ཐུགས་ཀྱི་ཡང་སྙིང་མ་མོ་འབུམ་ཏིག་གི་རྒྱུད།
ཐུགས་ཀྱི་ཡང་སྙིང་མ་མོ་འབུམ་ཏིག་གི་རྒྱུད། བཅོམ་ལྡན་འདས་དཔལ་ཧེ་རུ་ཀ་རྟག་པ་ཆེན་པོ་ལ་ཕྱག་འཚལ་ལོ། །བྱང་ཆུབ་སེམས་ཁྱབ་གདལ་བའི་རང་བཞིན་ལ་ཡུམ་དངོས་གྲུབ་ཆེན་པོར་བསྟན་པ་དང་། ཐུགས་ཀྱི་སྒྲོམ་བུ་ལས་ཕྱུང་བའི་དགོངས་པའི་བརྣག་པ་མཐར་ཕྱིན་པའི་དོན་དུ་གསུངས་པ་ལས། གནོད་འདུལ་ལྷ་ཡིས་ཡང་གསོལ་པ། །འཇིག་རྟེན་པ་ཡི་ཆོས་རྣམས་ལས། །སེམས་ཉིད་མྱ་ངན་ཇི་ལྟར་བཟླ། །རྟག་ཆད་རྣམ་གཉིས་གང་དུ་བསྡུ། །ཡང་དག་རྫོགས་ཀྱིས་བཀའ་སྩོལ་ཅིག །དེ་སྐད་གསོལ་པ་གསན་ནས་ཀྱང་། །ཉག་
གཅིག་ཡབ་ཀྱིས་བཀའ་སྩལ་པ། །ཉོན་ཅིག་གཡུང་དྲུང་ཡང་དག་པ། །སྣོད་ཀྱི་འཇིག་རྟེན་ཀུན་བཟང་པོ། །བཅུད་ཀྱི་འཇིག་རྟེན་སངས་རྒྱས་རྒྱུ། །ཕྱི་ནང་སྣོད་བཅུད་རྣམ་པར་དག །རྟག་ཆད་རྣམ་གཉིས་མྱ་ངན་འདས། །གཡུང་དྲུང་ལྷ་ཡིས་ཡང་གསོལ་པ། །སྟོན་པ་རྣམ་གསུམ་གང་ལ་བགྱི། །སྡུད་པ་རྣམ་གསུམ་གང་ལ་བགྱི། །གནས་ཞེས་བགྱི་བ་ཇི་ལྟ་བུ། །གནས་ལ་ངེས་པ་དུ་ཞིག་མཆིས། །དུས་ཞེས་བྱ་བ་ཇི་ལྟ་བུ། །དུས་ལ་ངེས་པ་དུ་ཞིག་མཆིས། །ཡང་དག་རྫོགས་ཀྱིས་བཀའ་སྩོལ་ཅིག །དེ་སྐད་གསོལ་པ་གསན་ནས་ཀྱང་། །ཡང་དག་རྫོགས་ཀྱིས་བཀའ་སྩལ་པ། །ཉོན་ཅིག་གཡུང་དྲུང་ཡང་དག་པ། །སྟོན་པ་རྣམ་གསུམ་ཡེ་ཤེས་སྐུ། །སྡུད་པ་རྣམ་གསུམ་རིག་པའི་གཏེར། །འཕོ་འགྱུར་མེད་པས་གནས་ཞེས་བྱ། །ཡང་དག་དོན་རྟོགས་དུས་ཞེས་བྱ། །རྡོ་རྗེ་སེམས་དཔས་ཡང་གསོལ་པ། །ལྷ་ལ་རྣམ་པ་དུ་ཞིག་མཆིས། །འཁོར་ལ་རྣམ་པ་དུ་ཞིག་མཆིས། །ལུང་ལ་རྣམ་པ་དུ་ཞིག་མཆིས། །ཡང་དག་རྫོགས་ཀྱིས་བཀའ་སྩོལ་ཅིག །དེ་སྐད་གསོལ་པ་གསན་ནས་ཀྱང་། །ཡང་དག་རྫོགས་ཀྱིས་བཀའ་སྩལ་པ། །ཉོན་ཅིག་གཡུང་དྲུང་ཡང་དག་པ། །ལྷ་ལ་རྣམ་པ་གསུམ་དུ་བསྟན། །འཁོར་ལ་རྣམ་པ་གསུམ་དུ་བསྟན། །ལུང་ལ་རྣམ་པ་གསུམ་དུ་བསྟན། །རྡོ་རྗེ་སེམས་དཔས་ཡང་གསོལ་པ། །རྒྱུད་ཅེས་བགྱི་བ་ཅི་ལྟར་ལགས། །ལུང་ཞེས་བགྱི་བ་ཇི་ལྟར་ལགས། །མན་ངག་བགྱི་བ་ཇི་ལྟར་ལགས། །དེ་སྐད་གསོལ་པ་གསན་ནས་ཀྱང་། །ཡང་དག་རྫོགས་ཀྱིས་བཀའ་སྩལ་པ། །ཉོན་ཅིག་གཡུང་དྲུང་ཡང་དག་པ། །རྒྱུད་ཅེས་བྱ་བ་འདྲེལ་པའི་བཀའ། །ལུང་ཞེས་བྱ་བ་སྟོན་པའི་བཀའ། །མན་ངག་ཅེས་བྱ་ལ་བཟླའོ། །གཡུང་དྲུང་ལྷ་ཡིས་ཡང་གསོལ་པ། །ཡུམ་གྱི་དབྱིངས་ཤེས་གང་ལ་བགྱི། །ཡབ་ཀྱི་མཁའ་ཞེས་གང་ལ་བགྱི། །བླང་དོར་མེད་པ་གང་གིས་འགྲུབ། །འཁོར་བའི་གནས་འདི་མི་འཚལ་ལམ། །ཀློང་ཞེས་བྱ་བ་ཇི་ལྟར་ལགས། །དེ་སྐད་གསོལ་པ་གསན་ནས་ཀྱང་། །ཡང་དག་
རྫོགས་ཀྱིས་བཀའ་སྩལ་པ། །ཉོན་ཅིག་གཡུང་དྲུང་ཡང་དག་པ། །འདུ་འབྲལ་མེད་པ་ཡུམ་གྱི་དབྱིངས། །སྐྱེ་ཤི་མེད་པ་ཡབ་ཀྱི་མཁའ། །བདེ་བ་ཆེན་པོའི་དོན་རྟོགས་ན། །བླང་དོར་མེད་པ་དེ་ཡིས་འགྲུབ། །གཉིས་མེད་དོན་རྟོགས་དེ་ཡི་ངང་། །རྡོ་རྗེ་སེམས་དཔས་ཡང་གསོལ་པ། །ཆོས་ཉིད་རྟག་པའི་གཡུང་དྲུང་ལ། །སེམས་ཉིད་རྟག་པའི་བློས་བཞག་ན། །འགྱུར་མེད་དོན་ཞེས་རུང་ལགས་སམ། །ཡང་དག་རྫོགས་ཀྱིས་བཀའ་སྩལ་པ། །ཉོན་ཅིག་གཡུང་དྲུང་ཡང་དག་པ། །ཆོས་ཉིད་རྟག་པའི་གཡུང་དྲུང་ལ། །སེམས་ཉིད་རྟག་པའི་བློ་བཞག་པ། །རྫོགས་པའི་ལྟ་བ་ལ་དོར་རོ། །རྡོ་རྗེ་སེམས་དཔས་ཡང་གསོལ་པ། །མ་ཞེས་བྱ་བ་གང་གི་དབྱིངས། །མོ་ཞེས་བྱ་བ་གང་གི་ཀློང་། །མ་མོའི་གཏན་ཚིགས་ཇི་ལྟར་ལགས། །འབྱུང་བ་ལྔ་པོ་གང་ལས་གྲུབ། །སངས་རྒྱས་དགོངས་པ་གང་གིས་འགྲུབ། །བདེ་བ་ཆེན་པོའི་ངང་ཉིད་ལས། །རྒྱུ་རྐྱེན་གཉིས་ཀྱིས་བསྐྱེད་ལགས་སམ། །འབྱུང་བ་ལྔ་ཡི་ངང་ཉིད་ལས། །འདི་ལ་འཕོ་འགྱུར་མཆིས་ལགས་སམ། །ཡང་དག་རྫོགས་ཀྱིས་བཀའ་སྩལ་པ། །ཉོན་ཅིག་གཡུང་དྲུང་ཡང་དག་པ། །མ་མོའི་དོན་རྣམས་རྟོགས་པའི་ཕྱིར། །མ་མོའི་ས་རྣམས་ངེས་པར་ཐོབ། །ཡིད་བཞིན་ནོར་བུ་མ་བཙལ་རྙེད། །ཡེ་ཤེས་ཉི་མ་རང་ལ་ཤར། །ཆེན་པོ་ལྔ་ཡི་ངང་ཉིད་དུ། །ཐམས་ཅད་མ་ལུས་སངས་རྒྱས་སོ། །གསང་བ་གཏན་ཚིགས་ཀྱི་ལེའུ་སྟེ་དང་པོའོ།། །།གནོད་འདུལ་ལྷ་ཡིས་ཡང་གསོལ་པ། །ཐེག་པ་དམན་པའི་འོག་མ་དང་། །སྐྱེ་བོ་དམ་མེད་དམ་ཉམས་ལ། །མི་བསྟན་སྦ་བའི་དམ་ཚིག་གང་། །བདག་གིས་ནན་ཏན་ཇི་ལྟར་བགྱི། །མངོན་སངས་རྒྱས་ལ་བདག་ཉན་འཚལ། །མངོན་སངས་རྒྱས་ཀྱིས་བཀའ་སྩོལ་ཅིག །དེ་སྐད་གསོལ་པ་གསན་ནས་ཀྱང་། །མངོན་སངས་རྒྱས་ཀྱིས་བཀའ་སྩལ་པ། །ཐེག་པ་དམན་པའི་འོག་མ་དང་། །སྐྱེ་བོ་དམ་མེད་དམ་ཉམས་ལ། །
མི་བསྟན་སྦ་བའི་དམ་ཚིག་ནི། །ཐེ་ཚོམ་མེད་པར་ངས་བསྟན་གྱི། །ངས་གསུང་བ་ལ་རྩེ་གཅིག་སེམས་སྐྱེད་ཅིག །ཐེག་པ་འོག་མ་རྣམས་ལ་གསང་བ་ནི། །རྟོགས་པའི་ལྟ་བ་ཆེན་པོ་གསང་། །མཛད་སྤྱོད་ངོ་མཚར་ཆེན་པོ་གསང་། །རྡོ་རྗེ་སློབ་དཔོན་སྒྲུབ་རོགས་གསང་། །མ་མོ་བརྟེན་པའི་དམ་རྫས་གསང་། །སྒྲུབ་པར་བྱེད་པའི་ལག་ཆ་གསང་། །བཟླས་པར་བྱ་བའི་སྔགས་རྣམས་གསང་། །བསྒྲུབ་པའི་གནས་ཀྱང་དེ་བཞིན་ནོ། །བསྒྲུབ་པའི་དུས་ཀྱང་དེ་བཞིན་ནོ། །བསྒྲུབ་པའི་རྟགས་ཀྱང་དེ་བཞིན་ནོ། །དངོས་གྲུབ་རྟགས་ཀྱང་སྔ་མ་བཞིན། །བླང་བའི་ཐབས་ཀྱང་གསང་བར་བྱ། །དབང་དུ་བསྡུ་བའི་ཐབས་ཀྱང་རབ་ཏུ་གསང་། །བཀོལ་བའི་ཐབས་ཀྱང་དེ་བཞིན་ནོ། །གདམས་པའི་གསང་བའི་དམ་ཚིག་ནི། །གདམས་པ་བཞིན་དུ་མ་ཉན་ཏེ། ། གསང་བ་མ་ཐུབ་འབྲས་བུ་ནི། །ཏིལ་འབྲུ་ཙམ་ཡང་ཐོབ་མི་འགྱུར། །དངོས་གྲུབ་ཉིད་ཀྱང་རིང་བ་དང་། །དེ་ནི་རིགས་ཀྱང་ཡོང་མི་བྱེད། །ཅེས་བཀའ་སྩལ་ཏོ། །མན་ངག་དམ་ཚིག་གི་ལེའུ་སྟེ་གཉིས་པའོ།། །།གནོད་འདུལ་ལྷ་ཡིས་ཡང་གསོལ་པ། །རྣལ་འབྱོར་ཟབ་མོའི་དོན་སྤྱོད་ལ། །ལྟ་བའི་དོན་གྱིས་ཕན་གདགས་པ། །བདག་གིས་ནན་ཏན་ཇི་ལྟར་བསྐྱེད། །རྟག་ཆེན་ཡབ་ལ་བདག་ཉན་འཚལ། །རྟག་ཆེན་ཡབ་ཀྱིས་བཀའ་སྩོལ་ཅིག །དེ་སྐད་གསོལ་པ་གསན་ནས་ཀྱང་། །རྟག་ཆེན་ཡབ་ཀྱིས་བཀའ་སྩལ་པ། །རྣལ་འབྱོར་ཟབ་མོའི་དོན་སྤྱོད་ལ། །ལྟ་བའི་དོན་གྱིས་ཕན་གདགས་པ། །ཡང་དག་ཉིད་དུ་ངས་བསྟན་གྱི། །ཉོན་ཅིག་གཡུང་དྲུང་ལྷ་ཡི་གཙོ། །ངས་བསྟན་པ་ལ་ཐེ་ཚོམ་མེད། །སྣོད་ཀྱི་འཇིག་རྟེན་ཤེས་བྱའི་ཡུལ། །བཅུད་ཀྱི་འཇིག་རྟེན་རིག་པ་སྟེ། །ཡུལ་དང་རིག་པ་གཉིས་མེད་དོན་གྱིས་བལྟ་བར་བྱ། །མ་མོ་མཁའ་འགྲོ་སྐྱབས་དང་གྲོགས་སུ་བལྟ། །སྣོད་ཀྱི་འཇིག་རྟེན་ཆོས་ཀྱི་དབྱིངས། །བཅུད་ཀྱི་འཇིག་རྟེན་ཡེ་ཤེས་ཆེ། །དབྱིངས་དང་ཡེ་ཤེས་གཉིས་མེད་དོན་གྱིས་བལྟ། །ཐབས་
དང་ཤེས་རབ་འདུ་འབྲལ་མེད་པར་བལྟ། །ཡབ་ཡུམ་རོལ་པ་བྱང་ཆུབ་སེམས་སུ་བལྟ། །མ་མོ་མཁའ་འགྲོ་བྲན་དང་གཡོག་ཏུ་བལྟ། །སྤྲུལ་པ་སྣ་ཚོགས་འཕྲོ་འདུ་དབྱིངས་སུ་བལྟ། །སྣང་སྲིད་ཐམས་ཅད་བྱང་ཆུབ་སེམས་ཀྱི་ཐིག་ལེར་བལྟ། །སྣོད་ཀྱི་འཇིག་རྟེན་བྱང་ཆུབ་སེམས། །བཅུད་ཀྱི་འཇིག་རྟེན་ཡེ་ཤེས་ཀློང་། །གཉིས་མེད་དོན་གྱི་སྐྱེ་མེད་སྐུ་རུ་བལྟ། །མ་མོ་མཁའ་འགྲོ་བྱང་ཆུབ་སེམས་ཀྱི་སྤྲུལ་པར་བལྟ། །སྣང་སྲིད་ཐམས་ཅད་ཐིག་ལེ་ཆེན་པོར་བལྟ། །སྣོད་བཅུད་གཉིས་མེད་རྟག་ཆེན་གཡུང་དྲུང་སྐུ། །སྣང་སྲིད་གཉིས་མེད་ཡེ་ཤེས་ཐིག་ལེའི་ཀློང་། །འཕྲོ་འདུ་ཐམས་ཅད་སེམས་ཀྱི་འབྲས་བུ་སྟེ། །མ་མོ་མཁའ་འགྲོ་ཡེ་ཤེས་འཕྲོ་འདུར་བལྟ། །ལུང་འདི་ཉིད་ཀྱི་བལྟ་བ་ནི། །མ་ནི་སྐྱེ་མེད་སྐུ་རུ་བལྟ། །མོ་ནི་བརྗོད་མེད་གསུང་དུ་བལྟ། །མ་དང་མོ་ནི་གཉིས་མེད་ཐུགས་སུ་བལྟ། །མ་ནི་བྱང་ཆུབ་སེམས་སུ་བལྟ། །མོ་ནི་ཡེ་ཤེས་ཀློང་དུ་བལྟ། །གཉིས་མེད་རྟོགས་པ་ཆེན་པོར་བལྟ། །མ་ནི་སྐྱེ་མེད་རྣམ་དག་དབྱིངས། །མོ་ནི་འགྱུར་མེད་ཡེ་ཤེས་ཏེ། །གཉིས་མེད་རྟག་པའི་གཡུང་དྲུང་སྐུ། །མ་དང་མོ་ཡི་ངང་ཉིད་ནི། །གཉིས་སུ་མེད་པའི་བྱང་ཆུབ་སེམས། །མ་དང་མོ་ཡི་ངང་ཉིད་ལས། །ཡེ་ནས་གཉིས་མེད་ཆོས་ཀྱི་སྐུ། །མ་དང་མོ་ཡི་ངང་ཉིད་ནི། །ཡེ་ནས་རྡོ་རྗེ་སྙིང་པོར་བལྟ། །མ་དང་མོ་ཡི་ངང་ཉིད་ནི། །ཡེ་ནས་འབྲས་བུ་གསུམ་དུ་བལྟ། །མ་དང་མོ་ཡི་ངང་ཉིད་ནི། །ཡེ་ནས་སྟོང་པ་གསུམ་དུ་བལྟ། །མ་དང་མོ་ཡི་ངང་ཉིད་ནི། །རྟོགས་ན་རྒྱལ་བའི་སྐུ་ཡང་ཡིན། །མ་རྟོགས་དམྱལ་བའི་གནས་སུ་འགྲོ། ། མདོར་ན་མ་དང་མོ་ཡི་ངང་ཉིད་ནི། །འཚོ་བར་བྱེད་པའི་སྨན་ཡང་ཡིན། །འཆི་བར་བྱེད་པའི་དུག་ཀྱང་ཡིན། །ཅེས་བཀའ་སྩལ་པ་དང་། འཁོར་རྣམས་དམས་ནས་ཡ་མཚན་སྐྱེས་སོ། །མ་མོའི་ལྟ་བའི་ལེའུ་སྟེ་གསུམ་པའོ།། །།གནོད་འདུལ་ལྷ་ཡིས་ཡང་གསོལ་པ། །སེམས་ཅན་ཀུན་ལ་ཕན་
གདགས་ཕྱིར། །བསྒོམ་པའི་དོན་ལ་བདག་ཉན་འཚལ། །ཡང་དག་རྫོགས་ཀྱིས་བཀའ་སྩོལ་ཅིག །དེ་སྐད་གསོལ་པ་གསན་ནས་ཀྱང་། །མངོན་རྫོགས་རྒྱལ་པོས་བཀའ་སྩལ་པ། །བསྒོམ་པའི་དོན་འདི་ངས་བསྟན་གྱི། །ཉོན་ཅིག་གཡུང་དྲུང་ཡང་དག་པ། །ངས་གསུང་བ་ལ་སེམས་མ་ཡེངས། །དེ་ལ་དང་པོ་དེ་བཞིན་ཉིད་ཀྱི་ཏིང་ངེ་འཛིན་ནི། སྣང་སྲིད་ཐམས་ཅད་མ་བྱུང་མ་སྐྱེས་པར་བསྒོམ། དེ་ནས་ཀུན་ཏུ་སྣང་བའི་ཏིང་ངེ་འཛིན་ནི། སྙིང་རྗེ་ནམ་མཁའི་ངོ་བོ་ལྟར། །སྣང་ལ་རང་བཞིན་མེད་པར་བསྒོམ། །དེ་ནས་རྒྱུ་ཡི་ཏིང་ངེ་འཛིན་ནི། ཨོཾ་དཀར་པོ་བཀྲ་ས་ལེ་བསྒོམ། ཨོཾ་དེ་ལས་འོད་འཕྲོས་པས་འཕགས་པའི་ཐུགས་ཀྱི་རྒྱུད་བསྐུལ། འགྲོ་བ་སེམས་ཅན་གྱི་དོན་བྱས་ནས། སླར་འདུས་པ་ལས་ཡེ་ཤེས་ལྔར་གྱུར་པར་བསྒོམ་མོ། །ཡེ་ཤེས་ལྔ་ཡི་འོད་ཟེར་ལས། །ཨེ་ཏཾ་མཾ་སུ་ཀེཾ་ཕྱཾ་ལཾ་བྷྲཱུཾ། ཞེས་བརྗོད་པས། ཡི་གེ་དེ་རྣམས་རིན་ཆེན་རྩར་ལ་བརྒྱུས་པ་བཞིན་དཀར་ཁྲིགས་སེ་བསྒོམ་མོ། །དེ་ནས་ཨེ་བྷ་ག་ཝ་པདྨ་མཎྜལ་ཞེས་བརྗོད་པས། ཡི་གེ་ཨེ་ལས་གསེར་གྱི་འཁོར་ལོ་རྩིབས་སྟོང་དང་ལྡན་པ་གཅིག་ཏུ་གྱུར་ནས་སྣང་སྲིད་ཀུན་ལ་ཁྱབ་པར་བསྒོམ་མོ། །དེའི་བྱིན་བརླབས་ལས་འོག་གི་ཕྱོགས་སུ་ཏཾ་ཏཾ་ཞེས་བརྗོད་པས་རླུང་གི་འཚུབ་མ་ལ་རྡོ་རྗེ་རྒྱ་གྲམ་གྱིས་ཁ་བཅད་པར་བསྒོམ་མོ། །དེའི་སྟེང་དུ་མཾ་ལས་རཀྟ་མཎྜལ་ཞེས་བརྗོད་པས། རཀྟའི་རྒྱ་མཚོ་མཐའ་དང་དབུས་མེད་པ་དམར་ཆིལ་བར་གྱུར་པར་བསྒོམ་མོ། །དེའི་སྟེང་དུ་སུཾ་ལས་བཛྲ་སུ་ཞེས་བརྗོད་པས། གསེར་གྱི་ས་གཞི་དཔེར་ན་མཚོ་ལ་དར་ཆགས་པ་ཙམ་མམ། འོ་མ་ལ་སྤྲིས་མ་ཆགས་པའི་ཚུལ་དུ་ཁད་ཀྱིས་ཆགས་པར་བསྒོམ་མོ། །དེའི་སྟེང་དུ་ཀེཾ་ལས་ཀེ་ནི་རི་ཛྭ་ལ་མཎྜལ་ཞེས་བརྗོད་པས། ཀེང་རུས་ཀྱི་རི་རབ་གསར་རྙིང་བརྩེགས་པ་ལ། གནམ་ལྕགས་ཀྱི་རྡོ་རྗེ་རྩེ་གཅིག་པའི་གཟེར་གྱིས་བཏབ་པས་རྩིབས་ལ་ཉི་ཟླ་འཆར་བར་བསྒོམ་མོ། །དེའི་སྟེང་དུ་ཕྱི་ལས་ཨགྣི་མཎྜལ་ཞེས་བརྗོད་པས། འབྱུང་བ་མེ་ཡི་དལ་གྱིས་འབྱུང་བ་ཐམས་
ཅད་ཆ་སྙོམས་ཏེ། གྲོའི་གླུམ་ལངས་པ་བཞིན་མྱལ་གྱིས་བཏང་བར་བསྒོམ་མོ། །དེའི་སྟེང་དུ་སུཾ་ལས་སུ་བཛྲ་སུ་མ་མེ་ཞེས་བརྗོད་པས། རི་རབ་རིན་པོ་ཆེ་སྣ་ལྔ་ལས་གྲུབ་པ་ཤར་ཤེལ་ཀ་ཀ་སྡི་རི་ཡང་ལྟར་དཀར་བ། ལྷོ་བཻ་དཱུརྱ་ཡ་ལྟར་སྔོ་བ། ནུབ་པདྨ་རཱ་ག་ལྟར་དམར་བ། བྱང་ཨིནྡྲ་ནཱི་ལ་ལྟར་ལྗང་བ། དབུས་སུ་ཤ་ར་ཀ་ལྟར་སེར་བ། དཔག་ཚད་བརྒྱད་ཁྲི་བཞི་སྟོང་དུ་ཕྱིན་པ། ཁ་ཁྱེར་གྱེན་དུ་བྱུང་བས་ནམ་མཁའ་མཐའ་ཡས་སྐྱེ་མཆེད་འཕང་གཅད་པར་བསྒོམ་མོ། །དེའི་སྟེང་དུ་མ་དམར་མོ་གཅིག་གསལ་ནས། དེའི་སྟེང་དུ་བྷྲཱུཾ་སྨུག་ནག་གཅིག་བསྒོམ་མོ། །དེ་ལས་འོད་ཟེར་འཕྲོས་པས་འཕགས་པའི་ཐུགས་དམ་གྱི་རྒྱུད་བསྐུལ། འགྲོ་བ་སེམས་ཅན་གྱི་དོན་བྱས་ནས་སླར་འདུས་པ་ལས། བྷྲཱུཾ་བི་ཤྭ་བི་ཤུདྡྷེ་ཛྙཱ་ན་ཙཀྲ་བྷནྡྷ་བྷྲཱུཾ། ཞེས་བརྗོད་པས་ཡེ་ཤེས་ཀྱི་གཞལ་ཡས་ཁང་གྲུ་བཞི་སྒོ་བཞི་དང་ལྡན་པ། སྒོ་ཁྱུད་རྟ་བབས་དང་ལྡན་པ་གཅིག་ཏུ་གྱུར་པར་བསྒོམ་མོ། །གཞལ་ཡས་ཁང་དེའི་ནང་དུ་དུར་ཁྲོད་ཀྱི་རྒྱན་མང་པོས་བརྒྱན་པར་བསྒོམ་མོ། །དེའི་སྟེང་དུ་མ་དམར་མོ་གཅིག་གསལ་བར་བསྒོམ་མོ། །དེ་ལས་མ་སཱུརྱ་མཎྜལ་ཞེས་བརྗོད་པས། ཉི་མའི་དཀྱིལ་འཁོར་དུ་གྱུར་པར་བསྒོམ་མོ། །དེའི་སྟེང་དུ་ཨ་དཀར་པོ་གཅིག་གསལ་བ་ལས། ཨ་ཙནྡྲ་མཎྜལ་ཞེས་བརྗོད་པས། ཟླ་བའི་དཀྱིལ་འཁོར་དུ་གྱུར་པར་བསྒོམ། ཉི་ཟླའི་སྟེང་དུ་ཙཀྲ་མཎྜལ་ཞེས་བརྗོད་པས། འཁོར་ལོ་རྩིབས་བཞི་པ་གཅིག་ཏུ་གྱུར་པར་བསྒོམ་མོ། །དེའི་སྟེང་དུ་མ་ཧཱ་དེ་ཝ་ཕོ་མོ་བསྒོམ་ལ། མ་ཧཱ་དེ་ཝཱ་ཨུ་མ་དེ་ཝཱི་ཁ་ཊྭཱཾ་ག་ཏི་ར་བཾ་ཞེས་བརྗོད་པས། དབང་ཕྱུག་ཆེན་པོ་གན་རྐྱལ་དུ་བསྒྱེལ་ནས་གདན་དུ་བཏིང་བར་བསྒོམ་མོ། །དེའི་སྟེང་དུ་རྒྱུའི་ཡི་གེ་ཨོཾ་དཀར་པོ་བཀྲ་ས་ལེ་བསྒོམ་མོ། །ཨོཾ་དེ་ལས་འོད་ཟེར་འཕྲོས་འདུས་པ་ལས། བྱང་ཆུབ་སེམས་སུ་གྱུར་པར་བསྒོམ་མོ། །དེ་ཡང་སྣང་སྲིད་སེན་མོ་ཙམ་ཡང་མ་གཡོས་པའི་ཐིག་ལེར་གསལ་བར་བསྒོམ་མོ། །ཐིག་ལེ་དེ་ལས་ཨོཾ་གུ་ཡ་ཛྙཱ་ན་ཤྲཱི་ཧེ་རུ་ཀ་ཧཱུཾ། ཞེས་བརྗོད་པས། བླ་མེད་
ཧེ་རུ་ཀའི་སྐུར་སལ་གྱིས་གྱུར་ཏོ། །ཏིང་ངེ་འཛིན་གྱིས་ལྕོགས་ཚད་དུ་དབུ་དགུ་ཕྱག་བཅོ་བརྒྱད་པར་བསྒོམ་མོ། །དེ་ལྟར་མི་གསལ་ན་སྐུ་མདོག་མཐིང་ནག་ལ་གཡས་དཀར་གཡོན་དམར། དབུ་གསུམ་ཕྱག་དྲུག་པ་ཞབས་བཞི་ཕྱོགས་བཞིར་གཏམས་པར་བསྒོམ་མོ། །གཤོག་པ་ཕྱོགས་བཞིར་བརྐྱང་བ། གླང་པོ་ཆེའི་ཀོ་རློན་གྱི་སྟོད་གཡོགས་དང་། ཞིང་ལྤགས་ཀྱི་གཡང་གཞི་དང་། ཐོད་རློན་གྱི་ཕྲེང་བ་ཚར་གསུམ་གྱིས་སྤྲས་པ། དབུ་རྒྱན་མགུར་ཆུ་དོ་ཤལ་བྱས། ཀླུ་རིགས་བཞིས་སྐུ་ལ་བརྒྱན་པ། མཚན་མ་རྣམ་པ་གསུམ་གྱིས་མཚན་པ། སྟག་ལྤགས་ཀྱི་ཤམ་ཐབས་ཀྱིས་བརྒྱན་པ། ཞལ་གཡས་དཀར་བ་གཡོན་དམར་བ། དབུས་སྐུ་དང་མཐུན་ཏེ་མཐིང་ནག་ཕྱག་གཡས་དང་པོ་ན་རྡོ་རྗེ་རྩེ་དགུ་པ་ཐོགས་པ། གཡས་བར་མ་ན་རལ་གྲི་བསྣམས་པ། གཡས་ཐ་མ་ན་ཞགས་པ་བསྣམས་པ། གཡོན་དང་པོ་ན་དྲིལ་བུ་བསྣམས་པ། གཡོན་བར་མ་ན་རྔེའུ་ཆུང་གཡོན་ཐ་མ་ན་དགྲ་སྟྭ་བསྣམས་པར་བསྒོམ་མོ། །དེ་ལྟར་གསལ་བ་དང་། གཡོན་གྱི་ཕྱོགས་སུ་གུ་ཡ་ཀྲོ་དྷཱི་ཤྭ་རཱི་ཧཱུཾ། ཞེས་བརྗོད་པས། ལུས་ལ་གྲིབ་མ་བྱུང་བའི་ཚུལ་དུ་ཡུམ་ཉིད་གསང་བའི་ཡུམ་ཆེན་མོར་སལ་གྱིས་གྱུར་པར་བསྒོམ་མོ། །སྐུ་མདོག་དང་ཕྱག་ཆ་གཙོ་བོ་དང་མཐུན་པར་བསྒོམ་མོ། །ཞལ་ལྔ་ཕྱག་དྲུག་པའོ། །གཡས་དང་པོ་ན་དྲིལ་བུ་བསྣམས་པ། གཡོན་དང་པོ་ན་བྷནྡྷ་རཀྟས་བཀངྐ་བ་ཐོགས་པ། གཡས་བར་མ་ན་ཞགས་པ་ཐོགས་པ། གཡས་ཐ་མ་ན་བདུད་རྩི་རྣམ་པ་ལྔ་ཐོགས་པ། གཡོན་བར་མ་ན་བྷནྡྷ་ལྟག་སྤྲོད་ཀྱི་རྔ་བསྣམས་པ། གཡོན་ཐ་མ་ན་གཡང་གཞི་བསྣམས་པ། ཞབས་རྣམ་པ་བརྒྱད་དང་ལྡན་པ་གཅིག་གསལ་བར་བསྒོམ་མོ། །དེ་ནས་ཡབ་ཡུམ་གཉིས་སུ་མེད་པའི་བརྡས་བསྐུལ་ནས། སྦྱོར་བ་མཛད་ནས་བྱང་ཆུབ་སེམས་ཀྱི་འོད་ཟེར་འཕྲོས་པས་ལྕགས་ཀྱུས་སྲིད་པའི་མ་མོ་ཀུན་བཀུག་ནས་གདན་དུ་བཏིང་། ཛཿཧཱུཾ་བཾ་ཧོཿ། ཀྲོ་དྷཱི་ཤྭ་རཱི་ཏི་ར་བཾ་ཤནྟི་ཏི་ར་བཾ། མུ་ཏྲི་ཏི་ར་བཾ། ཤནྟྲ་ཏི་ར་བཾ། དུནྟི་ཏི་ར་བཾ། དནྟི་ཏི་ར་བཾ། སཱུརྱ་ཏི་ར་བཾ། ཁ་ར་ཀ་བི་ཏི་ཏི་ར་བཾ། སྲིད་འགྲོ་ཏི་ར་བཾ། བཛྲ་
ཕྱཱུ ་ཕྱཱུ ཏི་ར་བཾ། བཛྲ་ཏ་ཀེཾ་བཛྲ་ཏ་ཀེཾ་ཏི་ར་བཾ། བཛྲ་ནི་ལ་བཛྲ་ནི་ལ་ཏི་ར་བཾ། བཛྲ་ལནྡྷ་བཛྲ་ལནྡྷ་ཏི་ར་བཾ། ནན་ཞེས་བརྗོད་པས། གན་རྐྱལ་དུ་ལིང་ལིང་འགྱེལ་ནས་ཕྱོགས་ཕྱོགས་སུ་གདན་དུ་བཏིང་བར་བསྒོམ་མོ། །ཡང་ཡབ་ཡུམ་གཉིས་སུ་མེད་པའི་བྱང་ཆུབ་ཀྱི་སེམས་ལས། ཡི་གེ་ཧ་རེ་རེ་གསལ་བར་བསྒོམ་མོ། །ཡི་གེ་ཧ་འཕྲོས་འདུས་པ་ལས། བྱང་ཆུབ་སེམས་སུ་གྱུར་པར་བསྒོམ་མོ། །ཤར་ཕྱོགས་འཁོར་ལོའི་རྩིབས་སྟེངས་སུ། སྒྲོལ་བྱེད་མ་དང་དཀར་མོ་མིག་གཅིག་མ་གཉིས་བསྣོལ་བའི་གདན་སྟེངས་སུ་བྱང་ཆུབ་ཀྱི་སེམས་ཡི་གེ་ཧ་ལས། ཨོཾ་གྷྲྀ་སྭ་མུ་མ་ཧ་དྷྲི་ག་ཅེས་བརྗོད་པས། རྟག་པའི་རྒྱལ་མོ་རྣམ་སྣང་གསལ་གྱི་སྐུར་སལ་གྱིས་གྱུར་ཏེ། སྐུ་མདོག་དཀར་མོ་ལ་དབུ་གསུམ་ཕྱག་དྲུག་པར་བསྒོམ་མོ། །གཡས་དང་པོ་ན་རྡོ་རྗེ། བར་པ་ན་དགྲ་སྟྭ། ཐ་མ་ན་སེང་གེ་བསྣམས་པ། གཡོན་དང་པོ་བྷནྡྷ་རཀྟས་བཀངྐ་བ། བར་མ་ན་གཏུན་ཤིང་རྡེག་པའི་ཚུལ་སྟོན་པ། ཐ་མ་ན་མཆོག་ཆེན་སྙོད་པར་བསྒོམ་མོ། །ཞབས་བཞི་བརྐྱང་བསྐུམ་དུ་བཞུགས་པར་བསྒོམ་མོ། །བྱང་ཕྱོགས་འཁོར་ལོའི་རྩིབས་སྟེངས་སུ། དབང་ཕྱུག་མ་དང་རལ་གཅིག་མ་གཉིས་བསྣོལ་བའི་གདན་སྟེངས་སུ། བྱང་ཆུབ་ཀྱི་སེམས་ཡི་གེ་ཧ་ལས། ཨོཾ་བྱི་ཡང་ཡང་ཏེ་ཧ་དྷྲིག་ཅེས་བརྗོད་པས། མཁའ་འགྲོ་མ་ཡང་གསལ་གཡོས་ཀྱི་སྐུར་སལ་གྱིས་གྱུར་ཏེ། སྐུ་མདོག་ལྗང་གུ་ལ་དབུ་གསུམ་ཕྱག་དྲུག་པར་གྱུར་ཏོ། ཕྱག་གཡས་དང་པོ་ན་རྡོ་རྗེ་རྒྱ་གྲམ་བསྣམས་པ། གཡས་བར་པ་ན་དབྱུག་ཐོ་ཆེན་པོ་བསྣམས་པ། གཡས་ཐ་མ་ན་སྤྱང་མོ་བསྣམས་པ། གཡོན་དང་པོ་ན་བྷནྡྷ་བསྣམས་པ། གཡོན་བར་མ་ན་རྒྱུ་ཕྲེང་བསྣམས་པ། གཡོན་ཐ་མ་ན་ཞིང་ཆུང་བཟུང་ཞིང་བསྣམས་ནས་སྙོད་པར་བསྒོམ་མོ། །ཞབས་བཞི་བརྐྱང་བསྐུམ་དུ་བཞུགས་པར་བསྒོམ་མོ། །ནུབ་ཕྱོགས་འཁོར་ལོའི་རྩིབས་སྟེངས་སུ། བདུད་རྩི་མ་དང་དམར་མོ་གཉིས་བསྣོལ་བའི་གདན་སྟེངས་སུ། བྱང་ཆུབ་སེམས་ཡི་གེ་ཧ་ལས། ཨོཾ་བྷི་ཤ་སི་དྷི་ཧ་དྷྲིག་ཅེས་བརྗོད་པས། མཁའ་འགྲོ་མ་གཉེན་གསལ་མར་སལ་གྱིས་གྱུར་ཏེ།
སྐུ་མདོག་དམར་མོ་ལ་ཞལ་གསུམ་ཕྱག་དྲུག་པར་གྱུར་ཏོ། །ཕྱག་གཡས་དང་པོ་ན་པདྨ་བསྣམས་པ། བར་མ་ན་ཞགས་པ། ཐ་མ་ན་ཅེ་སྤྱང་འཛིན་པ། གཡོན་དང་པོ་ན་བྷནྡྷ་བསྣམས་པ། བར་མ་ན་ཏྲི་ཤུལ་བསྣམས་པ། ཐ་མ་ན་ཞིང་ཆེན་ཐོགས་ནས་སྙོད་པར་བསྒོམ་མོ། །ཞབས་བཞི་བརྐྱང་བསྐུམ་དུ་བཞུགས་པར་བསྒོམ་མོ། །ལྷོ་ཕྱོགས་འཁོར་ལོའི་རྩིབས་སྟེངས་སུ། དབང་སྡུད་མ་དང་རལ་གཅིག་མ་གཉིས་བསྣོལ་བའི་གདན་སྟེངས་སུ། བྱང་ཆུབ་ཀྱི་སེམས་ཡི་གེ་ཧ་ལས། ཨོཾ་ཛྭ་ལ་རཾ་ཧ་དྷིག་ཅེས་བརྗོད་པས། མཁའ་འགྲོ་མ་འོད་གསལ་འབར་གྱི་སྐུར་སལ་གྱིས་གྱུར་ཏེ། སྐུ་མདོག་སྔོན་མོ་ལ་ཞལ་གསུམ་ཕྱག་དྲུག་པར་བསྒོམ་མོ། །ཕྱག་གཡས་དང་པོ་ན་རིན་པོ་ཆེ་འབར་བ་བསྣམས་པ། བར་མ་ན་མེ་དཔུང་འབར་བ་བསྣམས་པ། ཐ་མ་ན་སྟག་མོ་འཛིན་པ། གཡོན་དང་པོ་ན་བྷནྡྷ། བར་མ་ན་དབྱུག་ཐོ་འབར་བ། ཐ་མ་ན་ཞིང་ཆུང་སྦྲམ་པོ་བཟུང་ནས་སྙོད་པར་བསྒོམ་མོ། །ཞབས་བཞི་བརྐྱང་བསྐུམ་དུ་བཞུགས་པར་བསྒོམ་མོ། །འཁོར་ལོའི་ལྟེ་བའི་དབུས་ཀྱི་དཀྱིལ་འཁོར་ན། དཔལ་ཆེན་མོ་བསྒོམ་པའི་གཡས་ཕྱོགས་སུ། མ་མོ་ཕྲ་མེན་མ་རྒྱ་མཚོ་མ་དང་། ཉི་ཟླ་ཐོད་ཕྲེང་མ་གཉིས་བསྣོལ་བའི་གདན་སྟེངས་སུ། བྱང་ཆུབ་ཀྱིས་སེམས་ཡི་གེ་ཧ་ལས། ཨོཾ་མ་ཧཱ་ལཾ་ཏེ་ཧ་དྷྲིག་ཅེས་བརྗོད་པས། ཡུམ་བཀྲག་གསལ་མར་སལ་གྱིས་གྱུར་ཏེ། སྐུ་མདོག་སེར་མོ་ལ་ཞལ་གསུམ་ཕྱག་དྲུག་པར་བསྒོམ་མོ། །ཞལ་གཡས་དཀར་བ། གཡོན་དམར་བ། དབུས་སེར་བ། གཡས་དང་པོ་ན་འཁོར་ལོ་བསྣམས་པ། བར་མ་ན་རྒྱལ་མཚན། ཐ་མ་ན་འུག་པ་འཛིན་པ། གཡོན་དང་པོ་ན་བྷནྡྷ། བར་མ་ན་སྤུ་གྲི་བསྣམས་པ། ཐ་མ་ན་ཞིང་ཆུང་བཟུང་ནས་སྙོད་པར་བསྒོམ་མོ། །ཞབས་བཞི་བརྐྱང་བསྐུམ་དུ་བཞུགས་པར་བསྒོམ་མོ། །དེ་ནས་བདག་ཉིད་དཔལ་ཆེན་པོའི་ཐུགས་ཀར་རིན་པོ་ཆེ་སྨུག་པོ་གུར་ཕུབ་པ་འདྲ་བའི་ནང་ན་དྭངས་མ་བཞི་ཞིག་ཡོད་དེ། རྩའི་དྭངས་མ་དང་ཁྲག་གི་དྭངས་མ་དང་། དབུགས་ཀྱི་དྭངས་མ་དང་། འོད་ཀྱི་དྭངས་མ་དང་བཞི་ལས།
ཤར་ལྷོའི་མཚམས་སུ་རྒྱན་གྱི་རྒྱལ་མོ་འགྱེལ་བའི་གདན་སྟེངས་སུ། རྩའི་དྭངས་མ་ལས། ཨཱོཾ་ཀ་མ་ལ་ཤྭ་རཱི་ཧ་དྷྲྀག་ཅེས་བརྗོད་པས་གསང་བའི་ཡུམ་རྒྱས་འདེབས་མར་སལ་གྱིས་གྱུར་ཏེ། སྐུ་མདོག་དམར་སྐྱ་ལ་སྐུ་ཕྱག་གིས་གང་བ། ཞལ་སྤྱན་གྱིས་གང་བ་ཅིག་བསྒོམ་མོ། །ལྷོ་ནུབ་ཏུ་དབྱིངས་ཕྱུག་མ་བསྒྱེལ་བའི་གདན་གྱི་སྟེངས་སུ། ཁྲག་གི་དྭངས་མ་ལས། ཨཱོཾ་ཀ་མ་ལ་ཤྭ་རཱི་ཧ་དྷྲྀག །ཅེས་བརྗོད་པས་གསང་བའི་ཡུམ་ཟ་བྱེད་མའི་སྐུར་སལ་གྱིས་གྱུར་ཏེ། སྐུ་མདོག་མཐིང་ནག་ལ་སྐུ་དབུགས་ཀྱིས་གང་བ། ཕྱག་ཞག་གིས་གང་བ་ཅིག་བསྒོམ་མོ། །ནུབ་བྱང་བདུད་རྩི་མ་བསྒྱེལ་བའི་སྟེངས་སུ། དབུགས་ཀྱི་དྭངས་མ་ལས། ཨོཾ་ཀ་མ་ལ་ཤྭ་རཱི་ཧ་དྷྲྀག་ཅེས་བརྗོད་པས། ཡུམ་རྨོངས་བྱེད་མར་སལ་གྱིས་གྱུར་ཏེ། སྐུ་མདོག་དམར་མོ་ལ་སྐུ་ལུས་ཁྲག་གིས་གང་བ། ཕྱག་རླུང་གིས་གང་བ་ཅིག་བསྒོམ་མོ། །བྱང་ཤར་དུ་གཅིག་པུ་མ་བསྒྱེལ་བའི་གདན་སྟེངས་སུ། འོད་ཀྱི་དྭངས་མ་ལས། ཨོཾ་ཀ་མ་ལ་ཤྭ་རཱི་ཧ་དྷྲྀག་ཅེས་བརྗོད་པས། ཡུམ་ཚེ་འཕེལ་མར་སལ་གྱིས་གྱུར་ཏེ། སྐུ་མདོག་ལྗང་གུ་ལ་སྐུ་བད་ཀན་གྱིས་གང་བ། ཕྱག་ཆུ་སེར་གྱིས་གང་བར་གྱུར་ཏེ། དེ་ལྟར་གསལ་བ་དང་། བྱང་ཆུབ་སེམས་ལས་འོད་ཟེར་འཕྲོས་འདུས་པ་ལས། ཛཿཧཱུཾ་བཾ་ཧོཿ། མ་མ་བྷྱོ་ཕཊ་ནན། མ་མ་དུཥྚཱཾ་ཕཊ་ནན། མ་མ་ཏྲག་རཀྴ་པྲ་ཝེ་ཤ་ཕཊ་ནན། ཤན་ནན་ཏི་ར་བཾ་ཞེས་བརྗོད་པས། སྲིད་པའི་དབང་ཆེན་རྣམས་ཁ་བུབ་གན་རྐྱལ་དུ་བསྒྱེལ་བར་བསྒོམ་མོ། །ཡང་བྱང་ཆུབ་སེམས་ལས་སྦས་པའི་མ་བཞི་དང་། དགྱེས་སྡེ་མོ་བཞི་དང་བརྒྱད་བསྒྱེལ་བའི་གདན་སྟེངས་སུ། བདག་གི་རྣམ་པར་ཤེས་པ་མིག་གི་དྭངས་མ་ལས། ཨཱོཾ་ཀ་མ་ལ་ཤྭ་རཱི་ཧ་དྷྲྀག་ཅེས་བརྗོད་པས། ཡུམ་ཁམས་གསུམ་གདར་གཅོད་མར་སལ་གྱིས་གྱུར་ཏེ། སྐུ་མདོག་དཀར་བཀྲ་མར་བཞུགས་པ། ཞལ་གཅིག་ཕྱག་གཉིས་པ་ཞལ་རྔམས་པའི་མཆེ་བ་གཙིགས་པ། ཕྱག་ན་འུག་པ་དང་ཁྱུང་ལ་སོགས་པའི་རྦོད་གཏོང་བསྣམས་པར་བསྒོམ་མོ། །ཨེ་ཀ་ཙ་ཏི་སྤུན་དྲུག་བསྒྱེལ་བའི་
གདན་སྟེངས་སུ། བདག་གི་རྒྱུངས་པ་ལས། ཨོཾ་ཀ་མ་ལ་ཤྭ་རཱི་ཧ་དྷྲྀག་ཅེས་བརྗོད་པས། སྐྱེ་ཤི་རྩད་གཅོད་མར་སལ་གྱིས་གྱུར་ཏེ་སྐུ་མདོག་དམར་བཀྲར་བཞུགས་པ། ཞལ་གཅིག་ཕྱག་གཉིས་པ། ཞལ་རྔམས་པའི་མཆེ་བ་གཙིགས་པ། ཕྱག་ན་མཚོན་ཆ་སྣ་ཚོགས་བསྣམས་པར་བསྒོམ་མོ། །སྲིད་པ་ཆགས་བྱེད་སྤུན་གཉིས་བསྒྱེལ་བའི་གདན་སྟེངས་སུ། གསང་བའི་བྱང་ཆུབ་སེམས་ལས། ཨཱོཾ་ཀ་མ་ལ་ཤྭ་རཱི་ཧ་དྷྲྀག་ཅེས་བརྗོད་པས། དུས་གསུམ་དབང་སྡུད་མར་སལ་གྱིས་གྱུར་ཏེ། སྐུ་མདོག་དཀར་བཀྲ་ལ་ཞལ་གཅིག་ཕྱག་གཉིས་པ། ཞལ་རྔམས་པའི་མཆེ་བ་གཙིགས་པ་ཕྱག་ན་རྦོད་གཏོང་གི་ཕྱག་བརྙན་བསྣམས་པར་བསྒོམ་མོ། །འདོད་ཁམས་ཀྱི་གཙོ་མོ་སྤུན་གཉིས་བསྒྱེལ་བའི་གདན་སྟེངས་སུ། བདག་གི་ཙིཏྟ་ལ་ཨཱོཾ་ཀ་མ་ལ་ཤྭ་རཱི་ཧ་དྷྲིག་ཅེས་བརྗོད་པས། པདྨ་ཤྭ་རཱིར་བསྐྱེད། དམར་པོ་ཞལ་གཅིག་ཕྱག་གཉིས་བསྒོམ། ནམ་མཁའི་རྒྱལ་མོ་སྤུན་གཉིས་ཀྱང་གན་རྐྱལ་བསྒྱེལ་བའི་གདན་སྟེངས་སུ། བདག་གི་སྲིད་པ་མདོ་བསྡུས་ལས། ཨཱོཾ་ཀ་མ་ལ་ཤྭ་རཱི་ཧ་དྷྲིག་ཅེས་བརྗོད་པས། ཡཀྴ་ཀྲོ་ཏཱི་ཤྭ་རཱི་མར་སལ་གྱིས་གྱུར་ཏེ། སྐུ་མདོག་སྨུག་ནག་ཞལ་གཅིག་ཕྱག་གཉིས་པ་བསྒོམ་མོ། །མ་བདུན་བསྒྱེལ་བའི་གདན་སྟེངས་སུ། །ཡིད་ཀྱི་རྣམ་པར་ཤེས་པ་ལས། ཨཱོཾ་ཀ་མ་ལ་ཤྭ་རཱི་ཧ་དྷྲིག་ཅེས་བརྗོད་པས། རག་མོ་ཀྲོ་ཏཱི་ཤྭ་རཱི་མར་སལ་གྱིས་གྱུར་ཏེ། སྐུ་མདོག་སྔོན་མོ་ལ་ཞལ་གཅིག་ཕྱག་གཉིས་པར་བསྒོམ་མོ། །དམག་གི་རྒྱལ་མོ་བཞི་བསྒྱེལ་བའི་གདན་སྟེངས་སུ། ཐབས་དང་ཤེས་རབ་ལས། ཨོཾ་ཀ་མ་ལ་ཤྭ་རཱི་ཧ་དྷྲིག་ཅེས་བརྗོད་པས། ས་མ་ཡ་ཀྲོ་ཏཱི་ཤྭ་རཱི་མར་སལ་གྱིས་གྱུར་ཏེ། སྐུ་མདོག་དམར་མོ་ལ་ཞལ་གཅིག་ཕྱག་གཉིས་པ་བསྒོམ་མོ། །སྲིང་བཞི་བསྒྱེལ་བའི་གདན་སྟེངས་སུ། སྟེང་འོག་བཤང་ལམ་སྒོ་བཞི་ལས། ཨཱོཾ་ཀ་མ་ལ་ཤྭ་རཱི་ཧ་དྷྲིག་ཅེས་བརྗོད་པས། བི་ཤྭ་ཀྲོ་དྷཱི་ཤྭ་རཱི་མའི་སྐུར་བསྐྱེད་སྐུ་མདོག་ལྗང་ནག་ལ། ཞལ་གཅིག་ཕྱག་ཀྱང་གཉིས་པར་བསྒོམ། ཉི་ཤུ་རྩ་བརྒྱད་བསྒྱེལ་
བའི་གདན་སྟེངས་སུ། ཉོན་མོངས་པའི་ཡིད་ལས་ནི། ཨཱོཾ་ཀ་མ་ལ་ཤྭ་རཱི་ཧ་དྷྲིག ཅེས་བརྗོད་པས། གུ་ཡ་ཀྲོ་ཏཱི་ཤྭ་རཱི་མར་སལ་གྱིས་གྱུར་ཏེ། སྐུ་མདོག་དཀར་བཀྲ་ལ་ཞལ་གཅིག་ཕྱག་གཉིས་པར་བསྒོམ་མོ། །དེ་ལྟར་དཔལ་ཆེན་པོ་ཡབ་ཡུམ་དང་།ཐུགས་ཡེ་ཤེས་ཀྱི་ངོ་བོ་ཉིད། གསང་བ་ཐུགས་ལས་བསྐྱེད་པའི་སྲས། །དཀྱིལ་འཁོར་བཞི་ཡི་དབང་བཙན་དུ། །ལྷ་རྣམས་གསལ་བར་གྱུར་པ་དང་། །ཡེ་ཤེས་རང་གནས་ཡིན་པ་སྟེ། །བྱིན་བརླབ་དབང་དང་ལྡན་བྱའི་ཕྱིར། །སྤྱན་དྲང་བསྡིམ་པར་བྱ་བ་ཡིན། །དེ་ནས་འབྱོར་ཚོགས་ཀྱི་མཆོད་པ་ཕུལ་ལ། འཛབ་དྲང་བ་ནི། ཨཱོཾ་ཤྲཱི་ཧེ་རུ་ཀ་ཀྲོ་དྷཱི་ཤྭ་རཱི་སྟྭཾ། རཾ་མཾ་མ་མ་ཡོ་གི་ནཱི། རུ་ལུ་རུ་ལུ་ཧཱུཾ་བྷྱོ་ཕཊ། དེ་ལྟར་བསྒོམ་ཞིང་བཟླས་བརྗོད་ཉིས་བརྒྱ་འབུམ་སུམ་འབུམ་བཟླས་ཏེ། དེ་ལྟར་བྱས་ན་མ་མོ་དེ་དབང་དུ་བསྡུ་འམ་འདུལ། བཀོལ་ཡང་དེ་ལྟར་བྱས་ན་ཇི་ལྟར་དུ་བཀོལ་ཡང་བཏུབ་པོ། །འགྲུབ་ཀྱང་དེས་འགྲུབ་པོ། །ཞེས་དཔལ་ཆེན་པོས་བཀའ་སྩལ་ཏོ། །འཁོར་རྣམས་སྤྲོ་བར་གྱུར་ཏོ། །བསྒོམ་པའི་ལེའུ་སྟེ་བཞི་པའོ།། །།གནོད་འདུལ་ལྷ་ཡིས་ཡང་གསོལ་པ། །སྲིད་པའི་དབང་ཆེན་མ་རྣམས་ཀུན། །གདན་དུ་གདིང་ན་ཇི་ལྟར་ལགས། །ཡང་དག་རྫོགས་ལ་བདག་ཉན་འཚལ། །ཡང་དག་རྫོགས་ཀྱིས་བཀའ་སྩོལ་ཅིག །དེ་སྐད་གསོལ་པ་གསན་ནས་ཀྱང་། །ཡང་དག་རྫོགས་ཀྱིས་བཀའ་སྩལ་པ། །སྲིད་པའི་དབང་ཆེན་མོ་རྣམས་ཀུན། །གདན་དུ་གདིང་བ་ངས་བསྟན་གྱི། །ཉོན་ཅིག་གནོད་འདུལ་ལྷ་ཡི་གཙོ། །ངས་བསྟན་པ་ལ་ཐེ་ཚོམ་མེད། །དྲག་པོའི་འོད་ཟེར་ལྕགས་ཀྱུ་ཡིས། །དབང་ཅན་མོ་རྣམས་བཀུག་ནས་སུ། །ཆགས་པ་གནས་སུ་སྦྱང་བའི་ཕྱིར། །རྒྱ་མཚོ་ཉི་ཟླ་ཐོད་ཕྲེང་གཉིས། །ཆགས་པའི་གདན་དུ་གདིང་བར་བྱ། །ཞེ་སྡང་གནས་སུ་སྦྱང་བའི་ཕྱིར། །སྒྲོལ་བྱེད་དཀར་མོ་མིག་གཅིག་གཉིས། །ཞི་བའི་གདན་དུ་གདིང་བར་བྱ། །ང་རྒྱལ་གནས་སུ་སྦྱང་བའི་ཕྱིར། །དབང་སྡུད་མ་དང་རལ་གཅིག་
གཉིས། །རྒྱས་པའི་གདན་དུ་གདིང་བར་བྱ། །འདོད་ཆགས་གནས་སུ་སྦྱང་བའི་ཕྱིར། །བདུད་རྩི་མ་དང་དམར་མོ་གཉིས། །དབང་གི་གདན་དུ་གདིང་བར་བྱ། །ཕྲག་དོག་གནས་སུ་སྦྱང་བའི་ཕྱིར། །གནས་འཕྲུལ་མ་དང་སེར་མོ་གཉིས། །དྲག་པོའི་གདན་དུ་གདིང་བར་བྱ། །རྒྱན་གྱི་རྒྱལ་མོ་དབྱིངས་ཕྱུག་དང་། །བདག་ཉིད་མ་དང་གཅིག་པུ་མ། །མཚམས་དང་མཚམས་སུ་བསྒྱེལ་ནས་སུ། །ཆགས་པའི་གདན་དུ་གདིང་བར་བྱ། །དབང་ཅན་དྲུག་ཅུ་རྩ་བརྒྱད་ཚོགས། །སྔངས་ཤིང་དྲེད་ནས་ཁ་སྦུད་འགྱེལ། །དེ་ནས་སྲོག་འཕྲོག་པའི་སྙིང་པོ་འདི་བརྗོད་དོ། །ཨཱོཾ་བཛྲ་ཨ་མྲྀ་ཏ། ཨུ་ཙི་ཏ། ཙིཏྟ་ནན། ཏྲ་ཐ་པྲ་ཝེ་ཤ་ནན། ཙིཏྟ་སྙིང་ཁ་རག་ནན། གདན་དུ་གདིང་བའི་ལེའུ་སྟེ་ལྔ་པའོ།། །།གནོད་འདུལ་ལྷ་ཡིས་ཡང་གསོལ་པ། །སྲིད་པའི་དབང་ཆེན་མ་རྣམས་ཀུན། །འདུལ་བའི་སྙིང་པོ་ཇི་ལྟར་ལགས། །དབང་ཆེན་ཡབ་ལ་བདག་ཉན་འཚལ། །དབང་ཆེན་ཡབ་ཀྱིས་བཀའ་སྩོལ་ཅིག །དེ་སྐད་གསོལ་པ་གསན་ནས་ཀྱང་། །དབང་ཆེན་ཡབ་ཀྱིས་བཀའ་སྩལ་པ། །ཉོན་ཅིག་གཡུང་དྲུང་ཡང་དག་པ། །མ་མོ་རྣམས་ཀྱི་གཉེན་པོ་ནི། །དཔལ་ཆེན་ཁྲག་འཐུང་མ་མོའི་རྗེ། །ཡུམ་ཆེན་ཉིད་བཞི་མུ་ཁ་ལེ། །ཉི་ཟླ་ཐོད་ཕྲེང་དཀར་མོ་དང་། །ཁྲོས་པའི་དབང་ཆེན་བཞི་པོ་དང་། །དེ་རྣམས་ལ་བས་གཞན་རྣམས་དང་། །ཡེ་ཤེས་ལས་བསྐྱེད་མ་མོ་ཡིས། །སྲིད་པའི་མ་མོ་ཐམས་ཅད་འདུལ། །དེ་རྣམས་བསྒོམས་ཤིང་བསྐུལ་བས་འདུལ། །ཡང་ན་མ་མོའི་གཉེན་པོ་ནི། །སྙིང་ཁྲག་དབང་དུ་བསྡུས་ནས་ནི། །མི་སྲུན་གཉེན་པོར་དེ་ཆེ་སྟེ། །མ་མོ་རྣམས་ཀྱང་དུར་ཁྲོད་ཝ་སྐྱེ་བཞིན། །བརྒྱལ་བར་འགྱུར་ཞིང་འགས་པར་འགྱུར། །ཐུགས་ལ་བརྣག་པའི་སྔགས་འདི་བརྗོད། །མ་ན་ས་མ་ཏི་ཧི་ཨི་ཨི་ཙིཏྟ་ནན། ཏྲ་ཐ་ཕཊ་ནན། དེ་སྐད་ཅེས་ནི་བརྗོད་ནས་སུ། །རང་དབང་མེད་པར་དབང་དུ་སྡུད། །ཡང་ན་བདུད་མོ་བཅུ་གཉིས་ནི། །འཇིག་རྟེན་འདི་ལ་གནོད་བྱེད་ན། །དབྱིངས་ཕྱུག་མ་དང་བདག་
ཉིད་ཆེན་མོ་དང་། །གཅིག་པུ་མ་དང་རྒྱན་གྱི་རྒྱལ་མོ་དང་། །ཁྲོས་པའི་དབང་མོ་ཆེ་བཞི་དང་། །ཐུགས་ཀྱི་དགྱེས་མོ་བཞི་རྣམས་ཀྱིས། །སྐྱོང་མ་བཅུ་གཉིས་དབང་དུ་སྡུད། །དབང་དུ་སྡུད་པའི་སྔགས་འདིའོ། །སེ་སེའུ་ཐུ་ལ། ཏཾ་བ་ཡ་བཾ། ནན་ཙིཏྟ་ནན། ཞེས་བརྗོད་པས། དེ་ཕྱིར་དབང་རྣམས་ཆེ་བའི་མཆོག །དེ་སྐད་ཅེས་ནི་བཀའ་སྩལ་པས། །འཁོར་ཐམས་ཅད་ཡི་རངས་པར་གྱུར་ཏོ། །གཉེན་པོའི་ལེའུ་སྟེ་དྲུག་པའོ།། །།གནོད་འདུལ་ལྷ་ཡིས་ཡང་གསོལ་པ། །མ་མོ་དབང་དུ་བསྡུ་བ་ཇི་ལྟར་ལགས། །རྫོགས་སངས་རྒྱས་ལ་བདག་ཉན་འཚལ། །རྫོགས་སངས་རྒྱས་ཀྱིས་བཀའ་སྩོལ་ཅིག །དེ་སྐད་གསོལ་པ་གསན་ནས་ཀྱང་། །རྫོགས་སངས་རྒྱས་ཀྱིས་བཀའ་སྩལ་པ། །མ་མོ་དབང་དུ་བསྡུ་བའི་དོན། །ཉོན་ཅིག་གནོད་འདུལ་ལྷ་ཡི་གཙོ། །ངས་བསྟན་པ་ལ་ཐེ་ཚོམ་མེད། །སེམས་རྩེ་གཅིག་ཏུ་བསྒོམས་ཏེ་གསལ་ན་མ་མོ་དབང་དུ་འདུའོ། །ཡང་གཅིག་ཏུ་གསལ་བར་རྟོགས་ན་མ་མོ་དབང་དུ་འདུའོ། །དེ་ཡང་མན་ངག་ཏུ་ལུས་ཀྱིས་སྐུ་ལ་སྦྱང་བས་སྐུ་ཕྱག་རྒྱ་ཆེན་པོར་དགོད་དོ། །ངག་གིས་གསུང་ལ་སྦྱང་བས། སྒྱུ་མ་རྣམ་པར་སྦྱང་བས་རྣམ་པར་དག་པ་ལྟར། སེམས་ཀྱིས་ཐུགས་ལ་སྦྱང་བས། རྣམ་པར་མི་རྟོག་པ་དག་པ་ཆོས་ཀྱི་དབྱིངས་ཉིད་གསལ་བར་དགོངས། རིག་སྔགས་ཡིད་ལ་བརྗོད་པས་དེ་བཞིན་གཤེགས་པ་དང་སོ་སོ་ཐ་མི་དད་དོ། །མ་མོ་ནི་སྙིང་པོའོ། །སྙིང་པོ་ནི་འབྲས་བུའོ། །འབྲས་བུ་ནི་བདག་ཉིད་དོ། །བདག་ཉིད་ནི་བྱང་ཆུབ་ཀྱི་སེམས་སོ། །བྱང་ཆུབ་ཀྱི་སེམས་ནི་སངས་རྒྱས་སོ། །མ་མོ་ནི་འདི་ལྟར་གནས་པ་དང་། བདག་ཉིད་ནི་ལས་མ་གཏོགས་པ་ལོགས་ན་གནས་པར་མ་གསུངས་སོ། །དེ་ལྟར་རྟོགས་ན་མ་མོ་དབང་དུ་འདུས་པར་གསུངས་སོ། །ཏིང་འཛིན་མ་ཡེངས་གསལ་བ་གཅེས་སོ། །མ་མོ་དབང་དུ་བསྡུ་བའི་ལེའུ་སྟེ་བདུན་པའོ།། །།རྡོ་རྗེ་སེམས་དཔས་ཡང་གསོལ་པ། །དོན་དུ་མན་ངག་ཇི་ལྟར་ལགས། །
མ་མོའི་མན་ངག་བདག་ཉན་འཚལ། །སྤྱི་དཔལ་ཆེན་པོས་བཀའ་སྩོལ་ཅིག །དེ་སྐད་གསོལ་པ་གསན་ནས་ཀྱང་། །སྤྱི་དཔལ་ཆེན་པོས་བཀའ་སྩལ་པ། །མན་ངག་ཅེས་ནི་བྱ་བའི་དོན། །ངས་བསྟན་པ་ལ་ཐེ་ཚོམ་མེད། །ཉོན་ཅིག་རྡོ་རྗེ་སེམས་དཔའི་གཙོ། །མན་ངག་ཐུགས་ཀྱི་རང་བཞིན་ཏེ། །མན་ངག་གསུང་གི་རང་བཞིན་ཡིན། །མན་ངག་སྐུ་ཡི་རང་བཞིན་ཏེ། །ཐུགས་ནི་སངས་རྒྱས་ཉིད་ཀྱི་སྤྱོད། །གསུང་ནི་སྒྲ་རུ་གྲག་པ་སྟེ། །སྐུ་ནི་འཇིགས་བྱེད་ཁྲོ་བོའི་སྐུ། །དེ་ནི་མ་མོའི་མན་ངག་དགོངས། །ཡང་ན་མ་མོའི་མན་ངག་ནི། །སྣང་སྲིད་ཐམས་ཅད་གསལ་བར་བསྒོམ། །སྣོད་བཅུད་འཇིག་རྟེན་ཐམས་ཅད་གསལ་བར་བསྒོམ། །དེ་ལ་མ་མོའི་རང་བཞིན་ནི། །བྱང་ཆུབ་སེམས་ཀྱི་སྤྲུལ་པ་ཡིན། །རང་བྱུང་རང་སར་གདལ་བ་ཡིན། །བདལ་བས་མཐའ་དབུས་མེད་པར་ཁྱབ། །དུས་གསུམ་འགྱུར་མེད་རིན་པོ་ཆེ། །མི་ནུབ་རྒྱ་ཆེན་གཡུང་དྲུང་ཡིན། །སྐུ་རུ་བཀྲམ། གསུང་དུ་གྲགས། ཐུགས་སུ་གསལ། དེ་ལ་ཐུགས་སུ་གསུང་སྦས། གསུང་ལ་སྐུ་ཐིམ་ནས་བདེ་བ་ལ་མན་ངག་ཅེས་བྱའོ། །མ་མོ་མན་ངག་གི་ལེའུ་སྟེ་བརྒྱད་པའོ།། །།རྡོ་རྗེ་སེམས་དཔས་ཡང་གསོལ་པ། །རྟོགས་པའི་ཁྱད་པར་ཇི་ལྟ་བུ། །སེམས་ཀྱི་ཁྱད་པར་ཇི་ལྟ་བུ། །མངོན་རྫོགས་ཡབ་ལ་བདག་ཉན་འཚལ། །མངོན་རྫོགས་ཡབ་ཀྱིས་བཀའ་སྩོལ་ཅིག །དེ་སྐད་གསོལ་པ་གསན་ནས་ཀྱང་། །མངོན་རྫོགས་ཡབ་ཀྱིས་བཀའ་སྩལ་པ། །རྟོགས་པའི་ཁྱད་པར་ཆེན་པོ་དང་། །སེམས་ཀྱི་ཁྱད་པར་ཆེན་པོའི་དོན། །ངས་བསྟན་པ་ལ་ཐེ་ཚོམ་མེད། །ཉོན་ཅིག་རྡོ་རྗེ་སེམས་དཔའི་གཙོ། །ཉན་ཐོས་དོན་ལ་མཁས་པ་དང་། །རང་རྒྱལ་བྱང་ཆུབ་སེམས་དཔའ་དང་། །ཀྲི་ཡ་དང་ནི་གཉིས་ཀའི་རྒྱུད། །ཡོ་ག་དང་ནི་ཐེག་པ་དྲུག །ཀུན་གྱི་དོན་ལ་མཁས་པ་དང་། །བསྐྱེད་པའི་དོན་དང་རྫོགས་པའི་དོན། །རྫོགས་པ་ཆེན་པོ་གསུམ་ལ་མཁས། །ལུང་དང་མན་ངག་ཕུར་ཐུག་པས། །མན་ངག་གདེང་ཅན་
རྟོགས་པ་དེས། །མ་མོའི་གནས་ནི་དབེན་པར་བཙལ། །མ་མོའི་སྒྲུབ་རྫས་ཁྱད་པར་ཅན། །ཁྱད་པར་དུ་ཡང་བསག་པར་བྱ། །མ་མོ་སྒྲུབ་པའི་གཟུངས་མ་ནི། །ང་རྒྱལ་མེད་ཅིང་ལྦ་བ་མེད། །ཙག་རོ་མེད་ཅིང་སྐྱོན་མེད་པ། །ཁྱད་པར་དུ་ཡང་གཟུངས་མར་བཟུང་། །མ་མོ་སྒྲུབ་པའི་གྲོགས་པོ་ཡང་། །ཁྱད་པར་དུ་ཡང་བརྟག་པར་བྱ། །སྒྲུབ་པའི་མཆེད་དང་ལྕམ་དྲལ་ཡང་། །ཁྱད་པར་དུ་ཡང་བརྟག་པར་བྱ། །སྒྲུབ་པའི་རྐྱེན་དང་ཡོ་བྱད་ལ། །རྩིང་ཞིབ་མི་བྱེད་བཀུར་བྱེད་པ། །ཁྱད་པར་དུ་ཡང་བརྟག་པར་བྱའོ། །སྒྲུབ་པའི་རྟེན་མོ་བརྟག་པ་ནི། །མིག་ཁམ་པ་ལ་སྐྲ་སེར་བ། །དཔྲལ་བའི་དབྱེས་ན་སྨེ་ཡོད་པ། །མ་མོ་ཐམས་ཅད་མགུ་བར་ཤེས། །དེ་ནི་རབ་ཏུ་བསྟེན་པར་བྱའོ། །སྒྲུབ་པའི་ཞལ་ཟས་ཡོ་བྱད་ཀྱང་། །རྫས་དང་གསུར་ཆེན་སྨན་ཆེན་རྣམས། །ཡང་དག་ཉིད་དུ་བསག་པར་བྱ། །དེ་ནས་སྒྲུབ་པ་བརྩམ་བྱ་སྟེ། །མ་མོ་ཐམས་ཅད་བསྒྲུབ་པ་ན། །མི་འགྲུབ་པ་ནི་ཡོད་མི་སྲིད། །འགྲུབ་པ་ཉིད་ནི་ཐེ་ཚོམ་མེད། །ལྷུར་ལེན་རྣལ་འབྱོར་བློ་ལྡན་པ། །གཉིས་མེད་རྟོགས་པའི་ཁྱད་པར་གཙོ། །རྟོགས་པ་ཁྱད་པར་གྱི་ལེའུ་སྟེ་དགུ་པའོ།། །།གནོད་འདུལ་ལྷ་ཡིས་ཡང་གསོལ་པ། །རྣལ་འབྱོར་ཡོངས་ལ་སྨན་སླད་དུ། །ལུང་ལ་རྣམ་པ་དུ་ཞིག་མཆིས། །མངོན་རྫོགས་དཔལ་ལ་བདག་ཉན་འཚལ། །མངོན་རྫོགས་དཔལ་གྱིས་བཀའ་སྩོལ་ཅིག །དེ་སྐད་གསོལ་པ་གསན་ནས་ཀྱང་། །མངོན་རྫོགས་དཔལ་གྱིས་བཀའ་སྩལ་པ། །རྣལ་འབྱོར་ཀུན་ལ་ཕན་གདགས་པའི། །ལུང་གི་གྲངས་ནི་ངས་བསྟན་གྱི། །ཉོན་ཅིག་གནོད་འདུལ་ལྷ་ཡི་གཙོ། །ངས་བསྟན་པ་ལ་གདོན་མི་ཟ། །ལུང་ལ་རྣམ་གྲངས་དགུ་ཞིག་མཆིས། །དུས་ཀྱི་ལུང་ཞེས་བྱ་བ་དང་། །རི་རབ་ལུང་ཞེས་བྱ་བ་དང་། །གསང་བའི་ལུང་དང་མ་མོའི་ལུང་། །དྲོད་ཀྱི་ལུང་ཞེས་བྱ་བ་དང་། །གསང་བ་ཆེན་པོའི་སྤྱི་ལུང་དང་། །ཁྲག་
གི་ལུང་དང་རྫས་ཀྱི་ལུང་། །དམ་ཚིག་ལུང་དང་དགུ་ཞིག་ཡོད། །སྦས་པའི་ལུང་དང་དགུ་ཞེས་བཤད། །གནོད་འདུལ་ལྷ་ཡིས་ཡང་གསོལ་པ། །ལུང་དགུ་ཇི་ལྟར་འཚལ་བར་བགྱི། །མངོན་རྫོགས་དཔལ་གྱིས་བཀའ་སྩོལ་ཅིག །དེ་སྐད་གསོལ་པ་གསན་ནས་ཀྱང་། །མངོན་རྫོགས་དཔལ་གྱིས་བཀའ་སྩལ་པ། །དུས་ནི་སྔ་ཕྱི་མེད་པར་ཤེས་པར་བྱ། །རི་རབ་རྒྱས་པའི་མཆོད་རྟེན་དུ། །རང་གི་སེམས་དང་ཕུང་པོར་ཤེས་པར་བྱ། །གསང་བའི་ལུང་ནི་ཐུགས་ལ་གབ། །མ་མོ་བྱང་ཆུབ་སེམས་ལས་བྱུང་། །དྲོད་ནི་གཉིས་སུ་མེད་པའི་དྲོད་ཚད་དོ། །གསང་བ་སྤྱི་ལུང་རྟོགས་པར་དཀའ། །ཁྲག་གི་ལུང་ནི་ཕན་ཡོན་མང་། །དམ་རྫས་ལུང་ནི་ཚང་བར་བྱ། །དམ་ཚིག་ལུང་ནི་མ་ནོར་བར་རྟོགས་པར་བྱའོ། །ལུང་གི་ལེའུ་སྟེ་བཅུ་པའོ།། །།གནོད་འདུལ་ལྷ་ཡིས་ཡང་གསོལ་པ། །དུས་ཀྱི་ལུང་ཞེས་ཇི་ལྟ་བུ། །ཡང་དག་རྫོགས་ལ་བདག་ཉན་འཚལ། །ཡང་དག་རྫོགས་ཀྱིས་བཀའ་སྩོལ་ཅིག །དེ་སྐད་ཞུས་པ་གསན་ནས་ཀྱང་། །ཡང་དག་རྫོགས་ཀྱིས་བཀའ་སྩལ་པ། །དུས་ཀྱི་ལུང་ཞེས་བྱ་བའི་དོན། །ངས་གསུང་བ་ལ་ཐེ་ཚོམ་མེད། །ཉོན་ཅིག་གནོད་འདུལ་ལྷ་ཡི་གཙོ། །དུས་གསུམ་གཅིག་སྟེ་ཁྱད་པར་མེད། །སྔོན་མེད་ཕྱི་མེད་གདོད་ནས་རྣམ་པར་དག །དེ་ནི་དུས་ཀྱི་ལུང་ཞེས་བཤད། །དུས་ཀྱི་ལུང་གི་ལེའུ་སྟེ་བཅུ་གཅིག་པའོ།། །།གནོད་འདུལ་ལྷ་ཡིས་ཡང་གསོལ་པ། །མ་མོ་རྣམས་ཀྱི་མཐུན་རྫས་གང་། །ཉག་གཅིག་ཡབ་ལ་བདག་ཉན་འཚལ། །ཉག་གཅིག་ཡབ་ཀྱིས་བཀའ་སྩོལ་ཅིག །དེ་སྐད་གསོལ་པ་གསན་ནས་ཀྱང་། །ཉག་གཅིག་ཡབ་ཀྱིས་བཀའ་སྩལ་པ། །མ་མོ་རྣམས་ཀྱི་མཐུན་པའི་རྫས། །ད་ལྟ་ཉིད་དུ་ངས་བསྟན་གྱི། །ཉོན་ཅིག་གནོད་འདུལ་ལྷ་ཡི་གཙོ། །ཞིང་ཆེན་སྦྲམ་པོ་མེད་ན་མི་འགྲུབ་པོ། །བཅུ་བདུན་ལོན་པའི་གཟུངས་ཆེན་མེད་ན་མི་འགྲུབ་བོ། །དེ་ཡི་རཀྟ་མེད་ན་མི་འགྲུབ་བོ། །བདུད་རྩི་རྣམ་ལྔའི་གསུར་ཆེན་མེད་ན་མི་འགྲུབ་པོ། །སྲོག་
ཆགས་པའི་དབུགས་དང་། །མི་དབང་ཤ་ཆེན་མེད་ན་མི་འགྲུབ་པོ། །འཆི་ཀའི་མཚལ་ཏིག་མེད་ན་མི་འགྲུབ་བོ། །རྣམ་ལྔ་ཤིང་ཐོག་མེད་ན་མི་འགྲུབ་པོ། །མཚན་དང་ལྡན་པའི་གཡང་གཞིའི་གཡབ་མོ་དང་། །ཟེའུ་འབྲུ་དང་། འབྲས་བུ་ལྔ་དང་། དེ་རྣམས་རྣལ་འབྱོར་པས་བཙལ་དགོས། ཕྱི་མ་ཡང་མཆོག་དང་། རྨིག་པ་ཟླུམ་པོར་གྱུར་པ་དང་། རྨིག་པ་ཁ་བྲག་ཏུ་གྱུར་པའི་བ་གླང་དང་། ཤེལ་དཀར་མོ་དང་། ཤེལ་ནག་མོ་དང་། ཙ་ར་དཀར་པོ་དང་། ཙ་ར་ནག་མོ་དང་། ཀུ་ཀུ་ར་དང་། ནམ་མཁའ་ལྡིང་དཀར་ནག་དང་། དེ་རྣམས་དགོས་སོ། །གཞན་ཡང་དུར་ཁྲོད་ཀྱི་རྫས་སུ་གྱུར་པ་ཀུན་བསག་གོ། །དུར་ཁྲོད་ཀྱི་གནས་སུ་རྫས་དང་ལྡན་པ་ལ་བསྒྲུབས་ན་མི་འགྲུབ་མི་སྲིད་དོ། །མ་མོ་དམ་རྫས་ཀྱི་ལེའུ་སྟེ་བཅུ་གཉིས་པའོ།། །།གནོད་འདུལ་ལྷ་ཡིས་ཡང་གསོལ་པ། །རི་རབ་ལུང་ཞེས་ཇི་ལྟ་བུ། །དོན་དུ་ཇི་ལྟར་འཚལ་བར་བགྱི། །ཉག་གཅིག་ཡབ་ཀྱིས་བཀའ་སྩོལ་ཅིག །དེ་སྐད་ཞུས་པ་གསན་ནས་ཀྱང་། །ཉག་གཅིག་ཡབ་ཀྱིས་བཀའ་སྩལ་པ། །རི་རབ་ལུང་ཞེས་བྱ་བའི་དོན། །ངས་གསུང་བ་ལ་གདོན་མི་ཟ། །ཉོན་ཅིག་གཡུང་དྲུང་ཡང་དག་པ། །རི་རབ་རྒྱུ་ནི་རིན་པོ་ཆེ། །ལྔ་ལས་གྲུབ་པའི་མཆོད་རྟེན་དེས། །དེ་ནི་ཕྱི་ཡི་རི་རབ་ལུང་། །ནང་གི་རི་རབ་བསྟན་པ་ནི། །དེ་འདྲའི་སེམས་ཅན་ཕུང་པོ་ཡང་། །རིན་པོ་ཆེ་ལས་གྲུབ་པ་ཡི། །རྒྱལ་བའི་མཆོད་རྟེན་ཆེན་པོ་ཡིན། །ཡབ་ཡུམ་མཁའ་ལས་བྱུང་བའོ། །ཡོངས་འདུ་ས་བརྟོལ་སྲོག་རྩ་ཡིན། །མཆོད་རྟེན་བུམ་པ་མགོ་བོ་ཡིན། །སྙིང་ནས་བྱང་ཆུབ་སེམས་ཀྱི་སྤྲུལ་པ་ལས་བྱུང་ངོ་། །སྲིད་པ་ཆགས་བྱེད་ཆ་སྙོམས་གཉིས། །སྲོག་རྩ་སྒལ་བུའི་སྟེང་ན་གནས། །ཞིག་འཛིན་དང་ནི་བྱན་མཁན་གཉིས། །སྲོག་རྩ་སྒལ་བུ་བཅུ་དྲུག་མོད། །རྩེའུ་ཆུང་གཉིས་ཀྱི་ཟུགས་མཚམས་ན། །དབྱིངས་ཕྱུག་རྒྱན་གྱི་རྒྱལ་མོ་གནས། །ལོང་རྩ་གཉིས་ཀྱི་ཟུགས་མཚམས་ན། །དཀར་མོ་རྩེ་དང་ནག་མོ་གནས། །ཨ་སོ་ལི་ཀའི་ཟུགས་མཚམས་ན། །
