རྒྱུད་ཀྱི་རྒྱལ་པོ་རྡོ་རྗེ་མཁའ་འགྲོའི་རྒྱུད་ལས་སྲིད་པ་ཕྲ་མེན་རྒྱ་མཚོས་བསྡུས་པ།
དཔལ་ཆེ་མཆོག་ཧེ་རུ་ཀ་ལ་ཕྱག་འཚལ་ལོ། །འདས་དང་མ་བྱོན་དུས་ཉིད་ན། །ལྕང་ལོ་ཅན་གྱི་ཕོ་བྲང་དུ། །འཇིགས་བྱེད་ཆེན་པོའི་སྐུ་ཅིར་ཡང་སྣང་བ་གནོད་སྦྱིན་འདུལ་བའི་རྩེ་ལ། དུར་ཁྲོད་ཀྱི་རྒྱན་སྣ་ཚོགས་དང་ལྡན་ཏེ། ཡེ་ཤེས་དགུའི་དབུ་དང་། སྟོང་པ་བཅོ་བརྒྱད་ཀྱི་ཕྱག་དང་ཐར་པ་བརྒྱད་ཀྱི་ཞབས་སུ་ལྡན་ཏེ། གྱད་དང་བརྗིད་པའི་ཚུལ་དུ་བཞུགས་སོ། །གནོད་སྦྱིན་ལྷའི་འདུན་ས་བྱི་ཤོའི་འཁོར་ལ། བཀའ་སྡོད་ཆེན་པོ། རྒྱ་གྲམ་འབར་བའི་གདན་ལ་མི་འཇིགས་པ་གསུམ་དང་བཅས་ནས། མི་ལྡོན་པར་རྟོག་པའི་ཚུལ་གྱིས། བསྡུ་བ་ཆེན་པོ་གཞན་དོན་དུ་མཛད་པའོ། །མཁའ་ལྔ་དབུས་ཀྱི་གཏིང་ཁུང་དུ་བསྡུས་ཏེ། འབར་བའི་རྭ་ལྔ་ལ། མུ་ཏིག་འབར་བས་དྲིལ་བ། རླུང་ནག་ཟླ་གམ་ལ། སྨིན་པ་ཆེན་པོས་བརྒྱན་པ་ཁྱམས་བཞི་འཁོར་ལོའི་ཚུལ་དུ་དབྱིངས་སུ་དྲིལ་བ། སྤངས་པ་ཐམས་ཅད་ཀྱི་ཕོ་བྲང་། ཐུན་མོང་མ་ཡིན་པར་འདྲེལ་ཏེ་བདེ་བ་ཆེན་པོའི་གནས་པའོ། །སྤྲུལ་པའི་ཆ་བྱད་མང་པོ་དང་བཅས་པ། མི་འགྱུར་བ་ཡབ་ཡུམ་ལ། ཤུགས་འགྲོ་ལྔའི་མདངས་ཀྱིས་བརྒྱན། །མི་འགྱུར་ཐིག་ལེའི་འོད་ཀྱིས་མཛེས། །རྡོ་རྗེ་འབར་བའི་བཞི་རུ་ལྡན། །ཤེས་པ་བརྒྱད་ཀྱི་རྟེན་དུ་གནས། །བཞད་པར་བྱེད་པའི་འོད་དུ་འབར། །དྭངས་མ་ཡུལ་གྱི་མཁའ་འགྲོ་རྣམས། །ཉེ་བའི་འཁོར་དུ་གནས་པའོ། །བསྐྱེད་དང་རྫོགས་པའི་མཁའ་འགྲོ་ནི། །བསྐྱོད་དང་སྨིན་པས་འདེགས་པར་བྱེད། །ཟ་བྱེད་བདུན་གྱི་དཀྱིལ་འཁོར་ལ། །སྐུ་གསུང་ཐུགས་ཀྱི་མཐའ་བརྒྱ་ཅན། །བདུད་རྩི་བཅུད་ཀྱི་མཁའ་འགྲོ་དྲུག །རྩེ་དང་སྐྱོབ་པ་བརྒྱད་དུ་ལྡན། །ལས་བྱེད་བཅུ་གཉིས་བརྒྱད་ཀྱིས་བསྐོར། །སྐུ་ཡི་མ་དང་གསུང་གི་སྲིང་། །ཐུགས་ནི་
ཆོ་འཕྲུལ་ལྡན་པའོ། །བཤད་པ་བཞི་གཉིས་དུས་བཞིར་བཅས། །ཚངས་ཆེན་ལྷ་ཡི་ཚུལ་ཁྲིམས་ཅན། །གནམ་གྱིང་དཀར་པོ་ཐུགས་རྗེ་ཅན། །བརྒྱ་བྱིན་སེར་སྐྱ་ཡོན་ཏན་མཛོད། །བྷྲིང་གི་རི་ཏི་མཚན་བཞིར་ལྡན། །འཁོར་ལོ་ཁྱབ་འཇུག་སྤུ་གྲི་བསྣམས། །སྟོབས་བཟང་ཆེན་པོ་གནོད་སྦྱིན་འཇོམས། །སྐོས་རྗེ་འཕྲུལ་གྱི་མེ་ལོང་འཕྱར། །བདུད་ཀྱི་རྒྱལ་པོ་སྲིད་པ་ཤིག །འབྱུང་རིངས་སྤུན་དགུའི་ཆོ་འཕྲུལ་འགྱེད། །ཕག་ཆེན་པོ་ནི་བརྟུལ་ཞུགས་ལྡན། །ཕུང་བྱེད་བདུན་གྱིས་སྲིང་མོ་འདུལ། །ནོར་བདག་ཆེན་པོ་ནེའུ་ལེ་བསྣམས། །རྒྱལ་ཆེན་བཞི་ནི་དམག་དཔོན་མཛོད། །གཤིན་རྗེ་རཱུ་ཏྲ་འཁོར་རྣམས་བསྡུས། །གིང་དང་བསེ་ཡི་སྐྱེ་ས་བསྟན། །བདུད་དང་གཤིན་རྗེའི་མ་རུ་ཙེ། །དེ་ལྟ་བུ་ཡི་འཁོར་ཚོགས་དང་། །རང་བཞིན་ཐབས་ཅིག་བཞུགས་པའི་ཚེ། །རང་བཞིན་འཁོར་ནི་ཤུགས་ཀྱིས་འདུལ། །ལས་ཀྱི་འཁོར་ནི་སྤྲུལ་པས་འདུལ། །སྲུང་བྱེད་འཁོར་ནི་ཐབས་ཀྱིས་འདུལ། །སྒྲོལ་བྱེད་འཁོར་ནི་མཛད་པས་འདུལ། །ཐབས་ཀྱི་འཁོར་ནི་རོལ་པས་འདུལ། །དེ་ཡི་འདུལ་ཐབས་འདི་ལྟ་སྟེ། །སྐྱེ་མེད་མི་གཡོ་ཆོས་ཀྱི་དབྱིངས། །རང་བཞིན་ཤུགས་ཀྱིས་འདུལ་ཐབས་སོ། །སྣང་སྲིད་རིག་པའི་ཆོ་འཕྲུལ་གྱིས། །སྙིགས་མའི་མ་མོ་འཇིག་པར་འགྱུར། །གཉིས་མེད་སྲས་ཀྱིས་རོལ་པ་ཡིས། །སྐུ་གསུང་ཐུགས་ཀྱི་མ་མོ་འཇིག །རིག་པ་གར་ཐབས་སྣ་ཚོགས་ཀྱི། །བཤན་པའི་དཔུང་རྣམས་འཇོམས་པའི་དཔལ། །མངོན་སྤྱོད་རིག་པའི་བརྟུལ་ཞུགས་ཀྱིས། །སྲིད་པའི་ཕོ་རྒྱུད་མཚན་མར་འཇོམས། །འདུལ་ཐབས་ལྔ་ལས་ཡེ་ཤེས་ཤར། །གསལ་ལ་མི་རྟོག་ཡེ་ཤེས་དང་། །མཉམ་ལ་མ་འདྲེས་ཡེ་ཤེས་དང་། །བྱེ་བྲག་འབྱེད་པའི་ཡེ་ཤེས་དང་། །ཕྲིན་ལས་རྫོགས་པའི་ཡེ་ཤེས་དང་། །ལྷུན་གྱིས་གྲུབ་པའི་ཡེ་ཤེས་དང་། །འཁོར་ལས་འཕྲུལ་པ་འདི་ལྟ་སྟེ། །དང་པོ་ལྷ་དང་གཉིས་པ་མི། །
གསུམ་པ་ཡི་དྭགས་ཡིན་པ་སྟེ། །བཞི་པ་བྱོལ་སོང་གནས་རིགས་ལ། །ལྔ་པ་དམྱལ་བའི་འཁྲུལ་འཁོར་ལའོ། །རྟོགས་པའི་ས་རྣམས་འདི་ལྟ་སྟེ། །ཐ་མ་བསྒྲལ་པས་དང་པོ་སྟེ། །ཀུན་ཏུ་འོད་དུ་ཤར་བའོ། །བཞི་པ་གཉིས་པའི་དོན་དུའོ། །པདྨ་ཅན་དུ་སྣང་བའོ། །གསུམ་པ་གནས་སུ་གྲོལ་བའོ། །འཁོར་ལོ་ཚོགས་ཆེན་དོན་དུ་ལྡན། །གཉིས་པ་དག་པ་བཞི་པ་ལ། །ཡེ་ཤེས་བླ་མ་ནོན་པའོ། །གཅིག་ལ་ལྔ་ཡི་དོན་དུ་སྟེ། །རྫོགས་པའི་སྤྱི་གཅིག་དོན་དུ་ཤར། །འཁོར་ལྔ་སྨིན་པའི་འབྲས་བུ་ལྔ། །དང་པོ་ས་ཡི་འོད་ཡིན་ཏེ། །གཉིས་པ་མེ་ཡི་འོད་དུ་འབར། །གསུམ་པ་ཆུ་ཡི་མདངས་སུ་ལྡན། །བཞི་པ་སྤྱོད་པའི་ཐབས་ཡིན་ཏེ། །ལྔ་པ་ནམ་མཁའི་ཡེ་ཤེས་སོ། །དང་པོ་རྩ་ལ་གཉིས་པ་ཁྲག །གསུམ་པ་དབུགས་ལ་བཞི་པ་དྲོད། །ལྔ་པ་བཀྲག་གི་ངོ་བོའོ། །འཁོར་གྱིས་བསྡུ་བ་འདི་ལྟ་སྟེ། །དཔལ་ཆེན་ཐུགས་ཀྱི་ཐིག་ལེ་རྫོགས། །ཧཱུཾ་ནི་སྙིང་རྗེ་ཆེན་པོས་ཏེ། །འ་ནི་བྱམས་པའི་རང་བཞིན་ལ། །ཧ་ནི་དགའ་བ་ཆེན་པོ་སྟེ། །ཟླ་ཚེས་བཏང་སྙོམས་བདག་ཉིད་བསམ། །ང་ནི་བརྩོན་འགྲུས་འབྱུང་བ་ལ། །ཨ་ནི་ཤེས་རབ་ཆེན་པོའི་དོན། །མ་ཞར་བསྡུས་པར་མྱ་ངན་བཟླས། །མི་དམིགས་ཆོས་ཀྱི་དབྱིངས་སུ་ཐིམ། །རྡོ་རྗེ་མཁའ་འགྲོའི་རྒྱུད་ལས། གླེང་གཞི་དང་། འཁོར་མྱ་ངན་ལས་བཟླ་བའི་ལེའུ་སྟེ་དང་པོའོ།། །།རྒྱལ་མཚན་རིམ་པ་གང་ལགས་པ། །ངོ་མཚར་ལྷ་ལ་བདག་ཉན་འཚལ། །རྫོགས་སངས་རྒྱས་ཀྱིས་བཀའ་སྩལ་པ། །དབེན་ལ་གཉན་པའི་ཆུ་ཀླུང་དུ། །མ་མོ་འདུ་བའི་དུར་ཁྲོད་དུ། །གནོད་སྦྱིན་འདུ་བའི་མདུང་རྩེ་དང་། །སྲིན་མོ་འདུ་བའི་སྦར་ཤད་དང་། །སྤེལ་དང་འགུགས་དང་དབྲོག་པ་དང་། །མནན་དང་སྦ་བ་དེ་བཞིན་ནོ། །མཆོད་དང་བསྐང་བའི་རྫས་རྣམས་དང་། །བུམ་ལྔ་རྟེན་དུ་བཅས་པས་ཏེ། །ཁྲུ་བཞི་སྦྱངས་པའི་མཎྜལ་དུ། །དབང་གི་སྐུད་པས་ཕྱེ་ནས་ནི། །སྡུལ་བྱེད་ལྔ་དང་ལྡན་པར་བྱ། །དབུས་
སུ་ཟླ་གམ་སྒོ་བཞི་ལ། །དབང་གི་དཀྱིལ་འཁོར་གསུམ་གྱིས་བརྒྱན། །པད་བཞི་འཁོར་ལོ་རྩིབས་བརྒྱད་ལྡན། །སྣམ་བུ་སྒོ་ཡིས་རྣམ་པར་མཛེས། །ཆེ་མཆོག་ཡབ་ཡུམ་གསལ་བྱས་ཏེ། །ཐུགས་ལས་བུམ་པ་བྷྲཱུཾ་གྱིས་བརླབས། །ཉི་ཟླའི་སྟེང་དུ་ལྷ་ལྔ་དགོད། །སྒོ་བཞིར་གྲུ་འདེགས་སྙིང་པོ་དགོད། །རྒྱལ་མོ་ལྔ་ཡི་སྙིང་པོ་བསྐྱེད། །ལྷ་མོ་ལྔ་ཡི་དཀྱིལ་འཁོར་ལ། །སྒོ་མ་བཞི་ཡི་མཛེས་པར་བསྐྱེད། །གཙོ་བོ་ཐུགས་ལས་འོད་འཕྲོས་པས། །བསྐུལ་བས་ཛ་དང་ནྲྀ་རུ་དྲངས། །ཡབ་ཡུམ་བསྙེན་པ་མཁའ་རུ་སྤྲོས། །བསྣོལ་མར་དྲངས་པས་འོད་དུ་གསལ། །ཡབ་ལ་རིགས་ལྔ་དབུ་ལ་རྫོགས། །ཡུམ་ལྔ་མཁའ་ལ་ཤར་བའོ། །དཀྱིལ་འཁོར་ཞལ་ནི་བསྒྱུར་བྱས་ལ། །ཞི་བ་ནུབ་སྒོ་ཤར་དུ་སྟེ། །ཐིག་བཞི་ལྡན་པའི་དགུར་རྫོགས་པ། །པད་བརྒྱད་མུ་ཁྱུད་རབ་མཛེས་པའོ། ། དེ་ཚེ་ཕྱོགས་བཞིར་བསྐྱེད་བྱ་བ། །ཡེ་ཤེས་གཏུམ་མོ་བཞི་པོ་དང་། །བཞད་པའི་རྒྱལ་མོ་བཞི་སོགས་ལ། །ཟུར་བཞི་དགྱེས་སྡེ་རབ་ཏུ་བསམ། །སྒོ་བཞི་གྲུ་འདེགས་བསམ་བྱས་ཏེ། །འཁོར་གྱི་མ་མོ་བཅུ་དྲུག་དབུས། །ཡུམ་གྱི་གནམ་ཞལ་གདངས་པ་རུ། །ཐིག་ལེ་བཅུད་ཀྱི་ཐབས་མཚམས་སུ། །ཉི་ཟླ་འབར་བའི་ག་འུ་རུ། །ནྲྀ་ཡི་རྩེ་ལ་ཧ་ལྔ་བསམ། །དེ་ནི་རྒྱལ་མོ་ལྔ་ཡི་རྒྱ། །དེ་སྟེང་རྟ་མགྲིན་དབང་གི་རྒྱ། །རྡོ་རྗེ་རྒྱ་གྲམ་འཕར་བའི་རྒྱ། །རྭ་ལ་ཉི་ཟླ་འབར་བའི་རྒྱ། །དེ་ནས་སྔགས་ཀྱི་ཕོ་ཉ་རྒྱ། །ཡབ་ཡུམ་སྔགས་ལ་ལས་སྔགས་གདགས། །ཨོཾ་ཤྲཱི་ཧེ་རུ་ཀ་ཀྲོ་དྷཱི་ཤྭ་རཱི་ཕཊ། ནྲྀ་ཨཱ་ཡུ་ཤ་ཛ། གཙོ་བོའི་ཐུགས་ལས་འོད་འཕྲོས་པས། །བཅུ་དྲུག་མ་མོ་རྒྱུད་བསྐུལ་ཏེ། །ཚེ་རྟེན་ནྲྀ་རུ་དྲངས་ནས་སུ། །གཙོ་བོའི་ཐུགས་ལས་བསྡུས་བྱས་པས། །རྡོ་རྗེའི་ལམ་བྱུང་གནམ་ཞལ་མཁའ། །རྟ་མགྲིན་ཞལ་ནས་ག་འུར་འཁྱིལ། །ཚིག་གི་ཕོ་ཉ་དགུག་བྱས་པ། །ཧཱུཾ་ཆེ་ཞེས་ཆེན་མོ་གསང་བའི་ཡུམ། །ཐིག་ལེ་སྦྱོར་བའི་ཡུམ་གཅིག་མ། །དཀར་
