དེ་བཞིན་གཤེགས་པ་ཐམས་ཅད་ཀྱི་དགོངས་པ་ལུང་བསྟན་པ། རྣལ་འབྱོར་ཆེན་པོའི་གསང་བ་རྣམ་པར་ཕྱེ་བ་རྣལ་འབྱོར་སྤྱོད་པའི་ས། དཔལ་རྡོ་རྗེ་ཕྲེང་བའི་མངོན་པར་བརྗོད་པ། རྟ་མཆོག་རོལ་པའི་ལུང་རྒྱུད་ཐམས་ཅད་ཀྱི་སྙིང་པོ། དབང་ཆེན་འདུས་པའི་རྒྱུད་ཅེས་བྱ་བ།
རྒྱ་གར་སྐད་དུ། སརྦ་ཏ་ཐཱ་ག་ཏཱ་ཤ་ཡ་བྱཱ་ཀ་ར་ཎ། མ་ཧཱ་ཡོ་ག་གུ་ཧྱ་སཾ་བྷོད། ཡོ་ག་ཙ་རྱ་བྷུ་མི་ཤྲཱི་བཛྲ་མཱ་ལ་ཨ་བྷི་དྷཱ་ན་པྲ་ཧ་ཡ་ལ་ལི་ཏ་ཨཱ་ག་མ་ཏནྟྲ་སརྦ་ཧྲྀ་ད་ཡ་མ་ཧེ་ཤ་ས་མུ་དཱ་ཡ་ཏནྟྲ་ནཱ་མ། བོད་སྐད་དུ། དེ་བཞིན་གཤེགས་པ་ཐམས་ཅད་ཀྱི་དགོངས་པ་ལུང་བསྟན་པ། རྣལ་འབྱོར་ཆེན་པོའི་གསང་བ་རྣམ་པར་ཕྱེ་བ་རྣལ་འབྱོར་སྤྱོད་པའི་ས། དཔལ་རྡོ་རྗེ་ཕྲེང་བའི་མངོན་པར་བརྗོད་པ། རྟ་མཆོག་རོལ་པའི་ལུང་རྒྱུད་ཐམས་ཅད་ཀྱི་སྙིང་པོ། དབང་ཆེན་འདུས་པའི་རྒྱུད་ཅེས་བྱ་བ། ལྷུན་གྱིས་གྲུབ་པའི་སངས་རྒྱས་རྣམས་ལ་ཕྱག་འཚལ་ལོ། །འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེའི་བདག་ཉིད། རྡོ་རྗེ་བཙུན་མོའི་བྷ་ག་ལ་བཞུགས་སོ། །དེ་ཉིད་ཀྱི་ཁྱད་པར་ལས་རྣམ་པར་མི་རྟོག་པའི་ཡེ་ཤེས་ཀྱི་དེ་ཁོ་ན་ཉིད་ལ་ཕྱོགས་པ་ནི། དེ་བཞིན་གཤེགས་པ་རྡོ་རྗེ་རྟག་པ་དང་། དེ་བཞིན་གཤེགས་པ་རྡོ་རྗེ་ཞེ་སྡང་དང་། དེ་བཞིན་གཤེགས་པ་རྡོ་རྗེ་ཡེ་ཤེས་དང་། དེ་བཞིན་གཤེགས་པ་རྡོ་རྗེ་ཆགས་པ་དང་། དེ་བཞིན་གཤེགས་པ་རྡོ་རྗེ་དམ་ཚིག་དང་བཅས་པ་དང་། གཞན་ཡང་རིགས་དང་འདྲེལ་བའི་བྱང་ཆུབ་སེམས་དཔའ་སེམས་དཔའ་ཆེན་པོར་གྱུར་པ་ནི། བྱང་ཆུབ་སེམས་དཔའ་ཆེན་པོ་རྡོ་རྗེ་སྙིང་པོ་དང་། བྱང་ཆུབ་སེམས་དཔའ་ཆེན་པོ་རྡོ་རྗེ་དམ་ཚིག་དང་། བྱང་ཆུབ་ཆེན་པོ་རྡོ་རྗེ་ཆོས་དང་། བྱང་ཆུབ་ཆེན་པོ་རྡོ་རྗེ་ཕྱག་དང་།བྱང་ཆུབ་ཆེན་པོ་རྡོ་རྗེ་བློ་གྲོས་དང་། བྱང་ཆུབ་ཆེན་པོ་རྡོ་རྗེ་དང་། བྱང་ཆུབ་ཆེན་པོ་རྡོ་རྗེ་ཀུན་ཏུ་དང་། བྱང་ཆུབ་ཆེན་པོ་རྡོ་རྗེ་རྒྱལ་པོ་དང་། བྱང་ཆུབ་ཆེན་པོ་རྡོ་རྗེ་ལོངས་སྤྱོད་དང་བཅས་པ་དང་། གཞན་ཡང་གདུག་པ་འདུལ་བ་ལ་ཕྱོགས་པ་ནི། གཤིན་རྗེ་མཐར་བྱེད་དང་། ཤེས་རབ་མཐར་བྱེད་དང་། ཆོས་མཐར་བྱེད་དང་། བགེགས་མཐར་བྱེད་དང་བཅས་པ་དང་། གཞན་ཡང་རྡོ་རྗེ་སྙིང་པོ་ལ་སོགས་པ་དང་། འདུས་པ་རྣམས་ལྷན་ཅིག་ཏུ་བཞུགས་པ་ནི། དཔེར་ན་ཏིལ་གྱི་གང་བུ་ཁ་བྱེ་བ་བཞིན་དུ་བཞུགས་སོ། །དབང་ཆེན་འདུས་པའི་ཏན་ཏྲ་ལས། གླེང་གཞིའི་ལེའུ་སྟེ་དང་པོའོ།། །།དེ་ནས་བཅོམ་ལྡན་འདས་ཀུན་ཏུ་བཟང་པོས།
ཆོས་ཐམས་ཅད་ཀྱི་དེ་ཁོ་ན་ཉིད་ཀྱི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ཡི་བྱིན་གྱིས་རླབས་ལས། བ་སྤུའི་བུ་ག་ནས་འོད་ཟེར་བརྒྱ་སྟོང་དུ་མ་འཕྲོས་པས་རྡོ་རྗེ་སྙིང་པོ་ལ་ཕོག་པར་གྱུར་ཏོ། །དེའི་ཚེ་རྡོ་རྗེ་སྙིང་པོ་སྟན་ལས་ལངས་ཏེ། བཅོམ་ལྡན་འདས་ལ་ལྷ་རྫས་ཀྱི་མཆོད་པ་མང་པོས་མཆོད་ནས། འདི་སྐད་ཅེས་བསྐུལ་ཏོ། །རྣམ་པར་རྟོག་བྲལ་གདོད་ནས་སྐྱེ་མེད་དབྱིངས། །མ་བཅོས་མཐའ་ཡས་ཡེ་ཤེས་ཆེན་པོར་གསལ། །སྨྲ་བསམ་ཡུལ་འདས་མཐའ་དག་འོད་གསལ་ཞིང་། །དམིགས་མེད་ཡུལ་བྲལ་སྙིང་རྗེས་ཡོངས་ལ་ཁྱབ། །མཁའ་ནང་སྟོང་པའི་ཆོ་འཕྲུལ་གསལ་མཛད་ཅིང་། །དྲི་མེད་ཐུགས་རྗེའི་འོད་མདངས་གསལ་བ་ཡིས། །ཐུགས་ཀྱི་རྟགས་སྟོན་འོད་ཟེར་རྒྱལ་བའི་སྐུ། །རྣམ་གསུམ་སེམས་དཔའ་གསང་སྔགས་འོད་ཕྲེང་ཚོགས། །ཆགས་པའི་སྐྱོན་བྲལ་ཡེ་ཤེས་ལྔ་ཡི་མདངས། །སྐུ་གསུང་ཡེ་ཤེས་རྣམ་ལྔའི་དགོངས་པ་རྣམས། །བདག་གཞན་འབྲས་བུ་ཐོབ་ཕྱིར་བཤད་དུ་གསོལ། །ཞེས་གླུས་བསྐུལ་ཏོ། །དེ་ནས་བཅོམ་ལྡན་འདས་ཀྱིས་གཟུངས་ཀྱི་དཀྱིལ་འཁོར་འབྱིན་པ་ཞེས་བྱ་བའི་དགོངས་པ་སྟོན་པ་ནི། གཟུངས་ཀྱི་རྒྱལ་མོ་ནམ་མཁའི་རྡོ་རྗེ་མ་དང་། ས་རྡོ་རྗེ་མ་དང་། ཆུ་རྡོ་རྗེ་མ་དང་། མེ་རྡོ་རྗེ་མ་དང་། རླུང་རྡོ་རྗེ་མ་ལ་འཁྲིལ་བར་གྱུར་ཏེ། གཟུངས་ཀྱི་བྱང་ཆུབ་ཆེན་མོ། འདས་པའི་རྡོ་རྗེ་དང་། མ་འོངས་པའི་རྡོ་རྗེ་དང་། ད་ལྟར་བྱུང་བའི་རྡོ་རྗེ་དང་། མ་བྱོན་པའི་རྡོ་རྗེ་དང་། གཟུགས་རྡོ་རྗེ་མ་དང་། སྒྲ་རྡོ་རྗེ་མ་དང་། དྲི་རྡོ་རྗེ་མ་དང་།རོ་རྡོ་རྗེ་མ་དང་། གཞན་གཟུགས་ཀྱི་ལས་མཛད་མ། འཛིན་བྱེད་རྡོ་རྗེ་མ་དང་། འཆིང་བྱེད་རྡོ་རྗེ་མ་དང་། སྡོམ་མཛད་རྡོ་རྗེ་མ་དང་། དགྱེས་པའི་རྡོ་རྗེ་མ་རྣམས་བཏོན་ཏེ། ལྷན་ཅིག་སྐྱེས་པའི་ཡེ་ཤེས་ཀྱི་རོ་བདེ་བ་ཆེན་པོས་རྒྱས་པར་མཛད་ནས། ཉིད་ཀྱི་ཐུགས་ལས་གར་གྱི་དབང་ཕྱུག་བདེ་ཆེན་ཕྱུང་སྟེ། ཞལ་གསུམ་ནི་སྔོན་པོ་དང་། སེར་པོ་དང་། དཀར་དམར་པདྨའི་མདངས་ཅན།ཕྱག་དྲུག་ན་པདྨའི་སྡོང་བུ་དང་། བུམ་པ་དང་། རྡོ་རྗེ་རྩེ་གསུམ་དང་།དཔལ་བེའུ་དང་། མདའ་དང་། གཞུ་འཛིན་པར་གྱུར་ཏེ། འདི་སྐད་ཅེས་གསུངས་སོ། །ཆོས་དང་ལོངས་སྤྱོད་སྤྲུལ་པ་དང་། །
ཆོས་དབྱིངས་མེ་ལོང་མཉམ་ཉིད་དང་། །སོ་སོར་ཀུན་རྟོག་བྱ་བ་གྲུབ། །བདག་དང་གཞན་གྱི་ཕྱིར་སྤྱོད་པ། །ལྟ་སྤྱོད་དཀྱིལ་འཁོར་དབང་དམ་དང་། །ཕྲིན་བསྒྲུབ་མཆོད་དང་ཏིང་འཛིན་རྒྱ། །གཞི་ལམ་འབྲས་བུ་རྡོ་རྗེའི་བདག །གསང་སྔགས་ང་ཡིས་བཤད་ཀྱིས་ཉོན། །ཞེས་གསུངས་སོ། །དབང་ཆེན་འདུས་པའི་རྒྱུད་ལས། གླེང་བསླང་བའི་ལེའུ་སྟེ་གཉིས་པའོ།། །།དེ་ནས་བཅོམ་ལྡན་འདས་ཀྱིས་སྐུ་རྡོ་རྗེ་ཡོངས་སུ་རྫོགས་པའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ཉིད་ལས་སྐུའི་ཚོགས་ཡོངས་སུ་གསལ་བ་ཞེས་བྱ་བ་འདི་ཆེད་དུ་བརྗོད་དོ། །སྤྱི་གཙུག་འཁོར་ལོ་རྩིབས་བརྒྱད་ལ། །སངས་རྒྱས་རྣམ་སྣང་རང་བྱུང་སྐུ། །ཀང་ཀ་རི་ཤ་ཤེལ་ལྟར་དག །བྱང་ཆུབ་མཆོག་གི་ཕྱག་རྒྱ་ཅན། །གཉིས་མེད་དམ་ཚིག་རྡོ་རྗེའི་སྐུ། །ཏིང་ངེ་འཛིན་གྱིས་འདི་སྐད་གསུངས། །དག་པ་དེ་བཞིན་གཤེགས་ཀུན་གྱིས། །ཕུང་པོ་ཁམས་སོགས་རྣམ་སྤངས་ཤིང་། །གཟུང་དང་འཛིན་པ་ལས་སྒྲོལ་ཞིང་། །ཆོས་བདག་མེད་པའི་སྟོང་ཉིད་ཅན། །ཞེས་གསུངས་སོ། །ཐུགས་ཀར་ཉི་མའི་གདན་སྟེངས་སུ། །སངས་རྒྱས་མི་བསྐྱོད་རང་བྱུང་སྐུ། །མཐིང་ག་ས་གནོན་ཕྱག་རྒྱ་ཅན། །ཀུན་གྱི་གཉིས་མེད་མི་ཟད་པའི། །ཡེ་ཤེས་ཏིང་འཛིན་སྙོམས་ཞུགས་ཏེ། །བྱང་ཆུབ་སེམས་ནི་འདི་གསུངས་སོ། །དངོས་པོ་འདི་དག་མ་སྐྱེས་པས། །ཕུང་པོར་གྲགས་པའི་ཆོས་ཉིད་མེད། །ནམ་མཁའ་ལྟ་བུར་བརྟག་དཀའ་བའི། །བདག་མེད་བྱང་ཆུབ་སེམས་ཞེས་བྱ། །ཞེས་གསུངས་སོ། །མགྲིན་པ་པདྨ་འདབ་བརྒྱད་ལས། །སངས་རྒྱས་སྣང་མཐའ་རང་བྱུང་སྐུ། །པདྨ་རཱ་ག་མཉམ་བཞག་རྒྱ། །ཡེ་ཤེས་སྒྲོན་འབར་ངང་ནས་གསུངས། །མ་སྐྱེས་པ་ཡི་ཆོས་རྣམས་ལ། །དངོས་པོ་མེད་ཅིང་བསྒོམ་པའང་མེད། །ནམ་མཁའི་གནས་སུ་སྦྱོར་བ་ཡིས། །ངོ་བོ་ཞེས་ནི་རབ་ཏུ་བཤད། །ཅེས་གསུངས་སོ། །ལྟེ་བ་རིན་ཆེན་ཟུར་བརྒྱད་ལས། །སངས་རྒྱས་རིན་འབྱུང་རང་བྱུང་སྐུ། །འཛམ་བུ་ན་དའི་གསེར་འོད་འདྲ། །སྦྱིན་པ་གཏོང་བའི་ཕྱག་རྒྱ་ཅན། །བདག་མེད་རྡོ་རྗེའི་ཏིང་འཛིན་ལ། །
སྙོམས་པར་ཞུགས་ནས་འདི་དག་གསུངས། །ཆོས་རྣམས་ཐམས་ཅད་དངོས་མེད་ཅིང་། །ཆོས་ཀྱི་མཚན་ཉིད་རྣམ་པར་སྤངས། །བདག་མེད་ཆོས་ལས་ཡང་དག་བྱུང་། །བྱང་ཆུབ་ཚུལ་ནི་བསྟན་པའོ། །ཞེས་གསུངས་སོ། །གསང་གནས་རྡོ་རྗེ་རྒྱ་གྲམ་ལ། །སངས་རྒྱས་དོན་གྲུབ་རང་བྱུང་སྐུ། །སྦྱིན་གཏོང་ཨིནྟྲ་ནཱི་ལིའི་མདོག །ཟིལ་གནོན་རྡོ་རྗེའི་ངང་ནས་གསུངས། །ཆོས་འདི་རང་བཞིན་འོད་གསལ་ཞིང་། །གདོད་ནས་དག་པས་མཁའ་དང་མཉམ། །བྱང་ཆུབ་མེད་ཅིང་མངོན་རྟོག་མེད། །བྱང་ཆུབ་སེམས་ནི་ཡིན་པར་བཤད། །ཅེས་གསུངས་སོ། །ཨེ་མ་ཧོ། ཞེས་གསུངས་པས་ཐམས་ཅད་ཀུན་རྫོབ་དང་དོན་དམ་པའི་བྱང་ཆུབ་སེམས་ཀྱིས་ཁྱབ་པར་གྱུར་ཏོ། །དེ་ནས་ནམ་མཁའི་དབྱིངས་ཕྱུག་མས་འདི་གསུངས་སོ། །སྣོད་བཅུད་སྣང་བའི་རང་བཞིན་འདི། །རྒྱུ་རྐྱེན་འབྲས་བུ་ངང་གིས་སྟོང་། །དེ་ཉིད་མ་སྐྱེས་ཆོས་ཀྱི་དབྱིངས། །ཆོས་རྣམས་ཡོངས་ཀྱི་འབྱུང་གནས་སོ། །དེ་ནས་སངས་རྒྱས་སྤྱན་གྱིས་འདི་གསུངས་སོ། །རང་བཞིན་འོད་གསལ་སེམས་ཉིད་འདི། །མེད་ལས་ཡོད་སྣང་སྒྱུ་མར་སྣང་། །མེ་ལོང་ལྟ་བུར་རང་གསལ་བས། །ཡོངས་ལ་ཁྱབ་པར་དེ་འགྱུར་རོ། །དེ་ནས་མཱ་མ་ཀཱིས་འདི་གསུངས་སོ། །འཁོར་བ་མྱ་ངན་འདས་པའི་ཆོས། །སྤྱི་དང་རང་གི་མཚན་ཉིད་རྣམས། །མ་འདྲེས་ཡོངས་སུ་རྫོགས་པའི་དོན། །རང་བཞིན་ངང་གིས་མཉམ་པ་ཉིད། །དེ་ནས་གོས་དཀར་མོས་འདི་གསུངས་སོ། །སྟོང་ཉིད་ཡེ་ཤེས་སྙིང་པོ་ནི། །ཕྱོགས་གཞན་རང་སར་རྟོགས་པའི་བློས། །སོ་སོའི་རང་གཞུང་ངེས་རྟོགས་ནས། །ཀུན་ཏུ་རྟོགས་པར་རབ་ཤེས་བྱོས། །དེ་ནས་དམ་ཚིག་སྒྲོལ་མས་འདི་གསུངས་སོ། །ཆོས་རྣམས་ཡོངས་སུ་རྫོགས་པའི་དོན། །དབྱེར་མེད་ངང་དུ་གནས་པ་ནི། །བྱ་བ་ཐམས་ཅད་ འགྲུབ་པ་སྟེ། །དབྱིངས་དང་ཡེ་ཤེས་འདུ་འབྲལ་མེད། །ཨ་ཧོ་ཞེས་བརྗོད་པས། འཆད་པའི་སྐྱེས་བུ་ཉིད་དགྱེས་པར་གྱུར་ཏོ། །དབང་ཆེན་འདུས་པའི་རྒྱུད་ལས། བྱང་ཆུབ་མཆོག་ཏུ་སེམས་ངེས་པར་བསྐྱེད་པའི་ལེའུ་སྟེ་གསུམ་པའོ།། །།དེ་ནས་བཅོམ་ལྡན་འདས་
ཐེག་པ་ཐམས་ཅད་རབ་ཏུ་གསལ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེའི་ཚེ་འདི་སྐད་ཅེས་གསུངས་སོ། །ཡེ་ཉིད་ཇི་བཞིན་ལྷུན་གྲུབ་ནི། །ནམ་མཁའ་དང་ནི་ཉི་མ་བཞིན། །ཡངས་ཤིང་རྒྱ་ཆེ་འོད་གསལ་བ། །འཁོར་འདས་འབྱུང་བའི་རང་བཞིན་ཅན། །སྲིད་རྩ་བདག་ལས་ལྷན་ཅིག་བྱུང་། །ཀུན་ཏུ་བརྟགས་པའི་རྟོགས་པས་བསླད། །དགེ་སྡིག་ལས་གསུམ་བག་ཆགས་ཅན། །ཉོན་མོངས་ལྔ་ཡིས་རྣམ་པར་བསྐྱེད། །སྣོད་བཅུད་གཉིས་ལས་མ་གཏོགས་པའི། །འགྲོ་བ་གཞན་ན་མི་མངའ་སྟེ། །ལས་དང་ལོངས་སྤྱོད་སོ་སོར་སྣང་། །གཅིག་ལས་དྲུག་རིགས་བསམ་ལས་འདས། །ཐོག་མཐའི་དོན་ལས་གོལ་ནས་སུ། །ཕྱི་ནང་རྟེན་ཅིང་འདྲེལ་འབྱུང་འཁོར། །བྱང་ཆུབ་སེམས་ཀྱི་སྣང་བ་འདི། །དེ་ཡང་སྣང་ཡང་སངས་རྒྱས་ཡིན། །ཞེས་གསུངས་སོ། །དེ་ནས་སངས་རྒྱས་ཀྱི་མཁྱེན་པས་གཟིགས་ནས་ཐུགས་རྗེའི་ཡེ་ཤེས་ཆེན་པོར་བསྐྱེད་པའི་གཞི་འདི་སྐད་ཅེས་གསུངས་སོ། །རྫོགས་སངས་རྒྱས་དང་དམྱལ་བ་ཡང་། །སེམས་ཉིད་རང་བཞིན་འོད་གསལ་ཏེ། །དེ་ལ་གཞི་དང་རྩ་བ་མེད། །ཆོས་སྐུ་ཉིད་པས་གཞན་མི་མངའ། །ཇི་ལྟར་ཐ་དད་སྣང་གྱུར་པ། །ཐམས་ཅད་མཁྱེན་པའི་སྤྱན་གྱིས་གཟིགས། །མངོན་ཤེས་དྲུག་གི་ཡུལ་དུ་སྣང་། །ལས་དང་ཐུགས་རྗེས་འདྲེལ་པའི་སྟོབས། །མུན་པའི་ནང་དུ་འཁོར་བ་ཀུན། །མ་རྟོགས་འཆལ་བ་རྒྱང་འཕེན་པ། །དམངས་རིགས་དང་ནི་རིགས་མ་དེས། །རིགས་ཆད་པ་དང་འདུ་ཤེས་ཅན། །ལོག་པར་རྟོག་པའི་མུ་སྟེགས་པ། །རང་བཞིན་དབང་ཕྱུག་རྒྱུར་འདོད་དང་། །རྡུལ་ཕྲན་ངོ་བོ་ཉིད་གྱུར་སྨྲ། །བྱེད་པ་རིག་བྱེད་རྟག་པར་བལྟ། །ཚེ་ལ་སྔ་ཕྱི་མེད་འདོད་ཅིང་། །ཡོན་ཏན་ལས་འབྲས་ཆད་པར་འདོད། །ཆོས་དང་གང་ཟག་བདག་ཏུ་འཛིན། །རྡུལ་ཕྲན་སྨྲ་བ་ཉན་ཐོས་ཅན། །ཕྱི་ནང་རྟེན་ཅིང་འདྲེལ་པ་དང་། །ལུགས་འབྱུང་དེ་ལྡོག་རང་སངས་རྒྱས། །དོན་དམ་བློ་ཡི་དང་སྟོང་ཞིང་། །ཀུན་རྫོབ་སྒྱུ་མར་སྣང་བ་དེས། །དབྱེ་གཞི་ལ་སོགས་རྣམ་པ་ཡིས། །བྱང་ཆུབ་སེམས་དཔའ་ཕལ་ཆེན་ཏེ། །དག་
པ་ཡེ་ཤེས་ཆོས་ཉིད་དུ། །རིགས་གསུམ་མགོན་ལ་སྤྱོད་པ་བལྟ། །འོག་སྤྱོད་གོང་ལ་བལྟ་བ་ཡིས། །ཨུ་པ་ཡ་ཞེས་དེ་ལྟར་སྣང་། །རྣམ་པར་སྣང་མཛད་ཆེན་པོ་ཡིས། །རྡོ་རྗེ་དབྱིངས་ཀྱི་རྣལ་འབྱོར་བལྟ། །ལོངས་སྤྱོད་རྫོགས་པའི་སྐུ་དག་ལ། །བདེན་པ་དབྱེར་མེད་མ་ཧཱ་ཡིན། །རྩོལ་བྲལ་དབྱེར་མེད་ཤིན་ཏུ་རྫོགས། །འདིར་ནི་སྤྲུལ་སྐུ་དམ་པ་ཡིས། །དབྱིངས་དང་ཡེ་ཤེས་གཉིས་སུ་མེད། །འོག་ཏུ་གྱུར་དང་སྟེང་ན་སྤྱོད། །མཐོ་དམན་ཐེག་པའི་གཏན་ཚིགས་ནི། །ཁྱད་པར་ཆེ་ལ་གཅིག་པའི་ཚུལ། །ཀུན་བརྟགས་འཁོར་བའི་རང་བཞིན་ནི། །གཞན་དབང་དེ་བཞིན་གཤེགས་པ་སྟེ། །ཡོངས་སུ་གྲུབ་པ་ཆོས་ཀྱི་སྐུ། །རྒྱུ་བདུན་འདོད་པས་འབྲས་བུ་འཕགས། །རང་སེམས་མངོན་སུམ་ལྷ་སྐུར་འབེབས། །རྗེས་ཀྱི་ཤེས་པ་ལྷ་སྐུར་རྟོགས། །རྫོགས་པ་ཨ་ནུ་ཡོ་ག་ནི། །མུ་བཞི་མཐའ་བྲལ་ཆོས་ཀྱི་དབྱིངས། །གཅིག་དང་དུ་མར་དེ་མ་གྲུབ། །རང་བྱུང་ཡེ་ཤེས་རྡོ་རྗེ་སྟེ། །ཀུན་ཏུ་བཟང་པོ་ཡབ་ཏུ་སྣང་། །དབྱིངས་དང་ཡེ་ཤེས་གཉིས་མེད་པ། །རྟེན་ཅིང་འདྲེལ་པའི་བདེ་ཆེན་སྲས། །སྤྲུལ་པའི་ལོངས་སྤྱོད་རྒྱུན་མི་ཆད། །ཅེས་གསུངས་སོ། །དབང་ཆེན་འདུས་པའི་རྒྱུད་ལས། བལྟ་བ་རིམ་པར་ཕྱེ་བའི་ལེའུ་སྟེ་བཞི་པའོ།། །།དེ་ནས་བཅོམ་ལྡན་འདས་ཀྱིས་འོད་ཟེར་འཕྲོ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་འདི་གསུངས་སོ། །དམ་པའི་རྒྱུད་ལུང་མན་ངག་མཛོད། །ལྟ་སྤྱོད་ཏིང་འཛིན་གདེང་ལྡན་ལ། །རང་བཞིན་སྦྱངས་པ་ཁྱད་པར་སྣོད། །བདེན་སྨྲ་མི་བསླུ་བཀའ་བཞིན་བྱ། །ལྟ་སྤྱོད་མི་བསླུ་དོན་ལྡན་ནས། །བྱང་ཆུབ་མཆོག་ཏུ་སེམས་བསྐྱེད་དེ། །དེ་བཞིན་ཉིད་ཀྱི་ཏིང་འཛིན་ནི། །སྟོང་པ་ཉིད་ཀྱི་ཏིང་འཛིན་བསྒོམ། །གཉིས་པ་ཀུན་སྣང་ནམ་མཁའི་ངང་། །སྙིང་རྗེའི་ཡུལ་གྱིས་ཁྱབ་པའི་ཕྱིར། །མཚམས་སྦྱོར་ཆེན་པོའི་ཏིང་འཛིན་བསྒོམ། །གསུམ་པ་རང་གི་ས་ནོན་ཏེ། །རབ་ཏུ་བརྟན་པའི་ཡེ་ཤེས་ལ། །དེ་ནས་ཕྲ་མོའི་ཨ་འཕྲོ་འདུ། །སྤྲོས་ཤིང་བསྡུས་ཀྱང་འཕེལ་འགྲིབ་མེད། །དེ་ལས་བདག་ཉིད་ཆེན་པོ་ནི། །ཐམས་ཅད་རྫོགས་པར་བསྐྱེད་བྱའོ། །རྒྱས་
བཏབ་བྱིན་བརླབ་དབང་བསྐུར་བས། །རྩ་བའི་དཀྱིལ་འཁོར་རབ་ཏུ་རྫོགས། །ཐོག་མར་ཡབ་ཡུམ་རྣམ་གཉིས་མཁའ། །རྡོ་རྗེ་པདྨར་བྱིན་གྱིས་བརླབ། །གཉིས་མེད་འཁྲིལ་བར་དགྱེས་པ་ལས། །བྷ་གའི་དཀྱིལ་དུ་ལིངྒ་ལ། །སྤྲོ་བསྡུས་དབྱིངས་སུ་འཁྱིལ་པ་ལས། །དབང་ཆེན་ས་བོན་འབྲུ་ལྔར་གྱུར། །ཨེ་ལས་ནམ་མཁའ་ཡཾ་ལས་རླུང་། །བཾ་ལས་རྒྱ་མཚོ་སུཾ་ལས་གསེར། །བྷྲཱུཾ་ལས་རིན་ཆེན་གཞལ་ཡས་ཁང་། །དབྱིབས་དང་ཁ་དོག་བསམ་ཡས་མཆོག །འཁོར་ལོ་གདན་དང་རོལ་མོའི་ཚོགས། །གདན་དང་རྒྱན་བཅས་ཡོངས་སུ་གྲུབ། །རྟེན་འབྱུང་ནམ་མཁའི་ཡི་གེ་ཨ། །འཕྲེལ་འགྲིབ་མེད་པར་གནས་པ་ལས། །གཉིས་མེད་དགྱེས་པའི་འཕྲོ་འདུ་ལས། །བཞི་བཅུ་རྩ་གཉིས་འོད་དུ་འབར། །གསུང་གི་དཀྱིལ་འཁོར་བཞི་བཅུ་གཉིས། །སྤྲོ་བསྡུ་གསལ་བར་གྱུར་པ་ལས། །ཐུགས་མཆོག་བཞི་བཅུ་རྩ་གཉིས་འབར། །དེ་ལས་མངོན་རྫོགས་སྐུར་གསལ་ལོ། །གཟུགས་དང་རྣམ་ཤེས་ཚོར་བ་དང་། །འདུ་ཤེས་འདུ་བྱེད་ཕུང་པོའི་སྐུ། །ནམ་མཁའ་ས་ཆུ་མེ་རླུང་དབྱིངས། །རྡོ་རྗེ་སྐྱིལ་ཀྲུང་རྫོགས་སངས་རྒྱས། །ས་དང་ནམ་མཁའ་སྤྱན་རས་ཕྱག །སྒེག་མོ་ཕྲེང་བ་དབྱངས་དང་གར། །བྱམས་པ་སྒྲིབ་སེལ་ཀུན་བཟང་འཇམ། །མེ་ཏོག་སྤོས་དང་མར་མེ་དྲི། །ཕྱི་ནང་སེམས་དཔའི་ངོ་བོ་སྟེ། །རང་གི་རིགས་སུ་ངེས་པར་གསལ། །སྲིད་ཐུབ་འཛིན་དང་རྣམ་པར་རྒྱལ། །ཤཱཀྱ་སེངྒེ་རྣམ་པར་གནོན། །རྣམ་པར་སྣང་བྱེད་ཆོས་ཀྱི་རྒྱལ། །ཀུན་ཏུ་བཟང་པོ་བཟང་མོ་དང་། །གཤིན་རྗེ་སྟོབས་ཆེན་རྟ་མགྲིན་དང་། །བདུད་རྩི་ལྕགས་ཀྱུ་ཞགས་པ་དང་། །སྒྲོག་དང་དྲིལ་བུ་འཛིན་པ་ཉིད། །བཞི་བཅུ་རྩ་གཉིས་ལྷུན་གྱིས་གྲུབ། །དཀར་སེར་དམར་ལྗང་མཐིང་གའི་མདོག །འོད་ཟེར་བྱེ་བ་ཕྲག་རྣམས་འགྱེད། །ཅེས་གསུངས་སོ། །དེ་ནས་བཅོམ་ལྡན་འདས་ཀྱིས་དཀྱིལ་འཁོར་རབ་ཏུ་འདུས་པ་འདི་གསུངས་སོ། །དཀྱིལ་འཁོར་གྲུ་བཞི་སྒོ་བཞི་པ། །ཐིག་བཞི་བཏབ་པའི་ཕོ་བྲང་དུ། །དབུས་སུ་མི་བསྐྱོད་ཡབ་ཡུམ་འཁྲིལ། །
དེ་ཡི་ཕྱག་ན་རྡོ་རྗེ་བསྣམས། །བརྒྱ་བྱིན་ཕྱོགས་སུ་རྣམ་སྣང་མཛད། །དེ་ཡི་ཕྱག་ན་འཁོར་ལོ་བསྣམས། །གཤིན་རྗེ་ལ་ནི་དཀོན་མཆོག་དཔལ། །དེ་ཡི་ཕྱག་ན་རིན་ཆེན་བསྣམས། །ནུབ་ཏུ་འོད་དཔག་མེད་པ་བྲི། །དེ་ཡི་ཕྱག་ན་པདྨ་བསྣམས། །གནོད་སྦྱིན་ཕྱོགས་སུ་གདོན་མི་ཟ། །དེ་ཡི་ཕྱག་ན་རྒྱ་གྲམ་འཛིན། །མེ་ཡི་ཕྱོགས་སུ་དབྱིངས་ཕྱུག་མ། །བདེན་བྲལ་ཕྱོགས་སུ་མཱ་མ་ཀཱི། །རླུང་གི་ཕྱོགས་སུ་གོས་དཀར་མོ། །དབང་ལྡན་མཚམས་སུ་སྒྲོལ་མ་ཉིད། །ཤར་གྱི་སྒོར་ནི་གཤིན་རྗེ་ལ། །ལྷོར་ནི་སྟོབས་ཆེན་ནུབ་ཏུ་རྟ། །བྱང་དུ་བདུད་རྩི་འཁྱིལ་པ་སྟེ། །ཞལ་གསུམ་ཕྱག་དྲུག་རྣམ་པར་བསམ། །དེ་ནས་བཅོམ་ལྡན་འདས་ཀྱིས་དཀྱིལ་འཁོར་ཤིན་ཏུ་བསྡུས་པ་ཞེས་བྱ་བ་འདི་གསུངས་སོ། །དུས་གསུམ་བདེ་གཤེགས་སྐུ་འདུས་པ། །བཅོམ་ལྡན་རྣམ་པར་སྣང་མཛད་བསྒོམ། །གསུང་ནི་ཐམས་ཅད་མཚོན་པས་ན། །བཅོམ་ལྡན་སྣང་བ་མཐའ་ཡས་བསྒོམ། །ཐམས་ཅད་མ་ལུས་ཀུན་འདུས་པ། །རྡོ་རྗེ་སེམས་དཔའ་ཐུགས་སུ་བསྒོམ། །ཞེས་གསུངས་སོ། །དབང་ཆེན་འདུས་པའི་རྒྱུད་ལས། སྐུ་ཡོངས་སུ་རྫོགས་པའི་ལེའུ་སྟེ་ལྔ་པའོ།། །།དེ་ནས་དེ་བཞིན་གཤེགས་པ་ཐམས་ཅད་ཀྱིས་གསུངས་འདི་དག་ཆེད་དུ་བརྗོད་དོ། །ཀ་ཁ་ག་གྷ་ང་། ཙ་ཚ་ཛ་ཛྷ་ཉ། ཏ་ཐ་ད་དྷ་ན། ཊ་ཋ་ཌ་ཌྷ་ཎ། པ་ཕ་བ་བྷ་མ། ཡ་ར་ལ་ཝ། ཤ་ཥ་ས་ཧ་ཀྵ། ཨ་ཨཱ། ཨི་ཨཱིཾ། ཨུ་ཨཱུ། རྀ་རཱྀ། ལྀ་ལཱྀ། ཨེ་ཨཻ། ཨོ་ཨཽ། ཨཾ་ཨཿ། ཨཱོཾ་མ་ཧཱ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱདྨ་ཀོ྅ཧཾ། ཨོཾ་དྷརྨ་དྷཱ་ཏུ་བཛྲ་སྭ་བྷཱ་ཝ་ཨཱདྨ་ཀོ྅ཧཾ། བྷྲཱུཾ་བྷི་ཤ་བྷི་ཤུདྡྷེ་ཛྙཱ་ན་མཎྜ་ལ་བྷྲཱུཾ། ཨོཾ་ཛི་ན་ཛིཀ །མུཾ་དྷཱ་ཏྭཱི་ཤྭ་རི། ཧཱུཾ་བཛྲ་དྷྲྀཀ །ལཾ་དྭེ་ཥ་ར་ཏི། སྲཱ་རཏྣ་དྷྲྀཀ །མཱཾ་མོ་ཧ་ར་ཏི། ཨཱཾ་ཨ་རོ་ལིཀ །པྱཾ་རཱ་ག་ར་ཏི། ཧ་པྲཛྙཱ་དྷྲྀཀ །ཏཱཾ་བཛྲ་ར་ཏི། ཀྵིཾ་ཧི་རཱ་ཛ་ཡ། ཧཱུཾ་ལཱ་སྱེ། ཏྲཾ་ཨ་གརྦྷཱ་ཡ། ཏྲཱཾ་མཱ་ལེ། ཧྲི་ཧ་ཧཱུཾ་པདྨ་པཱ་ད་མ། ཧྲཱྀ་གིརྟི། ཛྙིཾ་ཀུ་རུ་པཱ་ཎ་ཧྲི། ཨཱཾ་ནི་ར་ཏི། མཻ་དྷ་ར་ཎེ་སྭཱ་ཧཱ། ཛ་དྷཱུ་པ། ་ནི་སྶ་རཾ་བྷཱ་ཡ། ཧཱུཾ་པུཥྤ། ཧཱུཾ་ས་རཱ་ཛ་ཡ། བཾ་
དི་བ། མུཾ་ཤྲཱི་ཨཾ་རཱ་གཱ་ཡ། ཧོ་གནྡྷེ། ཨཱོཾ་མུཾ་ནི་ཀྲིཾ། ཨཱོཾ་མུ་ནི་ཏྲུཾ། ཨཱོཾ་མུ་ནི་སྲུཾ། ཨཱོཾ་མུ་ནི་བྲཾ། ཨཱོཾ་མུ་ནི་ཀྵཾ། ཨཱོཾ་མུ་ནེ་ཡེ་སྭཱ་ཧཱ། ཨཱོཾ་བཛྲ་ཙིཏྟ་ཧཱུཾ། ཨོཾ་བཛྲ་བྷ་དྲཱ་ཨོཾ། ཧཱུཾ་ཡ་མཱན་ཏ་ཀྲྀཏ་ཧཱུཾ་ཕཊ། ཛ་བཛྲ་ཀྲོ་དྷཱི། ཧཱུཾ་པྲཛྙཱ་ན་ཏ་ཀྲྀཏ་ཕཊ། ཧཱུཾ་རཏྣ་ཀྲོ་དྷཱི། ཧཱུཾ་པདྨཱན་ཏ་ཀྲྀཏ་ཕཊ། བཾ་པདྨ་ཀྲོ་དྷཱི། ཧཱུཾ་བིགྷྣཱཾ་ཏ་ཀྲྀཏ་ཕཊ། ཧོ་ཀརྨ་ཀྲོ་དྷཱི།ཨཱོཾ་མ་ཧཱ་ནྱ་ཏ་ཛྙཱ་ན་བཛྲ་སྭཱ་བྷཱ་ཝ་ཨཱདྨ་ཀོ྅ཧཾ། ཨོཾ་མ་ཧཱ་ཨཱ་དཪྴ་ཛྙཱ་ན་བཛྲ་སྭ་བྷཱ་ཝ་ཨཱདྨ་ཀོ྅ཧཾ། ཨོཾ་མ་ཧཱ་ས་མ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱདྨ་ཀོ྅ཧཾ། ཨཱོཾ་མ་ཧཱ་པྲཏྱ་བེ་ཀྵ་ཎ་ཛྙཱ་ན་བཛྲ་སྭ་བྷཱ་ཝ་ཨཱདྨ་ཀོ྅ཧཾ། ཨཱོཾ་མ་ཧཱ་ཀྲྀ་ཏྱ་ནུཥྛ་ན་ཛྙཱ་ན་བཛྲ་སྭ་བྷཱ་ཝ་ཨདྨ་ཀོ྅ཧཾ། ཨོཾ་སརྦ་ཏ་ཐཱ་ག་ཏ་ཀཱ་ཡ་བཛྲ་སྭ་བྷཱ་ཝ་ཨཱདྨ་ཀོ྅ཧཾ། ཨོཾ་སརྦ་ཏ་ཐཱ་ག་ཏ་ཝཱཀྐ་བཛྲ་སྭ་བྷཱ་ཨཱདྨ་ཀོ྅ཧཾ། ཨོཾ་སརྦ་ཏ་ཐཱ་ག་ཏ་ཙིཏྟ་བཛྲ་སྭ་བྷཱ་ཝ་ཨཱདྨ་ཀོ྅ཧཾ། ཨོཾ་མ་ཧཱ་སུ་ཁ་བོ་དྷཱི་ཙིཏྟ་ཛྙཱ་ན་དྷཱ་ཏུ་ཨ། ཞེས་གསུངས་སོ། །དབང་ཆེན་འདུས་པའི་ཏན་ཏྲ་ལས། གསུང་གི་ལེའུ་སྟེ་དྲུག་པའོ།། །།དེ་ནས་བཅོམ་ལྡན་འདས་ཀྱིས་ཐུགས་ཡོངས་སུ་དག་པའི་ཏིང་ངེ་འཛིན་ལ་སྙོམས་པར་ཞུགས་ནས་འདི་གསུངས་སོ། །ཉི་ཟླ་འབྲུ་ལྔའི་འོད་ཟེར་ལས། །སྒྱུར་བའི་ཕྱག་རྒྱ་རྣམ་པར་བསྒྱུར། །འཁོར་ལོ་རྡོ་རྗེ་རིན་པོ་ཆེ། །པདྨ་རལ་གྲི་དྲིལ་བུར་བཅས། །རིན་ཆེན་མྱུ་གུ་རལ་གྲི་དང་། །པདྨ་དཀར་པོ་རྡོ་རྗེ་དང་། །ཀླུ་ཤིང་ཆོས་ཀྱི་འཁོར་ལོ་དང་། །ཨུཏྤལ་རིན་ཆེན་སྙེ་མ་འཛིན། །མེ་ལོང་ཕྲེང་བ་པི་ཝང་གར། །མེ་ཏོག་བདུག་པ་མར་མེ་དང་། །དྲི་ཆབ་འཐོར་བས་དགྱེས་པར་རོལ། །པི་ཝང་གོ་ཆ་གསེག་པར་དང་། །ཆོས་ཀྱི་པོ་ཏི་རིན་ཆེན་སྒྲོམ། །མེ་ཆུ་མཉམ་གཞག་འོད་ཟེར་འཕྲོ། །ཐོད་དབྱུག་རྡོ་རྗེ་སྦྲུལ་ཞགས་རྒྱ། །ལྕགས་ཀྱུ་ཞགས་པ་ལྕགས་སྒྲོག་དྲིལ། །དམ་ཚིག་རང་གི་ཡོན་ཏན་དངོས། །རྒྱལ་སྲས་རྣམས་ཀྱིས་རྒྱས་བཏབ་པ། །ལས་ཀྱི་རྣམ་སྨིན་ངེས་པ་ཡིས། །ཀུན་ནས་རྒྱས་བཏབ་ལྟ་བུར་གནས། །གང་ཡང་འདི་ནི་ལས་གང་གིས། །དེ་འབྲས་ཇི་ལྟ་བཞིན་དུ་འགྱུར། །ཆོས་མེད་རང་བཞིན་མེད་པ་ཉིད། །རང་བཞིན་གྱིས་ནི་རྒྱས་བཏབ་ནས། །སྟོང་དང་སྙིང་རྗེ་མི་ཕྱེད་པ། །སངས་རྒྱས་ཞིང་ནི་རྣམ་སྦྱོང་
བ། །དེ་བཞིན་གཤེགས་པའི་ཕྲིན་ལས་ནི། །ཡོངས་སུ་དག་པར་མཛད་པའི་ལས། །དེ་ཡི་རང་བཞིན་རང་བཞིན་མེད། །ཕྱག་རྒྱ་ཆེན་པོ་ཞེས་ནི་བརྗོད། །བདེ་གཤེགས་རྣམས་ཀྱི་ཐུགས་འཛིན་པ། །སྲོག་ཤིང་དབང་པོ་མྱོང་བ་དང་། །ཟ་བྱེད་ཀུན་ཏུ་རྒྱུ་བ་དང་། །ཀླུ་དང་རུས་སྦལ་རྩངས་པ་དང་། །ལྷ་སྦྱིན་དང་ནི་གཞུ་ལས་རྒྱལ། །ཕུང་པོ་རྣམ་ཤེས་མ་ལུས་ཀུན། །འདི་དོན་ཤེས་ནས་གཟུང་བར་བྱ། །བྱེད་པ་ཅན་གྱི་རླུང་འདི་ཡང་། །རྣམ་ཤེས་ཁམས་དང་འདྲེས་ནས་སུ། །དབང་པོའི་སྲང་ནས་ཐོན་འགྱུར་ཏེ། །ཡུལ་རྣམས་ཀུན་ལ་འཇུག་པས་ན། །སྣང་དང་མཆེད་དང་ཐོབ་པ་དང་། །ཉེ་བར་ཐོབ་པར་བྱེད་པ་དང་། །ཡུལ་ཅན་གཞན་པ་ལོག་པ་ན། །ཡུལ་ལ་དངོས་པོར་སུ་ཞིག་འཛིན། །རྣམ་ཤེས་ནང་དུ་འཇུག་པ་ཡང་། །རླུང་ལ་དངོས་པོར་མ་གྲུབ་པས། །སེམས་ལ་དངོས་པོར་སུ་ཞིག་འཛིན། །ཡུལ་སེམས་རབ་ཏུ་རྟོགས་གྱུར་ན། །གང་བལྟས་པདྨ་དབང་གི་ལྷ། །ཇི་ལྟར་སྤྱད་ཀྱང་སྐྱོན་མེད་པས། །དབང་ཆེན་ཞེས་ཀྱང་དེ་ལ་བྱ། །གང་ཟག་ཉེ་ལམ་བསྒྲུབ་འདོད་པས། །གནས་ཁང་ཤིན་ཏུ་མུན་ནག་སར། །རྡོ་རྗེ་གཙུག་ཏོར་ལྟ་སྟངས་ཀྱི། །ངེས་པ་ཁོ་ན་འགྲུབ་པ་སྟེ། །དེ་ལྟར་ཇི་ལྟར་བསྒོམ་ཞེ་ན། །ཞབས་ཀྱིས་རྡོ་རྗེ་བཅའ་བ་དང་། །ཕྱག་གཉིས་ཁུ་ཚུར་སྟ་ཟུར་མནན། །སྤྱན་གཉིས་རི་རབ་ནང་དུ་སྦ། །ལྕེ་རྩེ་གྱེན་གཏད་ཞལ་ཡང་གདངས། །སྲོག་གི་རྩ་ནས་ཡེ་ཤེས་རླུང་། །སྤྱི་བོ་ཚངས་པའི་བུ་གར་འདོན། །འཇའ་ཚོན་སྣ་ལྔའི་འོད་ལ་བལྟ། །ངེས་པར་ཐོབ་འགྱུར་ཐེ་ཚོམ་མེད། །ཅེས་གསུངས་སོ། །དབང་ཆེན་འདུས་པའི་ཏན་ཏྲ་ལས། ཐུགས་ཡོངས་སུ་རྣམ་པར་དག་པའི་སྤྱོད་ཡུལ་བསྟན་པའི་ལེའུ་སྟེ་བདུན་པའོ།། །།དེ་ནས་བཅོམ་ལྡན་འདས་ཀྱིས་དཀྱིལ་འཁོར་ཡོངས་སུ་གསལ་བ་འདི་གསུངས་སོ། །དམིགས་པ་ཕྲ་བའི་རིག་པ་ནི། །གཙོ་བོའི་བསྙེན་པ་འབུམ་དུ་བྱ། །འཁོར་རྣམས་ལ་ནི་ཁྲི་ཡིན་ཏེ། །དགེ་སློང་རྡོ་རྗེ་འཛིན་པས་བྱ། །དུར་ཁྲོད་དང་ནི་ཁང་ཁྱིམ་དང་། །རི་བོ་དབེན་གནས་ས་ཕྱོགས་སུ། །ས་དང་བར་སྣང་ནམ་མཁའ་བརྟག །འབྲུ་ལྔ་ཕྲ་བཀོད་སོར་མོ་ཡིས། །
དབང་གི་ཕུར་པ་སོར་བཞི་པས། །གདབ་པར་བྱ་ཞིང་མེ་ཡིས་སྦྱང་། །ལས་དང་བྱ་བ་ཏིང་འཛིན་སྦྱང་། །དེ་ན་གནས་པའི་འབྱུང་པོ་ལ། །འཚེ་བྱེད་བསྐྲད་ལ་ཐལ་མོ་བརྡབ། །ས་ལ་ལན་གསུམ་སྔགས་ཀྱིས་སྦྱང་། །ཨོཾ་བཛྲ་ཀྲོ་དྷ་ཛྭ་ལ་ཨ་ན་ལཱརྐ་ཧཱུཾ་ཕཊ། ཨོཾ་ཨུངྒཙྪ་ཏ། ཨོཾ་ཨུངྒཙྪ་ཏ། སརྦ་བྷུ་ཏ་གྲ་ཧ་ཨཱདྨ། ཨོཾ་ཨཱཿཧཱུཾ། བཛྲ་སཏྭ་ཨཱ་བེ་ཤ་ཏེ་ཧཱུཾ་ཕཊ། གསེག་མ་མགལ་དུམ་སྦུན་པ་དང་། །བ་ཚ་གྱོ་མོ་སྤང་པ་ཡི། །མཉམ་ཞིང་མེ་ལོང་ལྟར་འཇམ་པ། །རྣམ་པ་ལྔ་ཡིས་བྱུག་པར་བྱ། །ཕྱི་ནང་གསང་བའི་སྐུད་པ་ཡིས། །རབ་ཏུ་མཉམ་གྱུར་གྲུ་བཞི་པ། །སྐུ་གདུང་ཉི་ཤུ་ལྔ་ཡང་སྦ། །སྐུ་གསུང་ཐུགས་ལས་བྱུང་བ་ཡི། །དཔའ་བོ་འབྲུ་ལྔས་བསྐྲད་པར་བྱ། །ཚངས་ཐིག་བཏབ་ནས་ཐིག་སྐུད་ལ། །ཞལ་བསིལ་ཆུ་ཡིས་གསང་བར་བྱ། །ཨཱོཾ་ཨ་མོ་གྷ་པདྨ་བ་སུ་དྷ་ར་དྷ་ར། དྷ་ར་ཎི་མཎྜ་ལ་ཧཱུཾ། ཤར་ལྷོ་ནུབ་བྱང་ལ་སོགས་པ། །ཇི་ལྟར་འདོད་པའི་ཆ་ཕྱེད་ནས། །ནོར་འཁྲུལ་མེད་པའི་དགོངས་ལྡན་གདབ། །རིན་ཆེན་འབྲུ་དང་རྡུལ་ཚོན་དང་། །དུར་ཁྲོད་རྫས་ཀྱིས་བྲི་བར་བྱ། །སྐུ་གསུང་ཐུགས་རྟེན་དགོད་པ་དག །རོལ་མོ་རྒྱན་རྣམས་བྲི་བར་བྱ། །རབ་ཏུ་མཛེས་པ་ཁོ་ནར་བྱ། །ཕྱོགས་མཚམས་ཕུར་བུས་གདབ་པར་བྱ། །ཁྲོ་བོའི་རྐང་སྟབས་བསྐོར་བ་དང་། །དྲ་བ་ར་བས་བཅིང་སོགས་པ། །མཚམས་ཀྱི་རིམ་པས་བསྲུང་བར་བྱ། །བུམ་པ་རྒྱུ་དབྱིབས་ཚད་ལྡན་དུ། །བྱུག་བདུག་བསྐྲངས་རླབས་རྫས་ཀྱིས་དགང་། །སྨན་འབྲུ་སྙིང་པོ་རིན་ཆེན་ལྔ། །དྲི་དང་མེ་ཏོག་དཔག་བསམ་ཤིང་། །བྱིན་བརླབ་ལས་བུམ་རྣམ་རྒྱལ་དང་། །ལྷ་གྲངས་མཉམ་པར་དགོད་པར་བྱ། །རང་གནས་དྲི་ཡི་ཐིག་ལེ་ལས། །བསྐྱེད་དྲང་མཆོད་སོགས་ལྷག་གནས་བྱ། །སྔགས་བརྗོད་མེ་ཏོག་དོར་ནས་ནི། །ལྷ་གནས་དོར་ནས་རང་བཞིན་མཐོང་། །སྐུ་ཁྲུས་རབ་ཏུ་གསོལ་བར་བྱ། །མེ་དང་ཉུང་དཀར་ཁྲོ་བོ་ཡིས། །རབ་ཏུ་སྦྱར་ཞིང་ཉོན་མོངས་སེལ། །ཨཱོཾ་སརྦ་ཨ་བ་ར་ཎ་ཤུཌྜྷ་སརྦ་པཱ་པཾ་བི་ཤུད་དྷ་བཛྲ་ཧཱུཾ་ཕཊ་