བདག་ཉིད་མ་དང་གཅིག་པུ་གནས། །ཨ་སོ་ལི་ཀའི་གནས་མཚམས་ན། །མཆུ་འཇིབ་མ་དང་རྐང་ལྡག་གཉིས། །རྒྱུངས་མ་ཡང་རྩེ་རྩ་དྲུག་ལས། །ཨེ་ཀ་ཛ་ཏི་སྤུན་དྲུག་གནས། །སྲོག་རྩ་འཁོར་ལོ་དབུས་མ་ལ། །འདོད་ཁམས་གཙོ་མོ་ནེ་མཚན་གནས། །འབྱུང་འཇུག་སྒོ་བཞིའི་རྩ་བཞི་ལ། །ལས་ཀྱི་སྲིན་མོ་བཞི་ཡང་གནས། །གསང་བའི་རྩ་ནི་ཟུགས་མཚམས་སུ། །ནམ་མཁའི་རྒྱལ་མོ་སྤུན་གཉིས་གནས། །དབང་པོ་བདུན་རྩ་ཟུགས་མཚམས་ན། །མ་མོ་བདུན་ནི་དེ་ན་གནས། །རྣམ་ཤེས་བརྒྱད་ཀྱི་གྱེས་མཚམས་ན། །ཁྲོས་པའི་མ་མོ་བཞི་རྣམས་གནས། །དེ་ལས་འཕྲོས་པའི་མདོ་རྩ་ལས། །གསང་བའི་དགྱེས་སྡེ་བཞི་རྣམས་གནས། །འཇུ་བྱེད་ཕྲ་མོའི་ཟུགས་མཚམས་ན། །ཉི་ཤུ་རྩ་བརྒྱད་དེ་ན་གནས། །དྭངས་མའི་དྭངས་མ་ཟུགས་མཚམས་ན། །ཡུམ་ཆེན་ལྔ་ནི་དེ་ན་གནས། །མི་ཤིགས་པ་ཡི་ཐིག་ལེར་ནི། །ཡབ་ཡུམ་མི་གཉིས་དེར་གནས་སོ། །འོད་ཟེར་འབྱུང་གནས་ཐོད་ཕྲེང་ངོ་། །ཤིང་གི་སྲོག་ཤིང་ཡལ་གར་བཅས། །ཡེ་ཤེས་མ་མོ་རང་གནས་ལ། །ནང་གི་རི་རབ་ལུང་ཞེས་བྱ། །ཕྱི་ཡང་དེ་དང་འདྲ་བ་སྟེ། །སྲིད་པའི་མ་མོ་རང་གནས་ཡིན། །རི་རབ་ལུང་གི་ལེའུ་སྟེ་བཅུ་གསུམ་པའོ།། །།གནོད་འདུལ་ལྷ་ཡིས་ཡང་གསོལ་པ། །གསང་ལུང་ཆེན་པོ་ཇི་ལྟར་ལགས། །ཉག་གཅིག་ཡབ་ལ་བདག་ཉན་འཚལ། །དེ་སྐད་གསོལ་པ་གསན་ནས་ཀྱང་། །ཉག་གཅིག་ཡབ་ཀྱིས་བཀའ་སྩལ་པ། །གསང་ལུང་ཆེན་པོ་ངས་བསྟན་གྱི། །ཉོན་ཅིག་གཡུང་དྲུང་ཡང་དག་པ། །གསང་བའི་ལུང་ཞེས་བྱ་བ་ནི། །ཡབ་ཀྱི་མཁའ་དང་ཡུམ་གྱི་དབྱིངས། །ཤིན་ཏུ་རྟོགས་པར་དཀའ་བའོ། །ཐབས་ནི་མ་འགགས་ཤེས་རབ་ལྡན། །ཤེས་རབ་མ་ཆགས་ཐབས་དང་ལྡན། །དོན་དེ་ཤིན་ཏུ་རྟོགས་པར་དཀའ། །གཉིས་སུ་མེད་པའི་བྱང་ཆུབ་སེམས། །ཐུན་མོང་མ་ཡིན་རྟོགས་པར་དཀའ། །བྷ་ག་དང་ནི་པདྨའི་དོན། །ཤིན་ཏུ་རྟོགས་པར་དཀའ་བའོ། །སྐྱེ་མེད་དབྱིངས་དང་ཡེ་ཤེས་ཀྱང་། །སྟོན་
པ་ཡི་ནི་ཐུགས་ལ་གབ། །ལུང་དེ་དམན་པས་རྟོགས་པར་དཀའ། །སེམས་ཅན་རྣམས་ལ་ཡེ་ནས་གསང་། །དེ་ནི་ལུང་ཆུང་བ་རྣམས་ལ། །བསྟན་ཀྱང་རྫོགས་པར་མི་འགྱུར་ལ། །བསྟན་ཀྱང་ཡ་ག་སྤ་ལོར་འགྱུར། །ཆོས་ལ་སྨོད་ཅིང་སྤང་བར་འགྱུར། །དེ་ནི་གསང་བའི་ལུང་ཞེས་བཤད། །གསང་བ་ལུང་གི་ལེའུ་སྟེ་བཅུ་བཞི་པའོ།། །།རྡོ་རྗེ་སེམས་དཔས་ཡང་གསོལ་པ། །དྲོད་ལུང་ཆེན་པོ་ཇི་ལྟར་ལགས། །དྲོད་ལུང་ཆེན་པོ་བདག་ཉན་འཚལ། །ངོ་མཚར་ལྷ་ཡིས་བཀའ་སྩོལ་ཅིག །དེ་སྐད་གསོལ་པ་གསན་ནས་ཀྱང་། །ངོ་མཚར་ལྷ་ཡིས་བཀའ་སྩལ་པ། །དྲོད་ལུང་ཆེན་པོ་ཞེས་བྱ་བ། །ད་ལྟ་ཉིད་དུ་ངས་བསྟན་གྱི། །ཉོན་ཅིག་རྡོ་རྗེ་སེམས་དཔའི་གཙོ། །ཐམས་ཅད་བསྐྱེད་པའི་ཡུམ་ཡིན་ནོ། །ཡབ་ཡུམ་གཉིས་སུ་མེད་པ་ལས། །དང་པོ་རྒྱུ་འབྱུང་བ་ལྔ་འབྱུང་། །དེ་ལས་སྐྱེ་འགྲོ་ཀུན་ཀྱང་འབྱུང་། །སྐྱེ་འགྲོ་རྣམ་པ་སྣ་ཚོགས་པའི། །པདྨ་ཀུན་ལ་དྲོད་འབེབས་པའོ། །དེ་ལ་དྲོད་ཀྱི་རང་བཞིན་ནི། །སྙིང་རྩ་དང་ནི་སྲོག་རྩར་འདྲེལ། །དེ་ནི་པདྨར་འདུས་ཏེ་འདུག །སྙིང་ན་ཡུམ་ཆེན་ཉིད་བཞུགས་པ། །དེས་ནི་སྙིང་ལ་དྲོད་འབེབས་སོ། །མོ་རིགས་ཐམས་ཅད་ཁྲག་འཛག་པ། །དོན་དང་གཏན་ཚིགས་དེ་ལྟར་ལགས། །དེ་བས་བུ་མེད་བྱི་ལའང་འཛག །དུད་འགྲོ་རྣམས་ཀྱི་ཕྱིར་མི་འཛག །སྲོག་རྩར་འཁྱུད་ནས་མངལ་དུ་འབབས། །ཕོ་དང་འཕྲད་ན་སྲིད་པར་ཆགས། །དེ་ལས་འགྲོ་བ་ཐམས་ཅད་འབྱུང་། །དོན་འདི་རབ་ཏུ་གསང་བར་བྱ། །ཞེས་བཤད་དོ། །དྲོད་ལུང་གི་ལེའུ་སྟེ་བཅོ་ལྔ་པའོ།། །།རྡོ་རྗེ་སེམས་དཔས་ཡང་གསོལ་པ། །གསང་བ་སྤྱི་ལུང་ཇི་ལྟར་ལགས། །གསང་བའི་དཔལ་ལ་བདག་ཉན་འཚལ། །གསང་བའི་དཔལ་གྱིས་བཀའ་སྩོལ་ཅིག །དེ་སྐད་གསོལ་པ་གསན་ནས་ཀྱང་། །གསང་བའི་བདག་པོས་བཀའ་སྩལ་པ། །གསང་བ་ཆེན་པོའི་སྤྱི་ཡི་ལུང་། །ངས་བསྟན་པ་ལ་ཐེ་ཚོམ་མེད། །ཉོན་ཅིག་གཡུང་དྲུང་ཡང་དག་པ། །གསང་
བ་ཆེན་པོ་སྤྱི་ཡི་ལུང་། །གོང་མའི་གསང་བའི་དོན་དེ་ནི། །སྣང་སྲིད་སྤྱི་ལ་ཁྱབ་སྟེ་གནས། །སངས་རྒྱས་རྒྱུ་ནི་རང་ལ་ཡོད། །སྣང་སྲིད་ཁྲག་གིས་བསྡུས་པ་ཡི། །སྤྱི་ཡི་མངའ་དབང་མཛད་པ་ནི། །ཡུམ་ཆེན་ཉིད་གཞི་ཆེན་མོ་ཡིན། །ཐམས་ཅད་ཉིད་གཞི་ཉིད་ལ་འདུས། །ཡུམ་ཆེན་ཉིད་ཀྱི་དྲོད་འབེབས་པས། །སྤྱི་ཡི་བདག་མོའི་ཡུམ་ཡིན་པས། །ཡུམ་ཆེན་ཉིད་ནི་གསང་བར་བྱ། །དོན་དེ་གསང་བས་གསང་བའི་ལུང་། །རྟོགས་པར་དཀའ་བས་གསང་བའི་ལུང་། །ཞེས་བཤད་དོ། །གསང་བའི་སྤྱི་ལུང་གི་ལེའུ་སྟེ་བཅུ་དྲུག་པའོ།། །།གནོད་འདུལ་ལྷ་ཡིས་ཡང་གསོལ་པ། །མ་མོ་རྣམས་ལ་ལུང་སྩལ་པ། །མངལ་ལ་སོགས་པ་མི་འཚལ་ན། །བླང་དོར་མེད་པ་གང་གིས་འགྲུབ། །སེམས་ཅན་སྐྱེ་ཤི་གང་ལས་བྱུང་། །སེམས་ཀྱི་རྟག་ཆད་ཇི་ལྟར་བགྱི། །ཆོས་ཀྱི་དབྱིངས་ནི་གང་ལ་བགྱི། །མ་མོ་རྣམས་ཀྱི་མཚན་ཉིད་གང་། །དེ་ལ་དབྱེ་བ་དུ་ཞིག་མཆིས། །གནོད་འདུལ་ལྷ་ཡིས་བཀའ་སྩོལ་ཞུས། །ཡུམ་གཅིག་ཆེན་མོས་བཀའ་སྩལ་པ། །ཉོན་ཅིག་གནོད་འདུལ་ལྷ་ཡི་གཙོ། །མངལ་ལ་སོགས་པ་མི་འཚལ་ན། །བླང་དོར་མེད་པ་གང་གིས་འགྲུབ། །སེམས་ཅན་སྐྱེ་ཤི་གང་ནས་སྐྱེ། །སྲིད་པའི་བྱུང་སྲིད་ཇི་ལྟ་བུ། །ཆོས་ཀྱི་དབྱིངས་ཀྱི་གང་ལ་བྱ། །མ་ནི་རྟག་པ་མེད་པས་མ། །མོ་ནི་སྣང་བ་སྐྱེས་པས་མོ། །མཁའ་དབྱིངས་གཉིས་སུ་མེད་པ་ལ། །སེམས་ཀྱི་རྟག་པ་དེ་ལ་བྱ། །ཆོས་ཀྱི་དབྱིངས་ཆེན་བརྡལ་བ་ལ། །མཐའ་དང་དབུས་སུ་ག་ལ་ཡོད། །ནམ་མཁའི་གཞལ་ཡས་གདངས་པ་ལ། །སྟེང་དང་འོག་ནི་ག་ལ་ཡོད། །ཤ་ཆེན་དམར་ཆེན་བཀྲམ་པ་ལ། །ཁྱོད་དང་ང་རུ་ག་ལ་དབྱེ། །སེམས་ཀྱི་རྟག་པ་དེ་ལ་བྱ། །ཆོས་ཀྱི་དབྱིངས་ཀྱི་བྱ་བ་ནི། །ཐམས་ཅད་སྐྱེ་བ་མེད་པའི་དབྱིངས། །ཐམས་ཅད་འགག་པ་མེད་པའི་ཀློང་། །མ་བཅོས་མ་བྱས་ཆོས་ཉིད་དོ། །མ་མོ་རྣམས་ཀྱི་མཚན་ཉིད་ནི། །གྲངས་སུ་བགྲང་བར་ག་ལ་ཡོད། །ཅེས་བཤད་དོ། །མ་མོའི་
སེམས་རྒྱན་ལས་འདས་པར་བསྟན་པའི་ལེའུ་སྟེ་བཅུ་བདུན་པའོ།། །།གནོད་འདུལ་ལྷ་ཡིས་ཡང་གསོལ་པ། །སེམས་ཅན་ཀུན་ལ་ཕན་གདགས་ཕྱིར། །དམ་ཚིག་དོན་ནི་བདག་ཉན་འཚལ། །ཡང་དག་རྫོགས་ཀྱིས་བཀའ་སྩོལ་ཅིག །དེ་སྐད་གསོལ་པ་གསན་ནས་ཀྱང་། །ཡང་དག་རྫོགས་ཀྱིས་བཀའ་སྩལ་པ། །སེམས་ཅན་ཀུན་ལ་ཕན་གདགས་ཕྱིར། །དམ་ཚིག་དོན་རྣམས་ངས་བསྟན་གྱི། །ཉོན་ཅིག་གཡུང་དྲུང་ཡང་དག་པ། །ངས་བསྟན་པ་ལ་ཐེ་ཚོམ་མེད། །ཡབ་ཀྱི་མཁའ་དང་ཡུམ་གྱི་དབྱིངས། །དེ་ཡི་དོན་རྟོགས་དམ་ཚིག་གོ། །དེ་ཡང་མན་ངག་གུ་ཧྱའོ། །བྱེད་པ་པོ་དང་བྱ་བ་མོ། །དེ་གཉིས་སྣང་སྲིད་ཆ་ཡོད་ན། །དམ་ཚིག་ཉིད་ཀྱང་ཉམས་པ་མེད། །དེ་ཡང་མན་ངག་གུ་ཡའོ། །རང་སེམས་དོན་རྟོགས་སྲིད་པ་ཤེས་གྱུར་ན། །དམ་ལ་ཉམས་མེད་སྟོན་པའི་སྒྲོན་མ་ཡིན། །དེ་ཡང་མན་ངག་གུ་ཡའོ། །ལྷག་པའི་དམ་ཚིག་བཞི་པ་དག །མཁས་པའི་བླ་མ་དེ་ཕྱིན་ན། །རྡོ་རྗེ་སེམས་དཔའི་རྗེ་བཙན་དང་། །སྐལ་བ་མི་མཉམ་རྡུལ་ཙམ་མེད། །དེ་ཡང་མན་ངག་གུ་ཡའོ། །སོ་སོའི་ཐེག་པ་བསམ་ཡས་པ། །སོ་སོ་ཉམས་པ་མེད་ན་བདེ། །འཇིག་རྟེན་པ་ལ་ཆད་མོད་བཙན། །དགེ་བ་སྤྱོད་པས་མི་དགེ་སྤང་། །འདུལ་བ་འཛིན་པས་བསྲུང་ན་བདེ། །བྱང་ཆུབ་ས་ལ་གནས་པ་རྣམས། །ཉམས་པ་མེད་པའི་ལས་ཀྱང་བྱ། །གཙང་སྦྲ་ཡོད་ལ་གཙང་སྦྲ་བྱ། །རྣལ་འབྱོར་སྤྱོད་པ་གཉིས་ཀྱིས་འགྲུབ། །ཐེག་པ་གཡོས་པས་ཐེག་པ་འཇོམས། །ཞེས་བཤད་དོ། །དམ་ཚིག་མན་ངག་ལུང་གི་ལེའུ་སྟེ་བཅོ་བརྒྱད་པའོ།། །།གཡུང་དྲུང་ལྷ་ཡིས་ཡང་གསོལ་པ། །ཁྲག་གི་ལུང་ཞེས་ཇི་ལྟར་ལགས། །ཉག་གཅིག་ཡབ་ལ་བདག་ཉན་འཚལ། །ཉག་གཅིག་ཡབ་ཀྱིས་བཀའ་སྩོལ་ཅིག །དེ་སྐད་ཞུས་པ་གསན་ནས་ཀྱང་། །ཉག་གཅིག་ཡབ་ཀྱིས་བཀའ་སྩལ་པ། །ཁྲག་ལུང་ཆེན་མོ་ངས་བསྟན་གྱིས། །ཉོན་ཅིག་གཡུང་
དྲུང་ཡང་དག་པ། །ངས་བསྟན་པ་ལ་ཐེ་ཚོམ་མེད། །ལྷག་ཆད་བྱུང་ན་འཆི་བར་འགྱུར། །ལྷག་ཆད་མེད་ན་འཚོ་བ་ཡིན། །ཁྲག་གི་ཚོགས་ལས་གྲུབ་པ་ཡིས། །ནད་ཡམས་སྣ་ཚོགས་གཏང་བར་བྱ། །ཁྲག་སྣ་ཚོགས་པར་བྱ་བ་ནི། །བམ་གྱི་ཁྲག་དང་ཞིང་ཁྲག་དང་། །གསོན་ཁྲག་མངལ་ཁྲག་སྣ་ཚོགས་དང་། །མཁའ་ལ་རྒྱུ་བའི་ཁྲག་རྣམས་དང་། །གཅན་ཟན་གདུག་པའི་ཁྲག་རྣམས་དང་། །སྡེར་ཆགས་མང་པོའི་ཁྲག་སྣ་དང་། །རྨིག་ཟླུམ་ཁ་བྲག་ཁྲག་རྣམས་དང་། །བསད་དང་གསོ་བའི་ལས་རྣམས་རྒྱུ། །གང་འདོད་ལས་རྣམས་བྱེད་པ་ཡིན། །དེ་ཕྱིར་ཕན་གནོད་མང་ཞེས་བྱ། །ཞེས་བཤད་དོ། །ཁྲག་གི་ལུང་གི་ལེའུ་སྟེ་བཅུ་དགུ་པའོ།། །།རྡོ་རྗེ་སེམས་དཔས་ཡང་གསོལ་པ། །མ་མོ་འབྱུང་བའི་རྒྱུ་ཞེས་གང་ལ་བགྱི། །མངོན་རྫོགས་དཔལ་ལ་བདག་ཉན་འཚལ། །མངོན་རྫོགས་དཔལ་གྱིས་བཀའ་སྩོལ་ཅིག །དེ་སྐད་གསོལ་པ་གསན་ནས་ཀྱང་། །མངོན་རྫོགས་ཡབ་ཀྱིས་བཀའ་སྩལ་པ། །ཉོན་ཅིག་རྡོ་རྗེ་སེམས་དཔའི་གཙོ། །མ་མོ་འབྱུང་བའི་རྒྱུ་ཞེས་བྱ་བ་ནི། །རྟེན་པའི་གླུ་དང་དབྱངས་ལ་འབྱུང་། །བདག་གིས་འདི་སྐད་བརྗོད་པར་བྱ། །ཧཱུཾ། མ་གཡེལ་མ་གཡེལ་ཐུགས་དམ་ཅན། །མ་གཡེལ་མ་གཡེལ་སྲུང་མའི་ཚོགས། །ཀུན་ཏུ་བཟང་མོ་ཡུམ་གྱི་དབྱིངས། །མ་མོ་འབོད་པའི་གླུ་ལེན་ཅིང་། །སྒྲ་ནི་སྟོང་གསུམ་ཁྱབ་པར་སྒྲོགས། །བསྒྲུབ་ནི་ཡེ་ཤེས་ཐིག་ལེ་བསྒྲུབ། །བརྟེན་པའི་ཧེ་རུའི་གནས་སུ་བརྟེན། །དུར་ཁྲོད་ཆེན་པོའི་གནས་འདི་རུ། །ཤ་ཆེན་གསུར་གྱི་དྲི་སྣོམ་ཞིང་། །དུས་འདི་ཉིད་དུ་ཕྲིན་ལས་མཛོད། །མཱཾ་ས་ཆེན་པོ་རི་ལྟར་སྤུངས། །རཀྟའི་རྒྱ་མཚོ་མཚོ་ལྟར་བསྐྱིལ། །རུས་པའི་ཕུང་པོ་རི་ལྟར་སྤུངས། །དྲི་ཆུ་མང་པོ་ཆུ་ལྟར་འབྲུབ། །མ་མོ་ཆེན་མོ་སྤྲིན་ལྟར་གཏིབས། །ཕོ་ཉ་མང་པོ་སྐར་ལྟར་འཁྲུག །སུམ་བརྒྱ་དྲུག་ཅུའི་དཀྱིལ་འཁོར་འབྱུང་། །དེ་ནི་མ་མོ་སྒྲུབ་པའི་གླུ། །ཡིད་ཙམ་གདུང་ལ་འཁྱུག་
པར་བླང་། །ཞེས་བཀའ་སྩལ་ཏོ། །མ་མོ་འབྱུང་བའི་རྒྱུ་དང་། མ་མོའི་གླུའི་ལེའུ་སྟེ་ཉི་ཤུ་ཐམ་པའོ།། །།གནོད་འདུལ་ལྷ་ཡིས་ཡང་གསོལ་པ། །རྣལ་འབྱོར་རྣམས་ལ་ཕན་གདགས་ཕྱིར། །བྷ་གའི་དོན་རྣམས་ཇི་ལྟར་ལགས། །སྤྱི་དཔལ་མཆོག་ལ་བདག་ཉན་འཚལ། །སྤྱི་དཔལ་མཆོག་གིས་བཀའ་སྩོལ་ཅིག །དེ་སྐད་གསོལ་པ་གསན་ནས་ཀྱང་། །སྤྱི་དཔལ་མཆོག་གིས་བཀའ་སྩལ་པ། །རྣལ་འབྱོར་རྣམས་ལ་ཕན་གདགས་ཕྱིར། །བྷ་གའི་དོན་རྣམས་ངས་བསྟན་གྱི། །ཉོན་ཅིག་གནོད་འདུལ་ལྷ་ཡི་གཙོ། །ངས་བསྟན་པ་ལ་ཐེ་ཚོམ་མེད། །བྷ་ག་ཞེས་ནི་བྱ་བའི་དོན། །ཆགས་པ་མེད་པས་བྷ་ཞེས་བྱ། །འདོད་པ་མེད་པས་ག་ཞེས་བྱ། །ཤེས་རབ་དོན་རྟོགས་བྷ་ཞེས་བྱ། །ཐབས་ཀྱི་དོན་རྟོགས་ག་ཞེས་བྱ། །སྐྱེ་བ་མེད་པས་བྷ་ཞེས་བྱ། །འགག་པ་མེད་པས་ག་ཞེས་བྱ། །སྣ་ཚོགས་འབྱུང་བས་བྷ་ཞེས་བྱ། །ཅིར་ཡང་འབྱུང་བས་ག་ཞེས་བྱ། །ཀུན་ལ་ཁྱབ་པས་བྷ་ཞེས་བྱ། །རྫུ་འཕྲུལ་ཆེན་པོ་ག་ཞེས་བྱ། །ཡང་ན་མཁའ་རྣམ་པར་དག་པ་ཞེས་བྱ་སྟེ། དབྱིངས་རྣམ་པར་དག་པ་ཞེས་ཀྱང་བྱ། བྷ་ག་ཀློང་ཞེས་ཀྱང་བྱ། གཏིང་དཔག་མེད་པ་ཞེས་ཀྱང་བྱ། །ཡངས་པ་ཆེན་པོ་ཞེས་ཀྱང་བྱ། །གཏིང་དཔག་དཀའ་བ་ཞེས་ཀྱང་བྱ། །ཀུན་ལ་ཁྱབ་པ་ཞེས་ཀྱང་བྱ། །སྣ་ཚོགས་འབྱུང་བ་ཞེས་ཀྱང་བྱ། །འདས་པ་ཀུན་གྱི་གནས་ཞེས་ཀྱང་བྱ། །གཤེགས་པ་ཀུན་གྱི་ཤུལ་ཞེས་ཀྱང་བྱ། ཐམས་ཅད་སྡུད་ཅེས་ཀྱང་བྱ། མདོར་འུབ་ཀྱིས་བསྡུས་ན། མཁའ་བཞི་དབྱིངས་དང་ལྔ། བདེ་བ་ཆེན་པོའི་ཀློང་དབྱིངས་སུ་འཁྱིལ་པ་ཞེས་བྱའོ། །དེ་སྐད་ཅེས་བཀའ་སྩལ་ཏོ། །བྷ་ག་དོན་གྱི་ལེའུ་སྟེ་ཉེར་གཅིག་པའོ།། །།གནོད་འདུལ་ལྷ་ཡིས་ཡང་གསོལ་པ། །འདོད་དགུ་སྒྲུབ་པའི་ཕྱག་རྒྱ་རྣམས། །སྤྱི་ཡི་ཡབ་ལ་བདག་ཉན་འཚལ། །སྤྱི་ཡི་ཡབ་ཀྱིས་བཀའ་སྩོལ་ཅིག །
དེ་སྐད་གསོལ་པ་གསན་ནས་ཀྱང་། །སྤྱི་ཡི་ཡབ་ཀྱིས་བཀའ་སྩལ་པ། །འདོད་དགུ་བསྒྲུབ་པའི་ཕྱག་རྒྱ་ནི། །ཡང་དག་ཉིད་དུ་ངས་བསྟན་གྱི། །ཉོན་ཅིག་གནོད་འདུལ་ལྷ་ཡི་གཙོ། །ངས་བསྟན་པ་ལ་ཐེ་ཚོམ་མེད། །སྤྱི་ཡི་ཕྱག་རྒྱ་བཅིངས་ནས་ནི། །ཆུ་བོ་ཆེན་པོ་འོང་བའམ། །ཆུ་ཀླུང་ཆེན་པོ་གཙང་བོའི་འགྲམ། །གླང་ནི་སྨུག་པོ་དག་ལ་ཞོན། །སྣང་སྲིད་རྫས་ནི་མང་པོ་བསག །མ་མོ་རྣམས་ནི་བསྐུལ་བར་བྱ། །ཕྱོགས་བཞིར་ཕྱག་རྒྱ་བསྒྱུར་ནས་ནི། །བསྒྲུབ་པའི་སྔགས་ནི་བརྗོད་པར་བྱ། །ཨཱོཾ་བ་མུ་ཀ་ཡོ་གཱི་ཤྭ་རཱི་ཧི་ཧི་ཨི་ཨི་ཞེས་བརྗོད་དོ། །དེས་དགོས་དགུ་འགྲུབ་པོ། །ཅི་འདོད་པ་མངོན་སུམ་དུ་འགྲུབ་པོ། །འདོད་དགུ་ཕྱག་རྒྱ་སྤྱི་བསྒྲུབ་པའི་ལེའུ་སྟེ་ཉེར་གཉིས་པའོ།། །།གནོད་འདུལ་ལྷ་ཡིས་ཡང་གསོལ་པ། །སེམས་ཅན་ཀུན་ལ་ཕན་གདགས་ཕྱིར། །ཚེ་སྲོག་ཉམས་པ་ཇི་ལྟར་གསོ། །ཡང་དག་རྫོགས་ལ་བདག་ཉན་འཚལ། །ཡང་དག་རྫོགས་ཀྱིས་བཀའ་སྩོལ་ཅིག །དེ་སྐད་ཞུས་པ་གསན་ནས་ཀྱང་། །ཡང་དག་རྫོགས་ཀྱིས་བཀའ་སྩལ་པ། །སེམས་ཅན་ཀུན་ལ་ཕན་གདགས་ཕྱིར། །ཚེ་སྲོག་ཉམས་པ་གསོ་བ་དང་། །གསོ་བའི་ཆོ་ག་ངས་བསྟན་གྱི། །ཉོན་ཅིག་གཡུང་དྲུང་ཡང་དག་པ། །ངས་བསྟན་པ་ལ་ཐེ་ཚོམ་མེད། །སྟེགས་བུ་མདའ་གང་གྲུ་བཞི་ལ། །འཁོར་ལོ་རྩིབས་བརྒྱད་དེ་དབུས་སུ། །པདྨ་ཆེན་པོ་འདབ་བརྒྱད་བྲིའོ། །པདྨ་ཆེན་པོ་དེ་དབུས་སུ། །རིན་ཆེན་འབར་བ་ཟུར་བརྒྱད་བྲི། །དེ་དབུས་ཟླ་གམ་དམར་པོ་བྲི། །བྷནྡྷ་མཚན་དང་ལྡན་པ་བཞག །རིན་ཆེན་འབར་བ་ཟུར་བརྒྱད་ལ། །ལྔ་ལ་རྟག་པའི་རྒྱལ་མོ་ལྔ། །གཉིས་ལ་སྨེ་ཤ་པྲ་མོ་ཧ། །པདྨ་ཆེན་པོ་འདབ་བརྒྱད་ལ། །ཕྱོགས་བཞིར་ཁྲོས་པའི་དབང་ཆེན་བསྐྱེད། །མཚམས་སུ་གསང་བའི་ཡུམ་བཞི་དགོད། །འཁོར་ལོ་ཆེན་པོ་རྩིབས་བརྒྱད་ལ། །ཕྱོགས་བཞིར་ཕྱག་རྒྱ་ཆེན་པོ་བཞི། །ཉི་ཟླ་ཐོད་ཕྲེང་རྒྱལ་མོ་
དགོད། །གཅིག་ལ་ཚེ་ཡི་སྙིང་པོ་བྲི། །སྨན་མོ་ཆེན་པོ་དོན་གྱིས་སྦྱར། །དཀྱིལ་འཁོར་དེ་ཡི་ཕྱི་རིམ་དུ། །བཀྲ་ཤིས་བརྒྱད་ཀྱང་བྲི་བར་བྱ། །སྒོ་བཞིར་ཁྲོ་བོ་བཞི་ཡང་དགོད། །ཚིལ་ཆེན་མར་མེ་རྒྱུན་མི་གཅད། །ལང་ཚོའི་སྒྲུབ་པ་འདི་བཞིན་བྱ། །ཤིང་བལ་བུ་དང་འབྲི་ཏ་ཨ་སྟ་དང་། པྲ་རྡོ་དང་། མར་དང་། ཨ་མྲྀ་ཏ་དང་འདི་རྣམས་ཀུན། །དངུལ་གྱི་བུམ་པར་བླུགས་ནས་ནི། དར་དམར་པོས་མགུལ་དཀྲིས་ལ་གཟུངས་ཐག་དཀར་དམར་ཟུང་གཅིག་གིས་བཏགས་ལ་དཀྱིལ་འཁོར་གྱི་དབུས་སུ་བཞག །གཟུགས་ཐག་དམར་པོ་ཡུམ་གྱིས་གཟུང་། དཀར་པོ་ཡབ་ཀྱིས་གཟུང་། ཞག་དགུར་བསྙེན་པ་བྱ་ཞིང་རྟག་པའི་རྒྱལ་མོ་ལྔ་བསྐུལ་ཞིང་བསྒྲུབ་པོ། །དེ་ནས་རང་གི་སྙིང་པོ་བཟླས། ཡང་ན་ཚེའི་སྙིང་པོ་དང་གཞུང་གཞན་ནས་འབྱུང་བའི་སྙིང་པོ་ཡང་གཞུང་བཞིན་དུ་བཟླས་བརྗོད་བགྱི། དུས་དེར་བར་གཅོད་འབྱུང་བས། མཚམས་དྲག་ཏུ་བཅད་དོ། །དེ་སྒྲུབ་པའི་གསང་བའི་སྔགས་འདིའོ། །ཨཱོཾ་ཨ་མྲྀ་ཏ་ཤ་ན། དུན་བུས་བུད་དེ་སྭཱ་ཧཱ། ཨཱ་ཡུཿཨུ་ཧ་ཨ། ཞེས་རྟག་ཏུ་བཟླས་སོ། །དངོས་གྲུབ་བླང་བའི་སྔགས་འདིའོ། །ཨཱོཾ་བྷ་བྷ་ལཾ་ཧཾ་ཨཱ་ཨཱ་ཛྙཱ་ན་སིབ། ཅེས་བཟླས་སོ། །ཚེ་བསྒྲུབ་པའི་ལེའུ་སྟེ་ཉེར་གསུམ་པའོ།། །།གནོད་འདུལ་ལྷ་ཡིས་ཡང་གསོལ་པ། །སེམས་ཅན་ཀུན་ལ་ཕན་གདགས་ཕྱིར། །རིམས་ནད་གཅོད་པའི་ཆོ་ག་ནི། །མངོན་རྫོགས་ཡབ་ལ་བདག་ཉན་འཚལ། །མངོན་རྫོགས་ཡབ་ཀྱིས་བཀའ་སྩོལ་ཅིག །དེ་སྐད་ཞུས་པ་གསན་ནས་ཀྱང་། །མངོན་རྫོགས་ཡབ་ཀྱིས་བཀའ་སྩལ་པ། །སེམས་ཅན་ཀུན་ལ་ཕན་གདགས་པའི། །རིམས་ནད་གཅོད་པའི་ཆོ་ག་ནི། །ཡང་དག་ཉིད་དུ་ངས་བཤད་ཀྱི། །ཉོན་ཅིག་གནོད་འདུལ་ལྷ་ཡི་གཙོ། །ངས་བསྟན་པ་ལ་ཐེ་ཚོམ་མེད། །རིམས་ནད་གཅོད་པའི་ཆོ་ག་ནི། རེ་མ་ཏི་བསྒྲུབས་ལ། ཐལ་ཆེན་དང་། ཉུང་དཀར་དང་ཙ་རའི་ཁྲག་དང་། རོ་སོལ་དང་། འདི་རྣམས་བསགས་ལ་དེ་ལ་གདབ་པའི་བརྣག་པའི་སྔགས་འདིའོ། ཨཱོཾ་པ་རི་རུ་རུ་སུ་རུ་ན་མ་པ་ར། ཨཱོཾ་འུར་བི་མ་སུ། སུ་ཏ་ན་བྷྱོ། ཞེས་ལན་ཉི་ཤུ་རྩ་གཅིག་བཟླས་ནས།
རིམས་ནད་ཡོད་པའི་ཕྱོགས་སུ་གཏོར་རོ། །ཕྱི་མ་ཆུ་ལ་ཡང་གཏོར་རོ། །དེ་ལྟར་བྱས་ན་རིམས་ནད་མི་ཆད་མི་སྲིད་དོ། །ཞེས་བཤད་དོ། །རིམས་ནད་གཅོད་པའི་ལེའུ་སྟེ་ཉེར་བཞི་པའོ།། །།གནོད་འདུལ་ལྷ་ཡིས་ཡང་གསོལ་པ། །སེམས་ཅན་ཀུན་ལ་ཕན་གདགས་ཕྱིར། །ཆར་ཆུ་དབབ་པའི་ཆོ་ག་ནི། །རྫོགས་སངས་རྒྱས་ལ་བདག་ཉན་འཚལ། །རྫོགས་སངས་རྒྱས་ཀྱིས་བཀའ་སྩོལ་ཅིག །དེ་སྐད་ཞུས་པ་གསན་ནས་ཀྱང་། །རྫོགས་སངས་རྒྱས་ཀྱིས་བཀའ་སྩལ་པ། །སེམས་ཅན་ཀུན་ལ་ཕན་གདགས་པའི། །ཆར་ཆུ་དབབ་པའི་ཆོ་ག་ནི། །ཡང་དག་ཉིད་དུ་ངས་བསྟན་གྱི། །ཉོན་ཅིག་གནོད་འདུལ་ལྷ་ཡི་གཙོ། །ཆར་ཆུ་དབབ་པ་ནི། སྲོ་ལོ་བ་དང་། མོན་སྲན་དང་། ཟིང་བུ་དང་། དེ་རྣམས་བསྲེས་ལ། དེ་ནས་སླ་ངའི་ནང་དུ་ཆུ་བླུགས་ལ། སྔགས་ཀྱིས་རྫས་དེ་ལ་བཏབ་ལ། ཁ་ཆུ་ད་རེ་ཡས་སྟགས་ཀྱི་ཐལ་བ་ཆུ་དེ་ལ་བླུགས་ཏེ་ཕྱོགས་བཅུར་གཏོར་རོ། །གནམ་ལ་གཏོར་རོ། །དེ་ལྟར་གཏོར་ཞིང་སྔགས་འདི་གདབ་པོ། ཨཱོཾ་སུ་པ་བེ་བ་སེ་ནམཿཁ་བོ་སུརྱ་བས་སྟ་དུ་ལ་ཧ་ཡ་སྭཱ་ཧཱ། ཞེས་མང་དུ་བཟླས་ཤིང་གཏོར་རོ། །ཡང་ཁ་སྲན་ཆུ་མིག་བཟང་པོར་རྫས་དེ་བླུགས་ལ་ནཱ་ག་རཱ་ཙ་ས་མ་ཡ་ཛཿ། ཞེས་དྲངས་ཤིང་། གོང་གི་སྔགས་དེ་བཟླས་ཤིང་ཆུ་བཅུས་ཤིང་གནམ་ལ་གཏོར་རོ། །དེ་ལྟར་བྱས་ན་ཆར་ཆུ་འབབ་ངེས་སོ། །ཐེ་ཚོམ་མེད་པར་འགྲུབ་ངེས་སོ། །ཆར་དབབ་པའི་ལེའུ་སྟེ་ཉེར་ལྔ་པའོ།། །།གནོད་འདུལ་ལྷ་ཡིས་ཡང་གསོལ་པ། །བཀའ་འདི་དང་དུ་ལེན་པ་ཡི། །རྣལ་འབྱོར་བསམ་པ་རྫོགས་པའི་ཕྱིར། །བདེ་བའི་དགོངས་པ་བདག་ཉན་འཚལ། །སྤྱི་ཡི་ཡབ་ལ་དགོངས་པ་སྐྱེས། །དེ་སྐད་གསོལ་པ་གསན་ནས་ཀྱང་། །ཉག་གཅིག་ཡབ་ཀྱིས་བཀའ་སྩལ་པ། །ཉོན་ཅིག་གཡུང་དྲུང་ཡང་དག་པ། །རྣལ་འབྱོར་བསམ་རྫོགས་བྱ་བ་དང་། །བདེ་བའི་དགོངས་པ་ངས་བསྟན་གྱི། །རྣལ་འབྱོར་སྤྱི་ལ་ནན་ཏན་
བསྐྱེད། །དེ་ནས་བསྒྲུབ་པའི་སྐྱེས་བུ་དེས། །མ་གོད་རས་ནི་གཙང་མ་ལ། །དུས་དྲུག་བསྲུངས་པའི་བྲིས་མཁན་གྱིས། །མ་འདྲེས་ཚོན་གྱིས་བྲི་བ་ནི། །གསེར་གྱི་ཁ་དོག་ལྟ་བུ་ཡི། །ཕྱག་གཉིས་བརྐྱང་བའི་ཕྱག་རྒྱ་ཡིས། །བླ་མེད་སྤྱི་དཔལ་དེ་བྲིས་ཏེ། །གཡོན་གྱི་ཕྱོགས་སུ་བྲི་བ་ནི། །ཕྱག་ན་རྡོ་རྗེ་དབུ་སྨད་ཅིང་། །སྐུ་མདོག་དཀར་འཚེར་ཚུལ་དུ་བྲི། །དེ་ཡི་འོག་ཏུ་བྲི་བ་ནི། །རིག་པ་འཛིན་པའི་ངོ་བོ་ནི། །གསེར་གྱི་པོག་ཕོར་བཟུང་ནས་ནི། །དེ་ལ་མཆོད་པ་བྱེད་པར་བྲི། །དེ་ནས་བསྙེན་པ་བྱེད་པ་ནི། །པ་ན་ས་ཡི་དྲི་ཆུ་དང་། །འོ་མ་ནས་ཕྱེས་ལུས་བཀྲུས་ཏེ། །བསྙེན་པ་གཞུང་བཞིན་བྱེད་པའོ། །གཙང་མའི་གོས་ཀྱིས་རབ་བརྒྱན་ཏེ། །རྒྱལ་བའི་སྐུ་ལ་མཆོད་པ་དང་། །རྟག་ཏུ་ཕྱག་ན་རྡོ་རྗེ་ལ། །མོས་པའི་སེམས་ཀྱིས་གཏོར་མ་དབུལ། །སྐུ་གཟུགས་མཆོད་རྟེན་སྤྱན་སྔ་རུ། །བཟླས་ན་དངོས་གྲུབ་མཆོག་ཆེན་སྟེར། །དེ་ནི་བྱས་ན་ཉམས་པའང་འགྲུབ། །ཞི་དང་དབང་དང་རྒྱས་དང་བསྐྲད། །བསྐང་བའི་ལས་དང་དགུག་པ་དང་། །རྣམ་པར་དབྱེ་དང་འཕྲོག་པ་དང་། །དུས་སླ་བ་དང་རབ་ཏུ་ཐར། །རྩོད་དང་འཁྲུག་པ་རྣམ་བཅོམ་པ། །ཕ་རོལ་སྡེ་རྣམས་བཤིག་པ་དང་། །ནམ་མཁའ་ལ་ནི་འགྲོ་བ་དང་། །སྤུ་གྲི་རལ་གྲི་འཁོར་ལོ་དང་། །རྡོ་རྗེ་གསལ་ཤིང་ཕུར་བུ་རྣམས། །བསམ་པ་གཅིག་གིས་འགྲུབ་པར་བསྟན། །དེ་ནས་དབང་དུ་བྱ་བ་ནི། །སྦྲང་རྩི་ཞོ་དང་དུར་བ་རྣམས། །མར་དང་ཉུང་དཀར་ལ་སོགས་ལ། །བརྒྱ་སྟོང་བཟླས་ཤིང་བསྲེག་པ་ན། །དབང་དུ་མི་འདུ་གང་ཡང་མེད། །པ་ལ་ཤ་ཡི་མེ་བུས་ཤིང་། །ཨ་ཀ་མ་ལ་ཡ་ཡི་ཡམ་ཤིང་དང་། །མར་དང་སྦྲང་རྩི་འོ་མ་རྣམས། །བདུན་སྟོང་བར་དུ་བཟླས་བསྲེགས་ན། །བསྐྲད་དང་ཕ་རོལ་སྡེ་བ་ཀུན། །ཞི་བར་འགྱུར་བ་གདོན་མི་ཟ། །བིལ་བ་དག་གི་ཡམ་ཤིང་ལ། །ཧཱུཾ་སྟོང་བསྲེག་ན་སྐྲོད་པར་བྱེད། །ན་ལེ་ཤམ་དང་དཀར་པོའི་ཤིང་། །
ཨ་ཤཏྠ་ཡི་འདབ་མའི་བར་དུ་བཅུག་ལ། ནུབ་བདུན་བཟླས་པ་བྱས་ན་ནི། །རྐང་པའི་བར་དུ་འགྲོ་བར་འགྱུར། །བིལ་བ་ཡམ་ཤིང་མེ་བུས་ལ། །བྱ་རོག་འུག་པའི་སྒྲོ་བཙུགས་ཏེ། །ཉུང་དཀར་མར་ལ་ཉུགས་ནས་ནི། །བརྒྱ་སྟོང་བར་དུ་བཟླས་བསྲེག་ན། །ཁམས་གསུམ་མཐོང་བར་གདོན་མི་ཟ། །གསང་བའི་ཕུར་བུ་ངེས་པ་ལ། །བརྒྱ་སྟོང་བཟླས་ཏེ་བསྐོར་བཏབ་ན། །གདུག་པའི་ཚོགས་ནི་གང་ཡང་རུང་། །འཕྲལ་དུ་འབྲོས་པར་གདོན་མི་ཟ། །སྐེ་ཚེ་ལན་ཚྭ་སྒོག་པ་གསུམ་ལ། །བསྔགས་ཏེ་ས་ལ་སྦས་པ་ན། །འཕྲལ་དུ་སྐྲོད་པར་དོགས་པ་མེད། །དུར་ཁྲོད་ཀྱི་ནི་དབུས་ཉིད་དུ། །ས་ཤི་དུམ་བུའི་མེ་བུས་ལ། །སྔོན་པོ་གོས་སུ་གོན་ནས་སུ། །ཐལ་ཆེན་ཁྲག་དང་སྤྲུས་པ་སྟེ། །བརྒྱ་སྟོང་བར་དུ་བཟླས་བསྲེག་ན། །ཚངས་པའི་ཚེ་ཡང་མོད་ལ་འཆི། །ཁྲོས་ཤིང་གསད་པ་བཟླས་ནས་སུ། །བདག་གི་ལུས་ལ་རྨ་བྱུང་ན། །དུག་འཐུང་བདེ་བར་འདུག་པ་ཡིན། །རྫ་ཆགས་ཕྲུ་བའི་ཁ་སྦུབ་བདུན། །བླངས་བཟླས་ཀྱང་ཏེ་སྔགས་ཀྱིས་བཏབ་ནས་ནི། །དེ་ཡི་གནས་སུ་ཁྱིམ་གྱི་སྟེང་། །དུས་གཏོར་བྱས་ན་རྟག་ཏུ་ངན་དམེ་བྱེད་པའོ། །དགྲ་ཡི་ཕྱོགས་སུ་བརྟགས་ནས་སུ། །དུར་ཁྲོད་དང་ནི་ཁྲག་དག་ལ། །བརྒྱ་སྟོང་བར་དུ་བཟླས་བསྲེག་ན། །དཔུང་གི་ཚོགས་རྣམས་འཇིགས་པར་བྱེད། །ལག་པ་ལ་ནི་བརྒྱ་སྟོང་བར་དུ་བཟླས་ཏེ་ས་ལ་བརྡབས་ན། གཏེར་གྱི་བདག་པོ་འབྲོས་པར་འགྱུར། །ཡོ་བྱད་སྔོན་པོས་བསྒྱུར་ནས་ནི། །མངར་གསུམ་ཡོན་དུ་ཕུལ་ནས་སུ། །ལག་མཐིལ་ས་ལ་བརྡབས་ནས་ནི། །མྱུག་ཅིང་ཞག་བདུན་བར་དུ་བརྒྱ་སྟོང་བཟླས། །གཏེར་ཁུགས་པ་ནི་གདོན་མི་ཟ། །རིང་པར་སྙིང་ནས་བཟླས་བྱས་ཏེ། །སྐུ་གདུང་ལྡན་པའི་མཆོད་རྟེན་ལ། །མཆོད་པ་རྒྱ་ཆེན་བྱས་ནས་སུ། །ཟས་གཙང་མ་དག་ཟ་བཞིན་དུ། །བརྒྱ་སྟོང་བཟླས་ན་མཁའ་ལ་འགྲོ། །གཞན་གྱི་དབང་དུ་མི་འགྱུར་ཞིང་། །ཀུན་གྱི་བླ་ན་སྤྱོད་པ་དང་། །གནོད་སྦྱིན་ཀུན་དང་ལྷན་ཅིག་ལྡིང་། །ཕྱག་
ན་རྡོ་རྗེ་མཆོད་ནས་ནི། །དེ་ཡི་གཡས་ཀྱི་ཕྱོགས་སུ་ནི། །ཨ་ཤྭཏྠ་ཡི་འདབ་མ་ལ། །འོག་བཞི་བཞག་སྟེ་སྟེང་དུ་གསུམ། །ད་ལྟར་ཞག་གསུམ་ཟིན་ནས་ནི། །འབྱུང་པོ་ཀུན་ལ་གཏོར་མ་སྦྱིན། །གྲུབ་པའི་མཚན་མ་གསུམ་གྱི་བར། །དེ་ཡི་བར་དུ་སྙིང་པོ་བཟླས། །འགྲོ་བར་དཀའ་བར་རབ་ཏུ་འགྲོ། །བར་དུ་བསྡུས་ཀྱང་གཏོར་མི་སྲིད། །འབར་བས་མཁའ་ལ་འགྲོ་བར་འགྱུར། །དུར་ཁྲོད་ཀྱི་ནི་དབུས་ཉིད་དུ། །ཕྱག་ན་རྡོ་རྗེའི་གཟུགས་བཞག་སྟེ། །རལ་གྲི་ལག་གིས་བཟུང་ནས་ནི། །དྲུང་དུ་བརྒྱ་སྟོང་བཟླས་པ་ནི། །བླང་བས་རལ་གྲིའི་རིག་འཛིན་ཐོབ། །མ་སྐྱེད་འཁྱིལ་པའི་སྐྲ་དག་དང་། །འདོད་པའི་གཟུགས་དང་ལྡན་པ་སྟེ། །ཆེ་ཚད་བསྐལ་པར་གནས་པ་སྟེ། །གསད་པའི་འཁོར་ལོའི་དུམ་བུའམ། །ལྕགས་གསུམ་དག་ལ་བྱས་པ་ཡི། །འཁོར་ལོ་རྫས་སུ་བཟུང་ནས་སུ། །སྐུ་གསུམ་ལྡན་པའི་མཆོད་རྟེན་དང་། །ཕྱག་ན་རྡོ་རྗེ་གཙོ་མཆོད་དོ། །ཞག་གཅིག་རྨྱུག་ཅིང་འཁོར་ལོ་བཟུང་། །ལན་སྟོང་བཟླས་བརྗོད་བྱས་པ་ན། །རླུང་གཡོས་མཚན་མ་འབྱུང་བ་དང་། །ལག་པ་དག་ཀྱང་དེ་བཞིན་འབར། །འཁོར་ལོ་ཡང་ནི་འོད་འབྱུང་སྟེ། །རིག་འཛིན་འཁོར་ལོ་བསྐོར་བ་ཡང་། །འོང་ནས་རིག་འཛིན་འཁོར་ལོའི་དངོས་གྲུབ་སྟེར། །གཞན་གྱི་མི་མཆེད་གནས་མཆོག་ལ། །བསྐལ་པ་ཆེན་པོར་གནས་པར་འགྱུར། །རྒྱས་པའི་ལྕགས་སུ་གྱུར་པ་ལས། །སོར་དྲུག་པོ་ཡི་རྡོ་རྗེ་བྱ། །སྐུ་གདུང་ལྡན་པའི་མཆོད་རྟེན་ལ། །སྐུ་གཟུགས་སྤྱན་སྔར་མཆོད་བསྙེན་བྱ། །རི་རྩེ་ལ་སོགས་གཙང་འགྲམ་དུ། །སྐུ་ཡི་གཟུགས་བརྙན་གཞག་ནས་སུ། །དྲིལ་བུ་བདུག་སྤོས་ལ་སོགས་པས། །འབྱུང་པོའི་ཚུལ་དུ་རྡོ་རྗེ་མཆོད། །སྔོན་པོའི་གོས་ཀྱང་བགོས་ནས་སུ། །རྡོ་རྗེའི་རིགས་ལ་མཆོད་པ་བྱ། །དེ་ནས་རྒྱ་མཚོ་འཁྲུགས་པ་དང་། །ས་ཡང་རབ་ཏུ་གཡོ་བྱེད་པའོ། །རླུང་ཡང་དྲག་ཏུ་ལྡང་བ་དང་། །ནམ་མཁའ་ནས་ནི་ཧ་ཧ་དང་། །
ཀཱི་ལི་ཀཱི་ལིའི་སྒྲ་ལྡང་བ་དང་། །འོད་ཟེར་གདུག་པ་འབར་བ་དང་། །དངོས་གྲུབ་མཆོག་ཏུ་གྱུར་པ་སྟེ། །ཏིང་འཛིན་འཁོར་ལོ་བསྐོར་བ་དང་། །འབད་དེ་གཡོག་ལྟར་བྱེད་པར་འགྱུར། །གཟུགས་དད་ཆེ་ཡང་བདེ་ལྡན་ཞིང་། །མཐུ་ཡང་ཕྱག་ན་རྡོ་རྗེ་བཞིན། །ཧཱུཾ་ཞེས་པས་ནི་རི་སྙིལ་བའོ། །དེ་ནས་རྒྱལ་པོའི་ས་བཟུང་བ། །རས་སམ་རྩིགས་པའི་ངོས་དག་ལ། །བཅོམ་ལྡན་འདས་མ་བྲི་བར་བྱ། །བདག་གམ་ར་ཡི་ཁྲག་དག་ལས། །གཏོར་མ་རྒྱ་ཆེར་བྱིན་ནས་ནི། །བ་ཤའི་ཤ་ཆེན་བདུག་པ་བྱ། །རྒྱས་པ་བརྒྱ་སྟོང་བཟླས་ན་འགྲུབ། །སྔགས་ཀྱི་མཆོག་ཀྱང་བསྙེན་པ་སྟེ། །ལས་དབང་དེ་ཡིས་འགྲུབ་པར་བྱེད། །བདག་སྐྲ་དག་ནི་བལ་ནས་སུ། །ཉི་ཤུ་རྩ་ལྔར་བསྲེག་པ་ན། །ནུབ་གསུམ་གྱིས་ནི་ནད་རྣམས་ཆད། །སྐྲ་དང་སེན་མོ་བྱིན་པའི་སྤུ། །བདག་གི་ཁྲག་དང་བསྲེས་ནས་སུ། །ཉི་ཤུ་རྩ་ལྔར་བསྲེག་པས་ན། །སྦྱིན་བསྲེག་མཐའ་རུ་དགྲ་མེད་དོ། །བདག་གི་ཁྲག་གིས་སྙིང་ག་རུ། །དགྲ་ཡི་མིང་རུས་བྲིས་ནས་སུ། །གོས་གཤེར་བ་རུ་བགོས་པ་སྟེ། །ཁ་ཤར་དུ་བལྟས་ཏེ་གོམ་སྟབས་ཀྱི་བར་དུ་ཁྲོ་ཞིང་འཛབ་བཟླས་ན་དགྲ་བོ་མོད་ལ་མེད་དོ། །ཁྲག་གིས་སྔགས་པའི་གོས་ཀྱི་དུམ་བུ་གཅིག་གཟུགས་དེ་ལ་དགབ་ལ་བདག་གི་ཁྲག་དང་། །ཉུང་དཀར་བསྲེས་ལ། ལན་ཉི་ཤུ་རྩ་ལྔར་བསྲེག་ན་དགྲ་མེད་དོ། །བ་ལ་ཤའི་གང་གི་གཟུགས་བྱས་ཏེ། བྱ་རོག་རུས་པའི་ཕུར་པ་ལ་བདག་གི་ཁྲག་གིས་བསྐུས་ཏེ། གཟུགས་དེ་ལ་གདབ་ལ་བསྲེག་པའི་དབུས་འོག་ཏུ་སྦས་ཏེ། ཞག་ལྔ་ཚུན་ཆད་ཀྱིས་གནས་རྗེའོ། །བའི་མཁྲིས་པ་ལ་ལན་ཉི་ཤུ་རྩ་ལྔ་བསྲེག་ན། ཚ་བའི་ནད་ཀྱིས་འཆིའོ། །སྟག་ཚིལ་ལན་ཉི་ཤུ་རྩ་ལྔ་བསྲེག་སྟེ་སྒོར་བསྐུས་ན། ནད་ཆེན་པོ་འཇུག་གོ། །བྱ་རོག་སྒྲོལ་བསེའི་འབྲས་བུ་བསྲེགས་པས་འགྲོ་བ་སྟོང་ཀ་འཆིའོ། །ཞོ་དང་སྦྲང་རྩིས་ཞི་བར་བྱེད། དུར་བས་ཚེ་རིང་མར་གྱིས་རྒྱས་པར་འགྱུར། ཉུང་
དཀར་གྱིས་ཟློག་པར་བྱེད། སྦྲང་རྩིས་འཕེལ་བར་འགྱུར།བརྩོན་པས་གཞན་གྱི་ལས་འཇིག ཀུན་ཀྱང་བསྲེག་པའི་ལས་རྣམས་ཏེ། །ཉི་ཤུ་རྩ་བཞི་གྲངས་སུའོ། །ཨ་ག་ཏི་དི་བ་མ་མ་དཏྟ་ཡནྟི་སྭཱ་ཧཱ། ཨ་ར་ན་ཏིའི་འདབ་མ་ཁྲག་དང་སྦྲུས་ཏེ། ལན་ཉི་ཤུ་རྩ་ལྔ་བསྲེག་ན། སྙིང་ནད་ཀྱིས་འཆི། མ་ད་ནའི་དུག་གི་ཚེར་མ་ཉི་ཤུ་རྩ་ལྔར་བསྲེག་ན། སྙིང་ནད་ཀྱིས་འཆི། བསེ་འབྲུ་ཉུང་བ་མར་བསྲེས་ཏེ། ཉི་ཤུ་རྩ་ལྔར་བསྲེགས་ན་མི་འགུལ་བར་ནི་འཆི་བར་བྱེད། སུརྱ་སུརྱ་ཕུ་ནར་ག་མ་ན་ཡ་སྭཱ་ཧཱ། གསང་གི་བར་བར་བེ་རེ་མི་རེ་མི་བུ་མི་བ་རང་བནྡྷ་མི། ཨི་དེ་མ་ཧཱ་མ་ཚ་ཚ་རྦ་ཁུ་མ་ར་ཙ་དྷ་ན། མ་ཨཱ་ཡུ་མ་ན་ནྱ་དུ་སྭཱ་ཧཱ། ད་ན་མ་ཏ་ཀརྐ་མ་ཧཱ་བི་ཛ་ཡ་སྭཱ་ཧཱ། སྐེ་ཚེ་དང་ཁྲག་དུག་བསྲེས་ཏེ།སྔགས་ལན་བརྒྱ་རྩ་བརྒྱད་བཟླས་ཏེ། བསྲེགས་ན་འཆི། ཚ་དང་སྐེ་ཚེ་ཁྲག་དང་དུག་བསྲེག་ན། དགྲ་ཡང་སྐད་ངན་འདོན་ནོ། །ཨོཾ་ཀ་ཏ་ཀ་ཏ་ཡཱ། བི་ག་ཏ་ཡཱ། འགྲོ་ཀུན་ཏུ་བབ་ཡཱ། ཤིམ་བུ་པཱུ་ཤ་ཡ་སྭཱ་ཧཱ། སྦལ་པའི་པགས་པ་ལན་ཉི་ཤུ་རྩ་ལྔ་བསྲེག་ན། ལྟོ་བ་སྦལ་པས་འགག་གོ། ཀླུ་ནད་ཀྱིས་འཆི། བི་ཏི་ཏིའི་འབྲས་བུ་དང་། བདག་གི་ཁྲག་ཏུ་བསྲེས་ཏེ་བསྲེག་ན། ཨུ་བ་ཏུམ་པས་འཛིན་ཏོ། །སྦུར་མ་ཚ་དང་རྨྱུག་ཚལ་དང་། རྡོ་དང་འཁར་བ་ལ་སོགས་ལ། བསྲེགས་པས་ལྟོ་བ་དེས་འགེངས་སོ། །འོན་ཏེ་ཁྱི་དང་བྱི་ལའི་དྲི་ཆེན་ལ་སྦྲུལ་གྱི་གཟུགས་བྱས་ཏེ། དེའི་ཁར་བཅུག་ན་སྙིང་འཕར་གདེངས་ཏེ་འཆིའོ། །ཚུར་འཛུལ་བའི་གསེབ་དག་ཏུ། དྲི་ཆུ་སོང་བའི་ས་བླངས་ཏེ། གསོབ་ཏུ་བླུགས་ནས་ཚོན་སྐུད་ལ་བསྔགས་ཏེ་བསྡམས་ན་འགགས་ཏེ་འཆི། ཨོཾ་དུ་ཏ་ར་ཏ་མུ་ཟུར་ཧཱུཾ། གསོ་ན་འགྲོ་བ་འདིས་ཆོག་གོ། །ཨཱོཾ་བཛྲ་ཀྲོ་དྷ་མཾ་འགྲིང་སྙིང་ཛ་ར་ཛ་ར། བུ་རུ་བུ་རུ། ཤེལ་ད་མི་ཧཱུཾ་ཕཊ་སྭཱ་ཧཱ། གཉིས་ཀ་ལན་བཅུ་དགུར་བཟླས་པ་ཡིན་ན། རྡོ་རྗེ་སེམས་དཔར་སྦར་བ་ན། །ས་ངན་ཀུན་གྱི་སོར་གདུབ་ཀྱིས། །གཡོན་པའི་སྲིན་ལག་དཀྲིས་ནས་ནི། །ཕྱག་རྒྱ་བསྡམས་ནས་སྔགས་བཟླས་སོ། །
བཛྲ་འགུག་དྷྲིག་ཨཱོཾ་ན་དབི་མ་ཤ་ཀྲ་གུ་བཻ་ར་ནན། ཉི་ཤུ་རྩ་གཅིག་བཟླས་ནས་ནི། །ཕྱག་རྒྱ་བསྡམས་ནས་འཕངས་པས་ན། །ལག་པ་བྱ་བ་ནི། ཨོཾ་བཛྲ་ཡག་མུཀྵ་དེ་ཤད་དེ། ཐེའུ་རང་ཧ་ཏེ་ཡ་སྭཱ་ཧཱ། ཉི་ཤུ་རྩ་གཅིག་བཟླས་ནས་སུ། །ཕྱག་རྒྱ་དགྲོལ་ལ་ལག་པ་བཟེད། །རྡོ་རྗེ་ལག་ཏུ་འོང་བ་ཡིན། །ཞེས་གསུངས་པ་དང་། འཁོར་གྱི་རྣལ་འབྱོར་པས་ཨ་ལ་ལའི་སྒྲ་བྱུང་ངོ་། །བསམ་རྫོགས་བདེ་བའི་ལེའུ་སྟེ་ཉེར་དྲུག་པའོ།། །།གཡུང་དྲུང་ལྷ་ཡིས་ཡང་གསོལ་པ། །བསྟན་པ་གཉན་པོ་འཇིག་བྱེད་ཅིང་། །ལུ་གུ་རྒྱུད་ལ་འགལ་བྱེད་དང་། །རྟག་ཏུ་གདུག་སེམས་གྱུར་པ་ལ། །སེམས་ལུས་སོ་སོར་དབྲལ་བའི་ཕྱིར། །ལྷ་དང་དབྱེ་བ་ཇི་ལྟར་ལགས། །རྫོགས་སངས་རྒྱས་ལ་བདག་ཉན་འཚལ། །རྫོགས་སངས་རྒྱས་ཀྱིས་བཀའ་སྩོལ་ཅིག །དེ་སྐད་གསོལ་པ་གསན་ནས་ཀྱང་། །རྫོགས་སངས་རྒྱས་ཀྱིས་བཀའ་སྩལ་པ། །བསྟན་པ་གཉན་པོ་འཇིག་བྱེད་དང་། །ལུ་གུ་རྒྱུད་ལས་འགལ་བྱེད་དང་། །རྟག་ཏུ་གདུག་སེམས་གྱུར་པ་རྣམས། །སེམས་ལུས་སོ་སོར་དབྲལ་བའི་ཕྱིར། །དབྱེ་བའི་ལས་རྣམས་ངས་བསྟན་གྱི། །ཉོན་ཅིག་གཡུང་དྲུང་ཡང་དག་པ། །ངས་བསྟན་པ་ལ་ཐེ་ཚོམ་མེད། །དགྲ་བོ་ལྷ་དང་དབྲལ་བའི་ཕྱིར། །བྱ་རོག་འུག་པའི་དང་རུ་ལ། །ཨ་དང་ནྲྀ་ཡི་མིང་བྲིས་ལ། །སྨྲེ་བ་རྐང་གི་དྲེག་པས་བླན། །ཤོག་ཤོག་ཚོན་རེ་གྲུ་བཞི་ལ། །ལྷ་དང་མི་ཡི་མིང་བྲིས་ལ། །ཚོན་སྐུད་སྣ་ལྔས་བྱད་དུ་གཞུག །རྐང་དུ་རྫ་ལུང་བཅུག་ནས་ནི། །འགི་ཏིའི་ཕྱིན་ཕྱོགས་དག་ཏུ་བསྟན། །དུ་ར་ནག་པོ་རྟ་རྐང་བསྡམས། །མན་དྷ་ལ་ཡི་དར་གྱིས་དཀྲིས། །ཨ་ནྲྀ་ཏཱི་བ་ཏིའི་ཐག་པས་བཅིངས། །ད་ར་པ་ཏའི་རྒྱུས་པས་གདགས། །སྤ་མ་དག་གི་དུད་པས་བདུག །བྲིག་ཤའི་ཤིང་ལ་བརྟགས་ནས་ཀྱང་། །ཐང་ལ་ཕྱར་ཏེ་སྡང་མིག་བལྟ། །ཨ་ཏིའི་རྦ་ཡི་ལྕགས་ཀྱིས་གདབ། །རྦ་ན་ཏ་ཡི་དུད་པས་བདུག །ཙ་ར་ཏ་ཡི་མདའ་ཡིས་བརྡེག །ཀུ་པ་ར་ཡི་མགུལ་དུ་གདགས། །མ་ལ་ཏ་ཡི་
སྒྲོམ་ནས་བྱུང་། །ལྕེ་འབར་མ་ཡི་སྙིང་པོ་བཟླས། །རྣ་ཉན་ཕྲ་མའི་གཟུགས་བྲིས་ལ། །ལྷ་དང་མི་ཡི་བར་དུ་གཞུག །མཱ་ར་ཡ་ཡི་སྔགས་ཀྱིས་དབྱེ། །མཚོན་ཆའི་ཕྱག་རྒྱ་བཅིངས་ནས་ནི། །གཟུགས་ཀྱི་བར་དུ་བརྡེག་པར་བྱ། །རཀྴ་རུ་ཏའི་སྔགས་ཀྱི་གདབ། །ལྕགས་ཀྱུའི་ཕྱག་རྒྱ་གཉིས་བཅིངས་ལ། །ཨངྐུ་ཤ་ཡི་སྔགས་ཀྱིས་དྲངས། །ཞགས་པའི་ཕྱག་རྒྱ་གཉིས་བཅིངས་ལ། །པཱ་ཤ་ཧཱུཾ་གི་སྔགས་ཀྱིས་བཅིངས། །ལྕགས་སྒྲོག་ཕྱག་རྒྱ་གཉིས་བཅིངས་ལ། །སྥོ་ཊ་བཾ་གྱི་སྔགས་ཀྱིས་བསྡམ། །དྲིལ་བུའི་ཕྱག་རྒྱ་གཉིས་བཅིངས་ལ། །གྷནྜེ་ཧོ་ཡི་སྔགས་ཀྱིས་སྦར། །བདག་ཉིད་ཆེན་མོའི་སྐུར་བསྒོམས་ཏེ། །ཕོ་ཉ་དྲུག་རྣམས་གཏན་ལ་དབབ། །གོང་མའི་ལས་རྣམས་སྦྱར་ཏེ་བྱ། །དེས་ནི་མཚན་མ་འབྱུང་བར་འགྱུར། །དེས་ཀྱང་མཚན་མ་མ་བྱུང་ན། །ད་ར་པ་ཏིའི་སོག་པ་ལ། །མ་ལ་ད་ཡི་ཁྲག་གིས་བྲིས། །ཏ་ན་ག་ནའི་དོང་དུ་གཞུག །ཆེ་མཆོག་ཡབ་ཡུམ་བསྒོམས་ནས་ནི། །སྨན་མོའི་སྔགས་དང་ཕྱག་རྒྱ་གདབ། །བསྐུལ་བའི་ཕྲིན་ལས་གཞུང་བཞིན་བྱ། །མ་མོའི་ཉེ་འབྱེད་ཀྱི་ལེའུ་སྟེ་ཉེར་བདུན་པའོ།། །།གཡུང་དྲུང་ལྷ་ཡིས་ཡང་གསོལ་པ། །དམ་ལས་འདས་པའི་སྔགས་གཟེར་དང་། །མཚན་མ་ངན་པའི་རྫུ་འཕྲུལ་དང་། །བདག་ལ་སྔགས་བཟློག་བྱུང་བ་རྣམས། །བཟློག་པའི་ཆོ་ག་ཇི་ལྟར་ལགས། །མངོན་སངས་རྒྱས་ལ་བདག་ཉན་འཚལ། །མངོན་སངས་རྒྱས་ཀྱིས་བཀའ་སྩོལ་ཅིག །དེ་སྐད་གསོལ་པ་གསན་ནས་ཀྱང་། །མངོན་སངས་རྒྱས་ཀྱིས་བཀའ་སྩལ་པ། །དམ་ལས་འདས་པའི་སྔགས་གཟེར་དང་། །མཚན་མ་ངན་པའི་རྫུ་འཕྲུལ་དང་། །བདག་ལ་སྔགས་བཟློག་བྱུང་བ་རྣམས། །བཟློག་པའི་ཆོ་ག་ངས་བསྟན་གྱི། །ཉོན་ཅིག་གཡུང་དྲུང་ཡང་དག་པ། །ངས་བསྟན་པ་ལ་ཐེ་ཚོམ་མེད། །བཟློག་པའི་ཆོ་ག་འདི་ལྟར་བྱ། །འཁར་བ་ལས་བྱས་པའི་པར་བུའི་ནང་དུ། ཡི་གེ་བྷྱོ་ཉི་ཤུ་རྩ་གཅིག་བྲིས་ལ། དེའི་ནང་དུ་དགྲ་བོའི་མིང་
བྱང་གཞུག །བྷནྡྷ་དུམ་བུ་བརྒྱད་པ་གཅིག་གི་ནང་དུ། དགྲ་བོའི་མིང་དང་བྷྱོ་ཉི་ཤུ་རྩ་བརྒྱད་བྲིས་ལ། གང་ཡིན་པའི་མིང་རུས་གཞུག །དེ་ནས་པར་བུ་དང་བྷནྡྷ་གཉིས་ལ་སྔགས་འདི་བཏབ་ལ། མིང་བྱང་ལ་གདབ་བོ། །བཟློག་པའི་ངན་སྔགས་འདིའོ། །ཨོཾ་བ་ར་བི་ར་ན་ང་ས་ནི་རི་ག ཤ་དུ་ལ་ཧཱུཾ་བྷྱོ་ཧཱུཾ། ཞེས་བརྗོད་དོ། །དེ་ནས་ཡང་པར་བུའི་ནང་དུ་དྲི་ཆེན་བཅུག་ནས་དྲི་ཆུས་གཏོར་ལ། སྔགས་འདི་སྟོང་དུ་བཟླས་ནས། ངན་སྔགས་དང་མཚན་མ་ངན་པའི་རྫུ་འཕྲུལ་དང་། བདག་ལ་སྔགས་བཟློག་བྱུང་བ་རྣམས་བཟློག་པར་འགྱུར་རོ། །ལྟས་ངན་པ་ཐམས་ཅད་བཟློག་པར་འགྱུར་རོ། །རྨི་ལམ་ངན་པ་ཡང་དེ་ལྟར་བྱས་ན་བཟློག་པར་འགྱུར་རོ། །ངན་སྔགས་བྷནྡྷ་པར་བུས་བཟློག་པའི་ལེའུ་སྟེ་ཉེར་བརྒྱད་པའོ།། །།གནོད་འདུལ་ལྷ་ཡིས་ཡང་གསོལ་པ། །བསྟན་པ་གཉན་པོ་འཇིག་བྱེད་ཅིང་། །ལུ་གུ་རྒྱུད་ལས་འགལ་བྱེད་པ། །སེམས་ཅན་ཀུན་ལ་གནོད་བྱེད་ཅིང་། །བདག་ལ་སྡང་སེམས་བྱེད་པ་ཡི། །རྟག་ཏུ་གདུག་སེམས་གྱུར་པ་ལ། །ངན་སྔགས་པར་བུར་བསད་པ་ཇི་ལྟར་ལགས། །མངོན་རྫོགས་ཡབ་ཀྱིས་བཀའ་སྩོལ་ཅིག །དེ་སྐད་ཞུས་པ་གསན་ནས་ཀྱང་། །མངོན་རྫོགས་ཡབ་ཀྱིས་བཀའ་སྩལ་པ། །བསྟན་པ་གཉན་པོ་འཇིག་བྱེད་ཅིང་། །ལུ་གུ་རྒྱུད་ལས་འགལ་བྱེད་དང་། །སེམས་ཅན་ཀུན་ལ་གནོད་བྱེད་པ། །ངན་སྔགས་པར་བུར་བསད་པ་འདི་བཤད་ཀྱི། །ཉོན་ཅིག་གནོད་འདུལ་ལྷ་ཡི་གཙོ། །ངས་བསྟན་པ་ལ་ཐེ་ཚོམ་མེད། །ངན་སྔགས་པར་བུར་བསད་པ་འདི་ལྟར་བྱ། །མངའ་གསོལ་བྱས་པའི་པར་བུ་རུ། །དགྲ་བོའི་མིང་རུས་བྲིས་ཏེ་གཞུག །མ་བདུན་སྔགས་ནི་སྟོང་བཟླས་ལ། །མིང་བྱང་དེ་ལ་གདབ་པར་བྱ། །དེ་ནས་ཐལ་ཆེན་ཉུང་དཀར་བསྲེག་པ་ཡིས། །ལན་ཁྲིར་བཟླས་ནས་པར་བུར་གདབ། །གང་ལ་བྱ་བ་དེ་དམིགས་ལ། །གསལ་བར་བསྒོམ་སྟེ་ཕྱག་བཙལ་ནས། །བསྒྱུར་ན་དགྲ་བོ་ཕུང་བར་འགྱུར། །དེ་ཡི་མོད་ལ་རྟགས་འོང་ངོ་། །ཐུགས་ལ་བརྣག་པའི་
ངན་སྔགས་ལ། །ཨཱོཾ་ཏ་ར་ཏུ་ར། བུ་ས་བེ་ཏེ་བ་ན་མུད་ལ་བཛྲ། བ་ཡ་བྷྱོ་བྷྱོ་བྷྱོ། མ་མ་ཙིཏྟ་ཁར་རག་མ་ར་ན། མ་ར་ན་བྷྱོ་བྷྱོ། དེ་ལྟར་བྱས་ན་རྟགས་མོད་ལ་འོང་ངོ་། །ངན་སྔགས་པར་བུར་བསད་པའི་ལེའུ་སྟེ་ཉེར་དགུ་པའོ།། །།གཡུང་དྲུང་ལྷ་ཡིས་ཡང་གསོལ་པ། །བསྟན་པ་གཉན་པོ་འཇིག་བྱེད་ཅིང་། །ལུ་གུ་རྒྱུད་ལས་འགལ་བྱེད་དང་། །སེམས་ཅན་ཀུན་ལ་གནོད་བྱེད་དང་། །བདག་ལ་ངན་སེམས་བྱེད་པ་ལ། །པར་བུར་མནན་པའི་ལས་རྣམས་ནི། །ཉག་གཅིག་ཡབ་ལ་བདག་ཉན་འཚལ། །རྟག་ཆེན་ཡབ་ཀྱིས་བཀའ་སྩོལ་ཅིག །དེ་སྐད་གསོལ་པ་གསན་ནས་ཀྱང་། །རྟག་ཆེན་ཡབ་ཀྱིས་བཀའ་སྩལ་པ། །བསྟན་པ་གཉན་པོ་འཇིག་བྱེད་ཅིང་། །ལུ་གུ་རྒྱུད་ལས་འགལ་བྱེད་དང་། །སེམས་ཅན་ཀུན་ལ་གནོད་བྱེད་དང་། །བདག་ལ་ངན་སེམས་བྱེད་པ་དག །པར་བུར་མནན་པ་ངེས་བསྟན་གྱི། །ཉོན་ཅིག་གཡུང་དྲུང་ལྷ་ཡི་གཙོ། །ངེས་བསྟན་པ་ལ་གདོན་མི་ཟ། །པར་བུ་མནན་པའི་ལས་ནི་འདི་ལྟར་བྱ། །ཁམ་ས་ལ་སོགས་སྦྱིན་པོ་ལ། །སླུ་གུའི་ཚུལ་དུ་བྱས་པ་ལ། །ནང་དུ་ཐལ་ཆེན་བླུགས་ནས་སུ། །དེ་ཡི་ནང་དུ་དགྲ་གཟུགས་གཞུག །དེ་ཡི་རུས་ལོ་དང་སྲིད་པའི་འབྲས་བུ་དང་། ཡ་ཆ་མ་ཆ་བར་དུ་དང་། དེ་རྣམས་བསྲེས་ལ་ཏིལ་ནག་པོ་དང་། སྐྱེ་ཚེ་དང་།བེ་རྒྱུ་དང་དེ་རྣམས་བླུགས་ནས་མི་ཁྲག་གིས་སྦྲུས་ལ། གཟུགས་བྱས་ལ། མིང་རུས་དང་། རུས་ཀྱི་ལྷ་དང་བཅས་ཏེ། ས་ཁྲུ་གང་བྲུས་ལ་དེའི་ནང་དུ་བཅུག་ལ་ཁ་སྦུབ་སྟེ་ཁ་རྩི་སྐྱས་དྲེས་ན་ལྐུགས་ཤིང་ཁ་སྦུབ་སྟེ་འཆིའོ། །རྟོགས་པའི་དབང་དུ་མཛད་ན་ནི་ཕྱག་རྒྱའོ། །མནན་པའི་སྔགས་ལ། ཨཱོཾ་དྲིལ་བུ་དེ་ཡག་མོ་ཁུ་གསོལ། དལ་བྷྲུཾ་བྷྲུཾ། མ་ར་ཎ་པྲ་ཝེ་ཤ་ཕཊ་ནན། པར་བུ་མནན་པའི་ལེའུ་སྟེ་སུམ་ཅུ་པའོ།། །།གཡུང་དྲུང་ལྷ་ཡིས་ཡང་གསོལ་པ། །བསྟན་པ་གཉན་པོ་འཇིག་བྱེད་ཅིང་། །ལུ་གུ་རྒྱུད་ལས་འགལ་བྱེད་དང་། །སེམས་
ཅན་ཀུན་ལ་གནོད་བྱེད་དང་། །བདག་ལ་ངན་སེམས་བྱེད་པ་ལ། །སྲོག་རྩ་སྐམ་ན་ཇི་ལྟར་སྐམ། །སྙིང་རྩ་དྲང་ན་ཇི་ལྟར་དྲང་། །རྫོགས་སངས་རྒྱས་ལ་བདག་ཉན་འཚལ། །རྫོགས་སངས་རྒྱས་ཀྱིས་བཀའ་སྩོལ་ཅིག །དེ་སྐད་ཞུས་པ་གསན་ནས་ཀྱང་། །རྫོགས་སངས་རྒྱས་ཀྱིས་བཀའ་སྩལ་པ། །བསྟན་པ་གཉན་པོ་འཇིག་བྱེད་དང་། །ལུ་གུ་རྒྱུད་ལས་འགལ་བྱེད་དང་། །སེམས་ཅན་ཀུན་ལ་གནོད་བྱེད་དང་། །བདག་ལ་སྡང་སེམས་བྱེད་པ་ལ། །སྲོག་རྩ་སྐམ་དང་སྙིང་རྩ་དྲང་། །དེ་ལྟར་གཉིས་ཀྱི་དོན་དེ་ཡང་། །ངས་བསྟན་པ་ལ་གདོན་མི་ཟ། །ཉོན་ཅིག་གཡུང་དྲུང་ཡང་དག་པ། །སྲོག་རྩ་སྐམ་ན་འདི་ལྟར་སྐམ། །སྙིང་རྩ་དྲང་ན་འདི་ལྟར་དྲང་། །ཞིང་ཆེན་དྲས་ལ་གཟུགས་བྲིས་པའི། །སྙིང་གར་མནན་པའི་སྔགས་བྲིས་ལ། །ཟངས་ཀྱི་སྦུ་གུའི་ནང་དུ་གཞུག །དེ་ནས་མ་མོ་སྲོག་ལ་རྦད་པ་འདི་སྐད་དོ། །ཧཱུཾ་ཁམས་གསུམ་རྒྱལ་མོ་དབང་གི་སྲིད་ཀྱི་གཞི། །གསང་བ་གསུམ་ལ་དབང་སྒྱུར་རྒྱས་འདེབས་མ། །གསང་བའི་ཐིག་བཞིས་གནས་བཞི་འཇོམས་མཛད་པ། །དཀར་མོ་སྔོན་མོ་དམར་མོ་སེར་མོ་བཞི། །ཙིཏྟ་སྨུག་ཆེན་གནས་འདྲེན་པ། །མ་མོ་ཆེན་མོ་འདྲེན་མ་བཞི། །དཀར་མོ་རྐུན་མོའི་ཚོགས་ནི་གནས་ནས་རྒྱུ། །རྔམས་བག་ཡུད་ཙམ་སྣ་ལ་རོལ་མཛད་མ། །ཁྱོད་ཀྱི་ཕྲིན་ལས་སྐལ་བའི་ངོ་ལོང་ཞིག །ཤ་རུ་གཏད་པའི་གནས་སྐལ་མ་རུ་ལོང་། ཧཱུཾ་ཏྲག་ཤ་ཀྲམ། ཧཱུཾ་སྔོན་མོ་རྨོངས་མོས་འདྲེན་བྱེད་ཙིཏྟ་དྲོངས། །སྙིང་དང་ཁྲག་བསྲེས་ཞིམ་དགུའི་ཟས་ལ་རོལ། །གཏད་ཤ་རུས་ནི་གནས་གཞི་ཟས་ལ་གཏད། །ཁ་རཾ་ཏྲག་ཤ་ཏྲམ། ཧཱུཾ་དམར་མོ་སྤོས་མོས་ཙིཏྟ་སྨུག་ཆེན་དྲོངས། །རྩ་བཞི་དྲོད་བཞི་གནས་བཞི་དབྱིངས་སུ་སྤོར། །གཏད་པར་གནས་བཞི་དངོས་ལ་ཁྲག་ཆེན་ཐོབ། །གསོད་མཛད་སྦྱོར་མཛད་ཐུགས་རྗེ་དབྱིངས་སུ་སྡུད། །མ་གཏད་མ་གཡེལ་མྱུར་དུ་ཞིག །ཏི་ཏ་ཀྲམ་མ་ཧཱ་ལ་བྷྱོ། མ་ཧཱ་རཀྟ་ལ་གྲམ་ཧྲི་ནི་ལ་འགྲམ། ཧཱུཾ་སེར་མོ་བྱང་ཆུབ་ཚེ་འདྲེན་མས་ནི་མཐིང་ག་ཧཱུཾ་གི་ཀློང་ནས་དྲོངས། །དཀར་མོ་དབྱིངས་ཀྱི་
