་དུས་དང་ལྡན་པ་རབ་ཡིན་ཏེ། །འདི་ལྡན་དུས་རྣམས་ཀུན་ལས་ཁྱད་པར་འཕགས། །ཕྱི་ཡི་བླ་མས་སྒྲོ་འདོགས་ཡོངས་སུ་གཅོད། །ནང་གི་བླ་མས་རང་བྱུང་ཡེ་ཤེས་སྟོན། །གསང་བའི་བླ་མས་ལྷན་སྐྱེས་ཡོངས་སུ་སྟོན། །མཐར་ཐུག་བླ་མས་ཆོས་རྣམས་དེ་ཉིད་སྟོན། །བླ་མའི་ཁྱད་པར་བཞི་དང་མ་ལྡན་ན། །དུས་ཀྱི་རྒྱལ་པོ་ཉམས་པར་ཤེས་པར་བྱ། །ཁམས་དགུ་འདུས་པའི་དྭངས་མ་ཆེན་པོ་ལ། །ཁམས་ཀྱི་འདུ་
ལུགས་རྣམ་པ་གསུམ་རྟོགས་པས། །རྣལ་འབྱོར་རང་ལུས་ཚོགས་འཁོར་བསྒྲུབ་པའི་དུས། །རྩ་དང་ཡི་གེ་ཐིག་ལེ་རླུང་གི་དུས། །ལས་དང་སྐལ་བར་ལྡན་པས་རྟོགས་པར་བྱ། །དུས་རྣམས་འདི་ལྟར་ཤེས་པའི་གང་ཟག་རྣམས། །རྒྱུད་སྡེ་བཅོ་བརྒྱད་ཚོགས་ཀྱི་འཁོར་ལོ་བསྒྲུབ། །ཅེས་གསུངས་སོ། །ཀརྨ་མཱ་ལེའི་རྒྱུད་ལས། དུས་ཀྱི་དཀྱིལ་འཁོར་གྱི་ལེའུ་སྟེ་གཉིས་པའོ།། །།དེ་ནས་བཅོམ་ལྡན་འདས་ཀྱིས་ཚོགས་ཀྱི་དཀྱིལ་འཁོར་འདི་དག་འགྲོ་བའི་དོན་དུ་སྐུ་གསུང་ཐུགས་ཡོན་ཏན་ཕྲིན་ལས་ལས་ཕྱུང་ནས་ཆེད་དུ་བརྗོད་དོ། །སྐལ་ལྡན་མི་དང་འབྱོར་ལྡན་དང་། །དགའ་ལྡན་ལྷ་ཡི་ཚོགས་ཏེ་རྣམ་གསུམ་མོ། །སྐལ་ལྡན་མི་ཡི་ཚོགས་ལ་བརྒྱད། །མི་ཆུད་པ་ཡི་སྐྱོན་དགུ་བསལ། །འདུ་བའི་ཡོན་ཏན་དྲུག་ལྡན་བསྡུ། །དེ་ཡི་སྤྱོད་པ་བསྟན་པ་དང་། །འདུས་ལ་བརྟག་བཞིས་སྐྱོན་རྣམས་གསལ། །བདུད་བཞི་གཞོམ་པར་བྱ་བ་དང་། །ཆོ་ག་ཕུན་སུམ་ཚོགས་པར་བྱ། །ཤེས་པ་ཕུན་སུམ་ཚོགས་པ་དང་། །མི་འགྲུབ་པ་ཡི་གེགས་བསལ་ཡིན། །དེ་ནས་སྐྱོན་དགུ་གསལ་བར་གསུངས། །སྔགས་པས་བསྒྲིམས་ཏེ་བསལ་བ་ནི། །སྡོམ་ལ་གནས་པའི་དཀའ་ཐུབ་ཅན། །ཟས་དང་སྤྱོད་ལམ་མི་མཐུན་དང་། །ལྟ་སྤྱོད་མཐུན་ཡང་ནང་མི་མཐུན། །ཕྱི་ནང་ཅན་དང་གནོད་སྦྱོར་ཅན། །འདོད་པས་མོས་དང་ཟས་ལ་བརྐམ། །དད་མེད་བསྒོམ་བསྒྲུབ་མི་ནུས་པས། །འདི་དག་བསལ་བར་གསུངས་པའོ། །ཡང་འདི་དག་གསུངས་སོ། །ཉོན་མོངས་ཚི་ཆད་ཏིང་འཛིན་གཡེལ་མི་འགྲུབ། །དང་དུ་ལེན་དང་སྤྱོད་པའི་དམ་ཉམས་དང་། །གཉིས་ཕྱི་མི་འགྲུབ་མ་སྤྱད་གྲོལ་མི་འགྱུར། །ཤེས་དང་སྤྱོད་པའི་དམ་ཚིག་ཅིར་གྱུར་ཡང་། །རྩ་བའི་དམ་ཉམས་མི་འགྲུབ་གེགས་སུ་ཆེ། །ཕྱི་ཆོས་ཁ་གསགས་ཁོང་དུག་བར་ཆད་འབྱུང་། །འདོད་མོས་དོན་ནོར་སྒྲར་འཇུག་སྔགས་སྤྱོད་ལོག །ཟས་སྐོམ་ཚོགས་ཀྱི་སྐོས་ནོར་
ཕུད་ལྷག་ཉམས། །མ་དད་ལེ་ལོས་རྒྱུ་འབྲས་འབྲས་བུ་མེད། །དེ་ཕྱིར་སྐྱོན་རྣམས་བསལ་བར་རྒྱལ་བས་གསུངས། །ཕྱི་རབས་རྒྱུད་འདི་ཤེས་པས་ཚོགས་འཁོར་བྱ། །དེ་ནས་འདུ་བའི་ཡོན་ཏན་དྲུག་ལྡན་བསྡུ། །དད་པ་ཆེ་ལ་བློ་དང་བརྩོན་འགྲུས་ལྡན། །དཔའ་བརྟུལ་ཆེ་ལ་ཡིད་རིང་རྒྱུད་ལ་མཁས། །གཏོང་ཕོད་ཐོས་འཛིན་མེ་གསོད་པ་ལྟར་འབད། །ཐོགས་མེད་འཇུག་ནུས་མ་གྲུབ་མི་གཏོང་དང་། །བརྡའ་དང་ལན་ཤེས་ལས་ལ་ཞུམ་པ་མེད། །རྫོགས་དང་བྱང་ཤེས་སུམ་ཆར་བསྟན་པ་དང་། །ཡོན་ཏན་ལྡན་པ་དེ་དག་བསྡུ་བར་བྱ། །འདི་སྐད་ཀྱང་གསུངས་སོ། །དེ་ཡི་སྤྱོད་པ་མཐུན་པ་ནི། །གཅིག་བཞིན་དུ་ནི་གཅིག་སྤྱོད་དང་། །ལྷན་ཅིག་སྤྱོད་དང་རྗེས་སྤྱོད་འདུག །སངས་རྒྱས་ཀུན་དང་དགོངས་མཉམ་སྦྱོར། །མཁའ་འགྲོ་འཁོར་ལོ་མཆོག་ཏུ་འབར། །དེ་ཡང་བརྟག་པ་རྣམ་བཞི་ནི། །སློབ་དཔོན་མ་བརྟགས་གྲོགས་མ་བརྟགས། །གཟུངས་མ་མ་བརྟགས་གནས་མ་བརྟགས། །དངོས་གྲུབ་མི་ཐོབ་ལས་མི་འགྲུབ། །དམ་ཚིག་ཉམས་དང་བར་ཆད་འབྱུང་། །རྡོ་རྗེ་སློབ་དཔོན་བློ་ལྡན་ལ། །གསང་སྔགས་རྒྱུད་ཀྱིས་དབང་བསྐུར་ཞིང་། །ལུང་དང་མན་ངག་ཡོངས་ཤེས་པ། །དེ་ཉིད་བཅུ་དང་ལྡན་པའོ། །ཐབས་དང་ཤེས་རབ་ལྡན་པ་ཡིས། །ལས་དང་ལས་ཀྱི་ཕྱག་རྒྱ་ཤེས། །སྤྱོད་པ་བརྡ་ཡི་ཚུལ་རིག་ཅིང་། །བརྣག་པར་བྱ་བའི་གཟུངས་ཐུབ་པའོ། །ངན་སེམས་གྲོགས་དང་འདྲེལ་པ་མེད། །མོས་ལྡན་དང་བའི་ཚིག་ལ་བབ། །དོགས་པའི་འདུ་ཤེས་སྤངས་པ་ཡི། །ཟླ་གསང་དཀར་དམར་རླུང་ཁར་ལྕི། །དབེན་པའི་རི་བོ་རི་སུལ་ནོགས། །ཞབས་ཀྱིས་བཅགས་ཤིང་ཡིད་དང་འཐད། །ལྷ་མིས་བཏུལ་བ་གང་ཡིན་པ། །དེ་ནི་བསྒྲུབ་པའི་གནས་སུ་འཐད། །དེ་ཡང་བདུད་བཞི་གཞོམ་བྱ་བ། །མཆོད་མཁན་ལས་མཁན་སྦྱོར་དང་སྒྲོལ། །སྣོད་དང་མི་ལྡན་གནས་ནོར་ལ། །ཤེས་རབ་སྙིང་རྗེས་མ་ཟིན་ན། །ཉམས་པའི་བདུད་དང་ལས་ཀྱི་བདུད། །ལྷ་དང་སྲིན་པོ་བདུད་རྣམས་སོ། །དེ་ཡང་འདི་ལྟར་རབ་ཏུ་ཤེས་
པར་བྱ་བ་ནི། །འཆད་མཁན་སྣོད་མི་རྟོག་པ་ཉམས་པའི་བདུད། །ཀརྨས་བབ་ཅོལ་བྱེད་པ་ལས་ཀྱི་བདུད། །སྦྱོར་བ་ཤེས་རབ་མ་ཟིན་ལྷ་བུའི་བདུད། །སྒྲོལ་བ་སྙིང་རྗེས་མ་ཟིན་སྲིན་པོའི་བདུད། །བདུད་བཞིའི་སྐྱོན་བསལ་བདུད་བཞི་བཅོམ་པ་ཡིན། །བདུད་བཞི་བཅོམ་པས་ཚོགས་ཀྱི་མཁན་པོ་རྣམས། །བླ་མ་སློབ་མ་མཐར་ཕྱིན་ཁྱད་པར་འཕགས། །དེ་ལ་ཆོ་ག་ཁྱད་པར་འཕགས་པ་ནི། །ཆོ་ག་ལྔ་ནི་རྫོགས་བྱས་ཤིང་། །ཡོ་བྱད་ལྔ་ནི་རྫོགས་པར་ལྡན། །སྔགས་ཀྱི་ཡན་ལག་ལྔ་རྫོགས་ཤིང་། །མ་ཉམས་འཇུག་ལ་རབ་བརྩོན་ན། །ཡན་ལག་མ་ཉམས་ཡོ་བྱད་ལྡན། །ཆོ་ག་རྫོགས་པར་ལྡན་པ་ཡི། །རྣལ་འབྱོར་ཚོགས་པའི་དཀྱིལ་འཁོར་གྱིས། །ངེས་པར་ལེགས་པའི་དགོངས་པ་འགྲུབ། །སྲི་ཞུ་གུས་པས་སྒྱུ་མེད་སློབ་དཔོན་མཉེས། །དམ་མནོས་མི་དཔྱ་མི་འབེལ་མི་གཅོད་སྤངས། །དཀྱིལ་འཁོར་ལྷ་རྒྱུད་ཕྱག་རྒྱ་བཞིར་ཤེས་ཞུགས། །སྒྲུབ་ལ་དབང་མནོས་ལུང་དང་མན་ངག་ཐོབ། །དབང་ཐོབ་བརྟུལ་ཞུགས་རིགས་པ་བསྒོམ་ཞིང་བསྒྲུབ། །ཁ་ཚིག་མ་ཡིན་རིག་པའི་གཏིང་དུ་གྱུར། །གནས་མཆོག་རབ་ཏུ་དབེན་ཞིང་ཡིད་འཐད་དང་། །གླང་ཆེན་ཁྱུ་མཆོག་ལ་སོགས་ཞི་ཁྲོའི་གདན། །ཕྱག་མཚན་འཕན་མེད་མ་ཡོ་རྫོགས་པ་དང་། །གསོ་བའི་ཟས་དང་རྐྱེན་བཟློག་སྨན་རྣམས་སོ། །དོན་དམ་གཉིས་སུ་མེད་པར་བྱང་ཆུབ་པའི། །རྟགས་སུ་ཟླ་དཀྱིལ་རྡོ་རྗེ་ཡིག་འབྲུས་མཚན། །སྐུར་གྱུར་ཕྱག་རྒྱ་གསུམ་འཕྲོ་འོད་ཟེར་ལས། །ལྔ་སྟེ་རིགས་ལྔའི་མཚན་རྟགས་བདུན་དུ་བགྲང་། །དེ་ལ་ཤེས་པ་ཕུན་སུམ་ཚོགས་པ་ནི། །ཤེས་འཇུག་མཚན་ཉིད་འབྱོར་པའི་སྐུ། །འབྲས་བུ་སྨིན་བྱེད་རྒྱུ་དང་རྐྱེན། །ནུས་མཐུ་ཅན་དུ་གང་གྱུར་པ། །རིག་འཛིན་རྒྱལ་བའི་ཞིང་དུ་གྲགས། །རྒྱུ་གཅིག་པ་དང་ཡིག་འབྲུའི་ཚུལ། །བྱིན་གྱིས་བརླབས་དང་མངོན་སུམ་པ། །རབ་ཏུ་རྟོགས་པ་རྣམ་པ་བཞི། །ཐམས་ཅད་མངོན་རྫོགས་རྒྱལ་པོ་ཆེ། །བསྙེན་པ་དང་ནི་ཉེ་བསྙེན་པ། །སྒྲུབ་པ་
དང་ནི་སྒྲུབ་ཆེན་ནོ། །གསང་བའི་ཐིག་ལེ་དཀྱིལ་འཁོར་དབྱིངས། །འབྱུང་བ་ཤེས་རབ་རིགས་ཀྱི་ཡུམ། །ཆེན་པོ་རིགས་ཀྱི་དེ་བཞིན་ཏེ། །བྱང་ཆུབ་སེམས་ནི་རྡོ་རྗེའི་ཚོགས། །ཆོས་སྐུ་མི་ཤིགས་སྲོག་འཛིན་ལ། །ཕྱི་རོལ་འབྱུང་བ་ལྔ་པོ་ཡུམ། །རྩ་བ་ཕུང་པོའི་རླུང་ལྔ་དང་། །ཡན་ལག་རྣམ་ཤེས་རླུང་ལྔར་སྨིན། །ལྷག་མར་བཅས་པའི་ལུས་ཉིད་ཀྱི། །ཚེ་ལ་དབང་བའི་རིག་འཛིན་ཐོབ། །རྒྱལ་སྲས་དེ་ནི་འདོད་ནས་འཆི། །རིག་པར་བཅས་པའི་ཚེ་དེ་ནི། །དེ་ཡི་ཚེ་ནི་བཅུ་དྲུག་ལས། །བརྒྱ་བརྒྱ་དག་ཏུ་བསྒྱུར་ནས་ནི། །བླ་མེད་བྱང་ཆུབ་ཐོབ་པར་བཤད། །ཡེ་ཤེས་ཐིག་ལེ་དེ་ཉིད་ལ། །ཡེ་ཤེས་ཐིག་ལེ་ཉིད་སྣང་བའོ། །ཡེ་ཤེས་ཆེན་པོ་མདུན་ནས་ཀྱང་། །དེ་ལྟར་མཐོང་བར་གྱུར་ན་ཡང་། །རྒྱབ་ནས་འབྱུང་བའི་ཡེ་ཤེས་ནི། །མི་དང་ལྷ་དང་ཚངས་པ་ཡི། །སྐྱེ་བ་རྣམ་དག་འཛིན་མོད་ཀྱི། །ཁྱད་པར་ས་ལ་གནས་འགྱུར་ཡིན། །མི་འགྲུབ་པ་ཡི་གེགས་བསལ་ཏེ། །མ་དད་པ་དང་ལེ་ལོ་དང་། །བྱང་ཆུབ་སེམས་ནི་མ་སྐྱེས་དང་། །ཐེ་ཚོམ་ཡོད་པ་ཅན་ཉིད་ནི། །བསྒྲུབ་པར་བྱ་བའི་གེགས་སུ་འགྱུར། །འགྲུབ་པའི་དུས་ནི་རབ་བཤད་ན། །ཞག་ནི་སུམ་ཅུ་ཕྲག་དྲུག་གམ། །བཅུ་བཞི་བཅོ་ལྔ་བཅུ་དྲུག་གིས། །དབང་བསྐུར་རིགས་ཀྱི་དམ་པ་འགྲུབ། །དེ་ཚེ་བཅོ་ལྔ་ཚུན་ཆད་ཀྱི། །སྐུ་ལྔ་ལྷུན་གྱིས་རྫོགས་པའོ། །དེ་ནས་བདེ་གཤེགས་སངས་རྒྱས་ཀྱིས། །འབྱོར་ལྡན་ཡོ་བྱད་ཚོགས་བཤད་པ། །སྒྲུབ་པའི་ཡོ་བྱད་གསུངས་པ་ཡི། །བརྒྱད་དམ་བཞི་ཡི་བདག་ཉིད་ཅན། །སྒྲུབ་པའི་ཡོ་བྱད་རྣམ་བརྒྱད་དེ། །གོས་རྒྱན་བཟའ་བཏུང་གླུ་དང་ཚིག །བྲོ་གར་སོགས་ཀྱི་སྤྲིན་ཕུང་ལ། །ཧཱུྃ་དང་ཤེས་པས་རབ་སྤྱད་ནས། །ངོ་མཚར་འབྱུང་བའི་དཀྱིལ་འཁོར་མཉེས། །བགོ་བ་སྣ་ཚོགས་བཤད་པ་ནི། །དབང་ཕྱུག་རིག་འཛིན་མར་ལྡན་པས། །ཚེ་ཡི་དམ་པ་འགྲུབ་པ་སྟེ། །གོས་ལྔ་དག་ཏུ་བཤད་པ་ནི། །ཡོ་བྱད་ཕྱི་མ་ཐམས་ཅད་དང་། །གོས་དང་རྒྱན་ལ་སོགས་པའོ། །དབུ་རྒྱན་དང་ནི་ཕྱག་གདུབ་དང་། །
དཔུང་རྒྱན་སྙན་ཆ་དོ་ཤལ་དང་། །སེ་མོ་དོ་དང་མེ་ཏོག་རྒྱན། །བྱང་ཆུབ་ཡན་ལག་བདུན་དུ་བཤད། །བདག་འཛིན་གཞན་རྟོག་བཏང་སྙོམས་ལས། །རང་བཞིན་རྣམ་པར་དག་པ་རྟོགས། །སྒྲིབ་གཉིས་ཉེས་སྐྱོན་སྤངས་པས་ན། །ཡེ་ཤེས་གོས་ནི་དཀར་པོར་བསྟན། །ཆགས་བྱ་ཆགས་མེད་སྤངས་ནས་ནི། །ཐུགས་རྗེས་ཐམས་ཅད་ཆགས་མེད་པས། །དབང་དུ་གྱུར་ཡང་མ་ཆགས་ཏེ། །ཚུལ་ཁྲིམས་གོས་ནི་དམར་པོ་ཡིན། །བདག་ཏུ་མི་འཛིན་བྱམས་པ་ཡིས། །ཡོན་ཏན་ཡིད་བཞིན་གཏེར་ཆེན་འཕྲོ། །ཀུན་གྱི་རེ་འདོད་སྐོང་བའི་ཕྱིར། །སྦྱིན་པའི་གོས་ནི་སེར་བོར་བསྟན། །གཉིས་མེད་ལས་ཀྱི་སྤྲུལ་པ་ཡིས། །ཇི་ལྟར་སྤྲུལ་ཞིང་མཛེས་མཛད་པས། །འགྲོ་ཀུན་དགེ་ལ་དགོད་པའི་ཕྱིར། །བརྩོན་འགྲུས་གོས་ནི་ལྗང་གུ་ཡིན། །ཆོས་ཉིད་ངང་ལ་བཅོས་སུ་མེད། །ཁ་དོག་མཐིང་ག་བསྒྱུར་དུ་མེད། །མི་འགྱུར་མི་ཤིགས་རང་བཞིན་པས། །ཤེས་རབ་གོས་ནི་མཐིང་ག་ཡིན། །དེ་ཡི་ཁ་དོག་གོས་ལྔར་བགོས། །དེ་ནས་རྒྱན་གྱི་ཆོས་ལྔར་བརྒྱན། །ཐུགས་ཀྱི་ཤེས་བྱ་ཟེའུ་ལྡིར་ཅོད་པན་དང་། །ཡོན་ཏན་གཟི་མདངས་སྟོད་གཡོགས་དང་། །སྐུ་བརྗིད་ཚུལ་གྱི་ཆོས་གོས་དང་། །གསུང་ཐུགས་རྗེས་ཆགས་སྨད་དཀྲིས་དང་། །མཛད་པ་གར་གྱི་གཙང་གོས་ཕུ་དུང་སྟེ། །འདི་རྣམས་རྒྱན་ཆས་དམ་པའོ། །ལས་རྣམས་རིགས་བཞི་མཐུན་པའི་ཆས། །དེ་བས་ཡང་དག་མཛེས་པའི་མེ་ཏོག་ཕྲེང་། །དམ་ཆོས་རྣམ་འབྱེད་དབུ་རྒྱན་རིན་ཆེན་ཕྲེང་། །ཕྱག་གདུབ་སྣ་ཚོགས་ལས་མཛད་བརྩོན་འགྲུས་ལྡན། །རིན་ཆེན་ཚོགས་སྤྲས་དབུ་རྒྱན་དྲན་པའི་ངང་། །སྙན་ཆ་ལུས་སེམས་བསིལ་བྱེད་ཤིན་ཏུ་སྦྱང་། །དོ་ཤལ་ཏིང་འཛིན་དབུས་མཆོག་ཕྲེང་བའི་རྒྱན། །བདག་འཛིན་བཏང་སྙོམས་སྤྲུལ་པའི་སེ་མོ་དོ། །བྱང་ཆུབ་འོད་འཕྲོ་ཤེས་བྱའི་ཅོད་པན་འཕུར། །ཁམས་ཀྱི་རང་བཞིན་ཐམས་ཅད་དང་། །སྲོག་དང་རྩ་བ་དེ་བཞིན་ཏེ། །བྱས་པའམ་ནི་བླུགས་པའམ། །བརྡུངས་པ་དང་ནི་བྲིས་
པའང་རུང་། །སྣ་ཚོགས་རབ་ཏུ་ལེགས་པ་ཡི། །མཚན་མའི་ཕྱག་རྒྱ་བཏག་པར་བྱ། །དབུ་རྒྱན་རིགས་བདག་རྣམ་སྣང་མཛད། །སྙན་ཆ་མགུར་ཆུ་སྣང་མཐའ་ཡས། །ཕྱག་གདུབ་ཕྲེང་བ་རྡོ་རྗེ་སེམས། །སྐུ་ཡི་སྐ་རགས་རིན་ཆེན་འབྱུང་། །རྐང་གདུབ་དོན་ཡོད་གདོན་མི་ཟ། །བྱང་ཆུབ་ལྕམ་དྲལ་རིགས་ལྔས་སྤྲས། །བདུད་འདུལ་སྟོབས་མཆོག་ཐེག་པ་མཆོག་གི་རྒྱན། །དཔའ་བརྗིད་མཉེན་ལྕུག་འཁྲིལ་པ་ཡུམ་གྱི་རྒྱན། །དཔའ་བརྟུལ་ཟ་བྱེད་ཡེ་ཤེས་ཐུགས་རྗེའི་རྒྱན། །མི་འཁོར་བྱང་ཆུབ་སེམས་ཀྱི་རྒྱན་དུ་བསྟན། །སྐུ་གསུམ་ཐེག་གསུམ་དུག་གསུམ་དབང་འཆེད་སྒྲོལ། །དོན་དམ་བཅུད་ཉིད་ཆགས་ཚུལ་ཐུགས་རྗེའི་རྒྱན། །འདུལ་བྱེད་ཕྲིན་ལས་རྒྱན་ཏེ་རྣམ་པ་བརྒྱད། །འཇིགས་བྱེད་ལགས་པའི་རྟགས་སུ་བསྟན་པ་ཡིན། །རྣལ་འབྱོར་བཟའ་བའི་རྣམ་པ་མང་པོ་ནི། །ཨ་མྲ་སྨིན་པ་གྲོལ་བར་བཤད། །འབྲས་བུ་ཆེན་པོ་པ་ན་སེ། །རྒུན་འབྲུ་ཁུ་བ་ཁུ་བའི་མཆོག །ན་ལི་ཀེ་ར་དངོས་གྲུབ་མཆོག །དམ་ཆོས་འབྲས་བུ་ཨ་རུ་ཀ །ཨ་མྲ་རྒུན་འབྲུམ་པ་ན་ས། །ན་ལི་ཀེ་ར་ཨ་རུ་ཀ །འབྲས་བུ་ཆེན་པོ་ཁྱད་པར་དག །བདུད་རྩི་འབྲས་བུ་ཡིན་པར་བཤད། །དཀར་རྩི་དམར་རྩི་དྲི་ཤ་ཆེན། །དག་པའི་སྣོད་ཆུ་དམ་པའོ། །རྩ་བ་འབྲས་བུ་སྡོང་བུ་དང་། །བཟའ་བ་བཅའ་བ་སྤྱད་པར་བྱ། །དཔའ་བོ་དཔའ་མོའི་བཏུང་བ་ནི། །རྣལ་འབྱོར་པ་ཡིས་བཏུང་ཞིང་མཆོད། །ཆང་ནི་སྒེག་མོ་ཡིན་པར་བཤད། །རབ་ཏུ་རྨོངས་པ་སྦྲང་རྩིའོ། །བུ་རམ་ཆང་ནི་མྱོས་བྱེད་གསུངས། །རྒུན་ཆང་དག་ནི་བདུད་རྩི་ཡིན། །གླུ་ནི་ཚིག་ཏུ་བརྗོད་པར་བྱ། །དར་དིར་དག་ནི་སིལ་སྙན་ཡིན། །རྡོ་རྗེ་སེམས་དཔའ་དཔལ་སྦྱོར་བའི། །གླུ་དང་སིལ་སྙན་གར་བྱེད་པ། །བརྡའ་ཡི་དམ་པར་བཤད་པ་ནི། །ཧཱུཾ་ལ་སོགས་པའི་གླུ་བླང་ངོ་། །རབ་ཏུ་ཞི་བ་སིལ་སྙན་གླུ། །ཨོཾ་གྱི་གླུ་ཡི་ཕྱག་རྒྱ་ནི། །ཚངས་པའི་དབྱངས་ཀྱིས་ཅི་དགར་བླང་། །གར་ནི་ཤིན་ཏུ་རྣམ་སྤྲུལ་ལོ། །མི་ཡི་དབང་པོའི་
སིལ་སྙན་གླུ། །ཏེ་ཞེས་བྱ་བ་གླུ་ཡི་རྒྱ། །ཐམས་ཅད་དགའ་བས་རབ་བསྒྲུབས་པ། །གར་ནི་ཤིན་ཏུ་རྣམ་སྤྲུལ་པའོ། །དུར་ཁྲོད་གླུ་དང་སིལ་སྙན་གླུ། །རྡོ་རྗེ་དྲག་པོ་སྒེག་མོའི་གླུ། །འཁུར་བ་དབུགས་ཀྱི་རླུང་འབྱིན་ཞིང་། །འབྲུག་གི་སྒྲ་ལྟར་ཟབ་པ་ཡི། །གར་ནི་ཤིན་ཏུ་རྣམ་སྤྲུལ་པའོ། །ཆགས་སམ་གླུ་གར་སིལ་སྙན་གླུ། །ཧྲིཿཞེས་བྱ་བ་གླུ་ཡི་རྒྱ། །ཁམས་གསུམ་རྣམ་པར་རྒྱལ་བར་བྱེད། །གར་ནི་ཤིན་ཏུ་རྣམ་འཕྲུལ་པའོ། །རབ་ཏུ་དཔའ་བོ་སིལ་སྙན་གླུ། །རྟ་མཆོག་རྣམ་པར་རོལ་པར་བྱེད། །ཧེ་ཞེས་བྱ་བ་གླུ་ཡི་རྒྱ། །གར་ནི་ཤིན་ཏུ་རྣམ་སྤྲུལ་བའོ། །སྐད་ཀྱི་གསངས་ནི་མཐོ་དམན་དང་། །གྲེ་འགྱུར་བཅས་ཤིང་བཟླའ་བ་དང་། །ཀ་ཀ་ལ་དང་རྡོ་རྗེའི་དབྱངས། །དེ་ནི་རབ་ཏུ་དབྱངས་སྙན་དང་། །ཀ་ཀ་ལ་ཡི་གླུ་ཡི་དབྱངས། །དུས་སུ་རབ་ཞི་བླང་བར་བྱ། །ཚིག་དྲུག་རྔ་ཐབས་དྲུག་དང་སྦྱར། །ཚིག་དྲུག་དཔའ་བོ་དཔའ་བོའི་ཚིག །རྡོ་རྗེ་སེ་གོལ་གཏོགས་པ་ཡིས། །སངས་རྒྱས་ཐམས་ཅད་བསྡུ་བར་བྱ། །ཐལ་མོ་ལེགས་པར་སྦྱར་བ་ཡིས། །ཐལ་མོ་ལན་གསུམ་རྣམ་པར་བརྡབ། །ཐབས་ནི་གཡས་སུ་སྦྱར་བྱ་སྟེ། །དེ་བཞིན་གཡོན་དུ་ཤེས་རབ་སྦྱར། །ཧོ་ཧི་ཨོཾ་ཧྲི་ཧཱུཾ་ལྔ་དང་། །ཧཾ་ཧཱུཾ་ཧྲི་ཏྲི་ཏཾ་ལྔ་རྣམས། །ཧཾ་ཨོཾ་ཧཾ་ཀུན་དེ་ལྟར་བྱ། །ཨོཾ་ཧྲིས་གཟིར་བའི་ཚུལ་དུ་བྱ། །དེ་ནས་ལག་པ་ཞི་བ་ཡིས། །ཐལ་མོ་གསུམ་གྱིས་བསྡུ་བར་བྱ། །དེ་ནས་སོར་མོ་ཐམས་ཅད་ཀྱང་། །བར་བར་བསྣོལ་ཏེ་བཅིང་བར་བྱ། །རྡོ་རྗེ་ཐལ་མོ་ཞེས་བཤད་དེ། །སངས་རྒྱས་ཐམས་ཅད་རབ་ཏུ་བསྒྲུབ། །ཨོཾ་སུ་ར་ཏེ་བཛྲ་ཨཉྫ་ལི་ཧཱུཾ། ཐལ་མོ་འདི་ཉིད་མཉམ་གཞག་སྟེ། །ཤིན་ཏུ་བསྐུལ་ནས་བཅིང་བར་བྱ། །རྡོ་རྗེ་བཅིངས་པ་བསྡུས་པ་ཡིས། །བཅིང་བའི་སྦྱོར་བ་ཉིད་དུ་བྱ། །ཨོཾ་སུ་ར་ཏ་བཛྲ་བན་དྷ་ཧཱུཾ། དེ་ཉིད་དུ་ནི་སྦོམ་པོ་གཞུག །ཁྲོ་བོའི་རྩེ་མོ་ཤིན་ཏུ་དགུག །རྡོ་རྗེ་སེམས་དཔའ་ཉིད་དུ་བསྒྲུབ། །ཨོཾ་སུ་ར་ཏ་བཛྲ་ཧཱུཾ།ཕྱག་རྒྱ་དང་ནི་སྒྲུབ་པ་དང་། །སྔགས་གསུམ་རིགས་ལྔ་སོ་སོར་བཅའ། །རྡོ་རྗེ་བཅིང་
བ་མཉམ་གཞག་སྟེ། །སྦོམ་པོ་ཁྲོ་བོ་རྩེ་མོར་སྦྱར། །གཡས་ཀྱི་རྡོ་རྗེ་སྦོམ་པོ་ནི། །དེ་ཡི་དབུས་སུ་གཞུག་པར་བྱ། །ཨོཾ་སུ་ར་ཏ་སྟྭཾ། ཧོ་བྷ་ག་ཝཱན། མ་ཧཱ་ཀཱ་རུ་ཎི་ཀ་དྲྀ་ཤྱ་ཧོ་ཧཱུཾ། ལག་པ་གཡས་གཡོན་གཉིས་གཉིས་རེག །མཛུབ་མོ་མཐེའུ་ཆུང་མཛེས་བསྒྱུར་ཏེ། །གཡོན་པའི་མཛུབ་མོ་ཁུ་ཚུར་བཅིང་། །གཡས་པ་བ་དན་གསུམ་པར་བྱ། །བསྙེམས་འཛིན་ཆེན་མོར་བྱས་བཅངས་པས། །སྦྱོར་བ་དེ་ནི་བཏེག་ནས་སུ། །མགྲིན་པའི་ཕྱོགས་སུ་ཡོངས་བསྒྱུར་ནས། །སྤྱི་བོའི་མཚམས་སུ་གཞག་པར་བྱ། །ཐམས་ཅད་འབེབས་པའི་གར་བྱེད་པ། །གར་བྱས་དེ་ནི་ཕབ་ནས་སུ། །སྐལ་བཟང་ཧཱུཾ་ཞེས་བྱ་བའི་གླུས། །མཆོད་པ་ཐམས་ཅད་དབུལ་བར་བྱ། །ལག་པ་གཡས་གཡོན་གཉིས་དག་གི། །མཛུབ་མོ་མཐེའུ་ཆུང་མཛེས་བསྒྱུར་བའི། །རྡོ་རྗེའི་ཐལ་མོ་སྦྱར་ནས་སུ། །དེ་ནི་གཡོན་དུ་བསྒྱུར་བར་བྱ། །རྡོ་རྗེའི་སྦྱོར་བས་བཏེག་ནས་སུ། །སྤྱི་བོའི་མཚམས་སུ་གཞག་པར་བྱ། །སྐལ་བཟང་ཧཱུཾ་ཞེས་བྱ་བའི་གླུས། །མཆོད་པ་ཐམས་ཅད་དབུལ་བར་བྱ། །ལག་པ་གཡས་གཡོན་གཉིས་དག་གི། །མཛུབ་མོ་མཐེའུ་ཆུང་མཛེས་བསྒྱུར་ཏེ། །རྡོ་རྗེའི་ཐལ་མོ་གྱེན་དུ་དགྲོལ། །མཆོད་པ་གཏོར་མ་ཀུན་གྱི་ཚུལ། །དུར་ཁྲོད་ཆ་ལུགས་གར་བྱེད་པ། །ཆ་བྱད་འདི་ཡིས་གར་བྱེད་ཅིང་། །སྐལ་བཟང་རྡོ་རྗེ་དྲག་པོར་བཀོད། །མཆོད་པ་ཐམས་ཅད་དབུལ་བར་བྱ། །ལག་པ་གཡས་གཡོན་གཉིས་དག་གི། །མཛུབ་མོ་མཐེའུ་ཆུང་མཛེས་བསྒྱུར་ཞིང་། །གཡས་གཡོན་ཐལ་མོ་བརྡབ་པ་ཡིས། །མཆོད་པ་ཐམས་ཅད་དབུལ་བར་བྱ། །གར་གྱི་དབང་ཕྱུག་གོ། །ལག་པ་གཡས་གཡོན་གཉིས་དག་གི། །མཛུབ་མོ་མཐེའུ་ཆུང་མཛེས་བསྒྱུར་ཏེ། །རྡོ་རྗེ་རིན་ཆེན་ཐལ་སྦྱར་ཏེ། །མཆོད་པ་ཐམས་ཅད་དབུལ་བར་བྱ། །དཔལ་རྡོ་རྗེ་རིན་ཆེན་ཏེ། ལས་དང་ཐུན་མོང་སྟེ། མཆོད་པ་ཐམས་ཅད་ཀྱི་སྤྱིའི་ཆོ་གའོ། །དེ་ནས་ཕྱག་རྒྱ་ཤེས་པས་ནི། །དཔལ་ལྡན་རྡོ་རྗེ་མཆོག་གི་གླུ། །
ལས་རྣམས་ཐམས་ཅད་རབ་འགྲུབ་ཅིང་། །སྲིད་པ་ཐམས་ཅད་རབ་ཏུ་འགྲུབ། །རྡོ་རྗེ་སེམས་དཔའ་བདེ་ཆེན་པོ། །སྐལ་བཟང་དཔལ་ཁྱོད་བདག་ལ་སོགས། །སྒྲུབ་ལ་རྟོག་པར་མཛད་དུ་གསོལ། །ཀྱེ་དེ་བཞིན་གཤེགས་པ་ཀུན་གྱི་བདག་ཉིད་བདེ་བ་མཁའ་འགྲོ་སྒྱུ་མ་སྣ་ཚོགས་བདེ་བའི་མཆོག །ཧཱུཾ་འགྲོ་བའི་རྒྱུད་རྣམས་རྣམ་པ་སྣ་ཚོགས་འདུལ་མཆོག་གྲུབ་པ་བདག་ལ་གྲུབ་པར་མཛད་དུ་གསོལ། ཨ་ལ་ལ་ཧོ། བདེ་བར་གཤེགས་པའི་འབྱོར་པ་སྣ་ཚོགས་གར་རྣམས་བསྟན་དུ་གསོལ། ཛཿཧཱུཾ་བཾ་ཧོཿ། ཀྱེ་བདེ་མཆོག་བདེ་བས་ཟུང་ལ་རྣམ་པར་སྤྲུལ། ཧཱུཾ་གནང་བར་མཛད་དུ་གསོལ། ཨ་ལ་ལ་ཧོ། དེ་བཞིན་གཤེགས་པ་སྣ་ཚོགས་མཁའ་འགྲོ་སྒྱུ་མས་སློབ་མ་གཟུང་དུ་གསོལ། དེ་ནས་གཞན་ཡང་བཤད་བྱ་བ། །ཥཥྛ་དབྱངས་ཀྱི་གླུ་བླངས་ནས། །དེ་བ་ཏ་ཡི་གླུ་བླང་ངོ་། །འཇིག་རྟེན་ཁམས་མང་རྡུལ་ཕྲན་གྲངས་མེད་ཁྱབ་པར་འཕྲོས་པ་ཡི། །རྒྱལ་བའི་དོན་རྣམས་རབ་ཏུ་ཕྲ་བའི་གྲངས་ཀྱི་རྡུལ་སྙེད་པ། །སྤྲུལ་པའི་སྐུ་རྣམས་རབ་ཏུ་ཕྲ་བའི་རྡུལ་གྱི་གྲངས་སྙེད་ནི། །སྲིད་པའི་བདེ་ཆེན་དེ་བཞིན་གཤེགས་ཀུན་རྣམ་སྤྲུལ་སྣ་ཚོགས་ཀྱིས། །རྡུལ་ཕྲན་གྲངས་མེད་དེ་བཞིན་གཤེགས་པ་རྣམ་པར་སྤྲུལ་པར་མཛོད། །ཧོ་རྣམ་པར་སྣང་མཛད་དཔལ་འབྱོར་པ། །ཨ་ལ་ལ་ཧོ། དེ་རང་བདག་ལ་གྲུབ་པར་མཛོད། །དེ་ནས་ཕྱག་རྒྱ་ཤེས་པ་ནི། །དཔལ་ལྡན་རྡོ་རྗེ་སྦྱོར་བའི་གླུ། །ལས་རྣམས་ཐམས་ཅད་རབ་སྒྲུབ་པ། །ཁྱད་པར་དུ་ནི་བཤད་པར་བྱ། །གཟིགས་པ་རྣམ་པ་སྣ་ཚོགས་འགྱུར་བའི་རྒྱས་ཐོབ་ལ། །རྣམ་པ་སྣ་ཚོགས་འོ་བྱེད་འཁྱུད་པས་རྨོངས་མཛད་དེ། །རྣམ་པ་སྣ་ཚོགས་བདེ་བའི་མཆོག་སྟོན་ཀུན་གསོལ་ལ། །རྣམ་པ་སྣ་ཚོགས་བདེ་མཆོག་ངོ་མཚར་བསྟན་དུ་གསོལ། །རྒྱས་བཏབ་རྨོངས་བྱས་བསྣམས་སུ་གསོལ། །བདེ་མཆོག་ངོ་མཚར་བདེ་ལ་བཞུགས། །ཧཱུཾ་ཨ་ལ་ལ་ཧོ་སྣང་བར་མཛོད། །རྣལ་འབྱོར་བདེ་མཆོག་སྒྱུ་མས་སྤྲུལ། །དམ་ཚིག་དག་ལ་འཇུག་ཏུ་གསོལ། །ཉོན་མོངས་ཀུན་ལས་རྒྱལ་བར་མཛོད། །མ་ལུས་པ་རྣམས་བསྣམས་སུ་གསོལ། །དེ་ནས་ཕྱག་རྒྱ་ཤེས་
པ་འདི། །པདྨའི་རྒྱལ་པོ་དཔལ་གྱི་གླུ། །ལས་རྣམས་ཐམས་ཅད་རབ་བསྒྲུབ་པའོ། །དེ་བཞིན་གཤེགས་པ་ཀུན་ལ་སོགས་པའི་གཟུགས་མཆོག་སྣ་ཚོགས་འཛིན། །སེམས་ཅན་རྣམ་པ་སྣ་ཚོགས་འདུལ་མཆོག་དངོས་གྲུབ་མཆོག་མངའ་བ། །སེམས་དཔའ་པདྨ་དགའ་མཆོག་སྒྱུ་མའི་དགའ་བ་བསྟན་དུ་གསོལ། །ཨ་ལ་ལ་ཧོ། ཀྱེ་གར་དབང་ཐར་དགའ་དགའ་བའི་གར་མཛོད་ཅིག །སངས་རྒྱས་རྡོ་རྗེ་འཛིན་པའི་དཔལ། །ཚངས་པ་འཇུག་སེལ་དབང་ཕྱུག་བདག །ཉི་ཟླ་བདག་ལགས་ཨ་ལ་ལ་ཧོ། །དཔའ་མོ་སྒྱུ་མ་དཔལ་ནི་པདྨ་རྣམ་པ་སྣ་ཚོགས་འདུལ་མཛད་དགའ་བའི་ཚུལ་གྱིས་གར་མཛད་པ། །པདྨའི་དམ་ཚིག་དབང་ཕྱུག་སངས་རྒྱས་གར་རྣམས་མཛད་དུ་གསོལ། །འདོད་ཆགས་རྣམ་པར་སྤྱོད་པ་ཐམས་ཅད་རྣམ་པར་སྦྱོང་། །པདྨ་འཛིན་པ་དེ་ཡི་སྤྱན་སྔར་གར་མཁན་གར་མཛོད་ཅིག །དེ་ནས་ཕྱག་རྒྱ་ཤེས་པ་ནི། །པདྨ་སྒྱུ་མ་མཆོག་གི་གླུ། །ལས་རྣམས་ཐམས་ཅད་རབ་སྒྲུབ་པ། །ཁྱད་པར་དུ་ནི་བཤད་པར་བྱ། །ཁམས་གསུམ་ཀུན་གྱི་ནང་ན་རྒྱལ་སྲིད་མཆོག་གི་ནོར་ལྡན་པས། །འཇམ་འདུས་གཡུལ་འགྱེད་སངས་རྒྱས་ཀུན་གྱིས་འདུལ། །རྣམ་པ་སྣ་ཚོགས་རྣམ་པར་རྒྱལ་བའི་རྒྱལ་མཚན་ཅན། །རྡོ་རྗེ་ཉི་མ་བདེ་མཆོག་སྒྱུ་མ་བསྟན་དུ་གསོལ། །སེམས་ཅན་སྤྲིན་ལ་བྱང་ཆུབ་མཆོག་གི་སྦྱིན་པ་སྣ་ཚོགས་ཆར་འབེབས་པ། །བདག་ཉིད་རེ་བ་ཀུན་གྲུབ་མྱུར་དུ་སྟོན་ཨ་ལ་ལ་ཧོ། །མི་ཟད་གཏེར་གྱི་དབང་ཕྱུག་ཁྱད་པར་བདག་ལ་སྩལ་དུ་གསོལ། །ཁྱད་པར་འདི་དག་བུད་མེད་རིན་ཆེན་རྣམས་ཀྱི་ཕྱིར། །རིན་ཆེན་ཀུན་གྱི་ནང་ན་བུད་མེད་རིན་ཆེན་གཅིག་ཏུ་མཆོག །བུད་མེད་རིན་ཆེན་ཤིན་ཏུ་རིན་ཆེན་ཐམས་ཅད་འགྲོ། །རཏྣ་ཨ་ལ་ལ་ཧོ། དེ་ནས་ཕྱག་རྒྱ་ཤེས་པ་ནི། །རྟ་མཆོག་དཔལ་ལྡན་གནས་པའི་གླུ། །ལས་རྣམས་ཐམས་ཅད་རབ་བསྒྲུབ་པ། །ཁྱད་པར་དུ་ནི་བཤད་པར་བྱ། །མྱོས་བྱེད་སྟོང་ལས་ལྷག་པར་བདེ་བ་འདོད་པའི་གཟུགས་སྟོན་པ། །འདུལ་བའི་དབང་གིས་གཤིན་རྗེ་སྟོང་ལས་རབ་ཏུ་འཇིགས་པར་སྟོན། །ཞི་བའི་སྐུ་ཡང་ཚངས་པ་སྟོང་བས་ལྷག་པར་རབ་ཏུ་སྟོན། །དཀྱིལ་
འཁོར་ཀུན་གྱི་མཆོག་ཏུ་དེ་བཞིན་གཤེགས་ཀུན་འགྲུབ་པར་མཛོད། །ཐམས་ཅད་རྣམ་དག་མོས་པའི་ངོ་སྟོན་གན་རྐྱལ་སྟོབས་ཀྱི་གནོན་པས་ནོན། །ཧི་ཧེ་ཧེ་ཧེ་ཧེ་དབང་ཕྱུག་ཐམས་ཅད་རབ་ཤིག་རབ་ཏུ་ཤིག །རབ་ཀྱི་རྩལ་གྱིས་གནོན་པའི་སྟོབས་ཀྱི་ངོ་སྟོན་དབང་ཕྱུག་གནོན། །སྦྱོར་ཆེན་ཧུ་ལུ་ཧུ་ལུ་མིག་གསུམ་པོ་ལ་གསུམ་གྲུབ་དྲོངས། །རབ་ཀྱིས་གནོན་པའི་སྟོབས་ཀྱིས་ངོ་སྟོན་མཐུ་ཆེན་ནོན། །མཉམ་སྦྱོར་རུ་དྲ་མ་ཏྲ་སྙིང་ལས་དཔའ་མོས་དྲོངས་ཤིག་རབ་དྲོངས་ཤིག །རབ་ཀྱི་རྩལ་གྱིས་གནོན་པའི་སྟོབས་ཀྱིས་ངོ་སྟོན་ཚངས་པ་ནོན། །སྦྱོར་ཆེན་ཚངས་ལས་གྲོལ་མ་དྲོངས་ཤིག་སྨ་ར་ཊ། །རབ་ཀྱི་རྩལ་གྱིས་གནོན་པའི་སྟོབས་ཀྱིས་ངོ་སྟོན་དགའ་དབང་ནོན། །མཉམ་སྦྱོར་ཀུན་གྱི་བདག་ལས་དགའ་དྲོངས་ཨ་ལ་ལ་ཧོ། །གདུག་ཅིང་ཁྲོ་ལ་རབ་ཏུ་གདུག་པའི་སེམས་ཅན་བསྒྲལ་བ་ཡིས། །བསྒྲལ་བའི་ཕྱིར་ན་སྒྲུབ་ཞུགས་ཨ་ལ་ལ་ཧོ། །ཨོཾ་སུམྦྷ་ནི་སུམྦྷ་ཧཱུཾ་ཕཊ་ཕཊ། མཛའ་བོ་མི་ལ་བྱའམ་མི་བྱ་དེ་དག་ཡོངས་སུ་རྟོག་པ་མེད་ཀྱང་བླ། །དེ་འདྲའི་མཛའ་བོ་སྒྱུ་མ་ཡིན་པས་དེ་ལ་མཛའ་ཞེས་སུ་ཞིག་ཟེར། །རྒོལ་བ་གང་ལ་བྱའམ་མི་བྱ་དེ་དག་ཡོངས་སུ་བརྟག་པ་མེད་ཀྱང་བླ། །དེ་འདྲའི་རྒོལ་བ་སྒྱུ་མ་ཡིན་པས་དེ་ལ་དཔའ་ཞེས་སུ་ཞིག་ཟེར་ཞེས་གསུངས་སོ། །དེ་ནས་རྔ་ཐབས་བསྟན་པ་ནི། །གླུ་དྲུག་དང་ནི་ཚིག་དྲུག་དང་། །རྔ་ཐབས་དྲུག་གི་ས་ནས་ནི། །སྨོན་ལམ་རྣམ་པ་གསུམ་པོ་ཡང་། །སོ་སོར་བཀར་ཏེ་ལས་བྱའོ། །དེ་དེ་བྱེད་པའི་དུས་སུ་ཡང་། །ཡེ་ཤེས་ཞལ་གྱི་ཕྱག་རྒྱ་དང་། །འཛུམ་བྱེད་ཡེ་ཤེས་ཕྱག་རྒྱ་དང་། །ལྟ་བྱེད་ཡེ་ཤེས་ཕྱག་རྒྱ་དང་། །ཆོས་ཀྱི་ཡེ་ཤེས་ཕྱག་རྒྱ་དང་། །ཕྱག་རྒྱ་བཞི་སྤྲུགས་ལྡན་པར་བྱ། །གར་གྱི་ཡེ་ཤེས་ཕྱག་རྒྱ་ཡི། །ཚུལ་དགུའི་རོལ་པའི་ཚམ་རྔམས་ཆས། །གླུ་ཡི་ཡེ་ཤེས་ཕྱག་རྒྱ་དང་། །རོལ་མོ་ཡེ་ཤེས་ཕྱག་རྒྱའོ། །དེ་ནས་གླུ་ཡི་ཡེ་ཤེས་ཀྱི། །ཕྱག་རྒྱ་བྱ་སྟེ་རབ་བཤད་པ། །དེ་ཡང་ཧཱུཾ་གི་གླུ་དང་ནི། །ཨོཾ་གྱི་གླུ་ལ་སོགས་པ་ཡི། །གླུ་དྲུག་གིས་ནི་མགོ་དྲངས་པའི། །ཕྱག་
རྒྱ་དྲུག་དང་ལྡན་བྱས་ལ། །གླུ་ཚིག་དྲུག་དང་གླུ་དབྱངས་བླང་། །ཚུལ་དགུ་ལས་ནི་མི་མཉམ་ཞིང་། །ཞི་བའི་རྡོ་རྗེ་བརྗིད་གནོན་འགྲོས། ། སྤྱུག་པ་ཡིན་ནམ་དབྱུག་པ་ཡང་འཇུག ། ཧེ་རུ་ཀ་ཡི་ཚམ་རྔམས་དང་། །ཁྲོ་བོ་རྣམས་ཀྱི་སྟངས་སྟབས་དང་། །མ་མོ་འབྱོན་ཚུལ་ཆས་བྱས་ནས། །སྨོན་ལམ་རྣམ་གསུམ་རྔ་བརྡུང་ངོ་། །དེ་དུས་ཞི་བའི་ཐལ་མོ་དང་། །ཁྲོ་བོ་ཆེན་པོའི་ཐལ་མོ་དང་། །མ་མོའི་གདང་ངར་རྐན་སྒྲ་དང་། །སྨང་རའི་དབྱུངས་ས་བླང་བ་དང་། །ཞབས་ཀྱང་འཕེན་ཞིང་སྡུད་པ་དང་། །འདོར་ཞིང་བརྐྱང་དང་བསྐུམ་པ་དང་། །འདེགས་ཤིང་གནོན་པ་ལ་སོགས་པས། །རྔ་བརྡུང་དུས་དེར་རོལ་མོ་ཡིས། །ཐབས་ནི་སྣ་ཚོགས་གཞན་ཡང་བྱའོ། །དེ་ནས་ཚིགས་བཅད་འདིས་བསྐུལ་ལོ། །ལ་ལར་དྲི་མེད་ཟླ་བའི་དཀྱིལ་འཁོར་སྟོང་པས་མཛེས་པའི་གཟུགས་སུ་རྣམ་པར་སྣང་། །ལ་ལར་འཇིགས་པ་ཉི་མ་བརྒྱ་ཕྲག་དགུ་ཡི་འོད་ཟེར་མཆོག་པས་འཇིགས། །ལ་ལར་མདངས་བཟང་གཟི་ཆེན་བདེ་དང་ཞི་བར་ལྡན་པའི་གཟུགས་སུ་རྣམ་པར་སྣང་། །ལ་ལར་འགྲོ་བ་ཐམས་ཅད་མཉམ་པར་འཇོག་པའི་གཟུགས་ལྡན་གསུང་མཆོག་མཉམ་པར་སྟོན། །རྡོ་རྗེ་སེམས་དཔའ་འགྲུབ་ཕྱིར་འདུལ་མཁས་མ་ལུས་སྤྲུལ་སྐུ་བདེ་བའི་མཆོག་རྣམས་ལ། །ཨཱ་ར་ལི་ཐམས་ཅད་མཉམ་སྦྱོར་གྲུབ་མཛོད་རུ་ཏི་མ་ཏི་ཨ་ལ་ལ་ཧོ། །རྣམ་པ་མང་པོས་འདུལ་བར་མཛད་པའི་ཚུལ་གྱིས་གར་མཁན་གར་མཛད་པ། །དམ་ཚིག་གར་གྱི་དབང་ཕྱུག་སངས་རྒྱས་གར་མཁན་གར་མཛོད་ཅིག །ཨ་ལ་ལ་ཧོ། རྣམ་པ་མང་པོ་བདེ་མཆོག་རབ་ཏུ་གར་མཛོད་ཐར་པའི་བདེ་བ་ཡང་དག་ཐོབ་པར་མཛོད། །རྣམ་པ་མང་པོ་འདོད་ཆགས་རྒྱུད་ཀྱིས་སེམས་ཅན་མ་ལུས་ལུས་པ་མེད་པར་འདུལ་མཁས་པ། །དེ་བཞིན་གཤེགས་པ་ཀུན་གྱི་མཁའ་འགྲོ་སྒྱུ་མའི་བདེ་མཆོག་རབ་སྤྲུལ་རྣམ་པར་སྤྲུལ། །ཏེ་ན་ཏེ་ཏེ་ཧཱུཾ།རྣམ་པ་མང་པོ་འདོད་ཆགས་རྒྱུད་ཀྱིས་སེམས་ཅན་མ་ལུས་ལུས་པ་མེད་པར་འདུལ་མཁས་པ། །དེ་བཞིན་གཤེགས་པ་ཀུན་གྱི་མཁའ་འགྲོ་སྒྱུ་མའི་བདེ་མཆོག་རབ་སྤྲུལ་རྣམ་པར་སྤྲུལ། །ཧཱུཾ་ཧཱུཾ་ཧཱུཾ། རྣམ་པ་མང་པོ་ཁྲོ་བོའི་རྒྱུད་ཀྱིས་
སེམས་ཅན་མ་ལུས་ལུས་པ་མེད་པར་འདུལ་མཁས་པ། །དེ་བཞིན་གཤེགས་པ་ཀུན་གྱི་མཁའ་འགྲོ་སྒྱུ་མ་བདེ་མཆོག་རབ་སྤྲུལ་རྣམ་པར་སྤྲུལ། །རུ་ལུ་རུ་ལུ་ཧཱུཾ་བྷྱོ་ཧཱུཾ། རྣམ་པ་མང་པོ་སྲོག་གི་རྒྱུད་ཀྱིས་སེམས་ཅན་མ་ལུས་ལུས་པ་མེད་པར་འདུལ་མཁས་པ། །དེ་བཞིན་གཤེགས་པ་ཀུན་གྱི་མཁའ་འགྲོ་སྒྱུ་མའི་བདེ་མཆོག་རབ་སྤྲུལ་རྣམ་པར་སྤྲུལ། །ཧཱུཾ་བི་ཤ་བི་ཤ་ཧཱུཾ། དེ་ལ་སོགས་ཏེ་མཐའ་ཡས་མཆོག །ཆོས་དབྱིངས་མཉམ་དང་མི་མཉམ་པ། །ནམ་མཁའི་དབྱིངས་ཀྱི་མཐའ་ཀླས་པར། །རང་བྱུང་རྣམས་ཀྱི་གླུ་ཡི་རྒྱ། །ནམ་མཁའ་ཀུན་གྱི་སྐབས་ན་དཔལ། །རྡོ་རྗེ་སེམས་དཔའ་ལ་ནི་གནས། །གྲུབ་པའི་དབང་ཕྱུག་རབ་གྲུབ་པ། །ཐམས་ཅད་བདག་ཉིད་གྲུབ་པར་འགྱུར། །སྙིང་པོ་ཕྱག་རྒྱ་སྔགས་རིགས་རྣམས། །བྱ་བ་རྣམ་པ་སྣ་ཚོགས་དང་། །རྣམ་པར་སེལ་ལ་སོགས་པའི་ཐབས། །དངོས་གྲུབ་ཐམས་ཅད་རབ་ཏུ་འགྲུབ། །ཛཿཧཱུཾ་བཾ་ཧོཿ། རུཊྚ་མཊྚ། སྨ་རཱ་ར་ཊ། ཧུ་ལུ་ཧུ་ལུ། པྲ་སིདྡྷྱ། ཊཀྐི་ཧཱུཾ་ཛཿ། ཀཱི་ནི་དྷུ་ནི་ཧཱུཾ་དྲུཾ། ཊཀྐི་ཧཱུཾ་ཛཿ། ཧུ་ལུ་ཧུ་ལུ། ཨ་ལ་ལ་ལ་ཧོ། སྤྱིའི་རྔ་རྡུང་བའོ། །ཤུདྡྷྱ་སིདྡྷྱ། ད་རི་ཥཱ་ཡ་སརྦྦ་ན་ཊ་གྷཻ་གྷཻ། ཊ་ཊ་གྷཻ་གྷཻ་གྷཻ། ཊ་གྷཻ་ཊ་ཀེ་གཻ་གཻ་གཻ། ཊྚ་ཏ་གྷཻ། ཊ་གེ། ཧོཾ་ཊོ་ཎ། ཊཀྐི་ཧཱུཾ་ཛཿ། གེ་ཏེ་གེ་དྷོ་ན། ཊ་ཀི་ཧཱུཾ་ཏུཾ། ཨ་ལ་ལ་ལ་ཧོ། རུ་ཊྚ་མ་ཊྚ། ཐལ་མོ་བརྡབ་པའི་རྟོག་པ་སྟེ། །དཔལ་རྡོ་རྗེ་སེམས་དཔའི་རྔ་སྟབས་སོ། །ཊ་གྷེ་ཊ་གྷེ། ཊ་གྷེ་གྷེ། ཊ་ཀེ་ན་ཊ། མྷ་མྷ་མྷ། ཊ་ལྱཽ ་ཊ་ལྱཽ ། རྒྱུན་གྱི་རྔའོ། །རྣམ་པར་སྣང་མཛད་དོ། །ཨཱཾ་ཨཱཾ་ཨཱཾ། ཧཱཾ་ཧཱཾ་ཧཱཾ། བཱཾ་བཱཾ་བཱཾ། དྷཾ་དྷཾ་དྷཾ། དམ་ཚིག་གསུམ་གྱི་རྔའོ། །དྷ་། དྷི་བཛྲ་བཛྲ་ཎྱང་། ཀོང་ཀོང་ཀོང་། ཧཱུཾ་བྷྱོ་ཧཱུཾ་བྷྱོ་ཧཱུཾ་བྷྱོ་ཧཱུཾ་བྷྱོ། རུ་ལུ་རུ་ལུ་ཧཱུཾ་བྷྱོ་། ཀྷོང་ཀྷོང་ཀྷོང་། ཌྷེཾ། ་། ངྒྷཱ ་ཀཽཾ་ཀཽཾ་ཀཽཾ། དཔལ་རྡོ་རྗེ་ཧེ་རུ་ཀའི་རྡོ་རྗེ་རྔའི་ཕྱག་རྒྱའོ། །པདྨ་པདྨ་ཧྲི། པདྨ་པདྨ་ཤཱི། པདྨ་པདྨ་ཧྲིར། དཔལ་པདྨོ་བརྡབ་པའི་རྔའོ། །སྣང་བ་མཐའ་ཡས་ཀྱིས་བརྡུང་བའོ། །ཏྲཱཾ་ཏྲཱཾ་ཏྲཱཾ། བྷ་བྷ་བྷ་བྷ་བྷ་བྷ་
བྷ། ཏ་ཊ་ཏཱ་ཊཱ་ཊཱ་ཊཱ་ཊཱ་ཊཱ། ཏཱཾ་ཏཱ་ཏཱ་ཏཱ། ཏྲཱ་ཏྲཱ་ཏྲཱ་ཏྲཱ་ཏྲཱ། ཏྲཾ་ཊཾ་ཀེ་ཏངྐུ་ད་ཏྲ། ཏུཊྚ་ཏྟྲ། རྒྱལ་པོའི་རྔའོ། །རིན་ཆེན་འབྱུང་ལྡན་གྱིས་བརྡུང་བའོ། །ཊཀྐི་ཧཱུཾ་ཛཿ། ཊཀྐི་ཧཱུཾ་ཛཿ། ཊཀྐི་ཧཱུཾ་ཛཿ། སྙེམས་པའི་འགྲོས་སོ། །ཏྲཱ་ཊྚ་ཏྲཱ་ཏྲཱ་ཏྲཱ་ཏྲཱ་ཏྲཱ། མྱུར་ཞིང་རབ་ཏུ་མྱུར་བའི་རྔའོ། །ཏ་ཊ་བྷ་ཏ། བ་ཏྲུན། ཏ་ཐཱ་ག་ཏེ། བ་ཧཱུཾ། ཏ་ཊཱ་བྷ་ཏ་ཏ་བྷ་ཧི་ན་དཔལ་རྟ་མཆོག་རྣམ་པར་རོལ་པའོ། །ཏ་ཏཱ་བྷ་ཊ་ཊ་བྷ་ཏཱ་ད་ཏྟྲ། ཤིན་ཏུ་མྱུར་བའི་རྔའི་ཕྱག་རྒྱ་སྟེ། སིལ་སྙན་གྱི་ཕྱག་རྒྱ་ཤེས་པའོ། །སངས་རྒྱས་བརྡའ་ཡི་ཕྱག་རྒྱ་ཡིས། །གར་གྱི་རྣམ་པར་རོལ་པར་བཤད། །རྣལ་འབྱོར་རིག་མར་དང་ལྡན་པས། །བྲོ་དང་གར་གྱི་བསྐྱོད་བྱས་ཏེ། །འོད་ཀྱི་འདུ་འཕྲོས་བྱིན་བརླབས་ཏེ། །དངོས་གྲུབ་མཆོག་ཀྱང་ཐོབ་པར་འགྱུར། །ཁྲག་འཐུང་ཆེན་པོ་ལ་སོགས་པའི། །བྲོ་གར་གླུ་ཚིག་ཆེན་མོས་ནི། །ཐམས་ཅད་ཐམས་ཅད་ཅི་འདོད་པ། །ཐམས་ཅད་ཐམས་ཅད་བྱེད་པ་ཡིན། །མཛོད་ལྡན་ཆེན་མོ་ལ་སོགས་པའི། །བྲོ་གར་གླུ་ཚིག་ཆེན་མོས་ནི། །འདུ་བར་འདོད་ན་འདུ་བར་བྱེད། །འཕེལ་བར་འདོད་ན་འཕེལ་བར་བྱེད། །སྦོས་མོ་ཆེན་མོ་ལ་སོགས་པའི། །བྲོ་གར་གླུ་ཚིག་ཆེན་མོས་ནི། །ལྷན་ནེར་འདོད་ན་ལྷན་ནེར་བྱེད། །རྨུགས་པར་འདོད་ན་རྨུགས་པར་བྱེད། །སེང་གདོང་ཆེན་མོ་ལ་སོགས་པའི། །བྲོ་གར་གླུ་ཚིག་ཆེན་མོས་ནི། །ཐམས་ཅད་ཀུན་ལ་ཟ་བར་བྱེད། །རྡུལ་ཆ་ཙམ་ཡང་མེད་པར་བྱེད། །བཞད་གདོང་ཆེན་མོ་ལ་སོགས་པའི། །བྲོ་གར་གླུ་ཚིག་ཆེན་མོས་ནི། །ཐམས་ཅད་ཀུན་ལ་འབྱིན་པར་བྱེད། །ཀུན་ལ་རབ་ཏུ་ཉམས་པར་བྱེད། །སླས་དང་བྱི་མོ་བྲན་མོ་ཡི། །བྲོ་གར་གླུ་ཚིག་ཆེན་མོས་ནི། །འབད་ཅིང་གཏང་བར་བྱ་བ་ནི། །ཐམས་ཅད་ཐམས་ཅད་བྱེད་པ་ཡིན། །དེ་ནས་གཞན་ཡང་རབ་བཤད་བྱ། །གོས་དང་རྒྱན་དང་བཟའ་བ་དང་། །བཏུང་བ་གླུ་དང་ཚིག་ཏུ་བཅས། །བྲོ་དང་གར་གྱིས་མཉེས་པར་བྱ། །ཚུལ་ཁྲིམས་གོས་ཆེན་ཞིང་བཙུགས་རྒྱལ་མཚན་ལ། །ཡེ་ཤེས་ལྔ་ལྡན་དབང་པོ་གཟི་བྱིན་ཏོག །ཚར་གསུམ་སྒེག་པའི་ལྕང་ལོ་སྤྲུལ་པའི་རྒྱན། །ཡན་
ལག་ལྕུག་ཕྲན་ཤེས་བྱའི་ཅོད་པན་འཕུར། །སོར་ཕྲན་རིན་ཆེན་སྦྱིན་པའི་སྣ་ཚར་ཅན། །བཅིངས་འདོམས་རྡོ་རྗེ་ཤམ་གྱི་གཟི་བག་ཅན། །བརྩོན་འགྲུས་ཡན་ལག་སྦུབས་ཀྱི་རྒྱལ་མཚན་ལ། །རྣམ་ཤེས་ཡེ་ཤེས་མཁྱེན་པའི་མི་ཏིའི་ཏོག །རབ་ཆེན་ལྕེའུ་ཕྲད་ཤེས་བྱའི་ཅོད་པན་ཅན། །གཟི་མདངས་ཆུ་རིས་ཤུ་ཀེན་སྤྲུལ་པའི་ཤམ། །རས་ཆེན་ཞི་གནས་ཟླ་འདྲའི་བླང་ལ་ནི། ། རས་ཆེན་བཞི་གནས་ཟླ་འདྲའི་བླང་བ་ནི། ཡང་འདུག ། ལྷག་མཐོང་ཉི་འོད་ཤུ་ཀེན་ལྕེའུ་འབར། །ཡེ་ཤེས་ལྔ་ལྡན་བདུད་རྩི་ཏོག་གི་མཚོན། །རྩེ་གཅིག་ཏིང་འཛིན་རྐང་ཕྲན་འདུད་དང་སྦྱིན། །ཚུལ་ཁྲིམས་རས་ཆེན་སྐུ་ཚན་འཕེན་ལ་ནི། །དཔའ་བརྟུལ་ཟ་བྱེད་གཟི་བརྗིད་སྟག་གི་ཞབས། །སྤྲུལ་པའི་ཕྱག་གཉིས་གཟིག་གི་དཔའ་བརྗིད་ཅན། །སྟག་གི་དབུ་རྒྱན་དྲག་ཚུལ་རུས་ཆེན་གདན། །ཞིང་གི་བླ་རེ་སྣོད་ཀྱི་ཆོས་དབྱིངས་ལ། །ཕྱོགས་མེད་ཀུན་ལ་ཁྱབ་པའི་ཐུགས་རྗེའི་ངང་། །ཆུ་རིས་གཟི་མདངས་སྤྲུལ་པའི་འཁོར་ཡུག་ཤམ། །ཕྲིན་ལས་ཁྲེའུ་སོར་ཕྲན་སྣ་ཚར་འཕྲུལ། །དཔལ་ཆེན་ཡབ་ཡུམ་ཁྲོ་ཆེན་མ་ཚོགས་དང་། །དབང་ཕྱུག་རྡོ་རྗེ་འཁོར་ཚོགས་ལྷ་གྲངས་བཞིན། །མེད་ན་དམར་པོའི་དར་ལས་བསབ་པའོ། །གོས་དང་རྒྱན་གྱི་ཕྱག་རྒྱ་ཤེས་པར་བྱ། །ཕྱི་ཡི་སྦས་པ་གསང་ལ་སོགས། །ནང་གི་མཆོད་པའི་མཆོག་རྣམས་ནི། །ཕྱག་རྒྱར་སྦྱར་བའི་ཚུལ་གནས་ཏེ། །ཚུལ་བཞིན་རྒྱས་བཏབ་དབུལ་བར་བྱ། །མཆོད་པ་ཀུན་གྱི་ཆོ་ག་དང་། །བཟླས་པ་ཀུན་གྱི་བྱེ་བྲག་ནི། །རང་གི་ཁྱད་པར་ཤེས་བྱ་སྟེ། །སྒྲུབ་པ་ཐམས་ཅད་བསྒྲུབས་བྱས་ན། །དངོས་གྲུབ་ཐམས་ཅད་མྱུར་དུ་འཐོབ། །བརྡའ་ཡི་དངོས་པོ་བསྟན་པ་ནི། །མཁའ་འགྲོ་ལ་སོགས་ཐར་པའི་མཆོག །རོ་ལ་སོགས་པ་དཔའ་བོ་མཆོག །ཟླ་ཚོགས་ལ་སོགས་ཡང་དག་ལྡན། །ཚེ་ནི་མཆོག་ཏུ་འཛིན་པའོ། །སྙིང་པོ་ཚིམས་བྱེད་མཆོག་ཡིན་ཏེ། །དྲི་ཞིམ་དམར་པོ་ཉིད་དུ་འདོད། །འཇམ་པོ་ཐལ་བར་ཡང་དག་བཤད། །གཟི་བརྗིད་དྲི་ཞིམ་ཉིད་དུ་འདོད། །དབྱངས་ནི་སྙན་པར་བྱ་བ་དང་། །ཐར་པ་ཆེན་པོ་ཤིན་ཏུ་མཛེས། །བཙུན་མོ་ལ་སོགས་རེག་འབྱུང་བས། །རྒུན་ཆང་སྦྲང་རྩི་
མཆོག་ཏུ་དཔལ། །ཚྭ་ནི་འདོད་ཆགས་སྲ་བ་ཡིན། །ཀཾ་བྷི་ལ་ནི་བྲན་མོར་བཤད། །ཆུར་བ་ཟླ་བ་ཉ་བ་ཡིན། །ཤ་ནི་སྨན་གྱི་མཆོག་ཡིན་ཏེ། །ཆང་ནི་ར་ས་ཡ་ན་ཡིན། །བྲན་ནི་ཚེ་ཞེས་བྱ་བར་བཤད། །བཟའ་བ་སྣ་ཚོགས་གྲུབ་པ་ནི། །ཤ་དང་ཆང་དུ་ལྡན་པ་དག །དགའ་བའི་ལོངས་སྤྱོད་སྐལ་བཟང་པོས། །ཚེ་ཡི་དམ་པ་འགྲུབ་པར་བཤད། །སྒེག་མོ་དང་ནི་ན་ཆུང་མཆོག །མྱོས་བྱེད་དང་ནི་བདུད་རྩི་དང་། །གཅིག་པུ་པ་དང་འདོད་ཆགས་སྲ། །གཡོན་ཅན་བྲན་མོ་དེ་བཞིན་ཏེ། །ལན་ཚྭ་ལ་སོགས་རོ་ཀུན་དང་། །ཁ་ར་ལ་སོགས་བདུད་རྩི་བཞིན། །བདག་ཉིད་ཀུན་གྱི་འགྲུབ་པ་ནི། །མ་ལུས་ལུས་པ་མེད་པར་འགྲུབ། །བག་ཟན་ལས་ནི་བྱས་པའི་ཕྱུགས། །ཙནྡན་དཀར་པོས་བསྐུས་པ་དང་། །བག་ཕྱེའི་ཟན་ལས་བྱས་པའི་ཤ །རྒྱལ་པོའི་ཟན་ཞེས་གང་བཤད་པའོ། །མེ་ཏོག་དཀར་དང་དམར་པོའོ། །མཐིང་ག་སེར་པོ་ཀུན་བསྡུས་པ། །མེ་ཏོག་ཕྱག་རྒྱའི་མཆོག་འདི་ནི། །འདོད་པའི་ཡོན་ཏན་ལྔ་ལས་བྱུང་། །རྒྱ་སྐྱེགས་མཐིང་ག་ལྗང་གུའི་མདོག །ཆོས་སྣ་བཞི་ཡིས་བཅོས་པ་དང་། །དཀར་པོ་ལྔ་ཡི་ཕྱག་རྒྱ་དག །སྔ་མ་བཞིན་དུ་མཉམ་པར་བསྒྲུབ། །ཁམས་ལས་བྱུང་བ་ཐམས་ཅད་དང་། །སྲོག་དང་རྩ་བའི་དེ་བཞིན་ཏེ། །རྣམ་པར་མཛེས་ཤིང་དྲི་ཞིམ་པ། །སྔ་མ་བཞིན་དུ་མཉམ་པར་བསྒྲུབ། །ཙནྡན་གཉིས་དང་གླ་རྩི་དག །ག་པུར་ནཱ་ག་ས་ལ་ཀི། །བདུག་པ་བུ་རམ་དང་སྦྱར་བ། །ལས་རྣམས་ཐམས་ཅད་རབ་སྒྲུབ་པའོ། །གན་དར་དྲི་དང་གུ་གུལ་དང་། །སརྫ་ག་པུར་གླ་རྩི་དག །བཙོས་པའི་བདུག་པ་རྫས་འདི་ལས། །མར་མེ་བྱས་ན་སྣང་བ་བསྐྱེད། །ཙནྡན་གུར་གུམ་ཀ་དང་། །ག་པུར་དང་ནི་གླ་རྩི་དང་། །བཅས་པ་བདུག་པ་གྲུབ་པ་སྟེ། །སྤོས་ཀྱི་ཕྱག་རྒྱ་སྤོས་མཆོག་འགྱུར། །ཀ་ཀྐོ་ལ་དང་སུག་སྨེལ་དང་། །གླ་སྒང་ག་པུར་གླ་རྩི་དག །འདི་རྣམས་ཞིབ་ཏུ་བཏགས་པ་ནི། །སེང་ལྡེང་བུ་རམ་དག་དང་སྦྱར། །ཤིང་ཚ་པ་ཏྭ་ལོ་དྲཱ་དང་། །ན་ལེ་ཤམ་དང་ག་པུར་སྦྱར། །ས་ཧ་ཀ་རའི་ཤིང་མར་གྱིས། །
ཁ་དྲི་ཞིམ་པོར་བྱ་ཕྱིར་སྤོས། །ཁ་ར་སྦྲང་རྩིས་བྱུགས་པ་ཡིས། །ཨ་མྲ་ལ་སོགས་ཚིག་གུས་བྱུག །ས་ཏ་ཀ་རའི་མར་ལ་སོགས། །མཉམ་པའི་དྲི་ཡིས་བསྐུ་བར་བྱ། །ཡུང་དང་རྒྱ་སྐྱེགས་ལ་སོགས་པའི། །ཚོན་གྱིས་མཐུན་པར་ཁ་སྒྱུར་ཏེ། །ཤུན་པ་གྲོ་བ་ལ་སོགས་བྱས། །མཆོད་པའི་ཚེ་ན་དབུལ་བར་བྱ། །འབྲས་བུར་བཅས་པའི་ཕྱག་རྒྱ་ཤེས་པའོ། །བཟའ་བཏུང་ཕྱག་རྒྱ་ཤེས་པའོ། །དེ་ནས་གླུ་ཚིག་དབྱངས་རྣམས་བླང་། །ཧ་ས་དྷིར་རྐ་སོར་སྣ་རྟ། །དྲེང་ངེ་བ་དང་དུང་ངེ་བ། །ཤ་དྷ་བ་དང་གརྔྷ་མ། །བད་ཀ་དེའུ་དང་ལྕང་ཀ་དེའུ། །གླུ་དྲུག་དབྱངས་སུ་བླང་བར་བྱ། །སྣ་ཡི་དབུགས་རིང་འགྲོ་བ་ལས། །གཡས་པར་མེ་བྱུང་དམར་ལ་འཚེར། །གྱེན་དུ་འབར་བར་འགྲོ་བ་སྟེ། །པདྨ་རིགས་ཀྱི་གསུང་དབྱངས་ཀྱིས། །སྣང་བ་མཐའ་ཡས་དགེས་པར་རོལ། །གཡོན་པར་རླུང་བྱུང་གནག་ལ་དང་། །གསེགས་ལ་འགྲོ་ཞིང་རྒྱུ་བ་ཉིད། །ལས་ཀྱི་རིགས་ཀྱི་གླུ་ཡིན་པས། །དོན་ཡོད་གྲུབ་པ་དགེས་པར་རོལ། །གཉིས་ཀར་དལ་རྒྱུ་ཆུ་ཀླུང་དཀར། །ཐུར་དུ་འབབ་ཅིང་རྒྱུ་བ་ནི། །རིན་ཆེན་རིགས་ཀྱི་གླུ་ཡིན་པས། །རིན་ཆེན་འབྱུང་ལྡན་དགེས་པར་རོལ། །གཉིས་ཀ་ཐུར་དུ་རྔུབ་པའི་རླུང་། །ཐད་ཀར་འགྲོ་ཞིང་རྒྱུ་བ་ཉིད། །བདེ་གཤེགས་རིགས་ཀྱི་གླུ་བླངས་པས། །རྣམ་པར་སྣང་མཛད་དགེས་པར་རོལ། །རྩོལ་བ་གླུ་ཡི་དམ་ཚིག་གིས། །མཆོད་པ་དམ་པར་བཞེས་སུ་གསོལ། །ཁོང་ན་གནས་པ་སྲོག་ཡིན་ཏེ། །ནམ་མཁའི་རླུང་ནི་ཀུན་གྱི་གནས། །རྒྱུ་བ་མེད་ཅིང་འཕོ་དུས་འབྱུང་། །རྡོ་རྗེ་སེམས་དཔའ་དགྱེས་པར་རོལ། །གླུ་ཚིག་སྒྲ་ཡི་ཕྱག་རྒྱ་ཤེས་པའོ། །བྲོ་གར་འདུ་འཕྲོ་བྱ་བ་ཡང་། །སིལ་སྙན་ཕྱག་རྒྱར་བཤད་པ་རྣམས། །གླིང་བུ་དང་ནི་རྒྱུད་གཅིག་དང་། །དེ་བཞིན་རྒྱུད་ལྔ་རྒྱུད་དྲུག་དང་། །ལས་རྣམས་ཐམས་ཅད་བསྒྲུབ་པའོ། །ཆ་ལུགས་བཞིན་དུ་གར་བྱེད་པ། །མ་རུངས་པ་ཡང་རབ་ཏུ་འགྲུབ། །ལས་རྣམས་ཀུན་ལ་མངོན་དུ་འགྱུར། །བརྡུངས་པས་
