བང་ཆེན་བསྡུས་པའི་ཏནྟྲ།
དབང་ཆེན་བསྡུས་པའི་ཏནྟྲ་ཡིན། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །ཚེ་ལ་དབང་ཐོབ་རིག་འཛིན་རྣལ་འབྱོར་གྱིས། །རྩིས་འགོས་གཏན་ལ་དབབ་པའི་ཕྱིར། །དབང་ཆེན་བསྡུས་པའི་ཏནྟྲ་ལས། །འགོ་ནན་རྩིས་འགོའི་ལེའུ་འདི་གསུངས་སོ། །འགོ་ནན་རྩིས་འགོའི་ལེའུ་འདི་ལ་དོན་རྣམ་པ་བརྒྱད་ཀྱིས་བསྟན་ཏེ། དེ་ཡང་གང་དང་གང་ཞེ་ན། ལུང་ལས། འཇིག་རྟེན་ཁམས་ན་དཀོན་པའི་བཀའ་གསང་རིན་པོ་ཆེ། །ཤེས་རབ་རིག་པ་མཛོད་ཀྱི་ཁ་ཕྱེ་ནས། །ཡེ་ཤེས་རིག་པ་ཉིད་ལ་ཉིད་ཀྱིས་སྟོན་པ་འདི། །སྟོབས་ལྡན་དབང་ཕྱུག་རྒྱལ་བ་གང་གི་མཐུ། །རྒྱལ་སྲས་ཁྲོ་བོ་སྙན་ཁུང་བརྒྱུད་པའི་ལུང་། །དབྱིངས་ལ་རིག་པ་གབ་པས་མན་ངག་མཆོག །གསུང་རབ་རྒྱ་མཚོ་ཐུགས་ཀྱི་ཉིང་ཁུ་འདི། །དགོངས་རྒྱུད་ཟབ་མོས་སྦས་པའི་ཏནྟྲ་གང་ནས་ཕྱུང་། །བསྒོམ་བསྒྲུབ་འཆད་ཅིང་མན་ངག་དཔྱིས་འབྱིན་པས། །བདག་གཞན་སེམས་ཀྱི་མདུད་པ་དམ་པོ་རྣམས། །མང་པོ་རྩིས་ཀྱི་ཀློང་ནས་འགྲོལ་མཛད་པ། །མཁྱེན་རབ་རྩལ་གྱི་སློབ་དཔོན་གང་གིས་མཛད། །དགོངས་རྒྱུད་ཐབས་ཀྱིས་འདྲེལ་བའི་ཕྱག་རྒྱ་ལ། །བལྟ་བདེ་བརྟག་པར་སླ་བའི་དོན་ཆེད་དུ། །ལེའུ་དང་གྲངས་སུ་བཅད་པའི་གསུངས་རབ་འདི། །ཡོན་ཏན་གྲངས་སུ་བཅད་པའི་དགོས་ཆེད་དུ་ཡིས་བསྟན། །གབ་པའི་སྦས་པའི་མ་རྟོགས་འཁྲུལ་པ་ཡིས། །སྔོན་གྱི་བག་ཆགས་རྩུབ་མོས་མཚམས་སྦྱར་ཏེ། །རྣམ་སྨིན་ལས་ཀྱི་དུག་གསུམ་མེར་འབར་བ། །བདུད་བཞིའི་དཔུང་འཇོམས་གདུལ་བྱ་གང་གི་ཆེད་དུ་མཛད། །ཁྱད་པར་གཞན་ལས་འཕགས་པའི་ཡ་མཚན་རྨད་ཀྱི་བཀའ། །ཐོས་པའི་སྐལ་དང་ལྡན་པའི་གང་ཟག་སྔ་རབས་འདས། །མི་སྲིད་སྲིད་པར་སྦྱོར་བས་འཇིག་རྟེན་དམ་པའི་དཔེ། །ཕུང་པོ་ལྷག་མ་མེད་པར་མངོན་སངས་གང་དང་གང་རྣམས་རྒྱས། །གསང་བའི་ཕྲིན་ལས་བག་ཡངས་བསྒྲུབ་པའི་གནས། །སེང་གེ་ཁྲོ་བོ་མ་མོ་གནས་པའི་ས། །སེམས་དགའ་ཡིད་འོང་བཀྲ་ཤིས་དབེན་པའི་གནས། །གྲུབ་པའི་དགོན་གནས་གང་དང་གང་དུ་མཐར་རུ་ཕྱིན། །ལུང་རྒྱུད་ལྟ་བས་བསྒྱིངས་པའི་
མན་ངག་རྒྱ་མཚོ་འདི། །ཆེ་བཙན་འགྲན་གྱི་བླ་མེད་རྒྱལ་བའི་བཀའ། །བརྟགས་ན་ད་ལྟ་ཉིད་ནས་སངས་རྒྱས་འདི། །ཡེ་ཤེས་མཚོན་གྱི་ཁྱད་པར་དོན་ལས་ཇི་ལྟར་གསལ། །དབང་ཆེན་བསྡུས་པའི་ཏནྟྲ་ལས། འགོ་ནན་རྩིས་འགོའི་ལེའུ་སྟེ་དང་པོའོ།། །།ཚེ་ལ་དབང་ཐོབ་རིག་འཛིན་རྣལ་འབྱོར་གྱིས། །ལོ་རྒྱུས་གཏན་ལ་དབབ་པའི་ཕྱིར། །དབང་ཆེན་བསྡུས་པའི་ཏནྟྲ་ལས། །བཅས་ཀ་གླེང་གཞིའི་ལེའུ་འདི་གསུངས་སོ། །བཅས་ཀ་གླེང་གཞིའི་ལེའུ་འདི་ལ་ཡང་དོན་གསུམ་སྟེ། དེ་ཡང་གང་དང་གང་ཞེ་ན། གདུལ་བྱ་མང་པོ་ཐབས་གང་གིས་བརྒྱུད་པ་ནི་རྒྱུད་ཀྱི་གླེང་གཞིའོ། །བཀའ་རྒྱུད་ཟབ་མོ་རྒྱལ་བའི་སྙན་ཁུང་ནས་གང་ཟག་གི་རྣ་བ་བརྒྱུད་པ་ནི་ལུང་གི་གླེང་གཞིའོ། །ཏིང་ངེ་འཛིན་ཐབས་ཀྱིས་བརྒྱུད་པ་ནི་མན་ངག་གི་གླེང་གཞིའོ། །གདུལ་བྱ་མང་པོ་ཐབས་ཀྱིས་བརྒྱུད་པའི་རྒྱུད་ཀྱི་གླེང་གཞི་ལ་ཡང་དོན་རྣམ་པ་ལྔ་སྟེ། ལྷ་ཆེན་པོ་འཁོར་དང་བཅས་པ་ཐབས་ཀྱིས་གདུལ་བ་དང་། ཀླུ་ཆེན་པོ་འཁོར་དང་བཅས་པ་དབང་གིས་གདུལ་བ་དང་། ཕྱོགས་སྐྱོང་འཁོར་དང་བཅས་དོན་གྱིས་གདུལ་བ་དང་། རྒྱལ་ཆེན་རིགས་བཞི་སྐུས་གདུལ་བ་དང་།གཟའ་དང་རྒྱུ་སྐར་དགོངས་པས་གདུལ་བའི་གདུལ་བྱའོ། །བཀའ་རྒྱུད་ཟབ་མོ་རྒྱལ་བའི་སྙན་ཁུང་ནས་གང་ཟག་གི་རྣ་བར་བརྒྱུད་པ་དང་། ཏིང་ངེ་འཛིན་ཐབས་ཀྱིས་བརྒྱུད་པའོ། །དབང་ཆེན་བསྡུས་པའི་ཏནྟྲ་ལས། བཅས་ཀ་གླེང་ གཞིའི་ལེའུ་སྟེ་གཉིས་པའོ།། །།ཚེ་ལ་དབང་ཐོབ་རིག་འཛིན་རྣལ་འབྱོར་གྱིས། །དོན་གྱི་ས་རྣམས་བཅད་པའི་ཕྱིར། །དབང་ཆེན་བསྡུས་པའི་ཏནྟྲ་ལས། །དོན་གྱི་ས་གཅོད་ལེའུ་འདི་གསུངས། །ལེའུ་འདི་ལ་ཡང་དོན་ཆེན་ལྔ་སྟེ། ལུང་ཆེན་པོ་ཉི་ཤུས་ས་གསལ་བར་བཅད་པ་དང་། མན་ངག་ཆེན་པོ་བཅུ་དྲུག་གིས་རིགས་གཉིས་བརྒྱུད་པའི་ལྷ་གསལ་བར་བསྒོམ་པ་དང་། དཀྱིལ་འཁོར་ཆེན་པོ་བརྒྱད་ཀྱིས་བསྒྲུབ་པ་མ་བསླད་པ་བརྩམ་པ་དང་། དབང་ཉི་ཤུ་རྩ་གཅིག་གིས་ཐབས་ཆེ་བའི་ཡོན་ཏན་ལྷུན་གྱིས་གྲུབ་པར་བསྟན་པ་དང་། དྲོད་ཆེན་པོ་གསུམ་གྱིས་མགོ་མཇུག་གི་བྱ་བ་ཆུད་མ་ཟོས་པར་བསྟན་པའོ། །དབང་ཆེན་བསྡུས་པའི་ཏནྟྲ་ལས། དོན་
གྱི་ལེའུ་སྟེ་གསུམ་པའོ།། །།ཚེ་ལ་དབང་ཐོབ་རིག་འཛིན་རྣལ་འབྱོར་གྱིས། །ཕྱག་རྒྱ་ཆེན་པོའི་རིག་འཛིན་བསྒྲུབ་པའི་ཕྱིར། །དབང་ཆེན་བསྡུས་པའི་ཏནྟྲ་ལས། །བསྒྲུབ་པ་ཟབ་མོའི་ལེའུ་འདི་གསུངས། །བསྒྲུབ་པ་ཟབ་མོའི་ལེའུ་འདི་ལ་ཡང་དོན་རྣམ་པ་བརྒྱད་དེ།དེ་ཡང་གང་དང་གང་ཞེ་ན། གནས་ཕུན་སུམ་ཚོགས་པ་དང་། དུས་ཕུན་སུམ་ཚོགས་པ་དང་། འཁོར་ཕུན་སུམ་ཚོགས་པ་དང་། རྫས་ཕུན་སུམ་ཚོགས་པ་དང་། ཡོ་བྱད་ཕུན་སུམ་ཚོགས་པ་དང་། ཏིང་ངེ་འཛིན་ཕུན་སུམ་ཚོགས་པ་དང་། ཕྲིན་ལས་ཕུན་སུམ་ཚོགས་པ་དང་། དངོས་གྲུབ་ཕུན་སུམ་ཚོགས་པ་རྣམས་སོ། །དེ་ལ་གནས་ལ་ཡང་གསུམ་སྟེ། སེང་གེའི་དགོན་གནས་དང་། ཁྲོ་བོའི་དགོན་གནས་དང་། མ་མོའི་དགོན་གནས་སོ། །དུས་ལ་ཡང་གསུམ་སྟེ།ཉི་ཟླ་གཟའ་སྐར་མཚན་མའི་དུས་དང་། དབྱར་དགུན་སྟོན་དཔྱིད་རིགས་ཀྱི་དུས་དང་། ཕྱི་ནང་རྒྱུ་རྐྱེན་ཡོ་བྱད་ཀྱི་དུས་སོ། །འཁོར་ལ་ཡང་གསུམ་སྟེ། གང་ཟག་ཕོ་མོ་ཕྱིའི་འཁོར་དང་། རྒྱལ་བ་ཡབ་ཡུམ་ནང་གི་འཁོར་དང་། ཤེས་རབ་གཟུངས་མ་གསང་བ་ཡུམ་གྱི་འཁོར་རོ། །ཡོ་བྱད་ལ་ཡང་གསུམ་སྟེ། རྩི་འབྲས་བཅུད་ཀྱི་ཡོ་བྱད་དང་། ཞིང་བཅུ་གལ་གྱི་ཡོ་བྱད་དང་། བྱང་ཆུབ་སེམས་ཀྱི་ཡོ་བྱད་དོ། །རྫས་ལ་ཡང་གསུམ་སྟེ། རྟེན་འདྲེལ་ཡོ་བྱད་ཀྱི་རྫས་དང་། དམ་ཚིག་གི་རྫས་དང་། ལོངས་སྤྱོད་རྫོགས་པའི་རྫས་སོ། །ཏིང་ངེ་འཛིན་ཕུན་སུམ་ཚོགས་པ་ལ་ཡང་ལྔ་སྟེ། མཉམ་པ་ཉིད་ཀྱི་ཏིང་ངེ་འཛིན་གྱིས་ཕྱི་ནང་གི་ཆོས་ཐམས་ཅད་བྱིན་གྱིས་བརླབ་པ་དང་། དབང་བསྒྱུར་ཐབས་ཀྱི་ཏིང་ངེ་འཛིན་གྱིས་བྱིན་གྱིས་བརླབ་པའོ། །ཕྱག་རྒྱ་ཆེན་པོའི་ཏིང་ངེ་འཛིན་གྱིས་འཁོར་བྱིན་གྱིས་བརླབ་པ་དང་། གིང་ཆེན་སྒྲོལ་བའི་ཏིང་ངེ་འཛིན་གྱིས་རྒྱུ་དང་ཡུམ་བྱིན་གྱིས་བརླབ་པ་དང་། ཚོགས་ཆེན་འདུས་པའི་ཏིང་ངེ་འཛིན་གྱིས་རྫས་བྱིན་གྱིས་བརླབ་པའོ། །ཕྲིན་ལས་ཕུན་སུམ་ཚོགས་པ་ལ་ཡང་བཅུ་སྟེ། དང་པོར་ཞེ་སྡང་མཚམས་ཀྱི་ཕྲིན་ལས་དང་། དམིགས་པ་རྟེན་གྱི་ཕྲིན་ལས་དང་། རྒྱན་གཟུངས་སྡེབས་པའི་ཕྲིན་ལས་དང་། བསྙེན་པ་དབུལ་
བའི་ཕྲིན་ལས་དང་། ཐུགས་དམ་བསྐུལ་བའི་ཕྲིན་ལས་དང་། གླུ་བྲོ་གར་གྱི་ཕྲིན་ལས་དང་། བརྟུལ་ཞུགས་ཆེན་པོའི་ཕྲིན་ལས་དང་། དབུགས་ཆེན་འབྱིན་པའི་ཕྲིན་ལས་དང་། བཀྲ་ཤིས་བསྡུས་པའི་ཕྲིན་ལས་དང་། དངོས་གྲུབ་ཕུན་སུམ་ཚོགས་པ་ལ་ཡང་གསུམ་སྟེ། མཚན་རྟགས་ཀྱི་དངོས་གྲུབ་དང་། མཚན་མ་མེད་པའི་དངོས་གྲུབ་དང་། གཉི་གར་འདྲེལ་བའི་དངོས་གྲུབ་བོ། །དབང་ཆེན་བསྡུས་པའི་ཏནྟྲ་ལས། བསྒྲུབ་པ་ཟབ་མོའི་ལེའུ་སྟེ་བཞི་པའོ།། །།ཚེ་ལ་དབང་ཐོབ་རིག་འཛིན་རྣལ་འབྱོར་གྱིས། །སྔགས་པ་གཏན་ལ་དབབ་པའི་ཕྱིར། །དབང་ཆེན་བསྡུས་པའི་ཏནྟྲ་ལས། །མན་ངག་འདྲེལ་བའི་ལེའུ་འདི་གསུངས། །མན་ངག་འདྲེལ་བའི་ལེའུ་འདི་ལ་ཡང་དོན་གསུམ་སྟེ། བལྟ་བ་ཉམས་དྲོད་ཀྱི་འདྲེལ་བ་དང་། དམ་ཚིག་ཡུམ་གྱི་འདྲེལ་བ་དང་། ཐུགས་རྗེ་ཕྲིན་ལས་ཀྱི་འདྲེལ་བའོ། །ལྟ་བ་ཉམས་དྲོད་ཀྱི་འདྲེལ་བ་ལ་ཡང་བཞི་སྟེ། ལུང་དང་། མན་ངག་དང་། རིགས་པ་དང་། གཏན་ཚིགས་སོ། །དམ་ཚིག་ཡུམ་གྱི་འདྲེལ་བ་ཡང་གཉིས་ཏེ། སྒྲོལ་བ་ཐུགས་རྗེའི་འདྲེལ་བ་དང་། སྦྱོར་བ་ཆོས་ཉིད་ཀྱི་འདྲེལ་བའོ། །ཐུགས་རྗེ་ཕྲིན་ལས་ཀྱི་འདྲེལ་བ་ཡང་གཉིས་ཏེ། མཛད་པའི་ཕྲིན་ལས་དང་། མི་མཛད་པའི་ཕྲིན་ལས་སོ། །དབང་ཆེན་བསྡུས་པའི་ཏནྟྲ་ལས། མན་ངག་འདྲེལ་བའི་ལེའུ་སྟེ་ལྔ་པའོ།། །།ད་ནི་གལ་པོ་དཀྱུས་ཀྱི་ལེའུ་འབྱུང་སྟེ། རྣལ་འབྱོར་གྱི་དབང་ཕྱུག་ཆེན་པོ།ཇི་ལྟར་དངོས་གྲུབ་དམ་པ་གཅིག་ཐོབ་པར་འདོད་ན། ཆོས་ཐམས་ཅད་རང་བཞིན་གྱིས་རྣམ་པར་དག་པའི་སྟོང་པ་ཉིད་ལས་ལངས་ཏེ། ཡི་གེ་ཧཱུཾ་དུ་བསྒོམས་ལ། ཡིད་ཀྱིས་བར་སྣང་གི་ཁམས་ཐམས་ཅད། གསེར་གྱི་སེང་གེ་སྤྱན་གསུམ་པ་ལ་འོད་ཟེར་འབར་བས་འཁྲིགས་པ་དྲུག་དྲུག་གི་སྟེང་དུ། རིན་པོ་ཆེའི་ཁྲི་ཕྱོགས་བཅུར་འོད་འབར་བ་བཞིའི་སྟེང་དུ་པདྨའི་ལེའུ་བརྒན་འོད་ཟེར་ཕྱོགས་བཅུར་འབར་བ། དེ་བས་ཆག་གང་ཙམ་གྱིས་མཐོ་བའི་སྟེང་དུ། མ་ལས་ཉི་མའི་དཀྱིལ་འཁོར་དུ་གྱུར་པར་དམིགས་ལ། དེའི་སྟེང་
དུ་རྣལ་འབྱོར་གྱི་དབང་ཕྱུག་ཆེན་པོ་རྒྱན་ཐམས་ཅད་ཀྱིས་བརྒྱན་པ། རྡོ་རྗེ་སེམས་དཔའ་ཧཱུཾ་ཞེས་བྱ་བའི་ཕྱག་རྒྱ་བཅིངས་ནས་མངོན་སུམ་གྱི་བསྒྲུབ་པར་བྱའོ། །དེ་ནས་ཡང་ཧཱུཾ་ཞེས་བཟླས་པས། ཕྱོགས་བཞི་མཚམས་བཞིར། རིན་པོ་ཆེའི་ཀ་བ་དཔངས་སུ་དཔག་ཚད་བརྒྱད་ཁྲི་བཞི་སྟོང་བས་ཀྱང་ཀླས་པ། ཀ་བ་གཅིག་ལ་ཡང་སྤྲིན་མེད་པའི་ཉི་མ་བདུན་བདུན་གྱིས་བརྒྱན་པ། འོད་ཟེར་གྱི་སྟོང་གསུམ་གྱི་སྟོང་ཆེན་པོ་བས་ཀྱང་ཀླས་པར་དམིགས་ལ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་ན། སྐྱེ་གནས་བཞི་ལས་སྐྱེས་པའི་སེམས་ཅན། ཉན་ཐོས་དང་རང་སངས་རྒྱས་དང་། རིགས་ངན་དང་རིགས་མེད་པ་ཐམས་ཅད་ཀྱི་རྣམ་པར་རྟོག་པའི་བག་ཆགས་ཐམས་ཅད་འོད་ཟེར་འབར་བ་དེས་བཅོམ་བརླགས་ནས། བླ་ན་མེད་པའི་བྱང་ཆུབ་ལ་དགོད་པའི་ཐབས་འདིས་བྱའོ། །ཉི་མའི་དཀྱིལ་འཁོར་གྱི་སྟེང་དུ་བདག་ཉིད་རྡོ་རྗེ་སེམས་དཔའི་རང་བཞིན་ཡང་ཡིན་ལ། ཁམས་གསུམ་གྱི་བདག་པོ་ཆེན་པོ་ཡང་བདག་ཉིད་ཡིན་ལ། ཁྲོ་བོ་ཆེན་པོ་ཡང་བདག་ཡིན་ནོ་ཞེས་དམིགས་ལ། ཉི་མའི་དཀྱིལ་འཁོར་གྱི་སྟེང་དུ་སྔ་མའི་རྒྱན་ཐམས་ཅད་ཀྱིས་བརྒྱན་པ། རྡོ་རྗེ་སེམས་དཔའི་རང་བཞིན་སྐུ་མདོག་དམར་པོ་དབུ་ལྔ་ཕྱག་བཅུ་དྲུག་པར་དམིགས་ལ། རིན་པོ་ཆེ་དང་རྡོ་རྗེ་ལས་བྱས་གཤོག་པ་བཞི་ཡང་བསྐྱེད་པར་བྱའོ། །དབུ་ལྔ་ལས་བཞིན་ཕྱོགས་བཞིར་འབར་བའི་གཟུགས་ཀྱིས་བལྟ་བའོ། །དབུ་དབུས་མ་ཀླད་པར་ནི་རིན་པོ་ཆེའི་གཞལ་ཡས་ཁང་དུ་བྱིན་གྱིས་བརླབས་ནས། དཔལ་རྣམ་པར་སྣང་མཛད་འཁོར་དང་བཅས་པ་བཞུགས་པར་དམིགས་ལ། ཐོད་པའི་ངོས་བཞིར་ཡང་རྒྱན་ཐམས་ཅད་ཀྱིས་བརྒྱན་པ། རྡོ་རྗེ་སེམས་དཔའི་སྐུ་མདོག་དམར་པོ་ཕྱག་རྒྱ་ཚུལ་བཞིན་དུ་གནས་པར་བསྒོམ་མོ། །གཡས་གཡོན་གྱི་དབུ་ནི་སྐུ་མདོག་དམར་པོ་སྤྱན་གསུམ་པར་དམིགས་ལ། དབུ་རལ་པའི་དབུས་ནས་རྟ་མགོ་ལྗང་གུ་རེ་རེ་བྱུང་བ། ལྷག་པར་དཔལ་རྟ་མགྲིན་དངོས་སུ་བྱུང་བར་བསམ་སྟེ། རྡོ་རྗེ་ཧཱུཾ་ཞེས་བྱ་བའི་སྒྲ་བསྒྲགས་པ་ཙམ་གྱིས། ནུབ་ཕྱོགས་ཀྱི་ཕྲ་མེན་མ་རྣམས་ཀྱིས། འཁོར་མང་པོ་ཀླུ་ཐམས་ཅད་དྲག་
པོའི་བརྟུལ་ཞུགས་ཀྱིས་དབང་དུ་བསྡུ་བར་བྱའོ། །ལྷོ་དང་བྱང་དུ་བལྟས་པའི་རྟ་མགོ་ལྗང་གུས་ཀྱང་ཧཱུཾ་ཧཱུཾ་ཞེས་བྱ་བའི་སྒྲ་འབྱིན་པས། གནོད་སྦྱིན་གྱི་འཁོར་ཐམས་ཅད་དང་། གྲུལ་བུམ་གྱི་འཁོར་ཐམས་ཅད་དང་། ཕྲ་མེན་མའི་འཁོར་ཐམས་ཅད་ཀྱང་། ཧཱུཾ་ཧཱུཾ་ཞེས་བསྒྲགས་པ་ཙམ་གྱིས་ཞབས་འོག་ཏུ་སོང་བར་དམིགས་ལ། གནས་བརྟན་པར་བྱའོ། །ཞལ་ཤར་ཕྱོགས་སུ་བལྟས་པའི་མདོག་དམར་པོ་སྤྱན་གསུམ་པ་ཞལ་ནས་ཀྱང་ཧཱུཾ་ཞེས་བྱ་བའི་སྒྲ་བསྒྲགས་པ་ཙམ་གྱིས། ལྗགས་འདྲིལ་ཞིང་སྤྱི་བོའི་གཙུག་ཏུ་རྡོ་རྗེ་ཁ་ཊྭཱཾ་ག་འབར་བ་གསུམ་གནས་པར་བསམ་མོ། །ཡང་ཤར་ཕྱོགས་འབར་བའི་གཟུགས་ཀྱིས་བལྟ་བར་བྱ་སྟེ། སྨིན་མ་གློག་བཞིན་དུ་འགྱུ་བ། སྨིན་མཚམས་ཁྲོ་གཉེར་གྱི་རླབས་བསྐྱོད་པར་བྱས་ལ། རྡོ་རྗེ་ཧཱུཾ་ཞེས་བྱ་བའི་སྒྲ་བརྗོད་པ་ཙམ་གྱིས། བརྒྱ་བྱིན་དང་། ཚངས་པའི་གནས་ཐམས་ཅད་དང་། ཕྲ་མེན་མའི་འཁོར་དང་བཅས་པ་ཞབས་འོག་ཏུ་སོང་བར་དམིགས་ལ་གནས་བརྟན་པར་བྱའོ། །ཕྱག་བཅུ་དྲུག་གཡས་གཡོན་དང་པོ་གཉིས་ནི་རྡོ་རྗེ་ལྕགས་ཀྱུ་འབར་བས་འགུགས་པའོ། །གཡས་པ་གཅིག་ནི་སྦྲུལ་གྱི་ཞགས་པ་བསྣམས་པར་བྱའོ། །གཡས་པ་གཅིག་ན་ནི་རྔེའུ་ཆུང་དང་ཁ་ཊྭཱཾ་ག་ལྷན་ཅིག་འཛིན་པའོ། །གཡས་པ་གཅིག་ན་ནི་ཐོད་རློན་ཁྲག་གིས་བཀང་བ་ནད་དང་བསྲེས་པས་འཇིག་རྟེན་གྱི་ཁམས་རབ་འབྱམས་མཐའ་ཀླས་པ་འོད་ཟེར་བདུད་རྩིར་བྱིན་གྱིས་བརླབས་ནས་ཟ་བའོ། །ཕྱག་གཡས་པ་བཞི་ནི་རྒྱུན་མི་འཆད་པར་ཧཱུཾ་ཞེས་ཟློས་ཤིང་རྡོ་རྗེ་འབར་བས་བརྡེགས་པའོ། །ཕྱག་གཡས་པ་རྣམས་ཀྱི་དཔུང་རྒྱན་དང་གདུ་བུ་ཡང་།སྦྲུལ་ནག་པོ་མི་སྲུན་པའི་ཁ་ནས་ཧཱུཾ་ཞེས་ཟེར་བ་བསྐལ་པའི་མེ་འབར་བ་མང་པོས་བརྒྱན་པའོ། །གཡོན་གྱི་འོག་མ་གཉིས་ནི། སྟེང་མ་རིན་པོ་ཆེའི་རྒྱུ་ལས་འབྱུང་བས་ང་རྒྱལ་བསྐྱེད་པའོ། །འོག་མ་ནི་སེམས་ཅན་ཐམས་ཅད་འདུལ་བའི་ཐབས་ལ་མཁས་པ་ཡིན་པས། རྒྱུན་མི་ཆད་པར་རྡོ་རྗེ་འབར་བས་འཇོམས་པའོ། །ཐེའུ་གཤོག་རྣམས་ནི་གང་གི་སྙིང་ལས་འདྲེན་པ་ཡིན་པས། རྡོ་རྗེ་ལྕགས་ཀྱུ་
རྣོ་བའི་མཆོག་ཀྱང་ཡིན་ལ་སྒྲོལ་བ་ཐམས་ཅད་ལ་བརྩོན་པ་ཡིན་པས་བསྒྲལ་བ་དམ་པའོ། །ཕྱག་གཡོན་པ་གཅིག་ན་སྡིགས་པའི་མཛུབ་མོའི་རྩེ་ལ་བསྐལ་པའི་མེ་ཆེན་འབར་བའོ། །གཅིག་ནི་ལུ་གུ་རྒྱུད་ཀྱི་ཞགས་པའོ། །གཅིག་ལ་ནི་ཐོད་རློན་ཁྲག་གིས་བཀང་ནས་བདག་ཉིད་ཆེན་པོའི་ཞལ་དུ་འབུལ་བའོ། །གཅིག་གིས་ནི་ཁྲོ་བོ་བརྒྱད་ཀྱི་སྙིང་རྒྱུ་མ་དང་ལྷན་ཅིག་ཏུ་ཆང་པར་བཅུག་ནས་ཟ་བའོ། །གཅིག་གིས་ནི་རྔེའུ་ཆུང་དང་ཁ་ཊྭཱཾ་ལྕགས་ཀྱུ་གསུམ་ལྷན་ཅིག་ཏུ་བཟུང་སྟེ་གང་གི་སྙིང་ལས་འདྲེན་པའོ། །ཕྱག་གཡོན་པ་བརྒྱད་ཆར་ཡང་སྦྲུལ་ནག་པོ་དང་སྔོ་བཀྲ་ཤ་དག་གིས་བརྒྱན་པ། ཁ་ནས་ཀྱང་ཧཱུཾ་གི་སྒྲ་སྒྲོགས་པ་ཤ་དག་གོ། །དེ་དག་གི་སྙིང་པོ་ནི་ཨཱོཾ་ཧ་ཧ་རུ་ལུ་ཧཱུཾ་ཕཊ་ཅེས་བརྗོད་པས། སྔ་མའི་བརྒྱ་བྱིན་དང་ཚངས་པ་དང་།ཕྲ་མེན་མ་ཡི་ཚོགས་མང་པོ་དབང་དུ་བསྡུས་ནས་སྤྲིན་ཕུང་བཞིན་དུ་བསྡུས་པའི་སྟེང་དུ་བདག་ཉིད་ཆེན་པོའི་ཧཱུཾ་ཐང་གཅིག་བཟླས་པས། ཞབས་དམར་པོ་བརྒྱད་དུས་གཅིག་ཏུ་བྱུང་བར་བསམ་མོ། །དེ་ལ་སྟེང་ཕྱོགས་ཀྱི་ཁམས་འདུལ་བའི་ཞབས་ནི། དྲག་ཤུལ་དཔའ་བར་ལྡན་པས་སྟག་གི་འགིང་དཀྲིས་ཏེ། སྟེང་ཕྱོགས་ཀྱི་ཧཱུཾ་ཀཱ་རའི་སྙིང་གར་རྡོག་པས་བརྫིས་ཏེ། ཉམ་ཐག་པའི་འབོད་སྒྲོགས་ཀྱི་སྒྲ་ཆེན་པོ་འབྱིན་པའོ། །ཞབས་གཅིག་གིས་ནི་ལྷོ་ནུབ་མཚམས་སུ་ཨཱརྱ་ཨ་ཙ་ལ་མདོག་སྔོ་སྐྱ་གན་རྐྱལ་དུ་མནན་པའི་སྙིང་གར་ཞབས་ཀྱི་བོལ་མན་ཆད་ནུབ་པར་མནན་ཏེ། ཞབས་ཀྱང་བཻ་ཌཱུརྱ་སྔོན་པོ་ཞུན་ཁྲབ་ཀྱིས་གཡོགས་པའོ། །ཞབས་གཅིག་གིས་ནི་ལྷོ་ཕྱོགས་ཀྱི་ཁམས་འདུལ་བ་ཡིན་པས། ཡ་མཱནྟ་ཀའི་སྙིང་གར་རྡོག་པས་མནན་ནས། ཞབས་ཀྱི་བོལ་ཐམས་ཅད་མན་ཆད་ནུབ་པར་དམིགས་ལ།ཞབས་ཀྱང་རྡོ་རྗེ་འཆོལ་པའི་ན་བཟས་བཀླུབས་པའོ། །ཞབས་གཅིག་གིས་ནི་ཤར་ལྷོ་མཚམས་ཀྱི་ནཱི་ལ་དནྡྲའི་སྙིང་གར་རྡོག་པས་མནན་ཏེ་འབོད་སྒྲོགས་ཀྱི་སྒྲ་འབྱིན་པར་དམིགས་ལ། ཞབས་ཀྱང་བསེ་ཁབ་སྨུག་པོས་དཀྲིས་པའོ། །ཞབས་གཅིག་གིས་ནི་ནུབ་ཕྱོགས་
ཀྱི་ཁམས་འདུལ་བ་ཡིན་པས་པདྨ་ཀུཎྜ་ལའི་མདོག་ནག་པོའི་སྙིང་གར་ཞབས་ཀྱི་རྡོ་རྗེ་ཕུར་པ་བཙུགས་པ་ཞབས་ཀྱང་སྦྲུལ་ནག་པོས་དཀྲིས་ཏེ། འཁོར་མང་པོ་དབང་དུ་བསྡུས་པའོ། །ཞབས་གཅིག་གིས་ནི་ནུབ་བྱང་གི་མཚམས་གདུལ་ཕྱིར་ཏ་ཀི་རཱ་ཙ་ཁ་སྦུབ་ཏུ་མནན་པའི་སྤྱི་བོར། ཞབས་དམར་པོའི་མཐིལ་ཁྲོ་བོ་ཆོལ་པའི་ཁར་དམིགས་ལ། རྐང་གི་ནང་གཞལ་ཡས་ཁང་དུ་བྱིན་གྱིས་བརླབས་ལ། ཞབས་ཀྱི་མཐིལ་ཁྲོ་བོ་ཆོལ་པའི་ཁ་དམར་པོའི་འོད་དུ་འཕྲོས་པའི་ནང་དུ་འདོད་པའི་དབང་པོ་ཏ་ཀི་ར་ཙའི་མགོ་རྐང་ནི་ནང་དུ་སོང་བར་དམིགས་ལ། ཞབས་ཀྱང་རྡོ་རྗེའི་མཆེ་བས་དཀྲིས་ཏེ། འཁོར་མང་པོས་ཕྱག་བྱེད་པའོ། །ཞབས་གཅིག་ནི་ཤུ་ཀེན་གྱི་སྨད་གཡོགས་ཅན། བྱང་ཕྱོགས་སུ་བརྐྱང་བས་ཨ་མྲྀ་ཏ་ཀུཎྜ་ལི་ཁ་སྦུབ་ཏུ་མནན་ནས། རྡོག་པས་སྒལ་པ་ཐམས་ཅད་བཅོམ་ནས་བོལ་མན་ཆོད་རློན་པའི་ནང་དུ་ནུབ་པར་དམིགས་ལ། སྡུག་བསྔལ་ཐམས་ཅད་བྱང་བར་བྱས་ཏེ། ཕྱི་མའི་དུས་ན་རྣལ་འབྱོར་གྱི་དབང་ཕྱུག་ཆེན་པོའི་གྲལ་ཐོབ་པར་གྱུར་ཅིག་ཅེས་སྨོན་ལམ་འདེབས་སོ། །ཞབས་གཅིག་གིས་ནི་བྱང་ཤར་མཚམས་མ་ཧཱ་བ་ལའི་ལྡན་སར་མནན་པས་དུང་ཆེན་པོ་བཅོམ་སྟེ། འདོད་པའི་ལྷ་མོས་ཕྱག་བྱས་ནས་ཞབས་ཀྱང་གཟིག་གི་བགོ་བས་དཀྲིས་ཏེ། འཁོར་གྱི་ལྷ་མོའི་ཚོགས་དང་། མ་དང་ཆུང་མ་དང་བུ་མོ་དང་ཚ་མོ་རྣམས་ཕྲོགས་པའོ། །གཡོན་གྱི་གཤོག་པ་ནི་རིན་པོ་ཆེའི་རྒྱུ་ལས་བྱུང་བས་འདོད་ཆགས་ཆེན་པོའི་རྒྱུ་ཡིན་ནོ། །ཐེའུ་གཤོག་རྣམས་ནི་འདོད་པའི་གཙོ་བོ་ཡིན་པས་ཤེས་རབ་ཀྱི་མཆོག་དང་སྦྱར་རོ། །སྤྱིར་གཤོག་པ་བཞི་ཆར་འབར་བ་ནི་སྦྲུལ་ནག་པོའི་རྒྱུ་ལས་བྱུང་བ། བར་བར་ནི་རྡོ་རྗེ་རྩེ་ལྔ་པའི་རྒྱུ་ལས་བྱུང་བའོ། །བར་བར་ནི་རིན་པོ་ཆེའི་རྒྱུ་ལས་བྱུང་བ་ཉི་མ་སྟོང་གིས་བརྒྱན་པའོ། །དེ་དག་ཐམས་ཅད་ཀྱི་བཟླས་པ་ནི། ཨཱོཾ་ཛྭ་ལ་ཛྭ་ལ་བཛྲ་ཧཱུཾ། བཛྲ་ཨ་མོ་ཀ་ཏྲཾ་ཞེས་བརྗོད་ཅིང་ལས་ཐམས་ཅད་བཅོལ་ལོ། །སྔགས་གོང་མ་ནི་རྡོ་རྗེ་དྲ་བ་མ། འོག་མ་ནི་ལྷ་མོ་གློག་འགྱུ་མའོ། །དེ་ལ་ཧེ་རུ་ཀ་ཁྲོ་བོ་ཐམས་ཅད་ཀྱི་བཟླས་པ་ནི་འདི་ཡིན་ཏེ། ཨཱོཾ་ཧུ་ལུ་ཧུ་ལུ་ཧཱུཾ་ཕཊ་ཨཱརྱ་ལ་ཧྲཱྀཿཛཿཉེ་བའི་སྙིང་པོ་ལན་བཞི་འབུམ་བཟླས་ན་ལས་ཅི་བྱ་བ་
འགྲུབ་བོ། །དེ་ལྟ་བས་ན་དཔལ་པདྨ་ཧེ་རུ་ཀ་བསྒྲུབ་པ་ལ། དྲག་པོའི་བགེགས་ཀྱི་དབང་དུ་འགྱུར་བར་མི་འབྱུང་སྟེ། བྱུང་ན་ཡང་བར་ཆོད་དང་དངོས་གྲུབ་གཉིས་དུས་གཅིག་ཏུ་འབྱུང་སྟེ། དེ་ལ་བུད་མེད་ཀྱི་ཚོགས་མང་པོ་དག་རྒྱན་རྣམ་པ་སྣ་ཚོགས་ཀྱིས་བརྒྱན་ཏེ་མཛེས་པར་བྱས་ནས་འོང་སྲིད་ཀྱིས། དེ་ལ་ཆགས་པའི་སེམས་མ་བསྐྱེད་ཅིག །བར་བར་དུ་ཕྲ་མེན་མའི་ཚོགས་མང་པོ་དག་མིའི་ཐོད་པ་མང་པོས་བརྒྱན་ཏེ། ལག་ན་ཐོད་ཁྲག་དང་མི་རོ་ཐོགས་ནས་མི་སྡུག་པའི་འབྲུ་ཚུགས་སུ་བལྟ་ཞིང་། མི་སྙན་པའི་ཚུལ་གྱི་བདག་ལ་བསད་དོ་བཅད་དོ། །བརྡེག་གོ་ཟེར་བ་དག་འོང་སྲིད་ཀྱིས། དེ་ལ་མ་འཇིགས་པར་དབང་ཆེན་གྱི་སྐུར་སྒོམས་ཤིག །འཁོར་དེ་རྣམས་ཀྱིས་རང་དབང་མེད་པར་ཕྱག་བྱེད་ཀྱིས། དངོས་གྲུབ་ཀྱི་རྟགས་དང་པོ་གཅིག་དང་སྦྱར་རོ། །དེའི་འོག་ཏུ་གནོད་སྦྱིན་གྱི་ཚུལ་སྟོན་ཅིང་རལ་པ་འབར་བ་ལ་མི་མགོ་མང་པོས་ལུས་བརྒྱན་ཅིང་། ལག་ན་མདུང་ཐུང་དང་རལ་གྲི་ཐོགས་པ་དག་མིའི་རྒྱུ་མས་བདག་གི་སྐེ་ནས་འདོགས་ཤིང་། སྦྲུལ་ནག་པོ་དག་བདག་གི་ལུས་ལ་ཟ་ཞིང་དམ་དུ་དཀྲིས་ཏེ། རྩིབ་མ་དག་ཅོམ་ཅོམ་དམ་དུ་སྡོམ་པ་དག་འོང་སྲིད་ཀྱིས། དེ་ལ་མི་འཇིགས་པར་དབང་ཆེན་གྱི་སྐུར་བསྒོམ་དང་། གནོད་སྦྱིན་དང་གྲུལ་བུམ་གྱི་དབང་པོར་གྱུར་ཏེ། དངོས་གྲུབ་ཀྱི་རྟགས་གཉིས་པ་ཡིན་ནོ། །དེའི་འོག་ཏུ་བར་སྣང་ལ་གནས་པའི་ལྷ་ཁྲོ་བོ་རྣམས་ཀྱིས་བསྡིག་པ་དག་འབྱུང་སྟེ། བར་སྣང་ལ་གཤེ་བའི་སྒྲ་འབྲུག་སྐད་དྲག་པོ་སྒྲོགས་ཤིང་། སྦྲུལ་ནག་པོ་ཁ་ནས་མེ་དང་དུག་སྐྱུགས་པ་དང་། ཨ་ལ་ལ་ཟེར་ཞིང་སྒྲ་འབྱིན་པ་དང་། མིག་གཡས་གཡོན་ཉི་མར་བསྒྱུར་ཏེ་འབར་བའི་གཟུགས་ཀྱིས་བལྟ་བ་དང་། རང་གི་ཁོག་པ་ཁ་ཕྱེ་ནས་མི་རོ་གསར་རྙིང་བདག་ལ་སྟོབ་པ་དང་། ཕོ་མོའི་མཚན་མ་ཐམས་ཅད་ཟ་བའི་ཁར་བསྒྱུར་ནས། འཇིག་ཚོགས་ཀྱི་མཆེ་བ་བརྡར་ནས་རྐང་པ་ཕུར་པར་བསྒྱུར་ཏེ་བདག་ལ་འདེབས་ཤིང་གནོད་པ་བྱེད་པ་དང་། མི་མགོ་པགས་པ་རློན་པས་གཡོགས་ཤིང་། ལག་པས་རྡོ་རྗེ་བརྡེག་པ་དག་འོང་སྲིད་ཀྱིས། དེ་ལ་མ་འཇིགས་དང་ལྷ་ཐམས་ཅད་
ཀྱི་དབང་པོར་འགྱུར་ཏོ། །དངོས་གྲུབ་ཀྱི་རྟགས་གསུམ་པ་ཡིན་ནོ། །ད་ལྟར་དངོས་གྲུབ་ཀྱི་རྟགས་དང་བར་ཆད་དང་ཉམས་ལེན་ནི་དུས་གཅིག་ཏུ་འབྱུང་བས་ངོ་ཤེས་པར་བྱའོ། །དེ་བས་ན་དཔལ་པདྨ་ཧེ་རུ་ཀའི་སྐུ་གསུང་ཐུགས་ཀྱི་ཆོ་འཕྲུལ་ནི་ཅིར་ཡང་སྟོན་ཅིང་ཅིར་ཡང་སྣང་སྟེ། གཅིག་ཏུ་ངེས་པ་མེད་པའི་ཕྱིར་ན། སྐུའི་ཆེ་བ་དང་། གསུང་གི་ཆེ་བ་དང་། ཐུགས་ཀྱི་ཆེ་བའོ། །སྐུ་གསུང་ཐུགས་ཡོན་ཏན་ཕྲིན་ལས་ཅིས་ཀྱང་མ་བསྒྲིབས་པས་ན།ཁམས་གསུམ་རྣམ་པར་རྒྱལ་བའི་དོན་ཟབ་ཏུ་བསྟན་ཏོ། །སྐུའི་ཆེ་བ་ལ་ཡང་གསུམ་སྟེ། ཆོས་ཀྱི་སྐུ་གདལ་བ་ཆེན་པོ། ལོངས་སྤྱོད་རྫོགས་པའི་སྐུ་མཚན་དང་དཔེ་བྱད། སྤྲུལ་པའི་སྐུ་ཇི་ལྟར་འདུལ་བཞིན་སྟོན་པའོ། །གསུང་གི་ཆེ་བ་ལ་ཡང་གསུམ་སྟེ། ཚིག་གི་གསུང་དང་། རིག་པའི་གསུང་དང་། དོན་གྱི་གསུང་ངོ་། །ཐུགས་ཀྱི་ཆེ་བ་ལ་ཡང་གསུམ་སྟེ། འཇིག་རྟེན་མཁྱེན་པའི་ཐུགས་དང་།མྱ་ངན་ལས་འདས་པའི་ཐུགས་དང་། གཉིས་སུ་མེད་པའི་ཐུགས་སོ། །དེ་ལྟར་ཁྲོ་བོ་ཁམས་གསུམ་རྣམ་པར་རྒྱལ་བ་སྐུ་གསུམ་དུ་ནི་གྲུབ། གསུང་གསུམ་དུ་ནི་བསྟན། ཐུགས་གསུམ་དུ་ནི་དགོངས་ནས། སྐུ་གསུམ་གྱི་ཐ་མ་སྤྲུལ་པའི་སྐུ་ལ།གསུང་གསུམ་གྱི་ཐ་མ་ནི་ཚིག་གི་གསུང་བསྒྲགས། ཐུགས་གསུམ་གྱི་ཐ་མ་འཇིག་རྟེན་མཁྱེན་པའི་ཐུགས་ཀྱིས་དགོངས་ནས་འགྲོ་བ་འདུལ་བའི་དོན་དུ་སྐུ་མདོག་མཐིང་ག་ཞལ་གསུམ་ཕྱག་དྲུག་པ། གཡས་དཀར་གཡོན་དམར་དབུས་མཐིང་ག །ཕྱག་གཡས་པ་ན་རྡོ་རྗེ་དང་རྔེའུ་ཆུང་དང་མདུང་རྩེ་གསུམ། གཡོན་པ་དྲིལ་བུ་དང་རྒྱུ་ཞགས་དང་ཐོད་རློན་གསུམ། བསྐལ་པའི་མེ་རི་དང་སྦྲུལ་ནག་སྤུངས་པ་དང་ཐོད་རློན་གྱི་ཕྲེང་བས་རྒྱན་དུ་བརྒྱན་ཏེ། ཉིད་ཀྱིས་ཉིད་ལ་ཆེ་བ་རྔོམ་པའི་ཚིག་འདི་སྨྲས་སོ། །ང་ནི་ཁྲོ་བོ་རྣམ་པར་རྒྱལ། །ཆོས་སྐུ་གདལ་བ་ཆེན་པོས་ནི། །སྐྱེ་བ་མེད་པའི་ཆོས་དབྱིངས་སུ། །མཚན་མ་མེད་པའི་ཆོས་རྣམས་བཤད། །ཆོས་ཀྱི་དབྱིངས་ཀྱི་ཡེ་ཤེས་སོ། །ལོངས་སྤྱོད་རྫོགས་སྐུ་མཚན་དང་དཔེ་བྱད་ཀྱིས། །སེང་གེ་གླང་ཆེན་ཁྲི་སྟེང་ནས། །དུས་གསུམ་སངས་རྒྱས་ཐམས་ཅད་ལ། །
ཡོད་དང་མེད་པའི་ཆོས་ཀྱང་བསྟན། །མེ་ལོང་ལྟ་བུའི་ཡེ་ཤེས་སོ། །སྤྲུལ་པ་འགྲོ་དོན་བྱེད་པའི་སྐུས། །འཇིག་རྟེན་ཕལ་པའི་ས་རྣམས་སུ། །དངོས་པོ་མཚན་མའི་ཆོས་བསྟན་པས། །བྱ་བ་ནན་ཏན་ཡེ་ཤེས་སོ། །དབང་ཆེན་བསྡུས་པའི་ཏནྟྲ་ལས། སྐུ་གསུང་ཐུགས་ཀྱི་ཆེ་བ་བསྟན་པའི་ལེའུ་སྟེ་དྲུག་པའོ།། །།དེ་ནས་ཡང་བཅོམ་ལྡན་འདས་ཀྱིས་གསང་བའི་བདག་པོ་ལ་བཀའ་བསྒོས་པ། གསང་བའི་བདག་པོ་རྡོ་རྗེ་འཆང་། །དབྱིངས་ལས་ཐབས་མཆོག་སྤྲུལ་པའི་ཕྱིར། །ཚར་གསུམ་ཅན་གྱི་རྔེའུ་ཆུང་གིས། །ལྕང་ལོ་ཅན་གྱི་ཕོ་བྲང་བཅོམ། །སྣང་མཛད་ཆེན་པོ་ཨ་ལ་ལ། །གནོད་སྦྱིན་ཆེན་པོ་ཨ་ལ་ལ། །ཆོས་ཀྱི་དབྱིངས་ཉིད་ཨ་ལ་ལ། །སངས་རྒྱས་བདེན་ཚིག་ཨ་ལ་ལ། །ཚར་གསུམ་ཅན་གྱི་རྔེའུ་ཆུང་གིས། །འཇིག་རྟེན་ཕལ་པའི་སར་བརྡུངས་པས། །མཚན་མ་དངོས་པོའི་ཆོས་རྣམས་ལས། །ཡོད་མེད་ཆོས་ལ་སྤྱོད་པར་ཤོག །ཚར་གསུམ་ཅན་གྱི་རྔེའུ་ཆུང་གིས། །འོག་མིན་གནས་ཀྱི་སར་བརྡུངས་པས། །ཡོད་མེད་ཆོས་ལ་སྤྱོད་པ་རྣམས། །རང་བཞིན་མེད་པའི་དོན་རྟོགས་ཤོག །དེ་སྐད་ཅེས་གསུངས་པས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དེ་ལྟར་མ་གྱུར་པ་གཅིག་ཀྱང་མེད་དོ། །དེའི་ཚེ་གསང་བའི་བདག་པོ་ལག་ན་རྡོ་རྗེས་གསོལ་པ། སྣང་བ་ཀུན་རྫོབ་ཚུལ་གནས་པས། །རྔ་ཡི་དོན་གཞུང་གང་ལགས་པ། །བཅོམ་ལྡན་འདས་ཀྱིས་བཤད་དུ་གསོལ། །ཞུས་པའི་ལན་འདི་གསུངས་པ་ལ། །དང་པོ་རྒྱུ་དང་རང་བཞིན་དང་། །དོན་དང་བསྒོམ་པ་གྲངས་དང་ནི། །བསྙེན་པར་བྱ་དང་ཐབས་ལ་སོགས། །རྒྱུ་ནི་ཕྱི་ནང་གསང་བ་གསུམ། །བྷ་ག་ཡངས་པའི་སྡོང་པོ་དང་། །བྷནྡ་ལྟག་སྤྲོད་རྔ་ཤིང་དང་། །ཙནྡན་དཀར་པོའི་ཤིང་སོགས་ལའོ། །ལྕག་དང་སྐད་དང་རྔའི་རང་བཞིན། །དབྱིངས་དང་ཡེ་ཤེས་རིག་པའི་སྒྲ། །རང་བཞིན་དོན་དུ་ཤེས་པར་བྱོས། །དོན་ལ་རྣམ་པ་གཉིས་ཡོད་དེ། །མཐའ་གཉིས་སྤངས་པ་ཟི་ལྡན་པའི། །བྷ་ག་མི་གནས་ཡེ་ཤེས་ཡིན། །བལྟ་བར་བསྒོམ་དང་ལྷ་ཡི་སྐུ། །སྤྲུལ་པར་བསྒོམ་པ་བསྒོམ་པའི་དོན། །སྒྲུབ་པ་ལས་ཀྱི་རྔ་དང་གསང་བ་ཡུམ་གྱི་རྔ། །རོལ་མོ་
དབྱངས་ཀྱི་རྔ་སྟེ་གྲངས་ཡིན་ནོ། །བསྙེན་པ་དང་ནི་ཉེ་བསྙེན་དང་། །བསྒྲུབས་པའི་འབྲས་བུ་བསྙེན་པའི་ཐབས། །འདི་ནི་རྡུང་བའི་ཐབས་ཡིན་ནོ། །དཔལ་ཆེན་རྔ་ཡི་རྡུང་ཐབས་ནི། །རྡོ་རྗེ་ནམ་གྱི་ཆ་ཕྱེད་ན། །དཀྱིལ་འཁོར་སྟེང་དུ་བདག་འདུག་སྟེ། །སེང་གེའི་ཕྱག་རྒྱ་བཅས་ནས་ཀྱང་། །མཚན་མ་ཆེན་པོ་དེ་ལ་གདབ། །མདུན་དུ་བྷནྡ་སྲུབས་མེད་བཞག །སྟེང་དུ་རྔ་གཞག་ལྕག་གིས་བརྡུང་། །འོན་ཏང་དངོས་གྲུབ་མོད་ལ་ཐོབ། །དེ་ནས་རྡུང་བའི་ཐབས་མཆོག་ནི། །རྔ་ནི་གར་གྱི་དབང་ཕྱུག་སྟེ། །རྔ་ལྕག་གཟི་ལྡན་པདྨ་ཅན། །རྔ་སྐད་རྡོ་རྗེ་གཤོག་པ་མོ། །གཟི་ལྡན་པདྨར་གྱུར་ནས་ཀྱང་། །མི་བརྡུང་མི་བསྐྱོད་དབྱིངས་སུ་བཞག །དུར་ཁྲོད་མ་མོའི་རྡུང་ཐབས་ནི། །རྔ་ནི་ཐབས་ཀྱི་རང་བཞིན་ལ། །ལྕག་ནི་ཤེས་རབ་ཡུམ་གྱི་ངང་། །ཡབ་ཡུམ་འདྲེལ་བའི་གར་ཐབས་ཀྱིས། །རྔ་སྐད་ཟབ་མོའི་དབྱངས་བླངས་པས། །ཐུགས་དམ་མ་ལུས་ཡོངས་སུ་བསྐང་། །ནམ་ཚོད་སྐྱ་རེངས་དང་པོ་ལ། །དཀྱིལ་འཁོར་སྟེང་དུ་བདག་འདུག་ལ། །གཡས་ཀྱི་མཐེ་བོང་མཐེའུ་སྦྱར། །ཁ་ཊྭཱཾ་ཕྱག་རྒྱ་བཅས་ནས་ཀྱང་། །སྲིན་ལག་ཁ་ལ་རྔ་བསར་ཏེ། །ཉི་མ་ཤར་གྱི་བར་དུ་ནི། །རྔ་སྐད་མི་གྲག་དལ་བུར་བརྡུང་། །མ་མོ་རྣམས་ནི་བྲན་བཞིན་འཁོལ། །རྦོད་གཏོང་ཕོ་ཉའི་རྡུང་ཐབས་ནི། །མཆོག་ཆེན་བརྐོས་པའི་རྩིབ་རུས་ལ། །མཆོག་ཆེན་ཉིད་ཀྱི་པགས་ཀྱིས་གཡོགས། །མཆོག་ཆེན་ཕུར་པས་ལན་དགུ་དྲག་ཏུ་བརྡུང་། །ཉི་ཚོད་གྲིབ་སོ་ཕྲིལ་ལི་ལི། །དུས་ཀྱི་ཉུ་ལོ་ཤ་ར་ར། །ཕོ་ཉ་ལས་བྱེད་ཁྲིགས་སེ་ཁྲིག །གཡས་ཀྱིས་རྔ་ལྕག་བཟུང་ནས་སུ། །གྲུལ་བུམ་སྐད་ལྟར་ཀུ་ཅོ་འདོན། །ཐེངས་དགུ་དྲག་ཏུ་བརྡུངས་ནས་ནི། །ལས་བདག་མ་ལུས་འདུར་གམ་ཆད། །ཕྲ་མེན་ཀེའུ་རི་ཚོགས་པའི་རྡུང་ཐབས་ནི། །ལས་ཀྱི་གཞུག་གུ་ཟུང་ནི་ལྟག་སྤྲོད་ལ། །ཅ་ར་ཤེལ་སྒོང་ཤུན་གྱིས་གཡོགས་ནས་ཀྱང་། །བཅུ་དྲུག་ཕྱག་རྒྱ་རོལ་པ་ཡིས། །ཁམས་གསུམ་སྲིད་གསུམ་དབང་དུ་བསྡུས། །ཚངས་པའི་ཐེའུ་བྲང་དམྱལ་ཐག་གཅོད། །རྔ་ནི་ཐབས་ཀྱི་རང་བཞིན་ལ། །ལྕག་ནི་ཤེས་རབ་ཡུམ་གྱི་ཚུལ། །
རྔ་སྐད་བྱང་ཆུབ་སེམས་ཀྱི་ངང་། །དཔལ་གྱི་རྔ་སྐད་ཐེངས་གཅིག་གིས། །དཔལ་ཆེན་ཡབ་ཡུམ་ཐུགས་དམ་བསྐུལ། །དཔལ་གྱི་རྔ་སྐད་ཐེངས་གཉིས་ཀྱིས། །མ་མོ་མཁའ་འགྲོའི་རེ་བ་སྐོང་། །དཔལ་གྱི་རྔ་སྐད་ཐེངས་གསུམ་གྱིས། །དབང་ཕྱུག་ཆེན་པོ་དབང་དུ་སྡུད། །ཚངས་པའི་རི་ལ་རྔ་བརྡུངས་པས། །གཟུགས་ཁམས་ལྷ་ཚོགས་དབང་དུ་སྡུད། །ལྔ་ཡིས་རི་རབ་རྩེ་མོ་ལ། །ལྷ་ཡི་དབང་པོ་བརྒྱ་བྱིན་ཡང་། །ལོངས་སྤྱོད་ལྔ་དང་ལྡན་པར་འགྱུར། །དྲུག་གིས་འཇིག་རྟེན་ཁམས་སུ་སྒྲ་བསྒྲགས་པས། །མི་ཡི་གནས་སུ་ཐིམ་པར་འགྱུར། །ཐུགས་རྗེ་ཐབས་ཀྱི་རོལ་པ་མཛད། །ཕྱོགས་སྐྱོང་ཟིལ་གྱིས་མནན་པའི་རྡུང་ཐབས་དང་། །དངོས་གྲུབ་ཉེ་བར་ལེན་པའི་རྡུང་ཐབས་ནི། །གྲི་ན་མགྲིན་སྔོན་ཅན་དུ་དྲེགས་ནས་ནི། །མགྲིན་སྔོན་ཉིད་ཀྱི་པགས་ཀྱིས་གཡོགས་ནས་ཀྱང་། །ཞིང་གི་གཟར་བུས་ལན་གསུམ་དྲག་ཏུ་བརྡུངས་ནས་ནི། ཉི་མ་ཤར་གྱི་ཟེར་ཀ་ལ། །དཀྱིལ་འཁོར་སྟེང་དུ་བདག་འདུག་ལ། །གཡོན་གྱི་མཐེ་བོང་གནམ་དུ་བསྒྲེང་། །རྔ་སྐད་གྲངས་སུ་བཅད་པ་ནི། །དྲུག་ཅུ་རྩ་གཉིས་དྲག་ཏུ་བརྡུང་། །མ་མོ་བཅུ་དྲུག་དངོས་གྲུབ་འཐོབ། །ཅེས་གསུངས་སོ། །དབང་ཆེན་བསྡུས་པའི་ཏནྟྲ་ལས། འོག་མིན་དང་། ལྕང་ལོ་ཅན། རི་རབ་རྩེ་མོ། འཇིག་རྟེན་ཕལ་པའི་གནས་རྣམས་སུ་ཚར་གསུམ་པོའི་རྔ་བརྡུང་བའི་ལེའུ་སྟེ་བདུན་པའོ།། །།དེ་ནས་བཅོམ་ལྡན་པདྨ་གར་དབང་གིས། ཕྱོགས་བཅུའི་འཇིག་རྟེན་ཐམས་ཅད་གཞལ་ཡས་ཁང་དུ་བྱིན་གྱིས་བརླབ་པ་དང་། ཕྱི་རབས་ཀྱི་རྣལ་འབྱོར་པའི་བར་གཅོད་དུ་འགྱུར་བའི་བསྒྲལ་བའི་ཞིང་བཅུ་ཞེ་གཅོད་པའི་ཕྱིར་བཀའ་སྩལ་པ། གསང་བའི་བདག་པོ་ལ་སོགས་པའི། །རོལ་པའི་འཁོར་ཚོགས་ཐམས་ཅད་ཉོན། །དཔེར་ན་དམ་ཚིག་མཆོག་རབ་ནི། །སྨད་པར་བྱ་བ་མ་ཡིན་ཏེ། །གཙོ་བོ་རབ་ཏུ་སྡུག་པ་ལ། །དྲང་དུ་སྨྲ་བ་གང་བྱེད་པ། །བསྒྲགས་པའི་ཚིག་གིས་བརྒྱན་ནས་སུ། །སྲི་ཞུ་སེམས་ཀྱི་གདུང་བ་ལ། །
ཡེ་ཤེས་ཚོགས་ཀྱིས་རབ་བསྐོར་བ། །མཉམ་པའི་དབྱིངས་ཉིད་ཡེ་ཤེས་ཏེ། །གཉིས་ཀ་ངེས་པར་མཉམ་པ་ནི། །སྟོང་གསུམ་དབང་པོར་གདོན་མི་ཟ། །འཇིག་རྟེན་ཁམས་ན་རྒྱལ་པོ་བཞིན། །དུས་གསུམ་ཀུན་གྱི་གནས་དང་རྟེན། །དེས་ན་རང་གི་གནས་ཁང་དུ། །རང་གི་དྲི་ཆེན་མཎྜལ་བྱ། །རང་གི་གུར་གུམ་ཆག་ཆག་གདབ། །སྤོས་དང་དུ་རུ་ཨ་ག་རུ། །ལི་ཤི་དང་ནི་ག་པུར་དང་། །ཛ་ཏི་ཕ་ལ་མཆོག་ཏུ་བསྔགས། །མེ་ཏོག་ཕྲེང་བས་ཀུན་ཏུ་བརྒྱན། །དེ་ལྟ་བུ་ཡི་གནས་མཆོག་ཏུ། །གཞན་ཞིག་ངེས་པར་བསྒྲལ་ན་ནི། །རྡོ་རྗེ་སྲིན་པོའི་ཏིང་འཛིན་བསྒོམ། །རཀྴའི་མིག་གིས་བལྟ་བར་བྱ། །ཁ་ནས་སྔགས་ཀྱི་ཚིག་ཟློས་ཤིང་། །ཕ་རོལ་རྣམ་ཤེས་ཧཱུཾ་གིས་དྲང་། །སྙིང་གར་མངོན་སུམ་དམིགས་བྱས་ན། །ཕ་རོལ་མངོན་སུམ་འཆི་བར་འགྱུར། །མགོ་དང་སྙིང་དང་རྐང་ལག་དག །ཡ་མཱན་ཏ་ཀའི་འཁོར་ལ་དབུལ། །གཞན་ཡང་ལྷག་མ་ཅི་ཡོད་པ། །ཧེ་རུ་ཀ་ལ་ཡོན་དུ་དབུལ། །གནས་ལུང་འཕྲུལ་གྱི་དགོངས་པའོ། །དེ་ལྟ་བུ་ཡི་དུས་དག་ཏུ། །ལག་ཆ་ཕུར་པ་མཆོག་ཡིན་ཏེ། །ཞི་བའི་སོར་ནི་བདུན་པར་བྱ། །རྒྱས་པའི་སོར་བརྒྱད་ཟུར་ཡང་བརྒྱད། །དབང་ལ་ཟླ་གམ་ངེས་པར་བཟང་། །དྲག་པོ་སོར་དྲུག་ཟུར་གསུམ་པའོ། །ཀུན་གྱི་རྩེ་མོར་ཧཱུཾ་གཞག་སྟེ། །དངོས་སུ་ཧ་ཧ་རུ་ལུ་བསྒོམ། །རྒྱ་མདུད་ཐོག་ཏུ་ཨཱོཾ་བསམ་མོ། །དེ་ལྟ་བུ་ཡི་དུས་དག་ཏུ། །ཕོ་ཉ་འོད་ཟེར་དུད་ཀ་སྤྲོ། །ཤར་གྱི་ཕྱོགས་སུ་མངག་པ་ནི། །མགོ་དགུ་པ་ལ་རྐང་གཅིག་པོ། །ལུས་ནག་པོ་ལ་འོད་ཕུང་གནག །རལ་པ་གནག་ཅིང་མཆེ་བ་གནག །མིག་ཀྱང་གནག་ཅིང་ལག་པ་གནག །མགྱོགས་ནི་རླུང་གིས་ཕྱོགས་སུ་བསྐྱད་དུ་མེད། །འདི་དག་དཔལ་གྱི་ཕོ་ཉ་སྟེ། །ཞུམ་པ་མེད་ཅིང་སྟོབས་ཆེན་འཇོམས། །གཡས་པ་གསུམ་ནི་སྟ་རེ་ཕྱར། །གཡོན་པ་གསུམ་ནི་ལྕགས་ཀྱུ་འཛིན། །ཡན་ལག་སྦྲུལ་ནག་མཆོག་གིས་བརྒྱན། །གཡོན་གྱི་ལྕགས་ཀྱུས་སྙིང་ནས་དྲངས། །གཡས་ཀྱི་སྟ་རེས་ངེས་པར་བཅོམ། །འདི་ནི་སྒོ་སྲུང་མཆོག་ཡིན་ཏེ། །ཕོ་ཉ་རྒྱུན་དུ་མངག་པར་བྱ། །བགེགས་རྣམས་ངེས་པར་ཕུང་བར་བྱེད། །རྐང་གཅིག་དེ་ཡི་ཕོ་ཉ་ནི། །ཁ་དོག་འབར་བ་ཅི་འདྲ་ན། །གཅིག་ལ་གཅིག་ནི་རབ་ཏུ་
འཁྲིལ། །ཡང་ན་ལག་པ་སྦྲེལ་ཏེ་འགྲོ། །མིག་ཀྱང་མེད་ཅིང་ཅང་མི་སྨྲ། །ལོང་བ་ཀུན་གྱི་མཆོག་ཡིན་ཏེ། །རྟ་བབས་ཀུན་གྱི་སྒོར་བསྒོམས་ཏེ། །ལན་འགའ་དྲག་ཏུ་མངག་པའི་ཚེ། །གཉིས་ཀ་སོང་ནས་དེར་ཕྱིན་ནས། །གང་ལ་དམིགས་པ་ལེན་པར་བྱེད། །སུས་ཀྱང་བཟློག་པར་མི་ནུས་སོ། །ལྷོ་ཡི་ཕྱོགས་ནས་དགྱེ་བ་ནི། །མགོ་བརྒྱད་པོ་ལ་ལག་བརྒྱད་པོ། །རྐང་པ་བརྒྱད་ལ་མིག་ཀྱང་མེད། །གཡས་པ་བཞི་ནི་རྡོ་རྗེ་འཛིན། །གཡོན་པ་བཞི་ནི་ཕུར་པ་འཛིན། །ཧ་ཧ་རུ་ལུའི་སྒྲ་སྒྲོགས་ཤིང་། །གཤིན་རྗེའི་གནས་རྣམས་ངེས་པར་འཇོམས། །མགོ་བརྒྱད་དེ་ཡི་ཕོ་ཉ་ནི། །ཧཱུཾ་དང་ཕཊ་ཀྱི་སྒྲ་སྒྲོགས་ཤིང་། །བསྐལ་པའི་འབྲུག་སྒྲ་ཆེན་པོ་བཞིན། །ཀུན་ཀྱང་མགྱོགས་པ་རླུང་དང་མཚུངས། །ཧ་ཧ་རུ་ལུའི་སྒྲ་སྒྲོགས་ཤིང་། །གང་ལ་དམིགས་པ་ལེན་པར་བྱེད། །ནུབ་ཀྱི་ཕྱོགས་ནས་དགྱེ་བ་ནི། །མགོ་དྲུག་ལག་དྲུག་རྐང་དྲུག་པོ། །གཡས་པ་གསུམ་ནི་ཕུར་པ་འདྲིལ། །གཡོན་པ་གསུམ་ནི་གཏོར་མ་གཏོང་། །མགྱོགས་ནི་རླུང་གི་ཤུགས་དང་འདྲ། །འདི་ནི་དཔལ་གྱི་ཕོ་ཉ་ཡིན། །ཧ་ཧ་རུ་ལུའི་སྒྲ་སྒྲོགས་ཤིང་། །རང་གི་རླུང་ཕྱོགས་སོང་བའི་ཚེ། །ཁྲོ་བོ་ཀུན་ཀྱང་ངེས་པར་འཆི། །རྐང་དྲུག་དེ་ཡི་ཕོ་ཉ་ནི། །ལྕགས་ཀྱི་སྤྱང་མོ་རྐང་གསུམ་མ། །གང་ནས་གང་དུ་འགྲོ་བའི་ཚེ། །གཟུགས་ལ་རྡོག་པས་བརྡེག་ཅིང་འགྲོ། །རང་གི་རྐང་པ་ཕུར་པ་ཡིན། །ལྕགས་ཀྱི་ཕུར་པ་རབ་ཏུ་དྲག །འོད་ཟེར་དུད་ཀས་རེག་པས་ནི། །ཚངས་པའི་གནས་ཀྱང་འཇིགས་བྱེད་ན། །གཟུགས་ཅན་དགྲ་བོར་སྨོས་ཅི་དགོས། །བྱང་གི་ཕྱོགས་ནས་དགྱེ་བ་ནི། །མགོ་གསུམ་ལག་དྲུག་རྐང་གསུམ་པོ། །ལག་པ་དྲུག་ནི་རྒྱུད་དྲུག་འཇོམས། །མི་ཤ་ཟ་ཞིང་བདུད་རྣམས་སྒྲོལ། །གནོད་སྦྱིན་གནས་རྣམས་ངེས་པར་འཇོམས། །རྐང་གསུམ་དེ་ཡི་ཕོ་ཉ་ནི། །བྱང་གི་ཕྱོགས་ནས་རྒྱུག་པ་མོ། །ལྕགས་ཀྱི་ཁྱི་སྟེ་རྐང་གསུམ་ལ། །ལྕགས་ཀྱི་ལུས་ལ་ཉི་མའི་མིག །སྤུ་ནི་ལྕགས་ཀྱུ་བསྒྲིལ་བ་བཞིན། །བང་ནི་གློག་གིས་བསྐྱད་དུ་མེད། །སྐད་ནི་གནམ་གྱི་འབྲུག་པས་ཆེ། །རབ་ཏུ་མི་བསྲུན་འདི་དག་ནི། །ཕྱག་ན་རྡོ་རྗེའི་མཐུ་ཡང་འཕྲོག །རྐང་གཅིག་གྱེན་དུ་བསྒྲེངས་
པས་ནི། །ཡ་བདུད་རྒྱལ་པོའི་སྙིང་ནས་འདྲེན། །རྐང་གཅིག་མཐུར་དུ་ཕྱུང་བས་ནི། །མ་བདུད་ཆེན་པོའི་སྙིང་ནས་འདྲེན། །རྐང་གཅིག་ཐད་ཀར་ཕྱུང་བས་ནི། །དགྲ་བོ་མ་ལུས་སྙིང་ལས་འདྲེན། །འབྱུང་པོ་མ་ལུས་དམྱལ་ཐག་གཅོད། །སྐུ་ནི་ལྕགས་ཐག་བསྒྲིལ་བ་འདྲ། །ཚེམས་ནི་སྤུ་གྲི་གཤིབས་པ་འདྲ། །མཱཾ་ས་ཟ་ཞིང་རི་ལུང་རྒྱུག །འཇིག་རྟེན་ཁམས་ཀུན་ཟ་བ་པོ། །གནོད་སྦྱིན་ཀུན་གྱི་སྟེང་ན་རྒྱུག །གློ་སྙིང་ནང་རོལ་འབྱིན་ཅིང་ཟ། །བར་སྣང་ཁམས་སུ་ཁྲོས་པའི་ཚེ། །ཉི་ཟླ་དག་ཀྱང་ཐང་ལ་རློག །གཟའ་སྐར་ཀུན་ཀྱང་དུམ་བུ་གཅོད། །ཤིན་ཏུ་ཁྲོ་ནས་རྦད་པའི་ཚེ། །བདུད་ཀྱི་སྙིང་ཁྲག་དྲོན་མོ་འཐུང་། །བར་སྣང་ཁམས་ནས་གནོད་བྱེད་ཀུན། །རྡུལ་ཆ་ཙམ་ཡང་ མེད་པར་མཛོད། །ཀུ་ཀུ་ར་ཙ་ཁ་ལང་ཁཱ་ཧི། ཞེས་བརྗོད་ཅིང་རྦད་དོ། །དབང་ཆེན་བསྡུས་པའི་ཏནྟྲ་ལས། གནས་བསྟན་པ་དང་། ཕུར་བུས་གདབ་པ་དང་། སྒོ་བཞིའི་ཕོ་ཉ་མངགས་པའི་ལེའུ་སྟེ་བརྒྱད་པའོ།། །།དེ་ནས་འདི་རྣམས་བསྟན་པའི་ཕྱིར། །དབང་ཆེན་ཉིད་ཀྱིས་བཀའ་སྩལ་པ། །བསྒྲུབ་པའི་ཆོ་ག་རྫོགས་པའི་ཚེ། །བར་སྣང་རྡོ་རྗེ་སེམས་དཔའ་ཡིས། །ཆ་ལུགས་ཅི་འདྲ་འཁོར་དང་བཅས། །སེམས་ཀྱིས་མཉམ་པར་དགོད་པར་བྱ། །བདག་ཕྲ་མེན་མ་ཡི་འཁོར་མང་པོ་དང་། གནོད་སྦྱིན་གྱི་འཁོར་མང་པོ་དང་རོལ་པར་འདོད་ན། བདག་དབང་ཆེན་གྱི་ཏིང་ངེ་འཛིན་དུ་ཞུགས་ཏེ། སྐུ་མདོག་དཀར་པོར་བསྒྱུར་ཏེ་ཀླུ་དང་བྲོས་བསྟེན་པར་བྱའོ། །བདག་འཁོར་མང་པོ་དང་མཉམ་པར་འདུག་པའི་དུས་ན་སྐུ་མདོག་དམར་པོར་བསྒྱུར་ཏེ། ལམ་དུ་ཞུགས་ནས་འགྲོ་བའི་དུས་ན། སྐུ་མདོག་ལྗང་གུར་བསྒྱུར་ཏེ་ཧེ་ཧེ་ཞེས་བྱ་སྟེ་དགོད་ཅིང་འགྲོའོ། །གང་དུ་ཕྱིན་པའི་གནས་སུ་ཧཱུཾ་ཞེས་བྱས་ལ་འདུག་གོ། །འོན་ཏང་མ་མོ་ཐམས་ཅད་དབང་དུ་འདུའོ། །ཉལ་བའི་ཚེ་ན་ཨ་ཞེས་བྱས་ལ་ཙོག་ཙོག་པོར་ཡུད་ཙམ་ཞིག་གནས་པར་བྱའོ། །བདག་ཉིད་གསེར་བཙོ་མའི་ཁ་དོག་བཞིན་འཚེར་བར་བསྒྱུར་ནས། ཀུན་ཏུ་བཟང་མོ་ནམ་མཁའ་ལས་ལངས་ནས་མངོན་སུམ་དུ་འཛུམ་པ་མཛད་པ་དང་། སྙན་པར་སྨྲ་བ་དང་། འདོད་སྦྱོར་བའི་