སྭཱ་ཧཱ། ཕྱི་ནང་གསང་བའི་རྫས་མཆོད་དེ། །རང་གི་མིང་སྔགས་དག་གིས་དབུལ། །ཨཱོཾ་སརྦ་ཏ་ཐཱ་ག་ཏ་པུཥྤ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡ་ཤྲི་ཡེ་ཨཱཿཧཱུཾ། ཆོས་དང་ལྡན་པའི་སློབ་དཔོན་གྱིས། །ཆོ་ག་ཇི་བཞིན་རབ་ཏུ་གནས། །ཨོཾ་སུ་པྲ་ཏིཥྛ་བཛྲ་སྭཱ་ཧཱ། ལས་རྣམས་བྱ་བ་མང་པོ་དག །གཏོར་མའི་རྫས་མཆོག་སྣོད་བཟང་པོར། །བཤམས་ཏེ་ཀུན་ལ་དབུལ་བར་བྱ། །ཨཱོཾ་བྲ་ཧྨ་དྷི་བ་ཏཱ་སརྦ་ཨིནྡྲ་ད་ཤ་ལོ་ཀ་རཀྵ་ཀ་ནཱ་ག་གན་དྷརྦ་ཀུམྦྷཱཎྜ། ཡཀྵ་བྷཱུ་ཏ་ག་ཎཱཿ། ཏ་ཐཱ་པྲེ་ཏ་ཨུནྨ་ད་ཏ་པི་ཤཱ་ཙི་ཨ་པ་སྨཱ་ར་ཌཱ་ཀི་ནཱི་གྲ་ཧ་བི་གྷྣཱཾ་མ་ཏྲྀ་ག་ཎཱཿསརྦ་ཏ་ཐཱ་ཨ་ནུ་ནེ་མ་ར་བེ་གྷྲ་ཧ། ཨོཾ་ཛོ་བྷ་ཀྵ་མ་ཧཱ་ཏེ་ཛ་མ་ནུ་ཥྱཱ་ནཱཾ་བི་ཧི་ས་ཀ་མུ་དྲཱ་མནྟྲ་ཨ་དྷི་དོ་བྷྱཤྩ། གྲ་ཧཱ་ན་ཀྵ་ཏྲ་མ་ནུ་ཥྱ་ཨི་མཾ་བ་ལིཾ་པྲ་ཏི་གྲྀ་ཧྞནྟུ། སིདྡྷིམྨེ་པྲ་ཡཙྪནྟུ་མེ་ས་དཱ་ས་མ་ནེ་ཥུ་ཀ་ར་མེ་ཥུ། ས་ཏ་ས་ཧ་ཡ་བྷ་བནྟུ་ཙ། དྷ་ན་དྷ་ན་སུ་བ་སུ་བ་ར་ནཉྩ། ད་དན་ཏུ་མ་མ་ཧོ་ཥི་ཏ་ཨི་ཏི་ཨུ་པ་ཏྲཱ་ཎ་རོ་ཥ་ཎི། སཏྭཱ་ནཱ་མ་ནཱ་ཤ་ཡནྟུ་ཙ་ཨཱཿཧཱུཾ་ཕཊ་སྭཱ་ཧཱ། རྡོ་རྗེའི་སྣོད་དང་ལྡན་པ་རྣམས། །དད་ཆུས་སེམས་ཀྱི་དྲི་མ་བཀྲུ། །གོས་གཙང་གོན་ལ་གཙང་ཁང་བྱུང་། །རས་ཀྱི་ཡོལ་བས་གཅད་པར་བྱ། །གདོང་བསལ་སྤྱན་རས་དགབ་པར་བྱ། ཨོཾ་ཙཀྵུ་ཙཀྵུ་ས་མནྟ་ཙཀྵུ་མཻ་ཏྲི་སིཌྜྷ་ལོ་ཙ་ནི་སརྦ་ཨརྠ་སཱ་དྷ་ནི་སྭཱ་ཧཱ། སྐུད་པ་ལེགས་པ་ཚད་ལྡན་ལ། །བསང་དར་རྡོ་རྗེའི་མདུད་པ་གསུམ། །མེ་ཏོག་གཏོར་ཞིང་དཔུང་གཡོན་བཅིངས། ཨོཾ་ལོ་ཙ་ནི་ཡ་ཐ་ཏྭད་ཏཾ་སཾ་པྲ་ཏཾ་མི་བྷ་བི་ཤུད་དྷི་རཾ་རཏྣ་ཏྲ་ཡཱ་ཡ་སིདྡྷི་ན་ནི་ད་ད་ཤཱ་ཡ་སྭཱ་ཧཱ། སོ་ཤིང་བཟང་པོའི་ཕུར་བུ་དེ། །བྱིན་བརླབ་ལག་གཏད་སློབ་མས་དོར། ཨོཾ་པྲ་ཏི་བཛྲ་ས་མནྟ་ཨཱིཾ་ཤྭ་རི་ཨཱཿཧཱུཾ་སྭཱ་ཧཱ། ཕྱོགས་བལྟས་དུར་བའི་སྔས་གདན་གྱིས། །ཉལ་ནས་ཇི་ལྟར་མཐོང་བ་སྨྲ། །གོ་བདེའི་རྣམ་པ་བླ་མས་བཤད། །ཞི་བའི་ལས་ཀྱི་སྡིག་སྒྲིབ་རྣམས། །བགེགས་རྣམས་ཞི་བ་དོན་དུ་བསྲེག །གོས་བཟང་བགོས་པའི་ཤིཀྵ་ཡིས། །ཐལ་སྦྱར་འཇུག་པར་གསོལ་བ་བཏབ། །གནང་བ་སྦྱིན་ཞིང་ཡི་དམ་ལྷས། །ཐུགས་རྗེས་གཟུང་བར་གསོལ་བ་གདབ། །དམ་ཚིག་ཆུ་བྱིན་གསང་བ་བསྒྲག །ཡེ་ཤེས་ལྷ་ཡི་བྱིན་རླབས་དབབ། །ཨཱོཾ་ཏིཥྛ་མ་ཧཱ་ཀྲོ་དྷ་ཨཱ་བེ་ཤཱ་ཡ་ཧཱུཾ། བཛྲ་སཏྭ་ཧི་མ་ཧེ་བིདྱཱ་རཱ་ཛཱ་ཡ་བྷྱོ་མ་ཧེ་ཕཊ།
དཀྱིལ་འཁོར་མཆོག་གི་བསྟན་པར་བྱ། །རང་བཞིན་དཀྱིལ་འཁོར་རང་གནས་མཐོང་། །སླར་ཡང་དབང་བསྐུར་གསོལ་གདབ་བསྐུར། །བུམ་པ་མི་བསྐྱོད་རྡོ་རྗེའི་ཆུ། །མགོ་ཐོག་རྣམ་ཤེས་ཕུང་པོར་བསྐུར། ཨོཾ་མ་ཧཱ་ས་མ་ཡ་ཨཱིཾ་ཤྭ་ར་ཏཾ་ཨ་བྷི་ཥིཉྩཱ་མི་སྭཱ་ཧཱ། ཨཱོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ས་མ་ཡ་ཤྲི་ཡེ་ཨཱཿཧཱུཾ། དབུ་རྒྱན་ཅོད་པན་བཟང་པོ་ཡིས། །ཡོན་ཏན་རིན་ཆེན་འབྱུང་ལྡན་བསྒོམ། །ཨཱོཾ་སརྦ་ཏ་ཐཱ་ག་ཏ་རཏྣ་མུ་ཀུ་ཊ་པུ་ཛཱ་ཡ་ཨ་དྷིཥྛ་ཡཱ་མི་ཨཱཿཧཱུཾ། རྡོ་རྗེ་ཡེ་ཤེས་ལྔ་རྫོགས་པའི། །འོད་དཔག་མེད་པ་ལག་གཡས་སྦྱིན། །ཀུན་བཟང་བརྟུལ་ཞུགས་རྡོ་རྗེ་ལོངས། །དངོས་གྲུབ་བཟང་པོ་ཟ་བར་གྱིས། ཨཱོཾ་བཛྲ་པཱ་ཎི་ཨ་བྷི་ཥཱིཉྩ་ཧཱུཾ། དྲིལ་བུ་རལ་གྲི་དོན་གྲུབ་ནི། །ལག་པ་གཡོན་པ་དོན་ཡོད་གྲུབ། །ཨཱོཾ་དྷཱ་ཏུ་ཨ་བྷི་ཥཱིཉྩ་ཧཱུཾ། རྣམ་པར་སྣང་མཛད་ངོ་བོ་དེ། །རང་བཞིན་གསལ་བར་གྱུར་པ་དང་། །རྡོ་རྗེའི་མིང་གི་དབང་ཡང་བསྐུར། །གཟུགས་ཀྱི་ཕུང་པོ་རྣམ་པར་བསྒོམ། ཨཱོཾ་སརྦ་ཏ་ཐཱ་ག་ཏ་ཆེ་གེ་མོ་བཛྲ་སཏྭཾ་ཨ་བྷི་ཥིཉྩ་མི་སྭཱ་ཧཱ། དེ་ཡིས་རྡོ་རྗེ་སློབ་དཔོན་དང་། །ཉན་དང་འཆད་དང་ཕྲིན་ལས་དང་། །རྡོ་རྗེ་རྒྱལ་པོ་འགྲུབ་པ་ཡི། །དབང་མཆོག་འདོད་པ་ཚིམ་པར་བྱ། །གཟུངས་མ་བསྟན་པ་ཞུ་བའི་ཕྱིར། །གདོལ་པ་མོ་དང་ཁྲུས་མཁན་འོང་། །སྨེ་ཤ་ཅན་དང་གར་མཁན་མ། །རོ་སྲེག་མོ་དང་བྲམ་ཟེ་མོ། །འགྲུབ་འགྱུར་དོན་དུ་རྣལ་འབྱོར་པས། །བདག་ཉིད་རོ་གཅིག་གནས་པར་བྱ། །རིན་ཆེན་པདྨ་དེ་བཞིན་ལས། །འཁོར་ལོའི་རིགས་སུ་ཤེས་པར་བྱ། །རྡོ་རྗེའི་རིགས་སུ་བརྗོད་པ་དེའོ། །མ་དང་སྲིང་མོ་བུ་མོ་དང་། །ཆུང་མ་མནའ་མའམ་སྒྱུག་མོ་དང་། །ལུགས་ལས་ལྡོག་པར་ཤེས་པ་ཡིན། །སེམས་དང་ངག་ལུས་སྲོག་དང་ནི། །ཐུར་སེལ་དབུ་མའི་རླུང་ཞེས་བྱ། །ས་ཆུ་མེ་རླུང་ནམ་མཁའ་དང་། །ནམ་མཁའ་ཆེན་པོར་རབ་ཤེས་ནས། །མངར་སྐྱུར་ཁ་བ་ལན་ཚྭ་རོ། །བསྐ་བ་ཚ་བ་དངོས་གྲུབ་སྟེ། །དེ་དག་ཤེས་ནས་རང་བཞིན་མེད། །དེ་ལ་དངོས་གྲུབ་བླང་བར་བྱ། །དགའ་བ་མཆོག་དགའ་དགའ་བྲལ་དང་། །
ལྷན་ཅིག་སྐྱེས་པའི་ཡེ་ཤེས་སོ། །བ་དང་བེའུ་བྱ་དང་བྱིའུ། །བུང་བ་མེ་ཏོག་ལས་ཤེས་ཏེ། །རང་བཞིན་བདེ་བ་བླང་བྱ་ཞིང་། །སངས་རྒྱས་རྣམས་ལ་མཆོད་པ་འབུལ། །ཤིན་ཏུ་ཆགས་བྲལ་ཆགས་ཆེན་པོས། །བདེ་བ་ཆེན་པོ་བླང་བར་བྱ། །རང་ལུས་སྲོག་དང་རྒྱལ་སྲིད་དང་། །གཅེས་པའི་རྣམ་པས་མཉེས་པར་བྱ། །འདི་དང་ཕྱི་མར་བདེ་ལྡན་པའི། །ཡོན་ཏན་བརྗོད་ལས་འདས་པར་འགྱུར། །གང་ཡིན་བགེགས་ལ་གཏོར་མས་མཆོད། །རྟག་ཏུ་དམ་ཚིག་ལག་ནས་བྱ། །ཨུཙྪིཥྚ་ཀྵེ་ཏྲ་པཱ་ལ་ཨེ་ཧྱེ་ཧི་ཙཀྲ་ཨུཙྪིཥྚ་སུ་བྷོ་ཛ་ནཾ་བི་བ་པི་བ་བྷཀྵ་བྷཀྵ་སརྦ་སིདྡྷིམྨེ་པྲ་ཡཙྪ་མེ་ཨཱཿཧཱུཾ་ཕཊ་སྭཱ་ཧཱ། ཞེས་གསུངས་སོ། །དབང་ཆེན་འདུས་པའི་རྒྱུད་ལས། དཀྱིལ་འཁོར་དང་དབང་བསྐུར་བའི་ལེའུ་སྟེ་བརྒྱད་པའོ།། །།དེ་ནས་བཅོམ་ལྡན་འདས་ཀྱིས་མཉེས་པ་ཆེན་པོ་འདི་གསུངས་སོ། །ཨོཾ་བསོད་ནམས་ཡེ་ཤེས་ཚོགས་རྫོགས་སྐུ། །རྡོ་རྗེའི་གསུང་དབྱངས་དྲུག་ཅུར་སྒྲོག །མི་རྟོག་ཐམས་ཅད་མཁྱེན་པའི་ཐུགས། །ཡོན་ཏན་མ་ལུས་རེ་བ་སྐོང་། །ཞི་རྒྱས་དབང་དྲག་ལྷུན་གྲུབ་པ། །རྡོ་རྗེ་དབྱིངས་ལ་ཕྱག་འཚལ་ལོ། །ཨ་ཧོ། ཧཱུཾ་དྲི་མེད་རྣམ་དག་ཞི་བ་ལས། །སྤྲོས་པ་ཐམས་ཅད་རབ་ཞི་བའི། །ཡེ་ཤེས་ཚོགས་མཆོག་མངའ་བརྙེས་པ། །རང་བཞིན་དག་པས་ཆོས་ཀྱི་སྐུ། །ཐུགས་རྗེས་སྡུག་བསྔལ་སེལ་མཛད་པ། །བསོད་ནམས་ཚོགས་རྫོགས་གཟུགས་ཀྱི་སྐུ། །ལས་དང་ཉོན་མོངས་ཤེས་བྱ་ཡི། །དྲི་མ་སྤངས་པའི་སྐུར་སྤྲུལ་པ། །གསུང་མཆོག་སྐུ་གསུམ་དག་པ་ལ། །ལུས་ངག་སེམས་ཀྱིས་ཕྱག་འཚལ་བསྟོད། །ཐུགས་རྗེ་ཆེན་པོས་གཟུང་བ་དང་། །ཡེ་ཤེས་སྣང་བ་གསལ་བར་མཛོད། ཨ་ཧོ། ཨོཾ་ཆོས་དབྱིངས་སྐྱེ་བ་མེད་པ་ལས། །ཐུགས་རྗེའི་དབང་གིས་སྐུར་བཞེངས་པ། །དབང་མཆོག་རྡོ་རྗེ་སེམས་དཔའ་ནི། །སངས་རྒྱས་ཀུན་གྱི་གསང་བའི་ཐུགས། །རབ་ཏུ་མི་རྟོག་དངོས་མེད་པ། །ཐུགས་མཆོག་ཁྱོད་ལ་ཕྱག་འཚལ་བསྟོད། །དབང་ཆེན་འདུས་པའི་ཏན་ཏྲ་ལས། བསྟོད་ཅིང་ལས་བཅོལ་པའི་གུས་པ་བསྟན་པའི་ལེའུ་སྟེ་དགུ་པའོ།། །།དེ་ནས་བཅོམ་
ལྡན་འདས་གདུག་པ་འདུལ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་ལས་མ་དག་པའི་སྣང་བ་ཞེས་བྱ་བ་འདི་གསུངས་སོ། །ཀུན་ཏུ་བཀོད་པའི་བསྐལ་པ་ལ། །མངོན་པར་དགའ་བའི་ཞིང་ཁམས་སུ། །དགེ་སློང་ཐུབ་དཀའ་གཞོན་ནུ་ལ། །ཐར་པ་ནག་པོ་དན་ཕག་གཉིས། །གསང་དོན་ཡན་ལག་རབ་ཞུས་པ། །ཇི་བཞིན་ཉིད་དེ་མ་བཅོས་ན། །དངོས་པོ་བཞི་ལ་གནས་སྤྱད་ཀྱང་། །ནམ་མཁའ་ལ་ནི་སྤྲིན་བཞིན་ཏེ། །རྣལ་འབྱོར་དེ་ཉིད་དམ་པའི་ལམ། །དེ་ཉིད་ལ་ནི་སོ་སོར་གོལ། །གཏུམ་ཚིག་ཞེ་གཅོད་དེ་ཉིད་ཉམས། །དམྱལ་བ་ཡི་དྭགས་དུད་འགྲོ་སོགས། །རྡོ་རྗེའི་སྔགས་ཀྱི་རྣམ་སྨིན་ཕོག །སྲུལ་ནས་སྨད་འཚོང་མ་ཡི་བུ། །དུག་ཤིང་ནལ་བྱི་གདོང་ནག་ཏུ། །ཤ་ཟ་མ་ཡི་དུར་ཁྲོད་བདག །ལྷ་སྲིན་ཡོངས་ཀྱི་འཁོར་གྱིས་བསྐོར། །ལྷ་ཡི་སྡེ་དཔོན་ཀ་རུ་དང་། །སྲིན་པོ་ལང་ཀ་མགྲིན་བཅུ་དང་། །ལྷ་ཀླུ་མི་རྣམས་ལམ་ལོག་སྤྱོད། །ངན་སོང་གསུམ་དུ་འཁོར་བ་ལས། །ཐུགས་རྗེའི་ཞིང་དུ་དེ་གཟིགས་ཏེ། །བདེ་གཤེགས་བཀའ་བགྲོས་བཅད་པ་ཡིས། །ཞི་བས་ཕན་པར་མ་གྱུར་ཏེ། །དེ་བཞིན་གཤེགས་ཀུན་ཁྲོ་བོར་གྱུར། །ཤ་རུས་ཁྲག་ལ་ལོངས་སྤྱོད་ཅིང་། །དུག་གསུམ་མ་ལུས་ཁོང་དུ་ཟོས། ཨོཾ་སརྦ་པཱ་པ་ཀ་ར་ཧེ་ཏ་པ་བི་ཤྭ་མ་ཏྲ་རུ་ཏྲ་ཧཱུཾ་ཕཊ། ཨཱོཾ་སརྦ་པཱ་པ་ཀ་ར་ཧེ་ཏ་ས་བྱི་ཤྭ་ཁ་ཏོང་ཁ་རུ་ཏྲ་ཧཱུཾ་ཕཊ། ཨོཾ་སརྦ་པཱ་པ་ཀ་ར་ཧེ་ཏ་པ་བྱི་ཤྭ་ཨ་ཤ་རུ་དྲ་ཧཱུཾ་ཕཊ། ཧྲི་པདྨཱནྟ་ཀྲྀཏ་བཛྲ་མ་ཧཱ་ཀྲོ་དྷ་ཧ་གྲཱི་བ་ཧཱུཾ་ཕཊ།ཏྲི་ཐུམ་བྷྲཱུཾ་ཛ། ཏེ་ཛ། བ་ཏྲི་ཡཾ་བུ་ཛ། ཡ་ད་ཤོ་ཛ། ག་ན་ཛ། ག་ག་ན་གྲ་ཙི་ཏི་ཙི་ཏི་ཛ། མ་མ་ཆུ་ག་ཛ། མཱ་ར་ཡ་ཧཱུཾ་ཕཊ། དེ་དག་སྣམ་ནས་བཏོན་ནས་ནི། །སྒྲིབ་སྦྱང་བཤགས་ཏེ་སྲོག་སྙིང་ཕུལ། །འཁོར་རྣམས་བྲན་དུ་འཁོལ་ནས་ནི། །དཀྱིལ་འཁོར་སྐྱོང་བར་ཁས་བླངས་ཏེ། །ཐལ་པའི་དབང་པོར་ལུང་བསྟན་ནས། །འདིར་ནི་བསྟན་པ་བསྲུང་བའི་ཕྱིར། །སྲོག་སྔགས་འདི་དག་དངོས་པོར་ཕུལ། །ཤོག་ཧེར་ནི་ཤོག །ཧེ་མ་དུ་མ་རིལ་ཤོག །དེར་ཤོག་འདིར་ཤོག །འདིར་དུཾ་འདིར་དུཾ། ཙི་ཏ་བཾ་ཙི་རྦད།
ཏྲག་རཀྴ་ཐུན་བྷྱོ། ཏྲག་རཀྴ་ཁཾ་ཁཾ། བུཾ་བུཾ་ཤན་ཏི་ཏ་ཤག །ཨཱོཾ་རཀྴ་ཤ་ར་ཏི། མ་ཧཱ་ཀཱ་ལ་ཀཱ་ལ་ཡ་སྟོ་ཡ་ཕཊ། ཡ་སྟོ་ཡ་ཁུག་ཁུག་ནི་ག་ཏ་ཡ་ག་ཏ་ཡ། བེ་ཛེ་བེ་ཛེ་དྲུངས་ཕྱུང་རྩད་ཆོད། ཏྲག་རཀྴ་ཐུམས། ཁ་དུམ་རྦད་རྦད་ཛ་ཛ། ཅེས་སྲོག་ལས་དང་བཅས་པ་ཕུལ་ལོ། །དེ་ཡི་ཆོ་ག་འདི་ཡིན་ནོ། །བྲུབ་ཁུང་ནག་པོ་གྲུ་གསུམ་ནང་། །ཕུར་བུ་ལྕགས་ཀྱི་ཁང་སྒྲོམ་འབར། །མདའ་དང་གསིལ་བྱེད་མཚོན་ཆ་ལ། །ཕུ་རུང་ཆས་གོས་ནག་པོར་ཤེས། །རུ་ཏྲ་ཀཱ་ལ་གྲི་གུག་ཐོད། །བེང་དང་བཅས་པ་བཟླས་པ་བརྩམ། །སློབ་དཔོན་ཆོས་གྲོགས་ཕ་བུ་དང་། །ཡུལ་དཔོན་བཙུན་ཆེན་ཉེ་བ་དང་། །མིང་དང་དོན་སྙིང་ཟ་ན་འགྲུབ། །སྤྲང་པོ་དབྱུག་པ་ཐོགས་པ་ངན། །བླ་འབྱེད་ཁྲི་ཚོས་འདྲེལ་བ་དང་། །ལུས་ངག་སེམས་ཀྱི་ལས་སུ་ནི། །བསྐོར་བ་བཟླས་བརྗོད་ཏིང་འཛིན་ཡིན། །བསྙེན་པ་ཐབས་ཀྱིས་བསྐོར་བར་བྱ། །རྦད་བསད་ཤེས་རབ་མེ་དང་མཚུངས། །སྦྱིན་བསྲེག་ཐལ་བ་ཕྱར་རམ་མནན། །དམ་ཚིག་ལ་སྡང་སྨོས་ཅི་དགོས། །དབང་ཆེན་འདུས་པའི་ཏན་ཏྲ་ལས། ་ཏྲ་བསྒྲུབ་པ་ཁྲོ་བོའི་གླེང་གཞི་བཅས་པ་སྟེ་ལེའུ་བཅུ་པའོ།། །།དེ་ནས་བཅོམ་ལྡན་འདས་ཀྱིས་ཁྲོ་བོ་ཐམས་ཅད་རབ་ཏུ་གསལ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་འདི་སྐད་དོ། །བདེ་བ་ཆེན་པོ་གར་དབང་ཕྱུག །པདྨ་རཱ་ག་ཀུན་ཏུ་ཞལ། །དབུ་ལྔ་མགོ་ལྔ་གཤོག་པ་བཞི། །ཤར་དུ་རོལ་པའི་ཕྱག་མཚན་ནི། །ཁྲོ་ཆེན་སྙིང་འབྱིན་ཁ་ཊྭཱཾ་ག །རྡོ་རྗེ་ལྕགས་ཀྱུ་སྦྲུལ་ཞགས་དང་། །ལྷོ་རུ་རོལ་པའི་ཕྱག་མཚན་ནི། །ཐོད་ཁྲག་རྡོ་རྗེ་ལུ་གུ་རྒྱུད། །རྡོ་རྗེ་བེ་ཅོན་རྔེའུ་ཆུང་། །ནུབ་ཀྱི་ཕྱག་བཞིར་བསྣམས་པ་ནི། །མེ་ཡི་ཞགས་པ་ཁྱུང་གི་ཁྲ། །སྡིགས་མཛུབ་མེ་འབར་ཁ་ཊྭཱཾ་འཁྲོལ། །བྱང་གི་ཕྱག་བཞིར་བསྣམས་པ་ནི། །རྡོ་རྗེ་དགུ་ལྔ་གསུམ་གཅིག་བརྡེག །ཞབས་བརྒྱད་ཁྲོ་བརྫིས་རྒྱན་དང་ལྡན། །སྐུ་ཡི་དབང་ཆེན་འདི་གསུངས་སོ། །སྲོག་དང་རྩོལ་པའི་བདག་ཉིད་ཅན། །འཇུག་གནས་ལྡང་བས་ཕྱི་དང་ནང་། །དེ་གཉིས་འདྲེལ་བའི་བདག་ཉིད་ཅན། །དེ་ཉིད་