མོ་ཉི་ཟླ་ཐོད་ཕྲེང་ཅན། །གྲུ་གསུམ་འབར་བའི་མིག་གཅིག་མ། །གཡུ་ཡི་རལ་པས་སྲིད་པ་སྒྲོལ། །ཆགས་པའི་ཕྱག་གིས་པདྨ་འཛིན། །རིན་ཆེན་མཆེ་མ་སྐྱེ་འགྲོའི་གསོས། །ཙིཏྟ་ཞགས་པས་མུ་སྟེགས་སྒྲོལ། །རྫུ་འཕྲུལ་ཤུགས་ཀྱིས་ཚེ་དྲོངས་ཤིག །དེ་ནས་སྤེལ་བར་བྱ་སྟེ། གྷྲི་པ་མུ་རན་ཧཱུཾ་ཨཱ་ཡུ་ཥེ་ཧཱུཾ་ཨ་བྷི་ཤ་སནྟི་ཨཱ་ཡུ་ཥེ་ཧཱུཾ་ཨ་བི་ཡང་ལང་ཏི་ཨཱ་ཡུ་ཥེ་ཧཱུཾ་ཨ། མ་ཧཱ་ལང་ཏི་ཧཱུཾ་ཨཱ་ཡུ་ཥེ་ཧཱུཾ་ཨ། ཆེ་མཆོག་ཀུན་གྱི་འཕྲོ་འདུ་ཡིས། །ག་འུ་རྒྱལ་མོ་ལྔ་བསྐུལ་བས། །འཕྲོ་འདུ་ཉི་མའི་འོད་ལྟར་སྤེལ། །དེ་ནས་ཚེ་གནས་བྱ་བ་ནི། །རྒྱལ་མོ་ལྔ་པོ་རྟེན་ལ་བསྡུ། །ཧཱུཾ་མཁའ་མཉམ་པ་ཡི་ཡེ་ཤེས་ནི། །ཆོས་དབྱིངས་ཉི་མ་ལྟ་བུ་ལ། །འཕྲོ་འདུ་ཡེ་ཤེས་ལྔ་རུ་ཤར། །བག་ཆགས་ལྔ་ཡི་རྒྱུད་སྦྱང་ནས། །འབྱུང་བ་ལྔ་ཡི་བཅུད་བསྡུས་པས། །མི་འགྱུར་ཚེ་ཡི་དངོས་གྲུབ་ཐོབ། །བུམ་པ་བཤིག་ལ་ཚེ་དབང་བསྐུར། །གནོན་པོའི་སྔགས་ཀྱིས་དྲལ་བྱས་ལ། །སྨིན་མཚམས་སྦས་ལ་རྒྱ་ཡིས་གདབ། །འབྲང་རྒྱས་བཀྲ་ཤིས་གསལ་བྱས་ནས། །མཁའ་འགྲོ་ཚོགས་ཀྱི་གཏང་རག་གཏོང་། །རྡོ་རྗེ་མཁའ་འགྲོའི་རྒྱུད་ལས། རྒྱལ་པོ་བསྒྱུར་བའི་ལེའུ་སྟེ་གཉིས་པའོ།། །།ཕྲ་མེན་རྒྱ་མཚོས་ཡང་གསོལ་པ། །སྲིད་པ་རྒྱུད་ཀྱི་བྱུང་ཚུལ་དང་། །གྲུབ་པའི་དོན་ནི་འབྲས་བུ་གཉིས། །ངོ་མཚར་ལྷ་ལ་བདག་ཉན་འཚལ། །བཅུ་ཚོ་བཞི་རྫོགས་རྒྱལ་སོགས་དེ། །ལྷ་མོ་ཡོངས་འཁྱུད་བདེ་བ་མས། །བཀའ་དོན་གཏན་ཚིགས་གཏན་ལ་ཕབ། །མི་ནུབ་ཚེ་ཡི་གཏན་ཚིགས་དག །རྟོགས་པ་དོན་གྱི་ཆེ་བ་དང་། །ས་གཞི་ལྟ་བུ་གཅན་འཕྲང་དང་། །རྒྱལ་པོ་ལྟ་བུའི་བཀའ་ཉན་དང་། །མཛད་པ་ཐབས་ཀྱི་གར་ཐབས་དང་། །གསལ་བ་དོན་གྱི་དཀྱིལ་འཁོར་དང་། །ལྷུན་གྱིས་གྲུབ་པའི་བསྒྲུབ་པ་དང་། །མངོན་སྤྱོད་ལས་ཀྱི་མཐའ་རྒྱ་རྣམས། །ང་ཡི་གསང་རྒྱུད་ཆེན་པོའི་དོན། །གཞི་གཉིས་དོན་དུ་ངས་བསྟན་གྱིས། །འཁོར་གྱི་གཙོ་བོ་སེམས་གཏོད་ཅིག །བརྗོད་བྱ་རྗོད་བྱེད་ཐབས་ཚུལ་གྱིས། །
དགོས་དང་དགོས་པའི་བྱེ་བྲག་དང་། །འདྲེལ་བ་ཐབས་ཀྱི་གཏན་ཚིགས་རྣམས། །འདྲེལ་དོན་གཏན་ཚིགས་གཏན་ལ་ཕབ། །རྡོ་རྗེ་མཁའ་འགྲོའི་རྒྱུད་ལས། གླེང་སློང་བའི་ལེའུ་སྟེ་གསུམ་པའོ།། །།རྟོགས་པའི་དོན་ནི་འདི་ལྟ་སྟེ། །སྐྱེ་མེད་མི་གནས་གཟུང་འཛིན་བྲལ། །མ་སྐྱེས་ཕྱིར་ན་སྐྱེ་བ་མེད། །དུས་གསུམ་འཕོ་འགྱུར་མེད་པའི་དོན། །མི་གཡོ་སེམས་ཀྱི་བདག་ཉིད་ལ། །འཕོ་འགྱུར་མེད་པའི་རིག་པ་གསལ། །འབྱུང་ལྔ་སེམས་ཀྱི་སྤྲུལ་པ་ལ། །ཡེ་ཤེས་ལྔ་ཡི་མཐའ་རྒྱ་ཅན། །ཀུན་འདུས་སྣང་སྲིད་དབྱིངས་ལ་འདུས། །འཕོ་འགྱུར་དུས་གསུམ་ངང་དུ་གསལ། །སྣང་སྲིད་རང་ཤར་ཀུན་ཏུ་བཟང་། །ཡེ་ནས་མ་གཤེགས་རང་བྱུང་བ། །སྣང་སྲིད་ཕྱག་རྒྱ་ཆེན་པོའི་དོན། །ཀུན་བཟང་ཀློང་གི་དཀྱིལ་འཁོར་ལ། །རིག་པ་ཐུགས་ཀྱི་འོད་ཤར་བ། །མཛེས་པ་ཡུལ་གྱི་རྒྱན་གྱིས་བརྒྱན། །དོན་ཀུན་རྒྱལ་བའི་ཐུགས་ལས་རྫོགས། །རྒྱལ་བ་ཐུགས་རྗེ་གཉིས་མེད་དོན། །སྐྱེ་འགག་མ་ལུས་སེམས་ལ་གསལ། །མ་འགགས་རིག་པའི་ཡེ་ཤེས་ལ། །སྣོད་བཅུད་ཀུན་གྱི་འོད་འདུས་པ། །མཁའ་ལ་རླུང་གི་དོན་དུ་ཤར། །མ་ནི་ངང་གི་རང་བཞིན་ལ། །མོ་ནི་རིག་པའི་དོན་ཤར་བ། །རིག་པ་མ་འགགས་གཏན་ཚིགས་ཀྱིས། །སྐྱེ་མེད་དོན་ཀུན་གཏན་ལ་ཕབ། །སྐྱེ་མེད་དོན་དམ་ཚད་མ་ཡིས། །སྐྱེ་བའི་ཆོས་ཀུན་གཏན་ལ་ཕབ། །དབྱིངས་དང་ཡེ་ཤེས་རང་བཞིན་ལས། །སྣང་སྲིད་མ་མོར་རང་བཞིན་འཆར། །རྫུ་འཕྲུལ་ཤུགས་ཀྱི་མཁའ་འགྲོ་རྣམས། །རྒྱལ་སྲས་ཐུགས་ཀྱི་དཀྱིལ་ནས་བྱུང་། །རང་གིས་རང་ལ་བརྟགས་བྱས་པས། །སྣང་དང་སྟོང་པའི་དོན་དུ་རྟོགས། །རང་ཉིད་ཚད་མའི་རྒྱལ་པོ་སྟེ། །ཤར་བ་རང་ཉིད་སྟོང་པར་རྟོགས། །སྐྱེ་འགག་མེད་པའི་ངང་ཉིད་ལས། །རོལ་པའི་ཁྱད་པར་ཅིར་ཡང་སྣང་། །མཚན་མའི་གཟུང་འཛིན་སྣ་ཚོགས་ཀུན། །སྤྲིན་ཕུང་མཁའ་ལ་ཐིམ་པ་བཞིན། །མ་སྐྱེས་ཆོས་དབྱིངས་
ངང་དུ་ཐིམ། །ཐིམ་པའི་རྒྱལ་པོ་ཕྱག་རྒྱ་གསལ། །སྣང་སྲིད་རིག་པའི་རྒྱན་ཤེས་ན། །མ་མོ་ཀུན་གྱི་རེ་གནས་ཡིན། །སྲིད་པའི་མ་མོ་ཐམས་ཅད་དང་། །རྒྱལ་བའི་ཐུགས་ལས་བྱེ་བྲག་མེད། །དེ་ཡི་དོན་ནི་འདི་ལྟ་སྟེ། །མཁའ་ལ་འོད་དུ་གསལ་རྟོགས་ན། །འབྱུང་བ་ལྔ་ཡི་རྣམ་རྟོག་བྲལ། །མ་སྐྱེས་རིག་པའི་དོན་ལ་གསལ། །ཆོས་ཉིད་འཛིན་པའི་མཚན་མ་འཇིག །གསེར་གྱི་ཐིག་ལེ་དོན་གསལ་བ། །ཕྲ་མེན་རྒྱ་མཚོ་སྤྲོས་དང་བྲལ། །ཐིག་ལེ་ཆེན་པོའི་དོན་རྟོགས་ན། །ཐོད་ཕྲེང་མ་ཡི་འཛིན་རྟོག་བྲལ། །ཡེ་ཤེས་བཞི་ཡི་དོན་ཤར་བས། །ཁྲོས་པའི་དབང་ཆེན་མཚན་མ་འཇིག །རྣམ་པར་ཤེས་པའི་ངང་རྟོགས་ན། །མ་ཆེན་བཞི་ཡི་འཛིན་རྟོག་བྲལ། །དོན་དང་སེམས་ཅན་རིག་གྱུར་ན། །དགེ་སྡིག་མ་ཡི་མྱ་ངན་འདས། །སྐྱེད་པའི་དོན་ཉིད་རྟོགས་གྱུར་ན། །ཆགས་བྱེད་མ་ཡི་མཚན་མ་འཇིག །སྙོམས་བྱེད་བྱམས་པའི་ངང་གནས་པ། །ཆ་སྙོམས་མ་ཡི་མཚན་མ་འཇོམས། །ལས་བསླུ་མེད་པའི་དོན་གསལ་བས། །ནམ་མཁའི་རྒྱལ་མོའི་འཛིན་རྟོག་བྲལ། །དཔག་བསམ་ཤིང་གི་བཅུད་ཕྱུང་བས། །བུ་མོ་དྲུག་གི་གཏི་མུག་བསལ། །ཟངས་ཀྱི་སྦུ་གུའི་ངང་བསྐྱོད་མ། །འདོད་ཁམས་གསུམ་གྱི་འདོད་ཆགས་སྒྲོལ། །རྒྱུ་བ་རླུང་གི་དོན་ཤེས་པས། །སྲིད་བཞི་དམག་དཔོན་མཚན་མ་འཇིག །དབང་པོ་འདིར་བསྡུས་རིག་གྱུར་ན། །སྲིན་མོ་བདུན་གྱིས་ཞེ་སྡང་འཇིག །དགའ་བ་བཞི་ཡི་དུས་ཤེས་ན། །དུས་བཞིའི་རྒྱལ་མོ་རྟོགས་པ་འཇིག །རུས་པའི་རི་རབ་དོན་གསལ་ན། །ཉི་ཤུ་རྩ་བརྒྱད་མཚན་མ་འཇོམས། །སྲིད་པ་མཚན་མའི་ལས་རྟོག་ཀུན། །བདག་མེད་རྟོགས་པའི་ཐབས་ཀྱིས་འདུལ། །སྣང་སྲིད་སྣང་བའི་མ་མོ་ཀུན། །རིག་པའི་ཡེ་ཤེས་ཆོ་འཕྲུལ་ཏེ། །རིག་པ་མཁའ་ལ་འགྲོ་བ་ནི། །ས་རྣམས་ཀུན་ཏུ་རྒྱུ་འགྲོ་མ། །རང་བཞིན་གནས་པའི་རྫུ་འཕྲུལ་ཅན། །མཁའ་ལ་འཕྱོ་ཞིང་དབྱིངས་ལ་ཉལ། །སྣང་སྲིད་གར་ཐབས་རྒྱལ་བའི་
ཡུམ། །འཕོ་འགྱུར་མི་མངའ་སྐྱེ་འགྲོ་གསོས། །བདེ་ཆེན་བཅུ་ཡི་དོན་རྟོགས་པ། །རྩ་བ་བྱང་ཆུབ་སེམས་སུ་གསལ། །སྤྱི་དཔལ་བཅུ་ཡི་དོན་གསལ་བས། །མངོན་རྫོགས་ཡབ་ཀྱི་ཐུགས་ལ་རྫོགས། །གསང་ཆེན་བཅུ་ཡི་མཁའ་གསལ་བས། །བྷ་ག་བཅུ་ཡི་དབྱིངས་འདུ་འབྱུང་། །རྫོགས་ཆེན་བཅུ་ཡི་དོན་གསལ་བས། །རྒྱལ་བའི་སྐུ་དང་ཡེ་ནས་མཉམ། །མངོན་རྫོགས་ཡབ་ཀྱི་དཀྱིལ་འཁོར་རོ། །བཅུ་ཚོ་བཅུ་ཡི་རྒྱན་གྱིས་བརྒྱན། །ཆོ་གས་ཐུགས་ཀྱི་དཀྱིལ་འཁོར་ལ། །ཡེ་ཤེས་ལྔ་ཡི་རྒྱན་གྱིས་མཛེས། །ཉོན་མོངས་ལྔ་ཡི་བག་ཆགས་སྦྱོངས། །ཁམས་གསུམ་འཁོར་བའི་ལམ་སྒོ་གཅད། །རྨད་བྱུང་རོལ་པའི་ཅིར་ཡང་སྣང་། །ཀུན་བཟང་ངང་དུ་ཐམས་ཅད་འདུས། །མཚན་མ་བཟང་ངན་ཐམས་ཅད་ཀུན། །ཅི་ཡང་སྣང་ཞིང་ངོ་བོ་སྟོང་། །སྟོང་པའི་ངང་ལས་རྟག་གནས་ན། །དུས་གསུམ་རྒྱལ་བའི་དགོངས་པ་ཡིན། །རྡོ་རྗེ་མཁའ་འགྲོའི་རྒྱུད་ལས། ལྟ་བ་རྒྱ་མཚོའི་ལེའུ་སྟེ་བཞི་པའོ།། །།ཕྲ་མེན་རྒྱ་མཚོས་ཡང་གསོལ་པ། །སྤྱོད་པའི་དོན་ཆེན་ཇི་ལྟར་ལགས། །རྒྱལ་པོ་བདེ་བས་བཀའ་སྩལ་པ། །སྤྱོད་མཆོག་དམ་པ་འདི་ལྟར་ཏེ། །རྒྱལ་པོའི་ཚོགས་ཀྱི་ཕོ་བྲང་དུ། །འབྱོར་པའི་ཡོ་བྱད་ལྡན་བྱས་ནས། །སྣ་ཚོགས་ཡི་གེས་གཞལ་ཡས་བརླབ། །དྲག་པོའི་ས་བོན་རྫས་སྦྱངས་ནས། །རྒྱལ་མོ་ལྔ་ཡི་ས་བོན་གྱིས། །བདུད་རྩི་ཆེན་པོ་ལོངས་སྤྱོད་ལྡན། །གཡས་པ་ཏ་ཀའི་འབྲས་བུ་ཡིན། །གཡོན་པ་ཏ་རི་བཅད་བྱས་པས། །ཧྲིལ་སྒོ་འབར་བས་རོལ་པ་བསྟབ། །འབའ་ཏ་བདུད་རྩི་འབར་བ་ཡང་། །ཕར་གཏོང་ཚུར་ལེན་འབར་བར་བྱ། །ལམ་དགུ་ཐིག་ལེ་ཐིག་པ་ཡང་། །བཏབ་པའི་ཚུལ་ནི་གོང་མ་བཞིན། །ཏ་ལས་ཏ་ཡི་རྫས་རྣམས་དང་། །བདུད་རྩི་ཆེན་པོའི་ཐབས་སུ་རོལ། །འབྱུང་འཇུག་ཀུན་ལ་རི་ཀྲིས་བསྲུང་། །ཡབ་ལས་རྒྱལ་བ་རིགས་ལྔ་བསྲུང་། །ཡུམ་ལས་རྒྱལ་མོ་ལྔ་ཡི་མཛེས། །རྡོ་རྗེ་ཡི་
