དཔལ་ཁྲག་འཐུང་འདུས་པ་རྩ་བའི་རྒྱུད་ཅེས་བྱ་བ།
རྒྱ་གར་སྐད་དུ། ཤྲི་ཧེ་རུ་ཀ་ས་མུ་དཱ་ཡ་མཱུ་ལ་ཏནྟྲ་ན་མ། བོད་སྐད་དུ། དཔལ་ཁྲག་འཐུང་འདུས་པ་རྩ་བའི་རྒྱུད་ཅེས་བྱ་བ། དཔལ་འཇིགས་བྱེད་ཆེན་པོ་ཁྲག་འཐུང་ཧེ་རུ་ཀ་ལ་ཕྱག་འཚལ་ལོ། །འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་དཔལ་ཧེ་རུ་ཀ་ཆེན་པོ། གསང་བ་ཆེན་པོའི་མཁའ་དབྱིངས་རྣམ་པར་དག་པའི་ཕོ་བྲང་ན། འཇིགས་བྱེད་ཆེན་པོའི་འཁོར་འདི་ལྟ་སྟེ། བུཌྜྷ་ཧེ་རུ་ཀ་དང་། རཏྣ་ཧེ་རུ་ཀ་དང་། པདྨ་ཧེ་རུ་ཀ་དང་། ཀརྨ་ཧེ་རུ་ཀ་དང་། བུཌྜྷ་ཀྲོ་དྷཱི་ཤྭ་རཱི་མ་དང་། རཏྣ་ཀྲོ་དྷཱི་ཤྭ་རཱི་མ་དང་། པདྨ་ཀྲོ་དྷཱི་ཤྭ་རཱི་མ་དང་། ཀརྨ་ཀྲོ་དྷཱི་ཤྭ་རཱི་མ་དང་། ཧཱུཾ་ཀ་ར་དང་།རྣམ་པར་རྒྱལ་བ་དང་། ནཱི་ལ་དཎྜ་དང་། ཡ་མཱནྟ་ཀ་དང་། ཨཱརྱ་ཨ་ཙ་ལ་དང་། ཧ་ཡ་གྷྲཱི་བ་དང་། ཨ་པ་ར་ཛི་ཏ་དང་། ཨ་མྲྀ་ཏ་ཀུན་དྷ་ལི་དང་། ཏྲཻ་ལོཀྱ་བི་ཛ་ཡ་དང་། མ་ཧཱ་བྷ་ལ་དང་། ཀོའུ་རཱི་མ་དང་། ཙོའུ་
རཱི་མ་དང་། བྲ་མོ་ཧ་དང་། བེ་ཏ་ལཱི་དང་། པུཀྐ་སཱི་དང་། སྒསྨ་རཱི་དང་། སྨ་ཤ་ནཱི་དང་། ཙན་དྷ་ལཱི་དང་། སིངྷ་མུ་ཁ་དང་། བྱ་གྷྲྀ་མུ་ཁ་དང་། སྲི་ག་ལ་མུ་ཁ་དང་།ཤྭ་ན་མུ་ཁ་དང་། གྲྀ་ཌྷ་མུ་ཁ་དང་། ཀང་ཀ་མུ་ཁ་དང་། ཀཱ་ཀ་མུ་ཁ་དང་། ཨུ་ལཱུ་ག་མུ་ཁ་དང་། ཨཾ་ཀུ་ཤ་མ་དང་། པཱ་ཤ་མ་དང་། སྥོ་ཊ་མ་དང་། གྷཎྜ་མ་དང་། ལས་བྱེད་པའི་མ་མོ་བདུན་ཕྲག་བཞི་དང་། མཁའ་འགྲོའི་ཚོགས་བསམ་གྱིས་མི་ཁྱབ་པ་དང་། ཐབས་ཅིག་ཏུ་རོལ་པ་ཆེན་པོས་བཞུགས་སོ། །དེ་ནས་འདུས་པའི་འཁོར་དེ་དག་རྣམས་ཀྱིས། དཔལ་ཧེ་རུ་ཀ་ལ་འདི་སྐད་ཅེས་གསོལ་ཏོ། །ཀྱེ་མ་བཅོམ་ལྡན་ཧེ་རུ་ཀ །དུས་གསུམ་སངས་རྒྱས་ཐམས་ཅད་ཀུན། །ཐུགས་རྗེ་ཞི་བའི་རང་བཞིན་ལ། །ཁྱོད་ཉིད་ཁྲོ་བ་ཅི་ཞིག་ལགས། །ཧེ་རུ་ཀ་ནི་ཇི་ལྟ་བུ། །ཐབས་དང་ཤེས་རབ་སྦྱར་བ་གང་། །མ་འོངས་དུས་ན་སྐྱེས་བུ་ཡི། །ཁྱོད་དང་བདག་ཅག་ལྷན་ཅིག་ཏུ། །ཉེ་བར་བྱེད་པའི་ཐབས་ཅི་ལགས། །ཐམས་ཅད་ཁྱོད་དང་གཅིག་པ་ཡིས། །འགྲོ་བའི་དོན་ཀུན་ཇི་ལྟར་བསྒྲུབ། །འདུལ་བར་བྱ་བའི་དོན་ཆེད་དུ། །བདག་ཅག་རྣམས་ལ་བསྟན་དུ་གསོལ། །ཞེས་ཞུས་སོ། །
དེ་ནས་དཔལ་ཆེན་ཧེ་རུ་ཀས། །འདུས་པའི་འཁོར་ལ་འདི་སྐད་གསུངས། །ཤིན་ཏུ་ཁྲོ་ཞིང་གཏུམ་པ་ལ། །ཞི་བས་ཕན་པར་མི་འགྱུར་ཏེ། །ཁྲོ་བོ་དེ་བཞིན་གཤེགས་ཀུན་མཛད། །སངས་རྒྱས་ཐུགས་རྗེ་ཁྲོས་པས་ནི། །གདུག་པ་མ་ལུས་འདུལ་བར་བྱེད། །ཐམས་ཅད་དབང་དུ་གྱུར་ནས་ཀྱང་། །བསྒོ་བའི་བཀའ་ཉན་བྲན་བཞིན་གནས། །ཧེ་ནི་དགོངས་ཤིང་བཞད་པའི་གསུང་། །རུ་ནི་ཀུན་ལ་ཆགས་པའི་ཐུགས། །ཀ་ནི་མཉམ་ཉིད་ཡེ་ཤེས་སྐུ། །ཤྲཱི་ནི་སྙིང་རྗེ་བདག་གཞན་རྟོགས། །མ་སྐྱེས་དབྱིངས་ནི་ཤེས་རབ་སྟེ། །མ་འགགས་སྤྲུལ་པ་དེ་ཡི་ཐབས། །དུས་གསུམ་དངོས་པོ་ཐམས་ཅད་ཀུན། །མཉམ་ཉིད་གནས་པ་སྦྱོར་བ་ཡིན། །ཕུང་པོ་ལྔ་ཉིད་ཧེ་རུ་ཀ །ཀྲོ་དྷཱི་ཤྭ་རཱི་འབྱུང་བ་ལྔ། །མ་མོ་རྣམ་པར་ཤེས་པ་བརྒྱད། །དེ་ཡི་ཡུལ་བརྒྱད་ཕྲ་མེན་གྱུར། །འདུ་ཤེས་བཅུ་ཉིད་ཁྲོ་བོར་གྱུར། །འགྱུར་བ་བཞི་ནི་ཁྲོ་མོ་སྟེ། །སེམས་ལས་བྱུང་བ་མཁའ་འགྲོའི་ཚོགས། །ཐམས་ཅད་ང་ཡི་སྐུ་གསུང་ཐུགས། །ཡེ་ནས་གནས་ཤིང་ལྷུན་གྱིས་གྲུབ། །འདུས་མ་བྱས་ཤིང་གཡོ་བ་མེད། །མ་རིག་རྩ་བ་ཡན་ལག་བཅས། །སྒྲིབ་བྱེད་དེ་ཡི་གནས་མ་མཐོང་། །གལ་ཏེ་བདག་ཉིད་ཤེས་འདོད་ན། །ཡང་དག་གྲུབ་པ་གཅིག་པུ་ཉིད། །སངས་རྒྱས་བདེ་ཆེན་ཀུན་འདུས་པ། །རྣལ་འབྱོར་ཟབ་མོ་སྐུ་གསུམ་རྫོགས། །མཁའ་འགྲོ་སྒྱུ་མ་བདེ་མཆོག་བདེ། །འགྲོ་བ་སྣ་ཚོགས་ཐབས་ཀྱིས་འདུལ། །དོན་དམ་ངེས་པའི་ལུང་འདི་ཉོན། །ཞེས་གསུངས་སོ། །དཔལ་ཁྲག་འཐུང་འདུས་པ་རྩ་བའི་རྒྱུད་ལས། གླེང་གཞིའི་དོན་བསྡུས་པའི་ལེའུ་སྟེ་དང་པོའོ།། །།དེ་ནས་འཁོར་གྱིས་ཡང་ཞུས་པ། །དཔལ་ཆེན་ཧེ་རུ་ཀ་ཡི་རྗེ། །མ་འོངས་སེམས་ཅན་སྐལ་མེད་ཅིང་། །གདུལ་བར་དཀའ་བ་གང་ཞིག་ལ། །ཇི་ལྟར་ངེས་པའི་དོན་བསྟན་ཡང་། །མྱུར་དུ་རྟོགས་པ་མ་ཡིན་པས། །བསྒྲུབ་པ་དང་ནི་ཆེན་པོ་དང་། །བསྙེན་པ་དང་ནི་ཉེ་བ་དང་། །ལས་ཀྱི་ཁྱད་པར་མ་ལུས་པ། །རིམ་པ་བཞིན་དུ་བསྟན་དུ་གསོལ། །ཞེས་ཞུས་པས། བཅོམ་ལྡན་འདས་ཀྱིས་བཀའ་སྩལ་པ། །ཕྱི་
དུས་སྙིགས་མ་བྱུང་བའི་ཚེ། །བློ་དང་ལྡན་པའི་སྐྱེས་བུ་ཡིས། །དུར་ཁྲོད་དགོན་པའི་ཕྱོགས་དག་གམ། །ངེས་པར་བརྟགས་པའི་ས་གཞི་ལ། །རྡོ་རྗེ་དུར་ཁྲོད་བདག་པོའི་ལུས། །རབ་ཏུ་ཉམ་ཐག་བསྒྱེལ་བ་སྟེ། །ང་ཡི་སྔོན་གྱི་ཕྲིན་ལས་ཡིན། །མཁའ་དང་བརྟན་ཞིང་གསལ་བ་དང་། །གཡོ་ཞིང་སྲེག་པར་རབ་སྣང་བ། །དཀྱིལ་འཁོར་ལྔ་རུ་བྱིན་གྱིས་བརླབས། །ལུས་དང་ལུས་ཀྱི་ཕུང་པོ་ལ། །གདུག་པའི་ཁྲག་འཐུང་ཚོགས་རྣམས་བསྒོམ། །ཕུན་སུམ་ཚོགས་པའི་ས་བླངས་ལ། །ལག་གང་ས་ལ་སོགས་པ་ཡི། །རྒྱ་ཆེར་བསྐྱེད་ལ་བདུད་རྩིས་གདབ། །ཤ་རུས་ཁྲག་སོགས་མཚོན་པ་ཡི། །རིམ་པའི་བྱེ་བྲག་འདི་ལྟ་སྟེ། །མཐིང་ག་དཀར་སེར་དམར་དང་ལྗང་། །དབུས་དང་ཕྱོགས་བཞི་རབ་ཏུ་མཛེས། །གནས་པའི་ཕོ་བྲང་ལྔ་འམ་དགུ། །བཅུ་དྲུག་གམ་ནི་ལྔ་བཅུ་བརྒྱད། །དྲུག་ཅུ་རྩ་བརྒྱད་ལ་སོགས་པའི། །ཚོགས་པའི་ཚད་དང་མཉམ་པ་ལ། །དམིགས་པ་གསལ་བ་རབ་ཏུ་བསྒོམ། །བདག་དང་ཡེ་ཤེས་སེམས་དཔའ་གཉིས། །སོ་སོ་མ་ཡིན་ཐ་དད་མིན། །མཆོད་བསྟོད་མཉེས་པ་བཟླས་པ་དང་། །དགུག་དང་གཞུག་ཅིང་བསྡིམ་པ་དང་། །བཅིངས་དང་དབང་དུ་བྱ་བ་དང་། །དགྱེས་པ་བསྐྱེད་ཅིང་ལས་ལ་སྦྱར། །ཐུན་མོང་དང་ནི་མཐར་ཐུག་པའི། །རང་གི་དེ་ཉིད་ཡོངས་ཤེས་ཤིང་། །གཉིས་སུ་འཛིན་པ་མ་ལུས་དོར། །ཡོད་མེད་སྐྱེ་འགག་རྟག་ཆད་དང་། །འགྲོ་འོང་ལ་སོགས་སྤྲོས་པའི་མཐའ། །ཇི་སྙེད་པ་ནི་རང་གི་བློ། །དེ་དང་བྲལ་བའི་སྒྲུབ་པ་པོ། །ང་འམ་ང་དང་འདྲ་བ་ཡིས། །སངས་རྒྱས་རྣམས་དང་དེ་ཡི་སྲས། །ཀུན་ནས་རབ་ཏུ་བསྒྲུབ་པ་ཡིན། །བྱམས་པ་དང་ནི་སྙིང་རྗེ་ཡིས། །ཁམས་གསུམ་གནས་པ་མ་ལུས་པའི། །འགྲོ་བ་ཐམས་ཅད་བསྒྲལ་འདོད་ཕྱིར། །ང་ལ་བསྙེན་པ་སྒྲུབ་པ་ཆེ། །རྣལ་འབྱོར་ཡེ་ཤེས་རང་གི་ངག །ཡི་གེ་སྔགས་ཀྱི་འཕྲོ་འདུ་ཡིས། །སྨྲ་བསམ་བརྗོད་མེད་ཚིག་ལས་འདས། །འཛིན་མེད་བྲག་ཆ་ལྟ་བུས་བསྙེན། །སེམས་ཅན་རྣམས་ཀྱི་ཕྱི་དང་ནང་། །གསང་བ་ཡོངས་སུ་ཤེས་འདོད་པས། །དུལ་
བའི་སེམས་སུ་བཞག་ནས་ནི། །དམ་ཚིག་ཆེན་པོ་བདེ་བར་གནས། །བསྟེན་པར་གནང་བའི་དབང་ཐོབ་ནས། །བསྒོམ་དབྱངས་ཡི་གེ་འབྲུ་བརྒྱད་བསྟན། །ཨོཾ་རུ་ལུ་རུ་ལུ་ཧཱུཾ་བྷྱོ་ཧཱུཾ། དབང་མཆོག་ཐོབ་ནས་འཁོར་དང་བཅས། །སྟོན་པས་བསྟན་པའི་ལུང་བཞིན་དུ། །བསྒོམ་རྒྱུད་གསལ་བར་ཅི་ནུས་བྱ། །དེ་ཡི་ངང་ལ་ཉེ་བར་བསྙེན། །གང་ཞིག་བདག་གཞན་དོན་གྱི་ཕྱིར། །ཕུང་པོ་མཆོད་རྫས་བྱ་བ་དང་། །རྩི་བཅུད་བདུད་རྩིར་བསྒྲུབ་པ་དང་། །བསྟན་ལ་རབ་སྡང་བསྒྲལ་བ་དང་། །ལུས་བྲལ་ངང་དུ་དྲངས་པ་དང་། །ང་ཉིད་ཀུན་རྫོབ་གནས་པ་དང་། །ཆགས་ཅན་གཉེན་པོས་གདུལ་བའི་རིགས། །དེ་ཉིད་དབང་དུ་བྱ་བ་དང་། །བརྟག་དང་དབབ་པ་ལ་སོགས་ཀུན། །ང་ལ་ཉེ་བར་བྱས་པས་འགྲུབ། །ཅེས་གསུངས་སོ། །དཔལ་ཁྲག་འཐུང་འདུས་པ་རྩ་བའི་རྒྱུད་ལས། ཧེ་རུ་ཀའི་ལས་ཡང་དག་པར་བསྡུས་པའི་ལེའུ་སྟེ་གཉིས་པའོ།། །།དེ་ནས་འཁོར་གྱིས་ཡང་ཞུས་པ། །མགོན་པོ་ཧེ་རུ་ཀ་དཔལ་རྗེ། །སྐལ་མེད་སེམས་ཅན་གདུལ་དཀའ་བ། །ཤིན་ཏུ་སྙིགས་མར་གྱུར་པའི་ལུས། །ཉོན་མོངས་པ་ཡི་སེམས་ཅན་རྣམས། །ཤེས་རབ་ཕུན་སུམ་མ་ཚོགས་ཤིང་། །རབ་ཏུ་འབད་པ་ཆུང་བས་ན། །ཤིན་ཏུ་བསྡུས་མིན་རྒྱས་མིན་པར། །ཁྱོད་ཀྱི་རང་བཞིན་བསྒྲུབ་པ་དང་། །གཙོ་དང་འཁོར་གྱི་བསྡུས་པའི་གནས། །རང་གི་རིགས་དང་ཕྲིན་ལས་དང་། །སྒྲུབ་དང་མཆོད་དང་བསྒྲལ་བ་དང་། །བསྐུལ་ཞིང་གནས་ནས་དྲང་བ་དང་། །བསྡུ་དང་སྦྱང་ཞིང་གསད་དང་གསོ། །ལས་དང་ལས་ལ་མངག་པ་རྣམས། །མཆོག་དང་དམན་དང་བར་མ་ཡི། །བློ་དང་ཡིད་ལ་གང་རིགས་པའི། །འབར་བའི་རྒྱལ་པོ་སྐུ་བཞེངས་ལ། །རོལ་པའི་ཆོ་འཕྲུལ་རབ་སྟོན་ཅིང་། །གསུང་གི་ཡི་གེ་འཁོར་ལོའི་གནད། །འོད་ཟེར་རབ་ཏུ་ཁྱབ་མཛད་དེ། །ཐུགས་ཀྱི་གསང་བ་ཀློང་བརྟོལ་ནས། །མ་འགགས་ཐབས་ཀྱི་རང་བཞིན་ལས། །ས་དང་འགྲོ་བ་སྨིན་པའི་ཆོས། །ད་ལྟ་ཉིད་དུ་བཤད་དུ་གསོལ། །ཞེས་གསོལ་པ་དང་། དེ་ནས་བཅོམ་ལྡན་འདས་
