སྲིད་པ་རྒྱ་མཚོ་བཞིའི་རྒྱུད་ཅེས་བྱ་བ།
རྒྱ་གར་སྐད་དུ། དུ་ར་ཀ་བི་ཏནྟྲ། བོད་སྐད་དུ། སྲིད་པ་རྒྱ་མཚོ་བཞིའི་རྒྱུད་ཅེས་བྱ་བ། ཡབ་མངོན་རྫོགས་རྒྱལ་པོ་དང་། ཡུམ་རིག་པའི་རྒྱལ་མོ་ལ་ཕྱག་འཚལ་ལོ། །འདས་དང་མ་འོངས་ཀྱི་མཚམས་སུ། འདི་སྐད་བདག་གིས་ཐོས་པའི་དུས་གཅིག་ན། གསེར་གྱི་ཉི་མའི་གདན་ལ། རིག་པའི་ཡེ་ཤེས་གཞལ་ཡས་འབར་བ་རུ། ཡེ་ཤེས་རང་སྣང་གདལ་བ་ལ། རིགས་ལྔའི་སངས་རྒྱས་ཀྱི་ཁྲི་ལ། སྐུ་རུ་བླ་མེད་ཁྲག་འཐུང་བརྗིད་པ། མངའ་དབང་ལྷུན་གྱིས་རྫོགས་པ། མཛད་པ་གར་གྱི་ཕྱག་རྒྱས་བཞུགས་ཏེ། བརྟུལ་ཤུགས་ཆེན་པོའི་མངའ་བདག །བུམ་པའི་འཁོར་ལོ་ལ་རིན་པོ་ཆེའི་འོད་འབར་བ། པདྨའི་ལྕེ་ལ་ཟངས་ཀྱི་མུ་ཁྱུད་འཁྱིལ་པ། གསེར་གྱི་འཁོར་ལོ་ལ་མུ་ཏིག་གི་འབུར་འཕང་བཅས་པ། སྲིད་པའི་ས་གཞི་ལ་མུ་ཏིག་གི་ཤར་བུ་འཕྲོ་བ། བདུད་རྩིའི་ཐིག་ལེ་ཧཱུཾ་བཅུར་འབར་བ། ཚོན་སྦྲེལ་བཞི་ལ་ཧཱུཾ་བཞི་བརྟེན་པ། ཆགས་པའི་འདབ་མ་ལ་བྱུ་རུའི་ཧཱུཾ་བཅུ་འབར་བ། རྣ་བ་ཡ་ཧཱུཾ་བཞིས་འདྲེལ་བ། གསེར་གྱི་འཁོར་ལོ་ལ་ཤེལ་གྱི་ཧཱུཾ་བཅུ་འབར་བ། འབུར་བཞི་ཧཱུཾ་
བཞིས་བསྲུང་བ། ཆགས་པ་སྣ་ཚོགས་རིགས་ལ་མུ་ཁྱུད་མུ་ཏིག་གི་ཧཱུཾ་བཅུས་འཁྲིགས་པ་ལས། ཁུག་པ་བཞི་ལ་ཧཱུཾ་བཞིས་མཛེས་པ། ཡུམ་གྱི་མཁའ་ལྔ་དབུ་མ་ལ་ཕྲིན་ལས་བཞིའི་དཀྱིལ་འཁོར་ཆགས་པ། དབུས་རྡོ་རྗེ་དབྱིངས་མ་ལ་རྒྱ་བཞིའི་ལྕགས་དང་ལྡན་ཏེ་སངས་རྒྱས་ཐམས་ཅད་བསྐྱེད་པའི་ཟ་མ་ཏོག་ཏུ་གནས་སོ། །རྡོ་རྗེ་འཇིགས་བྱེད་ཀྱི་རྭ་ལྔ་ལས། བྱང་ཆུབ་སེམས་ལྔའི་ཆར་བཞུགས་པའི་གནས་འཛིན་པའི་གནས་བཞིར་བབ་པ། དེ་ལྟ་བུའི་ཡུམ་ལ་སྐུ་ལས་ཧཱུཾ་བདུན་ཧ་ལྔ་མུཾ་གཅིག་ཏུ་ཤར་ཏེ། ཐུགས་ལས་ཧཱུཾ་མུཾ་གཉིས། མུཾ་བཞི། ཧཱུཾ་མཚན་གསུམ་དུ་ལྡན་ཏེ། ཡོན་ཏན་ལས་བྷྱོ་ལྔ་བཅུ་དྲུག་ཏུ་ཤར་བ། རུ་མཚོན་བཞི་ལ་བྷྱོ་བཞི། བྷ་ག་བཞི་ལ་ཧཱུཾ་བཞི། དེ་ལྟ་བུའི་ཡབ་ཡུམ་ལ། སྐུའི་སྤྱི་དཔལ་གྱི་ཁྲོ་བོ་བཅུ་ལ་ཏ་ཀྲྀཏ་བཞིས་བསྐོར་བ་དང་། གསུང་གསང་ཆེན་གྱི་ཁྲོ་བོ་བཅུ་ལ་ཏ་ཀྲྀཏ་བཞིས་བསྐོར་བ་དང་། ཐུགས་གདེང་ཆེན་གྱི་ཁྲོ་བོ་བཅུ་ལ་ཏ་ཀྲྀཏ་བཞིས་བསྐོར་བ། ཡོན་ཏན་རྫོགས་ཆེན་གྱི་ཁྲོ་བོ་བཅུ་ལ་ཏ་ཀྲྀཏ་བཞིས་བསྐོར་བས། དེ་ལྟ་བུའི་ཡབ་ཡུམ་ལ་དཀར་མོའི་མདོ་བཅུ་གསུམ་དང་། ནག་མོའི་མདོ་བཅོ་བརྒྱད་དང་། སེར་མོའི་མདོ་ལྔ་བཅུ་དྲུག་དང་།སྤྲུལ་པའི་མ་མོ་བརྒྱད་དུ་ལྡན་ཏེ་ཐབས་ཅིག་ཏུ་བཞུགས་སོ། །དེ་ནས་སྲིད་པའི་ཕྲ་མེན་རྒྱ་མཚོས་འདི་སྐད་ཅེས་གསོལ་ཏོ། །ཡབ་ཡུམ་སྲིད་པའི་བཅའ་བཞི་ཀུན། །གཏན་ཚིགས་རྩ་བ་ཇི་ལྟར་ལགས། །རྫོགས་སངས་རྒྱས་ལ་བདག་ཉན་འཚལ། །ཡང་དག་རྫོགས་ཀྱིས་བཀའ་སྩལ་པ། །ཕྲ་མེན་རྒྱ་མཚོ་གསང་བའི་ཡུམ། །གཏན་ཚིགས་རྩ་བ་འདི་རྣམས་ཀུན། །སྲིད་པའི་རྩ་བ་མཚོ་བཞིར་བཤད། །ཕྲ་མེན་རྒྱ་མཚོས་ཡང་གསོལ་པ། །སྲིད་པའི་རྩ་བ་མཚོ་བཞི་ཇི་ལྟར་ལགས། །མངོན་རྫོགས་ཡབ་ཀྱིས་བཀའ་སྩལ་པ། །མཚོ་བཞི་སྲིད་པའི་དོན་བཤད་པ། །སྲིད་པའི་བྱ་ལུང་རྒྱ་མཚོ་དང་། །དབང་ཕྱུག་ལས་ཀྱི་རྒྱ་མཚོ་དང་། །བསྐང་ལུང་ལས་ཀྱི་རྒྱ་མཚོ་དང་། །བརྟན་མ་ལས་ཀྱི་རྒྱ་མཚོ་རྣམས། །ཡང་དག་ཉིད་དུ་བཤད་པར་བྱའོ། །མ་མོ་སྲིད་པའི་རྒྱ་མཚོ་བཞི་ལས། གླེང་
གཞིའི་ལེའུ་སྟེ་དང་པོའོ།། །།བྱ་ལུང་སྲིད་པའི་རྒྱ་མཚོ་ལས། །དང་པོ་བཅས་དང་གཉིས་པ་སྐོངས། །གསུམ་པ་དགྲ་ཡི་བྱེ་བྲག་གོ། །སྲིད་པའི་མ་མོ་ཐམས་ཅད་དང་། །ཕོ་ཡི་རིགས་སུ་གཏོགས་པ་ཀུན། །སྲིད་པ་འཁྲུག་པའི་བྱད་བསྟན་པ། །ནམ་མཁའ་སྨུག་ནག་འཐིབས་པ་ལ། །དྲེད་མོ་རལ་པ་འཛིངས་པ་བྱུང་། །དེ་ནི་མ་མོ་འཁྲུག་པའི་བྱད། །གནམ་ལ་སེང་གེ་དཀར་མོ་དང་། །འབྲུག་རིས་སྔོན་མོ་འཐབ་པའི་རྟགས། །ས་ལ་གནམ་ལྕགས་འབར་བ་འཁྲུག །གླང་པོ་རྦ་ལ་མཆོངས་པ་ཡིས། །ས་ལ་སྟག་སེང་འཛིངས་པ་བྱུང་། །གནམ་ལ་སྤྲིན་དམར་མཆེད་པ་ཡིས། །ས་ལ་བུད་མེད་རལ་འཛིངས་བྱུང་། །སྐར་མདའ་ནམ་མཁར་འཕྲོས་པ་ཡིས། །ས་ལ་དབྱིག་གི་ནོར་བུ་ཉམས། །རི་རབ་རྩེ་ལ་མེ་ཆེན་འབར། །ས་ལ་ལྕི་བའི་ཟས་རྣམས་ཟ། །རྒྱ་མཚོའི་གཏིང་ནས་སྦྲུལ་གདུག་ལངས། །ས་ལ་མེ་ཏོག་བཅུད་དང་བྲལ། །མཁའ་ལ་སྟག་མོ་མཆོངས་པ་དེ། །ས་ལ་རྣལ་འབྱོར་རྫི་བས་བསྐྱོད། །མཁའ་ལ་བྱ་རྒོད་སྡེར་ཆེན་འཛིངས། །ས་ལ་གཏེར་གྱི་བཅུད་ཉམས་འགྱུར། །གཡུ་ཤ་དཀར་མོ་རྭ་འཛིངས་པས། །ས་ལ་དུས་ཀྱི་དོ་བ་འབྱུང་། །ཐོ་རངས་སེང་གེ་ངུ་ཞིང་འབོད། །ས་ལ་རྣོ་དབལ་ངར་དུ་འབབ། །སྲོད་ལ་གསེར་གྱི་སྦུད་པ་སྦུད། །ས་ལ་རྨ་བྱ་གཡེངས་པར་འགྱུར། །གཡུ་སྒོང་སྔོན་མོ་གནམ་དུ་ཡར། །ལྕགས་ཀྱི་སེར་བ་ཐབ་ཏུ་འབབ། །ཤེལ་དཀར་ནང་དུ་དུག་གིས་བཀངྐ་། །ཟངས་སྒོང་དམར་པོ་ཐུར་དུ་འདྲིལ། །མི་བཟད་འབར་བ་ཀླད་ལ་བསྐོར། །མི་བཟད་འབར་བའི་ནད་ཟེར་འབྱུང་། །ཉི་མ་སྤྲིན་གྱི་ཤུགས་ཅན་འཁྲུགས། །ཚུབ་མ་དམར་པོ་ནམ་མཁར་འཕྱོ། །སེང་གེ་གངས་ཀྱི་སྟོད་ནས་ལྷུང་། །སྒོ་ནས་ཤེལ་གྱི་སྒོ་ང་ཡར། །ནམ་མཁའི་དཀྱིལ་ནས་སྤྲིན་ཆེན་རལ། །ས་ལ་བོང་བུའི་བཅུད་ཆེན་ཟགས། །བསེ་སྒོང་ཁྲ་བོ་རྒྱ་མཚོར་འབར། །ས་ལ་ལྕུག་ཕྲན་ཟོར་གྱིས་འདེབས། །གཟའ་སྐར་འཁྲུག་པའི་ཆོ་འཕྲུལ་ནི། །ཟོ་བ་རྒྱན་
གྱི་རྩེ་མོ་རུ། །ཟ་འོག་ཝུ་བ་མིན་ནམ་སྦུད་པ་ཆགས་པ་ནི། །དེ་ལ་ལྟས་ངན་དགྲ་བཟློག་བྱ། །སྲིད་པ་མཚོ་བཞི་ལས། ལྟས་ངན་གྱི་དགྲ་ཇི་ལྟར་འབྱུང་བའི་ལེའུ་སྟེ་གཉིས་པའོ།། །།ཕྲ་མེན་རྒྱ་མཚོས་ཡང་གསོལ་པ། །བཅས་ཀྱི་རིམ་པ་ཅི་ལྟར་ལགས། །རྫོགས་སངས་རྒྱས་ལ་བདག་ཉན་འཚལ། །རྫོགས་སངས་རྒྱས་ཀྱིས་བཀའ་སྩལ་པ། །ས་ཡི་འཁོར་ལོ་སྦྱངས་པ་ལ། །འོག་གཞི་རུས་སྦལ་ཁོག་པ་ལ། །གསེར་གྱི་འཁོར་ལོ་རྩིབས་བརྒྱད་ལ། །གླིང་བཞི་འཁོར་ཡུག་གླིང་ཕྲན་ལྡན། །མཐའ་མ་ལྕགས་རི་ནག་པོ་ལ། །རིན་ཆེན་སྣ་ལྔའི་གཅལ་བཀྲམ་སྟེ། །རྩིབས་བརྒྱད་སྟེང་དུ་ཀླུ་བརྒྱད་བྲི། །འབྲུ་སྣ་ལྔ་ཡི་ངར་ཕྱེ་ལ། །ཞབས་བརྒྱད་ཀླུ་བརྒྱད་བརྫིས་པར་བྱ། །ཞབས་ཀྱི་རྩེ་ནི་ཕྱི་རུ་བསྟན། །ཞབས་བརྒྱད་བང་རིམ་མཐའ་མས་བཏེགས། །བང་རིམ་ལྟེ་བའི་ཕོ་བྲང་ལ། །དབུས་སུ་ཆགས་འཛིན་ཆེན་མོ་ལ། །བུད་མེད་ལྔ་བཅུ་ལྔ་ཡིས་བསྐོར། །རྡོ་རྗེའི་ཀ་བ་བཞི་ཡིས་བཏེགས། །དེ་སྟེང་བང་རིམ་བར་མ་ལ། །དབུས་སུ་ཕྲ་མེན་རྒྱ་མཚོ་ལ། །བུད་མེད་བཅུ་བདུན་འཁོར་གྱིས་བསྐོར། །རྡོ་རྗེའི་ཀ་བ་བཞི་ཡིས་བཏེགས། །དེ་སྟེང་བང་རིམ་གསུམ་པ་ལ། །བུམ་པ་ཞལ་ལྔའི་དབྱིབས་སུ་བྱ། །ནང་གི་དབུས་སུ་དགོད་པ་ནི། །དབུས་སུ་སྲིད་པའི་རྒྱལ་མོ་ལ། །དབྱིངས་ཀྱི་མ་བདུན་འབྱུང་ལྔའི་ཡུམ། །བཅུ་གཉིས་ཡང་དག་དཀྱིལ་འཁོར་ལྡན། །མཚམས་དང་ཡན་ལག་ཀླུ་ཡང་མ་ཆེན་བརྒྱད། །དང་པོ་དུང་སྒོང་བཅུ་གསུམ་ལ། །མཚལ་གྱིས་ཁ་མིག་གཤག་པ་བྲི། །དབུས་ཀྱི་བུམ་པ་ཉིད་ལའོ། །སྤྱན་གཟིགས་གཏོར་མ་ཕྲ་མེན་སྣོད། །ཁ་ཁྱེར་དང་པོ་འཁོར་བར་བཞག །དར་དཀར་རུ་མཚོན་བཅུ་གསུམ་གཟུག །ཐུགས་ཀྱི་བང་རིམ་ཕོ་བྲང་ལ། །ལྕགས་སྒོང་ནག་པོ་བཅོ་བརྒྱད་དང་། །དར་ནག་རུ་མཚོན་བཅོ་བརྒྱད་གཟུག །སྤྱན་གཟིགས་གཏོར་མས་འཁོར་བར་བྱ། །ཡོན་ཏན་བང་རིམ་ཕོ་བྲང་ལ། །བསྭེ་སྒོང་ཁྲ་བོ་ལྔ་བཅུ་དྲུག །དར་སེར་རུ་མཚོན་དེ་བཞིན་བྱ། །རྒྱན་གྱི་གཏོར་མ་དགྲམ་པར་བྱ། །ཡན་ལག་བཞི་དང་བྷ་ག་
བཞི། །སྒོ་ང་བརྒྱད་དང་རུ་མཚོན་བརྒྱད། །དེ་བཞིན་གནས་སུ་དགོད་པར་བྱ། །ཕྱི་ཁྱམས་མདའ་བཞི་མེ་ལོང་བཞི། །རལ་གྲི་བཞི་དང་གུར་དུ་བཅས། །གཅིག་གིས་གཟུགས་མེད་དངོས་སུ་བསྐང་། །སྲིད་པ་མཚོ་བཞི་ལས། བཅས་ཀྱི་ལེའུ་སྟེ་གསུམ་པའོ།། །།ཕྲ་མེན་རྒྱ་མཚོས་ཡང་གསོལ་པ། །བསྐང་གི་རིམ་པ་གང་ལགས་པ། །རྫོགས་སངས་རྒྱས་ལ་བདག་ཉན་འཚལ། །ཡང་དག་རྫོགས་ཀྱིས་བཀའ་སྩལ་པ། །ཧཱུཾ། དུང་མཁར་ཟོ་བའི་ནང་ཤེད་ནས། །སྲིད་པའི་རྒྱལ་མོ་ཡུམ་གཅིག་མ། །དཀར་མོ་མཛེས་ལ་ཤེལ་ལྟར་དག །སྨན་གྱི་གའུ་བུམ་པ་འཛིན། །སྤྱན་ནས་ཟླ་བའི་དཀྱིལ་འཁོར་འཆར། །ཐུགས་ལས་མེ་ལོང་ཡེ་ཤེས་གསལ། །མི་བསྐྱོད་དབྱིངས་ནས་ཐུགས་རྗེ་གསལ། །ནམ་མཁའི་མདངས་ལ་ཁྱབ་པ་མོ། །འགྲོ་བ་ཡོངས་ཀྱི་མདངས་འཕྲོག་མ། །ཧཱུཾ། ཡུམ་ཆེན་དབུ་ལས་སྤྲུལ་པ་ནི། །དུང་སྒོང་འབར་བ་དཀར་པོ་གཅིག །མཐོ་སྟེ་ནམ་མཁའི་དབྱིངས་སུ་འབར། །དམའ་སྟེ་རྒྱ་མཚོའི་གཏིང་ན་ཉལ། །ལྕགས་ཀྱི་སྒོ་ང་རང་རྡོལ་བས། །རིགས་སུ་སྒུམ་ཐུན་མཆུ་ཟླུམ་བྱུང་། །དེ་ནས་རིགས་ཀྱི་མིག་དཀར་བ། །རྨ་བྱའི་བུ་མོ་ཧ་ལོ་མགྲིན། །དཔྲལ་བའི་དཀྱིལ་ན་ཟླ་གམ་ནི། །རི་རབ་ཀྱི་ཟོམ་དང་མཉམ། །ཁ་དོག་ནི་སྣ་ཚོགས་ནི། །བདེར་གཤེགས་ཀྱི་རིགས་དང་མཉམ། །སྤྱན་མིག་ནི་དམར་བཟློག་པས། །ཁམས་གསུམ་ནི་དབང་དུ་སྡུད། །འཕྲག་ལེ་ནི་གཡས་གོང་ནས། །རི་རབ་ནི་གོང་ལྟར་འཕེན། །འཕྲག་ལེ་ནི་གཡོན་གོང་ནས། །རྒྱ་མཚོ་ནི་ཞོ་ལྟར་བཤིག །གཡུ་སྡེར་འབར་བ་ཡིས། །འགྲོ་དྲུག་ནི་གནས་ནས་འདྲེན། །གཡས་ཀྱི་འདབ་གཤོག་བཞི་བཅུ་རྩ་གཉིས་ཀྱིས། །སངས་རྒྱས་བཞི་བཅུ་རྩ་གཉིས་རོལ་པ་མཛད། །གཡོན་གྱི་འདབ་གཤོག་དྲུག་ཅུ་རྩ་བརྒྱད་ལ། །མ་མོ་དྲུག་ཅུ་རྩ་བརྒྱད་རོལ་པ་མཛད། །བསྐང་ངོ་སྲིད་པའི་རྒྱལ་མོའི་ཐུགས་དམ་བསྐང་། །མི་ལ་ནི་སྲིད་པ་མེད། །བྱ་ལ་ནི་སྲིད་པ་ཡོད། །མི་ལ་ནི་མཐོ་འཇུང་མེད། །བྱ་ལ་ནི་མཐོ་
འཇུང་ཡོད། །མི་ཡི་གླུད་དུ་བྱ་བཞེས་ཤིག །གསེར་མཁར་གའུ་འབར་བ་ནས། །དཀར་མོའི་རྒྱལ་མོ་མི་བཟད་མ། །འབར་མ་གློག་གི་བང་བ་ཅན། །གསེར་གྱི་དྲིལ་ཞགས་སྡོག་ཅིང་འཕེན། །མི་འགྱུར་དབྱིངས་ནས་འོད་གསལ་མ། །བྱ་ཐང་དཀར་ནི་གཡང་ཞུ་ནི། །མཐིང་ནག་ནམ་མཁའི་ན་བཟའ་ལ། །གཞའ་ཚོན་འབར་བའི་མཐའ་ཆག་ཅན། །འདི་ཡི་མདངས་ཀྱིས་ཐུགས་དམ་བསྐང་། །གཏི་མུག་ནད་རྣམས་ཞི་བར་མཛོད། །རྣལ་འབྱོར་ཉམས་པ་སྐོང་གྱུར་ཅིག །གཡུ་སྒོང་ཁ་འབར་ནང་ནས་ནི། །སྔོན་མོ་གཡུ་ཡི་འཕུར་རྩལ་ཅན། །མཐིང་ནག་ནམ་མཁའི་རྒྱལ་མཚན་ཅན། །ཉི་ཟེར་ཞགས་པས་སྐྱེ་འགྲོ་འདྲེན། །བྱ་སྐྱིན་དཀར་ནི་གཡང་ཞུ་ནི། །ན་བཟའ་མཐིང་ནག་ན་བཟའ་ལ། །ཉི་ཟེར་དམར་པོའི་འོད་ཀྱིས་མཛེས། །ལྗགས་ལ་གློག་དམར་ལམས་སེ་ལམ། །འདི་ཡི་མདངས་ཀྱིས་བསྐང་བྱས་པས། །གཏི་མུག་ནད་རྣམས་ཞི་བར་མཛོད། །དམ་ཚིག་ཉམས་པ་སྐོང་གྱུར་ཅིག །ཟངས་མཁར་དམར་པོ་འབར་བ་ན། །དམར་མོ་ཁྲག་གི་ཕོ་འཐིང་ཅན། །སྤྲིན་དམར་མཆེད་པའི་ན་བཟའ་ཅན། །བྱུ་རུའི་ཞགས་པས་འགྲོ་བ་འདྲེན། །བྱ་ལྕོག་འབར་བའི་གྱུར་མོ་མགྲིན། །ཆོས་ཀྱི་སྒྲ་སྒྲོགས་ནམ་མཁའི་དབྱིངས་སུ་ཁྱབ། །ཐེ་བྲང་གཉིས་ལས་ཤར་བའི་སྲས་གཅིག་མ། །མཐུན་པའི་རྫས་ཆེན་འདི་ཡིས་སྐོང་། །གཏི་མུག་ནད་རྣམས་ཞི་བར་མཛོད། །དམ་ཚིག་ཉམས་པ་སྐོང་གྱུར་ཅིག །ཤེལ་མཁར་འོད་གསལ་མཛེས་པ་ན། །སྤྱན་ནི་ཟླ་ཚེས་འབར་བ་ལ། །ཞལ་ནི་གཡུ་ཞལ་སྔོན་མོ་སྟེ། །གཡུ་ཡི་སྨིན་མ་ལམས་སེ་ལམ། །ཟླ་ཚེས་ཞགས་པ་སྡོག་ཅིང་འཕེན། །མཁའ་ལ་རྒྱུ་བའི་མ་མོ་སྟེ། །ཐུགས་རྗེས་དབྱིངས་ནས་རོལ་པ་མཛད། །རིག་བྱེད་གསལ་བའི་ཐང་དཀར་ནི། །ཟླ་བ་ཚེས་གཅིག་དབུ་ལ་རྫོགས། །སྤྱན་ནི་ཁྲོ་ཆུ་འབར་བ་ལ། །ན་བཟའ་ཤེལ་དཀར་མཛེས་པས་བརྒྱན། །རིག་པ་འདི་ཡིས་ཐུགས་དམ་བསྐང་། །མུ་མེན་མཛེས་པའི་དཀྱིལ་འཁོར་ནས། །མཐིང་ནག་ནམ་མཁའི་གོ་ཟུ་ལ། །རྡོ་རྗེ་ཧ་ཡི་ཆ་ག་
ཅན། །སྤུ་གྲི་འབར་བ་ལག་ན་ཐོགས། །སོ་སོར་རྟོག་པའི་ཐུགས་མངའ་བ། །ཚུལ་ཁྲིམས་ལྡན་པའི་རིག་པ་ཅན། །བཅོས་ཀྱི་རལ་ཀ་སྐུ་ལ་གསོལ། །གཟི་ཡི་ཕྲེང་བས་དབུ་ལ་མཛེས། །རིག་བྱེད་འདི་ཡི་མདངས་ཀྱིས་བསྐང་། །གཏི་མུག་ནད་རྣམས་ཞི་བར་མཛོད། །གསེར་མཁར་གྲུ་བཞི་ལྡེམ་པ་ན། །སེར་མོ་རླུང་གི་གོ་ཟུ་ཅན། །རྡོ་རྗེ་རྒྱ་གྲམ་ཕྲ་བཀྱེ་བ། །འཛུམ་པའི་མདངས་ཀྱིས་སྲིད་པ་གསལ། །འདྲེ་བྱ་རིག་བྱེད་མདངས་ལྡན་མ། །ཟངས་ཀྱི་ཞབས་མས་ལུས་མཛེས་ཤིང་། །འདི་ཡི་མདངས་ཀྱིས་བསྐང་བྱས་པས། །མ་རིག་ནད་རྣམས་བྱང་བར་མཛོད། །རླུང་གི་དཀྱིལ་འཁོར་ཟླ་གམ་ནས། །ལག་ན་བ་དན་ལྕེ་བརྒྱད་ཐོགས། །བསམ་པ་ཙམ་གྱིས་ཕྱོགས་བཅུར་ཕྱིན། །སྲོག་ཆགས་ཀུན་གྱི་དབུགས་ལ་ཉུལ། །འོད་ལྡན་བཀྲག་གསལ་རླུང་ཞོན་མ། །སྤུ་རུ་རྒྱལ་མཚན་མཛེས་ལྡན་འབར། །ལུས་ལ་བྲ་ཕ་མ་ཙར་ཡང་མ་ར་ཙས་བརྒྱན། །འདི་ཡི་མདངས་ཀྱིས་བསྐང་བྱས་པས། །མ་རིག་ནད་རྣམས་བྱང་བར་མཛོད། །ཧཱུཾ། ནམ་མཁའ་ཡངས་པའི་དཀྱིལ་འཁོར་ནས། །སྐྱེ་མེད་འགྲོ་བ་བཀྲག་གི་བདག །སེང་གེའི་གདངས་སྐད་ཕྱོགས་བཅུར་སྒྲོགས། །ཞེ་སྡང་ནད་རྣམས་ཞི་བར་མཛོད། །སེང་གེ་དཀར་མོའི་མདངས་ཀྱིས་བསྐང་། །གཡུ་བྱ་ཁྲག་མིག་མདངས་ཀྱིས་བསྐང་། །སེམས་ཀྱི་ནད་རྣམས་བྱང་བར་མཛོད། །བྱང་ཕྱོགས་རླུང་གི་དཀྱིལ་འཁོར་ནས། །ལྗང་མོ་སྟོང་གསུམ་ཁྱབ་པར་འགྲོ། །ཁྱུང་གི་སྐད་ཀྱིས་ཀླུ་བདུད་འཇོམས། །ཕྲག་དོག་ནད་རྣམས་ཞི་བར་མཛོད། །བྱ་ཁྱུང་སྔོན་མོའི་མདངས་ཀྱིས་བསྐང་། །ཁ་རླངས་ནམ་མཁའི་སྤྲིན་དུ་འཁྲིགས། །རླབས་ཀྱིས་ནམ་མཁའ་ཁེབས་པར་གཅོད། །འདི་ཡི་མདངས་ཀྱིས་བསྐང་བྱས་པས། །མ་རིག་ནད་རྣམས་བྱང་བར་མཛོད། །རྒྱ་མཚོ་ཆེན་པོའི་དཀྱིལ་འཁོར་ནས། །དམར་མོ་ཆུ་ཡི་འཁོར་ལོ་ཅན། །ཁྲག་གི་རལ་པས་སྟོང་གསུམ་ཁེབས། །འདོད་ཆགས་ནད་རྣམས་བྱང་བར་མཛོད། །དུད་ཁ་འབར་བའི་མདངས་ཀྱིས་བསྐང་། །མ་རིག་ནད་རྣམས་བྱང་བར་མཛོད། །