ལོངས་སྤྱོད་ཀྱི་རྩེད་མོ་ཡང་བྱས་པར་བསམ་མོ། །དེ་ལྟར་བསམ་པའི་ཡོན་ཏན་ནི། །ས་ཡི་འོག་ཏུ་འདའ་འཕང་བས། །གནམ་གྱི་སྟེང་གི་ལྷ་བྲན་འཆི། །སྤྱོད་ལམ་འགྲུབ་པ་འདི་ལྟ་བུ། །མཚོན་ཐོགས་ཀུན་གྱི་རྒྱལ་པོ་སྟེ། །རལ་གྱི་འཛིན་པ་ཆེན་པོར་འགྱུར། །འཇམ་དཔལ་འཁོར་གྱིས་ཕྱག་བྱས་པའོ། །ཞེས་སྨྲས་སོ། །དེ་ལྟ་བུ་ཡི་དུས་དག་ཏུ། །གནོད་སྦྱིན་ཕྲ་མེན་འཁོར་རྣམས་ཀྱིས། །བདག་ལ་རབ་ཏུ་བརྩེས་གྱུར་ན། །ཕག་གི་བརྟུལ་ཞུགས་ཆེན་པོ་ཡིས། །ས་ཡི་འོག་ཏུ་མངོན་སུམ་བྱ། །ངག་གིས་ཧཱུཾ་ཞེས་བརྗོད་པར་བྱ། །མཱཾ་ས་དག་ཀྱང་མང་དུ་བཟའ། །ནམ་མཁའ་ལ་ནི་སེམས་དཔའ་བསམ། །བགྲང་ཕྲེང་ཀླད་ལ་ལན་གསུམ་བསྐོར། །དེ་ལྟར་བྱས་ན་བདག་རྒྱལ་ཞིང་། །ནད་གཏོང་མ་ནི་འཆིང་བར་འགྱུར། །དེ་ལྟ་བུ་ཡི་དུས་དག་ཏུ། །གནོད་སྦྱིན་རྣམས་ནི་འཁོལ་འདོད་ན། །དེ་ཡི་གཟུགས་ནི་ཁྲག་གིས་བྲིས། །དུར་ཁྲོད་ཆེན་པོར་སོང་ནས་ནི། །སྙིང་གར་ཕུར་པས་མནན་ནས་ནི། །དགུག་པའི་བརྟུལ་ཞུགས་ཧཱུཾ་ཞེས་བཟླས། །མ་འོངས་བར་དུ་བསྡད་ན་ནི། །ཞག་བདུན་གྱིས་ནི་ཁུག་པར་འགྱུར། །གནོད་སྦྱིན་རྣམས་ལ་ཅི་དགར་སྤྱོད། །བདག་གི་བྲན་དང་འདྲ་བར་འོང་། །ཕྲ་མེན་རྣམས་ནི་འཁོལ་འདོད་ན། །ཕྲ་མེན་གཟུགས་ནི་ཁྲག་གིས་བྲི། །ཡན་ལག་ཕུར་པས་མནན་ནས་སུ། །སྙིང་གར་རྡོག་པས་མནན་བྱས་ཏེ། །དགུག་པའི་བརྟུལ་ཞུགས་ཧཱུཾ་ཞེས་བཟླས། །ཞག་བདུན་གྱིས་ནི་ངེས་པར་འོང་། །ཕྲ་མེན་རྣམས་ནི་ཅི་དགར་འཁོལ། །ཁོང་གིས་ལན་ན་ཁོང་དག་འཆི། །བདག་གིས་ལན་ན་བདག་ཉིད་ཉམས། །གཉིས་གཙོ་ལས་ལ་འཁོལ་འདོད་ན། །དེ་ཡི་གཟུགས་ནི་ཁྲག་གིས་བྲིས། །ཕུར་བུ་སྙིང་དང་ཁ་རུ་གདབ། །དགུག་པའི་བརྟུལ་ཞུགས་ཧཱུཾ་ཞེས་བཟླས། །ཞག་བདུན་གྱིས་ནི་དབང་དུ་འདུ། །ཕྱག་ན་རྡོ་རྗེ་དགའ་བར་འགྱུར། །མི་མོ་ལས་ལ་འཁོལ་འདོད་ན། །བུད་མེད་བོངས་ཚད་ཁྲག་གིས་བྲིས། །སྙིང་གར་རྡོག་པས་མནན་ནས་ནི། །ཕུར་བུ་འདྲིལ་ཞིང་བསྒོམ་པར་བྱ། །ཞག་བདུན་གྱིས་ནི་ངེས་པར་དུ། །ཅི་བགྱི་གསུངས་ཞེས་ཟེར་ཏེ་འོང་། །དེ་ནས་བདག་གིས་སྤྱད་པར་བྱ། །བུད་མེད་རྣམས་ནི་ཅི་དགར་
འཁོལ། །བགེགས་རྣམས་ལས་ལ་འཁོལ་འདོད་ན། །སོ་སོའི་གཟུགས་དག་ཁྲག་གིས་བྲིས། །ཕུར་བུའི་རྩེ་མོར་མིང་བྲི་ཞིང་། །གོང་དུ་ཧཱུཾ་གཅིག་བཞག་ནས་ནི། །ཚོན་སྐུད་སྣ་ལྔའི་སྐུད་པས་གདགས། །ལན་གསུམ་བསྐོར་ཏེ་གདབ་བྱས་ན། །བདག་གི་དབང་དུ་འདུ་བར་འགྱུར། །ཇི་ལྟར་བསྒོ་བ་ཉན་པར་བྱེད། །འགྲོ་ཉལ་འདུག་སྡོད་ཅི་བྱེད་ཀྱང་། །འཁོར་དང་བཅས་པའི་བསྙེན་པ་འབུལ། །ནང་པར་མལ་ནས་ལངས་ནས་ཀྱང་། །ཡི་དམ་གནས་པའི་ས་ཕྱོགས་སུ། །གོམ་གསུམ་སྤགས་ནས་དྲན་པར་བྱ། །གཤང་གཅི་བྱེད་པའི་ས་དག་ཏུ། །དྲི་ཆེན་ལག་ཏུ་བླངས་ནས་ཀྱང་། །ཕྱོགས་བཅུ་ཀུན་ཏུ་ཁ་བལྟས་ཏེ། །སུས་མ་མཐོང་བར་ཁམ་གསུམ་བཟའ། །དྲི་ཆུ་ཁྱོར་བར་བླུགས་ནས་ནི། །སུས་མ་མཐོང་བར་ཧུབ་གསུམ་བཏུང་། །ཤིན་ཏུ་དབེན་པའི་ས་ཕྱོགས་སུ། །དྲི་ཆེན་མདུན་དུ་བཞག་ནས་ནི། །ཡན་ལག་བཞི་ནི་ས་ལ་གཟུག །ཕག་སྐད་ཐེངས་གསུམ་ངུར་བར་བྱེད། །རུ་ལུ་རུ་ལུ་ཚལ་པ་བཟླས། །བྱང་གི་ཕྱོགས་སུ་ཁ་བལྟས་ཏེ། །གནོད་སྦྱིན་དབང་དུ་བསྡུ་བའི་ཕྱིར། །དྲི་ཆུ་མདུན་དུ་བཞག་ནས་ནི། །ཁྱི་སྐད་ཐེངས་གསུམ་ངུས་ནས་ནི། །རུ་ལུ་རུ་ལུ་ཁ་ལོང་ཁ། །ཀུ་ཀུ་རཱ་ཙ་ཁ་ལོང་ཁཱ། །ཉིན་དང་མཚན་དུ་ཐུག་ཕྲད་དུ། །རིགས་མ་འཆོལ་བར་སྦྱོར་བ་བྱ། །སྐྱེ་བོས་མཐོང་བར་གྱུར་ན་ཉམས། །སུས་མ་མཐོང་ན་དངོས་གྲུབ་ཡིན། །བྱང་ཆུབ་སེམས་ནི་ལྕེ་ལ་བཞག །དུས་དང་རྣམ་པར་མེད་པར་ནི། །སྦྱོར་བ་ཁོ་ན་ལས་སུ་བཟང་། །སྐབས་ལ་བབ་པའི་དུས་དུས་སུ། །དུར་ཁྲོད་གནས་སུ་བྱུག་པར་བྱ། །ཞིང་དང་བྷནྡ་མང་དུ་བསགས། །རང་གི་དབེན་ས་གང་ཡིན་པར། །སྐྱེ་བོ་རྣམས་ལས་ཐག་བསྲིངས་ཏེ། །སྲོད་དང་ཐོ་རངས་ནམ་གྱི་གུང་། །དྲོས་དང་ཉི་ཕྱེད་དགོངས་ཀའི་དུས། །དབྱངས་དང་སྐད་དྲུག་ཤེས་པར་བྱ། །དུས་དྲུག་ཀུན་ཏུ་རྔེའུ་ཆུང་བརྡུང་། །སྲོད་ལ་འཁོར་གསུམ་བྲོ་བརྡུངས་ཏེ། །ནུབ་ཀྱི་ཕྱོགས་སུ་ཁ་བལྟས་ལ། །རྟ་སྐད་འཚེར་བའི་གླུ་སྐད་བླང་། །རུ་ལུའི་བསྙེན་པ་འབུམ་བཟླས་ཤིང་། །སྣུམ་ཆེན་གསུར་གྱི་སྤོས་མེ་གཏོང་། །ནམ་གྱི་གུང་ལ་མ་ཉལ་བར། །ཕྲིན་ལས་
གོང་མ་བཞིན་དུ་བྱ། །བྱང་གི་ཕྱོགས་སུ་ཁ་བལྟས་ཏེ། །གླུ་དབྱངས་ཁྱི་སྐད་ཐེངས་གསུམ་ཟུག །ཐོ་རངས་ལངས་ནས་ཕྱག་རྒྱར་གསལ། །བྱང་ཤར་མཚམས་སུ་ཁ་བལྟས་ལ། །དབྱངས་ནི་ཤིན་ཏུ་གདུང་བར་བྱེད། །དེ་ཡང་བསྙེན་པ་གོང་མ་བཞིན། །དུས་ལ་བབ་པའི་བྲོ་མཆོད་ལ། །ཕྱི་ནང་དྲག་ཏུ་མཚམས་བཅད་དོ། །རྔེའུ་ཆུང་དིར་དིར་ལན་གསུམ་བརྡུང་། །ཤ་ཁྲག་གཏོར་མ་རྒྱུན་མི་གཅད། །གླུ་བྲོ་ཤར་གྱི་ཕྱོགས་སུ་དབུལ། །ཉི་མ་ཕྱེད་ཀྱི་དུས་སུ་ནི། །ལྷོ་ཡི་ཕྱོགས་སུ་ཁ་བལྟས་ཏེ། །གྲུལ་བུམ་སྐད་དུ་ཀུ་ཅོ་བྱས། །ཕྲིན་ལས་དགོངས་པ་གོང་མ་བཞིན། །དགོངས་མཆོད་དུས་ལ་བབ་པའི་ཚེ། །གྲིབ་སོ་བཟློག་པའི་ཆོ་ག་བྱ། །ཧ་ཅང་སྐད་ནི་མི་ཆེ་བར། །དེར་ཡང་རྔེའུ་ཆུང་དིར་དིར་བརྡུང་། །དབྱངས་ནི་ཡིད་ཙམ་གདུང་བར་བླང་། །དེར་ཡང་དུས་དྲུག་ཀུན་ཏུ་ཡང་། །གསང་བའི་མཆོད་པ་རྒྱུན་མི་གཅད། །མི་ཡི་བུ་མོ་བསྟེན་པར་བྱ། །ལན་འགའ་དེ་དང་མ་ལྡན་ན། །ཀུ་ཀུ་ར་དང་ར་ལ་སོགས། །བ་དང་བུད་མེད་གང་ཡང་རུང་། །ཤིན་ཏུ་དཀོན་ནས་མེད་པའི་ཚེ། །བྱེས་དང་འགྲོན་པོ་བྱེད་པ་ན། །ལུས་ལས་སྤྲུལ་པའི་ལྷ་མོ་ཡིས། །སྦྱོར་བའི་དམ་ཚིག་མི་གཅག་གོ། །དེ་ལྟར་བྱས་ན་དངོས་གྲུབ་ཐོབ། །རྒྱུན་དང་རྒྱུན་མེད་རྟག་པར་ནི། །སྨན་ནི་ལུས་ལ་བསྲེལ་བར་བྱ། །དབང་ཆེན་བསྡུས་པའི་ཏནྟྲ་ལས། ཕྲིན་ལས་མཐར་ཕྱིན་ཐམས་ཅད་དབང་དུ་བསྡུ་བའི་ལེའུ་སྟེ་དགུ་པའོ།། །།ཚངས་པའི་གཞལ་ཡས་ཁང་བསྟན་པ། །ཉན་ཐོས་མདོ་སྡེ་ཀྲི་ཡ་དང་། །ཐེག་པ་ཆེན་པོ་ཡོ་ག་དང་། །གསང་བ་ཡི་ནི་ཐེག་པ་གསུམ། །གཞུང་དང་མཐུན་པའི་གཞལ་ཡས་ཁང་། །སྲིན་པོ་རཀྴ་ཡ་བསྒྲལ། །དེ་ཡི་ཁོག་སྦུབས་སྐྱེ་མཆེད་ལས། །གཞལ་ཡས་ཁང་གི་རྒྱུ་ཡིན་ཏེ། །སྒོ་བཞི་རྟ་བབས་མུ་ཁྱུད་བཅས། །དྲག་པོའི་ཁྲོ་བོའི་ཁྱམས་ལ་སོགས། །ཚངས་པའི་གདུང་ཆེན་གཤག་ཏུ་གཏམས། །ཡང་ན་ཚངས་པའི་གཞལ་ཡས་ནི། །བརྒྱ་བྱིན་ལྷ་ཡི་དབང་པོ་བསྒྲལ། །ཁྱབ་འཇུག་གཏུམ་པོ་འཁོར་དང་བཅས། །
ཐེག་མཆོག་ཨ་ནུ་ཡོ་ག་ཡི། །གཞུང་ལས་བྱུང་བ་བཞིན་དུ་བསྒོམ། །ཡང་ན་ཚངས་པའི་གཞལ་ཡས་ནི། །ཐེག་རྒྱལ་ཨ་ཏི་ཡོ་གའི་གཞུང་། །ཁྱབ་དང་གནས་དང་འབྱུང་ལ་སོགས། །རྣམ་པ་གསུམ་པོ་གཞལ་ཡས་ཁང་། །སྣོད་བཅུད་འབྱུང་བའི་ཡུམ་དུ་གསལ། །ཏིང་འཛིན་གསལ་བ་སྐད་ཅིག་ལ། །བསྐྱེད་ནས་གསང་ཡུམ་བཞི་ཡི་མཁར། །བྷ་ག་དགྱེས་པའི་ནང་དུ་བསྒོམ། །དེ་ཡི་དཀྱིལ་དུ་བདག་པོ་དམིགས། །དེ་ལ་རང་བཞིན་མེད་པ་སྟེ། །ནམ་མཁའ་ལྟ་བུར་རབ་རྟོགས་ནི། །གཞལ་ཡས་ཁང་ཞེས་མཁས་པས་གསུངས། །དབང་ཆེན་བསྡུས་པའི་ཏནྟྲ་ལས། གཞལ་ཡས་ཁང་ཚངས་པའི་ལེའུ་སྟེ་བཅུ་པའོ།། །།ཚེ་ལ་དབང་ཐོབ་རིག་འཛིན་རྣལ་འབྱོར་གྱིས། །ཏིང་འཛིན་གཏན་ལ་དབབ་པའི་ཕྱིར། །དབང་ཆེན་བསྡུས་པའི་ཏནྟྲ་ལས། །བསྒོམ་ཁོག་རྩ་བའི་ལེའུ་འདི་གསུངས། །བསྒོམ་ཁོག་རྩ་བའི་ལེའུ་འདི་ལ་ཡང་ལེའུ་རྣམ་པ་བཞི་སྟེ། གང་དང་གང་ཞེ་ན། བསྒོམ་ཁོག་རྩ་བའི་ལེའུ་དང་། གསང་བ་ཚེའི་ལེའུ་དང་།སྒྲོལ་བ་ཐུགས་རྗེའི་ལེའུ་དང་། མཛད་པ་ཕྲིན་ལས་ཀྱི་ལེའུ་དང་བཞིའོ། །དང་པོར་བསྒོམ་ཁོག་རྩ་བའི་ལེའུ་འབྱུང་སྟེ། འདི་སྐད་ཅེའོ། །རྣམ་པར་མི་རྟོག་ཡེ་ཤེས་སྐྱེ་མེད་ཅིང་། །གཟུང་འཛིན་རྟོག་པའི་མཐའ་གཉིས་མ་ཆགས་དབྱིངས། །ཐམས་ཅད་སྤྲོས་བྲལ་མཉམ་ཉིད་ཇི་བཞིན་ངང་། །རྣམ་རྟོག་བརྗོད་མེད་སྨྲ་བསམ་ཡུལ་ལས་འདས། །ཨཱོཾ་མ་ཧཱ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱདྨ་ཀོ྅ཧཾ། མ་ལྟར་བྱམས་པའི་སྙིང་རྗེས་ཡོངས་ལ་ཁྱབ། །མཁའ་ལྟར་གོ་འབྱེད་ཆོ་འཕྲུལ་འབྱུང་བའི་ཡུམ། །ཀུན་ལ་ཁྱབ་པས་ཡེ་ཤེས་གསལ་བའི་ངང་། །རིན་ཆེན་གཏེར་ལྡན་ཆེ་བའི་ཁྱད་པར་སྟོན། །ཨཱོཾ་དྷརྨ་དྷཱ་ཏུ་སྭ་བྷཱ་ཝ་ཨཱདྨ་ཀོ྅ཧཾ། ཡི་གེ་ཧཱུཾ་ནི་སེམས་ཀྱི་རང་བཞིན་ཏེ། །ཆགས་པའི་སྐྱོན་བྲལ་རིན་ཆེན་སྣ་ལྔའི་མདོག །འབྱུང་བ་ལྔ་དང་ཡུམ་ལྔ་ཡེ་ཤེས་ལྔ། །གདུལ་བྱའི་ཕྲིན་ལས་རྣམ་པ་ལྔ་རུ་སྦྱོར། །བཛྲ་ཙིཏྟ་ཧཱུཾ། ཞབས་བསྐྱེད་མཐིང་གའི་སྤྲོ་བསྡུས་ལས། །གསལ་བའི་གོ་འབྱེད་ནམ་མཁར་འགྱུར། །དུས་གསུམ་འགྱུར་བ་མེད་པས་ཀུན་ཏུ་བཟང་། །
གཏོས་ནི་འབྱུང་བ་ཀུན་ལ་ཁྱབ། །རྣ་རུ་ལྗང་གུའི་སྤྲོ་བསྡུ་ལས། །རྒྱ་གྲམ་རླུང་གི་དཀྱིལ་འཁོར་ཤར་བར་གསལ། །ཐམས་ཅད་སྐྱོད་བྱེད་ཡུམ་ཆེན་དམ་ཚིག་སྒྲོལ། །གཏོས་ནི་ནམ་མཁའི་མཐའ་དང་མཉམ། །མ་ཉིད་དམར་པོའི་འཕྲོ་འདུ་ལས། །རཀྟ་ཁྲག་གི་རྒྱ་མཚོ་འཁྱིལ། །ཐམས་ཅད་བསྐྱེད་པའི་ཡུམ་ཆེན་མཱ་མ་ཀི། །གཏོས་ནི་ནམ་མཁའི་མཐའ་དང་མཉམ། །ཐིག་ལེ་སྔོ་སྐྱའི་འཕྲོ་འདུ་ལས། །ཀེང་རུས་ཆེན་པོའི་རི་རབ་སྟེ། །ཐམས་ཅད་རྟེན་པའི་ཡུམ་ཆེན་སངས་རྒྱས་སྤྱན། །གཏོས་ནི་ནམ་མཁའི་མཐའ་དང་མཉམ། །ཧ་ཉིད་སེར་པོའི་འཕྲོ་འདུ་ལས། །བསྐལ་པའི་མེ་དཔུང་ཆེན་པོར་འབར། །འབྱུང་བ་དྲོད་སྙོམས་ཡུམ་ཆེན་ན་བཟའ་དཀར། །གཏོས་ནི་ནམ་མཁའི་མཐའ་དང་མཉམ། །ཧཱུཾ་མཛད་ཧཱུཾ་གི་བྱིན་རླབས་བསམ་མི་ཁྱབ། །འབྱུང་ལྔར་སྤྲོས་པས་ཡུམ་ལྔའི་དཀྱིལ་འཁོར་གསལ། །དབང་ཆེན་ཡུམ་དུ་བརྩེགས་པའི་བྱིན་རླབས་ཀྱིས། །ཡི་གེ་ཧཱུཾ་ཡང་ནམ་མཁའི་དབྱིངས་ན་གསལ། །ཡི་གེ་ཧཱུཾ་གི་བྱིན་རླབས་ཀྱིས། །དབང་ཆེན་ཡུམ་ལྔའི་མཁའ་དཀྱིལ་དུ། །གཟུགས་ཁམས་དབང་དུ་བསྡུ་བའི་ཕྱིར། །ལྷ་ཆེན་བརྒྱད་ནི་རྨང་དུ་བཏིང་། །འདོད་ཁམས་དབང་དུ་བསྡུ་བའི་ཕྱིར། །ཕྱོགས་སྐྱོང་བཅུ་ནི་རྩིག་པར་བརྩིགས། །སྐུ་བཞི་དཔལ་བརྒྱད་ཚང་བའི་ཕྱིར། །རྒྱལ་ཆེན་བཞི་ནི་ཀ་བར་བཙུག །གཏི་མུག་ལ་སོགས་ཡེ་ཤེས་བསྐྱེད་པའི་ཕྱིར། །ཀླུ་ཆེན་བརྒྱད་ནི་གདུང་དུ་དྲེས། །གཞལ་ཡས་མ་བསྒྲིབས་ཡོངས་སུ་གསལ་བའི་ཕྱིར། །གཟའ་ཆེན་བརྒྱད་ནི་གདན་དུ་བོར། །དུས་བཞི་འགྱུར་ལྡོག་མེད་པར་བྱ་བའི་ཕྱིར། །རྒྱུ་སྐར་རྣམས་ནི་ཕྱོགས་ནས་མིག་ཚགས་བྱས། །རྒྱལ་མཚན་བཞི་དང་བླ་རེར་བཅས། །ཉ་སྦྲུལ་མཆོག་ཕྲན་ཟ་ར་ཚགས། །བདེ་གཤེགས་གཞལ་ཡས་ཁང་གི་རང་བཞིན་ནོ། །ཨཱོཾ་དྷི་བ་ཀ་པཱ་ལ་བྷྲཱུཾ། དྷི་བ་ཀ་པཱ་ལ་བྷྲཱུཾ། དྷི་བ་ཀ་པཱ་ལ་བྷྲཱུཾ། ཨཱོཾ་རཀྴ་ཀ་པཱ་ལ་བྷྲཱུཾ། རཀྴ་ཀ་པཱ་ལ་བྷྲཱུཾ། རཀྴ་ཀ་པཱ་ལ་བྷྲཱུཾ། ཨཱོཾ་རཱ་ཛ་ཀ་པཱ་ལ་བྷྲཱུཾ། རཱ་ཛ་ཀ་པཱ་ལ་བྷྲཱུཾ། རཱ་ཛ་ཀ་པཱ་ལ་བྷྲཱུཾ། ནཱ་ག་ཀ་པཱ་ལ་བྷྲཱུཾ། ནཱ་ག་ཀ་པཱ་ལ་བྷྲཱུཾ། ནཱ་ག་ཀ་པཱ་ལ་བྷྲཱུཾ། སཱུརྻ་ཀ་པཱ་ལ་
བྷྲཱུཾ། སཱུརྻ་ཀ་པཱ་ལ་བྷྲཱུཾ། སཱུརྻ་ཀ་པཱ་ལ་བྷྲཱུཾ། ཀྲོ་ཏ་ཀ་པཱ་ལ་བྷྲཱུཾ། ཀྲོ་ཏ་ཀ་པཱ་ལ་བྷྲཱུཾ། ཀྲོ་ཏ་ཀ་པཱ་ལ་བྷྲཱུཾ། ཧ་ཧ་རུ་ལུ་ཧཱུཾ་ཕཊ། ཧ་ཧ་རུ་ལུ་ཧཱུཾ་ཕཊ། ཧ་ཧ་རུ་ལུ་ཧཱུཾ་ཕཊ། ཛཿཧཱུཾ་བཾ་ཧོཿ། དེ་ལྟ་བུ་ཡི་དབུས་ཉིད་དུ། །དཀྱིལ་འཁོར་གྲུ་བཞི་མན་དྷ་ལ། །དབུས་ནི་ཟླ་གམ་ཨེ་ཡི་དཀྱིལ། །བཅུ་དྲུག་འཁོར་ལོའི་མཐའ་བསྐོར་ཞིང་། །ཧྲཱྀཿལས་པདྨ་ཉི་ཤུ་བཞི། །ཟུར་བཞི་རིན་ཆེན་ཁྲི་རྐང་ལ། །སྤྲིན་མེད་ཉི་མ་བདུན་གྱིས་བརྒྱན། །བར་ཁྱམས་གཉིས་དང་སྒོ་བཞིར་ལྡན། །བདེ་གཤེགས་བཞུགས་པ་གནས་ཀྱི་དབྱིབས་ཉིད་དེ། །རྡོ་རྗེའི་གཞལ་ཡས་ནམ་མཁའི་ཚད་མཉམ་པ། །ཀ་བ་ཡིད་བཞིན་བུམ་པ་བརྒྱད་དུ་བསྟན། །རིན་ཆེན་མཆོག་སྦྱིན་དབང་གི་ཡུམ་དུ་སྟོན། །ཀུན་ཏུ་རོལ་པས་ཅིར་ཡང་སྒྲོལ་བའི་དབྱིངས། །བྷ་ག་མ་དྷ་ལ་གྷུ་ཡ་སིདྡྷི་ཧཱུཾ། ཧཱུཾ། དབང་ཕྱུག་མར་བསྡུས་སིངྷ་ཛམ་བྷ་ལ། །དྲུག་གསུམ་ཟིལ་གནོན་རྣམ་དག་འཇོམས་མཛད་པའི། །མཐུ་རྩལ་ཆེ་བའི་ཁྱད་པར་ཀུན་ལས་འཕགས། །དོན་དམ་གསང་སྦས་དབང་ཕྱུག་རྒྱལ་བའི་བཀའ། །སིངྷ་ཛམ་བྷ་ལ་བི་མ་ལ་སི་ཏི་ཧཱུཾ། ཧཱུཾ། རིན་ཆེན་ཁྲི་རྐང་འབར་བའི་སྐུར་སྟོན་པ། །ཡོན་ཏན་དྲུག་སྟོང་དཔག་ཚད་འཕངས་དང་མཉམ། །སྤྲིན་མེད་ཉི་མ་བདུན་བརྩེགས་གསལ་བས་བརྒྱན། །རིགས་བཞི་ཁྲག་འཐུང་སྐུ་ཡི་ངོ་བོར་རྫོགས། །རཏྣ་ཏྲཱཾ། ཧཱུཾ། འདམ་གྱི་སྐྱོན་བྲལ་རཱ་གའི་མདོག །དྲི་ཞིམ་དབྱིབས་ལེགས་ཁ་དོག་སོ་སོར་གསལ། །ཆོས་དབྱིངས་ཆེ་བའི་ཁྱད་པར་རབ་སྟོན་ཕྱིར། །རིགས་མཆོག་བརྗིད་ལྡན་གསང་བ་ཡུམ་གྱི་མཁའ། །པདྨ་དྷ་ར་ཧྲཱྀཿ།ཧཱུཾ། འཇིག་རྟེན་འོད་ཀྱི་རྒྱལ་པོ་ཉི་ཟླའི་དཀྱིལ་འཁོར་ནི། །ཐབས་མཆོག་བརྗིད་ལྡན་འོད་ཟེར་ཕྱོགས་བཅུར་འགྱེད། །སྟོང་གསུམ་མུན་ནག་གཏིང་ནས་སེལ་མཛད་པའི། །ཡེ་ཤེས་གསལ་བའི་མེ་ལོང་མཱ་མ་ཀི། །སཱུརྻ་མ་དྷ་ལ་ཧཱུཾ། ཙནྡྲ་ཨ། ཉི་ཟླ་དེ་དཀྱིལ་གདན་སྟེངས་སུ། །ནམ་མཁའི་ཡི་གེ་ཧཱུཾ་བབ་སྟེ། །རྣམ་གསུམ་ཚུལ་གྱིས་སྐུ་ཉིད་རྫོགས། །ཕྱག་རྒྱ་ཆེན་པོ་བཞི་དང་ལྡན། །ཨཱོཾ་བཛྲ་སཏྭ་ཡ་ཏ་ཨཱདྨ་ཀོ྅ཧཾ། བཅོམ་ལྡན་དཔལ་མཆོག་རྡོ་རྗེ་སེམས་དཔའ་ནི། །སྐུ་གསུམ་
ལྷུན་གྲུབ་དབུ་གསུམ་བརྗིད་པར་ལྡན། །མཐིང་ག་དཀར་གསལ་པདྨ་རཱ་གའི་ཞལ། །རྒྱུད་དྲུག་རྩད་གཅོད་ཡེ་ཤེས་དྲུག་གི་ཕྱག །གཡས་པས་རྡོ་རྗེ་འཁོར་ལོ་པདྨ་འཛིན། །གཡོན་པས་དྲིལ་བུ་རིན་ཆེན་རལ་གྲི་འཛིན། །རྣམ་པ་ཐམས་ཅད་མཆོག་དང་རབ་ལྡན་པས། །ཐམས་ཅད་རྒྱན་གྱི་མ་ལུས་ཡོངས་སུ་རྫོགས། །སྤྱན་དྲངས་མཆོད་པ་རྫོགས་པ་དང་། །བསྒྲུབ་པའི་དོན་དུ་མཆོད་པ་འབུལ། །དབང་དང་བྱིན་རླབས་དངོས་གྲུབ་སྩོལ། །གསོལ་བྱས་དེ་གནང་ཐོབ་དམིགས་ལ། །བདག་ཉིད་ཞེ་སྡང་རྡོ་རྗེ་ལས། །རིགས་གཉིས་ལུང་གི་བརྒྱུད་པ་དང་། །འགྲོ་དྲུག་གནས་ནས་དྲང་བའི་ཕྱིར། །ཡི་གེ་ཧཱུཾ་དྲུག་ཆོ་འཕྲུལ་བསྟན། །ཁྲོ་བོའི་རྒྱལ་པོ་ཁྲོ་བའི་ཧཱུཾ་སྒྲ་ཅན། །ཧཱུཾ་གིས་ཁམས་གསུམ་མ་ལུས་དབང་དུ་སྡུད། །ཧཱུཾ་གིས་མ་རིག་དུག་གསུམ་མུན་ཁང་འཇོམས། །ཧཱུཾ་གིས་དུས་གསུམ་རྒྱལ་བ་ཐམས་ཅད་བསྐྱེད། །ཧཱུཾ་གིས་ཐམས་ཅད་འཇིགས་ཤིང་ཐམས་ཅད་སྡུད། །ཧཱུཾ་གིས་ངན་སོང་གནས་རྣམས་སྟོངས་པར་བྱེད། །ཧཱུཾ་གིས་བླ་མེད་བྱང་ཆུབ་གནས་སུ་སྒྲོལ། །ཧཱུཾ་མཛད་ཧཱུཾ་གི་བྱིན་རླབས་བསམ་མི་ཁྱབ། །ཧཱུཾ་ཡིག་དྲུག་ལས་འོད་ཟེར་འབུམ་སྤྲོས་པས། །ལྷུན་གྱིས་རྫོགས་པའི་སངས་རྒྱས་ཐུགས་དམ་བསྐུལ། །ཉོན་མོངས་འཁོར་བའི་སེམས་ཅན་སྡིག་སྦྱངས་ཏེ། །བླ་མེད་བྱང་ཆུབ་བདེ་ཆེན་དབྱིངས་སུ་བསྡུས། །ཨཱོཾ་པདྨ་མ་ཧཱ་ཤྲཱི་ཧེ་རུ་ཀ་མ་ཧཱ་ཙཎྜ་སརྦ་དུཥྚན་ཧ་ན་ཏ་ཀ་པ་ཙ་ཧཱུཾ་ཕཊ། སྐུ་བཞི་གཅིག་ཏུ་བསྒོམས་པས་ཀུན་ཏུ་ཞལ། །སྐུ་མདོག་པདྨ་རྒྱས་པའི་དབུ་ལྔར་ལྡན། །དབུ་སྐྲ་ཁམ་ནག་རལ་པ་གྱེན་དུ་འཁྱིལ། །བཅོ་ལྔའི་སྤྱན་བཟློག་སྨིན་མཚམས་ཁྲོ་གཉེར་བརྗིད། །སྙན་བཅུས་གསན་ཅིང་ཤངས་ལྔས་སྒྲ་ཆེན་འབྱིན། །ཞལ་ལྔ་རྔམ་ཞིང་བརྗིད་པའི་སྨང་ར་འཁྱུག །ལྗགས་ལྔ་འགྲིལ་ཞིང་དཀར་བའི་མཆེ་བ་གཙིགས། །བཅུ་དྲུག་ཕྱག་ན་མཚོན་ཆ་སྣ་ཚོགས་བསྣམས། །ཞབས་བརྒྱད་ཟིལ་གནོན་སྟངས་སྟབས་ཚུལ་དུ་བཞུགས། །གཡས་ཀྱི་ཕྱག་བརྒྱད་ཕྱག་ན་བསྣམས་པ་ནི། །རྡོ་རྗེ་ལྕགས་ཀྱུ་སྦྲུལ་གྱི་ཞགས་པ་དང་། །ཅང་ཏེའུ་ཁ་ཊྭཱཾ་ཐོད་རློན་ཁྲག་གིས་
བཀང་། །རྡོ་རྗེ་རྩེ་དགུ་དང་ནི་རྩེ་ལྔ་དང་། །རྩེ་གསུམ་རྩེ་གཅིག་འབར་བ་གསོར་ཞིང་བརྡེག །གཡོན་གྱི་ཕྱག་བརྒྱད་ཕྱག་ན་བསྣམས་པ་ནི། །རྡོ་རྗེ་ལྕགས་ཀྱུ་སྡིགས་མཛུབ་ལུ་གུ་རྒྱུད། །ཐོད་རློན་ཞལ་དུ་སྟོབ་དང་ཁྲོ་བོ་བརྒྱད་སྙིང་འཛིན། །ཅང་ཏེའུ་ཁ་ཊྭཱཾ་ལྕགས་ཀྱུ་ལྷན་ཅིག་བསྣམས། །ཧ་ཧ་རུ་ལུ་ཧཱུཾ་ཕཊ། ཧ་ཧ་རུ་ལུ་ཧཱུཾ་ཕཊ། ཆོས་དབྱིངས་ཡོན་ཏན་འབྱུང་གནས་གཞལ་མེད་ཁང་། །རྒྱལ་བ་འཁོར་བཅས་དབུ་ལྔའི་ཅོད་པན་འཛིན། །ཕྱོགས་བཞི་དབུས་དང་རིགས་ལྔའི་སྐུར་སྟོན་པ། །སྤྱི་མཐུན་ལྔ་ལྔར་སྣང་བས་ནམ་མཁའི་རྒྱན་དུ་ཆེ། །ཨཱོཾ་ཙཀྲ་ཨཱོཾ་བྷྲཱུཾ། ཙཀྲ་ཧཱུཾ་བྷྲཱུཾ། ཙཀྲ་ཏྲཱཾ་བྷྲཱུཾ། ཙཀྲ་ཧྲཱྀཿབྷྲཱུཾ། ཙཀྲ་ཧཱ་བྷྲཱུཾ། བྷུཌྜྷ་ཡ་ཐཱ་ཏ་ཏྭ་ཨ་ཧཾ། བཛྲ་ཡ་ཐཱ་ཏ་ཏྭ་ཨ་ཧཾ། རཏྣ་ཡ་ཐཱ་ཏ་ཏྭ་ཨ་ཧཾ། པདྨ་ཡ་ཐཱ་ཏ་ཏྭ་ཨ་ཧཾ། ཀརྨ་ཡ་ཐཱ་ཏ་ཏྭ་ཨ་ཧཾ། ཀ་མ་ལ་མུ་ཁ། ཀ་མ་ལ་སི་ཏི། ཀ་མ་ལ་ཤ་ཛ་ཨོཾ་ཨཱཾཿཧཱུཾ། དབུ་གཙུག་ལྷག་པར་རྟ་མགོ་ལྗང་ནག་ལྔ། །ཕྱོགས་བཅུ་ཁྱབ་པར་གཟིགས་ཤིང་དབང་གི་རྟ་སྐད་སྒྲོགས། །དབང་གི་རྟ་གདོང་མགྱོགས་པའི་ཕྲིན་ལས་ནི། །རྣམ་ཤེས་ཡིད་མྱུར་གློག་གི་རྒྱན་དུ་སྣང་། །ཨཱོཾ་ཤྲཱི་པདྨ་བི་མོཀྵ་ཡོ་གཱི་ཤྭ་རཱི། ཧ་ཡ་གྷྲཱི་བ་ཧྲིཾ་ཧྲིཾ། སྐྱེ་བ་མེད་ལས་སྐྱེས་པའི་ཚུལ། །མཚན་མ་མེད་ལས་མཚན་མར་སྣང་། །ཐུགས་ཀར་དཔལ་བེའུ་ཤར་བ་ནི། །སྐྱེས་བུ་ཆེན་པོ་ཉིད་ཀྱི་རྟགས། །ཨཱོཾ་ཛྙཱ་ན་སཏྭ་ཧཱུཾ་ཛཿཨཱོཾ་ཨཱཾ་ཧཱུཾ། རྡོ་རྗེ་རིན་ཆེན་སྦྲུལ་ནག་གཤོག་པ་ནི། །རྟོགས་པས་འཕང་གཅོད་ཕྲིན་ལས་རླབས་ཀྱིས་སྡུད། །ཉི་མ་སྟོང་གིས་བརྒྱན་པའི་ཐེའུ་གཤོག་ཅན། །མཁའ་འགྲོ་རྒྱལ་པོ་རྒྱལ་མོའི་སྤྲུལ་པ་འགྱེད། །ཨཱོཾ་ཛྭ་ལ་ཛྭ་ལ་ཨ་མུ་ཀ་ཧཱུཾ། ཛྭ་ལ་ཛྭ་ལ་ཨ་མོ་ཀ་ཏྲཱཾ། མཚུངས་མེད་ཆེ་བའི་ཁྱད་པར་རབ་སྟོན་ཕྱིར། །ང་རྒྱལ་མཐུ་བསྙེམས་བདུད་ཀྱི་དཔུང་བཅོམ་ནས། །འཇིག་རྟེན་འདས་པའི་ཁྲོ་བོ་ཆེན་པོ་བརྒྱད། །ཆེ་བའི་རྟགས་དང་ལྡན་པས་དབང་ཕྱུག་ཡང་ཆེན་གནོན། །ཨཱོཾ་ནཱ་ན་ཡ་སྟམྦྷ་ནི། ནཱ་ཤ་ཡ་སྟམྦྷ་ནི་ཧཱུཾ། སུཾ་བྷ་ནི་སུཾ་བྷ་ཧཱུཾ། ཞབས་བརྒྱད་ཏིང་འཛིན་བརྒྱད་ཀྱི་ཆས་དང་ལྡན། །བཀའ་དང་དམ་ཚིག་གནས་པར་བྱ་བའི་ཕྱིར། །སྙིང་གར་མཁྲིག་མ་བསྣུབས་ཤིང་སྒལ་ཚིགས་འཇོམས། །ཉོན་མོངས་
ཉམ་ཐག་འབོད་སྒྲོགས་སྒྲ་ཆེན་འབྱིན། །དཔའ་བོ་རབ་བརྗིད་ཏིང་འཛིན་སྟག་གི་ཆས། །རྣོ་གདུག་ཟློག་བྱེད་རྒྱ་བྱེའུ་ལྕགས་ཀྱི་ཆས། །ཤེས་རབ་ཏིང་འཛིན་རྡོ་རྗེ་ཕྱེད་པའི་ཆས། །དབང་གི་བསེ་ཁྲབ་སྨུག་པོ་གཟི་འབར་ཆས། །དཔའ་བརྗིད་མཉེན་ལྕུག་སྦྲུལ་ནག་འཁྲིལ་བའི་ཆས། །དབང་ཕྱུག་དམར་གསལ་མཆེ་བ་ཆགས་པའི་ཆས། །ཤུ་ཀེང་སྨད་གཡོགས་ཆུ་རིས་དར་གྱི་ཆས། །གཅན་གཟན་རྒྱལ་པོ་ཐབས་མཆོག་གཟིག་གི་ཆས། །ཞབས་ཀྱི་ཆས་བརྒྱད་ཏིང་འཛིན་བྱེ་བྲག་གིས། །ཕྱོགས་མཚམས་ཁྲོ་བོ་ཚུལ་བཞིན་གནས་པར་བྱའོ། །ཧཱུཾ་ཀཱ་ར་དང་མི་གཡོ་མགོན། །གཤིན་རྗེ་གཤེད་དང་དབྱུག་སྔོན་ཅན། །གཡས་ཀྱི་ཞབས་བཞིའི་གདན་དུ་བཏིང་། །པྲ་བེ་ཤ་ཡ་ཕཊ། ས་མ་ཡ་ཧོ། ས་མ་ཡ་སྟྭཾ། པདྨ་འཁྱིལ་དང་འདོད་པའི་རྒྱལ། །བདུད་རྩི་འཁྱིལ་དང་སྟོབས་པོ་ཆེ། །གཡོན་གྱི་ཞབས་བཞིའི་གདན་དུ་བཏིང་། །པྲ་བེ་ཤ་ཕཊ། ས་མ་ཡ་ཧོ། ས་མ་ཡ་སྟྭཾ། རཾ། འབར་བ་འཕྲོ་བ་ཡེ་ཤེས་ཐུགས་རྗེར་ལྡན། །གདུག་པའི་ཚོགས་འཇོམས་ཉོན་མོངས་དུག་བསྲེག་ཅིང་། །ཤེས་རབ་གསལ་བས་མ་རིག་མུན་པ་སེལ། །བསྐལ་པའི་མེ་དཔུང་འབར་བ་སྟོང་ལ་གནས། །རཾ་ཛ་ལ་སྥ་ར་ཎ་ཧཱུཾ། དུང་ཆེན་ཁོང་གསེང་རྒྱུ་མའི་ཐོད་ཕྲེང་ནི། །དུས་གསུམ་སངས་རྒྱས་ཡེ་ཤེས་ལྔ་དང་ལྡན། །སྐུ་གསུང་ཐུགས་ལྡན་རྡོ་རྗེ་རྩེ་གསུམ་འབར། །དབང་པོ་དབྱེར་མེད་སྟོང་པའི་རྒྱན་དུ་སྣང་། །ཨཱོཾ་རཏྣ་ཀྲོ་ཏཱི་ཤྭ་རཱི་སྨ་ཤ་ནི་བ་བི་ཤ་ན། ནི་ལ་ཛ་ལ་མ་ལ་མ་ཀུ་ཏེ་མ་ཧཱ་པྲ་དཾ་པྲ་བེ་ཤ་ཀ་པ་ལ།རུ་ལུ་ར་ལི་ཧ་སྡི་ཁ་ཊྭཱཾ་ག་ཏྲི་ཤཱུ་ལ། ཏུན་དུ་མ་ལ་ཧཱུཾ་ཧཱུཾ་ཕཊ། ཐོད་སྦྲུལ་མཉེན་ལྕུག་འཇིགས་བྱེད་རྒྱན་དུ་ཆེ། །སྦྲུལ་ནག་སྟོང་གིས་བརྒྱན་པའི་རྔོམ་བརྗིད་ཅན། །ཀླུ་ལྔས་མཆོད་ཕྱིར་སྐུ་ཡི་གནས་ལྔར་འཁྲིལ། །དུག་ལྔ་མ་སྤངས་དབང་གི་རྟགས་སུ་བསྟན། །ནཱ་ག་རཱ་ཛ་ཧ་ར་རུ་ལུ་ཧཱུཾ་ཕཊ། རྣོ་གདུག་ཞེན་པ་བཟློག་པས་བདུད་བཞི་འཇོམས་པ་དང་། །ཁམས་གསུམ་གཡུལ་ལས་རྒྱལ་བའི་རྟགས་སུ་བསྟན། །ཞིང་ལྤགས་གོས་སུ་གསོལ་བས་དུར་ཁྲོད་བདག །འགྲོ་སྲེ་འདོམས་སུ་བསྡུས་པས་ཕྱི་ནང་གསང་བར་གཅིག །གླང་ཆེན་ཀོ་རློན་བརྗིད་
དུ་ཆེ་བ་དང་། །སྟག་ཆེན་ཤམ་ཐབས་དཔའ་བར་ལྡན་པ་དང་། །ཞིང་ལྤགས་རློན་པ་ཐབས་ལ་མཁས་པ་ཡི། །ན་བཟའ་རྒྱན་གྱིས་སྐུ་ལ་མངའ་གསོལ་ལོ། །བམ་སྣིག་ཏ་ཛྭ་ལ་ཧཱུཾ། སྐྱེ་མེད་དབྱིངས་ནས་སྐྱེ་བའི་ཆོ་འཕྲུལ་བསྟན། །མི་གནས་དབང་ཆེན་ཐུགས་ཀྱི་དཀྱིལ་འཁོར་ནས། །ཕྱོགས་བཅུ་དུས་གསུམ་སངས་རྒྱས་འབྱུང་བའི་ཡུམ། །ཀྲོ་ཏཱི་ཤྭ་རཱི་གཟི་ལྡན་ཕྱག་རྒྱར་གསལ། །ཨཱོཾ་ཨེ་ཀ་བི་ཀ་ཏེ་མ་ཏ་ཀ་ཏེ་སྭཱ་ཧཱ། ཛ་ཨཱོཾ་ཨཱཾ་ཧཱུཾ། ཟུར་གསུམ་ལོགས་གསུམ་གདན་སྟེངས་སུ། །ཕྱག་རྒྱ་ཆེན་པོ་བཞི་ལས་མ་གཡོས་ཏེ། །གནས་པ་བྱང་ཆུབ་སེམས་ལ་རྟག་བཞུགས་ཀྱང་། །འཇུག་དང་སྨོན་དང་ལྡན་པས་འགྲོ་དོན་མཛད་སླད་དུ། །རིགས་མཆོག་གསང་ཡུམ་ཁམ་རྒྱ་དྲུག་ཏུ་གསལ། །བྷུཌྜྷ་བཛྲ་ཨཱོཾཿ། སརྦ་བཛྲ་ཧཱུཾ། རཏྣ་བཛྲ་ཏྲཱཾ།པདྨ་བཛྲ་ཧྲཱྀཿ། ཀརྨཱ་བཛྲ་ཧཱ། གྷུ་ཎ་བཛྲ་ཕཊ། ཐོད་རུས་ཉི་ལྟར་ཤར་བའི་བར་ཁྱམས་དང་པོ་ལ། །ཆོས་ཉིད་སྤྲོས་དང་བྲལ་བའི་རང་བཞིན་ལས། །མཚན་མའི་དངོས་པོ་རྟོག་པ་མི་མངའ་ཡང་། །ཁམས་གསུམ་འཁོར་བ་རྣམས་ཀྱི་དོན་སླད་དུ། །སྤྲུལ་སྐུ་ལོང་བ་བརྒྱད་དང་དམུས་ལོང་དྲུག་ཅུར་གསལ། །ཨཱོཾ་ཤྭ་རི་ཁཱ་ཧི་ཤྭ་རི་ཁཱ་ཧི་ཧཱུཾ། མེ་རི་སྤྲིན་ལྟར་འཁྲིགས་པའི་བར་ཁྱམས་ཐ་མ་ལ། །དེ་བའི་བདུད་འཇོམས་འབར་བའི་ཞབས་བརྒྱད་ལ། །སྐྱེ་མེད་དོན་རྟོགས་ལྕགས་ཀྱི་སྤྱང་མོ་བརྒྱད། །ཕྱི་ནང་གཉིས་མེད་རྟོག་འཇོམས་ཁྱི་བརྒྱད་གཉིས། །རྩ་བ་རང་སྔགས་བརྗོད་པས་ཕྱག་རྒྱར་གསལ། །ཏིཔྟ་ཙཀྲ་ཤྭ་ན་མུ་ཁ་ཁ་ལོ་ཁ། ཀུ་ཀུ་རཱ་ཙ་རཀྴ་ཁ་ལོ་ཁ་ཧཱུཾ་ཕཊ། འབར་ཆེན་དཀྱིལ་འཁོར་ཕྱོགས་བཞིའི་སྒོ་བཞི་ན། །ཐེག་ཆེན་དགུ་དང་ལྡན་པའི་ཕྱིར། །མགོ་དགུ་པོ་ལ་རྐང་གཅིག་པོ། །རྣམ་ཐར་བརྒྱད་ལ་གཟུད་པའི་ཕྱིར། །མགོ་བརྒྱད་ལག་བརྒྱད་རྐང་བརྒྱད་པོ། །ཡེ་ཤེས་དྲུག་ལྡན་རྟོགས་པའི་ཕྱིར། །མགོ་དྲུག་ལག་དྲུག་རྐང་དྲུག་པོ། །སྐུ་གསུང་ཐུགས་དང་དབྱེར་མེད་ཕྱིར། །མགོ་གསུམ་ལག་དྲུག་རྐང་གསུམ་པོ། །སྔགས་བརྗོད་ཙམ་གྱིས་ཕྱག་རྒྱར་གསལ། །ཧཱུཾ་ཧཱུཾ་ཧཱུཾ་ཕཊ། ཏྲཱཾ་ཧཱུཾ་ཕཊ། ཧྲཱྀཿཧཱུཾ་ཕཊ།ཧཱ་ཧཱུཾ་ཕཊ། སྟེང་འོག་ཕྱོགས་མཚམས་ཐབས་དང་ཤེས་རབ་ལས། །བྱང་
ཆུབ་སེམས་ཀྱི་རང་བཞིན་མེ་དབལ་རླུང་། །འཁོར་བ་དོང་སྤྲུག་བག་ཆགས་བསྲེག་པའི་ཕྱིར། །སྔགས་བརྗོད་ཙམ་གྱིས་མེ་རླུང་འབྲུག་ཏུ་གསལ། །ཛི་ན་ཁ་ཏོ་ཙེ་རེ་མ། ཡཀྴ་ཀུ་བ་ན་ཙ་ཧཱུཾ། ཧཱུཾ། བདེ་གཤེགས་ཕོ་བྲང་རིན་ཆེན་གཞལ་ཡས་ནི། །ཡིད་བཞིན་འབྱོར་ལྡན་རྒྱལ་བ་རྒྱ་མཚོའི་དབྱིངས། །ཤེས་རབ་ཟབ་མོ་རྣམ་དག་ཡུམ་གྱི་མཁའ། །བྷ་གའི་ཀློང་ནས་སྤྲུལ་པ་མང་པོ་འབྱུང་། །སྣ་ཚོགས་ཡོན་ཏན་གསང་བ་མཛོད་ཀྱི་གཏེར། །ཁྲོ་བོ་འབྱུང་གནས་དཔལ་ཆེན་རྔམ་པའི་ཡུམ། །ཏུག་ཆོམ་འབྲུག་སྒྲས་སྟོང་གསུམ་ཡོངས་སུ་ལྡིར། །ནམ་མཁའི་མཐའ་དང་མཉམ་པས་ཆོས་ཀྱི་དབྱིངས། །ཕྱོགས་བཅུ་རྒྱ་མ་ཆད་པས་དཔག་ཅིང་ཚད་ལས་འདས། །ཚད་མེད་ཡོན་ཏན་དཔག་གིས་མི་ལང་སྟེ། །ཀླུ་ཆེན་ཕོ་མོ་བསྣོལ་བའི་གདུང་ཕྱི་ལ། །རྒྱལ་ཆེན་རིགས་བཞི་གཞིབས་པའི་ཀ་བ་བཙུགས། །ལྷ་ཆེན་དྲེགས་པ་བཅོམ་པའི་བརྩིག་རྨང་ལ། །ཕྱོགས་སྐྱོང་ཕོ་མོ་བསྣོལ་བའི་བརྩིག་ཏུ་བརྩིགས། །གཟའ་བརྒྱད་བད་དུ་བཀྲམ་པའི་དྲལ་དྲབ་ལ། །རྒྱུ་སྐར་རྣམས་ཀྱིས་ཕྱོགས་ནས་མིག་ཚགས་བྱས། །ཞིང་ཆེན་བླ་རེ་མཆོག་ཕྲན་འཕན་གདུགས་དང་། །ཉ་ཆེན་བླུད་བུ་སྦྲུལ་ཆེན་ཟ་ར་ཚགས། །ཆུ་སྲིན་སྒོ་དང་མེ་རི་སྤྲིན་ལྟར་འཁྲིགས། །ཐོད་རུས་བར་ཁྱམས་རྡོ་རྗེའི་གཟེར་མགོ་ལ། །ཉི་མ་ཟླ་བ་བར་སྣང་ཡོས་ལྟར་བསྐད། །དབུས་ཀྱི་འཁོར་ལོ་ལྟེ་བ་ཟླུམ་པོ་ལ། །སྐར་མ་རྒྱལ་གྱི་འོད་ཟེར་གདུབ་བུར་བསྐོར། །སྔ་མ་འདས་པའི་རྒྱལ་སྲས་གསང་བའི་གནས། །སླད་ཀྱིས་འབྱོན་པའི་རྒྱལ་སྲས་གཤེགས་པའི་ཤུལ། །ད་ལྟར་བཞུགས་པའི་ཁྲོ་བོའི་གཞལ་ཡས་ལ། །གར་གྱི་དབང་ཕྱུག་ཆེན་པོས་བསྟོད་པའི་ཕྱིར། །ཏིང་འཛིན་ལྷ་ཡི་བུ་དང་གང་ཟག་རྣལ་འབྱོར་པས། །སྨོན་ལམ་མཐུན་པའི་ཚུལ་གྱིས་ཕྱག་འཚལ་བསྟོད། །ཨཱོཾ་དྷརྨ་དྷཱ་ཏུ་གྷུ་ཧྱ་མ་དྷ་ལ་རཱ་ག་སིདྡྷི་བྷྲཱུཾ། དེ་ལྟར་བསྐྱེད་པའི་དཀྱིལ་འཁོར་དུ། །རང་བཞིན་དཀྱིལ་འཁོར་འཁོར་དང་བཅས། །སྤྱན་དྲངས་མཆོད་པ་རྫོགས་ནས་ནི། །བསྒྲུབ་པའི་དོན་དུ་བསྙེན་པ་འབུལ། །དབང་དང་བྱིན་རླབས་
དངོས་གྲུབ་སྩོལ། །གསོལ་བས་དེ་གནང་ཡིད་ཀྱིས་དམིགས། །དཀྱིལ་འཁོར་བསྡུས་ལ་བཀྲ་ཤིས་གསོལ། །ལུས་བསྲུང་བ་དང་གོ་བགོ་བྱ། །དབང་ཆེན་བསྡུས་པའི་ཏནྟྲ་ལས། བསྒོམ་ཁོག་རྩ་བའི་ལེའུ་སྟེ་བཅུ་གཅིག་པའོ།། །།གང་དུ་བསྐྱེད་པའི་གཞལ་ཡས་སུ། །ལྷ་རྣམས་སྔགས་ཀྱིས་བསྐྱེད་བྱས་ནས། །གཙོ་བོའི་སྐུ་མདོག་ཕྱག་མཚན་ནི། །གོང་དུ་སྨོས་པའི་གཞུང་དང་མཐུན། །ཡུམ་གྱི་སྐུ་མདོག་ཕྱག་མཚན་ནི། །ཞལ་གཅིག་ཕྱག་ཀྱང་གཉིས་པ་སྟེ། །གཡས་པས་ཡིད་བཞིན་ནོར་བུ་འཛིན། །གཡོན་པས་རིན་ཆེན་ཟ་མ་ཏོག །གསང་བའི་དཀྱིལ་འཁོར་བསྐྱེད་པའི་ཕྱིར། །གཟི་ལྡན་ཐུགས་ཀྱི་དཀྱིལ་འཁོར་དུ། །གྲུ་གསུམ་མཱུཾ་དང་བཅས་པར་དམིགས། །གཙོ་བོ་ཡབ་ཀྱི་ཐུགས་ཀ་རུ། །རྩེ་ལྔ་ཨཱོཾ་དང་བཅས་པར་དམིགས། །མཱུཾ་དང་ཨོཾ་དུ་ལྡན་བྱས་ཏེ། །ཡི་གེ་འབྲུ་བཅུ་བཞིའི་ཕྲེང་བ་ཡིས། །ཐུགས་ནས་སྐུ་ཡི་གསང་བརྒྱུད་པས། །དང་པོ་གསུང་གི་ཡིག་འབྲུ་ལ། །གཉིས་པ་ཐུགས་ཀྱི་ཕྱག་མཚན་ཏེ། །གསུམ་པ་སྐུར་འགྲུབ་ཡུངས་འབྲུའི་ཚུལ། །ཨཱོཾ་ལས་དབང་ཆེན་ཡབ་ཡུམ་སྐུ། །ཡན་ལག་བཞི་ལས་གྱུར་པ་ནི། །རིགས་བཞི་ཡབ་ཡུམ་བརྒྱད་ཀྱི་སྐུ། །ཧུ་ལུ་གོང་མ་ཏ་ཀི་མ་མོ་བརྒྱད། །ཧུ་ལུ་འོག་མ་ཏ་ཀི་ཕྲ་མེན་བརྒྱད། །དེ་ཡི་ཡོན་ཏན་ཕྲིན་ལས་ལས། །སྐུ་གསུང་ཐུགས་སུ་གྲུབ་པ་ནི། །ཁམ་རྒྱ་ཆེན་མོ་དྲུག་གི་སྐུ། །ཧཱུཾ་ལས་སྒོ་སྲུང་བཞི་རུ་འགྱུར། །ཕྲ་ལས་ལོང་བ་དམུས་ལོང་ཚོགས། །ཏ་ལས་སྤྱང་མོ་ཁྱི་ཡི་ཚོགས། །ཨེ་ལས་ཡུམ་གྱི་གཞལ་ཡས་ཁང་། །དཀྱིལ་འཁོར་གཞུང་དང་མཐུན་པར་དམིགས། །ཡེ་ཤེས་འབྲུ་ལས་བསྐྱེད་པ་ཡིས། །དཀྱིལ་འཁོར་ལྷ་རྣམས་བཞུགས་སུ་གསོལ། །ཨཱ་ནི་མ་སྐྱེས་ཆོས་ཀྱི་དབྱིངས། །ར་ལི་རིག་པ་བྱང་ཆུབ་སེམས། །ཧྲིཾ་ནི་སྐུ་གསུང་ཐུགས་ཀྱི་བདག །ཛཿས་ནི་ཐམས་ཅད་དབང་དུ་བསྡུས། །དེ་ནི་ཡིག་འབྲུ་བཅུ་བཞི་ལས། །གསང་བའི་དཀྱིལ་འཁོར་བསྒྲུབ་པའོ། །དབང་ཆེན་ཐུགས་ཀྱི་དཀྱིལ་འཁོར་ནས། །ཡི་གེ་བཅུ་བཞི་འོད་དུ་འཕྲོས། །གཟི་ལྡན་ཡུམ་གྱི་གཞལ་ཡས་སུ། །ཐུགས་
ནས་སྐུ་ཡི་གསང་བརྒྱུད་དེ། །གསེར་ཞུན་ལྟ་བུར་འཁྱིལ་པ་ལ། །ཛྙཱ་ན་སཏྭ་ཞེས་བརྗོད་པས། །ཡེ་ཤེས་སེམས་དཔའི་སྐུར་གྱུར་ཏེ། །ཞལ་གཅིག་ཕྱག་གཉིས་སྐུ་མདོག་དམར། །གཡས་པས་ཡིད་བཞིན་ནོར་བུ་འཛིན། །གཡོན་པས་རིན་ཆེན་ཟ་མ་ཏོག །གསང་བ་ཚེ་ཡི་དངོས་གྲུབ་སྟེ། །བྱང་ཆུབ་སེམས་ཀྱི་གྲུབ་རྟགས་སོ། །གཙོ་བོ་ཡབ་ཡུམ་ཐུགས་ཀ་ནས། །ཧཱུཾ་དང་ཨེ་ཡི་སྤྲོ་བསྡུ་ལས། །རྡོ་རྗེ་པདྨ་བྱིན་བརླབས་ནས། །ཡུམ་གྱིས་ཡབ་ལ་འདི་སྐད་བསྐུལ། །ཧཱུཾ། བདེ་གཤེགས་གཉིས་མེད་རྣལ་འབྱོར་ཟབ་མོ་ལ། །ཐབས་དང་ཤེས་རབ་ཟུང་དུ་ཡེ་འདྲེལ་ཡང་། །འགྲོ་དོན་ཡིད་བཞིན་ཤུགས་ཀྱིས་མཛད་སླད་དུ། །བྱང་ཆུབ་སེམས་ཀྱི་སྤྲོ་བསྡུ་གཏང་བའི་ཕྱིར། །གཉིས་མེད་སྦྱོར་བ་ད་ནི་དུས་ལ་བབ། །ཨ་ལ་ལ་ཧོ། ཡབ་ཀྱིས་ཡུམ་ལ་འདི་སྐད་བསྐུལ། །ཧཱུཾ། རྡོ་རྗེ་རྒྱལ་པོ་ཀུན་འཇུག་ཕྱིར། །རིན་ཆེན་རྡོ་རྗེ་བླ་ན་མེད། །ཆོས་ཀྱི་རྡོ་རྗེའི་གླུ་བླངས་པས། །ལས་ཀྱི་རྡོ་རྗེ་གར་བྱེད་འགྱུར། །བྱང་ཆུབ་སེམས་ཀྱི་འོད་ཟེར་ལས། །ནན་ཏན་མཆོད་པ་འབུལ་བས་ནི། །ཚིམ་འགྱུར་གཉི་གར་སྤྲོ་བར་བྱ། །ཨ་ལ་ལ་ཏེ་དུས་ལ་བབ། ཨཱོཾ་བྷྲཱུཾ། ཧཱུཾ་བྷྲཱུཾ། ཏྲཱཾ་བྷྲཱུཾ། ཧྲཱྀཿབྷྲཱུཾ། ཨཱཿབྷྲཱུཾ། ནྲྀ་བྷྲཱུཾ། བདེ་གཤེགས་རིགས་ལྔའི་དཀྱིལ་འཁོར་ནས། །ཛཿལས་ལྷ་མོ་ལྕགས་ཀྱུ་ཅན། །སྟོང་ཁམས་ཁྱབ་པར་སྤྲོས་པའི་ཚེ། །འགྲོ་བ་ཡོངས་ཀྱི་ཚེ་ལ་མངའ་མཛད་མ། །རྡོ་རྗེའི་རིག་འཛིན་ཚེ་ལ་དབང་བསྒྱུར་ཞིང་། །རི་རབ་རྨང་དྲལ་རྒྱ་མཚོའི་གཏིང་དྲལ་ཏེ། །དྲེགས་པ་གཤིན་རྗེའི་ལག་ན་གནས་པའི་ནྲྀ། །ཇི་ལྟར་ལྕགས་ཀྱུས་ཉ་རྣམས་དྲངས་པ་བཞིན། །ཟླ་གསལ་དྲི་མེད་ཐུགས་ཀྱི་དཀྱིལ་འཁོར་དུ། །ཨཱ་ཡུ་ཚེ་ཡི་ལས་རྣམས་འགྲུབ་པར་མཛོད། །ཨཱོཾ་ཧུ་ལུ་ཧུ་ལུ་ཧཱུཾ་ཕཊ། ཨེ་ཨཱ་ར་ལི་ཧྲཱིཾ་ཛཿཧཱུཾ་ཕཊ། གསང་ཆེན་ཐུགས་ཀྱི་དཀྱིལ་འཁོར་དུ། །ཡིག་འབྲུ་བཅུ་བཞིའི་འཕྲོ་འདུ་ཡིས། །ནྲྀ་ཡི་རང་བཞིན་ཧཱུཾ་དུ་གྱུར། །ཧཱུཾ་ལས་ཡེ་ཤེས་སེམས་དཔའི་སྐུ། །སྲན་ཟླུམ་ཙམ་གྱི་ཟླ་དཀྱིལ་དུ། །ཡུངས་འབྲུ་ཙམ་གྱི་ཕྱག་རྒྱ་གསལ། །ཡིད་བཞིན་རིན་ཆེན་ཟ་མ་ཏོག །མི་འཛིན་འཛིན་པའི་ཚུལ་དུ་གནས། །མི་
གནས་གནས་པའི་སྦ་ཐབས་ནི། །སྐྱེ་བ་མེད་པའི་དབྱིངས་སུ་སྦ། །གསང་བ་ཡུམ་གྱི་མཁའ་ལ་སྦ། །རང་རིག་ཡེ་ཤེས་གདེང་ལ་སྦ། །དེ་གསུམ་དང་དུ་ལོན་ནས་ནི། །འདུ་འབྲལ་བྱ་བའི་མིང་ཡང་མེད། །དབང་ཆེན་བསྡུས་པའི་ཏནྟྲ་ལས། གསང་གནས་ཚེ་ཡི་ལེའུ་སྟེ་བཅུ་གཉིས་པའོ།། །།གང་དུ་བསྐྱེད་པའི་གཞལ་ཡས་སུ། །དཀྱིལ་འཁོར་ལྷ་རྣམས་སྔགས་ཀྱིས་བསྐྱེད། །སྤྱན་དྲང་མཆོད་པ་རྫོགས་ནས་ནི། །ཁམས་གསུམ་རྒྱུད་དྲུག་བསྒྲལ་བའི་དོན་སླད་དུ། །སྔོན་གྱི་རྒྱལ་བས་ཐུགས་དམ་བཞེས་པ་ནི། །ལོག་རྟོག་འཁྲུལ་པའི་ཞེན་པ་བཟློག་པ་དང་། །སྐྱེ་འཆི་འཁོར་བའི་འདམ་ནས་དབྱུང་བའི་ཕྱིར། །རྟོག་པས་བདག་བསྒྲལ་དོན་དང་ལྡན་པ་ལ། །ཐུགས་རྗེ་ཆེན་པོས་བཟུང་ནས་བདག་བསྒྲལ་རྣམས། །ཕྲིན་བཏགས་གནང་བའི་ཚིག་སྩལ་ནས། །བརྟུལ་ཞུགས་ཆེན་པོ་དྲུག་གི་བྲོ། །ཞིང་བཅུའི་སྒྲིབ་པ་རྒྱུན་གཅོད་དོ། །དེ་ལྟར་སྒྲིབ་པ་རྒྱུན་བཅད་ནས། །སྒྲོལ་བྱེད་གིང་གི་དབང་དྲུག་སྦྱིན། །དེ་ཡང་གང་དང་གང་ཞེ་ན། ཡི་གེ་འཁོར་ལོ་ཕྲ་དགོད་པའི་དབང་དང་། དྲི་མེད་ཡེ་ཤེས་པདྨ་སྤྱན་གྱི་དབང་དང་། ཤེས་རབ་སྣང་བ་ཀུན་ཏུ་འོད་ཀྱི་དབང་དང་། སྒྲོལ་བ་ཤུགས་ཀྱིས་བསྡུས་པ་གསང་བ་ཡུམ་གྱི་དབང་དང་། རྡོ་རྗེ་དང་པདྨར་ལྡན་པ་བྱང་ཆུབ་སེམས་ཀྱི་དབང་དང་། འདེབས་པ་ཕྱག་མཚན་ཐུགས་རྗེ་མཆོག་གི་དབང་ངོ་། །འདེབས་པ་ཕྱག་མཚན་ཐུགས་རྗེ་ཡིས། །ཉོན་མོངས་འཁོར་བའི་རྒྱ་དྲལ་ནས། །པྲ་བེ་ཤ་ཕཊ་ཅེས་སྒོ་ཕྱེ་སྟེ། །སེམས་ཀྱི་བདག་པོ་ནྲྀ་དུད་ཀ །བཟུང་བས་ཏི་ཡི་དངོས་གཞིར་གྱུར། །ཐུགས་ཀྱི་ས་བོན་ཧཱུཾ་བར་དུ། །སྐད་ཅིག་གསལ་བའི་ཏིང་འཛིན་གྱིས། །ཏི་ཧཱུཾ་ཏི་ཧཱུཾ་ཞེས་བརྗོད་པས། །ཏི་ཡང་ཧཱུཾ་དུ་གྱུར་ནས་ནི། །སྐུ་གསུང་ཐུགས་སུ་གནས་ནས་ནི། །དུག་གསུམ་དངོས་ལ་འབིགས་པར་བྱེད། །ཁམས་གསུམ་ཡོངས་ལ་ཁྱབ་པར་གདལ། །ཆོས་དབྱིངས་གནས་ཀྱི་མཐར་རུ་ཕྱིན། །གསང་ལུང་འཕྲུལ་གྱི་དགོངས་པའོ། །དེ་ལྟར་གྱུར་པའི་དུཿཁ་ནས། །བསྒྲལ་བའི་ཡོན་ཏན་བཅུ་བཞི་སྟེ། །དེ་ཡང་གང་དང་གང་ཞེ་ན། འཁོར་
བའི་གནས་མྱ་ངན་ལས་འདས་པའི་དབྱིངས་སུ་བསྐྱས་པ་དང་། ཉོན་མོངས་པའི་དམག་ཚོགས་ཀྱི་ནང་དུ་མི་འཇིགས་པ་ཆོས་ཉིད་ཀྱི་དཔུང་བསྙིལ་བ་དང་། གཏི་མུག་གི་མུན་ཁང་དུ་ཡེ་ཤེས་ཀྱི་སྒྲོན་མ་བཏེགས་པ་དང་། མ་རིག་པའི་རྒྱུ་དང་བཅས་པའི་སེམས་ཕྲལ་ནས། རིག་པའི་ཡེ་ཤེས་ཀྱི་གཏེར་བཅུག་པ་དང་། འཁོར་བའི་རུ་མཚོན་ཆེན་པོ་བཅག་པ་དང་། མྱ་ངན་ལས་འདས་པའི་གཡུལ་སོ་བསྟོད་པ་དང་། དུག་གསུམ་གྱི་མདུད་པ་བཀྲོལ་བ་དང་། དཔལ་ཐར་པའི་སྒོ་ཕྱེ་བ་དང་། ཡེ་ཤེས་མཚོན་གྱི་ཆར་ཕབ་པ་དང་། རྒྱུ་དྲུག་འཁོར་བའི་གནས་སྦར་བ་དང་། སྐྱེ་ཤི་མེད་པའི་ཡུལ་དུ་ཕྱིན་པ་དང་། འདུ་འབྲལ་མེད་པའི་གྲོགས་དང་ཕྲད་པ་དང་། རང་བཞིན་མེད་པའི་སྐུ་ཐོབ་པ་དང་། གཡུང་དྲུང་བརྟན་པའི་ས་རྙེད་པའོ། །ཀུན་གྱི་ཐུན་མོང་མ་ཡིན་ཡང་། །བདག་དང་གཞན་གྱི་དོན་སླད་དུ། །དང་དུ་བླངས་ནས་བྱ་བར་གསུངས། །ཕུང་པོ་ལྷག་མའི་རྗེས་ཤུལ་ལ། །གནས་ཀྱི་བྲོ་བརྒྱད་བརྡུང་བར་གསུངས། །མགོ་ལ་ལང་ཀ་མནན་པའི་བྲོ། །ནང་གྲོལ་ཙིཏྟ་འཁོར་བའི་བྲོ། །རྣམ་ཤེས་ཚོགས་བརྒྱད་ཏ་ཀྲྀཏ་བརྒྱད་ཀྱི་བྲོ། །ཕུང་པོ་ཁམས་དང་སྐྱེ་མཆེད་ཞབས་ཀྱི་ཆས་བརྒྱད་བྲོ། །ཡན་ལག་བཞི་ལ་ལྷ་མོ་ཟ་བྱེད་བཞི་ཡི་བྲོ། །ནང་གྲོལ་སྲིད་པའི་གྲོང་ན་ངན་སོང་གནས་ཀྱི་བྲོ། །གཡང་གཞི་མ་མོ་ལས་ལ་འཁྲུགས་པའི་བྲོ། །སླ་བཞི་ཁྲོ་བོ་གཟིར་ཆེན་གནོན་པའི་བྲོ། །དེ་ལྟར་བྲོ་བརྒྱད་བརྡུངས་ནས་ནི། །སྨོན་ལམ་བཏབ་ནས་ཕུང་པོ་གྲོལ། །ཚོགས་ལ་རོལ་ནས་ལྷག་མ་བསྐྱོད། །དབང་ཆེན་བསྡུས་པའི་ཏནྟྲ་ལས། ཐུགས་རྗེ་སྒྲོལ་བའི་ལེའུ་སྟེ་བཅུ་གསུམ་པའོ།། །།གང་དུ་བསྐྱེད་པའི་གཞལ་ཡས་སུ། །ལྷ་རྣམས་སྔགས་ཀྱིས་བསྐྱེད་ནས་ནི། །སྤྱན་དྲངས་མཆོད་པ་རྫོགས་པ་དང་། །མ་བསྒྲལ་བ་ཡི་ཕུང་པོ་ལ། །བརྟུལ་ཞུགས་བྲོ་དྲུག་བརྡུང་བར་གསུངས། །བདག་ཉིད་ཆེན་པོའི་སྐུར་བསྒོམས་ལ། །ངན་སོང་གསུམ་གྱི་ཕུང་པོ་ལ། །འཁོར་བའི་ལམ་ལྔ་དགག་པའི་ཕྱིར། །དཔའ་བོ་འབྲུ་ལྔ་ཕྲ་བཀོད་པས། །རྒྱུད་དྲུག་འབྲོས་ཁུངས་གཅོད་པའི་
རྒྱུད། །ལུས་ངག་སེམས་ཀྱི་ས་གཞི་ལ། །ཡིག་འབྲུ་འཁྲིགས་པའི་བྲོ་བརྡུངས་པས། །དུག་གསུམ་རྡུལ་ཕྲན་བཞིན་དུ་བཤིག །ཕུང་པོ་ཁམས་དང་སྐྱེ་མཆེད་ཚོགས། །རྡོ་རྗེ་དབྱིངས་ཀྱི་དཀྱིལ་འཁོར་དུ། །སྐུ་གསུང་ཐུགས་སུ་བདག་སྦྱོར་བས། །ཕྱག་རྒྱ་ཆེན་པོར་དབང་སྒྱུར་ཅིག །ཚོན་ལྔས་རྒྱས་པའི་དཀྱིལ་འཁོར་དུ། །ཁམས་གསུམ་བསྐོར་བའི་བྲོ་བརྡུངས་པས། །འཁོར་ལོས་སྒྱུར་བའི་རྒྱལ་པོར་བཤད། །ཐིག་ལེ་གསང་བའི་དཀྱིལ་འཁོར་དུ། །རྡོ་རྗེ་ལས་ཀྱི་བྲོ་བརྡུངས་པས། །དབང་ཕྱུག་གར་གྱི་རྒྱལ་པོར་གྱུར། །རྫོགས་སངས་རྒྱས་པའི་དཀྱིལ་འཁོར་དུ། །དཔའ་བོ་རྡོ་རྗེའི་བྲོ་བརྡུང་བ། །དགྲ་བོ་ཀུན་གྱི་ཀླད་ལ་བརྡུང་། །མ་ཚོགས་འདུས་པའི་དཀྱིལ་འཁོར་དུ། །རྐང་པ་ཕུར་པའི་བྲོ་བརྡུང་བ། །བགེགས་དང་འབྱུང་པོའི་སྙིང་ལ་བརྡུང་། །གིང་ཆེན་འདུས་པའི་དཀྱིལ་འཁོར་དུ། །འཁོར་ལོ་ཐབས་ཀྱི་བྲོ་བརྡུང་བ། །མ་སྲིན་རྣམས་ཀྱི་སྙིང་ལ་བརྡུང་། །ཕོ་ཉ་འདུས་པའི་དཀྱིལ་འཁོར་དུ། །བསྐལ་པ་བརྒྱད་ཀྱི་བྲོ་བརྡུང་བ། །རྒྱབ་ཉན་རྐུན་བུའི་སྙིང་ལ་བརྡུང་། །ཀུན་ཏུ་བཟང་མོའི་མཁའ་དཀྱིལ་དུ། །ཙིཏྟ་འབར་བའི་བྲོ་བརྡུང་བ། །མཉམ་པ་ཉིད་ཀྱི་དབྱིངས་ལ་བརྡུང་། །གསང་བ་ཡུམ་གྱི་བྷ་ག་ལ། །ལས་ཀྱི་ལིངྒའི་བྲོ་བརྡུང་བ། །བག་ཆགས་སྟུག་པོའི་ཚོགས་ལ་བརྡུང་། །ཚོགས་ཆེན་འདུས་པའི་དཀྱིལ་འཁོར་དུ། །ཡུངས་ཀར་གསེར་གྱི་བྲོ་བརྡུང་བ། །བཀའ་ལས་འདས་པའི་སྙིང་ལ་བརྡུང་། །ཟ་བྱེད་ཆེན་པོའི་དཀྱིལ་འཁོར་དུ། །རྡོ་རྗེ་མཆེ་བའི་ཚེམས་བདར་བས། །བཀའ་ལས་འདས་པའི་སྙིང་ལ་བརྡུང་། །ཧ་ཧ་རུ་ལུ་ཧ་ཧ་རུ་ལུ་ཧཱུཾ་ཕཊ། ངན་སོང་གནས་ཀྱི་བྲོ་སྟེ་དང་པོའོ།། །།རྟ་ཡི་བརྟུལ་ཞུགས་ཆེན་པོས་ནི། །བདག་ཉིད་ཆེན་པོའི་སྐུར་བསྒོམས་ཏེ། །ཞིང་བཅུ་བསྒྲལ་བའི་ཕུང་པོ་ལ། །གཏུམ་ཆེན་རྔམ་པའི་སྒྲ་སྒྲོགས་ཤིང་། །དབང་མཆོག་རྟ་སྐད་ཙེ་རེ་རེ། །ཁྲོ་བོའི་འབྲུག་སྒྲ་འུ་རུ་རུ། །དཔལ་གྱི་རྔ་སྒྲ་ལྡི་རི་རི། །རོལ་པའི་རྟ་བྲོ་ཆེམས་སེ་ཆེམ། །གསང་བའི་བཤུགས་པ་ཀྱུ་རུ་རུ། །བསྐལ་པའི་གློག་དམར་ལྗིབས་སེ་ལྗིབ། །