དེ་བཞིན་གཤེགས་པ་ཐམས་ཅད་ཀྱི་བདག་པོ་ཧེ་རུ་ཀ་ཆེན་པོས། དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་རྡོ་རྗེ་བཙུན་མོའི་བྷ་ག་ཡངས་པའི་ཀློང་། དམ་ཚིག་ཆེན་པོའི་བྱིན་གྱིས་རླབས་པའི་དཀྱིལ་འཁོར་གྱི་ཏིང་ངེ་འཛིན་ལ་སྙོམས་པར་ཞུགས་ནས། རིག་པའི་སྐྱེས་བུ་ཆེན་པོའི་གཟུགས་བྱང་ཆུབ་ཀྱི་སེམས་རྡོ་རྗེ་ཁྲོ་བོ་ཆེན་པོའི་ལོངས་སྤྱོད་རབ་ཏུ་རྫོགས་པའི་སྐུ། འཇིགས་བྱེད་འབར་བ་ཀུན་ཏུ་བསྟན་ཏེ། དགེས་པ་ཆེན་པོའི་གད་མོའི་སྒྲས། སྟོང་གསུམ་གྱི་འཇིག་རྟེན་གྱི་ཁམས་རབ་ཏུ་གང་བར་མཛད་ནས། རྡོ་རྗེ་དྲག་པོ་ཆེན་པོའི་ཐུགས་གཉིས་སུ་མེད་པའི་བདེ་བ་ཆེན་པོ། ཐམས་ཅད་ཀྱི་ངོ་བོ་རབ་ཏུ་གསལ་བར་མཛད་དེ། འདུས་པའི་འཁོར་རྣམས་ལ་འདི་སྐད་ཅེས་བཀའ་སྩལ་ཏོ། །ཨེ་མ་འདུས་པའི་འཁོར་རྣམས་ཉོན། །དང་པོ་མཉམ་པའི་གཞི་ཉིད་ལས། །འདས་དང་མ་འོངས་བཅིངས་དང་གྲོལ། །བརྟན་དང་གཡོ་བ་སྲིད་དང་ཞི། །ཡོངས་སུ་གྲུབ་དང་ཀུན་ཏུ་བརྟགས། །གཞན་གྱི་དབང་དུ་གྱུར་པ་ཡིས། །ང་ཉིད་གཙོ་བོ་ལྟ་བུར་སྣང་། །ཕུང་པོ་ལྔ་དང་རྣམ་ཤེས་བརྒྱད། །ཡུལ་བརྒྱད་དང་ནི་འདུ་ཤེས་བཅུ། །འགྱུར་བ་བཞི་དང་བཅས་པ་ཀུན། །ཡང་དག་མཐོང་བ་གོང་མའི་གནས། །ཡིད་ལས་བྱུང་བའི་རྟོགས་པའི་དངོས། །མ་ལུས་ལུས་པ་མེད་པ་ཀུན། །བདུན་ཕྲག་བརྒྱད་ཕྲག་བཞི་བཞི་དང་། །བཅོ་བརྒྱད་དང་ནི་དྲུག་ཅུ་བཞི། །བཞི་དང་བདུན་དང་བཞི་གཉིས་དང་། །གྲུབ་པར་ཤེས་པ་འོག་མའི་གནས། །ང་ཉིད་ངར་སྣང་རྡོ་རྗེ་སྟེ། །སངས་རྒྱས་གཏི་མུག་དེ་བཞིན་གཤེགས། །ང་རྒྱལ་རིན་ཆེན་འབྱུང་བ་སྟེ། །པདྨ་ཆགས་རབ་ཧེ་རུ་ཀ །ཕྲག་དོག་ལས་ནི་རབ་ཏུ་བསྒྲུབ། །གཟུགས་དང་རྣམ་ཤེས་ཚོར་བ་དང་། །འདུ་ཤེས་འདུ་བྱེད་ལྔ་རང་བཞིན། །མ་བཅོས་པ་དང་ཞི་བ་དང་། །རབ་ཏུ་རྒྱས་དང་དབང་དུ་བྱེད། །ཚར་གཅོད་དྲག་པོ་ཇི་བཞིན་བསྒྲུབ། །ངང་ནས་ཤེས་ཤིང་གནས་པ་ཡིན། །ཞེས་གསུངས་སོ། །དཔལ་ཁྲག་འཐུང་འདུས་པ་
རྩ་བའི་རྒྱུད་ལས། གནས་དང་རིགས་བསྡུས་པའི་ལེའུ་སྟེ་གསུམ་པའོ།། །།དེ་ནས་ཧེ་རུ་ཀ་དཔལ་གྱིས། །འདུས་པའི་འཁོར་ལ་འདི་སྐད་གསུངས། །ང་ཡི་སྐུ་གསུང་ཐུགས་ཀྱི་བདག །ལུས་ངག་ཡིད་གསུམ་བསྒྲུབ་འདོད་པས། །ཤེས་རབ་ཀྱིས་ནི་བློ་ཕྱེ་ནས། །གུས་པ་ཡི་ནི་དམ་ཚིག་དང་། །གཙང་དང་འཇིགས་པའི་བརྟུལ་ཞུགས་བཅས། །སྲོག་ལུས་ཡན་ལག་རྫས་རྣམས་ཀུན། །བླ་མ་མཉེས་པར་བྱ་ཕྱིར་དབུལ། །དངོས་གྲུབ་འདོད་ཕྱིར་གསོལ་བ་གདབ། །བློ་ཞན་ཤེས་རབ་ཆུང་བ་ཡིས། །བསྒྲུབས་ཀྱང་འགྲུབ་པར་མི་འགྱུར་ཏེ། །ཕུང་བྱེད་གཉིས་ཀ་བསྲེག་པས་ན། །དེ་བས་གཞན་དུ་བསྟན་པ་མེད། །ངེས་པར་བརྟགས་པའི་ས་གཞི་ལ། །ཕུན་སུམ་ཚོགས་པ་བཞི་ལྡན་ནས། །དུར་ཁྲོད་ས་ནི་རབ་ཏུ་བརྟགས། །འབྱུང་པོའི་གཏོར་མ་བཏང་ནས་ཀྱང་། །གསང་བ་དོན་གྱི་ལས་རྣམས་སྤྱད། །རྣམ་པར་རྟོག་པ་བགེགས་ཡིན་ཏེ། །རྣམ་རྟོག་རང་གི་སེམས་ལས་འབྱུང་། །སེམས་ཉིད་ཡེ་ནས་དག་ཤེས་ན། །གཞན་ནས་བགེགས་ཞེས་བྱ་བ་མེད། །མཐུན་པའི་གཉེན་པོས་འདུལ་དོན་དུ། །ཞེ་སྡང་རྡོ་རྗེའི་ཏིང་འཛིན་གྱིས། །མཁའ་ལ་ཁྲོ་བོ་འཆོལ་པ་སྤྲོ། །བསྐྲད་དང་བརྡེག་དང་གཅོད་པར་བྱ། །སྔ་མ་ལས་ནི་གནས་བསྒྱུར་ཏེ། །རྫས་དང་ས་གཞི་བརྟགས་པ་དེར། །སློབ་དཔོན་ཇི་བཞིན་སྟན་བདེར་གནས། །རབ་ཏུ་མཉམ་པའི་ཚད་གཞལ་ཏེ། །རང་བྱུང་བདུད་རྩིའི་ཆག་ཆག་གདབ། །བ་སུ་ཏ་ཡི་ཐིག་གིས་བཅད། །རེ་མིག་ཐོད་པའི་ཕྲེང་བ་བཞི། །ཕོ་བྲང་ཟླ་གམ་ཆེན་པོ་དགུ། །མཐིང་ག་དཀར་སེར་དམར་དང་ལྗང་། །རབ་ཏུ་དམར་བ་དག་ཏུ་བྱ། །འཁོར་ལོ་རྩིབས་བརྒྱད་བརྒྱད་གཉིས་བྱ། །ཕྱོགས་བཞི་སྒོ་བཞི་ནང་ཁྱམས་བཅས། །འོད་ཀྱི་རང་བཞིན་བརྩིག་པས་བཅད། །ཕྱི་རོལ་འདོད་ཡོན་གནས་ལ་སོགས། །མཁའ་འགྲོ་དུར་ཁྲོད་གནས་ཆེན་ཀུན། །ཇི་ལྟར་གསུངས་པ་བཞིན་དུ་བྲི། །སྔོན་གྱི་ཕྲིན་ལས་ཤེས་པར་བྱ། །རྡུལ་ཚོན་གཞལ་ཡས་ཁང་དེ་ལ། །ཇི་ལྟར་དགོས་པའི་རྫས་རྣམས་ནི། །
ལྷ་རྣམས་རབ་ཏུ་འབྱུང་བ་ཡི། །གནས་རྣམས་སོ་སོ་དེ་ཉིད་དུ། །ཐོད་པ་རཱུ་པ་བྲི་བ་དང་། །སོ་སོའི་ཡི་གེ་ཕྲེང་བའི་སྔགས། །སྣང་བའི་འོད་དང་བཅས་པ་དང་། །ལྷ་ཞལ་ལྡན་པའི་ཕུར་པ་རྣམས། །སྐུ་གསུང་ཐུགས་དང་ཕྲིན་ལས་རྟེན། །མཚན་དང་ལྡན་པའི་སྣོད་ནང་དུ། །འབྲུ་བཅུད་བདུད་རྩི་རབ་སྦྱར་བ། །ཡོན་ཏན་དངོས་གྲུབ་འབྱུང་བའི་རྟེན། །རྫས་ཀྱི་འཁོར་བ་མཛེས་པར་གཞག །ཕྱི་རོལ་བར་ཆད་སྲུང་བའི་རྒྱན། །མིག་གི་རྟེན་ཡང་མངོན་པར་དགྲམ། །རྡོ་རྗེ་སློབ་དཔོན་རྒྱལ་ཐེབས་དང་། །ཤེས་རབ་མ་དང་ལས་མཁན་དང་། །དྲལ་གྱི་དགོས་པ་ཚངས་པ་ཡིས། །ཕྱི་དང་ནང་གི་འགྲུལ་བཅད་དེ། །ལྷག་པའི་རྟགས་ཀྱི་ཀུན་མཚོན་ནས། །སྒྲུབ་རྫས་དེ་དག་བྱིན་གྱིས་བརླབ། །རང་གི་གནས་སུ་མངའ་གསོལ་ཏེ། །མཆོག་ཏུ་བྱ་ཕྱིར་རབ་ཏུ་བརྟན། །དམིགས་མེད་སྟོབས་ཀྱི་གདེང་ཅན་གྱིས། །སྐུ་མཆོག་འབར་བའི་ཚུལ་དུ་བསམ། །ཁམས་གསུམ་ཁྲག་ཏུ་དམིགས་ནས་ཀྱང་། །དུར་ཁྲོད་ཀུན་ཏུ་ཁྱབ་པར་བསམ། །ཞི་བའི་ཚུལ་གྱིས་བཀའ་བསྒོ་ཞིང་། །ཁྲོ་བོའི་ལས་ཀྱིས་བསྲུང་བ་ནི། །འབར་བའི་མེ་དང་མཚོན་ཆ་ལྔ། །ཁྲག་འཐུང་ལྷ་རྣམས་སྤྲུལ་པའི་ཚོགས། །བལྟ་བ་རྣམ་དག་དོན་རྣམས་ཀྱིས། །ཕྱི་ནང་གསང་བ་ཀུན་ཏུ་བསྡམས། །ཚོགས་བསག་ཕྲ་མོས་ཁ་བསྐངས་ཤིང་། །ཞི་བའི་མཆོད་པས་མཉེས་པ་དག །བསྙེན་པོའི་དོན་དུ་འདི་དག་བྱ། །དེ་ལྟར་བདག་ཉིད་བརྟན་བྱས་ནས། །ཡེ་ཤེས་དཀྱིལ་འཁོར་བསྒྲུབ་པ་ནི། །དང་པོ་ཆོས་ཀྱི་དབྱིངས་ཉིད་ལས། །དམིགས་པ་མེད་པའི་དོན་གྱིས་བསྒོམ། །ཆོས་དབྱིངས་ཡེ་ཤེས་དེ་ཉིད་ཀྱིས། །མ་ཁྱབ་པ་ལ་ཐུགས་རྗེ་བསྐྱེད། །དངོས་ནི་ཧཱུཾ་དུ་བྱིན་བརླབས་ནས། །རིན་ཆེན་གསལ་བར་ཤར་བ་དང་། །བྱང་ཆུབ་སེམས་ཀྱི་འོད་ཟེར་འཕྲོས། །མོས་པའི་ཐུགས་ལ་མཉེས་བསམས་ཏེ། །འོད་འདུས་ཐོག་མའི་ཧཱུཾ་ལ་གཟུད། །སངས་རྒྱས་མཁའ་འགྲོ་ཡུམ་ལྔ་ཡི། །མཁའ་དབྱིངས་རྣམ་དག་འབྱུང་བ་ལྔ། །རང་གི་ས་བོན་ལྔ་ལས་བསྐྱེད། །དེ་ནས་དུར་ཁྲོད་བདག་
པོ་དག །ཕྱག་རྒྱ་ཆེ་དང་ལྡན་པས་ནི། །རབ་ཏུ་འབད་པས་བསྒོམ་བྱས་ཏེ། །དེ་ཡི་ནང་དུ་སྔར་བཤད་པའི། །ཚད་མེད་གནས་ཏེ་བསྒོམ་བྱ་བ། །སྐུ་གསུམ་ལྡན་པའི་ཐོད་པ་ནི། །སྐམ་པོ་ཤ་རིས་ཐོད་རློན་རྣམས། །རྨང་དང་བརྩིག་པ་ཁ་བད་ལ། །ལྷ་ཆེན་ཕུང་པོ་ཀ་བ་ལ། །གཟའ་ཀླུ་རྒྱུ་སྐར་རྣམས་ཀྱིས་ཕུབས། །དབང་ཕྱུག་དང་ནི་འཁོར་ལོས་སྒྱུར། །བ་དན་ཕྱར་ཞིང་རྒྱལ་མཚན་ཕྱར། །ཀུན་གྱི་ཚུལ་དང་མ་ལུས་ལྡན། །དྲག་པོའི་གནས་ཀྱི་དབུས་དག་ཏུ། །རཱུ་ཏྲ་ཉི་ཟླ་པདྨའི་སྟེང་། །གནས་གཞན་རྣམས་སུ་ཏི་རའོ། །ལྷ་རྣམས་རང་གི་ས་བོན་ལས། །ཕྱག་མཚན་སྙིང་པོ་ཕྲ་མོ་དག །བརྟན་པར་གྱུར་ནས་མཁའ་ལ་གཞག །བསྐུལ་བའི་རང་བཞིན་ཀུན་འདུས་པས། །དེས་ཀྱང་སྤྲོ་བའི་ལས་རྣམས་བྱས། །ང་ཡི་རང་བཞིན་ལྷ་རྣམས་ཀུན། །སོ་སོའི་སྐུ་མདོག་ཕྱག་མཚན་དང་། །བསྐྱེད་རྫོགས་གྲུབ་པའི་ལྷ་དག་བསྒོམ། །དེ་ཡི་རིམ་པའང་འདི་ལྟ་སྟེ། །མི་དམིགས་ཆོས་ལ་བློ་བརྟགས་ཤིང་། །ཡེ་ཤེས་ཅན་གྱི་བྱིན་སྟོབས་ཀྱིས། །ཐམས་ཅད་དམ་ཚིག་ཆེན་པོ་ཡི། །བདེ་མཆོག་སྒྱུ་མའི་བརྡའ་མཚོན་ཏེ། །རྡོ་རྗེ་པདྨ་ལྡན་བྱས་ནས། །དབྱིངས་ཀྱི་བདེ་ཆེན་ལས་བྱུང་བའི། །རང་གི་ཡེ་ཤེས་དེ་ལས་བསྐྱེད། །ཇི་བཞིན་མཁའ་ལ་གསལ་དག་པའི། །སྤྲིན་མེད་ཉི་མའི་འོད་ལྟར་འཚེར། །རང་གི་བྱིན་གྱིས་བརླབས་ལས་བྱུང་། །རིགས་ཀྱི་བདག་པོས་རང་དབང་བསྐུར། །ལས་ཀྱི་ཁྱད་པར་བསྟན་ནས་ཀྱང་། །སོ་སོའི་གནས་སུ་བརྟན་པར་བསྒོམ། །ཡེ་ཤེས་དཀྱིལ་འཁོར་སྤྱན་དྲངས་ཏེ། །བཞུགས་དང་རྟེན་དང་མི་གཡོ་བས། །དམ་ཚིག་ཟིལ་གནོན་ཕྱག་བྱ་དང་། །མཆོད་དང་བསྟོད་དང་བཟའ་བ་དག །ཚུལ་བཞིན་གོམས་པའི་བློ་དག་གི། །ཅི་རིགས་སུ་ནི་སྤྱད་པར་བྱ། །དམ་ཚིག་མཆོག་གི་མཆོད་པ་དང་། །སྐུལ་ཚིག་དབྱངས་ཀྱིས་དེ་དག་མཉེས། །འཁོར་བཅས་མཆོད་པ་རྫོགས་ནས་ནི། །བསྙེན་པའི་ལུང་བཞིན་བརྩོན་པར་འབད། །ཞག་གྲངས་དུས་ན་བརྟགས་པའམ། །མཚན་མ་བརྟན་པོ་བྱུང་