མེ་རི་གྲུ་གསུམ་འབར་བ་ནས། །མེ་ཡི་འོད་ལས་སྤྲུལ་པ་མོ། །རལ་པ་མེ་སྟག་མེ་དཔུང་འབར། །གླང་ཆེན་མདངས་ཀྱིས་གཤིན་རྗེ་འཇོམས། །ང་རྒྱལ་ནད་རྣམས་བྱང་བར་མཛོད། །གླང་ཆེན་གཟུགས་ཀྱི་རྒྱལ་པོས་བསྐང་། །མ་རིག་ནད་རྣམས་བྱང་བར་མཛོད། །གསེར་གྱི་ས་གཞི་འབར་བ་ནས། །སེར་མོ་རྡོ་རྗེའི་རལ་པ་ཅན། །ལག་ན་ས་ཡི་དཀྱིལ་འཁོར་ཐོགས། །གཏི་མུག་ནད་རྣམས་བྱང་བར་མཛོད། །མི་ཡི་རྒྱལ་མཚན་འབར་བས་བསྐང་། །མ་རིག་ནད་རྣམས་བྱང་བར་མཛོད། །དཀར་མོའི་རྒྱལ་མོ་བློན་མོ་དང་། །བར་མཚམས་བློན་མོ་གོང་ལེར་བཅས། །དུང་སྒོང་དཀར་མོ་བཅུ་གསུམ་ལ། །མཚལ་གྱི་ཐིག་ཕྲན་འབར་བས་བརྒྱན། །དཀར་མོའི་ཚོགས་ཀྱི་ཐུགས་དམ་བསྐང་། །བསྐང་བཟློག་ཆེན་མོའི་དུས་ལ་བབ། །དར་གྱི་རུ་མཚོན་འབར་བ་འདིས། །དཔུང་བཞིའི་ཚོགས་ཀྱི་དཔུང་ཆེན་བཟློག །ཐུགས་དམ་ཆེན་པོ་སྐོང་གྱུར་ཅིག །དུས་བཞི་དཔལ་གྱི་གཏོར་མ་ཡིས། །དབྱིངས་ཀྱི་མ་བདུན་དུས་ཀྱི་སྲིང་། །ཐུགས་དམ་ཆེན་པོ་སྐོང་གྱུར་ཅིག །དཀར་མོ་སྒེག་མ་ཐུགས་དམ་དབྱིངས་ཀྱི་ལྷ། །མདོག་བཟང་དབྱིངས་ཀྱི་ཡུམ་ཆེན་ལ་སོགས་རྣམས། །ཐུགས་རྗེའི་དབྱིངས་ནས་ཤར་བའི་གྲུབ་པ་མོ། །མི་འགྱུར་ཆོས་ཀྱི་དབྱིངས་ལས་ཕྱི་རོལ་མེད། །ཐུགས་རྗེ་མི་འགྱུར་དབྱིངས་ནས་སྐུ་སྤྲུལ་པ། །གང་ཟག་ཤེས་བྱའི་བག་ཆགས་ཅི་མཆིས་པ། །བྱམས་མགོན་ཁྱོད་ཀྱི་སྤྱན་སྔར་མཐོལ་ཞིང་བཤགས། །ཁྱེད་ཀྱི་ཐུགས་རྗེ་ནམ་མཁའི་མཐའ་དང་མཉམ། །འགྲོ་བ་ཀུན་ལ་སྙོམས་པའི་ཐུགས་རྗེ་ཅན། །རྟོག་མེད་ཐུགས་དམ་ངང་གི་དགོངས་ནས་ཀྱང་། །ཉོན་མོངས་སྒྲིབ་པ་མ་ལུས་སྦྱང་དུ་གསོལ། །སྲིད་པའི་ལས་ཀྱིས་མནར་བའི་སེམས་ཅན་རྣམས། །དང་པོ་མ་རིག་འཁོར་བའི་གནས་ལ་འཁྱམས། །བྱམས་མགོན་ཐུགས་རྗེས་དགོངས་ནས་སྦྱང་དུ་གསོལ། །དཀར་མོ་འོད་གསལ་སྲིད་པའི་རྒྱལ་མོ་དང་། །དབྱིངས་ཀྱི་མ་བདུན་དུས་ཀྱི་སྲིང་མོ་ལྔ། །མཐུན་པའི་རྫས་དང་མཆོད་པའི་ཡོ་བྱད་རྣམས། །བསྒྲུབ་པའི་དུས་སུ་
གནས་སུ་བསྟབ་བྱས་ན། །དམ་སྐོང་ཕྲིན་ལས་ཆེན་པོ་མཛད་དུ་གསོལ། །དཀར་མོ་གཤོག་ཐོགས་ནམ་མཁར་འཕུར་བའི་ཚོགས། །བརྩོན་འགྲུས་མཐར་ཕྱིན་ཕྱི་བཤོལ་མི་མངའ་བས། །འགྲོ་དྲུག་ཐུགས་རྗེས་གནས་ནས་དྲང་དུ་གསོལ། །སེམས་ཅན་ལས་ཀྱི་བག་ཆགས་དབང་གིས་ན། །དམ་ཚིག་ཆེན་པོའི་བསྐང་བཟློག་འདི་བྱས་པས། །སྲིད་པའི་དགྲ་ལྟས་ངན་པ་བཟློག་ཏུ་གསོལ། །སྲིད་པ་མཚོ་བཞི་ལས། དཀར་མོའི་མདོས་ཀྱི་སྐོང་། བྱ་ལུང་ལས་ཀྱི་རྒྱ་མཚོ་ལས། དཀར་མོའི་མདོས་བསྟན་པའི་ལེའུ་སྟེ་བཞི་པའོ།། །།ཕྲ་མེན་རྒྱ་མཚོས་ཡང་གསོལ་པ། །ནག་མོའི་རིམ་པ་གང་ལགས་པ། །རྫོགས་སངས་རྒྱས་ལ་བདག་ཉན་འཚལ། །སྤྱི་དཔལ་ཆེན་པོས་བཀའ་སྩལ་པ། །ཧཱུཾ། ཡུམ་གྱི་ཐུགས་མཆོག་འབར་བ་ལས། །གསེར་གྱི་ཐིག་ལེ་གྲུ་གསུམ་ནས། །བཙོ་མ་གསེར་གྱི་སླག་པ་ལ། །རྡོ་རྗེ་ཧ་ཡི་ཕྲེང་བས་བརྒྱན། །ཐུགས་ལས་ཡེ་ཤེས་འོད་གསལ་མ། །ཁྱོད་ཀྱི་ཐུགས་དམ་བསྐང་བ་ནི། །ལྕགས་སྒོང་ནག་པོ་འབར་བ་ལ། །གཡུ་ཡི་ཐིག་ཕྲན་འབར་བ་འཕྲོས། །ཡུམ་གྱི་ཐུགས་ལས་སྤྲུལ་པ་སྟེ། །མཐོ་ཡང་དེ་ནི་མི་མཐོ་སྟེ། །རི་རབ་ཀྱི་ནི་ཟོམ་ལས་འཕར། །དམའ་ཡང་དེ་ནི་མི་དམའ་སྟེ། །རྒྱ་མཚོ་ཆེན་པོའི་གཏིང་ནས་ཉུལ། །སྒོ་ང་རང་གིས་རང་བརྡོལ་བས། །ཤ་ཟན་མཆུ་གུག་རིགས་སུ་བྱུང་། །བྱ་ཆེན་འདི་ཡི་དཔྲལ་བ་ནི། །རི་རབ་བུམ་པའི་གཏོས་དང་མཉམ། །དབུ་ལ་གཡུ་ཡི་རྭ་འབར་བ། །ནམ་མཁའི་ཁམས་ཀྱི་མཐོངས་སུ་སླེབས། །ཁ་ཡིས་ཀླུ་བདུད་དྲེགས་པ་ནི། །འོག་གི་རྒྱ་མཚོའི་གཏིང་ནས་འདྲེན། །མིག་ནི་ཉི་ཟླ་འབར་བ་སྟེ། །ཀླུ་བརྒྱད་ཟིལ་གྱིས་གནོན་པར་བྱེད། །ཁ་ནས་མེ་འབར་རྒྱ་མཚོ་སྐེམས། །སེམས་ནི་ཆགས་སྡང་ལྔ་དང་ལྡན། །སྡེར་མོ་གཡུ་སྡེར་འབར་བ་ཡིས། །ཆུ་སྲིན་ནག་པོའི་སྙིང་ནས་འདྲེན། །ཁ་རླངས་ན་བུན་བཞིན་དུ་ཆགས། །དུང་གི་གཤོག་འདབ་འབར་བ་བ་ལས། །གཡུ་ཡི་གཤོག་རྩེ་
ཟེར་འཕྲོ་བས། །ཐགས་བཟངས་རིས་ཀྱི་མགོ་བོ་གཅོད། །གཡས་ཀྱི་གཤོག་པ་བརྐྱང་བ་ཡིས། །ལྷ་ཡི་དབང་པོའི་གནས་ལ་ཁྱབ། །གཡོན་གྱི་གཤོག་པ་རླབས་པ་ཡིས། །གསེར་གྱི་ས་གཞི་འབར་བ་གཤོག །ལྟོ་ནས་འབྲུག་སྔོན་འབར་བ་འཁྲུག །ཁ་ནས་གློག་འཁྱུག་ལྗིབས་སེ་ལྗིབ། །ལྕེ་ཡི་རྩེ་ལས་ཐོག་ཆེན་འབེབས། །མིག་ནས་ལྕགས་ཀྱི་སེར་ཆེན་འབེབས། །སྣ་ནས་བུ་ཡུག་ཚུབ་མར་འཚུབས། །ཁྱོད་ཀྱི་ཙིཏྟ་འབར་བ་ནས། །ཟུར་ཕུད་ལྔ་པའི་ཆོ་འཕྲུལ་འགྱེད། །མཁལ་མ་ཨག་ནི་དེ་བ་སྟེ། །མཆིན་པ་རོ་གླིང་ཆེན་པོ་ལ། །མཁྲིས་པ་གསོད་བྱེད་ཆེན་པོ་སྟེ། །མཆེར་པ་མྱོས་བྱེད་འབར་བ་ལ། །གློ་བ་སྐྱོད་བྱེད་སྟོབས་ཅན་ཏེ། །གྲོང་པ་སྡེ་དཔོན་ཆེན་པོ་སྟེ། །གཉེ་མ་དབང་ལྡན་འབར་བར་སྤྲུལ། །སྒལ་ཚིགས་འཁོར་ལོ་བཅུ་དྲུག་ལ། །སྲིད་པའི་ཕོ་རྒྱུད་བཅུ་དྲུག་སྤྲུལ། །གཡས་ཀྱི་གཤོག་སྦུབས་ལྔ་བཅུ་དྲུག །ཁྲག་འཐུང་ལྔ་བཅུ་རྩ་དྲུག་རྫོགས། །གཡོན་གྱི་འདབ་གཤོག་ལྔ་བཅུ་དྲུག །དམན་མོ་ལྔ་བཅུ་རྩ་དྲུག་འཆར། །མདངས་ཀྱི་ཐིག་ལེ་བཅུ་གསུམ་ལ། །ཡུལ་གྱི་མ་མོ་བཅུ་གསུམ་འཆར། །དཔལ་བེའི་ཐིག་སྒྲོ་བཅོ་བརྒྱད་ལ། །སེམས་ཀྱི་མ་ཆེན་བཅོ་བརྒྱད་གནས། །མཇུག་སྒྲོའི་ཐིག་ལེ་བརྒྱད་དུ་ཤར། །སྣང་སྲིད་ཕོ་རྒྱུད་མོ་རྒྱུད་དང་། །མ་མོར་གྲགས་པ་ཐམས་ཅད་ཀུན། །ཁྱུང་ཆེན་སྐུ་ཡི་ཁྱོན་དུ་རྫོགས། །ཀླུ་ཡི་རྒྱལ་པོ་ནོར་འཛིན་དང་། །སྲིད་པའི་བྱ་ཁྱུང་འབར་བ་གཉིས། །གནོད་སྦྱིན་བུ་མོ་རྟ་གདོང་མས། །རྒྱ་མཚོ་ཆེན་པོའི་གཏིང་ནས་དཀྲུགས། །ཁ་རླངས་ནམ་མཁའི་སྤྲིན་དུ་ཆགས། །ཀླུ་དང་བྱང་ཆུབ་སེམས་འཁྲུགས་ནས། །སྲིད་པའི་མ་མོ་ཐུགས་འཁྲུགས་ཏེ། །དེ་ཕྱིར་སྐོང་ཟློག་འདི་ལྟར་རོ། །ཧཱུཾ། སེར་མོ་འོད་བཟང་མདངས་བཟང་མོ། །མཁའ་ལྡིང་ནམ་མཁའི་སྐར་མདའ་ཅན། །འདི་ཡི་མདངས་ཀྱིས་ཐུགས་དམ་བསྐང་། །དཀར་མོ་འོད་ཀྱི་ཟེར་འཕྲོ་མ། །མཐིང་ནག་འབར་བས་ཐུགས་དམ་བསྐང་། །དཀར་མོ་ཤེལ་གྱི་མདངས་བཟང་མོ། །ཚུལ་ཁྲིམས་རྣམ་དག་མདངས་
ཀྱིས་བསྐང་། །གསེར་བྱ་ནམ་མཁའི་སྤྲིན་དམར་མགོ། །མགྲིན་བཟང་མོ་ཡི་མདངས་ཀྱིས་བསྐང་། །དམར་མོ་ཟངས་ཀྱི་མིག་གཅིག་མ། །རོ་འདྲེན་ཁ་འབར་མདངས་ཀྱིས་བསྐང་། །ནག་མོ་སྤྱང་གདོང་དབུགས་འཕྲོག་མ། །དྲན་བྱེད་ནག་མོའི་མདངས་ཀྱིས་བསྐང་། །མེ་ལོང་ཡེ་ཤེས་ཀུན་གསལ་མ། །སྔོན་མོ་མདངས་ཀྱིས་ཐུགས་དམ་བསྐང་། །མཉམ་ཉིད་ཡེ་ཤེས་ཀུན་སྙོམས་མ། །གསེར་མདའ་རིག་པའི་མདངས་ཀྱིས་བསྐང་། །སོ་སོར་ཀུན་རྟོགས་མ་འདྲེས་གསལ། །བསྒྲུབ་བྱ་དམར་མོའི་མདངས་ཀྱིས་བསྐང་། །བྱ་བ་ནན་ཏན་མཛད་པ་རྫོགས། །ནཱིར་ཏི་ལྗང་མོའི་མདངས་ཀྱིས་བསྐང་། །བག་ཆགས་ཀུན་གསལ་དབྱིངས་ཉིད་གསལ། །ཀྲོ་ཏ་ནག་མོའི་མདངས་ཀྱིས་བསྐང་། །སྣང་སྲིད་ལོངས་སྤྱོད་རྒྱན་དུ་ཤར། །གཟི་ཆེན་དིར་བའི་མདངས་ཀྱིས་བསྐང་། །ཉོན་མོངས་གནས་ནས་རིག་པ་གསོལ། །ཁྲ་རི་ཁྲ་མོའི་མདངས་ཀྱིས་བསྐང་། །ཉོན་མོངས་གནས་ནས་རིག་པ་གསལ། །སྐད་ཅིག་གཅིག་ལ་སྟོང་གསུམ་ཁྱབ། །རོ་ཟ་ནག་མོའི་མདངས་ཀྱིས་བསྐང་། །དཀར་མོ་དཔལ་ཆེན་ཡབ་ལ་བཞད། །རུ་ཚེ་རྐང་ལྡན་མདངས་ཀྱིས་བསྐང་། །ནག་མོ་ཁ་འབར་སྟོང་གསུམ་གྲགས། །སྲིན་མོ་དྲི་ཟའི་མདངས་ཀྱིས་བསྐང་། །དམར་མོ་གཟི་མདངས་འོད་འཕྲོ་མ། །ཟངས་སྤྲིན་དམར་མོའི་མདངས་ཀྱིས་བསྐང་། །སེར་མོ་རླུང་ཞོན་སྟོང་གསུམ་ཁྱབ། །རིག་བྱེད་གསེར་བྱའི་མདངས་ཀྱིས་བསྐང་། །ཞེ་སྡང་ནད་རྣམས་བྱང་བར་མཛོད། །ཧཱུཾ་ཐུགས་རྗེའི་དབྱིངས་ནས་ཤར་བའི་མ་ཆེན་རྣམས། །རིག་པ་གསལ་བའི་མ་ཆེན་རྒྱ་མཚོ་མ། །ཐུགས་རྗེ་རྒྱུན་གྱིས་བདག་ལ་དགོངས་སུ་གསོལ། །ཉི་ཟླའི་འོད་ཀྱིས་ཁམས་གསུམ་གསལ་མཛད་མ། །བྱམས་མགོན་ཐུགས་རྗེས་བདག་ལ་དགོངས་སུ་གསོལ། །མི་འགྱུར་དབྱིངས་ནས་ཤར་བ་གསང་བའི་ཡུམ། །གཟུང་འཛིན་སྤྲོས་པའི་མཚན་མ་གཞོམ་དུ་གསོལ། །ཡེ་ཤེས་མཁའ་ལས་ཀར་ཚོགས་རྒྱས་པའི་ཡུམ། །མ་
རིག་མུན་པའི་ལིང་ཏོག་བསལ་དུ་གསོལ། །འཁོར་བའི་རྒྱུན་གཅོད་ཐུགས་རྗེའི་དབྱིངས་ནས་གསལ། །ལས་ཀྱིས་མནར་བའི་འགྲོ་བ་དྲང་དུ་གསོལ། །འཛུམ་པའི་མདངས་ཀྱིས་དབང་ཆེན་ཡབ་ལ་སྦྱོར། །གཟི་མདངས་བཀྲག་ལ་ལོངས་སྤྱོད་མཛད་པ་མོ། །ཡུན་རིང་དུས་ནས་འགྲོ་བའི་དོན་མཛད་མ། །ཆག་ཉམས་འགལ་འཁྲུལ་ཅི་མཆིས་བཟོད་པར་གསོལ། །ལྕགས་སྒོང་བཅོ་བརྒྱད་རུ་མཚོན་འབར་བ་ཡིས། །ནག་མོའི་རྒྱལ་མོ་བློན་མོ་ལ་སོགས་དང་། །བར་མཚམས་བློན་མོ་ཁ་བློན་གུང་བློན་མོ། །ཉུལ་བྱེད་གོ་ལ་ལ་སོགས་བློན་མོའི་ཚོགས། །ཐུགས་དམ་ཆེན་པོ་དབྱིངས་སུ་སྐོང་གྱུར་ཅིག །སྲིད་པ་མཚོ་བཞི་ལས། བྱ་ལུང་རྒྱ་མཚོ་ནག་མོའི་མདོས་བསྐང་བསྟན་པའི་ལེའུ་སྟེ་ལྔ་པའོ།། །།ཕྲ་མེན་རྒྱ་མཚོས་ཡང་གསོལ་པ། །སེར་མོའི་བསྐང་ལུགས་གང་ལགས་པ། །རྫོགས་སངས་རྒྱས་ལ་བདག་ཉན་འཚལ། །རྫོགས་སངས་རྒྱས་ཀྱིས་བཀའ་སྩལ་པ། །ཡུམ་ཆེན་ཆགས་པའི་ལྟེ་བ་ནས། །བསེ་སྒོང་ཁྲ་བོ་རྡོལ་བ་ནས། །འདམ་འདབ་བཟང་ཡང་ཟན་རིགས་ཀྱི་མཆུ་ལེབ་བྱུང་། །རི་རབ་ཆེན་པོའི་བྱང་ཕྱོགས་ནས། །ཤང་ཤང་ཏེའུའི་གཟི་མདངས་ཅན། །ལུས་ནི་གསེར་གྱི་བུམ་པ་ལ། །གཤོག་པ་གཡུ་ཡི་རྡོ་རྗེ་རིས། །སྡེར་མོ་ལྕགས་སྡེར་རྩེ་གསུམ་འབར། །མགྲིན་པ་ཟངས་ཀྱི་འཁོར་ལོ་ལ། །སྤྱན་ནི་འབར་བ་མེ་ཡི་སྤྱན། །མཆུ་ནི་ཟླ་གམ་འབར་བ་ལས། །ལྕེ་ནི་རྡོ་རྗེ་ཧ་རུ་འབར། །དཔྲལ་བ་ཟླ་ཚེས་འབར་བ་ལ། །ཚིགས་པ་དུང་གི་འཁོར་ལོའི་རྒྱུད། །ཙིཏྟ་རིན་ཆེན་འབར་བ་སྟེ། །གློ་བ་པདྨའི་རྩེ་ཟུར་ལྡན། །མཁལ་མ་མུ་ཏིག་རྔོག་མ་ལས། །གཉེ་མ་བདུད་ཀྱི་ཞགས་པ་འཁྱིལ། །མཚེར་པ་མཆོང་གི་མཆིང་བུ་སྟེ། །མགྲིན་པ་དབང་གི་དཀྱིལ་འཁོར་ལ། །ལྟེ་བ་ཞི་བའི་དཀྱིལ་འཁོར་འབར། །སྙིང་ག་རྒྱས་པ་ཆེན་པོ་སྟེ། །གཞུག་མ་མངོན་སྤྱོད་དྲེགས་པ་སྒྲོལ། །ལས་བཞིའི་ཡོན་ཏན་ཀུན་ལ་རྫོགས། །སྲིད་པ་ཆགས་བྱེད་ཆེན་མོ་ལ། །འདི་ཡི་མདངས་ཀྱིས་ཐུགས་
དམ་བསྐང་། །འདོད་ཆགས་ནད་རྣམས་བྱང་བར་མཛོད། །གསེར་གྱི་བུམ་པ་གཡུ་ཆག་ཅན། །ཆ་སྙོམས་མ་ཡི་ཐུགས་དམ་བསྐང་། །དུང་གི་འཁོར་ལོ་སྨིན་རིས་ཅན། །ཨེ་ཀ་ཙ་ཏིའི་ཐུགས་དམ་བསྐང་། །ནམ་མཁའི་འཁོར་ལོ་མགྲིན་རིངས་འབར། །ནམ་མཁའི་རྒྱལ་མོའི་ཐུགས་དམ་བསྐང་། །ནག་མོ་དུང་གི་ཁོལ་ཐག་ཅན། །སྤྱི་ཕུད་མ་ཡི་ཐུགས་དམ་བསྐང་། །ཁྲ་མོ་གཟི་མདངས་ཆུ་གཞུང་ཞོན། །སྲིང་མོ་བཞི་ཡི་ཐུགས་དམ་བསྐང་། །རོལ་པ་དུང་གི་མཆེ་བ་ཅན། །དམག་དཔོན་བཞི་ཡི་ཐུགས་དམ་བསྐང་། །དཀར་དམར་འཕྱོན་མ་སྒྲ་འབྱིན་མ། །གྲུ་འདེགས་བཞི་ཡི་ཐུགས་དམ་བསྐང་། །འདམ་བྱ་ནག་མོ་གསེར་མིག་མ། །འདོད་ཁམས་ནེ་མཚན་ཐུགས་དམ་བསྐང་། །སྒྲིགས་མ་རྒྱ་མཚོའི་རླབས་ལ་འཕྱོ། །སྲིན་མོ་བདུན་གྱི་ཐུགས་དམ་བསྐང་། །དུང་གི་སྤུ་རིས་གསེར་མཆུ་ཅན། །ཤར་གྱི་མ་བདུན་ཐུགས་དམ་བསྐང་། །སེར་མོ་འཕྱོ་བའི་ལྡིང་སྟབས་ཅན། །ལྷོ་ཡི་མ་བདུན་ཐུགས་དམ་བསྐང་། །དམར་མོ་ཁྲག་གི་མཆུ་དྲེག་ཅན། །ནུབ་ཀྱི་མ་བདུན་ཐུགས་དམ་བསྐང་། །ཉུལ་བྱེད་སྔོན་མོ་རླུང་ལ་འཕྱོ། །བྱང་གི་མ་བདུན་ཐུགས་དམ་བསྐང་། །ནག་མོ་གསེར་མིག་བུམ་པའི་ལུས། །དུས་བཞི་རྒྱལ་མོའི་ཐུགས་དམ་བསྐང་། །བདུད་བྱ་ནག་མོ་སྲིན་སྐད་ཅན། །གདོང་མོ་བཞི་ཡི་ཐུགས་དམ་བསྐང་། །བསེ་སྒོང་ལྔ་བཅུ་རྩ་དྲུག་དང་། །དར་སེར་རུ་མཚོན་འབར་བ་ཡིས། །སེར་མོ་མདོག་བཟང་ཐུགས་དམ་བསྐང་། །ཧཱུཾ། མི་ཕམ་ཐུགས་རྗེ་དབྱིངས་ལས་སྤྲུལ་པ་མོ། །ཡོན་ཏན་ལྷུན་རྫོགས་སྐུ་འཁྲུངས་ཕྱི་བཤོལ་མེད། །ཆགས་བྱེད་ཆ་སྙོམས་ཀུན་ལ་བཟོད་པར་གསོལ། །ཕྲིན་ལས་དྲག་པོས་སྐྱེ་ཤི་རྩད་གཅོད་མ། །ཨེ་ཀ་ཛ་ཏིའི་སྐུ་ལ་བཟོད་པར་གསོལ། །དྲག་ཤུལ་སྤྱོད་པས་ཁམས་གསུམ་རྡུལ་དུ་རློག །སྲིན་མོ་བདུན་གྱི་ཚོགས་ལ་བཟོད་པར་གསོལ། །ཐུགས་རྗེ་ཐབས་ཀྱིས་འགྲོ་དོན་མཐར་ཕྱིན་མ། །ནམ་མཁའི་རྒྱལ་མོའི་སྐུ་ལ་