ཐིག་ལེ་མས་ནི་སྤོར། །རྩ་བཞི་དྲོད་ཀྱི་གནས་ནས་སྒྱུར། །ཁྲག་ཆེན་འཁྱིལ་པའི་གནས་ནས་སྒྲོལ། །གསང་བའི་མ་བཞིའི་ཕྲིན་ལས་ནི། །བསད་པའི་དྲག་བགེགས་ད་ལྟ་དྲོངས། །ཁུག་ཅིག་རྒྱོབ་ཅིག་འབར་མ་བཞི། །དྲོངས་ཤིག་སྟོབ་ཅིག་མཚན་ཆེན་སྟོབ། །གསང་བའི་དབྱིངས་ནས་ད་ལྟ་དྲིལ། །མ་ཧཱ་རཀྟ་ལ་གྲམ། མ་ཧཱ་ཙིཏྟ་ལ་བྷྱོ། མ་ཧཱ་མཱཾ་ས་ལ་ཡཱ། མ་ཧཱ་ཤ་ལ་ཡ་གྲམ། དེ་ལྟར་གསང་བའི་མ་བཞི་ལ་དྲིལ་ལོ། །དེ་ནས་འབར་མ་དགུ་རྦད་པ་འདི་སྐད་དོ། །ཧཱུཾ་ནང་གི་འབར་བ་ཁྲག་འཐུང་ལྔ། །རྩ་བཞིའི་དྲོད་ལ་དབང་སྒྱུར་མ། །ཚེ་གསུམ་འབར་མ་ད་ཚུར་བྱོན། །ཁྲག་ཆེན་ཀློང་ནས་ལྗགས་འདྲིལ་མ། །ཡུམ་བཞི་འགས་མ་ད་ཚུར་བྱོན། །རྣམ་ཤེས་འདྲེན་པའི་གད་རྒྱངས་ཅན། །སྙིང་འདྲེན་མ་མོ་ད་ཚུར་བྱོན། །ཀུན་གཞི་སྡུད་པའི་ཚུལ་མཁན་མོ། །མྱོས་བྱེད་མ་མོ་ད་ཚུར་བྱོན། །མ་བཞི་ཀློང་ནས་ཁྲག་ཆེན་འདོར། །གསལ་འཛིན་འབར་མ་ཀློང་དགུ་མོ། །ཡུམ་ཆེན་འབར་མ་ད་ཚུར་བྱོན། །ཀློང་ན་གནས་པའི་འབར་མ་ལྔ། །གནོད་པའི་དགྲ་བགེགས་ཀློང་ནས་དྲོངས། །ཁྲག་འཐུང་ཆེན་མོ་བྱོལ་མཁན་མ། །ཀློང་ན་གནས་པའི་འབར་མ་ལྔ། །ཀློང་ནས་ནི་ཀློང་དུ་རྒྱོབ། གནས་ནས་ནི་གནས་སུ་སྤོར། མ་ཧཱ་ཙི་ཏྟ་སྥ་ར་ཎ་ཕཊ། མ་ཧཱ་རཀྟ་ལ་བྷྱོ། མ་ཧཱ་མཱཾ་ས་ལ་བྷྱོ། མ་ཧཱ་ཏྲག་རཀྴ་ཙིཏྟ་ཁཱ་ཧི། འདི་ལྔ་ནི་སྦས་པའི་མ་བཞི་དང་། ཡང་སྦས་ཀྱི་མ་མོ་གཅིག་སྟེ་ལྔའོ། །དེ་ལྔ་ནི་ཡེ་ཤེས་ཀྱི་འཕྲོ་འདུ་མ་ལྔའོ། །དེ་ནས་ཕྱིའི་མ་མོ་བཞི་བསྐུལ་བ་འདི་སྐད་དོ། །ཧཱུཾ་ཕྱི་རིམ་མ་མོ་འབར་མ་བཞི། །རྩ་བཞིའི་ཀློང་ནས་རྒྱ་གྲམ་འཕྱོ། །དཀར་མོ་འབེབས་མཁན་ཚེ་འཕྲོག་མ། །སྔོན་མོ་འབེབས་མཁན་སྲོག་འཕྲོག་པ། །དམར་མོ་འབེབས་མཁན་དབང་ཕྲོག་མ། །སེར་མོ་འབེབས་མཁན་གཟི་འཕྲོག་མ། །ཕྱི་རིམ་འདྲེན་པའི་འབར་མ་བཞི། །འཁྲུག་བྱེད་མ་མོའི་ལས་ལ་བབ། །གཡུལ་བཞི་མ་ཡི་དུས་ལ་བབ། །འཇིགས་བྱེད་མ་མོ་འབར་མ་བཞི། །ཀློང་
ནས་དྲིལ་སྟེ་དང་སྤྲོད་མཛོད། །གཞན་ལས་འཇོམས་བྱེད་གཡུལ་བཤམ་མོ། །རྦོད་གཏོང་མ་མོ་འབར་མ་དགུ། །ཤ་རུ་གནོད་བྱེད་དྲོངས་ལ་ཤོག །གཏད་པའི་གནས་སུ་འཕྲུལ་ཆེན་འགྱིང་། །སྙིང་འདྲེན་མ་མོའི་དུས་ལ་བབ། །པ་མ་ཏྲ་ཀ་ཤ་གྲམ། ཤ་ཏི་ང་ལ་གྲམ། སྨ་ར་རཀྟ་ལ་བྷྱོ། མ་ཧཱ་མཱཾ་ས་ལ་བྷྱོ། མ་ཧཱ་རཀྟ་ལ་བྷྱོ། མ་ཧཱ་ཤ་ཏི་བྷྱོ། དེ་མ་དེ་ས་མཾ། མ་ཧཱ་ཧཱ་ན་ཏེ་ཧཱུཾ། ད་ར་ད་ནི་ཧཱུཾ། ཞེས་བརྗོད་དོ། །རྟག་ཏུ་བཟླས་སོ། །ཡང་ན་རྟག་ཏུ་བཟླས་པའི་སྙིང་པོ་ནི། །ཧཱུཾ་ཏྲ་ཀ་ར་ཀ་ཤ་གྲམ། ཁ་ཏྲག་རཀྴ་ཀྲཾ། ཙིཏྟ་གྲམ། མ་ཧཱ་ལ་བྷྱོ། མ་ཧཱ་རཀྟ་ལ་གྲམ། མ་ཧཱ་མཱཾ་ས་ལ་གྲམ། དྷི་ནི་ལ་གྲམ། འདི་གསང་བའི་མ་བཞི་བརྣག་པའི་སྔགས་ཏེ། དུས་དང་རྣམ་པ་མེད་པར་བཟླས་ན། དགྲའི་སྙིང་ཡང་མངོན་དུ་ཕྱུང་ནས་སྟོན་ཏོ། །སྙིང་རྩ་དྲང་བ་དང་སྲོག་རྩ་སྐམ་པའི་ལེའུ་སྟེ་སོ་གཅིག་པའོ།། །།གནོད་འདུལ་ལྷ་ཡིས་ཡང་གསོལ་པ། །བསྟན་པ་གཉན་པོ་འཇིག་བྱེད་ཅིང་། །ལུ་གུ་རྒྱུད་ལས་འགལ་བྱེད་དང་། །སེམས་ཅན་ཀུན་ལ་གནོད་བྱེད་དང་། །བདག་ལ་སྡང་སེམས་བྱེད་པ་ལ། །སྲོག་རྩ་སྐམ་ན་ཇི་ལྟར་སྐམ། །ཡང་དག་རྫོགས་ལ་བདག་ཉན་འཚལ། །ཡང་དག་རྫོགས་ཀྱིས་བཀའ་སྩོལ་ཅིག །དེ་སྐད་ཞུས་པ་གསན་ནས་ཀྱང་། །ཡང་དག་རྫོགས་ཀྱིས་བཀའ་སྩལ་པ། །བསྟན་པ་གཉན་པོ་འཇིག་བྱེད་དང་། །ལུ་གུ་རྒྱུད་ལས་འགལ་བྱེད་དང་། །སེམས་ཅན་ཀུན་ལ་གནོད་བྱེད་དང་། །བདག་ལ་སྡང་སེམས་བྱེད་པ་རྣམས། །སྲོག་རྩ་སྐམ་པ་ངས་བསྟན་གྱི། །ཉོན་ཅིག་གནོད་འདུལ་ལྷ་ཡི་གཙོ། །ངས་བསྟན་པ་ལ་ཐེ་ཙོམ་མེད། །སྲོག་རྩ་སྐམ་ན་འདི་ལྟར་སྐམ། །དུར་ཁྲོད་ཞིང་རས་ལ་གཟུགས་བྱས་ལ། འཇག་མ་ལ་བྱས་པའི་གཟུགས་སྒྱེ་ནང་དུ། ཡང་ཀྱི་ནང་དུ་བཅུག་སྟེ། དེ་ནས་ཨ་ཕྱི་ཆེན་མོ་བསྒོམ་པ་ནི། མདོག་ནག་མོ་ལ་ཞིང་ཆེན་གྱི་སླག་པ་གསོལ་བ། ཞིང་ཆེན་གྱི་བྷནྡྷ་མང་པོས་མཐའ་མ་བསྐོར་བ། ཕྱག་གཡས་ཞིང་ཕྲེང་འདྲེན་པ། གཡོན་ན་མི་མགོའི་ཕོར་བུ་རུ། མིའི་སྙིང་དང་ཁྲག་དང་།
ཚིལ་གཏུབས་ནས་བསྐང་བར་བསྒོམ། དེ་ལྟར་གསལ་བ་དང་འདི་ལྟར་ཅེས་བསྐུལ་ལོ། །ཧཱུཾ་སྲིན་མོ་ཆེན་མོ་ཤམ་ཤམ་མོ། །ཨ་ཕྱི་ཆེན་མོ་མི་བཟད་མ། །སྐུ་མདོག་སྔོ་ནག་མཆེ་བ་ཅན། །བརྗིད་པའི་དབུ་ལ་སྤྱན་རེ་མང་། །གོས་སུ་ཞིང་ཆེན་སླག་པ་གསོལ། །ཐ་མ་མི་མགོ་སྟོང་གིས་བསྐོར། །གཡས་ན་ཞིང་གི་སོར་ཕྲེང་བགྲང་། །གཡོན་ན་མི་མགོའི་ཕོར་བུ་རུ། །མི་ཁྲག་སྙིང་ཚིལ་གཏུབས་ནས་སུ། །རང་གིས་རང་ལ་ཐིམ་པར་སྟོབ། །ཞལ་གདངས་མཆེ་བ་གཙིགས་པ་ཡིས། །མ་མོ་ཐམས་ཅད་འདར་ཞིང་འདུད། །གཡང་གཞི་རུ་མཚོན་ཕྱར་ནས་སུ། །བདུད་དང་མུ་སྟེགས་ཐལ་བར་རློག །འཇིག་རྟེན་ཐམས་ཅད་ཟློག་པར་བྱེད། །སྲིད་པ་གསུམ་ལ་ཕུད་ཉུལ་མ། །དེ་ནི་ཇོ་མོ་ཉིད་ལ་མཆོད། །བཅོལ་ན་ཀུན་ཀྱང་འགྲུབ་པར་བྱེད། །དགྲ་སྲོག་དམར་མོ་རྩད་ནས་ཆོད། །འདིར་བྱོན་དམ་སྐོང་ཕྲིན་ལས་མཛོད། །སྙིང་ཁྲག་མཆོད་པ་འདི་བཞེས་ལ། །དགྲ་བོའི་སྲོག་རྩ་དྲང་དུ་གསོལ། །དགྲ་པོའི་སྲོག་རྩ་སྐམ་དུ་གསོལ། །ཞེས་བསྐུལ་ཞིང་སྔགས་འདིས་གདབ་པོ། །ཨོཾ་ཟང་འགྲོ་མུ་རང་མ་ཤང་། ཟང་འབྲམ་མུ་རཾ་ཤ །ཧཱུཾ་རག་ཏྲག་རཀྴ་གྲམ། ཐུམ་རི་ལི་ལི་རྦད། ཅེས་བཟླས་ཤིང་ཞག་གསུམ་གྱི་བར་དུ་མིའི་ཚིག་གིས་བར་མཆོད་པར་བྱའོ། །དེ་ནས་གཟུགས་ཀྱི་ཁ་བྲག་ནས་སྔགས་གདབ་པོ། །ལས་འདིས་ནི་མི་འགྲུབ་མི་སྲིད་དོ། །ཐེ་ཚོམ་མ་བྱེད་ཅིག་པའོ། །དེ་ནས་གསང་བའི་མ་མོ་བསྐུལ་བ་འདི་སྐད་དོ། །ཧཱུཾ་ཐིག་ལེ་དབྱིངས་ལས་བསྐྱེད་པའི་ཁྲོ་རྒྱལ་ཡུམ། །དཔལ་ཆེན་ཐུགས་ལས་བསྐྱེད་པའི་ཁྲོ་མོའི་སྐུར་སྟོན་པ། །སྲིད་པ་རྩད་གཅོད་དབང་གི་སྐུ། །མཆེ་བ་གཙིགས་ནས་སྲོག་རྩ་འདྲེན། །སྐྱེ་ཤི་རྩ་བ་བཅད་ནས་བདེ་ཀློང་ཐུགས་ལ་སྡུད། །ཕྱག་ནས་སྤྲུལ་པ་གཏོང་ཞིང་དུག་གསུམ་དབྱིངས་སུ་སྡུད། །མ་ཚོགས་དབང་དུ་བསྡུས་ནས་བྷ་གའི་མངའ་མཛད་མ། །དགྲ་བོའི་སྲོག་རྩ་སྐམས་ཞིང་འདིར་གཤེགས་ཤིག །ཁྲག་ཏུ་སྲོག་གཏུབས་མཆོད་པ་འདི་བཞེས་ལ། །
དགྲ་བོའི་སྲོག་རྩ་སྐམ་དུ་གསོལ། ཧ་ཧཾ་ཧེ་བྷྱོ། རུ་ལུ་རུ་ལུ་ཧཱུཾ་ཧཱུཾ། རུ་ལུ་རུ་ལུ་བྷྱོ་བྷྱོ། མ་ཧཱ་ཙིཏྟ་ལ་བྷྱོ། མ་ཧཱ་མཱང་ས་ལ་བྷྱོ། མ་ཧཱ་རཀྟ་ལ་བྷྱོ། ཞེས་ཁྲག་ལ་གདབ་པོ། །ཁ་བྲག་ལ་ཡང་གདབ་པོ། །རྩ་རྣམས་སྐམ་པའི་ལེའུ་སྟེ་སོ་གཉིས་པའོ།། །།གནོད་འདུལ་ལྷ་ཡིས་ཡང་གསོལ་པ། །བསྟན་པ་གཉན་པོ་འཇིག་བྱེད་དང་། །ལུ་གུ་རྒྱུད་ལས་འགལ་བྱེད་དང་། །སེམས་ཅན་ཀུན་ལ་གནོད་བྱེད་དང་། །བདག་ལ་ངན་སེམས་བྱེད་པ་རྣམས། །རྩ་རྣམས་སྐམ་ན་ཇི་ལྟར་སྐམ། །རྩ་རྣམས་སྐམ་པ་ངས་བསྟན་གྱི། །ཉོན་ཅིག་གནོད་འདུལ་ལྷ་ཡི་གཙོ། །ངས་བསྟན་པ་ལ་གདོན་མི་ཟ། །རྩ་རྣམས་བསྐམ་ན་འདི་ལྟར་སྐམ། །དེ་ལ་སྐེ་ཚེ་དང་ཉུང་དཀར་དང་། ཏིལ་ནག་པོ་ཐལ་ཆེན་བསྲེས་པ་ལ། ལྕེ་པོག་གིས་སྦྲུས་ལ། དེ་ལ་གཟུགས་བྱས་ཏེ། ཤོག་ཤོག་ཚོན་གང་བ་བརྒྱད། གཅིག་ལ་མུ་ཏྲི་ནི་བྷྱོ་ཞེས་བྲིས་ལ་རྩེ་ཆུང་གཡས་ལ་སླན། གཅིག་ལ་ཨ་ཤནྟིང་ནི་བྷྱོ་ཞེས་བྲིས་ལ། རྩེ་ཆུང་གཡོན་པ་ལ་སླན། གཅིག་ལ་བྷ་ག་དུནྟྲི་བྷྱོ། ཞེས་བྲིས་ལ། ཨ་སོ་ལི་ཀ་གཡས་པར་སླན། གཅིག་ལ་ག་མུན་དན་ཏྲི་བྷྱོ་ཞེས་བྲིས་ལ། ཨ་སོ་ལི་ཀ་གཡོན་པ་ལ་སླན་ནོ། །གཅིག་ལ་བཛྲ་ཀེཾ་ཀེཾ་བྷྱོ། ཞེས་བྲིས་ལ་ལོང་རྩ་གཡས་པ་ལ་སླན་ནོ། །གཅིག་ལ་བཛྲ་ཏ་ཀེཾ་ཏ་ཀེཾ་བྷྱོ། ཞེས་བྲིས་ལ། ལོང་རྩ་གཡོན་པ་ལ་སླན་ནོ། །གཅིག་ལ་བཛྲ་ནི་ལ་བཛྲ་ནི་ལ་བྷྱོ། ཞེས་བྲིས་ལ་སྲོག་ཁུང་དུ་མནན་ནོ། །གཅིག་ལ་བཛྲ་ལན་དྷ་བཛྲ་ལན་དྷ་བྷྱོ་ཞེས་བྲིས་ལ་སྲོག་ཡང་འོག་ཏུ་སླན་ནོ། །དེ་ནས་སྙིང་དང་ཁྲག་དང་རྩ་དང་བསྲེས་པའི་མཆོད་པ་ཐོགས་ལ་འདི་སྐད་ཅེས་བསྐུལ་ལོ། །ཧཱུཾ་མ་མོ་ཆེན་མོ་མེ་འབར་མ། །བྷ་ག་འབུམ་ལ་མངའ་མཛད་མ། །དབྱིངས་ཕྱུག་ཆེན་མོ་གཤེགས་སུ་གསོལ། །སྡང་བའི་དགྲ་བོ་ལས་ངན་པོ། །རྩ་རྣམས་གནས་སུ་བསྐམ་པའི་ཕྱིར། །འདི་ཡི་རྩེ་ཆུང་གཡས་པ་དྲོངས། །སྙིང་ཁྲག་མཆོད་པ་འདི་བཞེས་ལ། །བཅོལ་བའི་ལས་རྣམས་འགྲུབ་པར་མཛོད། །མུ་ཏྲ་ནི་ས་མ་ཡ་བྷྱོ་བྷྱོ།
ཏྲག་རཀྴ་བྷྱོ་བྷྱོ། ཧཱུཾ་མ་མོ་ཆེན་མོ་མེ་འབར་མ། །འཇིག་རྟེན་ཡོངས་ཀྱི་རྒྱན་མཛད་མ། །རྒྱན་གྱི་རྒྱལ་མོ་གཤེགས་སུ་གསོལ། །སྡང་བའི་དགྲ་བོ་ལས་ངན་པོ། །རྩ་རྣམས་གནས་སུ་བསྐམ་པའི་ཕྱིར། །འདི་ཡི་རྩེ་ཆུང་གཡོན་པ་དྲོངས། །སྙིང་ཁྲག་མཆོད་པ་འདི་བཞེས་ལ། །བཅོལ་བའི་ལས་རྣམས་འགྲུབ་པར་མཛོད། །ཨ་ཤནྟིཾ་ནི་ས་མ་ཡ་བྷྱོ་བྷྱོ་ཏྲག་རཀྴ་བྷྱོ་བྷྱོ། ཧཱུཾ་མ་མོ་ཆེན་མོ་མེ་འབར་མ། །བདག་ཉིད་ལྷག་ལྷག་བཞད་མཛད་མ། །བདག་ཉིད་ཆེན་མོ་གཤེགས་སུ་གསོལ། །སྡང་བའི་དགྲ་བོ་ལས་ངན་པོ། །རྩ་རྣམས་གནས་སུ་བསྐམ་པའི་ཕྱིར། །ཨ་སོ་ལི་ཀ་གཡས་པ་དྲོངས། །སྙིང་ཁྲག་མཆོད་པ་འདི་བཞེས་ལ། །བཅོལ་བའི་ལས་རྣམས་འགྲུབ་པར་མཛོད། །བྷ་ག་དན་ཏྲི་ནི་ས་མ་ཡ་བྷྱོ་བྷྱོ། ཏྲག་རཀྴ་བྷྱོ་བྷྱོ། ཧཱུཾ་མ་མོ་ཆེན་མོ་མེ་འབར་མ། །སྟོང་གསུམ་གཅིག་ཏུ་རྒྱུག་འགྲོ་མ། །གཅིག་པུ་ཡུམ་མཆོག་གཤེགས་སུ་གསོལ། །སྡང་བའི་དགྲ་བོ་ལས་ངན་པོ། །རྩ་རྣམས་གནས་སུ་བསྐམ་པའི་ཕྱིར། །ཨ་སོ་ལི་ཀ་གཡོན་པ་དྲོངས། །སྙིང་ཁྲག་མཆོད་པ་འདི་བཞེས་ལ། །བཅོལ་བའི་ལས་རྣམས་འགྲུབ་པར་མཛོད། །ག་མུན་དན་ཏྲི་ནི་ས་མ་ཡ་བྷྱོ་བྷྱོ། ཏྲག་རག་ཤ་བྷྱོ་བྷྱོ། ཧཱུཾ་མ་མོ་ཆེན་མོ་མེ་འབར་མ། །དཀར་མོ་མིག་གཅིག་མཆེ་བ་ཅན། །ཤར་གྱི་གླིང་ནས་གཤེགས་སུ་གསོལ། །སྡང་བའི་དགྲ་བོ་ལས་ངན་པོ། །རྩ་རྣམས་གནས་སུ་བསྐམ་པའི་ཕྱིར། །དམ་ཉམས་འདི་ཡི་ལོང་རྩ་གཡས་པ་དྲོངས། །སྙིང་ཁྲག་མཆོད་པ་འདི་བཞེས་ལ། །བཅོལ་བའི་ཕྲིན་ལས་འགྲུབ་པར་མཛོད། །བཛྲ་ཀེཾ་ས་མ་ཡ་བྷྱོ་བྷྱོ། ཏྲག་རཀྴ་བྷྱོ་བྷྱོ། ཧཱུཾ་མ་མོ་ཆེན་མོ་མེ་འབར་མ། །ནག་མོ་ཆེན་མོ་རལ་པ་ཅན། །ལྷོ་ཡི་གླིང་ནས་གཤེགས་སུ་གསོལ། །སྡང་བའི་དགྲ་བོ་ལས་ངན་པོ། །རྩ་རྣམས་གནས་སུ་བསྐམ་པའི་ཕྱིར། །འདི་ཡི་ལོང་རྩ་གཡོན་པ་དྲོངས། །སྙིང་ཁྲག་མཆོད་པ་འདི་བཞེས་ལ། །བཅོལ་
བའི་ལས་རྣམས་འགྲུབ་པར་མཛོད། །བཛྲ་ཏ་ཀེཾ་བཛྲ་ཏ་ཀེཾ། ས་མ་ཡ་བྷྱོ་བྷྱོ། ཏྲག་རཀྴ་བྷྱོ་བྷྱོ། ཧཱུཾ་མ་མོ་ཆེན་མོ་མེ་འབར་མ། །དམར་མོ་ཆེན་མོ་དབང་སྡུད་མ། །ནུབ་ཀྱི་གླིང་ནས་གཤེགས་སུ་གསོལ། །སྡང་བའི་དགྲ་བོ་ལས་ངན་པོ། །རྩ་རྣམས་གནས་སུ་བསྐམ་པའི་ཕྱིར། །སྲོག་པ་རྩ་ལ་དམར་མོས་གཞིབ། །དགྲ་སྲོག་དམར་པོ་རྩད་ནས་ཆོད། །ཤ་ཁྲག་དམར་གྱི་མཆོད་པ་འདི་བཞེས་ལ། །བཅོལ་བའི་ལས་རྣམས་མྱུར་དུ་སྒྲུབས། །བཛྲ་ནི་ལ་བཛྲ་ནི་ལ་ས་མ་ཡ་བྷྱོ་བྷྱོ། ཏྲག་རཀྴ་ཏྲག་རཀྴ་བྷྱོ་བྷྱོ། ཧཱུཾ་མ་མོ་ཆེན་མོ་མེ་འབར་མ། །སེར་མོ་ཆེན་མོ་རྐང་ལྡག་མ། །བྱང་གི་གླིང་ནས་གཤེགས་སུ་གསོལ། །སྡང་བའི་དགྲ་བོ་ལས་ངན་པོ། །གསང་བའི་གསང་གནས་བསྐམ་པའི་ཕྱིར། །དགྲ་བོ་འདི་ཡི་གསང་བ་དྲོངས། །དམར་གྱི་མཆོད་པ་འདི་བཞེས་ལ། །བདག་གིས་བཅོལ་བའི་ལས་རྣམས་འགྲུབ་པར་མཛོད། །བཛྲ་ལན་ད་བཛྲ་ལན་ད། ས་མ་ཡ་བྷྱོ་བྷྱོ། ཏྲག་རཀྴ་བྷྱོ་བྷྱོ། སྔགས་ལ། ཏྲག་ཤ་ཁ་ཏཾ། སྙིང་ཁ་རག་པ་ཏི། དུར་ཧ་རི་བྷྱོ་ཛ། ཧཱུཾ་ཛ་ནི་ཛཱ། པ་ར་པ་ར་པ་ཏི་ཛཱ། ཀ་ཏང་ཀ་རི་ཛཱ་ཛཱ། ཞེས་དུས་དང་རྣམ་པ་མེད་པར་བཟླས་སོ། །རྩ་རྣམས་སྐམ་པའི་ལེའུ་སྟེ་སོ་གསུམ་པའོ།། །།གནོད་འདུལ་ལྷ་ཡིས་ཡང་གསོལ་པ། །བསྟན་པ་གཉན་པོ་འཇིག་བྱེད་དང་། །ལུ་གུ་རྒྱུད་ལས་འགལ་བྱེད་དང་། །སེམས་ཅན་ཀུན་ལ་གནོད་བྱེད་ལ། །རྟག་ཏུ་བཟླས་པའི་ཐུན་སྔགས་གང་། །ངོ་མཚར་ལྷ་ལ་བདག་ཉན་འཚལ། །ངོ་མཚར་ལྷ་ཡིས་བཀའ་སྩོལ་ཅིག །དེ་སྐད་ཞུས་པ་གསན་ནས་ཀྱང་། །ངོ་མཚར་ལྷ་ཡིས་བཀའ་སྩལ་པ། །བསྟན་པ་གཉན་པོ་འཇིག་བྱེད་ཅིང་། །ལུ་གུ་རྒྱུད་ལས་འགལ་བྱེད་དང་། །སེམས་ཅན་ཀུན་ལ་གནོད་བྱེད་དང་། །བདག་ལ་ངན་སེམས་བྱེད་པ་ལ། །མ་མོའི་ཐུན་སྔགས་ངས་བསྟན་གྱི། །ཉོན་ཅིག་གནོད་འདུལ་ལྷ་ཡི་གཙོ། །ངས་བསྟན་པ་ལ་ཐེ་ཚོམ་མེད། །གསང་བའི་ཐུན་སྔགས་འདི་ལྟར་བཟླས། །ཨོཾ་གུ་ཧྱ་ཛྙཱ་ན་ཤྲཱི་ཧེ་རུ་ཀ་ཧཱུཾ། གུ་ཧྱ་ཛྙཱ་ན་
ཀྲོ་ཏཱི་ཤྭ་རཱི་སྟྭམ། ཨོཾ་རུ་ལུ་རུ་ལུ་ཧཱུཾ་མ་བྷྱོ་ཕཊ། མ་ར་ཎ་ཙིཏྟ་ཁ། ཉིད་གཞི་མུ་ཁ་ལེ། ཀྲོ་དྷཱི་ཤྭ་རཱི་བྷ་ག་པདྨརྱ། བདེ་ཀློང་འདུས་འདུས་ན། སྙིང་ཙ་ཤ་ཡུ་ནི། ཧཱུཾ་ཧཱུཾ་བྷྱོ་བྷྱོ། ཨོཾ་རུ་ལུ་རུ་ལུ་ཧཱུཾ་བྷྱོ་ཧཱུཾ་བྷྱོ་ཕཊ། སྙིང་ཁ་རག་ཙིཏྟ་རྦད། ཏྲག་རཀྴ་གྲམ། ཁ་རམ་ཏྲག་རཀྴ་གྲམ། ཙིཏྟ་གྲམ་ཙིཏྟ་གྲམ་མ་ཧཱ་ལ་བྷྱོ། མ་ཧཱ་རཀྟ་ལ་གྲམ། དྷི་ནི་ལ་བྷྱོ། ཐུམ་རི་ལི་ལི་རྦད། ཙིཏྟ་ཆུམ་རྦད་ཨོ་གྲི་སྭ་མུ་ལ་ཧཱུཾ་ཧ། རུ་ལུ་རུ་ལུ་ཧཱུཾ་བྷྱོ། ཙིཏྟ་ཁ་ཙིཏྟ་རཀྴ་ཁ་མ་ཧཱ་མཱཾ་ས་ལ་ཡཱ། མ་ཧཱ་རཀྟ་ལ་གྲམ། ཙིཏྟ་ལ་རྦད། ཐུམ་རི་ལི་ལི་རྦད། ཨོཾ་ཛྭ་ལ་རཾ་མ་ཧཱ། རུ་ལུ་རུ་ལུ་ཧཱུཾ་བྷྱོ། ཙིན་ད་ཙིན་ད་མ་ཧཱ་མཱང་ས་ལ་ཡ། མ་ཧཱ་རཀྟ་ལ་གྲམ། ཙིཏྟ་ལ་རྦད། ཐུམ་རི་ལི་ལི་རྦད། ཨོཾ་བི་ཤ་སངྷ་ཧ། རུ་ལུ་རུ་ལུ་ཧཱུཾ་བྷྱོ། ས་མ་ཡ་ཙིཏྟ་ཁ་ཙིཏྟ་ཁ། མ་ཧཱ་མཱཾ་ས་ལ་ཡཾ། མ་ཧཱ་རཀྟ་ལ་གྲམ། ཙིཏྟ་རྦད་ཐུམ་རི་ལི་ལི་རྦད། ཨོཾ་བི་ཡང་ཡང་ཏེ་ཧ། རུ་ལུ་རུ་ལུ་ཧཱུཾ་བྷྱོ། ཀར་མ་ཧཱ། ཙིཏྟ་ཁ་མ་ཧཱ་མཱང་ས་ལ་ཡ། མ་ཧཱ་རཀྟ་ལ་གྲམ། ཙིཏྟ་ལ་རྦད། ཐུམ་རི་ལི་ལི་རྦད། ཨོཾ་མ་ཧཱ་ལཾ་ཏེ་ཧ་རུ་ལུ་རུ་ལུ་ཧཱུཾ་བྷྱོ་ཧཱུཾ། ཙ་ཀ་ཀཱ་ཡ། ཙིཏྟ་ཁ་མ་ཧཱ་མཱཾ་ས་ལ་ཡཱ། མཱ་ཧཱ་རཀྟ་ལ་གྲམ། ཙིཏྟ་རྦད། ཐུམ་རི་ལི་ལི་རྦད། ཨོཾ་བཛྲ་ཀྲོ་དྷཱི་ཤྭ་རཱི་པདྨ་བྷ་ག་པདྨ་རུ་ལུ་རུ་ལུ་ཧཱུཾ་བྷྱོ་ཧཱུཾ། ཙིཏྟ་ཁ་སྙིང་ཁ་རག །ཏྲག་རཀྴ་གྲམ་མ་ཧཱ་མཱང་ས་ལ་ཡཱ། མ་ཧཱ་རཀྟ་ལ་གྲམ། ཙིཏྟ་རྦད་ཐུམ་རི་ལི་ལི་རྦད། བཛྲ་ཀྲོ་ཏཱི་ཤན་ཏིང་པདྨ་ག་རུ་ཏིང་རུ་ལུ་རུ་ལུ་ཧཱུཾ་བྷྱོ། ཙིཏྟ་སྙིང་ཁ་རག །ཏྲག་རག་ཤ་གྲམ། མ་ཧཱ་མཱང་ས་ལ་ཡཱ། མ་ཧཱ་རཀྟ་གྲམ། ཐུམ་རི་ལི་ལི་རྦད། ཨོཾ་མུ་ཏི་ནི་བྷྱོ། རུ་ལུ་རུ་ལུ་ཧཱུཾ་བྷྱོ། ཙིཏྟ་ཁ་སྙིང་ཁ་རག །ཏྲག་རཀྴ་གྲམ། མ་ཧཱ་མཱང་ས་ལ་ཡཱ། མ་ཧཱ་རཀྟ་ལ་གྲམ། ཙིཏྟ་ལ་རྦད། ཐུམ་རི་ལི་ལི་རྦད། ཨོཾ་ཨ་ཤནྟིཾ་ནི་བྷྱོ། རུ་ལུ་རུ་ལུ་ཧཱུཾ་བྷྱོ། ཙིཏྟ་ཁ་སྙིང་ཁ་རག །ཏྲག་རཀྴ་ལ་གྲམ། མ་ཧཱ་
མཱང་ས་ལ་ཡཱ། མ་ཧཱ་རཀྟ་ལ་གྲམ། ཙིཏྟ་རྦད། ཐུམ་རི་ལི་ལི་རྦད། ཨོཾ་ག་མུན་དན་ཏི་ནི་བྷྱོ། རུ་ལུ་རུ་ལུ་ཧཱུཾ་བྷྱོ། ཙིཏྟ་ཁ་སྙིང་ཁ་རག །ཏྲག་རཀྴ་གྲམ་མ་ཧཱ་མཱང་ས་ལ་ཡཱ། མ་ཧཱ་རཀྟ་ལ་གྲམ་ཙིཏྟ་རྦད། ཐུམ་རི་ལི་ལི་རྦད། ཨོཾ་བཛྲ་ཀེཾ་བཛྲ་ཀེཾ། རུ་ལུ་རུ་ལུ་ཧཱུཾ་བྷྱོ། ཙིཏྟ་ཁ་སྙིང་ཁ་རག །ཏྲག་རཀྴ་གྲམ་མ་ཧཱ་མཱང་ས་ལ་ཡཱ་མ་ཧཱ་རཀྟ་ལ་གྲམ། ཙིཏྟ་རྦད། ཐུམ་རི་ལི་ལི་རྦད། ཨོཾ་བཛྲ་ཏ་ཀེཾ་བཛྲ་ཏ་ཀེཾ་རུ་ལུ་རུ་ལུ་ཧཱུཾ་བྷྱོ། ཙིཏྟ་ཁ་སྙིང་ཁ་རག །ཏྲག་རཀྴ་གྲམ། མ་ཧཱ་མཱང་ས་ལ་ཡཱ། མ་ཧཱ་རཀྟ་ལ་གྲམ། ཙིཏྟ་རྦད། ཐུམ་རི་ལི་ལི་རྦད། བཛྲ་ནི་ལ། བཛྲ་ནི་ལ། རུ་ལུ་རུ་ལུ་ཧཱུཾ་བྷྱོ། ཙིཏྟ་ཁ་སྙིང་ཁ་རག །ཏྲག་རག་ཤ་གྲམ། མ་ཧཱ་མཾ་ས་ལ་ཡཱ། མ་ཧཱ་རཀྟ་ལ་གྲམ། ཙིཏྟ་ལ་རྦད། ཐུམ་རི་ལི་ལི་རྦད། བཛྲ་ལན་ད་བཛྲ་ལན་ད། རུ་ལུ་རུ་ལུ་ཧཱུཾ་བྷྱོ། ཙིཏྟ་ཁ་སྙིང་ཁ་རག་ཏྲག་རཀྴ་གྲམ། མ་ཧཱ་མཱཾ་ས་ལ་ཡཱ། མ་ཧཱ་རཀྟ་ལ་གྲམ། ཙིཏྟ་རྦད། ཐུམ་རི་ལི་ལི་རྦད། བཛྲ་སཱུརྱ་བྷི་ཏི་ཨ་ཏོ་ཡེ། རུ་ལུ་རུ་ལུ་ཧཱུཾ་བྷྱོ། ཏྲག་རཀྴ་གྲམ། མ་ཧཱ་མཱང་ས་ལ་ཡཱ། མ་ཧཱ་རཀྟ་ལ་གྲམ། ཙིཏྟ་རྦད། ཐུམ་རི་ལི་ལི་རྦད། ཨོཾ་བཛྲ་པདྨ་བི་ཏོ་ཨ་ཏོ་ཡེ་རུ་ལུ་རུ་ལུ་ཧཱུཾ་བྷྱོ། ཙིཏྟ་ཁ་སྙིང་ཁ་རག་ཏྲག་རཀྴ་གྲམ། མ་ཧཱ་མཱང་ས་ལ་ཡཱ། མ་ཧཱ་རཀྟ་གྲམ། ཙིཏྟ་རྦད། ཐུམ་རི་ལི་ལི་རྦད། ཨོཾ་བཛྲ་ཁ་རག་བྷི་ཏོ་ཨ་ཏེ་ཡེ། རུ་ལུ་རུ་ལུ་ཧཱུཾ་བྷྱོ། ཙིཏྟ་ཁ་སྙིང་ཁ་རག །ཏྲག་རཀྴ་གྲམ། མ་ཧཱ་མཱཾ་ས་ལ་ཡཱ། མ་ཧཱ་རཀྟ་གྲམ། ཙིཏྟ་རྦད། ཐུམ་རི་ལི་ལི་རྦད། ཨོཾ་བཛྲ་སྲིད་འགྲོ་བྱི་ཏོ་ཨ་ཏོ་ཡེ། རུ་ལུ་རུ་ལུ་ཧཱུཾ་བྷྱོ་ཧཱུཾ། ཙིཏྟ་ཁ་སྙིང་ཁ་རག །ཏྲག་རཀྴ་གྲམ། མ་ཧཱ་མཱཾ་ས་ལ་ཡཱ། མ་ཧཱ་རཀྟ་ལ་གྲམ། ཙིཏྟ་རྦད། ཐུམ་རི་ལི་ལི་རྦད། ཨོཾ་བཛྲ་ཟ་འགྲམ་མུ་རཾ་ཤྭ། ཟ་འགྲམ་མུ་རཾ་ཤྭ། ཙིཏྟ་ཁ་སྙིང་ཁ་རག །ཏྲག་རཀྴ་གྲམ། མ་ཧཱ་མཱཾ་ས་ལ་ཡཱ། མ་ཧཱ་རཀྟ་གྲམ། ཙིཏྟ་རྦད། ཐུམ་རི་ལི་ལི་རྦད། ཨོཾ་བཛྲ་ཁ་རག་སྙིང་ཁ་རཀ །ཙིཏྟ་སྙིང་ཁ་རག །ཏྲག་རཀྴ་གྲམ། མ་ཧཱ་མཱཾ་ས་ལ་ཡཱ། མ་ཧཱ་རཀྟ་ལ་གྲམ། ཙིཏྟ་རྦད། ཐུམ་རི་ལི་ལི་རྦད། ཏྲག་རཀྴ་ཏྲག་རཀྴ། ཙིཏྟ་ཁ་སྙིང་ག་རག །ཏྲག་རཀྴ་ཤམ་གྲམ། མ་ཧཱ་མཱཾ་ས་ལ་ཡཱ། མ་ཧཱ་རཀྟ་གྲམ། ཙིཏྟ་རྦད། ཐུམ་རི་ལི་ལི་རྦད། རཀྴ་མུན་ཏྲ་བ་མ་
རཀྴ། ཙིཏྟ་ཁ་སྙིང་ཁ་རག །ཏྲག་རཀྴ་གྲམ། མ་ཧཱ་མཱཾ་ས་ལ་ཡཱ། མ་ཧཱ་རཀྟ་ལ་གྲམ། ཙིཏྟ་རྦད་ཐུམ་རི་ལི་ལི་རྦད། ཁ་མུན་ཏྲ་བ་རཀ་ཤ །ཙིཏྟ་ཁ་སྙིང་ཁ་རཀ་ཏྲག་རཀྴ་གྲམ། མ་ཧཱ་མཱང་ས་ལ་ཡཱ། མ་ཧཱ་རཀྟ་ལ་གྲམ། ཙིཏྟ་རྦད། ཐུམ་རི་ལི་ལི་རྦད། པྲ་བན་པྲ་བན་ཀར་ཏིཥྚ་བྷྱོ། ཙིཏྟ་ཁ་སྙིང་ཁ་རཀ །ཏྲག་རཀྴ་གྲམ། མ་ཧཱ་མཾ་ས་ལ་ཡཱ། མ་ཧཱ་རཀྟ་ལ་གྲམ། ཙིཏྟ་རྦད། ཐུམ་རི་ལི་ལི་རྦད། སྲང་གི་ཁང་གི་ཤྭང་བྷྱོ། ཙིཏྟ་ཁ་སྙིང་ཁ་རག །ཏྲག་རཀྴ་གྲམ། མ་ཧཱ་མཱང་ས་ལ་ཡཱ། མ་ཧཱ་རཀྟ་ལ་གྲམ། ཙིཏྟ་རྦད། ཐུམ་རི་ལི་ལི་རྦད། བྷྱོ་ཧཱུཾ་ཀ་རི་ཁ་བ། ཙིཏྟ་ཁ་སྙིང་ཁ་རཀ །ཏྲག་རཀྴ་གྲམ། མ་ཧཱ་མང་ས་ལ་ཡཱ། མ་ཧཱ་རཀྟ་ལ་གྲམ། ཙིཏྟ་རྦད། ཐུམ་རི་ལི་ལི་རྦད། བཛྲ་ད་རོད་བཛྲ་ད་རོད། ཙིཏྟ་ཁ་སྙིང་ཁ་རཀ །ཏྲག་རཀྴ་གྲམ། མ་ཧཱ་མཱང་ས་ལ་ཡཱ། མ་ཧཱ་རཀྟ་ལ་གྲམ། ཙིཏྟ་རྦད། ཐུམ་རི་ལི་ལི་རྦད། ནི་ལ་ཆུར་མ་དྲི་ཁ་ཊྭཱཾ་ག །ཙིཏྟ་ཁ་སྙིང་ཁ་རཀ །ཏྲག་རཀྴ་གྲམ། མ་ཧཱ་མཱང་ས་ལ་ཡཱ། མ་ཧཱ་རཀྟ་ལ་གྲམ། མ་ཧཱ་ཙིཏྟ་ལ་གྲམ། ཙིཏྟ་རྦད། ཐུམ་རི་ལི་ལི་རྦད། ད་ལ་ཙྪ་ལ་ཙིཏྟ་ཁ། སྙིང་ཁ་རཀ །ཏྲག་རཀྴ་གྲམ། མ་ཧཱ་མཾ་ས་ལ་ཡཱ། མ་ཧཱ་རཀྟ་ལ་གྲམ། ཙིཏྟ་རྦད། ཐུམ་རི་ལི་ལི་རྦད། པདྨ་བ་ལ་ཙནྚ། ཙིཏྟ་ཁ་སྙིང་ཁ་རཀ །ཏྲག་རཀྴ་གྲམ། མ་ཧཱ་མཱཾ་ས་ལ་ཡཱ། མ་ཧཱ་རཀྟ་ལ་གྲམ། ཙིཏྟ་རྦད། ཐུམ་རི་ལི་ལི་རྦད། མ་ཧཱ་འགུར་རཀྟོ། ཙིཏྟ་ཁ་སྙིང་ཁ་རག །ཏྲག་རཀྴ་གྲམ། མ་ཧཱ་མཱང་ས་ལ་ཡཱ། མ་ཧཱ་རཀྟ་ལ་གྲམ། ཙིཏྟ་རྦད། ཐུམ་རི་ལི་ལི་རྦད། ཏིང་སཾ་དད། ཨེ་ཨ་ར་ལི་བྷྱོ། རུ་ལུ་རུ་ལུ་བྷྱོ། བྷྱོ་རུ་ལུ་རུ་ལུ་བྷྱོ། ཙིཏྟ་ཁ་སྙིང་ཁ་རག །ཏྲག་རཀྴ་གྲམ། མ་ཧཱ་མཱཾ་ས་ལ་ཡཱ། མ་ཧཱ་རཀྟ་ལ་གྲམ། ཙིཏྟ་རྦད། ཐུམ་རི་ལི་ལི་རྦད། ཏྲག་རཀྴ་ཏྲག་རཀྴ་བྷྱོ། ཙིཏྟ་ཁ་སྙིང་ཁ་རཀ །ཏྲག་རཀྴ་གྲམ། མ་ཧཱ་མཱང་ས་ལ་ཡཱ། མ་ཧཱ་རཀྟ་ལ་གྲམ། ཙིཏྟ་རྦད། ཐུམ་རི་ལི་ལི་རྦད། ཨོཾ་ཨ་ཏིང་བྷྱོ། ཙིཏྟ་ཁ་སྙིང་ཁ་རཀ །ཨོཾ་ཧེ་པར་ཏི་བྷྱོ། ཙིཏྟ་ཁ་སྙིང་ཁ་བྱི་ཏིང་བྷྱོ། ཙིཏྟ་ཁ་སྙིང་ཁ་
རཀ་ཕུར་ཏིང་བྷྱོ། ཙིཏྟ་ཁ་སྙིང་ཁ་རག་ཕུར་ཏིང་བྷྱོ། ཙིཏྟ་ཁ་སྙིང་ཁ་རག་ཕུར་ཏིང་བྷྱོ། ཙིཏྟ་ཁ་སྙིང་ཁ་རག །མ་ཧཱ་མཱཾ་ས་ལ་ཡཱ། མ་ཧཱ་རཀྟ་ལ་གྲམ། ཙིཏྟ་རྦད། ཐུམ་རི་ལི་ལི་རྦད། ཤནྟིང་བྷྱོ། ཙིཏྟ་ཁ་སྙིང་ཁ་རཀ །དུན་ཏིང་བྷྱོ། ཙིཏྟ་ཁ་སྙིང་ཁ་རཀ །ཧ་རྟིང་བྷྱོ། ཙིཏྟ་ཁ། སྙིང་ཁ་རཀ །གྲུབྟིཾ་བྷྱོ། ཙིཏྟ་ཁ་སྙིང་ཁ་རཀ །ཏྲག་རཀྴ་ཏྲག་རཀྴ་གྲམ། མ་ཧཱ་མཱཾ་ས་ལ་ཡཱ། མ་ཧཱ་རཀྟ་ལ་གྲམ། ཙིཏྟ་ལ་རྦད། ཐུམ་རི་ལི་ལི་རྦད། ཧེ་ས་ཏི་སང་བྷྱོ། ཙིཏྟ་ཁ་སྙིང་ཁ་རག །ཨ་ཏ་ཡ་ཏ་ལ་བྷྱོ། ཙིཏྟ་ཁ་སྙིང་ཁ་རཀ །ད་ལ་དུ་ན་བྷྱོ། ཙེཏྟ་ཁ་རཀ །འདི་ན་མ་མ་གཡས་བྷྱོ། ཙིཏྟ་ཁ་སྙིང་ཁ་རཀ །ཏྲ་ཏྲག་རཀྴ་གྲམ། མ་ཧཱ་མཱཾ་ས་ལ་ཡཱ། མ་ཧཱ་རཀྟ་ལ་གྲམ། ཙིཏྟ་རྦད། མ་ནུ་རཀྴ་སི་བྷྱོ། ཙིཏྟ་ཁ་སྙིང་ཁ་རཀ །བྲཧྨ་ཎཱི་བྷྱོ། ཙིཏྟ་ཁ་སྙིང་ཁ་རཀ །རོའུ་ཏྲཱི་མ་བྷྱོ། ཙིཏྟ་ཁ་སྙིང་ཁ་རཀ །བིཥྞ་བེ་བྷྱོ། ཙིཏྟ་ཁ་སྙིང་ཁ་རཀ །ཀོའུ་མ་རཱི་བྷྱོ། ཙིཏྟ་ཁ་སྙིང་ཁ་རཀ །ཨིནྟྲ་ཎཱི་བྷྱོ། ཙིཏྟ་ཁ་སྙིང་ཁ་རཀ །ཏྲག་རཀྴ་གྲམ། མ་ཧཱ་མཱཾ་ས་ལ་ཡཱ། མ་ཧཱ་རཀྟ་ལ་གྲམ། ཙིཏྟ་རྦད། ཐུམ་རི་ལི་ལི་རྦད། སིངྒ་ལ་བྷྱོ། ཙིཏྟ་ཁ་སྙིང་ཁ་རཀ །ཨ་མྲྀ་ཏ་བྷྱོ། ཙིཏྟ་ཁ་སྙིང་ཁ་རཀ །སོའུ་མྱ་མ་བྷྱོ། ཙིཏྟ་ཁ་སྙིང་ཁ་རཀ །དཎྜ་བྷྱོ། ཙིཏྟ་ཁ་སྙིང་ཁ་རཀ །རཀྴ་སཱི་བྷྱོ། ཙིཏྟ་ཁ་སྙིང་ཁ་རཀ །བྷ་ག་ཤ་སི་བྷྱོ། ཙིཏྟ་ཁ་སྙིང་ཁ་རཀ །ར་ཏཱི་བཛྲ་བྷྱོ། ཙིཏྟ་ཁ་སྙིང་ཁ་རཀ །ཏྲག་རཀྴ་གྲམ། མ་ཧཱ་མཱཾ་ས་ལ་ཡཱ། མ་ཧཱ་རཀྟ་ལ་གྲམ། ཙིཏྟ་རྦད། ཐུམ་རི་ལི་ལི་རྦད། རུ་ཏེ་ར་མ་ཏྟཱ་བྷྱོ། ཙིཏྟ་ཁ་སྙིང་ཁ་རཀ །ཨེ་ཀ་ཙ་ར་ཎི་བྷྱོ། ཙིཏྟ་ཁ་སྙིང་ཁ་རཀ །མ་ནོ་ཧ་རཾ་བྷྱོ། ཙིཏྟ་ཁ་སྙིང་ཁ་རཀ །སིདྡྷི་བྷྱོ། ཙིཏྟ་ཁ་སྙིང་ཁ་རཀ །བཱ་ཡ་བེ་བྷྱོ། ཙིཏྟ་ཁ་སྙིང་ཁ་རཀ །མ་ཧཱ་མ་ར་ཎཱི་བྷྱོ། ཙིཏྟ་ཁ་སྙིང་ཁ་རཀ །ཨགྣི་མ་བྷྱོ། ཙིཏྟ་ཁ་སྙིང་ཁ་རཀ །ཏྲག་རཀྴ་གྲམ། མ་ཧཱ་མཾ་ས་ལ་ཡཱ། མ་ཧཱ་རཀྟ་ལ་གྲམ། ཙིཏྟ་ལ་རྦད། ཐུམ་རི་ལི་ལི་རྦད། བཱ་ར་ཧཱི་བྷྱོ། ཙིཏྟ་ཁ་སྙིང་ཁ་རཀ །ཙ་མུཎྜི་བྷྱོ། ཙིཏྟ་ཁ་སྙིང་ཁ་རཀ །སུ་ཏ་ནཱ་བྷྱོ། ཙིཏྟ་ཁ་སྙིང་ཁ་རཀ །བཱ་རུ་ཎི་བྷྱོ། ཙིཏྟ་ཁ་སྙིང་ཁ་རཀ །མ་ཧཱ་ཀཱ་ལཱི་བྷྱོ།
ཙིཏྟ་ཁ་སྙིང་ཁ་རཀ །ཙ་ཀཱ་ལི་བྷྱོ། ཙིཏྟ་ཁ་སྙིང་ཁ་རཀ །ཀུམྦྷ་ཀཪྞ་བྷྱོ། ཙིཏྟ་ཁ་སྙིང་ཁ་རཀ །བཛྲ་ལཾ་བོ་ད་ར་བྷྱོ། ཙིཏྟ་ཁ་སྙིང་ཁ་རཀ །ཏྲག་རཀྴ་གྲམ། མ་ཧཱ་མཱཾ་ས་ལ་ཡཱ། མ་ཧཱ་རཀྟ་ལ་གྲམ། ཙིཏྟ་རྦད། ཐུམ་རི་ལི་ལི་རྦད། ཏྲག་རཀྴ། ཁ་མུཎྜ་བྷྱོ་རུ་ལུ་ཧེ་མོ་ཨ་ལོ། ཙིཏྟ་ནི་ལ་བྷྱོ་རུ་ལུ་ཧེ་མོ་ཡ་བྷྱོ་རུ་ལུ་ན་ག་ནད་ཏེ་མོ་ཡང་ཏན་བྷྱོ་རུ་ལུ། ཡམ་ཤ་ཀ་ཀྲོ་དྷཱི་བྷྱོ་རུ་ལུ། སྙིང་ཁ་རཀ །སྲོག་ཐུན་བྷྱོ་རུ་ལུ། མ་བྷྱོ་སྲིན་བྷྱོ་ཐུན་བྷྱོ། བཛྲ་སྙིང་གོང་ཆོད། ཏི་ཁ་ལ་ཟ་མུཉྫ་མུ་ཉ་ལོང་དན་ཏི་རྦད། དྷ་ར་རྔམ་རྦད། ཤ་ཁྲག་ཐིག་སྣ་རྦད་ཚལ་པ་དུམ་བུ་ཁྲག་ཏི་རྦད། སྣང་ན་ནི་རྦད། ཤཀྟི་ཤཀྟི་རྦད། རྦ་ན་ཏ་རྦ་ན་ཏ་རྦད། དུཾ་བུ་དུཾ་བུ་ཚལ་པ་རྦད། རཀྴ་རཀྴ་རུ་དྲ་རྦད། སྙིང་ནག་སྙིང་སྲོག་རྩ་རྦད། ཚལ་པ་ཚལ་པ་དེ་ནི་རྦད། བཾ་རི་ལི། དཾ་པ་དུཾ་བུ་ཏབྟ་ཙཀྲ་རྦད། གཤིན་ཙཱ་ཚ་ཡ་རུ་ཐུན་ལིང་། གུང་ཐུཾ་ལིང་གུང་ཐུཾ་རྦད་རྦ་རྒུག་ཙར་ལིང་ལིང་། རྨུགས་རྦད། མྱོས་ཙར་ལིང་། མ་མ་རཀྴ་རུ་རུ་ཏྲ་རྦད། ཅེས་དྲག་ཏུ་བཟླས་སོ། །དུག་སྣ་ཚོགས་དང་ཁྲག་ཏུ་སྦྱར་ནས་བཏབ་ལ། དགྲ་བོའི་ཁྱིམ་ལ་ཕོག་པར་གཏོར་རོ། །ཅེས་དྲག་ཏུ་བཟླས་ཤིང་། དགྲ་བོ་ཐག་རིངས་ན་ཡུལ་ཕྱོགས་སུ་གཏོར་རོ། །མ་མོའི་ཐུན་སྔགས་ཀྱི་ལེའུ་སྟེ་སོ་བཞི་པའོ།། །།གཡུང་དྲུང་ལྷ་ཡིས་ཡང་གསོལ་པ། །བསྟན་པ་གཉན་པོ་འཇིག་བྱེད་དང་། །ལུ་གུ་རྒྱུད་ལས་འགལ་བྱེད་དང་། །སེམས་ཅན་ཀུན་ལ་གནོད་བྱེད་དང་། །བདག་ལ་སྡང་སེམས་བྱེད་པ་རྣམས། །དབང་དུ་བསྡུ་བ་ཇི་ལྟར་ལགས། །རྫོགས་སངས་རྒྱས་ལ་བདག་ཉན་འཚལ། །རྫོགས་སངས་རྒྱས་ཀྱིས་བཀའ་སྩོལ་ཅིག །དེ་སྐད་གསོལ་པ་གསན་ནས་ཀྱང་། །རྫོགས་སངས་རྒྱས་ཀྱིས་བཀའ་སྩལ་པ། །བསྟན་པ་གཉན་པོ་འཇིག་པ་དང་། །ལུ་གུ་རྒྱུད་ལས་འགལ་བྱེད་དང་། །སེམས་ཅན་ཀུན་ལ་གནོད་བྱེད་དང་། །བདག་ལ་སྡང་སེམས་བྱེད་པ་རྣམས། །དབང་དུ་བསྡུ་བ་ངས་བསྟན་གྱི། །ཉོན་ཅིག་གཡུང་དྲུང་ཡང་དག་པ། །
ངས་བསྟན་པ་ལ་ཐེ་ཚོམ་མེད། །དགྲ་བོ་དབང་དུ་བསྡུ་བ་འདི་ལྟར་བྱ་སྟེ། གྲོ་ག་ལ་དགྲ་བོའི་མིང་རུས་བྲིས་ལ། རི་དྭགས་ཆུར་འཛུལ་བའི་མིག་དང་། ཉ་ཐང་ལ་རྒྱུག་པའི་གཤོག་པ་དང་། ཆུ་ཉི་མ་མེད་པ་དང་། དེ་རྣམས་བསྲེས་ལ་ཉུང་དཀར་དང་ཐལ་ཆེན་ལ་སྔགས་ཀྱིས་བཏབ་ལ། ཁྱིམ་མམ་ཡུལ་ཕྱོགས་སུ་གཏོར་རོ། །མིང་བྱང་དོག་པས་བཅིངས་ལ་རྐང་པའི་བར་དུ་གཞུག་གོ། །ངན་སྔགས་ལ། པ་ར་ཙོ་ཏ་ནི། མ་མ་བ་ཏ་ན། ལ་བ་ལཾ་དུ་ཧཱུཾ། ཆེ་གེ་མོ་དབང་དུ་སྡུས་ཤིག་མིང་སྭཱ་ཧཱ། ཨོཾ་བཛྲ་ནི་ལ། སྙིང་ཁ་རཀ །ཏྲག་རཀྴ་ཧྲི་ཧྲི་ཧྲི། དབང་དུ་སྡུས་ཤིག །ཅེས་དྲག་ཏུ་བཟླས་སོ། །དགྲ་བོ་དབང་དུ་བསྡུ་བའི་ལེའུ་སྟེ་སོ་ལྔ་པའོ།། །།རྡོ་རྗེ་སེམས་དཔས་ཡང་གསོལ་པ། །བསྟན་པ་གཉན་པོ་འཇིག་བྱེད་དང་། །ལུ་གུ་རྒྱུད་ལས་འགལ་བྱེད་དང་། །སེམས་ཅན་ཀུན་ལ་གནོད་བྱེད་དང་། །བདག་ལ་སྡང་སེམས་བྱེད་པ་རྣམས། །ཕུར་བུས་གདབ་པ་ཅི་ལྟར་ལགས། །སྤྱི་དཔལ་ཆེ་ལ་བདག་ཉན་འཚལ། །སྤྱི་དཔལ་མཆོག་གིས་བཀའ་སྩོལ་ཅིག །དེ་སྐད་གསོལ་པ་གསན་ནས་ཀྱང་། །སྤྱི་དཔལ་མཆོག་གིས་བཀའ་སྩལ་པ། །བསྟན་པ་གཉན་པོ་འཇིག་བྱེད་དང་། །ལུ་གུ་རྒྱུད་ལས་འགལ་བྱེད་རྣམས། །སེམས་ཅན་ཀུན་ལ་གནོད་བྱེད་དང་། །བདག་ལ་སྡང་སེམས་བྱེད་པའི་དགྲ་རྣམས་ལ། །ཕུར་བུས་གདབ་པ་ངས་བསྟན་གྱི། །ཉོན་ཅིག་རྡོ་རྗེ་སེམས་དཔའི་དཔལ། །ངས་བསྟན་པ་ལ་ཐེ་ཚོམ་མེད། །མཆོག་ཆེན་བསྒྲལ་བའི་དཔའ་ཐུང་གཡས་པ་ལ། སོར་གཅིག་པ་དང་། སོར་གསུམ་པ་དང་། སོར་ལྔ་པ་དང་། སོར་བརྒྱད་པ་དང་། སོར་བཅུ་གཉིས་པ་དང་། ཕུར་བུའི་རྒྱུ་དང་ཚད་ནི་དེ་རྣམས་སོ། །དེ་རྣམས་ཀྱང་མགོའི་རྒྱ་མདུད་ཟུར་གསུམ་པར་བྱས་ལ། དེའི་འོག་མ་ཡང་རྒྱ་མདུད་ཟུར་གསུམ་དུ་བཞག་གོ། །སྐེད་པའི་རྒྱ་མདུད་ཡང་ཟུར་གསུམ་པར་བྱ། རྩེ་མོ་ཟུར་གསུམ་ཆུ་སྲིན་གྱི་ཁ་ནས་བྱུང་བར་བྱའོ། །དེ་ནས་སོར་གཅིག་པར་བྱས་པའི་སྤྱི་བོར་གསང་བའི་ཧེ་རུ་ཀ་དགོད།
སྐེད་པའི་རྒྱ་མདུད་ལ་གསང་བའི་ཁྲོ་མོ་དགོད། སྟོད་ཀྱི་ལྕུམ་གཞོགས་ལ་གསང་བའི་མ་བཞི་དགོད་དོ། །རྩེ་མོ་ལ་ཨེ་ཀ་ཛ་ཊཱི་དགོད་དོ། །དེ་ནས་མདུན་གྱི་དཀྱིལ་འཁོར་ཨེའི་སྟེང་དུ་བཞུགས་སུ་གསོལ། དེ་ནས་བྱིན་གྱིས་བརླབ་པ་དང་། དབང་བསྐུར་བར་བྱ་སྟེ། དེ་ནས་དྲིལ་ཞིང་འདི་བརྗོད་དོ། ཨོཾ་གུ་ཧྱ་ཤྲཱི་ཧེ་རུ་ཀ་ཧཱུཾ། གུ་ཧྱ་ཀྲོ་ཏཱི་ཤྭ་རཱི་སྟྭཾ། བཛྲ་ཀཱི་ལི་ཀཱི་ལ་ཡ། དགྲ་བོ་མཱ་ར་ཡ་ཕཊ། ཅེས་བཟླས་ཤིང་གང་ལ་དམིགས་པ་དེའི་དཀར་ནག་གི་མཚམས་སུ་བརྡེག་གོ། །ཕུར་བུ་སོར་གསུམ་པ་ལ། སྤྱི་བོར་འཇམ་དཔལ་འཇིགས་བྱེད་ཧེ་རུ་ཀ་དགོད། རྒྱ་མདུད་འོག་མ་ལ་ཡུམ་ཆེན་མོ་ཉིད་གཞི་མུ་ཁ་ལེ་དགོད། སྟོད་ཀྱི་ལྕུམ་གཞོགས་ལ་ཁྲོས་མའི་དབང་མོ་ཆེ་བཞི་དགོད། རྩེ་མོ་ལ་ཧཱུཾ་གསུམ་དགོད། དེ་ནས་མདུན་གྱི་ཉི་མའི་དཀྱིལ་འཁོར་ལ་བཞུགས་སུ་གསོལ། བྱིན་གྱིས་བརླབ་པར་བྱ། དབང་ཡང་བསྐུར་རོ། །དེ་ནས་འདི་བརྗོད་དོ། །ཨོཾ་ཛྙཱ་ན་ཤྲཱི་ཧེ་རུ་ཀ །ཛྙཱ་ན་ཀྲོ་ཏཱི་ཤྭ་རཱི་སྟྭཾ། བཛྲ་ཀཱི་ལི་ཀཱི་ལ་ཡ། དགྲ་བོ་མཱ་ར་ཡ་ཕཊ། དེ་ནས་ཕུར་པ་སོར་ལྔ་པ་ལ་སྤྱི་བོར་དཔལ་ཆེན་པོ་དགོད། སྐེད་པའི་རྒྱ་མདུད་ལ་ཡུམ་བཀྲག་གསལ་མ་དགོད། སྟོད་ཀྱི་ལྕུམ་གཞོགས་ལ་ཡུམ་ཆེན་མོ་བཞི་དགོད། རྩེ་མོ་ལ་ཛ་དམར་པོ་གཅིག་དགོད། དེ་མདུན་གྱི་ནམ་མཁའ་ལ་བཞུགས་སུ་གསོལ། །བྱིན་གྱིས་བརླབ་པ་དང་། དབང་བསྐུར་པ་བྱས་ལ་འདི་སྐད་བརྗོད་དོ། །ཨོཾ་ཤྲཱི་ཧེ་རུ་ཀའི་ཤ་སིདྷི་ཧ། བི་ཡང་ཡང་ཏེ་ཧ། བཛྲ་ཀཱི་ལི་ཀཱི་ལ་ཡ། དགྲ་བོ་མཱ་ར་ཡ་ཕཊ། དེ་ནས་ཕུར་པ་སོར་བརྒྱད་པ་ལ་སྤྱི་བོར་དཔལ་ཆེན་ཧེ་རུ་ཀ་དགོད། སྐེད་པའི་རྒྱ་མདུད་ལ་ཡུམ་སྲིད་པའི་བདེ་འགྲོ་མ་དགོད། སྟོད་ཀྱི་ལྷུམ་གཞོགས་ལ་དབྱིངས་ཕྱུག་མ་དགོད། རྩེ་མོའི་ངོས་སུ་ཁྲོས་མའི་དབང་མོ་ཆེ་བཞི་དགོད། དེ་ནམ་མདུན་གྱི་གདན་ལ་བཞུགས་སུ་གསོལ། བྱིན་གྱིས་བརླབ་པ་དང་། དབང་བསྐུར་བར་བྱས་ལ་འདི་སྐད་དོ། །ཨོཾ་ཤྲཱི་ཧེ་རུ་ཀ་ཀྲོ་དྷཱི་ཤྭ་རཱི་བྷ་ག་པདྨརྱ། བཛྲ་ཀཱི་ལི་ཀཱི་ལ་ཡ། དགྲ་བོ་མཱ་ར་ཡ་ཧཱུཾ་ཕཊ། ཨོཾ་
མུ་ཏྲ་ཤནྟིཾ། དུནྟྲི་དུནྟྲི། བཛྲ་ཀཱི་ལི་ཀཱི་ལ་ཡ། དགྲ་བོ་མཱ་ར་ཡ་ཧཱུཾ་ཕཊ། ཨོཾ་སཱུརྱ་པདྨ་ཁ་རག་སྲིད་འགྲོ་བཛྲ་ཀཱི་ལི་ཀཱི་ལ་ཡ། དགྲ་བོ་མཱ་ར་ཡ་ཧཱུཾ་ཕཊ། དེ་ནས་ཕུར་པ་སོར་བཅུ་གཉིས་པ་ལ་གོང་མའི་སྟེང་ཐུགས་ཀྱི་དགྱེས་སྡེ་མོ་བཞི་བསྣན་ལ་དགོད་དོ། །དེ་ནས་མ་མོ་རྣམས་སྤྱན་འདྲེན་པ་དང་། བཞུགས་སུ་གསོལ་པ་དང་། གཉིས་སུ་མེད་པར་བསྡིམ་པ་དང་། མཆོད་པ་འབུལ་བ་དང་། བཤགས་པ་བྱ་བ་དང་། དངོས་གྲུབ་གསོལ་པ་ལ་སོགས་བྱས་ལ། དེ་ནས་འཛབ་ལ་ཞུགས། བར་བར་དུ་བསྟོད་ཚིགས་ཀྱི་མཆོད་པ་འབུལ། ཐུགས་དམ་བསྐུལ། ཕྲིན་ལས་བཅོལ། གསང་བའི་ཐུགས་ཀ་ནས་ཛ་འདི་འདྲ་བ་སྤྲོ་ཞིང་མནན་སྔགས་དང་། དགྲ་བོའི་སྲོག་གི་སྙིང་པོ་དང་བཅས་པ་དྲངས་ཤིང་དགུག་གོ། །རྟགས་དང་མཚན་མ་མ་བྱུང་གི་བར་དུ་དེ་ལྟར་བྱའོ། །དེ་ནས་རྟགས་དང་མཚན་མ་བྱུང་བ་དང་། མྱུར་དུ་ཕུར་པས་གདབ་པར་བྱ་སྟེ། ཕུར་པ་རྣམས་གནས་གནས་སུ་གདབ་པར་བྱ་སྟེ། འདེབས་སྟངས་རྣམ་པ་གསུམ་བཞི་ཡང་གྱིས་གདབ་པོ། །དེ་ནས་གནན་པ་བྱའོ། །ཕུར་བུ་གདབ་པའི་ལེའུ་སྟེ་སོ་དྲུག་པའོ།། །།གནོད་འདུལ་ལྷ་ཡིས་ཡང་གསོལ་པ། །བསྟན་པ་གཉན་པོ་འཇིག་བྱེད་ཅིང་། །ལུ་གུ་རྒྱུད་ལས་འགལ་བྱེད་ཅིང་། །སེམས་ཅན་ཀུན་ལ་གནོད་བྱེད་དང་། །བདག་ལ་སྡང་སེམས་བྱེད་པ་རྣམས། །དཔུང་བཤིག་པ་ཡི་ཆོ་ག་ནི། །ཡང་དག་རྫོགས་ལ་བདག་ཉན་འཚལ། །ཡང་དག་རྫོགས་ཀྱིས་བཀའ་སྩོལ་ཅིག །དེ་སྐད་གསོལ་པ་གསན་ནས་ཀྱང་། །ཡང་དག་རྫོགས་ཀྱིས་བཀའ་སྩལ་པ། །ད་ལྟ་ཉིད་དུ་ངས་བསྟན་གྱི། །ཉོན་ཅིག་གནོད་འདུལ་ལྷ་ཡི་གཙོ། །ངས་བསྟན་པ་ལ་ཐེ་ཚོམ་མེད། །ཕ་རོལ་དགྲ་དཔུང་བཤིག་པ་ནི། །ལས་ཀྱི་ཆོ་ག་འདི་ལྟར་བྱ། །ཁྲབ་ཕུབ་གོན་ལ་རྒྱལ་མཚན་གཅིག་དང་མདུང་གཅིག་དང་གཉིས་ཐོགས་ལ། རྒྱལ་མཚན་གྱི་རྩེ་མོ་ལ། ཨོཾ་བཛྲ་ཀྲོ་དྷཱི་ཤྭ་རཱི་བྷ་ག་པདྨརྱ། ཧཱུཾ་ཧཱུཾ་བྷྱོ་བྷྱོ་ས་མ་ཡ་ཤིག་ཅེས་བྲིའོ། །མགུལ་པར་
ཨོཾ་ཤནྟིཾ་པདྨ་ག་རུ་ཏི་བྷྱོ་བྷྱོ་ས་མ་ཡ་ཤིག་ཅེས་བྲིའོ། །ཤར་ཕྱོགས་སུ་ཨོཾ་མུ་ཏྲི་ནི་བྷྱོ་བྷྱོ་ས་མ་ཡ་ཤིག །ཅེས་བྲིའོ། །ལྷོ་ཕྱོགས་སུ་ཨོཾ་ཨཱ་ཤནྟིཾ་ནི་བྷྱོ་བྷྱོ་ས་མ་ཡ་ཤིག །ཅེས་བྲིའོ། །ནུབ་ཕྱོགས་སུ་ཨོཾ་ག་མུན་དུན་ཏྲི་ནི་བྷྱོ་བྷྱོ་ས་མ་ཡ་ཤིག །ཅེས་བྲིའོ། །བྱང་ཕྱོགས་སུ་ཨོཾ་ག་མུན་དནྟྲི་བྷྱོ་བྷྱོ་ས་མ་ཡ་ཤིག །ཅེས་བྲིའོ། །དེ་ནས་སྐེད་པ་ལ་ཤར་ཕྱོགས་སུ་ཨོཾ་སཱུརྱ་བི་ཏོ་ཨ་ཏོ་ཡེ་བྷྱོ་བྷྱོ་ས་མ་ཡ་ཤིག །ཅེས་བྲིའོ། །ལྷོ་ཕྱོགས་སུ་ཨོཾ་བཛྲ་པདྨ་བྱི་ཏོ་ཨ་ཏོ་ཡེ་བྷྱོ་བྷྱོ་ས་མ་ཡ་ཤིག །ཅེས་བྲིའོ། །ནུབ་ཕྱོགས་སུ་བཛྭ་ཁ་ཊྭཱཾ་ག་བྱི་ཏོ་ཨ་ཏོ་ཡེ་བྷྱོ་བྷྱོ་ས་མ་ཡ་ཤིག །ཅེས་བྲིའོ། །བྱང་ཕྱོགས་སུ་བཛྲ་སྲིད་འགྲོ་བྱི་ཏོ་ཨ་ཏོ་ཡེ་བྷྱོ་བྷྱོ་ས་མ་ཡ་ཤིག །ཅེས་བྲིའོ། །དེ་ནས་སྐེད་སྨད་དུ། ཤར་ཕྱོགས་སུ་བཛྲ་ཀེཾ་བཛྲ་ཀེཾ་བྷྱོ་བྷྱོ་ས་མ་ཡ་ཤིག །ཅེས་བྲིའོ། །ལྷོ་རུ་བཛྲ་ཏ་ཀེཾ་ས་མ་ཡ་བྷྱོ་བྷྱོ་ས་མ་ཡ་ཤིག །ཅེས་བྲིའོ། །ནུབ་ཕྱོགས་སུ། ཨོཾ་བཛྲ་ནི་ལ་ད་བཛྲ་ནི་ལ་ད་བྷྱོ་བྷྱོ་ས་མ་ཡ་ཤིག །ཅེས་བྲིའོ། །བྱང་ཕྱོགས་སུ་བཛྲ་ལན་ད་བཛྲ་ལན་ད་བྷྱོ་བྷྱོ་ས་མ་ཡ་ཤིག །ཅེས་བྲིའོ། །དར་ལ་སྐུར་བྱས་ཏེ་རྒྱལ་མཚན་བྱས་ན་ཡང་བཟང་། དེ་ནས་མདུང་དར་གྱི་རྩེ་མོ་ལ་སྲིད་པའི་མ་མོ་རྣམས་ཀྱི་སྙིང་པོ་བྲི་སྟེ། དར་གྱི་ལྕེ་ལྔ་བཅུ་གཅིག་པར་བྱས་ཏེ། དང་པོ་ལ་བཛྲ་ཟ་འགྲམ་མུ་རཾ་ཤྭ། ཞེས་བྲིས་སོ། །དེའི་འོག་མ་ལ་བཛྲ་ཁ་རག་སྙིང་ཁ་རག །ཅེས་བྲིའོ། །དེའི་འོག་མ་ལ་སྙིང་ཏྲག་རཀྴ་ཏྲག་རཀྴ། ཞེས་བྲིའོ། །དེའི་འོག་མ་ལ་ཁ་མུན་ཙཀྲ་ཤ་བྷྱོ། ཞེས་བྲིའོ། །དེའི་འོག་མ་ལ་ཏྲག་ཤ་མུ་ཏྲ་བན་ཁ་མུནྟྲ་བ་ཏྲ་རཀྴ་བྷྱོ། ཞེས་བྲིའོ། །དེའི་འོག་མ་ལ་པྲ་བན་པྲ་ཀ་ར་ཏིཥྚ་བྷྱོ་བྷྱོ། ཞེས་བྲིའོ། །དེའི་འོག་མ་ལ་སྲང་གི་ཝང་གིང་ཤང་ཞེས་བྲིའོ། །དེའི་འོག་མ་ལ་བྷྱོ་བྷྱོ་ཧཱུཾ་ཀ་རི་ཁ་བ་དོ་རད་བ་དོར་བྷྱོ། ཞེས་བྲི། དེའི་འོག་མ་ལ་ཆུ་ར་མི་ཏ་ཁ་ཊྭཱཾ་བྷྱོ། ཞེས་བྲིའོ། །དེའི་འོག་མ་ལ་བ་ལ་ཛྭ་ལ་བྷྱོ་ཞེས་བྲིའོ། །དེའི་འོག་མ་ལ་པདྨ་བ་ལ་ཙཎྜ་མ་འགུར་རཀྟོ་བྷྱོ། ཞེས་བྲིའོ། །དེའི་འོག་མ་ལ་ཏིང་སཾ་ཏིང་སཾ། ཞེས་བྲིའོ། །དེའི་
འོག་མ་ལ་ལཱ་ལི་ཏི་བྷྱོ། ཞེས་བྲིའོ། །དེའི་འོག་མ་ལ་ཧེ་སང་ཏིང་བྷྱོ། ཞེས་བྲིའོ། །དེའི་འོག་མ་ལ་བྱི་ཏིང་བྷྱོ། ཞེས་བྲིའོ། །དེའི་འོག་མ་ལ་ཕུར་ཏིང་བྷྱོ་ཞེས་བྲིའོ། །དེའི་འོག་མ་ལ་མུར་ཏིང་བྷྱོ། ཞེས་བྲིའོ། །དེའི་འོག་མ་ལ་བཛྲ་ཤཱནྟིཾ་བྷྱོ། ཞེས་བྲིའོ། །དེའི་འོག་མ་ལ་དུནྟིང་བྷྱོ། ཞེས་བྲིའོ། །དེའི་འོག་མ་ལ་གྲུབ་ཏིང་བྷྱོ། ཞེས་བྲིའོ། །དེའི་འོག་མ་ལ་ཧར་ཏིང་བྷྱོ། ཞེས་བྲིའོ། །དེའི་འོག་མ་ལ་ཧེ་སང་ཏིང་ཧེ་སང་ཏིང་བྷྱོ། ཞེས་བྲིའོ། །དེའི་འོག་མ་ལ་དུ་ན་བྷྱོ། ཞེས་བྲིའོ། །དེའི་འོག་མ་ལ་འདི་ན་མ་མ་གཡས་བྷྱོ། ཞེས་བྲིའོ། །དེའི་འོག་མ་ལ་མ་ནུ་རཀྴ་སཱི་བྷྱོ། ཞེས་བྲིའོ། །དེའི་འོག་མ་ལ་བྲཱ་ཧྨ་ཎཱི་བྷྱོ། ཞེས་བྲིའོ། །དེའི་འོག་མ་ལ་རོའུ་ཏྲི་མ་བྷྱོ། ཞེས་བྲིའོ། །དེའི་འོག་མ་ལ་བིཥྞ་བེ་བྷྱོ། ཞེས་བྲིའོ། །དེའི་འོག་མ་ལ་ཀཽ་མ་རཱི་བྷྱོ། ཞེས་བྲིའོ། །དེའི་འོག་མ་ལ་ཨིནྟྲ་བྷྱོ། ཞེས་བྲིའོ། །དེའི་འོག་མ་ལ་པིཾ་ག་ལ་བྷྱོ། ཞེས་བྲིའོ། །དེའི་འོག་མ་ལ་ཨ་མྲྀ་ཏ་བྷྱོ། ཞེས་བྲིའོ། །དེའི་འོག་མ་ལ་སཽ་མྱ་བྷྱོ། ཞེས་བྲིའོ། །དེའི་འོག་མ་ལ་དཎྜ་དཾ་བྷྱོ། ཞེས་བྲིའོ། །དེའི་འོག་མ་ལ་རཀྴ་སཱི་བྷྱོ། ཞེས་བྲིའོ། །དེའི་འོག་མ་ལ་བག་ཤ་སཱི་བྷྱོ། ཞེས་བྲིའོ། །དེའི་འོག་མ་ལ་ར་ཏྲཱི་བཛྲ་བྷྱོ། ཞེས་བྲིའོ། །དེའི་འོག་མ་ལ་ར་ཏྲི་རེ་མཏྟཱ་བྷྱོ། ཞེས་བྲིའོ། །དེའི་འོག་མ་ལ་ཨེ་ཀ་ཙ་ར་བྷྱོ། ཞེས་བྲིའོ། །དེའི་འོག་མ་ལ་མ་ནོ་ཧ་ར་བྷྱོ། ཞེས་བྲིའོ། །དེའི་འོག་ཏུ་སིདྡྷི་ཀཾ་བྷྱོ། ཞེས་བྲིའོ། །དེའི་འོག་མ་ལ་བཱེ་ཡ་བེ་བྷྱོ། ཞེས་བྲིའོ། །དེའི་འོག་མ་ལ་མ་ཧཱ་མ་ར་ཎ་བྷྱོ། ཞེས་བྲིའོ། །དེའི་འོག་མ་ལ་ཨགྣི་མ་བྷྱོ། ཞེས་བྲིའོ། །དེའི་འོག་མ་ལ་བཱ་ར་ཧཱི་བྷྱོ། ཞེས་བྲིའོ། །དེའི་འོག་མ་ལ་ཙ་མུནྟྲཱི་བྷྱོ། ཞེས་བྲིའོ། །དེའི་འོག་མ་ལ་སུ་ཏ་ཏ་ན་བྷྱོ། ཞེས་བྲིའོ། །དེའི་འོག་ཏུ་བཱ་རུ་ཎཱི་བྷྱོ། ཞེས་བྲིའོ། །དེའི་འོག་མ་ལ་མ་ཧཱ་ཀཱ་ལི་བྷྱོ། ཞེས་བྲིས་སོ། །དེའི་འོག་མ་ལ་ཙ་ཀཱ་ལ་བྷྱོ། ཞེས་བྲིའོ། །དེའི་འོག་མ་ལ་ཀུམྦྷ་ཀརྞ་བྷྱོ། ཞེས་བྲིའོ། །དེའི་འོག་མ་ལ་བཛྲ་ལམ་བྷོ་ད་ར་བྷྱོ། ཞེས་བྲིའོ། །དེ་ནས་དགྲ་བོ་གང་ན་འདུག་པའི་ས་ཕྱོགས་སུ་ཁ་བལྟས་ལ། མ་བདུན་དང་སྲིང་བཞི་ཡང་བསྐུལ། ནམ་མཁའི་རྒྱལ་མོ་ཡང་བསྐུལ་ལོ། །སྔགས་
དྲུག་ཅུ་རྩ་བརྒྱད་ཀྱང་བཟླས་སོ། །མ་མ་རུ་ལུ་རུ་ལུ་བྷྱོ། ཏྲཀྵ་ཏྲཀྴ་ཏྲཀྴ་རཀྴ་ཏྲཀྴ་ཙིཏྟ་ཁ་ཐུམ། ཁ་རག་བྷྱོ། ཤིག་ཤིག་ཅེས་དུས་དང་རྣམ་པ་མེད་པར་བཟླས་སོ། །དེ་ནས་དགྲ་བོའི་ཕྱོགས་སུ་རྒྱལ་མཚན་བརྡབ། །མདུང་གིས་ཀྱང་གདབ་པའི་ཚུལ་སྟོན་དེས་འགྲུབ་པོ། །དགྲ་བོའི་དཔུང་བཤིག་པའི་ལེའུ་སྟེ་སོ་བདུན་པའོ།། །།གཡུང་དྲུང་ལྷ་ཡིས་ཡང་གསོལ་པ། །བསྟན་པ་གཉན་པོ་འཇིག་བྱེད་དང་། །རྣལ་འབྱོར་ཐམས་ཅད་སུན་འབྱིན་བྱེད། །དམ་པའི་ཆོས་ལ་སྨོད་པ་དང་། །བདག་ལ་དམོད་བྱད་བྱེད་པ་རྣམས། །ཟློག་པའི་ཆོ་ག་ཇི་ལྟར་ལགས། །ཡང་དག་རྫོགས་ལ་བདག་ཉན་འཚལ། །ཡང་དག་རྫོགས་ཀྱིས་བཀའ་སྩོལ་ཅིག །དེ་སྐད་གསོལ་པ་གསན་ནས་ཀྱང་། །ཡང་དག་རྫོགས་ཀྱིས་བཀའ་སྩལ་པ། །བསྟན་པ་གཉན་པོ་འཇིག་པ་དང་། །རྣལ་འབྱོར་ཐམས་ཅད་སུན་འབྱིན་དང་། །དམ་པའི་ཆོས་ལ་སྨོད་པ་དང་། །བདག་ལ་དམོད་བྱད་བྱེད་པ་རྣམས། །བཟློག་པའི་ཆོ་ག་ངས་བསྟན་གྱི། །ཉོན་ཅིག་གཡུང་དྲུང་ཡང་དག་པ། །ངས་བསྟན་པ་ལ་ཐེ་ཚོམ་མེད། །བཟློག་པའི་ཆོ་ག་འདི་ལྟར་བྱ། །མུ་སྟེགས་ཀྱི་རང་བཞིན་གྱི་འཇིག་རྟེན་ལ་གནས་པས། འཇིག་རྟེན་མཆོག་ཏུ་གྱུར་པའི་སྤྱོད་ཡུལ། ལོངས་སྤྱོད་དུ་གྱུར་པའི་གསུར་ཆེན་དང་། གུ་གུལ་གྱི་དུད་པས་མིང་བྱང་ལ་བདུག །ཐལ་ཆེན་གྱིས་ཁང་ཁྱིམ་ལ་གཏོར་ལ། ཐུགས་ལ་བརྣག་པའི་སྔགས་འདི་བཟླས་སོ། །ཧཱུཾ་བ་ཏོ་བ་ལ་སད་ད་བཛྲ་མཱ་ར་ཡ་ཕྱེ། ཞེས་བཟླས་ཤིང་གཏོར་རོ། །ཁང་པ་ཐག་རིང་ན་ཡུལ་ཕྱོགས་སུ་ཁ་བལྟས་ལ་གང་ལ་བྱ་བ་དེར་དམིགས་ལ། སྔགས་བཟླས་ཤིང་ཐལ་ཆེན་གཏོར་རོ། །དེ་ལྟར་བྱས་ན་མུ་སྟེགས་ཀྱི་བྱད་བཟློག་གོ། །མུ་སྟེགས་བཟློག་པའི་ལེའུ་སྟེ་སོ་བརྒྱད་པའོ།། །།གནོད་འདུལ་ལྷ་ཡིས་ཡང་གསོལ་པ། །བསྟན་པ་གཉན་པོ་འཇིག་བྱེད་ཅིང་། །ལུ་གུ་རྒྱུད་ལས་འགལ་བྱེད་དང་། །སེམས་ཅན་ཀུན་ལ་གནོད་བྱེད་དང་། །བདག་ལ་སྡང་སེམས་བྱེད་པ་དག །ཡུལ་ནས་དབྱུང་ན་ཅི་ལྟར་དབྱུང་། །རྫོགས་སངས་རྒྱས་ལ་བདག་ཉན་འཚལ། །
རྫོགས་སངས་རྒྱས་ཀྱིས་བཀའ་སྩོལ་ཅིག །དེ་སྐད་གསོལ་པ་གསན་ནས་ཀྱང་། །རྫོགས་སངས་རྒྱས་ཀྱིས་བཀའ་སྩལ་པ། །བསྟན་པ་གཉན་པོ་འཇིག་བྱེད་དང་། །ལུ་གུ་རྒྱུད་ལས་འགལ་བྱེད་དང་། །སེམས་ཅན་ཀུན་ལ་གནོད་བྱེད་དང་། །བདག་ལ་སྡང་སེམས་བྱེད་པ་རྣམས། །ཡུལ་ནས་དབྱུང་བའི་ཆོ་ག་ནི། །གཏན་ཚིགས་རྩ་བ་གཏན་ལ་དབབ། །ཉོན་ཅིག་གནོད་འདུལ་ལྷ་ཡི་གཙོ། །ངས་བསྟན་པ་ལ་ཐེ་ཚོམ་མེད། །མི་མང་པོ་ཕུང་བའི་རོ་ཤུལ་གྱི་ས་དང་། སྲུབ་མའི་ལོ་མ་དང་། ཇུ་ཙེའི་ཕུབ་མ་དང་། ཐལ་ཆེན་དང་དེ་རྣམས་བསྲེས་ལ། རྔ་མོའི་སྙིང་དང་། ཁྱི་དང་སྤྱང་ཀིའི་ཁྲག་གིས་སྦྲུས་ལ་གཟུགས་བྱས་ཏེ། གྲོ་ག་ལ་མིང་རུས་བྲིས། མགོ་བོར་ཧཱུཾ་བྲིས། མཇུག་ཏུ་ཕཊ་བྲིས་ལ། ཙིཏྟ་ན་རཀྴ། ཙིཏྟ་ན་རཀྴ་ཁ། ཙིཏྟ་ཡཀྴ་ཁ། ཙིཏྟ་ཐུམ་རི་ལི་ལི་རྦད། ཅེས་གྲོ་ག་ལ་བྲིས་ལ་མིང་རུས་དང་གཉིས་སྙིང་གར་བླན། ཡཾ་ནག་པོ་བདུན་བྲིས་ལ་ཁ་བྲག་ཏུ་སླན། དེ་ནས་གྲོ་གའི་རྐྱལ་བུའི་ནང་དུ་བཅུག་ལ། རྡོ་རྗེ་རྒྱ་གྲམ་གྱི་ཕྱག་རྒྱ་བྱས་ལ། སྔགས་འདི་ལན་ཉི་ཤུ་རྩ་གཅིག་བཟླས་པས་དམིགས་བྱ་མྱོས་ཤིང་དབྱུང་བར་འགྱུར་རོ། །སྔགས་ལ། བ་ཏི་ཏ་ན་ཐོ་བ་བུད། ན་མ་ཤ་ལ་སྭཱ་ཧཱ། ཡཾ་ཐེག་ཡཾ་ཞེས་བཟླས་ཤིང་མཐུན་པའི་རླུང་ལ་བསྐུར་ན་ཡུལ་ནས་དབྱུང་བ་ལ་ཐེ་ཚོམ་མེད་དོ། །ཡུལ་ནས་དབྱུང་བའི་ལེའུ་སྟེ་སོ་དགུ་པའོ།། །།གཡུང་དྲུང་ལྷ་ཡིས་ཡང་གསོལ་པ། །བསྟན་པ་གཉན་པོ་འཇིག་བྱེད་དང་། །ལུ་གུ་རྒྱུད་ལས་འགལ་བྱེད་དང་། །སེམས་ཅན་ཀུན་ལ་གནོད་བྱེད་དང་། །བདག་ལ་སྡང་སེམས་བྱེད་པ་རྣམས། །མ་མོས་ཁ་བཅིང་ཇི་ལྟར་བགྱི། །རྫོགས་སངས་རྒྱས་ལ་བདག་ཉན་འཚལ། །རྫོགས་སངས་རྒྱས་ཀྱིས་བཀའ་སྩོལ་ཅིག །དེ་སྐད་གསོལ་པ་གསན་ནས་ཀྱང་། །རྫོགས་སངས་རྒྱས་ཀྱིས་བཀའ་སྩལ་པ། །བསྟན་པ་གཉན་པོ་འཇིག་བྱེད་ཅིང་། །ལུ་གུ་རྒྱུད་ལས་འགལ་བྱེད་དང་། །སེམས་ཅན་ཀུན་ལ་གནོད་བྱེད་དང་། །བདག་ལ་སྡང་སེམས་བྱེད་པ་རྣམས། །མ་མོས་ཁ་བཅིང་ངས་བསྟན་
