འཇམ་དཔལ་གཤིན་རྗེ་འཁྲུལ་འཁོར་ནག་པོ་སྡིག་པ་སྙིང་འཛིངས་གསང་བའི་རྒྱུད།
རྒྱ་གར་སྐད་དུ། མཉྫུ་ཤྲཱི་ཡ་མ་ཡནྟྲ་ཀཱ་ལ་བིཙྪ་ཧྲྀ་ད་ཡ་ཀཱི་རྞ་གུ་ཧྱ་ཏནྟྲ། བོད་སྐད་དུ། འཇམ་དཔལ་གཤིན་རྗེ་འཁྲུལ་འཁོར་ནག་པོ་སྡིག་པ་སྙིང་འཛིངས་
གསང་བའི་རྒྱུད། བཅོམ་ལྡན་འདས་འཇམ་དཔལ་འཇིགས་བྱེད་ཆེན་པོ་ཡ་མཱནྟ་ཀ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། ཆོས་ཀྱི་དབྱིངས་རྣམ་པར་དག་པའི་ཀློང་། མཐའ་དབུས་མེད་པའི་ཕོ་བྲང་ན། རྒྱ་ཡོངས་སུ་མ་ཆད་པའི་ཡེ་ཤེས་ལྷུན་གྱིས་གྲུབ་པའི་གཞལ་ཡས་ཁང་ན། བཅོམ་ལྡན་འདས་སྐུ་གསུང་ཐུགས་རྡོ་རྗེའི་བདག་ཉིད། སངས་རྒྱས་ཀུན་གྱི་ངོ་བོ་རྡོ་རྗེ་འཆང་ཆེན་པོས། སངས་རྒྱས་ཀུན་གྱི་རང་བཞིན་ཆོས་ཉིད་ཅི་ཡང་མ་ཡིན་པ་ཞེས་བྱ་བ་མཉམ་པ་ཆེན་པོའི་ངང་ལ་སྙོམས་པར་ཞུགས་སོ། །དེ་ཉིད་མ་བསྒྲིབས་ཀྱི་དབྱིངས་ལ་གནས་པའི་ཡེ་ཤེས་དང་། ས་དང་ལམ་ལ་གནས་པ་རྣམས་དང་། ལྷ་དང་མཁའ་འགྲོ་རིག་པ་འཛིན་པ་རྣམས་དང་། འཇིག་རྟེན་ལས་འདས་པའི་ཡེ་ཤེས་པ་དང་། འཇིག་རྟེན་དྲེགས་པའི་གཙོ་བོ་རྣམས་དང་ཐབས་གཅིག་ཏུ་བཞུགས་སོ། །དེའི་ཚེ་དེའི་དུས་ན་འཁོར་དེ་དག་གི་ནང་ནས་རྡོ་རྗེ་སྙིང་པོ་ཞེས་བྱ་བ་སྟན་ལས་ལངས་ཏེ། བཅོམ་ལྡན་འདས་ལ་གསོལ་པ། ཀྱེ་ཧོ། སངས་རྒྱས་ཀུན་གྱི་རང་བཞིན་རྡོ་རྗེ་འཆང་། །ཆོས་སྐུ་ཐུགས་རྗེ་ཆེན་པོས་ཀུན་ཁྱབ་ཀྱང་། །མ་རྟོགས་སེམས་ཅན་ཐུགས་རྗེས་བསྒྲལ་བའི་ཕྱིར། །མི་རྟོག་དབྱིངས་ལས་རྫོགས་པའི་སྐུར་བཞེངས་ལ། །མཉམ་པའི་ངང་ལས་འགྲོ་བའི་དོན་མཛོད་ཅིག །ཅེས་གསོལ་པས། དེ་ནས་བཅོམ་ལྡན་འདས་ཉིད་མི་རྟོག་པའི་དབྱིངས་ལས་རོལ་པ་ཆེན་པོའི་ཐུགས་རྗེའི་ཆགས་པས་སྐུར་བཞེངས་ཏེ། དྲེགས་པ་ཅན་དབང་དུ་བསྡུ་ཞིང་འདུལ་བའི་ཕྱིར། ཕྱག་རྒྱ་ཆེན་པོ་ཟིལ་གྱིས་གནོན་པའི་སྐུར་ཏིང་ངེ་འཛིན་ལ་སྙོམས་པར་ཞུགས་ཏེ། གསང་སྔགས་འདི་དག་ཆེད་དུ་གསུངས་སོ། །ཨྱེ་ཨྱེ་ཨྱེ། ཨ་ཀྲོ་ཏེ་ཀ །ཡ་མཱནྟ་ཀ །ཡ་མ་ཡེ། ཀཱ་ལ་རཱུ་པ། ཀ་པ་ཡེ། ཧྲི་སྡི། ཨ་པ་ཡེ། ཨ་ཨ་ནེ། ཨ་ནེ། ཨུ་ཨུ་ནེ། ཨུ་ནེ། དུ་དུ་ནེ་དུ་ནེ། ཨ་ཨཱིཾ། ཨུ་ཨེ། ཨོ་ཨཾ། ར་རཱི། ལ་ལཱི། དུ་དུ་ཡེ། བྱ་ཙ་ཡེ། སིངྷ་ཡེ། ཧྲི་ད་ཡེ། བྷི་ད་ཡེ། ཙིཏྟ་ཡེ། ཧ་ལ་ཡེ། མུ་ཁ་ཡེ། ཨཱུ་ཨཱུ་ནེ། ཨཱུ་ཨཱུ་ནེ། བྱི་ཀྲི་ཏ། ཨཱ་ཨཱ། ནཱ་ནཱ། ཡ་མ་ར་ཙ། ཡ་མ་རཀྴ། ཡ་མ་ར་ག་ཨ། ཡ་མ་རཀྵ། བེ་ཏཱ་ལི་ཀྲོ་དྷཱི་ཤྭ་རཱི། མ་མ་ཨེ་ཀ་ཛ་ཏི། དམ་ཁ་
ལ་བམ་རིལ། རུ་ལུ་རུ་ལུ་ཤྲཱི་བཛྲ་ཀྲོ་ཏ། ཡ་མ་ཀརྨ་རོ་ཥ་ཎ་ཀྲོ་དྷ་ཙནྡྷ། རག་ཤ་མོན་ཏ། ཨ་མུ་ཀ །མྱགས་ཐུཾ་རིལ་ཏྲིག་ནན། སྦུར་ཡ་ནན། ཨེ་ཧུར་ཐུཾ་ཛ། ཁཾ་ཤག་རོ་མྱགས་མུག་ཏི་རྦད་ཡ། ཞེས་གསུངས་པས་ནམ་མཁའ་ཉིད་གྲུ་གསུམ་མཐིང་ནག་ཏུ་གྱུར་ཏོ། །རླུང་རྡོ་རྗེ་རྒྱ་གྲམ་ཕྱོགས་བཅུར་འཐོར་རོ། །རཀྟའི་རྒྱ་མཚོ་འཁྲུག་གོ། །འཇིག་རྟེན་གྱི་ཁམས་ཐམས་ཅད་འུར་འུར་དང་ཆེམ་ཆེམ་དང་རབ་ཏུ་འགུལ་ལྡེག་གོ། །དེའི་ཚེ་དེའི་དུས་ན་འཁོར་ཐམས་ཅད་བརྒྱལ་ཏེ། ལུས་ས་ལ་རྡེབས་ཤིང་དྲན་པའི་དབང་པོ་ཉམས་སོ། །དེ་ནས་ཡང་རྡོ་རྗེ་སྙིང་པོས་གསོལ་པ། ཀྱེ་མ་ཧོ། འཇིགས་བྱེད་ཆེན་པོ་ལགས། མཉམ་པའི་ངང་ལས་འཇིགས་པའི་སྐུར་ཁྲོས་ཏེ། །གསང་སྔགས་གསུང་གི་ངོ་བོ་ཆེད་དུ་གསུང་། །འཇིག་རྟེན་ཁམས་རྣམས་རབ་ཏུ་ཆེར་གཡོས་ཏེ། །འཁོར་ཚོགས་འདུས་པའི་སྲོག་དང་བྲལ་དུ་ཉེ། །ཐུགས་རྗེ་ཉི་མ་ལྟ་བུར་དབུགས་དབྱུང་ཕྱུང་། །དཀྱིལ་འཁོར་ཆེན་པོ་བསྐྲུན་པར་ཕྲིན་ལས་བསྒོ། །ཞེས་གསོལ་ཏོ། །དེ་ནས་བཅོམ་ལྡན་འདས་ཀྱིས་དབུགས་དབྱུང་བའི་ཏིང་ངེ་འཛིན་ལ་ཞུགས་ནས། འཁོར་ཐམས་ཅད་བརྒྱལ་བ་ལས་ལངས་ཏེ། བཅོམ་ལྡན་འདས་ལ་འདུན་པ་སྐྱེས་ཏེ། སྐད་ཅིག་མས་ལྷགས་ཏེ་རང་རང་གི་སྙིང་པོ་མཐུ་རྩལ་དྲན་ནས་ཕུལ་ཏེ་སྐུ་ལ་འཁྲིལ་བར་གྱུར་ཏོ། །དཔལ་སྡིག་པ་སྙིང་འཛིངས་འཁྲུལ་འཁོར་ནག་པོ་གསང་བའི་རྒྱུད་ལས། གླེང་གཞིའི་ལེའུ་སྟེ་དང་པོའོ།། །།དེ་ནས་བཅོམ་ལྡན་འདས་ལ་རྡོ་རྗེ་སྙིང་པོས་གསོལ་པ། ཀྱེ་ཧོ། སངས་རྒྱས་ཀུན་གྱི་ངོ་བོ་ཉིད། །ལྔ་བརྒྱའི་ཐ་མ་སྙིགས་མའི་དུས་ཀྱི་ཚེ། །འཆི་བདག་བདུད་ཀྱི་གཤིན་རྗེ་ཁོང་ནས་འཁྲུག །མཚམས་མེད་ལྔ་ཡི་ལས་རྣམས་འདུན་སྤྱོད་པ། །དགའ་རབ་དབང་ཕྱུག་བདུད་ཀྱི་སྤྲུལ་པ་འགྱེད། །རང་དང་འདྲ་བའི་ཚུལ་འཛིན་བན་འདྲ་ཡིས། །ཕྱི་རོལ་ལ་སོགས་སྔགས་དང་དུག་རླངས་འཚལ། །དེ་དུས་གཟེར་ཐུན་ནག་པོ་དམོད་པའི་མཆོག །སྡིག་པ་ནག་པོ་སྙིང་ལ་རུ་འཛིངས་པའི། །ལས་ཀྱི་འཁྲུལ་འཁོར་ནག་པོ་བཤད་པར་མཛོད། །ཅེས་གསོལ་པས།