བཟོད་པར་གསོལ། །དུར་ཁྲོད་བསྐལ་པ་བརྒྱད་ཀྱི་གནས་ཉུལ་མ། །འདོད་ཁམས་ནག་མོའི་ཚོགས་ལ་བཟོད་པར་གསོལ། །ཐུགས་རྗེའི་རྒྱུན་གྱིས་བྲིང་བྲིང་དགོངས་མཛད་མ། །ལས་ཀྱི་སྲིང་མོའི་ཚོགས་ལ་བཟོད་པར་གསོལ། །གླིང་བཞི་དམག་དཔོན་དྲི་ཟའི་འཁོར་སྐྱོང་མ། །དམག་གི་རྒྱལ་མོའི་ཚོགས་ལ་བཟོད་པར་གསོལ། །རི་རབ་གླིང་བཞིའི་ཁམས་ཀྱི་འཁོར་སྐྱོང་མ། །གྲུ་འདེགས་ཆེན་མོའི་སྐུ་ལ་བཟོད་པར་གསོལ། །རྣལ་འབྱོར་ཀུན་གྱི་ཕྲིན་ལས་མཐར་ཕྱིན་མ། །དབང་ཕྱུག་རྩ་བརྒྱད་ཚོགས་ལ་བཟོད་པར་གསོལ། །དུས་བཞི་དབྱིངས་ནས་རང་བཞིན་འཆར་མཛད་མ། །རྒྱལ་མོ་བཞི་ཡི་ཚོགས་ལ་བཟོད་པར་གསོལ། །འཇིག་རྟེན་ཐོག་དང་སེར་བའི་སྣ་འདྲེན་མ། །གདོང་མོ་བཞི་ཡི་སྐུ་ལ་བཟོད་པར་གསོལ། །བྱ་ལུང་རྒྱ་མཚོ་ལས་སེར་མོའི་མདོས་སྐོང་བསྟན་པའི་ལེའུ་སྟེ་དྲུག་པའོ།། །།ཕྲ་མེན་རྒྱ་མཚོས་ཡང་གསོལ་པ། །བཟློག་པའི་ལས་རྣམས་བཤད་དུ་གསོལ། །ཡང་དག་རྫོགས་པས་དོན་གསུངས་པ། །བཟློག་པ་ལ་ཡང་གཉིས་ཡོད་དེ། །ཏིང་འཛིན་རྩལ་གྱིས་བཟློག་པ་དང་། །སྲིད་པའི་མདངས་ཀྱིས་བཟློག་པའོ། །ཏིང་འཛིན་རྩལ་ལ་འདི་ལྟ་སྟེ། །ཡུལ་དང་དྭངས་མ་རྩ་གསུམ་ལས། །སྲིད་པའི་མདོ་གསུམ་རང་བཞིན་ཤར། །དང་པོ་ལྔ་གཉིས་གསུམ་དུ་ལྡན། །གཉིས་པ་ལྔ་གསུམ་གསུམ་པར་སྣང་། །གསུམ་པ་བཅུ་ཚན་ལྔ་དང་དྲུག །བཞི་པ་བཞི་ཉིད་གར་དུ་འཕྱོ། །ནམ་མཁའ་ཚངས་པའི་བུ་ག་ནས། །སྐར་མདའ་འབབ་པའི་ཚུལ་འཕྲོས་པས། །ལས་ཀྱི་བ་དན་བསྐུལ་བྱས་ནས། །སྲིད་པའི་བསྐལ་པ་འོད་འབར་བས། །རྩ་ཡི་མཁའ་འགྲོ་འོད་དུ་འབར། །འོད་ཟེར་ལྔ་བཅུ་དྲུག་ཏུ་འཕྲོས། །དྭངས་མའི་མཁའ་འགྲོ་ཐིག་ལེ་འབར། །བཅོ་བརྒྱད་འོད་ཀྱི་ཟེར་འཕྲོས་པས། །ཡུལ་གྱི་མཁའ་འགྲོ་གནས་སུ་ཐིམ། །བཅུ་གསུམ་འོད་ཟེར་མཁའ་ལ་འཕྲོས། །ཕུང་པོ་སྒྱུ་མ་གནས་སུ་བསྒྲལ། །ཕོ་བྲང་གསུམ་གྱི་དཀྱིལ་འཁོར་
དུ། །དུག་གསུམ་རྩ་བ་རྩད་ནས་བཅད། །སྲིད་པ་མཚོ་བཞི་ལས། ཏིང་ངེ་འཛིན་གྱི་རྩལ་གྱི་བཟློག་ཐབས་ཀྱི་ལེའུ་སྟེ་བདུན་པའོ།། །།མདངས་ཀྱི་བཟློག་པ་འདི་ལྟ་སྟེ། །བསྒྲལ་བ་དང་ནི་བཟློག་པའོ། །བསྒྲལ་བ་ལ་ནི་གསུམ་ཡིན་ཏེ། །འཁོར་ལོ་གསུམ་དང་བཤགས་པ་ལྔ། །སྦྱོར་བ་གསུམ་གྱི་བདག་ཉིད་དོ། །སྲིན་མོའི་གཟུགས་ཀྱི་ལིངྒ་ལ། །སྒྲོམ་བུ་བྷ་གའི་ཧོམ་ཁུང་དུ། །ཟ་འོག་རྒྱལ་པོ་གསེར་མིག་ཅན། །ལྟས་ངན་ཀུན་གྱི་མིང་བྲིས་ལ། །དེ་ཡི་སྐེ་རུ་བཏགས་ནས་ནི། །སྲོ་ཙ་ན་ཡི་ཐག་པས་བཏགས། །འབྲུ་སྣ་ལྔ་ལ་བྱས་པའི་གཟུགས། །པུ་ཏྲ་ཟླ་བ་ལོན་པ་ལ། །མགོ་བོ་བྱ་ཡི་མགོ་བོ་ལ། །ལུས་ལ་ལྟས་ངན་སྤུ་ཡིས་བརྒྱན། །ལག་པ་གཡས་སུ་འགྱོག་ཕུར་ལ། །གཡོན་པ་མཆོག་གི་ཕུར་པའོ། །རྐང་པ་གཡས་པ་ཐོག་ཕུར་ལ། །གཡོན་པ་ཤིང་བུའི་མཆོག་ཕུར་རོ། །དེ་ཡི་ལག་ཏུ་གོང་མ་གཏད། །དེ་ཡི་གནས་ལྔར་དགོད་པ་ནི། །ས་བོན་ལྔ་ནི་དགོད་བྱས་ཏེ། །དེ་ཡི་སྟེང་དུ་དགོད་བྱ་བ། །རལ་གྲི་ས་བོན་ལྔ་ཡིས་སྦྱངས། །མར་མེ་ལྔ་ཡིས་གནས་ལྔར་མཚོན། །སྟོང་པ་ལྔ་དང་མཉེས་པ་ལྔ། །གྲུབ་པ་ལྔ་ཡང་དེ་བཞིན་དུ། །རྟོག་པ་ལྔ་ཡང་ཡང་དག་ལྡན། །དེ་ལྟར་སྦྱངས་ནས་བཟློག་པར་བྱ། །ཧཱུཾ། བདག་ཉིད་ཆེ་མཆོག་ཧེ་རུ་ཀ །དབུ་ནི་ཉི་ཤུ་རྩ་གཅིག་ལ། །ཕྱག་ནི་བཞི་བཅུ་རྩ་གཉིས་ལ། །སངས་རྒྱས་བཞི་བཅུ་རྩ་གཉིས་བསྣམས། །དུར་ཁྲོད་རྒྱན་གྱིས་བརྒྱན་པ་ལས། །ཁྲོ་ཚུལ་དྲུག་ཅུ་རྩ་གཅིག་སྤྲུལ། །དབུ་ལ་ཁྱུང་ཆེན་འབར་བས་བརྒྱན། །ཁྱུང་གི་རལ་པ་སྤྲུག་པ་ཡིས། །ཡུལ་གྱི་མ་མོ་ཀུན་སྤྱོད་དེ། །ནམ་མཁའ་སྨུག་ནག་འཐིབས་པའི་བྱད། །དྲེད་མོ་རལ་འཛིན་ལྟས་ངན་བཟློག །གཡས་ཀྱི་གཤོག་ཟུར་དང་པོ་ལས། །སྟེང་གི་ཁྲོ་བཅུ་འབར་བ་ཤར། །སེང་གེ་འབྲུག་སྔོན་འཐབ་པའི་བྱད། །གནམ་ལྕགས་འབར་བའི་ལྟས་ངན་བཟློག །གཤོག་ཟུར་འབར་བ་གཉིས་པ་ནས། །གསང་བའི་ཁྲོ་བོ་བཅུ་རུ་འབར། །
གླང་ཆེན་རྦ་ལ་མཆོངས་པའི་བྱད། །སྟག་སེང་འཛིངས་པའི་ལྟས་ངན་བཟློག །གཤོག་ཟུར་གསུམ་པའི་འོད་ཟེར་ལས། །སྤྱི་དཔལ་ཁྲོ་བཅུ་འབར་བར་ཤར། །གནམ་ལ་སྤྲིན་དམར་མཆེད་པའི་བྱད། །བུད་མེད་རལ་འཛིངས་ལྟས་ངན་བཟློག །གཡས་ཀྱི་གཤོག་ཟུར་བཞི་པ་ལས། །རྫོགས་པ་ཆེན་པོ་ཁྲོ་བཅུ་འབར། །སྐར་མདའ་ས་ལ་ལྟུང་བའི་བྱད། །དབྱིག་གི་ནོར་བུའི་ལྟས་ངན་བཟློག །གཡས་ཀྱི་གཤོག་ཟུར་ལྔ་པ་ལས། །ཏ་ཀྲིཏ་ཁྲོ་བོ་བཅུ་དྲུག་བྱུང་། །རི་རབ་མེ་ཆེན་འབར་བའི་བྱད། །ལྕི་བ་ཟས་ཀྱི་ལྟས་ངན་བཟློག །གཡོན་གྱི་གཤོག་ཟུར་དང་པོ་ལས། །སྲོག་རྩའི་མ་མོ་བདུན་དུ་ཤར། །རྒྱ་མཚོ་སྦྲུལ་གདུག་ལངས་པའི་བྱད། །མེ་ཏོག་བཅུད་ཉམས་ལྟས་ངན་བཟློག །གཡོན་གྱི་གཤོག་ཟུར་གཉིས་པ་ལས། །ཨེ་ཀ་དྲག་མོ་སྤུན་དྲུག་སྤྲུལ། །མཁའ་ལ་སྟག་མོ་མཆོངས་པའི་བྱད། །རྫི་བ་སྤྱོད་པའི་ལྟས་ངན་བཟློག །གཡོན་གྱི་གཤོག་ཟུར་གསུམ་པ་ལས། །སྲིན་མོ་འབར་མ་བདུན་དུ་སྤྲུལ། །མཁའ་ལ་བྱ་རྒོད་སྡེར་འཛིངས་བྱད། །གཏེར་གྱི་བཅུད་ཉམས་ལྟས་ངན་བཟློག །གཡོན་གྱི་གཤོག་ཟུར་བཞི་པ་ལས། །སྲིང་མོ་བཞི་དང་རྒྱལ་མོ་ཤར། །གཡུ་ཤ་དཀར་མོ་རྭ་འཛིངས་དང་། །སེང་གེ་ངུ་འབོད་ལྟས་ངན་བཟློག །གཡོན་གྱི་གཤོག་ཟུར་ལྔ་པ་ལས། །ཉི་ཤུ་བརྒྱད་ཀྱི་སྤྲུལ་པ་འབྱུང་། །རྣོ་དབལ་མཚོན་གྱི་ལྟས་ངན་དང་། །རྨ་བྱ་གཡེང་བའི་ལྟས་ངན་བཟློག །གཡུ་སྒོང་སྔོན་མོ་ཡར་བ་དང་། །ལྕགས་ཀྱི་སེར་བ་ཐབ་ཏུ་འབབ། །ཤེལ་དཀར་སྣོད་དུ་དུག་སྤྱོད་དང་། །ཟངས་སྒོང་དམར་པོ་མཐུར་དུ་འདྲིལ། །མི་བཟད་འབར་བ་གླད་ལ་བསྐོར། །ཉི་མ་སྤྲིན་གྱིས་འཁྲུག་པ་དང་། །འཚུབ་མ་དམར་པོའི་རྨིས་ཀྱང་སྙིང་རྟགས་དང་། །སེང་གེ་གངས་ཀྱི་སྟོངས་ནས་ལྷུང་། །ཤེལ་གྱི་སྒོ་ང་ཡར་བ་དང་། །སྤྲིན་ཆེན་རལ་པའི་རྟགས་བསྟན་པ། །བོང་བུ་བཅུད་ཆེན་ཟགས་པ་དང་། །དབང་མོ་ཉི་ཤུ་རྩ་བརྒྱད་ཀྱིས། །ལྟས་ངན་བཅུ་གསུམ་སླར་ལ་བཟློག །ཁྱུང་གི་མཇུག་སྒྲོ་བརྒྱད་པོ་ལ། །རྒྱལ་
མོ་བཞི་དང་གདོང་མོ་བཞི། །སྤྲུལ་པ་འོད་ཀྱི་ཕྲེང་བར་ཤར། །བསེ་སྒོང་ཁྲ་བོའི་བྱད་བསྟན་ཏེ། །ལྕུག་ཕྲན་ཟོར་གྱིས་འདེབས་པ་དང་། །གཟའ་སྐར་འཁྲུག་པའི་བྱད་བྱུང་བ། །ཟོར་བརྒྱད་ཀྱང་རྒྱན་རྩ་ལ་སྦུད་པ་ཆགས། །དེ་ཡི་ལྟས་ངན་སླར་ལ་བཟློག །ཁྲོ་བོའི་རྒྱལ་པོ་ཁམས་གསུམ་ཧཱུཾ་སྒྲ་ཅན། །སྐུ་ལ་ཟངས་ཁྲབ་དམར་པོའི་འོད་ཀྱིས་མཛེས། །ཕྱག་ན་མདུང་དམར་མེ་ལྕེ་ལམས་སེ་ལམ། །བ་དན་རྩེ་གསུམ་སྲིད་གསུམ་གཡབ་མོས་འདེབས། །གཡས་ནས་བསྐོར་བས་སྲིད་གསུམ་དབང་དུ་སྡུད། །གླད་ལ་བསྐོར་བས་བདུད་དཔུང་རྡུལ་དུ་བཟློག །སྲོག་དབུགས་གཟུགས་ལ་དབང་ཞིང་ཀུན་གྱི་དྲོད་ལ་ཁྱབ། །ལྟས་ངན་དམིགས་ཀྱིས་བསྒྲལ་བའི་དུས་ལ་བབ། །དེ་ནས་ཉུང་དཀར་གྱི་རྒྱལ་པོས་བྲབ་ལ། ཨོཾ་རཀྴ་ཤྲཱི་ཧེ་རུ་ཀ །བྱི་ཀྲམ་ཧ་ཀྲམ་རྦད། དེ་ལ་དུ་ན་རྦད། དེ་ནས་བསྟབ་སྟེ། ཧཱུཾ། འཇིགས་བྱེད་ཆེན་པོ་ཞལ་ཕྱེས་ཤིག །ཁྲོ་བོ་འབར་བའི་ཞལ་དུ་བསྟབ། །མ་མོ་ཆེན་མོ་ཞལ་ཕྱེས་ཤིག །དམ་ཅན་རྒྱ་མཚོའི་ཞལ་དུ་བསྟབ། །ཕོ་ཉ་ཆེན་མོ་ཞལ་ཕྱེས་ཤིག །མཆེ་གཤོག་ནུ་མའི་ཞལ་དུ་བསྟབ། །དགེ་བསྙེན་ཆེན་པོ་ཞལ་ཕྱེས་ཤིག །གིང་ཆེན་ཚོགས་ཀྱི་ཞལ་དུ་བསྟབ། །ཡས་ཀྱི་བདུད་གཡོས་ཁཱ་ཧི། མས་ཀྱི་སྲི་ལངས་ཁཱ་ཧི། སྲིན་པོའི་དམགས་ཚོགས་ཁཱ་ཧི། སྔགས་ཀྱི་ཨ་བྷི་ཙ་ར་ཁཱ་ཧི། བྱ་བསད་སྐྱིབས་ངན་ཁཱ་ཧི། དེ་ནས་བྱ་ཡི་སྐྱིབས་ངན་ན། །ཧཱུཾ། ལས་ཀྱི་ཕོ་ཉ་ཆེན་མོ་སྟེ། །ལྕགས་ཀྱི་བྱ་ཁྲ་ཆེན་མོ་ལ། །དམར་མོ་ཉི་མའི་མིག་ཅན་ཞོན། །ན་བཟའ་སྤྲིན་དམར་མཆེད་པ་ལ། །རྡོ་རྗེ་མེ་སྟག་ཚོམ་བུར་འཕྲོ། །ཉི་ཟེར་ཞགས་པ་སྡོག་ཅིང་འཕེན། །སྙིང་ཟན་ཙིཏྟའི་དཀྱིལ་ན་གནས། །ཤན་པ་འབུམ་གྱི་འཁོར་གྱིས་བསྐོར། །སྲོག་ཟན་ཆེན་མོའི་དུས་ལ་བབ། །སྡེར་མོ་ཁྲག་གི་དྲེག་པ་ཅན། །གང་ལ་བྱ་བའི་སྙིང་འདྲེན་མ། །རེངས་པར་ཁུག་ལ་མྱུར་དུ་སྒྲོལ། །བསྡིམས་ལ་དྲག་སྔགས་འབར་བས་གདབ། །
ཧཱུཾ་ཙི་ར་དུང་ཏྲི་ཙ་ར་ལས་ལ་ཆུམ་ཆུམ་སོད་རྦད་ཕཊ་སྭཱ་ཧཱ། དེ་ནས་རྣོ་དབལ་ཏྲི་རྩེ་ལ། །རྡོ་རྗེ་གདན་གྱིས་བསྒྲལ་བྱས་ཏེ། །དེ་ནས་མེ་ལོང་གཡས་གཡོན་གྱི་བར་དུ་སྲིན་མོ་རྐང་བཙུག་ལ་བསྒྲལ། ཧོམ་ཁུང་ནང་དུ་ཡུ་བ་གཟུག །ཟ་འོག་སྦུད་པས་གན་རྐྱལ་བསྟན། །ཙིཏྟ་དྲུང་ཕྱུང་ལྟོ་བར་གཞག །ཙིཏྟ་པཉྩ་ལྔ་རུ་བྱ། །རླངས་པ་ནམ་མཁའི་ཁམས་སུ་འཁྲིགས། །སྲིད་པ་མཚོ་བཞི་ལས། བྱ་ལུང་ལས་ཀྱི་རྒྱ་མཚོ་ལས་རྫས་ཀྱི་བཟློག་ཐབས་ཏེ་ལེའུ་བརྒྱད་པའོ།། །།ཕྲ་མེན་རྒྱ་མཚོས་ཡང་གསོལ་པ། །སྲིད་པའི་བསྐང་ལུང་ཇི་ལྟར་ལགས། །རྫོགས་སངས་རྒྱས་ལ་བདག་ཉན་འཚལ། །ཡང་དག་རྫོགས་ཀྱིས་བཀའ་སྩལ་པ། །རྩ་བ་ཆེན་མོ་མདོ་འགྲེལ་དང་། །ཉམས་ན་བསྐང་བའི་རིམ་པའོ། །རྩ་བ་ལ་ནི་འདི་ལྟ་སྟེ། །རྒྱལ་པོའི་བཀའ་རྟགས་རྗེས་སུ་ཐོབ། །དེ་ནི་སྐུ་ཡི་ས་མ་ཡ། །བསྐྱེད་རྫོགས་ས་བོན་རྒྱུན་མི་གཅད། །འདི་ནི་གསུང་གི་ས་མ་ཡ། །རིག་པའི་རྩལ་ནི་རྡོ་རྗེར་བསྒོམ། །འདི་ནི་ཐུགས་ཀྱི་ས་མ་ཡ། །རྫས་ཆེན་གནས་སུ་སྟབ་པ་ནི། །འདི་ནི་ཡོན་ཏན་ས་མ་ཡ། །རྩེ་གཅིག་མཁའ་འགྲོ་འདུ་བྱེད་པ། །འདི་ནི་ཕྲིན་ལས་ས་མ་ཡ། །སྡོམ་པའི་དམ་ཚིག་རྣམ་ལྔ་པའོ། །འདི་ནི་ཡན་ལག་ས་མ་ཡ། །འདི་ནི་ས་གཞི་རྡོ་རྗེ་སྟེ། །འདས་ན་ཕུང་བྱེད་སྲེག་པར་འགྱུར། །ལྡན་ན་ཡོན་ཏན་གཏེར་དུ་འགྱུར། །བསྐང་ན་གསེར་དངུལ་བཞུ་བ་བཞིན། །སྲིད་པའི་བསྐང་ལུང་ལས་རྩ་བ་ཆེན་པོའི་མདོ་འགྲེལ་གྱི་ལེའུ་སྟེ་དགུ་པའོ།། །།བསྐང་བའི་རིམ་པ་འདི་ལྟ་སྟེ། །རྣལ་འབྱོར་སྡོམ་ལ་མི་གནས་པས། །དེ་ཚེ་སྲིད་པའི་མ་མོ་འཁྲུག །མ་མོ་འཁྲུག་པའི་བྱད་བསྟན་པ། །ཡིད་དུ་མི་འོང་ཡ་ང་འབྱུང་། །དེ་ལ་གོང་གི་བམ་གྱིས་བསྐང་། །ཧཱུཾ། ང་ནི་མ་མོ་ཀུན་གྱི་རྗེ། །ང་ནི་རྒྱལ་བ་ཀུན་གྱི་ཡབ། །ང་ནི་སྲིད་གསུམ་སྙིང་རྗེའི་མཆོག །ང་ཡི་བཀའ་ལས་མ་འདའ་ཞིག །ཧཱུཾ། སྤྱི་གཙུག་གཡུ་ཡི་རྡོ་རྗེ་རྩེ་དགུ་འབར། །གཡུ་
ཡི་རལ་པས་སྟོང་གསུམ་ཁེབས། །རིགས་ལྔའི་སངས་རྒྱས་དབུ་ལ་རྫོགས། །བདག་གི་གང་བའི་ཐིག་ལེ་ལས། །བླ་ན་མེད་པའི་ཡབ་ཡུམ་གཉིས། །ཕ་མ་མེད་པའི་སྔོན་དུ་བྱུང་། །སངས་རྒྱས་ཉིད་པས་ཤིན་ཏུ་བགྲེས། །འདི་ཡི་སེམས་དང་ཡུལ་གྱིས་སྐོང་། །གཉིས་མེད་སྦྱོར་བའི་འོད་ཟེར་ལས། །མཁའ་འགྲོ་བརྟན་འབར་སེམས་མའི་མཆོག །སེང་གེ་བརྗིད་པའི་དབུ་མངའ་བ། །སྤྲིན་དཀར་མཛེས་པའི་ན་བཟའ་ཅན། །འདི་ཡི་ཤ་ཡིས་ཐུགས་དམ་བསྐང་། །ཡུམ་དང་གཉིས་སུ་མེད་གྱུར་ཅིག །གཏི་མུག་ནད་རྣམས་ཞི་བར་མཛོད། །གཉིས་མེད་སྦྱོར་བའི་འོད་ཟེར་ལས། །མཁའ་འགྲོ་ཡང་གསལ་སེམས་མའི་མཆོག །འཕྱོ་བ་ཁྱུང་གི་དབུ་མངའ་མ། །ལྗང་ནག་འབར་བའི་ན་བཟའ་ནི། །ཕྲིན་ལས་ལྷུན་གྱིས་གྲུབ་པ་མོ། །འདི་ཡི་དབུགས་ཀྱིས་ཐུགས་དམ་བསྐང་། །ཡུམ་དང་གཉིས་སུ་མེད་གྱུར་ཅིག །ཕྲག་དོག་ནད་རྣམས་ཞི་བར་མཛོད། །གཉིས་མེད་སྦྱོར་བའི་འོད་ཟེར་ལས། །མཁའ་འགྲོ་གཉེན་གསལ་སེམས་མའི་མཆོག །མཛེས་པ་ཆེན་མོའི་དབུ་མངའ་མ། །དམར་ནག་འབར་བའི་ན་བཟའ་ཅན། །འདི་ཡི་ཁྲག་གིས་ཐུགས་དམ་བསྐང་། །ཡུམ་དང་གཉིས་སུ་མེད་གྱུར་ཅིག །འདོད་ཆགས་ནད་རྣམས་བྱང་བར་མཛོད། །གཉིས་མེད་སྦྱོར་བའི་འོད་ཟེར་ལས། །མཁའ་འགྲོ་འོད་གསལ་སེམས་མའི་མཆོག །བརྟན་པ་གླང་ཆེན་སྐུ་མངའ་མ། །བཻ་ཌཱུརྱ་སྔོན་པོའི་ན་བཟའ་གསོལ། །འདི་ཡི་དྲོད་ཀྱིས་ཐུགས་དམ་བསྐང་། །ཡུམ་དང་གཉིས་སུ་མེད་གྱུར་ཅིག །ང་རྒྱལ་ནད་རྣམས་བྱང་བར་མཛོད། །གཉིས་མེད་སྦྱོར་བའི་འོད་ཟེར་ལས། །མཁའ་འགྲོ་བཀྲག་གསལ་སེམས་མའི་མཆོག །མི་འགྱུར་རྡོ་རྗེའི་དབུ་མངའ་མ། །བཙོ་མ་གསེར་གྱི་ན་བཟའ་ཅན། །འདི་ཡི་བཀྲག་གིས་ཐུགས་དམ་བསྐང་། །ཡུམ་གྱི་ཐུགས་དམ་སྐོང་གྱུར་ཅིག །ཞེ་སྡང་ནད་རྣམས་ཞི་བར་མཛོད། །
ཁམས་གསུམ་གསང་བའི་ཡུམ་མཆོག་མ། །ཕྲ་མེན་རྒྱ་མཚོ་གསང་བའི་ཡུམ། །རྣལ་འབྱོར་ཁྲོས་པས་སྲིད་པ་སྒྲོལ། །རྡོ་རྗེ་ཁ་ཊྭཱཾ་མཚོན་ཆ་ཐོགས། །འདི་ཡི་གསེར་གྱི་ཐིག་ལེས་བསྐང་། །རྡོ་རྗེ་ཁྲོ་མོ་ཁམས་གསུམ་སྒྲོལ། །སྤྲིན་དཀར་མཛེས་པའི་ན་བཟའ་ཅན། །ཙིཏྟ་བརྒྱུས་པའི་ཞགས་པ་འཕེན། །ཉི་མ་ཟླ་བའི་རྒྱན་གྱིས་མཛེས། །འདི་ཡི་ཐིག་ལེས་ཐུགས་དམ་བསྐང་། །རིག་པའི་ཡོན་ཏན་རྒྱན་མངའ་མ། །སྣང་སྲིད་ཀུན་གྱི་བྷ་གའི་དབྱིངས། །གཅིག་པུ་ཀུན་ཏུ་ཁྱབ་པར་མཛད། །ཆེ་བའི་ང་རྒྱལ་བདག་ཉིད་མ། །འདི་ཡི་དྭངས་མས་ཐུགས་དམ་བསྐང་། །རྡོ་རྗེ་ཁྲོས་པས་ཞེ་སྡང་འཇོམས། །རིན་ཆེན་ཁྲོས་པས་ང་རྒྱལ་འཇོམས། །པདྨ་ཁྲོས་པས་འདོད་ཆགས་འཇོམས། །ལས་མཆོག་ཁྲོས་པས་ཕྲག་དོག་འཇོམས། །དཀར་མོ་རལ་གཅིག་ཡབ་ལ་བཞེད། །ནག་མོ་གཡུ་ཡི་ཕོད་མཐིང་ཅན། །དམར་མོ་ཁྲག་གི་རལ་གཅིག་མ། །སེར་མོ་རླུང་གི་གོ་ཟུ་ཅན། །དྭངས་མ་བརྒྱད་ཀྱིས་ཐུགས་དམ་བསྐང་། །སྲིད་པ་གསུམ་གྱི་སྐྱེད་བྱེད་མ། །འདི་ཡི་ལྟེ་བས་ཐུགས་དམ་བསྐང་། །བདུད་རྩི་ཡོངས་ཀྱི་བཅུད་སྙོམས་མ། །འདི་ཡི་ཕོ་བས་ཐུགས་དམ་བསྐང་། །ནག་མོ་རལ་གཅིག་འཇིགས་པའི་གཟུགས། །ནག་མོ་རལ་གཅིག་མཆེ་བ་ཅན། །ཧར་ཏིང་དཀར་མོ་འཇིགས་པའི་གཟུགས། །དུན་ཏིང་ནག་མོ་མཆེ་བ་ཅན། །ཤན་ཏིང་དམར་མོ་གཤོག་པ་ཅན། །གྲུབ་ཏིང་སེར་མོ་ནུ་མ་ཅན། །འདི་ཡི་གཞུང་པས་ཐུགས་དམ་བསྐང་། །ཞིང་ལྤགས་གཡང་གཞིའི་རུ་མཚོན་ཅན། །དབུ་བརྒྱ་སྤྱན་སྟོང་འཇིགས་པའི་གཟུགས། །མ་ཡམས་ཆེན་མོ་གསང་བའི་ཡུམ། །འདི་ཡི་སྲོག་རྩས་ཐུགས་དམ་བསྐང་། །དཀར་མོ་གསེར་གྱི་ལྕགས་ཀྱུ་ཅན། །དམར་མོ་དུང་གི་ཟོ་བ་ཅན། །སྲིད་པའི་མེ་དང་རླུང་གིས་བསྐང་། །རྒྱ་མཚོ་རློབ་པའི་མཐུ་མོ་ཆེ། །རི་རབ་བསྙིལ་བའི་རྔམ་སྟབས་ཅན། །མཛེས་པའི་ཚུལ་གྱིས་འོད་འཕྲོ་མ། །བརྟུལ་ཞུགས་ཟ་བྱེད་འཇིགས་པའི་སྐུ། །ཕྲིན་ལས་འབྱུང་པོ་ཀུན་འདུལ་མ། །