ཁོ་ན་ངོ་བོར་གསལ། །ཚོགས་ཆེན་ཡོངས་འདུས་གར་གྱི་དབང་། །དབུ་ལྔ་དམར་པོ་རྟ་མགོ་ལྔ། །ཕྱག་ནི་བཅུ་དྲུག་གཤོག་པ་བཞི། །ཞབས་བརྒྱད་རྔོམ་བརྗིད་དུར་ཁྲོད་བརྒྱན། །གཡས་ཀྱི་ཕྱག་བརྒྱད་བསྣམས་པ་ནི། །རྡོ་རྗེ་ཁ་ཊྭཱཾ་དྲིལ་བུར་བཅས། །རྡོ་རྗེ་ལྕགས་ཀྱུ་སྦྲུལ་ཞགས་དང་། །འཁོར་ལོ་རིན་ཆེན་ཟུར་བརྒྱད་དང་། །རལ་གྲི་རྡོ་རྗེ་ལུ་གུ་རྒྱུད། །པདྨ་ཡུ་འཛིན་ཐོད་ཁྲག་བཀང་། །ཁྲོ་སྙིང་གཤིན་རྗེའི་དབྱུག་པ་དང་། །རྒྱ་གྲམ་རྡོ་རྗེ་བེ་ཅོན་དང་། །མེ་ཕྲེང་ཏྲི་ཤཱུལ་ཁྱུང་གི་ཁྲ། །གསུང་གི་དབང་ཆེན་འདི་གསུངས་སོ། །སྲོག་དང་ཐུར་སེལ་གྱེན་རྒྱུ་དང་། །མཉམ་དུ་གནས་དང་ཁྱབ་པར་བྱེད། །ལྡང་ཤིང་རྒྱུ་བ་རྣམ་པར་རྒྱུ། །ཡང་དག་རབ་ཏུ་ངེས་པར་རྒྱུ། །པདྨ་གསང་བ་དབང་ཆེན་སྐུ། །པདྨ་གསང་བའི་སྐུར་བྱུང་བས། །དབུ་ལྔ་དམར་པོ་གཤོག་པ་བཞི། །ཞབས་བརྒྱད་བཅུ་དྲུག་ཕྱག་རྒྱ་ཆེ། །རྡོ་རྗེ་ལྕགས་ཀྱུ་སྦྲུལ་ཞགས་དང་། །ཅང་ཏེའུ་ཁ་ཊྭཱཾ་ཐོད་རློན་ཁྲག །རྡོ་རྗེ་རྩེ་དགུ་རྩེ་ལྔ་དང་། །རྩེ་གསུམ་རྩེ་གཅིག་འབར་བ་དང་། །རྡོ་རྗེ་ལྕགས་ཀྱུ་ལུ་གུ་རྒྱུད། །ཐོད་རློན་སྟོབས་དང་ཁྲོ་བརྒྱད་སྙིང་། །མེ་ཡི་ཞགས་པ་ཁྱུང་གི་ཁྲ། །སྡིགས་མཛུབ་མེ་འབར་ཁ་ཊྭཱཾ་འཁྲོལ། །ཐུགས་ཀྱི་དཔལ་ཆེན་འདི་གསུངས་སོ། །སྙིང་ག་གསང་བ་ལྐོག་མ་དང་། །ལྟེ་བ་དང་ནི་ཚིགས་རྣམས་ལ། །རྒྱས་དང་རྣམ་པར་རྒྱས་པ་དང་། །མྱོང་ལྟུང་མཛའ་བའི་རྩ་ལ་གནས། །མིག་དང་རྣ་བ་སྣ་དང་ནི། །ལྕེ་དང་ལུས་དང་སྐྱེ་མཆེད་ལ། །རླུང་གི་ཆ་དང་སྣ་དང་ནི། །བསྙེན་བཀུར་ལྐོག་ཤལ་མཆིན་པར་གནས། །ཤེས་རབ་རྟ་མགྲིན་དབང་གི་སྐུ། །དབུ་གསུམ་རྟ་མགོ་ལྗང་གུ་ནི། །རལ་པ་དམར་པོ་གྱེན་དུ་འཁྱིལ། །ལྕགས་སྒྲོག་རལ་གྲི་དགྲ་སྟྭ་གཡས། །ལྕགས་སྒྲོག་གཤོལ་དང་ཐོ་བ་གཡོན། །བརྐྱང་བསྐུམ་ཆུ་བདག་ཉི་སྟེང་བགྲད། །ཨེ་ཀ་དམར་ནག་དུར་ཁྲོད་ཆས། །ཁ་ཊྭཱཾ་ཐོད་རློན་དམར་བཀང་སྟོབ། །ཕྲ་མེན་བྱི་ལ་པུ་ཤུད་མགོ། །དམར་ནག་བསྐལ་པའི་མེ་འབར་བ། །ལྕགས་ཀྱུ་ཕུར་པ་འཛིན་ཅིང་འདེབས། །རྩ་
བའི་ལྷ་བཞི་འདི་གསུངས་སོ། །བག་ཆགས་ཉོན་མོངས་རླུང་ངོ་བོ། །དབང་པོ་གཉིས་དང་མཉམ་སྦྱོར་འཇུག །སྲོག་རླུང་ཉ་འདྲ་དང་པོར་འཕོ། །གཉིས་པ་ཐུར་སེལ་རུས་སྦལ་འདྲ། །གསུམ་པ་གྱེན་རྒྱུ་ཕག་རྒོད་འདྲ། །དྲུག་པ་ཁྱབ་བྱེད་སེང་གེ་འཕོ། །ལྔ་པར་མཉམ་གནས་མི་ཡི་གཟུགས། །དྲུག་པ་ལས་རླུང་ས་ཁམས་མིག །བདུན་པ་རྣ་བར་རུས་སྦལ་ཆུ། །བརྒྱད་པ་རྩ་རླུང་སྣ་བུག་མེ། །དགུ་པར་ལྷ་སྦྱིན་རླུང་ཁམས་རོ། །བཅུ་པ་གཞུ་རྒྱབ་ལུས་ཁམས་ཅན། །སངས་རྒྱས་སྤྲུལ་པའི་སྐུ་འདྲ་བ། །རབ་ཏུ་སྐྱེ་བར་དེ་ཡིས་བྱ། །པདྨ་གར་གྱི་དབང་ཕྱུག་ནི། །ཞལ་གསུམ་ཕྱག་བརྒྱད་ཞབས་བཞིར་བགྲད། །དཀར་དང་དམར་ནག་ལྗང་ནག་ཞལ། །དབུ་གཙུག་རྟ་མགོ་ལྗང་གུ་ནི། །གྱེན་དུ་ཁ་གདངས་རྟ་སྐད་འཚེར། ༈ །ཁ་ཊྭཱཾ་རལ་གྲི་རྔེའུ་ཆུང་དང་། །དགྲ་སྟྭ་གཡས་ཀྱི་ཕྱག་ན་འཛིན། །ཡེ་ཤེས་མདའ་དང་དབྱིངས་ཀྱི་གཞུ། །མདུང་ཐུང་གསེར་གྱི་ཞགས་པ་གཡོན། །སྤྱི་གཙུག་ཡེ་ཤེས་ཁྱུང་ཆེན་རྫོགས། །ཐུགས་ལ་རྡོ་རྗེ་གཏུམ་པོ་འབར། །པདྨ་གར་གྱི་དབང་མོ་ནི། །ཞལ་གཅིག་ཕྱག་གཉིས་སྐུ་མདོག་དམར། །གཡས་པ་རྡོ་རྗེ་ཡབ་ལ་འཁྱུད། །གཡོན་པ་བདུད་རྩི་ཡབ་ལ་སྟོབ། །དྲག་པོ་གསུམ་སྦས་འདི་གསུངས་སོ། །ལུས་ཀྱི་སྲོག་རྣམས་གསུམ་འཛིན་ཅིང་། །རླུང་རྣམས་ཕྲ་བའི་གཟུགས་ཀྱིས་ནི། །ཤེལ་དང་ཡང་དག་འདྲེས་གྱུར་ནས། །དབང་པོའི་ལམ་ནས་བྱུང་ནས་ནི། །ཡུལ་རྣམས་ལ་ནི་འཇུག་པར་བྱེད། །སྣང་བ་གསུམ་དུ་གྱུར་ནས་ནི། །རང་བཞིན་རྟོག་བཅས་བརྒྱད་ཅུ་པའོ། །ཡོངས་ལ་འཆར་ཞིང་འཇུག་པ་ནི། །རྟ་མཆོག་རཱ་གའི་མདོག་ལྡན་པ། །ཞལ་གསུམ་ཕྱག་དྲུག་ཞབས་བཞིར་གནས། །དམར་དང་དཀར་བ་མཐིང་གའི་གཟུགས། །རྟ་མགོ་ལྗང་གུ་འཁྲུལ་མར་འགྱུར། །དང་པོ་རྡོ་རྗེ་བྷན་དམར་འཕྱར། །བར་གཉིས་ལུ་གུ་རྒྱུད་བསྣམས་པ། །ཐ་མ་རྡོ་རྗེ་ཕུར་བུ་འདྲིལ། །ཁྲོ་གཉེར་མ་ནི་འབར་འདྲ་འཁྲིལ། །མོ་ཡི་རྟགས་ལྡན་བྱང་ཆུབ་སེམས། །མཐར་བྱེད་རྟ་ཡིས་འདི་དག་གསུངས། །ཐོག་མར་ལོ་བཅུ་
ལོན་པའི་དུས། །རྒྱགས་པས་མྱོས་པས་གཞུ་རྒྱལ་ཟ། །ལོ་བཅུས་དེ་ཡིས་ལྷ་སྦྱིན་ཟ། །ལོ་བཅུས་རྒྱགས་རླུང་རྩངས་པ་ཟ། །ལོ་བཅུ་བཏང་བཟུང་རུས་སྦལ་ཟ། །རླུང་དང་བཏང་བཟུང་ནུས་སྟོབས་མཚུངས། །གནོད་པ་མེད་པ་ལོ་བཅུ་ཡིན། །བཅུ་གཞན་རྒྱགས་མྱོས་བཏང་བཟུང་ཟ། །བཅུ་པས་མྱོས་ཆུ་ཚེ་འཕེལ་བྱ། །བཅུ་གཞན་མྱོས་པའི་རླུང་ཟ་བྱེད། །མེ་རླུང་བཏང་བཟུང་ལོངས་སྤྱོད་འཕེལ། །མེ་ཆུ་རླུང་རྒྱས་ཆུ་རླུང་འདྲེས། །དེ་ལྟར་ལོ་བཅུ་གཞན་དུ་ཕྱིན། །ཆུ་བཞི་འབྲས་བུ་བཞིན་དུ་འགྱུར། །རང་སེམས་ཐིག་ལེ་རོལ་པའི་སྐུ། །གཡས་དཀར་གཡོན་སྔོ་དབུས་དམར་བ། །རྟ་མགོ་ལྗང་གུ་རྟ་སྐད་འཚེར། །རྡོ་རྗེ་རལ་གྲི་ལྕགས་སྒྲོག་དང་། །ཐོད་པ་ལྕགས་ཀྱུ་ཞགས་པ་རྣམས། །ཞབས་བཞི་རིགས་བཞི་ཀླུའི་སྟེངས་ན། །ངོ་བོ་ཉིད་ཀྱི་ཡུམ་དང་འཁྲིལ། །ཐིག་ལེ་རོལ་པས་འདི་གསུངས་སོ། །མཐར་ནི་མི་གནས་འཕོ་བ་ཡིས། །མི་ཤིགས་འཆི་བ་འོད་གསལ་བྱེད། །སྣང་བ་གསུམ་དང་རླུང་མཉམ་པས། །བར་དོར་དངངས་ཤིང་ལུས་རྣམས་ལེན། །ཞལ་གསུམ་དཀར་དམར་བཻ་ཌཱུརྱ། །སྐུ་གསུང་ཐུགས་ཀྱི་ཁྱུང་གསུམ་རྫོགས། །ཞིང་དབྱུག་རལ་གྲི་རྩེ་དགུ་དང་། །ལྟོ་འགྲོའི་ཞགས་པ་གཡོན་པ་སྟེ། །བེ་ཅོན་མགོ་གཉིས་རྡོ་རྗེ་བསྣམས། །ཡེ་ཤེས་ཆེན་པོས་འདི་གསུངས་སོ། །རླུང་དང་རྣམ་ཤེས་འདྲེས་པའི་ལས། །ཇི་ལྟར་ལྷ་ཡི་སྐུ་རྣམས་ནི། །ཡོངས་སུ་གསལ་བར་བསྐྱེད་པ་ཡི། །བྱ་བ་ཀུན་ཡང་འགྲུབ་པར་བྱེད། །དཀར་དམར་སྔོ་བའི་ཞལ་གསུམ་མདོག །རྡོ་རྗེ་རིན་ཆེན་དབྱུག་པ་གཡས། །ཁྲོ་འཛུམ་མ་ཆགས་པདྨ་གཡོན། །བདེ་བ་ཆེན་པོས་འདི་གསུངས་སོ། །བདེ་ཆེན་པདྨའི་གསང་སྦུབས་སུ། །ས་ཡི་རླུང་ཆེན་རྣམ་པར་རྒྱུ། །བྱང་ཆུབ་སེམས་ཀྱི་ཐིག་ལེ་འདི། །བདེ་བ་ཆེན་གྱི་ཡེ་ཤེས་ཐོབ། །དམར་པོ་ཞལ་གསུམ་ཕྱག་དྲུག་པ། །ཞལ་ནི་དེ་བཞིན་མཚུངས་པ་ལ། །པདྨ་རལ་གྲི་གཏུན་ཤིང་གཡས། །དྲིལ་བུ་དགྲ་སྟྭ་མེ་ཡི་ཞགས། །འཕགས་པ་
རྟ་མགྲིན་འདི་གསུངས་སོ། །ཡི་གེ་ཨོཾ་ནི་སྐུ་ཡིན་ཏེ། །ཨཱཿཞེས་བྱ་བ་གསུང་དུ་འགྱུར། །ཧཱུཾ་ནི་མི་རྟོག་ཡེ་ཤེས་ཐུགས། །རྡོ་རྗེའི་བཟླས་པ་འགྲུབ་པ་ཡིན། །ཞལ་གསུམ་ཕྱག་དྲུག་ཞབས་བཞིར་བགྲད། །དཀར་དང་དམར་དང་སྔོ་བའི་མདོག །མུཉྫའི་གསེབ་ནས་ལྗང་ཞུར་ཅན། །གྱེན་དུ་ཁ་གདངས་ཧྲཱྀཿསྒྲ་འབྱིན། །གཡས་རྡོར་གཡོན་པ་དུང་ཕོར་འཛིན། །ཐ་མས་ཐབས་ཤེས་མདའ་གཞུ་ཅན། །གསང་བའི་ཡུམ་བཞི་འཁོར་དུ་གནས། །གྲི་གུག་ཐོད་པ་གཡས་གཡོན་འཛིན། །རྟ་མགྲིན་ལྷ་ལྔས་འདི་གསུངས་སོ། །རླུང་ལྔ་ལ་ནི་དབང་ཐོབ་ནས། །དེ་ལས་སེམས་གསུམ་སྐྱེ་བ་དང་། །མ་དག་པ་ཡི་སྒྱུ་མ་འགྲུབ། །བསམ་གཏན་གཉིས་ཀྱི་འོད་གསལ་དུ། །དེ་ཉིད་མངོན་དུ་བྱེད་པ་སྟེ། །དག་པའི་སྒྱུ་མའང་འགྲུབ་པ་ཡིན། །གཡས་དཀར་དབུས་དམར་གཡོན་མཐིང་ལྗང་། །སངས་རྒྱས་འོད་ཀྱི་གོང་བུ་ན། །རྡོ་རྗེ་ཁ་ཊྭཱཾ་སྦྲུལ་ཞགས་གཡས། །དྲིལ་བུ་བྷན་དམར་ལྕགས་སྒྲོག་གཡོན། །ཨེ་ཀ་ཙ་ཏི་དམར་ནག་འཁྲིལ། །ཁ་ཊྭཱཾ་ཐོད་པ་ཞལ་གསུམ་འདྲེན། །ཀུན་ཏུ་ཁ་སྦྱོར་འདི་གསུངས་སོ། །ལ་ལས་རང་སྲོག་འཛིན་པ་དང་། །དྲི་ཆུ་ཁུ་བ་ཐུར་དུ་སེལ། །ཟས་དང་བཏུང་བ་འཇུ་བ་དང་། །གཏམ་སོགས་སྒྲ་ནི་འབྱུང་བ་དང་། །འགྲོ་དང་ལྡོག་པའི་ལས་ཆེན་དེ། །སྲོག་ཐུར་མེ་གྱེན་ཁྱབ་པའི་ལས། །དམར་པོ་པདྨ་སྡིགས་མཛུབ་གཡོན། །ཁྱུང་ཆེན་དཀར་གསལ་ཐུགས་ལ་རྫོགས། །ཀླུ་རྣམས་འདུལ་མཛད་རྒྱན་དུ་ཆེ། །ནཱ་ག་གནོད་འདུལ་འདི་གསུངས་སོ། །རྒྱུ་བ་གཟུང་འཛིན་རྣམ་རྒྱུ་སྒྲ། །ཡང་དག་དྲིལ་བ་རབ་རྒྱུའོ། །ངེས་པར་རྒྱུ་བ་རེག་བྱ་སྟེ། །དབང་པོ་རབ་ཏུ་ལས་ཀྱི་བདག །ཧྲཱྀཿསྒྲ་རྡོ་རྗེའི་སྐུར་རྫོགས་པ། །དབུ་གསུམ་དེ་བཞིན་ཕྱག་རྒྱ་དྲུག །རྡོ་རྗེ་པདྨ་རྒྱུ་མ་དང་། །དུང་ཆེན་རྔེའུ་ཆུང་ཁ་ཊྭཱཾ་འཁྲོལ། །དམར་སྐྱ་རྡོ་རྗེ་ཐོད་ཅན་ཡུམ། །དཔལ་ཆེན་འབར་བས་འདི་གསུངས་སོ། །རྟེན་ནི་ཟུང་དུ་འཇུག་ལ་གནས། །རྡོ་རྗེའི་བཟླས་པས་ལས་བཞི་འགྲུབ། །ཁྱབ་བྱེད་རྣལ་
འབྱོར་བར་མ་དོར། །རང་བཞིན་འོད་གསལ་ཉམས་སུ་མྱོང་། །ཧྲཱྀཿལས་སྐྱེས་པའི་ཕྱག་རྒྱ་ཆེ། །དཀར་དང་དམར་དང་ལྗང་སྔོན་ཞལ། །དང་པོ་ཁ་ཊྭཱཾ་རྔེའུ་ཆུང་འཛིན། །བར་གཉིས་སྙིང་འདྲེན་ཕྱག་བྱས་པ། །མཐའ་གཉིས་ཞིང་དབྱུག་བྷནྡྷ་འཛིན། །རྟ་མགྲིན་གཏུམ་པོས་འདི་གསུངས་སོ། །རྡོ་རྗེ་སྤྱན་ལ་སོགས་པ་ཡི། །མངོན་པར་ཤེས་པ་ལྔ་དང་ལྡན། །དེ་ཀུན་ཟག་པ་ཡོད་མེད་པ། །གནས་སྐབས་དང་ནི་མཐར་ཐུག་གོ། །སྟོང་ཉིད་ཡེ་ཤེས་ཁྱབ་པའི་སྐུ། །ཞལ་གཅིག་ཕྱག་བཞི་བརྐྱང་བསྐུམ་ཞབས། །གཡས་པ་ཐོད་དབྱུག་སྡིགས་མཛུབ་མེ། །ཆོས་འཁོར་སྐྱོན་མེད་པདྨ་འཛིན། །བརྐྱང་བསྐུམ་ཞབས་དང་ལྡན་པ་ཡི། །དཔའ་བོ་གཅིག་པས་འདི་གསུངས་སོ། །ཕུང་པོ་ཁམས་ནི་ལྔ་འགྲུབ་བྱེད། །ཡུལ་ལྔའི་རང་བཞིན་ཀུན་དང་ལྡན། །དམར་པོ་པདྨ་གཡོན་དྲིལ་བུ། །དམར་པོ་གྲི་གུག་ཐོད་པ་འཛིན། །ཡབ་ཡུམ་ཞལ་གཅིག་ཕྱག་གཉིས་ཞབས། །པདྨ་ཁྲོ་རྒྱལ་འདི་གསུངས་སོ། །ཆུ་ནི་ཞེ་སྡང་རྡོ་རྗེ་ལ། །ས་ནི་ང་རྒྱལ་རིན་པོ་ཆེ། །མེ་ནི་ཆོས་རྗེ་འོད་དཔག་མེད། །རླུང་ནི་རྟ་མཆོག་ཀུན་ཏུ་ལས། །རྟེན་དང་བརྟེན་པར་བཟུང་བ་ནི། །རྣམ་པར་སྣང་མཛད་ཀུན་ཏུ་གསལ། །དམར་པོ་གྲི་གུག་ཐོད་པ་ཅན། །འཇིགས་བྱེད་དཔལ་གྱིས་འདི་གསུངས་སོ། །ཆོས་དབྱིངས་སྲོག་ལ་མཉམ་ཉིད་ཐུར། །སོར་རྟོག་གྱེན་ལ་མེ་མཉམ་གྲུབ། །ཁྱབ་པ་མེ་ལོང་ཡེ་ཤེས་སོ། །རཱ་གའི་མདོག་འདྲ་དབྱུག་པ་ཅན། །སྡིགས་མཛུབ་མཛད་པས་འདི་གསུངས་སོ། །གཟུགས་སྒྲ་དྲི་རོ་རེག་བྱ་ཡི། །ཆོས་ཀྱི་ལྷ་མོས་མཆོད་པར་བྱེད། །ཞལ་གསུམ་པ་ལ་འཇིགས་འཇིགས་བལྟ། །རྡོ་རྗེ་དུང་དམར་དབྱུག་པ་དང་། །ཞགས་པ་མཛུབ་མོ་རིགས་ལྔའི་ཁྱུང་། །ཁྱུང་གཤོག་མ་ཡིས་འདི་གསུངས་སོ། །ས་ཆུ་མེ་རླུང་རྣམ་པ་བཞི། །ཕྱི་རོལ་སྟོན་དཔྱིད་དབྱར་རྒུན་རྒྱུ། །ཟླ་བ་ཉིན་ཞག་བཅས་པ་ལ། །གཡས་པ་ནས་ནི་འབྱུང་བའི་ཁམས། །མེ་ཡི་དཀྱིལ་འཁོར་ཉིད་ཡིན་ཏེ། །ཁ་
དོག་དམར་བ་བཟང་པོ་འདི། །བཅོམ་ལྡན་ཆགས་པ་ཆེན་པོའོ། །གཡོན་པ་དག་ནི་འབྱུང་བའི་ཁམས། །རླུང་གི་དཀྱིལ་འཁོར་དང་འདྲེས་པས། །ལྗང་སེར་དག་ཏུ་སྣང་བ་སྟེ། །བཅོམ་ལྡན་ལས་རབ་ཆེན་པོ་རབ། །གཉིས་པ་ལས་ནི་འབྱུང་བའི་ཁམས། །གསེར་གྱི་མདོག་ཏུ་སྣང་བ་སྟེ། །དབང་ཆེན་གྱི་ནི་དཀྱིལ་འཁོར་ཉིད། །བཅོམ་ལྡན་དཀོན་མཆོག་དཔལ་ཡིན་ནོ། །དལ་ཞིང་རྒྱུ་བ་མེད་པའི་ཁམས། །དག་པའི་ཤེལ་ལྟར་སྣང་བ་ནི། །འདི་ནི་ཆུ་ཡི་དཀྱིལ་འཁོར་ཏེ། །བཅོམ་ལྡན་རྡོ་རྗེ་བརྟན་པའོ། །ཁམས་ཀུན་ལས་ནི་ཡང་དག་བྱུང་། །རྟེན་དང་བརྟེན་པར་བཟུང་བ་ནི། །རྣམ་པར་སྣང་མཛད་རང་བཞིན་ཏེ། །འཆི་བའི་མཐར་ནི་འབྱུང་བར་གྱུར། །གཙོ་ལ་འཁོར་དུ་སྣང་བ་ནི། །གྱེན་ལ་མེ་སྟེ་གསེག་ལ་རླུང་། །ཐུར་དུ་ཆུ་ལ་ཐད་ཀར་ས། །གྲངས་ནི་ཤེས་རབ་ཉིན་མཚན་ཐབས། །ཉི་ཁྲི་ཆིག་སྟོང་དྲུག་བརྒྱར་འགྱུར། །ཞལ་གསུམ་དཀར་སྔོ་དམར་བ་ལ། །གཡས་པ་གསུམ་ན་བསྣམས་པ་ནི། །རྡོ་རྗེ་ཁ་ཊྭཱཾ་ཅང་ཏེའུ་ལ། །མེ་དཔུང་ཞགས་པ་ཐོད་ཁྲག་གཡོན། །གཟི་ལྡན་རྡོ་རྗེ་ཐོད་ཁྲག་འཁྲིལ། །པདྨ་དོན་ཡོད་འདི་གསུངས་སོ། །འཛིན་པ་དཀར་ལ་སེལ་བྱེད་སེར། །མཉམ་གནས་ལྗང་ནག་གྱེན་ནི་དམར། །ཁྱབ་པ་ནམ་མཁའ་སྔོ་བསངས་ཏེ། །ཡན་ལག་རྩ་བའི་རྗེས་སུ་འབྲང་། །ཞལ་གཅིག་པ་ལ་མདངས་ཀྱང་བཟང་། །གཡས་པ་རྡོ་རྗེ་གདེངས་པ་ལ། །གཡོན་པ་པད་སྡོང་ཐོད་པར་བཅས། །པདྨ་གསང་ཆུང་འདི་གསུངས་སོ། །དེ་དག་ཀུན་གྱི་དགོས་པ་ཡང་། །རླུང་གི་དེ་ཉིད་འཇུག་འགྱུར་ཞིང་། །རྡོ་རྗེ་ཡི་ནི་བཟླས་པ་འགྲུབ། །རྫོགས་པའི་རིམ་བསྒོམས་འཕྲལ་ནད་འཇོམས། །རྡོ་རྗེ་རིག་པ་འཛིན་པ་ཡི། །རིག་འཛིན་དངོས་གྲུབ་མཆོག་ཐོབ་ནས། །དག་པའི་སངས་རྒྱས་ཞིང་དུ་བྱེད། །དབང་ཆེན་འདུས་པའི་ཏན་ཏྲ་ལས། དབང་ཆེན་སྐུའི་ངོ་བོ་གསལ་བར་བསྟན་པའི་ལེའུ་སྟེ་བཅུ་གཅིག་པའོ།། །།དེ་ནས་བཅོམ་ལྡན་འདས་ཀྱིས་འཁོར་གྱི་ཚོགས་རབ་ཏུ་གསལ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་འདི་གསུངས་