དེ་ནས་བཅོམ་ལྡན་འདས་ཀྱི་ཁྲོ་བོ་ཐམས་ཅད་འབྱུང་ཞིང་ལས་ཀྱི་གཟེར་ཐུན་དྲག་པོ་རྒྱས་པར་བྱ་བའི་ཕྱིར། བཙུན་མོ་ཆོས་ཀྱི་དབྱིངས་ཀྱི་བྷ་ག་ལ་སྙོམས་པར་ཞུགས་ཏེ་ཡེ་ཤེས་བཞི་དང་སྐུ་གསུང་ཐུགས་ལས། ཡ་མ་རཱ་ཛ་དང་། མྱོས་བྱེད་འབར་བ་དང་། ཨཱརྱ་དམར་པོ་དང་། རལ་པ་ཚར་དགུ་དང་བཞི་མངོན་དུ་ཕྱུང་སྟེ། དེ་ཉིད་དྲེགས་པ་འདུལ་ཞིང་ཟིལ་གྱིས་གནན་པའི་ཕྱིར། ཡ་མ་རཱ་ཙ་དང་། ཕྱག་ན་རྡོ་རྗེ་དང་། རུས་སྦལ་མི་ཟན་དང་། ཡེ་ཤེས་བྱ་ཁྱུང་དང་བཞིར་གྱུར་ཏོ། །འབྱུང་བའི་ངོ་བོར་འཛིན་པ་ཉིད་དག་ནས། །དྭངས་མ་ཡེ་ཤེས་ཆེན་པོ་བཞིར་གྲོལ་ཏེ། ཕྱག་རྒྱའི་སྐུ་ལ་རྫོགས་པར་གྱུར་ཏོ། །སྤྲུལ་པ་རྣམ་པ་གསུམ་སྟེ། སྐུའི་སྤྲུལ་པ་འཆི་བདག །གསུང་གི་སྤྲུལ་པ་སྲོག་བདག །ཐུགས་ཀྱི་སྤྲུལ་པ་ཚེ་བདག་སྟེ། གདུག་པ་ཅན་འདུལ་བར་གྱུར་ཏོ། །གཤེད་ཆེན་པོ་བཞི་ལས། ལས་ཀྱི་མོན་པ་བཞིར་སྤྲུལ་ཏེ། ཕོ་གཤེད་སུམ་བརྒྱ་དྲུག་ཅུས་ཕུང་པོ་ལ་དབང་བསྒྱུར་རོ། །མོ་གཤེད་བདུད་མོ་བཞིས་མོ་གཤེད་སུམ་བརྒྱ་དྲུག་ཅུས་འབྱུང་བ་ལ་དབང་བསྒྱུར་རོ། །དེ་ལྟར་གཤིན་རྗེ་བདུན་བརྒྱ་ལ་སོགས་པ། འཇིག་རྟེན་པའི་དྲེགས་པ་ཅན་ཐམས་ཅད་ཀྱིས་དཔལ་ཕྱག་རྒྱ་ཆེན་པོ་ཟིལ་གྱིས་གནོན་པའི་ཡ་མཱནྟ་ཀ་ལ་ཡོངས་སུ་བསྐོར་ཏེ། རོལ་པ་ཆེན་པོ་ལས་ཀྱི་དཀྱིལ་འཁོར་དུ་འཁོད་པར་གྱུར་ཏེ་བཞུགས་སོ། །དེའི་ཚེ་དེའི་དུས་ན། བཅོམ་ལྡན་འདས་ཀྱིས་འཁོར་རྣམས་ལ་འདི་སྐད་ཅེས་གསུངས་སོ། །སྣང་སྟོང་གཉིས་མེད་ཡེ་ཤེས་སྐུ། །ཐིག་ལེ་ཉག་གཅིག་སྤྲོས་དང་བྲལ། །སྐྱེ་མེད་རྣམ་དག་བདེ་ཆེན་སྐུ། །འགག་མེད་བདེ་ཆེན་ཀློང་གདལ་བའི། །བརྡ་དང་བྲལ་བའི་ཆོས་ཉིད་ལ། །ཆགས་དང་བྲལ་གྱིས་གྲུབ་པའོ། །ཞེན་ཆགས་གཟུང་འཛིན་རྟོག་དཔྱོད་འདས། །གཉིས་མེད་དོན་དམ་ཆོས་ཀྱི་སྐུ། །རྒྱུ་དང་རྐྱེན་ལས་སྒྲུབ་པ་མེད། །ཀུན་གྱི་རང་བཞིན་དངོས་མེད་པ། །ཡོན་ཏན་མ་ལུས་ཀུན་འབྱུང་བའི། །དེ་ཉིད་རྟོག་མེད་བརྗོད་དང་བྲལ། །དུག་ལྔ་ཡེ་ཤེས་ལྔ་ཡི་སྐུ། །ཕྱག་རྒྱ་ཆེན་པོ་ཡེ་ཤེས་ཉིད། །སྟོང་པ་ཆེན་པོའི་ངང་ཉིད་ལས། །རང་སྣང་རོལ་པའི་ཕྱག་རྒྱར་གསལ། །ལས་དང་སྦྱོར་བ་དུ་མ་ཀུན། །སྒྱུ་མ་ལྷུན་
གྲུབ་རོལ་པར་བཤད། །འདི་དག་བདེ་དང་སྨིན་བྱེད་པའི། །རོལ་པ་ཆེན་པོའི་འཁོར་ལོ་ཡིན། །སྡིག་པ་སྙིང་འཛིངས་འཁྲུལ་འཁོར་ནག་པོའི་གསང་རྒྱུད་ལས། ལས་ཀྱི་འཁྲུལ་འཁོར་བཤད་པའི་ལེའུ་སྟེ་གཉིས་པའོ།། །།དེ་ནས་བཅོམ་ལྡན་འདས་རྡོ་རྗེ་འཆང་ཆེན་པོས། རང་གཤེད་རང་ལ་དབབ་པའི་ཕྱིར། སྡིག་པ་ནག་པོ་སྙིང་ལ་རུ་འཛིངས་པའི། འཁྲུལ་འཁོར་དཀྱིལ་འཁོར་ཆེན་པོའི་བཅའ་ཐབས་འདི་གསུངས་སོ། །སྟོབས་ཆེན་ནག་པོའི་རྫས་བཟློག་དག །ཕུང་ཤུལ་མི་བསད་གཡུལ་བཀྱེས་ས། །དུར་ཁྲོད་རོ་ཡི་ས་དག་ལ། །རོ་བསྲེག་རྡོ་དང་སོལ་བ་དང་། །གྲི་ལྕགས་དཔའ་བོ་གཡུལ་བསད་ཁྲག །ར་དུག་རེའུ་ལྕག་ཨ་ཤོ་ནག །གྲོག་མཁར་ས་སྤྱིན་ཁྲོ་ཤུག་ནག །ཤོག་འདམ་མཆེ་ཆུ་སྦྱར་ཏེ་བརྩེག །ནག་པོ་ཁྲུ་གང་བང་རིམ་བཞི། །ཡོངས་རྫོགས་སྟོབས་ཆེན་མི་འགྱུར་གནད། །གདན་ལ་རུས་སྦལ་གླང་ཆེན་འདེགས། །བར་ལ་རིགས་བཞི་སྦྲུལ་གྱིས་འདེགས། །བང་རིམ་བཞི་ལ་སྟག་དང་གཟིག །གསུམ་པ་སེང་གེ་ཆུ་སྲིན་ནོ། །འཁོར་ལོ་འབྲུག་གིས་འདེགས་པ་ལ། །ཆར་ཁེབས་མཁའ་ལྡིང་རོ་ཉེ་ཟ། །རང་རང་ཁ་དོག་ལྡན་པ་སྟེ། །མཁས་པས་བཀོད་པས་སྟོབས་ཆེན་གནད། །བང་རིམ་ཕྱོགས་ཀུན་དྲག་པོའི་སྒོ། །ཡོངས་སུ་རྫོགས་པའི་ལྟོ་རུ་བཅའ། །གྲི་མདའ་རྨྱུག་རྒོད་ཁྲག་ཆེན་ལྡན། །སྲོག་ཤིང་ཟིལ་གནོན་སྐུ་རུ་ཤར། །བང་རིམ་དང་པོ་ཟུར་བཞི་ལ། །སྲིན་པོ་ཡ་མ་རཱ་ཙ་དང་། །གཤིན་རྗེ་མྱོས་བྱེད་འབར་བ་དང་། །བདུད་པོ་ཨཱརྱ་མ་རུ་ཙེ། །གནོད་སྦྱིན་རལ་པ་ཚར་དགུ་དགོད། །བང་རིམ་གཉིས་པར་སྲོག་གི་གཤེད། །དུང་ལྕགས་བསེ་དང་གསེར་གྱི་མོན། །གསུམ་པ་ཕྱི་ཡི་གཤེད་བཞིའོ། །ཐ་མར་འཆི་བདག་བཅུ་གཉིས་དགོད། །དཀར་པོ་སྙིང་འབྱིན་མགོན་པོ་ནག །ཡབ་རྗེ་ནག་པོ་སྐུ་མདོག་དམར། །དྲག་པོ་སྒོ་བཞི་དག་ལ་དགོད། །ལྷར་གསལ་སྟོང་གསུམ་ཟིལ་གནོན་སྒྲོལ། །སངས་རྒྱས་ཐུགས་རྗེ་སྟོབས་དཔག་མེད། །བཀའ་རྟེན་བྱིན་རླབས་ཡུན་དུ་གནས། །བང་རིམ་དག་
གི་བར་བར་དུ། །ཕས་ཀྱི་ལྷ་དང་གནོད་བྱེད་མནན། །གང་བསྒྲུབ་ལས་རྣམས་འགྲུབ་པར་འགྱུར། །སྟོབས་དང་ལྡན་པའི་སྔགས་པ་འམ། །རྡོ་རྗེ་ནང་དམེ་དྲག་པོ་ཡི། །གནམ་ལྕགས་ཨུར་མོ་ནང་འགྲས་ན། །རྒྱ་མཚོའི་གཏིང་དུ་ནཱ་ག་བདུད། །མུན་པའི་དམག་སྡུད་འཁོར་ལོ་བཅའ། །རི་རབ་རྩེ་ལ་གནམ་ལྕགས་དག །ཨུར་མོ་སོ་བརྡར་འཁོར་ལོ་བཅའ། །རི་ཐང་མཚམས་སུ་ཞེ་སྡང་ཅན། །ཁྲོས་པ་གཞུ་བཅག་འཁོར་ལོ་བཅའ། །ནམ་མཁའ་མཐིང་གི་བྱ་ར་ལ། །སྦྱོར་བ་བཤིག་པའི་མཚོན་ཆ་དབབ། །ཡ་བག་ཤ་ཡི་ལས་ཡིན་པས། །མེ་དང་མི་སྲུན་གང་ཟག་གིས། །སྤྱད་ཀྱང་རང་ལ་གཅོད་པར་འགྱུར། །སྡིག་པ་ནག་པོ་སྙིང་ལ་རུ་འཛིངས་འཁྲུལ་འཁོར་ནག་པོའི་གསང་བའི་རྒྱུད་ལས། སྟོབས་ཆེན་གྱད་གནོན་མཆོད་རྟེན་ཡོངས་རྫོགས་ཀྱི་ལེའུ་སྟེ་གསུམ་པའོ།། །།དེ་ནས་བཅོམ་ལྡན་འདས་ཀྱིས་རང་གཤེད་རང་ལ་དབབ་པའི་ལས། ལས་ཀྱི་འཁྲུལ་འཁོར་སྙིང་ལ་བསྐོར་བ་འདི་གསུངས་སོ། །སྐུ་རྟེན་ཡོངས་སུ་རྫོགས་པའི་ལྟེ་བ་རུ། །མཎྜལ་མཐིང་ནག་གྲུ་གསུམ་དག །ཕུང་ས་གསུམ་དང་དུག་ཁྲག་སྦྲུ། །བང་རིམ་གསུམ་ལ་ཁ་ཁྱེར་རྩང་། །དུག་དང་སོལ་བས་ནག་པོར་བྱུག །དཔའ་བརྟུལ་ཅན་གྱི་སྔགས་པ་ཡིས། །ཞིང་ལྤགས་དག་གམ་རོ་རས་ལ། །རྣོ་མྱུར་གདུག་བྱེད་ཕག་མོའི་ལྟོར། །སྲིད་པའི་ཁྱམས་ཁང་སྲོག་སྙིང་སྡུད། །ཁྱམས་ཁང་ལྷོ་རུ་མནན་པ་གཞུག །སྙིང་གར་མཚོན་ཆའི་འཁོར་ལོ་བཅའ། །རྒྱ་གྲམ་དག་ལ་རྩ་བའི་སྔགས། །ཡང་ལོགས་བཅུ་བཞི་སྤུ་གྲིས་སོ། །རྩ་བ་སྤུ་གྲིའི་བར་ན་ཁྱམས། །བསྟེན་པ་བདུད་དུ་འབེབས་པའི་འབྲུ། །མིང་རུས་ཁམས་བཅས་ཟ་ཁ་དབབ། །རུས་སྦལ་ལྟོ་བའི་ཕྱོགས་མཚམས་ལ། །བཅུ་གཉིས་ནང་བསྟན་ཕག་མོའི་འབྲུ། །འཁྲུལ་མིག་ཁྱམས་ཁང་མིང་རུས་བྲི། །ཁ་སྦྱར་དུག་དང་ཁྲག་གིས་བྱུག །སྨེ་བའི་རྫས་བྱུག་ཛ་རིལ་གཞུག །རྒྱུ་རྐྱེན་དྲུག་ལ་ལིངྒ་བྲི། །རང་རྒྱུད་རྩ་བའི་འཁོར་ལོ་དག །དམར་ནག་ཡ་ཡི་དབུས་ན་མ། །མ་ཡི་
གང་ན་སྲོག་སྙིང་ནྲྀ། །མེ་ཆུ་ལས་ཀྱི་འཁྲུག་ཅིང་སྐྱོམ། །སྙིང་གི་རྩ་བཞི་དྭངས་མ་ལ། །ཞེ་སྡང་སྡིག་པ་ནག་པོ་གནས། །ལུས་ལ་དམར་ལེན་ཡིག་འབྲུ་གནས། །རུ་འཛིངས་འབྲུ་བརྒྱད་བསྣོལ་མར་གནས། །རྩ་མདུད་རང་གཤེད་འབྲུ་ཡིས་འཇོམས། །དྭངས་མ་བཞི་ཡི་ས་རེ་ལ། །ཆོས་ཉིད་རྩ་ལ་ཨེ་དད་མྱགས། །ས་ཡི་དྭངས་མ་མེ་ལ་སྡུད། །ཡོན་ཏན་རྩ་ལ་ཡ་དང་རྔུབས། །མེ་ཡི་དྭངས་མ་ཆུ་ལ་སྡུད། །ཡེ་ཤེས་རྩ་ལ་མུག་དང་ཤག །ཆུ་ཡི་དྭངས་མ་རླུང་ལ་སྡུད། །རང་རྒྱུད་རྩ་ལ་ཀ་དང་དུན། །དྭངས་མ་སྡུད་ཅིང་ནད་གཞི་རྒྱས། །རླུང་གི་རྣམ་ཤེས་དྭངས་མ་འདེགས། །དེ་བསྐུལ་དེ་འོད་དེ་མཚོན་ལས། །དེ་བཅད་དེ་ཉིད་བསྲེགས་ཤིང་འཇོམས། །མདུད་པ་བཞི་ལ་མཚོན་ཆའི་འབྲུ། །བདུན་གཉིས་དྲུག་གཉིས་བསྣོལ་མར་གནས། །ལས་ཀྱི་མེ་ཆུས་འཁྲུག་ཅིང་སྐྱོམ། །རང་བདུད་རང་གི་རྒྱུད་ལ་ལྡང་། །མཚོན་ཆས་རང་སྲོག་རང་གིས་གཅོད། །སྙིང་ལ་གནས་པའི་ཚེ་བདག་གིས། །རྩ་རྣམས་གཅོད་ཅིང་སྲོག་རྟེན་འཇོམས། །དེ་ནས་བཅོམ་ལྡན་འདས་ཀྱིས་རང་གཤེད་འཁྲུལ་འཁོར་གསང་བའི་ཡང་སྙིང་འདི་གསུངས་སོ། །ཨེ་མྱགས་ཡ་རྔུབས། མུག་ཤག་ཀ་དུན། དགྲ་བོའི་སྲོག་ལ་ནྲྀ་ཧུར་ཐུཾ་ཛ། རྩ་ཁྲག་སྙིང་ཐུམས་རིལ་རཾ་ཤག་རྦད། དགྲ་བོའི་ཙིཏྟ་དྲེང་ཤག་ཛ། སྲོག་ལ་ཧུར་ཐུམ་རྦད། དུན་ཀ་ཤག་མུགས། རྔུབས་ཡ་མྱགས་ཨེ། ཤག་རཾ་རིལ་ཐུཾ། སྙིང་ཁྲག་རྩ་རྦུད། ཐུཾ་རིལ་དགྲ་བོ་ཛ། ཐུམས་ཧུར་ལ་སྲོག་རྦད་ཤག་དྲེང་ཙིཏྟ་དགྲ་བོ་ཛ། ཨེ་ཡ་ཤག་མྱགས་དུན་རྔུབས་ཀ་མུག །སྲོག་ཐུམས་རིལ་ཏྲི་ནྲྀ་ཧུར་ཐུམས་ཛ། ཐུམས་ཁྲག་སྙིང་རྩ་ལ་རཾ་ཡང་ཐུན་ཤག་རྦད། དགྲ་བོའི་སྲོག་ལ་དྲེང་ཐུཾ་ཙིཏྟ་ཤག་ཧུར་ཛ་ལ་རྦད། རྣལ་མ་བཟློག་དང་ལྟོ་བ་དཀྲུག །བསྒྲུབ་དང་སྤོགས་དང་ཤི་ས་ཡི། །ཡི་ཆད་རང་དབང་མེད་པར་འཕོ། །འཁོར་ལོ་མཁས་པས་གདུག་པར་གཏད། །ནམ་མཁའ་བར་སྣང་ས་གཞི་ལ། །མནན་པའི་ལས་ཀུན་རྫོགས་པར་བྱ། །ཞེས་གསུངས་སོ། །སྡིག་པ་ནག་པོ་སྙིང་ལ་རུ་འཛིངས་འཁྲུལ་འཁོར་གསང་བའི་རྒྱུད་ལས།
རང་གཤེད་འཁོར་ལོ་སྙིང་ལ་བསྐོར་བའི་ལེའུ་སྟེ་བཞི་པའོ།། །།དེ་ནས་བཅོམ་ལྡན་འདས་འཇིགས་བྱེད་ཆེན་པོ་དེས། རང་གཤེད་རང་ལ་དབབ་པ་དྲག་པོ་ཐུན་གྱི་ལས་འདི་གསུངས་སོ། །གནད་ཀྱི་གསང་ཐུན་ལས་ཀྱི་མཚོན། །བསྐྱོད་པ་ཁ་གསོ་ལས་ཀྱི་གཅོད། །གྲི་རྒོད་ཐོད་པ་མོན་ནམ་མནོལ། །ཁྱི་དང་སྤྱང་ཀི་ཝ་ཡི་ཁྲག །ཐལ་ཆེན་མནོལ་ཁྲག་བདུད་མདའ་གསུམ། །ཟངས་ཕྱེ་ལྕགས་ཕྱེ་རྡོ་ཕྱེ་སྦྱར། །གྲི་རྒོད་ཁྲག་དང་དུག་རྒོད་དང་། །ཚ་བ་གསུམ་དང་ཡུགས་སའི་ཁྲག །གྲི་ལྕགས་ཕུར་པ་དུང་ཆེན་གཟིར། །བཅས་པ་འཁོར་ལོ་ཐུན་དང་སྤེལ། །འཁོར་ལོ་གཏད་ནས་ཟོར་ཁ་གསོ། །ཉ་སྟོང་དུས་སུ་ཡུལ་ལ་བྲབ། །མོན་ཐོད་ནང་དུ་བརྣག་པ་གཞུག །ལྷ་གསལ་ཞལ་ནས་དུག་རླངས་འཕྲོ། །ནད་དང་མཚོན་ཆ་ཆར་དུ་དབབ། །དུག་གི་ན་བུན་ཁོང་དུ་སྐྱེལ། །ནད་ཁྲག་རྒྱས་ནས་རྩ་མདུད་ཆད། །འགྱུར་བ་མེད་པའི་ལས་སུ་གསུངས། །དགྲ་བོའི་སྲོག་ལ་ཐུམས་རིལ་རྦད་བྷྱོ། ཨ་མུ་ཀ་རྩ་ལ་ཐུན་རྨུགས་རྦད་བྷྱོ། སྔགས་པ་སྙིང་དུ་སོང་། ཙིཏྟ་གཏུབ་རྦད་ལོང་། སྲོག་ཙིཏྟ་ལོང་། མྱགས་མྱགས་མཱ་ར་ཡ། ཙིཏྟ་ལ་ཐུན་བྷྱོ། དུག་རླངས་འཆོལ་བ་ལས་ཀྱི་ཐུན། །སྙིང་ལ་དུག་དབལ་འདེབས་པར་བྱེད། །སྐྱེས་པ་ཁ་གསོ་རྒྱུན་མི་བཅད། །སྡིག་པ་སྙིང་འཛིངས་འཁྲུལ་འཁོར་ནག་པོའི་རྒྱུད་ལས། རང་གཤེད་ཐུན་ནག་གསང་བའི་ལེའུ་སྟེ་ལྔ་པའོ།། །།དེ་ནས་བཅོམ་ལྡན་འདས་འཇིགས་བྱེད་ཆེན་པོ་དེས། རྡོ་རྗེའི་ནང་དམེའི་ལས་ཀྱི་དམོད་པ་བསད་པ་ལས་ཀྱི་སྤུ་གྲི་འདི་གསུངས་སོ། །དམར་ལེན་ཡང་གསང་སྙིང་པོའི་མཆོག །གདུག་རྩུབ་མཆོག་གསུམ་སྡེ་གནས་སུ། །རང་ཉམས་བརྟེན་པ་མཚམས་བཅད་ལ། །ཡེ་ཤེས་རིག་པའི་བདེ་ཀློང་ནས། །མཁའ་ལྔ་ཁྱབ་པའི་དོན་བསྡུས་ལ། །གཟུང་འཛིན་ཆོས་ཀྱི་དབྱིངས་སུ་བསྒྲལ། །སྟོབས་ཅན་ལྷ་ཚོགས་གཟན་ལ་དབབ། །རྒྱུ་རྐྱེན་ཚོགས་པའི་འཁོར་ལོ་ལ། །མཆོག་དང་ཕག་མོ་ལྟོ་སྡེབས་ལ། །དབུས་ཀྱི་ཕོ་བྲང་རྒྱ་ཆེན་པོར། །མཐའ་འགྱུར་གང་ཡིན་ལིངྒ་བྲི། །གུ་རུ་སེང་གེའི་