བ་ན། །བསྒྲུབ་པ་ཆེན་པོ་བརྩམ་པར་བྱ། །དཔལ་ཁྲག་འཐུང་འདུས་པ་རྩ་བའི་རྒྱུད་ལས། བསྙེན་པ་དང་བསྒྲུབ་པ་ཡང་དག་པར་བསྡུས་པའི་ལེའུ་སྟེ་བཞི་པའོ།། །།དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་ནམ་མཁའི་དབྱིངས་དང་མཉམ་པའི་སྐུ་གསུང་ཐུགས་རྡོ་རྗེ་བཙུན་མོའི་བྷ་ག་ལ་དམ་ཚིག་ཆེན་པོའི་ཕྱག་རྒྱ་བྱིན་གྱིས་རློབས་པའི་ཏིང་ངེ་འཛིན་ལ་སྙོམས་པར་ཞུགས་ནས། ནམ་མཁའི་ཁམས་དང་མཉམ་པའི་སེམས་ཅན་གྱི་ཁམས་ཐམས་ཅད་ཀྱི། བྱང་ཆུབ་ཀྱི་སེམས་རྡོ་རྗེ་ཇི་སྙེད་པ་ཐམས་ཅད་རབ་ཏུ་འབར་བའི་སྐུར་བྱིན་གྱིས་བརླབས་ནས། འདི་སྐད་བཀའ་སྩལ་ཏོ། །ཨེ་མ་འདུས་པའི་འཁོར་ཚོགས་ཉོན། །ང་ཡི་སྐུ་གསུང་ཐུགས་ཀྱི་བདག །རྣམ་པར་གྲོལ་བ་མཚོན་པའི་ཕྱིར། །བཛྲ་ཧེ་རུ་ཀ་དཔལ་གྱི། །རྟགས་ཀྱི་ཕྱག་རྒྱ་འདི་ལྟར་རོ། །གཡས་དཀར་གཡོན་དམར་དབུས་མཐིང་ཞལ། །ཞལ་གསུམ་ཕྱག་དྲུག་ཞབས་བཞིར་བགྲད། །རྡོ་རྗེ་ཁ་ཊྭཱྃ་རྔེའུ་ཆུང་གཡས། །དྲིལ་བུ་རྒྱུ་ཞགས་ཁྱུང་ཁྲ་གཡོན། །དྲིལ་བུ་དུང་དམར་རྒྱུ་ཞགས་གཡོན། །ཧེ་རུ་ཀ་ཡི་ཡེ་ཤེས་རྒྱ། །ཤེས་རབ་དབྱིངས་མའི་ཕྱག་རྒྱ་ནི། །ཞལ་གཅིག་ཕྱག་གཉིས་སྐུ་མདོག་མཐིང་། །གཡས་པ་ཐབས་ཀྱི་ཡབ་ལ་འཁྱུད། །གཡོན་པ་དུང་དམར་གཙོ་ལ་སྟོབ། །ཀྲོ་དྷཱི་ཤྭ་རཱི་དབྱིངས་ཀྱི་རྒྱ། །བུཌྜྷ་ཧེ་རུའི་ཕྱག་རྒྱ་ནི། །དབུ་གསུམ་ཕྱག་དྲུག་ཞབས་བཞིར་བགྲད། །སྨུག་ནག་མཐིང་དང་དམར་བའི་ཞལ། །ཏི་ར་རྡོ་རྗེ་ཁྱུང་ཆེན་གཡས། །འཁོར་ལོ་ཏི་ར་ཁྱུང་ཆེན་གཡས། །བྷན་དམར་རྒྱུ་ཞགས་བ་སུ་གཡོན། །བུཌྜྷ་ཀྲོ་དྷཱི་ཡུམ་དང་སྦྱོར། །རཏྣ་ཧེ་རུ་ཀ་ཡི་ཕྱག་རྒྱ་ནི། །དབུ་གསུམ་ཕྱག་དྲུག་ཞབས་བཞིར་བགྲད། །སེར་ནག་མཐིང་དང་དམར་བའི་ཞལ། །རིན་ཆེན་བྱིས་དབྱུག་དགྲ་སྟྭ་གཡས། །བྷན་དམར་རི་རབ་རྒྱུ་ཞགས་གཡོན། །རཏྣ་ཀྲོ་དྷཱི་ཡུམ་དང་སྦྱོར། །པདྨ་ཧེ་རུའི་ཕྱག་རྒྱ་ནི། །དབུ་གསུམ་ཕྱག་དྲུག་ཞབས་བཞིར་བགྲད། །དམར་ནག་མཐིང་དང་དཀར་བའི་ཞལ། །པདྨ་བེ་ཅོན་དགྲ་སྟྭ་གཡས། །བྷན་དམར་ཐོང་གཤོལ་རི་རབ་
གཡོན། །པདྨ་ཀྲོ་དྷཱི་ཡུམ་དང་སྦྱོར། །ཀརྨ་ཧེ་རུའི་ཕྱག་རྒྱ་ནི། །དབུ་གསུམ་ཕྱག་དྲུག་ཞབས་བཞིར་བགྲད། །ལྗང་ནག་དཀར་དང་དམར་བའི་ཞལ། །རྒྱ་གྲམ་རལ་གྲི་དགྲ་སྟྭ་གཡས། །ཐོད་ཁྲག་རི་རབ་ཐོང་གཤོལ་ཕུར་པ་གཡོན་གང་གཡོན། །ཀརྨ་ཀྲོ་དྷཱི་ཡུམ་དང་སྦྱོར། །ཡུམ་ཆེན་རྣམས་ཀྱི་ཕྱག་རྒྱ་ནི། །ཞལ་གཅིག་ཕྱག་གཉིས་ཞབས་གཉིས་འཁྱུད། །སོ་སོའི་གཙོ་བོའི་སྐུ་མདོག་ལ། །གཡས་པ་ཁ་ཊྭཱཾ་ཡབ་ལ་འཁྱུད། །གཡོན་པ་དུང་དམར་གཙོ་ལ་སྟོབ། །ཡབ་ཡུམ་འདི་དག་ཐམས་ཅད་ཀུན། །ཉི་ཟླ་པདྨ་རཱུ་ཏྲ་གནོན། །ཁྲོ་བོའི་གར་ཉམས་དགུ་ལྡན་ཞིང་། །དུར་ཁྲོད་འཇིགས་པའི་ཆས་ཀྱིས་བརྒྱན། །མ་མོ་རྣམས་ཀྱི་ཕྱག་རྒྱ་ནི། །ཀོའུ་རི་བྷན་དམར་བྱིས་དབྱུག་སྔོ། །ཙོའུ་རི་མདའ་གཞུ་འགེངས་མ་སེར། །པྲ་མོ་ཆུ་སྲིན་རྒྱལ་མཚན་དམར། །བེ་ཏ་བྱི་ཟ་རྡོ་འཕྱར་ནག །པུཀྐ་དམར་སེར་བྱིས་རྒྱུ་འདྲེན། །གྷསྨ་དུང་དམར་ཁྲག་འཐུང་ལྗང་། །སྨ་ཤ་མཐིང་ནག་བྱིས་སྙིང་ཟ། །ཙན་དྷ་སེར་སྐྱ་མཆོག་ལུས་འབྲལ། །ཕྲ་མེན་རྣམས་ཀྱི་ཕྱག་རྒྱ་ནི། །སེང་ཧ་སེར་མོ་ཞིང་ཟ་སེར། །བྱཱ་གྷྲ་དམར་མོ་ལག་བསྣོལ་སྟག །སྲི་ལ་ནག་མོ་བྱིས་ལྡག་ཝ། །ཤྭ་ན་མཐིང་ག་ཤ་འདྲད་སྤྱང་། །གྲྀ་ཌྷ་དམར་མོ་དུང་གྲི་རྒོད། །ཀང་ཀ་དམར་སྨུག་ཞིང་ཁུར་དུར། །ཀཱ་ཀ་བྱ་རོག་བྷན་གྲི་གནག །ཨུ་ལཱུ་མཐིང་ནག་ལྕགས་ཀྱུ་འུག །ལྷ་མོ་དང་ནི་ཕྲ་མེན་རྣམས། །ཁྲོ་མོའི་ལུས་ལ་ཅུང་ཟད་ཞི། །ཁྲོ་བོ་རྣམས་ཀྱི་ཕྱག་རྒྱ་ནི། །ཧཱུཾ་ཀ་ར་ནི་སྐུ་མདོག་སྔོ། །ཕྱག་གཉིས་མདའ་གཞུ་འགེངས་ཤིང་འཕེན། །རྣམ་པར་རྒྱལ་བ་སྐུ་མདོག་དཀར། །གཡས་པ་འཁོར་ལོ་གཡོན་ཏྲི་ཤཱུལ། །དབྱུག་པ་སྔོན་པོ་སྐུ་མདོག་སྔོ། །མེ་དབལ་གཡས་ལ་དབྱུག་ཏོ་གཡོན། །གཤིན་རྗེ་གཤེད་པོ་སྔོ་སྐྱའི་མདོག །གཡས་པ་ཐོད་དབྱུག་གཡོན་དགྲ་སྟྭ། །མི་གཡོ་བ་ནི་མདོག་ལྗང་སྔོན། །རལ་གྲི་གཡས་ལ་ཞགས་པ་གཡོན། །རྟ་མགྲིན་ཅན་ནི་སྐུ་མདོག་དམར། །སྤུ་གྲི་གཡས་ལ་ལྕགས་སྒྲོག་གཡོན། །འདོད་པའི་རྒྱལ་པོ་དམར་སྐྱའི་མདོག །བྷནྡྷ་གཡས་ལ་རྔ་ཡབ་གཡོན། །བདུད་རྩི་འཁྱིལ་པ་ལྗང་ནག་སྟེ། །གཡས་
པས་རྒྱ་གྲམ་གཡོན་དྲིལ་བུ། །ཁམས་གསུམ་རྣམ་རྒྱལ་སྐུ་མདོག་མཐིང་། །རྡོ་རྗེ་གཡས་ལ་སྦྲུལ་ཞགས་གཡོན། །སྟོབས་པོ་ཆེ་ནི་དུང་ཁའི་མདོག །ཐོ་བ་གཡས་ལ་ཞགས་པ་གཡོན། །ཁྲོ་བོ་འདི་དག་ཐམས་ཅད་ཀྱང་། །དཔལ་གྱི་ཆས་ཀྱིས་རབ་བརྒྱན་པའོ། །རྟ་གདོང་དཀར་མོ་ལྕགས་ཀྱུ་འདྲེན། །ཕག་གདོང་སྔོན་མོ་མཆེ་ཞགས་བསྡམ། །སྤྲེའུ་གདོང་དམར་མོ་ལྕགས་སྒྲོག་འཆིངས། །སྤྱང་གདོང་ལྗང་གུ་དྲིལ་འཁྲོལ་བརྡེག །ཁྲོ་མོའི་ཆས་ཀྱིས་ཅུང་ཟད་བརྒྱན། །ཀུན་ཀྱང་གཙོ་ལ་འདུད་ཅིང་བལྟ། །དེ་ཉིད་རིགས་ཀྱི་དབུ་བརྒྱན་ཅིང་། །རང་གི་སེམས་དཔའ་སྙིང་ལ་གནས། །གཟུགས་སུ་བརྟགས་པའི་དངོས་པོ་ཀུན། །ང་ཡི་ཕྱག་རྒྱའི་དཀྱིལ་འཁོར་ཡིན། །ཞེས་གསུངས་སོ། །དཔལ་ཁྲག་འཐུང་འདུས་པ་རྩ་བའི་རྒྱུད་ལས། ཕྱག་རྒྱའི་ཚོགས་ཡང་དག་པར་བསྡུས་པའི་ལེའུ་སྟེ་ལྔ་པའོ།། །།དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོ་དེས། དུས་གསུམ་གྱི་བདེ་བར་གཤེགས་པ་ཐམས་ཅད་གསུང་གི་རྡོ་རྗེ་གསང་བའི་སྙིང་པོ་ཡང་དག་པར་འབྱུང་བ་འོད་ཟེར་རྣམ་པར་འཕྲོ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། འཇིག་རྟེན་གྱི་ཁམས་ཐམས་ཅད་འཇིགས་པའི་སྒྲ་ཆེན་པོས་གཡོ་བར་མཛད་ནས། འདི་སྐད་ཅེས་བཀའ་སྩལ་ཏོ། །ཧཱུཾ་ཧཱུཾ་ཧཱུཾ་ཧཱུཾ་ཧཱུཾ། བྷྱོ་བྷྱོ་བྷྱོ་བྷྱོ་བྷྱོ། ཧ་ཧ་ཧ་ཧ། ཧ་ཧ་ཧ་ཧ། ཧེ་ཧེ་ཧེ་ཧེ། ཧེ་ཧེ་ཧེ་ཧེ། ཧཱུཾ་ཧཱུཾ་ཧཱུཾ་ཧཱུཾ་ཧཱུཾ། ཧཱུཾ་ཧཱུཾ་ཧཱུཾ་ཧཱུཾ་ཧཱུཾ། ཛཿཧཱུཾ་བཾ་ཧོཿ། རྩ་བའི་སྙིང་པོའོ། །ཨོཾ་རུ་ལུ་རུ་ལུ་ཧཱུཾ་བྷྱོ་ཧཱུཾ། ཉེ་བའི་སྙིང་པོའོ། །ཨཱོཾ་བཛྲ་ཤྲཱི་ཧེ་རུ་ཀ་ཧཱུཾ། ཨཱོཾ་བུཌྜྷ་ཤྲཱི་ཧེ་རུ་ཀ་ཧཱུཾ། ཨཱོཾ་རཏྣ་ཤྲཱི་ཧེ་རུ་ཀ་ཧཱུཾ། ཨཱོཾ་པདྨ་ཤྲཱི་ཧེ་རུ་ཀ་ཧཱུཾ། ཨཱོཾ་ཀརྨ་ཤྲཱི་ཧེ་རུ་ཀ་ཧཱུཾ། ཨཱོཾ་བཛྲ་ཀྲོ་དྷཱི་ཤྭ་རི་སྟྭཾ། བུཌྜྷ་ཀྲོ་དྷཱི་ཤྭ་རི་སྟྭཾ། རཏྣ་ཀྲོ་དྷཱི་ཤྭ་རི་སྟྭཾ། པདྨ་ཀྲོ་དྷཱི་ཤྭ་རི་སྟྭཾ། ཨོཾ་ཀརྨ་ཀྲོ་དྷཱི་ཤྭ་རི་སྟྭཾ། བཛྲ་ཀོའུ་རཱི་ཧ། བཛྲ་ཙོའུ་རཱི་ཧ། བཛྲ་པྲ་མོ་ཧེ་ཧ། བཛྲ་བེ་ཏཱ་ལཱི་ཧ། བཛྲ་པུཀྐ་སཱི་ཧ། བཛྲ་གྷསྨ་རཱི་ཧ། བཛྲ་སྨ་ཤ་ནཱི་ཧ། བཛྲ་ཙནྡ་ལཱི་ཧ། བཛྲ་སིངྷ་མུ་ཁ་ཧེ། བཛྲ་བྱཱ་གྷྲི་མུ་ཁ་ཧེ། བཛྲ་ཤྲི་ག་ལ་མུ་ཁ་ཧེ། བཛྲ་ཤྭ་ན་མུ་ཁ་ཧེ། བཛྲ་གྲྀ་ཌྷ་མུ་