དཔལ་གྱི་གཞིར་འགྱུར་འགྲུབ། །གླིང་བུ་ལེན་པའི་ཚུལ་སྟོན་པ། །ཇི་ལྟར་བསམ་པའི་གར་བྱེད་པ། །པི་ཝང་ལེན་པའི་ཚུལ་སྟོན་ཅིང་། །ཇི་ལྟར་བསམ་པའི་གར་བྱེད་དང་། །ཅང་ཏེའུའི་ཚུལ་སྟོན་རྣལ་འབྱོར་པ། །ཇི་ལྟར་བསམ་པའི་གར་བྱེད་དང་། །རྫ་རྔའི་ཚུལ་སྟོན་རྣལ་འབྱོར་པས། །ཇི་ལྟར་བསམ་པའི་གར་བྱེད་དང་། །འགྲོ་བ་གསུམ་དག་དབང་དུ་བྱེད། །དངོས་གྲུབ་མ་ལུས་མྱུར་དུ་འགྲུབ། །རིམས་གདོན་དུག་སེལ་སྡུག་བསྔལ་སེལ། །གནས་གསུམ་དག་ནི་སྐད་ཅིག་འབེབས། །དཔལ་རྡོ་རྗེ་གླིང་བུ་གར་བྱེད་དང་། །དཔལ་རྡོ་རྗེ་པི་ཝང་བདེ་བས་རྨོངས་བྱེད་དང་། །དཔལ་རྡོ་རྗེ་ཅང་ཏེའུ་སྡུག་བསྔལ་སེལ། །དཔལ་རྡོ་རྗེ་རྫ་རྔ་མྱོས་བྱེད་དོ། །ཁཻ་ནིང་འཇམ་པ་འཁར་སིལ་ཏེ། །ཇི་ལྟར་བསམ་པའི་གར་བྱེད་དང་། །གུང་གུང་དྲིལ་བའི་སིལ་སྙན་ཕྲེང་། །ཇི་ལྟར་བསམ་པའི་གར་བྱེད་དང་། །ཏིང་ཞེས་སྙིགས་མའི་སིལ་སྙན་གླུ། །ཇི་ལྟར་བསམ་པའི་གར་བྱེད་དང་། །མ་གན་སིལ་སྙན་གར་གྱི་གནས། །ཇི་ལྟར་བྱེད་པའི་གར་བྱེད་དང་། །དི་རོ་དར་དིར་སིལ་སྙན་སྤྲོས། །ཇི་ལྟར་བསམ་པའི་གར་བྱེད་དང་། །པོ་ཏི་སིལ་སྙན་མེ་ཏོག་རྔ་། །ཇི་ལྟར་བསམ་པའི་གར་བྱེད་དང་། །ཏི་ལི་སིལ་སྙན་མེ་མར་གནས། །ཇི་ལྟར་བསམ་པའི་གར་བྱེད་དང་། །ད་དྲི་སིལ་སྙན་དྲི་ཡི་གནས། །ཇི་ལྟར་བསམ་པའི་གར་བྱེད་དང་། །འགྲོ་བ་གསུམ་དག་དབང་དུ་བྱེད། །ཇི་ལྟར་སིལ་སྙན་ཕྱག་རྒྱ་དང་། །ལྷ་མོ་རྣམས་ཀྱི་གནས་ནས་མཆོད་པར་བྱའོ། །ཡེ་ཤེས་ལྔ་ལྡན་བྷན་ད་བཅུད་ཀྱི་རྔ་། །ཚུལ་ཁྲིམས་གོས་ཆེན་ཡུམ་གྱུར་སྣོད་ཀྱིས་གཡོགས། །གཉིས་མེད་ཐུགས་རྗེའི་བ་སུའི་རྒྱུན་གྱིས་བསྡམས། །སྐུ་གསུམ་དབྱེར་མེད་སྒྲུབ་པའི་རྔ་ལ་ནི། །གསུང་སྒྲ་གསང་སྔགས་ཞིང་གི་རཀྟས་བྲིས། །རྐང་ཕྲན་ཤེས་རབ་ཚུལ་ཁྲིམས་པོ་བུ་ཡི། །ཏོག་བཏགས་བརྡུངས་པས་སྤྲུལ་པའི་ལས་ལ་འཇུག །ཁ་ཅིག་ཏིང་འཛིན་དྲི་ཞིམ་བྱུང་ལ་སྦྱར། །སོ་སོའི་གསུང་སྒྲ་ཞིང་གི་རཀྟས་བྲིས། །སྣོད་ཀྱི་ཞིང་ལྤགས་ཡུམ་གྱུར་དབྱིངས་ཀྱིས་གཡོགས། །ཡན་ལག་ཞིང་ལྤགས་སོ་སོར་བསྒྲིམས་ལ་བསྡམ། །གཉིས་མེད་
ཕྱག་རྒྱ་བཞི་ཡི་གཡང་གཞིས་བསྡམ། །ཕྲིན་ལས་ཐབས་མཆོག་རིན་ཆེན་རྐང་གིས་བརྡུང་། །རྔ་ཡི་ཕྱག་རྒྱ་ཤེས་པའོ། །སྤྱིར་ནི་རྫས་མཆོད་རྣམ་བཞིར་འདུས། །ཇི་ལྟར་འོས་ཤིང་རིགས་པ་དང་། །རང་གི་སྦྱོར་བ་རྗེས་མཐུན་པ། །འདི་དག་གསལ་བར་བཤད་བྱ་བ། །དེ་ལ་འོས་པར་གྱུར་པ་ནི། །མི་འགྱུར་འགྲོན་གཟའ་ལས་སྦགས་སོ། །དེ་ཡང་རིགས་པར་བྱ་བ་ཡང་། །མཁའ་ལ་འགྲོ་བ་ལ་སོགས་པའི། །སེམས་ཅན་ཆེན་པོ་ལྔ་པོ་དེ། །མཆོད་པའི་རྐྱེན་དུ་འབྱུང་བ་ནི། །ཚོགས་དང་མཆོད་པའི་དོན་དུའོ། །སྲོག་གཅོད་ཉེན་དང་མ་འདྲེལ་པའོ། །འབྱོར་བ་ཕྱུག་པོ་དབུལ་པོ་དང་། །བདོག་དང་དྲོད་ཟླ་ཇི་ལྟར་བྱ། །རྗེས་སུ་མཐུན་པར་བྱ་བ་ཡང་། །འདྲིས་ཕྱོགས་གཉེན་དུ་འདྲེལ་བའི་ཕན་ལན་གང་། །ཕངས་པའི་ལོངས་སྤྱོད་གཏོང་བར་བྱེད་གྱུར་ན། །འཁོར་བའི་གནས་ནས་འདོན་པའི་བཀའ་དྲིན་ལན། །ལུས་སྲོག་བྱེ་བས་མཆོད་ཀྱང་ལན་མི་ལོན། །མཁའ་ལ་སོགས་པའི་སེམས་ཅན་ལྔ། །སྒྲུབ་པའི་རྫས་སུ་གསུངས་པ་ཡང་། །སྒྲུབ་བྱེད་ཉེན་དང་མ་འདྲེས་པར། །སྡིག་མེད་ཤ་ཁྲག་མཆོད་བསྟོད་བྱ། །བདོག་པ་ཆེ་ཆུང་འབྱོར་ཚད་མཆོད་བྱེད་པ། །དག་སེམས་མཆོད་པ་བྱེད་པའི་ཕུལ་བྱུང་བས། །མ་དག་སྟོང་གི་ཕྱི་མཆོད་སྟོང་གི་ཆར་མི་ཕོད། །བསམ་དག་སྔོན་གྱི་སྤྲང་མོ་ཕྱུག་མོ་བཞིན། །མཆོད་བྱར་གྱུར་པ་རྣམས་ལ་མཆོད་པ་ནི། །སྤྱི་བོ་བདེ་ཆེན་དཀྱིལ་འཁོར་དུ། །སུམ་ཅུ་རྩ་གཉིས་ཡི་གེ་ཧཾ། །བདེ་གཤེགས་མཁའ་འགྲོ་སྣང་མཛད་སྐུ། །བདེ་བ་ཆེན་པོའི་ཐིག་ལེས་མཆོད། །མགྲིན་པའི་དཀྱིལ་འཁོར་བཅུ་དྲུག་ལ། །གསུང་དབྱངས་ཨཱཿལས་བྱུང་བ་ཡི། །སྣང་མཐའ་མཁའ་འགྲོ་ཚེ་དཔག་མེད། །ལོངས་སྤྱོད་རྫས་ཀྱི་རྣམ་པས་མཆོད། །སྙིང་གའི་དཀྱིལ་འཁོར་བརྒྱད་དཀྱིལ་ཧཱུཾ། །ཐུགས་ཀྱི་མཁའ་འགྲོ་མི་བསྐྱོད་པ། །འཁོར་དང་མྱ་ངན་འདས་པའི་ཆོས། །ཡིད་ལ་ཐིམ་པས་མཆོད་པར་བྱ། །ལྟེ་བའི་དཀྱིལ་འཁོར་དྲུག་ཅུ་བཞི། །རིན་
འབྱུང་མཁའ་འགྲོ་དཀོན་མཆོག་དཔལ། །ཨཾ་ལས་མ་བུ་སྤྲུལ་བྱེད་པ། །འབྱུང་བའི་མཆོད་པ་དབུལ་བར་བྱ། །གསང་བ་མེ་རླུང་དཀྱིལ་འཁོར་དུ། །རཾ་ཡཾ་འབར་བའི་བདེ་བ་ཡིས། །དོན་གྲུབ་མཁའ་འགྲོ་གདོན་མི་ཟ། །བདེ་བ་ཙཎྜའི་མེ་ཡིས་མཆོད། །དེ་ལ་རྗེས་མཐུན་མཆོད་པ་ལྔ། །ཁྲག་ནི་མེ་ཏོག་ཡིན་པར་བཤད། །མདངས་ནི་བདུག་པ་ཡིན་པར་བཤད། །ཤ་ཆེན་དག་ནི་མར་མེ་སྟེ། །ཐལ་བ་དག་ནི་སྤོས་སུ་བཤད། །ཆང་དང་སྦྲང་རྩི་བུ་རམ་ཆང་། །རྒུན་ཆང་གསང་བའི་ཡུམ་བཞིན་རྣམས། །བདུད་རྩི་ལམ་གྱི་ཡན་ལག་བརྒྱད། །སངས་རྒྱས་ཀུན་གྱི་བརྡ་ཡིན་ནོ། །མཆོད་པ་སོ་སོར་དབུལ་བ་ནི། །རིགས་རྣམས་ཀུན་གྱི་མེ་ཏོག་ནི། །མེ་ཏོག་དམར་པོ་སངས་རྒྱས་ལ། །རྡོ་རྗེ་ཅན་ལ་སྣ་ཚོགས་པ། །འཇིག་རྟེན་དབང་ལ་མེ་ཏོག་དཀར། །སེར་པོ་མཁའ་ལ་བྱུང་བའོ། །རིགས་ནི་དེ་རྣམས་བདུག་པ་ནི། །ཙནྡན་བདུག་པས་སངས་རྒྱས་ལ། །རྡོ་རྗེ་ཅན་ལ་དུ་རུ་སྐ། །སྤྱན་རས་གཟིགས་ལ་ཀ་པི་ཏ། །ལྕེ་པོག་རྡོ་རྗེ་ཉི་མ་ལའོ། །རིགས་ནི་དེ་རྣམས་མར་མེ་ལ། །མར་མེའི་ཕྲེང་བ་སངས་རྒྱས་ལ། །རྡོ་རྗེ་ཅན་ལ་མར་མེ་བདུན། །སྤྱན་རས་གཟིགས་ལ་མར་མེ་བརྒྱ། །སྟོང་ནི་རྡོ་རྗེ་ཉི་མ་ལའོ། །དེ་རྣམས་རིགས་ཀྱི་བདུག་སྤོས་ནི། །སངས་རྒྱས་རྣམས་ལ་ཙནྡན་སྤོས། །རྡོ་རྗེ་ཅན་ལ་གུར་གུམ་ཡིན། །སྤྱན་རས་གཟིགས་ལ་ཙནྡན་དམར། །ག་པུར་རྡོ་རྗེ་ཉི་མ་ལའོ། །མེ་ཏོག་ཀུན་དང་བདུག་པ་ཀུན། །དེ་བཞིན་མར་མེ་ཐམས་ཅད་དང་། །སྤོས་རྣམས་ཐམས་ཅད་ཇི་སྙེད་པ། །རྡོ་རྗེ་རྟ་ལ་དབུལ་དུ་རུང་། །དེ་རྣམས་རིགས་ཀྱི་ལྷ་བཤོས་ནི། །སངས་རྒྱས་རྣམས་ལ་བཤོས་དབུལ་བར། །ཤ་དང་ཆང་ནི་རྣམ་པར་སྤང་། །གླུ་དང་སིལ་སྙན་གྲུབ་པ་དང་། །གདུགས་དང་རྒྱལ་མཚན་བ་དན་དུང་། །ཤ་དང་ཆང་དུ་བཅས་པ་ནི། །གཏོར་མའི་མཆོག་སྟེ་སྣ་ཚོགས་པའོ། །བདག་གི་ཕྱུག་ཆེན་སྐལ་བཟང་པོས། །རྡོ་རྗེ་ལས་ནི་དཔལ་གྲུབ་པའོ། །བཤོས་དང་གཏོར་མ་དཀར་པོ་དང་། །པདྨའི་མེ་ཏོག་ལྡན་པ་ནི། །
སྤྱན་རས་གཟིགས་དབང་གཙོ་བོ་ལ། །ཕུལ་ན་དགོས་པ་ཐམས་ཅད་འགྲུབ། །རྒྱལ་པོའི་ཁ་ཟས་སྣ་ཚོགས་པ། །ཤ་དང་ཆང་དུ་བཅས་པ་དང་། །གླུ་དང་སིལ་སྙན་ལྡན་པ་དག །རྡོ་རྗེ་ཉི་མའི་འཁོར་ལ་དབུལ། །ཁ་ཟས་ཀུན་གྱི་རོ་རྣམས་དང་། །ཤ་དང་ཤ་ཡི་མཆོག་རྣམས་དང་། །ཤ་ཡི་སྦྱོར་དང་བའི་ཤ་སྐམ་དག །རྡོ་རྗེ་རྟ་ལ་དབུལ་བར་བྱའོ། །ཕུལ་ན་སྐུ་དབྱིངས་གསལ་བ་དང་། །ཁམས་ཀྱི་རྣམ་པ་བདེ་བ་དང་། །ཡིག་འབྲུ་རང་བཞིན་གསལ་བ་དང་། །ངོ་བོ་ཟུང་དུ་འཇུག་པ་དེ། །རྩ་དང་བདུད་རྩི་ཡིག་འབྲུ་དང་། །ཀླུ་རྣམས་གདན་དུ་བསྣུན་པའོ། །དེ་ནས་དགའ་ལྡན་ལྷ་ཡི་ཚོགས། །རྣམ་པ་བདུན་གྱིས་རབ་བཤད་བྱ། །རྡོ་རྗེ་སློབ་དཔོན་སེམས་དཔའ་ཡི། །ཕུང་པོ་ལྔ་ལ་སངས་རྒྱས་གདན། །འབྱུང་བ་ལྔ་ལ་ཡུམ་གྱི་གདན། །ཕྱི་ནང་དབང་པོ་རྣམ་ཤེས་དང་། །ཡུལ་དང་དུས་ལ་སོགས་པ་ལ། །བྱང་ཆུབ་ལྕམ་དྲལ་བཅུ་དྲུག་གདན། །ཉོན་མོངས་དྲུག་ལ་ཐུབ་པའི་གདན། །ཡིད་ཆོས་ཀུན་བཟང་ཡབ་ཡུམ་གདན། །རེག་སོགས་སྒོ་བ་ཡབ་ཡུམ་གདན། །དེ་ནི་སློབ་མའི་ལུས་ཉིད་ལ། །གདན་རྣམས་ཚང་བར་བཀོད་པའོ། །རྡུལ་ཚོན་དཀྱིལ་འཁོར་གདན་རྣམས་ཚང་། །གསང་བའི་ཁམས་ནི་བདུད་རྩིའི་གདན། །ཤེས་རབ་ཡེ་ཤེས་ཡི་གེའི་གདན། །བདེ་བ་ཆེན་པོ་རླུང་གི་གདན། །དེ་ཀུན་ཐམས་ཅད་གདན་གསུམ་སྟེ། །སངས་རྒྱས་ལོངས་སྤྲུལ་ཡབ་ཡུམ་གདན། །བྱང་ཆུབ་སེམས་དཔའ་ཡབ་ཡུམ་གདན། །སྒོ་བ་ཁྲོ་བོ་ཁྲོ་མོའི་གདན། །གདན་ཤེས་ཕྲིན་ལས་རྫོགས་མཛད་ལས། །རང་བཞིན་དཀྱིལ་འཁོར་བསྐྱེད་པར་བྱ། །དེ་ཡང་ཇི་ལྟ་བུ་ཞིག་ན། །མི་བསྐྱོད་རལ་གྲི་འཁོར་ལོ་གཡས། །དྲིལ་བུ་རིན་ཆེན་པདྨ་གཡོན། །སྣང་མཛད་འཁོར་ལོ་རལ་གྲི་རྡོ་རྗེ་གཡས། །དྲིལ་བུ་པདྨ་རིན་ཆེན་གཡོན། །རིན་འབྱུང་རིན་ཆེན་འཁོར་ལོ་རྡོ་རྗེ་གཡས། །དྲིལ་བུ་པདྨ་རལ་གྲི་གཡོན། །མཐའ་ཡས་པདྨ་རྡོ་རྗེ་འཁོར་ལོ་གཡས། །དྲིལ་བུ་རིན་ཆེན་རལ་གྲི་གཡོན། །དོན་གྲུབ་རལ་གྲི་འཁོར་ལོ་རྡོ་རྗེ་གཡས། །དྲིལ་
བུ་རིན་ཆེན་པདྨ་གཡོན། །རྒྱལ་མོ་གཡས་པ་དྲིལ་བུ་ཨུཏྤལ་གཡོན། །དེ་གནས་བསྒྱུར་བ་ཁྲག་འཐུང་ཆེན་པོ་ནི། །བུཌྜྷ་དཀར་སྨུག་དམར་བའི་ཕྱག་དྲུག་ན། །གཡས་པ་ཏི་ར་རྡོ་རྗེ་ཁྱུང་། །རྡོ་རྗེ་དཀར་མཐིང་དམར་བའི་ཕྱག་དྲུག་ན། །རྡོ་རྗེ་ཁ་ཊྭཱྃ་རྔ་ཆུང་གཡས། །རིན་ཆེན་མཐིང་སེར་དམར་བའི་ཕྱག་དྲུག་ན། །རིན་ཆེན་རྡོ་རྗེ་དགྲ་སྟྭ་གཡས། །དེ་གསུམ་གཡོན་པ་མཐུན་པར་སྣང་བ་ནི། །དྲིལ་བུ་དུང་དམར་རྒྱུ་ཞགས་བསྣམས། །པདྨ་མཐིང་དང་དམར་དཀར་ཕྱག་དྲུག་ན། །བེ་ཅོན་རྡོ་རྗེ་དགྲ་སྟྭ་གཡས། །ལས་ནི་དཀར་ལྗང་དམར་བའི་ཕྱག་དྲུག་ན། །རལ་གྲི་རྡོ་རྗེ་དགྲ་སྟྭ་གཡས། །དེ་གཉིས་མཐུན་པར་གཡོན་ན་བསྣམས་པ་ནི། །དྲིལ་བུ་དུང་དམར་ཐོང་གཤོལ་བསྣམས། །ལྕགས་ཀྱུ་སེ་གོལ་བཅིངས་ནས་ནི། །ཤ་མྱག་རྟ་ལ་བཏགས་པ་ནི། །སངས་རྒྱས་ཐམས་ཅད་བསྡུ་བར་བྱ། །སྒོ་ཀུན་ལྕགས་ཀྱུས་སྤྱན་དྲངས་སོགས། །ལས་ཆེན་མཆོག་གིས་གཞུག་པ་དང་། །དམ་ཚིག་མཆོག་གིས་བརྟན་པར་བྱ། །འཇམ་པའི་ཕྱག་ན་ཕྱག་དང་མཆོད་དང་བསྟོད། །རྣམ་པ་བདུན་གྱི་ལས་བྱས་ལ། །འཁོར་ཚོགས་འཁོར་ལོས་ཚོགས་བཅས་ལ། །ཏིལ་གྱི་འབྲུ་བཞིན་གང་ནས་ནི། །དགའ་བས་ཚོགས་རྣམས་དགེས་པར་རོལ། །ཚོགས་ཀྱི་བསྐོས་ཉུལ་ཆེན་མོ་ཡིན། །མཆོད་པའི་ཕུད་ནི་ཉམས་མ་ཉམས། །ཉུལ་བས་ལེགས་པར་བསྟན་པར་བྱ། །མ་བྱས་བར་ཆད་བྱེད་པར་འགྱུར། །ལྷ་རྣམས་ཐམས་ཅད་ཚོགས་པས་ན། །སྐྱེ་བོ་དམ་པ་ཀུན་ཚོགས་པས། །ཚོགས་ཀྱི་དཀྱིལ་འཁོར་དམ་པ་ནི། །ཡོ་བྱད་ཐམས་ཅད་འདུས་པ་སྟེ། །སངས་རྒྱས་ཀུན་གྱི་བརྡ་དག་གིས། །དེ་བཞིན་མཛའ་བ་འདུ་ཞེས་གསུངས། །ཞེས་གསུངས་སོ། །ཀརྨ་མཱ་ལེའི་རྒྱུད་ལས། ཚོགས་ཀྱི་དཀྱིལ་འཁོར་གྱི་ལེའུ་སྟེ་གསུམ་པའོ།། །།དེ་ནས་བཅོམ་ལྡན་འདས་དཔལ་ཞེ་སྡང་རྡོ་རྗེ་ཆེན་པོའི་སྐུ་གསུང་ཐུགས་རྡོ་རྗེ་ལས། གསལ་བཀྲའི་དཀྱིལ་འཁོར་འདི་གསུངས་སོ། །གསལ་བཀྲ་འབྱུང་བའི་ཏིང་འཛིན་བྱེ་བྲག་དང་། །སྒོམ་
ཐབས་རབ་ཏུ་བཤད་པར་བྱ། །གསལ་བཀྲའི་དཀྱིལ་འཁོར་རྫོགས་པར་གདོན། །དེ་ཡང་དང་པོ་བསྟན་པ་ནི། །སྙིང་པོ་ཕྱག་རྒྱ་ལ་སོགས་པ། །ཕྱག་རྒྱ་བཞི་དང་རྣམ་པར་སྦྱར། །ལས་ཀྱི་ཚུལ་གྱི་འབྲང་བ་དང་། །རྡོ་རྗེའི་སེ་གོལ་བརྡབ་པ་དང་། །ཐལ་མོ་དལ་བུས་བསྡུ་བ་དང་། །གླུ་དང་སིལ་སྙན་གར་བྱེད་དང་། །སྒེག་ལ་སོགས་པའི་ཉམས་དགའ་དང་། །སྣ་ཚོགས་ཕྱག་རྒྱའི་གར་བྱེད་པས། །ཐམས་ཅད་བདག་ཉིད་རྒྱར་སྦྱར་ཏེ། །དབབ་པ་ཐམས་ཅད་རབ་ཏུ་འགྲུབ། །རྡོ་རྗེ་སེམས་དཔའ་སྒེག་པ་ལ། །དཔའ་ལ་དཔའ་བོ་དེ་བཞིན་གཤེགས། །རྡོ་རྗེ་ཁྲོ་བོ་སྙིང་རྗེ་ལ། །དགོད་པ་འཇིག་རྟེན་དབང་ཕྱུག་མཆོག །རྡོ་རྗེ་ཉི་མ་ཁྲོ་བོ་ལ། །རྡོ་རྗེ་དྲག་པོ་འཇིགས་པ་ལ། །ཤཱཀྱ་ཐུབ་པ་མི་སྡུག་པ། །ངོ་མཚར་ལ་ནི་ཨཱ་ར་ལི། །རབ་ཏུ་ཞི་ལ་སངས་རྒྱས་བརྟག །སྡུག་བསྔལ་ཀུན་སེལ་ཞི་བའི་ཕྱིར། །དངོས་པོ་ཀུན་གྱི་རང་བཞིན་གྱིས། །ཉེ་བར་གནས་ཤིང་བྱིན་གྱིས་རློབས། །བལྟ་བས་མི་ངོམས་པ་ཡི་གཟུགས། །ཐམས་ཅད་བདག་ཉིད་སྟོན་པར་མཛད། །ལེགས་སོ་ཞེས་བྱ་གྲུབ་པ་ནི། །མཆོག་ཏུ་གྱུར་པ་རབ་ཏུ་སྩོལ། །ཡིད་ལ་བསམ་པ་རྫོགས་པའི་ཕྱིར། །མཆོད་པ་རབ་ཏུ་སྦྱར་བར་བྱ། །སྒེག་པ་དང་ནི་དཔའ་བ་དང་། །འཇིགས་སུ་རུང་བར་སྣང་བ་ནི། །དགོད་དང་གཤེ་དང་རྔམ་པ་དང་། །ངོ་མཚར་སྙིང་རྗེ་ཞི་བའི་སྐུ། །དབང་ཕྱུག་ཆེན་པོ་ཆགས་པས་སྒེག །དེ་བཏུལ་དཔལ་ལྡན་ཁྲག་འཐུང་སྒེག །ལྷ་མིན་བ་སུ་ཀ་ར་དཔལ། །བཏུལ་བས་སངས་རྒྱས་དཔའ་བོ་ཡིན། །ཁྱབ་འཇུག་ཕག་གདོང་སེང་གེ་འཇིགས། །འཇིགས་པར་བྱེད་པས་འཇིགས་སུ་རུང་། །གཞོན་ནུ་སྨིན་དྲུག་རྔ་གད་དགོད། །ཐུལ་ཕྱིར་བདེ་གཤེགས་བཞད་པར་གྲགས། །ལྷ་ཆེན་ཚོགས་ཀྱི་བདག་པོ་གཤེ། །བརྟུལ་བས་བཅོམ་ལྡན་གཤེ་བའི་ཚུལ། །སྒྲ་གཅན་ཉི་ཟླ་ཁར་འཇུག་རྔམས། །ལོངས་སྤྱོད་ཆེན་པོ་རྔམས་པའི་སྐུ། །ཀླུ་ཆེན་པོ་ཤས་ས་གཡོས་མཚར། །ཡན་ལག་བརྒྱད་ལྡན་ངོ་མཚར་ཉིད། །བརྒྱ་བྱིན་ལྷ་རྣམས་སྙིང་རྗེས་སྐྱོང་། །དེ་བཏུལ་སྙིང་རྗེའི་ཉམས་དང་ལྡན། །འདི་ནས་ཚིག་རྐང་ཁ་ཤས་ཆད། དེ་བཅོམ་
བསྐལ་པའི་མེ་དཔུང་བཞུགས། །ཀུན་ཏུ་སྣ་ཚོགས་སྐལ་བཟང་པོ། །ཀུན་གྱི་སློབ་དཔོན་བདག་ཉིད་བསྒྱུར། །ཀུན་འབྱུང་ལ་སོགས་སྦྱོར་བ་ཡིས། །རྒོལ་བ་བདག་དང་གར་བྱས་ཏེ། །དེ་ནས་རྒོལ་བ་ཅི་རིགས་པར། །སངས་རྒྱས་ཐམས་ཅད་འབྱུང་བར་འགྱུར། །སྒེག་པས་འགྲོ་བ་ཤེས་རབ་སྐྱེས། །དཔའ་བས་མཛད་སྤྱོད་ཉམ་ང་མེད། །གདུག་རྩུབ་རྒྱན་གྱི་བརྒྱན་པས་འཇིགས། །རྒོད་པས་རྨད་བྱུང་ཆོས་འཁོར་འཆད། །གཤེ་བས་ལོག་ལྟ་ཚར་ཡང་གཅོད། །རྔམས་པས་སྨོན་ལམ་ཕྱི་བཤོལ་མེད། །སྙིང་རྗེས་ཡལ་བར་མི་དོར་འདུལ། །ཉོན་མོངས་སྒྲུབ་པའི་རྒྱུར་མཛད་མཚར། །ཁྲོ་དྲག་དབྱིངས་ལས་མ་གཡོས་ཤིང་། །དེ་ནས་སླར་ཡང་རྒོལ་བ་ལ། །རྡོ་རྗེ་འཛིན་པ་ཆེན་པོར་བསྒྱུར། །རྒོལ་བས་དེ་ནས་ཚུལ་བཞིན་དུ། །པདྨ་གར་འབྱུང་མཆོག་ཏུ་བསྒྱུར། །དེ་ནས་སླར་དུ་རྒོལ་བ་ཡང་། །རྡོ་རྗེ་ཉི་མ་མཆོག་ཏུ་བསྒྱུར། །དེ་ནས་ཕྱིར་ཡང་རྒོལ་བ་ནི། །རྡོ་རྗེ་རྟ་མཆོག་འབྱུང་བར་བྱ། །དེ་ནས་སླར་ནི་རྒོལ་བ་ཡང་། །བདག་ཉིད་འབྱུང་བས་རབ་ཏུ་འགྲུབ། །དེ་ལྟར་རབ་ཏུ་གར་བྱས་ཏེ། །དེ་ལས་གང་ཞིག་ཕམ་འགྱུར་བ། །ཚོགས་ལ་དེ་ནི་ཚོགས་ཀྱི་ཟས། །ཡོན་དང་བཅས་པར་དབུལ་བར་བྱ། །མཆོད་པའི་ཕྱག་རྒྱ་འདི་རྣམས་ཀྱིས། །རྟོག་པ་ཀུན་ལས་ཐར་བར་འགྱུར། །བསོད་ནམས་ཐམས་ཅད་འཕེལ་བར་འགྱུར། །དེ་བཞིན་རྟག་པར་བསྲུང་བར་འགྱུར། །རིམས་དང་དུག་དང་དབྱིག་དུག་དང་། །མཁའ་འགྲོས་གཙེས་དང་གདོན་རྣམས་དང་། །བདུད་དང་སེམས་ཅན་དམྱལ་བ་རྣམས། །འདི་ཡིས་རབ་ཏུ་ཞི་བར་འགྱུར། །དངོས་གྲུབ་ཡོན་ཏན་ཕུན་སུམ་ཚོགས། །དགའ་དང་དེ་བཞིན་བདག་པོ་དང་། །སངས་རྒྱས་དམ་པ་ཐམས་ཅད་དང་། །ཕྱག་རྒྱའི་མཆོག་རྣམས་བསྒྲུབ་པར་འགྱུར། །དེ་ཡང་ཕྱག་རྒྱ་དང་། ཉེ་བའི་ཕྱག་རྒྱ་དང་། འདྲ་བའི་ཕྱག་རྒྱ་དང་། ལག་གི་ཕྱག་རྒྱ་དང་། ཡེ་ཤེས་ཀྱི་ཕྱག་རྒྱ་དང་། ལན་དུ་བརྒལ་བར་བྱའོ། །གར་དགུའི་ཕྱག་རྒྱ་ཤེས་པའོ། །དེ་ནས་ཏིང་ངེ་འཛིན་བསྟན་ཏེ། རྡོ་རྗེ་སེམས་
དཔའ་དཔལ་འབྱོར་པ། །ཇི་ལྟའི་དབྱིངས་དང་གཟུགས་སུ་ལྡན། །བདེ་བ་ཉིད་ཀྱིས་ཀུན་གྱི་བདག །ཀུན་གྱི་བདག་ལ་བཞུགས་པར་བྱ། །ཕྱག་རྒྱ་འདི་ཡིས་རྣལ་འབྱོར་པ། །འདོད་པ་བཞིན་དུ་འགྲོ་འོང་ལྡིང་། །རྒྱལ་པོ་སངས་རྒྱས་ཀུན་དང་འདྲ། །རྡོ་རྗེ་སེམས་དཔའ་རབ་ཏུ་འགྲུབ། །ཆགས་པ་མེད་ཅིང་མ་ཆགས་མེད། །དབུ་མ་ཡང་ནི་དམིགས་སུ་མེད། །བུད་མེད་ཀུན་གྱི་རྒྱུ་སྦྱོར་འདི། །གཉིས་སུ་མེད་པ་ཐེག་པའི་མཆོག །ཕྱག་རྒྱ་འདི་ཡིས་བཏབ་ན་ནི། །འདོད་པ་བཞིན་དུ་འགྲོ་འོང་ལྡིང་། །ཡོད་པ་མ་ཡིན་མེད་པའང་མིན། །དབུ་མར་ཡང་ནི་དམིགས་སུ་མེད། །ཤེས་རབ་ཕ་རོལ་ཕྱིན་སྦྱོར་བ། །སངས་རྒྱས་བྱང་ཆུབ་རབ་འགྲུབ་པའོ། །བུད་མེད་ལ་སོགས་རིན་ཆེན་མཆོག །མཁའ་ལས་དངོས་རྣམས་ཐམས་ཅད་སྤྱོད། །དངོས་པོ་མེད་པར་བདག་སྦྱོར་བས། །ནམ་མཁའ་ཀུན་དང་མཉམ་སྦྱོར་བ། །མཁའ་འགྲོ་སྒྱུ་མ་བདེ་བའི་མཆོག །ཤིན་ཏུ་རྟག་པར་འགྲུབ་པར་འགྱུར། །ཇི་ལྟར་པདྨ་དམར་པོ་འདི། །ཆགས་པའི་ཉེས་པ་མི་གོས་ཏེ། །རྣལ་འབྱོར་ལྡན་པའང་དེ་བཞིན་དུ། །གནས་ཀྱི་ཉེས་པས་ཡོངས་མི་གོས། །ཇི་ལྟར་པདྨ་ཚོན་བསྒྱུར་ཀྱང་། །ཚོན་གྱི་ཉེས་པས་མི་གོས་ཏེ། །དེ་ནི་གནས་ཀྱི་ཉེས་པ་ཡིས། །འགྲོ་ལ་ཕན་ཕྱིར་མི་གོས་སོ། །འདོད་ཆགས་ཆེན་པོ་རྣམ་དག་ལ། །ནོར་ཆེན་བདེ་བ་ཆེན་པོ་སྟེ། །ཁམས་གསུམ་དབང་པོ་ཐོབ་པས་ནི། །སེམས་ཅན་དོན་རྣམས་བསྟན་པར་བྱ། །ཐམས་ཅད་ནམ་མཁའི་མཚན་ཉིད་དེ། །ནམ་མཁའ་ལ་ཡང་མཚན་ཉིད་མེད། །ཁམས་གསུམ་དག་པ་མ་ལུས་པས། །ཐམས་ཅད་སྒྱུ་མ་ལྟ་བུ་སྟེ། །ཇི་ལྟར་སྒྱུ་མ་ཐམས་ཅད་དུ། །མཐོང་བ་དང་ནི་རེག་པར་འགྱུར། །དམིགས་སུ་ཡོད་པའང་མ་ཡིན་ཏེ། །དེ་བཞིན་འགྲོ་བ་ཀུན་གྱི་ཚུལ། །ཕྱག་རྒྱ་འདི་ཡིས་རྣལ་འབྱོར་པ། །འདོད་པ་བཞིན་དུ་འགྲོ་འོང་ལྡིང་། །ཏིང་ངེ་འཛིན་གྱི་ཕྱག་རྒྱ་བསྒྱུར་བ་ཤེས་པའོ། །ལྷ་མོ་ཀུན་གྱི་བདེ་བའི་མཆོག །མཛེས་པའི་ཞལ་ནི་རྣམ་བསྒྱུར་ཞིང་། །བདེ་བ་མྱོང་བ་རབ་སྦྱོར་བ། །མཛེས་
པར་བལྟ་བའི་གར་བྱེད་པ། །སངས་རྒྱས་རྡོ་རྗེ་པདྨ་འཛིན། །རྡོ་རྗེ་ཉི་མ་ཁམས་གསུམ་པ། །རྒྱས་བཏབ་རྨོངས་བྱས་ཐོས་པ་དང་། །ཐལ་བར་གྱུར་ཀྱང་འཚོ་བར་བྱེད། །བུད་མེད་མཁས་པ་སྒྱུ་མ་ཆེ། །མཛེས་པའི་ཞལ་ནི་རྣམ་པར་བསྒྱུར། །རིམ་གྲོར་བཅས་ཤིང་སྟེག་པའི་མཆོག །མཛེས་པར་བལྟ་བའི་གར་བྱེད་པས། །སངས་རྒྱས་རྡོ་རྗེ་པདྨ་འཛིན། །རྡོ་རྗེ་ཉི་མ་ཁམས་གསུམ་པ། །རྒྱས་བཏབ་རྨོངས་བྱེད་བསླངས་ནས་ནི། །ཟོས་ན་སླར་ཡང་འཚོ་བར་བྱེད། །སངས་རྒྱས་བྱང་ཆུབ་མཉམ་སྦྱོར་བ། །རབ་ཏུ་དགའ་བས་བལྟ་ཞིང་འཛུམ། །ཤིན་ཏུ་སྲིད་པ་ཡང་དག་བསྒྲུབ། །གསལ་བར་བལྟ་བ་ལ་གནས་པ། །དྲག་པོ་དབང་པོ་ཉེ་དབང་བཅས། །ཉི་ཟླ་གཤིན་རྗེ་ཚངས་བཅས་པའི། །སྲིད་པ་ཤིན་ཏུ་ཀུན་བསྒྲུབས་ནས། །གནས་གསུམ་དག་ནི་སྒྲུབ་པར་བྱེད། །སྒེག་ལ་སོགས་པའི་ཉམས་དང་ལྡན། །མཛེས་པའི་ཞལ་ནི་རྣམ་བསྒྱུར་ཞིང་། །རིམ་གྲོ་བར་ནི་བཅས་པའི་མཆོག །སྒེག་པའི་བལྟ་བས་གར་བྱེད་པ། །མཛེས་པའི་ཚུལ་དང་ཐབས་རྣམས་ཀྱིས། །དྲག་པོ་དབང་པོ་ཉེ་དབང་བཅས། །ཉི་ཟླ་གཤིན་རྗེ་ཚངས་བཅས་པའི། །འཇིག་རྟེན་གསུམ་དག་སྒྲུབ་པར་བྱེད། །མཆེ་བ་ཅུང་ཟད་གཙིགས་པའི་ཁ། །ཁྲོ་ཞིང་འཛུམ་དང་བཅས་པའི་བཞིན། །ཁྲོ་ལས་འགྱུར་བར་བཅས་ཤིང་འཛུམ། །གསལ་བར་བལྟ་ཞིང་ལེགས་པར་གནས། །དྲག་པོ་དབང་པོ་ཉེ་དབང་བཅས། །ཉི་ཟླ་གཤིན་རྗེ་ཚངས་བཅས་པའི། །རྒྱལ་པོ་སྒྱུ་མས་རྣམ་རྒྱལ་ནས། །ཁམས་གསུམ་དག་ནི་སྒྲུབ་པར་བྱེད། །འདོད་ཆགས་མྱོས་པའི་གཡེན་སྤྱོ་བ། །མཛེས་པའི་བཞིན་ནི་རྣམ་པར་བསྒྱུར། །འདི་ནི་བཞིན་གྱི་ཕྱག་རྒྱ་མཆོག །ཁམས་གསུམ་དག་ཀྱང་དགའ་བར་བྱེད། །དྲག་པོ་མཆེ་བ་རྣོན་པོ་གཙིགས། །གདུག་པ་ཟ་བ་འཇིགས་འཇིགས་བལྟ། །གཡས་པའི་བཞིན་གྱི་ཕྱག་རྒྱ་ཡིས། །ཁམས་གསུམ་དག་ཀྱང་ཟ་བར་བྱེད། །དངོས་གྲུབ་ཀུན་གྱི་བདེ་བ་མཆོག །རབ་ཏུ་དགའ་བར་བལྟ་ཞིང་འཛུམ། །གཡོན་པའི་བཞིན་གྱི་ཕྱག་རྒྱ་ཡིས། །ཁམས་གསུམ་དག་ཀྱང་ཐར་བར་བྱེད། །སྤྱི་བོར་རྟ་མགྲིན་གསང་མཐོ་བ། །རྟ་མགོ་ལྗང་སེར་ཁ་དོག་
གསལ། །སོ་གཙིགས་པས་ནི་མཆུ་མནན་ནས། །འཇིག་རྟེན་ཐམས་ཅད་འཇིགས་པར་བྱེད། །བཞིན་གྱི་ཕྱག་རྒྱ་ཞེས་བྱའོ། །ལྷ་མོ་ཀུན་གྱི་བདེ་བའི་མཆོག །མཛེས་པའི་མ་མཆུ་སོས་མནན་ནས། །འཛུམ་པའི་ཕྱག་རྒྱ་མཆོག་འདི་ནི། །སངས་རྒྱས་ཐམས་ཅད་དགའ་བར་བྱེད། །འདོད་ཆགས་བདེ་བས་གཡེན་སྤྱོ་བའི། །སྒེག་པའི་མ་མཆུ་སོས་མནན་པའི། །འཛུམ་པའི་ཕྱག་རྒྱའི་མཆོག་འདི་ནི། །ཁམས་གསུམ་དག་ཀྱང་དགའ་བར་བྱེད། །སྦྱོར་བ་ཀུན་གྱི་བདེ་བའི་མཆོག །མཛེས་པའི་མ་མཆུ་གཡོ་བར་བྱེད། །འཛུམ་པའི་ཕྱག་རྒྱ་མཆོག་འདི་ནི། །ཁམས་གསུམ་དག་ཀྱང་དགའ་བར་བྱེད། །བདེ་བ་རྒྱ་ཆེར་སྟོན་པས་འཛུམ། །དགྱེས་པས་མ་མཆུ་མནན་པ་ནི། །རིན་ཆེན་འཛུམ་པའི་ཕྱག་རྒྱ་ཡིས། །ཁམས་གསུམ་འདོད་པ་སྟེར་བར་བྱེད། །ཤ་ཆེན་གྱི་ནི་རོ་མྱང་ཞིང་། །མ་མཆུ་སོ་ཡིས་མནན་པ་ཡིས། །འཛུམ་པའི་ཕྱག་རྒྱ་མཆོག་འདི་ནི། །ཁམས་གསུམ་དག་ཀྱང་ཟ་བར་བྱེད། །བདེ་བ་ཀུན་གྱི་རོ་མྱང་ཞིང་། །མ་མཆུ་རྣམ་པར་མཛེས་བྱས་པ། །འཛུམ་པའི་ཕྱག་རྒྱ་མཆོག་འདི་ནི། །ཐལ་བར་གྱུར་པའང་འཚོ་བར་བྱེད། །འཛུམ་པའི་ཕྱག་རྒྱ་ཤེས་པའོ། །བདེ་བ་མྱོང་བ་ལས་སྦྱོར་བ། །ཟམ་ཟིམ་བལྟ་བ་རྣམ་བསྒྱུར་བས། །རྒྱས་བཏབ་རྨོངས་བྱས་ཟོས་པ་ཡིས། །ཁམས་གསུམ་དག་ཀྱང་འཚོ་བར་བྱེད། །བུད་མེད་མཁས་པ་སྒྱུ་མའི་མཆོག །མཛེས་པར་བལྟ་བའི་གར་བྱས་པས། །རྒྱས་བཏབ་རྨོངས་བྱས་བསླངས་ནས་སུ། །ཁམས་གསུམ་དག་ཀྱང་སྒྲུབ་པར་བྱེད། །སངས་རྒྱས་གསང་བའི་མཉམ་སྦྱོར་བས། །བལྟ་བ་རབ་ཞི་བདེ་བར་གནས། །བལྟ་བའི་ཕྱག་རྒྱ་མཆོག་འདི་ནི། །བུད་མེད་ཐམས་ཅད་དབང་དུ་བྱེད། །སྨིན་མཚམས་ཁྲོ་གཉེར་འགྱུར་བར་བཅས། །བལྟ་བ་རབ་འབར་རྣམ་པར་བསྒྱུར། །བལྟ་བའི་ཕྱག་རྒྱའི་མཆོག་འདི་ནི། །ཁམས་གསུམ་དག་ཀྱང་འབར་བར་བྱེད། །ཁྲོ་ཞིང་འགྱུར་བར་བཅས་པས་འཛུམ། །བལྟ་བ་གསལ་ལ་བདེ་བར་གནས། །བལྟ་བའི་ཕྱག་རྒྱའི་མཆོག་འདི་ནི། །ཁྲོས་པ་
ཐམས་ཅད་དབང་དུ་འགྱུར། །སྒེག་ལ་སོགས་པའི་རོ་དང་ལྡན། །སྒེག་བཅས་བལྟ་བའི་གར་བྱེད་པས། །བལྟ་བའི་ཕྱག་རྒྱའི་མཆོག་འདི་ནི། །ཁམས་གསུམ་དག་ཀྱང་གར་བྱེད་འཇུག །བལྟ་བའི་ཕྱག་རྒྱ་ཤེས་པའོ། །ན་མཿསྟུ་སརྦ་བུདྡྷེ་བྷྱཿ། ཞེས་པའི་ཕྱག་རྒྱ་ལ་གནས་ན། །ལས་དང་མཆོད་པ་མ་ལུས་པ། །ལུས་པ་མེད་པར་ཐམས་ཅད་འགྲུབ། །རུ་རུ་སྤུ་རུ་ཛྭ་ལ་ཏིཥྛ་སིཌྜྷ་ལོ་ཙ་ནེ། སརྦ་ཨཱརྠ་སཱ་དྷ་ནི་སྭཱ་ཧཱ། ཆོས་ཀྱི་ཕྱག་རྒྱ་མཆོག་འདི་ནི། །སེམས་ཅན་ཐམས་ཅད་དབང་དུ་བྱེད། །སུ་བྷ་གཱ་སྟཾ་མ་ཧཱ་ན་དེ་བི་ཧི་རི། མི་རི། རི་ཏི། ནི་རི་ཤྲི་ཡེ་སྭཱ་ཧཱ། ཆོས་ཀྱི་ཕྱག་རྒྱ་མཆོག་འདི་ནི། །འདོད་པའི་བདེ་བ་ཀུན་སྦྱིན་པའོ། །ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། ཆོས་ཀྱི་ཕྱག་རྒྱ་དམ་པ་འདི། །སངས་རྒྱས་བྱང་ཆུབ་རབ་བསྒྲུབ་ན། །བུད་མེད་གཞན་ལྟ་སྨོས་ཅི་དགོས། །ཏྲཱཾ་བྷ་བ་ཊཱ་ཊཱ། ཏྲ་ཊ་ཏྲ་ཊ། ཆོས་ཀྱི་ཕྱག་རྒྱ་དམ་པ་འདི། །རེ་བ་ཐམས་ཅད་རྫོགས་བྱེད་པའོ། །ཨོཾ་ཤྲཱི་བཛྲ་པདྨ་བྷཌྜ་བྷ་མུ་ཁ། ཡོ་གཱི་ཤྭ་རི་ཧི་ཧི་ཧི་ཧི། ཆོས་ཀྱི་ཕྱག་རྒྱ་དམ་པ་འདི། །འཇིག་རྟེན་ཐམས་ཅད་རབ་ཏུ་འཇིག །ཆོས་ཀྱི་ཕྱག་རྒྱ་ཤེས་པའོ། །བྱང་ཆུབ་རྡོ་རྗེ་ལྕམ་དྲལ་གྱི། །ཕྱག་རྒྱ་གཙོ་ཡིས་ལྕེ་ལ་སྒྲོལ། །འཁོར་གྱི་ཆོས་ཀྱི་ཕྱག་རྒྱ་སྟེ། །གཙོ་བོ་རང་གི་རིགས་ཤེས་སོ། །དེ་ནས་རིགས་ཅན་མ་ལུས་པ། །དཔའ་བོ་དཔའ་མོ་བརྡའ་ཡིས་སྤྲད། །ལག་པ་གཡས་གཡོན་གཉིས་དག་གི། །མཛུབ་མོ་མཐེའུ་ཆུང་མཛེས་པར་བསྒྱུར། །དཔལ་ལྡན་གཡོན་པ་འགྱིང་བའི་ཐབས། །གཡས་པ་བ་དན་གསུམ་པར་བྱ། །སྲི་ཞུར་བཅས་པའི་སྒེག་པའི་མཆོག །བདག་ཉིད་རྡོ་རྗེ་སེམས་དཔའ་ལ། །འཛུམ་དང་བཅས་པའི་མིག་གིས་བལྟ། །བསམ་པ་གཡོ་བའི་ཕྱག་རྒྱའོ། །རྡོ་རྗེ་དཔལ་གྱི་ཐལ་མོ་བསྒྱུར། །བསམ་པ་གཡོས་པའི་ཕྱག་བྱས་པའི། །སངས་རྒྱས་མཆོད་པའི་ལས་བྱས་ན། །མ་ལུས་ལུས་པ་མེད་པར་འགྲུབ། །སྨིན་མ་གཡོན་པ་བཏེག་ཚུལ་གྱིས། །རུ་ལུ་རུ་ལུར་བཅས་བགད་ན། །ཚངས་པ་ཉེ་དབང་དྲག་པོར་བཅས། །ཁམས་
གསུམ་དག་ཀྱང་ཕྱག་བྱེད་འགྱུར། །ཐལ་མོ་པདྨ་ཁ་འབུས་བཞིན། །སྦྱོར་ལྡན་རང་གི་སྙིང་གར་བཅིང་། །མཐེ་བོང་མཐེ་ཆུང་འདབ་མ་བཞིན། །རྒྱས་པ་འདུད་པའི་ཕྱག་ཀྱང་བྱ། །ལུས་ཀྱི་ཡན་ལག་ཐམས་ཅད་ནི། །ས་ལ་བསྙལ་ཏེ་ཕྱག་བྱ་བ། །སྙིང་ག་ཁ་དང་སྤྱི་གཙུག་ཏུ། །ཐལ་མོ་སྦྱར་ཏེ་ཕྱག་བྱའོ། །དཔལ་ལྡན་རྡོ་རྗེ་འགྱིང་བའི་ཐབས། །འཛུམ་པའི་མིག་གིས་ཕྱག་བྱས་ན། །ཁམས་གསུམ་པ་ཡང་ཕྱག་བྱེད་ན། །མཐུ་བསྙེམས་གཞན་ལྟ་སྨོས་ཅི་དགོས། །སངས་རྒྱས་མཉེས་པའི་བརྡ་ཡིན་པས། །ཕྱག་འཚལ་ཕྱག་རྒྱ་ཤེས་པའོ། །དཔའ་བོ་ཁྲོ་རྒྱལ་བྱང་ཆུབ་སེམས། །དཔའ་མོ་ཁྲོ་མོ་སེམས་མའི་ཚོགས། །བརྡའ་དག་བྱ་བ་འདི་ལྟར་བཤད། །ཆོས་རྣམས་བརྡའ་ལྟར་མེད་རིག་བྱ། །བརྡ་ཙམ་ལེན་པས་སྒྲ་དཔེས་མཚོན། །བརྡའ་ཡི་གསང་བས་གསང་བསྒྲུབ་ཕྱིར། །འགྲུབ་རྣམས་དོན་འདི་ཤིན་ཏུ་བཅས། །ཀ་ནི་འདོད་པ་བྱེད་འདོད་ཕྱིར། །བདག་ནི་འདོད་ཆགས་སྲས་ཡིན་ཏེ། །གཏི་མུག་འདོད་པས་མ་བྱིན་ན། །མྱུར་དུ་དམ་ཚིག་དེ་ཉམས་སོ། །དམ་ཚིག་དམ་ཚིག་ཅན་མཐོང་ན། །ལག་པ་གཡས་པ་བརྐྱང་བྱས་ཏེ། །དེས་ཀྱང་གཡོན་པ་བརྐྱང་པ་ཡིས། །རང་གི་ནུ་མ་རབ་བསྟན་ནས། །མགོ་བོ་རབ་ཏུ་བསྡུ་བྱས་ན། །ཕྱག་བྱེད་བདེ་བ་དྲིས་པ་ཡིན། །ལག་པ་གཡོན་པ་དཀུར་བརྟེན་ན། །ཕྱག་ལན་དེ་ནི་བྱས་པར་འགྱུར། །གཡོན་པ་འོག་ཏུ་བཞག་པ་ནི། །གཡོན་དུ་འདུད་པས་ཕྱག་ལན་ནོ། །གཡོན་པའི་སྨིན་མ་བསྐྱོད་པ་ཡིས། །མྱུར་དུ་ཕྱག་ནི་བྱས་པར་འགྱུར། །སྦྱོར་བ་ཤིན་ཏུ་བརྩོན་པ་ཡི། །གཡས་ཀྱི་སྨིན་མས་ཕྱག་ལན་བྱས། །གཡས་ཀྱི་ལག་པས་སྙིང་ག་རུ། །སྦྱོར་དང་ལྡན་པས་མཉེས་བྱས་ཏེ། །དེ་ནི་རྡོ་རྗེ་སློབ་དཔོན་མཆོག །དེ་ནི་མཚན་མར་ཤེས་པར་བྱ། །གཡོན་གྱི་ཁྲོ་མོ་བསྒྲེངས་ནས་ནི། །ནམ་ཞིག་སོ་ལྟར་བསྟན་བྱས་ན། །ལུས་ཆེན་དེ་ནི་ཁྲོས་འགྱུར་ཞེས། །རྣལ་འབྱོར་པ་ཡིས་རྟགས་ཤེས་བྱ། །གཡོན་གྱི་ཕྱོགས་སུ་འགྱིང་པ་ཡིས། །ལག་པ་སྙིང་གར་བརྐྱང་བྱས་ཏེ། །དབང་མོ་
གྱེན་དུ་རྣམ་བསྟན་ནས། །དེ་སྐྱེས་མཛའ་བ་རབ་ཏུ་བརྟག །ཆུང་ངུ་རྩེ་མོར་བྱས་པ་ཡིས། །ནམ་ཞིག་བསྐྱོད་པར་མཐོང་བ་ན། །དེ་ཚེ་རིག་མ་རྣལ་འབྱོར་དབང་། །རྡོ་རྗེ་པདྨོར་བརྩོན་པར་བྱ། །སྦོམ་པོ་ནམ་ཞིག་མཐོང་སྟོན་ན། །དེ་ཚེ་སྟོན་མོ་སྦྱིན་པར་བྱེད། །གལ་ཏེ་ཤིན་ཏུ་མཐོང་སྟོན་ན། །མངོན་པའི་ང་རྒྱལ་རབ་ཏུ་བརྟག །ཁྲོ་མོ་ལྕགས་ཀྱུ་དྲངས་བྱས་ཏེ། །དེ་ཚེ་སྔགས་མཁན་གྱིས་བསྟན་ན། །དེ་ཚེ་ངེས་པར་འོང་བྱས་ཏེ། །གཞན་དུ་ན་ནི་དམྱལ་བར་ལྟུང་། །དེ་ཉིད་རྣམ་པར་བཟློག་པ་ལྟར། །སྔགས་མཁན་གྱི་ནི་ནམ་བསྟན་ན། །དེ་ཚེ་མྱུར་དུ་འགྲོ་བྱས་ཏེ། །གཞན་དུ་བྱས་ན་དམ་ཚིག་ཉམས། །གཞན་རྣམས་ཀྱི་ནི་ཕྱག་རྒྱ་ཡིས། །རྣལ་འབྱོར་པ་ཡིས་རྣམ་བསྐུལ་ནས། །ལས་ཀྱི་སྦྱོར་བ་ཤེས་པ་ཡིས། །ལས་དེ་དག་ནི་བརྩམ་པར་བྱ། །བརྡ་ཡི་ཕྱག་རྒྱ་ཤེས་པའོ། །གཞན་ཡང་རབ་ཏུ་རྒྱས་བཤད་བྱ། །བརྡ་ཡི་དམ་ཚིག་སྟོན་པ་ནི། །སྤྱི་བོར་ཉུག་པ་གང་ཡིན་པ། །ཕྱག་འཚལ་བར་ནི་སྟོན་པ་ཡི། །དཔྲལ་བར་རེག་པར་བྱེད་པ་ནི། །ཕྱག་ལན་ཡིན་པར་ཤེས་པར་བྱ། །སྨིན་མ་བསྒྱུར་བ་གང་ཡིན་པ། །སངས་རྒྱས་ཐམས་ཅད་གནས་པའི་བརྡའ། །གཡས་པ་ནམ་མཁར་འགྲོ་བ་འགྲུབ། །གཡོན་པ་རྣམ་པར་རྒྱལ་བའི་མཆོག །རང་བྱུང་རྣམས་ཀྱི་བརྡ་ཡི་རྒྱ། །མིག་གཉིས་གཡོ་བར་འགྲུབ་པ་སྟེ། །གཡོན་པ་བུད་མེད་བཟང་མོ་ཡིན། །གཡས་པ་སྐྱེས་པ་བཟང་པོའོ། །རྣ་བ་དག་ལ་རེག་པའི་བརྡའ། །གཡས་གཡོན་གཉིས་ཀ་དེ་བཞིན་དེ། །གཡས་པ་ལེགས་པར་བླངས་པ་ཡིས། །གཡོན་པ་ལེགས་པར་སྨྲ་བའོ། །སྣ་ཡི་བུ་ག་གཉིས་ཀྱི་བརྡའ། །སངས་རྒྱས་ཐམས་ཅད་གནས་པ་སྟེ། །གཡས་པ་བདག་ལ་བདུག་པ་སློང་། །གཡོན་པ་བདག་ལ་དྲི་སློང་བའོ། །ལྕེ་ནི་ལྡག་པ་ལྟར་བྱེད་པ། །བརྡ་ཡི་ཕྱག་རྒྱར་གནས་པ་སྟེ། །གཡས་པ་ཤ་ཡི་ཕྱག་རྒྱ་སྟེ། །གཡོན་པ་ཆང་གི་ཕྱག་རྒྱ་ཡིན། །མཆེ་བ་གཡས་དང་གཡོན་པ་ཡིས། །དམ་དུ་མ་མཆུ་མནན་པ་ནི། །གཡོན་པ་བུད་མེད་རེག་ན་བདེ། །གཡས་པ་དེ་བཞིན་སྐྱེས་པའོ། །ལྐོག་མར་རེག་པའང་དེ་བཞིན་དུ། །བརྡའ་ཡི་ཕྱག་རྒྱར་གནས་པ་སྟེ། །ཐེག་པ་ཆེན་པོ་བླ་མེད་པའི། །རྟོག་པ་ཐམས་
ཅད་སྨྲ་བའི་མཆོག །སྙིང་གར་གྱེན་དུ་འདྲེན་པ་ནི། །རང་བྱུང་ཕྱག་རྒྱའི་བརྡའ་འགྲུབ་པ། །རྡོ་རྗེ་ཐམས་ཅད་འདྲེན་པ་སྟེ། །འཁོར་བ་ཤིན་ཏུ་སྡུད་པའོ། །ལྟེ་བའི་དཀྱིལ་དུ་རེག་པ་ནི། །བརྡའ་ཡི་ཕྱག་རྒྱར་གནས་པ་སྟེ། །དབུ་མའི་ནན་ཏན་བསྒྲུབས་པ་ཡིས། །ཆོས་ཀྱི་འཁོར་ལོ་ཆེན་པོ་དཀྱིལ། །རང་གི་དབང་པོ་བསྒྲེང་བ་ནི། །རང་བྱུང་རྣམས་ཀྱི་བརྡའ་ཡི་རྒྱ། །དེ་ལས་དེ་བཞིན་བདེ་བ་ཡིས། །སངས་རྒྱས་ཐམས་ཅད་ཐོབ་པར་འགྱུར། །ཕྲག་པ་གཉིས་ནི་ཀུན་བསྟོད་པ། །བརྡའ་ཡི་ཕྱག་རྒྱར་གནས་པ་སྟེ། །གཡས་པ་འགུགས་པའི་ཕྱག་རྒྱ་ཡིན། །གཡོན་པ་སླར་དུ་བཏང་བའོ། །དཔུང་པ་གཡས་གཡོན་གཉིས་ཀ་ཡིས། །བདག་ལ་འཁྱུད་པའི་ཕྱག་རྒྱ་ཡི། །གཡས་པ་ཐམས་ཅད་འགྲུབ་པ་ཡིན། །གཡོན་པ་དབང་ཕྱུག་ཐམས་ཅད་འགྲུབ། །ཁུ་ཚུར་གཡས་གཡོན་གཉིས་ཀ་ཡིས། །ཁུ་ཚུར་བཅངས་ནས་དགྲོལ་བ་དག །གཡས་པ་རྒྱས་འདེབས་ཕྱག་རྒྱ་ཡིན། །གཡོན་པ་མི་རྣམས་ཐོང་ཤིག་པའོ། །བརླ་གཉིས་རབ་ཏུ་བསྡམ་པ་ནི། །གཡས་དང་གཡོན་པ་དེ་བཞིན་ཏེ། །གཡོན་པ་འདོད་ལ་རབ་ཏུ་བརྩོན། །གཡས་པ་ཆོས་ལ་བརྩོན་པའོ། །པུས་མོའི་ལྷ་ངའི་བརྡའ་དག་ནི། །གཡས་དང་གཡོན་པ་དེ་བཞིན་ཏེ། །གཡོན་པ་འདུད་པའི་ཕྱག་རྒྱ་སྟེ། །གཡས་པ་རབ་ཏུ་འདུད་པའོ། །པུས་མོ་གཡས་གཡོན་གཉིས་དག་གི། །བརྡའ་ཡི་ཕྱག་རྒྱར་གནས་པ་སྟེ། །གཡས་པ་བཅིང་བའི་ཕྱག་རྒྱ་ཡིན། །གཡོན་པ་ཐམས་ཅད་རྣམ་པར་དགྲོལ། །རྐང་པ་གཉིས་ཀྱིས་ས་གནོན་པ། །གཡས་དང་གཡོན་པ་དེ་བཞིན་ཏེ། །གཡོན་པ་ཐམས་ཅད་གནོན་པའོ། །གཡས་པ་ཐམས་ཅད་རབ་ཏུ་འཇོམས། །ཨ་ཏི་པུ་ཞེས་བྱ་བའི་བརྡའ། །དེ་ནི་ཕྱག་འཚལ་ཞེས་སྟོན་པའོ། །པྲ་ཏི་ཨོཾ་དྷི་བྷུ་ཞེས་པ་ནི། ཕྱག་ལན་ཡིན་པར་ཤེས་པར་བྱའོ། །དངོས་གྲུབ་ལས་དང་བདེ་བ་དག །འདི་ཡིས་མི་འགྲུབ་གང་ཡང་མེད། །རང་དོན་ལས་རྣམས་གང་བསྒྲུབ་པ། །མ་ལུས་ལུས་པ་མེད་པར་འགྲུབ། །བརྡའ་ཡི་ཕྱག་རྒྱ་ཤེས་པའོ། །དེ་རུ་དཀྱིལ་འཁོར་
ཆོ་ག་བཞིན། །བདུད་རྩི་འཁྱིལ་པ་བསྒོམས་ནས་ནི། །དཀྱིལ་འཁོར་གྲུ་བཞིར་ལྷམ་པ་ལ། །བཤང་གཅི་ཆོ་ག་བཞིན་བྱུགས་ནས། །ཡིད་འོང་སློབ་མས་ཐིག་བཟུང་ལ། །ངོས་བཞི་དང་ནི་གྲུ་བཞི་དང་། །སྒོ་བཞི་པར་ཡང་གདབ་པར་བྱ། །དབུས་ནི་རབ་ཏུ་ཟླུམ་པོ་ལ། །ཐིག་བཞི་བཏབ་པས་ལེ་ཚེ་དགུ། །ཕྱོགས་བཞི་དང་ནི་དབུས་ལྔ་ལ། །རིགས་ལྔ་ཡབ་ཡུམ་བཀོད་པ་དང་། །མཚམས་སུ་ནང་གི་སེམས་དཔའ་སྟེ། །གྲུ་ཆད་བྱམས་པ་ལ་སོགས་པ། །ཡབ་དང་ཡུམ་དུ་བཅས་པ་དང་། །བར་ཁྱམས་ཀུན་བཟང་ཡབ་ཡུམ་དང་། །ཐུབ་དྲུག་སེམས་དཔའ་བཅུ་དྲུག་སོགས། །སྒོ་བཞིར་སྒོ་བ་ཡབ་ཡུམ་བརྒྱད། །ཁྲོ་བོའི་དཀྱིལ་འཁོར་དེ་བཞིན་དུ། །ལེ་ཚེ་དགུ་པར་མཁས་པས་བརྟག །བར་ཁྱམས་གཉིས་དང་ལྡན་པར་བྱ། །ཕུར་བུ་སྲད་བུ་མཚོན་ཆའི་ཆས། །ཐབས་དང་ལྡན་པས་བསྒོམ་ཞིང་བརྒྱན། །ཁམ་ཕོར་པདྨ་མཚན་ལྡན་པས། །དཔལ་དང་ལྡན་པའི་ཡི་གེ་བྲི། །ཡེ་ཤེས་གསལ་བའི་འོད་ཀྱང་དགོད། །སྐུ་གསུང་ཐུགས་ཀྱི་ངང་དུ་བསྒོམ། །ཨཱ་ལི་ཀཱི་ལི་མཉམ་སྦྱོར་བ། ། མཁའ་ཡི་ཡང་ཁ་ཡི་ནང་དུ་འདུད་པར་བྱ། །དེ་ཡི་འོག་ཏུ་རི་མོ་རྣམས། །ཡི་གེ་ཐམས་ཅད་དགོད་པར་བྱ། །གུག་བསྐྱེད་དག་གིས་ལྕུག་མར་བྱ། །ཡི་གེ་ར་ནི་མྱུ་གུར་བྱ། །ཀླད་ཀོར་ཟླ་བ་ཁམ་པ་དང་། །ཆོག་གཉིས་ཟླ་བ་གཉིས་སུ་བྱ། །འདི་ནི་སངས་རྒྱས་ཐམས་ཅད་ཀྱི། །ཕྱག་རྒྱ་མི་འགྱུར་དམ་པ་སྟེ། །སངས་རྒྱས་དཔལ་གྱི་ངོ་བོར་བཤད། །ཨོཾ་ཨཱཿཧཱུཾ་སྭཱ་ཧཱ། ཨོཾ་ནི་བདེ་གཤེགས་ཀུན་གྱི་སྐུ། །ཨཱཿནི་ཆོས་འཛིན་རྣམས་ཀྱི་གསུང་། །ཧཱུཾ་ནི་སངས་རྒྱས་ཐུགས་རྣམས་འདུས། །སྭཱ་ཡིས་ཡོན་ཏན་ཡིད་བཞིན་འཕེལ། །ཧཱ་ནི་ལས་རྣམས་ཐོགས་པ་མེད། །རིགས་ལྔར་ཆོས་དབྱིངས་སངས་རྒྱས་འདུས། །ཡི་གེ་དག་ཀྱང་མི་འགྱུར་མཆོག །རྡོ་རྗེ་སེམས་དཔའ་དཔལ་གྱི་ལྷའི། །བསྟོད་དང་བཅས་པའི་མཚན་བྲིས་ན། །སྡིག་པ་ཀུན་ལས་ཐར་བར་བྱེད། །བསོད་ནམས་ཐམས་ཅད་རབ་ཏུ་འགྲུབ། །རྡོ་རྗེ་སེམས་དཔའ་དཔལ་སྦྱོར་ཞེས། །རབ་ཏུ་ཆགས་པའི་མཚན་བྲིས་ན། །སྡུག་བསྔལ་ཀུན་
ལས་ཐར་བར་འགྱུར། །བདེ་བ་ཐམས་ཅད་རབ་ཏུ་འགྲུབ། །ཆགས་ཆེན་གྲོལ་བ་དཔལ་ཞེས་པའི། །ཆགས་པའི་མཚན་དག་བྲིས་ན་ནི། །སྡིག་པ་ཀུན་ལས་ཐར་བར་བྱེད། །གྲོལ་བ་ཀུན་ལ་རབ་ཏུ་གནས། །སྙིང་རྗེ་དྲི་མེད་ཁྲོ་དཔལ་ཞེས། །བསྟོད་དང་བཅས་པའི་མཚན་བྲིས་ན། །སྡིག་པ་ཀུན་ལས་ཐར་བར་འགྱུར། །དངོས་གྲུབ་ཀྱི་ནི་མཆོག་ཏུ་འགྱུར། །པདྨ་ཆགས་པ་དཔལ་དག་ཅེས། །ཆགས་པའི་མཚན་དག་བྲིས་ན་ནི། །སྡིག་པ་ཀུན་ལས་ཐར་བར་འགྱུར། །དག་པ་ཐམས་ཅད་རྣམ་པར་དག །རྡོ་རྗེ་ཉི་མ་དཔལ་མདངས་ཤེས། །བསྟོད་དང་བཅས་པའི་མཚན་བྲིས་ན། །སྡིག་པ་ཀུན་ལས་ཐར་བར་འགྱུར། །ལོངས་སྤྱོད་ཅན་ལ་རབ་ཏུ་གནས། །རྟ་མཆོག་ཕ་རོལ་གནོན་དཔལ་ཞེས། །ཆགས་པའི་མཚན་དག་བྲིས་ན་ནི། །སྡིག་པ་ཀུན་ལས་ཐར་བར་འགྱུར། །དབང་ཕྱུག་ཐམས་ཅད་རབ་ཏུ་འགྲུབ། །བྲིས་ན་བསོད་ནམས་ཆེ་བར་འགྱུར། །བརྗོད་པ་དག་ཀྱང་དེ་བཞིན་ཏེ། །ལས་ཀྱི་དངོས་གྲུབ་རབ་འབྱམས་དག །མ་ལུས་བར་ནི་རབ་ཏུ་འགྲུབ། །འཁོར་རྣམས་བཀོད་པ་ཅི་འདྲ་དང་། །སྲིད་པའི་བསོད་ནམས་ཅི་འདྲ་དང་། །བརྗོད་པའི་བསོད་ནམས་ཅི་འདྲ་དང་། །དེ་འདྲའི་འཁོར་ལོའི་མཆོག་གི་མཛེས། །ལྷག་པའི་ལྷ་ནི་གང་གང་གི། །སློབ་དཔོན་གང་དང་གང་དག་གིས། །དེ་དང་དེ་ཡི་མཚན་དག་ནི། །དཔལ་གྱི་ཚིག་དང་ལྡན་པར་བརྗོད། །དེ་ནས་ལས་ཀྱི་ཕྱག་རྒྱ་འདི། །དམ་ཚིག་དམ་པས་བཤད་པར་བྱ། །རྡོ་རྗེ་ཁུ་ཚུར་དམ་པར་བཅིང་། །མཉམ་པར་བཞག་པས་གཉིས་སུ་བྱ། །རྡོ་རྗེ་ཕྱག་རྒྱ་གཉིས་སུ་བྱ། །དེ་ནས་བཅིང་བར་རབ་ཏུ་བཤད། །གཡོན་པ་རྡོ་རྗེ་མཛུབ་མོ་བཟུང་། །གཡས་པ་ནང་དུ་བསྒྲེང་བར་བྱ། །བྱང་ཆུབ་མཆོག་གི་ཕྱག་རྒྱ་སྟེ། །སངས་རྒྱས་བྱང་ཆུབ་སྙིང་བྱེད་པའོ། །མི་གཡོ་བ་ཡི་ས་ལ་རེག་པའོ། །རིན་ཆེན་གྱི་ནི་མཆོག་སྦྱིན་པའོ། །ཚེ་དཔག་མེད་པའི་ཏིང་འཛིན་མཆོག །གདོན་མི་ཟ་ཡི་མི་འཇིགས་མཆོག །དེ་ནས་ལས་ཀྱི་ཕྱག་རྒྱ་རྣམས། །མདོར་བསྡུས་རབ་ཏུ་བཤད་པར་བྱ། །རྡོ་རྗེ་སེམས་སོགས་སེམས་
རྣམས་ནི། །རྡོ་རྗེ་ལས་རྣམས་བྱེད་པའོ། །བགྱིས་བྱས་གསོད་པར་གཉིས་ཀ་ཡིན། །ལྕགས་ཀྱུ་འཛིན་པར་གནས་པ་དང་། །མདའ་འཕང་བ་ཡི་ཚུལ་དང་ནི། །ལེགས་སོ་ཞེས་བྱ་སྙིང་གར་བཞག །དབང་བསྐུར་བ་ནི་རྡོ་རྗེ་གཉིས། །སྙིང་གར་ཉི་མ་བསྟན་པར་བྱ། །གཡོན་པ་ལ་ནི་གྲུ་མོ་གཟུགས། །དེ་བཞིན་ཁ་ཕྱོགས་བསྐོར་བར་བྱ། །གཡས་པ་ཡི་ནི་གཡོན་པར་དབྱེ། །སྙིང་གར་གཡོན་པར་རལ་གྲི་མདུང་། །མགལ་མེའི་འཁོར་ལོ་བསྐོར་བ་ཡིན། །རྡོ་རྗེ་གཉིས་པ་ཁ་ནས་དབྱིངས། །རྡོ་རྗེ་གར་བསྐོར་སྒྲོལ་བ་དང་། །ཐལ་མོ་འགྲམ་པ་སྤྱི་བོར་བཞག །གོ་ཆ་མཐེའུ་ཆུང་མཆེ་བའོ། །རིན་ཆེན་མྱུ་གུ་རལ་གྲི་འཛིན། །པདྨ་དཀར་པོ་རྡོ་རྗེ་འཛིན། །ཀླུ་ཤིང་ཆོས་ཀྱི་འཁོར་ལོ་འཛིན། །རིན་ཆེན་ཉི་མ་ཨུཏྤལ་འཛིན། །ཁུ་ཚུར་གཉིས་ནི་མནན་པའོ། །རྡོ་རྗེ་འགྱིངས་པའི་ཚུལ་གྱི་ནི། །བསམ་པ་གཡོས་པས་འདུད་པར་བྱ། །ཕྲེང་བ་བཅིང་དང་ཁ་ནས་དབྱུང་། །རྡོ་རྗེ་གར་གྱིས་བསྐོར་བ་ཡིན། །རྡོ་རྗེ་ཁུ་ཚུར་ཚུལ་གྱིས་ནི། །བདུག་པ་ལ་སོགས་དེ་བཞིན་གཞན། །སངས་རྒྱས་ཀུན་ལ་མཆོད་པ་ཡིན། །ཕྱག་རྒྱའི་མཆོད་པ་བྱེད་པའོ། །མཛུབ་མོ་ལྕགས་ཀྱུ་བཅིངས་པ་ནི། །མཐེ་ཆུང་ལས་ཏེ་ལྕགས་ཀྱུ་ཆེ། །མཁྲིག་མ་མདུད་ནས་མཛུབ་གཉིས་མདུད། །རྒྱབ་གཉིས་དང་ནི་བརྐྱང་སྟེ་མནན། །དེ་ནས་འདི་རྣམས་བསྒྲུབ་པར་བཤད། །རྡོ་རྗེ་ལས་བྱེད་མཉམ་པའོ། །རྡོ་རྗེ་ཀུན་གྱི་རྡོ་རྗེ་ནི། །རང་གི་སྙིང་ལ་གོམས་པར་བྱའོ། །ལྷ་མོ་བཞི་ཡི་ལས་ཀྱི་རྒྱ། །དེ་ནས་བརྟུལ་ཞུགས་བསམ་བྱ་བ། །སྒེག་ལ་སོགས་པའི་རོ་ལྡན་པས། །སྔགས་དང་ཕྱག་རྒྱའི་མཆོག་འདི་ཡིས། །བདག་ཉིད་ལ་ནི་མཆོད་པར་བསམ། །རྡོ་རྗེའི་ཐལ་མོ་མཉམ་བཞག་སྟེ། །རྡོ་རྗེ་བཅིང་བ་བསྡམ་པར་བྱ། །དེ་ལ་དགའ་བྱེད་དབང་བསྐྱེད་པའི། །མདའ་ཡི་ཚུལ་དུ་གཟུང་བར་བྱ། །སྙིང་གར་འབིགས་པའི་སྦྱོར་བ་ཡིས། །དེ་ཡི་ལས་རྣམས་ཐམས་ཅད་བྱེད། །བདེ་གཤེགས་མྱ་ངན་འདས་ཀྱང་རུང་། །བདུད་རྣམས་ཐམས་ཅད་འབིགས་པར་བྱེད། །བཅིང་བ་དེ་ཉིད་བཅིངས་བྱས་ཏེ། །རྣལ་འབྱོར་