ཁོག་མི་བཤིག །ལས་ཀྱི་རྒྱལ་པོ་བཙད་པོ་ལ། །འཁོར་ལོ་རུས་སྦལ་ཐོད་པར་བྲུབ། །དཀྱིལ་འཁོར་བྱིན་ཅན་འོག་ཏུ་མནན། །སློབ་མ་དམ་མེད་དགྲར་ལངས་ན། །གཅེར་བུའི་ལིངྒའི་སྙིང་ནང་དུ། །ཞེ་སྡང་ལྕགས་ཀྱི་སྡིག་པ་གཞུག །ཐོད་པ་སྟག་གི་འཛུམ་ལ་མནན། །དམ་འདྲེས་ཡི་དམ་གཅིག་པ་ན། །གཅེར་བུ་རིད་པའི་ཀླད་དཀྱིལ་དུ། །ཕྲག་དོག་བསེ་ཡི་སྦལ་པ་གཞུག །དམེ་ཁྲག་ནད་ཁྲག་རྐྱེན་རླངས་བསྐུ། །ཐོད་པ་གཟིག་གི་ཐིག་ལེར་གཏད། །དམ་མི་གཅིག་པ་སྤྱི་ཡི་སྤུན། །ལིངྒ་སྤྱི་ཚར་སྙིང་ག་རུ། །བསེ་ཡི་སྦལ་པ་དམར་པོ་བྲི། །དུག་རྒོད་ཛྭ་ལའི་ཁྲག་གིས་བྲབ། །ཐོད་པ་མུན་པའི་གླིང་དུ་མནན། །ལྷ་གསས་ཆགས་པའི་བོན་པོ་ལ། །སྙིང་གར་གདུག་གི་ཕག་པ་གཞུག །ནད་ཁྲག་ཁྱི་ལུད་ཐུན་བྲབ་ལ། །སྲིན་མོའི་སྒྲོམ་དུ་ཉེ་བར་གཏད། །དྲག་སྔགས་ཨུར་མོ་ནང་འགྲས་ན། །དྲག་སྔགས་རྣལ་བཟློགས་སྣོལ་མར་བརྡེག །མནན་པ་འབྲོང་གི་ར་བྲག་མནན། །དྲིལ་དང་རྐྱང་པ་ལས་ཀྱི་སྡེབས། །རྩ་བ་འབྲུ་བརྒྱད་སྤུ་གྲི་བཅས། །འཁོར་ལོ་ཐོད་པར་བཅས་པས་གྲུབ། །མ་གྲུབ་སྦྱོར་བ་སྟོབས་ཞན་ན། །དྲིལ་བའི་མཐའ་རུ་སྤུ་གྲི་བསྒྱུར། །དྲག་སྔགས་རྣལ་བཟློག་དཀྲུགས་པས་སྡེབས། །དེ་ནས་བཅོམ་ལྡན་འདས་ཉིད་ཀྱིས། སྐུ་གསུང་ཐུགས་རྡོ་རྗེ་ལས་གསང་སྔགས་འདི་གསུངས་སོ། །རཱ་ཛ་ནྲྀ་ཛ་ཐུཾ་རིལ་མཱ་ར་ཡ་རྦད། སྲོག་ལ་ཧུར་ཐུཾ་རྩལ་མཱ་ར་ཡ་རྦད། སྲོག་ལ་ཧུར་ཐུམས་ཡཾ་ཐུན་རྨུག་མཱ་ར་ཡ་རྦད། སྲོག་ལ་མུགས་ཛ་ཧྲི་ཤག་མཱ་ར་ཡ་རྦད། སྲོག་ལ་ནྲྀ་ཛ་ཐུན་རྨུགས་མཱ་ར་ཡ་རྦད། ཙིཏྟ་ཁཾ་ཤག་ཛ་སྲོག་ལ་མཱ་ར་ཡ་ཐུན་རྦད། འདོད་པའི་མིང་དང་ཨ་མུ་ཀ །ལས་ཀྱི་སྐབས་སུ་ཤེས་པར་བྱ། །སྔགས་ཀྱི་འཁོར་ལོ་ནང་གཅོད་དང་། །ཁ་འཐབ་མཇིང་བསྣོལ་རྩལ་འདྲེན་སྔགས། །དམ་ཚིག་དམེ་འཁྲུག་བྱུང་བ་ལ། །དཔའ་བོ་ཆེན་པོས་ལས་འདི་བཤད། །སྤྱང་ཀི་མོན་གྱི་ཐོད་པ་དང་། །མུ་ཟི་ནག་པོ་མཛེ་ཅན་སྣེལ། །ཁྲིམས་འཆལ་མགོ་འམ་གོས་དག་ལ། །རབས་ཆད་ནག་པོའི་ཐོད་པར་མནན། །འདི་དག་ལས་
ཀུན་ཡང་རབ་སྟེ། །རང་གཤེད་ནག་པོ་ལས་མཐར་ཕྱིན། །ཞེས་གསུངས་སོ། །སྡིག་པ་རུ་འཛིངས་འཁྲུལ་འཁོར་ནག་པོ་གསང་བའི་རྒྱུད་ལས། གསང་བ་ཡང་སྙིང་གི་ལེའུ་སྟེ་དྲུག་པའོ།། །།དེ་ནས་བཅོམ་ལྡན་འདས་ཀྱིས་བན་སྒྲ་ནག་པོ་སྟོབས་དང་འབྲལ་བའི་འཁྲུལ་འཁོར་འདི་གསུངས་སོ། །དབང་ཆེན་སྟོབས་དང་དབྲལ་བ་དག །དུར་ཁྲོད་གདུག་པའི་དབེན་གནས་སུ། །སྣ་ཚོགས་དྲག་པོའི་ས་དག་ལ། །མཆོད་རྟེན་ནག་པོ་བང་རིམ་གསུམ། །དུག་ཁྲག་དག་གིས་རབ་ཏུ་བྱུག །གྲི་རྒོད་རས་སམ་རྒྱ་ཤོག་ལ། །བན་དགྲ་ནག་པོའི་ལིངྒ་བྲི། །རྐང་རྗེས་སྐྲ་དང་ཆུ་ངན་ས། །བག་ཕྱེ་ཁྲག་དང་ཁམ་ས་རུ། །མཛུབ་གང་དབང་པོ་དོད་པ་ལ། །སྙིང་གར་མིང་རུས་གཞུག་པར་བྱ། །ལྕེ་སྟེང་དུ་ནི་ལྔ་ཡི་མཚོན། །རྒྱ་གྲམ་ཐུགས་ཐུག་པའི་ལམ་གྱི་འཇོམ་འདྲ་ཡིན་ནམ་དཔྱད་ཉིད་ལམ་གྱིས་མཛེས། །སྲོག་འདུས་ལྷ་སྲིན་སྙིང་པོས་མནན། །སྟེང་དུ་རི་རབ་མཆོད་རྟེན་བཞག །གནས་ཁང་སྟེང་ངམ་ཤར་དུ་མནན། །རྩོལ་བསྒྲུབ་ཕྲིན་ལས་ཅི་བྱས་ཀྱང་། །ངག་གི་ནུས་པ་སྟོབས་ཀྱིས་འཆིང་། །དམ་ཚིག་ལྡན་དང་སྔགས་གཅིག་པའི། །རྒྱུད་གསུམ་ནུས་པ་སྟོབས་དང་བྲལ། །ཧ་ལ་ནག་པོ་སྟྭམྦྷ་རི། །ནུས་པ་འཇོམས་པའི་འཁྲུལ་འཁོར་ཡིན། །དེ་ནས་བཅོམ་ལྡན་འདས་ཀྱིས་སྟོབས་ཅན་མནན་པའི་སྔགས་འདི་གསུངས་སོ། །ཨྱེ་ཨྱེ་ཨྱེ། ཧྲིཥྚཱི་ཨ་པ་ཡ། བི་ཀྲྀ་ཏཱ་ན་ན་ཧཱུཾ་བར་འདིར་བྷི་ཏཾ་ཟེར་བའང་འདུག་སྟྭམྦྷ་ཡ། ལཾ་ལཾ་ལཾ་ལཾ་ནན་ཏཀྵེ་ན། ཡ་མ། མ་མ། རག་མོ། རཀྵ། ཀྵེ་མ། ཤྲཱི་བཛྲ་ཀྲོ་ཏ། དུན་ཏིང་ཀཱི་ལ་ཡ། མ་མ་རག་མོ། སྙིང་དུ་རྔུབས། ཧེ་རགྴ་ཏྲག་ཏུ་བྲག །དུན་ཏིང་བྷི་ལ་ནི། ཨྱེ་དུན་ཏྲི། ཏྲི་ཤ་ན་ར་ཙ་ཧ་སྡི། ར་ཙ་མུ་ཏྲག །ཤ་ཏྲུཾ་ཏི་སྟ། རོ་ནི་རོ་ཏྲི་ནན། ཨ་ཏྲི་ས་དུ། ཙ་ཏྲི། རཱ་ཙ། ནཱ་ག །དེ་བ་རུ་ཏྲི། ཁ་རཀྵ་མ་ཏྲི། དུན་ཏིང་དུན་ཏིང་ཏྲི། ཏྲི་སྲོག་ལ་མཱ་ར་ཡ། ག་ན་པ་ཏི། བྷ་ན་ཀ་རོ། ཀཱ་ལ་དུ་བྲག །བྱི་རུ་ར། ནཱ་ག་མོ་ཏི། ས་ག་བྱི་དུ། སརྦ་ཤ་ཏྲཱུ། ཨེ་ཆེ་གེ་མོ་ཨ་མུ་ཀཾ། དུ་དུ་ནན། དུ་དུ་ནན། དུ་དུ་ནན། མྱགས་ཐུཾ་རིལ་ཏྲིག་ནན། སྦུར་ཡ་ནན། མན་ཏྲ་ནན། ཁཾ་ཤག་རོ་མྱགས་མུག་ཏི་རྦད། བསྟན་པ་སྤྱི་ལ་གནོད་པ་ཡི། །བན་འདྲ་མུ་སྟེགས་དག་ལ་བྱ། །ཀུན་ལ་བྱས་ན་སྔགས་ཀུན་གྱི། །