གེ་རྫོགས་པས་རྒྱན། །བྷ་གར་དབྱིངས་ཕྱུག་རྒྱལ་མོ་སྟེ། །ཐབས་ཀྱི་སྤྱན་ནི་བརྡེག་བྱས་ཏེ། །ན་སའི་རྩེ་མོར་ཧཱུཾ་གཟུགས་ཏེ། །རྟ་མཆོག་གཡས་ནས་གཡོན་དུ་དྲིལ། །འོང་བའི་སྒྲ་ལ་ཧཱུཾ་ཞེས་བརྗོད། །འགྲོ་བའི་སྒྲ་ལ་ཕཊ་དུ་བསྒྲགས། །དེ་ནས་མཁའ་འགྲོ་མཆོད་བྱས་ཏེ། །རྡོ་རྗེ་མཁའ་འགྲོ་མ་ཚོགས་ཀུན་གྱི་རྗེ། །སངས་རྒྱས་རྣལ་འབྱོར་ཀུན་གྱི་མེས་གཅིག་ལ། །བདེ་ཆེན་ཡུམ་གྱི་དབྱིངས་ནས་གཤེགས་སུ་གསོལ། །མཁའ་བཞི་དབྱིངས་ལས་བསྐྱེད་པའི་སྲས་མོ་ལྔ། །འབྱུང་བ་ལྔ་དང་དུས་བཞི་ཆ་སྙོམས་མ། །མི་འགྱུར་གཡུང་དྲུང་བསྐྱེད་པའི་ས་ཡི་གཉིས་མེད་སྐུ། །རྒྱལ་མོ་ལྔ་ལ་སོགས་པ་གཤེགས་སུ་གསོལ། །ཀུན་གཞི་སེམས་ལས་བསྐྱེད་པ་ཁྲོ་མོ་ཚོགས། །ཕྱིར་མི་འོངས་པའི་སྤུན་དྲུང་བཅུ་བཞི་ཡི། །རུས་མིན་སྤུན་དྲུག་ཚོགས་རྣམས་གཤེགས་སུ་གསོལ། །ཕྱི་ནང་ཡུལ་ལས་བསྐྱེད་པའི་ལྔ་བཅུ་ལྔ། །མཚན་མེད་ནམ་མཁའ་ལྟ་བུའི་རང་བཞིན་ལས། །ཉི་ཟླ་གཟའ་སྐར་མང་པོ་ཤར་བ་ལྟར། །གནས་འདིར་འཁོར་བཅས་མ་ལུས་གཤེགས་སུ་གསོལ། །ས་མ་ཡཱ་དུ་ན་སྟྭམ། རྡོ་རྗེ་ཞིང་ཆེན་བསྣོལ་བའི་གདན་སྟེང་དུ། །ཉི་ཟླ་པདྨ་འོད་ཀྱི་དཀྱིལ་འཁོར་བཅས། །དབྱིངས་ཀྱི་སྤུན་དྲུག་བསྒོམ་བྱ་མ་མོའི་ཚོགས། །ལྔ་བཅུ་རྩ་ལྔའི་ཚོགས་ཀྱི་དཀྱིལ་འཁོར་ཚོགས། །མི་གཡོ་མི་འགུལ་བརྟན་པར་བཞུགས་སུ་གསོལ། །སྤྱོད་པའི་ངོ་བོ་འདི་ལྟ་སྟེ། །ཨུ་མ་ཚང་ནས་ཉལ་བ་དང་། །བཅུ་དྲུག་ཚང་ནས་སྡོད་པ་དང་། །ཕུགས་ནས་སྲམ་ལྟར་འཐེན་པ་དང་། །མཁའ་ལ་རླུང་ལྟར་འཕྱོ་བ་དང་། །རྔམས་པའི་དྲག་ཤུལ་བྱེད་པ་དང་། །ནམ་མཁའི་སྐས་ལ་འཛེག་པ་དང་། །གླག་ཆེན་གཟན་ལ་དབབ་པ་དང་། །འཕར་བ་དཔྱང་ཐག་ཆོད་པ་དང་། །གླང་ཆེན་རོལ་དུ་ཞུགས་པ་དང་། །མགལ་མེ་ཀླད་ལ་སྐོར་བ་དང་། །འདི་རྣམས་དམིགས་ཀྱིས་བསྒྲལ་བའོ། །ཕ་དང་ཁུ་བོ་མེས་པོ་དང་། །ལྷ་དང་བྲམ་ཟེ་མུ་སྟེགས་དང་། །བྲན་དང་གཡོག་པོ་བདུད་དང་ནི། །གཤིན་རྗེ་
དྲེགས་པ་བསྒྲལ་བའོ། །ཉོན་མོངས་ཡིད་དང་རྣམ་ཤེས་ཡིད། །ཀུན་གཞི་སེམས་དང་འདོད་ཆགས་སེམས། །ང་རྒྱལ་དང་ནི་ཁོང་ཁྲོ་དང་། །སེར་སྣ་དག་དང་རྒྱུ་དག་དང་། །ལེ་ལོ་དང་ནི་ཕྲག་དོག་རྣམས། །འདི་རྣམས་དམིགས་ཀྱིས་སྒྲོལ་བའོ། །ཉོན་མོངས་གཟུགས་ཕུང་བཤིག་པའི་ཕྱིར། །གཡས་པ་སྤུ་གྲི་འབར་བ་ལ། །གཡོན་པ་གྱད་ཀྱིས་བརྒྱངས་ནས་སུ། །ཏྲ་ཐའི་སྔགས་ཀྱིས་སྒོ་ཕྱེ་ནས། །ཉ་ལ་བསྡུས་ལ་ཙེ་ལ་བསྡིམ། །འབྱུང་བ་གསུམ་གྱིས་སྦྱངས་བྱས་ནས། །རྡོ་རྗེ་ལྷགས་ཀྱིས་བསྡུས་བྱས་ནས། །ཀུན་ནས་བཟང་མོའི་མཁའ་ལ་བཞག །གསེར་དང་དངུལ་དང་འདྲེས་པ་བཞིན། །བསྡུས་ནས་རྒྱལ་བའི་ཕྱག་རྒྱར་བསྐྱེད། །ཟླ་རླུང་སྦྱོར་བའི་ཐབས་ཀྱིས་འཕང་། །རྒྱལ་བའི་རིགས་ཀྱི་སྲས་སུ་བསྐྱེད། །དགེ་སྡིག་ལས་ཀྱི་ཤན་ཕྱེད་ནས། །སྡིག་པ་བྱང་ནས་ཡེ་ཤེས་འབར། །སྦྱོར་བ་ཆེན་པོའི་དམ་ཚིག་ནི། །མ་དང་སྲུ་མོ་ཕྱི་མོ་དང་། །ལྷ་མོ་ཀླུ་མོ་རིགས་ངན་མོ། །གདོལ་པ་མོ་དང་ཕྱལ་པ་དང་། །རྨ་བྱ་མདོག་སྡུག་ཐབས་ཀྱིས་བརླབ། །ད་འོད་རི་ཀ་དབྱེ་བ་དང་། །སྒྲ་ཡི་ཐལ་མོ་སྦྱར་བ་དང་། །མཁའ་ལ་རླུང་གིས་བསྐྱོད་པ་དང་། །ལྕགས་སྒྲོག་ཕྱག་རྒྱ་བསྡམས་པ་དང་། །སྲེག་པའི་མེ་ཡིས་དབབ་པ་དང་། །ཡེ་ཤེས་རླུང་གིས་བསྒྲག་པ་དང་། །ལས་ཀྱི་རླུང་གིས་བཟློག་པ་དང་། །དགྱེས་པའི་ས་བོན་སྤྲོ་བ་སྟེ། །འདི་རྣམས་སྦྱོར་བའི་ཐབས་སུ་བསྟན། །དེ་ལས་ས་དགུ་དོན་གྱིས་རྫོགས། །ཡེ་ཤེས་དགུ་དང་ཡང་དག་ལྡན། །རྡོ་རྗེ་མཁའ་འགྲོའི་རྒྱུད་ལས། ཚོགས་དང་ཏན་གྷན་གྱི་སྤྱོད་པ་བསྟན་པའི་ལེའུ་སྟེ་ལྔ་པའོ།། །།ཕྲ་མེན་རྒྱ་མཚོས་ཡང་གསོལ་པ། །གཅན་འཕྲང་ཆུ་ཡི་རང་བཞིན་འདི། །རིམ་པ་གང་དང་གང་ལགས་པ། །ངོ་མཚར་ལྷ་ལ་བདག་ཉན་འཚལ། །ཡང་དག་རྫོགས་ཀྱིས་བཀའ་སྩལ་པ། །རྒྱལ་པོའི་བཀའ་རྟགས་མི་བཅག་པ། །ཇི་ལྟར་བསྒོ་བའི་ལས་བྱ་ཞིང་། །ལུས་ཀྱི་བསྲུང་བྱ་ཐུབ་པ་དང་། །ངག་གི་སྐྱོན་སྦ་ཡོན་ཏན་བརྗོད། །
སེམས་ཀྱི་གྱ་གྱུ་མེད་པ་ནི། །རྒྱལ་པོ་བཀའ་ཡི་དམ་ཚིག་གོ། །རྡོ་རྗེ་རིག་པ་འཛིན་རྣམས་ལ། །ལུས་ངག་ཡིད་ཀྱི་རྩེ་སྡོམ་ཞིང་། །སྐྱོ་ངལ་མེད་པའི་དང་བ་ཡིས། །རྩེ་གཅིག་ཡིད་ཀྱིས་མོས་པར་བྱ། །འདི་ནི་སྐུ་ཡི་ས་མ་ཡ། །རིག་པའི་ཕྱག་རྒྱ་གཏན་བསྒོམ་ཞིང་། །འོད་ཀྱི་རྒྱན་གྱི་ལྷ་གསལ་བ། །སྐུ་གསུང་ཐུགས་ལ་གཏན་གནས་ཏེ། །ཉི་མའི་སྙིང་པོ་གཏན་གསལ་བ། །འདི་ནི་ཙིཏྟ་ས་མ་ཡ། །ཐིག་ལེ་འབར་བའི་སྒྲ་བྱུང་ཞིང་། །བསྐྱེད་རྫོགས་ས་བོན་རྒྱུན་མི་གཅད། །སྤྲོས་པས་ལྷ་བརྙེས་ངན་སོང་སྦྱོང་། །སྣང་སྲིད་སྔགས་ཀྱི་ཕྲེང་བར་གསལ། །འདི་ནི་གསུང་གི་ས་མ་ཡ། །འདི་ཡིས་བཀའ་གཞུང་མ་ཐུབ་པར། །ཕྱིན་ཅི་ལོག་ཏུ་སྤྱད་པ་ན། །འདི་རུ་མི་བདེ་སྣ་ཚོགས་འབྱུང་། །འབྲས་བུ་རྡོ་རྗེ་དམྱལ་བར་ལྟུང་། །ཉམས་པའི་རྒྱུ་ནི་འདི་ལྟ་སྟེ། །དད་པ་ཆུང་ཞིང་སེར་སྣ་ཆེ། །ཁྲོ་གཏུམ་ཆེ་ཞིང་བདག་མེད་པ་དང་། །གཡོ་སྒྱུ་ཆེ་ལ་ཕྲག་དོག་པ། །འདི་ནི་ཉམས་པའི་རྒྱུ་ཡིན་ནོ། །རྟོགས་པའི་དམ་ཚིག་གཞུང་ཐུབ་ན། །འཇིག་རྟེན་འདས་དང་འཇིག་རྟེན་པའི། །མཁའ་འགྲོ་རང་བཞིན་ཉེ་བ་ལ། །བར་ཆད་རྐྱེན་རྣམས་མི་འབྱུང་ཞིང་། །དགྲ་བགེགས་ཀུན་ལ་དབེན་པ་འཇུག །ཚེ་རིང་བ་དང་རྒྱུད་འཕེལ་འགྱུར། །རྒྱལ་པོ་ལྟ་བུར་ཀུན་གྱིས་བཀུར། །ངན་སོང་གནས་རྣམས་སྟོངས་པར་འགྱུར། །ཉམས་ན་སྐོང་ཐབས་འདི་ལྟ་སྟེ། །སྐུ་ཡི་དམ་ཚིག་གཞུང་ཉམས་ན། །མཁའ་འགྲོ་རྣམས་ཀྱིས་འཚེ་གྱུར་པས། །ལུང་ལྡན་དེ་ལ་གསོ་རུ་གཞུག །ཐུགས་ཀྱི་དམ་ཚིག་ཉམས་གྱུར་ན། །རྒྱལ་བའི་ཡི་དམ་སྤོབས་པ་དབབ། །གསུང་གི་དམ་ཚིག་ཉམས་གྱུར་ན། །རང་སྔགས་ཕྲེང་བ་འདབ་ཏུ་བཟླས། །བསྐང་གསོའི་ཆོ་ག་གཞན་ཡང་བྱ། །རྒྱུད་ཀྱི་རྒྱལ་པོ་རྡོ་རྗེ་མཁའ་འགྲོའི་རྒྱུད་ལས། ས་མ་ཡ་དམ་ཚིག་ལེའུ་སྟེ་དྲུག་པའོ།། །།ཕྲ་མེན་རྒྱ་མཚོས་ཡང་གསོལ་པ། །རྒྱལ་པོ་བཀའ་རྟགས་ཇི་ལྟར་ལགས། །ངོ་མཚར་ཆེ་བ་བདག་ཉན་འཚལ། །མངོན་རྫོགས་ཡབ་ཀྱིས་བཀའ་