ཁ་ཧེ། བཛྲ་ཀང་ཀ་མུ་ཁ་ཧེ། བཛྲ་ཀཱ་ཀ་མུ་ཁ་ཧེ། བཛྲ་ཨུ་ལཱུ་མུ་ཁ་ཧེ། བཛྲ་ཧཱུཾ་ཀ་ར་ཧཱུཾ། བཛྲ་བི་ཛ་ཡ་ཧཱུཾ། བཛྲ་ནཱི་ལ་དཎྜ་ཧཱུཾ། བཛྲ་ཡ་མཱནྟ་ཀ་ཧཱུཾ། བཛྲ་ཨཱརྱ་ཨ་ཙ་ལ་ཧཱུཾ། བཛྲ་ཧ་ཡ་གྲཱི་བ་ཧཱུཾ། བཛྲ་ཨ་བ་ར་ཛི་ཏ་བཛྲ་ཨ་མྲྀ་ཏ་ཀུཎྜ་ལི་ཧཱུཾ། བཛྲ་ཏྲཻ་ལོཀྱ་བི་ཛ་ཡ་ཧཱུཾ། བཛྲ་མ་ཧཱ་བ་ལ་ཧཱུཾ།བཛྲ་ཨཱརྻ་ཏེ་ཛ་ཏང་ཛ། བཛྲ་ཨ་མུ་ཁེ་ཧཱུཾ། བཛྲ་ལོ་ཀ་བཾ། བཛྲ་བྷསྨི་པ་ལ་ཡ་བ་ཏུ་ཧོ། རབ་ཏུ་བསྐྱེད་པའི་སྙིང་པོའོ། །ཨཱོཾ་བཛྲ་ཤྲཱི་ཧེ་རུ་ཀ་ཀྲོ་དྷཱི་ཤྭ་རི་སྟྭཾ།ས་མ་ཡ་ཧོ། ས་མ་ཡ་སྟྭཾ། རཱ་གོ྅ཧཾ། རཱ་ག་ཡཱ་མི། བཛྲ་སརྦ་ཏ་ཐཱ་ག་ཏ་ཨཱ་ནུ་རཱ་ག་ཎ་བཛྲ་སྭ་བྷཱ་ཝ་ཨཱདྨ་ཀོ྅ཧཾ། ཧཱུཾ་སྥ་ར་ན་ཕཊ། སཾ་ཧ་ར་ན་ཧཱུཾ། ངེས་པར་འབྱུང་བའི་སྙིང་པོའོ། །ཨཱོཾ་སརྦ་ཏ་ཐཱ་ག་ཏ་ཙཀྲ་ཀཱ་ཡ་ཨ་དྷིཥྛ་ན་ཨཱོཾ། ཨཱོཾ་སརྦ་ཏ་ཐཱ་ག་ཏ་བཛྲ་པདྨ་ཝཱ་ཀ་ཨ་དྷིཥྛ་ན་ཨཱཿ། ཨཱོཾ་སརྦ་ཏ་ཐཱ་ག་ཏ་བཛྲ་ཙིཏྟ་ཨ་དྷིཥྛ་ན་ཧཱུཾ། བྱིན་གྱིས་རླབས་པའི་སྙིང་པོའོ། །ཨཱོཾ་མ་ཧཱ་ཤཱུ་ནྱ་ཏ་ཨ་དྷ་རི་ཤ་ས་མ་ཧཱ་པྲ་ཏྱ་བེ་ཀྵ་ཎ་ཀྲྀ་དྱཱ་ནུ་ཥྛཱ་ན་ཛྙཱ་ན་བཛྲ་སྭ་བྷཱ་ཝ་ཨཱདྨ་ཀོ྅ཧཾ། ཨ་བྷི་ཥིཉྩ་མཾ།དབང་སྐུར་བའི་སྙིང་པོའོ། །ཨཱོཾ་བཛྲ་ཤྲཱི་ཧེ་རུ་ཀ་ཀྲོ་དྷཱི་ཤྭ་རི་ཨེ་ཙཀྲ་མཎྜ་ལ་ཨཱ་ར་ལི་ཧྲིང་ཧྲིང་ཛ་ཛཿ། བོད་པའི་སྙིང་པོའོ། །ཨཱོཾ་བཛྲ་ཤྲཱི་ཧེ་རུ་ཀ་ཀྲོ་དྷཱི་ཤྭ་རི་ཨེ་ཙཀྲ་མཎྜ་ལ་ས་མ་ཡ་ཛཿ། པྲ་བེ་ཤ་ཏིཥྛ་ཨ་ཨཱཿ། བཞུགས་པའི་སྙིང་པོའོ། །ཨཱོཾ་བཛྲ་ཤྲཱི་ཧེ་རུ་ཀ་ཀྲོ་དྷཱི་ཤྭ་རི་ཀ་རུ་ཎ་མ་ཧཱ་མཱཾ་ས་རཀྟ་ཨ་མྲྀ་ཏ་ཨི་དཾ་གྲྀ་ཧྞ་བ་ལིཾ་ཏ་པི་པ་ཧོ། ཁ་ཁ་ཁཱ་ཧི་ཁཱ་ཧི་ཨ་ལ་ལ་ཧོ། བསྟབ་ཅིང་བཟའ་བའི་སྙིང་པོའོ། །ཨཱོཾ་བཛྲ་ཤྲཱི་ཧེ་རུ་ཀ་ཀྲོ་དྷཱི་ཤྭ་རི་མ་ཧཱ་བོ་དྷི་ཙིཏྟ་ཛྙཱ་ན་ཨ་ཧོ་སུ་ཁ། ཀཱ་ཡ་ཝཱ་ཀ་ཙིཏྟ་སིདྡྷི་སིདྡྷི་ཧཱུཾ་ཧཱུཾ་ཧྲིཾ་ཧྲིཾ། དངོས་གྲུབ་བསྡུ་བའི་སྙིང་པོའོ། །ཐམས་ཅད་ཉེ་བ་ནི་འདིས་བྱའོ། །ཨཱོཾ་རུ་ལུ་རུ་ལུ་ཧཱུཾ་བྷྱོ་ཧཱུཾ། དག་པའི་ཧེ་རུ་ཀ་ཉིད་ཀྱིས། །གཉིས་མེད་དོན་ལ་རབ་བརྩོན་པས། །དབྱངས་དྲུག་བླངས་པས་དོན་དྲུག་རྫོགས། །སྔགས་ཀྱི་ཡི་གེའི་སྒྲ་བསྒྲགས་པས། །དཀྱིལ་འཁོར་ལྷ་རྣམས་གསལ་བར་བསྐྱེད། །འབྲུག་ལྟར་ཟབ་ཅིང་སྒྲ་བསྒྲགས་པས། །གཏུམ་དང་གདུག་པ་ལྷན་ནེར་འགྱུར། །མཁུར་བ་དབུགས་ཀྱི་རླུང་འབྱིན་གྱིས། །ཁྲོ་བོ་ཁྲོ་མོའི་སྤྲུལ་པ་འགྱེད། །རྡོ་རྗེ་སྲིན་པོའི་ངུར་
སྐད་ཀྱིས། །གདུག་པ་ཅན་རྣམས་སྤ་བཀོང་འདུལ། །འཁུན་ཅིང་གདུང་བའི་སྒྲ་འབྱིན་པས། །དྲེགས་པའི་ཚོགས་རྣམས་རྡུལ་དུ་རློག །ཚངས་པ་དབྱངས་ཀྱི་འདྲེན་ཚུལ་གྱིས། །ཐམས་ཅད་མ་ལུས་དབང་དུ་སྡུད། །ཅེས་གསུངས་སོ། །དཔལ་ཁྲག་འཐུང་འདུས་པ་རྩ་བའི་རྒྱུད་ལས། ཡི་གེ་ཕྲེང་བའི་དོན་ཡང་དག་པར་བསྡུས་པའི་ལེའུ་སྟེ་དྲུག་པའོ།། །།དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོ་དེས། དེ་ཉིད་དེ་བཞིན་གཤེགས་པ་ཐམས་ཅད་ཀྱི་ཐུགས་ཀྱི་རྡོ་རྗེ་དེ་ཁོ་ན་ཉིད་ཀྱི་སྙིང་པོ་ཆོས་ཐམས་ཅད་ཀྱི་རང་བཞིན་མཉམ་པ་ཉིད་རྣམ་པར་སྤྲོ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། སེམས་ཅན་ཐམས་ཅད་ཀྱི་སེམས་ཀྱི་དོན་དམ་པ་ལྷུན་གྱིས་གྲུབ་པ་ཡོངས་སུ་རྫོགས་པའི་དཀྱིལ་འཁོར་ཆེན་པོར་བྱིན་གྱིས་བརླབས་ནས། འདི་སྐད་ཅེས་བཀའ་སྩལ་ཏོ། །ཨེ་མ་འཁོར་བའི་སེམས་ཅན་རྣམས། །ང་ཡི་ངང་ལས་མ་འདས་ཀྱང་། །ཉོན་མོངས་ལས་ཀྱི་འཁྲུལ་པ་ཡིས། །བརྟགས་ཏེ་ང་ལ་གཟུགས་སུ་མཐོང་། །སྒྲ་དང་དྲི་རོ་རེག་དང་ཆོས། །ཐོས་ཤིང་ཚོར་མྱོང་བརྟགས་ཤིང་སྤྱད། །སྐྱེ་བོ་དེ་ཡིས་ང་མི་མཐོང་། །ང་ལ་གཟུགས་མེད་མཐོང་བ་མེད། །སྒྲ་མེད་ཐོས་པའང་ཡོད་མ་ཡིན། །རོ་དང་རེག་མེད་མྱོང་ཚོར་མེད། །ཡིད་ཆོས་རྟོག་པ་ག་ལ་ཡོད། །བརྟེན་པའི་གཞི་ནི་གཞལ་མེད་ཁང་། །འབྱུང་བ་ལྔ་ནི་དག་པའི་ཡུམ། །ཕུང་པོ་ལྔ་ནི་གྲོལ་བའི་ཡབ། །དབང་པོ་དག་པ་ཕྱག་ཡིན་ཏེ། །ཕྱག་མཚན་དྲུག་ནི་ཡུལ་དྲུག་འཛིན། །ཁམས་ཆེན་བཅོ་བརྒྱད་དཔའ་བོ་ཡི། །ཉམས་དགུ་དང་ནི་ཆས་བརྒྱད་དོ། །རྩ་བའི་ཉོན་མོངས་དགུ་གསུམ་སྟེ། །ཁམས་བཞི་ཞབས་སུ་སྣང་བ་ཡིན། །དེ་ཉིད་སྟོང་ཞིང་ཤིན་ཏུ་སྟོང་། །རབ་ཏུ་སྟོང་པ་ཆེན་པོའི་ངང་། །གྲོལ་ཞིང་ཤེས་པས་ང་ཡི་གཟུགས། །དགེས་ཤིང་ཆགས་པའི་ཐུགས་རྗེ་ཡིས། །སྙོམས་མཛད་ཡེ་ཤེས་གང་ཡིན་པ། །ཧེ་རུ་ཀ་སྟེ་ང་ཡི་སྒྲ། །དྲི་ནི་དག་པའི་ཕུང་པོ་ལྔ། །རོ་ནི་སྐུ་དྲུག་ཡེ་ཤེས་དྲུག །སྟོབས་དང་མི་འཇིགས་རེག་པ་ཡིན། །མ་
འདྲེས་ཆོས་ནི་བཅོ་བརྒྱད་དེ། །སེམས་ཅན་རྣམས་ཀྱི་སེམས་བྱུང་དང་། །ཡེ་ནས་འདྲེལ་བ་ང་ཡི་རྒྱུད། །རང་བཞིན་རྣམ་པར་དག་པ་ལས། །ཅུང་ཟད་འཁྲུལ་པ་རྒྱུད་ཀྱི་གཞི། །ལམ་ནི་སྨིན་ཅིང་གྲོལ་བའོ། །རང་གི་དེ་ཉིད་ལེགས་མཐོང་ཞིང་། །སར་གནས་དབང་ཐོབ་འབྲས་བུ་སྟེ། །བསགས་ཤིང་ཐོབ་ལ་རྟེན་གྱུར་པས། །ང་ཡི་སྐུ་ཞེས་བརྗོད་པ་ཡིན། །ཡང་དག་མཐའ་དང་མ་ལུས་པ། །མི་རྟོག་པ་ཡི་རྟོག་པ་ནི། །ཡེ་ཤེས་ཡིན་ཏེ་ང་ཉིད་མཐོང་། །ཀྱེ་ཚོགས་ཀུན་བརྩོན་པས་ང་ལ་ཉོན། །ང་ལ་གཉིས་སུ་མ་བལྟ་ཞིག །ང་དང་སོ་སོར་མ་འཛིན་ཅིག །བཤང་གཅི་ཁུ་བ་ཁྲག་དང་ཤ །ང་ཡི་ཚོགས་རྣམས་མཆོད་པས་མཉེས། །དུར་ཁྲོད་མི་གཙང་བམ་པའི་རྫས། །མ་བྱིན་བླངས་ཏེ་ཡིད་བཞིན་སྤྱད། །མ་དང་སྲིང་མོ་བུ་མོ་སོགས། །ནུས་དང་ལྡན་ལ་མི་ཚངས་སྤྱད། །བློ་ཆུང་ཤེས་རབ་དམན་པ་ཡིས། །སྐལ་མེད་རྣམས་ལ་རྫུན་དུ་སྨྲ། །ལོག་པའི་ལམ་ཞུགས་སྟོབས་ཅན་ནི། །ཀ་རུ་ཎ་ཡིས་བསད་ཅིང་བསྒྲལ། །སྤར་ཞིང་མཆོད་དེ་སྦྱངས་པ་ཡིས། །ང་ཡི་ངང་དུ་གཞག་པར་བྱ། །ཨེ་མ་ཡུལ་དང་བསམ་པའི་དངོས། །སྐྱེ་འགག་རྟག་ཆད་འགྲོ་འོང་དང་། །ཡོད་མེད་རྟག་ཆད་བྲལ་བ་སྟེ། །རྣལ་འབྱོར་གསུམ་གྱི་རབ་བསྙད་ནས། །ང་དང་གཉིས་སུ་མེད་པ་ཡིན། །ཞེས་གསུངས་སོ། །དཔལ་ཁྲག་འཐུང་འདུས་པ་རྩ་བའི་རྒྱུད་ལས། སྙིང་པོ་དེ་ཁོ་ན་ཉིད་ཡང་དག་པར་བསྡུས་པའི་ལེའུ་སྟེ་བདུན་པའོ།། །།དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོ་དེས། དེ་བཞིན་གཤེགས་པ་ཐམས་ཅད་ཀྱི་ཕྲིན་ལས་སྣ་ཚོགས་པའི་རྡོ་རྗེ་དངོས་གྲུབ་ཉེ་བར་གྱུར་པའི་སྙིང་པོ་རབ་ཏུ་བསྡུ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། འཇིག་རྟེན་གྱི་ཁམས་ཐམས་ཅད་ཀྱི་རིག་པ་མ་ཡིན་པའི་དངོས་པོ་མ་ལུས་པ་རྣམ་པར་དག་པ་མཆོད་པའི་རྫས་སུ་བྱིན་གྱིས་བརླབས་ཏེ། གཙང་བ་དང་སྨེ་བའི་རྟོག་པ་མ་ལུས་པར་བཟློག་པ། རྡོ་རྗེ་དམ་ཚིག་ཆེན་པོ་རབ་ཏུ་བླང་བའི་ཕྱིར། འདི་སྐད་ཅེས་བཀའ་སྩལ་ཏོ། །ཀྱེ་མ་འདུས་པའི་འཁོར་ཚོགས་ཉོན། །ཕུན་སུམ་ཚོགས་པ་བཞི་
ལྡན་ཞིང་། །ཚུལ་རིམ་གོམས་པའི་རྣལ་འབྱོར་པས། །སྔོན་དུ་འགྲོ་བའི་ལས་སྤྱད་དེ། །བར་ཆད་བྱེད་པའི་བགེགས་ཆེན་ཡང་། །འཇིགས་པ་མེད་པའི་སེམས་ཀྱིས་བཟློག །དངོས་གྲུབ་སྦྱིན་པའི་གཟུགས་བརྙན་ཡང་། །རེ་དང་ཆགས་དང་དོགས་པ་ཡིས། །ངན་པའི་དོན་གྱི་སེམས་མི་དབྱུང་། །བྱིན་གྱིས་བརླབས་པས་མ་ལུས་བྱང་། །ང་དང་ལྔ་བཅུ་རྩ་བརྒྱད་པའི། །ཇི་ལྟར་བཤད་པའི་ཕོ་བྲང་དུ། །རིགས་ཆེན་རིགས་ལྔ་བྷནྡྷ་ལྔ། །རྣམ་པར་དག་པའི་བཅུད་ཀྱི་དངོས། །ཕྱི་ནང་གསང་བའི་དམ་ཚིག་སྟེ། །སྡོང་པོ་ལོ་མ་མེ་ཏོག་དང་། །འབྲས་བུ་གརྦྷ་ཤུན་པགས་དང་། །རྩ་བ་དང་ནི་སྐོགས་མའོ། །དོན་སྙིང་ལྔ་དང་བྷེ་ར་ལོག །ལམ་གཉིས་བརྒྱད་ནི་ནང་ཡིན་ནོ། །སེམས་བཅུད་དྲི་ནི་གཉིས་དང་ནི། །གོ་རོ་ཙ་ན་མཱཾ་ས་ལྔ། །གསང་བ་ཡིན་ཏེ་རྩ་བ་བརྒྱད། །མངོན་པ་ཕྱི་དང་སྦས་པ་ནང་། །རྒྱལ་བློན་སྐྱོབས་དང་བཅས་པ་ནི། །ལོ་ཐོག་ཤིང་ཐོག་མེ་ཏོག་དང་། །རྩྭི་ཐོག་འབྲུ་དང་རྡོ་ཤིང་བཅུད། །སེམས་ཅན་བཅུད་དང་རིན་པོ་ཆེ། །མ་ལུས་ལུས་པ་མེད་པ་ཀུན། །དུག་ལྔ་སྨན་དུ་བསྒྲུབ་པས་ན། །དགག་བྱ་གང་ཡང་ཡོད་མ་ཡིན། །རོ་དང་ནུས་པ་ཁ་དོག་རྣམས། །རྣམ་དག་རྩ་བ་ཡན་ལག་བཅས། །སྤང་བྱ་གང་ཡང་ཡོད་མ་ཡིན། །དཀྱིལ་འཁོར་ཆེན་པོའི་གནས་སུ་དགོད། །སྣང་བ་ཆེན་པོ་ཤར་བ་དགྲམ། །སྒྲུབ་པ་པོ་རྣམས་རྒྱན་རྟགས་ལྡན། །སོ་སོའི་གྲལ་དུ་འཁོད་ནས་ནི། །ཁྲོལ་བུ་བཏགས་བཙགས་ཕྱེ་མ་དང་། །གོང་བུ་སྐྱོ་མ་ལྡེ་གུ་དང་། །རི་ལུ་བྱས་པས་སོ་སོ་ཡིས། །དུས་དང་རྟགས་ཀྱི་རིམ་པ་བཞིན། །ལྔ་དང་དེ་ཉིད་ཉི་ཤུ་ཡི། །བར་དུ་སྦྱར་བར་བྱ་བ་ནི། །སྔ་མའི་དཀྱིལ་འཁོར་ལས་ལ་གཞུག །ཚངས་པ་དང་ནི་དྲང་སྲོང་ཚོགས། །སྤྱན་དྲང་གཞུག་ཅིང་རྟོག་པ་བཟློག །མཛེས་དགའ་སྤྲོ་བའི་སྤྱོད་པ་བརྟེན། །ངོ་བོ་རྣམ་དག་ངང་དུ་གསལ། །འོད་ཟེར་འཕྲོ་འདུ་བྱ་བ་དང་། །ཐམས་ཅད་བདུད་རྩིའི་སྔགས་ཀྱིས་སྦྱངས། །དེ་ནས་རིགས་ལྔའི་དཀྱིལ་འཁོར་དང་། །དཔའ་བོ་འབྲུ་ལྔའི་སྔགས་ཀྱིས་སྦྱངས། །ཡེ་