ནུས་པ་ཉམས་པར་འགྱུར་བས་ན། །རྣལ་འབྱོར་ཅན་གྱིས་བྱ་བར་བཤད། །ལས་འདི་ཡ་བག་ཤ་ཡིན་པས། །ཕུང་བྱེད་ནག་པོའི་སྦྱོར་བར་བཤད། །སྡིག་པ་སྙིང་ལ་རུ་འཛིངས་འཁྲུལ་འཁོར་གསང་རྒྱུད་ལས། སྟོབས་ཅན་ནུས་པ་དབྲལ་བའི་ལེའུ་སྟེ་བདུན་པའོ།། །།དེ་ནས་ཡང་བཅོམ་ལྡན་འདས་ཀྱིས་རྡོ་རྗེ་ནང་འགྲས་ཀྱི་ལས་འབྱུང་བའི་ཁྲམ་བཟློག་ཆེན་པོ་ཞེས་བྱ་བ་འདི་གསུངས་སོ། །དབེན་ཞིང་ཉམས་དགའི་གནས་དག་ཏུ། །རིགས་དང་རིགས་མིན་སྦྱོར་བ་འཇོམས། །སྟོབས་གཟིར་ཕོ་ཉ་བཟློག་ཅིང་མནན། །རིགས་ཅན་སྦྱོར་བ་དབང་དུ་བསྡུ། །རིགས་མེད་ཡུལ་གྱི་ལུས་སྲོག་དབྲལ། །ཡུགས་ཟ་མོ་ཡི་ཞབས་མ་དང་། །ས་དཀར་ཅོང་ཟིས་མདོག་ཕྱུང་ལ། །འཁོར་ལོ་རིམ་པ་ལྔ་རུ་བསྐོར། །གྲུ་གསུམ་ནག་པོ་མིང་ཚར་བྲི། །ཟླ་གམ་ལྷ་དང་མིང་རུས་བྲི། །མུ་ཁྱུད་སྦྲུལ་གྱིས་རབ་ཏུ་བསྐོར། །འཁྲུལ་མིག་བཅུ་གཉིས་རྩ་བའི་སྔགས། །ཕྱི་རིམ་རྒྱ་གྲམ་རལ་གྲིས་གཏམས། །ཡང་ལོགས་བཅུ་དྲུག་གསོར་དང་གནོན། །ཁ་སྦྱར་མུ་སའི་ཐོད་པར་བྲུབ། །ཞག་གསུམ་ཐང་བཅད་མལ་འོག་མནན། །སྟོབས་ཀྱི་ཕོ་ཉའི་རྦོད་གཏོང་འཆད། །ཚེ་བདག་ལས་ཀྱི་འཁྲུལ་འཁོར་ཡིན། །ཨེ་ཀ་ཧེ་དུན་ཡ་མ་སྙིང་ཁྲག་ར་མཱ་ཙ་ཡ། དགྲ་བོ་ཨ་མུ་ཀ་སྲོག་ལ་ཐུན་རྨུགས་རྦད་བྷྱོ། སྲོག་ལ་ཁཾ་ཤག་བྷྱོ། སྲོག་ལ་དྲེང་ཤག་བྷྱོ། སྲོག་ལ་ཡཾ་ཤག་བྷྱོ། དགྲ་བོའི་སྲོག་ལ་མཱ་ར་ཡ་རྦད། དགྲ་བོའི་སྲོག་སྟྭམྦྷ་ཡ་ནན། ལས་འདི་ཡང་སྙིང་གསང་བའི་བཅུད། །ཕོ་ཉ་ཟློག་པའི་ལས་སུ་བཤད། །ཅེས་གསུངས་སོ། །སྡིག་པ་སྙིང་འཛིངས་འཁྲུལ་འཁོར་གསང་བའི་རྒྱུད་ལས། གཞན་གྱི་རྐང་མགྱོགས་བཟློག་ཅིང་མནན་པའི་ལེའུ་སྟེ་བརྒྱད་པའོ།། །།དེ་ནས་ཡང་དེའི་ཚེ་དེའི་དུས་ན་བཅོམ་ལྡན་འདས་ཀྱིས་སྡིག་པ་སྙིང་འཛིངས་ལྷ་སྲིན་ཙིཏྟ་དཀྲུག་པ་འདི་གསུངས་སོ། །དུར་ཁྲོད་རས་ལ་དུག་ཁྲག་གིས། །སྙིང་གི་འཁོར་ལོ་བྲི་བར་བྱ། །རྩ་ཆེན་བཞི་ལ་དམར་ལེན་འབྲུ། །འབྲུ་བརྒྱད་རང་གནད་བསྣོལ་མར་གནས། །རྩ་བྲན་བརྒྱད་དང་སུལ་
བརྒྱད་དུ། །ཙིཏྟ་དཀྲུག་པའི་སྤུ་གྲི་བྲི། །ཕྱི་རིམ་རྩིབས་ཆེན་བཅུ་དྲུག་བྲི། །ཕྱི་རིམ་མུ་ཁྱུད་གདུག་པ་ལྔ། །འཆི་བདག་ཤན་པའི་ལྟོ་བར་བྲི། །དེ་ལྟར་འཁོར་ལོ་ཁ་སྦྱར་བར། །དམིགས་པའི་ལིངྒ་བྲིས་ཏེ་གཞུག །ཞག་བདུན་བར་དུ་མ་ཡེངས་པར། །ཙིཏྟ་དཀྲུག་པའི་འཁོར་ལོ་བསྐོར། །ཡང་གསང་ཐུགས་ཀྱི་ལས་མཆོག་ཡིན། །ཕྱག་རྒྱ་ཟིལ་གནོན་གསལ་བར་བསྒོམ། །ལས་ཀྱི་འཁོར་ལོ་ལྟོ་དཀྲུག་པས། །སྲོག་དང་གྲོག་སྲོག་ཀྱང་གི་མིང་སྡེབ་ཅན། །གཟས་པའི་ཙིཏྟ་དཀྲུག་པར་བྱེད། །རྩ་ཕྲན་བརྒྱད་དང་རྩ་ཆེན་བཞི། །ལས་ཀྱི་དམོད་པའི་མཚོན་ཆས་གཅོད། །རྩ་སྲོག་བཅད་ནས་རྣམ་ཤེས་ཕྲོགས། །འཆི་བདག་བདུད་ཀྱི་ལས་སུ་རིག །འཇིག་རྟེན་ལྷ་སྲིན་ཐམས་ཅད་ཀུན། །གཤེད་བདག་ནག་པོའི་ལྟོ་ན་འཆང་། །རཱུ་ཏྲ་དེ་ཡི་རྒྱུད་ལ་གནས། །དེ་ཡིས་རང་སྲོག་རང་གིས་གཅོད། །དེ་ནས་བཅོམ་ལྡན་འདས་ཀྱིས་སྡིག་པ་སྙིང་འཛིངས་ཙིཏྟ་དཀྲུག་པའི་གསང་སྔགས་འདི་གསུངས་སོ། །ཨེ་དུན་ཀ་ཡཾ་ཨེ་མྱགས་ཡ་རྔུབས། མུག་ཤག་ཀ་དུན། ཡ་མ་ར་ཙ་ཙིཏྟ་དཀྲུག་དགྲ་བོ་ནྲྀ་མཱ་ར་ཡ་རྦད། མ་མ་རུ་ལུ་མ་ཙིཏྟ་དཀྲུག་དགྲ་བོ་ནྲྀ་མཱ་ར་ཡ་རྦད། ཏིར་ཏི་ཀ་དུ། རུ་ཏྲ་དྷ། དེ་བ་ཨ་རཀྴར། རག་མོ་ར། ཡཀྴ་ཀྵ། ཡག་མོ་ཀྵ། མུན་མུན་པ། ཤུལ་ཛ། ར་ཙ་ཙ། བཛྲ་ས་དུ་ཏྲི། ཧཾ་ཤཾ་ཏྲི། ནཱ་ག་ཕུ། ཙིཏྟ་དཀྲུག་དགྲ་བོ་ནྲྀ་མཱ་ར་ཡ་རྦད། དེ་ཡི་ལས་དེ་མ་གྲུབ་ན། །དྲག་སྔགས་འདི་ལ་རབ་ཏུ་འབད། །ཙིཏྟ་དཀྲུག་དགྲ་བོའི་སྲོག་ལ་དྲེང་ཤག་ནྲྀ་མཱ་ར་ཡ་རྦད། ཐང་གསུམ་ཡང་འདུག་མཐའ་སྡུད་མནན་པའི་སྔགས་ཀྱིས་བསྡུ། །སྡིག་པའི་ལུས་ཆད་བརྟགས་ལ་གཏད། །ཐོད་པ་དུར་མའི་ལས་ཡིན་པས། །གསང་སྔགས་གྲོང་ཁྱེར་དཀྲུག་པ་སྟེ། །གནད་ལ་དབབ་ཞིང་བསད་པ་ཞེས། །ལྷ་སྲིན་འཁྲུག་ནས་ནད་འཐབ་ཅིང་། །སྟོབས་ཆེན་དྲིལ་བའི་ལས་སུ་བཤད། །སྡིག་པ་སྙིང་འཛིངས་འཁྲུལ་འཁོར་གསང་བའི་རྒྱུད་ལས། ཙིཏྟ་དཀྲུག་པའི་ལེའུ་སྟེ་དགུ་པའོ།། །།དེ་ནས་བཅོམ་ལྡན་འདས་ཀྱིས་ཕྱག་རྒྱ་ཆེན་པོ་བསྲུང་བའི་རིམ་པ་འདི་གསུངས་སོ། །ཨེ་ཉིད་སྟོང་པ་ཆོས་འབྱུང་ཞེས། །མ་སྐྱེས་འགག་པ་མེད་པ་ལས། །རྒྱུ་རྐྱེན་སྔགས་ལས་མ་བསྐྱེད་པར། །རོལ་པ་