སྟོང་དེ་གཟུང་བར་བྱ། །ཆུང་ངུ་ཤིན་ཏུ་བརྐྱང་བྱས་ཏེ། །དེ་བཞིན་སྡོམ་པོ་བརྐྱང་བར་བྱ། །དེ་དག་ལས་ཀྱི་ཕྱག་རྒྱ་སྟེ། །གཡོན་དུ་འགྱིངས་པས་གར་རྣམས་བྱ། །རྡོ་རྗེ་ཁུ་ཚུར་མཆན་ཁུང་གཉིས། །གཡོན་དུ་འགྱིངས་པས་གཞག་པར་བྱ། །དེ་དག་ལས་ཀྱི་ཕྱག་རྒྱ་སྟེ། །ལས་རྣམས་ཕྱག་རྒྱ་ཤེས་པའོ། །དེ་ནས་དེ་བཞིན་གཤེགས་རྣམས་ཀྱིས། །དམ་ཚིག་ཕྱག་རྒྱ་ཐམས་ཅད་གཞུག །རྡོ་རྗེ་དམ་ཚིག་ཕྱག་རྒྱ་ནི། །ཐལ་མོ་དམ་དུ་སྦྱར་བ་ལས། །སོར་མོ་ཐམས་ཅད་བསྣོལ་བ་ནི། །རྡོ་རྗེ་ཐལ་མོར་བཀའ་སྩལ་ཏེ། །རབ་ཏུ་བསྡམ་ཕྱིར་རྡོ་རྗེ་བསྡམས། །དམ་ཚིག་ཕྱག་རྒྱ་ཐམས་ཅད་ནི། །རྡོ་རྗེ་བསྡམས་ལས་བྱུང་བའོ། །དེ་དག་བསྡམས་པ་རྡོ་རྗེ་ནི། །བསྡམས་པ་བླ་མེད་བཤད་པར་བྱ། །རྡོ་རྗེ་བསྡམས་པ་དམ་བྱས་ལ། །གུང་མོ་མྱུ་གུ་ལྟང་མཉམ་བསྒྲེང་། །གུང་མོ་ནང་དུ་གཤིབས་པ་ནི། །སངས་རྒྱས་གཉིས་པ་ཡིན་པར་བཤད། །གུང་མོ་རིན་ཆེན་འདྲ་བ་དང་། །གུང་མོ་པདྨ་འདྲ་བར་དགུག །དེ་བཞིན་མཛུབ་མོ་དགུག་པའོ། །སངས་རྒྱས་ལྔ་ཡི་ཕྱག་རྒྱ་ཡིན། །དེ་ནས་དེ་བཞིན་གཤེགས་པ་ཡིས། །དམ་ཚིག་འཛིན་དང་ཕྱག་རྒྱ་རྣམས། །དངོས་གྲུབ་ལས་རྣམས་ཡང་དག་བཤད། །ཟླ་བ་ལྟ་བུ་ལག་གཉིས་ཀྱི། །གུང་མོ་སོར་མོ་རབ་སྦྱར་ཏེ། །ཐ་མའི་སོར་མོ་ངོས་མི་སྤྲད། །རྡོ་རྗེ་སེམས་དཔའི་རྡོ་རྗེའོ། །མཛུབ་མོ་ལྕགས་ཀྱུ་མཛུབ་མོ་སྦྱར། །ལེགས་སོ་སྦྱིན་པ་འདྲ་བ་ནི། །རྡོ་རྗེ་སེམས་དཔའ་བཞི་པོ་ཡིན། །དངོས་གྲུབ་ཕྱག་རྒྱ་མང་པོའོ། །མཐེ་བོང་གཤིབས་ལ་མཛུབ་གཉིས་བཅག །རྩེ་སྤྲད་རིན་ཆེན་རྡོ་རྗེ་ཡིན། །དེ་ཉིད་གུང་མོ་སྲིན་ལག་དང་། །མཐེ་ཆུང་རྣམས་ནི་བསྣོལ་བརྐྱང་བའོ། །དེ་ལ་སྲིན་ལག་མཐེ་ཆུང་གཉིས། །མཉམ་པར་གཤིབས་པ་རྒྱལ་མཚན་ནོ། །དེ་ཉིད་ལས་ནི་བསྐོར་ནས་ཀྱང་། །དེ་ཡི་ཁ་ཕྱོགས་བཞད་པའོ། །མཐེ་བོང་གཉིས་ཀར་མཉམ་པར་གཞིབས། །མཛུབ་མོ་གཉིས་ཀ་དགུག་པ་དང་། །གུང་མོ་བསྒྲེངས་པའི་རྩེ་མོ་དགུག །དེ་ཉིད་རྡོ་རྗེ་རལ་གྲིའོ། །དེ་ནས་སྲིན་ལག་མཐེ་ཆུང་གཞིབས། །འཁོར་ལོ་ཡིན་པར་བཤད་པ་ཡིན། །བསྡམས་
པའི་མཐེ་བོང་གཉིས་བཀྲོལ་ལ། །བཀན་ཏེ་ཁ་སྦྱོར་བཞག་པའོ། །མཐེ་བོང་མཐེ་ཆུང་རྩེ་སྤྲད་སྟེ། །ལས་ཀྱི་རྡོ་རྗེ་ཡིན་པར་བཤད། །དེ་ལ་མཛུབ་མོ་གཉིས་གཤིབས་པ། །སྙིང་གར་བརྐྱངས་ཏེ་བཞག་པའོ། །མཛུབ་མོ་རྩེ་བཀུག་མཆེ་བ་ལྟར། །མཐེ་ཆུང་བར་ནི་མི་འབྱར་བྱའོ། །མཐེ་ཆུང་གཉིས་པར་མཐེ་བོང་གཉིས། །མཛུབ་མོ་སྙིང་གར་བཅིངས་པའོ། །སྙིང་གར་མཐེ་བོང་མཉམ་སྟེ་བཞག །རབ་ཏུ་བརྐྱང་ན་ཕྲེང་བའོ། །ཐལ་སྦྱར་རྩེ་མོ་ཁ་ནས་དབྱིངས། །གར་ལས་ཐལ་སྦྱར་སྤྱི་བོར་བཞག །རྡོ་རྗེ་བཅིངས་པ་ཐུར་དུ་བཏང་། །ཐལ་མོ་སྦྱར་བ་གྱེན་དུ་གཏོར། །མཐེ་བོང་མཉམ་སྟེ་རབ་ཏུ་བསྡམས། །རབ་ཏུ་བརྐྱང་ན་བྱུག་པའོ། །མཐེབ་མཛུབ་བཀུག་ལ་གུང་གཉིས་སྦྱོར། །སྦོམ་པོ་མཐེ་ཆུང་སྦྱར་གསུམ་བསྒྲེང་། །ལག་གཉིས་སོར་མོ་པདྨ་བྱ། །གུང་གཉིས་རྩེ་སྤྲད་རྩེ་ལྔར་བྱ། །གཡས་པ་བསྒྲེངས་པ་ཀླུ་ཤིང་འདྲ། །ཐལ་སྦྱར་འཁོར་ལོ་བྱ་བ་དང་། །ལག་གཉིས་པདྨ་ཁ་བྱེ་འདྲ། །ཨུཏྤལ་གྱེན་ལ་ཁ་གདེངས་བྱ། །མཛུབ་མོ་གཅིག་པོ་བཀུག་པ་དང་། །མཐེ་བོང་གཉིས་ནི་མདུད་པར་འདོར། །མཐེ་བོང་གཉིས་པོ་མདུད་པར་བཅིངས། །རྡོ་རྗེ་བཅིངས་པ་མཛུབ་མོ་བསྡམས། །ཡང་ན་ལྷ་རྣམས་སོ་སོའི་ཚུལ། །བཅིངས་ཤིང་མཁའ་ལ་དགྲོལ་བར་བྱ། །ལས་དང་ཐུན་མོང་ཉིད་དུ་བཤད། །ལུས་དང་ངག་སེམས་རྡོ་རྗེ་ཡི། །སོར་བསྣོལ་བསྡམས་པ་དམ་ཚིག་སྟེ། །སེམས་ཀྱི་ཤེས་པ་ལྡན་པ་ལས། །གཉིས་ཕྱེ་ལས་ཀྱི་ཕྱག་རྒྱ་ཡིན། །ནང་གི་ལྷ་མོའི་ཕྱག་རྒྱ་རྣམས། །གར་གྱི་ཚོགས་ཀྱི་མཆོད་པ་དང་། །་ལས་དང་དམ་ཚིག་མཚམས་མཚམས་བྱ། །སྒོ་བཞི་སོ་སོའི་ལས་དང་ནི། །དམ་ཚིག་ཕྱག་རྒྱ་ལ་སོགས་པ། །ལྷ་རྣམས་སྤྱན་དྲང་དུས་ན་བྱ། །དམ་ཚིག་ཕྱག་རྒྱ་ཤེས་པའོ། །དེ་ནས་བཅོམ་ལྡན་འདས་ཞེ་སྡང་རྡོ་རྗེ་གསལ་བཀྲའི་དཀྱིལ་འཁོར་རྫོགས་པར་གདོན་པ་འདི། འགྲོ་བའི་ཆེད་དུ་བརྗོད་དེ་སྐུ་གསུང་ཐུགས་ལས་བྱུང་ངོ་། །ཅི་འདོད་ཁྲུས་བྱས་སྣ་ཚོགས་གོས་གྱོན་ནས། །ཚོམ་བུའི་གྲལ་བཤམས་ལོག་འདྲེན་མཚམས་བཅད་དང་། །བརྡའ་སྒོ་དབྱེ་དང་
རྒྱན་ཆས་མངའ་གསོལ་དང་། །རྒྱུ་འཇུག་ཕྲིན་གདགས་ལན་སྩལ་ཏིང་འཛིན་བསྒོམ། །སྤྱན་དྲང་ལས་ལ་བཞུགས་གསོལ་དམ་ཚིག་བསྟན། །ཕྱག་རྒྱ་ལྷ་མོ་གར་ཚོགས་གསོད་པ་དང་། །རྣམ་པ་བཅུ་དྲུག་རྩིས་མགོར་ཤེས་བྱས་ནས། །མ་འོངས་རྣལ་འབྱོར་ཕན་ཕྱིར་གསལ་བཤད་ན། །དེ་ནས་ཅི་འདོད་ཁྲུས་བྱས་ཏེ། །དྲི་ཞིམ་རྒྱན་གྱིས་བཀླུབས་པ་ཡི། །སྣ་ཚོགས་གོས་ནི་བགོ་བྱ་སྟེ། །དྲི་ཞིམ་ཕྲེང་བ་གདགས་པར་བྱ། །ཨ་མྲྀ་ཏ་ལྔས་ཁྲུས་བྱས་ནས། །ལས་བཞིའི་རྒྱན་དང་ཆ་ལུགས་གོས། །ཐམས་ཅད་མཛེས་པར་སྣང་བའོ། །དགེ་སྐོས་གྲལ་རྣམས་བཤམ་པར་བྱ། །ལྔ་དང་ལྔ་ཡི་སྦྱོར་བ་ཡིས། །ཚོམ་བུ་ལྔ་ཡི་ལྷ་བཀོད་ལ། །ཁྲོ་བོ་བཅུ་དང་ཁྲོ་མོ་བཅུ། །འཁོར་ལོའི་ཚུལ་དུ་གནས་པར་བསྒོམ། །དེ་བཞིན་རིགས་དང་རྡོ་རྗེའི་རིགས། །པདྨའི་རིགས་ནི་སྐུ་གསུང་ཐུགས། །ཁྲོ་བོའི་ཚོགས་དང་ལྡན་པ་ཡིས། །ཚོམ་བུ་གསུམ་པའི་ལྷ་རྣམས་བསྒོམ། །རིགས་ཀྱི་རིགས་ཏེ་རིགས་ཀྱི་གཙོ། །ཐུགས་ཀྱི་ཐུགས་ཏེ་ཐུགས་ཀྱི་མཆོག །ཁྲོ་བོའི་ཚོགས་དང་ལྡན་པ་ཡི། །ཚོམ་བུ་གཅིག་པའི་ལྷ་རྣམས་བསྒོམ། །དམ་པའི་མཆོག་ནི་དམ་པ་ཡི། །ཐིག་ལེ་སྟོང་པ་ཚོམ་བུ་བརྒྱ། །རྣམ་པ་ཀུན་དང་ལྡན་པ་ཡི། །མཆོག་རྣམས་ཀྱི་ནི་དགོད་པར་བྱ། །ཁྲོ་བོ་ཁྲོ་མོའི་ཚོགས་ཆེན་དང་། །ཕོ་ཉ་བཀའ་ཉན་ཕྱག་བརྙན་ཚོགས། །ཅི་བགྱི་ལ་སོགས་ཚོགས་རྣམས་ཀྱི། །དངོས་གྲུབ་ལས་རྣམས་རྫོགས་པར་བྱེད། །བདེ་ཆེན་ལོངས་སྤྱོད་ཆོས་དང་སྤྲུལ། །དཀྱིལ་འཁོར་སྤྲོས་པ་བསྒོམ་པར་བྱ། །གྲུབ་པ་སྔགས་ཀྱི་ཡི་གེ་ལས། །ཚོམ་བུ་སྤྲོས་པ་བསྒོམ་པར་བྱ། །ཁམས་ཀྱི་བདུད་རྩི་ཆེན་པོ་ལས། །ཕྱག་རྒྱ་སྤྲོས་པ་བསྒོམ་པར་བྱ། །སྙིང་པོ་རླུང་གི་དབྱེ་བ་ལས། །རྣམ་གྲངས་སྤྲོས་པ་བསྒོམ་པར་བྱ། །ཚོགས་ཀྱི་འཁོར་ལོ་གྲུབ་པ་རྣམས། །རིགས་དང་སྦྱར་ནས་གྲལ་རྣམས་བཤམས། །ལོག་འདྲེན་མཚམས་བཅད་རྣམ་པ་བརྒྱད། །བཅོལ་དང་བསྲུང་དང་ཕྱག་མཚན་ནམ། །ཚམ་རྔམས་འགྲོས་དང་ཆོས་ཉིད་རང་བཞིན་མཚམས། །ཏིང་འཛིན་མཚམས་དང་
རྣམ་པ་བརྒྱད་ཀྱིས་བསྟན། །བཅོལ་བའི་མཚམས་ནི་ཁྱེད་ལ་རབ་བཤད་དེ། །དེ་ཡི་ཕྱག་རྒྱ་བང་རིམ་འཁོར་བ་ཡི། །དཔལ་དང་ལྡན་པའི་མཎྜལ་བཅུ་བཞི་ལ། །ཟབ་ཅིང་རྒྱ་ཆེ་གཟི་འཕགས་ཕྱོགས་སྐྱོང་བཞི། །ཐུགས་རྗེ་ཐབས་མཁས་ཐུགས་དམ་དཀྱིལ་ཆེན་བཅུ། །ལྷ་ཡི་བཀོད་པ་རིམ་བཞིན་སྤྱན་དྲངས་ཏེ། །ཐུགས་ཀ་ནས་ནི་མཆོད་པ་རིམ་བཞིན་གསོལ། །དེ་ཡི་གཏོར་མའི་བྱེ་བྲག་བསྟན་པ་ནི། །བཟའ་བ་ཅི་འབྱོར་བུ་རམ་ཅན། །སྭ་ཏི་ཀ་དང་ཨུ་ལོ་པའི། །ལག་པན་རྩ་བ་འབྲས་བུ་དང་། །འོ་ཐུག་དང་ནི་འདོད་པ་སྟེ། །དེ་ནི་ཐམས་ཅད་འདོད་ཅེས་བྱ། །དེ་རྣམས་ཉིད་ལ་ཅི་མཉེས་པ། །ཁ་དོག་སྣ་ཚོགས་ཞེས་བྱའོ། །གང་གཞན་ཅུང་ཟད་ལྷག་པ་ནི། །ཁ་དོག་རྣམ་པ་སྣ་ཚོགས་སུ། །དངོས་པོ་དེ་དག་ཉིད་ལ་ནི། །སྣ་རེ་ལས་ཀྱང་མར་བྱས་ལ། །གཞན་དག་ལས་ཀྱང་ཅི་རྙེད་པ། །བསྟན་པ་གཏོར་མ་རྒྱ་ཆེན་ཡིན། །འབྲས་བུ་ལ་ཀ་ལི་ཀ་དང་། །སྲན་ཆལ་ཏིལ་གྱི་པྲི་ཏེ་ཀ །ལག་པན་རྩ་བ་འབྲས་བུ་ལས། །ཅུང་ཟད་བདུན་ལས་ཅུང་ཟད་དང་། །མེ་ཏོག་འབྲས་བུ་ཆུར་བཅས་པ། །འདབ་མར་བཅས་པའི་གཏོར་མ་དེ། །ཕྱི་རོལ་འབྱུང་པོ་ཐམས་ཅད་ལ། །དེ་ནི་འབྱུང་པོ་ཀུན་གྱི་འོ། །མཆོད་པ་སྣ་ལྔ་འདིར་བཤད་པ། །ཉ་ཤ་ཆང་དང་བུ་རམ་ཆང་། །བཟའ་དང་སྲན་མའི་ཁུ་བ་དང་། །དྲི་དང་མེ་ཏོག་ལ་སོགས་ལྡན། །གཏོར་མ་འདི་ནི་ཕྱི་རུ་བཤད། །དེ་ཉིད་རྣམ་གྲོལ་ཕུང་པོ་ལྔ་ཉིད་དུ། །མཆོད་པ་སྣ་ལྔ་ཚུལ་བཞིན་དབུལ་བར་བྱ། །ཏིང་འཛིན་མཐུར་ལྡན་རྣམ་གྲོལ་གཟི་བྱིན་ཅན། །ཤེས་རིག་གྲགས་པ་ཚུལ་ཁྲིམས་འཁོར་གྱིས་བསྐོར། །མྱ་ངན་འདས་པ་བདུད་རྩི་རོ་ཡི་བཅུད། །ཡེ་ཤེས་གོང་ནས་གོང་དུ་ཁྱད་པར་འཕགས། །ལྷན་ཅིག་གཡུལ་ལས་ཤིན་ཏུ་རྒྱལ་བར་བསྔོ། །བདེ་བའི་སྟན་ལ་ལག་ན་རྡོ་རྗེ་ཡི། །བདག་ཉིད་བཅུ་པོ་ཚུལ་དུ་ཕྱུང་ནས་ནི། །ཕྱོགས་ཀྱི་ལྷ་རྣམས་སོ་སོའི་གནས་གནས་སུ། །དབང་ལྡན་ཕྱོགས་ནས་གཏོར་མ་ཚུལ་བཞིན་འབུལ། །དབང་དང་ལྡན་པ་འདྲེན་པའི་ལྷ། །བགེགས་ཀྱི་རྒྱལ་པོ་གདོན་
གྱི་གཙོ། །དབང་བདག་གདོན་གྱི་ཚོགས་བཅས་ལ། །མཆོད་ཅིང་བསྟོད་དེ་ཕྱག་ཀྱང་འཚལ། །དབང་པོ་རྡོ་རྗེ་འཆང་བའི་ལྷ། །ལྷ་ཡི་རྒྱལ་པོ་གདོན་གྱི་བདག །ཤར་ཕྱོགས་གདོན་ཚོགས་བཅས་པ་ལ། །མཆོད་ཅིང་བསྟོད་དེ་ཕྱག་ཀྱང་འཚལ། །མེ་སྟེ་བསྲེག་བྱ་ལེན་པའི་ལྷ། །འབྱུང་པོའི་རྒྱལ་པོ་གདོན་གྱི་བདག །ཤར་ལྷོ་མེ་ལྷའི་ཚོགས་བཅས་ལ། །མཆོད་ཅིང་བསྟོད་དེ་ཕྱག་ཀྱང་འཚལ། །གཤིན་རྗེ་བེ་ཅོན་ཐོགས་པའི་ལྷ། །ལྷ་ཡི་རྒྱལ་པོ་གདོན་གྱི་བདག །ལྷོ་ཕྱོགས་གཤིན་རྗེའི་ཚོགས་བཅས་ལ། །མཆོད་ཅིང་བསྟོད་དེ་ཕྱག་ཀྱང་འཚལ། །བདེན་དང་བྲལ་བ་ལེགས་ལྡན་ལྷ། །སྲིན་པོའི་རྒྱལ་པོ་གདོན་གྱི་བདག །བདེན་བྲལ་ཕྱོགས་ཀྱི་གདོན་བཅས་ལ། །མཆོད་ཅིང་བསྟོད་དེ་ཕྱག་ཀྱང་འཚལ། །ཞགས་པ་ཐོགས་པ་ཆུ་ཡི་ལྷ། །ཡང་དག་བསྲུང་བ་གདོན་གྱི་བདག །ནུབ་ཕྱོགས་ཀླུ་ཡི་གདོན་བཅས་ལ། །མཆོད་ཅིང་བསྟོད་དེ་ཕྱག་ཀྱང་འཚལ། །རླུང་སྟེ་སྲོག་ཀྱང་འཛིན་པའི་ལྷ། །ཚིག་བསྲུང་གདོན་གྱི་བདག་པོ་སྟེ། །རླུང་ལྷ་འཁོར་གྱི་གདོན་བཅས་ལ། །མཆོད་ཅིང་བསྟོད་དེ་ཕྱག་ཀྱང་འཚལ། །གནོད་སྦྱིན་ལག་ན་དབྱུག་ཏོ་ཐོགས། །ནོར་སྲུང་གདོན་གྱི་བདག་པོ་སྟེ། །བྱང་ཕྱོགས་གདོན་གྱི་ཚོགས་བཅས་ལ། །མཆོད་ཅིང་བསྟོད་དེ་ཕྱག་ཀྱང་འཚལ། །འོག་གི་ལྷ་སྟེ་ས་ཡི་ཀླུ། །ས་འཛིན་དང་ནི་ལག་ཆེན་དང་། །དམ་ཚིག་ཤེས་པའི་གདོན་བཅས་ལ། །མཆོད་ཅིང་བསྟོད་དེ་ཕྱག་ཀྱང་འཚལ། །སྟེང་གི་ལྷ་མང་ཐམས་ཅད་དང་། །ཉི་མ་ཟླ་བ་གདོན་གྱི་གཙོ། །གཟའ་དང་རྒྱུ་སྐར་བཅས་པ་ལ། །མཆོད་ཅིང་བསྟོད་དེ་ཕྱག་ཀྱང་འཚལ། །ཟབ་ཅིང་རྒྱ་ཆེ་གཟི་འཕགས་པོ། །ཆོས་སྐྱོང་རྒྱལ་པོ་རྣམ་ཐོས་སྲས། །བཙུན་མོ་སྲས་དང་བློན་པོར་བཅས། །མངགས་པའི་ཕོ་ཉ་ཇི་སྙེད་རྣམས། །འདིར་གཤེགས་མཆོད་པ་དམ་པ་བཞེས། །གཞན་ཡང་དེ་ཡི་ཚུལ་མཆོག་ཏུ། །ཆོས་སྐྱོང་རྒྱལ་པོ་ཡུལ་འཁོར་སྲུང་། །ཆོས་སྐྱོང་རྒྱལ་པོ་འཕགས་སྐྱེས་པོ། །ཆོས་སྐྱོང་རྒྱལ་པོ་སྤྱན་མི་བཟང་། །
ཨོཾ་ཨི། ཨོཾ་ཨི། ཨོཾ་ཨ། ཨོཾ་ཡ། ཨོཾ་ར། ཨོཾ་བ། ཨོཾ་ཡཾ། ཨོཾ་ཀུ། ཨོཾ་བྲ། ཨོཾ་ཨཱ། ཨོཾ་བཻ། ཨོཾ་དྷྲྀ། ཨོཾ་བི། ཨོཾ་ཀྵ། སྒྲ་དང་ལྡན་པའི་སྙིང་པོ་བརྗོད། །ཡུལ་འཁོར་སྲུང་བའི་ཞགས་པའི་རྒྱ། །མཐེའུ་ཆུང་གཉིས་ནི་ཞགས་པའི་མིག །འཕགས་སྐྱེས་པོ་ཡི་བེ་ཅོན་རྒྱ། །ལག་གཤིབས་མཐེབ་བསྒྲེང་མཐེའུ་ཆུང་ཞགས། །མིག་མི་བཟང་ནི་རྡོ་རྗེའི་རྒྱ། །མཛུབ་མོ་གཉིས་ནི་རྩེ་མོར་བྱ། །རྣམ་ཐོས་སྲས་ནི་དབྱུག་ཏོའི་རྒྱ། །མཐེ་བོང་གཉིས་ནི་གཤིབས་ཏེ་བསྒྲེང་། །བརྒྱ་བྱིན་གྱི་ནི་རྡོ་རྗེ་གདེངས། །གཡས་ཀྱི་རྩེ་གསུམ་ཕྱག་རྒྱ་གདེངས། །མེ་ལྷའི་ཕྱག་རྒྱ་ཞགས་ཐབས་ཡིན། །གཡས་ཀྱང་མཛུབ་བཀུག་གུང་ཚིགས་གསུམ་ལ་བཏང་། །སྨྲ་འདོད་དང་ནི་མེ་འབར་ལྟ་བུར་བྱ། །གཤིན་རྗེའི་བེ་ཅོན་ཕྱག་རྒྱ་སྟེ། །ལག་བསྣོལ་སྲིན་ལག་གཤིབས་ཏེ་བསྒྲེང་། །བདེན་བྲལ་རལ་གྲིའི་ཕྱག་རྒྱ་སྟེ། །གཡས་པ་ཁུ་ཚུར་གུང་མཛུབ་རལ་གྲིའི་རྒྱ། །གཡོན་པས་སྟ་ཟུར་ཤུབས་སུ་བཟུང་། །ཆུ་ལྷ་ཞགས་པའི་ཕྱག་རྒྱ་སྟེ། །ལག་གཡས་མཐེའུ་ཆུང་ཞགས་པའི་མིག །རླུང་ལྷའི་བ་དན་ཕྱག་རྒྱ་སྟེ། །གཡོན་པ་གུང་བསྒྲེང་མཛུབ་མོ་དགུག །ཀུ་བེ་ར་ཡི་དབྱུག་ཏོ་ནི། །བཅིངས་ལ་ནང་བཟློག་མཐེ་ཆུང་བརྐྱང་། །སྲིན་ལག་གཉིས་བརྐྱང་རྒྱབ་ཏུ་བཞག །དབང་ལྡན་རྩེ་གསུམ་ཕྱག་རྒྱ་སྟེ། །མཐེ་བོང་སྲིན་ལག་མིག་ཏུ་བྱ། །མཐེའུ་ཆུང་མིག་འབྲས་སོ་སོར་དྲང་། །གུང་མོ་རྩེ་སྤྲད་མཛུབ་མོ་རྩེ་གསུམ་གདེངས། །འོག་གི་པདྨའི་ཕྱག་རྒྱ་སྟེ། །ལག་གཉིས་པདྨ་ལྟ་བུར་བྱ། །སྟེང་གི་མེ་ཏོག་ཕྱག་རྒྱ་སྟེ། །ཁོང་སྟོང་མཐེབ་གཤིབས་སྤྱི་བོར་བསྒྲེང་། །ལྕགས་ཀྱུ་དྲངས་ནས་སླར་བསྐྱོད་པ། །སྤྱན་དྲངས་གཤེགས་སུ་གསོལ་བ་ནི། །ཨཱ་གཙྪ་དང་ཨཱ་གཙྪའོ། །རྒྱལ་ཆེན་ཕྱོགས་སྐྱོང་སོ་སོའི་འཁོར་བཟློག་ཅིང་། །ཕྱོགས་དང་ཕྱོགས་མཚམས་ཐམས་ཅད་བསྲུང་བ་དང་། །དམ་བཅས་ཞལ་འཆེས་ཁས་བླངས་ལྷ་དག་སྟེ། །བརྟན་པར་བརྗོད་ལ་ཚུལ་བཞིན་བསྲུང་དུ་གསོལ། །བསྟོད་དང་ཕྱག་རྒྱ་དྲག་ཏུ་བསྟན་པས་གཏུགས། །ཕྱག་རྒྱ་ལག་གཉིས་ཐལ་མོ་སྦྱར་བྱས་ལ། །ཨོཾ་སྭ་བྷཱ་བ་བི་ཤུཌྜྷཿསརྦ་དྷརྨཱ་སྭ་བྷཱ་
ཝ་ཤུདྷོ྅་ཧཾ། ཞེས་བརྗོད་དོ། །ཆོས་ཀྱི་དབྱིངས་སུ་བསྒོམ་ཞིང་སྦྱོང་། །རིག་སྔགས་རྒྱལ་པོ་སྟོབས་བཟང་ནམ་མཁའི་མཛོད་འདི་བཟླས། །ན་མཿསརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་བྷྱེཿསརྦ་ཐཱ་ཁཾ་ཨུངྒ་ཏེ། སྥ་ར་ཨི་མཾ་ག་ག་ན་ཁཾ་སྭཱ་ཧཱ། ལག་པས་སྤྱི་བོར་སྦྱར་ནས་པདྨ་ཁ་བྱེ་བ། །ཇི་ལྟར་ཐོགས་མེད་བསམ་པ་བཞིན་དུ་བྱུང་སྟེ་སྤེལ། །གཞན་ཡང་འཕགས་པ་རྒྱལ་ཆེན་ཤུགས་ལྡན་འོད་ཀྱི་ནི། །སྔགས་ཀྱི་མདོ་འདིས་ཀྱང་ནི་བྱིན་གྱིས་བརླབ་པར་བྱ། །ལག་པ་གཡས་པའི་ཁ་ཚུར་བཅངས་ལ་མཛུབ་མོ་བསྒྲེང་བ་སྟེ། །ན་མཿསརྦ་ཏ་ཐཱ་ག་ཏ་ཨ་ཝ་ལོ་ཀི་ཏེ། ཨོཾ་སཾ་བྷ་ར་སཾ་བྷ་ར་ཧཱུཾ། ཞེས་བརྗོད་པས་ནི་ཐ་ན་ཆུང་ན་ཡི་དྭགས་ཡན་ཆད་ལ། །ཡུལ་ཆེན་མ་ག་དྷའི་དྲེ་ཆེན་བརྒྱ་བརྒྱ་ལ། །ཕམ་རྒྱལ་མེད་པར་ཚུལ་བཞིན་སྤྱོད་པའི་དབང་ཐོབ་འགྱུར། །འཕགས་པ་བདུད་རྩི་ཐལ་སྦྱོར་སྔགས་འདིས་བྱིན་བརླབས་ཏེ། །ལག་པ་གཡས་པའི་མཐེ་བོང་མཐེའུས་མནན་བྱས་ཏེ། །སོར་མོ་ལྷག་མ་རྣམས་ནི་རྩེ་གསུམ་བརྐྱང་བྱས་ནས། །ཨོཾ་ཨ་མྲྀ་ཏ་ཧཱུྃ་ཞེས་བརྗོད་ཐོབ་པས་ཡིད་བཞིན་འབྱུང་ཞིང་དག་པར་འགྱུར་བར་བསམ། །གཞན་ཡང་ཡེ་ཤེས་སྐར་མདའི་སྔགས་དང་ཕྱག་རྒྱ་འདིས་གཏུགས་ཏེ། །ལག་པ་གཡོན་པའི་ཐལ་མོས་གཏོར་མར་རབ་གཏུགས་ལ། །ཨོཾ་ཛྙཱ་ན་ཨ་ཝ་ལོ་ཀི་ཏེ། ན་མཿས་མནྟ་སྥ་ར་ཎ་ར་སྨི་བྷ་བ་ས་མ་ཡ་མ་ཧཱ་མ་ཎི་དུ་རུ་དུ་རུ་ཧྲྀ་ད་ཡ་ཛྭ་ལ་ནི་ཧཱུཾ། འདིས་ཀྱང་སོ་སོར་ཐོབ་པར་བྱ་སྟེ་བརྣན་པར་བྱའོ། །ཕྱག་རྒྱ་རྣམ་བཞིར་བསྟན་པ་གཏོར་མ་སྤྱིའི་ཆོ་གའོ། །དེས་ནི་གཏོར་མ་ཐམས་ཅད་གཏང་ཞིང་མཚམས་སུ་འགྱུར། །དེ་ནས་བསྲུང་བའི་མཚམས་ནི་གཅད་པར་བྱ། །རྩིབས་བཅུ་རིམ་པ་བཅུ་སེར་བའི། །ཁྲོ་བོ་བཅུ་དག་ཕྱུང་ནས་ནི། །ཧཱུཾ་ལས་བསྐྱེད་པའི་ཉི་མའི་སྟེང་། །ཕྱོགས་བཅུའི་དཀྱིལ་འཁོར་ཕྱོགས་རྣམས་སུ། །རིམ་པ་བཞིན་དུ་གདབ་པར་བྱ། །དེ་བཏབ་ནས་ཀྱང་ཕྱོགས་བཅུ་ཡི། །ཕུར་པའི་ཕྱོགས་ནས་ཆར་ཆེན་འབེབས། །འཇིགས་སུ་རུང་བའི་འབྲུག་སྒྲ་སྒྲོགས། །དྲི་ཟའི་ཕྱོགས་ནས་གློ་བུར་བ། །མཚམས་ཀྱི་སྣང་བ་ནམ་ནངས་བཞིན། །རཀ་ཤའི་
ཕྱོགས་ནས་འོངས་པ་ནི། །འཆི་བདག་གཟུགས་ཅན་འཇིགས་འཇིགས་ལྟར། །རལ་གྲི་ཐོགས་ཤིང་སྒྲ་ཆེན་འབྱིན། །སྣ་ཆེན་མོ་ལ་མི་ཐོད་དུ། །མི་ཡི་ཁྲག་ནི་འཐུང་བྱེད་པ། །མགོ་སྐྲ་གྱེན་དུ་བརྫེས་ཤིང་འབར། །སྐྱིན་ཐང་ཆར་བཞིན་འབབ་པ་ཡིས། །སྒྲུབ་པའི་ལས་རྣམས་འཇིག་པར་བྱེད། །འབར་བྱ་ཕྱོགས་ནས་སེམས་ཅན་མ། །འཇིགས་པའི་གཟུགས་ཅན་ཐ་དད་པའོ། །པ་ནིའི་ཕྱོགས་ནས་ལྟོ་འཕྱེའི་བདག །སྤྲིན་དང་བཅས་པའི་འབྲུག་སྒྲ་སྒྲོགས། །སྲོག་འཛིན་ཕྱོགས་ནས་འཚུབ་མ་འབྱུང་། །ཡཀྵ་ཕོ་མོས་བྱང་ཕྱོགས་ནས། །དབང་ལྡན་ཕྱོགས་ནས་ཚོགས་ཀྱི་གཟུགས། །སྟེང་ནས་མཐུ་ཆེན་ལྷ་རྣམས་འབྱུང་། །འོག་ནས་ས་འགས་གཡོ་བར་བྱེད། །སྒྲུབ་པ་ཆེན་པོ་སྒྲུབ་ཆེན་ལ། །འདི་ལ་སོགས་པ་བགེགས་རྣམས་ནི། །ནམ་གྱི་ཕྱེད་ན་འབྱུང་བར་འགྱུར། །ཕྱོགས་བཞི་མཚམས་བརྒྱད་བླ་ས་འོག །ཁྲོ་བོའི་རྒྱལ་པོས་བདུད་རྗེ་འཇོམས། །ཡ་མཚན་ཆེ་ལ་ཕྱག་འཚལ་ལོ། །ཤར་ཕྱོགས་འབྱུང་པོ་ཐབས་ཀྱིས་འདུལ། །ལྷོ་ཕྱོགས་གཤིན་རྗེ་ཞབས་ཀྱིས་གནོན། །ནུབ་ཕྱོགས་ཀླུ་ཡི་གདོན་རྣམས་འཇོམས། །བྱང་ཕྱོགས་གནོད་སྦྱིན་ཀུན་གྱི་བླ། །མཚམས་ཀྱི་ཁྲོ་བོ་ཆེན་པོ་ཡིས། །མཚམས་ཀྱི་བགེགས་རྣམས་ཞི་བར་མཛོད། །ཁྲོ་བོའི་རྒྱལ་པོ་བདུད་རྗེ་འཇོམས། །ཡ་མཚན་ཆེ་ལ་ཕྱག་འཚལ་ཏེ། །བདུད་དགྲ་ཐམས་ཅད་ཡོངས་བཅོམ་ནས། །བགེགས་རྣམས་ཐམས་ཅད་ཞི་བར་མཛོད། །ཨོཾ་གྷ་གྷ་གྷཱ་ཏ་ཡ། སརྦ་དུཥྚཱན་ཕཊ། ཀཱི་ལ་ཡ་ཀཱི་ལ་ཡ། སརྦ་པཱ་པཾ་ཕཊ། ཧཱུཾ་ཧཱུཾ་ཧཱུཾ། བཛྲ་ཀཱི་ལ་ཡ། བཛྲ་དྷ་ར་ཨཱ་ཛྙཱ་པ་ཡ་ཏེ། ཀཱ་ཡ་ཝཱ་ཀ་ཙིཏྟ་བཛྲ་ཀཱི་ལ་ཡ་ཧཱུཾ་ཕཊ། ཁྲོ་བོ་སོ་སོའི་མིང་ནས་ཕྱུང་ཞིང་གདབ། །དེ་ཡང་དོན་གསུམ་ལྡན་པར་གདབ་པ་སྟེ། །མི་དགེ་བཅུ་ཡི་བགེགས་རྣམས་མནན་པ་དང་། །ཕྱོགས་སྐྱོང་འཇིག་རྟེན་ཐུགས་རྗེས་བཟུང་བ་དང་། །མཁའ་དབྱིངས་ལྡན་པའི་སྤྲུལ་པས་དོན་བྱའི་ཕྱིར། །དེ་ལྟར་རྟོགས་ལྡན་ཉེས་པ་གཏིང་ནས་མེད། །དེ་ནས་ལྟ་བའི་མཚམས་ནི་རབ་བཤད་བྱ། །ཞི་གནས་ལྷག་མཐོང་ཉི་ཟླའི་སྤྱན་ལས་ནི། །ཁྲོ་འགྲོས་ཉི་
གདུགས་ཟེར་འཕྲོ་མཚན་མ་སྲེགས། །འབྱོན་ཚུལ་ཟླ་བའི་བསིལ་བས་ཀུན་ཞི་ནས། །བལྟ་བ་གཉིས་ཀྱི་ཕྱག་རྒྱས་འགྲོས་གཉིས་བཟློག །ཚམ་རྔམས་ཀྱི་ནི་མཚམས་བྱ་བ། །ཁྲོ་བོ་ཁྲོ་མོ་ཐམས་ཅད་ཀུན། །གསལ་ཞིང་འོད་ཟེར་འཕྲོ་བསྒོམས་ནས། །བསྒུལ་བསྐྱོད་ཐམས་ཅད་ཕྱག་རྒྱ་ཡིན། །ཡན་ལག་སྙིང་པོ་རྩེ་གཅིག་དང་། །རྩེ་ལྔ་རྩེ་དགུ་བཅུ་གཅིག་ཏུ། །ལས་རྣམས་སོ་སོར་རབ་ཏུ་བསྒོམ། །ཐབས་དང་ཤེས་རབ་ལྡན་པའི་ཞབས། །རྟག་ཏུ་རྡོ་རྗེ་འབར་བར་འགྱུར། །ཐབས་ཆེན་རེ་རེ་བསྐྱོད་པས་ནི། །པདྨ་ཆགས་མེད་རེ་རེ་འབྱུང་། །རྡོ་རྗེ་པདྨ་དེ་འབྱོར་ནས། །སེམས་ཅན་ཐམས་ཅད་བླ་ན་མེད། །བྱང་ཆུབ་ཞིང་དུ་སྐྱེ་བར་འགྱུར། །རང་བཞིན་དཀྱིལ་འཁོར་ལྷ་རྣམས་ཀྱང་། །ཁྲོ་བོའི་དཀྱིལ་འཁོར་བསྒོམ་བྱ་སྟེ། །དབུ་ཡི་དཀྱིལ་འཁོར་བསྐྱོད་བྱས་ན། །སངས་རྒྱས་དཀྱིལ་འཁོར་ཐམས་ཅད་གཡོ། །ལག་གི་འདུ་བྱེད་བསྐྱོད་བྱས་ན། །རིག་འཛིན་ཞིང་ཁམས་ཐམས་ཅད་གཡོ། །རྐང་པའི་སྟབས་ཆེན་མནན་མཆོངས་པས། །སྡུག་བསྔལ་མི་བཟད་ཐམས་ཅད་དང་། །བདུད་དང་ལོག་འདྲེན་ཐམས་ཅད་མནན། །ཆོས་ཉིད་མཚམས་ནི་དོན་དམ་སྟེ། །རྣམ་པར་རྟོག་པ་བགེགས་ཡིན་ཏེ། །བགེགས་ཀྱང་རང་གི་སེམས་ལས་བྱུང་། །སེམས་ཀྱི་རང་བཞིན་ཡེ་ནས་དག་ཤེས་ན། །གཞན་ན་བགེགས་ཞེས་བྱ་བའི་མིང་ཡང་མེད། །རང་བཞིན་ཀུན་རྫོབ་མཚམས་གཅད་དེ། །རྡོ་རྗེ་ཕུང་པོ་ཡན་ལག་ནི། །རྫོགས་པའི་སངས་རྒྱས་ལྔ་རུ་གྲགས། །སྐྱེ་མཆེད་ཁམས་རྣམས་མང་པོ་ཀུན། །བྱང་ཆུབ་སེམས་དཔའི་དཀྱིལ་འཁོར་ཉིད། །ས་ཆུ་སྤྱན་དང་མཱ་མ་ཀི། །མེ་རླུང་གོས་དཀར་སྒྲོལ་མ་སྟེ། །ནམ་མཁའ་དབྱིངས་ཀྱི་དབང་ཕྱུག་མ། །སྲིད་གསུམ་ཡེ་ནས་སངས་རྒྱས་ཞིང་། །སངས་རྒྱས་མ་ཡིན་བགེགས་མེད་དོ། །གསལ་ལ་མི་འགྱུར་ཏིང་འཛིན་མཚམས། །དེ་ལ་གཞན་གྱིས་འཇིག་པ་མེད། །དེ་ལ་བགེགས་ཀྱིས་མི་ཚུགས་སོ། །འཇིག་ལས་ལྷག་པའི་བགེགས་གཞན་མེད། །བསྟན་
པ་ཙམ་གྱིས་གཞན་ཕམ་མོ། །དེ་ཕྱིར་ཁྱད་འཕགས་ཏིང་འཛིན་བསྒོམ། །ཕྱག་མཚན་མཚམས་ནི་འདི་དག་གསུངས། །སྟེང་ཡང་རྡོ་རྗེའི་བླ་དྲེ་སྟེ། །འོག་ཀྱང་རྡོ་རྗེའི་ས་གཞིའོ། །བར་མཚམས་མེད་པར་རྡོ་རྗེས་གཏམས། །རྡོ་རྗེའི་མཚམས་ལས་མ་འདའ་ཞིག །སྟེང་ཡང་འཁོར་ལོའི་བླ་དྲེ་སྟེ། །འོག་ཀྱང་འཁོར་ལོའི་ས་གཞིའོ། །བར་མཚམས་མེད་པར་འཁོར་ལོས་གཏམས། །འཁོར་ལོའི་མཚམས་ལས་མ་འདའ་ཞིག །སྟེང་ཡང་རལ་གྲིའི་བླ་དྲེ་སྟེ། །འོག་ཀྱང་རལ་གྲིའི་ས་གཞིའོ། །བར་མཚམས་མེད་པར་རལ་གྲིའི་གཏམས། །རལ་གྲིའི་མཚམས་ལས་མ་འདའ་ཞིག །སྟེང་ཡང་རྡོ་རྗེའི་ཐོ་བ་སྟེ། །འོག་ཀྱང་རྡོ་རྗེའི་ཐོ་བའོ། །བར་མཚམས་མེད་པར་ཐོ་བས་གཏམས། །ཐོ་བའི་མཚམས་ལས་མ་འདའ་ཞིག །སྟེང་ཡང་རྒྱ་གྲམ་བླ་དྲེ་སྟེ། །འོག་ཀྱང་རྡོ་རྗེ་རྒྱ་གྲམ་མོ། །བར་མཚམས་མེད་པར་རྒྱ་གྲམ་གཏམས། །རྒྱ་གྲམ་མཚམས་ལས་མ་འདའ་ཞིག །སྟེང་བྲག་རྡོ་རྗེའི་བླ་དྲེ་སྟེ། །འོག་ཀྱང་རྡོ་རྗེའི་ས་གཞི་བྲག །བར་མཚམས་མེད་པར་རྡོ་རྗེའི་བྲག །བྲག་གི་མཚམས་ལས་མ་འདའ་ཞིག །ཨོཾ་བཛྲ་ལརྐ་ཕཊ།བཛྲ་ཛྙཱ་ན་ཙཀྐྲ་ཕཊ། བཛྲ་ཏིཀྵྞ་ཕཊ། བཛྲ་མུངྒ་ར་ཕཊ། བཛྲ་ཀརྨ་སརྦཱ་ཕཊ། བཛྲ་ཤཻ་ལ་ཕཊ། ལག་པ་གཉིས་བསྣོལ་ཁུ་ཚུར་བཅིང་། །གུང་མོ་རྩེ་སྦྱར་མཐའ་གཉིས་བསྒྲེང་། །ཕྱག་རྒྱ་འདི་ནི་མཆོག་ཡིན་ཏེ། །རྡོ་རྗེ་སེམས་དཔའི་རྡོ་རྗེ་ཡིན་པར་བཤད། །གཡོན་པ་ལག་པ་སྦུབ་པ་དང་། །གཡས་པ་བཀན་ནས་ཐོག་ཏུ་བཞག །སོར་མོ་ཕན་ཚུན་གཅུས་ཏེ་བསྣོལ། །མཐེབ་གཉིས་ལོག་སྤྲད་འཁོར་ལོའོ། །གཡོན་པ་ཤུབས་བྱས་དཀུ་ལ་བརྟེན། །གཡས་ཀྱི་མཐེ་བོས་མཐེའུ་ཆུང་མནན། །ལྷག་མ་གསུམ་པོ་རལ་གྲིའི་ཚུལ། །གློག་གི་ཚུལ་དུ་བསྐོར་བར་བྱ། །ལག་པ་ཁུ་ཚུར་གཅིག་ཏུ་བཅིང་། །ཐོ་བའི་ཚུལ་དུ་གཡས་སུ་བསྒྲེང་། །བརྡེག་པའི་ཚུལ་དུ་བསྐོར་ནས་མནན། །འདི་ནི་བེ་ཅོན་ཕྱག་རྒྱའོ། །གཡས་དང་གཡོན་གྱི་ཐལ་མོ་ནི། །རྡོ་རྗེའི་བྲག་གིས་གཏམས་པར་བྱ། །བརྡེག་པའི་ཚུལ་དུ་རབ་ཏུ་བརྡེག །ལོག་འདྲེན་བགེགས་རྣམས་གཞོམ་པའོ། །ལག་པ་ཕན་ཚུན་བསྣོལ་བ་
ལས། །གུང་མོ་ཚིགས་བཅག་ནང་དུ་བརྒྱང་། །ཐ་མ་རྩེ་མོ་ཅན་དུ་བྱ། །རྒྱ་གྲམ་ཕྱག་རྒྱ་དམ་པོའོ། །ལྔ་པོས་མཚམས་ནི་མི་གཡེལ་བརྩོན་འགྲུས་བསྒོམ། །གཉིས་ཀྱི་རྟོགས་པའི་ཡེ་ཤེས་འཕང་བཅད་ལ། །གཅིག་ནི་སྲན་གྱི་མཐུ་དང་ལྡན་པར་བྱ། །དེ་ནས་བར་ཆད་ཐམས་ཅད་བསྲུང་བ་ཞེས་བྱ་འདི་དག་འགྲོ་བའི་དོན་དུ་གསུངས་སོ། །ཐབས་ཀྱི་ཕྱོགས་སུ་ལྟུང་བའི་རྣལ་འབྱོར་པ། །མཚན་བཅས་སྨོན་པས་འཇུག་པས་ལྟུང་བ་དང་། །མཚན་ཉིད་སྣ་ཚོགས་ཉམས་ཀྱིས་ལྟུང་བའོ། །གང་ཟག་དེ་ལ་དུས་བཞིར་བར་ཆད་བཞི། །ལམ་འཇུག་འཇིག་རྟེན་ཆོས་ཀྱིས་བར་ཆད་བྱེད། །གཉེན་དུས་འདྲེལ་པའི་བར་ཆད་བྱུང་བ་ན། །དད་པ་བརྟན་པོའི་སྦྱིན་པ་ཕྲ་མོས་བསྲུང་། །བླ་མ་མཆེད་ལྕམ་གྲོགས་ཀྱི་བར་ཆད་ནི། །ཟང་ཟིང་སྦྱིན་པས་བརྩེ་སེམས་འཕྲེང་བས་བསྲུང་། །ལམ་ཞུགས་ཕྱིར་ལོག་བདུད་ཀྱི་བར་ཆད་བྱེད། །རྫས་ཀྱིས་བསྲུང་བ་བླ་མ་གྲོགས་གཞན་ལ། །རྐྱེན་ལ་ལྟོས་པའི་སྔགས་མདུད་རབ་ཏུ་གདགས། །ཏིང་འཛིན་བསྲུང་བ་དྲ་བ་ར་བ་ནི། །སྤྱི་བོ་སྣ་ཚོགས་རྡོ་རྗེའི་ར་བ་ལས། །རྐང་མཐིལ་རྡོ་རྗེ་ཆེན་པོའི་ས་གཞི་དང་། །རྩིབ་མ་རྡོ་རྗེའི་ར་བར་གནས་པ་དང་། །པགས་པ་རྡོ་རྗེའི་གུར་དུ་ཕུབ་ནས་ནི། །བ་སྤུ་མདའ་ཡི་དྲ་བ་ཆེན་པོ་སྟེ། །སེན་མོ་མེ་རི་རབ་ཏུ་འབར་བའོ། །སྔགས་ཀྱིས་བསྲུང་པ་གནོད་མཛེས་ང་རྒྱལ་བྱེད། །ཨོཾ་སུཾ་བྷ་ནི་སུཾ་བྷ་ཧཱུཾ། གྲྀ་ཧྞ་གྷྲྀ་ཧྞ་ཧཱུཾ།གྲྀ་ཧྞཱ་པ་ཡ་གྲྀ་ཧྞཱ་པ་ཡ་ཧཱུཾ། ཨཱ་ན་ཡ་ཧོཿ། བྷ་ག་ཝཱན་བིདྱཱ་རཱ་ཛཱ་ཡ་ཧཱུཾ་ཕཊ།སེམས་བསྟན་བདུད་སྟོབས་འཕེལ་བའི་བར་ཆད་ལ། །བར་དུ་གཅད་པའི་བདག་དང་བར་གཅོད་བདུན། །བར་ཆད་གསུམ་ཀ་སེམས་དང་སྒྱུ་མར་ཤེས། །རང་བཞིན་མེད་པར་ཤེས་པས་བསྲུང་བ་ཡིན། །སེམས་བརྟན་ཏིང་འཛིན་མ་ཤེས་བར་ཆད་བདུད། །ལྟེ་འོག་ཀྵ་ཡིག་གནད་དུ་བསྣུན་བྱས་ལ། །སྲིན་པོ་རཱུ་ཏྲ་མི་འཆམས་བར་ཆད་འབྱུང་། །ཏིང་འཛིན་ངོ་ཤེས་བསམ་གཏན་གེགས་ཀྱང་སེལ། །བར་ཆད་ངོ་ཤེས་བདུད་དང་སྐྱོན་ཉིད་ཡོན་ཏན་ཤར། །དེ་ནས་བརྡའ་སྒོ་དབྱེ་བ་ནི། །ཀུན་གྱིས་སངས་
རྒྱས་མར་མེ་མཛད། །བརྐྱང་ཕྱག་བྱས་ལ་འདི་སྐད་གསུངས། །ཡེ་ནས་རྣམ་པ་ཀུན་ལྡན་པ། །ལྷ་དང་སློབ་དཔོན་རྡོ་རྗེའི་མཆེད། །ཕྱོགས་མཚམས་ཀུན་ནས་འཁྱིལ་པའི་དཔལ། །གསལ་ལ་བརྟན་པའི་རྣལ་འབྱོར་པ། །མ་བུའི་འདུ་ཤེས་ཉེར་བཞག་སྟེ། །བརྡའ་དང་གར་གྱིས་མཚོན་ནས་ནི། །རྡོ་རྗེ་དབྱིངས་ཀྱི་འཁོར་ལོ་ན། །རྣལ་འབྱོར་སྤྱོད་མཆོག་ཕྱག་བགྱིད་དོ། །དེ་ལྟར་བརྡའ་ཡིས་སྒོ་ཕྱེ་ནས། །ཕྱིན་ཆད་མི་ཚིག་སྨྲ་བཅད་ནས། །བརྡའ་ཚིག་སྨྲ་བར་བྱ་བའོ། །ལས་རྣམས་བརྡའ་ཡིས་ཀུན་མཚོན་བྱའོ། །དེ་ནས་རྒྱན་ཆས་གསོལ་བ་ནི། །སློབ་མ་ཀུན་གྱིས་མེ་ཏོག་གཏོར་ལ་བརྗོད། །ཚོགས་ཀྱི་འཁོར་ལོ་ཆེན་པོ་འདིར་འདུས་ཀུན། །དབང་རྣམས་རིམ་པ་བཞིན་དུ་རྫོགས་པ་དང་། །སོ་སོ་ཉིད་ཀྱིས་མཁྱེན་པའི་ཁྱད་པར་ལས། །བླ་མར་རྩི་བ་རྣམས་ལ་མངའ་གསོལ་ཕྱིར། །གུས་པའི་སྲི་ཞུས་མེ་ཏོག་མངོན་གཏོར་ན། །དེ་བཞིན་མཁྱེན་པ་མཛོད་ཅིག་དགོངས་སུ་གསོལ། །རྡོ་རྗེ་རྒྱལ་པོ་དགྱེས་ཤིང་བཞུགས་སུ་གསོལ། །རང་བཞིན་མཚན་མོའི་དུས་ནི་འདི་ཉིད་དུ། །རྡོ་རྗེ་ཚོགས་མཆོག་དགྱེས་པར་བསྒྲུབ་འཚལ་གྱིས། །རྡོ་རྗེ་རྒྱལ་པོ་ཆེན་པོར་མངའ་གསོལ་བས། །མཁྱེན་པ་གསལ་ཞིང་བྱིན་རླབས་བསྐྱེད་པ་དང་། །བསྒྲུབ་པའི་དཀྱིལ་འཁོར་རྫོགས་པར་གཟུང་དུ་གསོལ། །ཡུམ་ཆེན་ཀུན་ཏུ་བཟང་མོར་མངའ་གསོལ་གྱིས། །གཙོ་བོ་ཡབ་དང་དགོངས་པ་བསྟུན་པ་དང་། །འགྲོ་བ་མི་ཤེས་མ་རིག་མུན་པ་ལ། །འོག་མིན་གནས་མཆོག་དམ་པ་བསྟན་དུ་གསོལ། །དཀྱིལ་འཁོར་སྐོང་བའི་བདག་པོར་མངའ་གསོལ་གྱིས། །ལེགས་ཉེས་ཚར་གཅོད་མཁོན་གཅུགས་སྦྱང་བ་དང་། །འགྲོ་བ་མི་ཤེས་མ་རིག་མུན་པ་ལ། །ལྷ་དང་མི་ཡི་ཆོས་རྣམས་བཤད་དུ་གསོལ། །སྟོན་པ་འཆད་པའི་བདག་པོར་མངའ་གསོལ་གྱིས། །དམ་ཆོས་གསུང་རབ་བདུད་རྩི་མང་པོ་དག །ལྗགས་ཀྱི་དབང་པོའི་སྟེང་དུ་བཀྲམ་ནས་ནི། །ལེགས་པར་འདུས་པའི་ཚོགས་ལ་བཀའ་སྩོལ་ཅིག །འཛིན་གིང་སྐྱེས་བུ་ཆེན་པོར་མངའ་གསོལ་གྱིས། །
ཁམས་གསུམ་འཁོར་བའི་སེམས་ཅན་ཉོན་མོངས་རྣམས། །བྱམས་པ་མཆོག་གི་ཐུགས་རྗེས་བཟུང་ནས་ནི། །མ་ནོར་འདུས་པའི་ཚོགས་སུ་ཁྲིད་ལ་སྤྱོན། །གིང་ཆེན་དཔའ་བོ་ཆེན་པོར་མངའ་གསོལ་གྱིས། །ཁམས་གསུམ་འཁོར་བའི་སེམས་ཅན་ཉོན་མོངས་དེ། །ཐུགས་རྗེ་ཆེན་པོས་བྱིན་གྱིས་བརླབས་ནས་ཀྱང་། །འོག་མིན་གནས་མཆོག་དམ་པར་བསྒྲལ་དུ་གསོལ། །རྫུ་འཕྲུལ་སྤྱན་གྱི་བདག་པོར་མངའ་གསོལ་གྱིས། །རྣལ་འབྱོར་སྤྱི་བགེགས་སྒོས་བགེགས་གང་ལགས་པ། །ཡེ་ཤེས་སྤྱན་གྱིས་ཐམས་ཅད་གཟིགས་ནས་ཀྱང་། །མ་ནོར་མངོན་སུམ་གཏན་ལ་དབབ་ཏུ་གསོལ། །ཕྱི་གིང་སྟོབས་པའི་བདག་པོར་མངའ་གསོལ་གྱིས། །ཕུད་ལ་དམ་ཞིང་གཙང་སྦྲ་ལེགས་པ་དང་། །རྒྱལ་བ་རྒྱ་མཚོའི་མཆེད་ལ་སྟོབས་པ་དང་། །ཁམས་གསུམ་ཡོངས་ཀྱི་ཐོ་ངན་མཛད་དུ་གསོལ། །ཕོ་ཉ་རྐང་མགྱོགས་ཆེན་པོར་མངའ་གསོལ་གྱིས། །ཉིད་ཀྱི་དགོས་ཆེད་དང་དུ་མི་བླང་ཞིང་། །བླ་མ་རྣམས་ཀྱི་བཀའ་བཞིན་བགྱི་བ་དང་། །མཆེད་ལྕམ་ཡོངས་ཀྱི་དགོས་ཆེད་བསྒྲུབ་ཏུ་གསོལ། །མཆེད་དང་ལྕམ་དྲལ་གསན་ཅིང་དགོངས་སུ་གསོལ། །ཛ་གད་གཉིད་ཀྱི་དབང་དུ་མི་གཏང་ཞིང་། །ལྷ་དང་དཀྱིལ་འཁོར་གསལ་བར་བསྒོམ་པ་དང་། །འཛབ་བསྙེན་ཟུར་མ་ཆག་པར་འདྲེན་དུ་གསོལ། །མེ་ཏོག་བོར་ལ་མངའ་གསོལ་ཏེ། །སློབ་དཔོན་གྱིས་ཀྱང་འདི་སྐད་གསུངས། །ང་ནི་ཟ་བྱེད་ཆེན་པོ་རྣམ་པར་འཇིགས་པའོ། །བླ་མའི་བླ་མ་ཆེན་པོ་ཧེ་རུ་ཀ །ཁམས་གསུམ་ཟ་བྱེད་ང་ཡིན་པས། །ཁམས་གསུམ་མ་ལུས་ཡོངས་བསྒྲལ་ལ། །དུག་གསུམ་ཟད་པར་རབ་བྱས་ཏེ། །སྲིད་གསུམ་དབང་དུ་བསྡུས་ནས་ནི། །ཆོས་ཉིད་དམ་ཚིག་ལས་མི་ཉམས། །སྒྲུབ་པའི་དཀྱིལ་འཁོར་གནན་པར་བྱ། །བརྗོད་ནས་གདན་ལ་འདུག་པར་བྱ། །དེ་ནས་རྒྱུད་འཇུག་ཕྲིན་གདགས་པ། །ཀ་ཆོས་མཐུན་པའི་བྱང་ཆུབ་ཆང་དང་སྦྱར། །གསོལ་ཀ་པས་དྲངས་འཕྲིན་ཡང་འདི་སྐད་གསོལ། །ཧོ་ཕྱོགས་བཅུ་མཐའ་ཀླས་སངས་རྒྱས་ཞིང་ཁམས་ན། །རབ་འབྱམས་
རྒྱ་མཚོ་ཀུན་ནས་འདུས་བྱོན་པའི། །རྣལ་འབྱོར་དབང་ཕྱུག་ཆེན་པོར་ལྷུན་གྲུབ་པའི། །མཆེད་དང་ལྕམ་དྲལ་རྒྱལ་བ་རྒྱ་མཚོར་བཅས། །ཐོགས་མེད་མཁྱེན་ཅིང་སྒྲིབ་པ་མི་མངའ་གཟིགས། །ཐུགས་རྗེ་ཆེན་པོའི་ངང་ཅན་ཉིད་གྱུར་ཅིང་། །འགྲོ་མགོན་སྐྱབས་ཆེན་རྩེ་གཅིག་སྟ་གོན་གནས། །དམ་ཚིག་མཆོག་གི་གསང་སྒོར་ཞལ་འཆེས་ལ། །ཐུགས་ཀྱི་དཀྱིལ་འཁོར་འདི་རུ་འདུས་པ་ལས། །མི་རྟོག་མ་ལུས་ཐམས་ཅད་གསན་དགོངས་གསོལ། །དོ་ནུབ་དུས་ཆེན་བྱིན་གྱིས་བརླབས་ནས་འདིར། །ཆོས་ཉིད་ནམ་མཁའི་མཐའ་མཉམ་གཞལ་ཡས་ཁང་། །རྒྱུ་འབྱུང་སྨིན་བྱེད་དཀྱིལ་འཁོར་ཆེན་པོ་རུ། །དགའ་ལྡན་ལྷ་ཡི་དཀྱིལ་འཁོར་བཀོད་པ་ན། །བདག་ཅག་སྐལ་ལྡན་མི་ཡི་ཚོགས་རྣམས་ཀྱིས། །འབྱོར་ལྡན་ཚོགས་ཀྱི་ཡོ་བྱད་འབྱོར་པ་དང་། །འོས་དང་རིགས་པ་རྗེས་མཐུན་རྣམ་བཞི་ཡིས། །དུས་བཞིན་འབྱུང་བའི་ཞལ་ཟས་ཟླ་རྫོགས་སུ། །རྒྱུ་མེད་དད་པ་མོས་པས་འབྱོར་ཚད་བསགས། །བདོག་ཚོད་དྲོད་སྦྱར་སྲིད་པའི་ལོངས་སྤྱོད་རྣམས། །རྒྱལ་ཆོས་མངའ་ཐང་ཁུངས་ཕྱུང་ལྷ་ཡི་ལུགས། །འཇིག་རྟེན་འཁོར་ཡུག་བཅས་ནས་སྲིད་བྲིན་བཀོད། །གཏན་པ་མེད་པའི་མཆོད་སྦྱིན་རྒྱལ་པོ་འདི། །མངའ་ཐང་མཆོད་པའི་རྐྱེན་དུ་གྲངས་མང་བསྔོས། །མཆོད་པ་དངོས་སུ་སྦྱར་བ་ཞོ་ནམ་སྲང་། །གྲངས་འདི་ཙམ་ཞིག་ནམ་མཁའི་སྐར་ལྟར་བཀྲམ། །ས་གཞི་རྩི་ཤིང་བཞིན་ནི་སྐྱེ་ཞིང་འདོད། །རྒྱ་མཚོའི་རྦ་རླབས་ལྟར་ནི་ཁྱབ་ཅིང་འཁྲུགས། །ནམ་མཁའི་སྤྲིན་གཏིབས་ཁུ་རླངས་ཆར་པ་འབབ། །ཆུ་བོའི་རྒྱུན་བཞིན་འབབ་པའི་མཆོད་པ་རྣམས། །དངོས་སུ་འབྱོར་དང་སྣ་ཚོགས་ཡིད་ཀྱིས་སྤྲུལ། །རྒྱལ་བ་རྒྱ་མཚོ་རྣམས་ལ་མཆོད་པ་དང་། །དུས་གསུམ་འཕགས་པའི་ཐུགས་དང་བསྐུལ་བ་དང་། །མཐའ་ཡས་འགྲོ་བའི་སེམས་ཅན་བསྒྲལ་བ་དང་། །ཕྱོགས་བཅུའི་རྣལ་འབྱོར་ཐུགས་དམ་བསྐང་བྱ་ཞིང་། །བྱང་ཆུབ་སེམས་དཔའི་སྤྱོད་པ་རླབས་པོ་ཆེས། །བདག་གཞན་དོན་རྣམས་མཐའ་རུ་དབྱུང་བའི་ཕྱིར། །རྒྱུ་མཆོག་རབ་ཞིའི་ཚུལ་དུ་འབུལ་ཞིང་མཆི། །ཐུགས་
རྗེ་ཆེན་པོས་དགོངས་ནས་བཞེས་སུ་གསོལ། །དེ་ལ་སྐབས་དབྱེ་གནང་བའི་ལན་འདི་སྩལ། །ཚོགས་ཀྱི་ཞལ་ཟས་རྒྱུ་སྦྱོར་ཡོན་བདག་གིས། །དགའ་ལྡན་ལྷ་ཡི་དཀྱིལ་འཁོར་བཀོད་པ་ལ། །སྐལ་ལྡན་མི་ཡི་ཚོགས་པ་རྣམས་ཀྱི་ནི། །འབྱོར་ལྡན་ཡོ་བྱད་ཚོགས་ཀྱི་རྫས་རྣམས་ཀྱང་། །རྒྱུ་མེད་བཀའ་ཡང་དད་པས་རབ་བསོགས་ནས། །མོས་པའི་འབྱོར་པའི་ཚད་ཀྱིས་ཕུལ་བ་རྣམས། །ཕྱོགས་བཅུ་དུས་གསུམ་སངས་རྒྱས་བདེ་གཤེགས་དང་། །རྒྱལ་བ་རྒྱ་མཚོ་རྣམས་ཀྱི་སྤྱན་དུ་བཤམས། །དད་པའི་ཤུགས་དང་ལྡན་པར་འབུལ་ལགས་ན། །ཐུགས་རྗེས་དགོངས་ནས་ཐུགས་དམ་བཞེས་པར་གནང་། །ཨོཾ་ཨཱཿཧཱུཾ་ཨ་ལ་ལ་ཧོ། དེ་ནས་ཏིང་འཛིན་བསྒོམ་པ་རྣམ་གཉིས་ནི། །སྔོན་དུ་དམ་རྫས་བྱིན་གྱིས་བརླབ་པ་དང་། །རང་བཞིན་དཀྱིལ་འཁོར་ཏིང་འཛིན་རང་ལུས་བརླབ། །རྫས་ནི་ཛ་གད་དམ་རྫས་རྣམ་པ་གཉིས། །གསང་བའི་དཀྱིལ་འཁོར་དག་ཏུ་མི་གཞུག་སྐྱོན། །དངོས་གྲུབ་མི་ཐོབ་སྐྱོན་ཡོད་ནན་ཏན་བྱ། །དཀྱིལ་འཁོར་འཁྲུལ་པའི་སྐྱོན་རྣམས་བསལ་བའི་ཕྱིར། །དང་པོར་ཛ་གད་བྱིན་གྱིས་བརླབ་པར་བྱ། །བུམ་པ་བཟང་ངན་གནས་པ་ཡིས། །དེ་ཡི་དབུས་སུ་བསམ་བྱ་བ། །གཟི་བརྗིད་འབར་བའི་དཀྱིལ་འཁོར་རོ། །བསྐལ་པའི་མེ་དཔུང་འབར་བ་ཡི། །ཧཱུཾ་གི་འོད་ཟེར་རེག་པས་ནི། །དྲི་མ་སྤངས་ཤིང་རྣམ་དག་པའི། །རྫས་ནི་ཧཱུཾ་གི་རང་བཞིན་དུ། །སྦྱོར་བ་སྤོས་ནི་གདབ་པར་བྱ། །ཉི་མའི་དཀྱིལ་འཁོར་སྟེང་དུ་ཡང་། །ཁ་དོག་དཀར་པོ་མི་བསྐྱོད་པ། །ས་གནོན་ཕྱག་རྒྱ་གནས་པར་བསྒོམ། །དེར་ནི་དབང་པོ་རྡོ་རྗེ་ཡི། །ཕྱག་རྒྱ་བཅིངས་ནས་བསྟན་པར་བྱ། །དེར་ནི་ཕྱག་རྒྱ་བཅིངས་པ་ལས། །བཅོམ་ལྡན་མ་ནི་དཀར་ཤམ་མདོག །སངས་རྒྱས་ལྔ་ཡིས་དབུ་བརྒྱན་ཅིང་། །རྡོ་རྗེ་ཕྱག་བསྣམས་འབྱུང་བར་འགྱུར། །བཅོམ་ལྡན་འདས་དང་ལྷན་ཅིག་ཏུ། །གཉིས་སུ་མེད་པར་མཉམ་སྦྱོར་ཏེ། །རྗེས་སུ་ཆགས་པའི་ཆགས་མེད་ཀྱིས། །གཉིས་ཀ་ཞི་བར་གྱུར་ནས་སུ། །བྱང་ཆུབ་སེམས་ཀྱི་རང་བཞིན་དུ། །གྱུར་ནས་བུམ་བཟང་ཡོངས་བཀང་བ། །དེ་ཡིས་འབར་བ་ལྟ་བུར་མཐོང་། །
དེ་ནས་ཉི་མའི་དཀྱིལ་འཁོར་སྟེང་། །ཨུཏྤལ་སྔོན་པོའི་མདོག་འདྲ་བའི། །མཱཾ་ནི་འོད་བཅས་རྣམ་པར་བསམ། །དེ་ལས་འོད་ཟེར་རྩེ་རྣམས་སུ། །བཅོམ་ལྡན་མ་ནི་སྔོ་བསངས་མདོག །ཡིད་དུ་འོང་བ་མཛེས་པའི་ཞལ། །གནག་དང་དམར་དང་དཀར་བ་ཡི། །ཞལ་གསུམ་གྱིས་ནི་རྣམ་པར་བརྒྱན། །མི་བསྐྱོད་ཅོད་པན་གནས་བྱས་ལ། །ཕྱག་དྲུག་རྡོ་རྗེ་འཁོར་ལོ་དང་། །ཨུཏྤལ་སྔོན་པོ་ཕྱག་ན་བསྣམས། །གཡོན་པ་འགྱིང་བས་དྲིལ་བུ་དང་། །རིན་ཆེན་རལ་གྲིས་རྣམ་པར་མཛེས། །རྒྱལ་མོ་རྣམ་པར་བྱུང་ནས་ནི། །ཕྱོགས་བཅུའི་ཆུ་ཁམས་བྱིན་གྱིས་བརླབ། །འབར་མ་དེ་ནི་སླར་གཤེགས་ནས། །ཡི་གེ་ས་བོན་བཅས་པར་ནི། །བྱང་ཆུབ་སེམས་བཞིན་ཞུ་བར་འགྱུར། །མཱ་མ་ཀཱི་ནི་རྣམ་པར་བསྒོམ། །མཱ་མ་ཀཱི་ནི་དེ་ཉིད་ཀྱང་། །བྱང་ཆུབ་སེམས་ཀྱི་རང་བཞིན་དུ། །ཤེས་རབ་བརྟུལ་ཞུགས་ཅན་གྱིས་མཆོད། །དེ་ནས་སྦོམ་པོ་དབང་གི་དབུལ། །ཉི་མའི་དཀྱིལ་འཁོར་བསྒོམ་བྱ་སྟེ། །དེར་ནི་མཆོད་བཅས་དང་དམིགས་ནས། །བདག་གི་ལྕེ་རྩེར་ཧཱུཾ་བསྒོམ་བྱ། །དེ་ཡི་སྔགས་ནི་འདི་ཡིན་ནོ། །ཨོཾ་མཱ་མ་ཀི་བཾ་ཀི་རི་ཀི་རི། ཨ་དྷི་ཏིཥྛ་སྭ་མཱཾ། དེ་ནི་བྱིན་གྱིས་རློབ་པ་དང་། །བཏུང་བ་གཉིས་ཀའི་སྔགས་ཤེས་བྱའོ། །དེ་ལ་དམ་རྫས་བྱིན་བརླབ་པ། །དེ་ཡི་ཐབས་ནི་འདི་ལྟར་བྱ། །བན་དྷ་བཅུད་ཡངས་བཟང་བ་ལ། །འཁོར་ཡུག་སྣོད་བཅུད་འཇིག་རྟེན་འདི། །བདུད་རྩིའི་རང་བཞིན་བསྒྲུབ་པའི་ཕྱིར། །ཐམས་ཅད་མཆོད་པའི་རྐྱེན་དུ་བཞེས། །མཆོད་པའི་རྒྱུ་རྐྱེན་འདི་ལ་རྟེན་བཅས་ནས། །འཇིག་རྟེན་ཁམས་མང་ཐམས་ཅད་ན། །སྲིད་པའི་ལོངས་སྤྱོད་འབྱུང་ལྔ་ཡི། །དངོས་ཅན་ཐམས་ཅད་ཁམས་གསུམ་གྱི། །མཆོད་པའི་རྫས་སུ་བྱིན་བརླབ་བོ། །དེ་ཡང་མཆོད་པའི་མཚན་ཉིད་ལྔ། །བྱིན་གྱིས་བརླབ་པའི་ཐབས་གསུམ་གྱིས། །དེ་བཟའ་རྒྱན་ལྔར་སྣང་བར་བྱ། །མཆོད་པའི་རང་བཞིན་མཚན་ཉིད་ས་ཉིད་གནས། །གཟུགས་སུ་འཛིན་པའི་ཕྱག་རྒྱ་ཡིན། །མཆོད་པའི་འབྲས་བུ་གོ་འབྱེད་པ། །འབྱུང་བ་ཆོས་ཉིད་ནམ་མཁའ་ཉིད། །
མཆོད་པ་གསལ་བར་སྟོབ་པ་ཡིས། །འབར་བ་རྫུ་འཕྲུལ་ལྷག་མཐོང་བ། །མཆོད་པ་ཀུན་ཏུ་དགྱེས་པའི་ཤུགས། །ཁྱབ་པར་བྱེད་པ་བསྐྱོད་པའི་རླུང་། །མཆོད་པ་ཐམས་ཅད་མ་ལུས་པར། །རྒྱུད་ཐིམ་ཚིམས་པ་ཞི་གནས་རླན། །དེ་ཡང་ཇི་ལྟ་བུ་ཞེ་ན། །བཟེད་བྱེད་སྣོད་ནི་ཡུམ་ལྔའི་མཁའ། །གཏོར་སྣོད་ཆེན་པོའི་ནང་དུ་ནི། །བཅུད་ཀྱི་འཇིག་རྟེན་མཆོད་རྫས་དང་། །གཟུགས་ཀྱི་ཕུང་པོའི་ལྷ་བཤོས་ནི། །སྤྱན་གཟིགས་སྨན་ལྔས་བསྡུས་པའི་རྐྱེན། །ཚོར་བ་བདེ་སྡུག་གཉིས་ཀ་མིན། །ཉམས་སུ་མྱང་བ་བདུག་སྤོས་དྲི། །འདུ་བྱེད་སྣ་ཚོགས་ཡན་ལག་རྣམས། །འདོད་སྲེད་བྱིན་ལེན་མེ་ཏོག་ཡིན། །འདུ་ཤེས་གསལ་བར་བྱེད་པ་ནི། །མཆོད་པའི་མར་མེ་ཁ་དྲུག་འབར། །རྣམ་ཤེས་ལུང་དུ་མ་བསྟན་པ། །རྐྱེན་ཉེ་བར་བསྐུལ་བའི་བག་ཆགས་ནི། །སོ་སོར་འགྲུབ་པའི་དྲི་ཆུ་ལྔའོ། །དེ་ཡང་ཇི་ལྟར་བྱ་ཞེ་ན། །སྦྱངས་པ་ཧཱུཾ་དང་ལྡན་པ་ནི། །རྟོགས་པར་བྱ་ཕྱིར་ཨཱཿབསྒོམས་ཏེ། །འབར་བ་ཨོཾ་ཞེས་བསྒོམས་བྱས་ལ། །ཡིག་འབྲུ་ཕྱག་མཚན་སྐུ་དང་གསུང་། །འཕྲོ་འདུའི་རིམ་པའང་དེ་བཞིན་ནོ། །མཚན་མ་མ་བྱུང་བར་དུ་བསྒོམ། །དེ་ལ་ཕྱག་རྒྱ་གཉིས་བསྟན་ཏེ། །གཙོ་གཟུངས་ལྔ་ནི་གྲུབ་པར་དམིགས། །དེ་ལ་བདུད་རྩི་ཀུན་འབྱུང་བ། །མུ་ཏིག་དྲི་མེད་ཁུ་འཕང་བཞིན། །དེ་སྟེང་ཧཱ་ལས་རྒྱ་གྲམ་བསྐྱེད། །ཁྲོ་བའི་ས་བོན་ཧྲཱྀཿདང་ལྡན། །དེ་ཡིས་འོད་འབར་སྔགས་པས་བལྟ། །ཧ་ཡ་གྲཱི་བ་ཧུ་ལུ་ཧུ་ལུ་ཧཱུཾ་ཕཊ། བརྒྱ་རྩ་བརྒྱད་ནི་བཟླ་བར་བྱའོ། །ལག་པ་བཀྲ་ཤིས་གསང་མཚན་པས། །པདྨའི་སྣོད་དེ་གནན་པར་བྱ། །ཨོཾ་ཨཱཿཧཱུཾ། བཛྲ་ཨ་མྲྀ་ཏ་ཧཱུཾ་ཐ་ཨ། བརྒྱ་རྩ་བརྒྱད་བཟླས་པར་བྱ། །པདྨ་ཕྱག་མཚན་རྒྱལ་པོའོ། །སྦོམ་པོ་དང་ནི་དབང་གཉིས་ཀྱི། །བསིལ་འོད་ས་བོན་གནས་པ་ལས། །དབུས་སུ་དྲངས་ནས་བཟའ་བ་དང་། །རང་གི་ལྷ་ཡི་སྦྱོར་བ་གསུམ། །ཀཱ་ཡ་ཝཱཀ་ཙིཏྟ་ཨོཾ་ཨཱཿཧཱུཾ། དོགས་པ་མེད་པའི་སེམས་ཀྱིས་ནི། །དེ་བཞིན་གཤེགས་པ་མཉེས་བྱའི་ཕྱིར། །དགའ་བའི་སེམས་ཀྱིས་བཟའ་བར་བྱ། །སངས་