རལ་པ་ཅན་གྱི་འཁོར་འདུལ་མ། །ཟ་བྱེད་མེ་ཟ་བྲག་གྱོན་མ། །དབང་པོ་བདུན་གྱིས་ཐུགས་དམ་བསྐང་། །མགྱོགས་མ་ཆེན་མོ་ལྷ་ཡི་སྲིང་། །ཁྱུང་ལྡིང་མ་ནི་གཤིན་རྗེའི་སྲིང་། །གཡག་མགོ་མ་ནི་ཀླུ་ཡི་སྲིང་། །སྡེར་མོ་ཅན་ནི་གནོད་སྦྱིན་སྲིང་། །འཕར་རྩ་བཞི་ཡིས་ཐུགས་དམ་བསྐང་། །སྤྱན་གཅིག་ལྷ་ཡི་དམག་དཔོན་མ། །རལ་གཅིག་གཤིན་རྗེའི་དམག་དཔོན་མ། །མཆུ་འཇིབ་ཀླུ་ཡི་དམག་དཔོན་མ། །ལས་མཁན་གནོད་སྦྱིན་དམག་དཔོན་མ། །ཉ་ཤ་བཞི་ཡིས་ཐུགས་དམ་བསྐང་། །དཀར་མོ་གཟུགས་ལྡན་མདངས་མཛེས་མ། །དམར་མོ་མེ་ཡི་མདངས་འཕྲོག་མ། །སྔོན་མོ་རལ་བཅིངས་གློག་བས་མགྱོགས། །དམར་ནག་རུས་སྦལ་ཆིབས་སུ་བཅིབས། །དམར་མོ་སྦལ་པ་ནག་པོ་ཞོན། །སྔོ་བསངས་ཤ་བ་ཆིབས་སུ་བཅིབས། །སེར་མོ་རླུང་ལ་འཕྱོ་ཞིང་འགྲོ། །སེར་སྐྱ་འཕར་བ་ལྕེ་བརྒྱད་ཞོན། །རྣམ་ཤེས་བརྒྱད་ཀྱི་མདངས་འཕྲོག་མ། །འདི་ཡི་འབྲས་བུས་ཐུགས་དམ་བསྐང་། །དུང་གི་སྤྱང་མོ་མགོ་མངས་མ། །ལྕགས་ཀྱི་སྤྱང་མོ་མཆེ་བ་ཅན། །ཟངས་ཀྱི་སྤྱང་མོ་ལྕེ་མངས་མ། །གསེར་གྱི་འཕར་མོ་མདངས་འཕྲོག་མ། །འདི་ཡི་རུས་པས་ཐུགས་དམ་བསྐང་། །ལྷ་ཡི་བུ་མོ་དུང་སྐྱོང་མ། །གཤིན་རྗེའི་བུ་མོ་དྲི་སྣོམ་མ། །ཀླུ་ཡི་བུ་མོ་འོད་འཕྲོ་མ། །གནོད་སྦྱིན་བུ་མོ་ཤན་པ་མོ། །འདི་ཡི་ཤ་ཡིས་ཐུགས་དམ་བསྐང་། །དེ་བའི་བུ་མོ་ལྷ་མོ་དབང་། །དཔལ་ཆེན་བུ་མོ་དཔལ་མོ་དབང་། །འཇོག་པོའི་བུ་མོ་ཀླུ་མོ་དབང་། །གནོད་སྦྱིན་བུ་མོ་ཤན་པ་མོ། །འདི་ཡི་ཁྲག་གིས་ཐུགས་དམ་བསྐང་། །དཔལ་ཆེན་ཐུགས་ཀྱི་བཀའ་སྡོད་མ། །དཀར་མོ་ཞི་བའི་ལས་བྱེད་མ། །སེར་མོ་རྒྱས་པའི་ལས་བྱེད་མ། །དམར་མོ་དབང་གི་ལས་བྱེད་མ། །ལྗང་མོ་མངོན་སྤྱོད་ལས་བྱེད་མ། །སྒལ་ཚིགས་འདི་ཡིས་ཐུགས་དམ་བསྐང་། །ཟློག་སྒྱུར་ཆེན་མོ་མཛད་དུ་གསོལ། །དབང་ཆེན་མོ་རྣམས་བསྐངས་པས་ན། །དབང་བྱེད་ཕོ་ལ་མི་འཚལ་ལམ། །རྫོགས་སངས་རྒྱས་
ཀྱིས་བཀའ་སྩལ་པ། །ཚངས་པ་ཆེན་པོ་མགོ་ལྔ་པ། །འདི་ཡི་ཀླད་པས་ཐུགས་དམ་བསྐང་། །ཀླད་གཟེར་ནད་རྣམས་ཞི་བར་མཛོད། །གནམ་གིང་དཀར་པོ་མིག་གཅིག་མ། །འདི་ཡི་མིག་གིས་ཐུགས་དམ་བསྐང་། །མིག་གི་ནད་རྣམས་ཞི་བར་མཛོད། །བརྒྱ་བྱིན་སེར་སྐྱ་ཆེན་པོ་ལ། །འདི་ཡི་སྙིང་གིས་ཐུགས་དམ་བསྐང་། །སྙིང་ནད་ཐམས་ཅད་ཞི་བར་མཛོད། །ལྷ་ཆེན་བྷྲིཾ་གི་རི་ཏི་ལ། །འདི་ཡི་མཚན་གྱིས་ཐུགས་དམ་བསྐང་། །མཆུ་སོའི་ནད་རྣམས་ཞི་བར་མཛོད། །འཁོར་ལོ་ཁྱབ་འཇུག་ཆེན་པོ་ལ། །འདི་ཡི་ལྟེ་བས་ཐུགས་དམ་བསྐང་། །སྦོ་ཡི་ནད་རྣམས་ཞི་བར་མཛོད། །ལྷ་ཆེན་སྟོབས་བཟང་སེར་སྐྱ་ལ། །གྲུ་མོ་བཞི་ཡིས་ཐུགས་དམ་བསྐང་། །ཡན་ལག་ནད་རྣམས་ཞི་བར་མཛོད། །སྐོས་རྗེ་དྲང་དཀར་ཆེན་པོ་ལ། །འདི་ཡི་ཕོ་བས་ཐུགས་དམ་བསྐང་། །ཕོ་མཆིན་ནད་རྣམས་ཞི་བར་མཛོད། །ཀཱི་ལ་ཡགྴ་ཆེན་པོ་ལ། །འདི་ཡི་མཁྲིས་པས་ཐུགས་དམ་བསྐང་། །མིག་སེར་ནད་རྣམས་ཞི་བར་མཛོད། །འབྱུང་རིགས་སྤུན་དགུ་ཆེན་པོ་ལ། །འདི་ཡི་སྲོག་རྩས་ཐུགས་དམ་བསྐང་། །སྟོད་གཟེར་ནད་རྣམས་ཞི་བར་མཛོད། །ས་བདག་ཕག་ཆེན་དྲེགས་པ་ལ། །འདི་ཡི་མཆིན་པས་ཐུགས་དམ་བསྐང་། །ཁྲག་གཟེར་ནད་རྣམས་ཞི་བར་མཛོད། །སྲིད་པའི་ཀླུ་བདུད་དྲེགས་པ་ལ། །འདི་ཡི་གློ་བས་ཐུགས་དམ་བསྐང་། །མཛེ་ནད་ཐམས་ཅད་ཞི་བར་མཛོད། །ནོར་ལྷ་ཆེན་པོའི་བདག་ཉིད་ལ། །འདི་ཡི་མཁལ་མས་ཐུགས་དམ་བསྐང་། །ཟ་ཁུའི་ནད་རྣམས་ཞི་བར་མཛོད། །རྣམ་སྤྲུལ་རྒྱལ་ཆེན་རིགས་བཞི་ལ། །ཡན་ལག་བཞི་ཡིས་ཐུགས་དམ་བསྐང་། །ཞ་གྲུམ་ནད་རྣམས་ཞི་བར་མཛོད། །གཤིན་རྗེ་ཆེན་པོ་གཟུགས་ཉིད་ལ། །འདི་ཡི་གཉེ་མས་ཐུགས་དམ་བསྐང་། །འདུས་པའི་ནད་རྣམས་ཞི་བར་མཛོད། །རཱུ་ཏྲ་ཆེན་པོ་གཟུགས་ཉིད་ལ། །དམ་རྫས་ལྔ་ཡིས་བསྐང་བྱས་པས། །སྨྱོ་འབོག་ནད་རྣམས་ཞི་བར་མཛོད། །བྱང་སྤྲིན་དམར་པོའི་གཟུགས་ཉིད་ལ། །
འདི་ཡི་མཆེར་པས་བསྐང་བྱས་པས། །མཆེར་ནད་འབར་བ་ཞི་བར་མཛོད། །སྲིད་པའི་བམ་སྐོང་གི་ལེའུ་སྟེ་བཅུ་པའོ།། །།སྲིད་པའི་མ་མོ་ཐུགས་འཁྲུག་སྟེ། །ལྔ་བརྒྱ་དུས་ཀྱི་ཐ་མ་ལ། །མ་མོའི་ཁ་རླངས་སྤྲིན་དུ་འཁྲིགས། །ནད་ཀྱི་བསྐལ་པ་སྣ་ཚོགས་འབྱུང་། །དེ་ཡི་སྐོང་ལུགས་ཇི་ལྟར་ལགས། །ཉག་གཅིག་ཡབ་ལ་བདག་ཉན་འཚལ། །ཡང་དག་རྫོགས་ཀྱིས་བཀའ་སྩལ་པ། །འཇིགས་བྱེད་ཆེན་པོའི་ཐུགས་ཀ་ནས། །རྒྱ་གྲམ་འབར་བའི་ཡི་གེ་ཡཾ་དུ་སྤྲུལ། །སྙིང་རྗེ་ཆེན་པོའི་ས་བོན་བཾ་དུ་སྤྲུལ། །ཤེས་རབ་ཆེན་པོའི་ས་བོན་རཾ་དུ་སྤྲུལ། །བཏང་སྙོམས་ཆེན་པོའི་ཡི་གེ་མ་རུ་སྤྲུལ། །ཡེ་ཤེས་ཆེན་པོའི་རི་རབ་སྭ་རུ་སྤྲུལ། །སྐྱེ་མེད་ནམ་མཁའི་ཡི་གེ་ཨེ་རུ་སྤྲུལ། །རི་རབ་རི་བདུན་གླིང་ཕྲན་འཁོར་ཡུག་བཅས། །དཔག་བསམ་ཤིང་དང་པདྨའི་ཤིང་ཆེན་དང་། །ཙུན་དའི་ཤིང་དང་ཛམ་བུའི་ཤིང་ཆེན་དང་། །སྒྲ་སྒྲོགས་ཤིང་དང་བཅས་པའི་ཡོན་ཏན་ལ། །ཉི་ཟླ་གཟའ་སྐར་རྒྱན་རྣམས་རྫོགས་པར་ལྡན། །སྲིད་པའི་ལྷ་བྲན་མང་པོ་རང་བཞིན་གནས། །སྲིད་པའི་ཆགས་ལུགས་དེ་ལྟར་ཆགས། །སྤྲུལ་པའི་གནས་ལུགས་འདི་ལྟར་ལགས། །རི་རབ་གཡུ་ཡི་བུམ་པ་ལ། །ལྷ་ཆེན་ཚངས་པ་ཆེན་པོ་དང་། །ཀུན་ཏུ་བཟང་མོ་ཐབས་ཅིག་བཞུགས། །རི་རབ་བུམ་པའི་ཤིང་མཚམས་སུ། །གནམ་གྱི་དཀར་པོ་མིག་མེད་དང་། །རྒྱལ་པོ་ལྔ་རུ་མདངས་ལ་གནས། །ཤིང་དང་ལོ་མའི་མཚམས་སུ་ཡང་། །ལྷ་ཆེན་སེར་སྐྱ་ཆེན་པོ་དང་། །རྒྱ་མཚོ་ཉི་མའི་མདངས་སུ་གནས། །རི་རབ་བུམ་པའི་ལྕོག་བཞི་ན། །ལྷ་ཆེན་བྷྲིཾ་གི་རི་ཏི་དང་། །ཁྲོས་པའི་དབང་ཆེན་རང་བཞིན་གནས། །རི་རབ་ཕྱི་ཡི་ལྕོག་བཞི་ལ། །ལྷ་ཆེན་འཁོར་ལོ་ཁྱབ་འཇུག་དང་། །ཐུགས་ཀྱི་དགྱེས་སྡེ་བག་ལ་གནས། །ལྷ་ཆེན་སྟོབས་བཟང་སེར་སྐྱ་དང་། །སྦས་པའི་མ་མོ་བཞི་པོ་རྣམས། །གྲ་བཞི་དག་ལ་རང་བཞིན་གནས། །རི་རབ་ཁོང་སེང་སྐེད་པ་ན། །སྐོས་རྗེ་བྲང་དཀར་ཆེན་པོ་དང་། །ཆགས་བྱེད་
ཆགས་སྙོམས་རང་བཞིན་གནས། །དཔག་བསམ་ཤིང་གི་རྩ་བ་ན། །ཀཱ་ལ་བདུད་ཀྱི་རྒྱལ་པོ་དང་། །ནམ་མཁའི་རྒྱལ་མོ་རང་བཞིན་གནས། །དཔག་བསམ་ཤིང་གི་ལོ་མ་ལ། །འབྱུང་མཇུང་རིངས་ཡང་རིགས་སྤུན་དགུའི་ཆོ་འཕྲུལ་དང་། །ཨེ་ཀ་ཆེན་མོ་ཐབས་གཅིག་བཞུགས། །རི་རབ་རྨང་གི་གྲ་བཞི་ལ། །ས་བདག་ཕག་མགོ་ཆེན་པོ་དང་། །གྲུ་འདེགས་བཞི་པོ་ཐབས་ཅིག་གནས། །སྲིད་པའི་རོལ་མཚོ་བདུན་པོ་ལ། །ཕུང་བྱེད་དྲེགས་པའི་ཀླུ་བདུན་དང་། །སྲིན་མོ་བདུན་པོ་ཐབས་ཅིག་བཞུགས། །དཔག་བསམ་ཤིང་གི་སུམ་ཆ་ལ། །དེ་བ་ནོར་གྱི་བདག་པོ་དང་། །འདོད་ཁམས་ནེ་མཚན་རང་བཞིན་གནས། །རི་རབ་བང་རིམ་བཞི་པོ་ལ། །རྒྱལ་པོ་ཆེན་པོ་སྡེ་བཞི་དང་། །ལས་ཀྱི་སྲིང་བཞི་རང་བཞིན་གནས། །དཔག་བསམ་ཤིང་གི་རྩ་བ་ན། །གཤིན་རྗེ་རཱུ་ཏྲའི་གཟུགས་ཉིད་དང་། །དབང་མོ་ཆེ་བརྒྱད་རང་བཞིན་གནས། །རྣལ་འབྱོར་ཉམས་ནི་འཁྲུགས་པ་དང་། །སེམས་ཅན་ཀུན་ལ་སྨན་སླད་དུ། །བསྐང་བའི་རྫས་རྣམས་འདི་ལྟར་ལགས། །ཡང་དག་རྫོགས་ཀྱིས་བཀའ་སྩལ་པ། །མ་མོ་བསྐང་བའི་རྫས་རྣམས་ནི། །ལྷ་མོ་ཡོངས་འཁྱུད་དེ་བཱ་ཡིས། །ལྷ་རྣམས་སྲོག་གི་འཇིགས་འགྱུར་ནས། །མ་མོ་རྣམས་ལ་རྫས་ཕུལ་བ། །རི་རབ་གཡུ་ཡི་བུམ་པ་ལ། །ཤུགས་ཀྱི་རྒྱལ་པོ་དྲུག་པོ་ལ། །བུད་མེད་གཙོ་མོ་དྲུག་པོ་བསྐྱོན། །ཉོན་མོངས་དྲུག་པོ་སྦྱང་བའི་རྫས། །རི་རབ་བང་རིམ་བར་མ་ལ། །གླང་ཆེན་གཟུགས་ནི་བཅུ་བཞི་ནི། །བག་ཆགས་གཏི་མུག་སྦྱང་བའི་རྫས། །སྟག་གཟིག་ལ་སོགས་བཅུ་བཞི་ནི། །བག་ཆགས་ང་རྒྱལ་སྦྱང་བའི་རྫས། །ཁྱུང་དང་རྨ་བྱ་བཅུ་བཞི་ནི། །བག་ཆགས་འདོད་ཆགས་སྦྱང་བའི་རྫས། །ཁྱི་དང་སེང་གེ་བཅུ་བཞི་ནི། །ཞེ་སྡང་བག་ཆགས་སྦྱང་བའི་རྫས། །རི་རབ་བང་རིམ་ཐ་མ་ལ། །སེམས་ཅན་མི་ལ་ཕན་སླད་དུ། །གནམ་ལ་འཕུར་དང་ཆུ་ལ་འཕྱོ། །ས་ལ་སྐྱེ་བ་དགུ་ཡི་རྫས། །བཞི་བརྒྱ་རྩ་བཞི་སྦྱང་བའི་རྫས། །ནམ་མཁའ་དཔག་བསམ་
ཤིང་གི་ལོ་མ་ལ། །ཏིལ་གོང་བདུད་རྩི་བུམ་པར་བཅས། །སེམས་ཅན་སྲོག་དང་མདངས་ཀྱི་རྫས། །དབང་བྱེད་ཕོ་ཡི་རྫས་རྣམས་ནི། །གསེར་སྐྱེམས་ཕྲ་མེན་སྐྱོགས་ལྔ་ལ། །ཕུང་པོ་ལྔ་ནི་སྦྱང་བའི་རྫས། །གསལ་བའི་མེ་མར་བརྒྱད་པོ་ནི། །རྣམ་ཤེས་ཚོགས་བརྒྱད་སྦྱང་བའི་རྫས། །དར་སྣ་ལྔ་ཡི་རུ་མཚོན་ནི། །དུག་ལྔའི་བག་ཆགས་སྦྱང་བའི་རྫས། །སྟག་གི་རྒྱལ་མཚན་འབར་བ་ནི། །ང་རྒྱལ་རི་བོ་སྦྱང་བའི་རྫས། །ཉི་མའི་འཁོར་ལོ་འབར་བ་ནི། །མ་རིག་མུན་པ་གསལ་བའི་རྫས། །ཤྭ་དང་ཁྲམ་ཤིང་མང་པོ་ནི། །ཕུང་པོའི་ནད་རྣམས་སྦྱང་བའི་རྫས། །མཁར་ཐབས་མདའ་ལ་སྦྲུལ་འཁྲིལ་བ། །ཕུང་པོའི་བདུད་རྣམས་འཇོམས་པའི་རྫས། །གུར་གྱི་དབྱེ་བ་གང་ལགས་པ། །ངོ་མཚར་ལྷ་ལ་བདག་ཉན་འཚལ། །མདའ་བཞི་རྒྱལ་མཚན་གནམ་དུ་ཡེ་རེ་རེ། །ཡེ་ཤེས་བཞི་ཡི་མེ་ལོང་འོད་ལམ་ལམ། །རལ་གྲི་རྒྱལ་མཚན་དམག་དཔོན་བཞི། །སྲིད་པའི་གུར་ཆེན་ལྔ་ནི་ལྡིངས་སེ་ལྡིང་། །སྟོན་ཟླ་གསུམ་གྱི་ངོ་ཤེད་ལ། །ཁྲི་གདུགས་བརྡལ་བའི་ཤར་ཕྱོགས་ནས། །དར་དཀར་གུར་ཕུབ་ལྡིངས་སེ་ལྡིང་། །དེ་ཡི་སྒོ་ཁྱུད་གཡས་པ་ལ། །དྲི་ཟའི་ཁྲམ་ཐོགས་ཡེ་རེ་རེ། །དེ་ཡི་སྒོ་ཁྱུད་གཡོན་པ་ལ། །སྨྲ་བོ་ལག་རིངས་རྒྱངས་སེ་རྒྱང་། །བཞི་ཟུར་མ་གཅིག་ལྡེམས་སེ་ལྡེམ། །ཞབས་བརྒྱད་མ་གཅིག་ཁྲིགས་སེ་ཁྲིག །ཤར་གྱི་གུར་བདག་སྒོ་ཕྱེས་ཤིག །དགུན་ཟླ་གསུམ་གྱི་ངོ་ཤེད་ལ། །ཁྲི་གདུགས་བརྡལ་བའི་ལྷོ་ཕྱོགས་ནས། །མཐིང་གི་གུར་ཕུབ་ལྡིངས་སེ་ལྡིང་། །དེ་ཡི་སྒོ་ཁྱུད་གཡས་པ་ལ། །གཤིན་རྗེའི་ཁྲམ་ཐོགས་ཡེ་རེ་རེ། །དེ་ཡི་སྒོ་ཁྱུད་གཡོན་པ་ལ། །སྨྲ་བོ་ལག་རིངས་རྒྱངས་སེ་རྒྱང་། །བཞི་ཟུར་མ་གཅིག་ལྡེམས་སེ་ལྡེམ། །ཞབས་བརྒྱད་མ་གཅིག་ཁྲིགས་སེ་ཁྲིག །ལྷོ་ཡི་གུར་བདག་སྒོ་ཕྱེས་ཤིག །དཔྱིད་ཟླ་གསུམ་གྱི་ངོ་ཤེད་ལ། །ཁྲི་གདུགས་བརྡལ་བའི་ནུབ་ཕྱོགས་ནས། །བྱི་རུའི་གུར་ཕུབ་ལྡིངས་སེ་ལྡིང་། །དེ་ཡི་སྒོ་
ཁྱུད་གཡས་པ་ལ། །ཀླུ་བདུད་ཁྲམ་ཐོགས་ཡེ་རེ་རེ། །དེ་ཡི་སྒོ་ཁྱུད་གཡོན་པ་ལ། །སྨྲ་བོ་ལག་རིངས་རྒྱངས་སེ་རྒྱང་། །བཞི་ཟུར་མ་གཅིག་ལྡེམས་སེ་ལྡེམ། །ཞབས་བརྒྱད་མ་གཅིག་ཁྲིགས་སེ་ཁྲིག །ནུབ་ཀྱི་གུར་བདག་སྒོ་ཕྱེས་ཤིག །དབྱར་ཟླ་གསུམ་གྱི་ངོ་ཤེད་ལ། །ཁྲི་གདུགས་བརྡལ་བའི་བྱང་ཕྱོགས་ནས། །གསེར་གྱི་གུར་ཕུབ་ལྡིངས་སེ་ལྡིང་། །དེ་ཡི་སྒོ་ཁྱུད་གཡས་པ་ལ། །གནོད་སྦྱིན་ཁྲམ་ཐོགས་ཡེ་རེ་རེ། །དེ་ཡི་སྒོ་ཁྱུད་གཡོན་པ་ལ། །སྨྲ་བོ་ལག་རིངས་རྒྱངས་སེ་རྒྱང་། །བཞི་ཟུར་མ་གཅིག་ལྡེམས་སེ་ལྡེམ། །ཞབས་བརྒྱད་མ་གཅིག་ཁྲིགས་སེ་ཁྲིག །བྱང་གི་གུར་བདག་སྒོ་ཕྱེས་ཤིག །གླིང་བཞི་མི་ལ་སྨན་སླད་དུ། །གླུད་ཀྱི་བྱེ་བྲག་ཇི་ལྟར་ལགས། །ཡང་དག་རྫོགས་ཀྱིས་བཀའ་སྩལ་པ། །ལུས་ངག་ཡིད་གསུམ་དག་བྱའི་ཕྱིར། །འབྲུ་སྣ་གསུམ་ལ་རྟེན་བཅས་ཏེ། །ཕུང་པོ་ལྔ་པོ་དག་བྱའི་ཕྱིར། །སྙིང་པོ་ལྔ་ཡིས་དོན་མཚོན་ནས། །ཉོན་མོངས་ལྔ་པོ་དག་བྱའི་ཕྱིར། །རིན་ཆེན་ལྔ་ཡི་ཟེར་སྤྲོས་ཏེ། །དབང་པོ་ལྔ་པོ་གསལ་བྱའི་ཕྱིར། །སྤོས་ཆེན་ལྔ་ཡི་དྲི་ཡིས་བརྒྱན། །རྒྱལ་པོ་ཆེན་པོའི་གཟུགས་གཅིག་ལ། །འགྲོན་བུའི་སོ་ལ་བྱུ་རུའི་ལྕ། །ཞོ་ཤའི་སྙིང་ལ་ལོང་ཏང་མིག །མུ་ཏིག་ཀླད་ལ་ཟེར་མོའི་སྐྲ། །ཐབས་ཆེན་ལྕགས་ལ་ཤེས་རབ་ཟངས། །ཡན་ལག་བཞི་ལ་བ་དན་བཞི། །རྣམ་ཤེས་བརྒྱད་ལ་མར་མེ་བརྒྱད། །གཡས་པ་རིན་ཆེན་གསེར་དང་དངུལ། །གཡོན་པ་བྱུ་རུ་མཚལ་དང་སྤོས། །འབྲས་སྲང་ཕྱེད་ལ་མ་ཏྲང་གཟུགས། །གཡས་སུ་ཟླ་བའི་འཁོར་ལོ་ལ། །གཡོན་དུ་ཉི་མའི་འཁོར་ལོ་བྲི། །ཕྱྭ་དང་དམུ་རྗེ་བཙན་པོ་དང་། །གནམ་ཁྱི་དཀར་པོ་ལྡེམ་པ་དང་། །བདུད་ལ་རེ་སྡེ་འགོང་ཡག་དང་། །བཙན་ལ་བཙན་རྗེ་ཡག་པ་དང་། །བཙན་ལ་སྐྱེས་བུའི་ལུང་བཙན་དང་། །ཆུ་སྲིན་རྒྱལ་པོ་ཀུ་བེ་ར། །ཤ་ནང་བྱད་སྤྲིན་དམར་པོ་དང་། །ལྷ་ལ་ཨཱརྱ་ཛམ་བྷ་ལ། །དྲི་ཟ་ཟུར་ཕུད་ལྔ་པ་དང་། །