ཤེས་ལྷ་རྣམས་སྤྲོས་ནས་ནི། །དབང་གི་རྒྱལ་པོས་བསྲུང་བར་བྱ། །རྡོ་རྗེ་རིགས་ཀྱིས་བསྡུས་ཤིང་སྦྱངས། །སླར་ཡང་ཐབས་དང་ཤེས་རབ་ཀྱིས། །མཐུན་པའི་རྫས་ལྡན་བཏག་ཅིང་བཙག །གསང་བ་མཆོག་གི་དཀྱིལ་འཁོར་བཞེངས། །ཡི་གེ་དགུ་ཡི་སྔགས་ཀྱིས་སྦྱངས། །འབྲས་བུ་ལྔ་སྦྱར་བདུད་རྩིར་བཅས། །མུ་ས་ལ་ཡིས་སྤྲད་ཅིང་སྦོལ། །རྒྱས་གདབ་མངའ་གསོལ་གདབ་པར་བྱ། །གཅིག་ཏུ་བྱ་བའི་ཚུལ་དག་ཀྱང་། །དཀྱིལ་འཁོར་བདུན་དང་སྦྱོར་བ་བརྒྱད། །བཞུ་དང་བཏུལ་དང་དབབ་དང་བསྐྱིལ། །ཡི་གེ་དགུ་ཡི་འཕྲོ་འདུ་ཡིས། །མཛད་པའི་ཚུལ་གྱིས་འགྲོ་དོན་སྤྱད། །མཆོད་བསྟོད་བསྐུལ་དང་བཤགས་པ་དང་། །བཟློག་ཅིང་བསྐུལ་དང་བཅོལ་སོགས་ཀྱིས། །རྟགས་དང་ལྡན་པར་མཐར་དབྱུང་སྟེ། །རྩ་བཞིའི་རྒྱུད་ལྡན་དགོངས་པར་བྱ། །ཚོགས་ཆེན་མཆོད་པ་རྒྱུན་མི་གཅད། །གཙང་སྦྲ་གསུམ་ལ་གནས་པར་བྱ། །ཚོགས་ཆེན་གཅིག་གི་བསོད་ནམས་ནི། །རྟག་ཏུ་ཉན་ཐོས་བརྒྱར་བསགས་པས། །བཅུ་དྲུག་ཆར་ཡང་མི་ཕོད་དོ། །མཐར་ཐུག་པར་ནི་དེ་བཤད་བྱ། །རྡོ་རྗེ་ཉི་མ་ནུབ་ནས་ནི། །དངོས་གྲུབ་ཆེན་པོ་བླང་བར་བྱ། །མཆོད་ཆེན་འདི་ནི་ཡོན་ཏན་མཆོག །ལྷ་རྣམས་ཉེར་སྐོང་ལས་རྣམས་འགྲུབ། །རིག་འཛིན་བཞི་དང་གྲུབ་པ་བརྒྱད། །ཐམས་ཅད་ང་ཡི་གསུངས་བཞིན་དུ། །འགྲུབ་པར་འགྱུར་ཏེ་གདོན་མི་ཟ། །གལ་ཏེ་བསོད་ནམས་ཡོན་ཏན་ལ། །གཟུགས་དང་དངོས་པོ་གྲུབ་འགྱུར་ན། །འཇིག་རྟེན་སྲོག་ཆགས་མ་ལུས་ཀྱིས། །བརྗོད་པར་ནུས་པ་འགྱུར་མ་ཡིན། །རྡོ་རྗེ་བདུད་རྩི་མཆོད་ཆེན་ཏེ། །ཕྱི་ནང་གསང་བ་ལྡན་པས་བཤད། །མདོར་ན་དེ་ཡི་བསོད་ནམས་ཀྱིས། །བདེ་བར་གཤེགས་པ་ཀུན་མཆོད་པས། །འདི་ཉིད་བསྒྲུབ་པའི་ཁྱད་པར་ནི། །ལྷག་པ་བས་ཀྱང་ཆེས་ལྷག་སྟེ། །འདི་མ་རྟོགས་པའི་མཆོད་པའི་སྟོབས། །ཕྱོགས་གཞན་ཀུན་ན་ཡོད་མ་ཡིན། །དེ་བས་རྟག་ཏུ་འབད་པར་བྱ། །ཞེས་གསུངས་སོ། །དཔལ་ཁྲག་འཐུང་འདུས་པ་རྩ་བའི་རྒྱུད་ལས། མཆོད་པ་ཆེན་པོའི་ལས་ཡང་དག་
པར་བསྡུས་པའི་ལེའུ་སྟེ་བརྒྱད་པའོ།། །།དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོ་དེས། ཕྱོགས་བཅུ་དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་ཁམས་གསུམ་གྱི་དངོས་པོ་མྱུར་དུ་བདེ་བ་ཆེན་པོའི་ས་ལ་སྒྲོལ་ཞིང་འགོད་པའི་ཏིང་ངེ་འཛིན་ལ་སྙོམས་པར་ཞུགས་ཏེ། ཁམས་གསུམ་པ་ཐམས་ཅད་ཀྱི་རྣམ་པར་ཤེས་པ་དང་རིགས་ཐམས་ཅད་རབ་ཏུ་བསྒྲལ་བའི་ཞིང་དུ་བྱིན་གྱིས་བརླབས་ཏེ། བྱམས་པ་ཆེན་པོ་དང་སྙིང་རྗེ་ཆེན་པོས་བདག་གི་བ་དང་ཕ་རོལ་ཏུ་འཛིན་པའི་རྟོག་པ་ཡང་དག་པར་སྒྲིབ་པ། རྡོ་རྗེ་དངོས་གྲུབ་ཆེན་པོའི་ལས་རབ་ཏུ་བསྒྲུབ་པར་བྱ་བའི་ཕྱིར། འདི་སྐད་ཅེས་བཀའ་སྩལ་ཏོ། །བསྙེན་པ་རྫོགས་པའི་རྣལ་འབྱོར་པས། །དངོས་གྲུབ་མྱུར་དུ་བསྒྲུབ་འདོད་ན། །རྫས་མཆོག་མཚན་ལྡན་བརྟག་ལ་བཙལ། །རྫས་བཞི་གང་ལ་བརྟགས་ཏེ་སྦྱར། །རྒྱལ་རིགས་དང་ནི་བྲམ་ཟེ་དང་། །རྗེ་རིགས་ལ་སོགས་རིགས་བཙུན་ཞིང་། །བྱད་བཞིན་བཟང་ལ་སྨིན་དཀྱུས་རིང་། །སྐྲ་ནི་བུང་བ་ལྟར་གནག་ལ། །སོ་དམ་མཆུ་ནི་བིམ་པ་འདྲ། །མཚན་དང་ལྡན་པ་བཀྲ་ཤིས་རྫས། །ལུས་བཟང་སྐད་སྙན་ཚིག་གསལ་ཞིང་། །སྐྲ་ཁམ་ཤེལ་མིག་སོ་ཟུང་ལྷག །སྐྲ་མཚམས་ནས་ནི་སྣ་རྩེའི་བར། །སྨེ་བ་བདུན་ལྡན་སྐྱེ་བདུན་པར། །མི་ལུས་སྐྱེས་པའི་རྟགས་མཚན་ཏེ། །དག་པའི་ལྷ་རྫས་ཡིན་ཞེས་བཤད། །སྐྱེས་པ་གཞོན་ནུ་འབད་རྩོལ་ཅན། །གླང་པོ་གཡུལ་དུ་ཞུགས་པ་དེ། །བསྒྲུབ་པ་མཆོག་གི་རྫས་ཡིན་ནོ། །བསྒྲལ་ཞིང་སྤྱད་པའི་བསྒྲུབ་རྫས་ནི། །མི་རྟ་གླང་ཆེན་མཁའ་ལྡིང་ཁྱི། །ཤེལ་ནག་སྨུག་དང་ཙ་ར་སོགས། །ཐུགས་དམ་བསྐང་ཞིང་ཚངས་པར་བྱ། །སྒྲུབ་པ་པོ་ཡིས་རོལ་པའི་རྫས། །མ་ཏྲཾ་བསྒྲལ་བའི་ཞིང་བཅུ་ནི། །དམིགས་ཀྱིས་བསྒྲལ་ཞིང་མངོན་སུམ་བཙལ། །གཞན་ཡང་དབང་ཕྱུག་ཆེན་པོ་ཡིས། །དུར་ཁྲོད་རྫས་མཆོག་མ་ཉམས་པ། །བླངས་ཏེ་བསྒྲུབ་པ་བྱ་བ་ཡང་། །རྒྱུད་བཟང་རིགས་བཙུན་མཚན་དང་ལྡན། །བཀྲ་ཤིས་གཙང་ཞིང་ཡིད་ཏུ་འོང་། །དུས་ཚོད་རབ་འབྲིང་
ཐ་མ་ལ། །དུས་ལ་བབ་པས་བླངས་པའི་དུས། །བདག་ཉིད་ཁྲག་འཐུང་ཡབ་ཡུམ་གྱི། །རྒྱལ་ཐེབས་ཀརྨ་གིང་གསུམ་ལ། །དབང་བསྐུར་བསྲུང་བ་བྱས་ནས་ནི། །མཚོན་ཆ་བསྐུར་ཏེ་ཕོ་ཉར་བཏང་། །སྲིད་པའི་རྒྱུ་མཆོག་བསྒྲུབ་རྫས་འདི། །རྣལ་འབྱོར་དབང་ཕྱུག་དངོས་གྲུབ་རྫས། །ཁ་ཊྭཱཾ་མཚོན་ཆ་ཐོགས་ནས་སུ། །དཔལ་ཆེན་ཁྲོ་བོའི་ཏིང་འཛིན་གྱིས། །ཁམས་གསུམ་ཟིལ་གྱིས་གནན་པའི་ཕྱིར། །ཉི་ཟླའི་སྤྱན་གྱིས་གསང་བར་བྱ། །རྡོ་རྗེའི་འགྲོས་ཀྱིས་རབ་ཏུ་བཙལ། །གཤིན་རྗེའི་ཁང་ཁྱིམ་གཞོམ་པའི་ཕྱིར། །ཁ་ཊྭཱཾ་རྡོ་རྗེ་ས་ལ་གདབ། །འཆི་བདག་བདུད་དང་དབྲལ་བའི་ཕྱིར། །གཤིན་རྗེ་གཤེད་ཀྱི་ཕུར་པས་བཏབ། །དུག་ལྔ་སྐྱེ་བཞི་རྩད་གཅད་ཕྱིར། །རྡོ་རྗེ་སྡེར་མོས་བླང་བར་བྱ། །རོ་ཉིད་གཤེད་དང་དབྲལ་བའི་ཕྱིར། །སེང་ལྡེང་ཕུར་བུ་སོར་བརྒྱད་ཚད། །སྟོབས་པོ་ཆེ་ཡི་སྐུར་བྱས་ལ། །དྲག་སྔགས་བརྒྱ་དང་རྩ་བརྒྱད་བཟླས། །སྔ་མའི་བདུད་དང་ཕྱི་མའི་ལྕགས། །གཟུགས་དང་མཚན་མར་བཅས་པ་ནི། །ཕུར་བུས་བཏབ་སྟེ་སྔ་གོས་གྲིལ། །ཁུང་བུར་མནན་ཏེ་དེ་སྲོད་གཟིར། །ཕྲིན་ལས་བཞི་ཡི་གཟིར་གནན་བྱ། །ནོར་བུ་ཡིད་བཞིན་གྱུར་བསམ་སྟེ། །ལས་ཀྱི་ཀརྨས་ཁྱེར་ནས་ནི། །རྒྱལ་ཐེབས་ཀྱིས་ནི་བྱིན་གྱིས་བརླབ། །གིང་གིས་ཕྲ་མེན་འཇོ་ཚུལ་བྱ། །དུར་ཁྲོད་མ་མོ་ཁྲོ་བའི་གནས། །སྲིན་པོ་སྟག་དྲེད་འཐབ་པ་དང་། །གཅན་གཟན་འདབ་ཆགས་འདུས་སར་དྲངས། །གནས་དེར་བསྲུང་དང་བསྐྲད་པར་བྱ། །སྒྲོམ་དུ་སྩལ་ཏེ་རྒྱ་ཡིས་གདབ། །ལས་དང་ཡེ་ཤེས་ཕོ་ཉ་ཡིས། །དེ་ཡི་རྣམ་པར་ཤེས་པ་དང་། །འདོད་ཡོན་རྫས་སུ་བཅས་པ་ཀུན། །སྔ་མ་ལས་ནི་གནས་བསྒྱུར་ཏེ། །ཁྲག་འཐུང་དཀྱིལ་འཁོར་གསལ་བྱས་ནས། །ཕུང་པོ་རྡོས་བཅས་བེམ་པོ་དེ། །ཕྱོགས་བཞིར་བྲོ་བཞིས་སྦྱང་བར་བྱ། །ཡེ་ཤེས་ལྷ་དང་མཁའ་འགྲོ་མ། །ཐུགས་དམ་བསྐང་ཞིང་བསྐུལ་བར་བྱ། །ཁྲུས་བྱས་ཟླ་གམ་ནུབ་ཏུ་བཞག །འབྲུ་ལྔ་བཀོད་ལ་ལམ་ལྔ་དགག །དེ་ལ་ལྷ་རྣམས་དགོད་པ་ནི། །བདག་ཉིད་ཡབ་ཡུམ་ས་བོན་ལས། །ཡན་ལག་
ལྔ་ལ་བསམ་པ་ནི། །རིགས་ལྔ་ཡབ་ཡུམ་དགོད་པར་བྱ། །མདུན་རྒྱབ་གཉིས་སུ་དགོད་པ་ནི། །ཨཱ་ལི་ཀཱ་ལི་བསམ་པར་བྱ། །རྣམ་ཤེས་དབང་པོ་ཡུལ་དུས་ལ། །སེམས་དཔའ་ཡབ་ཡུམ་དགོད་པར་བྱ། །སྤྱི་བོ་རྒྱབ་དང་ལྕེ་ཡི་སྟེང་། །རྐང་མཐིལ་ཡན་ཆད་ཐུབ་པ་དྲུག །མཆན་ཁུང་གཉིས་དང་མཁལ་ཁུང་གཉིས། །སྒོ་བ་ཡབ་ཡུམ་བསྒོམ་པར་བྱ། །རྣམ་སྨིན་ཟག་བཅས་ཕུང་པོ་ལ། །ཕྱག་རྒྱའི་དཀྱིལ་འཁོར་གསལ་བཀོད་ནས། །འོད་ཟེར་འཕྲོ་འདུས་སྦྱངས་བྱས་ཏེ། །དོན་གཉིས་མཐར་ཕྱིན་ཕྱག་རྒྱ་གྲོལ། །ཆོ་ག་ལྔ་དང་ཡན་ལག་ལྔས། །ཡང་དུ་ཡང་དུ་སྦྱང་བར་བྱ། །བྱང་ཤར་མཚམས་སུ་དྲངས་བྱས་ལ། །དེ་ཡི་བཤའ་ཐབས་རྒྱབ་ནས་བཤའ། །དེ་ཉིད་ཁྲག་འཐུང་ལྷ་ཚོགས་རྫས། །གློ་སྙིང་དཔལ་ཆེན་ཡབ་ཡུམ་གྱིའོ། །མིག་དང་རྣ་བ་སྣ་དང་ལྕེ། །རིགས་བཞི་ཁྲག་འཐུང་ཡབ་ཡུམ་རྫས། །བུམ་པ་བདུད་རྩི་རྣམ་པ་ལྔ། །དཔུང་པ་གཡས་གཡོན་བཞག་ཤ་དང་། །རྒྱུ་མཆིན་མགོ་ཤ་གསང་བ་རྣམས། །རྩ་བའི་ལྷ་དགུའི་རྫས་སུ་བཞག །གོ་རོ་ཙ་ན་རྒྱུང་བ་དང་། །རྐང་དང་ཚིལ་བུ་ཤ་དང་ཁྲག །སྲོག་རྩ་མཁྲིས་པ་བརྒྱད་རྣམས་ནི། །མུ་ཁ་ཕྲ་མེན་བརྒྱད་ཀྱི་རྫས། །ཡན་ལག་རྣམ་ཐར་བཞི་རྣམས་ནི། །ཡེ་ཤེས་སྒོ་མ་བཞི་ཡི་རྫས། །སྒལ་ཚིགས་ཕྲུགས་རེར་བསྡེབ་པ་ནི། །དབང་མོ་ཉི་ཤུ་བརྒྱད་ཀྱིའོ། །ཉིང་ལག་ཆེ་ཕྲར་བསྡེབ་པ་ནི། །རང་བྱུང་ཁྲོ་བོ་བཅུ་ཡི་རྫས། །ཤ་ཁྲག་རུས་པ་རྐང་དང་ཚིལ། །མཁའ་ལ་འགྲོ་མ་ཀུན་གྱི་རྫས། །མཚན་དང་ལྡན་པའི་བྷནྡྷ་ནི། །དཔལ་ཆེན་བཞུགས་པའི་རྟེན་ཡང་ཡིན། །དངོས་གྲུབ་ཆེན་པོ་བསྒྲུབ་པའི་སྣོད། །དེ་ཡི་ནང་དུ་སྩལ་བའི་རྫས། །གོ་རོ་ཙ་ན་དྲི་ཆེན་དང་། །སྙིང་དང་སྲོག་པ་རྩ་ཡི་ཁྲག །མཱཾ་ས་མཁྲིས་པ་དྲི་ཆུ་དང་། །དེ་དག་མཉམ་པའི་ཆང་དང་སྦྱར། །ཚིལ་ཆེན་སྙིང་པོ་ལྔར་སྦྱར་བ། །བརླ་རྐང་གཉིས་དང་རྗེ་ངར་རྐང་། །དུང་ཆེན་འབུད་པའི་སྒྲ་ཡི་རྫས། །དཔུང་པའི་རྐང་འགོ་རྣམས་གཉིས་ནི། །རཀྟ་སྦྲེང་བའི་གཟར་བུའོ། །