རྒྱས་ཀུན་གྱི་བདག་ཉིད་དེ། །བཅུད་ཀྱིས་ལེན་པའི་གཏེར་གྱུར་ཏེ། །རྡོ་རྗེ་སེམས་དཔའི་ཚེ་དང་གཞོན། །ནད་མེད་པ་དང་བདེ་མཆོག་འགྲུབ། །དེ་ལ་མཚན་མོ་ཞུགས་གྱུར་ནས། །འདོད་པ་བཞིན་དུ་འགྲོ་འོང་ལྡིང་། །རྣལ་འབྱོར་བདེ་མཆོག་རྣམ་པ་ཡིས། །མཆོད་པའི་དམ་རྫས་ཐམས་ཅད་ལ། །སྣ་ཚོགས་བསམ་ཟེར་འགྲམ་པའི་ཁ་རྒྱན་དང་། །ཀུན་ཏུ་ཁྱབ་པ་ཆུ་ཡི་རྒྱན། །ཁེབས་པར་གཏིབས་པ་བར་སྣང་རྒྱན། །རྟག་པར་འབབ་པ་རླུང་གི་རྒྱན། །སྐྱེ་ཞིང་ཐོན་པས་གཞི་ཡི་རྒྱན། །སྣང་བ་ལྔ་པོ་འདི་ཉིད་ནི། །མཚན་ཉིད་ལྔ་ཡིས་མཆོད་པར་བྱ། །རྔ་སྒྲ་ཅང་ཏེའུ་པི་ཝང་དང་། །གླིང་བུ་དུང་དང་ཀར་ཀོ་ཏ། །གཎྜི་ཆོས་རྣམས་སྣ་ཚོགས་དང་། །གླུ་དང་དེའུ་ཚིགས་དང་བཅས། །སྙན་པའི་གླུ་དབྱངས་སྣ་ཚོགས་ཀྱིས། །སྙན་གྱི་མཆོད་པར་བཞེས་སུ་གསོལ། །རྒྱལ་བའི་ཐུགས་དམ་བསྐང་གྱུར་ཅིག །གར་དང་ཕྱག་རྒྱ་སྟངས་སྟབས་དང་། །གཟུགས་དང་དབྱིངས་དང་གནས་པའི་རྟེན། །གདུགས་དང་མཛེས་པའི་ཡིད་འོང་ཞིང་། །ཁ་དོག་གསལ་བ་སྣ་ཚོགས་ཀྱིས། །སྤྱན་གྱི་མཆོད་པར་བཞེས་སུ་གསོལ། །རྒྱལ་བ་རྒྱལ་མཚོའི་ཐུགས་དམ་བསྐང་། །དྲི་དང་སྤོས་དང་བདུག་པ་དང་། །བསྲེགས་དང་བཅོས་དང་སྦྱར་བ་དང་། །རླངས་དང་དུ་བ་སྣ་ཚོགས་ཀྱིས། །ཤངས་ཀྱི་མཆོད་པར་བཞེས་སུ་གསོལ། །དཀྱིལ་འཁོར་ཐུགས་དམ་བསྐང་གྱུར་ཅིག །བཟའ་དང་བཅའ་དང་བཏུང་བ་དང་། །བཤོས་དང་ཞལ་ཟས་སྣ་ཚོགས་པ། །ཁ་དང་མངར་དང་སྐྱུར་བ་དང་། །ཚ་དང་རྩུབ་དང་ལན་ཚྭའི་རོ། །ལྗགས་ཀྱི་མཆོད་པར་བཞེས་སུ་གསོལ། །སྲས་བཅས་འཁོར་གྱི་ཐུགས་དམ་བསྐང་། །ལྷ་དང་མི་ཡི་ན་བཟའ་དང་། །གོས་དང་རྒྱལ་མཚན་ལྷབ་ལྷུབ་དང་། །རིན་ཆེན་མཆོད་པ་དབུ་རྒྱན་དང་། །དཔུང་རྒྱན་དོ་ཤལ་སེ་མོ་དོ། །དར་དཔྱངས་པི་ཏའི་ཤམ་བུ་དང་། །སྙན་ཆ་མགུར་ཆུ་བླ་མེད་དོ། །སྐུ་ཡི་མཆོད་པར་བཞེས་སུ་གསོལ། །དགའ་ལྡན་ལྷ་ཡི་ལོངས་སྤྱོད་དང་། །འབྱོར་ལྡན་མི་ཡི་ལོངས་སྤྱོད་དང་། །འབྱོར་ལྡན་འཕྲུལ་གྱི་ཡོ་བྱད་རྣམས། །དཀྱིལ་འཁོར་ཆེན་པོར་
བཞེས་སུ་གསོལ། །འཕགས་པའི་ཐུགས་དམ་བསྐང་གྱུར་ཅིག །འབྲུ་ཚིག་དོན་དང་མན་ངག་དང་། །གསལ་དང་གོ་འབྱེད་སྙིང་པོའི་རྒྱུད། །དབང་པོ་ཚིམས་བྱེད་རྒྱལ་བའི་བཀའ། །ཕྱག་རྒྱ་ཆེན་པོ་གསུང་ལྡན་པ། །ཆོས་ཀྱི་མཆོད་པར་བཞེས་སུ་གསོལ། །མ་ལུས་ཐུགས་དམ་བསྐང་གྱུར་ཅིག །བསྒོམ་པའི་ཏིང་འཛིན་རྣམ་པ་བཞི། །ཏིང་འཛིན་སྣོད་བཅུད་བདག་གཞན་སྲས། །དང་པོར་སྟོང་པ་བྱང་ཆུབ་སེམས། །གཉིས་པ་སྙིང་རྗེའི་རྣམ་པ་དང་། །གསུམ་པ་རྒྱུ་ལས་བྱུང་བ་ནི། །སྣོད་ཀྱི་གཞལ་ཡས་བཅུད་ཀྱི་ལྟས། །བདག་ཉིད་མངོན་པར་སངས་རྒྱས་པས། །བདག་གི་སྲས་སུ་སངས་རྒྱས་རྣམས། །རང་རིག་བདེ་བའི་ཆ་དང་ནི། །ཆ་ཤས་དུམ་བུའི་ཕྱག་མཚན་དང་། །ཆེན་པོ་ལྔ་ལས་སྐུར་རྫོགས་བྱ། །རིགས་མི་འགྲུབ་ཅིང་ལྷུན་གྲུབ་ཕྱིར། །གསོལ་གདབ་དཀྱིལ་འཁོར་རྫོགས་པར་བྱས། །དབྱིངས་ལས་མ་གཡོས་དབྱིངས་ལས་ས་ལེ་བ། །ཡོངས་ལ་སྙོམས་པས་སྙིང་རྗེ་ཅིར་ཡང་འཆར། །མཁའ་ལྟར་གོ་འབྱེད་སྤྲུལ་པ་འབྱུང་བའི་རྒྱུ། །དང་པོར་སྟོང་པ་བྱང་ཆུབ་སེམས། །གཉིས་པ་ས་བོན་དུ་གྱུར་པ། །གསུམ་པ་ལ་ནི་གཟུགས་སོགས་ཏེ། །བཞི་པ་ལ་ནི་ཡི་གེ་དགོད། །ལྔ་པ་འཁོར་རྣམས་གདོན་པར་བྱ། །སྣ་ཡི་དབུགས་རིངས་འགྲོ་བའམ། །སྙིང་གའི་ས་བོན་འབར་བ་དང་། །བྷ་གར་ལིངྒ་བཞག་པའམ། །དབྱིངས་ལས་ཡེ་ཤེས་ཆུ་བུར་ལྟར། །རྩ་བའི་དཀྱིལ་འཁོར་གཞལ་ཡས་ཁང་། །འབྱུང་བ་ལྔ་དང་ལྡན་པར་བྱ། །གྲུབ་པ་སྔགས་རྣམས་རྩ་ནང་དུ། །གསུང་གི་ཡི་གེ་ཡིན་པར་འགྲུབ། །ལུས་ཁམས་བཅུད་ཀྱི་བདུད་རྩི་ལས། །སྐུར་རྫོགས་སངས་རྒྱས་དཀྱིལ་འཁོར་བསྒོམ། །སྙིང་པོ་རླུང་ལས་ཐུགས་ཀྱི་དགོངས། །རླུང་གི་སྤྲོ་དང་བསྡུ་བ་ཡིས། །རང་ལུས་རྒྱལ་བའི་ཕྱག་རྒྱ་ཡི། །གནས་ལུགས་རང་བཞིན་ཞི་ཁྲོ་དང་། །རང་གནས་ཕུང་པོའི་ཞི་ཁྲོ་དང་། །གདུལ་བྱ་སྤྲུལ་པའི་ཞི་ཁྲོ་དང་། །མཐར་ཕྱིན་འབྲས་བུའི་ཞི་ཁྲོ་ལས། །དཀྱིལ་འཁོར་མ་ལུས་ཐམས་ཅད་འགྲུབ། །རང་བཞིན་དམ་ཚིག་དཀྱིལ་འཁོར་བསྐྱེད། །དེ་ནས་སྤྱན་དྲང་རབ་ཏུ་
བཤད་པར་བྱ། །སྙན་གསན་གསོལ་དང་སྤྱན་ཡང་དྲང་བར་བྱ། །སྙན་གསན་གསོལ་ཕྱིར་སེ་གོལ་གཉིས་ཀྱི་སྒྲས། །ཡབ་ཡུམ་འཕགས་པ་ཐམས་ཅད་སྔགས་ཀྱིས་བསྡུ། །ཨོཾ་སརྦ་ཏ་ཐཱ་ག་ཏ་ས་པ་རི་ཝཱ་ར་བཛྲ་ས་མཱ་ཛ་ཧཱུཾ། ཨོཾ་ཕྱོགས་བཅུའི་འཇིག་རྟེན་རབ་འབྱམས་ན། །རྒྱལ་བ་གང་བཞུགས་འཁོར་དང་བཅས། །བླ་མེད་ལྷ་དང་ལྷ་མོ་དང་། །གྲུབ་པའི་བྱིན་རླབས་བསམ་མི་ཁྱབ། །སེམས་དཔའ་བཅུ་དྲུག་རིགས་ཀྱི་ཡབ། །སེམས་མ་བཅུ་དྲུག་རིགས་ཀྱི་ཡུམ། །སེམས་དཔའ་བརྒྱད་དང་སེམས་མ་བརྒྱད། །དེ་བཞིན་སྤྲུལ་སྐུ་ཐུབ་དྲུག་དང་། །མཐུ་ཆེན་ཁྲོ་བོ་ཁྲོ་མོ་དང་། །ཕོ་ཉ་འཇིག་རྟེན་སྐྱོང་བར་ལྡན། །ཨོཾ་སྔོན་གྱི་ཐུགས་དམ་ཆེན་པོ་ནི། །འཇིག་རྟེན་ཁམས་ནི་མ་ལུས་ཀུན། །རྒྱལ་བའི་ཞིང་དུ་སྦྱོར་བས་ན། །ཕྱག་རྒྱ་ཆེན་པོར་བདག་སྦྱོར་ཅིག །དཔའ་བོ་ཆེན་པོའི་མཐུ་རྣམས་དང་། །ཐུགས་རྗེ་ཆེན་པོའི་བྱིན་རླབས་ཀྱིས། །བདག་ལ་བྱིན་གྱིས་བརླབ་མཛོད་ཅིག །བདག་གི་ལྷག་པའི་བསམ་པ་རྣམས། །འགྲུབ་པར་བྱིན་གྱིས་བརླབ་ཏུ་གསོལ། །ཡོད་མེད་སྟོང་པ་ཤིན་ཏུ་རྣལ་འབྱོར་མཐུ། །ནམ་མཁའ་བཞིན་ལས་དམ་ཚིག་ཉེ་བར་གནས། །བདེ་གཤེགས་བདེ་བར་གཤེགས་པ་བཞེངས་སུ་གསོལ། །རྡོ་རྗེ་སེམས་དཔའ་སྐལ་བཟང་དཔལ་ཁྱོད་བདག །ཕོ་བྲང་གཞལ་ཡས་སྤྲིན་གཏིབས་བཞིན། །རྒྱན་གདུགས་སྣ་ཚོགས་མཛེས་ལྷབ་ལྷུབ། །སྤོས་མཆོག་དམ་པ་ངད་སང་སང་། །རིན་ཆེན་སྣ་ཚོགས་སྒྲ་སིལ་སིལ། །སིལ་སྙན་སྣ་ཚོགས་ཕྱོགས་བཅུར་དྲངས། །ཏཱ་ལའི་སྐྱེ་ཤིང་གསེར་བཙོ་འཁྲིལ། །ཉི་ཟླ་པདྨ་དབུས་ཀྱི་དཀྱིལ་འཁོར་དུ། །ཡང་དག་བཞུགས་ཀྱི་ཕོ་བྲང་ན། །དགེས་སོ་བཅོམ་ལྡན་གཤེགས་སུ་གསོལ། །དབང་ཕྱུག་ཆེན་པོ་ཡབ་ཡུམ་དང་། །བྱང་ཆུབ་རྡོ་རྗེ་ལྕམ་དྲལ་དང་། །མ་མོ་མཁའ་འགྲོའི་ཚོགས་ཆེན་དང་། །ལྷ་དང་ལྡན་པའི་རྣལ་འབྱོར་པ། །ཐུགས་དང་འཐད་པའི་གནས་འདི་རུ། །བྱིན་གྱིས་བརླབ་ཕྱིར་གཤེགས་སུ་གསོལ། །རྡོ་རྗེ་སེམས་དཔའ་མཉེས་མཛོད་ཅིག །དེ་ནས་སྤྱན་དྲང་འདི་སྐད་གསུང་། །རྡོ་རྗེ་སེམས་དཔའ་སངས་རྒྱས་ཀུན་གྱི་དངོས། །དུས་གསུམ་
བདེ་བར་གཤེགས་པའི་བཤེས་གཉེན་ཏེ། །སྤྲུལ་པ་ཞི་ཁྲོ་མང་པོའི་འབྱུང་གནས་གཙོ། །འགྲོ་བའི་དོན་ཕྱིར་མཆོད་ཀྱིས་གཤེགས་སུ་གསོལ། །ཐུབ་པ་ཆེན་པོ་ཡེ་ཤེས་སྒྲོན་འབར་བར། །ཉི་ཟླ་ལྟ་བུར་སྒྲིབ་པ་སེལ་མཛད་ཅིང་། །ཡོན་ཏན་མཆོག་གིས་བརྒྱན་ཅིང་བཀླུབས་པའི་མགོན། །མཆོད་གནས་དཔལ་ཞིང་དམ་པར་གཤེགས་སུ་གསོལ། །རིན་ཆེན་དབྱིག་ལྟར་ཤིན་ཏུ་མཛེས་པའི་སྐུ། །མཉམ་ཉིད་ཡེ་ཤེས་ནམ་མཁའི་དབྱིངས་ལྟར་དག །འགྲོ་བ་མ་ལུས་བསྒྲལ་བར་དམ་བཅས་ལ། །བཀའ་དྲིན་བསབ་ཕྱིར་མཆོད་ཀྱིས་གཤེགས་སུ་གསོལ། །ཆགས་རབ་དོན་ཕྱིར་མ་ལུས་དབང་དུ་སྡུད། །རྟོགས་པ་ཡེ་ཤེས་ཐར་ལམ་འདྲེན་པའི་དཔལ། །ཆུ་སྐྱེས་ཁ་འབུས་འགྲོ་བའི་ཡིད་བསྒྱུར་བ། །དྲག་པོའི་དོན་ཕྱིར་མཆོད་ཀྱིས་གཤེགས་སུ་གསོལ། །ཡེ་ཤེས་མཚོན་ཆེན་དུག་གསུམ་རྩད་ནས་གཅོད། །ནན་ཏན་ཡེ་ཤེས་སྤྲུལ་པ་ཕྱོགས་བཅུར་འགྱེད། །ཕྲིན་ལས་རྣམ་བཞིས་འགྲོ་དྲུག་བསྒྲལ་བའི་ཕྱིར། །མཉམ་པའི་དོན་ཕྱིར་མཆོད་ཀྱིས་གཤེགས་སུ་གསོལ། །ཤེས་རབ་དབྱིངས་མའི་རིགས་ཀྱི་ཡུམ་ལྔའི་ངང་། །ཆོས་དབྱིངས་ཡེ་ཤེས་ནམ་མཁར་གསལ་བ་དང་། །གསང་ཆེན་བདེ་བའི་ལོངས་སྤྱོད་རྫོགས་པའི་ངང་། །ཐབས་ཀྱི་ཕྱག་རྒྱར་རོལ་ཅིང་གཤེགས་སུ་གསོལ། །རྟོགས་པའི་ཡེ་ཤེས་རིགས་ཀྱི་ཕྱག་རྒྱར་སྣང་། །ཐབས་ཀྱིས་མ་རྨོངས་ཕྲིན་ལས་མཛད་པའི་རྟགས། །ཐུགས་རྗེའི་སྤྱོད་པས་ཡོན་ཏན་མཐར་ཕྱིན་པ། །སེམས་དཔའ་ཆེན་པོ་མཆོད་ཅིང་གཤེགས་སུ་གསོལ། །ཕྱི་ནང་གཉིས་ཀྱི་ལྷ་མོ་དམ་ཚིག་མ། །ཕྱག་རྒྱ་བཞི་ཡི་ཡེ་ཤེས་གསལ་བ་ལ། །གར་དང་ཕྱག་རྒྱས་རོལ་ཅིང་དགེས་མཛད་དེ། །གཙོ་མཆོག་ཐུགས་དམ་བསྐང་ཕྱིར་གཤེགས་སུ་གསོལ། །ཏ་ཀྲྀཏ་ཁྲོ་རྒྱལ་གདུག་པ་གདུལ་དཀའ་འདུལ་བའི་ཕྱིར། །ཐུགས་རྗེའི་ཐབས་ཀྱིས་ཕྱོགས་སྐྱོང་ཞབས་ཀྱིས་གནོན། །ཧཱུཾ་དང་ཕཊ་ཀྱི་འབྲུག་སྒྲ་ལྡིར་བ་ལས། །བརྗོད་པའི་དུས་ཐབས་འགྱིང་ཞིང་གཤེགས་སུ་གསོལ། །གཞལ་ཡས་ཕྱོགས་བཞིའི་ཡེ་ཤེས་བཞི་ཡི་ངང་། །བྱམས་དང་སྙིང་རྗེ་དགའ་བ་བཏང་སྙོམས་ཚུལ། །ཐར་པའི་ལམ་སྟོན་ཡང་
དག་དབྱིངས་ལ་དགོད། །སྒོ་སྐྱོང་སྤྱན་འདྲེན་མཆོད་ཀྱིས་གཤེགས་སུ་གསོལ། །སྐུ་གསུང་ཐུགས་ལས་སྤྲུལ་པའི་ཕོ་ཉ་མོ། །ཕྲིན་ལས་རྣམ་བཞི་རྫོགས་པར་མཛད་འཚལ་གྱི། །ཡེ་ཤེས་སྐར་ལྟར་འཁྲུགས་པའི་དཀྱིལ་འཁོར་འདིར། །དམ་ཚིག་རྗེས་དགོངས་མཆོད་ཅིང་གཤེགས་སུ་གསོལ། །དེ་ནས་ཞི་བསྡུས་སྤྱན་དྲངས་པ། །ཡོད་མེད་སྟོང་པ་ཤིན་ཏུ་རྣལ་འབྱོར་མཐུ། །ནམ་མཁའ་བཞིན་ལས་དམ་ཚིག་ཉེ་བར་གཤེགས། །བདེ་གཤེགས་བདེ་བར་གཤེགས་པ་བཞེངས་སུ་གསོལ། །རྡོ་རྗེ་སེམས་དཔའ་སྐལ་བཟང་དཔལ་ཁྱོད་བདག །ཨེ་ཧྱེ་ཧི་བྷ་ག་ཝཱན། མ་ཧཱ་ཀཱ་རུ་ཎི་ཀ་དྲྀ་ཤྱ་ཧོ། ས་མ་ཡ་ཧོ། རྩ་སྔགས་ཕྱག་རྒྱ་བཞི་ལྡན་པས། །ཛཿཧཱུཾ་བཾ་ཧོཿས་སྤྱན་དྲང་ངོ་། །ཕྱག་རྒྱ་བཞིས་ཀྱང་སྤྱན་དྲང་བ། །ཐུགས་རྗེ་ལྕགས་ཀྱུས་ཐུགས་ཀྱི་རྒྱུད་བསྐུལ་ཞིང་། །བྱམས་པའི་ཞགས་པས་གནས་ནས་སྤྱན་དྲངས་ཏེ། །བཀའ་ཡི་ལྕགས་སྒྲོག་ཕོ་ཉས་གནས་སྟོབས་ལ། །བདེ་གཤེགས་བཞུགས་ཤིང་རྣམ་གྲོལ་དགེས་པ་བསྐྱེད། །ཨོཾ་བཛྲ་ས་མ་ཡ་ཨཱ་ཀཪྵ་ཡ། སརྦ་མཎྜ་ལ། བཛྲ་ཏྱ་སྱ་མ་ཏི་ཀྲ་མ།ཛཿཧཱུཾ་བཾ་ཧོཿ། ཕྱག་རྒྱ་བཞིས་ནི་སྤྱན་དྲངས་པས། །གཞལ་ཡས་ནང་དུ་བྱོན་པར་བསམ། །ལས་ཀྱི་ཕྱག་རྒྱ་ལས་ལ་བཞུགས་གསོལ་ནི། །རིན་ཆེན་སེང་གེའི་གདན་ལ་ཡང་དག་ངེས་བཞུགས་པའི། །རང་གི་ལྷ་མོ་དག་དང་གཡོག་དང་འཁོར་དུ་བཅས། །ཀུན་ཏུ་བཟང་པོའི་སྨོན་ལམ་རྗེས་སུ་དགོངས་མཛད་དེ། །འཇིག་རྟེན་ལྷ་མིར་བཅས་ལ་སྨན་སླད་ལས་ལ་བཞུགས། །སྟོབས་ཀྱི་གླང་པོའི་ཁྲི་ལ་ཡང་དག་ངེས་བཞུགས་ཤིང་། །རང་གི་ལྷ་མོ་དག་དང་གཡོག་དང་འཁོར་དུ་བཅས། །ཀུན་ཏུ་བཟང་པོའི་སྨོན་ལམ་རྗེས་སུ་དགོངས་མཛད་དེ། །འཇིག་རྟེན་ལྷ་མིར་བཅས་ལ་སྨན་སླད་ལས་ལ་བཞུགས། །རྫུ་འཕྲུལ་རྟ་ཡི་ཁྲི་ལ་ཡང་དག་ངེས་བཞུགས་ཤིང་། །རང་གི་ལྷ་མོ་དག་དང་གཡོག་དང་འཁོར་དུ་བཅས། །ཀུན་ཏུ་བཟང་པོའི་སྨོན་ལམ་རྗེས་སུ་དགོངས་མཛད་དེ། །འཇིག་རྟེན་ལྷ་མིར་བཅས་པ་སྨན་སླད་ལས་ལ་བཞུགས། །དབང་གི་རྨ་བྱའི་ཁྲི་ལ་ཡང་དག་ངེས་བཞུགས་
ཤིང་། །རང་གི་ལྷ་མོ་དག་དང་གཡོག་དང་འཁོར་དུ་བཅས། །ཀུན་ཏུ་བཟང་པོའི་སྨོན་ལམ་རྗེས་སུ་དགོངས་མཛད་དེ། །འཇིག་རྟེན་ལྷ་མིར་བཅས་ལ་སྨན་སླད་ལས་ལ་བཞུགས། །ཐོགས་མེད་མཁའ་ལྡིང་ཁྲི་ལ་ཡང་དག་ངེས་བཞུགས་ཤིང་། །རང་གི་ལྷ་མོ་དག་དང་གཡོག་དང་འཁོར་དུ་བཅས། །ཀུན་ཏུ་བཟང་པོའི་སྨོན་ལམ་རྗེས་སུ་དགོངས་མཛད་དེ། །འཇིག་རྟེན་ལྷ་མིར་བཅས་ལ་སྨན་སླད་ལས་ལ་བཞུགས། །ལག་གི་འདུ་བྱེད་ཕྱག་རྒྱ་ཡིས། །སྟངས་ཚུལ་བྱ་ཞིང་རིགས་ལྔ་ཡི། །ཡབ་ཡུམ་བཞུགས་སུ་གསོལ་བ་ནི། །མི་བསྐྱོད་ཉི་མའི་དཀྱིལ་ཡི་གེ། །རིན་ཆེན་ཟླ་བའི་དཀྱིལ་ཡི་གེ། །ལྔ་གཉིས་ཟུང་དུ་འཕྲོས་པ་ཡིས། །སྦྱར་བས་ཕྱག་རྒྱ་འབྱུང་བའི་རྒྱུ། །ཨོཾ་བཛྲ་ཨཉྫ་ལི། ཧཱུཾ་དང་མཱུཾ་གཉིས་རྩེ་སྦྱར་ཏེ། །འབྲུ་བརྒྱད་བསྣོལ་ནས་རྩེ་སྤྲད་པ། །རྒྱལ་བ་ཀུན་དང་མཉམ་སྦྱོར་བའི། །བདེ་བ་ཆེན་པོའི་སྦྱིན་པའི་རྒྱ། །ཨོཾ་སུ་ར་ཏ་བནྡྷ་ཧཱུཾ། འབྲུ་བཞི་སྦས་ནས་ཐུགས་ཀར་བཀན། །ཨོཾ་བསྒྲེང་རྩེ་མོར་འཁོར་ལོ་འབར། །ཟླ་བརྟུལ་འབྲུ་སྦས་དྲིལ་གསིལ་ཞིང་། །འཁྲིལ་བའི་ཚུལ་དུ་ཆོས་ལ་བརྟེན། །ཨོཾ་ཛི་ན་ཛིཀ །འབྲུ་བཞི་སྦས་ནས་ཐུགས་ཀར་བཀན། །ལཱཾ་བསྒྲེང་རྩེ་མོར་དྲིལ་གསིལ་ཞིང་། །ཉི་མ་འབྲུ་ལྔ་ལས་སུ་འཁྲིལ། །བཏུད་དེ་འཛུམ་པའི་མདངས་ཀྱིས་བལྟ། །ལཱཾ་དྭེ་ཥ་ར་ཏི། འབྲུ་བཞི་སྦས་ནས་ཐུགས་ཀར་བཀན། །ཧཱུཾ་བསྒྲེང་རྩེ་མོར་རྡོ་རྗེ་འབར། །ཟླ་བརྟུལ་འབྲུ་སྦས་དྲིལ་གསིལ་ཞིང་། །འཁྲིལ་བའི་ཚུལ་གྱིས་ཆོས་ལ་བརྟེན། །ཧཱུཾ་བཛྲ་དྷྲྀཀ །འབྲུ་བཞི་སྦས་ནས་ཐུགས་ཀར་བཀན། །མཱུཾ་བསྒྲེང་རྩེ་མོར་དྲིལ་གསིལ་ཞིང་། །ཉི་མ་འབྲུ་ལྔ་ལས་སུ་འཁྲིལ། །བཏུད་དེ་འཛུམ་པའི་མདངས་ཀྱིས་བལྟ། །མཱུཾ་དྷཱ་ཏྭཱི་ཤྭ་རི། འབྲུ་བཞི་སྦས་ནས་ཐུགས་ཀར་བཀན། །སྭཱ་བསྒྲེང་རྩེ་མོར་རིན་པོ་ཆེ། །ཟླ་བརྟུལ་འབྲུ་སྦས་དྲིལ་གསིལ་ཞིང་། །འཁྲིལ་བའི་ཚུལ་གྱིས་ཆོས་ལ་བརྟེན། །སྭཱ་རཏྣ་དྷྲྀཀ །འབྲུ་བཞི་སྦས་ནས་ཐུགས་ཀར་བཀན། །ཉི་མ་འབྲུ་ལྔ་ལས་སུ་འཁྲིལ། །བཏུད་དེ་འཛུམ་པའི་མདངས་ཀྱིས་བལྟ། །མཱཾ་མོ་ཧ་ར་ཏི། འབྲུ་བཞི་སྦས་ནས་ཐུགས་ཀར་བཀན། །ཨོཾ་བསྒྲེང་རྩེ་མོར་པདྨ་འབར། །ཟླ་བརྟུལ་འབྲུ་སྦས་དྲིལ་གསིལ་
ཞིང་། །བཏུད་དེ་འཛུམ་པའི་མདངས་ཀྱིས་བལྟ། །ཨཾ་ཨཱ་རོ་ལིཀ །འབྲུ་བཞི་སྦས་ནས་ཐུགས་ཀར་བཀན། །བྞུ་བསྒྲེང་རྩེ་མོར་དྲིལ་གསིལ་འབར། །ཉི་མ་འབྲུ་ལྔ་ལས་སུ་འཁྲིལ། །བཏུད་དེ་འཛུམ་པའི་མདངས་ཀྱིས་བལྟ། ། བྞུ ་རཱ་ག་ར་ཏི། འབྲུ་བཞི་སྦས་ནས་ཐུགས་ཀར་བཀན། །ཧཱ་བསྒྲེང་རྩེ་མོར་རལ་གྲི་འབར། །ཟླ་བརྟུལ་འབྲུ་སྦས་དྲིལ་གསིལ་ཞིང་། །འཁྲིལ་བའི་ཚུལ་གྱིས་ཆོས་ལ་བརྟེན། །ཧཱ་པྲཛྙཱ་དྷྲྀཀ །འབྲུ་བཞི་སྦས་ནས་ཐུགས་ཀར་བཀན། །ཏཱཾ་བསྒྲེང་རྩེ་མོར་དྲིལ་གསིལ་འབར། །ཉི་མ་འབྲུ་ལྔ་ལས་སུ་འཁྲིལ། །བཏུད་དེ་འཛུམ་པའི་མདངས་ཀྱིས་བལྟ། །ཏཱཾ་བཛྲ་ར་ཏི། ཀུན་བཟང་མཉམ་གཞག་ཡེ་ཤེས་འཕྲོ། །ཡུམ་གྱུར་མཉམ་རྫོགས་དཔའ་མོའི་དཀྱིལ། །ཡང་ན་རྡོ་རྗེ་ཐལ་མོ་ཉིད། །ཡང་ན་དེ་བཞིན་གཤེགས་པ་ཉིད། །ཧཱུཾ་ཧཱུཾ་ཧཱུཾ། བཛྲ་ཙིཏྟ་ཧཱུཾ། ཨ་ཨ་ཨ་བཛྲ་བྷ་དྲ་ས་མནྟ་ཨ། པི་ཝང་སྡེབ་པ་ལྟར་བྱེད་པ། །ལྷ་ཡི་ཐུབ་པའི་ཕྱག་རྒྱ་ཡིན། །ཨོཾ་མུ་ནི་ཀྲིཾ་སྭཱ་ཧཱ། གོ་ཆ་འཛིན་པ་ལྟར་བྱེད་པ། །ལྷ་མིན་ཐུབ་པའི་ཕྱག་རྒྱ་ཡིན། །ཨོཾ་མུ་ནེ་ཧཱུཾ་ཏྲུཾ་སྭཱ་ཧཱ། གསེག་པར་འཛིན་པ་ལྟར་བྱེད་པ། །མི་ཡི་ཐུབ་པའི་ཕྱག་རྒྱ་ཡིན། །ཨོཾ་མུ་ནེ་སྲུཾ་སྭཱ་ཧཱ། པུ་ཏི་ཆོས་འཆད་ཕྱག་རྒྱ་ནི། །བྱོལ་སོང་ཐུབ་པའི་ཕྱག་རྒྱ་ཡིན། །ཨོཾ་མུ་ནེ་བྲཾ་སྭཱ་ཧཱ། རིན་ཆེན་སྒྲོམ་བུ་ཁ་འབྱེད་ནི། །ཡི་དྭགས་ཐུབ་པའི་ཕྱག་རྒྱ་ཡིན། །ཨོཾ་མུ་ནེ་ཀྵཾ་སྭཱ་ཧཱ། མེ་འབར་ཆུ་བླུག་ལག་གཉིས་ནི། །དམྱལ་བའི་ཐུབ་པའི་ཕྱག་རྒྱ་ཡིན། །ཨོཾ་མུ་ནེ་ཡེ་སྭཱ་ཧཱ།ས་སྙིང་རིན་ཆེན་མྱུ་གུ་འབར། །གཟུགས་ནི་སྒེག་མོ་མེ་ལོང་འཛིན། །ཀྵྀ་ཧི་རཱ་ཛ་ཡ། ཧཱུཾ་ལཱ་སྱེ་ས་མ་ཡ་སྟྭཾ། ནམ་མཁའི་སྙིང་པོ་རལ་གྲི་འཛིན། །དྲི་ནི་རིན་ཆེན་ཕྲེང་བ་མ། །ཏྲཱཾ་ཨཱ་གརྦྷཱ་ཡ། ཏྲཾ་མཱ་ལྱེ་ས་མ་ཡ་སྟྭཾ། སྤྱན་རས་གཟིགས་དབང་པདྨ་དཀར། །རོ་ནི་པི་ཝང་གླུ་ལེན་མ། །ཧྲཱྀཿཔདྨ་པ་དམ། ཧྲཱྀཿགཱི་ཏི་རཱ་གོ྅ཧཾ། ཕྱག་ན་རྡོ་རྗེ་རྡོ་རྗེ་འཛིན། །སྒྲ་ནི་ཕྱག་ན་གར་བྱེད་མ། །ཛིཾ་ཀུ་རུ་པནྣ་ཧྲཱྀཿ། ཨ་ནྲྀ་ཏི་རཱ་ག་ཡཱ་མི། བྱམས་པ་ཕྱག་ན་ཀླུ་ཤིང་འཛིན། །འདས་པ་དཔྱིད་ནི་སྤོས་མེ་མ། །མཻ་དྷ་ར་ཎེ་སྭཱ་ཧཱ། ཛ་དྷཱུ་པ་པྲ་བེ་ཤ །སྒྲིབ་སེལ་ཆོས་ཀྱི་འཁོར་ལོ་དང་། །ད་ལྟ་དབྱངས་ནི་མེ་ཏོག་མ། །ཨོཾ་ནིསྶ་རཾ་བྷ་ཡ་སྭཱ་ཧཱ། ཧཱུཾ་པུཥྤ་ཨཱ་
བེ་ཤ །ཀུན་བཟང་རིན་ཆེན་སྙེ་མ་འཛིན། །འབྱུང་བ་སྟོན་ཏེ་མར་མེ་མ། །ཧཱུཾ་ས་རཱ་ཛཱ་ཡ། བཾ་དཱི་པ་སུ་གཱི་རི། འཇམ་དཔལ་ཕྱག་ན་ཨུཏྤ་ལ། །མ་འོངས་དགུན་ནི་དྲི་ཆབ་མ། །མུཾ་ཤྲཱིཿཨཾ་རཱ་གཱ་ཡ། ཧོ་གནྡྷེ་ཙིཏྟ་ཧོ། གཤིན་རྗེ་མི་མགོའི་དབྱུག་པ་འཕྱར། །འགུགས་བྱེད་ལྕགས་ཀྱུ་ཕྱག་ན་འཛིན། །ཧཱུཾ་ཡ་མཱན་ཏ་ཀྲྀཏ་ཕཊ། ཨོཾ་བཛྲ་དྷ་ར་མ་ཧཱ་ཀྲོ་དྷཱི་ཤྭ་རི་ཛྭ་ལ་ནི་ཧཱུཾ་ཕཊ། རྣམ་པར་རྒྱལ་བ་རྡོ་རྗེ་གནོན། །འཆིང་མཛད་ཕྱག་ན་ཞགས་པ་བསྣམས། །ཧཱུཾ་བིགྷྣཱཾ་ཏ་ཀྲྀཏ་ཕཊ།ཨོཾ་མ་ཧཱ་རཏྣ་དྷ་ར་མ་ཧཱ་ཀྲོ་དྷཱི་ཤྭ་རི་ཛྭ་ལ་ནི་ཧཱུཾ་ཕཊ། རྟ་མགྲིན་ཕྱག་ན་ཐོད་སྦྲུལ་གནོན། །སྡོམ་བྱེད་ཕྱག་ན་ལྕགས་སྒྲོག་བསྣམས། །ཧཱུཾ་པདྨཱནྟ་ཀྲྀཏ་ཕཊ། ཨོཾ་མ་ཧཱ་པདྨ་དྷ་ར་མ་ཧཱ་ཀྲོ་དྷཱི་ཤྭ་རི་ཛྭ་ལ་ནི་ཧཱུཾ་ཕཊ། བདུད་རྩི་འཁྱིལ་པ་རྒྱ་གྲམ་བསྣམས། །དགྱེས་མཛད་མ་ནི་དྲིལ་བུ་འཁྲོལ། །ཨོཾ་པྲཛྙཱནྟེ་ཀྲྀཏ་ཕཊ། ཨོཾ་མ་ཧཱ་ཀརྨ་དྷ་ར་མ་ཧཱ་ཀྲོ་དྷཱི་ཤྭ་རི་ཛྭ་ལ་ནི་ཧཱུཾ་ཕཊ། ཕྱག་རྒྱའི་མཆོད་པ་སྣ་ཚོགས་ཀྱིས། །དཀྱིལ་འཁོར་ཐུགས་དམ་བསྐང་གྱུར་ཅིག །རྒྱལ་སྲས་མཆོད་པས་མཉེས་གྱུར་ནས། །མཐར་ཕྱིན་དངོས་གྲུབ་སྩལ་དུ་གསོལ། །ཨོཾ་བཻ་རོ་ཙ་ན་ཨོཾ། ཨོཾ་བཛྲ་ཨཀྵོ་བྷྱཿཧཱུཾ། ཨོཾ་རཏྣ་སཾ་བྷ་ཝ་ཏྲཱཾ། ཨོཾ་ཨ་མི་ཏཱ་བྷ་ཧྲཱྀཿ། ཨོཾ་ཨ་མོ་གྷ་སིདྡྷི་ཧཱ།རྡོ་རྗེ་ཁུ་ཚུར་བཅངས་པ་ནི། །སངས་རྒྱས་རྣམས་ཀྱི་ཡེ་ཤེས་འཇུག །མི་གཡོ་བ་ཡི་རྒྱ་བཅིངས་པས། །ཡིད་ནི་གཡོ་བ་མེད་པར་གནས། །རིན་ཆེན་འབྱུང་བའི་རྒྱ་བཅིངས་པས། །གཞན་ལ་ཕན་པ་བྱེད་པར་འགྱུར། །དམ་ཆོས་ཕྱག་རྒྱ་མྱུར་བ་ནི། །ཆོས་ཀྱི་དབྱིངས་འཁོར་རབ་ཏུ་བསྐོར། །མི་འཇིགས་མཆོག་གི་ཕྱག་རྒྱ་ནི། །སེམས་ཅན་ཀུན་ལ་མི་འཇིགས་སྦྱིན། །ལས་ཀྱི་ཕྱག་རྒྱ་འདི་རྣམས་ཀྱིས། །ཇི་ལྟར་འདོད་པར་རྣམ་སྤྲུལ་ནས། །མ་ལུས་ལུས་པ་མེད་པར་འགྲུབ། །དེ་ནས་སེམས་དཔའ་བཅུ་དྲུག་གི། །ལས་ཀྱི་ཕྱག་རྒྱས་ལས་རྣམས་བཞུགས། །བཛྲ་སཏྭ་ཧཱུཾ། བཛྲ་རཱ་ཛ་ཧཱུཾ། བཛྲ་རཱ་ག་ཧཱུཾ། བཛྲ་སཱ་དྷུ་ཧཱུཾ། ཤིན་ཏུ་འབིགས་པས་རྡོ་རྗེའོ། །མཆོག་ཏུ་སྦྱོར་བས་ལྕགས་ཀྱུའོ། །ཕྲ་མོར་འབིགས་པས་མདའ་ཡིན་ཏེ། །མགུ་བས་དགེས་
པར་བྱེད་པའོ། །ཨོཾ་བཛྲ་རཏྣ་ཏྲཱཾ། ཨོཾ་བཛྲ་སཱུརྱ་ཏྲཱཾ། བཛྲ་ཀེ་ཏུ་ཏྲཱཾ། བཛྲ་ཧ་ས་ཧ། སྒྲུབ་པ་རིན་པོ་ཆེར་བཤད་དེ། །ཉི་མ་གཟི་བརྗིད་ཅེས་སུ་བརྗོད། །བསྒྲེང་བས་རྒྱལ་མཚན་ཆེར་བསྟན་ཏེ། །བཞད་པས་བཞད་པ་ཞེས་སུ་གྲགས། །ཨོཾ་བཛྲ་དྷརྨ་ཧྲཱྀཿ། བཛྲ་ཏཱིཀྵྞ་ཧྲཱྀཿ། ཧེ་ཏུ་ཡིན་ནམ། བཛྲ་ཙཀྲ་ཧྲཱྀཿ། བཛྲ་བྷཱ་ཥ་ཧྲཱྀཿ། འདོད་ཆགས་དག་པས་པདྨོ་སྟེ། །ཉོན་མོངས་དགྲ་གཅོད་རལ་གྲིའོ། །དཀྱིལ་འཁོར་ཚོལ་དུ་འཁོར་ལོ་སྟེ། །ཚིག་ཏུ་བརྗོད་པས་སྨྲ་ཞེས་བྱའོ། །ཨོཾ་བཛྲ་ཀརྨ་ཧཱ། བཛྲ་རཀྵ་ཧཱ། བཛྲ་ཡཀྵ་ཧཱ། བཛྲ་སན་དྷི་ཧཱ། སྣ་ཚོགས་ཐམས་ཅད་རྡོ་རྗེའི་ཕྱིར། །མི་ཚུགས་བསྲུང་བས་གོ་ཆའོ། །འཇིགས་པར་སྦྱོར་བས་མཆེ་བ་སྟེ། །བཅིངས་པའི་ཚུལ་གྱིས་ཁུ་ཚུར་རོ། །དེ་ནས་དམ་ཚིག་ཕྱག་རྒྱ་ཡིས། །དངོས་གྲུབ་མ་ཐོབ་བར་དུ་ནི། །ལས་མ་གྲུབ་ཀྱི་བར་དག་ཏུ། །བརྟན་པར་བཞུགས་སུ་གསོལ་བ་ནི། །བདེ་ཆེན་དབྱིངས་ནས་རྒྱལ་བའི་སྐུར་བཞེངས་ཤིང་། །ཐུགས་བརྩེར་ལྡན་པའི་ཡེ་ཤེས་གདུང་བ་ཡིས། །བྱམས་པའི་ཞལ་བཟང་བདག་ལ་བསྟན་པ་དང་། །མ་བསྒྲིབས་སྤྱན་གྱིས་བདག་ལ་གཟིགས་སུ་གསོལ། །རྩེ་གཅིག་འདུད་པའི་རྡོ་རྗེ་ལྕམ་དྲལ་ལ། །ཀུན་ནས་བྱིན་གྱིས་རློབ་ཅིང་སྐྱོབ་པ་དང་། །མི་གཉིས་དོན་ཀུན་དངོས་གྲུབ་མཆོག་རྣམས་ཀུན། །བདག་ལ་སྩལ་ཅིང་བརྟན་པར་བཞུགས་སུ་གསོལ། །ཨོཾ་ཨཱཿཧཱུཾ་སྭཱ་ཧཱཿས་མ་ཡ་སྟྭཾ་ས་མ་ཡ་ཧོ། ས་མ་ཡ་ཧཱུཾ། ཏིཥྛ་བཛྲ། བསྡུས་ནས་མཉམ་སྦྱར་གཞུག་པ་ནི། །ཡེ་ཤེས་འཁོར་ལོ་སྐུ་གསུང་ཐུགས། །ཡོན་ཏན་ཕྲིན་ལས་རྨད་པོ་ཆེ། །དེ་ཉིད་དུ་ནི་མཉམ་སྦྱར་བའི། །ཕྱག་རྒྱ་ཆེན་པོར་བདག་སྦྱོར་ཅིག །ཨོཾ་ཙཀྲ་ས་མ་ཡ་ཨོཾ།གསུང་ཐུགས་ཡོན་ཏན་ཕྲིན་ལས་བཞི། །འཁོར་ལོའི་ཚུལ་མཆོག་བཞིན་དུ་སྦྱར། །ལྷ་རྣམས་ཀུན་གྱི་ཏིང་འཛིན་ནི། །རང་གི་སྙིང་གར་བརྟན་པར་བཞག །ལས་དང་དམ་ཚིག་ཕྱག་རྒྱ་ཡིས། །འཁོར་ཚོགས་ཡན་ཆད་མ་རྫོགས་ན། །གཙོ་བོ་རིགས་ལྔ་དག་ལ་འདུས། །དེ་ནས་ཕྱག་གི་ཕྱག་རྒྱ་ཡིས། །རིགས་ལྔ་སོ་སོར་ཕྱག་རྒྱར་གསུངས། །མ་སྐྱེས་རྡོ་རྗེ་ཐབས་ཀྱི་ཡེ་ཤེས་ནི། །དམིགས་མེད་ཤེས་རབ་ཡུམ་གྱི་ངང་དུ་གསལ། །ཐུགས་རྗེའི་བྱེ་བྲག་སྣ་ཚོགས་ཅིར་ཡང་
སྟོན། །རྡོ་རྗེ་སེམས་དཔའ་ཆེ་ལ་ཕྱག་འཚལ་ལོ། །ཆོས་སྐུ་ནམ་མཁའ་བཞིན་དུ་དབྱེར་མེད་ཀྱང་། །གཟུགས་སྐུ་འཇའ་ཚོན་བཞིན་དུ་སོ་སོར་གསལ། །ཐབས་དང་ཤེས་རབ་མཆོག་ལ་མངའ་བརྙེས་པའི། །རིགས་ལྔ་བདེ་བར་གཤེགས་ལ་ཕྱག་འཚལ་ལོ། །དམིགས་མེད་ཆོས་ཀྱི་སྐུ་ལ་ཕྱག་འཚལ་ལོ། །ལོངས་སྤྱོད་རྫོགས་པའི་སྐུ་ལ་ཕྱག་འཚལ་ལོ། །ཅིར་ཡང་སྤྲུལ་པའི་སྐུ་ལ་ཕྱག་འཚལ་ལོ། །ཁམས་གསུམ་ཞིང་དུ་སྦྱོར་ལ་ཕྱག་འཚལ་ལོ། །མཛེས་མའི་སྐུ་མཆོག་འགྲོ་བ་སྒྲོལ་ལ་མཁས། །ངོ་མཚར་ཕོ་བྲང་བདེ་བར་གཤེགས་པའི་ཡུམ། །ཤེས་རབ་ཐབས་ཀྱི་གཙོ་ལ་མཉེས་མཛད་མ། །རིགས་ཀྱི་ཡུམ་མཆོག་རྣམས་ལ་ཕྱག་འཚལ་ལོ། །ཐབས་མཁས་ཐུགས་རྗེས་ཡེ་ཤེས་སྤྲུལ་པའི་སྐུ། །རང་རྒྱུད་རྣལ་འབྱོར་དག་པས་གྲུབ་པའི་ས་བརྙེས་མ། །ཐུགས་རྗེ་ཆེན་པོས་འགྲོ་བའི་དོན་མཛད་པའི། །སེམས་དཔའ་སེམས་མ་རྣམས་ལ་ཕྱག་འཚལ་ལོ། །བྱམས་དང་སྙིང་རྗེ་དགའ་དང་བཏང་སྙོམས་ཀྱིས། །ཉོན་མོངས་ལོག་པར་ལྟ་བའི་དགྲ་རྣམས་འཇོམས། །གཤིན་རྗེ་གཤེད་པོ་ལ་སོགས་ཁྲོ་བོ་བཞི། །སྒོ་བ་ཡབ་ཡུམ་རྣམས་ལ་ཕྱག་འཚལ་ལོ། །ཨ་ཏི་བུ་ཧོ། པྲ་ཏཱིཙྪ་ཧོ། ཨ་ལ་ལ་ཧོ། དེ་ནས་རིགས་ལྔ་བསྡུས་ཕྱག་འཚལ། །རྡོ་རྗེ་སེམས་ལ་ཕྱག་འཚལ་ནི། །མི་བསྐྱོད་པ་ནི་ཡེ་ཤེས་ཆེ། །རྡོ་རྗེ་དབྱིངས་ཀྱི་མཚོན་ཆེན་པོ། །རྡོ་རྗེ་གསུམ་མཆོག་དཀྱིལ་འཁོར་གསུམ། །གསང་བ་གསུམ་ལ་ཕྱག་འཚལ་ལོ། །རྣམ་པར་སྣང་མཛད་ཕྱག་འཚལ་ནི། །རྣམ་པར་སྣང་མཛད་དག་ཆེན་པོ། །རྡོ་རྗེ་ཞི་བ་དགེས་པ་ཆེ། །རང་བཞིན་གྱིས་ནི་འོད་གསལ་མཆོག །རྡོ་རྗེའི་སྟོན་ལ་ཕྱག་འཚལ་ལོ། །རིན་ཆེན་འབྱུང་ལྡན་ཕྱག་འཚལ་ནི། །རིན་ཆེན་རྒྱལ་པོ་རབ་ཏུ་ཟབ། །རྡོ་རྗེ་ནམ་མཁའ་དྲི་མ་མེད། །དངོས་གཉིས་དག་པས་དྲི་མ་མེད། །གསང་བ་གསུམ་ལ་ཕྱག་འཚལ་ལོ། །རྡོ་རྗེ་ཆོས་ལ་ཕྱག་འཚལ་ནི། །རྒྱལ་ཆེན་རྡོ་རྗེ་སྣང་མཐའ་ཡས། །རྣམ་པར་མི་རྟོག་རྡོ་རྗེའི་མཁའ། །
འདོད་ཆགས་ཕ་རོལ་ཕྱིན་བརྙེས་པའི། །རྡོ་རྗེའི་གསུང་ལ་ཕྱག་འཚལ་ལོ། །ལས་ཀྱི་རིགས་ལ་ཕྱག་འཚལ་ནི། །རྡོ་རྗེ་དོན་གྲུབ་རྫོགས་སངས་རྒྱས། །བསམ་པ་ཐམས་ཅད་ཡོངས་རྫོགས་པ། །རང་བཞིན་དག་པ་ཉིད་ལས་བྱུང་། །རྡོ་རྗེ་སེམས་ལ་ཕྱག་འཚལ་ལོ། །བྱང་ཆུབ་མཆོག་དང་ས་གནོན་དང་། །སྦྱིན་གཏོང་མཉམ་གཞག་མཆོག་སྦྱིན་གྱི། །ཕྱག་རྒྱ་ལྔ་ནི་རབ་བཅས་ནས། །ཏིང་འཛིན་ཕྱག་རྒྱ་སྔགས་ཚིག་ལྡན། །ཨ་ཏི་པུ་ཧོ། ཏ་ཐཱ་བནྡ་ནངྈ་རོ་ཡ་མི། མ་ཧཱ་ཡཱོ་གི་པ་ཏི་ཨ་ལ་ལ་ཧོ། དེ་ནས་ལྷ་མོ་གར་ཚོགས་ནི། །སྟངས་ཚུལ་གར་སྔགས་ཚིགས་བཅད་སྦྱར། །ཨོཾ་སུ་ར་ཏ་མ་ཧཱ་ཨངྐུ་ཤ་སུ་ཁེ་ཛཿ། ཨོཾ་སུ་ར་ཏ་མ་ཧཱ་པཱ་ཤ་སུ་ཁེ་ཧཱུཾ། ཨོཾ་སུ་ར་ཏ་མ་ཧཱ་སྥོ་ཊ་སུ་ཁེ་བཾ། ཨོཾ་སུ་ར་ཏ་མ་ཧཱ་གྷཎྜཱ་སུ་ཁེ་ཧོཿ། རྡོ་རྗེ་ལྕགས་ཀྱུ་མཁའ་དབྱིངས་སྐུལ་བྱེད་ཐུགས་རྗེའི་ངང་། །བྱམས་པའི་ཞགས་པས་འགྲོ་དོན་ལས་ལ་གཞུག །དགའ་བའི་ལྕགས་སྒྲོག་འཁོར་བར་ཇི་སྲིད་བརྟན། །སོ་སོར་ཆོས་སྟོན་བཏང་སྙོམས་དྲིལ་བུའི་ངང་། །ཨོཾ་སུ་ར་ཏ་བཛྲ་མ་ནོ ་ཝ་ཧོ། ཨོཾ་སུ་ར་ཏ་བཛྲ་ཀཱི་ལི་ཀཱི་ལ་ཡ། ཨོཾ་སུ་ར་ཏ་བཛྲ་མི་ཏྲི་ཧྲི། ཨོཾ་སུ་ར་བཛྲ་གརྦྷེ་ཧཱུཾ། ཡུལ་མེད་སེམས་རྟོགས་མོས་བྱེད་དམ་ཚིག་གམ། །བདག་ལྟར་མ་སྐྱེས་གསོད་བྱེད་ཕྱག་རྒྱའི་སྐུ། །སྒྲིབ་གཉིས་རྨོངས་བྱེད་ཆོས་ཀྱི་ཕྱག་རྒྱ་མ། །བྱེད་པ་གར་ཚུལ་སྤྲུལ་པ་མྱོང་བྱེད་ལས། །ཧཱུཾ་ལཱ་སྱེ་ས་མ་ཡ་སྟྭཾ། ཏྲཾ་མཱ་ལེ་ས་མ་ཡ་ཧོ། ཧྲཱྀཿགཱི་ཏཱི་རཱ་གོ྅ཧཾ། ཨཾ་ནིརྟི་རཱ་ག་ཡཱ་མི། ཤིན་ཏུ་སྒེག་པས་གཟི་བརྗིད་འབར། །ཡིད་བཞིན་རིན་ཆེན་ཕྲེང་བ་འབར། །དབྱངས་སྙན་ཡིད་འཕྲོག་གཟི་ལྡན་འབར། །གཟུགས་མཛེས་བསྐྱོད་པས་ཕྱོགས་བཅུར་གཡོ། །ཛཿདྷཱུ་པེ་པྲ་བེ་ཤ །ཧཱུཾ་པུཥ྇་ཨཱ་བེ་ཤ །པཾ་དཱི་པ་སུ་གི་རཱི། ཧོ་གན་དྷི་ཙིཏྟ། ཀུན་ཏུ་ཚིམས་བྱེད་བྲོ་བསྲུང་ཚིམས། །བལྟ་མཛེས་རིན་ཆེན་ཕུང་པོར་འཕྲོ། །འོད་གསལ་འཕྲོས་པས་ཀུན་ཏུ་གསལ། །བདུད་རྩི་བསིལ་དྲོ་འཇམ་པའི་དབྱངས། །དེ་ནས་བསྟོད་པའི་མཆོད་པ་ནི། །གླུ་ཡི་ཡེ་ཤེས་རྒྱན་འདིས་མཆོད། །བདེ་བ་ལས་འཁྲུངས་རྡོ་རྗེ་འཆང་། །དངོས་མེད་འབྱུང་གནས་ཆེན་པོར་མཁྱེན། །གང་དུ་དང་པོ་རྣམ་པར་
སྣང་མཛད་ནི། །དྲི་མེད་བློ་ཡིས་ཨོཾ་དུ་སྤྲུལ། །གཟུགས་མང་ཚུལ་གྱི་ཕྲེང་བས་བསྐོར་བ་ནི། །སྒྱུ་འཕྲུལ་དྲ་བ་ཁྱེད་ལ་ཕྱག་འཚལ་ལོ། །གཟུགས་བརྙན་ཡི་གེ་ཀུན་ལ་ཁྱབ་པ་ཡིས། །སྤྲོས་མེད་གསུང་དུ་འཇིག་རྟེན་དབང་ཕྱུག་བཞུགས། །མི་གསུང་ལྷ་མོ་དམ་བཅས་འདུལ་མཛད་པ། ། སྒྱུ་འཕྲུལ་ཚུལ་ཡང་ལྡན་པ་འགའ་མ་མཆིས་ཀྱང་འཇུག་རྫུ་འཕྲུལ་ཚུལ་མང་དགའ་ལྡན་དགའ་མ་མཆིས། །གང་དུ་བདེ་ཆེན་རང་བཞིན་རྗེས་ཆགས་པ། །ན་ཆུང་དག་དང་ལྷན་ཅིག་རྗེས་ཆགས་ཞུགས། །གཡས་ཀྱི་ཕྱག་གིས་རྡོ་རྗེ་གསོར་ནས་ཀྱང་། །གཡོན་གྱི་ཕྱག་གིས་དྲིལ་བུའི་སྒྲ་སྙན་འཁྲོལ། །ལྷ་མོ་མཐའ་དག་བཙུན་མོར་གྱུར་པ་ཡིས། །དམ་ཚིག་རྣམས་ཀྱི་བྱ་བ་བྱས་པར་འགྱུར། །གཅིག་གི་ལག་པས་ཀུན་ལ་འཇུས་པ་སྟེ། །གཉིས་པ་རྗེས་སུ་ཆགས་ཤིང་བདེ་བའི་མཐུ། །གསུམ་པ་མི་ཟད་རིན་ཆེན་ཕྲེང་བ་འཐོར། །བཞི་པ་བདེ་བའི་མཐའ་ཡིས་འཕེན་པ་དེ། །གང་ཞིག་གླུ་ནི་ལེན་པར་བྱེད་པ་དག །རྡོ་རྗེ་བདེ་བ་ཅན་དང་མཉམ་པར་འགྱུར། །ཏིང་ངེ་འཛིན་གྱི་དྲོད་ཉུལ་བས། །རྣལ་འབྱོར་ཏིང་འཛིན་བསྒོམ་མི་བསྒོམ། །ཉུལ་བས་གསལ་ཞིང་བཀྲ་བར་བྱ། །མི་ལྡན་ཞེས་པས་བསམ་ཡས་མཆོད། །རྒྱུད་ཀྱི་རྒྱལ་པོ་ཀར་མ་མཱ་ལེ་ལས། གསལ་བཀྲའི་དཀྱིལ་འཁོར་བསྟན་པའི་ལེའུ་སྟེ་བཞི་པའོ།། །།དེ་ནས་བཅོམ་ལྡན་འདས་ཞེ་སྡང་རྡོ་རྗེ་དཀྱིལ་འཁོར་ཐམས་ཅད་ཀྱི་བདག་པོས་ཐིམ་པའི་དཀྱིལ་འཁོར་འདི་གསུངས་སོ། །དེ་ཡང་མཆོད་དང་སྨོན་ལམ་གཉིས། །མཆོད་པའི་ཚོགས་རྣམས་འབུལ་བ་ནི། །ཡོན་ཏན་ལྷ་མོའི་མཆོད་པ་དང་། །ཡན་ལག་ཀུན་འབྱུང་ཏིང་ངེ་འཛིན། །གཞལ་མེད་རྒྱན་རྣམས་ཕུན་སུམ་ཚོགས། །སྤྲིན་བཀོད་ཡོངས་སུ་བསྔོ་བ་དང་། །འཁོར་ལོས་སྒྱུར་རྒྱལ་རྒྱལ་སྲིད་དང་། །སྐུ་གསུང་ཐུགས་ཡོན་ཕྱག་རྒྱ་བཞི། །ཉོན་མོངས་ལྔ་ཡི་མཆོད་པ་དང་། །ཕྱག་རྒྱ་དྲུག་ལས་འདོད་ཡོན་ལྔ། །ནན་ཏན་སྦྱོར་བའི་མཆོད་པ་དང་། །ཐབས་དང་ཤེས་རབ་གསང་བ་དང་། །བདུད་རྩི་སྨན་གྱི་མཆོད་པ་དང་། །ཕུང་པོ་ལྔ་ཡི་མཆོད་པ་དང་། །ལུས་ལ་སྨན་ལྔའི་མཆོད་པ་དང་། །དབང་པོ་རེག་བྱའི་མཆོད་པ་དང་། །ཀུན་
ཏུ་བཟང་པོའི་མཆོད་པ་དང་། །བསྟོད་པ་གླུ་ཡི་མཆོད་པ་དང་། །རྣམ་པར་མི་རྟོག་དོན་གྱི་མཆོད། །བཅུ་བདུན་ཕྱིར་བསྡུས་དབུལ་བ་ནི། །ཕྱག་རྒྱ་བཞི་ནི་ཤེས་པར་བྱ། །ཡོན་ཏན་ལྷ་མོའི་མཆོད་པ་ནི། །སྤོས་ཀྱི་སྤྲིན་ལྡིང་བདུག་པ་མོ། །རྒྱལ་བའི་དཀྱིལ་འཁོར་བདུག་པས་འགེངས། །བྱམས་པའི་ཐབས་དང་ཤེས་རབ་ལ། །བཛྲ་དྷཱུ་པེ་མཆོད་པར་རོལ། །ཨོཾ་བཛྲ་དྷཱུ་པེ་དྷཱུ། ཨུཏྤལ་མཐིང་ག་མེ་ཏོག་འཐོར། །ཟླ་གམ་རིན་ཆེན་འཕྲོ་འདུར་གསལ། །སྙིང་རྗེའི་ཐབས་དང་ཤེས་རབ་ལ། །བཛྲ་པུཥ྇་མཆོད་པར་རོལ། །ཨོཾ་པུཥ྇་པུ། དབང་གི་ཕྱག་ན་སྒྲོན་མེ་བསྣམས། །ཆོས་ཀྱི་རྒྱལ་མཚན་འབར་བ་འཛིན། །དགའ་བའི་ཐབས་དང་ཤེས་རབ་ལ། །བཛྲ་ཨཱ་ལོ་ཀེ་མཆོད་པར་རོལ། །ཨོཾ་བཛྲ་ཨཱ་ལོ་ཀེ་ཧྲཱྀཿ། ཙནྡན་བདུད་རྩིའི་ཆར་འབེབས་མ། །དཀྱིལ་འཁོར་གསང་བའི་ཐིག་ལེར་དབེན། །བཏང་སྙོམས་ཐབས་དང་ཤེས་རབ་ལ། །བཛྲ་གནྡྷེའི་མཆོད་པར་རོལ། །བཛྲ་གནྡྷེ་ག་ན། ཕྱི་ཡི་མཆོད་པའི་རྣམ་པ་ནི། །ཚད་མེད་བཞི་དང་རྣམ་པར་སྦྱོར། །སྟབས་དང་གར་བྱེད་གླུ་དབྱངས་ལེན། །དཀྱིལ་འཁོར་ཀུན་ལ་མཆོད་པར་འབུལ། །ཨོཾ་ན་མཿསརྦ་ཏ་ཐཱ་ག་ཏ་དྷཱུ་པེ་པུཥ྇་ཨཱ་ལོ་ཀེ་གནྡྷེ་པུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། སྡུག་པ་སྒེག་མོ་རྡོ་རྗེའི་སྤྱན། །སེམས་དཔའ་སྔོན་མོའི་ཡེ་ཤེས་འབེབས། །མེ་ལོང་ལྟ་བུའི་ཡེ་ཤེས་ལ། །བཛྲ་ལཱ་སྱེ་མཆོད་པར་རོལ། །ཨོཾ་བཛྲ་ལཱ་སྱེ་ཧཱུཾ། ཡིད་བཞིན་རིན་ཆེན་གཙུག་ཕྲེང་མ། །འཇམ་དཔལ་རྣོན་པོའི་དངོས་གྲུབ་འཛིན། །བཛྲ་མཱ་ལེ་མཆོད་པར་རོལ། །ཨོཾ་བཛྲ་མཱ་ལེ་ཏྲཱཾ། པདྨ་དབྱངས་མཁན་རྨ་བྱའི་མགྲིན། །སྤྱན་རས་གཟིགས་དབང་དངོས་གྲུབ་འཛིན། །སོ་སོར་རྟོག་པའི་ཡེ་ཤེས་ལ། །བཛྲ་གཱི་ཏཱིའི་མཆོད་པར་རོལ། །ཨོཾ་བཛྲ་གཱི་ཏཱི་ཧྲཱྀཿ། གར་མཁན་འགྱིང་བ་གཟི་ལྡན་མ། །ལས་ཀྱི་འཁོར་ལོ་རྣམ་པར་འཇོམས། །བྱ་བ་ནན་ཏན་ཡེ་ཤེས་ལ། །བཛྲ་ནཱིརྟི་མཆོད་པར་རོལ། །བཛྲ་ནཱིརྟི་ཨ། ནང་གི་མཆོད་པ་དམ་པ་ནི། །ཡེ་ཤེས་བཞི་དང་མཉམ་པར་སྦྱོར། །རྐང་སྟབས་ལག་གར་གླུ་དབྱངས་ལེན། །དཀྱིལ་འཁོར་ལྷ་ལ་མཆོད་པར་
འབུལ། །ཨོཾ་ན་མཿསརྦ་ཏ་ཐཱ་ག་ཏ་ལཱ་སྱེ་གཱི་ཏཱི་ནིརྟི་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། ཡན་ལག་ཀུན་འབྱུང་བདུད་རྩི་ནི། །མཆོད་པའི་ཕྱག་རྒྱ་ཆེན་པོ་ནི། །སེམས་ཀྱི་ཡིད་བཞིན་སྤྲིན་ཚོགས་ཀྱིས། །ཕྱོགས་བཅུ་ཐམས་ཅད་སངས་རྒྱས་ཞིང་། །མཉེན་འཇམ་རེག་ན་བདེ་བ་ཡི། །སྣ་ཚོགས་རིན་པོ་ཆེ་ཡི་གཞི། །མཛེས་པར་བྲིས་ཤིང་སྤྲས་པ་དང་། །ཀུན་འབྱུང་རིན་ཆེན་ཕུང་པོར་འབར། །ཏྲཱཾ།དབྱིབས་ལེགས་རྫིང་བུ་རོ་མཆོག་བསིལ། །ཁཾ། བྷྲཱུཾ་རིན་ཆེན་ཁང་པ་སྣ་ཚོགས་དང་། །རྒྱན་དང་དཔག་བསམ་ལྗོན་པའི་ཚལ། །ཧྲཱྀཿ། གླུ་དབྱངས་ཚིགས་སུ་བཅད་པའི་སྒྲ། །ཏྲཱཾ། བླ་རེ་རྒྱལ་མཚན་ན་བཟའ་གདུགས། །དོ་ཤལ་དཔུང་རྒྱན་སེ་མོ་དོ། །ཨ། བཟའ་དང་བཏུང་བའི་མཆོག་རྣམས་དང་། །རང་ལ་མཛེས་པར་བརྒྱན་པ་ཡི། །ལྷ་དང་ལྷ་མོ་རྡུལ་སྙེད་ཀྱིས། །བྲོ་གར་གླུ་ཚིག་བསམ་ཡས་ཀྱིས། །ཕྱོགས་བཅུ་ནམ་མཁའི་ཁམས་བཀང་ནས། །དཀྱིལ་འཁོར་ཀུན་ལ་རྒྱས་པར་འབུལ། །མ་བྷྲཱུཾ་ཏྲཱཾ་ཧྲཱྀཿཨ། ཨོཾ་ན་མོ་རཏྣ་ཏྲ་ཡཱ་ཡ། ན་མོ་བྷ་ག་ཝ་ཏེ་བཛྲ་སཱ་ར་པྲ་མ་རྡ་ནེ། ཏ་ཐཱ་ག་ཏཱ་ཡ། ཨཪྷ་ཏེ། སམྱཀྶཾ་བུདྡྷཱ་ཡ། ཏདྱ་ཐཱ།ཨོཾ་བཛྲེ་བཛྲེ། མ་ཧཱ་བཛྲེ། མ་ཧཱ་ཏེ་ཛ་བཛྲེ། མ་ཧཱ་བིདྱཱ་བཛྲེ། མ་ཧཱ་བོ་དྷི་ཙིཏྟ་བཛྲེ། མ་ཧཱ་བོ་དྷི་མཎྜོ་པ་སཾ་ཀྲ་མ་ཎ་བཛྲེ། སརྦ་ཀརྨ་ཨཱ་བ་ར་ན་བི་ཤོ་དྷ་ནི་བཛྲེ་སྭཱ་ཧཱ། གཞལ་མེད་རྒྱན་རྣམས་ཕུན་སུམ་ཚོགས། །ཀུ་རྩི་དང་ནི་གསན་འགག་དང་། །དར་དིར་དང་ནི་སིལ་སྙན་དང་། །ཡོ་བྱད་དང་ནི་ཏིང་འཛིན་དང་། །ལག་སྟོངས་ཕྱག་རྒྱ་མཐུན་པར་བྱ། །ལག་གཉིས་སིལ་སྙན་བརྡུང་བ་དང་། །དུང་དང་གླིང་བུ་འབུད་པ་དང་། །ལག་པ་གཉིས་ནི་རྔ་ཡབ་གཡབ། །བསིལ་ཡབ་ཚུལ་གྱིས་བསིལ་ཡབ་དང་། །ཁུ་ཚུར་གཉིས་ནི་རྒྱལ་མཚན་བྱ། །འབྱོན་ཚུལ་བསྐྱོད་པས་བ་དན་འཕྱང་། །ཚོན་འགྱེ་ཚེ་ན་ལྕུག་ཕྲན་ལྟར། །བསྐྱོད་ཅིང་མཚོན་ཕྱེ་ཕྲེང་བ་འགྱེད། །ལག་གཡོན་སྣོད་ཀྱི་ཚུལ་བྱས་པ། །གཡས་པ་ཡི་ནི་ལྷ་བཤོས་དབུལ། །ལག་པ་བླ་འོག་གཉིས་བཞག་སྟེ། །ཁང་པ་བརྩེགས་པར་བཞུགས་གནས་བྱ། །གོས་ཀྱི་ཚུལ་གྱིས་གོས་རྣམས་དང་། །གདུ་བུ་དོ་ཤལ་དཔུང་རྒྱན་དང་། །རྣ་ཆ་ཁམས་ལྔ་རྣམས་སུ་བཞག །དེ་དག་
གདུགས་ཀྱི་ཚུལ་བྱས་ལ། །ལྷ་རྫས་གདུགས་ནི་ལེགས་པར་གཟུག །བསམ་གཏན་ཚུལ་གྱི་ལག་པ་དག །ནམ་མཁའ་ལ་ནི་མཛེས་བསྐོར་ཞིང་། །སངས་རྒྱས་ཞིང་རབ་འགེངས་བྱེད་པའི། །བླ་རེ་རྣམ་པ་སྣ་ཚོགས་བྱུང་། །སོར་མོ་གར་གྱི་ཕྲེང་བ་ལས། །བསྐྱོད་པས་རིན་ཆེན་འཕན་རྣམས་གདགས། །གར་གྱི་ཕྲེང་བ་སྣ་ཚོགས་ཀྱིས། །གྲྭར་ནི་པདྨའི་ཕྲེང་བ་བྲི། །ལག་པ་དྲིལ་བུའི་ཚུལ་བྱས་ལ། །དྲིལ་བུ་གཡེར་ཁའི་དྲ་བས་བརྒྱན། །གསང་སྔགས་འདི་ཡི་ཆོ་ག་བཞིན། །རྡོ་རྗེ་དྲིལ་བུ་གསིལ་བ་དང་། །སྒོ་འཕར་དག་ཀྱང་དབྱེ་བར་བྱ། །ཨོཾ་བཛྲ་གྷཎྜ་ར་ཎི་ཏ། པྲ་ར་ཎི་ཏ། སཾ་པྲ་ར་ཎི་ཏ། སརྦ་བུཌྜྷ་ཀྵེ་ཏྲ་པྲ་ཙ་ལི་ནི། པྲཛྙཱ་པ་རཱ་མི་ཏཱ་ནཱ་ད་སམྦྷ་ཝེ། བཛྲ་དྷརྨ་ཧྲྀ་ད་ཡ། སནྟོ་ཥ་ནི་ཧཱུཾ། དེ་ལ་སྒོ་འཕར་དབྱེ་བའི་བྱ། །ཕྱག་རྒྱ་མཛུབ་མོས་མདུད་པ་དགྲོལ། །དེ་ནས་མཆོད་པ་ཀུན་འབྱུང་གི། །ཕྱག་རྒྱ་བཅའ་བ་འདི་ལྟ་སྟེ། །གཡོན་གྱི་མཐེབ་མཛུབ་ཁོ་རང་གི། །གཡས་ཀྱི་སྦོམ་པོ་གཞུག་པར་བྱ། །བདག་ཉིད་བྱང་ཆུབ་སེམས་བསྒོམས་ལ། །ཀུན་འབྱུང་མཆོད་པ་སྔགས་འདི་འབུལ། །ཨོཾ་ཨ་ནུཏྟ་ར་སརྦ་པཱུ་ཛ་མེ་གྷ། ཨུདྒ་ཏེ་སྥ་ར་ཎ་ཨི་མཾ་ག་ག་ན་ཧཱུཾ་སྭཱ་ཧཱ། མཆོད་པ་སྤྲིན་གྱི་ཕྱག་རྒྱ་ནི། །རང་གི་ལག་པ་བླ་ས་འོག །སྤྲིན་ལྟར་བཏང་ངོ་མཆོད་པར་བྱ། །སྤྲིན་བཀོད་ཡོངས་སུ་བསྔོ་བར་བྱའོ། །དེ་ནས་འཁོར་ལོས་སྒྱུར་བ་ཡི། །རྒྱལ་སྲིད་དག་གི་མཆོད་པ་ནི། །ཞིང་འདི་རིན་ཆེན་སྣ་བདུན་གྱིས། །མཁས་པ་རྣམས་ཀྱིས་ཡོངས་བསྐངས་ལ། །དངོས་གྲུབ་འབྲས་བུ་བསྒྲུབ་པའི་ཕྱིར། །ཉིན་རེ་ཤེས་རབ་ཅན་གྱིས་དབུལ། །ཏྲཾ་རཏྣ་པཱུ་ཛ་བཛྲ་སྭ་བྷཱ་ཝ་ཨཱདྨ་ཀོ྅ཧཾ། བརྗོད་པས་འཁོར་ལོ་རིན་པོ་ཆེ། །རྟ་མཆོག་གླང་པོ་བཙུན་མོ་དང་། །བློན་པོ་ནོར་བུ་གྲངས་མེད་པས། །བདག་ཉིད་འཁོར་ལོས་སྒྱུར་རྒྱལ་བསྒོམ། །རྒྱལ་སྲིད་ཕངས་པ་མེད་པར་དབུལ། །སྐུ་གསུང་ཐུགས་དང་ཡོན་ཏན་དང་། །ཕྲིན་ལས་ལྔ་ཡི་མཆོད་པ་ནི། །སྲིད་གསུམ་སེམས་ཅན་ཐམས་ཅད་ཀྱི། །དགེ་དང་སྡིག་པའི་ལས་སྤྱད་པས། །ཐམས་ཅད་སངས་རྒྱས་མཛད་སྤྱོད་དེ། །ལས་
ཀྱི་མཆོད་པར་བཞེས་སུ་གསོལ། །ཨོཾ་སརྦ་ཏ་ཐཱ་ག་ཏ་ཀརྨ་པཱུ་ཛ་ཧཱུཾ། སྲིད་གསུམ་སེམས་ཅན་ཐམས་ཅད་ཀྱི། །གཟུགས་ལ་སོགས་པ་འདོད་རྣམས་དང་། །ཆགས་ལས་གྱུར་པའི་བདེ་བ་དེ། །སངས་རྒྱས་རྣམས་ལ་ཕུལ་གྱུར་ནས། །རྡོ་རྗེ་རིན་ཆེན་འདྲ་བར་འགྱུར། །ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་ཏ་པཱུ་ཛ་ཧཱུཾ། ནམ་མཁའི་མཐའ་ཀླས་འཇིག་རྟེན་ན། །སྣང་ཞིང་སྲིད་པའི་གཟུགས་རྣམས་ཀུན། །ཕྱག་རྒྱ་སྣ་ཚོགས་དཀྱིལ་འཁོར་ལ། །སྐུ་མཆོག་ཕྱག་རྒྱའི་མཆོད་པར་བཞེས། །ཨོཾ་སརྦ་ཏ་ཐཱ་ག་ཏ་ཀཱ་ཡ་པཱུ་ཛ་ཧཱུཾ། ནམ་མཁའི་མཐའ་ཀླས་འཇིག་རྟེན་ན། །སྒྲར་གྲགས་པ་ནི་ཇི་སྙེད་རྣམས། །ཐམས་ཅད་མ་ལུས་སྔགས་ཀྱི་ཚིག །གསུང་མཆོག་ཆོས་ཀྱི་མཆོད་པར་བཞེས། །ཨོཾ་སརྦ་ཏ་ཐཱ་ག་ཏ་ཝཱ་ཀ་པཱུ་ཛ་ཧཱུཾ།ནམ་མཁའི་མཐའ་ཀླས་འཇིག་རྟེན་ན། །སེམས་ཅན་རྣམས་ཀྱི་སེམས་རྟོག་རྣམས། །ཏིང་འཛིན་འབུམ་ཕྲག་སྣ་ཚོགས་ལ། །དམིགས་པས་དམ་ཚིག་མཆོད་པར་བཞེས། །ཨོཾ་སརྦ་ཏ་ཐཱ་ག་ཏ་ས་མ་དྷཱི་པཱུ་ཛ་ཧཱུཾ། ཕྱག་རྒྱ་བཞི་དང་མཉམ་སྦྱོར་ན། །ལས་དང་རིན་ཆེན་གཅིག་ཏུ་བསྡུ། །ཉོན་མོངས་ལྔ་ཡི་མཆོད་པ་ནི། །སྲིད་གསུམ་སེམས་ཅན་ཐམས་ཅད་ཀྱི། །འདོད་ཆགས་སྤྱོད་པའི་ལས་རྣམས་ཀུན། །ཐམས་ཅད་ཡབ་ཡུམ་གཉིས་མེད་སྦྱོར། །སྦྱོར་བའི་མཆོད་པར་བཞེས་སུ་གསོལ། །སྲིད་གསུམ་སེམས་ཅན་ཐམས་ཅད་ཀྱི། །ཞེ་སྡང་སྤྱོད་པའི་ལས་རྣམས་ཀུན། །རྡོ་རྗེ་རིགས་ཀྱི་མཛད་སྤྱོད་དེ། །སྒྲོལ་བའི་མཆོད་པར་བཞེས་སུ་གསོལ། །སྲིད་གསུམ་སེམས་ཅན་ཐམས་ཅད་ཀྱི། །གཏི་མུག་སྤྱོད་པའི་ལས་རྣམས་ཀུན། །བདེ་གཤེགས་རིགས་ཀྱི་མཛད་སྤྱོད་དེ། །རྟོག་མེད་མཆོད་པར་བཞེས་སུ་གསོལ། །སྲིད་གསུམ་སེམས་ཅན་ཐམས་ཅད་ཀྱི། །ང་རྒྱལ་སྤྱོད་པའི་ལས་རྣམས་ཀུན། །རིན་ཆེན་རིགས་ཀྱི་མཛད་སྤྱོད་དེ། །ཏིང་འཛིན་མཆོད་པར་བཞེས་སུ་གསོལ། །སྲིད་གསུམ་སེམས་ཅན་ཐམས་ཅད་ཀྱི། །ཕྲག་དོག་སྤྱོད་པའི་ལས་རྣམས་ཀུན། །ལས་ཀྱི་རིགས་ཀྱི་མཛད་སྤྱོད་