རྒྱལ་པོ་ཆེན་པོ་སྡེ་བཞི་དང་། །ས་ཡི་ལྷ་མོ་བརྟན་མ་དང་། །ཉི་པ་སད་ཀྱི་འཁོར་ཚོགས་དང་། །སྣང་སྲིད་མ་མོ་འཁྲུག་པ་ལ། །མཐུན་པའི་རྫས་ཆེན་འདི་འབུལ་ན། །འབྲུ་སྣ་ལྔ་ལ་མ་ཏྲང་གཟུགས། །མགྲོན་བུའི་སོ་ལ་སོགས་པ་ཡི། །ལོངས་སྤྱོད་འཕན་བཟང་བཅུ་གསུམ་པོ། །སྲིད་པའི་བགེགས་ཆེན་བཅུ་གསུམ་གྱིས། །ལྷུ་གསུམ་དེ་ནི་བཅུ་གསུམ་དང་། །མགོ་དང་བཅུ་གསུམ་གླུད་དུ་འབུལ། །སྲིད་པ་མཚོ་བཞི་ལས། སྐོས་བྱང་ཆེན་མོའི་ལེའུ་སྟེ་བཅུ་གཅིག་པའོ།། །།ཕྲ་མེན་རྒྱ་མཚོས་ཡང་གསོལ་པ། །དབང་ཆེན་རྒྱ་མཚོ་ཇི་ལྟར་ལགས། །ཡང་དག་རྫོགས་ཀྱིས་བཀའ་སྩལ་པ། །རྫོགས་པའི་ཐིག་ལེ་ཆེན་པོ་དང་། །རྩ་བ་སྔགས་ཀྱི་སྙིང་པོ་བཤད། །འབྲུ་གསུམ་གསེར་གྱི་སྒྲོམ་བུ་ནི། །ཤེལ་ལྟར་དག་པའི་ཐིག་ལེ་ཅན། །ཨཱོཾ་ནི་ཡེ་ཤེས་རྫོགས་པའི་སྐུ། །ཨཱཿནི་སྣ་ཚོགས་སྤྲོས་པའི་གསུང་། །མཐིང་ནག་ཧཱུཾ་ནི་ཐུགས་ཀྱི་སྟེ། །གཅིག་ཏུ་གྱུར་པའི་རིན་པོ་ཆེ། །སྐྱེ་ཤི་མེད་པར་སྡུག་བསྔལ་སྤངས། །འདུ་འབྲལ་མེད་པ་ཕྱག་རྒྱའི་མཆོག །དུས་གསུམ་ཐིག་ལེ་གཅིག་ཏུ་འདུས། །ཐིག་ལེ་རྣམ་གསུམ་གཅིག་གི་ངང་། །ཀུན་འདུས་བྱང་ཆུབ་སེམས་ཆེན་པོ། །རྟག་ཆེན་གཡུང་དྲུང་རྒྱལ་བའི་སྐུ། །གནས་སུ་བགྲོད་པས་ཐབས་མཆོག་སྟེ། །གཞན་ནས་འོང་བ་མ་ཡིན་ཏེ། །བསྒོམ་པས་རང་གི་སེམས་ལས་འབྱུང་། །རྣམ་ཤེས་ཧཱུཾ་ནི་རྟག་པ་སྟེ། །སྐུར་གྱུར་ཡེ་ཤེས་སེམས་དཔའ་ལ། །བདེ་ཆེན་འོད་ཟེར་འཕྲོས་པས་བརྗིད། །རྡོ་རྗེ་སྔོན་པོ་རྩེ་ལྔ་པ། །ཡབ་ཡུམ་གཉིས་སུ་མེད་པའི་ངང་། །ལེ་བརྒན་ཧཱུཾ་གི་སྦྱོར་བའི་དབྱིངས། །ཀུན་ཏུ་བཟང་མོ་བདེ་བའི་མཁའ། །སངས་རྒྱས་སེམས་ཅན་གཉིས་ཀའི་ཡུམ། །རྡོ་རྗེ་སེམས་དཔའ་སངས་རྒྱས་གཙོ། །འབྲས་བུ་གྱུར་པ་བདེ་བའི་མཆོག །ཧཱུཾ། ཀུན་གཞི་བདེ་ཆེན་སྙིང་པོ་ལ། །སྐུ་གྱུར་ཀུན་ཏུ་བཟང་པོ་སྟེ། །བདེ་ཆེན་འོད་ཟེར་འཕྲོས་པས་བརྗིད། །ཧེ་རུ་
ཀ་ནི་ཟ་བྱེད་པའོ། །གོ་རོ་ཙ་ན་འོག་མིན་གནས། །མ་ཆགས་པདྨ་བདེ་བའི་མཁར། །རྡོ་རྗེ་རྐྱང་པས་སྤྱོད་པའི་ལམ། །རྡོ་རྗེ་རྒྱ་གྲམ་གྲུབ་པའི་ས། །ཨ་དཀར་སྐྱེ་འགག་མེད་པའི་དབྱིངས། །སྐྱོན་བྲལ་ཟླ་བའི་གདན་ལ་བཞུགས། །སྒྲོལ་མ་རླུང་གིས་བཏེགས་ནས་སུ། །འོག་མིན་གནས་མཆོག་ཁྱད་པར་དུ། །ཀུན་ཏུ་བཟང་མོའི་སྐུར་བསྟན་པས། །འགྲོ་བ་ཀུན་གྱི་དཔལ་དུ་ཆེ། །དྭངས་མ་ཆེན་པོའི་ཡེ་ཤེས་ཏེ། །ཡེ་ཤེས་ཆེན་པོ་ཉིད་ཀྱི་གནས། །གསེར་གྱི་ཉི་མ་འོད་ཀྱི་གཙོ། །འོད་ཀྱི་ཐིག་ལེ་ཉི་མའི་གདན། །བཅུད་ཀྱི་གཙོ་བོ་ཉིད་ཀྱི་བདག །རྣམ་ཤེས་གཙོ་བོ་བྱང་ཆུབ་སེམས། །སྐྱོན་བྲལ་ཉིད་ཀྱི་ཕྱག་རྒྱ་ཆེ། །སྐུ་གྱུར་མངོན་རྫོགས་རྒྱལ་པོ་ལ། །ཁམས་གསུམ་ཐམས་ཅད་སྐུ་ཡི་དབྱིག །སྐུ་ལས་ཡེ་ཤེས་འོད་འཕྲོས་པས། །གསུང་ལྔ་མི་བཟད་མཛོད་དུ་གསལ། །ཐུགས་ལ་ཡེ་ཤེས་རྒྱ་ཡིས་བཏབ། །རྩ་བརྒྱད་རྩ་བྲན་སྟོང་བཤད་ཅིང་། །ཐམས་ཅད་དབང་གི་རང་བཞིན་ཏེ། །བདུད་རྩི་ལྔ་རུ་རང་གནས་ཀྱང་། །སྟོང་གི་འཇིག་རྟེན་ཐམས་ཅད་ན། །རྟོགས་པའི་མཐུ་དང་གྲུབ་པའི་མཐུ། །རྩལ་དང་ལྡན་པ་བསམ་ཡས་ཀྱང་། །འགྲན་ཟླ་མེད་པའི་གཅིག་པུ་ཉིད། །ཁམས་གསུམ་བྱ་བའི་ངང་ཉིད་ན། །ཕྱི་དང་ནང་དང་གསང་བ་ཡི། །ནོར་བུ་རིན་ཆེན་འབར་བ་བཞིན། །ཀུན་གྱི་རེ་སྐོང་གཅིག་པུ་ཉིད། །བྱང་ཆུབ་སེམས་ཀྱི་ངང་ཉིད་ནི། །སྐྱོན་དང་བྲལ་བས་དག་པ་ཉིད། །ཐབས་དང་ཤེས་རབ་ངང་ཉིད་ནི། །བསྒྲུབ་པའི་ལམ་དུ་མིང་བཏགས་ཀྱང་། །ཅི་ལ་མི་བརྟེན་བསྒྲུབ་དང་བྲལ། །ཁམས་གསུམ་ཧེ་ཡི་ངང་ཉིད་དེ། །ཡང་དག་ཧེ་ནི་གཅིག་པུ་ཉིད། །དགྱེས་པ་ཆེན་པོས་སྟོབ་པར་བཤད། །སྲིད་གསུམ་ཁྲག་གི་རང་བཞིན་ཏེ། །ཆགས་པ་དབང་ཆེན་གཅིག་པུ་ཉིད། །འཐུང་ཞིང་བསྡུས་པའི་སྒྲ་རུ་བརྗོད། །སྣོད་བཅུད་ཁ་ཡི་རང་བཞིན་ཏེ། །མཚན་མའི་རྟོག་པ་མ་ལུས་ཀུན། །ཟ་ཡིན་སྟོང་པ་ཉིད་དུ་བཤད། །ཐེག་པའི་
བྱེ་བྲག་བསམ་ཡས་ཀུན། །གནས་དང་གནས་ཀྱི་ཁྱད་པར་རྣམས། །ས་ཡི་ཁྱད་པར་བཅུ་དང་གསུམ། །རྒྱུ་འབྲས་ཁྱད་པར་ལྷུན་གྱིས་གྲུབ། །བླ་མེད་ཡེ་ཤེས་མཆོག་གི་ས། །དབང་ཕྱུག་ལས་ཀྱི་རྒྱ་མཚོ་ལས། ཐིག་ལེའི་ལེའུ་སྟེ་བཅུ་གཉིས་པའོ།། །།རྩ་བའི་སྙིང་པོ་འདི་ལྟ་སྟེ། བླ་མེད་ཁྲག་འཐུང་སྐུ་ཡི་སྙིང་པོར་གསལ། །ཨཱོཾ་ལ་འགྲོ་བ་ལྔ་ཡི་སྙིང་པོར་རྫོགས། །དེ་ལ་སྤྱི་དཔལ་བཅུ་དང་ལྡན། །ཨཱོཾ་ཨཱོཾ་ཨཱོཾ་ཨཱོཾ་ཨཱོཾ་ཨཱོཾ་ཨཱོཾ་ཨཱོཾ་ཨཱོཾ་ཨཱོཾ། ཕཊ་ཕཊ་ཕཊ་ཕཊ། ཨཱཾ་ཨཱཾ་ལ་དྭངས་མ་ལྔ་པོ་རྫོགས། །བདེར་གཤེགས་གསུང་གི་སྙིང་པོར་ཤར། །དེ་ལ་གདེང་ཆེན་བཅུ་ཡི་དབྱིངས། །ཨཱཾ་ཨཱཾ་ཨཱཾ་ཨཱཾ་ཨཱཾ་ཨཱཾ་ཨཱཾ་ཨཱཾ་ཨཱཾ་ཨཱཾ། ཕཊ་ཕཊ་ཕཊ་ཕཊ། ཁྲག་འཐུང་ཐུགས་ཀྱི་སྙིང་པོ་ལ། ཧཱུཾ་ཧཱུཾ་ལས་ཡེ་ཤེས་ལྔ་ཚན་ལྔ། །དེ་ལ་གསང་ཆེན་བཅུ་དང་ལྡན། །ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ། ཕཊ་ཕཊ་ཕཊ་ཕཊ། སྭཱ་སྭཱ་ལ་འབྱུང་བ་ལྔ་པོ་ཚང་། །ཁྲག་འཐུང་ཡོན་ཏན་སྙིང་པོ་སྟེ། །དེ་ལ་རྫོགས་ཆེན་བཅུ་དང་ལྡན། །སྭ་སྭ་སྭ་སྭ་སྭ་སྭ་སྭ་སྭ་སྭ་སྭ། ཕཊ་ཕཊ་ཕཊ་ཕཊ། དབང་ཕྱུག་ལས་ཀྱི་རྒྱ་མཚོ་ལས། རྩ་བ་སྔགས་ཀྱི་ལེའུ་སྟེ་བཅུ་གསུམ་པའོ།། །།ཕྲ་མེན་རྒྱ་མཚོས་ཡང་གསོལ་པ། །སྲིད་པའི་མ་མོ་ཐུགས་འཁྲུགས་པས། །ནད་དང་མཚོན་གྱི་ཆར་པ་དང་། །ལྟས་ངན་བྱད་ཀྱི་དགྲ་ཐབས་དང་། །དུས་མིན་འཆི་དང་མུ་གེ་དང་། །མེ་དང་རྒྱལ་པོའི་ཆད་པ་འབྱུང་། །དེ་ཡི་བསྐང་བཟློག་ཇི་ལྟར་ལགས། །ཡང་དག་རྫོགས་ཀྱིས་བཀའ་སྩལ་པ། །དེ་ཡི་བསྐང་ལུགས་བསྟན་པ་ནི། །སྲོག་གིས་བསྐང་བ་འདི་ལྟར་རོ། །ཧཱུཾ། སྐུ་རུ་བླ་མེད་ཁྲག་འཐུང་བརྗིད། །གཟུངས་མར་དཔལ་འབར་ཁྲོ་མོ་རྩེ། །སེམས་སུ་མཁའ་འགྲོ་རྣམ་ལྔ་གསལ། །རྒྱན་དུ་འོད་ཆེན་སྣ་ཚོགས་བརྗིད། །འཁོར་དུ་གསང་བའི་ཡུམ་བཞི་གདུང་། །ཡུལ་དང་ཐུགས་ཀྱི་དགྱེས་སྡེ་ཤར། །གནས་སུ་ཁྲོས་པའི་དབང་ཆེན་བཟང་། །
ཁྲི་རུ་ཆགས་བྱེད་ཆགས་སྙོམས་སྤགས། །གདེང་དུ་བུ་མོ་སྤུན་དྲུག་ཆེ། །མཆོད་པར་སྲིན་མོ་བདུན་པོ་བཟང་། །གཏེར་དུ་གར་གྱི་མཁའ་འགྲོ་སྦས། །མཁའ་ལ་བུ་མོ་སྤུན་གཉིས་འགྲོ། །ཐུགས་རྗེ་ལས་ཀྱི་སྲིན་མོ་ཆེ། །དཔུང་རྣམས་དམག་གི་རྒྱལ་མོས་འཛེམས། །བཀའ་བཞིན་ལས་ཀྱི་དབང་ཕྱུག་མཛད། །ཡུམ་ཆེན་ཐུགས་ཀྱི་ཆོ་འཕྲུལ་ལས། །འབྱུང་བ་ལྔ་ཡི་ཆོ་འཕྲུལ་འབྱུང་། །འབྱུང་བ་ས་ཡི་ངོ་བོ་ལ། །རྣམ་སྣང་གསལ་གྱི་ངོ་བོར་གསལ། །ཤེལ་དཀར་དགུ་བརྩེགས་འབར་བའི་ནང་ཤེད་ནས། །རྣམ་པར་སྣང་མཛད་སྐུ་ནི་ཕྱེད་ནུབ་ཙམ། །མེ་ལོང་ལྟ་བུའི་ཡེ་ཤེས་རང་བཞིན་ཤར། །འབྱུང་བ་རླུང་གི་རང་བཞིན་ལས། །ཡང་གསལ་གཡོས་ཀྱི་ངོ་བོར་སྤྲུལ། །རྒྱ་གྲམ་དགུ་བརྩེགས་འབར་བའི་ནང་ནས་ནི། །དོན་ཡོད་གྲུབ་པའི་སྐུ་ནི་ཕྱེད་ནུབ་ཙམ། །བྱ་བ་ནན་ཏན་ཡེ་ཤེས་རང་བཞིན་ཤར། །འབྱུང་བ་ཆུ་ཡི་རང་བཞིན་ལས། །གཉེན་གསལ་འབར་གྱི་ངོ་བོར་སྤྲུལ། །བྱུ་རུ་དགུ་བརྩེགས་འབར་བའི་ནང་ཤེད་ནས། །འོད་དཔག་མེད་པའི་སྐུ་ནི་ཕྱེད་ནུབ་ཙམ། །སོ་སོར་རྟོགས་པའི་ཡེ་ཤེས་རང་བཞིན་ཤར། །འབྱུང་བ་མེ་ཡི་རང་བཞིན་ལས། །འོད་གསལ་འབར་བའི་ངོ་བོར་སྤྲུལ། །མུ་མེན་དགུ་བརྩེགས་འབར་བའི་ནང་ནས་ནི། །རིན་ཆེན་འབྱུང་ལྡན་སྐུ་ནི་ཕྱེད་ནུབ་ཙམ། །མཉམ་པ་ཉིད་ཀྱི་ཡེ་ཤེས་རང་བཞིན་ཤར། །འབྱུང་བ་ནམ་མཁའི་རང་བཞིན་ལས། །བཀྲག་གསལ་གཉེན་གྱི་ངོ་བོར་སྤྲུལ། །རྡོ་རྗེ་དགུ་བརྩེགས་འབར་བའི་ནང་ནས་ནི། །མི་བསྐྱོད་པ་ཡི་སྐུ་ནི་ཕྱེད་ནུབ་ཙམ། །ཆོས་ཀྱི་དབྱིངས་ཀྱི་ཡེ་ཤེས་རང་བཞིན་ཤར། །སྲོག་ཆགས་བཀྲག་དང་མདངས་ཉམས་ན། །བསྐང་བའི་ཆོ་ག་འདི་ལྟར་ལགས། །ཡང་དག་རྫོགས་ཀྱིས་བཀའ་སྩལ་པ། །ཧཱུཾ། ནག་མོ་གཡུ་ཡི་ཁ་རན་ཅན། །མཁའ་ཀློང་ཡུམ་གྱི་རྫས་སུ་འབུལ། །ཚོན་ལྔས་མཛེས་པའི་རྒྱ་རན་ལ། །མདངས་ལྡན་དར་གྱིས་བརྒྱན་པ་ནི། །
རྒྱལ་མོ་ལྔ་ཡི་ཐུགས་དམ་བསྐང་། །ནམ་མཁའ་ཤེལ་མིག་བཅུ་བཞི་ལ། །ཚོན་ལྔ་གཞན་གྱིས་སྤྲས་པ་ནི། །ཕྲ་མེན་རྒྱ་མཚོ་ལ་སོགས་ཏེ། །རྗེ་མོ་བཅུ་བཞིའི་རྫས་སུ་འབུལ། །ནག་མོ་རྒྱ་རན་གཡུ་ཆག་ཅན། །སྲིད་པ་ཆགས་བྱེད་རྫས་སུ་འབུལ། །སེར་མོ་དར་དཀར་ཁ་ཆག་ཅན། །ཆ་སྙོམས་མ་ཡི་རྫས་སུ་འབུལ། །དཀར་མོ་གསེར་གྱི་མཐའ་ཆག་ཅན། །ཨེ་ཀ་ཙ་ཏིའི་རྫས་སུ་འབུལ། །སྔོན་མོ་དུང་གི་མཐའ་ཆག་ཅན། །ནམ་མཁའ་རྒྱལ་མོའི་རྫས་སུ་འབུལ། །ལྗང་མོ་སྣ་ཚོགས་མིག་མངས་རིས། །གླིང་བཞི་སྤྱི་ཕུད་རྫས་སུ་འབུལ། །གསེར་མིག་སྣ་ཚོགས་མཐའ་ཆག་ཅན། །དམག་དཔོན་རྒྱལ་མོའི་རྫས་སུ་འབུལ། །གཡུ་མིག་ཚོན་ལྔ་གཞན་གྱིས་སྤྲས། །གྲུ་འདེགས་ཆེན་མོའི་རྫས་སུ་འབུལ། །དམར་མོ་ཁྲག་གི་ཕོ་མཐིང་ཅན། །སྲིན་མོ་ཆེན་མོའི་རྫས་སུ་འབུལ། །ནག་མོ་གཡུ་ཡི་ཕོ་མཐིང་ཅན། །ས་བདག་ཆེན་མོའི་རྫས་སུ་འབུལ། །སྔོན་མོ་གཡུ་ཡི་གཞའ་ཚོན་རིས། །རྡོ་རྗེ་གར་དབང་རྫས་སུ་འབུལ། །ཤེལ་མི་གསེར་གྱི་ཕོ་མཐིང་ཅན། །སྲིན་མོ་བཞི་ཡི་རྫས་སུ་འབུལ། །དཀར་མོ་བདུན་དང་སེར་མོ་བདུན། །དམར་མོ་བདུན་དང་ལྗང་མོ་བདུན། །ཉི་ཤུ་རྩ་བརྒྱད་རྫས་སུ་འབུལ། །གཡུ་མིག་དུང་གི་ཆ་ག་ཅན། །བརྟན་མ་བཅུ་གཉིས་རྫས་སུ་འབུལ། །ཧཱུཾ། རི་རབ་གཡུ་ཡི་ཟོམ་རྩེ་ལ། །གསང་བའི་ཡུམ་གཅིག་མཁའ་འགྲོ་མ། །རྣམ་པར་རྟོག་བྲལ་ཀུན་བཟང་མོ། །སྐྱེ་མེད་མ་མོ་ཀུན་ཏུ་བཟང་། །སྐུ་མེད་མ་མོ་རྟོག་བྲལ་སྐུ། །སྐྱེ་མེད་ཀུན་ཏུ་བཟང་མོ་ལ། །བྱ་ཆེན་ཁྱུང་གི་གཟུགས་པོ་ཆེ། །དུག་ལྔ་རགས་པས་གཟུགས་པོ་ཆེ། །ཁྱུང་གི་གཟུགས་ཀྱིས་ཐུགས་དམ་བསྐང་། །ཁྱུང་གི་སྒོ་ང་གཡུ་སྒོང་འབར། །སྲོག་མེད་གཟུགས་ཀྱིས་ཐུགས་དམ་བསྐང་། །ཁྱུང་གི་གཤོག་འདབ་དཀར་ལ་འཚེར། །ཁྱུང་གི་མདངས་ཀྱིས་ཐུགས་དམ་བསྐང་། །
གསང་བའི་མཁའ་ཀློང་ཡུམ་གྱི་བྷ་ག་ལས། །སེམས་ཅན་ལས་ཀྱི་སྐུ་ནི་མཚོན་པ་སྟེ། །སེམས་ཀྱི་རང་བཞིན་འོད་གསལ་མ། །སྐྱོན་གྱིས་མ་བསྒྲིབས་འོད་གསལ་མ། །གླང་ཆེན་གཟུགས་ཀྱིས་ཐུགས་དམ་བསྐང་། །གཏི་མུག་རགས་པའི་གཟུགས་པོ་ཆེ། །ཨེ་ན་ཡ་ནི་གཟུགས་ཀྱིས་བཟློག །གིའུ་ཝཾ་བདུད་རྩི་སྨན་གྱི་མཆོག །སྟོབས་བཅུ་གླང་ཆེན་ཐུགས་དམ་བསྐང་། །ཐམས་ཅད་སྙོམས་མཛད་ཀུན་གྱི་ཡུམ། །གསང་བའི་གནས་ནས་ཕྲག་དོག་འཇོམས། །ཡེ་ཤེས་དོན་གསལ་ལྷུན་གྱིས་གྲུབ། །ཐོགས་མེད་ཁྱུང་གིས་ཐུགས་དམ་བསྐང་། །ཕྲག་དོག་རླུང་ནི་མཁའ་ལ་འཕྱོ། །ཤེས་རབ་མཐར་ཕྱིན་ཁྱུང་ཆེན་གཟུགས། །ཁྱུང་གི་དབུགས་ཀྱང་གཟུགས་ཀྱིས་ཐུགས་དམ་བསྐང་། །ཧཱུཾ། ཐམས་ཅད་སྦྱོར་མཛད་ཡུམ་མཆོག་སྐུ། །སྦྱོར་བ་མཐར་ཕྱིན་དབྱིངས་སུ་གསལ། །མཁའ་ལ་རླུང་ཆེན་ཕོ་བྲང་ནས། །ཐུགས་རྗེས་འབྱུང་བའི་སྐུར་བཞེངས་ཤིག །མདངས་ལྡན་ཕུད་ཀས་ཐུགས་དམ་བསྐང་། །འདོད་ཆགས་གཟུགས་ནི་འོད་འབར་སྐུ། །ཆགས་པའི་འབྲས་བུར་མདངས་སུ་ཤར། །ཆགས་པའི་ནད་ཀྱིས་ཟིན་པ་ལ། །རྨ་བྱ་མདོངས་ལྡན་ཁྲག་གིས་བསྐང་། །སྐྱེ་མེད་མོ་ནི་ལྷུན་རྫོགས་སྐུ། །ཤེས་རབ་གསལ་བའི་རང་བཞིན་གསུང་། །ཐབས་ལ་མཁས་པའི་ཡེ་ཤེས་ཐུགས། །གང་གིས་མི་བསྐྱོད་གསལ་བའི་སྤྱན། །རྫུ་འཕྲུལ་མདངས་ལྡན་དྲོད་ཀྱིས་བསྐང་། །ང་རྒྱལ་རགས་པའི་རྫུ་འཕྲུལ་གཟུགས། །དར་དུ་དྲག་ཅིང་མདངས་སུ་ཆེ། །འདི་ཡི་དྲོད་ཀྱིས་ཐུགས་དམ་བསྐང་། །མཁའ་ལ་གླང་ཆེན་ཕོ་བྲང་ནས། །ཀུན་དུ་བྱང་ཆུབ་སེམས་ཆེན་པོ། །རྟོག་བྲལ་ནམ་མཁའི་མདངས་ཅན་མ། །སྐྱེ་འགག་མེད་པའི་མདངས་ཀྱི་བདག །ཞེ་སྡང་རགས་པའི་གཟུགས་ཀྱིས་བསྐང་། །རྩལ་གསུམ་ཁྱོན་དུ་རྫོགས་པ་ཡི། །སྟོབས་ཀྱིས་གཅན་གཟན་ཟིལ་གྱིས་གནོན། །འདི་ཡི་སེམས་ཀྱིས་ཐུགས་དམ་བསྐང་། །རི་རབ་གཡུ་ཡི་བུམ་རྩེ་ལ། །རིན་
ཆེན་གཡུ་མིག་གསེར་གྱིས་སྤྲས། །ལེ་བརྒན་འབར་བའི་གདུགས་ཀྱིས་བཀབ། །ཕྲ་མེན་སྐྱོགས་ལྔའི་མདངས་ཀྱིས་མཛེས། །རིགས་དང་མཐུན་པའི་རུ་མཚོན་ལྔ། །ཕྱོགས་བཞི་དབུས་དང་ལྔ་ལའོ། །མདངས་དང་བཀྲག་གིས་ཐུགས་དམ་བསྐང་། །གཅན་གཟན་རྒྱལ་པོ་དྲུག་པོ་ལ། །དཀར་ལ་མཛེས་པའི་རྒྱན་གྱིས་བརྒྱན། །མཁའ་དྲུག་རྒྱལ་མོའི་ཐུགས་དམ་བསྐང་། །ཧཱུཾ། ལྷུན་གྱིས་གྲུབ་པའི་བདག་ཉིད་ཅན། །ཐིག་ལེ་འོད་ཀྱི་ཀློང་དཀྱིལ་ནས། །དཔལ་འབར་ཉག་གཅིག་སེམས་མའི་སྐུ། །ཐུགས་རྗེ་སྣ་ཚོགས་དབྱིངས་ནས་འཆར། །གཞོགས་ཕྱེད་ན་ཞིང་དབུགས་མི་བདེ། །རྨ་བྱའི་བུ་མོ་ཧ་ལོ་མགྲིན། །སྐྱིན་དཀར་གཡང་ཞུས་ཐུགས་དམ་བསྐང་། །ཇི་ལྟར་སྣང་བའི་བདག་ཉིད་སྐུ། །ཉི་མ་འབུམ་གྱི་འོད་ཟེར་ཅན། །ཀུན་ལ་ཁྱབ་གདལ་འོད་གསལ་ཅན། །མ་སྐྱེས་དབྱིངས་ནས་ཕྱག་རྒྱར་གསལ། །ཧ་ཕྲེང་འབར་བའི་གཟུ་ཐོག་ལྕམ། །ཐང་དཀར་གཡང་ཞུས་ཐུགས་དམ་བསྐང་། །སྐྲང་འབུར་ནད་རྣམས་ཞི་བར་མཛོད། །ཧཱུཾ། སྐྱེ་འགྲོ་མ་ལུས་གསོ་མཛད་མ། །འགྲོ་བ་གསལ་བའི་མིག་གཅིག་མ། །བྷ་ག་གསལ་བའི་ལྷུན་རྫོགས་མ། །དུག་གསུམ་གསོལ་མཛད་ཁྱབ་པ་མོ། །རི་སྐེགས་མདངས་ཀྱིས་ཐུགས་དམ་བསྐང་། །ཧཱུཾ། མཚན་མའི་རྣམ་རྟོག་ལྷུན་རྫོགས་སྐུ། །ལྟ་བ་འགྱུར་མེད་བྱང་ཆུབ་སེམས། །སྤྱོད་པ་སྤྲོས་མེད་སྤྲོས་དང་བྲལ། །མ་བྱུང་མ་སྐྱེས་དབྱིངས་ནས་གསལ། །ཤང་ཤང་མདངས་ཀྱིས་ཐུགས་དམ་བསྐང་། །རྣམ་རྟོག་སྤྲོས་བྲལ་མཚན་མེད་སྐུ། །སྟོང་པ་འགྱུར་མེད་ཀུན་ལ་ཁྱབ། །ཁྱབ་གདལ་ཆེན་པོ་སྦས་པའི་སྐུ། །ཡེ་ཤེས་ཐུགས་ཡང་སྦས་པའི་སེམས། །གསུང་སྙན་ནེ་ཙོས་ཐུགས་དམ་བསྐང་། །ཧཱུཾ།དབྱིངས་ཀྱི་མ་མོ་སྐྱེ་མེད་མ། །རྣལ་འབྱོར་རིག་པའི་ཐུགས་མཚན་མ། །དམ་ཚིག་ཉམས་པའི་རྗེས་གཅོད་མ། །ཁུ་བྱུག་མདངས་ཀྱིས་ཐུགས་དམ་བསྐང་། །ཞེ་སྡང་རྣམ་དག་ཁྲོས་