གྱི། །ཉོན་ཅིག་གཡུང་དྲུང་ཡང་དག་པ། །ངས་བསྟན་པ་ལ་ཐེ་ཚོམ་མེད། །མ་མོས་ཁ་བཅིང་བ་ལ། མི་འཕན་པོ་ཕྱུག་པོའི་ཐོད་པ་ལ། རྨྱུག་མའི་སྤྲ་རྩི་དང་ཀླད་པར་བརྫིས་ལ་ཐོད་པའི་ཁར་བཅུག་ལ། སྐུད་པ་སྔོ་དམར་གྱིས་ཁ་བཅིངས་ལ། ཆུ་སྲིན་གྱི་ཕྱག་རྒྱ་བཅས་ལ་ཕྱོགས་བཞིར་བསྒྱུར་ཞིང་བསྟན་ནས་བརྣག་པའི་སྔགས་འདི་བཟླས་སོ། ཨོཾ་རྣལ་ཐིག་རྣལ་པྲ་བ་ཚུགས་ཤྭ་ལ་མེད་ཐུ་ལས་ཐུ་ལྕགས་ཀྱིས་ཀྱི་ཀྲ་ཐེད་སྭཱ་ཧཱ། ཞེས་བཟླས་ཤིང་ཕྱག་རྒྱ་བསྒྱུར་རོ། །བཟློག་པའི་ཚེ་མཆིལ་མ་རང་གི་ཁོང་པར་མི་གཏང་བར་བྱའོ། །ལས་འདིས་བདག་ལ་དགྲ་མི་སྲིད་དོ། །དེས་དགྲ་བོ་སྟོང་ཡང་ཁ་བཅིང་བར་འགྱུར་རོ། །མ་མོས་དགྲ་བོའི་ཁ་བཅིངས་པའི་ལེའུ་སྟེ་བཞི་བཅུ་པའོ།། །།གཡུང་དྲུང་ལྷ་ཡིས་ཡང་གསོལ་པ། །བསྟན་པ་གཉན་པོ་འཇིག་བྱེད་དང་། །ལུ་གུ་རྒྱུད་ལས་འགལ་བྱེད་དང་། །སེམས་ཅན་ཀུན་ལ་གནོད་བྱེད་དང་། །བདག་ལ་ངན་སེམས་བྱེད་པ་ལ། །ནན་ཏུར་ལས་རྣམས་ཇི་ལྟར་འཚལ། །རྫོགས་སངས་རྒྱས་ལ་བདག་ཉན་འཚལ། །རྫོགས་སངས་རྒྱས་ཀྱིས་བཀའ་སྩོལ་ཅིག །དེ་སྐད་གསོལ་པ་གསན་ནས་ཀྱང་། །རྫོགས་སངས་རྒྱས་ཀྱིས་བཀའ་སྩལ་པ། །བསྟན་པ་གཉན་པོ་འཇིག་བྱེད་དང་། །ལུ་གུ་རྒྱུད་ལས་འགལ་བྱེད་དང་། །སེམས་ཅན་ཀུན་ལ་གནོད་བྱེད་དང་། །བདག་ལ་ངན་སེམས་བྱེད་པ་ལ། །ནན་ཏུར་ལས་རྣམས་ངས་བསྟན་གྱི། །ཉོན་ཅིག་གཡུང་དྲུང་ཡང་དག་པ། །ངས་བསྟན་པ་ལ་ཐེ་ཚོམ་མེད། །ཇི་ལྟར་ཡིད་འཐད་གནས་སུ་ནི། །འབྲུ་སྣ་ཚོགས་པའི་མི་གཟུགས་ལ། །མཁར་ཐབས་མདའ་ཡིས་བརྒྱན་ནས་ནི། །སླེའུ་བཟང་དར་དཀར་ཆས་ཀྱིས་བརྒྱན། །ཡོ་བྱད་ཚོགས་པའི་སྡེར་ཆ་ལ། །ཟ་འོག་མདའ་ཡིས་རྣམ་པར་བརྒྱན། །སླེའུ་ཟངས་སླེ་རིས་སྦྲ་ཡི་རྐྱེན། །རིན་ཆེན་སྣ་བདུན་རྒྱན་གྱིས་བརྒྱན། །མ་ཧཱ་ཤནྟིཾ་གཞུང་བཞིན་བརྗོད། །ཕོ་རིགས་རྣམས་ལ་གཞུང་བཞིན་བསྔོ། །དེ་ནས་གཞུང་བཞིན་བསྔོ་བ་དང་། །སོལ་བའི་དོང་ཁྲུ་གང་བའི་
ནང་དུ་ཕྱི་རྒན་དུ་མནན་ལ། དེའི་སྟེང་དུ་ར་སོག་ལ་དགྲ་གང་ཡིན་པའི་གཟུགས་བྲིས་ལ། ཁ་སྦུབ་ཏུ་མནན་ནོ། །དེའི་སྟེང་དུ་རྡོ་རྗེ་རྒྱ་གྲམ་གྱིས་མནན་ནོ། །དེ་ནས་དགྲ་བོའི་མིང་བྲིས་ཏེ། འོ་དོད་འབོད་ལ་གཏོང་ལས་མྱུར་དུ་འགྲུབ་པོ། །རྨྱུག་རྒོད་ལ་དཔག་བསམ་གྱི་ཤིང་གི་གཟུགས་བྱས་ལ། གྲོ་ག་ལ་དགྲ་བོའི་གཟུགས་བྱས་ལ། སྙིང་གར་ཁྲག་གིས་མིང་བྲིས་ལ་གསེར་གཡུ་གཉིས་སྐོས་རྗེ་དྲང་དཀར་ལ་བསྔོས་ལ། དེ་ནས་མན་ཏ་ལའི་དར་དུ་བཏུམ་ལ། འདའ་ར་པ་ཏིས་གདགས་སོ། །ཨ་ཏི་པ་རའི་ཐག་པས་བཅིང་ངོ་། །འོ་དོད་དྲག་ཏུ་འབོད་དོ། །དེས་སྨྱོ་རྒོད་དྲག་པོས་ཐེབས་པར་འགྱུར་རོ། །ལྕགས་དང་གསེར་དུ་གཡུ་བསྲེས་ལ་ཁོལ་པོ་ཞིག་འཛིན་ལ་བསྔོས་ལ། གོང་དུ་བསྟན་པའི་གཟུགས་དང་། བསྔོས་པའི་ཡས་སྟགས་བསྲེས་ལ་རུ་སྦལ་གྱི་ཤུན་པས་གཏུམས་ལ། པ་ར་ཏའི་དོང་དུ་གཞུག་གོ། །ཡེ་ཤེས་རྗེ་མོའི་ཕྱག་རྒྱས་གདབ་པོ། །དེས་ནི་དབང་པོ་མི་གསལ་བ་དང་དིག་པ་དང་ལྐུགས་པར་འགྱུར་རོ། །ཟངས་དང་ལྕགས་དང་གསེར་གསུམ་བརྡར་ལ། ཡ་བདུད་ཆེན་པོ་ལ་བསྔོས་ལ། གོང་དུ་བསྟན་པའི་གཟུགས་དང་། བསྔོས་པའི་ཡས་སྟགས་བསྲེས་ལ་མུ་ལ་ནའི་དོང་དུ་གཞུག་གོ། །ཆེ་མཆོག་རྟགས་ཀྱི་ཕྱག་རྒྱས་གདབ་པོ། །དེས་གློ་བུར་དུ་འཆི་བར་འགྱུར་རོ། །འབྲུ་སྲན་དག་ལ་གླིང་བཅུ་གཉིས་ཀྱི་གཟུགས་བྲིས་ལ། དཀོར་ཆས་བརྒྱན་ལ་ཡར་ལྷ་ཤོད་ཀྱི་སྐྱེས་ཏོ་རེ་ལ་བསྔོས་ལ། དེ་ནས་འཇག་མ་ལ་མི་གཟུགས་བྱས་ཏེ། དགྲ་བོའི་མིང་བྲིས་ཏེ་གཟུགས་སྙིང་གར་གླན་ནོ། །ཟན་ལ་ཟ་བའི་ཚུལ་བྱེད་དུ་གཞུག་གོ། །འོ་དོད་དྲག་ཏུ་འབོད་དོ། །དེ་ལྟར་བྱས་ན་ཐུམ་བུར་འོང་ངོ་། །རུས་པ་སྣ་ཚོགས་སྤུངས་ལ་གཤིན་རྗེའི་རྒྱལ་པོ་ལ་བསྔོས་ལ་ཡས་སྟགས་དེའི་གསེབ་ཏུ་ཁམ་ས་ལ་དགྲ་བོའི་གཟུགས་བྱས་ལ། སྙིང་གར་མིང་རུས་བྲིས་ཏེ་ཁ་སྦུབ་སྟེ་བསྒྱེལ་ལ་མདའ་འཕེན་པའི་ཚུལ་དུ་བྱས་པའོ། །ཅི་ཡང་རུང་བའི་ཤིང་ལྤགས་ཡང་བཀོན་ནོ། །གཤིན་རྗེ་ནག་པོའི་སྔགས་ཀྱང་གདབ་པོ། །དེས་གྲིར་འཆིའོ། །མི་ནོར་
དུ་བཏགས་པ་སྣ་ཚོགས་ཀྱི་དཀྱིལ་དུ། རྩྭ་ལ་གཟུགས་བྱས་ལ་གྲོ་ག་ལ་མིང་བྲིས་ཏེ། ས་ལ་ཨུ་མ་དེ་ཝཱིའི་གཟུགས་བྱས་ལ། ཨུ་མ་དེ་ཝཱིའི་གཟུགས་སྟེང་དུ་བསྐྱོན་ལ་འདོད་ཆགས་སྤྱོད་པའི་ཚུལ་དུ་བྱའོ། །མ་ཨེ་བ་ནི་བྷཉྫ་མཱ་ར་ན་ཕཊ་ཅེས་བྱ་བའི་སྔགས་ཀྱིས་གདབ་པོ། །མཁལ་སྐེད་ན་བ་དང་ཕོ་མཚན་སྐྲངས་པ་དང་། ཆུ་འགགས་ནས་འཆིའོ། །དུང་དང་གསེར་དང་གཡུ་དང་བསེ་དང་མཚལ་ལ་སོགས་པའི་ཡས་སྟགས་སྣ་ཚོགས་དང་། དགྲ་བོའི་མིང་བྱང་བྲིས་ལ་བ་ཏི་དམར་པོའི་པགས་པས་གཏུམས། བ་རི་བ་མ་ཧཱ་ར་ན་ཅེས་བཟླས་སོ། །དེ་ལ་གདབ་པར་བྱ། དེས་ནི་མྱུར་དུ་སྦོས་པར་འགྱུར། གསེར་དང་དུང་དང་ལྕགས་གསུམ་ལ་དགྲ་བོའི་མིང་བསྲེས་ཏེ་བསྲེགས་ལ་རྫ་ནག་པོའི་ནང་དུ་བཅུག་ལ། བ་ཏི་མཱ་ར་སྔགས་ཀྱིས་བཏབ་ལ་སྦ་ཞིང་གཏད་ན་རྦབ་དང་བྲག་གཡང་དུ་འཆི། ཆོ་ག་བྱེད་པའི་དུས་སུ་བདག་ཉིད་མུ་ཁ་ལེའི་ཏིང་ངེ་འཛིན་ནམ། དབང་ཆེན་གྱི་ཏིང་ངེ་འཛིན་ལ་ཞུགས་ལ་གཞུང་བཞིན་དུ་བསྐུལ་ལོ། །ཕོ་རིགས་ཀྱི་ཕྱི་མ་ལ་ལས་བཅོལ་བ་ནི་ཡོད་ན། འཁུ་ལྡོག་ཆེ་ལ་རྒྱབ་འགྱུར་བས་འདིར་མ་གསུངས་སོ། །བདུད་ལ་གཏད་པའི་ལེའུ་སྟེ་ཞེ་གཅིག་པའོ།། །།གནོད་འདུལ་ལྷ་ཡིས་ཡང་གསོལ་པ། །སེང་གེ་ཕྲུ་གུ་ནང་འཛིངས་པའི། །རྨི་ལྟས་བཟློག་ན་ཇི་ལྟར་ཟློག །གསད་པའི་ཐབས་ནི་ཇི་ལྟར་ལགས། །ཡང་དག་རྫོགས་ལ་བདག་ཉན་འཚལ། །ཡང་དག་རྫོགས་ཀྱིས་བཀའ་སྩོལ་ཅིག །དེ་སྐད་ཞུས་པ་གསན་ནས་ཀྱང་། །ཡང་དག་རྫོགས་ཀྱིས་བཀའ་སྩལ་པ། །ཉོན་ཅིག་གནོད་འདུལ་ལྷ་ཡི་གཙོ། །ངས་བསྟན་པ་ལ་ཐེ་ཚོམ་མེད། །སེང་གེ་ཕྲུ་གུ་ནང་འཛིངས་པའི། །རྨི་ལྟས་བཟློག་པར་བྱ་ན་འདི་ལྟར་བཟློག་གོ། ། མ་གྱི་ནང་ནས་འབོབ་ཕྱུང་ལ། །དེ་ཡང་ས་ལ་བརྡབ་པར་བྱ། །བེར་ག་དང་ཕུ་འདུད་ཡང་ས་ལ་བརྡབ་པར་བྱའོ། །དེ་གསུམ་གདབ་པའི་སྔགས་ལ། ཨོཾ་མེ་ཨ་མ་ལ་མེ་སྭཱ་ཧཱ། མེ་ཏི་མེ་ཏི་མཱ་ར་ཡ་ཏི་ནས་སྭཱ་ཧཱ། དེས་ཇི་ལྟར་ལ་ཡང་ཟློག་གོ། །གསད་པའི་ཐབས་
ནི་ཁྲག་དུང་ཕོར་གང་གི་ནང་དུ་ཁྱི་རུས་དང་ཕག་རུས་དང་ཝ་རུས་དང་ཀུན་བཙོས་ལ། སྲོད་འཁོར་ཙམ་ལ་ཁྱིམ་ལ་གཏོར་ཞིང་སྔགས་འདི་བཟླས་སོ། །མ་དུ་མ་ནུ་ར། རཀ་མ་བ་ཤ །ཀུ་རུ་ཐུམ་རྦད། དུན་ཏི་དུན་ཏིངས་མཱ་ཡ་མ་ཤ་ཁ་མུ་ལེ་རྦད། པར་ལ་ཁྱུང་ཏིང་ཧེ། ཞེས་བརྒྱ་རྩ་བརྒྱད་བཟླས། པུ་ན་ཤ་ཁྲག་སྡིབས། ཁ་མུ་ལེ་རྦད། ཁ་མུ་ཏོ་ཏིང་རྦད། ཨི་ཏིང་ཡ་རྦད། ཅེས་བརྗོད་ན་རྩལ་ཉམས་ནས་ཟླ་བ་ལ་རྟགས་འོང་ངོ་། །སེང་གེ་ཕྲུ་གུ་ནང་འཛིངས་པའི་རྨི་ལྟས་བཟློག་པ་དང་། གསད་པའི་ཐབས་ཀྱི་ལེའུ་སྟེ་ཞེ་གཉིས་པའོ།། །།བཅོམ་ལྡན་འདས་དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །སྔོན་འདས་པའི་དུས་མ་བྱུང་བའི་སྔོན་རོལ་ན། སྲིད་པ་ཐམས་ཅད་ཀྱི་སེམས་མྱ་ངན་ལས་ཟློས་པའི་ཕྱིར། གཡུང་དྲུང་ལྷ་ཡིས་ཡང་གསོལ་པ། །ཐམས་ཅད་མྱ་ངན་ཇི་ལྟར་ཟློ། །དེ་ཀུན་ལྷ་ཡིས་བཀའ་སྩལ་པ། །ཉོན་ཅིག་གཡུང་དྲུང་ཡང་དག་པ། །ཆེ་བས་ཆེ་བའི་ཟབ་མོ་འདིར། །ཆེ་བའི་ཡེ་ཤེས་རྙེད་དཀའ་བ། །ཤེས་རབ་ཐབས་ལ་བརྟེན་ཏེ་འགྲུབ། །མིང་ཙམ་འདི་ཞེས་བསྟན་དུ་མེད། །བརྗོད་པ་ཀུན་ལས་འདས་པའོ། །དོན་དམ་སྤྲོས་ལས་འདས་པས་ན། །ཐམས་ཅད་མ་ལུས་སངས་རྒྱས་སོ། །མགུར་ཆེན་གྱི་ལེའུ་སྟེ་ཞེ་གསུམ་པའོ།། །།ཏིང་འཛིན་དབང་ཆེན་དཀྱིལ་འཁོར་རིམ་གྱིས་བསྐྱེད། །བདག་ཉིད་ཆེ་མཆོག་སྐུར་བསྒོམས་ལ། །ཐམས་ཅད་མ་ལུས་དབང་དུ་སྡུད། །མན་ངག་མཛུབ་ཚུགས་དྲུག་གིས་དོན་རྣམས་བྱ་བར་བསྟན། །མགུར་ཆུང་གི་ལེའུ་སྟེ་ཞེ་བཞི་པའོ།། །།རྡོ་རྗེ་སེམས་དཔས་ཡང་གསོལ་པ། །སེམས་ཅན་དུས་མིན་འཆི་བ་རྣམས། །དེ་ལས་བཟློག་པ་ཇི་ལྟར་ཟློག །བསྐང་བའི་གནས་ལྔ་ཇི་ལྟར་ལགས། །ཡང་དག་རྫོགས་ལ་བདག་ཉན་འཚལ། །ཡང་དག་རྫོགས་ཀྱིས་བཀའ་སྩོལ་ཅིག །དེ་སྐད་གསོལ་པ་གསན་ནས་ཀྱང་། །ཡང་དག་རྫོགས་ཀྱིས་བཀའ་སྩལ་པ། །སེམས་ཅན་དུས་མིན་འཆི་བ་རྣམས། །དེ་ལ་བཟློག་པ་ངས་བསྟན་གྱི། །
ཉོན་ཅིག་རྡོ་རྗེ་སེམས་དཔའི་གཙོ། །ངས་བསྟན་པ་ལ་ཐེ་ཚོམ་མེད། །བསྐང་བའི་གནས་ལྔ་འདི་རྣམས་སོ། །སྣང་སྲིད་ཐམས་ཅད་ཡུམ་གྱི་བྷ་ག་སྟེ། །དུས་གསུམ་བདེ་གཤེགས་ཡུམ་གྱི་ཀློང་ནས་བསྐྱེད། །དབུས་ཀྱི་ཆེ་མཆོག་སྐུ་དང་གཉིས་མེད་བཞུགས། །མུ་མཐར་ཁྱབ་པའི་ཐུགས་དམ་བདག་སྐོང་ན། །དབང་དང་དངོས་གྲུབ་དུས་འདིར་སྩལ་དུ་གསོལ། །ཤར་ཕྱོགས་རྡོ་རྗེ་རིགས་ཀྱི་གཙོ། །རྡོ་རྗེ་དབྱིངས་ཕྱུག་མི་ཕྱེད་མ། །བསྐང་ངོ་བསྐལ་པའི་ཐུགས་དམ་བསྐང་། །ལྷོ་ཕྱོགས་རིན་ཆེན་རིགས་ཀྱི་གཙོ། །རིན་ཆེན་དབྱིངས་ཕྱུག་མི་ཕྱེད་མ། །བསྐང་ངོ་བསྐལ་པའི་ཐུགས་དམ་བསྐང་། །ནུབ་ཕྱོགས་པདྨ་རིགས་ཀྱི་གཙོ། །པདྨ་དབྱིངས་ཕྱུག་མི་ཕྱེད་མ། །བསྐང་ངོ་བསྐལ་པའི་ཐུགས་དམ་བསྐང་། །བྱང་ཕྱོགས་ལས་ཀྱི་རིགས་ཀྱི་གཙོ། །ལས་ཀྱི་དབྱིངས་ཕྱུག་མི་ཕྱེད་མ། །བསྐང་ངོ་བསྐལ་པའི་ཐུགས་དམ་བསྐང་། །དབྱིངས་ཀྱི་མ་ཆེན་བརྒྱད་རྣམས་དང་། །ཡུལ་གྱི་མ་ཆེན་བརྒྱད་རྣམས་ཀྱི། །བསྐང་ངོ་བསྐལ་པའི་ཐུགས་དམ་བསྐང་། །བསྐང་བའི་ལེའུ་སྟེ་ཞེ་ལྔ་པའོ།། །།རྡོ་རྗེ་སེམས་དཔས་ཡང་གསོལ་པ། །དམ་ཚིག་འདས་པའི་སྔགས་གཟེར་དང་། །འཇིག་རྟེན་མཚན་མ་བྱོལ་བ་དང་། །ལྷ་འདྲེ་རྫུ་འཕྲུལ་དྲག་གཡོས་དང་། །ངན་སྔགས་རྫུ་འཕྲུལ་ཅི་ལྟར་བཟློག །རྫོགས་སངས་རྒྱས་ལ་བདག་ཉན་འཚལ། །རྫོགས་སངས་རྒྱས་ཀྱིས་བཀའ་སྩོལ་ཅིག །དེ་སྐད་ཞུས་པ་གསན་ནས་ཀྱང་། །རྫོགས་སངས་རྒྱས་ཀྱིས་བཀའ་སྩལ་པ། །དམ་ཚིག་འདས་པའི་སྔགས་གཟེར་དང་། །འཇིག་རྟེན་མཚན་མ་བྱོལ་བ་དང་། །ལྷ་འདྲེ་རྫུ་འཕྲུལ་དྲག་གཡོས་དང་། །ངན་སྔགས་རྫུ་འཕྲུལ་བཟློག་པ་ནི། །ཟློག་པའི་ལས་རྣམས་ངས་བསྟན་གྱི། །ཉོན་ཅིག་རྡོ་རྗེ་སེམས་དཔའི་གཙོ། །ངས་བསྟན་པ་ལ་ཐེ་ཚོམ་མེད། །ངན་སྔགས་ཕུར་བུས་བཟློག་པའི་ཕྱིར། །གཏན་ཚིགས་མན་ངག་འདི་གསུངས་སོ། །བ་ཀོ་འདྲ་བའི་མཎྜལ་བྱ། །སྤང་སྐོང་མཎྜལ་གཞུང་
བཞིན་བྱ། །ཚྭ་ཚྭ་ཅ་ཏི་མང་དུ་གདབ། །ཕྱི་ཡི་བཤགས་པ་མང་དུ་བྱ། །དེ་ནས་གསང་བའི་མཚམས་བཅད་དེ། །ལས་ཀྱི་དཀྱིལ་འཁོར་གཞུང་བཞིན་བྱ། །ནང་གི་སརྦ་རུ་པ་བཏང་། །བསྐང་གསོ་སྤང་སྐོང་མང་དུ་གདོན། །བསྐང་བའི་གནས་ལྔ་གཞུང་བཞིན་བྱ། །མ་ཧཱ་ཤནྟིཾ་ཆོ་ག་བྱ། །མ་མོར་གྲགས་པ་ཀུན་ཀྱང་བསྐང་། །ཡོ་བྱད་ནག་མོ་གཞུང་བཞིན་བཏང་། །རྟགས་དང་མཚན་མ་ཞིབ་ཏུ་བརྟགས། །རྟགས་དང་མཚན་མ་ཟིན་པ་དང་། །བསྐང་བཟློག་ཆོ་ག་བརྩམ་པར་བྱ། །དེས་ནི་མཚན་མ་བཟློག་པར་འགྱུར། །དེ་ནས་བསྐྱར་ཏེ་ཡང་གསུངས་པ། །བསྐང་བ་དེས་ཀྱང་མ་སྐོངས་ན། །དབང་གི་རྒྱལ་པོའི་སྐུར་བསྒོམས་ལ། །རྩ་བ་གང་ཡིན་མ་མོ་དེ། །ཀུ་ཤ་དག་ལ་གཟུགས་བྱས་ལ། །འདའ་ར་པ་ཏིའི་རྒྱུས་པས་གདགས། །ཡེ་ཤེས་མ་མོ་བཅུ་བཞི་ཡང་། །ཆེ་མཆོག་ཧེ་རུ་ཀའི་སྐུར་བསྒོམས་ཏེ། །མགོ་ལུས་བསྣོལ་ཏེ་གདན་དུ་གདིང་། །དེས་ནི་ངན་སྔགས་ཟློག་པར་འགྱུར། །གལ་ཏེ་ལས་སུ་མ་གྲུབ་ན། །བརྟགས་ཏེ་རྩ་བ་གང་ཡིན་པ། །ཤོག་ཤོག་དག་ལ་གཟུགས་བྱས་ཏེ། །མཆོག་གི་ཕུར་བུས་གསང་བར་བརྡེག །སྨན་མོ་ལྔ་བཅུ་རྩ་གསུམ་ཡང་། །འཇག་མ་དག་ལ་གཟུགས་བྱས་ཏེ། །ཟངས་ཀྱི་ཕུར་བུ་དམར་པོས་བརྡེག །དབུས་ཀྱི་མ་མོ་བཅུ་གསུམ་ཡང་། །ཞིང་གི་ཤུན་པ་རས་མ་ལ། །ཁྲག་དང་མཚལ་གྱིས་གཟུགས་བྲིས་ཏེ། །གསེར་རམ་སེར་པོའི་ཕུར་པས་གདབ། །དེས་ནི་ངན་སྔགས་ཟློག་པར་འགྱུར། །གལ་ཏེ་ལས་སུ་མ་གྱུར་ན། །དབུས་ཀྱི་ཆེ་མཆོག་ཡབ་ཡུམ་གཉིས། །སྤྲ་ཚིལ་དག་ལ་གཟུགས་བྱས་ཏེ། །ལྕགས་སམ་ནག་པོའི་ཕུར་པ་ཡིས། །ཐུགས་ཀ་ཉིད་དུ་གདབ་པར་བྱ། །ལས་རྣམས་འགྲུབ་པར་གདོན་མི་ཟ། །ཆོས་ཉིད་དབྱིངས་སུ་གདབ་པར་བྱ། །ཆེ་མཆོག་རྟགས་ཀྱི་ཕྱག་རྒྱས་བརྡེག །འགྱུར་མེད་དབྱིངས་སུ་རྒྱས་གདབ་པོ། །དམ་ཚིག་འདས་པའི་སྔགས་གཟེར་དང་། །འཇིག་རྟེན་མཚན་མ་བྱོལ་བ་དང་། །ལྷ་འདྲེ་རྫུ་འཕྲུལ་དྲག་གཡོས་པ། །ངན་སྔགས་ཕུར་བུས་
བཟློག་པའི་ལེའུ་སྟེ་ཞེ་དྲུག་པའོ།། །།གཡུང་དྲུང་ལྷ་ཡིས་ཡང་གསོལ་པ། །དབང་པོའི་ཐིག་ལེ་ཉམས་པ་དང་། །ཐིག་ལེའི་སྤྱོད་པ་ཉམས་པ་རྣམས། །མྱུར་དུ་བཟློག་ཅིང་གསད་པའི་ཕྱིར། །ཡང་དག་རྫོགས་ལ་བདག་ཉན་འཚལ། །ཡང་དག་རྫོགས་ཀྱིས་བཀའ་སྩོལ་ཅིག །དེ་སྐད་གསོལ་པ་གསན་ནས་ཀྱང་། །ཡང་དག་རྫོགས་ཀྱིས་བཀའ་སྩལ་པ། །སླར་ལ་བཟློག་ཅིང་གསད་པའི་ཕྱིར། །ངེས་པའི་མན་ངག་འདི་བསྟན་གྱིས། །ཉོན་ཅིག་གཡུང་དྲུང་ཡང་དག་པ། །ངས་བསྟན་པ་ལ་ཐེ་ཚོམ་མེད། །རྟགས་དང་མཚན་མ་བྱུང་བའི་ཚེ། །བསྡམས་པའི་ཕྱག་རྒྱ་བཀྲོལ་ནས་ནི། །དགྲ་དེའི་ཡུལ་ཕྱོགས་བསྟན་ནས་ནི། །གྲོ་ག་ཤིང་ཤུན་ར་སོག་ལ། །མི་དེའི་མིང་བྱང་བྲིས་ནས་ནི། །དེ་ཡི་ལག་ཏུ་བསྐུར་ནས་ནི། །ཤུགས་སྒྲོལ་མ་ཡི་སྔགས་ཀྱིས་གདབ། །ཁྲག་དང་དུག་གི་གཏོར་མ་ཡང་། །རབས་ཆད་ཐོད་པར་བཤམས་ནས་ཀྱང་། །ཡུལ་པ་དེ་ཡི་ཕྱོགས་སུ་གཏོར། །ལས་རྣམས་ངེས་པར་གདོན་མི་ཟ། །སྙིང་གི་ཕུར་བུ་ཕྱུང་ནས་ནི། །ཨ་མྲྀ་ཏ་ཡིས་མཆོད་བྱས་ནས། །དམ་རྫས་གཙང་མའི་གཏོར་མ་ལ། །ཀུ་ས་ར་ཡི་རཀྟས་བྲན། །གང་ཡིན་དེ་ཡི་ཕྱོགས་སུ་ཁ་བལྟས་ཏེ། །གཙོ་འཁོར་གཞུང་བཞིན་བསྐུལ་ནས་ནི། །ལུས་ཀྱང་གསིག་ཅིང་ཕྱག་རྒྱ་བསྡམ། །བདག་ཉིད་དབང་གི་སྐུར་བསྒོམས་ཏེ། །དབང་དྲག་ཕྱག་རྒྱ་བཅིངས་ནས་ནི། །གཟུགས་དེ་ཉིད་ལ་ཚམ་རྔམས་བྱ། །དྲག་ཤུལ་དབང་གིས་བསྐྱོད་ལ་བཏང་། །དེ་ལྟར་དྲག་ཤུལ་གྱིས་སྨན་མོ་རྣམས་དབང་དུ་བསྡུས་ལ་བཏང་ངོ་། །དེ་ལྟར་བྱས་ན་ལས་མི་འགྲུབ་མི་སྲིད་དོ། །འདི་རམ་བུ་གུ་ཧྱ་དེ་བ་ཙནྡྲའི་ཐུགས་ཀྱི་མན་ངག་གོ། །བསྡམས་པའི་ཕྱག་རྒྱ་བཀྲོལ་ནས་ནི། །བྲིག་ཤའི་ལྕགས་ཀྱིས་བསྡམས་ནས་ནི། །བེང་གི་ཕྱག་རྒྱ་བཅིངས་ནས་ཀྱང་། །རྡོ་རྗེ་གནོན་འགྲོས་གོམ་པ་ཡིས། །ཕྱོགས་དེར་བདུན་དུ་འགྲོ་བའོ། །ཡབ་ཡུམ་སྔགས་ཀྱིས་བཏབ་ནས་ནི། །བེང་གི་ཕྱག་རྒྱ་དྲག་བསྒྱུར་ནས། །དེས་ནི་མོད་
ལ་ལས་རྣམས་འགྲུབ། །ལན་གསུམ་བྱས་ན་ན་བར་འགྱུར། །ལན་ལྔ་བྱས་ན་འཆི་བར་འགྱུར། །ལན་གསུམ་བར་དུ་དྲིལ་ནས་ནི། །སྙིང་གི་ཕུར་བུ་ཕྱུང་ནས་ནི། །སྤྱི་བོའི་གཙུག་ཏུ་གདབ་པར་བྱ། །ལྕགས་སྣ་ལྔ་ཡི་ཕུར་བུ་ལ། །དབང་དྲག་ལས་རྣམས་གཞུང་བཞིན་བྱ། །དེས་ནི་ངེས་པར་གདོན་མི་ཟ། །མོན་ནམ་རབས་ཆད་ཐོད་པ་ལ། །ནང་དུ་མ་བདུན་སྙིང་པོ་བྲི། །སྤྱི་གཙུག་ཉི་ཟླ་ཐོད་ཕྲེང་བྲི། །ཆགས་འཛིན་སྤུན་གཉིས་རྣ་ལྟག་གོ། །ཚོན་སྐུད་གཉིས་ཀྱི་མིང་ནས་གདགས། །རཀྴ་རུ་ཏའི་སྔགས་ཀྱིས་གདབ། །བེང་གི་ཕྱག་རྒྱ་གཉིས་བསྒྲིལ་ཏེ། །དྲག་ཏུ་བསྐུལ་ཏེ་འཕངས་ལ་བཏང་། །ལས་རྣམས་འགྲུབ་པར་གདོན་མི་ཟ། །ཞིང་གི་ཤ་ཚིལ་རས་རོས་ཀྱིས། །མ་མོ་རྣམས་ལ་གཏང་རག་གཏོང་། །མྱུར་དུ་བཟློག་ཅིང་བསད་པའི་ལེའུ་སྟེ་ཞེ་བདུན་པའོ།། །།གཡུང་དྲུང་ལྷ་ཡིས་ཡང་གསོལ་པ། །བསྟན་པ་གཉན་པོ་འཇིག་བྱེད་ཅིང་། །ལུ་གུ་རྒྱུད་ལས་འགལ་བྱེད་དང་། །སེམས་ཅན་ཀུན་ལ་གནོད་བྱེད་དང་། །བདག་ལ་སྡང་སེམས་བྱེད་པ་ལ། །ནན་ཏུར་ལས་རྣམས་ཇི་ལྟར་འཚལ། །ངོ་མཚར་ལྷ་ལ་བདག་ཉན་འཚལ། །ངོ་མཚར་ལྷ་ཡིས་བཀའ་སྩོལ་ཅིག །དེ་སྐད་གསོལ་པ་གསན་ནས་ཀྱང་། །ངོ་མཚར་ལྷ་ཡིས་བཀའ་སྩལ་པ། །བསྟན་པ་གཉན་པོ་འཇིག་བྱེད་ཅིང་། །ལུ་གུ་རྒྱུད་ལས་འགལ་བྱེད་དང་། །སེམས་ཅན་ཀུན་ལ་གནོད་བྱེད་པ། །བདག་ལ་ངན་སེམས་བྱེད་པ་ལ། །ནན་ཏུར་ལས་རྣམས་ངས་བསྟན་གྱི། །ཉོན་ཅིག་གཡུང་དྲུང་ཡང་དག་པ། །ངས་བསྟན་པ་ལ་ཐེ་ཚོམ་མེད། །སྲོག་ལུས་རྩ་རྣམས་བསྐམ་པའི་ཕྱིར། །ར་སོག་གྲོ་ག་ཤིང་ཤུན་ནམ། །གཡམ་པ་སྔོན་པོའི་ངོས་དག་ལ། །ཁྱི་དང་ར་ཁྲག་སོལ་བ་ཡིས། །དགྲ་བོའི་གཟུགས་ནི་བྲིས་ནས་ནི། །ཚེར་མ་ཅན་གྱི་ཤིང་རྣམས་ལ། །རྫས་ཀྱི་འབྲིག་ཤའི་ཤིང་བུ་ལ། །ར་ཏི་སྨུག་པོའི་ལྕག་འབྲས་བཏགས། །དགྲ་བོའི་གཟུགས་ལ་བརྡེག་པར་བྱ། །ཡང་ན་
ཏི་ཀའི་བ་ཡི་ཤུན་པ་ལ། །ན་ས་འགུ་རུ་ཏ་ཡིས་བྲིས། །མགོ་ལ་མཁའ་འགྲོ་ལྔ་པོ་ནི། །ཙ་ར་མ་ཏི་ཏ་ཡིས་བྲིས། །ལྟེ་བར་ཆགས་འཛིན་སྤུན་གཉིས་བྲི། །རྐང་པ་གཉིས་ལ་མ་བདུན་བྲི། །གཡས་པའི་དུམ་བུ་བཞི་པོ་ལ། །ཕུང་བྱེད་སྦས་པའི་མ་བཞི་བྲི། །གཡོན་པའི་དུམ་བུ་བཞི་པོ་ལ། །ཁྲོས་པའི་དབང་ཆེན་བཞི་པོ་བྲི། །གསང་བའི་ཡུམ་བཞི་ཀླད་པའི་རྒྱས། །ཉི་ཟླ་ཐོད་ཕྲེང་སྙིང་གི་དཀྱིལ། །ཕྲ་མེན་རྒྱ་མཚོ་མཁལ་མ་ལ། །ཡེ་ཤེས་ཚོགས་ཀྱི་རྗེ་མོ་ནི། །ཕུད་ཀྱི་བདག་མོར་བཞུགས་སུ་གསོལ། །ཕྱི་མ་སྨན་མོའི་ཚོགས་རྣམས་ནི། །གདུང་རྩིབ་ཁར་དང་ཀོ་རེའོ། །ཨ་ཕྱི་ཆེན་མོ་རྒྱུངས་པའོ། །དུས་དྲུག་རྒྱུ་བའི་དགྲ་བོ་ནི། །ཤ་བ་གཉན་དང་བ་གླང་ངོ་། །འདི་ནི་ནམ་གྱི་གུང་ལ་རྒྱུ། །རྟ་དང་ལུག་ནི་ར་དང་གསུམ། །འདི་ནི་ཉི་མའི་གུང་ལ་རྒྱུའོ། །རྗེ་ཁོལ་དྲུག་ཅུ་རྩ་བདུན་ནི། །དུས་དྲུག་རྒྱུ་བ་དེ་བཞིན་ནོ། །མྱུར་དུ་བསྒྲལ་བའི་ངན་སྔགས་རྣམས། །གོང་གི་སྔགས་རྣམས་བཟླས་པ་ཡིས། །དགྲ་བོའི་གཟུགས་ལ་བརྡེག་པར་བྱ། །གཡོན་གྱི་དམེ་ལག་བཅད་ནས་ནི། །རང་གི་དཔྲལ་བའི་དབུས་སུ་བཞག །བདུད་ཀྱི་ཆས་སུ་ཞུགས་ནས་ནི། །སྐྲ་བཤིག་མིག་ནས་མཆི་མ་ཕྱུང་། །དེའི་ཕྱོགས་ཉིད་དུ་བསྟན་པས་ནི། །ང་རོ་དྲག་ཏུ་བསྒྲགས་ནས་ནི། །གཡས་པའི་ཕྱག་རྒྱ་སྡིགས་མཛུབ་ཀྱིས། །སྔགས་འདི་དྲག་ཏུ་བཟླས་ལ་བརྡེག །སྙིང་ལ་ཟ་བ་རྩིབ་མ་ཤ་ལ་རོལ། །ཁྲག་ལ་འཐུང་། ཀངྐ་ཀ་ཤ་ཟན། ཡཾ་ཏཾ་ཕར་ལ་ཏོ། ཤ་ལ་ཀྱི་སྤྱང་། ཀྲང་ཧེ་ཀྲང་ཧེ་བཛྲ་བྷནྡྷ། བྷྱོ་རུ་ལུ་རུ་ལུ་ཧཱུཾ་བྷྱོ་ཧཱུཾ། ཞེས་བརྡེག་གོ། །ཁྲག་སྐེམས་ཀྱི་ལེའུ་སྟེ་ཞེ་བརྒྱད་པའོ།། །།རྩ་བའི་རྒྱུད་རྫོགས་སོ།། །།རྒྱ་གར་སྐད་དུ། མ་ཧཱ་བོ་དྷི་ཙིཏྟ་གུ་ཧྱ་ཏནྟྲ། བོད་སྐད་དུ། མ་མོ་བྱང་ཆུབ་ཀྱི་སེམས་གསང་བའི་རྒྱུད། བཅོམ་ལྡན་འདས་དཔལ་ཧེ་རུ་ཀ་ཡབ་མངོན་རྫོགས་ཀྱི་རྒྱལ་པོ་ལ་ཕྱག་འཚལ་ལོ། །སྔོན་འདས་པའི་དུས་མ་བྱུང་བའི་མངོན་
རོལ་ནས། ཡབ་ཀྱི་སྐུ་ཆེ་བའི་ཡོན་ཏན་གྱིས་དགྲ་བགེགས་མནན་ཅིང་གཟིར་བའི་ཕྱིར། འབྱུང་བ་ལྔའི་དབྱིངས་ལས་བསྐྱེད་པའི་བུད་མེད་བཞི་དང་། ཐུགས་ལས་བསྐྱེད་པའི་མ་མོ་དང་། དབྱིངས་ལས་བསྐྱེད་པའི་མ་མོ་དང་། མཁའ་ལས་བསྐྱེད་པའི་མ་མོ་དང་། ཡི་དམ་བསྒོམ་ལེགས་མ་མོའོ། །འདས་པ་དང་མ་བྱུང་བའི་ལེའུ་སྟེ་ཞེ་དགུ་པའོ།། །།རི་རབ་རྩེ་ལ་གཡུང་དྲུང་གི་གནས་ནས། ཐིག་ལེ་ཆེན་པོའི་ཚུལ་དུ་བཞུགས་སུ་གསོལ་ནས། ཡབ་མངོན་རྫོགས་ཀྱི་རྒྱལ་པོས་འབྱུང་བ་ལྔ་སྲིད་པའི་རྒྱུར་བཤིག་ནས་སྐྱེ་འགྲོ་ཐམས་ཅད་དེ་ལས་ཤར་བར་མཁྱེན་ཏེ། ཡབ་མངོན་རྫོགས་ཀྱི་རྒྱལ་པོས། ཐིག་ལེ་ཆེན་པོ་ཡེ་ནས་མཉམ་པ་ལས། ཡེ་ནས་མཉམ་པའི་སླད་བཞིན་དུ། འབྱུང་བ་ལྔ་ཡེ་ནས་སངས་རྒྱས་པར་མཁྱེན་ཏོ། །འབྲས་བུ་བྱང་ཆུབ་སེམས་སུ་ལ་བཟླའོ། །བྱང་ཆུབ་སེམས་སུ་ལ་བཟླ་བའི་ལེའུ་སྟེ་ལྔ་བཅུ་པའོ།། །།ཀུན་གཞི་ཡོངས་སུ་གཏན་ལ་དབབ་པ་ནི། མ་མོ་ལྟ་བ་བྱང་ཆུབ་ཀྱི་སེམས་དང་། མ་མོ་སྤྱོད་པ་བྱང་ཆུབ་ཀྱི་སེམས་དང་། མ་མོ་བསྒྲུབ་པ་བྱང་ཆུབ་ཀྱི་སེམས་དང་། མ་མོ་བསྒོམ་པ་བྱང་ཆུབ་ཀྱི་སེམས་དང་། མ་མོ་སྨོན་པ་བྱང་ཆུབ་ཀྱི་སེམས་དང་། མ་མོ་རྒྱུ་བྱང་ཆུབ་ཀྱི་སེམས་དང་། མ་མོ་འབྲས་བུ་བྱང་ཆུབ་ཀྱི་སེམས་དང་། མ་མོ་རྒྱུ་འབྲས་རྟོགས་པའི་བྱང་ཆུབ་ཀྱི་སེམས་དང་། མ་མོ་ཐུགས་རྗེ་འབྱུང་བ་བྱང་ཆུབ་ཀྱི་སེམས་དང་། མ་མོའི་འབྲས་བུ་གཞན་དུ་མི་འགྱུར་བ་བྱང་ཆུབ་ཀྱི་སེམས་དང་། མ་མོ་རིག་པ་བརྙེས་པ་ཡང་དག་པ་བྱང་ཆུབ་ཀྱི་སེམས་དང་། མ་མོ་སྙིང་རྗེས་སྒྲོལ་བ་བྱང་ཆུབ་ཀྱི་སེམས་དང་། མ་མོ་གནས་ཐ་དད་པའི་བྱང་ཆུབ་ཀྱི་སེམས་དང་། མ་མོའི་དོན་དམ་པ་བྱང་ཆུབ་ཀྱི་སེམས་དང་། ཆོས་ཐམས་ཅད་རང་བཞིན་གྱི་སེམས་སུ་འདུས་ཏེ། སེམས་ཅན་ལ་དོན་བཅུས་བསྟན་ཏེ། མ་མོ་སེམས་ཀྱི་རང་བཞིན་བསྟན་པ་དང་། མ་མོ་སེམས་ཀྱི་འབྲས་བུ་བསྟན་པ་དང་། མ་མོ་སེམས་ཀྱི་ཡུལ་བསྟན་པ་དང་། མ་མོ་སེམས་ཀྱི་རྣམ་གྲངས་བསྟན་པ་
དང་། མ་མོ་སེམས་ཀྱི་རྩ་བ་བསྟན་པ་དང་། མ་མོ་སེམས་ཀྱི་ཡོན་ཏན་བསྟན་པ་དང་། །མ་མོ་སེམས་ཀྱི་སྐྱོན་བསྟན་པ་དང་། མ་མོ་སེམས་ཀྱི་གོལ་ས་བསྟན་པ་དང་། མ་མོ་སེམས་ཀྱི་གཞག་ཐབས་བསྟན་པ་དང་། མ་མོ་སེམས་ཀྱི་ངོ་བོ་ཉིད་བསྟན་པ་དང་བཅུའོ། །མ་མོ་ཀློང་ཡངས་པའི་ཐིག་ལེ་དང་། ཐམས་ཅད་རང་གི་རིག་པའི་ཡེ་ཤེས་འཕྲོས་ཤིང་འདུས་པའོ། །ཀུན་གཞི་ལྟ་བས་ཐག་བཅད་པའི་ལེའུ་སྟེ་ང་གཅིག་པའོ།། །།འགྲོ་བ་འཚམས་པར་འདུལ་བའི་ཆེད་དུ་རི་བཟང་པོ་བྲག་ཆོལ་ཟངས་འདྲ་བ། སྒོ་ཆུ་ལ་ཕུགས་རིང་བའི་ནང་དུ་དཀྱིལ་འཁོར་ཞལ་དབྱེ་སྟེ། ས་བསླང་བ་དང་། ས་བརྟག་པ་དང་། ས་སྦྱང་བ་དང་། སའི་ལྷ་མོ་སྦྲན་ནོ། །ས་ནི་བྱང་ཤར་མཚམས་ལས་བླང་ངོ་། །རྩིགས་པའི་ཆུ་ནི་ལྷོ་དྲང་པོ་ནས་བླང་ངོ་། །སྐྱེས་བུ་སྔགས་མཁན་ནི་ནུབ་དྲང་པོར་བཞུགས་སོ། །ཁྲོ་བོ་བཅུ་ལ་སོགས་པས་མཚམས་དྲག་ཏུ་བཅད་དོ། །འབྱུང་བ་ཆེན་པོ་ལྔ་ཡེ་ནས་སངས་རྒྱས་པའི་སླད་བཞིན་དུ་བྱང་ཆུབ་ཡེ་ནས་མ་གཡོས་པས་དངོས་གྲུབ་རང་བཞིན་འབྱུང་བར་འགྱུར་རོ། །ཡང་དག་རྨད་བྱུང་དཀྱིལ་འཁོར་དུ། །ནུབ་ཏུ་རཀྟའི་ཆག་ཆག་གདབ། །བཀའ་གསང་དམ་པའི་གནས་མཆོག་ཏུ། །དབུས་སུ་དྲི་ཆེན་ཆག་ཆག་གདབ། །བཀའ་གསང་མཆོག་གི་གནས་འདི་རུ། །ཤར་དུ་བྱང་ཆུབ་སེམས་ཀྱི་ཆག་ཆག་གདབ། །ཡོན་ཏན་རིགས་ཀྱི་གསང་མཆོག་ཆེན་པོ་སྟེ། །དམོད་གཟུགས་ལྷོ་རུ་མཱཾ་སའི་ཆག་ཆག་གདབ། །བཀའ་གསང་རྨད་དུ་བྱུང་བའི་དཀྱིལ་འཁོར་དུ། །བྱང་དུ་དྲི་ཆུའི་ཆག་ཆག་གདབ། །ཡང་གསང་ཐུགས་ཀྱི་དཀྱིལ་འཁོར་དུ། །གཟི་བྱིན་བསྐྱེད་ཕྱིར་ཚིལ་ཆེན་ཆག་ཆག་གདབ། །དེ་ནས་གནམ་ཐིག་གདབ་པར་བྱ་སྟེ། །དམོད་གཟུགས་ཚོན་སྐུད་འཁེལ་དུ་གཞུག །འཁོར་ལོ་རྩིབས་བཞི་ཐིག་ཏུ་གདབ། །ཐིག་རས་བོར་ལ་ས་ཐིག་ནི། །འཁོར་ལོ་རྩིབས་བཞིའི་ཐིག་ཏུ་གདབ། །ལྟེ་བ་ཟླུམ་པོར་བསྐོར་ལ་ཟླ་གམ་བྱ། །ཕྱི་རིམ་སོར་གསུམ་ཐོད་པས་བསྐོར། །འཁོར་ལོ་རྩིབས་བཞི་ཟླུམ་པོར་བསྐོར། །
ཐོད་རློན་ཕྲེང་བ་གདབ་པར་བྱ། །གྲུ་ཆད་བཞི་དང་ལྡན་པར་བྱ། །ཕྱི་རིམ་སྣམ་བུ་སེར་པོ་གྲུ་བཞི་ལ། །སོར་གསུམ་བཅད་ལ་རྡོ་རྗེ་བཏང་། །དེ་ཡི་ཕྱི་རིམ་སྣམ་བུ་གྲུ་བཞི་ལ། །སྒོ་ཁྱུད་བཞི་དང་ལྡན་པར་བྱ། །ཚོན་ཕྱེ་བྱིན་བརླབ་བྲི་བར་བྱ། །དབུས་ཀྱི་ཟླ་གམ་དམར་པོ་ལ། །མངོན་རྫོགས་རྒྱལ་པོ་དགོངས་པའི་ཁྱད་པར་བཞུགས་སུ་གསོལ། གཡོན་གྱི་ཟླ་གམ་དམར་པོ་ལ། ཡུམ་ཀུན་བཟང་དབྱིངས་ཀྱི་ཆོས་བདག་མོ་བཞུགས་སུ་གསོལ། འཁོར་ལོའི་རྩིབས་བཞི་ལ་རྒྱལ་མོ་བཞི་བཞུགས་སུ་གསོལ། དེ་ནས་ཟླ་གམ་དཀར་པོ་ནི་ཆོས་ཀྱི་སྐུའི་རང་བཞིན་ནོ། །དམར་པོ་ནི་ལོངས་སྤྱོད་རྫོགས་པའི་རང་བཞིན་ནོ། །ཚོན་ཚོགས་སུ་ནི་སྣང་བ་ནི། །སྤྲུལ་པའི་སྐུའི་རང་བཞིན་ནོ། །བྷནྡྷ་བརྒྱད་དམ་ལྔའམ་གསུམ་བཀོད་དེ། རྒྱལ་མོ་བཞིའི་སྐུ་གསུང་ཐུགས་ཕྱོགས་བཞིར་དགོད་དོ། །སྤྱང་ཀིའི་ཁྲག་ཐིགས་གཅིག་དང་། མཚལ་ཆེན་གྱི་ཐིགས་གཅིག་གིས་ནི། ཆགས་ཤིང་འཇིག་ཅིང་འཐོར་བར་འབྱུང་ངོ་། །ཁྲག་སྣ་གཞན་དང་བསྲེས་ལ་བྷནྡྷའི་ནང་དུ་བླུག་གོ། །རིན་ཆེན་གསེར་ཕྱེ་མེ་ལོང་བཞི་དང་། བུད་མེད་མཚན་དང་ལྡན་པའི་ནུ་ཞོ་དང་། སྐྱེས་བུའི་བྱང་ཆུབ་སེམས་སུ་སྦྱར་བས་འཕགས་པ་དང་མ་མོའི་ཐུགས་དམ་བསྐང་ངོ་། །ཡེ་ཤེས་ཀྱི་ལྷ་གསལ་བར་བསྒོམ་མོ། །ཡེ་ཤེས་ཁྲག་སྣ་མང་པོའི་རྟེན་བཅའ་ཞིང་གཡང་གཞི་དང་མ་བྲལ་བ་ཡང་དགྲམ་མོ། །དཀྱིལ་འཁོར་བཅའ་གཞིའི་ལེའུ་སྟེ་ང་གཉིས་པའོ།། །།ཧཱུཾ་དམིགས་མེད་དབྱིངས་ཀྱི་རང་བཞིན་ནི། །དམིགས་མེད་ཡུམ་གྱི་དབྱིངས་སུ་གསལ། །སྙིང་རྗེ་ནམ་མཁའི་ངོ་བོ་ལས། །རིག་པའི་ཡེ་ཤེས་བདེ་ཆེན་མཁའ། །དམིགས་སུ་མེད་པའི་མཁའ་དབྱིངས་ལས། །ཡི་གེ་ཧཱུཾ་གཅིག་གསལ་བར་བསྒོམ། །ཨེ་ཏཾ་མཾ་ལཾ་བཾ་བྷྲཱུཾ་བྷནྡྷ་ཛྙཱ་ན་ཙཀྲ་ཧཱུཾ། ཕྱི་ནི་རིན་པོ་ཆེ་ལས་གྲུབ་པ། ནང་བྷནྡྷའི་གཞལ་ཡས་ཁང་། གནམ་ལྕགས་ཀྱི་གཟེར་ཆེན་བཏབ་པ། ཕྱི་ནང་སྣང་ལ་རང་བཞིན་མེད་པ། དབུས་གྲུ་གསུམ་ཟླ་གམ་དམར་པོ་གསུམ་གྱིས་བསྐོར་བ།
འཁོར་ལོ་རྩིབས་བཞི་གྲུ་ཆད་དང་ལྡན་པ། ཕྱི་དང་ནང་མེད་པ་ཀུན་ཏུ་ཡང་ནང་དུ་གྱུར་པ། ཐོད་པ་སྐམ་རློན་གྱི་ཕྲེང་བས་བརྒྱན་པ། སྦྲུལ་ནག་གི་ཆུན་འཕྱང་གིས་བརྒྱན་པ། ཉི་ཟླའི་གདན་བཏིང་བ། དེའི་སྟེང་དུ་ལྷ་ཆེན་དང་། ཁྱུ་མཆོག་གདན་དུ་བཏིང་བ། དེའི་སྟེང་དུ་ཨོཾ་ཤྲཱི་ཧེ་རུ་ཀ་ཧཱུཾ། ཞེས་བརྗོད་པས། དབུ་དགུ་ཕྱག་བཅོ་བརྒྱད་པར་བསྒོམ། ཨོཾ་ཀྲོ་དྷཱི་ཤྭ་རཱི་ཧཱུཾ། ཞེས་བརྗོད་པས་ཡུམ་ཡང་བསྐྱེད། དེ་ནས་ཡབ་ཡུམ་རོལ་ཏེ། ཨངྐུ་ཤ་ཛཿ། པྲ་ཝེ་ཤ་ཕཊ། པཱ་ཤ་ཧཱུཾ། མ་ཧཱ་སུ་ཁ་སྥོ་ཊ་བཾ། བཛྲ་གྷཎྜ་ཧོཿ། སེམས་ལས་བསྐྱེད་པའི་མ་མོ་བཅུ་གསུམ་དང་། ཡེ་ཤེས་མ་མོ་བཅུ་བཞི་དག །དྲུག་ཅུ་རྩ་བརྒྱད་དཀྱིལ་འཁོར་རྫོགས། །ཡང་དག་ཐུགས་ཀྱི་མ་མོ་བཞི། །དང་པོ་བསྐྱེད་ཀྱང་ཐུགས་ལས་བསྐྱེད། །ཕྱོགས་བཞི་དབུས་དང་ལྔ་རུའོ། །དབང་ཆེན་གྱི་དཀྱིལ་འཁོར་གྱི་ལེའུ་སྟེ་ང་གསུམ་པའོ།། །།ད་ནི་ཡུམ་ཆེན་མོ་སྤྱན་དྲང་ངོ་། །མ་གཅིག་ཀུན་བཟང་དབྱིངས་ཀྱི་ཆོས་བདག་མོ། །སྤྱན་འདྲེན་མཆོད་ཀྱི་གཤེགས་སུ་གསོལ། །དུར་ཁྲོད་འབར་བའི་དཀྱིལ་འཁོར་དུ། །དགྱེས་ཤིང་བརྟན་པར་བཞུགས་སུ་གསོལ། །ཡ་མཚན་འཕྲུལ་གྱི་དངོས་གྲུབ་སྩོལ། །དང་པོ་སེམས་ལས་བསྐྱེད་པ་སྟེ། །ཁ་བློན་ཆེན་མོ་སྤྱན་དྲང་ངོ་། །སྔོན་ཚེ་དཔལ་ཆེན་སྤྱན་སྔ་རུ། །ཁ་བློན་ཆེན་མོར་ཞལ་བཞེས་ཀྱི། །ཐུགས་དམ་རྒྱུད་བསྐུལ་གཤེགས་སུ་གསོལ། །མི་ནུབ་རྒྱལ་མཚན་ཞེས་ཀྱང་བྱ། །དེ་ནས་སྒོ་བློན་ཆེན་མོ་སྤྱན་དྲང་ངོ་། །སྔོན་ཚེ་དཔལ་ཆེན་སྤྱན་སྔ་རུ། །སྒོ་བློན་ཆེན་མོར་ཞལ་འཆེས་ཀྱི། །ཐུགས་དམ་རྒྱུད་བསྐུལ་གཤེགས་སུ་གསོལ། །དེ་ནས་ཕྲིན་ལས་ཆེན་མོ་སྤྱན་དྲང་ངོ་། །སྔོན་ཚེ་དཔལ་ཆེན་སྤྱན་སྔ་རུ། །ཕྲིན་བློན་ཆེན་མོར་ཞལ་བཞེས་པའི། །ཐུགས་དམ་རྒྱུད་བསྐུལ་གཤེགས་སུ་གསོལ། །ད་ནི་དུར་ཁྲོད་བདག་མོ་སྤྱན་དྲང་སྟེ། །དུར་ཁྲོད་བདག་མོ་ཤྲི་ཛ་མུན་ཏི། །དཔལ་ཆེན་ཐུགས་ཀྱི་སྲས་མོ་སྟེ། །མཐིང་ནག་རླུང་ཞོན་ཛ་མུནྟྲཱི། །སྔོན་ཚེ་དཔལ་ཆེན་
སྤྱན་སྔ་རུ། །སྲས་མཆོག་དམ་པར་ཁས་བླངས་ཏེ། །ཐུགས་དམ་རྒྱུད་བསྐུལ་གཤེགས་སུ་གསོལ། །ཡུམ་གྱི་སྙིང་པོ་ས་མཱ་ཛ། ཁ་བློན་གྱི་སྙིང་པོ་སྤྱི་དྲི་སྤྱི་དྲི་མ་སྙིང་ཁ་རག་ཛ་ཛ། སྒོ་བློན་གྱི་སྙིང་པོ། རཀྴ་མ་སྙིང་ཁ་རཀྴ་ཛ་ཛ། ཕྲིན་བློན་གྱི་སྙིང་པོ་རཀ་མོ་རཀྴ་སྙིང་ཁ་རག་ཛ་ཛ། ཛ་མུནྟྲིའི་སྙིང་པོ། ཧཱུཾ་ཤྲཱིཿ ཛ་མུནྟྲི་བར་དྷ་ཡི་ཏིཥྚ་ཛྭ་ལ་ནི་ཧཱུཾ་ཕཊ་ཛཿ། གོང་གི་མ་མོ་དེ་རྣམས་ནི། རྩ་ཆེན་པོ་བཞི་ལས་བསྐྱེད་པའོ། །འབྱུང་བ་ལྔ་ལས་རྟག་པའི་རྒྱལ་མོ་སྤུན་ལྔ་བསྐྱེད་དོ། །འགྲི་ས་མུ་ཧཱུཾ་ཧ། ཛྭ་ལ་པ་རཾ་ཧ། བི་ཤྭ་སི་ཏི་ཧ། ཀྲོ་དྷཱི་ཤྭ་རཱི་ཧ། བི་ཡ་ཡཾ་ཏེ་ཧ། ཀྲོ་དྷཱི་ཤྭ་རཱི་ཧི་ཀ་མ་ལ་ཤྭ་རཱི་ཧ། ཀ་མ་དེ་ལ་ཧེ་སི། སོ་སོའི་གནས་ནས་བསྐྱེད་པར་བྱ། །བྱེད་པ་པོ་དང་བྱ་བ་མོ། །ཕ་མ་མེད་པའི་བུ་མོ་གཉིས། །སྲིད་པ་སྔོན་དུ་བྱུང་བ་ཡིན། །སངས་རྒྱས་པས་ཀྱང་ཤིན་ཏུ་བགྲེས། །ལྔ་ལས་བྱུང་བའི་བུད་མེད་ལྔ། །གཉིས་གཉེན་མེད་ཀྱང་མེད་སྲིད་པའི་གཡུང་དྲུང་ཡིན། །བསྐྱེད་པའི་ཁྲོ་མོ་བཅུ་གསུམ་ནི། །ཅིར་མི་འོང་བའི་སྤུན་དྲུག་ཡིན། །མཚོན་དུ་མེད་པའི་ནམ་མཁའ་ལས། །གཟའ་སྐར་མང་པོ་འཆར་བ་ལྟར། །སྐྱེ་འགག་མེད་པའི་དབྱིངས་སུ་ཐིམ། །ཆོས་ཐམས་ཅད་བསྒྲུབ་པ་ལ་གཅད་པའི་ཕྱིར། དཀྱིལ་འཁོར་གྱི་སྤྱན་དྲང་བའི་ལེའུ་སྟེ་ང་བཞི་པའོ།། །།འདིར་ནི་རྩ་ཆེན་པོ་བཞི་ལས། སུམ་བརྒྱ་དྲུག་ཅུར་གྱེས་པ་ནི། མ་མོ་སུམ་བརྒྱ་དྲུག་ཅུའོ། །དེ་ཡང་ཡང་གབ་བཞི་ནི་རྩ་ཆེན་པོ་བཞི་ལ་གནས་སོ། །དེ་ནི་ཡོན་ཏན་གྱི་རྩ་བཞི་དང་། སྐྱོན་གྱི་རྩ་བཞིའོ། །འཆི་བར་བྱེད་པའི་བདུད་ཀྱང་ཡིན། འཚོ་བར་བྱེད་པའི་སྨན་ཀྱང་ཡིན། རྣམ་པར་ཤེས་པ་གཞེར་འདེབས་ཞེས་ཀྱང་བྱ། འོད་ཀྱི་རང་བཞིན་དུ་གནས་སོ། །རྒྱུ་ཆོས་ཀྱི་དབྱིངས་དང་།འབྲས་བུ་རིག་པའི་ཡེ་ཤེས་གཉིས་སུ་མེད། འབྱུང་བ་ཆེན་པོ་ལྔ་ནི་རྒྱུ་ཆོས་ཀྱི་དབྱིངས་སོ། །ཡེ་ཤེས་འབྱུང་བ་ལྔ་ནི་འབྲས་བུ་ཡིན་ཏེ། བདེ་བ་ཆེན་པོ་འཇིག་རྟེན་གྱི་མ་མོ་ཐམས་ཅད་ནི། ཚིག་དང་དོན་འདིར་འདུས་སོ། །འདི་བཞི་ནི་ཡང་གབ་དབང་གི་རྒྱལ་མོ་བཞི་ཞེས་བྱའོ། །
སེམས་ལ་བསྐྱེད་པའི་མ་མོ་བཞི་དང་། དམ་ལ་གནས་པའི་སྲིང་མོ་བཞི། ཡིད་ལ་གཞུང་བའི་མཛའ་མོ་བཞི། ལུས་ལ་བསྐྱེད་པའི་མ་མོ་བཞི། བདུད་རྩི་སྒྲུབ་པའི་རྒྱལ་མོ་བཞི། ཕུར་བུ་སྒྲུབ་པའི་བློན་མོ་བཞི། མ་མོ་ཀུན་གྱི་གཙོ་མོ་བཞི། མ་མོ་ཐུན་གྱི་བདག་མོ་བཞི། ལས་ལ་གཤིན་པའི་བྲན་མོ་བཞི། དགྲ་བོའི་སྙིང་འཕྲོག་ལྷ་མོ་བཞི། ཐམས་ཅད་ཡང་གབ་ལྷ་མོ་བཞི་རུ་འདུས། ཉིས་བརྒྱ་དང་ནི་ནུབ་པོ། །ཐུགས་རྩ་བའི་མན་ངག་གི་ལེའུ་སྟེ་ང་ལྔ་པའོ།། །།ཡང་གབ་དབང་གི་རྒྱལ་མོ་བཞི་ལ་སོགས་པ། མ་མོ་རྣམས་སྤྱན་དྲང་བའི་སྔགས་ནི། ཏྲག་རཀྴ་མུ་ཏྲ། ཁ་མུན་ཏྲ་རག་མོ་ཛ་ཛ་ཏེ་ཁུམ་ཁ་ལ་མ་ཏི་བྷྱོ་བྷྱོ། རྒྱུན་མ་ཆད་པར་དེ་བཟླས་པས་ནི། རང་དབང་མེད་པར་ནམ་མཁའ་ལ་སྤྲིན་འདུས་པ་བཞིན་ཐམས་ཅད་ཀྱང་ཚོགས་སོ། །རྦད་པའི་སྙིང་པོ་ནི། ཏྲག་རཀྴ་མུ་དྲ་སྙིང་ཁ་རག་རྦད། ཆུམས་ཐུམ་རིལ་ལི་རྦད་བྷྱོ། མ་མ་ར་ཙ་ཡ་ཡཱ་ཐུན་བྷྱོ། སྙིང་པོ་སྔགས་ཀྱི་ལེའུ་སྟེ་ང་དྲུག་པའོ།། །།བྷནྡྷའི་ནང་དུ་ཁྲག་སྣ་སྟོང་རྩ་བརྒྱད་དང་། ཤ་སྣ་སྟོང་རྩ་བརྒྱད་དང་། སྙིང་སྣ་སྟོང་རྩ་བརྒྱད་བླུགས་ལ་དེ་ནས་སྦྲེངས་ཤིང་བསྐུལ་ལོ། །དམ་རྫས་ཙིཏྟ་བརྒྱད་དང་། རཀྟ་བརྒྱད་ཀྱང་དབུལ་ལོ། །མ་རྙེད་ན་འབྱོར་ཚོད་དེ། ཁྲག་གཅིག་དང་། མངལ་ཁྲག་གཅིག་སྦྲེངས་ཤིང་ཐུགས་དམ་བསྐུལ་བ་ནི། གླིང་གཞི་མུན་པའི་གཡུང་དྲུང་འདས་པའི་ཕ་རོལ་ན། །གསེར་གྱི་རི་བདུན་འདས་པའི་ཕ་རོལ་ན། །ལྕགས་མཚོ་ནག་པོ་འཁྱིལ་པའི་ཕ་རོལ་ན། །གསེར་གྱི་ཁྲི་ལ་གཡུ་ཡི་གདན་འདིང་མ། །སྣང་སྲིད་ཐམས་ཅད་དབང་དུ་སྡུད་མཛད་མ། །སྐྱེ་འགྲོ་མཐའ་ལ་ལེགས་ཉེས་སྟངས་འཛིན་མ། །ཐོག་གི་རྒྱལ་མོ་གློག་ཕྲེང་མ། །སྲིང་གཅིག་ཆེན་མོ་ཀླུ་ཡི་རྗེ། །སྐུ་ལ་རྨ་བྱའི་ཐུལ་པ་གསོལ། །ཐ་མ་གཡུ་ཡི་རྡོ་རྗེས་གཏམས། །བུད་མེད་གསེར་གྱི་གོ་ལྕོག་ཅན། །སྤྱན་མིག་གཡས་པ་ཟླ་བ་འཁྱིལ་པ་ཙམ། །གཡོན་པ་ཉི་མ་འཁྱིལ་པ་ཙམ། །བཞུགས་ནི་ཉི་མ་ལྷོ་ན་བཞུགས། །མཚོ་སྨན་ཆེན་མོ་
ལེགས་ཉེས་སྟངས་འཛིན་མ། །སྐུ་ནི་མི་བསྐྱོད་དབྱིངས་ན་བཞུགས། །ཕྱག་ན་འཕྲུལ་གྱི་མེ་ལོང་བསྣམས། །རྣམ་པར་ཐར་པའི་ལམ་སྟོན་མ། །སངས་རྒྱས་རྣམས་དང་དགོངས་པ་མཐུན། །དབང་ཕྱུག་ཕྲ་མེན་རྣམས་ཀྱི་དགོངས་སྤྱོད་ཅན། །སྲིད་པ་གསུམ་གྱི་ལེགས་ཉེས་སྟངས་འཛིན་མ། །གླིང་བཞི་སེམས་ཅན་ཚེ་ཚད་གཏན་ལ་འབེབས། །རྒྱལ་རིགས་རྣམས་དང་ལས་སྟབས་གཅིག །ལེགས་ལྡན་ནག་པོ་ཕོ་ཉར་འགྱེད། །ཀླུ་ཡང་ཕོ་ཉར་ཕྱོགས་བཅུར་འགྱེད། །ཀླུ་རྣམས་ཀུན་ལ་དབང་བསྒྱུར་མ། །ཁམས་གསུམ་མ་ལུས་དབང་དུ་སྡུད། །གནས་ནི་མ་པང་མཚོ་ལ་གནས། །ཐུགས་རྗེ་མཚོ་ནི་ཆོས་ཀྱི་དབྱིངས། །སྲིད་པ་གསུམ་གྱི་མཚོ་ཆེན་ཡང་། །དབྱར་ནི་མི་སྐྱེ་རྒུན་མི་འཁྱག །མ་པང་མཚོ་ལ་དཔལ་གནས་སོ། །གཡས་ན་སྲིད་པའི་འཁོར་ལོ་བསྣམས། །གཡོན་ན་འཕྲུལ་གྱི་མེ་ལོང་བསྣམས། །ཚེ་ཡི་བུམ་པ་ཕྱག་ན་བསྣམས། །ལེགས་ཉེས་རྣམས་ཀྱི་སྟངས་འཛིན་མ། །རྣལ་འབྱོར་དམ་ཚིག་ཅན་ལ་དངོས་གྲུབ་སྩོལ། །བཅོལ་བའི་ལས་རྣམས་གྲུབ་པར་མཛོད། །ད་ནི་དཀར་མོ་དབུ་ལྔ་མ་བསྐུལ་ཏེ། དཔལ་ཆེན་ཐུགས་ལས་སྤྲུལ་པའི་སྲས་མོ་སྟེ། །གནས་ནི་རོལ་མཚོ་བདུན་ལ་གནས། །ཆིབས་སུ་འཇིགས་པའི་མགོ་དགུ་བཅིབས། །སྐུ་ནི་ཤེལ་སྒོང་དྭངས་པ་འདྲ། །ཉི་མའི་ཟེར་བས་ཤིན་ཏུ་འཚེར། །ཟླ་བའི་འོད་ལས་དཀར་ལ་དྭངས། །སྐུ་ཡི་འོད་ཀྱིས་སྟོང་ཁམས་ཁྱབ། །ཞལ་ནས་འཇིགས་པའི་སྐར་མདའ་འཕྲོ། །དགུ་ཚིགས་གཞུང་དུ་བརྡུང་བ་མོ། །སྐར་ཆེན་མདའ་རུ་འཕེན་པ་མོ། །དགྲ་སྙིང་ཕུར་གྱིས་འདེབས་པ་མོ། །ཆེ་ཞེ་མོན་མོ་དབང་ཕྱུག་མོ། །ཤ་ཁྲག་དམར་གྱི་དྲི་སྣོམ་མོ། །ལེགས་ཉེས་གཉིས་ཀྱི་སྟངས་འཛིན་མ། །དམ་ཚིག་ཅན་གྱི་རྗེས་གཅོད་མོ། །ཐོག་དང་སེར་བ་ཞལ་ནས་འཕེན། །སྦྲུལ་ནག་སྟོང་གི་ཞགས་པ་འདེབས། །ཟླ་བ་ཚེས་པའི་སྤྱན་ཟུར་གཟིགས། །ཁམས་གསུམ་མ་ལུས་ས་ལེར་མཁྱེན། །སྲིད་གསུམ་མ་ལུས་ཟིལ་གྱིས་གནོན། །དགྲ་བོ་དམ་ཉམས་གཤེད་དམར་ཞལ་གྱིས་བཞེས། །རྣལ་འབྱོར་དམ་ཚིག་ཅན་ལ་དངོས་གྲུབ་
སྩོལ། །ད་ནི་གུ་ཧྱ་མ་བསྐུལ་ཏེ། །གངས་དཀར་རྩེ་ལ་གནས་པ་མོ། །ལས་སུ་བཅོལ་ན་ཀུན་ཀྱང་འགྲུབ། །ཕྱག་ན་གསང་བའི་མཆོག་ཕུར་བསྣམས། །དགྲ་བགེགས་སྙིང་ལ་གཟེར་འདེབས་མ། །སྐུ་ལ་བཙོས་ཀྱི་ལའུ་ནག་གསོལ། །ཞལ་ནས་སྒྲ་ཆེན་འབྲུག་ལྟར་སྒྲོགས། །ཕྱག་ནས་ཐོག་འཛག་དགྲ་སྙིང་སྐྲག །ཐུགས་ནི་དགྲ་བོའི་ཙིཏྟ་རློམ། །སྤྱན་གྱིས་སྟོང་ཁམས་ཁྱབ་པར་གཟིགས། །སྨུག་ནག་ཆེན་མོ་དབུ་ལྔ་མ། །ཙིཏྟ་སྟོང་གི་མངའ་བདག་མོ། །ནམ་མཁའི་ཁམས་ལ་དབང་སྒྱུར་མ། །སྟོན་ཟླ་གསུམ་ལ་མངའ་མཛད་མ། །འབྲས་བུ་ལོ་ཐོག་བཅུད་ལེན་མ། །དབྱར་ཟླ་གསུམ་ལ་མངའ་མཛད་མ། །ཐོག་དང་སེར་བའི་སྣ་འདྲེན་མ། །མེ་ཏོག་ཀུན་གྱི་མདངས་ལེན་མ། །སེམས་ཅན་ཀུན་གྱི་སྲོག་གཅོད་མ། །དགུན་ཟླ་གསུམ་ལ་སྡོམས་མཛད་མ། །ཐེའུ་བྲང་ཧས་པོ་དབང་སྒྱུར་མ། །དཔྱིད་ཀྱི་ཟླ་གསུམ་མངའ་མཛད་མ། །རླུང་དང་འཚུབ་མའི་སྣ་འདྲེན་མ། །སྲིད་པའི་བུ་མོ་ཐུགས་དམ་ཅན། །ཐུགས་དམ་དུས་ལ་བབ་ཀྱི་གཤེགས་སུ་གསོལ། །ད་ནི་ཁྲག་སྐྱུགས་མའི་བདག་མོ་བསྐུལ་ཏེ། ཧཱུཾ། དུར་ཁྲོད་བདག་མོ་ཤྲཱི་ཛ་མུནྟྲི། །སྐུ་མདོག་དམར་སྨུག་ཆེན་མོ་ལ། །ཕྱག་ན་མི་ཐོད་ཕྲེང་བ་རྣམས། །ནུ་མའི་བཤལ་ཁས་གསུས་པ་ཁེབས། །ཡར་བལྟས་གནམ་གྱི་ལྷ་རྒྱལ་མོ། །མར་བལྟས་ས་ཡི་ཀླུ་རྒྱལ་མོ། །ཆིབས་སུ་མགྱོགས་པ་རླུང་ལ་ཆིབས། །ན་བཟའ་གོ་ཟུ་ནག་པོ་མནབས། །ཞལ་ནས་རྫི་བ་འབུད་པ་མོ། །ཕྱག་ན་ཟངས་ཀྱི་རྒྱུད་ཞགས་ཐོགས། །གཡོན་ནི་འཛིན་འགུགས་བྱེད་པའི་ཕྱག །སྡང་བའི་དགྲ་བོ་ཁུགས་ལ་སྒྲོལ། །རླུང་གི་ཕྱོགས་ནས་ཕོ་ཉ་འགྱེད། །སྤྲུལ་པ་ཤ་ཞོན་མང་པོ་གཏོང་། །སྡང་བའི་དགྲ་བོ་དྲོངས་ཤིག་ཁུག །ཅེས་བརྗོད་ལ། ཐུགས་དམ་བསྐང་པའི་རྫས་ཤེལ་སྨུག་པོ་དང་། ཀུ་ཀུ་རཱ་ཙ་དཀར་པོ་ཤེལ་མིག་དང་། རྨ་བྱའི་མདོངས་དང་། རཀྟ་མང་པོ་སྦྲོངས་ཤིང་ནམ་གྱི་གུང་ལ་ཐུགས་དམ་བསྐང་ན་ཟློག་པར་འགྱུར་རོ། །དམ་ཚིག་ཉམས་ན་མི་བཟློག་གོ། །
སྲིད་པའི་མ་མོ་དང་། འཇིག་རྟེན་གྱི་མ་མོ་དང་། འཇིག་རྟེན་གྱི་ལྷ་འདྲེ་ཐམས་ཅད་ལ་དཔང་གཟུག་གོ། །མ་ཚང་ཚིག་བསྐང་བའི་ལེའུ་སྟེ་ང་བདུན་པའོ།། །།ཞིང་ལྤགས་གཡང་གཞི་དང་མ་བྲལ་བ་བདུན་ཡང་བླ་རེར་གདགས། ཞིང་གི་གུར་ཐབས་དང་། ཞིང་གི་རྦད་ཕུར་དང་། མཆོག་ཕྲན་ཡང་དགྲམ་མོ། །ཙིཏྟའི་ཕོ་ལོང་དང་། མི་དབང་གི་འབྲས་བུ་དང་། མཚལ་ཆེན་བཏབ་པའི་རཀྟ་དང་། སྣེལ་གྲིར་ཤི་བའི་མདོང་མོ་དང་། སྦྲུལ་དཀར་ནག་ལ་སོགས་པས་བརྒྱན་ནོ། །བྱང་ཆུབ་སེམས་དང་ཙིཏྟ་ཕྲུག་པར་བྱ། ལྷོ་ཕྱོགས་ཀྱི་བྷནྡྷར་གླང་པོ་ཆེའི་འབྲས་བུ་གཅིག་དང་། ཙིཏྟ་གཅིག་གིས་རཏྣ་སམ་བྷའི་ཐུགས་དམ་བསྐང་ངོ་། །ནུབ་ཕྱོགས་ཀྱི་བྷནྡྷར་རྨ་བྱའམ་བྱ་མཚལ་བུའི་འབྲས་བུ་དང་། བུད་མེད་སྐྲ་སེར་ལ་ལི་བའི་རཀྟ་གཅིག་གིས་པདྨ་ཧེ་རུ་ཀའི་ཐུགས་དམ་བསྐང་ངོ་། །བྱང་ཕྱོགས་སུ་ཤང་ཤང་ངམ། ཕ་ཝང་གི་འབྲས་བུ་དང་། ཅི་ཡང་རུང་བའི་འབྲས་བུ་ཙིཏྟ་གཅིག་གིས་དོན་ཡོད་གྲུབ་པའི་ཐུགས་དམ་བསྐང་། ཤར་ཕྱོགས་སུ་བྷནྡྷར་གླང་པོ་ཆེའམ། རྟ་སྔོན་པོ་གཅིག་གི་འབྲས་བུ་གཅིག་གིས། རྡོ་རྗེ་སེམས་དཔའི་ཐུགས་དམ་བསྐང་ངོ་། །དབུས་ཀྱི་བྷནྡྷར་དྲི་ཆེན་དང་། ཁྱི་དཀར་པོ་གཅིག་གི་འབྲས་བུའམ་ཙིཏྟས་རྣམ་པར་སྣང་མཛད་ཀྱི་ཐུགས་དམ་བསྐང་ངོ་། །གཟུགས་དང་མིང་རུས་ལྡན་པར་བརྟགས། །རྩིབས་ཆ་ལྔ་དང་དབུས་ལ་དགོད། །ཙིཏྟ་དཔེའུ་ཆུང་གི་ལེའུ་སྟེ་ང་བརྒྱད་པའོ།། །།བྷནྡྷ་བཅོ་བརྒྱད་མེད་དུ་མི་རུང་། ཁྲག་སྣ་སྟོང་རྩ་བརྒྱད་མ་རྙེད་ནའང་། བཅོ་བརྒྱད་མེད་དུ་ཡིད་མི་རུང་ངོ་། །ཤ་སྣ་སྟོང་རྩ་བརྒྱད་མེད་ནའང་བརྒྱ་རྩ་བརྒྱད་མེད་དུ་མི་རུང་། སྨན་སྣ་སྟོང་རྩ་བརྒྱད་མེད་ན་ཡང་། བརྒྱ་རྩ་བརྒྱད་མེད་དུ་མི་རུང་། གསུར་ཆེན་གྱི་དུད་པ་ཡང་རྒྱུན་མི་གཅད་པར་བཏང་ངོ་། །གཟུངས་མ་མཚན་དང་ལྡན་པ་བརྒྱད་མ་རྙེད་ནའང་། བཞི་མེད་དུ་མི་རུང་ངོ་། །དགོངས་པ་མཁན་གཅིག །སྐྱེས་བུ་སྔགས་མཁན་ངར་ཅན་གཅིག་དགོས་སོ། །དལ་གྱི་གྲྭ་བཞིར་ཁམ་རྒྱ་ཆེན་མོའི་སྙིང་པོ་བྲི། དཀྱིལ་