སྩལ་པ། །རྒྱལ་པོ་བཀའ་རྟགས་ཆེན་པོ་ནི། །ངས་བསྟན་པ་ལ་སེམས་ཐུད་ཅིག །ཕྱི་དང་ནང་དང་གསང་བ་འདི། །རབ་འབྲིང་གསུམ་གྱི་སྣོད་ལ་བསྐུར། །ཞིང་གི་རུ་མཚོན་འབར་བ་འདི། །རྒྱལ་སྲས་ལག་ཏུ་བསྐུར་བྱས་པས། །སྲིད་པའི་མཁའ་འགྲོ་དབང་དུ་འགྱུར། །དཔུང་བཞི་ཚོགས་ལས་རྒྱལ་བར་བྱེད། །ཀེ་དུ་རཀྴ་ས་མ་ཡ་སྟྭཾ། ཧཱུཾ་རལ་གྲི་འདོད་ཆགས་འབར་བ་འདིས། །རྒྱལ་སྲས་ལག་ཏུ་བསྐུར་བྱས་པས། །ཉོན་མོངས་འཁོར་བའི་དྲ་བ་གཅོད། །སྲིན་པོ་དྲེགས་པའི་ཁོག་པ་དྲལ། །རཀྴ་ལ་ཁད་ག་ན་ཧཱུཾ། དར་ནག་འབར་བའི་རུ་མཚོན་འདིས། །རྒྱལ་སྲས་ཅོད་པན་འཕྱོ་བའི་དབང་། །ཐབས་དང་ཤེས་རབ་དབང་བསྐུར་བས། །དུས་གསུམ་གནས་སུ་བསྒྲལ་བའི་དབང་། །ཧ་ཧ་ན་ན་ན་ཕཊ་ཧཱུཾ། ཐོད་ཚར་འབར་བའི་དབུ་རྒྱན་ཅན། །རྒྱལ་མོ་ལྔ་ཡི་ཕོ་བྲང་སྟེ། །ཉོན་མོངས་ལྔ་ཡི་བག་ཆགས་སྦྱངས། །ཡེ་ཤེས་ལྔ་ཡི་འོད་དུ་ཤར། །ཛྙཱ་ན་ཧ་ཏ་ཧཱུཾ། ནང་གི་དོན་ལ་འདི་ལྟ་སྟེ། །རཀྟའི་ཐིག་ལེ་འབར་བ་འདིས། །མཁའ་འགྲོ་རིག་པ་གསལ་བས་ཏེ། །ཆེ་མཆོག་ནུ་མའི་འོད་དུ་འབར། །ལྷ་མོ་རིགས་ཀྱི་བཞུགས་གནས་སོ། །མོ་ཧ་ལ་ལ་ཧཱུཾ། རཀྟའི་ཐིག་ལེ་རྒྱ་གོང་དུ། །ཐལ་བའི་ཚོམ་བུ་ཁ་དོག་ཁ། ། རིག་འཛིན་རྣམ་གསུམ་ཕོ་བྲང་ནས། །དུག་གསུམ་རྩད་ནས་གཅོད་པའི་རྟགས། །སྐུ་གསུང་ཐུགས་ཀྱི་དོན་མཚོན་པ། །པྲ་ཙ་ལ་ཧཱུཾ། ཐལ་བའི་རྟགས་ཀྱི་རྒྱ་གོང་དུ། །ཟོ་རིས་འབར་བའི་ཐིག་ལེ་ལྔ། །རྒྱལ་བ་རིགས་ཀྱི་ཕོ་བྲང་སྟེ། །དུག་ལྔ་གནས་སུ་སྦྱངས་ནས་ནི། །ཡེ་ཤེས་ལྔ་ཡི་རྒྱ་ཡིས་གདབ། །པཉྩ་ཛྙཱ་ན་ཧཱུཾ། དམ་རྫས་ལྷ་ཡི་ཐིག་ལེ་ལ། །རྒྱལ་མོ་ལྔ་ཡི་སྙིང་པོས་སྦྱོངས། །ཨོཾ་ལྡན་དཀར་བའི་ཐིག་ལེ་ཡིས། །རྣམ་སྣང་དཔལ་གྱི་ཡེ་ཤེས་དོན་ཐོབ་ཤོག །ཧཱུཾ་ལྡན་མཐིང་ལ་འབར་བའི་རང་བཞིན་གྱིས། །བཀྲག་གསལ་སྙན་གྱི་ཡེ་ཤེས་དོན་ཐོབ་ཤོག །སྭ་ལྡན་སེར་ལ་
འབར་བའི་ཐིག་ལེ་ཡིས། །འོད་གསལ་འབར་བའི་ཡེ་ཤེས་དོན་ཐོབ་ཤོག །ཨོཾ་ལྡན་དམར་ལ་དྭངས་པའི་ངོ་བོ་འདི། །གཉེན་གསལ་འབར་བའི་ཡེ་ཤེས་དོན་ཐོབ་ཤོག །ཧ་ལྡན་ལྗང་ལ་ལྡེམ་པའི་བདག་ཉིད་ཀྱིས། །ཡང་གསལ་གཡོས་ཀྱི་ཡེ་ཤེས་དོན་ཐོབ་ཤོག །གསང་བའི་དོན་ལ་འདི་ལྟ་སྟེ། །རྡོ་རྗེ་རིགས་ཀྱི་མཚན་ལྡན་མ། །ཁྲུས་ཀྱི་དྲི་ལྡན་ལྷ་མོ་རླབ། །སེང་གེ་སྟག་གི་གཡས་ཕབ་ནས། །གྱི་ལིང་རྫུ་འཕྲུལ་ཆེན་པོ་དང་། །གཅན་གཟན་ཐ་མ་བརྟུལ་ཞུགས་དང་། །རྒྱུ་བའི་རླུང་ནི་ན་སར་གཟུང་། །ལས་ཀྱི་རླུང་ནི་རྒྱ་གྲམ་གཟུང་། །ཁྱབ་བྱེད་རླུང་ནི་གཏི་མུག་སྟེ། །རླུང་གསུམ་གཟུང་བས་བརྟུལ་ཞུགས་མཆོག །རེ་རེ་ལ་ཡང་བཞི་བཞིའི་སྟེ། །ཡེ་ཤེས་བཅུ་དྲུག་མ་ཏ་རུ། །ལྷན་ཅིག་སྐྱེས་པའི་བདེ་དབང་བསྐུར། །ཨོཾ་རྡོ་རྗེ་རིགས་ཀྱི་ཡུམ་མཆོག་མ། །བདེ་མཆོག་ཡེ་ཤེས་སྐྱེད་བྱེད་མ། །གཡོ་བ་ལྔ་ལ་ཡེ་ཤེས་ལྔ། །འཛིན་བཞི་བཅུ་དྲུག་རྟོགས་པའི་ཐབས། །ཡུལ་མཆོག་མ་ཡིས་སྣང་བར་མཛོད། །རང་རིག་གསལ་བའི་ཡེ་ཤེས་འོད། །སྐད་ཅིག་རྟོགས་པའི་ཐབས་མཆོག་འདི། །སྐྱེ་མེད་ཡུམ་དང་རྒྱལ་པོ་ཡབ། །བདག་ལ་སྨིན་པའི་དོན་གསལ་བ། །རྒྱལ་བའི་སྐུ་དང་བཀའ་དྲིན་ཅིག །ཧོ། རིག་པའི་རྒྱལ་པོ་སྲས་མཛེས་དེས། །ལུས་ཀྱི་བཀུར་བ་ཕུན་སུམ་ཚོགས། །ངག་གི་སྐྱོན་སྦ་ཡོན་ཏན་བརྗོད། །སེམས་ཀྱིས་རྟག་ཏུ་འདུལ་བཅས་ལ། །ཡུམ་དང་རྒྱལ་པོ་ཐུན་མོང་བསྐུར། །སྲོག་ལུས་མན་ཆོད་ལུས་ཀྱི་རྣམས། །རྒྱལ་མོ་མཆོད་པས་སངས་རྒྱས་མཉེས། །དེ་ལྟར་ཐོབ་པའི་ཡོན་ཏན་ནི། །ལུས་ལ་འཚེ་བ་མི་འབྱུང་ཞིང་། །སྐྱེ་བོ་ཀུན་གྱིས་བཀུར་བ་དང་། །མཁའ་འགྲོ་མ་རྣམས་ཉེ་བ་དང་། །བརྒྱ་བྱིན་ཚེ་དང་མཉམ་པར་ངེས། །ཧེ་རུ་ཧཱུཾ་སྲས་འཁོར་རྣམས་མཉེས། །རྒྱལ་བ་ཉིད་དང་དགོངས་པ་མཉམ། །དེ་ལྟར་མ་ཐོབ་གང་ཟག་དང་། །བསྒྲུབ་པའི་ལས་ལ་འབྲས་མེད་འགྱུར། །འཇིག་རྟེན་འདི་ལ་ལས་ལོག་པས། །ཕྱི་མར་ངན་འགྲོའི་སྡུག་བསྔལ་འབྱུང་། །རྡོ་རྗེ་མཁའ་འགྲོའི་རྒྱུད་ལས། དབང་བྱིན་པའི་ལེའུ་སྟེ་བདུན་པའོ།། །།
ཕྲ་མེན་རྒྱ་མཚོས་ཡང་གསོལ་པ། །དཀྱིལ་འཁོར་རིམ་པ་གང་ལགས་པ། །མངོན་རྫོགས་དཔལ་ལ་བདག་ཉན་འཚལ། །རྒྱལ་སྲས་དེ་བས་བཀའ་སྩལ་པ། །བདག་ཉིད་བྱང་ཆུབ་ཐིག་ལེ་ལ། །སྐྱེ་འགག་མེད་པའི་ངོ་བོས་ཏེ། །མི་དམིགས་མ་སྐྱེས་དབྱིངས་ཉིད་ལས། །ཆོས་རྣམས་འབྱུང་བའི་རང་བཞིན་ཏེ། །སྣང་སྲིད་མ་འགགས་རིག་པའི་རྩལ། །མ་འགགས་རིག་པ་རང་ཤར་བ། །ནམ་མཁའི་ངོ་བོ་སྙིང་རྗེ་མཆོག །མཚམས་སུ་སྦྱོར་བའི་སྙིང་རྗེ་སྟེ། །དབྱིངས་དང་ཡེ་ཤེས་རང་བཞིན་ལས། །གཉིས་མེད་རིག་པ་ཐུགས་ཀྱི་མཆོག །རིག་པ་གསལ་བ་ཡེ་ཤེས་རྒྱན། །མཐིང་ག་ཧཱུཾ་ནི་ཐུགས་ཀྱི་གཏོར། །ཨེ་ཨཱ་ཀཱ་ཤ་ནི་ཨཱ། དུ་ཀར་མ་རཀྴ་ལ། རཾ་ཛྭ་ལ་མཎྜ་ལ། མ་ཏི་ག་ར་མ། ཀིང་ནྲྀ་ཏྲི་ལཾ། རཾ་བི་ཤུད་དྷི། པདྨ་ཙཀྲ་ཏིར་བཾ། མཐིང་ག་ཧཱུཾ་གི་འཐོར་རླུང་ལ། །དྲག་པོ་ནམ་མཁའི་དཀྱིལ་འཁོར་སྣང་། །སྐྱོད་བྱེད་འབར་བའི་དབང་གི་དཀྱིལ་འཁོར་འབྱུང་། །རཀྟ་དམར་སྨུག་ཞི་བའི་དཀྱིལ་འཁོར་ཆགས། །ཤ་ཆེན་སྤུངས་པས་རྒྱལ་བའི་དཀྱིལ་འཁོར་ལ། །ཀེང་རུས་ཁྲལ་ཁྲོལ་རུས་པའི་རི་རབ་བརྩེགས། །སྣ་ཚོགས་བྷྲཱུཾ་ལས་ཕོ་བྲང་གཞལ་ཡས་ཤར། །འཁོར་ལོ་རྩིབས་ལ་ཡུམ་གྱི་མཁའ་བཞིས་བརྒྱན། །རྩིབས་ཆེན་བཞི་ལས་བཞི་ཡི་དཀྱིལ་འཁོར་ཤར། །དབུས་ཀྱི་ཤར་ནུབ་ཉི་ཟླ་འབར་བ་ལ། །ཕྱི་ཁྱམས་བྷ་ག་བཞི་ཡི་བར་ཁྱམས་ལ། །དུས་བཞི་འབྱུང་བ་བཞི་ཡི་གདན་དུ་གསལ། །གསུམ་པ་པདྨ་འདབ་བརྒྱད་པ་རུ་སྣང་། །བཞི་པ་འདབ་བརྒྱད་པདྨ་རྩིབས་སུ་ལྡན། །གྲུ་ཆད་བཞི་ལ་སྣམ་བུ་ཁྱམས་གསུམ་ལྡན། །ནང་གི་རྩིག་པར་རིན་ཆེན་རྣམ་ལྔ་ལ། །ཕྱི་ཡི་རྩིག་པ་ཐོད་པའི་མཁར་དུ་གཏམས། །ལྷ་བརྒྱད་གདུང་ལ་ཀླུ་བརྒྱད་ཕྱམ་དུ་བོར། །གཟའ་བརྒྱད་ཁ་བད་རྒྱུ་སྐར་དྲལ་བུ་བྱས། །རྒྱལ་ཆེན་རིགས་བཞི་སྦྲུལ་ནག་རྒྱན་གྱིས་བརྒྱན། །ཞིང་གི་རྒྱལ་མཚན་སྒོ་བཞིར་བརྒྱན། །ཉི་ཟླ་པདྨའི་འོད་ཀྱི་གདན་དུ་གསལ། །དབུས་སུ་རུ་དྲ་ཕོ་མོ་བསྣོལ་བ་ལས། །ལྷ་ཡི་དབང་པོ་རྒྱ་མཚོ་ཉི་མའི་གདན། །རྩིབས་བཞིའི་སྟེང་དུ་བདུད་བཞིའི་རྒྱལ་མོ་གདན། །དུས་བཞིའི་རྒྱལ་མོ་བཞི་ལ་སྨྲའོ་
ལག་རིས་གདན། །ཕྱོགས་སྐྱོང་བརྒྱད་ནི་དགྱེས་སྡེ་ཁྲོས་པའི་གདན། །སྨན་མོ་ཐམས་ཅད་སྐམ་རློན་ཞིང་གི་གདན། །དབང་མོ་རྩ་བརྒྱད་དར་གྱི་བློན་གདན་ནོ། །ཧཱུཾ་ཆེན་དབུས་ཀྱི་གདན་ལ་ཤར་བ་ལ། །ཨོཾ་ཤྲཱི་ཧེ་རུ་ཀ་ཀྲོ་དྷཱི་ཤྭ་རཱི་ས་མ་ཡ་སྟྭཾ། བཅོམ་ལྡན་ཆེ་མཆོག་ཧེ་རུ་ཀ །ཀུན་ཏུ་བཟང་མོའི་རོལ་པ་ལས། །དགྱེས་པའི་རོལ་པ་གར་དུ་བཞེས་སུ་གསོལ། །སྐྱེ་མེད་ཀུན་ཏུ་བཟང་མོ་ལ། །སྣང་སྲིད་རྫས་སུ་དབུལ་དུ་གསོལ། །མཁའ་ལ་ཀློང་ཆེན་དབྱིངས་ནས་བཞེངས། །མཁའ་བཞི་དབུས་ཀྱི་དཀྱིལ་འཁོར་ལ། །དགྱེས་པ་གར་གྱི་ཐིག་ལེ་སྤྲོ། །འཁོར་ལོ་པདྨ་རིམ་པ་ནི། །རིམ་པ་བཞི་ཡི་འཕར་བའི་དབུས། །ཐིག་ལེ་སྤྲོས་པས་ཡིག་འབྲུ་ཤར། །བསྐྱེད་པའི་སྔགས་ཀྱིས་ཕྱི་རུ་གདོན། །བདག་གི་གསེར་གྱི་ཉི་མ་ལས། །ས་བོན་ལས་ནི་སྐུར་བསྐྱེད་པ། །བཛྲ་ཀྲོ་དྷཱི་ཤྭ་རཱི་བྷ་ག་པདྨརྱ་ཧཱུཾ། བདག་གི་འོད་ཆེན་ཁ་དོག་ལས། །ས་བོན་ལས་ནི་སྐུར་བསྐྱེད་པ། །བཛྲ་ཤནྟི་པདྨ་ག་རུ་ཏི་བྷྱོ། བདག་གི་འབྱུང་བ་ལྔ་པོ་ལས། །ས་བོན་ལས་ནི་སྐུར་བསྐྱེད་པ། །གི་ས་མུཾ་ཧཱུཾ་ཧ་ཛ་ལ་བར་རཾ་ཧཱུཾ་ཧ། ཤི་ཤ་སན་ཏི་ཧ་ཀ་སི་ལོང་ཧེ་ཧ། མ་ཧཱ་ལང་ཧེ་ཧ། བདག་གི་དྭངས་མ་བཞི་པོ་ལས། །ས་བོན་ལས་ནི་སྐུར་བསྐྱེད་པ། །མུ་ཏྲི་ནི་ཨ་ཤན་ཏྲི་ནི། བ་ག་དུན་ཏྲི་ནི། ཁ་མུན་དན་ཏྲི་ནི། བདག་གི་དྭངས་མ་བཞི་པོ་ལས། །ས་བོན་ལས་ནི་སྐུར་བསྐྱེད་པ། །རཾ་ཛྭ་ལ་ནི། པཾ་ཏིང་ཀ་ལ། སུ་ཙིཏྟ་ཧ། ཡཾ་གརྦྷེ་ལཾ། བདག་གི་དྭངས་མ་བརྒྱད་པོ་ལས། །ས་བོན་ལས་ནི་སྐུར་བསྐྱེད་པ། །ཨོཾ་སུརྱ་བི་ཏི་ཨ་ཏོ་ཡེ། པདྨ་བི་ཏོ་ཨ་ཏོ་ཡེ། ཁ་རཾ་བི་ཏོ་ཨ་ཏོ་ཡེ། སྲིད་འགྲོ་བི་ཏོ་ཨ་ཏོ་ཡེ། ཨོཾ་བཛྲ་ཀེཾ་ཀེཾ། བཛྲ་ཏ་ཀེ་བཛྲ་ཏ་ཀེཾ། བཛྲ་ནི་ལ་བཛྲ་ནི་ལ། བཛྲ་ལན་ཏ། བཛྲ་ལན་ཏ། བདག་གི་གསང་བ་བདེ་ཆེན་ལས། །ས་བོན་ལས་ནི་སྐུར་བསྐྱེད་པ། །ཟ་གྲཾ་ས་མུ་རཾ་ཤྭ་ར་ཟ་གྲཾ་མུར་རཾ་ཤྭ་ར་བཛྲ་ཁ་རག་སྙིང་ཁ་རག །བདག་གི་ཟངས་མའི་སྦུ་གུ་ལས། །ས་བོན་ལས་ནི་སྐུར་བསྐྱེད་པ། །པྲ་བན་ཀ་རི་བྷྱོ། པྲ་ཀིང་ཝང་གི་ཏི་བྷྱོ། བདག་གི་སྲིད་པ་མདོར་
