ཐམས་ཅད་བདུད་རྩི་ལྔའི་རང་བཞིན།
རྒྱ་གར་སྐད་དུ། སརྦ་པཉྩ་ཨ་མྲྀ་ཏ་སྭ་བྷཱ་བ། བོད་སྐད་དུ། ཐམས་ཅད་བདུད་རྩི་ལྔའི་རང་བཞིན། བཅོམ་ལྡན་འདས་དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་གསང་བ་མཆོག་གི་དཀྱིལ་འཁོར་ན། ཤིན་ཏུ་རྣལ་འབྱོར་གྱི་དབང་ཕྱུག་ཆེན་པོ་དང་ཐབས་ཅིག་ཏུ་བཞུགས་ཏེ། ཉན་ཐོས་དང་རང་སངས་རྒྱས་དང་། ཐེག་པ་ཆེན་པོའི་མདོ་སྡེའི་རྒྱལ་པོ་བྱང་ཆུབ་སེམས་དཔའ་དང་། དགྲ་བཅོམ་པའི་ཉན་ཐོས་ཀྱི་དགེ་འདུན་ཆེན་པོ་དག་མིང་ཡང་མི་གྲག་པའི་ནང་དུ། གསང་སྔགས་ཀྱི་སྙིང་པོ་བདུད་རྩིའི་མཆོག་ཏུ་བྱ་བའི་བལྟ་བ་དང་། སྤྱོད་པ་དང་བསྒྲུབ་པ་འདི་གསུངས་སོ། །བསམ་གྱིས་མི་ཁྱབ་བསྟན་པ་དང་། །བརྒྱད་ཁྲི་བཞི་སྟོང་རྣམ་གྲངས་ཀྱང་། །ཐེག་པའི་སྒོ་ནི་གསུམ་དུ་འདུས། །གསང་གཉིས་ཐེག་པར་འདུས་དང་བཞི། །ལྡེམ་པོར་དགོངས་དང་དོན་དམ་ཡང་། །བཀྲི་བའི་དོན་དེ་སངས་རྒྱས་ཡིན། །རྣ་བརྒྱུད་སྟོན་པས་ཐུགས་བརྟོལ་ཏེ། །ངེས་པའི་ལུང་ཡང་སངས་རྒྱས་ལ། །
སངས་རྒྱས་མཉམ་དང་དབྱིངས་སུ་འགྲོ། །བྱང་ཆུབ་སེམས་འདི་ཀུན་ཏུ་བཟང་། །རྫོགས་པའི་ཡེ་ཤེས་བདེ་ཆེན་ཉིད། །མི་རྟོག་སྤྱོད་པའི་ཡུལ་མ་ཡིན། །མ་ལུས་མཐའ་དག་ཉིད་ཀྱི་རྒྱ། །ཡེ་ནས་བྱ་མེད་བྱ་མི་དགོས། །རྒྱུ་དང་འབྲས་བུ་འཁྲུལ་པའི་སྒྲ། །བྱང་ཆུབ་འདོད་པ་ལྟུང་བའི་གནས། །བསྒྲུབ་ཅིང་མ་བཙལ་བདེ་བར་གནས། །རྒྱུད་དང་ལུང་དང་མན་ངག་ཀྱང་། །དམངས་དང་རྗེའུ་དང་རྒྱལ་པོའི་ཚུལ། །ཁྱད་པར་རྩལ་འཕང་ཐག་རིང་ཡང་། །གཅིག་ལ་གཅིག་བརྟེན་གཅིག་གི་དང་། །གཅིག་སྟེ་རྣམ་པ་ཡོངས་ཀྱིས་མེད། །དེ་བས་སྐུ་གསུང་ཐུགས་ཀྱི་བདག །སྐུ་དང་རྒྱན་དང་འཁོར་ལོ་ཡང་། །ལུང་ཆེན་ཟབ་མོའི་ནང་ནས་གསལ། །ལྔ་བཞི་ནང་དུ་འཁོར་བ་ཡང་། །ཡེ་ཤེས་སངས་རྒྱས་དེ་ལས་མེད། །བལྟ་བ་འདི་ལ་གནས་པ་ནི། །རྣལ་འབྱོར་འདི་ནི་སྐལ་བ་བཟང་། །ཅི་སྤྱད་ཅི་བསྒོམ་ཅི་བསྒྲུབས་ཀྱང་། །བདུད་རྩི་ཉིད་དེ་སྨན་གྱི་མཆོག །བདེ་གཤེགས་ཀུན་གྱི་ཐུགས་དམ་ཉིད། །རྒྱལ་བ་རྒྱ་མཚོ་རྣམས་ཀྱི་གསོས། །སངས་རྒྱས་བདེ་ཆེན་ཉིད་ལས་བྱུང་། །མཐའ་ཡས་སེམས་ཅན་དོན་གྱི་ཕྱིར། །རང་ལ་མཆོད་ཅིང་རང་གིས་བཟའ། །སྒྲུབ་པ་པོས་ནི་ནན་ཏན་བྱ། །ཞེས་བཀའ་སྩལ་ཏོ། །བལྟ་བའི་གནས་སྐབས་རྫོགས་སོ།། །།བཅོམ་ལྡན་འདས་བདེ་བ་ཆེན་པོ་ལ་ཕྱག་འཚལ་ལོ། །ལས་འདི་ལུང་གི་བསྒྲུབ་བྱ་ན། །མི་སྤང་བ་དང་དང་དུ་བླང་། །སྤྱད་པའི་དམ་ཚིག་བཅོ་ལྔ་བསྲུང་། །དེ་ཡང་མ་ཧཱ་ས་མ་ཡ། །བཞི་པོ་རྫོགས་ན་ཀུན་ཏུ་བཟང་། །ཞི་རྒྱས་དབང་དང་མངོན་སྤྱོད་དང་། །མནན་བཟློག་དྲུག་ནི་གཅིག་ཏུའོ། །དང་ལ་ག་ཎའི་ལུང་བཤད་སྟེ། །བྷ་ག་བཱན་ནི་ཉིད་ཀྱི་བཀའོ། །ལྷ་ཡི་བདུད་དང་ཕུང་པོའི་བདུད། །ཉོན་མོངས་བདུད་དང་འཆི་བདག་བཅོམ། །ཕྱག་རྒྱ་ཆེན་པོ་བཞི་དང་ལྡན། །བྱང་ཆུབ་འཁོར་བ་མྱ་ངན་འདས། །བཅོམ་ལྡན་འདས་ཀྱིས་བཀའ་སྩལ་ཏོ། །སངས་རྒྱས་སེམས་ཅན་ཐམས་ཅད་དང་། །མཚན་མར་བཏགས་པ་ཐམས་ཅད་ཀུན། །བདེ་ཆེན་ཉིད་ལས་གཞན་མ་ཡིན། །བདེ་ཆེན་ཉིད་ལས་གཞན་པའི་ཆོས། །སངས་རྒྱས་ཉིད་ཀྱིས་མི་བརྙེས་སོ། །ཕྱི་ནང་མ་ལུས་སྣོད་བཅུད་ཀྱང་། །ཡབ་ཡུམ་བདེ་བའི་ངང་དུ་གསལ། །འདི་ནི་སྙིང་པོ་བྱང་ཆུབ་ལུང་། །དེ་ནས་ཏ་ན་བཤད་པར་བྱ། །ཁམས་གསུམ་ཐམས་ཅད་བསྒྲལ་བའི་ཕྱིར། །མ་སྐྱེས་པས་ན་འགག་པ་