རྡོ་རྗེ་ཐོག་འབེབས་ལམས་སེ་ལམ། །ཧཱུཾ་གིས་དབང་བསྐུར་ཁམས་གསུམ་གཡོ། །ཕཊ་ཀྱིས་སྐུ་སྤྲུལ་འཇིག་རྟེན་ཁྱབ། །རཾ་གྱིས་མེ་འབར་ཐམས་ཅད་བསྲེག །གཅན་གཟན་མུ་ཁ་སྤྲིན་ལྟར་གཏིབས། །ཀཾ་ཀ་འདབ་ཆགས་སྐར་ལྟར་འཁྲུགས། །སྔོན་གྱི་ཐུགས་དམ་བསྐང་བའི་ཕྱིར། །ཀུན་ཏུ་བཟང་མོའི་མཁའ་དབྱིངས་སུ། །ཁམས་གསུམ་མངོན་བསྒྲལ་མཛད་པ་ཆེ། །ཟ་བྱེད་ཆེན་པོའི་དཀྱིལ་འཁོར་འདིར། །རུས་པའི་ཕུང་པོ་སྤུངས་པ་ལ། །གཅན་གཟན་མཆེ་བའི་བྲོ་བརྡུངས་པས། །བདག་ཏུ་བལྟ་བའི་ཞེ་སྡང་བཅོམ། །ཁྲག་འཐུང་ཆེན་པོའི་དཀྱིལ་འཁོར་དུ། །རཀྟའི་རྒྱ་མཚོ་འཁྱིལ་པ་ལ། །མ་ཚོགས་མཁའ་འགྲོ་བྲོ་བརྡུངས་པས། །འདོད་ཆགས་ངོ་བོ་རྩད་ནས་བཅོམ། །རྔམ་ཆེན་འཁྲུགས་པའི་དཀྱིལ་འཁོར་དུ། །ཤ་ཆེན་ཕུང་པོ་སྤུངས་པ་ལ། །སྡེར་ཆགས་འདུས་པའི་བྲོ་བརྡུངས་པས། །བདག་ཏུ་ལྟ་བའི་ང་རྒྱལ་བཅོམ། །གཏུམ་ཆེན་རྔམ་པའི་དཀྱིལ་འཁོར་དུ། །དབང་པོ་ཡན་ལག་ཚོགས་པ་ལ། །གཤོག་པ་རླབས་ཀྱི་བྲོ་བརྡུངས་པས། །བདག་ཏུ་རྟོག་པའི་ཕྲག་དོག་བཅོམ། །འཇིགས་བྱེད་ཆེན་པོའི་དཀྱིལ་འཁོར་དུ། །སྦུབས་ཀྱི་ཁྲི་རྐང་ཟླུམ་པོ་ལ། །རྡོ་རྗེ་མཆུ་ཡི་བྲོ་བརྡུངས་པས། །གཏི་མུག་རྨོངས་པའི་ངོ་བོ་བཅོམ། །སྐུ་གསུང་ཐུགས་ཀྱི་དཀྱིལ་འཁོར་དུ། །དུག་གསུམ་གཞོམ་པའི་ལས་བྱས་པས། །སྔོན་གྱི་དམ་ཚིག་ཆེན་པོ་སྐོང་། །མ་བདུན་མཁའ་འགྲོའི་དཀྱིལ་འཁོར་དུ། །ཏན་གཎ་འཕྲུལ་པའི་ལས་བྱས་པས། །རྣལ་འབྱོར་སྐོང་བའི་ཆོ་ག་རྫོགས། །དབང་ཆེན་གར་གྱི་དཀྱིལ་འཁོར་དུ། །བདུད་བཞི་འདུལ་བའི་ལས་བྱས་པས། །ཁམས་གསུམ་བསྒྲལ་བའི་ཆོ་ག་རྫོགས། །ཕྱག་བརྙན་ཚོགས་ཀྱི་དཀྱིལ་འཁོར་དུ། །བཀའ་འདས་བསྒྲལ་བའི་ལས་བྱས་པས། །དགྲ་བོ་མནན་པའི་ཆོ་ག་རྫོགས། །ཧ་ཡ་གྷྲཱི་ཝ་ཧུ་ལུ་ཧུ་ལུ་ཧཱུཾ་ཕཊ། རྟའི་བྲོ་སྟེ་གཉིས་པའོ།། །།ཁྲག་འཐུང་ཆེན་པོའི་བརྟུལ་ཞུགས་ནི། །ཞིང་བཅུ་བསྒྲལ་བའི་ཕུང་པོ་ལ། །བདག་ཉིད་ཆེན་པོའི་
སྐུར་བསྒོམས་ཏེ། །དབུ་ནི་རིགས་ལྔའི་ཚོགས་ལ་རོལ། །ཐུགས་ནི་སྐྱེ་མཆེད་དབྱིངས་ལ་རོལ། །ཕྱག་ནི་ཕྲ་མེན་ཚོགས་ལ་རོལ། །གཤོག་པ་གཏི་མུག་ཀླུ་ལ་རོལ། །ཞབས་ནི་ཁྲོ་ཆེན་བརྒྱད་ལ་རོལ། །སྐུ་ནི་རྔོམ་བརྗིད་ཆས་ལ་རོལ། །རྡོ་རྗེ་གསང་བའི་ཡུམ་ལ་རོལ། །གསུང་ནི་ཕོ་ཉའི་ཚོགས་ལ་རོལ། །འཁོར་བའི་སྐྱམས་ལིངས་ཆེན་པོ་ལ། །ཕྱོགས་བཅུའི་སངས་རྒྱས་ར་མདར་གཉེར། །ཁོང་སྙིང་ཡུམ་གྱི་བྷ་ག་ལ། །ཁམས་གསུམ་ཡོངས་སྒྲོལ་མཛད་པའི་ཚེ། །ཡེ་ཤེས་ལྔ་ཡིས་རུ་དཔོན་མཛད། །ཁྲོ་བོ་རྡོ་རྗེའི་གོ་ཚགས་སྡོམས། །སྤྲུལ་པའི་ཕོ་ཉས་དང་རུ་ཆུམ། །དུག་གསུམ་དཔལ་གྱི་མདའ་ཁར་འགྲིམ། །རྡོ་རྗེ་མཚོན་གྱི་ཆར་པ་ཕོབ། །ལུས་ནི་རྡུལ་ཕྲན་བཞིན་དུ་ཤིག །སེམས་ནི་ཡུམ་གྱི་མཁའ་ལ་སྟོབ། །ཧ་ཧ་རུ་ལུ་ཧཱུཾ་ཕཊ། ཁྲག་འཐུང་ཁྲོ་བོའི་བྲོ་སྟེ་གསུམ་པའོ།། །།ཞེ་སྡང་ཞབས་ཀྱི་ཆ་ལུགས་ལས། །ཁྱི་ཡི་བརྟུལ་ཞུགས་ཆེན་པོ་ཡིས། །ཞིང་བཅུ་བསྒྲལ་བའི་ཕུང་པོ་ལ། །བདག་ཉིད་ཆེན་པོའི་སྐུར་བསྒོམས་ནས། །ཁམས་གསུམ་མ་ལུས་བཟའ་བའི་ཕྱིར། །དཔལ་གྱི་ཁྱི་བརྒྱད་ལས་ལ་བཀྱེ། །ཚེམས་ནི་སྲ་སྙི་མེད་པར་རྣོ། །སྐད་ནི་ཕྱི་ནང་མེད་པར་ཟུགས། །དེ་ཕྱིར་བདུད་ཀྱི་མེལ་ཚེ་བ། །བང་ནི་ངལ་དུབ་མེད་པར་མགྱོགས། །དེ་ཕྱིར་ཡེ་ཤེས་སྤྲུལ་པའི་ཁྱི། །ཟས་སུ་གཙང་སྨེ་མེད་པར་བཟའ། །དེ་ཕྱིར་མཱཾ་ས་དྲི་ཆེན་ཟ། །སྐོམ་དུ་ཁ་མངར་མེད་པར་འཐུང་། །དེ་ཕྱིར་ཁྲག་དང་དྲི་ཆུ་འཐུང་། །ཤར་གྱི་ཕྱོགས་ནས་རྒྱུག་པའི་ཁྱི། །འབྲུག་སྒྲ་ལྡིར་བས་ལྷ་ཆེན་འདུལ། །ལྷོ་ཡི་ཕྱོགས་ནས་རྒྱུག་པ་ནི། །གློག་དམར་ལྗིབ་ཀྱིས་གཤིན་རྗེ་སྒྲོལ། །ནུབ་ཀྱི་ཕྱོགས་ནས་རྒྱུག་པ་ནི། །རྡོ་རྗེ་ཁྱུང་གཤོག་ཀླུ་འབྲུག་འདུལ། །བྱང་གི་ཕྱོགས་ནས་རྒྱུག་པ་ནི། །གནོད་སྦྱིན་ཕོ་མོའི་སྒལ་རྩིབ་འཇོམས། །ཤར་ལྷོ་མཚམས་ནས་རྒྱུག་པ་ནི། །དྲང་སྲོང་བདུད་འདུལ་ཆམ་ལ་འབེབས། །ལྷོ་ནུབ་མཚམས་ནས་བྱུག་པ་ནི། །ཟ་བྱེད་སྲིན་པོའི་དོན་སྙིང་འབྱིན། །ནུབ་བྱང་མཚམས་ནས་རྒྱུག་པ་ནི། །རླུང་ལྷ་སྔོན་པོའི་བ་དན་གཅོད། །བྱང་ཤར་མཚམས་ནས་རྒྱུག་པ་ནི། །བགེགས་ཆེན་
ཕོ་མོའི་ཚོགས་ལ་རོལ། །སྟེང་གི་ཕྱོགས་ནས་རྒྱུག་པ་ནི། །ཉི་ཟླ་གཟའ་སྐར་ཁ་ལོ་ཁ། །འོག་གི་ཕྱོགས་ནས་རྒྱུག་པ་ནི། །ས་བདག་ཕོ་མོའི་ཐིབས་ཀྱིས་གནོན། །ཀུན་ཀྱང་མི་བཟད་ཅི་འདྲ་ན། །མཆེ་བ་རྒྱ་ཟོར་བཀུག་པ་འདྲ། །སྤྱན་ནི་ཉི་ཟླ་ཞུན་མ་འདྲ། །རལ་པ་ཉི་ཟེར་འཛིངས་པ་འདྲ། །སྡེར་མོ་གནམ་ལྕགས་ཞུན་མ་འདྲ། །ཁྱོད་ཀྱི་ཕྲིན་ལས་དུས་ལ་བབ། །ཀུ་ཀུ་རཱ་ཙ་ཁ་ལོ་ཁ་ཧཱུཾ་ཕཊ། ཁྱི་ཡི་བྲོ་སྟེ་བཞི་པའོ།། །།ཕག་གི་བརྟུལ་ཞུགས་ཆེན་མོ་ནི། །ཞིང་བཅུ་བསྒྲལ་བའི་ཕུང་པོ་ལ། །བདག་ཉིད་ཆེན་པོའི་སྐུར་བསྒོམས་ཏེ། །བླང་དོར་མེད་པའི་མཉམ་པ་ལ། །ཕྱོགས་བཅུ་ཟས་སུ་བཟའ་བའི་ཕྱིར། །འབར་བའི་ཁྲོན་བརྐོ་ང་རེ་མཁས། །ཁྲོན་དུ་མ་གྱུར་གང་ཡང་མེད། །སྐུ་ནི་འབར་བའི་ཆ་ལུགས་ལ། །གནམ་ལྕགས་ཨུར་མོའི་ཟེ་བས་བརྒྱན། །ཞལ་ནི་ཕག་རྒོད་མཆེ་བར་སྤྲུལ། །གསུང་ནི་གྲུལ་བུམ་ཕྱོགས་བཅུར་སྒྲོགས། །ཚེམས་ནི་སྲ་སྙི་མེད་པར་རྣོ། །ཤངས་ནི་ཉོན་མོངས་ཐ་བ་རློག །རྦད་ནས་ཁྲོས་པའི་བྲོ་བརྡུངས་ཚེ། །སྲིད་གསུམ་མ་ལུས་དབང་དུ་སྡུད། །དམྱལ་ཚོགས་མེ་དཔུང་རྩད་ནས་གཅོད། །དུ་རུ་དུ་རུ་ཚལ་པ་ཚལ་པ་ཧཱུཾ་ཕཊ། ཕག་གི་བྲོ་སྟེ་ལྔ་པའོ།། །། རྡོ་རྗེ་གཤོག་པའི་བྱིན་རླབས་ལ། །བྱ་ཡི་བརྟུལ་ཞུགས་ཆེན་པོ་ནི། །ཞིང་བཅུ་བསྒྲལ་བའི་ཕུང་པོ་ལ། །བདག་ཉིད་ཆེན་པོའི་སྐུར་བསྒོམས་ཏེ། །རྡོ་རྗེའི་གཤོག་ཆེན་གདེངས་པའི་ཚེ། །ཁམས་གསུམ་ཁྱབ་པར་གཟན་ལ་རོལ། །རྡོ་རྗེའི་གཤོག་ཆེན་བཅུམ་པའི་ཚེ། །རྒྱུད་དྲུག་སེམས་ཅན་སྤར་མོར་འཛུད། །རྡོ་རྗེ་མཆུ་ཆེན་གདེངས་པའི་ཚེ། །རྒྱུད་དྲུག་སེམས་ཅན་རིལ་མིད་མཛད། །བྱ་ཡི་བརྟུལ་ཞུགས་ཆེན་པོ་ནི། །ཞིང་བཅུ་བསྒྲལ་བའི་ལྷག་རོལ་ལ། །དཀར་པོའི་ཚོགས་དང་དམར་པོའི་ཚོགས། །དབྱར་གྱི་ཆར་སྤྲིན་འཁྲིགས་པ་བཞིན། །ལྡིང་ཤིང་འབབས་ལ་འབབས་ཤིང་གཞོལ། །གཏན་ནས་ལེན་པའི་ལས་མཛོད་ཅིག །མ་མོ་ཀོ་དཀྵ་ཡ་ཧ་ཧ་རུ་ལུ་ཧཱུཾ་ཕཊ། བྱ་ཡི་བྲོ་སྟེ་དྲུག་པའོ།། །།བསྒོམ་ཁོག་རྩ་བའི་
ལེའུ་ལས། མཛད་པ་ཕྲིན་ལས་ཀྱི་ལེའུ་སྟེ་བཅུ་བཞི་པའོ།། །།དེ་ཡན་ཆད་དུ་མ་བསྒྲལ་བའི་ཕུང་པོ་ལ་བརྟུལ་ཞུགས་ཆེན་པོ་དྲུག་གི་བྲོས་རྒྱུའི་བག་ཆགས་ཀྱི་སྒྲིབ་པ་སྦྱང་བ་དང་གནོད་བྱེད་ཀྱི་དགྲ་བགེགས་བཏུལ་བ་བསྟན་ནས། འདི་མན་ཆད་དུ་བསྒྲལ་བའི་ལྷག་མ་ལ། སྒྲོལ་བ་གནད་ཀྱི་བྲོ་བརྒྱད་བརྡུང་བར་གསུངས་ཏེ། དེ་ཡང་མགོ་ལ་ལང་ཀ་མནན་པའི་བྲོ་ཞེས་པའོ། །ཧཱུཾ། རཱུ་ཏྲ་བསྒྲལ་བའི་ངོ་བོ་ལ། །ལུ་གུ་རྒྱུད་དུ་སྦྲེལ་བསྡམས་པ། །བདག་ཉིད་ཆེན་པོའི་སྐུར་བསྒོམས་ཏེ། །ཁྲག་འཐུང་འབར་བའི་དབུ་གཙུག་ཏུ། །མཐིང་ནག་གྲུབ་པའི་དཀྱིལ་འཁོར་བསྒོམ། །ཧྲཱྀཿལས་གྲུབ་པའི་རྟ་མགོ་ལ། །ཧཱུཾ་གི་འབྲུག་སྒྲ་ལྡི་རི་རི། །དེ་ཡི་བྱིན་རླབས་ཆེན་པོ་ལས། །ལང་ཀ་མནན་པའི་བྲོ་བརྡུང་འཚལ། །རྟ་གདོང་ཆེན་པོས་སྟོང་གསུམ་གཡོས། །རྟ་སྐད་རྔམ་པའི་ཐུགས་དམ་བསྐུལ། །བཀའ་བཞིན་ལས་ལ་གཤེགས་སུ་གསོལ། །ཨེ་ཧྱེ་ཧི་བྷ་ག་བཱན་ཧྲཱིཾ་ཧྲཱིཾ། ཞེས་དྲུག་ཏུ་བརྗོད་དོ། །ལང་ཀ་གནོན་པའི་བྲོ་སྟེ་དང་པོའོ།། །། ཙིཏྟ་འཁོར་བའི་བྲོ་ཞེས་པ། །ཧཱུཾ། ལང་ཀ་བསྒྲལ་བའི་ཙིཏྟ་ལ། །ལུ་གུ་རྒྱུད་དུ་སྦྲེལ་བསྡམས་ཤིང་། །ཁྲག་འཐུང་འབར་བའི་ཐུགས་དཀྱིལ་ནས། །ཧཱུཾ་ལས་གྲུབ་པའི་དཔལ་བེའུ་ལས། །ཡེ་ཤེས་ལྔ་ཡི་ཕྱག་རྒྱ་འཁྲུགས། །དེ་ཡི་བྱིན་རླབས་ཆེན་པོ་ལས། །རིགས་ལྔ་ཁྲག་འཐུང་སྤྲིན་ལྟར་གཏིབས། །ཙིཏྟ་འཁོར་བའི་རི་དྭགས་ལ། །ཡེ་ཤེས་ལྔ་ཡི་ཁྱི་བཀྱེ་སྟེ། །དུས་གསུམ་སངས་རྒྱས་ར་མདར་གཉེར། །ཁོང་སྙིང་ཡུམ་གྱི་བྷ་ག་ལ། །རྒྱུ་དྲུག་འཁོར་བའི་ལིངས་འདེབས་སོ། །རྣམ་ཤེས་བརྒྱད་ཀྱི་དཀྱིལ་འཁོར་དུ། །དུར་ཁྲོད་བརྒྱད་ཀྱི་ལམ་ཕྱུང་སྟེ། །འཁོར་བའི་རྒྱུན་གཅོད་ཐུགས་རྗེའི་བྲོ། །སྲིན་པོ་བསྒྲལ་བའི་སྙིང་ལ་བརྡུང་། །ཛྙཱ་ན་སིདྡྷི་སྥ་ར་ཎ་ཡཾ་ཡཾ་ཞེས་བརྗོད་དོ། །ཙིཏྟ་འཁོར་བའི་བྲོ་སྟེ་གཉིས་པའོ།། །།རྣམ་ཤེས་ཚོགས་བརྒྱད་ཏ་ཀྲྀཏ་བརྒྱད་ཀྱི་བྲོ་ཞེས་པའོ། །ཧཱུཾ་རཱུ་ཏྲ་བསྒྲལ་བའི་རྣམ་ཤེས་ལ། །ལུ་གུ་རྒྱུད་དུ་སྦྲེལ་བསྡམས་ཏེ། །བདག་ཉིད་ཆེན་པོའི་སྐུར་བསྒོམས་ཏེ། །མཚུངས་མེད་ཆེ་བའི་
ཁྱད་པར་བསྟན་པའི་ཕྱིར། །ང་རྒྱལ་མཐུ་བསྙེམས་བདུད་ཀྱི་དཔུང་བཅོམ་ནས། །འཇིག་རྟེན་འདས་པའི་དེ་བ་ཆེན་པོ་བརྒྱད། །ཆེ་བའི་རྟགས་དང་ལྡན་པས་དབང་ཕྱུག་ཡང་ཆེས་གནོན། །དྲག་ཤུལ་ཆེན་པོས་འདུལ་བར་བཀའ་སྩལ་ཏོ། །ཧཱུཾ་དང་ཀཱ་ཡི་འཕྲོ་འདུ་ལས། །ཁྲོ་བོ་མཐིང་ནག་སྤྲིན་ལྟར་འཁྲིགས། །ཁྲོ་ཆུང་ཚོན་གང་སྐར་ལྟར་འཁྲུགས། །ཧཱུཾ་ཆེན་ཀཱ་རའི་ཕྱག་རྒྱར་གསལ། །ཉི་ཟླ་བསྒྲལ་བའི་རྣམ་ཤེས་ལ། །ཏ་ཀྲྀཏ་ཆེན་པོ་དོག་ལ་གཤེགས། །དགྲ་ནི་ཐལ་བར་རློག་པའི་བྲོ། །བདུད་ནི་ཕྱེ་མར་འཐག་པའི་བྲོ། །རུས་པ་ཐལ་ཆེན་ས་ལ་ལ། །རླུང་ནག་འཚུབས་མས་ཕྱོགས་བཅུར་འཁྲིགས། །འོད་ཆེན་རྡོ་རྗེའི་བུ་ཡུག་འཚུབས། །ཨཱ་དང་ཏྱ་ཡི་འཕྲོ་འདུ་ལས། །ཁྲོ་བོ་ལྗང་སྔོན་སྤྲིན་ལྟར་འཁྲིགས། །ཁྲོ་ཆུང་ཚོན་གང་སྐར་ལྟར་འཁྲུགས། །མི་གཡོ་མགོན་པོའི་ཕྱག་རྒྱར་གསལ། །མེ་ལྷ་བསྒྲལ་བའི་རྣམ་ཤེས་ལ། །ཏ་ཀྲྀཏ་ཆེན་པོ་དོག་ལ་གཤེགས། །དགྲ་ནི་ཐལ་བར་རློག་པའི་བྲོ། །བདུད་ནི་ཕྱེ་མར་འཐག་པའི་བྲོ། །རུས་པ་ཐལ་ཆེན་ས་ལ་ལ། །རླུང་ནག་འཚུབས་མས་སྤྲིན་ལྟར་འཁྲིགས། །འོད་ཆེན་རྡོ་རྗེའི་བུ་ཡུག་འཚུབས། །ཡ་དང་མ་ཡི་འཕྲོ་འདུ་ལས། །ཁྲོ་བོ་མཐིང་ནག་སྤྲིན་ལྟར་གཏིབས། །ཁྲོ་ཆུང་ཚོན་གང་སྐར་ལྟར་འཁྲུགས། །གཤིན་རྗེ་གཤེད་པོའི་ཕྱག་རྒྱར་གསལ། །གཤིན་རྗེ་བསྒྲལ་བའི་རྣམ་ཤེས་ལ། །ཏ་ཀྲྀཏ་ཆེན་པོ་དོག་ལ་གཤེགས། །དགྲ་ནི་ཐལ་བར་རློག་པའི་བྲོ། །བདུད་ནི་ཕྱེ་མར་འཐག་པའི་བྲོ། །རུས་པ་ཐལ་ཆེན་ས་ལ་ལ། །རླུང་ནག་འཚུབས་མས་ཕྱོགས་བཅུར་འཁྲིགས། །འོད་ཟེར་རྡོ་རྗེའི་བུ་ཡུག་འཚུབས། །ནཱི་དང་ལ་ཡི་འཕྲོ་འདུ་ལས། །ཁྲོ་བོ་སྔོན་པོ་སྤྲིན་ལྟར་གཏིབས། །ཁྲོ་ཆུང་ཚོན་གང་སྐར་ལྟར་འཁྲུགས། །དབྱུག་པ་སྔོན་པོའི་ཕྱག་རྒྱར་གསལ། །སྲིན་པོ་བསྒྲལ་བའི་རྣམ་ཤེས་ལ། །ཏ་ཀྲྀཏ་ཆེན་པོ་དོག་ལ་གཤེགས། །དགྲ་ནི་ཐལ་བར་རློག་པའི་བྲོ། །བདུད་ནི་ཕྱེ་མར་འཐག་པའི་བྲོ། །རུས་པ་ཐལ་ཆེན་ས་ལ་ལ། །རླུང་ནག་འཚུབས་མས་ཕྱོགས་བཅུར་འཁྲིགས། །འོད་ཆེན་རྡོ་རྗེའི་བུ་ཡུག་འཚུབས། །བད་དང་མ་ཡི་འཕྲོ་འདུ་ལས། །
ཁྲོ་བོ་དུད་ཀ་སྤྲིན་ལྟར་གཏིབས། །ཁྲོ་ཆུང་ཚོན་གང་སྐར་ལྟར་འཁྲུགས། །པདྨ་འཁྱིལ་པའི་ཕྱག་རྒྱར་གསལ། །ས་བདག་བསྒྲལ་བའི་རྣམ་ཤེས་ལ། །ཏ་ཀྲྀཏ་ཆེན་པོ་དོག་ལ་གཤེགས། །དགྲ་ནི་ཐལ་བར་རློག་པའི་བྲོ། །བདུད་ནི་ཕྱེ་མར་འཐག་པའི་བྲོ། །རུས་པ་ཐལ་ཆེན་ས་ལ་ལ། །རླུང་ནག་འཚུབས་མས་ཕྱོགས་བཅུར་འཁྲིགས། །འོད་ཆེན་རྡོ་རྗེའི་བུ་ཡུག་འཚུབས། །ཊ་དང་ཀི་ཡི་འཕྲོ་འདུ་ལས། །ཁྲོ་བོ་དམར་སྐྱ་སྤྲིན་ལྟར་གཏིབས། །ཁྲོ་ཆུང་ཚོན་གང་སྐར་ལྟར་འཁྲུགས། །ཊཀྐི་རཱ་ཛའི་ཕྱག་རྒྱར་གསལ། །རླུང་ལྷ་བསྒྲལ་བའི་རྣམ་ཤེས་ལ། །ཏ་ཀྲྀཏ་ཆེན་པོ་དོག་ལ་གཤེགས། །དགྲ་ནི་ཐལ་བར་རློག་པའི་བྲོ། །བདུད་ནི་ཕྱེ་མར་འཐག་པའི་བྲོ། །རུས་པ་ཐལ་ཆེན་ས་ལ་ལ། །རླུང་ནག་འཚུབས་མས་ཕྱོགས་བཅུར་འཁྲིགས། །འོད་ཆེན་རྡོ་རྗེའི་བུ་ཡུག་འཚུབས། །ཨ་དང་མྲྀ་ཡི་འཕྲོ་འདུ་ལས། །ཁྲོ་བོ་ལྗང་ནག་སྤྲིན་ལྟར་གཏིབས། །ཁྲོ་ཆུང་ཚོན་གང་སྐར་ལྟར་འཁྲུགས། །བདུད་རྩི་འཁྱིལ་པའི་ཕྱག་རྒྱར་གསལ། །གནོད་སྦྱིན་བསྒྲལ་བའི་རྣམ་ཤེས་ལ། །ཏ་ཀྲྀཏ་ཆེན་པོ་དོག་ལ་གཤེགས། །དགྲ་ནི་ཐལ་བར་རློག་པའི་བྲོ། །བདུད་ནི་ཕྱེ་མར་འཐག་པའི་བྲོ། །རུས་པ་ཐལ་ཆེན་ས་ལ་ལ། །རླུང་ནག་འཚུབས་མས་ཕྱོགས་བཅུར་འཁྲིགས། །འོད་ཆེན་རྡོ་རྗེའི་བུ་ཡུག་འཚུབས། །མ་དང་ཧཱ་ཡི་འཕྲོ་འདུ་ལས། །ཁྲོ་བོ་སེར་ནག་སྤྲིན་ལྟར་གཏིབས། །ཁྲོ་ཆུང་ཚོན་གང་སྐར་ལྟར་འཁྲུགས། །མ་ཧཱ་བ་ལའི་ཕྱག་རྒྱར་གསལ། །བགེགས་ཆེན་བསྒྲལ་བའི་རྣམ་ཤེས་ལ། །ཏ་ཀྲྀཏ་ཆེན་པོ་དོག་ལ་གཤེགས། །དགྲ་ནི་ཐལ་བར་རློག་པའི་བྲོ། །བདུད་ནི་ཕྱེ་མར་འཐག་པའི་བྲོ། །རུས་པ་ཐལ་ཆེན་ས་ལ་ལ། །རླུང་ནག་འཚུབས་མས་ཕྱོགས་བཅུར་འཁྲིགས། །འོད་ཆེན་རྡོ་རྗེའི་བུ་ཡུག་འཚུབས། །ཧ་ན་ཧ་ན་རྒྱོབ། གརྫ་གརྫ་སྒྲོགས། ད་ཧ་ད་ཧ་སྲེགས། པ་ཙ་པ་ཙ་ཚོས། བནྡྷ་བནྡྷ་ཆིངས། ཧུ་ལུ་ཧུ་ལུ་ཞུགས། བྷིནྡ་བྷིནྡ་ཕུག །ཙྪིནྡ་ཙྪིནྡ་ཆོད། ཏིཥྛ་ཏིཥྛ་གནས། སྥོ་ཊ་སྥོ་ཊ་སྥོར། ཞེས་གསུངས་ཤིང་དྲག་པོར་རོལ་ལོ། །དབང་ཆེན་བསྡུས་པའི་ཏནྟྲ་ལས། ཏ་ཀྲྀཏ་བརྒྱད་ཀྱི་བྲོ་ཡི་ལེའུ་སྟེ་བཅོ་ལྔ་
པའོ།། །།དེ་ནས་ཡང་བཅོམ་ལྡན་འདས་ཀྱིས། བསྒྲལ་བའི་ཞིང་བཅུའི་ཕུང་པོ་ཁམས་དང་སྐྱེ་མཆེད་ལ་ཞབས་ཀྱི་ཆས་བརྒྱད་ཀྱི་བྲོ་བརྡུང་བ་ཞེས། ཧཱུཾ། སྲིན་པོ་རཱུ་ཏྲ་བསྒྲལ་བའི་ཕུང་ཁམས་སྐྱེ་མཆེད་ལ། །ལུ་གུ་རྒྱུད་དུ་སྦྲེལ་བསྡམས་ནས། །བདག་ཉིད་ཆེན་པོའི་སྐུར་བསྒོམས་ཏེ། །མི་གནས་ཡེ་ཤེས་བརྒྱད་ཀྱི་དཀྱིལ་འཁོར་དུ། །ལྷ་ཆེན་མགོ་བཅུ་དུར་ཁྲོད་བརྒྱན་དུ་སྤྲུལ། །ཞེ་སྡང་གདུག་པའི་ཚོགས་བརྒྱད་གནས་སུ་བསྒྲལ། །ཕྱོགས་བཞི་མཚམས་བརྒྱད་དྲེགས་པ་འདུལ་བའི་ཕྱིར། །ཞབས་ཀྱི་ཆས་བརྒྱད་རྣམ་ཤེས་བརྒྱད་ཀྱི་ངང་། །བྱང་ཆུབ་སེམས་དཔའ་བརྒྱད་ཀྱི་འཕྲོ་འདུ་དང་། །ཕྲ་མེན་མུ་ཀ་བརྒྱད་ཀྱི་འབྱོན་ཚུལ་གྱིས། །ཏ་ཀྲྀཏ་བརྒྱད་ཀྱི་ཐུགས་དམ་བསྐང་བའི་ཕྱིར། །གར་དང་བརྡ་ཡི་མཚོན་ནས་སྤྱན་འདྲེན་ན། །དམ་ཚིག་གསང་བའི་བྲོ་ལ་གཤེགས་སུ་གསོལ། །དཔའ་བོ་ཏིང་འཛིན་སྟག་གི་ཆས་མཆོག་གིས། །དྲེགས་པའི་མགོ་བཅད་བྷནྡྷ་གསང་བའི་བྲོ། །རྣོ་གདུག་ཟློག་བྱེད་རྒྱ་བྱེའུ་ཆས་མཆོག་གིས། །རྟོག་འཇོམས་སྤྱོད་པ་བརྟུལ་ཞུགས་ཆེན་པོའི་བྲོ། །ཤེས་རབ་ཏིང་འཛིན་རྡོ་རྗེའི་ཆས་མཆོག་གིས། །མི་འགྱུར་གཡུང་དྲུང་སྐྱིད་རྟགས་དཔལ་གྱི་བྲོ། །དམག་གི་བསེ་ཁྲབ་གཟི་འབར་ཆས་མཆོག་གི། །ཁམས་གསུམ་དབང་བསྡུད་རཀྟ་ཆགས་པའི་བྲོ། །དཔའ་བརྗིད་མཉེན་ལྕུག་སྦྲུལ་ནག་ཆས་མཆོག་གིས། །མཁའ་དབྱིངས་རྣམ་དག་གསང་བ་ཡུམ་གྱི་བྲོ། །དབང་ཕྱུག་དམར་གསལ་ཆེ་བའི་ཆས་མཆོག་གིས། །སྡུག་བསྔལ་ནད་སེལ་ཟུག་རྔུ་གཅོད་པའི་བྲོ། །ཤུ་ཤ་ཆེན་སྣང་ཀེན་སྨད་གཡོགས་དར་གྱི་ཆས་མཆོག་གིས། །དུར་ཁྲོད་གནས་སུ་མ་མོ་མཉེས་པའི་བྲོ། །གཅན་གཟན་རྒྱལ་པོ་གཟིག་གི་ཆས་མཆོག་གིས། །འདུལ་སྦྱོང་དྲག་པོ་ལས་ཀྱི་ཚར་གཅོད་བྲོ། །འདུལ་བྱེད་ཞབས་ཀྱིས་ཐམས་ཅད་ཟིལ་གྱིས་གནོན། །ཛཿཧཱུཾ་བཾ་ཧོཿས་སྤྱན་དྲངས་ཚུར་གཤེགས་ལ། །ངག་གི་དབང་ཕྱུག་ཐུགས་དམ་བསྐང་བའི་ཕྱིར། །དབང་ཆེན་ཡུམ་དུ་བརྩེགས་པའི་ས་གཞི་ལ། །ང་རྒྱལ་དབང་དུ་བསྡུ་བའི་བྲོ་ར་བཙུག །དྲེགས་པ་འདུལ་ཕྱིར་ཟིལ་གནོན་
སྟོབས་ཀྱི་ཚུལ། །སྲིད་གསུམ་མ་ལུས་དབྱིངས་སུ་བསྒྲལ་བ་དང་། །ལྷ་ཆེན་ཁྱབ་འཇུག་ཟིལ་གྱིས་གནོན་པ་དང་། །གསང་བའི་རཱུ་ཏྲ་ཐལ་བར་བརླག་པའི་ཕྱིར། །ཕུང་པོ་ཁམས་དང་སྐྱེ་མཆེད་དོན་ལ་གཤེགས་སུ་གསོལ། །ཏྲག་རཀྴ་རཱུ་ཏྲ་མ་ཧཱ་ཙིཏྟ་ཛ་ཛཿ། ཞེས་དྲག་ཏུ་བསྐོར་རོ། །ཕུང་པོ་ཁམས་དང་སྐྱེ་མཆེད་ཞབས་ཀྱི་ཆས་བརྒྱད་ཀྱི་བྲོ་སྟེ་བཞི་པའོ།། །།ཡན་ལག་བཞི་ལྷ་མོ་ཟ་བྱེད་ཀྱི་བྲོ་ཞེས་པ། ཧཱུཾ། སྲིན་པོ་རཱུ་ཏྲ་བསྒྲལ་བའི་ཡན་ལག་ལ། །ལུ་གུ་རྒྱུད་དུ་སྦྲེལ་བསྡམས་ནས། །བདག་ཉིད་ཆེན་པོའི་སྐུར་བསྒོམས་ཏེ། །ཐོགས་མེད་ལས་ཀྱི་དབང་སྡུད་མ་མོ་སྟེ། །ཡན་ལག་ཆེན་པོ་གསེར་གྱི་ས་གཞི་ལ། །ལྕགས་ཀྱུ་དམར་པོས་འཁོར་བའི་ནད་ཁྲག་འབྱིན། །ཨ་མོ་དེ་བ་འདིར་གཤེགས་ཨཾ་ཀུ་ཤ །ཡོན་ཏན་ལྷུན་གྲུབ་ཅིར་ཡང་སྤྲུལ་པའི་ཡུམ། །དུར་ཁྲོད་གསང་བའི་ལྷ་མོ་གློག་འགྱུ་མ། །རྡོ་རྗེ་ཞགས་པས་ཁམས་གསུམ་ཅིག་ཆར་འཆིངས། །ལྷ་མོ་གློག་འགྱུ་འདིར་གཤེགས་པཱ་ཤ་ཧཱུཾ། །གསུང་གིས་ཐམས་ཅད་ཟིལ་གྱིས་གནོན་པའི་ཡུམ། །རྡོ་རྗེ་དྲ་བ་བཀའ་ཡི་རྗེས་གཅོད་མ། །ལྕགས་སྒྲོག་དམར་པོས་རྒྱུད་དྲུག་ཅིག་ཆར་སྡོམ། །རྡོ་རྗེ་དྲ་བ་འདིར་གཤེགས་སྥོ་ཊ་བམ། །སྐུ་མཆོག་མི་བཟད་འབར་བའི་ཡུམ་གཅིག་མ། །རྡོ་རྗེ་སྡེར་མོ་རལ་པའི་ཅོད་པན་ཅན། །རྡོ་རྗེ་དྲིལ་བུས་མ་ལུས་དགྱེས་པ་བསྐྱེད། །དུར་ཁྲོད་སྒྲ་ཡིས་འཚོག་འགྱུར་གྷཎྜ་ཧོ། །ཞེས་བརྗོད་ལ་དྲག་ཏུ་བསྐོར་རོ། །ཡན་ལག་བཞི་ལ་ལྷ་མོ་ཟ་བྱེད་མ་བཞིའི་བྲོ་སྟེ་ལྔ་པའོ།། །།ནང་རོལ་ངན་སོང་གནས་ཀྱི་བྲོ་ཞེས་པ། །ཧཱུཾ། སྲིན་པོ་རཱུ་ཏྲ་བསྒྲལ་བའི་སློ་ཤུལ་ལ། །ལུ་གུ་རྒྱུད་དུ་སྦྲེལ་བསྡམས་ནས། །བདག་ཉིད་ཆེན་པོའི་སྐུར་བསྒོམས་ནས། །སྡུག་བསྔལ་ཡོངས་སྒྲོལ་མཛད་པའི་ཕྲིན་ལས་ཀྱིས། །ངན་སོང་གཏིང་ནས་སྦྱང་བའི་ཕྲིན་ལས་མཛོད། །མཁའ་ལྡིང་ཤུགས་ཀྱིས་འགྲོ་བའི་བརྩོན་འགྲུས་དང་། །ཕྲ་མེན་མགོ་བརྙན་ཚོགས་ཀྱི་རྐན་སྒྲ་ཡིས། །ཁམས་གསུམ་འཁོར་བ་སྔངས་པའི་གླུ་བླངས་ཏེ། །ལྷག་ཕུད་མེད་པའི་ནང་གྲོལ་སྤུངས་པ་ལ། །བྱ་རོག་འུག་པ་བཞད་དང་ཁྭ་ལ་སོགས། །སྟག་སེང་སྤྱང་ཀི་འཇིགས་
པའི་གདོང་རྣམས་ནི། །ལ་ལ་ལྡིང་ཞིང་ལ་ལ་འབབས། །ལ་ལ་འཇོལ་ཞིང་ལ་ལ་འཐོག །ཧ་ཧ་རུ་ལུའི་སྒྲ་སྒྲོགས་ཤིང་། །ཞིང་བཅུ་གནས་ནས་བླང་ཕྱིར་གཤེགས་སུ་གསོལ། །ཞེས་བརྗོད་ལ། ནང་གྲོལ་ཁ་ཕྱེ་ལ་སྡང་མིག་གིས་བལྟ་ཞིང་གཏུམ་བག་གིས་དྲག་ཏུ་བསྐོར་རོ། །ནང་གྲོལ་ངན་སོང་གནས་ཀྱི་བྲོ་སྟེ་དྲུག་པའོ།། །།གཡང་གཞི་མ་མོ་འཁྲུགས་པའི་བྲོ་ཞེས་པ། །ཧཱུཾ། སྲིན་པོ་རཱུ་ཏྲ་བསྒྲལ་བའི་གཡང་གཞི་ལ། །ལུ་གུ་རྒྱུད་དུ་སྦྲེལ་བསྡམས་ནས། །བདག་ཉིད་ཆེན་པོའི་སྐུར་བསྒོམས་ལ། །ཤ་ཁྲག་དམར་ལ་དགྱེས་པའི་མཁའ་འགྲོ་རྣམས། །གསང་བའི་གོད་བསྲུང་གསང་བའི་དཀྱིལ་འཁོར་སྐྱོང་། །མ་བདུན་ལས་ལ་འཁྲུགས་པའི་དཀྱིལ་འཁོར་དུ། །འཁོར་བའི་གཏིང་བསྙེག་ཞིང་བཅུའི་ནང་གྲོལ་ལ། །དུག་གསུམ་རྔུབས་པའི་ཤུགས་ཀྱིས་འདིར་གཤེགས་ཤིག །གསང་བའི་ཤུན་ཆེན་བརྡལ་བའི་ས་གཞི་ལ། །ཕྱོགས་སྐྱོང་རྒྱལ་པོ་ལས་ལ་འཁྲུགས་པའི་བྲོ། །སྲིན་པོ་སྨུག་ནག་ཐུགས་རྗེ་ཆགས་པའི་བྲོ། །གླིང་བཞི་ཀུན་འབྱམས་རབ་ཏུ་རྔམ་པའི་བྲོ། །བརྟན་མ་བཅུ་གཉིས་མ་ཆེན་འཁྲུགས་པའི་བྲོ། །གཡང་གཞི་ཤུན་གྱི་བྲོ་གྲ་འདིར་གཤེགས་ལ། །ཁྱི་ཕག་བྱ་དང་རྡོ་རྗེའི་བརྟུལ་ཞུགས་ཀྱིས། །ང་དང་བདག་ཏུ་ལྟ་བའི་མུན་ཁང་ཤིག །རཱུ་ཏྲའི་གནས་བཅོམ་ཤ་ཟའི་མན་དྷལ་ལ། །ཤ་ཟན་སྟོང་གི་ཆུན་ལག་དེངས་སེ་དེང་། །རཀྟ་དམར་གྱི་རྦ་ཀློང་འཁྱིལ་པ་ལ། །ཁྲག་འཐུང་སྟོང་གི་རྐན་སྒྲ་ཆི་ལི་ལི། །རུས་པ་ཚོགས་ཀྱི་མཁར་བུ་གཏམས་པ་ལ། །མཆེ་བ་དུང་གི་སོ་སྒྲ་ཐམས་སེ་ཐམ། །གཡང་གཞི་སྤྲིན་གྱི་བ་དན་ལྷུབས་སེ་ལྷུབས། །འདི་འདྲའི་དུར་ཁྲོད་འབར་བའི་ས་གཞི་ལ། །དབང་ཆེན་འཁྲུགས་པའི་བྲོ་གྲ་དི་རི་རི། །སྐྱེས་བུ་གིང་ཆེན་འདུས་པའི་ས་གཞི་ལ། །མ་མོ་ལས་ལ་འཁྲུགས་པའི་བྲོ་བརྡུངས་པས། །བདུད་དང་སྲིན་པོའི་མིག་འབྲས་ཐང་ལ་རློག །གཏི་མུག་ཀླུ་དབང་སྙིང་ཁྲག་ཁ་ནས་སྐྱུགས། །ལང་ཀ་གདོན་གྱི་ཁ་སོ་སིལ་བུར་ལྷོགས། །རཀྴ་རཱུ་ཏྲ་ཧ་ཧ་རུ་ལུ་ཧཱུཾ་ཕཊ་ཅེས་བརྗོད་ལ་དྲག་ཏུ་བསྐོར་རོ། །གཡང་གཞི་མ་མོ་འཁྲུགས་པའི་བྲོ་སྟེ་བདུན་པའོ།། །།
རྐང་ལག་ཁྲོ་བོ་ཟིལ་གནོན་བྲོ་ཞེས་པ། །ཧཱུཾ། སྲིན་པོ་རཱུ་ཏྲ་བསྒྲལ་བའི་སླ་བཞི་ལ། །ལུ་གུ་རྒྱུད་དུ་སྦྲེལ་བསྡམས་ནས། །བདག་ཉིད་ཆེན་པོའི་སྐུར་བསྒོམས་ལ། །རྐང་ལག་རྡོ་རྗེ་ཕུར་པའི་བྲོ། །ཡ་ག་ཅན་གྱི་སྙིང་ལ་བརྡུང་། །རྡོ་རྗེ་ཁྲོ་བོའི་ཐུགས་ཀ་ནས། །ཁྲོ་མོ་འབར་བའི་ཐུགས་ཀ་རུ། །སུམྦྷ་ནི་ཡི་སྒྲ་བསྒྲགས་ནས། །སྔགས་དང་ཕྱག་རྒྱ་རོལ་པའི་བྲོ། །ཞེ་སྡང་ཅན་གྱི་སྙིང་ལ་བརྡུང་། །བསྐལ་པ་མཐའ་ཡས་མི་ལྡང་ཕྱིར། །བརྗིད་པའི་སྟབས་དང་སྔགས་ཀྱིས་འཆམས། །ཨོཾ་སུམྦྷ་ནི་སུམྦྷ་ཧཱུཾ། གྷྲྀ་ཧྞ་གྷྲྀ་ཧྞ་ཧཱུཾ། གྷྲྀ་ཧྞཱ་པ་ཡ་གྷྲྀ་ཧྞཱ་པ་ཡ་ཧཱུཾ། ཨ་ན་ཡ་ཧོ། བྷ་ག་ཝཱན་བིདྱ་རཱ་ཛ་ནན། ཞེས་བརྗོད་ལ་མནན་ནོ། །ཁྲོ་བོ་ཟིལ་གནོན་བྲོ་སྟེ་བརྒྱད་པའོ།། །། དབང་ཆེན་བསྡུས་པའི་ཏནྟྲ་ལས། མཛད་པ་ཕྲིན་ལས་ཀྱི་ལེའུ་སྟེ་བཅུ་དྲུག་པའོ།། །།དེ་ནས་བར་ཅིས་ཀྱང་མ་ཆོད་པར་སྒྲོལ་བ་གནས་ཀྱི་སྨོན་ལམ་འདི་གསུངས་ཏེ། ཧོཿ། སྨོན་ལམ་དུ་གསོལ་བ་ནི། མི་གནས་ཡེ་ཤེས་ཐུགས་ཀྱི་དཀྱིལ་འཁོར་དུ།དཔལ་དུར་ཁྲོད་ཀྱི་མངའ་བདག །ཧེ་རུ་ཀ་མ་བདུན་ཕྲ་མེན་ཚོགས་ཀྱི་ཐུགས་དམ་བསྐང་བ་དང་། རྒྱུ་དུག་གསུམ་གྱི་རྩ་བ་གཅད་ནས། འབྲས་བུ་ངན་སོང་གསུམ་སྟོངས་པར་བགྱི་བའི། རྒྱུ་ཉོན་མོངས་པའི་སེམས་ཅན་འདི་དག་ལ།དཔའ་བོ་འབྲུ་ལྔ་ལུས་ལ་བཀོད་པས་དེ་བཞིན་གཤེགས་པའི་སྙིང་པོ་ལྡན་ཏེ། ཕུང་པོ་ལྔ་རིགས་ལྔའི་སངས་རྒྱས་སུ་གྱུར་ཅིག །ཤ་ཁྲག་མང་པོ་མཆོད་པའི་ཚོགས་སུ་རོལ་པས། ཟས་ཀྱི་རོ་བདེ་བ་ཉམས་སུ་བསྟར་བས་འབྱུང་བ་ཆེན་པོ་བཞི་རིགས་ཀྱི་ཡུམ་ཆེན་མོ་བཞིར་གྱུར་ཅིག །རྣམ་པར་ཤེས་པའི་ཚོགས་བརྒྱད་ཡེ་ཤེས་བརྒྱད་ཀྱི་བདག་ཉིད་དུ་བསྒྱུར་བས། སྐུ་གསུང་ཐུགས་ཡོན་ཏན་ཕྲིན་ལས་མང་པོའི་སྒོ་ནས། ཅིས་ཀྱང་མ་བསྒྲིབས་པར་གྱུར་ཅིག །ཁོག་པ་ནི་རིན་པོ་ཆེ་གཞལ་ཡས་ཁང་དུ་ཕུལ་བས། རིན་པོ་ཆེའི་འོད་ཟེར་སྣ་བདུན་ལས་གྱུར་པའི་གཞལ་ཡས་ཁང་། རྒྱན་སྣ་ཚོགས་མཛེས་པ་ནམ་མཁའི་མཐའ་དང་མཉམ་པར་གྱུར་ཅིག །ནང་ཁྲོལ་སྣོད་ཀྱི་དཀྱིལ་འཁོར་དུར་ཁྲོད་ཀྱི་གཞལ་ཡས་ཁང་གནས་ཐུན་མོང་མ་ཡིན་པ་ནས།
གློ་བ་ལས་ཀྱི་ཧེ་རུ་ཀ་ལ་ཕུལ་བས། གློ་མ་བུ་ཐབས་དང་ཤེས་རབ་འདྲེལ་བ་ལས་ཧཱུཾ་དབུགས་ཀྱི་རང་བཞིན་སྒྲ་ཆེན་པོ་འབྱུང་བས། བདེ་བར་གཤེགས་པའི་གསུང་དབྱངས་ཀྱི་སྒྲ་བསྒྲགས་ནས་རྣམ་སྨིན་དབང་དུ་འདུ་བར་གྱུར་ཅིག །མཆིན་པ་པདྨ་ཧེ་རུ་ཀའི་ཚོགས་སུ་ཕུལ་བས། མཆིན་གྲི་དབང་གི་བླ་རེ་སྤྲིན་གྱིས་ཁེབས་པས། གཏི་མུག་ཀླུ་དབང་ནི་དབང་དུ་བསྡུས། མཁྲིས་པ་ཆོས་ཉིད་བདུད་རྩི་ཕུལ་བ་ལ། ཆོས་ཀྱི་བདུད་རྩིའི་ཆར་ཆེན་པོ་འབབས་པར་གྱུར་ཅིག །མཁལ་མ་གཡས་གཡོན་རྡོ་རྗེ་རིགས་ཀྱི་ཕ་ལམ། རིན་པོ་ཆེའི་རིགས་དང་རྡོ་རྗེའི་རིགས་ལ་ཕུལ་བས། རིན་པོ་ཆེའི་རིགས་ལ་ཕུལ་བས་ནི་དགོས་འདོད་ཀྱི་རེ་བ་ཡིད་བཞིན་སྐོང་བར་གྱུར་ཅིག །རྡོ་རྗེའི་རིགས་ལ་ཕུལ་བས་དུས་གསུམ་དུ་འགྱུར་བ་མེད་དེ་སྲ་མཁྲེགས་རྡོ་རྗེ་དང་འདྲ་བར་གྱུར་ཅིག །ཙིཏྟ་སྡུག་བསྔལ་གྱི་ཚོགས་ཡེ་ཤེས་སེམས་དཔའ་ལ་ཕུལ་བས། ཆོས་ཉིད་སྒྱུ་མའི་དོན་ཡེ་ཤེས་སྒྱུ་མས་རྟོགས་ནས་སྤྲུལ་པ་སྒྱུ་མའི་སྐུ་མངོན་དུ་ཕྱུང་སྟེ། རྣལ་འབྱོར་པ་མང་པོས་འགྲོ་བའི་དོན་བྱེད་པར་གྱུར་ཅིག །ལྷུ་བཅུ་གཉིས་ལྷ་མོ་བཅུ་གཉིས་ཀྱི་ཚོགས་རྫུ་འཕྲུལ་ཡང་སུ་ཕུལ་པས། སྐྱེ་མཆེད་བཅུ་གཉིས་ལྷ་མོ་བཅུ་གཉིས་སུ་གནས་བསྒྱུར་ཏེ། རྡོ་རྗེའི་གདན་ལ་མངོན་པར་རྫོགས་པར་སངས་རྒྱས་ནས། ཆོས་ཀྱི་གདན་ཚོམས་ཆེན་པོ་མཛད་པར་གྱུར་ཅིག །སྒྱུ་མ་ཤེས་རབ་ཀྱི་ལམ་དུ་ཕུལ་བས། རྒྱུ་ཡི་ཆོས་ཉོན་མོངས་པ་ལྔ་དང་དུག་གསུམ་ལས། འབྲས་བུའི་ཆོས་སྐུ་གསུམ་ཡེ་ཤེས་ལྔ་ལས། གཞན་དུ་འགྱུར་འོང་མེད་པར་ཉིད་ལས་ཉིད་དུ་སངས་རྒྱས་པར་གྱུར་ཅིག །གཉེ་མ་ཐབས་ཀྱི་དཀྱིལ་འཁོར་དུ་ཕུལ་བས། ཐབས་མཁས་པའི་ཐུགས་རྗེའི་མཛད་ཕྱོགས་ཀྱིས་འཁོར་བ་ནི་དབྱིངས་སུ་ཟླུམ་པས། ཕྱི་དང་ནང་གཉིས་སུ་མེད་པའི་དོན་རྟོགས་པར་གྱུར་ཅིག །རྣམ་པར་ཐར་པའི་སྒོ་བཞི་ལ།མིད་པ་ཆོས་མཐར་བྱེད་ཀྱི་སྒོ་སྲུང་དུ་ཕུལ་བས། ཆོས་ཀྱི་སྒོ་མོ་བརྒྱད་ཁྲི་བཞི་སྟོང་། ནམ་དུ་ཡང་ནུབ་པའི་དུས་མེད་པར་གྱུར་ཅིག །
སྒྲོ་བ་ཤེས་རབ་མཐར་བྱེད་ཀྱི་སྒོ་སྲུང་དུ་ཕུལ་བས། ཕྱི་ནང་གི་གསང་རྒྱུད་ཕུན་སུམ་ཚོགས་པ་ནམ་དུ་ཡང་ནུབ་པའི་དུས་མེད་པར་གྱུར་ཅིག །ཆུ་སོ་བགེགས་མཐར་བྱེད་ཀྱི་སྒོ་སྲུང་དུ་ཕུལ་བས། འདས་པ་དང་ད་ལྟ་དང་མ་བྱོན་པ་དང་དུས་གསུམ་གྱི་བདེ་བར་གཤེགས་པ་རྣམས་གདུང་རྒྱུད་མཐའ་ནམ་དུ་ཡང་མི་འཆད་པར་གྱུར་ཅིག །ཚིལ་ནག་གཤིན་རྗེ་མཐར་བྱེད་ཀྱི་སྒོ་སྲུང་དུ་ཕུལ་བས། གཤིན་རྗེ་དང་བཅས་པའི་མ་མོ་མཚམས་འདྲལ་བའི་འབྱུང་པོ་ཚར་བཅད་ནས། གཞལ་ཡས་ཁང་དུས་གསུམ་དུ་བཀྲ་ཤིས་པར་གྱུར་ཅིག །མགོ་མངོན་པར་བྱང་ཆུབ་པའི་དཀྱིལ་འཁོར་དུ་ཕུལ་བས། མིག་ཤེས་རབ་ཀྱི་སྒྲོན་མས་མ་རིག་པའི་མུན་པ་སེལ་བར་གྱུར་ཅིག །ཁ་ཟ་བྱེད་ཀྱི་ཧོམ་གྱིས་རྒྱུད་དྲུག་གི་རྩ་བ་གཏོར་མར་བཞེས་པར་གྱུར་ཅིག །སོ་ལས་ཀྱི་ཁྲོ་བོས་དུག་གསུམ་རྩད་ནས་གཅོད་པར་གྱུར་ཅིག །ལྕེ་འཇིག་རྟེན་སྲིད་པའི་མེ་དཔུང་དུ་ཕུལ་བས། འཁོར་བའི་བག་ཆགས་བསྲེག་པའི་གཉེན་པོར་གྱུར་ཅིག །སྣ་སྡུག་བསྔལ་སྣ་ཚོགས་འབུད་པའི་རླུང་དུ་ཕུལ་བས། སྐྱོན་གྱི་བག་ཆགས་སེལ་ཞིང་འཐོར་བའི་གཉེན་པོར་གྱུར་ཅིག །རྣ་བ་ཡོན་ཏན་མ་འགགས་པའི་སྒོ་མོར་ཕུལ་བས། གསུང་རབ་རྒྱ་མཚོ་ཆོས་ཉིད་ཀྱི་སྒྲ་ཐོས་པས་ཕྲིན་ལས་ཀྱི་རྒྱ་མཚོ་ཇི་ལྟར་བཅོལ་པ་བཞིན་ཐོས་ཤིང་འགྲུབ་པར་གྱུར་ཅིག པགས་པ་དབང་གི་བླ་རེ་ཕུལ་བས་ཡེ་ཤེས་ཐིབས་སུ་ཆེ་བའི་ཁྱད་པར་ལས། བ་སྤུ་ཉག་རེ་ལས་ཀྱང་སྤྲུལ་པ་ལྕམ་དྲལ་གྱིས་འཇིག་རྟེན་ཡོངས་སུ་འཁྲིགས་པས། འགྲོ་བའི་དོན་ཡིད་བཞིན་དུ་བྱེད་པར་གྱུར་ཅིག །ཟིན་ལག་གཡོན་པ་གྱེན་དུ་བསྒྲེངས་པས་ནི། བཀའ་དྲིན་ཆེན་པོ་ནི་ཞར་ཡང་མི་ནུབ་པའི་གཡུང་དྲུང་གི་རྒྱལ་མཚན་ཆེན་པོ་ནི་བཙུགས། གསང་སྔགས་ཕྱོགས་བཅུར་དར་བའི་དབང་གིས་བདུད་བཞི་བསྙལ་ཞིང་མགོ་མནན་པས། ཆོས་ཀྱི་རུ་མཚོན་ཆེན་པོ་ཕྱར་བའི་མཐུས། འཁོར་བའི་གཡུལ་སོ་ནི་མྱ་ངན་ལས་འདས་པའི་དབྱིངས་སུ་བཟློག །དབལ་སོ་རྣོན་པོ་ནི་དུག་གསུམ་གྱི་དགྲ་ལ་བཙུགས་པས། ཕྲིན་ལས་རྒྱལ་ཐབས་ཆེན་པོ་བརྙེས་ཏེ་ཉོན་མོངས་པའི་རྒྱུ་ངན་སོང་
གསུམ་ནི་སྟོངས། སངས་རྒྱས་པའི་རྒྱུ་གསང་སྔགས་ཆོས་ཀྱི་དབུ་རྨོག་ནི་བཙན། འབྲས་བུ་ཡེ་ཤེས་ལྷ་ཡི་རྒྱལ་སྲིད་ནི་མཐོ་བར་གྱུར་ཅིག །དགྲ་ལག་གཡས་པ་ཐུར་དུ་བཅག་པས་ནི། མུ་སྟེགས་ལྟ་བ་སུམ་བརྒྱ་དྲུག་ཅུའི་ཀླད་པ་འགེམས་པ་གསང་བའི་གཎྜི་ཡུམ་གྱི་མཁའ་དབྱིངས་སུ་བརྡུངས་པས་ནག་པོ་ཕྱིན་ཅི་ལོག་གི་བསྟན་པ་ནི་བཤིག །ཚེ་ལ་བར་དུ་གཅོད་པའི་བདུད་བཞི་ནི་བཏུལ།མཚན་མ་ལོག་པར་སྟོན་པའི་དགྲ་བགེགས་མང་པོ་ནི་བྲི། དུས་ཉེ་བར་ལྷུང་བའི་ཡེ་འབྲོག་མང་པོ་ནི་བཟློག །བྱུར་ཆག་མང་པོ་ཀུན་ནས་སྡང་བའི་དགྲ་བགེགས་མང་པོ་ནི་བཅིངས་ནས། བདག་ཅག་རྡོ་རྗེ་ཆེ་གེ་མོ་རྣམས་ཡེ་ཤེས་བླ་མའི་ས་ནོན། དབང་ཕྱུག་ཆེན་པོའི་གྲལ་ཐོབ། ཕྱག་རྒྱ་ཆེན་པོའི་དོན་རྟོགས་པར་གྱུར་ཅིག །དེ་སྐད་ཅེས་གསུངས་སོ། །དབང་ཆེན་བསྡུས་པའི་ཏནྟྲ་ལས། སྒྲོལ་བ་གནས་ཀྱི་སྨོན་ལམ་གྱི་ལེའུ་སྟེ་བཅུ་བདུན་པའོ།། །།མཛད་པ་ཕྲིན་ལས་ཀྱི་ལེའུ་བཞིས་བསྟན་པའི་ཐ་མ་མཉེས་པ་མཆོད་པའི་ལེའུ་འབྱུང་སྟེ། མཉེས་པ་མཆོད་པའི་ལེའུ་ལའང་རང་བཞིན་གནས་ནས་སྤྱན་འདྲེན་ལེའུ་དང་། བསྡི་གནས་བཞུགས་གསོལ་གྱི་ལེའུ་དང་། བསྐུར་འོས་ཕྱག་འཚལ་གྱི་ལེའུ་དང་། མཉེས་པ་མཆོད་པའི་ལེའུ་དང་། རྟོགས་པས་བདག་བསྒྲལ་ལེའུ་དང་། ཐུགས་རྗེས་གཞན་བསྒྲལ་མཆོད་པའི་ལེའུ་དང་། བཅོལ་པའི་ཕྲིན་ལས་ཀྱི་ལེའུ་དང་། ཕྲིན་ལས་ཁ་སྐོང་ཕྱག་རྒྱའི་ལེའུ་བརྒྱད་ཀྱིས་བསྟན་ཏེ། དེ་ལ་དང་པོར་རང་བཞིན་གནས་ནས་སྤྱན་འདྲེན་གྱི་ལེའུ་འབྱུང་སྟེ། གོང་དུ་བསྐྱེད་པའི་དབུ་ལྔའི་གཞལ་ཡས་ཁང་དུ་རྡོ་རྗེ་དབྱིངས་ཀྱི་དཀྱིལ་འཁོར་སྤྱན་དྲང་བ་འདི་སྐད་དོ། །ཧཱུཾ། དུས་གསུམ་བདེ་གཤེགས་རྒྱལ་བ་ཀུན་གྱི་གཙོ། །རྣམ་པར་སྣང་མཛད་རིགས་ལྔ་འཁོར་དང་བཅས། །དབང་རྣམས་རྫོགས་པར་མཛད་པའི་དོན་སླད་དུ། །རྡོ་རྗེ་དབྱིངས་ཀྱི་དཀྱིལ་འཁོར་མ་ལུས་ཀུན། །རིགས་ལྔ་སྤྱི་ཡི་ཕྱག་རྒྱས་སྤྱན་འདྲེན་ནོ། །གར་གྱི་སྤྱི་གཙུག་རྒྱན་དུ་གཤེགས་སུ་གསོལ། །ཛཿཧཱུཾ་བཾ་ཧོཿ། ཨཱོཾ་ཛི་ན་ཛིཀ་ལཱ་མ་དྭེ་ཥ་ར་ཏི། ཧཱུཾ་བཛྲ་དྷྲྀཀ་མཱུཾ་དྷཱ་ཏྭཱི་ཤྭ་རི། སྭཱ་རཏྣ་དྷྲྀཀ །མཱཾ་མོ་ཧ་ར་ཏི། ཨཱཾ་ཨཱ་རོ་ལིཀ །
པྱཾ་རཱ་ག་ར་ཏི། ཧ་པྲཛྙཱ་དྷྲྀཀ །ཏཱཾ་བཛྲ་ར་ཏི། ཀ་མ་ལ་མུ་ཀ །ཀ་མ་ལ་པ་འདི། ཀ་མ་ལ་ལ་སེ། ཀ་མ་ལ་ལ་ཤྐ། ས་མ་ཡ་ཧོ། ས་མ་ཡ་སྟྭམ། སྔ་མ་བསྐྱེད་པའི་དཀྱིལ་འཁོར་དུ། རྟ་མགྲིན་དབང་གི་དཀྱིལ་འཁོར་སྤྱན་དྲང་བ་འདི་སྐད་དོ། །ཧཱུཾ། དབང་གི་རྒྱལ་པོ་ཁྲོ་བོ་རྟ་མཆོག་དཔལ། །ཕྲིན་ལས་མྱུར་མགྱོགས་གར་ཡང་ཐོགས་པ་མེད། །དྲག་ཤུལ་སྲིན་པོ་འདུལ་བའི་དོན་སླད་དུ། །རྟ་མགྲིན་དབང་གི་དཀྱིལ་འཁོར་མ་ལུས་ཀུན། །རྟ་གདོང་ཞལ་གྱི་ཕྱག་རྒྱས་སྤྱན་འདྲེན་ན། །དབང་གི་རྟ་སྐད་འཚེར་ཞིང་གཤེགས་སུ་གསོལ། །ཛཿཧཱུཾ་བཾ་ཧོཿ། ཨཱོཾ་ཤྲཱི་པདྨ་བཌ་མུ་ཁ་ཡོ་གཱི་ཤྭ་རི་ཧ་ཡ་གྷྲཱི་ཝ་ཨེ་ཧྱེ་ཧི་ཧྲིཾ་ཧྲིཾ། གོང་དུ་བསྐྱེད་པའི་དཀྱིལ་འཁོར་དུ་ཡེ་ཤེས་སེམས་དཔའི་དཀྱིལ་འཁོར་སྤྱན་དྲང་བ་འདི་སྐད་དོ། །ཧཱུཾ། མཁྱེན་རིག་ཡེ་ཤེས་མངའ་བ་འཕྲུལ་པའི་གནས། །ཕྲ་མོའི་ཏིང་འཛིན་ཁྲོ་བོ་དཔལ་གྱི་ཐུགས། །ཚོན་གང་གསལ་བར་ཤར་བས་མ་རིག་རྨོངས་པ་སེལ། །ཡེ་ཤེས་སེམས་དཔའི་དཀྱིལ་འཁོར་མ་ལུས་ཀུན། །རིག་བྱེད་ལྕགས་ཀྱུའི་ཕྱག་རྒྱས་སྤྱན་འདྲེན་ནོ། །ཤེས་རབ་སྒྲོན་དང་བཅས་ནས་གཤེགས་སུ་གསོལ། །ཛཿཧཱུཾ་བཾ་ཧོཿ། ཛྙཱ་ན་སཏྭ་ཧཱུཾ། ས་མ་ཡ་ཧོ། ས་མ་ཡ་སྟྭམ། གོང་དུ་བསྐྱེད་པའི་དཀྱིལ་འཁོར་དུ། འགྲོ་བ་འདུལ་བའི་དཀྱིལ་འཁོར་སྤྱན་དྲང་བ་འདི་སྐད་དོ། །ཧཱུཾ། འཁོར་བའི་རྒྱ་མཚོ་ཅིག་ཆར་སྐེམ་པའི་ཕྱིར། །ཐབས་ལྡན་འཕྲུལ་གྱི་ཕྱག་མཚན་སྣ་ཚོགས་ཀྱིས། །འགྲོ་དྲུག་གནས་ནས་དྲང་བའི་དོན་སླད་དུ། །འགྲོ་བ་འདུལ་བའི་དཀྱིལ་འཁོར་མ་ལུས་ཀུན། །ལུ་གུ་རྒྱུད་ཀྱི་ཞགས་པས་སྤྱན་འདྲེན་ན། །སྡུག་བསྔལ་ཕུང་པོ་འཇོམས་ཕྱིར་གཤེགས་སུ་གསོལ། །ཛཿཧཱུཾ་བཾ་ཧོཿ། ཧ་ཧ་རུ་ལུ་ཧཱུཾ་ཕཊ། ཧ་ཧ་རུ་ལུ་ཧཱུཾ་ཕཊ་ས་མ་ཡ་ཧོ། ས་མ་ཡ་སྟྭམ། གོང་དུ་བསྐྱེད་པའི་དཀྱིལ་འཁོར་དུ། །ཁམས་གསུམ་རྣམ་པར་རྒྱལ་བའི་དཀྱིལ་འཁོར་སྤྱན་དྲང་བ་འདི་སྐད་དོ། །ཧཱུཾ།མཁའ་ལྟར་ཁྱབ་པའི་ཐུགས་རྗེ་ཉི་མའི་སྐུ། །འགྲོ་བའི་དཔལ་བསྐྱེད་འཕགས་ལམ་འགྲོ་བའི་དཔལ། །རྨད་བྱུང་ཕྲིན་ལས་སྣ་ཚོགས་སྐུར་བསྟན་པའི། །ཁམས་གསུམ་རྣམ་རྒྱལ་དཀྱིལ་འཁོར་མ་ལུས་ཀུན། །
ཁྱུང་ཆེན་གཤོག་པའི་ཕྱག་རྒྱས་སྤྱན་འདྲེན་ནོ། །གདུག་པའི་ཀླུ་ཚོགས་འདུལ་ཕྱིར་གཤེགས་སུ་གསོལ། །ཛཿཧཱུཾ་བཾ་ཧོཿ། ཨཱོཾ་ཛྭ་ལ་ཛྭ་ལ་ཨ་མོ་གྷ་སིདྡྷི་ཧཱུཾ། ཛྭ་ལ་ཛྭ་ལ་ཨ་མོ་གྷ་སིདྡྷི་ཏྲཾ། ས་མ་ཡ་ཧོ། ས་མ་ཡ་སྟྭམ། གོང་དུ་བསྐྱེད་པའི་དཀྱིལ་འཁོར་དུ། ཧཱུཾ་མཛད་ཁྲོ་བོ་ཞབས་ཀྱི་དཀྱིལ་འཁོར་སྤྱན་དྲང་བ་འདི་སྐད་དོ། །ཧཱུཾ། སྲིད་པ་མ་ལུས་དཀྱིལ་འཁོར་རབ་འབྱམས་འདིར། །འཇིག་རྟེན་འདས་པ་དབང་དུ་བསྡུ་བའི་ཕྱིར། །ཟིལ་གནོན་དྲག་པོ་འདུལ་བའི་དོན་སླད་དུ། །ཧཱུཾ་མཛད་ཞབས་ཀྱི་དཀྱིལ་འཁོར་མ་ལུས་ཀུན། །བརྐྱང་བསྐུམ་ཕུར་པའི་ཕྱག་རྒྱས་སྤྱན་འདྲེན་ན། །གནོན་མཛད་སྟོབས་ཀྱི་རྒྱལ་པོར་གཤེགས་སུ་གསོལ། །ཨཱོཾ། ཛཿཧཱུཾ་བཾ་ཧོཿ། ནཱ་ཤ་ཡ་སྟྭཾ་བྷ་ནི། སུམྦྷ་ནི་སུམྦྷ་ནི། ས་མ་ཡ་ཧོ། ས་མ་ཡ་སྟྭཾ། གོང་དུ་བསྐྱེད་པའི་དཀྱིལ་འཁོར་དུ། གསང་མཆོག་ཐུགས་ཀྱི་དཀྱིལ་འཁོར་སྤྱན་དྲང་བ་འདི་སྐད་དོ། །ཧཱུཾ།ཤེས་རབ་སེམས་མ་ཡུམ་གྱི་གཞལ་ཡས་འདིར། །རང་བྱུང་ཡེ་ཤེས་ཐུགས་ཀྱི་ས་བོན་རྒྱུ། །རྡོ་རྗེ་ཆེ་མཆོག་བསྐུལ་བའི་དོན་སླད་དུ། །གསང་མཆོག་ཡུམ་གྱི་བྷ་ག་མ་ལུས་ཀུན། །དམ་ཚིག་སྦྱོར་བའི་ཕྱག་རྒྱས་སྤྱན་འདྲེན་ན། །བདེ་མཆོག་དབྱིངས་ལ་རོལ་ཅིང་གཤེགས་སུ་གསོལ། །ཨཱོཾ་ཛཿཧཱུཾ་བཾ་ཧོཿ། ཛྙཱ་ན་སིདྡྷི། ཨཱོཾ་རཱ་ག་སིདྡྷི་ཨཱོཾ། ས་མ་ཡ་ཧོ། ས་མ་ཡ་སྟྭམ། གོང་དུ་བསྐྱེད་པའི་དཀྱིལ་འཁོར་དུ། ཡོན་ཏན་ལྷུན་གྱིས་གྲུབ་པའི་དཀྱིལ་འཁོར་སྤྱན་དྲང་བ་འདི་སྐད་དོ། །ཧཱུཾ།ཆགས་པའི་སྐྱོན་བྲལ་པདྨ་རཱ་གའི་མདོག །ཡོན་ཏན་ལྷུན་གྱིས་གྲུབ་པ་གར་གྱི་དབང་ཕྱུག་སྟེ། །ལོག་པར་ལྟ་བ་གཏན་དུ་རྒྱུན་གཅད་ཕྱིར། །ལྷུན་གྱིས་གྲུབ་པའི་དཀྱིལ་འཁོར་མ་ལུས་ཀུན། །གླུ་བྲོ་གར་གྱི་ཕྱག་རྒྱས་སྤྱན་འདྲེན་ན། །ཚོགས་ཆེན་འདུན་སར་འདུས་ཤིང་གཤེགས་སུ་གསོལ། །ཨཱོཾ་ཛཿཧཱུཾ་བཾ་ཧོཿ། པདྨ་མ་ཧཱ་ཤྲཱི་ཧེ་རུ་ཀ་མ་ཧཱ་ཙཎྜ་སརྦ་དུཥྚཱན་ཧ་ན་ཏ་ཀ་པ་ཙ་ཧཱུཾ་ཧཱུཾ་ཕཊ། ས་མ་ཡ་ཧོ།ས་མ་ཡ་སྟྭམ། དབང་ཆེན་བསྡུས་པའི་ཏནྟྲ་ལས། རྡོ་རྗེའི་ཚིག་དྲུག་པས་རང་བཞིན་གནས་ནས་སྤྱན་འདྲེན་གྱི་ལེའུ་
