མ་མོ་འདུས་པའི་ཏནྟྲ།
བཅོམ་ལྡན་འདས་དཔལ་ཀུན་ཏུ་བཟང་མོ་ལ་ཕྱག་འཚལ་ལོ། །འདས་པའི་དུས་མ་བྱུང་བའི་སྔོན་རོལ་ན། སེམས་ཅན་ཐམས་ཅད་སེམས་མྱ་ངན་ལས་བཟླ་བ་དང་། ཐེ་ཚོམ་བཅད་པ་བཅད་པའི་ཕྱིར། རྡོ་རྗེ་སེམས་དཔས་གསོལ་པ། གནོད་འདུལ་ལྷ་ཡིས་ཡང་གསོལ་པ། །འཇིག་རྟེན་པ་ཡི་ཆོས་རྣམས་ལ། །སེམས་ཉིད་མྱ་ངན་ཇི་ལྟར་བཟླ། །རྟག་ཆད་མཐའ་ཉིད་གང་དུ་བསྡུ། །ཡང་དག་རྫོགས་ཀྱིས་བཀའ་སྩོལ་ཅིག །དེ་སྐད་གསོལ་པ་གསན་ནས་ཀྱང་། །ཉག་གཅིག་ཡབ་ཀྱིས་བཀའ་སྩལ་པ། །སྣོད་ཀྱི་འཇིག་རྟེན་ཀུན་བཟང་ཟླ། །བཅུད་ཀྱི་འཇིག་རྟེན་སངས་རྒྱས་རྒྱུ། །ཕྱི་ནང་སྣོད་བཅུད་རྣམ་པར་དག །རྟག་ཆད་མཐའ་གཉིས་མྱ་ངན་འདས། །གནོད་འདུལ་ལྷ་ཡིས་ཡང་གསོལ་པ། །སྟོན་པ་རྣམ་གསུམ་གང་ལ་བགྱི། །སྡུད་པ་རྣམ་གསུམ་གང་ལ་བགྱི། །གནས་ཞེས་བགྱི་བ་ཇི་ལྟ་བུ། །གནས་ལ་ངེས་པ་དུ་ཞིག་མཆིས། །དུས་ཞེས་བགྱི་བ་ཇི་ལྟ་བུ། །དུས་ལ་རྣམ་པ་དུ་ཞིག་མཆིས། །ཡང་དག་རྫོགས་ཀྱིས་བཀའ་སྩོལ་ཅིག །ཉོན་ཅིག་གཡུང་དྲུང་ཡང་དག་པ། །སྟོན་པ་རྣམ་གསུམ་རིག་པའི་གཏེར། །འཕོ་འགྱུར་མེད་པས་གནས་ཞེས་བྱ། །ཡང་དག་དོན་རྟོགས་དུས་ཞེས་བྱ། །གནོད་འདུལ་ལྷ་ཡིས་ཡང་གསོལ་པ། །ལྷ་ལ་རྣམ་པ་དུ་ཞིག་མཆིས། །འཁོར་ལ་རྣམ་པ་དུ་ཞིག་མཆིས། །ལུང་ལ་རྣམ་པ་དུ་ཞིག་མཆིས། །ཡང་དག་རྫོགས་ཀྱིས་བཀའ་སྩོལ་ཅིག །ཉོན་ཅིག་གཡུང་དྲུང་ཡང་དག་པ། །ལྷ་ལ་རྣམ་པ་གསུམ་དུ་བསྟན། །འཁོར་ལ་རྣམ་པ་གསུམ་དུ་བསྟན། །ལུང་ལ་རྣམ་པ་གསུམ་དུ་བསྟན། །གནོད་འདུལ་ལྷ་ཡིས་ཡང་གསོལ་པ། །རྒྱུད་ཅེས་བྱ་བ་ཇི་ལྟར་ལགས། །ལུང་ཞེས་བྱ་བ་ཇི་ལྟར་ལགས། །མན་ངག་བགྱི་བ་ཇི་ལྟར་ལགས། །ཉོན་ཅིག་གཡུང་དྲུང་ཡང་དག་པ། །རྒྱུད་ཅེས་བྱ་བ་འདྲེལ་པའི་དོན། །ལུང་ཞེས་བྱ་བ་སྟོན་པའི་བཀའ། །མན་ངག་བྱ་བ་ལ་བཟླའོ། །གནོད་འདུལ་ལྷ་ཡིས་ཡང་གསོལ་པ། །ཡུམ་གྱི་དབྱིངས་
ཞེས་གང་ལ་བགྱི། །ཡབ་ཀྱི་མཁའ་ཞེས་གང་ལ་བགྱི། །འཁོར་བའི་གནས་འདི་མི་འཚལ་ན། །ཀློང་ཞེས་བྱ་བ་ཇི་ལྟ་བུ། །ཉོན་ཅིག་གཡུང་དྲུང་ཡང་དག་པ། །འདུ་འབྲལ་མེད་པ་ཡུམ་གྱི་དབྱིངས། །སྐྱེ་ཤི་མེད་པ་ཡབ་ཀྱི་མཁའ། །བླང་དོར་མེད་པ་བདེ་བའི་ཀློང་། །བདེ་བ་ཆེན་པོ་དོན་རྟོགས་ན། །བླང་དོར་མེད་པ་དེ་ཡིས་གྲུབ། །གཉིས་མེད་དོན་རྟོགས་དེ་ཡི་ངང་། །གནོད་འདུལ་ལྷ་ཡིས་ཡང་གསོལ་པ། །ཆོས་ཉིད་རྟོགས་པ་གཡུང་དྲུང་ལྷ། །སེམས་ཉིད་རྟོགས་པའི་ལ་དོར་བ། །འགྱུར་མེད་དོན་ཆེན་བརྗོད་པ་གང་། །དེ་སྐད་གསོལ་པ་གསན་ནས་ཀྱང་། །མངོན་རྫོགས་ཡབ་ཀྱིས་བཀའ་སྩལ་པ། །ཉོན་ཅིག་གཡུང་དྲུང་ཡང་དག་པ། །ཆོས་ཉིད་རྟོགས་པའི་གཡུང་དྲུང་བའི། །སེམས་ཉིད་དོན་གྱི