འཁོར་གྱི་མུ་རན་ལ་ལོང་བ་རྒྱབ་སྦྲེལ་བྲིའོ། །ཡང་སྤྲུལ་དང་བཅས་པར་བྱ། ཕུར་བུ་བརྒྱ་རྩ་བརྒྱད་ཀྱིས་དཀྱིལ་འཁོར་མཐའ་མ་བསྐོར། མདའ་བཞི་ཡང་ཁྱམས་སུ་གཟུག །བྷནྡྷ་བཞི་དགོད་དེའི་བར་ཁྱམས་བཞི་རུ་གསེར་ཕྱེ་མེ་ལོང་བཞི་དགོད་དོ། །དཀྱིལ་འཁོར་བཞི་རྒྱན་གྱིས་བརྒྱན་ནོ། །དཔལ་ཆེན་པོ་རྩ་བཞི་ལས་བསྐྱེད་དེ། ནང་རྟགས་ཕྱིར་ཕྱུང་བས་སྨེ་བ་དཀར་ནག་ཏུ་ཕྱུང་སྟེ། སྨེ་བ་མདངས་ཀྱི་མ་མོ་ཞེས་ཀྱང་བྱའོ། །དྲག་པོ་ཕུར་བུ་ལ་སྔགས་པ་ནི། མ་མ་ཏྲག་ཨེ་ཀཾ་རུ་ལུ་ཞེས་གདབ་པོ། །གུ་ཧྱ་གཏེར་གྱི་ལེའུ་སྟེ་ང་དགུ་པའོ།། །།དེ་ནས་ཡུམ་སྦས་ལ་མཚམས་བཅད། ཡུམ་རྣམས་བདུད་རྩིའི་ཆུས་བཀྲུས་ལ། མདེའུ་སྦྲང་མ་ལ་དར་ལེའུ་བརྒན་གྱིས་མགུལ་ཆིངས་བྱས་ལ། ཡུམ་གྱི་དཔུང་ཀ་ནས་གཟུང་ལ། ཐེ་ཚོམ་རྨ་ཡང་སྤང་སྟེ་བཅོམ་ལྡན་འདས་དང་དགོངས་སྤྱོད་གཅིག་ཏུ་བཞུགས་སོ། །མ་ལྟར་དབང་མ་བྱེད། དབྱིངས་ལས་ཡེ་ཤེས་འབྱོར། སྲིང་ལྟར་ལྷས་མ་དམ། གྲོགས་ལྟར་ཕྲག་མ་དོག །མཛའ་མོ་ལྟར་གཞུང་མ་ངན།བྲན་ལྟར་སྙིང་མ་རིང་། དེ་ནས་དཀྱིལ་འཁོར་གྲྭ་བཞིར་དབང་བསྐུར་ལ་བཞག །དང་པོ་ནུབ་མོ་བཤགས་པ་བྱ། དེའི་ཕྱི་དེའི་ནུབ་མོ་བར་ཆད་ཀྱིས་མི་ཚུགས་པར་བྱ་བའི་ཕྱིར། ཕུར་པ་བརྒྱ་རྩ་བརྒྱད་ཀྱི་དཀྱིལ་འཁོར་བཞེངས་སུ་གསོལ། དེའི་ཕྱི་དེའི་ནུབ་མོ་ནམ་མཁའ་ལྡིང་གཅིག་གིས་ཐུགས་དམ་བསྐང་། དེའི་ཕྱི་དེའི་ནུབ་མོ་ཙ་རས་བཟློག །དེའི་ཕྱི་དེའི་ནུབ་མོ་ལུག་སྨུག་ནག་གིས་ཐུགས་དམ་བསྐང་། ཡུམ་གྱི་དཔུང་ཀ་ནས་བཟུང་ལ་ཐེ་ཚོམ་རྨའོ། །ཁར་སང་ཁར་ཉིན་སྔོན་མ་རུ་ངོ་མ་ཤེས། སྲིང་དུ་ངོ་མ་ཤེས། གྲོགས་སུ་ངོ་མ་ཤེས། མཛའ་མོར་ངོ་མ་ཤེས། བྲན་ལྟར་ངོ་མ་ཤེས། མ་རུ་ངོ་ཤེས་ན། དབྱིངས་དང་ཡེ་ཤེས་ལྡན། གྲོགས་ལྟར་ངོ་ཤེས་ན། བརྩེ་བའི་གཞུང་དང་ལྡན། མིང་པོར་ནི་ངོ་ཤེས་ན། གཟི་བརྗིད་ནི་མཛེས་དང་ལྡན། རྗེ་རུ་ནི་ངོ་ཤེས་ན། དབྱིངས་སུ་ནི་འབངས་སུ་འཆི། དེ་ནས་ཡབ་མངོན་རྫོགས་ཀྱི་རྒྱལ་པོས་སྲིན་ལག་ནས་བཟུང་སྟེ། ཡུམ་གྱི་
བྷ་ག་དབང་དུ་བསྡུས་ལ་སྤྱན་དྲངས་ཏེ། དགུང་བཞིའི་ནུབ་མོ་ཤེལ་དཀར་པོ་ཡ་སངས་ཀྱིས་དཀར་མོ་རྣམས་ཀྱི་ཐུགས་དམ་བསྐང་། ཁྱི་ནག་པོ་ཤེལ་མིག་གིས་མཚོ་སྨན་དང་ཀླུ་རྣམས་ཀྱི་ཐུགས་དམ་བསྐང་། པྲ་དབབ་པ་ཡང་ཡུམ་བདུད་རྩིའི་ཆུས་བཀྲུས། རཀྟའི་ཐིག་ལེ་གདབ། སྲིན་ལག་ལ་སྐུད་པ་ནག་པོ་གཅིག་གིས་གདགས། གུང་མོ་ནས་སྐུད་པ་དཀར་པོས་བཏགས་ལ་བཟུང་པྲ་དབབ་པའི་ཡུམ་མཚམས་བཅད། དེ་ནས་ཉུང་དཀར་ལ་བསྔགས་ལ་སྤྱི་བོ་ནས་པྲ་དབབ་པའི་སྙིང་པོ་འདི་ཡང་བཟླས་སོ། །ཏྲག་རཀྴ་མུ་ཏྲ་མུ་ཏྲ་རུ་ལུ་རུ་ལུ་རག་མོ་ཛཱ་ཛཱ། ཁ་ལ་མ་ཏི་བྷྲཱུཾ་སྙིང་ཁ་རཀ་བྷྱོ། རུ་ལུ་རུ་ལུ་ཁ་རཾ་རཀྴ་ནི་ཐུམ་རི་ལི་ལི་ཤུ་ཏིཥྛ་རྦ་ཧཱུཾ། གཞུང་ལས་བྱུང་བའི་མ་མོའི་སྙིང་པོ་མཆེད་ཕྱོགས་སུ་ལྷ་ཕོབ་ལ་འཛབ་དཔོག་གོ། །པྲ་དབབ་པའི་ཡུམ་པདྨའི་སྟེང་དུ་བཞག་ལ། ཕྱོགས་ཕྱོགས་ནས་དབང་བསྐུར་རོ། །དེ་ནས་པྲ་དབབ་པ་དང་། དངོས་གྲུབ་ལུགས་བཞིན་བཤམས་ལ། བདུད་རྩིའི་བདག་མོ་ཡིན་པས་བསྙེན་བསྒྲུབ་བདུད་རྩིའི་འཛབ་དྲང་ངོ་། །དེ་ནས་ཡང་སྲིན་ལག་ནས་བཟུང་སྟེ་པྲ་དབབ་པོ། །འཇིག་རྟེན་སྔ་མའི་གཏམ་ཁྱེར་ནས་འོང་བ་ནི། རལ་གཅིག་མ་ཡིན་པས་སྙིང་པོ་དྲང་ངོ་། །ཏྲག་རག་ཤུ་ཏྲ་མོ་རུ་ལུ་བྷྲཱུཾ། ཨོཾ་ཤྲཱི་མཉྫུ་དཱིཔྟ་ཙཀྲ་བྷྲཱུཾ། དེ་ནས་སྔགས་མཁན་གྱི་ཞབས་གཡོན་པའི་མཐེ་བོང་ལ་བཏགས་ལ། ལུང་གིས་ཟིན་པར་བྱས་ལ་ལྷ་སྲིན་སྡེ་བརྒྱད་གང་ལ་བཀོལ་ཀྱང་འགྲུབ་པོ། །པྲ་དབབ་པའི་ལེའུ་སྟེ་དྲུག་ཅུ་པའོ།། །།ཏ་ན་སྒྲོལ་བའི་ལུང་གིས་མ་མོ་རྣམས་ཀྱི་ཐུགས་དམ་བསྐང་། ག་ཎ་སྦྱོར་བའི་ལུང་གིས་འཕགས་པ་རྣམས་ཀྱི་ཐུགས་དམ་བསྐང་ངོ་། །སྦྱོར་སྒྲོལ་གཉིས་སུ་མེད་པར་བལྟ། །སྦྱོར་སྒྲོལ་གྱི་ལེའུ་སྟེ་རེ་གཅིག་པའོ།། །།དབང་དུ་བསྡུ་བ་ལ་ཡང་གསུམ་སྟེ་ནམ་མཁས་འབྱུང་བ་དབང་དུ་བསྡུ་བ་དང་། ཆོས་ཉིད་ཀྱིས་ཆོས་ཅན་དབང་དུ་བསྡུ་བ་དང་། སེམས་ཅན་སྲིད་པས་དབང་དུ་བསྡུ་བ་དང་། སྤྱོད་པས་དབང་དུ་བསྡུ་བ་དང་། ལྟ་བས་དབང་དུ་བསྡུ་བའོ། །དབང་དུ་གང་བསྡུ་ན། མ་མོ་དོན་གྱི་ལྷ་དགུ་དབང་དུ་བསྡུའོ། །
མ་མོ་འཁོར་ལ་མི་གཟན་པར་དབང་དུ་བསྡུ་བ་དང་། བདག་མ་མོའི་དབང་དུ་མི་འགྲོ་བ་དང་། མ་མོ་བདག་གི་དབང་དུ་འདུ་བར་བསྡུ་བའོ། །དབང་དུ་བསྡུ་བའི་ལེའུ་སྟེ་རེ་གཉིས་པའོ།། །།ཆོས་དང་ནམ་མཁའ་གཉིས་སུ་མེད་དེ། ནམ་མཁའ་འབྱུང་བ་བཞི་ལ་ཤི་ས་བསྟན་པ་དང་། བྱང་ཆུབ་ཀྱི་སེམས་བདག་དཔལ་ཆེན་པོས་སྲིད་པ་གསུམ་ཤི་ས་བསྟན་པ་དང་། དེ་གཉིས་ནི་ལྟ་བས་ཤི་ས་བསྟན་པའོ། །སྤྱོད་པས་ཤི་ས་བསྟན་པ་ནི། ཧེ་རུ་ཀ་ཉིད་ཀྱི་སྨེ་བ་དཀར་ནག་ལས་བསྐྱེད་ནས་ཕྱི་རབས་ཀྱི་རྣལ་འབྱོར་པ་རྣམས་བསྟན་པ་བསྲུང་བར་དམ་བཅས་པའི་ཆེད་དུ། འཇིག་རྟེན་གྱི་མ་མོ་བཀའ་སྲུང་དུ་བཞག་གོ། །ཕྲིན་ལས་ཀྱི་ཤི་ས་བསྟན་པ་ནི། བདག་ཉིད་ཏིང་ངེ་འཛིན་ལས་གནས་ཏེ། ཨོཾ་བཛྲ་ཤྲཱི་ཧེ་རུ་ཀ་མ་མ་ཧཱུཾ་ཕཊ། ཅེས་བརྗོད་པས། སྐུ་ཆེ་ལ་ཡན་ལག་རགས་པ། ཆུ་ལས་ཆུ་བུར་རྡོལ་བའི་ཚུལ་དུ་ལྷག་གིས་སྐྱེས་པས། དེའི་ཞལ་ནས། མ་མ་རཀྴ་མ་ལེ་ཐུཾ་རྦད་ཛ་ཛཿ། ཞེས་བརྗོད་པས། ཡང་གསང་གི་མ་མོ་དྲུག་དང་། ཡང་གབ་དབང་གི་རྒྱལ་མོ་བཞི་པོ་དེ་བྱ་མདུན་དུ་ནམ་མཁའ་ལས་བབས་པ་བཞིན་ནམ། ཉ་བྱེ་ཚན་ལ་བསྐྱུར་བ་བཞིན་དུ་གྱུར་ཏེ། ཅི་བཀའ་སྩལ། འཇིག་རྟེན་ན་ཉམས་པ་དང་འཁྲུག་པ་ཅི་མཆིས་ཟེར་རོ། །དེ་ལྟར་སྐྲག་ཅིང་སྔངས་པ་ནི། འཆི་ས་བསྟན་པའི་ལེའུ་སྟེ་རེ་གསུམ་པའོ།། །།དཔལ་ཆེན་པོའི་བྱང་ཆུབ་སེམས་རིན་པོ་ཆེའི་སྒྲོམ་ལས། ཐུགས་ཀྱི་རྩ་བཞི་ཕྱོགས་བཞིར་གྱེས་པ་ལས་དར་དཀར་གྱི་སྐུད་པ་གསེར་གྱི་སྦུ་གུ་ནས་ཙམ་གནས་པ་ལས། སྙིང་ཁ་རག་རྦད་ཛ་ཛ། ཅེས་བྱས་པས་ཐུགས་ཀྱི་རྩ་ནས་ཕྲིན་ལས་ཀྱི་དོན་མཛད་པ། སྲིད་པའི་མ་མོ་སྐུ་མདོག་དཀར་པོ་གངས་རི་ལ་ཉི་མ་ཤར་བ་འདྲ་བ་ཕྱག་གཡས་ན་སྙིང་དང་ཁྲག་བསྣམས་པ། གཡོན་ན་མདའ་གཞུ་ཐོགས་པ། མདུན་དྲང་པོར་བན་གླང་དཀར་པོ་བཅིབས་ཏེ་ཉི་ཟེར་འབུམ་གྱིས་བརྒྱན་པ། ཟླ་བ་སྟོང་གིས་བརྒྱན་པ་གཅིག་བྱུང་བས། ཅི་བཀའ་སྩལ་ཟེར་ནས་མདུན་དུ་འདུག་གོ། །སྲིན་མོ་དུང་ལོ་
ཅན་ཞེས་བྱའོ། །ལྷོ་ཕྱོགས་རྩ་བཻ་ཌཱུརྱ་འདྲ་བ་རྩའི་སྒོ་ནས་སྐུ་ནས་ཙམ་ལས། མ་མོ་སྙིང་འདུན་ལིང་སྲོག་རྩ་བྷྱོ། ཞེས་བརྗོད་པས། དེའི་གཡོན་དུ་སྐུ་མདོག་སྔོན་མོ་ཆུ་གླང་འབར་བ་ལ་བཅིབས་པ་སྐུ་དང་ཕྱག་སྦྲུལ་ནག་འབར་བས་ནི་བརྒྱན། ཟངས་ཀྱི་དྲ་བ་མིག་མངས་གཅིག་ནི་བཅིབས་ཀྱི་ཕྱི་གོང་ལ་བཏགས། ཕྱག་གཡས་ན་ལྕགས་ཀྱི་བསེ་གབ་ཆེན་པོ་གཅིག་ཐོགས། གཡོན་ན་འཕྲུལ་གྱི་མེ་ལོང་གཅིག་བསྣམས། སྐུ་ལ་རྨ་བྱའི་ཐུལ་པ་གཅིག་མནབས། ཡིད་ཀྱི་དྲ་བ་བརྒྱ་སྟོང་གིས་འཇིག་རྟེན་གྱི་ཁམས་གཡོགས་པ། སྤྱན་གཡས་གཡོན་དུ་ཉི་ཟླ་འཁྱིལ་པ་ཙམ། ཅི་བཀའ་སྩལ་ཞེས་ཟེར་ནས་མདུན་དུ་འདུག་གོ། །ནུབ་ཕྱོགས་ཀྱི་རྩ་དར་ལེའུ་བརྒན་གྱི་ལྕེ་འདྲ་བ། སྐུ་ནས་ཙམ་ལས། དྷར་མ་རཀྴ་ཛ་ཛཿ། ཞེས་བརྗོད་པས། སྐུ་མདོག་དམར་པོ་མེ་ལྕེ་ཆད་པ་འདྲ་བ།ཟངས་ཀྱི་དྲེའུ་རྟ་སྨུག་པོ་ལ་རྔ་རྔོག་ལྕགས་ཀྱིས་བྱས་པ། ཆེ་ཆུང་གི་ཚད་དཔག་ཚད་བརྒྱད་ཁྲི་བཞི་སྟོང་ལ་ཞོན་ནས་སྐུ་ལ་ལེའུ་བརྒན་དམར་པོ་གསོལ་པ། ཟངས་ཀྱི་ཞགས་པ་འདོམ་དགུ་བརྒྱ་བཞི་སྟོང་ཡོད་པ་སྔ་གོང་ལ་བཏགས། ཡིད་ཀྱི་དྲ་བ་བརྒྱ་སྟོང་གིས་འཇིག་རྟེན་གྱི་ཁམས་གཡོགས་པ། སྐུ་རགས་སྦྲུལ་གྱི་ཞགས་པ་བཅིངས་ཤིང་། ཕྱག་ན་དུང་གི་གའུ་གཅིག་བསྣམས་པ། ཅི་བཀའ་སྩལ་ཞེས་ཟེར་ཞིང་མདུན་ན་ཡེ་རེ་འདུག་པ། བྱང་ཕྱོགས་ཀྱི་རྩ་ལྗང་གུ་ནས་སྐུ་ནས་ཙམ་ལས། རུ་ཏྲ་མ་མ་ཐུམ་ཛ་ཛཿ། ཞེས་བརྗོད་པས། སྐུ་མདོག་ལྗང་སར་རལ་པ་སྤྱི་བོར་བཅིངས་པ། སྤྱན་འབར་བ་སྐུ་ཁྲོ་མོར་བཞུགས་པ། སྐུའི་ཆ་ལུགས་འབར་བ་སྐྱེས་བུའི་ཆས་སུ་ཞུགས་པ། ཟབ་སླག་དམར་བཀྲ་ལ་ལྕགས་ཀྱི་སྟག་རལ་གྱིས་བརྒྱན་པ། ལྕགས་ཀྱི་དྲེའུ་རྟ་ནག་གུ་ལ་རྔ་རྔོག་ཟངས་སུ་འདུག་པ་ཟབས་སུ་ཆག་གང་གྲུ་བཞི་ཡོད་པ་མགྱོགས་པ་གློག་བས་མྱུར་བ་གཅིག་ལ་ཞོན་ནས། བསེ་སྒ་བསྟད་པ། ལག་པ་གཡས་ན་སྤུ་གྲི། གཡོན་ན་སྦྲུལ་ཞགས་དུག་དང་ཁྲག་བསྣམས་པ་གཅིག་བྱོན་ནས། ཅི་བཀའ་སྩལ་ན། ཟེར་ནས་མདུན་ནས་འདུག་གོ། །
མ་མོ་ལས་ལ་གཟུད་པའི་ལེའུ་སྟེ་རེ་བཞི་པའོ།། །།མ་མོ་མཚན་གྱི་རྣམ་གྲངས་དང་བཟླས་པ་ལས་ཀྱི་སྔགས་སོ། །ཡུམ་ཆེན་མོ་སེམས་ཀྱི་བུ་གཅིག་མ་ནི། ཡུམ་རྡོ་རྗེ་རྫོགས་མ་བྱ་སྟེ་ཡུམ་ཆེན་མོ་ཉིད་དོ། །དཀར་མོ་དབུ་དགུ་མའི་མཚན་གསོལ་པ།། །།རྒྱ་གར་སྐད་དུ། དཀར་མོ་རེ་མ་ཏི། སཾ་སྐྲི་ཏའི་སྐད་དུ། མ་སར་དབང་ཕྱུག་མ། རྡོ་རྗེ་དབང་ཕྱུག་མ། རྡོ་རྗེ་ས་མཉྫ་ཞེས་བྱའོ། །བོད་སྐད་དུ། དཀར་མོ་དབུ་དགུ་མ་ཞེས་བྱའོ། །གསང་བའི་མཚན་གསོལ་པ། རྡོ་རྗེ་ལྕམ་གཅིག་པདྨའི་སྲིང་ཞེས་བྱའོ། །བཟླས་པའི་ལས་ཀྱི་སྔགས་ནི། ཏྲག་ཁ་མུནྟྲ་བྷྱོ་རུ་ལུ་ཧེ་མོ་ཨ་ལོ་ཙིཏྟ་ན་མ་ལ་བྷྱོ་རུ་ལུ་ཧེ་མོ་ཡ་བྷྱོ་རུ་ལུ། ནཱ་ག་དན་ཧ་མོ་ཡ་བྷྱོ་རུ་ལུ། ཡ་མ་ཤ་ཀ་ཀྲོ་ཏ་བྷྱོ་རུ་ལུ། སྙིང་ཁ་རག་སྲོག་ཐུན་བྷྱོ་རུ་ལུ། མ་མོ་བྷྱོ་སྲིང་བྷྱོ་ཐུན་བྷྱོ། མཚོ་སྨན་རྒྱལ་མོའི་མཚན་གསོལ་པ།། །།རྒྱ་གར་སྐད་དུ། ཨཱརྱ་རེ་མནྟི་ཞེས་བྱའོ། སཾ་སྐྲི་ཏའི་སྐད་དུ། འོ་དེའི་སྲིང་མོ་ཞེས་བྱའོ། །བོད་སྐད་དུ། མཚོ་སྨན་ཆེན་མོ་དཔལ་ལྡན་ཞེས་བྱའོ། །གསང་བའི་མཚན་གསོལ་པ། གཉེན་གྱི་ལྷ་གཅིག་ཀླུ་འབུམ་བསིལ་ཞེས་བྱའོ། །བཟླས་པ་ལས་ཀྱི་སྔགས་ནི། བཛྲ་སྙིང་གོད་ཆོད། ཏི་ཁ་ལ་ཟ་མུན་ཟ་མུན་ལོང་ཏནྟྲི་རྦད། ཡུན་ཏན་ཏི་རྦད། ད་ར་རྔཾ་རྦད། ཐིམ་རྔམ་རྦད། ཤ་ཁུག་ཐིག་ན་རྦད། སྲིད་པའི་བུ་མོའི་མཚན་གསོལ་པ།། །།རྒྱ་གར་སྐད་དུ། གུ་ཧ་རེ་མ་ཏི་ཞེས་བྱའོ། །སཾ་སྐྲི་ཏའི་སྐད་དུ། སྨུག་ནག་དབུ་ལྔ་མ་ཞེས་བྱའོ། །བོད་སྐད་དུ། སྲིད་པའི་བུ་མོ་ཞེས་བྱའོ། གསང་བའི་མཚན་གསོལ་པ། ནམ་མཁའ་མཁའ་འགྲོ་དབྱིངས་རུམ་བསིལ་ཞེས་བྱའོ། །བཟླས་པ་ལས་ཀྱི་སྔགས་ནི། ཚལ་པ་དུམ་བུ་ཁྲག་ཏི་རྦད། སྣང་ན་ནི་རྦད། ཤག་ཏི་ཤག་ཏི་རྦད། རྦ་ན་རྦ་ར་རྦ་ཐ་རྦད། དུམ་བུ་དུམ་བུ་ཚལ་པ་རྦད། རཀྴ་རཀྴ་རུ་ཏྲ་རྦད། སྙིང་ནག་སྙིང་ནག་སྲོག་རྩ་རྦད། ཚལ་པ་ཚལ་པ་ཏེ་ནི་རྦད། བཾ་རིལ་དམ་པ་དམ་འུ་དཱིཔྟ་ཙཀྲ་རྦད། དུར་ཁྲོད་ཀྱི་མ་མོ་ཛ་མུནྟྲིའི་མཚན་གསོལ་པ།། །།
རྒྱ་གར་སྐད་དུ། གིང་ཀ་ར་མོ་ཞེས་བྱའོ། །སཾ་སྐྲི་ཏའི་སྐད་དུ། ཤྲཱི་ཛ་མུནྟྲི་ཅེས་བྱའོ། །བོད་སྐད་དུ། རྡོ་རྗེ་རླུང་སྒྲོན་མ་ཞེས་བྱའོ། །གསང་བའི་མཚན་གསོལ་པ། རྡོ་རྗེ་སྒྲོལ་མ་མཁའ་འགྲོ་མཆོག་ཅེས་བྱའོ། །བཟླས་པ་ལས་ཀྱི་སྔགས་ནི། ཤྲཱི་ཛ་ཙ་ཏུ་ཐུན་ལིང་གྲཾ་ཐུན་ལིང་། གྲུམ་ཐུན་རྦད། ཤྭ་རྦ་རྐུག་ཚར་མི་མུགས་རྦད། མྱོས་ཙར་ལིང་། མ་མ་རཀྴ་རུ་ཏྲ་རྦད། ཅེས་བརྗོད་དོ། །མཚན་དང་བཟླས་པ་ལས་སྔགས་ཀྱི་ལེའུ་སྟེ་རེ་ལྔ་པའོ།། །།བུད་མེད་སྣེལ་གྲིར་ཤི་བའི་དོར་རྟ་དང་། མོན་པ་རབས་ཆད་ཀྱི་ཐོད་པ་དང་། སྤྱང་ཐོད་ཕག་ཐོད། གུ་གུལ་ནག་པོ་དང་། དུག་སྣ་ཚོགས་དེ་རྣམས་དགྲ་བོའི་ཁྱིམ་གྱི་སྒོ་ནས་རྐང་འདོམ་བཅུ་གསུམ་བཅལ་བའི་ས་དེར་གཟའ་མིག་དམར་གྱི་ནུབ་མོ། ནམ་གུང་ཕྱེད་ཤིང་ཕྱེད་ན། མགོ་སླེ་རལ་གྱིས་ཕུར་ལ་ཁང་སེལ་དུ་སྦས་ནས། ནང་དུ་མིང་རུས་བཅུག་སྟེ་སྙིང་པོ་གོང་མ་ཀུན་བཟླས་ལ། ཁང་ཁྱིམ་བསྐོར་ན། རྟ་གཡག་འཐབ་པ་བཞིན་དུ་རྟགས་མོད་ལ་འོང་ངོ་། །ཟླ་གསང་ནག་པོ་མན་ངག་གི་ལེའུ་བཅུད་ཀྱི་སྙིང་ཁུའོ། །གོང་གི་མཇུག་སྡུད་འོག་གི་མགོ་འདྲེན་པའོ། །ཟླ་གསང་གི་མན་ངག་བསྟན་པའི་ལེའུ་སྟེ་རེ་དྲུག་པའོ།། །།རྟགས་ནི་ནམ་མཁའི་དབྱིངས་ནས་སྐུ་མདོག་དཀར་མོ་དབུ་དགུ་མར་སྟོན་ཏེ། དེ་ལྟར་ངོ་མ་ཤེས་ན་ཡང་རང་གི་མདངས་དཀར་ལ། མིག་སྤྲིན་དཀར་དུ་བདུག་མ་ཆགས་པ་གཡོན་གྲུབ་པའི་རྟགས་ཡིན་ནོ། །སེམས་སྨྱོ་འདི་དང་འབོག་འདྲེ་དང་། སྙིང་འགས་པར་བྱེད་པ་དང་། དབང་པོ་སྡོམ་པ་དང་། ཡན་ལག་ཟ་རུ་འཇུག་པ་དང་། ཡིད་འགས་པར་བྱེད་པ་དང་། ཡང་ཤི་དང་ཡང་སོས་ནད་ཡིན་ཏེ། འཇིག་རྟེན་སྔ་མ་ལ་དམྱལ་བའི་རྡོ་རྗེ་བྱེད་པ་དང་། ཐིག་ལེའི་སྤྱོད་པ་ཉམས་པ་ཡིན་པས། དེའི་གཉེན་པོ་རང་རང་གི་སེམས་ཀྱི་ཆད་པ་བྱུང་བ་ཡིན་པས། ཐོད་ཕྲེང་ཅན་དང་། ཚངས་པ་ཕོ་ཉར་གཏོང་བ་ཡིན་པས་དེའི་ནད་ཀྱི་གཏན་ཚིགས་དེ་ཡིན་ནོ། །གྲུབ་རྟགས་དམ་ཚིག་དམྱལ་བའི་ལེའུ་སྟེ་རེ་བདུན་པའོ།། །།
འཇམ་དཔལ་ཡ་མ་རཱ་ཙའི་གསང་ཐུན་འདི་ཡང་། རྣལ་འབྱོར་པ་ཤེས་རབ་ཟབ་མོ་རྣམས་ཀྱི་དོན་ཆེད་དང་། དཔལ་དང་བརྗིད་པ་བསྐྱེད་པ་དང་། ཕྲིན་ལས་བཅོལ་བ་དང་། དཀོན་མཆོག་གསུམ་གྱི་དབུ་འཕང་བསྟོད་པ་དང་། གཙུག་ལག་ཁང་དང་། དབེན་གནས་བསྲུང་བ་དང་། བསྟན་པ་བསྲུང་བའི་དོན་དང་། གསང་བ་ཐུགས་ཀྱི་རེག་ཆོད་དོ། །ཨོཾ་ཤྲཱི་མཉྫུ་ཡ་མ་རཱ་ཙ། ཨེ་ཀ་ཛ་ཏི་ཏྲག་རཀྴ་མུ་ཏྲ་ཁ་མུན་དྲ་རུ་ལུ་བྷྱོ། དཀར་མོ་ཛཱ་ཛཱ། ཨེ་ཀ་མ་ཁ་ལ་མ་མ་ཏི་བྷྱོ། དགྲ་བོ་ནྲྀ་མཱ་ར་ཡ་ཛཱ་ཛཱཿ། དུ་མཱ་ར་ཡ། མཱ་ར་ཡ་དུ། ཡ་མ་སྙིང་ཡ་མ་ཁྲག་ཡ་མ་དུ། ཡ་མ་རྦད། ཚལ་བ་བཾ་རིལ། དཾ་པ་དུམ་བུ་མཱ་ར་ཡ་ཧཱུཾ་ཕཊ། བརྗོད་དོ། །ཙིཏྟའི་ཡང་སྙིང་མཚོ་སྨན་གྱི་ཐུན་འདི་ལ། ཡས་སྟགས་ནི་ཐོད་པ་བྱ་རོག་རྗེས་དྲུག་པར་དུག་སྣ་ཚོགས་དང་། དམེ་ཁྲག་རྣམ་གསུམ་དང་། ཁྱི་ནག་པོ་ཤེལ་མིག་གི་ཁྲག་བསྩལ་ཉུང་དཀར་ལ་བསྔགས་ཤིང་། ས་མ་ཡ་དགྲ་བོའི་སྙིང་ལིང་རྦུད། ས་མ་ཡ་དགྲ་བོའི་སྙིང་དུ་ནང་ལི་རྦད། ས་མ་ཡ་མ་ཡ་དགྲ་བོའི་སྙིང་ཀ་ལི་རྦུད། ས་མ་ཡ་དགྲ་བོའི་སྙིང་རཀྴ་ཙིཏྟ་རྦུད། ས་མ་ཡ་དགྲ་བོའི་སྙིང་ཁྲག་ཚལ་པ་རྦུད། ས་མ་ཡ་དགྲ་བོའི་སྙིང་ཧུར་བུ་རྦུད། ས་མ་ཡ་དགྲ་བོའི་གནས་ནས་ཐིབས་ཐིབས་རྦུད། ས་མ་ཡ་དགྲ་བོའི་སྙིང་ཙིཏྟ་རྦུད། ས་མ་ཡ་དགྲ་བོ་ནྲཾ་སོད་མཱ་ར་ཡ་ཙིཏྟ་བཾ་རི་ལི་ལི་རྦུད། ཅེས་བཟླས་སོ། །འདིས་ཟིན་པའི་ནད་ནི་བྱིང་ནད་དང་། མཛེ་དང་། ཕོ་ལ་མིག་དང་སྨྱོ་ཞིང་འབོག་པར་འགྱུར་རོ། །དཀར་མོ་དབུ་དགུ་མའི་ཐུན་ནི། དམེ་ཁྲག་རྣམ་གསུམ་ཐོད་པའི་ནང་དུ་སྩལ། ཏྲག་རཀྴ་མུ་ཏྲ་སྙིང་ཁ་རག་རྦད། ཆུམ་ཐུམ་རི་ལི་བྷྱོ། ཏྲག་རཀྴ་མུ་ཏྲ་སྙིང་ཁར་ག་གོ་རོ་ཙ་ར་རྦད། སྙིང་རྩ་སྲོག་རྩ་རྦད་མ་མ་སྙིང་རཀྟ་ཐུན་བྷྱོ། མ་མ་ར་ཙ་ཡ་ཐུན་བྷྱོ་ནྲྀ་སོད་རྦད། ཆུམ་ཐུམ་རི་ལི་ལི་དུ་ན་ཡ་མ་སྙིང་ཡ་མ་སྙིང་མཱ་ར་ཡ་ཧཱུཾ་ཕཊ། ནད་ཀྱིས་སྙིང་འགས་པ་དང་གཟེར་བ་དང་། ཡན་ལག་འབྲལ་བར་བྱེད་དོ། །སྲིད་པའི་བུ་མོའི་ཐུན་ནི་བྷནྡྷ་ལ་ཨེ་ཁང་བརྒྱ་རྩ་བརྒྱད་བྲིའོ། །གླང་པོའི་མཆེ་
བ་དང་། དམེ་ཁྲག་གསུམ་དང་ས་ལས་སྐྱེས་པའི་དུག་སྣ་ཚོགས་བྷནྡྷར་སྩལ་ལ། དྷ་ར་མ་ཤང་ཀ་རི་ཨུ་སྙིང་ཀུ་རུ་ཧཱུཾ་ཕཊ། ཏབ་པ་ལིང་མུ་ལིང་དུ་རུ་དུ་རུ་ཧཱུཾ་ཕཊ། ཀརྨ་ཙཎྜ་མུ་ཏིང་དུ་རུ་དུ་རུ་ཧཱུཾ་ཕཊ། དུག་སྔགས་སོ། །རཀྴ་མུ་རུ་མུ་རུ། རུ་ལུ་རུ་ལུ་ཧཱུཾ་ཕཊ། རྩ་བ་པ་ལ་ནི་ཤིང་དགྲ་བོ་ལ་སྭཱ་ཧཱ། པདྨ་ནི་ར་ཏ་ར་ཏི་རུ་ཏི་ར་ནི་མ་ཏི་བྷྱོ། ཨོཾ་ཏདྱ་ཐཱ། ཏུ་ཧུ་ཏུ་ཧུ་བེ་ཙི་ཏི་པ་ཏི་སོ་རེ་ར་ཧཱུཾ་རོ། དུ་རུ་དུ་བེ་སྭཱ་ཧཱ། ཨེ་བེ་ཤཾ། པྲ་བེ་ཤི། བེ་ཤཾ་རུ་བེ་ཤ་ཀ་ཁ་ཐུན་བྷྱོ། འདིས་ཟིན་པ་ནི་འགག་ནད་དང་། ཆུ་འགག་པ་དང་། སྦོས་ནད་དང་། སྐྱིགས་ཀྱང་སྐབས་སུ་འདྲེན་པ་ལྟར་འོང་ངོ་། །ཙ་མུཎྚིའི་ཐུན་གྱི་ཡས་སྟགས་ནི། ཁྲག་སྣ་ལྔ་དང་། བོང་ང་ནག་པོ་དང་། སྤྱང་ཀིའི་ཁྲག་དང་། བུ་མོ་གཞོན་པའི་མངལ་ཁྲག་དང་སྙིང་སྣ་ཚོགས་སྩལ། བྲ་བོ་སྲན་མ་ལ་ཟན་ཟུར་གསུམ་བྱས་ལ། དེའི་ནང་དུ་དགྲ་བོའི་མིང་རུས་བཙུག་ལ་དེར་སྩལ། སྔགས་ནི། རུ་རུ་རྦད། རཀྴ་རྦད། མ་མ་སྙིང་རྦད། ཙིཏྟ་རྦད། ཁ་ཐུན་རྦད། མཱ་ར་ཡ་རྦད། བལ་ཕྱུག་བལ། མ་མ་ཐུན་ཐུན་བུར་སོད་སྣ་ཏིཀྵྞ་ཏུ་ན་རྦད། ནད་ནི་ཀླད་གཟེར་དང་རྒྱུ་གཟེར་དང་། རྒྱུ་འཁྲིལ་དང་མྱོས་ནད་འོང་། ནམ་གུང་དང་ཉིན་གུང་དང་གནམ་སྟོང་ལ་བཟླས་སོ། །སོ་སོའི་དགྲ་བོའི་གཟུགས་ལ་གནས་བཞིར་ཕུར་བུས་བཏབ་ལ་ཐུན་སྦྲེང་ངོ་། །ཤིན་ཏུ་རྒྱུད་ཀྱི་ངན་སྔགས་ཞེས་ཀྱང་བྱའོ། །ཐུགས་ཀྱི་རེག་ཆོད་ཅེས་བྱ་སྟེ། ཉུང་དཀར་གྱིས་བྲབ། གུ་གུལ་གྱིས་བདུག་གོ། །ཐུན་བསྒྲུབ་པའི་ལེའུ་སྟེ་རེ་བརྒྱད་པའོ།། །།དེ་ནས་ཐོད་པར་ཁྲག་དཀར་དམར་དུ་འདྲེས་ན་ཡབ་ཡུམ་གཉིས་སུ་མེད་པའི་དངོས་གྲུབ་ཐོབ་པ་ཡིན་ནོ། །ཐོད་པའི་ཁྲག་བོ་ན་སྒྲིབ་པ་ཡིན་ནོ། །བཤགས་པ་བྱ། ཐོད་པ་འགུལ་ཞིང་ལྡེག་ན་ཕོ་ཉ་རྣམས་ཀྱི་དངོས་གྲུབ་ཐོབ་པ་ཡིན་ནོ། །ཁོལ་ཞིང་རླངས་པ་བྱུང་ན་ཁྲོ་བོ་ཞེ་སྡང་ཅན་གྱི་དངོས་གྲུབ་ཐོབ་པ་འབྱུང་བ་ཡིན་ནོ། །དེ་ལས་ནག་པར་གྱུར་ན་ཆོས་ཀྱི་དབྱིངས་ཀྱི་དངོས་གྲུབ་ཐོབ་པ་ཡིན་ནོ། །ཐུན་གྲུབ་རྟགས་ཀྱི་ལེའུ་སྟེ་རེ་དགུ་པའོ།། །།རབས་ཆད་ཐོད་པ་གསུམ་
པོ་གང་ཡང་རུང་། གཟུགས་བཅུག་ལ་ཁ་བཅད་རྒྱས་བཏབ་པོ། །མཚལ་གྱིས་སྲུབས་སུ་རི་བདུན་བྲི། སྙིང་པོ་འབོད་རྦད་བྲིའོ། །སྤྱི་བོར་མུ་ཁ་ལེ་བྲིའོ། །དེ་གར་འཇུག་པར་ཉུང་དཀར་བསྔགས་ཤིང་རས་སུ་ཕུར། ལམ་རྒྱ་གྲམ་དུ་མནན་ན་གྲིར་འཆིའོ། །བང་སོའི་ཟུར་རམ་དུར་མཆད་དམ། བྲག་གམ་ལ་བཙས་གང་ཡང་རུང་སྟེ། ཀླུ་འམ་གདུག་པ་ཅན་ཡོད་པའི་ཆུ་མིག་བྲམ་ཅན་དུ་སྦས། དུས་ཉི་མ་ཕྱེད་ན་བྱ། དེ་ལྟར་བྱས་ན་རྟགས་ཀྱང་མྱུར། །དེས་ཀྱང་འགྲུབ་པར་མ་གྱུར་ན། །ཕྱུང་ལ་བརྟན་པའི་སྟེང་དུ་བཞག །ས་ཕུག་ནང་དུ་རེ་བ་གདེངས། །ཆུ་ཡིས་བྲན་ལ་སྙིང་པོ་བཟླ། །སོ་དང་སེའུ་དང་ཡུག་པོར་ན། །བསྲེས་ལ་ཞིབ་ཏུ་བརྡུང་བར་བྱ། །ཕག་པའི་ཐོད་པར་བླུག་ནས་ནི། །རྒྱ་མཚོ་ཆེན་པོའི་ནང་དུ་བསྒྱུར། །ནམ་ཡང་ཐར་བར་མི་བྱའོ། །ཕྲིན་ལས་རྦོད་གཏོང་མནན་པའི་ལེའུ་སྟེ་བདུན་ཅུ་པའོ།། །།དཔལ་ཧེ་རུ་ཀ་ལ་ཕྱག་འཚལ་ལོ། །སྐྱེ་མེད་རྣམ་དག་མཁའ་དབྱིངས་དག་པ་ནས། །སྣང་ལ་མ་འགགས་སྣ་ཚོགས་གཟུགས་སུ་ཤར། །སྐྱེ་བའི་ཆོ་འཕྲུལ་འབར་བའི་སྐུར་བསྟན་པ། །ཧཱུཾ་ལས་བསྐྱེད་པའི་དཔལ་ཆེན་ཧེ་རུ་ཀ །ཡེ་ཤེས་ཐུགས་ཀྱི་ཁྱད་པར་ཆེན་པོ་ལས། །འཇིག་རྟེན་ཁམས་ནི་རབ་འབྱམས་མ་ལུས་ཀུན། །རཾ་ཡཾ་ཁཾ་འཕྲོས་མ་དག་བསྲེས་སྦྱངས་བཀྲུས། །སྟེང་འོག་ཕྱོགས་མཚམས་འཁོར་ལོ་པདྨ་གནས། །ཨོཾ་པདྨ་སརྦ་ཡང་ཏ་ཐཱ་ག་ཏ་བུཌྜྷ་གནྡྷེ་ལཾ། པད་མ་དྷ་ར་ཨ། ཨ་བྷི་ཥིཉྩ་ཡ། གྲུ་གསུམ་མཐིང་ནག་འབར་བའི་ནམ་མཁའ་ལས། །འཐོར་བྱེད་རླུང་ནག་ཚོགས་ཀྱི་རྒྱ་གྲམ་གཏམས། །ཆགས་བྱེད་རཀྟའི་ཚོགས་ཀྱི་རྦ་ཀློང་འཁྱིལ། །ཀེང་རུས་འབར་བའི་རི་རབ་མི་བཟད་བརྩེགས། །ས་གཞི་རྡོ་རྗེ་རྒྱ་གྲམ་གཅལ་བཀྲམ་སྟེ། །ཞིང་ཆེན་གསར་རྙིང་གཏམས་པས་མཐའ་དབུས་བརྡལ། །ཨེ་ཡཾ་ཁཾ་སུཾ་བྷྲཱུཾ། མི་བཟད་སྨུག་ནག་འབར་བའི་གཞལ་ཡས་ནི། །ཆུ་སྲིན་བྱེ་བ་ས་ཡའི་ཐོད་པ་ལ། །མི་བཟད་དུར་ཁྲོད་འབར་བའི་རྩིགས་རྨང་བྱས། །དྲེགས་
པའི་ཐོད་དགུ་འབར་བས་རྩིགས་པ་བརྩིགས། །གནམ་ལྕགས་ངུར་མོ་འབར་བས་གཟེར་ཆེན་བཏབ། །རིན་ཆེན་མཆོག་གིས་ཟུར་བཞི་མཛེས་པར་བརྒྱན། །གཡུ་འོད་སྔོན་པོ་འབར་བའི་ཁ་བད་ཅན། །མུ་ཁྱུད་གནམ་ལྕགས་འབར་བའི་རི་ཡིས་བསྐོར། །བྷྲཱུཾ་བི་ཤྭ་བི་ཤུདྡྷེ་ཛྙཱ་ན་ཙཀྲ་བྷྲཱུཾ། མཐིང་ནག་གྲུ་གསུམ་འབར་བའི་དཀྱིལ་འཁོར་འདིར། །ཟླ་གམ་དབང་ཆེན་འབར་བའི་མཎྜ་ལ། །གྲུ་ཆད་གྲུ་བཞི་སྒོ་ཁྱུད་བཞི་དང་ལྡན། །ཐོད་ཕྲེང་རྡོ་རྗེ་ར་བ་མེ་དཔུང་འབར། །ཛྙཱ་ན་བཛྲ་ཛྭ་ལ། མཎྜལ་ཧཱུཾ་བྷྲཱུཾ། ཞིང་ཆེན་ཞིང་ཆུང་མང་པོ་གཅལ་དུ་བཀྲམ། །མཆོག་ཆེན་མཆོག་ཕྲན་མང་པོ་གདན་དུ་བཏིང་། །ཐེ་རང་དགུ་བརྒྱ་མང་པོའི་གབ་ཙེ་ལ། །ལྷ་སྲིན་སྡེ་བརྒྱད་མང་པོའི་ནང་སྟན་ཅན། །ནྲྀ་ཏི་ར་བཾ། ཨིནྡྲ་ཏི་ར་བཾ། དེ་བ་ཏི་ར་བཾ། རཀྴ་ཏི་ར་བཾ། རཱུ་ཏྲ་མཎྜལ་ལ་ཧཱུཾ། དུར་ཁྲོད་དབྱིངས་ནས་ཕྱག་རྒྱའི་སྐུར་གསལ་བ། །མདོག་བཟང་ནག་མོ་རལ་པའི་ཟར་བུས་བརྒྱན། །རྒྱན་དང་ཆ་ལུགས་སྣ་ཚོགས་འཇིགས་པས་བརྒྱན། །རླུང་འཚུབ་ནང་ན་སྐུ་ཡི་ཕྱག་རྒྱར་གསལ། །ཨོཾ་རུ་རུ་རོ་རུ་ཙ་པ་ལ། ཨ་ཤུག་མེ་མ་ཧཱུཾ་མ་བྷྱོ་ཛ་ཛ། ཏིང་ངེ་འཛིན་དང་གཞལ་ཡས་ཁང་གི་ལེའུ་སྟེ་དོན་གཅིག་པའོ།། །།དཔལ་དང་ལྷ་མོ་འགྲོ་ཀུན་བྱམས་པ་མོ། །སེམས་ཅན་ཀུན་ལ་བྱམས་པ་མ་དང་འདྲ། །མི་སླུ་དམ་ཚིག་རྗེས་སུ་དགོངས་མཛོད་ལ། །བདག་ལ་བརྩེ་དགོངས་གནས་འདི་ཉིད་དུ་སྤྱོན། ཛཿཧཱུཾ་བཾ་ཧོཿ། ཨེ་ཧྱེ་ཧི་མ་མ་ཏྲག་རཱུ་ཏྲ།མ་མ་ཡ་བྷྱོ་རུ་ལུ་རུ་ལུ་ཧཱུཾ་ཛཿ། དད་པ་དང་ནི་དམ་ཚིག་གིས། །མ་གཅིག་ལྷ་མོ་སྤྱན་འདྲེན་ན། །བྱང་ཤར་མཚམས་ནས་སྤྱན་འདྲེན་ནོ། །འཇིགས་བྱེད་ཆེན་མོ་གཤེགས་སུ་གསོལ། །སྤྱོད་པ་རླབས་ཆེན་གཤེགས་སུ་གསོལ། །ཤུགས་དྲག་མཐུ་ཆེན་གཤེགས་སུ་གསོལ། །ཁྱབ་འགྲོ་རྩལ་ཆེན་གཤེགས་སུ་གསོལ། །དགྲ་བགེགས་འདུལ་བྱེད་གཤེགས་སུ་གསོལ། །ཡོན་བདག་འཆི་བདག་བཟློག་ཏུ་གསོལ། །ཁྲག་འཐུང་ཆེན་མོ་གཤེགས་སུ་གསོལ། །འཇིག་རྟེན་འཁྲུགས་ཆེན་གཤེགས་སུ་གསོལ། །བདུད་ཀྱི་ཡུམ་གཅིག་གཤེགས་སུ་
གསོལ། །གཤིན་རྗེའི་ལྕམ་གཅིག་གཤེགས་སུ་གསོལ། །འདོད་ཁམས་དབང་ཕྱུག་གཤེགས་སུ་གསོལ། །འཚུབ་མ་སྟོང་འཁྱིལ་ནང་ནས་གཤེགས་སུ་གསོལ། །གཡས་ཀྱི་ཕྱག་ན་རླུང་འཚུབས་བསྣམས་པ་ནི། །རླུང་ནག་ནང་ནས་རལ་གྲི་ཕྱུང་བའི་ཚུལ། །དགྲ་བོ་ཆེ་གེ་མོ་ཡི་རྩད་ཆོད་ལ། །དམ་ཚིག་བཞིན་དུ་གཤེགས་སུ་གསོལ། །གཡོན་ན་ནེའུ་ལེའི་རྐྱལ་པ་ཐོགས་པ་ནི། །མི་མགོ་བཅད་པ་སྦས་པའི་སྣོད། །དགྲ་བོ་ཆེ་གེ་མོ་ཡི་དྲུངས་འབྱིན་མ། །དམ་ཚིག་བཞིན་དུ་གཤེགས་སུ་གསོལ། །སྔོན་ཚེ་དཔལ་ཆེན་ཧེ་རུ་ཀའི། །སྤྱན་སྔར་ཁས་བླངས་དམ་བཅས་པས། །མ་རུ་ཙེ་ཡི་སྒོ་འགྲམ་དུ། །ཇི་ལྟར་ཁས་བླངས་དམ་བཅས་བཞིན། །ཁས་བླངས་མནས་བོར་ད་བསྐུལ་གྱི། །དམ་ཚིག་བཞིན་ལ་གཤེགས་སུ་གསོལ། །ཛཿཧཱུཾ་བཾ་ཧོཿཨེ་ཧྱེ་ཧི་རུ་རུ་རོ་རུ་ཙ་པ་ལ་ཨ་ཤུག་མེ་མ་ཧཱུཾ་མ་བྷྱོ་ཛཱ་ཛཱ། ཨཱ་གཙྪ་ཡ་ཨཱ་གཙྪ་ཡ་ཧཱུཾ་ཛཿ། ཁྱོད་ནི་འདོད་ཁམས་འཕྲུལ་མོ་ཆེ། །ང་ནི་རྣལ་འབྱོར་སྒྲུབ་པ་པོ། །ཟས་ངན་མཱཾ་ས་ཟ་ཟ་ཡི། །སྐོམ་ངན་ཁྲག་ཏུ་འཐུང་འཐུང་གི། །སྣོད་ངན་བྷནྡྷ་ཐོགས་ཐོགས་ཀྱི། །གནས་ངན་བྲག་ཕུག་རྒྱུ་རྒྱུ་ཡི། །གོས་ངན་གཡང་གཞི་གོན་གོན་གྱི། །མཚོན་ངན་ཕུར་པ་འདེབས་འདེབས་ཀྱི། །ལས་ངན་དགྲ་བོ་སྒྲོལ་བར་གྱིས། །དམ་ཚིག་དུས་ལ་བབ་ཀྱི་གཤེགས་སུ་གསོལ། །ཛཿཧཱུཾ་བཾ་ཧོཿ། ཨེ་ཧྱེ་ཧི། ཏདྱ་ཐཱ། རུ་རུ་བི་ཏིཥྛ་བ་ཏོ་སི་རུ་རུ་རོ་རུ་པི་ཏིཥྛ་བ་ཏོ་སི་ཧཱུཾ་ཛཱ་ཛཱཿ། འཁོར་བ་མྱ་ངན་འདས་པ་གཉིས་ལ་དབང་བསྒྱུར་ཞིང་། །སྔོན་ཚེ་དཔལ་ཆེན་ཧེ་རུ་ཀའི། །སྤྱན་སྔར་ཁས་བླངས་དམ་བཅས་པའི། །རྣལ་འབྱོར་བདག་གི་ལས་རྣམས་སྒྲུབ་པར་མཛོད། །ནག་མོ་རེ་མ་ཏི་ལ་ཕྱག་འཚལ་ལོ། །མ་མོ་ཁྱོད་ལ་མཆོད་པ་འབུལ་བ་ནི། །དགྲ་བོ་ཆེ་གེ་འདི་ལགས་ཏེ། །ཕུང་པོ་ལྔ་དང་འབྱུང་བ་ལྔ། །ཁམས་དང་སྐྱེ་མཆེད་བཅས་པ་འདི། །མ་ལུས་བཞེས་ནས་བསྣམ་དུ་གསོལ། །མ་མོ་འདིར་སྤྱོན་དམ་ཅན་རྣམས་ལ་སྤྱོན། །འབྱུང་པོ་འབྱུང་མོའི་ཤ་ནི་ཟན་བས་ཞིམ། །མ་མོ་དམ་ཅན་འདིར་སྤྱོན་ཁྲག་ལ་སྤྱོན། །འབྱུང་པོ་འབྱུང་མོའི་ཁྲག་ནི་ཆང་བས་ཞིམ། །མ་མོ་
དམ་ཅན་འདིར་སྤྱོན་རུས་ལ་སྤྱོན། །འབྱུང་པོ་འབྱུང་མོའི་རུས་པ་མར་བས་ཞིམ། །ཤ་ཁྲག་རུས་པའི་དམ་རྫས་འདི་གསོལ་ལ། །བདག་གིས་བཅོལ་བའི་ལས་འདི་མཐར་ཕྱུང་ཞིག །རུ་རུ་རོ་རུ་ཙ་པ་ལ་ཨ་ཤུག་མེ་ཧཱུཾ་བྷྱོ་ཧཱུཾ་ཛ་ཛ་ཁ་དཾ་བ་ལ་ཏཾ། བཾ་མ་བཾ་མ་མ་ཁཱ་ཧི་མ་ཁཱ་ཧི། དགྲ་བོ་སྙིང་ཙིཏྟ་ཁཱ་ཧི། རཀྟ་ཁཱ་ཧི། ནི་རི་ཏི་ཁཱ་ཧི། བ་སུ་ཏ་ཁཱ་ཧི། གཟུགས་ཕུང་དང་དབང་པོ་ལྔ་གསོལ་ཅིག །རོལ་ཅིག་མངོན་དུ་མཛོད། མ་བྷྱོ་རུ་རུ་ཁཱ་ཧི། མའོ་མའོ། །སྤྱན་དྲང་བ་དང་ཕྱག་འཚལ་བའི་ལེའུ་སྟེ་དོན་གཉིས་པའོ།། །།མ་མོ་ཁྱོད་ལ་མཐོལ་བཤགས་གསོལ་པ་ནི། །བདག་ཅག་རྣལ་འབྱོར་སྒྲུབ་པ་པོས། །ཐོག་མ་མེད་པའི་དུས་མཐའ་ནས། །མཚམས་མེད་ལྔ་དང་མི་དགེ་བཅུ། །མདོར་ན་སྡིག་པ་ཅི་བགྱིས་པ། །དེ་དག་བདག་གིས་སོ་སོར་བཤགས། །ཨོཾ་བཛྲ་སཏྭ་ས་མ་ཡ། མ་ནུ་པཱ་ལ་ཡ། བཛྲ་སཏྭ་ཏྭེ་ནོ་པ་ཏིཥྛ། དྲྀ་ཌྷོ་མེ་བྷ་ཝ། སུ་ཏོ་ཥྱོ་མེ་བྷ་ཝ། ཨ་ནུ་རཀྟོ་མེ་བྷ་ཝ། སུ་པོ་ཥྱོ་མེ་བྷ་ཝ། སརྦ་སིདྡྷིམྨེ་པྲ་ཡཙྪ། སརྦ་ཀརྨ་སུ་ཙ་མེ། ཙིཏྟཾ་ཤྲི་ཡཿཀུ་རུ་ཧཱུཾ། ཧ་ཧ་ཧ་ཧ་ཧོཿ། བྷ་ག་ཝཱན་སརྦ་ཏ་ཐཱ་ག་ཏ་བཛྲ་མཱ་མེ་མུཉྩ། བཛྲཱི་བྷ་ཝ། མ་ཧཱ་ས་མ་ཡ་སཏྭ་ཨཱ། སོགས་དང་། ཨེ་རཀ་ཏི། མ་མོ་ཁྱོད་ལ་དངོས་གྲུབ་སློང་བ་ནི། །དགྲ་བོ་ཆེ་གེ་མོ་འདི་ལགས་ཏེ། དུས་བཏབ་སྟུང་ལ་ཚེ་ཡི་འདུ་བྱེད་སྐུལ། །གཟུགས་ཕུང་ཆོམས་ལ་ཡིད་ཕུང་ཆིངས། །འཁོར་ཤིགས་ཚངས་དཀྲུགས་ལས་མཛོད་ཅིག །ང་ཡང་དམ་ལས་མི་འདའ་འོ། །ཁྱོད་ཀྱིས་དམ་ལས་མ་འདའ་ཞིག །མའོ་མའོ། མ་ཤོད་མ་ཤོད། ཙ་པ་ལ་ཙ་པ་ལ། ཧི་ལི་ཧི་ལི། རུ་རུ་བྷྱོ་བྷྱོ། གསོལ་ལོ། །རོལ་ཅིག །མངོན་དུ་མཛོད་ཅིག །དུས་བཏབ་སྟུང་ལ་ཚེ་ཡི་འདུ་བྱེད་སྐུལ། །ས་མ་ཡ་ས་མ་ཡ། རཏྣ་ཧ་ན་ཧ་ན་སྟྭཾ། གིང་ཀ་ར་གིང་ཀ་ར་ལས་མཛོད་ཅིག །མ་མོ་ཁྱོད་ལ་ཕྲིན་ལས་བཅོལ་བ་ནི། །དགྲ་བོ་ཆེ་གེ་མོ་འདི་ལགས་ཏེ། ཀྱེ་མའོ་ནད་ཀྱི་བདག་མོ་ཆེན་མོ་སྟེ། །གཤིན་རྗེའི་ཁམས་ནས་སྲིང་གཅིག་མ། །འཇིགས་པའི་
ལན་བུ་གཅིག་མ་སྟེ། །རོ་ཉེ་མཛེས་པས་རྣམ་པར་བརྒྱན། །ཆ་ལུགས་མ་ལུས་འཆང་བྱེད་མ། །རྐང་སྒྲོག་ལྕགས་ཀྱིས་རབ་ཏུ་དཀྲིས། །ཕྱིན་ཕྱོགས་དྲེའུའི་ཕ་ལ་ཞོན། །འབྱུང་པོ་ཕལ་ཆེན་ཀུན་གྱིས་རྗེ་མོར་མཐོང་། །འབྱུང་པོ་ཕལ་ཆེན་ཤ་ལ་ཆེམ་ཆེམ་ཟ། །མི་ཁྲག་ཆང་གི་སར་རོ་མྱོས། །མཚན་མོ་རྦད་པས་དཔག་ཚད་དགྲ་རྣམས་ཟ། །ལོངས་ཤིག་དེ་ནི་དགྲ་རྣམས་ལོངས། །རལ་པ་འབར་བ་སྟོང་ཁམས་སྔངས། །དགྲ་རྣམས་ཁྲག་གི་སྐོམ་གྱི་རྒྱ་མཚོར་བསྐྱིལ། །དགྲ་རྣམས་ཤ་ནི་ཁྱོད་ཀྱིས་རྒྱག་མིད་ཅིག །ཕོངས་པས་དགྲ་ཡི་སེམས་འདྲེན་མ། །དུས་ལ་བབས་ཀྱིས་ད་ཟོ་ཞིག །ཀྱེ་མ་རིམས་ཀྱི་རྐྱེན་མོ་ཆེན་མོ་སྟེ། །འཚུབ་མ་སྟོང་འཁྱིལ་བྱེད་པ་མ་མོ་ཁྱོད་ཀྱི་མཐུ། །ཤིང་ལོ་རླུང་ཁྱེར་ས་ལ་མ་རེག་ང་ལ་ཡོད། །སྙིང་རྩ་མ་ཉམས་སྐམ་པ་ང་ལ་ཡོད། །མི་དབང་འབྲས་བུ་སྐམ་པ་ང་ལ་ཡོད། །འཆི་ཀའི་མཚལ་ཐིག་སྐམ་པ་ང་ལ་ཡོད། །མ་མོ་རྟོག་པའི་དབང་གིས་ཐང་གཅིག་མི་བཀྲེས་སམ། །འཛར་བའི་སྣོད་དུ་བྱས་པའི་དགྲ་བོ་ཁྲིད་དེ་ཤོག །མ་མོ་ཁྱོད་ཀྱི་མཐུ་ཡིས་ཁྱད་པར་ནི། །ཤིག་ཤིག་གཏོགས་སྤྱོད་བཤིག་པ་བྱང་ཆུབ་ལམ། །གཏུབས་ཤིག་དམྱལ་བ་སྒྱུ་མ་ཁྱད་པར་གྱིས། །གཏུབས་ཤིག་མ་མོ་ཁྱོད་ཀྱི་མཐུ་དང་དབལ་སོ་ནི། །ཐབས་མཆོག་སྙིང་རྗེའི་བྱིན་རླབ་ཀྱིས། །རི་མཆོག་རྩ་བའི་བྲག་ཕུག་ཏུ། །ཀ་ར་བཱི་རའི་རྒྱ་ལྕགས་ཀྱིས། །རུས་པ་ཕུང་བར་བཤིག་པར་མཛོད། །མ་མོ་དམ་ལས་མ་འདའ་ཞིག །ཨོཾ་ཏདྱ་ཐཱ། རུ་རུ་བེ་རི་སྟ་བ་ཏོ་སོ་རུ་རུ་རོ་རུ་བི་ཏི་སྟ་བ་དེ་སོ་སྭཱ་ཧཱ། ཏདྱ་ཐཱ། དུ་རུ་བ་ཏོ་རྟི་བ་དོ་མ། རུ་རུ་རོ་རུ་ཏིཥྚ་བ་ཏོ་ཧཱུཾ་ཛཿ། སྙིང་པོ་འདི་ལན་དྲུག་ཅུ་བརྗོད། རལ་ཆེན་ལན་བདུན་གདབ། གདུང་བའི་ང་རོ་དབྱུང་། བོད་པའི་བརྡས་འབོད་པའོ། །ཡུན་གྱིས་མ་མོ་ཁྱོད་ལ་གསོལ་འདེབས་ན། །བདག་གིས་བཅོལ་བའི་ལས་རྣམས་ཀུན། །བསམ་པ་ཙམ་གྱིས་འགྲུབ་པར་མཛོད། །མ་མོ་ཁྱོད་ཉིད་བདག་གིས་གྲུབ་པར་གྱུར་ཅིག །ཕྲིན་ལས་བཅོལ་ཞིང་ཐུགས་དམ་བསྐང་བའི་
ལེའུ་སྟེ་དོན་གསུམ་པའོ།། །།ཆོ་ག་འདིའི་ཐབས་ནི་བྱ་རོག་དང་འུག་པའི་གུང་རུ་ལ། ཤོག་ཤོག་གྲུ་བཞི་ཚོན་རེ་བ་གཉིས་ལ། གཅིག་ལ་མིང་བྲི། གཅིག་ལ་དགྲ་བླ་བྲིས། ཁྱི་ཁྲག་དང་ར་ཁྲག་གིས་བླན། བར་དུ་ཤོག་བུ་གྲུ་བཞི་པ་གཅིག་ལ། ཨ་ནྲྀ་རཀ་ཤ་ཕྱེ། བྱ་བ་བྲིས་ལ་བར་དུ་གཞུག །རྩ་བ་ཚོན་སྐུད་ཀྱིས་དཀྲི། ཡང་ཤོག་བུ་གསུམ་ཀ་ཐི་གུས་བཏགས་ལ་སྔགས་བར་དུ་གཞུག །མ་མ་ཏྲག་རཀྴ་མ་ར་ཕྱེ། ཞེས་བརྗོད་ལ། ཉུང་དཀར་ལ་སྔགས་ཏེ་གདབ། རླུང་ཆེན་པོ་ལ་ཕྱར་རོ། །ལས་བྱང་ལས་འབྱུང་བ་བཞིན་དུ་བསྐུལ་ཞིང་ལས་བཅོལ་ལོ། །ལྷ་དང་དཔྲལ་བར་ཡང་བྱེད་དོ། །ནང་འཐབ་ཏུ་གཞུག་ནའང་འགྲུབ་པོ། །ཡང་ན་ཤོག་ཤོག་གཅིག་ལ་དགྲ་བོའི་མིང་བྲི། གཅིག་ལ་ལྷ་འདྲེ་གང་གཉན་པའི་མིང་བྲིས་ལ་བར་དུ་སྔགས་གཞུག །ཤིང་རིང་པོ་ལ་བཏགས་ཏེ། རླུང་ཆེན་པོ་ལ་ཕྱར་ན་མཐའ་ཕུང་བར་འགྱུར་རོ། །ཤོག་ཤོག་ཚོན་གང་གྲུ་བཞི་པ་གཉིས་ལ། གཅིག་ལ་ར་རོག་པོའི་ཁྲག་གིས་དགྲ་བོའི་མིང་བྲིས། སྙིང་པོ་ནི་མ། ཤོག་ཤོག་ཚོན་གང་པ་གཅིག་ལ། ཁྱི་རྒྱ་བོའི་ཁྲག་གིས་དགྲ་བོའི་དགྲ་བླ་བྲིའོ། །སྐྱེར་མདའ་ཟུང་གཅིག་ལ། གཅིག་ལ་བྱ་རོག་གི་སྒྲོས་བསྐྱོན། གཅིག་ལ་འུག་པའི་གུང་རུའི་སྒྲོས་བསྒྲོན། འུག་པའི་སྒྲོས་བསྐྱོན་པའི་མདའ་ནི་སེར་བཀྲར་བྲིའོ། །བྱ་རོག་གིས་བསྒྲོན་པའི་མདའ་ནི་ནག་པོ་ལྡིང་ནག་ཏུ་བྲིའོ། །མདའ་དེ་གཉིས་ལ་བྱ་རོག་གིས་བསྒྲོན་པའི་མདའ་ལ། བྱ་རོག་གི་གུང་རུ་མདའ་ཚད་མ་གཅིག་གདགས་སོ། །ཤོག་ཤོག་ཚོན་གང་པ་གཅིག་ལ་ཁྲག་གིས་བྲིས་ལ་བྱ་རོག་གི་གུང་རུ་ལ་གདགས་སོ། །འུག་པའི་གུང་རུ་ལ་བྲིས་པ་ནི་མདའ་ཁྲ་བོ་ལ་གདགས་སོ། །ཤོག་ཤོག་ཚོན་གང་པ་གྲུ་བཞི་པ་གཅིག་ལ། ཁྱི་ཁྲག་གིས་བྲིས་པ་ནི་འུག་པའི་གུང་རུ་ལ་གདགས་སོ། །གཉིས་པོ་འཐབ་ཏུ་གཞུག་པའི་སྔགས་ནི། ཨོཾ་མཱ་མཱ་ཏྲག་རུ་ཏྲ་མཱ་ར་ཡ། མ་མ་ཁྲག་མཁའ་ལྡིང་། ཏྲག་བྷྱོ་རུ་ལུ་རུ་ལུ་ལུ། ས་སེར་དང་། ཡུངས་ཀར་དང་། ས་ནག་བསྲེས་པ་ལ་སྔགས་བརྒྱ་
རྩ་བརྒྱད་བཟླས་ཏེ། ཤོག་ཤོག་གུང་རུ་གཉིས་ལ་དྲག་ཏུ་བརྡེག་གོ། །དེ་ནི་དགྲ་དང་དགྲ་བླ་ཕྲལ་བའི་སྔགས་ཡིན་ནོ། །མཁའ་ལྡིང་ནང་འཐབ་ཏུ་གཞུག་པའི་སྔགས་ཀྱང་ཡིན་ནོ། །གནས་ནི་ལྷ་འདྲེ་མི་སྲུན་པའི་བྲག་ཕུག་དགོན་པར་བྱའོ། །བསྙེན་པ་ཞག་བདུན་གྱི་བར་དུ་ཚུགས་ན་ཇི་ལྟར་དགྲ་བླ་བཟང་པོ་ཡང་འོང་ངོ་། །རྟགས་དང་སྦྱར་ལ་བསྲེག་རྫས་ལྔས་ཀྱང་བདུག་ཅིང་དབྱེའོ། །དབྱེ་བ་གསུམ་གྱི་ལེའུ་སྟེ་དོན་བཞི་པའོ།། །།ཡང་རྣམ་པ་གཅིག་ལ། དོང་ཁྲུ་གང་གྲུ་གསུམ་པ་གཅིག་བརྐོས་ལ། ནང་རྒྱ་སོལ་གྱིས་བཀངྐ་ལ་ལྷང་ཚེར་ལ་དགྲ་བོའི་མིང་དང་རུས་དང་། གཟུགས་བྲིས་ནས་མི་ཤི་བའི་ལག་པ་གཡས་པར་བཅུག་ལ། དོང་གི་དཀྱིལ་དུ་བཅུག་ལ། ཤ་རུས་ཟ་བའི་སྙིང་པོ་ཉུང་དཀར་ལ་བཟླས་ཏེ། ཞག་གསུམ་བསྙེན་པ་བཙུགས་ཏེ། སྲིན་མོ་ཏི་སྟ་ལྕགས་ཀྱི་རྐང་གསུམ་མ་རྦད་ཅིང་། དོང་མཚོན་རྣོན་པོས་ཁ་བཅད་དོ། །ཕོ་ཉ་རྣམས་ཀྱི་སྙིང་པོ་དྲག་ཏུ་བཟླས་ཤིང་། ཉུང་དཀར་གྱིས་བྲབ་ཕོ་ཉ་ཡང་བཏང་ལྕགས་ཀྱི་ཕུར་བུ་སོར་གསུམ་པ་གཅིག་སྙིང་གར་བརྡེག་དོན་མ་འགྲུབ་ཀྱི་བར་དུ་མ་བྱུང་ཞིག་པར་བསྒོའོ། །ནམ་ཕྱེད་ཚུར་ཕྱེད་ན་དོང་ཁ་བསུབས་ལ། དམོད་གཟུག་ལ་མནན་པའི་ལས་བྱའོ། །རྡོ་རྗེ་སྤུན་ཡིན་ཡང་གདོན་མི་ཟ་བར་ངེས་སོ། །དཀོན་མཆོག་གསུམ་གྱི་བསྟན་པ་འཇིག་ངེས་པ་ལ་བྱའོ། །བབ་ཆོལ་དུ་མི་བྱའོ། །བྱས་ན་སྡིག་ཆེའོ། །ཡང་ན་གཡམ་པ་སྔོན་པོ་ལ་དགྲ་བོའི་མིང་རུས་དང་གཟུགས་བྲིས། ཤིང་སྲེག་ཤའི་ལྕགས་ཀྱིས་བྲབ་དགྲ་བོའི་གཟུགས་ལ་གདབ་ཅིང་། མ་མོ་རྡོ་རྗེ་དཔུང་སྒྲོལ་མ་ཞེས་བྱ་བ་མདོག་ནག་མོར་འདུག་པ། སེར་བུ་ལུ་ཞོན་པ་གཅིག་བསྒོམ་མོ། །ཏྲག་རཀྴ་བུ་རུ་མུ། རུ་ལུ་རུ་ལུ་ཧཱུཾ་བྷྱོ་ཧཱུཾ། ཞེས་བརྗོད་ཅིང་། བརྡེག་ན་ཞག་བདུན་ནས་རྟགས་འོང་ངོ་། །ཡང་ན་མི་ཁོག་སྐམ་པའི་ནང་དུ་གཏོར་མ་བཤམ། གཏོར་མ་བཤམ་པའི་ཐབས་ལ། དཔྱིད་བྱ་ནག་པོའི་མིག་ལ་གཏོར་མ་བྱ། དབྱར་མེ་ཏོག་སྣ་ཚོགས་དང་ཁྲག་བསྲེས་ལ་གཏོར་མ་བྱ། སྟོང་འབྲུ་སྣ་ཚོགས་དང་
ཁྲག་བསྲེས་ལ་གཏོར་མ་བྱ། དགུན་ཤིང་སུར་བུའི་ཐལ་བ་དང་ཁྲག་བསྲེས་ལ་གཏོར་མ་བྱ། དུས་བཞི་དང་སྦྱར་བའི་གཏོར་མའི་ནང་ནང་དུ་ཞིང་ལྤགས་དང་དགྲ་བོའི་མིང་རུས་དང་གཟུགས་བྲིས་ལ་གཞུག །ཤ་རུས་ཟ་བའི་སྙིང་པོ་འདི་བཟླས་སོ། །སྙིང་ཟ་བ་ཙིཏྟ་མ་མ་ཤ །རོལ་ཁྲག་འཐུང་། ཀངྐ་ཀ་ཤ་ཟན། ཡང་ཏང་པ་ར་དོ་ཤལ་ཁྱི་སྤྱང་། གྲང་སྟེང་། གྲ་ཧེ་བཛྲ་བྷནྡྷ་བྷྱོ་རུ་ལུ་རུ་ལུ། ཞེས་བཟླས་ཏེ། དམེ་ལག་ལ་ཁྲག་ཕྱུང་བ་རང་གི་དཔྲལ་བའི་དབྱེས་སུ་བྱུགས་ཏེ། དབང་ཆེན་གྱི་ཏིང་ངེ་འཛིན་ལ་ཞུགས་པར་གྱུར་ཏེ། བསྒོམས་ཤིང་བསྐུལ་ནས་ཉི་མ་ནུབ་ཁར་བཏང་ན་རྒྱུན་ཆད་པར་གྱུར་ཏོ། །དུས་བཞི་དཔུང་སྒྲོལ་གྱིས་བསད་པའི་ལེའུ་སྟེ་དོན་ལྔ་པའོ།། །།ཡང་ན་རབས་ཆད་ཀྱི་ཐོད་པར་ཆུ་གཙང་མ་དང་ཁྲག་བསྲེས་ལ་བླུག་སྙིང་པོ་ནུས་ཚད་བཟླས་ནས། ཁྱིམ་མམ་མཁར་ལ་གཏོར་ལ་ཞག་བདུན་ན་རྟགས་འོང་ངོ་། །ཡུལ་ཕྱོགས་སུ་གཏོར་ན་ཡུལ་དུ་མི་དགེ་བ་སྣ་ཚོགས་འོང་ངོ་། །ཏྲག་རཀྴ་མུ་ཏྲ་ཤ་མུ་ཏྲ་སྙིང་ཁ་རག་མ་བྷྱོ་བྷྱོ། ཞེས་བརྗོད་དེ། ཐོད་པ་འཕང་ངོ་། །ཡང་ན་རབས་ཆད་ཀྱི་ཐོད་པའི་ནང་དུ་ཁྲག་སྣ་ཚོགས་པ་དང་དུག་སྣ་ཚོགས་ཉུང་དཀར་དང་བསྲེས་ཏེ་བླུགས་ལ་བག་ཟན་གྱིས་ཁ་བཅད་ནས་མིག་ངོས་ནས་ཚོན་སྐུད་ཀྱིས་བཏགས་ལ། བདག་ཨེ་ཀ་ཛཱ་ཏིའི་ཏིང་འཛིན་དུ་ཞུགས་ལ། ཚོན་སྐུད་བདག་གི་སོས་བཟུང་སྟེ་དགྲ་བོའི་ཡུལ་ཕྱོགས་སུ་ཁ་བལྟས་ཏེ་སྔགས་འདི་དྲག་ཏུ་བཟླས་སོ། །མ་མ་ཏྲག་རཀྴ་མུ་ཏྲ་མ་བྷྱོ་རུ་ལུ་རུ་ལུ་བྷྱོ། ཞེས་བརྗོད་པ། གང་ལ་དམིགས་པའི་ཁྱིམ་དང་། ཡུལ་དང་མཁར་ལ་བརྒྱབ་ན་མཐའ་ཕུང་ངོ་། །ཆོ་ག་འདི་གཉིས་ནི་དཀོན་མཆོག་གསུམ་གྱི་སྐུ་དགྲར་དར་བའི་དགྲ་བོའམ་རྒྱལ་ཁམས་ཡོངས་སུ་ཕུང་བར་བྱེད་པའི་ལྷ་འདྲེ་མི་སྲུན་པའམ། བསྟན་པ་འཇིག་པ་སྨད་ཅིང་སྤྱན་མིག་འཛེར་བའི་རཱུ་ཏྲ་ལ་བྱའོ། །ཐོད་པ་དཀར་ནག་གིས་བསད་པའི་ལེའུ་སྟེ་དོན་དྲུག་པའོ།། །།ཡང་ན་ཕུད་གཙང་མ་བྱས་ལ། ལྷ་བཤོས་ཟུར་གསུམ་པ་བྱས་ལ་དཀར་པོ་གཅིག་དམར་
པོ་གཅིག་ནག་པོ་གཅིག་བྱས་ལ། མདོག་དང་སྦྱར་ཏེ་ཕུར་བུ་སེན་གང་བ་གསུམ་གཞུག་གོ། །གཞོང་སྒོར་གཅིག་གི་ནང་དུ་སྲན་མ་ཕུལ་གང་བྲ་བོ་ཕུལ་གང་། སོ་བ་མཆུ་རིང་ཕུལ་གང་སྟེ་ཕུལ་གསུམ་བླུགས་ལ། དེ་རེ་རེའི་སྟེང་དུ་ལྷ་བཤོས་རེ་རེ་བཞག །ཏིང་ངེ་འཛིན་རྣམ་གསུམ་རིམ་གྱིས་བསྐྱེད་དེ། ལས་ཀྱི་ལྷ་ཧ་ཡ་གྲཱི་ཝ་གསལ་བར་བསྒོམ། སྲིང་མོ་བཞི་དབང་དུ་བསྡུས་ལ་ལས་ལ་གཏོང་ངོ་། །ཕོ་ཉ་ཕྱི་མ་ཡང་གཏོང་ངོ་། །ཕོ་ཉ་བཏང་བའི་རྗེས་སུ་རྒྱས་པའི་ལྷ་བཤོས་ཡང་བཏང་ངོ་། །ཆོས་འཁོར་འཇིག་པའི་དགྲ་བགེགས་དང་། ཕ་ཚན་ཆེན་པོ་ཤི་ཁ་དབྱེ་བ་ལ་བྱའོ། །མདོས་ཕུར་སོར་དྲུག་གིས་བསད་པའི་ལེའུ་སྟེ་དོན་བདུན་པའོ།། །།སྦས་པའི་འཕྱང་བསྐུལ་བའི་ལེའུ་ལྷག་མ། སྣང་སྲིད་ཐམས་ཅད་ཡུམ་གྱི་མཁའ་ལས་སྦས། རྒྱལ་མོ་བཅུ་གསུམ་སྐུ་གཡས་སུ་སྦས། དབྱིངས་ཀྱི་ཡུམ་དགུ་སྐུ་གཡོན་དུ་སྦས། མཚན་མར་སྣང་བ་ཐམས་ཅད་སེམས་སུ་སྦས། སེམས་ཡེ་ཤེས་སུ་སྦས། ཡེ་ཤེས་ཆོས་ཀྱི་དབྱིངས་སུ་སྦས། མན་ངག་སྟོན་པའི་ཕྱིར་ཡང་འཕྱོང་། དོན་སྟོང་པའི་ཕྱིར་ཡང་འཕྱོང་། ལུང་བརྒྱུད་པའི་ཕྱིར་ཡང་འཕྱོང་། རྒྱུད་དང་ལུང་དང་མན་ངག་གསུམ། རྒྱུད་དུ་བསྟན་པའི་ལེའུ་བརྒྱ་ཉི་ཤུ་རྩ་གཉིས། ལུང་དུ་བསྟན་པའི་ལེའུ་བརྒྱ་ཉི་ཤུ་རྩ་གཉིས། མན་ངག་ཏུ་བསྟན་པའི་ལེའུ་བརྒྱ་ཉི་ཤུ་རྩ་གཉིས་ཏེ། སུམ་བརྒྱ་དྲུག་ཅུ་རྩ་ལྔའི་དབུ་ལས་སྤྱན་བཀོལ། ཀུན་གྱི་དོན་བཀོལ་བའི་ཕྱིར་ན་བཀོལ། ལས་དང་དཀྱིལ་བསྒྲུབ་པའི་བཀོལ་བས་བཀོལ། དོན་ཚང་བར་སྟོན་པས་ལེའུ་ལགས། སྐུ་གསུང་ཐུགས་ཀྱི་འཕྱོང་བཀོལ་བའི་ལེའུ་ལགས་ཏེ་དོན་བརྒྱད་པའོ།། །།རྣལ་འབྱོར་ཆགས་པའི་ཆོ་གའི་རྒྱུད་ལས་བྱུང་བའི་ལུང་། །ཡབ་ཡུམ་གཉིས་མེད་དོན་གྱི་རྣལ་མ་ལ། །ཏིང་འཛིན་ཕུན་སུམ་ཚོགས་པར་འབྱོར་ཏེ་གནས། །ཆོ་ནི་ཤེས་རབ་མ་ཆགས་དབྱིངས། །ག་ནི་ཐབས་མཆོག་གནོད་མེད་མཐའ། །གཉིས་སུ་མེད་པས་ནང་ཞེས་བྱ། །སྤྲུལ་པ་འབྱུང་བས་
རྒྱུད་ཅེས་བྱ། །མངོན་སངས་རྒྱས་པས་ལུང་ཞེས་བྱ། །རྡོ་རྗེ་སྦས་པའི་ཕྱིར། གསང་བ་ལས་ཀྱི་ཐིག་ལེ། ཕྱི་སྣོད་ཀྱི་བསྡུས་པས་ཡུམ་གྱི་རྡོ། ནང་བཅུད་བསྡུས་ཡབ་ཀྱི་རྗེ། གཉིས་མེད་གཅིག་པས་རྡོ་རྗེའི་དོན། རང་བཞིན་གསང་བའི་མཚན། སྦས་པའི་གསང་དང་མན་ངག་གསང་། །ཡིད་བཞིན་འབྱུང་བས་བ་ཞེས་བྱ། །ཐབས་རྣམས་སྟོན་པས་ལས་ཞེས་བྱ། །ཀྱི་ནི་གོང་འོག་འདྲེལ་བའོ། །ཐིག་ནི་མ་ནོར་བྱང་ཆུབ་སེམས། །ལེས་ནི་མ་ཁྱབ་མེད་པའོ། །དོན་གྱི་བཅུད་རྣམས་འབྱུང་བས་འཕྱོང་གི་མདོ། །སྐུ་གསུང་ཐུགས་ཀྱི་བཅུད་ཀྱི་འཕྱོང་སྟེ་ལེའུ་སྟེ་དོན་དགུ་པའོ།། །།དད་པ་དང་བརྩོན་འགྲུས་སུ་ལྡན་པས། སྣོད་དང་སྐལ་བར་ལྡན་པས་གནས་གཞུང་དང་མཐུན་པའི་ཁྱད་པར་ཅན་དུ། གསང་བའི་དཀྱིལ་འཁོར་གཞུང་བཞིན་དུ་བཤམས་ལ། སྒྲུབ་པའི་དཀྱིལ་འཁོར་གང་ཡང་རུང་བ་བཞེངས་སུ་གསོལ། བདུད་རྩི་སྣ་ལྔའི་ཆག་ཆག་བཏབ། སྤྱན་དྲང་བ་ལ་སོགས་གཞུང་བཞིན་བྱ། འབྲས་བུ་ཆེན་པོ་ལྔ་ལ་སོགས་པ་རྩ་བ་ལྔ་སྩལ། བྱིན་གྱིས་བརླབས་པ་དག་པའི་ཞིང་ལྔ་ནི། རྟ་དཀར་པོ་ཤེལ་མིག་ཁྱི་དཀར་པོ་སྣ་དམར། གླང་དཀར་པོ་ལྟེ་དམར། བྱ་དཀར་པོ་ཟེ་དམར། མི་ཤེལ་མིག་ཏུ་འདུག་པའོ། །བྱིན་གྱིས་མ་བརླབས་པའི་ཞིང་ལྔ་ནི། རྟ་ཁྱི་མི་སོགས་མདོག་ནག་པོར་འདུག་པ་ལྔའོ། །འབྲས་བུ་ལྔ་ནི་ཤིང་ལ་གནས་པའི་ནེ་ཙོ། ནགས་ལ་གནས་པའི་སྤྲེའུ། ས་ལ་གནས་པའི་དྲེད་མོ། ནམ་མཁའ་ལ་གནས་པའི་ཤང་ཤང་། ཆུ་ལ་གནས་པའི་སྦལ་པ། སྣང་ཞིང་སྲིད་པས་བསྡུས་པ་ཀུན་ལ་བྱའོ། །སློབ་མ་སྣོད་དང་ལྡན་མི་ལྡན་དང་རྫས་ཀྱི་ལེའུ་སྟེ་བརྒྱད་ཅུ་པའོ།། །།ཏ་ན་ཞེས་པས་སྒྲོལ་བའི་མན་ངག་སྟོན་ཏེ། བཀྲ་ཤིས་དག་པའི་ཞིང་བཅུ་དང་། སྨོན་ལམ་འདྲེལ་བའི་ཞིང་བཅུ་དང་། ཐུགས་རྗེས་སྤྲུལ་པའི་ཞིང་བཅུའོ། །མི་བསྒྲལ་དུ་མི་རུང་བའི་ཞིང་བཅུའོ། །མི་བསྒྲལ་དུ་མི་རུང་བའི་ཞིང་བཅུ་ལ་ནི། ནམ་མཁའ་ལ་རླུང་ལྟར་འཕྱོ་བ་དང་། ཕུག་ན་སྟམ་སྐྲམས་ལྟར་ཐེམས་པ་དང་།