སྟེ་བཅོ་བརྒྱད་པའོ།། །།ད་ནི་སྤྱན་དྲངས་པའི་དཀྱིལ་འཁོར་དེར་བཞུགས་སུ་གསོལ་ཏེ་འདི་སྐད་དོ། །རིན་ཆེན་ཕོ་བྲང་ཀླད་པའི་གཞལ་ཡས་སུ། །འོད་ཟེར་མང་པོའི་གདན་ཁྲི་བཤམས་པ་ལ། །རྡོ་རྗེ་དབྱིངས་ཀྱི་དཀྱིལ་འཁོར་མ་ལུས་ཀུན། །སྤྲོས་པ་མེད་པའི་ཚུལ་གྱིས་བཞུགས་སུ་གསོལ། །གདུལ་བྱ་དྲག་པོ་ཐོད་རུས་གཞལ་ཡས་སུ། །ཏི་ར་གསར་རྙིང་གདན་ཁྲི་བཤམས་པ་ལ། །རྟ་མགྲིན་དབང་གི་དཀྱིལ་འཁོར་མ་ལུས་ཀུན། །རྔོམ་བརྗིད་བསྒྱིངས་པའི་ཚུལ་གྱིས་བཞུགས་སུ་གསོལ། །སྐྱེ་མེད་ཙིཏྟ་ཐུགས་ཀྱི་གཞལ་ཡས་སུ། །དྲི་མེད་ཟླ་གསལ་གདན་ཁྲི་བཤམས་པ་ལ། །ཡེ་ཤེས་སེམས་དཔའི་དཀྱིལ་འཁོར་མ་ལུས་ཀུན། །མཉམ་པ་ཉིད་ཀྱི་ཚུལ་གྱིས་བཞུགས་སུ་གསོལ། །ཟ་བྱེད་དུར་ཁྲོད་ཕྱག་གི་གཞལ་ཡས་སུ། །མོས་པ་འཐད་པའི་གདན་ཁྲི་བཤམས་པ་ལ། །འགྲོ་བ་འདུལ་བའི་དཀྱིལ་འཁོར་མ་ལུས་ཀུན། །དགྱེས་པ་རོལ་པའི་ཚུལ་གྱིས་བཞུགས་སུ་གསོལ། །རྫུ་འཕྲུལ་ཆེན་པོ་ཀླུ་ཡི་གཞལ་ཡས་སུ། །སྦྲུལ་ནག་སྤུངས་པའི་གདན་ཁྲི་བཤམས་པ་ལ། །ཁམས་གསུམ་རྣམ་རྒྱལ་དཀྱིལ་འཁོར་མ་ལུས་ཀུན། །ཁྱུང་ཆེན་རྫོགས་པའི་ཚུལ་གྱིས་བཞུགས་སུ་གསོལ། །ཁྲོ་བོ་ཆེན་པོ་ཐུགས་ཀྱི་གཞལ་ཡས་སུ། །ཤ་ཁྲག་རློན་པའི་གདན་ཁྲི་བཤམས་པ་ལ། །ཧཱུཾ་མཛད་ཞབས་ཀྱི་དཀྱིལ་འཁོར་མ་ལུས་ཀུན། །ཟིལ་གནོན་བགྲད་པའི་ཚུལ་གྱིས་བཞུགས་སུ་གསོལ། །གཟི་ལྡན་པདྨ་ཐུགས་ཀྱི་གཞལ་ཡས་སུ། །ལོངས་སྤྱོད་དགྱེས་པའི་གདན་མཆོག་བཤམས་པ་ལ། །གསང་མཆོག་ཐུགས་ཀྱི་དཀྱིལ་འཁོར་མ་ལུས་ཀུན། །བདེ་བ་ཆེན་པོའི་ཚུལ་གྱིས་བཞུགས་སུ་གསོལ། །ཡེ་ཤེས་ལྷ་ཡི་ཕོ་བྲང་གཞལ་ཡས་སུ། །ཉི་ཟླ་འོད་ཀྱི་གདན་མཆོག་བཤམས་པ་ལ། །ལྷུན་གྱིས་གྲུབ་པའི་དཀྱིལ་འཁོར་མ་ལུས་ཀུན། །ཡོན་ཏན་རྫོགས་པའི་ཚུལ་གྱིས་བཞུགས་སུ་གསོལ། །ཨཱོཾ་ཏིཥྛ་བཛྲ་ས་མ་ཡ་ཧཱུཾ། དབང་ཆེན་བསྡུས་པའི་ཏནྟྲ་ལས། རྡོ་རྗེའི་ཚིག་བཞི་པས་བསྡི་གནས་བཞུགས་གསོལ་གྱི་ལེའུ་སྟེ་བཅུ་དགུ་པའོ།། །།དེ་ལྟར་བཞུགས་སུ་གསོལ་བ་ནས་དཀྱིལ་འཁོར་ལ་ཕྱག་
བྱ་བ་འདི་སྐད་དོ། །སྲིད་གསུམ་འཇོམས་མཛད་ཐར་ལམ་འདྲེན་པའི་ལྷ། །རྣམ་པར་སྣང་མཛད་རིགས་ལྔ་འཁོར་དང་བཅས། །སྤྱི་གཙུག་རྒྱལ་བའི་ཡིད་ཀྱིས་ཕྱག་འཚལ་ན། །ཐུགས་རྗེ་མཆོག་གིས་བདག་ལ་དགོངས་སུ་གསོལ། །དབང་དྲག་འཇོམས་བྱེད་སྲིན་པོ་འདུལ་བའི་ལྷ། །རྟ་མགོ་ལྗང་གུ་འཁོར་དང་བཅས་པ་ལ། །བརྐྱང་བསྐུམ་སྲིན་པོའི་ཚུལ་གྱིས་ཕྱག་འཚལ་ན། །ཐུགས་རྗེ་མཆོག་གིས་བདག་ལ་དགོངས་སུ་གསོལ། །ཐིག་ལེ་ཆེན་པོ་ཀློང་གི་དཀྱིལ་འཁོར་ནས། །ཡེ་ཤེས་སེམས་དཔའི་འཁོར་དང་བཅས་པ་ལ། །མི་གཡོ་བསམ་གཏན་ཚུལ་གྱིས་ཕྱག་བགྱི་ན། །ཐུགས་རྗེ་མཆོག་གིས་བདག་ལ་དགོངས་སུ་གསོལ། །ཏ་ཀྲྀཏ་བཅུ་དྲུག་ཐབས་ཀྱི་བརྒྱུད་པའི་ཚོགས། །སྤྲུལ་པའི་ཕྲ་མེན་ཕྱག་མཚན་འཁོར་བཅས་ལ། །མ་མོ་འཛུམ་པའི་ཚུལ་གྱིས་ཕྱག་བགྱི་ན། །ཐུགས་རྗེ་མཆོག་གིས་བདག་ལ་དགོངས་སུ་གསོལ། །གཏི་མུག་གསུམ་སེལ་འཇིག་རྟེན་སྒྲོན་མའི་ལྷ། །ཁམས་གསུམ་རྣམ་རྒྱལ་འཁོར་དང་བཅས་པ་ལ། །ཀླུ་འབྲུག་འབྲོས་པའི་ཚུལ་གྱིས་ཕྱག་འཚལ་ན། །ཐུགས་རྗེ་མཆོག་གིས་བདག་ལ་དགོངས་སུ་གསོལ། །ཁམས་གསུམ་དབང་སྡུད་ཁྲོ་བོ་ནོན་པའི་ལྷ། །ཧཱུཾ་མཛད་ཞབས་ཀྱི་དཀྱིལ་འཁོར་མ་ལུས་ལ། །དྲང་སྲོང་ཙོག་པུའི་ཚུལ་གྱིས་ཕྱག་འཚལ་ན། །ཐུགས་རྗེ་མཆོག་གིས་བདག་ལ་དགོངས་སུ་གསོལ། །བདེ་བ་ཆེན་པོ་བྱང་ཆུབ་སེམས་ཀྱི་གནས། །གཟི་ལྡན་པདྨ་འཁོར་དང་བཅས་པ་ལ། །མ་མོ་མདངས་ཀྱི་ཚུལ་གྱིས་ཕྱག་འཚལ་ན། ། ) ཐུགས་རྗེ་མཆོག་གིས་བདག་ལ་དགོངས་སུ་གསོལ། །བསོད་ནམས་ཡེ་ཤེས་ཚོགས་ཀྱིས་བརྒྱན་པའི་སྐུ། །པདྨ་དབང་ཆེན་གར་གྱི་དབང་ཕྱུག་ལ། །ཐལ་སྦྱར་མི་ཡི་ཚུལ་གྱིས་ཕྱག་འཚལ་ན། །ཐུགས་རྗེ་མཆོག་གིས་བདག་ལ་དགོངས་སུ་གསོལ། །ཨ་ལ་ལ་ཧོ། ཨ་ཏི་པུ་ཧོ། པྲ་ཏཱིཙྪ་ཧོ། དབང་ཆེན་བསྡུས་པའི་ཏནྟྲ་ལས། རྡོ་རྗེ་ཚིག་བཞི་པས་བཀུར་འོས་ཕྱག་འཚལ་ལེའུ་སྟེ་ཉི་ཤུ་པའོ།། །།ད་ནི་མཉེས་པ་མཆོད་པའི་ལེའུ་འབྱུང་སྟེ། མཉེས་པ་མཆོད་པའི་ལེའུ་ལ་ཡང་རྣམ་པ་བཞི་སྟེ། སྣང་སྲིད་ཀྱི་མཆོད་པ་དང་།
གླུ་བྲོ་གར་གྱི་མཆོད་པ་དང་། རང་བྱུང་བདུད་རྩིའི་མཆོད་པ་དང་། དམ་ཚིག་རྫས་ཀྱི་མཆོད་པ་དང་བཞིའོ། །དེ་ལ་དང་པོར་སྣང་སྲིད་ཀྱི་མཆོད་པ་འབྱུང་སྟེ་འདི་སྐད་དོ། །ཧཱུཾ་བདེ་བར་གཤེགས་སོ་བཅོམ་ལྡན་འདས། །བདེ་བར་གཤེགས་སོ་ཁྲོ་རྒྱལ་གཙོ། །བདེ་བར་གཤེགས་སོ་ཨཱ་ར་ལི། །རྒྱལ་བ་རྒྱ་མཚོ་ཡེ་ཤེས་ཀྱིས། །སྲིད་པ་རྒྱ་མཚོ་མཐའ་དག་ཀུན། །ཀུན་བཟང་མཆོད་སྤྲིན་མཆོག་ཏུ་རོལ། །ཨཱོཾ་མ་ཧཱ་ཤཱུ་ནྱ་ཏཱ་སྭ་བྷཱ་བ་ཨཱདྨ་ཀོ྅ཧཾ། གཉིས་པ་གླུ་བྲོ་གར་གྱི་མཆོད་པ་འབུལ་བ་འདི་སྐད་དོ། །ཧཱུཾ། ལྷ་ཡི་ལྷ་མོ་གླུ་བྲོ་གར་གྱི་ཚོགས། །དགའ་ལྡན་ལོངས་སྤྱོད་བསོད་ནམས་གྲུབ་པའི་རྟགས། །མཐུན་པར་སྣང་བའི་ལོངས་སྤྱོད་ལ། །མཛེས་པར་འགྱུར་བའི་གར་དང་ཚངས་པ་དབྱངས་ཀྱི་གླུ། །མི་གནས་རོལ་པའི་བྲོ་དང་ཐུགས་དམ་བསྐུལ་བའི་ཚིག །སྤྲུལ་པ་མཆོག་གི་རྐྱེན་དུ་འཚམས་པའི་ཕྱིར། །བདེ་བར་གཤེགས་པ་རྣམས་ལ་འབུལ་ལགས་ན། །ཀུན་ཏུ་བཟང་པོའི་ངང་གིས་བཞེས་སུ་གསོལ། །ཨཱོཾ་སརྦ་ཏ་ཐཱ་ག་ཏ་པཱུ་ཛ་སྭ་བྷཱ་བ་ཨཱདྨ་ཀོ྅ཧཾ། གསུམ་པ་རང་བྱུང་བདུད་རྩིའི་མཆོད་པ་འབུལ་བ་ནི། རྒྱུད་ལས། མཚན་དང་ལྡན་པའི་བྷནྡ་ལ། །བདུད་རྩི་ལྔ་དང་ཛ་གད་བཅས། །རཾ་ཡཾ་ཁཾ་གི་ཡིག་འབྲུ་ཡིས། །མཚན་ཉིད་མེད་པར་སྟོང་བྱས་ནས། །བདག་ཉིད་ཆེན་པོའི་ཐུགས་ཀ་ནས། །ཡིག་འབྲུ་བཅུ་ཡི་འོད་འཕྲོས་པས། །མཚན་ཉིད་མེད་པའི་སྟོང་པ་ལས། །ཨཱོཾ་ལས་དབང་ཆེན་ཡབ་ཡུམ་སྐུ། །ཧུ་ལུ་གོང་མ་ཏ་ཀྲྀཏ་བཅུ་དྲུག་ལ། །ཧུ་ལུ་འོག་མ་ཕྲ་མེན་བཅུ་དྲུག་སྐུ། །ཧཱུཾ་ལས་ཁམ་རྒྱ་དམུས་ལོང་སྐུ། །ཕཊ་ལས་ཁྱི་སྤྱང་སྒོ་སྲུང་སྐུ། །ཨེ་ལས་ཡུམ་གྱི་བྷ་གར་གྱུར། །ཨཱས་ནི་མ་སྐྱེས་མཉམ་པ་ཉིད། །ར་ལིས་གསང་བའི་རྡོ་རྗེ་ལས། །ཡིག་འབྲུ་བཅུ་བཞིའི་རང་བཞིན་ནི། །རིན་ཆེན་ཕྲེང་བ་བརྒྱུས་པ་འམ། །མགལ་མེ་ཀླད་ལ་བསྐོར་བ་བཞིན། །ཧྲཱྀཿཡིས་ཐམས་ཅད་དབང་དུ་བསྡུ། །ཛཿཡིས་ཡབ་ཡུམ་ཐུགས་དམ་བསྐུལ། །ཡབ་ཡུམ་གཉིས་མེད་སྦྱོར་བ་ལས། །བྱང་ཆུབ་སེམས་ཀྱི་རང་བཞིན་ནི། །དུས་གསུམ་སངས་རྒྱས་མཆོད་པའི་རྫས། །དེ་ཕྱིར་རང་བྱུང་བདུད་རྩིར་བསྔགས། །ཞེས་བྱ་
སྟེ། རང་ལ་མཆོད་ཅིང་རང་གིས་བཟའ། །རིན་ཆེན་ཕོ་བྲང་ཀླད་པའི་གཞལ་ཡས་ན། །རྣམ་སྣང་མི་བསྐྱོད་རིན་ཆེན་མཐའ་ཡས་གྲུབ། །རྡོ་རྗེ་དབྱིངས་ཀྱི་དཀྱིལ་འཁོར་མ་ལུས་ལ། །དུག་ལྔ་སྨན་དུ་བསྒྱུར་བའི་མཆོད་པ་འབུལ། །དབང་རྣམས་རྫོགས་པའི་དངོས་གྲུབ་སྩལ་དུ་གསོལ། །ཐོད་རུས་མེ་ལྟར་འབར་བའི་གཞལ་ཡས་ན། །རྟ་མགྲིན་དབང་གི་དཀྱིལ་འཁོར་མ་ལུས་ལ། །དུག་ལྔ་སྨན་དུ་བསྒྱུར་བའི་མཆོད་པ་འབུལ། །རྫུ་འཕྲུལ་མྱུར་མགྱོགས་དངོས་གྲུབ་སྩལ་དུ་གསོལ། །དྲི་མེད་ཟླ་གསལ་འོད་ཀྱི་དཀྱིལ་འཁོར་ན། །ཡེ་ཤེས་སེམས་དཔའི་དཀྱིལ་འཁོར་མ་ལུས་ལ། །དུག་ལྔ་སྨན་དུ་བསྒྱུར་བའི་མཆོད་པ་འབུལ། །མཁྱེན་རིག་གསལ་བའི་དངོས་གྲུབ་སྩལ་དུ་གསོལ། །ཟ་བྱེད་དུར་ཁྲོད་ཕྱག་གི་གཞལ་ཡས་ན། །རྟ་མགྲིན་མ་མོ་ཕྲ་མེན་མ་ལུས་ལ། །དུག་ལྔ་སྨན་དུ་བསྒྱུར་བའི་མཆོད་པ་འབུལ། །དུར་ཁྲོད་བརྒྱད་ཀྱི་དངོས་གྲུབ་སྩལ་དུ་གསོལ། །རྡོ་རྗེ་རིན་ཆེན་སྦྲུལ་ནག་གཤོག་པ་དང་། །ཁམས་གསུམ་རྣམ་རྒྱལ་དཀྱིལ་འཁོར་མ་ལུས་པ། །དུག་ལྔ་སྨན་དུ་བསྒྱུར་བའི་མཆོད་པ་འབུལ། །ཁྱུང་ཆེན་རྫོགས་པའི་དངོས་གྲུབ་སྩལ་དུ་གསོལ། །ཁྲོ་བོ་ཆེན་པོ་ཐུགས་ཀྱི་གཞལ་ཡས་ན། །ཧཱུཾ་མཛད་ཞབས་ཀྱི་དཀྱིལ་འཁོར་མ་ལུས་ལ། །དུག་ལྔ་སྨན་དུ་བསྒྱུར་བའི་མཆོད་པ་འབུལ། །ཟིལ་གནོན་དྲག་པོའི་དངོས་གྲུབ་སྩལ་དུ་གསོལ། །གཟི་ལྡན་པདྨ་ཐུགས་ཀྱི་དཀྱིལ་འཁོར་ན། །གསང་མཆོག་ཐུགས་ཀྱི་དཀྱིལ་འཁོར་མ་ལུས་ལ། །དུག་ལྔ་སྨན་དུ་བསྒྱུར་བའི་མཆོད་པ་འབུལ། །སྐྱེ་འཆི་མེད་པའི་དངོས་གྲུབ་སྩལ་དུ་གསོལ། །ཡེ་ཤེས་ལྷ་ཡི་ཕོ་བྲང་གཞལ་ཡས་ན། །ལྷུན་གྱིས་གྲུབ་པའི་དཀྱིལ་འཁོར་མ་ལུས་ལ། །དུག་ལྔ་སྨན་དུ་བསྒྱུར་བའི་མཆོད་པ་འབུལ། །འདུ་འབྲལ་མེད་པའི་དངོས་གྲུབ་སྩལ་དུ་གསོལ། །ཟུར་གསུམ་ལོགས་གསུམ་གདན་སྟེང་ན། །ཁམ་རྒྱ་ཆེན་མོ་དྲུག་རྣམས་ལ། །དམ་ཚིག་མཆོག་གི་མཆོད་པ་འབུལ། །བཅོལ་པའི་ཕྲིན་ལས་འགྲུབ་པར་མཛོད། །ཐོད་སྐམ་འབར་བའི་བར་ཁྱམས་ལ། །ལོང་བ་རྒྱབ་སྦྲེལ་བརྒྱད་རྣམས་དང་། །
སྤྲུལ་སྐུ་དམུས་ལོང་དྲུག་ཅུ་ལ། །དམ་ཚིག་མཆོག་གི་མཆོད་པ་འབུལ། །བཅོལ་པའི་ཕྲིན་ལས་འགྲུབ་པར་མཛོད། །མེ་རི་སྨུག་པོའི་བར་ཁྱམས་ན། །ཡེ་ཤེས་དཔལ་གྱི་ཁྱི་སྤྱང་ལ། །དམ་ཚིག་མཆོག་གི་མཆོད་པ་འབུལ། །བཅོལ་པའི་ཕྲིན་ལས་འགྲུབ་པར་མཛོད། །དཀྱིལ་འཁོར་ཕྱོགས་བཞི་སྒོ་བཞི་ན། །སྒོ་བ་ཆེན་མོ་བཞི་རྣམས་དང་། །མེ་འབྲུག་རླུང་འབྲུག་ལ་སོགས་ལ། །དམ་ཚིག་མཆོག་གི་མཆོད་པ་འབུལ། །བཅོལ་པའི་ཕྲིན་ལས་འགྲུབ་པར་མཛོད། །བཞིས་བསྟན་པའི་ཐ་མ་དམ་ཚིག་རྫས་ཀྱི་མཆོད་པ་འབུལ་བ་འདི་སྐད་དོ། །ཡབ་ཡུམ་གཉིས་མེད་དགྱེས་པར་སྦྱོར་བའི་རྫས། །དབང་པོ་དབྱེར་མེད་བདེ་བ་ཆེན་པོའི་ངང་། །བྱང་ཆུབ་སེམས་ཀྱི་མཆོད་པ་དམ་པ་འདི། །གཉིས་སུ་མེད་པའི་ཚུལ་གྱིས་འབུལ་ལགས་ན། །བླང་དོར་མེད་པའི་ངང་དུ་བཞེས་སུ་གསོལ། །སྲིད་པའི་གཅོང་སྙིང་ཟད་པར་བྱ་བའི་ཕྱིར། །ཁམས་གསུམ་ནད་པ་གསོ་བའི་གཉེན་པོའི་རྫས། །བདུད་རྩི་ཆེན་པོ་པཉྩ་ཨ་མྲྀ་ཏ། །བླ་མེད་སྨན་པའི་ཚོགས་ལ་འབུལ་ལགས་ན། །འགྲོ་བའི་རིམས་ནད་གཅད་ཕྱིར་བཞེས་སུ་གསོལ། །ཉོན་མོངས་མ་རིག་ལས་ཀྱི་འཁྲུལ་པའི་དུག །འཇིག་རྟེན་སྐྱེ་ཤི་རྩད་ནས་གཅད་པའི་ཕྱིར། །དུང་ཆེན་དམར་གྱིས་བཀང་བའི་དམ་རྫས་འདི། །གཉིས་སུ་མེད་པའི་ཚུལ་གྱི་འབུལ་ལགས་ན། །བླང་དོར་མེད་པའི་ངང་གིས་བཞེས་སུ་གསོལ། །ཡིད་ལ་གདུང་བའི་རིག་པ་འཕྲེང་བའི་ཕྱིར། །ཡབ་ཡུམ་ཐབས་དང་ཤེས་རབ་ཡེ་འདྲེལ་ཡང་། །ཟླ་གམ་འདུ་འབྲལ་མེད་པའི་མཆོད་པ་འདི། །གཉིས་སུ་མེད་པའི་ཚུལ་གྱིས་འབུལ་ལགས་ན། །བླང་དོར་མེད་པའི་ངང་གིས་བཞེས་སུ་གསོལ། །རང་རྒྱུད་བཤིག་པའི་ཕུང་པོ་རྡོས་པ་ཅན། །བདག་མེད་རྒྱལ་བའི་ཞིང་དུ་སྦྱོར་བའི་ཚེ། །ཞིང་ཆེན་རྫས་ཀྱི་མཆོད་པ་དམ་པ་འདི། །གཉིས་སུ་མེད་པའི་ཚུལ་གྱིས་འབུལ་ལགས་ན། །བླང་དོར་མེད་པའི་ངང་དུ་བཞེས་སུ་གསོལ། །ཨཱོཾ་རུ་རུ་པ་ཏི་མ་ཧཱ་སུ་ཁ་སིདྡྷི་ཨ་ལ་ལ་ཧོ། མ་ཧཱ་ཡོ་གི་ནི་ཁ་རཾ། མ་ཧཱ་ཏ་ཀི་ནི་ཁ་རཾ། ཁ་ཁ་ལེ་ལེ་ཧྲཱྀཿབྷྱོ། སརྦ་པཉྩ་ཨ་མྲྀ་ཏ་ཁཱ་ཧི་ཁཱ་ཧི། དབང་ཆེན་བསྡུས་
པའི་ཏནྟྲ་ལས། མཉེས་པ་མཆོད་པ་ལྔས་མཆོད་པའི་ལེའུ་སྟེ་ཉེར་གཅིག་པའོ།། །།ད་ནི་རྟོགས་པས་བདག་བསྒྲལ་གྱི་མཆོད་པ་འབྱུང་སྟེ་འདི་སྐད་དོ། །ཧཱུཾ།ཁམས་གསུམ་རྒྱུ་དྲུག་བསྒྲལ་བའི་དོན་སླད་དུ། །སྔོན་གྱི་རྒྱལ་བས་ཐུགས་དམ་བཞེས་པ་ནི། །ལོག་རྟོག་འཁྲུལ་པའི་ཞེན་པ་བཟློག་པ་དང་། །སྐྱེ་འཆི་འཁོར་བའི་འདམ་ནས་དབྱུང་བའི་ཕྱིར། །རྟོགས་པས་བདག་བསྒྲལ་བསམ་དང་ལྡན་པ་ཡིས། །ཐུགས་རྗེ་ཆེན་པོས་བཟུང་ནས་གཞན་བསྒྲལ་རྣམས། །སྙིང་པོ་བྱང་ཆུབ་སེམས་སུ་དགོད་པའི་ཕྱིར། །རབ་འབྱམས་སྲིད་པའི་འཇིག་རྟེན་མ་ལུས་ཀུན། །སྐད་ཅིག་ཆ་ལ་ཏིང་འཛིན་གྱིས། །ཤེས་རབ་ཟབ་མོ་ཡུམ་གྱི་མཁའ་དབྱིངས་སུ། །སྔགས་དང་ཕྱག་རྒྱའི་སྨོན་ལམ་མཐུ་སྟོབས་ཀྱིས། །རྒྱལ་བའི་སྲས་སུ་འབྲས་བུ་གྲུབ་པར་བསྔོ། །ཤ་ཁྲག་དྲོད་དང་དབུགས་ཀྱི་ཚོགས་ལ་སོགས། །ས་ཆུ་མེ་རླུང་འབྱུང་བ་ཆེན་པོ་བཞི། །ཤེས་རབ་ཡུམ་གྱི་པདྨར་རབ་བསྡིམས་པས། །དགྱེས་པར་རོལ་པའི་དམ་རྫས་བདུད་རྩི་འདིས། །སྐུ་གསུང་ཐུགས་ཀྱི་ཐུགས་དམ་བསྐང་གྱུར་ཅིག །གཟུགས་དང་ཚོར་བ་འདུ་ཤེས་བྱ་བྱེད་རྣམས། །ཕུང་པོ་ལྔ་ཡི་འཁོར་དང་བཅས་པ་རྣམས། །བདེ་གཤེགས་རིགས་ལྔའི་ཐུགས་སུ་རབ་བསྡིམས་པས། །དགྱེས་པར་རོལ་པའི་དམ་རྫས་བདུད་རྩི་འདིས། །སྐུ་གསུང་ཐུགས་ཀྱི་ཐུགས་དམ་བསྐང་གྱུར་ཅིག །ཁམས་དང་སྐྱེ་མཆེད་འདུ་བྱེད་མང་པོ་རྣམས། །རྟ་མཆོག་འབར་བའི་ཚོགས་སུ་རབ་བསྡིམས་པས། །དགྱེས་པར་རོལ་པའི་དམ་རྫས་བདུད་རྩི་འདིས། །སྐུ་གསུང་ཐུགས་ཀྱི་ཐུགས་དམ་བསྐང་གྱུར་ཅིག །ཀུན་གཞི་ཡིད་དང་ཉོན་མོངས་སྒོ་ལྔའི་འཁོར། །རྣམ་པར་ཤེས་པ་འཁོར་དང་བཅས་པ་འདི། །མཁྱེན་རབ་ཡེ་ཤེས་ཚོགས་སུ་རབ་བསྡིམས་པས། །དགྱེས་པར་རོལ་པའི་དམ་རྫས་བདུད་རྩི་འདིས། །སྐུ་གསུང་ཐུགས་ཀྱི་ཐུགས་དམ་བསྐང་གྱུར་ཅིག །མིག་དང་རྣ་བ་སྣ་དང་ལྕེ་ཡི་ཚོགས། །དབང་པོ་ལྔ་ཡི་འཁོར་དང་བཅས་པ་འདི། །སྤྲུལ་པ་རྒྱ་མཚོའི་ཚོགས་སུ་རབ་བསྡིམས་པས། །དགྱེས་པར་རོལ་པའི་
དམ་རྫས་བདུད་རྩི་འདིས། །སྐུ་གསུང་ཐུགས་ཀྱི་ཐུགས་དམ་བསྐང་གྱུར་ཅིག །གཟུགས་དང་སྒྲ་དང་དྲི་དང་རོ་རེག་ཆོས། །འདོད་པ་ལྔ་ཡི་འཁོར་དང་བཅས་པ་འདི། །རྡོ་རྗེ་གཤོག་པའི་ཚོགས་སུ་རབ་བསྡིམས་པས། །དགྱེས་པར་རོལ་པའི་དམ་རྫས་བདུད་རྩི་འདིས། །སྐུ་གསུང་ཐུགས་ཀྱི་ཐུགས་དམ་བསྐང་གྱུར་ཅིག །འདོད་ཆགས་ཞེ་སྡང་གཏི་མུག་ང་རྒྱལ་ཕྲག་དོག་ཆེ། །ཉོན་མོངས་ལྔ་ཡི་འཁོར་དང་བཅས་པ་འདི། །ཁྲོ་རྒྱལ་འབར་བའི་ཚོགས་སུ་རབ་བསྡིམས་པས། །དགྱེས་པར་རོལ་པས་དམ་རྫས་བདུད་རྩི་འདི། །སྐུ་གསུང་ཐུགས་ཀྱི་ཐུགས་དམ་བསྐང་གྱུར་ཅིག །གཟུགས་ཀྱི་ཁོག་སྟོང་དུར་ཁྲོད་གཞལ་ཡས་སུ། །ནམ་མཁའི་མཐའ་དང་མཉམ་པར་རབ་སྤྲུལ་ནས། །རྒྱལ་བ་ཡབ་ཡུམ་སྲས་དང་བཅས་པ་འདི། །བཞུགས་གནས་དམ་པར་དམིགས་ཏེ་འབུལ་ལགས་ན། །ཕོ་བྲང་བླ་མེད་ཐུགས་དམ་བསྐང་གྱུར་ཅིག །ནང་ཁྲོལ་གློ་སྙིང་མཁལ་མ་མཆིན་པ་དང་། །རྒྱུ་ལོང་ལ་སོགས་སྣོད་དང་བཅས་པ་འདིས། །དུར་ཁྲོད་འབྱུང་བའི་དཀྱིལ་འཁོར་ཆེན་པོར་བསྔོ། །ཐབས་ལ་མཁས་པས་བྱིན་གྱིས་བརླབས་ནས་ཀྱང་། །སྒོ་སྐྱོང་འཁོར་བཅས་ཐུགས་དམ་བསྐང་གྱུར་ཅིག །པགས་ཆེན་གཡང་གཞི་སྡུག་བསྔལ་གསོབ་ཀྱི་ཚོགས། །ཁྲོ་རྒྱལ་གིང་གི་ན་བཟར་རབ་སྤྲུལ་ནས། །བཀྲ་ཤིས་ཆེན་པོར་བྱིན་གྱིས་བརླབས་ནས་ནི། །གླང་ཆེན་ཀོ་རློན་བརྗིད་དུ་ཆེ་བ་དང་། །སྟག་ཆེན་ཤམ་ཐབས་དཔའ་བར་ལྡན་པ་དང་། །ཞིང་ལྤགས་རློན་པ་ཐབས་ལ་མཁས་པ་ཡི། །ན་བཟའ་རྒྱན་གྱིས་ཐུགས་དམ་བསྐང་གྱུར་ཅིག །ཨ་ལ་ལ་ཧོ། ཨ་ཏི་པུ་ཧོ། པྲ་ཏི་པུ་ཧོ། དབང་ཆེན་བསྡུས་པའི་ཏནྟྲ་ལས། རྟོགས་པས་བདག་བསྒྲལ་གྱི་ལེའུ་སྟེ་ཉེར་གཉིས་པའོ།། །།ད་ནི་ཐུགས་རྗེ་ཆེན་པོས་ཁམས་གསུམ་ཡོངས་བསྒྲལ་གྱི་མཆོད་པ་དབུལ་བ་འབྱུང་སྟེ་འདི་སྐད་དོ། །ཧཱུཾ། ཁམས་གསུམ་ཡོངས་སྒྲོལ་མཛད་པའི་ཤ་ཁྲག་ལ། །གཏུམ་ཆེན་མེ་ལྟར་འབར་བའི་གཞལ་ཡས་སུ། །གདུག་པའི་འཁོར་དང་ཕྲ་མེན་སྲིན་མོའི་ཚོགས། །
གཅན་གཟན་དོམ་དྲེད་ཝ་སྤྱང་མང་པོ་འབྱུང་། །ཟ་བྱེད་མཆེ་བ་དར་མས་དཀར་དང་དམར་ལ་རོལ། །ནང་ཆ་དོན་སྙིང་ཐོད་ཁྲག་དབང་པོའི་ཚོགས། །འཇིག་རྟེན་སྲིད་པའི་དོན་སྙིང་སྔོན་གྱི་ལུགས་བཞིན་འབུལ། །མི་མཇེད་སྟོང་གི་གནས་མཆོག་དམ་པ་རུ། །ཚངས་པ་ཁྱོ་ཤུག་བསྒྲལ་བའི་ཕུང་པོ་ཡིས། །དཔལ་ཆེན་སྤྱན་གྱི་ཐུགས་དམ་བསྐང་གྱུར་ཅིག །དགའ་བྱེད་བསྟེན་པས་མྱོས་པའི་འཇིག་རྟེན་ན། །སུམ་ཅུ་རྩ་གསུམ་ལྷ་དབང་དབང་བསྒྱུར་གཙོ། །བརྒྱ་བྱིན་ཁྱོ་ཤུག་བསྒྲལ་བའི་ཕུང་པོ་ཡིས། །དཔལ་ཆེན་ཞལ་གྱི་ཐུགས་དམ་བསྐང་གྱུར་ཅིག །གཞན་འཕྲུལ་དབང་བྱེད་བསོད་ནམས་གྲུབ་པའི་མཐུས། །བདུད་ཀྱི་རྒྱལ་པོ་ཁྱོ་ཤུག་བསྒྲལ་བའི་ཕུང་པོ་ཡིས། །དཔལ་ཆེན་མཆེ་བའི་ཐུགས་དམ་བསྐང་གྱུར་ཅིག །ལྟ་བ་ལོག་པར་རྟོགས་པའི་མུ་སྟེགས་ལྷ། །མ་ཧཱ་དེ་བ་ཁྱོ་ཤུག་བསྒྲལ་བའི་ཕུང་པོ་ཡིས། །དཔལ་ཆེན་ཤངས་ཀྱི་ཐུགས་དམ་བསྐང་གྱུར་ཅིག །འཇིག་རྟེན་དུག་གསུམ་དབང་གིས་མྱོས་པའི་ལྷ། །ཞེ་སྡང་སྲིན་པོ་ཁྱོ་ཤུག་བསྒྲལ་བའི་ཕུང་པོ་ཡིས། །རྟ་མགོ་ལྗང་གུའི་ཐུགས་དམ་བསྐང་གྱུར་ཅིག །དུས་ངན་ལས་ཀྱི་མནར་བའི་འཁོར་བའི་ལྷ། །ཉི་ཟླ་གཟའ་སྐར་ཁྱོ་ཤུག་བསྒྲལ་བའི་ཕུང་པོ་ཡིས། །དཔལ་ཆེན་སྙན་གྱི་ཐུགས་དམ་བསྐང་གྱུར་ཅིག །རྣམ་སྨིན་ཞེ་སྡང་བརྡར་བའི་འཆི་བདག་ལྷ། །གཤིན་རྗེ་ཁྱོ་ཤུག་བསྒྲལ་བའི་ཕུང་པོ་ཡིས། །དཔལ་ཆེན་ཕྱག་གི་ཐུགས་དམ་བསྐང་གྱུར་ཅིག །འཇིག་རྟེན་ལས་ཀྱི་གྲུབ་པའི་མཐུ་བོ་ཆེ། །ཀླུ་ཆེན་ཁྱོ་ཤུག་བསྒྲལ་བའི་ཕུང་པོ་ཡིས། །དཔལ་ཆེན་གཤོག་པའི་ཐུགས་དམ་བསྐང་གྱུར་ཅིག །དུར་ཁྲོད་གསང་བའི་ལོངས་སྤྱོད་ཅི་འདྲ་བ། །ཏི་ར་གསར་རྙིང་ཞིང་ཆུང་ཚོགས་ལ་སོགས། །ཀེཾ་རུས་གནས་སུ་གྱུར་པའི་རི་རབ་ཀྱིས། །དཔལ་ཆེན་ཞབས་ཀྱི་ཐུགས་དམ་བསྐང་གྱུར་ཅིག །ཉོན་མོངས་ལྔ་དང་བཅས་པའི་ཕུང་པོ་ལྔ། །སྡུག་བསྔལ་ནད་དང་བཅས་པའི་འབྱུང་བ་བཞི། །འདོད་ཆགས་རྐྱེན་དང་བཅས་པའི་དབང་པོ་ལྔ། །སྐུ་ལྔ་
ཆོས་ལྔ་དབྱེར་མེད་ཡེ་ཤེས་ལྔ། །ཀུན་ཏུ་བཟང་མོ་མཁའ་དབྱིངས་བདེ་བ་ལ། །མཉམ་ཉིད་དོན་གྱིས་དབྱིངས་ནས་བཞེས་སུ་གསོལ། །སྐུ་གསུང་ཐུགས་ཀྱི་བདེ་བ་མཆོག་སྐྱེད་ཅིག །ཨོཾ་ཨཱཿཧཱུཾ། དགྱེས་པ་ཆེན་པོ་དམ་ཚིག་མཆོག་ལ་རོལ་ཅིག་ས་མ་ཡ། །བཞད་པའི་གད་མོས་འབྲུག་སྟོང་སྒྲོགས་ཤིག་ཧ་ཧ་ཧེ། །ཧ་ཧ་ཧེ། གནོད་པའི་འབྱུང་པོ་ཟ་བྱེད་ཚོགས་སུ་བསྟབ་པོ་མ་ཏང་ཁ་མ་ཏང་ཁ། །སྡང་བའི་དགྲ་བགེགས་ཚུལ་བཞིན་དྲོངས་ཤིག་ཀ་རུཀྴ་ཀ་རུཀྴ། །དབྱིངས་ཀྱི་བདེ་བ་འབུལ་ལོ་མལ་ལུ་ཕེ་ཁཱ་ཧི། །ཀུན་རྫོབ་ཆོ་འཕྲུལ་བསྐྱེད་ཅིག་ཧ་ལེ་ཧུ་ལེ་ཁཱ་ཧི། །ཤེས་རབ་ཐབས་སུ་རོལ་ཅིག་མ་ཙེ་མེ་ཙ་ཁཱ་ཧི། །ཡབ་ཡུམ་ཟུང་དུ་འཁྲིལ་ཏེ་རཀྟ་རུག་ཏི་ཁཱ་ཧི། །འཇིགས་བྱེད་དཀྱིལ་འཁོར་བསྐྱེད་ཅིག་ཀྲོ་ཏ་ཤམ་བྷ་རི། །ཐུགས་དམ་ཆེན་པོ་སྐོངས་ཤིག་ཨ་ལ་ལ་ཧོ། །དངོས་གྲུབ་དབྱིག་མཆོག་སྩོལ་ཅིག །བསམ་པ་རྒྱ་མཚོ་སྒྲུབས་ཤིག །བདུད་དཔུང་ཆེན་པོ་ཆོམ་ཞིག །དགྲ་དཔུང་ཆེན་པོ་ཆོམ་ཞིག །ཨ་ལ་ལ་ཧོ། དབང་ཆེན་བསྡུས་པའི་ཏནྟྲ་ལས། ཐུགས་རྗེས་ཁམས་གསུམ་ཡོངས་སྒྲོལ་གྱི་ལེའུ་སྟེ་ཉེར་གསུམ་པའོ།། །།ད་ནི་མཉེས་པའི་མཆོད་པའི་ལེའུ་ལས་སྤྱི་དོན་བདུན་པ། བཅོལ་པ་ཕྲིན་ལས་ཀྱི་ལེའུ་འབྱུང་སྟེ་འདི་སྐད་དོ། །དུས་མཐའི་བསྐལ་པ་མེ་ལྟར་འབར་བའི་ཀློང་རུམ་ནས། །ཟ་བྱེད་ཁྲག་འཐུང་ལེ་བརྒན་འབར་བའི་སྐུ། །དབང་གི་རྟ་གདོང་ཕྲིན་ལས་ལྗང་གུ་ནི། །འོད་ཀྱི་གཟི་བྱིན་ནམ་མཁའི་མདངས་སུ་ཆེ། །སྤྱན་གྱི་གཟིགས་ཐབས་ཕྲིན་ལས་རྣམ་བཞི་ནི། །སྡང་མིག་ལོག་པའི་སྤྱན་དམར་བཟློག་པ་ནི། །ང་མེད་བདག་ཏུ་ལྟ་བའི་ཁྲོ་བོ་ཀུན། །ཕྱོགས་མེད་ཟིལ་གྱིས་མནན་པར་ཐུགས་དམ་བསྐུལ། །ཟུར་མིག་འཕྲེད་ཀྱི་གཟིགས་ཐབས་བསྟན་པ་ནི། །གསང་བ་ཡུམ་གྱི་ཚོགས་ཆེན་མ་ལུས་ཀུན། །གདུང་བའི་ཚུལ་གྱིས་སྐུ་ལ་འཁྲིལ་བ་དང་། །ཟླ་གམ་འོད་ཀྱི་འཕྲོ་འདུ་འབུལ་བ་དང་། །བྷ་གའི་གནས་སུ་ལིངྒ་བསྟེན་པའི་ཕྱིར། །ཐོགས་མེད་ཟིལ་གྱིས་མནན་པར་ཐུགས་དམ་བསྐུལ། །ངན་སོང་ཡོངས་སུ་སྦྱོང་བའི་གཟིགས་ཐབས་
ཀྱིས། །ལོག་འདྲེན་གཏན་དུ་འཁྱམས་པའི་ཡི་དྭགས་དང་། །གཏི་མུག་ཡུན་དུ་རྨོངས་པའི་བྱོལ་སོང་གཉིས། །སྡུག་བསྔལ་བཟོད་པར་དཀའ་བའི་དམྱལ་བ་གསུམ། །ཐར་ལམ་ཡང་དག་གནས་སུ་བསྒྲལ་བའི་ཕྱིར། །འཁོར་བ་གཡུལ་བཟློག་ཕྲིན་ལས་ཐུགས་དམ་བསྐུལ། །དགྱེས་མདངས་ཞི་བའི་གཟི་མདངས་བསྟན་པས་ནི། །སྲིད་པ་རབ་འབྱམས་འཇིག་རྟེན་མ་ལུས་ཀུན། །ཕྱོགས་མེད་དབྱིངས་ཀྱིས་ཟིལ་གྱིས་མནན་པ་དང་། །ཞེ་སྡང་ཁྲོ་གཏུམ་གཞིལ་བར་ཐུགས་དམ་བསྐུལ། །སྙན་གྱི་ཁྲོ་རྒྱལ་དུང་གི་ཁོང་གསེང་ནས། །གསན་པ་མ་འགགས་ཆོས་ཉིད་སྒྲ་དབྱངས་ཀྱིས། །ཉོན་མོངས་སྒྲ་རྣམས་དབྱིངས་སུ་དབང་བསྒྱུར་ཞིང་། །དམིགས་པ་མ་ཆད་སྣ་ཚོགས་སྒྲ་ལ་སོགས། །སྒྲ་མཐའ་ཇི་བཞིན་གོ་བར་ཐུགས་དམ་བསྐུལ། །གཞན་གྱི་སྙན་དང་ཐུན་མོང་མ་ལགས་ཏེ། །ཡེ་ཤེས་སྙན་གྱིས་འབོད་སྒྲོགས་མང་པོ་གསོན། །ཐུགས་རྗེའི་སྙན་གྱིས་ཉམ་ཐག་སྒྲ་ལ་གསོན། །ཐབས་ཀྱི་དབྱངས་ལ་བསྐུལ་བའི་དབྱངས་ལ་གསོན། །ཕྱི་ནང་གསང་བའི་སྙན་གསུམ་རྫོགས་པ་ཡིས། །ཇི་སྐད་བསྐུལ་བར་གསན་པའི་ཐུགས་དམ་བསྐུལ། །ཤངས་ནི་ཁྲོ་རྒྱལ་འབར་བའི་ཀློང་རུམ་ནས། །དུག་ལྔ་གསོད་པའི་མཚོན་ལྔ་ཡེ་ཤེས་སྐུ། །ཁམས་གསུམ་བསྒྲལ་བའི་ཕྲིན་ལས་བཅོལ་བ་ནི། །ཨཱཾ། འདོད་ཆགས་དབང་བསྒྱུར་དྲི་མེད་པདྨའི་སྐུ། །ཆགས་པའི་སྐྱོན་རྣམས་སྦྱང་བར་ཐུགས་དམ་བསྐུལ། །ཧཱུཾ། ཞེ་སྡང་དབང་བསྒྱུར་སྐྱེ་མེད་རྡོ་རྗེའི་སྐུ། །སྡུག་བསྔལ་ཕུང་པོ་བཤིག་པར་ཐུགས་དམ་བསྐུལ། །ཨཱོཾ། གཏི་མུག་དབང་བསྒྱུར་ཡེ་ཤེས་འཁོར་ལོའི་སྐུ། །མ་རིག་རྨོངས་པ་བསལ་བར་ཐུགས་དམ་བསྐུལ། །སྭཱ། ང་རྒྱལ་དབང་བསྒྱུར་ཡིད་བཞིན་རིན་ཆེན་སྐུ། །དྲེགས་པའི་རྒྱལ་པོ་བཤིག་པར་ཐུགས་དམ་བསྐུལ། །ཧཱ། ཕྲག་དོག་དབང་བསྒྱུར་བདེ་ཆེན་གར་གྱི་སྐུ། །སྐྱེ་འཆི་རྩད་ནས་གཅོད་པར་ཐུགས་དམ་བསྐུལ། །ཞལ་ནི་ཁྲོ་རྒྱལ་འབར་བའི་ཀློང་རུམ་ན། །ཧོམ་ལྔར་འདྲེལ་བའི་སྦྱིན་བསྲེག་ཆེན་པོ་མཛད། །ཟ་བྱེད་ཁྲོ་བོའི་དཀྱིལ་འཁོར་
མ་ལུས་ཀུན། །དུག་གསུམ་བཟའ་བའི་མགྲོན་དུ་སྤྱན་འདྲེན་ནོ། །རྒྱུ་དྲུག་གཏོར་མར་བཞེས་པའི་ཐུགས་དམ་བསྐུལ། །པདྨ་ལེ་བརྒན་ཅིར་ཡང་འགྱུར་བའི་ལྗགས། །ཟླ་གམ་འཕྲོ་འདུ་དབྱིངས་སུ་འགྱུར་བའི་གསུང་། །དྲི་མེད་རྒྱལ་བའི་གསུང་རབ་བདུད་རྩིའི་ཆར། །བདེ་ཆེན་ཆུ་བོའི་རྒྱུན་ལྟར་སྤྲོ་བར་ཐུགས་དམ་བསྐུལ། །ཐུགས་ནི་ཁྲོ་རྒྱལ་ཕྲ་བར་བསྒོམ་པའི་ལྷ། །ཕྲ་མོའི་ཏིང་འཛིན་ཡེ་ཤེས་ཧེ་རུ་ཀ །རྡུལ་གཅིག་སྟེང་ན་རྡུལ་སྙེད་སྐུར་སྤྲུལ་ཞིང་། །ཆོས་ཉིད་དབྱིངས་ཀྱིས་བསྡུས་པའི་འཇིག་རྟེན་ན། །མ་རིག་རྨོངས་པས་ལྡོངས་པའི་སྐྱེ་འགྲོ་དང་། །རྣལ་འབྱོར་དམ་ལ་གནས་པའི་སྒྲུབ་པ་པོ། །ཐོག་མ་མེད་པའི་དུས་ནས་འཁོར་བའི་རྒྱུ། །གཟུང་འཛིན་སྐྱོན་གྱི་བག་ཆགས་མ་ལུས་ཀུན། །གཏན་ནས་སྦྱང་བར་ཐུགས་དམ་ཆེན་པོ་བསྐུལ། །སྐུ་ནི་ཁྲོ་རྒྱལ་རྔོམ་བརྗིད་བསྒྱིངས་པའི་ལྷ། །ཐོད་སྦྲུལ་མེ་ལྟར་འབར་བའི་ཧཱུཾ་སྒྲ་ཅན། །ཞག་ཆེན་ཐིག་ལེ་དམར་ཆེན་ཚོམ་བུས་བརྒྱན། །སྤྲུལ་པ་རྒྱ་མཚོ་འཁྲིགས་པའི་སྤྲིན་ཚོགས་ལ། །འདོད་ཆགས་ཞེ་སྡང་གཉིད་ཀྱིས་རྨོངས་པ་རྣམས། །གདུག་པ་མ་ལུས་འདུལ་བར་ཐུགས་དམ་བསྐུལ། །ཕྲིན་ལས་རྒྱན་གྱི་ཐུགས་དམ་བསྐུལ་བ་ནི། །ཐུགས་དམ་དབང་གི་ལོག་འདྲེན་འདུལ་བའི་ཕྱིར། །དབུ་རྒྱན་ཚོགས་ལ་ཐུགས་དམ་བསྐུལ་བ་ནི། །དབང་རྣམས་རྫོགས་པའི་ཕྲིན་ལས་འགྲུབ་པར་མཛོད། །རྟ་མཆོག་ཚོགས་ལ་ཐུགས་དམ་བསྐུལ་བ་ནི། །སྲིན་པོ་འདུལ་བའི་ཕྲིན་ལས་འགྲུབ་པར་མཛོད། །ཡེ་ཤེས་ཚོགས་ལ་ཐུགས་དམ་བསྐུལ་བ་ནི། །ཐབས་ལ་མཁས་པ་གསང་བའི་ཐུགས་དམ་འགྲུབ་པར་མཛོད། །ཕྱག་མཚན་ཚོགས་ལ་ཐུགས་དམ་བསྐུལ་བ་ནི། །དུར་ཁྲོད་གཞོམ་པའི་ཕྲིན་ལས་འགྲུབ་པར་མཛོད། །གཤོག་པའི་ཚོགས་ལ་ཐུགས་དམ་བསྐུལ་བ་ནི། །ཀླུ་ཆེན་འདུལ་བའི་ཕྲིན་ལས་འགྲུབ་པར་མཛོད། །ཞབས་ཀྱི་ཚོགས་ལ་ཐུགས་དམ་བསྐུལ་བ་ནི། །གཟིར་གནོན་བགྲད་པའི་ཕྲིན་ལས་འགྲུབ་པར་མཛོད། །གཟི་ལྡན་ཚོགས་ལ་ཐུགས་དམ་བསྐུལ་བ་ནི། །
ཚེ་གནས་གསང་བའི་ཕྲིན་ལས་འགྲུབ་པར་མཛོད། །དཔལ་ཆེན་ཚོགས་ལ་ཐུགས་དམ་བསྐུལ་བ་ནི། །ལྷུན་གྱིས་རྫོགས་པའི་ཕྲིན་ལས་འགྲུབ་པར་མཛོད། །ཨཱོཾ་ཡེ་ཤེས་ལྔ་ལས་སྤྲུལ་ཅིག་ཨ་ལ་ལ། །གྷུ་ཧྱ་གསང་བའི་ཚིག་ཏུ་སྡུས་ཤིག་ཨ་ལ་ལ། །སྭ་སྡི་གྲུབ་པ་མང་པོ་ཚོགས་ལ་རོལ་ཅིག་ཨ་ལ་ལ། །ཡོ་གི་ནཱི་རྣལ་འབྱོར་མང་པོའི་ཚོགས་སུ་སྡུས་ཤིག་ཨ་ལ་ལ། །ཧྲཱིཾ་ཧྲཱིཾ་སྔོན་གྱི་འབོད་པའི་བརྡ་སྐད་ལགས་པ་ཨ་ལ་ལ། །བྷྱོ་བྷྱོ་ཕྲིན་ལས་བཅོལ་བ་བརྡ་སྐད་མང་པོ་ཨ་ལ་ལ། །ཁ་ཁ་ཁ་ལེ་ལེ་བྷྱོ་ཞལ་དུ་བསྟབ་པ་ལགས་པ་ཛྙཱ་ན་སིདྡྷི་བྷྱོ། གཉིས་སུ་མེད་པར་སྦྱོར་ཅིག་སྟ་ན་སིདྡྷི་བྷྱོ། སྐྱེ་འཆི་མེད་པར་སྒྲོལ་ཅིག་ཡཀྴ་སིདྡྷི་བྷྱོ། སྲིན་པོ་མ་ལུས་སྒྲོལ་ཅིག་ཡཀྴ་སིདྡྷི་བྷྱོ། གནོད་སྦྱིན་མ་ལུས་སྒྲོལ་ཅིག །ཐུགས་དམ་སྐོངས་ཤིག །དངོས་གྲུབ་སྩོལ་ཅིག །ཨ་ལ་ལ་ཧོ། དབང་ཆེན་བསྡུས་པའི་ཏནྟྲ་ལས། བཅོལ་པ་ཕྲིན་ལས་ཀྱི་ལེའུ་ཞེས་བྱ་སྟེ་ཉི་ཤུ་རྩ་བཞི་པའོ།། །།ཡེ་ཤེས་ཆོས་ཉིད་མཉམ་པ་ལ། །བྱ་བ་བྱེད་པར་མི་དམིགས་ཀྱང་། །སྐུ་གསུམ་ཕྱག་རྒྱར་བརྟག་པའི་ཕྱིར། །ཕྲིན་ལས་ཕྱག་རྒྱ་ལེའུ་འདི་གསུངས་སོ། །ལག་པ་གཡས་པའི་སོར་མོ་ལ། །ཡབ་ལྔའི་དཔའ་བོ་འབྲུ་ལྔ་དགོད། །ལག་པ་གཡོན་པའི་སོར་མོ་ལ། །ཡུམ་ལྔའི་དཔའ་མོ་འབྲུ་ལྔ་དགོད། །ཡབ་ཡུམ་གཉིས་མེད་སྦྱོར་བ་ལས། །རིགས་ལྔའི་ཕྱག་རྒྱ་འབྱུང་བའི་རྒྱུ། །གཡོན་གྱི་རྡོ་རྗེ་ཁུ་ཚུར་ནང་། །གཡས་ཀྱི་མཛུབ་མོ་བཅུག་ནས་ནི། །སྙིང་གར་བཞག་སྟེ་བསྒོམ་པ་ནི། །རྣམ་སྣང་དཔལ་གྱི་ཕྱག་རྒྱའོ། །གཡས་པའི་ཐལ་མོ་སྙིང་གར་བརྐྱང་། །གཡོན་གྱི་ཐལ་མོ་ས་ལ་གཏུགས། །མི་འཁྲུགས་པ་ཡི་ཕྱག་རྒྱའོ། །གཡས་ཀྱི་ཐལ་མོ་སྙིང་གར་བརྐྱང་། །གཡོན་གྱི་ཐལ་མོ་བཀན་ནས་བརྐྱང་། །སྦྱིན་པའི་ཚུལ་དུ་སྟོན་པ་ནི། །རིན་ཆེན་འབྱུང་བའི་ཕྱག་རྒྱའོ། །ལག་པ་གཡས་ཀྱིས་གཡོན་མནན་ནས། །སྙིང་གར་བཞག་སྟེ་བསྒོམ་པ་ནི། །འོད་དཔག་མེད་པའི་ཕྱག་རྒྱའོ། །གཡོན་གྱི་ཐལ་མོ་སྙིང་གར་བརྐྱང་། །གཡས་པས་སྐྱོབ་པ་ལྟར་བྱེད་
པ། །གདོན་མི་ཟ་བའི་ཕྱག་རྒྱའོ། །ལག་གཉིས་རྡོ་རྗེ་བསྡམས་པ་ལས། །གུང་མོ་མཐེའུ་ཆུང་རྩེ་སྦྱར་ནས། །མཛུབ་གཉིས་ལྕགས་ཀྱུ་ལྟར་བཀུག་སྟེ། །མཐེ་བོང་ཕྲལ་ནས་བསྒྲེང་བ་ནི། །རྟ་གདོང་ཞལ་གྱི་ཕྱག་རྒྱའོ། །ལག་གཉིས་རྡོ་རྗེ་བསྡམས་པ་ལས། །མཛུབ་གཉིས་ལྕགས་ཀྱུ་ལྟར་བཀུག་ནས། །བསྐུལ་ཞིང་འདྲེན་པ་ལྟར་བྱེད་པ། །རིག་བྱེད་ལྕགས་ཀྱུའི་ཕྱག་རྒྱའོ། །ལག་གཉིས་རྒྱབ་སྦྱར་སྲིན་ལག་བསྒྲེང་། །མཐེ་བོང་གུང་མོ་སོ་སོར་སྦྱར། །ལུ་གུ་རྒྱུད་ཀྱི་ཞགས་པའོ། །ལག་གཉིས་མཐེ་བོང་སྦྲེལ་བ་ལས། །ལྷག་མ་ལོ་མ་ལྟར་བརྐྱངས་ཏེ། །སྟ་ཟུར་གཡས་གཡོན་བརྐྱང་བ་ནི། །ཁྱུང་ཆེན་གཤོག་པའི་ཕྱག་རྒྱའོ། །ལག་གཉིས་ཐེ་བོང་སྦྲེལ་ནས་ནི། །གཡས་ཀྱི་སོར་མོ་བསྐུམ་བྱས་ནས། །གཡོན་པ་བརྐྱང་སྟེ་ཐུར་དུ་བཙུགས། །བརྐྱང་བསྐུམ་ཕུར་པའི་ཕྱག་རྒྱའོ། །ལག་པ་གཡས་གཡོན་ཐལ་མོ་སྦྱར། །རྩེ་བསྣོལ་གདུགས་ཕུབ་ལྟར་བྱས་ལ། །དམ་ཚིག་སྦྱོར་བའི་ཕྱག་རྒྱའོ། །ལག་པ་གཡས་གཡོན་གར་བསྒྱུར་ཞིང་། །ཁ་ནས་སྔགས་དང་ཚིག་ཟློས་པ། །གླུ་བྲོ་གར་གྱི་ཕྱག་རྒྱའོ། །ལག་པ་གཡས་པའི་སོར་མོ་བརྐྱང་། །གཡོན་གྱི་སོར་མོ་ཕྱེད་སླེབ་སྦྱར། །སྤྱི་བོར་བཞག་སྟེ་ཕྱག་བྱས་པ། །སྤྱི་གཙུག་རྒྱལ་བའི་ཕྱག་རྒྱའོ། །རྐང་པ་གཡས་བསྐུམ་གཡོན་བརྐྱང་ནས། །ལག་པ་ཐལ་སྦྱར་ཕྱག་བྱས་པ། །བརྐྱང་བསྐུམ་སྲིན་པོའི་ཕྱག་རྒྱའོ། །ལག་པ་གཡས་གཡོན་སྙིང་གར་བསྣོལ། །མིག་གཉིས་བཙུམས་ནས་ཕྱག་བྱས་པ། །མི་གཡོ་བསམ་གཏན་ཕྱག་རྒྱའོ། །གཡས་པའི་ཐལ་མོ་སྙིང་གར་སྦྱར། །གཡོན་གྱི་ཐལ་མོ་སྨིན་ཕྲག་བསྒྲེང་། །མ་མོ་འཛུམ་པའི་ཕྱག་རྒྱའོ། །གཞོགས་གཡས་ས་ལ་བསྙེས་ནས་ནི། །ལག་གཉིས་ས་ལ་རྡེབས་པ་ནི། །ཀླུ་འབྲུག་འབྲོས་པའི་ཕྱག་རྒྱའོ། །རྐང་གཉིས་ལོང་བུ་སྦྱར་ནས་ནི། །ལག་གཉིས་ཐལ་སྦྱར་ཙོག་ཙོག་འདུག །དྲང་སྲོང་ཙོག་པུའི་ཕྱག་རྒྱའོ། །ལག་པ་གཡས་པའི་ཐལ་མོ་ལ། །མདངས་ཆེན་ཕྱུང་ནས་བལྟ་བ་ནི། །ལྷ་མོ་མདངས་ཀྱི་ཕྱག་རྒྱའོ། །ལག་པ་ཐལ་སྦྱར་ལུས་བཏུད་ནས། །གུས་པའི་སེམས་ཀྱིས་བསྐོར་བ་ནི། །
ཐལ་སྦྱར་མི་ཡི་ཕྱག་རྒྱའོ། །དབང་ཆེན་བསྡུས་པའི་ཏནྟྲ་ལས། མཉེས་པ་མཆོད་པའི་ལེའུ་ལ་བརྒྱད་ཀྱིས་བསྟན་པའི་ཐ་མ་ཕྲིན་ལས་ཁ་སྐོང་ཕྱག་རྒྱའི་ལེའུ་ཞེས་བྱ་སྟེ་ཉི་ཤུ་རྩ་ལྔ་པའོ།། །།བསྒོམ་ཁོག་རྩ་བའི་ལེའུ་རྣམས་ལས། །ཀུན་རྫོབ་ཆོ་འཕྲུལ་ཅིར་བསྟན་ཡང་། །སྐྱེ་མེད་དབྱིངས་སུ་གཅིག་པའི་ཕྱིར། །གསང་བ་མྱ་ངན་འདས་པའི་ལེའུ་འདི་གསུངས་སོ། །ཁམས་གསུམ་དབང་དུ་སྡུད་པའི་གཞལ་ཡས་ཁང་། །ནམ་མཁའི་མཐའ་མཉམ་ཆོ་འཕྲུལ་ཅིར་ཡང་སྟོན། །སྐྱེ་མེད་བྱང་ཆུབ་སེམས་ལས་མ་གཡོས་ཕྱིར། །གསང་བ་ཡུམ་གྱི་བྷ་གར་མྱ་ངན་འདས། །འགྱུར་མེད་འཇིགས་སྤངས་སེང་གེའི་ཁྲི་གཅལ་ནི། །དབང་ཕྱུག་མངར་བསྡུས་ཆོ་འཕྲུལ་ཅིར་སྟོན་ཡང་། །སྐྱེ་མེད་བྱང་ཆུབ་སེམས་ལས་མ་གཡོས་ཕྱིར། །གསང་བ་ཡུམ་གྱི་བྷ་གར་མྱ་ངན་འདས། །རིན་ཆེན་འབར་བའི་ཁྲི་རྐང་བཞི་སྣང་བས། །རིགས་བཞི་ཁྲག་འཐུང་ཆོ་འཕྲུལ་བཞིར་སྣང་ཡང་། །སྐྱེ་མེད་བྱང་ཆུབ་སེམས་ལས་མ་གཡོས་ཕྱིར། །གསང་བ་ཡུམ་གྱི་བྷ་གར་མྱ་ངན་འདས། །པདྨ་ལེ་བརྒན་ཁ་དོག་འབར་བ་ལས། །ཀུན་ཏུ་བཟང་མོའི་ཆོ་འཕྲུལ་ཅིར་སྟོན་ཡང་། །སྐྱེ་མེད་བྱང་ཆུབ་སེམས་ལས་མ་གཡོས་ཕྱིར། །གསང་བ་ཡུམ་གྱི་བྷ་གར་མྱ་ངན་འདས། །སྤྲུལ་སྐུ་ཉི་ཟླའི་དཀྱིལ་འཁོར་འབར་བ་ལས། །ཐབས་དང་ཤེས་རབ་ཆོ་འཕྲུལ་ཅིར་ཡང་སྟོན། །སྐྱེ་མེད་བྱང་ཆུབ་སེམས་ལས་མ་གཡོས་ཕྱིར། །གསང་བ་ཡུམ་གྱི་བྷ་གར་མྱ་ངན་འདས། །རང་སེམས་ཡི་གེ་ཧཱུཾ་གི་བྱིན་རླབས་ལས། །རྡོ་རྗེའི་སེམས་དཔའི་ཆོ་འཕྲུལ་ཅིར་སྣང་ཡང་། །སྐྱེ་མེད་བྱང་ཆུབ་སེམས་ལས་མ་གཡོས་ཕྱིར། །གསང་བ་ཡུམ་གྱི་བྷ་གར་མྱ་ངན་འདས། །ཡི་གེ་ཧཱུཾ་དྲུག་ཆོ་འཕྲུལ་ཆེན་པོ་ལས། །གར་དབང་ལྷ་ཡི་ཆོ་འཕྲུལ་ཅིར་སྣང་ཡང་། །སྐྱེ་མེད་བྱང་ཆུབ་སེམས་ལས་མ་གཡོས་ཕྱིར། །གསང་བ་ཡུམ་གྱི་བྷ་གར་མྱ་ངན་འདས། །བརྗིད་པའི་དབུ་རྒྱན་རིགས་ལྔའི་དཀྱིལ་འཁོར་ལས། །རྡོ་རྗེ་དབྱིངས་ཀྱི་ཆོ་འཕྲུལ་ཅིར་སྣང་ཡང་། །སྐྱེ་མེད་བྱང་ཆུབ་སེམས་ལས་མ་གཡོས་ཕྱིར། །
གསང་བ་ཡུམ་གྱི་བྷ་གར་མྱ་ངན་འདས། །སྲིན་པོ་འདུལ་བྱེད་རྟ་མགོ་ལྗང་གུ་ནི། །རྫུ་འཕྲུལ་མྱུར་མགྱོགས་ཆོ་འཕྲུལ་ཅིར་སྣང་ཡང་། །སྐྱེ་མེད་བྱང་ཆུབ་སེམས་ལས་མ་གཡོས་ཕྱིར། །གསང་བ་ཡུམ་གྱི་བྷ་གར་མྱ་ངན་འདས། །གསང་བ་ཐུགས་ཀྱི་དཔལ་བེའུའི་སྒྲོམ་བུ་ནས། །ཡེ་ཤེས་སེམས་པའི་ཆོ་འཕྲུལ་ཅིར་སྣང་ཡང་། །སྐྱེ་མེད་བྱང་ཆུབ་སེམས་ལས་མ་གཡོས་ཕྱིར། །གསང་བ་ཡུམ་གྱི་བྷ་གར་མྱ་ངན་འདས། །ཟ་བྱེད་དུར་ཁྲོད་ཕྱག་གི་གཞལ་ཡས་ནས། །ཏ་ཀྲྀཏ་ཕྲ་མེན་ཆོ་འཕྲུལ་ཅིར་སྣང་ཡང་། །སྐྱེ་མེད་བྱང་ཆུབ་སེམས་ལས་མ་གཡོས་ཕྱིར། །གསང་བ་ཡུམ་གྱི་བྷ་གར་མྱ་ངན་འདས། །རྫུ་འཕྲུལ་ཆེན་པོ་གཤོག་པའི་གཞལ་ཡས་ནས། །ཁམས་གསུམ་རྣམ་རྒྱལ་ཆོ་འཕྲུལ་ཅིར་སྣང་ཡང་། །སྐྱེ་མེད་བྱང་ཆུབ་སེམས་ལས་མ་གཡོས་ཕྱིར། །གསང་བ་ཡུམ་གྱི་བྷ་གར་མྱ་ངན་འདས། །གནོན་མཛད་ཡོངས་ཀྱི་དཀྱིལ་འཁོར་ཆེན་པོ་ལས། །འཇིགས་བྱེད་ཁྲོ་བོའི་ཆོ་འཕྲུལ་ཅིར་སྣང་ཡང་། །སྐྱེ་མེད་བྱང་ཆུབ་སེམས་ལས་མ་གཡོས་ཕྱིར། །གསང་བ་ཡུམ་གྱི་བྷ་གར་མྱ་ངན་འདས། །སྐུ་རྒྱན་དཔལ་གྱི་ཆས་སུ་བསྟན་པ་དང་། །ཐུགས་གཏེར་གསང་ཡུམ་སྐུ་ལ་འཁྲིལ་བ་གཉིས། །བཀའ་སྡོད་ཕོ་ཉའི་ཚོགས་སུ་བསྟན་པ་གསུམ། །གདུལ་བྱའི་བྱེ་བྲག་སོ་སོར་ཅིར་སྣང་ཡང་། །སྐྱེ་མེད་བྱང་ཆུབ་སེམས་ལས་མ་གཡོས་ཕྱིར། །གསང་བ་ཡུམ་གྱི་བྷ་གར་མྱ་ངན་འདས། །དབང་ཆེན་བསྡུས་པའི་ཏནྟྲ་ལས། གསང་བ་མྱ་ངན་འདས་པའི་ལེའུ་སྟེ་ཉི་ཤུ་རྩ་དྲུག་པའོ།། །།ཚེ་ལ་དབང་ཐོབ་རིག་འཛིན་རྣལ་འབྱོར་པས། །དབང་ཆེན་བསྡུས་པའི་ཏནྟྲ་ལས། །རོ་བསྲེགས་ཐལ་བ་བསྒྲུབ་པའི་ཕྱིར། །བསྡུས་ཏེ་གསུང་བའི་སྒྲུབ་ཐབས་འདི། །ཕུན་སུམ་ཚོགས་པ་ལྔར་ལྡན་ཞིང་། །ཡིད་དུ་འོང་བས་དམ་པ་བཙལ། །དང་པོ་ས་བླངས་བྱིན་གྱིས་བརླབས། །བརྟགས་པའི་གནས་སུ་མ་དྷལ་བྱ། །འདོམ་གང་གྲུ་བཞིར་ཁྱུད་ཀོར་བཅས། །སྟེང་དུ་རཀྟའི་གོ་མ་ཡེ། །ཆགས་པའི་དམ་ཚིག་སྔགས་ཀྱིས་བྱུག །དེ་ནས་མཚན་དང་ལྡན་པའི་ཡུམ། །ཁྲུས་བྱས་དར་ལྡན་རྒྱན་
གྱིས་བཀླུབ། །དུར་ཁྲོད་བཀའ་དང་མཐུན་པ་ཡིས། །གསང་བའི་ཐིག་སྐུད་བཀལ་ནས་ཀྱང་། །སྤྱི་བོར་བཞག་སྟེ་དབང་བསྐུར་ནས། །ཆགས་པ་ཆེན་པོར་མཆོད་པའི་སྔགས། །ལན་གསུམ་བཟླས་ཏེ་གཟི་ལྡན་དུ། །གྱུར་པར་དམིགས་ཏེ་དགྱེ་བར་བྱ། །ཟླ་གམ་ཁ་སྤྲོད་ཟླུམ་པོ་ལའི། །དཀྱིལ་དུ་ཧེ་ཞལ་གྲུ་གསུམ་ལ། །གྲུ་གང་ཁ་བསྐོར་འཕང་དུ་བརྩིག །ས་བོན་མགར་བའི་སོ་དོག་གམ། །ཡང་ན་སྣུམ་ཆེན་བསྲེག་པའི་ས། །ནག་པོ་ས་ལས་ཧེ་ཞལ་བྲི། །མུ་ལ་རཀྟ་ཟླ་གམ་དུ། །འོད་ཕུང་མཐའ་སྐོར་ཡུག་རྣམས་བསྔགས། །དམར་པོ་ཡོན་ཏན་དབང་དུ་སྡུད། །དེ་ཡི་དབུས་སུ་བསགས་པའི་རྫས། །དམར་པོ་དཔལ་དང་ལྡན་པའི་ཤིང་། །བཤུལ་ལ་སོགས་པའི་སྣུམ་པོ་བརྔོ། །ཧེ་ཡི་དབུས་སུ་ཡོངས་པས་བཤམས། །དེ་ཡི་འགྲམ་མམ་སྟེང་དག་ཏུ། །ཐོད་པ་རྣམ་གཉིས་ཧཱུཾ་དང་ལྡན། །འཕྲོ་འདུ་དམིགས་པའི་རྟེན་དུ་གཞག །མཐའ་སྐོར་མེ་རི་དམར་པོ་ལ། །ཕུར་པ་དང་ནི་རྫས་རྣམ་བཀྲམ། །མེ་སྔགས་བཏབ་སྟེ་གཞག་པར་བྱ། །གསང་བའི་གཟུངས་ཐག་དམར་པོས་བཅིངས། །ཟླ་གམ་སྟེང་དུ་ལོངས་སྤྱོད་བཀྲམ། །དེ་ནས་ཐལ་བ་བསྒྲུབ་པའི་ཕྱིར། །བམ་གྱི་རོ་ཡི་ས་ཕྱོགས་སུ། །མ་མོ་གོམ་པ་དྲུག་ཅུ་ཡིས། །རྡོ་རྗེའི་འགྲོས་སུ་སོང་ནས་ཀྱང་། །རྡོ་རྗེའི་དཔུང་གི་ས་ཕྱོགས་སུ། །བཅུ་དྲུག་རོལ་པའི་ཕོ་ཉ་དགྱེ། །བཀྲ་ཤིས་ཆེན་པོའི་རྟ་བྲོས་བསྐོར། །ཕྱུང་ནས་ཤུལ་དུ་དམིགས་པ་ཡང་། །ཁོ་བོ་རྫས་ལས་དམིགས་ནས་གདབ། །བྱང་ཤར་མཚམས་སུ་བཤིག་པ་ཡང་། །ལུ་གུ་རྒྱུད་ཀྱི་བྲིས་བསྐོར་ཏེ། །དུར་ཁྲོད་ལས་བདག་སྤྱན་དྲངས་ཏེ། །བཤིགས་ནས་མངོན་སྤྱོད་རོལ་པར་བསྒོམ། །སྙིང་ནི་དྲན་པའི་རྟེན་ཡིན་པས། །ཧེ་ཡི་སྟེང་དུ་གཞག་པར་བྱ། །བྷནྡ་དབང་པོ་ལྔ་ཡི་རྟེན། །ཕྲལ་ནས་ཟླ་གམ་དབུས་སུ་གཞག །གཟི་བརྗིད་ལྡན་པའི་ལྷ་མོ་ལྔ། །སྟེང་དུ་དབང་པོ་ལྔ་ཡང་གཞག །རེ་ཁཱ་ལ་ནི་ནར་གྲོལ་ཏེ། །རྐང་ལག་སྒོ་བཞི་རྣམས་སུའོ། །ཐོད་སྐམ་བར་ཁྱམས་སྒལ་ཚིགས་ཏེ། །མེ་རི་ལ་ནི་རྒྱུ་ཕྲེང་ངོ་། །ཤུན་གྱི་གཡབ་དང་རླུང་གི་ཕྱོགས། །སྣ་ཚོགས་ཡམ་
ཤིང་བརྫངས་ནས་གཞག །དེ་ནས་ཐལ་བའི་ས་བོན་མཆོག །དེ་ཡི་འཕྲད་དུ་འབྲུག་རུས་དང་། །བྱི་ལ་བན་གླང་རྔ་མོ་དང་། །མཁའ་ལྡིང་ལ་སོགས་འབྲས་བུ་ལྔའི། །གསང་དང་གཉིད་ལ་སོགས་པ་ཡང་། །མར་ལ་སོགས་པས་བྱུགས་ལས་སྩལ། །མཚན་དང་ལྡན་པའི་ཤེས་རབ་ཀྱིས། །ཐལ་མོ་སྦྱར་ནས་འདི་སྐད་དོ། །པུ་ཙ་མེ། དེ་ཡི་འོག་ཏུ་མེ་ཡི་ལྷ། །རྒྱལ་པོ་བསྒོམ་པའི་ཏིང་ངེ་འཛིན། །སྙིང་པོ་བཟླས་ཏེ་གཡོགས་ནས་བསྡམ། །བསྙེན་པ་ཉི་ཁྲི་བཏོན་ནས་ཀྱང་། །མཆོད་ཅིང་བསྙེན་པའི་ལས་བྱའོ། །ཏིང་འཛིན་མཆོད་པས་ཚིམ་བྱས་ནས། །དེ་ནས་རྫས་ཀྱི་མཆོད་པས་མཆོད། །མཚན་གསུམ་དཔེ་ཡིས་ཤེས་རབ་ཀྱིས། །ཙིཏྟ་བླངས་ཏེ་རུས་པར་བཅས། །ཕུལ་ནས་རྣམ་དག་དབྱིངས་སུ་བསྟན། །མཚན་དང་རུས་པ་དེ་བཞིན་ཏེ། །རྣ་བ་རུས་པ་མིག་དང་ལྕེ། །སྣ་དང་ཁྲག་ལ་སོགས་པ་ཡིས། །ཤ་དང་རྐང་དང་དེ་བཞིན་ཏེ། །ཚིལ་དང་སྐྲ་ལ་སོགས་པ་དབུལ། །དེ་ནས་བ་སུ་ཏ་ཡི་རྫས། །མཚན་དང་ལྡན་པ་བླངས་ཏེ་དབུལ། །ཕོ་ཉ་མཆོད་པའི་སྦྱིན་སྲེག་སྟེ། །གཏུན་ཁུང་ཆེན་མོ་སྔ་མ་བཞིན། །དེ་ནས་བགེགས་ཆེན་འདུལ་བའི་ཕྱིར། །རྩེད་འཇོའི་བྲོ་ཡང་འདི་སྐད་དོ། །ཧ་ན་ཧ་ན་པ་ཙ་ཧཱུཾ་ཕཊ། མཆོག་ལ་སོགས་པའི་ཤེལ་ཚོགས་ལྡན། །གང་ཡང་རུང་བ་བསྒྲལ་བའི་ཕྱིར། །སྙིང་ལ་རྩེད་འཇོ་ཐབས་ཀྱི་བྲོ། །ལུ་གུ་རྒྱུད་ཀྱི་འདི་སྐད་དོ། །ཨཾ་ཀུ་ཤ་ཛཿ། དེ་ནས་དབང་པོ་ལྔ་རྣམས་ལ། །རྩེད་འཇོའི་ཚུལ་གྱིས་གར་བྱེད་ཅིང་། །བརྗིད་པའི་སྟབས་ཀྱིས་འདི་ལྟར་རོ། །སྥོ་ཊ་བཾ། པཱ་ཤ་ཧཱུཾ། གྷཎྜ་ཧོཿ། དེ་དག་ཞིང་བཅུ་བསྒྲལ་བའི་ཚིག །དཀྱིལ་འཁོར་དེ་ཡི་དོན་ཡང་བཤད། །འདོམ་གང་གྲུ་བཞི་ཁྲུ་ཚད་ཙམ། །ཟླ་གམ་ཁ་ཡོད་གསང་བའི་མཁའ། །ཟླུམ་པོ་སྤྲོས་པ་མེད་པའི་དོན། །ཧེ་ནི་དབྱིངས་ཕྱུག་གཟི་ལྡན་དབྱིངས། །ཡམ་ཤིང་བྱང་ཆུབ་སེམས་ཀྱི་གསུང་། །མེ་ནི་གཉིས་མེད་སྤྲུལ་པ་ཡིན། །དམ་རྫས་ལྷ་ཚོགས་མང་པོར་བཀྲམ། །དེ་ནས་རུས་པའི་ཡོན་ཏན་བཤད། །འབྲས་བུ་ལྔ་ནི་རིགས་ལྔ་འགྲུབ། །
