འཇམ་དཔལ་མ་རུ་ཙེའི་སྔགས་རྒྱུད་ལས་ཕྱི་མའི་ཕྱི་མ།
འཇམ་དཔལ་མ་རུ་ཙེའི་སྔགས་རྒྱུད་ལས་ཕྱི་མའི་ཕྱི་མ། དེ་ནས་ཡང་དེའི་ཚེ་དེའི་དུས་ན་དབང་ཕྱུག་ཆེན་པོས་བཅོམ་ལྡན་འདས་ཡ་མཱནྟ་ཀ་ལ་འདི་སྐད་ཅེས་གསོལ་ཏོ། །རང་རིག་ཡེ་ཤེས་བློ་དང་མ་ལྡན་པས། །བསྙེན་པ་མ་རྫོགས་ལས་ལ་བསྐུལ་སྔ་བ། །རྫས་དང་ལག་ཆ་གཞུང་བཞིན་མ་རྫོགས་ཤིང་། །རྟགས་དང་མཚན་མ་དུས་ལ་མ་ཕྱིན་པ། །སྒྲོལ་བདག་ཆེན་པོའི་སྐུ་ལ་བཟོད་པར་གསོལ། །ཞེས་བག་ཆགས་སྦྱངས་ནས་ཡང་འདི་སྐད་ཅེས་ཞུས་སོ། །རྒྱུད་འདིའི་གཞི་རྣམས་དཔའ་བོ་ཡི། །འགྲོ་བའི་དོན་དུ་བདག་ལ་ཤོད། །ཅེས་པས། དེ་ནས་དཔའ་བོས་ཡང་དག་བཤད། །མ་སྐྱེས་པ་ཡི་ཆོས་ཉིད་ལས། །དུས་གསུམ་སྲིད་པས་བསྡུས་པའི་ཆོས། །སྐྱེ་བའི་ཆོ་འཕྲུལ་འབྱུང་བ་ཡི། །གཟུང་འཛིན་འཁྲུལ་པའི་རྒྱུ་ལས་བྱུང་། །དང་པོར་ཞེན་རྟོག་བཟློག་པའི་ཕྱིར། །ཇི་ལྟར་མོས་པ་དམ་པས་འདུལ། །དེ་བས་འདི་ནི་གདོང་དམར་དོན། །སྐུ་མདོག་ཕྱག་མཚན་ཕྱག་རྒྱ་ནི། །ཇི་ལྟར་འདུལ་བ་བཞིན་དུ་བསྟན། །གཞི་ཉིད་སྣང་མེད་གཅིག་གི་ངང་། །དཔེར་ན་སྤྱིར་འདོད་སྒེར་འདོད་པས། །ལས་ཀྱི་བརྩོན་འགྲུས་རིམ་པ་བཞིན། །གཤིན་རྗེ་གཅིག་ལ་ལས་བཅོལ་མྱུར། །དེ་བཞིན་སོ་སོ་ལས་ཉིད་ལ། །བསྙེན་ཞིང་བསྒྲུབ་པ་ལ་སོགས་པའི། །སྒྲོལ་བའི་ལས་ཉིད་བཤད་བྱ་བ། །ཀུ་མ་རཱ་ཛ་བཅོ་ལྔའི་ཕྲེང་། །འཁོར་ལོ་སྒྲུབ་པའི་བསྙེན་པ་སྟེ། །སྒྲུབ་པའི་སྔགས་ཚན་བཞི་པོ་རྣམས། །ནམ་གྱི་གུང་དང་ཐོ་རངས་རྩེ། །ཉི་མ་ཤར་དང་དགོང་གི་བར། །སྔགས་བཟླས་རྫས་ཀྱིས་བྲབ་པར་བྱ། །སྲོག་ལས་དྲང་བའི་བསྙེན་པ་ནི། །ཤྲཱི་མཉྫུ་ཡི་གསང་སྔགས་ལ། །རྟག་ཏུ་གྲངས་པའི་བསྙེན་པ་ཡིན། །དེ་ལ་སྒྲུབ་པའི་གསང་སྔགས་ནི། །རྣལ་མ་ཏྲི་ལང་སྔགས་གཉིས་པོ། །གོང་མ་དེ་ལ་བཏགས་ཏེ་བཟླས། །དྲག་པོ་ཕུར་པའི་སྒྲུབ་སྔགས་སོ། །རྫས་ལ་བགྲང་བའི་བསྙེན་པའོ། །རཏྣ་ཏྲ་