སོ། །རྡོ་རྗེ་དབྱིངས་དང་རྟ་མགྲིན་དབང་། །ཡེ་ཤེས་སེམས་དཔའ་གཟི་ལྡན་མ། །འགྲོ་འདུལ་ཁམས་གསུམ་རྣམ་པར་རྒྱལ། །ཧཱུཾ་མཛད་དུས་གསུམ་བྱང་ཆུབ་སེམས། །ཁམ་རྒྱ་དྲུག་དང་ལོང་བ་བརྒྱད། །དམུས་ལོང་དྲུག་ཅུ་ལྕགས་སྤྱང་བརྒྱད། །ཡེ་ཤེས་ཁྱི་བཅུ་སྒོ་བ་བཞི། །མེ་རླུང་འབྲུག་རྣམས་ཡོངས་སུ་རྫོགས། །བདེ་ཆེན་ཕོ་བྲང་རྣམ་སྣང་དང་། །མི་བསྐྱོད་རིན་ཆེན་སྣང་མཐའ་ཡས། །དོན་གྲུབ་ཡབ་ཡུམ་ལ་སོགས་པ། །སྐུ་མདོག་ཕྱག་རྒྱ་གདན་རྒྱན་བཞུགས། །ཐེག་པའི་འགྲོས་ལྡན་རྟ་མགོ་ལྔ། །དམར་པོ་གྲི་ཐོད་སྲིན་པོ་འཇོམས། །རྡོ་རྗེ་རིན་ཆེན་ཁྱུང་གཤོག་སྤྲུལ། །ཨ་མོ་དྷི་བ་གློག་འགྱུ་མ། །དཀར་སེར་དམར་ལྗང་གྲུ་གསུམ་ཀློང་། །ལྕགས་ཀྱུ་ཞགས་པ་ལྕགས་སྒྲོག་དྲིལ། །ཐོད་པ་རྟ་མགོ་སྨན་བླ་དང་། །སྣང་མཐའ་དོན་གྲུབ་སྐུར་སྣང་ངོ་། །ཕྱག་རྒྱ་བཅུ་དྲུག་འཇིགས་པའི་མཚོན། །བདུད་དཔུང་སྤ་བཀོང་ཐལ་བར་བྱེད། །ཐུགས་ཀྱི་ཡེ་ཤེས་ཁ་སྦྱོར་བ། །དམར་པོ་འཁོར་ལོ་ཟ་མ་ཏོག །དམར་སྐྱ་ནོར་བུ་ཟ་མ་ཏོག །ཕྱག་རྒྱ་ཡེ་ཤེས་སྔགས་དང་བཅས། །སྐུ་གསུང་ཐུགས་ཀྱི་ཕྱག་རྒྱའོ། །དཔའ་བོ་སྟག་ཆས་ཧཱུཾ་ཆེན་བཅོམ། །རྒྱ་བྱེའུ་ལྕགས་ཀྱིས་མི་གཡོ་བ། །རྡོ་རྗེའི་གཤོག་པ་གཤིན་རྗེའི་གཤེད། །བསེ་ཁྲབ་སྔོན་པོ་དབྱུག་སྔོན་ཅན། །སྦྲུལ་ནག་པདྨ་འཁྱིལ་པ་སྟེ། །མཆེ་བ་འདོད་པའི་རྒྱལ་པོ་ལ། །ཤུ་ཀེན་དར་གྱིས་བདུད་རྩི་འཁྱིལ། །གཅན་གཟན་གཟིག་གིས་སྟོབས་ཆེན་མནན། །ས་སྟོབས་དབང་ལྡན་སྦས་པས་རོལ། །གཉིས་མེད་བྱང་སེམས་ལྷུན་གྱིས་གྲུབ། །དེ་བཞིན་རྡོར་རིན་པད་གྲུབ་གསང་། །དཀར་སེར་སྔོ་དམར་ལྗང་གུ་ནག །ཟངས་གྲི་ཐོད་པ་རྒྱུ་ཕྲེང་སྙིང་། །རང་སྔགས་བརྗོད་པ་ཐོད་པའི་གནས། །དམུས་ལོང་དྲུག་ཅུ་བཅོ་ལྔ་ཕྱོགས། །ལྕགས་ཀྱུ་ཕུར་པ་ཁ་དོག་རིགས། །མགོ་བརྙན་སྤྲུལ་པ་ཅེ་སྤྱང་བརྒྱད། །མཐིང་ནག་གྲི་གུག་ཐོད་པ་ཁྲག །ལྕགས་སྤྱང་བརྒྱད་ཀྱི་ཁྲི་ལ་བཞུགས། །རང་གི་བརྒྱད་དང་ཡེ་ཤེས་བཅུ། །སྔགས་ལས་གྲུབ་པའི་མེ་དཔུང་
ཀློང་། །མགོ་དགུ་རྐང་གཅིག་ལྕགས་ཀྱུ་དཀར། །འོད་གཤོག་བརྒྱད་ལྡན་ཞབས་པ་སྔོ། །ཡེ་ཤེས་དྲུག་དྲུག་ལྕགས་སྒྲོག་དམར། །གསང་བ་གསུམ་ལྡན་དྲིལ་བུ་ལྗང་། །ཐོད་ཁྲག་སྔགས་སྒྲུབ་སྒོ་བཞིར་གནས། །མེ་རླུང་འབྲུག་བརྒྱད་ཕྱོགས་བཅུར་ཁྱབ། །དུར་ཁྲོད་སྤྲུལ་པ་ཀུན་དང་རོལ། །དཀྱིལ་འཁོར་བརྒྱད་རྣམས་ཡོངས་སུ་གསལ། །མི་ཐོད་སྦྲུལ་དང་དུར་ཁྲོད་རྒྱན། །ཟུར་གསུམ་ལོགས་གསུམ་ཁམ་རྒྱ་དྲུག །རིགས་མདོག་ཐོད་པ་གྲི་གུག་བཅས། །ཐོད་ཁྱམས་ལོང་བ་དམུས་ལོང་རྣམས། །གཡུ་འབྲུག་ལྕགས་རྟ་བ་གླང་དང་། །ཆུ་སྲིན་ལ་ནི་ཆིབས་སུ་མཛད། །ལེ་བརྒན་སེ་རལ་སྦྲུལ་དང་རླུང་། །སྐུ་ལ་ན་བཟའ་རབ་ཏུ་གྱོན། །མེ་དཔུང་ཁྱུང་སྡེར་སྦྲུལ་ཞགས་སྙིང་། །དམུས་ལོང་སྤྱིར་ཡང་སྤྲུལ་པར་མཛད། །ཡེ་ཤེས་སྒྲོན་མ་ཕྱོགས་མཐུན་མཚམས། །མེ་དཔུང་ལྕགས་ཀྱི་སྤྱང་མོ་བརྒྱད། །ཡེ་ཤེས་སྤྲུལ་པའི་ཁྱི་བཅུར་བཅས། །ཤར་དུ་མགོ་དགུ་རྐང་གཅིག་ནག །སྟ་རེ་ལྕགས་ཀྱུ་གཡོན་དང་བཅས། །ལྷོ་རུ་མགོ་བརྒྱད་རྡོ་རྗེ་ཕུར། །ནུབ་ཏུ་མགོ་དྲུག་ཕུར་པ་གཏོར། །བྱང་དུ་མགོ་གསུམ་སྙིང་དྲུག་ཟ། །མེ་འབྲུག་དམར་པོ་མེ་དང་སྦྲུལ། །རླུང་འབྲུག་སྔོན་པོ་རླུང་ཐོད་སྦྲུལ། །རང་སྔགས་སྐུར་བྱུང་འཁོར་དུ་གནས། །ཞེས་གསུངས་སོ། །དབང་ཆེན་འདུས་པའི་རྒྱུད་ལས། འཁོར་གྱི་དཀྱིལ་འཁོར་ཡོངས་སུ་བསྟན་པའི་ལེའུ་སྟེ་བཅུ་གཉིས་པའོ།། །།དེ་ནས་བཅོམ་ལྡན་འདས་ཀྱིས་ཡོངས་སུ་སྒྲུབ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་འདི་གསུངས་སོ། །ཨོཾ་ཨཱཿཧཱུཾ་སྭཱ་ཧཱ། མཱུཾ་ལཱཾ་བྞུ ་ཏཱཾ་མཾ་ཛ།ཨཱོཾ་པདྨཱནྟ་ཀྲྀཏ་བཛྲ་མ་ཧཱ་ཀྲོ་དྷ་ཧ་ཡ་གྲཱི་བ་ཧྲཱྀཿཛ། ཨོཾ་བཛྲ་ཛྙཱ་ན་སཏྭ་ཧཱུཾ། ཨཱོཾ་ཧ་ཧ་རུ་ལུ་ཧཱུཾ་ཕཊ། ཨཱོཾ་བཛྲ་པཱ་ཤ་ཧཱུཾ། སྤོ་ཊ་བཾ། ཨཾ་ཀུ་ཤ་ཛ། གྷཎྜ་ཧོ། ཨཱོཾ་བཛྲ་ཀྲོ་ཏ་ཨཱ་བེ་ཤ་ཨཱཿཧཱུཾ་ཛ། ཨཱོཾ་ཀ་ཏི་ཀ་ཏཾ་བཾ་ཛ། ཨཱོཾ་ཨ་ཀ་ཊེ་བི་ཀ་ཊེ་ཀ་ཊཾ་ཀ་ཊེ་ཧཱུཾ་ཕཊ། ཨཱོཾ་པདྨ་ཤྲཱི་ཧེ་རུ་ཀ་ཧཱུཾ་ཕཊ། བྷུཌྜྷ་བཛྲ་ཨོཾ། སཏྭ་བཛྲ་ཧཱུཾ། རཏྣ་བཛྲ་ཏྲཾ། དྷརྨ་བཛྲ་ཧྲཱྀཿ། ཀརྨ་བཛྲ་ཧཱ། གུ་ཎ་
བཛྲ་ཕཊ། ཨཱོཾ་ཤྭ་རཱི་ཁཱ་ཧི་ཧཱུཾ། ཤྭ་རཱི་ཁཱ་ཧི་ཏྲཱཾ། ཤྭ་རཱི་ཁཱ་ཧི་ཧྲཱྀཿ། ཤྭ་རཱི་ཁཱ་ཧི་ཧོ། ཤྭ་རཱི་ཁཱ་ཧི་ཧཱ། ཨཱོཾ་ཤྭ་རཱི་ཧཱུཾ། ཤྲཱི་ཁཱ་ཧི་ཏྲཱཾ། ཤྲཱི་ཁཱ་ཧི་ཧྲཱྀཿ། ཤྲཱི་ཁཱ་ཧི་ཧཱ། ཨཱོཾ་དཱིཔྟ་ཙཀྲ་ཤྭ་ན་མུ་ཁ་ཁུར་མོར་ཁ་ཧཱུཾ་ཕཊ། ཀུ་རུ་ཀུ་རུ་ཡཀྴ་ཧཱུཾ་ཕཊ། ཀུ་ཀུ་ར་ཙ་ཁ་ལོང་ཁ་ཧཱུཾ་ཕཊ། ཧཱུཾ་ཧཱུཾ་ཧཱུཾ་ཕཊ། ཧཱུཾ་ཏྲཱཾ་ཏྲཱཾ་ཕཊ། ཧཱུཾ་ཧྲཱྀཿཧྲཱྀཿཕཊ། ཧཱུཾ་ཧཱ་ཧཱ་ཕཊ། ཨཱོཾ་ཛི་ན་ལཾ་ཏེ་ཙ་རམ། ཡཀྴ་ཀུ་པན་ཙ་ཧཱུཾ་ཕཊ། འཁོར་གྱི་དཀྱིལ་འཁོར་གྱི་སྔགས་སོ། །ཨཱོཾ་པདྨ་མ་ཧཱ་ཤྲཱི་ཧེ་རུ་ཀ་མ་ཧཱ་ཙཎྜ་སརྦ་དུཥྚན། ཧ་ན་ད་ཧ་པ་ཙ་ཧཱུཾ་ཕཊ། སྐུའི་སྔགས་སོ། །ཨཱོཾ་པདྨ་བྷ་ཏ་སི་ཏི་ཧ་ཧེ་ཙཀྲ་བྷྱོ་བྷྱོ་ཧཱུཾ་ཧཱུཾ་ཧཱུཾ་ཕཊ། གསུང་གི་བསྙེན་སྔགས་སོ། །ཨཱོཾ་རུ་ལུ་རུ་ལུ་ཧཱུཾ་ཕཊ། ཨེ་ཨཱ་ར་ལི་ཧཱུཾ་ཧྲཱྀཿཛ། ཐུགས་ཀྱི་བསྙེན་སྔགས་སོ། །ཨཱོཾ་ཧྲཱྀཿཧྲཱྀཿཧ་ཧ་ཧཱུཾ་ཧཱུཾ་ཕཊ། ཡོན་ཏན་གྱི་བསྙེན་སྔགས་སོ། །ཨཱོཾ་ཧྲི་དི་མ་ད་རི་ཧ་ཡ་གྲཱི་ཝ་ཨེ་ཀ་ཛཱ་ཊི་ཧུ་ལུ་ཧུ་ལུ་ཧཱུཾ་ཧྲཱྀ་ཛ་ཛ། ཕྲིན་ལས་ཀྱི་བསྙེན་སྔགས་སོ། །གསང་སྔགས་ལྔ་པོ་འདི་དག་ལ། །གང་གིས་བསྙེན་པ་བསྐྱལ་བ་དེ། །རིག་འཛིན་ས་ལ་གདོན་མི་ཟ། །བདུད་དང་འབྱུང་པོ་སྨོས་ཅི་དགོས། །བཅོམ་ལྡན་འདས་པ་དེ་ཉིད་ཡིན། །དབང་ཆེན་འདུས་པའི་ཏན་ཏྲ་ལས། སྔགས་ཀྱི་ལེའུ་སྟེ་བཅུ་གསུམ་པའོ།། །།དེ་ནས་བཅོམ་ལྡན་འདས་ཀྱིས་ཁྲོ་བོའི་ཕྱག་རྒྱ་འདི་དག་གསུངས་སོ། །རིགས་ལྔ་སྤྱི་ཡི་ཕྱག་རྒྱ་ཡིས། །རྡོ་རྗེ་དབྱིངས་ཀྱི་དཀྱིལ་འཁོར་གསལ། །སྤྱི་གཙུག་རྒྱལ་བའི་ཚུལ་ཕྱག་འཚལ། །རྟ་གདོང་ཞལ་གྱི་ཕྱག་རྒྱ་ཡིས། །རྟ་མགྲིན་བརྐྱང་བསྐུམ་སྲིན་པོའི་ཕྱག །རིག་བྱེད་ལྕགས་ཀྱུས་ཕྱག་རྒྱ་ཡིས། །སེམས་དཔའ་བསམ་གཏན་མི་གཡོའི་ཕྱག །ལུ་གུ་རྒྱུད་ཀྱི་འགྲོ་བ་འདུལ། །མ་མོ་འཛུམ་པའི་མདངས་དང་ལྡན། །རྣམ་པར་རྒྱལ་བ་ཁྱུང་གཤོག་རྫོགས། །ཀླུ་འབྲུག་འབྲོས་པའི་རྒྱ་དང་བཅས། །བརྐྱང་བསྐུམ་ཕུར་པ་ཧཱུཾ་མཛད་འདྲེན། །དྲང་སྲོང་ཙོག་པུའི་ཚུལ་ཕྱག་འཚལ། །ལྷ་མོ་འཛུམ་མདངས་གཟི་དང་ལྡན། །དམ་ཚིག་སྦྱོར་བའི་ཚུལ་ཕྱག་བྱ། །གླུ་བྲོ་གར་ཕྱག་པདྨ་དབང་། །
ཐལ་སྦྱར་མི་ཡི་ཕྱག་ཀྱང་འཚལ། །སྦྲུལ་ནག་ཞགས་པ་སྤྲུལ་པ་རྣམས། །དམ་ཚིག་སྦྱོར་བའི་ཚུལ་དུ་བྱ། །དབང་ཆེན་འདུས་པའི་ཏན་ཏྲ་ལས། ཕྱག་རྒྱའི་ལེའུ་སྟེ་བཅུ་བཞི་པའོ།། །།དེ་ནས་བཅོམ་ལྡན་འདས་ཀྱིས་ཆོས་ཐམས་ཅད་དང་དུ་བླང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་འདི་གསུངས་སོ། །ཐོག་མར་ཤེས་པ་དམ་པ་སྟེ། །དེ་ཡང་ལུང་དང་མན་ངག་ཤེས། །མི་འཁྲུགས་སྦྱོར་བའི་རྒྱུ་བཙལ་ནས། །བརྡའ་སྐད་ཚོགས་ལ་མཁས་པའི་གིང་། །ལས་དང་ཕྱག་རྒྱ་ལེན་ཤེས་ན། །མང་པོའི་དོན་དུ་བྱེ་བ་རུང་། །དགྱེས་པ་བསྐྱེད་དང་ཐུགས་དང་འཐད། །མཆོད་སྟོབ་རྡུལ་ཕྱག་འཁོར་དུ་བཅས། །ཏིང་འཛིན་མཆོག་དང་བཀྲ་ཤིས་ཤིང་། །ཡིད་འོང་ཉམས་དགའ་ལ་སོགས་པར། །དུས་དང་འཚོ་བ་ལ་སོགས་བསྒྲུབ། །རིགས་དང་ཡོ་བྱད་མཚན་མ་དང་། །ལང་ཚོ་མན་ངག་ལྡན་པའི་དུས། །བཟའ་བ་བཅའ་བ་བཏུང་བ་བགོ། །རབ་ཏུ་འབད་པས་གནོད་བྲལ་བའི། །དག་པའི་རྫས་ཀྱང་ལྡབ་ཏུ་བྱ། །མ་དག་དམ་ཚིག་སྐོང་ཡོ་བྱད། །གོ་ཆ་སོགས་དགོད་དུད་པ་དང་། །འབྱུང་བཞིའི་ཁམས་ཀྱི་བཅུད་དང་བཅས། །བརྡ་ཡི་བྱེ་བྲག་སྒྲ་སྒྲོག་པ། །མཆོད་དམ་སྐྱོ་བ་སེལ་བར་བྱེད། །སྒྲུབ་པ་སྐུ་དང་གསུང་ཐུགས་རྟེན། །བཀྲ་ཤིས་དག་པ་སྒྲུབ་མཆོག་ཞིང་། །དེ་དག་དང་པོ་བཞི་རུ་ངེས། །དཀོན་མཆོག་མགོན་པོ་སྙིང་རྗེ་བགེགས། །མདོ་བཞི་ཐབས་ཀྱི་བར་ཆད་མཆོད། །རྒྱལ་པོ་ཁྲོ་བོའི་སྟངས་སྟབས་དང་། །དམ་སྲི་སྒོ་བྱང་མ་ཏྲཾ་མནན། །རྒྱན་བསྡེབ་མེ་ཁྲག་སྟོང་པས་བསྲུང་། །དཀྱིལ་འཁོར་བྱུག་པ་ཚོན་ཐིག་གི། །རྡོ་རྗེ་དྲིལ་བུ་སྐུ་རྫས་དགོད། །བླ་རེ་བཟའ་བཏུང་རྒྱན་གྱིས་བསྐོར། །རང་བཞིན་མེད་ལ་གོམས་པ་ཡིས། །ཅི་ཡང་འབྱུང་བའི་ཆོ་འཕྲུལ་དུ། །གནས་རྫས་འཁོར་སོགས་རབ་ཏུ་གནས། །སྲི་མནན་འདྲེས་དང་མ་འདྲེས་ལ། །རང་བཞིན་དཀྱིལ་འཁོར་བསྐྱེད་པ་དང་། །ཡེ་ཤེས་དཀྱིལ་འཁོར་སྤྱན་ཡང་དྲང་། །དྲེང་ངེ་བ་དང་དུང་
ངེ་བ། །ཤ་དྷ་བ་དང་གྷ་ར་དྷ་བ། །ལྕང་ཀ་དེའུ་པང་དེའུ། །འཁོར་བ་སྤྱི་ནས་འདྲེན་པའི་བྲོ། །སྡུག་བསྔལ་ནད་མེད་ཐུགས་རྗེའི་བྲོ། །ཐུགས་ཀྱི་དབྱིངས་ནས་བསྐུལ་བའི་བྲོ། །ཡེ་ཤེས་རྒྱན་གྱི་བྲོ་བོ་ཆེ། །མ་མོ་མཁའ་འགྲོ་འཁྲུགས་པའི་བྲོ། །ལངྈ་སྲིན་པོ་བསྒྲལ་བའི་བྲོས། །བདུད་བཞི་མ་ལུས་འཇོམས་པ་དང་། །འདས་དང་མ་འདས་དངོས་གྲུབ་ཐོབ། །དངོས་གྲུབ་བཟང་པོའི་མཚན་མ་ལ། །ཉམས་ལེན་བར་ཆད་གསལ་ཞིང་བླང་། །སྤྱོད་ལམ་རྒྱུན་གྱི་རྣལ་འབྱོར་པས། །མ་ཉམས་བལྟ་བའི་གདེང་དང་ལྡན། །ཞེས་གསུངས་སོ། །དབང་ཆེན་འདུས་པའི་ཏན་ཏྲ་ལས། བསྒྲུབ་པའི་དོན་བསྟན་པའི་ལེའུ་སྟེ་བཅོ་ལྔ་པའོ།། །།དེ་ནས་བཅོམ་ལྡན་འདས་ཀྱིས་ས་གཞི་ཆེན་པོའི་ཏིང་ངེ་འཛིན་ལ་སྙོམས་པར་ཞུགས་ཏེ་འདི་སྐད་གསུངས་སོ། །བླ་མ་དང་ནི་མཆེད་ལྕམ་ལ། །ལུས་ངག་ཡིད་ཀྱིས་གུས་པར་བྱ། །སྔགས་དང་ཕྱག་རྒྱ་རྒྱུན་མི་གཅད། །ཡི་དམ་ལྷ་དང་གསང་བའི་བཅུད། །མི་སྤང་སྣོད་ངན་སྤེལ་མི་བྱ། །འདི་ནི་སྐུ་གསུང་ཐུགས་ཀྱི་དམ། །གཟུངས་མ་མཚན་ལྡན་དང་དུ་བླང་། །ཞིང་བཅུ་ཡལ་བར་དོར་མི་བྱ། །ཁྱད་པར་རྫས་ལ་བླང་བར་བྱ། །བཅུད་འཐིག་སྣོད་ངན་ངག་འཁྱལ་དང་། །ཚིག་རྩུབ་ལྟ་ངན་ཞེ་ཡང་བཅད། །གླང་པོ་མི་རྟ་བྱ་ཁྱི་དང་། །དྲི་ཆེན་དྲི་ཆུ་བྱང་ཆུབ་སེམས། །མཱཾ་ས་པདྨ་རཀྟ་རྣམས། །དག་པའི་བདུད་རྩི་ཆེན་པོ་ཡིན། །ཉོན་མོངས་ལྔ་ཉིད་རྣམ་དག་པས། །སྤང་བར་བྱ་བའི་རྒྱུ་ཡང་མེད། །རང་གི་ཕུང་པོ་ལྷར་ཤེས་ནས། །རིགས་ལྔའི་སངས་རྒྱས་ལོགས་ན་མེད། །ཡོན་ཏན་མཐའ་དག་ལྡན་གྱུར་ན། །བསྒྲུབ་ཅིང་དང་དུ་ཡོངས་ཀྱིས་བླང་། །རྒྱལ་བློན་ཕལ་པ་ལྷ་སྲིན་ལྡང་། །ནད་མང་ནོར་འབྲི་ཚེ་ཐུང་བས། །མྱུར་དུ་གསོ་བའི་ལས་ལ་འབད། །མཆོད་པ་སྣ་ཚོགས་གཏོར་བསྐང་བས། །རྩ་བ་ལ་ནི་གསུམ་ཡིན་ཏེ། །ཡན་ལག་རྒྱུན་དུ་བསྐང་བ་དང་། །རྩ་བ་ཉམས་པའི་རྣལ་འབྱོར་པས། །བསྐལ་པ་གཅིག་གཉིས་གསུམ་བར་དུ། །རྡོ་རྗེའི་དམྱལ་
བར་སེམས་རྒྱུན་འཚིག །ཡན་ལག་ཉམས་ན་ངན་འགྲོར་ལྟུང་། །ཚེ་འདིར་བསམ་པ་འགྲུབ་པ་དང་། །ཕྱི་མར་སངས་རྒྱས་ས་ལ་འགྲོ། །དེ་ཕྱིར་རྣལ་འབྱོར་དམ་ཚིག་བསྲུང་། །ཁྱད་པར་སྒྲུབ་པ་བྱེད་པའི་ཚེ། །ལུས་ངག་ཡིད་ཀྱི་བྱ་བ་ཡིས། །སྟོན་པའི་བཀའ་བཞིན་བསྲུང་བར་བྱ། །དེ་བས་མ་ཡི་ངག་ལྟར་ཉོན། །དབང་ཆེན་འདུས་པའི་རྒྱུད་ལས། དམ་ཚིག་གི་ལེའུ་སྟེ་བཅུ་དྲུག་པའོ།། །།དེ་ནས་བཅོམ་ལྡན་འདས་ཀྱིས་བརྟུལ་ཞུགས་ཆེན་པོའི་ཏིང་ངེ་འཛིན་ལ་སྙོམས་པར་ཞུགས་ནས་འདི་གསུངས་སོ། །ཁྱུང་ཆེན་བརྟུལ་ཞུགས་ལྟ་འཕང་བཅད། །གླང་ཆེན་ལྟ་བུར་སྤྱོད་པ་དོར། །ཝ་ལྟར་ཆོས་དང་མི་མཐུན་དོར། །གྱི་ལིང་ལྟ་བུར་བརྩོན་འགྲུས་མྱུར། །ཁྱི་ཕག་ལྟ་བུར་གཙང་སྨེ་སྤང་། །བུ་ཆུང་ལྟ་བུར་བླང་དོར་བྲལ། །སྨྱོན་པ་ལྟ་བུར་འཇིགས་མེད་སྤྱད། །བུང་བ་ལྟ་བུའི་བདུད་རྩི་བླང་། །དྲང་སྲོང་སྤྱོད་པས་བརྩོན་འགྲུས་བསྒྲུབ། །བུ་བཞིན་མ་ཡི་ངག་ལ་སྤྱད། །དཀའ་བ་ཐམས་ཅད་དང་དུ་བླང་། །བགེགས་དང་འབྱུང་པོ་ཐོག་བརྫིས་བྱ། །ལུས་ངག་ཡིད་གསུམ་ལྷ་སྐུར་སྦྱར། །ཕག་གི་བརྟུལ་ཞུགས་ཆེན་པོ་ཡིས། །ཁམས་གསུམ་ཁྲོན་ཏུ་བརྐོ་བར་བྱ། །ཁྱི་ཡི་བརྟུལ་ཞུགས་ཆེན་པོ་ཡིས། །བདུད་རྩི་ཟས་སུ་ཟ་བར་བྱ། །རྡོ་རྗེ་རྟ་ཡི་བརྟུལ་ཞུགས་ཀྱིས། །རྟ་སྐད་ཐེངས་གསུམ་འབོད་པར་བྱ། །དཔལ་གྱི་རྟ་སྐད་ཆེན་པོ་ཡིས། །ཡང་དག་སྐུ་གསུམ་དབྱིངས་ནས་བསྐུལ། །མ་མོའི་བརྡའ་སྐད་སྦྲན་པ་ཡིས། །བརྡའ་སྐད་ཀློང་རྡོལ་ལས་ལ་རྦད། །རྣལ་འབྱོར་གསང་བ་བརྡའ་སྐད་ཀྱིས། །མཉམ་དང་བསྐུལ་དང་རྟགས་ཙམ་འཛིན། །ཤ་རུལ་དོང་དུ་བཅུག་པ་ལ། །ཤ་སྦྲང་ཤིན་ཏུ་འདུ་བ་དང་། །སྤྱང་དང་ལུག་བཞིན་དྲེད་པ་དང་། །ཁྱི་དང་ཕག་བཞིན་རྦད་པར་འགྲོ། །དཔལ་གྱི་ཕེཾ་བརྡབས་ཧཱུཾ་སྒྲ་ལས། །བསྒྲུབ་པའི་དབྱངས་དང་ཚངས་པ་ཡིས། །ཞིང་ཁམས་རི་རབ་རྩེ་ལ་བླངས། །གསུམ་ཞེས་བྱ་བ་དགུ་ཡི་ཆོས། །ལྟ་བ་སྤྱོད་དང་བསྒོམ་པ་དང་། །འབྲས་བུ་བཞིན་དུ་གར་གྱུར་པ། །རྦད་པས་ཐལ་བ་བཞིན་དུ་རློག །