རུས་སྦལ་གླང་ཆེན་ཟིལ་གྱིས་གནོན། །འབྲུག་ནི་མཁའ་འགྲོ་དབང་དུ་སྡུད། །བྱི་ལ་ཕྲ་མེན་དངོས་གྲུབ་འདུ། །བན་གླང་སྟོབས་ཀྱིས་བགེགས་ཆེན་འདུལ། །རྔ་མོ་སྲིན་པོའི་རྒྱལ་པོའི་མཐུ་ཡང་ཕྲོག །འདབ་ཆགས་ཕོ་ཉ་མངག་པའི་མཆོག །མིང་རུས་ཐལ་བའི་དུས་སུ་ཡང་། །དེ་ནས་བསྲེག་པར་བྱ་བ་ནི། །རཱ་ག་པཱུ་ཙ་ཡ་ཏྱ་ན་ཧཱུཾ་ཛཿཛཿ། མཆོད་སྦྱིན་བསྲེག་པའི་ལས་རྣམས་བྱའོ། །དེ་ནས་ཐུགས་དམ་གཞུང་བཞིན་བསྐུལ། །འདི་ཡི་དུས་སུ་དགོངས་པ་ཡང་། །པུ་ཏྲ་ཅན་གྱི་སྣོད་ནང་དུ། །རུས་པ་བཏགས་པའི་ཕྱེ་མ་བླུགས། །དམིགས་པ་གསུམ་ལས་འབྱུང་བ་བཞིན། །ནང་དུ་བླུགས་ཏེ་བཏུལ་ལ་གཞག །དེ་ནས་རྡོ་རྗེ་ལྕམ་དྲལ་གྱིས། །བསྐོར་ཏེ་དབྱངས་བླངས་དབུས་སུ་གཞག །དེ་ལྟར་དཀྱིལ་འཁོར་རྫོགས་པ་ཡང་། །རྡོ་རྗེ་གོ་ཚགས་གཞུང་བཞིན་སྤེལ། །ཕྲིན་ལས་བཅོལ་བ་སྔ་མ་བཞིན། །ཡབ་ཡུམ་གཉིས་སུ་མེད་པར་སྦྱངས་པ་ལས། །སེམས་ཀྱི་ཁ་དོག་དཀར་པོ་ཡི་གེ་ཧྲཱྀཿ། །མཁའ་མཉམ་སྤྲོས་ཤིང་སླར་ཡང་བསྡུ། །དངོས་མེད་སྟོང་པར་གྱུར་པར་དམིགས། །ལྷ་མོ་གློག་འགྱུ་མ་དང་རོལ་པ་ལས། །བྱང་ཆུབ་སེམས་ནི་ཨཱ་ཡུ་དམར་པོར་སྤྲོ། །རུས་པ་མཚན་མེད་འདྲ་བ་བཞིན། །དྲ་བ་མོ་དང་གཉིས་མེད་རོལ་པ་ལས། །བྱང་ཆུབ་སེམས་ནི་གཉིས་མེད་སྟོང་ཁམས་གང་། །བསྐུལ་ཞིང་དོན་བྱས་འབར་བ་འཕྲོ་ལ་དམིགས། །ཨ་མོ་དེ་བས་གཉིས་མེད་མཉེས་གྱུར་ནས། །སེམས་ཀྱི་ཁ་དོག་དམར་དཀར་བསྣོལ་བ་ཡང་། །སྐར་ཚོགས་ལྟ་བུས་རབ་ཏུ་འཁྲིགས་པས་བསྒྲུབ། །གསུངས་པས་ཚིམ་ལྟར་བཙོ་མའི་ཁ་དོག་བཞིན། །སྡེར་མོ་ཅན་གྱིས་དགྱེས་པར་བྱང་ཆུབ་སེམས། །རིན་ཆེན་ཞུན་མ་ལྟ་བུའི་སྐུ་སྦྱངས་ནས། །དངོས་མེད་བྱང་ཆུབ་སེམས་སུ་ཞུ་བ་ལས། །བདེ་བའི་དངོས་གྲུབ་བླང་བའི་ཕྱིར། །བསྒྲུབ་པ་དེ་བྱི་མཚན་ཡོད་པའི། །རཱ་ག་པཱུ་ཙ་ཞེས་བརྗོད་ཅིང་། །ཐལ་ཆེན་འོད་དུ་ཞུ་བར་དམིགས། །ཡཾ་ལས་རླུང་གིས་བཏེགས་ནས་ཀྱང་། །གཟི་ལྡན་གསང་བའི་བྷ་ག་ལ། །རང་བཞིན་མེད་པའི་ཆོས་སྐུར་གསལ། །མཐར་ཕྱིན་མཉེས་ཤིང་འགྲོ་རྒྱུད་སྦྱང་། །དེ་ཡང་མི་གཡོ་
དབྱིངས་སུ་ཐིམ། །དེ་ནས་གསང་བའི་མདུད་པ་དགྲོལ། །སྣུམ་ལ་འཕེལ་གྱུར་གྲུབ་པའི་རྫས། །ཉུང་ན་སྤངས་ཤིང་ཏིང་འཛིན་བསྐྱར། །གྲུབ་ན་དངོས་ལ་མཚན་མས་གདབ། །མཚན་ལྡན་ལག་མཐིལ་ཨ་བསམ་སྟེ། །བྲོས་བསྐོར་དབང་བསྐུར་བྱིན་གྱིས་བརླབ། །དེ་ནས་དངོས་གྲུབ་གོ་སྐབས་དབྱེ། །ས་མ་ཡ་པདྨ་དྷ་ར་པཱུ་ཙ་མེ། དང་པོར་དེ་བྱི་གདབ་པར་བྱ། །དེ་ནས་གཙོ་དང་རིམ་པ་བཞིན། །ཆད་ན་བར་ཆད་ཆེན་པོ་འབྱུང་། །ལྷག་ན་རིམ་པ་བཞིན་དུ་དགོད། །རྡོ་རྗེ་སློབ་དཔོན་ཡབ་ཡུམ་དང་། །མཆེད་ཀྱང་དགོངས་པའི་ཚད་དང་སྦྱར། །དེ་ནས་ལུས་ལ་རྟག་བཅངས་ན། །སྐུ་གསུང་ཐུགས་ཀྱི་དངོས་གྲུབ་ཐོབ། །ལུས་ཀྱང་དར་ལ་བབ་ཅིང་སྲ། །ལོངས་སྤྱོད་ལྡན་ཞིང་བདེ་སྐྱིད་འབྱུང་། །དེ་ནས་ལྷག་མའི་གཏོར་མ་བཏང་། །དཀྱིལ་འཁོར་བསྡུ་ཞིང་བཀྲ་ཤིས་གསོལ། །ཡལ་བར་མི་གཏོང་མ་མོའི་རྟེན། །གླུ་དང་དབྱངས་དང་རྔ་ལ་སོགས། །རྩེ་འཇོ་མང་པོ་ལུགས་བཞིན་བྱ། །དབང་ཆེན་བསྡུས་པའི་ཏན་ཏྲ་ལས། ཐལ་ཆེན་བསྒྲུབ་པའི་ལེའུ་སྟེ་ཉི་ཤུ་རྩ་བདུན་པའོ།། །།ཚེ་ལ་དབང་ཐོབ་རིག་འཛིན་རྣལ་འབྱོར་གྱིས། །ལོག་རྟོག་དངོས་པོ་གཞོམ་པ་དང་། །ཆོ་འཕྲུལ་མངོན་དུ་བསྟན་པའི་ཕྱིར། །དབང་ཆེན་བསྡུས་པའི་ཏན་ཏྲ་ལས། །བསྐལ་པའི་ཐོག་ཐོག་གསང་བའི་ལེའུ། །དགོངས་པའི་རྒྱུད་དང་མཐུན་པར་གསུངས། །དང་པོར་ཏིང་འཛིན་རྣམ་གསུམ་ལས། །རྒྱུ་ཡི་ཏིང་འཛིན་ཧཱུཾ་དམར་གསལ། །དེ་ཡི་སྐད་ཅིག་ཏིང་འཛིན་ལས། །ཁ་དོག་ལྔ་ཡི་འབྲུ་བསྒོམས་ལ། །དབང་ཆེན་དཀྱིལ་འཁོར་རིམ་པ་བཞིན། །ཁ་དོག་གསུམ་པོའི་འབྲུ་ཉིད་ལས། །བདག་པོའི་རྐྱེན་དང་འཚམས་པའི་གནས། །ཐུག་པ་མེད་པའི་གཞལ་ཡས་ཁང་། །ཆོས་ཀྱི་སྐུ་དང་མཉམ་པར་བསྐྱེད། །དེ་ཡི་ནང་དུ་དམིགས་པ་ཡང་། །ཆོ་ག་གསུམ་དང་ལྡན་པའི་གསུང་། །དེ་ལས་ཞེ་སྡང་རྡོ་རྗེའི་སྐུ། །བརྒྱུད་པས་པདྨ་ཧེ་རུ་ཀ །སྐུ་བསྐྱེད་སྙིང་པོ་འདི་ཉིད་དོ། །པདྨ་མ་ཧཱ་ཤྲཱི་ཧེ་རུ་ཀ །ཧ་ཧ་ཧཱུཾ་ཛཿ། ས་བོན་སྔགས་ཀྱིས་གསལ་བར་བསྒྱུར། །
ཧཱུཾ། ཧྲཱྀཿ།ཕཊ། ཨཱོཾ། ཨཱ། ཧི། མ། ཛཿཛ། རུ་ལུ། ཛ་ས། གྷུ་ཤ་བ་ག་པྲ་བེ་ཤ །བཛྲ་བཛྲ། ཡཀྴ་བཛྲ་ཧཱུཾ་བྷྱོ། བཛྲ་ཧཱུཾ། ཨཱ་ར་ལི། ཨ་ཧི་ཤ་ཛ་ཀྲ་ཏྲི། དཱིཔྟ་ཙཀྲ། སྐུ་བསྐྱེད་གསལ་བར་གྱུར་པ་ན། །ལོག་རྟོག་གཞོམ་ཕྱིར་འདི་གསུངས་སོ། །ཐོག་ཐོག་འབར་བ་དབབ་པའི་ཕྱིར། །ཧཱུཾ། དབང་ཆེན་རྒྱལ་པོ་རྡོ་རྗེ་ཐོག་ཐོག་འབེབས། །ཧཱུཾ་དང་ཕཊ་ཀྱིས་སྲིད་གསུམ་འཁོར་བ་འཇིག །ཧཱུཾ་མཛད་ཧཱུཾ་གི་བྱིན་རླབས་བསམ་མི་ཁྱབ། །རྡོ་རྗེ་ཁྲག་འཐུང་ཁྲག་གི་རྒྱ་མཚོ་སྐེམ། །རྡོ་རྗེའི་མཚོན་མེ་གནམ་ལྕགས་ཐོ་ལུམ་འདྲ། །གསང་སྔགས་ལོག་པར་ལྟ་བ་རབ་ཏུ་འཇོམས། །འཇིག་རྟེན་འདི་དང་ཕ་རོལ་གཉིས་སུ་ཡང་། །གདུག་པ་སེལ་ཅིང་དུག་གསུམ་རྩད་ནས་གཅོད། །མ་ཧཱ་ཙནྡྷ་སརྦ་དུཥྚན་ཏ་ཀ་ཧ་ན་ད་ཧ་པ་ཙ་ཧཱུཾ་ཕཊ། ལོག་རྟོག་དངོས་པོ་བསྒྲལ་ནས་ཀྱང་། །རབ་ཏུ་རྔམ་པའི་ཚིག་གིས་བསྔང་། །སྐྲག་ཅིང་དབང་དུ་འདུས་པར་འགྱུར། །ཚངས་པ་ལ་སོགས་ལྷ་ཆེན་རྣམས། །ཐོག་ཐོག་དཔལ་གྱིས་མྱོས་གྱུར་ཏེ། །སེམས་ནི་བླ་མེད་གནས་སུ་ཡང་། །ཙཀྲ་ཞེས་པའི་སྔགས་དག་གིས། །དབང་གི་སྐུར་བསྐྱེད་ཚངས་པའི་མཆེ་བ་གཙིགས། །ཤངས་ཀྱི་སྒྲོམ་ནས་ཐོག་ཐོག་འབེབས། །ཨཱོཾ་འཁོར་ལོས་ལུས་ཀྱི་རྣམ་རྟོག་བཅོམ། །ཨཱཾ་གིས་ངག་གི་ཉེས་པ་སྦྱང་། །ཧཱུཾ་གིས་སེམས་ཀྱི་གཟུང་འཛིན་སྤང་། །སྭཱ་ཡིས་ང་རྒྱལ་རི་བོ་བཤིག །ཧཱ་ཡིས་ཕྲག་དོག་གནས་སུ་དག །ཁམས་གསུམ་མ་ལུས་རྒྱུ་དྲུག་ཀུན། །ཡེ་ཤེས་མཚོན་ཆ་ཐོག་ཐོག་གིས། །སྒྲོལ་བར་མ་གྱུར་གཅིག་ཀྱང་མེད། །ནན་ཏན་ཐུགས་རྗེས་འགྲོ་བ་བསྒྲལ་བའི་ཕྱིར། །འཁོར་བ་དོང་སྤྲུག་ཆེན་པོ་མཛད། །མངོན་སྤྱོད་ཡ་མཚན་ཆེན་པོ་ཡི། །མཆོག་དང་ཙརྱ་འབྱོར་ཚོགས་ལ། །ནན་ཏན་གྱིས་ནི་པྲ་བེ་ཤ །ཧཱུཾ་གིས་རྒྱལ་སྲས་གཞོན་ནུའོ། །གཡུང་དྲུང་ལྟ་བུའི་སྐུ་ཡང་ཐོབ། །འདུ་འབྲལ་མེད་པའི་དབྱིངས་སུ་དེ། །དེ་ནས་ཕུང་པོ་བཤིག་བྱས་ཏེ། །ལྷག་མ་བརྒྱད་ལ་བྲོ་བརྒྱད་བརྡུང་། །མགོ་ལ་ལང་ཀ་གནོན་པའི་བྲོ། །ཙིཏྟ་འཁོར་བའི་བྲོ་བོ་
ཆེ། །རྣམ་ཤེས་ཏ་ཀྲྀཏ་ཆས་བརྒྱད་བྲོ། །ཕུང་པོ་ཁམས་དང་སྐྱེ་མཆེད་ལ། །ཞབས་ཀྱི་དཔལ་གྱི་ཆས་བརྒྱད་བྲོ། །ཡན་ལག་བཞི་ལ་ལྷ་མོ་ཟ་བྱེད་བཞི་ཡི་བྲོ། །ནང་ཁྲོལ་ངན་སོང་རྣམས་ཀྱི་བྲོ། །གཡང་གཞི་མ་མོ་འཁྲུགས་པའི་བྲོ། །སླ་བཞི་ཁྲོ་བོ་ཟིལ་གནོན་བྲོ། །ཨཱོཾ་ནཱ་ཤ་ཡ་སྟྭམ་བྷ་ཡ་ནན། ཡཀྴ་སུམྦྷ་ནི་གན་དྷ་རི་རི་ཤ་ཧཱུཾ་ཀཱ་ར་པྲ་བེ་ཤ་ཕཊ། བྷ་ག་ཝཱན་ཚིནྡྷ་ཚིནྡྷ་ཧཱུཾ། ཀྲོ་དྷ་ནི་ཀྲོ་དྷ་ནི་ཧཱུཾ། རྫོགས་དང་མཐར་ཕྱིན་ལས་ཀྱང་བྱ། །ཐོག་ཐོག་མངོན་པར་བཏང་བ་ནི། །རྡོ་རྗེ་ངུར་མོའི་ཏིང་ངེ་འཛིན། །གསལ་ནས་སྔགས་འདི་བཟླས་པར་བྱ། །མ་ཧཱ་ཙནྡ་སརྦ་དུཥྚན་ཧ་ན་ཏ་ཀ་པ་ཙ་ཧཱུཾ་ཕཊ། ཛྭ་ལ་རཾ་རཾ་ཛྭ་ལ་རཾ། རཀྴ་རཀྴ་ཧཱུཾ་རཾ། མ་ཧཱ་རུ་ལུ་ཤ །ཨེ་ཧྱེ་ཧི་ཧཱུཾ་བྷ་ག་བཱན། གསེར་ལ་བཏབ་སྟེ་གཏོར་བར་བྱ། །དེ་ཡི་ཚིག་ཀྱང་རབ་ཏུ་བརྗོད། །ཟས་སུ་ཤ་ཆེན་དྲང་བར་བྱ། །ལས་འདི་ངེས་པར་བསྒྲུབ་པར་བྱ། །མཁའ་ལྡིང་རྫས་ལ་དབང་བཙུགས་ཏེ། །ཆུ་མིག་ལྐུགས་པའི་ཀླུ་ལ་གཏད། །ཐོག་ཐོག་འབེབས་ཤིང་དགྲ་བོ་འཆི། །ངེས་འགྱུར་འདི་ལ་ཐེ་ཚོམ་མེད། །དབང་ཆེན་བསྡུས་པའི་ཏན་ཏྲ་ལས། རྡོ་རྗེ་ཐོག་འབེབས་ཀྱི་ལེའུ་སྟེ་ཉི་ཤུ་རྩ་བརྒྱད་པའོ།། །།ཚེ་ལ་དབང་ཐོབ་རིག་འཛིན་རྣལ་འབྱོར་གྱིས། །འབྱུང་པོ་དགྲ་བགེགས་ཚར་གཅད་ཕྱིར། །དབང་ཆེན་བསྡུས་པའི་ཏན་ཏྲ་ལས། །ཕོ་ཉ་མངག་པའི་ལས་འདི་གསུངས། །ཁྲག་འཐུང་འབར་བའི་ཐུགས་ཀ་ནས། །ལས་དང་ཐུགས་ལས་སྤྲུལ་པ་ཡི། །ཡེ་ཤེས་གསང་བར་བསྡུས་པ་ལས། །རྡོ་རྗེ་ཐུགས་ཀྱི་གོ་ལ་མ་འདི་རྣམས་དཔེ་ཁ་ཅིག་ཏུ་གོ་མ་ལ་ཡང་སྣང་། །རྡོ་རྗེ་ཁྲག་འཐུང་གཟུངས་མ་སྟེ། །འདུ་འབྲལ་མེད་པའི་ངང་ཉིད་ཀྱིས། །གང་ལ་བྱས་པའི་གནས་དག་ཏུ། །ཁམས་གསུམ་སྒྲོལ་བའི་ལས་མཛོད་ཅིག །ཁྲག་འཐུང་འབར་བའི་དབུ་གཙུག་ནས། །རྡོ་རྗེ་སྐུ་ཡི་གོ་ལ་མ། །དེ་བཞིན་གཤེགས་པའི་གཟུངས་མ་སྟེ། །འདུ་འབྲལ་མེད་པའི་ངང་ཉིད་ཀྱིས། །གང་ལ་བྱ་བའི་གནས་དག་ཏུ། །ཁམས་གསུམ་སྒྲོལ་བའི་ལས་མཛོད་ཅིག །ཁྲག་འཐུང་
འབར་བའི་ལྗགས་ལས་ཀྱང་། །རྡོ་རྗེ་གསུང་གི་གོ་ལ་མ། །པདྨ་ཁྲག་འཐུང་གཟུངས་མ་སྟེ། །འདུ་འབྲལ་མེད་པའི་ངང་ཉིད་ཀྱིས། །གང་ལ་བྱ་བའི་གནས་དག་ཏུ། །ཁམས་གསུམ་སྒྲོལ་བའི་ལས་མཛོད་ཅིག །ཁྲག་འཐུང་འབར་བའི་ལྟེ་བ་ནས། །ཡོན་ཏན་རྡོ་རྗེ་གོ་ལ་མ། །རིན་ཆེན་ཁྲག་འཐུང་གཟུངས་མ་སྟེ། །འདུ་འབྲལ་མེད་པའི་ངང་ཉིད་ཀྱིས། །གང་ལ་བྱ་བའི་གནས་དག་ཏུ། །ཁམས་གསུམ་སྒྲོལ་བའི་ལས་མཛོད་ཅིག །ཁྲག་འཐུང་འབར་བའི་ཞབས་ལས་ཀྱང་། །རྡོ་རྗེ་ལས་ཀྱི་གོ་ལ་མ། །ལས་རབ་ཁྲག་འཐུང་གཟུངས་མ་སྟེ། །འདུ་འབྲལ་མེད་པའི་ངང་ཉིད་ཀྱིས། །གང་ལ་བྱ་བའི་གནས་དག་ཏུ། །ཁམས་གསུམ་སྒྲོལ་བའི་ལས་མཛོད་ཅིག །ཁྲག་འཐུང་སྐུ་ཡི་འོད་ཟེར་ལས། །རྡོ་རྗེ་ལས་ཀྱི་གོ་ལ་མ། །དཔལ་དང་ཁམ་རྒྱའི་ཚོགས་སུ་སྦྱོར། །གཉིས་སུ་མེད་པའི་འོད་ཟེར་ནི། །མི་ཡི་ལུས་ལ་དྲེད་མོའི་མགོ། །མངག་པའི་ལས་ལ་མ་གཡེལ་ཅིག །ཁྲག་འཐུང་སྐུ་ཡི་མེ་ལྕེ་ལས། །ཕྲ་མེན་ལས་ཀྱི་གོ་ལ་མ། །དཔལ་དང་སྤྱང་མོའི་ཚིགས་སུ་སྦྱོར། །གཉིས་སུ་མེད་པའི་འོད་ཟེར་ནི། །མི་ཡི་ལུས་ལ་ལྕགས་སྤྱང་མགོ། །ཕྲ་མེན་ཉིད་པས་ལས་ལ་བརྩོན། །མངག་པའི་ལས་ལ་མ་གཡེལ་ཅིག །ཁྲག་འཐུང་ཞབས་ཀྱི་གདན་ཁྲི་ལས། །ཁྲག་འཐུང་ལས་ཀྱི་གོ་ལ་མ། །དཔལ་དང་ཁྱི་མོའི་ཚོགས་སུ་སྦྱོར། །གཉིས་སུ་མེད་པའི་འོད་ཟེར་ནི། །མི་ཡི་ལུས་ལ་ཁྱི་ཡི་མགོ། །མངག་པའི་ལས་ལ་མ་གཡེལ་ཅིག །ཁྲག་འཐུང་འབར་བའི་བ་སྤུ་ལས། །ཕྲ་མེན་ལས་ཀྱི་གོ་ལ་མ། །དཔལ་དང་ལོང་བའི་ཚོགས་སུ་སྦྱོར། །གཉིས་སུ་མེད་པའི་འོད་ཟེར་ནི། །མི་ཡི་ལུས་ལ་ཁྱི་ཡི་མགོ། །ཕྲ་མེན་ཉིད་པས་ལས་ལ་བརྩོན། །མངག་པའི་ལས་ལ་མ་གཡེལ་ཅིག །ཁྲག་འཐུང་འབར་བའི་གཞལ་ཡས་ལས། །ཕྲ་མེན་ལས་ཀྱི་གོ་ལ་མ། །དཔལ་དང་དམུས་ལོང་ཚོགས་སུ་སྦྱོར། །
གཉིས་སུ་མེད་པའི་འོད་ཟེར་ནི། །མི་ཡི་ལུས་ལ་དམུས་ལོང་མགོ། །ཕྲ་མེན་ཉིད་པས་ལས་ལ་བརྩོན། །མངག་པའི་ལས་ལ་མ་གཡེལ་ཅིག །དཔལ་ཆེན་པདྨ་ཧེ་རུ་ཀའི། །དབུ་ཡི་དཀྱིལ་འཁོར་མན་ཆད་ནས། །ཞབས་ཀྱི་གདན་ཁྲི་ཡན་ཆད་དུ། །ཐུགས་དམ་ངང་ལས་སྤྲུལ་པ་ཡི། །རྡོ་རྗེ་ལས་ཀྱི་གོ་ལ་མ། །མངག་པ་ཙམ་གྱིས་ལས་མཛོད་ཅིག །མ་མ་ཛཿཛཿབྷྱོ་བྷྱོ་ལས་ལ་བྷྱོ། དབང་ཆེན་བསྡུས་པའི་ཏན་ཏྲ་ལས། ཕོ་ཉ་མངག་པའི་ལེའུ་སྟེ་ཉི་ཤུ་རྩ་དགུ་པའོ།། །།ཚེ་ལ་དབང་ཐོབ་རིག་འཛིན་རྣལ་འབྱོར་གྱིས། །བདུད་དང་སྲིན་པོ་འདུལ་བའི་ཕྱིར། །དབང་ཆེན་བསྡུས་པའི་ཏནྟྲ་ལས། །ཕོ་ཉ་མངག་པའི་ལེའུ་འདི་གསུངས། །ཏི་ར་ཆེན་པོའི་གནས་ཉུལ་མ། །རྣལ་འབྱོར་དབང་ཕྱུག་ཆེན་པོ་ལ། །བཀའ་དང་དམ་ཚིག་མ་ཉམས་པར། །བསྒྲུབ་པ་རྣམས་ལ་དངོས་གྲུབ་སྩོལ། །གང་ཞིག་བཀའ་ལས་འདའ་བྱེད་པ། །སྒྲུབ་པ་པོ་ལ་བར་གཅོད་པའི། །མ་བདག་ལས་ཀྱི་ཉུལ་མ་མོ། །སྲིད་པ་གསུམ་ལ་བྱ་ར་མཛད། །ཤར་ནས་ཏི་རའི་གནས་ཉུལ་མ། །རྡོ་རྗེ་ནམ་གྱི་སྲོད་ལ་རྒྱུག །ནག་མོ་ཁྲག་གི་རལ་པ་ཅན། །ཏི་ར་ཆེན་མོ་ཁ་ན་ཐོགས། །གཟི་ལྡན་པདྨའི་སྤྲུལ་པ་སྟེ། །ཉམས་པའི་ཁྲག་འཐུང་དབང་མོ་ཆེ། །སྲིན་མོ་ཐོད་ཕྲེང་ཡིན་པར་གྲགས། །ལྷོ་ནས་ཏི་རའི་གནས་ཉུལ་མ། །རྡོ་རྗེ་ནམ་གྱི་ཕྱེད་ན་རྒྱུག །ནག་མོ་ཞག་གི་རལ་པ་ཅན། །ཏི་ར་ཆེན་མོ་ཁ་ན་ཐོགས། །གཤོག་པ་ཅན་གྱི་སྤྲུལ་པ་སྟེ། །ཉམས་པའི་ཁྲག་འཐུང་དབང་མོ་ཆེ། །སྲིན་མོ་སྐམ་མ་ཡིན་པར་གྲགས། །ནུབ་ནས་ཏི་རའི་གནས་ཉུལ་མ། །རྡོ་རྗེ་ནམ་གྱི་ཐོ་རང་རྒྱུག །ནག་མོ་དུང་གི་རལ་པ་ཅན། །ཏི་ར་ཆེན་མོ་ཁ་ན་ཐོགས། །དྲ་བ་མོ་ཡི་སྤྲུལ་པ་སྟེ། །ཉམས་པའི་ཁྲག་འཐུང་དབང་མོ་ཆེ། །སྲིན་མོ་ར་རོ་ཡིན་པར་གྲགས། །བྱང་ནས་ཏི་རའི་གནས་ཉུལ་མ། །རྡོ་རྗེ་ཉི་མའི་ཟེར་ལ་རྒྱུག །ནག་མོ་གཡུ་ཡི་རལ་པ་ཅན། །ཏི་ར་ཆེན་མོ་ཁ་ན་ཐོགས། །སྡེར་མོ་ཅན་གྱི་སྤྲུལ་
པ་སྟེ། །ཉམས་པའི་ཁྲག་འཐུང་དབང་མོ་ཆེ། །སྲིན་མོ་ཆང་འཐུང་ཡིན་པར་གྲགས། །སྟེང་ནས་ཏི་རའི་གནས་ཉུལ་མ། །རྡོ་རྗེ་ཉི་མ་ཕྱེད་ན་རྒྱུག །ནག་མོ་གསེར་གྱི་རལ་པ་ཅན། །ཏི་ར་ཆེན་མོ་ཁ་ན་ཐོགས། །གློག་འགྱུ་མ་ཡི་སྤྲུལ་པ་སྟེ། །ཉམས་པའི་ཁྲག་འཐུང་དབང་མོ་ཆེ། །སྲིན་མོ་ཕོར་ཐོགས་ཡིན་པར་གྲགས། །འོག་ནས་ཏི་རའི་གནས་ཉུལ་མ། །རྡོ་རྗེ་ཉི་མའི་གྲིབ་སོ་སྡུད། །ནག་མོ་ཟངས་ཀྱི་རལ་པ་ཅན། །ཏི་ར་ཆེན་པོ་ཁ་ན་ཐོགས། །ཐེའུ་གཤོག་མ་ཡི་སྤྲུལ་པ་སྟེ། །ཉམས་པའི་ཁྲག་འཐུང་དབང་མོ་ཆེ། །སྲིན་མོ་གཞོང་ཐོགས་ཡིན་པར་གྲགས། །དུས་དྲུག་མ་མོ་ཁྱེད་རྣམས་ཀྱང་། །སྔོན་གྱི་ཐུགས་དམ་ཇི་བཞིན་དུ། །བསྒྲུབ་པ་ལས་ཀྱི་བྱ་ར་མཛོད། །གང་ཞིག་ཉམས་པའི་ཁྲག་ལ་རོལ། །མ་ཉམས་རྣམས་ལ་དངོས་གྲུབ་སྩོལ། །བཅོལ་བའི་ལས་རྣམས་འགྲུབ་པར་མཛོད། །དབང་ཆེན་བསྡུས་པའི་ཏན་ཏྲ་ལས། ཕོ་ཉ་ཏི་རའི་གནས་ཉུལ་ གྱི་ལེའུ་སྟེ་སུམ་ཅུ་པའོ།། །།ཚེ་ལ་དབང་ཐོབ་རིག་འཛིན་རྣལ་འབྱོར་གྱིས། །བདུད་དང་དྲེགས་པ་བསྒྲལ་པའི་ཕྱིར། །དབང་ཆེན་བསྡུས་པའི་ཏན་ཏྲ་ལས། །ཤོར་བ་གཞོན་ནུའི་ལེའུ་འདི་གསུངས་སོ། །ཐོག་མ་མེད་པའི་དུས་མཐའ་ནས། །བདུད་དང་དབང་ཕྱུག་དྲེགས་པ་དེས། །འཇིག་རྟེན་ཁམས་ཀུན་ཟ་བྱེད་པར། །འཇིགས་བྱེད་ཆེན་པོ་ཁྲག་འཐུང་གིས། །ཤོར་བ་གཞོན་ནུ་ལ་སོགས་པའི། །བདུད་དང་གཤིན་རྗེ་དྲེགས་པ་དེ། །ཐུགས་རྗེ་ཚད་མེད་བཞིས་བསྒྲལ་ནས། །ཕུང་པོ་ཉལ་ཐབས་གན་རྐྱལ་ཏེ། །འཛམ་གླིང་ལྷོ་ཡི་གླིང་ཁམས་སུ། །རོ་ལངས་ས་གཞིར་གྱུར་པར་བཤད། །རཱུ་ཏྲའི་མགོ་ནི་ལྷོ་ནུབ་མཚམས། །རྐང་པ་བྱང་ཤར་མཚམས་སུ་སྟེ། །ལག་པ་གཉིས་ནི་གཡས་གཡོན་གདེངས། །ཀུན་ཀྱང་ཐུག་པ་མེད་པར་བརྐྱང་། །དེ་བས་འཛམ་གླིང་ས་འདི་ཀུན། །བཀྲ་ཤིས་ཡ་མཚན་ཐུགས་རྗེར་ལྡན། །ཆོས་དང་རྫུ་འཕྲུལ་འབྱུང་བའི་གནས། །ཆོ་འཕྲུལ་འབྱུང་བར་བཀའ་སྩལ་ཏོ། །རཱུ་ཏྲའི་ལུས་ནི་འཛམ་བུའི་གླིང་། །སྙིང་ནི་མ་ག་
དྷཱ་ཡི་གནས། །དུར་ཁྲོད་མིང་ནི་བསིལ་བའི་ཚལ། །གཟི་ལྡན་མ་དང་གོའུ་རིས་བསྲུངས། །མཁས་དང་སྙིང་སྟོབས་གཉི་གར་ལྡན། །རཱུ་ཏྲའི་མགོ་ནི་ལྷོ་ཕྱོགས་ཀྱི། །དུར་ཁྲོད་སིང་གའི་གླིང་ཕྲན་དེ། །གཤོག་པ་མོ་དང་ཙོའུ་རིས་བསྲུངས། །མཐོང་ཐོས་འཕྲུལ་དང་ལྡན་པ་མངའ། །རཱུ་ཏྲའི་ལག་གཡས་ཤར་ལྷོའི་མཚམས། །དུར་ཁྲོད་བལ་ཡུལ་ཡིན་པ་སྟེ། །གློག་འགྱུ་མ་དང་པུཀྐས་བསྲུངས། །དེ་ན་ཟས་དང་ལོངས་སྤྱོད་ལྡན། །རཱུ་ཏྲའི་ལག་གཡོན་ལྷོ་ནུབ་མཚམས། །དུར་ཁྲོད་ཆེན་པོ་སཱ་ལའི་ཡུལ། །སྡེར་མོ་ཅན་དང་བེ་ཏཱས་བསྲུངས། །མཐུ་དང་དབང་ཆེན་གྱད་ཀྱི་གནས། །རཱུ་ཏྲའི་རྐང་གཡས་བྱང་ཤར་མཚམས། །དུར་ཁྲོད་ཆེན་པོ་ལི་ཡི་ཡུལ། །དྲ་བ་མོ་དང་ཙཎྜས་བསྲུངས། །ཤ་ཀི་ནི་སྟེ་མེ་ཆུ་འགྲུབ། །རཱུ་ཏྲའི་རྐང་གཡོན་ནུབ་བྱང་མཚམས། །དུར་ཁྲོད་ཆེན་པོ་ཁ་ཆེའི་ཡུལ། །ཐེའུ་གཤོག་མ་དང་པྲ་མོས་བསྲུངས། །དེ་ན་བདེ་སྐྱིད་ཕུན་སུམ་ཚོགས། །རཱུ་ཏྲའི་ཕོ་མཚན་སྟེང་ཕྱོགས་ན། །དུར་ཁྲོད་ཆེན་པོ་ཨུ་རྒྱན་ཡུལ། །མགྱོགས་མེ་མ་དང་གྷས་མས་བསྲུངས། །འབྱོར་ལྡན་ཚོགས་ནི་དངོས་གྲུབ་འཆང་། །དངོས་གྲུབ་ཐོབ་པ་དེ་ན་མང་། །རཱུ་ཏྲའི་ནང་ཁྲོལ་མ་ལུས་ཀུན། །དུར་ཁྲོད་ཆེན་པོ་ཟ་ཧོར་ཡུལ། །ལང་ཀ་པུ་རི་སྲིན་པོའི་གནས། །ཨ་མོ་དེ་དང་སྨ་ཤས་བསྲུངས། །སྲིན་པོ་སྲིན་མོ་ཤ་ཟ་དང་། །འབྱོར་པའི་ལོངས་སྤྱོད་ཀུན་དང་ལྡན། །དཔལ་གྱི་ཐུགས་རྗེའི་བྱིན་རླབས་ཀྱིས། །ཏ་ནས་བཏུལ་ནས་བསྒྲལ་བ་ཡི། །ས་གཞི་དཀྱིལ་འཁོར་དམ་པ་འདིར། །འདས་པའི་དུས་ན་སྔོན་བྱུང་བ། །སངས་རྒྱས་ཀུན་གྱིས་བྱིན་གྱིས་བརླབས། །དེ་ལྟར་གྱུར་པའི་འཛམ་གླིང་འདི། །སྐྱེ་ཤི་གནས་པའི་ཡུལ་ཡིན་པས། །ཕྱི་རབས་སྔགས་འཆང་སྒྲུབ་པ་པོས། །འཇིགས་བྱེད་ཆེན་པོའི་དཀྱིལ་འཁོར་ནི། །བཀའ་བཞིན་བསྐྱེད་ནས་བྱིན་བརླབས་ནས། །སྔགས་མཆོག་བདུད་རྩི་བསྒྲུབ་པའི་ཕྱིར། །བསྒྲལ་བའི་རྒྱུ་དང་དམ་རྫས་ཀུན། །སངས་རྒྱས་སྒྲུབ་པའི་རྒྱུ་དང་གཞི། །དམ་ཚིག་དམ་པར་སྲུང་བའི་རྫས། །
འབྲས་བུ་ཆེན་པོ་ལྔ་ཡིན་པས། །བདུད་དང་གཤིན་རྗེ་ལ་སོགས་དང་། །ཚོགས་དང་ཙ་རྱའི་འབྱོར་ཚོགས་པ། །ལེ་ལོ་སྤངས་པའི་བརྩོན་འགྲུས་ཀྱིས། །བར་ཆད་མེད་པར་འབད་ལ་བསྒྲལ། །རྣམ་ཤེས་ཧཱུཾ་དུ་བསྒྱུར་བྱས་ཏེ། །བྱང་ཆུབ་སེམས་ཀྱི་དབང་བསྐུར་ནས། །ཡང་དག་གནས་སུ་བསྡུ་བར་བྱ། །དེ་ལྟའི་ཏ་ནའི་དཀྱིལ་འཁོར་འདིར། །དུར་ཁྲོད་བདག་པོ་བཏུལ་ནས་ནི། །འཁོར་བཅས་མ་ལུས་དབང་དུ་བསྡུས། །སྲིན་པོ་ཡོངས་སྒྲོལ་ཆེན་པོ་མཛད། །ས་ནས་ས་ཡི་རིམ་པ་བཞིན། །གོང་ནས་གོང་དུ་ཡང་ནས་ཡང་། །མི་ལྡོག་དབྱིངས་སུ་ཐིམ་པར་བྱས། །བདུད་དང་སྲིན་པོ་མ་ལུས་ཀུན། །སྔོན་གྱི་རྒྱལ་བས་གསུངས་པ་བཞིན། །བཏུལ་ནས་ཡང་དག་སྒྲོལ་མཛད་པ། །འདི་ནི་སྒྲོལ་བའི་ཕྲིན་ལས་སོ། །དབང་ཆེན་བསྡུས་པའི་ཏནྟྲ་ལས། ཤོར་བ་གཞོན་ནུའི་ལེའུ་སྟེ་སོ་གཅིག་པའོ།། །།ཚེ་ལ་དབང་ཐོབ་རིག་འཛིན་རྣལ་འབྱོར་གྱིས། །ཁམས་གསུམ་འཁོར་བའི་སེམས་ཅན་རྣམས། །ཉེ་ལམ་བྱང་ཆུབ་བསྟན་པའི་ཕྱིར། །དབང་ཆེན་བསྡུས་པའི་ཏནྟྲ་ལས། །བསྒྲུབ་པ་ཟབ་མོའི་ལེའུ་འདི་གསུངས། །ཕུན་སུམ་ཚོགས་པ་ལྔར་ལྡན་ཞིང་། །དེ་ཡང་གསང་བར་ཤེས་པར་བྱ། །མཎྜལ་ཟླ་གམ་བྱེ་བྲག་ཀྱང་། །མཁས་པས་དབྱིངས་སུ་ཤེས་པར་བྱ། །དེ་ཕྱིར་བསྒྲུབ་པ་ཟབ་མོའམ། །ཉེ་ལམ་ཞེས་ཀྱང་དེ་ལ་བརྗོད། །དེ་ལྟར་གྱུར་པའི་དཀྱིལ་འཁོར་དུ། །དབང་གི་རྒྱལ་པོའི་སྐུ་བསྐྱེད་ཅིང་། །གདན་ལྔ་རིམ་གྱིས་བཀོད་པ་ཡང་། །ཟབ་མོའི་དོན་དུ་ཤེས་པར་བྱ། །རྫོགས་པ་ཆེན་པོ་ཡིན་པའི་ཕྱིར། །གཞལ་ཡས་གདལ་བ་ཆོས་ཀྱི་དབྱིངས། །ནམ་མཁའ་ལྟ་བུ་གནས་མི་དམིགས། །དེ་ལྟའི་དབུས་སུ་སྐུ་བསྐྱེད་པ། །པདྨ་གར་གྱི་དབང་ཕྱུག་དང་། །གཉིས་སུ་མེད་པར་གཟི་དང་ལྡན། །རྟོགས་ནས་གདེང་དུ་ལོན་པ་ནི། །ཟབ་མོ་ཞེས་ཀྱང་དེ་ལ་བརྗོད། །དེ་ནས་ཡུམ་རྣམས་བསྒྲུབ་པ་
ཡང་། །དྲ་བ་ཅན་ལ་སོགས་པ་བཞི། །སྤྲོས་དང་བྲལ་བ་ཤེས་པར་བྱ། །ཟབ་མོ་ཞེས་ནི་མཁས་པས་གསུངས། །དཀྱིལ་འཁོར་ཆེན་པོ་ཡིན་པའི་ཕྱིར། །སྒོ་སྲུང་ཁྲོ་བོ་མགོ་དགུ་བརྩེགས། །ཐེག་ཆེན་དགུ་ཡི་རིམ་པ་བཞིན། །དེ་ཉིད་གསང་བར་ཤེས་པར་བྱ། །དེ་ཕྱིར་ཐེག་ཆེན་ཉེ་ལམ་པ། །དེ་ལྟར་དཀྱིལ་འཁོར་རྫོགས་པ་དང་། །རྒྱལ་པོ་འཁོར་དང་ལྡན་པ་བཞིན། །ཕྱི་རོལ་ལོང་བ་རྒྱབ་སྦྲེལ་ཡང་། །ཆོས་སྐུར་གཅིག་པས་ཐ་དད་མིན། །དེ་ཡི་ཕྱི་རིམ་དམུས་ལོང་རྣམས། །མི་འགྱུར་དབྱིངས་སུ་མྱ་ངན་འདས། །འཁོར་བ་མ་སྤངས་མྱ་ངན་འདས། །དེ་ཕྱིར་དམུས་ལོང་འཁོར་བ་ཅན། །ཕྱི་རིམ་ཁམ་རྒྱ་ཆེན་མོ་དྲུག །གཟི་ལྡན་སྤྲུལ་པར་གྲགས་པས་ན། །ཡུངས་ཀར་ཚུལ་བཞིན་ཟླུམ་པོར་བཞུགས། །འཁོར་བ་དབྱིངས་སུ་ཟླུམ་པའི་ཚུལ། །ཕྱི་རིམ་སྤྱང་མོ་བསྒྲུབ་པ་ནི། །ཞབས་ཀྱི་སྤྲུལ་པ་ཡིན་པས་ན། །ཕོ་ཉར་བཟང་ཞིང་མངག་པར་མགྱོགས། །དེ་ཡང་ཆོས་ཉིད་ཡིན་པའི་ཕྱིར། །ཟབ་མོའི་དོན་དུ་ཤེས་པར་བྱ། །ཁྱི་བརྒྱད་དགྱེ་ཞིང་བསྒྲུབ་པ་ཡང་། །གསང་བའི་སྤྲུལ་པ་ཡིན་པའི་ཕྱིར། །ཕྲ་མེན་སྤྲུལ་པ་ཤེས་པར་བྱ། །སྤྲུལ་པ་མེ་འབྲུག་ནག་པོ་རྣམས། །ཡབ་ཡུམ་འདུ་འབྲལ་མེད་པ་ཡི། །སྤྲུལ་པ་ཡིན་པར་བསྟན་པ་ཡང་། །ཡང་ན་སྲིད་པའི་རྒྱལ་པོར་དམིགས། །རྩ་བའི་དཀྱིལ་འཁོར་བསྒྲུབ་པ་ནི། །ཕུང་པོ་ལྔ་ཉིད་གཞལ་ཡས་ཁང་། །ཙིཏྟ་དཔལ་བེའུ་སེམས་ཀྱི་རྟེན། །དབང་ཆེན་ཡབ་ཡུམ་ཕྱག་རྒྱར་གསལ། །མ་བཞི་བུ་བརྒྱད་དབྱིངས་ཕྱུག་བཞི། །དེ་ཡང་མཚན་མེད་སྤྲོས་དང་བྲལ། །རྣམ་ཤེས་བརྒྱད་པོ་གནས་སུ་དག །ལོང་བ་རྒྱབ་སྦྲེལ་ཡེ་ནས་གནས། །ཤེས་པའི་ཡུལ་བརྒྱད་གནས་སུ་དག །དམུས་ལོང་འཁོར་བར་ཡེ་ནས་གནས། །ཞབས་ཀྱི་ཆས་བརྒྱད་གནས་སུ་དག །ལྕགས་ཀྱི་སྤྱང་མོར་ཡེ་ནས་གནས། །ཁྱི་བརྒྱད་སྤྱང་མོ་བརྒྱད་དང་བཅས། །ཞབས་ཀྱི་སྤྲུལ་པར་རབ་ཏུ་གྲགས། །དེ་རྣམས་རྩ་བར་བསྡུས་པའི་ཕྱིར། །ཟབ་མོར་བསྒྲུབ་པར་ཤེས་པར་བྱའོ། །དབྱིངས་ལས་ཡེ་ཤེས་བསྒྲུབ་པའི་ཕྱིར། །ཡེ་ཤེས་དབྱིངས་སུ་
བཞུགས་པ་ལ། །རྟགས་སུ་གཟི་ལྡན་ཐུགས་ཀར་སྦས། །ཟབ་མོ་ཞེས་ཀྱང་དེ་ལ་བསྔགས། །ལོང་བ་རྒྱབ་སྦྲེལ་ཡེ་ཤེས་འཁོར། །མགོ་དགུ་བརྩེགས་པ་ཡན་ཆད་ཀུན། །འཁོར་གྱི་ཆོས་ཀྱི་དབྱིངས་སུ་དམིགས། །གཙོ་བོ་ཡབ་ཡུམ་ཡེ་ཤེས་ཏེ། །ཡེ་ཤེས་དབྱིངས་ལ་སྦྱོར་བའི་ཕྱིར། །སྟོང་པ་ཆེན་པོར་རབ་བསྒོམས་ན། །ཟབ་མོ་ཞེས་ཀྱང་དེ་ལ་བརྗོད། །དེ་ལྟར་དབྱིངས་ལས་མ་གཡོས་ཀྱང་། །མཚན་མའི་དངོས་པོ་བཤིག་པ་དང་། །ལོག་པར་བལྟ་བ་གཞོམ་པའི་ཕྱིར། །ཕོ་ཉ་རྣམས་ཞེས་བཤད་པར་བྱའོ། །བདག་ཉིད་ཆེན་པོར་རབ་རྟོགས་ཏེ། །བཙལ་བ་མེད་པར་དབྱིངས་གཅིག་ན། །ཕོ་ཉ་ཞེས་ཀྱང་དེ་ལ་བྱ། །བྱ་དང་བྱེད་པར་མི་དམིགས་ཤིང་། །འཕྲོ་འདུ་ལ་སོགས་མི་བརྩམ་ན། །འགྱེད་པ་ཞེས་ཀྱང་དེ་ལ་བྱ། །ཕོ་ཉའི་དོན་དྲུག་བཤད་པ་ནི། །སྐུ་དང་རྔམས་དང་ཡེ་ཤེས་དང་། །བསྒྲུབ་དང་སྤྲུལ་པ་ཡིག་འབྲུའོ། །ཡང་ན་ཕོ་ཉ་གསུམ་དུ་བཤད། །དོན་དང་ལས་དང་རིགས་ལ་སོགས། །ཕོ་ཉ་རྣམས་ནི་དགྱེ་བར་བྱ། །ཞེས་བཤད། དབང་ཆེན་བསྡུས་པའི་ཏནྟྲ་ལས། ཉེ་ལམ་བྱང་ཆུབ་སེམས་ཀྱི་ལེའུ་སྟེ་སོ་གཉིས་པའོ།། །།ཚེ་ལ་དབང་ཐོབ་རིག་འཛིན་རྣལ་འབྱོར་གྱིས། །ཀླུ་རྒྱལ་ཟིལ་གྱིས་གནན་པའི་ཕྱིར། །དབང་ཆེན་བསྡུས་པའི་ཏནྟྲ་ལས། །གཞུང་ཕྱུང་བ་ཡི་ཏིང་འཛིན་བསྒོམ། །ཧཱུཾ་ལས་ཕྱག་རྒྱ་གདན་དང་བཅས། །དམར་པོ་དབུ་ལྔ་བཅུ་དྲུག་ཕྱག །གསལ་བར་བསྒོམ་པའི་བྱིན་རླབས་ཀྱིས། །ཀླུ་ཆེན་དབང་དུ་བསྡུ་བའོ། །དེ་ལྟར་ཕྱག་ན་ཀླུ་རྣམས་བསྣམས། །དེ་ལྟར་གསལ་བ་མ་ལུས་ཀུན། །གཡས་ཀྱི་དང་པོར་བསྣམས་པ་ནི། །ཀླུ་ཆེན་རྒྱལ་རིགས་དབང་བསྡུས་མཐའ་ཡས་བསྣམས། །གཡས་ཀྱི་དང་འོག་དུང་སྐྱོང་བསྣམས། །དེ་ཡི་འོག་མ་འཇོག་པོ་བསྣམས། །དེ་ཡི་འོག་མ་ནོར་རྒྱས་བུ། །འོག་མ་མ་དྲོས་བུ་བསྣམས་སོ། །དེ་འོག་སོག་མ་མེད་བསྣམས་ཤིང་། །འོག་མ་གཟི་ཅན་འཛིན་
པར་གྲགས། །དེ་འོག་རིགས་ལྡན་འཛིན་པའོ། །གཡོན་གྱི་ཕྱག་ན་བསྣམས་པ་ནི། །དང་པོར་བ་རུ་ཎ་ཡང་འཛིན། །འོག་མར་ཀརྐོ་ཊ་བསྣམས་ཤིང་། །འོག་མ་ལྟ་ན་སྡུག་ཀྱང་འཛིན། །དེ་འོག་སྟོབས་བཟང་རབ་ཏུ་བསྣམས། །འོག་མ་བ་ལང་ཅན་ཡང་འཛིན། །འོག་མ་པདྨ་རབ་ཏུ་བསྣམས། །འོག་མ་གང་བ་བཟང་པོ་སྟེ། །དེ་འོག་ནོར་བུའི་མགྲིན་ཡང་བསྣམས། །ཀླུ་ཡི་རྒྱལ་པོ་དེ་རྣམས་ནི། །སྙིང་གར་དབང་གི་ཞབས་ཀྱི་ནི། །ཚམ་རྔམས་སྟོང་དང་ཆས་པའི་ཕྱིར། །སྐུ་བསྐྱེད་འོག་ཏུ་གཞལ་ཡས་ཁང་། །སྦྲུལ་ནག་གྲུབ་པ་འབྱམས་ཀླས་པའི། །མཉམ་དང་མཉམ་པར་དམིགས་པར་བྱའོ། །དེ་ཡི་དབུས་སུ་བསྒོམ་པ་ཡང་། །གཙོ་བོ་ཡབ་ཡུམ་འཁོར་དང་བཅས། །ཧཱུཾ་ལས་རྫོགས་པའི་ཚུལ་དུ་བསྐྱེད། །དེ་ནས་གསང་བའི་བསྙེན་པ་འབུལ། །བསྙེན་པའི་སྔགས་ནི་འདི་དག་གོ། །པདྨ་ཤྲཱི་ཧེ་རུ་ཀ་ཨེ་ཀ་ཏེ་མ་ཧཱ་སུ་ཁ་ཧཱུཾ། ནཱ་ག་པྲ་བེ་ཤ་ཛཿཅེས་བྱའོ། །རྫུ་འཕྲུལ་སྔགས་དང་ཕྱག་རྒྱ་དང་། །དྲག་པོའི་ཕྲིན་ལས་ཉི་ཚེ་བ། །བསྒྲུབ་པའི་དུས་སུ་ཀླུ་ཡང་བསྒྲལ། །བསྙེན་པ་ཆོས་ཀྱི་དབྱིངས་ནས་གྲངས། །རྫུ་འཕྲུལ་འཕྲོག་ཕྱིར་སྨྱོན་པར་བཞུགས། །ཀླུ་རྣམས་དབང་དུ་བསྡུ་བའི་ཕྱིར། །མགྲིན་སྔོན་ལ་སོགས་རྣམ་ཤེས་ནི། །གསེར་ཞུན་ལྟ་བུར་གྱུར་ནས་ནི། །གཟི་ལྡན་པདྨའི་དབྱིངས་སུ་བསླན། །གནས་ཀྱི་རང་བཞིན་ལྷུན་གྱིས་གྲུབ། །སྐུ་ཡི་གཤོག་པ་མཁའ་དང་མཉམ། །བར་ནས་གསེར་གྱི་མེ་སྟག་བཞིན། །གློག་འགྱུའི་འོད་ཟེར་རྣམ་པར་འཕྲོ། །ཀླུ་ཡི་ཕུང་པོ་རྡུལ་ཕྲན་བཞིན། །ཡན་ལག་ཀུན་ཀྱང་རབ་ཏུ་ཉམས། །ཀླུ་ཡི་ཆོ་འཕྲུལ་ཞི་བར་གྱུར། །གཤོག་པ་ཁྱུང་གི་འཇིགས་པར་གྱུར། །བྱེ་མ་སྙེད་ཀྱི་མེ་སྟག་འཕྲོ། །བྱེ་མས་འཇིགས་ཞེས་དེ་ལ་བསྔགས། །ཁྱུང་ལྟར་གནས་པས་ཀླུ་ཆེན་གནོན། །དབང་དུ་བསྡུས་པས་ཀླུ་རྒྱལ་འདུལ། །རྫུ་འཕྲུལ་ཕྲོགས་པས་དངོས་གྲུབ་ཐོབ། །ཀླུའི་ལེའུ་ཞེས་དེ་ལ་བརྗོད། །དཀྱིལ་འཁོར་བསྡུ་བ་སྔ་མ་བཞིན། །ཧཱུཾ་གི་སྤྲོ་བསྡུས་དབྱིངས་
སུ་ཐིམ། །དབང་ཆེན་བསྡུས་པའི་ཏནྟྲ་ལས། ཀླུ་རྒྱལ་འཕྲུལ་གྱི་ལེའུ་སྟེ་སོ་གསུམ་པའོ།། །།ཚེ་ལ་དབང་ཐོབ་རིག་འཛིན་རྣལ་འབྱོར་གྱིས། །སྡང་བའི་དགྲ་བགེགས་བསྒྲལ་བའི་ཕྱིར། །དབང་ཆེན་བསྡུས་པའི་ཏནྟྲ་ལས། །སྤྱང་མོ་རོ་བཤལ་ལེའུ་འདི། །དབུ་ཡི་དཀྱིལ་འཁོར་མན་ཆད་ནས། །ཞབས་ཀྱི་གདན་ཁྲི་ཡན་ཆད་དུ། །སྤྱང་མོ་རོ་བཤལ་རྦད་པར་བྱ། །དབུ་ལྔ་འབར་བའི་གཞལ་ཡས་ན། །དཔལ་གྱི་ཕོ་ཉ་རོ་བཤལ་བསྐུལ། །དབང་པོ་ལྔ་པོ་རྡུལ་ཕྲན་བཞིན། །སྡང་མིག་འབར་བ་གྲུ་གསུམ་ནས། །དཔལ་གྱི་ཕོ་ཉ་རོ་བཤལ་བསྐུལ། །གཟུགས་ཀྱི་རྣམ་ཤེས་ཐལ་བར་རློགས། །ཁྲོ་རྒྱལ་ཤངས་ཀྱི་རླུང་སྒྲོམ་ནས། །དཔལ་གྱི་ཕོ་ཉ་རོ་བཤལ་བསྐུལ། །དྲི་ཡི་རྣམ་ཤེས་ཐལ་བར་རློགས། །འབར་བ་ཞལ་གྱི་ཧོམ་ལྔ་ནས། །དཔལ་གྱི་ཕོ་ཉ་རོ་བཤལ་བསྐུལ། །རོ་ཡི་རྣམ་ཤེས་རྡུལ་དུ་རློགས། །ཁྲོ་རྒྱལ་སྐུ་ཡི་བ་སྤུ་ནས། །དཔལ་གྱི་ཕོ་ཉ་རོ་བཤལ་བསྐུལ། །རེག་བྱ་ཐལ་བ་བཞིན་དུ་རློགས། །འབར་བའི་ཕྱག་མཚན་མང་པོ་ནས། །དཔལ་གྱི་ཕོ་ཉ་མང་པོ་བསྐུལ། །དགྲ་སྲོག་གཅོད་ཅིང་དགྲ་སྙིང་འབྱིན། །ཁྲོ་བོ་རྔམ་པའི་གཤོག་པ་ནས། །དུར་ཁྲོད་ཕོ་ཉ་རོ་བཤལ་བསྐུལ། །མགྱོགས་བྱེད་ལས་ཏེ་མྱུར་བར་བསྐུལ། །ཞབས་བརྒྱད་བརྐྱངས་ཏེ་ཁྲོ་བརྒྱད་གཟིར། །དྲག་ཤུལ་སྟག་གི་ཕོ་ཉ་མོ། །ཁ་ན་རོ་བཤལ་དགྲ་བགེགས་འགུགས། །རྣོ་གདུག་ལྕགས་ཀྱི་ཕོ་ཉ་མོ། །ཁ་ན་རོ་བཤལ་ཡིད་འཕྲོག་བྱེད། །རྡོ་རྗེ་རོལ་པའི་ཕོ་ཉ་མོ། །ཁ་ན་རོ་བཤལ་སྤྱང་མོ་གདོང་། །མཆེ་བ་བདུད་བཞི་ཟིལ་གྱིས་གནོན། །དབང་གི་གཟི་འབར་ཕོ་ཉ་མོ། །ཁ་ན་རོ་བཤལ་དུར་ཁྲོད་འཇོམས། །སྦྲུལ་ནག་འཁྲིལ་བའི་ཕོ་ཉ་མོ། །ཁ་ན་རོ་བཤལ་རི་ལུང་འཕྱང་། །མགྱོགས་ཀྱང་རླུང་གིས་བསྐྱད་དུ་མེད། །ཟ་བྱེད་ཆེ་བའི་ཕོ་ཉ་མོ། །ཁ་ན་རོ་བཤལ་ང་རོ་སྒྲོགས། །སྲིད་པའི་ལྷ་བྲན་ཟས་སུ་ཟ། །ཤུ་ཀེན་དར་གྱི་ཕོ་ཉ་མོ། །ཁ་ན་རོ་བཤལ་འཇིགས་པའི་གཟུགས། །འོད་ཟེར་འབར་བས་སྟོང་ཁམས་
བསྲེག །གཅན་གཟན་གཟིག་གི་ཕོ་ཉ་མོ། །ཁ་ན་རོ་བཤལ་གད་མོས་འདེབས། །སྔགས་པས་ལན་གསུམ་རྦད་པ་དང་། །ཞུ་གླག་མེད་པར་ཕུང་བར་བྱེད། །གདན་ཁྲི་སེང་གེའི་བར་བར་ན། །སེང་གེའི་ཁ་ནས་རོ་བཤལ་བསྐུལ། །སྲིད་པ་གསུམ་ཡང་དབང་དུ་སྡུད། །རིན་ཆེན་ཁྲི་རྐང་བར་བར་ན། །འཇའ་ཚོན་སྣ་ལྔའི་སྤྱང་མོ་ལ། །ཁ་ནས་རོ་བཤལ་འདུར་གོམ་མཆོད། །ཉི་ཟླ་བརྩེགས་པའི་བར་བར་ན། །ལྕགས་ཀྱི་སྤྱང་མོ་མགོ་དགུ་མ། །ཁ་ན་རོ་བཤལ་སྟོབས་ཆེན་འཇོམས། །ཉི་ཟླ་གཟའ་སྐར་ཙོག་པོར་འཕེན། །གདན་ཁྲི་པདྨའི་བར་བར་ན། །དུང་གི་སྤྱང་མོ་མགོ་གསུམ་མ། །སྤྱན་གསུམ་དུར་ཁྲོད་གནས་སུ་གཟིགས། །ཁ་ནས་རོ་བཤལ་རཱུ་ཏྲ་འཇོམས། །རིགས་གཉིས་བརྒྱུད་པའི་བཀའ་ཉན་མ། །ལས་ལ་བབ་པོ་ཕོ་ཉའི་ཚོགས། །ཁ་ལོ་ཁ་ལ་ལོ་ཁ། དབང་ཆེན་བསྡུས་པའི་ཏནྟྲ་ལས། སྤྱང་མོ་རོ་བཤལ་གྱི་ལེའུ་སྟེ་སུམ་ཅུ་སོ་བཞི་པའོ།། །།ཚེ་ལ་དབང་ཐོབ་རིག་འཛིན་རྣལ་འབྱོར་གྱིས། །དབང་ཆེན་བསྡུས་པའི་ཏནྟྲ་ལས། །ཚངས་དབྱངས་གླུ་ཡི་ལེའུ་གསུངས། །ཚངས་པ་དབྱངས་ཀྱི་གླུ་དྲུག་ནི། །དྲེང་ངེ་བ་དང་དུང་ངེ་བ། །ཤརྔྷ་བ་དང་གརྔྷ་བ། །ཅང་ཀ་དེའུ་དང་པང་ཀ་དེའུ། །གླུ་དྲུག་བླངས་པས་དོན་དྲུག་གྲུབ། །དྲེང་ངེ་བ་ཡི་གླུ་བླངས་པས། །ཚངས་པ་ལྷ་ཡི་དཀྱིལ་འཁོར་ནས། །སྐུ་ཡི་དངོས་གྲུབ་ཆེན་པོ་ཐོབ། །དུང་ངེ་བ་ཡི་གླུ་བླངས་པས། །བརྒྱ་བྱིན་ལྷ་ཡི་དབང་པོ་ཡི། །གསུང་གི་དངོས་གྲུབ་ཆེན་པོ་ཐོབ། །ཤ་རྡ་བ་ཡི་གླུ་བླངས་པས། །རྒྱལ་པོ་ཆེན་པོ་བཞི་རྣམས་ཀྱི། །ཡོན་ཏན་ཆེན་པོའི་དངོས་གྲུབ་ཐོབ། །གརྔྷ་བ་ཡི་གླུ་བླངས་པས། །ཕྱོགས་སྐྱོང་ཆེན་པོ་བཅུ་རྣམས་ཀྱི། །ཡོན་ཏན་ཆེན་པོའི་དངོས་གྲུབ་ཐོབ། །ཅང་ཀ་དེའུའི་གླུ་བླངས་པས། །སྲིད་པའི་དབང་སྡུད་མཐུ་བོ་ཆེ། །པང་ཀ་དེའུའི་གླུ་བླངས་པས། །དྲག་པོའི་ཡུལ་བདག་དབང་དུ་སྡུད། །པདྨ་གར་གྱི་བྲོ་བརྡུངས་པ། །བདུད་བཞི་ཐལ་བར་རློག་པའི་བྲོ། །སྲིད་པའི་དཀྱིལ་འཁོར་འདྲེན་པའི་བྲོ། །དྲེང་ངེ་བ་ཡི་གླུ་
དང་སྦྱར། །སྡུག་བསྔལ་ནད་སེལ་ཐུགས་རྗེའི་བྲོ། །དུང་ངེ་བ་ཡི་གླུ་དང་སྦྱར། །ཐུགས་དམ་དབྱིངས་ནས་བསྐུལ་བའི་བྲོ། །ཤརྔྷ་པ་ཡི་གླུ་དང་སྦྱར། །ཡེ་ཤེས་རྒྱལ་བའི་བྲོ་བོ་ཆེ། །གརྔྷ་བ་ཡི་གླུ་དང་སྦྱར། །མ་མོ་འཁྲུག་པའི་བྲོ་བོ་ཆེ། །ཅང་ཀ་དེའུའི་གླུ་དང་སྦྱར། །ལངྈ་བསྒྲལ་བའི་བྲོ་བོ་ཆེ། །པང་ཀ་དེའུའི་གླུ་དང་སྦྱར། །ཚངས་པའི་དབྱངས་ཀྱི་གླུ་བླངས་པས། །པདྨ་གར་གྱི་དབང་ཕྱུག་མས། །ཁམས་གསུམ་མ་ལུས་དབང་དུ་འགྱུར། །དབང་ཆེན་བསྡུས་པའི་ཏན་ཏྲ་ལས། ཚངས་པ་དབྱངས་ཀྱི་གླུ་དྲུག་གི་ལེའུ་སྟེ་སུམ་ཅུ་སོ་ལྔ་པའོ།། །།ཚེ་ལ་དབང་ཐོབ་རིག་འཛིན་རྣལ་འབྱོར་གྱིས། །དབང་ཆེན་བསྡུས་པའི་ཏན་ཏྲ་ལས། །མ་མོ་བཀོལ་བའི་ལེའུ་འདི་གསུངས། །དུར་ཁྲོད་ཆེན་པོར་མངོན་སུམ་དུ། །དུར་ཁྲོད་དཀྱིལ་འཁོར་གྲུ་བཞི་སྟེ། །དབུས་ཀྱི་མཐིང་ནག་གྲུ་གསུམ་ལ། །མཐའ་སྐོར་ཟླ་གམ་བརྒྱད་ཀྱིས་བསྐོར། །དབུས་སུ་ཡུམ་ཆེན་གཟི་ལྡན་དང་། །ཟླ་གམ་བརྒྱད་ལ་གཞག་པ་ཡང་། །མཚན་དང་ལྡན་པའི་བྷནྡྷ་ལ། །གྲུབ་པའི་མ་མོ་བརྒྱད་བྲིས་ཏེ། །དུར་ཁྲོད་མ་མོ་དགོད་པ་ཡང་། །ཤར་དུ་རྡོ་རྗེ་སྡེར་མོ་ཅན། །ལྷོ་རུ་མ་མོ་གློག་འགྱུ་མ། །ནུབ་ཏུ་རྡོ་རྗེ་དྲ་བ་མོ། །བྱང་དུ་མ་མོ་དེ་བ་གཞག །ཤར་ལྷོ་མཚམས་སུ་དགོད་པ་ཡང་། །རྡོ་རྗེ་ཁམ་རྒྱ་ཆེན་མོའོ། །ལྷོ་ནུབ་མཚམས་སུ་དགོད་པ་ཡང་། །རིན་ཆེན་ཁམ་རྒྱ་དགོད་པར་བྱ། །ནུབ་བྱང་མཚམས་སུ་པདྨ་རྒྱ། །བྱང་ཤར་མཚམས་སུ་ལས་ཀྱི་རྒྱ། །ཕྱི་རིམ་བར་ཁྱམས་ཆེན་མོ་ལ། །ཟླ་གམ་དམར་པོ་བཅུ་དྲུག་ལ། །ཕྲ་མེན་བཅུ་དྲུག་རིམ་པ་བཞིན། །སྒོ་བཞིར་ཟླ་གམ་བཞི་བྲིས་ཏེ། །སྟེང་དུ་ལྕགས་ཀྱུ་ལ་སོགས་དགོད། །དེ་ལྟར་བཤམས་པའི་དཀྱིལ་འཁོར་དུ། །གནོད་སྦྱིན་གཟུགས་ནི་ཁྲག་གིས་བྲིས། །སྙིང་གར་རྡོག་པས་མནན་ནས་སུ། །དགུག་པའི་བརྟུལ་ཞུགས་ཧཱུཾ་བཟླས་པས། །གནོད་སྦྱིན་མ་འོངས་བར་དུ་ནི། །རྦད་ནས་ཞག་བདུན་གྱིས་ཀྱང་ཁུག །
གནོད་སྦྱིན་ཀུན་ལ་ཅི་དགར་སྤྱད། །རྣལ་འབྱོར་པ་ཡི་བྲན་དུ་འགྱུར། །ཕྲ་མེན་ལས་ལ་འཁོལ་འདོད་ན། །དཀྱིལ་འཁོར་དེ་ཡི་དབུས་དག་ཏུ། །རས་སམ་གྲོ་ག་ཤིང་ཤུན་ལ། །ཕྲ་མེན་གཟུགས་ནི་ཁྲག་གིས་བྲིས། །དབང་པོ་ཡན་ལག་ཕུར་པས་མནན། །སྙིང་གར་རྡོག་པས་མནན་ནས་ནི། །དགུག་པའི་ཧཱུཾ་ཞེས་བརྟུལ་ཞུགས་བཟླས། །གོང་མ་བཞིན་དུ་བདུན་གྱིས་འོང་། །བདག་ཉིད་ཇི་ལྟར་འདོད་པ་བཞིན། །ཕྲ་མེན་རྣམས་ནི་ཅིར་དགར་འཁོལ། །ཁོང་གིས་འགལ་ན་ཁོང་དག་འཆི། །བདག་གིས་འགལ་ན་བདག་ཉིད་ཉམས། །མ་མོ་བསྒྲུབ་པའི་དུས་དག་ཏུ། །ནད་པར་མལ་ནས་ལངས་ནས་ཀྱང་། །ཡི་དམ་གནས་པའི་ས་ཕྱོགས་སུ། །གོམ་གསུམ་སྤགས་ནས་སྐུ་གསུམ་དྲན། །བཤང་གཅི་བྱེད་པའི་ས་ཕྱོགས་སུ། །དྲི་ཆེན་ལག་ཏུ་བླངས་ནས་ཀྱང་། །སུས་མ་མཐོང་བར་ཁམ་གསུམ་བཟའ། །དྲི་ཆུ་ཁྱོར་བར་བླུགས་ནས་ཀྱང་། །སུས་མ་མཐོང་བར་ཐང་གསུམ་བཏུང་། །ཕྲ་མེན་ཆེན་མོ་བཀོལ་བའི་ཕྱིར། །ཤིན་ཏུ་དབེན་པའི་ས་ཕྱོགས་སུ། །རྐང་བཞི་ས་ལ་བཙུགས་ནས་ནི། །ཕག་སྐད་ཐེངས་གསུམ་ངུར་བར་བྱ། །བྱང་གི་ཕྱོགས་སུ་ཁ་བལྟས་ཏེ། །དྲི་ཆེན་མདུན་དུ་བཞག་ནས་ཀྱང་། །ཁྱི་སྐད་ཐེངས་གསུམ་ཟུག་པར་བྱ། །ནུབ་ཀྱི་ཕྱོགས་སུ་ཁ་བལྟས་ཏེ། །རྟ་སྐད་འཚེར་བའི་གླུ་སྐད་བླངས། །ཕྲ་མེན་རྣམས་ལ་ཅི་དགར་སྤྱོད། །འདི་ནི་མ་མོ་བཀོལ་བའི་ལེའུ། །དཀྱིལ་འཁོར་འདི་ལ་བཀྲམ་པ་ཡང་། །དབུས་སུ་བཀྲམ་པ་འདི་དག་སྟེ། །གཉིས་ལྡན་བྱང་ཆུབ་སེམས་ཆེན་པོ། །འོ་མ་དང་ནི་བསྲེས་ལ་བཞག །ཕྱར་ཞིང་མ་མོ་སྙན་དབྱངས་བླངས། །ཕྱོགས་བཞི་བདུད་རྩི་བཞི་རྣམས་ཀྱིས། །རིམ་པ་བཞིན་དུ་ཟླ་གམ་ལའོ། །ཡི་གེ་འཕྲོ་འདུས་སྦྱངས་ནས་ཀྱང་། །ཕག་མོ་བསྟེན་དབྱངས་བླངས་ཤིང་ཕྱར། །མཐའ་སྐོར་ཤར་ལྷོའི་མཚམས་སུ་ནི། །རྫས་ཀྱི་གྱོ་ཚལ་བཅུ་དྲུག་ལ། །རཀྟ་ཁྲག་དང་བསྲེས་པ་ཡིས། །ཁ་ཞེས་བོས་ལ་ཕྱར་ལ་གཞག །སྒོ་མ་རྣམས་ལ་དགོད་པ་ཡང་། །བྱང་བུ་སྣག་ཚས་བྲིས་པ་ལ། །ཁ་ཁ་ལེ་ལེས་བོས་ལ་སྦྱར། །འདི་ལྟར་རྟོགས་ནས་བསྒོ་
བ་ཡང་། །འགྲུབ་འགྱུར་འདི་ལ་ཐེ་ཚོམ་མེད། །གཏོར་མ་ཆོ་ག་གཞུང་བཞིན་གཏང་། །སློབ་མ་རཀྟས་དབང་བསྐུར་རོ། །དངོས་གྲུབ་བརྟན་ཕྱིར་བཟླས་པའི་ལས། །སྲོད་ལ་འཁོར་གསུམ་བྲོ་བརྡུངས་ལ། །ཐོ་རངས་སྦྱོར་བའི་ལས་ཀྱང་བྱ། །བྱང་ཆུབ་སེམས་ཀྱི་དབང་བསྐུར་རོ། །དངོས་གྲུབ་ཏུ་ནི་རྟག་འགྱུར་རོ། །དབང་ཆེན་བསྡུས་པའི་ཏན་ཏྲ་ལས། མ་མོ་བཀོལ་བའི་ལེའུ་སྟེ་སུམ་ཅུ་སོ་དྲུག་པའོ།། །།ཚེ་ལ་དབང་ཐོབ་རིག་འཛིན་རྣལ་འབྱོར་གྱིས། །མཐུ་ཆེན་ལངྈ་འདུལ་བའི་ཕྱིར། །དབང་ཆེན་བསྡུས་པའི་ཏན་ཏྲ་ལས། །སྲིན་པོ་གནན་ཕྱིར་འདི་གསུངས་སོ། །དང་པོར་ཏིང་འཛིན་རྣམ་གསུམ་ལས། །རྒྱུ་ཡི་ཏིང་འཛིན་དམིགས་པ་ཡང་། །ཆོ་ག་གསུམ་དང་ལྡན་པའི་ཧཱུཾ། །འཕྲོ་འདུ་རྡོ་རྗེར་རབ་ཏུ་དམིགས། །དེ་ལས་གར་གྱི་སྐུར་གསལ་ཞིང་། །དབུ་ལྔ་བཅུ་དྲུག་བསྒོམ་པ་ཡང་། །སྙིང་པོ་སྔགས་ཀྱིས་ཁྲོས་པར་བསྒོམ། །ཧྲཱྀ་ཕཊ། ཨཱོཾ་ཧཱུཾ་རུ་ལུ་རཾ་ཛཿ། བཛྲ་ཨེ་ཨཱ་ར་ལི་ཛཿ། དེ་རྣམས་སྤྲོ་བསྡུ་གསལ་བ་ལས། །སྐུར་གྱུར་བརྟན་པར་གྱུར་པ་དང་། །ཉིད་ཀྱིས་འདུལ་བར་ཞལ་འཆེས་ཏེ། །སྡིགས་མཛུབ་ནམ་མཁར་ཕྱར་བ་ཡང་། །བསྐལ་པའི་མེ་འབར་མེ་ལྕེ་ལས། །ཨ་ལ་ལ་ཡི་ཐོག་ཐོག་འཁྲུགས། །དེ་ཡང་ཐུགས་རྗེ་གསང་བའི་ཐོག །ཀླུ་དང་ལངྈའི་སྲིང་པོར་འདྲིལ། །བསྒྲལ་སྔགས་དྲག་པོས་རབ་ཏུ་བསྒྲལ། །འདྲེན་པའི་སྙིང་པོ་ཙིཏྟ་ཕྱུང་། །སྲིན་མོ་བཞིར་ནི་རྣམ་པར་སྤྲུལ། །མེ་སྤྲུལ་རྣམས་སུ་དེ་བཞིན་ཏེ། །ཕུང་པོ་ལྔ་ནི་གཞལ་ཡས་ཁང་། །ཚོགས་བརྒྱད་དུར་ཁྲོད་བརྒྱད་དུ་དྲང་། །བཀའ་དང་མཐུན་པའི་གཞལ་ཡས་ནི། །རྒྱན་དང་ཆ་ལུགས་གསུངས་པ་བཞིན། །དེ་ཡི་ནང་དུ་དམིགས་པ་ཡང་། །འཁོར་ལོ་འབར་བའི་གཞལ་ཡས་ཁང་། །གསང་བའི་རྫས་དང་མཆོད་པར་བཅས། །འཁོར་ལོའི་ཡོན་ཏན་བསམ་མི་ཁྱབ། །མཐའ་ལ་རྩིབས་དང་གྲུ་ཆད་དང་། །མུ་ཁྱུད་བར་ཁྱམས་སྒོ་ཁྱུད་བཅས། །སྤྲོས་ཤིང་དབྱིངས་སུ་