པའི་སྐུ། །གཙོ་མོ་ཆེན་མོ་དབྱིངས་ནས་གསལ། །ཅི་ལ་ཐོགས་མེད་སྤྱོད་པ་མོ། །ཀུན་གཞི་དབྱིངས་ནས་དབྱིངས་སུ་སྦྱོར། །མཁའ་ལྡིང་མདངས་ཀྱིས་ཐུགས་དམ་བསྐང་། །ཇི་ལྟར་ཐོགས་མེད་ལྷུན་རྫོགས་སྐུ། །ང་ཕྲག་དོག་ཡང་རྒྱལ་ཁྲོས་པའི་ཐུགས་མཆོག་མ། །སྐྱོན་བྲལ་རྣམ་རྟོག་སྤྲོས་མེད་མ། །སེམས་ཉིད་མི་འགྱུར་ཆོས་ཀྱི་དབྱིངས། །གསེར་མིག་མདངས་ཀྱིས་ཐུགས་དམ་བསྐང་། །དབྱིངས་ནས་སྐུ་འཁྲུངས་གསང་བའི་ཡུམ། །བརྩོན་འགྲུས་ལྷུན་གྲུབ་མཐར་ཕྱིན་མ། །རང་བཞིན་འོད་གསལ་སེམས་མའི་མཆོག །སྣང་བ་ཐམས་ཅད་ཆོས་ཀྱི་དབྱིངས། །གླང་པོའི་མདངས་ཀྱིས་ཐུགས་དམ་བསྐང་། །གསང་བའི་བྷ་གའི་མཁའ་དབྱིངས་ནས། །མཚན་མེད་མི་འགྱུར་ནམ་མཁའི་སྐུ། །སྐྱོན་གྱིས་མ་བསྒྲིབས་དག་པའི་གསུང་། །ཐབས་དང་ཤེས་རབ་གཉིས་མེད་ཐུགས། །སྣར་སྣང་བ་དཀར་དམར་བྱུང་མོ་རྐང་མར་མདངས་ཀྱིས་བསྐང་། །གླང་ཐབས་ནད་རྣམས་ཞི་བར་མཛོད། །ཧཱུཾ། གསང་བའི་དབྱིངས་ལས་གཏེར་འཆང་མ། །གཟའ་སྐར་རྫོགས་པའི་རྒྱན་མངའ་ཞིང་། །རང་བཞིན་ལྷུན་གྱིས་གྲུབ་པའི་སྐུ། །གཏིང་དཔག་མེད་པའི་དབྱིངས་ནས་ཤར། །ནམ་མཁའ་ཧན་གྱི་ཐུགས་དམ་བསྐང་། །སྲིད་པའི་དབང་བསྒྱུར་མཐུ་མོ་ཆེ། །ཤིན་ཏུ་རྙེད་དཀའ་གསང་བའི་ཡུམ། །རང་བཞིན་འོད་གསལ་ཀློང་དུ་འཁྱིལ། །རྒྱལ་བའི་སྐུ་དང་ཡེ་ནས་མཉམ། །གཤོག་སྡེར་ལྟོ་འགྲོའི་མདངས་ཀྱིས་བསྐང་། །རྣམ་གྲོལ་མ་རིག་མུན་པ་སེལ། །ཡེ་ཤེས་ལྔ་ལྡན་གསལ་བའི་ཐུགས། །མཁའ་ལྟར་ཡངས་པའི་ཐུགས་མངའ་མ། །སྦེད་བྱེད་མདངས་ཀྱིས་ཐུགས་དམ་བསྐང་། །གསང་བའི་འོད་འབར་བཀྲག་ཆེན་ལྡན། །སུས་ཀྱང་མ་རྟོགས་གསང་བའི་ཡུམ། །སྐྱེ་མེད་དབྱིངས་ནས་ཤར་བའི་སྐུ། །སེམས་ཅན་ལས་ཀྱི་མདངས་འཕྲོག་མ། །དེ་བ་ཧི་ཏའི་མདངས་ཀྱིས་བསྐང་། །མདོངས་པའི་ནད་རྣམས་ཞི་བར་མཛད། །ཡེ་ཤེས་རྗེ་མོ་བཅུ་བཞི་ལ། །ཐུན་མོང་མཐུན་པའི་རྫས་ཀྱིས་
བསྐང་། །གླང་ཆེན་སྟག་དང་གཟིག་ལ་སོགས། །ཀུ་ཀུ་ར་ཙའི་གཟུགས་སོགས་དང་། །བཅུ་བཞི་ཕྲག་བཞིས་ཐུགས་དམ་བསྐང་། །སྟག་མོ་དར་མའི་མཆེ་བ་ནི། །ཞེ་སྡང་ཟ་བྱེད་ཁ་འབར་མ། །ལྟག་པར་རྡོ་རྗེ་རྩེ་ལྔ་འབར། །གཞའ་ཚོན་འབར་བའི་རི་མོ་ཅན། །ཡེ་ཤེས་རྗེ་མོའི་ཐུགས་དམ་བསྐང་། །ཧཱུཾ། ཁམས་གསུམ་ཟ་བའི་མངའ་བདག་མོ། །ཚོགས་ཀྱི་གཙོ་མོ་འཇིགས་པའི་སྐུ། །གཡང་གཞི་རུ་མཚོན་ཕྱར་ནས་སུ། །ན་ཚེ་ཟ་བྱེད་ཆེན་མོ་ལ། །ངེས་མེད་ལྡེམ་བུའི་སྙིགས་མས་བསྐང་། །མཁལ་སྐེད་ནད་རྣམས་ཞི་བར་མཛོད། །ཐིག་ལེ་བཅུད་བསྡུས་དཀྱིལ་འཁོར་ནས། །གདོང་བརྒྱ་འཇིགས་པའི་ཆ་ལུགས་ལ། །སྟག་ལྤགས་གཡང་གཞིའི་ན་བཟའ་ཅན། །སྙོམས་བྱེད་ཆེན་མོ་འཇིགས་པའི་སྐུ། །གཟི་ཆེན་ལྡིར་བའི་སྙིགས་མས་བསྐང་། །ཕོ་མཆིན་ནད་རྣམས་ཞི་བར་མཛོད། །འཇིགས་པ་ཚངས་པའི་རྩེ་ལ་གནས། །སྤྲིན་དཀར་མཛེས་པའི་ན་བཟའ་ཅན། །བྷན་དྷ་སྟོང་སྐོར་གླད་ལ་སྡེབ། །རལ་གཅིག་མི་བཟད་འཇིགས་པའི་སྐུ། །བྱི་ཀྲ་ཏྲི་ཡི་སྙིགས་མས་བསྐང་། །སྐེ་མཇིང་ནད་རྣམས་ཞི་བར་མཛོད། །ཧཱུཾ། མེ་རི་གྲུ་གསུམ་འབར་བ་ནས། །སྲིད་པའི་དྲོད་ལ་ཉུལ་བྱེད་མ། །མུ་ཏིག་ཟར་བུ་གོས་སུ་གསོལ། །བདེ་བ་ཆེན་པོའི་གནས་ཉུལ་མ། །བེ་ཏ་ལི་ཀའི་སྙིགས་མས་བསྐང་། །ཆུ་སོའི་ནད་རྣམས་ཞི་བར་མཛོད། །ཟླ་གམ་རླུང་གི་དཀྱིལ་འཁོར་ནས། །ཉག་གཅིག་དཀར་མོ་མཛེས་མ་ལ། །གུར་གུམ་ལྕགས་ཡུ་གླད་ལ་བསྐོར། །དྭངས་མའི་གནས་རྣམས་ཉུལ་བྱེད་མ། །གོར་ར་ཧ་ཏའི་ཐུགས་དམ་བསྐང་། །ལྒང་བའི་ནད་རྣམས་ཞི་བར་མཛོད། །ཟླ་གམ་དབང་གི་དཀྱིལ་འཁོར་ནས། །དཀར་མོ་རལ་པ་འཁྱིལ་པ་མོ། །ཁ་ཊྭཱཾ་ཀ་ཡི་མཚོན་ཆ་ཐོགས། །ཤིན་ཏུ་འཇིགས་པའི་སྐུ་མངའ་མ། །ཀུ་ཀུ་ར་ཙའི་སྙིགས་མས་བསྐང་། །སྟོད་གཟེར་ནད་རྣམས་
ཞི་བར་མཛོད། །སོག་ཁ་གདེངས་པའི་དཀྱིལ་འཁོར་ནས། །ནག་མོ་མཆེ་བའི་དཔུང་རྒྱན་ཅན། །འཁོར་ལོ་འབར་བ་ལག་ན་ཐོགས། །ཤིན་ཏུ་འཇིགས་པའི་སྐུ་མངའ་མ། །མྱུར་བ་སྲིད་འགྲོའི་སྙིགས་མས་བསྐང་། །རྒྱུ་གཟེར་ནད་རྣམས་ཞི་བར་མཛོད། །རྒྱ་མཚོ་ཟླུམ་པོའི་དཀྱིལ་འཁོར་ནས། །དམར་མོ་ཁྲག་གི་ཕོ་མཐིང་ཅན། །རྒྱ་མཚོ་ཆེན་པོ་གླད་ལ་བསྐོར། །བཤན་པ་འབུམ་གྱི་དབུས་ནས་འགྱིངས། །བརྩོན་འགྲུས་ཝ་ཡི་སྙིགས་མས་བསྐང་། །མཛེ་ཤུའི་ནད་རྣམས་ཞི་བར་མཛོད། །ཧཱུཾ། རླུང་ནག་འཁྲུག་པའི་དཀྱིལ་འཁོར་ནས། །སེར་མོ་རླུང་གི་གོ་ཟུ་ཅན། །ཤིན་ཏུ་མི་བཟད་འཇིགས་པའི་སྐུ། །མི་ཀྲི་བྱ་ཀྲིའི་སྙིགས་མས་བསྐང་། །ལྷོག་ནད་སྐམ་པ་ཞི་བར་མཛོད། །ཧཱུཾ། ནམ་མཁའ་ཡངས་པའི་དཀྱིལ་འཁོར་ནས། །སྐུ་ནི་དཀར་མོ་མཛེས་པ་ལ། །ལག་ན་དར་དཀར་རུ་མཚོན་བསྣམས། །འཇོམས་བྱེད་ཆེན་མོ་ལས་ཀྱི་ཡུམ། །དགེ་བསྙེན་ཆས་སུ་ཞུགས་པས་བསྐང་། །དབྱལ་པའི་ནད་རྣམས་ཞི་བར་མཛོད། །མཐིང་ནག་འབར་བའི་དཀྱིལ་འཁོར་ནས། །ནག་མོ་ལྕགས་ཀྱི་རལ་པ་ཅན། །དར་ནག་རུ་མཚོན་ལག་ན་འཕྱར། །འཇོམས་བྱེད་ཆེན་མོ་ལས་ཀྱི་ཡུམ། །དགེ་བསྙེན་ཆས་སུ་ཞུགས་པས་བསྐང་། །དྲག་ཤུལ་གཟེར་ནད་ཞི་བར་མཛོད། །ལེ་བརྒན་དར་གྱི་ནང་ཤེད་ནས། །དམར་མོ་ཁྲག་གི་མཆུ་འཇིབས་མ། །དར་དམར་རུ་མཚོན་ཕྱར་ནས་སུ། །འཇོམས་བྱེད་ཆེན་མོ་ལས་ཀྱི་ཡུམ། །དགེ་བསྙེན་ཆས་སུ་ཞུགས་པས་བསྐང་། །སྨྱོ་འབོག་ནད་རྣམས་ཞི་བར་མཛོད། །ལྗང་ནག་འབར་བའི་དཀྱིལ་འཁོར་ནས། །སེར་མོ་རླུང་གི་རལ་གྲིའི་སོ། །ལག་ན་དར་སེར་རུ་མཚོན་ཐོགས། །འཇོམས་བྱེད་ཆེན་མོ་ལས་ཀྱི་ཡུམ། །དགེ་བསྙེན་ཆས་སུ་ཞུགས་པས་བསྐང་། །ཚ་བའི་ནད་རྣམས་ཞི་བར་མཛོད། །ཧཱུཾ། ཐུགས་རྗེ་དབྱིངས་ཀྱི་དཀྱིལ་འཁོར་ནས། །མེ་ལོང་ཡེ་ཤེས་རིག་པ་གསལ། །མགྱོགས་མ་ཆེན་མོ་ལྷ་ཡི་སྲིང་། །དུང་
སྒོང་འབར་བས་ཐུགས་དམ་བསྐང་། །སྙིང་ནད་འབར་བ་ཞི་བར་མཛོད། །རིག་པ་རྩལ་གྱི་དཀྱིལ་འཁོར་ནས། །མཉམ་ཉིད་ཡེ་ཤེས་རིག་པ་གསལ། །ཁྱུང་ཆེན་ལྡིང་བ་གཤིན་རྗེའི་སྲིང་། །གསེར་སྒོང་སེར་པོས་ཐུགས་དམ་བསྐང་། །སྙིང་ནད་འབར་བ་ཞི་བར་མཛོད། །ཆགས་པ་དབང་གི་དཀྱིལ་འཁོར་ནས། །སོ་སོར་རྟོགས་པའི་ཡེ་ཤེས་གསལ། །དམར་མོ་ཀླུ་ཡི་སྲིང་གཅིག་མ། །ཟངས་སྒོང་དམར་པོས་ཐུགས་དམ་བསྐང་། །སྙིང་ནད་འབར་བ་ཞི་བར་མཛོད། །ཕྲག་དོག་ལས་ཀྱི་དཀྱིལ་འཁོར་ནས། །བྱ་བ་གྲུབ་པའི་ཡེ་ཤེས་གསལ། །ནག་མོ་གནོད་སྦྱིན་སྲིང་མོ་སྟེ། །བསེ་སྒོང་ཁྲ་བོས་ཐུགས་དམ་བསྐང་། །སྙིང་ཆུའི་ནད་རྣམས་ཞི་བར་མཛོད། །ལྕགས་མཁར་གྲུ་གསུམ་འབར་བ་ན། །ནག་མོ་རལ་པས་སྟོང་གསུམ་ཁེབས། །སྙིང་ཟན་ཙིཏྟའི་དཀྱིལ་ན་བཞུགས། །བདུད་ཀྱི་རུ་མཚོན་ཕྱར་ནས་སུ། །སྲིད་པའི་ལྷ་འདྲེ་དམ་ལ་སྡུད། །ངེས་མེད་ད་རྩེའི་ཡང་ཆའི་འབྲས་བུས་བསྐང་། །འོད་གསལ་རྨ་བྱའི་གདུགས་ཀྱིས་བསྐང་། །མིག་སར་ནད་རྣམས་ཞི་བར་མཛོད། །ཧཱུཾ། ཁྲག་གི་རྒྱ་མཚོའི་ཀློང་དཀྱིལ་ནས། །སྲིན་མོ་འདོད་ཆགས་མི་བཟད་མ། །བྱ་རྒོད་དར་མའི་སྙིང་གིས་བསྐང་། །སྒྲིབ་བྱེད་ནད་རྣམས་ཞི་བར་མཛོད། །འོད་ཕུང་འཁྲིགས་པའི་དཀྱིལ་འཁོར་ནས། །སྲིན་མོ་འཁོར་འདུལ་མི་བཟད་མ། །གཙོས་མོ་དར་མའི་ཁྲག་གིས་བསྐང་། །གློ་བུར་ནད་རྣམས་ཞི་བར་མཛོད། །ནམ་མཁའ་ཡངས་པའི་དཀྱིལ་འཁོར་ནས། །སྲིན་མོ་ནམ་མཁའི་ཆ་བྱད་ཅན། །སྤྱང་མོ་དར་མའི་ལྕེ་ཡིས་བསྐང་། །ལྕེ་ནད་འབར་བ་ཞི་བར་མཛོད། །གཅན་ཟན་སྤུངས་པའི་དཀྱིལ་འཁོར་ནས། །འཁོར་འདུལ་ཆེན་མོ་སྐུ་སྤྲུལ་ནས། །ཕག་རྒོད་འབར་བའི་མཁལ་མས་བསྐང་། །འོན་པའི་ནད་རྣམས་ཞི་བར་མཛོད། །གཞའ་ཚོན་འབར་བའི་དཀྱིལ་འཁོར་ནས། །སྲིན་མོ་ཁ་འབར་སྟོང་གསུམ་གྲགས། །
འཕར་བ་རྐན་རྡེབས་འབྲས་བུས་བསྐང་། །ཟ་ཁུའི་ནད་རྣམས་ཞི་བར་མཛོད། །འདབ་ཆགས་མང་པོའི་དཀྱིལ་འཁོར་ནས། །སྲིན་མོ་ནག་མོ་གཤོལ་ཐོགས་མ། །དྲེད་མོ་འབར་བའི་མཆེར་བས་བསྐང་། །མཆེར་བའི་མཁུན་ནད་ཞི་བར་མཛོད། །བུད་མེད་མང་པོའི་དཀྱིལ་འཁོར་ནས། །སྲིན་མོ་སྤྱང་གདོང་དབུགས་འཕྲོག་མ། །བྱ་གཅན་གསོད་བྱེད་མཁྲིས་པས་བསྐང་། །མཁྲིས་ནད་འབར་བ་ཞི་བར་མཛོད། །ཧཱུཾ། ལྕགས་མཁར་དགུ་བརྩེགས་འབར་བ་ནས། །ནག་མོ་མི་བཟད་འཛེམ་བག་མེད། །དྲིབ་ལེན་བཙོས་རྐའི་མགོ་བོས་བསྐང་། །འབྲུམ་བུའི་ནད་རྣམས་ཞི་བར་མཛོད། །ཧཱུཾ། སྦྲུལ་ནག་གདེངས་པའི་དཀྱིལ་འཁོར་ནས། །འབྲོག་མོ་འབུམ་གྱི་ཁ་བློན་མོ། །ཙུན་ད་རིག་པས་ཐུགས་དམ་བསྐང་། །ཤ་བཀྲའི་ནད་རྣམས་ཞི་བར་མཛོད། །ཧཱུཾ། དུང་མཁར་ཟོ་བའི་ནང་ཤེད་ནས། །དཀར་མོ་ཉག་གཅིག་སེམས་མའི་མཆོག །གཡུ་བྱ་སྔོན་མོ་སྣ་ཚོགས་མདོག །སྤྱན་ནི་བསྐལ་པའི་མེ་དབལ་འབར། །གསུང་གིས་ཁམས་གསུམ་གནད་ལ་འདོར། །སྡེར་མོ་ལྕགས་ཀྱུ་འདྲིལ་བ་འདྲ། །གཤོག་འདབ་ཡི་གེ་ཛ་བྲིས་པས། །རྨུ་ཡི་ཚོགས་རྣམས་འདུལ་བར་མཛད། །ལྐུགས་པའི་ནད་རྣམས་ཞི་བར་མཛོད། །མཐིང་གི་གུར་ཕུབ་ལྡིང་བ་ནས། །སྔོན་མོ་གཡུ་ཡི་རལ་པ་ཅན། །བདུད་བྱ་ནག་མོ་ལྕགས་མིག་མ། །མཆུ་ནི་བྱུ་རུ་འབར་བ་ལ། །སྐད་ནི་སྲིན་པོའི་གདངས་སྐད་ཅན། །གཤོག་རླབས་ལྷ་སྲིན་དབང་དུ་སྡུད། །སྲིད་པ་བྱ་ཡི་ལྟོགས་རྟོགས་འདོད་ཡང་ནད་ཅན། །འདི་ཡི་ཁྲག་གིས་ཐུགས་དམ་བསྐང་། །སྨྲ་བའི་ནད་རྣམས་ཞི་བར་མཛོད། །བྱུ་རུའི་གུར་ཕུབ་ལྡིང་བ་ན། །དམར་མོ་དུང་ཤིང་མཁའ་ལ་འགྲོ། །དུར་ཁྲོད་ལྷ་སྲིན་གདུག་པའི་བྱ། །གསེར་མིག་འཁྱིལ་པའི་འོད་འཕྲོ་ཞིང་། །ཟ་འོག་འཇོལ་བེར་ལུས་ལ་གོན། །སྲོག་ཆགས་དྭངས་པའི་གདངས་སྐད་ཅན། །ལྷ་སྲིན་འདུལ་བའི་བྱ་སྐད་ཅན། །འཕྱོ་ཞིང་སྒྲེགས་པའི་ནད་རྣམས་ཞི་
བར་མཛོད། །གསེར་མཁར་གྲུ་བཞི་སྤྲས་པ་ན། །སེར་མོ་འཕུར་བའི་ལྡིང་སྟབས་ཅན། །མོན་བྱ་ཏི་པ་བྱུ་རུའི་རྭ། །བཙོ་མ་གསེར་གྱི་སླག་པ་ལ། །སྐད་ནི་ནམ་མཁའི་གདངས་ལ་སྒྲོགས། །འདོད་ཆགས་རྒྱལ་མོ་འདི་ཡིས་བསྐང་། །གློ་སུབ་ནད་རྣམས་ཞི་བར་མཛོད། །ཧཱུཾ། ཤར་ཕྱོགས་ནམ་མཁའི་དཀྱིལ་ཡངས་ནས། །དཔལ་གྱི་མདངས་འཕྲོག་ན་བཟའི་གཟི། །དྲི་ཟ་མགོ་བཅད་ཁྲག་གིས་བསྐང་། །ལྷོ་ཕྱོགས་ནམ་མཁའི་དཀྱིལ་ཡངས་ནས། །དཔལ་གྱི་ཁྲག་འཕྲོག་ནམ་མཁའི་གཟི། །གཤིན་རྗེའི་མགོ་བཅད་ཁྲག་གིས་བསྐང་། །ནུབ་ཕྱོགས་ནམ་མཁའི་དཀྱིལ་ཡངས་ནས། །དཔལ་གྱི་དྲོད་འཕྲོག་ནམ་མཁའི་གཟི། །ཀླུ་བདུད་མགོ་བཅད་ཁྲག་གིས་བསྐང་། །བྱང་ཕྱོགས་ནམ་མཁའི་དཀྱིལ་ཡངས་ནས། །དཔལ་གྱི་དྲོད་འཕྲོག་ནམ་མཁའི་གཟི། །གནོད་སྦྱིན་མགོ་བཅད་ཁྲག་གིས་བསྐང་། །ནམ་མཁའི་ཁམས་ཀྱི་གློག་མ་སྲིན། །དམ་སྲི་འདི་ཡི་ཐོད་པས་བསྐང་། །བར་སྣང་ཁམས་ཀྱི་གློག་མ་སྲིན། །དམ་སྲི་འདི་ཡི་སྙིང་གིས་བསྐང་། །ས་ཡི་ཕུང་བྱེད་ནག་མོ་སྟེ། །དམ་སྲི་འདི་ཡི་འབྲས་བུས་བསྐང་། །བྱང་ཤར་སྟག་སྨན་ཟོར་བ་གདོང་། །འདི་ཡི་ལག་པ་གཡས་པས་བསྐང་། །ནུབ་བྱང་བམ་སྲིན་དྲེད་མོའི་གདོང་། །འདི་ཡི་ལག་པ་གཡོན་པས་བསྐང་། །ལྷོ་ནུབ་འབྲོག་སྲིན་ཆུ་སྲིན་གདོང་། །འདི་ཡི་རྐང་པ་གཡས་པས་བསྐང་། །ཤར་ལྷོ་བ་ལམ་དྲེའུ་སྣ་མ། །འདི་ཡི་རྐང་པ་གཡོན་པས་བསྐང་། །དུང་གི་སྤྱང་མོ་མགོ་དགུ་མ། །སྤྱང་མོ་དར་མའི་སྙིང་གིས་བསྐང་། །ལྕགས་ཀྱི་ཁྱི་མོ་མགོ་དགུ་མ། །སྤྱང་མོ་དར་མའི་སྙིང་གིས་བསྐང་། །ལྕགས་ཀྱི་སྤྱང་མོ་མགོ་དགུ་མ། །ལྕགས་ཀྱི་ཁྱི་མོའི་སྙིང་གིས་བསྐང་། །ཟངས་ཀྱི་འཕར་བ་ལྕེ་བརྒྱད་མ། །འཕར་བ་རྐན་རྡེབ་སྙིང་གིས་བསྐང་། །གསེར་གྱི་ཝ་མོ་རྫུ་འཕྲུལ་ཅན། །ཝ་མོ་འདི་ཡི་སྙིང་གིས་
བསྐང་། །ལྷ་ཡི་བུ་མོ་མདངས་འཕྲོག་མ། །ངེས་མེད་འདི་ཡི་ཤ་ཡིས་བསྐང་། །གཤིན་རྗེའི་བུ་མོ་དྲི་སྣོམ་མ། །ངེས་མེད་འདི་ཡི་ཁྲག་གིས་བསྐང་། །ཀླུ་ཡི་བུ་མོ་ཁྲག་འཇིབས་མ། །ངེས་མེད་འདི་ཡི་རུས་པས་བསྐང་། །གནོད་སྦྱིན་བུ་མོ་ལས་མཁན་མ། །ངེས་མེད་འདི་ཡི་དབུགས་ཀྱིས་བསྐང་། །ལྷ་ཆེན་བུ་མོ་ལྷ་མོ་དབང་། །འདི་ཡི་ཁྲག་གིས་ཐུགས་དམ་བསྐང་། །དཔལ་ཆེན་བུ་མོ་དཔལ་མོ་དབང་། །འདི་ཡི་ཁྲག་གིས་ཐུགས་དམ་བསྐང་། །གནོད་སྦྱིན་བུ་མོ་ལེགས་མོ་དབང་། །འདི་ཡི་ཁྲག་གིས་ཐུགས་དམ་བསྐང་། །འཇོག་པོའི་བུ་མོ་ཀླུ་མོ་དབང་། །འདི་ཡི་ཁྲག་གིས་ཐུགས་དམ་བསྐང་། །ཚངས་མ་རྡོ་རྗེ་མགོ་བཞི་མ། །ཁྲོ་མོ་རྡོ་རྗེ་གཟིག་གི་མགོ། །ཁྱབ་འཇུག་རྡོ་རྗེ་དྲེད་མོའི་མགོ། །གཞོན་ནུ་རྡོ་རྗེ་ཕ་ཝང་མགོ། །དབང་མོ་རྡོ་རྗེ་དོམ་གྱི་མགོ། །ནག་མོ་རྡོ་རྗེ་ཁྱུང་གི་མགོ། །དབང་མོ་རྡོ་རྗེ་དྲེད་ཀྱི་མགོ། །ཤར་ཕྱོགས་གླིང་ཁམས་ཟླ་གམ་དུ། །དར་དཀར་ཕྱར་བ་གསར་བཏིང་ནས། །རྟ་དང་བོང་བུ་དྲེའུ་དང་རྐྱང་། །རྨིག་པ་ཟླུམ་པོར་གཏོགས་པའི་རིགས། །ཤར་གྱི་མ་བདུན་ཐུགས་དམ་བསྐང་། །ཕུང་པོའི་ནད་རྣམས་ཞི་བར་མཛོད། །ཆུ་ལྷ་རྡོ་རྗེ་ཆུ་སྲིན་མགོ། །བེ་ཅོན་རྡོ་རྗེ་ཁྲ་ཡི་མགོ། །སྲིན་མོ་རྡོ་རྗེ་སྟག་གི་མགོ། །ཟ་བ་རྡོ་རྗེ་ཕག་གི་མགོ། །གཅིག་སྤྱོད་རྡོ་རྗེ་བྱ་རྒོད་མགོ། །ཁྲག་འཐུང་རྡོ་རྗེ་རྟ་ཡི་མགོ། །ཕྲག་དོག་རྡོ་རྗེ་གཟིག་གི་མགོ། །ལྷོ་ཕྱོགས་གླིང་ཁམས་སོག་ཁ་ལ། །མཐིང་ནག་ཕྱར་བ་གསར་བཏིང་ནས། །བ་དང་མཛེ་དང་ཤ་བ་གནག །རྨིག་པ་ཁ་བྲག་གཏོགས་པའི་རིགས། །ལྷོ་ཕྱོགས་མ་བདུན་ཐུགས་དམ་བསྐང་། །ཚོར་བའི་ནད་རྣམས་ཞི་བར་མཛོད། །གྲུབ་པ་རྡོ་རྗེ་པུ་ཤུད་མགོ། །རླུང་མོ་རྡོ་རྗེ་ཤ་བའི་མགོ། །བུམ་པ་རྡོ་རྗེ་སེང་གེའི་མགོ། །གསོད་བྱེད་རྡོ་རྗེ་སྤྱང་ཀིའི་མགོ། །མི་མོ་རྡོ་རྗེ་ཀྱུང་ཀའི་མགོ། །གཏུམ་མོ་རྡོ་རྗེ་ཕག་གི་མགོ། །རྒན་བྱེད་རྡོ་རྗེ་ཁྱུང་གི་མགོ། །