་ངོ་བོ་ལ། །རྫོགས་པའི་ལྟ་བ་ལ་དོར་བའོ། །གནོད་འདུལ་ལྷ་ཡིས་ཡང་གསོལ་པ། །མ་ཞེས་བྱ་བ་གང་གི་མཁའ། །མོ་ཞེས་བྱ་བ་གང་གི་ཀློང་། །མ་མོའི་གཏན་ཚིགས་ཇི་ལྟར་ལགས། །འབྱུང་བ་ལྔ་པོ་གང་ལས་གྲུབ། །སངས་རྒྱས་རྒྱུ་ཉིད་གང་གིས་གྲུབ། །བདེ་བ་ཆེན་པོ་ངང་ཉིད་ལས། །རྒྱུ་རྐྱེན་གཉིས་ཀྱིས་བསྐྱེད་ལགས་སམ། །འགྱུར་བ་ལྷ་ཡི་ངང་ཉིད་ལས། །འདི་ལ་འཕོ་འགྱུར་མཆིས་ལགས་སམ། །ཉོན་ཅིག་གཡུང་དྲུང་ཡང་དག་པ། །ཆེ་བས་ཆེ་བ་ཟབ་མོ་འདི། །ཤེས་རབ་ཐབས་ལ་བརྟེན་ཏེ་གྲུབ། །མ་དང་མོ་ཡི་དོན་རྟོགས་ན། །མ་བགྲོད་ས་རྣམས་ངེས་པར་ཐོབ། །ཡིད་བཞིན་ནོར་བུ་མ་བཙལ་རྙེད། །ཡེ་ཤེས་ཉི་མ་རང་ལ་ཤར། །ཆེན་པོ་ལྔ་ཡི་ངང་ཉིད་དུ། །ཐམས་ཅད་མ་ལུས་སངས་རྒྱས་སོ། །ཧཱུཾ་ཧཱུཾ་ཧཱུཾ། གསང་བའི་མགུར་ཆེན་པོའི་ལེའུ་སྟེ་དང་པོའོ།། །།ཏིང་འཛིན་དབང་ཆེན་དཀྱིལ་འཁོར་བསྐྱེད། །བདག་ཉིད་ཆེ་མཆོག་སྐུར་བསྒོམས་ལ། །ཐམས་ཅད་མ་ལུས་དབང་དུ་བསྡུ། །མན་ངག་མཛུབ་ཚུགས་དོན་ལ་རྣམ་པ་དྲུག་ཏུ་བསྟན། །གནོད་འདུལ་ལྷ་ཡིས་ཡང་གསོལ་པ། །སེམས་ཅན་དུས་མིན་འཆི་བ་རྣམས། །དེ་ལ་བཟློག་ན་ཇི་ལྟར་བཟློག །བསྐང་བའི་གནས་ལྔ་ཇི་ལྟར་ལགས། །ཡང་དག་རྫོགས་ཀྱིས་བཀའ་
སྩལ་པ། །དེ་སྐད་གསོལ་པ་གནས་ནས་ཀྱང་། །སེམས་ཅན་དུས་མིན་འཆི་བའི་ཚེ། །བསྐང་བའི་གནས་རྣམས་འདི་རྣམས་སོ། །ཧཱུཾ་སྣང་སྲིད་ཐམས་ཅད་ཡུམ་གྱི་བྷ་ག་སྟེ། །དུས་གསུམ་བདེ་གཤེགས་ཡུམ་གྱི་དབྱིངས་ནས་བསྐྱེད། །དབུས་ཀྱི་ཡུམ་དང་ཆེ་མཆོག་ཡབ་ཡུམ་ཚོགས། །མུ་མཁར་ཁྱབ་པའི་ཐུགས་གསུམ་བདག་སྐོང་ན། །ཐམས་ཅད་སྐོངས་ནས་དབང་དང་དངོས་གྲུབ་གསོལ། །ཧཱུཾ་ཤར་ཕྱོགས་རྡོ་རྗེ་རིགས་ཀྱི་གཙོ། །རྡོ་རྗེ་དབྱིངས་ཕྱུག་མི་ཕྱེད་མ། །བསྐང་ངོ་བསྐལ་པའི་ཐུགས་དམ་བསྐང་། །ལྷོ་ཕྱོགས་རིན་ཆེན་རིགས་ཀྱི་གཙོ། །རིན་ཆེན་དབྱིངས་ཕྱུག་མི་ཕྱེད་མ། །བསྐང་ངོ་བསྐལ་པའི་ཐུགས་དམ་བསྐང་། །ནུབ་ཕྱོགས་པདྨ་རིགས་ཀྱི་གཙོ། །པདྨ་དབྱིངས་ཕྱུག་མི་ཕྱེད་མ། །བསྐང་ངོ་བསྐལ་པའི་ཐུགས་དམ་བསྐང་། །བྱང་ཕྱོགས་ལས་ཀྱི་རིགས་ཀྱི་གཙོ། །ལས་ཀྱི་དབྱིངས་ཕྱུག་མི་ཕྱེད་མ། །བསྐང་ངོ་བསྐལ་པའི་ཐུགས་དམ་བསྐང་། །དབྱིངས་ཀྱི་མ་ཆེན་བརྒྱད་རྣམས་དང་། །ཡུལ་གྱི་སྲིང་མོ་བརྒྱད་རྣམས་ཀྱང་། །བསྐང་ངོ་བསྐལ་པའི་ཐུགས་དམ་བསྐང་། །བསྐལ་ལེ་ཆུང་ངུ་གསང་བ་མགུར་ཆུང་གི་ལེའུ་སྟེ་གཉིས་པའོ།། །།གནོད་འདུལ་ལྷ་ཡིས་ཡང་གསོལ་པ། །བསྟན་པ་གཉན་པོ་འཇིག་བྱེད་ཅིང་། །ལུ་གུ་རྒྱུད་ལས་འགལ་བྱེད་པ། །སེམས་ཅན་ཀུན་ལ་གནོད་བྱེད་པའི། །རྟག་ཏུ་གདུག་པའི་སེམས་ཅན་རྣམས། །ལུས་སེམས་སོ་སོར་དབྲལ་བའི་ཕྱིར། །ལྷ་དང་དབྱེ་བ་ཇི་ལྟར་ལགས། །རྫོགས་སངས་རྒྱས་ལ་བདག་ཉན་འཚལ། །དེ་སྐད་གསོལ་པ་གསན་ནས་ཀྱང་། །ངོ་མཚར་ལྷ་ཡིས་བཀའ་སྩལ་པ། །རྟག་ཏུ་གདུག་པའི་སེམས་ཅན་རྣམས། །ལུས་སེམས་སོ་སོར་ཕྲལ་བའི་ཕྱིར། །དབྱེ་བའི་ལས་རྣམས་ངས་བསྟན་གྱི། །ཉོན་ཅིག་གཡུང་དྲུང་ཡང་དག་པ། །འགོ་བའི་ལྷ་དང་བྲལ་བའི་ཕྱིར། །བྱ་རོག་འུག་པའི་དང་རུ་ལ། །ཨ་དང་ནྲྀ་ཡི་ཡི་གེ་བྲི། །དམེ་བ་མགར་གྱི་དྲེག་པས་བསླན། །ཤོག་ཤོག་ཚོན་གང་གྲུ་བཞི་ལ། །ལྷ་དང་མི་ཡི་མིང་བྲིས་ལ། །ཚོན་སྐུད་སྣ་ལྔས་བྱད་དུ་གཞུག །
རྐང་དུ་ཛ་དུར་བཅུག་ནས་ནི། །འོག་ཏི་ཕྱིན་ཕྱོགས་དག་ཏུ་བསྟན། །དུ་ར་ནག་པོའི་རྟ་རྐང་བསྡམ། །གོང་མའི་ལས་རྣམས་བསྐྱར་ལ་བྱ། །དེས་ནི་མཚན་མ་འབྱུང་བར་འགྱུར། །དེས་ཀྱང་མཚན་མ་མ་བྱུང་ན། །འདའ་ར་པ་ཏིའི་སོག་པ་ལ། །མཎྜ་ལ་ཡི་དར་གྱིས་དཀྲི། །ཨ་ཏི་ར་ཡི་ཐག་པས་བཅིངས། །ད་ར་པ་ཏི་རྒྱུད་པས་གདགས། །སྦ་མ་ཏི་ཡི་དུད་པས་བདུག །འབྲིག་ཤ་ཤིང་ལ་བཏགས་ནས་ཀྱང་། །དད་ལ་ཕྱར་ཏེ་སྡང་མིག་བལྟ། །ཨ་ཏ་ར་ཡི་ལྕགས་ཀྱིས་བྲབ། །རྦ་ན་ཏི་ཡི་དུད་པས་བདུག །ཨ་ར་མ་ཏིའི་མདའ་ཡིས་བརྡེག །གུ་པ་ར་ཡི་མགུལ་ཏུ་བཏགས། །མ་ལ་ཏི་ཡི་མདོམས་ནས་དབྱུང་། །ས་འབར་མ་ཡི་སྙིང་པོ་བཟླས། །རྣ་མཉན་ཕྲ་མའི་གཟུགས་བྲིས་ལ། །ལྷ་དང་མི་ཡི་བར་དུ་གཞུག །མ་ར་ཎ་ཡི་སྔགས་ཀྱིས་དབྱེ། །མཚོན་ཆའི་ཕྱག་རྒྱ་བཅས་ནས་སུ། །གཟུགས་ལ་རྣམ་པར་བརྡེག་པར་བྱའོ། །རཀྵ་ཏུའི་དྲག་སྔགས་ཀྱིས་གདབ། །ལྕགས་ཀྱུའི་ཕྱག་རྒྱ་གཉིས་བཅིངས་ནས། །ཨཾ་ཀུ་ཤ་ཡི་སྔགས་ཀྱིས་དྲང་། །ཞགས་པའི་ཕྱག་རྒྱ་གཉིས་བཅིངས་ནས། །པཱ་ཤ་ཧཱུཾ་གི་སྔགས་ཀྱིས་བཅིངས། །ལྕགས་སྒྲོག་ཕྱག་རྒྱ་གཉིས་བཅིངས་ནས། །སྥོ་ཊ་བཾ་གྱི་སྔགས་ཀྱིས་བསྡམ། །དྲིལ་བུའི་ཕྱག་རྒྱ་གཉིས་བཅིངས་ལ། །གྷཎྜ་ཧོཿཡི་སྔགས་ཀྱིས་གདབ། །བདག་ཉིད་དབང་ཆེན་སྐུར་བསྒོམས་ཏེ། །སྤྲོ་བ་དྲུག་རྣམས་གནད་ལ་གདབ། །གོང་མའི་ལས་རྣམས་བསྐྱར་ལ་བྱ། །དེས་ནི་མཚན་མ་འབྱུང་བར་འགྱུར། །དེས་ཀྱང་མཚན་མ་མ་བྱུང་ན། །འདའ་ར་དི་ཏིའི་སོག་པ་ལ། །ནུ་ཏ་མ་ཡི་ཁྲག་གིས་བྲིས། །འདའ་ན་ནག་ནི་ས་དོང་དུ་གཞུག །ཆེ་མཆོག་ཡབ་ཡུམ་བསྒོམས་ནས་ནི། །སྨན་མོའི་སྔགས་དང་ཕྱག་རྒྱས་གདབ། །བསྐུལ་བའི་ཕྲིན་ལས་གཞུང་བཞིན་བྱ། །ཉེ་འབྱེད་ཀྱི་ལེའུ་སྟེ་གསུམ་པའོ།། །།གནོད་འདུལ་ལྷ་ཡིས་ཡང་གསོལ་པ། །བསྟན་པ་གཉན་པོ་འཇིག་བྱེད་ཅིང་། །ལུ་གུ་རྒྱུད་ལས་འགལ་བྱེད་པ། །སེམས་ཅན་ཀུན་ལ་