ལྷ་སྲིན་ཐམས་ཅད་དབང་དུ་སྡུས། །དཔལ་གྱི་སྐུ་དང་གཉིས་སུ་མེད། །འདི་ནི་རྣལ་འབྱོར་སྤྱོད་པ་ཡིན། །དབང་ཆེན་འདུས་པའི་རྒྱུད་ལས། སྤྱོད་པ་བསྟན་པའི་ལེའུ་སྟེ་བཅུ་བདུན་པའོ།། །།དེ་ནས་བཅོམ་ལྡན་འདས་ཀྱིས་ནམ་མཁའ་དྭངས་པའི་ཏིང་ངེ་འཛིན་ལ་སྙོམས་པར་ཞུགས་ནས་འདི་གསུངས་སོ། །སྔགས་ལ་རྒྱུ་འབྲས་ཐམས་ཅད་ཀྱང་། །ཆོས་རྣམས་རྒྱུ་འབྲས་མི་བསླུ་བས། །སྐད་ཅིག་མ་ཡི་ཏིང་འཛིན་གྱིས། །གར་གྱི་དབང་ཕྱུག་སྐུར་གསལ་བ། །ཞལ་གཅིག་ཕྱག་གཉིས་སྐུ་མདོག་དམར། །ཐམས་ཅད་གཅིག་ཏུ་བསྡུས་པས་ན། །རྡོ་རྗེ་པདྨ་འཛིན་པའོ། །དེ་ཡི་ཐུགས་ཀར་ཀུན་རྫོབ་ནས། །སྐུ་གསུམ་ལྷུན་གྱིས་གྲུབ་པས་ན། །ཟག་པ་མེད་པའི་འཕྲོ་འདུ་འགྱེད། །རིན་ཆེན་གཡུ་ཡི་ཆུ་མིག་ལ། །ཡིད་བཞིན་བདུད་རྩི་བབས་པ་ལས། །སྐལ་ལྡན་གང་ཞིག་བསྒྲུབ་པ་ནི། །འགྲུབ་འགྱུར་འདི་ལ་ཐེ་ཚོམ་མེད། །ཆོས་ཉིད་སྐྱེ་མེད་རྒྱ་མཚོ་བཞིན། །མི་སྐྱེ་མི་འགག་མི་གཡོ་དང་། །དྭངས་ཤིང་རྟོག་མེད་རྒྱ་མཚོའི་དབྱིངས། །སྒྱུ་མའི་ཕྱག་རྒྱ་གསལ་བ་ནི། །དཔལ་ཆེན་ཡུམ་ནི་ཆོས་ཀྱི་སྐུ། །ངོ་བོ་ཉིད་ཀྱིས་གཉིས་སུ་མེད། །དངོས་པོའི་ཚུལ་གྱིས་སྦྱོར་ཞིང་འཁྲིལ། །འཕྲོ་འདུ་བྱང་སེམས་འོད་ཟེར་ནི། །གསང་ཡུམ་ཕོ་ཉའི་ཚོགས་ལ་སོགས། །དངོས་པོ་སྤྲུལ་སྐུ་སྤྱིར་སྣང་མོད། །དོན་འདུས་ཆོས་དབྱིངས་རྒྱ་མཚོ་འདྲ། །དེ་ལ་སྤྲོས་ཀྱང་འཕེལ་འགྲིབ་མེད། །ལྟ་བ་རྒྱ་མཚོ་རིན་ཆེན་བཞིན། །དེ་བསྡུས་ཉུང་ཞིང་འགྲིབ་པ་མེད། །རྒྱ་མཚོའི་རླབས་ལྟར་དབྱིངས་སུ་ཐིམ། །འདི་རྟོགས་རྣལ་འབྱོར་སྐལ་བར་ལྡན། །སྤྱོད་པ་མཁའ་ལ་སྤྲིན་ཚོགས་ལྡིང་། །ཇི་ལྟར་བལྟས་ཀྱང་དབྱིངས་ན་ཡན། །ནམ་མཁའི་བྱ་བཞིན་ལྟུང་གནས་མེད། །དམ་ཚིག་ལྡན་པའི་རྣལ་འབྱོར་པས། །ངེས་པའི་དོན་རྟོགས་གནས་རབ་བགྲོད། །ཅེས་གསུངས་སོ། །དབང་ཆེན་འདུས་པའི་རྒྱུད་ལས། ལྟ་བ་གཡུའི་ཆུ་མིག་གི་ལེའུ་སྟེ་བཅོ་བརྒྱད་པའོ།། །།དེ་ནས་བཅོམ་ལྡན་འདས་ཀྱིས་པཱུ་ཛ་སྣ་ཚོགས་
གསལ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་འདི་གསུངས་སོ། །མེ་ཏོག་བདུག་པ་མར་མེ་དྲི། །དཀར་སེར་དམར་ལྗང་ལྷ་མོ་ཡིས། །སྤྱན་ཤངས་ཐུགས་ལ་དབུལ་བར་བྱ། །ཚད་མེད་བཞི་དང་ལྡན་པར་འགྱུར། །ཨཱོཾ་ནཱ་མཿསརྦ་ཏ་ཐཱ་ག་ཏ། པུཥ྇། དྷཱུ་པེ། ཨཱ་ལོ་ཀེ། གནྡྷེ། པཱུ་ཛཱ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། རྡོ་རྗེ་ལྷ་མོ་གཟུགས་མཛེས་མ། །རིན་ཆེན་ལྷ་མོ་དཔལ་འཕྲེང་ཅན། །པདྨའི་ལྷ་མོ་གླིང་བུའི་སྒྲ། །ལས་ཀྱི་ལྷ་མོ་གར་མཁན་མ། །ཡེ་ཤེས་བཞི་དང་མཉམ་པར་རོལ། ཨོཾ་ཨཱཿཧཱུཾ།ལཱ་སྱེ་ཧཱུཾ། མཱ་ལེ་ཏྲཱཾ། གིརྟི་ཧྲཱྀཿ། ནིར་ཏི་ཨ། འཁོར་ལོ་རིན་ཆེན་མུན་པ་སེལ། །གླང་པོ་རིན་ཆེན་སྟོབས་དང་ལྡན། །བློན་པོ་རིན་ཆེན་དམ་ཆོས་སྐྱོང་། །བཙུན་མོ་རིན་ཆེན་དབྱིངས་དང་ལྡན། །རྟ་མཆོག་རིན་ཆེན་རྫུ་འཕྲུལ་ཤུགས། །ནོར་བུ་རིན་ཆེན་ཕོངས་པ་སེལ། །དམག་དཔོན་རིན་ཆེན་བདུད་བཞི་འདུལ། །རྒྱལ་སྲིད་མཆོད་པ་བླ་ན་མེད། །རཏྣ་པཱུ་ཛཱ་མེ་གྷ་ཧཱུཾ། དཔལ་ལྡན་པདྨ་ལྕང་ལོ་རུ། །གླང་པོ་མི་རྟ་བྱ་ཁྱིའི་ཤ །སངས་རྒྱས་ཡེ་ཤེས་འོད་ཟེར་འཕྲོ། །དམ་རྫས་ལྔ་ཡི་མཆོད་པ་འདིས། །མངོན་པར་ཤེས་པ་ལྔ་ཐོབ་བྱེད། །ཨོཾ་བ་ལིཾ་ཏ་ཏེ་ཛོ་བ་ལིཾ་ཏ་བ་ལ་བ་ཏི་གྷུ་ཧྱ་ས་མ་ཡེ་སྭཱ་ཧཱ། དཔལ་གྱི་ཞལ་བུ་ཕོ་བྲང་དུ། །རང་བྱུང་རྣམ་དག་བདུད་རྩི་ལྔ། །རིན་ཆེན་རྣམ་སྣང་ཆོས་ཀྱི་དབྱིངས། །བྱང་སེམས་ཞེ་སྡང་མེ་ལོང་ཐུགས། །མཱཾ་ས་མཉམ་ཉིད་རིན་ཆེན་རིགས། །པདྨ་རཀྟ་འོད་དཔག་མེད། །དྲི་ཆུ་ཆེན་པོ་བྱ་བ་གྲུབ། །དུག་ལྔ་ཡེ་ཤེས་ལྔར་རྟོགས་བྱེད། །ཨོཾ་ཨ་མྲྀ་ཏ་ཀུཎྜ་ལི་ཧ་ན་ཧ་ན་ཧཱུཾ་ཕཊ། ཞིང་གི་ཆོས་དབྱིངས་རྣམ་པར་དག །ཡེ་ཤེས་ཅན་གྱི་སྤྱོད་ཡུལ་དུ། །གཟུགས་དང་སྒྲ་དང་དྲི་དང་རོ། །རེག་བྱ་ཆོས་ཀྱི་ལོངས་སྤྱོད་རྣམས། །དཀྱིལ་འཁོར་ལ་ཡང་དཀྱིལ་འཁོར་ཐིམ། །ཡེ་ཤེས་ལ་ཡང་ཡེ་ཤེས་རོལ། །ཆོས་ཉིད་ལ་ཡང་ཆོས་ཉིད་བཞེས། །ཀུན་ཏུ་བཟང་པོས་མཉེས་གྱུར་ཅིག །ན་མཿསརྦ་ཏ་ཐཱ་ག་ཏེ་བྷྱོ་བྷི་ཤྭ་མུ་ཁེ་བྷྱཿ། སརྦ་ཐཱ་ཁཾ་ཨུད་ག་ཏེ་སྥ་ར་ཎ་ཧི་མཾ་ག་ག་ན་ཁཾ་སྭཱ་ཧཱ། བདག་རྟོག་ཕུང་ཁམས་སྤྱོད་ཡུལ་རྣམས། །ཡེ་ཤེས་ལྷ་དང་གཉིས་མེད་པས། །དགྱེས་པར་རོལ་པའི་
མཆོད་པ་འདི། །གཉིས་མེད་བླང་དོར་མེད་པར་བཞེས། །འཁོར་བ་མ་རིག་མུན་པ་ལས། །སྟོབས་ཆེན་ཡོངས་བསྒྲལ་ཤ་དང་ཁྲག །དགྱེས་པར་རོལ་པའི་དམ་རྫས་ཀྱིས། །སྐུ་གསུང་ཐུགས་ཀྱི་དམ་ཚིག་སྐོང་། །དབང་ཆེན་འདུས་པའི་རྒྱུད་ལས། མཆོད་སྦྱིན་དམ་པའི་ལེའུ་སྟེ་བཅུ་དགུ་པའོ།། །།དེ་ནས་བཅོམ་ལྡན་འདས་ཀྱིས་ལས་སྣ་ཚོགས་གསལ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་འདི་གསུངས་སོ། །གང་གི་ཚེ་ཉམས་ཚེ་ཡར་བ། །དྲོད་ཚད་ལྡན་པའི་སློབ་དཔོན་གྱིས། །དཀྱིལ་འཁོར་རྩིབས་དྲུག་གང་རུང་ཡང་། །བུམ་པ་ཞལ་ཟས་རྫས་བཤམས་ཏེ། །གཟི་ལྡན་མ་དང་ཁམ་རྒྱ་དྲུག །གཤོག་པའི་མ་མོ་བཞི་བསྐྱེད་ནས། །ཚེ་བསྐུལ་བསྒྲུབ་དང་དགུག་པ་དང་། །གཟུང་དང་བསྡིམ་དང་སྦ་བ་དང་། །དབང་བསྐུར་དངོས་གྲུབ་བླང་བ་དང་། །རྒྱས་བཏབ་ལྷ་དང་ཚེ་ཚད་མཉམ། །ཨཱོཾ་ན་མོ་བྷ་ག་ཝ་ཏེ་ཨ་པ་རི་མི་ཏ་ཨཱ་ཡུརྫྙཱ་ན་སུ་བི་ནི་ཤྩི་ཏ་ཏེ་ཛོ་རཱ་ཛཱ་ཡ་ཏ་ཐཱ་ག་ཏཱ་ཡ། སརྦ་སཾ་སྐཱ་ར་པ་རི་ཤུདྡྷེ་དྷརྨ་ཏེ་ག་ག་ན་ས་མུད་ག་ཏེ་སྭ་བྷཱ་ཝ་བི་ཤུདྡྷེ་མ་ཧཱ་ན་ཡ་པ་རི་ཝ་རེ་སྭཱ་ཧཱ། གང་གི་ལས་ཀྱིས་ཚེ་འཕོས་པས། །དངོས་གྲུབ་ཆེན་པོ་བལྟ་བ་གཅད། །རིན་ཆེན་གའུ་རིན་ཆེན་བླངས། །མཆོད་སྦྱིན་སྲད་པ་ཆེན་པོ་བྱ། །གཞལ་ཡས་ཁང་དུ་བྷྲཱུཾ་ལས་བསྐྱེད། །རྡོ་རྗེ་རོལ་མོའི་གར་གྱིས་ཁྱེར། །དྲི་ཞིམ་དག་གི་ཆུ་ཡིས་བཀྲུ། །བར་དོའི་ཤེས་པ་རྟེན་ལ་དགུག །ངན་སོང་སྦྱོང་བའི་བྲོ་ཡིས་སྦྱོང་། །སྐྱབས་གསོལ་སེམས་ལྡན་དཀྱིལ་འཁོར་གཞུག །ལྷ་དང་རིག་པ་མཁའ་ལ་གཞུག །དགྲ་དང་བགེགས་ཀྱི་ཤེས་པ་བསྡིམ། །དུག་གསུམ་འཁོར་བའི་ཆུ་ལས་བསྒྲལ། །ལྷ་དང་མཆོད་པའི་དམ་རྫས་བསྐྱེད། །ལས་ངན་སྡིག་སྒྲིབ་མེ་ལ་སྦྱང་། །ཐལ་བ་སྐུ་གདུང་མཆོད་པའི་རྟེན། །གཤེད་ལྕགས་ལྡང་བ་མེད་པར་མནན། །ལོངས་སྤྱོད་བདག་ཉིད་རོལ་པ་ཡིན། །ཨཱོཾ་སུམྦྷ་ནི་སུམྦྷ་ཧཱུཾ། གྲཱྀ་ཧྞ་གྲཱྀ་ཧྞ་ཧཱུཾ། གྲཱྀ་ཧྞཱ་པ་ཡ་གྲཱྀ་ཧྞཱ་པ་ཡ་ཧཱུཾ། ཨཱ་ན་ཡ་ཧོ། བྷ་ག་ཝཱན། བིདྱ་ར་ཛཱ་ཡ་ཧཱུཾ། ཧྲཱྀ་ལས་བྱུང་བ་དམར་མོའི་སྐུ། །གྲི་གུག་ཐོད་པ་ཕྱག་ན་བསྣམས། །ནེའུ་
ལེའི་རྐྱལ་པ་མཆན་ན་བསྣམས། །རྡོ་རྗེའི་སྔགས་ཆུ་བདག་ཉིད་བཏུང་། །ཟས་ནོར་འདོད་པས་མཆོག་ཏུ་སྔགས། །ཨཱོཾ་ཛམྦྷ་མོ་ཧི་ཧི་ཐི་ཧྲི་ད་ཡ་མ་བར་པ་ནི་ཧཱུཾ་ཕཊ་སྭཱ་ཧཱ། ཨཱོཾ་ཛྷཾ་བེ་མོ་ཧེ་ཐི་པི་ནི་རི་ཧ་མ་མ་བ་སུ་པུཥྚིཾ་ཀུ་རུ་ཧྲིང་ཛ། གནོད་སྦྱིན་མོ་ནི་ནོར་འཁྱིལ་མ། །མོན་ནག་སྤྱན་དམར་གཡས་པ་ན། །རིན་ཆེན་བུམ་པ་ཐུགས་ཀ་ན། །གཡོན་པ་ནེའུ་ལེ་རིན་ཆེན་སྐྱུགས། །གོས་ནོར་ཟས་ཀྱི་བདག་མོ་ཡིན། །ཆངས་བུ་ལན་བདུན་གསུམ་དུ་ནི། །ཁྱིམས་དང་སྐྱེ་རགས་གཙང་མའི་ས། །ཨཱོཾ་ཏདྱ་ཐཱ་ཨ་ན་ལེ་ཀུཎྜ་ལི་བྷ་ན་བི་ཤ་ཙི་ན་ཡེ་སྭཱ་ཧཱ། ཨཱོཾ་ན་མོ་ཁྲ་མོ་ཁྲི་ཡེ་སྭཱ་ཧཱ། ཨཱོཾ་ན་མོ་ཁྲི་ཁ་མུ་མ་ཧཱ་ཁྲ་མོ་མ་ཧཱ་ཙི་ན་ཡེ་སྭཱ་ཧཱ། ལྟས་ངན་འདི་ཡང་བསྒྲུབ་ཁང་དང་། །རྟོལ་མོ་རོག་མོ་ཁ་མཛེར་ཅན། །སྲིན་པོའི་ལག་པ་འཕར་སྤྱང་ལྕེ། །རྫས་སྣ་གསུམ་གྱི་རིལ་བུ་བྱ། །གཏོར་མ་དུས་དྲུག་རང་ཉིད་ཀྱང་། །ཚ་བའི་ཟས་སོགས་ཤ་ཆང་བཟའ། །སྟག་གཡག་སྐྱེས་པ་བུད་མེད་ཞོན། །མདུན་དུ་མི་ལ་བྲིད་པའི་སྐུ། །མི་སྨྲ་མི་འཕྲོ་མི་ཡུར་ཞིང་། །ལྷ་བསྙེན་གོང་དུ་སོང་བས་བཟླས། །རྫས་མེད་གྲུབ་པར་མི་འགྱུར་རོ། །ཤན་ནི་པ་སིན་ཏྲ་ས་མ་ཡ་ཛ། ཤད་ནེ་མ་སེན་ཏ་མཱ་ར་ཡ་ཕཊ།མཱ་ར་ཡ་ཛ། ཆེ་གེ་མོའི་ཙིཏྟལ་ཆུམས། ཐུམས་ལིང་། རྦད་སུ་ལིང་། ཤང་ཤན་རྒྱུག་རྒྱུག །རྦུད་རྦུད་ས་མ་ཡ་ཕཊ་ཛ། གང་གི་རྐང་ལག་རེང་བྱེད་པ། །སྣག་ཚ་ནང་དུ་མཚོན་རྩི་བརྡར། །རབ་པོ་འཁོར་ལོ་རབ་གནས་བྲི། །དབང་གི་སྐུར་བསྒོམས་བཟླས་པས་འགྲུབ། །ཨཱོཾ་ན་ཏྲ་མུ་ལ་ནི་སྭཱ་ཧཱ། མ་མ་སརྦ་དུ་ཁྲ།མུ་ཁ་སྟཾ་བྷ་ཡ། ཧ་ས་ཏ་བྷན་ཐཱ་ཡས་ཐད་བྷན་དྷ་ཡ། ཧཱུཾ་ཧཱུཾ་ཧཱུཾ་ཕཊ་ཕཊ་ཕཊ་སྭཱ་ཧཱ། རྡོ་རྗེ་གོ་ཆ་གོན་བྱེད་པ། །རིམ་པ་བཞི་པའི་འཁོར་ལོ་ལ། །རྡོ་རྗེ་རྡོ་རྗེའི་ག་ལོགས་བྲི། །ཀ་དང་ཀ་ཡི་ཡ་ཏ་ཅན། །འཆང་བ་བསྲུང་བའི་མིང་གིས་བསྐོར། །སྔགས་བཅས་རྡོ་རྗེ་ཕྱེད་པ་བཟློག །བྲིས་ནས་བཏགས་ན་སྲུང་བའི་མཆོག །རྡོ་རྗེའི་གོ་ཆ་བླ་ན་མེད། །ཨཱོཾ་ཀྲུ་ཡེ་ཝ་ཁར་ལྕེ་མར་ཐཾ་སུཾ་འབྱུང་ཀླག་ཙ་ར་ནི་རྣམ་པ་དུག་རྣམས་བཟློག །ཡུལ་ཁམས་རབ་ཏུ་སྲུང་བྱེད་པ། །རིན་ཆེན་རྫ་ཡི་ག་འུ་རུ། །དཀར་གསུམ་མངར་བའི་རྣམ་པ་དང་། །
ཡེ་ཤེས་ལྔ་དང་འཇའ་ཚོན་ལྔ། །ཀླུ་དང་སྲིན་མོའི་འོ་མ་དང་། །སྔགས་ཀྱི་འབྲུ་གུ་རྨུ་ཡི་དཀར། །དེ་ནི་སེར་བའི་གདོང་དུ་གཏད། །སེར་བའི་ཁལ་རྟ་མགོ་བཅད་དེ། །རིལ་བུ་སྔགས་རྫས་རྒྱས་བཏབ་ནས། །གཤེད་ཀྱི་ཐོད་པ་སྟེང་དུ་སྐྱོན། །སེར་སྒོ་སེར་བའི་སྲང་ཡང་བཅད། །དྲོད་ཀྱི་དཔག་བསམ་གཞུ་བྱ་སྟེ། །དྲག་པོའི་མདའ་ལ་བཙན་བྱའི་སྒྲོ། །སྲིན་གྱི་རྔ་མས་རྒྱུད་སྦྱར་ཏེ། །གདོང་བཟློག་མདེའུ་རྩེ་གནམ་དུ་གཏད། །བདག་ཉིད་རྟ་གདོང་ཨོཾ་ཚུགས་བསྒོམ། །ཨེ་ཀ་ཛ་ཏི་ཕོ་ཉར་མངག །དྲག་པོའི་རྫས་སྣ་ཚོགས་ཚད་ལ། །བསྙེན་ཅིང་གདོང་དུ་གདབ་པར་བྱ། །ཨཱོཾ་ཏདྱ་ཐ་ཙ་ཏི་ཙ་ཏི། གུ་གུ་ཏི། ཤར་ཤར་ཤུར་ཤུར། མ་ལི་མ་ལི། ཀྱིལ་ཀྱིལ་བྷྱོ་བྷྱོ། སུ་པྲ་ཏི་ཛ་ཡ། མི་ལི་མི་ལི། མ་མ་རུ་ལུ་རུ་ལུ། ཧཱུཾ་བྷྱོ་ཧཱུཾ་ཕཊ་ཏ་ར། ཨོཾ་ན་ག་ཤེ་དུམ་པ་ཤེ། ནན་ཏི་ས་མ་ཡ། ཤཀྱ་ཧཱུཾ་ཕཊ་སྭཱ་ཧཱ། ཨོཾ་འབྲུག་ཐོག་ཕྱིར་རུཾ་སྭཱ་ཧཱ། ཞིང་བཅུ་བསྒྲལ་བའི་ལས་བྱ་ན། །རིན་ཆེན་དབང་གི་གཞོང་པ་རུ། །པདྨ་རཀྟ་མཚལ་ཆེན་དང་། །ཟེ་མ་ཀ་ལ་བིང་འདྲའི་སྙིང་། །འདོད་ཆགས་རང་གཤེད་ཐོད་པ་རུ། །ཁྲག་དུག་སྙིང་སྣ་མང་པོའི་སྙིང་། །བྱ་མོ་ནག་མོའི་གྲི་སྙིང་ནང་། །དོན་པོ་ལེ་བརྒན་ཁ་ཡང་བཅད། །མདུན་དུ་མུཾ་ལས་བྱང་ཆུབ་མ། །དམར་སེར་གྲི་དང་བྷན་དྷ་བསྣམས། །མ་མོ་ནག་མོ་དུན་བྷྱོ། མ་མོ་དུན་ཏིང་མ་ལས་ལ་དུན་བྷྱོ། ཏྲག་རཀྴ་ཛ་མུན་ཏི་སྙིང་ཤད་ཤད་ནྲྀ་ཛ་དུན་བྷྱོ། འུར་སྐམ་མེ་ཤ་རཾ་ཁ་ཁ་ཧ་ཧ་གྲ་ཏ་ཧྲི་ཛ་ཛ། ཙ་ཐུན་མཱ་ར་ཡ་ཐུན་སོད། ཤག་ཐུན་མཱ་ར་ཡ་ཐུན་སོད། རུ་རུ་རག་མོ་མཱ་ར་ཡ་ཐུན་སོད། མ་མ་མུག་ཏི་གྷྲི་ན་ཐུན་སོད། མ་མ་ཤ་ཐུན་ཏི་ཐུན་སོད། མ་མ་ཐུན་ཐུན་མཱ་ར་ཡ་ཐུན་སོད། ཤག་ཤག་མ་ཐུན་མུག་ཤག་ཐུན་སོད། མ་མ་རག་མོ་མ་ཏི་ཛ་ཛ། རཀྴ་རུ་རུ་ཙ་མུན་ཏི་ཀཱི་ལ་ཡ་རྦད་རྦད། ཏྲག་རཀྴ་ཙ་མུན་ཏི་ཀཱི་ལ་ཡ་རྦད་རྦད། མ་མ་སྙིང་ཁ་རག་ནྲྀ་ཛ། བ་ལ་ནི་ས་ནི་མུགས་མུགས། རག་མོ་ནི་ཧེ་ཧེ་ཛ། ཐུམ་རི་ལི་རྦད་རྦད། ཏྲག་རཀྴ་མུ་ཏྲ་སྙིང་ཁ་རག་མོ་དུན་བྷྱོ། སྲིད་གསུམ་དབང་དུ་སྡུད་པ་ཡི། །བདག་ཉིད་དམར་