བ་སུ་ཏ་ཡི་རྒྱུ་ཞགས་ནི། །ཐིག་གདབ་མཎྜལ་བསྐོར་བ་དང་། །བི་ནཱ་ཡ་ཀ་བཅིང་བའི་རྫས། །ཤུན་ཆེན་ཞིང་གི་གཡང་གཞི་ནི། །བླ་རེར་དྲེ་དང་དཔའ་བོའི་ཆས། །ཡ་འགལ་མ་འགལ་གཉིས་པོ་དེ། །ཁ་ཐམ་བྱ་བའི་རྫས་ཀྱང་ཡིན། །དེ་དང་སོག་པའི་མ་མདོ་ནི། །ཡ་མ་དམ་སྲི་མནན་པའི་རྫས། །ཤར་སྒོར་དངོས་གྲུབ་གསོལ་བྱང་དང་། །རྡོ་རྗེ་དང་ནི་དྲིལ་བུ་དང་། །བདུད་རྩི་བུམ་པ་དངོས་གྲུབ་རྫས། །དེ་དག་ཀུན་ཏུ་བྱ་བ་ནི། །དངོས་གྲུབ་རྫས་དང་ངོ་བོ་ཉིད། །སློབ་མ་ལྷ་དང་རཱུ་ཏྲ་དང་། །བསྒྲུབ་པའི་རྫས་སུ་བལྟ་བ་རྣམས། །གནས་སུ་དགོད་ཅིང་ལྷ་རུ་དམིགས། །སྨན་དུ་བཀྲོ་དང་རྫས་སུ་བསྒྲུབ། །མཆོད་པར་དབུལ་དང་རྒྱན་དུ་དགྲམ། །འབར་བར་བསྲེགས་དང་བགེགས་སུ་མནན། །ང་ཡི་སྤྱོད་པ་མཐུན་པར་སྤྱད། །ཧེ་རུ་ཀ་དཔལ་ཉིད་དུ་འགྱུར། །ཞེས་གསུངས་སོ། །དཔལ་ཁྲག་འཐུང་འདུས་པ་རྩ་བའི་རྒྱུད་ལས། དངོས་གྲུབ་ཆེན་པོ་ཉེ་བའི་སྒྲུབ་པ་ཡང་དག་པར་བསྡུས་པའི་ལེའུ་སྟེ་དགུ་པའོ།། །།དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོ་ཧེ་རུ་ཀ་ཁྲག་འཐུང་གི་རྒྱལ་པོ་དེས་ཁམས་གསུམ་པ་ཐམས་ཅད་རང་གི་སྐུ་གསུང་ཐུགས་ཀྱི་ངང་ཉིད་དུ་བརྟན་པར་བྱ་བའི་ཕྱིར། ནམ་མཁའི་དབྱིངས་ཀྱི་དཀྱིལ་འཁོར་ཆེན་པོར་ཕྱི་དང་ནང་གི་དངོས་པོ་མ་ལུས་པར་སྣང་བར་བྱས་ནས། ཆོས་ཀྱི་རྒྱལ་ཚབ་ཏུ་དབང་བསྐུར་བར་བྱ་བ་བླ་ན་མེད་པའི་ས་ནོན་པར་བྱེད་པ། སངས་རྒྱས་དང་བྱང་ཆུབ་སེམས་དཔའ་དང་འཕགས་པའི་ཚོགས་མ་ལུས་པ་རྣམས་ཀྱིས་བཀུར་བའི་གནས་སུ་འོས་པ། ལྷ་དང་མི་དང་ལྷ་མ་ཡིན་པ། གནོད་སྦྱིན་ལ་སོགས་པ་དྲེགས་ཤིང་གདུག་པའི་ཚོགས་ཐམས་ཅད་འདུལ་ཞིང་ཚར་གཅོད་པར་ནུས་པ། རང་གི་ལུས་དང་ངག་དང་ཡིད་ཀྱི་ལས་ཀྱི་མཐའ་མ་ལུས་པ་ཐམས་ཅད་ཧེ་རུ་ཀའི་རིག་པའི་སྐྱེས་བུ་ཆེན་པོའི་གཟུགས་ཀྱིས་འགྲོ་བའི་དོན་མ་ལུས་པར་བྱེད་པའི་ཐབས་ཆེན་པོ་འདི་དག་བཀའ་སྩལ་ཏོ། །རྡོ་རྗེ་རིགས་ཀྱི་གནས་མཆོག་ནི། །དུར་ཁྲོད་དང་ནི་ལྷ་རྟེན་གནས། །མ་མོའི་ཁྱིམ་དང་ཡིད་འོང་གནས། །དེར་ནི་ས་ཡི་ཆོ་ག་བྱས། །
སྐྱེས་བུ་རྟོགས་པའི་བློ་གྲོས་ཅན། །དད་པའི་སེམས་དང་ལྡན་པ་ཡིས། །སྲོག་ལུས་མན་ཆད་རྫས་རྣམས་ཀུན། །སེར་སྣ་མེད་པའི་སེམས་ཀྱིས་དབུལ། །ཚུལ་དགུ་ལྡན་པའི་བླ་མ་ཡིས། །རྟག་པར་དབང་བསྐུར་དམ་པར་བྱ། །ཧེ་རུ་ཀ་ཉིད་དོན་གཉེར་ཞིང་། །འཇིག་རྟེན་དྲེགས་པའི་ཕྱིར་མ་ཡིན། །བརྟུལ་ཞུགས་སྤྱོད་པ་མངོན་ནུས་ལ། །ཁུར་ཆེན་ཁུར་དུ་ཁུར་ནུས་པའི། །ཡེ་ཤེས་རྡོ་རྗེ་འཐོབ་བྱེད་པ། །དེ་བཞིན་གཤེགས་པ་ཐམས་ཅད་ཀྱི། །ཕོ་བྲང་སྙིང་པོ་དམ་པ་འདིར། །བདག་གི་སློབ་མ་གཞུག་པར་བྱ། །རིན་ཆེན་མེ་ཏོག་གང་གཏོར་བ། །གང་ལ་བབ་པ་དེ་ཡི་རིགས། །གཙོ་བོར་བལྟས་ནས་བསྒྲུབ་ན་ནི། །དངོས་གྲུབ་མྱུར་བར་ཐེ་ཚོམ་མེད། །ཡེ་ཤེས་དཀྱིལ་འཁོར་གཟུགས་བརྙན་ནི། །ཀུན་རྫོབ་གཟུགས་སུ་བསྟན་པ་ཡིན། །འདི་ལ་དད་པ་རབ་ཏུ་བསྐྱེད། །དངོས་གྲུབ་མ་ལུས་མངོན་དུ་འགྱུར། །དམ་ཚིག་མཆོག་ནི་འདི་བཟུང་བས། །བླ་མ་སྤུན་གྲོགས་ལྷ་དང་འཁོར། །སྔགས་དང་ཕྱག་རྒྱ་གསང་ཚིག་རྣམས། །བསྐུར་དང་མི་སྤང་བསྒྲུབ་པ་དང་། །རྒྱུན་མི་གཅད་ཅིང་ལྟངས་མ་བཏང་། །འདི་ནི་གཞི་ཡི་དམ་ཚིག་ཡིན། །སྤང་བར་མི་བྱ་དང་དུ་བླང་། །སྤྱད་པར་བྱ་ཞིང་ཤེས་པར་བྱ། །བསྒྲུབ་པར་བྱ་བའི་དམ་ཚིག་རྣམས། །སེམས་དང་སེམས་ཉིད་འདྲེས་པ་ན། །མ་བཅིངས་པ་དང་བསྒྲུབ་པ་དང་། །གཅིག་པུ་དང་ནི་ལྷུན་གྱིས་གྲུབ། །དེ་ལས་མི་འདའ་དམ་ཚིག་ཡིན། །འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་ཉམས་ན་བསྲེག་པར་བྱ། །དམ་ཚིག་བསྲུངས་ན་དངོས་གྲུབ་ནི། །རྡོ་རྗེ་བདུད་རྩིའི་ཆུ་འདིས་གྲུབ། །རང་བཞིན་ལྷུན་གྲུབ་དཀྱིལ་འཁོར་དུ། །སློབ་མ་རབ་ཞུགས་དབང་བསྐུར་ཏེ། །བྱ་བྲལ་རྫོགས་པའི་མན་ངག་བསྟན། །ཏིང་འཛིན་བརྟེན་པའི་དཀྱིལ་འཁོར་དུ། །སློབ་མ་འབྲིང་གཞུག་དབང་བསྐུར་ཏེ། །བསྐྱེད་རྫོགས་གྲུབ་པའི་མན་ངག་བསྟན། །གཟུགས་བརྙན་བསྙེན་སྒྲུབ་དཀྱིལ་འཁོར་དུ། །ཐ་མ་གཞུག་ཅིང་དབང་བསྐུར་ཏེ། །རིམ་གྱིས་བློ་སྦྱང་མན་ངག་བསྟན། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་
ཅད་ཀྱི་བདག་པོ་ཀུན་ཏུ་བཟང་པོ་ཧེ་རུ་ཀ་ཆེན་པོ་དེ་ལ། བཅོམ་ལྡན་འདས་དཔལ་རྣམ་པར་སྣང་མཛད་ཀྱིས་སངས་རྒྱས་ཀྱི་ཞིང་རྡུལ་སྙེད་དུ་ཕྲ་བ་སྙེད་ཀྱི་དེ་བཞིན་གཤེགས་པ་ནམ་མཁའི་དབྱིངས་དང་མཉམ་པའི་དེ་བཞིན་གཤེགས་པ་ཐམས་ཅད། རྡོ་རྗེ་བཙུན་མོའི་བྷ་ག་ལ་དམ་ཚིག་ཆེན་པོའི་དཀྱིལ་འཁོར་དུ་བྱིན་གྱིས་བརླབ་པ་དང་། དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་བདག་པོ་དེ་དབང་བསྐུར་བ་ཡོངས་སུ་རྫོགས་ཤིང་མཉེས་པར་བྱ་བའི་ཕྱིར། ཉིད་ཀྱི་སྐུ་བུད་མེད་ཀྱི་གཟུགས་སུ་སྤྲུལ་ནས་བཞུགས་པར་གྱུར་ཏོ། །དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཀྱི་བདག་པོ་དེ། དཀྱིལ་འཁོར་གྱི་དབུས་སུ་བཞུགས་པར་གྱུར་ཏོ། །དེ་ནས་བཅོམ་ལྡན་འདས་མི་བསྐྱོད་པ་ལ་སོགས་པ་ཧེ་རུ་ཀ་རིགས་ལྔ། བྱང་ཆུབ་ཀྱི་སེམས་རྡོ་རྗེ་དེ་བཞིན་གཤེགས་པ་ཐམས་ཅད་ཀྱི་ཐུགས་ལ་བཞུགས་སོ། །དེའི་ཚེ་ནམ་མཁའི་ཁམས་ཀྱི་དབྱིངས་ཐམས་ཅད་རྡོ་རྗེའི་ངོ་བོར་གནས་པར་གྱུར་ཏོ། །དེ་ནས་བཅོམ་ལྡན་འདས་བྱང་ཆུབ་ཀྱི་སེམས་རྡོ་རྗེ་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་མཉམ་པ་ཉིད་འབྱུང་བ་ཞེས་བྱ་བའི་ཏིང་ངེ་འཛིན་ལ་མཉམ་པར་བཞག་ནས། རིག་པའི་སྐྱེས་བུ་ཆེན་པོའི་གཟུགས་དེ་བཞིན་གཤེགས་པ་ཐམས་ཅད་ཀྱི་བདག་པོར་བྱིན་གྱིས་བརླབས་སོ། །དབང་བསྐུར་མ་ཐག་ཏུ་བྱང་ཆུབ་ཀྱི་སེམས་རྡོ་རྗེ་དེ་བཞིན་གཤེགས་པ། ཧེ་རུ་ཀ་ཞལ་གསུམ་ཕྱག་དྲུག་པར་དེ་བཞིན་གཤེགས་པ་ཐམས་ཅད་ཀྱིས་གཟིགས་པར་གྱུར་ཏོ། །དེའི་ཚེ་ན་ནམ་མཁའི་ཁམས་ཀྱི་དབྱིངས་ན་གནས་པའི་སེམས་ཅན་ཇི་སྙེད་དུ་བྱང་ཆུབ་ཀྱི་སེམས་རྡོ་རྗེས་བྱིན་གྱིས་བརླབས་ཤིང་། དབང་བསྐུར་མ་ཐག་ཏུ་ཐམས་ཅད་ཀྱི་བདེ་བ་དང་ཡིད་བདེ་བ་ཐོབ་པར་གྱུར་ནས། མི་བསྐྱོད་པ་ལ་སོགས་པའི་བྱང་ཆུབ་ཀྱི་སེམས་རྡོ་རྗེ་དེ་བཞིན་གཤེགས་པ་ཐམས་ཅད་ངོ་མཚར་དུ་གྱུར་ཏེ། གསང་བ་བྱང་ཆུབ་སེམས་ཀྱི་དབང་ལ་ངོ་མཐོན་དུ་ངམ་ཞིང་བསྟོད་དོ། །ཡང་དེའི་སྐལ་བ་དང་མི་ལྡན་པའི་སེམས་ཅན་གྱི་ཁམས་རྣམས་ཀྱི་དོན་གྱི་ཕྱིར་ན། ཕྱོགས་བཅུའི་ནམ་
མཁའི་ཁམས་ཀྱི་དེ་བཞིན་གཤེགས་པ་ཐམས་ཅད་འདུས་ཏེ། བྱང་ཆུབ་སེམས་དཔའ་དོན་ཐམས་ཅད་རབ་ཏུ་གྲུབ་པ་ཞེས་བྱ་བ་དཀའ་བ་དཔག་ཏུ་མེད་པས་བྱང་ཆུབ་ཀྱི་སྙིང་པོར་གནས་པ་ག་ན་བ་དེར་གཤེགས་ཏེ། ཐམས་ཅད་ལོངས་སྤྱོད་རྫོགས་པའི་སྐུ་རབ་ཏུ་འབར་བར་བསྟན་ནས། འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ཁྱོད་གང་གི་དོན་དུ་དེ་བཞིན་གཤེགས་པ་ཐམས་ཅད་ཀྱི་དེ་ཁོ་ན་ཉིད་རྟོགས་པར་བྱ་བའི་ཕྱིར། དཀའ་བ་སྣ་ཚོགས་སྤྱོད་པ་ལ་སྤྲོ་བར་བྱེད། འདི་ནི་རྣམ་པར་དག་པ་མ་ཡིན་ཞིང་མཐར་ཐུག་པར་མི་འགྱུར་བའི་བསམ་གཏན་ཏེ། རང་གི་སེམས་ཉིད་འོད་གསལ་ཞིང་དྲི་མ་མེད་པ་ལ་གནས་པར་བྱོས་ཤིག་ཅེས་བཀའ་སྩལ་ནས། ཐམས་ཅད་ཀྱི་ཕྱག་གིས་སྤྱི་བོའི་གཙུག་ཏུ་རེག་པར་མཛད་པས། བྱང་ཆུབ་སེམས་དཔའ་དེས་དེ་བཞིན་གཤེགས་པ་རྣམས་ཀྱི་བྱིན་གྱིས་རླབས་ཀྱིས་བསྐུལ་ཏེ་དབང་བསྐུར་བར་རིག་ནས། ཕྱོགས་བཅུ་ན་བཞུགས་པའི་དེ་བཞིན་གཤེགས་པ་ཐམས་ཅད་ལ་ཕྱག་འཚལ་ལོ། །ཞེས་བརྗོད་དེ། ཚུལ་དེ་བཞིན་དུ་བཅོམ་ལྡན་འདས་ཀྱིས་བྱང་ཆུབ་སེམས་དཔའ་ཕྱག་ན་རྡོ་རྗེ་ལྷོ་ཕྱོགས་ཀྱི་ཤིང་སཱ་ལའི་དྲུང་བྱང་ཆུབ་སེམས་དཔའི་ཡུལ་སྟོབས་ཅན་དང་ལྕང་ལོ་ཅན་གྱི་གནས་སུ་དབང་བསྐུར་ཏོ། །དེ་བཞིན་དུ་མ་འོངས་པའི་དུས་སུ། །ཟ་ཧོར་མེ་རི་འབར་བ་དང་། །གནམ་ལྕགས་མེ་རི་འབར་བ་དང་། །མ་ལ་ཡ་ཡི་རྩེ་མོ་དང་། །ལང་ཀ་གྲུབ་པའི་ཡུལ་དག་དང་། །ཆུ་བོ་གང་གཱའི་འགྲམ་དང་ནི། །ཨངྒ་མ་ག་དྷཱ་ཡི་ཡུལ། །ཤྲཱི་ན་ལནྡཱའི་ཡུལ་དུ་ནི། །བྱིན་གྱིས་བརླབས་ཏེ་དབང་བསྐུར་བར་འགྱུར་རོ། །སྔོན་ཚེ་ཚེ་རབས་གྲངས་མེད་ནས། །དགེ་བའི་ལས་ཀྱིས་བསྟན་པ་ཡི། །ལྷག་པའི་ལྷ་ནི་གང་ཡིན་པ། །ད་ལྟ་ཉིད་དུ་ཁྱོད་ལ་དབབ། །ཨཱོཾ་དཔལ་ལྡན་རྡོ་རྗེ་འཆང་བའི་སྐུ། །རྡོ་རྗེ་མི་ཕྱེད་གསུམ་བསྒོམས་ནས། །དེང་བདག་བྱིན་གྱིས་བརླབས་ནས་སུ། །རྡོ་རྗེའི་སྐུར་ནི་མཛད་དུ་གསོལ། །ཨཱོཾ་བུཌྜྷ་བཻ་རོ་ཙ་ན་ཨཱོཾ། ཨཱཿཆོས་ཀྱི་ངག་ལམ་དཔལ་དང་ལྡན། །རྡོ་རྗེ་མི་ཕྱེད་གསུམ་བསྒོམས་ནས། །དེང་བདག་བྱིན་གྱིས་བརླབས་ནས་ནི། །རྡོ་རྗེའི་གསུང་དུ་མཛད་དུ་གསོལ། །ཨ་མི་དེ་བ་ཧྲཱྀཿཨཱ། ཧཱུཾ་དཔལ་ལྡན་ཐུགས་ནི་རྡོ་རྗེ་འཆང་། །རྡོ་རྗེ་མི་ཕྱེད་གསུམ་བསྒོམས་ནས། །དེང་བདག་བྱིན་གྱིས་བརླབས་ནས་