ཆེན་པོའི་སྐུ་རུ་གསལ། །དབུ་གསུམ་ཕྱག་དྲུག་ཞབས་བཞི་བགྲད། །གཡས་དཀར་གཡོན་དམར་དབུས་མཐིང་རྔམ། །རྡོ་རྗེ་འཁོར་ལོ་རལ་གྲི་གཡས། །བེ་ཅོན་གཏུན་ཤིང་སྡིགས་མཛུབ་གཡོན། །རིགས་ལྔའི་ཁྲོ་བོས་དབུ་ལ་བརྒྱན། །རང་གི་ཕྱག་རྒྱ་ཆེན་པོས་བརྗིད། །སྦྲུལ་དང་རིན་ཆེན་འབར་བ་དང་། །དྲེགས་པའི་མགོ་བཅད་ཕྲེང་བས་བརྒྱན། །ཀླུ་རིགས་དུ་མས་སྐུ་ལ་སྤྲས། །ཡུམ་ནི་དམིགས་མེད་ཆོས་ཀྱི་དབྱིངས། །མཐིང་ནག་ཙིཏྟ་བྷན་དམར་སྟོབ། །ཐུགས་ཀར་སྨུག་ནག་ཡ་མ་གནས། །མེ་ལོང་ཡེ་ཤེས་ངོ་བོ་ཉིད། །འཁོར་ལོ་དོན་སྙིང་ཕྱག་ན་བསྣམས། །ཡ་མའི་ཐུགས་ཀར་དྲེགས་པ་ཆེ། །མཉམ་ཉིད་ཡེ་ཤེས་ངོ་བོ་ཉིད། །ལྗང་ནག་རྡོ་རྗེ་སྙིང་ཕྲེང་འཛིན། །དྲེགས་པའི་ཐུགས་ཀར་ཁྱམས་ཁང་སྟེ། །བྱ་བ་ནན་ཏན་ཡེ་ཤེས་ཉིད། །འཇིགས་བྱེད་ཆེན་པོ་ཐུར་དུ་བལྟ། །དབུ་གཙུག་མཁའ་ལྡིང་གདུག་པ་འདུལ། །སོ་སོར་ཀུན་རྟོག་ཡེ་ཤེས་ཉིད། །དཀར་པོ་ཟིལ་གནོན་རོ་ཉེ་ཟ། །ཕྲག་སོར་སྨུག་ནག་འཇིགས་པའི་ཁྱུང་། །དཔུང་བར་སྟག་ཆེན་རོ་ལ་རྔམས། །ནུ་འཇིང་སེང་གེ་རལ་པ་སྤྲུག །སྟ་ཟུར་དུག་སྦྲུལ་ནག་པོ་འཁྱུག །སངས་རྒྱས་ཀུན་གྱི་ངོ་བོ་ཉིད། །རྡོ་རྗེ་འཆང་རྒྱལ་སྤྱི་གཟུགས་ཅན། །མ་སྐྱེས་ངང་ལས་རང་བཞིན་འཆར། །གདོད་ནས་རྣམ་དག་ཡེ་ཤེས་སྐུ། །བསྐྱེད་དང་སྤྱན་དྲངས་མཆོད་མི་དགོས། །རྒྱུ་དང་རྐྱེན་ལ་རག་མ་ལུས། །སྐྱེ་འགག་མེད་པའི་ཡེ་ཤེས་གསལ། །ཕྱག་རྒྱ་ཀུན་གྱི་ཟིལ་གནོན་ཡིན། །རོལ་པ་ཆེན་པོའི་ཕྲིན་ལས་ཀྱི། །གསང་སྔགས་ཕྲེང་བ་དེ་ཉིད་ལས། །བོད་པ་མིང་དང་བརྡའ་རུ་སྦྱར། །རྣམ་པར་ཤེས་པ་འབྲུ་རེ་ཕྲོགས། །དྲེགས་པ་འདུལ་བྱེད་གསང་སྔགས་སྲོག །ཟིལ་གནོན་གསུང་གི་ངོ་བོ་ཉིད། །འདི་ཉིད་མཆོག་གི་ལས་ཡིན་པས། །འདི་མེད་ལས་ཀུན་དབྱུག་པ་རྐྱང་། །རྦོད་གཏོང་འཁྲུག་གམ་ཐུན་མོང་དུ། །རྫས་དང་སྔགས་ཀྱི་ནུས་པ་ཡིས། །དྲེགས་པའི་སྦྱོར་བ་ངན་པ་འཇོམས། །སྡིག་པ་ནག་པོ་སྙིང་འཛིངས་འཁྲུལ་འཁོར་ནག་པོ་གསང་བའི་རྒྱུད་ལས། ཕྱག་རྒྱ་ཆེན་པོ་
སྲུང་བའི་ལེའུ་སྟེ་བཅུ་པའོ།། །།དེ་ནས་བཅོམ་ལྡན་འདས་འཇིགས་བྱེད་ཆེན་པོ་དེས། ཀླུ་བདུད་འཆི་བདག་གདུག་པ་ཅན་ཆུ་སྲིན་མགོ་ཅན་དབང་དུ་བསྡུས་ཏེ། ལས་ཀྱི་འཁྲུལ་འཁོར་གཏད་ལོག་ནག་པོ་ཞེས་བྱ་བ་འདི་གསུངས་སོ། །རུས་སྦལ་ནག་པོ་མཇིང་བསྣོལ་གྱི། །ལས་ཀྱི་འཁྲུལ་འཁོར་འདི་ལྟ་སྟེ། །ཏཱ་ལའི་ལོ་མའམ་ཀ་རི་ཀ །ཡང་ན་རྒྱ་ཤོག་དག་ལ་ཡང་། །ཀླུ་རིགས་བཞི་དང་ས་བདག་དང་། །དཔེ་གཅིག་ལ་བར་འདིར། སྲིད་པའི་རུས་སྦལ་ལྟོ་བར་བྲིས། །འཁོར་ལོ་རིམ་པ་བཅུ་བཞི་བསྐོར། །དབུས་སུ་ལིང་ཚེ་དགུ་རུ་བྱ། །མུ་ཁྱུད་ཡང་སྙིང་ཞེས་པ་ཞིག་བྱུང་ཡང་ཚིག་མཐའ་ཡང་མ་འགྲིག་པས་དཔྱད། ཀླུ་ཡི་ཡང་སྙིང་གཏད་ལོག་དང་། །རྩ་བའི་སྙིང་པོ་འབྲུ་བརྒྱད་བཞི། །འདོད་པའི་མིང་རུས་ཨ་མུ་ཀ །ནག་པོ་མགོ་དགུའི་གསང་སྔགས་སྦྲེལ། །ཡང་གསང་དཔའ་བརྟུལ་ཅན་གྱིས་སྤྱད། །ཨེ་དུར་ཀ་ཡི། དགྲ་བོའི་ཙིཏྟ་དྲེང་ཤག་ཛ། སྲོག་ལ་དྲེང་ཤག་ཧུར་ཐུམས་རྦད། ཨེ་མྱགས་ཡ་རྔུབས་མུག་ཤག་ཀ་དུན་ནཱ་ག་རུ་ཏྲ་ཀཱ་ལ་དགྲ་བོའི་སྙིང་ལ་བྷྱོ། ནག་པོ་བམ་ཙིཏྟ་ལ་རྒྱོབ། ཏྲག་ཐུར་སྙིང་སྒུལ་མྱགས་མྱགས། རྩ་བཞི་སྐུམས། ཤན་ཤན་སྲོག་ལ་ཤན། ཐུར་ཐུར་དགྲ་བོའི་ཙིཏྟ་ལ་ཐུར་རྦད། ས་ནཱ་ག་ཧ་ལ་ཙ་མ་རི་དགྲ་བོའི་སྙིང་ལ་ཐུན་བྷྱོ། ཞག་གསུམ་མཚོན་ཆ་བསྣོལ་མས་གཅོད། །མཐའ་རུ་དཔའ་བརྟུལ་ཅན་གྱིས་སྤྱད། །ཀླུ་ཡི་ནད་རླངས་དུག་གི་ངར། །ཁ་དག་དེ་ལ་རང་གཤེད་དབབ། །འདི་ནི་ལས་ཀྱི་མན་ཏྲ་ཧོ། །སྟོབས་ཆེན་འཇོམས་པ་དྲག་པོའི་མཚོན། །སྦྱོར་བ་མཁས་པའི་སྔགས་པ་ཡིས། །ལས་རྫོགས་རུས་སྦལ་ཁོག་པར་གཞུག །བང་རིམ་ལྔ་པའི་འོག་ཏུ་མནན། །རི་གསུམ་འབྲོང་གི་རྭ་བྲག་མནན། །ཡང་ན་ས་བདག་གནས་སར་གཏད། །ལས་འདི་མནན་པ་ཀུན་གྱི་མཆོག །ཅེས་གསུངས་སོ། །སྡིག་པ་སྙིང་འཛིངས་འཁྲུལ་འཁོར་གསང་བའི་རྒྱུད་ལས། གཏད་ལོག་ནག་པོ་རུས་སྦལ་མཇིང་བསྣོལ་གྱི་ལེའུ་སྟེ་བཅུ་གཅིག་པའོ།། །།དེ་ནས་བཅོམ་ལྡན་འདས་འཇིགས་བྱེད་ཆེན་པོ་དེས་འཁྲུལ་འཁོར་རྫས་བཟློག་དུས་ཀྱི་འཁོར་ལོ་ཞེས་བྱ་བ་འདི་གསུངས་སོ། །སྟོབས་ཆེན་འཁོར་ལོའི་གནད་དག་གིས། །ལས་དང་སྦྱོར་བ་ནུས་པའི་མཐུ། །ལུང་པ་རི་ཀ་འཁོར་བ་ལྟར། །རང་གི་ནུས་པ་འཇོམས་ཤིང་གསོད། །དེ་ཡི་སྦྱོར་བ་
འདི་ལྟ་སྟེ། །རི་རབ་འོག་གམ་རྒྱ་མཚོའི་གཏིང་། །གདུག་པ་ཅན་གྱི་སྟོབས་གཞོམ་ཕྱིར། །ཁམ་སའི་ག་འུར་རུས་སྦལ་གྱི། །ལྟོ་སྦྱར་བར་དུ་རུས་སྦལ་བཅའ། །རྒྱ་ཤོག་དག་ལ་མུ་ཁྱུད་གསུམ། །གྲུ་གསུམ་སྡིག་པ་རུ་འཛིངས་པའི། །སྟེང་འོག་ལིངྒ་ལྟོ་སྦྱར་བྱ། །བར་མའི་མུ་ཁྱུད་དྲེགས་པ་ཅན། །འདུས་པའི་ཡང་སྙིང་འཁོར་བར་བྲི། །ཕྱི་རིམ་འབྱུང་བའི་འཁྲུལ་འཁོར་གྱི། །སྐྱོམ་ཞིང་སྡུད་པའི་ཡང་སྙིང་བྲི། །ཨེ་བཾ་རཾ་ཡཾ་ཁཾ་ཤིག །ཙིཏྟ་གཏུབས། སས་གཏིབས། མེས་ཚིག །ཆུས་དཀྲུག །རླུང་གིས་གཡེང་། ཁ་རི་བ་ལྡག །སྣ་རི་ཁས་ཡེན། ཁ་རི་སྡག་རྣམ་རི་ཙེ་ཁས་ཡིན་སོགས་འདྲ་མིན་མང་། དགྲ་བོ་མཱ་ར་ཡ། ཨེ་ཀ་ཡ་མ་སྲོག་ལ་ཧུར་ཐུཾ་གཟིར་ནན། དགྲ་བོའི་སྙིང་ལ་ཤག་རྦད། ར་ཏི་ར་ཁྲག་དགྲ་བོའི་སྲོག་ལ་ཡཾ་ཡཾ་ཏྲི་ལིང་དགྲ་བོའི་སྙིང་ལ་ཤག་རྦད། ནག་པོ་ནཱ་ག་བྷེ་ཏ་སྲོག་ལ་ཛ་ལ་ཛ་ལ། ནྲྀ་ཐུཾ་ཤག །དགྲ་བོའི་སྙིང་ལ་རྦད། ཙིཏྟ་དྲེང་ཤག་ནྲྀ་མཱ་ར་ཡ། འཁོར་ལོ་ཁ་སྦྱར་ག་འུར་གཞུག །ནམ་མཁའ་བར་སྣང་ས་འོག་གི། །དབང་ཆེན་སྟོབས་ཆེན་འདུས་པ་ཡིན། །འོག་གི་འཁྲུལ་འཁོར་གསང་བར་བཤད། །བར་ཆའི་འཁོར་ལོ་འདི་ལྟ་སྟེ། །གཤེད་པོ་ལས་རྒྱས་ལྟོ་བ་རུ། །མུ་ཁྱུད་རིམ་པ་ལྔ་རུ་བསྐོར། །དབུས་སུ་འདོད་པའི་མིང་རུས་བྲི། །གཡས་གཡོན་འདོམས་སུ་དམ་སྲི་རུ། །ཀླུ་སྲིན་ས་སྲིན་སྙིང་པོ་བྲི། །སྙིང་ལ་སྡིག་པ་བཞི་བགྲད་པ། །དམར་ལེན་དྲག་སྔགས་འབྲུ་བརྒྱད་བྲི། །ཕྱི་རིམ་ཡང་སྙིང་འཁྲུལ་མིག་དག །བརྒྱད་བཞི་དྲེགས་པའི་ཡང་སྙིང་བྲི། །ཐ་མ་འཁོར་ལོ་བཅུ་གཉིས་རྩིབས། །བྱས་པ་འཇིག་པའི་འཁྲུལ་འཁོར་བྲི། །བར་ཆ་དག་གི་འཁྲུལ་འཁོར་ཡིན། །སརྦ་ཤ་ཏྲུཾ་སྟྭམྦྷ་ཡ་ནན། འགྲིར་རྦད། པདྨ་སྦུར་སྲོག་ནན་སྙིང་གཟེར་དྲེང་ཤག་ཡཾ་རྦད། རི་རབ་བང་རིམ་གསུམ་པའི་ཁར། །གྲུ་གསུམ་ནག་པོ་དུག་ཁྲག་བྱུག །རབས་ཆད་ཐོད་པར་འཁྲུལ་འཁོར་བཅའ། །སྒོ་བཞི་རྫོགས་པའི་མཆོད་རྟེན་དག །རུས་སྦལ་གདན་ལ་གླང་ཆེན་འདེགས། །སྒོ་བཞི་གྲི་ལྕགས་སྦུག་མ་རུ། །དྲག་པོའི་སྔགས་ཐུན་མཚོན་ཆས་བརྡར། །བསད་པ་ལས་ཀྱི་མཚོན་དུ་བཤད། །ནམ་
མཁར་ཕྱག་རྒྱ་གསལ་བ་ཡི། །སྟོབས་ཆེན་སྙིང་པོ་རྫོགས་པ་དང་། །ལས་རབ་ཀུན་གྱི་མཆོག་ཏུ་བཤད། །སྡིག་པ་སྙིང་འཛིངས་འཁྲུལ་འཁོར་ནག་པོ་གསང་རྒྱུད་ལས། རྫས་བཟློག་གསང་བ་འཁྲུལ་འཁོར་གྱི་ལེའུ་སྟེ་བཅུ་གཉིས་པའོ།། །།དེ་ནས་ཡང་འཇིགས་བྱེད་ཆེན་པོ་དེས། གསང་སྔགས་ཀྱི་འཁོར་ལོ་བསྐོར་བ་འདི་གསུངས་སོ། །གདོད་ནས་རྣམ་དག་ཡེ་ཤེས་སྐུ། །ལྷུན་གྱིས་གྲུབ་པ་ཡིན་པ་ལ། །རྩོལ་བསྒྲུབ་རེ་དོགས་འཛིན་པ་བྲལ། །རྣམ་རྟོག་བག་ཆགས་སྤྲིན་ལྟ་བུ། །ནམ་མཁའ་ལྟ་བུར་འཛིན་མེད་པ། །སྲུང་བ་ཀུན་གྱི་མཆོག་ཏུ་བཤད། །སྟོང་པའི་དབྱིངས་ལས་རྫོགས་པ་ཡི། །ཕྱག་རྒྱའི་རོལ་པ་ཡོངས་རྫོགས་པ། །བསམ་གཏན་སེམས་ཀྱི་འཁོར་ལོར་བཤད། །རྒྱུ་དང་འབྲས་བུ་སྲོག་དང་ལས། །དྲེགས་པའི་དེ་ཉིད་ཤེས་པ་ན། །དྲེགས་པ་རང་གཤེད་རང་གིས་བྱེད། །བསམ་གཏན་འཁོར་ལོ་བྱེད་པ་ན། །སྔགས་དང་རྫས་དང་ཏིང་འཛིན་གྱིས། །མིང་དང་རྟོག་པ་དབྱིངས་སུ་བསྒྲལ། །སྔགས་ཀྱི་གྲོང་ཁྱེར་རབ་བསྒྲིལ་ཞིང་། །མིང་ནས་བོས་ཤིང་རབ་ཏུ་གཟིར། །རྣམ་ཤེས་འཕྲོག་ཅིང་གཅད་བྱ་བ། །སྔགས་ཀྱི་ཕྲེང་བས་གདུག་པ་འདུལ། །དྲེགས་པས་དཀྲུགས་ཤིང་དབང་བསྡུས་ལ། །མིང་ནས་བོས་ལ་ཐོག་ལྟར་གཟིར། །རྣམ་ཤེས་འཕྲོག་སྟེ་མཚོན་ཆས་གཅོད། །བསྲུང་ཞིང་བཟློག་པའི་ལས་སུ་རིག །དེ་ཉིད་རང་གཤེད་ཕེབ་པས་ན། །རྣོ་མྱུར་སྲིད་པའི་ཁྱམས་ཁང་ན། །རང་གཤེད་གདུག་པའི་ཡི་གེ་གནས། །དྲག་སྔགས་དབུགས་ཀྱི་རྟ་ལ་ཞོན། །དུག་རླངས་འོད་ཟེར་རང་ཤུགས་འཕྲོ། །ཤ་ཟ་གསོད་བྱེད་ཕོ་ཉ་བསྐུལ། །རང་གནད་གདུག་པའི་ཡི་གེ་བླངས། །རང་གཤེད་གྲོགས་ཀྱི་འཁོར་ལོ་འཕྲོ། །ཀུན་འདུས་རྩ་བཅད་ཙིཏྟར་འདུས། །ཧུར་ཐུམས་ཛ་ཡི་ནྲྀ་ཕྲོགས་ནས། །སྲིད་པའི་ཁྱམས་ཁང་མཚོན་ཆས་གཅོད། །འདི་དག་བསད་པའི་ལས་སུ་རིག །བསྐྱེད་པ་ཁ་གསོ་དུག་དབལ་གྱིས། །རྩ་རྣམས་ཁེངས་ནས་ནད་རྒྱས་ནས། །རྩ་ཡི་མདུད་བཅད་སྲོག་བྲལ་གྱུར། །ཕྱོགས་སམ་སྒོ་བཞི་ལས་ཀྱི་ཐུན། །ཁ་གསོ་ཟོར་གྱི་
ལས་སུ་ཤིས། །འཁོར་ལོ་ཐུན་བརྡེག་ལས་རབ་མཆོག །རྐྱང་པ་སྦྲག་མ་ལས་ཀྱིས་སྡེབས། །སྤྱིར་ནི་འཁྲུལ་འཁོར་གསང་བའི་བཅུད། །ཡང་གསང་ཐུགས་ཀྱི་འཁོར་ལོར་བཤད། །ལས་ཀྱི་རྒྱལ་པོའི་སྙིང་ནང་དུ། །རྩ་བཞི་མཚོན་གྱིས་གཅོད་པར་བྱེད། །དམ་མེད་སློབ་བུའི་སེམས་པ་ཉིད། །ལྕགས་ཀྱི་སྡིག་པས་རྩ་བརྒྱད་ཟ། །དམ་འདྲེས་བསེ་ཡི་སྦལ་པ་ལ། །ནད་ཁྲག་འདུས་ཤིང་ལྡང་བར་འགྱུར། །སྔགས་པ་ནག་པོ་སྤྱི་ཡི་སྤུན། །རང་གཤེད་བསེ་ཡི་སྦལ་པ་ཡིས། །རྣམ་ཤེས་དུག་ཁྲག་མེ་ཆུར་བསྐོལ། །བོན་པོ་རིགས་གཉིས་ཕྱི་རོལ་པ། །ཕག་རྒོད་ནད་དང་མཚོན་གྱིས་བསྒྲལ། །གནམ་ལྕགས་འཐབ་ན་རྟོག་མེད་ལས། །ཕྱག་རྒྱ་རྫོགས་པས་རོལ་པའི་སྐུ། །གཉིས་སུ་མེད་པའི་ཡེ་ཤེས་བསྒོམ། །གཞན་གྱི་སྟོབས་རྣམས་རབ་ཏུ་གཟིར། །ལས་དྲུག་སྤྱི་ཡི་དགོངས་པར་བཤད། །ནག་པོ་སྟོབས་དང་དབྲལ་བ་དག །རྒྱ་གྲམ་དྲེགས་པའི་སྔགས་བྲིས་ཏེ། །ལྕེ་སྟེང་རི་རབ་དག་གིས་མནན། །ཞི་ཁྲོ་ཕུར་པ་གཤིན་རྗེ་ནས། །ས་བདག་ཀླུ་སྲིན་ཡན་ཆད་ཀྱི། །སྔགས་ཀྱི་བཟླས་བརྗོད་ཅི་བྱས་པ། །རི་རབ་རྒྱ་གྲམ་ཆེན་པོ་ཡིས། །ངག་གི་ནུས་པ་གནོན་པར་བྱེད། །ནུས་པ་ནོན་ཅིག་ཅེས་ཀྱང་བརྗོད། །དྲག་པོའི་ངག་མནན་འཁོར་ལོ་བཤད། །འབྱུང་བའི་ཁྲམ་བཟློག་ཆེན་པོ་སྟེ། །གསང་སྔགས་འཁོར་ལོ་བསྐོར་བ་ཡིས། །འཇིག་རྟེན་ལྷ་འདྲེ་ཁམས་འཁྲུགས་ཤིང་། །མཚོན་ཆའི་འཁོར་ལོ་ལོག་པ་ལྟར། །ཁོ་རང་རྒྱུད་ལ་ལྡོག་པ་ནི། །ཕོ་ཉ་བཟློག་པ་ཞེས་སུ་བཤད། །འཆི་བདག་ཤན་པའི་ལྟོ་བ་རུ། །གསང་བའི་སྔགས་ཀྱི་ལྟོ་དཀྲུག་པས། །ལྷ་སྲིན་ཙིཏྟ་འཁྲུག་པ་ཡིས། །གཟས་པའི་རྩ་སྲོག་འབྲལ་བས་ནི། །ཙིཏྟ་དཀྲུག་པའི་ལས་སུ་བཤད། །སྲིད་པའི་རུས་སྦལ་ལྟོ་བ་རུ། །ཀླུ་དང་ས་བདག་སྡེ་བཞི་ལ། །སྟོབས་ཀྱི་སྔགས་ཀྱི་འོད་ཟེར་གྱིས། །གདུག་པའི་ཀླུ་གཉན་དུག་བླངས་ཏེ། །གཟས་པའི་སྙིང་ལ་འདུས་པར་བསམ། །གཏད་ལོག་ནག་པོའི་ལས་སུ་བཤད། །ཕྱག་རྒྱ་མཚོན་ཆ་དམིགས་པའི་ཡུལ། །གསལ་བ་གསུམ་གྱིས་ལས་ཀུན་འགྲུབ། །ཅེས་གསུངས་སོ། །སྡིག་པ་སྙིང་ལ་རུ་