ནུབ་ཕྱོགས་གླིང་ཁམས་ཟླུམ་པོ་རུ། །དར་དམར་ཕྱར་བ་གསར་བཏིང་ནས། །འདམ་ཟན་མ་ནི་ཤ་ཟན་དང་། །སྒུམ་ཐུ་ལ་སོགས་རིགས་གསུམ་པོ། །སྦྲུལ་དང་སྡིག་པ་ལ་སོགས་པས། །ནུབ་ཕྱོགས་མ་བདུན་ཐུགས་དམ་བསྐང་། །འདུ་ཤེས་ནད་རྣམས་ཞི་བར་མཛོད། །སྣ་ཚོགས་རྡོ་རྗེ་བ་གླང་མགོ། །ཀླུ་མོ་རྡོ་རྗེ་སྦྲུལ་གྱི་མགོ། །བདག་ཉིད་རྡོ་རྗེ་ཀུན་གྲགས་མ། །བུམ་སྣ་རྡོ་རྗེ་སྲིན་མོའི་མགོ། །དམར་སེར་རྡོ་རྗེ་ར་ཡི་མགོ། །བུམ་སྣ་རྡོ་རྗེ་སྤྲེལ་གྱི་མགོ། །ལྗང་ནག་རྡོ་རྗེ་འུག་པའི་མགོ། །བྱང་ཕྱོགས་གླིང་ཁམས་གྲུ་བཞི་ལ། །དར་སེར་ཕྱར་བ་གསར་བཏིང་ན། །སྤྲ་དང་སྤྲེལ་དང་ཤང་ཤང་དང་། །མི་ལ་སོགས་ཏེ་གདོང་པ་ཅན། །བྱང་ཕྱོགས་མ་བདུན་ཐུགས་དམ་བསྐང་། །འདུ་བྱེད་ནད་རྣམས་ཞི་བར་མཛོད། །སྨན་ཕྲན་ཡོངས་ཀྱི་བཀའ་སྡོད་མ། །བོད་ཁམས་སྐྱོང་བར་མཚན་གྲགས་པའི། །ཕྲ་མེན་གསེར་སྐྱེམས་མཆོད་པས་བསྐང་། །རིམས་ནད་ཐམས་ཅད་ཞི་བར་མཛོད། །རི་རབ་གླིང་བཞིའི་གཏོར་མ་ནི། །རྡོ་རྗེ་རྒྱ་གྲམ་མིག་མང་རིས། །རིན་ཆེན་སྣ་ལྔ་རིམ་བརྩེགས་ཚུལ། །དཔག་བསམ་ཤིང་བུ་བདུད་རྩིའི་བཅུད། །ལྷ་སྲིན་སྡེ་བརྒྱད་བསྐོར་ཕྱག་འཚལ། །ཙུ་ཏའི་ཤིང་དང་གེལ་པའི་ཤིང་། །འཛམ་བུའི་ཤིང་དང་སྒྲ་སྒྲོགས་པ། །ཕྱོགས་བཞིར་བྱུ་རུའི་སྐས་བཙུགས་ནས། །གཏོར་ཐོགས་གཞོང་ཐོགས་ལྷ་བྲན་རྣམས། །བྱང་ཆུབ་ཤིང་ལ་སྐྱེས་ཤིང་མཆོད། །རི་བདུན་བང་རིམ་བརྩེགས་པའི་ཚུལ། །རོ་དྲུག་རྒྱ་མཚོ་སྣ་ཚོགས་མདོག །བུམ་པ་བདུད་རྩི་ཆུ་མིག་བཞི། །ལྷ་རུ་གྲགས་པའི་གསོས་སུ་ཆེ། །ལྕགས་རི་འབར་བའི་མཐའ་བསྐོར་ཅན། །སྲིད་པ་ཕོ་རྒྱུད་མོ་རྒྱུད་དང་། །མ་མོར་གྲགས་པ་ཀུན་གྱི་གནས། །སྤྲུལ་པའི་འཁོར་ལོ་ཐམས་ཅད་ལ། །སྣང་སྲིད་གཟུགས་ཀྱིས་བསྐང་བྱས་པས། །ཡོན་ཏན་ནམ་མཁའི་མཐའ་དང་མཉམ། །མཆོག་དང་ཐུན་མོང་དངོས་གྲུབ་ཐོབ། །
བསྐང་ལུང་ལས་ཀྱི་རྒྱ་མཚོ་ལས། སྲིད་པའི་སྲོག་སྐོང་གི་ལེའུ་སྟེ་བཅུ་བཞི་པའོ།། །།ཕྲ་མེན་རྒྱ་མཚོས་ཡང་གསོལ་པ། ཤིན་ཏུ་བྱིན་རླབས་ཆེན་པོ་དང་ལྡན་པའི་ཧེ་རུ་ཀ་ལ། དབང་བསྐུར་བའི་རིམ་པ་འདི། དུས་འདིར་བདག་ལ་བསྟན་དུ་གསོལ། །ཡང་དག་རྫོགས་ཀྱིས་བཀའ་སྩལ་པ། །དབྱར་དགུན་སྟོན་དཔྱིད་ར་བ་ཡི། །བརྒྱད་དང་གནམ་སྟོང་ཉ་ལ་བསྐུར། །སངས་རྒྱས་ཀུན་ལ་དབང་བསྐུར་ཞིང་། །སྲིད་པ་གསུམ་ལ་དབང་སྒྱུར་ཞིང་། །མཁའ་འགྲོ་དབང་ཕྱུག་དབང་དུ་སྡུད། །འཇིག་རྟེན་དགོས་པ་ཐམས་ཅད་འགྲུབ། །དབང་བསྐུར་གནང་བ་མ་ཐོབ་པར། །གང་ཞིག་སྔགས་ལ་འཇུག་བྱེད་པ། །ཉན་དང་སྒྲུབ་པ་བྱེད་པ་རྣམས། །འཁོར་ལོ་སྲོག་ཤིང་མེད་དང་འདུ། །ངོ་བོ་ཉི་ཤུ་རྩ་གཅིག་སྟེ། །རྡོ་རྗེ་རྒྱལ་པོའི་དབང་དང་ནི། །རྡོ་རྗེ་སློབ་དཔོན་གྱི་དབང་དང་། འབར་བ་ཆེན་པོའི་དབང་དང་། འཁོར་ལོ་སྒྱུར་བའི་དབང་དང་། རྒྱལ་ཐེབས་སྤྱི་བླུགས་ཀྱི་དབང་དང་། རྡོ་རྗེ་རྒྱལ་ཐེབས་ཀྱི་དབང་དང་། ཀརྨའི་དབང་དང་། གིང་གི་དབང་དང་། ཉན་པའི་དབང་དང་། ཕྲིན་ལས་མཐར་ཕྱིན་གྱི་དབང་དང་། ཐབས་དང་ཤེས་རབ་ཀྱི་དབང་དང་། རྡོ་རྗེ་ཚེའི་དབང་དང་། དངོས་གྲུབ་རྣམ་གསུམ་གྱི་དབང་དང་། མཐུ་སྟོབས་ཕུན་སུམ་ཚོགས་པའི་དབང་དང་། འཆད་པའི་དབང་དང་། དེ་བཱི་ཡུམ་གྱི་དབང་དང་། རྒྱན་ཆས་རྟགས་ཀྱི་དབང་དང་། ལོངས་སྤྱོད་རྫས་ཀྱི་དབང་དང་། རོལ་པ་ཆེན་པོའི་དབང་དང་། ཕྱི་ནང་གསང་བའི་དབང་ངོ་། །ཐོག་མར་བདག་ལ་གང་གནང་བ། །དེ་ནི་སློབ་མ་དེ་ལ་སྦྱིན། །ཕྲིན་ལས་གཞུང་ཐུབ་འཛིན་པ་ལ། །རང་རྟགས་རྡོ་རྗེ་དྲིལ་བུ་སྦྱིན། །སྒྲུབ་པའི་དོན་མཆོག་ལྷུར་ལེན་པར། །རྫས་མཆོག་བཟང་པོའི་དབང་རྟགས་སྦྱིན། །འཆད་ཅིང་སྟོན་པར་བྱེད་པ་ལ། །གསེར་གྱི་གླེགས་བམ་བཟང་པོ་སྦྱིན། །བསྒོམ་པའི་དབང་དང་ལྡན་པ་ལ། །རིན་པོ་ཆེ་ཡི་ཕྲེང་བ་སྦྱིན། །ཟབ་མོའི་དབང་མཆོག་ལྡན་པ་ལ། །མཐིང་ག་ལེ་བརྒན་ཅོད་པན་སྦྱིན། །
བླ་མ་མཆོད་པའི་རིམ་པ་ལ། །འཛམ་གླིང་རིན་ཆེན་གང་བ་དང་། །རྟ་དང་གླང་པོ་དུད་འགྲོའི་ཚོགས། །རྫ་དང་ཤིང་ལས་སྐྱེས་པ་ཡི། །དེ་ཡི་གྲངས་དེ་དབུལ་བར་བྱ། །འདི་དང་ལྡན་པའི་བུ་མཆོག་ནི། །སངས་རྒྱས་སེམས་ཅན་ཐམས་ཅད་ལ། །ཡིད་ཅི་དགའ་བར་དབང་ཡང་བསྐུར། །མ་མོ་མཁའ་འགྲོ་བྲན་བཞིན་ཁོལ། །ཚེ་དང་ལོངས་སྤྱོད་ཕུན་སུམ་ཚོགས། །ངན་སོང་གསུམ་པོ་ཀུན་སྤངས་ནས། །བླ་མེད་འབྲས་བུ་ཐོབ་པར་འགྱུར། །ཚེ་ཟད་འཆི་བར་ངེས་པ་ཡང་། །ཚེ་དཔག་མེད་པ་ཐུབ་པར་འགྱུར། །དབང་ཕྱུག་ལས་ཀྱི་རྒྱ་མཚོ་ལས། དབང་གི་ལེའུ་སྟེ་བཅོ་ལྔ་པའོ།། །།བཞི་བསྡུས་པ་ཡི་དཀྱིལ་ཁོར་ནས། །རྩ་བརྒྱད་སྟོང་དང་ཙཀྲ་བརྒྱད། །སྙིང་པོ་གཉིས་ཏེ་རྫོགས་པའི་ལུང་། །རིམ་གྱིས་བཤད་དེ་བྱེ་བྲག་དབྱེ། །གྲུབ་པའི་མཆོག་སྟེ་སྤྱོད་པས་བསྟན། །མཐར་གྱིས་བགྲོད་དེ་གནས་སུ་བྱུང་། །དེ་ལ་ཧཱུཾ་ཉིད་རིང་པོར་སྤྲོས། །ཐིག་བཞིན་ལྡན་པའི་དཀྱིལ་འཁོར་ནས། །ཀུན་ནས་ཟླུམ་པའི་ཐིག་ལེ་ནི། །བཟླས་པས་སྐྱེ་ཤི་སྡུག་བསྔལ་སྤངས། །ཤྲཱི་མ་ཧཱ་སུ་ཁ་བཛྲ་བོ་དྷི་ཧཱུཾ་ཧོ། ལྟ་སྤྱོད་རྣམ་བཞིས་ཐག་བཅད་དེ། །ཆགས་སྡང་རྣམ་གཉིས་རྩད་བཅད་ནས། །བག་ཆགས་རྣམ་གཉིས་དབྱིངས་སུ་དགོད། །ང་རྒྱལ་ཕྲག་དོག་གནས་འགྱུར་ཏེ། །སྒོམ་སྒྲུབ་རྣམ་གཉིས་རྣམ་པར་སྤངས། །གཏི་མུག་ཆེན་པོ་ཡང་དག་ཉིད། །ཡང་དག་སྐུ་ལྔ་མངོན་པར་ཤར། །དེ་ལ་གསུང་ལྔ་ཡང་དག་གྲགས། །དེ་ལ་ཐུགས་ལྔ་རྟོག་པ་མེད། །ཡོན་ཏན་ལྔ་ཡང་མངོན་པར་ཤར། །ཕྲིན་ལས་ལྔ་ཡང་ཡང་དག་མཛད། །དེ་ལ་བླ་མེད་ཧེ་རུ་ཀ །དཔལ་འབར་ཀྲོ་ཏཱི་ཤྭ་རཱིའི་སྐུ། །སྦྱོར་བས་སྐྱེ་ཤི་རྩ་བ་གཅོད། །བཅུ་དྲུག་ས་ལ་མངོན་པར་ཕྱིན། །དབང་ཕྱུག་ལས་ཀྱི་རྒྱ་མཚོ་ལས། བཞི་བསྡུས་ཐིག་ལེའི་ལེའུ་སྟེ་བཅུ་དྲུག་པའོ།། །ཁྲུ་བརྒྱད་པ་ཡི་དཀྱིལ་འཁོར་དུ། །སྦྱང་དང་བསྲུང་བའི་ལས་རྣམས་བྱ། །སྲད་བུ་ཚོན་གྱི་ཆོ་ག་བྱ། །འོག་
གཞི་འཁོར་ལོ་རྩིབས་བཞི་བྲི། །དབུས་སུ་འཁོར་ལོ་རྩིབས་བཞི་ལ། །དབུས་སུ་ཧཱུཾ་མུཾ་ཡབ་ཡུམ་བསྐྱེད། །ཨོཾ་སརྦ་ཏ་ཐཱ་ག་ཏ་ཤྲཱི་ཧེ་རུ་ཀ་ཧཱུཾ་ཕཊ། དབུ་དགུ་ཕྱག་ནི་བཅོ་བརྒྱད་ལ། །ཞབས་ཀྱང་རྣམ་པ་བརྒྱད་དུ་བསྟན། །གཤོག་པ་རྡོ་རྗེ་འབར་བས་གཏམས། །དུར་ཁྲོད་ཆས་བརྒྱད་སྐུ་ལ་རྫོགས། །ཀྲོ་ཏཱི་ཤྭ་རཱི་ས་མ་ཡ་ཧཱུཾ་ཕཊ། ཡབ་དང་གཉིས་སུ་མེད་པ་སྟེ། །ཆ་ལུགས་ཐམས་ཅད་གཙོ་དང་མཐུན། །འཁོར་ལོ་བཞི་ལ་གསང་བའི་ཡུམ། །ཙ་ར་མ་ནུ་ཕཊ། རཏྣ་ད་རུ་ཕཊ། པདྨ་གུར་པ་ཡ་ཕཊ། གར་སེ་ཏྲི་ཏ་ཡ་ཕཊ། དཀར་མོ་ཉི་མའི་གའུ་ཅན། །སེར་མོ་རིན་ཆེན་འོད་འབར་མ། །དམར་མོ་པདྨའི་བཅུད་འཛིན་མ། །ལྗང་མོ་རྡོ་རྗེ་རྒྱ་གྲམ་ཅན། །ཕྱི་ཡི་ཤར་གྱི་འཁོར་ལོ་ལ། །དངུལ་གྱི་ཕུར་པ་བཅུ་པོ་དང་། །སྒོ་བཞིར་མཆོག་གི་ཕུར་པ་བཞི། །ཡབ་ཡུམ་མཁའ་ནས་ཁྲོ་བཅུ་དགོད། །སྒོ་བཞིར་ཏ་ཀྲིཏ་བཞི་པོ་དགོད། །བཛྲ་གར་བྷ་ཀཱི་ལ་ཡ་ཕཊ། རཏྣ་གར་བྷ་ཀཱི་ལ་ཡ་ཕཊ། པདྨ་གར་བྷ་ཀཱི་ལ་ཡ་ཕཊ། ཀརྨ་གར་བྷ་ཀཱི་ལ་ཡ་ཕཊ། མཻ་ཏྲི་ཀཱི་ལ་ཡ་ཕཊ། ཀ་རུ་ཎ་གར་བྷ་ཀཱི་ལ་ཡ་ཕཊ། ལོ་ཀ་ཀཱི་ལ་ཡ་ཕཊ། བི་རུ་ཀཱི་ལ་ཡ་ཕཊ། གར་བྷ་ཀཱི་ལ་ཡ་ཕཊ། ཡགྴ་ཀཱི་ལ་ཕཊ། སརྦ་དུ་ཤ་ཕཊ། སིངྷ་ཤི་རི་ཕཊ། གར་ཤ་ཧེ་ཕཊ། ཛག་ཤ་ཕཊ། ཨོཾ་མ་ཧཱ་ཤཱུ་ནྱ་ཏཱ་ཛྙཱན་བཛྲ་སྭ་བྷཱ་བ་ཨཱདྨ་ཀོ྅ཧཾ། ཨཱ་དཪྴ་ཨ་ཧཾ། ས་མན་ཏ་ཨ་ཧཾ། པྲ་ཏི་བེཀྵ་ཎ་ཨ་ཧཾ། ཀྲྀ་ཏྱཱ་ནུཥྠ་ན་ཨ་ཧཱཾ། ཀཱ་ཡ་བཛྲ་སྭ་བྷཱ་བ་ཨཱདྨ་ཀོ྅ཧཾ། ཝཱཀ་བཛྲ་སྭ་བྷཱ་བ་ཨཱདྨ་ཀོ྅ཧཾ། ཙིཏྟ་བཛྲ་སྭ་བྷཱ་བ་ཨཱདྨ་ཀོཉཱཧཾ། ཛཿཧཱུཾ་བཾ་ཧོཿ། ཐུགས་རྗེ་བྱམས་སྙོམས་འགྱུར་བ་མེད་པའི་སྐུ། །ཧཱུཾ་ལྔ་འདྲེལ་པའི་གསུང་ལས་འགྲོ་དོན་མཛད། །ཐུགས་ལྔ་མི་རྟོག་ཅིར་ཡང་ས་ལེར་མཁྱེན། །སྐུ་གསུང་ཐུགས་ཀྱི་གཙོ་ལ་ཕྱག་འཚལ་བསྟོད། །ཐུགས་རྗེ་དབྱིངས་རྫོགས་རཀྟའི་རྒྱ་མཚོ་འཁོལ། །དཔལ་ཆེན་ཁྲོ་ཚོགས་ཞལ་དུ་མཆོད་པར་བཞེས། །དམ་རྫས་རྣམ་ལྔ་རང་བྱུང་བདུད་རྩི་ལྔ། །དུག་ལྔ་བཅོམ་པས་ཡེ་ཤེས་མཆོད་པར་བཞེས། །སྲིད་པའི་ཤ་ཆེན་
སྤུངས་པའི་བ་ལིཾ་ཏ། །འཁོར་ཡུག་རྟོགས་པའི་མཆོད་པ་ཆེན་པོར་བཞེས། །དེ་ནས་ཐུགས་ཀྱི་བསྙེན་པ་བྱ། །ཨོཾ་ཤྲཱི་ཧེ་རུ་ཀ་ཀྲོ་ཏཱི་ཤྭ་རཱི་བཛྲ་ཀཱི་ལི་ཀཱི་ལ་ཡ་ཧཱུཾ་ཕཊ། ཤར་གྱི་འཁོར་ལོའི་ལྟེ་བ་ལ། །ལིངྒ་འོད་འབར་ནུབ་ཏུ་བསྟན། །སྣ་ཚོགས་དྲི་ཡི་ཐག་པས་གདགས། །རྟེན་དང་མཚན་མ་སྙིང་དང་བྲལ། །ཆོས་ཉིད་བཀའ་ཡི་བདེན་པ་བདར། །གསུམ་ལྡན་དོན་དང་ལྡན་བྱས་ཏེ། །དྲིལ་ཅིང་འབྱུང་བ་གསུམ་གྱིས་སྦྱང་། །དམིགས་པའི་ཕྱོགས་བཅུར་ཁྱབ་པར་བྱ། །ལྷུ་དུམ་ཕྲལ་ཏེ་ཟོས་བསམ་ནས། །དེ་ནས་ཞི་བའི་མེ་ལ་བསྲེག །ཐལ་བ་གནོད་པའི་ས་རུ་སྦ། །ཕྱི་བའི་རྐྱལ་པར་གཟུགས་བཅུག་ལ། །ཉི་ཟེར་ཞགས་པས་བཏགས་ནས་ནི། །རྒྱལ་པོ་དེ་དེ་བས་ཀྱང་ལ་བྲབ་པར་བྱ། །ཨོཾ་ཤྲཱི་ཧེ་རུ་ཀ་དན་ལ་དུན་རྦད། ཁ་འདར་ལིང་། མྱོགས་རྨུག་རྦད་ཕཊ་སྭཱ་ཧཱ། ཤིན་ཏུ་འགུལ་ན་ཐུན་དུ་འཕང་། དབང་ཕྱུག་ལས་ཀྱི་རྒྱ་མཚོ་ལས། སྤྱི་དཔལ་ཕུར་ནག་གི་ལེའུ་སྟེ་བཅུ་བདུན་པའོ།། །།སྟོང་པ་ཉིད་ཀྱི་ངང་ཉིད་ལས། །ལྷོ་ཡི་འཁོར་ལོའི་གདན་སྟེང་དུ། །ཡབ་ཡུམ་མཁའ་ནས་ཨོཾ་ཡང་འོད་འཕྲོས་པས། །ཁྲོ་བཅུ་ཟ་བྱེད་བཞི་རུ་གསལ། །གསེར་གྱི་ཕུར་པ་བཅུ་དགོད་ནས། །སྒོ་བཞིར་སེང་ལྡེང་ཕུར་པ་དགོད། །ཡགྴ་ཀཱི་ལ་ཡ་ཕཊ། རགྴ་ཀཱི་ལ་ཡ་ཕཊ། བི་ཤྭ་ཀཱི་ལ་ཡ་ཕཊ། བི་ཤ་ཀཱི་ལ་ཡ་ཕཊ། ཏེ་ཤ་ཀཱི་ལ་ཡ་ཕཊ། ཀེ་ཤ་ཀཱི་ལ་ཡ་ཕཊ། བེ་ཤ་ཀཱི་ཡ་ཡ་ཕཊ། བི་ཤ་ཀཱི་ལ་ཡ་ཕཊ། དྷྲི་ཤ་ཀཱི་ལ་ཡ་ཕཊ། ཏྲ་ཤ་ཀཱི་ལ་ཡ་ཕཊ། ཀ་ཤ་ཕཊ། བག་ཤ་ཕཊ། རུ་ཏྲི་ཕཊ། རག་ཏྲི་ཕཊ། དབང་དང་བྱིན་བརླབ་ལྡན་པར་བྱ། །མཆོད་དང་བཟླས་པ་གོང་བཞིན་བྱ། །ལྷོ་ཡི་འཁོར་ལོའི་ལྟེ་བ་ལ། །གྲུ་བཞི་བྷ་གའི་དབྱིངས་ཉིད་དུ། །བདུན་དང་ལྡན་པའི་གཟུགས་ཉིད་ལ། །ཡན་ལག་ཧཱུཾ་ལ་གསང་བར་ཕཊ། །སྙིང་གར་མ་ར་ཡ་དང་ལྡན། །ལུང་གསུམ་ལྡན་ན་ཨ་ཡིས་བསྡུ། །སྟེང་གི་ཕྱོགས་བཅུར་ཁྱབ་པར་སྦྱངས། །ཡན་ལག་བཞི་ལ་ཏ་ཀྲིཏ་སྦྱར། །གདབ་པ་གོང་གི་སྔགས་ཀྱིས་གདབ། །ལྷུ་དུམ་ཕྲལ་ཏེ་བསྟབ་པར་བྱ། །དེ་ནས་རྒྱས་པའི་སྦྱིན་བསྲེག་བྱ། །ཐལ་བ་གནོད་པའི་
ས་རུ་སྦ། །སྟག་མོ་དར་མའི་རྐྱལ་པ་རུ། །གཟུགས་དང་དུག་གི་རྫས་སྦྱར་ལ། །ལྕགས་དང་ཟངས་ཀྱི་གཟེར་གྱིས་གདབ། །ཨོཾ་ཤྲཱི་ཧེ་རུ་ཀ །དུར་བ་ཁ་ཐུན་རྦད། རགྴ་ཛ་དུར་བྷྱོ། ལི་ཀྲ་ཐུན་ཏྲ་ཆུམ། སྲོག་ལ་ཡང་སྭཱ་ཧཱ། འགུལ་ན་ཉི་ཟེར་རྟ་ལ་བསྐྱོན། །དབང་ཕྱུག་ལས་ཀྱི་རྒྱ་མཚོ་ལས། ཕུར་ནག་གདེང་ཆེན་གྱི་ལེའུ་སྟེ་བཅོ་བརྒྱད་པའོ།། །།དེ་ནས་སྐད་ཅིག་གསུམ་པ་ལ། །ནུབ་ཀྱི་འཁོར་ལོའི་དཀྱིལ་ཉིད་དུ། །ཡབ་ཡུམ་ཐབས་དང་ཤེས་རབ་ལས། །གསང་བ་སྔགས་ཀྱིས་བསྐྱེད་བྱ་བ། །ཟངས་ཀྱི་ཕུར་པ་བཅུ་བཀོད་ནས། །སྒོ་བཞིར་སྐྱེར་པའི་ཕུར་པ་དགོད། །ཧཱུཾ་ཀཱ་ར་ཀཱི་ལ་ཡ་ཕཊ། བི་ཛ་ཡ་ཀཱི་ལ་ཡ་ཕཊ། ནཱི་ལ་དཎྜ་ཀཱི་ལ་ཡ་ཕཊ། ཡ་མཱན་ཏ་ཀཱི་ལ་ཡ་ཕཊ། ཨཱརྱ་ཀཱི་ལ་ཡ་ཕཊ། ཧ་ཡ་གྲཱི་ཝ་ཀཱི་ལ་ཡ་ཕཊ། ཨ་པ་ར་ཛི་ཏ་ཀཱི་ལ་ཡ་ཕཊ། ཨ་མྲྀ་ཏ་ཀཱི་ལ་ཡ་ཕཊ། ཏྲཻ་ལོ་ཀྱ་ཀཱི་ལ་ཡ་ཕཊ། མ་ཧཱ་བ་ལ་ཀཱི་ལ་ཡ་ཕཊ། ཛ་ལ་ཕཊ། ཀེ་དུ་ར་ཕཊ། རིག་ཤ་ཕཊ། ཧ་ཏེ་ཕཊ། དབང་ལྔ་བྱིན་གསུམ་ལྡན་བྱས་ནས། །མཉེས་དང་བསྟོད་པའི་ལས་སུ་བྱ། །བསྙེན་པ་དམིགས་པའི་དོན་དུ་ལྡན། །ནུབ་ཀྱི་པདྨ་ཟླ་གམ་དུ། །གདུག་པ་དྲག་པོའི་གཟུགས་ཉིད་ལ། །ཡན་ལག་ལྔ་པོ་ཐམས་ཅད་ལ། །མནན་དང་སྦར་བའི་སྔགས་ཀྱིས་བསྐོར། །ཛ་ཡིས་དྲངས་ཤིང་ཕཊ་ཀྱིས་བསྡིམ། །ཉི་ཟླ་ལྡན་པའི་རྒྱལ་བ་ཡིས། །རྟེན་གྱི་ཕྱོགས་བཅུར་སྦྱར་བྱས་ནས། །ཧྲཱྀཿལ་ཧཱུཾ་གིས་བསྡུ་བྱས་ཏེ། །ཡན་ལག་ཏ་ཀྲིཏ་སྦྱར་བར་བྱ། །ལྷུ་དུམ་ཕྲལ་ཏེ་ཟོས་བསམ་ནས། །དབང་གི་སྦྱིན་བསྲེག་དེ་བཞིན་བྱ། །ཐལ་བ་ཀླུ་ལ་གཏད་དེ་གནན། །ཟངས་སྲིན་གླང་དམར་སྲོག་རྟེན་དུ། །རྟེན་གྱི་གསལ་ཕུར་དྲག་པོས་བྲབ། །ཨཱོཾ་ཤྲཱི་ཧེ་རུ་ཀ །ཟིར་བ་ཁ་ཐུན་ལི་ཀྲི་ཆུམ། །སྲོག་ལ་ཡ་ཡ། ཁྲག་ལ་ཐིབས་སྭཱ་ཧཱ། དབང་ཕྱུག་ལས་ཀྱི་རྒྱ་མཚོ་ལས། ཕུར་ནག་གསང་ཆེན་གྱི་ལེའུ་སྟེ་བཅུ་དགུ་པའོ།། །།དེ་ནས་སྐད་ཅིག་བཞི་པ་ལ། །བྱང་གི་འཁོར་ལོའི་དཀྱིལ་ཉིད་དུ། །ཡབ་ཡུམ་ཐབས་དང་ཤེས་རབ་ལས། །ལྕགས་ཀྱི་ཕུར་པ་ནག་པོ་བཅུ། །སྒོ་བཞིར་རྒོད་ཀྱི་