བཅུ་དྲུག་ཚགས་ན་ཉལ་བ་དང་། །ཨུ་མ་ཚང་ན་སྡོད་པ་དང་། །རྔམ་པའི་དྲག་ཤུལ་བྱེད་པ་དང་། །བདག་སྤུན་སྤྱི་ལ་གནོད་པ་དང་། །དམྱལ་བའི་རྡོ་རྗེ་བྱེད་པ་དང་། །ཐིག་ལེ་སྤྱོད་པ་ཉམས་པའོ། །འདི་རྣམས་ནི་མི་བསྒྲལ་མི་རུང་ངོ་། །ཐབས་རྣམ་པ་བཞིས་བསྒྲལ། གནས་གང་དུ་བསྒྲལ། ཐབས་གང་གིས་བསྒྲལ་བའོ། །ག་ཎ་ཞེས་པས་སྦྱོར་བའི་མན་ངག་སྟོན་ཏེ་བཞི་པའོ། །སྦྱོར་བ་ནི་ཡུལ་ཆོས་ཉིད་དུ་སྦྱོར་བ་དང་། རིག་པ་ཡེ་ཤེས་སུ་སྦྱོར་བ་དང་། ཐབས་ཤེས་རབ་དུ་སྦྱོར་བ་དང་། དབྱིངས་དང་ཡེ་ཤེས་སྦྱོར་བ་དང་། འདོད་ཆགས་དང་ཞེ་སྡང་གཏི་མུག་རྣམས། རྒྱུ་ལ་ཆགས་པའི་འབྲས་བུ་ཡིན། །དྲང་པོར་རྟོགས་པ་སྐུ་གསུང་ཐུགས། །ལོག་པར་རྟོག་ན་འཁོར་བའི་རྒྱུ། །འདོད་ཆགས་རྒྱུ་ནི་ཁྲག་ལས་བྱུང་། །ཁྲག་ནི་འཁོར་བའི་གཞི་ཡིན་པས། །དང་པོ་བསྐྱེད་ཀྱང་ཁྲག་ལས་བསྐྱེད། །ཐ་མ་འཇིག་ཀྱང་ཁྲག་ལས་འཇིག །གཞུང་ལས་མཆོད་པ་དང་། །མཐུན་པའི་རྫས་བསགས་པ་དང་། ཕྱི་ནང་གསང་བའི་མཆོད་པ་དང་། མཆོད་པའི་ཡོན་ཏན་གཞུང་བཞིན་གྱིས། །པད་མ་ཅན་དང་སྡུག་པོ་བཀོད་པ་དང་། །ཡི་གེ་འཁོར་ལོ་ཚོགས་ཆེན་ས་གནོན་ནོ། །ཏ་ན་ག་ཎ་སྤྱོད་པའི་ལེའུ་སྟེ་གྱ་གཅིག་པའོ།། །།ད་ནི་མ་མོ་དབང་དུ་བསྡུ་བའི་ཐབས་བཤད་དོ། །གནོད་འདུལ་ལྷ་ཡིས་ཡང་གསོལ་པ། །འོག་གི་དབང་ཆེན་མ་མོ་རྣམས། །དབང་དུ་བསྡུ་ན་ཇི་ལྟ་བུ། །མངོན་རྫོགས་དཔལ་ལ་བདག་ཉན་འཚལ། །དེ་སྐད་གསོལ་པ་གསན་ནས་ཀྱང་། །ཡང་དག་གཟིགས་ཀྱིས་བཀའ་སྩལ་པ། །ཉོན་ཅིག་གནོད་འདུལ་ལྷ་ཡི་གཙོ། །ངས་གསུངས་པ་ལ་གདོན་མི་ཟ། །ང་ཡིས་བཤད་པ་གང་ཞེ་ན། །ཡུལ་དང་དྭངས་མ་རྩ་རྣམས་ལ། །རིམ་གྱིས་མ་མོ་ལ་སོགས་ཏེ། །གུ་ཡ་གསང་བའི་ཡུམ་བཞི་དང་། །རྒྱན་གྱི་མ་སྲིང་ཤེས་པར་བྱ། །དེས་ནི་མ་མོ་དབང་དུ་སྡུད། །དབང་དུ་བསྡུ་བའི་
ལེའུ་སྟེ་གྱ་གཉིས་པའོ།། །།དབང་ནོད་པ་དང་ཡོན་དབུལ་བ་སྟོན་ཏེ། དབང་ལ་གསུམ་སྟེ། ཕྱི་ཡི་དབང་ནི་རྫས་ལྔ་བཅུ་རྩ་ལྔ་དང་། ཡོ་གའི་དབང་བཅུ་ལ་སོགས་པར་བསྐུར་རོ། །ནང་དབང་བསྒྲུབ་རྫས་ཟབ་མོ་ལ་སོགས་པས་བསྐུར་རོ། །གསང་བའི་དབང་ནི་ཡབ་ཡུམ་བྱང་ཆུབ་སེམས་ཀྱིས་བསྐུར། དབང་བསྐུར་བདེ་གཤེགས་སོ་སོའི་དངོས་གྲུབ་ཐོབ། དབང་ཡོན་འབུལ་བ་ནི། བུ་དང་ཆུང་མ་འཁོར་བཅས་དབུལ། །ཟང་ཟིང་ལོངས་སྤྱོད་ཨ་ཅང་ཞེས། །རབ་འབྲིང་ཐ་གསུམ་དངོས་གྲུབ་ཐོབ། །སྣང་སྲིད་ཀྱི་མ་མོ་ནི་མའམ་ཆུང་མའམ། །སྲིང་མོའམ་བྲན་བཞིན་དུ་ལས་བྱེད་དོ། །དབྱིངས་ལྡན་ཁྱབ་གསལ་ཡེ་གནས་མ། །གདོད་ནས་ཡོད་པས་ཡེ་གནས་མོ། །མཁའ་སྣང་དག་བྱེད་ཡེ་གནས་མ། །དག་པ་ཆེན་མོ་ཡེ་ནས་མོ། །ཡུལ་དུ་སྣང་བ་གདོད་ནས་མོ། །དབང་ནོད་ཅིང་དབང་ཡོན་དབུལ་བའི་ལེའུ་སྟེ་གྱ་གསུམ་པའོ།། །།དོན་འདི་ལ་སྤྱི་དོན་རྣམ་པ་ལྔས་སྟོན་ཏེ། ཐབས་རྣམ་པ་ལྔ། དེ་ཁོ་ན་ཉིད་རྣམ་པ་ལྔ། དགོས་ཆེད་བཅོ་ལྔ་དང་། མཇུག་ཏུ་མན་ངག་གསུམ་དང་། ཐིག་ལེ་ཆེན་པོ་གསུམ་དུ་བསྡུའོ། །ཐབས་ཀྱིས་སྣ་ཚོགས་འབྱུང་བར་བྱེད། དེ་ཟེར་ན་སྐུ། ཁོ་ཟེར་ན་གསུང་། ན་ཟེར་ན་ཐུགས། ཉིད་ནི་མན་ངག་དོན་ལ་བྱའོ། །ཐུགས་ཀྱི་དགོངས་པ་ཡིན་པས་དགོས་ཆེད། ལས་ཀྱི་མན་ངག་ཡིན་པས་དགོས་ཆེད། དགོས་འདྲེལ་གྱི་མཇུག་བསྡུས་པས་མཇུག །དོན་ཐམས་ཅད་ཀྱི་མཇུག་སྡུད་པས་མཇུག །སྣང་སྲིད་སེམས་ལས་བཟློག་པས་མཇུག །ཐིག་མ་ནོར་བ། ལེ་གདལ་བ་མ་ནོར་བ་གདལ་བས་སེམས་ཉིད་ཡངས་པའི་ཀློང་། གསེར་གྱི་སྲོག་རྩའི་ལེའུ་སྟེ་གྱ་བཞི་པའོ།། །།དེ་ལ་ཐབས་རྣམ་པ་ལྔ་གང་ཞེ་ན། བདག་མ་མོའི་དབང་དུ་མི་འགྲོ་བར་འདོད་པའི་ཐབས་དང་། དབང་མ་སྐྱེས་པའི་ཆོས་ཀྱི་དབྱིངས་ལ། ཐབས་ཤེས་རབ་གཉིས་སུ་མེད་པས་མ་མོ། དངོས་པོ་དང་མཚན་མར་སྣང་བ་ཐམས་ཅད་
ཆོས་ཉིད་དུ་རྟོགས་པས་དབང་དུ་བྱའོ། །བྱང་ཆུབ་ཀྱི་སེམས་མ་བཙལ་བར་ལྷུན་གྱིས་གྲུབ་པར་རྟོགས་པས་མི་འགྲོ་བའོ། །མ་མོ་བདག་གི་དབང་དུ་བྱ་བ་ལ་གཉིས་ཏེ། ལྟ་བས་དབང་དུ་བསྡུ་བ་དང་། བསྒོམ་པས་དབང་དུ་བསྡུ་བའོ། །དང་པོ་ནི་ཕྱི་སྣང་སྲིད་ཀྱིས་བསྡུས་པའི་ཆོས་ཐམས་ཅད་སྐྱེ་བ་མེད་པའི་ངང་དུ་སངས་རྒྱས་པར་རྟོགས་ཙམ་ན། སྣང་སྲིད་ཐམས་ཅད་དབང་དུ་འདུ་ན་གཞན་ལྟ་ཅི་སྨོས། བསྒོམ་པས་དབང་དུ་བསྡུ་བ་ནི། ཏིང་ངེ་འཛིན་རྣམ་གསུམ་རིམ་གྱིས་བསྐྱེད། དེ་ནི་མི་རྟོག་རྟོག་ལས་འདས། །ཀུན་སྣང་ཡིད་བཞིན་ནོར་བུ་ལྟར། །རྒྱུ་ཡི་ཆོས་ཉིད་དབྱིངས་ཉིད་ལས། །དབང་ཆེན་དཀྱིལ་འཁོར་རིམ་གྱིས་བསྐྱེད། །སྤྲོ་བསྡུ་རྣམ་གཉིས་བ་ཐག་གཟིངས། །ཧཱུཾ་ཨེ་ཏཾ་མཾ་ལཾ་སུཾ་བྷྲཱུཾ་བཛྲ་ཛྙཱ་ན་ཙཀྲ་ཧཱུཾ། གཞལ་ཡས་ཁང་རྒྱ་ཁྱོན་དཔག་ཏུ་མེད་པ། ནམ་མཁའི་ཁམས་དང་མཉམ་པ་ཞིག་ལམ་གྱིས་བསྐྱེད་དོ། །དེའི་དབུས་སུ་བཾ་པདྨ་མཎྜལ་ལ་མ་སཱུརྱ་མཎྜལ་ལ། དེའི་སྟེང་དུ་རྒྱུ་སྐར་ཉི་ཤུ་རྩ་བརྒྱད་བསྣོལ་ལ་བཏིང་། དེའི་སྟེང་དུ་ལྷ་བརྒྱད་བཏིང་། དེའི་སྟེང་དུ་ཀླུ་བརྒྱད་བཏིང་། དེའི་སྟེང་དུ་གཟའ་བརྒྱད་བཏིང་། དེའི་སྟེང་དུ་ཕྱོགས་སྐྱོང་རྒྱལ་ཆེན་ཚངས་པ། བརྒྱ་བྱིན་བསྣོལ་བ་བཏིང་། དེའི་སྟེང་དུ་ཧཱུཾ་ལས་ཆེ་མཆོག་ཧེ་རུ་ཀ་ཞལ་གཅིག་ཕྱག་གཉིས་པ་བསྐྱེད་དེ། ཞབས་གཡས་ཀྱིས་ཚངས་པའི་སྙིང་བརྫིས་པ། གཡོན་གྱིས་བརྒྱ་བྱིན་བརྫིས་པ། ཕྱག་གཡས་ན་གསེར་གྱི་རྡོ་རྗེ་ཐུགས་ཀར་འཛིན་པ། གཡོན་གྱིས་གསེར་གྱི་དྲིལ་བུ་དཀུར་བརྟེན་པ། དབུ་སྐྲ་ཁམ་ནག་རལ་པ་གྱེན་དུ་བསྐྱིལ་པ། ཐོད་པ་སྐམ་རློན་གྱིས་སེ་རལ་ཁར་བརྒྱན་པ། ཞིང་ཆེན་གྱི་གཡང་གཞི། སྟག་ལྤགས་ཀྱིས་ཤམ་ཐབས་བྱས་པ། སྦྲུལ་གྱི་ཆུན་འཕྱང་གིས་སྐུ་ལ་བརྒྱན་པར་བསྒོམ་མོ། །ཡབ་ཀྱི་སྐུ་མདོག་གསལ་བར་བསྒོམས་ལ། མ་མོ་དབང་དུ་སྡུད་པའི་ལེའུ་སྟེ་གྱ་ལྔ་པའོ།། །།གཡོན་དུ་གདན་ཉི་ཟླ་ལས། བརྟན་མ་བཅུ་གཉིས་བཏིང་ངོ་། །དེའི་སྟེང་དུ་
དབང་མོ་ཉི་ཤུ་རྩ་བརྒྱད་བསྣོལ་ལ་གདིང་། དེའི་སྟེང་དུ་འདོད་ཁམས་གཙོ་མོ། གཤིན་རྗེ་ནག་པོའི་བུ་མོ་གདུག་པ་ཚེ་འཕྲོག་མ། སྲིད་པ་ཆགས་འཛིན་བསྣོལ་ལ་གདིང་། དེའི་སྟེང་དུ་མ་བདུན་བསྣོལ་ལ་གདིང་། དེའི་སྟེང་དུ་སྲིང་བཞི་བསྣོལ་བ་གདིང་། དེའི་སྟེང་དུ་བློན་མོ་བཞི། རྒྱལ་མོ་བཞི་འཇུག་སྒྲོལ་དྲུག །ཤུགས་སྒྲོལ་མ་དྲུག །སྒྲོལ་གིང་མ་དྲུག ཚེ་བདག་མ་ཆེན་མོ། དེའི་སྟེང་དུ་སྤྲུལ་བདག་མ་ཆེན་མོ་གདིང་ངོ་། །དེའི་སྟེང་དུ་རོ་ལང་ཡེ་ཤེས་ཚོགས་ཀྱི་རྗེ་མོ་བསྒོམ། རྒྱན་དང་ཆ་ལུགས་གཙོ་དང་མཐུན། གོང་མ་ལྟར་བཀྲ་ས་ལེ་བསྒོམས་ན། མ་མོ་བདག་གི་དབང་དུ་འགྱུར་རོ། །གཡོན་དུ་ཉིད་བཞི་བསྒོམ་པས་མ་མོ་དབང་དུ་འགྱུར་རོ། །འཁོར་ལོ་ཞལ་གྱིས་བཞེས་པའི་ལེའུ་སྟེ་གྱ་དྲུག་པའོ།། །།མ་མོ་སྲོག་འཛིན་པའི་ཐབས་ལ་དྲུག་སྟེ་གང་ཞེ་ན། ཆོས་ཐམས་ཅད་ཀྱི་སྲོག་ནི་མ་མོས་འཛིན། མ་མོའི་སྲོག་ནི་དམ་ཚིག་གིས་འཛིན། དམ་ཚིག་གི་སྲོག་ནི་ལུང་གིས་འཛིན། ལུང་གི་སྲོག་ནི་མན་ངག་གིས་འཛིན། མན་ངག་གི་སྲོག་ནི་བསྒོམ་པས་འཛིན། སྒོམ་པའི་སྲོག་ནི་ལྟ་བས་འཛིན། མ་མོ་ལྟ་བས་མྱ་ངན་ལས་འདས་པའི་ཐབས་ནི། སྣང་ཞིང་སྲིད་པའི་ཆོས་ཐམས་ཅད་བརྟན་མ་བཅུ་གཉིས་སུ་ལ་བཟླ། བཅུ་གཉིས་ལྷོའི་སྐྱི་འཐིང་གཡའ་མ་སྐྱོང་དུ་ལ་བཟླ། དེ་དབང་ཕྱུག་མ་ཉི་ཤུ་རྩ་བརྒྱད་དུ་ལ་བཟླ། དེ་ལྟར་རིམ་བཞིན་དུ་ཡུམ་མུ་ཁ་ལེ་ལ་ལ་བཟླ། མུ་ཁེ་ལེ་སེམས་ཉིད་དུ་ལ་བཟླ། སེམས་ཉིད་རྒྱུ་རྐྱེན་མེད་པའོ། །མ་མོ་སྲོག་འཛིན་པའི་ལེའུ་སྟེ་གྱ་བདུན་པའོ།། །།དེ་ཁོ་ན་ཉིད་རྣམ་པ་ལྔ་ལ། མ་མོ་དེ་ཁོ་ན་ཉིད་དང་། དངོས་གཞི་དེ་ཁོ་ན་ཉིད་གཉིས་ཏེ་གང་ཞེ་ན། སྣང་སྲིད་ཆགས་པར་བྱེད་པ་ཀུན་གཞི་སྣང་སྲིད་འབྱུང་བར་བྱེད་པ་ཡང་ཀུན་གཞི། སྙིང་པོ་དེ་ཁོ་ན་ཉིད་དང་། སྙིང་པོ་ལ་བཞི་སྟེ། རྒྱུའི་སྙིང་པོ་དང་། རྒྱུའི་ཆོས་ཉིད་ལས་ཡི་གེ་གང་རུང་གིས་བསྐྱེད་པའོ། །རྩ་བའི་སྔགས་ལ། ཨོཾ་ཨཱཿཧཱུཾ། གར་བྱུང་བར་སྐུ་བསྐྱེད་དོ། །
རྩ་བའི་སྔགས་ལ། ཨོཾ་རུ་ལུ་རུ་ལུ་ཧཱུཾ་བྷྱོ་ཧཱུཾ། སྲོག་གི་སྙིང་པོའོ། །རྩ་བའི་སྔགས་ལ། ཁ་རག་སྙིང་ཁ་རག་ཙིཏྟ་རྦད། ཐུན་བྷྱོ་བྱ་བ་ནི་བརྡེག་པའི་སྔགས་སོ། །དེ་ཁོ་ན་ཉིད་རྣམ་པ་ལྔའི་ལེའུ་སྟེ་གྱ་བརྒྱད་པའོ།། །།རྫས་ཀྱི་དེ་ཁོ་ན་ཉིད་ལ་གསུམ་སྟེ། སྒྲུབ་པའི་རྫས་དང་། བསྙེན་པའི་རྫས་དང་། མཆོད་པའི་རྫས་དང་གསུམ། བསྙེན་སྟངས་ཀྱི་དེ་ཁོ་ན་ལ་ཉིད་ལ་བདུན་ཏེ། ཚོགས་ཀྱི་རྗེ་མོ་ལྟར་བསྙེན། ཡུམ་ལྔ་མའི་ཚུལ་དུ་བསྙེན། སྒྲོལ་གིང་མ་མ་མོ་བཞི། ཕྲ་མེན་རྒྱ་མཚོ་མ་དང་ལྔ་ནི་ཆུང་མ་ལྟར་བསྙེན་ནོ། །འཇུག་སྒྲོལ་མ་མཛའ་མོ་ལྟར་བསྟེན་ནོ། །དངོས་གསང་བའི་ཡུམ་བཞི་སྟེང་འོག་གི་སྒྲོལ་བྱེད་མ་གཉིས་ཏེ་དྲུག་བྱི་མོ་ལྟར་བསྙེན་ནོ། །ཤུགས་སྒྲོལ་མ་བཞི། རྒྱལ་མོ་དང་བློན་མོ་རྣམས་ནི་སྲིང་མོ་ལྟར་བསྟེན་ནོ། །དྲག་ཤུལ་གྱི་ཚུལ་དབང་དུ་བསྡུ་བ་མན་ཆད་བྲན་མོ་མངགས་པའི་ཚུལ་དུ་བསྟེན་ནོ། །གསེར་གྱི་སྲོག་རྩ་དགོས་ཆེད་ཀྱི་ལེའུ་སྟེ་གྱ་དགུ་པའོ།། །།དགོས་ཆེད་བཅོ་ལྔ་དང་། དང་པོ་མ་མོ་གང་ནས་བྱུང་ཤེས་པར་བྱ་བ་དང་། གང་ནས་བྱུང་བའི་ལོ་རྒྱུས་འོག་མ་ཁོ་ནར་ཞིག་ཐིག་ལེའི་བཞེངས་ནས་མར་བྱུང་ངོ་། །བྱུང་ནས་སྲོག་གིས་འཛིན་པ་ལ་གསུམ་སྟེ། མ་མོ་ལུས་ཀྱི་སྲོག་ནི་ཕྱག་རྒྱས་བཟུང་སྟེ། ངག་གི་སྲོག་ནི་སྔགས་ཀྱིས་བཟུང་། སེམས་ཀྱི་སྲོག་ནི་ཏིང་ངེ་འཛིན་གྱིས་བཟུང་། སྲོག་ཟིན་ནས་ཇི་ལྟར་བཀོལ་བ་ལ་གསུམ་སྟེ། སྲོག་བཟུང་ནས་བཀོལ་བ་དང་། རྟེན་སྟངས་བཞིན་དུ་བཀོལ་བ་དང་། གོང་དུ་བསྟན་པ་བཞིན་དུ་ཏིང་ངེ་འཛིན་དང་། དབང་ཆེན་གྱི་དཀྱིལ་འཁོར་དུ་བསྒོམ་ལ་བཀོལ་བའོ། །མ་མོ་ཤི་ས་བསྟན་པར་བྱ་བ་ལ་གསུམ་སྟེ། དམ་ཚིག་མ་བསྲུངས་པས་འཆི་བ་དང་། ལས་གཞུང་བཞིན་མ་བསྒྲུབས་པས་འཆི་བ་དང་། ཏིང་ངེ་འཛིན་ལ་ལེ་ལོ་བྱས་པས་འཆི་བའོ། །མ་མོའི་དཀྱིལ་འཁོར་བསྟན་པ་ལ་གཉིས་ཏེ། དཀྱིལ་ཆོས་ཀྱི་དབྱིངས་ལ་འཁོར་རང་རིག་པས་བསྐོར་བས་དཀྱིལ་འཁོར། དཀྱིལ་ཚོགས་ཀྱི་
རྗེ་མོ་ལ་འཁོར་སྣང་སྲིད་མ་མོས་བསྐོར་བས་དཀྱིལ་འཁོར་གཞན་དཔེ་ཆུང་ཞིབ་ཏུ་བརྟག་གོ། །གསེར་གྱི་སྲོག་ཐིག་བསྟན་པའི་ལེའུ་སྟེ་དགུ་བཅུ་པའོ།། །།མ་མོ་བསྒྲུབ་པར་བྱ་བའི་ཚད་བསྟན་པ་དང་། དང་པོ་ས་ཆོག་དང་། མཚམས་དང་། གཟུངས་མ་དང་། ཐིག་སྐུད་དང་། ཚོན་དང་། ཞལ་ཟས་ལ་སོགས་པ་བྱིན་གྱིས་བརླབ་པོ། །དེ་ནས་སྒྲུབ་པའི་དཀྱིལ་འཁོར་རྣམས་གཞུང་བཞིན་དུ་བྱ་ལ་བྲིའོ། །སྒྲུབ་པ་ལ་གཉིས་ཏེ་རང་བཞིན་གྱི་སྒྲུབ་པ་དང་། གཟུགས་བརྙན་གྱི་བསྒྲུབ་པའོ། །རང་བཞིན་ལ་གཉིས་ཏེ། ཕྲ་མེན་རྒྱ་མཚོ་དང་། དབྱིངས་ཀྱི་ཡུམ་ལྔའོ། །འོ་ན་ཕྲ་མེན་རྒྱ་མཚོ་ལ་བསྒྲུབ་ཏུ་མེད་ཟེར་ཏེ། བསྒྲུབ་ཏུ་ཡོད། སྐད་ཅིག་ཀྱང་འདིའི་ངང་ལས་འདིར་མི་རུང་བས་རྒྱུན་དུ་བསྒྲུབས་པའི་ལྷ་ཡིན་ནོ། །སྒྲུབ་རྫས་གང་ཞེ་ན། ལུས་སེམས་ཚགས་སུ་བཅུག་ལ། རིག་པ་སྐད་ཅིག་མ་དེ་ཡིན་ལ། མ་ཡེངས་པའི་དོན་སྟོན། སྒྲུབ་པའི་རྟགས་གང་ཞེ་ན། ཆོས་ཐམས་ཅད་བྷ་ག་དགྱེས་པའི་གནས་དེར་ལྷུན་གྱིས་གྲུབ་ཅིང་། སངས་རྒྱས་པས་རང་གི་རིག་པ་ལྷངས་ཀྱིས་རྟོགས་པས་དེ་ཁོ་ན་འགྲུབ་པའི་རྟགས་ཡིན་ནོ། །ཡུམ་ལྔ་བསྒྲུབ་ཏུ་མེད་ཟེར་ཏེ་ཡོད། ཡུམ་ལྟར་སྣང་བ་ཆོས་ཀྱི་དབྱིངས་ཡིན། ཆོས་འཇུག་རིག་པའི་ཡེ་ཤེས་ཡིན། ལྔ་ལྔ་ལྟར་སྣང་བ་ནི་བསྒྲུབ་པའི་རྫས་ལྟ་བུ་ཡིན། རིག་པ་དང་དབྱིངས་ཀྱི་ངང་དུ་ཆོས་ཐམས་ཅད་ལྷུན་གྱིས་གྲུབ་པ་ནི་འགྲུབ་པའི་རྟགས་ཡིན། འགྲོ་ཉལ་འདུག་སྡོད་སྤྱོད་ལམ་རྣམ་བཞིར་སྐད་ཅིག་ཀྱང་མ་ཡེངས་པ་ནི་རང་བཞིན་གྱིས་གྲུབ་པའོ། །མ་མོ་གཉིས་རང་བཞིན་གྱིས་བསྒྲུབས་པའི་ལེའུ་སྟེ་གོ་གཅིག་པའོ།། །།གཟུགས་ཅན་གྱི་སྒྲུབ་པ་ལ་བཅུ་དགུ། དེ་ལ་ཁྲོས་པའི་དབང་མོ་ཆེ་བཞིའི་དཀྱིལ་འཁོར་སྒྲུབ་པ་ནི། གསང་བའི་དཀྱིལ་འཁོར་གཞུང་བཞིན་བཞེང་དུ་གསོལ། རིགས་བཞིའི་སྒྲུབ་རྫས་ཡང་བསག །རྒྱུ་བཞི་ཡང་བསོགས་ཏེ་དགོངས་པ་ཏིང་ངེ་འཛིན་གཞུང་བཞིན་བསྒྲུབ། ཞག་
གཅིག་ནུབ་མོ་གསང་བའི་ཡུམ་དུ་དམ་བཅའོ། །གྲུབ་རྟགས་ནི་འོད་དང་སྒྲ་མངོན་དུ་འབྱུང་ངོ་། །གྲུབ་ནས་ཆེ་མཆོག་གི་ཏིང་ངེ་འཛིན་ཞལ་གཅིག་ཕྱག་གཉིས་ཞབས་གཉིས་ཀྱི། མ་ཧཱ་དེ་བ་ལ་སོགས་པའི་མཐུ་ཆེན་བརྫིས་ཤིང་ཕྱག་ན་འཇིགས་པའི་མཚོན་ཆ་སྣ་ཚོགས་བསྣམས་པ། སྐུ་རྒྱན་དང་ཆ་ལུགས་གསལ་བར་བསྒོམ། དེ་ནས་བདག་གི་མ་མོར་སྦྱོར་རོ། །བྱང་ཆུབ་སེམས་དྲོད་ལ་དབབ་པ་དང་རཀྟ་སྦྱར་སྣ་ལ་བདག་མཆོད། དེ་ནས་སྒྲུབ་ཟླ་ལ་སྦྱིན་གྲུབ་པའི་ཡོན་ཏན་ནི་བསམ་པ་ཡིད་བཞིན་འགྲུབ་པོ། །སྟེང་འོག་གི་མ་མོ་སྒྲུབ་པ་ནི་དཀྱིལ་འཁོར་གཞུང་བཞིན་བཤམས་ལ་གསེར་ཆ་ལ་སོགས་པ་ལ་བསྒྲུབ་པོ། །རྟགས་འོད་དང་སྒྲ་སྙན་མེ་ཆེན་འབྱུང་། དཔའ་བོ་སྒེག་པོའི་ཏིང་ངེ་འཛིན་དུ་འཇུག་པས་པདྨ་དབང་དུ་བསྡུས་ལ་བྱི་མོར་དམ་བཅའོ། །གྲུབ་པའི་ཡོན་ཏན་དགྲ་ལ་དྲག་ཅིང་། བྱང་ཆུབ་སེམས་ཡིད་བཞིན་དུ་འགྲུབ་པོ། །ཤུགས་སྒྲོལ་མ་བཞིའི་སྒྲུབ་ཐབས་ནི། བྷནྡྷ་ཚལ་བུ་བཞིའི་ནང་། བྱང་ཆུབ་སེམས་ཤ་ཆེན་རཀྟ་བ་སུ་ཏ་སོགས་པ་བླུགས་ལ་བསྒྲུབ་པོ། །རྟགས་སྤྲིན་ག་རྟ་སྐད་འབྱུང་། པདྨ་བསྡུ་ཞིང་ཆུང་མར་དམ་བཅའོ། །གྲུབ་པའི་ཡོན་ཏན་དགྲ་ལ་འདེབས། །ཁྲོས་པ་ཤུགས་སྒྲོལ་གྱི་ལེའུ་སྟེ་གོ་གཉིས་པའོ།། །།ཨེ་ཀ་ཛ་ཏིའི་སྒྲུབ་ཐབས་ནི། སྟེགས་བུ་འདོམ་གང་གྲུ་བཞི་པ་གཅིག་བྱས་ལ་དབུས་ཟླ་གམ་གཅིག་པར་བྲིས་ཏེ། དམ་ཚིག་གཙང་མའི་གཏོར་མ་བཤམས་ལ་དར་དམར་པོས་ཁ་བཅད་ལ། ཁ་ནུབ་ཕྱོགས་སུ་བལྟས་ཏེ། སྒྲུབ་རྟགས་ཀུན་གོང་མ་བས། ནུབ་མོ་ཨེ་ཀ་ཙ་ཏི་བསྒྲུབས་ཏེ། སྟེགས་བུ་འདོམ་གང་གྲུ་བཞི་གཅིག་ལ་དབུས་སུ་ཟླ་གམ་གཅིག་བྲི། བྷནྡྷ་མཚན་དང་ལྡན་པ་གཅིག་གི་ནང་དུ་བྱང་ཆུབ་སེམས་ཀྱི་དངོས་གཞི་སྩལ་ལ། ཁ་ནུབ་ཏུ་བལྟས་ལ་དར་དཀར་གྱིས་ཁ་བཅད་དཀྱིལ་འཁོར་བསྒྲུབ་པོ། །བྷ་ག་དབང་དུ་བསྡུ་བ་ཀུན་གོང་མར་འགྲེའོ། །འཇུག་སྒྲོལ་མ་སྒྲུབ་པ་ནི། སྟེགས་བུ་ཁྲུ་གང་པ་གཅིག་ལ་ཟླ་གམ་གཅིག་པར་བྱས་ལ། པདྨ་རིགས་ཀྱི་བྷནྡྷ་མཚན་དང་ལྡན་པ་གཅིག་གི་ནང་དུ། པདྨ་རཀྟ་ལ་ཁ་གནམ་ལ་བསྟན་དབུས་སུ་བཞག་ཅིང་བསྒྲུབ་པོ། །ཡོན་ཏན་སྣང་སྲིད་ཀྱི་བདེ་
བ་ཀུན་དུས་གཅིག་ལ་སྙོམས་པར་མཛད་དོ། །བྷ་ག་སྲུང་མར་ས་བདག་ཆེན་མོ་སྒྲུབ་པ་ནི། སྟེགས་བུ་གྲུ་གསུམ་གཅིག་ཟླ་གམ་གཅིག་བྲིས་ལ། མཚན་དང་ལྡན་པ་གཅིག་ཏུ་སྲོག་མེད་པའི་དབུགས་ཏེ། བ་སུ་ཏ་དབུགས་ཀྱིས་བཀངྐ་ལ་བདུད་རྩི་སྣ་ལྔ་ཟླ་གམ་སྟེང་དུ་བཞག །དེའི་སྟེང་དུ་སྟེགས་བུ་ཟླུམ་པོ་མཐོ་གང་གཅིག་ལ་རིན་ཆེན་ཟུར་བརྒྱད་བྲིས་ལ། རིན་པོ་ཆེ་གང་ཡང་རུང་བ་ཅིག་གི་ཕོར་པ་རུ། རིན་པོ་ཆེ་སྣ་ཚོགས་དང་འབྲུ་སྣ་ཚོགས་དང་། ཟབ་དར་ཀུན་ནང་དུ་སྩལ་ལ་བསྒྲུབ་པོ། །ཀླུ་དང་ས་བདག་བྲན་མོ་བཞིན་དུ་འཁོལ་ལོ། །ཕྱོགས་བཞིར་འཇུག་སྒྲོལ་མ་བཞི་སྒྲུབ་པ་ནི། དཀྱིལ་འཁོར་རྩིབས་བཞི་པ་གཅིག་བྱས་ལ་ཟླ་གམ་བཞི་བྲི། མཚན་དང་ལྡན་པ་བཞི་ལ་ཕྱོགས་བཞིར། བོ་དྷི་མཱཾ་ས་རཀྟ་དྲི་ཆུ་བསྟེན་ཅིང་བསྒྲུབ་པོ། །ཁམས་གསུམ་སྒྲོལ་བའི་དངོས་གྲུབ་ཐོབ་པོ། །སྨན་མོ་རྣམས་ཀྱི་སྒྲུབ་ཐབས་ཀྱི་ལེའུ་སྟེ་གོ་གསུམ་པའོ།། །།ཚེ་བདག་ཆེན་མོའི་སྒྲུབ་པ་ནི། དཀྱིལ་འཁོར་ཟླུམ་པོ་ཁྲུ་གང་པ་གཅིག་བྱས་ལ་ཟླ་གམ་གཅིག་པར་བྲིས་ལ། བྷནྡྷ་མཚན་དང་ལྡན་པ་གཅིག་གི་ནང་ལ་ཙིཏྟ་སྣ་ཚོགས་དང་རཀྟས་བཀངྐ་ལ་ཁ་ཤར་དུ་བསྟན་ལ་ཤིང་ཤུན་གྱིས་ཁ་བཅད་ལ་བསྒྲུབ་ན་ཞག་བདུན་ནས་ཟླ་བ་ལྟུང་ངོ་། །བཅུ་བཞི་ན་ཉི་མ་ལྟུང་། ཉི་ཤུ་ན་བྷནྡྷ་མཚན་དང་ལྡན་པའི་ནང་དུ་སྙིང་དང་རཀྟ་བསྲེས་པ་འབྱུང་། ཡོན་ཏན་གཞན་ལྟ་ཅི་སྨོས། ཁྲོས་པའི་མ་བཞི་དང་ཐུགས་ཀྱི་དགྱེས་སྡེ་མོ་བཞི་ཡང་མ་སྲིང་བཞིན་དུ་ལས་བྱེད་དོ། །ཧེ་རུ་ཀས་ནྲྀ་མན་ཆད་སྐུ་བསྐྱེད་པ་ཙམ་གྱིས་འདར་ལྕུག་ལྕུག་ལས་བྱེད་དོ། །ཡིད་བཞིན་དུ་འགྲུབ་སྟེ་འོང་ངོ་། །རྒྱལ་མོ་བཞི་སྒྲུབ་པ་ནི།དཀྱིལ་འཁོར་རིན་ཆེན་མཁར་ཐབས་སུ། །ཐིག་གདབ་ཟླ་གམ་བཞི་བཀོད་དེ། །བྷནྡྷ་མཚན་ལྡན་བཞིར་རྫས་བཀྲམ། །ཤར་དུ་བོ་དྷི་དང་དྲི་ཆེན་དང་། ལྷོར་ཤ་དང་མཱཾ་ས། ནུབ་པདྨ་རཀྟ། བྱང་དུ་དྲི་ཆུ་དང་རྒྱུའི་དྲི་ཆུ་བཞག་གོ། །ཨ་མ་ལ་དེ་ཝ་ཤ་བྷྱོ་རུ་ལུ། ནུས་ཚད་བཟླས། དཔོན་ཆེན་ཟེར་ནས་ཟླ་གམ་འབུལ་དུ་འོང་ངོ་། །དམ་བསྲེ་སྤྲོ་བསྡུ་བྱའོ། །དེ་ཕན་ཆད་བྲན་བཞིན་ལས་བྱེད་དོ། །བྲན་བཞིན་སྒྲུབ་པ་ནི་དཀྱིལ་འཁོར་པདྨ་འདབ་མ་བཞིའི་ཐིག་ཏུ་གདབ། དེ་ལ་དབུས་སུ་ཟླ་གམ་དགོད། མཚན་དང་ལྡན་པའི་བྷནྡྷར་གོང་མ་དང་མཐུན་པའི་རྫས་གཞག །འོད་དང་དྲི་
དང་གཟུགས་ཀྱང་སྟོན། ཕོ་ཉ་བཞི་བསྒྲུབ་པ་ནི་སྟེགས་བུ་གྲུ་བཞི་པ་གཅིག་ལ་ཐོད་པ་དར་མ་བཞིའི་ནང་དུ་འབྱོར་ཚད་དམ་རྫས་སྩལ་ལ་ཤིང་ཤུན་གྱིས་ཁ་བཅད་ལ་དེས་བསྒྲུབ་པོ། །རྟགས་ཀུན་གོང་མར་བས་ཡོན་ཏན་ནི་ཀུན་དབང་དུ་སྡུད་དོ། །ཐོད་ཕྲེང་རྒྱལ་མོ་བཞི་བྲན་མོ་བཞིའི་སྒྲུབ་ཐབས་ཀྱི་ལེའུ་སྟེ་གོ་བཞི་པའོ།། །།གནོད་སྦྱིན་སྟོབས་བཟང་གི་སྒྲུབ་པ་ནི། དཀྱིལ་འཁོར་ཟླུམ་པོ་ཁྲུ་གང་པ་གཅིག་ལ་ཟླ་གམ་གཅིག་བྱས་ལ། ཟླ་གམ་སྟེང་དུ་ཡཀྴ་ཀྲོ་དྷཱི་ཤྭ་རཱི་ཞེས་བརྗོད་པས། གནོད་སྦྱིན་གྱི་རྒྱལ་མོ་སྟོབས་བཟང་སྐུའི་རྒྱ་ཁྱོན་ནི་འཇིག་རྟེན་འཁྲུག་དོགས་ཙམ་ཡོད་ལ་སྐུ་མཐིང་ནག་འབར་བ་ལ་སྤྱན་ཉི་ཟླ་སྟོང་གིས་བརྒྱན་པ། ཕྱག་གཡས་ན་རྡོ་རྗེ་གདེངས་པ་བསྣམས་པ། གཡོན་ན་བྷནྡྷ་འབར་བ་བསྣམས་པ། གཡས་འོག་མ་ན་སྦྲུལ་ནག་སྟོང་གི་ཞགས་པ་འཕེན་པ། གཡོན་འོག་མ་ན་བདུད་རྩི་བཅུད་ཀྱི་བུམ་པ་བསྣམས་པ། སྐུ་ཡེ་ཤེས་ཐུ་ལུམ་འབར་བའི་ནང་ན་བཞུགས་པ། ཡེ་ཤེས་ཀྱི་མེ་རིས་ཉོན་མོངས་པའི་རྟོག་པ་རྨང་ནས་བསྲེག་པ། འཁོར་གནོད་སྦྱིན་མང་པོས་བསྐོར་བ། སངས་རྒྱས་པས་མཐུ་ཆེ་རྐང་མགྱོགས་པས་བང་མགྱོགས་པ་སྲིད་པའི་འཇིག་རྟེན་ཐམས་ཅད་ཀྱང་འཁྲུག་པར་ནུས་པ། ཤར་ཕྱོགས་ཀྱི་རྒྱལ་པོ་ཡུལ་འཁོར་སྲུང་གི་ཡུམ་མཛད་པ་བདུད་རྩི་བུམ་པ་ལས་ལོངས་སྤྱོད་རྒྱུན་ཏུ་མཛད་པ། རྣལ་འབྱོར་པ་ཐམས་ཅད་ཀྱི་གྲོགས་སུ་འགྲོ་བ་རྒྱུན་ཏུ་མཛད་པ། སྒྲུབ་པ་པོ་རྣམས་ཀྱི་དངོས་གྲུབ་སྒྲུབ་པ་གནོད་སྦྱིན་ཕོ་མོ་ཐམས་ཅད་དབང་དུ་སྡུད་པ། འཇིག་རྟེན་དམག་ཐམས་ཅད་ཀྱི་དཔུང་གནོན་པ་ཉི་ཟླ་ཕྲུགས་གཅིག་ཕོ་ཉར་འགྱེད་པ། གཟའ་ཆེན་པོ་བརྒྱད་ཀྱིས་སྐུ་ལ་བརྒྱན་པ་དེས་ནི་བདུད་རྩིའི་རྒྱ་མཚོ་ཆེན་པོ་ནས། ཟངས་ཀྱི་ལྷུང་བཟེད་ཀྱིས་རྒྱལ་པོ་བཞིའི་ཞལ་དུ་བདུད་རྩིའི་སྐྱེམས་སྟོབ་པ་གང་སུ་ཞིག་དང་དུ་ལེན་པའི་སྒྲུབ་པ་པོས་དེ་ཉམས་སུ་བླངས་ཤིང་བསྒྲུབས་ན། རྣལ་འབྱོར་པ་རྣམས་ཀྱི་དགོངས་པ་ཡིད་བཞིན་དུ་སྟེར་རོ། །ཆར་ཆུ་ཡང་དུས་སུ་འབེབས་སོ། །དགོས་འདོད་རེ་བ་སྐོང་ངོ་། །དངོས་གྲུབ་ཀྱང་དུས་སུ་སྟེར་རོ། །འཇིག་རྟེན་གྱི་མཐུ་ཐམས་ཅད་ཀྱང་འགྲུབ་པོ། །ལས་ཐམས་ཅད་ཀྱང་ཟློག་པར་བྱེད་དོ། །རྫུ་འཕྲུལ་གྱི་མཐུ་མང་པོ་ཡང་མངོན་པར་སྟོན་ནོ། །འཇིག་རྟེན་གྱི་དགོས་པ་ཐམས་ཅད་ཀྱང་མངོན་དུ་སྟེར་རོ། །རིང་ན་གནས་པའི་དངོས་
གྲུབ་ཀྱང་ལེན་པར་ནུས་སོ། །གཞན་གྱི་དམག་དཔུང་ཐམས་ཅད་ཟློག་པར་བྱེད་དོ། །གནོད་པ་ཐམས་ཅད་ཀྱང་འཇིགས་པར་བྱེད་དོ། །གཞན་གྱི་མཐུ་དང་རྫུ་འཕྲུལ་ཡང་ལེན་པར་ནུས་སོ། །འཇིག་རྟེན་གཞན་དག་ན་གནས་ཀྱང་བདག་གི་གནས་སུ་འོངས་ནས་ཅི་བྱ་ཟེར་རོ། །ཅི་སྒྲུབ་ཅེས་ཟེར་རོ། །དེ་ལྟར་སྟོབས་བཟང་གི་དངོས་གྲུབ་ཐོབ་ན་གནོད་སྦྱིན་གྱི་འཁོར་ཐམས་ཅད་ཀྱིས་བསྐོར་ནས་བདག་ཅག་གིས་ཅི་བགྱི་ཞེས་བཀའ་ཉན་ནོ། །ཨ་ལ་ལ་ཧོ། བཅོམ་ལྡན་འདས་བདག་ཅག་ལ་ལས་ཀྱི་དངོས་གྲུབ་སྩོལ་ཅིག །རྣལ་འབྱོར་རྣམས་ཀྱི་དམ་བསྲེས་ཤིག །བདག་ཀྱང་བཀའ་ཡི་རྫས་སུ་བསྒྲུབ་པར་བགྱིའོ། །ཞེས་དམ་བཅའོ། །དེ་ནས་བཅོམ་ལྡན་འདས་ཀྱིས་འཇིག་རྟེན་གྱི་ལས་ཐམས་ཅད་ཡོངས་སུ་སྒྲུབས་ཤིག །ཛཾ་བྷ་ལ་སོགས་ཏེ་གནོད་སྦྱིན་གྱི་སྟོབས་ཐམས་ཅད་ཕྱུང་ཞིག་ཅེས་བསྒོའོ། །དེ་ལྟར་བསྒྲུབས་ན་དགོས་པ་ཐམས་ཅད་ཀྱང་སྟེར་རོ། །རྫས་དང་ཡོ་བྱད་ཀྱང་ལིང་ལིང་སྤྱོད་པར་འགྱུར་རོ། །ཡོན་ཏན་ཀྱང་མངོན་དུ་འཆར་རོ། །བརྒྱ་བྱིན་སྲིན་མོ་སྒྲུབ་པ་ནི་དཀྱིལ་འཁོར་གྲུ་གསུམ་པ་གཅིག་བྱས་ལ་དབུས་སུ་ཟླ་གམ་གཅིག་པར་བྲི། ཁམ་ཕོར་གཅིག་གི་ནང་དུ་གངས་ཀྱི་ཆུ་དང་བྱ་རྒོད་ཀྱི་ཤ་དང་། ཤེལ་དང་ནས་དཀར་མོ་འབྲུ་དགུ་བླུགས་ལ། ཨ་པྲ་བེ་ཤ་བྱའི་འཛབ་དྲང་ངོ་། །གཞན་ཀུན་གོང་མ་བ་མ་ཚངས་པའི་ཆུང་མ་སྒྲུབ་པ་ནི། མ་ཏྲང་གི་ཐོད་པ་བརྩེགས་པ་ལ་དཔྲལ་བར་ཟླ་གམ་བྱས་པ་ལ། མཚན་ལྡན་གཅིག་གི་ནང་དུ་བདུད་རྩི་སྣ་ལྔ་སྩལ་ལ་ཁ་ཤིང་ཤུན་གྱིས་བཅད་ལ། བྲཧྨ་ཎཱི་ཞེས་བཟླས་སོ། །ཡོན་ཏན་ནི་སྲིན་མོ་བརྒྱད་འདུལ་ལོ། །ཕོ་ཉ་དྲུག་ཅུའི་གཙོ་མོ་སྟེ་རྡོ་རྗེ་ཁྱུང་མགོ་ཅན་སྒྲུབ་པ་ནི་ཐོད་པའི་དབུས་དཔྲལ་བར་ཟླ་གམ་བྲི། བྷནྡྷ་མཚན་དང་ལྡན་པ་གཅིག་ཏུ་རཀྟ་དང་དྲི་ཆུ་བསྲེས་ཏེ་ནང་དུ་ཨ་མྲྀ་ཏ་ཡང་བླུགས་ལ་སྙིང་པོ་བཟླས་ཤིང་བསྒྲུབ་པོ། །ཡོན་ཏན་ནི་འོག་མ་ཀུན་འཁོལ་ལོ། །ཨེ་ཀ་ཛ་ཏི་རལ་གཅིག་མགོ་དགུ་མ་བསྒྲུབ་པ་ནི་གོང་མ་དང་མཐུན་ནོ། །སྲིད་པ་ཆགས་བྱེད་མ་སྒྲུབ་པ་ནི་སྟེགས་བུ་ཁྲུ་གང་ལ་པདྨ་འདབ་མ་བཞི་པར་བྱས་ལ་ཁམ་ཕོར་གྱི་ནང་དུ་རྒོད་ཀྱི་ཚིལ་ལམ་ག་ནུས་བུའམ་མ་ཚལ་སྤོས་གསེར་གཡུ་ལ་སོགས་པ་བླུགས་ལ་བསྒྲུབ་པོ། །ཡོན་ཏན་ནི་སྨན་མོ་ཐམས་ཅད་དབང་དུ་སྡུད་ཅིང་འཁོལ་ལོ། །བརྟན་མ་བཅུ་གཉིས་སྒྲུབ་པ་ནི་ས་གཙང་མར་གྲ་ཕྱིང་ལ་སོགས་པ་བཏིང་ལ་འབྱོར་ཚད་བསོག་
པས་བསྒྲུབ་པོ། །སྙིང་པོ་བཟླས་ཤིང་བསྟེན་ན། ཀུན་མཐུན་གྲུབ་པའི་ཡོན་ཏན་དགྲ་འཇོམས་སོ། །རང་བཞིན་གཉིས་བསྒྲུབ་པའི་དཀྱིལ་འཁོར་དགུ་བཅུ་རྩ་གཉིས་པའི་གསང་བའི་དམ་ཚིག་བསྒྲུབ་པའི་ལེའུ་སྟེ་གོ་ལྔ་པའོ།། །།མ་མོའི་གསང་མཚན་བསྟན་པ་ནི། ཡུམ་ལྔ་ནི་ཀུན་ཏུ་རྒྱུ་ཞིང་ཁྱབ་པའོ། །རྡོ་རྗེ་དབྱིངས་ཀྱི་ཡུམ་མཆོག་མ། སྒྲོལ་གིང་མོ་བཞི་ལ་རྡོ་རྗེ་བདེ་མཆོག་མ། རྡོ་རྗེ་འོད་གསལ་མ། རྡོ་རྗེ་བདེ་སྦྱོར་མ། རྡོ་རྗེ་བདུད་རྩིའི་རྒྱལ་མོ། སྟེང་འོག་གི་སྒྲོལ་གིང་མ། རྡོ་རྗེ་བདེ་འདེགས་མ། རྡོ་རྗེ་བདེ་སྒྲུབ་མའོ། །ཤུགས་སྒྲོལ་མ་དྲུག་ནི། རྡོ་རྗེ་གསང་བའི་གཟུགས་འཛིན་མ། རྡོ་རྗེ་བདེ་སྐྱོང་མ། རྡོ་རྗེ་བདེ་བརྩེགས་མ། རྡོ་རྗེ་གཟུགས་མཛེས་མ། རྡོ་རྗེ་དཔལ་གྱི་ཡུམ་གཅིག་མ། རྡོ་རྗེ་འཁོར་སྐྱོང་མའོ། །འཇུག་སྒྲོལ་མ་དྲུག་ལ། རྡོ་རྗེ་དབྱིངས་ཀྱི་གཏེར་ལྡན་མ། རྡོ་རྗེ་བདེ་ལྡན་དཔལ་གྱི་མཆོག །རྡོ་རྗེ་བདེ་བ་རྒྱས་འདེབས་མ། རྡོ་རྗེ་བདེ་བ་ཟ་བྱེད་མ། རྡོ་རྗེ་བདེ་བ་རྨོངས་བྱེད་མ། རྡོ་རྗེ་བདེ་བ་ཚེ་འཕེལ་མ། རྡོ་རྗེ་གསང་བའི་ཡུམ་གཅིག་མ། རྡོ་རྗེ་བདེ་སྦྱོར་མ། རྡོ་རྗེ་ཡུམ་གཅིག་མ། རྡོ་རྗེ་གྲགས་མ། རྡོ་རྗེ་རྒྱན་གཅིག་མ། རྡོ་རྗེ་མེ་ཏོག་གཟུང་གཅིག་མ། རྡོ་རྗེ་གསང་བའི་དབྱིངས་ཕྱུག་མ། རྡོ་རྗེ་ཐོགས་མེད་མ། རྡོ་རྗེ་གར་གྱི་དབང་ཕྱུག་མ། ཐུགས་རྗེ་ནམ་མཁའི་དབྱིངས་ཕྱུག་མ། རྡོ་རྗེ་ཀུན་ཏུ་བཟང་མོ། རྡོ་རྗེ་ཀུན་ཏུ་གྲགས་མ། རྡོ་རྗེ་ཀུན་གསལ་མ། རྡོ་རྗེ་གསལ་འཕྲོ་མ། བདེ་འགྲོ་མ། རྡོ་རྗེ་འོད་གསལ་མ། རྡོ་རྗེ་འོད་ཆགས་མ། རྡོ་རྗེ་སྡེར་མོ། རྡོ་རྗེ་ཐོ་བ། རྡོ་རྗེ་འཇིགས་བྱེད་མ། དབང་སྡུད་མ། གསང་བ་རྡོ་རྗེ་ཡུམ། རྡོ་རྗེ་འཇིགས་བྱེད་གཟུགས་འཛིན་མ། རྡོ་རྗེ་གྲགས་མ། རྡོ་རྗེ་གཡུ་སྒྲོན་མ། རྡོ་རྗེ་དཔལ་འགྱུར་མ། རྡོ་རྗེ་ལས་བྱེད་མ། རྡོ་རྗེ་གློག་མ། རྡོ་རྗེ་དཔལ་འབར་མ། རྡོ་རྗེ་རེ་རྣམས། རྡོ་རྗེ་ཡེ་ཤེས་འོད་འཕྲོ་མ། རྡོ་རྗེ་དོན་གྲུབ་མ། རྡོ་རྗེ་ཀུན་གྲུབ་མ། བསམ་འཕེལ་གསང་མཚན་གྱི་ལེའུ་སྟེ་གོ་དྲུག་པའོ།། །།དམ་ཚིག་དབོག་པར་བྱིན་པ་དང་། །དབང་དུ་བསྡུ་བའི་ལེའུ་ལས། །ཨ་མྲྀ་ཏ་ནི་ཁར་བླུགས་ལ། །དེ་ནི་བསྡིག་པ་ལྟ་བུའོ། །མ་མོ་འཁྲུག་པའི་སྐོང་ཐབས་བསྟན། །མི་བདེ་སྣ་ཚོགས་གང་བྱུང་ཡང་། །བསྐང་འཕྲོ་ཡང་རྫས་བཞིན་དུ་རིམ་པས་བཅོས། །གོང་མ་སྐོང་པས་འོག་མ་བདེ། །དེ་ནས་ལས་ལ་གཟུད་པ་ལ་གསུམ་སྟེ། མ་མོ་གསང་བའི་ལས་ལ་གཟུད་པ་དང་། དམ་བཅས་པས་
ལས་ལ་གཟུད་པ་དང་། བཅོལ་བས་ལས་ལ་གཟུད་པ་དང་། མན་ངག་རྣམ་པ་གསུམ་ལས་དང་པོ་གང་ནས་བྱུང་བའི་མན་ངག་ནི། གང་ནས་མ་བྱུང་བདག་ཉིད་ལས་བྱུང་། ཕུང་པོ་ལྔ་ལ་ཡབ་ལྔ་འབྱུང་བ་ལྔ་ཡུམ་ལྔ། རྣམ་པར་ཤེས་པའི་ཚོགས་བརྒྱད་ཀོའུ་རི་བརྒྱད། །དེའི་ཡུལ་བརྒྱད་ལ་སིང་ཧ་མ་བརྒྱད། ཡན་ལག་བཞི་ལྷ་མོ་བཞི་ཚེའུ་སག་ནེའུ་སག་ཁྲོ་བོ་ཁྲོ་མོ། སྒལ་ཚིགས་དབང་ཕྱུག་མ་ཉི་ཤུ་རྩ་བརྒྱད། བདག་གི་ཀུན་གཞི་རྣམ་པར་ཤེས་པ་ལས། ཚེ་བདག་ཆེན་མོ་གསང་བའི་གཟུངས་མ་གཉིས་བསྐྱེད། ཁྲག་གི་དྭངས་མ་དབུགས་ཀྱི་དྭངས་མ། དྲོད་ཀྱི་དྭངས་མ་རྣམ་པར་ཤེས་པའི་དྭངས་མ་ལས། འཇུག་སྒྲོལ་མ་བཞི་བསྐྱེད། རྣམ་པར་ཤེས་པ་ཚོགས་བརྒྱད་ཀྱི་དངས་མ་ལས། སྒྲོལ་གིང་མ་བཞི་ཤུགས་སྒྲོལ་མ་བཞི་སྟེ་བརྒྱད་བསྐྱེད། བདག་གི་བྱང་ཆུབ་སེམས་ལས། སྲིད་པ་ཆགས་འཛིན་མ་སྤུན་གཉིས་བསྐྱེད། བདག་གི་སྒལ་ཚིགས་ལས་ཨེ་ཀ་ཙ་ཏི་སྤུན་དྲུག་བསྐྱེད། བདག་གི་སྲོག་རྩ་ལས་འདོད་ཁམས་མ་མོ་སྤུན་གཉིས་བསྐྱེད། བདག་གི་ལྟེ་བ་ལས། སྟེང་འོག་སྒྲོལ་གིང་མ་གཉིས་བསྐྱེད། བདག་གི་ཡིད་ཀྱི་རྣམ་པར་ཤེས་པ་ལས། སྲིན་མོ་བརྒྱད་བསྐྱེད། རྐང་ལག་གཡས་གཡོན་བཞི་ལས། དམག་གི་རྒྱལ་མོ་སྤུན་བཞི་བསྐྱེད། སྟེང་འོག་བཤང་ལམ་སྒོ་བཞི་ལས། ལས་ཀྱི་སྲིན་མོ་བཞི་བསྐྱེད། བདག་གི་མཁལ་མ་གཡས་གཡོན་གཉིས་ལས། པདྨ་གར་གྱི་དབང་ཕྱུག་མ་དང་། རྡོ་རྗེ་གར་གྱི་དབང་ཕྱུག་གཉིས་བསྐྱེད། མཁྲིས་པ་ལས་ནག་མོ་ཁྲག་འཛག་མ་བསྐྱེད། ལག་མགོ་རྐང་མགོ་གཉིས་བཞི་ལས། ཕོ་ཉ་ཆེན་མོ་བཞི་བསྐྱེད། བདག་ཉིད་ཉོན་མོངས་པའི་ཡིད་ལས། བརྟན་མ་བཅུ་གཉིས་བསྐྱེད་དོ། །དང་པོ་གང་ནས་མ་མོ་བྱུང་བ་ནི་བདག་ཉིད་ལས་བྱུང་ངོ་། །དེ་ལྟར་བྱུང་བས་མན་ངག་གོ། །མ་མོ་བྱུང་བའི་རྒྱུད་དང་གསང་བའི་ལས་ལ་གཟུད་པའི་ལེའུ་སྟེ་གོ་བདུན་པའོ།། །།དང་པོ་གསང་བའི་ལས་ལ་གཟུད། དུར་ཁྲོད་ཞིང་ལ་ཕོ་ཉར་བཏང་ཞིང་གཟུད། བར་དུ་དམ་བཅའ་ཞིང་ལས་གཟུད་པ་དང་། ཇོ་མོར་གཟུང་ན་ཇོ་མོར་གཟུད་དོ། །
ཐ་མར་བཅོལ་བའི་ལས་ལ་གཟུད་པ་ནི། དགྲ་བོའི་ལུས་ལ་གཟུད་པ་ཡིན་ནོ། །ཀུན་གཞི་སྤྲུལ་བདག་དང་། ཚེ་བདག་ཆེན་མོ་གཉིས་ལས་ལ་གཟུད་དོ། །དེས་ཀུན་གཞི་ཉམས་སུ་གཞུག་གོ། །ཐ་མར་མཇུག་བསྡུ་བའི་མན་ངག་ནི། སྣང་སྲིད་ཀྱི་ཆོས་ཐམས་ཅད་ཉོན་མོངས་པའི་ཡིད་ལ་བསྡུའོ། །དེ་ལས་རིམ་གྱིས་ཀུན་གཞི་ལ་བསྡུའོ། །ཀུན་གཞི་སྐྱེ་འགག་མེད་པའི་ངང་ངོ་། །ཐིག་ལེ་རྣམ་པ་གསུམ་ལས། དབྱིངས་དང་རིག་པ་གཉིས་མེད་དང་། །ཐབས་དང་ཤེས་རབ་གཉིས་མེད་དང་། །དེ་ནི་མ་མོའི་ཐིག་ལེའོ། །གྲུབ་པའི་ཐིག་ལེ་ནི་ཆོས་ཐམས་ཅད་རང་བཞིན་ལྷུན་གྱིས་གྲུབ་པ་ནི་རྩལ་སེམས་དང་བྲལ་བ་སྟེ། ཡེ་ནས་བཅོས་སུ་མེད་པའི་ཀློང་ཆེན་པོ་ཡིན་ནོ། །ལེན་པའི་ཐིག་ལེ་ནི། ཐིག་ནི་བདག་གི་ཀུན་གཞི་བྱང་ཆུབ་ཀྱི་སེམས་ཡིན་ནོ། །ལེ་ནི་རང་རིག་གི་ཡོན་ཏན་ཡིན། གཉིས་སུ་མེད་པའི་ངང་ལས་འཇིགས་བྱེད་འབར་བའི་སྐུ། དུར་ཁྲོད་ཀྱི་ཆས་ཀྱིས་གདུག་པ་ཅན་འདུལ་བ་དང་། རྒྱན་དང་ཆ་ལུགས་སུ་སྣང་བ་ལས། རྡོ་ཁབ་ལེན་གྱིས་ལྕགས་རྣམས་སྡུད་ཚུལ་དུ། མ་མོ་ཐམས་ཅད་འདར་ཞིང་འདུད། ཐམས་ཅད་ནི་སྐུ་ལ་འཁྲིལ། རྒྱལ་མོ་བརྒྱད་ཅུ་རྩ་བཞི་བྲན་དུ་ཁོལ། བློན་མོ་དགུ་ནི་དམིགས་པ་བཞིན་དུ་འགྱེད། འཇིག་རྟེན་གྱི་ཆོས་ཐམས་ཅད་གསལ་བར་སྟན། མ་མོ་འབུམ་ལ་སོགས་པ་ནི་ཅི་བགྱི་ཟེར་ཞིང་བཀའ་སྡོད། མ་མོ་བཀོལ་བའི་ལུགས་ཀྱིས་ནི། ཚོགས་ཀྱི་རྗེ་མོ་ཇོ་མོ་བཞིན་དུ་བཀོལ། མ་མོ་བཅུ་གསུམ་ཆུང་མ་བཞིན་དུ་བཀོལ། བྷ་གའི་ཁ་སྲུང་མ་ལ་སོགས་པ་དྲུག་ནི་ཁོལ་མོ་བཞིན་དུ་བཀོལ། ཚེ་བདག་ཆེན་མོ་ལ་སོགས་པ་བུ་མོ་བཞིན་དུ་བཀོལ། བརྟན་མ་བཅུ་གཉིས་གསུམ་བཀྲ་བཞིན་དུ་བཀོལ། དྲག་ཤུལ་གྱིས་དབང་དུ་བསྡུས་པའི་མ་བདུན་ནི་བྱི་མོའི་ཚུལ་དུ་བཀོལ་ལོ། །འཇིག་རྟེན་འདས་པ་ཆེན་མོ་ལས་ནི་བྱུང་། འཇིག་རྟེན་ལ་ནི་གནས་ཏེ་དེ་གང་ནས་བྱུང་ན། མ་མོའི་ལེའུ་སྟོང་ཕྲག་དྲུག་ཅུ་རྩ་ལྔ་ལས། མན་ངག་གི་ལེའུ་འཇིག་རྟེན་ལས་འདས་པའི་ལེའུ་བརྒྱ་ཉི་ཤུ་རྩ་གཉིས་འབྱུང་བའོ།། །།
མ་མོ་དབང་དུ་བསྡུ་ཞིང་། བཀོལ་ཐབས་བསྟན་པའི་ལེའུ་སྟེ་གོ་བརྒྱད་པའོ།། །།ཏིང་འཛིན་རྣམ་པ་གསུམ་བསྐྱེད་པ། །དེ་བཞིན་ཉིད་ཀྱི་ཏིང་འཛིན་ནི་བསྐྱེད་ལ། དེ་བཞིན་ཉིད་ཀྱི་རང་བཞིན་ནི། །དམིགས་མེད་ཡུམ་གྱི་ངང་དུ་གསལ། །ཁྱབ་གདལ་དོན་ནི་རྫོགས་པར་ལྡན། །མ་ཧཱ་ཤཱུ་ནྱ་ཏཱ་ཛྙཱ་ན་མཎྜ་ལ་ཧཱུཾ། ཀུན་སྣང་གི་ཏིང་ངེ་འཛིན་ནི། །དག་པའི་ཡེ་ཤེས་བདེ་ཆེན་མཁར། །ཀུན་ཏུ་སྣང་སྲིད་ཁྱབ་པར་གསལ། །གཉིས་མེད་ལྷུན་གྱིས་གྲུབ་པའི་མཆོག །དྷརྨ་དྷཱ་ཏུ་མཎྜལ་ཧཱུཾ། དེ་ནས་རྒྱུ་ཏིང་ངེ་འཛིན་གྱིས། དབང་ཆེན་ཡུམ་གྱི་དཀྱིལ་འཁོར་བསྐྱེད། །གཉིས་སུ་མེད་པའི་མཁའ་དབྱིངས་ལས། །བྱང་ཆུབ་སེམས་ཀྱི་སྤྲིན་ཚོགས་གཏིབས། །བདེ་མཆོག་ཡིད་བཞིན་ཆར་དུ་འབེབས། །ཐམས་ཅད་མ་ལུས་བསྐྱེད་པའི་རྒྱུ། །རིན་ཆེན་འབར་བའི་འོད་ཟེར་ལས། །དབང་ཆེན་དཀྱིལ་འཁོར་འབྱུང་བའི་རྒྱུ། །ཨེ་ཏཾ་མཾ་ལཾ་བྷྲཱུཾ། གྲུ་གསུམ་མཐིང་ནག་འབར་བའི་ནམ་མཁའ་ལས། །འཐོར་བྱེད་རླུང་ནག་ཚོགས་ཀྱིས་རྒྱ་གྲམ་གཏམས། །ཆགས་པའི་རྒྱ་མཚོ་རཀྟ་རྦ་ཀློང་བསྐྱིལ། །ཞིང་ཆེན་གཏམས་པའི་ས་གཞི་མཐའ་དབུས་བརྡལ། །ཀེང་རུས་འབར་བའི་རི་རབ་གཞལ་ཡས་ནི། །ཆུ་སྲིན་བྱེ་བ་ས་ཡའི་ཐོད་པ་ལ། །མི་བཟད་དུར་ཁྲོད་འབར་བའི་རྩིགས་རྨང་བྱས། །ཐོད་དགུ་འབར་བའི་རྩིགས་པ་མཁར་དུ་བརྩེགས། །གནམ་ལྕགས་ངུར་མོ་འབར་བའི་གཟེར་ཆེན་བཏབ། །རིན་ཆེན་མཆོག་གིས་ཟུར་བཞི་མཛེས་པར་བརྒྱན། །གཡུ་འོད་སྔོན་པོ་འབར་བའི་ཁ་བད་ཅན། །མུ་ཁྱུད་གནམ་ལྕགས་འབར་བའི་མེ་རིས་བསྐོར། །སུཾ་བྷནྡྷ་བྷནྡྷ་རཀྴ་རཀྴ་ཏིར་བཾ། ད་ནི་གདན་ཁྲི་བསྐྱེད་དེ། མཐིང་ནག་འབར་བའི་གཞལ་ཡས་འདིར། །ཞིང་ཆེན་ཞིང་ཆུང་གཅལ་དུ་བཀྲམ། །མཆོག་བྲན་མང་པོ་གདན་དུ་བཏིང་། །ཐེ་བྲང་དགུ་བརྒྱའི་གབ་ཙེ་ལ། །ལྷ་སྲིན་ཀུན་གྱི་ནང་སྟན་བྱ། །ནྲྀ་ཏི་ར་བཾ། ཨ་ཀྲ་ཏི་ར་བཾ། རཀྵ་ཏི་ར་བཾ། ཞེས་བསྐྱེད་དོ། །ད་ནི་ཕྱག་བྱ་སྟེ། མི་མངོན་མཁའ་དབྱིངས་སྨུག་མོའི་དཀྱིལ་འཁོར་དང་། །སྐུ་ལ་ཉག་གཅིག་སྤྲུལ་པ་དྲུག་ལ་བཀའ་ཉན་སྟོང་། །བཀའ་
ཉན་སྟོང་ལ་ཕྱག་བརྙན་འབུམ། །སྣང་སྲིད་བདག་ལ་ཕྱག་འཚལ་ལོ། །དབྱར་ཞིང་ནམ་མཁའི་ཁམས་ན་རྒྱུ། །འབྲུག་དང་གློག་གི་བདག་མོ་མཛད། །ལྕེ་དང་བུ་ཡུག་འབེབས་མཛད་མ། །གློག་མ་སྲིན་ལ་ཕྱག་འཚལ་ལོ། །དཔྱིད་ཅིང་ཀུན་ལ་དྲོད་མཛད་མ། །ཆུ་བོ་ཀུན་གྱི་སྣ་འདྲེན་མ། །ཆུ་བོ་ཀུན་གྱི་གཞུང་འབྱམས་མ། །ནག་མོ་གཙོ་ལ་ཕྱག་འཚལ་ལོ། །སྟོན་ཞིང་འབྲས་བུ་སྨིན་མཛད་མ། །སྤང་བོ་དེ་ནི་ཁ་སེར་ལ། །འབྲུ་དང་ལོ་ཡི་བཅུད་ལེན་པ། །མི་རྣམས་ཀུན་གྱི་དཔལ་འཕྲོག་མ། །གློག་འགྱུ་མ་ལ་ཕྱག་འཚལ་ལོ། །དགུན་ཞིང་རྒྱ་མཚོའི་གཏིང་ན་བཞུགས། །ཁམས་གསུམ་ཀུན་གྱི་རྒྱས་འདེབས་མ། །ཀླུ་འབྲུག་ཀུན་གྱི་དགྱེས་སྡེ་མོ། །གློག་འགྱུ་མ་ལ་ཕྱག་འཚལ་ལོ། །རྡོ་རྗེ་དྲི་ཆུ་བདུད་རྩིའི་མཆོག །པཉྩ་ཨ་མྲྀ་ཏ་དང་སྦྱར། །དམ་རྫས་སྙིང་གི་ཁྲག་ཆེན་པོ། །བསྲེ་བའི་མཆོག་སྟེ་ཁྲག་གི་སྙིང་། །མ་ཧཱ་ཀུ་ཀུ་ལ་ས་མ་ཡ། པཉྩ་ས་མ་ཡ། མ་ཧཱ་ཨ་མྲྀ་ཏ་ས་མ་ཡ། ཏིང་ངེ་འཛིན་གྱི་ལེའུ་སྟེ་གོ་དགུ་པའོ།། །།ད་ནི་མཆོད་པ་འབུལ་ཏེ། སྨུག་ནག་འཇིག་རྟེན་རྒྱལ་མོ་བཞེས་སུ་གསོལ། །ནག་མོ་མི་བཟད་རྒྱ་མཚོ་བཞེས་སུ་གསོལ། །ཕྱག་བརྙན་རྐང་དྲུག་མཛེས་མ་བཞེས་སུ་གསོལ། །མདོག་བཟང་ནག་མོ་མཐུ་ཆེན་བཞེས་སུ་གསོལ། །ཨེ་ཧྱེ་ཧི་ཚུར་སྤྱོན་འཁོར་དང་བཅས། ཛཿཧཱུཾ་བཾ་ཧོཿ། སྤྱན་འདྲེན་མ་ལུས་གཤེགས་སུ་གསོལ། །མ་གཅིག་ཆེན་མོ་འདིར་སྤྱོན་ཤ་ལ་སྤྱོན། །འབྱུང་པོ་འབྱུང་མོའི་ཤ་ནི་ཟན་བས་ཞིམ། །མ་གཅིག་ཆེན་མོ་འདིར་སྤྱོན་ཁྲག་ལ་སྤྱོན། །འབྱུང་པོ་འབྱུང་མོའི་ཁྲག་ནི་ཆང་བས་ཞིམ། །མ་གཅིག་ཆེན་མོ་འདིར་སྤྱོན་རུས་ལ་སྤྱོན། །འབྱུང་པོ་འབྱུང་མོའི་རུས་ནི་མར་བས་ཞིམ། །བདག་གི་བརྣག་པའི་ལས་འདི་མཐར་ཕྱུང་ཞིག །ད་ལྟ་ཉིད་དུ་རྟགས་དང་མཚན་མ་ཕྱུང་། །ཁ་ཁ་དུ་ར་མ་ཏི་རུ་ལུ་བྷྱོ། ད་ནི་སྨན་མཆོད་བྱ་སྟེ། རང་བྱུང་བདུད་རྩི་དམ་རྫས་ལྔ། །གདོད་ནས་དག་པ་བདུད་རྩིའི་མཆོག །རྩ་བ་བརྒྱད་ལ་ལོ་མ་སྟོང་། །སངས་རྒྱས་སྟོང་གི་དངོས་གྲུབ་ལེན། །དམར་ཆེན་མཚོ་དང་མཱཾ་ས་དྲི། །ག་པུར་ཤེལ་དང་
སྤོས་ཕོར་དྲི། །སངས་རྒྱས་སྟོང་གི་ཐུགས་དམ་སྟེ། །རྣལ་འབྱོར་ཡོངས་ཀྱི་དམ་ཚིག་མཆོག །དམ་ཚིག་སྦྱིན་པ་ཆེན་པོ་འདི། །སྦྱིན་ནོ་བསྟབ་པོ་བསྐུལ་ལོ་གསོལ། །དམ་རྫས་བདུད་རྩི་ཆེན་པོ་འདི། །མ་ཚོགས་སྟོང་གི་འཁོར་ལ་མཆོད་པ་འབུལ། །འདུལ་བའི་ལྷ་མོ་མཐུ་མོ་ཆེ། །དུས་ལ་རྔུབ་ཅིང་དམ་ལ་འཕྲེང་། །དབང་ཕྱུག་ཆེན་མོ་ཀུན་གྱི་སྲིང་། །རྣལ་འབྱོར་ཀུན་གྱི་མ་གཅིག་མ། །མཚན་བཟང་ནག་མོ་རེ་མ་ཏི། །མ་ཚོགས་སྟོང་གི་འཁོར་ཚོགས་ལ། །རྣམ་དག་བདུད་རྩི་དམ་རྫས་མཉེས་མཆོད་འབུལ། །ཐུགས་རྗེས་བརྩེར་དགོངས་དབང་དང་དངོས་གྲུབ་སྩོལ། །བར་དེར་མ་མོའི་འཛབ་ནུས་ཚད་བགྲང་ངོ་། །སྤྱན་དྲང་བ་དང་མཆོད་པའི་ལེའུ་སྟེ་བརྒྱ་ཐམ་པའོ།། །།ད་ནི་རྔ་བརྡུང་བ་དང་མ་མོའི་ཐུགས་དམ་བསྐུལ་བ་ནི། མ་གཡེལ་མ་འདའ་སྲིང་གཅིག་མ། །མ་ཡི་ནང་ནས་མ་གཅིག་མ། །དམ་ཉམས་ཀུན་གྱི་བདུད་གཅོད་མ། །དམ་ལ་གནས་པའི་ཚེ་འཛིན་མ། །སྟོང་ཁམས་ཀུན་གྱི་ཉུལ་ལེ་མ། །ནད་བདག་ཆེན་མོ་རིམས་བདག་མོ། །ཆིབས་སུ་དྲེའུ་རྟ་རྐང་གསུམ་ཆིབས། །དྲ་བ་དགུ་ཡི་ལྟི་ལེན་ཅན། །བྱེ་རུ་དམར་པོའི་རྒྱན་སྲབ་ཅན། །ཉིན་བཞིན་ཁྱོ་དགུ་བསྐུངས་ན་སྦེད། །མཚན་མོ་དུར་ཁྲོད་ཁྱབ་པར་ཉུལ། །རྣལ་འབྱོར་མཐའ་དག་ཚོགས་ཁང་འགྲིམ། །རྣལ་འབྱོར་དམ་ཚིག་གཙང་མི་གཙང་། །མཆེད་ལྕམ་བརྩེ་གདུང་ཆེའམ་ཆུང་། །སློབ་དཔོན་ཏིང་འཛིན་དྲོད་ཉུལ་མ། །ལེགས་ཉེས་སྟངས་འཛིན་དམ་ཚིག་རྗེས་གཅོད་མ། །ཉིད་ཀྱི་སྐུ་མདོག་མཐིང་ནག་ལ། །རལ་པའི་ཟར་བུ་གཡས་ནས་གཡོན་དུ་འཁྱིལ། །ཞལ་ནས་མི་ཁྲག་རྟ་ཁྲག་འཛག །མིག་ནས་ཁྲག་འཛག་ཟུ་ལུ་ལུ། །ལྕགས་ཀྱི་དྲེའུ་རྟ་རྐང་གསུམ་བསྐྱོད་པའི་ཚེ། །དཔག་ཚད་བརྒྱད་ཁྲི་བཞི་སྟོང་ཡང་། །མཚན་མོ་གཅིག་ལ་ཁྱབ་པར་གཅོད། །རྣལ་འབྱོར་ཆེན་མོ་ཨ་ལ་ལ། །ཁྱོད་ཀྱི་ལག་པ་གཡས་པ་རུ། །བདུད་ཀྱི་ཁྲམ་བམ་རེ་རེ་ཐོགས། །སྐྱེ་འགྲོ་དབུགས་སུ་སྣང་བ་ཀུན། །སང་ཕོད་དེང་སང་སུ་འཆི་བ། །དོ་ཅིག་ཤོ་རྡེའུ་ནག་པོ་འགྲེམས། །
ཁྱོད་ཀྱི་མཆན་ཁུང་གཡས་པ་ན། །བྱང་དམར་དཀྱུས་པའི་བམ་པོ་སྦེད། །སང་ཕོད་དེང་སང་སུ་འཆི་བ། །དོ་ཅིག་བྱང་དམར་དཀྱུས་ལ་འདེབས། །ཁྱོད་ཀྱི་མཆན་ཁུང་གཡོན་པ་ན། །ནད་ཀྱི་རྐྱལ་བ་སྔོ་དམར་ལ། །སྦྲུལ་ནག་བརྒྱ་ཡི་ཁ་བཅིངས་ཅན། །ལྔ་བརྒྱ་དུས་ཀྱི་སྙིགས་མ་ལ། །གསང་སྔགས་བོན་དུ་གྱེར་བའི་དུས། །རྣལ་འབྱོར་གྲོང་བསྙེན་བྱེད་པའི་དུས། །དེ་ཚེ་སྲིད་པའི་མ་མོ་འཁྲུག །དེ་ཚེ་ཁྱོད་ཀྱི་རྟགས་བསྟན་པ། །ཁྱོད་ཀྱི་ཁ་རླངས་སེར་པོ་ཡིས། །སྟོང་ཁམས་ཐམས་ཅད་འགེངས་བྱེད་ཅིང་། །བུད་མེད་སེར་པོས་ས་གཞི་འགེངས། །ཆེ་ཞེས་མཁྲིས་ཆེན་ཤ་ཡ་གཏོང་། །ནམ་མཁའི་མཐོངས་ན་ཁྱོད་གནས་པ། །ནམ་མཁའི་དབྱིངས་ཀྱི་དཔལ་མོ་བཙན། །སེམས་ཅན་ཀུན་གྱི་ལམ་སྟོན་མ། །བར་སྣང་མཁའ་ལ་བཞུགས་པའི་ཚེ། །བྷ་ག་ཧྲི་སྡི་མཁའ་ལ་ཆར་འབེབས་མ། །འབྱུང་བ་ལྔ་ཡི་ཆ་སྙོམས་མ། །འཛམ་གླིང་འབྲུ་ཡི་བཅུད་ལེན་མ། །དེ་ཡང་བྱང་ཤར་རེ་མ་ཏི། །རི་རབ་རྩེ་ལ་བཞུགས་པའི་ཚེ། །མེ་ཟ་མ་ལ་བྲག་གྱོན་མ། །རྣལ་འབྱོར་ཀུན་གྱི་ཚེ་འཛིན་མ། །དེ་ཡང་བྱང་ཤར་རེ་མ་ཏི། །འབར་མ་ཉུལ་བྱེད་གཙོ་མོ་ནི། །འབར་མ་ཉི་མའི་ཞགས་པ་ཅན། །ཕུད་ལྷག་ཉུལ་ཞིང་སྒྲུབ་མཆོག་སྐྱོང་། །དེ་ཡང་དཔལ་ལྡན་རེ་མ་ཏི། །ཧཱུཾ། དབང་ཕྱུག་ཉི་ཤུ་རྩ་བརྒྱད་ནང་ན་བཞུགས་པའི་ཚེ། །མི་སྲིང་གཡག་མགོ་ཐོད་རློན་འཆང་། །ཁ་ཆུ་སྙེག་ཅིང་སྒྲུབ་མཆོག་སྐྱོང་། །དེ་ཡང་དཔལ་ལྡན་རེ་མ་ཏི། །མ་བརྒྱའི་གཙོ་མོ་མཛད་པའི་ཚེ། །ཨེ་ཀ་ཛ་ཏི་རལ་གཅིག་མ། །རྣལ་འབྱོར་ཏིང་འཛིན་དྲོད་ཉུལ་མ། །དེ་ཡང་དཔལ་ལྡན་རེ་མ་ཏི། །ཆེ་ཞེ་ཆེན་མོ་མཐུ་མོ་ཆེ། །ཆེ་ཞེ་ཆེན་མོ་དུས་ལ་བབ། །ཕྲིན་ལས་བཅོལ་ཞིང་ངེས་ཚིག་གི་ལེའུ་སྟེ་བརྒྱ་དང་གཅིག་པའོ།། །།བྱང་ཤར་མཚམས་ཀྱི་སྲིང་གཅིག་མ། །བསེ་ཡི་གདོང་ལ་གཡུ་ཡི་སྤྱན། །ཟ་འོག་དཀར་བཀྲའི་སླག་པ་ཅན། །དཔུང་ཟླུམ་རེ་ལྡེའི་སྨད་དཀྲིས་གསོལ། །གཡུ་ཡི་ལྟེ་ཤོ་རྒྱལ་ལ་རྩེ། །ཆིབས་སུ་དྲེའུ་རྟ་རྐང་གསུམ་ཆིབས། །
ལག་ན་ལྕགས་ཕུར་སྲོད་དྲིལ་མ། །ནད་གཏོང་རིམས་ཀྱི་རྐྱེན་བདག་མོ། །མིང་ནས་བོས་ན་མི་གསན་ནམ། །དམ་ཚིག་བསྲུང་ན་མི་དགོས་སམ། །བདུད་ཀྱི་ཡུལ་དུ་དམག་འདྲེན་མ། །སྲིང་གཅིག་རེ་ཏིང་མ་ལ་འདུ། །དགྲ་བགེགས་མ་ལུས་རྡུལ་དུ་རློགས། །མ་རུང་ད་བྷྱོ། མ་རུང་ད་བྷྱོ། དེ་ལྟར་བྱས་ན་གང་ལ་དམིགས་པ་མི་འགྲུབ་མི་སྲིད་དོ། །རེ་མ་ཏི་བྱང་ཤར་སྲིང་གཅིག་གི་ལེའུ་སྟེ་བརྒྱ་དང་གཉིས་པའོ།། །།གབ་པོ། །གསང་ངོ་། །མི་སྤེལ་ལོ། །རང་སྒྲོལ་གྱི་གསང་སྔགས་དང་ཕྱག་རྒྱ་ལ། བསྒོམ་ཞིང་དབང་དུ་བསྡུ་བ་ནི། ཨོཾ་བཛྲ་སཏྭ་ན་ད་ར་ཡ་རྦད། བྱིན་གྱིས་བརླབ་པའི་གསང་སྔགས་ལ། ཨོཾ་བཛྲ་དྷ་ར་རྦད། གཾ་ཤི་ད་ར་ཡ་རྦད།ཁྲག་ཏི་རྦད། ཁཾ་རིལ་རྦད། ཨོཾ་བཛྲ་མུག་ཐིག་ཐིག་རྦད། ཨོཾ་པུ་རགྴ་ཤ་ནི་ཐིམ། པུ་ཏི་ཛྙཱ་ནཱ་ད་ར་ཐིམ། ཨོཾ་བཛྲ་སུ་ན་རི་ལ་རྦད། པྲ་ཏི་བ་ར་སུ་ཙནྡྲ་རྦད། ཨོཾ་བཛྲ་ད་ར་ལྕིབ། ཨོཾ་བཛྲ་སྙིང་གོང་ཆོད། ཁ་ལ་ཟ་མུ་ལོ་དན་ཏི། ཡོ་ཏི་ད་ན་ཏིར་དྷ་ར་ཡ་རྦད། དབང་པོ་ལྔ་ལ་དེ་སྐད་བརྗོད་ལ། སྒོ་བཞི་དབྱེ་བའི་ཕོ་ཉ་བཏང་སྟེ། ཤར་ཕྱོགས་ནམ་མཁའི་དཀྱིལ་ཡངས་ནས། །སྤྲིན་གྱི་སྙིང་པོ་དུ་རུ་ཀ །དབུ་སྟོང་འབུམ་ཕྲག་ཞབས་བརྒྱ་ལ། །ཕྱག་གཡས་རྒྱུ་དྲུག་ཙིཏྟ་བསྣམས། །གཡོན་ན་རྡོ་རྗེ་སྣ་ཚོགས་བསྣམས། །མཆན་ཁུང་གཡས་ཀྱི་སྒོ་ཕྱེ་ལ། །ཙིཏྟ་ཕྱུར་བའི་དུས་ལ་བབ། །དམར་འབྱིན་ཆེན་མོ་ད་ཚུར་སྤྱོན། །ཐར་ལམ་སྟོན་པའི་དུས་ལ་བབ། །ཨོཾ་བཛྲ་ཁྲག་ཏི་ཏི་རྣར་མ་རྦད། ལྷོ་ཕྱོགས་ནམ་མཁའི་དཀྱིལ་ཡངས་ནས། །ཆུ་ཡི་སྙིང་པོ་ན་ཚེ་མ། །ཆུ་སྲིན་འབར་བའི་ཁ་ནས་ནི། །འོད་ཟེར་མང་པོ་སྟོང་འཕྲོས་པས། །འོད་ཟེར་མང་པོའི་འཕྲོ་འདུ་ཡིས། །མཆན་ཁུང་གཡོན་གྱི་སྒོ་ཕྱེ་ལ། །ཙིཏྟ་ཕྱུང་བའི་དུས་ལ་བབ། །དམར་འབྱིན་ཆེན་མོ་ད་ཚུར་སྤྱོན། །ཐར་ལམ་སྟོན་པའི་དུས་ལ་བབ། །ཨོཾ་བཛྲ་ཙཀྲ་རུ་ད་ར་རྦད། སྙིང་རྩ་ཆོད། ནུབ་ཕྱོགས་ནམ་མཁའི་དཀྱིལ་ཡངས་ནས། །ནག་མོ་མཁའ་ལ་དབང་ཕྱུག་འཕྱོ། །རི་རབ་ངོས་ལ་སྐུ་རྟེན་འཆའ། །རྒྱ་མཚོའི་གཏིང་དུ་རྐང་བརྐྱང་