འཛིངས་འཁྲུལ་འཁོར་ནག་པོ་གསང་བའི་རྒྱུད་ལས། ཡང་གསང་ཐུགས་ཀྱི་ལེའུ་སྟེ་བཅུ་གསུམ་པའོ།། །།དེ་ནས་བཅོམ་ལྡན་འདས་ཀྱིས་ཡོངས་སུ་བསྐོར་བའི་འཁོར་རྣམས་ལ་འདི་སྐད་ཅེས་གསུངས་སོ། །ཨེ་མ་རྣམ་རྟོག་མཚན་མ་རང་གྲོལ་བའི། །རྡོ་རྗེ་བདེ་བ་ཆེན་པོའི་བཀའ། །གསང་ཚིག་དམོད་པའི་ལས་མཆོག་འདི། །རིག་བྱེད་རྡོ་རྗེ་སྙིང་པོས་ཟུང་། །སྐྱེ་མེད་རྣམ་དག་ཆོས་དབྱིངས་ཕོ་བྲང་ནས། །ཐུགས་རྗེའི་རོལ་པས་བྱེ་བྲག་ཅིར་བསྟན་ཀྱང་། །གཉིས་མེད་འབྲས་བུ་ཕྱག་རྒྱ་ཆེན་པོས་རྫོགས། །སྣང་སྟོང་གཉིས་མེད་ཡེ་ཤེས་སྒྱུ་མའི་སྐུ། །རྟག་ཆད་མཐའ་ལས་གྲོལ་བའི་ཡེ་ཤེས་ཉིད། །ཁོ་ན་ཉིད་དོ་གཉུག་མ་རྡོ་རྗེའི་སྐུ། །ཕྱག་རྒྱ་ཆེན་པོས་ཟིལ་གྱིས་གནོན་པར་གནས། །སྐུ་ཡི་སྒྱུ་མའི་ཕྱག་རྒྱ་ཅིར་ཡང་གནས། །གསུང་ནི་ཁྲོ་བོ་རྔམ་སྒྲ་ལྔ་དང་ལྡན། །ཐུགས་ནི་སྣ་ཚོགས་ཆོ་འཕྲུལ་མཚོན་ཆ་བཞིན། །ལས་ཀྱི་སྐབས་ཀྱིས་ཕྱེ་བ་དེ་ལྟ་བུའི། །ངོ་བོ་ཉིད་ནི་ཆོས་སྐུ་འགྱུར་བ་མེད། །སྐྱེ་བའི་ཆོ་འཕྲུལ་སྣང་ལ་རང་བཞིན་མེད། །ཡོན་ཏན་ཡེ་ཤེས་མཚན་དང་དཔེ་བྱད་ལྡན། །སྙིང་པོ་འགྱུར་བ་མེད་པའི་ངང་ལས་འཆར། །ཐམས་ཅད་ཆོས་སྐུ་བདེ་བ་ཆེན་པོའི་ངང་། །བགྲོད་པ་རྣམ་གསུམ་ཐོབ་པའི་རྩལ་གྱི་ཡོད། །ཨེ་མ་རྣོ་དབལ་མཚོན་ཆའི་མཆོག །སྡིག་པ་སྙིང་ལ་རུ་འཛིངས་པའི། །སྙིང་པོ་དུག་དབལ་དམོད་པའི་མཆོག །ཁྱད་པར་གསང་བའི་སྦྱོར་བ་འདི། །དཔའ་བརྟུལ་དྲག་པོའི་སྟོབས་ཀྱིས་སྤྱོད། །སྡེབས་དང་རྐྱང་པ་སྟོབས་དང་སྦྱར། །སྟོབས་ལྡན་འཛོམ་ན་སྦྱོར་བ་བསྡེབ། །རྒྱ་མདུད་བརྩེགས་པའི་ལྟོ་བ་འམ། །ནམ་མཁའ་བར་སྣང་ས་གཞིའི་འོག །འཁོར་ལོ་རྫོགས་པ་རྫས་ཀྱི་གནད། །རི་རབ་མཆོད་རྟེན་བར་དག་ཏུ། །སྟོབས་ཀྱི་འཁོར་ལོ་ཐོད་པར་གཞུག །ཕྱག་རྒྱ་གསལ་བས་རྔམ་ཚིག་བཟླ། །དྲེགས་པ་དཀྲུག་ཅིང་གནོད་བྱེད་གཟིར། །རང་གཤེད་འཁོར་ལོ་ཐུན་གྱིས་བྲབ། །བླ་གནས་གཟུགས་ལ་གནད་ཡིག་དགོད། །མཐའ་བསྒྱུར་སྤུ་གྲི་རྣོ་དབལ་སྦྱར། །བགེགས་ཀྱང་མགྱོགས་ཀྱི་ཕོ་ཉ་བཟློག་ཅིང་བསད། །གདུག་པ་ཀླུ་ཡི་གཏད་ཁྲམ་བཟློག །བསྡེབ་པའི་ལས་རིམ་སྐབས་སུ་སྦྱར། །བསད་པའི་ལས་སུ་
ཤིས་པར་སྤྱད། །རྒྱུན་དུ་ལྷ་སྲིན་སྟོབས་གཞོམ་ཞིང་། །ངག་མནན་འཁོར་ལོ་བཅས་ལ་མནན། །སྟོབས་ཆེན་ནུས་པ་འཇོམས་པར་བཤད། །ཙིཏྟ་དཀྲུག་པའི་རང་གཤེད་དབབ། །སྡིག་པའི་ལུས་ཚད་བརྟགས་ལ་གཏད། །དྲེགས་པ་འཁྲུགས་ན་ཤིས་པར་བཤད། །ཨེ་མ་ཡང་གསང་རྣལ་འབྱོར་རྒྱུད། །ཐབས་དང་ཤེས་རབ་སྙིང་པོའི་དོན། །རྩ་བ་བཤད་པ་འཕྲུལ་གྱི་བཀའ། །ཡང་སྙིང་ནག་པོ་གསང་བའི་མཚོན། །སྡིག་པ་སྙིང་ལ་རུ་འཛིངས་འདི། །གསང་བདག་རྡོ་རྗེ་སྙིང་པོ་དང་། །ལོངས་སྤྱོད་འཕྲུལ་ནི་སྤྲུལ་པར་བཤད། །ལྷ་དང་མཁའ་འགྲོ་རིག་པ་འཛིན། །རྫུ་འཕྲུལ་སྟོབས་ཆེན་དྲེགས་པའི་འཁོར། །བྱང་སེམས་བཀའ་དང་ལུང་བོར་མིན། །སློབ་དཔོན་མི་སྤང་སྤུན་མི་བརྙས། །སངས་རྒྱས་བཀའ་ལ་ངེས་པར་བཀུར། །བླ་མ་དཀོན་མཆོག་ཡི་དམ་མཆོད། །བདག་གཞན་བྱང་ཆུབ་སེམས་མི་གསད། །དོན་གྱི་ལམ་སྟོར་ལོག་པ་ལ། །གསང་སྔགས་བརྡའ་དང་དམ་མི་སྨྲ། །ཡོངས་སུ་མ་སྦྱངས་ཚད་མི་སྦྱར། །ཐེག་པ་དམན་ལ་ཆོས་མི་བཤད། །བཀའ་ལ་ཚད་མའི་སྒྲས་མི་གཞལ། །དད་ལྡན་མི་བཟློག་ཕྱག་རྒྱ་བསྟན། །རིན་པོ་ཆེ་ཡི་རྩལ་མི་སྤྲུག །རྣལ་འབྱོར་མི་གཏང་གསང་སྔགས་བཟླ། །དྲོད་རྟགས་དབང་པོ་རང་ཉམས་བརྟག །སེམས་ཀྱི་མེ་ལོང་རྟག་ཏུ་བལྟ། །ཨེ་མ་འཁོར་དུ་འདུས་པའི་ཚོགས། །ལྷ་ཀླུ་དྲེགས་པ་རྫུ་འཕྲུལ་ཅན། །ང་ཡི་གསང་རྒྱུད་སྙིང་པོ་འདི། །མ་འོངས་དམ་ཅན་སྒྲུབ་བྱེད་ན། །དེ་ཡི་དམ་ལས་མི་འདའ་སྲུངས། །འཁོར་གྱི་དྲེགས་པ་ཕོ་མོ་ཡིས། །རྣལ་འབྱོར་བསྒྲུབ་པའི་གྲོགས་གྱིས་ཤིག །ཅེས་གསུངས་སོ། །དེ་ནས་རྡོ་རྗེ་སྙིང་པོ་ལ་སོགས་པའི་འཁོར་རྣམས། བཅོམ་ལྡན་འདས་ཀྱིས་གསུངས་པ་ལ་དགའ་མགུ་ཡི་རངས་ཏེ་མངོན་པར་བསྟོད་དོ། །འཇམ་དཔལ་གཤིན་རྗེ་འཁྲུལ་འཁོར་ནག་པོ་སྡིག་པ་སྙིང་འཛིངས་གསང་བའི་རྒྱུད་ལས། རྒྱུད་གཏད་ཅིང་རྗེས་སུ་ཡི་རང་བའི་ལེའུ་སྟེ་བཅུ་བཞི་པའོ།། །།འཇམ་དཔལ་གཤིན་རྗེ་དངོས་གྲུབ་ཉེ་བར་བསྡུས་པའི་ཟླ་གསང་ནག་པོའི་
སྙིང་པོའི་རྒྱུད། ལས་ཀྱི་འཁྲུལ་འཁོར་ནག་པོ་སྡིག་པ་སྙིང་འཛིངས་ཀྱི་རྒྱུད་ཅེས་བྱ་བ། ལྷ་ཡུལ་དུ་གྲགས་པ་རྫོགས་སོ།། །།བལ་ཡུལ་གྱི་སློབ་དཔོན་ཆེན་པོ་བ་སུ་དྷ་ར་དང་། བོད་ཀྱི་ལོཙྪ་བ་གནུབས་བན་སངས་རྒྱས་ཡེ་ཤེས་བདག་གིས་བསྒྱུར་བའོ། །རྒྱ་རྒྱ་རྒྱ། རྒྱ་རྒྱ་རྒྱ། རྒྱ་རྒྱ་རྒྱ། ཊྟྲྀ།