ཐིག་ཕུར་དགོད། །བཛྲ་ཏྲ་ཏྲིད་ཀཱི་ལ་ཡ། ཁ་ཐུན་ཏ་ཏྲ་ཀཱི་ལ་ཡ། རེ་མ་ར་ཏི་ཀཱི་ལ་ཡ། རུ་སྡི་རཱུ་སི་སུ་ཏྲ་ཀཱི་ལ་ཡ། རགྴ་ཏེ་ཏྲ་ཀཱི་ལ་ཡ། ཧེ་ཏེ་ཁ་རག་ཀཱི་ལ་ཡ། ད་དུར་ཕྲ་ཏི་ཀཱི་ལ་ཡ། རུ་བི་སུ་ཏྲི་ཀཱི་ལ་ཡ། གར་བྷེ་ལང་ཏེ་ཀཱི་ལ་ཡ། རིག་ཤ་ཀྲོ་ཏ་ཀཱི་ལ་ཡ། རིག་ཤ་ཕཊ། གར་བྷེ་ཕཊ། རུ་བེ་ཕཊ། ཀི་ཏ་རད་ཏ་ཕཊ། བྱིན་བརླབས་དབང་གིས་མཛེས་བྱས་ནས། །མཆོད་དང་བཟླས་པ་གོང་བཞིན་བྱ། །བྱང་གི་ཕོ་བྲང་ལྟེ་བ་ལ། །མ་ཏཾ་བཞི་ཡི་ལིངྒ་ལ། །ལུས་ཀྱི་ཕྱོགས་སུ་ངེས་པར་སྦྱར། །ཏ་ཀྲིཏ་ཡན་ལག་བཞི་ལའོ། །ཧཱུཾ་གིས་ཨ་ཡི་འོད་བསྡུས་ནས། །མཁའ་ལ་བབ་ནས་ཕཊ་ཀྱིས་སྤྲོ། །ལྷུ་དུམ་ཕྲལ་ཏེ་ཟོས་བསམ་ན། །རྡོ་རྗེ་བྲག་ཡང་འཇིག་པར་འགྱུར། །དེ་བཞིན་དྲག་པོའི་སྦྱིན་བསྲེག་བྱ། །ཐལ་བ་གནོད་སྦྱིན་བྲག་ལ་གཏད། །གཏོར་ལྟོ་བ་ཡང་ནག་པོའི་སྦུད་པ་རུ། །ཁ་གསར་དྲེ་བོའི་ལྟོ་བར་གཞུག །གསལ་བའི་མདོངས་དང་བཅས་པར་གཞུག །ཟི་ར་ནག་པོས་བྲབ་པར་བྱ། །ཨོཾ་ཤྲཱི་ཧེ་རུ་ཀ་ཐུ་ར་ཏ་ཀྲཾ་སྙིང་ལ་རྦད། ཁ་ས་ད་རོ་ཆེ་ལ་རྦད། ན་རཱ་ཙ་དུར་རྦད་སྭཱ་ཧཱ། དེ་ནས་སྦུད་པས་སྤྲུགས་པ་ན། །ནུབ་ཀའི་འོད་དང་ནམ་ལངས་ནས། །སྲིན་མོ་དམར་ཐག་ཟེར་དུ་འཕྲོ། །རུ་པ་སེ་ཏྲ་གུ་ལ་ཀ་པི་རུ་ཏྲ་ཁ་དུ་ཡ་ས་ཏོ་རྦད། ཐིག་ལེའི་ནད་རྣམས་འབྱུང་བར་འགྱུར། །དབང་ཕྱུག་ལས་ཀྱི་རྒྱ་མཚོ་ལས། དཀྱིལ་འཁོར་ཕྲིན་ལས་ཀྱི་ངོ་བོ་བསྟན་པའི་ལེའུ་སྟེ་ཉི་ཤུ་པའོ།། །།ཕྲ་མེན་རྒྱ་མཚོས་ཡང་གསོལ་པ། །ཕོ་ཡི་སྐོང་ལུགས་ཇི་ལྟར་ལགས། །ཡང་དག་རྫོགས་ཀྱིས་བཀའ་སྩལ་པ། །དེ་ནས་ཕོ་རིགས་མཆོད་འདོད་ན། །རི་རབ་ཆེན་པོའི་དཀྱིལ་འཁོར་ནས། །རི་རབ་བུམ་པའི་ནང་དུ་ནི། །ཚངས་པ་མགོ་ལྔའི་གཟུགས་སུ་བྱ། །རི་རབ་བུམ་པའི་ཤིང་མཚམས་སུ། །དཀར་མོ་མིག་གཅིག་གཟུགས་སུ་གནས། །ཤིང་དང་ལོ་མའི་མཚམས་སུ་ནི། །བརྒྱ་བྱིན་དབུ་རྟའི་ཚུལ་དུ་གནས། །རི་རབ་བུམ་པའི་ལྕོག་བཞི་ལ། །བྷྲིཾ་གི་རི་ཏིའི་གཟུགས་སུ་གནས། །རི་རབ་ཕྱི་ཡི་ལྕོག་བཞི་ལ། །འཁོར་ལོ་ཁྱབ་འཇུག་གཟུགས་སུ་གནས། །རི་རབ་བུམ་པའི་གྲ་བཞི་ལ། །སྟོབས་བཟང་སེར་སྐྱའི་གཟུགས་སུ་གནས། །
དཔག་བསམ་ཤིང་གི་སྐེད་པ་ལ། །སྐོས་རྗེ་དྲང་དཀར་གཟུགས་སུ་གནས། །དཔག་བསམ་ཤིང་གི་རྩ་བ་ན། །ཀཱ་ལ་བདུད་ཀྱི་གཟུགས་སུ་གནས། །དཔག་བསམ་ཤིང་གི་སྐེད་པ་ན། །འབྱུང་རིགས་སྤུན་དགུའི་གཟུགས་སུ་གནས། །རི་རབ་རྨང་གི་གྲ་བཞི་ལ། །ཕག་ཆེན་པོ་ཡི་གཟུགས་སུ་གནས། །རོལ་མཚོ་བདུན་གྱི་ནང་དུ་ནི། །སྲིད་པའི་ཀླུ་བདུན་གཟུགས་སུ་གནས། །དཔག་བསམ་ཤིང་གི་སུམ་ཆ་ལ། །ནོར་ལྷ་ཆེན་པོའི་གཟུགས་སུ་གནས། །རི་རབ་བང་རིམ་བཞི་པོ་ལ། །རྒྱལ་ཆེན་བཞི་ཡི་གཟུགས་སུ་གནས། །རི་རབ་བྱང་ཤར་མཚམས་སུ་ཡང་། །བྱང་སྤྲིན་དམར་པོའི་གཟུགས་སུ་གནས། །དཔག་བསམ་ཤིང་གི་རྩ་བ་ན། །རཱུ་ཏྲ་ཆེན་པོའི་གཟུགས་སུ་གནས། །དེ་ཡི་མཐུན་རྫས་བསྟན་པ་ནི། །རྒྱལ་པོ་ཆེན་པོའི་གཟུགས་གཅིག་ལ། །ཡན་ལག་ལྔ་ལ་རིན་ཆེན་དགོད། །གོང་མ་འདྲ་བའི་གཟུགས་གཅིག་ལ། །མེ་མར་བརྒྱད་ཀྱིས་མཛེས་པར་བྱ། །གོང་མ་འདྲ་བའི་གཟུགས་གཅིག་ལ། །དར་སྣ་ལྔ་ཡི་ཚོམ་བུས་བརྒྱན། །རྒྱལ་པོའི་གཟུགས་དང་འདྲ་གཅིག་ལ། །སྟག་གི་རྒྱལ་མཚན་ལག་ཏུ་བསྐུར། །གོང་མའི་གཟུགས་དང་འདྲ་གཅིག་ལ། །ཉི་མའི་འཁོར་ལོ་ལག་ཏུ་བསྐུར། །རྒྱལ་པོའི་གཟུགས་དང་འདྲ་གཅིག་ལ། །གླང་པོ་ཆེ་ལ་ཞོན་པ་བྱ། །གོང་མ་འདྲ་བའི་གཟུགས་གཅིག་ལ། །ཤོད་ཀྱི་རྡེའུ་ཐོགས་པར་བྱ། །མི་ནག་གཟུགས་སུ་བྱས་པ་ལ། །ཁྲམ་ཤིང་ལག་ན་ཐོགས་པ་བྱ། །འབྲང་རྒྱས་གཅིག་ལ་མི་ཐུང་དགུ། །ཕྱོགས་མཚམས་དབུས་སུ་དགོད་པར་བྱ། །སྦྲུལ་འཁྱིལ་པ་ཡི་སྟེང་དུ་ནི། །ཕག་གི་མགོ་ཅན་ལྟ་བུར་བྱ། །འབྲང་རྒྱས་གྲུ་བཞི་པ་གཅིག་ལ། །ཀླུ་རྒྱལ་བདུན་གྱི་གཟུགས་སུ་བྱ། །གོང་དང་འདྲ་བའི་གཟུགས་གཅིག་ལ། །ནེའུ་ལེ་ཐོགས་པ་གཅིག་ཏུ་བྱ། །གླིང་བཞི་ལྡན་པའི་འབྲང་རྒྱས་ལ། །རྒྱལ་ཆེན་བཞི་ཡི་གཟུགས་སུ་བྱ། །ཐོད་པ་མཚན་ངན་ནང་དུ་ནི། །ར་ཁྱིའི་ཁྲག་དང་འབྲུ་ནག་ཆན། །སྨེ་བཞི་རྒྱན་དང་ལྡན་པར་བྱ། །འབྲང་རྒྱས་ཟླ་གམ་ཁ་གཅིག་ལ། །ཟ་འོག་མདའ་ལ་བསེ་གླུད་ལྡན། །དྲེ་ཆ་གསང་ཕྱེ་དྲེ་བཞི་ལ། །ལྕོག་མོ་བྷན་དྷའི་གཟུགས་བྱས་ལ། །མཁར་ཐབས་མདའ་ཡིས་རྣམ་པར་བརྒྱན། །ཞིང་
གི་འཕན་གྱིས་རྣམ་པར་བརྒྱན། །སྤྱན་གཟིགས་ཟས་དང་ལྡན་པ་འདི། །དེ་ནི་ཕོ་རིགས་སྤྱི་ཡི་རྫས། །ཧཱུཾ། རི་རབ་གཡུ་ཡི་བུམ་པ་ལ། །ཆགས་པའི་ལོངས་སྤྱོད་སྤྱད་པས་གྲོལ། །ཤེལ་དཀར་མཛེས་པའི་སླག་པ་ལ། །གཡུ་ཡི་ཐིག་ཕྲན་འབར་བ་ཅན། །དབུ་ལ་ཉི་མའི་ཕྲེང་བས་བརྒྱན། །ཕྱག་ན་གསེར་གྱི་ཕྲེང་བ་ཐོགས། །ཡུམ་དང་གཉིས་སུ་མེད་པ་སྟེ། །སྲིད་པ་ཀུན་ལ་ལོངས་སྤྱོད་མཛད། །འདིར་བྱོན་ཚེ་སྲོག་གླུད་ལོངས་ཤིག །སྲིད་པ་དེ་ཡི་བཀའ་ཉན་ནི། །ཕ་མ་མེད་པའི་ངང་ལས་སྤྲུལ། །སྐུ་ནི་གངས་རི་འཚེར་བ་ལ། །དུང་གི་རལ་པ་ཐོར་ཚུགས་འཁྱིལ། །སྲིད་པ་གསུམ་གྱི་བྱད་མཁན་དེ། །འདིར་བྱོན་ཚེ་སྲོག་གླུད་བཞེས་ཤིག །སྲིད་པ་དེ་ཡི་བཀའ་ཉན་ནི། །འོད་ཀྱི་རྫུ་འཕྲུལ་ལས་སྤྲུལ་པ། །རིན་ཆེན་འབར་བའི་ན་བཟའ་ལ། །ཞབས་ལ་ཉི་མའི་ཕྲེང་བས་བརྒྱན། །སྐུ་ལ་ལོངས་སྤྱོད་བརྒྱ་བརྒྱ་སྤྲུལ། །འདིར་བྱོན་ཚེ་སྲོག་གླུད་བཞེས་ཤིག །མེ་ལས་སྤྲུལ་པའི་སྲིད་པ་དེ། །ཨ་འབྲས་ཤིང་གི་སླག་པ་ལ། །མེ་ཏོག་ཧ་ཡི་ཕྲེང་བས་བརྒྱན། །ལག་ན་པླཀྵྀའི་ཕྲེང་བ་ཐོགས། །སྦྲུལ་ནག་སྟོང་གི་སྐུ་རགས་ཅན། །འདིར་བྱོན་ཚེ་སྲོག་གླུད་བཞེས་ཤིག །ཉི་མའི་འོད་ལས་སྤྲུལ་པ་སྟེ། །བཙོ་མ་གསེར་གྱི་སླག་པ་ལ། །མུ་ཏིག་ཤར་བུའི་འཕྲ་ཐིག་ཅན། །ཉི་མའི་སྤུ་གྲི་གླད་ལ་བསྐོར། །འདིར་བྱོན་ཚེ་སྲོག་གླུད་བཞེས་ཤིག །ཆུ་ཡི་སྐྱར་ལས་སྤྲུལ་པ་སྟེ། །གསེར་དངུལ་འབར་བའི་སླག་པ་ལ། །མུ་ཏིག་འབར་བའི་ཤར་བུས་བརྒྱན། །ཟླ་བའི་འཁོར་ལོ་ལག་ན་ཐོགས། །འདིར་བྱོན་ཚེ་སྲོག་གླུད་བཞེས་ཤིག །ནམ་མཁའི་མདངས་ལས་སྤྲུལ་པ་སྟེ། །དཔག་བསམ་ཤིང་གི་སྐེད་པ་ནས། །གསེར་མཁར་ནི་སེར་པོ་ལ། །གསེར་སྒོ་ནི་ཐབས་སེ་ཐབས། །གཡུ་བད་ནི་སྔོན་པོས་བསྐོར། །དེ་ཡི་ནི་ནང་ཤེད་ན། །སྐུ་ལ་སྤྲིན་དཀར་གཡང་གཞི་ཅན། །གཞའ་ཚོན་འབར་བའི་མཐའ་ཆག་ཅན། །འདིར་བྱོན་ཚེ་སྲོག་གླུད་བཞེས་ཤིག །དཔག་བསམ་ཤིང་གི་རྩ་བ་ལ། །རིན་ཆེན་ནི་སྟེགས་བུ་ལ། །ལྕགས་ཀྱི་ནི་མུ་ཁྱུད་
ཅན། །སྲིད་པ་ནི་ཞིག་འཛིན་ཏེ། །ལྕགས་ཀྱི་ནི་སླག་པ་ལ། །རྡོ་རྗེ་ནི་ཧ་ཡིས་བརྒྱན། །ལག་ན་མདུང་དམར་ཟངས་སེ་ཟང་། །ཚེ་སྲོག་ནི་གླུད་བཞེས་ཤིག །དཔག་བསམ་ཤིང་གི་རྩེ་ལྐོག་ན། །ལྕགས་མཁར་ནི་སྔོན་པོ་ལ། །བསེ་ཡི་ནི་མཐའ་བསྐོར་ཅན། །ཟངས་ཀྱིས་ནི་སྒོ་སྩལ་ལོ། །མ་ཧཱ་དེ་ཝ་ལྷ་ཆེན་པོ། །ཞིང་ལྤགས་གཡང་གཞིའི་ན་བཟའ་ལ། །ཐོད་པ་འབུམ་གྱི་མཐའ་བསྐོར་ཅན། །བེ་ཅོན་འབར་བ་ལག་ན་ཐོགས། །སྲིད་པ་གསུམ་གྱི་མཐུ་མོ་ཆེ། །འབྱུང་རིགས་སྤུན་དགུའི་འཁོར་གྱིས་བསྐོར། །མདོས་བདག་ཆེན་པོས་མདོས་བཞེས་ཤིག །རྒོད་མ་ཁ་ཡི་སྤྲུལ་པ་སྟེ། །ས་བདག་ཕག་ཆེན་མི་བཟད་པ། །ཆུ་སྲིན་འབར་བའི་སླག་པ་ལ། །མུ་ཏིག་ཤར་བུའི་ག་ཤས་བརྒྱན། །ལག་ན་ཆུ་སྲིན་རྒྱལ་མཚན་ཐོགས། །མདོས་བདག་ཆེན་པོས་མདོས་བཞེས་ཤིག །སྲིད་པའི་མཚོ་བདུན་ནང་ཤེད་ནས། །ཕུང་བྱེད་དྲེགས་པའི་གཟུགས་སུ་སྣང་། །དབུ་ལ་ཡིད་བཞིན་ནོར་བུས་བརྒྱན། །ཕྱག་ན་དོན་ཡོད་ཞགས་པ་བསྣམས། །མཁའ་ལ་ཡིད་བཞིན་ཆར་འབེབས་ཤིང་། །རྒྱ་མཚོ་མཐའ་བཞི་རྦ་རླབས་ནས། །ཀླུ་བྲན་ཐམས་ཅད་ཆོ་ངེ་བརྡུང་། །འདིར་བྱོན་ཚེ་སྲོག་གླུད་བཞེས་ཤིག །ནམ་མཁའི་ཁམས་ན་གནས་པ་སྟེ། །མ་ཧཱ་དེ་ཝ་ལྷ་ཆེན་པོ། །བཙུན་མོ་ཨུ་མ་འཁོར་དང་བཅས། །བཻ་ཌཱུར་སྔོན་པོའི་སླག་པ་ལ། །གཟའ་སྐར་ཐོད་ཕྲེང་ཕྲེང་བས་བརྒྱན། །ལག་ན་དུང་གི་ཟོ་བ་ཐོགས། །ནོར་ལྷ་ཆེན་པོའི་མིང་ནས་བྱུང་། །མདོས་བདག་ཆེན་པོས་མདོས་བཞེས་ཤིག །རྒྱལ་པོ་ཆེན་པོ་སྡེ་བཞི་ཡང་། །འཇིག་རྟེན་སྐྱོང་བར་མཚན་གྲགས་པའི། །ལྷ་མི་ཡོངས་ཀྱི་འཁོར་སྐྱོང་ཞིང་། །ལྷ་མ་ཡིན་གྱི་གཡུལ་བཟློག་པ། །ཁ་དོག་ལས་བཞིའི་མདོག་ཏུ་གསལ། །རྒྱན་རྣམས་རིན་ཆེན་ཤར་བུས་མཛེས། །དབུ་ལ་སངས་རྒྱས་ལྔ་ཡིས་མཛེས། །ཕྱག་ན་རིན་ཆེན་ཕྱག་རྒྱས་མཛེས། །མདོས་བདག་ཆེན་པོས་མདོས་བཞེས་ཤིག །ཉི་མ་བྱང་ཤར་མཚམས་ཤེད་ནས། །དཔག་བསམ་ཤིང་གི་རྩ་བ་ན། །ཀེང་རུས་བརྩེགས་པའི་གདན་སྟེང་ན། །དམ་རྫས་ལྔ་ལ་ལོངས་སྤྱོད་ཅིང་། །ཞིང་ཆེན་གཡང་གཞིའི་སླག་
པ་ལ། །རཀྟའི་ཐིག་ལེ་འབར་བས་བརྒྱན། །ཐོད་པ་ཚར་གསུམ་སྐུ་ལ་བརྒྱན། །རིགས་བཞི་སྦྲུལ་གྱི་རྒྱན་གྱིས་བརྒྱན། །སྲིན་མོ་འབུམ་གྱི་དབུས་ནས་འགྱིང་། །མདོས་བདག་ཆེན་པོས་མདོས་བཞེས་ཤིག །ཉི་མ་བྱང་ཤར་མཚམས་ཤེད་ནས། །བསེ་མཁར་ནི་ཁྲ་བོ་ལ། །དངུལ་གྱི་ནི་མཐའ་བསྐོར་ཅིང་། །ཟངས་ཀྱིས་ནི་སྒོ་གསལ་ལ། །དེ་ཡི་ནི་བདག་མོ་ལ། །ལུས་ལ་ཟངས་ཀྱི་སླག་པ་ལ། །དུང་གི་ཐིག་ཕྲན་ཕྲེང་བས་བརྒྱན། །གཡོན་པ་ལྕགས་ཀྱུ་འབར་བ་ལ། །གཡས་པས་སྤུ་གྲིས་གསོད་ཅིང་གཅོད། །མདོས་བདག་ཆེན་པོས་མདོས་བཞེས་ཤིག །སྲིད་པའི་བསྐང་ལུང་ལས། ཕོ་སྐོང་གི་ལེའུ་སྟེ་ཉི་ཤུ་རྩ་གཅིག་པའོ།། །།ཕྲ་མེན་རྒྱ་མཚོས་ཡང་གསོལ་པ། །བརྟན་མའི་བྱེ་བྲག་གང་ལགས་པ། །ཡང་དག་རྫོགས་ཀྱིས་བཤད་དུ་གསོལ། །རྫོགས་སངས་རྒྱས་ཀྱིས་བཀའ་སྩལ་པ། །ལྷ་མོ་བརྟན་མའི་བྱེ་བྲག་རྣམས། །ངས་བསྟན་པ་ལ་སེམས་ཐུད་ཅིག །དཀྱིལ་འཁོར་བཞི་ཡི་བྱང་ཤར་དུ། །མཎྜལ་གྲུ་གང་འཁོར་རྒྱུད་ལས། །དབུས་སུ་ཡབ་ཡུམ་བསྐྱེད་བྱས་ཏེ། །དཔལ་གྱི་གཏོར་མ་བཏེགས་བྱས་ཏེ། །བཅོམ་ལྡན་ཆེ་མཆོག་ཧེ་རུ་ཀ །མཛད་པ་མཐར་ཕྱིན་ཆེ་བའི་སྐུ་མངའ་བ། །ཐུགས་རྗེ་རྒྱུན་གྱིས་འགྲོ་དོན་རྫོགས་པར་མཛད། །ཡབ་ཡུམ་གཉིས་མེད་བཀའ་ཡི་གཏོར་མ་བཞེས། །ཐོད་པ་རློན་པའི་ཕྱག་རྒྱ་མདུད་ལ། ཨོཾ་ཤྲཱི་ཧེ་རུ་ཀ་ཀྲོ་དྷཱི་ཤྭ་རཱི་ས་མ་ཡ་ཨ་མྲྀ་ཏ་བ་ལིཾ་ཏ་ཁཱ་ཧི། ཞེས་བསྟབ་བོ། །བཅོམ་ལྡན་དཔལ་ཆེན་ཧེ་རུ་ལ། །དཀར་མོ་བཅུ་གསུམ་འཁོར་གྱིས་བསྐོར་བ་ནི། །ཐུགས་རྗེ་ལས་ཀྱི་འབྲས་བུ་མཆིས་པར་མཛོད། །མུཾ་དཾ་ཥྚ་ཡོ་གི་ནཱི་ཨ་མྲྀ་ཏ་ཁཱ་ཧི། བཅོམ་ལྡན་དཔལ་ཆེན་ཧེ་རུ་ལ། །ནག་མོ་བཅོ་བརྒྱད་ཚོགས་ཀྱིས་བསྐོར་བ་ནི། །ཐུགས་རྗེ་ལས་ཀྱི་འབྲས་བུ་མཆིས་པར་མཛོད། །ཁ་མུན་བ་ཏི་ཡ་ཧཱུཾ་བྷྱོ་ཁཱ་ཧི། ཞེས་བསྟབ། བཅོམ་ལྡན་དཔལ་ཆེན་ཧེ་རུ་ལ། །སྐུ་ཡི་ཁྲོ་བོ་བཅུ་དྲུག་བསྐོར་བ་ནི། །སྐུ་མཆོག་འབར་བའི་ཕྲིན་ལས་མཛད་དུ་གསོལ། །ཨོཾ་ཤྲཱི་ཧེ་རུ་ཀ་ཨཱ་གཙྪ་ཡ་ཤཱནྟིཾ་ཁཱ་ཧི། ཞེས་བསྟབ། བཅོམ་ལྡན་དཔལ་ཆེན་ཧེ་རུ་ལ། །གསུང་གི་ཁྲོ་བོ་བཅུ་དྲུག་བསྐོར་བ་ནི། །གསུང་
མཆོག་འབར་བའི་ཕྲིན་ལས་མཛད་དུ་གསོལ། །ཨོཾ་ཤྲཱི་ཧེ་རུ་ཀ་བྷ་ག་བཱན་གརྦྷ་བ་ལིཾ་ཁཱ་ཧི། བཅོམ་ལྡན་དཔལ་ཆེན་ཧེ་རུ་ལ། །ཐུགས་ཀྱི་ཁྲོ་བོ་བཅུ་དྲུག་བསྐོར་བ་ནི། །ཐུགས་མཆོག་འབར་བའི་ཕྲིན་ལས་མཛད་དུ་གསོལ། །ཨོཾ་ཤྲཱི་ཧེ་རུ་ཀ་ཙིཏྟ་ཁ་སྟྭ་མཱ་ར་ཡ་ཁཱ་ཧི། བཅོམ་ལྡན་དཔལ་ཆེན་ཧེ་རུ་ལ། །རྫོགས་ཆེན་ཁྲོ་བོ་བཅུ་དྲུག་བསྐོར་བ་ནི། །ཡོན་ཏན་འབར་བའི་ཕྲིན་ལས་མཛད་དུ་གསོལ། །སྭཱ་ཤྲཱི་ཧེ་རུ་ཀ་རཏྣ་ཀེ་ཏུ་པུཥྚིཾ་ཁཱ་ཧི། བཅོམ་ལྡན་དཔལ་ཆེན་ཧེ་རུ་ལ། །སྤྲུལ་པའི་བུ་མོ་བརྒྱད་ཀྱིས་བསྐོར་བ་ནི། །བཀའ་ཡི་གཏོར་མ་འདི་འབུལ་གྱི། །ལས་ཀྱི་འབྲས་བུ་མཆིས་པར་མཛོད། །ཀྲོ་ཏཱི་ཤྭ་རཱི་བ་སཱ་ཏ་རག་ཏ་ཁཱ་ཧི། བཅོམ་ལྡན་དཔལ་ཆེན་ཧེ་རུ་ལ། །སེར་མོ་ལྔ་བཅུ་རྩ་དྲུག་ཚོགས་ཀྱིས་བསྐོར་བ་ནི། །བཀའ་ཡི་གཏོར་མ་འདི་འབུལ་ན། །ལས་ཀྱི་འབྲས་བུ་མཆིས་པར་མཛོད། །ཀྲོ་ཏཱི་ཤྭ་རཱི་ཙིཏྟ་རག་ཤ་དེ་བ་ཁ་དུར་ནི་ཁཱ་ཧི། བཅོམ་ལྡན་དཔལ་ཆེན་ཧེ་རུ་ལ། །ཤྭ་ན་མུ་ཁའི་ཚོགས་ཀྱིས་བསྐོར་བ་ནི། །སྐུ་ཡི་འབྲས་བུ་མཆིས་པར་མཛོད། །ཀཱ་ཡ་དུ་ར་ཀ་ཏོ་ཡ་ཏི་ཁཱ་ཧི། བཅོམ་ལྡན་དཔལ་ཆེན་ཧེ་རུ་ལ། །གསུང་གི་ཕོ་ཉའི་ཚོགས་ཀྱིས་བསྐོར་བ་ནི། །ཀུ་མ་རཱ་ཙ་ཁ་དུར་ཏྲི་ཀ་ན་ར་ཁཱ་ཧི། བཅོམ་ལྡན་དཔལ་ཆེན་ཧེ་རུ་ལ། །ཐུགས་ཀྱི་ཕོ་ཉའི་ཚོགས་ཀྱིས་བསྐོར་བ་ནི། །ཐུགས་ཀྱི་ཕྲིན་ལས་འབྲས་བུ་མཆིས་པར་མཛོད། །རཀྴ་ཀྲོ་དྷཱི་ཤྭ་རཱི་ཏ་རི་ཀ་ཏ་ར་ཁཱ་ཧི། འཇིགས་བྱེད་ཡབ་ཡུམ་འཁོར་བཅས་ལ། །ཁ་འབར་རྩ་འདྲེན་བརྒྱད་ཀྱིས་བསྐོར་བ་ལ། །ཐུགས་ཀྱི་ཕྲིན་ལས་གྲུབ་པར་མཛད་དུ་གསོལ། །ཙ་དུར་ཁ་ས་པ་ཏི་རག་ཏི་རག་དུར་ཁཱ་ཧི། དེ་ནས་དཔལ་ཆེན་ཡབ་ཡུམ་ལ། །བདུད་མོ་བཞི་དང་གནོད་སྦྱིན་བཞི། །སྨན་ཕྲན་བཞི་ཡིས་བསྐོར་བ་རྣམས། །བཀའ་ཡི་གཏོར་མ་འདི་བཞེས་ལ། །ལས་ཀྱི་འབྲས་བུ་མཆིས་པར་མཛོད། །སྲིད་པའི་ཕྲ་མེན་རྒྱ་མཚོ་ལ་སོགས་པ་ལ། །སྲིད་པ་གསལ་བའི་དོན་དུ་གཏད་པའོ། །སྒྲུབ་མཆོག་རྣལ་འབྱོར་རྣམས་དང་འཕྲད་པར་ཤོག །སྲིད་པའི་བརྟན་མ་ལས་ཀྱི་རྒྱ་མཚོའོ། །སྲིད་པ་མཚོ་བཞིའི་ལེའུ་ཐ་མ་སྟེ་ཉི་ཤུ་རྩ་གཉིས་པའོ།། །།རྒྱུད་ཀྱི་རྒྱལ་པོ་ཆེན་པོ་སྲིད་པ་མཚོ་བཞིའི་རྒྱུད་ཅེས་བྱ་བ་རྫོགས་སོ།། །།