བསྡུས་ལས། །ས་བོན་ལས་ནི་སྐུར་བསྐྱེད་པ། ཏྲག་རག་ཤ་ཁ་མུན་ཙམ་ཛག་ཤ་ཏྲག་རག་ཤ་མུ་དྲ་བ་ན། བདག་གི་དཔག་བསམ་ཤིང་བུ་ལས། །ས་བོན་ལས་ནི་སྐུར་བསྐྱེད་པ། །ཁ་མུན་པ་རག་པ་ཏྲ་རག་ཤ །སྲན་ཝཾ་ཀ་རི་ཏ་བྷྱོ། བདག་གི་དབང་པོ་མདོར་འདུས་ལས། །ས་བོན་ལས་ནི་སྐུར་བསྐྱེད་པ། །ཧཱུཾ་ཀ་བ་རོད་ད་རོད། ནི་ལ་ཆུ་རང་ཁ་དོང་ཀ་ཏ་པ་ལ། ཙ་པ་ལ། པདྨ་ཙག་ཤ །མ་ཀུ་རག་ཏི། དར་པཾ་དིང་པཾ། ཨེ་ཨཱ་ར་ལི། ནུ་པོ་རུ་ལུ་ནུ་པོ་རུ་ལུ་བྷྱོ། ཏྲག་ཤག་ཤ་རག་ཤ །གཡས་གཡོན་ཐབས་དང་ཤེས་རབ་ལས། །ས་བོན་ལས་ནི་སྐུར་བསྐྱེད་པ། །མ་ཏཾ་བྷྱོ། བྷྱོ་ཏི་བྷྱོ། པུཥྚིཾ་བྷྱོ། མུ་ཏིཾ་བྷྱོ། བཛྲ་ཤནྟིཾ་བྷྱོ། དུན་ཏིཾ་བྷྱོ། ཧར་ཏིཾ་བྷྱོ། གྲུབ་ཏིཾ་བྷྱོ། ཨ་པར་ལ་ཏ་བྷྱོ། ད་ལ་དུ་ན་བྷྱོ། དི་ན་མ་མ་ཡ་བྷྱོ། བདག་གི་སྲིད་པ་དབང་ཕྱུག་ལས། །ས་བོན་ལས་ནི་སྐུར་བསྐྱེད་པ། བྷྱོ་བྷྱོ་བྷྱོ་བྷྱོ་བྷྱོ་བྷྱོ། བྷྱོ་བྷྱོ་བྷྱོ་བྷྱོ་བྷྱོ་བྷྱོ། བྷྱོ་བྷྱོ་བྷྱོ་བྷྱོ་བྷྱོ་བྷྱོ། བྷྱོ་བྷྱོ་བྷྱོ་བྷྱོ་བྷྱོ་བྷྱོ། རྡོ་རྗེ་མཁའ་འགྲོའི་རྒྱུད་ལས། དཀྱིལ་འཁོར་བསྐྱེད་པའི་ལེའུ་སྟེ་བརྒྱད་པའོ།། །།ཧཱུཾ་སྣང་སྲིད་ཐམས་ཅད་ཡུམ་གྱི་བྷ་གའི་ཀློང་། །དུས་གསུམ་བདེ་གཤེགས་འབྱུང་བ་ལྔ་ལ་རྫོགས། །འབྱུང་བ་ལྔ་ཉིད་ཡུམ་གྱི་བྷ་གས་བརྒྱན། །འདས་དང་མ་བྱོན་བྷ་ག་ཉིད་ཀྱིས་བརྒྱན། །བདེ་ཆེན་ཡུམ་གྱི་དབྱིངས་ནས་གཤེགས་སུ་གསོལ། །མཁའ་བཞི་དབྱིངས་ལས་བསྐྱེད་པའི་སྲས་མོ་ལྔ། །འབྱུང་བ་ལྔ་ཡི་རྒྱལ་མོ་གཤེགས་སུ་གསོལ། །དྭངས་མ་ཡུམ་ལས་བསྐྱེད་པའི་མཁའ་འགྲོའི་ཚོགས། །རྗེ་མོ་བཅུ་བཞིའི་ཚོགས་རྣམས་གཤེགས་སུ་གསོལ། །སྙིགས་མ་ཙ་ལས་བསྐྱེད་པའི་མ་མོའི་ཚོགས། །ལྔ་བཅུ་དྲུག་གི་ཚོགས་བཅས་གཤེགས་སུ་གསོལ། །འབྱུང་བ་བཞི་དང་དུས་བཞི་ཆ་སྙོམས་མ། །དུས་བཞིའི་རྒྱལ་མོ་འཁོར་བཅས་གཤེགས་སུ་གསོལ། །ཧཱུཾ་སྣང་སྲིད་ཐམས་ཅད་འཁོར་ལོ་རྩིབས་བཞི་པོ། །གྲུ་ཆད་སྒོ་བཞི་བྷ་གའི་ཚུལ་དུ་བརྒྱན། །དབུས་ནི་མི་འགྱུར་ཆོས་ཀྱི་བུམ་པ་ལ། །འདབ་བརྒྱད་དབྱིངས་ལས་
འཁོར་ལོ་རྩིབས་བཅུ་བཅས། །རྩིག་པ་གཉིས་ལས་སྣམ་བུ་སྒོ་ཡི་རྒྱན། །ཤར་དུ་རྟ་ཁྲག་ལྷོ་རུ་མི་ཁྲག་དང་། །ནུབ་ཏུ་མདའ་སྦྱར་བྱང་དུ་བདུད་རྩི་སོགས། །རང་བཞིན་མཚན་མོ་དུས་ནི་འདི་ཉིད་དུ། །མདའ་བཞི་རྒྱལ་མཚན་གནམ་དུ་ཡེ་རེ་རེ། །ཁྲག་དང་ཞག་གི་འདམ་ཆུ་ཟུ་ལུ་ལུ། །ཡེ་ཤེས་བཞི་ཡི་མེ་ལོང་ལམས་སེ་ལམ། །རལ་གྲི་རྒྱལ་ཆེན་དམག་དཔོན་ཆེན་པོ་བཞི། །འགྲོ་བའི་དོན་དུ་བརྟན་པར་བཞུགས་སུ་གསོལ། །བདུད་རྩི་ཕྱག་གི་བུམ་པའི་རྒྱུ་དག་གི། །ཧཱུཾ་གིས་བསྡིམས་ཤིང་རྒྱུད་སྦྱངས་ཧ་ལྔ་འབར། །ཐུགས་ལས་བཞི་འཕྲོས་བརྟན་པར་བཞུགས། །སྲིད་པའི་རི་ལ་འགྲོ་བའི་མཁའ་འགྲོ་རྣམས། །སྭ་གཉིས་ལུ་གུ་རྒྱུད་བྱས་ཧཱུཾ་གཉིས་ལྕགས་ཀྱུའི་ཚུལ་དུ་རྟེན། །ཨོཾ་ཤྲཱི་ཧེ་རུ་ཀ་ཡོ་གི་ཛ་ཛ་སུརྱ་མཎྜལ་བི་བམ། དམ་ཚིག་གཙོ་འཁོར་ལྡན་པ་ཡི། །སྤྲུལ་པ་རེ་རེ་གདན་དུ་བསྐྱེལ། །མཁའ་ཡི་གཏིང་ཁུང་དབུར་གནས་པ། །ནམ་མཁའི་མཐའ་ལ་རལ་གྲི་ཕབ། །ཏྲ་ཏ་ཕཊ། སོ་སོ་རང་རིག་སྒོ་དབྱེ་ནས། །ཧཱུཾ་གི་སྦུབས་ཀྱི་ལེ་བརྒན་དྲངས། །ཆེ་མཆོག་ལེ་བརྒན་འབར་བར་སྨིན། །ཨོཾ་ཨ་མྲྀ་ཏ་ཨུ་ཙིཏྟ་ཨ་ཧཱུཾ་ཨ། ཤེས་རབ་སྙིང་རྗེ་དུས་གཅིག་འབར། །ནུབ་པའི་གདན་ནས་བཏགས་བྱས་ཏེ། །ཕོ་བྲང་སྟེང་དུ་ཟུང་སྟེ་བཞེངས། །ཞལ་སྦྱོར་ཚུལ་དུ་གནས་པའོ། །གཉིས་སྦྱོར་གཙོ་ལ་ཟུར་བརྟན་པའོ། །རྡོ་རྗེ་མཁའ་འགྲོ་ལས། སྤྱན་དྲངས་ཤིང་དབང་བསྐུར་བའི་ལེའུ་སྟེ་དགུ་པའོ།། །།ཧཱུཾ་བཅོམ་ལྡན་ཆེ་མཆོག་ཧེ་རུ་ཀ །མཐིང་ནག་འཇིགས་པའི་ཆ་ལུགས་ཅན། །དཀར་ནག་འབར་བའི་ཞལ་མངའ་བ། །གཡས་ཀྱི་དང་པོ་རྡོ་རྗེ་ལ། །གཡོན་པ་དུང་ཆེན་གའུ་འཛིན། །གཡས་ཀྱི་བར་མ་གཡང་གཞི་ལ། །གཡོན་པ་རིན་ཆེན་སྲིད་དབང་བསྐུར། །གཡས་ཀྱི་ཐ་མ་རྩེ་གསུམ་ལ། །གཡོན་གྱི་ཐ་མ་ཚེ་འཛིན་ཅིང་། །མི་ཟད་གཏེར་གྱི་མཆོད་པར་བཞེས། །ཀུན་ཏུ་བཟང་མོ་བདེ་བའི་ཡུམ། །བཞི་ཟུར་ཞབས་བརྒྱད་ཕྱག་དྲུག་འབར། །གཡས་ཀྱི་དང་པོ་སྲིད་རྩེ་འཛིན། །གཡོན་གྱི་དང་པོ་རྒྱ་མཚོ་རློབ། །གཡས་ཀྱི་བར་མ་ཡབ་ལ་འཁྱུད། །གཡོན་གྱི་བར་
མས་དུང་དམར་སྟོབ། །གཡས་ཀྱི་ཐ་མ་རུ་མཚོན་འཕྱར། །གཡོན་གྱི་ཐ་མ་མེ་དཔུང་བརྡེག །མི་ཟད་གཏེར་གྱི་མཆོད་པར་བཞེས། །སྦོམ་མེ་མཐེའུ་ཆུང་རྩེ་མནན་ནས། །གུང་མོ་རྩེ་སྤྲད་བཞི་བསྒྲེང་བ། །རྒྱལ་མོ་ལྔ་ཡི་ཕྱག་རྒྱ་ཡིན། །གཡས་པ་མཛུབ་མོ་བསྒྲེང་བ་ལ། །གཡོན་པ་ཆགས་པ་འཁྱུད་པ་ནི། །དུས་བཞི་རྒྱལ་མོ་ཕྱག་རྒྱ་ཡིན། །གཡས་པ་ཁུ་ཚུར་སྙིང་གར་བསྟེན། །གཡོན་པ་མཚོན་གྱི་བྱེད་པ་ཡིན། །ཕྲ་མེན་རྒྱ་མཚོ་ཉིད་ཀྱི་རྒྱ། །མཐེབ་མཛུབ་རྩེ་མོ་སོ་སོར་སྤྲད། །སྤྱན་གྱི་ཐད་ཀར་འཛིན་པ་ནི། །དེ་ནི་རྡོ་རྗེ་ཉི་མའི་རྒྱ། །མཐེབ་མོ་གཉིས་དང་མཛུབ་གཉིས་བསྒྲེང་། །གསུམ་པོ་ཕན་ཚུན་ཐགས་སུ་བཏགས། །དེ་ནི་སྦས་པའི་མ་བཞིའི་རྒྱ། །གུང་མོ་སྲིན་ལག་སོ་སོར་དགུག །མཐེ་བོང་གཉིས་ཀྱིས་སོ་སོར་མནན། །དེ་ནི་ཁྲོས་པའི་རྒྱལ་མོའི་རྒྱ། །མཐེའུ་ཆུང་མཐེ་བོང་རྩེ་ལ་མནན། །ལྷག་མ་གསུམ་པོ་འདི་ལྟར་བྱས། །ཐུགས་ཀྱི་དགྱེས་སྡེ་རྒྱ་ཆེན་ཡིན། །ཕན་ཚུན་ཐགས་སུ་བཏགས་པ་ལ། །ཕྱི་རུ་འགྱེད་ནས་འོད་འཕྲོས་པས། །སྨན་མོ་རྣམས་ཀྱི་ཕྱག་རྒྱ་ཡིན། །ཉི་ཤུ་རྩ་བརྒྱད་པོ་ཡི་ཕྱག་རྒྱ་ནི། །གཞན་དང་འགྲེ་སྟེ་འདིར་མ་བཤད། །མེ་ཏོག་རྒྱན་གྱི་མཆོད་པ་འདི། །སྣང་སྲིད་མཛེས་པའི་མཆོད་པ་ཆེན་པོ་བཞེས། །མེ་བདུག་སྤོས་ཀྱི་དུད་པ་ཆེན་པོ་འདི། །ཚིམ་པའི་མཆོད་པ་ཆེན་པོ་བཞེས་སུ་གསོལ། །བདུད་རྩི་ཆེན་པོའི་དམ་སྐོང་མཆོད་པར་བཞེས། །འདོད་ཆགས་ཁྲག་གི་མཆོད་པ་དམ་པར་བཞེས། །རྨད་བྱུང་རྒྱན་གྱི་གཏོར་མའི་མཆོད་པར་བཞེས། །ཞེ་སྡང་ཏིང་འཛིན་རམ་གྱི་མཆོད་པར་བཞེས། །འདོད་ཆགས་སྦྱོར་བྱེད་མཆོད་པར་བཞེས། །ལ་ལ་དྲིལ་ཆེན་སྒྲ་སྒྲོགས་ཁྲོ་ལོ་ལོ། །ལ་ལ་རོལ་པའི་རྟ་བྲོ་ཆེམས་སེ་ཆེམ། །རོལ་མོ་ཡེ་ཤེས་མཆོད་པ་ཆེན་པོ་བཞེས། །གནམ་ལྕགས་དུར་མོ་མེ་ཡི་མཆོད་པར་བཞེས། །གནམ་ལ་འཕུར་དང་ཆུ་ལ་འཕྱོ་བ་དང་། །ས་ལ་སྐྱེས་པའི་མདངས་ཀྱི་མཆོད་པར་བཞེས། །ཧོ་དགོངས་སུ་གསོལ། མ་མོ་མཁའ་འགྲོ་ཕྱི་ནང་གི་ཕྱོགས་སུ་བསྒྱུར་བ་དང་།