དེ། །དམ་ཚིག་མཆོད་པར་བཞེས་སུ་གསོལ། །ཨོཾ་མུ་ནུ་ཧ་ལ་པཉྩ་པཱུ་ཛ་སྭཱ་ཧཱ། དེ་ནས་ཕྱག་རྒྱ་དྲུག་ལས་ནི། །འདོད་ཡོན་ལྔ་རྣམས་དབུལ་བར་བྱ། །མདོ་དང་རྒྱས་དང་བསྡུས་པར་ནི། །རིམ་པ་བཞིན་དུ་དབུལ་བར་བྱ། །ཏིང་འཛིན་བདུག་པ་རྣམ་གྲོལ་མེ་ཏོག་འཕྲོ། །ཤེས་རབ་མར་མེ་དྲི་ཆུ་ཚུལ་ཁྲིམས་དང་། །བདུད་རྩི་མྱ་ངན་འདས་མཆོག་རོ་ཡི་བཅུད། །ཨོཾ་དྷཱུ་པེ་པུཥ྇་ཨཱ་ལོ་ཀེ་གནྡྷེ་ནཻ་ཝི་དྱཱ་ཧཱུཾ། ཆོས་ཉིད་རང་བཞིན་དག་པར་ནི། །དྲི་མའི་མཚན་མ་མི་མངའ་ཡང་། །འཇིག་རྟེན་སྲི་ཞུའི་ཚུལ་གྱིས་སུ། །ཕྱག་དང་ཞབས་ནི་བསིལ་མཛད་ནས། །རྡོ་རྗེའི་གདན་ལ་བཞུགས་སུ་གསོལ། །ཨོཾ་བཛྲ་ཨཱ་ཧ་ར་པཱུ་ཛ་མེ་གྷ་ས་མ་ཡེ་ཧཱུཾ། དེ་ནས་ཨརྒྷཾ་བཞུགས་སུ་གསོལ། །དེ་ནས་བདུག་སྤོས་དབུལ་བ་ནི། །ཏིང་འཛིན་མཆོག་གི་རང་བཞིན་ལས། །དྲི་ཡི་བདུག་པའི་ལྷ་རྫས་འདི། །བདག་གིས་དད་པས་འབུལ་ལགས་ཀྱི། །བཞེས་ཏེ་དངོས་གྲུབ་སྩལ་དུ་གསོལ། །ཨོཾ་སརྦ་ཏ་ཐཱ་ག་ཏ་དྷཱུ་པེ་པཱུ་ཛ་ཡ་སྥ་ར་ཎ་ས་མ་ཡེ་ཧཱུཾ། དེ་ནས་མེ་ཏོག་དབུལ་བ་ནི། །བྱང་ཆུབ་ཡན་ལག་མཆོག་གི་རྒྱན། །ཁ་དོག་དབྱིབས་ལེགས་མེ་ཏོག་འདི། །བདག་གིས་དད་པས་འབུལ་ལགས་ཀྱི། །བཞེས་ཏེ་གྲུབ་མཆོག་སྩལ་དུ་གསོལ། །ཨོཾ་སརྦ་ཏ་ཐཱ་ག་ཏ་བཛྲ་པུཥ྇་པཱུ་ཛ་ཡ་སྥ་ར་ཎ་ས་མ་ཡེ་ཧཱུཾ། དེ་ནས་མར་མེ་དབུལ་བ་ནི། །ཤེས་རབ་མཆོག་གི་རང་བཞིན་ལས། །སྣང་ཞིང་གསལ་བའི་ཞུན་མར་འདི། །བདག་གིས་དད་པས་འབུལ་ལགས་ཀྱི། །བཞེས་ཏེ་གྲུབ་མཆོག་སྩལ་དུ་གསོལ། །ཨོཾ་སརྦ་ཏ་ཐཱ་ག་ཏ་བཛྲ་ཨཱ་ལོ་ཀེ་པཱུ་ཛ་ཡ་སྥ་ར་ཎ་ས་མ་ཡེ་ཧཱུཾ། དེ་ནས་དྲི་ཆབ་དབུལ་བ་ནི། །རྣམ་དག་ཚུལ་ཁྲིམས་རང་བཞིན་ལས། །ཁྲུས་ཀྱི་ཡོན་མཆོག་དྲི་འདི་དག །བདག་གིས་དད་པས་འབུལ་ལགས་ཀྱི། །ཐུགས་རྗེས་དགོངས་ནས་བཞེས་སུ་གསོལ། །ཨོཾ་སརྦ་ཏ་ཐཱ་ག་ཏ་བཛྲ་གནྡྷེ་པཱུ་ཛ་ལ་སྥ་ར་ཎ་ས་མ་ཡེ་ཧཱུཾ། དེ་ནས་ལྷ་བཤོས་དབུལ་བ་ནི། །མྱ་ངན་ལས་མཆོག་རང་བཞིན་ལ། །བཅུད་ལེན་བྲོ་མཆོག་ཞལ་ཟས་འདི། །བདག་གིས་དད་
པས་འབུལ་ལགས་ཀྱི། །བཞེས་ཏེ་གྲུབ་མཆོག་སྩལ་དུ་གསོལ། །ཨོཾ་སརྦ་ཏ་ཐཱ་ག་ཏ་བཛྲ་ནཻ་ཝི་དྱ་པཱུ་ཛ་ཡ་སྥ་ར་ཎ་ས་མ་ཡེ་ཧཱུཾ། གཟུགས་ལ་རྣམ་གསུམ་ཤེས་བྱས་ནས། །མཆོད་པ་བྱེད་པས་མཉེས་པར་བྱ། །དེ་ཉིད་བཅོམ་ལྡན་སྣ་ཚོགས་པ། །སངས་རྒྱས་རྣམ་པར་སྣང་མཛད་ཞི། །ཨོཾ་བཛྲ་རཱུ་པ་ཨཱཿཧཱུཾ། དྲི་ལ་རྣམ་གསུམ་ཤེས་བྱ་སྟེ། །ལྷ་རྣམས་ལ་ནི་དབུལ་བར་བྱ། །དེ་ཉིད་བཅོམ་ལྡན་སྣ་ཚོགས་པ། །སངས་རྒྱས་རིན་ཆེན་འབྱུང་གནས་གཙོ། །ཨོཾ་བཛྲ་དྷཱུ་བ་ཨཱཿཧཱུཾ།སྒྲ་ལ་རྣམ་གསུམ་ཤེས་བྱས་ནས། །སངས་རྒྱས་སོགས་ལ་དབུལ་བར་བྱ། །དེ་ཉིད་བཅོམ་ལྡན་སྣ་ཚོགས་པ། །འདོད་ཆགས་ཆོས་ཀྱི་འབྱུང་གནས་གཙོ། །ཨོཾ་བཛྲ་ཤཔྟ་ཨཱཿཧཱུཾ། རོ་ལ་རྣམ་གསུམ་ཤེས་བྱས་ནས། །ལྷ་རྣམས་ལ་ནི་དབུལ་བར་བྱ། །དེ་ཉིད་སངས་རྒྱས་སྣ་ཚོགས་པ། །སངས་རྒྱས་ཐོགས་མེད་རྡོ་རྗེ་འཛིན། །ཨོཾ་བཛྲ་བཱི་ཎི་ཨཱཿཧཱུཾ། རེག་ལ་རྣམ་གསུམ་ཤེས་བྱས་ནས། །བདག་གིས་རིགས་ལ་དབུལ་བར་བྱ། །དེ་ཉིད་བཅོམ་ལྡན་རྡོ་རྗེ་ཅན། །མི་བསྐྱོད་པ་ཡི་ཚུལ་བརྙེས་སོ། །ཨོཾ་བཛྲ་སྤཪྵེ་ཨཱཿཧཱུཾ། གཟུགས་སྒྲ་རོ་ལ་སོགས་པ་ལ། །རྟག་ཏུ་སེམས་ནི་སྦྱང་བར་བྱ། །ལྷ་ཉིད་དུ་ནི་རྟག་ཏུ་བསྒོམ། །རིགས་ཀྱི་ཚུལ་དུ་རྣམ་པར་བསྒོམ། །གཞན་ཡང་རྒྱས་པར་རབ་བྱ་སྟེ། །མཆོད་པ་དབུལ་བར་བྱ་བ་ནི། །ལག་པ་གཉིས་ནི་བསྣོལ་བྱས་ནས། །གུང་མོ་གཉིས་ནི་ནང་དུ་བཀུག །རྒྱབ་སྦྱར་མཐེ་བོང་ངོ་སྦྱར་ཏེ། །མཐེའུ་ཆུང་རྩེ་སྤྲད་གུང་མོ་ནི། །སྤྱི་བོར་བཙུགས་ལ་དབྱངས་ཀྱིས་དབུལ། །འབྱུང་བ་ཀུན་ལ་ནམ་མཁའ་ནི། །འབྱུང་བ་ཆེན་པོ་ལྔ་པོ་སྟེ། །ནམ་མཁའ་ལ་ནི་འདོད་པ་འབྱུང་། །འདོད་པའི་མཆོད་པ་གྲུབ་གྱུར་ཅིག །ཨོཾ་སརྦ་ཏ་ཐཱ་ག་ཏ་ག་ག་ན་པཱུ་ཛ་བཛྲ་སྭ་བྷ་ཝ་ཨཱདྨ་ཀོ྅ཧཾ། བདག་གི་ལུས་དང་སྲིད་པ་ཡི། །ཞལ་ཟས་རྡུལ་ཕྲན་བཞིན་ལྷགས་ཏེ། །འདོད་ཡོན་ལྔ་རུ་གྱུར་པར་བསམ། །དེ་ནས་སོར་མོ་གཞན་བསྣོལ་ཏེ། །མཛུབ་མོ་མཐེ་བོང་རྩེ་སྤྲོད་དེ། །གདོང་གི་ཐད་ཀར་
ལན་གསུམ་བསྐོར། །ཧཱུཾ་གཟུགས་ནི་ལག་གཉིས་མེ་ལོང་འཛིན། །གཟུགས་མཛེས་སྤྱོད་པས་ཕྱོགས་བཅུར་གཡོ། །ཤིན་ཏུ་སྒེག་པའི་གཟི་བརྗིད་འབར། །གཟུགས་ཀྱི་ལྷ་མོ་སྤྱན་ལ་ཐིམ། །ཨོཾ་མོ་ཧ་ར་ཏི་ཨོཾ། རང་གཟུགས་དམ་ཚིག་དག་གིས་མཆོད། །དེ་འོག་སོར་མོ་གཞན་བསྣོལ་ལ། །མཛུབ་མོ་གཉིས་ནི་རྩེ་སྤྲད་ལ། །ཚིགས་པ་དང་པོ་ནང་དུ་བཅག །མཐེ་བོང་གཉིས་གཞིབས་ཚོགས་མར་བཀན། །དཔྲལ་བའི་ཐད་ཀར་བསྣོལ་ནས་བཅའོ། །སྒྲ་ཡི་ལག་གཉིས་པི་ཝང་སྟེ། །བདེ་བའི་སྒྲ་སྙན་ཕྱོགས་བཅུར་སྒྲོགས། །དབྱངས་ལྡན་ཡིད་འོང་གཟི་ལྡན་འབར། །སྒྲ་ཡི་ལྷ་མོ་སྙན་ལ་ཐིམ། །ཨོཾ་རཏྣ་ར་ཏི་ཏྲཱཾ། རང་སྒྲའི་དམ་ཚིག་མཆོད་པར་བསམ། །དེ་འོག་སོར་མོ་གཞན་བསྣོལ་ལ། །མཛུབ་མོ་གཉིས་ནི་སོ་སོར་བསྒྲེང་། །བར་མའི་ཚིགས་གཉིས་ཡིད་ཙམ་བཀུག །མཐེ་བོང་གཉིས་གཞིབས་རབ་ཏུ་བསྒྲེང་། །དྲི་ནི་ལག་གཉིས་སྤོས་བསྣམས་ཏེ། །སྤོས་ཀྱི་སྤྲིན་ལྡིང་བདུག་པ་མོ། །ཀུན་ཏུ་ཚིམས་བྱེད་དྲི་བསུང་ཐིམ། །དྲི་ཡི་ལྷ་མོ་ཤངས་ལ་ཐིམ། །ཨོཾ་ར་ཏི་བཛྲ་ཨཱཿ། རང་དྲི་དམ་ཚིག་མཆོད་པར་བསམ། །དེ་ནས་ལག་པ་གཉིས་བསྣོལ་ཏེ། །མཛུབ་མོ་གཉིས་ནི་སོ་སོར་བསྣོལ། །ཚིགས་བཀུག་པདྨོ་འདྲ་བར་བྱ། །མཐེ་བོང་གཉིས་བསྣོལ་མཛུབ་མོ་གཉིས། །དྲུང་དུ་བཙུགས་ཏེ་ཁ་ཐད་བསྐོར། །རོ་ནི་ལག་གཉིས་སྣོད་བསྣམས་ཏེ། །བཅུད་ལེན་བྲོ་མཆོག་ལྔ་བརྒྱར་འཕྲོ། །བདུད་རྩི་བསིལ་དྲོ་འཇམ་པའི་དབྱངས། །རོ་ཡི་ལྷ་མོ་ལྗགས་ལ་ཐིམ། །ཨོཾ་ཨཱརྱ་ད་ར་ཧྲི། རང་རོ་དམ་ཚིག་མཆོད་པར་བསམ། །དེ་འོག་སོར་མོ་གཞན་བསྣོལ་ལ། །གུང་གཉིས་གཞིབས་བསྒྲེང་སྙིང་གར་བསྐོར། །རེག་ནི་རྡོ་རྗེ་ཡོངས་འཁྱུད་མ། །མཉེན་འཇམ་རེག་བདེ་འཁྲིལ་ཁྱབ་སྦྱོར། །ཀུན་ཏུ་སྦྱོར་བའི་བདེ་བ་དེ། །རེག་གི་ལྷ་མོ་སྐུ་ལ་ཐིམ། །ཨོཾ་དྭེ་ཥ་ར་ཏི་ཧཱུཾ།རང་རེག་དམ་ཚིག་མཆོད་པར་བསམ། །འདོད་པའི་ཡོན་ཏན་དྲུག་རྣམས་ཀྱིས། །མཆོད་ན་སངས་རྒྱས་སྲས་བཅས་མཉེས། །དེ་ནས་ནན་ཏན་སྦྱོར་སྒྲོལ་བའི། །མཆོད་པ་དམ་
པ་དབུལ་བར་བྱ། །རིགས་ལྔ་སོ་སོའི་བསྙེན་པ་ནི། །ཕྲེང་བ་འདྲེན་པའི་ཚུལ་བསྐོར་ཞིང་། །ཆོ་ག་རྣམ་གསུམ་ཚུལ་ཚོགས་ནས། །ཐབས་དང་ཤེས་རབ་གཉིས་མེད་པའི། །གསང་བའི་མཆོད་པ་བདེ་བཞིར་རོལ། །སྲིད་གསུམ་སེམས་ཅན་ཐམས་ཅད་ཀྱི། །སེམས་ཀུན་ཡུམ་གྱི་མཁའ་ལ་བསྡུ། །ཡབ་ཡུམ་བྱང་སེམས་དབང་བསྐུར་ནས། །ཀུན་ཏུ་འོད་ཀྱི་སར་བཀོད་དེ། །ལོངས་སྤྱོད་རྫོགས་པའི་སྐུར་བསྒྲལ་ནས། །སྲིད་པའི་འཁོར་བ་ཀུན་སྟོངས་པས། །སྲིད་པའི་སེམས་ཅན་མ་ལུས་ཀུན། །བདག་སྲས་སངས་རྒྱས་རིགས་ལྔར་བསྐྱེད། །སྦྱོར་བའི་མཆོད་པ་འདི་སྐད་འབུལ། །ཐབས་དང་ཤེས་རབ་མཉམ་པའི་ངང་ཉིད་ལས། །བྱང་ཆུབ་སེམས་སྤྲིན་སྒྲོལ་མར་འཕྲོས་པ་ལས། །སངས་རྒྱས་བྱང་ཆུབ་ཉན་ཐོས་རང་རྒྱལ་དང་། །བདུད་དང་མུ་སྟེགས་འགྲོ་བ་མཐའ་དག་ནི། །བསྡུས་ནས་མཁའ་དབྱིངས་གསང་བའི་དབང་བསྐུར་ཏེ། །སྐུ་གསུམ་ས་ལ་བཀོད་པ་མཉེས་པའི་མཆོད་པ་ཡིན། །ཨོཾ་སརྦ་ཏ་ཐཱ་ག་ཏ་པཱུ་ཛ་བཛྲ་སྭ་བྷ་ཝ་ཨཱདྨ་ཀོ྅ཧཾ། ཨོཾ་བདེ་ཆེན་ཡུམ་གྱི་བྷ་ག་རུ། །ཁམས་གསུམ་སེམས་ཅན་མ་ལུས་པ། །འདོད་ཁམས་འགྲོ་དྲུག་ཡི་གེར་ཐིམ། །གཟུགས་ཁམས་བསམ་གཏན་ཨོཾ་ལ་ཐིམ། །གཟུགས་མེད་ཤེས་རབ་ཨ་ལ་ཐིམ། །སྐུ་གསུམ་འབྲུ་གསུམ་ཉིད་ལ་ཐིམ། །འཁོར་འདས་བདེ་བ་ཆེན་པོའི་ཞིང་། །མཉེས་པའི་མཆོད་པར་བཞེས་སུ་གསོལ། །བོ་དྷི་ཙིཏྟ་པཱུ་ཛཱ་ཡ་པཱུ་ཛཱ་ཡ་ཧཱུཾ། བདག་གི་ལུས་ལས་བྱུང་བ་ཡི། །ཕྱིར་ལྡང་ཨོཾ་ལས་འདོད་ཡོན་མཆོད། །ནང་འཇུག་ཧཱུཾ་གི་དངོས་གྲུབ་ལེན། །ཁོང་གནས་ཨ་ཡིས་ཆོས་སྐུར་རྟོགས། །འབྲུ་གསུམ་སྐུ་གསུང་ཐུགས་སུ་བསྒྲལ། །སྒྲོལ་བའི་མཆོད་པར་བཞེས་སུ་གསོལ། །ཏ་ན་བ་དྷི་ཏི་པཱུ་ཛཱ་ཡ་པཱུ་ཛཱ་ཡ་ཧཱུཾ། ལས་དང་མཆོད་པ་ལན་རེ་རེ། །སྒྲོལ་སྦྱོར་མཆོད་པ་ལྔ་ཞེས་བྱ། །རྫོགས་ནས་འཁོར་གྱི་ལྷ་མོ་དང་། །སེམས་དཔའ་རྣམས་ཀྱང་དེ་བཞིན་བསྙེན། །དེ་ནས་ཐབས་དང་ཤེས་རབ་ཀྱི། །གསང་བའི་མཆོད་པས་མཆོད་པར་བྱ། །ཐམས་
ཅད་ལས་བྱེད་སྔགས་རྣམས་ལ། །གདོན་མི་ཟ་བའི་བཀའ་བསྒོ་ནས། །ལས་དང་མཆོད་པའི་དུས་སུ་ནི། །ལས་དང་མཆོད་པའི་དུས་འགྲུབ་ཕྱིར། །ལྕེ་ཐོག་རྡོ་རྗེ་རྒྱ་གྲམ་བསྒོམ། །དཀྱིལ་དུ་ཡི་གེ་ཧ་བཀོད་ལ། །མཐར་ནི་སྔགས་ཆར་ཡིག་འབྲུ་ནི། །ན་མོ་བུཌྜྷ་སརྦ་བུདྡྷེ་བྷྱཿ། བཀོད་ནས་བསྒོམ་པར་བྱ་བ་སྟེ། །ལས་དང་མཆོད་པ་མ་ལུས་པ། །ལུས་པ་མེད་པར་ཐམས་ཅད་འགྲུབ། །ཐབས་ཀྱི་རྡོ་རྗེ་ཆེན་པོ་དང་། །ཤེས་རབ་པདྨར་རབ་སྦྱར་བས། །བྱང་ཆུབ་སེམས་ཀྱི་རང་བཞིན་ནི། །བདེ་བའི་བསྙེན་པ་མཆོག་བདེ་ཉེ། །བདེ་བྲལ་སྒྲུབ་དང་ལྷན་སྐྱེས་ཆེ། །ཐབས་དང་ཤེས་རབ་གསང་བ་ཡི། །མཆོད་པ་དམ་པ་དབུལ་བ་ནི། །ཐབས་ཀྱི་སྙིང་རྗེ་ཆེན་པོ་ཡིས། །སེམས་ཅན་མ་ལུས་དོན་དུ་དབུལ། །ཤེས་རབ་སྟོང་པ་ཆེན་པོ་ཡིས། །ཆོས་རྣམས་རང་བཞིན་རྟོགས་པར་འབུལ། །སངས་རྒྱས་མཆོད་པས་མཉེས་གྱུར་ཅིག །ཨོཾ་སརྦ་པཱུ་ཛ་མེ་གྷ་པཱུ་ཛཱ་ཡ་པཱུ་ཛཱ་ཡ་ཧཱུཾ། དེ་ནས་བདུད་རྩི་སྨན་གྱི་ནི། །མཆོད་པ་དམ་པ་དབུལ་བར་བྱ། །རང་བྱུང་གདོད་ནས་དག་པ་ཡི། །རྩ་བརྒྱད་སྟོང་ལས་སྦྱར་བའི་སྨན། །རིགས་ལྔ་དམ་ཚིག་ལྔ་ཡི་དངོས། །ཡེ་ཤེས་ལྔ་རྫོགས་གྲུབ་པའི་རྫས། །རྒྱུད་ལྔའི་སེམས་ཅན་ཀུན་སྒྲོལ་བའི། །དུག་ལྔ་སེལ་བའི་བདུད་རྩི་སྟེ། །ཐམས་ཅད་བདུད་རྩིའི་རྣལ་འབྱོར་ཆེ། །བྱང་ཆུབ་སེམས་ནི་བདུད་རྩི་ཆེ། །པདྨ་མེ་ཏོག་ཡང་དག་ལྡན། །ག་པུར་ཤེལ་གྱི་སྤོས་པོར་དྲི། །གཙང་དམེ་མེད་པའི་དྲི་མེད་ཆུ། །རིན་ཆེན་མེ་ལྟར་འབར་བའི་ཚོགས། །མ་ལུས་བསྡུས་པའི་ཐིག་ལེ་སྟེ། །གཅིག་ཏུ་དཔའ་བོའི་རོ་རྣམས་དང་། །གཉིས་སུ་མེད་པར་མཉམ་སྦྱོར་བ། །འཆི་མེད་བདུད་རྩི་ར་སཱ་ཡན། །རྒྱལ་བ་རྒྱ་མཚོ་ཀུན་གྱི་གསོས། །ཇི་སྲིད་སངས་རྒྱས་ཐམས་ཅད་དང་། །བྱང་ཆུབ་སེམས་དཔའ་ཐམས་ཅད་ཀྱི། །ཐུགས་དམ་དབྱིངས་ཉིད་སྐུལ་བའི་མཆོག །སྐུ་གསུང་ཐུགས་ཀྱི་ངང་ཉིད་འདི། །བདག་ཅག་དད་པས་འབུལ་ལགས་ནི། །བཞེས་ཏེ་ཀུན་ཏུ་དགེས་མཛོད་ལ། །ཕུལ་བས་དངོས་གྲུབ་བདག་ལ་
སྩོལ། །ཨོཾ་སརྦ་ཏ་ཐཱ་ག་ཏ་མ་ཧཱ་ཨརྒྷཾ་པྲ་ཏཱིཙྪ་ཧོ། ཤཱི་པཉྩ་ཁཱ་ཧི་ཁཱ་ཧི། རྣམ་སྣང་མི་བསྐྱོད་རིན་ཆེན་མཐའ་ཡས་གྲུབ། །དུས་གསུམ་བདེ་གཤེགས་རྒྱལ་བ་ཡབ་རྣམས་ལ། །རྣམ་དག་བདུད་རྩི་དམ་རྫས་མཉེས་མཆོད་དབུལ། །ཐུགས་རྗེས་བརྩེར་དགོངས་དབང་དང་དངོས་གྲུབ་སྩོལ། །བཟང་མོ་སྤྱན་དང་མ་མ་གོས་དཀར་སྒྲོལ། །དུས་གསུམ་བདེ་གཤེགས་རྒྱལ་བ་ཡུམ་རྣམས་ལ། །རྣམ་དག་བདུད་རྩི་དམ་རྫས་མཉེས་མཆོད་འབུལ། །ཐུགས་རྗེས་བརྩེར་དགོངས་དབང་དང་དངོས་གྲུབ་སྩོལ། །ཆོས་རྣམས་རྣམ་དག་ཡེ་ནས་ལྷུན་གྲུབ་པའི། །བྱ་བ་བྱེད་དང་ཡིད་ཆོས་རྣམ་དག་ལ། །རྣམ་དག་བདུད་རྩི་དམ་རྫས་མཉེས་མཆོད་འབུལ། །ཐུགས་རྗེས་བརྩེར་དགོངས་དབང་དང་དངོས་གྲུབ་སྩོལ། །བདེ་གཤེགས་ཡབ་ཡུམ་གཉིས་མེད་ཐུགས་ཀྱི་སྲས། །ཕྱག་རྒྱའི་ཚོགས་མཆོག་སེམས་དཔའ་བཅུ་དྲུག་ལ། །རྣམ་དག་བདུད་རྩི་དམ་རྫས་མཉེས་མཆོད་འབུལ། །ཐུགས་རྗེས་བརྩེར་དགོངས་དབང་དང་དངོས་གྲུབ་སྩོལ། །སེམས་དཔའི་ཐུགས་རྗེས་རོལ་པའི་དབྱིངས་ཕྱུག་མ། །ཤེས་རབ་སྐུ་མཆོག་སེམས་མ་བཅུ་དྲུག་ལ། །རྣམ་དག་བདུད་རྩི་དམ་རྫས་མཉེས་མཆོད་འབུལ། །ཐུགས་རྗེས་བརྩེར་དགོངས་དབང་དང་དངོས་གྲུབ་སྩོལ། །འགྲོ་བའི་དཔལ་དུ་གྱུར་པའི་བྱང་ཆུབ་སེམས། །ས་སྙིང་ལ་སོགས་སེམས་དཔའ་བརྒྱད་རྣམས་ལ། །རྣམ་དག་བདུད་རྩི་དམ་རྫས་མཉེས་མཆོད་འབུལ། །ཐུགས་རྗེས་བརྩེར་དགོངས་དབང་དང་དངོས་གྲུབ་སྩོལ། །སྒེག་མོ་ཕྲེང་བ་དབྱངས་དང་གར་ལ་སོགས། །མཛེས་པའི་སྐུ་མཆོག་སེམས་མ་བརྒྱད་རྣམས་ལ། །རྣམ་དག་བདུད་རྩི་དམ་རྫས་མཉེས་མཆོད་འབུལ། །ཐུགས་རྗེས་བརྩེར་དགོངས་དབང་དང་དངོས་གྲུབ་སྩོལ། །ཐབས་མཁས་ཐུགས་རྗེས་ཅིར་འདུལ་དེར་སྟོན་པའི། །ཐུབ་དྲུག་ལ་སོགས་སྤྲུལ་སྐུ་ཐམས་ཅད་ལ། །རྣམ་དག་བདུད་རྩི་དམ་རྫས་མཉེས་མཆོད་འབུལ། །ཐུགས་རྗེས་བརྩེར་དགོངས་དབང་དང་དངོས་གྲུབ་སྩོལ། །བསྐལ་པ་མེ་ལྟར་
འབར་བའི་ཀློང་དཀྱིལ་ན། །འཇིགས་བྱེད་ཁྲོ་བོ་ཆེན་པོ་བཞི་རྣམས་ལ། །རྣམ་དག་བདུད་རྩི་དམ་རྫས་མཉེས་མཆོད་འབུལ། །ཐུགས་རྗེས་བརྩེར་དགོངས་དབང་དང་དངོས་གྲུབ་སྩོལ། །ཁྲོ་བོའི་སྐུ་ལ་གཉིས་མེད་ལྷུན་སྦྱོར་བའི། །ཡེ་ཤེས་གཞལ་ཡས་སྒོ་མ་བཞི་རྣམས་ལ། །རྣམ་དག་བདུད་རྩི་དམ་རྫས་མཉེས་མཆོད་འབུལ། །ཐུགས་རྗེས་བརྩེར་དགོངས་དབང་དང་དངོས་གྲུབ་སྩོལ། །སྡོམ་པ་གནས་ཤིང་རིག་འཛིན་གྲུབ་པའི་ཚོགས། །ལྷ་དང་ལྷ་མོ་ཕྱོགས་བཅུའི་རྣལ་འབྱོར་ལ། །རྣམ་དག་བདུད་རྩི་དམ་རྫས་མཉེས་མཆོད་འབུལ། །ཐུགས་རྗེས་བརྩེར་དགོངས་དབང་དང་དངོས་གྲུབ་སྩོལ། །དུག་གསུམ་རྩད་གཅོད་ཁམས་གསུམ་འདྲེན་པའི་དཔལ། །རྡོ་རྗེ་སློབ་དཔོན་ཚོགས་ཀྱི་གཙོ་བོ་ལ། །རྣམ་དག་བདུད་རྩི་དམ་རྫས་མཉེས་མཆོད་འབུལ། །ཐུགས་རྗེས་བརྩེར་དགོངས་དབང་དང་དངོས་གྲུབ་སྩོལ། །ཚེ་རབས་སྔོན་ནས་ལས་ཀྱི་འཕྲོ་མཐུན་པའི། །རྒྱལ་ཐེབས་ཀར་གིང་རྡོ་རྗེ་མཆེད་ལྕམ་ལ། །རྣམ་དག་བདུད་རྩི་དམ་རྫས་མཉེས་མཆོད་འབུལ། །ཐུགས་རྗེས་བརྩེར་དགོངས་དབང་དང་དངོས་གྲུབ་སྩོལ། །འདི་དང་ཕ་རོལ་གཉིས་ཀར་མི་འབྲལ་བའི། །དམ་ཚིག་གཟུངས་ཀྱིས་ཟིན་པའི་མཆེད་ལྕམ་སྒྲུབ་ཟླ་ལ། །རྣམ་དག་བདུད་རྩི་དམ་རྫས་མཉེས་མཆོད་འབུལ། །ཐུགས་རྗེས་བརྩེར་དགོངས་དབང་དང་དངོས་གྲུབ་སྩོལ། །གཡོ་མེད་ཁྲེལ་བརྩོན་དམ་ཚིག་ལྷུར་ལེན་པའི། །སྙིང་དང་འདྲ་བའི་སློབ་མ་ལྕམ་དྲལ་ལ། །རྣམ་དག་བདུད་རྩི་དམ་རྫས་མཉེས་མཆོད་འབུལ། །ཐུགས་རྗེས་བརྩེར་དགོངས་དབང་དང་དངོས་གྲུབ་སྩོལ། །ཕྱིས་འབྱུང་ཀུན་ལ་ངས་ལུང་བསྟན། །བསྡུས་ནས་མཚན་བརྗོད་འདི་ལྟར་འབུལ། །བཅོམ་ལྡན་རྣམ་པར་སྣང་མཛད་དང་། །ཡུམ་ཆེན་སངས་རྒྱས་སྤྱན་གཉིས་ལ། །དམ་ཚིག་མཆོག་གི་མཆོད་པ་འབུལ། །ཕུལ་བའི་དངོས་གྲུབ་བདག་ལ་སྩོལ། །བཅོམ་ལྡན་རྡོ་རྗེ་སེམས་དཔའ་དང་། །ཡུམ་ཆེན་
ཀུན་ཏུ་བཟང་མོ་ལ། །དམ་ཚིག་མཆོག་གི་མཆོད་པ་འབུལ། །ཕུལ་བའི་དངོས་གྲུབ་བདག་ལ་སྩོལ། །བཅོམ་ལྡན་རིན་ཆེན་འབྱུང་ལྡན་དང་། །ཡུམ་ཆེན་རཏྣ་མཱ་མ་ཀི། །དམ་ཚིག་མཆོག་གི་མཆོད་པ་འབུལ། །ཕུལ་བའི་དངོས་གྲུབ་བདག་ལ་སྩོལ། །བཅོམ་ལྡན་སྣང་བ་མཐའ་ཡས་དང་། །ཡུམ་ཆེན་ན་བཟའ་དཀར་མོ་ལ། །དམ་ཚིག་མཆོག་གི་མཆོད་པ་འབུལ། །ཕུལ་བའི་དངོས་གྲུབ་བདག་ལ་སྩོལ། །བཅོམ་ལྡན་དོན་ཡོད་གྲུབ་པ་དང་། །ཡུམ་ཆེན་དམ་ཚིག་སྒྲོལ་མ་ལ། །དམ་ཚིག་མཆོག་གི་མཆོད་པ་འབུལ། །ཕུལ་བའི་དངོས་གྲུབ་བདག་ལ་སྩོལ། །དེ་བཞིན་ཡིད་ཆོས་ཐུབ་དྲུག་དང་། །སེམས་དཔའ་སེམས་མ་བཅུ་དྲུག་དང་། །སྒོ་བ་ཡབ་ཡུམ་ལ་སོགས་ལ། །དམ་ཚིག་མཆོག་གི་མཆོད་པ་འབུལ། །ཕུལ་བའི་དངོས་གྲུབ་བདག་ལ་སྩོལ། །དབྱིངས་ནས་བསྐུལ་བས་ཐུགས་རྗེའི་སྤྲུལ་པ་འཕྲོ། །རིགས་ཀྱི་འདུལ་བའི་ཕྲིན་ལས་སོ་སོར་མཛད། །བདེ་བ་ཆེན་པོའི་དངོས་གྲུབ་དོན་དུ་སྐོང་། །དེ་ནི་རིན་ཆེན་གསང་བའི་དངོས་གྲུབ་ཡིན། །བདེ་བ་ཆེན་པོའི་དཀྱིལ་འཁོར་ལས་བྱུང་ངོ་། །དེ་ནས་རྫས་ཀྱི་དངོས་གྲུབ་བླང་བ་ནི། །ཡེ་ཤེས་རྒྱལ་པོའི་སྐུ་གསུང་ཐུགས། །ཡོན་ཏན་ཕྲིན་ལས་རྨད་པོ་ཆེ། །དེ་ཉིད་དུ་ནི་མཉམ་སྦྱོར་བའི། །ཕྱག་རྒྱ་ཆེན་པོར་བདག་སྦྱོར་ཅིག །ལྕེ་ཡི་དམ་ཚིག་རྡོ་རྗེ་ལ། །རྡོ་རྗེ་ཅན་གྱིས་ཧཱུཾ་བསྒོམས་ཏེ། །བདུད་རྩི་ལྔ་རུ་སྦྱར་བ་འདི། །ཐོས་ན་བྱང་ཆུབ་ཐོབ་པར་འགྱུར། །ཨོཾ་ཀཱ་ཡ་སིདྡྷི་ཨོཾ། ཨཱཿབཱཀ་སིདྡྷི་ཨཱཿ། ཧཱུཾ་ཙིཏྟ་སིདྡྷི་ཧཱུཾ། དེ་ནས་ཕུང་པོ་རྣམ་ལྔ་ཡི། །མཆོད་པ་དམ་པ་འབུལ་བ་ནི། །དེ་ནས་ཡང་དག་རབ་གསལ་བ། །བུད་མེད་དག་ནི་བཞི་རྣམས་དང་། །གར་གྱི་མཆོད་པའི་ཕྱག་རྒྱ་ཡིས། །མཆོད་པ་ཐམས་ཅད་དབུལ་བར་བྱ། །རབ་ཏུ་དགའ་བའི་བདག་ལ་ཕྱག་འཚལ་ལོ། །དེ་བཞིན་གཤེགས་པའི་ཐུགས་དམ་གྲུབ་པར་མཛོད། །ཨོཾ་ཧཱུཾ། དམ་ཚིག་དམ་པ་གྲུབ་པར་མཛོད། །ཨོཾ་ཧཱུཾ། མཆོད་པ་ཆེན་པོ་ཐམས་ཅད་གསལ་བར་མཛད་དུ་གསོལ། །ཨོཾ་ཧཱུཾ། མཆོད་པ་ཆེན་པོ་དག་པར་མཛོད། །ཨོཾ་ཧཱུཾ། མཆོད་པ་ཆེན་པོ་ཐམས་ཅད་གྲུབ་པར་མཛོད། །ཨོཾ་ཧཱུཾ། མཆོད་པ་ཆེན་པོ་ཐམས་ཅད་ཉམས་སུ་བསྟར་བར་མཛོད། །ཨོཾ་ཧཱུཾ། ལྷ་མོའི་ཕྱག་རྒྱའི་གར་སྟབས་ཀྱིས། །རིམ་པ་བཞིན་དུ་དབུལ་བར་བྱ། །བདེ་བར་གཤེགས་སོ་བཅོམ་ལྡན་འདས། །བསོད་ནམས་ཅན་དུ་དེ་བདག་འགྱུར། །བྱིན་གྱི་རླབས་ཀྱིས་
བྱིན་བརླབས་ནས། །མཆོད་པ་དམ་པ་བཞེས་སུ་གསོལ། །སྤོས་ནི་ཏིང་འཛིན་ཕུང་པོའི་མཆོད་པར་འབུལ། །མེ་ཏོག་རྣམ་གྲོལ་ཕུང་པོའི་མཆོད་པར་འབུལ། །མར་མེ་ཤེས་རབ་ཕུང་པོའི་མཆོད་པར་འབུལ། །དྲི་ཆུ་ཚུལ་ཁྲིམས་ཕུང་པོའི་མཆོད་པར་འབུལ། །ལྷ་བཤོས་རྣམ་གྲོལ་ཡེ་ཤེས་ཕུང་པོའི་མཆོད་པར་འབུལ། །དེ་དག་བདག་གི་ལུས་ལས་བྱུང་། །སྨན་ནི་རྣམ་ལྔས་འཕགས་པ་མཆོད། །ནམ་མཁའི་དབྱིངས་ཀྱི་དབུས་གནས་པར། །དཀྱིལ་འཁོར་བཀོད་པ་བསྒོམ་པར་བྱ། །དེ་བཞིན་གཤེགས་ལ་བདག་གི་ལུས། །བླ་མ་བཤང་དང་གཅི་བས་མཆོད། །མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། དེ་ནས་ལྷ་རྣམས་ལུས་ལ་བཙུད། །རེག་པའི་མཆོད་པ་དམ་པ་དེ། །འཕགས་པ་རྣམས་ལ་དབུལ་བར་བྱ། །བདག་པོའི་ཕྱག་རྒྱར་མཉམ་གཞག་ལ། །འདོད་ཆགས་བློ་ཅན་སངས་རྒྱས་ཀྱི། །སངས་རྒྱས་དཀྱིལ་འཁོར་བདག་ཉིད་དུ། །རེག་པའི་སྦྱོར་བ་དབུལ་བར་བྱ། །བཛྲ་མིནྟ་སུ་ར་སྟྭཾ། པཱུ་ཛ་བཛྲ་ཞེས་དབུལ། ལུས་སྨན་དུག་གསུམ་མཆོད་པར་བྱ། །ཤ་དང་ཁྲག་དང་རུས་པ་གསུམ། །རྣལ་འབྱོར་པ་ཡིས་ལག་བྲིམས་ལ། །དུས་གསུམ་མཆོད་པར་དབུལ་བ་ནི། །འབྱུང་པོའི་ཁྲག་ནི་ཆང་བས་ཞིམ། །འདོད་ཆགས་མཆོད་པ་བླ་ན་མེད། །འདོད་ཆགས་མཆོད་པ་འདི་བཞེས་ལ། །གསུང་གི་དངོས་གྲུབ་སྩལ་དུ་གསོལ། །མ་ཧཱ་རཀྟ་ཀེཾ་ནི་རི་ཏི། འབྱུང་པོའི་རུས་པ་མར་བས་ཞིམ། །ཞེ་སྡང་མཆོད་པ་བླ་ན་མེད། །ཞེ་སྡང་མཆོད་པ་འདི་བཞེས་ལ། །ཐུགས་ཀྱི་དངོས་གྲུབ་སྩལ་དུ་གསོལ། །མ་ཧཱ་རཀྟ་ཀེང་ནི་རི་ཏི་ཛྭ་ལ་མཎྜ་ལ་ཁ་རཾ་ཁཱ་ཧི། འབྱུང་པོའི་ཤ་ནི་ཟན་པས་ཞིམ། །གཏི་མུག་མཆོད་པ་བླ་ན་མེད། །གཏི་མུག་མཆོད་པ་འདི་བཞེས་ལ། །སྐུ་ཡི་དངོས་གྲུབ་སྩལ་དུ་གསོལ། །མ་ཧཱ་ཏིཀྵྞ་ཁ་རཾ་ཁཱ་ཧི། དཔལ་ཆེན་འཁོར་བཅས་ཁྲག་ལ་སྤྱོན། །དཔལ་ཆེན་འཁོར་བཅས་རུས་ལ་སྤྱོན། །དཔལ་ཆེན་འཁོར་བཅས་ཤ་ལ་སྤྱོན། །འབྱུང་པོའི་ཁྲག་ནི་ཆང་བས་ཞིམ། །འབྱུང་པོའི་རུས་པ་མར་བས་ཞིམ། །འབྱུང་པོའི་ཤ་ནི་ཟན་པས་ཞིམ། །འདོད་ཆགས་མཆོད་པ་བླ་ན་མེད། །
ཞེ་སྡང་མཆོད་པ་བླ་ན་མེད། །གཏི་མུག་མཆོད་པ་བླ་ན་མེད། །སྲིད་གསུམ་སེམས་ཅན་ཐམས་ཅད་ནི། །འདོད་ཆགས་མཆོད་པར་བཞེས་སུ་གསོལ། །ཞེ་སྡང་མཆོད་པར་བཞེས་སུ་གསོལ། །གཏི་མུག་མཆོད་པར་བཞེས་སུ་གསོལ། །ཕྱོགས་བཅུའི་སངས་རྒྱས་ཐམས་ཅད་ཀྱི། །གསུང་གི་རྒྱུད་རྣམས་མཉེས་གྱུར་ཅིག །ཐུགས་ཀྱི་རྒྱུད་རྣམས་མཉེས་གྱུར་ཅིག །སྐུ་ཡི་རྒྱུད་རྣམས་མཉེས་གྱུར་ཅིག །དུས་གསུམ་རྣལ་འབྱོར་ཐམས་ཅད་ཀྱི། །གསུང་གི་དམ་ཚིག་བསྐང་གྱུར་ཅིག །ཐུགས་ཀྱི་དམ་ཚིག་བསྐང་གྱུར་ཅིག །མཆོད་པ་ཆེན་པོ་འདོད་ཆགས་ཆེ། །སེམས་ཅན་ཐམས་ཅད་དགའ་བར་བྱེད། །མཆོད་པ་ཆེན་པོ་ཞེ་སྡང་ཆེ། །ཉོན་མོངས་དགྲ་ཆེན་བཟློག་ཏུ་གསོལ། །མཆོད་པ་ཆེན་པོ་གཏི་མུག་ཆེ། །གཏི་མུག་བློ་སྟེ་གཏི་མུག་སེལ། །དང་པོ་གསུམ་ལ་ལན་གསུམ་ཉིད། །བདུན་ལ་ཉི་ཤུ་རྩ་གཅིག་ལ། །བརྒྱ་རྩ་བརྒྱད་དུ་བགྲང་བའོ། །གོང་མའི་དོན་ཡང་འདི་ལྟར་ཤེས། །ཉོན་མོངས་ལས་དང་སྡུག་བསྔལ་གསུམ། །རྒྱུ་དང་རྐྱེན་དང་འབྲས་བུར་ཤེས། །དུག་གསུམ་རེ་རེ་དག་ལ་ཡང་། །དགུ་ཕྲུག་དག་ཏུ་དབུལ་བར་བྱ། །ཐམས་ཅད་ཟད་པར་བྱ་ཕྱིར་ཞལ་དུ་གསོལ། །རྒྱུ་རྐྱེན་འབྲས་བུ་རྣམ་གསུམ་བསྟབ་པ་ནི། །སྲིད་གསུམ་དུག་གསུམ་དག་པས་རྒྱལ་བའི་སྐུ་གསུང་ཐུགས། །ཕྱོགས་བཅུའི་རྣལ་འབྱོར་སྐུ་གསུང་དམ་ཚིག་སྐོང་། །འགྲོ་བ་ཡུན་རིང་དུག་གསུམ་བསྒྲལ་བའི་ཕྱིར། །ཐ་མའི་བསྐུལ་བ་གསུམ་དེ་ཉི་ཤུ་གཅིག །རྩ་གཅིག་ལྔ་རུ་བགྲངས་ན་བརྒྱ་རྩ་བརྒྱད། །དེ་ནས་དུག་གསུམ་སྨོན་ལམ་གདབ་པ་ནི། །དུག་གསུམ་མཆོད་པར་དབུལ་བ་ཡིས། །སྲིད་གསུམ་སེམས་ཅན་ཐམས་ཅད་ཀྱི། །དུག་གསུམ་བག་ཆགས་དག་གྱུར་ཅིག །དུག་གསུམ་རྒྱལ་བའི་སྐུ་གསུང་ཐུགས། །རྒྱུད་རྣམས་མ་ལུས་མཉེས་གྱུར་ཅིག །ཕྱོགས་བཅུའི་རྣལ་འབྱོར་ཐམས་ཅད་ཀྱི། །སྐུ་གསུང་ཐུགས་དམ་བསྐང་གྱུར་ཅིག །བདག་དང་མཐའ་ཡས་སེམས་ཅན་རྣམས། །སྐུ་གསུང་ཐུགས་ཀྱི་དངོས་གྲུབ་ཐོབ་གྱུར་ཅིག །དེ་ནས་དུག་གསུམ་རང་བཞིན་ལེགས་ཤེས་བྱ། །རྒྱུ་ནི་གཏི་
མུག་འདོད་ཆགས་ཞེ་སྡང་གསུམ་ཉིད་ལ། །མ་རྟོགས་ཁམས་གསུམ་འཁོར་བའི་འབྲས་བུར་སྣང་། །གཏི་མུག་མ་རྟོགས་འདོད་ཆགས་ཞེ་སྡང་གསལ། །རྣལ་འབྱོར་ལམ་མཆོག་རྒྱུད་པས་འབྲས་བུ་སྐུ་གསུམ་ཐོབ། །དེ་ནས་དབང་པོ་རེག་བྱའི་མཆོད་པ་ནི། །དཀྱིལ་འཁོར་ལྷ་རྣམས་དགུག་པ་ནི། །གཞུག་དང་དབང་དུ་བྱ་ཞིང་མཉེས་པར་བྱ། །ཨོཾ་བཛྲ་ཨཾ་ཀུ་ཤ་སརྦ་མཎྜ་ལ་ཛཿ།ཨོཾ་བཛྲ་པཱ་ཤ་སརྦ་མཎྜ་ལ་ཧཱུཾ། ཨོཾ་བཛྲ་སྥོ་ཊ་སརྦ་མཎྜ་ལ་བཾ། ཨོཾ་བཛྲ་གྷཎྜ་སརྦ་མཎྜ་ལ་ཧོཿ། ཉམས་ཀྱིས་ལྕོགས་ན་མངོན་སུམ་གྱི། །འགྱུར་བའི་བར་དུ་དཀྱིལ་འཁོར་རྣམས། །གསང་བའི་མཆོད་པ་བཞི་དང་སྦྱར། །ལྷ་རྣམས་ལུས་ལ་གཟུང་བའི་ཕྱིར། །རེག་བྱའི་མཆོད་པ་དམ་པ་ཡིས། །སངས་རྒྱས་ཐམས་ཅད་མཆོད་པར་བྱ། །བོ་ལ་ཀ་ཀོ་མཉམ་སྦྱར་ཞིང་། །སྐད་ཅིག་མ་ནི་དང་པོ་ལ། །བདེ་བའི་ཡེ་ཤེས་བསྐྱེད་པར་བྱ། །དེ་ནས་སྐད་ཅིག་གཉིས་པར་ནི། །མཆོག་ཏུ་དགའ་བའི་ཡེ་ཤེས་སོ། །ཐིག་ལེ་འབར་བའི་དྲོད་ཀྱང་འཆར། །དེ་ནས་སྐད་ཅིག་གསུམ་པ་ལ། །རྣམ་རྟོག་བྲལ་བདེའི་ཡེ་ཤེས་ནི། །ཐིག་ལེ་གཡོ་བའི་དྲོད་ཅེས་བྱ། །དེ་ནས་སྐད་ཅིག་བཞི་པ་ལ། །ཐིག་ལེ་བརྟན་པའི་དྲོད་ཅེས་བྱ། །ལྷན་ཅིག་སྐྱེས་པའི་ཡེ་ཤེས་རྟོགས། །དེ་ནི་མཆོད་པ་དམ་པ་ཡིན། །ཀུན་ཏུ་བཟང་པོའི་མཆོད་པ་ནི། །སྲིད་བཀོད་ཡོངས་སུ་བསྔོ་ཞིང་འབུལ། །བདེ་བར་གཤེགས་སོ་བཅོམ་ལྡན་འདས། །རྒྱལ་བ་རྒྱ་མཚོ་མཉེས་བྱའི་ཕྱིར། །སྲིད་པ་རྒྱ་མཚོ་མཐའ་ཀླས་པས། །ཀུན་བཟང་མཆོད་སྤྲིན་མཆོག་ཏུ་རོལ། །ཨོཾ་ས་མནྟ་བྷ་དྲ་ག་ག་ན་ཁཾ་སྭཱ་ཧཱ། བསྟོད་པ་གླུ་ཡི་མཆོད་པ་ནི། །རོལ་མོ་ཡེ་ཤེས་གླུ་ཡིས་བསྟོད། །མཆོད་པ་མཇུག་སྡུད་རོལ་མོ་ནི། །ཡེ་ཤེས་གླུ་འདི་བླངས་ལ་དབུལ། །དབང་པོའི་སྤྱོད་ཡུལ་རང་བཞིན་དངོས་པོ་མེད། །རྣམ་དག་བདུད་རྩིའི་རང་བཞིན་སྡུག་བསྔལ་སེལ། །དམ་རྫས་དག་པ་ལྔ་དང་ཞལ་ཟས་ལྔ། །སྐུ་ལྔ་ཆོས་ལྔ་གསུང་ལྔ་རང་བཞིན་དབྱེར་མེད་བསམ། །དེ་ཕྱིར་དག་པས་དག་པ་ཉིད་མཆོད་ཅིང་། །ཆོས་ཉིད་ལ་ཡང་ཆོས་ཉིད་ཐིམ་པར་འབུལ། །དྲི་མེད་རྣམ་དག་ནམ་མཁའི་
རང་བཞིན་ལ། །ལོག་རྟོག་མཚན་མ་མང་པོ་སྤྲིན་ཕུང་བཞིན། །ཡེ་ཤེས་ཉི་ཟེར་ཐུགས་རྗེས་རབ་བརྒྱན་ནས། །དག་པའི་དོན་དུ་རྟོགས་ནས་མཆོད་པར་བགྱི། །མཉམ་ཉིད་བླ་ན་མེད་པར་སྙོམས་པ་དང་། །བདེ་མཆོག་ལོངས་སྤྱོད་རྫོགས་པ་སྐུ་ཡི་རྒྱན། །འདོད་པའི་ཡོན་ཏན་ལྔ་ཡིས་རབ་བརྒྱན་ཏེ། །དམ་ཚིག་བཞིན་དུ་ཅི་བདེར་བཞེས་སུ་གསོལ། །དེ་ནས་དཀྱིལ་འཁོར་ལྷ་རྣམས་ལ། །བསྟོད་པ་མང་པོའི་གླུ་འདི་བླང་། །རྡོ་རྗེ་གསོར་ནས་དྲིལ་བུ་གསིལ། །རིགས་ལྔའི་ཕྱག་རྒྱའི་དྲིལ་སྟབས་བྱ། །ཨོཾ་ཕྱོགས་བཅུ་དུས་བཞི་རྫོགས་པ་ཡི། །ཡེ་ཤེས་དཀྱིལ་འཁོར་ཐིག་ལེ་ཆེ། །བསོད་ནམས་དཀྱིལ་འཁོར་སྐུ་ཡི་ཚོགས། །སྣང་སྟོང་ཐིག་ལེ་ཀུན་ཏུ་རྫོགས་ཧོ། །ཨོཾ་རྡོ་རྗེ་བསོད་ནམས་ཐིག་ལེ་ཆེ། །རྡོ་རྗེ་ཡེ་ཤེས་དཀྱིལ་འཁོར་ལྡན། །རྡོ་རྗེ་སྒྲ་ཆེན་མཐའ་ཡས་པ། །རྡོ་རྗེ་རྒྱལ་པོ་ཐིག་ལེ་ཆེ་ཧོ། །ཨོཾ་སྐུ་གསུང་ཐུགས་ནི་རྫོགས་པ་ཆེ། །ཡོན་ཏན་ཕྲིན་ལས་ཀུན་ཏུ་རྫོགས། །ཡེ་ནས་ལྷུན་རྫོགས་ཀུན་ཏུ་བཟང་། །འདུས་པའི་ཚོགས་ཆེན་ཐིག་ལེ་ཆེ་ཧོ། །ཨོཾ་མི་དམིགས་སྒྱུ་འཕྲུལ་མཉམ་པའི་དབྱིངས། །མཐའ་ཡས་ཀུན་ནས་སྣ་ཚོགས་འཕྲོ། །མཐའ་ཡས་ཀུན་ནས་ལྷུན་གྱིས་ཐིམ། །སྣ་ཚོགས་སྐུ་གསུང་ཐུགས་ཆེན་པོ་ཧོ། །ཨོཾ་ཕྱོགས་བཅུའི་འཇིག་རྟེན་རྡུལ་སྙེད་དུ། །རྒྱལ་བའི་དོན་རྣམས་རྡུལ་ཕྲན་སྙེད། །སྤྲུལ་པ་རྡུལ་ཕྲན་བསམ་ཡས་ཀྱིས། །སྐད་ཅིག་ཡུད་ལ་ལྷུན་གྱིས་གྲུབ་ཧོ། །ཨོཾ་ཐམས་ཅད་མ་ལུས་སྐུ་གསུང་ཐུགས། །སྐུ་གསུང་ཐུགས་ཀྱི་བདག་ཉིད་ཆེ། །སྐུ་གསུང་ཐུགས་ཀྱིས་ཀུན་ཏུ་ཁྱབ། །སྐུ་གསུང་ཐུགས་ཀྱི་ཐིག་ལེ་ཆེ་ཧོ། །སྐུ་གསུང་མཆོད་པ་ཐམས་ཅད་ནི། །ཕྱག་རྒྱ་རྣམ་པ་བཞིར་འདུས་ཏེ། །སངས་རྒྱས་ཐམས་ཅད་ཡིད་ཀྱི་ནི། །ཕྱག་ན་རྡོ་རྗེ་ལྷ་ཚོགས་སོ། ། ཚིག་ཁ་ཤས་ཆད་དམ། ལུས་ཀྱི་འཇིག་རྟེན་མགོན་པོ་སྟེ། །ནམ་མཁའི་སྙིང་པོ་ལས་ཀྱིས་སོ། །དཀྱིལ་འཁོར་གསུམ་དུ་སྤྱིར་ཤེས་བྱ། །དེས་ནི་མཆོད་པ་རེ་རེ་ལ། །བཞི་བཞི་བརྒྱད་ཁྲི་འབུམ་དུ་བསྐང་། །སྐུ་ཡི་ཕྱག་རྒྱ་
སྟངས་ཚུལ་སོགས། །བཞི་བཞི་སོ་སོར་བརྟགས་ལ་བསྒོམ། །མཐུན་པའི་ཏིང་འཛིན་ཕྱག་བཞི་དང་། །བསྙེན་པ་དུས་བཞིར་རྫོགས་པར་བྱ། །བརྒྱད་ཁྲི་འབུམ་དུ་བསྐངས་ཏེ་འབུལ། །དེ་དག་ཤེས་ནས་དཀྱིལ་འཁོར་གྱི། །ལྷ་ལ་མཆོད་པ་གླུ་འདིས་བསྟོད། །མཉམ་ཉིད་མི་གཡོ་མཉམ་ཉིད་མཆོག་གི་ཆོས་ཉིད་ཅན། །ཐུགས་རྗེའི་བདག་ཉིད་འགྲོ་བའི་སྡུག་བསྔལ་སེལ་བར་མཛད། །ཡོན་ཏན་མཐའ་ཡས་དངོས་གྲུབ་ཐམས་ཅད་སྨིན་མཛད་པ། །དྲི་མེད་མི་གཡོ་མཉམ་ཉིད་དམ་པའི་མཆོག་ཆེན་པོ། །ཡོན་ཏན་ཤིན་ཏུ་ཕྲ་བའི་ཆ་ལའང་ཚད་མེད་དེ། །དཔེ་ནི་ནམ་མཁའ་དང་ཡང་བསྒྲུན་དུ་ཡོད་མ་ཡིན། །དངོས་གྲུབ་མཐའ་ཡས་མཉམ་ཉིད་དཔེ་དང་བྲལ་བ་རྣམས། །སེམས་ཅན་ཁམས་ལ་དངོས་གྲུབ་མཆོག་རྣམས་ངེས་པར་སྩོལ། །རྟག་ཏུ་དྲི་མ་མེད་པའི་ཐུགས་རྗེའི་ཤུགས་ལས་བྱུང་། །སྨོན་ལམ་གྲུབ་པ་འགག་པ་མེད་པའི་ཆོས་ཉིད་ཅན། །འགྲོ་བའི་དོན་སྒྲུབ་རབ་ཏུ་བརྩོན་པ་མཐའ་ཡས་པ། །ཐུགས་རྗེ་ཆེན་པོའི་བདག་ཉིད་རྟག་ཏུ་རྣམ་པར་སྣང་། །ཚད་མེད་ཚད་དང་བྲལ་བས་ཤིན་ཏུ་ཡོངས་རྫོགས་པའི། །བདེ་བར་གཤེགས་པའི་གོ་འཕང་དམ་པ་བརྙེས་གྱུར་ཀྱང་། །ཁམས་གསུམ་ཀུན་ལ་དངོས་གྲུབ་མཆོག་སྩོལ་མཛད་པ་ཡི། །ཐུགས་རྗེའི་སྤྱོད་པ་མི་གཡོ་འགག་པར་ཡོངས་མི་འགྱུར། །ཨེ་མ་ཧོ་ཤིན་ཏུ་བཟང་པོའི་ཆོས་ཉིད་མཆོག་དང་ལྡན། །མཆོག་སྦྱིན་རྣམས་ཀྱི་ནང་ནས་གོ་འཕང་མཆོག་བརྙེས་པ། །ཁམས་གསུམ་ཀུན་ལ་རྟག་ཏུ་དངོས་གྲུབ་མཆོག་སྩོལ་མཛད། །མགོན་པོ་དུས་གསུམ་སྒྲིབ་པ་མེད་པར་རབ་མཁྱེན་པ། །དམ་ཚིག་མཆོག་གསུམ་དངོས་གྲུབ་དམ་པ་བདག་ལ་སྩོལ། །མཆོད་པ་རྣམ་བཞིར་ཤེས་བྱ་སྟེ། །ཕྱག་འཚལ་ཐལ་མོ་སྦྱར་བ་དང་། །དེ་བཞིན་བྱམས་དང་སྙིང་རྗེ་དང་། །མེ་ཏོག་བདུག་པ་འཇིག་རྟེན་པའི། །སོར་མོ་ལས་བྱུང་མེ་ཏོག་རྣམས། །སྐྱོབ་པ་ཀུན་ལ་དབུལ་བར་བྱ། །ཡན་ལག་ཀུན་འབྱུང་ཕྱག་རྒྱ་ནི། །བཅིངས་ནས་བྱང་ཆུབ་སེམས་བསྒོམ་སྟེ། །སོ་སོར་མགོན་པོ་ཐམས་
ཅད་ལ། །དེ་ཡི་སྲས་རྣམས་ཐམས་ཅད་ལ། །དེ་ཡི་སྲས་རྣམས་ནན་ཏན་བྱ། །མཐེ་བོང་སྲིན་ལག་སྦྱར་བ་ནི། །བཀྲ་ཤིས་པ་ཞེས་བརྗོད་པ་སྟེ། །དེ་ཡི་རྫས་རྣམས་ཀུན་བླངས་ཏེ། །དཔྲལ་བ་སྙིང་ག་ལྟེ་བ་ནས། །མགོན་པོ་སྲས་རྣམས་རིམ་བཞིན་དབུལ། །རྡོ་རྗེ་ཁུ་ཚུར་བཅངས་ནས་ནི། །བརྗིད་པས་མཐའ་ནས་གར་བྱ་ཞིང་། །མཉེས་པར་གྲོལ་བའི་ཐལ་མོ་ཡིས། །པདྨའི་ཕྲེང་བས་དབུལ་བར་བྱ། །སྐབས་སུ་བབ་ན་ཁུ་ཚུར་ཡང་། །རུང་ཞེས་ལྷ་ལ་མཆོད་བྱེད་དུས། །རྗེས་སུ་ཡི་རང་ཐལ་མོ་སྦྱར། །ལས་ལ་གཞུག་པའི་ཚེ་ན་ནི། །ཁམས་གསུམ་སེམས་ཅན་ཐམས་ཅད་ལ། །བྱམས་པ་སྙིང་རྗེ་བསྒོམ་པར་བྱ། །དེ་ནས་བསྟོད་པའི་གླུ་འདི་བླང་། །རྡོ་རྗེ་ཆེ་མཆོག་ལོག་འདྲེན་མང་པོ་འཇོམས། །ཕན་དང་བདེ་མཛད་ཐར་ལམ་འདྲེན་པའི་གཙོ། །རྨད་བྱུང་ཕྲིན་ལས་སྣ་ཚོགས་མངའ་བའི་ལྷ། །རང་བྱུང་ཁྱོད་ཀྱིས་གྲུབ་མཆོག་སྩལ་དུ་གསོལ། །སྟོབས་བཅུས་ཕ་རོལ་དཔུང་རྣམས་འཇོམས་པ་པོ། །དཔལ་ཆེན་ལོག་པའི་དགྲ་རྣམས་རྣམ་པར་འཇོམས། །རྔམ་ཆེན་གདུག་པ་མ་ལུས་ཀུན་འདུལ་བ། །འབར་བའི་སྐུ་མཆོག་བདག་ལ་བསྟན་དུ་གསོལ། །འཕགས་པའི་རྗེས་འབྲང་ཞི་ཁྲོ་མང་པོའི་ཚོགས། །འགྲོ་ལ་ཕན་མཛད་བདེ་གཤེགས་བསྒོམ་པ་ལ། །གནོད་བྱེད་བགེགས་ཀྱི་ཚོགས་རྣམས་གཞོམ་པ་དང་། །མཐུ་རྩལ་བྱིན་རླབས་དངོས་གྲུབ་སྩལ་དུ་གསོལ། །བདག་གི་ལུས་དང་ངག་དང་སེམས་རྣམས་ནི། །མ་སྐྱེས་རྡོ་རྗེ་རང་བཞིན་ཆོས་ཀྱི་སྐུ། །འཕགས་མཆོག་ཁྱེད་དང་དབྱེར་མེད་ཚུལ་གཅིག་སྟེ། །དངོས་གྲུབ་སྩལ་དང་སྩོལ་བར་མི་དམིགས་ཀྱང་། །སྔོན་གྱི་སྨོན་ལམ་ཐུགས་རྗེ་ཆེ་མངའ་བར། །ལོག་རྟོག་སྒྱུ་མའི་ཚུལ་གྱིས་གསོལ་འདེབས་ན། །དུས་ལ་མི་འདའ་རྡོ་རྗེའི་དམ་ཚིག་ཅན། །ཡེ་ཤེས་ལྷ་ཁྱོད་བདག་ལ་བྱིན་གྱིས་རློབས། །མ་རིག་བདག་གི་ལུས་དང་ངག་སེམས་ཀྱིས། །བག་མེད་ཚུལ་གྱིས་དམ་ལས་འགལ་གྱུར་ཏེ། །རྒྱལ་བ་འཁོར་བཅས་ཐུགས་དང་ཅི་འགལ་བ། །ཐོགས་མེད་ཐུགས་རྗེ་ཅན་ལ་བཟོད་པར་གསོལ། །
དེ་ནས་རྣམ་པར་མི་རྟོག་པའི། །དོན་གྱི་མཆོད་པ་འབུལ་བ་ནི། །རང་ལུས་རྣམ་པར་མི་རྟོག་པར། །བཤིགས་ནས་སྟོང་པ་ཉིད་དུ་བསྒོམ། །དེ་ལྟ་བུ་ཡི་ཆོས་ཉིད་ཀྱི། །མཆོད་པ་འཕགས་པ་རྣམས་ལ་འབུལ། །དུས་གསུམ་སངས་རྒྱས་ཀུན་གྱི་སྤྱོད་ཡུལ་ཏེ། །མཉམ་ཉིད་མི་གཡོ་མཉམ་ཉིད་སངས་རྒྱས་པར། །གཟུང་འཛིན་མཚན་མ་ཀུན་ལས་འདས་པ་ཡི། །མཉམ་པ་ཆེན་པོའི་མཆོད་པ་རྣམ་པར་རོལ། །དེ་ནས་བཅོམ་ལྡན་འདས་ཞེ་སྡང་རྡོ་རྗེས་མཆོད་པ་ཐམས་ཅད་དོན་ཡོད་པར་བྱ་བའི་སྨོན་ལམ་འདི་གསུངས་སོ། །སྨོན་ལམ་རྒྱས་དང་བསྡུས་པ་ཡང་། །དཀྱིལ་འཁོར་གསུམ་གྱི་ཁོག་འདིར་ལྟོས། །མཁྱེན་པར་གསོལ་དང་མཆོད་འབུལ་གཉིས། །མི་མཐུན་པར་ནི་གནས་ཀྱིས་བཅོས། །ཕྱི་རབས་སྒོ་བཞི་རྩིས་འགོ་ལྔས། །ངས་ནི་ཁྱེད་ལ་གསལ་བར་བསྟན། །མཁྱེན་པར་གསོལ་དང་མཆོད་འབུལ་གཤེགས། །ལས་བཅོལ་སྨོན་ལམ་གདབ་དང་ལྔ། །ཕྱག་རྒྱ་ཡཀྵའི་མཆེ་བ་ནི། །གཏོར་མ་ལ་གཏུག་སྔགས་འདི་བརྗོད། །ཨོཾ་ཨེ་ཤ་ཧཱུཾ། པེ་ཤ་ཧཱུཾ། ས་མ་ཡ་བྷཀྵ་ཧཱུཾ། ཨོཾ་རུ་ལུ་རུ་ལུ་ཧཱུཾ་བྷྱོ་ཧཱུཾ། ཛཿཧཱུཾ་བཾ་ཧོཿ། ཨོཾ་པྲ་ཏཱིཙྪ་ཧོ། ཧོ་ཡེ་ནས་སྤྲོས་པ་མེད་པའི་དབྱིངས། །རང་བཞིན་རྣམ་པར་དག་པ་ན། །དུས་གསུམ་གཤེགས་ཤིང་བཞུགས་པ་ཡི། །རྫོགས་པའི་སངས་རྒྱས་བཅོམ་ལྡན་འདས། །རྣམ་པ་ཐམས་ཅད་ཀུན་མཁྱེན་པའི། །ཡེ་ཤེས་བྱེ་བྲག་ཀུན་ལྡན་པ། །འགྲོ་བ་མ་ལུས་འདུལ་ཐབས་སུ། །བཅོམ་ལྡན་རྡོ་རྗེ་སེམས་སོགས་ཏེ། །རིགས་ལྔའི་བདེ་བར་གཤེགས་པ་དང་། །རིགས་མཆོག་གཟུངས་ཀྱི་ཡུམ་དང་བཅས། །རྒྱལ་སྲས་འཁོར་དུ་སེམས་དཔའ་ཚོགས། །སེམས་མའི་དཀྱིལ་འཁོར་ལ་སོགས་པ། །ཡེ་ཤེས་ཆེན་པོའི་དབང་ཕྱུག་ཅན། །ཐབས་མཁས་པ་ཡི་བདག་ཉིད་ཀྱིས། །མཁའ་འགྲོ་རང་བཞིན་རྣལ་འབྱོར་ཅན། །ངོ་བོ་ཉིད་སྐུ་མ་ལུས་རྣམས། །སོ་སོའི་ཕོ་བྲང་བཞུགས་གནས་ནས། །གཞལ་མེད་ཁང་ནས་སྐུ་བསྐྱོད་གཤེགས། །ཕྱོགས་བཅུའི་
ཞིང་ཁམས་མཐའ་ཡས་ནས། །རབ་འབྱམས་མ་ལུས་ཀུན་འདུས་ཤིང་། །འབྱོར་བའི་རྣལ་འབྱོར་དབང་ཕྱུག་ཆེ། །གྲུབ་པའི་མཆེད་ལྕམ་རྒྱ་མཚོར་བཅས། །ཐོགས་པ་མེད་པར་རབ་མཁྱེན་ཅིང་། །སྒྲིབ་པ་མི་མངའ་དོན་གཟིགས་པ། །ཐུགས་རྗེ་ཆེན་པོའི་ངང་གྱུར་ཅིང་། །འགྲོ་བའི་མགོན་སྐྱབས་སྟ་གོན་གནས། །དམ་ཚིག་མཆོག་གི་གསང་སྒོ་འདིར། །ཞལ་གྱིས་འཆེས་པའི་ཐུགས་དམ་གྱིས། །དཀྱིལ་འཁོར་འདིར་ནི་གཏོགས་པ་ཡི། །རྒྱལ་བ་རྒྱ་མཚོ་འཁོར་བཅས་པ། །ཁྱེད་རྣམས་གསན་ཅིང་དགོངས་སུ་གསོལ། །ཧོ་རྣལ་འབྱོར་མཆོད་པ་སྐུ་གསུང་ཐུགས། །རྡོ་རྗེ་ལས་བྱུང་རིན་ཆེན་འདྲ། །བྱིན་གྱིས་བརླབས་ཤིང་མཆོད་འབུལ་བས། །ཡེ་ཤེས་རྒྱ་མཚོའི་སྤྱན་ལྡན་རྣམས། །དུས་གསུམ་བཞུགས་ལ་མཆོད་པར་འབུལ། །དེ་དུས་བྱིན་གྱིས་བརླབས་པ་དང་། །མཆོད་ཅིང་ནམ་མཁའི་གཞལ་ཡས་ཁང་། །རྒྱུ་འབྱུང་སྨིན་བྱེད་དཀྱིལ་འཁོར་འདིར། །དགའ་ལྡན་ལྷ་ཡི་དཀྱིལ་འཁོར་བཀོད། །བདག་ཅག་སྐལ་ལྡན་མི་ཚོགས་རྣམས། །འབྱོར་ལྡན་ཡོ་བྱད་ཚོགས་བཤམས་པ། །འབྱོར་འོས་རིགས་པ་རྗེས་མཐུན་རྣམས། །རྣམ་བཞིའི་སྒོ་ནས་དུས་བཞིར་འབྱུང་། །ཞལ་ཟས་ཟླ་ཚིགས་རྒྱུ་མེད་པའི། །དད་པས་བསོགས་ཏེ་མོས་པ་ཡིས། །འབྱོར་ཚད་བདོག་དྲོད་སྦྱར་བ་འདི། །སྲིད་པའི་ལོངས་སྤྱོད་རྒྱལ་ཆོས་ཀྱི། །མངའ་ཐང་བྱུང་ཁུངས་ལྷ་ཡི་ལུས། །འཇིག་རྟེན་འཁོར་ཡུག་བཅས་པ་འདི། །སྲིད་བཀོད་གཏན་པ་མེད་པ་ཡི། །མཆོད་སྦྱིན་མངའ་ཐང་མཆོད་པའི་རྐྱེན། །དབུལ་ན་ཕྱོགས་བཅུ་དུས་གསུམ་གྱི། །རྒྱལ་བ་རྒྱ་མཚོར་བཅས་རྣམས་ཀྱི། །ཕོ་བྲང་དཀྱིལ་འཁོར་གཞལ་ཡས་ཁང་། །ཀུན་ཏུ་བཟང་པོའི་མཆོད་པ་འདིས། །འདོད་པའི་ཡོན་ཏན་རྣམ་ལྔ་ཡི། །ལྷ་མོ་ཕྲིན་ལས་རྒྱ་མཚོ་རྣམས། །གར་གྱི་སྤྲིན་ཕུང་བཞིན་གྱུར་ཏེ། །ནམ་མཁའི་གཟའ་སྐར་བཞིན་དུ་བཀྲམ། །ས་གཞིའི་རྩི་ཤིང་བཞིན་དུ་ཐོན། །རྒྱ་མཚོའི་རླབས་ལྟར་འཕྱོ་ཞིང་ཁྱབ། །སྤྲིན་བཞིན་གཏིབས་ནས་ཆར་བཞིན་
འབབ། །ཆུ་བོའི་རྒྱུན་བཞིན་དུས་གསུམ་འབྱུང་། །ཕྱོགས་བཅུའི་རྒྱལ་བ་རྒྱ་མཚོ་ཡི། །ཞལ་དུ་དྲངས་ནས་བདག་ལོངས་སྤྱད། །མཉེས་མཆོད་ཕོག་ནས་དགེས་ལོངས་སྤྱོད། །འདོད་ཡོན་ལྔ་ཡི་མཆོད་ཕུལ་བས། །བདག་དང་མཐའ་ཡས་སེམས་ཅན་རྣམས། །དུག་ལྔ་རྒྱུད་གནས་བག་ཆགས་བྱང་། །རྒྱུད་ལྔའི་སེམས་ཅན་རྣམས་ནི་སྒྲོལ། །གནས་ལྔའི་འབྲས་བུ་ཐོབ་གྱུར་ནས། །རྒྱལ་བ་རིགས་ལྔའི་ཐུགས་དམ་བསྐང་། །འབྲས་བུ་བདག་དང་མཐའ་ཡས་པའི། །སེམས་ཅན་མ་ལུས་ཐམས་ཅད་ཀྱི། །སྐུ་གསུང་ཐུགས་དང་ཡོན་ཏན་ལས། །མི་ཟད་རྒྱན་གྱི་འཁོར་ལོ་ཡི། །འབྲས་བུ་ཐོབ་པར་མཆོད་པར་འབུལ། །མཆོད་པ་དམ་པ་བཞེས་སུ་གསོལ། །མཐོལ་བཤགས་བཟོད་པར་གསོལ་བ་ནི། །བདག་ཅག་ཚོགས་ཀྱི་དཀྱིལ་འཁོར་འདིར། །འདུས་ཤིང་ཚོགས་པའི་སྐལ་ལྡན་རྣམས། །དང་པོ་གསང་བསྒོས་ཁས་འཆེས་ཏེ། །དམ་ཚིག་གཉན་པོ་མངོན་པར་མནོས། །ཆག་ཉམས་ཞིག་རལ་གྱུར་པ་དང་། །རྩ་དང་ཡན་ལག་དམ་མནོས་ནས། །བཀའ་བཞིན་བསྲུང་བ་རྔོ་མ་ཐོགས། །བསྲུང་བའི་དམ་ཚིག་མནོས་པ་ལས། །གཏི་མུག་མ་ཚོར་དབང་གིས་ནི། །བདེ་དང་སྡུག་བསྔལ་རྐྱེན་མ་བཟོད། །སྒོ་གསུམ་ཉེས་སྐྱོན་མེ་ཤོར་བས། །བདག་དང་གཞན་གྱི་རྒྱུད་བསྲེགས་པས། །སྐྱོན་བྲལ་མཚན་མར་མ་ཕྱིན་ཏེ། །བསྲུང་བའི་དམ་ཚིག་ཉམས་པ་བཤགས། །སྤྱད་པར་བྱ་བའི་དམ་མནོས་ནས། །ཕྱིར་མི་ལྡོག་པའི་སྲན་ཆུང་བས། །རང་སེམས་མ་དད་དབང་གིས་ནི། །གང་ཟག་སྤྱོད་པ་དམན་པ་ཡིས། །ཡ་གས་འཇིགས་པའི་རྐྱེན་མ་བཟོད། །དཔའ་ལོས་སྒྱུ་སོགས་ཕྱི་ཚུལ་གྱུར། །ལས་རྩལ་ཚད་མར་མ་ཕྱིན་པས། །སྤྱད་པའི་དམ་ཚིག་ཉམས་པ་བཤགས། །དང་བླང་དམ་ཚིག་མནོས་པ་ལས། །བཀའ་ཡི་གཞུང་བཞིན་མ་གྱུར་ཏེ། །རྟོགས་པ་ཞན་པའི་དབང་གིས་ན། །ཐེ་ཚོམ་ངན་སྤྱོད་རྐྱེན་མ་བཟོད། །སྒྲུབ་རྫས་མཐུན་རྐྱེན་དང་མ་ལོན། །སྤྱོད་པ་མི་མཐུན་བསྲུང་
མ་འཕངས། །འཇུག་རྩལ་ཚད་མར་མ་ཕྱིན་པས། །དང་བླང་དམ་ཚིག་ཉམས་པ་བཤགས། །ཤེས་པར་བྱ་བའི་དམ་མནོས་ནས། །བདེན་ཡིད་མ་ཆེས་ང་བྲལ་བས། །མཉན་སེམས་ཡུན་བསྲིང་རྐྱེན་མ་བཟོད། །གཏི་མུག་ཤེས་པ་རང་རྒྱུད་པས། །ཤེས་བྱ་ཚད་མར་མ་ཕྱིན་པས། །ཤེས་པར་བྱ་བའི་དམ་ཚིག་ཉམས་པ་བཤགས། །བསྒྲུབ་པར་བྱ་བའི་དམ་ཚིག་མནོས་པ་ལས། །དཔའ་བརྟུལ་བརྟུལ་ཞུགས་བསྒྲུབ་ལ་འཇུག་ཆུང་བས། །བསྒྲུབ་པ་དུས་ལས་ཡོལ་བའི་དབང་གིས་ནི། །ན་ཚའི་སྡུག་བསྔལ་རྐྱེན་གྱིས་མ་བཟོད་དེ། །བསྒྲུབ་པའི་ལྷ་བབས་པ་ལས་འཕང་གྱུར་ཏེ། །ཁྱད་པར་དྲོད་རྩལ་ཚད་མར་མ་ཕྱིན་ཏེ། །བསྒྲུབ་པའི་དམ་ཚིག་ཉམས་པ་མཐོལ་ལོ་བཤགས། །མི་སྤང་པ་ཡི་དམ་ཚིག་མནོས་པ་ལས། །ཆོས་རྣམས་ཐམས་ཅད་རང་བཞིན་དབྱིངས་གཅིག་པར། །མ་རྟོགས་དབང་གིས་གཟུང་འཛིན་རྟོག་པའི་བློ། །ཁ་བྲག་གྱུར་ཏེ་བཟང་ངན་རྐྱེན་མ་བཟོད། །ཉན་ཐོས་ལྟ་བུར་གཉིས་སུ་འབྱེད་རྟོགས་པས། །གཉིས་སུ་མེད་རྩལ་ཚད་མར་མ་ཕྱིན་ཏེ། །མི་སྤང་དམ་ཚིག་ཉམས་པ་མཐོལ་ལོ་བཤགས། །མི་སྨད་པ་ཡི་དམ་ཚིག་མནོས་པ་ལས། །བདག་ཏུ་འཛིན་པའི་ང་རྒྱལ་དྲེགས་པ་ཡིས། །གཞན་དུ་རྟོག་པའི་ཕྲག་དོག་དབང་གིས་ནི། །འཇིག་རྟེན་འདོད་ཆགས་བསྟོད་སྨད་རྐྱེན་མ་བཟོད། །རང་བསྟོད་གཞན་ལ་སྨོད་པའི་ལས་བགྱིས་པས། །གཉན་པར་བལྟ་བའི་རྩལ་ཚད་མ་ཕྱིན་པར། །མི་སྨད་དམ་ཚིག་ཉམས་པར་གྱུར་ན་བཤགས། །མཆོད་པར་བྱ་བའི་དམ་ཚིག་མནོས་པ་ལས། །རྒྱང་ཕན་ཆོས་ཀྱིས་བསྡུས་པའི་དབང་གི་ནི། །མཁྱེན་གསལ་གང་མ་མཉེས་པར་མ་བསམས་པས། །བདག་ཉིད་དམན་པར་མ་མཐོང་རྐྱེན་མ་བཟོད། །མཆོད་སྦྱིན་ཐམས་ཅད་དབང་དུ་མ་ཆུད་པས། །མཉེས་བྱའི་མཆོད་པ་རྩལ་ཚད་མ་ཕྱིན་ཏེ། །མཆོད་པའི་དམ་ཚིག་ཉམས་པ་མཐོལ་ཞིང་བཤགས། །བདག་གི་མ་ཡིན་པ་ཡི་གྲོགས་བསྟེན་དང་། །
རྒྱུད་མི་གཅིག་པའི་བསོད་ནམས་འདྲེས་པ་དང་། །ལེ་ལོ་དང་ནི་སྙོམས་ལས་དབང་གྱུར་ནས། །གཟའ་གཏད་བཅས་ནས་གཟུང་འཛིན་མ་བཤིགས་པས། །སྒྲོལ་དང་སྦྱོར་གནས་བྱིན་གྱིས་མ་བརླབས་པར། །ཏིང་འཛིན་ཡུན་ཐུང་ཐུགས་རྗེའི་གནས་མ་གྱུར། །ཡེ་ཤེས་བབས་པའི་ལྷ་སྲུང་མ་འཕངས་འགྱུར། །གནས་སྦྱོང་མན་ངག་ཚད་མར་མ་ཐོས་པ། །རྣམ་པར་ཤེས་རྒྱུད་ཚད་མར་མ་ཕྱིན་ཏེ། །ཉམས་པ་བརྒྱད་པོ་འདི་མནོད་སེམས་ཡིད་བཀུར། །ལུས་སེམས་འགྱོད་པ་ཆེན་པོས་མཐོལ་བཤགས་ན། །བཟོད་པ་ཆེན་པོས་གསོལ་ལོ་ཚངས་པར་མཛོད། །དེ་ནས་ཕྲིན་ལས་བཅོལ་བ་ནི། །བདག་ཅག་སྒྲུབ་པ་འདིར་འདུས་རྣམས། །དགེ་བའི་རྩ་བ་བསྒྲུབ་པ་ལ། །བར་ཆད་བྱེད་པའི་སྡང་དགྲ་དང་། །སྦྱོར་བ་རྐུ་དང་གནོད་བགེགས་གསུམ། །ཞི་དང་དབང་དང་མངོན་སྤྱོད་ཀྱི། །མནན་དང་བཟློག་དང་སྤོར་ཞིང་སྤར། །འདུལ་སྐལ་ཕྲིན་ལས་གང་གྱུར་བཞེས། །ཚར་གཅད་གྲུབ་པར་མཛད་དུ་གསོལ། །དངོས་གྲུབ་གསོལ་བའི་ཕྲིན་ལས་ནི། །ཡིད་ལ་བརྣག་པའི་འབྲས་བུ་རྣམས། །ཇི་ལྟར་འགྲུབ་ཅིང་གསོལ་བྱང་ལ། །དྲིས་བཞིན་འབྲས་བུ་ཐོབ་གྱུར་ཅིག །དེ་ནས་སྨོན་ལམ་གདབ་པ་ནི། །བཤགས་སྦྱོང་འདི་རྣམས་བརྗོད་ཙམ་གྱིས། །ཚོར་བ་དང་ནི་མ་ཚོར་བའི། །ཉམས་པ་ཐམས་ཅད་བྱང་གྱུར་ཅིག །ཚོར་དང་མ་ཚོར་ཉམས་པ་རྣམས། །ཕྱིན་ཆད་བྱེད་པར་མ་གྱུར་ཅིག །གནས་ཐོབ་པ་དང་རྒྱུད་བྱང་བས། །སླན་ཆད་ཕྱིར་ལ་མི་ལྡོག་པའི། །སེམས་དང་མི་འབྲལ་བར་གྱུར་ཅིག །ཤེས་རབ་རྣོ་ཞིང་དབང་པོ་གསལ། །ཡེ་ཤེས་ངང་གྱུར་སེམས་ཅན་དོན། །མ་ལུས་བྱེད་པའི་མཐུ་ཐོབ་ནས། །སྐྱེས་པའི་ཚེ་རབས་ཐམས་ཅད་དུ། །སློབ་དཔོན་བཀའ་དྲིན་ལན་ལྡོན་ཞིང་། །ཕ་མའི་དྲིན་ལན་རྗེས་སུ་བསྒྲུབ། །མན་ངག་སྣོད་དང་ལྡན་གྱུར་ཅིག །ཚེ་འདི་དང་ནི་ཚེ་རབས་གཞན། །སྐྱོན་བརྗོད་ཐམས་ཅད་དང་བྲལ་ནས། །དགེ་བའི་རྩ་བ་ཐམས་ཅད་ཀྱི། །ཡོན་ཏན་ཚད་བཞིན་ཐོབ་གྱུར་ཅིག །དུས་ཀྱིས་མནར་བའི་སེམས་ཅན་རྣམས། །ལྔ་བརྒྱ་ཐ་མའི་དུས་བབ་ནས། །བདེན་པའི་ཚིག་དང་བྲལ་བ་རྣམས། །དམ་ཚིག་ཉམས་
པའི་སྐྱོན་ཅན་དང་། །ལྷན་ཅིག་སྐྱེས་སྐྱོན་དྲ་བས་འདྲེལ། །དམ་ཉམས་ཉེས་པ་ཚེ་འདི་དང་། །གཞན་དུ་མ་སྨིན་བྲལ་གྱུར་ཅིག །སྔོན་ཆད་བསྒྲལ་ཅིང་སྤྱད་དོ་འཚལ། །ཡེ་ཤེས་ཆེན་པོའི་ངང་གིས་བསྒྲལ། །ཐུགས་རྗེ་གདུང་བའི་ཤུགས་ཀྱིས་བསྒྲལ། །རྒྱུད་བྱང་གནས་ཀྱང་སྟོབས་གྱུར་ཅིག །སྔ་རབས་དུས་ཚེར་འདས་པ་རྣམས། །ཐུགས་དམ་ཉམས་པ་ཀུན་བསྐངས་ཏེ། །ཡེ་ཤེས་བླ་མའི་ས་ནོན་ནས། །རྣལ་འབྱོར་དབང་ཕྱུག་གྲལ་ཐོབ་སྟེ། །རིག་འཛིན་རྩལ་འཆང་ཁྱད་པར་ལ། །ཡེ་ཤེས་གོམ་པ་འདོར་བྱེད་ཅིང་། །ས་བཅུ་ཟིལ་གྱིས་རབ་མནན་ཏེ། །སྔོན་གྱི་ཐུགས་དམ་འདྲེལ་པ་ཡི། །འགྲོལ་ཅིང་བརྩེ་གདུང་ཤུགས་ཀྱིས་ནི། །བདག་གི་སྟོང་དང་གྲོགས་གྱུར་ཅིག །སྐུ་གསུང་ཐུགས་ནི་མི་ཟད་པ། །རྒྱན་གྱི་འཁོར་ལོ་ཐོབ་གྱུར་ཅིག །ཅེས་ནི་ཞེ་སྡང་རྡོ་རྗེ་ཡིས། །ཕྱི་རབས་རྣལ་འབྱོར་བློ་སྦྱར་གསུངས། །མངོན་ཤེས་མཁྱེན་པའི་ཐུགས་མངའ་བས། །ཕྱིས་འབྱུང་བློ་མཐུན་དགོངས་ནས་གསུངས། །ཀརྨ་མཱ་ལེའི་རྒྱུད་འདིར་ནི། །མཆོད་པའི་ཕུད་ཉུལ་ཆེན་མོས་ནི། །ལྷ་མོ་བརྒྱད་སོགས་འདོད་པ་ཡིས། །མཆོད་པའི་ཚོགས་རྣམས་ཐམས་ཅད་ལ། །ཏིང་འཛིན་ལྡན་པས་མཆོད་པ་མཆོད། །ཉུལ་ལེས་འབྱོངས་དང་མ་འབྱོངས་བལྟ། །དེ་ཕྱིར་མཁས་པས་སྦྱང་བར་བྱ། །མཁས་པའི་ཡོན་ཏན་མཐའ་ཡས་པ། །ཀུན་གྱི་བྱ་བའི་ལས་མ་ཡིན། །ཞེས་གསུངས་སོ། །ཀརྨ་མཱ་ལེའི་རྒྱུད་ལས། ཐིམ་པའི་དཀྱིལ་འཁོར་བསྟན་པའི་ལེའུ་སྟེ་ལྔ་པའོ།། །།དེ་ནས་བཅོམ་ལྡན་འདས་ཞེ་སྡང་རྡོ་རྗེ། དཀྱིལ་འཁོར་ཐམས་ཅད་ཀྱི་མངའ་བདག་ཆེན་པོས། ཁྲོ་བོ་ཆེན་པོའི་དཀྱིལ་འཁོར་གྱི་གཙོར་མཛད་པའི་ཕྱིར།རྣོན་པོའི་དཀྱིལ་འཁོར་བསྐྱེད་པ་འདི། །འགྲོ་བའི་ཆེད་དུ་དགོངས་ནས་གསུངས་སོ། །དོན་རྣམས་གསལ་ཕྱིར་བཅོ་ལྔར་གསུངས། །སྙིང་རྗེ་འབྱུང་དང་སྔོན་གྱི་གླེང་གཞི་དང་། །བསྐྱེད་དང་བདུད་བཞི་གཞོམ་པར་བྱ་བ་དང་། །དབང་བསྐུར་གནས་བསྲུང་གཤོག་བསྐྱེད་རྫོགས་པ་གདོན། །མ་ཏྲང་མནན་དང་སྤྱན་དྲང་བསྡིམ་པ་དང་། །
ལས་དང་བརྟན་བཞུགས་བྱ་ཞིང་གདན་ལ་དབབ། །དེ་ལ་སྙིང་རྗེ་ཆེན་པོ་འབྱུང་བ་ནི། །སྦོམ་པོ་གཉིས་ནི་ཐུར་དུ་བསྟན། །མཛུབ་མོ་གཉིས་ནི་རབ་ཏུ་མདུད། །གུང་གཉིས་རྩེ་སྤྲད་སྲིན་མཐེབ་བརྐྱང་། །ས་འོག་ས་བླ་བར་སྣང་ནས། །ཧེ་རུ་ཀ་དང་མཁའ་འགྲོ་བསྡུ། །སྲིད་པ་སྤྱི་བཅིངས་དཔྲལ་བར་བཞག །ཐུགས་རྗེ་ཆེན་པོས་ཀུན་ལ་ཁྱབ། །ཨོཾ་སརྦ་ཏ་ཐཱ་ག་ཏ་ཨ་ཤང་སི་ཏ་སརྦ་སཏྭཱ་ན། སརྦ་ཏ་ཐཱ་ག་ཏ་ཏིཥྛ་མ་མ་སྭ་བྷཱ་ཝ་ཤུདྷོ྅་ཧཾ། དེ་ནས་གླེང་གཞི་འདི་གསུངས་སོ། །འདས་པའི་དུས་ན་སྔོན་བྱུང་ནི། །བདག་ཉིད་ཆེན་པོ་རྟག་པ་ཡི། །དེ་བཞིན་གཤེགས་པའི་གསུང་རབ་ལས། །འགྲོ་བའི་ཚུལ་དུ་སྔོན་བྱུང་སྟེ། །དེ་ཚེ་སེམས་ཅན་ཐམས་ཅད་ཀུན། །ཤིན་ཏུ་ཁྲོ་ཞིང་གཏུམ་པར་འགྱུར། །ཤིན་ཏུ་ཁྲོ་ཞིང་གདུག་པ་ལ། །ཞི་བས་ཕན་པར་མི་འགྱུར་ཏེ། །ཤེས་རབ་ཐབས་ཀྱི་ངོ་བོ་ལས། །ཁྲོ་བོས་དེ་བཞིན་གཤེགས་ཀུན་མཛད། །ཁྲོ་བའི་ཚུལ་ཅན་ཁྲོས་པས་ཀྱང་། །འཇིག་རྟེན་གསུམ་དག་སྲེག་བྱེད་ན། །སངས་རྒྱས་ཐུགས་རྗེས་ཁྲོས་པས་ནི། །ཐམས་ཅད་འཇིགས་པའི་མཆོག་ཡིན་ཏེ། །ཁམས་གསུམ་འདི་དག་སྨོས་ཅི་དགོས། །རྡོ་རྗེ་སེམས་དཔའ་དེ་བཞིན་གཤེགས། །དམ་ཚིག་ལ་སྡང་རྣམ་སྦྱང་ཕྱིར། །དུར་ཁྲོད་གར་གྱི་ཕྱག་རྒྱར་གསལ། །དེ་ནས་བསྐྱེད་པར་བྱ་བ་ཡང་། །ཧཱུཾ་བཞི་འཕྲོས་དང་འདུས་པ་ལས། །ཡི་གེ་ཧཱུཾ་དང་ཀློང་གྱུར་ཏེ། །ཧཱུཾ་ཉིད་བདག་ལ་རབ་ཐིམ་པས། །ཧཱུཾ་ཤྲཱི་ཧེ་རུ་ཀ་ཧཱུཾ། ཨ་བརྗོད་པས་དཔལ་ལྡན་ཧེ་རུ་ཀ །བདག་ཉིད་གྱུར་པར་རབ་ཏུ་བསྒོམ། །ཀློང་དེ་ཡུམ་ལ་རབ་ཐིམ་པས། །ཀློང་ཀྲོ་དྷཱི་ཤྭ་རཱི་ས་མ་ཡ་དེ་བི་ཏ་ན་ཤོ་དྷ་ཡ། བརྗོད་པས་རང་གི་ཡུམ་ཉིད་དུ། །ཀྲོ་དྷཱི་ཤྭ་རི་མ་རུ་གྱུར། །ཧེ་རུ་ཀ་ནི་ལྔ་སོགས་པ། །ཧཱུཾ་དང་ཧ་ཧེ་ཕཊ་ཅེས་པས། །ཏིང་ངེ་འཛིན་གྱིས་ཁྲོས་པར་བཟླས། །ཕྱོགས་བཅུའི་ཞིང་ཁམས་མ་ལུས་པར། །བྷྲཱུཾ་དང་ཙ་ལས་འཁོར་ལོར་གྱུར། །གཏུམ་ཆེན་དུས་མཐའི་མེ་ལྟར་འབར། །སྣ་ཚོགས་ཁྲོ་འབྱུང་འོད་འཕྲོ་འབར། །སྲིད་གསུམ་བསྲེག་པའི་མེ་ཡིན་ཏེ། །ཡིད་ཀྱི་ཡེ་ཤེས་མེ་རུ་
འབར། །འོད་འཕྲོ་འབར་བའི་ཚོགས་ཆེན་པ། །ཧཱུྃ་རལ་པ་མུན་ཛའི་ཅོད་པན་འབར། །ཕྱོགས་བཅུར་ཁེངས་པའི་གཤོག་པ་གདེངས། །ཉི་མ་ཐོད་སྦྲུལ་མང་པོའི་གཟི། །ཁྲོ་གཉེར་གློག་སྟོང་འགྱུ་བ་བཞིན། །རྔམ་པའི་ང་རོ་འབྲུག་སྟོང་ལྡིར། །ཕཊ་རཾ་ཛྭ་ལ་ཧཱུཾ་བརྗོད་ཅིང་། །འཕྲོས་པའི་སྤྲིན་ཆེན་ཕྱོགས་བཅུར་འབར། །ཁྲོས་པའི་རྡོ་རྗེ་མེ་ཆེན་པོ། །རྡོ་རྗེ་འཁོར་ལོ་བརྩེགས་པ་འབར། །ཙཀྲ་ཕཊ་རཾ་ཧཱུཾ་རཾ་འབར། །ཁྲོ་བོ་ཁྲོ་མོའི་ཚོགས་ཀྱིས་བསྐོར། །གནས་དང་ཡུལ་གྱི་ཕྱག་རྒྱས་མཛེས། །སོ་སོར་རང་སྔགས་ཁྲི་འབུམ་ཟློས། །སྒྲ་སྐད་ང་རོ་དྲག་པོར་ལྡན། །ཧཱུཾ་ཧཱུཾ་ཧ་ཧ་ཕཊ་བྷྱོ་ལས། །སླས་དང་བྱི་མོ་བྲན་མོའི་ཚོགས། །ཤིན་ཏུ་རྔམ་པའི་གཟུགས་ཀྱིས་གནས། །ནྲྀ་ཡི་ཙིཏྟ་ཟ་ཞིང་རྒྱུག །ཏི་ར་རྒྱུ་མའི་ཞགས་པ་འདེབས། །རང་གི་སྟན་དང་ལག་ཆར་ནི། །རྡོ་རྗེ་གཏམས་པའི་བྲག་རི་དང་། །ཏི་ར་གསར་སྙིང་བུམ་རིལ་འཕེན། །སོ་སོའི་རང་སྔགས་བཟླས་ནས་སུ། །རྒྱུད་དྲུག་གནས་པའི་སེམས་ཅན་དང་། །མ་རུངས་གདུག་པ་ཐམས་ཅད་ཀུན། །ཛཿཧཱུཾ་བཾ་ཧོས་བཀུག་ནས་ནི། །ལན་གཉིས་ལན་གསུམ་ཞལ་དུ་བསྡིམ། །དེ་ནས་བདུད་བཞི་གཞོམ་པ་ནི། །ཆོ་འཕྲུལ་བཞི་ཡི་སྔགས་བརྗོད་དོ། །ཧཱུཾ་ཧཱུཾ་ཧཱུཾ་ཧཱུཾ། ཧཱུཾ་བི་ཤྭ་ཀྲོ་དྷ་མཎྜ་ལ་ཧ་ལ་ཧ་ལ་ཕཊ་ཕཊ་ཕཊ། རིགས་ལྔའི་ཞལ་ནས་སྔགས་བརྗོད་པས། །བདུད་བགེགས་མ་ལུས་རབ་ཏུ་འགྱེལ། །ཧེ་མ་ཧཱ་རུ་དྲ། ཀྵ་ཏྲུཾ་ཀརྨ་བཛྲ། མ་ཧཱ་དེ་བ། མ་རུ་དྲ། ཧཱུཾ་ཛྫ་ཛྫ། ཞེས་པས་ཞབས་ཀྱི་འོག་ཏུ་གཞུག །གཉིས་པ་དབང་ཆེན་ཐོག་སེར་འབེབས། །ཙཀྲ་ཧཱུཾ་བྷྲཱུཾ། དབང་ཆེན་རྡོ་རྗེ་ཐོག་སེར་འབེབས། །བཛྲ་ཧཱུཾ་བྷྲཱུཾ། ཡོད་དམ། དབང་ཆེན་འཁོར་ལོའི་ཐོག་སེར་འབེབས། །ཙཀྲ་ཨོཾ་བྷྲཱུཾ། དབང་ཆེན་རིན་ཆེན་ཐོག་སེར་འབེབས། ། རཏྣ་ཡིན་ནམ། ཙཀྲ་ཏྲཱཾ་བྷྲཱུཾ། དབང་ཆེན་པདྨའི་ཐོག་སེར་འབེབས། །པདྨ་ཡིན་ནམ། ཙཀྲ་ཧྲི་བྷྲཱུཾ། དབང་ཆེན་རལ་གྲིའི་ཐོག་སེར་འབེབས། །ཙཀྲ་ཀརྨ་ཧཱ་བྷྲཱུཾ། ཞེས་པས་ལུས་དེ་གཤགས་དྲལ་བྱས། །རྔམ་པ་གློག་གི་འཁོར་ལོ་འབར། །རྡོ་རྗེའི་རྫུ་འཕྲུལ་རྣམ་པར་སྤྲུལ། །དཔའ་བོ་ཁྲོ་བོ་འཇིགས་བཅས་པས། །རིག་སྔགས་དོན་ལ་ཡང་དག་སྦྱོར། །ཁྲག་གི་རྒྱ་མཚོའི་རྦ་རླབས་ཆི་ལི་ལི། །
རུས་པའི་ཚོགས་ཀྱི་ཕུང་པོ་ཁྲ་ལ་ལ། །རྡོ་རྗེ་ཞིང་ཆེན་དྲི་ངད་བསུངས་སེ་བསུང་། །མཐོང་ཐོས་རྔམ་པ་མཁའ་འགྲོའི་ཚོགས་དང་རོལ། །རཀྟ་ཛ་མུནྟ་ཛྭ་ལ་མཎྜ་ལ་ཧཱུཾ། ཀེཾ་ནི་རི་ཏི་ཛྭ་ལ་མཎྜ་ལ་ཧཱུཾ། མ་ཧཱ་ཏིཀྵྞཱ་ཡང་ཏིཥྛ་ཛྭ་ལ་མཎྜ་ལ་ཧཱུཾ། ཁ་ཁ་ལ་ཤ་ཏ་ཨ་ལ་ལ་ཧོ། འཆི་བ་མེད་པར་སྲོག་གདོན་པ། །རྡོ་རྗེའི་སྲོག་ནི་རླུང་ལྟ་བུ། །ཡང་དག་བསྒྲལ་བ་རྡོ་རྗེ་ཆེ། །སྐྱེ་ཤི་མེད་པའི་ས་ལ་འགོད། །བཛྲ་རཱ་ཛ། རཏྣ་རཱ་ཛ། པདྨ་རཱ་ཛ། ཀརྨ་རཱ་ཛ་ཏ་ཐཱ་ག་ཏ་རཱ་ཛ། དེ་ནས་རང་དབང་རང་ལ་རྫོགས། །བུམ་པ་ཅོད་པན་མིང་དང་ནི། །རྡོ་རྗེ་དྲིལ་བུ་རྒྱུ་ནས་བླང་། །ལམ་བསྒོམ་འབྲས་བུར་གྱུར་པ་ཡི། །བརྡའ་རྣམས་སྟོན་པའི་དབང་ཡང་བསྐུར། །གསང་དབང་ཤེས་རབ་ཡེ་ཤེས་དང་། །བདེ་ཆེན་སྐུ་གསུང་ཐུགས་བྱིན་བརླབ། །དབང་བསྐུར་བ་ཡི་སྔགས་འདི་ཡིན། །ཨོཾ་མ་ཧཱ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱདྨ་ཀོ྅ཧཾ། ཨོཾ་མ་ཧཱ་ཨཱ་དཪྴ་ཛྙཱ་ན་བཛྲ་སྭ་བྷཱ་ཝ་ཨཱདྨ་ཀོ྅ཧཾ། ཨོཾ་མ་ཧཱ་པྲ་ཏྱ་བེཀྵེ་ཎ་ཛྙཱ་ན་བཛྲ་སྭ་བྷཱ་བ་ཨཱདྨ་ཀོ྅ཧཾ། ཨོཾ་མ་ཧཱ་ས་མ་ཏཱི་ཛྙཱ་ན་བཛྲ་སྭ་བྷཱ་བ་ཨཱདྨ་ཀོ྅ཧཾ།ཨོཾ་མ་ཧཱ་ཀྲྀ་ཏྱཱཥྛ་ན་ཛྙཱ་ན་བཛྲ་སྭ་བྷཱ་བ་ཨཱདྨ་ཀོ྅ཧཾ། ཨོཾ་སརྦ་ཏ་ཐཱ་ག་ཏ་མ་ཧཱ་ཀཱ་ཡ་བཛྲ་སྭ་བྷཱ་བ་ཨཱདྨ་ཀོ྅ཧཾ། ཨོཾ་སརྦ་ཏ་ཐཱ་ག་ཏ་མ་ཧཱ་ཝཱཀ་བཛྲ་སྭ་བྷཱ་བ་ཨཱདྨ་ཀོ྅ཧཾ། ཨོཾ་སརྦ་ཏ་ཐཱ་ག་ཏ་མ་ཧཱ་ཙིཏྟ་བཛྲ་སྭ་བྷཱ་བ་ཨདྨ་ཀོ྅ཧཾ། དེ་ནས་གནས་ནི་བསྲུང་བ་ཡང་། །རྩ་ནི་དཀྱིལ་འཁོར་གཞལ་ཡས་ཁང་། །ལུས་ཁམས་བདུད་རྩི་ལྷ་ཡི་ཆུ། །སྔགས་ཀྱི་ཡི་གེ་གསུང་ཡིན་ཏེ། །ཐུགས་ནི་སྙིང་པོ་རླུང་དུ་གནས། །གནས་བསྲུང་བ་ཡི་དམ་པའོ། །དེ་ནས་གཤོག་པ་བསྐྱེད་པ་ནི། །རྡོ་རྗེ་ལྟ་བུའི་ནམ་འཕང་གཅོད། །རིན་ཆེན་གཤོག་པས་མཆོད་སྦྱིན་གཏོང་། །མ་མོ་མཁའ་འགྲོ་དབང་དུ་སྡུད། །དེ་ནས་རྫོགས་པར་གདོན་པ་ནི། །ཕྱག་རྒྱ་བཅས་ཏེ་སྣ་བུག་ནས། །ཡུངས་ཀར་གཞི་ལས་ཐམས་ཅད་རྫོགས། །སྲོག་དང་རྩོལ་པ་ལས་བྱུང་ངོ་། །ཛཿཧཱུཾ་བཾ་ཧོཿ སྔགས་སོར་བཞག །ཤྲཱི་ཧེ་རུ་ཀ་ཨ་གད་ཏ་ཡ་ཨ་གད་ཏ་ཡ། པྲ་བེ་ཤ་ཡ་པྲ་བེ་ཤ་ཡ། བནྡྷ་ཡ་བནྡྷ་ཡ། ཏོ་ཤ་ཡ་ཏོ་ཤ་ཡ། མོ་ཧ་ཡ་མོ་ཧ་ཡ།བཛྲ་ཌཱཀྐི་ནི་ནན། ཤྲཱི་ཧེ་རུ་ཀ་ཧཱུཾ་ཕཊ། ཛཿཧཱུཾ་བཾ་ཧོཿ། ཤྲཱི་ཧེ་རུ་ཀ་མ་ཧཱ་བཛྲ་སརྦ་དུཥྚན། ས་མ་ཡ་མུ་དྲ། པྲ་བྷཉྩ་ཀ་ཧཱུཾ་ཕཊ། དེ་ནས་
མ་ཏྲང་མནན་པ་ནི། །མ་ཏྲང་རྣམ་པ་གསུམ་ཡོད་དེ། །ཆོས་ལ་བདག་ཏུ་འཛིན་པས་ཡིན། །གང་ཟག་བདག་འཛིན་ཁ་ཊྭཱཾ་ག །རྒྱུ་འབྲས་ཆད་བལྟ་ཨཱ་ཀཪྴ། །དུས་གསུམ་རྒྱུར་གྱུར་ལུས་ངག་ཡིད། །ཁམས་གསུམ་ངང་གནས་འཁོར་བ་ཡིན། །དོན་གྱི་གཞོམ་དང་ཐབས་ཀྱི་གཞོམ། །ཧེ་ནི་གཟུང་བའི་ཡུལ་མེད་ཆོས་ཀྱི་སྐུ། །ཧེ་ཧེ་ཀ །རུ་ནི་འཛིན་པའི་སེམས་མེད་ཡེ་ཤེས་ཡིན། །རུ་རུ་ཀ །ཀ་ནི་རྟེན་འདྲེལ་རྒྱུ་འབྲས་ཆོ་འཕྲུལ་སྟོན། །ཀ་ཀརྨ། དུག་གསུམ་རྣམ་པར་དག་པས་ཁམས་གསུམ་དབང་དུ་སྡུད། །སྐུ་གསུམ་ལྷུན་གྱིས་གྲུབ་ཅིང་མཚན་མ་གསུམ་དང་བྲལ། །སྐུ་གསུམ་ས་གསུམ་ཏིང་འཛིན་ཡེ་ཤེས་གསུམ། །ཤྲཱི་ནི་གཉིས་མེད་ཡེ་ཤེས་ལ། །ཧེ་ནི་རྒྱུ་སོགས་སྟོང་པ་ཉིད། །རུ་ནི་ཚོགས་དང་བྲལ་བ་སྟེ། །ཀ་ནི་གང་དུའང་མི་གནས་པའོ། །རྡོ་རྗེ་གསོར་ནས་འདི་སྐད་གསུངས། །ཤར་ཕྱོགས་འཇིག་རྟེན་ལམ་སྒོ་ནས། །འབྱུང་པོ་གཏུམ་པོ་ང་རྒྱལ་ཅན། །ཁྱོད་ནི་སྒྲིབ་པ་ཀུན་གྱིས་བསྒྲིབས། །ཡང་དག་ཤེས་རབ་ཡེ་ཤེས་ཀྱི། །ཁུངས་བཙལ་རྩད་བཅད་རང་ལས་བྱུང་། །བདག་འཛིན་བདག་གིར་རྟོག་པ་ནི། །བདག་མེད་སྟོང་པའི་ཐོ་བས་གཞོམ། །བདག་པོ་ཐབས་སྟོབས་བརྩོན་འགྲུས་ཀྱིས། །གནས་ངན་ལེན་པའི་དེད་དཔོན་བྱེད། །དེ་ཉིད་བདག་རྟོག་ཡིན་པས་ན། །བདག་མེད་སྟོང་པའི་སྟོབས་ཀྱིས་གཞོམ། །ཨཱདྨ་ནི་མ་ཧཱ་ཤུ་ནྱ་ཏཱ་ཛྙཱ་ན་བཛྲ་མུངྒ་ར་ཨཱ་ཀོ་ཊ་ཡ་ཧཱུཾ་ཕཊ། ཨོཾ་སརྦ་པཱ་པ་ཀ་ར་ཧེ་ཏ་པ་པི་མ་ཏྲཾ་རུ་དྲ་ཧཱུཾ་ཕཊ། སརྦ་པ་པ་ཀ་ར་ཧེ་ཏེ་པ་ཏྲི་ཁ་ཊྭཱཾ་ག་རུ་དྲ་ཧཱུཾ་ཕཊ། ཨོཾ་སརྦ་པ་པ་ཀ་ར་ཧེ་ཏ་པ་པི་ཏ་ཨཱ་ཀཪྴ་རུ་དྲ་ཧཱུཾ་ཕཊ། ཆོས་ཆེན་གྱི་ནི་གོ་བགོས་ཏེ། །དཔལ་ཆེན་སྟོབས་ཀྱང་ཆེ་བ་བདག །སྟོང་པའི་མཚོན་ཆ་རྣོན་པོ་ཡིས། །གདབ་པ་དག་ཀྱང་དེ་དག་འདེབས། །ཆོས་ཀུན་རྟག་ཏུ་རང་གི་ངོ་བོས་སྟོང་། །རྒྱལ་བའི་སྲས་རྣམས་དངོས་པོ་རྣམ་པར་འཇིག །སྲིད་པ་ཇི་བཞིན་ཡེ་ནས་སྟོང་པ་ཡིན། །ཉི་ཚེ་སྟོང་ཉིད་མུ་སྟེགས་ཅན་རྣམས་ཀྱིས། །དེ་བས་ཡང་ནི་འདི་སྐད་གསུངས། །འཕགས་པ་ཐམས་ཅད་བདག་ལ་
གསོན། །འབྱུང་པོ་མང་པོ་ཀུན་ཉོན་ཅིག །རྡོ་རྗེ་རྣོན་པོ་འཇམ་དཔལ་གྱི། །ཐུགས་རྗེའི་ངང་དང་ཤེས་རབ་དང་། །ཐབས་མཁས་པ་ཡི་བྱིན་རླབས་ཀྱིས། །འགྲོ་བ་ཐམས་ཅད་བསྲུང་བར་མཛད། །འགྲོ་བའི་བདག་པོའི་ཚེ་དང་སྲོག །གསོན་པོ་བདེ་བར་བར་གཅོད་པ། །བདག་དང་གཤིན་རྗེ་འཁོར་བཅས་ཀུན། །བཅོམ་ཞིང་གསོད་པའི་གཤེད་པོ་ནི། །འཇམ་དཔལ་འཕྲུལ་གྱི་དངོས་གྲུབ་མཆོག །སྲིད་གསུམ་མཐར་བྱེད་རྔམ་པ་དེས། །ཁ་ཊྭཱཾ་ཐོད་དབྱུག་མི་བཟད་པས། །གཤིན་རྗེ་བཅོམ་ནས་གསད་པར་བྱ། །ཛཿཧཱུཾ་བཾ་ཧོཿ། ཤྲཱིཿཧེ་རུ་ཀ་མ་ཧཱ་བཛྲ་སརྦ་དུཥྚན། ས་མ་ཡ་མུ་དྲ་པྲ་བྷཉྩ་ཀྲ་ཧ་ན་ཧཱུཾ་ཕཊ། བདག་པོ་གདོལ་པ་དྲག་པོ་ཡི། །རོ་ཡི་ཉལ་ཐབས་གན་རྐྱལ་ཏེ། །ལག་པ་གཡས་གཡོན་མཁྲིག་མ་ནི། །ཁྱི་གཉིས་དང་ནི་བྱ་རྒོད་གཉིས། །མགོ་ནི་ལྷོ་ནུབ་མཚམས་སུ་བསྟན། །རྐང་པ་བྱང་ཤར་ཐུག་པ་མེད། །དེ་ཡང་ཅུང་ཟད་བསྣོལ་བའོ། །ཐལ་བའི་མདོག་ལ་སྐྲ་འགྲེངས་པ། །ཁོང་པ་ནམ་མཁའི་གཞལ་ཡས་ཁང་། །ཡན་ལག་རིན་ཆེན་དུར་ཁྲོད་རྟེན། །ཤེས་རབ་དགྲ་སྟྭས་གཤག་པར་བྱ། །དགྲ་སྟྭའི་ཕྱག་རྒྱ་ཧ་ཧ་ཞེས། །ཁོང་པ་གཤགས་ནས་དེ་ནང་དུ། །བྷྲཱུཾ་རཏྣ་ཁ་ཏ་ལི་བྱི་ཧཱུཾ། ཞེས་པས་ཁོང་པ་གཞལ་ཡས་ཁང་། །གཉིས་སུ་མེད་པར་བསམ་པར་བྱ། །དེ་ནས་དེ་ནང་འཇུག་པ་ནི། །གནས་ཀྱི་སྒོ་འདི་སུ་ཡིས་བཅད། །སེམས་ཀྱི་བདག་པོས་བཅད་དམ་ཅི། །གཟུང་འཛིན་རྐང་པ་བསྣོལ་བ་ནི། །ཡུལ་ལས་འདས་པའི་ཞབས་ཀྱིས་དབྱེ། །ཧཱུཾ་ཕཊ་མ་ཏྲཾ་རུ་དྲ་ཕཊ། །དེ་ནས་ལྕགས་ཀྱི་ཕྱག་རྒྱས་བཏབ། །རྡོ་རྗེའི་གར་གྱི་ཚུལ་གྱིས་ནི། །འཁོར་བཅས་ཁང་པར་འཇུག་པར་བྱ། །ཏོ་ཙ་པྱང་ཏོ་སོར་བཞག་ཙ་པྱང་། མ་ནུ་ད་ར། ཨུད་མ་ད་ར། ཤྲཱི་ཀཱ་ལ་ལ་ཡེ་ཏོ་ཙ་པྱཱང་། པདྨ་རཀྟ་ད་རཾ། ཨུདྨ་ད་རཾ། བཛྲ་ད་རཾ། བཛྲ་མ་ཧཱ་མཱཾ་ས་ད་རཾ། ཞེས་པའི་སྔགས་དེ་བརྗོད་ནས་ནི། །ཧ་ཧ་ཧཾ་ཞེས་བརྗོད་པ་ཡི། །སྔགས་དེས་སྒོ་གཉིས་གཅད་པར་བྱའོ། །དེ་ནས་སྤྱན་ཡང་དྲང་བ་ནི། །ཡེ་ཤེས་སྤྱན་གྱི་སྤྱོད་ཡུལ་ནས། །དཔལ་ཆེན་ཁྲག་འཐུང་འཁོར་དང་བཅས། །སེམས་ཅན་དོན་སླད་དམ་ཚིག་དགོངས། །
གནས་འདིར་མ་ལུས་གཤེགས་སུ་གསོལ། །ཨེ་ཧྱེ་ཧི་བྷ་ག་ཝཱན། ཛཿཧཱུཾ་བཾ་ཧོཿ། རུ་ལུ་རུ་ལུ། ཛཿཧཱུཾ་བཾ་ཧོཿཨེ་ཧྱེ་ཧི་དྲྀ་ཤྱ་ཧོ། ས་མ་ཡ་ཧོ། ས་མ་ཡ་སྟྭཾ། ཨོཾ་ཤྲཱི་ཧེ་རུ་ཀ །ཨོཾ་ཨེ་བཛྲ་ཨཱ་ར་ལི། ཧྲིཾ་ཧྲིཾ་ཧྲིཾ། དེ་ནས་བསྡིམ་པ་འདི་སྐད་གསུངས། །དད་པ་དང་ནི་དམ་ཚིག་གིས། །ཚུར་གཤེགས་ཚུར་གཤེགས་ཧེ་རུ་ཀ །ཆོས་སྐུ་ཞི་བའི་ངང་ལས་ཀྱང་། །གཟུགས་སྐུ་འཇིགས་ཚུལ་བསྟན་དུ་གསོལ། །ཐུགས་རྗེ་ཆེན་པོ་ཐབས་མཁས་པས། །གདུག་པ་འདུལ་ཕྱིར་གཤེགས་སུ་གསོལ། །ཚོགས་རྗེ་ཚོགས་བདག་དབང་དང་ལྡན། །ཚོགས་ཀྱི་སློབ་དཔོན་གཤེགས་སུ་གསོལ། །ཡེ་ཤེས་རྟོགས་པའི་ཁྱད་པར་ལས། །སྤྲུལ་པ་མང་པོའི་ཚོགས་བཅས་གཤེགས་སུ་གསོལ། །ཛཿཧཱུཾ་བཾ་ཧོཿ། ཤྲཱི་ཧེ་རུ་ཀ་མ་ཧཱ་བཛྲ་སརྦ་དུཥྚན། ས་མ་ཡ་མུ་དྲ། པྲ་བེ་ཤ་ཕཊ། ཨཱ་བེ་ཤ་ཨ། ཤྲཱི་ཧེ་རུ་ཀ་ཧཱུཾ་ཕཊ། ཛཿཧཱུཾ་བཾ་ཧོཿ། ཤྲཱི་ཧེ་རུ་ཀ་མ་ཧཱ་བཛྲ་སརྦ་དུཥྚན། ས་མ་ཡ་མུ་དྲ། པྲ་བན་ཙཀྵ་ཧཱུཾ་ཕཊ། དེ་ནས་ལས་ལ་གཞུག་པ་ནི། །བདེ་གཤེགས་ཕོ་བྲང་དཀྱིལ་འཁོར་འདིར། །འགྲོ་བ་མ་ལུས་བསྒྲལ་བའི་ཕྱིར། །དོན་གྱི་དབང་དུ་དགོངས་ནས་ཀྱང་། །འཁོར་བཅས་རབ་འབར་གཤེགས་སུ་གསོལ། །ཛཿཧཱུཾ་བཾ་ཧོཿ། ཤྲཱི་ཧེ་རུ་ཀ་མ་ཧཱ་བཛྲ་སརྦ་དུཥྚན། ས་མ་ཡ་སྟྭཾ། ཨ་པ་སྟཾ་བ་ཀ་ཧཱུཾ་ཕཊ། དེ་ནས་དམ་ཚིག་ཕྱག་རྒྱ་ཡིས། །བརྟན་པར་བཞུགས་སུ་གསོལ་བ་ནི། །སེམས་ཅན་དོན་ཕྱིར་ནན་ཏན་མཆོག་བསྐྱེད་ཅིང་། །ཡེ་ཤེས་ཐུགས་རྗེས་བདག་ལ་དགོངས་ནས་ཀྱང་། །མི་གཉིས་དོན་ཕྱིར་དངོས་གྲུབ་མཆོག་རྣམས་ཀུན། །བདག་ལ་སྩལ་ཅིང་བརྟན་པར་བཞུགས་སུ་གསོལ། །ཛཿཧཱུཾ་བཾ་ཧོཿཤྲཱི་ཧེ་རུ་ཀ་མ་ཧཱ་བཛྲ་སརྦ་དུཥྚན། ས་མ་ཡ་ཧི། ཀཱ་ཡ་ཝཱཀ་ཙིཏྟ། ཏིཥྛ་བཛྲ་ཧཱུཾ། དེ་ནས་ལྷ་ནི་གནད་ལ་དབབ་པ་ཡི། །ཆོ་ག་ཡང་ནི་འདི་སྐད་གསུངས། །དམ་ཚིག་པ་ལ་བཞུགས་པ་ཡི། །དཔལ་ཆེན་ཁྲག་འཐུང་འཁོར་དང་བཅས། །དམ་ཚིག་ཚུལ་བཞིན་མ་གཤེགས་སམ། །གྲུབ་པ་མཆོག་དག་མ་སྩལ་ན། །སྐུ་གསུང་ཐུགས་དང་འགལ་བའོ། །ཨོཾ་བཛྲ་
གུ་ཧྱེ་ཤཱི་ཧེ་རུ་ཀ་ས་མ་ཡ་སྟྭཾ། ཨོཾ་བཛྲ་གུ་ཧྱ་དྲྀ་ཤྱ་ས་མ་ཡ་ཧཱུཾ། ཨོཾ་བཛྲ་གུ་ཧྱ་དྲྀ་ཤྱ་ས་མ་ཡ་ཕཊ། སྐུ་གསུམ་ཕྱག་རྒྱ་རབ་བཤད་བྱ། །ལག་པ་གཉིས་ནི་ཐལ་མོ་སྦྱར། །མཐེའུ་ཆུང་གུང་མོ་རྩེ་སྤྲད་ནས། །སྲིན་ལག་གཉིས་ནི་རབ་ཏུ་བསྣོལ། །མཛུབ་མོ་གཉིས་ནི་ཟླུམ་པོར་བཀུག །ཐོད་པ་སྐམ་པོའི་ཕྱག་རྒྱའོ། །སྔ་མ་བཞིན་དུ་གནས་པ་ལ། །སྲིན་ལག་མཛུབ་མོའི་ནང་དུ་གཞུག །ཐོད་པ་རླན་པའི་ཕྱག་རྒྱའོ། །ལག་གཉིས་སྙིམ་པ་ལྟར་བྱས་ལ། །ཐོད་པ་ཚལ་བུའི་ཕྱག་རྒྱའོ། །གཡས་པ་མཛུབ་མོ་ཟླུམ་པོར་བྱ། །གཡོན་པའི་མཛུབ་མོ་དེ་ལ་གཏད། །གཡས་ཀྱི་མཐེ་བོང་གཡོན་པ་ཡིས། །མཐེ་བོང་རྒྱབ་ཚིགས་དང་པོར་གཏད། །གཞན་རྣམས་ཐལ་སྦྱར་རྩེ་སྤྲད་པ། །ཕྲིན་ལས་རྣམ་བཞིའི་ཕྱག་རྒྱའོ། །ཕྱག་རྒྱའི་ལས་འདི་བཅའ་བ་ཡང་། །དམིགས་པ་ཡོད་པས་ཤེས་པར་བྱའོ། །དེ་ནས་ཕྱག་ཀྱང་བྱ་བ་ནི། །ཧེ་རུ་ཀ་ལྔ་ལ་ཕྱག་འཚལ་བ། །འགྲོ་རྣམས་ཇི་ལྟར་འདུལ་བཞིན་གཤེགས་མཛད་པ། །ཤེས་རབ་ནམ་མཁའི་བསྐལ་པས་རྒས་རྒུད་སྟོངས། །གཏི་མུག་ཚུལ་གྱིས་གཏི་མུག་འཇོམས་མཛད་པ། །གཏི་མུག་འཁོར་ལོ་ཁྱོད་ལ་ཕྱག་འཚལ་ལོ། །བུཌྜྷ་ཧེ་རུ་ཀ་ཧ་ཧ་རུ་ལུ་རུ་ལུ་ན་མཿ། ཡེ་ཤེས་རྡོ་རྗེས་ཉོན་མོངས་རྡོ་རྗེ་འཇོམས། །ཐབས་འཛིན་མཚོན་ཆའི་བསྐལ་པས་དངོས་པོ་འཇིག །ཞེ་སྡང་ཚུལ་གྱིས་ཞེ་སྡང་འཇོམས་མཛད་པ། །ཞེ་སྡང་རྡོ་རྗེ་ཁྱོད་ལ་ཕྱག་འཚལ་ལོ། །བཛྲ་ཧེ་རུ་ཀ་རུ་ལུ་རུ་ལུ་ན་མཿ། རིན་ཆེན་དབྱིངས་ལྟར་རེ་འདོད་ཀུན་བསྐང་ཞིང་། །བདག་མེད་ཞི་གནས་ཆུ་ཡི་བསྐལ་པས་འཁྲུ། །ང་རྒྱལ་ཚུལ་གྱིས་ང་རྒྱལ་འཇོམས་མཛད་པ། །ང་རྒྱལ་རིན་ཆེན་ཁྱོད་ལ་ཕྱག་འཚལ་ལོ། །རཏྣ་ཧེ་རུ་ཀ་ཧ་ཧ་རུ་ལུ་རུ་ལུ་ན་མཿ། འཁོར་བའི་འདམ་དུ་པད་ལྟར་སྐུ་འཁྲུངས་ཤིང་། །ལྷག་མཐོང་མེ་ཆེན་བསྐལ་པས་ཐམས་ཅད་བསྲེག །འདོད་ཆགས་ཚུལ་གྱིས་འདོད་ཆགས་འཇོམས་མཛད་པ། །འདོད་ཆགས་པདྨ་ཁྱེད་ལ་ཕྱག་འཚལ་ལོ། །པདྨ་ཧེ་རུ་ཀ་ཧ་ཧ་རུ་ལུ་རུ་ལུ་ན་མཿ། ཕྲིན་ལས་རྒྱ་མཚོས་འགྲོ་བའི་
དོན་མཛད་ཅིང་། །ཤེས་རབ་ཐོགས་མེད་བསྐལ་པའི་རླུང་གིས་བསྐྱོད། །ཕྲག་དོག་ཚུལ་གྱིས་ཕྲག་དོག་འཇོམས་མཛད་པ། །ཕྲག་དོག་རལ་གྲི་ཁྱོད་ལ་ཕྱག་འཚལ་ལོ། །ཀརྨ་ཧེ་རུ་ཀ་ཧ་ཧ་རུ་ལུ་རུ་ལུ་ན་མཿ། བདག་མེད་ཕྱོགས་བྲལ་དོན་དམ་ཐུགས་ཆུད་ཅིང་། །བྱམས་དང་སྙིང་རྗེ་དགྲ་ཟུན་མི་མངའ་ཡང་། །གདུག་པ་འདུལ་ཕྱིར་དུས་ལས་མི་འདའ་བའི། །འཇིགས་བྱེད་ཧེ་རུ་ཀ་ལ་ཕྱག་འཚལ་ལོ། །མི་གནས་མི་དམིགས་ཆོས་སྐུར་དག་པ་ལས། །བདུད་འདུལ་ཁྲོ་བོ་མཆོག་གི་སྐུར་སྟོན་པ། །ཐུགས་རྗེའི་གཟི་ལྡན་གདུག་པ་ཐབས་ཀྱིས་འདུལ། །བཅོམ་ལྡན་ཁྲོ་རྒྱལ་གཙོ་ལ་ཕྱག་འཚལ་ལོ། །མཉམ་ཉིད་ངང་གིས་ཁྲོ་ལ་ཕྱག་འཚལ་ལོ། །ཁྲོས་པས་ལོངས་སྤྱོད་མཛད་ལ་ཕྱག་འཚལ་ལོ། །རྡོ་རྗེ་འདུ་འཕྲོ་མཛད་ལ་ཕྱག་འཚལ་ལོ། །ཁྲོ་མོ་དབང་ཕྱུག་སྐུ་ལ་ཉེར་གནས་ཤིང་། །ཐབས་དང་ཤེས་རབ་འདྲེལ་བའི་དཀྱིལ་འཁོར་ནས། །མཁའ་འགྲོ་མི་བཟད་འབར་བའི་སྤྲིན་འཕྲོ་མ། །གདུག་པ་འདུལ་མཛད་ཡུམ་ལ་ཕྱག་འཚལ་ལོ། །ནམ་མཁའི་ལུས་ཅན་གར་ཡང་ཐོགས་མེད་རྒྱུ། །འདོད་དགུར་བསྒྱུར་བའི་གཟུགས་ཅན་འཕྲུལ་མོ་ཆེ། །མ་སྲིང་བྱམས་མའི་ཚུལ་གྱི་གྲོགས་མཛད་མ། །ཕྱི་ནང་མཁའ་འགྲོའི་ཚོགས་ལ་ཕྱག་འཚལ་ལོ། །ཨོཾ་ན་མཿསརྦ་ཏ་ཐཱ་ག་ཏ་བནྡ་ནཾ་ཀ་རོ་ཡཱ་མི་ཧཱུཾ། ཨ་ཏི་པུ་ཧོ། པྲ་ཏི་ཛ་ཧོ་ཨ་ལ་ལ་ཧོ།དེ་ནས་ཁྲོ་རྒྱལ་ཆེ་རྣམས་ཀྱི། །ཐིམ་པའི་དཀྱིལ་འཁོར་རབ་བཤད་བྱ། །མཆོད་པ་འབུལ་དང་སྨོན་ལམ་གདབ། །མཆོད་པ་བཅུ་གཅིག་དབུལ་བར་བྱ། །ཕྲ་མེན་གར་གྱི་མཆོད་པ་དང་། །སྨན་གྱི་མཆོད་པ་འབུལ་བ་དང་། །དངོས་གྲུབ་བསྐུལ་དང་དངོས་གྲུབ་བླང་། །ཐུགས་དམ་བསྐང་ཞིང་བཀའ་ལོག་བསྐལ། །ཟ་སྟོབས་སྒག་ཟིལ་གཏོར་མ་བསྟོད། །ཕྲ་མེན་གར་གྱི་མཆོད་པ་ནི། །ཕྲ་མེན་ཉུ་ལེའི་ལྗོན་ཚུལ་སྟབས། །སྲིད་གསུམ་འཇོམས་མཛད་དབྱུག་ཐོགས་གཽ་རི་མ། །དམ་ཚིག་དབྱིངས་མཆོག་སྐུལ་བྱེད་ཙཽ་རི་མ། །སྟོང་གསུམ་དབང་མཛད་རྒྱལ་བྱེད་ཕྲ་མོ་ཧཱ། །མ་ལུས་
ཐལ་བྱེད་རྔེའུ་ཐོགས་བེ་ཏཱ་ལཱི། །བདེ་ཆེན་དབྱིངས་སུ་འདྲེན་མཛད་པུཀྐ་སཱི། །དཀྲུགས་ནས་ཞལ་དུ་གསོལ་མཛད་གྷསྨ་རཱི། །འབར་བས་སྟོང་གསུམ་སྟོང་བྱེད་ཙཎྜ་ལཱི། །ཐུགས་རྗེས་འཇིག་རྟེན་སྒྲོལ་མཛད་སྨ་ཤ་ནཱི། །འགྲོ་བའི་སྡུག་བསྔལ་གསོད་བྱེད་སིངྷ་མ། །འཆི་བདག་བདུད་ཀྱི་སྡེ་འཇོམས་བྱཱ་གྷྲི་མ། །དུར་ཁྲོད་བགེགས་ཀྱི་ཚོགས་འཇོམས་སྲིཾ་ག་ལཱ། །འགྲོ་བའི་དོན་གྲུབ་ལས་བྱེད་ཤྭ་ན་མ། །མགྱོགས་མ་སྙོགས་པའི་ལས་བྱེད་གྲྀ་ཌྷ་མ། །འགྲོ་བའི་སྡུག་བསྔལ་ཆེ་འཕྲོག་ཀཾ་ཀ་མ། །ཡོན་ཏན་ཡིད་བཞིན་བདག་ཉིད་ཀཱ་ཀ་མ། །འགྲོ་བའི་དོན་གྲུབ་ཁྲག་འཐུང་ཨུ་ལཱུ་མ། །བཛྲ་གཽ་རཱི་ཧ། བཛྲ་ཙཽ་རཱི་ཧ། བཛྲ་པ་མོ་ཧཱ་ཧ། བཛྲ་བེ་ཏ་ལཱི་ཧ། བཛྲ་པུཀྐ་སཱི་ཧ། བཛྲ་ཙཎྜ་ལཱི་ཧ། བཛྲ་སྨ་ཤ་ནཱི་ཧ། བཛྲ་གྷསྨ་རཱི་ཧ། བཛྲ་སིངྷ་མུ་ཁཱི་ཧེ། བཛྲ་བྱཱ་གྷྲཱི་མུ་ཁཱི་ཧེ། བཛྲ་ཛེྨ ་ག་ལ་མུ་ཁཱི་ཧེ། བཛྲ་ཤྭ་ན་མུ་ཁཱི་ཧི། བཛྲ་གྲྀ་ཌྷ་མུ་ཁཱི་ཧེ། བཛྲ་ཀཾ་ཀ་མུ་ཁཱི་ཧེ། བཛྲ་ཀཱ་ཀ་མུ་ཁཱི་ཧེ། བཛྲ་ཨུ་ལཱུ་མུ་ཁཱི་ཧེ། ཉོན་མོངས་གནས་ནས་འདྲེན་མཛད་རྟ་གདོང་ལྕགས་ཀྱུ་མ། །འཁོར་བའི་སྡུག་བསྔལ་འཆིང་མཛད་ཕག་གདོང་ཞགས་པ་མ། །གཉིས་མེད་དབྱིངས་སུ་བརྟན་པར་གཞུག་མཛད་འཇིག་རྟེན་ལྕགས་སྒྲོག་མ། །མ་ལུས་རྡུལ་དུ་རློག་མཛད་ཐལ་བྱེད་དྲིལ་བུ་མ། །བཛྲ་ཨཱརྱ་ཏེ་ཛ་ཏང་ཛ། བཛྲཱ་མུ་ཁེ་ཧཱུཾ། བཛྲ་ལོ་ཀ་བཾ། བཛྲ་བྷསྨི་པ་ལ་ཡ་བ་ཏུ་ཧེ། དེ་ནས་སྨན་མཆོད་དབུལ་བར་བྱ། །བླ་མེད་དམ་རྫས་རྣམ་པ་ལྔ། །ཡེ་ནས་དྲུག་པའི་བདུད་རྩི་སྟེ། །གཉིས་མེད་དབྱིངས་སུ་ལྷུན་གྱིས་རྫོགས། །འཆི་མེད་བདུད་རྩིའི་རང་བཞིན་ཏེ། །རང་བྱུང་གདོད་ནས་རྣམ་པར་དག །རྩ་བརྒྱད་སྟོང་ལས་སྦྱར་བའི་སྨན། །རྩ་བ་འབུམ་ཕྲག་བསམ་ཡས་པ། །རིགས་ལྔ་དམ་ཚིག་ལྔ་ཡི་དངོས། །ཡེ་ཤེས་ལྔ་རྫོགས་གྲུབ་པའི་རྫས། །རྒྱུད་དྲུག་སེམས་ཅན་ཀུན་སྒྲོལ་བ། །དུག་ལྔ་སེལ་བའི་བདུད་རྩི་སྟེ། །ཐམས་ཅད་བདུད་རྩིའི་རྣལ་འབྱོར་ཆེ། །ཤ་ཆེན་མཆོད་པ་རིན་པོ་ཆེ། །པདྨ་མེ་ཏོག་ཡང་དག་ལྡན། །རྡོ་རྗེ་ཆུ་སྟེ་བདུད་རྩི་མཆོག །ག་པུར་ཤེལ་གྱི་སྤོས་ཕར་ནི། །
རིན་ཆེན་སྒྲོན་ལྟར་འབབ་པ་ཡི། །གཉིས་མེད་རོལ་པའི་དཀྱིལ་འཁོར་འདིར། །བཞེས་ཏེ་བྱིན་གྱིས་བརླབ་ཏུ་གསོལ། །ན་མཿསརྦ་ཏ་ཐཱ་ག་ཏ་ཨརྒྷཾ་པྲ་ཏཱིཙྪ་ཤྲཱི་པཉྩ་ཁཱ་ཧེ་ཁཱ་ཧི། དཔལ་ཆེན་བཛྲ་ཧེ་རུ་ཀ །ཡུམ་ཆེན་ཀྲོ་དྷཱི་ཤྭ་རཱི་དང་། །དཔལ་ཆེན་བུཌྜྷ་ཧེ་རུ་དང་། །ཡུམ་ཆེན་བུཌྜྷ་ཀྲོ་དྷཱི་དང་། །དཔལ་ཆེན་རཏྣ་ཧེ་རུ་དང་། །རཏྣ་ཀྲོ་དྷཱི་ཤྭ་རཱི་དང་། །དཔལ་ཆེན་པདྨ་ཧེ་རུ་དང་། །པདྨ་ཀྲོ་དྷཱི་ཤྭ་རཱི་དང་། །དཔལ་ཆེན་བི་ཤྭ་ཧེ་རུ་དང་། །བི་ཤྭ་ཀྲོ་དྷཱི་ཤྭ་རཱི་ལ། །དམ་ཚིག་མཆོག་གི་མཆོད་པ་འབུལ། །བཞེས་ཏེ་ཀུན་ཏུ་དགྱེས་མཆོད་ལ། །ཕུལ་བའི་དངོས་གྲུབ་བདག་ལ་སྩོལ། །ཨོཾ་ན་མཿསརྦ་ཏ་ཐཱ་ག་ཏ་ཨརྒྷཾ་པྲ་ཏཱིཙྪ་ཧོ། དཔལ་ཆེན་མི་ཕམ་རྡོ་རྗེ་དང་། །མ་ཚོགས་དབང་ཕྱུག་འཁོར་གྱི་རྐྱེན། ཁྲོ་བོ་ཆེན་མོ་བཅུ་རྣམས་དང་། །ཁྲོ་མོ་ཆེན་མོ་བཅུ་རྣམས་ལ། །དམ་ཚིག་མཆོག་གི་མཆོད་པ་འབུལ། །བཞེས་ཏེ་ཀུན་ཏུ་དགྱེས་མཆོད་ལ། །ཕུལ་བའི་དངོས་གྲུབ་བདག་ལ་སྩོལ། །ཨོཾ་ན་མཿསརྦ་ཏ་ཐཱ་ག་ཏ་ཨརྒྷཾ་པྲ་ཏཱིཙྪ་ཧོ། གཽ་རཱི་ལ་སོགས་བཞི་རྣམས་དང་། །པུཀྐ་ལ་སོགས་བཞི་རྣམས་ལ། །དམ་ཚིག་མཆོག་གི་མཆོད་པ་འབུལ། །བཞེས་ཏེ་ཀུན་ཏུ་དགྱེས་མཆོད་ལ། །ཕུལ་བའི་དངོས་གྲུབ་བདག་ལ་སྩོལ། །ཨོཾ་ན་མཿསརྦ་ཏ་ཐཱ་ག་ཏ་ཨརྒྷཾ་པྲ་ཏཱིཙྪ་ཧོ། སིངྷ་ལ་སོགས་བཞི་རྣམས་དང་། །གྲྀ་ཌྷ་ལ་སོགས་བཞི་རྣམས་ལ། །དམ་ཚིག་མཆོག་གི་མཆོད་པ་འབུལ། །བཞེས་ཏེ་ཀུན་ཏུ་དགྱེས་མཆོད་ལ། །ཕུལ་བའི་དངོས་གྲུབ་བདག་ལ་སྩོལ། །ཨོཾ་ན་མཿསརྦ་ཏ་ཐཱ་ག་ཏ་ཨརྒྷཾ་པྲ་ཏཱིཙྪ་ཧོ། རྟ་གདོང་ལ་སོགས་བཞི་རྣམས་དང་། །དུས་གསུམ་རྡོ་རྗེ་སློབ་དཔོན་དང་། །མཆེད་དང་ལྕམ་དྲལ་སྔར་འདས་ལ། །དམ་ཚིག་མཆོག་གི་མཆོད་པ་འབུལ། །བཞེས་ཏེ་ཀུན་ཏུ་དགེས་མཛོད་ལ། །ཕུལ་བའི་དངོས་གྲུབ་བདག་ལ་སྩོལ། །ན་མཿསརྦ་ཏ་ཐཱ་ག་ཏ་མ་ཧཱ་ཨརྒྷཾ་པྲ་ཏཱིཙྪ་ཧོ། ཡང་ནི་ཕྱི་རབས་བློ་ལ་དགོངས། །འདི་སྐད་ཡང་ནི་བསྐྱར་ཏེ་གསུངས། །ཚོགས་རྗེ་ཚོགས་བདག་དཔལ་ཆེན་ཧེ་རུ་ཀ །
འབར་བའི་རྒྱལ་པོ་ཁྲག་འཐུང་ལྔ་རྣམས་དང་། །དཔལ་ཆེན་སྐུ་ལ་གཉིས་མེད་ལྷུན་སྦྱོར་བའི། །ཀྲོ་དྷཱི་ཤྭ་རཱི་འབར་བའི་ཡུམ་རྣམས་ལ། །དམ་ཚིག་བདུད་རྩི་དམ་རྫས་མཉེས་མཆོད་འབུལ། །ཐུགས་རྗེ་ཆེས་དགོངས་དབང་དང་དངོས་གྲུབ་སྩོལ། །ན་མཿསརྦ་ཏ་ཐཱ་ག་ཨརྒྷཾ་པྲ་ཏཱིཙྪ་ཤྲཱི་པཉྩ་ཁཱ་ཧི། མཐིང་གའི་མཆོག་རྣམས་རྡོ་རྗེ་གསང་བའི་ཡུམ། །ཞིང་བཅུ་གཏན་ནས་འབྱིན་པའི་མཁའ་འགྲོ་མ། །ཀེའུ་རི་ལ་སོགས་མ་མོ་བརྒྱད་རྣམས་ལ། །དམ་ཚིག་བདུད་རྩི་དམ་རྫས་མཉེས་མཆོད་འབུལ། །ཐུགས་རྗེ་ཆེས་དགོངས་དབང་དང་དངོས་གྲུབ་སྩོལ། །ན་མཿསརྦ་ཏ་ཐཱ་ག་ཏ་ཨརྒྷཾ་པྲ་ཏཱིཙྪ་ཤྲཱི་པཉྩ་ཁཱ་ཧི། ཟ་བྱེད་མགོ་བརྙན་རྡོ་རྗེ་མཆེ་གཤོག་ཅན། །དམ་ལོག་བགེགས་ཀྱི་སྙིང་ལ་འདྲེན་མཛད་མ། །སིངྷ་ལ་སོགས་ཕྲ་མེན་བརྒྱད་རྣམས་ལ། །དམ་ཚིག་བདུད་རྩི་དམ་རྫས་མཉེས་མཆོད་འབུལ། །ཐུགས་རྗེ་ཆེས་དགོངས་དབང་དང་དངོས་གྲུབ་སྩོལ། །ན་མཿསརྦ་ཏ་ཐཱ་ག་ཏ་ཨརྒྷཾ་པྲ་ཏཱིཙྪ་ཤྲཱི་པཉྩ་ཁཱ་ཧི། ཏི་རའི་སྙིང་འདྲེན་འཆིང་སྡོམ་དབང་སྡུད་མ། །རྟ་གདོང་ལ་སོགས་སྒོ་མ་བཞི་རྣམས་ལ། །དམ་ཚིག་བདུད་རྩི་དམ་རྫས་མཉེས་མཆོད་འབུལ། །ཐུགས་རྗེ་ཆེས་དགོངས་དབང་དང་དངོས་གྲུབ་སྩོལ། །ན་མཿསརྦ་ཏ་ཐཱ་ག་ཏ་ཨརྒྷཾ་པྲ་ཏཱིཙྪ་ཤྲཱི་པཉྩ་ཁཱ་ཧི།བསྐལ་པ་མེ་ལྟར་འབར་བའི་ཀློང་དཀྱིལ་ན། །འཇིགས་བྱེད་ཆེན་པོ་ཁྲོ་བོའི་ཚོགས་རྣམས་ལ། །དམ་ཚིག་བདུད་རྩི་དམ་རྫས་མཉེས་མཆོད་འབུལ། །ཐུགས་རྗེ་ཆེས་དགོངས་དབང་དང་དངོས་གྲུབ་སྩོལ། །ན་མཿསརྦ་ཏ་ཐཱ་ག་ཏ་ཨརྒྷཾ་པྲ་ཏཱིཙྪ་ཤྲཱི་པཉྩ་ཁཱ་ཧི། ཁྲོ་རྒྱལ་སྐུ་ལ་གཉིས་མེད་འཁྲིལ་བའི་ཡུམ། །སྙེམས་མ་ལ་སོགས་ཁྲོ་མོའི་ཚོགས་རྣམས་ལ། །རྣམ་དག་བདུད་རྩི་དམ་རྫས་མཉེས་མཆོད་འབུལ། །ཐུགས་རྗེས་བརྩེར་དགོངས་དབང་དང་
དངོས་གྲུབ་སྩོལ། །ཨོཾ་ན་མཿསརྦ་ཏ་ཐཱ་ག་ཏ་ཨརྒྷཾ་པྲ་ཏཱིཙྪ་ཤྲཱི་པཉྩ་ཁ་རཾ་ཁཱ་ཧི། དཔལ་གྱི་འཁོར་ཚོགས་བཛྲ་ཨཱ་ར་ལི། །མཁའ་འགྲོ་ཤུགས་འགྲོ་མ་སྲིང་རྒྱ་མཚོ་ལ། །རྣམ་དག་བདུད་རྩི་དམ་རྫས་མཉེས་མཆོད་འབུལ། །ཐུགས་རྗེས་བརྩེར་དགོངས་དབང་དང་དངོས་གྲུབ་སྩོལ། །ཨོཾ་ན་མཿསརྦ་ཏ་ཐཱ་ག་ཏ་ཨརྒྷཾ་པྲ་ཏཱིཙྪ་ཤྲཱི་པཉྩ་ཁ་རཾ་ཁཱ་ཧི། ཐུགས་རྗེ་ཤུགས་ཀྱི་འདྲེན་པའི་ལས་མཛད་མ། །ཕོ་ཉ་རྒྱ་མཚོ་ཅི་བགྱི་བཀའ་ཉན་ལ། །རྣམ་དག་བདུད་རྩི་དམ་རྫས་མཉེས་མཆོད་འབུལ། །ཐུགས་རྗེས་བརྩེར་དགོངས་དབང་དང་དངོས་གྲུབ་སྩོལ། །ཨོཾ་ན་མཿསརྦ་ཏ་ཐཱ་ག་ཏ་ཨརྒྷཾ་པྲ་ཏཱིཙྪ་ཤྲཱི་པཉྩ་ཁ་རཾ་ཁཱ་ཧི། སྡོམ་ལ་གནས་དང་རིག་འཛིན་སྒྲུབ་པ་པོ། །ལྷ་དང་ལྷན་ཅིག་ཕྱོགས་བཅུའི་རྣལ་འབྱོར་ལ། །རྣམ་དག་བདུད་རྩི་དམ་རྫས་མཉེས་མཆོད་འབུལ། །ཐུགས་རྗེས་བརྩེར་དགོངས་དབང་དང་དངོས་གྲུབ་སྩོལ། །ཨོཾ་ན་མཿསརྦ་ཏ་ཐཱ་ག་ཏ་ཨརྒྷཾ་པྲ་ཏཱིཙྪ་ཤྲཱི་པཉྩ་ཁ་རཾ་ཁཱ་ཧི། དུག་གསུམ་ཟད་མཛད་དུས་གསུམ་འདྲེན་པའི་དཔལ། །རྡོ་རྗེ་སློབ་དཔོན་ཚོགས་ཀྱི་གཙོ་བོ་ལ། །རྣམ་དག་བདུད་རྩི་དམ་རྫས་མཉེས་མཆོད་འབུལ། །ཐུགས་རྗེས་བརྩེར་དགོངས་དབང་དང་དངོས་གྲུབ་སྩོལ། །ཨོཾ་ན་མཿསརྦ་ཏ་ཐཱ་ག་ཏ་ཨརྒྷཾ་པྲ་ཏཱིཙྪ་ཤྲཱི་པཉྩ་ཁ་རཾ་ཁཱ་ཧི། བརྩེ་གདུང་མཐུན་པའི་དམ་ཚིག་ལུ་གུ་རྒྱུད། །འཇིག་རྟེན་འདི་དང་ཕྱི་མར་མི་འབྲལ་བའི། །དམ་ཚིག་གཟུངས་ཀྱིས་འདྲེལ་བའི་མཆེད་ལྕམ་ལ། །རྣམ་དག་བདུད་རྩི་དམ་རྫས་མཉེས་མཆོད་འབུལ། །ཐུགས་རྗེས་བརྩེར་དགོངས་དབང་དང་དངོས་གྲུབ་སྩོལ། །ཨོཾ་ན་མཿསརྦ་ཏ་ཐཱ་ག་ཏ་ཨརྒྷཾ་པྲ་ཏཱིཙྪ་ཤྲཱི་པཉྩ་ཁ་རཾ་ཁཱ་ཧི། སྟོང་གི་འཇིག་རྟེན་རབ་འབྱམས་མ་ལུས་ན། །རྡོ་རྗེ་སློབ་དཔོན་ཇི་སྙེད་བཞུགས་སོ་འཚལ། །མཆེད་དང་ལྕམ་དྲལ་ཇི་སྙེད་མཆིས་སོ་འཚལ། །སྔ་རབས་འདས་དང་ད་ལྟར་བཞུགས་པ་དང་། །སླད་ཀྱིས་འབྱོན་པའི་ཐུགས་དམ་གཙང་བ་དང་། །གཡར་དམ་གཙང་མ་མ་ལུས་ཇི་སྙེད་ལ། །དྲི་མེད་རྣམ་དག་དམ་པའི་མཉེས་མཆོད་འབུལ། །ཐུགས་རྗེས་ཆེར་དགོངས་དབང་དང་དངོས་གྲུབ་སྩོལ། །ན་མཿསརྦ་ཏ་ཐཱ་ག་ཏ་ཨརྒྷཾ་པྲ་ཏཱིཙྪ་ཧོ། ཤྲཱིཿཔཉྩ་ཁཱ་ཧི། དེ་ནས་བདུད་རྩིའི་དམ་བླངས་ཏེ། །དངོས་གྲུབ་བླང་བར་རབ་ཏུ་གསུངས། །ཁྲོ་ལ་ཁྲོས་པས་ཞི་མཛད་པ། །ཐུགས་རྗེས་ཁྲོས་པས་རྔམ་པའི་ཚོགས། །འབར་
བའི་བྱིན་རླབས་རྨད་པོ་ཆེ། །དེ་ཉིད་དུ་ནི་བདག་ལ་སྩོལ། །ལྕེ་ཡི་དམ་ཚིག་རྡོ་རྗེ་ལ། །རྡོ་རྗེ་ཅན་གྱིས་ཧཱུཾ་བསྒོམས་ཏེ། །བདུད་རྩི་ལྔ་རུ་སྦྱར་བ་ནི། །ཟོས་ན་བྱང་ཆུབ་གསུམ་ཐོབ་འགྱུར། །ཀཱ་ཡ་སིདྡྷི་ཨོཾ། བཱ་ཀ་སིདྡྷི་ཨཱཾ། ཙིཏྟ་སིདྡྷི་ཧཱུཾ། དེ་ནས་ཐུགས་དམ་བསྐང་བ་ནི། །ཧཱུཾ་མཛད་ཧཱུཾ་གི་ཐུགས་དམ་བསྐང་བ་ནི། །ལྕང་ལོར་བཅས་པའི་པདྨ་བནྡྷ་ལ། །ཚེ་འཛིན་སྲོག་དང་དམར་ཆེན་དམ་པས་བཀང་། །པདྨ་ཟིལ་ཏིག་དྲི་དང་རཀ་ཁ་ཁ། །རྡོ་རྗེ་ལས་ཀྱི་ཆུ་དང་པཉྩ་ཨ་མྲྀ་ཏ། །ཤ་ཆེན་མཁའ་ལྡིང་ཤེལ་སྒང་གཟུགས་ཀྱི་མཆོག །སྨན་ཆེན་ལྔ་དང་ཚེ་དང་བྱི་ལང་སེ། །སྒྲོལ་དང་སྦྱོར་གྱི་བདུད་རྩི་མཆོག་ཉིད་ཀྱིས། །ཧ་རུ་མ་བདུན་ཕྲ་མེན་ཚོགས་བཅས་དང་། །རྡོ་རྗེ་སློབ་དཔོན་ལྷ་ཚོགས་གཙོ་མཆོག་རྣམས། །མཆེད་དང་ལྕམ་དྲལ་སྒྲོལ་བའི་གིང་ཀ་ར། །མཆོད་པར་བཞེས་ལ་མཉེས་ནས་དམ་ཚིག་སྐོངས། །གྲུབ་མཆོག་འཕྲུལ་གྱི་དངོས་གྲུབ་སྩལ་དུ་གསོལ། །རྡོ་རྗེ་མཆེ་བའི་རྒྱ་བཅིངས་ཏེ། །གཏོར་མ་ལ་གཏུགས་ཐོད་རྩལ་བྱ། །བནྡྷ་བཅུད་ཡངས་ཟབ་པ་དང་། །འཁོར་ཡུག་གཏོགས་པའི་སྣོད་བཅུད་འདི། །བདུད་རྩིའི་རང་བཞིན་ཡིན་པའི་ཕྱིར། །འཇིགས་བྱེད་བཀའ་བཟློག་རོལ་ཅིང་དགྱེས། །སྲིད་གསུམ་རྩེ་འཇོམས་ཏྲི་ཤཱུ་ལ། །ཁམས་གསུམ་རབ་ཏུ་དཀྲུགས་ནས་ནི། །ཟ་བྱེད་ཆེན་པོའི་ཞལ་དུ་ཡང་། །ཐུགས་རྗེས་འགྲོ་དོན་ཡུད་ལ་བསྟབ། །འགྲོ་དང་མི་འགྲོ་སྣོད་བཅུད་ཀྱིས། །འཇིག་རྟེན་ཁྱེད་ལྔས་ཀུན་ཟ་ན། །དངོས་པོར་གྱུར་པའི་གནས་འདི་ཀུན། །ངས་བསྟབ་ཁྱེད་ཀྱིས་ཡུད་ལ་གསོལ། །ཁ་ཁཱ་ལེ་ལེ་ཤ་ཏ་པ་ག་ཏ། ཨ་ལ་ལ་ཧོ། མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། ཞེས་པས་མ་ཧཱ་དེ་བ་དང་། །བཀའ་ཟློག་མ་ཡི་མཆོད་པ་བྱ། །རྒྱུད་ལྔའི་སེམས་ཅན་དུག་ལྔར་འབར། །ཞི་བའི་ལས་ཀྱིས་མི་འདུལ་བས། །མི་རྟག་མཚན་ཉིད་བསྟན་པའི་ཕྱིར། །ཁྲོས་པའི་ཟ་བྱེད་བཞི་ཡིས་བཤིག །ལཾ་རཾ་ཡཾ་ཁཾ་ཆེན་པོ་ཡིས། །ཟ་བྱེད་ཁྲོས་པ་བཞིས་བཤིགས་ནས། །བག་ཆགས་མ་ལུས་རྣམ་སྦྱང་ཕྱིར། །ནམ་མཁའ་
ཁྲོ་བོ་ཟ་བྱེད་ཆེའི། །ཞལ་གྱི་དབྱིངས་སུ་སྟོང་ཁམས་བསྡིམ། །མ་ཧཱ་ཤཱུ་ནྱ་ཏཱ་ཛྙཱ་ན་སྭ་བྷཱ་བ་ཨཱདྨ་ཀོ྅ཧཾ། ད་ནི་ཟ་བྱེད་ཆེན་པོ་སྟེ། །གདུལ་དཀའ་མ་ལུས་འདུལ་བ་དང་། །ཁམས་གསུམ་མ་ལུས་ཟ་བར་བྱ། །ང་ནི་ཁྲག་འཐུང་ཆེན་པོ་སྟེ། །དམར་ཆེན་ཁྲག་གི་རྒྱ་མཚོ་ལ། །འཁོར་བའི་ཁྲག་ཞག་འཐུང་བར་བྱེད། །མ་ལུས་འདོད་ལ་མ་ཆགས་ཤིང་། །དམ་ཚིག་ལ་སྡང་བསྒྲལ་བར་བྱ། །མ་ཧཱ་ཏིཀྵྞ་ཛྭ་ལ་ཁ་རཾ། མ་ཧཱ་རཀྟ་མུནྟ་ཛྭ་ལ་ཁ་རཾ། མ་ཧཱེ་ཀེཾ་ནི་རི་ཏི་ཛྭ་ལ་ཁ་རཾ། ཧེ་རུ་ཀ་ཡི་གནས་བཅུ་དང་། །དུར་ཁྲོད་ཆེན་པོའི་གནས་བརྒྱད་དུ། །ཁྲག་འཐུང་ཡབ་ཡུམ་སྤྱན་དྲངས་པ། །དུར་ཁྲོད་མཆོག་གི་གནས་འདི་རུ། །ཞིང་ཆེན་གསར་རྙིང་ཏི་རར་བཅས། །དམར་གྱི་ཨརྒྷཾ་རྒྱ་མཚོར་དཀྱིལ། །མཁའ་འགྲོ་འབར་བའི་ཚོགས་མཆོད་དང་། །མ་ལུས་བསྣམས་ནས་བཞེས་སུ་གསོལ། །ཁ་ཁ་ཁཱ་ཧི་ཁཱ་ཧི། ཁ་རཾ་ཁཱ་ཧི། སྒེག་པ་དཔའ་བ་འཇིགས་སུ་རུང་བ་དང་། །དགོད་དང་གཤེ་དང་འཇིགས་པར་བྱེད་པ་དང་། །སྙིང་རྗེ་རྔམ་དང་ཞི་བ་ལ་སོགས་ཏེ། །སྐུ་ཡི་དངོས་པོ་ཤིན་ཏུ་བསྒྱུར་ནས་ནི། །རྣལ་འབྱོར་ལོངས་སྤྱོད་མཆོག་འདི་བཞེས་སུ་གསོལ། །ཟླ་བ་ལ་སོགས་དམར་ཆེན་སྙིང་པོ་ལྔ། །མཱཾ་ས་ལ་སོགས་རོ་མཆོག་དཔའ་བོ་གསལ། །མ་ཙ་མེ་ཙ་རཀྟ་རུ་ཏི་ར། །ཉེ་བའི་སྙིང་པོ་མ་ལུས་བསྒྲུབ་འཚལ་གྱི། །དྲི་མེད་གཟི་ལྡན་མཆོད་མཆོག་སྦྱོར་བ་འདི། །ཡེ་ཤེས་ལྷ་ཚོགས་རྣམས་ཀྱིས་བཞེས་སུ་གསོལ། །རྣམ་དག་སྒྲིབ་སྤངས་སྲིད་གསུམ་སྐྱོན་བྲལ་བའི། །སྟོན་ཀའི་ཟླ་གསལ་དྲི་མེད་ཞལ་མངའ་བ། །བཅོམ་ལྡན་བདེ་གཤེགས་རྡོ་རྗེའི་དཀྱིལ་འཁོར་ཅན། །ཁྲོ་བོའི་ཚོགས་ཆེན་མ་ལུས་ཐམས་ཅད་ལ། །དུས་གསུམ་རྒྱལ་བ་ཐམས་ཅད་བསྐྱེད་པའི་ཡུམ། །ཤེས་རབ་ལྷ་མོ་རིགས་ཀྱི་ཡུམ་ལ་སོགས། །རྣལ་འབྱོར་གྲུབ་དང་རིག་འཛིན་ཐམས་ཅད་ལ། །འགྲོ་བའི་དོན་ཕྱིར་ཕྱག་འཚལ་མཆོད་པར་བགྱི། །མི་མཉམ་མཉམ་པའི་ནམ་མཁའ་མཉམ་པ་དང་། །བསོད་ནམས་ཡེ་ཤེས་ཚོགས་ཀྱིས་རབ་བརྒྱན་པ། །ཡིད་