འཇིག །བདག་ཉིད་མེད་ན་མཉམ་པའི་ལུང་། །ཐུགས་རྗེ་ཆེན་པོས་ཅིར་མི་མཛད། །ཡང་དག་ཉིད་ལ་ཡང་དག་སྒྲོལ། །ཡང་དག་བསྒྲལ་ན་བདེ་ཆེན་ཐོབ། །སྟོང་གསུམ་མ་ལུས་བཏོན་པ་ལས། །འབུམ་གྱིས་ཆར་ཡང་མི་ཕོད་དོ། །སྐྱེས་བུ་ཆེན་པོ་རྣལ་འབྱོར་གྱིས། །བསྒྲལ་བ་འབའ་ཞིག་སྙིང་རྗེ་མཆོག །མི་ལྡོག་དབྱིངས་སུ་ཡང་དག་ཡིད། །ཐིག་ལེ་ཆེན་པོར་དབང་བསྐུར་ཏེ། །ཟླ་གསང་དབུས་ན་བྱང་ཆུབ་སེམས། །རྫོགས་སངས་རྒྱས་ལ་སོམ་ཉི་མེད། །དྲི་ཆེན་རྣམ་པར་སྣང་བར་མཛད། །མི་བསྐྱོད་བྱང་ཆུབ་སེམས་དཔའ་ཉིད། །མཱཾ་ས་རིན་ཆེན་འབྱུང་ལྡན་ཆེ། །རཀྟ་སྣང་བ་མཐའ་ཡས་གསུངས། །དྲི་ཆུ་དོན་ཡོད་ལས་གྲུབ་པོ། །ཐམས་ཅད་མ་ལུས་སངས་རྒྱས་ལྔ། །ལུས་པ་མེད་པ་ཡེ་ཤེས་ལྔ། །མ་བཅོས་ཡེ་ནས་དེ་ཉིད་དོ། །དེ་ཕྱིར་སྨན་ཆེན་བཅུད་ཀྱི་མཆོག ། བདུད་རྩི་ཞེས་ནི་དེ་ལ་བྱ། །རྟོག་པའི་ཀླུངས་སུ་སུ་འདྲིས་པ། །མི་ཞེས་བྱ་བ་སངས་རྒྱས་ཡིན། །བཅོམ་ལྡན་འདས་ནི་གུད་ན་མེད། །ཅེས་བཀའ་སྩལ་ཏོ། །སྤྱོད་པའི་སྐབས་རྫོགས་སོ།། །།རིགས་ལྔ་བདེ་བར་གཤེགས་ལ་ཕྱག་འཚལ་ལོ། །བྱིན་རླབས་དབབ་པ་བསྟན་པར་བྱ། །ཡིད་འོང་གནས་སུ་འདུག་ནས་ནི། །བྱ་བ་མེད་པའི་ལམ་འདི་བསྒྲུབ། །མཎྜལ་བརྒྱད་པའི་གཞུང་བཞིན་དུ། །དཔལ་དང་ལྡན་པའི་སྣོད་བཞག་སྟེ། །སྟོང་ལས་འབྱོར་པ་ཡེ་ནས་དག །བཏག་དང་བཙག་དང་གཅལ་བ་ཡིས། །ཉི་ཟླ་གསལ་བའི་དཀྱིལ་འཁོར་དུ། །འབྲུ་ལྔ་ཡེ་ཤེས་འཕྲོ་འདུ་ལས། །སྟོང་ཁམས་ཁྱབ་པར་དོན་བྱས་ཏེ། །བཅུད་ཀྱི་སྙིང་པོ་ཀུན་བསྡུས་ནས། །དུས་གསུམ་སངས་རྒྱས་མཆོད་པའི་ཕྱིར། །མུ་ཏིག་དཀར་པོ་དྲི་མེད་ལྟར། །སྒྲུབ་པ་པོས་ནི་ནན་ཏན་དུ། །གུ་ཧྱ་ལག་གི་ཕྱག་རྒྱ་ནི། །གཞུང་བཞིན་བསྟན་ནས་འཕྲོ་འདུ་བྱ། །དེ་དབུས་ཀླུ་བདག་ས་བོན་གྱིས། །དངོས་གྲུབ་དམ་པ་བླང་བར་བྱ། །དགུ་པའི་སྔགས་ཀྱིས་བཏབ་ནས་ནི། །ལེ་ལོ་མེད་པའི་བརྩོན་འགྲུས་ཀྱིས། །བར་ཆད་མེད་པའི་འཕྲོ་འདུ་བྱ། །གསལ་ལ་འབྱུང་འཇུག་ལྷན་ནེའོ། །རྟགས་དང་མཚན་མ་བདུན་གྱིས་འབྱུང་། །འོད་དང་དུ་བ་དྲི་