འབྲུག་གི་སྒྲ་སྒྲོགས་པ་དང་། གློག་གི་ལྕེ་འབྱིན་པ་དང་། གནམ་ལྕགས་ཀྱི་རྐན་རྡེབས་པ་དང་། རྒྱུ་འབྱུང་བ་ལྔ་ཁ་ལོ་སྒྱུར་བའི་རྒྱལ་མོ་ལྔ་དང་། ལས་མཛད་སྲིད་པ་ཁྲོས་པའི་དབང་མོ་ཆེ་བཞི། དྭངས་མའི་དབྱིངས་ལས་ཤར་བའི་མ་ཆེན་བཞི་དང་། རིག་པ་རྒྱན་གྱི་མ་ཆེན་བཞི་དང་། དམན་མོར་གྲགས་པ་ཐམས་ཅད་དང་། མཁྱེན་པ་དང་ནི་བྱིན་གྱིས་བརླབ་ཏུ་གསོལ། །དེ་ནས་རིག་པ་དོན་ལ་བཟླས། ཨོཾ་ཤྲཱི་ཧེ་རུ་ཀ །བཛྲ་བོ་དྷི་ཙིཏྟ་ས་མ་ཡ་ཧཱུཾ་ཧོ། ཀྲོ་དྷཱི་ཤྭ་རཱི་པདྨ་རུ་ལུ་རུ་ལུ་བྷྱོ། ཐུགས་ལས་ལྗགས་ཀྱི་རྩེ་ལ་འཕྲོ། །མཁའ་ལ་འདུ་ཞིང་དབྱིངས་སུ་བསྡུ། །དཀྱིལ་འཁོར་གཉིས་སྡེབས་ཞལ་སྐོར་བཟླས། །རང་རང་རྩ་བའི་སྙིང་པོ་སྤྲོ། །རྡོ་རྗེ་མཁའ་འགྲོའི་རྒྱུད་ལས། མཆོད་པ་རིམ་པར་བསྟན་པའི་ལེའུ་སྟེ་བཅུ་པའོ།། །།ཧཱུཾ་ཐུགས་ཀྱི་ཀུན་མཁྱེན་སྐུ་ཡི་ཀུན་ཏུ་ཁྱབ། །གསུང་གི་སྒྲ་སྒྲོགས་ཡོན་ཏན་ཅིར་ཡང་སྣང་། །ཕྲིན་ལས་རྒྱ་མཚོ་མཛད་ལ་ཕྱག་འཚལ་ལོ། །ཅི་མི་འོང་བའི་སྤུན་དྲུག་བཅུ་གསུམ་པོ། །རུས་མིན་སྤུན་དྲུག་ཚོགས་ལ་ཕྱག་འཚལ་ལོ། །རིག་པའི་དབྱིངས་ལས་ཤར་བའི་དམ་ཅན་ཚོགས། །ཐུགས་རྗེ་རྩེ་གཅིག་ཡིད་ཀྱིས་དགོངས་ནས་གཤེགས། །སྲིད་པ་ཀུན་གྱི་ལས་རྣམས་གྲུབ་པ་མོ། །སྲིད་པའི་དམན་མོའི་ཚོགས་ལ་ཕྱག་འཚལ་ལོ། །དེ་ནས་གདན་རྣམས་བསྒྱེལ་ནས་སུ། །གྲུབ་པའི་ལས་རྣམས་བྱེད་པར་བསྒོ། །ཧཱུཾ་བཅོམ་ལྡན་ཆེ་མཆོག་ཧེ་རུ་ཀ །མཐིང་ནག་འབར་བའི་ཆ་ལུགས་ལ། །དུར་ཁྲོད་འབར་བས་སྐུ་ལ་བརྒྱན། །ཕྱག་དྲུག་ཕྱག་ཆས་སྐྱེ་ཤི་སྒྲོལ། །བསྐལ་པ་མེ་ཡི་གཟི་མདངས་ཅན། །ཡུམ་དང་གཉིས་སུ་མེད་པར་རོལ། །ཐུགས་རྗེ་དབྱིངས་ནས་རོལ་པར་མཛད། །ཐུགས་རྗེ་མི་འགྱུར་དབྱིངས་ནས་སྐུ་སྤྲུལ་པ། །མཁའ་དྲུག་རྒྱལ་མོ་མངོན་སྤྱོད་ལས་གྱིས་ཤིག །མི་དམིགས་སྐྱེ་མེད་དབྱིངས་ནས་སྐུ་སྤྲུལ་པ། །ཕྲ་མེན་རྒྱ་མཚོ་ལ་སོགས་ལས་གྱིས་ཤིག །སྙིང་རྗེ་ཆེན་པོའི་འོད་ལས་སྐུ་སྤྲུལ་མ། །ཉི་མ་ཐོད་ཕྲེང་ལ་སོགས་ལས་གྱིས་ཤིག །ཐུགས་ཀྱི་སྤྲུལ་པས་ཁམས་གསུམ་རྡུལ་དུ་རློག །ཁྲོས་པའི་དབང་ཆེན་ལ་སོགས་ལས་གྱིས་ཤིག །སྐྱེ་
མེད་མི་འགྱུར་དབྱིངས་ནས་དོན་མཛད་མ། །སྦས་པའི་མ་ཆེན་ལ་སོགས་ལས་གྱིས་ཤིག །རིག་པའི་འོད་ལས་ཤར་བའི་བཞད་སྒྲ་ཅན། །ཐུགས་ཀྱི་དགྱེས་སྡེ་ལ་སོགས་ལས་གྱིས་ཤིག །སྣང་སྲིད་ཐམས་ཅད་སྐྱེ་འགྲོའི་རྣམ་འཕྲུལ་མ། །ཆགས་བྱེད་ཆ་སྙོམས་ལ་སོགས་ལས་གྱིས་ཤིག །དཔག་བསམ་ཤིང་བུ་ཁྱེར་ནས་སྤྲུལ་པའི་ལྷ། །ཨེ་ཀ་ཙ་ཏི་ལ་སོགས་ལས་གྱིས་ཤིག །འཐོར་རླུང་དྲག་པོས་སྣང་སྲིད་བྷྱོ་ཟློག་བྱེད། །ནམ་མཁའི་རྒྱལ་མོ་ལ་སོགས་ལས་གྱིས་ཤིག །འདོད་ཆགས་གནས་སུ་སྟོབས་མཛད་བྱམས་སྙོམས་མ། །འདོད་ཁམས་ནེ་མཚན་ལ་སོགས་ལས་གྱིས་ཤིག །བདུད་ཀྱི་བུ་སྨད་སྲིད་གསུམ་བྷྱོ་ཟློག་མཛད། །སྲིན་མོ་ཆེན་མོ་ལ་སོགས་ལས་གྱིས་ཤིག །ཐུགས་རྗེ་བྱམས་པས་ཡབ་ལ་བརྩེ་བ་མ། །ལས་ཀྱི་སྲིན་མོ་ལ་སོགས་ལས་གྱིས་ཤིག །བརྟུལ་ཞུགས་སྟོབས་ཀྱིས་བདུད་ཀྱི་དཔུང་འཇོམས་མ། །དམག་དཔོན་རྒྱལ་མོ་ལ་སོགས་ལས་གྱིས་ཤིག །རྒྱལ་བའི་བཀའ་བཞིན་ལས་རྣམས་ཁས་བླངས་པ། །ཉི་ཤུ་རྩ་བརྒྱད་དབང་མོ་ལས་གྱིས་ཤིག །རྡོ་རྗེ་མཁའ་འགྲོའི་རྒྱུད་ལས། བསྐུལ་བའི་ལེའུ་སྟེ་བཅུ་གཅིག་པའོ།། །།ཕྲ་མེན་རྒྱ་མཚོས་ཡང་གསོལ་པ། །བསྒྲུབ་པའི་རིམ་པ་གང་ལགས་པ། །མངོན་རྫོགས་དཔལ་ལ་བདག་ཉན་འཚལ། །རྒྱལ་པོ་བདེ་བས་བཀའ་སྩལ་པ། །དབེན་ལ་གཉན་པའི་གནས་སུ་ནི། །འདབ་བཞི་སྒོ་བཞི་ཡང་དག་ལྡན། །ཡབ་ཡུམ་བསྙེན་པ་རྫོགས་བྱས་ནས། །ཀུན་ཏུ་བཟང་མོའི་བྷ་ག་ལ། །རྒྱལ་མོ་བཞི་དང་ཐུན་མོང་ཤར། །ཧཱུཾ་ཧཱུཾ་ཧཱུཾ། བྷྱོ་བྷྱོ་བྷྱོ་བྷྱོ། རཾ་ཛྭ་ལ་ནི་ཕཊ། སིང་ཏིང་ས་ལ་ཕཊ། ཕ་ཙནྟི་ཧ་ཕཊ། ཡཾ་གརྦྷེ་ལང་ཕཊ། ཏི་ཕང་ཕཊ། ཨ་པར་མནྟ་ཕཊ། དྭངས་སམ་འདི་དང་ས་མ་ཕཊ། ས་ཡི་དུས་ཉུལ་ཆེན་མོས་ཏེ། །ཤར་ཕྱོགས་ཁམས་ནས་གཤེགས་སུ་གསོལ། །མེ་ཡི་འོད་ནས་རྣམ་སྤྲུལ་མ། །ལྷོ་ཕྱོགས་ཁམས་ནས་གཤེགས་སུ་གསོལ། །ཆུ་ཡི་དྭངས་མས་སྤྲུལ་པ་མོ། །ནུབ་ཕྱོགས་ཁམས་ནས་གཤེགས་སུ་གསོལ། །རླུང་གི་བྱེད་ལས་སྐྱེད་པ་མོ། །བྱང་ཕྱོགས་ཀློང་
ནས་གཤེགས་སུ་གསོལ། །ལྷ་ཡི་བུ་མོ་འདབ་བཟང་མོ། །གཤིན་རྗེའི་བུ་མོ་རལ་པ་ཅན། །ཀླུ་ཡི་བུ་མོ་ཡིད་འཕྲོག་མ། །གནོད་སྦྱིན་བུ་མོ་གར་མཁན་མ། །ཕྱོགས་བཞི་དག་ནས་གཤེགས་སུ་གསོལ། །ཐིམ་པའི་རྒྱལ་མོའི་བྱེ་བྲག་ནི། །རྒྱ་མཚོ་གཟུགས་ཀྱི་ཁོག་པ་རུ། །གསེར་མིག་འབར་བའི་ཤ་ཡིས་བསྐང་། །རྒྱ་མཚོ་དགྲ་ཡི་ཁོག་པ་རུ། །ཙ་ར་ཀའི་པའི་མདངས་སྤྱིས་བསྐང་། །ན་ཁྲོ་ཏ་ཡི་ཁོག་པ་རུ། །སྟོངས་བྱེད་མ་ཡི་བཅུད་ཀྱིས་བལྟམས། །གནོད་སྦྱིན་འབར་བའི་རྩེ་མོ་རུ། །གངས་ཀྱི་ཞུན་ཆུ་འབར་བས་བསྐང་། །མཐུན་པའི་རྫས་ཀྱིས་སྐུ་མཉེས་བྱ། །སྤྱི་དཔལ་ཆེན་པོ་མཆོད་བྱས་ནས། །རང་རང་སྔགས་ཀྱིས་མཆོད་པར་བྱ། །ལྷ་ཡི་འབར་བའི་ཨེ་སྤྱིལ་དུ། །རྟེན་གྱི་འཁོར་ལོ་དམིགས་པ་ཡིས། །སྲི་རྩོ་ན་ཡི་ཐག་པས་གདགས། །གཟུགས་མོ་བྱི་ཐུར་དག་ལ་སྟོད། །ཧཱུཾ་དཔལ་གྱི་ཕོ་ཉ་ཆེན་མོ་ནི། །སྟོན་ཟླ་གསུམ་གྱི་ངོས་ཤེད་ལ། །ཁྲི་གདུགས་གདལ་བའི་ཤར་ཕྱོགས་ནས། །སྲིད་པ་བགྲེང་བུ་ཤ་ཟ་མ། །ཤར་ནས་དམ་སྲི་ཤ་དང་ཕྲོལ། །དགུན་ཟླ་གསུམ་གྱི་ངོས་ཤེད་ལས། །ཁྲི་གདུགས་གདལ་བའི་ལྷོ་ཕྱོགས་ནས། །སྲིད་པའི་འཕྲང་ཉལ་དྲོད་འཕྲོག་མ། །ལྷོ་ནས་དམ་སྲི་དྲོད་དང་ཕྲོལ། །དབྱར་ཟླ་གསུམ་གྱི་ངོས་ཤེད་ལ། །ཁྲི་གདུགས་གདལ་བའི་ནུབ་ཕྱོགས་ནས། །སྲིད་པ་ཏ་སྦྱོར་ཁྲག་འཛག་མ། །ནུབ་ནས་དམ་སྲི་ཁྲག་དང་ཕྲོལ། །ཁྲི་གདུགས་གདལ་བའི་བྱང་ཕྱོགས་ནས། །སྲིད་པའི་གན་རྐྱལ་དབུགས་འཕྲོག་མ། །བྱང་ནས་དམ་སྲི་དབུགས་དང་ཕྲོལ། །ཧཱུཾ་གླིང་བཞི་མགྱོགས་མ་ཤར་ནས་གཤེགས། །མཁའ་ལ་ཁྱུང་ལྡིང་ལྷོ་ནས་གཤེགས། །དམར་མོ་གཡག་མགོ་ནུབ་ནས་གཤེགས། །སེར་མོ་ལས་མཁན་བྱང་ནས་གཤེགས། །ཨེ་ལ་གནས་པའི་དམ་སྲི་མ། །རྒྱལ་མོ་བཞི་ཡི་རྣོ་ཡིས་གཅད། །ཏྲི་ཙིཏྟ་ཡ་ཁད་ཀན། རི་ཙིཏྟ་ལ་ཐུམ་ལུམ། ཁམ་ཙིཏྟ་ལ་ཧཱུཾ། ཨ་ཙིཏྟ་ལ་ཧ་ཕཊ། རྡོ་རྗེ་མཁའ་འགྲོའི་རྒྱུད་ལས། དམ་སྲི་རླག་བྱེད་ཁྲག་གི་ལག་ཆ། ཕུང་བྱེད་དྲེགས་པའི་རྣོ་ཁ་སྒྲིལ་གྱི་ལེའུ་སྟེ་བཅུ་གཉིས་པའོ།། །།དབེན་ལ་
གཉན་པའི་གནས་སུ་ནི། །མཎྜལ་འཁོར་ཡུག་ལྡན་པ་ལ། །འཁོར་ལོ་རྩིབས་བརྒྱད་འབར་བ་ལ། །རྡོ་རྗེ་འབར་བ་མེ་འོད་ལྡན། །ཡབ་ཡུམ་བསྙེན་པ་རྫོགས་བྱས་ནས། །ཡུམ་གྱི་མཁའ་དཀྱིལ་བྷ་ག་ལ། །རྩིབས་བརྒྱད་འཁོར་ལོ་འབར་བ་ལ། །ལྷ་མོ་ཚོམ་བུ་སྦོ་བར་བྱ། །ཙ་པ་ལ་ཕཊ། མ་རིང་ནི་ཕཊ། དུང་པ་ནི་ཕཊ། རག་ཤ་ནི་ཕཊ། ཙིཏྟ་ལ་ཕཊ། གརྦྷེ་ལང་ཕཊ། ཨུ་པ་ཏེ་ཕཊ། ནུ་མ་རེ་ཕཊ། ཕྱོགས་མཚམས་བརྒྱད་ནས་བསྐུལ་ཤེས་ན། །གྲུབ་པའི་མཚན་རྟགས་བསྟན་དུ་གསོལ། །ཛཿཧཱུཾ་བཾ་ཧོཿ། ལུང་སྟོང་མ་ཡི་རྩེ་མོ་རུ། །སྣ་ཚོགས་ལྔ་ཡི་རྩི་སྦྱར་བས། །ཐོབ་པའི་རྒྱལ་མོ་མཉེས་པར་བྱ། །རང་རང་སྔགས་ལ་རུ་ལུས་སྔགས། །ཐུགས་ཀར་སྔགས་ཟེར་འཕྲོ་འདུས་བསྐུལ། །བཞི་ཡི་ལྷོ་ཕྱོགས་ཨེ་ཡི་གནས། །སྲིན་པོ་འདུལ་བའི་གཟུགས་ཉིད་ལ། །ལྕགས་ཀྱི་དྲ་བས་རྒྱ་གྲམ་བྱ། །གངས་རི་འབར་བའི་རྩེ་ལ་བཞག །དེ་ནས་ཕོ་ཉ་མངག་པ་སྟེ། །ཧཱུཾ་མི་དམིགས་ཏིང་འཛིན་ཡེ་ཤེས་བདེ་བ་ཆེ། །ཧེ་རུ་ཧཱུཾ་སྲས་འཁོར་དུ་བཞད། །སྤྲུལ་པ་སེང་གེའི་མགོ་བོ་ཅན། །གངས་ཀྱི་སྟོངས་ནས་ངར་སྒྲ་འབྱིན། །གཅན་གཟན་ཕྲ་མོ་མང་པོ་འདར་ཅིང་འདུད། །དམ་ཉམས་རྡུལ་དུ་རློག་པའི་དུས་ལ་བབ། །ཧཱུཾ་མི་དམིགས་ཏིང་འཛིན་ཡེ་ཤེས་བདེ་བ་ཆེ། །སྤྲུལ་པ་སྟག་གི་མགོ་བོ་ཅན། །དམ་ཉམས་དགྲ་བོ་སྒྲལ་བའི་དུས་ལ་བབ། །ཧཱུཾ་མི་དམིགས་ཕྲ་མོ་ཆུ་སྲིན་རྒྱལ་མཚན་ཕྱར། །སྤྲུལ་པ་ཝ་ཡི་མགོ་ཅན་དུར་ཁྲོད་ཁྱབ་པར་ཉུལ། །སྙིང་རྗེ་མེད་པར་ལས་ཀྱིས་གསོད་པར་བྱེད། །དམ་ཉམས་རྡུལ་དུ་རློག་པའི་དུས་ལ་བབ། །ཧཱུཾ་མི་བཟད་ཁྲོས་པས་བྱང་ཕྱོགས་དྲེགས་པ་འཇོམས། །མི་དམིགས་ཕོ་ཉ་མི་སྡུག་རྡོ་རྗེ་ཕྱར། །སྤྲུལ་པ་སྤྱང་མོའི་མགོ་ཅན་སྲོག་ཆགས་གཞན་མ་སྒྲོལ། །རྟེན་ལ་ཕབ་གནས་གསུམ་རྣོན་པོས། །ནག་མོ་མགོ་ཅན་སྦུད་པ་རུ། །གདུག་པ་ཅན་གྱི་ཤིང་གིས་དགང་། །སྲིན་མོ་ཁྲོས་ནས་མེ་བསླངས་ལ། །སྙིང་པོ་རྒོད་ཀྱི་མཇུག་མས་མེ་སྦར་ལ། །བྱེད་པ་མོ་ནི་བཞི་གཉིས་ལ། །རང་རང་སྔགས་ཀྱིས་སྲེག་བྱང་བྱ། །