ཡཱའི་བསྙེན་པ་ཡིན། །ཀླུ་ལིང་བྷ་ས་ལ་སོགས་པ། །བསྒྲུབ་ཅིང་ལྷ་དང་དབྱེ་བ་ཡིན། །ཐོད་པའི་བསྙེན་པར་གྲངས་པ་ནི། །ཤྲཱི་མཉྫུའི་གསང་སྔགས་དང་། །མ་རུ་ཙེ་ཡི་གསང་སྔགས་ནི། །ཡི་གེ་བཅུ་གཉིས་ཡང་སྙིང་བགྲང་། །བསྒྲུབ་ཅིང་གནད་ལ་བོར་བ་ནི། །ཤྲཱི་མཉྫུས་དབུ་གནན་ཏེ། །རཏྣ་ཡ་ལ་སོགས་པ་ཡི། །མཆེད་བཞིའི་རྩ་བའི་དྲག་སྔགས་ལ། །བསེ་ཡི་ལྷ་མོའི་དྲག་སྔགས་སྤེལ། །བར་བར་མིང་དང་རུས་བཅུག་ལ། །མཱ་ར་ཡ་ཡི་སྒྲ་དང་བཅས། །ཛོ་ད་བ་ཏྲི་ལ་སོགས་པ། །བདུད་དང་བསེ་མོའི་དྲག་སྔགས་དང་། །སྲིད་པའི་མ་མོའི་དྲག་སྔགས་དང་། །ཟོར་ཐུན་དབབ་པའི་དྲག་སྔགས་དང་། །གཤིན་རྗེའི་ཁམ་སྔགས་བཟླས་པ་དང་། །ཕུར་བུས་གདབ་དང་བསྲེག་གནན་སྔགས། །དྲག་པོའི་ལས་སྔགས་ཞེས་སུ་བཤད། །རང་སེམས་བསྐྱེད་པ་ལྷར་བསྒོམས་པས། །རྟོག་པ་དོར་བའི་དགོངས་པ་ནི། །ཤི་ནས་ལས་ཀྱི་སྲིན་པོར་སྐྱེས། །དེ་ཕྱིར་སྣང་ལ་རང་བཞིན་མེད། །ཡེ་ཤེས་གསལ་བའི་ཐུགས་རྗེ་ཡིས། །ཉོན་མོངས་སྒྲོལ་བ་མ་གཏོགས་པར། །ཞེ་སྡང་གདུག་པས་དམིགས་ལ་སྒྲོལ། །དམྱལ་བར་སྐྱེ་བ་མནར་མེད་ལེན། །དེ་ཕྱིར་ཐུགས་རྗེའི་གཟུངས་ཐག་གཅེས། །སྒྲོལ་བའི་ཕྲིན་ལས་གསུངས་པ་ནི། །རྒྱལ་བའི་ལུང་ལས་གསུངས་པ་ནི། །སྦྱོར་བའི་མཆོད་པས་བསྐང་བ་ནི། །བུ་མོ་ཤིན་ཏུ་མཚན་ལྡན་ལ། །ཆགས་པའི་བུ་མོ་མིང་བཞི་མ། །བཀུག་སྟེ་བསྡིམ་ལ་སྦྱོར་དག་བསྐུལ། །བྷ་ག་གསང་བའི་མདངས་འབུལ་བསམ། །ཐ་ཚིག་ཤིན་ཏུ་བསྲེས་པ་དང་། །མཁའ་གསང་བྱིན་གྱིས་བརླབ་པ་ཙམ། །བྱང་སེམས་མཁའ་ལ་ཕེབས་པ་དང་། །འཕགས་པ་ཡི་དམ་ལྷ་ཡང་མཆོད། །བདག་ཉིད་དངོས་གྲུབ་བླང་བྱས་ནས། །སྲིད་པའི་དབང་ཅན་ཕོ་མོ་རྣམས། །སྤྱན་དྲང་མཆོད་ལ་དེ་དབང་བསྐུར། །མངག་པའི་ལས་ལ་བསྐུལ་བར་བྱ། །