གནོད་བྱེད་ཡིད། །རྟག་ཏུ་གདུག་པའི་སེམས་གྱུར་ལ། །ནན་ཏུར་ལས་རྣམས་ཇི་ལྟར་ལགས། །རྫོགས་སངས་རྒྱས་ལ་བདག་ཉན་འཚལ། །དེ་སྐད་གསོལ་པ་གསན་ནས་ཀྱང་། །ངོ་མཚར་ལྷ་ཡིས་བཀའ་སྩལ་པ། །རྟག་ཏུ་གདུག་པའི་སེམས་གྱུར་ཏེ། །སེམས་ཅན་ཀུན་ལ་གནོད་པ་ལ། །ནན་ཏུར་ལས་རྣམས་ངས་བསྟན་གྱིས། །ཉོན་ཅིག་གཡུང་དྲུང་ཡང་དག་པ། །སྲོག་ལུས་རྩ་ནས་སྐམ་པའི་ཕྱིར། །ར་སོག་གྲོ་ག་ཤིང་ཤུན་ནམ། །གཡམ་པ་སྔོན་པོའི་ངོས་དག་ལ། །ཁྱི་ཁྲག་ར་ཁྲག་གསོལ་བ་ཡིས། །དགྲ་བོའི་གཟུགས་དག་བྲིས་ནས་ནི། །ཚེར་མ་ཅན་གྱི་ཤིང་དག་ལ། །རྫས་ཀྱི་བྲྀཀྵའི་ཤིང་བུ་ལ། །དམར་ཏི་དམར་པོའི་ལྕག་འབྲས་གདགས། །དགྲ་བོའི་གཟུགས་ལ་བརྡེག་པར་བྱའོ། །ཡང་ན་ཀ་སའི་ཤུན་པ་ལ། །ན་ས་ཀུ་རུ་ཏ་ཡིས་ནི། །འགྲོ་བའི་མཁའ་འགྲོ་ལྔ་པོ་ཡང་། །ཙ་ར་མ་ཏི་ཏི་ཡིས་ནི། །ལྟེ་བར་ཆགས་འཛིན་སྤུན་གཉིས་བྲི། །རྐང་པ་གཉིས་ལ་མ་བདུན་ནི། །གཡས་པའི་དུམ་བུ་བཞི་པོ་ལ། །ཕུང་བྱེད་སྦས་པའི་མ་བཞི་ནི། །གཡོན་པ་དུམ་བུ་བཞི་པོ་ལ། །ཁྲོས་པའི་དབང་ཆེན་བཞི་པོ་ནི། །གསང་བའི་ཡུམ་བཞི་ཀླད་པ་ལ། །ཉི་ཟླ་ཐོད་ཕྲེང་སྙིང་གི་དཀྱིལ། །ཕྲ་མེན་རྒྱ་མཚོ་མཁའ་ལའོ། །ཕུང་གི་བདག་མོ་བཞུགས་སུ་གསོལ། །ཕྱི་མའི་དམན་མོ་འཁོར་རྣམས་ཀྱིས། །གུང་རྩིབས་འཁོར་དང་ལོ་རེ་ལའོ། །ཨ་ཕྱི་ཆེན་པོ་གཞུངས་པ་ལའོ། །དུས་དྲུག་རྒྱུ་བའི་དགྲ་བོ་ནི། །ཤ་བ་གཉན་དང་བ་གླང་ངོ་། །འདི་རྣམས་ནམ་གྱི་གུང་ལ་རྒྱུ། །རྟ་དང་ལུག་དང་ར་གསུམ་ནི། །འདི་ནི་ཉིན་བཞིན་རྒྱུ་བའོ། །རྗེ་ཁོལ་དྲུག་ཅུ་རྩ་བརྒྱད་དང་། །དུས་དྲུག་རྒྱུ་བ་དེ་བཞིན་ནོ། །མྱུར་དུ་བཟླས་པའི་སྔགས་རྣམས་ནི། །གོང་གི་སྔགས་རྣམས་བཟླས་པ་ཡིན། །སྔགས་ཉུང་དག་ལ་ཁྲི་འབུམ་དུ། །བཟླས་ནས་དགྲ་ལ་བརྡེག་པར་བྱ། །གཡོན་གྱི་དམེ་ལག་བཅད་ནས་ནི། །རང་གི་དཔྲལ་བའི་དབྱེས་སུ་བཞག །བདུད་ཀྱི་ཆས་སུ་ཞུགས་
ནས་ནི། །སྐྲ་བཤིག་མིག་ནས་མཆི་མ་ཕྱུང་། །དེ་ཕྱོགས་ཉིད་དུ་བསྟན་པས་ནི། །ང་རོ་དྲག་ཏུ་བཟླས་ནས་ཀྱང་། །གཡས་པའི་ཕྱག་རྒྱ་སྡིགས་མཛུབ་ཀྱིས། །སྔགས་འདི་དྲག་ཏུ་བཟླས་ལ་བརྡེག །སྙིང་ལ་ཟོ་ཞིག་ལཱ་མཱ་ཤ །རོ་ལ་ཤ་ཁྲག་འཐུང་ཀངྐ་ཀ་ཤ་ཟ་ན་ཡང་ཏ་སར་ལ་ཧོ། ཤ་ལ་ཀྱི་སྤྱང་ཀྲ་ཧེ་ཀྲ་ཧེ། བཛྲ་བནྡྷ་བྷྱོ་རུ་ལུ་རུ་ལུ། ཤ་ཁྲག་སྐམས་པའི་ལེའུ་སྟེ་བཞི་པའོ།། །།གནོད་འདུལ་ལྷ་ཡིས་ཡང་གསོལ་པ། །དམ་ལས་འདས་པའི་སྔགས་གཟེར་དང་། །འཇིག་རྟེན་མཚན་མ་བྱོལ་བ་དང་། །ལྷ་འདྲེ་རྫུ་འཕྲུལ་དྲག་གཡོས་ན། །ངན་སྔགས་རྫུ་འཕྲུལ་ཇི་ལྟར་བཟློག །རྫོགས་སངས་རྒྱས་ལ་བདག་ཉན་འཚལ། །དེ་སྐད་གསོལ་པ་གསན་ནས་ཀྱང་། །ངོ་མཚར་ལྷ་ཡིས་བཀའ་སྩལ་པ། །དམ་ལས་འདས་པའི་སྔགས་གཟེར་དང་། །འཇིག་རྟེན་མཚན་མ་བྱོལ་བ་དང་། །དྲེགས་མྱོས་པ་ཡི་རྫུ་འཕྲུལ་དག །བཟློག་པའི་ལས་རྣམས་ངས་བསྟན་གྱིས། །ཉོན་ཅིག་གཡུང་དྲུང་ཡང་དག་པ། །ངན་སྔགས་པར་བུ་བཟློག་པའི་ཕྱིར། །གཏན་ཚིགས་མན་ངག་འདི་གསུངས་སོ། །བ་ཀོ་འདྲ་བའི་མཎྜལ་བྱས། །འཇིག་རྟེན་མཚན་མ་བྱོལ་བ་དང་། །མཎྜལ་མཆོད་པ་གཞུང་བཞིན་བྱ། །སཱཙྪ་ཙ་ཏི་མང་དུ་གདབ། །ཕྱི་ཡི་བཤགས་པ་གཞུང་བཞིན་བྱ། །དེ་ནས་གསང་བའི་མཚམས་ཀྱང་བཅད། །དེ་ནས་དཀྱིལ་འཁོར་གཞུང་བཞིན་བྱ། །ནང་གི་རཱུ་པ་སརྦ་བཏང་། །བསྐང་གསོ་སྤང་སྐོང་གྲངས་ཀྱིས་གདོན། །བསྐང་བའི་གནས་ལྔ་གཞུང་བཞིན་བྱ། །མ་ཧཱ་ཤཱནྟིཾ་མཆོད་པར་བྱ། །མ་མོར་གྱུར་པ་ཀུན་ཀྱང་བསྐང་། །ཡོ་བྱད་ནག་པོ་གཞུང་བཞིན་བཏང་། །རྟགས་དང་མཚན་མ་ཞིབ་ཏུ་བརྟགས། །རྟགས་དང་མཚན་མ་ཟིན་པ་དང་། །སྐོང་ཟློག་ཆོ་ག་གཞུང་བཞིན་བྱ། །དེས་ནི་མཚན་མ་བཟློག་པར་འགྱུར། །དེ་ནས་བསྐྱར་ཏེ་ཡང་གསུངས་པ། །བསྐང་བ་དེས་ཀྱང་མ་སྐོང་ན། །དབང་གི་རྒྱལ་མོའི་སྐུར་བསྒོམས་ལ། །རྩ་བ་གང་ཡིན་མ་མོ་དེ། །ཀུ་ཤ་ལ་ནི་གཟུགས་བྱས་ལ། །
ཡན་ལག་བསྡུས་ཏེ་རྒྱ་ཡིས་བསྡམ། །སྨན་མོ་ལྔ་བཅུ་རྩ་གསུམ་ཡང་། །ཤིང་ཤུན་དག་ལ་གཟུགས་བྱས་ལ། །དར་བ་ཏི་ཡི་རྒྱུད་པས་གདགས། །ཡེ་ཤེས་རྗེ་མོ་བཅུ་བཞི་ཡང་། །ཆེ་མཆོག་སྐུ་རུ་བསྒོམས་ནས་ནི། །མགོ་ལུས་བསྣོལ་ཏེ་གདན་དུ་གདིང་། །དེས་ནི་ངན་སྔགས་ཟློག་པར་འགྱུར། །དེས་ཀྱང་ལས་རྣམས་མ་གྲུབ་ན། །བརྟགས་ཏེ་རྩ་བ་གང་ཡིན་ལ། །ཤོག་ཤོག་དག་ལ་གཟུགས་བྱས་ལ། །མཆོག་གི་ཕུར་པ་དག་གི་བརྡེག །སྨན་མོ་ལྔ་བཅུ་རྩ་གསུམ་ཡང་། །འཇག་མ་དག་ལ་གཟུགས་བྱས་ལ། །ཟངས་ཀྱི་ཕུར་པ་དམར་པོས་གདབ། །དབུས་ཀྱི་མ་མོ་རྣམ་གསུམ་ཡང་། །ཞིང་གི་ཤུན་པའི་རས་མ་ལ། །ཁྲག་དང་མཚལ་གྱི་གཟུགས་བྱས་ལ། །གསེར་རམ་སེར་པོའི་ཕུར་པ་གདབ། །དེས་ནི་ངན་སྔགས་ཟློག་པར་འགྱུར། །གལ་ཏེ་ལས་སུ་མ་གྱུར་ན། །དབུས་ཀྱི་ཆེ་མཆོག་ཡབ་ཡུམ་གཉིས། །སྤྲ་ཚིལ་དག་ལ་གཟུགས་བྱས་ནས། །ལྕགས་སམ་ནག་པོའི་ཕུར་པ་ཡིས། །ཐུགས་ཀ་ཉིད་དུ་གདབ་པར་བྱ། །ལས་རྣམས་འགྲུབ་པར་གདོན་མི་ཟ། །ཀཱི་ལ་ཡ་ཡི་སྔགས་བརྗོད་ནས། །ཆོས་ཉིད་དབྱིངས་སུ་གདབ་པར་བྱ། །ཆེ་མཆོག་རྟགས་ཀྱི་ཕྱག་རྒྱ་ཡིས། ། འགྱུར་མེད་དབྱིངས་སུ་ཕུར་པས་གདབ། །ངན་སྔགས་པར་བུ་ཟློག་པའི་ལེའུ་སྟེ་ལྔ་པའོ།། །།གནོད་འདུལ་ལྷ་ཡིས་ཡང་གསོལ་པ། །དེ་ལྟར་པར་བུ་བཟློག་ནས་ནི། །སྔོན་དུ་སྔགས་ཀྱི་སྔགས་གཟེར་དེས། །ཚེ་སྲོག་ཉམས་པ་ཇི་ལྟར་གསོ། །རྫོགས་སངས་རྒྱས་ལ་བདག་ཉན་འཚལ། །སྔོན་དུ་སྔགས་པའི་སྔགས་གཟེར་དེས། །ཚེ་སྲོག་ཉམས་པ་གསོ་བའི་ཕྱིར། །གསོ་བའི་ཆོ་ག་ངས་བསྟན་གྱིས། །ཉོན་ཅིག་གཡུང་དྲུང་ཡང་དག་པ། །སྟེགས་བུ་འདོམ་གང་གྲུ་བཞི་ལ། །འཁོར་ལོ་རྩིབས་བརྒྱད་དེ་དབུས་སུ། །པདྨ་ཆེན་པོ་འདབ་བརྒྱད་བྲི། །པདྨ་ཆེན་པོ་དེ་དབུས་སུ། །རིན་ཆེན་འབར་བ་ཟུར་བརྒྱད་བྲི། །དེ་དབུས་ཟླ་གམ་