དྷ་དུ་ར་ཡི་ཁུ་བ་དང་། །མཆི་རྐྱེན་རྒྱ་ཚིལ་མཆོད་པར་སྦྱར། །རྡོ་རྗེ་མཁའ་འགྲོའི་རྒྱུད་ལས། བཤན་པ་མོ་བརྒྱད་སྒྲུབ་པའི་ཐབས་བསྟན་པའི་ལེའུ་སྟེ་བཅུ་གསུམ་པའོ།། །།དབེན་གནས་གཉན་པའི་གནས་མཆོག་ཏུ། །མཎྜལ་འཇིམ་པའི་དྲི་བྱུགས་ལ། །གྲུ་གསུམ་གཅིག་ལ་རྩིབས་བརྒྱད་ལྡན། །ཆེ་མཆོག་བསྙེན་པ་རྫོགས་བྱས་ནས། །ཡུམ་གྱི་བྷ་གའི་དཀྱིལ་དུ་འཁོར། །སྙིང་པོ་ཐིག་ལེ་སྤྲོས་པ་ལས། །ད་རི་ཧཱུཾ་ཕཊ། རུ་ལུ་ཧཱུཾ་ཕཊ། ར་ཏ་ཧཱུཾ་ཕཊ། རྩ་ཏེ་ཀ་ཧཱུཾ་ཕཊ། གུ་ཤ་ཏེ་ཧཱུཾ་ཕཊ། ཨ་ཏོ་ཡེ་ཧཱུཾ་ཕཊ། བི་ཏ་སྭ་ཕཊ། དུ་ར་རྩ་ཡེ་ཕཊ། ཛཿཧཱུཾ་ཧཱ་ཧེ་ཕཊ། རྒྱན་ལྡན་སྔགས་ཀྱིས་མཆོད་བྱས་ལ། །སྟོང་རྩ་བརྒྱད་ཀྱི་འཕྲོ་འདུ་བྱ། །རང་རང་སྔགས་ལ་རུ་ལུས་སྔགས། །མཐིང་ནག་ཨེ་ཡི་དཀྱིལ་འཁོར་དུ། །སུ་ཏྲ་ན་ཡི་རྐྱལ་པ་རུ། །ནྲྀ་ཏྲ་ན་ཡི་གཟུགས་བཅུག་ལ། །དེ་ནས་དཔལ་གྱི་ཕོ་ཉ་ལ། །ཧཱུཾ་ཤར་གྱི་ཕྱོགས་ནས་བསྐུལ་བ་ནི། །དཔལ་གྱི་བཀྲག་འཕྲོག་ནམ་མཁའི་གཟི། །སྐུ་མདོག་དཀར་སེར་སྤྲིན་གྱི་རལ་པ་ཅན། །སྤྱི་གཙུག་དམར་པོ་ཞེ་སྡང་སྐྱེད། །སྐར་མདའ་ཕྱག་གཉིས་གཟའ་ཡི་ཞགས་པ་འཕེན། །གཡས་པ་འོད་ཟེར་དམར་པོ་གཡོན་པ་ཁྲོ་ཆུ་ཙགས་ཆ་འཛིན། །དྲི་ཟ་མགོ་ཆང་བྷན་དྷ་རུ། །སྙིང་ཁྲག་དམར་ལ་ད་སྡོམས་ཤིག །ཧཱུཾ་ལྷོ་ཡི་ཕྱོགས་ནས་བསྐུལ་བ་ནི། །དཔལ་གྱི་ཁྲག་འཐུང་ནམ་མཁའི་གཟི། །ཁྲག་མདོག་དམར་མོ་བསེ་ཡི་རལ་པ་ཅན། །སྤྱི་གཙུག་འོད་ཟེར་དམར་པོ་སྐྱེས། །གཡས་པ་འོད་ཟེར་དམར་པོ་འཛིན། །གཤིན་རྗེ་མགོ་བཅད་བྷན་དྷ་རུ། །སྙིང་ཁྲག་དམར་ལ་ད་སྡོམས་ཤིག །ཧཱུཾ་ནུབ་ཀྱི་ཕྱོགས་ནས་བསྐུལ་བ་ནི། །དཔལ་གྱི་དྲོད་འཕྲོག་ནམ་མཁའི་གཟི། །མེ་འཕྲེང་བུ་འཕྲེང་མ་ཡི་རལ་པ་ཅན། །སྤྱི་གཙུག་མེ་ཡི་འདོད་ཆགས་དམར་པོ་སྐྱེས། །མེ་ཡི་ཕྱག་རྒྱ་གར་ཐབས་བྱེད། །མེ་མདའ་ཞབས་གཉིས་བརྐྱང་བསྐུམ་ཚུལ། །ཀླུ་བདུད་མགོ་བཅད་བྷནྡྷ་རུ། །སྙིང་ཁྲག་དམར་ལ་ད་སྡོམས་ཤིག །ཧཱུཾ་བྱང་གི་ཕྱོགས་ནས་བསྐུལ་པ་ནི། །དཔལ་གྱི་
དབུགས་འཕྲོག་ནམ་མཁའི་གཟི། །སྐུ་མདོག་ལྗང་གུ་སྤྲིན་གྱི་རལ་པ་ཅན། །རླུང་གི་ཕྱག་གཉིས་གར་ཐབས་འགྱེད། །གཡས་པ་རྒྱ་གྲམ་རལ་གྲི་འདེབས། །གནོད་སྦྱིན་མགོ་བཅད་བྷནྡྷ་རུ། །སྙིང་ཁྲག་དམར་ལ་ད་སྡོམས་ཤིག །བཀུག་ལ་པུ་ཏྲའི་རྒྱལ་པོ་རུ། །ཀྲོ་ཏ་ན་ཡིས་བཏགས་ནས་སུ། །འབྱུང་བ་རླུང་གི་དཀྱིལ་འཁོར་དུ། །མོན་པ་ནག་པོས་བཏགས་ནས་ནི། །སྲིད་པ་མ་སྟོངས་བར་དུ་གདུག །རྡོ་རྗེ་མཁའ་འགྲོའི་རྒྱུད་ལས། ཇག་པ་མ་མོའི་སྒྲུབ་པ་བསྟན་པའི་ལེའུ་སྟེ་བཅུ་བཞི་པའོ།། །།དུར་ཁྲོད་ངན་པའི་ས་ཕྱོགས་སུ། །མཎྜལ་ཙནྡན་དྲིས་བྱུགས་ལ། །པད་བཞི་འཁོར་ལོ་རྩིབས་བཞི་བཅས། །ཆེ་མཆོག་བསྙེན་པ་རྫོགས་བྱས་ནས། །ཡུམ་གྱི་མཁའ་ལས་འོད་འཕྲོས་པ། །ཀུ་མ་ད་རི་ཕཊ། ཀངྐ་ཀ་ད་རི་ཕཊ། ཙ་མུན་ད་རི་ཕཊ། ཆུ་ལ་ད་རི་ད་རི་ཕཊ། ར་ཙ་ཧ་ཕཊ། ཀེ་རུ་ཧེ་ཕཊ། ཀ་ར་ཏ་ཕཊ། དུ་ན་ཡེ་ཕཊ། རྒྱན་ལྡན་གཏོར་མ་མཉེས་བྱས་ལ། །རང་རང་སྔགས་ལ་ཛ་ཡིས་མཛེས། །སྟོང་རྩ་བརྒྱད་དུ་བསྙེན་པ་བྱ། །ཤར་དུ་སྐར་མདའ་གསང་གིས་མཛེས། །ལྷོ་རུ་ནེ་ཀྲ་འབྲུ་མར་དགང་། །ནུབ་ཏུ་བདུད་ཀྱི་རྩེ་མོ་རུ། །རྒྱ་རུ་ར་ཡི་ཁུ་བས་དགང་། །རྐང་རྗེས་ཟད་པའི་རབས་ཆད་ཐོད་པ་རུ། །མེ་ཏོག་འབར་བའི་སྦྲང་རྩི་བཅུད་ཀྱིས་དགང་། །མ་ཧཱ་དེ་ཝའི་བུ་མོ་སྟེ། །ཀུ་མ་ད་རའི་དུས་ལ་བབ། །དཔལ་ཆེན་ཐུགས་ཀྱི་བུ་མོ་སྟེ། །ཀངྐ་ཀ་ད་རའི་དུས་ལ་བབ། །གནོད་སྦྱིན་ལེགས་པའི་བུ་མོ་སྟེ། །ཙ་མུན་ད་རའི་དུས་ལ་བབ། །ཀླུ་རྒྱལ་འཇོག་པོའི་བུ་མོ་སྟེ། །ཆུ་ལ་ད་རའི་དུས་ལ་བབ། །སྲིན་མོ་རྒྱུ་བའི་ཚེ་སྲོག་བདག །སྤྲུལ་པའི་རྒྱལ་མོའི་དུས་ལ་བབ། །འཇིང་གི་ཐུན་ལ་རྒྱུ་འགྲོ་མ། །རྒྱན་གྱི་རྒྱལ་མོའི་དུས་ལ་བབ། །ནམ་ཕྱེད་ཐུན་ལ་བབ་པའི་ཚེ། །དབང་གི་རྒྱལ་མོའི་དུས་ལ་བབ། །ཐོ་རངས་ཐུན་ལ་བབ་པའི་ཚེ། །ལས་
ཀྱི་རྒྱལ་མོའི་དུས་ལ་བབ། །ཁྲག་མཚོ་འབར་བའི་དཀྱིལ་འཁོར་དུ། །ཤིན་ཏུ་རྣོ་བའི་སྟེང་ནས་ནི། །རྣོ་དབལ་སྔགས་ཀྱིས་དབབ་པར་བྱ། །གུ་གུ་ཙིཏྟ་ལི་ཁ་ཐིམ་རྦད། ར་ཏོ་ནི་ད་ནི་པྲ་ཏོ་རྦད། དྭངས་དུ་ནི་ཐོ་རྦད། ཀྲི་ཏ་རུ་བི་ཏི་ནི་རྦད། ནད་དང་མཚོན་གྱི་བསྐལ་པ་ཡིས། །དུས་མཐའི་མེ་བཞིན་འཁྲུག་པར་བསམ། །རྡོ་རྗེ་མཁའ་འགྲོའི་རྒྱུད་ལས། གའུ་ཕུང་བྱེད་ཆེན་པོའི་ལེའུ་སྟེ་བཅོ་ལྔ་པའོ།། །།གྲུབ་པའི་ས་གཞི་བརྟག་པ་རུ། །འཁོར་ལོ་འབར་བའི་རྩིབས་བཞི་ལ། །དུར་ཁྲོད་ཐལ་བས་བྲིས་བྱས་ཏེ། །དབུས་སུ་རྟ་མཆོག་ཡབ་ཡུམ་བསྐྱེད། །མཁའ་ལ་སྲས་སུ་ཡུམ་བཞི་བསྐྱེད། །སྙིང་རྩ་ཤ་མ་ལ་བྷྱོ། ཙ་བ་ས་ལ་བྷྱོ། མ་མ་ལ་ས་བྷྱོ། མཐིང་ནག་འབར་བའི་དཀྱིལ་འཁོར་དུ། །གདུག་པའི་པགས་པར་ར་དཀར་གཞུག །དེ་ནས་ཕོ་ཉ་ཆེན་མོ་ནི། །བྱང་ཤར་མཚམས་ཀྱི་འཁོར་འདུས་མ། །སྟག་སྨན་ཟོར་གདོང་ཆེན་མོ་ནི། །ཆིབས་སུ་ལྷོ་ཡི་སྟག་ལ་ཆིབས། །འཁོར་དུ་གཟིགས་སྨན་རོལ་པོ་འབྲོང་། །བྱང་ཤར་དགྲ་འདུལ་ཆེན་མོ་གཤེགས། །གློག་སྟོང་འཁྱུག་ཅིང་གཤེགས་སུ་གསོལ། །ནུབ་བྱང་མཚམས་ཀྱི་འཁོར་འདུལ་མ། །ནག་མོ་གདོང་དྲུག་མཆེ་ཆེན་འབེབས། །ཆིབས་སུ་བྱང་ཀའི་འབྲོང་ལ་ཆིབས། །གཡས་ནས་མི་ལྤགས་གཡང་གཞི་རྡེབ། །གཡོན་ན་མདུང་དམར་རུ་མཚོན་འདེབས། །ནུབ་བྱང་བདུད་འདུལ་དུས་ལ་བབ། །འབྲུག་སྟོང་ལྡིར་ཅིང་ད་ཚུར་སྤྱོན། །ལྷོ་ནུབ་མཚམས་ཀྱི་འཁོར་རྒྱལ་མོ། །ཁྲི་དམན་ལྡེམ་དྲུག་ཆེན་མོ་ནི། །ཆིབས་སུ་ནམ་མཁའི་གློག་ལ་ཆིབས། །གཡས་ན་དམན་བརྒྱ་ཤ་ར་ར། །གཡོན་ནས་གློག་འཁྱུག་ལྕིབས་སེ་ལྕིབ། །ལྷོ་ནུབ་སྲིན་མོ་དུས་ལ་བབ། །ཤར་ལྷོ་མཚམས་ཀྱི་བདུད་འདུལ་མ། །མཚན་ནི་བ་ལང་དྲེའུ་སྣ་མ། །ཆིབས་སུ་དྲེལ་རྟ་ཕག་ལ་ཆིབས། །དྲི་ཟ་འདུལ་བྱེད་ཆེན་མོ་གཤེགས་སུ་གསོལ། །གློག་སྟོང་འཁྱུག་ཅིང་ད་ཚུར་སྤྱོན། །