ནི། །རྡོ་རྗེའི་ཐུགས་སུ་མཛད་དུ་གསོལ། །ཧཱུཾ་བཛྲ་སཏྭ་ཧཱུཾ། འདི་ནི་སྔོན་དུ་འགྲོ་བ་སྟེ། །ཕྱི་ནང་གསང་བར་ཡོངས་སུ་སྦྱོར། །བུམ་པ་དབུ་རྒྱན་ཅོད་པན་དང་། །མེ་ཏོག་ཕྲེང་དང་ཕྱག་རྒྱ་དང་། །བྷནྡྷ་རྡོ་རྗེ་དྲིལ་བུ་དང་། །འདོད་ཡོན་ལྔ་དང་བདུད་རྫི་ལྔ། །ཤ་ལྔ་དང་ནི་རྫས་བརྒྱད་དང་། །རྒྱལ་པོའི་བཀའ་རྟགས་རྣམ་པ་བདུན། །ཐུན་མོང་བྱིན་གྱིས་རླབས་པའི་རྫས། །ཁྱད་པར་གསང་བར་གྱུར་པ་ནི། །ཡིད་འོང་བཀྲ་ཤིས་རིགས་ཀྱི་ཡུམ། །ཞི་རྟགས་རྒྱན་གྱིས་མཛེས་པར་བྱ། །ཐབས་ནི་གཡས་ཀྱི་ཕྱོགས་སུ་སྟེ། །དེ་བཞིན་ཤེས་རབ་གཡོན་དུའོ། །ཐབས་ཀྱི་བདག་ཉིད་གནས་ལྔ་རུ། །དཔའ་བོ་འབྲུ་ལྔའི་སྙིང་པོ་ལ། །རྒྱས་གདབ་བྱིན་བརླབ་དབང་བསྐུར་ནས། །བདེ་གཤེགས་ཡབ་ལྔའི་དཀྱིལ་འཁོར་གསལ། །དེ་ཡི་གཟུགས་ཀྱི་ཕུང་པོ་ལ། །བདེ་བར་གཤེགས་པའི་ས་བོན་ལྔ། །འཕྲོ་འདུ་གསལ་བར་གྱུར་པ་ནི། །རྒྱས་གདབ་བྱིན་བརླབ་དབང་བསྐུར་ནས། །བདེ་གཤེགས་ཡུམ་ལྔའི་དཀྱིལ་འཁོར་གསལ། །སྤྱི་བོའི་གཙུག་དང་ལྕེ་ཡི་སྟེང་། །ནུ་མའི་བར་དང་ལྟེ་བའི་སྟེང་། །གསང་གནས་ཡན་ལག་དབང་རྣམས་ནི། །རིགས་ལྔ་སེམས་དང་སྒོ་བ་བསམ། །ཞི་བ་དང་ནི་ཁྲོ་བོ་རྣམས། །སྦྱང་དང་བསྟན་པའི་ཚུལ་དུ་བྱ། །ལྷ་རྣམས་བརྡའ་འཕྲད་འོད་ཟེར་གྱིས། །དཀྱིལ་འཁོར་སྤྱན་དྲང་མཆོད་བསྟོད་ནས། །དབབ་ཅིང་བསྡིམ་པས་ཡབ་ཡུམ་གཉིས། །རྒྱལ་པོ་རྒྱལ་མོར་བྱིན་གྱིས་བརླབ། །ཡེ་ཤེས་དམ་ཚིག་ཆེན་པོ་ཡིས། །པདྨ་རིན་ཆེན་ལྡན་བྱས་ནས། །བདེ་མཆོག་སྒྱུ་མའི་བརྡས་མཚོན་ཏེ། །དབྱིངས་ཀྱི་བདེ་ཆེན་འབྱུང་བ་ནི། །རང་རིག་ཡེ་ཤེས་དེ་ལ་འོད། །ཇི་བཞིན་མཁའ་ལ་གསལ་དག་པའི། །དྲི་མེད་ཉི་མའི་འོད་བས་འཚེར། །བྱང་ཆུབ་སེམས་ནི་ཀུན་ཏུ་དག །ཁམས་གསུམ་རབ་ཏུ་འདས་ནས་ཀྱང་། །མ་ལུས་སྙིང་རྗེས་ཁྱབ་བྱས་ཏེ། །འདོད་པར་བྱ་
བ་རབ་ཏུ་མཉེས། །འོད་འདུས་ཐོག་མའི་གཟུགས་ལ་གཟུད། །རྒྱལ་པོ་ཡབ་ཡུམ་གཉིས་མེད་སྦྱོར། །རང་རིག་བདེ་འབྱུང་གསལ་བའི་རྒྱུན། །འཕྲོ་འདུ་གསལ་བའི་རིན་ཆེན་གྱིས། །སློབ་མ་བྱིན་བརླབ་དབང་བསྐུར་བྱ། །དེ་ནི་ཕན་པའི་བྱིན་རླབས་སོ། །ནུས་པར་བྱེད་པའི་བྱིན་རླབས་ནི། །ཉན་པ་དང་ནི་བསྒྲུབ་པ་དང་། །ལས་བྱེད་པ་དང་འཆད་པ་དང་། །ནུས་པ་ཆེན་པོར་བསྒྲུབ་པའོ། །དེ་ཡི་ཁྱད་པར་བསྒྲུབ་པ་ནི། །ཟླ་གམ་གཅིག་གམ་དྲུག་ཅུའི་བར། །རྡོ་རྗེ་རྒྱལ་པོ་རྒྱལ་ཐེབས་དང་། །སྦྱོར་སྒྲོལ་གིང་དང་ལས་མཁན་དང་། །བསྒྲུབ་པ་གྲོགས་མཆོག་དབང་རྣམས་ནི། །ཐབས་དང་ཤེས་རབ་དབང་ཆེན་ཏེ། །རྡོ་རྗེ་དྲིལ་བུའི་རིག་པ་འཛིན། །མྱ་ངན་འདས་དང་འཁོར་བ་ཡི། །ཆོས་ལ་འདོད་བཞིན་བྱིན་གྱིས་བརླབ། །བློ་བྲལ་འདི་ལ་གནས་པ་ཡིས། །རྣལ་འབྱོར་དེ་ནི་སྐལ་བ་བཟང་། །བདག་དང་གཞན་དོན་མི་འབྱེད་པས། །སྒྱུ་མ་ལྷུན་གྲུབ་ཡུལ་ལ་རོལ། །རང་གི་མཐུ་ཡི་རིག་པ་ལས། །ཆོས་ནི་གཞན་ནས་འབྱུང་མི་འགྱུར། །ཅི་སྟེ་རྣམ་པ་ཡོངས་ཀྱིས་མེད། །རྣལ་འབྱོར་ནམ་མཁའི་ལམ་ལ་གནས། །མ་བྱུང་མ་སྐྱེས་སྙིང་པོ་ལ། །སྒྲོ་བཏགས་ཆོས་ཀུན་ག་ལ་ཡོད། །དབང་ཐོབ་མཛེས་པ་དེ་དག་གི། །དུལ་བའི་སེམས་སུ་བཞག་ནས་ནི། །དམ་ཚིག་ཆེན་པོ་བདེ་བར་གནས། །ཁྱོད་ཀྱིས་སྲོག་ཆགས་གསད་པར་བྱ། །རྫུན་གྱི་ཚིག་ཀྱང་སྨྲ་བར་བྱ། །མ་བྱིན་པར་ཡང་ཁྱོད་ཀྱིས་ལོང་། །ཕ་རོལ་བུད་མེད་སྤྱད་པར་བྱ། །རྡོ་རྗེའི་ལམ་ནི་འདི་དག་གིས། །སེམས་ཅན་ཐམས་ཅད་བསྐུལ་བར་བྱ། །དཀའ་ཐུབ་དག་གིས་གཟིར་མི་བྱ། །ཅི་བདེ་བར་ནི་བདེ་བར་སྤྱད། །འདི་ནི་སངས་རྒྱས་བྱེད་སྤྱོད་ཡིན། །རྣལ་འབྱོར་ལོངས་སྤྱོད་ཐམས་ཅད་ལ། །ཅིས་ཀྱང་མ་འཇིགས་དགའ་བར་གྱིས། །སྡིག་པ་མེད་ཀྱི་ཁྱོད་མ་འཇིགས། །གཞན་ཡང་དམ་ཚིག་ལ་སྡང་ཞིང་། །སྐྱེ་བོ་གང་དག་བསྟན་ལ་གནོད། །
བརྟུལ་ཞུགས་ཁྱོད་ཀྱིས་དེ་དྲངས་ལ། །ཁྲག་ཆེན་པོ་ནི་བཏུང་བར་གྱིས། །སྐལ་ངན་འཇིག་རྟེན་ཉན་ཐོས་ལ། །ནམ་ཡང་དགའ་བར་མི་བྱ་སྟེ། །སྐལ་བཟང་ཧེ་རུ་ཀ་དཔལ་གཙོ། །ཁྱོད་ཀྱིས་རྟག་ཏུ་བསྒྲུབ་པར་གྱིས། །ཞེས་གསུངས་སོ། །དཔལ་ཁྲག་འཐུང་འདུས་པ་རྩ་བའི་རྒྱུད་ལས། ཧེ་རུ་ཀ་བྱིན་གྱིས་བརླབས་པ་རྡོ་རྗེ་དམ་ཚིག་འབྱུང་བའི་ལེའུ་སྟེ་བཅུ་པའོ།། །།དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོ་རབ་ཏུ་གནས་པར་བྱེད་པའི་ཧེ་རུ་ཀ་ཆེན་པོ་དེས། ཕྱོགས་བཅུའི་དེ་བཞིན་གཤེགས་པ་ཐམས་ཅད་རྡོ་རྗེའི་བ་སྤུའི་བུ་གར་བསྡུས་ཏེ། སྐུའི་དབྱིབས་སུ་བརྒྱུད་ཅིང་རྡོ་རྗེའི་ལམ་དུ་ཕྱུང་སྟེ། ཡུམ་གྱི་མཁའ་ལ་ཕབ་ནས། བྱང་ཆུབ་ཀྱི་སེམས་ཧཱུཾ་གི་རང་བཞིན་དུ་བྱས་ནས། དཔལ་ཧེ་རུ་ཀ་འཇིགས་བྱེད་ཆེན་པོའི་སྐུ་ལ། དུར་ཁྲོད་ཆེན་པོའི་ཆས་ཀྱིས་བརྒྱན་པ། ཕྱག་ན་གདུག་བྱེད་ཀྱི་མཚོན་ཆ་ཐོགས་པ་དེ་བཞིན་གཤེགས་པ་ཐམས་ཅད་ཀྱི་སྐུའི་ངོ་བོར་བཞེངས་ཏེ། སྲིད་གསུམ་གདུག་པ་འདུལ་བའི་ཕྱིར། །ཞེ་སྡང་ཆེན་པོའི་སྐུར་བསྟན་ཏེ། །དེ་བཞིན་ཉིད་ཀྱི་དབྱིངས་ཉིད་ནས། །ཁྲོ་མོ་དབང་ཕྱུག་མངོན་དུ་ཕྱུང་། །བྱང་ཆུབ་སེམས་ཀྱི་སྤྲིན་ཚོགས་ལས། །མཉམ་པ་ཉིད་ཀྱི་ཏིང་འཛིན་གྱིས། །ཆོས་ཀུན་གཉིས་མེད་བྱིན་གྱིས་བརླབས། །དབང་བསྐུར་ཐབས་ཀྱི་ཏིང་འཛིན་གྱིས། །གནས་མཆོག་དམ་པར་བྱིན་གྱིས་བརླབས། །རོལ་པ་ཆེན་པོའི་ཏིང་འཛིན་གྱིས། །བསྒྲུབ་པའི་བདག་པོར་བྱིན་གྱིས་བརླབས། །ཤེས་རབ་སྙིང་རྗེའི་ཏིང་འཛིན་གྱིས། །ཡུམ་དང་རྒྱུ་ལ་བྱིན་གྱིས་བརླབས། །ཚོགས་ཆེན་རྫོགས་པའི་ཏིང་འཛིན་གྱིས། །བསྒྲུབ་པའི་རྫས་མཆོག་བྱིན་གྱིས་བརླབས། །རིགས་ཀྱི་སེམས་དཔའི་ཏིང་འཛིན་གྱིས། །སློབ་མ་གསར་བུ་བྱིན་གྱིས་བརླབས། །ཁམས་གསུམ་ཡོངས་སྒྲོལ་ཏིང་འཛིན་གྱིས། །ཏ་ན་ཆེན་པོའི་བྱིན་གྱིས་བརླབས། །སྲིད་གསུམ་བདེ་སྦྱོར་ཏིང་འཛིན་གྱིས། །ག་ཎ་མཁའ་འགྲོའི་བྱིན་གྱིས་བརླབས། །དེ་བཞིན་ཉིད་ཀྱི་ཏིང་འཛིན་གྱིས། །ཕྱི་ནང་ཆོས་ཀུན་བྱིན་གྱིས་བརླབས། །ཀུན་ཏུ་སྣང་གི་ཏིང་འཛིན་གྱིས། །སྙིང་རྗེའི་ཡུལ་རྣམས་བྱིན་གྱིས་བརླབས། །