ཟླུམ་པོ་ལ། །བྷནྡྷ་མཚན་དང་ལྡན་པ་བཞག །རིན་ཆེན་འབར་བའི་ཟུར་བརྒྱད་ལ། །ལྔ་ལ་རྟག་པའི་རྒྱལ་མོ་ལྔ། །གཉིས་པ་སྨ་ཤ་པྲ་མོ་ཧ། །གཅིག་ལ་ཚེ་ཡི་སྙིང་པོ་བྲི། །པདྨ་ཆེན་པོའི་འདབ་བརྒྱད་ལ། །ཕྱོགས་བཞིར་ཁྲོས་པའི་དབང་ཆེན་བསྐྱེད། །མཚམས་སུ་གསང་བའི་ཡུམ་བཞི་དགོད། །འཁོར་ལོ་ཆེན་པོ་རྩིབས་བརྒྱད་ལ། །ཕྱོགས་བཞིར་ཕྱག་མཚན་ཆེན་པོ་བཞི། །གཉིས་པར་རྒྱ་མཚོ་ཐོད་ཕྲེང་དགོད། །གཅིག་ལ་ཚེ་ཡི་སྙིང་པོ་དགོད། །སྨན་མོ་ཕྱི་མ་དོན་གྱིས་སྦྱར། །དཀྱིལ་འཁོར་དེ་ཡི་ཕྱི་རིམ་དུ། །བཀྲ་ཤིས་བརྒྱད་ཀྱང་དགོད་པར་བྱ། །སྒོ་བཞིར་ཁྲོ་བོ་བཞི་ཡང་དགོད། །ཏིལ་ཆེན་མེ་མར་རྒྱུན་མི་གཅད། །ཡོ་བྱད་ཆེན་པོའི་ཟས་རྣམས་ལ། །རྩ་བའི་སྔགས་ཀྱིས་བཏབ་ལ་བཞག །མ་མོ་བྱོན་གྱིས་སྔགས་རྒྱས་གདབ། །ཨུ་ཏའི་བྱ་བའི་སྔགས་ཀྱིས་གདབ། །དངོས་གྲུབ་རྟགས་དང་སྦྱར་ནས་ནི། །གསོ་བསྐྱེད་བཟང་ཞིང་གཏམས་པར་བྱ། །ཚེ་སྒྲུབ་པའི་རིམ་པ་སྟེ་ལེའུ་དྲུག་པའོ།། །།གནོད་འདུལ་ལྷ་ཡིས་ཡང་གསོལ་པ། །དཔའ་བོ་ཐིག་ལེ་ཉམས་པ་དང་། །ཐིག་ལེའི་སྤྱོད་པ་ཉམས་པ་རྣམས། །ལས་དེ་སླར་ལ་ཟློག་པའི་ཕྱིར། །ཉག་གཅིག་ཡབ་ལ་བདག་ཉན་འཚལ། །ཡང་དག་རྫོགས་ཀྱིས་བཀའ་སྩོལ་ཅིག །དེ་ལས་སླར་ལ་ཟློག་པའི་ཕྱིར། །ངེས་པའི་མན་ངག་ངས་བསྟན་གྱིས། །ཉོན་ཅིག་གཡུང་དྲུང་ཡང་དག་པ། །རྟགས་དང་མཚན་མ་བྱུང་བའི་ཚེ། །བསྡམ་པའི་ཕྱག་རྒྱ་བཀྲོལ་ནས་ནི། །དགྲ་བོའི་ཡུལ་ཕྱོགས་བསྟན་པ་ནི། །གྲོ་ག་ཤིང་ཤུན་རས་ལ་སོགས། །མི་དེའི་མིང་རུས་བྲིས་ནས་ནི། །དེ་ཡི་ལག་ཏུ་བསྐུར་བྱའོ། །ཤུགས་སྒྲོལ་མ་ཡི་སྔགས་ཀྱིས་གདབ། །ཁྲག་དང་དུག་གི་གཏོར་མ་ཡང་། །རབས་ཆད་ཐོད་པར་བཤམས་ནས་ནི། །ཡུལ་སའི་ཕྱོགས་སུ་གཏོར་མ་གཏང་། །སྙིང་གི་ཕུར་པ་ཕྱུང་ནས་ནི། །ཨ་མྲྀ་ཏ་ཡིས་མཆོད་བྱས་ནས། །དམ་རྫས་ཚང་བའི་གཏོར་མ་ལ། །ཀུ་པ་ར་ཡི་རཀྟས་
སྦྲེང་། །གང་ཡིན་ཕྱོགས་སུ་ཁ་བལྟས་ལ། །གཙོ་བོ་གཞུང་བཞིན་བསྐུལ་ནས་ནི། །ལུས་ཀྱིས་བསིག་ཅིང་ཕྱག་རྒྱས་བསྡམ། །བདག་ཉིད་དབང་གི་སྐུར་བསྒོམས་ལ། །དབང་དྲག་ཕྱག་རྒྱ་བཅས་ནས་ནི། །གཟུགས་དེ་ཉིད་ལ་ཚམ་རྔམས་བྱ། །དྲག་ཤུལ་དབང་གིས་བསྐྱོད་ལ་བཏང་། །འདི་ལྟར་མ་མོ་དྲག་ཤུལ་གྱི། །དཔལ་གྱི་དབང་གིས་བསྡུས་ལ་བཏང་། །ལས་ཀྱི་མི་འགྲུབ་མི་སྲིད་དོ། །བསྡམས་པའི་ཕྱག་རྒྱས་བཀྲོལ་ནས་ནི། །འབྲིག་ཤའི་ཤིང་གི་ལྕགས་ཀྱིས་བསྡམ། །གོང་མའི་ཕྱག་རྒྱ་བཅས་ནས་ནི། །རྡོ་རྗེ་གནོན་འགྲོས་གོང་མ་ཡིས། །ཕྱོགས་དེར་གོམ་པ་བདུན་འགྲོའོ། །ཡབ་ཡུམ་སྔགས་ཀྱིས་བཏབ་ནས་ནི། །གོང་གི་ཕྱག་རྒྱ་དྲག་བསྐུལ་ལོ། །དེས་ནི་མོད་ལ་ལས་རྣམས་འགྲུབ། །ལན་གསུམ་བྱས་ན་ན་བར་འགྱུར། །ལན་ལྔ་བྱས་ན་འཆི་བར་འགྱུར། །སྙིང་གི་ཕུར་པ་ཕྱུང་ནས་ནི། །ལན་གསུམ་དྲག་ཏུ་དྲིལ་ནས་ནི། །སྤྱི་བོའི་གཙུག་ཏུ་གདབ་པར་བྱ། །ལྕགས་སྣ་ལྔ་ཡི་ཕུར་བུ་ལ། །དབང་དྲག་ལས་རྣམས་གཞུང་བཞིན་བྱའོ། །དེས་ནི་འཆི་བར་གདོན་མི་ཟ། །མོན་ནམ་རབས་ཆད་ཐོད་པ་ལ། །ནང་དུ་མ་བདུན་སྙིང་པོ་བྲི། །སྤྱི་གཙུག་ཉི་ཟླ་ཐོད་ཕྲེང་བྲི། །ཆགས་འཛིན་སྤུན་གཉིས་རྣ་ལྟག་གོ། །ཚོན་སྐུད་གཉིས་སུ་མི་གནས་གདགས། །རག་ཤ་རཱུ་ཏྲའི་སྔགས་ཀྱིས་གདབ། །གོང་གི་ཕྱག་རྒྱ་གཉིས་སྤེལ་ཏེ། །དྲག་ཏུ་བསྐུལ་ཏེ་འཕངས་ལ་གཏང་། །ཞིང་གི་ཤ་ཚིལ་རོ་སོགས་ཀྱིས། །མ་མོ་རྣམས་ལ་གཏང་རག་གཏང་། །ལས་རྣམས་འགྲུབ་པར་གདོན་མི་ཟ། །ངན་སྔགས་པར་བུས་བསད་པའི་ལེའུ་སྟེ་བདུན་པའོ།། །།གནོད་འདུལ་ལྷ་ཡིས་ཡང་གསོལ་པ། །བསྟན་པ་གཉན་པོ་འཇིག་བྱེད་ཅིང་། །ལུ་གུ་རྒྱུད་ལ་འགལ་བྱེད་པ། །སེམས་ཅན་ཀུན་ལ་གནོད་བགྱིད་པ། །རྟག་ཏུ་གདུག་པའི་སེམས་ཅན་ལ། །ནན་ཏུར་ལས་རྣམས་ཇི་ལྟར་ལགས། །རྫོགས་སངས་རྒྱས་ལ་བདག་ཉན་འཚལ། །དེ་སྐད་གསོལ་པ་
གསན་ནས་ཀྱང་། །ངོ་མཚར་ལྷ་ཡིས་བཀའ་སྩལ་པ། །རྟག་ཏུ་གདུག་པའི་སེམས་གྱུར་པས། །སེམས་ཅན་ཀུན་ལ་གནོད་གྱུར་དེར།།ནན་ཏུར་ལས་རྣམས་ངས་བསྟན་གྱིས། །ཉོན་ཅིག་གཡུང་དྲུང་ཡང་དག་པ། །ཇི་ལྟར་ཡིད་འཐད་གནས་སུ་ནི། །འབྲུ་སྣ་ཚོགས་པའི་མི་གཟུགས་ལ། །མཁར་ཐབས་མདའ་ཡིས་རབ་བརྒྱན་ནས། །གླིང་བཟང་དར་དཀར་ཆས་ཀྱིས་བརྒྱན། །ཡོ་བྱད་ཚོགས་པའི་གདེར་ཆ་དང་། །ཟ་འོག་མདའ་ཡིས་རྣམ་པར་བརྒྱན། །ཕྱི་ཡི་མ་ཧཱ་ཤཱནྟིཾ་བྱ། །མ་ཧཱ་ཤཱནྟིང་གཞུང་བཞིན་བརྗོད། །ཕོ་རིགས་རྣམས་ལ་འདི་སྐད་སྐོང་། །སོལ་བའི་དོང་ནི་ཁྲུ་གང་པར། །ནང་དུ་གླུད་ཕྱི་རྒན་དུ་མནན་ལ། དེའི་ནང་དུ་གསེར་རམ་གཡུ་བརྡར་ལ། དགྲ་གང་ཡིན་པ་ར་སོག་ལ་གཟུགས་བྲིས་ལ་ཁ་བུབ་ཏུ་མནན་ནོ། །དེའི་སྟེང་དུ་རྡོ་རྗེ་རྒྱ་གྲམ་གྱིས་གནོན། དེས་དགྲ་བོའི་གཟུགས་བྲིས་ཏེ་འོ་དོད་བོས་ལ་བཏང་། ལས་མྱུར་བར་འགྲུབ་བོ། །སྙུག་རྒོད་ལ་དཔག་བསམ་ཤིང་གི་གཟུགས་བྱས་ལ། ཡང་ན་གྲོ་ག་ལ་མིང་རུས་བྲིས་ལ་སྙིང་གར་གླན། གསེར་གཡུ་གཉིས་སྐོས་རྗེ་དྲང་ཀར་ལ་བསྔོ། དེ་ནས་མན་ད་ལའི་དར་དུ་གཏུམས་ལ་མདའ་སྤ་ཏིས་གདགས་སོ། །ཨ་ཏི་པ་ཏི་ཐག་པས་གདགས་སོ། །འོ་དོད་དྲག་ཏུ་འབོད། དེས་ནི་སྨྱོ་འབོག་དྲག་པོས་འདེབས་པར་འགྱུར་རོ། །ལྕགས་དང་གསེར་གཡུ་བསྲེས་ལ་ཁོལ་མོ་ཞིག་འཛིན་ལ་བསྔོས་ཏེ། གོང་དུ་བསྟན་པའི་གཟུགས་དང་བསྔོ་བའི་ཡས་སྟགས་བསྲེས་ལ་རུས་སྦལ་ཤུན་པས་གཏུམས་ལ་ལ་ར་ཏིའི་དོང་དུ་གཞུག་གོ། །ཡེ་ཤེས་མ་མོའི་ཕྱག་རྒྱས་གདབ། དེ་ཡིས་དབང་པོ་མི་གསལ་བ་དང་། ལྕེ་དིག་པ་དང་ལྐུགས་པར་འགྱུར་རོ། །ལྕགས་དང་གསེར་དང་ཟངས་དང་གསུམ་བརྡར་ལ་ཡ་བདུད་ཆེན་པོ་ལ་བསྔོས་ལ། གོང་དུ་བསྟན་པའི་གཟུགས་དང་བསྔོ་བའི་ཡས་སྟགས་བསྲེས་ལ་མུ་ལའི་དོང་དུ་གཞུག་གོ། །ཆེ་མཆོག་རྟགས་ཀྱི་ཕྱག་རྒྱས་གདབ། དེས་ནི་གློ་བུར་དུ་འཆི་བར་འགྱུར་རོ། །འབྲུ་ཟན་དྲེ་གང་ལ་གླིང་ཕྲན་བཅུ་གཉིས་ཀྱི་གཟུགས་བྱས་ལ་དཀོར་ཆས་བརྒྱན་ལ་
ཡར་ལ་ཤོད་ཀྱི་སྐྱེས་ཏོ་རེ་ལ་བསྔོའོ། །དེ་ནས་འཇག་མ་ལ་གཟུགས་བྱས་ལ་དགྲ་བོའི་མིང་རུས་བྲིས་ལ་གཟུགས་ཀྱི་སྙིང་གར་གླན་ནོ། །ཟས་ལ་ཟ་བའི་ཚུལ་བྱེད་དུ་གཞུག་གོ། །འོ་དོད་དྲག་ཏུ་འབོད་དོ། །དེ་ལྟར་བྱས་ན་གློ་བུར་དུ་འཆི་བར་འགྱུར་རོ། །རུས་པ་སྣ་ཚོགས་བསྡུས་ནས་གཤིན་རྗེ་ལ་བསྔོས་ནས་ཡས་སྟགས་དེའི་གསེབ་ཏུ་ཁམ་ས་ལ་དགྲ་བོའི་གཟུགས་བྱས་ལ་མིང་རུས་བྲིས་ཁ་བུབ་ཏུ་བསྟན་ལ་འདའ་འགེངས་པའི་ཚུལ་དུ་བྱའོ། །ཅི་ཡང་རུང་བའི་ཞིང་ལྤགས་བསྐོན་ལ་གཤིན་རྗེ་ནག་པོའི་སྔགས་ཀྱིས་གདགས་སོ། །དེས་གྲིར་འཆིའོ། །མི་ནོར་དུ་བཏགས་པའི་གཟུགས་བྱས་ལ། ས་ལ་ཨུ་མ་དེ་ཝའི་གཟུགས་བྱས་ལ། ཨུ་མ་དེ་ཝའི་སྟེང་དུ་བསྐྱོན་ལ་འདོད་ཆགས་སྤྱོད་པའི་ཚུལ་དུ་བྱའོ། །མ་ཨེ་བ་ནི་རྦན་ཙ་མ་ནི་ཕཊ། བྱ་བའི་སྔགས་ཀྱིས་གདབ་པའོ། །མཁལ་སྐེད་ན་བ་དང་། ཕོ་མཚན་སྐྲངས་པ་དང་། ཆུ་འགགས་ནས་འཆིའོ། །དུང་གསེར་གཡུ་དང་བསྭེ་དང་མཚལ་ལ་སོགས་པའི་ཡས་སྟགས་སྣ་ཚོགས་པ་དང་དགྲ་བོའི་མིང་རུས་བྲིས་ལ། ར་ཏི་ཚ་རའི་པགས་པས་གཏུམས་ལ་ས་ཏི་ས་ལ་མ་རན་བཟླས་ཏེ་དེ་ལ་གདབ་པར་བྱའོ། །དེས་ནི་མྱུར་དུ་འབོག་པར་འགྱུར་རོ། །བསེ་དང་དུང་དང་ལྕགས་དགྲ་བོའི་མིང་བསྲེས་ཏེ་རྫ་ནག་པོའི་ནང་དུ་བཅུག་ལ། བ་ཏ་མ་ནའི་སྔགས་ཀྱིས་བཏབ་ལ་བོས་ཤིང་གཏད་ན་རྦབ་དང་གཡང་དུ་འགྲོའོ། །ཆོ་ག་བྱེད་པའི་དུས་སུ་མ་བདུན་གྱི་ཆས་སུ་ཞུགས་ལ་ངོ་ཁྲག་གིས་བྱུགས་ཏེ། བདག་ཉིད་དབང་ཆེན་ཏིང་འཛིན་ནམ་ཡུམ་མུ་ཁ་ལེའི་ཏིང་འཛིན་དུ་ཞུགས་ལ། གཞུང་བཞིན་བསྐུལ་ལ་ལས་བཅོལ་ལོ། །ཕོ་རིགས་ཕྱི་མ་ལ་ལས་བཅོལ་ཞིང་གཏད་པ་ཡོད་ན་འཁུ་ལྡོག་ཆེ་ལ་རྒྱབ་འགྱུར་བས་འདིར་མ་གསུངས་སོ། །དགྲ་བོ་བདུད་ནག་པོ་ལ་གཏད་པའི་ལེའུ་སྟེ་བརྒྱད་པའོ།། །།ཆུ་སྲིན་པིར་གྱི་ཁ་ནང་དུ། །གྲེ་བར་རིན་ཆེན་སོང་བ་ལྟར། །བསྐལ་པར་
བཞག་ཀྱང་མི་གཏོང་ངོ་། །རྨོངས་པ་འཕྱར་བས་བྱིན་གྱུར་ན། །དུས་མེད་པར་ནི་སྲོག་ཟད་ནས། །བསྐལ་པ་བདུན་དུ་རླག་པར་འགྱུར། །གསང་བ་གཏན་ཚིགས་ཞེས་བྱའོ། །མ་མོ་འདུས་པའི་ཏནྟྲ་རྫོགས་སོ།། །།