ནས། །ཕྱག་གིས་སྟོང་ཁམས་ཡོངས་སུ་ཉུལ། །ནུབ་ཕྱོགས་དབུགས་ཀྱི་སྒོ་ཕྱེ་ལ། །ཙིཏྟ་དབྱུང་བའི་དུས་ལ་བབ། །དམར་འབྱིན་ཆེན་མོ་ད་ཚུར་སྤྱོན། །ཐར་ལམ་སྟོན་པའི་དུས་ལ་བབ། །ཨོཾ་བཛྲ་ཀྵུ་ཏཱ་བྷ་ར་ཧྲྀ་ད་ཡ་བཛྲ་ཧཱུཾ་ཕཊ། བྱང་ཕྱོགས་ནམ་མཁའི་དཀྱིལ་ཡངས་ནས། །དབང་དྲག་རལ་པ་འཇོམས་མཛད་མ། །རལ་པ་མང་པོ་གཏིབས་འཕྲོས་པར། །རལ་པ་མང་པོའི་འཕྲོ་འདུ་ཡིས། །བྱང་ཕྱོགས་ལྕགས་ཀྱི་སྒོ་ཕྱེ་ལ། །ཙིཏྟ་དབྱུང་བའི་དུས་ལ་བབ། །དམར་འབྱིན་ཆེན་མོ་ད་ཚུར་སྤྱོན། །ཐར་ལམ་སྟོན་པའི་དུས་ལ་བབ། །བཛྲ་པ་རི་ཤུ་བ་རུ་ཀ་ར་ཁྲག་པ་ར་རྦད། ལག་པ་གཡས་ཀྱི་སོར་མོ་གསུམ་ལྕགས་ཀྱི་སྤྱང་མོ་མགོ་དགུ་གཅིག་ཏུ་བསམ་ལ། མཆན་ཁུང་གཡས་པའི་རྩིབ་མ་ཡར་གཉིས་མར་གཉིས་བར་དུ་བཙུགས་ལ་གདབ། ལག་པ་གཡོན་པའི་སོར་མོ་གསུམ་ལ་འཛིན་པའི་ལྕགས་ཀྱུར་བསམ་ལ། མཆན་ཁུང་གཡོན་མའི་འོག་ཏུ་བཙུགས་ལ། སྔགས་གདབ། ལྗགས་ཀྱི་སྟེང་ནས་རྡོ་རྗེ་ལྕགས་ཀྱུ་གྲངས་མེད་པ་ཞིག་འཕྲོས་པས་ཕུང་པོ་བསྒྱེལ་བའི་ཕོ་ཉར་གྱུར་ཏེ། ལྗགས་ཀྱི་སྟེང་དུ་དགྲ་བོའི་ཙིཏྟ་དམར་པོ་སུ་ལ་གསུམ་དྲང་ངོ་། །དེའི་འཕྲོས་པས། ཧ་དམར་པོ་གཅིག་ཏུ་གྱུར་ཏེ། ཡེ་ཤེས་ཀྱི་གཞལ་ཡས་ཁང་ལས། བྷ་གའི་དཀྱིལ་དུ་ཙིཏྟ་ཟུར་གསུམ་དྲང་བར་བསམ་མོ། །དུར་ཁྲོད་ཀྱི་སྒོ་བཞི་ཕྱེ་བས། དབང་པོ་ལྔ་དབྱུང་བའི་སྔགས་ནི། བཛྲ་ཀ་རུ།གློ་བ་མ་ལྔ་བུ་ལྔ་གྲོལ། སྙིང་ཁ་ཁྲག་རྦད། སྡྱ་ཐུཾ་རི་ལི་ལི། འབྲུ་སི་ཏི་ས་མནྡ་ཆོད། ད་ར་དབྱུགས་ད་ར་ཁུམས་ད་ར་ཆོད། སྣང་སྲིད་རང་གྲོལ་གྱི་ལེའུ་སྟེ་བརྒྱ་གསུམ་པའོ།། །།མ་མོ་བྷྱོ། རུ་ལུ་རུ་ལུ། སྙིང་ཁ་རག །མ་རག་ཤ །རཀྴ་རག་མོ། སྙིང་ཁྲག་མ་ཐུན་ཐུན། ཏྲག་རག་ཤ །མ་སྙིང་ཏ་ཀེཾ། མ་མ་བྷྱོ། རུ་ལུ་རུ་ལུ་བྷྱོ་བྷྱོ། སྙིང་ཁ་རག །ས་མ་ཡ་དཾ་དཾ། ཛ་ཛ། ཀྲོ་མ་ཙ་ལ། ཀྲོ་མ་ཙ་ལ། དགྲ་བོ་ནྲྀ་མཱ་ར་ཡ་ཛ། མ་མོ་ནི་སྙིང་རྩ་ལ་ཐུན་ཐུན། སྙིང་ཁྲག་མ་ཐུན།
ཤ་ཏི་ཏཾ་མ་མ་སྙིང་ལ་ཡཱ་ཡཱ་བྷྱོ། མ་མ་ཤ་ཤ །མ་མ་ཧྲིང་ཧྲིང་། སཱ་མཱ་ཡཱ། སཱ་མཱ་ཡཱ། དགྲ་བོ་ནྲྀ་མཱ་ར་ཡ་སོད་སོད། མ་ཙིཏྟ་ལ་ཛྭ་ཝ་རཾ། སྙིང་ལ་ཙིཏྟ་མ་རིལ། སྡྱ་ཐུཾ་རིལ་བྷྱོ། རག་མོ་སྙིང་རྩ་བྷྱོ། རག་མོ་རག་མ། རུ་རུ་རོ་རུ་ཙ་པ་ལ། དགྲ་བོའི་སྙིང་ཁ་རག་མ་བྷྱོ། ཙ་པ་ཙ་པ་མ་བྷྱོ། ཁྲག་ལ་མུ་ཤ་མ་བྷྱོ། རུ་སྙིང་ཁྲག །ཁ་ལ་རག་ཤ་ནི་རྦད། ཐུཾ་རི་ལི་ལི་རྦད། སྙིང་ལ་རག་ཤ་ན། ཤ་ཏི་ཏ་རྦད། ཐུཾ་རི་ལི་ལི། ནི་ཤང་ཀུ་རུ་རཀྴ་ཏ་ཁ་རཾ། ཀུ་ནི་ཀུ་རུ་ཁ་རཾ། ཏྲག་རག་ཤ་མུ་ཏྲ། སྙིང་ཁ་རག་མ་བྷྱོ། ལི་པ་ཏི་ནན་ཡུང་ཏིམ་ནན། ཤལ་མ་ཏི་ནན། ཁུངས་བུ་ནི། ཨ་མ་ཏི་ནན། རཀྵ་ཙ་དྲ་མ་ནི་ཧཱུཾ། རཏྣ་ཙཀྲ་ཡ་ནི་ཧཱུཾ། ཀརྨ་ཙ་ན་ཧཱུཾ། ཧཱུཾ་ཧཱུཾ་ཧཱུཾ་ཧཱུཾ། མཱ་མཱ་མཱ་མཱ། ལི་ལི་ལི་ལི། དྲུང་དྲུང་། རུང་རུང་། བྷྱོ་བྷྱོ། བྷྱོ་བྷྱོ། དཱིཔྟ་ཙཀྲ་ནི་ཧཱུཾ། བཾ་ནི་རྟི། བ་ཡ་དཱིབྟ་ཙཀྲ་ནི་ཧཱུཾ། ར་བ་ཏ་ས་ཏ་ནི་བྱི་ལེན། ཁ་ཁྱུད་ཚོ། པྲ་ཕུད་སེ་ནེ་ཚོ། ལྟི་མ་ཐཱ་སེ་ནེ་ཚོ། མ་མ་ལི་ཐུང་ཥུང་ཚོ། ཤ་བ་རི་ནི་རུ་ཆོང་། ཤ་བ་རི་ནི་རུ་ཆོང་ནཾ་སུ་ཏི་ནི་བྷྱོ། སྙིང་ཁ་རཀ་བྷྱོ། སུ་ཏི་ཁ་རཀ་བྷྱོ། སྙིང་ཁ་རཀ་བྷྱོ། མ་མོ་སྟོང་རྩ་བརྒྱད་ཀྱི་སྤྱིར་བསྒྲུབ་པའི་ལེའུ་སྟེ་བརྒྱ་བཞི་པའོ།། །།དཔལ་རི་རབ་ཕྱི་བཾ་ནི་རྟི་ཧཱུཾ། ལཾ་ནི་རྟ་ཡ་ཧཱུཾ། ཙི་རྟ་ནི་རྟ་ཡ་ཧཱུཾ། མ་ཤུན་ནི་རྟ་ཡི་ཧཱུཾ། ལིང་གས་ཏིང་སང་། རུ་པ་སི་ཏི་སང་། ཤ་ན་ཏིང་བར་སད། ས་སྙིགས་ཏི་སང་། ར་ཤ་ཏིང་ནི་རུབ། མུ་རཾ། ས་ཏི་རུབ། ཉག་ཏི་མ་ཤ་ལྗོམ་ཏིས་ཤཾ། མྱོས་ཏི་མཱ་རཾ། ཁ་རཾ་ཏི་རཾ། རོ་ཏི་མ་ཤཾ། ཤི་ལི་གི་ཧཱུཾ། མ་ལིང་གི་ནི་ཧཱུཾ། ཁར་གཱ་ནི་ཧཱུཾ། ཤ་ཀ་ནི་ཧཱུཾ། སྲ་བ་གིར་ནི་ཧཱུཾ། ཙིཏྟ་གཱ་ནི་ཧཱུཾ། ཡཾ་ཡཾ་ཡཾ་ཡཾ། ཡཾ་ཡཾ་གི་ན་ལུཾ་པོ་རི་ཏི་ཡཾ། ས་རོག་མ་ཏི་ཡཾ། བྱི་ལི་མཾ་ཡཾ། ཀྲ་ཀྲི་མཾ་ཡཾ། ཁ་དུབ་ཏི་ཡཾ། གུང་གུང་། གུང་གུང་། མ་གུང་མ་གུང་། མ་གུང་མ་གུང་། སྣ་རོག་སྲ་ཏི་རཾ། ཤ་རོག་སྲ་ཏི་རཾ། དམུག་ཡོ་ས་མ་རཾ། ལེ་བ་ཏེ་མ་རཾ། ཤིང་ཁ་རུབ་ཏི་རཾ། ཤ་ཁ་ལ་རཾ།
སྤྱི་ཥླྀ་པ་རཾ། གྲི་ཐོག་མ་རཾ། ལཾ་ལཾ། ལཾ་ལཾ། བཾ་བཾ། བཾ་བཾ། ཛ་མ་རེ་མ་རཾ། སྨཾ་ནི་རྟ་རིན་ཡ་བཾ་བཾ། གང་ཤུ་ཏི། བཾ་བཾ། སྲུཾ་ཛ་ཏི་བཾ་བཾ། ཀྲོ་ཏ་ཛ་ཏི་བཾ་བཾ། གྲི་ན་བ་ཏི། བཾ་བཾ། རུལ་རུལ། རུལ་རུལ། ཧཱུཾ་ཧཱུཾ། ཧཱུཾ་ཧཱུཾ། བྷྱོ་བྷྱོ། བྷྱོ་བྷྱོ། གིང་ན་ཏི་བཾ། ཛ་ལ་ནི་བཾ་ཀུར་བ་ནི་བཾ། མ་གུར་པ་ནི་བཾ། ཕྱི་རྩྭ་ར་ལ་ཏི་བཾ་བཾ། གྲ་གྲི་ལི་ལི། རུང་རུང་ཨོཾ་བ་ཡུ་ས་ལ་ཡེ་མ། ཏ་ཏེ་ང་ཉ་ར་རཾ་རཾ། ཤང་ལ་ལ་རཾ་རཾ། མ་ཀུ་མ་མ་ན་མ་དྲི་ལན། མ་ལ་ཀུན་ན། བྱི་སྒེ་མ་མོ་རོ་ཁཾ། ཀེས་ན་ཀེས་མ། ཤི་མ་ལ་ཀྵ་ཏྭ། བྷྱོ་བྷྱོ་བྷྱོ་བྷྱོ། སྙིང་ཁྲག་ཚལ་པ། སྙིང་ཁྲག་ཚལ་པ། ཀངྐ་ཀ་བྷྱོ། ལི་བ་ཏིཾ་བྷྱོ། མ་ནི་བྷྱོ། སིང་ཁ་རོ་བྷྱོ། སྒ་རོག་མ་བྷྱོ། ཕྱག་གཡོས་མ་བྷྱོ། ཤནྟིང་མ་བྷྱོ། གྲུང་མ་བྷྱོ། སྲུཾ་ཏིང་བཾ་བཾ། དུནྟི་དབུགས་འཕྲོག་མ་བྷྱོ། ཤོ་ན་མ་སྣ་བཾ་བཾ་བྷྱོ། ཨོཾ་ཏུ་ཧཱུཾ་ཙ་ར་ཕཊ་དུ། སྐྱེ་འགྲོ་ཀུན་ལ་མངའ་མཛད་མ། དུང་དུང་མ་མོ་དུང་། སྔགས་འདི་འཛབ་ཏུ་བཟླས་སོ། །མ་མོ་བསད་པ་དུག་སྔགས་ཀྱི་ལེའུ་སྟེ་བརྒྱ་ལྔ་པའོ།། །།མཚན་གྱི་རྣམ་གྲངས་བསྟན་པ་ནི། ཐམས་ཅད་སྒྲོལ་བས་ན་སྒྲོལ་བའི་ལེའུ་ཞེས་བྱ། ཐོད་པའི་ལས་ཀྱིས་ཐམས་ཅད་གསོད་པས་ན་སྒྲུབ་པའི་ཐོད་མདའ་ཞེས་བྱ། མ་མོ་ཐམས་ཅད་ཀྱིས་ལས་ཐམས་ཅད་ཁྲག་གིས་བྱེད་པས་མ་མོའི་ཁྲག་མདའ་ཞེས་ཀྱང་བྱ། དུག་དང་ཁྲག་ཏུ་བསྲེས་ནས་ལས་བྱེད་པས་ཁྲག་ཟོར་ནག་པོ་ཞེས་ཀྱང་བྱ། མ་མོ་སྟོང་རྩ་བརྒྱད་འབུམ་དུ་སྤྲུལ་ནས་ལས་ལ་གཏོང་བས་རྦད་པའི་ཕོ་ཉ་ཞེས་ཀྱང་བྱ། སྔགས་ཀྱིས་ལས་ཐམས་ཅད་བྱེད་པས་གསོད་པའི་ངན་སྔགས་ཞེས་ཀྱང་བྱ། ཆོས་ཉིད་ལས་མ་གཡོས་པས་གསང་བའི་ཐིག་ལེ་ནག་པོ་ཞེས་ཀྱང་བྱ། མ་མོ་རྣམས་ཀྱི་སྲོག་འཛིན་པས་ན་མ་མོ་རྣམས་ཀྱི་སྲོག་ཅེས་ཀྱང་བྱ། མ་མོ་རྣམས་ཀྱི་ཐབས་རྫོགས་པར་སྟོན་པས་ན་མ་མོ་འབུམ་གྱི་ཏི་ཀ་ཞེས་ཀྱང་བྱའོ། །མ་མོ་འབུམ་གྱི་ལས་ཐམས་ཅད་ཀྱི་མཚན་བསྟན་པའི་
ལེའུ་སྟེ་བརྒྱ་དྲུག་པའོ།། །།མ་མོ་སྟོང་རྩ་བརྒྱད་ཀྱི་སྲོག་གི་སྙིང་པོ་བསྟན་པ་ནི། མ་མོ་སྙིང་ཁ་རག་སྙིང་ཁ་རག་སྙིང་ཁ་རག་ཤམ་རག་ཤ །རག་མོ་འབུམ་སྙིང་ཁྲག་མ་དུན་དུན། ཏྲག་རག་ཤ་མ་སྙིང་ཏེ་ཀེཾ། མ་མ་རུ་ལུ་རུ་ལུ་བྷྱོ་བྷྱོ། སྙིང་ཁ་རག་ས་མ་ཡ། དཾ་དཾ་ཛ་ཛ། མ་མོ་སྟོང་རྩ་བརྒྱད་རྦད་པའི་སྔགས་བསྟན་པ་ནི། མ་མོ་ནི་སྙིང་ཙིཏྟ་ཐུན་ཐུན། སྙིང་ཁྲག་མ་ཐུན། ཤ་ཏ་ས་མ་སྙིང་ལ་ཡ་ཡ་མ་བྷྱོ། མ་མོ་སྟོང་རྩ་བརྒྱད་ཀྱི་བསད་པའི་སྔགས་ནི། མ་མོ་ཤག་མ་མ་ཧྲིང་ཧྲིང་། མ་མ་ས་མ་ཡ། དགྲ་བོ་ནྲྀ་མ་ར་ན་སོད། མ་ཙ་ཏ་ཛྭ་ལ་རཾ། སྙིང་ལ་ཙིཏྟ་མ་རོལ། ཐུཾ་ཐུཾ་རིལ་ལ་བྷྱོ། མ་མོ་ལས་མྱུར་དུ་མཛོད་ཅིག །མཇུག་ལ་བསྐུལ་བའི་ཚིག་དེ་བར་བར་དུ་བཏང་། སྔགས་ཀྱི་ཚིག་གསུམ་གྱིས་ཐམས་ཅད་འགྲུབ་པར་བྱེད་པ་གསང་བའི་ཡང་ཐིག་ཐུགས་ཀྱི་བརྣག་པའོ། །མ་མོ་སྟོང་རྩ་བརྒྱད་ཀྱི་བསྡུས་པའི་ངན་སྔགས་བསྟན་པའི་ལེའུ་སྟེ་བརྒྱ་བདུན་པའོ།། །།དེ་གསུམ་གཅིག་ཏུ་དྲིལ་ནས་བཟླས་པའི་ཐབས་བསྟན་པ་ནི། དུས་ནམ་ཡང་རུང་སྟེ་གསུམ་གཅིག་ཏུ་འདྲེལ་ནས་ཟུར་མ་ཆག་པར་གྲངས་མང་དུ་བཟླས་ཏེ། ཡུངས་ཀར་ལ་བསྔགས་ཤིང་ཁྲག་གི་ནང་དུ་གདབ་པོ། །རྒྱུན་མི་འཆད་པར་བྱའོ། །གང་ལ་བྱ་བ་ལ་བརྡེག་པའི་དུས་སུ་མཇུག་གདགས་པའི་སྔགས་བསྟན་པ་ནི། དགྲ་བོའི་ཡུལ་མཁར་དང་དུར་མཆད་དང་དགྲ་ཕས་འོང་བའི་མདུན་དུ་བརྡེག་པ་དང་། དེ་གསུམ་གྱི་སྔགས་འདྲ་སྟེ། དགྲ་བོ་ཀླད་པ་ལ་ཡ། སྙིང་ལ་ཡ།དབང་པོ་ལ་ཡ། མ་མ་སྙིང་ཟན་མ་བྷྱོ། ཁ་འདར་ཁ་འདར་བྷྱོ། བྱ་བ་འདིས་སྔགས་གོང་མ་གསུམ་གྱི་མཇུག་ལ་གདགས་ཏེ། ཁྲག་དང་ཡུངས་ཀར་བསྲེས་པ་དེ་གཏོར་ཞིང་གཡབ་མོས་གཡབ་བོ། །ཀླུ་ལ་བརྡེག་ན། ནཱ་ག་ནཱ་ག་ཤིག་དུཾ་པ་ཧུ་ཡ་ཤིག །ནཱ་ག་ས། ནཱ་ག་ལས་མྱུར་དུ་གྱིས་ཤིག །བྱ་བ་མཇུག་ལ་བཏགས་ལ་བརྡེག་གོ། །བཙན་ལ་བརྡེག་ན། བཙན་སྟེམ་དམུ་སྟེམ། སྣན་ཀྲིམ་རག་ཤ །ཛྭ་ལ་ཆོམ་ཏྲི་མ་ཛ། བཙན་གྱིས་ལས་མྱུར་དུ་གྱིས་ཤིག་བྱ་བ་
མཇུག་ལ་བཏགས་ཏེ་བརྡེག་གོ། །གནོད་པའི་འདྲེ་ལ་བརྡེག་ན། ཀྲི་ལིང་ཤ་ཁྱུང་ཁྱུང་ཏྲི་ཙ་པ་ལ་ཤིག་ཁྱུང་ཁྲི་ཚོམ་མ། དུར་ཁྲི་ཀ་མ་མ་ལས་དྲག་ཏུ་མཛོད་ཅིག །བྱ་བ་འདིས་མཇུག་ལ་བཏགས་ཏེ་བརྡེག་གོ། །ངན་སྔགས་བཟླས་པའི་ཐབས་དང་གཟེར་སྔགས་བསྟན་པའི་ལེའུ་སྟེ་བརྒྱ་བརྒྱད་པའོ།། །།བསྒྲུབ་པའི་དུས་བསྟན་པ་ནི། བཅུ་བཞི་བཅོ་ལྔ་ཉ་གསུམ་ལ་བསྒྲུབ་པོ། །ཚེས་བརྒྱད་དང་ཉི་ཤུ་གཉིས་དང་། གནམ་སྟོང་ལ་བསྒྲུབ་པོ། །བརྡེག་པའི་དུས་བསྟན་པ་ནི། ཉ་གསུམ་ལ་བསྒྲུབ་ལ་བཅུ་བདུན་གྱི་ནང་པར་ཉི་མ་ཕྱེད་ནས་བརྡེག །གནམ་སྟོང་ཚེས་བརྒྱད་ཉི་ཤུ་གཉིས་ལ་བསྒྲུབ་ལ་ཕྱེད་ནུབ་མོ་བརྡེག་པར་བྱའོ། །བརྡེག་པའི་དུས་བསྟན་པའི་ལེའུ་སྟེ་བརྒྱ་དགུ་པའོ།། །།བསྒྲུབ་པའི་གནས་བསྟན་པ་ནི། དབེན་པའི་དུར་ཁྲོད་དམ། སུ་ཕུག་གམ། རི་བྲག་ཉམ་ང་བའི་བྲག་ཕུག་གམ་ཆུ་གླིང་དང་ནགས་ཚལ་སྟུག་པོའི་གནས་སུ་བསྒྲུབ་པར་བྱའོ། །བསྙེན་པ་བྱ་བ་ནི་རྣལ་འབྱོར་པ་རང་ཉམས་གར་བདེ་བའི་གནས་སུ་བྱའོ། །བརྡེག་པའི་གནས་ནི་ཀླུ་ཡོད་པའི་ཆུ་མིག་ཏུ་བརྡེག་པ་དང་།བཙན་གནས་པའི་རྟེན་ལ་བརྡེག་པ་དང་། དགྲ་བོའི་དུར་མཆད་ལ་བརྡེག་པ་དང་། གྲོང་ཁྱེར་སྤྱིར་བརྡེག་པ་དང་། དགྲ་གང་ཡིན་པའི་ཁྱིམ་ལ་བརྡེག་པ་དང་། ཡུལ་གྱི་ཕྱོགས་སུ་བརྡེག་པ་དང་། གནོད་ནས་ཆགས་པའི་འདྲེ་ཆེན་པོ་ལ་བརྡེག་པ་དང་། དགྲ་ཕས་འོང་བའི་མདུན་དུ་བརྡེག་པའོ། །གནས་བསྟན་པའི་ལེའུ་སྟེ་བརྒྱ་བཅུ་པའོ།། །།བརྡེག་པའི་ཐབས་བསྟན་པ་ནི། གང་ལ་བརྡེག་པའི་གནས་སུ་རྒྱ་བཀྲོལ་ལ། མི་ཤི་བའི་ལག་པ་གཡས་པར་བླུག་ལ་གཏོར་རོ། །གདུག་པའི་སྔགས་བཟླས་མིའི་གཡང་གཞིའམ། ཁྱི་ནག་པོའི་གཡང་གཞི་གང་ཡོད་པས་གཡབ་ཅིང་བརྡེག་གོ། །གྲོང་ཡུལ་རང་ས་ལ་གཏོར་ན་ཕྱིན་ཕྱོགས་སུ་བསྐོར་ཞིང་ཁྲག་གཏོར་གཡབ་མོ་ནག་པོས་བརྡེབ་པོ། །དུར་མཆད་ལ་བརྡེག་ན་གོང་མའི་སྟེང་དུ་བུད་མེད་ཀྱི་ཞབས་མ་རྙིང་པས་བརྡེག ། མ་གྱི་འབོག་དང་གསུར་ཆེན་དང་གུ་གུལ་སྦྱར་བའི་དུད་པ་གཏང་། ཀླུ་ལ་བརྡེག་ན། ཁྲག་དང་གུ་གུལ་དང་ཚིལ་ཆེན་གྱི་དུད་པ་བཏང་ན། དགྲ་དང་ཀླུ་ནད་དང་ཐོག་སེར་མྱུར་དུ་འོང་ངོ་། །
བཙན་ལ་བརྡེག་ན་ཁྲག་དང་གུ་གུལ་དང་རྟ་བོང་གི་ཚིལ་ཆེན་བསྲེགས་པའི་དུད་པ་བཏང་ན། བཙན་སེར་དང་ཐོག་མྱུར་དུ་འོང་ངོ་། །དམུ་ལ་བརྡེག་ན་ཁྲག་གི་སྟེང་དུ་ར་ཐུག་ལུག་ཐུག་གི་སྤུའི་གཞོབ་བཏང་ན། དམུ་སེར་དང་ཐོག་མྱུར་དུ་ཡོང་ངོ། །སྨན་ལ་བརྡེག་ན་ཁྲག་གི་སྟེང་དུ་གུ་གུལ་དང་ཚིལ་ཆེན་དང་རྒྱ་ཚིལ་བསྲེགས་ཏེ་དུད་པ་བཏང་ན། སྨན་སེར་དང་ཐོག་མྱུར་དུ་ཡོང་ངོ་། །ཡུལ་གྱི་ལྷ་ལ་བརྡེག་ན་ཁྲག་དང་ར་ཐུག་གི་རྨང་ཁའི་དྲི་མ་དང་རྭ་གཉིས་བསྲེས་པའི་དུད་པས་བདུག་ན་སེར་བ་དང་ཐོག་འོང་ངོ་། །གནོད་པའི་འདྲེ་ལ་བརྡེག་ན། ཁྲག་དང་གུ་གུལ་གྱི་དུད་པ་བཏང་ནས་འདྲེ་དང་བྲལ་ནས་འགྲོའོ། །དགྲ་ཕས་འོང་བའི་གདོང་དུ་ཁྲག་བརྒྱབ་ན་མོད་ལ་རྟགས་འོང་ངོ་། །སྔགས་ཟུར་ཆག་ཏུ་མི་རུང་། དེ་ནས་སླར་ལོག་ནས་གཏོར་མ་ཀུན་ཁ་ཅིག་ཏུ་བསྲེས་ལ་ཕྲིན་ལས་བཅོལ། བྱང་ཤར་གྱི་མཚམས་སུ་མ་མོ་འབུམ་ལ་བསྔོས་ལ་བཏང་ངོ་། །དེ་ནས་ལས་ཀྱི་རྗེས་མི་མངོན་པར་བྱ། རྫས་རྣམས་ཀྱང་མིས་མི་མཐོང་བར་སྦའོ། །བརྡེག་པའི་ཐབས་ཀྱི་ལེའུ་སྟེ་བརྒྱ་བཅུ་གཅིག་པའོ།། །།རྒྱུན་གྱི་ཏིང་འཛིན་བསྟན་པ་ནི། རུ་དོང་ཁ་དམ་པོ་འམ་རྨྱུག་དོང་དམ་པོའམ། ཤིང་དོང་ཁ་དམ་པོའི་ནང་དུ་གོང་དུ་བླུགས་པའི་རྫས་དེ་རྣམས་བཙལ་ལ། ལུས་ལ་ཡུངས་ཀར་གྱི་སྒྱེའུ་བཏགས་ལ། ཁྱིམ་ན་འདུག་ཀྱང་རུང་འགྲོ་ཡང་རུང་། ཁོམ་དལ་གྱིས་སྔགས་ཟུར་མ་ཆག་པར་ཡུངས་ཀར་ལ་བསྔགས་ལ་ཁྲག་ཏུ་བླུགས་སོ། །ཡུལ་དུ་འདུག་ན་མིས་མི་མཐོང་བར་སྦའོ། །བྱེས་སུ་འགྲོ་ན་ལུས་ལ་བཅང་། དགྲ་བྱུང་ན་སྔོན་དུ་གཏོར། ནུབ་མོ་ཁྱིམ་དང་གྲོང་ཡུལ་དུ་གཏོར་ན་རྟགས་མོད་ལ་འོང་ངོ་། །རྒྱུན་གྱི་ཏིང་ངེ་འཛིན་བསྟན་པའི་ལེའུ་སྟེ་བརྒྱ་བཅུ་གཉིས་པའོ།། །།བསྐང་བའི་ཆོ་ག་བསྟན་པ་ནི། མདོས་ཆེན་པོ་བཤམས་ལ། ཤ་སྣ་མང་པོ་དང་། བྱ་སྤུའི་རྣམ་གྲངས་དང་། གཅན་གཟན་སྣ་ཚོགས་ཀྱི་སྤུ་དང་། དར་སྣ་ཚོགས་པས་བརྒྱན་ལ། བྷན་དྷ་གླིང་བཞི་པའི་ནང་དུ་མཐུན་པའི་རྫས་རྣམས་སྩལ་ལ། གླིང་གི་ཕྱོགས་བཞིར་བཞག་གོ། །དེ་ནས་ཕྲིན་ལས་གཞུང་བསྲངས་ལ། འཛབ་ཤས་གཅིག་བྱས་ལ་བསྐང་བའི་ཆོ་ག་བྱའོ། །གསང་བའི་ཆོ་ག་ནི་སྙིང་པོ་
བཞི་གང་ཡིན་པའི་གནས་བཞི་རུ་བཏགས་ལ། དེ་ལས་མ་མོ་བཞིའི་གཞལ་ཡས་ཁང་དུ་བསྐྱེད་དོ། །དེའི་ནང་དུ་མ་མོ་བཞིས་གཙོ་མོ་བྱས་ནས། མ་མོ་འབུམ་གནས་པར་བྱ་ལ། དེའི་ཚེ་སྲོག་བྱིན་གྱིས་བརླབ་པར་བྱས་ཤིང་གསོ་བའི་ལས་བྱའོ། །གསོ་བའི་ལས་གཅིག་ནི་ཆེ་མཆོག་ཧེ་རུ་ཀ་ཡབ་ཀྱི་མཁའ་ཀློང་དུ་ཧེ་རུ་ཀ་རང་བྱུང་གནས་པར་བསྟན་ལ། དེ་ལ་དབང་མ་མོ་རྣམས་ཀྱིས་བཀུར་ལ། འཇིག་རྟེན་ཁམས་སུ་འདུ་བའི་ཞིང་ཁམས་སུ་ལས་ལ་གཏོང་ངོ་། །བསྐང་བའི་ལེའུ་སྟེ་བརྒྱ་བཅུ་གསུམ་པའོ།། །།ལས་ཀྱི་བརྣག་པ་མ་མོའི་སྙིང་ཟོར་བྱ་ན། རབས་ཆད་ཀྱི་ཐོད་པའི་ནང་དུ་ནས་སྔོན་མོའི་ངར་ཕྱེ་དང་། ཕ་བོང་གི་དྲེག་པ་ནག་པོ་དང་། ཏིལ་ནག་པོ་དང་། སྐེ་ཚེ་དང་། དེ་རྣམས་ར་ཁྲག་གིས་སྦྲུས་ལ་གཏོར་མར་བྱ། དེ་ལ་ཆང་ཕུད་ཀྱིས་ཀྱང་བྲན་ནོ། །ཞིང་རས་ལ་དགྲ་བོ་གང་ཡིན་པའི་གཟུགས་བྱས་ཏེ། སྙིང་གར་ར་ཁྲག་གིས་མིང་བྲིས་ཏེ། དེ་དྲིལ་ནས་མགོ་ཐུར་དུ་བསྟན་ཏེ། སྙིང་གསར་པའི་ནང་དུ་བཅུག་ལ། སྙིང་གི་ཁ་ངར་ཟན་གྱིས་བཅད་དེ་གཏོར་མའི་ནང་དུ་གཞུག་གོ། །མདུན་དུ་དོང་གྲུ་གསུམ་པ་ཕྱག་གང་པ་གཅིག་པོ་བརྐོས་ལ། དེའི་ནང་དོང་ཁའི་ཐོ་ཕྱི་ཀུན་མི་རོ་བསྲེགས་པའི་སོལ་བས་བྱུག་སྟེ། དེའི་ནང་དུ་གཏོར་མ་བཅུག་སྟེ། རྣལ་འབྱོར་པ་ཁ་བྱང་ཕྱོགས་སུ་བལྟས་ནས་ཞེ་སྡང་རྡོ་རྗེའི་ཏིང་ངེ་འཛིན་དུ་ཞུགས་ལ་ཆེ་བའི་ང་རྒྱལ་བསྐྱེད་དེ། ས་མ་ཡ་དུ་ཡ་དུ་ཞེས་བྱ་སྟེ་མ་མོ་འབུམ་ལས་ལ་གཞུག་པའི་སྙིང་པོ་འདི་སྟོང་རྩ་བརྒྱད་དུ་ཟུར་མ་ཆག་པར་བཟླས་ཤིང་། མི་ཁྲག་ཁྱི་ཁྲག་ཟངས་ཕྱེ་ལྕགས་ཕྱེ་རྡོ་ཕྱེ། དུག་ཀྱི་ལྕེ་བ་ནག་པོ་དང་རེ་ལྕག་པའི་རྩ་བ་དང་། ཆང་ཕུད་དང་ཁ་ཆར་གྱི་ཆུ་དང་བསྲེས་ཏེ། སྙིང་པོ་ཐོག་ལག་ཏུ་ཐོགས། ནས་མར་ལམ་སྒྲོལ་སྔགས་བཟླས་ཤིང་། ལན་གསུམ་བླུགས་སོ། །སྙིང་པོ་འདི་བརྗོད་དོ། །མ་མ་ས་ཡ་དུ་ཁ་ཤ་སཾ། ཏྲག་རག་ཤམ་བྷྱོ། སྙིང་སྙིང་། ཁྲག་ཁྲག །ཏི་ཐུན་ཐུན་མ་ཐུན་ཛ་ཐུན། བྷྱོ་བྷྱོ་མ་མ་ཡ་ཡ། ནི་ན་ཁུག་དཾ་ཛ་ཛ་ཞེས་བརྒྱ་རྩ་བརྒྱད་ཐིམ་པ་དང་། རང་གིས་མ་ཉེས་པའི་དཔང་གཟུགས་དོང་གི་ཁ་གཡམ་པས་བཅད་ལ་དེའི་སྟེང་དུ་གདན་བཏིང་ལ་བདག་ཉིད་འདུག་ལ།
རྨྱུག་མ་མཐོ་གང་པ་བཞི་ལ་ཞིང་ལྤགས་ཀྱི་སྒྲོས་བསྒྲོན་ལ། སྐྱེར་པའི་མདེའུ་སོར་གསུམ་པ་བཙུགས་ཏེ། ལྟོང་གི་བུ་ག་ནས་མར་ཉུང་ནག་ལ། སྒྲོལ་གིང་སྔགས་འདི་བརྒྱ་རྩ་བརྒྱད་བཟླས་སྟེ་བླུགས་ནས་རྨྱུག་མའི་ནང་ཁེངས་པ་དང་ཁ་ངར་ཟན་གྱིས་བཅད་ལ། སྐྱེར་པའི་གཞུ་བྱས་ཏེ་གཏོར་མའི་ནང་ན་མོའི་སྙིང་ལ་ཁ་བྱང་ཕྱོགས་སུ་བལྟས་ལ། ཕྱོགས་བཞིར་མདའ་རེ་རེ་བརྡེག་གོ། །རྟགས་ཞག་བཅོ་ལྔ་ན་འོང་ངོ་། །དུས་ནི་ཉ་གསུམ་ལ་བྱའོ། །བསྟན་པ་འཇིག་པ་ལ་བྱ་ཕྲན་ཚེགས་ལ་མི་བྱའོ། །སྔགས་ནི་ཡུངས་ནག་ལ་འདི་བཟླས་སོ། །མ་ཏི་རཀྨོ་ཐུན་སྲོག་ལ་དུན་དུན་མ་མ་སྲོག་ཤ་སྙིང་ཤ་ཟ་མ་དུན་ཡ་ཞེས་བཟླས་སོ། །དེ་ནས་མདའ་ཕྱུང་ལ་གཏོར་མའི་ནང་དུ་སྙིང་དང་གཟུགས་དུམ་བུར་གཏུབས་ལ་ཕྱོགས་ཀྱི་ལམ་དུ་གཏོར་རོ། །མིས་མ་ཚོར་བར་བྱ། ཞག་བཅོ་ལྔ་ནས་རྟགས་འོང་ངོ་། །དུས་ནི་ཉ་གསུམ་ལ་བྱའོ། །བསྟན་པ་འཇིག་པ་ལ་བྱ་ཡི་ཕྲན་ཚེགས་ལ་མི་བྱའོ། །མ་མོ་སྙིང་ཟོར་གྱི་ལེའུ་སྟེ་བརྒྱ་བཅུ་བཞི་པའོ།། །།དགྲ་བོ་བདུད་ཐམས་ཅད་ལ་གཏད་ན་གནས་དབེན་པར་སོང་ལ་ཁམ་ཕོར་གྱི་ནང་དུ་ནས་ནག་སྲན་མ་གྲོ་ཏིལ་དེ་རྣམས་བཏགས་པའི་གཏོར་མ་བྱས་ལ། ནང་དུ་རིན་པོ་ཆེ་སྣ་བདུན་དང་། ལུག་གི་ཤ་རྗེ་ངར་གཏུབས་པ་བླུགས་ལ་གཏོར་མ་བྱ། ཕྱི་ནང་གསང་བའི་སྟེང་དུ་བཞག །ངར་ཟན་ལ་གླུད་སོར་བཅུ་གཉིས་པ་གཅིག་བྱས་ལ། ཁ་སྣ་དང་གཟུགས་ལེགས་པར་བྱས་ལ། ཞིང་ལྤགས་ལ་གང་ཡིན་པའི་མིང་རུས་བྲིས་ཏེ། དེའི་སྙིང་གར་གཞུག །དེ་གཏོར་མའི་ནང་དུ་གཞག་གོ། །གྲ་ཕྱིང་གི་སྟེང་དུ་དར་མཐིང་ནག་གི་གུར་དབུབ། དེའི་ནང་དུ་གཏོར་མ་གཞུག་བདག་ཉིད་དཔལ་རྟ་མགྲིན་གྱི་ཏིང་ངེ་འཛིན་དུ་ཞུགས་ལ་ཆེ་བའི་ང་རྒྱལ་བསྐྱེད་དེ་བདུད་ཐམས་ཅད་ལ་གཏད་པའི་སྙིང་པོ་འདི་ཟུར་མ་ཆག་པར་སྟོང་རྩ་བརྒྱད་ཐེམ་པར་བཟླས་སོ། །བདུད་ཏྲི་ནི་ར་ཟུང་། མ་ཏི་ནི་ཟུང་། ཏྲི་ཙ་པ་ལ་ནི་ར་ཟུང་། ཆུམས་ཤིག་ཡམ་ནི་ར་ཟུང་། ཐུན་ཏྲི་པ་ཧྲིང་དུན་ཏྲི།མ་མ་ཏྲི། དུན་ཛ། མ་ར་ཛ་ཛ། ཡ་ཡ་ཏིང་ཏིང་ཞེས་བཟླས་སོ། །དེ་ནས་སྙིང་པོ་ཐེམ་པ་དང་། གཏོར་མ་དང་གླུད་གཉིས་ཀ་བུད་
མེད་ཡུགས་ས་མའི་ཞབས་མ་རྙིང་པར་བཏུམས་ལ། ཆུར་བསྐུར་ན་ཆུར་འཆི། གྲོག་པོ་མགོ་རྡུམ་དུ་སྦས་ན་ལུང་པ་སབ་སུབ་ཏུ་འཆི། བྲག་ཆེན་པོའི་སར་སྦས་ན་རི་བྲག་དང་གཡང་སར་འཆི། རེ་རུལ་འདྲེ་ཅན་དུ་སྦས་ན་གྲོང་ཟང་ཟིང་གི་ནང་དུ་འཆི། ལམ་པོ་ཆེའི་བཞི་མདོར་སྦས་ན་མི་མང་པོ་འདུ་བའི་སར་འཆི་བར་འགྱུར་རོ། །དགྲ་བོ་བདུད་ལ་གཏད་པའི་ལེའུ་སྟེ་བརྒྱ་བཅོ་ལྔ་པའོ།། །།ཟླ་བ་ཉ་གསུམ་ལ་གནས་དབེན་པར་སོང་ལ། ཕྱེ་ཕུད་མ་ཉམས་པའི་གཏོར་མ་གཅིག་བྱས་ལ་ལུག་གི་སྙིང་ཁྲག་རྟའི་སྙིང་ཁྲག་ཁྱིའི་སྙིང་ཁྲག་གསེར་གཡུ་མཆོང་བྱུ་རུ་ཤེལ་དངུལ་དེ་རྣམས་གཏོར་མར་བླུགས་ལ། གྲ་ཕྱིང་གསར་པའི་སྟེང་དུ་བཞག་ལ། བདག་ཉིད་དཔལ་རྟ་མགྲིན་གྱི་ཏིང་ངེ་འཛིན་དུ་གནས་ཏེ། ཆེ་བའི་ང་རྒྱལ་བསྐྱེད་ལ། རྨྱུག་མ་ཚིགས་གསུམ་པ་ལ་སྲིན་བྱའི་སྒྲོ་བསྐྱོན་ལ། ལྟོང་གི་བུ་ག་ནས་ཉུང་དཀར་ལ་བདུད་ཐམས་ཅད་ལ་བསྐུལ་བའི་སྙིང་པོ་འདི་སྟོང་རྩ་བརྒྱད་བཏབ་ལ་བླུགས་ནས་གང་བ་དང་། བུ་གའི་ཁ་བལ་ནག་གིས་དགག་གོ། །རྨྱུག་མ་ལ་ལྟས་ངན་སྣ་ཚོགས་ཀྱི་གཟུགས་ར་ཁྲག་གིས་བྲིས་ལ། འཕེན་ཁར་འོ་མ་བུ་དམར་ཁམ་འདུག་པའི་མདེའུ་བཅུག་ལ། རྭ་གཞུས་དགྲ་གང་ན་ཡོད་པའི་ཕྱོགས་སུ་འཕང་ན། དགྲ་བོའི་ཁྱིམ་དུ་ལྟས་ངན་སྣ་ཚོགས་པ་འབབ་ཅིང་སྨྱོ་འབོག་དང་། བརྒྱལ་ནད་ཀྱིས་འཆིའོ། །འཕེན་ཀར་ཡུངས་ནག་ལ་བཟླས་པའི་སྙིང་པོ་འདིའོ། །ཏྲི་ཁ་ཐུན། ཁཱ་ཁཱ་ཏྲཱི། སྨུག་ཏྲི། བདུད་ཏྲི། བདུད་མ་ཏྲི་སྐྱོལ་སི་བཾ། དུམ་མཚོ་སྐྱོལ། མ་ར་དད་པའི་སེར་ཏ། ཆོ་ཕོབ། ཡ་ཡ་མ་ཡ་ཏྲི་ཏྲི་ཛ་ཛ། ཞེས་བཟླས་ལ་གྲངས་ཐེམས་པར་བྱས་ཤིང་ཟུར་ཆག་ཏུ་མི་རུང་བས་མ་ཆག་པར་བྱ་སྟེ་མདའ་འཕང་ངོ་། །མདའ་འཕང་བའི་རྟིང་ན་ཕར་གཏོར་མ་ཡང་བདུད་ལ་འཕང་བཏང་ངོ་། །རང་གིས་མ་ཉེས་པའི་དམོད་གཟུག །དགྲ་བོའི་ཡུལ་དུ་ལྟས་ངན་སྣ་ཚོགས་པ་ཕོབ་ཅིག །ཆོ་འཕྲུལ་སྣ་ཚོགས་པ་སྟོན་ཅིག་ཅེས་བསྒོའོ། །ཐ་ཡ་དུ་རག་ཏུ་མྱགས་ཞེས་བྱས་འཕང་ངོ་། །ལྟས་ངན་དབབ་པའི་ལེའུ་སྟེ་བརྒྱ་བཅུ་དྲུག་པའོ།། །།
དེ་ནས་ཡང་བསྒོམ་པའི་ཐབས་བསྟན་པ་ནི། དང་པོ་དེ་བཞིན་ཉིད་ཀྱི་ཏིང་ངེ་འཛིན་སྟོང་ཞིང་བདག་མེད་པར་བསྒོམ་མོ། །ཀུན་ཏུ་སྣང་བའི་ཏིང་ངེ་འཛིན་རྐྱེན་གྱི་རང་བཞིན་སྣང་ལ་རང་བཞིན་མེད་པར་བསྒོམ་མོ། །རྒྱུའི་ཏིང་ངེ་འཛིན་ནི་སེམས་ཉིད་ཡི་གེ་ཧཱུཾ་དུ་གསལ་བ། དེའི་ཁྱད་པར་ལས་གཞལ་ཡས་ཁང་ལ་སོགས་པ་གསལ་བར་བྱས་པའི་རྗེས་ལ། ཆེ་མཆོག་ཧེ་རུ་ཀ་གསལ་བར་བསྒོམ་མོ། །གཡོན་དུ་ཡུམ་འདོད་པའི་དབང་མོ་ཡང་ལུས་དང་གྲིབ་མའི་ཚུལ་དུ་གསལ་བར་བསྒོམ་མོ། །ཆེ་མཆོག་ཡབ་ཡུམ་རོལ་པའི་བྱང་ཆུབ་སེམས་ལས་བྷྱོ་བཞི་འཕྲོས་པ་ལས། བྷྱོ་སྨུག་ནག་གཅིག་ལས་ཁྲམ་ཁ་སྟོང་གི་དབང་མོ་ཆེ་བསྐྱེད་དེ། སྐུ་མདོག་མཐིང་ནག་ཕྱག་གཡས་པ་བརྒྱ་ཡིས་ལྕགས་ཀྱུ་དང་མདུང་བརྒྱ་བསྣམས་པ། ཕྱག་གཡོན་མདའ་གཞུ་བསྣམས་པ། ཞབས་བརྒྱ་ཚར་གཅིག་གིས་ལྷ་ཆེན་རྣམས་གནོན་པ་ཞིག་བསྐྱེད་དོ། །བྷྱོ་གཅིག་ལ་ཐེག་ཆེན་ས་གཞིའི་དབང་མོ་ཆེ་བསྐྱེད་དེ། སྐུ་མདོག་སེར་ནག་ཕྱག་གཡས་བརྒྱ་ན་དར་ནག་འབུམ་བསྣམས་པ། གཡོན་མཚོན་ཆ་སྣ་ཚོགས་བསྣམས་པའོ། །བྷྱོ་གཅིག་ལ་རི་རབ་གླིང་བཞིའི་དབང་མོ་ཆེ་བསྐྱེད་དོ། །སྐུ་མདོག་ལྗང་ནག་ཕྱག་གཡས་པ་བརྒྱ་ན་ལྕགས་ཀྱུ་འབར་བ་བསྣམས་པ། གཡོན་པ་ན་བྷན་དྷ་བསྣམས་པའོ། །བྷྱོ་གཅིག་ལ་རྒྱ་མཚོ་གླིང་གི་དབང་མོ་ཆེ་བསྐྱེད་ལ། སྐུ་མདོག་དམར་ནག་ཕྱག་གཡས་པ་བརྒྱ་ན་མཚོན་ཆ་འབར་བ་བསྣམས་པའོ། །གཡོན་ན་ལྕགས་ཀྱུ་བསྣམས་པའོ། །དེ་རྣམས་ཀྱང་ཞབས་ཐུར་དུ་ཟུག་པས་གདུག་པ་ཅན་ཐམས་ཅད་བརྫིས་པ། སྟག་ལྤགས་ཀྱི་ཤམ་ཐབས་ཅན། སྦྲུལ་ནག་སྟོང་གིས་སྐུ་ལ་བརྒྱན་པ། དབུ་སྐྲ་ཁམ་ནག་གྱེན་དུ་བརྫེས་པ། མཆེ་བ་གཙིགས་པ། ལྗགས་འདྲིལ་བ། རྐན་རྡེབ་པ་ཐོད་པ་སྐམ་རློན་གྱིས་དབུ་བཅིངས་པ། སྤྱན་དགུ་ཉི་ཟླའི་དཀྱིལ་འཁོར་དུ་འདྲིལ་བ། བསྐལ་པའི་མེ་དཔུང་གི་དབུས་ན་བཞུགས་པར་བསྒོམ་མོ། །དཀྱིལ་འཁོར་བསྐྱེད་པའི་ལེའུ་སྟེ་བརྒྱ་བཅུ་བདུན་པའོ།། །།དེ་ནས་མ་མོ་རྣམས་སྤྱན་དྲངས་ཏེ། ཧཱུཾ།
བཅོམ་ལྡན་ཆེ་མཆོག་ཧེ་རུ་ཀ །མཐིང་ནག་འབར་བའི་ཞལ་མངའ་ཞིང་། །ཕྱག་དྲུག་ཕྱག་ཆས་སྲིད་པ་སྒྲོལ། །ཡུམ་དང་གཉིས་སུ་མེད་པ་སྟེ། །ཐུགས་རྗེའི་དབྱིངས་ནས་རོལ་མཛོད་གཤེགས། །སྲིད་པ་བདེ་འགྲོ་ཁམས་གསུམ་ཀུན་གྱི་ཡུམ་མཆོག་མ། །གེ་སར་དཀྱིལ་ནས་འཕེལ་འགྲིབ་མཛད། །ཟུར་གསུམ་འཁྱིལ་པས་སྣང་སྲིད་ཟིལ་གྱིས་གནོན། །ཤ་ཁྲག་དམ་རྫས་འདི་ལ་བརྟེན་ཏེ་གཤེགས་སུ་གསོལ། །ཁྲམ་ཁ་སྟོང་གི་དབང་མོ་ཆེ། །སྐུ་མདོག་མཐིང་ནག་འབར་བ་ལ། །ཕྱག་ན་མཚོན་ཆ་འབར་བ་བསྣམས། །ཡ་བདུད་རྒྱལ་པོའི་སྙིང་ཡང་འབྱིན། །དམ་རྫས་བདུད་རྩི་འབར་བ་འདི་ལ་བརྟེན་ཏེ་གཤེགས་སུ་གསོལ། །ཐེག་ཆེན་ས་གཞི་འདེགས་པའི་དབང་མོ་ཆེ། །སྐུ་མདོག་སེར་ནག་འབར་བ་ལ། །ཕྱག་ན་བདུད་ཀྱི་ཁྲམ་བམ་བསྣམས། །གནམ་ས་གཉིས་ལ་བྷྱོ་བཟློག་མཛད། །ཀླུ་ཆེན་བརྒྱད་ཀྱི་སྙིང་ཡང་འབྱིན། །དམ་རྫས་འདི་ལ་བརྟེན་ཏེ་གཤེགས་སུ་གསོལ། །རྒྱ་མཚོ་གླིང་གི་དབང་མོ་ཆེ། །སྐུ་མདོག་དམར་ནག་འབར་བ་ལ། །ཕྱག་ན་མཚོན་ཆ་འབར་བ་བསྣམས། །ཀླུ་རྣམས་ཀུན་ལ་མངའ་མཛད་མ། །དམ་རྫས་འདི་ལ་བརྟེན་ཏེ་གཤེགས་སུ་གསོལ། །རི་རབ་གླིང་བཞིའི་དབང་མོ་ཆེ། །སྐུ་མདོག་ལྗང་ནག་འབར་བ་ལ། །ཕྱག་ན་རི་རབ་གླིང་བཞི་བསྣམས། །སྣང་སྲིད་ཀུན་ལ་མངའ་མཛད་མ། །དམ་རྫས་འདི་ལ་བརྟེན་ཏེ་གཤེགས་སུ་གསོལ། །མ་མ་བྷྱོ་བྷྱོ་རུ་ལུ་རུ་ལུ། སྙིང་ཁ་རག །སྙིང་ཁ་རཀ །མ་རགྴ་མ་རགྴ། རག་མོ་སྙིང་ཁྲག་མ་ཐུན་ཐུན། ཏྲག་རག་ཤ་སྙིང་ཏེ་ཀེ་མ། མ་མ་མ་བྷྱོ་བྷྱོ་རུ་ལུ་རུ་ལུ། སྙིང་ཁ་རག་ས་མ་ཡ་ཛ་ཛ། ཀྲོ་མ་ཛྭ་ལ། ཀྲོ་མ་ཛྭ་ལ། ཛཿཧཱུཾ་བཾ་ཧོཿ། ཞེས་སྤྱན་དྲང་བར་བྱའོ། །སྤྱན་དྲང་བའི་ལེའུ་སྟེ་བརྒྱ་བཅོ་བརྒྱད་པའོ།། །།དེ་ནས་ཕྱག་འཚལ་ཏེ། གདུག་པའི་ཚོགས་འཇོམས་ཀུན་བཟང་ཧེ་རུ་ཀ །ལྷ་ཡི་ལྷ་ཁྱོད་བདག་ལ་དགོངས་ནས་ཀྱང་། །ཡབ་ཡུམ་ཐབས་དང་ཤེས་རབ་གཉིས་མེད་ལས། །ཡབ་ཡུམ་རྫོགས་པའི་སྐུ་ལ་ཕྱག་འཚལ་ལོ། །དབྱིངས་མ་བཞི་ཡི་ཡུམ་
མཆོག་དབང་སྡུད་མ། །ཕྱི་ནང་སྣོད་བཅུད་སྐྱེ་འགྲོ་སྐྱེད་མཛད་པ། །ཁམས་གསུམ་སྣང་སྲིད་ཡོངས་ཀྱི་ཁ་ལོ་སྒྱུར། །དབང་བྱེད་ཆེན་མོ་བཞི་ལ་ཕྱག་འཚལ་ལོ། །ཁམས་གསུམ་ཡུམ་མཆོག་ལ་སོགས་སྟོང་དང་འབུམ། །ཀུན་གྱི་མངའ་བདག་ལགས་པས་བྲན་དང་རྗེ་ཡི་ཚུལ། །སྐྱེ་འགྲོ་ཀུན་གྱི་ཚེ་སྲོག་བཅུད་ལེན་མ། །མ་ལུས་སྤྲུལ་པའི་ཚོགས་ལ་ཕྱག་འཚལ་ལོ། །ཕྱག་བཙལ་བའི་ལེའུ་སྟེ་བརྒྱ་བཅུ་དགུ་པའོ།། །།མཆོད་ཅིང་ཐུགས་དམ་བསྐུལ་བ་ནི། ཤ་ཁྲག་དམ་རྫས་སུ་སྦྱར་བ་བྷན་དྷའི་ནང་དུ་སྩལ་པ་ཐོགས་ལ་པདྨ་བྷན་དྷ་འཕྲུལ་གྱི་གཞལ་ཡས་སུ། རཀྟ་དམར་གྱི་རྦ་ཀློང་འཁྱིལ་པ་དང་། །ཁམས་གསུམ་སྒྲོལ་བའི་དམ་རྫས་ཤ་ཆེན་དང་། །སྙིང་གསུམ་ཆུ་གསུམ་སྦྱར་བའི་བདུད་རྩི་ཆེན་པོ་འདིས། །དཔལ་ལྡན་ཡབ་ཡུམ་སྐུ་ལ་མཆོད་པར་འབུལ། །ཡེ་ཤེས་འཕྲུལ་གྱི་དངོས་གྲུབ་སྩལ་དུ་གསོལ། །མ་མོ་མཐིང་ནག་འཁྱིལ་པའི་སྐུ། །གནས་ནི་ནམ་མཁའི་དཀྱིལ་ན་གནས། །དབུ་ཡང་སྟོང་ལ་ཕྱག་གཡས་སྟོང་། །སྟོང་གསུམ་སྟོང་གི་འཇིག་རྟེན་ན། །ཁྲོ་མོ་མི་བཟད་སྐུ་བྱུང་བ། །སྐུ་ནི་རིན་ཆེན་ནམ་མཁའི་སྐུ། །ཕྱག་ན་དར་ནག་རུ་མཚོན་བསྣམས། །བདུད་ཀྱི་དམག་དཔུང་རྡུལ་དུ་རློག །དམ་རྫས་བདུད་རྩི་འབར་བ་འདི་གསོལ་ལ། །བདག་གིས་བཅོལ་བའི་འབྲས་བུ་མཆིས་པར་མཛོད། །མ་མོ་སེར་ནག་འཁྱིལ་པའི་སྐུ། །བཞུགས་ནི་ས་གཞི་ཉིད་ལ་བཞུགས། །སྣང་སྲིད་ཡོངས་ལ་མངའ་མཛད་ཅིང་། །སྲིད་པ་གསུམ་ཆར་དབང་དུ་སྡུད། །གནམ་ས་གཉིས་ལ་བྷྱོ་བཟློག་མཛད། །དམ་རྫས་བདུད་རྩི་འབར་བ་འདི་གསོལ་ལ། །བདག་གིས་བཅོལ་བའི་འབྲས་བུ་མཆིས་པར་མཛོད། །མ་མོ་དམར་ནག་མཐུ་མོ་ཆེ། །བཞུགས་ནི་གླིང་བཞི་ཀུན་ན་བཞུགས། །གླིང་བཞི་ཀུན་འབྱམས་དྲག་མོ་རྒྱལ། །བདུད་ཀྱི་ཡུལ་རྣམས་རྡུལ་དུ་རློག །དམ་རྫས་བདུད་རྩི་འབར་བ་འདི་གསོལ་ལ། །བདག་གིས་བཅོལ་བའི་འབྲས་བུ་མཆིས་པར་མཛོད། །ཅེས་བརྗོད་ཅིང་དམ་རྫས་རྣམས་སྒྲེངས་ཤིང་ལས་བཅོལ་བར་བྱའོ། །ཐུགས་དམ་བསྐུལ་ཞིང་མཆོད་པ་དབུལ་
བའི་ལེའུ་སྟེ་བརྒྱ་ཉི་ཤུ་པའོ།། །།དེ་ནས་སྙིང་ཐིག་བསྟན་ཏེ། མ་མ་ས་མ་ས་མ་ཡ་ཧོ། མ་མ་ས་མ་ས་མ་ཡ་སྟྭ་མ། ཧཱུཾ་བྷྱོ་བྷྱོ། རོ་ཧ་ར་སྡྱ་མི་ཏ། ཁ་ཊྭཱཾ་ག་ཛྭ་ལ་ཛྭ་ལ། ཏི་ཏ་དང་ཤཾ། ཁ་རཾ་ཁ་ལ་བྷྱོ། ཛ་དུན་ཏིང་བྷྱོ། སྙིང་ཁ་རག །ཏྲག་རག་ཤ །ཁ་མུན་ཛ་བཛྲ་དུན་བྷྱོ། རུ་ལུ་རུ་ལུ་ཧཱུཾ་བྷྱོ། ཞེས་པ་ནི་ཁམས་གསུམ་ཡུམ་མཆོག་མའི་སྲོག་གི་སྙིང་པོའོ། །ཨོཾ་རུ་སྙིང་ཁྲག་ཁ་ལ་རག་ཤ་ནི་རྦད་ཐུམ་རི་རི་ལི་ལི་བྷྱོ། ཁྲམ་ཁ་སྟོང་གི་དབང་མོ་ཆེའི་སྲོག་གི་སྙིང་པོའོ། །ནི་ཤ་ཀུ་རུ་རག་ཏ་ཁ་རཾ་ནི། ཀུ་ནི་ཀུ་རུ་ཁ་རཾ་ཁ་རྦད་རི་ལི་ལི་བྷྱོ། ཐེག་ཆེན་ས་གཞི་འདེགས་པའི་སྲོག་གི་སྙིང་པོའོ། །སྙིང་ལ་རག་ཤ་ནི་སྡི་སྟ། རྦད་ཐུཾ་རི་ལི་ལི་བྷྱོ། ཞེས་པ་ནི་རི་རབ་འདེགས་པ་དབང་མོ་ཆེའི་སྲོག་གི་སྙིང་པོའོ། །ཏྲག་རག་ཤ་མུ་ཏྲ་སྙིང་ཁ་རག་མ་བྷྱོ། ཞེས་པ་ནི་རྒྱ་མཚོ་གླིང་གི་དབང་མོ་ཆེའི་སྲོག་གི་སྙིང་པོའོ། །སྙིང་ཐིག་གི་ལེའུ་སྟེ་བརྒྱ་ཉེར་གཅིག་པའོ།། །།དེ་ནས་ཡང་ལན་སྟོང་ངམ་ཁྲི་ལ་སོགས་པ་བཟླས་ཤིང་བར་བར་དུ་བསྐུལ་ཞིང་རཀ་ཏ་སྦྲེང་། དེ་ནས་མ་མོ་སྤྱིའི་སྲོག་གི་སྙིང་པོ་དང་། གཙོ་མོ་བཞིའི་སྲོག་གི་སྙིང་པོ་དང་སྦྲེལ་ཏེ་བཟླས་ལ་བྷན་དྷའི་ནང་དུ་རྫས་སྩལ་ཏེ་བསྒྲུབ་ན་རྟགས་འབྱུང་སྟེ། ཚེས་བརྒྱད་ནས་བཙུགས་བཅོ་ལྔ་ལ་རྟགས་འབྱུང་ངོ་། །གྲུབ་པའི་རྟགས་བྱུང་བ་དང་བསྙེན་པ་དབུལ་ལོ། །བཅོ་ལྔ་ལ་དབུ་བཙུགས་ན་ཉི་ཤུ་གཉིས་ན་རྟགས་འོང་ངོ་། །དེ་ལྟར་རྟགས་བྱུང་བ་དང་ལས་ལ་སྦྱར་བར་བྱ་སྟེ། གསང་སྔགས་འདི་བཟླས་སོ། །ཨོཾ་བཛྲ་ད་ར་ལིང་། ཨོཾ་བཛྲ་སྙིང་གོ་ཆོད། ཛ་ལ་ཛ་མུན་ལོ་དན་ཏིང་ད་ར་ཡ་རྦད། ཨོཾ་བཛྲ་ཁུག་ཏི་སྣར་བ་རྦད། ཨོཾ་བཛྲ་ཙཀྲ་དུ་ཀྲི་ད་ར་ཡ་རྦད། ཨོཾ་བཛྲ་ག་ཤུད་ཀྲི་ད་ར་ཏི་ཡ་བཛྲ་ཧཱུཾ་ཕཊ། རྦད་དུ་རྦད་དུ་རྦད་དུ་རྦད་དུ། དུ་ར་ཤ་ཀ་སྟ། བི་ཏ་ས་མ་ཡ། ཞེས་པས་གྲངས་འབུམ་དུ་བཟླས་ཤིང་བསྐུལ་ན་རྟགས་འོང་ངོ་། །དུས་དང་རྟགས་དང་གསང་བའི་སྔགས་བསྟན་པའི་ལེའུ་སྟེ་བརྒྱ་ཉེར་གཉིས་པའོ།། །།དེ་ནས་མ་མོའི་ཤི་ས་བསྟན་པར་བྱ་སྟེ། ལས་མ་
གྲུབ་ན་ལས་འདིའི་ཐབས་བྱའོ། །རཀ་ཏའི་མཚོ་ལ་གནས་པ་མོ། །དབུ་ཡང་རྡོ་རྗེས་ཚལ་པར་འགེམས། །མགོ་ནས་བརྒྱབ་ནས་མཇུག་ཏུ་འགེམས། །ལུས་ཀྱང་རྡོ་རྗེས་འགེམས་པར་བྱེད། །ཕྱག་ན་གནམ་ལྕགས་ཨུར་མོ་ཡིས། །མགོ་ནས་བརྒྱབ་ནས་མཇུག་ཏུ་འགེམས། ། ངག་ཀྱང་རྡོ་རྗེས་རྡུལ་དུ་རློག །ཅེས་བསྡིག་སྟེ། བདག་ཉིད་ཀྱི་ཕྱག་ན་གནམ་ལྕགས་ཨུར་མོའི་རལ་གྲི་བསྣམས་པས། མ་མོ་རྣམས་རང་དབང་མེད་པར་སྲོག་གི་སྙིང་པོ་ནས་དྲངས་ཏེ། འདར་ཡེད་ཡེད་འདུག་པར་བསྒོམ། སྔགས་འདི་བཟླས་སོ། །རག་ཤ་པ་ཙ་རག་ཤ་པ་ཙ་ཚ་ལ་པ་ཚལ་པ། ཀྲོ་མ་ཛ་ལ་ཀྲོ་མེ་ཛ་ལ། ཞེས་དྲག་ཏུ་བཟླས་ཏེ་ཨ་མྲྀ་ཏ་གཏོར་བས་རང་དབང་མེད་པར་ལས་བྱེད་པར་འགྱུར་རོ། །ཡང་མ་མོ་ལས་བྱེད་དུ་མ་འདོད་ན་བདག་ཉིད་ཆེ་མཆོག་ཧེ་རུ་ཀར་བསྒོམས་ལ་ཕུག་ན་ལྕགས་ཀྱུ་བཙོ་རལ་པོ་ཅན་གྱིས། མ་མོའི་མགོ་ནས་བརྒྱབ་ནས་མཇུག་ཏུ་འགེམས་པར་བསྒོམ་ཞིང་། སྔགས་གོང་མ་བཟླས་ཤིང་ཨ་མྲྀ་ཏ་གཏོར་ན་ལས་བྱེད་དོ། །དེས་ཀྱང་ལས་བྱེད་དུ་མ་འདོད་ན། ཚིག་དང་དབྱངས་སུ་བཅས་པས་བསྟོད་དོ། །མ་མོ་ཤི་ས་བསྟན་པའི་ལེའུ་སྟེ་བརྒྱ་ཉེར་གསུམ་པའོ།། །།དེ་ནས་ཡང་ཁྱད་པར་དུ་ལས་ལ་གཏོང་ཞིང་མྱུར་དུ་བསད་པའི་ལས་ཐེམས་འདི་དག་གོ། །མར་གྱི་ཚེས་བརྒྱད་ཉི་ཤུ་གསུམ་དང་གནམ་སྟོང་ལ་གསང་བའི་ལས་བྱ་སྟེ། གནས་དབེན་པར་སོང་ལ་ཧེ་རུ་ཀའི་གཏོར་མ་དང་ཁྲག་གིས་བསྐུལ་བར་བྱ། ནུབ་མོ་ཧེ་རུ་ཀའི་འབྲུ་གསུམ་དང་མ་མོའི་འབྲུ་གསུམ་བཟླས་པ་ནི་མ་མོའི་ལས་ལ་བཏང་བའི་འབྲུ་གསུམ་དང་། མ་མོ་བསད་པའི་འབྲུ་གསུམ་དང་། བརྒྱ་རྩ་བརྒྱད་བཟླས་ཏེ་ལས་བྱས་ན་འགྲུབ་པོ། །གྲོ་གའམ་ཤིང་ཤུན་ནམ་ཤོག་ཤོག་ལ་དགྲ་བོའི་གཟུགས་མིང་བྱང་དང་བཅས་ཏེ། བྱ་རྒོད་ཀྱི་ཁྲག་དང་སྦྱར་སྤེལ་ནས། ར་དུག་པ་ལ་མེ་སྦར་ནས་བསྲེགས་ན་ལུས་འདི་མི་གཡོ་བར་འཆིའོ། །སྔགས་ཀྱང་བཟླས་པར་བྱའོ། །བྱ་རོག་གི་ཤ་ཁྲག་སྒྲོ་དང་མིང་རུས་ལ་སྔགས་བརྒྱ་རྩ་བརྒྱད་བཟླས་ནས་བསྲེག་ན་ཚངས་པའི་ཚེ་དང་མཉམ་པ་ལ་ཡང་སྐད་ཅིག་གིས་འཆིའོ། །འུག་པའི་ཤ་ཁྲག་དང་
སྒྲོ་མིང་རུས་ཀུན་གོང་མ་བཞིན་དུ་བསྲེགས་ན་མྱུར་དུ་སྨྱོ་ནས་འཆི་བར་འགྱུར་རོ། །སྲིན་བྱའི་ཁྲག་དང་སྒྲོ་དང་དགྲ་བོའི་མིང་རུས་བཅས་པས་སྔགས་བརྒྱ་རྩ་བརྒྱད་བཟླས་ནས་བསྲེགས་ན་ལུས་འདར་ཞིང་འཆིའོ། །རའི་ཤ་ཁྲག་དང་མི་རུས་གོང་མ་བཞིན་དུ་བསྲེགས་ན་སྐད་ངན་འདོན་ཅིང་འཆིའོ། །སྲིན་ཤིང་སྣང་མའི་འབྲས་བུ་གོང་མ་བཞིན་དུ་བསྲེགས་ན་རེངས་ནས་འཆི་བར་འགྱུར་རོ། །སྟར་བུའི་འབྲས་བུ་གོང་མ་བཞིན་དུ་བསྲེགས་ན་བྱིང་ནས་འཆི་བར་འགྱུར་རོ། །འདྲེ་ཚེར་མའི་འབྲས་བུས་གོང་མ་བཞིན་དུ་བསྲེགས་ན་ལུས་སྐམས་ནས་འཆི་བར་འགྱུར་རོ། །ཤུག་པའི་ཐང་ཆུ་དང་སྐེ་ཚེ་དང་ཏིལ་ནག་པོ་དང་། ལན་ཚྭ་བ་དང་རི་ཤོ་བའི་རྩ་བ་དང་བ་གླང་གི་མཁྲིས་པ་དང་དེ་རྣམས་རེ་རེ་གོང་མ་བཞིན་དུ་བསྲེགས་ན་ཚ་བའི་ནད་ཀྱིས་འཆིའོ། །སྦྱིན་སྲེག་དྲག་པོའི་ལས་ཀྱི་ལེའུ་སྟེ་བརྒྱ་ཉེར་བཞི་པའོ།། །།གསང་བའི་སྔགས་བསྟན་པར་བྱ་སྟེ། ཧེ་རུ་ཀའི་སྙིང་པོ་འབྲུ་གསུམ་ནི། ཨོཾ་ཤྲཱི་བཛྲ་ཨོཾ་པདྨ་ཏ་ཀྲི་ཏ་ཧཱུཾ། བཛྲ་མ་ཧཱ་ཀྲོ་ཏཱ་ཕཊ་བཾ་ཧཱུཾ། ཨོཾ་ཨ་ར་ལི་ཧྲི་ཛ། མ་ཧེ་སྲོག་རྩ་ཐུན་བྷྱོ། སྲོག་གི་སྙིང་པོ་འབྲུ་གསུམ་ནི། མ་མ་ཁ་རག །སྙིང་ཁ་རག །མ་རག་ཤ་མ་རག་ཤ །མ་ཧཱ་ཙིཏྟ་མ་ཧཱ་ཙིཏྟ། ཛ་ཛ་ཏིང་ཏིང་བྷྱོ། རག་མོ་སྙིང་ཁྲག་མ། མ་རག་ཤ་མ་རཀ་ཤ །མ་སྙིང་ཛ་ཛ། དུན་དུན་རག་མོ་ཏ་ཀེཾ། མ་མ་མ་བྷྱོ་རུ་ལུ་རུ་ལུ། སྙིང་ཁ་རག་ས་མ་ཡ་དུ་ཛ་ཛ་དཾ་དཾ་ཛ་ཛ། ལས་ལ་བཏང་བ་འབྲུ་གསུམ་ནི། ཙ་ར་ནན། མ་རག་ཤ་ནི་དུ་ཛ། སྙིང་ཙིཏྟ་མ་ཐུན་ཐུན། སྙིང་ཁ་རག་མ་ཐུན་ཐུན། མ་ཏིང་ནག་མོ་ཐུན་ཐུན། སྙིང་ཁྲག་མ་ར་ཐུན། ཆེ་གེ་མོ་ཐུན་ཐུན་ཤལ་ཤ་ཏི་རག་མོ་སྙིང་མ་རག་ཏུ་ཆེ་གེ་མོ་ལ་ཐུན། བསད་པའི་འབྲུ་གསུམ་ནི། མ་དུ་སྙིང་ཤ་སྙིང་དུ་ཕྱིག་ཡཾ། ཆེ་གེ་མོ་ས་དུ་དུ་མཱ་ར་ཡ་ཐུན་བྷྱོ། མ་མ་ཏྲག་མོ་ཐུན་བྷྱོ། ཁ་ལ་ཁ་ལ་ཤ་ཁ་ཚེ། སྙིང་དུ་ཕྱིག་ཡཾ། ཆེ་གེ་མོ་ས་དུ་ལིང་དུན་ཕཊ། ཐུན་ཐུན་བྷྱོ། མ་མ་ཏྲག་མུ་དུད་ཧྲིང་། མ་ར་ཤ་དུ་ཆེ་གེ་མོ་སྙིང་ཟན་མ། ཙིཏྟ་རོལ་སྙིང་དུ་ཕྱིག་ཡཾ། ཆེ་གེ་མོ་ས་དུ་མཱ་ར་ཡ་ཐུན་བྷྱོ་ཕཊ། ཐུན་བྷྱོ། ཞེས་པ་བཟླས། ཉི་མ་དམར་ཐག་ཆད་ཀྱི་བར་དུ་
བསྲེགས་པ་མིང་རུས་དང་རྫས་རྣམས་སྤེལ་ལ་བྱའོ། །བསྲེག་པའི་ཐལ་བ་གཏོར་མར་བླུགས་ཏེ། ཆུ་མིག་བསྣོལ་བའི་དབུས་སམ། ལམ་རྒྱ་གྲམ་མམ། མི་རོ་བམ་པའི་ཁུང་དུ་སྦས་ལ་བཞག་གོ། །གསང་བ་སྦས་པའི་འབྲུ་གསུམ་གྱི་ལེའུ་སྟེ་བརྒྱ་ཉེར་ལྔ་པའོ།། །།གསང་བའི་དཀྱིལ་འཁོར་བསྟན་པ་ནི། ཞིང་གི་སྣམ་བུ་ལ་ཐིག་བཏབ་ལ་གྲུ་བཞི་ཁྲུ་གང་གི་ཚད་དུ་བྱ། གྲུ་བཞི་པ་ལ་མ་མོའི་ཞལ་བྲི། མ་མོ་བཞིའི་དབུས་སུ་གྲུ་གསུམ་བྲི། དེའི་ཕྱི་རིམ་ཟླུམ་པོས་བསྐོར་དབུས་ཀྱི་གྲུ་གསུམ་ར་བར་མི་ཁྲག་ཁྱི་ཁྲག་མི་རུས་བསྲེགས་པའི་སོལ་ཕྱེ་དང་བསྲེས་ལ་དམར་ནག་དུ་བྱུག་ཟླ་གམ་ཁྲག་གིས་དམར་པོར་བྱུག་རེ་ཁ་ཀུན་ཐལ་ཆེན་དང་དུག་དང་རེ་ལྕག་པ་བརྡུངས་པའི་ཁུ་བ་དང་བསྲེས་ལ་དཀར་པོར་བཏང་། མ་མོའི་ཞལ་དམར་པོས་བྱུག་སྤྱན་དཀར་པོར་བྲི། དབུ་ནག་པོར་བྱ། ཕྱི་རིམ་སྣམ་བུ་སོར་གསུམ་པ་གཅིག་བཏང་ལ།གཞི་ཁྲག་གིས་དམར་པོར་བྱུག་ཐོད་པའི་ཕྲེང་བས་བསྐོར། སྒོ་མི་བཏོད་དོ། །དེ་ནི་བར་སྣང་གི་དཀྱིལ་འཁོར་རོ། །སའི་དཀྱིལ་འཁོར་བསྟན་ཏེ། མདུན་དུ་དཀྱིལ་འཁོར་འདོམ་གང་པ་ཞིག་བྱས་ལ་གཞི་ཁྲག་གིས་དམར་པོར་བྱུག་ལ་དབུས་སུ་གྲུ་གསུམ་བྲི། ཐ་མ་ཟླ་གམ་གསུམ་གྱིས་བསྐོར། དེའི་ཕྱི་རིམ་དུ་འཁོར་ལོ་རྩིབས་བཞི་པར་བྲི། དེའི་ཕྱི་རིམ་ཐོད་ར་ཟླུམ་པོར་བསྐོར། དེའི་ཕྱི་རིམ་གྲུ་བཞིར་བྱ། སྒོ་མི་བཏོད། དབུས་ཀྱི་གྲུ་གསུམ་ལ་དཔལ་ཆེན་པོའི་ཞལ་གཅིག་བྲི། ཟླ་གམ་གསུམ་ལ་ཡང་ཞལ་རེ་རེ་བྲི། འཁོར་ལོ་བཞི་ལ་བྷན་དྷ་རེ་བྲི། དེའི་ཕྱི་རིམ་ལ་མདའ་གཞུ་བྲི། དེའི་ཕྱི་རིམ་ལ་མེ་རི་བྲི་བར་བྱ། གསང་བའི་དཀྱིལ་འཁོར་བསྟན་པའི་ལེའུ་སྟེ་བརྒྱ་ཉེར་དྲུག་པའོ།། །།གསང་བའི་རྫས་བསྟན་པ་ནི། ས་བདག་རྒྱལ་པོའི་སྙིང་གསར་པ་གཅིག་དགོས། དེ་མེད་ན་བམ་གསར་པས་བྱའོ། །སེང་གེ་དཀར་པོའི་སྙིང་དགོས།དེ་མེད་ན་ཁྱི་དཀར་པོའི་སྙིང་ལ་བྱའོ། །སྟག་དར་མའི་སྙིང་དགོས། དེ་མེད་ན་སྲེ་མོང་གི་སྙིང་ངོ་། །གླང་པོ་ཆེའི་སྙིང་དགོས། །དེ་མེད་ན་གླང་ཁྱུ་བའི་སྙིང་ངོ་། །དེའི་སྟོངས་བཞི་ལ།
བྱ་ཕོ་མཚལ་བུའི་སྙིང་དང་། ཉ་མཁར་པའི་སྙིང་། ལུག་ནག་མོ་མཁལ་དཀར་གྱི་སྙིང་དང་། སྲམ་གྱི་སྙིང་བཞིའོ། །གཡོན་ན་ཡང་སྟོངས་སུ་གྱུར་པའི་སྙིང་སྣ་ཚོགས་པ་བསག་པར་བྱའོ། །གཡོན་ཁྲག་གསུམ་ལ། བུ་མོ་གཞོན་ནུའི་མངལ་ཁྲག་དང་། །བྱེའུ་སྐྱེས་པའི་ལྟེ་ཁྲག་དང་། མཚོན་གྱིས་ཕོག་པའི་ཁྲག་དང་གསུམ་མོ། །དེའི་སྟོངས་སུ་གྱུར་པའི་མི་ཁྲག་ཁྱི་ཁྲག་རྟ་ཁྲག་གསུམ་མོ། །དེ་ལ་སོགས་པ་ཁྲག་སྣ་མང་པོ་བསག་པར་བྱའོ། །ཆུ་སྣ་གསུམ་ལ་གངས་ཆུ། ཆུ་མིག་ལྐུགས་པའི་ཆུ། ཁ་ཆར་གྱི་ཆུ་དང་གསུམ་མོ། །དེ་ནི་ཕྱིའི་ཆུ་སྣ་གསུམ་མོ། །དེའི་སྟོངས་སུ་གྱུར་པ་ནི་བུད་མེད་བུ་ཁྱེའུ་སྐྱེས་པའི་ནུ་ཞོ་དང་། ནལ་གྱི་མཁྲིས་པ་དང་། ར་ཐུག་གི་རྨང་ཀའི་དྲི་མ་གསུམ་ནི་གསང་བའི་རྫས་སོ། །དུག་སྣ་གསུམ་ལ་སྦྱར་དུག་ར་དུག་ཀྱི་ལྕེ་བ་ནག་པོ་དང་གསུམ་མོ། །ལྕགས་སྣ་གསུམ་ལ་ལྕགས་ཕྱེ་ཟངས་ཕྱེ་རྡོ་ཕྱེ་གསུམ་མོ། །དེའི་སྟོངས་སུ་གྱུར་པ་ལ་ལུག་མིག་ཁྲག་ཐལ་ཆེན་གཞན་བདུད་རྩི་ལྔ་དང་ཆང་ཕུད་ཚིལ་ཆེན་ཤ་ཆེན་གྱིས་གཞི་བཟུང་ནས་ཤ་སྣ་ཚོགས་དང་། གཏོར་གཞོང་ཆེན་པོ་གཅིག་བྷན་དྷ་གཉིས། མེ་མར་གཅིག །ཡུངས་ཀར་ཁྲག་གིས་བྱུགས་པ་ཁྱོར་གང་། ཟངས་མའི་རལ་ཐོག་མཐིལ་ནག་སྒྲུབ་པའི་སྣོད་རབས་ཆད་ཀྱི་ཐོད་པ་དུམ་བུ་གསུམ་པ་མ་ཉམས་པ་གཅིག །ཞིང་གི་རྒྱུས་པ་བཀལ་བ་ཁྲག་གིས་བྱུགས་པ་དང་། ཞིང་གི་རྒྱུ་མ་བཀལ་བའི་ཐག་པ་ཁྲག་གིས་བྱུགས་པ་དགོས་སོ། །རབས་ཆད་ཀྱི་ཐོད་པ་མེད་ན། ཁམ་སའི་གབ་ཚེ་ཁ་སྦྱང་ལེགས་པ་སྟེང་མའི་དཀྱིལ་དུ་མཐོང་ཁུང་རང་བ་ཞིག་བཏོད་ལ། ར་ཁྲག་ཁྱི་ཁྲག་མི་ཁྲག་གསུམ་གྱིས་ཞན་པར་བསྐུས་ལ་མི་འགོག་པར་བྱུག །ཕྱོགས་བཞིར་མི་མགོའི་གཟུགས་ཁ་སྣ་ཚང་བ་ལེགས་པར་བྲི་སྟེ། མི་རོ་བསྲེགས་པའི་སོལ་བས་སོ། །གསང་བའི་རྫས་བསྟན་པའི་ལེའུ་སྟེ་བརྒྱ་ཉེར་བདུན་པའོ།། །།དེ་ནས་ཡང་གསང་བའི་རྫས་དགྲམ་པ་བསྟན་པ་ནི། མདུན་གྱི་གྲུ་གསུམ་སྟེང་དུ་གཏོར་མ་གཞི་ཆེན་པོའི་ནང་དུ་ར་ཁྲག་ཁྱི་ཁྲག་མི་ཁྲག་གསུམ་དང་། ཤ་སྣ་མང་པོ་དང་སྙིང་སྣ་