དང་སྒྲ། །ལྷ་མོའི་གཟུགས་ཀྱང་སྟོན་པར་བྱེད། །མང་དུ་འཕེལ་ན་འགྲུབ་རྟགས་ཡིན། །དེ་ལ་ཡ་མཚན་བསྐྱེད་མི་བྱ། །མཚན་མ་དེ་དག་མ་བྱུང་ན། །བསྐང་གསོ་ཆོ་ག་རྒྱ་ཆེར་བྱ། །སྤོགས་ཐབས་བསྐྱར་ནས་རྩལ་ཤུགས་དབྱུང་། །རྫས་རྣམས་ཀྱང་ནི་བསྟར་བར་བྱ། །དེ་ནས་མཆོད་ཅིང་དངོས་གྲུབ་བླང་། །སློབ་མ་ལ་ཡང་དབང་བསྐུར་རོ། །ཚེ་དང་སྐོངས་དང་ཡིད་དུ་འོང་། །ནད་དང་བྲལ་དང་ཅི་འདོད་དང་། །བགེགས་རྣམས་ཞི་བ་ལ་སོགས་པའི། །ཡོན་ཏན་བརྒྱ་རྩ་བརྒྱད་རྣམས་འདི་ཡིས་ཐོབ། །སྙིང་པོ་ཚིམས་བྱེད་བཅུད་ཀྱི་མཆོག །གཙོ་བོ་ལྔ་དང་འབྲས་བུ་ལྔ། །འདི་དག་རབ་ཏུ་བསྐྱབ་པའི་ཕྱིར། །དྲི་ཞིམ་བཅུད་ལྡན་ཐམས་ཅད་ཀུན། །མང་པོ་འདུས་པའི་མཐུ་བྱིན་ཆེ། །ཡངས་ཤིང་རྒྱུད་ལ་གོམས་པ་དང་། །སློབ་མ་དཔའ་བརྟུལ་གཙང་སྦྲ་ཅན། །ཟླ་གསང་དཀར་དམར་རླུང་དཀར་ལྕི། །ཉུང་ཡང་པཉྩ་ཡན་ཆད་ཀྱི། །མི་ཕྱེད་པ་ཡི་བདུན་གནས་པའི། །ཐུགས་ཀྱི་དངོས་གྲུབ་དམ་པ་འདི། །རེ་བ་མེད་པས་བླང་བར་བྱ། །འདི་ཚེ་འབྲུ་ནི་བརྟག་པར་བྱ། །མ་དག་པ་ནི་མཚམས་གཅད་དོ། །ལས་ཀྱི་གཙོར་ནི་བསྐང་གསོ་དང་། །སྦྱང་དང་མཚམས་དང་བསལ་བ་ཡིས། །ནན་ཏན་གྱིས་ནི་བརྩོན་འགྲུས་བསྐྱེད། །ཐེ་ཚོམ་མེད་ན་ངེས་པར་འགྲུབ། །ཅེས་བཀའ་སྩལ་ནས། ཤིན་ཏུ་རྣལ་འབྱོར་གྱི་དབང་ཕྱུག་ཆེན་པོ་ཀུན་ཡི་རངས་ཏེ་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །ཨེ་མ་ཧོ་གསང་བ་ལས་བྱུང་བའི། །བྱང་ཆུབ་བདེ་ཆེན་ཉིད་ལ་རྫོགས། །མ་རིག་མུན་སེལ་ཡེ་ཤེས་སྒྲོན། །དཔའ་བོ་ཁྱོད་ལ་སྐྱབས་སུ་མཆི། །ཞེས་བསྒྲུབ་པའི་སྐབས་རྫོགས་སོ།། །།ཤིན་ཏུ་རྣལ་འབྱོར་དབང་ཕྱུག་ཆེན་པོའི་སྒྲུབ་པ། བདུད་རྩི་མཆོག་གི་ལུང་། དུམ་བུ་གསུམ་པའི་རྒྱུད་ཅེས་བྱ་བ་རྫོགས་སོ།། །།