ལུས་ལ་བསྡིམ་པའི་ལྷ་མོ་རྣམས། །དགའ་བའི་ཡིད་ཀྱིས་གཤེགས་སུ་གསོལ། །འབྲས་བུ་ཕྱིན་པར་བྱེད་པ་ནི། །བལྟ་བ་དང་ནི་དམ་ཚིག་ཡིན། །འདི་ཡི་དམ་ཚིག་བསྟན་པ་ནི། །བ་དམར་གླང་དམར་ཤ་ཡང་བསྲུང་། །ཁྱི་དང་སྐྱེས་པ་མཚོན་མི་བསྟེན། །མཐུན་པའི་རྫས་རྣམས་ཚོགས་པར་བྱ། །བདག་ཉིད་བདུད་ཆས་འཇུག་པ་ནི། །ལྷག་པར་སྐུ་ཡི་དམ་ཚིག་ཡིན། །མ་ནོར་སྔགས་བཟླས་ཆུ་བོའི་གཞུང་། །སྐད་མི་གཅིག་དང་སྐྱེས་པ་དང་། །སྨྲ་བ་སྤངས་ཏེ་བཟླས་པ་ནི། །ཚད་དུ་འབྱུང་ཞིང་མཆོད་བསྟོད་བྱ། །དཀོན་མཆོག་སྤྱི་དང་བླ་མ་ལ། །ངག་གི་ཉེས་པ་སྦྱང་བར་བྱ། །ལྷག་པ་གསུང་གི་དམ་ཚིག་ཡིན། །ཏིང་འཛིན་མི་འབྲལ་རྒྱུན་དུ་བྱ། །ལྟ་བ་དང་ནི་སྤྱོད་པ་ནི། །མཐུན་པའི་ཕྱོགས་ནས་སྤྱད་པར་བྱ། །བཤད་ཅིང་བསྟན་པར་མི་བྱ་སྟེ། །སྦྲུལ་ལྟར་གདུག་པའི་ཞེ་སྡང་གནག །བརྣག་པ་ཐུགས་ཀྱི་དམ་ཚིག་ཡིན། །བསྙེན་བསྒྲུབ་ལས་ལ་སྦྱར་དུས་བསྲུང་། །རྒྱུན་ཏུ་སྤྱི་ཡི་དམ་ཚིག་བསྲུང་། །དམ་ཚིག་སྲོག་ལྟར་བསྲུང་བ་གཅེས། །དམ་ཚིག་གཞུང་ལྟར་བསྲུང་བ་དང་། །བཀའ་དབང་གཞུང་དུ་ཞུ་བ་དང་། །ཕྱི་ནང་གསང་བའི་དབང་བསྐུར་ཞིང་། །ལུང་དང་མན་ངག་དེ་ལ་བསྟན། །དེ་མ་ཡིན་ལ་བསྟན་གྱུར་ན། །བདག་ཀྱང་ཕུང་ལ་གཞན་ཀྱང་བརླག །རྒྱུ་དང་ཡི་གེར་བྲིས་པ་འདི། །སྐལ་ལྡན་རྣམས་ལ་སྣང་བར་གྱིས། །ཞེས་བཀའ་སྩལ་པ་དང་དབང་ཕྱུག་ཆེན་པོ་ཤིན་ཏུ་ཡི་རངས་ཏེ་བསྟོད་དོ།། །།འཇམ་དཔལ་མ་རུ་ཙེའི་སྔགས་རྒྱུད་ལས་ཕྱི་མའི་ཕྱི་མ་རྫོགས་སོ།། །།