བསྡིམ་བྱས་ཏེ། །དབྱིངས་ལས་འབར་བའི་སྐུ་ཡང་བསྐྱེད། །སྐད་ཅིག་མ་ཡི་ཏིང་འཛིན་ལས། །ཧཱུཾ་དུ་སྐུར་བསྐྱེད་འབར་བ་ཡིས། །ཀླུ་དང་ལངྈ་བཅད་གཏུབས་ཏེ། །ཉོན་མོངས་ལྔ་ཡང་གནན་པར་བྱ། །དེ་ལྟར་བྱས་ནས་མནན་ནས་ཀྱང་། །འཁོར་གྱི་ལྷ་མོས་བསྟོད་པ་བྱས། །བསྡུ་བར་བྱ་བའི་ལུང་དུ་གྲགས། །འབར་བའི་གཞལ་ཡས་འོད་ལྟ་བུ། །མཆོད་རྟེན་ཆེན་པོ་བཞི་ལ་འདུས། །ལོང་བའི་ཚོགས་ལ་རིམ་པ་བཞིན། །དད་དམ་རང་བཞིན་བདག་ཉིད་དོ། །སྐྱེ་བ་མེད་པའི་དབྱིངས་ལ་བསྡུ། །དཀྱིལ་འཁོར་བསྡུ་བར་གསུངས་པ་ནི། །མཆོད་རྟེན་སྒོ་ཁྱུད་རིམ་པ་བཞིན། །དེ་ནས་སྒྲུབ་རྫས་བསྡུ་བ་ཡང་། །ཤ་དྲི་མནན་པའི་ཁྲག་ལ་བསྡུ། །ཁྲག་དང་ཙནྡན་སྔ་མ་བཞིན། །ལས་ཀྱི་རྣམ་པ་བྱ་བའི་ཕྱིར། །སྤྲོ་བའི་ཐབས་ནི་འདི་དག་གོ། །སྐུ་གསུམ་ཕྱག་རྒྱ་འོད་དུ་འཕྲོ། །མཚོན་ཆ་ལ་སོགས་སྔ་མ་བཞིན། །ལས་ཀྱི་གནན་པ་བྱ་བའི་ཕྱིར། །ཀླུ་དང་སྲིན་པོ་མནན་པའི་ཐབས། །ཧོམ་ཁུང་དག་ཏུ་གནན་པ་བྱ། །ལང་ཀའི་གནས་སུ་གནན་པའི་ཕྱིར། །མེ་ལྷ་གཞུང་བཞིན་བསྒོམས་ལ་གཞག །སྤར་ནས་སྦྱིན་སྲེག་བྱ་བ་ཡང་། །རྔ་ཡི་རོལ་མོས་དྲངས་ཏེ་བྱའོ། །མི་མཐུན་ཕྱོགས་ནི་ཧོམ་ཁུང་བསྟབ། །དཀྱིལ་འཁོར་བསྡུ་བར་བསྟན་པའི་ཕྱིར། །སྒོ་ལྔ་ལ་སོགས་དབྱིངས་སུ་བཅུན་པར་བྱ། །དབང་ཆེན་བསྡུས་པའི་ཏན་ཏྲ་ལས། ལངྈ་མནན་པའི་ལེའུ་སྟེ་སུམ་ཅུ་སོ་བདུན་པའོ།། །།ཚེ་ལ་དབང་ཐོབ་རིག་འཛིན་རྣལ་འབྱོར་པས། །ཐོད་རྒལ་འཇིགས་པའི་ཕྲིན་ལས་ཀྱིས། །རྣལ་འབྱོར་དགྲ་བགེགས་གདུལ་བའི་ཕྱིར། །རྒྱུད་ལས་ངེས་པའི་གཞུང་འདི་གསུངས། །དང་པོར་ཏིང་འཛིན་རྣམ་གསུམ་བསྒོམ། །རྒྱུ་ནི་ཧཱུཾ་དམར་སྤྲོས་པ་ལས། །འོད་ཀྱིས་དམྱལ་བའི་ཉེས་སྐྱོན་སྦྱངས། །འདི་ནི་ཁྲག་འཐུང་ཧཱུཾ་གི་ལེའུ། །དམར་པོ་ཧཱུཾ་གི་འཕྲོ་འདུ་ལས། །ཡི་དྭགས་རྣམས་ཀྱི་བཀྲེས་སྐོམ་འཇོམས། །བདེ་བ་ཆེན་པོའི་ཐུགས་རྗེའི་ལེའུ། །ཕྲ་མེན་རྔ་ཐབས་ཞེས་ཀྱང་བྱ། །དེ་ལ་ཉི་མ་བདུན་གྱིས་རབ་བསྐོར་བ། །སྲིད་གསུམ་
མ་ལུས་བསྲེག་པའི་དབང་དང་ལྡན། །སྤྲིན་མེད་གསལ་བའི་འོད་ཟེར་འབར་བ་སྤྲོས། །དེ་སྟེང་པདྨ་ཁ་སྟོང་ལྡན་པ་ལས། །རྡོ་རྗེ་རྩེ་གཅིག་པདྨའི་སྙིང་པོར་གནས། །དེ་དབུས་ཧཱུཾ་ལས་བྱོལ་སོང་སྐྱེ་གནས་འཇོམས། །འདི་ནི་གསལ་བྱེད་ཉི་ཟླ་འོད་ཀྱི་ལུང་། །པདྨའི་ལྟེ་བར་གནས་པའི་རྡོ་རྗེའི་དཀྱིལ། །ཧཱུཾ་ལས་འོད་འཕྲོས་མི་རྣམས་བག་ཆགས་སྦྱངས། །འཁོར་ལོ་རྩིབས་སྟོང་ལྡན་པའི་ཧཱུཾ་དུ་གྲགས། །དེ་སྟེང་བྷྲཱུཾ་ལས་ཡེ་ཤེས་གཞལ་ཡས་ཁང་། །རྒྱལ་ཆེན་ཕྱོགས་སྐྱོང་མ་ལུས་ཀ་དང་གདུང་། །མེ་རི་ཐོད་ཕྲེང་སྦྲུལ་ལ་སོགས་པས་བརྒྱན། །དེ་དབུས་རྡོ་རྗེ་སེམས་དཔའི་ཕྱག་རྒྱ་གསལ། །འདི་ནི་རྡོ་རྗེ་སེམས་དཔའི་ལུང་དུ་གྲགས། །དེ་ལས་ཧཱུཾ་གི་འོད་ཟེར་གསལ་བ་དང་། །ཞེ་སྡང་རྡོ་རྗེ་སེམས་དཔའི་སྐུར་བསྒོམས་ནས། །ཤངས་དང་ཁྲོ་བོ་ཧཱུཾ་དྲུག་སྒྲ་བཏོན་པས། །རྒྱུད་དྲུག་གནས་པའི་འཁོར་བ་རྩད་བཅད་དེ། །སྤྲོས་ནས་རིམ་པ་བཞིན་དུ་ཐིམ་བྱས་ནས། །ཁྲོ་བོར་གྱུར་པའི་ཧཱུཾ་གི་ལེའུ་ཞེས་བྱའོ། །ཧཱུཾ་ལས་འབར་བའི་སྐུ་བསྐྱེད་གསལ་བ་དང་། །ལྗགས་ཀྱི་དཀྱིལ་དུ་བྷྲཱུཾ་ལས་རིན་པོ་ཆེ། །ཨཱོཾ་ལ་སོགས་པའི་འཕྲོ་འདུ་ལས། །དཔལ་ཆེན་འབར་བའི་སྐུར་གསལ་ཏེ། །ཁང་བུ་ལྔ་དང་ལྡན་པར་དམིགས། །དེ་དབུས་རྟ་མགོ་ལྗང་གུ་བསྒོམ། །སྦྲུལ་ནག་སྟོང་གི་རྒྱན་དུ་མཛེས། །ཐོད་པ་ཚར་གསུམ་བརྗིད་པར་ལྡན། །ཞིང་ལྤགས་སྟོད་ལ་གཡང་གཞི་ཤམ་ཐབས་ཅན། །ཕྱི་ནང་གཤོག་པ་ནམ་མཁའི་ཁམས་དང་མཉམ། །གསང་བའི་ལྷ་མོ་རྡོ་རྗེ་དྲ་བ་མོ། །འགྲོ་བ་མ་ལུས་དབང་དུ་སྡུད་པའི་ཡུམ། །བཅུ་དྲུག་ཕྱག་ན་མཚོན་ཆ་མ་ལུས་བསྣམས། །ཞེ་སྡང་གདུག་པའི་དགྲ་བགེགས་མང་པོ་འདུལ། །ཞབས་ཀྱི་ཆས་བརྒྱད་ཁྲོ་བོ་གནོན་དང་སྦྱོར། །དཔའ་བོ་ལ་སོགས་ཏིང་འཛིན་བརྒྱད་དང་ལྡན། །འཁོར་གྱི་མེ་འབྲུག་རླུང་འབྲུག་ལ་སོགས་ནི། །རང་སྔགས་སྙིང་པོས་ཕྱོགས་མཚམས་ཁྱབ་པར་རོ། །རླུང་འབྲུག་སྔོན་མོ་རྩ་བའི་སྔགས་ཀྱིས་བསྒོམ། །ལོང་བ་རྒྱབ་སྦྲེལ་མང་པོ་དམིགས་པ་ཡང་། །ཡང་སྤྲུལ་བྱེ་བ་འབུམ་དང་བཅས་པ་སྟེ། །ཕྱོགས་བཞི་ནས་ནི་རྣམ་
པར་འཁྲུགས་པའོ། །ཕྱི་རིམ་དམུས་ལོང་འཁོར་བ་ཅན། །ཤོ་རི་ཁ་ཡི་སྒྲས་བསྐྱེད་ཅིང་། །མཐའ་དབུས་མེད་པར་ཁྱབ་པའོ། །ཁམ་རྒྱ་ཆེན་མོ་དྲུག་རྣམས་ནི། །དཀྱིལ་འཁོར་གྲྭ་ཡི་ཕྱོགས་སུ་གསལ། །ཡེ་ཤེས་དཔལ་གྱི་ཁྱི་བརྒྱད་ནི། །ཕྱོགས་བཞི་དང་ནི་མཚམས་ནས་འགྱེད། །མ་ལུས་དགྲ་བགེགས་མཆེ་བས་གཅོད། །ཕྱི་རིམ་ལྕགས་ཀྱི་སྤྱང་མོ་བརྒྱད། །དགྲ་བོ་རྣམས་ལ་རྦད་པར་བྱ། །དེ་ལྟར་ཕྱག་རྒྱ་རྫོགས་པ་དང་། །སྐུ་ཉིད་འཁོར་ལ་སྦས་པ་སྟེ། །ཕྱོགས་བཞི་དབུས་ལྔར་ཁང་བུར་སྦ། །རྟ་མགོ་ལ་སོགས་རིམ་པ་བཞིན། །དེ་ཡང་ཆོས་ཀྱི་དབྱིངས་སུ་སྡུད། །ད་ནི་ཕུར་པའི་ལས་བྱས་ཏེ། །རྒྱ་མདུད་འཁོར་ལོའི་ཚུལ་དུ་བྱ། །སྤྱི་བོར་པདྨ་ཁྲག་འཐུང་སྟེ། །ཟུར་བརྒྱད་ལོང་བ་རྒྱབ་སྦྲེལ་ཚོགས། །རྒྱ་མདུད་འོག་མར་དམུས་ལོང་དམིགས། །ངོས་ལ་ལྕགས་ཀྱི་སྤྱང་མོ་སྟེ། །རྩེ་མོར་ཁྲོ་བོ་དམིགས་བྱ་བ། །མགོ་དགུ་བརྩེགས་པའི་རྐང་གཅིག་པོ། །ད་ནི་བསྡུ་བར་བྱ་བ་ཡང་། །སྒོ་སྲུང་སྤྱང་མོ་ཉིད་ལའོ། །སྤྱང་མོ་ཞབས་ཀྱི་ཆས་བརྒྱད་ལའོ། །དེ་ཡང་དུར་ཁྲོད་བརྒྱད་ལ་འདུས། །དུར་ཁྲོད་ཡེ་ཤེས་ཆེན་པོ་སྟེ། །དེ་ཡང་མི་གནས་ཡེ་ཤེས་ལའོ། །མེ་འབྲུག་གཤོག་པ་ཉིད་ལ་འདུས། །གཤོག་པ་སྐུ་ཡི་རྒྱན་དང་ལྡན། །དེ་ཡང་ཚོན་སྣ་ལྔ་ལ་འདུས། །ཚོན་སྣ་ལྔ་ནི་དབུ་རྒྱན་ལྔའོ། །དེ་ཡང་རིན་ཆེན་ཁང་བུ་སྟེ། །དེ་ཡང་སྐུ་གསུང་ཐུགས་ལ་འདུས། །དེ་ཉིད་ཆོས་ཀྱི་དབྱིངས་ལ་འདུས། །དབྱིངས་ཀྱང་ཀུན་གཞི་ཉིད་དུ་སྟེ། །མི་དམིགས་ཆོས་སྐུ་ཆེན་པོར་གནས། །དབང་ཆེན་བསྡུས་པའི་ཏན་ཏྲ་ལས། ཐོད་རྒལ་འཇིགས་པའི་ལེའུ་སྟེ་སུམ་ཅུ་སོ་བརྒྱད་པའོ།། །།ཚེ་ལ་དབང་ཐོབ་རིག་འཛིན་རྣལ་འབྱོར་གྱིས། །གནོད་སྦྱིན་ཕྲ་མེན་འཁོར་བཅས་ཀྱིས། །བདག་ལ་རབ་ཏུ་གཙེས་འགྱུར་ན། །དབང་ཆེན་བསྡུས་པའི་ཏན་ཏྲ་ལས། །དཀའ་ཐུབ་སྨྱོན་ཐབས་འདི་གསུངས་སོ། །ས་ཡི་འོག་ཏུ་མངོན་སུམ་བྱ། །ངག་གི་ཧཱུཾ་ཞེས་ཅུང་ཟད་བཟླས། །མཱང་ས་དག་ཀྱང་མང་དུ་བཟའ། །ནམ་མཁའ་ལ་ནི་སེམས་དཔའ་
བསམ། །བགྲང་འཕྲེང་ཀླད་ལ་ལན་གསུམ་བསྐོར། །དེ་ལྟར་བྱས་ན་བདག་རྒྱལ་ཞིང་། །ནད་གཏོང་མ་ནི་འཆི་བར་འགྱུར། །ཉིན་དང་མཚན་དུ་ཐུག་ཕྲད་དུ། །རིགས་མ་འཆོལ་བར་སྦྱོར་བར་བྱ། །སྐྱེ་བོས་མཐོང་ན་དམ་ཚིག་ཉམས། །སུས་མ་མཐོང་ན་དངོས་གྲུབ་ཡིན། །སྦྱོར་བའི་བྱང་སེམས་ལྕེ་ལ་གཞག །རང་གི་དབེན་རིགས་གང་ཡིན་པར། །སྐྱེ་བོ་འདུ་འཛི་ཐག་བསྲིངས་ཏེ། །དགུག་པའི་བརྟུལ་ཞུགས་ཆེན་པོ་ནི། །དབྱངས་ཀྱང་དྲག་ཏུ་བླང་བར་བྱ། །བྱ་ཡི་བརྟུལ་ཞུགས་ཆེན་པོས་ནི། །ཁམས་གསུམ་སྒུམ་བུར་བཏུ་བར་བྱ། །ཕག་གི་བརྟུལ་ཞུགས་ཆེན་པོས་ནི། །སྲིད་གསུམ་ཁྲོན་དུ་བརྐོ་བར་བྱ། །ཁྱི་ཡི་བརྟུལ་ཞུགས་ཆེན་པོས་ནི། །དམྱལ་ཁམས་ཟས་སུ་ཟ་བར་བྱ། །སྲོད་དང་ཐོ་རངས་བྲོ་བརྡུངས་པ། །དཀའ་ཐུབ་སྨྱོན་པའི་བྲོ་བརྡུངས་པ། །རུ་ལུའི་བསྙེན་པ་འབུམ་བཟླས་ནས། །གནོད་སྦྱིན་ཕྲ་མེན་འཁོར་རྣམས་ཀྱང་། །བདག་གི་དབང་དུ་འདུ་བར་འགྱུར། །གླུ་དབྱངས་ཁྱི་སྐད་བྱང་དུ་ཟུག །ཁྱི་ཡི་དཀའ་ཐུབ་སྨྱོན་པ་ཡིན། །རྟ་སྐད་ནུབ་ཀྱི་ཕྱོགས་སུ་འཚེར། །རྟ་ཡི་དཀའ་ཐུབ་སྨྱོན་པ་ཡིན། །བྱ་སྐད་ནུབ་ཀྱི་ཕྱོགས་སུ་ཅོང་། །བྱ་ཡི་དཀའ་ཐུབ་སྨྱོན་པ་ཡིན། །ཕག་སྐད་ལྷོ་ཡི་ཕྱོགས་སུ་ངུར། །ཕག་གི་དཀའ་ཐུབ་སྨྱོན་པ་ཡིན། །དེ་ལྟར་བྱས་ནས་བརྟུལ་ཞུགས་ཀུན། །ཧཱཾ་ཞེས་བྱ་བའི་དབྱངས་བླངས་ནས། །བདག་གི་ལུས་ལ་ཞུགས་པར་བྱ། །དུས་ལ་བབ་པའི་བྲོས་མཆོད་པ། །རྔེའུ་ཆུང་ལན་གསུམ་བརྡུང་བར་བྱ། །དེ་ནས་དགྲ་བགེགས་འདུལ་བའི་ཕྱིར། །བརྟུལ་ཞུགས་ཏིང་འཛིན་ཞུགས་ནས་ཀྱང་། །གླུ་བྲོ་དམ་ཚིག་བཞིན་དུ་བླངས། །བསྒྲུབ་པ་ཆེན་པོའི་བར་གཅོད་པ། །བརྟུལ་ཞུགས་ཆེན་པོས་བསྒྲལ་ནས་ཀྱང་། །དུས་གསུམ་རྒྱལ་བའི་སྲས་སུ་བསྐྱེད། །དཀའ་ཐུབ་ཆེན་པོ་ཡིན་པའི་ཕྱིར། །སུ་དང་གཏམ་ཡང་བསྲེ་མི་བྱ། །སྨྱོན་པའི་ཚུལ་དུ་མཆོངས་པ་ཡིས། །གནོད་སྦྱིན་ཕྲ་མེན་རྣམས་ཀྱང་བརྒྱལ། །ནམས་ཀྱང་བདག་གིས་དབང་དུ་
འགྱུར། །ཉན་ཐོས་དབང་དུ་བསྡུ་བའི་ཕྱིར། །སྔགས་ཀྱི་དཀའ་ཐུབ་ཆེན་པོ་ཡིས། །བདུད་རྩི་རྣམ་ལྔའི་ལོངས་སྤྱོད་བྱ། །མ་སྤངས་པར་ནི་དབང་དུ་སྡུད། །ནན་ཏན་དྲག་ཤུལ་སྨྱོན་ཐབས་སུ། །སུ་དང་ཕྲད་པར་སྦྱར་ཞིང་བསྒྲལ། །འདི་ནི་དཔལ་གྱི་ཐུགས་དམ་སྟེ། །རྒྱུན་མི་ཆད་པར་སྤྱད་ན་ནི། །བདག་གིས་ཇི་ལྟར་འདོད་པ་བཞིན། །དཀའ་ཐུབ་བསྲུངས་པས་དངོས་གྲུབ་ཐོབ། །འདི་ལ་སོམ་ཉི་ཇི་སྟེ་ཟ། །དབང་ཆེན་བསྡུས་པའི་ཏན་ཏྲ་ལས། བརྟུལ་ཞུགས་དཀའ་ཐུབ་སྨྱོན་པའི་ལེའུ་སྟེ་སུམ་ཅུ་སོ་དགུ་པའོ།། །།ཚེ་ལ་དབང་ཐོབ་རིག་འཛིན་རྣལ་འབྱོར་གྱིས། །བསྒྲུབ་མཆོག་གང་ཞིག་རྟོགས་འདོད་ཕྱིར། །དབང་ཆེན་བསྡུས་པའི་ཏན་ཏྲ་ལས། །མན་ངག་བསྡུས་པའི་ལུང་འདི་གསུངས་སོ། །དེ་ལ་དབང་གི་རྒྱལ་པོ་འདིའི་མགོ་མཇུག་ཏུ། སྤྱི་དོན་བཞིས་སྟོན་ཏེ། གང་ཞེ་ན། རྒྱན་གསུམ་གྱི་དོན་དཔེ་གསུམ་གྱི་སྒོ་ནས་བསྟན་པ་དང་། རྩིས་འགོ་རྣམ་པ་བརྒྱད་ཀྱིས་ཇི་ལྟར་བསྒོམ་པའི་དོན་བསྟན་པ་དང་། དཀྱིལ་འཁོར་བརྒྱད་ཀྱིས་ཆེ་བ་རྣམ་པ་བརྒྱད་མཐར་ཕྱིན་པར་བསྟན་པ་དང་། རྟོགས་པ་རྣམ་པ་བདུན་གྱིས་རེ་དོགས་ཀྱི་ཐག་གཅད་པའོ། །དེ་ལ་རྒྱན་གྱི་དོན་དཔེ་གསུམ་གྱིས་བསྟན་པ་གང་ཞེ་ན། སྐུ་རྫོགས་པའི་དཀྱིལ་འཁོར་ཐམས་ཅད་ཕུན་སུམ་ཚོགས་པའི་རྒྱན་དུ་བསྟན་པ་དང་། རྒྱན་གྱི་དཀྱིལ་འཁོར་ཐམས་ཅད་སྐྱེ་བ་མེད་པའི་དབྱིངས་སུ་བསྟན་པ་དང་། དེ་སྐད་གསུང་བ་ཐམས་ཅད་བྷ་ག་མཎྜ་ལ་མན་ངག་རྒྱ་མཚོའི་དཀྱིལ་འཁོར་དུ་བསྟན་པའོ། །རྩིས་འགོ་རྣམ་བརྒྱད་ཀྱིས་ཇི་ལྟར་བསྒོམ་པའི་དོན་བསྟན་པ་ཡང་། དང་པོར་མཉམ་པ་ཆེན་པོ་དེ་བཞིན་ཉིད་ཀྱི་རྩིས་འགོ་དང་། གསང་བའི་དབང་ཕྱུག་ཡི་གེ་ཧཱུཾ་གི་རྩིས་འགོ་དང་། ཤེས་རབ་ཐབས་སུ་རོལ་པས་གཞལ་ཡས་ཡུམ་གྱི་རྩིས་འགོ་དང་། ཁམས་གསུམ་དོན་མཛད་སེང་གེ་རྩལ་གྱི་རྩིས་འགོ་དང་། ཡོན་ཏན་ཚང་བར་རྫོགས་པས་རིན་ཆེན་ཁྲིའི་རྩིས་འགོ་དང་། མཁའ་དབྱིངས་དབྱིངས་སུ་དག་པ་དྲི་མེད་པདྨའི་རྩིས་འགོ་དང་། སྤྲུལ་སྐུ་འགྲོ་དོན་ལ་འཁོད་པས་ཉི་ཟླ་འོད་ཀྱི་རྩིས་འགོ་དང་།
རིགས་གཉིས་ལུང་གི་བརྒྱུད་པས་ཞེ་སྡང་རྡོ་རྗེའི་རྩིས་མགོ་དང་བརྒྱད་དོ། །དཀྱིལ་འཁོར་བརྒྱད་ཀྱི་ཆ་བ་རྣམ་པ་བརྒྱད་མཐར་ཕྱིན་པ་ནི།དབུས་རྡོ་རྗེ་དབྱིངས་ཀྱི་དཀྱིལ་འཁོར་གྱིས་དབང་རྣམས་རྫོགས་པའི་མཐར་ཕྱིན། ཐོད་རུས་རྟ་མགྲིན་དབང་གི་དཀྱིལ་འཁོར་གྱིས་སྲིན་པོ་འདུལ་བའི་ཆེ་བ་མཐར་ཕྱིན། ཐུགས་ཀར་ཡེ་ཤེས་སེམས་དཔའི་དཀྱིལ་འཁོར་གྱིས་མཁྱེན་རིགས་གསལ་བའི་ཆེ་བ་མཐར་ཕྱིན། ཟ་བྱེད་དུར་ཁྲོད་ཕྱག་གི་དཀྱིལ་འཁོར་གྱིས་ཐབས་དང་ཤེས་རབ་རོལ་པའི་ཆེ་བ་མཐར་ཕྱིན། གཤོག་པ་ཁམས་གསུམ་རྣམ་རྒྱལ་དཀྱིལ་འཁོར་གྱིས་ཀླུ་ཆེན་ཟིལ་གྱིས་མནན་པའི་ཆེ་བ་མཐར་ཕྱིན། ཞབས་བརྒྱད་ཁྲོ་བོ་བརྒྱད་མནན་པའི་དཀྱིལ་འཁོར་གྱིས་ས་བཅུ་ཟིལ་གྱིས་མནན་པའི་ཆེ་བ་མཐར་ཕྱིན། གཟི་ལྡན་ཐུགས་ཀར་སྦས་པའི་ཆེ་བས་གནས་ལྷུན་གྱིས་གྲུབ་པའི་ཆེ་བ་མཐར་ཕྱིན། ལྷུན་གྲུབ་སྐུ་ལ་རྫོགས་པའི་དཀྱིལ་འཁོར་གྱིས་ཡོན་ཏན་རྫོགས་པའི་ཆེ་བ་མཐར་ཕྱིན་པ་སྟེ་བརྒྱད་དོ། །རྟོགས་པ་བདུན་གྱིས་རེ་དོགས་ཀྱི་དམིགས་པ་བསལ་བ་ནི། གོང་མ་ལྟར་གོང་གིས་རྟོགས་པ་ནི་ཛྙཱ་ན་ཙིཏྟ་ཛྭ་ལ་ཡེ་ཤེས་སུ་རྟོགས་པའོ། །བུཌྜྷ་ཙིཏྟ་ཛྭ་ལས་སངས་རྒྱས་སུ་རྟོགས་པའོ། །བོ་དྷི་ཙིཏྟ་ཛྭ་ལས་བྱང་ཆུབ་ཏུ་རྟོགས་པའོ། །གོང་མ་ལྟར་མ་རྟོགས་ཏེ་དངོས་སུ་བཟུང་ན་ནི།རཀྴ་ཙིཏྟ་ཛྭ་ལས་སྲིན་པོར་རྟོགས་པའོ། །ཡཀྴ་ཙིཏྟ་ཛྭ་ལས་གནོད་སྦྱིན་དུ་རྟོགས་པའོ། །ཀརྨཱ་ཙིཏྟ་ཛྭ་ལས་སྲིན་པོར་རྟོགས་པའོ། །ན་ར་ཀ་ཙིཏྟ་ཛྭ་ལས་དམྱལ་བར་རྟོགས་པའོ། །དབང་ཆེན་བསྡུས་པའི་ཏན་ཏྲ་ལས། མན་ངག་བསྡུས་པའི་ལེའུ་སྟེ་བཞི་བཅུ་པའོ།། །།ཚེ་ལ་དབང་ཐོབ་རིག་འཛིན་རྣལ་འབྱོར་གྱིས། །རོ་སྦྱོར་བདུད་རྩིར་བྱ་བའི་ཕྱིར། །དབང་ཆེན་བསྡུས་པའི་ཏནྟྲ་ལས། །སྒྲུབ་ཐབས་གསང་བ་འདི་གསུངས་སོ། །དང་པོར་ཕུན་སུམ་ཚོགས་ལྡན་ནས། །ཡིད་དུ་འོང་བའི་དགོན་གནས་སུ། །བསླང་དང་བྱིན་གྱིས་བརླབ་པ་དང་། །མཚམས་ལ་སོགས་པ་རིམ་པ་བཞིན། །མན་དྷལ་འདོམ་གང་གྲུ་བཞི་སྟེ། །བཀའ་དང་མཐུན་པའི་ཆག་
ཆག་གདབ། །ཐིག་བཞི་གདབ་པའི་མཐའ་སྐོར་ལ། །རཱུ་ཏྲ་རྣམ་གསུམ་བསྣོལ་ཏེ་གནས། །དབུས་སུ་ཟླ་གམ་བཞི་པ་སྟེ། །དེའི་དབུས་མཐིང་ནག་གྲུ་གསུམ་པའོ། །ཁ་བཞི་པ་ལ་སྦྱིན་སྲེག་པའོ། །མཐའ་སྐོར་འབར་བའི་འོད་ཀྱིས་སོ། །མཐུན་པའི་དམ་རྫས་གནས་པའི་ཕྱིར། །དྲུག་གཉིས་ལྡན་པའི་ཏིང་འཛིན་གྱིས། །མཚན་མས་བཏང་སྟེ་ཧཱུཾ་ཞེས་བསྐོར། །བརྟུལ་ཞུགས་ཆེན་པོས་ཁྲོས་པ་ནི། །གར་གྱི་དབང་ཕྱུག་ཆེན་པོའི་བྲོ། །བརྡུངས་པ་ཙམ་གྱིས་ལས་རྣམས་འགྲུབ། །ཕུད་ཉུལ་ཆེན་མོས་ལས་མཛད་ངེས། །བདག་ཉིད་ཆེན་པོའི་སྐུར་བསྒོམ་ནས། །གཙུག་གི་རྟ་མགོ་ལྗང་གུ་ལས། །རྟ་ཡི་བརྟུལ་ཞུགས་ཆེན་པོ་སྟེ། །ཧཱུཾ་ཞེས་དུ་མར་བརྗོད་ཅིང་བརྡུང་། །བདག་ཉིད་ཆེན་པོའི་སྐུར་བསྒོམས་ནས། །ཞབས་ལས་སྤྲུལ་པའི་ཁྱི་བརྒྱད་ཀྱིས། །བག་ཆགས་གནས་སུ་སྦྱང་བའི་ཕྱིར། །ཁྱི་ཡི་བརྟུལ་ཞུགས་ཆེན་པོ་སྟེ། །ཀུ་ཀུ་ར་ཞེས་རྦད་ཅིང་བརྡུང་། །བདག་ཉིད་ཆེན་པོའི་སྐུར་བསྒོམས་ནས། །གཤོག་པ་རྡོ་རྗེས་གཏམས་པ་ལས། །གཟུང་འཛིན་གནས་སུ་དག་བྱའི་ཕྱིར། །བྱ་ཡི་བརྟུལ་ཞུགས་ཆེན་པོ་ཡིས། །ཛཿཞེས་བརྗོད་ཅིང་མགྱོགས་པར་རོ། །བདག་ཉིད་ཆེན་པོའི་སྐུར་བསྒོམས་ནས། །མི་དམིགས་སྐུ་ཡི་སྦྲུལ་མགོ་ལས། །ཕག་གི་བརྟུལ་ཞུགས་ཆེན་པོས་ནི། །གཏི་མུག་གནས་སུ་དག་པའི་ཕྱིར། །དགུག་པའི་བརྟུལ་ཞུགས་ཧཱུཾ་དང་བཅས་པར་བརྡུང་། །ཆས་བརྒྱད་ལས་ཀྱི་སྤྱང་མོར་དམིགས། །ཐོ་བས་དབྱེ་བ་སྡེར་མོ་ཉིད། །ངན་སོང་གནས་ཀྱི་གདུལ་སྦྱང་བྱ། །ཏིང་འཛིན་ཕྱག་རྒྱར་བཅས་པར་དབྱེ། །རྫོགས་ནས་མ་དྷལ་ཉིད་དུ་གྲགས། །རྟེན་ནི་དུག་གསུམ་ཉིད་དུ་རྟེན། །ལྔ་ནི་ཟླ་གམ་ཉིད་དུ་སྟེ། །སྙིགས་མ་བར་ཁྱམས་གྲྭ་བཞི་ལ། །རྩེ་མོ་མ་ཏང་ཀ་ཉིད་ལའོ། །སྒོ་ཟུར་ལ་ནི་བརྟག་པ་རྣམས། །སྒོ་ནི་ནང་རོལ་རྡོ་རྗེ་སྟེ། །ཕྱག་མཚན་བཅུ་ཕྲག་གཉིས་ལའོ། །ཡན་ལག་བར་དུ་བ་སུ་ཏ། །འོད་ལ་རཀྟ་ཁྲག་དང་བཅས། །ཤུན་ཆེན་བླ་རེ་ཉིད་དུའོ། །རྫི་མ་སྐྲ་དང་ཁ་སྤུ་རྣམས། །མཆོད་པའི་ཕྱིར་ན་གཏོར་བའོ། །ས་ལ་དབང་བའི་བྷནྡྷ་ལ། །
ཕྱེ་མར་རཀྟར་བཅས་པ་རྣམས། །སྤྱོས་སམ་ཡང་ན་བརྫིས་པ་ལ། །སྟེང་ནས་བཅིངས་ཏེ་རྒྱས་བཏབ་དང་། །སྐུ་གསུམ་ཐོད་པ་ཤར་ཕྱོགས་སུ། །རཀྟ་ཆང་དང་སྦྱར་བ་ལ། །སྟེང་ནས་རིན་ཆེན་རྡོ་རྗེས་རྒྱ་ཡིས་བཏབ། །གླིང་གསུམ་པ་ནི་ལྷོ་ཕྱོགས་ཏེ། །རཀྟ་འོ་མར་སྦྱར་བ་ལ། །སྟེང་ནས་རིན་ཆེན་རྒྱ་ཡིས་བཏབ། །དབང་དུ་སྡུད་པའི་བྷནྡ་རུ། །རཀྟ་སྦྲང་རྩི་མར་ལ་སོགས། །སྟེང་ནས་པདྨས་རྒྱ་ཡིས་བཏབ། །གླིང་བཞི་རྒྱ་གྲམ་བྱང་ཕྱོགས་དེར། །རཀྟ་ཆུ་དང་ཆ་བསྙམས་ནས། །སྟེང་ནས་ལས་ཀྱི་རྒྱས་བཏབ་བོ། །རྫོགས་ནས་ཏིང་འཛིན་ཚོགས་སུ་སྩལ། །མཚམས་དང་སྲུང་བའི་གོ་ཆའོ། །ཕྱག་རྒྱ་བསྐྱེད་དང་འཕྲོ་འདུ་དང་། །དྲོད་ཚད་དབབ་དང་ཐུགས་རྗེ་དབབ། །ཚེ་གནས་བསྡིམ་དང་ལྔ་པའོ། །ཡང་ནས་ཡང་དུ་བསྙེན་པ་བྱ། །ཕྲིན་ལས་སྐབས་དང་སྦྱར་ནས་བཅོལ། །དབང་དང་དམ་ཚིག་མི་བཟའ་སྟེ། །ཞི་བ་ལ་སོགས་དཀྱིལ་འཁོར་གྱི། །འཕྲོ་འདུ་རིམ་གྱིས་བསྙེན་པས་སྦྱང་། །བསྐུལ་དང་དོན་བྱས་འདུས་པ་དང་། །ཆོ་ག་གསུམ་གྱིས་སྣང་མཛད་སྐུ། །སེམས་སུ་ཞུ་ནས་དབྱིངས་སུ་ཐིམ། །སྐྱེ་མེད་དབྱིངས་ནས་དངོས་མེད་སྐུ། །ཧཱུཾ་དུ་གྱུར་ནས་རྩེ་ལྔ་འབར། །བསྐུལ་དང་དོན་བྱས་མི་བསྐྱོད་སྐུ། །སེམས་སུ་ཞུ་ནས་དབྱིངས་སུ་ཐིམ། །སྐྱེ་མེད་དབྱིངས་ནས་དངོས་མེད་སྐུ། །སྭཱ་ལས་རིན་ཆེན་ཟུར་བརྒྱད་འཕྲོ། །བསྐུལ་དང་དོན་བྱས་འབྱུང་ལྡན་ཉིད། །སེམས་སུ་ཞུ་ནས་དབྱིངས་ཉིད་དུའོ། །སྐྱེ་མེད་དབྱིངས་ནས་དངོས་མེད་སྐུ། །ཨཱཾ་ལས་པདྨར་གསལ་བ་དང་། །བསྐུལ་དང་དོན་བྱས་སྣང་མཐའ་ཡས། །སེམས་སུ་ཞུ་ནས་དབྱིངས་སུ་ཐིམ། །སྐྱེ་མེད་དབྱིངས་ནས་དངོས་མེད་སྐུ། །ཧཱ་ལས་རྒྱ་གྲམ་འབར་འཕྲོ་བ། །བསྐུལ་དང་དོན་བྱས་དོན་ཡོད་གྲུབ། །སེམས་སུ་ཞུ་ནས་དབྱིངས་སུ་ཐིམ། །འཕྲོ་འདུ་གསལ་དང་ལས་སུ་རུང་། །དངོས་གྲུབ་ཐོབ་ནས་མྱ་ངན་འདས། །མང་དུ་འཕེལ་ཕྱིར་བསྙེན་པ་སྦྱང་། །གྲུབ་ནས་དངོས་གྲུབ་གསོལ་བ་དང་། །བརྟན་པར་བྱ་ཕྱིར་བདུད་རྩིའི་སྣོད། །
ཡུམ་གྱི་གསང་བའི་ཚིག་ཏུའོ། །སྔགས་དང་ལྡན་པས་དབང་བསྐུར་ཏེ། །གནས་ལྔ་དག་ཏུ་ཐིམ་པར་བྱ། །དེ་ནས་རྒྱ་བཤིག་མདུད་པ་དགྲོལ། །བཀྲ་ཤིས་མཚན་དང་ལྡན་པའི་ཡུམ། །དར་ལ་བབས་པས་བསྐུལ་བའི་དབྱངས། །པྲ་བེ་ཤ་ཞེས་མདུད་པ་གྲོལ། །ཆ་གཅིག་འཕགས་པ་མཆོད་ཕྱིར་འབུལ། །ཆ་གཅིག་སློབ་དཔོན་ཉིད་ལའོ། །གཅིག་ནི་ཡོངས་ལ་སྦྱིན་པར་གསུངས། །དེ་ནས་བདུད་རྩི་དམ་པའི་སྣོད། །དེ་ནི་སྤྱི་བོས་བླངས་ནས་ཀྱང་། །བཀྲ་ཤིས་ཚིགས་སུ་བཅད་པར་གསུངས། །རང་བཞིན་དཀྱིལ་འཁོར་རྫོགས་པ་ཡང་། །གཟུགས་བརྙན་ཉིད་འདྲ་ཉིད་ལ་དབུལ། །ཙིཏྟ་ལ་སོགས་རང་བཞིན་རྫས། །རང་བཞིན་མཆོད་པ་ཉིད་དུའོ། །རྣ་བ་སྒྲ་ཡི་མཆོད་པ་ཡིས། །གློག་འགྱུ་ཉིད་དེ་དབྱིངས་སུ་ཐིམ། །དེ་ནི་ཨ་མོ་དེ་བ་སྟེ། །སྤྲོས་པ་མེད་པའི་ངང་ལའོ། །མིག་ནི་རྡོ་རྗེ་སྡེར་མོ་སྟེ། །མཐའ་གཉིས་བྲལ་བའི་དབྱིངས་སུ་གཞག །ལྕེ་ནི་རྡོ་རྗེ་དྲ་བ་མོ། །མི་འགྱུར་དབྱིངས་སུ་ཡང་དག་ཉིད། །རང་བཞིན་མཆོད་པ་རྫོགས་པར་ལྡན། །གཟུགས་བརྙན་དཀྱིལ་འཁོར་འདྲ་བ་ལ། །ཡོངས་སུ་བསྔོ་བར་བྱ་བ་ནི། །ཕོ་བ་ཤར་ཕྱོགས་བར་ཁྱམས་ལ། །དབྱངས་དང་བཅས་པས་དབུལ་བ་ནི། །རྡོ་རྗེ་ཁམ་རྒྱ་ཆེན་མོ་ལ། །ཕུལ་བས་གཟི་ལྡན་དབྱིངས་སུ་ཐིམ། །གྲོད་པ་ལྷོ་ཕྱོགས་ཉིད་ནས་ནི། །རིན་ཆེན་ཁམ་རྒྱ་ཆེན་མོ་ལ། །དབྱངས་དང་བཅས་པ་སྔ་མ་བཞིན། །ཕུལ་བས་གཟི་ལྡན་དབྱིངས་སུ་ཐིམ། །གཉེ་མ་ནུབ་ནས་སྔ་མ་བཞིན། །མ་ཆགས་པདྨའི་ཁམ་རྒྱ་ལ། །ཕུལ་བས་གཟི་ལྡན་བྷ་ག་ལ། །ལང་ཀ་བྱང་ནས་རིམ་པ་བཞིན། །དོན་རབ་ལྷུན་གྲུབ་ཁམ་རྒྱ་ལ། །དབྱངས་ཀྱིས་བསྟོད་ནས་མཉེས་པར་བྱའོ། །གཟི་ལྡན་ལ་ནི་འདུ་འཕྲོའི་ཚུལ། །སུལ་མང་ཤར་ལྷོའི་མཚམས་སུ་སྟེ། །དེ་བཞིན་ཁམ་རྒྱ་ཉིད་ལ་མཆོད། །དབྱངས་དང་ལྡན་པས་ཡེ་ཤེས་དང་། །སྒྱུ་མ་ཡེ་ཤེས་ལྷོ་ནུབ་སྟེ། །དེ་བཞིན་ཁམ་རྒྱ་ཉིད་ལ་མཆོད། །ཁྱབ་པ་ཡེ་ཤེས་ཁམ་རྒྱའོ། །དབྱངས་དང་ཚིག་
ལྡན་སྔ་མའི་ངང་། །སྒལ་ཚིགས་ཕྱོགས་བཞི་གྲུ་ཆད་ལ། །ལོང་བའི་ཚོགས་ལ་དབུལ་བ་དང་། །དབྱངས་དང་ལྡན་པའི་ཚིག་དག་གིས། །ཡེ་ཤེས་ལྔ་ཡི་ངང་ལ་གཞག །དཀྱིལ་འཁོར་ཡན་ལག་བར་བར་ནས། །དམུས་ལོང་ཚོགས་ལ་དབུལ་བ་ཡང་། །ནེའུ་སེག་དབྱངས་དང་ལྡན་པ་ཡིས། །ཕུལ་བས་ཡེ་ཤེས་ལྔ་ཡི་དབྱིངས་ལ་སྦྱོར། །གསང་བའི་ཆུ་བོ་ནང་སྒོ་ནས། །དབུ་དགུ་བར་དུ་བརྩེགས་པ་ལ། །དབྱངས་ཀྱིས་མཉེས་པར་སྔ་མ་བཞིན། །མེ་རི་ལ་ནི་བ་སུ་ཏ། །སྤྱང་མོ་བརྒྱད་ལ་མཆོད་པ་ཡང་། །དབྱངས་ཚིག་ལྡན་པས་དབྱིངས་ལ་ཐིམ། །ཁྲག་གི་ལྕེ་ཡི་བར་བར་ནས། །ཟ་བྱེད་ཡེ་ཤེས་ཀུ་ཀུ་ར། །བརྒྱད་ལ་དབྱངས་ཀྱིས་མཆོད་པ་ཡང་། །མ་སྐྱེས་དབྱིངས་ནས་ཐིམ་པར་བྱ། །བསྡུ་བའི་ཐབས་ནི་འདི་དག་གསུངས། །དབྱིངས་ལས་ཆོ་འཕྲུལ་རབ་སྤྲོས་ཏེ། །མཐའ་བསྐོར་ཟ་བྱེད་ཡེ་ཤེས་ཀྱི། །སྤྱང་མོ་མགོ་དགུ་བརྩེགས་པའོ། །དབུ་དགུ་ཉིད་ཀྱང་དམུས་ལོང་སྟེ། །དམུས་ལོང་ལོང་བའི་ཚོགས་ལ་བསྡུས། །ལོང་བ་ཁམ་རྒྱ་ཆེན་མོ་ལའོ། །དེ་གཉིས་གཙོ་བོ་ཡབ་ཡུམ་ལའོ། །ཡུམ་ཡང་དཔལ་བེའུ་ཐུགས་ལ་བསྡུས། །དཔལ་བེའུ་སྐྱེ་མེད་དབྱིངས་སུ་སྟེ། །བརྗོད་པ་མེད་པའི་ངང་ལ་ཐིམ། །བདག་དང་མ་དྷལ་ཇི་བཞིན་ཏེ། །བདག་ཉིད་མ་དྷལ་ཉིད་ལ་སྤྲོ། །མ་དྷལ་ཟླ་གམ་ཉིད་ལ་སྟེ། །ཟླ་གམ་གཟི་ལྡན་ཡུམ་གྱི་ངང་། །ཡང་ན་བདག་ཉིད་ཆེན་པོ་ནི། །སྐྱེ་བ་མེད་པའི་དབྱིངས་སུ་ཐིམ། །མ་དྷལ་ཡེ་ཤེས་ལྔ་ལ་བསྡུ། །དམ་རྫས་གསང་བའི་བྷ་ག་ལ། །ཡོངས་སུ་བསྡུ་ཞིང་བསྡུ་བ་རྣམས། །སྐྱེ་བ་མེད་པའི་ངང་ལ་གཞག །ཅུང་ཟད་སྐྱེ་མེད་བསྒོམ་ནས་ཀྱང་། །གོང་མ་བཞིན་དུ་རིམ་པར་བསྡུ། །དབང་བསྐུར་བ་དང་འབྱུང་བ་དང་། །ཚེ་དང་དབང་དང་དངོས་གྲུབ་རྣམས། །བཟོད་པར་གསོལ་དང་སྨོན་ལམ་གདབ། །གཏོར་མ་གཏོང་བ་གཞུང་བཞིན་བྱ། །དབང་ཆེན་བསྡུས་པའི་ཏན་ཏྲ་ལས། རོ་སྦྱོར་བདུད་རྩིའི་ལེའུ་སྟེ་ཞེ་གཅིག་པའོ།། །།ཚེ་ལ་དབང་ཐོབ་རིག་འཛིན་རྣལ་འབྱོར་གྱིས། །མཐའ་གཉིས་དོན་ལ་སློང་བའི་བདུད་
རྩི་བསྒྲུབ་པའི་ཕྱིར། །དབང་ཆེན་བསྡུས་པའི་ཏན་ཏྲ་ལས། །ཤ་རཱི་རམ་བསྒྲུབ་པའི་ལེའུ་འདི་གསུངས་སོ། །མི་འགལ་ཙམ་དུ་སྤྱད་བྱ་བ། །གསང་བའི་རྫས་མཆོག་སྤྲོས་ནས་ཀྱང་། །ལས་སུ་བྱ་བའི་རྣམ་གྲངས་ནི། །གྲུབ་པའི་རྟགས་སུ་བསྒྲུབས་ནས་ནི། །མཐའ་གཉིས་སྤངས་པའི་སྤྱོད་དང་ལྡན་པ་ནི། །འབྲས་བུ་ཐོབ་པའི་རྫས་མཆོག་སྟེ། །རྒྱུ་འབྲས་ལྔ་ཉིད་སྐྱེ་མེད་ཨ་མྲྀ་ཏ། །མཐའ་གཉིས་དོན་ལ་སློང་བའི་བདུད་རྩི་བསྒྲུབ། །དེ་ཡང་དང་པོར་རབ་བརྟགས་ཏེ། །བཞེད་དང་མཐུན་པའི་ས་གཞི་ལ། །མ་དྷལ་འདོམ་གང་གྲུ་བཞི་ལ། །དབུས་སུ་གྲུ་གསུམ་བརྐོ་བར་བྱ། །འཕང་དུ་ཁྲུ་གང་ཁ་ཁྱེར་ལ། །ལྕགས་ཀྱུ་མདའ་གཞུ་ཐོད་པར་བཅས། །སྟེང་དུ་ཁྲུ་ཕྱེད་ཟུར་གསུམ་བརྐོ། །ཧེ་ཞལ་མཚོན་རྩི་ནག་པོ་བཀྱེ། །གྲུ་གསུམ་བརྐོས་པའི་ཕུག་གསུམ་དུ། །ས་བོན་ཡི་གེ་རཾ་ཡང་བྲིས། །དཀྱིལ་དུ་རང་རྟགས་ཨ་ཡང་བྲི། །ཕྱོགས་མཚམས་སོར་བཞིའི་ཐོག་དག་ཏུ། །འདྲེན་བྱེད་སྙིང་པོས་བསྐོར་ལ་གཞག །དམར་པོ་སྣུམ་ཆེན་བརྔོས་པས་བརྫངས། །མཐོ་བཞི་བརྟན་པར་གཟུག་པར་བྱ། །རྒྱ་ཤུགས་ཙནྡན་ལ་སོགས་པ། །བུ་རམ་སྦྲང་རྩི་བསྲེས་ལ་གཞག །ཡམ་ཤིང་སྣ་ཚོགས་ཚེར་མ་ཅན། །ཡང་ན་དངོས་གྲུབ་བསྡུ་བའི་ཕྱིར། །ཚེར་མ་མེད་པར་མཁས་པས་བསྔགས། །སྟེང་འོག་ཤུན་གྱི་བླ་རེར་དྲེ། །འོག་ཏུ་ཤ་ཆེན་ལང་ལིང་དང་། །ཞིང་ཆེན་རས་རོས་རིམ་པ་བཞིན། །དངོས་གྲུབ་མ་ཉམས་གཡང་གཞི་ནི། །རླུང་གི་ཕྱོགས་སུ་གཟུག་པར་བྱ། །རྫས་ལ་སོགས་པ་མང་དུ་བསག །མེ་སྔགས་བཏབ་སྟེ་གཞག་པར་བྱ། །གཞུང་དང་མཐུན་པའི་ཕྲིན་ལས་བྱ། །རྫས་མཆོག་ཡོད་པའི་ས་ཕྱོགས་དེར། །གདུལ་སྦྱང་ལས་ནི་རིམ་པ་བཞིན། །བཀྲོའམ་ཡང་ན་བསྒྲུབ་ཀྱང་རུང་། །སྣ་ཚོགས་བཅོས་པའི་རས་ཀྱིས་དཀྲིས། །བསྔགས་པའི་དཀྱིལ་དུ་གཞག་བྱ་སྟེ། །ཐོག་ཐག་ཡམ་ཤིང་བརྫངས་ཏེ་གཞག །ཏིང་འཛིན་གསལ་བས་རིམ་པ་བཞིན། །སྤར་ནས་མཆོད་པ་དབུལ་བ་ནི། །རཀྟ་དམར་ལ་སོགས་པས་མཆོད། །སྣུམ་ཆེན་གསུར་གྱིས་སྤོས་མེ་བཏང་། །
མཉེས་པའི་མཆོད་པ་དམ་པའོ། །བསྒྲུབ་པ་ཆེན་པོའི་དུས་དག་ཏུ། །ཞི་བ་ལ་སོགས་ཕྲིན་ལས་ནི། །མནན་བཟློག་གཉིས་དྲུག་བསྐྱར་ལ་འབད། །མ་དྷལ་དེ་བཞིན་རྫོགས་པ་དང་། །དངོས་གྲུབ་བསྡུ་བ་སྔ་མ་བཞིན། །དེ་ནས་ལྷད་དག་མ་ཤོར་བར། །རྣམ་གྲངས་སུ་ནི་དབྱེ་བར་བྱ། །ཤ་རི་རམ་དང་ལྡེར་སོ་དང་། །མཆོད་རྟེན་དག་ཏུ་གྱུར་ན་སྔགས། །ཡ་མཚན་རྟགས་དག་འབྱུང་བར་ངེས། །འཆི་མེད་བདུད་རྩི་རྣམ་ལྔར་བསྒྲུབ། །རྣམ་གྲངས་གཉིས་མེད་བསྲེ་དང་ནི། །བརྟགས་ནས་བྱིན་གྱིས་བརླབས་པ་དང་། །བཅག་དང་གཅལ་བའི་ལས་རྣམས་ནི། །ཐབས་ལ་མཁས་པས་རིམ་པ་བཞིན། །དཔལ་དང་ལྡན་པའི་སྣོད་དུ་བླུག །ཐིག་བཞི་བཏབ་པའི་དབུས་སུ་གཞག །གསུང་གི་ཡིག་འབྲུ་ཧྲཱྀཿཞེས་བྱ། །ཁྲག་འཐུང་ཕྱག་རྒྱར་གྱུར་པར་བསྒོམ། །གཟི་ལྡན་ཐུགས་ལས་མངོན་ཕྱུང་སྟེ། །གཉིས་མེད་འཕྲོ་འདུས་སྦྱང་བའོ། །དཀར་དང་འདྲིལ་བའི་རང་བཞིན་ལས། །ཧཱུཾ་བཞིས་གསལ་ནས་རིམ་པ་བཞིན། །འཕྲོ་འདུས་རྒྱས་འདེབས་ལ་སོགས་པ། །རིམ་པ་བཞིན་དུ་བསྐྱེད་པར་བྱ། །དབྱིངས་དང་ཡེ་ཤེས་གཉིས་མེད་པའི། །ཡེ་ཤེས་ཟེར་གྱིས་རྣམ་རྟོག་སྦྱང་། །བདེ་བའི་འབྲུ་མཆོག་ཆ་བཞིན་གསལ། །དེ་ལས་ལྷ་མོ་བཞི་ཡི་རྒྱ། །གཉིས་སུ་མེད་པའི་རོལ་པ་ལས། །ཡིག་འབྲུར་བཅས་པའི་སྤྲུལ་པ་ཡིས། །སྣོད་བཅུད་བཅས་པའི་མཚན་མ་སྦྱང་། །དེ་ལྟར་འཕྲོ་འདུ་གསལ་བའི་ལས། །བསྐུལ་དང་དོན་བྱས་རིམ་པ་བཞིན། །ཏིང་འཛིན་རྩེ་གཅིག་བསྒོམ་པར་བྱ། །སྐྱེ་མེད་དབྱིངས་སུ་ལྷན་ནེར་གཞག །དེ་ནས་བདུད་རྩི་དམ་པ་འདི། །གསལ་ཞིང་དག་པའི་འབྱོར་པ་ལག་ཏུ་བླང་། །དབྱངས་དང་ཚིག་གིས་བསྡིམ་པའི་ལས་བྱའོ། །མཉེས་ནས་སྐུ་གསུམ་དངོས་གྲུབ་ཐོབ། །བཅུ་དྲུག་ཕྱག་རྒྱའི་རིམ་པར་བསྐོར། །དགའ་བའི་གད་མོ་ཧ་ཧ་ཧེ་ཧེས་འདེབས། །གཉིས་མེད་རྟོག་པའི་གླུ་བྲོ་བླང་། །ཐབས་ལ་མཁས་པའི་དཔའ་བོ་ཡིས། །རྟགས་དང་ལྡན་པའི་ཐིག་ལེས་གདབ། །སྐུ་གསུམ་དངོས་གྲུབ་ཐོབ་པར་
དམིགས། །དེ་ནས་བྱིན་བརླབ་དབང་བསྐུར་རིམ་པ་བཞིན། །གཏོར་མ་གཏོང་བའི་བྱ་བྱེད་རྣམས། །སྣང་བ་ཉིད་ནས་གཉིས་མེད་བསྒོམ་པས་ནི། །སྐྱེ་མེད་ངང་ལ་ལྷན་ནེ་གཞག་པར་བྱ། །དབང་ཆེན་བསྡུས་པའི་ཏན་ཏྲ་ལས། ཤ་རཱི་རམ་སྒྲུབ་པའི་ལེའུ་ཞེས་བྱ་སྟེ་བཞི་བཅུ་ཞེ་གཉིས་པའོ།། །།ཚེ་ལ་དབང་ཐོབ་རིག་འཛིན་རྣལ་འབྱོར་གྱིས། །ཆོས་སྐུ་གཉིས་མེད་མཉམ་པ་ལས། །འཛིན་རྟོག་དངོས་པོའི་མཐའ་བསལ་ཞིང་། །ཞིང་ལས་ནས་འགྱུར་གསུངས་པ་བཞིན། །གདེང་དང་ལྡན་ནས་ཐ་དད་མེད། །ས་བོན་ལས་ནི་འབྲས་བུའི་ཚུལ། །རྟོགས་པའི་རླུང་དུ་འདྲིས་པས་གང་། །འགྲུབ་འགྱུར་འདི་ལ་ཐེ་ཚོམ་མེད། །སྣང་མཛད་ལས་གྱུར་ཀུན་ཏུ་གཟིགས། །བྱང་ཆུབ་སེམས་དཔའ་ཉིད་ལ་རྫོགས། །མི་བསྐྱོད་ལ་སོགས་ཤར་དུ་སྟེ། །རིན་ཆེན་འགྱུར་བ་ལྷོ་ཉིད་དོ། །མཐའ་ཡས་ལ་སོགས་ནུབ་ཏུའོ། །དོན་ཡོད་བྱང་གི་ཕྱོགས་སུ་གྱུར། །འབྱུང་ལྔ་ཡུམ་གྱི་གནས་འགྱུར་བ། །ས་བོན་ལས་ནི་མྱུ་གུའི་ཚུལ། །བཟང་ལས་འགྱུར་བ་གཟི་དང་ལྡན། །སྤྱན་ལས་འགྱུར་བ་གློག་འགྱུར་ཏེ། །མཱ་མ་ཀཱི་ནི་འདྲ་བར་འགྱུར། །ན་བཟའ་དཀར་ནི་སྡེར་མོ་ཅན། །སྒྲོལ་ལས་གྱུར་པ་གཤོག་པ་མོ། །ཡབ་ཡུམ་བཅུ་ནི་རབ་སྦྱར་ཏེ། །དགྱེས་པའི་དབྱིངས་སུ་གྱུར་པ་ལས། །བྱང་ཆུབ་སེམས་ནི་ཆགས་པའི་གཞི། །རྟ་མགོ་ལྗང་གུ་ཡིན་པར་གྲགས། །དབུ་ལྔ་ཡེ་ཤེས་ལྔ་ཡི་དབྱིངས། །སེམས་དཔའ་བརྒྱད་སྦྱར་དམུས་ལོང་ཚོགས། །སེམས་མ་ལས་བསྒྱུར་རྒྱབ་སྦྲེལ་ནི། །སེམས་དཔའ་སེམས་མ་ལྡན་སྦྱོར་བས། །བྱང་ཆུབ་སེམས་ནི་ཆགས་པའི་རྒྱུ། །མཁའ་སྤྲོས་པ་ཡི་འོད་ཟེར་ནི། །སྤྲུལ་པ་ཡིན་པར་སྤྱང་མོ་བརྒྱད། །དབྱིངས་སུ་འདྲེན་པས་ཡེ་ཤེས་ཁྱི། །ལྕགས་ཀྱུ་ལ་སོགས་སྒོ་མ་བཞི། །གྱུར་པས་དབུ་དགུ་རབ་ཏུ་བརྩེགས། །སྤྲུལ་སྐུ་ཐུབ་དྲུག་ལས་སྤྲུལ་པ། །ཁམ་རྒྱ་དྲུག་ཏུ་སྤྲུལ་པ་ཡིན། །གནས་ནི་མ་ནོར་ཆོས་ཀྱི་དབྱིངས་སུ་དོན་རྟོགས་ནས། །དབྱིངས་ལས་ཡེ་ཤེས་རོལ་པས་ནི། །གནས་འགྱུར་མཆོག་གི་ལེའུ་ཞེས་བྱ། །ཞི་བ་མི་གཡོ་ཆོས་སྐུ་ལས། །ཁྲོ་བོར་
གྱུར་པའི་དཀྱིལ་འཁོར་འདིར། །སྟོན་པའི་བཀའ་དང་མི་འགལ་བར། །ཕྱི་རབས་རྣལ་འབྱོར་སྐལ་རབ་ལ། །ངེས་པའི་ལུང་དུ་བརྩམ་པ་སྟེ། །རྟོགས་ན་ཐེ་ཚོམ་མེད་པར་འགྲུབ། །དབང་ཆེན་བསྡུས་པའི་ཏན་ཏྲ་ལས། གཞི་གནས་འགྱུར་མཆོག་གི་ལེའུ་སྟེ་ཞེ་གསུམ་པའོ།། །།ཚེ་ལ་དབང་ཐོབ་རིག་འཛིན་རྣལ་འབྱོར་གྱིས། །དབང་ཆེན་བསྡུས་པའི་ཏན་ཏྲ་ལས། །མན་ངག་ལུང་གི་བརྒྱུད་པའི་ལུང་། །ས་བོན་ལས་ནི་འབྲས་བུ་བཞིན། །ཁྲག་འཐུང་འབར་བའི་དཀྱིལ་འཁོར་ལས། །ཡང་ཆེ་དབང་གི་དཀྱིལ་འཁོར་བརྒྱུད། །དུར་ཁྲོད་འབར་བའི་གཞལ་ཡས་ནས། །ལྷ་ཆེན་འཁོར་བཅས་བསྒྲལ་བའི་ཕྱིར། །རྒྱལ་མཚན་ལྔ་དང་ཀ་བར་བཅས། །འཕན་དང་ཟ་རང་བླ་རེ་རྣམས། །ཁམས་གསུམ་དབང་སྡུད་ཡུམ་གྱི་བྷ་གར་བརྒྱུད། །རིན་ཆེན་འབར་བའི་ཁྲི་བཞི་ཡང་། །འཁོར་བ་ཐབས་ཀྱིས་འདུལ་བ་དང་། །སྲིན་པོ་རཱུ་ཏྲ་བསྒྲལ་བ་ཡང་། །ཁྱད་པར་གཞལ་ཡས་དཔག་པའི་ཕྱིར། །ཁྲག་འཐུང་ཆེན་པོའི་སྐུ་བཞིན་བརྒྱུད། །དུར་ཁྲོད་མ་མོ་བདུན་རྣམས་ཀྱང་། །སྣང་བྱེད་ཉི་མ་བདུན་དུ་བརྒྱུད། །དབང་ཕྱུག་ཉི་ཤུ་རྩ་བརྒྱད་ནི། །ཐབས་ཀྱི་རྩལ་འཕགས་སེང་གེར་བརྒྱུད། །ཐབས་དང་ཤེས་རབ་རང་བཞིན་ནི། །ཉི་ཟླ་པདྨ་བརྩེགས་པར་བརྒྱུད། །ཞེ་སྡང་ཁྲག་འཐུང་འབར་བའི་སྐུ། །ངག་གི་དབང་ཕྱུག་ཉིད་དུ་བརྒྱུད། །ཀྲོ་དྷཱི་ཤྭ་རཱི་ལ་སོགས་ཀུན། །གཟི་ལྡན་གསང་བའི་ཡུམ་ཉིད་དེ། །རིགས་ལ་དབང་རྣམས་མི་བཟའ་བར། །ཐམས་ཅད་ཡོངས་སུ་རྫོགས་པའི་ཕྱིར། །ཁྲག་འཐུང་ལྔ་པོ་དབུ་ལྔར་བརྒྱུད། །ཁྲོ་བོ་ཆེན་པོ་མཐུ་ཆེན་བརྒྱད། །བསྒྲལ་བ་ཞབས་ཀྱི་གདན་དུ་བརྒྱུད། །རྫོགས་པ་ཆེན་པོ་ཡིན་པའི་ཕྱིར། །ཏིང་འཛིན་བརྒྱད་དང་ལྡན་པར་དམིགས། །རྒྱན་གྱི་བྱེ་བྲག་མང་པོ་རྣམས། །རྡོ་རྗེ་རིན་ཆེན་ལས་བྱུང་བའི། །གཤོག་པ་དག་ཏུ་རྣམ་པར་བརྒྱུད། །སྒོ་བ་ཁྲོ་བོ་ཡབ་ཡུམ་བརྒྱད། །དབུ་དགུ་བརྩེགས་པའི་རྐང་གཅིག་པོ། །འཇིགས་དང་ཆས་པ་ཉིད་དུ་བརྒྱུད། །རྒྱས་འདེབས་ལ་སོགས་ལྷ་མོ་ནི། །ཁམ་རྒྱ་ཆེན་མོ་
དྲུག་ཏུ་བརྒྱུད་པ་སྟེ། །སྤྲུལ་པ་ཡང་སྤྲུལ་བསམ་ཡས་ལ། །ལོང་བའི་ཚོགས་ཀྱི་ཆ་བྱད་དུ། །བརྒྱུད་པ་ཡིན་ཞེས་འདྲེན་པས་བསྟན། །ཕྲ་མེན་བཅུ་དྲུག་ཐབས་ཀྱིས་བརྒྱུད། །ཕྱག་རྒྱ་བཅུ་དྲུག་ཐབས་ཀྱི་དཀྱིལ་འཁོར་དུ། །ལྕགས་ཀྱུ་རྡོ་རྗེ་ལ་སོགས་པའི། །ཕྱག་མཚན་བཅུ་དྲུག་ཉིད་དུ་བརྒྱུད། །གསང་བ་བས་ཆེར་གསང་བ་ཡི། །ཡང་གསང་ཐུགས་ལ་གབ་པ་སྟེ། །འདི་ནི་མན་ངག་བརྒྱུད་པའི་ལུང་། །རྗེས་སུ་རྣལ་འབྱོར་རྣམས་ཀྱིས་སྤྱོད། །དབང་ཆེན་བསྡུས་པའི་ཏན་ཏྲ་ལས། མན་ངག་བརྒྱུད་པའི་ལེའུ་སྟེ་བཞི་བཅུ་ཞེ་བཞི་པའོ།། །།ཚེ་ལ་དབང་ཐོབ་རིག་འཛིན་རྣལ་འབྱོར་གྱིས། །དབང་ཆེན་བསྡུས་པའི་ཏན་ཏྲ་ལས། །ཁྲག་འཐུང་ཆེན་པོ་ཧཱུཾ་གི་ལེའུ། །ལྟ་བ་ཆེན་པོ་འདི་གསུངས་སོ། །ཧཱུཾ་ལས་འབྱུང་ལྔ་ཡུམ་གྱི་དབྱིངས། །གཞལ་ཡས་ཧཱུཾ་ཉིད་བྷ་གའི་ཀློང་། །འདུས་བྱས་མ་བྱས་རྣམ་པར་དག །ཧཱུཾ་ལས་ཁྲག་འཐུང་ཁྲི་བཞིར་འབར། །སྤྲོས་མེད་ཐིག་ལེར་གནས་པའི་ཕྱིར། །མ་བཅོས་ལྷུན་གྱིས་གྲུབ་པར་གནས། །མ་ཚོགས་ཧཱུཾ་གི་དབང་ཕྱུག་མ། །སེང་གེ་ལྟ་བུའི་སྒྲ་སྒྲོགས་ཤིང་། །སྒྲ་ཉིད་སྒྲ་མཐར་སྟོང་པའི་ཕྱིར། །སྟོང་ཉིད་ཡེ་ཤེས་རྣམ་པར་དག །ཧཱུཾ་ལས་པདྨ་ཁ་སྟོང་ལྡན། །གསང་བའི་བྷ་གར་ལྷུན་གྱིས་གྲུབ། །ཧཱུཾ། ཉི་ཟླ་ཟུང་དུ་བརྩེགས་པ་ཡང་། །ཤེས་རབ་ཐབས་སུ་འདྲེལ་བ་ཡིས། །ཕྱག་རྒྱ་ཡོད་པའི་དཀྱིལ་འཁོར་ཆེ། །ཧཱུཾ་ལས་ཞེ་སྡང་རྡོ་རྗེའི་སྐུ། །འབྱུང་བྱེད་ཆེན་པོར་གྱུར་པས་ནས། །སྐྱེ་མེད་དབྱིངས་སུ་རྣམ་པར་དག །སྤྲུལ་པའི་འཁོར་ཚོགས་མ་ལུས་ཀུན། །ཡེ་ཤེས་ཐུགས་ཀྱི་རང་བཞིན་ཏེ། །ཐིག་ལེ་ཧཱུཾ་གི་བདག་ཉིད་ཆེ། །ཧཱུཾ་ལས་རྒྱན་གྱི་བྱེ་བྲག་རྣམས། །དབྱིངས་ལས་ཡེ་ཤེས་འཇུག་པའི་ཕྱིར། །དབྱིངས་ཉིད་ལྷུན་གྱིས་གྲུབ་པའི་རྒྱན། །ཧཱུཾ་ལས་འབར་བའི་སྐུར་གྱུར་པ། །ཆོས་སྐུར་གཅིག་པུར་སྦྱོར་བའི་དོན། །ཧཱུཾ་ལས་དབུ་ལྔར་སྣང་བ་ནི། །ཡེ་ཤེས་ལྔ་ཉིད་དབྱིངས་ལ་འཕྱོ། །ཧཱུཾ་ལས་སྤྱན་ལྔ་བགྲད་པ་ཡང་། །དབང་པོ་ཡུལ་
ལ་རྣམ་པར་དག །ཧཱུཾ་ལས་ལྗགས་ལྔར་འབར་བ་ཡང་། །དབང་པོ་རོ་ལ་སྦྱོར་བའོ། །ཧཱུཾ་ལས་ཤངས་ལྔའི་འཚུབ་མ་ཡང་། །དབང་པོ་དྲི་མ་རྣམ་པར་དག །ཧཱུཾ་ལས་སྙན་ལྔའི་གསན་པ་ཡང་། །མ་བཀག་བསྒྲལ་བ་ཅི་བདེར་སྦྱོར། །ཧཱུཾ་ལས་ཞལ་ལྔར་གདངས་པ་ཡང་། །སྲིད་གསུམ་དབྱིངས་སུ་ཟ་བའོ། །ཧཱུཾ་ལས་རྟ་མགོ་ལྗང་གུ་ཡང་། །ཆགས་པས་དབང་དུ་བསྡུས་ནས་ནི། །མ་ཆགས་དབྱིངས་ལ་ཡེ་ཤེས་རོལ། །ཨེ་མ་ཡ་མཚན་དབང་གི་སྐུ། །སྣ་ཚོགས་ཅིར་ཡང་སྟོན་མོད་ཀྱང་། །སྤྲོས་མེད་ཐིག་ལེ་རྣམ་དག་པས། །འདི་ནི་རྣམ་དག་ཧཱུཾ་ལེའུ། །ཐམས་ཅད་སྟོང་པའི་དབྱིངས་སུ་བལྟའོ། །དབང་ཆེན་བསྡུས་པའི་ཏན་ཏྲ་ལས། ཁྲག་འཐུང་ཧཱུཾ་གི་ལེའུ་སྟེ་བཞི་བཅུ་ཞེ་ལྔ་པའོ།། །།ཚེ་ལ་དབང་ཐོབ་རིག་འཛིན་རྣལ་འབྱོར་གྱིས། །འགྲོ་དྲུག་ཐབས་ཀྱིས་འདུལ་བ་དང་། །ངན་སོང་གནས་ནས་འདོན་པའི་ཕྱིར། །དབང་ཆེན་བསྡུས་པའི་ཏན་ཏྲ་ལས། །བསྐྱེད་རྫོགས་ཆེན་པོའི་ལེའུ་འདི་གསུངས། །ཏིང་འཛིན་བསྐྱེད་པའི་ས་བོན་སྔགས། །ཨེ་ཡཾ་སོགས་ལས་རིམ་པ་བཞིན། །གཞལ་ཡས་ཁང་དུ་བསྒོམ་པར་བྱ། །རིན་ཆེན་རྒྱན་ལ་སོགས་པས་མཛེས། །དེ་ཡི་ནང་དུ་དམིགས་པ་ནི། །ཙཀྲ་ལ་སོགས་འཁོར་ལོ་ཆེ། །རྩིབས་དང་རྩིབས་ཀྱི་མུ་ཁྱུད་དང་། །ལྟེ་བ་བར་ཁྱམས་སྒོ་ཁྱུད་དང་། །རྡོ་རྗེ་དབྱིངས་ཀྱི་དཀྱིལ་འཁོར་ལྡན། །ལྟེ་བ་ཟླུམ་པོར་གྱུར་པ་ལ། །དཔའ་བོ་ཧཱུཾ་ལས་རྡོ་རྗེ་ཆེ། །དེ་ལས་ཕྱག་རྒྱ་བསྐྱེད་པ་ཡིས། །ཞེ་སྡང་རྒྱལ་པོ་རྣམ་པར་བསྒོམ། །འཁོར་ལོའི་མདུན་གྱི་དྲང་པོར་ནི། །དཔའ་བོ་ཨཱོཾ་ལས་འཁོར་ལོ་ཆེ། །དེ་ལ་ཕྱག་རྒྱའི་སྐུར་བསྐྱེད་པ། །གཏི་མུག་རྒྱལ་པོ་རྣམ་པར་བསྒོམ། །གཡས་སུ་ལྟ་བའི་འཁོར་ལོ་ལས། །དཔའ་བོ་སྭཱ་ལས་རིན་པོ་ཆེ། །དེ་ལ་ཕྱག་རྒྱའི་སྐུར་བསྐྱེད་པ། །ང་རྒྱལ་རྒྱལ་པོ་རྣམ་པར་བསྒོམ། །རྒྱབ་ཀྱི་འཁོར་ལོ་བསམ་པ་ཡང་། །དཔའ་བོ་ཨཱོཾ་ལས་པདྨ་ཆེ། །དེ་ལས་ཕྱག་རྒྱའི་སྐུར་བསྐྱེད་པ། །འདོད་ཆགས་རྒྱལ་པོ་རྣམ་པར་བསྒོམ། །གཡོན་གྱི་རྩིབས་ལ་དམིགས་པ་ནི། །དཔའ་བོ་ཧཱ་ལས་རྒྱ་གྲམ་སྟེ། །