གཏུབས་པའི་དུམ་བུ། མཆོད་པའི་སྨན་དང་ཚིལ་ཆེན་དང་། ཆང་ཕུད་དང་ཚིལ་ཆེན་ཕྱེ་ཕུད་ལ་ཟན་ཁམས་ལ་ཟུར་གསུམ་དུ་བྱས་ལ་དེ་རྣམས་ཀུན་བཀོལ་ལ་ཁྲག་གིས་བྲན་ཏེ། དམར་མེར་རེ་བཞག །གཡས་ཕྱོགས་ཀྱི་ཟླ་གམ་ལ་བྷན་དྷ་གཅིག་གི་ནང་དུ་ཟན་ཁྲག་གིས་བྱུགས་པ་ཟུར་གསུམ་པ་བཅུ་གསུམ་བཞག་ལ། ལོགས་གསུམ་དགྲ་བོ་གང་ལ་བྱ་བའི་མིང་རུས་བྲིས་ཏེ་དགོད་དོ། །དེའི་ནང་དུ་ཡང་སྙིང་གཏུབས་པ་དང་། ཆང་ཕུད་ཤ་ཡི་དམ་དུམ་དང་། ར་ཁྲག་ཁྱི་ཁྲག་མི་ཁྲག་ཡང་རྩལ་ལ་བཞག་གོ། །གཡོན་གྱི་ཟླ་གམ་ལ་བྷན་དྷའི་ནང་དུ་ཡུངས་ཀར་བླུག་ལ་བཞག་གོ། །འཁོར་ལོ་དང་མཐུན་པའི་རྫས་བཞག་གོ་མེ་རི་ལ་ཞིང་ཆེན་གྱི་སྒལ་ཚིགས་དང་ལྷུ་དུམ་དང་། ཚིལ་ཆེན་གྱི་མེ་མར་དང་། གསུར་ཆེན་རྒྱུན་མི་འཆད་པར་བཏང་ངོ་། །དབུས་ཀྱི་གཏོར་མའི་ནང་དུ་ལྷ་བཤོས་ཟུར་གསུམ་པ་ཁྲག་གིས་བྱུག་པ་གཅིག་ཀྱང་བཞག་ཟླ་གམ་གྱི་ཕྱི་རོལ་འཁོར་ལོ་བཞིའི་རྩེ་མོ་ལ། སྐྱེར་པའི་རྩང་ཁྲག་གིས་བྱུགས་པ་མདའ་གང་བ་བཞི་གཟུག་གོ། །དེ་ལ་ནམ་མཁའི་དཀྱིལ་འཁོར་ལ་ཕྱོགས་བཞིར་བུག་པ་ཕུག་ལ་རྩང་བཞི་ཚོན་སྐུད་ཀྱིས་དུམ་བུས་བཏགས་སོ། །གཏོར་མ་བྱས་ཕྱག་གང་གི་མཐོ་བར་བྱས། དེའི་དབུས་སུ་གྲུ་གསུམ་ཐོད་པ་རབས་ཆད་ཀྱི་ཐོད་པའམ། ཁམ་ཕོར་ཁ་སྦྱར་ཏེ་གཞག་པར་བྱའོ། །དེའི་ནང་དུ་སྙིང་སྣ་གསུམ་དང་གསོན་ཁྲག་གསུམ་དང་། ཆུ་སྣ་གསུམ་དང་། དུག་སྣ་གསུམ་དང་། ལྕགས་ཕྱེ་ཟངས་ཕྱེ་རྡོ་ཕྱེ་ཆང་ཕུད་དེ་རྣམས་སྩལ་ཏེ། རྒྱུ་ཞགས་ཀྱིས་དམ་དུ་བཅིངས་ལ། ཕྱོགས་བཞི་འོག་དང་སྟེང་དང་ལྔར་རྒྱུ་ཞགས་ཀྱི་ཐོད་དུ་ཁྲག་གིས་སྦྲུས་པའི་ཟན་ལ་ཡི་གེ་ཧཱུཾ་གི་རྒྱ་སྩལ་ལོ། །དེའི་དབུས་ནས་རྒྱུས་པའི་གཟུངས་ཐག་མ་བཏགས་ལ་གཞག་གོ། །དེའི་ནང་དུ་སྐྱེར་པའི་རྩངས་མཐོ་གང་ཙམ་གྱིས་མཐོ་བར་ཞིང་ཆེན་དཀྱིལ་འཁོར་ཁེབས་པར་དར་མཐིང་ནག་གམ་ཞིང་ཆེན་གྱི་གཡང་གཞིའམ། ཁྱི་ནག་པོའི་གཡང་གཞིའམ། དེ་རྣམས་གང་ཡོད་པ་གཅིག་གིས་ཐིབ་བེ་གཡོགས་སོ། །རྫས་དགོད་པའི་ལེའུ་སྟེ་བརྒྱ་ཉེར་བརྒྱད་པའོ།། །།
བདག་ཉིད་བསྒོམ་པའི་ཐབས་བསྟན་པ་ནི། པདྨ་ཧེ་རུ་ཀའམ། ཆེ་མཆོག་གམ། གཤིན་རྗེའམ་རང་གི་ཡི་དམ་གང་བྱེད་པའི་གཙོ་བོར་བྱས་ཏེ། མན་ངག་གི་སེམས་ལས་མ་གཡོས་པར་བྱ་སྟེ། མཚམས་བཅད། བཤགས། བྱིན་དབབ། མཆོད་པའི་རྫས་རྣམས་དབུལ། ཡི་དམ་གང་བྱེད་པའི་གཞུང་བསྲངས། འཛབ་ཤས་གཅིག་བྱས་ལ། དེ་ནས་མ་མོའི་ཡིད་ཀྱིས་མ་མོའི་ཆས་གོས་རྣམས་གོན་ལ། ཁ་ལྷོ་ཕྱོགས་སུ་བལྟས་ལ། མ་མོའི་དཀྱིལ་འཁོར་བསྐྱེད་ལ། ཆེ་མཆོག་གམ་གཙོ་བོ་གང་ཡིན་པའི་ང་རྒྱལ་དང་ལྡན་པས་གཟུངས་ཐག་བཟུང་སྟེ། ཡུངས་ཀར་ཆང་བར་བླུག་ལ། མ་མོ་སྟོང་རྩ་བརྒྱད་སྤྱིའི་འཛབ་ཟུར་མ་ཆག་པ་བརྒྱའམ་སྟོང་འབུམ་ཇི་ཙམ་ནུས་ཚད་རྒྱུན་མི་འཆད་པར་བཟླས་ཤིང་། བར་བར་དུ་མ་མོ་འབུམ་གྱི་རྗེ་མོ་བསྐུལ་ཞིང་ཡིད་ལ་བརྣག་པའི་ཕྲིན་ལས་གྲུབ་པར་མཛོད་ཅིག །ཅེས་བསྐུལ་ཞིང་སྔགས་ཀྱིས་བཏབ་པའི་ཡུངས་ཀར་ཐོད་པའམ་ཁམ་སའི་གའུའི་མཐོང་ཁུང་ནས་མར་ཁྲག་གི་ནང་དུ་བླུག་གོ། །ཡང་ཡུངས་ཀར་ལ་སྔགས་བཟླས་ཤིང་དེ་བཞིན་དུ་བྱ། ཉིན་ལན་གསུམ་མཚན་ལན་གསུམ་དཀྱིལ་འཁོར་གསལ་བར་བསྒོམ་མོ། །བསྒོམ་པའི་ཐབས་ཀྱི་ལེའུ་སྟེ་བརྒྱ་ཉེར་དགུ་པའོ།། །།གསང་བའི་ཡང་ཏིག་བཀྲོལ་བ་ནི། གཙོ་མོ་བཞིའི་མཆན་བུ་རེ་རེ་བརྡེག་པར་འབྱུང་སྟེ། ཁྲམ་ཁ་སྟོང་གི་བྱ་བ་དང་། མ་མ་སྙིང་ཁ་རག་བྱ་བ་དང་སྦྱོར་རོ། །སྲོག་གི་བཤན་པ་བསྐུལ་བ་ནི། །ནམ་མཁའ་སྟོང་གི་དཀྱིལ་འཁོར་ནས། །མུན་པའི་བུ་མོ་གློག་མ་སྲིན། །སྐུ་ཡི་ཆ་བྱད་འབྱུང་བ་ནི། །སྟོང་གི་མུན་ནག་འཐིབས་པ་གྱོན། །མཁའ་བཞིན་ནག་མོ་འཇིགས་པའི་ཚུལ་སྟོན་ཅིང་། །རལ་པ་ཁམ་ནག་བར་སྣང་ཁེབས་པ་བསིག །ཐོག་འབྲུག་ཆེམ་ཆེམ་བསྐལ་པའི་སྒྲ་སྒྲོགས་ཤིང་། །ཞལ་ཆེན་གདངས་ནས་ཁམས་གསུམ་ཞལ་དུ་རྔུབས། །ཁ་དགུ་གདངས་ནས་སྲིད་གསུམ་སྐོམ་དུ་འཐུང་། །བར་སྣང་ཁམས་ཀྱི་ཡེ་ཤེས་བོ་དྷི་མ། །སྐུ་ལུས་ནག་མོ་རླུང་གི་འཁོར་ལོ་ཅན། །མགྱོགས་མའི་ཆིབས་སུ་ལྕགས་ཀྱི་སྤྱང་མོ་ཆིབས། །རྔམ་པའི་ཆ་ལུགས་
སྟག་གི་མཆེ་བ་གཙིགས། །ཟ་བའི་ཚུལ་སྟོན་མི་ཤ་རློན་པ་ཟ། །སྐོམ་པའི་རྟགས་སུ་མི་ཁྲག་བཤུལ་པོར་འཐུང་། །ཙིཏྟ་འདྲེན་པའི་ལྕགས་ཀྱུ་ཕྱག་ན་བསྣམས། །གཡས་ཀྱི་ཕྱག་ན་མི་མགོ་འབུད་དུང་བསྣམས། །ཁྱོད་ཀྱི་མིག་རྩ་རིག་རིག་བལྟས་པའི་ཚེ། །མ་མོ་འབུམ་ཡང་ཁྱེད་ལ་རིག་རིག་བལྟ། །བ་སྤུ་སེར་ནག་བསིགས་པའི་སྐྲ་གསེབ་ནས། །སྤྲུལ་པའི་ཕོ་ཉ་ལྕགས་ཀྱི་ཚ་ཚ་འཁྲུག །ལས་སུ་སྲིད་པ་གསུམ་གྱི་བྷྱོ་བཟློག་མཛད། །ཁྱོད་ནི་བདུད་དང་སྲིན་པོའི་ཕོ་ཉ་སྟེ། །རྔམ་པའི་ང་རོས་སྟོང་ཁམས་སྒྲོལ་མཛད་མ། །བར་སྣང་ཁམས་ནས་ལྕགས་ཀྱི་གཞུ་བདུངས་ནས། །སྡང་བའི་དགྲ་ལ་གསེར་མདའ་སེར་པོ་འཕེན། །དགྲ་བོའི་རྣམ་ཤེས་བརྒྱད་ལ་གསེར་མདའ་ཡཱ། །ཐོད་པ་ཁྲག་གི་རྒྱ་མཚོ་དཀྲུགས་དཀྲུགས་ནས། །དགྲ་བོའི་སྙིང་ལ་ཁྲག་ཟོར་ཡཱ། །ལས་སུ་དགྲ་བོ་ཚོལ་ཚོལ་ནས། །དགྲ་རྙེད་ནས་ནི་ཆོ་ངེས་འདེབས། །ཡཱ་ཡཱ་མཱ་མཱ། དགྲ་བོའི་སྙིང་ལ་ཐུན་ཐུན། སྙིང་ཙིཏྟ་སྙིང་ཙིཏྟ། ཁ་ཤ་ཐུན་རིལ་ཡ་མ་སྙིང་ཁྲག་ཤ་མ་མ་སྙིང་དུ་ཕྱིག་ཡཾ། ཡ་ཐིབས་ཙ་ཏེ་བཾ། ཤན་བ་དུ་ཡ་སོད་སོད། ཅེས་ཁྲག་སྦྲེངས་ཤིང་སྙིང་པོ་བཟླས་ལ་མདའ་ཕུར་བརྡེག་པར་བྱའོ། །བདུད་མོ་ཀུན་གྱི་གཙོ་མོ་དང་། མ་མོ་ཁྲག་ལ་བྱ་བ་དང་སྦྱར་ལ། སྲོག་གི་བཤན་པ་ཆེན་མོ་ནི། །སྐུ་མདོག་མཐིང་ནག་ཆེན་མོ་ལ། །ཁྲག་དང་ཞག་གི་ཐིག་ལེས་བརྒྱན། །རལ་པ་སེར་ནག་ནམ་མཁའི་ཁམས་སུ་གཏིབས། །སྤྱན་གསུམ་ཟློག་ཅིང་ཁ་བཞིན་ནག་མོར་བལྟ། །ཡ་མཁལ་ལྡིང་ཞིང་བར་སྣང་ཁམས་སུ་ཉབ། །མ་མཁལ་བཤལ་ནས་དགྲ་བོའི་ཤ་རུས་ཟ། །མི་སྙིང་བརྒྱུས་པའི་སློག་པ་སྐུ་ལ་གསོལ། །དབུ་གསུམ་རུས་སྦལ་ནག་པོའི་ཐོད་པས་བརྒྱན། །གཡས་ཀྱི་ཕྱག་ན་ཐོད་པའི་ཁྲག་ཟོར་འཕེན། །གཡོན་གྱི་ཕྱག་གིས་དགྲ་ལ་གཡབ་མོ་འདོར། །ཞབས་དྲུག་བགྲད་ཅིང་དགྲ་བོའི་སྙིང་རྩ་གཅོད། །དུར་ཁྲོད་ཀློང་དུ་ལྕགས་ཀྱི་གཞུ་བདུངས་ནས། །བསྐུལ་བའི་གནས་ནས་གསེར་གྱི་མདའ་འཕེན་མ། །དགྲ་བོའི་རྣམ་ཤེས་བརྒྱད་ལ་གཟེར་འདེབས་མ། །དཔལ་གྱི་མ་མོ་སྲིད་པའི་ཁྲག་འཐུང་མ། །
མགྱོགས་པའི་ཆིབས་སུ་འཕར་བ་རྐང་གསུམ་ཆིབས། །རག་ཤ་དབུགས་བདག་སྲོག་གི་ཤན་པ་མོ། །རེངས་པར་ཁུགས་ལ་དགྲ་བོའི་ཙིཏྟ་ཕྱུང་། །རླུང་ནག་འཚུབ་མ་འཁྱིལ་པའི་དཀྱིལ་འཁོར་ནས། །མཁའ་ལ་རླུང་ལྟར་གཏིབས་ཤིང་དབུགས་ལ་བྷྱོ། །ཁྲག་གི་རྦ་ཀློང་འཁྱིལ་པའི་དཀྱིལ་འཁོར་ནས། །རག་མོ་ཁྲག་འཐུང་ཁོང་གི་སྙིང་ལ་བྷྱོ། །དམ་ཉམས་དགྲ་བོ་སྡང་བྱེད་སྙིང་ལ་ཡཱ། །མ་མ་ཏྲག་ཤ་ཀཱ་པཱ་ཙ་ཡ། མུ་ཏི་རི་རྦད། ཤ་ཏ་མཱ་ར་ཡཱ་སོད་སོད། སྙིང་ཁྲག་ཞུས་ཡ་སོད། མེ་ས་དུ་སོད་མཱ་ར་ཡ། ཤིག་ཤིག་མ་སྙིང་ཡ་དུ་ཛ་ཛ། མ་དུ་མ་ཤ་མ་ཛ་ཛ་ཅེས་པས་རཀ་ཏ་སྦྲེང་ངོ་། །སྨན་ཕྲན་ཀུན་གྱིས་གཙོ་མོ་དང་། །མ་མ་པ་ཤ་བྱ་བ་དང་། །སྲོག་གི་བཤན་པ་ཆེན་མོ་ནི། །སྐུ་མདོག་དམར་ནག་ཆེན་མོ་ལ། །སྤྲིན་དམར་གཞའ་ཚོན་གོས་སུ་གྱོན། །ཆིབས་སུ་རླུང་ནག་འཚུབས་མ་ཆིབས། །རྔམ་པའི་སྐུ་མདོག་ཟ་ཚུལ་བསྟན། །མི་ལྤགས་གཡང་གཞི་གོས་སུ་གོན། །ལག་ན་ཙིཏྟའི་ཕྲེང་བ་བགྲང་། །ཁ་དུག་ལྕེ་འབར་བདུད་ཀྱི་བཤན་པ་མོ། །དབུ་དགུ་གསིགས་པས་བསྐལ་པའི་མེ་སྟག་འཕྲོ། །ཁ་དགུ་གདངས་ཤིང་ཁམས་གསུམ་ཟས་སུ་ཟ། །ཞལ་དུ་རྔུབས་པས་སྲིད་གསུམ་སྐོམ་དུ་འཐུང་། །སྤྱན་གསུམ་བཟློག་པས་ཁྲག་གི་རྒྱ་མཚོར་འཁྱིལ། །ཁ་ནས་མེ་འབར་བདུད་བཞི་སྲེག་པར་མཛད། །ཁྲོས་པའི་ཁ་བཞིན་མིག་རྩ་དམར་པོར་སྟོན། །དབུ་དགུ་རལ་པ་ཐུར་དུ་བསིགས་པ་ཡིས། །གནམ་ལྕགས་ཨུར་མོའི་ཐོག་དང་སེར་ཆེན་འབེབས། །ཕྱག་ན་སྤུ་གྲི་མཚོན་ཆ་སྣ་ཚོགས་བསྣམས། །དམ་ཉམས་དགྲ་བོ་རྣམས་ཀྱི་སྙིང་རྩ་ཆོད། །ཞལ་ནས་སྒྱུགས་པའི་བརྡའ་སྐད་ཕྱོགས་བཅུར་འབོད། །སྦྲུལ་ནག་འཁྲིགས་པའི་ཞགས་པས་བཅིངས་ནས་ཀྱང་། །རག་ཤ་མདའ་ཟོར་སྙིང་གི་དཀྱིལ་དུ་རྒྱོབ། །ཚེ་སྲོག་གཅོད་ཅིང་ཀུན་གྱི་ཕུད་ཉུལ་མ། །ལྕགས་ཀྱུ་འབར་བས་སྙིང་གི་དཀྱིལ་ནས་དྲོངས། །དམ་ལས་མ་འདའ་བཅོལ་བའི་ཕྲིན་ལས་མཛོད། །མི་མགོ་སྟོང་གི་ཐོད་ཕྲེང་བསིགས་ཤིང་སྤྱོན། །འོ་དོད་ཆེན་པོ་ཕྱོགས་བཅུར་འབོད་ཅིང་སྤྱོན། །དགྲ་
བོའི་ཤ་དང་ཁྲག་ལ་ལོངས་སྤྱོད་མ། །དགྲ་ལ་ཆོ་ངེས་འདེབས་ཤིང་གཤེགས་སུ་གསོལ། །ཡཱ་ཡཱ་མཱ་མཱ་ཧྲི་ཛ་ཛ། ཙིཏྟ་བ་ཤིག་ལ། མ་བཾ་ཡ་ཐུཾ་དུར་སྙིང་དུ་ཟུར་ཙིཏྟ་ཤ་ཡ། ཙིཏྟ་ཤ་ཡ། ཙིཏྟ་ཤ་ཡ་བཾ་ཙིཏྟ་ཤ་ཡ་ཟང་ཤག་མ་མ་ཐུཾ་ཡ། སྙིང་དུན་དུན་ཀེཾ། སྙིང་ཀེཾ་མ་ར་ཏྲི་ཟོ་ཞིག་གཏོར་མར་སྦྲེང་ངོ་། །ཉུལ་ལེ་མ་ཀུན་གྱི་གཙོ་མོ་དང་སྔགས་དང་སྦྱར། བཤན་པ་ནི། གདུག་བྱེད་གསོད་པའི་ཕོ་ཉ་ནི། །སྐུ་མདོག་ཅིར་ཡང་མ་ངེས་ཏེ། །སྤྲུལ་པའི་མངའ་བདག་ཆེན་མོ་སྟེ། །ལྕགས་ཀྱི་སྤྱང་མོ་བརྒྱ་ལ་ཆིབས། །ཤིན་ཏུ་གདུངས་ཤིང་རྦད་པའི་ཚེ། །མེ་ལྕེ་འབར་བའི་འོད་ཟེར་འཕྲོ། །བ་སྤུ་ཉག་མ་རེ་རེ་ནས། །སྲིན་མོ་འབུམ་གྱི་གཟུགས་སུ་སྟོན། །གདོང་དང་མིག་ནི་ཁྲོ་ཚུལ་བལྟ། །ཕྱག་ན་ལྕགས་ཀྱུ་འབར་བ་བསྣམས། །དམ་ཉམས་དགྲ་བོའི་སྙིང་ནས་དྲོངས། །མཆི་མ་ཁྲག་གི་ཐིགས་པ་ལས། །ལྕགས་ཀྱི་སྤྱང་མོ་དགུ་བྱུང་སྟེ། །ཟས་སུ་དགྲ་བོའི་རྣམ་ཤེས་ཟ། །སྐོམ་དུ་དགྲ་བོའི་ཁྲག་ལ་འཐུང་། །ཡ་སོ་ལྕགས་ཀྱི་སྤུ་གྲིས་གཏམས། །མ་སོ་གསེར་གྱི་སོག་ལེས་གཏམས། །མཆེ་བ་རྣོ་དཀར་ཟླ་ཚེས་བཞིན། །སེང་གེའི་སྤུ་ལྟར་གཅིག་ནས་སྐྱེས་པ་ཡིས། །བ་སྤུ་སེར་ནག་བསྐལ་པའི་མེ་ལྟར་འབར། །སྤྱན་གསུམ་བགྲད་པའི་ཁྲོ་ཚུལ་སྟོན། །རྔམས་པའི་ཞལ་ནས་འབྲུག་སྒྲ་དྲག་པོ་སྒྲོགས། །ཆིབས་སུ་ཕག་མོ་མགོ་དགུ་ཆིབས། །ཁྱོད་ནི་སྲིན་པོའི་བུ་མོ་སྟེ། །སྲིན་མོ་འབུམ་ཕྲག་བྲན་དུ་ཁོལ། །ཉམས་པའི་སྙིང་འབྱིན་ཆད་པར་བཅུག་ནས་ཟ། །མ་མ་སྙིང་མཱ་ར་ཡ་ཛ་ཛ་སྙིང་ཙིཏྟ། ཐུན་ཛ་ཛ། སྙིང་ཤ་ཤ་མཱ་ར་ཡ། སྙིང་ཏི་མཱ་ར་ཡ། ཤིན་ཏུ་ཡ་གཾ། སྙིང་དུ་བཾ་ཡཾ། སྙིང་ཁ་རག །ཤ་པ་ཡ་ནི་སོད་ཡ། ཀྱིས་ཡང་སོད། ཡ་གདུན་ནེ་ཤ་སོད། ཅེས་པས་བརྡེག་གོ། །ཆོ་ག་ཟིན་པ་དང་ཁྲག་ཟོར་སྤྱན་དྲངས་ལ་མཁར་རམ་དུར་མཆད་ལ་བརྡེག་གོ། །དགྲ་བོའི་ཕྱོགས་སུ་འཕེན་ན། མདའ་ལ་བྱ་རྒོད་སྡེར་མོ་མདེའུ་རུ་བཅུག་ལ། མདའ་ཁྲག་གིས་དམར་པོར་བྱུགས་ལ། སྣ་ལ་དམར་གཏོར་འཕང་མ་མོ་རྦད་ལ་མདའ་ཕྱིས་ལ་འཕང་། ཕོ་ཉ་ནི་མ་བྷྱོ་བྱ་བ་བཏང་ངོ་། །ནམ་ལངས་
པ་དང་ཕོ་རོག་ཁང་ཐོག་དུ་འབབ་པོ། །དེ་ལྟར་བྱུང་ན་ལས་འགྲུབ་པའི་རྟགས་སོ། །ཡུངས་ཀར་དང་ཁྲག་བརྡེག་པའི་སྔགས། རག་མོ་རག་མོ་རུ་རུ་ཚལ་པ་སྙིང་ཁྲག་མ་བྷྱོ། ཁྲག་ལ་མུ་མུ་ཤ་མ་བྷྱོ། རག་མོ་སེར་བྱེད་སྙིང་ལ་བྷྱོ། རག་མོ་ལྟ་བྱེད་མིག་ལ་བྷྱོ། རག་མོ་ཉན་བྱེད་རྣ་བ་ལ་བྷྱོ། རག་མོ་སྣོམ་བྱེད་སྣ་ལ་བྷྱོ། རག་མོ་མྱོང་བྱེད་ལྕེ་ལ་བྷྱོ། རག་མོ་སྲོག་རྒྱུད་ལུས་ལ་བྷྱོ། རག་མོ་བམ་རིལ་རག་མོ་ཆེམ་ཆེམ་ཆེམ། རག་མོ་པ་ཤ་པ་ལ་ཛ་ཛ། རག་མོ་སྙིང་རྒྱུད་རྩ་ལ་ཛ་ཛ། རྩ་རྒྱུད་སྲོག་ལ་ཛ་ཛ། སྲོག་རྒྱུད་དབུགས་ལ་ཛ་ཛ། རུ་ལུ་རུ་ལུ་མདའ་དེ་བྷྱོ། དགྲ་བོའི་སྙིང་ལ་ཐུན་བྷྱོ་ཞེས་པས་ལ་འགྲུབ་པ་སྟེ། གསང་བ་ཡང་ཏིག་གི་ལེའུ་སྟེ་བརྒྱ་སུམ་ཅུ་པའོ།། །།དེ་ནས་མ་མོ་བསྐུལ་པ་བསྟན་པ་ནི་ཕོ་ཉ་ཐམས་ཅད་ཀྱི་གཙོ་མོ་ཁྲམ་ཁ་སྟོང་གི་དབང་མོ་ཆེའོ། །དེ་བསྐུལ་བ་ནི། ནམ་མཁའི་དབྱིངས་ཀྱི་དཀྱིལ་འཁོར་ནས། །སྐུ་ཡི་ཆ་བྱད་བྱུང་བ་ནི། །སྐུ་ནི་རིན་ཆེན་ནམ་མཁའི་སྐུ། །ཤིན་ཏུ་འབར་བའི་སྐུ་མངའ་བ། །གསུང་ནི་སྟོང་ཁམས་གྲགས་པར་འབྱུང་། །ཕྱག་ཀྱང་འབུམ་ཕྲག་བསམ་ཡས་ཏེ། །ཕྱག་ན་དར་ནག་འབུམ་བསྣམས་ཤིང་། །བདུད་ཀྱི་དམག་དཔུང་རྡུལ་དུ་རློག །ཕྱག་ན་རག་ཤའི་མདའ་གཞུ་འགེངས། །དགྲ་བགེགས་མ་ལུས་ཐལ་བར་རློག །སྐུ་ལས་འོད་ཟེར་འཕྲོས་པ་ཡིས། །ཕོ་ཉ་འབུམ་གྱི་གཟུགས་སྣང་བས། །སྲི་དང་གསུམ་གྱི་མུ་སྟེགས་འདུལ། །བདུད་ཀྱི་ཁྲག་གིས་མ་མོ་ངོམས་བྱེད་ཅིང་། །བདུད་ཀྱི་ཁྲག་གིས་མ་མོ་སྐུ་རྒྱན་བཞུགས། །ཐུགས་དམ་དུས་ལ་བབ་པོ་འཕྲིན་ལས་མཛོད། །སྲོག་གི་སྙིང་པོ་དམ་ལས་མ་འདའ་ཞིག །བདུད་མོ་ཐམས་ཅད་ཀྱི་གཙོ་མོ་རི་རབ་གླིང་བཞི་དབང་མོ་ཆེའོ། །དེ་བསྐུལ་བ་ནི། རི་རབ་གླིང་བཞིའི་དཀྱིལ་འཁོར་ནས། །སྐུ་ཡི་ཆ་བྱད་བྱུང་བ་ནི། །སྲིན་མོ་འབུམ་གྱི་ཐོད་པས་བརྒྱན། །ཐོད་པ་རབ་ཏུ་གསིགས་པ་ཡིས། །བདུད་ཀྱི་དཔུང་ཡང་རྡུལ་དུ་རློག །ཞབས་ཀྱང་འབུམ་ཕྲག་ཡངས་པར་འབྱུང་། །
ཞབས་ཀྱིས་རི་རབ་གླིང་བཞི་གནོན། །བདུད་ཀྱི་གཡུལ་ཡང་འཇོམས་པར་མཛད། །གཡས་ཀྱི་ཕྱག་ན་བསྣམས་པ་ནི། །སྤུ་གྲི་འབར་བའི་ཞགས་པ་དང་། །ཞིང་གི་དབྱུག་པ་བསྣམས་པས་ནི། །བཀའ་ལས་འདའ་བ་ཐམས་ཆད་སྒྲོལ། །གཡོན་གྱི་ཕྱག་ན་བསྣམས་པ་ནི། །ལྕགས་མདུང་འབར་བ་འབུམ་ཕྲག་ལ། །དར་ནག་འབར་བ་འབུམ་གྱིས་བཀླུབས། །ལྷ་སྲིན་མང་པོའི་དཔུང་ཡང་བཟློག །སྐུ་མདོག་དམར་ནག་སྒེག་པ་ལ། །དབུ་གསུམ་རབ་ཏུ་འཇིགས་པར་སྣང་། །དབུ་སྐྲ་རལ་ནག་འབར་བ་ལ། །རལ་པ་གྱེན་དུ་གསིགས་པ་ཡིས། །སྟེང་གི་ལྷ་རྣམས་དབང་དུ་སྡུད། །རལ་པ་ཐད་ཀར་གསིགས་པ་ཡིས། །ཁམས་གསུམ་མ་ལུས་དབང་དུ་སྡུད། །རལ་པ་ཐུར་དུ་གསིགས་པ་ཡིས། །མི་ཡུལ་དགྲ་བགེགས་རྡུལ་དུ་རློག །ཐུགས་དམ་དུས་ལ་བབ་ཀྱི་ཕྲིན་ལས་མཛོད། །སྲོག་གི་སྙིང་པོ་དམ་ལས་མ་འདའ་ཞིག །སྨན་ཕྲན་ཀུན་གྱི་གཙོ་མོ་སྟེ། །ས་གཞི་འདེགས་པའི་དབང་མོ་ཆེ། །དེ་བསྐུལ་བ་ནི། ཐེག་ཆེན་ས་གཞིའི་དཀྱིལ་འཁོར་ནས། །སྐུ་ཡི་ཆ་བྱད་བྱུང་བ་ནི། །སྣང་སྲིད་ཀུན་གྱིས་སྐུ་བརྒྱན་ཅིང་། །དབུ་ནི་ལྕགས་མདུང་མེས་བསྲེགས་འདྲ། །བ་སྤུ་ཀུན་གྱི་བུ་ག་ནས། །ལྕགས་ཀྱི་མཚོན་ཆ་སྣ་ཚོགས་འཕྲོ། །རབ་ཏུ་འབར་བས་དགྲ་བགེགས་འཇིལ། །ཕྱག་རྒྱ་གཡོན་པ་བཞི་བྱུང་བས། །ལྕགས་ཀྱུ་མེ་འོད་འབར་བ་བསྣམས། །དགྲ་བགེགས་མ་ལུས་སྙིང་ནས་འདྲེན། །ཕྱག་རྒྱ་གཡས་པ་བཞི་བྱུང་བས། །རལ་གྲི་མེ་འོད་འབར་བ་བསྣམས། །དགྲ་བགེགས་མ་ལུས་སྙིང་ཆེན་འབྱིན། །ཞབས་དགུ་ཐུར་དུ་བྱུང་བ་ནི། །རྡོ་རྗེ་ཕུར་བུ་དགུ་འདྲིལ་ཞིང་། །དགྲ་བགེགས་མ་ལུས་སྙིང་ལ་འགེམས། །ཁམས་གསུམ་སྒྲོལ་བའི་ཞེ་སྡང་གིས། །ཕ་རོལ་གདུག་པའི་ཞེ་སྡང་གཅོད། །ཐུགས་དམ་དུས་ལ་བབ་ཀྱི་ཕྲིན་ལས་མཛོད། །སྲོག་གི་སྙིང་པོ་དམ་ལས་མ་འདའ་ཞིག །ཉུལ་ལེ་ཀུན་གྱི་གཙོ་མོ་སྟེ། །རྒྱ་མཚོ་གླིང་གི་དབང་མོ་ཆེ། །དེ་བསྐུལ་བ་ནི། རྒྱ་མཚོ་གླིང་བཞིའི་དཀྱིལ་འཁོར་ནས། །སྐུ་ཡི་ཆ་བྱད་བྱུང་བ་ནི། །སྐུ་ནི་རིན་ཆེན་འབར་བ་ལ། །གཡུ་ཡི་དབུ་ལ་ཤེལ་གྱི་གདོང་། །སྐུ་ལས་འོད་ཟེར་འཕྲོས་
པ་ཡིས། །ཁམས་གསུམ་མ་ལུས་བདུད་དཔུང་འཇོམས། །དེ་ཡི་ཐོད་པ་དམར་པོ་ནི། །ཡང་དག་གསང་བའི་དཀྱིལ་འཁོར་འདིར། །རྡོ་རྗེ་རལ་པ་གཡེངས་པ་ཡིས། །ཁམས་གསུམ་མ་ལུས་དམྱལ་ཐག་གཅོད། །དེ་ཡི་ཞེ་སྡང་ཆེན་པོས་ནི། །རྡོ་རྗེ་མཚོན་ཆ་རབ་ཏུ་འབེབས། །མི་བཟད་གདོན་དང་དགྲ་བགེགས་སྒྲོལ། །ཕྱག་ན་མདུང་དམར་གཞིབས་པ་ལ། །དར་ནག་འབུམ་གྱིས་བཀླུབས་ནས་ནི། །ཕས་ཀྱི་གཡུལ་ངོ་ཟློག་པར་མཛད། །ཟློག་ཅིག་ཐུགས་དམ་དུས་ལ་བབ། །བཅོལ་བའི་ཕྲིན་ལས་གྲུབ་པར་མཛོད། །སྲོག་གི་སྙིང་པོ་དམ་ལས་མ་འདའ་ཞིག །སྲོག་གི་སྙིང་པོ་རྣམ་གསུམ་དྲངས་ཤིང་བརྣག་པའི་ལས་བཅོལ་ལོ། །བསྐུལ་བའི་ལེའུ་སྟེ་བརྒྱ་སོ་གཅིག་པའོ།། །།དེ་ནས་ཡང་ཕྲིན་ལས་རྫོགས་རྟགས་བྱུང་ནས་དངོས་གྲུབ་བླང་བ་བསྟན་པ་ནི། བྷན་དྷ་མཚན་དང་ལྡན་པའི་ནང་དུ་བདུད་རྩི་བླུགས་ལ། དམ་བཅའ་བ་དང་དམ་བསྲེ་བ་བདུད་རྩིས་བྱས་ལ། དེ་ནས་ཞལ་ཟས་རྣམ་པ་སྣ་ཚོགས་པ་བསགས་ཏེ་བདུད་རྩིས་བསངས། མཚམས་དྲག་ཏུ་བཅད། བཟླས་པ་མང་དུ་བྱ། དེ་ནས་དངོས་གྲུབ་བླང་སྟེ། འདི་སྐད་དོ། །ཧཱུཾ། རང་བཞིན་རྣམ་དག་པདྨའི་སྐུ་འཁྲུངས་པ། །རིག་འཛིན་རྩལ་འཕང་ཆོས་ཀྱི་དབྱིངས་ཉིད་ཧཱུཾ། །ཡང་དག་མཐར་ཕྱིན་བདག་ཉིད་སྨྲེང་ཞིང་གསོལ། །མ་ཡིས་མངོན་སྤྱོད་དངོས་གྲུབ་བདག་ལ་སྩོལ། །ཧཱུཾ། ཆོས་ཉིད་དོན་རིག་པདྨའི་སྐུ་འཁྲུངས་པ། །སྐྱེ་འགྲོ་འབྱུང་འགྱུར་ཡུམ་ཆེན་དབྱིངས་ཀྱི་ངང་། །ཡུམ་ཆེན་གཟི་ལྡན་པདྨའི་ངང་ཉིད་ཐུགས། །དེ་ཉིད་མཉམ་དགོངས་དངོས་གྲུབ་བདག་ལ་སྩོལ། །ཧཱུཾ། ང་ཡི་ཁྱད་པར་རིག་པ་མངོན་པར་བཞུགས། །ཐུགས་རྗེ་རྔམ་འབྱུང་བྷན་དྷ་རྟགས་ཀྱིས་འབོད། །མ་ཆེན་སྙིང་གི་དངོས་གྲུབ་བདག་ལ་སྩོལ། །ཧཱུཾ། མཁའ་དབྱིངས་དག་པའི་ནམ་མཁའི་ཀློང་འཁྱིལ་དུ། །རིགས་མཆོག་དག་པའི་དངོས་གྲུབ་བདག་ལ་སྩོལ། །ཧཱུཾ། རབ་འབྱམས་བདེན་
མོས་ཡང་དག་དོན་གྲུབ་མ། །འབྲས་བུ་མི་དམིགས་ཐུགས་རྗེའི་ངང་འབྱམས་མ། །མཐའ་ཡས་ཀློང་གི་དངོས་གྲུབ་བདག་ལ་སྩོལ། །ཧཱུཾ། བཀྲ་ཤིས་བདེན་མོའི་ངང་འབྱམས་མ། །ཐུགས་མཆོག་ཡུམ་གྱི་དངོས་གྲུབ་བདག་ལ་སྩོལ། །ཧཱུཾ། ཕྱག་རྒྱ་རིགས་མོ་ཡངས་པས་ཀུན་ཏུ་གསལ། །མ་གཅིག་ཐུགས་རྗེ་ཆེན་པོ་བདག་ལ་སྩོལ། །ཧཱུཾ། མྱ་ངན་འདས་པའི་ཆོས་ལ་ཟབ་མོས་པ། །ས་བདག་རྒྱལ་པོའི་དངོས་གྲུབ་བདག་ལ་སྩོལ། །ཧཱུཾ། མི་མཉམ་བྷ་ག་དག་པ་ཆོས་ཀྱི་སྐུ། །བདག་གི་རྣམ་ཤེས་ཙིཏྟ་བེམ་པོ་འདི། །གཏི་མུག་ཤས་བསྡུས་རང་བཞིན་མུན་པའི་ཁམས། །ནང་ཁྲོལ་ཕྱི་ཤ་རྩ་བརྒྱད་འཁོར་བའི་རྒྱུ། །མ་དག་དག་ཕྱིར་ཡི་དམ་ལྷ་ཁྱོད་ལ། །འབྲས་བུ་ཐོབ་ཕྱིར་བདག་གིས་སྨྲེང་གསོལ་ན། །མ་ལ་ཡེ་ཤེས་སྤྱན་མངའ་བས། །སྤྱན་གྱི་དངོས་གྲུབ་བདག་ལ་སྩོལ། །མ་ལ་ཡེ་ཤེས་ཐུགས་མངའ་བས། །ཐུགས་ཀྱི་དངོས་གྲུབ་བདག་ལ་སྩོལ། །ཧཱུཾ། རིགས་མཆོག་ཁྱད་པར་སྤྲུལ་པ་མངོན་འབྱིན་མ། །མ་ལ་སྐུ་མཆོག་ཁྱད་པར་བསམ་ཡས་པས། །སྐུ་མཆོག་ཁྱད་པར་དངོས་གྲུབ་བདག་ལ་སྩོལ། །མ་ལ་རྫུ་འཕྲུལ་རྐང་མངའ་བས། །རྐང་མགྱོགས་དངོས་གྲུབ་བདག་ལ་སྩོལ། །ཧཱུཾ། མ་ལ་ཡེ་ཤེས་ཞལ་མངའ་བས། །མི་བརྗེད་གཟུངས་ཀྱི་དངོས་གྲུབ་བདག་ལ་སྩོལ། །ཧཱུཾ།དུས་འདི་ཐམས་ཅད་གཟུང་བའི་སྙོམས་པའི་ཁམས། །སྐལ་ལྡན་དད་མོས་བདག་གིས་སྨྲེང་གསོལ་ན། །བྱིན་རླབ་མཐུ་ཆེན་སྩོལ་བའི་དུས་ལ་བབ། །དྲག་ཤུལ་མཐུ་ཡི་དངོས་གྲུབ་སྩལ་དུ་གསོལ། །ཞེས་དངོས་གྲུབ་བླང་བའི་ལེའུ་སྟེ་བརྒྱ་སོ་གཉིས་པའོ།། །།དེ་ནས་ཡང་སེར་བའི་ཐབས་ལ་སྦྱོར་བར་འདོད་ན་ལས་འདི་བྱའོ། །ཞིང་གི་གཡང་གཞི་ཡན་ལག་བཞི་ལ་སྲོག་ལ་བྱེད་ན་བཤན་པ་མོ་བཞི་བྲིས་ལ་སྦྱར་རོ། །སེར་བ་ལ་སྦྱར་ན་གདོང་མོ་བཞི་སྤྱན་དྲངས་ཏེ། ཤར་ཕྱོགས་ནམ་མཁའི་དཀྱིལ་ཡངས་ནས། །ཤར་གྱི་སྟག་སྲིན་ཟོར་བ་གདོང་། །ཐོག་མདའ་ཐམས་ཅད་གཤེགས་ཤིང་གཤེགས། །ལྷོ་ཕྱོགས་ནམ་མཁའི་དཀྱིལ་ཡངས་ནས། །སྲིང་གཅིག་བམ་སྲིང་དྲེད་མོ་གདོང་། །སྲིང་གཅིག་གཟེར་ཐབས་བདག་མོ་ད་ཚུར་སྤྱོན། །ནུབ་ཕྱོགས་ནམ་མཁའི་དཀྱིལ་ཡངས་ནས། །ནུབ་ཀྱི་ཀོང་སྲིན་བན་གླང་གདོང་། །སྲིང་གཅིག་གླང་ཐབས་བདག་མོ་ད་ཚུར་སྤྱོན། །བྱང་ཕྱོགས་ནམ་མཁའི་དཀྱིལ་ཡངས་ནས། །བྱང་གི་འཕྲོག་སྲིན་ཆུ་སྲིན་གདོང་། །རི་རབ་རྩེ་ནས་འབྲུག་སྒྲོགས་
མ། །འབྲུག་ལྡིང་གློག་འགྱུ་ད་ཚུར་སྤྱོན། །ཞེས་སྤྱན་དྲངས་ལ། དེ་ནས་སྔགས་ཀྱིས་བརྟན་པར་བཞུགས་སུ་གསོལ་བ་ནི། རག་མོ་རག་མོ་སྙིང་རྩ་ཤ་མ་མ་ས་མ་ཡ་ཏིཥྠ་ལྷན། རག་མོ་རག་མོ་རུ་རུ་རོ་རུ་ཙ་པ་ལ་དགྲ་བོའི་སྙིང་ཁ་རག་ས་མ་ཡ་ཏིཥྠ་ལྷན། རག་མོ་རག་མོ་ཙབ་མོ་ཙབ་མོ། ཁྲག་ལ་མུ་ཤ་མ་ས་ཡ་ཏིཥྠ་ལྷན། རག་མོ་རག་མོ་ཏྲག་མོ་ཏྲག་ཤིག་ཤིག་དགྲ་བོའི་སྙིང་ཁ་རག་ལ་མ་ས་ཡ་ཏིཥྠ་ལྷན། མ་མོ་རྣམས་དམ་ཚིག་གི་དབང་གིས་ས་མ་ཡ་ཏིཥྠ་ལྷན། ཞེས་པས་བཞུགས་སུ་གསོལ་བར་བྱའོ། །སྤྱན་དྲངས་པ་དང་བཞུགས་སུ་གསོལ་བའི་ལེའུ་སྟེ་བརྒྱ་སོ་གསུམ་པའོ།། །།དེ་ནས་མཆོད་པ་འབུལ་ཏེ། ཤ་ཁྲག་སྣ་ཚོགས་པ་དང་ར་ཁམ་རོག་གི་ཤ་ཁྲག་གི་མཆོད་པ་དབུལ་བར་བྱ་སྟེ། འདི་སྐད་དོ། །ཤར་ཕྱོགས་ནམ་མཁའི་དཀྱིལ་ཡངས་ནས། །ཤར་གྱི་སྟག་སྲིན་ཟོར་པ་གདོང་། །ནམ་མཁའི་དཀྱིལ་ནས་ཐོག་འབེབས་མ། །འདིར་གཤེགས་རྣལ་འབྱོར་མཆོད་པ་བཞེས། །ལྷོ་ཡི་བམ་སྲིན་དྲེད་མོ་གདོང་། །བར་སྣང་ཁམས་ནས་འབྲུག་སྒྲོགས་མ། །འདིར་གཤེགས་རྣལ་འབྱོར་མཆོད་པ་བཞེས། །ནུབ་ཀྱི་ཀོང་སྲིན་གློག་འགྱུ་མ། །འདིར་གཤེགས་རྣལ་འབྱོར་མཆོད་པ་བཞེས། །བྱང་གི་འབྲོག་སྲིན་ཆུ་སྲིན་གདོང་། །འདིར་གཤེགས་རྣལ་འབྱོར་མཆོད་པ་བཞེས། །ཞེས་པའི་རྟིང་མ་ལ་སོགས་གོང་གི་མཆོད་སྔགས་ཏེ། དེའི་མཐར་སྭཱ་ཧཱ་ཞེས་བཏགས་ལ་གཟར་བུའི་ནང་དུ་རཀྟ་སྦྲེང་ངོ་། །རའི་སྙིང་ནང་དུ་མིང་རུས་དང་བཅས་པའི་གཟུགས་བཅུག་ལ་བསྟབ་པར་བྱ་སྟེ། རྣལ་འབྱོར་དམ་ཚིག་ཅན་གྱི་གྲོགས་མཛད་མ། །ཤ་ཁྲག་དམར་གྱི་ཕོ་ཉ་རྗེས་གཅོད་མ། །ཙ་རའི་སྙིང་དང་ཁྲག་ལ་དགྱེས། །ལེགས་ཉེས་ཀུན་གྱི་སྟངས་འཛིན་མ། །ཤ་ཁྲག་དམར་གྱི་རྗེས་གཅོད་མ། །ཕྲིན་ལས་དམ་ཉམས་གཤེད་དམར་གཤེགས། །དམ་ཉམས་གཤེད་དམར་ཞལ་འཆེས་མ། །མནའ་ཟན་གང་ཡིན་ཁྲིད་ལ་ཤོག །སྔགས་གོང་མ་ལ་ཁ་རཾ་ཁཱ་ཧི་ཞེས་པས་བསྟབ་པར་བྱའོ། །མཆོད་པ་དབུལ་བ་དང་བསྟབ་པའི་ལེའུ་སྟེ་བརྒྱ་སོ་བཞི་པའོ།། །།གསང་བའི་སྔགས་བསྟན་པ་ནི། གུ་སི་དན་མ་དགྲ་ལ་བྷྱོ། ཨུ་ཙུཥྨ་ཤ་དགྲ་ལ་བྷྱོ། ཁཾ་ཁ་རྦད་ཤ་དགྲ་ལ་བྷྱོ། སྙིང་ཁ་རག་མ་དགྲ་ལ་བྷྱོ། བྷྱོ་བྷྱོ་བྷྱོ་བྷྱོ། འུ་ཡཾ་ལོ་ཐོག་ལ་བྷྱོ། ས་ཤར་བ་བ་
ལོ་ཐོག་ལ་བྷྱོ། ནལ་ཆན་ལོ་ཐོག་ལ་བྷྱོ། ཐོར་ཐོག་ལོ་ཐོག་ལ་བྷྱོ། ཨོཾ་ཧ་ཡ་གྲཱི་བ་ཧྲི། པདྨ་བ་མོ་ཏ་ཧྲི། ཙ་ན་ད་རག་ཤ་ཧྲི་དབང་། ཙིན་ད་ཙིན་ད་ཤད་ཡ་མཱན་ཏ་ཀ་ཧཱུཾ་པ་ཙ་པ་ཙ་ཧཱུཾ་ཕཊ། ཛྭ་ལ་ཛྭ་ལ་རཾ། ཛྭ་ལ་ཛྭ་ལ་རཾ་ཧཱུཾ་ཕཊ། མ་མ་རིལ་རིལ། ཤར་ཤར་ཏྲ་ཏྲག་ཏུ་ཙ་ཏུ་ཙ་ཤུ་ཏི་པྲོཾ། ཙ་མུན་དུད་པྲོཾ། ཡ་མཱན་ཏ་ཀ་ཨ་དཀར་དུ་རུ་དུ་རུ། ཕྲཾ་དུད་པྲོཾ། དཀར་པྲོཾ་ཡུ་ཏི་སྨིན། ཤ་ར་ཤ་ལ་ལྟ་ཧྲིལ་བྷྱོ། རག་མོ་སྙིང་ཙ་རུ་རུ་ཙབ་མོ་སྙིང་ཁ་རག་གུ་སི་དན་མ་ཤག་མུ་ཤ་མ་བྷྱོ། ཞེས་པ་སྟེ་སྔགས་འདིས་ཐམས་ཅད་འགྲུབ་པའོ། །གསང་བ་སྔགས་ཀྱི་ལེའུ་སྟེ་བརྒྱ་སོ་ལྔ་པའོ།། །།རྫས་སྣ་བསྟན་པ་ནི། ཡུལ་གང་དུ་ལས་བྱེད་པའི་སྔོ་སྣ་ཚང་བར་བླངས་ལ། དེ་རྣམས་བརྡུངས་ལ་ཁྲག་གི་ཟངས་བུ་རུ་མཆོད་པ་དབུལ་ལོ། །ཚིལ་ཆེན་གྱི་དུད་པ་བཏང་། དེ་ནས་མཐུན་པའི་རྫས་གང་བྱེད་པས་ལྷ་བསང་། གང་ལ་བྱེད་པའི་ཡུལ་ལྷ་ཡང་རུང་སྟེ་གཟུགས་ལ་ཕུར་པས་གདབ། ཕུར་བུའི་ངོས་བཞི་རུ་སྲོག་གི་སྙིང་པོ་ཐི། ཕུར་པ་སེང་ལྡིང་ལ་བགྱི། བདེན་པ་བདར་མ་ཉེས་པའི་དཔང་གཟུག །ཡམས་ནད་འབེབས་པར་འདོད་ན། དུག་སྣ་ཚོགས་དང་ཁྲག་སྣ་ཚོགས་དང་སྔོ་ཁུར་སྦྱིན་བསྲེག་བྱ། དེའི་ཐལ་འཇིམ་དེ་ཕྱོགས་སུ་རླུང་ཕྱོགས་མ་ལངས་པ་ལ་གཏོར་ཞིང་སྔགས་བཟླས་ན་ཡམས་ནད་འོང་། ཐལ་འཇིམ་དེ་ཕྱུགས་ལ་གཏོར་ནས་སྔགས་བཟླས་ན། ཡམས་ནད་ལྷོག་རྒལ་འབྱུང་ངོ་། །མི་ལ་གཏོར་ན་ཕོ་གཟེར་དང་གླང་ཐབས་འོང་ངོ་། །མཁར་གྱི་འགྲམ་རྩར་སྦས་ན་མཁར་འཇིག་གོ། །ལས་འདི་བྱས་ན་ཁྲག་གི་སེར་བ་དགུན་ཡང་འབེབས་ན་སྟོན་ཟླ་གསུམ་ལ་སྨོས་ཀྱང་ཅི་འཚལ། ཞེས་གསུངས་སོ། །རྫས་བསྟན་པ་དང་སྐྱིན་ཐང་དབབ་པའི་ལེའུ་སྟེ་བརྒྱ་སོ་དྲུག་པའོ།། །།དེ་ནས་ཡང་སྲིད་པ་ལས་ཀྱི་མ་མོ་དང་། །བདེ་འགྲོ་ལས་ཀྱི་མ་མོ་དང་། །མཁས་པ་ལས་ཀྱི་མ་མོ་དང་། །རྒྱུའི་བདེ་འགྲོ་ལས་ཀྱི་མ་མོ་དང་། །སྲས་ཀྱིས་དབང་དུ་བསྡུས་པ་ལས་ཀྱི་མ་མོ་དང་། །གྲགས་པ་ལས་ཀྱི་མ་མོ་དང་། །གྲང་ཀྲིད་ལས་ཀྱི་མ་མོ་དང་། །ཡང་གསལ་ལས་ཀྱི་མ་མོ་དང་། །ཤུ་བ་བན་ཆེན་ལས་ཀྱི་མ་མོ་དང་། །འཇུག་པ་ལས་ཀྱི་མ་མོ་དང་། །འཕེན་པ་ལས་ཀྱི་མ་མོ་དང་། །རྡོ་རྗེ་དབང་ཕྱུག་ལས་ཀྱི་མ་མོ་དང་། །ལག་པ་གཅོད་པ་ལས་ཀྱི་མ་མོ་དང་། །དོན་ལ་མཁས་པ་ལས་
ཀྱི་མ་མོ་དང་། །མཁའ་ལ་འགྲོ་བ་ལས་ཀྱི་མ་མོ་དང་། །དབྱིངས་ལ་ཤར་བ་ལས་ཀྱི་མ་མོ་དང་། །གདུག་པ་འདུལ་བ་ལས་ཀྱི་མ་མོ་དང་། །རྒྱུ་མ་འདྲེན་པ་ལས་ཀྱི་མ་མོ་དང་། །རོ་ལ་དགའ་བ་ལས་ཀྱི་མ་མོ་དང་། །ནད་ཁ་གཏོང་བ་ལས་ཀྱི་མ་མོ་དང་། །ཁྲག་ཚིལ་འཇིབས་པ་ལས་ཀྱི་མ་མོ་དང་། །སྣང་སྲིད་ཉུལ་བ་ལས་ཀྱི་མ་མོ་དང་། །མངལ་ནས་འདྲེན་པ་ལས་ཀྱི་མ་མོ་དང་། །ཕུར་བུ་འཕེན་པ་ལས་ཀྱི་མ་མོ་དང་། །དབུགས་ལ་མངའ་མཛད་ལས་ཀྱི་མ་མོ་དང་། །བཙོ་ལ་བཏབ་པ་ལས་ཀྱི་མ་མོ་དང་། །རག་མོ་ཤ་ཟན་ལས་ཀྱི་མ་མོ་དང་། །དཀར་མོ་ཤ་ཟན་ལས་ཀྱི་མ་མོ་དང་། །སྔོན་མོ་དྲོད་ལེན་ལས་ཀྱི་མ་མོ་དང་། །སྤྱི་འདུལ་ལས་ཀྱི་མ་མོ་དང་། །གླིང་བཞི་རྒྱལ་མོ་ལས་ཀྱི་མ་མོ་དང་། །སྲིན་མོ་འཇིགས་བྱེད་ལས་ཀྱི་མ་མོ་དང་། །གླིང་བཞི་རྒྱལ་མོ་ལས་ཀྱི་མ་མོ་དང་། །གནོད་སྦྱིན་རྒྱལ་མོ་ལས་ཀྱི་མ་མོ་དང་། །རལ་གཅིག་འཇིགས་བྱེད་ལས་ཀྱི་མ་མོ་དང་། །རྔམས་མ་འཇིགས་ཚོགས་ལས་ཀྱི་མ་མོ་དང་། །ཤ་ཟན་ཁྲག་འཐུང་ལས་ཀྱི་མ་མོ་དང་། །རུས་པ་འཇིགས་ཚོགས་ལས་ཀྱི་མ་མོ་དང་། །དམ་སྲི་འཇིགས་ཚོགས་ལས་ཀྱི་མ་མོ་དང་། །ཕྱག་བརྙན་གཙོ་མོ་ལས་ཀྱི་མ་མོ་དང་། །བུད་མེད་འཇིགས་ཚོགས་ལས་ཀྱི་མ་མོ་དང་། །ལྕགས་ཀྱི་སྤྱང་མོ་མགོ་དགུ་ལས་ཀྱི་མ་མོ་དང་། །མི་མོ་ཡེ་ཤེས་མཁའ་ལྡན་ལས་ཀྱི་མ་མོ་དང་། །ལྕགས་ཀྱི་བྱ་ཁྭ་ལས་ཀྱི་མ་མོ་དང་། །དབང་བྱེད་ཁ་འབར་ལས་ཀྱི་མ་མོ་དང་། །གཤིན་རྗེ་ཁ་འབར་ལས་ཀྱི་མ་མོ་དང་། །རྒྱ་ཡུལ་སྤྱན་ཕྲན་ལས་ཀྱི་མ་མོ་དང་། །གཡུའི་རལ་ཅན་ལས་ཀྱི་མ་མོ་དང་། །གཅེར་བུ་རྒྱུག་པ་ལས་ཀྱི་མ་མོ་དང་། །ཚིག་གིས་དོན་བསྲུངས་ལས་ཀྱི་མ་མོ་དང་། །མཆེ་གཅིག་རྩད་གཅོད་ལས་ཀྱི་མ་མོ་དང་། །ཚལ་པར་གཏོང་བ་ལས་ཀྱི་མ་མོ་དང་། །རྐན་རྡེབ་ཕྲིན་ལས་ཀྱི་མཛད་རྩ་ལས་ཀྱི་མ་མོ་དང་། །བུད་མེད་མཛེས་པ་ལས་ཀྱི་མ་མོ་དང་། །ཤྭ་རེ་ཛ་ཛ་ལས་ཀྱི་མ་མོ་དང་། །དམག་གི་རྒྱལ་མོ་ལས་ཀྱི་མ་མོ་དང་། །དགྲ་བླའི་རྒྱལ་མོ་ལས་ཀྱི་མ་མོ་དང་། །བག་ཞད་ཐལ་བར་རློག་པ་ལས་ཀྱི་མ་མོ་དང་། །དམ་ཚིག་གཉན་པོ་ཚུལ་བཞིན་བསྲུངས་པ་ལས་ཀྱི་མ་མོ་དང་། །
ཐུགས་དམ་བསྐུལ་བ་ལས་ཀྱི་མ་མོ་དང་། །ཆ་ལུགས་བརྟེན་པ་ལས་ཀྱི་མ་མོ་དང་། །གྲུབ་པའི་ལྷ་མོ་ལས་ཀྱི་མ་མོ་དང་། །ཕྲིན་ལས་མཛད་པ་ལས་ཀྱི་མ་མོ་དང་། །མཁའ་ལྡིང་གསེར་ཅན་ལས་ཀྱི་མ་མོ་དང་། །གླིང་ག་ཏྭ་ར་ལས་ཀྱི་མ་མོ་དང་། །ཁྲོ་གཉེར་སྲོག་བདག་ལས་ཀྱི་མ་མོ་དང་། །ཤ་ཁྲག་སྲོག་བདག་ལས་ཀྱི་མ་མོ་དང་། །སྨེ་ཤ་སྲོག་བདག་ལས་ཀྱི་མ་མོ་དང་། །མཁའ་ལྡིང་རོ་ཟ་རྔམ་བྱེད་ལས་ཀྱི་མ་མོ་དང་། །ད་ར་སྲི་བདག་ལས་ཀྱི་མ་མོ་དང་། །ད་ར་དབུགས་ལེན་ལས་ཀྱི་མ་མོ་དང་། །དུ་ར་ཡིད་འཕྲོག་ལས་ཀྱི་མ་མོ་དང་། །ཁྱབ་གདལ་ཕོ་ཉ་ལས་ཀྱི་མ་མོ་དག །ལ་ལའི་ལག་ན་རྒྱུ་ཞགས་འཆིང་། །ལ་ལའི་ལག་ན་ཐོད་ཕྲེང་འཛིན། །ལ་ལ་ཞིང་ཆུང་བ་སུ་འདྲེན། །ལ་ལ་མིག་མེད་རྒྱ་མཚོ་སྐེམས། །ལ་ལ་འགུགས་བྱེད་ལྕགས་ཀྱུ་འཛིན། །ལ་ལ་སྦྲུལ་ནག་ཞགས་པ་འཛིན། །ལ་ལ་ཕོ་ཉ་འགུགས་ཤིང་འདྲེན། །སྲིད་པའི་བུ་གཅིག་མ་དང་བརྒྱ་བཅུ་གཅིག་གཤིན་རྗེའི་ལྕམ་མོ་དཔལ་གྱི་ཕྱག་བརྙན་དཔལ་གྱི་དྲི་སྣ་ཚོགས་མ་དང་། གཤིན་རྗེའི་ལྕམ་མོ་ལྕགས་ཀྱི་སྤྱང་མོ་མགོ་དགུ་མ་དང་། ཡ་མཱན་ལྕམ་མོ་ཡེ་ཤེས་མཁའ་ལྡན་མིང་མོའི་དཔལ་དང་། ཡ་མཱན་ལྕམ་མོ་སྲིང་གཅིག་འབར་བ་དང་། ཡ་མཱན་ལྕམ་མོ་བྱིས་པ་ལས་ཀྱི་དུར་བྱེད་མ་དང་། ཡ་མཱན་ལྕམ་མོ་སྲིད་པའི་བདེ་འགྲོ་མ་དང་། ཡ་མཱན་སྲིན་མོ་ལས་ཀྱི་བདེ་འགྲོ་མ་དང་། ཡ་མཱན་ལྕམ་མོ་མཁའི་བདེ་འགྲོ་མ་དང་། ཡ་མཱན་ལྕམ་མོ་རྒྱུའི་བདེ་འགྲོ་མ་དང་། ཡ་མཱན་ལྕམ་མོ་སྲས་ཀྱི་བདེ་འགྲོ་མ་དང་། གཤིན་རྗེ་ཀྲང་ཀྲི་ཡང་གསལ་གཡོས་དང་། ཡ་མཱན་ལྕམ་མོ་བམ་ཆེན་ཤུ་བའི་ཡང་གསལ་གཡོས་དང་། གཤིན་རྗེའི་ལྕམ་མོ་ལས་ལ་འཇུག་པས་ཡང་གསལ་གཡོས་དང་། གཤིན་རྗེའི་ལྕམ་མོ་ཙིཏྟཾ་འཕེན་པའི་ཡང་གསལ་གཡོས་དང་། གཤིན་རྗེའི་ལྕམ་མོ་གསང་སྔགས་མ་ཡང་གསལ་གཡོས་དང་། ཡ་མཱན་ལྕམ་མོ་མངལ་ནས་འདྲེན་མ་དང་། གཤིན་རྗེའི་ལྕམ་མོ་རོ་ལ་དགའ་བའི་ལེན་མ་དང་། གཤིན་རྗེའི་ལྕམ་མོ་ཁྲག་ཚིལ་ལེན་མ་དང་། གཤིན་རྗེའི་ལྕམ་མོ་མ་མོ་སྤྱི་ཕུད་མ་དང་། གཤིན་རྗེའི་ལྕམ་མོ་རྒྱུ་མ་འདྲེན་མ་དང་།
གཤིན་རྗེའི་ལྕམ་མོ་དགྲ་བགེགས་ལེན་དང་། གཤིན་རྗེའི་ལྕམ་མོ་སྣང་སྲིད་ཀྱི་སྤྱི་ཕུད་མ་དང་། གཤིན་རྗེའི་ལྕམ་མོ་མ་མོ་སྤྱི་ཕུད་མ་དང་། གཤིན་རྗེའི་ལྕམ་མོ་གང་སྤྱི་ཕུད་མ་དང་། གཤིན་རྗེའི་ལྕམ་མོ་སྲས་ཀྱི་དབང་དུ་སྡུད་མ་སྤྱི་ཕུད་མ་དང་། གཤིན་རྗེའི་ལྕམ་མོ་གསང་སྔགས་མ་སྤྱི་ཕུད་མ་དང་། མཚོ་སྨན་རྒྱལ་མོ་དང་ཉི་ཤུ་རྩ་གཅིག །དབྱིངས་ཀྱི་བཀའ་སྡོད་བློན་མོ་གཅིག་མ། བཀའ་གཉན་བློན་མོ་པྲེ་ཏ་ལི། གཤིན་རྗེའི་ལྕམ་མོ་བཀའ་སྡོད་བློན་མོ་སྣང་སྲིད་སྤྱི་ཕུད་མ་དང་། སེམས་ལས་བསྐྱེད་པའི་བཀའ་སྡོད་བློན་མོ་ཡང་གསལ་གཡོས་དང་། ཐུགས་དམ་བསྐང་བའི་བཀའ་སྡོད་བློན་མོ་བཀྲག་གསལ་མཉམ་དང་། ཤུགས་སྒྲོལ་བཀའ་སྡོད་ཁྲག་འཐུང་མ། དྲེགས་ལྡན་བཀའ་སྡོད་བློན་མོ་དྲུག་ཅུ་གཙོ། གནོད་བྱེད་སྙིང་འཕྲོག་མ་འབར་མ་མེ་ཁྱེར་གློག་ཕྲེང་འཛིན་ཏེ་དགུའོ། །མ་མོ་རྣམས་ཀྱི་ཀུན་གྱི་བློན་མོ་རེ་མ་ཏིའོ། །མ་མོ་བྱུང་བ་བསྟན་པའི་ལེའུ་སྟེ་བརྒྱ་སོ་བདུན་པའོ།། །།ཨོཾ་ཏི་ཁྲག་ཤ་ཁྲག་མ་རུ་ལུ། སྙིང་ཕུར་ཏི་བྷྱོ། མུ་ལ་ཤ་གྲཾ། སྙིང་ཀྲཾ་མ་བྷྱོ། མུནྟི་ཤནྟི་སྙིང་ཁ་རག་ཤུ་ལ་ཙཀྲ་ཁྲ་མ་མུ་ཏི་བྷྱོ། ཁ་ཐུན་ཤིག་ཤིག །བྷྲཱུཾ་བྷྲཱུཾ་ཤིག་ཤིག་རོ་ཟ་མུ་བྷྱོ། ཛུ་ནམ་ཤིག་ཤིག །སྙིང་ལ་ཕུར་བྷྱོ། ཨོཾ་རོ་ལ་ཤྭ་ཁྲག་མ་མུ་ཛཱི་ཧ་ལ་ཧ་ལ་ཙཀྲ་མ་བྷྱོ། ཨོཾ་ཏི་ཤི་ཏི་ཤིག་ཤིན་ཏིང་མ་མོ་བྷྱོ། ཨོཾ་མུ་ཏི་པྲ་མ་གཟེར་ན་གཟེར་ན་བྷྱོ། ཤིག་ཤིག་མ་མོ་དགྲ་ལ་བྷྱོ། ཨོཾ་རོ་ཟ་ཤིག་ཤིག་ཏི་སྒ་རྦད་རྦད་བྷྱོ། ཛ་ཛ་ས་མུན་ཛ། རག་ཤ་དུན་དུན་ལི་ལི། གྲཾ་གྲཾ་ཛ། རི་ལུངས་རྨུགས། ས་མ་ཡཱ། འགིལ་འགིལ་ཛ། ས་མ་ཡ་ཏྲི་རུ་ལུ་ཁ་ཐུན་སྨ་ར་ཀེ་ཛ། གང་དུ་ཛ་ཡ་རུ་བས་ཤ་ཁྲག་ལ་དུ་ལ་ཛ་ཏི་ཤ་ཤ་ཕཊ། ཛ་ཛ་ཀྲི་ཟད་ཀྲི་ཟད་གྲི་རི་ལུ་གཾ། ཚལ་དུམ་བྷྱོ། ཙིཏྟ་ཁྲག་དུག་ཤ་ན་བྷྱོ། ཀྲུག་པ་ར་ལ་ཤ་ཡ། རུ་པ་ཏི་ཤ་དུ་ཁྲག་ལ་ཤ་ཤ་ཟབ་ལ་བྷྱོ། བཛྲ་ཀ་རུན་ཚུར་ཆོད་རྦད། ཤིང་ཤིང་ཧུབ་ཐུཾ་གཞུང་ཀས་ཕཊ་རྦད་ཛ་ཛ། རག་ཤ་དུན་ཕུར་འདྲི་དུ་རག་ཤ་རྦད་རྦད། རག་ཤ་ཁ་ལ་དུན་ཏྲི་ཚུབ་པ་ལི་ཀ་ཤ་ཀ །རག་ཕུད་ཏྲག་ཕཊ། རྦ་ན་རྦ་ན་ཕཊ། ཛ་ཛ་ཕཊ་ཕཊ་རྦད་རྦད། རགྴ་
གྲི་ར་ཏུ་སི་ནན། དུ་ཏྲི་མོ་རུབ་པ་ཤ་ཁྲག་ལ་རུབ། སུ་ནི་ཁྲག་དུ་དུ་ཛ། ཁ་རགྴ་སྙིང་ལས་ཡང་ཙིབ་མ་ལ་ཤ །རོ་ལ་ཁྲག་འཐུང་ཐུཾ་ཛ། ཙི་བ་རཀྴ་རྦད་རྦད། གདུག་པའི་ལྷ་མོ་མི་སྲིན་གྱིས་བསད་པའི་ལེའུ་སྟེ་བརྒྱ་སོ་བརྒྱད་པའོ།། །།གི་ལིང་ག་ལཾ་ཏི་ས་ཤ་ལང་ལང་སུ་ར་ཏོ། བཾ་ནི་ར་ཏི་ཡ་གར་བྷ་ཡ། གུར་བ་ས་ཏི་ཡ་པེ་ཧ་མ་ཤན་ཏིང་ནོར་རྡིང་ཡིད། ས་མུན་ཏྲི་ཕཊ་ཕཊ། རབ་ཤིང་ཀས་ནི་ཀི་ན་ཡ་དང་། སྣི་སྣི་ལ་གུཾ་གུཾ་དུན་ཏི་ཡ། གུཾ་གུཾ། པྲ་ཏི་ཡ་གུཾ་གུཾ། པ་ཡ་ཏ་ན། ཨོཾ་ཤི་ལ་དན་ཏིང་ཨོཾ། ཀྲས་ལང་པས་མི་ཨོཾ། ཨོཾ་ཨོཾ་ཨོཾ། ཧཱུཾ་ཧཱུཾ། ཛྭ་ལ་ཛྭ་ལ་སརྦ་ཛྭ་ལ་ཀི་ཏ་མཱ་རཱ་ཡཱ་བཾ། ནི་རྟི་ཡེ། ཨེ་དན་དན། མང་གྲི་བ་ལང་། ཧ་ར་ཧ་ར། བ་ར་འདྲེ། ཧྲི་པ་ཆིངས་ཤིག །ཀྲང་ཅིང་ཧར་སྭཱ་ཧཱ། ཉུང་དཀར་དང་ཆུ་ལ་བརྒྱ་རྩ་བརྒྱད་བཟླས་ཏེ་གཏོར་རོ། །ཨོཾ་ཧ་ར་ཧ་ར་བྲ་མ་ཡཱ། ཙང་ཤིག་ཙང་ཤིག་ཧ་ར་སྭཱ་ཧཱ། མ་མོ་སྣང་སྲིད་དབང་དུ་བསྡུ་བའི་ལེའུ་སྟེ་བརྒྱ་སོ་དགུ་པའོ།། །།ཧཱུཾ། ཕོ་བྲང་རིན་ཆེན་གཞལ་ཡས་ཁང་། །ཕོ་བྲང་འབྱམས་ཀླས་སྤྲིན་གཏིབས་ཤིང་། །ཕོ་བྲང་རིན་ཆེན་གཞལ་ཡས་ཁང་། །རིན་ཆེན་མཛེས་པའི་རྒྱན་ལྷབ་ལྷུབ། །ཤར་ལྷོ་ནུབ་བྱང་སྒོ་བཞི་ནས། །འཇིགས་པ་བཞི་ཡིས་སྒོ་བཀག་ཀྱང་། །མགྱོགས་མ་བཞི་ཡིས་སྒོ་ཕྱེ་ཞིག །ཁམ་བྲུམ་བྲ་བེ་ཤ་ཤག །ཅེས་བརྗོད་ལ་སྒོ་དབྱེའོ། །ཧཱུཾ། ཡང་དག་གསང་བའི་དཀྱིལ་འཁོར་དུ། །སངས་རྒྱས་བདེ་ཆེན་ཡང་དག་པ། །ཡབ་ཡུམ་སྲས་དང་འཁོར་བཅས་རྣམས། །རིགས་ཀྱི་ལྷར་ནི་རྣམ་རྟོགས་ཤིང་། །གཉིས་མེད་དོན་གྱིས་འདྲེལ་བ་ལ། །མི་ཕྱེད་དད་པས་ཕྱག་འཚལ་ལོ། །ཧཱུཾ། ཡང་དག་གསང་བའི་དཀྱིལ་འཁོར་དུ། །རྡོ་རྗེ་སློབ་དཔོན་ཡེ་ཤེས་ལྷར། །བཀའ་དྲིན་རྗེས་སུ་དྲན་པའི་ཕྱིར། །གསང་བའི་ཚུལ་གྱིས་ཕྱག་འཚལ་ལོ། །ཧཱུཾ། ཡང་དག་གསང་བའི་དཀྱིལ་འཁོར་དུ། །དམ་ཚིག་གཟུང་གིས་འདྲེལ་པའི་མཆེད། །མ་བུའི་འདུ་ཤེས་ཉེར་གཞག་ནས། །གདུང་བའི་ཚུལ་གྱིས་ཕྱག་འཚལ་ལོ། །ཨ་ལ་ལ་ཧོ། ཞེས་ཕྱག་བྱའོ། །ཧཱུཾ། དགོངས་ཤིག་ཡེ་ཤེས་མངོན་རྫོགས་ལྷ། །ཡབ་ཡུམ་འཁོར་དང་བཅས་པ་རྣམས། །བདག་ཅག་རྣལ་འབྱོར་སྒྲུབ་པ་ལ། །དགྱེས་ཤིང་ཡེ་ཤེས་མདངས་ཕྱུང་ཞིག །བྱམས་པ་ཕྱོགས་མེད་སྤྱན་གྱིས་
གཟིགས། །འཁོར་བའི་སེམས་ཅན་བདག་ཅག་རྣམས། །མ་རིག་འཁྲུལ་པའི་རང་དབང་གིས། །གཟུང་འཛིན་གཉིས་སུ་བཟུང་བས་ནོངས། །སྡིག་ལ་མ་འཛེམ་མི་དགེ་སྣ་ཚོགས་སྤྱད། །གྲིབ་མ་ངན་པས་ན་བུན་བཞིན་དུ་གཏིབས་ཤིང་མཆིས། །མི་གསང་མི་འཆབ་ཡེ་ཤེས་ལྷ་ལ་མཐོལ། །ཡེ་ཤེས་ལྷ་ཡིས་བཟོད་པར་བཞེས། །ཨ་ལ་ལ་ཧོ། བརྡའ་སྒོ་དབྱེ་ཞིང་བཤགས་པ་བྱེད་པའི་ལེའུ་སྟེ་བརྒྱ་བཞི་བཅུ་པའོ།། །།ཧཱུཾ། རིན་ཆེན་ཨིནྡྲ་ནཱི་ལའི་བུམ་པ་རུ། །འབྲུ་བཅུད་སྟོང་ལས་སྦྱར་བའི་འཛའ་གད་དཔའ་བོས་གཏམས། །གཉིས་མེད་བྱང་ཆུབ་སེམས་ཀྱི་རང་བཞིན་ཏེ། །འཐུངས་པས་ཚིམས་པའི་ལོངས་སྤྱོད་ཆེན་པོ་འདི། །མཆོད་ནི་ཡེ་ཤེས་ལྷ་ལ་མཆོད། །སྐོང་ནི་མ་མོའི་ཐུགས་དམ་སྐོང་། །འབུལ་ནི་སློབ་དཔོན་ལྷ་ལ་འབུལ། །ཨ་ལ་ལ་སྟེ་བཞེས་སུ་གསོལ་ལོ། །མདུན་དུ་དྲང་ངོ་། །ཧཱུཾ། གཞོང་པ་ཟླ་གམ་དཀྱིལ་འཁོར་དུ། །ཚེ་དང་གལ་གཉིས་མཐུན་བསྡེབས་སོ། །དཀར་གྱི་ཐིག་དགྱེ་དམར་གྱི་གུར་ཕུབ་པ། །ལོངས་སྤྱོད་མཆོད་པ་ཆེན་པོ་འདིས། །འཕགས་པ་མཆོད་ལ་མ་མོ་སྐོངས། །ཨ་ལ་ལ་ཧོ། རཀ་ཏ་ཁྲག་གི་རྒྱ་མཚོའི་ཐིག་ལེ་དང་། །སྣང་སྲིད་ཁྲག་གི་རྦ་རླབས་ཆི་ལི་ལི། །མཁའ་དབྱིངས་རྒྱལ་བ་མ་ལུས་མཆོད་པ་དང་། །འཕགས་པ་མཆོད་པས་མ་མོའི་ཐུགས་དམ་སྐོངས་། །ཨ་ལ་ལ་བརྗོད་ལ་དྲང་ངོ་། །ཛ་གད་གཏོར་མ་དྲང་བའི་ལེའུ་སྟེ་བརྒྱ་ཞེ་གཅིག་པའོ།། །།རྡོ་རྗེ་རྒྱལ་ཐེབས་ཡབ་ཡུམ་ལངས་ལ། རྡོ་རྗེ་རྒྱལ་པོ་ལ་རྒྱན་ཆས་གསོལ་བ་འདི་སྐད་དོ། །ཧཱུཾ། གསང་བ་ཆེན་པོའི་དཀྱིལ་འཁོར་དུ། །རང་བཞིན་མཚན་མའི་དུས་ནི་འདི་ཉིད་དུ། །རྡོ་རྗེ་རྒྱལ་པོར་མངའ་གསོལ་ལོ། །ཐེག་པ་ཀུན་ལས་དཔགས་པ་དང་། །མ་མོ་དབང་དུ་བསྡུ་བའི་ཕྱིར། །ཤུན་ཆེན་རལ་ཀ་འདི་གསོལ་བས། །མི་འཁོར་ཆོས་ཉིད་རྒྱན་དུ་ཤོག །ཨོཾ་གུ་ཡ་སིདྡྷི་ཧཱུཾ། ཞེས་སྐུ་ལ་གསོལ་ལོ། །དབུ་རྒྱན་མཆོག་གིས་མངའ་གསོལ་བས། །ཐེག་པ་ཡོངས་སུ་དཔགས་པ་དང་། །སྲིད་གསུམ་དབང་དུ་བསྡུ་བའི་ཕྱིར། །སྲིད་པའི་སྤྱི་བླུགས་དབུ་ཞྭ་འདི་གསོལ་བས། །སྲིད་པའི་དབང་ཅན་རྣམས་ལ་དབང་སྒྱུར་ཤོག །ཨོཾ་གུ་ཡ་ཧེ་ཧེ། ཞེས་བརྗོད་པས་དབུ་ལ་གསོལ་ལོ། །དེ་ནས་ཞིང་གི་སོར་ཕྲེང་དབུལ་བ་འདི་སྐད་དོ། །
ཕྲེང་བ་ཆེན་པོས་མངའ་གསོལ་ལོ། །ཐེག་པ་ཡོངས་ལ་འཕགས་པ་དང་། །མ་མོའི་སྲོག་སྙིང་དྲང་བའི་ཕྱིར། །ཞིང་གི་སོར་ཕྲེང་འདི་ཕུལ་བས། །མ་མོ་རྣམས་ལ་དབང་སྒྱུར་ཤོག །ཨོཾ་གུ་ཡ་མ་མ་རཀྟ་ཧཱུཾ། ཕྱག་ཏུ་དབུལ་ལོ། །ཕྱག་རྒྱ་ཆེན་པོས་མངའ་གསོལ་ལོ། །བདུད་དང་མུ་སྟེགས་འདུལ་བ་དང་། །མ་མོ་གཡབ་ཀྱིས་གདབ་པའི་ཕྱིར། །རྩེ་ལྔ་འབར་བའི་ཕྱག་རྒྱ་འདི་རྣམས་ལ། །བདུད་དང་མུ་སྟེགས་དབང་དུ་སྡུས། །ཨོཾ་གུ་ཡ་ཧ་ཧ། ཞེས་བརྗོད་ལ་འབུལ་ལོ། །སྟག་ལྤགས་གཡང་གཞིས་མངའ་གསོལ་ལོ། །བདུད་བཞི་རྡུལ་དུ་རློག་པ་དང་། །ཕྲིན་ལས་རྣམ་བཞི་སྒྲུབ་པའི་ཕྱིར། །སྟག་ལྤགས་གཡང་གཞི་འདི་གསོལ་བས། །དཔལ་རྟུལ་ཟ་བྱེད་རྒྱན་དང་ལྡན་པར་ཤོག །ཨོཾ་གུ་ཡ་བྱཱ་བྷྲ་ཧཱུཾ། ཞེས་བརྗོད་ལ་སྐུ་ལ་གསོལ་ལོ། །དེ་ནས་ཡུམ་ལ་རྒྱན་ཆས་གསོལ་ཏེ། གཙོ་བོ་ལས་དང་མཐུན་ནོ། །དེ་ནས་ལས་ཀྱི་ཀར་མས་རྡོ་རྗེ་རྒྱལ་ཐེབས་ལ་རྒྱན་ཆས་གསོལ་ཏེ་འདི་སྐད་དོ། །ཧཱུཾ། བཀའ་གསང་དམ་པའི་གནས་མཆོག་འདིར། །རྡོ་རྗེ་རྒྱལ་ཐེབས་གསན་ཅིང་དགོངས་སུ་གསོལ། །རྡོ་རྗེ་རྒྱལ་པོ་བསྙེལ་ཅིང་བསྙེལ་བའི་ཚེ། །ཐུགས་དམ་འཕྲོ་ནས་གཟུང་ནས་བསྐུལ་བའི་ཕྱིར། །རྒྱན་ཆས་གསུམ་གྱིས་མངའ་གསོལ་ལོ། །ཞྭ་དཀར་ཚིལ་ཆེན་དབུ་རྒྱན་དང་། །མཆོག་གི་ཕུར་བུ་བཅིང་བ་དང་། །དུང་ཆེན་ཕྲེང་བས་དབང་བསྐུར་ཏེ། །རྒྱན་ཆས་གསུམ་གྱིས་དབང་བསྐུར་བས། །བདུད་དང་མུ་སྟེགས་རྡུལ་དུ་རློག །དེ་ནས་མཆེད་བྱིངས་ལ་མཚན་མ་གདབ་པ་འདི་སྐད་དོ། །དུར་ཁྲོད་ཆེན་པོའི་གནས་བརྒྱད་དང་། །ཡེ་ཤེས་ཆེན་པོའི་ཀློང་དཀྱིལ་ནས། །དཔལ་ཆེན་ཀུན་དང་གཅིག་པ་དང་། །མ་མོ་གཡབ་ཀྱིས་གདབ་པ་དང་། །མཁའ་འགྲོ་དབང་དུ་བསྡུ་བའི་ཕྱིར། །ཐལ་ཆེན་མཚན་མ་དཔྲལ་བར་གདབ། །མཚན་མ་དཔྲལ་བར་མི་གདབ་ཏུ། །དཔལ་ཆེན་ཀུན་དང་རང་རྟགས་གཅིག །པདྨའི་རཀྟའི་མཚན་མ་འདི། །སྨིན་མཚམས་བར་དུ་ཐིག་ལེར་དགོད། །ཞག་གི་སོར་རིས་ཁ་འགྲམ་ལ། །བདུད་རྩི་རཀྟ་ཐུགས་ཀ་ལ། །ཨོཾ་ཀ་ར་སིང་སིང་ཧ། ཨོཾ་དཀར་སིང་དཀར་སིང་ཧ། ཞེས་ཀུན་གྱིས་དིར་རི་རི་བཟླས་ཤིང་ཀུན་ལ་གདབ་པོ། །རྡོ་རྗེ་རྒྱལ་པོ་རྒྱལ་ཐེབས་མངའ་གསོལ་ཞིང་མཆེད་ལ་མཚན་མ་གདབ་པའི་ལེའུ་སྟེ་བརྒྱ་བཞི་བཅུ་ཞེ་གཉིས་པའོ།། །།བསྟན་པ་བསྲུང་བའི་མན་ངག་ཐུགས་ཀྱི་ཡང་སྙིང་མ་མོ་འབུམ་ཐིག་འདི། རྩ་བའི་རྒྱུད་ལ་ལེའུ་ཞེ་བརྒྱད། ཕྱི་མ་ལ་ལེའུ་དགུ་བཅུ་གོ་གཉིས། འཕྱོང་གི་ལེའུ་གཉིས་ཏེ་བསྡོམས་པས་བརྒྱ་བཞི་བཅུ་ཞེ་གཉིས་པ་རྫོགས་སོ།། །།