རྣམ་དག་རྒྱུ་ཡི་ཏིང་འཛིན་གྱིས། །རང་གི་སེམས་ཉིད་བྱིན་གྱིས་བརླབས། །དབང་ཆེན་མཁའ་དབྱིངས་ཏིང་འཛིན་གྱིས། །ཕྱི་ནང་འབྱུང་བ་བྱིན་གྱིས་བརླབས། །བསོད་ནམས་གཏེར་འབྱིན་ཏིང་འཛིན་གྱིས། །གཞལ་མེད་ཁང་པ་བྱིན་གྱིས་བརླབས། །ཡི་གེ་འཕྲོ་འདུའི་ཏིང་འཛིན་གྱིས། །དམ་ཚིག་སེམས་དཔའ་བྱིན་གྱིས་བརླབས། །ཕྱག་རྒྱ་འབར་བའི་ཏིང་འཛིན་གྱིས། །ཡེ་ཤེས་སེམས་དཔའ་བྱིན་གྱིས་བརླབས། །གནས་གསུམ་དག་པའི་ཏིང་འཛིན་གྱིས། །མཆོད་པའི་རྫས་ཀུན་བྱིན་གྱིས་བརླབས། །ཤེས་རབ་རྩལ་གྱི་ཏིང་འཛིན་གྱིས། །ལྷག་པའི་རྒྱན་རྟགས་བྱིན་གྱིས་བརླབས། །དུས་བཞི་མཉམ་སྦྱོར་ཏིང་འཛིན་གྱིས། །སྦྱོར་དང་སྒྲོལ་བ་བྱིན་གྱིས་བརླབས། །ཞེས་གསུངས་ནས་དེ་བཞིན་གཤེགས་པ་ཐམས་ཅད་ཀྱི་ཡང་དག་པའི་ཕྲིན་ལས་ཀྱི་བདག་ཉིད་བྱམས་པ་དང་སྙིང་རྗེ་རབ་ཏུ་བརྟན་པ། བྱང་ཆུབ་ཀྱི་སེམས་ཀྱི་ངང་ལས་ཐུགས་ཆོས་ཉིད་ཀྱི་ཞི་བའི་ངང་ལས་མ་གཡོས་ཀྱང་ཁྲོ་བོ་འབར་བ་ཁྲག་འཐུང་ཆེན་པོའི་ཚུལ་དུ་ཕྱུང་བ་ནི། མི་གཡོ་ཕྱག་རྒྱ་ཆེན་པོའི་ངང་། །ཆོས་ཀྱི་སྐུ་ལས་བཞེངས་ནས་ཀྱང་། །སེམས་ཅན་ཐམས་ཅད་ཁྲོ་བའི་ཕྱིར། །རྡོ་རྗེ་ཡང་ནི་ཁྲོ་བར་བྱ། །ཞེས་གསུངས་ནས། ཉོན་མོངས་ཅན་གྱི་སེམས་ཅན་རིས་སོ་སོའི་གནས་ནས་དྲངས་པ་དང་། དངོས་གྲུབ་ཀྱི་རྣམ་པར་བསྡུ་བ་དང་།གནས་སྦྱང་བ་དང་། བསྒྲལ་ཞིང་སླར་གསོ་བ་དང་། ལས་རབ་ཏུ་གྲུབ་པར་བྱ་བའི་རིམ་པ་དག་དང་། གཞན་ཡང་དཔལ་ཆེན་པོའི་ཡེ་ཤེས་སེམས་དཔའི་འཁོར་རྒྱ་མཚོ་དང་བཅས་པ་ཕྱི་དང་ནང་གི་རྣལ་འབྱོར་མ་དང་། གྲུབ་པ་མོ་དབང་ཕྱུག་ཆེན་མོ་དང་བཅས་པ་དཔང་དུ་གསོལ་ཏེ། གང་ཞིག་བསྟན་པ་ལ་སྡང་བ་ཐུགས་རྗེ་ཆེན་པོས་མ་བསྒྲལ་དུ་ཟིན་ན། རྣལ་འབྱོར་ཆེན་པོའི་སྒོར་ཞུགས་ཀྱང་ཚུལ་བཞིན་དུ་མ་གྱུར་ཏེ། དེ་བཞིན་གཤེགས་པའི་གསུང་མ་བཟུང་བར་འགྱུར་བས། རྣམ་པར་ཤེས་པ་བླ་ན་མེད་པའི་གནས་སུ་བསྒྲལ་བར་བྱ་བ་ནི། ཆོས་ཉིད་ཀྱི་ཁྱད་པར་རོ། །
ཐར་པ་ཆེན་པོའི་ལམ་ཆེན་འདིར། །བྲོད་པ་ཅན་དག་འགྲོ་བ་ལྟར། །སྐལ་བར་ལྡན་པའི་ནང་ན་ཁྱོད། །བདེ་བར་འོངས་སོ་ལེགས་པར་འོངས། །བདེ་གཤེགས་ཐུགས་རྗེ་སྒྲོལ་ལ་མཁས། །བློ་ངན་སེམས་ཅན་སྙིང་རིང་ཅན། །གཉིས་སུ་མེད་པར་བསྒྲལ་བར་སྣང་། །ཁམས་གསུམ་ནས་བྱུང་སེམས་ཅན་རྣམས། །རྡོ་རྗེའི་སྐུ་ཡི་ཁྱད་པར་གྱིས། །འོད་ཟེར་ཚུལ་གྱིས་བསྡུས་ནས་ནི། །དེ་དག་བདག་གིས་གཟུགས་ལ་གཟུད། །སྤྲོ་བསྡུ་རྡོ་རྗེ་ཐམས་ཅད་ཀྱི། །སྐུ་དང་ཡེ་ཤེས་མཆོག་ཏུ་བསྒྲལ། །ལས་ལ་བབ་པའི་རྣལ་འབྱོར་པས། །དུས་ལ་བབ་པའི་སེམས་ཅན་འདི། །གཉིས་མེད་ཕྱག་རྒྱ་ཆེན་པོ་ཡི། །དུས་ལ་བབ་པོ་ས་མ་ཡ། །ཨཱོཾ་ཀ་རེ་ཀ་ཧ་ཙ་རོ་པ་ཧོ་ས་མ་ཡ་སྟྭཾ། མཐའ་མེད་འགོག་མེད་མི་འཛིན་པའི། །རྣལ་འབྱོར་མཉམ་ཉིད་ཐོད་རྒལ་དུ། །ཁྲོ་གཏུམ་རྔམ་ཞི་ལ་སོགས་པ། །སྣ་ཚོགས་སྟོན་ཡང་སེམས་མི་གཡོ། །ཨ་ཙ་ལ་ས་མ་ཡ་དྷརྨཱ་དྷཱ་ཏུ་སྭ་བྷཱ་ཝ་ཨཱདྨ་ཀོ྅ཧཾ། ཁྲོ་བོའི་མཚན་མེད་བྱམས་པར་གནས། །གསོད་བྱེད་སྙིང་རྗེའི་མཚན་ཉིད་དེ། །བསྒྲལ་ནས་བསྟབ་པ་དགའ་བའི་མཆོག །ཡལ་བར་མི་འདོར་བཏང་སྙོམས་སོ། །ཨཱོཾ་མ་ཧཱ་ཀ་རུ་ཎ་མ་ཧཱ་མཻ་ཏྲི་སྭ་བྷཱ་ཝ་ཨཱདྨ་ཀོ྅ཧཾ། དྲོད་དབུགས་རླན་ལས་རཾ་ཡཾ་ཁཾ། །བསྲེག་ཅིང་རྟོག་ལ་བཀྲུ་བར་བྱ། །ཆུ་ཤེལ་དཀྱིལ་འཁོར་སྐྱེ་མེད་བསམ། །ཞེ་སྡང་སེར་སྣ་གཏི་མུག་ནི། །དམྱལ་བ་བྱོལ་སོང་ཡི་དྭགས་ལམ། །ང་རྒྱལ་འདོད་ཆགས་ཕྲག་དོག་ནི། །ལྷ་དང་ལྷ་མིན་མི་ཡི་ལམ། །དགེ་བཅུ་བསམ་གཏན་སྙོམས་འཇུག་ནི། །གོང་མ་གསུམ་དུ་སྐྱེ་བའི་རྒྱུ། །དེ་དག་རང་བཞིན་མེད་ཤེས་ཤིང་། །སེམས་མི་སྐྱེ་བ་སྐྱེ་རྒྱུན་གཅོད། །ཨ་ནྲྀ་སུ་ཏྲི་པྲེ་དུ་ཛཿ། རྒྱུད་དྲུག་འཁོར་བ་རྩད་བཅད་ནས། །རྒྱུད་ལྔ་ལམ་གྱི་སྒོ་དགག་ཕྱིར། །ཨཱོཾ་ཨཱཿཧཱུཾ་ཧྲཱྀཿསྭཱ་ཧཱ། སོ་སོའི་སྐྱེ་གནས་སྒོ་བཀག་ནས། །མཉེས་པ་ལྔ་དང་སྟོང་པ་ལྔ། །སྐོང་བ་དང་ནི་གྲུབ་པ་ལྔ། །འབྲས་བུ་ལྔ་ཡི་འདི་དག་བསྟན། །ཞེས་གསུངས་སོ། །ཞེས་
དཔལ་ཁྲག་འཐུང་འདུས་པ་རྩ་བའི་རྒྱུད་ལས། སྐུ་གསུང་ཐུགས་ཀྱི་ཕྱག་རྒྱ་ཆེན་པོ་སྒྲོལ་བ་བླ་ན་མེད་པའི་ཕན་ཡོན་ཡང་དག་པར་བཤད་པའི་ལེའུ་སྟེ་བཅུ་གཅིག་པའོ།། །།དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོ་ཧེ་རུ་ཀ་དེ། འདུས་པའི་འཁོར་རབ་ཏུ་བསྡིག་པའི་ཕྱིར། ཉིད་ཀྱི་སྐུ་ལས་ཁྲོ་བོ་ཆེན་པོ་ཉོན་མོངས་པའི་ཚོགས་མ་ལུས་པ་ཞལ་དུ་རྔུབ་པར་བྱེད་པའི་ཁྲག་འཐུང་གི་ཚོགས་བྱེ་བ་གྲངས་མེད་པ་དང་། ཁྲོ་མོ་དབང་ཕྱུག་གི་གཙོ་མོ་དང་། མ་མོ་དང་། ཕྲ་མེན་མ་དང་། མཁའ་འགྲོ་མ་དང་། མ་མོ་དང་། སྲིན་མོ་དང་། ལུ་གུ་རྒྱུད་དང་། ཕོ་ཉ་མོ་དང་། སའི་བདག་མོ་དང་། ལང་ཀའི་ཚོགས་དང་། གིང་གི་གཙོ་བོ་དང་གཡོག་ཏུ་བཅས་པ་དང་། འབར་མ་དང་། སྲིན་མོའི་ཚོགས་དང་། བར་སྣང་ཡངས་པ་ལ་རྒྱུ་བའི་མཁའ་འགྲོ་མ་རྣམས་མངོན་དུ་ཕྱུང་སྟེ། དེ་དག་ཀྱང་ཤ་ཟ་ཁྲག་འཐུང་བ་ལ་དགའ་བ་དང་། མཆེ་བ་ཅན་དང་།གཤོག་པ་ཅན་དང་། ནུ་མ་ཅན་དང་། སྡེར་མོ་ཅན་གྱི་ཚོགས་ཇི་སྙེད་པ་གང་དག་གི། གང་དག་འདའ་བར་བྱེད་པ་རྣམས་ཚར་གཅོད་པར་དབང་བསྐུར་ཏེ།བྲན་གྱི་ཚོགས་བཞིན་དུ་མཛད་ནས། དམ་ཚིག་གི་བྱ་ར་ལ་བཞག་སྟེ། འདི་སྐད་ཅེས་བཀའ་སྩལ་ཏོ། །ཉོན་ཅིག་གདུག་པ་ཅན་གྱི་ཚོགས། །ང་ཡི་བསྟན་པའི་ཚུལ་འདི་ཉིད། །མ་འོངས་པ་ན་སྙིགས་མའི་དུས། །ཤིན་ཏུ་གདུལ་བར་དཀའ་བ་འབྱུང་། །བྱམས་དང་སྙིང་རྗེས་གཞི་བཟུང་བའི། །ཀུན་ཏུ་བཟང་པོའི་ས་ཆེན་ལ། །མྱུར་དུ་འབད་པས་བསྒྲལ་བར་བྱ། །སྐུ་དང་གསུང་དང་ཐུགས་ཀྱི་བདག །ཚེ་ལུང་རྡོ་རྗེའི་དངོས་གྲུབ་གཞི། །ཁྱེད་ཀྱིས་དེ་ལ་མྱུར་དུ་གསོལ། །ཉོན་མོངས་ལས་དང་བག་ཆགས་དང་། །རྣམ་པར་སྨིན་པ་སྙོམས་པར་འཇུག །སྤྲུལ་པ་དང་ནི་ཆོས་ཀུན་གྱིས། །ང་ཡི་ས་ལ་སྒྲིབ་པ་སྦྱངས། །རྟོགས་པ་དང་ནི་ཐུགས་རྗེ་ཡིས། །གཟས་པ་པོ་དང་བདག་ཉིད་དང་། །ཐུན་མོང་ཕལ་པ་བསྒྲལ་ཞིང་གསོ། །རྒྱལ་པོ་མེ་དང་ཆུ་དང་དུག །སྦྲུལ་དང་གཅན་གཟན་ཁྲོ་བོ་དང་། །མི་རྒོད་ཆོམ་རྐུན་གདོན་
རྣམས་ཀུན། །ང་ལ་གང་ལྟོས་ཞི་བར་གྱིས། །ཚེ་དབང་དཔལ་དང་དབང་ཕྱུག་དང་། །གྲགས་པ་དང་ནི་ལོངས་སྤྱོད་ཚོགས། །གང་འདོད་དེ་ལ་རྒྱས་པར་གསོལ། །ཕ་མ་མཁན་པོ་སློབ་དཔོན་དང་། །རྒྱལ་པོ་རྗེ་དཔོན་ཚུལ་དག་ནི། །མ་ལུས་དེ་ཡི་དབང་དུ་བསྡུས། །སྟོང་ཕྲག་བརྒྱད་ཅུའི་བགེགས་དང་བདུད། །མི་དང་མི་མ་ཡིན་གྱི་ཚོགས། །ང་ལ་མི་མཐུན་མངོན་དུ་སྤྱོད། །ཀྱེ་ཀྱེ་ཁྱེད་རྣམས་བརྩོན་པས་ང་ལ་ཉོན། །ང་ཡི་བསྟན་པ་འདི་ལྟ་བུ། །འདས་དང་མ་འོངས་དུས་རྣམས་ལ། །ཤིན་ཏུ་དཀོན་ཞིང་རྙེད་པར་དཀའ། །དེ་ཕྱིར་ང་ཡིས་ཁྱེད་རྣམས་ལ། །གདམས་ཤིང་ཡོངས་སུ་བསྟན་པ་ཡིན། །ཞེས་གསུངས་སོ། །དཔལ་ཁྲག་འཐུང་འདུས་པ་རྩ་བའི་རྒྱུད་ལས། ལས་ཀྱི་གཉེར་གཏད་པའི་ལེའུ་སྟེ་བཅུ་གཉིས་པའོ།། །།དེ་ནས་དཔལ་ཆེན་པོ་ཉིད་ལས་སྤྲུལ་པའི་ཁྲོ་བོ་དང་ཁྲོ་མོའི་ཚོགས་དང་། མ་མོ་དང་མཁའ་འགྲོའི་ཚོགས་དང་། ཕྲ་མེན་མ་དང་། ཕོ་ཉའི་ཚོགས་དང་བཅས་པ་དེ་དག་གི་མགྲིན་གཅིག་ཏུ། འདི་སྐད་ཅེས་བསྟོད་དོ། །བདག་མེད་ཕྱོགས་བྲལ་དོན་དམ་ཐུགས་ཆུད་ཅིང་། །བྱམས་དང་སྙིང་རྗེས་དགྲ་ཟིན་མི་མངའ་ཞིང་། །གདུག་པ་འདུལ་ཕྱིར་དུས་ལས་མི་འདའ་བའི། །འཇིགས་བྱེད་ཧེ་རུ་ཀ་ལ་ཕྱག་འཚལ་ལོ། །ཞེས་པ་ལ་སོགས་པས་བསྟོད་དེ། ཕྱག་འཚལ་ཞིང་ཞབས་ལ་སྤྱི་བོས་གཏུགས་ནས། དཔལ་ཆེན་པོ་ཉིད་ཀྱི་བསྟན་པའི་གཉེར་གཏད་པ་རྣམས་བསྲུངས་ཤིང་སྐྱོང་བར་ཁས་བླངས་ཤིང་། དམ་བཅས་སོ། །ཉིད་ཀྱི་སྐུ་གསུང་ཐུགས་ཀྱི་ཡོན་ཏན་དང་ཕྲིན་ལས་རྣམས་ལ་རྗེས་སུ་ཡི་རང་ཞིང་མངོན་པར་དགའོ། །དེ་ནས་འཁོར་གྱི་ཚོགས་མ་ལུས་པ་དེ་དག་ནི། དཔལ་ཆེན་པོ་ཉིད་ཀྱི་སྐུ་ལ་འོད་ཟེར་གྱི་ཚུལ་དུ་ཐིམ་པར་གྱུར་ཏེ། དཔལ་ཆེན་པོ་ཧེ་རུ་ཀ་ཡབ་ཡུམ་ཉིད་ཀྱང་། རོལ་པ་ཆེན་པོའི་རོས་ཚིམས་པར་མཛད་ནས། བདེ་བ་ཆེན་པོའི་ངང་སྐྱེ་བ་མེད་པའི་ཆོས་ཀྱི་སྐུ་མཉམ་པ་ཉིད་ཀྱི་ཀློང་དུ་ཐིམ་པར་གྱུར་ཏོ། །སེམས་ཅན་གྱི་ཁམས་མ་ལུས་ཤིང་ལུས་པ་མེད་པ་ཐམས་ཅད་ཀྱང་། དཔལ་
ཆེན་པོ་ཡབ་ཡུམ་གྱི་བྱིན་གྱིས་རླབས་ཀྱིས། མི་སྐྱེ་བའི་ཆོས་ལ་བཟོད་པ་ཐོབ་སྟེ། ཆོས་ཀྱི་མིག་རྣམ་པར་དག་ནས། ལྷུན་གྱིས་གྲུབ་པའི་ས་ལ་རབ་ཏུ་ཉེ་བར་གནས་པར་གྱུར་ཏོ། །དཔལ་ཁྲག་འཐུང་འདུས་པ་རྩ་བའི་རྒྱུད་ལས། བྱིན་གྱིས་རླབས་པའི་ཆོ་འཕྲུལ་གྱི་དཀྱིལ་འཁོར་རྣམ་པར་བསྡུས་པའི་ལེའུ་སྟེ་བཅུ་གསུམ་པའོ།། །།བཅོམ་ལྡན་འདས་གསང་བ་དཔལ་ཧེ་རུ་ཀའི་གལ་པོ་བསྡུས་པ། དཔལ་ཁྲག་འཐུང་འདུས་པ་རྩ་བའི་རྒྱུད་ཅེས་བྱ་བ་རྫོགས་སོ།། །།རྒྱ་གར་གྱི་མཁན་པོ་སློབ་དཔོན་ཆེན་པོ་པདྨ་འབྱུང་གནས་དང་། བོད་ཀྱི་ལོཙྪ་བ་བཻ་རོ་ཙ་ན་བདག་གིས་བསྒྱུར་ཞིང་ཞུས་ཏེ་གཏན་ལ་ཕབ་པའོ།། །།རྒྱལ་པོའི་བླ་དཔེའོ། །གཏེར་རྒྱ། སྦས་རྒྱ། གཏད་རྒྱ། རྒྱ་རྒྱ་རྒྱ།། །།