བཞིན་སྐུ་མཆོག་ཡོན་ཏན་མཐའ་ཡས་གཏེར། །ཤེས་རབ་དཀྱིལ་འཁོར་མ་ལུས་ཐམས་ཅད་དང་། །ཕྱག་བརྙན་འདུ་འཕྲོ་རྔམ་པའི་ཚོགས་ལ་སོགས། །རྣལ་འབྱོར་ཆེན་པོའི་དམ་ཚིག་མངའ་འོ་འཚལ། །དགྱེས་པས་རོལ་པའི་མཆོད་པ་འདི་བཞེས་ཤིག །མ་ཧཱ་བ་ལིཾ་ཏ་ཁཱ་ཧི་ཁཱ་ཧི། དེ་ནས་གླུ་དྲུག་བསྟོད་པར་བྱ། །ཧཱུཾ་གཏུམ་ཆེན་དུས་མཐའི་མེ་ལྟར་འབར། །འོད་ཟེར་ཉི་མ་འབུམ་གྱི་གཟི། །ཁྲོ་གཉེར་གློག་སྟོང་འགྱུ་བ་བཞིན། །མཆེ་བ་ཟང་ཡག་ཟ་བྱེད་ཆེ་ཧོ། ཧཱུཾ། རྔམ་པའི་ང་རོ་འབྲུག་སྟོང་ལྡིར། །ཏུག་ཆོམ་རི་རབ་འབུམ་བསྙིལ་སྐད། །ཨ་ལ་ཧ་ལའི་གད་རྒྱངས་ཆེ། །སྐྱུགས་པའི་འཐོར་རླུང་གཡེང་བ་ཆེ་ཧོ། །ཧཱུཾ་ཁྲོ་བོ་ཤེས་རབ་འོད་པོ་ཆེ། །ཡེ་ཤེས་དཀྱིལ་འཁོར་ཀུན་ཏུ་གསལ། །འབར་བའི་ཡེ་ཤེས་ཀུན་ཏུ་འཇོམས། །སྣ་ཚོགས་ཡེ་ཤེས་ཐིག་ལེ་ཆེ་ཧོ། །ཧཱུཾ་ཁྲོ་བོའི་རྒྱལ་པོ་སྤྲིན་ཆེན་པོ། །ཁྲོས་པའི་དཀྱིལ་འཁོར་ཆར་ཆེན་འབབས། །དཀྱིལ་འཁོར་ཡིད་བཞིན་འབྱུང་བའི་གཏེར། །སྣ་ཚོགས་འཁོར་བའི་ཐིག་ལེ་ཆེ་ཧོ། ཧཱུཾ་བདུད་ཀུན་གྱི་ནི་བདག་པོ་སྟེ། །བདུད་ཀྱི་བདུད་སྟེ་བདུད་རྣམས་འཇོམས། །འཇིགས་པའི་ཚོགས་ཀྱང་འཇིགས་བྱེད་པ། །འཇིགས་བྱེད་ཆེན་པོ་ཐིག་ལེ་ཆེ་ཧོ། །ཧཱུཾ་རྡོ་རྗེ་བྲག་ཆེན་སྲ་བ་པོ། །རྡོ་རྗེ་ཆུ་བོ་སྡུད་ཆེན་པོ། །རྡོ་རྗེ་མེ་སྟེ་ཀུན་འབར་ཆེ། །རྡོ་རྗེ་རླུང་སྟེ་འཐོར་རླུང་ཆེ་ཧོ། །དེ་ནས་སྨོན་ལམ་གདབ་པར་བྱ། །ཆོས་ཉིད་སྤྲོས་པ་མེད་པའི་དབྱིངས། །རང་བཞིན་དཀྱིལ་འཁོར་རྣམ་པར་དག །དུས་གསུམ་བཞུགས་པའི་བཅོམ་ལྡན་འདས། །ཐམས་ཅད་མཁྱེན་པའི་ཡེ་ཤེས་ལྡན། །ཐུན་མོང་མ་ཡིན་རྣམ་པར་གྲོལ། །ཡེ་ཤེས་ཆེན་པོའི་རོལ་པ་ལས། །རྨད་དུ་བྱུང་བའི་དྲག་ཤུལ་ཅན། །རིགས་ལྔའི་བདེ་གཤེགས་ཧེ་རུ་ཀ །རིགས་དང་བཅས་པའི་ཡུམ་རྣམས་དང་། །གཽ་རིའི་ཚོགས་དང་སིང་ཧའི་འཁོར། །ཕྱི་ནང་རྣལ་འབྱོར་གྲུབ་པ་མོ། །ཡེ་ཤེས་སྔགས་ཞིང་ལས་སྐྱེས་རྣམས། །མཁྱེན་ལྡན་བྱིན་བརླབ་
མཛད་དུ་གསོལ། །རྣལ་འབྱོར་ཕ་དང་རྣལ་འབྱོར་མ། །ཕོ་ཉ་ཕོ་དང་ཕོ་ཉ་མོ། །ཅི་བགྱིའི་བཀའ་ཉན་ཐམས་ཅད་དང་། །ཕྱོགས་བཅུའི་གདུང་སོབ་བདེ་གཤེགས་རྣམས། །རྡོ་རྗེའི་སློབ་དཔོན་མཆེད་ལྕམ་བཅས། །དགོངས་དོན་ཐུགས་དམ་རྩེ་གཅིག་ཏུ། །བཀའ་གཞུང་བཞིན་དུ་མཛད་པ་རྣམས། །མཁྱེན་པས་བྱིན་བརླབ་མཛད་དུ་གསོལ། །རྣལ་འབྱོར་ཕུད་ཀྱི་མཆོད་པ་འདི། །ཆོས་ཉིད་ལས་ནི་ཆོས་ཉིད་འབྱུང་། །ཀུན་རྫོབ་ཙམ་ལ་བརྟེན་བྱས་ནས། །སྤྲུལ་པར་རོལ་ཅིང་རྣལ་འབྱོར་གྱི། །མཆོད་པ་ལོངས་སྤྱོད་སྦྱར་བ་འདི། །བདག་ཉིད་ཆེན་པོ་འཁོར་བཅས་རྣམས། །དབང་གི་འཚལ་མའི་སླད་དུ་ནི། །ཕུད་དང་གཙང་མར་རབ་སྤགས་ནས། །དགའ་དང་གུས་པའི་སེམས་ཀྱིས་ནི། །ལྷ་དང་ལྷ་མོ་གར་གྱིས་བླངས། །རྒྱལ་བའི་དཀྱིལ་འཁོར་གཞལ་མེད་ཁང་། །ཆོས་དབྱིངས་མཐར་ཀླས་བཀང་ནས་དབུལ། །གཉིས་མེད་བདེ་ཆེན་ངང་ཉིད་དུ། །དགྱེས་པ་ཆེན་པོས་ལྷུན་དགོངས་ནས། །ཡེ་ཤེས་སྒྱུ་མའི་ངང་དུ་རོལ། །སྐུ་གསུང་ཐུགས་གཏེར་གཞེས་སུ་གསོལ། །མཐོལ་བཤགས་དག་ཏུ་གསོལ་བ་ནི། །གསང་བའི་དཀྱིལ་འཁོར་འདིར་འདུས་རྣམས། །གསང་སྔགས་གསང་སྒོར་ཁས་བླངས་ནས། །དམ་ཚིག་གཉེན་པོ་མནོས་པ་ལས། །རྩ་བ་ཡན་ལག་ཞིག་རལ་རྣམས། །ཤིན་ཏུ་གནོང་འགྱོད་མཐོལ་ཞིང་བཤགས། །བཟོད་པ་ཆེན་པོས་ངང་བཞེས་ལ། །ཚངས་པ་ཡིད་བཞིན་སྩལ་དུ་གསོལ། །དངོས་གྲུབ་ཐོབ་པར་གསོལ་བ་ནི། །ཐོགས་པ་མེད་པའི་ཤེས་རབ་དང་། །མི་བརྗེད་གཟུངས་དང་མངོན་ཤེས་དྲུག །རྒྱུན་གྱི་ཏིང་འཛིན་རྡོ་རྗེའི་སྐུ། །གཡུང་དྲུང་ཚེ་དང་སྐུ་གསུང་ཐུགས། །མི་ཟད་རྒྱན་གྱི་འཁོར་ལོ་ནི། །དུས་འདིར་འཐོབ་པར་སྩལ་དུ་གསོལ། །ཚེ་འདིར་མཆོག་དང་ཐུན་མོང་སྩོལ། །ཕྲིན་ལས་གསོལ་བར་ཞུ་བ་ནི། །ཡས་ཀྱི་བདུད་དང་མས་ཀྱི་སྲི། །ཕ་ཁུ་རྒན་སྲི་མ་བུའི་བྱུར། །བུ་ཚའི་ཆུང་སྲི་དྲི་ངན་ཅན། །རྣལ་འབྱོར་དམ་སྲི་ལོ་ཟླའི་
ཀེག །ཞི་རྒྱས་དབང་དང་དྲག་པོ་དང་། །མནན་ཟློག་ལས་ཀྱིས་འདུལ་བ་དང་། །རྡུལ་ཕྲན་བཞིན་དུ་བཅོམ་བྱས་ནས། །མིང་ཡང་མེད་པར་མཛད་དུ་གསོལ། །སྒྲུབ་པའི་བར་ཆད་མེད་པར་མཛོད། །དེ་ནས་བཅོམ་ལྡན་འདས་ཞེ་སྡང་རྡོ་རྗེ་དྲག་པོ་བསྒྲལ་བའི་ཏིང་ངེ་འཛིན་ལ་ཞུགས་ནས། རྡོ་རྗེ་སྲིན་པོའི་དཀྱིལ་འཁོར་འདི་གསུངས་སོ། །ཁྲག་འཐུང་རྡོ་རྗེ་རྣོན་པོའི་དཀྱིལ་འཁོར་ནི། །རྣམ་པ་བཅུ་ཡིས་རབ་ཏུ་བཤད་པར་བྱ། །དཀྱིལ་འཁོར་བསྐྱེད་དང་སྤྱན་དྲང་བསྡིམ་མཆོད་བསྟོད། །ཞིང་བཅུ་དགུག་སྦྱང་བསྒྲལ་མཆོད་གནས་སུ་འཕང་། །རྡོ་རྗེ་སྲིན་པོའི་དཀྱིལ་འཁོར་བསྐྱེད་བྱ་བ། །ཡི་གེ་ཧཱུ་ལས་ཡོངས་སུ་གྱུར་པ་ནི། །ཧཱུཾ་རཀྴ་ཤྲཱི་ཧེ་རུ་ཀ་ཧཱུཾ་ཕཊ། རྡོ་རྗེ་སྲིན་པོ་དབུ་དགུ་ཕྱག་བཅོ་བརྒྱད། །ཞབས་བརྒྱད་དུར་ཁྲོད་ཆས་དང་ལྡན་པར་བསྐྱེད། །ཨེ་ཀ་ཛ་ཊི་བཛྲ་མ་ཧཱ་ཀྲོ་དྷཱི་ཤྭ་རི་ཧཱུཾ་ཕཊ། གཙོ་དང་མདོག་མཐུན་སྐུ་ལ་འཁྲིལ་བའི་ཡུམ། །ཡབ་ཡུམ་གཉིས་མེད་མཁའ་གསང་བྱིན་བརླབས་ནས། །དེ་ནས་ཁྲོ་བོ་སྔགས་ཀྱིས་བསྐྱེད་པ་ནི། །ཧཱུཾ་ཙ། ཧཱུཾ་ཏ། ཧཱུཾ་ཀློང་། ཧཱུཾ་རང་། ཧཱུཾ་ཧྲི། ཧཱུཾ་ཀྲོང་། ཧཱུཾ་ཨ། ཧཱུཾ་བྷྲཱུཾ། ཧཱུཾ་ཀྵ། ཧཱུཾ་ཧཱུཾ། ཡིག་འབྲུ་བསྒྲིལ་བ་དེ་རྣམས་ལས། །འོད་འཕྲོས་ཁྲོ་བོ་ཡབ་ཡུམ་བསྐྱེད། །རུ་ལུ་ལྔ་དང་མ་མ་ལྔ། །བྷྱོ་བྷྱོ་ལྔ་དང་དྷ་ལ་ལྔ། །ཉི་ཤུ་ལས་ནི་ཕ་བཅུ་དང་། །མ་བཅུའི་སྲས་ནི་ལྕམ་དྲལ་བསྐྱེད། །དེ་ནས་སྤྱན་ཡང་དྲང་བར་བྱ། །ལུས་བརྡའ་དམ་ཚིག་ཕྱག་རྒྱ་ནི། །པདྨའི་ཕྱག་རྒྱ་དཔྲལ་བར་བཅིངས། །སྐྲ་བཤིག་གཅེར་བུར་མཆོང་ཞིང་རྒྱུག །རྡོ་རྗེ་དབྱུག་པ་བླངས་ནས་སུ། །གཡབ་མོ་ལྔས་ཀྱང་གཡབ་པར་བྱ། །དེ་ནས་དཀྱིལ་འཁོར་གཞུག་པར་བརྟག །གཞུག་པའི་དམ་ཚིག་ཕྱག་རྒྱ་ནི། །ལས་ཀྱི་ཕྱག་རྒྱ་དམ་ཚིག་རྒྱ། །སྒྲ་བརྡའ་དམ་ཚིག་ཕྱག་རྒྱས་བསྡིམ། །མཆོད་པ་དམ་ཚིག་ཕྱག་རྒྱ་ནི། །རོལ་པ་གར་གྱི་ཚམ་རྔམས་ཕྱག །བྷན་དྷའི་ཕྱག་རྒྱ་རབ་བཅས་བྱ། །ཁ་ཁ་ཁཱ་ལྱ་ཤ་ཏ་པ་ག་ཏ། ཨ་ལ་ལ་ཧོ། མ་ཧཱ་པཉྩ་ཨ་མྲྀ་ཏ།
ཁ་རཾ་ཡོ་གི་ནཱི། ཁ་རཾ་ཏ་ཀི་ནི། ཨ་ལ་ལ་ཧོ། བྷ་ག་ཝཱན་ཁ་ཁ་ཁཱ། ཨེ་མ་ཆོས་ཏེ་ཨེ་མ་ཆོས། །ཨེ་མ་ཆོས་ཀྱི་དོན་བྱུང་བ། །ཆོས་དོན་འགག་པ་བདག་མེད་པ། །ནམ་མཁའ་དང་ནི་མཉམ་པའི་གནས། །རྡོ་རྗེ་རྒྱལ་པོར་ཕྱག་འཚལ་ལོ། །ཨ་ཏི་པུ་ཧོ། དཔལ་ཆེན་ཡེ་ཤེས་ཁྱད་པར་ས་བཅུར་བཞུགས། །དབང་ཕྱུག་མངའ་མཛད་སྟོབས་བཅུས་ཟིལ་གྱིས་གནོན། །དགེ་བཅུས་དྲེགས་བྱེད་ང་རྒྱལ་སྤྱི་ནས་འཇོམས། །སྟོབས་བཅུས་བརྗིད་གནོན་ཕྱོགས་བཅུར་རོལ་པ་མཛད། །སྲིད་གསུམ་འཇོམས་པའི་ལྷ་ལ་ཕྱག་འཚལ་ལོ། །མཉམ་ཉིད་ངང་གིས་ཁྲོ་ལ་ཕྱག་འཚལ་ལོ། །ཁྲོས་པས་ལོངས་སྤྱོད་མཛད་ལ་ཕྱག་འཚལ་ལོ། །རྡོ་རྗེ་འདུ་འཕྲོ་མཛད་ལ་ཕྱག་འཚལ་ལོ། །ཨ་ཏི་པུ་ཧོ། པྲ་ཏཱིཙྪ་ཧོ། ཨ་ལ་ལ་ཧོ། དེ་ནས་བསྟོད་པར་བྱ་བ་ནི། །སྔགས་དང་ཚིག་ཏུ་བསྟོད་པ་ཡིན། །ཏ་ཀེ་མ། ཏ་ཀེ་མ། ཏ་ཀེ་མ། གོ་ཏེ་མ། ཀེཾ་ཀེཾ །བསྐལ་པ་མེ་ལྟར་འབར་བ་ཡི། །འོད་ཟེར་འཕྲོ་འདུའི་ཀློང་དཀྱིལ་ན། །ཁྲོ་བོ་ཁྲོ་མོ་རྣམས་བཞུགས་པ། །སྐུ་ནི་ཅིར་ཡང་འགྱུར་བའི་གཟུགས། །དབུ་སྐྲ་ཁམ་ནག་རལ་པ་ཅན། །གྱེན་དུ་འཁྱིལ་པས་སྲིད་རྩེར་འབར། །མི་མཉམ་ཁྲོ་གཉེར་སྡང་མིག་ནི། །ལོག་པར་བལྟ་བ་འདུལ་བའི་མཆན། །མཆེ་བ་ཟང་ཡག་གཙིགས་པ་ནི། །སྐྱེ་བཞིའི་རྩ་བ་གཅོད་པའི་ཚུལ། །ཐུགས་རྗེའི་བྱིན་རླབས་སྤྲིན་ལྟར་གཏིབས། །བྱམས་པའི་འོད་ཟེར་གློག་ལྟར་འགྱུ། །སྤྲུལ་པ་ཐོག་ཐོག་ཆར་བཞིན་འབེབས། །སྔོན་གྱི་ཐུགས་དམ་ཆེན་པོ་ནི། །ཚམ་རྔམས་ཆེན་པོ་བདུད་ལ་སྟོན། །ཀྱལ་ཀ་ཆེན་པོ་བགེགས་ལ་མཛད། །དམ་ཚིག་ཅན་ལ་དངོས་གྲུབ་སྩོལ། །འཁྱིལ་ཞིང་རྒྱན་ཡང་འཁྱིལ་པ་ལ། ། སེམས་ཀྱི་ཡང་སེམས་ཅན་ཆོས་པས་སྐུ་མི་མངའ། །སྒྲ་ལས་འདས་པའི་སྦྱོར་བ་སྟེ། །བསམ་དང་བྲལ་བའི་ཡེ་ཤེས་ལགས། །དེ་ནས་སྒྲོལ་བའི་ལས་བགྱིད་ན། །མོཀྵ་མདུན་དུ་བཀུག་བྱས་ལ། །དེ་ནས་འཛིན་གིང་འདི་སྐད་གསུངས། །
ཉོན་མོངས་འཁོར་བའི་སེམས་ཅན་འདི། །བསྟན་པས་འདུལ་བའི་སྣོད་མ་ཡིན། །མ་ཆགས་པས་ནི་སྡིག་རེ་ཆེ། །གསད་པ་ཁོ་ནར་བྱ་བའི་འོས། །ལུས་ཀྱི་འབྱུང་བ་ལྔ་པོ་ནི། །ཁྲག་འཐུང་ལྔ་ཡི་ཞལ་དུ་བསྟབ། །སེམས་ཀྱི་བག་ཆགས་མི་དགེ་བཅུ། །ཁྲོ་བོ་ཆེན་པོ་བཅུ་ལ་འབུལ། །ཡན་ལག་ཕྱེ་བའི་དངོས་པོ་རྣམས། །མ་མོ་དུར་ཁྲོད་བརྒྱད་ལ་འབུལ། །ཤ་དང་ཁྲག་དང་རུས་པ་གསུམ། །སྡེར་མོ་ཅན་དང་མཆུ་ཅན་དང་། །མཆེ་བ་ཅན་གྱི་ཚོགས་ལ་བསྟབ། །རྣམ་རོལ་ལུས་ངག་ཡིད་གསུམ་ནི། །བདེ་ཆེན་སྐུ་གསུང་ཐུགས་སུ་གྲུབ། །ངོ་བོ་ཉིད་ཀྱིས་ཡིན་པ་ལ། །གཏོར་མ་བདག་པོས་ངོས་བཟུང་འདྲ། །འདི་ལ་སོགས་ཏེ་སེམས་ཅན་ཁམས། །དུར་ཁྲོད་བདག་པོས་བསྒྲལ་བའི་ཕྱིར། །འཇིག་རྟེན་གང་བའི་ཧེ་རུ་ཀ །དབུ་གསུམ་ཕྱག་དྲུག་ཞབས་བཞིར་བགྲད། །དབུ་གསུམ་རལ་གསུམ་སྲིད་གསུམ་མགོན། །སྤྱན་དགུས་ས་དགུ་ཅིས་འདུལ་མཁྱེན། །ཤངས་གསུམ་སྐུ་གསུམ་སྤྲུལ་པ་འགྱེད། །ཞལ་གསུམ་དབྱིངས་སུ་དུག་གསུམ་ཤར། །མཆེ་བཞིས་སྐྱེ་བཞི་རྩད་ནས་གཅོད། །ཕྱག་དྲུག་རྒྱུད་དྲུག་གཏིང་ནས་འདོན། །ཞབས་བཞིས་ཕྲིན་ལས་རྣམ་བཞིས་སྒྲོལ། །ཐུགས་དམ་ཉིད་ཀྱིས་སྒྲོལ་བ་ལ། །མ་བྱས་བསྐུལ་བྱ་ཅི་ཞིག་འཚལ། །བསྒལ་བའི་འདུལ་སྐལ་ལགས་པས་བཞེས། །གཉིས་སུ་མེད་པའི་ཞིང་དུ་སྦྱོར། །ཨོཾ་བཛྲ་མ་ཧཱ་ཤྲཱི་ཧེ་རུ་ཀ་མ་ཧཱ་ཙཎྜ་སརྦ་དུཥྚན་ཏ་ཀ་ཧ་ན་ད་ཧ་པ་ཙ་ཧཱུཾ་ཧཱུཾ་ཧཱུཾ་ཕཊ། ཨོཾ་བཛྲ་དྷ་ར་མ་ཧཱ་ཀྲོ་དྷཱི་ཤྭ་རི་ཛྭ་ལ་ནི་ཧཱུཾ་ཕཊ། ཨོཾ་བཛྲ་མ་ཧཱ་ཤྲཱི་ཧེ་རུ་ཀ་མ་ཧཱ་ཙཎྜ་སརྦ་དུཥྚན་ཏ་ཀ་ཧ་ན་ད་ཧ་པ་ཙ་ཧཱུཾ་ཧཱུཾ་ཧཱུཾ་ཕཊ། ཨོཾ་མ་ཧཱ་བཛྲ་དྷ་ར་མ་ཧཱ་ཀྲོ་དྷཱི་ཤྭ་རི་སརྦ་དུཥྚན་ཧཱུཾ་ཕཊ། ཨོཾ་རཏྣ་མ་ཧཱ་ཤྲཱི་ཧེ་རུ་ཀ་མ་ཧཱ་ཙཎྜ་སརྦ་དུཥྚན་ཏ་ཀ་ཧ་ན་ད་ཧ་པ་ཙ་ཧཱུཾ་ཧཱུཾ་ཧཱུཾ་ཕཊ། ཨོཾ་མ་ཧཱ་སཱུརྱ་རཏྣ་མ་ཧཱ་ཀྲོ་དྷཱི་ཤྭ་རི་བིདྨ་ཧཱུཾ་ཕཊ།ཨོཾ་པདྨ་མ་ཧཱ་ཤྲཱི་ཧེ་རུ་ཀ་མ་ཧཱ་ཙཎྜ་སརྦ་དུཥྚན་ཏ་ཀ་ཧ་ན་ད་ཧ་པ་ཙ་ཧཱུཾ་ཧཱུཾ་ཧཱུཾ་ཕཊ། ཨོཾ་ཧྲཱྀཿཤྲུ་ཏ་ས་མ་ཏ་པདྨ་མ་ཧཱ་ཀྲོ་དྷཱི་ཤྭ་རི་ཁཱ་ཧི་ཧཱུཾ་ཕཊ། ཨོཾ་ཀརྨ་མ་ཧཱ་ཤྲཱི་ཧེ་རུ་ཀ་མ་ཧཱ་ཙཎྜ་སརྦ་དུཥྚན་ཏ་ཀ་ཧ་ན་ད་ཧ་པ་ཙ་ཧཱུཾ་ཧཱུཾ་ཧཱུཾ་ཕཊ། ཨོཾ་སརྦ་ཨ་མོ་གྷ་མ་ཧཱ་ཀྲོ་དྷཱི་ཤྭ་རི་བི་ཤྭ་ཧཱུཾ་ཕཊ།
སྔགས་ཀྱིས་སྐུ་བསྐྱེད་གསལ་བར་བྱ། །ཞེས་པས་ཞིང་དེ་བསྟབ་པ་དང་། །དེ་ལ་འདི་སྐད་ལན་དུ་སྩལ། །རྡོ་རྗེའི་ཕོ་བྲང་དཀྱིལ་འཁོར་དུ། །བདག་འཛིན་རྣམ་རྟོག་ཟད་བྱས་ལ། །ཐུགས་ཀྱི་དངོས་གྲུབ་འཐོབ་བྱའི་ཕྱིར། །སེམས་ཀྱི་རྟོག་པ་བསྒྲལ་བར་གནང་། །པདྨའི་ཕོ་བྲང་དཀྱིལ་འཁོར་འདིར། །ཆགས་པའི་བག་ཆགས་ཟད་བྱས་ལ། །གསུང་གི་དངོས་གྲུབ་འཐོབ་བྱའི་ཕྱིར། །པདྨའི་དབྱིངས་སུ་སྦྱོར་བར་གནང་། །རིན་ཆེན་ཕོ་བྲང་དཀྱིལ་འཁོར་འདིར། །ང་རྒྱལ་རྣམ་རྟོག་ཟད་བྱས་ལ། །ཡོན་ཏན་དངོས་གྲུབ་འཐོབ་བྱའི་ཕྱིར། །ཆེ་བའི་དབང་མཆོག་སྦྱིན་པར་གནང་། །རྒྱ་གྲམ་ཕོ་བྲང་དཀྱིལ་འཁོར་འདིར། །ཕྲག་དོག་རྣམ་རྟོག་ཟད་བྱས་ལ། །ཕྲིན་ལས་དངོས་གྲུབ་འཐོབ་བྱའི་ཕྱིར། །ལས་རྣམས་རྒྱ་མཚོས་སྒྲོལ་བར་གནང་། །བདེ་གཤེགས་ཕོ་བྲང་དཀྱིལ་འཁོར་འདིར། །རྨོངས་པའི་བག་ཆགས་ཟད་བྱས་ལ། །སྐུ་ཡི་དངོས་གྲུབ་འཐོབ་བྱའི་ཕྱིར། །ཆོས་སྐུའི་དཀྱིལ་འཁོར་རྟོགས་པར་གནང་། །ཞེས་པས་གནང་བ་སྦྱིན། དེ་ནས་གིང་གིས་མོཀྵ་བཏེག །མཚམས་མེད་ལས་ཀྱིས་དམྱལ་བར་འགྲོ། །དམ་ཉམས་རྡོ་རྗེ་དམྱལ་བར་གནས། །ཐར་ལམ་འདི་ལས་གཞན་མེད་པས། །བདེ་བ་གྲོལ་བའི་ལམ་དུ་ཤོག །ཅེས་པས་བསྟབ་པར་བྱའོ། །དེ་ནས་སྦྱང་བར་བྱ་བ་ཡང་། །མོཀྵའི་ལུས་ནི་བསྲེག་སྦྱར་བྱ། །ལྷག་མཐོང་མེ་འབར་འོད་འཕྲོས་དུག་གསུམ་བསྲེག །ཧཱུཾ་རཾ། མཚན་མའི་མེ་བུས་བརྩོན་འགྲུས་རླུང་གིས་གཏོར། །ཆགས་རླན་སྡུག་བསྔལ་ཞི་གནས་ཆུ་ཡིས་བཀྲུས། །ཧཱུཾ་ཁཾ།དེ་ནས་ལུས་ལ་དགོད་པ་ནི། །ཨ་ནྲྀ་སུ་ཏྲི་པྲེ་དུ། མཱུཾ་མཱཾ་ལཱཾ་པཱཾ་ཏཱཾ། ཨོཾ་ཨཱཿཧཱུཾ་སྭཱ་ཧཱ། སྤྱི་བོ་དཔྲལ་བ་མགྲིན་པ་སྙིང་། །ལྟེ་བ་དང་ནི་རྐང་མཐིལ་དུའོ། །མཱུཾ་ལས་འོད་འཕྲོས་ཨ་ཡི་རྣམ་རྟོག་བསྲེག །མཱུཾ་རཾ་ཨ་ཕཊ། ཧཱུཾ་ལས་འོད་འཕྲོས་སུ་ཡི་རྣམ་རྟོག་བསྲེག །ཧཱུཾ་རཾ་སུ་ཕཊ། ཨཱཾ་ལས་འོད་འཕྲོས་ནྲྀ་ཡི་རྣམ་རྟོག་བསྲེག །ཨཱཾ་རཾ་ནྲྀ་ཕཊ། ཨཽཾ་ལས་འོད་འཕྲོས་ཏྲི་ཡི་རྣམ་རྟོག་བསྲེག །ཨོཾ་རཾ་
ཏྲི་ཕཊ། ཏྲཱཾ་ལས་འོད་འཕྲོས་པྲེ་ཡི་རྣམ་རྟོག་བསྲེག །ཏྲཱཾ་རཾ་པྲེ་ཕཊ། ཧཱ་ལས་འོད་འཕྲོས་དུ་ཡི་རྣམ་རྟོག་བསྲེག །ཧཱ་རཾ་དུ་ཕཊ། དེ་ལྟར་རྒྱུན་གཅོད་སྒོ་དགག་པ། །ཨ་དྲུག་འོད་འཕྲོས་ཟླ་སྟེང་དུ། །ཧ་ལས་འོད་ཟེར་རབ་འཕྲོས་པས། །རྡོ་རྗེ་རྒྱ་གྲམ་ཕྱག་རྒྱས་གཏུག །ཨོཾ་ཤྲཱི་ཀྲི་སྨྲི་ཏི་བི་ཛ་ཡ་སྨ་ར་སྨ་ར་ཧཱུཾ། བརྗོད་པས་ཕྱག་མཚན་དྲུག་གི་གཟུངས། །སྐྱེས་དབུགས་ལུས་གནས་དྲུག་ནས་འབྱུང་། །སྒོ་གཅོད་རིགས་དྲུག་ཕྱག་མཚན་འབར། །རྒྱུད་དྲུག་འཁོར་གནས་མི་གཏོང་བར། །རིགས་དྲུག་དཀྱིལ་འཁོར་བདེ་དབྱིངས་བསྡུ། །ཉམས་དང་གར་སྔགས་མཐོང་སྣང་རྨི། །སེམས་ལུས་ངག་ཡུལ་བག་ཆགས་རྣམས། །གནས་སྦྱོངས་སུམ་ཅུ་ཐམ་པར་སྦྱང་། །དེ་ནས་གནས་གཞོམ་ཡོངས་བསྒྲལ་བ། །མཱུཾ་བདག་ཉིད་བསམ་གཏན་རང་བཞིན་པས། །ལེ་ལོ་གཡེང་བ་ཞི་བར་བྱེད། །སྟོང་ཉིད་རང་བཞིན་རྟོགས་བྱའི་ཕྱིར། །ལྷ་རྣམས་བྱང་ཆུབ་རྡོ་རྗེས་བསྒྲལ། །ཧཱུཾ་བདག་ཉིད་ཡེ་ཤེས་ཚུལ་མཆོག་སྟེ། །ང་དང་བདག་འཛིན་དབྱིངས་སུ་སྦྱོར། །མེ་ལོང་ཡེ་ཤེས་རྟོགས་བྱའི་ཕྱིར། །ལྷ་མིན་ཞེ་སྡང་རྡོ་རྗེས་བསྒྲལ། །ཨཱཿབདག་ཉིད་ཚུལ་ཁྲིམས་རང་བཞིན་ཏེ། །ལས་དང་ཉོན་མོངས་དག་པར་བྱེད། །གསུང་རབ་རྒྱ་མཚོ་རྟོགས་བྱའི་ཕྱིར། །མི་རྣམས་འདོད་ཆགས་རྡོ་རྗེས་བསྒྲལ། །ཨོཾ་བདག་ཉིད་ཤེས་རབ་འོད་གསལ་ཏེ། །རྨོངས་པའི་གཏི་མུག་ཞི་བར་བྱེད། །ཆོས་དབྱིངས་ཡེ་ཤེས་རྟོགས་བྱའི་ཕྱིར། །བྱོལ་སོང་གཏི་མུག་རྡོ་རྗེས་བསྒྲལ། །ཏྲཱཾ་བདག་ཉིད་སྦྱིན་པའི་རང་བཞིན་ཏེ། །བཀྲེས་དང་སྐོམ་པའི་སྡུག་བསྔལ་སེལ། །མཉམ་ཉིད་ཡེ་ཤེས་རྟོགས་བྱའི་ཕྱིར། །ཡི་དྭགས་ང་རྒྱལ་རྡོ་རྗེས་བསྒྲལ། །ཧཱ་བདག་ཉིད་བརྩོན་འགྲུས་རང་བཞིན་ཏེ། །ཚ་དང་གྲང་བའི་སྡུག་བསྔལ་སེལ། །བྱ་བའི་དོན་རྣམས་བསྒྲུབ་པའི་ཕྱིར། །དམྱལ་ཁམས་ཕྲག་དོག་རྡོ་རྗེས་བསྒྲལ། །ཧྲི་བི་ཥ་མཱུ་ལ་ཙྪིནྡ་ཙྪིནྡ་ཙྪིནྡ་ཧཱུཾ་ཕཊ། པ་ར་བིཏྱཱ་ཁཌྒ་ཙྪིནྡ་ཙྪིནྡ་ཙྪིནྡ་
ཧཱུཾ་ཕཊ། སརྦ་དུརྒ་སརྦ་ཀརྨ་ཀླེ་ཤ་ཧཱུཾ་ཕཊ། མཐ་མཐ་སརྦ་ཏིརྱ་ཀ་ག་ཏེ་ཧེ་ཏུཾ་ཧཱུཾ་ཕཊ། པ་ཙ་པ་ཙ་སརྦ་པྲེ་ཏ་ཀ་ག་ཏེ་ཧེ་ཏུཾ་ཧཱུཾ་ཕཊ། ད་ཧ་ད་ཧ་སརྦ་ན་ར་ཀ་ག་ཏེ་ཧེ་ཏུཾ་ཧཱུཾ་ཕཊ། རིགས་དྲུག་དག་གི་ཕྱག་མཚན་ལ། །སངས་རྒྱས་རིགས་དྲུག་ཕྱག་མཚན་བཟུང་། །ཁྲོ་བོ་བཅུས་བསྒྲལ་དགོད་པ་ནི། །མགོ་ལ་ཧཱུཾ་མཛད་ཆེན་པོ་སྟེ། །དཔྲལ་བར་རྣམ་པར་རྒྱལ་བ་ཡིན། །ཁ་རུ་ཧ་ཡ་གྲཱི་བ་སྟེ། །ཁམས་གསུམ་ལག་པ་གཡས་པར་ཡིན། །གཡོན་པར་དབྱུག་པ་སྔོན་པོ་སྟེ། །བདུད་རྩི་འཁྱིལ་པ་སྙིང་གར་བསྡུ། །ལྟེ་བར་ཡ་མཱནྟ་ཀ་སྟེ། །རྐང་གཡས་གཞན་གྱིས་མི་ཐུབ་པ། །གཡོན་པ་མི་གཡོ་མགོན་པོ་སྟེ། །མ་ཧྲ་བ་ལ་གསང་བར་བསྡུ། །དེ་ནས་ཡིག་འབྲུ་བཅུ་བཀོད་དེ། །བསྐྱེད་ཅིང་སྤྲོ་བསྡུ་བྱས་པ་ཡིན། །ཧཱུཾ་ལས་འོད་འཕྲོས་ལོག་པར་གཡེམས་པ་བཅོམ། །མོས་པའི་དབང་རྫོགས་རྡོ་རྗེ་ཧཱུཾ་ཀཱ་ར། །ཧཱུཾ་ཪྠཾ།ཧཱུཾ་ཀཱ་ར་ཨ་བྷི་ཥིཉྩ་ཧཱུཾ་ཨ། ཀློང་ལས་འོད་འཕྲོས་མ་བྱིན་ལེན་པ་བསྲེག །ཡོ་བྱད་དབང་སྩོལ་གཞན་གྱིས་མི་ཐུབ་རྒྱལ། །ཀྲཾ་རཾ། ཨ་པ་ར་ཛི་ཏ་ཨ་བྷི་ཥིཉྩ་ཧཱུཾ། རཾ་ལས་འོད་འཕྲོས་ལོག་པར་ལྟ་བ་བཅོམ། །སྐྱེ་ལ་དབང་མཛད་བྲན་ཚུལ་མི་གཡོ་མགོན། །རཾ་རཾ། ཨཱརྱ་ཨ་ཙ་ལ་ཨ་བྷི་ཥིཉྩ་ཧཱུཾ། ཀློང་ལས་འོད་འཕྲོས་སྲོག་གཅོད་སྒྲིབ་པ་བསྲེག །ཚེ་ལ་དབང་སྩོལ་འཇིགས་བྱེད་གཤིན་རྗེའི་གཤེད། །ཀློང་རཾ། ཡ་མཱནྟ་ཏ་ཀ་ཨ་བྷི་ཥིཉྩ་ཧཱུཾ། ཏ་ལས་འོད་འཕྲོས་རྫུན་གྱི་སྐྱོན་རྣམས་བསྲེག །ཡེ་ཤེས་དབང་སྩོལ་དབྱུག་པ་སྔོན་པོ་ཅན། །ཏ་རཾ་ནཱི་ལ་དཎྜ་ཨ་བྷི་ཥིཉྩ་ཧཱུཾ། ཧྲི་ལས་འོད་འཕྲོས་ཕྲ་མའི་སྒྲིབ་པ་བསྲེག །ཆོས་ལ་དབང་སྩོལ་ཧ་ཡ་གྲཱི་ཝ་དཔལ། །ཧྲི་རཾ། ཧ་ཡ་གྲཱི་ཝ་ཨ་བྷི་ཥིཉྩ་ཧཱུཾ། ཙ་ལས་འོད་འཕྲོས་འཁྱལ་པའི་སྒྲིབ་པ་བསྲེག །སེམས་ལ་དབང་སྩོལ་འདོད་པའི་ཁྲོ་བོ་རྒྱལ། །ཙ་རཾ་ཊཱཀྐི་རཱ་ཛ་ཨ་བྷི་ཥིཉྩ་ཧཱུཾ། འདི་སྐོར་དང་གོང་གི་ས་བོན་གཉིས་མ་འགྲེས་པས་དཔྱད་ཨ་ལས་འོད་འཕྲོས་ངག་རྩུབ་སྒྲིབ་པ་བསྲེག །ལས་ལ་དབང་སྩོལ་བདུད་རྩི་ཀུཎྜ་ལི། །ཨ་རཾ། ཨ་མྲྀ་ཏ་ཀུཎྜ་ལི་ཨ་བྷི་ཥིཉྩ་ཧཱུཾ། ཀྴ་ལས་འོད་འཕྲོས་གནོད་སེམས་སྒྲིབ་པ་བཅོམ། །རྫུ་འཕྲུལ་དབང་སྩོལ་འཇིགས་བྱེད་སྟོབས་པོ་ཆེ། །
ཀྵ་རཾ། མ་ཧཱ་བ་ལ་ཨ་བྷི་ཥིཉྩ་ཧཱུཾ། བྲུཾ་ལས་འོད་འཕྲོས་བརྣབ་སེམས་ཉེས་པ་བཅོམ། །སྨོན་ལམ་དབང་སྩོལ་འདམ་སྐྱེས་ཀུཎྜ་ལི། །བྲུཾ་རཾ། ཀ་མ་ལི་ཀུཎྜ་ལི་ཨ་བྷི་ཥིཉྩ་ཧཱུཾ། དེ་ནས་ཕྱག་རྒྱ་བརྒྱད་དགོད་དེ། །སྙིང་ལ་དཀར་མོ་གཽ་རི་མ། །མགོ་ལ་རྐུན་མོ་ཙཽ་རི་མ། །རྐང་གཡོན་རྨོངས་མོ་པྲ་མོ་ཧཱ། །ལག་གཡོན་ཐལ་བྱེད་བེ་ཏཱ་ལཱི། །ལག་གཡས་སྦོས་མོ་པུཀྐ་སཱི། །རྐང་གཡས་སྨེ་ཤ་ཙཎྜ་ལཱི། །ཕོ་མཚན་གཏུམ་མོ་གྷསྨ་རཱི། །ཁ་ལ་མ་ཚོགས་སྨ་ཤ་ནཱི། །གཽ་ལས་འོད་འཕྲོས་མ་དྲིན་བག་ཆགས་བསྲེག །གཽ་རཱི་རཾ།ཙཽ་ལས་འོད་འཕྲོས་ལོག་པར་བལྟ་བ་བཅོམ། །ཙཽ་རཱི་རཾ། པྲ་ལས་འོད་འཕྲོས་ངག་གི་སྒྲིབ་པ་བསྲེག །པྲ་མོ་ཧ་རི། བེ་ལས་འོད་འཕྲོས་ལོག་པར་ལེན་པ་བཅོམ། །བེ་ཏཱ་ལི་རཾ། ཕུ་ལས་འོད་འཕྲོས་ལོག་པའི་ལས་རྣམས་བསྲེག །པུཀྐ་སཱི་རཾ། རི་ལས་འོད་འཕྲོས་ལོག་པར་འཚེ་བ་བཅོམ། །གྷསྨ་རཱི་རཾ། ལི་ལས་འོད་འཕྲོས་ལོག་པར་རྩོལ་བ་བཅོམ། །ཙཎྜ་ལཱི་རཾ། ནི་ལས་འོད་འཕྲོས་འཁྲུལ་རྟོག་རྩེ་གཅིག་བཅོམ། །སྨ་ཤ་ནཱི་རཾ། དུར་ཁྲོད་གནས་ཀྱི་མ་བརྒྱད་ཀྱིས། །ལོག་པར་བལྟ་བ་བརྒྱད་བཅོམ་མོ། །དེ་ནས་འོད་ཀྱི་གོང་བུ་དེ། །སྤྱི་བོར་བསྡུས་ཏེ་འདི་སྐད་གསུངས། །གད་མཆོག་ཐམས་ཅད་སྟོབས་ཀྱི་སོའུ་མ། །རྣམ་རྟོག་བག་ཆགས་སྲེགས་ཤིག་ཨ་མྲྀ་ཏ། །དམ་ཚིག་ལས་ཀྱིས་སྒྲོལ་ཅིག་ཀརྨ་ཛ། །བདེ་ཆེན་དབྱིངས་སུ་སྡོམས་ཤིག་མུ་ཏིག་བཾ། །ཨ་ཙནྡ་མཎྜ་ལ། མ་སཱུརྻ་མཎྜལ། ས་མ་ཡ་དྷ་ར་ཀརྨ་བཛྲ། བཛྲ་མུ་ཏི་བཾ། ཞེས་པས་དོན་རྣམས་མ་ལུས་པ། །ལྷ་མོ་བཞི་ལ་ལས་བཅོལ་ལོ། །དེ་ནས་བསྒྲལ་བར་བྱ་བ་ཡང་། །དེ་དང་འདྲ་བར་བྱ་བ་ནི། །སྲིད་པ་ཡོངས་བསྒྲལ་ཏིང་འཛིན་ཡང་། །རྣལ་འབྱོར་པ་ཡིས་ཡང་དག་བྱ། །ལྷག་མཐོང་མེ་ཆེན་བསྐལ་པའི་བག་ཆགས་བསྲེག །རཏྣ་ཧེ་རུ་ཀ་རཾ།བརྩོན་འགྲུས་རླུང་གི་བསྐལ་པས་མཚན་མ་གཏོར། །ཀརྨ་ཧེ་རུ་ཀ་ཡཾ། ཞི་གནས་ཆུ་ཡི་བསྐལ་པས་དབྱིངས་སུ་བཀྲུས། །པདྨ་ཧེ་རུ་ཀ་ཁཾ། ཆོས་དབྱིངས་ནམ་མཁའི་བསྐལ་པས་དབྱིངས་སུ་བསྡིམ། །བུཌྜྷ་ཧེ་རུ་ཀ་ག་ག་ན་ཨེ། གཟུང་འཛིན་ས་ཡི་བསྐལ་པས་
ཕྱག་རྒྱར་བསྒྲུབས། །བཛྲ་ཧེ་རུ་ཀ་ལཾ། ཀཱ་ཡ་ཝཱ་ཀ་ཙིཏྟ་ཧཱུཾ། བཛྲ་སཏྭ་རཱ་ཛ། རཏྣ་རཱ་ཛ། པདྨ་རཱ་ཛ། ཏ་ཐཱ་ག་ཏ་རཱ་ཛ། དྲག་པོའི་ལས་ཀྱིས་བསྒྲལ་བ་རྣམས། །འཁོར་བའི་ལམ་ལྔ་སྒོ་བཅད་དེ། །རྣམ་ཤེས་ཧཱུཾ་གིས་བསྡུས་ནས་ནི། །འོག་མིན་བླ་མེད་གནས་མཆོག་ན། །གཙོ་བོ་ལྔ་དང་གཙོ་མོ་ལྔ། །སེམས་དཔའ་དང་ནི་སེམས་མ་དང་། །ཁྲོ་བོ་དང་ནི་ཁྲོ་མོ་ཡི། །སྦྱོར་བའི་ལྷུམས་སུ་ཕཊ་ཀྱིས་འཕངས། །ཁམས་གསུམ་ཡོངས་བསྒྲལ་དེ་དུས་ན། །ཡོངས་ལ་སྦྱར་བ་ཤེས་པར་བྱ། །བདེ་བ་བཞིས་ནི་ཀུན་ཁྱབ་པོ། །དེ་ནས་གིང་ལ་འདི་སྐད་གསུངས། །ཁྱོད་ནི་ཕོ་ཉ་གིང་ཀ་ར། །ཀ་ཏར་སྔོན་པོ་འདི་ལོང་ལ། །ཨ་ཕྱི་ར་ཛ་གནས་བསྟོད་ཏེ། །དཀྱིལ་འཁོར་གསང་བར་དབང་སྐུར་ཅིག །འཁོར་བའི་རྩད་གཅོད་ཤེས་རབ་མཚོན། །པྲཛྙཱ་ཏཱིཀྵྞ་ཧཱུཾ། རཾ་གྱིས་བསྲེགས་ཤིང་དབྱིངས་སུ་བསྡུས། །ཧཱུཾ་རཾ། ཟླ་དཀྱིལ་བཞག་སྟེ་ཧོ་ཡིས་གཡེང་། །ཨ་ཧོ་ཡཾ། ཕཊ་ཀྱིས་འཕངས་ཏེ་དབྱིངས་སུ་བསྡིམ། །སྥ་ར་ན་ཕཊ། བདེ་བ་ཆེན་པོའི་གནས་སུ་བཀོད། །མ་ཧཱ་སུ་ཁ་བྷྲཱུཾ། དེ་ནས་གིང་གིས་འདི་སྐད་གསུངས། །མི་འགྱུར་ནམ་མཁའི་རང་བཞིན་ལས། །གཟུགས་སྣང་རྟོག་པས་རྣམ་པར་བསྒྲིབས། །བག་ཆགས་མ་ལུས་ཀུན་སྦྱང་ཕྱིར། །ཁམས་གསུམ་ཐམས་ཅད་བསྒྲལ་བར་བྱ། །ང་ནི་ཟ་བྱེད་ཆེན་པོ་སྟེ། །སེམས་ཅན་ཐམས་ཅད་གསད་པར་བྱ། །མ་སྐྱེས་ཕྱིར་ཡང་གསད་པར་བྱ། །མ་གྲུབ་ཕྱིར་ཡང་གཏུབ་པའི་རྫས། །མ་རུངས་འདོད་ལ་རབ་ཆགས་ཤིང་། །དམ་ཚིག་ལ་སྡང་དགྲ་བགེགས་རྣམས། །སྙིང་རྗེ་བྱང་སེམས་ལྡན་པ་ཡིས། །ངོ་མཐོན་སྟོབས་ཀྱིས་བསྒྲལ་བར་བྱ། །པྲ་བེ་ཤ་ཕཊ།སྔགས་ཀྱིས་བརྗོད་ནས་ཙིཏྟ་བཟུང་། །དེ་རྣམས་ཉི་ཤུ་དགུ་དང་ལྡན། །བདེ་གཤེགས་གསང་བའི་སྒོ་ཕྱེ་ནས། །རིག་པའི་མེ་ཏོག་ལྷ་ལ་འཕེན། །གཙོ་བོ་བསྒྲུབ་པའི་ལྷར་བབས་ན། །ལྷ་ཡི་དངོས་གྲུབ་དོན་དུ་སྐོང་། །དོན་དམ་ཆོས་སྐུའི་ཡེ་ཤེས་གཞུག །མཐའ་བྲལ་ཆོས་ཉིད་སྙིང་པོ་རྟོགས། །རྟོགས་པའི་ཏིང་
འཛིན་ལྗགས་ལ་བསྟར། །དེ་ཡང་རྣམ་པ་གཅིག་ཏུ་ཡང་། །ཡེ་ཤེས་དབྱིངས་སུ་གཞུག་པས་གཟུང་བ་སྟོང་། །སྙིང་པོ་ལྗགས་ལ་བསྟར་བས་འཛིན་པ་སྤོང་། །གཟུང་འཛིན་གཉིས་མེད་དོན་དམ་ཐུགས་སུ་ཆུད། །རྟོགས་ནས་སྤྲུལ་པའི་འགྲོ་དོན་ཕྱོགས་བཅུར་མཛད། །དེ་ནས་འདི་སྐད་ཀྱང་གསུངས་པ། །ཁྲོ་གཏུམ་ཚད་མེད་བྱམས་པར་སྣང་། །གསོད་ཆེན་ཐུགས་རྗེའི་བདག་ཉིད་སྟེ། །བསྒྲལ་ཞིང་བསྟབ་པ་དགའ་བའི་མཆོག །ཡལ་བར་མི་འདོར་བཏང་སྙོམས་སོ། །ང་རྒྱལ་དྲེགས་སེམས་ཀུན་བསྒྲལ་ལྷ་བདུད་བཅོམ། །གཟུགས་ནི་བཤིག་དྲལ་ཕུང་པོའི་རྣམ་རྟོག་བཅོམ། །ཤ་ཟ་ཁྲག་འཐུང་རུས་འཆའ་ཉོན་མོངས་བཅོམ། །དེ་ཉིད་མ་སྐྱེས་མ་བྱུང་སྐྱེ་ཤི་མེད། །དེ་ནས་གིང་གི་ཚམ་རྔམས་འཇུག །ཕྱག་རྒྱ་འབྱུང་བའི་ཚམ་རྔམས་ཆས། །ལྷ་རྣམས་སྐུར་གསལ་ཕྱག་རྒྱ་བྱ། །ཨོཾ་ཤྲཱི་ཧེ་རུ་ཀ་ཧཱུཾ།ཨ་ཨ་ཨ། ཕྱག་རྒྱ་དེ་དང་འདྲ་བ་ནི། །རྡོ་རྗེ་རྩེ་གཅིག་རྩེ་དགུ་དང་། །བཅུ་གཅིག་ཕྱག་རྒྱ་བཅིངས་བྱས་ཏེ། །སོ་སོའི་རང་སྔགས་འདི་བཟླས་སོ། །ཨོཾ་བཛྲ་ཀྲོ་དྷ་ཧཱུཾ་ཀཱ་ར་གརྫ་གརྫ་ཧཱུཾ་ཕཊ། ཨོཾ་བཛྲ་ཀྲོ་དྷ་མ་ཧཱ་བ་ལ་སྥོ་ཊ་སྥོ་ཊ་ཧཱུཾ་ཕཊ།ཨོཾ་བཛྲ་ཀྲོ་དྷ་བི་ཛ་ཡ་ཧ་ན་ཧ་ན་ཧཱུཾ་ཕཊ། ཨོཾ་བཛྲ་ཀྲོ་དྷ་ནཱི་ལ་དཎྜ་ད་ཧ་ད་ཧ་ཧཱུཾ་ཕཊ། ཨོཾ་བཛྲ་ཀྲོ་དྷ་ཡ་མཱནྟ་ཀ་པ་ཙ་པ་ཙ་ཧཱུཾ་ཕཊ། ཨོཾ་བཛྲ་ཀྲོ་དྷ་ཨཱརྱ་ཨ་ཙ་ལ་བནྡྷ་བནྡྷ་ཧཱུཾ་ཕཊ། ཨོཾ་བཛྲ་ཀྲོ་དྷ་ཧ་ཡ་གྲཱྀ་བ་ཧུ་ལུ་ཧུ་ལུ་ཧཱུཾ་ཕཊ། ཨོཾ་བཛྲ་ཀྲོ་དྷ་ཨ་པ་ར་ཛི་ཏ་ཏིཥྛ་ཏིཥྛ་ཧཱུཾ་ཕཊ། ཨོཾ་བཛྲ་ཀྲོ་དྷ་ཨ་མྲྀ་ཏ་ཀུཎྜ་ལི་ཙྪིནྡ་ཙྪིནྡ་ཧཱུཾ་ཕཊ།ཨོཾ་བཛྲ་ཀྲོ་དྷ་ཏྲཻ་ལོཀྱ་བི་ཛ་ཡ་བྷིནྡ་བྷིནྡ་ཧཱུཾ་ཕཊ། ལག་པ་ཐལ་སྦྱར་གྱེན་དུ་བསྒྲེང་། །རྐང་པ་མཐིལ་སྦྱར་ཐུར་དུ་གཟུག །ཚིགས་ཆེན་བཞི་ཡང་བཅག་པར་བྱ། །མགོ་དང་མཚན་མ་སྙིང་པོར་བརྟག །རྡོ་རྗེ་རྩེ་གཅིག་རྩེ་དགུ་དང་། །བཅུ་གཅིག་ཏུ་ནི་རྣམ་བརྟགས་ཏེ། །འདི་ནི་ཁྲག་འཐུང་ཆེན་པོ་ཡི། །ཕྱག་རྒྱ་ཡིན་པར་རྒྱལ་པོས་བཤད། །ལག་པ་ཐལ་སྦྱར་གྱེན་དུ་བསྒྲེང་། །རྐང་པ་ཕྲལ་ནས་བརྐྱང་བསྐུམ་བཞིན། །གོམ་པའི་སྟབས་ཀྱིས་གར་བྱེད་ཅིང་། །འདི་ནི་ཧཱུཾ་གི་ཕྱག་རྒྱ་ཡིན། །རྐང་པའི་མཐིལ་ནི་མནན་པའི་སྟངས། །
ལག་པ་ཕྲལ་ནས་གར་བྱེད་ཅིང་། །མནན་མཆོངས་སྟབས་སུ་བྱེད་པ་ནི། །སྟོབས་པོ་ཆེ་ཡི་ཕྱག་རྒྱ་ཡིན། །རྐང་པ་གཡོན་གྱིས་གཡས་ལ་འཁྱུད། །ལག་པ་གར་སྟབས་བསྐོར་ནས་ནི། །ཐལ་མོ་དྲག་པོར་བརྡེབ་པ་ནི། །རྣམ་པར་རྒྱལ་བའི་ཕྱག་རྒྱ་ཡིན། །ལག་པ་གཡས་གཡོན་མཐེ་བོ་ཡིས། །མཐེའུ་ཆུང་སེན་མོ་མཐིལ་དུ་མནན། །གདེངས་པའི་སྟབས་སུ་བསྒྲེང་བ་ནི། །དབྱུག་སྔོན་ཅན་གྱི་ཕྱག་རྒྱ་ཡིན། །ལག་པ་གཡས་པའི་ཁུ་ཚུར་གྱིས། །བརྡེག་པའི་སྟབས་སུ་གདེངས་པ་དང་། །གཡོན་པ་དགུ་ལ་བརྟེན་པ་ནི། །གཤིན་རྗེ་འཇོམས་པའི་ཕྱག་རྒྱ་ཡིན། །ལག་པ་གཡས་པའི་ཐལ་མོ་ཡིས། །གདབ་པའི་སྟབས་སུ་གདེངས་པ་དང་། །གཡོན་པས་འཛིན་པ་ལྟར་བྱེད་པ། །མི་གཡོ་མགོན་པོའི་ཕྱག་རྒྱ་ཡིན། །ལག་པ་ཐལ་མོ་སྦྱར་ནས་ཀྱང་། །གུང་མོ་ནང་དུ་བསྣོལ་བར་བྱ། །མཐེ་བོང་གཉིས་ཀྱང་ཕྲལ་ཏེ་བསྒྲེང་། །སྤྱི་བོར་བཞག་སྟེ་རྟ་ཡི་རྒྱ། །རྐང་པ་གཡས་པ་ཐུར་དུ་གཟུག །ལག་པ་གཡས་པ་གྱེན་དུ་བསྒྱེར་དགྱེར་ཡང་། །གཡོན་གྱི་རྐང་ལག་ཕྱག་རྒྱ་ནི། །གཞན་གྱིས་མི་ཐུབ་ཕྱག་རྒྱ་ཡིན། །ལག་པ་གཡས་གཡོན་དཀུར་བརྟེན་ཏེ། །རྐང་པ་བཤིབས་ཏེ་མཆོངས་པ་ནི། །བདུད་རྩི་འཁྱིལ་པའི་ཕྱག་རྒྱ་ཡིན། །ལག་པ་གཡས་གཡོན་བསྣོལ་བ་དང་། །རྐང་པ་བརྐྱང་བསྐུམ་བྱེད་པ་ན། །ཁམས་གསུམ་རྒྱལ་བའི་ཕྱག་རྒྱར་ནི། །མགོན་པོ་དཔའ་བོས་ཡང་དག་བཤད། །ལག་པ་གཡས་གཡོན་སྤྲུག་པ་དང་། །ལུས་ཀྱང་དྲག་ཏུ་གསིག་པ་ནི། །རྡོ་རྗེ་ཕྲ་མེན་མ་རྣམས་ཀྱི། །ཕྱག་རྒྱ་ཡིན་ཞེས་འདྲེན་པས་བཤད། །དེ་ལྟར་ཚམ་རྔམས་བྱས་པ་ལས། །ཡིག་འབྲུ་བཅུ་ལས་འོད་འཕྲོས་པས། །མི་དགེ་བཅུ་རྣམས་རྣམ་པར་དག །དེ་ནས་ཕྲ་མེན་མ་བརྒྱད་ཀྱི། །སྟབས་དང་ཕྱག་རྒྱ་འབྱོན་ཚུལ་བྱས། །ལག་པར་བལྟ་བ་བརྒྱད་བཅོམ་མོ། །དེ་ནས་རྟགས་དང་ལྡན་པར་བསྒྲལ། །ཡུམ་ནི་མདུན་དུ་འདུག་པ་ལ། །གཉིས་སུ་མེད་པར་སྦྱོར་བར་བྱ། །དང་པོ་བདེ་བ་བསྙེན་པ་ལ། །མཆོག་ཏུ་བདེ་བ་ཉེ་བསྙེན་ཏེ། །བྲལ་
བའི་བདེ་བ་སྒྲུབ་པ་ལ། །སྒྲུབ་ཆེན་ལྷན་ཅིག་སྐྱེས་པ་སྟེ། །མཁའ་དབྱིངས་ལྕགས་ཀྱུའི་ཕྱག་རྒྱས་དྲངས། །ཡབ་ཡུམ་བྱང་སེམས་དབང་བསྐུར་ཏེ། །དང་པོར་རེག་པ་སྲ་བ་ས། །སངས་རྒྱས་སྤྱན་གྱི་བུམ་དབང་བསྐུར། །དེ་ནས་གཤེར་བ་ཆུ་ཡིན་ཏེ། །མཱ་མ་ཀཱི་ཡི་ཅོད་པན་གདགས། །དེ་ནས་དྲོ་བ་མེ་ཡིན་ཏེ། །གོས་དཀར་མོ་ཡི་རྡོ་རྗེའི་དབང་། །དེ་ནས་གཡོ་བ་རླུང་ཡིན་ཏེ། །སྒྲོལ་མས་དྲིལ་བུའི་དབང་ཡང་བྱིན། །ཐིག་ལེ་ནམ་མཁའི་གཟུགས་ཅན་ཉིད། །རྡོ་རྗེ་སེམས་དཔའི་སར་བསྒྲལ་ལོ། །སྲིད་པའི་འཁོར་ལོས་ལོག་པའི་ལམ། །འཁོར་བ་རྒྱུན་གཅད་མྱ་ངན་འདས། །ཆོས་ཀྱི་འཁོར་ལོ་བསྐོར་བའི་རྟགས། །གདན་དུ་འཁོར་ལོས་མཚན་པ་ཡིན། །ཨཱཛྙ་ཙཀྲ་ཧཱུཾ།མཉམ་ཉིད་རྡོ་རྗེ་དབང་ཕྱུག་གིས། །སྟོང་ཉིད་སེངྒེའི་སྒྲ་བསྒྲགས་ཏེ། །བདུད་བཞི་རབ་ཏུ་བཅོམ་པའི་རྟགས། །མི་འཇིགས་སེངྒེའི་ཁྲི་ལ་བཞུགས། །སིང་ཧ་ཛམ་བ་ལ་བི་མ་ལ་སིདྡྷི་ཧཱུཾ། མྱ་ངན་མི་འདའ་རྡོ་རྗེའི་ངང་། །ཉོན་མོངས་མི་སྤང་གོས་པ་མེད། །མ་ཆགས་རང་བཞིན་དག་པས་ན། །པདྨའི་དཀྱིལ་འཁོར་གདན་ལ་བཞུགས། །ཨོཾ་བཛྲ་པདྨ་སྟཾ་ན་བེ་ཤ་ཧཱུཾ། ཞི་བའི་མཐའ་ལ་མི་གནས་ཏེ། །འཇིག་རྟེན་ཀུན་དང་མཐུན་འཇུག་རྟགས། །ཐབས་དང་ཤེས་རབ་འདྲེལ་བས་ན། །ཉི་ཟླའི་དཀྱིལ་འཁོར་གདན་ལ་བཞུགས། །ཨོཾ་སཱུརྱ་ཧཱུཾ། ཙནྡྲ་ཨ། གདན་རྣམས་དེ་ཡི་སྟེང་དག་ཏུ། །སྔགས་བཟླས་རིགས་ལྔའི་སྐུར་བསྐྱེད་དོ། །འཆི་བ་མེད་པར་སྲོག་དྲན་པས། །རྡོ་རྗེའི་སྲོག་ནི་རླུང་ལྟ་བུ། །གང་དག་བསྒྲལ་བ་རྡོ་རྗེའི་ཚེ། །སྐྱེ་ཤི་མེད་པའི་ས་ལ་བཀོད། །དེ་ཉིད་སྲས་ཀྱི་དང་པོར་ནི། །རྡོ་རྗེ་སེམས་དཔའ་ཁྱོད་ཀྱིས་སྟབས། །ཐབས་ལ་མཁས་པའི་སྤྱོད་པའོ། །དེ་ནས་ཡེ་ཤེས་ལྔས་བྱིན་བསྡུ། །རྣམ་པར་ཤེས་པའི་ཚོགས་བརྒྱད་བསྒྱུར། །སྐུ་གསུང་ཐུགས་དང་ཡོན་ཏན་དང་། །ཕྲིན་ལས་ལྔས་ཀྱང་དབང་བསྐུར་ལ། །མ་ལུས་ཐམས་ཅད་ལྷར་བསྒྱུར་རོ། །དེ་ནས་བསྒྱུར་བྱས་ཡི་གེ་ཡི། །བཞི་བཅུ་རྩ་གཉིས་དབང་བསྐུར་རོ། །དེ་ནས་
སྟོབས་གིང་དག་གིས་ནི། །ཤ་དང་ཁྲག་དང་རུས་པ་གསུམ། །ཁྱེར་ནས་བསྟབ་པ་འདི་སྐད་གསུངས། །ཁྲག་ནི་འདོད་ཆགས་བདེ་བ་ཆེ། །ཁྱོད་ཀྱི་ཞེ་སྡང་གསལ་བ་ཆེ། །ཤ་ནི་གཏི་མུག་མི་རྟོག་ཆེ། །རྒྱུ་ནི་དུག་གསུམ་དག་ནས་ཀྱང་། །ཁམས་གསུམ་འཁོར་བ་ལས་གྲོལ་ནས། །འབྲས་བུ་སྐུ་གསུམ་ཐོབ་པར་མཛོད། །ཞལ་དུ་བསྟབ་པོ་ཁ་རཾ་ཁཱ་ཧི། །དེ་ནས་སློབ་དཔོན་འདི་སྐད་གསུངས། །ང་ནི་ཟ་བྱེད་ཆེན་པོ་སྟེ། །ཁམས་གསུམ་མ་ལུས་བསྒྲལ་བར་བྱ། །གདུལ་དཀའ་མ་ལུས་འདུལ་བའི་ཕྱིར། །ཤ་རུས་ལ་སོགས་བཟའ་བར་བྱ། །དེ་ནས་ཁོག་པ་དུར་ཁྲོད་ཀྱི། །གནས་བརྒྱད་བརྩིགས་པར་བྱ་བ་ཡང་། །སྒྲུབ་ཆེན་ལ་སོགས་གཞན་མི་བྱ། །བྱས་ན་ཞག་བདུན་ཁྲག་སྐྱུག་འཆི། །རྟོགས་ལྡན་སྒྲུབ་གནས་དུར་ཁྲོད་མནན། །ཤེས་རློམ་འཕྲལ་སྣང་ཀུན་བྱེད་པ། །མ་བདུན་ཟ་ལམ་ཞག་བདུན་འཆི། །རྣམ་ཤེས་ཙིཏྟ་ན་ར་ཀན། །འཇམ་དཔལ་འཕྲུལ་གྱི་དངོས་གྲུབ་མཆོག །སྲིད་གསུམ་མཐར་བྱེད་རྔམས་པ་དེས། །ཐོད་དབྱུག་ཆེན་པོ་མི་བཟད་པས། །གཤིན་རྗེ་བཏུལ་ཏེ་བསད་ནས་སུ། །རོ་ཡང་ལྷོ་ཡི་འཛམ་གླིང་དུ། །དུར་ཁྲོད་ཆེན་པོ་བརྒྱད་དུ་བརྩིགས། །དེ་ལྟར་དེ་བཞིན་བདག་གིས་ནི། །ཕ་ལ་བུས་ནི་བྱས་པ་བཞིན། །འདི་ལུས་དུར་ཁྲོད་གནས་སུ་འབུལ། །འདི་ཡི་ལུས་སྙིང་མ་ག་དྷ། །དུར་ཁྲོད་ཆེན་པོ་བསིལ་ཚལ་དུ། །མ་མོ་ཆེན་མོ་གོའུ་རི་མ། །དུར་ཁྲོད་ཆེན་པོའི་རྒྱན་དུ་འབུལ། །མཁས་ལ་སྙིང་སྟོབས་ཆེ་བ་ཡི། །དངོས་གྲུབ་ཆེན་པོ་སྩལ་དུ་གསོལ། །འདི་ཡི་མགོ་བོ་ལྷོ་ཕྱོགས་ཀྱི། །སིངྒ་ལ་ཡི་གླིང་ཕྲན་ལ། །མ་མོ་ཆེན་མོ་ཙོའུ་རི་མ། །དུར་ཁྲོད་ཆེན་པོའི་རྒྱན་དུ་འབུལ། །མཐོང་ཐོས་རྣམ་པར་འཕྲུལ་བག་གི། །དངོས་གྲུབ་དམ་པ་སྩལ་དུ་གསོལ། །འདི་ཡི་ལག་གཡས་ཤར་ལྷོ་མཚམས། །བལ་ཡུལ་ན་ནི་པུཀྐ་སཱི། །དུར་ཁྲོད་ཆེན་པོའི་རྒྱན་དུ་འབུལ། །ལྷག་པར་ཟས་ཀྱི་དངོས་འབྱོར་པའི། །དངོས་གྲུབ་དམ་པ་སྩལ་དུ་གསོལ། །འདི་ཡི་ལག་གཡོན་ལྷོ་ནུབ་མཚམས། །སཱ་ལའི་
ཚལ་ན་བེ་ཏཱ་ལཱི། །དུར་ཁྲོད་ཆེན་པོའི་རྒྱན་དུ་འབུལ། །ཕྱག་ན་རྡོ་རྗེའི་མཐུ་སྟོབས་སྩོལ། །འདི་ཡི་རྐང་གཡས་བྱང་ཤར་མཚམས། །ལི་ཡི་ཡུལ་ན་ཙཎྜཱ་ལཱི། །དུར་ཁྲོད་ཆེན་པོའི་རྒྱན་དུ་འབུལ། །ལོངས་སྤྱོད་འཁོར་ལྡན་དངོས་གྲུབ་སྩོལ། །འདི་ལ་རྐང་གཡོན་ནུབ་བྱང་མཚམས། །ཀ་ནི་ཀ་མཐུན་པྲ་མོ་ཧཱ། །དུར་ཁྲོད་ཆེན་པོའི་རྒྱན་དུ་འབུལ། །བདེ་སྐྱིད་ལྡན་པའི་དངོས་གྲུབ་སྩོལ། །འདི་ཡི་ཕོ་མཚན་བྱང་ཕྱོགས་ན། །ཨུ་རྒྱན་ཡུལ་ན་གྷས་མ་རི། །དུར་ཁྲོད་ཆེན་པོའི་རྒྱན་དུ་འབུལ། །གྲུབ་པ་མྱུར་བའི་དངོས་གྲུབ་སྩོལ། །བཞག་ཤ་ཁོག་ཤ་ལ་སོགས་པ། །ཐམས་ཅད་ལོ་ཀའི་དུར་ཁྲོད་ན། །སྨ་ཤ་ནི་ཡི་རྒྱན་དུ་འབུལ། །ལས་རྣམས་ཀུན་གྱི་དངོས་གྲུབ་སྩོལ། །ཞེས་པས་དུར་ཁྲོད་ཁང་བརྩིག་གོ། །དེ་ནས་ཕུང་པོ་ལྔ་པོ་རྣམས། །མཆོད་པར་བྱ་བ་འདི་གསུངས་སོ། །བཅོམ་ལྡན་རྡོ་རྗེ་སེམས་དཔའ་ལ། །གཟུགས་མཆོག་གླང་པོའི་གདན་ཁྲི་འབུལ། །ཐུགས་ཀྱི་དངོས་གྲུབ་དམ་པ་དང་། །སྟོབས་བཅུའི་དབང་རྣམས་སྩལ་དུ་གསོལ། །བཅོམ་ལྡན་རྣམ་པར་སྣང་མཛད་ལ། །གཟུགས་མཆོག་སེང་གེའི་གདན་ཁྲི་འབུལ། །སྐུ་ཡི་བྱིན་རླབས་རྒྱ་མཚོ་དང་། །མི་འཇིགས་བཞི་ཡི་དབང་རྣམས་སྩོལ། །བཅོམ་ལྡན་སྣང་བ་མཐའ་ཡས་ལ། །གཟུགས་མཆོག་རྨ་བྱའི་གདན་ཁྲི་འབུལ། །གསུང་རབ་རྒྱ་མཚོ་འཆད་པ་དང་། །དབང་བཅུའི་དངོས་གྲུབ་སྩལ་དུ་གསོལ། །བཅོམ་ལྡན་རིན་ཆེན་འབྱུང་གདན་ལ། །གཟུགས་མཆོག་རྟ་ཡི་གདན་ཁྲི་འབུལ། །ཡོན་ཏན་རྒྱ་མཚོའི་བྱིན་རླབས་དང་། །རྫུ་འཕྲུལ་རྐང་བཞིའི་དངོས་གྲུབ་སྩོལ། །བཅོམ་ལྡན་དོན་ཡོད་གྲུབ་པ་ལ། །གཟུགས་མཆོག་མཁའ་ལྡིང་གདན་ཁྲི་འབུལ། །ཕྲིན་ལས་རྒྱ་མཚོ་མཐའ་ཡས་དང་། །ཐོགས་མེད་ལས་བཞིའི་དངོས་གྲུབ་སྩོལ། །ས་དང་ཆུ་དང་མེ་དང་རླུང་། །ནམ་མཁའ་དང་ནི་འབྱུང་བ་ལྔ། །སངས་རྒྱས་སྤྱན་དང་མཱ་མ་ཀཱི། །ན་བཟའ་དཀར་དང་དམ་ཚིག་སྒྲོལ། །ཀུན་ཏུ་བཟང་མོ་ལ་སོགས་པ། །རིགས་ཀྱི་གསང་མཆོད་འདི་འབུལ་གྱི། །མི་
འགྱུར་གཟུགས་ཀྱི་དངོས་གྲུབ་སྩོལ། །དེ་ནས་ཚོགས་ཀྱི་ཞལ་ཟས་རྣམས། །རང་གིས་ལོངས་ཀྱང་སྤྱད་པར་བྱའོ། །དང་པོ་ཞལ་ཟས་ལྷ་ལ་བསྟབ། །དགྱེས་མཆོག་ཉེ་བར་སྤྱོད་པ་ཡི། །རྡོ་རྗེ་བདུད་རྩིའི་ཞལ་ཟས་འདི། །པདྨ་དྲི་མ་མེད་པ་ལྟར། །རྒྱལ་བ་རྣམས་ཀྱིས་བཞེས་སུ་གསོལ། །ཞེས་པས་ལྷ་ལ་དབུལ་བར་བྱའོ། །དེ་ནས་ཟ་བྱེད་ཞལ་ཧོམ་གྱི། །མཆོད་པ་དག་ཀྱང་བྱ་བ་ནི། །རྣལ་འབྱོར་ནང་པའི་ཞལ་ཧོམ་ནི། །ཁོད་པ་རིན་ཆེན་གཞལ་ཡས་ཁང་། །དེ་ནང་དཀྱིལ་འཁོར་ལྷ་བཀོད་ལ། །ཞལ་ཡང་ཧོམ་ཁུང་བསྲེག་ཁང་དུ། །ཡེ་ཤེས་ཆེ་བའི་མེ་སྦར་ཏེ། །ལྕེ་ནི་ལས་སུ་བྱ་བ་ཡི། །ལྷ་རྣམས་སོ་སོའི་བཞུགས་གནས་ལ། །ཁོད་པ་རིན་ཆེན་གཞལ་ཡས་ཁང་། །དབུས་ཀྱི་གཙོ་བོ་ནས་བརྩམས་ཏེ། །ལྷ་ཡི་དཀྱིལ་འཁོར་རིམ་བཞིན་དུ། །བསྲེག་ཁང་བཞུགས་གནས་སྤྱན་དྲངས་ཏེ། །ལག་པ་རྡོ་རྗེའི་ཧོམ་གཟར་དང་། །འདོད་པའི་ལྷ་མོའི་བསྲེག་རྫས་སུ། །བདུད་རྩིའི་ཧོམ་དུ་བསྡིམ་པའི་ཚེ། །སོ་ནི་ཡེ་ཤེས་མེས་བཅོམ་ནས། །དཀན་དང་ལྗགས་ཀྱི་དབང་པོར་རོ། །སྤྱན་དྲངས་རང་བཞིན་གང་ཡིན་བསྡིམ། །མགྲིན་པ་བླ་མེད་ལམ་དྲངས་ཏེ། །ཁོད་པ་རིན་ཆེན་གཞལ་ཡས་ཁང་། །དེ་ཡི་ནང་དུ་ལྷ་རྣམས་མཆོད། །བ་སྤུའི་ཕྱོགས་སུ་གཟི་བརྗིད་ནི། །མེ་འབར་ཕྲིན་ལས་རྣམ་པ་བཞིས། །འགྲོ་བའི་དོན་ཡང་བརྩམ་པར་བྱའོ། །དཀྱིལ་འཁོར་ལྷ་ནི་རེ་རེ་ལ། །གིང་གིས་བསྲེག་རྫས་གསུམ་གསུམ་བསྟབ། །བསྟབ་པའི་ཚིག་དང་སྔགས་རྣམས་ནི། །ལྷ་ཡི་རིམ་པ་དག་དང་སྦྱར། །སྐུ་གསུང་ཐུགས་ཀྱི་རྒྱུད་མཉེས་བྱ། །དེ་ཡང་ངས་ནི་ཁྱེད་རྣམས་ལ། །རབ་ཏུ་གསལ་བ་ཡང་བཤད་ན། །འབར་བའི་བསྲེག་ཁང་ཞལ་ཧོམ་དུ། །ཡེ་ཤེས་མཆེ་བའི་མེ་འབར་ཏེ། །འོག་མིན་ལྷ་ཡི་གཞལ་ཡས་ནས། །དཀྱིལ་འཁོར་ལྷ་རྣམས་སྤྱན་དྲངས་ཏེ། །ལྕེ་དབུས་པདྨའི་གདན་ལ་བཞུགས། །ལག་པ་ཧོམ་གཟར་བསྲེག་རྫས་སྟོབ། །དབྱིབས་དང་ཁ་དོག་མཚན་ལྡན་པའི། །ཞལ་དུ་གྱུར་པའི་མེ་བོས་ལ། །
བཟའ་བཏུང་བྲོ་བའི་ཚོགས་རྣམས་ཀྱི། །ལས་བཞིའི་མཆོད་པ་རབ་ཏུ་སྦྱིན། །དཀྱིལ་འཁོར་ལྷ་རིམ་ཞལ་ཧོམ་མཆོད། །དབྱིབས་ཀྱི་བཞུགས་ཚུལ་རིགས་ཀྱི་མདོག །མཚན་གྱི་ཁྱད་པར་ལྷ་རྣམས་ཀྱི། །སོ་སོའི་རིམ་བཞིན་བདག་བསྒོམས་ཏེ། །མཆོད་པ་ཤེས་རབ་ཅན་གྱིས་བྱ། །ཞལ་ཟས་ཁམ་ནི་རན་པར་གཏུབ། །ཕྱག་རྒྱ་ལག་པ་རྡོ་རྗེའི་གར། །ཧོམ་གཟར་བསྐོར་ཏེ་ཞལ་བསྟབ་ཚེ། །ལྷ་རྣམས་མཚན་ནས་བརྗོད་ཅིང་བསྐུལ། །འབྲིམ་མཁན་གཡས་བྲིམས་ལྷ་ཚོགས་མཆོད། །བདག་མཆོད་ཀུན་མཉེས་ཐམས་ཅད་འགྲངས། །ཀུན་ལ་ཕན་པའི་སྨན་ཡིན་ཏེ། །རྣལ་འབྱོར་བདག་ཉིད་ཆེན་པོ་ཡི། །ཐམས་ཅད་བཟའ་ཞིང་བརྒྱན་པར་བྱ། །དེ་ཡང་ཇི་ལྟར་བྱ་ཞེ་ན། །ཕྱི་རབས་ཀྱིས་ནི་དོན་བཞིར་ཤེས། །མཆོད་པའི་གནས་དང་ཡོན་ཏན་དང་། །ཅི་ཕྱིར་མཆོད་དང་མཆོད་པའི་རྫས། །མཆོད་པར་བྱ་བའི་རྫས་དག་ནི། །རང་ལ་རྒྱན་ཅིང་གཟབས་པ་སྟེ། །རྒྱན་ལྔ་དག་ཏུ་ཤེས་པར་བྱ། །ནང་རྒྱན་ཕྱི་ཡི་ཆས་རྒྱན་དང་། །མཛེས་པ་ལུས་ལ་བཀོད་པ་ལྷ། །བྱིན་རླབས་སྤྲུལ་པའི་རྒྱན་ལྔའོ། །བཟའ་བ་རྔམ་པ་ལྔ་པོ་ལ། །ཡེ་ཤེས་དབྱིངས་ལ་བཟའ་བ་དང་། །དབྱིངས་ནི་ཡེ་ཤེས་ལ་བཟའ་དང་། །དབྱིངས་དང་ཡེ་ཤེས་བག་ཆགས་བཟའ། །ཐུགས་རྗེས་འཁོར་བའི་སེམས་ཅན་བཟའ། །རྔམ་ཞལ་དུས་གསུམ་བག་ཆགས་བཟའ། །རྔམ་པའི་ཞལ་དུ་ཟ་བ་ནི། །ཕུན་ཚོགས་བཞི་དང་དཀྱིལ་འཁོར་ལྔ། །ཕུན་སུམ་ཚོགས་པ་རྣམ་བཞི་ནི། །ཧོམ་ཁུང་ཕུན་ཚོགས་རྣམ་དག་ཞལ། །ཡེ་ཤེས་ཕུན་ཚོགས་ཚེམས་འབར་མེ། །མཆོད་པ་ཕུན་ཚོགས་ཧོམ་གཟར་ལ། །བདག་ཉིད་ཕུན་ཚོགས་གཙོ་བོ་ཆེ། །དཀྱིལ་འཁོར་རྣམ་པ་ལྔ་ཡོད་དེ། །གསལ་བཀྲ་ཟ་བྱེད་ཐིམ་པ་གསུམ། །ལས་དང་དོན་གྲུབ་དཀྱིལ་འཁོར་ལྔའོ། །ལོངས་སྤྱོད་མཛད་པའི་དུས་སུ་ཡང་། །བྱི་འཁུར་མི་བཅའ་སྐོས་ལ་ཕེབས། །ཞི་བའི་སྨོན་ལམ་ལ་སོགས་ཏེ། །རིགས་ལྔ་ཧེ་རུ་ཀ་ཡི་མཚན། །བརྗོད་ནས་མཆོད་པའི་དུས་སུ་ཡང་། །དུར་ཁྲོད་མཆོག་གི་རྒྱན་དུ་ཆེ། །འདོད་ཆགས་ཁྲག་གི་རྒྱ་མཚོ་ལ། །