དེ་ལས་ཕྱག་རྒྱའི་སྐུར་བསྐྱེད་པ། །ཕྲག་དོག་རྒྱལ་པོ་རྣམ་པར་བསྒོམ། །དཔའ་བོ་འབྲུ་ལྔས་འགྱུར་བའི་སྐུ། །ཡབ་ཡུམ་ཕྱག་རྒྱར་གསལ་བ་ལས། །བྱང་ཆུབ་སེམས་ཀྱི་ས་བོན་ནི། །དབང་ཆེན་པདྨ་གར་གྱི་སྐུ། །རྫོགས་པ་ཆེན་པོར་བསྒོམ་པ་ཡང་། །དཔའ་བོ་འབྲུ་ལྔས་བསྐྱེད་པ་ཡང་། །རྟགས་སུ་དབུ་ལྔར་རབ་ཏུ་བསྟན། །ཧཱུཾ་ལས་ཀུན་ཏུ་ཐལ་བའི་དབུ། །འདོད་ཁམས་དབང་དུ་སྡུད་པའོ། །ཨོཾ་ལས་དྲི་ཟ་གནོན་པའི་དབུ། །སྭཱ་ལས་གྲུལ་བུམ་དབང་དུ་སྡུད། །ཨཱཾ་ལས་ཀླུ་ཡང་དབང་དུ་སྡུད། །ཧཱ་ལས་གནོད་སྦྱིན་དབང་དུ་སྡུད་པའོ། །ཐར་པ་བརྒྱད་དང་ལྡན་པའི་ཞབས། །ཁྲོ་བོ་བརྒྱད་ལ་ཁྱབ་པར་སྦྱོར། །གཟི་ལྡན་ཡུམ་དང་སྤྲུལ་པའི་འཁོར། །དབང་ཆེན་སྐུ་ལ་ཡོངས་སུ་རྫོགས། །བསྐྱེད་རྫོགས་ལེའུ་ཞེས་དེ་ལ་བྱ། །དབང་ཆེན་བསྡུས་པའི་ཏན་ཏྲ་ལས། བསྐྱེད་རྫོགས་ཆེན་པོའི་ལེའུ་སྟེ་བཞི་བཅུ་ཞེ་དྲུག་པའོ།། །།ཚེ་ལ་དབང་ཐོབ་རིག་འཛིན་རྣལ་འབྱོར་གྱིས། །རྒྱུད་དྲུག་གནས་སུ་བསྒྲལ་བའི་ཕྱིར། །དབང་ཆེན་བསྡུས་པའི་ཏན་ཏྲ་ལས། །དམར་འབྱིན་རཀྟའི་ལེའུ་འདི་གསུངས་སོ། །རྫོགས་པའི་ཏིང་འཛིན་སྐད་ཅིག་མས། །བདག་ཉིད་ཕྱག་རྒྱའི་སྐུར་བསྒྱུར་བར། །ཧཱུཾ་ཞེས་པས་ནི་རྫོགས་པར་རོ། །དབུ་ལྔ་པ་ལ་ཕྱག་བཅུ་དྲུག །དབུ་ལ་དཀྱིལ་འཁོར་ལྔ་ཡང་རྫོགས། །བཅུ་དྲུག་ཕྱག་ན་མཚོན་ཆ་ཐོགས། །ཞབས་བརྒྱད་དུར་ཁྲོད་བརྒྱད་ལ་སྦྱོར། །ཕྱག་རྒྱ་དེ་ལྟར་གསལ་བ་དང་། །གང་ལ་བྱ་བའི་སེམས་ཅན་དེའི། །སྤྱི་བོར་ཛཿལས་ལྕགས་ཀྱུ་ཡིས། །དབྱིངས་ལ་ཡེ་ཤེས་འཇུག་ཚུལ་དུ། །དུ་མར་བརྗོད་ཅིང་དྲང་བར་བྱ། །ཁ་ཡི་རཾ་ལས་འོད་འཕྲོས་འདུས། །ཛཿཡིས་ལྕགས་ཀྱུས་དྲངས་པ་དང་། །རྡོ་ལ་ལྕགས་ནི་འདུ་ཚུལ་དུ། །དུ་མར་བརྗོད་ཅིང་དྲང་བར་བྱ། །སྙིང་གར་ཡཾ་ལས་འོད་འཕྲོ་འདུས། །རླུང་གི་འཁོར་ལོ་ཟུར་དྲུག་པའི། །འཁོར་ལོས་རབ་ཏུ་གཅོད་ཚུལ་དུ། །ཕ་རོལ་སྙིང་རྩ་གཅད་པའི་ཕྱིར། །དུ་མར་བརྗོད་ཅིང་དྲང་བར་བྱ། །བདག་ཉིད་ཕྱག་རྒྱར་གསལ་བ་དང་། །འདྲེན་ཅིང་སྒྲོལ་བའི་ཕོ་ཉ་ནི། །གང་ཡང་རུང་བའི་སེམས་ཅན་དེའི། །ལུས་
ངག་ཡིད་ལ་རྦད་པར་བྱ། །རྟ་མཆོག་འབར་བའི་ཤངས་ལྔ་ལས། །རླུང་གི་མི་ལ་སྤྱང་ཀུའི་གདོང་། །མཆེ་བས་བདུད་ཀྱི་སྙིང་རྩ་གཅོད། །རྣ་བ་སྦྲུལ་གྱི་འཛུལ་ཁུང་ནས། །སྦྲུལ་གྱི་མི་ལ་སྤྱང་ཀུའི་གདོང་། །ཁ་རླངས་སྤྲིན་གྱི་དཀྱིལ་འཁོར་ནས། །འོད་ཀྱི་མི་ལ་འཇའ་ཚོན་གདོང་། །རལ་པ་ཁྲག་གི་ཟར་བུ་ལས། །ཁྲག་གི་མི་ལ་སྤྱང་ཀུའི་གདོང་། །སྤྱན་མིག་གྲུ་གསུམ་འབར་བ་ལས། །ཟངས་ཀྱི་མི་ལ་སྤྱང་ཀུའི་གདོང་། །ཁ་ལ་རོ་ཤལ་རྦད། གུང་གི་དུན་དུན་རྦད། གང་ལ་བྱ་བའི་སེམས་ཅན་དེའི། །ལུས་ངག་ཡིད་ལ་རྦད་པར་བྱ། །བདག་ཉིད་ཕྱག་རྒྱར་གསལ་བ་དང་། །འདྲེན་ཅིང་སྒྲོལ་བའི་ཕོ་ཉ་ནི། །གཤོག་པ་རྡོ་རྗེ་གདེངས་པ་ཡིས། །ཕོ་ཉ་ཡིད་མགྱོགས་རླུང་བས་མྱུར། །ལྕགས་ཀྱི་མི་ལ་མཁའ་གཤོག་ཅན། །ཕྱག་རྒྱ་བཅུ་དྲུག་འབར་བ་ལ། །ལྕགས་ཀྱི་མི་མོ་བརྒྱད་སྤྲུལ་པ། །ལྕགས་གཤོག་ཁྱུང་གི་འདབ་མ་ཅན། །སྐུ་གསུང་ཐུགས་ལས་སྤྲུལ་པ་ནི། །ལ་ལ་བྱན་ལག་མགོ་བོ་ལ། །ལུས་ནི་ལྕགས་ཀྱི་སྤྱང་མོར་སྤྲུལ། །ལ་ལ་ཁྱུང་གི་མགོ་བོ་ལ། །ལུས་ནི་ཟངས་ཀྱི་ཝ་མོར་སྤྲུལ། །ལ་ལ་ཁྲ་ཡི་མགོ་བོ་ལ། །ལུས་ནི་དྲེའུ་ནག་རྐང་གསུམ་མོ། །ལ་ལ་ཁྭ་ཡི་མགོ་བོ་ལ། །ལུས་ནི་སྡིག་པ་རྐང་གཅིག་པ། །ལ་ལ་ཆུན་ལག་མགོ་བོ་ལ། །ལུས་ནི་དུང་གི་སྤྱང་མོར་སྤྲུལ། །ལ་ལ་ཆུ་བྱའི་མགོ་བོ་ལ། །ལུས་ནི་བཅུ་དྲུག་ཚང་མར་སྤྲུལ། །ལ་ལ་བཞད་ཀྱི་མགོ་བོ་ལ། །ལུས་ནི་བྱུ་རུའི་སེང་གེར་སྤྲུལ། །ལ་ལ་ཀངྈའི་མགོ་བོ་ལ། །ལུས་ནི་ལྕགས་དྲེའུ་རྐང་གཅིག་པོ། །ལ་ལ་འུག་པའི་མགོ་བོ་ལ། །ལུས་ནི་དུང་ཕག་དཀར་མོར་སྤྲུལ། །ལ་ལ་པུ་ཤུད་མགོ་བོ་ལ། །ལུས་ནི་ལྕགས་ཀྱི་སྡིག་པར་སྤྲུལ། །ལ་ལ་མཐིང་རིལ་མགོ་བོ་ལ། །ལུས་ནི་དྲེའུ་ནག་རྐང་གསུམ་པོ། །ལ་ལ་སྐྱིན་གྱི་མགོ་བོ་ལ། །ལུས་ནི་བྱི་ལ་རྩལ་པོ་ཆེ། །ལ་ལ་བྱ་རྒོད་མགོ་བོ་ལ། །ལུས་ནི་གསེར་སྟ་གསེར་པོར་སྤྲུལ། །གང་ལ་བྱ་བའི་སེམས་ཅན་དེའི། །རྒྱུ་དྲུག་འཁོར་བའི་སེམས་
ཅན་རྣམས། །དམྱལ་ཁམས་བཅུ་དྲུག་ཁ་བྲིམས་ཏེ། །ཐུགས་རྗེ་ཆེན་པོའི་བྱིན་བརླབས་ཀྱིས། །འདི་ལ་བྱིན་གྱིས་བརླབས་ནས་ཀྱང་། །དམར་པོ་འབྱིན་པའི་ཕོ་ཉ་འགྱེད། །དུས་ལས་མ་གཡེལ་ཕྲིན་ལས་མཛོད། །བདག་ཕྱག་རྒྱར་གསལ་བར་བྱས་ལ། གཅོད་པ་དང་བྱིན་གྱིས་བརླབ་པའི་སྔགས་འབུམ་བཟླས། ལས་གྲུབ་པ་ལ་ཐེ་ཚོམ་མེད། རྡོ་རྗེ་སྡེར་མོ་ཅན་གྱི་གསང་སྔགས་ཀྱིས་དྲང་ངོ་། །དབང་ཆེན་བསྡུས་པའི་ཏན་ཏྲ་ལས། དམར་འབྱིན་གྱི་ལེའུ་སྟེ་བཞི་བཅུ་ཞེ་བདུན་པའོ།། །།ཚེ་ལ་དབང་ཐོབ་རིག་འཛིན་རྣལ་འབྱོར་གྱིས། འབྱུང་པོ་དགྲ་བགེགས་འདུལ་བའི་ཕྱིར། །དབང་ཆེན་བསྡུས་པའི་ཏན་ཏྲ་ལས། །ཆོས་ཀྱི་ཕོ་ཉའི་ལེའུ་འདི་གསུངས། །བསྐུལ་པའི་ལས་དག་རྦད་པའི་ཕྱིར། །གདུག་བྱེད་ཞབས་ཀྱི་འོད་ཟེར་ནི། །དཔའ་མཆོག་དྲག་ཤུལ་སྟག་གི་ཆས། །ཁྲོ་བོ་ཡབ་ཡུམ་སྦྱོར་བའི་བྱིན་རླབས་ལས། །སྟག་མགོ་དམར་པོ་དབུ་ལྔ་མེ་ལྟར་འབར། །སྟག་ལག་ཁྲ་མོ་ཞེ་སྡང་གློག་སྟོང་འགྱུ། །རྐང་གཅིག་མགྱོགས་མ་ཤིན་ཏུ་མི་བཟད་དེ། །ཤར་ཕྱོགས་ཁྱབ་པར་རྒྱུག་ཅིང་དཔལ་གྱི་བཀའ་ཉན་མ། །དྲི་ཟ་དབང་སྡུད་གདོན་བགེགས་ཐལ་བར་རློགས། །གདུག་བྱེད་ཞབས་ཀྱི་འོད་ཟེར་འཕྲོས་པ་ནི། །རྣོ་གདུག་ཟློག་བྱེད་རྒྱ་བྱེའུ་ལྕགས་ཀྱི་ཆས། །ཁྲོ་བོ་ཡབ་ཡུམ་སྦྱོར་བའི་བྱིན་རླབས་ལས། །ལྕགས་མགོ་སྔོན་མོ་དབུ་ལྔ་མེ་ལྟར་འབར། །ལྕགས་ལག་ཁྲ་མོ་ཞེ་སྡང་གློག་སྟོང་འགྱུ། །རྐང་གཅིག་མགྱོགས་མ་ཤིན་ཏུ་མི་བཟད་དེ། །ཤར་ལྷོར་ཁྱབ་པར་རྒྱུག་ཅིང་དཔལ་གྱི་བཀའ་ཉན་མ། །དྲང་སྲོང་དབང་སྡུས་དགྲ་བགེགས་ཐལ་བར་རློགས། །གདུག་བྱེད་ཞབས་ཀྱི་འོད་ཟེར་འཕྲོས་པ་ནི། །ཤེས་རབ་ཏིང་འཛིན་རྡོ་རྗེ་འཆོལ་བའི་ཆས། །ཁྲོ་བོ་ཡབ་ཡུམ་སྦྱོར་བའི་བྱིན་རླབས་ལས། །རྡོ་རྗེ་དམར་པོའི་དབུ་ལྔ་མེ་ལྟར་འབར། །རྡོ་རྗེའི་ལག་པ་ཞེ་སྡང་གློག་སྟོང་འགྱུ། །རྐང་གཅིག་མགྱོགས་མ་ཤིན་ཏུ་མི་བཟད་དེ། །ལྷོ་ཕྱོགས་ཁྱབ་པར་རྒྱུག་ཅིང་དཔལ་གྱི་བཀའ་ཉན་མ། །གཤིན་རྗེ་དབང་སྡུད་དགྲ་བགེགས་ཐལ་བར་རློགས། །གདུག་བྱེད་ཞབས་ཀྱི་འོད་ཟེར་འཕྲོས་པ་
ནི། །དཔའ་བརྗིད་མཉེན་ལྕུག་སྦྲུལ་ནག་འཁྲིལ་བའི་ཆས། །ཁྲོ་བོ་ཡབ་ཡུམ་སྦྱོར་བའི་བྱིན་རླབས་ལས། །སྦྲུལ་མགོ་ནག་པོའི་དབུ་ལྔ་མེ་ལྟར་འབར། །སྦྲུལ་ལག་ཁྲ་མོ་ཞེ་སྡང་གློག་སྟོང་འགྱུ། །རྐང་གཅིག་མགྱོགས་མ་ཤིན་ཏུ་མི་བཟད་དེ། །ལྷོ་ནུབ་ཁྱབ་པར་རྒྱུག་ཅིང་དཔལ་གྱི་བཀའ་ཉན་མ། །སྲིན་པོ་དབང་སྡུད་དགྲ་བགེགས་ཐལ་བར་རློགས། །གདུག་བྱེད་ཞབས་ཀྱི་འོད་ཟེར་འཕྲོས་པ་ནི། །དབང་གི་བསེ་ཁྲབ་གཟི་འབར་བགྲད་པའི་ཆས། །ཁྲོ་བོ་ཡབ་ཡུམ་སྦྱོར་བའི་བྱིན་རླབས་ལས། །བསེ་མགོ་དམར་པོ་དབུ་ལྔ་མེ་ལྟར་འབར། །བསེ་ལག་ཁྲ་མོ་ཞེ་སྡང་གློག་སྟོང་འགྱུ། །རྐང་གཅིག་མགྱོགས་མ་ཤིན་ཏུ་མི་བཟད་དེ། །ནུབ་ཕྱོགས་ཁྱབ་པར་རྒྱུག་ཅིང་དཔལ་གྱི་བཀའ་ཉན་མ། །ཀླུ་སྲིན་དབང་སྡུད་གདོན་བགེགས་ཐལ་བར་རློགས། །གདུག་བྱེད་ཞབས་ཀྱི་འོད་ཟེར་འཕྲོས་པ་ནི། །ཟ་བྱེད་ཆེན་པོ་ཏིང་འཛིན་མཆེ་བའི་ཆས། །ཁྲོ་བོ་ཡབ་ཡུམ་སྦྱོར་བའི་བྱིན་རླབས་ལས། །ཟ་བྱེད་མཆེ་བའི་དབུ་ལྔ་མེ་ལྟར་འབར། །མཆེ་བའི་ལག་པ་ཞེ་སྡང་གློག་སྟོང་འགྱུ། །རྐང་གཅིག་མགྱོགས་མ་ཤིན་ཏུ་མི་བཟད་དེ། །ནུབ་ཕྱོགས་ཁྱབ་པར་རྒྱུག་ཅིང་དཔལ་གྱི་བཀའ་ཉན་མ། །རླུང་ལྷ་དབང་སྡུད་དགྲ་བགེགས་ཐལ་བར་རློགས། །གདུག་བྱེད་ཞབས་ཀྱི་འོད་ཟེར་འཕྲོས་པ་ནི། །གཟི་མདངས་ཤུ་ཀེན་སྤྲུལ་པ་དར་གྱི་ཆས། །ཁྲོ་བོ་ཡབ་ཡུམ་སྦྱོར་བའི་བྱིན་རླབས་ལས། །དར་མགོ་དམར་པོ་དབུ་ལྔ་མེ་ལྟར་འབར། །དར་ལག་ཁྲ་མོ་ཞེ་སྡང་གློག་སྟོང་འགྱུ། །རྐང་གཅིག་མགྱོགས་མ་ཤིན་ཏུ་མི་བཟད་དེ། །བྱང་ཕྱོགས་ཁྱབ་པར་རྒྱུག་ཅིང་དཔལ་གྱི་བཀའ་ཉན་མ། །གནོད་སྦྱིན་དབང་སྡུད་གདོན་བགེགས་ཐལ་བར་རློགས། །གདུག་བྱེད་ཞབས་ཀྱི་འོད་ཟེར་འཕྲོས་པ་ནི། །གཅན་གཟན་རྒྱལ་པོ་གདུག་པ་གཟིག་གི་ཆས། །ཁྲོ་བོ་ཡབ་ཡུམ་སྦྱོར་བའི་བྱིན་རླབས་ལས། །གཟིག་མགོ་དམར་མོ་དབུ་ལྔ་མེ་ལྟར་འབར། །གཟིག་ལག་ཁྲ་མོ་ཞེ་སྡང་གློག་སྟོང་འགྱུ། །རྐང་གཅིག་མགྱོགས་མ་ཤིན་ཏུ་མི་བཟད་དེ། །བྱང་ཤར་ཁྱབ་པར་རྒྱུག་ཅིང་དཔལ་གྱི་བཀའ་ཉན་མ། །དབང་ལྡན་དབང་
སྡུད་གདོན་བགེགས་ཐལ་བར་རློགས། །ཕྱོགས་བཞི་མཚམས་བརྒྱད་དྲེགས་པའི་དཔུང་འཇོམས་མ། །ཟ་བྱེད་མཆེ་བས་གདུག་པའི་དཔུང་ཡང་འཇོམས། །ང་རྒྱལ་བསྙེམས་པས་ཕ་རོལ་ཟིལ་གྱིས་གནོན། །ཏུག་ཆོམ་འབྲུག་སྒྲས་སྲིན་པོའི་ཐོད་རུས་འཇོམས། །ཛཿཧཱུཾ་བཾ་ཧོཿས་སྲིད་པ་དབང་དུ་སྡུད། །ཧཱུཾ་དང་ཕཊ་ཀྱིས་སྲིད་གསུམ་འཁོར་བ་འཇིག །ཕྲིན་ལས་དུས་ལ་བབ་པོ་གཤེགས་སུ་གསོལ། །མ་མ་བགྱིས་པས་མ་མོ་བསྐུལ། །ཛཿཛཿབགྱིས་པས་མཁའ་འགྲོ་རྦད། །ཧེ་ཧེ་བགྱིས་པས་ཕྲ་མེན་དགྱེ། །ཧྲཱྀཿཧྲཱྀཿབགྱིས་པས་རྟ་མགྲིན་མངག །བྷྱོ་བྷྱོ་བགྱིས་པས་དབང་ཕྱུག་བོད། །དབྱངས་སུ་ཚངས་པའི་གླུ་དྲུག་བླངས། །ལས་སུ་དགྲ་བགེགས་མ་ལུས་བསྒྲལ། །རྟགས་སུ་གསང་བའི་རྔེའུ་ཆུང་བརྡུང་། །དཔལ་གྱི་ཕྲིན་ལས་དུས་ལ་བབ། །དབང་ཆེན་བསྡུས་པའི་ཏན་ཏྲ་ལས། གློ་རྡེག་ཆས་ཀྱི་ཕོ་ཉ་མངག་པའི་ལེའུ་སྟེ་ཞེ་བརྒྱད་པའོ།། །།ཚེ་ལ་དབང་ཐོབ་རིག་འཛིན་རྣལ་འབྱོར་གྱིས། །རྡོ་རྗེ་ཆེ་མཆོག་བསྒྲུབ་པའི་ཕྱིར། །དབང་ཆེན་བསྡུས་པའི་ཏན་ཏྲ་ལས། །བཀྲ་ཤིས་གསང་བའི་ལེའུ་འདི་གསུངས། །ཡིད་དུ་འོང་བའི་གནས་མཆོག་ཏུ། །ཕུན་སུམ་ཚོགས་དང་ལྡན་བྱས་ནས། །བཀྲ་ཤིས་མ་དྷལ་ཟླུམ་པོ་ལ། །འདོམ་གང་ཚད་དང་ལྡན་པར་བྱ། །པདྨ་འདབ་མ་བརྒྱད་པ་ལ། །སྟེགས་བུ་ཟླ་གམ་རེ་རེ་བཀོད། །ཕྱོགས་བཞིར་ཟླ་གམ་བཞི་པ་ལ། །གཤོག་པ་མོ་ལ་སོགས་པ་བཞི། །སྟེང་དུ་བྷནྡ་བཞི་དང་བཅས། །མཚམས་ཀྱི་ཟླ་གམ་བཞི་པོ་ལ། །ཟ་བྱེད་ལ་སོགས་ཡུམ་བཞི་ཡང་། །བྷནྡ་བཞི་ལ་རྡོ་རྗེས་མཚན། །ཤིན་ཏུ་བརྟགས་ཏེ་བཀོད་པར་བྱ། །དབུས་ཀྱི་ལྟ་བ་ཟླུམ་པོ་ལ། །ཡུམ་མཆོག་གཟི་ལྡན་པདྨ་ཅན། །ཟླ་གམ་ཁ་སྤྲོད་ཐོད་པར་བཅས། །སྙིང་པོ་སྔགས་དང་བཅས་པར་དགོད། །མཚན་མའི་རྣམ་རྟོག་མི་མངའ་ཡང་། །བདུད་དང་གཤིན་རྗེ་གདུལ་བ་དང་། །ཚེ་དང་བསོད་ནམས་བརྟན་པའི་ཕྱིར། །རྡོ་རྗེའི་ར་བས་ཀུན་ཏུ་བསྐོར། །རྣལ་འབྱོར་གང་ཞིག་སྐལ་ཡོད་པ། །དཀྱིལ་འཁོར་དེ་ཡིས་དོན་ཡང་བཤད། །རྫས་ལ་དངོས་
གྲུབ་གསོལ་བ་གདབ། །ཚེ་ཡི་རིག་འཛིན་ཐོབ་པའི་ཕྱིར། །ཚེ་བུམ་བྷནྡ་སྲུབ་མེད་ལ། །མགུལ་ཆིངས་གསང་བའི་རས་ཀྱིས་དཀྲི། །ནང་དུ་དཔའ་བོ་སྨན་དང་བཅས། །སྙིང་པོ་ཡུམ་གྱི་སྐུར་བསྐྱེད་ཅིང་། །གསང་བའི་བསྙེན་པ་དགུ་འབུམ་དབུལ། །བུམ་པར་བསྡུ་ཞིང་དབྱིངས་སུ་ཐིམ། །སྦྱོར་བའི་བྱང་ཆུབ་སེམས་དང་བཅས། །མཁའ་ལ་སྤྲོས་ཤིང་དབྱིངས་སུ་བསྡུ། །དེ་ལས་སེམས་ཀྱིས་སྐུར་བསྒོམ་པས། །ཚོན་གང་སྐུ་ཡིས་སྟོང་གསུམ་གང་། །ཚེ་གནས་འཕྲུལ་གྱི་དགོངས་པ་ཆེ། །སྤེལ་བའི་ཆོ་ག་ཡིན་པར་གསུངས། །རྣལ་འབྱོར་ཡབ་ཡུམ་སྦྱོར་བའི་སེམས། །དམར་པོ་ཧྲཱྀཿདང་ལྡན་སྤྲོས་ནས། །གཟི་ལྡན་ཐུགས་ཀར་ཐིམ་བྱས་ཏེ། །གཉིས་སུ་མེད་པར་གྱུར་པ་ནི། །བསྡིམ་པའི་ཆོ་ག་ཡིན་པར་གསུངས། །སྦྱོར་བའི་སེམས་ལ་འཕྲོ་འདུ་ན། །ཁམས་གསུམ་གང་ནས་འདུས་པ་དང་། །གཟི་ལྡན་ལྟེ་བའི་གཞལ་ཡས་སུ། །ཐིམ་གྱུར་རྒྱ་གྲམ་གཏམས་པས་བཅད། །བདུད་དང་མུ་སྟེགས་གང་གིས་ཀྱང་། །འདི་ལ་མཐོང་བར་མི་ནུས་པས། །སྦ་བའི་ཆོས་གང་ཡིན་པར་གསུངས། །སྦྱོར་བའི་བྱང་ཆུབ་སེམས་ཀྱི་སྤྲིན། །ཛཿཛཿསྤྲིན་ཕུང་འཕྲོ་འདུ་ལས། །ཀླུ་དང་སྲིན་པོ་འཁོར་བཅས་ཀྱི། །ཚེ་དང་གཟི་བརྗིད་བཀུག་ནས་ཀྱང་། །བུམ་པ་གཟི་ལྡན་ཐུགས་ཀར་བསྡུ། །འདི་ནི་འགུགས་པའི་ཆོ་གར་གསུངས། །སྦྱོར་བའི་བྱང་སེམས་ཧཱུཾ་དཀར་སྤྲོ། །དེ་ལ་རྩེ་གསུམ་རྡོ་ལྕགས་ཀྱུ། །ཚེ་ཉམས་ལྡེག་པའི་སྦྱོར་བ་ཡིས། །ལུས་ངག་ཡིད་གསུམ་བརླབས་ནས་ནི། །སྐུ་གསུང་ཐུགས་སུ་གསལ་བ་དང་། །ནྲྀ་ཡང་ཧཱུཾ་དུ་བྱིན་བརླབས་ཏེ། །ཤིན་ཏུ་གང་ངམ་རྒྱས་པ་ནི། །གསོ་བའི་ཆོ་ག་ཡིན་པར་གསུངས། །ཐམས་ཅད་གཅིག་ཏུ་གྱུར་པ་དང་། །མཉམ་ཉིད་ཆོས་སྐུ་དག་པ་ཡིས། །དབང་དུ་བསྡུ་བའི་ཆོ་ག་ཡིན། །ཅིར་སྣང་ཅི་སྲིད་བྱང་ཆུབ་སེམས། །དེ་ལས་ཕྱག་རྒྱའི་དཀྱིལ་འཁོར་ཆེ། །གཡོ་དང་མི་གཡོ་སྣ་ཚོགས་ཀུན། །མི་ནུབ་ལྡན་པའི་ཨཱ་ཡུ་སེམས། །དམར་པོ་དབང་བསྡུས་རྒྱས་བཏབ་པ། །རྒྱས་གདབ་ཆོ་ག་ཡིན་པར་གསུངས། །ཐམས་ཅད་མ་
ལུས་གཟི་ལྡན་ཡུམ། །དཀྱིལ་འཁོར་བུམ་པར་བཅས་པ་ཀུན། །མི་དམིགས་གཟི་ལྡན་མཁའ་ལ་ཐིམ། །ཚོན་གང་གསལ་བའི་སྐུ་བསྐྱེད་ནས། །མུ་ཏིག་ནས་ཙམ་ཕྱག་ན་བསྣམས། ། རྐང་པ་འདི་གཉིས་དཔྱད་དགོས་དེ་ཉིད་ཡེ་ཤེས་ཕྱག་ན་བསྣམས། །གཉིས་སུ་མེད་པར་གྱུར་པ་དང་། །སྐྱེ་མེད་ཆོས་ཀུན་རྟོགས་པ་ནི། །གནས་ཀྱི་ཆོ་ག་ཡིན་པར་གསུངས། །སོ་སོར་ཕོ་ཉ་གཏང་བ་ཡང་། །སྤེལ་བའི་དུས་ན་གཤོག་པ་མོ། །བསྡིམ་པའི་དུས་ན་དྲ་བ་ཅན། །སྦ་བའི་དུས་ན་སྡེར་མོ་ཅན། །དགུག་པའི་དུས་ན་གློག་འགྱུ་མ། །གསོ་བའི་དུས་ན་མགོ་བརྙན་ཅན། །དབང་དུ་བསྡུ་བ་དམར་མོའི་ཚོགས། །རྒྱས་འདེབས་དུས་ན་གསང་ཡུམ་བཞི། །བསྒྲུབ་པ་ཆེན་པོ་རྫོགས་པ་དང་། །དངོས་གྲུབ་གསོལ་དང་དབང་བསྐུར་དང་། །སྨོན་ལམ་གདབ་དང་པྲ་ལ་སོགས། །ཕྲིན་ལས་བཅོལ་དང་གཏོར་མ་གཏང་། །གཞུང་ལས་འབྱུང་བ་བཞིན་དུ་བྱ། །དབང་ཆེན་བསྡུས་པའི་ཏན་ཏྲ་ལས། བཀྲ་ཤིས་ཚེ་ཡི་ལེའུ་སྟེ་བཞི་བཅུ་ཞེ་དགུ་པའོ།། །།ཚེ་ལ་དབང་ཐོབ་རིག་འཛིན་རྣལ་འབྱོར་གྱིས། །ཕྱི་རབས་རྣལ་འབྱོར་རྟོགས་པ་བསྐྱེད་པའི་ཕྱིར། །དབང་ཆེན་བསྡུས་པའི་ཏན་ཏྲ་ལས། །ལྟ་བ་བྱང་ཆུབ་སེམས་ཀྱི་ལེའུ་འདི་གསུངས། །ཏིང་འཛིན་ཐབས་ཀྱི་བརྒྱུད་པའི་བྱེ་བྲག་ལ། །དབང་ཆེན་དཀྱིལ་འཁོར་རིམ་པ་ཅིར་སྣང་བ། །ཡབ་ཡུམ་གཉིས་མེད་བྱང་ཆུབ་སེམས་སུ་བལྟ། །གཞལ་ཡས་ཡིད་བཞིན་ལྷུན་གྱིས་གྲུབ་པ་ཡང་། །སྐྱོན་མེད་ཡོན་ཏན་ཕུན་སུམ་ཚོགས་ལྡན་པས། །ཡབ་ཡུམ་གཉིས་མེད་བྱང་ཆུབ་སེམས་སུ་བལྟ། །མེ་རི་དམར་པོ་ཕྱོགས་བཞིར་འཕྲོ་བ་ཡང་། །སྟོང་ཁམས་ཡོངས་སུ་བསྲེགས་པའི་མཐུ་ལྡན་པས། །ཡབ་ཡུམ་གཉིས་མེད་བྱང་ཆུབ་སེམས་སུ་བལྟ། །མེ་འབྲུག་དམར་མོ་ནག་མོར་སྣང་བ་ཡང་། །ཞེ་སྡང་གདུག་པའི་དགྲ་བགེགས་གདུལ་བ་དང་། །གཉེན་པོ་གཞན་མ་མེད་པའི་མཐུ་ལྡན་པས། །ཡབ་ཡུམ་གཉིས་མེད་བྱང་ཆུབ་སེམས་སུ་བལྟ། །འཕན་དང་རྒྱལ་མཚན་བ་དན་དང་། །བླ་རེ་རྒྱལ་མཚན་ལ་སོགས་མང་པོ་ཀུན། །ཆོས་ཀྱི་རུ་མཚོན་ཆེན་པོ་འཕྱར་བ་ཡིས། །བདུད་བཞི་
བསྙལ་མགོ་གནན་པའི་ཕྱིར། །གདུག་པའི་གཉེན་པོ་གཞན་མེད་པས། །ཕ་རོལ་ཟིལ་གྱིས་གནོན་པའི་མཐུ། །ཡབ་ཡུམ་གཉིས་མེད་བྱང་ཆུབ་སེམས་སུ་བལྟ། །རིན་ཆེན་ཁྲི་རྐང་ཕྱོགས་བཞིར་གསལ་བ་ཡང་། །སྤྲིན་མེད་ཉི་བདུན་གསལ་བའི་མཐུ་ལྡན་པས། །ཡབ་ཡུམ་གཉིས་མེད་བྱང་ཆུབ་སེམས་སུ་བལྟ། །གསེར་གྱི་སེང་གེ་ཉི་ཤུ་བཞིར་སྣང་བ། །སྟོབས་ཀྱི་དཔག་ཚད་གཞན་ལས་དཔག་པའི་ཕྱིར། །ཐེག་པའི་བ་དན་རྒྱ་མཚོ་ལྟ་བུ་སྟེ། །ཐེག་པ་ཕྲ་མོ་འདུལ་བའི་མཐུ་ལྡན་པས། །ཡབ་ཡུམ་གཉིས་མེད་བྱང་ཆུབ་སེམས་སུ་བལྟ། །པདྨ་སྟོང་དང་ལྡན་པར་སྣང་བ་ཡང་། །སྣ་ཚོགས་འབྱུང་ཞིང་སྐྱེ་བའི་གཞི་དང་ལྡན། །ཉེས་པའི་སྐྱོན་དང་བྲལ་བའི་མཐུ་ཡོད་པས། །ཡབ་ཡུམ་གཉིས་མེད་བྱང་ཆུབ་སེམས་སུ་བལྟ། །ཡེ་ཤེས་རིན་ཆེན་ཉི་ཟླའི་འོད་སྣང་བས། །འཇིག་རྟེན་ཡོངས་སུ་སྒྲོན་ལྟར་འབར་བ་དང་། །སྟོང་གསུམ་མུན་ནག་སེལ་བའི་མཐུ་ལྡན་པས། །ཡབ་ཡུམ་གཉིས་མེད་བྱང་ཆུབ་སེམས་སུ་བལྟ། །ཞེ་སྡང་རྡོ་རྗེ་ཕྱག་རྒྱའི་སྐུར་གསལ་བ། །རྒྱལ་བ་མང་པོའི་ཐུགས་ཀྱི་དངོས་གཞི་སྟེ། །གཅིག་ལས་འདོད་དགུར་བསྒྱུར་བའི་མཐུ་ལྡན་པས། །ཡབ་ཡུམ་གཉིས་མེད་བྱང་ཆུབ་སེམས་སུ་བལྟ། །རྨད་བྱུང་པདྨ་གར་གྱི་སྐུར་གསལ་བས། །ཁམས་གསུམ་མ་ལུས་དབང་དུ་བསྡུ་བ་དང་། །ངན་སོང་གནས་སུ་སྟོང་པའི་མཐུ་ལྡན་པས། །ཡབ་ཡུམ་གཉིས་མེད་བྱང་ཆུབ་སེམས་སུ་བལྟ། །དབུ་གཙུག་རྟ་མགོ་ལྗང་གུ་བསྟན་པ་ནི། །ཀླུ་ཡི་རྒྱལ་པོའི་རྫུ་འཕྲུལ་ཕྲོག་པ་དང་། །ཐུགས་རྗེ་ཆགས་པས་འགྲོ་བ་བསྒྲལ་བའི་མཐུ་ལྡན་པས། །ཡབ་ཡུམ་གཉིས་མེད་བྱང་ཆུབ་སེམས་སུ་བལྟ། །རྡོ་རྗེ་རིན་ཆེན་ལས་བྱུང་གཤོག་པ་ནི། །རྫུ་འཕྲུལ་ལ་སོགས་གང་ཡང་ཐོགས་པ་མེད། །མྱུར་བའི་ཤུགས་ལྡན་མཁའ་ལ་དབྱིངས་ཕྱུག་མ། །ཐུགས་རྗེ་ཀུན་ལ་སྙོམས་པའི་མཐུ་ལྡན་པས། །ཡབ་ཡུམ་གཉིས་མེད་བྱང་ཆུབ་སེམས་སུ་བལྟ། །བཅུ་དྲུག་ཕྱག་ན་མཚོན་ཆ་བསྣམས་པ་ཡང་། །ཕྲ་
མེན་བཅུ་དྲུག་དབྱིངས་ལ་རོལ་པ་དང་། །མི་མཐུན་གཉེན་པོས་འདུལ་བའི་མཐུ་ལྡན་པས། །ཡབ་ཡུམ་གཉིས་མེད་བྱང་ཆུབ་སེམས་སུ་བལྟ། །སྐུ་ལ་ཚར་གསུམ་ཕྲེང་དང་ལྡན་པ་ནི། །དུག་གསུམ་ཚོགས་ལ་ཞེན་པ་བཟློག་པ་དང་། །དུག་གསུམ་དབྱིངས་སུ་སྒྲོལ་བའི་མཐུ་ཡོད་པས། །ཡབ་ཡུམ་གཉིས་མེད་བྱང་ཆུབ་སེམས་སུ་བལྟ། །མཉེན་ལྕུག་སྦྲུལ་གྱི་ཆུན་པོར་སྣང་བ་ཡང་། །སྐུ་ལ་ཞེ་སྡང་གདུག་པ་མི་མངའ་ཡང་། །མི་མཐུན་དྲེགས་པ་གཞིལ་བར་བྱ་བ་དང་། །ཀླུ་དབང་འཁོར་གྱིས་དབང་བསྐུར་མཐུ་ལྡན་པས། །ཡབ་ཡུམ་གཉིས་མེད་བྱང་ཆུབ་སེམས་སུ་བལྟ། །ཞབས་ཀྱིས་ཁྲོ་བརྒྱད་ཟིལ་གནོན་གཏང་བ་ཡང་། །ས་བཅུ་འདས་ཤིང་ཕ་རོལ་ཕྱིན་རྫོགས་ཏེ། །དབང་བཅུ་ཅིག་ཆར་རྫོགས་པའི་མཐུ་ལྡན་པས། །ཡབ་ཡུམ་གཉིས་མེད་བྱང་ཆུབ་སེམས་སུ་བལྟ། །ཕྱག་རྒྱ་ཆེན་པོ་གཅིག་ཏུ་མ་ངེས་ཏེ། །འཁོར་གྱི་ཕོ་ཉ་ཡང་སྤྲུལ་མང་པོ་དང་། །དབང་གི་སྐུ་གསུང་ཐུགས་ལས་མ་གཡོས་ཀྱང་། །ལོག་རྟོག་འདུལ་ཕྱིར་རྣམ་པར་སྤྲུལ་པ་ནི། །སྐུ་གསུང་ཉིད་ལས་གཡོས་པ་མེད་པ་ནི། །ཐམས་ཅད་མ་ལུས་སྤྲོས་མེད་ཐིག་ལེ་ཆེ། །འབྱུང་བ་ལྔ་ལ་སོགས་པས་བསྡུས་པ་ཀུན། །ཡེ་ནས་སྤྲོས་མེད་བྱང་ཆུབ་སེམས་སུ་བལྟ། །ལྟ་བ་འདི་ལ་གང་ཞིག་བསྒོམ་པ་ནི། །ད་ལྟ་ཉིད་ནས་སྐལ་བ་བྱང་ཆུབ་མཉམ། །དབང་ཆེན་བསྡུས་པའི་ཏན་ཏྲ་ལས། ལྟ་བ་བྱང་ཆུབ་སེམས་ཀྱི་ལེའུ་ཞེས་བྱ་སྟེ་ལྔ་བཅུ་པའོ།། །།ཚེ་ལ་དབང་ཐོབ་རིག་འཛིན་རྣལ་འབྱོར་གྱིས། །ཉེ་བར་བསྒྲུབ་པའི་མན་ངག་ཏུ། །དབང་ཆེན་བསྡུས་པའི་ཏན་ཏྲ་ལས། །སྦྱོར་བའི་དམ་ཚིག་འདི་གསུངས་སོ། །ཕྱི་རབས་སྐལ་བ་ལྡན་པ་ཡིས། །མ་ཉམས་བརྩོན་པས་སྤྱད་བྱས་ནས། །ཐེ་ཚོམ་མེད་ཅིང་ངེས་པར་འགྲུབ། །ལུས་དང་ངག་ཡིད་ཕྱག་རྒྱ་ཆེ། །དབྱིངས་ནས་གསང་བའི་ཡུམ་བསྐྱེད་པ། །སྙིང་པོ་འབྲུ་དང་བཅས་པས་སོ། །མཉམ་པས་མཉམ་པའི་ཕྱག་རྒྱར་གསལ། །གཉིས་སུ་མེད་པར་སྦྱར་བའི་ཕྱིར། །གསང་བའི་རྩེ་མོར་ཨཱོཾ་སེར་པོ། །ཡེ་ཤེས་ལྔ་ཡི་ས་བོན་བསམ། །རྡོ་རྗེ་རྩེ་ལྔར་གྱུར་
པར་དམིགས། །དེ་དཀྱིལ་ཨཱཿལས་ཟླ་བ་སྟེ། །ཐབས་ཀྱི་ཕྱག་རྒྱའི་ཆོ་འཕྲུལ་ལོ། །གཟི་ལྡན་གསང་བར་ཨེ་གྲུ་གསུམ། །དེ་དཀྱིལ་མ་ལས་ཉི་མ་སྟེ། །དེ་སྟེང་པདྨ་བཾ་ལས་བརྟག །ཤེས་རབ་ཕྱག་རྒྱའི་ཆོ་འཕྲུལ་ལོ། །སྐུ་བསྐྱེད་ཕྱག་རྒྱ་གསལ་བ་དང་། །སོ་སོར་གསང་བའི་བརྡ་མཚོན་ཏེ། །བསྟོད་ཅིང་བསྐུལ་དང་ལྡན་བྱས་ནས། །ཨཱོཾ་དང་མཱུཾ་གྱི་འཕྲོ་འདུ་ལས། །ཆོ་ག་གསུམ་གྱི་བྱིན་རླབས་ལས། །པྲ་བེ་ཤ་ཞེས་སྒོ་ཕྱེ་སྟེ། །འདབ་བརྒྱད་པདྨ་ཉི་མར་བཅས། །དེ་དབུས་གསང་བའི་རྡོ་རྗེ་དབུལ། །ཧཱུཾ་གིས་གསོར་ཞིང་ཧ་ཡིས་བསྐྱོད། །ཡང་ནས་ཡང་དུ་བསྐྱོད་པ་ནི། །སྐུ་གསུང་དབྱིངས་སུ་བསྐུལ་བའོ། །ཧཱུཾ་ནི་ཡབ་ཀྱི་བྱང་ཆུབ་སེམས། །གོ་རོ་ཙ་ནའི་དབྱིངས་ནས་བཏོན། །སྲོག་ཆགས་གསང་བའི་སྦུབས་སུ་སྦྱང་། །ལྗགས་ཀྱི་དབང་པོར་བསྐྱིལ་བ་དང་། །ནཱ་སའི་དབྱིངས་ནས་ཀླད་པར་བསྐུལ། །ཚོར་བ་ཉམས་སུ་མྱོང་ནས་ནི། །སྒལ་བའི་རྩར་དུ་བརྒྱུད་ནས་ཀྱང་། །གསང་བའི་རྡོ་རྗེའི་ལམ་དུ་སྦྱང་། །བྷ་ག་གསང་བའི་དཀྱིལ་འཁོར་དུ། །ཡང་ནས་ཡང་དུ་སྤྲོ་ཞིང་བསྡུ། །ཉི་མ་ཟླ་བ་པདྨ་དང་། །རྡོ་རྗེ་ལ་སོགས་འདྲེན་པ་དང་། །སྦྱོར་བའི་བྱང་ཆུབ་རབ་སྤྲོས་པས། །ཕྱོགས་བཅུ་རྒྱལ་བའི་ཐུགས་དམ་བསྐུལ། །མཐའ་ཡས་སེམས་ཅན་དོན་ཡང་བྱ། །སླར་འདུས་ཕྱག་རྒྱའི་སྐུར་འགྱུར་བ། །ཡེ་ཤེས་སེམས་དཔའ་ཚོན་གང་པོ། །དེ་ཡང་ཡབ་ཡུམ་སྦྱོར་བ་ཡིས། །བྱང་ཆུབ་སེམས་ནི་ལྕེ་ལ་གཞག །རྫས་ལས་ཚེ་ཡི་དངོས་གྲུབ་གསོལ། །འདི་ནི་སྦྱོར་བའི་ལུང་དུ་གྲགས། །བྱང་ཆུབ་སེམས་ཀྱི་འོད་ཟེར་ལས། །སླར་ཡང་ཡུམ་གྱི་དབྱིངས་སུ་ཐིམ། །དེ་ལས་ཕྱག་རྒྱའི་སྐུར་བསྒོམ་ལ། །དོང་ཙེ་ཙམ་གྱི་ཟླ་དཀྱིལ་དུ། །ཡེ་ཤེས་སེམས་དཔའ་ཚོན་གང་དམར། །ཡུང་འབྲུ་ཙམ་གྱི་གོ་མནབས་པ། །གཡས་པས་ཡིད་བཞིན་ནོར་བུ་བསྣམས། །གཡོན་པས་རིན་ཆེན་ཟ་མ་ཏོག །དེ་ལྟར་དཀྱིལ་འཁོར་གསལ་བ་ལྟར། །སྤྲུལ་པས་བདག་གཞན་དོན་བྱས་པ། །ཐམས་ཅད་མ་ལུས་ཕྱག་རྒྱའི་སྐུ། །སྦྱོར་བ་ཆེན་པོས་བསྐྱེད་པའོ། །རྫོགས་ནས་མཐོལ་བཤགས་བཟོད་
པར་གསོལ། །དབང་ཆེན་བསྡུས་པའི་ཏན་ཏྲ་ལས། སྦྱོར་བའི་ལེའུ་སྟེ་ང་གཅིག་པའོ།། །།ཚེ་ལ་དབང་ཐོབ་རིག་འཛིན་རྣལ་འབྱོར་གྱིས། །སྐུ་གསུང་ཐུགས་ཀྱི་རྔོམ་བརྗིད་ནི། །སྐྱེ་མེད་ཐབས་ཀྱི་ཕྱག་རྒྱ་ཆེ། །འདི་ནི་དཔའ་བོ་ཆེན་པོའི་སྐུ། །ཁྲོ་བོ་རྔོམ་བརྗིད་རྒྱལ་པོའི་ལེའུ། །བློ་དང་ལྡན་པའི་རྣལ་འབྱོར་གྱིས། །ཕྱི་རབས་སྐལ་ལྡན་དོན་ཕྱིར་གསུངས། །སྐུ་ལས་རྔམ་པ་བཞིར་གྲགས་པ། །ནམ་མཁའི་རི་མོ་ཕྱག་རྒྱ་དེས། །ཅིར་ཡང་འགྱུར་བའི་བཞུགས་ཐབས་རྔམ། །ཟིལ་གྱིས་གནོན་པའི་གདན་མཆོག་རྔམ། །ཚམ་རྔམས་ཆེན་པོའི་སྟོངས་ཐབས་རྔམ། །གསུང་ལས་རྔམ་པ་བཞིར་གྲགས་པ། །ཧོམ་ལྔར་འདྲེལ་བའི་ཞལ་རྔམ། ཟླ་གམ་ཅིར་ཡང་འགྱུར་བའི་ལྗགས་རྔམ། སྐྱེ་ཤི་རྩད་ནས་གཅོད་པའི་ཚེམས་རྔམ།གསུང་སྒྲ་འབྲུག་ལྟར་སྒྲོགས་པའི་དབྱངས་རྔམ། ཐུགས་ཀྱི་རྔམ་བཞིར་གྲགས་པ།ཏིང་འཛིན་ནམ་མཁའི་རྒྱན་གྱི་སྐར་ཚོགས་ལྟ་བུ་རྔམ། ཕྲིན་ལས་རྒྱ་མཚོ་རྒྱན་གྱི་རླབས་ལྟ་བུ་རྔམ། ཡོན་ཏན་ས་གཞི་རྒྱན་གྱི་རྩི་ཤིང་ནགས་ཚལ་ལྟ་བུ་རྔམ།མཛད་པའི་རོལ་མོ་རྒྱན་གྱི་གར་ཐབས་ལྟ་བུ་རྔམ། ཡོན་ཏན་གྱི་རྔམ་བཞིར་གྲགས་པ། རཱུ་ཏྲ་བཅོམ་པའི་གནས་རྔམ། ལྷ་ཆེན་མནན་པའི་གདན་རྔམ།ཁམས་གསུམ་བསྒྲལ་བའི་ཞིང་རྔམ། རྟོག་འཇོམས་སྤྱོད་པའི་བརྟུལ་ཞུགས་རྔམ།སྐུ་ཡི་བརྗིད་པ་བཞིར་གྲགས་པ། སྐུ་ཆེ་ཡན་ལག་རགས་པས་བརྗིད་ཆེ། གྲངས་མང་རྐྱེན་དང་འཚམས་པས་བརྗིད་ཆེ། བཀུར་འོས་གཙོ་བོར་མཐོང་བས་བརྗིད་ཆེ། ཁྱད་ཞུགས་བླ་མ་ཡིན་པས་བརྗིད་ཆེ། གསུང་གི་བརྗིད་པ་བཞིར་གྲགས་པས། གདངས་ཆེ་སྟོང་གསུམ་གང་བས་བརྗིད་ཆེ། ཚིག་ཉུང་ཐེ་ཚོམ་གཅོད་པས་བརྗིད་ཆེ། དོན་ལ་ཉི་ཚེར་སྟོན་པས་བརྗིད་ཆེ། གསལ་བས་མཐའ་གཉིས་སྤངས་པས་བརྗིད་ཆེ། ཐུགས་ཀྱི་བརྗིད་པ་བཞིར་གྲགས་ལ། ཐུགས་རྗེས་ཐུགས་དམ་མཐར་ཕྱིན་བརྗིད་ཆེ། མ་རྨོངས་ཐབས་ཀྱིས་འདུལ་བ་བརྗིད་
ཆེ། མ་བཀག་ས་ལེར་མཁྱེན་པས་བརྗིད་ཆེ། སྣ་ཚོགས་ཅིར་ཡང་སྟོན་པས་བརྗིད་ཆེ།ཡོན་ཏན་བརྗིད་པ་བཞིར་གྲགས་པ། མེད་ལ་ཟད་མི་ཤེས་པས་བརྗིད་ཆེ།གཅིག་ལས་འདོད་དགུར་བསྒྱུར་བས་བརྗིད་ཆེ། གནོད་སྦྱོར་ཕན་པར་མཛད་པས་བརྗིད་ཆེ། ཐབས་མཁས་སྐྱོན་གྱིས་མ་གོས་པས་བརྗིད་ཆེ། ཕྲིན་ལས་བརྗིད་པ་བཞིར་གྲགས་པ། ཕྲིན་ལས་རྒྱུན་དུ་མཛད་པས་བརྗིད་ཆེ། མི་བསྙེངས་ཉམས་བག་རོལ་པས་བརྗིད་ཆེ། འཁོར་བ་ཡུན་རིང་མི་བསྙེངས་བརྗིད་ཆེ། མགོན་སྐྱབས་རྒྱུན་དུ་མཛད་པས་བརྗིད་ཆེ། དགོངས་པའི་དོན་རྣམས་མཛད་པས་བརྗིད་ཆེ། དེ་ལྟར་དབང་ཆེན་ཧེ་རུ་ཀའི། །ཡོན་ཏན་སུམ་ཅུ་རྩ་དྲུག་གིས། །དུག་གསུམ་སྐུ་གསུང་ཐུགས་སུ་སྦྱར། །སྡུག་བསྔལ་བདེ་བ་ཆེན་པོར་སྦྱར། །དབྱིངས་ལས་ཡེ་ཤེས་ཆེན་པོ་སྟེ། །ངན་འགྲོ་མཐོ་རིས་སྐྱས་བཏབ་པས། །དམྱལ་ཚོགས་དོང་སྤྲུག་ཆེན་པོར་མཛད། །རྒྱལ་བ་གང་གི་ཐུགས་རྗེས་ཀྱང་། །འདི་ནི་རྡུལ་ཆ་བསྐྱད་དུ་མེད། །སྲིད་གསུམ་དབང་དུ་བསྡུས་ནས་ནི། །ཁམས་གསུམ་དུས་གཅིག་དབྱིངས་སུ་ཐིམ། །ཐིག་ལེ་ཆོས་སྐུར་ཡེ་གནས་པས། །དབང་ཆེན་ཞེས་ཀྱང་འདི་ལ་བསྔགས། །དབང་ཆེན་བསྡུས་པའི་ཏན་ཏྲ་ལས། ཁྲོ་བོ་རྔོམ་བརྗིད་རྒྱལ་པོའི་ལེའུ་སྟེ་ལྔ་བཅུ་ང་གཉིས་པའོ།། །།ཚེ་ལ་དབང་ཐོབ་རིག་འཛིན་རྣལ་འབྱོར་གྱིས། །ཚེ་དང་དབང་ཐང་སྤེལ་བའི་ཕྱིར། །དབང་ཆེན་བསྡུས་པའི་ཏན་ཏྲ་ལས། །གཟི་བྱིན་ཚེ་ཡི་ལེའུ་འདི་གསུངས་སོ། །དང་པོར་ཕུན་སུམ་ཚོགས་ལྡན་ནས། །བཀའ་དང་མཐུན་པའི་དགོན་གནས་སུ། །མན་དྷལ་འདོམ་གང་གྲུ་བཞི་ལ། །དབུས་སུ་གྲུ་གསུམ་ཚད་དུ་ནི། །ཁྲུ་གང་གྲུ་གསུམ་འཕང་དུ་བརྩིག །ངོས་སུ་ཟླ་གམ་བཞི་པ་ལ། །བར་ཁྱམས་སྒོ་དང་སྒོ་ཁྱུད་བཅས། །མེ་དཔུང་འབར་བས་མཐའ་བསྐོར་ཞིང་། །ཤིན་ཏུ་མཛེས་དང་ལྡན་པར་བྲི། །ལཀྵ་ཕུན་སུམ་ཚོགས་པ་ཡང་། །གཟི་ལྡན་མཚན་དང་ལྡན་པར་བྲི། །ཐོད་པ་མ་གས་ཁྱད་པར་ཅན། །ལྕང་ལོ་འབར་བས་
བརྒྱན་པ་ལྔ། །དབུས་དང་ཕྱོགས་བཞི་ཟླ་གམ་ལའོ། །སྨན་དང་ཛ་གད་རྒུན་ཆང་ངམ། །མངར་དང་སྦྲང་རྩི་འོ་མ་སོགས། །ཇི་ཙམ་འབྱོར་བའི་ཡོ་བྱད་རྣམས། །གོང་མའི་སྣོད་རྣམས་རབ་ཏུ་དགང་། །དེ་ནས་རྣལ་འབྱོར་དབང་ཕྱུག་གི། །ཚེ་དང་གཟི་བརྗིད་སྤེལ་བའི་ཕྱིར། །ཐབས་ལ་མཁས་པས་འདི་སྐད་གསུངས། །སྦྱང་དང་སྤེལ་དང་བསྒོམ་པ་དང་། །ཡིག་འབྲུ་སྤྲོ་དང་བསྡུ་བ་དང་། །རིགས་ཀྱི་ཕོ་ཉ་གཏང་བ་དང་། །བསྙེན་པའི་གྲངས་དང་རྒྱས་གདབ་དང་། །ཕྲ་དང་རིག་པས་མངོན་སུམ་བསྡུ། །བལྟ་བས་ལྷན་ནེར་གསལ་བའོ། །དེ་ལ་སྦྱང་བར་བྱ་བ་ཡང་། །སྔགས་དང་ཕྱག་རྒྱ་ཕོ་ཉ་དང་། །ཆོས་ཉིད་དག་པའི་ངང་གིས་སོ། །སྤེལ་བའི་དོན་དང་རང་བཞིན་ནི། །ཆོས་ཀྱི་དབྱིངས་ལས་མ་གཡོས་ཀྱང་། །མཚན་མའི་ཕྱག་རྒྱ་མཁའ་ལྟར་ཁྱབ། །འདི་ནི་སྤེལ་བའི་ལུང་དུ་གསུངས། །བསྒོམ་པར་བྱ་བ་འདི་དག་སྟེ། །སྣོད་བཅུད་ཡུམ་གྱི་དབྱིངས་སུ་བསྒོམ། །སྣང་སྲིད་ཕྱག་རྒྱའི་ཚོགས་སུ་བསྒོམ། །འདི་ནི་བསྒོམ་པའི་ལུང་དུ་གསུངས། །ཡིག་འབྲུ་སྤྲོ་བར་བྱ་བ་ནི། །ཨཱ་ཡུ་དམར་པོ་དབང་གི་སྐུ། །བསྙེན་པའི་ས་བོན་ཉིད་དུ་སྤྲོ། །འདི་ནི་སྤྲོ་བའི་ལུང་དུ་གསུངས། །བསྐུལ་དང་དོན་བྱས་འདུས་པ་དང་། །གཟི་དང་ལྡན་པའི་དཔལ་བེའུ་ན། །སེམས་དཔའི་སྐུ་དང་ལྡན་པར་བྱ། །རིགས་ཀྱི་ཕོ་ཉ་དགྱེ་བ་ནི། །ཤར་ནས་རྡོ་རྗེའི་ཕོ་ཉ་མོ། །གཤོག་པའི་ལུས་ལ་ཕོ་ཉའི་གདོང་། །ལྷོ་ནས་རྡོ་རྗེ་ཕོ་ཉ་མོ། །གཤོག་པའི་ལུས་ལ་རིན་ཆེན་གདོང་། །ནུབ་ནས་རྡོ་རྗེ་ཕོ་ཉ་མོ། །གཤོག་པའི་ལུས་ལ་སྦྲུལ་གྱི་གདོང་། །བྱང་ནས་རྡོ་རྗེའི་ཕོ་ཉ་མོ། །ཐེའུ་གཤོག་ལུས་ལ་སྤྲུལ་པའི་གདོང་། །དབུས་ནས་མགྱོགས་པའི་ཕོ་ཉ་མོ། །བ་མན་ལུས་ལ་འཁོར་ལོའི་གདོང་། །རྒྱན་དང་ཆ་ལུགས་སྨོས་པར་མཐུན། །བསྙེན་པའི་གྲངས་ནི་འདི་དག་གི། །ཨཱ་ཡུ་སེམས་ཀྱི་རང་བཞིན་ནི། །གདོད་ནས་མ་སྐྱེས་ནམ་མཁའ་བཞིན། །བུན་ནེ་མ་བཀག་ཅི་བདེར་ཡན། །རྟོགས་ནས་ཞག་གཅིག་དྲུག་སྟོང་
བཟླ། །དེ་ལྟར་རྟགས་ནས་གྲངས་རྫོགས་པ། །འདི་ནི་བསྙེན་པའི་ལུང་དུ་གསུངས། །མཁས་ལྡན་ཆེན་པོས་རྒྱས་གདབ་པ། །ཐམས་ཅད་མཉམ་ཉིད་ཆོས་སྐུ་ལ། །གཅིག་ཏུ་བསྡུས་ནས་གཟི་ལྡན་རྒྱ། །ཐུགས་ཀར་རྡོ་རྗེ་རྒྱ་གྲམ་གྱིས། །འགྱུར་བ་མེད་པར་བསྡིམ་ལ་གདབ། །འདི་ནི་རྒྱས་བཏབ་ལུང་དུ་གསུངས། །པྲ་ལ་དབབ་པར་བྱ་བ་ནི། །རིན་ཆེན་མེ་ཏོག་བོར་ནས་ཀྱང་། །གང་ལ་བབ་པའི་ཚེ་དབང་བསྐུར། །འདི་ནི་པྲ་དབབ་ལུང་དུ་གསུངས། །རིག་པས་སྐུར་གསལ་བྱ་བ་དང་། །བལྟ་བ་ཐམས་ཅད་སངས་རྒྱས་པའོ། །འདི་ནི་མངོན་སུམ་ལུང་དུ་གསུངས། །དེ་ནས་བསྐུལ་ཅིང་དོན་བྱ་བ། །བདག་ཉིད་དཔལ་གྱི་ཐུགས་ཀ་ནས། །ལྕགས་ཀྱུ་ཞགས་པའི་ཕོ་ཉ་རྣམས། །ཚེ་དང་གཟི་མདངས་ཕྲོག་ཕྱིར་བསྐུལ། །ལྕགས་ཀྱུས་བསྐུལ་བས་གཤིན་རྗེ་འཛིན། །ཞགས་པས་བསྡམས་པས་འབྱུང་པོ་འདུལ། །སྒྲོག་གིས་ཐམས་ཅད་སྡོམ་པར་བྱེད། །དྲིལ་བུས་ལུས་སེམས་མྱོས་པར་བྱེད། །ཚེ་ལ་བར་ཆད་བྱེད་པའི་བགེགས། །གང་ན་གནས་པ་ཐམས་ཅད་ཀུན། །བཀུག་ནས་རྣམ་ཤེས་ཨཱ་ཡུར་དམིགས། །འཕྲོ་འདུས་དོན་བྱས་སླར་འདུས་དང་། །ཨཱ་ཡུ་སྐྱེ་མེད་དང་པོའི་གནས། །ས་ནས་ཆོས་ཀྱི་དབྱིངས་སུ་བསྡུ། །ཚེ་དང་གཟི་བརྗིད་འཕེལ་རྒྱས་ཤིང་། །སྡུག་བསྔལ་བདེ་བར་བྱིན་རློབས་པས། །གཟི་བྱིན་ལེའུ་འདི་ལ་བསྔགས། །དེ་ནས་རྫས་དང་ལག་ཆ་དང་། །སྨན་ལ་སོགས་པའི་བྱེ་བྲག་རྣམས། །མཁས་ལྡན་ཆེན་པོས་འདི་ལྟར་རོ། །སྣ་ཚོགས་མཚན་མར་སྣང་བ་ཡི། །རྫས་དང་ལག་ཆའི་མཚན་མ་ཀུན། །སོ་སོའི་མཚན་ཉིད་མངོན་སུམ་ཡང་། །སྒྱུ་མ་ལྟ་བུར་མངོན་བྱས་ཏེ། །སྒྱུ་མ་ཉིད་ལ་སྒྱུ་མ་རོལ། །ཡེ་ཤེས་ཉིད་ལ་ཡེ་ཤེས་ཐིམ། །ཐིམ་གྱུར་དབྱིངས་ནས་ཕྱག་རྒྱ་ཆེ། །འདི་ནི་བྱང་ཆུབ་སེམས་ཀྱི་རྒྱ། །མ་བཏབ་བཞིན་དུ་ཡོངས་ལ་གསལ། །སྐྱེ་ཤི་མེད་པའི་ཆོས་སྐུར་དམིགས། །འདུ་
འབྲལ་མེད་པའི་གཟུངས་སུ་འགྱུར། །འགྱུར་བ་མེད་པའི་སྐུ་བརྙེས་པས། །གཟི་བྱིན་ཚེ་ཡི་ལེའུ་འོ། །ཞེས་གསུངས་སོ། །དབང་ཆེན་བསྡུས་པའི་ཏན་ཏྲ་ལས། གཟི་བྱིན་ཚེའི་ལེའུ་སྟེ་ལྔ་བཅུ་གསུམ་པའོ།། །།ཚེ་ལ་དབང་ཐོབ་རིག་འཛིན་རྣལ་འབྱོར་གྱིས། །ཕྱི་རབས་རྣལ་འབྱོར་རྣམས་ཀྱི་དོན་ཆེད་དུ། །དབང་ཆེན་བསྡུས་པའི་ཏན་ཏྲ་ལས། །ཕུན་སུམ་ཚོགས་པ་བརྒྱད་ཀྱི་ལེའུ་འདི་གསུངས། །དེ་ཡང་གང་དང་གང་ཞེ་ན། གནས་ཕུན་སུམ་ཚོགས་པ་བཅའ་བ་དང་། དུས་ཕུན་སུམ་ཚོགས་པ་འདུ་བ་དང་། འཁོར་ཕུན་སུམ་ཚོགས་པ་དང་ལྡན་པ་དང་། རྫས་ཕུན་སུམ་ཚོགས་པ་བཙལ་བ་དང་། ཡོ་བྱད་ཕུན་སུམ་ཚོགས་པ་བསག་པ་དང་། ཏིང་ངེ་འཛིན་ཕུན་སུམ་ཚོགས་པ་བསར་བ་དང་། ཕྲིན་ལས་ཕུན་སུམ་ཚོགས་པ་སྤྱད་པ་དང་། དངོས་གྲུབ་ཕུན་སུམ་ཚོགས་པ་བསྡུ་བའོ། །དེ་ལྟར་ཕུན་སུམ་ཚོགས་པ་བརྒྱད་དང་ལྡན་པར་བྱ་དགོས་ཏེ། ཏན་ཏྲ་མ་མོ་ལས་ཀྱང་། བསྒྲུབ་པ་ཆེན་པོའི་དུས་དག་ཏུ། །གནས་མ་བརྟགས་དང་དུས་ལས་ཡོལ། །འཁོར་དང་མི་ལྡན་རྫས་མ་རྙེད། །ཡོ་བྱད་མ་ཚང་ཏིང་འཛིན་གཡེལ། །ཕྲིན་ལས་མ་འགྲུབ་དངོས་གྲུབ་ཡལ། །འདི་རྣམས་བསྒྲུབ་པའི་སྐྱོན་བརྒྱད་ཡིན། །ཕྱི་རབས་སྔགས་འཆང་སྒྲུབ་པ་པོས། །དོན་ལས་ཡིད་ཆེས་མ་གྱུར་ཀྱང་། །ཐོས་པའི་སེམས་ནི་རྩེ་གཅིག་གིས། །བསྒྲིམ་ནས་ཕུན་སུམ་ཚོགས་བྱས་ན། །བསྒྲུབ་པའི་འབྲས་བུ་ཡལ་མི་འགྱུར། །འདི་ལ་ཐེ་ཚོམ་ཅི་སྟེ་ཟ། །ཞེས་གསུངས་སོ། །དབང་ཆེན་བསྡུས་པའི་ཏན་ཏྲ་ལས། ) ཕུན་སུམ་ཚོགས་པ་བརྒྱད་ཀྱི་ལེའུ་སྟེ་ལྔ་བཅུ་བཞི་པའོ།། །།ཚེ་ལ་དབང་ཐོབ་རིག་འཛིན་རྣལ་འབྱོར་གྱིས། །ཕུན་སུམ་ཚོགས་པ་བརྒྱད་དང་ལྡན་བྱས་ནས། །ཕྱི་རབས་རྣལ་འབྱོར་རྣམས་ཀྱི་དོན་ཆེད་དུ། །དབང་ཆེན་བསྡུས་པའི་ཏན་ཏྲ་ལས། །ཁྱད་པར་དབང་གི་ལེའུ་འདི་གསུངས། །དེ་ཡང་གང་དང་གང་ཞེ་ན། ཡེ་རྒྱ་སྤྱི་ཡི་དབང་དང་། ཁྱད་པར་རིམ་པའི་དབང་ངོ་། །ཡེ་
རྒྱ་སྤྱི་ཡི་དབང་ནི་རྒྱུད་ལས་འདི་སྐད་དོ། །རྒྱལ་ཐབས་སྤྱི་བླུག་ཐེག་ཆེན་ཨ་ཏིའི་དབང་། བསྐུར་རོ་ཙམ་གྱིས་ཐོབ་པའོ། །ཁྱད་པར་རིམ་པའི་དབང་ལ་ཡང་། ཐབས་གང་གིས་དབང་བ་དང་། དོན་ཆེན་ཅི་ལ་དབང་བ་དང་།དབང་གི་དངོས་གཞི་བསྟན་པ་དང་། དབང་གི་གྲངས་བསྟན་པ་དང་། དབང་རྟགས་ཅི་འཆང་བ་བསྟན་པ་དང་། དབང་བ་ཡུལ་ཅི་ལ་བསྒྱུར་བསྟན་པ་དང་།དབང་གི་ཚད་བསྟན་པ་དང་། དབང་བསྐུར་བའི་དུས་བསྟན་པ་དང་། དབང་བསྐུར་བའི་ཐབས་བསྟན་པ་དང་། དབང་གི་ཁྱད་པར་བསྟན་པ་དང་། དབང་གི་མན་ངག་བསྟན་པ་དང་། དབང་གི་ཡོན་ཏན་བསྟན་པའོ། །དེ་ལྟ་བས་ན་ཕྱི་ནང་གསང་བ་ཡི། །ཐེག་པའི་རིམ་པ་ཅི་སྙེད་གསུངས་མོད་ཀྱི། །དེ་ཡི་ནང་ནས་འབྲས་བུ་ཐེག་རྒྱལ་བསྔགས། །འབྲས་བུ་ཐེག་རྒྱལ་ནང་ནས་དབང་ལུང་གཅེས། །ཤེས་བཞིན་དབང་མེད་རློམས་སེམས་ཅན། །ཁ་ཅིག་ཡ་མ་བརླ་དང་གསོབ་འདྲ་བས། །དོན་དང་མཐུན་པའི་སྐྱེས་བུ་དབང་ཆེན་ལ། །རྟགས་དང་ལྡན་པས་དབང་བསྐུར་ཤིན་ཏུ་རིགས། །དབང་མེད་ཁ་ཅིག་རང་དབང་ཟོས་གྱུར་ཅིང་། །ཐུག་ཐུབ་ཁོང་ཡངས་ཤེས་ཐོས་གཙོར་བཞག་ནས། །ཆེ་བཞི་མེད་བཞིན་ཡོད་པའི་ལས་སྤྱོད་པ། །ངན་སོང་གསུམ་གྱི་ས་བོན་དེ་ཡིན་པས། །སྲིད་པར་འཁྱམས་ཤིང་ཆོས་ལམ་རིང་བར་སྣང་། །བཀའ་ལ་བརྟེན་ནས་དབང་མེད་བཀའ་རྐུན་ལ། །དབང་ལུང་ཚད་མར་བརྒྱུད་པའི་སྐྱེས་བུ་ཡིས། །བསྐུར་ཡང་མི་ཐོབ་བོང་བུའི་སྤྱོད་པ་བཞིན། །ཐོབ་པར་མི་འགྱུར་ཆགས་པར་མི་འགྱུར་རོ། །དབང་གི་ཁྱད་པར་བསྟེན་པའི་ལེའུ་སྟེ་ལྔ་བཅུ་ལྔ་པའོ།། །།ཚེ་ལ་དབང་ཐོབ་རིག་འཛིན་རྣལ་འབྱོར་གྱིས། །ཕུན་སུམ་ཚོགས་པ་བརྒྱད་དང་ལྡན་བྱས་ནས། །ཕྱི་རབས་རྣལ་འབྱོར་རྣམས་ཀྱི་དོན་ཆེད་དུ། །དབང་གི་ཁྱད་པར་རིམ་པར་བསྐུར་ནས་ཀྱང་། །འདའ་ཀ་ཐུགས་ཀྱི་དམ་ཚིག་འདི་གསུངས་སོ། །བསྡམ་པར་བྱ་བའི་དམ་ཚིག་ནི། །སྲོག་གི་ཕྱིར་ཡང་མི་འདའ་འོ། །
སྣ་ཚོགས་དངོས་པོར་སྣང་བ་ཡང་། །དངོས་པོ་མེད་པའི་སྐུར་གསལ་བས། །རྟོག་པའི་དོན་ལས་མི་འདའོ། །སྒྲ་མཐའ་སྣ་ཚོགས་གྲགས་པ་ཡང་། །སྨྲ་བ་མེད་པའི་གསུང་ཡིན་པས། །རིག་པའི་དོན་ལས་མི་འདའོ། །བསྟན་དུ་མེད་པའི་བསམ་པ་ནི། །དེ་ཡི་ཐུགས་ཀྱི་རང་བཞིན་ཏེ། །དེ་ལས་འདའ་བར་མི་བྱའོ། །སྐུ་གསུང་ཐུགས་ལས་མ་གཡོས་ཀྱང་། །ཆེ་བའི་ཡོན་ཏན་སྣ་ཚོགས་འབྱུང་། །འོད་ཡང་ཟད་མེད་འཕེལ་མེད་པ། །ཡོན་ཏན་དམ་ཚིག་ཡིན་པར་གྲགས། །འདི་ལས་འདའ་བར་མི་བྱའོ། །བཙལ་བ་མེད་པའི་ལས་གང་ཡིན། །དེ་ཉིད་ཐབས་ཀྱི་སྤྱོད་མཆོག་པས། །ཕྲིན་ལས་དམ་ཚིག་འདའ་དཀའ་བའོ། །ལྔ་པོ་འདི་ལ་གང་གནས་པ། །རྣལ་འབྱོར་སྐལ་ལྡན་དམ་པའོ། །བསྒྲུབ་པའི་དམ་ཚིག་ཆེན་པོ་ནི། །བྱང་ཆུབ་སེམས་དང་ཤ་རྣམས་དང་། །ཁྲག་དང་དྲི་ཆུ་དྲི་ཆེན་པ། །དབང་པོ་ལྔ་དང་བཅས་པ་འདི། །བདེ་གཤེགས་ལྔ་ཡི་ཐུགས་དམ་སྟེ། །བསྒྲུབ་པ་གནས་པས་མི་སྤང་ཞིང་། །འདའ་བར་བྱ་བ་མ་ཡིན་ནོ། །བརྟུལ་ཞུགས་ཆེན་པོའི་དམ་ཚིག་ནི། །དཀའ་ཐུབ་སྡོམ་ལ་གནས་པའི་ཕྱིར། །བདུད་རྩི་དམ་རྫས་རྐྱེན་བཅས་ལ། །ཐོགས་པ་མེད་པའི་བརྟུལ་ཞུགས་ཀྱིས། །སྤང་ལེན་མེད་པའི་རོལ་པ་བྱ། །དེ་ལས་འདའ་བར་མི་བྱའོ། །བསྙེན་པའི་དམ་ཚིག་ཆེན་པོ་ནི། །ལྷ་དང་རྫས་དང་ཚེ་ལ་སོགས། །སྙིང་པོ་ཡིག་འབྲུར་བཅས་པ་རྣམས། །གཉིས་སུ་མེད་པར་རྟོགས་བྱས་ནས། །མཉམ་པ་ཆེན་པོའི་དབྱིངས་སུ་གཞག །དེ་ལས་འདའ་བར་མི་བྱའོ། །སྤྱད་པའི་དམ་ཚིག་ཆེན་པོ་ནི། །པདྨ་ཅན་དང་དུང་ཅན་དང་། །བ་གླང་ཅན་དང་རི་མོ་ཅན། །མི་མོ་མིག་རིང་ལ་སོགས་ལ། །ཕྲད་པར་གྱུར་པ་སྦྱར་བ་ཡིན། །མཐོང་བ་ཙམ་གྱི་དམ་ཚིག་སྟེ། །དབང་པོ་ཡུལ་དུ་ཤེས་མཚོན་བྱ། །དེ་ལས་འདའ་བར་མི་བྱའོ། །གྲུབ་པར་བྱ་བའི་དམ་ཚིག་ནི། །ཉོན་མོངས་ལྔ་པོ་གནས་སུ་དག །སྐུ་ལྔ་ཡེ་ཤེས་ལྔར་སྦྱར་ཅིང་། །ཐམས་ཅད་ལྷ་ཡི་ཕྱག་རྒྱར་གསལ། །འདི་ལས་འདའ་བར་མི་བྱའོ། །ཤེས་པར་བྱ་བའི་
དམ་ཚིག་ནི། །འཁོར་བའི་ཆོས་ལྔ་མ་སྤངས་པར། །སྤྱད་པས་གྲོལ་ཏེ་མྱ་ངན་འདས། །ཕྱི་ནང་སྣོད་བཅུད་མ་ལུས་ཀུན། །ཕྱག་རྒྱ་ཆེན་པོའི་དཀྱིལ་འཁོར་འདུས། །འདི་ལས་འདའ་བར་མི་བྱའོ། །དང་དུ་བླང་བའི་དམ་ཚིག་ནི། །ཏན་གཎ་ལ་སོགས་སྤྱད་པ་ཡང་། །འདས་པའི་སངས་རྒྱས་རྣམས་ཀྱི་བཀའ། །མ་བྱིན་པར་ཡང་བླང་བ་དང་། །མི་དབང་པར་ཡང་སྤྱོད་པ་དང་། །ལྷ་དང་སློབ་དཔོན་མཆེད་ལ་སོགས། །དེ་ལ་རྫུན་གྱི་ཚིག་སྨྲ་ཞིང་། །བརླང་པོའི་ཚིགས་ཀྱིས་ཞེ་བགམ་པ། །དེ་ལས་འདའ་བར་མི་བྱའོ། །གླུ་བྲོ་གསང་བའི་དམ་ཚིག་ནི། །དབྱིངས་ཉིད་རྟོགས་པའི་ས་གཞི་ལ། །བྷུཌྜྷ་ཁྲག་འཐུང་རོལ་པའི་བྲོ། །གཏི་མུག་གནས་སུ་འཇོམས་པ་སྟེ། །འདའ་དཀའ་སྐུ་ཡི་དམ་ཚིག་གོ། །མེ་ལོང་གསལ་བའི་ས་གཞི་ལ། །རྡོ་རྗེ་ཁྲག་འཐུང་རོལ་པའི་བྲོ། །ཞེ་སྡང་གནས་སུ་འཇོམས་པ་ཡིས། །འདའ་དཀའ་ཐུགས་ཀྱི་དམ་ཚིག་གོ། །མཉམ་པ་ཆེན་པོའི་ས་གཞི་ལ། །རིན་ཆེན་ཁྲག་འཐུང་རོལ་པའི་བྲོ། །ང་རྒྱལ་གནས་སུ་འཇོམས་པ་སྟེ། །ཡོན་ཏན་ལྷུན་གྲུབ་དམ་ཚིག་བྲོ། །སོ་སོར་རྟོག་པའི་ས་གཞི་ལ། །པདྨ་ཁྲག་འཐུང་རོལ་པའི་བྲོ། །འདོད་ཆགས་གནས་སུ་འཇོམས་པ་སྟེ། །སྒྲ་མཐའ་གསུང་གི་དམ་ཚིག་གོ། །ནན་ཏན་ཆེན་པོའི་ས་གཞི་ལ། །ཀརྨ་ཁྲག་འཐུང་རོལ་པའི་བྲོ། །ཕྲག་དོག་གནས་སུ་འཇོམས་པ་སྟེ། །ཕྲིན་ལས་འདའ་དཀའི་དམ་ཚིག་གོ། །སྟོང་ཉིད་ཡེ་ཤེས་ས་གཞི་ལ། །དབང་ཆེན་ཁྲག་འཐུང་རོལ་པའི་བྲོ། །དུག་ལྔ་གནས་སུ་འཇོམས་པ་སྟེ། །སྐུ་ལྔ་ལྷུན་སྦྱོར་དམ་ཚིག་གོ། །དབྱིངས་ཕྱུག་ལྔ་ཡི་ས་གཞི་ལ། །ཡེ་ཤེས་དྲུག་གི་བྲོ་བརྡུངས་ཤིང་། །དུག་ལྔ་འཇོམས་པའི་གླུ་བླངས་པས། །སྡུག་བསྔལ་ཆུ་བོའི་གཞུང་བསྐམས་ནས། །འཁོར་བའི་རྒྱ་མཚོ་གཏིང་བསྐམས་ཏེ། །སྐུ་གསང་ཐུགས་སུ་རྒྱས་བཏབ་པས། །བདེ་བ་ཆེན་པོའི་སར་གནས་ཏེ། །དམྱལ་ཚོགས་མེ་དཔུང་གནས་སུ་བསད། །འདི་ནི་དཔལ་གྱི་བྲོ་བོ་ཆེ། །ཐོས་པ་ཙམ་གྱིས་རྟོག་པ་འབྱང་། །བརྡུང་བ་ཙམ་
གྱིས་ཐུགས་དམ་བསྐང་། །འདི་ནི་གླུ་བྲོའི་དམ་ཚིག་སྟེ། །འདི་ལས་འདའ་བར་མི་བྱའོ། །ཐམས་ཅད་ཆོས་སྐུ་གདལ་བ་ཆེ། །དབང་ཆེན་བསྡུས་པའི་ཏན་ཏྲ་ལས། འདའ་དཀའ་ཐུགས་ཀྱི་དམ་ཚིག་གི་ལེའུ་སྟེ་ལྔ་བཅུ་དྲུག་པའོ།། །།ཚེ་ལ་དབང་ཐོབ་རིག་འཛིན་རྣལ་འབྱོར་གྱིས། །ཕྱི་རབས་རྣལ་འབྱོར་རྣམས་ཀྱི་དོན་ཆེད་དུ། །དབང་ཆེན་བསྡུས་པའི་ཏན་ཏྲ་ལས། །མན་ངག་སྦས་པའི་ལེའུ་འདི་གསུངས། །ཕོ་བྲང་རིན་ཆེན་གཞལ་ཡས་ཁང་། །གདན་དང་འབྱུང་བར་བཅས་པ་རྣམས། །དབང་ཆེན་རིམ་གྱིས་བསྐྱེད་པ་ཡི། །འབྱུང་བ་ལྔ་ཡི་ཡི་གེ་ཧཱུཾ་ལ་སྦས། །རིགས་བཞི་སྦས་པའི་ཧེ་རུ་ཀ །རིན་ཆེན་ཁྲི་རྐང་བཞི་ལ་སྦས། །མ་ཚོགས་དབང་ཕྱུག་ཉི་ཤུ་བརྒྱད། །འདེགས་པའི་སེང་གེའི་གདན་དུ་སྦས། །མ་བདུན་གསང་བའི་ཕྱག་རྒྱ་ནི། །གསང་བའི་ཉི་མ་བདུན་དུ་སྦས། །གདན་ཁྲི་པདྨར་བརྩེགས་པ་ཡང་། །ཤེས་རབ་ཡུམ་གྱི་རང་བཞིན་ཏེ། །གསང་བ་ཡུམ་གྱི་བྷ་གར་སྦས། །ཞེ་སྡང་རྡོ་རྗེའི་ཕྱག་རྒྱ་ཡང་། །མན་ངག་གསང་བར་བརྒྱུད་པ་ནི། །གར་གྱི་དབང་ཕྱུག་སྐུ་ལ་སྦས། །རྡོ་རྗེ་དབྱིངས་ཀྱི་དཀྱིལ་འཁོར་རྣམས། །དབུ་ལྔའི་གཞལ་ཡས་ཉིད་ལ་སྦས། །གསུང་དབྱངས་སྔགས་ཀྱི་དཀྱིལ་འཁོར་ནི། །དབུ་ཡི་རྟ་མགོ་ལྗང་གུར་སྦས། །སྐྱེ་མེད་ཡེ་ཤེས་སེམས་དཔའ་ནི། །ཐུགས་ཀའི་དཔལ་གྱི་བེའུར་སྦས། །དུར་ཁྲོད་ཕྲ་མེན་བཅུ་དྲུག་ནི། །འཇིགས་པའི་ཕྱག་མཚན་བཅུ་དྲུག་ཉིད་ལ་སྦས། །གདུལ་བྱ་ཕྱག་གི་བྱེ་བྲག་བཅུ་དྲུག་ནི། །ཏ་ཀྲྀཏ་བཅུ་དྲུག་ངོ་བོ་ཉིད་ལ་སྦས། །ཚེ་གནས་གསང་བའི་ཡུམ་ཆེན་གཟི་ལྡན་མ། །གསང་མཆོག་ཐུགས་ཀྱི་རྡོ་རྗེ་ཉིད་ལ་སྦས། །སྤྲུལ་པའི་འཁོར་ཚོགས་མང་པོ་ཀུན། །ཆོས་སྐུ་དངོས་པོར་མི་མཐོང་བས། །དམུས་ལོང་འཁོར་བའི་ཚོགས་སུ་སྦས། །བཀའ་ཉན་ལས་ཀྱི་ཕོ་ཉ་ཀུན། །དབྱིངས་ལ་རྟོགས་པ་མི་མངའ་བས། །ཁྱི་དང་སྤྱང་ཀུའི་ཚོགས་སུ་སྦས། །སྒོ་སྲུང་ཡབ་ཡུམ་བརྒྱད་རྣམས་ཀྱང་། །སྤྲུལ་སྐུ་དབྱིངས་སུ་གཅིག་པའི་ཕྱིར། །མགོ་དགུ་རྐང་གཅིག་ཉིད་དུ་སྦས། །མེ་འབྲུག་
རླུང་འབྲུག་ལ་སོགས་ཀུན། །སྒྲ་ཉིད་སྒྲ་མཐར་སྟོང་པའི་ཕྱིར། །སྟོང་པ་ཆེན་པོ་ཉིད་ལ་སྦས། །དེ་ལྟར་གང་ཞིག་རྟོགས་པ་ནི། །དཀྱིལ་འཁོར་བྱ་བ་དེ་ཉིད་ཡིན། །ཞེས་གསུངས་སོ། །དབང་ཆེན་བསྡུས་པའི་ཏན་ཏྲ་ལས། མན་ངག་སྦས་པའི་ལེའུ་སྟེ་ལྔ་བཅུ་བདུན་པའོ།། །།ཚེ་ལ་དབང་ཐོབ་རིག་འཛིན་རྣལ་འབྱོར་གྱིས། །ཕྱི་རབས་རྣལ་འབྱོར་རྣམས་ཀྱི་དོན་ཆེད་དུ། །དབང་ཆེན་བསྡུས་པའི་ཏན་ཏྲ་ལས། །ཡང་དག་དོན་གྱི་རྣམ་གྲངས་ལེའུ་འདི་གསུངས་སོ། །དེ་ཡང་གང་དང་གང་ཞེ་ན། མ་ནོར་བར་རྟོགས་པའི་བལྟ་བ་ཡང་དག་པ་དང་། མ་བགྲོད་པར་ཕྱིན་པའི་ས་ཡང་དག་པ་དང་། མ་བསྒྲུབས་པའི་དངོས་གྲུབ་ཡང་དག་པ་དང་། གཉིས་སུ་མི་འབྱེད་པའི་སྤྱོད་པ་ཡང་དག་པ་དང་། བསྲུང་དུ་མེད་པའི་དམ་ཚིག་ཡང་དག་པ་དང་། འབད་པ་མེད་པའི་བརྩོན་འགྲུས་ཡང་དག་པ་དང་། བྲིས་པ་མེད་པའི་དཀྱིལ་འཁོར་ཡང་དག་པ་དང་། བསྒོམ་དུ་མེད་པའི་ལྷ་ཡང་དག་པ་དང་། བསྐུར་བ་མེད་པའི་དབང་ཡང་དག་པ་དང་། མ་སོང་བར་ཕྱིན་པའི་གནས་ཡང་དག་པ་དང་། བརྗོད་དུ་མེད་པའི་ཚིག་ཡང་དག་པ་དང་བཅུ་གཅིག་ཏུ་བཀའ་སྩལ་ཏོ། །དེ་ལ་མ་ནོར་བར་རྟོགས་པའི་བལྟ་བ་ཡང་དག་པ་ནི། རྒྱུད་ལས། བལྟ་བ་འདི་ལ་གང་གནས་པ། །རྣལ་འབྱོར་འདི་ནི་སྐལ་བ་བཟང་ཅེས་འབྱུང་། །མ་བགྲོད་པར་ཕྱིན་པའི་ས་ཡང་དག་པ་ནི། རྒྱུད་ལས། ཀུན་ཏུ་འོད་ཀྱི་ས་ལས་འདས་ནས་ནི། །པདྨ་ཅན་དུ་གྱུར་པ་ན་ཅེས་འབྱུང་། །མ་བསྒྲུབས་པར་གྲུབ་པའི་དངོས་གྲུབ་ཡང་དག་པ་ནི། རྒྱུད་ལས། ངང་ལ་གནས་པ་དངོས་གྲུབ་ཡིན། །ཀློང་དུ་གྱུར་པས་བསྒྲུབ་ཐབས་སོ། །ཞེས་འབྱུང་། གཉིས་སུ་མི་འབྱེད་པའི་སྤྱོད་པ་ཡང་དག་པ་ནི། རྒྱུད་ལས། བླ་མེད་ཐེག་པར་རབ་ངེས་ན། །ཉོན་མོངས་འདོད་ལྔ་ཀུན་སྤྱད་ཀྱང་། །པདྨ་ལ་ནི་འདམ་བཞིན་ཏེ། །དེ་ནི་ཚུལ་ཁྲིམས་ཕུན་སུམ་ཚོགས་ཞེས་འབྱུང་། །བསྲུང་དུ་མེད་པའི་དམ་ཚིག་ཡང་དག་པ་ནི། རྒྱུད་ལས། གཏི་མུག་ཞེ་སྡང་ང་རྒྱལ་དང་། །འདོད་ཆགས་ཕྲག་དོག་ཆེན་པོ་ནི། །
བདེ་གཤེགས་ལྔ་ཡི་རང་བཞིན་པས། །བསྲུང་དུ་མེད་པའི་སྡོམ་པ་ཅན། །ཞེས་འབྱུང་། འབད་པ་མེད་པའི་བརྩོན་འགྲུས་ཡང་དག་པ་ནི། རྒྱུད་ལས། མི་ལེན་བྱང་ཆུབ་སྤྱོད་པ་ལ། །བྱེད་པ་མེད་པ་ལས་ཡིན་ཏེ། །མི་བཙལ་བཞག་པ་བརྩོན་འགྲུས་སོ། །ཞེས་འབྱུང་། བྲི་བ་མེད་པའི་དཀྱིལ་འཁོར་ཡང་དག་པ་ནི། རྒྱུད་ལས། འབྱུང་བ་ཡུམ་གྱི་གཞལ་ཡས་ན། །སྣང་སྲིད་ཕྱག་རྒྱའི་དཀྱིལ་འཁོར་ཡིན། །བྲི་བར་བྱ་བ་མིང་ཡང་མེད། །ཅེས་འབྱུང་། བསྒོམ་དུ་མེད་པའི་ལྷ་ཡང་དག་པ་ནི། རྒྱུད་ལས། བདག་ཉིད་ཆེན་པོའི་དོན་རྟོགས་ནས། །སངས་རྒྱས་ཀུན་གྱི་ཉིང་ཤ་ཅན། །བསྒོམ་པས་གཞན་ནས་མི་རྙེད་དོ། །ཞེས་འབྱུང་། བསྐུར་བ་མེད་པའི་དབང་ཡང་དག་པ་ནི། རྒྱུད་ལས། དབྱིངས་དང་ཡེ་ཤེས་དོན་རྟོགས་ན། །ཐབས་དང་ཤེས་རབ་དབང་ཆེན་ཡིན། །རྡོ་རྗེ་དྲིལ་བུ་རིག་པས་བཟུང་། །ཞེས་འབྱུང་། མ་སོང་བར་ཕྱིན་པའི་གནས་ཡང་དག་པ་ནི། རྒྱུད་ལས། ཁམས་གསུམ་ཡུམ་གྱི་བྷ་ག་ལས། །གང་ལྟར་སོང་ཡང་གནས་ཀྱི་མཆོག །ཅེས་འབྱུང་། བརྗོད་དུ་མེད་པའི་ཚིག་ཡང་དག་པ་ནི། རྒྱུད་ལས། མཚན་མ་མིང་དུ་བཏགས་པ་ཡང་། །མཚན་མ་མེད་པའི་ཆོས་ཡིན་པས། །ཚིག་ཏུ་བརྗོད་པའི་ཐ་སྙད་བྲལ། །ཞེས་འབྱུང་། དོན་དེ་ལྟ་བས་ན་རྣལ་འབྱོར་གྱི་དབང་ཕྱུག་ཆེན་པོས། དོན་དེ་ལྟར་ཡིད་ཆེས་ནས། རྟོགས་པ་ཀླུང་དུ་གྱུར་ནས་བསྒོམ་པ་ནི། བྷུཌྜྷ་ཙིཏྟ་ཛྭ་ལ་ཡིན་ནོ། །ཛྙཱ་ན་ཙིཏྟ་ཛྭ་ལ་ཡིན་ནོ། །བོ་བྷི་ཙིཏྟ་ཛྭ་ལ་ཡིན་ནོ། །དོན་འདི་ལ་ཡིད་མ་ཆེས་ཤིང་། ཡིན་མ་ཡིན་ཞེའམ། འདི་ལྟ་བུའི་ལྟ་བས་གཏན་ལ་མི་ཕེབས་ཞེས་སྐུར་པ་འདེབས་ཤིང་རྟོགས་པ་ཀླུང་དུ་མ་གྱུར་ན་ནི། ཀརྨ་ཙིཏྟ་ཛྭ་ལ་ཡིན་ནོ། །རཀྴ་ཙིཏྟ་ཛྭ་ལ་ཡིན་ནོ། །ནཱ་ག་ཙིཏྟ་ཛྭ་ལ་ཡིན་ནོ། །དབང་ཆེན་བསྡུས་པའི་ཏན་ཏྲ་ལས། ཡང་དག་དོན་གྱི་རྣམ་གྲངས་ཀྱི་ལེའུ་སྟེ་ལྔ་བཅུ་བརྒྱད་པའོ།། །།ཚེ་ལ་དབང་ཐོབ་རིག་འཛིན་རྣལ་འབྱོར་གྱིས། །ཕྱི་རབས་རྣལ་འབྱོར་རྣམས་ཀྱི་དོན་སླད་དུ། །དབང་ཆེན་བསྡུས་པའི་ཏན་ཏྲ་ལས། །
རྨད་བྱུང་བྱང་ཆུབ་སེམས་ཀྱི་ལེའུ་འདི་གསུངས་སོ། །འབར་བའི་དབུ་ལྔ་རྨད་དུ་བྱུང་བ་ནི། །ཡེ་ཤེས་ལྔ་དང་ཡུམ་ལྔ་དབང་པོ་སྦྱོར། །མཉམ་པ་ཆེན་པོའི་ངང་དུ་ལྷན་ནེ་བསྒོམ། །འབར་བའི་རྟ་མགོ་རྨད་དུ་བྱུང་བ་ནི། །ལངྈ་ལ་སོགས་ཧེ་རུ་གསུམ་དུ་སྣང་། །སྐུ་གསུང་ཐུགས་ལས་མ་གཡོས་ལྷན་ནེར་བསྒོམ། །འབར་བའི་རལ་པ་རྨད་དུ་བྱུང་བ་ནི། །དབྱིངས་ལས་མ་གཡོས་ཆོས་སྐུ་འབར་བ་ལས། །ཁྲོ་བོ་མུན་ཛའི་ཅོད་པན་བྱེ་བ་འབུམ། །སྤྲུལ་སྐུའི་འགྲོ་དོན་སྒྲོལ་བར་ལྷན་ནེར་བསྒོམ། །འབར་བའི་སྤྱན་ལྔ་རྨད་དུ་བྱུང་བ་ནི། །དབང་པོ་ཡུལ་དང་གཉིས་མེད་སྦྱོར་བ་ཡིན། །ཡིན་དང་མ་ཡིན་རྣམ་པའི་བྱེ་བྲག་རྣམས། །ཅིག་ཆར་བཅད་ནས་དབྱིངས་སུ་ལྷན་ནེར་བསྒོམ། །འབར་བའི་ཤངས་ལྔ་རྨད་དུ་བྱུང་བ་ནི། །དབང་པོ་ཡུལ་དང་གཉིས་མེད་སྦྱོར་བ་ཡིན། །བསྲུང་བ་ཆོས་ཀྱི་བྱེ་བྲག་སོ་སོ་ཡང་། །ཚོར་བ་ཉམས་སུ་མྱོང་ཤིང་ཚིམས་གྱུར་ནས། །སྐྱེ་འགག་མེད་པའི་ངང་ལ་ལྷན་ནེར་བསྒོམ། །འབར་བའི་སྙན་ལྔ་རྨད་དུ་བྱུང་བ་ནི། །གསན་པ་མ་འགགས་སྒྲ་མཐའ་སོ་སོ་ཡང་། །དེ་ཉིད་སྒྲ་མཐར་སྟོང་པས་ཆོས་ཀྱི་སྐུ། །མེད་པ་ཟད་མི་ཤེས་པ་ལྷན་ནེར་བསྒོམ། །འབར་བའི་ཞལ་ལྔ་རྨད་དུ་བྱུང་བ་ནི། །ཧོམ་ལྔར་འདྲེལ་བས་རྒྱུད་ལྔ་བསྲེག་པའི་ཕྱིར། །སྤྲུལ་པའི་འཕྲོ་འདུ་ཉིད་དུ་སྣང་མོད་ཀྱི། །གར་ཡང་མ་འཕྲོས་དབྱིངས་སུ་ལྷན་ནེར་བསྒོམ། །འབར་བའི་ལྗགས་ལྔ་རྨད་དུ་བྱུང་བ་ནི། །བདེན་པའི་དོན་སྟོན་གསུང་རབ་མང་པོ་འཆད། །སྡེ་སྣོད་རྒྱུད་ལ་རྨོངས་པ་མི་མངའ་བའི། །ལེའུ་བརྒན་ཆགས་པས་འགྲོ་བ་སྒྲོལ་བར་བསྒོམ། །འབར་བའི་ཨག་ཚོམས་རྨད་དུ་བྱུང་བ་ནི། །ཆོས་སྐུ་མཚན་མ་མེད་པའི་ངོ་བོ་ལས། །གཟུགས་སྐུ་འཇའ་ཚོན་ལྔ་བུར་སྤྲུལ་པར་བསྒོམ། །འབར་བའི་ཚེམས་ལྔ་རྨད་དུ་བྱུང་བ་ནི། །འཁོར་བ་རྩད་གཅོད་ཡེ་ཤེས་ཆེན་པོ་ལྔས། །སྐྱེ་མེད་དོན་རྟོགས་དབྱིངས་སུ་གཞུག་པའི་ཕྱིར། །མ་གཡོས་ཆོས་ཀྱི་དབྱིངས་སུ་ལྷན་ནེར་བསྒོམ། །འབར་བའི་ཕྱག་མཚན་རྨད་དུ་བྱུང་བ་ནི། །རྡོ་རྗེ་ལྕགས་ཀྱུ་སྦྲུལ་གྱི་ཞགས་པ་དང་། །ཁྲོ་ཆེན་
སྙིང་འབྱིན་རྡོ་རྗེ་ཁ་ཊྭཱཾ་ག །ཐོད་རློན་ཁྲག་དང་རྡོ་རྗེ་ལུ་གུ་རྒྱུད། །རྡོ་རྗེ་ལྕགས་ཀྱུ་དང་ནི་རྔེའུ་ཆུང་འཛིན། །སྡིགས་མཛུབ་རྩེ་ལ་མེ་འབར་རྡོ་རྗེ་ཁ་ཊྭཱཾ་སྒྲོལ། །རྡོ་རྗེ་རྩེ་གཅིག་རྩེ་གསུམ་རྩེ་ལྔ་རྩེ་དགུ་འབར་བ་གསོར་ཞིང་བརྡེག །སོ་སོའི་ཕྱག་མཚན་དངོས་སུ་གསལ་བ་ཡང་། །སྣང་ཙམ་ཉིད་ན་རང་བཞིན་མེད་པས་ན། །སྟོང་པ་ཆེན་པོའི་ཐིག་ལེ་ས་ལེར་བསྒོམ། །འབར་བའི་སྐུ་རྒྱན་རྨད་དུ་བྱུང་བ་ནི། །རྡོ་རྗེ་རིན་ཆེན་ལས་བྱུང་གཤོག་པ་ཅན། །ཐོད་རློན་སྦྲུལ་དང་གླང་ཆེན་སྟག་ལ་སོགས། །རྔོམ་བརྗིད་ལྡན་པའི་ཆ་ལུགས་ཅིར་སྟོན་པ། །ནམ་མཁའ་ལྟ་བུའི་དབྱིངས་སུ་ལྷན་ནེར་བསྒོམ། །འབར་བའི་ཞབས་བརྒྱད་རྨད་དུ་བྱུང་བ་ནི། །ཕྱིན་ཅི་ལོག་གི་དངོས་པོ་འཇོམས་པས་ན། །མཚན་མ་སྣ་ཚོགས་མཚན་མ་མེད་བྱས་པས། །སོ་སོའི་ན་བཟའ་གོ་ཆ་ཅི་འདྲ་ཡང་། །ཡེ་ཤེས་དབྱིངས་ལ་སྦྱོར་བ་ཉིད་དུ་བསྒོམ། །འབར་བའི་གདན་ཁྲི་རྨད་དུ་བྱུང་བ་ནི། །གཞན་གྱི་དངོས་གྲུབ་བདག་གིར་བྱ་བ་དང་། །མཉམ་པ་ཆེན་པོའི་དོན་ལ་དགོད་པའི་ཕྱིར། །དབྱིངས་དང་ཡེ་ཤེས་གཉིས་སུ་སྦྱོར་བར་བསྒོམ། །འབར་བའི་གཞལ་ཡས་རྨད་དུ་བྱུང་བ་ནི། །སྣ་ཚོགས་མང་པོ་རྒྱན་དང་བཀྲམ་པ་ཡང་། །ནམ་མཁའི་མཐའ་དང་དབྱེར་མེད་སྟོང་པས་ན། །སྤྲོས་མེད་ཐིག་ལེ་བྱང་ཆུབ་སེམས་སུ་བསྒོམ། །དབང་ཆེན་བསྡུས་པའི་ཏན་ཏྲ་ལས། རྨད་བྱུང་བྱང་ཆུབ་སེམས་ཀྱི་ལེའུ་སྟེ་ལྔ་བཅུ་དགུ་པའོ།། །།ཚེ་ལ་དབང་ཐོབ་རིག་འཛིན་རྣལ་འབྱོར་གྱིས། །ཕྱི་རབས་རྣལ་འབྱོར་རྣམས་ལ་ཕན་གདགས་ཕྱིར། །དབང་ཆེན་བསྡུས་པའི་ཏན་ཏྲ་ལས། །ལྟ་བ་རྒྱ་མཚོའི་ལེའུ་འདི་གསུངས། །བདེན་པ་བཞི་ཡིས་ལམ་མཚོན་ཏེ། །ས་དང་ས་ཡི་རིམ་པ་བཞིན། །བགྲོད་ནས་ཕྱིན་པར་འདོད་པ་གང་། །ལྡོངས་པས་ནམ་མཁར་བསྙེགས་པ་ལྟར། །ཕྱིན་པའི་གནས་སུ་ཁྱབ་པ་ཡང་། །གནས་ལས་འཕོས་པ་མེད་པས་ན། །ལྟ་བ་རྒྱ་མཚོ་བཞིན་དུ་བལྟ་བར་བྱ། །རྟེན་ཅིང་འདྲེལ་བར་བཅས་པ་ཡིས། །ཕྱི་ནང་འབྲས་བུ་རྒྱུ་བཅས་ཀུན། །ལུགས་དང་ལུགས་ལས་བཟློག་པ་ལ། །ས་ཡི་རིམ་པར་འདོད་
པ་དག །སྨིག་རྒྱུ་བཞིན་དུ་ཆུར་དམིགས་ཏེ། །ཕྲད་པར་མ་གྱུར་ཕྱིན་མི་འགྱུར། །འོན་ཀྱང་མ་བགྲོད་སར་གཞག་པས། །ལྟ་བ་རྒྱ་མཚོ་བཞིན་དུ་བལྟ་བར་བྱ། །དམིགས་སུ་མེད་པས་དམིགས་བྱ་བས། །དེ་ཉིད་དམིགས་པ་ཆེན་པོ་སྟེ། །མཚན་མ་མིང་དུ་བཅས་པ་ཡང་། །མཚོན་པ་ཚུལ་དུ་བཅས་སོ་ཞེས། །ཐམས་ཅད་དམིགས་པའི་ཡུལ་འདས་པས། །བླ་མེད་གོ་འཕང་བགྲོད་པ་ཡང་། །མ་བགྲོད་ཕྱིན་པས་བླ་ན་མེད། །ལྟ་བ་རྒྱ་མཚོ་བཞིན་དུ་བལྟ། །དག་པའི་དོན་ཉིད་རང་གིས་རིག་རྟོགས་པས། །བྲན་དང་ཇོ་བོ་ལྟ་བུའི་ཚུལ་གྱིས་ཀྱང་། །སངས་རྒྱས་ས་ཡི་གོ་རིམ་བཙལ་བར་འདོད། །ཕྱི་ནང་དག་པའི་རྒྱུ་རྐྱེན་ཚོགས་པ་ཡིས། །མཐོ་རིས་ལྷ་ཡི་གནས་ཐོབ་གང་ཡིན་པ། །ལྟ་བ་འདི་ཡི་ལུང་དུ་ལྷན་ནེ་བ། །རྒྱ་མཚོ་བཞིན་དུ་གཡོས་པ་མེད་པར་བལྟ། །དེ་ཉིད་བཞི་དང་ལྡན་པར་བསྒོམ་པ་དང་། །གང་ལ་མི་རྟོག་ཅི་ལ་མི་ཆགས་ཏེ། །མེ་ལོང་བཞིན་དུ་རིག་པ་མངོན་སུམ་ཕུལ། །འབྲས་བུ་མ་ནོར་ལམ་དུ་ཚོལ་བ་ཡིས། །གོམས་པའི་མཐུ་མེད་འཕགས་ལམ་རིང་ན་ཡང་། །ལྟ་བ་རྒྱ་མཚོ་བཞིན་དུ་བལྟ་བར་བྱ། །བྱིན་རླབས་ཆེན་པོས་སངས་རྒྱས་ཁྱད་པར་ཅན། །ཐམས་ཅད་ལྷ་ཡིན་པས་ན་མངོན་སུམ་པས། །རིག་པ་དང་ནི་གོམས་པར་བཅས་པ་ཡིན། །ས་དང་ས་ཡི་རིམ་པར་བགྲོད་པ་ཡང་། །ཐེག་མཆོག་འདི་ཡི་ངང་ལ་ཡེ་གནས་པས། །ལྟ་བ་རྒྱ་མཚོ་བཞིན་དུ་ཟབ་མོར་བལྟ། །འབྱུང་དང་འབྱུང་འགྱུར་ཡབ་ཡུམ་ཡིན་པས་ན། །དུག་ལྔ་ཉིད་ཀྱང་ཡེ་ནས་སངས་རྒྱས་ལས། །སྡུག་བསྔལ་ཆུ་བོར་འབྱུང་བའི་འགྲོ་བ་རྣམས། །སྒྲོལ་དང་སྦྱོར་བའི་ཕྲིན་ལས་ཟབ་མོ་ཡིས། །ཞིང་བཅུ་གནས་སུ་སྒྲོལ་བའི་སངས་རྒྱས་ཀྱང་། །ལྟ་བ་འདི་ཡི་ངང་དུ་སངས་རྒྱས་པས། །ལྟ་བ་རྒྱ་མཚོ་བཞིན་དུ་ལྷུན་གྱིས་གནས། །སྣ་ཚོགས་ཀུན་ཏུ་བཟང་པོ་རྡོ་རྗེ་སེམས། །དེ་ཉིད་མ་སྐྱེས་པས་ནི་ཡུམ་གྱི་མཁའ། །སྣང་ལ་རང་བཞིན་མེད་པས་ཆོས་ཀྱི་དབྱིངས། །དེ་ཡང་དབྱེར་མེད་འབྲས་བུ་སྐུ་གསུང་
ཐུགས། །བཙལ་དང་བྲལ་བའི་ས་ལ་བགྲོད་པ་དང་། །ལྟ་བ་འདི་ཡི་ངང་ལ་རྒྱ་མཚོ་བཞིན། །རྒྱ་མཚོ་ཆེན་པོར་ཆུ་བོ་ཀུན་འབབ་ལྟར། །ཐེག་པའི་རྒྱལ་པོ་ཀུན་ཏུ་བཟང་པོ་འདི། །བདེ་མཆོག་ལྷུན་གྱིས་གྲུབ་པའི་མན་ངག་པས། །མིང་དང་མཚན་མའི་སྤྱོད་ཡུལ་མ་ཡིན་ཏེ། །དབྱེ་བ་མེད་པའི་ངང་དུ་རྫོགས་སངས་རྒྱས། །ལྟ་བ་རྒྱ་མཚོའི་གཏིང་ལྟར་ཡེ་ནས་དག །དེ་བས་ལྟ་བ་རྒྱ་མཚོ་བཞིན་དུ་བལྟ། །གྷུ་ཧྱ་ས་མ་ཡ་ཡི་ཐུགས་ཀ་ནས། །སྐལ་ལྡན་འགའ་ཡི་རྐྱེན་དུ་གསུངས་པ་འདི། །སྣོད་མེད་ཕལ་གྱི་སྤྱོད་ཡུལ་མ་ཡིན་པས། །ཆུ་སྲིན་དང་ནི་ནོར་བུ་རིན་ཆེན་ཚུལ། །རྒྱ་མཚོའི་གཏིང་གི་རྡོ་ལྟར་ཁར་དབྱུང་མིན། །རྨོངས་ཤིང་འཆལ་པས་གལ་ཏེ་ཁར་ཕྱུང་ན། །རང་རྒྱུད་ངན་སོང་གསུམ་དུ་ངེས་འཁྱམས་པས། །གདེང་དང་ལྡན་པའི་སྐྱེས་བུའི་ཐུགས་ལ་བརྣག །དབང་ཆེན་བསྡུས་པའི་ཏན་ཏྲ་ལས། ལྟ་བ་རྒྱ་མཚོའི་ལེའུ་སྟེ་དྲུག་ཅུ་པའོ།། །།ཚེ་ལ་དབང་ཐོབ་རིག་འཛིན་རྣལ་འབྱོར་གྱིས། །དབང་ཆེན་བསྡུས་པའི་ཏན་ཏྲ་ལས། །ཆོས་རྣམས་ཀུན་གྱི་གཞི་རྩ་ནི། །སེམས་དང་ཀུན་གཞིར་ལྡན་པའི་ཕྱིར། །གཏན་ལ་དབབ་པའི་ལེའུ་འདི་གསུངས། །དེ་ཡང་ཆོས་རྣམས་རྩ་བ་ཀུན་གཞི་ཉིད་ལ་འདུས། །ཀུན་གཞི་གནས་འགྱུར་ཡེ་ཤེས་ལྔར་སྣང་བ། །དེ་ལྟའི་དོན་ལ་མཉམ་པར་བཞག་པས་ན། །ཀུན་གཞི་གནས་འགྱུར་བ་ཡང་དེ་ཉིད་ཡིན། །ཡེ་ཤེས་ལྔ་ཉིད་དེ་ལ་ཚང་བས་ན། །ཡེ་ཤེས་ལྔ་པོ་གཅིག་ཏུ་འདུས་རིགས་བྱ། །སེམས་དང་ཀུན་གཞི་རྩ་བའི་དོན་རྟོགས་ན། །ཡེ་ནས་སངས་རྒྱས་པས་ན་བཅོས་མེད་པར། །དང་པོར་ས་ཉིད་ནོན་པ་མཁས་པས་གསུངས། །གནས་སྐབས་དེ་ན་བལྟ་མཐར་ཡོད་མེད་ཐུག །སེམས་ཀྱི་རང་བཞིན་ཇི་ལྟར་ཡོད་པ་དང་། །སེམས་ལ་མཚན་མ་ཡོད་མེད་རྟོགས་པར་བྱ། །སེམས་དེ་ཉིད་ལ་ལྟ་བས་ཇི་ལྟར་བལྟ་བར་བྱ། །སེམས་ཉིད་སྣང་བ་ཡིན་ནམ་མི་སྣང་བ། །སེམས་དེ་སངས་རྒྱས་ཡིན་ནམ་སངས་རྒྱས་མིན། །སེམས་ལས་གུད་ན་སངས་རྒྱས་ཡོད་དམ་མེད། །དེ་ཡང་ཅིར་བཞག་བལྟ་བས་ཟིན་བྱ་དགོས། །དེ་ལྟར་རྟོགས་ནས་གདེང་དུ་གྱུར་པ་ན། །འདུས་
བྱས་དགེ་རྩ་མི་དགག་ནུས་ཚད་བྱ། །འོན་ཀྱང་ཆོས་ཀུན་རང་བཞིན་སེམས་ལ་འདུས། །དེ་ལ་བསམ་ཞིང་བསྒོམ་མེད་ངང་ལ་བཞག་པ་ན། །ཅིར་སྣང་ཅི་སྲིད་མཚན་མེད་དབྱིངས་གཅིག་པས། །འདུ་འབྲལ་མེད་པའི་ཆོས་ཉིད་ཡེ་སངས་རྒྱས། །དོན་དེ་མ་བརྗོད་པ་ན་མ་བཙལ་ཡང་། །ལྷུན་གྲུབ་ས་དེ་ད་ལྟ་ཉིད་ནས་ནོན། །དེ་ལྟའི་དོན་རྟོགས་ཉམས་སུ་གསལ་ན་ཡང་། །ཆོས་ཀུན་སྒོ་དང་མི་འགལ་བསྟན་པའི་ཕྱིར། །ཏིང་འཛིན་གསུམ་ལྡན་གོལ་བའི་སྒོ་བཀག་ནས། །དྲོད་ཆེན་གསུམ་གྱིས་སངས་རྒྱས་དགོངས་པ་མྱོང་། །དེ་བས་ཏིང་འཛིན་རྣམ་པ་གསུམ་བསྒོམ་པས། །འབྲས་བུ་ཕ་རོལ་ཕྱིན་དྲུག་རང་བཞིན་རྫོགས། །རང་སེམས་ནམ་མཁའ་མ་གཡོས་ངང་ལ་གཞག །འོན་ཀྱང་དྲན་ཞིང་རྟོག་པ་ཅི་བྱུང་བས། །ཆོས་ཉིད་མ་གཡོས་རྟོགས་པས་མ་བཅད་པས། །ངང་གིས་མ་བཅོས་ཡོང་གིས་འོད་གསལ་ཞེས། །སྔ་རབས་མཁས་ལྡན་རྣམས་ཀྱིས་རབ་ཏུ་བསྔགས། །ཡིད་དང་སེམས་གསལ་བྱེད་ཉིད་ཏིང་འཛིན་ཏེ། །ཡོ་ག་གསུམ་དོན་གནས་སྐབས་དེ་ལ་གསལ། །དེ་ལྟ་བས་ན་སྙན་ཁུང་ཡང་བརྒྱུད་ནས། །སེམས་ཉིད་སངས་རྒྱས་དོན་དུ་ཤེས་པར་བྱ། །དེ་ལྟའི་དོན་སྟོན་སྐྱེས་བུ་ཡང་རབ་ལ། །ཅི་ལ་མི་བརྩེག་ཡོན་གྱི་རྣམ་གྲངས་དབུལ། །འོན་ཀྱང་བྱ་བཙལ་མེད་པའི་དོན་རྟོགས་ནས། །ཡེ་ནས་བདག་ཉིད་རྣམ་པར་དག་ཅེས་བྱ། །དེ་ན་འཛིན་ཆགས་བདེ་སྡུག་ཅི་བྱུང་ཡང་། །ཚོགས་གཉིས་དུས་གཅིག་རྫོགས་པར་དམ་བཅའོ། །རྣམ་པར་མི་རྟོག་ཏིང་འཛིན་མཚན་མ་རྣམ་པར་དག །ཆོས་ཉིད་མངོན་དུ་གྱུར་ན་ཆེ་ཡོན་རྒྱུན་མི་འཆད། །སྒྲིབ་པ་གཉིས་བྱང་ཚོགས་གཉིས་རྫོགས་པས་ན། །ཕྱི་ནང་བཞེད་དང་མཐུན་པར་ས་རྣམས་ནོན། །འདིར་ནི་བདེ་གཤེགས་དགོངས་སྤྱོད་ཟབ་མོ་ཡིན། །སེམས་དཔའ་ཕལ་གྱི་སྤྱོད་ཡུལ་མ་ཡིན་ནོ། །སངས་རྒྱས་རྣམས་ཀྱིས་མཉམ་པའི་དོན་རྟོགས་ཀྱང་། །འགྲོ་བ་སེམས་ཅན་རྣམས་ཀྱིས་མ་རྟོགས་པས། །གདོད་ནས་ཞེན་པའི་བག་ཆགས་སྦྱང་དཀའ་འོ། །ས་དང་ས་ཡི་འདོད་སྟོངས་ཁྱད་ཡོད་གསུངས། །མཉམ་པར་རྟོགས་དང་མ་རྟོགས་གཉིས་མེད་གསལ་དུས་ན། །
སངས་རྒྱས་ཆེ་ཡོན་ལྷུན་གྱིས་གྲུབ་ངེས་སོ། །སྟོང་དང་རང་བཞིན་མེད་ཅིང་མ་སྐྱེས་ཁྱད་པར་ནི། །ཡོད་མེད་རྟག་ཆད་བྱ་བཙལ་ལ་སོགས་པ། །ཐམས་ཅད་ལྷུན་གྱིས་གྲུབ་པར་ཡེ་གནས་པ། །རྒྱུ་དང་འབྲས་བུ་ཅིར་སྣང་ཅི་སྲིད་ཀྱང་། །བུཌྜྷ་ཉག་གཅིག་སྐུ་ཡི་རྒྱན་དུ་སྣང་། །དེ་ཉིད་མ་བཀག་དཀྱིལ་འཁོར་རྫོགས་པའི་ཚུལ། །གོང་འོག་ལ་སོགས་སྐྱོན་ཡོན་གཉིས་པོ་དག །རྟོགས་དང་མི་རྟོགས་རེ་རྩོལ་གནས་པ་ཡིས། །རྒྱུ་འབྲས་སོ་སོར་གསལ་བ་སྨྲ་ན་ཡང་། །བལྟ་སྤྱོད་མཉམ་པའི་དོན་དུ་ཤེས་བྱ་དགོས། །བལྟ་སྤྱོད་ཡེ་ནས་འདུ་འབྲལ་མེད་བཞིན་དུ། །མི་མཉམ་མཉམ་པའི་སྤྱོད་ཡུལ་ཅིར་སྣང་ཡང་། །ཕྱག་རྒྱའི་དཀྱིལ་འཁོར་མ་གཏོགས་གང་ཡང་མེད། །གནས་སྐབས་དེ་ན་ཐབས་ཤེས་ཚོགས་འདྲེལ་ཡང་། །དེ་ཙམ་ཉིད་ལ་དགོངས་པ་ཆོས་ཉིད་ཀུན། །དོན་དུ་ཡེ་ཤེས་ཆེན་པོའི་སེམས་ལ་འདུས། །སེམས་ནི་ཡེ་ནས་ངང་གིས་མ་བཅོས་པས། །ཏིང་ངེ་འཛིན་གྱི་དམིགས་པ་ཐམས་ཅད་བྲལ། །དེ་ལྟར་བྲལ་བའི་བྱང་ཆུབ་བདེ་ཆེན་ནི། །བགྲོད་པའི་ས་དང་ལྟ་བའི་གཟུགས་མེད་པས། །མཚན་མར་བཏགས་པའི་སྐྱོན་ཡོན་མ་ལུས་དག །ཐེག་རྒྱལ་ཡངས་རྩེས་ཐེ་ཚོམ་གེགས་བསལ་ཞིང་། །བླང་མེད་དངོས་གྲུབ་ཆེན་པོས་ལ་བཟླས་པ། །དེ་བས་དབུ་མའི་ལྟ་བ་ཆ་ཕྲ་བ། །ཐམས་ཅད་མ་ལུས་དབང་དུ་རབ་འདུས་ཏེ། །གཞན་ལས་དཔག་པའི་དོན་ནི་འདི་གསུངས་སོ། །མདོ་སྡེ་ལ་སོགས་ཕྱི་ནང་ཡུལ་དག་པས། །དག་པའི་མཚན་མ་ཙམ་དུ་གནས་པ་དང་། །རྣལ་འབྱོར་སྤྱོད་པས་ཆོས་རྣམས་སེམས་སུ་འདུས། །མཐའ་གཉིས་ངང་གིས་གསལ་ཞེས་སྨྲ་བ་ཡང་། །ཉམས་རྟོགས་ལྟ་བ་གུད་ན་ཡང་མེད་དོ། །གཞན་ན་ཡོད་པར་འདོད་པ་བག་ཆགས་སྐྱོན་ཡིན་ནོ། །དེ་བས་བསྒོམ་ཆོས་སོ་སོར་ཅིར་སྣང་ཡང་། །ལྟུང་བའི་སྤྱོད་ཡུལ་འཁྲུལ་པ་ཉིད་སྣང་ཡིན། །སངས་རྒྱས་སེམས་ཅན་སྒྱུ་མ་སྨིག་རྒྱུའི་ཚུལ། །ཡེ་ཤེས་སྐྱེ་འགགས་མེད་པས་ནམ་མཁའ་བཞིན། །དེ་ཡི་དུས་ན་འདས་ཏེ་མཐོང་བ་མེད། །དེ་ཡང་མི་སྣང་ཉིད་ན་སྐྱོན་ཡིན་པ། །འཁྲུལ་པ་ཡིན་པས་བཏུབ་པ་མ་ཡིན་ནོ། །མཐོང་དང་མ་མཐོང་
སྣང་ལ་རང་བཞིན་མེད། །དགོངས་སྤྱོད་ཟབ་མོའི་མན་ངག་ཐམས་ཅད་ནི། །རང་རིག་ཡེ་ཤེས་མངོན་སུམ་སྣང་དུས་ན། །དག་པའི་ཡེ་ཤེས་སངས་རྒྱས་མཐོང་ཞེས་བྱ། །དེ་ལྟར་ཡེ་ཤེས་སངས་རྒྱས་མཐོང་བའི་ཚེ། །བག་ཆགས་མེད་ཅིང་མཐོང་ཡུལ་འདས་པ་སྟེ། །བྱར་མེད་སྣང་མེད་མ་བཙལ་བཞག་པ་ཡིན། །དམིགས་པའི་ཡུལ་མེད་ཆོས་ལམ་བག་ཆགས་སྤང་། །མཐོང་ཚོར་བདེ་བའི་ལམ་ཉིད་མུ་མེད་གདལ་བའི་དབྱིངས། །འགྲེའུ་ལོག་སྤྱིའུ་ཚུགས་ཡེ་ཤེས་དབྱིངས་མི་གཡོ། །དེ་ཡང་གཏན་ཚིགས་མདོ་སྡེ་ཟབ་མོའི་ནང་། །དེ་ལྟའི་དོན་ལ་སངས་རྒྱས་སྤྱོད་མི་མཛད། །ཆོས་རྣམས་ཐམས་ཅད་རིག་པའི་ཡེ་ཤེས་སྣང་། །དེས་འདྲེལ་ཕན་ཆད་གདོད་ནས་མ་སྐྱེས་ཏེ། །རྒྱུ་དང་འབྲས་བུར་བཏགས་པ་ཡང་ཡེ་མེད། །འདི་ལྟར་རིག་ན་སྐྱེ་འགག་གཉིས་མེད་ལྷུན་གྱིས་གྲུབ། །དོན་ལ་མཉམ་པར་བཞག་པའི་སྐྱོན་ཆེན་ནི། །ལུང་དང་འགལ་ཞིང་དོན་དང་འཕྲད་མི་འགྱུར། །དོན་ལ་ངེས་བློ་ཁྱབ་པར་བཏང་བ་ནི། །མི་འགལ་ཡེ་ཤེས་རང་བཞིན་དག་པ་སྟེ། །རིག་པས་གསལ་ནས་ཐམས་ཅད་གཉིས་སུ་མེད། །བྱང་ཆུབ་སྙིང་པོར་རྒྱུ་འབྲས་ལྷུན་གྲུབ་བོ། །དེ་ཡི་དུས་ན་དྲོད་གསུམ་མན་ངག་རྫོགས། །སྣང་དང་མི་སྣང་རྟག་ཆད་ལ་སོགས་པ། །ཤེས་རབ་ཟབ་མོས་ངེས་པའི་གཏིང་བརྟོལ་ཏེ། །ཕྱི་ནང་ཐེ་ཚོམ་བལྟ་བའི་ཕུགས་གཏིབ་པོ། །འདི་ཡི་དོན་ལ་གསང་ཐུབ་སྲན་ཆེ་ཞིང་། །ཚིག་དང་དོན་དུ་འདྲེལ་བས་ཐག་ཆོད་ན། །རིག་འཛིན་རྡོ་རྗེ་གཡུང་དྲུང་ལྷུན་གྱིས་འགྲུབ། །དབང་ཕྱུག་ཡིན་པས་དེ་ལ་ཀུན་ཕྱག་འཚལ། །གཡོ་སྒྱུ་མེད་པས་གཙུག་གི་ནོར་བུ་བཞིན། །དབང་ཆེན་བསྡུས་པའི་ཏན་ཏྲ་ལས། ཀུན་གཞི་གཏན་ལ་དབབ་པའི་ལེའུ་སྟེ་རེ་གཅིག་པའོ།། །།ཚེ་ལ་དབང་ཐོབ་རིག་འཛིན་རྣལ་འབྱོར་གྱིས། །ཕྱི་རབས་རྣལ་འབྱོར་རྣམས་ཀྱི་དོན་ཆེད་དུ། །དབང་ཆེན་བསྡུས་པའི་ཏན་ཏྲ་ལས། །སྦྱིན་སྲེག་མཆོད་སྦྱིན་གྱི་ལེའུ་འདི་གསུངས། །དང་པོར་ཕུན་སུམ་ཚོགས་ལྡན་ནས། །མཎྜལ་ཚད་དང་ལྡན་པ་ལ། །ཐིག་བཞི་གདབས་པས་ལེ་ཚེ་དགུ། །དབུས་སུ་གྲུ་གསུམ་འབར་བའོ། །སྒོ་ཡི་ཚད་ནི་ཁྲུ་གང་ལ། །འཕང་དུ་ཁ་ཁྱེར་མཁྱུད་གང་ངོ་། །ཁ་དོག་མཛེས་པའི་ཚོན་རྩི་ལྔ། །ལེ་ཚེ་བརྒྱད་ལ་རིམ་པ་བཞིན། །དབུས་སུ་མཐིང་ནག་ཡིག་
འབྲུར་བཅས། །རྒྱན་དང་གདགས་པ་ལ་སོགས་པ། །མཚན་དང་ལྡན་པའི་ཡམ་ཤིང་དང་། །དཔལ་དང་ལྡན་པའི་བྷནྡ་རྣམས། །ཧེ་ཡི་དབུས་སུ་བརྫངས་ལ་གདབ། །དཔལ་དང་མ་མོ་མཆོད་པའི་རྫས། །བྱང་ཆུབ་སེམས་དང་རྡོ་རྗེ་ཆུ། །ཟིལ་དང་རཀྟ་ཤ་ལ་སོགས། །རིམ་བཞིན་དགྲམ་པའི་ས་ཕྱོགས་ནི། །དབུས་སུ་བྱང་ཆུབ་སེམས་ཆེན་པོ། །ཤར་གྱི་གླིང་ལ་རྡོ་རྗེ་ཆུ། །ཟིལ་མངར་རཀྟ་ལྷོ་ཡི་ཕྱོགས། །ཤ་ནི་ནུབ་ཀྱི་ཕྱོགས་སུ་དབུལ། །དྲི་ལ་སོགས་པ་བྱང་དུ་དགོད། །ཤ་ཁྲག་གཏོར་མ་ལ་སོགས་ཀུན། །འབར་བའི་དཀྱིལ་འཁོར་ཐོག་ཐག་ཏུ། །ཕོ་ཉའི་རིམ་པ་བཞིན་དུ་དགོད། །སྐད་ཅིག་མ་ཡི་ཏིང་འཛིན་གྱིས། །འཛབ་ལ་སོགས་པ་མ་རྫོགས་ཚེ། །བཅུ་གཅིག་ཕྲིན་ལས་གཞུང་བཞིན་འབད། །བསྙེན་པ་ཉི་ཁྲི་རྫོགས་པ་དང་། །དཔལ་དང་མ་མོ་མཆོད་པའི་ཕྱིར། །སྦྱིན་སྲེག་གཞུང་བཞིན་བརྩོན་པར་འབད། །གར་གྱི་དབང་ཕྱུག་ཆེན་པོ་ལ། །བྱང་ཆུབ་སེམས་ཀྱི་མཆོད་པ་ཡིས། །མཆོད་སྦྱིན་བསྲེག་པའི་ལས་བྱའོ། །རྡོ་རྗེ་ཆུ་ན་གཟི་ལྡན་ལའོ། །ཟིལ་མངར་ལྷོ་ཡི་ཕྱོགས་སུ་སྟེ། །ཤ་ཆེན་ནུབ་ཀྱི་ཕྱོགས་སུ་དབུལ། །དྲི་ལ་སོགས་པ་བྱང་དུ་དབུལ། །ཡུམ་བཞི་ལ་ཡང་དེ་བཞིན་ཏེ། །མཆོད་སྦྱིན་བསྲེག་པའི་ལས་བྱའོ། །ཤ་ཁྲག་གཏོར་མ་ལ་སོགས་པ། །ཕོ་ཉ་རྣམས་ལ་མཆོད་པའི་ཕྱིར། །མཆོད་སྦྱིན་བསྲེག་པའི་ལས་བྱའོ། །བསྙེན་པ་ཆོས་ཀྱི་དབྱིངས་ནས་དྲངས། །བསྒྲུབ་པ་གཉིས་མེད་མཉམ་པར་བཞག །སྐབས་སུ་ལས་ནི་བཅུ་གཅིག་བརྩམ། །ཞག་གྲངས་སུ་ནི་གྲངས་པ་དང་། །དབང་བསྐུར་དཀྱིལ་འཁོར་ལུགས་བཞིན་དབྱུང་། །དེ་ནས་གཏོར་མ་ལ་སོགས་ཏེ། །ལྷག་མ་བསྐྱང་ཞིང་ཕོ་ཉ་བསྙེན། །ལས་ཀྱི་གོ་རིམ་མ་ནོར་བར། །མཆོད་སྦྱིན་བསྲེག་པའི་ལས་ལ་འབད། །དེ་ནས་རྫས་དང་ལག་ཆ་དང་། །དཀྱིལ་འཁོར་ལྷ་དང་བྱེ་བྲག་རྣམས། །རིམ་པ་བཞིན་དུ་མཐའ་ནས་སྤྲོ། །བསྙུལ་དང་དོན་བྱས་སླར་འདུས་ནས། །བདག་དང་བཅས་པ་རབ་ཏུ་ཞུ། །རིམ་པ་བཞིན་དུ་དབུས་སུ་བསྡིམ། །ཚོན་རྩི་དང་ནི་སོལ་བ་དང་། །གཞན་ཡང་ལྷག་མ་ཅི་ཡོད་རྣམས། །གྲུ་གསུམ་ཡུམ་གྱི་
མཁའ་ལ་བསྡིམ། །དེ་ནས་བཤགས་དང་སྦྱང་བ་དང་། །གླུ་བྲོ་ལ་སོགས་ལོངས་སྤྱོད་རྣམས། །མ་མོ་དང་ནི་མཁའ་འགྲོ་དང་། །ཕོ་ཉ་མ་མོ་བསྟེན་པའི་ཕྱིར། །ཆས་རབ་ལྡན་པས་འབད་ལ་བྱའོ། །དབང་ཆེན་བསྡུས་པའི་ཏན་ཏྲ་ལས། སྦྱིན་སྲེག་མཆོད་སྦྱིན་གྱི་ལེའུ་སྟེ་དྲུག་ཅུ་རེ་གཉིས་པའོ།། །།ཚེ་ལ་དབང་ཐོབ་རིག་འཛིན་རྣལ་འབྱོར་གྱིས། །དུས་གསུམ་སངས་རྒྱས་ཐམས་ཅད་མཉེས་པའི་ཕྱིར། །དབང་ཆེན་བསྡུས་པའི་ཏན་ཏྲ་ལས། །རྡོ་རྗེ་གླུ་ཡི་ལེའུ་འདི་གསུངས། །ཆོ་ག་གསུམ་དང་ཏིང་འཛིན་བཅས་པ་ཡིས། །བདག་ཉིད་ཕྱག་རྒྱ་ཆེན་པོའི་ང་རྒྱལ་བསྐྱེད། །རྡོ་རྗེ་གསང་བའི་གླུ་འདི་བླང་། །ཨཱོཾ།གཙུག་ཏུ་འཁོར་ལོ་རྩིབས་བརྒྱད་འབར། །ཆོ་ག་གསུམ་ལྡན་སྣང་མཛད་ཆེ། །ཡུམ་དང་གཉིས་མེད་སྦྱོར་བ་ལས། །འཁོར་ལོ་སྙིང་གི་དབུས་སུ་བསྒོམ། །དེ་ལ་རང་བཞིན་མེད་པར་དམིགས། །ཧཱུཾ། དཔྲལ་བར་རྡོ་རྗེ་རྩེ་ལྔ་འབར། །ཆོ་ག་གསུམ་ལྡན་རྡོ་རྗེ་སེམས། །ཡབ་ཡུམ་གཉིས་མེད་སྦྱོར་བ་ལས། །རྡོ་རྗེ་སྙིང་གི་དབུས་སུ་བསྒོམ། །དེ་ལ་རང་བཞིན་མེད་པར་དམིགས། །སྭཱ་ལས་རིན་ཆེན་ཟུར་དྲུག་འབར། །ཆོ་ག་གསུམ་ལྡན་འབྱུང་ལྡན་ཆེ། །ཡབ་ཡུམ་གཉིས་མེད་སྦྱོར་བ་ལས། །རིན་ཆེན་སྙིང་གི་དབུས་སུ་བསྒོམ། །དེ་ལ་རང་བཞིན་མེད་པར་དམིགས། །ཨཱ་ལས་པདྨ་འདབ་བརྒྱད་དམར། །ཆོ་ག་གསུམ་ལྡན་སྣང་མཐའ་ཡས། །ཡབ་ཡུམ་གཉིས་མེད་སྦྱོར་བ་ལས། །པདྨ་སྙིང་གི་དབུས་སུ་བསྒོམ། །དེ་ལ་རང་བཞིན་མེད་པར་དམིགས། །ཧཱ་ལས་རྡོ་རྗེ་རྒྱ་གྲམ་དང་། །ཆོ་ག་གསུམ་ལྡན་དོན་ཡོད་གྲུབ། །ཡབ་ཡུམ་གཉིས་མེད་སྦྱོར་བ་ལས། །རྒྱ་གྲམ་སྙིང་གི་དབུས་སུ་བསྒོམ། །དེ་ལ་རང་བཞིན་མེད་པར་དམིགས། །སྐུ་གསུང་ཐུགས་ཡོན་ཕྲིན་ལས་ལྔ། །རིགས་ལྔ་དཔལ་གྱི་གླུ་བླངས་ལ། །གསང་བ་ཡུམ་གྱི་བྲོ་བརྡུངས་ཤིང་། །དཔའ་བོ་འབྲུ་ལྔས་དབང་བསྐུར་བས། །ཐམས་ཅད་མ་ལུས་ཕྱག་རྒྱའི་སྐུ། །ལུས་པ་མེད་པ་ཆོས་ཀྱི་དབྱིངས། །ཧྲཱྀཿརྟ་མགྲིན་གཙུག་ན་ནོར་བུ་འབར། །ཆོ་ག་གསུམ་ལྡན་ཧ་ཡ་གྷྲཱི། །ཡབ་ཡུམ་གཉིས་མེད་སྦྱོར་བ་ལས། །
ནོར་བུ་སྙིང་གི་དབུས་སུ་བསྒོམ། །དེ་ལ་རང་བཞིན་མེད་པར་གསལ། །ཧཱུཾ། གཡས་པ་བརྒྱད་ན་ལྕགས་ཀྱུ་འབར། །ཆོ་ག་གསུམ་ལྡན་ཕྲ་མེན་མ། །གཙོ་བོ་གཉིས་མེད་སྦྱོར་བ་ལས། །ལྕགས་ཀྱུ་སྙིང་གི་དབུས་སུ་བསྒོམ། །དེ་ལ་རང་བཞིན་མེད་པར་དམིགས། །གཡོན་པ་བརྒྱད་ན་མཚོན་ཆ་འབར། །ཆོ་ག་གསུམ་ལྡན་བཛྲ་སྟེ། །གཙོ་བོ་གཉིས་མེད་སྦྱོར་བ་ལས། །མཚོན་ཆ་སྙིང་གི་དབུས་སུ་བསྒོམ། །དེ་ལ་རང་བཞིན་མེད་པར་དམིགས། །མླཱ། ཞབས་བརྒྱད་འབར་བའི་ཆོས་བརྒྱད་འབར། །ཆོ་ག་གསུམ་ལྡན་ཡུམ་གྱི་མཁའ། །གཙོ་དང་གཉིས་མེད་འཁྲིལ་པ་ལས། །ཆས་བརྒྱད་སྙིང་གི་དབུས་སུ་བསྒོམ། །དེ་ལ་རང་བཞིན་མེད་པར་དམིགས། །ཕཊ། སྐུ་གསུང་ཐུགས་ལས་རྣམ་སྤྲུལ་པའི། །སྒོ་སྐྱོང་ཁྲོ་བོ་མགོ་དགུ་བརྩེགས། །ཁམ་རྒྱ་མ་དང་ལོང་བའི་ཚོགས། །དམུས་ལོང་དང་ནི་ཁྱི་སྤྱང་རྣམས། །དབང་ཆེན་སྐུ་ལ་རབ་ཏུ་འབར། །ཆོ་ག་གསུམ་ལྡན་སྤྲུལ་པའི་ཚོགས། །ཡབ་ཡུམ་གཉིས་མེད་སྦྱོར་བ་ལས། །འཁོར་རྣམས་སྙིང་གི་དབུས་སུ་བསྒོམ། །དེ་ལ་རང་བཞིན་མེད་པར་དམིགས། །འདི་ནི་ཡེ་ཤེས་རྒྱན་གྱི་གླུ། །རྒྱན་ཉིད་ཡེ་ཤེས་གླུ་བླངས་པས། །སྐད་ཅིག་མ་ཡི་ཏིང་འཛིན་གྱིས། །བདག་ཉིད་ཕྱག་རྒྱ་རྟགས་མཆོག་འབར། །ཨཱོཾ། འཁོར་ལོ་ཡེ་ཤེས་ཅན་རྣམས་ཀྱིས། །འཁོར་ལོ་རྡོ་རྗེ་བསྒོམ་བྱས་ན། །དེ་ཉིད་ཆོས་སྐུ་ནམ་མཁའ་ཆེ་ཧོ། །ཧཱུཾ། ཡེ་ཤེས་རྡོ་རྗེ་ཅན་རྣམས་ནི། །རྡོ་རྗེ་རྡོ་རྗེ་བསྒོམ་བྱས་ན། །དེ་ཉིད་ཆོས་དབྱིངས་ངང་ལ་རྫོགས་ཧོ། །རིན་ཆེན་ཡེ་ཤེས་ཅན་རྣམས་ནི། །རིན་ཆེན་རྡོ་རྗེ་བསྒོམ་བྱས་ནས། །དེ་ཉིད་ལོངས་སྤྱོད་ལྷུན་གྱིས་གྲུབ་ཧོ། །པདྨ་ཡེ་ཤེས་ཅན་རྣམས་ནི། །པདྨ་རྡོ་རྗེར་བསྒོམ་བྱས་ན། །དེ་ཉིད་བརྟན་པར་འགྱུར་བ་མེད་ཧོ། །རྒྱ་གྲམ་རྡོ་རྗེ་ཅན་རྣམས་ནི། །རྒྱ་གྲམ་རྡོ་རྗེ་བསྒོམ་བྱས་ནས། །དེ་ཉིད་སྤྲུལ་སྐུ་ངོ་མཚར་ཆེ་ཧོ། །རྒྱན་ཉིད་ཡེ་ཤེས་གླུ་བླངས་པས། །བསྐུལ་དང་དོན་བྱས་འདུས་པ་དང་། །ཐམས་ཅད་སྐུ་སྟེ་དངོས་མེད་སྐུ། །སྟོང་པ་ཆེན་པོའི་ངང་ལ་བཞག་ཧོ། །དབང་ཆེན་བསྡུས་པའི་ཏན་ཏྲ་ལས། རྡོ་རྗེ་གསང་བའི་གླུའི་ལེའུ་སྟེ་དྲུག་ཅུ་རྩ་གསུམ་པའོ།། །།ཚེ་ལ་དབང་ཐོབ་རིག་འཛིན་རྣལ་འབྱོར་གྱིས། །འཇིག་
རྟེན་ཡོངས་སྒྲོལ་མཛད་པའི་ཚེ། །དབང་ཆེན་བསྡུས་པའི་ཏན་ཏྲ་ལས། །ཟིལ་ནོན་དྲག་པོའི་ལེའུ་འདི་གསུངས། །ཨཱོཾ་ནཱ་ཤ་ཡ་སྟམྦྷ་ཡ། ནཱ་ཤ་སྟམྦྷ་ཡ། སུམ་བྷ་ནི་སུམ་བྷ་ཧཱུཾ། གྲྀ་ཧྞ་གྲི་ཧྞ་ཧཱུཾ། གྲྀ་ཧྞཱ་པ་ཡ་ཧཱུཾ། གྲྀ་ཧྞཱ་པ་ཡ་ཧཱུཾ། ཨཱ་ན་ཡ་ཧོ་བྷ་ག་བཱན། བིདྱཱ་རཱ་ཛ་ནན་ནན། སྐད་ཅིག་མ་ཡི་ཏིང་འཛིན་གྱིས། །འབར་བ་ཆེན་པོར་བདག་བསྐྱེད་ལ། །དབུ་ལྔ་བཅུ་དྲུག་ཕྱག་རྒྱ་ལྡན། །ཏིང་འཛིན་བརྒྱད་ཀྱིས་བྱིན་བརླབས་པས། །དམར་པོ་ཞབས་བརྒྱད་ལྡན་པ་ཡིས། །བག་ཆགས་མི་ལྡན་གནན་པའི་ཕྱིར། །ཚམ་རྔམས་ཆེན་པོས་འདི་སྐད་དོ། །མཚུངས་མེད་ཆེ་བའི་ཁྱད་པར་རབ་སྟོན་ཅིང་། །ང་རྒྱལ་མཐུ་བསྙེངས་བདུད་ཀྱི་དཔུང་བཅོམ་ནས། །འཇིག་རྟེན་འདས་པའི་དེ་བ་བརྒྱད། །ཆེ་བའི་རྟགས་དང་ལྡན་པས་དབང་ཕྱུག་ཡང་ཆེན་གནོན། །ཞབས་བརྒྱད་ཏིང་འཛིན་བརྒྱད་ཀྱི་ཆས་དང་ལྡན། །བཀའ་དང་དམ་ཚིག་གནས་པར་བྱ་བའི་ཕྱིར། །སྙིང་གར་མཁྲིག་མ་ནུབ་ཅིང་སྒལ་ཚིགས་འཇོམས། །ཉོན་མོངས་ཉམ་ཐག་འབོད་སྒྲོག་དིར་རི་རི། །ཞེས་བརྗོད་ལ། གདུལ་བྱའི་ཞབས་གཅིག་ཤར་དུ་བགྲད་པས། དཔའ་བོ་སྟག་གི་ཆས་དང་ལྡན་པས། ཧཱུཾ་ཀ་ར་ལ་བོལ་ནུབ་པར་གཟིར་བས། ཚམ་རྔམས་ཆེན་པོས་ཉམ་ང་བར་བྱའོ། །གདུལ་བྱའི་ཞབས་གཅིག་ཤར་ལྷོ་མཚམས་སུ་བགྲད་པས། རྣོ་གདུག་ཟློག་བྱེད་རྒྱ་བྱེའུ་ཆས་དང་ལྡན་པས། ཨཱརྱ་ཨ་ཙ་ལ་བོལ་ནུབ་པར་གཟིར་བས་ཚམ་རྔམས་ཆེན་པོས་ཉམ་ང་བར་བྱའོ། །གདུལ་བྱའི་ཞབས་གཅིག་ལྷོ་ཕྱོགས་སུ་བགྲད་པས། ཤེས་རབ་ཏིང་འཛིན་རྡོ་རྗེ་འཆོལ་བའི་ཆས་དང་ལྡན་པས་ཡ་མན་ཏ་ཀ་ལ་བོལ་ནུབ་པར་གཟིར་བས་ཚམ་རྔམས་ཆེན་པོས་ལྡན་པར་བྱའོ། །གདུལ་བྱའི་ཞབས་གཅིག་ལྷོ་ནུབ་ཏུ་བགྲད་པས། དབང་གི་བསེ་ཁྲབ་ཆས་དང་ལྡན་པས། ནཱི་ལ་དཎྜ་ལ་བོལ་ནུབ་པར་གཟིར་བས། ཚམ་རྔམས་ཆེན་པོས་ཉམས་པར་བྱའོ། །གདུལ་བྱའི་ཞབས་གཅིག་ནུབ་ཏུ་བགྲད་པས། དཔའ་བརྗིད་མཉེན་ལྕུག་སྦྲུལ་ནག་འཁྱིལ་པའི་ཆས་དང་ལྡན་པས། པདྨ་ཀུཎྜ་ལི་ལ་བོལ་ནུབ་པར་གཟིར་བས། ཚམ་རྔམས་ཆེན་པོས་ཉམ་ང་བར་བྱས་སོ། །གདུལ་བྱའི་ཞབས་གཅིག་ནུབ་བྱང་དུ་བགྲད་
པས། དམར་གསལ་མཆེ་བའི་རྫས་དང་ལྡན་པས། ཏ་ཀི་རཱ་ཛ་ལ་བོལ་ནུབ་པར་གཟིར་བས། ཚམ་རྔམས་ཆེན་པོས་ཉམ་ང་བར་བྱའོ། །གདུལ་བྱའི་ཞབས་གཅིག་བྱང་ཕྱོགས་སུ་བགྲད་པས། ཤུ་ཀེན་ཆུ་རིས་དར་གྱི་ཆས་དང་ལྡན་པས། ཨ་མྲྀ་ཏ་ཀུཎྜ་ལི་ལ་བོལ་ནུབ་པར་གཟིར་བས།ཚམ་རྔམས་ཆེན་པོས་ཉམ་ང་བར་བྱའོ། །གདུལ་བྱའི་ཞབས་གཅིག་བྱང་ཤར་མཚམས་སུ་བགྲད་པས། གཅན་གཟན་གཟིག་གི་ཆས་དང་ལྡན་པས། མ་ཧཱ་བ་ལ་ལ་བོལ་ནུབ་པར་གཟིར་བས། །ཚམ་རྔམས་ཆེན་པོས་ཉམ་ང་བར་བྱས་ཏེ།འདི་སྐད་ཅེས་བརྗོད་དོ། །ཧཱུཾ་ཀཱ་ར་པྲ་བེ་ཤ་ཡ་ཕཊ་ནན། ཨཱརྱ་ཨ་ཙ་ལ་པྲ་བེ་ཤ་ཡ་ཕཊ་ནན། ཡ་མཱནྟ་ཀ་པྲ་བེ་ཤ་ཡ་ཕཊ་ནན། ནི་ལ་དཎྜ་པྲ་བེ་ཤ་ལ་ཕཊ་ནན། པདྨ་ཀུཎྜ་ལི་པྲ་བེ་ཤ་ཡ་ཕཊ་ནན། ཏ་ཀི་རཱ་ཛ་པྲ་བེ་ཤ་ཡ་ཕཊ་ནན། ཨ་མྲྀ་ཏ་ཀུཎྜ་ལི་པྲ་བེ་ཤ་ཡ་ཕཊ་ནན། མ་ཧཱ་བ་ལ་པྲ་བེ་ཤ་ཡ་ཕཊ་ནན། དེ་ལྟར་གནོན་ཅིང་གཟིར་བ་ཡང་། །དོན་དུ་དབྱིངས་དང་ཡེ་ཤེས་ལ། །རྟགས་ནི་ཐབས་དང་ཤེས་རབ་བོ། །ཕྱག་རྒྱ་ཆེན་པོའི་སྐུར་བསྒོམས་ནས། །ཟིལ་གནོན་དྲག་པོའི་ལས་བྱས་པས། །སྡུག་བསྔལ་ཆུ་བོ་རྒྱུན་བསྐམས་ཏེ། །སྔོན་གྱི་རྒྱལ་བ་རྣམས་ཀྱི་བཀའ། །ཞི་བས་ཐམས་ཅད་ཚིམ་པར་མཛོད། །རྒྱས་པས་མ་ལུས་མངོན་སངས་རྒྱས། །དབང་གིས་དབང་དུ་མ་འདུས་མེད། །མངོན་སྤྱོད་བྱིན་གྱིས་བརླབ་པ་ནི། །ཐབས་ལ་མཁས་པའི་མཛད་སྤྱོད་ཀྱིས། །བསད་ཅིང་མནན་པ་མ་ལུས་ཀུན། །ཕྲ་མོའི་སྐུར་བསྐྱེད་བསྐུལ་དོན་བྱས། །སླར་འདུས་ཆོས་ཀྱི་དབྱིངས་སུ་ཐིམ། །དམིགས་པ་མེད་པའི་ཆོས་སྐུར་བསྒོམ། །དབང་ཆེན་བསྡུས་པའི་ཏན་ཏྲ་ལས། ཟིལ་གནོན་དྲག་པོའི་ལེའུ་སྟེ་དྲུག་ཅུ་རྩ་བཞི་པའོ།། །། རྫོགས་སོ།། །།དཔལ་གྱི་མགུར་ནས་གསུངས་པའི་དབང་ཆེན་ཏན་ཏྲ་འདི། །ཕྱི་རབས་རྣལ་འབྱོར་འགའ་ཡི་སྤྱོད་ཡུལ་མ་གཏོགས་པ། །མིང་ཙམ་རྣལ་འབྱོར་ཀུན་གྱི་ཐུན་མོང་མིན། །ཡོན་ཏན་གཏན་དུ་ནུབ་པར་མི་བྱའི་ཕྱིར། །ཡང་དབང་གཏེར་དུ་སྦས་ཤིང་འགའ་དང་འགའ་ལ་བརྒྱུད། །པདྨ་དབང་ཆེན་ལ་སྤྱིར་ལེའུ་བདུན་ཅུ་བཞུགས་པ་ལས། འདི་ལ་ལེའུ་དྲུག་ཅུ་རྩ་བཞི་ལས་མི་གསུངས་ཏེ་ལེའུ་དྲུག་ཙམ་མ་འདུས་སོ།།