མོ་ཉིད་དུ་བསམ། །མདའ་དང་ལྕགས་ཀྱུ་གཞུ་དང་ནི། །ཨུཏྤལ་འཛིན་མ་བསམ་ལ་བཟླས། །ཨོཾ་ཀུ་རུ་ཀུལླེ་ཧྲཱྀཿསྭཱ་ཧཱ། འབུམ་ཁྲི་བྱེ་བ་བདུན་འབུམ་གྱིས། །ཕྱུག་བདག་ལྷ་མིན་རྒྱལ་པོ་དང་། །སྐྱེ་དགུའི་འཇིག་རྟེན་དབང་དུ་གྱུར། །དམ་ལ་མི་གནས་བསྒྲལ་བའི་ཞིང་། །ཕོ་མོ་ཐོད་པ་དམར་ནག་ཏུ། །ཁྲག་དུག་སྙིང་སྣའི་རྫས་ལ་འདོད། །དང་པོར་བཅུ་པ་བསྒྲིམས་ཏེ་གྲངས། །གཟེར་རམ་ཁོང་ཁྲག་ཡོད་གྱུར་ན། །དགོས་པའི་སྔགས་བྱང་འབྲུ་གཅིག་དབྱུང་། །བཅུ་གཉིས་དག་ཏུ་གཏོར་བའོ། །བླ་དྭགས་དག་ནི་བྱུང་གྱུར་ན། །བཅུ་གསུམ་དག་ཏུ་རྦད་བྷྱོ་བཟློག །ཤན་དམར་གློ་དམར་རྟགས་བྱུང་ན། །དགུ་པ་གཏོར་ལ་འབྲུ་གཅིག་དབྱུང་། །ཁྱི་ནག་མ་མོ་བཟློག་གྱུར་ན། །ལྔ་དང་དྲུག་པ་མཐའ་བརྟུལ་དབྱུང་། །བདུན་དུ་གཏོར་བ་མན་ངག་ཡིན། །ཐོག་མར་འབྲུ་བཞི་འཁོར་ལོའི་སྔགས། །བཅུན་ཡིན་བཅུག་པས་ཆོ་འཕྲུལ་འཇིལ། །ལྔ་རུ་གཏོར་བ་མན་ངག་ཡིན། །མུན་ལྟར་གཏིབས་པའི་མ་མོ་དམར། །ལྕགས་ཀྱུ་ཞགས་ཐོགས་སྔགས་འདི་ཡིན། །མུ་རཀྴ་ཛ་མུན་ཏི་ཁ་ལ་བྷྱོ་རྦད། །རླུང་སེམས་སྲོག་རྩོལ་ལྡན་པ་ཡིས། །སྲིད་གསུམ་སེམས་ཅན་ལས་ལ་སྤྱོད། །སྲིད་པའི་བར་དོར་གནས་པ་ཀུན། །པདྨ་དབང་ཆེན་ཁྲག་འཐུང་གིས། །རིགས་དྲུག་བཀུག་ལ་རྟེན་ལ་བསྡིམ། །སྐྱབས་གསོལ་སེམས་བསྐྱེད་ས་ལ་བཞག །དཀྱིལ་འཁོར་གཞུག་པ་གཉིས་པ་སྟེ། །བསྙེན་པར་སྣང་བ་བྱ་བ་དང་། །ཉེ་བསྙེན་དང་ནི་བསྒྲུབ་པ་དང་། །སྒྲུབ་ཆེན་ཐོབ་ནས་སྐུ་གསུམ་གྱི། །ས་ལ་བཞག་པ་བདུན་པ་སྟེ། །བག་ཆགས་ལས་ངན་བྱང་བའི་སྔགས། །ངན་སོང་རིགས་དྲུག་གཞོམ་པར་བྱ། །ཨཱོཾ་ད་ཧ་ད་ཧ་སརྦ་ན་ར་ཀ་ག་ཏེ་ཧེ་ཏུཾ་ཧཱུཾ་ཕཊ། ཨཱོཾ་སརྦ་དུརྒ་སརྦ་ག་མཾ་སརྦ་ཀླེ་ཤ་ཧེ་ཏུཾ་ཧཱུཾ་ཕཊ། ཨཱོཾ་པ་ར་བིད་ཁངྒ་ཙྪིནྡ་ཧཱུཾ་ཕཊ། ཚོན་སྣ་ལྔ་ལྡན་སྲད་བུ་ལ། །རྡོ་རྗེ་གསུམ་གདབ་མདུད་པའི་རྒྱ། །ཡེ་ཤེས་ལྷ་བསྡིམ་འོད་ཞུ་ནས། །སྐྱབས་འགྲོ་གསོལ་གདབ་ལུས་ལ་གདགས། །གྲོ་ག་ཤིང་ཤུན་དྲི་ལྡན་ཆུས། །ཡི་དམ་སྔགས་དང་ཕྱག་རྒྱ་བྲིས། །རབ་ཏུ་གནས་ཏེ་གང་ཡིན་ལ། །བཏགས་ན་གདོན་བགེགས་འཇོམས་པར་ནུས། །
སྤྲིན་མེད་དྭངས་པའི་ཆོས་དབྱིངས་སུ། །ཚེ་ཡི་ཕྱག་རྒྱ་བཞི་བཅིངས་ནས། །དེའི་ཚེ་ཐུབ་དང་མི་ཐུབ་པའི། །བར་ཆད་ངེས་པར་བརྟག་པར་བྱ། །ཚེ་བསླུ་ཚེ་བསྐྱེད་ལ་སོགས་པས། །རྣལ་འབྱོར་ཚེ་སྲོག་བརྟན་པར་གཟུང་། །རང་རིག་བསྒོམ་ལ་གཞོལ་བ་ཡིས། །མདུན་གྱིས་དམིགས་པ་འགུལ་གྱུར་ན། །ཧཱུཾ་གི་སྒྲ་དང་སེམས་སུ་བཅས། །ཡི་དམ་ལྷ་ཡི་ཐུགས་ཀར་འགྲོ། །དང་པོ་ཞི་བའི་དུས་ཉིད་དུ། །ཤར་དུ་ཁ་བལྟས་ནམ་མཁའི་གནས། །བཅོམ་ལྡན་མགོན་པོ་ཚེ་དཔག་མེད། །མདོག་དཀར་བདུད་རྩི་ལྷུང་བཟེད་བསྣམས། །སྤྱན་དྲངས་མཆོད་པ་ཕུལ་ནས་ནི། །བདུན་པོ་རྣམ་དག་མཉེས་བསམས་ནས། །གཡས་ཀྱི་རླུང་གིས་དངོས་གྲུབ་བསྐུལ། །གཡོན་གྱི་རླུང་གིས་བླངས་ནས་ནི། །རང་གི་ཐུགས་ལ་བསྡིམ་པ་དང་། །ཤིན་ཏུ་བརྟན་པར་བྱ་བ་དང་། །མི་གཡོ་འཆི་མེད་ཐོབ་པའི་སྔགས། །ཉི་ཤུ་རྩ་གཅིག་གྲངས་དང་བཅས། །ཨཱོཾ་ཨཱ་ཡུ་ཥེ་ས་ར་ཧ་ཀ་ར་རི་ཤ་ར་རི་ཧཱུཾ་ཕཊ་སྭཱ་ཧཱ། ཨཱོཾ་ཨ་མ་ར་ཎི་ཛཱི་ཝན་ཏི་ཡེ་སྭཱ་ཧཱ། ཨཱོཾ་མ་ཧཱ་ཨ་མ་ར་ཨཱ་ཡུར་ཛྙཱ་ན་བྷྲཱུཾ་ཧཱུཾ། ཨཱོཾ་ཨ་མ་ར་ཎི་ཛཱི་ཝ་ན་ཏི་སྭཱ་ཧཱ། གང་གི་ཆུང་ཚེ་འཕེལ་བྱེད་པ། །སྤུ་མེད་བྱ་ཡི་སྒྲོ་དང་ནི། །བྱང་ཆུབ་འཕེལ་བའི་དཔག་བསམ་ཤིང་། །རོ་དང་ལྡན་པའི་གསེར་མདོག་དང་། །ཟ་བྱེད་ཕྲ་མོའི་སྡེར་མོ་དང་། །རབ་ཏུ་གཅེས་སོགས་རྫས་བཅངས་ཏེ། །གནམ་གཏའ་ཆོས་ཀྱི་དབྱིངས་སུ་སྦ། །བར་གཏའ་ལྷ་སྲིན་སྲོག་ལ་བཅུན། །ས་གཏའ་སྲིད་ཀྱི་ས་གཞི་གཟུང་། །འཇམ་པ་པོ་དང་རི་དྭགས་རྒྱལ། །ཛ་མི་ཀ་སོགས་བརྟག་པར་བྱ། །རྒྱལ་བསེན་ས་བདག་གཅུད་ལ་བོར། །མེད་བཙལ་ཡོད་གསོ་ཤི་འཕྲོ་གཅོད། །བྱ་གདོན་མངལ་ཁ་ལ་སོགས་པས། །སྲིའུ་གསོ་བ་བླ་ན་མེད། །འགོ་བའི་ལྷ་ལྔ་བསྟེན་པར་བྱ། །ཨཱོཾ་ཨཱ་ཡུརྫྙཱ་ན་བྷྲཱུཾ་སྭཱ་ཧཱ། ཟླ་བ་ཞག་ལ་སོགས་པ་ཡི། །ཀེག་དང་བཅས་པའི་གཏོར་མ་ཡིས། །གདོན་ཆེན་བཅོ་ལྔ་མཆོད་པར་བྱ། །དབང་ཆེན་འདུས་པའི་རྒྱུད་ལས། ལས་སྣ་ཚོགས་ཀྱི་ལེའུ་སྟེ་ཉི་ཤུ་པའོ།། །།དེ་ནས་བཅོམ་ལྡན་འདས་
ཀྱིས་གདུག་པ་འདུལ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་འདི་གསུངས་སོ། །རྣམ་སྨིན་འདུ་བ་གནོད་པའི་གདོན། །ཚོགས་དང་འཚོ་བྱེད་སྔགས་ཀྱིས་གཞོམ། །རྗེའུ་རིགས་ལག་གཡས་རྒྱལ་རིགས་མགོ། །བྲམ་ཟེ་ལག་གཡོན་དམངས་རིགས་གཡས། །གདོལ་པ་རྐང་པ་གཡོན་ནས་འཇུག །རྒྱལ་རིགས་རུས་ཏེ་རྗེའུ་རིགས་པགས། །དམངས་རིགས་སྤུ་སྟེ་བྲམ་ཟེ་ཁྲག །གདོལ་པ་ཤ་ལ་ཞུགས་པ་དང་། །སྙིང་དང་གློ་བ་སྲོག་རྩ་མཆིན། །དབང་པོ་ཀླད་པ་ཆུ་བ་རྣམས། །རང་གི་རྟགས་ཀྱིས་སྟོན་པར་བྱེད། །རྒྱལ་རིགས་ལྕི་འཐིབས་ས་ཡི་དུག །བྲམ་ཟེ་ཆུ་དུག་གྲང་ཞིང་འདར། །རྗེའུ་རིགས་མེ་ནི་ཚ་ཞིང་བསྲེག །དམངས་རིགས་ཡང་ཞིང་གཡོ་བ་རླུང་། །གདོལ་པ་རེག་མཐོང་ཁ་རླངས་ཅན། །གཟེར་ཞིང་ཟ་འཕྲུག་མྱོས་པར་བྱེད། །རྒྱལ་རིགས་རྒྱལ་པོ་རྟག་ཏུ་གནོད། །རྗེའུ་རིགས་ཀླུ་བཙན་རྟག་ཏུ་གནོད། །དམངས་རིགས་དམ་སྲི་རྣམས་དང་སྡང་། །བྲམ་ཟེ་སྲིན་མོའི་ཚོགས་དང་བཅས། །གདོལ་པ་མཛེ་འདྲེ་རྟག་ཏུ་གནོད། །མ་མོས་བྱད་དུ་འཇུག་པ་དང་། །རྒྱལ་པོས་སྣ་འདྲེན་གློ་བུར་བཙན། །ཐེ་བྲང་དམ་སྲི་ཉེན་ལངས་གཅོད། །ལུས་སྙོམས་ཆུ་ལ་བརྟག་པ་ཡང་། །གཡའ་མེད་སྣོད་དུ་ཉི་ཤར་དུས། །ནད་གཞི་ཁ་དོག་སྒོ་ནས་བརྟག །འབུར་ལོང་ག་གོ་ལ་ཡི་མདོག །མུ་ཏྲའི་མདོག་ནི་ནད་མེད་རྟགས། །མར་ཁུ་འོ་མ་ཆུ་རྩ་རམས། །མཁྲིས་རླུང་བད་ཀན་འདུས་པའི་ནད། །དེ་སོགས་བརྟགས་པས་མདོག་རྣམས་གསལ། །གཟུགས་ལ་གདོན་བརྟག་ཕྱོགས་བཞི་དབུས། །ཁང་ས་ཞིང་ས་དུར་ས་དང་། །མཆིན་པ་སྙིང་གློ་མཁལ་མ་དང་། །རྒྱལ་པོ་རྗེའུ་རིགས་བྲམ་ཟེ་དམངས། །སྟོན་དཔྱིད་དབྱར་དགུན་ལ་སོགས་བརྟག །ཁྲག་ལ་བཟང་ངན་དུས་དང་ནི། །ཐུབ་དང་མི་ཐུབ་བརྟག་པ་དང་། །དམར་སེར་ཁམ་པ་ནག་པོའི་དུས། །དང་པོ་ངན་ལ་བར་མ་འབྲིང་། །ཐ་མ་བཟང་ན་ཆུ་སེར་རྒྱས། །དང་པོ་བཟང་འབྲིང་ཐ་མ་ངན། །ཆུ་སེར་གཏིང་དུ་ཞེན་པ་དང་། །སྐྱ་བོ་དམར་པོ་རྨ་ཁར་བཅུག །དྲིལ་ལམ་
འབྱར་གྱིས་དབྱེ་བར་བྱ། །ཚངས་པའི་མཁར་དང་བདུད་ཀྱི་མཁར། །གནོད་སྦྱིན་མཁར་དང་སྲིན་པོའི་མཁར། །མ་མོའི་མཁར་དང་སྲོག་གི་མཁར། །སྲིན་པོའི་མཁར་ཤོར་སྤང་བར་བྱ། །གཡས་པ་དཀའ་སྟེ་གཡོན་པ་སླ། །ཤ་སྤུ་རུས་དུག་དཀའ་བར་འགྱུར། །དབང་པོ་གསལ་བྱེད་ཆུ་བུར་མིག །གདོན་གནོད་པ་དང་ཞག་ཟླ་ལོ། །འབྲས་བུ་སྨིན་དང་མཚོ་རྡོལ་དང་། །རྣམ་སྨིན་རིགས་དང་བྱད་ཀ་དང་། །ཀུ་རེ་མནོལ་ཕྱིར་རེ་འདོད་དང་། །དམིགས་བསལ་སྔགས་ཆུན་སྔགས་དྲེད་དང་། །གདོན་ཙབས་མཆོད་པའི་མིག་སྤྲིན་བརྟག །ལུས་ཀྱི་ཤ་མཚན་དོད་པ་དང་། །ངག་གི་སྒྲ་སྐད་སྐྱེ་བ་དང་། །སེམས་ཀྱི་རྨི་ལམ་སྣ་ཚོགས་རྣམས། །གང་ཡིན་རབ་ཏུ་གཟུང་བར་བྱ། །རྣམ་པར་སྨིན་པའི་ལས་བྱུང་ན། །བསོད་ནམས་ཚོགས་དང་སྟོང་ཉིད་བསྒོམ། །འབྱུང་བ་འཁྲུགས་པའི་དུ་བ་ལས། །སྨན་དང་སྣ་ཚོགས་རྫས་ཀྱི་གསོ། །སེང་ལྡེང་མུ་ཟི་རྒྱལ་བློན་བསྲེ། །ཀླུ་བདུད་ནག་པོ་བཤལ་སྨན་དང་། །ཕོལ་དང་ཤ་བཀྲ་ལ་སོགས་པར། །འབྲུ་སྦུ་ཤུན་ཤ་ཚིལ་གསུམ་དང་། །དུག་བཞི་ཁྲག་གཉིས་ལ་སོགས་བདུག །སྤྱང་དུག་སྤྱང་ཚེར་གླ་རྩི་བཙོད། །སྣག་ཚ་ར་དུག་ལོང་རྡོལ་དང་། །གུ་གུལ་དྲི་ཆེན་ཏི་ཙ་དང་། །ཀ་ར་བི་ར་ག་པུར་དང་། །ཙནྡན་མུ་ཟི་ལྡོང་རོས་དང་། །མར་དཀར་ར་གཞོབ་ལ་སོགས་བྱུག །བདུད་རྩི་མར་ཁུ་ཨ་རུ་ར། །པི་པི་ལིང་དང་རྣམ་པ་གསུམ། །མཛེ་ནད་ནག་པོ་ཀླུ་བདུད་ནག །བཙན་དུག་གུ་གུལ་མུ་ཟི་ནག །ཤུ་དག་ནག་པོ་རྣམ་པ་དྲུག །མ་མ་གི་རམ་མཆོག་རིས་དང་། །བོང་ཏེའུ་རྨ་བྱ་ར་ལས་ཁྲག །ཐ་ཀར་སྲོ་མ་གུ་གུལ་དཀར། །ཟ་འབྲུ་སུག་མ་ཡུ་མོ་མདེའུ། །བྱང་པ་ཚ་སྲིན་སྡིག་སྔོ་སྔོ། །ཀ་ཀ་རུ་ནི་རྣམ་པ་ལྔ། །སེང་ལྡེང་རྒྱ་དོཾ་རྡོ་རྒྱུས་འགྲོན། །ལྟོ་རུ་གཏང་བར་ཡང་དག་བཤད། །ཡན་ལག་ཞ་གྲུམ་ལ་སོགས་པ། །སྨན་གྱི་སྦྱོར་བས་གཞོམ་པར་བྱ། །འཕྲལ་གྱི་རྐྱེན་དབང་གྱུར་པ་ལས། །དྲག་པོ་སྔགས་ཀྱི་སྦྱོར་བ་གདབ། །
ནཱ་ག་རཱ་ཙ་མཱ་ར་ཡ་ཕཊ། ཕུ་མེ་རཱ་ཙ་མཱ་ག་ཡ་ཕཊ། ས་ཁྲག་རཱ་ཙ་མཱ་ར་ཡ་ཕཊ། ཡ་མ་ཤུ་ཤུ་ནཱ་ག་ཙ་ཏྲི་ཐུན་ཟེར་རྦད། ར་ཙ་འདྲི་ལ་ཐིབ་ར་རཱ་ཙ་ཐང་ཐང་ཤི་ཤི་རྦད།མ་མ་ཡཾ་ཏྲི་དུ་མེ་མཱ་ར་ཡ་རྦད། ནག་མོ་ཤུ་ཤུ་མཱ་ར་ཡ་རྦད། ནཱ་ག་ཙི་ཏྲ་དུ་ན་ནན། ནཱ་ག་ཙ་ཏྲ་འུར་ནན། མཱ་ར་ཡ་རྦད། ས་དཾ་སོ་མཱ་ར་ཡ་རྦད། ཙཀྲ་རུ་ཏྲི་རྦད། ནཱ་ག་རཱ་ཙ་མཱ་ར་ཡ་བ་ཤང་ཁུག་ཛ། རུ་རུས་དུར་ཁུག་ཛ། ནཱ་ག་ཡུམ་ཐུམས་རི་ལི་རྦད་ཛ། ཅེས་གསུངས་སོ། །དེ་ནས་བཅོམ་ལྡན་འདས་ཀྱིས་གདུག་པ་འཇོམས་པའི་འཁོར་ལོ་འདི་གསུངས་སོ། །སྨུག་ནག་གྲུ་གསུམ་གནམ་སྒོ་བཅའ། །མུ་ཁྱུད་གྲུ་ཆད་བར་ཁྱམས་སྒོ། །དཀྱིལ་འཁོར་དབུས་སུ་ཕུར་པ་གཉིས། །གནམ་སྒོ་ལ་ཡང་ཕུར་པ་གཉིས། །རོ་རས་གྲོ་ག་ཤིང་ཤུན་ལ། །བྱ་རོག་མགོ་རྩ་ཁྲག་དུག་གིས། །སྔགས་གྲངས་མཉམ་པའི་རེ་མིག་ལ། །ཉི་ཤུ་རྩ་གཅིག་དྲག་སྔགས་དགོད། །ཕུར་པའི་སྔགས་ཀྱིས་ཀླུ་ལ་གཟིར། །ཞག་གྲངས་ཐེམས་ནས་སྲོག་རྩ་བཅད། །དྲག་པོའི་མེ་ལ་སྦྱིན་སྲེག་བྱ། །གདུག་པ་གསུམ་དང་སྡོང་ཟླར་བཅས། །དབང་ཆེན་རྔམ་པའི་ཞལ་དུ་འབུལ། །དཔལ་གྱི་ཞབས་འོག་དག་ཏུ་མནན། །ཀླུ་ཡི་གདུག་རྩུབ་ཞི་བར་འགྱུར། །དེ་ནས་བཅོམ་ལྡན་འདས་ཀྱིས་འདི་གསུངས་སོ། །ལས་ཀྱི་ཁྱུང་ནག་ཁྲོས་པ་ནི། །རྡོ་རྗེ་རྒྱ་གྲམ་ཕྱག་ན་གསོར། །ཀླུ་གཉན་ས་བདག་ཞལ་དུ་གསོལ། །དེའི་སྐུ་གཟུགས་བྲིས་ནས་ནི། །ནུ་མར་རྫས་ཀྱི་ཐུམ་པོས་བརྒྱན། །སྤྲུལ་པ་རིགས་ལྔའི་ཁྱུང་ལྔ་འགྱེད། །དེ་ཡི་དྲག་སྔགས་འདི་དག་ཡིན། །ཨཱོཾ་ག་རུ་ཊ་ཙ་ལེ་ཙ་ལེ་ཧཱུཾ་ཕཊ། ནཱ་ག་སྲོག་ཚིག་ནན་རྦད། ལུས་རྡུལ་བུན་ནཱ་ག་མཱ་ར་ཡ་རྦད་སོད། རཾ་རཾ་ཛྭ་ལ་ཛྭ་ལ་ཤི་ཤི་རྡུལ་བུན་ནཱ་ག །མཱ་ར་ཡ་རྦད་སོད། ཨཱོཾ་ནཱ་ག་ཤི་ནན། ནཱ་ག་བེར། ནཱ་ག་ཆིངས། ནཱ་ག་སྡོམས། ནཱ་ག་སོད། ནཱ་ག་གོ་ལ་ཡ། ནཱ་ག་རཱ་ཙ་ཆིངས། ནཱ་ག་རཱ་ཙ་ཧཱུཾ། ནཱ་ག་རཱ་ཙ་ཕཊ། ནཱ་ག་ཤུ་ཤུ་ནན། ནཱ་ག་བྱེར། ནཱ་ག་སྙིང་ལ་སྲོག་རྦུད། པྲ་ཏི་ས་མ་ཡ། ནཱ་ག་སྙིང་ཚལ་པ་དུམ་བུ་རྦད། ཨཱོཾ་སིད་ཐཱ་ཐ་ག་རུ་ཊ་བི་ཤད་དེ་ནཱ་ནན། ནཱ་ག་ཐམས། ཉི་མ་ས་ལ་ནན་ཀླད་པ་ནན། ཙིཏྟ་གྷུ་མི་ནན། ཀུན་ཤིག་ཙི་རྟ་
མུ་ཏྲ་བཟློག་བྱེར། ནཱ་ག་བེར། ནཱ་ག་བཟློག །ནཱ་ག་ཤིག །ནཱ་ག་ནན། ནཱ་ག་མགོ་ལ་ནན། ནཱ་ག་བྱེར་བྱེར། མཱ་ར་ཡ་ཕཊ་རྦད་སོད། ཡ་མ་ཤུ་ཤུ་སོད། ནག་པོ་ཤུ་ཤུ་མགོ་ལ་ནན། ས་དམ་ནག་པོ་ས་ཁྲག་མཱ་ར་ཡ་རྦད། ན་མ་ཤ་མ་ཏྲི་རཀྴ་མཱ་ར་ཡ་རྦད། ཙ་ཀྲཾ་དུ་ཏྲི་སུ་མི་མཱ་ར་ཡ་རྦད། རཱ་ཙ་ཐང་ཐང་ཤི་ཤི་རྦད། ཏྲཾ་རིལ་ཐུམས་ཀྱི་མ་ཏང་ཁུག་ཤེལ་རཱ་ཙ་མཱ་ར་ཡ་རྦད། ཅེས་གསུངས་སོ། །དབང་ཆེན་འདུས་པའི་རྒྱུད་ལས། མཛེ་ནད་གསོ་བའི་ལེའུ་སྟེ་ཉི་ཤུ་རྩ་གཅིག་པའོ།། །།དེ་ནས་བཅོམ་ལྡན་འདས་ཀྱིས་ཚོགས་ཐམས་ཅད་ཡོངས་སུ་རྫོགས་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་འདི་གསུངས་སོ། །དགོས་པའི་ལོངས་སྤྱོད་ཚང་བ་ནི། །འབྱོར་ལྡན་ཡོ་བྱད་ཚོགས་ཡིན་ཏེ། །དགྱེས་ལྡན་ལྷ་དང་སྐལ་ལྡན་མི། །དེ་བཞིན་ཡང་དག་ཤེས་པར་ལྡན། །ཚེ་འཛིན་ཛ་གད་ཛ་ཏི་དང་། །ཟླ་རྒྱས་ཟླ་ཕྲོམ་འཇམ་དེས་དང་། །མེ་ཏོག་ཙི་དང་ཀུན་ཏུ་རྒྱུག །འཇམ་སྙིང་བྱི་ལ་སེ་དང་ནི། །ཀུན་འབྱོར་འབྲང་རྒྱས་འབྱོར་ཚོགས་རྣམས། །སྒྲུབ་པའི་རྫས་སུ་ཡང་དག་ལྡན། །ཨཱ་ཙརྱ་རྡོ་རྗེ་སློབ་དཔོན་ཡིན། །གུ་རུ་ཏ་ར་མཁས་པས་བཤད། །རུ་བ་མ་རིའི་རྩེ་མོ་ཡིན། །མ་ཏང་ལ་ཀོ་སོ་མང་ཡུལ། །ཕ་ལམ་ཀ་ནི་གྲོང་ཁྱེར་ཡིན། །སུ་མེད་གྲོང་དུ་བཤད་པའོ། །ཀ་ལོ་ཀ་ནི་ཡོད་པའི་མིང་། །ཤ་རིང་ག་གམ་སྐལ་ཡོད་ཤེས། །ཙེ་ཏྲ་ཀམ་ནི་སྐལ་མེད་བརྗོད། །ཕུར་ན་མ་ནི་སྣོད་ལྡན་མ། །ས་རི་བྱ་ནི་སྣོད་ངན་ཏེ། །ག་ཡ་ནི་ཞེས་རྒྱལ་རིགས་ལ། །ར་གམ་རྗེའུ་རིགས་ཞེས་ནི་བཤད། །བི་ར་རྒྱ་ནི་དམངས་རིགས་སོ། །རཾ་ས་ཀ་རི་བྲམ་ཟེར་བཤད། །བི་ར་དྷུ་པེ་གདོལ་པ་ཅན། །ས་མུད་ཏྲཾ་ནི་རྒྱལ་པོར་བརྗོད། །ཙ་བམ་རིག་ངན་ཞེས་ནི་བཤད། །ཤམ་རཾ་སྨེ་ཤ་ཅན་དུ་བརྗོད། །བྷ་བ་ཙག་ཏྲཾ་ཀོ་ལྤགས་མཁན། །ཁད་ཀཾ་རོ་སྲེག་མ་རུ་བཤད། །པ་ཤ་ཞགས་འབར་མ་རུ་བཤད། །ཀུ་མ་རི་ནི་ཉིན་མོར་བཤད། །ཀ་ཉ་མཚན་མོ་རབ་ཏུ་གྲགས། །ཏ་པ་ཉི་མ་ཕྱེད་དུ་བཤད། །ཏ་པི་མཚམས་ཀྱི་ཆ་རུ་བཤད། །རྟི་ཏྲེ་བཟང་པོའི་དུས་སུ་བཤད། །པྲ་ཏི་