ཞེ་སྡང་རུས་པའི་ཕུང་པོ་སྟེ། །གཏི་མུག་ཤ་ཡི་དཀྱིལ་འཁོར་འདིར། །བདག་དང་མཐའ་ཡས་སེམས་ཅན་རྣམས། །དུག་གསུམ་བག་ཆགས་བྱང་བྱས་ནས། །སྲིད་གསུམ་སེམས་ཅན་ཐམས་ཅད་སྒྲོལ། །ས་གསུམ་འབྲས་བུ་འཐོབ་པ་དང་། །སྐུ་གསུང་ཐུགས་ཀྱི་རྒྱུད་མཉེས་པས། །སྐུ་གསུང་ཐུགས་ཀྱི་དམ་ཚིག་སྐོང་། །བདག་དང་མཐའ་ཡས་སེམས་ཅན་རྣམས། །སྐུ་གསུང་དངོས་གྲུབ་ཐོབ་གྱུར་ཅིག །འདི་ཡི་དུས་ན་ཏི་རའི་གནས་འཕྲོག་མ། །ཞིང་བཅུ་སྒྲོལ་དང་མ་སྒྲོལ་ཉུལ་བ་ནི། །སྔགས་པས་བསྒྲིམས་ནས་བྱས་པ་ན། །ངས་ནི་ཁྱེད་ལ་གསལ་བར་བཤད། །ཀརྨ་མཱ་ལེའི་རྒྱུད་ལས། རྣོན་པོའི་དཀྱིལ་འཁོར་བསྐྱེད་པའི་ལེའུ་སྟེ་དྲུག་པའོ།། །།དེ་ནས་བཅོམ་ལྡན་འདས་ཞེ་སྡང་རྡོ་རྗེས། འབར་བའི་དཀྱིལ་འཁོར་ཆེན་པོ་འདི། རྣལ་འབྱོར་གྱི་དབང་ཕྱུག་ཆེན་པོ་རྣམས་ལ་གསུངས་སོ། །འབར་བའི་དཀྱིལ་འཁོར་ཞི་དང་ཁྲོ། །དང་པོ་སྤྱན་དྲང་མཆོད་པ་འབུལ། །གསོག་འཇོག་མེད་པར་ལྷག་མ་བཞག །ཧོ་གསང་བའི་དོན་ལ་གཏོགས་པ་ཡི། །མཁའ་འགྲོ་སུམ་ཅུ་རྩ་གཉིས་རྣམས། །སྔོན་གྱི་ཐུགས་དམ་མ་འདའ་བར། །སྒྲུབ་པའི་སྟོང་གྲོགས་འདིར་གཤེགས་ཤིག །ཛཿཧཱུཾ་བཾ་ཧོཿ། ཌཱ་ཀི་ནི་ཧཱུཾ་ཛཿཨེ་ཨཱ་ར་ལི་ཧྲིཾ་ཧྲིཾ།ཧཱུཾ་རྣམ་དག་ཆོས་ཉིད་ཞི་བ་ལས། །ཐོགས་མེད་ཐུགས་རྗེའི་སྤྲུལ་པ་འབྱུང་། །རང་རང་ལས་ཀྱི་སྐལ་གྱུར་པས། །སྤྲུལ་པ་བསམ་ཡས་མཁའ་ལ་འགྲོ། །འཇའ་ཚོན་མདོག་འཛིན་རིགས་ལས་སྤྲུལ། །མི་རོ་སྐམ་པོའི་གདན་སྟེངས་ན། །ཐུགས་རྗེའི་སྤྲུལ་པ་ཡང་དག་ཞོན། །མཐིང་ག་མི་བསྐྱོད་དཔའ་བོའི་གཟུགས། །སུམ་ཅུ་རྩ་གཉིས་ཀུན་འཇིག་ཅིང་། །མི་ཐོད་ཁྲག་གིས་བཀང་བ་དང་། །ཁ་ཊྭཱཾ་ཏྲི་ཤུལ་གཤོལ་གྲི་བསྣམས། །རང་རང་ལག་ཆ་སྣ་ཚོགས་ལྡན། །དཔའ་བོའི་གཟུགས་ཅན་ཁྲོ་མིག་བགྲད། །ཉི་ཟླའི་ཚུལ་དུ་མཁའ་ལ་འགྲོ། །ཟས་སུ་ཤ་དང་ཁྲག་དང་ནི། །རྐང་དང་ཚིལ་བུ་རྒྱུ་མ་ཟ། །ཡང་དག་དེ་ཉིད་འཇིག་རྟེན་ཉིད། །སྤྲུལ་པའི་
ཚུལ་གྱི་གཟུགས་ཀྱིས་འདུལ། །གཙོ་བོ་དགའ་བར་བྱེད་པ་དང་། །ནང་ཁྲོལ་འདྲེན་པར་བྱེད་པ་དང་། །ཁྱོ་ལ་ཆགས་པར་བྱེད་པ་དང་། །རྣལ་འབྱོར་སྤྲོ་བར་བྱེད་པ་དང་། །སྐྱེ་འགྲོ་གསོད་པར་བྱེད་པ་དང་། །འཇིག་རྟེན་འབར་བར་བྱེད་པ་དང་། །གཟུགས་རྣམས་བརྗིད་པར་བྱེད་པ་དང་། །གླིང་རྣམས་འཁོར་ལོ་ལྟར་བསྐོར་མ། །མཁའ་འགྲོ་མ་མོ་ཁྱོད་རྣམས་ཡིན། །སྔོན་ཚེ་བཅོམ་ལྡན་མི་བསྐྱོད་པའི། །ཡེ་ཤེས་དབྱིངས་ལ་ཆགས་ཚུལ་དུ། །དགའ་མ་གསོད་དགའ་འཛིན་དགའ་མ། །འདྲེན་དགའ་མིག་དམར་ཐོད་པ་འཛིན། །མྱོས་མ་ར་བྱིལ་གདོང་དམར་གྱིས། །མདུན་རྒྱབ་ཟུར་གཉིས་དབུས་གསུམ་པོའི། །མདུན་ལ་གཙོ་མོ་བདུན་གྱི་མཁྲིལ། །མི་བསྐྱོད་སྤྱན་སྔར་ཁས་བླངས་པ། །སླས་སུ་བདག་ཅག་འདུན་བགྱིད་པས། །མནའ་བོར་དམ་བཅས་ཁས་བླངས་ཏེ། །འཇིག་རྟེན་མ་འདས་བར་དུ་ནི། །འཇིག་རྟེན་བསྟན་པ་བསྲུང་བར་བྱས། །ཁས་བླངས་འགལ་བར་མི་བྱའི་ཕྱིར། །མཆོད་སྦྱིན་བཟང་པོ་འདི་བཞེས་ལ། །རྣལ་འབྱོར་བཅོལ་བའི་ལས་གྱིས་ཤིག །སྔོན་ཚེ་བཅོམ་ལྡན་རྟག་པ་ལ། །ཆགས་ཆེན་མ་དང་ཆགས་མཆོག་མ། །ཆགས་བྲལ་མ་དང་རྒྱས་འདེབས་མ། །འཁོར་ལོར་འཁོར་བ་ལྔ་ཡི་འཁྲིལ། །རྟག་པའི་སླས་སུ་བྱས་ནས་ནི། །འཇིག་རྟེན་མ་འདས་བར་དུ་ནི། །བསྟན་པ་བསྲུང་བ་མནའ་བོར་བ། །ཁས་བླངས་འགལ་བར་མི་བྱ་ཕྱིར། །མཆོད་སྦྱིན་བཟང་པོ་འདི་བཞེས་ལ། །རྣལ་འབྱོར་བཅོལ་བའི་ལས་གྱིས་ཤིག །བཅོམ་ལྡན་རིན་ཆེན་འབྱུང་ལྡན་ལ། །བདུད་རྩི་ཆང་མ་བསིལ་མ་དང་། །བེ་ཅོན་འཛིན་མ་རྒྱུ་འཐུང་མ། །རྒྱུ་འཛིན་ཁ་འཛིན་ལྔ་ཡིས་ནི། །མདུན་རྒྱབ་ཟུར་གཉིས་དབུས་ལ་འཁྲིལ། །འབྱུང་ལྡན་སླས་སུ་བྱས་ནས་ནི། །འཇིག་རྟེན་མ་འདས་བར་དུ་ནི། །འཇིག་རྟེན་བསྟན་པ་བསྲུང་བར་བྱ། །ཁས་བླངས་འགལ་བར་མི་བྱའི་ཕྱིར། །མཆོད་སྦྱིན་བཟང་པོ་འདི་བཞེས་ལ། །རྣལ་འབྱོར་བཅོལ་བའི་ལས་གྱིས་ཤིག །བཅོམ་ལྡན་སྣང་བ་མཐའ་ཡས་ལ། །སྟོབས་བཟང་སེར་སྨུག་ཁ་ཡལ་
མ། །འདོད་པ་མོ་དང་ནོར་བུ་བཟང་། །བ་དན་མ་ནི་བུམ་ལྟོ་མ། །ལྔ་ཡིས་མདུན་ཟུར་དབུས་ལ་འཁྲིལ། །འཇིགས་དབང་སླས་སུ་བྱས་ནས་ནི། །བསྟན་པ་བསྲུང་བར་མནའ་བོར་བས། །ད་རུང་འཇིག་རྟེན་མ་འདས་པས། །མཆོད་སྦྱིན་བཟང་པོ་འདི་བཞེས་ལ། །རྣལ་འབྱོར་བཅོལ་བའི་ལས་གྱིས་ཤིག །བཅོམ་ལྡན་དོན་ཡོད་གྲུབ་པ་ལ། །གསོད་བརྩོན་གསལ་བའི་འོད་འཆང་མ། །སོ་ཞག་ཁྲག་འཇིབ་བུས་བཟང་མ། །དབྱུག་སྣ་སྦྲུལ་ལུས་གསེར་མིག་མ། །མདུན་ཟུར་བཞི་དང་དབུས་གསུམ་ལ། །དྲུག་འཁྲིལ་དོན་གྲུབ་སླས་སུ་བྱས། །བསྟན་པ་བསྲུང་བར་མནའ་བོར་བས། །ད་རུང་འཇིག་རྟེན་མ་འདས་པས། །མཆོད་སྦྱིན་བཟང་པོ་འདི་བཞེས་ལ། །རྣལ་འབྱོར་བཅོལ་བའི་ལས་གྱིས་ཤིག །ཤར་ཉིད་དུ་ནི་བུམ་སྣ་སྟེ། །ནུབ་ཏུ་དྷ་ཤ་གྲཱི་བའོ། །ལྷོ་རུ་རྣམ་པར་འཇོམས་མ་སྟེ། །བྱང་ཉིད་དུ་ནི་འབོད་གྲོགས་སོ། །མཁའ་ལ་འགྲོ་བའི་སྒོ་མ་བཞི། །བཅོམ་ལྡན་རྡོ་རྗེ་མི་བསྐྱོད་པའི། །ཞབས་བཞིའི་འོག་ན་ཤི་བཞིན་གནས། །ཉི་ཟླ་པདྨའི་གདན་དུ་འབར། །མཁའ་འགྲོ་སུམ་ཅུ་རྩ་གཉིས་པོ། །ད་རུང་འཇིག་རྟེན་མ་འདས་ཀྱི། །སླས་དང་གདན་དུ་བྱས་རྣམས་ཀྱིས། །མནའ་བོར་ཚུལ་བཞིན་ལས་བྱའི་ཕྱིར། །མཆོད་སྦྱིན་བཟང་པོ་འདི་བཞེས་ལ། །བཅོལ་བའི་ལས་རྣམས་གྲུབ་པར་མཛོད། ། སྔགས་སོར་བཞག །ཨཱ་གཙྪ་ཡིན་ནམ་ཨོཾ་བཛྲ་ཌཱ་ཀི་ནི་ཨ་གད་ཏ་ཡ་ཨ་གད་ད་ཏ་ཡ་བནྡྷ་ཡ། ཏོ་ཤ་ཡ་ཏོ་ཤ་ཡ། མོ་ཧ་ཡ་མོ་ཧ་ཡ། སརྦ་ཌཱ་ཀི་ནི། བུཌྜྷ་ཌཱ་ཀི་ནི་ཁཱ་ཧི། བཛྲ་ཌཱ་ཀི་ནི་ཁཱ་ཧི། རཏྣ་ཌཱ་ཀི་ནི་ཁཱ་ཧི། པདྨ་ཌཱ་ཀི་ནི་ཁཱ་ཧི། ཀརྨ་ཌཱ་ཀི་ནི་ཁཱ་ཧི། འབར་བའི་དཀྱིལ་འཁོར་གསུམ་བསྒོམ་པ། །གསལ་བར་བཅུ་དྲུག་རབ་བཤད་བྱ། །མཁའ་འགྲོའི་དཀྱིལ་འཁོར་བསྐྱེད་པ་དང་། །སྤྱན་དྲང་བ་དང་ལས་ལ་གཞུག །ཟིལ་གྱིས་མནན་དང་ཕྱག་རྒྱ་དང་། །དབང་དུ་བསྡུ་བར་བྱ་བ་དང་། །དགོས་པའི་དོན་རྣམས་བསྒྲུབ་ཏུ་གཞུག །དམ་ཚིག་མནའ་བསྒག་བྱ་བ་དང་། །བདག་གཞན་བསྲུང་དུ་གཞུག་པ་དང་། །བདག་དང་མི་མཐུན་ཁྲོ་གཞུག་དང་། །དངོས་གྲུབ་མཆོག་འདོད་འཁོར་དུ་གཞུག །ཧེ་རུ་ཀ་ཡི་ལས་ལ་
གཞུག །ཁ་ཆུས་གདབ་དང་རིགས་ལྔར་བསྟབ། །རྡོ་རྗེའི་མོ་གདབ་དམ་ཡང་བསྲེ། །གཞུག་ཏུ་མནན་པའི་ཆོ་ག་བྱ། །ཀརྨ་མཱ་ལེའི་རྒྱུད་ཆེན་འདིར། །འདི་དག་རབ་ཏུ་གསལ་བར་བཤད། །མཁའ་འགྲོ་མ་ཡི་དཀྱིལ་འཁོར་ན། །སྲིན་མོའི་ཟ་ལམ་གོམ་པ་ནི། །བདུན་ཅུའི་ཕྱི་རོལ་དག་ཏུ་ནི། །རྡོ་རྗེ་དྲི་ཆུའི་དཀྱིལ་འཁོར་བྲི། །དབང་ཕྱུག་མ་ཡི་དཀྱིལ་འཁོར་བསྒོམ། །མཁའ་འགྲོའི་དཀྱིལ་འཁོར་བསྐྱེད་པ་ནི། །མཁའ་འགྲོའི་རྒྱལ་པོ་ཆེན་པོ་ནི། །པདྨ་ཧེ་རུ་ཀ་རུ་བསྐྱེད། །རྡོར་རིགས་དམ་པ་ཉི་ཤུ་དང་། །དབང་མོ་ཉི་ཤུ་ལ་སོགས་པ། །མཁའ་འགྲོ་ཁྱོ་ཤུག་ཚུལ་དུ་བསྐྱེད། །དེ་ནས་སྤྱན་དྲང་འདི་སྐད་གསུངས། །ཧེ་རུ་ཀ་ཡི་གནས་བཅུ་དང་། །དུར་ཁྲོད་ཆེན་པོའི་གནས་བརྒྱད་ནས། །དཔལ་ཆེན་ཁྲག་འཐུང་འཁོར་དང་བཅས། །དུར་ཁྲོད་ཆེན་པོའི་གནས་འདི་རུ། །དམར་གྱི་ཨརྒྷ་རྒྱ་མཚོར་འཁྱིལ། །ཞིང་ཆེན་གསང་རྙིང་ཏི་རར་བཅས། །ཐོད་རུས་འབར་བའི་དཀྱིལ་འཁོར་འདིར། །མཁའ་འགྲོ་འབར་བའི་ཚོགས་བཅས་ཀྱིས། །མ་ལུས་གཤེགས་ཤིང་བསྣམ་དུ་གསོལ། །ཛཿཧཱུཾ་བཾ་ཧོཿ། ཤྲཱི་ཧེ་རུ་ཀ ། སྔགས་སོར་བཞག ། ཨ་གད་ཏ་ཡ་ཨ་གད་ཏ་ཡ། པྲ་བེ་ཤ་ཡ་པྲ་བེ་ཤ་ཡ། བནྡྷ་ཡ་བནྡྷ་ཡ། ཏོ་ཤ་ཡ་ཏོ་ཤ་ཡ། མོ་ཧ་ཡ་མོ་ཧ་ཡ། བཛྲ་ཌཱ་ཀི་ནཱི་ནཱཾ་ཤྲཱི་ཧེ་རུ་ཀ་ཧཱུཾ་ཕཊ། ན་མོ་རཏྣ་ཏྲ་ཡཱ་ཡ། ན་མཿཙཎྜ་བཛྲ་པཱ་ཎ་ཡེ། མ་ཧཱ་ཡཀྵ་སེན་པ་ཏ་ཡེ། ཨེ་ཧྱེ་ཧི། ས་མ་ཡ་ས་མ་ཡ། ཨཱ་ན་ཡ་ཨཱ་ན་ཡ། ཀོ་ཏ་ཀྵ་ཀོ་ཏ་ཀྵ། མ་མ་བྷྱོ་བྷྱོ། རུ་ལུ་རུ་ལུ་ཨཱ་ར་ལི་ཧོ། ཧྲིཾ་ཧྲིཾ་ཧྲིཾ། བརྗོད་པས་དབང་ཕྱུག་མ་དང་ནི། །རྡོ་རྗེ་རིགས་དམ་ལ་སོགས་པ། །ཁྱོ་ཤུག་རེ་རེ་དག་ལ་ཡང་། །འཁོར་ནི་ས་ཡ་ཕྲག་བཅོ་བརྒྱད། །བཅོ་བརྒྱད་སྤྲིན་ཕུང་བཞིན་དུ་ཡང་། །མདུན་གྱི་ནམ་མཁར་ལྷགས་པ་ལས། །སོ་སོའི་རང་སྔགས་བརྗོད་པ་ཡིས། །དམ་ཚིག་ལ་ནི་ཐིམ་པར་བསམ། །མ་ནུ་རཀྵ་སཱི་བྷྱོ། བྲཧྨ་ཎཱི་བྷྱོ། རཽ་ཏྲི་བྷྱོ།ཀཽ་མཱ་རཱི་བྷྱོ། བཻཥྞ་བེ་བྷྱོ། ཨིནྡྲ་ནཱི་བྷྱོ། བཛྲ་སིངྒ་ལཱི་བྷྱོ། ཨ་མྲྀ་ཏཾ་བྷྱོ། སཽ་མྱ་བྷྱོ། དཎྜ་དི་བྷྱོ། རཀྵ་སཱི་བྷྱོ། བྷཀྵ་སཱི་བྷྱོ། ར་ཏི་བཛྲ་བྷྱོ། རུ་དྷི་ར་མཏྟ་བྷྱོ། ཨེ་ཀ་ཙ་ཏི་ཎཱི་བྷྱོ།
མ་ནོ་ཧ་རཾ་བྷྱོ། སིདྡྷི་ཀ་བྷྱོ། ཝ་ཡ་བཱི་བྷྱོ། མ་ཧཱ་མ་ར་ཎ་བྷྱོ། ཨ་བྷྱོ། ཝ་ར་ཧཱི་བྷྱོ། ཙ་མུཎྜཱི་བྷྱོ། སུ་ཏ་ནཾ་བྷྱོ། ཝ་རུ་ཎཱི་བྷྱོ། བཛྲ་མ་ཧཱ་ཀཱ་ལཱི་བྷྱོ། ཙ་ཀཱ་ལཱི་བྷྱོ། ཀུམྦྷ་ཀཪྞ་བྷྱོ། ལམྦོ་ད་ར་བྷྱོ། དེ་ནས་ལས་ལ་གཞུག་པ་ནི། །ཊ་ཀིའི་ཕྱག་རྒྱས་བཅིངས་ནས་ནི། །ལས་ཀྱི་ཕྱག་རྒྱ་འདི་བསྟན་པས། །རྟག་ཏུ་ལས་ཀུན་བྱེད་པ་སྟེ། །མ་དང་སྲིང་མོ་རྣམས་དང་ནི། །ཆུང་མ་བུ་མོ་འདྲ་བར་བྱོས། །ཨོཾ་བཛྲ་ཌཱ་ཀི་ནཱི། ཨཱ་ཀརྵཱ་ཡ། ཨཱ་ཀརྵཱ་ཡ། པྲ་བེ་ཤ་ཡ་པྲ་བེ་ཤ་ཡ། བནྡྷ་ཡ་བནྡྷ་ཡ། ཏོ་ཤ་ཡ་ཏོ་ཤ་ཡ། མོ་ཧ་ཡ་མོ་ཧ་ཡ། སརྦ་བཛྲ་ཌཱ་ཀི་ནཱི་ནཱཾ། ཛཿཧཱུཾ་བཾ་ཧོཿ། ཌཱ་ཀི་ནཱི་ཧཱུཾ་ཛཿ། ཉེར་གནས་ཞི་ཚུལ་ལས་ལ་གཞུག །གཞན་ཡང་ལས་ཀྱི་ཕྱག་རྒྱ་དང་། །དམ་ཚིག་ཕྱག་རྒྱ་ལས་ལ་གཞུག །དབང་ཕྱུག་མ་ཡི་གཙོ་མོ་བརྒྱད། །དེ་ཡི་དམ་ཚིག་ལས་རྒྱ་ནི། །ཐུན་མོང་དག་ཏུ་གར་མཆོད་བྱ། །ལག་གཡོན་རྩེ་གསུམ་ཕྱག་རྒྱ་བཅས། །གཡས་ཀྱི་གཡོག་མོས་རྩེ་མནན་པ། །དེ་ནི་ཨུ་མའི་ཕྱག་རྒྱའོ། །ལག་པ་གཡོན་པ་ཕྱག་རྒྱ་ཨོཾ། །སྨད་འདོན་ལྟར་བྱེད་ཚངས་མའོ། །རྡོ་རྗེ་མནན་ནས་མདུད་པའི་རྒྱ། །མངའ་བདག་གཡོག་མོ་རྩེ་སྤྲད་དེ། །ལྷག་མ་མདའ་སྒྲོ་ལྟ་བུའམ། །ཡང་ན་ཏྲི་ལ་ཉིད་དུ་བཅའ། །འདི་གསུམ་གང་རུང་དགའ་བར་བྱེད། །ལག་པ་གཡས་ཀྱི་མངའ་བདག་དང་། །གཡོག་གཉིས་གཡོན་གྱི་ཆང་བར་བཅངས། །སིལ་གསིལ་ལྟར་བྱས་གཞོན་ནུ་མ། །ཡང་ན་མདུང་གི་ཕྱག་རྒྱའོ། །གཡོན་གྱི་མངའ་བདག་ལ་སོགས་པ། །བརྐྱང་ནས་རྩེ་བཅུམ་འཁོར་ལོ་མ། །ལག་པ་གཡས་གཡོན་བཀའ་ཉན་གཉིས། །ཁར་བཅུག་མངའ་བདག་གྱེན་བསྒྲེང་ཕག །ཁུ་ཚུར་དེ་ཉིད་མ་བཤིགས་པར། །ཐུར་དུ་མནན་པ་གཤིན་རྗེ་མ། །ལག་པ་གཡས་གཡོན་མངའ་བདག་དང་། །གཡོག་དང་འབྲིང་མོ་གསུམ་བཅངས་ཏེ། །སེང་གེའི་རྣ་བ་བརྒྱ་བྱིན་མ། །ཕྱག་རྒྱ་དེ་རྣམས་བྱེད་བཞིན་དུ། །གསང་སྔགས་འདི་དང་སྦྱར་ཏེ་བཟླས། །སྔགས་སོར་བཞག །ཛ་ཡ་དུ་ཨུ་མ་བ་ཧི་ཀང་ཀ་དྷ་རཱི། ཛཱ་ཡ་དུ་བྲཧྨ་ཎཱི་ཀ་མ་ལ་དྷ་རཱི། ཛཱ་ཡ་དུ་མ་ཧེ་ཤྭ་རི་
ཤཱུལ་དྷ་རཱི། ཛ་ཡ་དུ་ཀཽ་མཱ་རཱི་ཤཀྟི་དྷ་རཱི། ཛ་ཡ་དུ་ནར་ཡ་ནི་ཙཀྲ་དྷ་རཱི། ཛ་ཡ་དུ་བ་ར་ཧི་དཎྜ་དྷ་རཱི། ཛ་ཡ་དུ་ཨིནྡྲ་ཡ་ནི།བཛྲ་དྷ་རཱི། ཛ་ཡ་དུ་ཙ་མུཎྜཱ་ཙིཏྟ་དྷ་རཱི། དགོས་དོན་ཕྲ་མོ་ཡན་ཆད་རྣམས། །བསྒྲུབ་ཏུ་གཞུག་པར་བྱ་བ་ནི། །གཡས་གཡོན་གཉིས་གཡོག་ལྕགས་ཀྱུར་བཅིང་། །དཀྱུ་ཞིང་དཀྱུས་ལ་འདི་སྐད་གསུངས། །དགོངས་དོན་སེམས་ཅན་གང་ཡིན་པ། །དེ་ཡི་མདུན་དུ་ཁྱོད་རྣམས་ཀུན། །དགོངས་པ་བསྒྲུབ་ཕྱིར་འདུག་པར་བྱོས། །ཁྱོད་ཀྱི་སྲོག་ནི་མ་རུངས་པར། །དམ་ཚིག་འདིས་ནི་འགྱུར་ཏ་རེ། །ཨོཾ་བ་ལིན་ཏོད་བ་ལིཾ་ཏ་ཨཱ་ཀཪྵ་ཡ་ཧཱུཾ་ཕཊ། དེ་ནས་དངོས་གྲུབ་མཆོག་འདོད་ཕྱིར། །དྲུང་དུ་འཁོར་དུ་གཞུག་པ་ནི། །གཡོན་པའི་གཡོག་གཡས་བཀའ་ཉན་གྱིས། །སྒྲ་འབྱིན་ཏོག་ཅིང་འདི་སྐད་གསུངས། །ཁྲོ་བོར་མཉམ་གཞག་གང་ཡིན་པ། །དམ་ཚིག་འདི་ཡང་བྱ་ར་བྱས། །ཁྱོད་ཀྱིས་དེ་ཡི་མདུན་དུ་ནི། །དངོས་གྲུབ་ཀུན་གྱི་མཆོག་ཕྱིར་འཁོད། །ཨོཾ་བཛྲ་པ་ཏ་ལ་བྷཉྫ་བྷཉྫ་ཧཱུཾ་ཧཱུཾ་ཕཊ། དེ་ནས་ཟིལ་གྱིས་མནན་པ་ནི། །སྙིང་གར་ཐལ་མོ་བསྣོལ་བྱས་ལ། །སྐུ་གསུང་ཐུགས་དང་མཉམ་སྦྱོར་བའི། །ཕོ་བྲང་དཀྱིལ་འཁོར་ངང་ལས་སྤྲུལ། །ང་ནི་བདུད་ཀྱི་བདུད་བདག་སྟེ། །མཁའ་འགྲོའི་ཚོགས་དང་བཅས་པའོ། །ཛཿཧཱུཾ་བཾ་ཧོཿ། ཤྲཱི་ཧེ་རུ་ཀ་སརྦ་དུཥྚན་ས་མ་ཡད། མ་རང་པྲ་པཉྩ་ཀ །བྷཀྵ་ཡ་བྷཀྵ་ཡ། བི་དྷྭན་ས་ཡ་བི་དྷྭན་ས་ཡ། ཧེ་བྷ་ག་ཝཱན། བུཌྜྷ་ཀྵེ་ཏྲ་སྟམྦྷ་ཡ་ཀ་ཧཱུཾ་ཕཊ། ཞེས་པས་དེ་རྣམས་ཟིལ་གྱིས་མནན་ནོ། །དེ་ནས་ཕྱག་དག་བྱ་བ་ནི། །བདག་མེད་ཕྱོགས་བྲལ་དོན་དམ་ཐུགས་ཆུད་ཅིང་། །བྱམས་དང་སྙིང་རྗེས་དགྲ་ཟུན་མི་མངའ་ཡང་། །གདུག་པ་འདུལ་ཕྱིར་དུས་ལ་མི་འདའ་བའི། །འཇིགས་བྱེད་ཧེ་རུ་ཀ་ལ་ཕྱག་འཚལ་ལོ། །ནམ་མཁའི་ལུས་ཅན་གར་ཡང་ཐོགས་མེད་ཅིང་། །འདོད་དགུར་སྒྱུར་བའི་གཟུགས་ཅན་འཕྲུལ་མོ་ཆེ། །མ་སྲིང་བྱམས་མའི་ཚུལ་གྱིས་གྲོགས་མཛད་མ། །ཕྱི་ནང་མཁའ་འགྲོའི་ཚོགས་ལ་ཕྱག་འཚལ་ལོ། །ཨོཾ་ཀ་ར་མུ་ཀ་ཤ་ར་ཡ་ཡ་ན་མཿ། ཨོཾ་རཱ་ག་ས་མ་ཡ་ཡ་ན་མཿ། ཨོཾ་ཁ་ཊྭ་ག་པྲ་ལ་ཡ་ཡ་ན་མཿ། ཨོཾ་གནྡྷ་ཛྭ་ལ་ཡ་ཡ་ན་མཿ། ཨ་ཏི་པུ་ཧོ། པྲ་ཏི་
ཛ་ཧོ། ཏ་ཐཱ་བནྡ་ནང་ཀ་རོ་མི་མ་ཧཱ་ཡོ་གཱི་གོ་རུ་པ་ཏེ་ཨ་ལ་ལ་ཧོ། བདག་གཞན་བསྲུང་དུ་གཞུག་པ་ནི། །ཁུ་ཚར་བཅངས་པའི་གཡོག་གཉིས་བསྒྲེང་། །གང་ཞིག་ལ་ལ་བསྒྲུབ་པའི་ཕྱིར། །ཁྲོ་བོའི་བལྟ་བས་བཅིངས་ནས་ནི། །སེམས་ཅན་གང་ལ་བསྲུང་བའི་ཕྱིར། །དེ་ཡི་རྒྱབ་ཏུ་འཇུག་པར་བྱ། །བཛྲ་བནྡྷ་ཧཱུཾ། བདག་དང་མི་མཐུན་དེ་དག་ལ། །དེ་ལ་ཁྲོ་རུ་གཞུག་པ་ནི། །ཧཱུཾ་གི་ཕྱག་རྒྱས་གཡོག་འཁྱུད་དེ། །སྤྱི་བོར་གཏུགས་ལ་འདི་སྐད་བསྒོ། །བདག་ཉིད་ཆེན་པོའི་དམ་ཚིག་ནི། །རིན་ཆེན་ཕྱག་རྒྱས་བཅིངས་ནས་ནི། །ཁྲོས་ནས་གང་ལ་བལྟས་པས་ནི། །དེ་ཡི་མདུན་དུ་དེ་བཞིན་འདུག །ཨོཾ་བཛྲ་མ་ལ་ཨཥྚ་བཾ། དེ་ནས་ཧེ་རུ་ཀ་ཡི་ནི། །ཕྱག་རྒྱ་དགུག་པའི་ལས་གཞུག་པ། །འདོད་པའི་ཕྱག་རྒྱ་བཅིངས་བྱས་ཏེ། །འདི་དག་བསྒོ་བར་གསུངས་པའོ། །རྡོ་རྗེ་ཕྱག་རྒྱ་བཅིངས་ནས་ནི། །གལ་ཏེ་གསོད་པར་འདོད་ན་ནི། །དགུག་པར་བྱ་བ་གང་ཡིན་པ། །དེ་ཡི་མདུན་དུ་རྟག་པར་དགུག །ཨོཾ་ཤྲཱི་ཧེ་རུ་ཀ །མ་ཧཱ་བཛྲ་སརྦ་དུཥྚན། ས་མ་ཡ་མུ་དྲ་པྲ་བྷཉྩ་ཀྲ་ཧཱུཾ་ཕཊ། དེ་ནས་དབང་དུ་བསྡུ་བ་ནི། །རྟ་གདོང་རྒྱ་བཅིངས་འདི་སྐད་གསུངས། །ང་ནི་དུས་གསུམ་བཞུགས་པ་ཡི། །སངས་རྒྱས་ཡིན་ཏེ་ཡེ་ཤེས་སྐུ། །ཡེ་ཤེས་སྤྲུལ་པའི་མཁའ་འགྲོ་མ། །ང་ཉིད་ཡིན་ཏེ་ང་ཡི་དབང་། །ཨོཾ་པདྨ་བནྡྷ་བ་མུ་ཀ །ཨཱ་ཀརྵཱ་ཡ། པྲ་བེ་ཤ་ཡ་པྲ་བེ་ཤ་ལ། བནྡྷ་ཡ་བནྡྷ་ཡ། ཏོ་ཤ་ཡ་ཏོ་ཤ་ཡ། སརྦ་བཛྲ་ཊཱཀྐི་ནི། ཧྲྀ་ད་ཡན་ཧ་ཧ་ཧི་ཧི་ཨོཾ། ཨོཾ་ཨཱཿཧཱུཾ། དེ་ནས་དམ་ཚིག་མནའ་བསྒག་པ། །མངའ་བདག་གཉིས་པོ་བཀུག་པ་ཡི། །གདོང་གིས་གཡོག་གཉིས་བཀུག་པ་ཡི། །གདེང་དུ་གཏུགས་ལ་འདི་སྐད་བརྗོད། །རྡོ་རྗེ་རིག་པ་འཛིན་པ་ཡི། །དམ་ཚིག་ཕྱག་རྒྱ་བཅིངས་པ་ལས། །གལ་ཏེ་གང་ཞིག་འདས་གྱུར་ན། །དམ་ཚིག་འདིས་ནི་ཁྱོད་གསོད་དོ། །ཨོཾ་བཛྲ་ཨ་ཀར་པྲི་ཏ་ས་མ་ཡ་ཧཱུཾ། འདི་རྣམས་སྤྱི་དགོས་རྣམ་གཉིས་སུ། །ཕྱེ་ནས་རིག་པ་དམ་པ་ལས། །སོགས་པ་གང་ཡིན་ཤེས་བྱའོ། །དེ་ནས་ཁ་ཆུ་བཏབ་ནས་ནི། །རིགས་
ལྔའི་མཁའ་འགྲོ་མ་ལ་བསྟབ། །བྱང་ཆུབ་སེམས་ཀྱི་སྤྲིན་དག་ལས། །འབྱུང་བ་ཆུ་ཡི་ཆར་བབ་པས། །མཁའ་འགྲོ་པདྨའི་དཀྱིལ་འཁོར་དུ། །བདེ་བ་ཐུགས་ཀྱི་དཀྱིལ་འཁོར་སྤྲོ། །མ་མོ་སྤྲིན་ཚོགས་མ་ལུས་ལ། །དགྱེས་མཉམ་མཆོག་གི་སྦྱིན་པས་བསྡིམ། །ཨོཾ་གུ་རུ་ཀྲོ་དྷ་ཧ་ཀ །རཏྣ་ཀྲོ་དྷ་ཀ །ས་མ་ཡ་བྲང་ཤ་ཁ་ལ་ལི་ཤག་ཤ་པུ་ཀ་པུ་ཏཀྵ་ཏྲེ་པྲ་ཏི་སྟམྦྷ་ཀ་ཡ་ཧཱུཾ་ཕཊ། དེ་ནས་གཏོར་སྣོད་བནྡྷ་ཡི། །ཕྱག་རྒྱ་བཅས་པས་ཕྱོགས་བཞི་ནས། །བཏེག་སྟེ་འདི་སྐད་བརྗོད་པར་བྱ། །སྐུ་གསུང་ཐུགས་ཀྱི་རང་བཞིན་རྒྱལ་བ་རྒྱ་མཚོ་རྣམས། །ཨེ་ཧྱེ་ཧི་ཨི་ཧྱེ་ཧི་ཚུལ་གཤེགས་ཚུར་སྤྱོན་འཁོར་དང་བཅས། །ཛཿཧཱུཾ་བཾ་ཧོཿས་སྤྱན་འདྲེན་མ་ལུས་གཤེགས་སུ་གསོལ། །ཀ་ལ་ཀི་ལ་ཧ་ཧ་དགའ་བའི་བཞད་མོས་ཁོང་། །བདེར་དྲོངས་བདེར་དྲོངས་ཨ་ཀོ་སུ་ཀ་ཤུ་པ་རི། །ཏིཥྛ་ཤི་ཤི་སློབ་མ་ཚུལ་ཅིག་སྣང་བར་མཛོད། །རོལ་ཅིག་དགོངས་ཤིག་འདོད་པ་ཏཥྚ་ཁཱ་ཧི་ཁཱ་ཧི། །བྷྱོ་སྦྱིན་ནོ་བསྐུལ་ལོ་ད་ར་ཧ་ར་ཧ་ར་ཧ། །ངོ་མཚར་མཆོག་ཏུ་བསྟབ་ཕོ་ཁ་ཁ་ལ། །བྲལ་བ་ལ་སོགས་དམར་ཆེན་སྙིང་པོ་ལྔ། །མཱཾ་ས་ལ་སོགས་རོ་མཆོག་དཔའ་བོས་གསོལ། །མ་ཙ་མེ་ཙ་རཀྟ་རུ་ཏ་རི། །ཉེ་བའི་བསྒྲུབ་པ་མ་ལུས་བསྒྲུབ་འཚལ་གྱི། །དྲི་མེད་གཟི་ལྡན་མཆོག་གི་མཆོད་པར་སྦྱར་བ་འདི། །ཡེ་ཤེས་རྒྱ་མཚོ་རྣམས་ཀྱིས་བཞེས་སུ་གསོལ། །ཨརྒྷཾ་སྦྲེང་ཞིང་དབང་ཕྱུག་མའི། །སྲོག་སྙིང་གཟུངས་སྔགས་རྣམས་བརྗོད་དོ། །དེ་ནས་རྡོ་རྗེ་དྲིལ་བུ་དང་། །ཁ་ཊྭཱཾ་ག་གསོར་འདི་སྐད་བརྗོད། །ཁ་ཊྭཱཾ་ག་ཁ་ཊྭཱཾ་ག །ཁ་ཊྭཱཾ་ག་ལ་རྒྱབ་བརྟེན་བཅས། །ནམ་མཁའི་ཕྱག་རྒྱ་རྣལ་འབྱོར་པས། །ནམ་མཁའ་ཀུན་ཏུ་འགྲོ་བ་གྲུབ། །དངོས་གྲུབ་ཐམས་ཅད་མཁས་འབྱིན་པས། །མཁའ་ལ་སྒྱུ་མ་ཀུན་བླངས་ཏེ། །ལུས་པ་མེད་པར་དེར་ཟོ་ཞིག །རྒྱས་བཏབ་རྨོངས་བྱས་བསླང་ནས་ནི། །གར་དག་བྱེད་ཅིང་རབ་ཏུ་ཟ། །གནྡྷ་ར་ཧོ། གནྡྷ་ར་ཡི་སྒྲ་ཡིས་སྒྲོལ་བར་མཛོད། །ལ་ལར་མཁས་པའི་གཟུགས་ཅན་འཛིན། །ལ་ལར་དུས་མཐའི་མེ་ལྟར་འབར། །ལ་ལར་གཤིན་རྗེ་བཞིན་དུ་རྔམས། །ལ་ལར་ཚངས་པ་བཞིན་དུ་ཞི། །
འཇིག་རྟེན་ཁམས་ནི་སྟོང་དག་ནི། །མཁའ་འགྲོ་འབར་བའི་ཚོགས་ཆེན་གྱིས། །མ་ལུས་ལུས་པ་མེད་པར་སྒྲོལ། །རབ་ཏུ་དགྱེས་པའི་བདེ་མཆོག་འབར་བའི་གཙོ། །རིན་ཆེན་ཚོགས་ཀུན་འདུས་པ་འདི་ལ་གཟིགས། །སྔོན་མེད་ཁྲོ་རོལ་འདི་ལ་རོལ་མཛོད་ཅིག །དུར་ཁྲོད་ཆེན་པོའི་དངོས་གྲུབ་སྩལ་དུ་གསོལ། །འདུལ་བའི་དབང་དུ་གྲུབ་པའི་ཆ་ལུགས་མི་བཟད་མ། །རྣལ་འབྱོར་མཁའ་འགྲོ་གཟི་བརྗིད་འབར་བ་འདི། །བདེ་བའི་སྤྱོད་པའི་གནས་ནས་བསྐྱོད་མཛད་ཅིང་། །ཐུགས་རྗེ་པདྨའི་དབྱིངས་ནས་དགྱེས་པར་མཛོད། །ཨ་ལ་ལ་ཧོ། ཇི་ལྟར་པདྨ་འདམ་ལ་ཆགས་པ་མེད་པ་བཞིན། །སྡུག་པའི་འཆིང་བས་མི་ཟིན་རྣམ་གྲོལ་ལོ། །བདག་ཅག་དམ་ཚིག་འདི་ལ་འདུས་ཤིང་ཚོགས་པ་རྣམས། །མཉེས་མཛོད་ཉིད་དུ་བདེ་བས་བཞེས་སུ་གསོལ། །དེ་ནས་ཀུན་གྱིས་ཐོབ་པར་བྱ་བ་ནི། །རིགས་ལྔའི་ཚོམ་བུ་གཏོར་མ་སོ་སོར་འབུལ། །ཨོཾ་བུད་དྷ་ཌཱ་ཀི་ནཱི་པྲ་ཏཱིཙྪ་མཱན་བ་ལིཾ་ཧཱུཾ་ཕཊ། ཨོཾ་རཏྣ་ཌཱ་ཀི་ནཱི་པྲ་ཏཱིཙྪ་མཱན་བ་ལིཾ་ཏྲཱཾ་ཕཊ། ཨོཾ་པདྨ་ཌཱ་ཀི་ནཱི་པྲ་ཏཱིཙྪ་མཱན་བ་ལིཾ་ཧྲཱྀཿཕཊ། ཨོཾ་ཀརྨ་ཌཱ་ཀི་ནཱི་པྲ་ཏཱིཙྪ་མཱན་བ་ལིཾ་ཧཱ་ཕཊ། དེ་ནས་རྡོ་རྗེའི་མོ་གདབ་ཅིང་། །དམ་ཚིག་བསྲེ་བར་བྱ་བ་ནི། །ཀཽ་རཱིའི་བནྡྷ་འཕྲུལ་ཞལ་གྱི། །ཕྱག་རྒྱས་གཏོར་མ་ལ་གཏུགས་ལ། །ཨོཾ་མ་ཧཱ་ཀྲོ་དྷཱི་ཤྭ་རི་ཧཱུཾ་ཕཊ། བརྗོད་པས་ཉི་མའི་དཀྱིལ་འཁོར་གྱི། །སྟེང་དུ་ཡི་གེ་ཧཱིཿབསྒོམས་ལ། །རིག་འཛིན་དངོས་གྲུབ་ལག་པ་ཡི། །ཕྱག་རྒྱ་དག་གིས་བླང་བྱ་ཞིང་། །ཨོཾ་ཨཱཿཧཱུཾ་ཨུཙྪིཥྚ་བཛྲ་ཨ་མྲྀ་ཏ་ཏིཥྛ་སྭ་མཾ་ཧཱུཾ་ཧྲཱྀཿཕཊ། སྔགས་དེ་བརྗོད་པས་དམ་བླང་ཞིང་། །འགྲུབ་མི་འགྲུབ་དང་རྣམ་བཞིའི་ལས། །གང་བྱ་རྡོ་རྗེའི་མོ་གདབ་པ། །རྫོགས་པ་ཆེན་པོའི་ལྟ་བས་གཟུང་། །འགྲུབ་དང་མི་འགྲུབ་སྲ་སྙི་ལ། །མདར་དང་མི་མདར་སྐྱུར་སྐྱུར་པོ། །ཚ་དང་ཁ་ལ་སོགས་པའི་རོ། །ཞི་རྒྱས་དབང་དང་མངོན་སྤྱོད་ཀྱི། །རིམ་པ་ཉིད་དུ་ཤེས་པར་བྱ། །
དབང་ཕྱུག་མ་དང་བདག་ཅག་གཉིས། །ཐུགས་དམ་གཅིག་ཏུ་བྱ་བའོ། །མཁའ་འགྲོ་མ་དང་བདག་ཅག་ཡང་། །ཐུགས་དམ་གཅིག་ཏུ་བྱ་བའོ། །དེ་ནས་མནན་པའི་ཆོ་ག་བྱ། །དྲག་པོས་མ་ལུས་འདུལ་བྱ་ཞིང་། །མནན་པའི་དུས་ལ་བབ་པ་རྣམས། །དབང་ཕྱུག་མ་ལ་ལས་བཅོལ་ཏེ། །བཀུག་ལ་ས་ཡི་འཕར་སྒོ་དབྱེ། །གཤིན་རྗེ་ཆོས་ཀྱི་རྒྱལ་པོ་ལ། །གཏད་ཅིང་ས་ཡི་འཕར་སྒོ་བཅད། །དེ་ནས་གཏོར་མ་ཕྱོགས་བཅུར་གཏོར། །གཏོར་གཞོང་རྣམས་ནི་ཁ་སྦུབ་སྟེ། །གཞོང་པ་ཡུམ་དུ་བསྒོམ་པ་ཡི། །སྟེང་དུ་སྟངས་སྟབས་འགྲེང་བྱ་ལ། །ལས་རྣམས་སྔོན་དུ་གྲུབ་པར་བྱ། །དངོས་གྲུབ་རྣམས་ནི་དབང་དུ་བྱ། །དབང་ནི་བརྟན་པར་བྱ་བའོ། །དེ་ནས་སླར་ཡང་ནང་དུ་འཇུག །སྨོན་ལམ་མཆོད་པས་ཐིམ་པ་ཡི། །དཀྱིལ་འཁོར་འདིར་ཡང་སྨོན་ལམ་ཡང་། །གདབ་ཅིང་དུག་གསུམ་མཆོད་པར་བྱ། །འདི་ཡི་དུས་ན་དུར་ཁྲོད་གནས་ཉུལ་མས། །ཕྱོགས་ནོར་མཆོད་རྫས་ཉུལ་བས་ན། །ལྷག་མའི་མཆོད་པས་ཚིམས་པར་བྱ། །གཏོར་མ་ཡོངས་ལ་ཁྱབ་པའོ། །ལེགས་པར་བྱེད་པར་གྱུར་པའི་རྣལ་འབྱོར་ལ། །ཉུལ་བྱེད་བར་ཆོད་ལས་གྲོལ་དངོས་གྲུབ་སྟེར། །ཞེས་གསུངས་སོ། །ཀརྨ་མཱ་ལེའི་རྒྱུད་ལས་འབར་བའི་དཀྱིལ་འཁོར་གྱི་ལེའུ་སྟེ་བདུན་པའོ།། །།དེ་ནས་བཅོམ་ལྡན་འདས་ཞེ་སྡང་རྡོ་རྗེས་སྤྱིའི་ལས་བསྡུས་པ་འདི་གསུངས་སོ། །སྤྱི་ཡི་ལས་བསྡུས་རྣམ་པ་བཅུར་བཤད་བྱ། །བཤགས་སྦྱོང་དངོས་གྲུབ་གསོལ་དང་སྨོན་ལམ་གདབ། །རྒྱས་པའི་གཏེར་བགོ་ལས་ནི་དངོས་གྲུབ་དང་། །དངོས་གྲུབ་དབང་བྱ་དབང་ནི་བརྟན་པར་བྱ། །ལྷ་གཤེགས་བཀྲ་ཤིས་བརྗོད་དང་ཛ་གད་གསོལ། །དེ་ནས་བཤགས་པ་བྱ་བ་ཡང་། །ཚོགས་པ་ནང་དུ་འདུས་ནས་ནི། །དང་ལ་ལས་ཀྱི་ཀརྨས་བཤགས། །དེ་ནས་གིང་གིས་བཤགས་པ་བྱ། །དེ་ཉིད་བཤགས་པ་བྱ་བ་ནི། །ལས་ཀྱི་སྐོལ་དམིགས་འདིར་སྩལ་ལས། །རྔོ་མ་
ཐོགས་པའི་མིང་ཕྱུང་བཤགས། །དེ་ནས་གྲོགས་པོ་ནང་བཤགས་བྱ། །གཡས་གཡོན་གྲལ་ཚལ་གཉིས་བྱས་ལ། །གླུ་དབྱངས་མགྲིན་མཐུན་འདི་སྐད་བླང་། །ཐམས་ཅད་མ་ལུས་མཆེད་ལྕམ་དྲལ། །བདེ་གཤེགས་སློབ་མར་ལུང་མནོས་ལ། །མཐུན་པར་སྤྱོད་པའི་དམ་ཚིག་པས། །མཉམ་དང་མི་མཉམ་དོན་གཅིག་ལ། །ལེགས་འོང་རྣམ་པར་དབྱེར་མེད་ཀྱང་། །རྣམ་པར་དག་པའི་སྒོ་ཙམ་དུ། །གཞུང་ལས་ཉམས་པ་ཅི་མཆིས་པ། །རྣམ་པར་དག་པའི་བསམ་པས་མཐོལ། །དོན་གྱིས་མི་གནས་ཚིག་གིས་བཤགས། །འཛིན་པ་མེད་པས་བཟོད་པར་གསོལ། །རང་བཞིན་དག་པས་ཚངས་པར་སྩོལ། །གཅིག་གིས་གཅིག་ཞབས་སྤྱི་བོར་བླང་། །ངག་གི་སྲི་ཞུས་བཟོད་པར་གསོལ། །ཚངས་པར་གྱུར་ཅིག་ཅེས་ཀྱང་བརྗོད། །དེ་ནས་ཀུན་གྲལ་བསྲེས་ནས་སློབ་དཔོན་ལ། །བཟོད་པར་གསོལ་ལ་འདི་སྐད་གསོལ། །རྡོ་རྗེ་སློབ་དཔོན་དཔལ་དང་ལྡན། །འཕགས་པའི་སྐུ་དང་ཐ་མི་དད། །བདེ་གཤེགས་རྣམས་ཀྱི་གསུང་རབ་ལུང་། །རྣ་བར་བརྒྱུད་པའི་མན་ངག་མངའ། །སྐུ་གསུང་ཐུགས་དང་རྡོ་རྗེར་གྱུར། །ཞལ་ནས་གསུངས་པ་རྒྱལ་བའི་བཀའ། །གཉིས་མེད་དག་གི་ལྷ་དང་མཉམ། །འཇིག་རྟེན་རྗེ་དང་ཕ་མའི་ཚུལ། །ལུས་ངག་ཡིད་ཐུགས་གནས་རབ་ཚུལ། །བསྙེན་བཀུར་གཞུང་བཞིན་རྔོ་མ་ཐོགས། །ངན་སེམས་དཔྱ་སེམས་དག་ལ་སོགས། །སྡོམ་པའི་དམ་ཚིག་ཅི་ཉམས་པ། །ཐམས་ཅད་མ་ལུས་མཐོལ་ཞིང་བཤགས། །ལུས་ངག་སྒྲིབ་པར་མི་འགྱུར་ཞིང་། །ཚངས་པ་འཕྲལ་དུ་སྩལ་དུ་གསོལ། །ངག་གི་སྲི་ཞུས་བཟོད་པར་གསོལ། །ལུས་ངག་ཞབས་ནི་སྤྱི་བོར་བླང་། །སློབ་དཔོན་གྱིས་ནི་ལན་སྩལ་པ། །གནོངས་པར་དྲན་ནམ་འགྱོད་སྐྱེས་ན། །སླན་ཆད་སྡོམ་ལ་ཚངས་པར་སྩལ། །དེ་ནས་དངོས་གྲུབ་གསོལ་བ་ནི། །རྡོ་རྗེ་དྲིལ་བུ་གསོར་ཞིང་བརྗོད། །ཕྱག་རྒྱ་
རྣམ་ལྔ་དངོས་གྲུབ་ཏུ། །རྡོ་རྗེ་སློབ་དཔོན་བརྗོད་གསོལ་བྱ། །དེ་ཡང་འདི་སྐད་གསུངས་ཏེ་བརྗོད། །སྐལ་ལྡན་མིའི་ཚོགས་དཀྱིལ་འཁོར་དུ། །དགའ་ལྡན་ཏིང་འཛིན་གསལ་བསྒོམས་པས། །གླུ་ཚིག་སྒྲ་ཡི་ཕྱག་རྒྱ་ཡིས། །ཆོས་ཀྱི་དངོས་གྲུབ་ཐོབ་གྱུར་ཅིག །བྲོ་གར་ཕྱག་རྒྱ་འདུ་འཕྲོ་ནི། །འཛུལ་ལམ་ནམ་མཁར་འགྲོ་བར་འགྱུར། །རྒྱན་དང་བགོ་བའི་ཕྱག་རྒྱ་ནི། །འབར་བའི་རྒྱལ་པོ་ཐུབ་མེད་འགྱུར། །བཟའ་དང་བཏུང་བའི་ཕྱག་རྒྱ་ནི། །ཡིད་བཞིན་སྐུ་དང་བདུད་རྩིར་འགྲུབ། །ཨཱ་ལི་ཀཱ་ལིའི་ཕྱག་རྒྱས་ནི། །ཐམས་ཅད་ཐམས་ཅད་འགྲུབ་པར་འགྱུར། །ཞེས་བརྗོད་དེ་ནས་སྨོན་ལམ་ཡང་། །དེ་དང་མཐུན་པར་གདབ་པ་སྟེ། །སྨོན་ལམ་འཇུག་ལ་བརྗོད་པ་ནི། །ཚོགས་ཀྱི་དཀྱིལ་འཁོར་དུས་སུ་ནི། །ཕྱག་རྒྱ་རྣམ་པ་ལྔ་བསྒོམས་པས། །དངོས་གྲུབ་ཐོབ་པར་གྱུར་ཅིག་བརྗོད། །དེ་ནས་སྨོན་ལམ་བཏབ་པ་ནི། །རྡོ་རྗེ་སློབ་དཔོན་མཆེད་ལྕམ་དྲལ། །ལག་པ་ལུ་གུ་རྒྱུད་སྦྲེལ་ནས། །གླུ་དབྱངས་མགྲིན་གཅིག་འདི་སྐད་བླང་། །རྡོ་རྗེ་སློབ་དཔོན་ལྕམ་དྲལ་མཆེད། །མཐུན་པར་སྤྱོད་པའི་རྣལ་འབྱོར་པ། །དམ་ལས་མི་འདའི་གྲོགས་མཆེད་རྣམས། །རྡོ་རྗེ་འབར་བའི་ལུ་གུ་རྒྱུད། །ཅིས་ཀྱང་མི་ཕྱེད་འདྲེལ་བས་ན། །རྣལ་འབྱོར་དག་གི་ཕྱག་རྒྱ་འདྲེལ། །འཇིག་རྟེན་འདི་དང་ཕ་རོལ་དུ། །ཐུགས་དམ་གཞུང་བཞིན་མི་འབྲལ་ཞིང་། །དཀྱིལ་འཁོར་གཅིག་ཏུ་བླ་མེད་བསྒྲུབ། །འཕགས་པའི་གོ་འཕང་འཐོབ་པ་དང་། །ཆོས་ཀྱི་ཆོས་ཉིད་དབྱིངས་ཉིད་དུ། །ལྷན་ནེ་ལྷང་ངེར་འགྲུབ་པར་སྨོན། །ཞེས་བརྗོད་ཚེ་ནི་ཕ་རོལ་ཏུ། །སློབ་དཔོན་ཞབས་དྲུང་མི་འབྲལ་བ། །རྡོ་རྗེའི་སྨོན་ལམ་དེ་གདབ་པོ། །དེ་ནས་རྒྱས་པའི་གཏེར་བགོ་བ། །བདུད་རྩི་ལྔའམ་ཟས་ལྔ་ལ། །རྡོ་རྗེ་རི་རབ་གཟུགས་བྱས་ལ། །རྣལ་འབྱོར་ལུ་གུ་རྒྱུད་ཚོགས་ནས། །རྒྱས་པའི་ཕུར་བུ་ཐོགས་ལ་དྲིལ། །གཅིག་ཀྱང་སྟོབ་ཚུལ་བྱེད་དུ་གཞུག །དེ་ནས་སློབ་དཔོན་འདི་སྐད་གསུང་། །མ་ཡི་ཚོགས་ཀྱི་
དཀྱིལ་འཁོར་མཆོག །ལུ་གུ་རྒྱུད་དུ་སྦྲེལ་བསྡམས་བསྐྱོད། །གཟི་བརྗིད་འབར་བའི་འཕྲུལ་ཆེན་འཕྲོ། །སངས་རྒྱས་ཞིང་ཁམས་མ་ལུས་པར། །མཆོད་ཡོན་ཡིད་བཞིན་དཔལ་ཕྲེང་གིས། །ཕྱོགས་བཅུ་གང་བར་རྒྱས་འབུལ་ན། །ཡོན་ཏན་ནམ་མཁའ་གང་བ་རྣམས། །ཐུགས་རྗེའི་ལྕགས་ཀྱུས་དབྱིངས་སུ་བསྡུ། །ཞེས་པས་ལྕགས་ཀྱུའི་ཕྱག་རྒྱ་བཅས། །ཐམས་ཅད་པུཥྚིཾ་ཀུ་རུས་དྲང་། །དེ་ནས་ཕུར་ཐོགས་དེས་འདི་གསུངས། །བདུད་རྩི་ལྔའམ་ཟས་ལྔ་ལ། །བརྒྱ་ཡི་ཡོན་ཏན་གཏེར་དུ་བརྟག །ང་རྒྱལ་དགའ་འཕྲོའི་ཕུར་པས་གདབ། །རྡོ་རྗེ་གཟི་བརྗིད་འཕེལ་བར་འགྱུར། །པུཥྚིཾ་ཀུ་རུ་ཞེས་བཟླས་ནས། །དེ་ལ་ཕུར་པས་གདབ་བྱའོ། །དེ་ནས་གཏོར་བགོད་བརྗོད་ཅིང་གདབ། །མ་ཡི་ཚོགས་ཀྱི་དཀྱིལ་འཁོར་མཆོག །འབར་བ་འདུ་འཕྲོ་གཟི་ཆེན་ལ། །དགའ་བའི་ཡིད་ཀྱི་མཆོད་སྦྱིན་བྱ། །ཡོན་ཏན་ནམ་མཁའི་མཐའ་དང་མཉམ། །དེ་ནས་གཞན་བྱིན་འདི་སྐད་གསུང་། །མ་ཡི་ཚོགས་ཀྱི་དཀྱིལ་འཁོར་མཆོག །ལུ་གུ་རྒྱུད་དུ་སྦྲེལ་བསྡམས་བསྐྱོད། །གཟི་བརྗིད་འབར་བའི་འཕྲུལ་ཆེན་སྤྲོ། །ཡོན་ཏན་ནམ་མཁའ་གང་བར་འགྱུར། །ང་རྒྱལ་རྡོ་རྗེ་འཁོར་བཅས་པས། །འཇིག་རྟེན་ཁམས་ནི་རབ་འབྱམས་ཀུན། །སྐད་ཅིག་ཡུད་ལ་རྒྱས་མཛད་དེ། །རྒྱས་པར་མ་གྱུར་གང་ཡང་མེད། །ཅེས་པས་བྲོ་བརྡུང་རྒྱས་པར་བསམ། །ལས་ནི་གཞན་མ་གསུམ་པོ་ཡང་། །མི་བྱར་མི་རུང་བྱེད་ན་ཡང་། །རྩིས་འགོ་འདི་ལྟར་ཤེས་བྱའོ། །དེ་ནས་དངོས་གྲུབ་བྱ་བ་ནི། །ཀུན་ལངས་ཧཱུཾ་གི་ཕྱག་རྒྱ་བཅའ། །བཛྲ་ཊཱ་ཀིའི་སྔགས་བརྗོད་ནས། །མཆོག་ཐུན་དངོས་གྲུབ་སྩོལ་བར་བསམ། །དེ་ནས་དངོས་གྲུབ་
དབང་དུ་བྱ་བ་ཡང་། །པདྨ་ཧེ་རུ་ཀ་ཡི་སྐུས། །གྲུབ་ཆེན་བརྒྱད་དང་སྐུ་གསུང་ཐུགས། །མི་ཟད་རྒྱན་གྱི་འཁོར་ལོ་བསམ། །དེ་ནས་དབང་བསྟན་པར་བྱ་བ་ནི། གཽ་རཱིའི་བནྡྷའི་འཕྲུལ་ཆེན་གྱི། །ཕྱག་རྒྱ་བཅས་ཏེ་སྔགས་འདི་བརྗོད། །མ་ཧཱ་ཀྲོ་དྷཱི་ཤྭ་རཱི་ཧཱུཾ་ཞེས་པ། །དབང་རྣམས་བརྟན་པར་གྱུར་ཅིག་ཅེས། །ལན་གསུམ་དེ་སྐད་བརྗོད་པར་བྱ། །དེ་ནས་ལྷ་རྣམས་གཤེགས་སུ་གསོལ། །དཀྱིལ་འཁོར་ལྷ་རྣམས་ལུས་ལ་བསྡུ། །དེ་ཉིད་རིག་པའི་མཆོད་པ་ཡིན། །བདག་གི་རིག་པའི་ཡེ་ཤེས་ཀྱི། །ཁྱད་པར་དག་ལས་བྱུང་བ་ནི། །གསང་སྔགས་ནང་པའི་ལུགས་ཡིན་ཏེ། །བདག་ཉིད་ཆེན་པོ་ཞེས་བྱ་སྟེ། །ལྷ་རྣམས་རང་གི་ལུས་ལ་བསྡུ། །ལས་གྲུབ་ཐུགས་དམ་གཤེགས་པ་དང་། །སླར་གཤེགས་ཆོ་ག་འདི་སྐད་གསུངས། །ཨོཾ་ཁྱེད་ཀྱིས་སེམས་ཅན་དོན་ཀུན་བྱས། །བདེ་བར་གཤེགས་སོ་བཅོམ་ལྡན་འདས། །ཐུགས་རྗེ་ཆེན་པོ་འདྲེལ་བས་ན། །སླར་གཤེགས་པར་ཡང་སྙན་ཆ་གསོལ། །བཛྲ་མུཿཡིས་ཡེ་ཤེས་གཤེགས། །དེ་ནས་བཀྲ་ཤིས་བརྗོད་པར་བྱ། །བཀྲ་ཤིས་ཕྱོགས་ཕྱོགས་མི་རེ་ལངས། །གླུ་དབྱངས་ཧ་ཀར་བླང་བྱས་ལ། །ཤར་ཕྱོགས་དཔལ་བེའུ་མགོ་བཙུགས་ལ། །བྱང་གི་ཉར་བཀར་འདི་སྐད་གསུངས། །འཇམ་དཔལ་གདུང་འཚོབ་དཔལ་བེའུ། །ཐུགས་ཀྱི་གསང་བ་མཛད་དུ་གསོལ། །སྐུ་མདོག་ཉི་ལྟར་དག་པའི་ཚུལ། །ཕྱག་སོར་ཞབས་སོར་ཉ་ལ་གསོལ། །དབྱངས་ཟབ་ཆོས་ཀྱི་དུང་ཆེན་སྒྲོགས། །ཚེམས་དང་རུས་པའི་སྦུབས་སུ་གསོལ། །ཤེས་མཆོག་བདུད་རྩི་བུམ་པའི་ངང་། །དབུ་སྐྲ་མགུར་དང་ཕྱག་ལ་གསོལ། །རྣམ་ཤེས་མ་ཆགས་པད་མོའི་དབྱིངས། །ཞལ་གྱི་དཀྱིལ་འཁོར་སྒྲོས་སུ་གསོལ། །
ནམ་མཁའི་མཐར་ཐུག་ཐུགས་རྗེའི་སྐྱབས། །དབུ་ཡི་དཀྱིལ་འཁོར་གཙུག་ཏུ་གསོལ། །མཁྱེན་དཔངས་དཀར་པོ་རྒྱལ་མཚན་འབར། །མཉེན་ལྕུག་འཁྲིལ་ལྡེམ་སྐུ་ལ་གསོལ། །ཡིད་བཞིན་ཆོས་ཀྱི་འཁོར་ལོ་བསྐོར། །ཕྱག་མཐིལ་ཞབས་མཐིལ་གཉིས་སུ་གསོལ། །རྫོགས་ནས་བཀྲ་ཤིས་ལུས་བཀོད་དེ། །ལན་བཞི་བསྐོར་ནས་སྔར་སར་བཀོད། །སོ་སོར་བཀྲ་ཤིས་དབུལ་བར་བྱ། །རྟོགས་པའི་ཡེ་ཤེས་དབྱིངས་ཀྱི་བཀྲ་ཤིས་འབར། །ཐུགས་རྗེའི་ཕྲིན་ལས་འཁོར་བར་བཀྲ་ཤིས་འབར། །མཐའ་གཉིས་མི་གནས་དབུ་མའི་བཀྲ་ཤིས་འབར། །དཔལ་བེའུ་གསུམ་འབར་བཀྲ་ཤིས་སློབ་དཔོན་བཞེས། །ཨོཾ་བི་མ་ལི་བི་མ་ལི་ཀ་ར་མ་མ་བཛྲ་ཤ་ན། ཡན་མངྒ་ལ་ཨཱ་བེ་ཤ་ཡ་སྭཱ་ཧཱ། དཔའ་བརྗིད་མཉེན་ལྕུག་རྒྱན་གྱི་བཀྲ་ཤིས་འབར། །འཁོར་བའི་གཏིང་འཕྱོ་ཐུགས་རྗེའི་བཀྲ་ཤིས་འབར། །གངས་ཆེན་མཁར་བའི་རང་བཞིན་བཀྲ་ཤིས་འབར། །ཉ་ཡི་གསུམ་འབར་བཀྲ་ཤིས་སློབ་དཔོན་བཞེས། །ཨོཾ་སུ་བ་གི་རི་བྲ་བ་ཀྲི་རཱ་ཛ་ཡ། ཡན་མངྒ་ལ་ཨཱ་བེ་ཤ་ཡ་སྭཱ་ཧཱ། བསྟན་པའི་ཆོས་སྒྲོགས་གསུང་གི་བཀྲ་ཤིས་འབར། །འཁོར་བར་མི་བསྙེམས་རྒྱལ་ཐབས་བཀྲ་ཤིས་འབར། །རང་བཞིན་རྣམ་དག་དགེ་བའི་བཀྲ་ཤིས་འབར། །དུང་གི་གསུམ་འབར་བཀྲ་ཤིས་སློབ་དཔོན་བཞེས། །ཨོཾ་མ་ནི་བ་ཏི་ཛ་ཡ། ཡན་མངྒ་ལ་ཨཱ་བེ་ཤ་ཡ་སྭཱ་ཧཱ། ས་བཅུར་མངའ་གསོལ་དབང་གི་བཀྲ་ཤིས་འབར། །བདུད་རྩི་བྲོ་མཆོག་ནད་སེལ་བཀྲ་ཤིས་འབར། །གཤེར་བྱེད་བག་ཆགས་སྦྱོང་བའི་བཀྲ་ཤིས་འབར། །བུམ་པའི་གསུམ་འབར་བཀྲ་ཤིས་སློབ་དཔོན་བཞེས། །ཨོཾ་མ་ཡ་མ་ཡ། ར་ཙ་ར་ཙ་ཀ་ཤ་ཀ་ཤ་ཡེ། མ་མ་པ་པ་ཀ་ཙ་ཡ། ཡན་མངྒ་ལ་ཨཱ་བེ་ཤ་ཡ་སྭཱ་ཧཱ། འདམ་སྐྱེས་
པད་ལྟར་ཐུགས་རྗེའི་བཀྲ་ཤིས་འབར། །ཆགས་པའི་སྐྱོན་བྲལ་ཐབས་མཁས་བཀྲ་ཤིས་འབར། །རང་བཞིན་རྣམ་དག་གར་སྐྱེས་བཀྲ་ཤིས་འབར། །པདྨའི་གསུམ་འབར་བཀྲ་ཤིས་སློབ་དཔོན་བཞེས། །ཨོཾ་ད་ཀ་ད་ཀ་དུ་ན་དུ་ན་ཛྭ་ལ་ཛྭ་ལ། ཡན་མངྒ་ལ་ཨཱ་བེ་ཤ་ཡ་སྭཱ་ཧཱ། འཁོར་བར་མི་གདུངས་སྐྱབས་ཀྱི་བཀྲ་ཤིས་འབར། །སྡུག་བསྔལ་ཞི་བྱེད་སྐྱབས་ཀྱི་བཀྲ་ཤིས་འབར། །ཁྱབ་པ་སྦྱིན་མཛད་ཡོན་ཏན་བཀྲ་ཤིས་འབར། །གདུགས་ཀྱི་གསུམ་འབར་བཀྲ་ཤིས་སློབ་དཔོན་བཞེས། །ཨོཾ་ཛ་ཡ་ཛ་ཡ། སརྦ་ཤ་ཏྲུཾ་སྟྭམ་བྷ་ནི་ཨ་མོ་གྷ་ཨ་པ་ར་ཛི་ཏ་ཛ་ཡ། ཡན་མངྒ་ལ་ཨཱ་བེ་ཤ་ཡ་སྭཱ་ཧཱ། ཆོས་ཀྱི་རྒྱལ་མཚན་མི་ནུབ་བཀྲ་ཤིས་འབར། །སྦྱིན་པའི་ཆར་ཆེན་རྟགས་ཀྱི་བཀྲ་ཤིས་འབར། །བདུད་སྡེ་ཕམ་མཛད་རྒྱལ་བའི་བཀྲ་ཤིས་འབར། །རྒྱལ་མཚན་གསུམ་འབར་བཀྲ་ཤིས་སློབ་དཔོན་བཞེས། །ཨོཾ་ད་ཛི་ནི་ད་ཛི་ནི་ཛ་ཡ་ཛ་ཡ། ཡན་མངྒ་ལ་ཨཱ་བེ་ཤ་ཡ་སྭཱ་ཧཱ། འཁོར་བའི་རྒྱུན་གཅོད་ཕྲིན་ལས་བཀྲ་ཤིས་འབར། །དཀྱིལ་འཁོར་བཀོད་པས་བཞུགས་གནས་བཀྲ་ཤིས་འབར། །མི་འགྱུར་འཁོར་ལོའི་ཆོས་སྐུའི་བཀྲ་ཤིས་འབར། །འཁོར་ལོའི་གསུམ་འབར་བཀྲ་ཤིས་སློབ་དཔོན་བཞེས། །ཨོཾ་ཛི་ལི་ཛི་ལི། མི་ལི་མི་ལི།བ་ཏྲེ་བ་ཏྲེ། ཛ་ཡ་མངྒ་ལ་ཨཱ་བེ་ཤ་ཡ་སྭཱ་ཧཱ། གླུ་དབྱངས་སོ་སོ་ནས་བརྗོད་ཅིང་། །སློབ་དཔོན་ལ་ནི་བཀྲ་ཤིས་དབུལ། །དེ་ཡང་ལུས་ལ་བཀོད་པར་བྱའོ། །དེ་ནས་སློབ་མས་སློབ་དཔོན་ལ། །བཀྲ་ཤིས་ཕམ་ཕབ་དཀར་ཤས་ཙམ། །ཞུ་ཞིང་གསོལ་བ་འདི་སྐད་གསུངས། །སློབ་དཔོན་སྐུ་མཆོག་ཡོན་ཏན་བཀྲ་ཤིས་འབར། །རི་རབ་གསེར་གྱི་ངོས་ལ་བྱ་གནས་པས། །བྱ་ཡི་དངོས་པོ་བོར་ནས་གསེར་དུ་སྣང་། །བདག་ཅག་
ཕྱོགས་ཀྱང་བཀའ་དྲིན་དགེས་ཁེངས་ནས། །ཉེས་པའི་སྐྱོན་བྲལ་བཀྲ་ཤིས་མཐར་ཕྱིན་སྨོན། །བརྗོད་ནས་བླ་མར་ཕྱག་བྱས་ནས། །སློབ་དཔོན་གྱིས་ཀྱང་འདི་སྐད་གསུང་། །འདིར་འདུས་སྐལ་ལྡན་རྣལ་འབྱོར་རྣམས། །བཀྲ་ཤིས་སྐལ་ཤས་ཐོབ་གྱུར་ཤོག །ཅེས་པས་ཐམས་ཅད་བཀྲ་ཤིས་སོ། །དེ་ནས་ཛ་གད་ཟས་གསོལ་བ། །བཀྲ་ཤིས་ཟས་བརྒྱད་ཨ་མྲྀ་ཏ། །སྦྱར་ནས་ཐམས་ཅད་གསོལ་འཚལ་ལོ། །རྡོ་རྗེ་གིང་གིས་ཛ་གད་དང་། །སྨན་ལྔ་སྩལ་ནས་རབ་སྦྱར་ཏེ། །བཀྲ་ཤིས་བཏེག་ནས་འདི་སྐད་གསུང་། །སྔོན་ཚེ་ཤཱཀ་ཐུབ་མངོན་པར་སངས་རྒྱས་ཚེ། །ཞིང་པའི་བུ་མོ་བཀྲ་ཤིས་ལོ་ལེགས་མས། །རྡོ་རྗེའི་གདན་ལ་བཀྲ་ཤིས་སྐྱེམས་གསོལ་བས། །བདུད་སྡེ་ཕམ་མཛད་དགེ་བའི་ལོ་ཏོག་སྨིན། །དེ་བཞིན་སློབ་དཔོན་རྡོ་རྗེའི་གདན་ལ་བཞུགས། །དགེ་བའི་ལོ་ཏོག་བཅུད་ཀྱི་ཛ་གད་དཔའ་བོ་འདི། །བདུད་རྩི་ལྔར་ལྡན་རིགས་ལྔའི་བཀྲ་ཤིས་འབར། །ཧོ་ཞེས་ཕྱག་ཏུ་ཕུལ་བྱས་ནས། །སྟྭཾ་ཞེས་ཕྱག་ཏུ་བཞེས་པར་བྱ། །ས་མ་ཡ་ནི་ཧོ་ཞེས་གསོལ། །ས་མ་ཡ་སྟྭཾ་ཕྱག་ཏུ་བཞེས། །བཀྲ་ཤིས་ཕམ་ཕབ་དག་ཀྱང་ནི། །གང་གིས་སློབ་མ་རིམ་པར་སྩལ། །བཀྲ་ཤིས་ཟས་དང་ཛ་གད་ནི། །བདེ་བ་ཆེན་པོའི་ཟས་སུ་བཟའ། །ཟག་པ་མེད་པའི་སྐོམ་དུ་འཐུང་། །ཚོགས་གཉིས་རྫོགས་པར་སངས་རྒྱས་སོ། །རྩ་ལ་ཐིམ་པས་དཀྱིལ་འཁོར་འབར། །བདུད་རྩི་ཁམས་ཐིམ་སྐུ་རུ་གསལ། །ཡི་གེ་ཐིམ་པས་སྔགས་སུ་སྒྲོགས། །སྙིང་རླུང་ཐིམ་པས་བཅུད་དུ་འདྲེས། །འགྲོས་རྣམས་ཐིམ་པས་གཙུག་ཏོར་འཁྱིལ། །རྩ་རྣམས་འགྲོས་ཐིམ་དབུ་མའི་ནང་། །དབུ་
ཡི་གཙུག་ཏོར་གྲུབ་པ་དང་། །ཁམས་ཀྱི་བདུད་རྩིར་རིང་བསྲེལ་ནི། །གཡས་སུ་འཁྱིལ་བའི་དུང་དང་འདྲ། །སྔགས་ནི་ཧཱུཾ་གི་གཟུགས་སུ་གྲུབ། །རླུང་ནི་འཆི་བ་མེད་པའི་སྲོག །མི་འགྱུར་སྤྲོས་དང་བྲལ་བར་གནས། །ཀརྨ་མཱ་ལེའི་རྒྱུད་ལས། སྤྱིའི་ལས་ཐམས་ཅད་མ་ལུས་པར་བསྡུས་པའི་ལེའུ་སྟེ་བརྒྱད་པའོ།། །།དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ལ་སོགས་པའི་འཁོར་མ་ལུས་པ་ཐམས་ཅད་འདུས་ནས། བདེ་བར་གཤེགས་པ་ཐམས་ཅད་ཀྱི་གཙོ་བོ།བཅོམ་ལྡན་འདས་ཞེ་སྡང་རྡོ་རྗེ་ལ་བསྟོད་པ། ཤ་དང་རུས་པ་ཁྲག་མེད་ཀྱང་། །ནམ་མཁའ་ལ་ནི་འཇའ་ཚོན་ལྟར། །ཁྱོད་ཀྱི་སྐུ་ནི་སྟོན་པར་མཛད། །ཁོང་སྟོང་མེད་ཁྱོད་སྐུ་ལ་བསྟོད། །རྒྱུད་མཆོག་ལས་ཀྱི་ཕྲེང་བ་འདིར། །དུས་ཀྱི་དཀྱིལ་འཁོར་རབ་གསུངས་པས། །ཕྱི་ན་གཟའ་དང་རྒྱུ་སྐར་དགེ། །ནང་དུ་ཁམས་དགུ་འདུ་ལུགས་རྟོགས། །གསང་བ་ཡུམ་གྱི་པདྨ་རྒྱས། །དེ་ཉིད་དབྱེར་མེད་ཆེན་པོར་གནས། །ཚོགས་ཀྱི་དཀྱིལ་འཁོར་ཆེན་པོ་ཡིས། །རྒྱུ་ནི་བསོད་ནམས་ཚོགས་རྫོགས་ནས། །འབྲས་བུ་ཡེ་ཤེས་ཚོགས་ཀྱང་རྫོགས། །ཚོགས་གཉིས་ལོངས་སྤྱོད་ཆེན་པོའི་སྐུ། །གསལ་བཀྲའི་དཀྱིལ་འཁོར་ཞི་བའི་ངང་། །ཕུང་ཁམས་སྐྱེ་མཆེད་ལྷུན་གྱིས་གྲུབ། །རྣོན་པོའི་དཀྱིལ་འཁོར་ཁྲོ་རྒྱལ་ཚོགས། །ཞིང་བཅུ་མངོན་པར་སངས་རྒྱས་བཀོད། །ཐིམ་པའི་དཀྱིལ་འཁོར་མཆོད་པ་ཡིས། །རང་བཞིན་ཡེ་ཤེས་ལྷ་རྣམས་མཉེས། །འབར་བའི་དཀྱིལ་འཁོར་མཁའ་འགྲོའི་ཚོགས། །བཀའ་དང་བསྟན་པ་གཉེན་པོ་བསྲུང་། །རྒྱུད་ཆེན་ལས་ཀྱི་
ཕྲེང་བ་འདི། །ཇི་ལྟར་གཟུང་ཞིང་གཏད་པར་བྱ། །དེ་ནས་ཞེ་སྡང་རྡོ་རྗེ་ཡིས། །འཁོར་གྱི་ས་བཅུ་བྱང་སེམས་ལ། །ལེགས་པར་ཡང་དག་རབ་གསུངས་པ། །རྒྱུད་དང་ལུང་དང་མན་ངག་རྣམས། །རྒྱུད་རྒྱལ་དྲེང་ཆགས་ཕུན་སུམ་ཚོགས། །ལུང་ཆེན་བཟུང་སྟེ་ངེས་པ་རྙེད། །མན་ངག་མི་བསླུ་ངེས་པའི་དོན། །ལུང་ཆེན་རྒྱ་ཆེན་བཤད་པའི་རྒྱུད། །ལས་ཀྱི་ཕྲེང་བ་གཟུང་བར་བྱ། །ལྷ་དང་རིག་འཛིན་མཁའ་འགྲོ་ལ། །གཏད་པས་སྐལ་ལྡན་མི་ལ་བརྒྱུད། །དེ་ནས་རིམ་པར་དར་བར་འགྱུར། །ཕྱི་རབས་སྐལ་ལྡན་དོན་བཤད་པས། །མ་འོངས་བློ་དང་འཚམས་པར་འགྱུར། །ཞེས་གསུངས་ནས་ཐམས་ཅད་ཆོས་ཀྱི་དབྱིངས་སུ་ཐིམ་མོ། །ཀརྨ་མཱ་ལེའི་རྒྱུད་ལས། རྗེས་སུ་ཡི་རང་བའི་ལེའུ་སྟེ་དགུ་པའོ།། །།ལུང་ཆེན་བཤད་པའི་རྒྱུད་ཀརྨ་མཱ་ལེ་རྫོགས་སོ།། །།རྒྱ་གར་གྱི་སློབ་དཔོན་དྷརྨྨ་ཤྲཱི་པྲ་བྷ་དང་། ཨ་ཙརྱ་བི་མ་ལ་ལ་སོགས་པའི་པཎྜི་ཏ་ལ་རཏྣ་ཨ་གྲས་བསྒྱུར་ཅིང་གཏན་ལ་ཕབ་པའོ།།