རྡོ་རྗེ་ཕུར་པ་མདུང་རྩེ་དམར་པོའི་རྒྱུད་ཅེས་བྱ་བ།
རྒྱ་གར་སྐད་དུ། བཛྲ་ཀཱི་ལ་ཡ་ཤཀྟི་ཨ་གྲ་རཱ་ག་ཏནྟྲ་ནཱ་མ། བོད་སྐད་དུ། རྡོ་རྗེ་ཕུར་པ་མདུང་རྩེ་དམར་པོའི་རྒྱུད་ཅེས་བྱ་བ། བཅོམ་ལྡན་འདས་དཔལ་རྡོ་རྗེ་གཞོན་ནུ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་འོག་མིན་གྱི་གནས་དྲག་པོ་མཐིང་ནག་འབར་བའི་གཞལ་ཡས་ཁང་ན། རྡོ་རྗེ་སྲིན་པོའི་ལྷ་ཚོགས་དང་ཐབས་གཅིག་ཏུ་བཞུགས་ཏེ། དེའི་ཚེ་ཉིད་ལས་མི་གཞན་པའི་འཁོར་ཀརྨ་ཧེ་རུ་ཀས་འདི་སྐད་ཞུས་སོ། །ཀྱེ་བཅོམ་ལྡན་འདས་ཉོན་མོངས་པ་སེམས་ཅན་རྒྱུ་ཅི་ལགས། རྐྱེན་ཅི་ལ་སྤྱོད། ལས་གང་སྨིན་བཀའ་སྩལ་དུ་གསོལ། ཞེས་ཞུས་པ་དང་། བཅོམ་ལྡན་འདས་ཀྱིས་བཀའ་སྩལ་པ། དང་པོ་འཇིག་རྟེན་སྲིད་པའི་རྒྱུད། །ཆགས་པ་གནས་པ་ཞིག་པ་ལས། །བར་དུ་སྟོངས་པར་གྱུར་པའི་ཚེ། །དེ་ཡང་སྣོད་ཆགས་བཅུད་ཆགས་མཉམ། །དེ་དུས་ལྷ་ཡི་སྤྲུལ་པ་ནི། །བག་ཙམ་རླན་འདུས་གནས་པ་ལས། །བྱ་རྒོད་དར་མ་གཅིག་ཏུ་སྲིད། །གཤེར་ལ་རླན་ཙམ་གྱུར་པ་ལས། །སྟག་ཆེན་དར་མ་གཅིག་ཏུ་སྲིད། །དེ་ནི་སྲིད་པའི་སྤྲུལ་པའོ། །བྱ་ཡི་ཚང་འཆའ་བའི་གནས། ཤར་ཕྱོགས་ཤེལ་གྱི་བྲག་ཁ་དཀར་པོ་རི་མཐོ་ས་གཙང་བར། །བྱ་དང་སྟག་གི་ལུས་གཉིས་ནི། །མ་འཕྲད་ཡིད་ཀྱིས་ཆགས་པས་བཤོས། །
སྲིད་པའི་སྒོ་ང་བདུན་དང་ཆུ་བུར་གཉིས་སུ་སྲིད། །སྒོ་ང་བདུན་པོ་ནི། ཤེལ་སྒོང་དཀར་པོ་དང་། དངུལ་སྒོང་སྐྱ་བོ་དང་། ལྕགས་སྒོང་ནག་པོ་དང་། གསེར་སྒོང་སེར་པོ་དང་། ཟངས་སྒོང་དམར་པོ་དང་། གཡུ་སྒོང་སྔོན་པོ་དང་། མཆོང་སྒོང་སྨུག་པོ་དང་བདུན་ནོ། །ཆུ་བུར་གཉིས་ལ་ཡིད་མ་ཆེས་ནས། མཆུས་བརྟོལ་བས། བུད་མེད་བཟང་སྡུག་ལ་འོད་ཆགས་པ་བདུན་བྱུང་བས། བྱ་འདྲོགས་ ཚང་བོར་རོ། །བུད་མེད་བདུན་གྱིས་ནི། སྒོ་ང་རེ་ཚགས་བྱས་སོ། །སྲིད་པའི་བྱུང་ཚུལ་བསྟན་པའི་ལེའུ་སྟེ་དང་པོའོ།། །།དེ་ནས་བུད་མེད་བདུན་ལས། གཅིག་གིས་ཤེལ་སྒོང་དཀར་པོ་བརྟོལ་བས། དེ་ནས་མི་དཀར་མདུང་ཙམ་ལ་དཔྲལ་བ་ན་མིག་གཅིག་ཡོད་པ་བྱུང་། བུད་མེད་གཅིག་གིས་དངུལ་སྒོང་སྐྱ་བོ་བརྟོལ་བས། མི་སྐྱ་བོ་རའི་མགོ་ཅན་བྱུང་། བུད་མེད་གཅིག་གིས་ལྕགས་སྒོང་ནག་པོ་བརྟོལ་བས། མི་ནག་པོ་ལག་པ་དགུ་པ་བྱུང་། བུད་མེད་གཅིག་གིས་གསེར་སྒོང་སེར་པོ་བརྟོལ་བས། མི་སེར་པོ་མིག་དམར་ཅན་བྱུང་། བུད་མེད་གཅིག་གིས་གཡུ་སྒོང་སྔོན་པོ་བརྟོལ་བས། མི་སྔོན་པོ་སྦལ་པའི་མགོ་ཅན་བྱུང་། བུད་མེད་གཅིག་གིས་ཟངས་སྒོང་དམར་པོ་བརྟོལ་བས། མི་དམར་པོ་ར་སྐྱེས་ཁམ་པ་ཞོན་པ་གཅིག་བྱུང་། བུད་མེད་གཅིག་གིས་མཆོང་སྒོང་སྨུག་པོ་བརྟོལ་བས། བུད་མེད་དྲུག་ལ་བཞིན་བཟང་སྡུག་ལ་འོད་ཆགས་པ་བྱུང་། གཅིག་ནག་མོ་དཔྲལ་ན་མིག་གཅིག་ཁ་ན་སོ་གཅིག །བྲང་ན་ནུ་གཅིག་ཡོད་པ་བྱུང་། གཅིག་གཅན་གཟན་གྱི་མགོ་ཅན་དུ་བྱུང་ངོ་། །བྱུང་ཚུལ་བསྟན་པའི་ལེའུ་སྟེ་གཉིས་པའོ།། །།དེ་ནས་མི་དཀར་པོ་མིག་གཅིག་པ་དང་། བུད་མེད་ནག་མོ་མིག་གཅིག་མ་གཉིས་མཆིས་པ་ལས། བུ་དགུ་མདའ་གཞུ་དང་མདུང་ཐོགས་པ་དང་། བུ་བཅོ་བརྒྱད་སྒྱེའུ་སེར་ཅན་བཅོ་བརྒྱད་བྱུང་ངོ་། །མི་སྐྱ་བོ་རའི་མགོ་ཅན་དང་། བུད་མེད་ཁྱིའི་མགོ་ཅན་
མཆིས་པ་ལས། བྱིས་པ་སྤྲེལ་མགོ་ཉིས་བརྒྱ། བྱིས་པ་བྱི་ལའི་མགོ་ཅན་ཉིས་བརྒྱ། བྱིས་པ་བོང་བུའི་མགོ་ཅན་ཉིས་བརྒྱ། བྱིས་པ་ཁྱུང་གི་མགོ་ཅན་ཉིས་བརྒྱ་སྟེ་སྟོང་ངོ་། །ཉིས་བརྒྱ་གཅིག་ཆད་མི་ནག་པོ་ལག་དགུ་པོ་དང་། བུད་མེད་བཟང་མོ་གཅིག་མཆིས་པས། བུ་ཁྱེའུ་གཉིས་བུ་མོ་གསུམ་སྟེ་ལྔ་བྱུང་ངོ་། །མི་སེར་པོ་མིག་དམར་ཅན་དང་། བུད་མེད་བཟང་མོ་གཅིག་རྩེས་པས། ཁྱེའུ་གཉིས་བུ་མོ་གསུམ་སྟེ་ལྔ་བྱུང་ངོ་། །ཆུ་བུར་གཅིག་བརྟོལ་བ་ལས། བུད་མེད་དཀར་མོ་དཔྲལ་ན་མིག་གཅིག་ཡོད་པ། བུད་མེད་སེར་མོ་རལ་གཅིག་གནམ་དུ་བསྒྲེང་བ། བུད་མེད་དམར་མོ་ལྕགས་ཀྱུ་ཐོགས་པ། བུད་མེད་སྔོན་མོ་དབྱུག་ཏོ་ཐོགས་པ་བཞི་བྱུང་སྟེ། རྩེས་པ་དང་སྐྱེས་ལུགས་ཀྱི་ལེའུ་སྟེ་གསུམ་ པའོ།། །།དེ་ནས་མི་དཀར་པོ་བུ་སྨད་བཅས་པས། འཇིག་རྟེན་གྱི་ཁམས་སུ་སེམས་ཅན་ཐམས་ཅད་ལ་གནོད་པ་སྣ་ཚོགས་བྱས། སྲོག་གཅོད་པ་དང་། ཤ་ཟ་བ་དང་། ཁྲག་འཐུང་བ་དང་། མདངས་འཕྲོག་པ་དང་། དབུགས་རྔུབ་པ་ལ་སོགས་པ་བཀྲེན་ཞིང་དབུལ་བ་རྣམས་བྱེད་པར་འགྱུར་རོ། །དེའི་ཚེ་རིགས་ལྔ་བདེ་བར་གཤེགས་པའི་སྤྱན་གྱིས་མ་བཟོད་ནས། ཐུགས་རྗེ་སྐྱེས་ཏེ་ཞི་བས་བདེན་པའི་ཆོས་གསུངས་པས་ཐུལ་བར་མ་གྱུར་ཏེ། བཅོམ་ལྡན་འདས་དཔལ་རྡོ་རྗེ་གཞོན་ནུར་སྐུ་སྤྲུལ་ཏེ། ཞལ་གསུམ་ཕྱག་དྲུག་ཞབས་བཞི་གྱད་ཀྱི་དོར་སྟབས་སུ་བཞུགས་སོ། །སྐུ་མདོག་སྔོན་པོ། ཕྱག་གཡས་དང་པོ་རྡོ་རྗེ་རྩེ་དགུ་བསྣམས། བར་པ་རྩེ་ལྔ་བསྣམས། གཡོན་དང་པོ་མེ་དཔུང་འབར་བ་བསྣམས། བར་པ་ཁ་ཊྭཱཾ་རྩེ་གསུམ་བསྣམས། ཐ་མ་གཉིས་རི་རབ་ཕུར་པ་འདྲིལ་བ། སྐྲ་ཉི་ཁྲི་ཆིག་སྟོང་བ་སྤུ་བྱེ་བ་འབུམ་རྡོ་རྗེས་གཏམས་པ། སྨིན་མ་དྲུག་གློག་བཞིན་འགྱུ་བ། སྤྱན་དགུ་ཚྭ་ཚྭ་འཕྲོ་བ། ཤངས་བུག་དྲུག་རླུང་ནག་འཚུབས་པ། སྙན་དྲུག་འབྲུག་ལྡིར་བ། ཞལ་གསུམ་ཀཱི་ལ་ཡ་དང་རུ་ལུའི་སྒྲ་སྒྲོགས་པས་ས་གཞི་གཡོ་བ། སྐུ་རི་
རབ་ཙམ་དུ་བཞེངས། ཞལ་བར་སྣང་ཙམ་དུ་གདངས་ཏེ་གསོལ་ནས། འཕོངས་སུ་བཏོན་པས། གདོད་དྲེད་ནས་ལུས་འདར་ཡེད་ཡེད། མིག་སྔོ་ཧྲིག་ཧྲིག་བྱུང་ནས། བདེ་བར་གཤེགས་པ་ཁྱེད་རང་ལ་སྐྱབས་སུ་མཆིའོ། །བདག་མ་བཀུམ་ཐུགས་རྗེས་གཟུང་དུ་གསོལ། །བདག་གི་བུ་སྨད་འཁོར་དུ་བཞེས་སུ་གསོལ། །བདག་གི་སྐུ་མདོག་དཀར་པོ་འདི་བཞེས་ལ་ཞལ་གཡས་དཀར་བ་སྟོན་པར་མཛོད་ཅིག །དེར་བྷ་ག་ཝཱན་གྱིས་བཀའ་སྩལ་པ། དངོས་གྲུབ་བར་ཆད་བྱེད་པའི་དགྲ། །གདུག་ཅིང་ཕུང་སེམས་ལྡན་པ་རྣམས། །ཟུང་ཞིག་རྒྱོབ་ཅིག་རྣམ་པར་ཆིངས། །ཤཱི་གྷྲཾ་ཨཱ་ན་ཡ་ཧཱུཾ་ཕཊ། ཅེས་གསུངས་པས། ཁོས་སྲོག་གི་སྙིང་པོ། ས་རི་ས་ཉ་རི་ས་ཛཿ། ཞེས་ཕུལ་ལོ། །བུ་དགུ་དང་བཅོ་བརྒྱད་ཆུང་མ་ནག་མོ་ཚོ་ཕུལ་ནས། དབང་དང་བྱིན་རླབས་ཞུས་སོ། །གསད་གསོལ་དབབ་གཅད་ཀྱི་ལས་བྱ་བར་ཁས་བླངས། མིང་བཏགས་པ། རྒྱལ་པོ་བློ་གྲོས་སྤྱན་གཅིག་པ་དང་། ཆུང་མ་ལ་བདག་ཉིད་ཆེན་མོར་མིང་བཏགས་སོ། །དེས་ཐོད་པའི་ཕྲེང་བ་ཡང་ཕུལ་ལོ། །བུ་དགུ་ལ་འགོང་པོ་སྤུན་དགུར་མིང་བཏགས་སོ། །བུ་བཅོ་བརྒྱད་ལ་ཡུལ་བློན་བཅོ་བརྒྱད་དུ་བཏགས་སོ། །མི་རིང་སྐྱ་བོ་རའི་མགོ་ཅན་དང་། ཆུང་མ་ཁྱིའི་མགོ་ཅན་གཉིས་ཀྱིས། བུ་སྟོང་ཚོ་དེད་ནས་སེམས་ཅན་ཐམས་ཅད་ལ་གནོད་པར་བྱེད་པ་ལ། བཅོམ་ལྡན་འདས་ཀྱིས་གཟིགས་ནས་འདི་མ་བྱེད་བྱས་པས་མ་ཐུལ། སྐུའི་ཚམ་རྔམས་བསྟན། ཡང་ཞལ་དུ་རྔུབས་པས། འདར་ཞིང་མིག་རིག་རིག་ཏུ་གྱུར་ཏེ། ཞུས་པ་བདག་གི་བུ་སྨད་འཁོར་དུ་བཞེས། བདག་གི་གོས་གླང་ཆེན་གྱི་ཀོ་རློན་འདི་བཞེས་ལ་རྒྱན་དུ་མཛོད། ཅེས་ཕུལ། བཅོམ་ལྡན་འདས་ཀྱིས་བཀའ་སྩལ་པ། དངོས་གྲུབ་བར་ཆད་བྱེད་པའི་དགྲ། །གདུག་ཅིང་སྡང་སེམས་ལྡན་པ་རྣམས། །རིངས་པར་ཁུག་ལ་སྨྲར་ཆུག་ཅིག །ཛྭ་ལ་པ་ཡ་ཛྭ་ལ་པ་ཡ་ཞེས་གསུངས་པས། ཁོས་སྲོག་གི་
སྙིང་པོ། ཀར་ཏྲི་ཛཿཡ་ཏྲཾ། ཞེས་ཕུལ་ལོ། །གསད་གསོ་དབབ་གཅད་ཀྱི་ལས་བྱ་བར་ཁས་བླངས་སོ། །མིང་གནམ་ཐེའུ་དཀར་པོ་རའི་མགོ་ཅན་དུ་མིང་བཏགས་སོ། །ཆུང་མས་ཞིང་གི་གཡང་གཞི་ཕུལ་ལོ། །ཤྭ་ན་མུ་ཁར་མིང་བཏགས་སོ། །བུ་ཚོ་ལ་ཐེ་བྲང་སྟོང་ཚོར་མིང་བཏགས་སོ། །མི་ནག་པོ་ལག་དགུ་འཁོར་བཅས་ཀྱིས་གྲིར་གསོད་པའི་ལས་བྱེད་པ་ལ། བཅོམ་ལྡན་འདས་ཀྱིས་མ་བྱེད་གསུངས་པས། ཁོ་མ་ཐུལ། སྤུ་ཚམ་རྔམས་རི་རབ་ཙམ་ཞལ་བར་སྣང་དུ་གདངས་ནས་གསོལ་བས་གདོད་དྲེད་ནས། འདར་ཞིང་མིག་རིག་རིག་བྱས་ནས། སྐུ་མདོག་ནག་པོ་འདི་ཡང་འབུལ། ཞལ་དབུས་མཐིང་ནག་སྟོན་པར་མཛོད། བདག་གི་ཆུང་མ་འདི་སྦྱོར་བའི་ཡུམ་དུ་བཞེས་སུ་གསོལ། བུ་ཚ་ཡང་འཁོར་དུ་འབུལ་ལོ་ཞེས་ཕུལ་བས། བཅོམ་ལྡན་འདས་ཀྱིས་བཀའ་སྩལ་པ། དངོས་གྲུབ་བར་ཆད་བྱེད་པའི་བགེགས། །གདུག་ཅིང་སྡང་སེམས་ལྡན་པ་རྣམས། །ལུས་ངག་རྡུལ་ཕྲན་བཞིན་དུ་རློགས། །ཁོས་སྲོག་གི་སྙིང་པོ་ཏེ་བཾ་བྷྱོ་ཞེས་ཕུལ་ལོ། །གསད་གསོ་དབབ་གཅད་ཀྱི་ལས་བྱེད་པར་དབང་བསྐུར། མིང་ནི་བདུད་རྣམས་རོལ་ཞེས་བྱ་བ་བཏགས་སོ། །ཆུང་མའི་ལག་ཏུ་རྡོ་རྗེ་གྱིན་དབང་བསྐུར། མིང་བཏགས་པ་རྡོ་རྗེ་ཡ་བྱིན་ཞེས་བྱའོ། །ཡང་མི་སེར་པོ་མིག་དམར་པོ་ཆུང་མ་དང་བཅས་པས། ཐམས་ཅད་གསོད་ཀྱི་འདུག་པ་བཅོམ་ལྡན་འདས་ཀྱིས་འདི་མ་བྱེད་བྱས་པས་ཉན་དུ་མ་འདོད་ནས། སྐུའི་ཚམ་རྔམས་རི་རབ་ཙམ་དུ་བྱས། ཞལ་བར་སྣང་ཙམ་དུ་གདངས་ནས་གསོལ་བས། གདོད་དྲེད་ནས་འདར་ཞིང་མིག་རིག་རིག་ཏུ་བྱས། གོས་སྟག་ལྤགས་རློན་པ་འདི་ཡང་སྐུའི་ཤམ་ཐབས་སུ་བཞེས། ཆུང་མ་འདི་ཡང་སྦྱོར་བའི་ཡུམ་དུ་བཞེས། བུ་གཉིས་བུ་མོ་གསུམ་སྟེ་ལྔ་ཡང་འཁོར་དུ་བཞེས་སུ་གསོལ། བཅོམ་ལྡན་འདས་ཀྱིས་བཀའ་སྩལ་པ། དངོས་གྲུབ་བར་ཆད་བྱེད་པའི་དགྲ། །གདུག་ཅིང་སྡང་སེམས་ལྡན་པ་རྣམས། །མངོན་སྤྱོད་ཚུལ་དུ་སྒྲོལ་བར་གྱིས། །ཧཱུཾ་ཀཱ་ར་ཨ་
གསུངས་པས། ཁོས་སྲོག་སྙིང་། ཨེ་བཾ་བྷྱོ། ཞེས་ཕུལ་ལོ། །དབང་གིས་མངོན་སྤྱོད་ཚུལ་དུ་སྒྲོལ་ཅིག་པར་བསྐུར་རོ། །མིང་ནི་གཟའ་མིག་དམར་དུ་མིང་བཏགས་སོ། །ཆུང་མ་ལ་དབང་བསྐུར་ལག་ཏུ་རྡོ་རྗེ་བྱིན་ནས། རྡོ་རྗེ་དེ་བྱིན་དུ་མིང་བཏགས་སོ། །ཡང་མི་དམར་པོ་ར་སྐྱེས་ལ་ཞོན་པ་ཆུང་མ་དང་བཅས་པས། བསྟན་པ་འཇིག་པའི་ལས་བྱེད་ཀྱི་འདུག །འདི་མ་བྱེད་བྱས་པས། ཁོ་མ་འདོད་ནས། སྐུའི་ཚམ་རྔམས་སྐུ་རི་རབ་ཙམ། ཞལ་བར་སྣང་ཙམ་གདངས་ནས་གསོལ་བས། གདོད་དྲེད་ནས་འདར་ཞིང་མིག་རིག་རིག་བྱས་ནས། བདག་གི་སྐུ་མདོག་དམར་པོ་འདི་ཡང་བཞེས། ཞལ་གཡོན་དམར་ལ་གདངས་པར་མཛོད་ཅིག །བདག་གི་ཆུང་མ་ཡང་སྦྱོར་ཡུམ་དུ་བཞེས་ཤིང་། བདག་དང་བུ་ཚ་ཡང་འཁོར་དུ་བཞེས་སུ་གསོལ། ཞེས་ཞུས་སོ། །བཅོམ་ལྡན་འདས་ཀྱིས་བཀའ་སྩལ་པ། དངོས་གྲུབ་བར་ཆད་བྱེད་པའི་དགྲ། །གདུག་ཅིང་སྡང་སེམས་ལྡན་པ་རྣམས། །གཏོགས་ཤིག་གྲོགས་དང་བྲལ་བར་གྱིས། །ཧ་ས་ཡ་ར་ཧྲི་ད་ན་གསུངས་པས། ཁོས་སྲོག་སྙིང་ཨེ་ཝཾ་བྷྱོ། ཞེས་ཕུལ་ལོ། །དམ་ཉམས་ཀྱི་མགོན་མ་བྱེད་ཅིག་ཅེས་དམ་བསྒྲགས་སོ། །མིང་བཏགས་པ། བཙན་ཤུ་བོ་རྡོ་རྗེ་ཟླ་བ་ཞེས་པ་མིང་བཏགས་སོ། །ཆུང་མ་ལ་དབང་བསྐུར། རྡོ་རྗེ་བསེ་བྱིན་དུ་མིང་བཏགས་སོ། །མི་སྔོན་པོ་སྦལ་བའི་མགོ་ཅན། ཆུང་མ་དང་བཅས་པས། མཛེ་ནད་གཏོང་ཞིང་འདུག་པ། བཅོམ་ལྡན་འདས་ཀྱིས་འདི་མ་བྱེད་བྱས་པས། མ་འདོད་ནས་སྐུའི་ཚམ་རྔམས། ཞལ་གསུམ་ཕྱག་དྲུག །ཞབས་བཞི་གྱད་ཀྱི་དོར་སྟབས་སུ་འདུག །ཕྱག་གཡས་དང་པོ་རྡོ་རྗེ་རྩེ་དགུ་བསྣམས། གཡོན་དང་པོས་མེ་དཔུང་འབར་བ་བསྣམས། བར་པ་གཉིས་ན་རྡོ་རྗེ་རྩེ་ལྔ་དང་ཁ་ཊྭཱཾ་རྩེ་གསུམ་བསྣམས། ཐ་མ་གཉིས་རི་རབ་ཕུར་བུ་འདྲིལ། ཞལ་བགྲད་མཆེ་གཙིགས། སྨིན་མ་དགུ་གློག་བཞིན་འགྱུ། སྤྱན་དགུ་ཚྭ་ཚྭ་འཕྲོ། ཤངས་སྦུབས་དྲུག་རླུང་ནག་འཚུབས། སྙན་
དྲུག་འབྲུག་ལྡིར། ཞལ་གསུམ་ཀཱི་ལ་ཡ་དང་རུ་ལུའི་སྒྲ་སྒྲོགས། བྷྱོ་དང་ཧཱུཾ་དང་ཕཊ་བྱས་པས། ས་གཞི་གཡོ་བ་དང་། འུར་འུར་དང་། ཆེམ་ཆེམ་བྱུང་། སྐྲ་ཉི་ཁྲི་ཆིག་སྟོང་། བ་སྤུ་བྱེ་བ་རྡོ་རྗེས་གཏམས་པ། མེ་འབར་བར་སྤྲུལ་ཏེ། སྐུ་རི་རབ་ཙམ། ཞལ་བར་སྣང་ཙམ་བསྐྱེད་ནས་བསྟན་པས་གདོད་དྲེད་ནས། འདར་ཡེད་ཡེད། མིག་རིག་རིག་བྱས་ནས། བདག་བུ་སྨད་དང་བཅས་པ་འཁོར་དུ་བཞེས་ཤིག །བདག་གི་སྦྲུལ་རིགས་བཞི་གདུག་པའི་རྒྱན་འདི་ཡང་བཞེས་ལ། ཕྱག་གདུབ་དང་། ཞབས་གདུབ་མཛོད་ཅིག །ཆུང་མ་ཡང་སྦྱོར་ཡུམ་དུ་བཞེས་ཤིག །ཞུས་པས། བཅོམ་ལྡན་འདས་ཀྱིས་བཀའ་སྩལ་པ། དངོས་གྲུབ་བར་ཆད་བྱེད་པའི་བགེགས། །གདུག་ཅིང་སྡང་སེམས་ལྡན་པ་རྣམས། །ཕོབ་ཅིག་རྣམ་པར་གཟིར་བར་གྱིས། །ཨ་ཝེ་ཤ་ཡ་ཞེས་གསུངས་པས། །ཁོས་སྲོག་སྙིང་ཧེ་སཾ་བྷྱོ་ཕུལ་ལོ། །མཛེ་དང་འབྲས་ཕོལ་ཀླུ་རྫོངས་སུ་ཆུག་ཅིག །ཅེས་ལས་བཅོལ། མིང་ཀླུ་དེངས་པོ་ཞེས་བྱ་བར་བཏགས་སོ། །ཆུང་མའི་ལག་ཏུ་རྡོ་རྗེ་བྱིན་ནས་དབང་བསྐུར་མིང་བཏགས་པ། རྡོ་རྗེ་ཕག་བྱིན་ནོ། །བུད་མེད་རྣམས་ཀྱིས་ཞག་གི་མཚོ་ལ་གནས་པས་ཞག་གི་ཟོ་རིས་ཕུལ་ལོ། །རཀྟའི་མཚོ་ལ་གནས་པས་རཀྟའི་ཐིག་ལེ་ཕུལ་ལོ། །དེ་ནས་བཅོམ་ལྡན་འདས་བཀའ་སྩོལ་ཞུས་པས། བཅོམ་ལྡན་འདས་ཀྱིས་བཀའ་སྩལ་པ། བྲན་དང་བཀའ་ཉན་ཕོ་ཉའི་ཚོགས། །ཁྱེད་ཀྱི་དམ་ཚིག་དུས་ལ་བབ། །སྔོན་ཆད་ཇི་ལྟར་དམ་བཅས་པའི། །མངོན་སྤྱོད་ཕྲིན་ལས་མྱུར་དུ་མཛོད། །ཅེས་གསུངས་པས། འཁོར་ཚོགས་སྲོག་གི་སྙིང་པོ་ཕུལ་བ། ཤྭ་ན་མུ་ཁས། སུ་རུ་སུ་རུ་བཛྲ་ཕུལ། བདག་ཉིད་ཆེན་མོས། མུ་རུ་མུ་རུ་བཛྲ་ཕུལ། ཡ་བྱིན་གྱིས། ཀ་ཏང་ཀ་ཏང་བཛྲ་ཕུལ། དེ་བྱིན་གྱིས། ཛ་ཡེ་བི་ཛ་ཡེ་བཛྲ་ཕུལ། ཕག་བྱིན་གྱིས། ཨ་བ་རཱ་ཛི་ཏ་བཛྲ་ཕུལ། བསེ་བྱིན་གྱིས། ཨ་ཛི་ཏེ་བཛྲ་ཕུལ། མ་བདུན་དང་སྲིང་མོ་བཞིས། ཐལ་ཆེན་གྱི་ཚོམ་བུ་ཕུལ།
བཅོམ་ལྡན་འདས་ཀྱིས་བཀའ་སྩོལ་ཞུས། །བཅོམ་ལྡན་འདས་ཀྱིས་བཀའ་སྩལ་པ། །རྡོ་རྗེ་གསང་བའི་བཀའ་ལས་ནི། །སྡིག་ཆེན་གང་ཞིག་འདའ་བྱེད་པ། །སྟོབས་ཆེན་ཁྲོ་བོ་ཆེན་པོ་ཡིས། །ཀླད་པ་ཚལ་པ་བརྒྱ་རུ་ཁོས། །ཉོན་ཅིག་བགེགས་དང་ལོག་འདྲེན་ཚོགས། །ང་ཡི་བཀའ་ལས་འདའ་མ་བྱེད། །ཅེས་གསུངས་པས། མ་བདུན་གྱིས་སྲོག་གི་སྙིང་པོ་ཕུལ་བ། མ་མ་བ་ཤཾ་ཀུ་རུ། མ་ཏཾ་ཉ་ཀ་ར་ཨི་དན། ཅེས་ཕུལ་ལོ། །སྲིང་མོ་བཞིས་སྲོག་སྙིང་། མཱ་ར་སཻ་ན་པྲ་མརྡ་ན་ཧཱུཾ་ཕཊ། ཅེས་ཕུལ་ལོ། །སྲུང་མ་ཐམས་ཅད་ཀྱིས། དྷ་ཏི་མ་མ་ཀརྨ་ཤཱི་གྷྲཾ་ཀ་རཱ་ཡ་ཕུལ་ལོ། །མིང་བཏགས་པ། རྡོ་རྗེ་གར་གྱི་དབང་ཕྱུག་མ། རྡོ་རྗེ་གསལ་བ་གློག་འཛིན་མ། རྡོ་རྗེ་ཀུན་བཟང་མཐུ་མོ་ཆེ། རྡོ་རྗེ་ཡེ་ཤེས་ཆེན་མོ། རྡོ་རྗེ་གསང་ཆེན་འོད་འབར་མ། རྡོ་རྗེ་གསུང་སྒྲོགས་ཆེན་མོ། རྡོ་རྗེ་སྒྲོལ་མ་ཟ་བྱེད་མ། ཞེས་མིང་བཏགས་སོ། །ཤར་གྱི་དཀར་མོ་རྡོ་རྗེ་སྤྱན་གཅིག་མ། །ལྷོ་ཡི་སེར་མོ་རྡོ་རྗེ་རལ་གཅིག་མ། །ནུབ་ཀྱི་དམར་མོ་རྡོ་རྗེ་དབང་སྡུད་མ། །བྱང་གི་སྔོན་མོ་རྡོ་རྗེ་ལས་མཁན་མའོ། །བཏུལ་ཞིང་དབང་བསྐུར་མིང་བཏགས་པའི་ལེའུ་སྟེ་བཞི་ པའོ།། །།དེ་ནས་བཅོམ་ལྡན་འདས་ཀྱིས་དྲེགས་པ་ཅན་ཕོ་ནི་བཏུལ། མོ་ནི་སྦྱོར་བའི་ཡུམ་དུ་བྱས། བུ་རྣམས་ནི་འཁོར་དུ་བྱས། རྒྱན་ཆ་ལུགས་ནི་ལྡན་པར་བྱས་ཏེ། རང་ལ་རང་ངོ་མཚར་བའི་བསྟོད་པ་ནི། དཔའ་བོ་སྒེག་པོ་འཇིགས་སུ་རུང་བ་དང་། །དགོད་དང་གཤེ་དང་འཇིགས་པར་སྟོན་པ་དང་། །སྙིང་རྗེ་རྔམ་དང་ཞི་བ་ལ་སོགས་པ། །སྐུ་ཡི་བརྙན་པོ་ཤིན་ཏུ་བསྟན་གྱུར་ཏེ། །ཞལ་གཡས་དཀར་ལ་བཞད་པས་དགོད་དགོད་འདྲ། །ཞལ་གཡོན་དམར་ལ་གདངས་པས་གཤེ་གཤེ་འདྲ། །ཞལ་དབུས་མཐིང་ལ་གནག་པས་ཁྲོ་ཁྲོ་འདྲ། །རྒྱུད་དྲུག་སྙིང་རྗེས་ཟིན་པས་ཆེ་ཆེ་འདྲ། །སྐུ་ཆེ་ཡན་ལག་རགས་པས་འཇིགས་འཇིགས་འདྲ། །རྒྱན་དང་ཆ་ལུགས་ལྡན་པས་སྒེག་སྒེག་འདྲ། །གདུག་ཚོགས་ཞལ་དུ་
རྔུབས་པས་དཔའ་དཔའ་འདྲ། །ཆོས་སྐུ་མཚན་མ་མེད་པས་ཞི་ཞི་འདྲ། །རྡོ་རྗེ་རྩེ་དགུས་ས་དགུའི་རྟོག་པ་འཇོམས། །རྡོ་རྗེ་རྩེ་ལྔས་རྒྱུད་ལྔ་གནས་སུ་སྒྲོལ། །མེ་དཔུང་འབར་བས་ཁམས་གསུམ་རྟོག་པ་སྲེག །ཁ་ཊྭཱཾ་རྩེ་གསུམ་དུག་གསུམ་རྩད་ནས་གཅོད། །རི་རབ་ཕུར་བུས་ཁམས་གསུམ་དབང་དུ་སྡུད། །དེ་འདྲའི་ཁྲོ་བོ་འཇིགས་ཚུལ་བསྟན་པ་ཡིས། །ཁམས་གསུམ་སེམས་ཅན་ཟིལ་གྱིས་གནོན་པར་བྱེད། །དཔའ་བོ་ཆེན་པོ་ཁྱེད་ལ་ཕྱག་འཚལ་བསྟོད། །རང་གིས་རང་ལ་བསྟོད་པའི་ལེའུ་སྟེ་ལྔ་ པའོ།། །།ཨོཾ་བཛྲ་ཀཱི་ལི་ཀཱི་ལ་ཡ། ཏ་ཐཱ་ཡ་ཏ་ཐཱ་ཡ་ཧཱུཾ་ཕཊ། ཧ་ས་ཡ་ར་ཧྲི་ད་ནེ་ཧཱུཾ་ཕཊ། ཤཱི་གྷྲཾ་ཨཱ་ན་ཡ་ཧཱུཾ་ཕཊ། ཛྭ་ལ་པ་ཡ་ཛྭ་ལ་པ་ཡ་ཧཱུཾ་ཕཊ། ཨཱ་ཝེ་ཤ་ཡ་ཨཱ་ཝེ་ཤ་ཡ་ཧཱུཾ་ཕཊ། བིནྡྷ་ཡ་བིནྡྷ་ཡ་ཧཱུཾ་ཕཊ། སུ་རུ་སུ་རུ་ཧཱུཾ་ཕཊ། མུ་རུ་མུ་རུ་ཧཱུཾ་ཕཊ། ཀ་ཏཾ་ཀ་ཏེ་ཧཱུཾ་ཕཊ། ཛ་ཡེ་བི་ཛ་ཡེ་ཧཱུཾ་ཕཊ། ཨ་ཛི་ཏེ་ཧཱུཾ་ཕཊ། ཨ་བ་ར་ཛི་ཏ་ཧཱུཾ་ཕཊ། མཱ་ར་སཻ་ན་པྲ་མརྡ་ན་ཧཱུཾ་ཕཊ། ཧཱུཾ་མ་མ་བ་ཤཾ་ཀུ་རུ། མ་ཏཾ་ཉ་ཀ་ར་ཨི་དན་ཧཱུཾ་ཕཊ། དྷ་དྷི་མ་མ་ཀརྨ་ཤཱི་གྷྲཾ་ཀ་རཱ་ཡ་ཧཱུཾ་ཕཊ། སྔགས་ཀྱི་ལེའུ་སྟེ་དྲུག་པའོ།། །།དེ་ནས་གསད་པའི་ལས་བསྟན་ཏེ། །སྨྱོ་འབོག་བསད་དང་གྲིར་བསད་པ། །ཀླུ་ནད་བསད་དང་རིམས་ཀྱིས་བསད། །དང་པོ་སྨྱོ་འབོག་བསད་པ་ལ། །སྨྱོ་རུ་གཞུག་སྟེ་བསད་པ་དང་། །འབོག་ཏུ་གཞུག་སྟེ་བསད་པ་དང་། །ལྐུགས་སུ་གཞུག་སྟེ་བསད་པ་དང་། །ལྟས་ངན་ཕབ་སྟེ་གསད་པའོ། །སྨྱོ་འབོག་གི་ལེའུ་སྟེ་བདུན་པའོ།། །།དེ་ནས་གྲི་རུ་གསད་པ་ལ། །མཚོན་གྲིར་བསད་དང་འགགས་གྲིར་བསད། །མེ་གྲི་ཆུ་གྲིར་བསད་པ་དང་། །རྦབ་གྲིར་གཡང་གྲིར་བསད་པའོ། །གྲིར་གསད་པའི་ལེའུ་སྟེ་བརྒྱད་པའོ།། །།དེ་ནས་ཀླུ་ནད་ཀྱིས་གསད་པ་ལ། མཛེ་ནད་བཏང་སྟེ་བསད་པ་དང་། །འབྲས་ནད་ཀྱིས་བསད་པ་དང་། །ཕོལ་དུ་བཏང་ལ་བསད་པ་དང་། །ཀླུ་རྫིངས་
བཅུག་ལ་བསད་པའོ། །ཀླུ་ནད་ཀྱིས་གསད་པའི་ལེའུ་སྟེ་དགུ་པའོ།། །།དེ་ནས་རིམ་གྱིས་གསད་པ་ལ། །བལ་ནད་བསད་དང་གག་པས་བསད། །རྒྱུ་གཟེར་བསད་དང་མཁྲིས་པས་གསད། །རིམས་ཀྱི་ལེའུ་སྟེ་བཅུ་པའོ།། །།དེ་ནས་གསོ་བའི་ལས་བསྟན་ཏེ། །རྫས་དང་སྔགས་དང་ཏིང་འཛིན་གྱིས། །སྨྱོ་འབོག་ཅན་དེ་གསོ་བ་དང་། །ནད་པ་ཚབས་ཆེ་གསོ་བ་དང་། །སྲིའུ་གསོ་དང་གསུམ་ཡིན་ནོ། །དང་པོ་སྨྱོ་འབོག་གསོ་བ་ནི། །ཕུར་བུའི་དགོངས་པར་བཞུགས་པས་སུ། །སྔགས་གྲངས་མང་དུ་བཟླས་པ་ཡིས། །བལྟ་བ་བསར་ཞིང་རྫས་ཀྱིས་བདུག །དྲག་པོའི་ལས་ཀྱིས་གསོ་བ་དང་། །ནད་པ་ཚབས་ཆེན་གསོ་བ་དང་། །གང་གནོད་པ་ཡི་མདོས་བྱས་ལ། །གཏའ་ར་གཏའ་ལུག་མང་དུ་གཞུག །གཏའ་ཐབས་བཅོ་བརྒྱད་གཞུང་བཞིན་བྱའོ། །སྲིའུ་གཅེས་པ་གསོ་བ་ནི། །ལུས་སྲུང་ཕུར་བུ་བླ་སྒོངས་དང་། །སྔགས་མདུད་སྲུང་འཁོར་རབ་གནས་གདགས། །ཆུ་གཏོར་མང་དུ་བཏང་བ་དང་། །ཚ་ཚ་གདབ་དང་དྷརྨ་གདོན། །དཀར་ཆོས་གཞུང་དུ་བྱ་བ་དང་། །དེས་ཀྱང་ཕན་པར་མ་གྱུར་ན། །རྡོ་རྗེའི་སྒྲུབ་པ་གཞུང་བཙུག་བྱའོ། །གསོ་བའི་ལེའུ་སྟེ་བཅུ་གཅིག་པའོ།། །།དེ་ནས་དབབ་པའི་ལས་བསྟན་ཏེ། །བདུད་ཀྱི་སེར་བ་ཇི་ལྟར་དབབ། །གཟའ་ཡི་སེར་བ་ཇི་ལྟར་དབབ། །བཙན་གྱི་སེར་བ་ཇི་ལྟར་དབབ། །ཀླུ་ཡི་སེར་བ་ཇི་ལྟར་དབབ། །ཐོག་དང་ལྟས་ངན་ཇི་ལྟར་དབབ། །དེ་རྣམས་མན་ངག་ཤེས་པར་བྱའོ། །དབབ་པའི་ལེའུ་སྟེ་བཅུ་གཉིས་པའོ།། །། ( དེ་ནས་གཅད་པའི་ལས་བསྟན་ཏེ། །བདུད་ཀྱི་སེར་བ་ཇི་ལྟར་གཅད། །གཟའ་ཡི་སེར་བ་ཇི་ལྟར་བཟློག །བཙན་གྱི་སེར་བ་ཇི་ལྟར་བཟློག །མ་མོའི་སེར་བ་ཇི་ལྟར་བཟློག །མི་ནད་ཕྱུགས་ནད་ཇི་ལྟར་བཟློག །ལྟས་ངན་རྨི་ངན་ཇི་ལྟར་བཟློག །གཅད་པའི་ལེའུ་སྟེ་བཅུ་གསུམ་པའོ།། །།དེ་ནས་སྨྱོ་རུ་གཞུག་པའི་རྫས། །རྟ་དཀར་ཐོད་པའི་ནང་དུ་བསག །ཐང་ཕྲོམ་ར་དུག་ར་མོ་
ཤག །ར་རོག་གཅིན་དང་མིང་བྱང་གཞུག །ངན་སྔགས་སོ་མའི་གླིང་བུར་བཟླས། །ཉུང་དཀར་བཟླས་ཤིང་ཐུན་བྲབ་བོ། །དྲ་དང་དུན་བྷྱོ་བཛྲ་སད་སད་མཱ་ར་ཡ་ཕཊ། གཞུག་ཏུ་དགྲ་ཡི་ཁང་པ་གཡས་སུ་སྦའོ། །འབོག་ཏུ་གཞུག་པའི་རྫས་ནི། སེང་གེ་དཀར་མོའི་སྙིང་ཤུན་དུ། །དུག་སྣའི་ཚོགས་དང་ཁྲག་སྣའི་ཚོགས། །དགྲ་ཡི་མིང་བྱང་བཅས་པ་གཞུག །ཉུང་དཀར་གླིང་བུར་ངན་སྔགས་བཟླས། །ཏྲི་དུ་ནི་ཤག །མཱ་ར་ནི་རྦད། ར་ར་སེ་ཁྱུད། ཅེས་དགྲ་ཡི་ཁང་པའམ། གདོང་ངམ་ལུས་ལ་ཕོག་པར་བརྡེག་གོ། །དེ་ནས་ལྟས་ངན་དབབ་པ་ནི། །བྱ་ཕོ་དཀར་པོའི་གསོབ་ནང་དུ། །ལྟས་ངན་ཐོད་པ་ལྔ་བསགས་ཏེ། །སྲིན་བྱ་དང་ནི་གླ་བ་དང་། །སྲེག་པ་དང་ནི་འུག་པ་དང་། །སྦྲུལ་གྱི་ཐོད་པ་བཅས་གཞུག་གོ། །དུང་གི་གླིང་བུར་ཉུང་དཀར་སྔགས་ལ་བྲབ། །སང་སང་ཕྱི་ཕྱི་ཐལ་སཾ་ཁྱུང་། ཏྲི་ཏྲི་རོ་ཏི་མཱ་ར་ཡ་དུན་ཡ། དགྲའི་ཁང་པའི་འགྲམ་འོག་ཏུ་སྦའོ། །དེ་ལྟར་བྱས་ན་ལྟས་ངན་འོང་། །དེ་ནས་ལྐུགས་སུ་གཞུག་པ་ནི། །ར་དཀར་གཉའ་ནག་སྲོག་རྩའི་ནང་། །མི་པེ་བོ་གསད་པའི་ལྕེ། །ཁྱི་དཀར་སྙིང་དང་ར་དཀར་སྙིང་། །རི་བོང་མགོ་ཁྲག་མིང་བྱང་གཞུག །ངན་སྔགས་ལྕགས་ཀྱི་གླིང་བུར་བཟླས། །ཉུང་དཀར་སྔགས་ཤིང་ཐུན་བླུགས་བྲབ། །རྦད་སུ་རྦད་སུ་ཁྲག་ཏི་རྦད། །ནང་ན་རྦད་རྨི་ན་རྨུགས། འགྱེལ་བ་ཀློང་ཕུ་བརླག་ཏུ་བརླག །བཤོས་སྐཾ་མོ། མཱ་ར་ཡ། ཐེམ་པའི་འོག་ཏུ་སྦའོ། །དེ་ལྟར་བྱས་ན་ལྐུགས་པར་འགྱུར། །དེ་ལྟར་སྨྱོ་འབོག་ལྐུགས་དང་གསུམ། །ལྟས་ངན་དབབ་པའི་ལེའུ་སྟེ་བཅུ་བཞི་པའོ།། །།གྲིར་གསད་པའི་ཐབས་འདི་ལ། དང་པོ་མཚོན་གྲིར་གསད་པ་ནི། །གྲུ་གསུམ་མཐིང་ནག་དཀྱིལ་འཁོར་བརྩིག །དབུས་སུ་གྲུ་གསུམ་བྲི་ལ་རོ་སོལ་བྱུག །ཁ་རུ་རླུང་ཁྱེར་ཕྱེ་འཇམ་བརྡལ། །ནང་དུ་སྡོང་གཅིག་དོར་རྟ་བཏིང་། །རྐང་རྗེས་ལ་སྩོགས་ལིངྒ་བྱ། །མགོ་བོ་ལྷོ་ནུབ་མཚམས་སུ་བསྟན། །རྐང་པ་བྱང་ཤར་
མཚམས་སུ་བསྟན། །སྙིང་གར་མིང་ལ་དཔྲལ་བར་དུས། །འདོམས་སུ་བླ་དྭགས་བྲི་ལ་གླན། །ཕུར་བུ་བཞི་དང་རྩང་གཉིས་ནི། །དམར་པོ་བྱུགས་ཟུར་གཅིག་ཏུ་དགོད། །ཟུར་གཅིག་བྷན་དྷ་གཅིག་གི་ནང་། །ཁྱི་དམར་སྙིང་ཁྲག་ར་དམར་སྙིང་། །ཁྲག་དང་འབྲུ་སྣའི་ཚོགས་ཕྱེ་ལ། །གཏོར་མ་ཆེན་པོ་བྱས་ལ་དགོད། །ཟུར་གཅིག་ཆང་ཕུད་བསེ་ཕོར་གང་། །དེ་ནས་རྔ་གླིང་སྒྲ་བསྒྲགས་ལ། །གསུར་ཆེན་སྤོས་ཀྱི་དུད་པ་བཏང་། །མ་རུ་ཙེ་ཡབ་ཡུམ་བསྐུལ་བ། ཧཱུཾ་མཐིང་ནག་གྲུ་གསུམ་འབར་བའི་ཀློང་དཀྱིལ་ནས། །སྲོག་ལ་མངའ་མཛད་གནོད་སྦྱིན་མ་རུ་ཙེ། །ཁྲག་མདོག་དམར་པོ་བསེ་ཡི་ལན་ཕྲན་ཅན། །སྤྱན་མིག་ཉི་མའི་འོད་ཟེར་སྐར་ལྟར་འཁྲུགས། །སྨིན་མ་གློག་འཁྱུག་བར་སྣང་གོ་སྐབས་འབྱེད། །ཤངས་ནས་བུ་ཡུག་རྡོ་རྗེ་ཐོག་ཆེན་འབེབས། །དགྱེས་པའི་ཞལ་བཞད་ཚེམས་ནི་སྤུ་གྲིས་གཏམས། །རྔམ་པའི་ལྗགས་འདྲིལ་བསྐལ་པའི་མེ་ལྟར་འབར། །ཨག་ཚོམ་དམར་སེར་དུག་གསུམ་རྩད་ནས་གཅོད། །སྙན་ནས་འབྲུག་སྟོང་སྒྲ་སྒྲོགས་དི་རི་རི། །སེན་མོ་ལྕགས་ཀྱུའི་རྩེ་ལྟར་འཛིན་ཅིང་འགུགས། །བ་སྤུའི་ནང་ནས་གནམ་ལྕགས་ཞུན་མ་འཁྲུགས། །མེ་ལྕེ་བན་ཐབས་གསུམ་གྱིས་ཆར་ཆེན་འབབ། །ཞབས་ཀྱིས་བསམ་པའི་གནས་སུ་ཡུད་ཀྱིས་ཕྱིན། །ན་བཟའ་དམར་པོ་སྤྲིན་གྱི་གཡང་གཞི་གསོལ། །ཉམས་པའི་སྙིང་ཕྱུང་ཆང་པར་བཅུག་ནས་གསོལ། །དུས་ལ་བབ་པོ་གནོད་སྦྱིན་མ་རུ་ཙེ། །བཅོལ་བའི་ལས་རྣམས་མྱུར་དུ་འགྲུབ་པར་མཛོད། །ཧཱུཾ་གནོད་སྦྱིན་མ་རུ་ཙེ་ཡི་ཐུགས་དམ་དགྱེས་བསྐུལ་ལ། །ཡུམ་གཅིག་རྡོ་རྗེ་གར་གྱི་དབང་ཕྱུག་མ། །ཁྲོས་པའི་སྐུ་མདོག་ཁྲག་གི་མཆིན་པ་འདྲ། །མི་བཟད་རྡོ་རྗེའི་ལྕགས་ཀྱུའི་ཕུར་པ་བསྣམས། །སྤྱན་ནས་ཁྲག་གི་མཆི་མ་ཕྲུལ་ལུ་ལུ། །སྙིང་རྗེ་མི་མངའ་དམ་ཉམས་སྒྲོལ་བར་མཛད། །ཕྱག་ན་རྡོ་རྗེ་ཕུར་བུ་འདྲིལ་ཞིང་འཕེན། །དུས་ལ་བབ་པོ་གར་གྱི་དབང་ཕྱུག་མ། །དམ་
ཉམས་གྲི་རུ་བསད་པའི་ལས་མཛོད་ཅིག །ནྲྀ་ཨངྐུ་ཤ་ཛ་ཛཿ། མངོན་དུ་ཁུགས་པར་བསམ་མོ། །དེ་ནས་རྗེས་བརྟགས་ཏེ། གདབ་ལས་གར་སོང་སོང་དུ་མི་བྱའོ། །མི་གདབ་པ་ནི། གྲུ་བཞི་ལ་ཟུར་དོད་པ་བྱུང་ན་མི་གདབ་བོ། །སྲིན་མོ་རལ་པ་གཏིབས་པ་འདྲ་བ་བྱུང་ན་མི་གདབ་པོ། །སྦྲུལ་འཁྱུས་པ་ལྟ་བུ་བྱུང་ན་མི་གདབ་བོ། །རྟ་བླ་མོའམ། མུག་པ་འཁྱུས་པ་འདྲ་བ་བྱུང་ན་མི་གདབ་བོ། །བྱིས་པའི་རྐང་རྗེས་འདྲ་བ་བྱུང་ན་མི་གདབ་བོ། །ཁབ་བམ་སྙུང་གིས་གཙགས་པ་འདྲ་བ་བྱུང་ན་མི་གདབ་བོ། །དེ་བླ་ཁུགས་པ་ཡིན་ནོ། །དེ་མ་བྱུང་བར་དུ་བསྒྲུབ་བོ། །གདབ་པ་ནི། ཕུར་བུ་བཞི་ལ་འུར་བླངས་ནས་གདབ་བོ། །ཨོཾ་ཀྲོ་དྷ་ནི་ཀྲོ་དྷ་ནི། པ་ཏྲ་པ་ཏྲ། ཤུ་ལ་ཤུ་ལ། དྷ་ཤ་གྲཱི་ཝ་ཧཱུཾ་ཕཊ། རྩང་དམར་པོ་གཉིས་གདབ་ལ། ཡཀྴ་གྲཱི་ཝ་མཱ་ར་ཡ་རྦད། ཀིང་མོ་སྙིང་ཁ་རག་རྦད། གཏོར་མ་ལག་ཏུ་བླངས་ཤིང་བསྐུལ། ཕུད་དེའི་དུས་སུ་གཏོར། དེ་ནས་འགགས་གྲིར་གསད་པ་ནི། །འཇག་མ་ལ་ནི་མི་རུ་བྱ། །འཇག་མ་ལ་ནི་རྟ་རུ་བྱ། །སྐུད་པ་སྔོ་དམར་སྐེ་ནས་གདགས། །ཕུར་པ་གཅིག་ལ་བཏོད་ནས་བཞག །ཤོག་བུ་ལ་ནི་དགྲ་གཟུགས་བྲི། །རྟ་ཡི་སྙིང་གར་གཞུག་པ་འམ། །ཡང་ན་མི་ཡི་སྙིང་གར་གཞུག །ཡམ་ཤུད་དམར་པོའི་སྙིང་པོ་བྲིས། །མི་ཡི་མགོ་ཡི་ནང་དུ་གཞུག །འཇག་མའི་མི་དེ་འཇག་མའི་རྟ། །ལ་ནི་བསྐྱོན་ལ་དེ་རུ་བཞག །བཤོས་བུ་ཟུར་གསུམ་མཐོ་དོ་ལ། །ར་ཁྲག་གིས་བྱུག་དེ་རྩར་བཞག །མདའ་དམར་གཅིག་ལ་ར་སྙིང་གདགས། །སྟག་རས་ར་འདྲེང་དམར་པོ་གདགས། །ནམ་མཁའ་ལྗང་བུ་དམར་པོ་ལ། །རྟེན་བཅའ་དར་དང་རྔ་དམར་གདགས། །བསེ་ཕོར་ཕུད་གཙང་བཀང་བ་ལ། །མར་གྱི་ཞགས་པས་བརྒྱན་ལ་གཏང་ངོ་། །ཡམ་ཤུད་དམར་པོ་བསྐུལ་བ་ནི། །ཧཱུཾ་གྱད་ཀྱི་སྐུ་མདོག་དམར་པོ་ནི། །སྐུ་ལ་བསེ་ཁྲབ་དམར་པོ་གསོལ། །དབུ་ལ་གསེར་གྱི་འགྱིང་ཐོད་བཅིངས། །གཡུ་ཡི་མཆེ་བ་གཙིགས་ཤིང་བཞད། །གཡས་
ན་བསེ་མདའ་དམར་པོ་བསྣམས། །གཡོན་ན་བསེ་གཞུ་དམར་པོ་བསྣམས། །ཆིབས་སུ་རྟ་དམར་ཞུར་པོ་ཆིབས། །སྐུ་ལ་དར་དཀར་བེར་ཆེན་གསོལ། །དམ་ཚིག་ཉམས་པའི་སྙིང་ནས་འདྲེན། །བསྟན་པ་བསྲུང་བར་ཞལ་གྱིས་བཞེས། །འགགས་གྲི་གཏང་བའི་དུས་ལ་བབ། །བཅོལ་པའི་ལས་རྣམས་འགྲུབ་པར་མཛོད། །ནྲྀ་ཨཾ་ཀུ་ཛ་ཛཿ། རྦབ་གྲི་གཡང་གྲིར་གསད་པ་ནི། །མདའ་ཀློང་བཅུ་གསུམ་བསད་པ་ནི། །བཤོས་བུ་ཁྲོ་བོ་བཅུ་གསུམ་ལ། །མདའ་བཀྲ་བཅུ་གསུམ་གཟུག་པར་བྱའོ། །ཤོག་བུ་ཚོན་གང་བཅུ་གསུམ་ལ། །ལྟོ་གཅིག་རུས་ལ་ལྟོ་གཅིག་མིང་། །གཉིས་བྲིས་མདའ་ལ་གདགས་པར་བྱ། །ཟན་གྱི་ཀོང་བུ་བཅུ་གསུམ་ལ། །ནང་དུ་ར་ཁྲག་བཀང་ལ་བཞག །དེ་ནི་གྲི་སེ་བསྐུལ་བ་ནི། །ཧཱུཾ་རྒྱལ་པོ་གྲི་སེ་མཐུ་བོ་ཆེ། །ཆིབས་སུ་དཀར་པོ་གཟི་མིག་ཆིབས། །སྐུ་ལ་ཟ་འོག་སེར་བཀྲ་གསོལ། །ཕྱག་ན་ཤེལ་གྱི་རྡོ་རྗེ་རྩེ་དགུ་བསྣམས། །བཞུགས་ནི་བྱང་ཤར་མཚམས་ན་བཞུགས། །ཁྲམ་ཐོགས་བཅུ་གསུམ་བཅས་པ་ཡིས། །དམ་ཉམས་དགྲ་བོ་དབང་དུ་སྡུད། །རྦབ་གྲི་གཡང་གྲིར་བསད་པའི་དུས་ལ་བབ། །བཅོལ་བའི་ལས་རྣམས་འགྲུབ་པར་མཛོད། །ནྲྀ་ཨངྐུ་ཤ་ཛ་ཛཿ། མེ་གྲི་ཆུ་གྲིར་གསད་པ་ནི། །ཧོམ་དུ་སྦྱིན་སྲེག་མེ་ཡིས་བསད། །འུག་པའི་ཚང་རྩི་ཧོམ་ཆག་གང་། །བཅུག་ལ་དཀྱིལ་དུ་མིང་བྱང་གཞུག །ཉུང་དཀར་དུག་ཐུན་ལྕགས་ཕྱེས་སྦར། །ཁུ་ལེ་ལག་དགུ་བསྐུལ་བ་ནི། །ཧཱུཾ་སྐྱེས་བུ་ཆེན་པོ་གིང་ཀ་ར། །ཁུ་ལེ་ལག་དགུ་མཐུ་བོ་ཆེ། །ཆིབས་སུ་ནག་བཀྲ་རྟིང་དཀར་ཆིབས། །སྐུ་ལ་ཟ་འོག་བེར་ཆེན་གསོལ། །རལ་གྲི་སྐྱ་འཇམ་ཕྱག་ན་བསྣམས། །དམ་ཉམས་དགྲ་བོ་གཏུབ་ལ་མེ་ལ་བསྲེག །བཅོལ་བའི་ལས་རྣམས་གྲུབ་པར་མཛོད། །ནྲྀ་ཨངྐུ་ཤ་ཛ་ཛཿ། གྲི་རུ་བསད་པའི་ལེའུ་སྟེ་བཅོ་ལྔ་པའོ།། །།ཁུ་ལེ་ལག་དགུའི་སྲོག་སྔགས་ལ། གིང་
ཀ་ར་གིང་ཀ་ར། མ་པ་རི་མ་པ་རི། ས་པ་རི་ས་པ་རི། ཡུ་ཏི་ཤ་ཏི། སྡིར་གི་ཏི། ར་ག་རཀྵ་མ། རཀྵ་མ། ཨ་ན་ཡེ། གིང་ཆེན་གིང་ཀ་ར། པ་ཏྲ་པ་ཏྲ། ཏི་ཏི་ཤེད། ཏི་ཏི་ཤེད། སི་ལི་ལི། མེས་མེས། ཆེ་གེ་མོ་ཛ་ཛ་རཾ་རཾ། རྟག་ཏུ་བཟླས་པའི་སྙིང་པོ་ནི། ཨོཾ་ཡཀྴ་གྲཱི་ཝ་མཱ་ར་ཡ་རྦད། གིང་མོ་སྙིང་ཁ་རག་རྦད། ཀྲོ་ཏ་ནི་ཀྲོ་ཏ་ནི། པྲ་ཏི་པྲ་ཏི། ཤུ་ལ་ཤུ་ལ། དྷ་ཤ་གྷྲཱི་ཝ་ཧཱུཾ་ཕཊ། རི་རི་དྷྲི། དིར་དིར། ཤཾ་ཤཾ། སང་སང་། ཏྲི་ཏ་ཏྲི་ཏ་དུན་བྷྱོ་ཡ། རྟ་ཐོད་ལ་ཁྲག་གིས་གཏད་ཁྲམ་འདི་བྲིའོ། །ཆེ་གེ་མོ་འདི་བཙན་གྲི་ལ་གཏད་དོ། །བྱ་དཀར་པོའི་སྐེ་རུ་སྔགས་བཏགས་ལ་གཏའ་རུ་གཞུག་གོ། །རྨྱུག་མ་ཚིགས་དགུ་པ་གཅིག་ལ། དར་དཀར་བཏགས་ལ་གཡབ་པོ། །ཆེ་གེ་མོ་འདི་བདུད་ཀྱི་རྒྱལ་པོ་ར་མགོ་བཀྲག་མེད་ལ་གཏད་དོ། །བདུད་ཀྱི་རྒྱལ་པོ་ས་ལུ་ནག་པོ་ལ་གཏད་དོ། །ཆེ་གེ་མོ་འདི་བདུད་ཀྱི་རྒྱལ་པོ་རེ་ཏི་འགོང་ཡག་ལ་གཏད་དོ། །བདུད་ཀྱི་རྒྱལ་པོ་མགོ་དམར་སེར་ལ་གཏད་དོ། །ཆེ་གེ་མོ་འདི་བདུད་ཀྱི་རྒྱལ་པོ་སྨ་མེ་འགག་གི་རྒྱལ་པོ་ལ་གཏད་དོ། །གསུང་ཟབ་མོའི་རྐྱེན་མོ་ལ་གཏད་དོ། །འགོང་ལྕམ་ཁྲ་མེ་ལ་གཏད་དོ། །དམུ་བདུད། བཙན་བདུད། དགྲ་ལྷ། སྲོག་བདག །དཔེ་དཀར། ས་བདག །ཐེ་བྲང་། འགོང་པོ། ཡ་མ། ཀླུ་མགོ་ལ་གཏད་དོ། །ཆེ་གེ་མོ་འདི་ཤར་དྲི་ཟའི་བཙན་ལ་གཏད་དོ། །ལྷོ་གཤིན་རྗེའི་བཙན་ལ་གཏད་དོ། །ནུབ་ཀླུ་བཙན་ལ་གཏད་དོ། །བྱང་གནོད་སྦྱིན་བཙན་ལ་གཏད་དོ། །གཞན་ཡང་སྣང་སྲིད་ཀྱི་ལྷ་འདྲེ་ཐམས་ཅད་ལ་གཏད་དོ། །གཏད་ཁྲམ་གྱི་ལེའུ་སྟེ་བཅུ་དྲུག་པའོ།། །།དེ་ནས་ཀླུ་ནད་ཀྱིས་གསད་པ། །དང་པོ་མཛེ་ནད་གཏང་བ་ནི། །རྫས་ཕག་པ་རོག་པོའི་ཐོད་པ་རུ། །རྫ་ལས་བྱས་པའི་སྡིག་པའི་གཟུགས། །བསྲེགས་པའི་ནང་དུ་མིང་བྱང་གཞུག །དེ་ཉིད་ཕག་ཐོད་ནང་བཅུག་
ལ། །སྒྲིལ་བྱེད་ཆོ་གས་བསྒྲུབ་པ་བྱ། །ཞག་དགུ་མཚན་བཟང་ཅི་ཐོན་བྱ། །ཆུ་མིག་ནུབ་ལྟར་གནན་པར་བྱ། །ཕོལ་དུ་བཏང་ནས་བསད་པ་ནི། །ཕག་ནག་སྟག་ནེའི་ཐོད་པ་རུ། །རྫས་དག་ལ་སྦལ་པའི་གཟུགས། །ཡང་བསྲེགས་དེ་ནང་མིང་བྱང་གཞུག །དེ་ཉིད་ཕག་ཐོད་ནང་བཅུག་ལ། །སྒྲིལ་བྱེད་ཆོ་གས་བསྒྲུབ་པ་བྱ། །ཞག་དགུ་མཚན་བཟང་ཅི་ཐོན་བྱ། །ཆུ་མིག་ལྷོར་ལྟ་དག་ཏུ་མནན། །འབྲས་སུ་གང་ལ་བསད་པ་ནི། །ཕག་པ་གླི་གྲེག་ཐོད་པ་རུ། །རྫས་ལས་བྱས་སྦྲུལ་གྱི་གཟུགས། །བསྲེགས་པ་དེ་ནང་ལིངྒ་གཞུག །དེ་ཉིད་ཕག་ཐོད་ནང་བཅུག་ལ། །སྒྲིལ་བྱེད་བསྒྲུབ་པའི་ཆོ་ག་བྱ། །ཞག་དགུས་མཚན་ལྟས་ཐོབ་གྱུར་ནས། །ཆུ་མིག་ཤར་དུ་བལྟས་པར་མནན། །ཀླུ་ནད་རྫིངས་སུ་གཞུག་པ་ནི། །ཕག་པའམ་མཛེ་ཕོའི་ཐོད་པ་རུ། །རྫས་ལས་བྱས་མཛོ་མོའི་གཟུགས། །བསྲེགས་པའི་ནང་དུ་མིང་བྱང་བཞུག །དེ་ཡང་ཕག་ཐོད་ནང་དུ་གཞུག །ཞག་དགུ་བར་དུ་བསྒྲུབ་པ་བྱ། །མཚན་མ་བཟང་ཐོབ་བརྟན་གྱུར་ན། །བྱང་ལྟ་གདོལ་པ་ཅན་ཏུ་གཏད། །དེ་བཞིན་བྱས་ན་དོན་གྲུབ་ངེས། །དེ་ལྟར་མན་ངག་དམ་པས་བྱའོ། །ཀླུ་སྒྲུབ་ནག་པོ་ཕག་མིག་གི་སྒྲུབ་པ། །ཝ་འམ་ཕག་མགོ་ལ་བརྟེན་ཏེ། །སྒྲུབ་པ་གཟུགས་ཏེ་གྲུབ་པ་དང་གནན་པ་བྱའོ། །ཀླུ་ནད་བཏང་བའི་ལེའུ་སྟེ་བཅུ་ བདུན་པའོ།། །།དེ་ནས་རིམས་ཀྱིས་བསད་པ་ནི། །མཁྲིས་པས་བསད་དང་གག་པས་བསད། །རྒྱུ་གཟེར་དང་ནི་བལ་ནད་དོ། །དེ་ལ་མཁྲིས་པས་བསད་པ་ནི། །ཡིད་ཆེས་ཤྭ་ན་མུ་ཁའི་རྒྱུད། །བསྒྲུབ་པ་ཐབས་ཀྱིས་ལག་ཏུ་བླང་། །གསོད་ཐབས་གསང་བའི་མན་ངག་ནི། །མནན་བསྲེག་འཕང་གསུམ་ལས་སྦྱར་ཏེ། །ཐུན་བྲབ་ཕུར་བུ་གདབ་པར་བྱའོ། །དེ་ནས་གག་པས་བསད་པ་ནི། །ཡིད་ཆེས་བདག་
ཉིད་མ་ཡི་རྒྱུད། །ལག་ཏུ་སྒྲུབ་པ་ཐབས་ཀྱིས་བླངས། །བསད་ཐབས་གསང་བའི་མན་ངག་ནི། །མནན་བསྲེག་འཕང་གསུམ་ལས་སྦྱར་ཏེ། །ཐུན་བྲབ་ཕུར་བུས་གདབ་པར་བྱའོ། །དེ་ནས་བལ་ནད་ཀྱིས་བསད་པ། །ཡིད་ཆེས་ཚ་བ་ཡང་གཏེར་རྒྱུད། །ལག་ཏུ་བླངས་པ་སྒྲུབ་ཐབས་སོ། །བསད་པའི་མན་ངག་བསྟན་པ་ནི། །མནན་བསྲེག་འཕང་གསུམ་ལས་བརྟུལ་ཏེ། །གང་དུ་ཐུན་བྲབ་ཕུར་བུ་གདབ། །རྒྱུ་གཟེར་དག་གིས་བསད་པ་ནི། །མ་བདུན་སྲིང་བཞིའི་ལས་ཡིན་ཏེ། །མན་ངག་གནད་ནི་སྣ་ཚོགས་ཀྱིས། །ཟོར་ཁའི་ལས་ཀ་ལོ་ནས་བྱའོ། །རིམས་ཀྱིས་བསད་པའི་ལེའུ་སྟེ་བཅོ་བརྒྱད་པའོ།། །།དེ་ནས་བསྟན་འཛིན་དབུ་སྨོད་དགྲ་བགེགས་ལ། །དྲེགས་པ་ཕོ་དྲུག་མོ་བདུན་བསྐུལ། །ཞེས་བཀའ་སྩལ་ཏོ། །དེ་ནས་ཀརྨ་ཧེ་རུ་ཀ་ལ་སོགས་པའི་རྡོ་རྗེ་སྲིན་པོའི་ལྷ་ཚོགས་དང་། འཇིག་རྟེན་པ་ཐམས་ཅད་ཀྱིས། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །བསྟོད་པའི་ལེའུ་སྟེ་བཅུ་དགུ་ པའོ།། །།རྡོ་རྗེ་ཕུར་བུ་མདུང་རྩེ་དམར་པོའི་རྒྱུད་ཅེས་བྱ་བ་རྫོགས་སོ།། །།