དུས་ངན་སྤངས་པར་གྱིས། །ཧི་ར་ནི་ནི་མེ་ཏོག་བརྗོད། །ཤ་རུ་ནཾ་ནི་ཡོངས་སུ་བརྗོད། །ཤ་ཀུ་ནི་ཀ་མར་མེར་བརྗོད། །ཤ་པྲ་ཏི་ཏ་ལྷ་བཤོས་ལ། །མཱ་ལ་ཏྲི་ནི་གྲི་རུ་བརྗོད། །ཀྲི་ཏི་མ་ཏི་སྒྲ་ཡིན་ཏེ། །ཤ་ཀི་ཀ་ནི་གོས་སུ་བཤད། །ག་ནི་བཤད་པར་ཡོངས་སུ་གྲགས། །རུ་ཤཾ་རི་ནི་ཁུ་བར་ཤེས། །ག་ནམ་ཤ་ཆེན་དུ་ནི་བཤད། །ཙན་ཏྲ་ན་མེ་ཁྲག་ཏུ་བཤད། །མེ་ག་མ་ཏྲཾ་ཅན་དུ་བརྗོད། །ཀུ་ཏ་རཾ་ནི་འདོད་ཡོན་སྤྱོད། །ཙ་ཏུཾ་རོ་དྲུག་ཟ་བ་པོ། །སཾ་བྷོ་ད་ཀཾ་ཆང་འཐུང་ངམ། །བི་ཏུཾ་ཤ་རུ་མངོན་པར་བརྗོད། །ན་མི་ནི་བ་ཀྲཾ་ནི་ཐོད། །ཀུ་ལཾ་མི་ཡི་རུས་པས་བརྒྱན། །ཤ་ཁམས་བཟང་བ་ཞེས་ནི་བརྗོད། །ཨཱ་རཾ་རོ་ནི་ཞིམ་པར་བཤད། །ཨ་ཀྵཾ་རཾ་ནི་རོ་མི་ཞིམ། །པ་ཀོ་ལ་མུད་དམ་གླུ་ལེན། །མི་ཀྲ་གར་ཞེས་བྱ་བར་བཤད། །ཤབ་ཏ་ཚོལ་ཆོས་སྐུ་ནི་བཤད། །མི་གམ་མི་སྨྲ་བར་ནི་བརྗོད། །བ་བི་ཏྲཾ་ནི་སྔགས་ཞེས་བཤད། །དྷ་རི་ད་ར་དཀྱིལ་འཁོར་ཏེ། །པ་ཏྲ་པ་ནི་གྲལ་ལ་འདུག །ཀ་པ་ཙི་ཏྲ་བྱིན་རླབས་ཀྱིས། །མ་ལ་ཀི་ནི་དགོངས་པའོ། །ཀ་མ་ཀུ་ཏྲི་ཕྲིན་ལས་ཏེ། །པ་རི་པུ་ནི་སྨོན་ལམ་མོ། །ཉེ་ས་ར་ནི་གདོང་དུ་བརྗོད། །པ་ཊཾ་དཔྲལ་བ་ཞེས་སུ་བཤད། །མ་ལ་སྨིན་མར་ཡང་དག་བཤད། །ཀོ་པ་བ་ཡ་མིག་ཏུ་ཤེས། །པདྨ་ཀར་ནི་ཀ་ནི་སྣ། །བལ་ལ་བོལ་ནི་མཆུ་རུ་ཤེས། །ཨན་དྷ་ན་ནི་སོ་རུ་བརྗོད། །པི་ཤ་མགྲིན་པ་རུ་ནི་གྲགས། །ཧཾ་བོ་ཕྲ་བ་རུ་ནི་བཤད། །ཨ་གུ་ཤ་ནི་དཔུང་བར་བརྗོད། །བ་ཧི་རུ་ནི་ལག་པར་བཤད། །པ་ར་ཨང་ག་ཀེ་ས་ར། །སེན་མོ་ཤེས་ནི་ཡང་དག་བཤད། །གྷེ་སཾ་རྗེ་ངར་དུ་ནི་བཤད། །ཤི་ལ་ཕ་ལེན་བུ་མོར་བཤད། །ཛ་ཏི་པ་ལི་སྐེད་ཡིན་ནམ་སྙེད་པར་བརྗོད། །མ་ཏ་ནམ་ནི་ལྟེ་བར་བརྗོད། །པདྨ་ཛ་ལམ་གསང་བའི་གནས། །ཀ་དམ་པ་ཉམས་བརླ་གཉིས་སོ། །ཆ་ག་ན་ནམ་རྐང་པར་བརྗོད། །ཤ་ཏ་ཀུ་སུ་སྨད་ལམ་སྟན། །ཤབ་ཏ་པུ་ཞེས་བྱ་བར་བརྗོད། །པདྨ་ནྲྀ་ནི་ཞི་བའི་ཡུམ། །ཧ་ཏི་ཎི་ནི་རྒྱས་པའི་ཡུམ། །ཤན་ཏྲི་ནི་ནི་དབང་གི་ཡུམ། །ཙན་ཏྲི་ཎི་ནི་དྲག་པོའི་ཡུམ། །པ་ར་སྒེག་མོ་རོ་འབེབས་ན། །ས་ནི་པ་ཏྲ་མཚན་ལྡན་མ། །པཾ་སུ་ཏྲཾ་ནི་དབང་གཉིས་
སྦྱོར། །ཨ་འབྲས་མེ་ཞེས་བྱ་བ་དང་། །རྒུན་འབྲུ་གླང་པོ་ཆེ་ལ་སོགས། །ས་ལ་སུ་ནི་རྟ་ཡིན་ཏེ། །ནི་ལོ་ནེ་རྒྱས་བྱ་ཞེས་བྱ། །ཨ་ཀ་རུ་ནི་ཁྱི་རུ་བརྗོད། །སུཾ་བྷཾ་ཞིང་ནི་བཟང་པོར་བཤད། །དྷ་ནི་རྟ་ནི་གསང་བར་བཤད། །ས་ར་བར་ཏ་འཚོ་བར་བཤད། །མི་རཾ་པ་མིའི་རོ་རུ་བརྗོད། །བ་ཧ་ར་ག་གད་པ་ཞེས། །བི དྲི ་ཕག་ཅེས་བརྗོད་པར་བྱ། །ས་ལ་ཤ་ནི་ཉ་ཞེས་བརྗོད། །ནི་ནཾ་ར་སྐྱེས་སུ་ནི་བརྗོད། །མ་དང་ཨ་ཧཾ་འདབ་ཆགས་ཤའོ། །ཤྱ་ནྱ་སྲོག་ཅེས་བྱ་བར་བརྗོད། །ན་ནཾ་ནི་ནི་རྣམ་ཤེས་བརྗོད། །ཨ་བི་ན་བཾ་རྒོད་པར་བཤད། །རུ་ཏི་རཾ་ནི་འཕྱ་བར་བརྗོད། །བྷ་ཧ་ནཾ་རི་ཆུ་རུ་བཤད། །ཨ་འཛམ་པ་ནི་མེ་ཞེས་བརྗོད། །ནི་ཙཾ་ད་དུར་ར་ཏུ་བརྗོད། །རང་ནཾ་ཆགས་པ་ཞེས་ནི་བཤད། །ས་ཀྵཾ་ཡན་ལག་རབ་ཏུ་བཤད། །ཤུ་བཾ་བཟང་པོ་ཞེས་ནི་བཤད། །བ་ཌ་ཀཾ་ནི་ཉོན་ཞེས་བརྗོད། །གྷི་ཏཾ་ལཾ་དུ་བཤད་པ་དང་། །ན་ག་རཾ་ནི་བདག་ལུས་བརྗོད། །ན་ལ་ནི་ལུ་ལཾ་སྟོབས་མེད། །གོ་པག་ཥྞ་ལཾ་ཐམས་ཅད་རྫོགས། །ས་ག་རཾ་ནི་རྒས་པར་བཤད། །བྱོ་མ་ག་ནཾ་ཕ་རོལ་དཔུང་། །ཀ་མ་ཡ་ནི་གྱིས་ཤིག་བརྗོད། །ཧོ་ནི་ཚིམས་པ་རུ་ནི་བཤད། །མ་ག་དོག་པ་རུ་ནི་བརྗོད། །ཨུ་ཙི་ལྷག་མ་ཞེས་བྱ་བཤད། །བྷ་ནི་ལི་གཏོར་གཏོར་མ་བཤོས། །ཨུ་ཏྲེ་པ་ཀྲ་ལྷ་ཕུད་སྦྱོར། །མ་ནི་པུ་རི་ལྷག་ཕུད་མཆོད། །མ་ཧེ་ནི་ནི་རལ་གུར་གྱིས། །སྟཾ་བྷ་ནན་ནི་གཏོར་གཞོང་གནོན། །ཨོ་ཏྲི་བ་ནི་དཀྱིལ་འཁོར་བསྡུས། །ཨ་ཏྲི་ས་མ་ལ་རྫོགས་རིམ་བསྒོམ། །བ་ཡང་སུ་ནི་རླུང་སྒྲར་གཟུང་། །ཐ་བ་བི་ར་འདི་ལྟ་སྟེ། །མ་ནི་བུ་རི་གང་ཞེ་ན། །ཀོ་ཊ་ཀྵ་ནི་སྲོག་འཛིན་པ། །ཀོ་ཏ་བར་ནི་ཐུར་དུ་སེལ། །ཀ་ཏ་གྱེན་དུ་རྒྱུ་བ་སྟེ། །གོ་ཏ་བ་ཤ་མེ་དང་མཉམ། །ཀོ་ཏི་ར་ག་ཁྱབ་བྱེད་ཏེ། །ཀོ་ཏ་ཀྵ་ནི་རྒྱུ་བ་ལ། །ཀོ་ལ་བ་ཀོ་ལ་ནི་རྒྱུ། །ཀོ་ལ་བ་ཤ་ཡང་དག་དང་། །ཀོ་ལ་བ་ཤུ་རབ་ཏུ་མ། །ཀོ་ལ་ར་ཐ་ངེས་པར་རྒྱུ། །དབང་ཆེན་འདུས་པའི་ཏན་ཏྲ་ལས། ཚོགས་ཀྱི་འཁོར་ལོ་སྒྲས་བཤད་པའི་ལེའུ་སྟེ་ཉི་ཤུ་རྩ་གཉིས་པའོ།། །།དེ་ནས་བཅོམ་ལྡན་འདས་ཀྱིས་གདུག་པ་ཐམས་ཅད་འཇོམས་པ་
ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་འདི་གསུངས་སོ། །ཁྲུ་གང་སོར་ནི་བཅུ་གཉིས་པ། །དཀར་ཞིང་ཟླུམ་པ་ཞི་བ་ལ། །ཁྲུ་དོ་ཟབས་སུ་དེ་ཕྱེད་སེར། །དམར་པོ་ཟླ་བ་ཕྱེད་པ་དབང་། །གསོད་པ་སོར་ནི་ཉི་ཤུ་པ། །གྲུ་གསུམ་ས་གཞི་ནག་པོར་བྱ། །དྲི་ཞིམ་དཀར་སེར་དམར་པོ་དང་། །དུག་དང་ཁྲག་དང་དུར་སོལ་བྱུག །འཁོར་ལོ་རིན་ཆེན་པདྨ་དང་། །རྒྱ་གྲམ་རིམ་པ་བཞིན་དུ་བྲི། །ཞི་བ་རྒྱས་པ་དབང་དང་དྲག །ཤར་བྱང་ནུབ་དང་ལྷོ་རུ་བལྟ། །དགང་གཟར་དབྱིབས་དང་ཚད་ལྡན་པ། །གྲུ་བཞི་ཟླུམ་པོ་ཟླ་གམ་དང་། །ཟུར་གསུམ་རྣམས་སུ་ལྡན་པར་བྱ། །བླུག་གཟར་རྡོ་རྗེ་ཕྱེད་པས་མཚན། །དགེ་སློང་རྒྱལ་པོ་བུད་མེད་དབང་། །བཤན་པ་ལས་བྱུང་ཤིང་དང་མེས། །པི་ལ་བ་ཨུ་དུམྺ་ར་ལ། །མར་དང་སྦྲང་རྩིས་སྦགས་པ་ལ། །འོ་མ་སྤོས་ཆུས་བྱུག་པ་དབུལ། །རྩ་བ་རྩེ་མོ་དང་བྲལ་བ། །འོ་མ་ཞོས་སྤངས་སེར་པོ་དང་། །ནགས་ཀྱི་ལྕུག་མ་དམར་པོ་ལ། །དཔལ་ཁའི་མར་དང་དམར་པོས་བྱུག །ཁ་ལ་ཚེར་མ་ཅན་གྱི་ཤིང་། །གས་དང་སྲོག་ཆགས་དག་གིས་ཟོས། །དུར་ཁྲོད་རོ་བསྲེག་ཁྲག་དུག་བྱུག །འབྲས་ཆེན་ནས་དང་འོ་མ་ཞོ། །སྦྲང་རྩི་མར་ནག་མི་ཤ་དང་། །ཁྲག་དང་ལན་ཚྭ་སྐྱེ་ཚེ་དབུལ། །ཙནྡན་མེ་ཏོག་དཀར་པོ་དང་། །སེར་པོ་དམར་དང་ཐང་ཆུ་ནག །བདུད་རྩི་རུས་པ་དང་བཅས་པས། །བ་གླང་ལྕི་བ་རྩ་བའི་ཆ། །ནིམ་པ་རོ་སྐྱུར་ཚ་རོག་དྲི། །བོང་བུའི་སྦངས་ལ་རབ་ཏུ་བྱ། །ཚེས་གཅིག་ཞི་ལ་བཅོ་ལྔ་རྒྱས། །བཅུ་བདུན་དབང་ལ་ཉི་ཤུ་དགུ། །དྲག་པོ་སྲོད་ཞི་སྔ་དྲོ་རྒྱས། །དགོང་དབང་ཉིན་མཚན་གུང་ལ་བསད། །དབྱར་དགུན་སྟོན་དཔྱིད་དུས་ཤེས་བྱ། །དཀར་པོ་རིན་ཆེན་དམར་ནག་པོས། །གཅེར་བུ་རབ་ཏུ་བྱ་བ་དང་། །དཀར་འཇམས་དམར་དང་རོ་རས་བཏིང་། །བྱམས་དང་སྙིང་རྗེ་བཏང་སྙོམས་དགའ། །ཉ་ཕྱིས་དུང་ཕོར་རིན་ཆེན་གསེར། །ཟངས་གཞོང་ཐོད་པའི་ནང་དུ་བཤམ། །བྱང་ཆུབ་སེམས་བསྒོམ་རྒྱལ་རིགས་དང་། །སྨད་འཚོང་གདོལ་པའི་མེ་བོར་ཏེ། །པདྨ་
དབང་ཆེན་འཁོར་བཅས་ལ། །མཆོད་པ་མཉེས་པར་ཕུལ་ནས་ནི། །གང་ལ་དམིགས་པའི་ལས་བཅོལ་ཏེ། །གཤེགས་ཏེ་སྨོན་ལམ་གདབ་པར་བྱ། །ཨཱོཾ། ཐེག་ཆེན་བྱང་ཆུབ་མཆོག་ལ་རྟག་ཏུ་ཞུགས་པ་དང་། །ཟབ་མོའི་ཆོས་ནི་རྟག་ཏུ་ཉན་པ་དང་། །རྡོ་རྗེ་སློབ་དཔོན་བཟང་དང་འགྲོགས་པ་དང་། །ལུས་ཀྱི་སྒྲིབ་སྦྱོང་བསྐྱེད་པའི་རིམ་བསྒོམ་ཞིང་། །ངག་གི་དྲི་མ་བྲལ་ཕྱིར་གསང་སྔགས་བགྲང་། །སེམས་ཀྱི་ལོག་ལྟ་ཞི་ནས་རྫོགས་རིམ་བསྒོམ། །རྡོ་རྗེ་བཙུན་མོའི་ཁུ་བ་རྟག་ཏུ་འཐུང་། །ཐབས་དང་ཤེས་རབ་རྡོ་རྗེ་དྲིལ་བུ་འཛིན། །རྨད་བྱུང་གཏོར་མས་ཐུགས་དམ་ཡོངས་སུ་བསྐང་། །དུས་གསུམ་རྒྱལ་བ་མཆོད་པའི་སྐལ་བར་ལྡན། །སྐྱེ་ཞིང་སྐྱེ་བ་ཚེ་རབས་ཐམས་ཅད་དུ། །སེམས་ཅན་དོན་བྱེད་བདག་དོན་ཡོངས་རྫོགས་ཤོག །ཨཱོཾ་མ་ཧཱ་བྷསྨི་ཀུ་རུ་ཧཱུཾ་སརྦ་སིདྡྷི་ཧཱུཾ་སྭཱ་ཧཱ། ཨཱོཾ་བཛྲ་དྷཱུ་པེ་ཧཱུཾ་ཛྭ་ལ་ཛྭ་ལ་ཛྙཱ་ན་ཛྭ་ལ་ཧཱུཾ། ཨཱོཾ་ཨ་ན་ལ་མ་ཧཱ་སུ་ཏྲ་ཛྭ་སརྦ་བྷསྨི་ཀུ་རུ་བཛྲ་དུཥྚན་ཧཱུཾ་ཕཊ། ཨཱོཾ་མ་ཧཱ་སརྦ་ཀུ་རུ་ཧཱུཾ། སརྦ་པཱ་པཾ་ད་ཧ་ན་བཛྲཱ་ཡ་སྭཱ་ཧཱ། ཨཱོཾ་སརྦ་ཡ་ཛྙཱ་ཡ་སྭཱ་ཧཱ། ཨཱོཾ་ཨ་པྲ་ཏི་ཧ་ཏ་བཛྲཱ་ཡ་སྭཱ་ཧཱ། ཨཱོཾ་བཛྲ་ཨཱ་ཡུ་ཥེ་སྭཱ་ཧཱ། ཨཱོཾ་བཛྲ་པུཥ྇་ཧཱུཾ། ཨཱོཾ་མ་ཧཱ་བ་ལཱ་ཡ་སྭཱ་ཧཱ། ཨཱོཾ་མ་ཧཱ་བི་གཱ་ཡ་སྭཱ་ཧཱ། ཨཱོཾ་ཨཱཿཧཱུཾ་སརྦ་ལོ་ཀེ་དྷཱུ་པེ་པཱུ་ཛ་སྭཱ་ཧཱ། ཨཱོཾ་སརྦ་ལོ་ཀེ་པུཥ྇་པཱུ་ཛ་སྭཱ་ཧཱ། ཨཱོཾ་སརྦ་ལོ་ཀེ་དཱི་པ་པཱུ་ཛ་སྭཱ་ཧཱ། ཨཱོཾ་སརྦ་གནྡྷེ་པཱུ་ཛ་སྭཱ་ཧཱ། ཨཱོཾ་སརྦ་ལོ་ཀེ་ནི་བི་ཀྵྦ་པཱུ་ཛ་སྭཱ་ཧཱ། ཨཱོཾ་སརྦ་ལོ་ཀེ་ཤཔྟ་པཱུ་ཛ་སྭཱ་ཧཱ། ཨཱོཾ་ཛྭ་ལ་ཀ་མ་ལ་ལཱ་སྱེ་ཧཱུཾ། མཱ་ལེ་ཏྲཱཾ། གཱི་ཏི་ཧྲཱིཾ། ནཱི་ཨ། ཨཱོཾ་སརྦ་པཱ་པཾ་མ་མ་ཀ་སྱ་ཀུ་རུ་ཤཱན་ཏིང་ཀུ་རུ་སྭཱ་ཧཱ། ཨཱོཾ་སརྦ་པཱ་པཾ་མ་མ་ཀ་སྱ་ཀུ་རུ་པུཥྚིཾ་ཀུ་རུ་སྭཱ་ཧཱ། ཨཱོཾ་སརྦ་པཱ་པཾ་མ་མ་ཀ་སྱ་ཀུ་རུ་བ་ཤང་ཀུ་རུ་སྭཱ་ཧཱ། ཨཱོཾ་སརྦ་པཱ་པཾ་མ་མ་ཀ་སྱ་ཀུ་རུ་མཱ་ར་ཡ་ཕཊ། ཀུན་གཞི་རྣམ་དག་ཧོམ་ཁུང་དུ། །ཉོན་མོངས་ལྔ་ཡི་ཡམ་ཤིང་ལ། །ཡེ་ཤེས་ལྔ་ཡི་མེ་སྤར་ན། །ཡེ་ཤེས་བསོད་ནམས་ཚོགས་རྫོགས་སོ། །བྷ་ག་ཡངས་པའི་ཐབ་ཁུང་དུ། །ཕུང་པོ་ལྔ་ཡི་བདག་ཉིད་ལ། །མར་དང་གཟར་བུའི་བྱ་ཐབས་ཀྱིས། །བསྙེན་པ་ཕུལ་བའི་ལས་བྱས་ན། །ནམ་ཡང་འདུ་
འབྲལ་མེད་པ་ཡིས། །གསང་བའི་སྦྱིན་བསྲེག་འགྲུབ་པ་ཡིས། །དབང་ཆེན་འདུས་པའི་ཏན་ཏྲ་ལས། སྦྱིན་སྲེག་གི་ལེའུ་སྟེ་ཉི་ཤུ་རྩ་གསུམ་པའོ།། །།དེ་ནས་འཁོར་རྣམས་རབ་ཏུ་དགའ་ཞིང་གུས་པ་དང་བཅས་པས། ཕྱེ་མ་ཕུར་མ་དང་། གདུགས་དང་། བ་དན་དང་། སིལ་སྙན་དང་། པདྨ་དང་། བན་དྷུ་ཀ་དང་། ཨུཏྤ་ལ་སོགས་པ་དང་། གཟུགས་དང་། སྒྲ་དང་། དྲི་དང་། རོ་དང་། རེག་བྱ་དང་། ཆོས་ལ་སོགས་པ་དང་། དགའ་བ་དང་། བདེ་བ་དང་། ཚིམ་པ་དང་། ཡིད་ངལ་སོས་པའི་མཆོད་པ་མང་པོས་མཆོད་ནས། གསོལ་པ། མགོན་པོ་བདག་ཅག་འདུས་པ་ཡིས། །རྒྱུད་འདི་བཟུང་ཞིང་བཅང་བ་དང་། །ཇི་ལྟར་བཤད་ཅིང་བསྟན་པར་བྱ། །གུས་པས་ནམ་ཡང་མི་སྤང་ངོ་། །ཞེས་ཞུས་པ་དང་། སྟོན་པས་བཀའ་སྩལ་པ། གང་གིས་བསྐལ་པར་སྦྱང་དཀའ་བ། །ངེས་པའི་བློ་ལྡན་ཅན་ལ་སྟེ། །དྲང་དོན་ངེས་པའི་དོན་དུ་བཤད། །ཇི་བཞིན་ཇི་བཞིན་མ་ཡིན་པ། །དགོངས་པ་དགོངས་མིན་རྣམ་པ་དྲུག །གསང་སྔགས་དོན་གྱི་རྒྱུད་བཤད་བྱ། །ཡི་དམ་ཉིད་དུ་ངེས་པར་ཟུང་། །དེ་ལྟར་མི་ལྡན་སྐལ་མེད་ལ། །འཕྱར་བ་གཡེང་བས་བྱིན་གྱུར་ན། །དུར་ཁྲོད་དཔའ་བོ་དཔའ་མོ་རྣམས། །འདུས་ནས་ཤ་ཟ་སྲོག་ལ་འབེབས། །ཞེས་གསུངས་པས། འཁོར་དེར་འདུས་པ་ཐམས་ཅད་ཀྱང་། བདེ་བ་ཆེན་པོའི་དོན་མངོན་དུ་བྱས། སྐུ་གསུམ་དབྱེར་མེད་ལྷུན་གྲུབ་ཀྱི་ངང་དུ་བཞུགས་པར་གྱུར་ཏོ། །དགོངས་པ་དེ་མངོན་དུ་གྱུར་ནས། བྱང་ཆུབ་སེམས་དཔའ་ཐམས་ཅད་ཀྱང་། བཅོམ་ལྡན་འདས་ལ་རྗེས་སུ་ཡི་རངས་པར་གྱུར་ཏོ། །བཅོམ་ལྡན་འདས་ཉིད་སྐུ་གསུང་ཐུགས་ལྷུན་གྲུབ་སྟུག་པོ་བཀོད་པའི་རྒྱན་ཉིད་དུ་བཞུགས་སོ། །དབང་ཆེན་འདུས་པའི་རྒྱུད་ལས། མཇུག་རྗེས་སུ་ཡི་རངས་པའི་ལེའུ་སྟེ་ཉི་ཤུ་རྩ་བཞི་པའོ།། །། རྒྱུད་ཀྱི་རྒྱལ་པོ་དབང་ཆེན་འདུས་པ་རྫོགས་སོ།། །། རྒྱ་གར་གྱི་མཁན་པོ་པཎྜི་ཏ་པདྨ་འབྱུང་གནས་དང་། བོད་ཀྱི་ལོཙྪ་བ་སྦ་སང་ཤི་ཏ་དང་། ངན་ལམ་རྒྱལ་བ་མཆོག་དབྱངས་དང་། ཅོག་རོས་བསྒྱུར་ཅིང་གཏན་ལ་ཕབ་པའོ།། །།