གདུག་པ་ཀླད་ལ་བསྐོར་ནས་ཀྱང་། །སྣང་བ་ཆེན་པོ་ནང་དུ་འཕང་། །རྡོ་རྗེ་མཁའ་འགྲོའི་རྒྱུད་ལས། འཁོར་འདུལ་མ་བཞི་སྒྲུབ་པའི་ལེའུ་སྟེ་བཅུ་དྲུག་པའོ།། །།དུར་ཁྲོད་འབར་བའི་ཐོད་པ་རུ། །ཟླ་གམ་བཞི་ལ་ཐིག་ལེས་བརྒྱན། །ཕྲ་མེན་བསྙེན་པ་རྫོགས་ནས་ཀྱང་། །མཁའ་ལ་འོད་འཕྲོས་སྤྲུལ་པ་རྫོགས། །དུར་ཏ་ཡེ་ཕཊ། པ་རི་ཏ་ཕཊ། ཛ་ག་ཤ་ཡེ་ཧཱུཾ། ཁ་ས་ཡེ་ཧཱུཾ། རང་རང་བསྙེན་པ་རྫོགས་བྱས་ནས། །ཕྱོགས་བཞི་ཐིག་ལེས་ཟླུམ་པོ་བཞི། །ཀ་ཀོ་ལ་ཡི་ཐིག་པ་དང་། །ཏྲོས་ཕོ་རོག་པ་ར་ཡི་ཐིག་ལེ་དང་། །གསེར་མིག་མ་ཡི་ཐིག་ལེ་དང་། །སོ་ཏ་ནག་པོའི་ཐིག་ལེ་དང་། །རོ་ཏིའི་མིང་བཅུག་ལ། །ཙ་ར་ན་ཡི་འུར་རྡོས་འཕང་། །ཧཱུཾ་འདོད་པའི་བུ་མོ་མི་བཟད་མ། །ནམ་མཁའ་དང་བའི་སྐུ་མངའ་མ། །ཡེ་ཤེས་ཟླ་བའི་ཐུགས་མངའ་མ། །ཏིང་འཛིན་ཉི་མའི་སྤྱན་མངའ་མ། །འདོད་པའི་བུ་མོ་མི་བཟད་མ། །དྲེད་པོའི་བུ་མོའི་གཟུགས་ལྡན་མ། །རྔ་མོ་གྭ་བཅིབས་གློག་བས་མགྱོགས། །སྤྲུལ་པའི་བུ་མོ་མི་བཟད་མ། །འདོད་པའི་བུ་མོ་མི་བཟད་མ། །རུས་སྦལ་ཆིབས་ནི་གློག་བས་མགྱོགས། །ཟངས་ཀྱི་སྐུ་བྱང་ཀླད་ལ་བསྐོར། །བཤན་པ་འབུམ་གྱི་དབུས་ན་འགྱིང་། །འདོད་པའི་བུ་མོ་སྤྲུལ་པ་མོ། །མེ་ཡི་འབར་མ་ལྕེ་བརྒྱད་ནི། །མྱུར་བའི་ཚད་ནི་གློག་བས་མགྱོགས། །ལག་པའི་སྙིང་འབྱིན་ཞལ་དུ་འདྲེན། །རྡོ་རྗེ་མཁའ་འགྲོ་ལས། ཁྱོ་མེད་མ་བཞི་སྒྲུབ་པ་བསྟན་པའི་ལེའུ་སྟེ་བཅུ་བདུན་པའོ།། །།ཕྲ་མེན་རྒྱ་མཚོས་ཡང་གསོལ་པ། །ཕོ་ཡི་སྒྲུབ་པ་ཇི་ལྟར་ལགས། །རྒྱལ་བ་ཡབ་ལ་བདག་ཉན་འཚལ། །རྒྱལ་པོ་དེ་བས་བཀའ་སྩལ་པ། །དབུས་སུ་གྲུ་གསུམ་འབར་བ་ལ། །ཤེལ་ནག་རྒྱལ་བུར་གཟུགས་བཅུག་ལ། །ཕྱག་རྒྱ་བཞི་ཡིས་དགུག་གཞུག་བྱ། །བསྡིམ་ལ་གུ་གུ་ཐུལ་ཐུལ་བྱ། །
དེ་ནས་ཕོ་ཉ་རབ་དགྱེ་སྟེ། །ཧཱུཾ་ཤར་གྱི་ཕྱོགས་ནས་བཞེངས་སེ་བཞེང་། །དུང་གི་གླང་པོ་ཆེན་པོ་ལ། །ཡ་རྐན་གནམ་ལ་མ་རྐན་ས། །མཆེ་བ་གངས་རི་གཏམས་པ་འདྲ། །ལྕེ་ནི་མུན་གྱི་གློག་བས་མགྱོགས། །དེ་འདྲའི་སེམས་ཅན་ཆེན་པོ་ལ། །བསེ་ཡི་སྐྱེས་བུ་འཕྲུལ་ཅན་ཞོན། །སྐུ་ལ་བསེ་ཁྲབ་ཁྲ་བོ་གསོལ། །ཕྱག་ན་བསེ་མདུང་དམར་པོ་བསྣམས། །དབུ་ལ་བསེ་ཡི་རྨོག་ཞུ་གསོལ། །རྡོ་རྗེ་འབར་བའི་ཕྲ་དོག་སྐྱེས། །བདུད་གཡག་འབྲོང་གི་གཞུ་མོ་ལ། །ཁྲོ་ཆུ་འབར་བའི་འཆང་ཟུང་དཀྱིལ། །གསེར་གྱི་མཆོག་མ་འབར་བ་ལ། །དངུལ་གྱི་སྤྱིན་གྱིས་སྡེབས་སྦྱར་ནས། །ཞིང་གི་རྒྱུས་ཀྱི་རྒྱུད་དུ་བལྟམས། །རྨྱུག་མ་བྱང་ཆུབ་ཤིང་བུ་ལ། །ཡེ་ཤེས་བཞི་ཡི་སྒྲོ་ཡིས་བསྐྱོན། །བདེ་ཆེན་ཆོས་ཀྱི་དབྱིངས་ཉིད་ལ། །རྨྱུག་མ་འོད་ཟེར་བདེ་བ་ཚ་ཚ་འཁྲུག །འཕྲོག་པར་རྒྱོབ་ཅིག་བཛྲ་ཡ། །གཟོར་རོ་གཟོར་རོ་ཙིཏྟ་མ་ཕཊ། ལྷོ་ཡི་ཕྱོགས་ནས་བཞེངས་སེ་བཞེང་། །གར་མཁན་ཤང་ཤང་རྟ་ཕོ་ལ། །ཡ་རྐན་རྦ་ལ་མ་རྐན་ཆུ། །མཆེ་བ་མཆུ་རི་འབར་བའི་སྐུ། །ལྕེ་ནི་མུན་གྱི་གློག་བས་གསལ། །དེ་འདྲའི་སེམས་ཅན་ཆེན་པོ་ལ། །བསེ་ཡི་སྐྱེས་བུ་གདུག་པ་ཞོན། །སྐུ་ལ་བསེ་ཁྲབ་ཁྲ་བོ་གསོལ། །ཕྱག་ན་བསེ་མདུང་དམར་པོ་བསྣམས། །དབུ་ལ་བསེ་ཡི་རྨོག་ཞུ་གསོལ། །རིན་ཆེན་སྔོན་པོའི་རྨོག་སྐྱེས་པ། །གཞུ་བཟུང་གཡོན་གྱི་ལྟོང་སྲོག་གཡས་ཀྱི་སྲོག །ཕོག་པར་རྒྱོབ་ཅིག་རཏྣ་ཡ། །གཟོར་རོ་གཟོར་རོ་ནཱ་ག་ཙིཏྟ་ཏྲ་ཋ་ཡ། ནུབ་ཀྱི་ཕྱོགས་ནས་བཞེངས་སེ་བཞེང་། །ཡིད་འོང་རྨ་བྱའི་རྟ་ཕོ་ལ། །ཡ་རྐན་མེ་ལ་མ་རྐན་དྲོད། །མཆེ་བ་མེ་སོ་དམར་པོ་ལ། །ལྕེ་ནི་མེ་ལྕེ་གློག་བས་མགྱོགས། །དེ་འདྲའི་སེམས་ཅན་ཆེན་པོ་ལ། །བསེ་ཡི་སྐྱེས་བུ་གདུག་པ་ཞོན། །སྐུ་ལ་བསེ་ཁྲབ་ཁྲ་བོ་གསོལ། །ཕྱག་ན་བསེ་མདུང་དམར་པོ་བསྣམས། །དབུ་ལ་བསེ་
ཡི་རྨོག་ཞུ་གསོལ། །བྱེ་རུ་དམར་པོའི་ཕྲ་དོག་སྐྱེས། །ཕོག་པར་རྒྱོབ་ཅིག་ནཱ་ག་ར། །གཟོར་རོ་གཟོར་རོ་ནཱ་ག་རྩ་པ་ལ་ཏྲ་ཏ་ཕཊ། བྱང་གི་ཕྱོགས་ནས་བཞེངས་སེ་བཞེང་། །གར་མཁན་ཤང་ཤང་རྟ་ཕོ་ལ། །ཡ་རྐན་རླུང་ལ་མ་རྐན་གྲང་། །མཆེ་བ་ཉི་ཟེར་འཛིན་པ་འདྲ། །ལྕེ་ནི་སྤྲུལ་པའི་གློག་བས་གསལ། །དེ་འདྲའི་སེམས་ཅན་ཆེན་པོ་ལ། །བསེ་ཡི་སྐྱེས་བུ་འཕྲུལ་པ་ཞོན། །སྐུ་ལ་བསེ་ཁྲབ་ཁྲ་བོ་གསོལ། །ཕྱག་ན་བསེ་མདུང་དམར་པོ་བསྣམས། །དབུ་ལ་བསེ་ཡི་རྨོག་ཞུ་ལ། །རྡོ་རྗེ་རྒྱ་གྲམ་ཕྲ་དོག་སྐྱེས། །ཕོག་པར་རྒྱོབ་ཅིག་ཁ་རམ་མ། །གཟོར་རོ་གཟོར་རོ་ཁ་དུན་ཙིཏྟ་ལ་ཧཱུཾ་ཕཊ། སྐྱེས་བུ་བཞི་ཡིས་མདོ་རྩེ་ཡིས། །གང་གི་གཟུགས་ལ་ཕབ་ལ་བསྒྲུབ། །རྡོ་རྗེ་མཁའ་འགྲོའི་རྒྱུད་ལས། བསེ་ཡི་སྐྱེས་བུ་བཞི་སྒྲུབ་པའི་ལེའུ་སྟེ་བཅོ་བརྒྱད་པའོ།། །།མདུང་རྩེ་སྦས་པའི་ས་ཕྱོགས་སུ། །འཁོར་ལོ་འབར་བ་བཞི་རུ་ལྡན། །དབུས་སུ་ཊ་ཀི་རཱ་ཙ་བསྐྱེད། །རྩ་དྲ་དུ་ཏྲ་ཧཱུཾ། ག་རྩ་པ་ར་ཏི་ཧཱུཾ། རྒྱན་ལྡན་གཏོར་མ་མཛེས་བྱས་ནས། །ར་རྩ་ནག་པོའི་ལྟོ་བ་རུ། །རཱུ་པ་ནྲྀ་དང་མིང་བྲིས་པས་མགོ་ལ་ལྷ་དང་བསྒྲལ་བའི་རྫས་སྟོན་བཞག་པར་བྱ། དེ་ནས་ཕོ་ཉ་དགྱེ་བྱས་ཏེ། ཧཱུཾ་ཁྲོ་བོ་ཆེན་པོ་ཁམས་གསུམ་གིང་ཀ་ར། །སྔོན་པོ་འབར་བ་ཆིབས་སུ་བཅིབས། །རྒྱ་ཕྱེ་སྟོད་ཀྱི་སླག་པ་ལ། །འབུམ་བྱེད་སྨད་ཀྱི་ཤམ་བུ་བཏགས། །ཞོ་དབུགས་དཀར་མོའི་རྨོག་ཞུ་ལ། །ཙནྡན་སྨུག་པོའི་འཛིང་ཐོད་བཅིངས། །བསེ་མདུང་དམར་པོ་དཔག་ཚད་བརྒྱད་ཁྲི་བཞི་སྟོང་ལ། །གནམ་ལྕགས་ཐོག་གི་མདུང་རྩེ་གསལ། །ནག་པོ་ཉི་ཁྲི་འཁོར་གྱིས་བསྐོར། །དགྲ་བོ་དབུགས་དང་བྲལ་བའི་དུས་ལ་བབ། །ཁྲོ་མོ་ཆེན་མོ་ཁམས་གསུམ་དབང་སྡུད་མ། །ཞབས་གཉིས་གྱད་དོར་གླིང་
བཞི་རཀྟས་བསྐོར། །ཕྱག་གཉིས་གཡོ་འགུལ་སྲིད་པའི་རི་བོ་འདེབས། །དགྲ་བགེགས་སྙིང་ལ་ཕུར་འདེབས་ལས་ཀྱི་གཤེད་མར་གཤེགས། །ཤར་ཕྱོགས་ཁམས་ན་རྒྱུ་བའི་གིང་ཆེན་བཞི། །མེ་ཟ་བྲག་གྱོན་དགྲ་བོའི་རུས་ལ་འཆའ། །ནང་པར་ཉི་མ་ཉིད་དང་དུས་གཅིག་འཆར། །སྲོག་དབུགས་གཟུགས་དང་ཕྲལ་བའི་དུས་ལ་བབ། །ལྷོ་ཕྱོགས་ཁམས་ནས་རྒྱུ་བའི་གིང་ཆེན་བཞི། །ཆུ་དབལ་སྔོན་པོ་ཆུ་ལྕེ་ཞོན་ནས་ནི། །སྲོད་ལ་པ་བ་སངས་དང་དུས་གཅིག་འཆར། །སྲོག་དབུགས་གཟུགས་ལ་དབང་ཞིང་ཀུན་གྱི་ཁྲག་ལ་ཁྱབ། །དགྲ་བོ་དབུགས་དང་ཕྲལ་བའི་དུས་ལ་བབ། །ནུབ་ཕྱོགས་ཁམས་ནས་རྒྱུ་བའི་གིང་ཆེན་བཞི། །མེ་དབལ་དམར་པོ་མེ་ལྕེ་ཞོན་པ་ནི། །ནམ་ཕྱེད་སྒྲ་གཅན་འཛིན་དང་དུས་གཅིག་རྒྱུ། །སྲོག་དབུགས་དྲོད་ལ་ཁྱབ་ཅིང་དམ་ཉམས་དྲོད་དང་བྲལ་བའི་དུས་ལ་བབ། །བྱང་ཕྱོགས་ཁམས་ནས་རྒྱུ་བའི་གིང་ཆེན་བཞི། །ཀླུ་དབལ་སྔོན་པོ་རླུང་ལྕེ་ཞེན་ནས་ནི། །སྲོག་དབུགས་དྲོད་ལ་ཁྱབ་ཅིང་ཀུན་གྱི་དབུགས་ལ་ཁྱབ། །དགྲ་བོ་དབུགས་དང་ཕྲལ་བའི་དུས་ལ་བབ། །གོང་གི་གཟུགས་ལ་ཕབ་བྱས་ནས། །འོད་ཡང་འབར་བས་ལྷུ་དུམ་ཕྲོལ། །མགོ་བོ་རྒྱ་བའི་རབ་ཏུ་འགྱུར། །ལྟེ་བ་རྒྱ་མཚོའི་ནང་དུ་སྐྱུར། །ལུས་པོ་དྲག་པོའི་མེ་ལ་བསྲེགས། །རྒྱུ་མ་འབྱུང་པོ་རྒྱུ་སར་མནན། །པགས་པའི་སྤྱི་ཟླུམ་ལུས་ལ་བསྐོན། །ནག་པོ་མགོ་བཅད་རླུང་གཏོར་བྱ། །རྡོ་རྗེ་མཁའ་འགྲོའི་རྒྱུད་ལས། བཤན་པ་གིང་གི་སྒྲུབ་པའི་ལེའུ་སྟེ་བཅུ་དགུ་པའོ།། །།བྲག་དམར་འདུ་བའི་རྩེ་དག་ཏུ། །རྫས་རྣམས་རབ་ཏུ་ལྡན་པ་ལ། །དཀྱིལ་འཁོར་རྩིབས་བརྒྱད་ལྡན་པ་ལ། །ལས་དཀྱིལ་འཁོར་ལོས་རབ་བརྒྱན་པ། །ཏིང་འཛིན་སྟོང་པའི་རང་བཞིན་ལས། །ཡབ་ཡུམ་སྔགས་ཀྱིས་རྫོགས་པར་བསྐྱེད། །ཨོཾ་ཨ་ཀྲོ་ཏེ་ཀ་ཡ་མཱནྟ་ཀ་ཧ་ན་མ་ཐ་བྷཉྫ་ཧཱུཾ་ཕཊ། ཡུམ་གྱི་མཁའ་
ལས་ཧཱུཾ་བཅུ་ལས། །གདན་གྱི་སྟེང་དུ་ཧཱུཾ་བཅུ་གདོན། །དེ་ནས་རང་བཞིན་སྤྱན་དྲངས་ཏེ། །ཧཱུཾ་ཆོས་སྐུ་མཉམ་ཉིད་རོལ་པའི་སྐུ། །སྨོན་ལམ་དབང་གིས་གཤེགས་སུ་གསོལ། །འཇམ་དཔལ་ཁྲོ་བོ་ཡེ་ཤེས་ལྷ། །མཉམ་ཉིད་རོལ་པས་གཤེགས་སུ་གསོལ། །ཧཱུཾ་སྟེང་ནས་ནག་པོ་འཇོམས་པ་གཤེགས། །ཤར་ནས་ཁྲོ་བོ་བྲམ་གྱོན་ནི། །ནམ་མཁའ་བྲག་འཛིན་གཤེགས་སུ་གསོལ། །ཤར་གྱི་ཨ་ཝ་གླང་མགོ་ཅན། །སྨུག་ནག་རྩེགས་པ་གཤེགས་སུ་གསོལ། །ལྷོ་ཕྱོགས་ཁྲོ་བོ་ཡ་བ་ཏི། །སྨུག་ནག་ལྕགས་ཀྱུ་གཤེགས་སུ་གསོལ། །ལྷོ་ནུབ་ལྕོགས་པ་མགོ་དགུ་ནི། །སྨུག་ནག་རལ་གྲི་གཤེགས་སུ་གསོལ། །ནུབ་ཕྱོགས་གཤིན་རྗེ་དམིགས་པ་ནི། །དམར་ནག་ཐོད་མཐིང་གཤེགས་སུ་གསོལ། །ནུབ་བྱང་གསོད་བྱེད་ཆེན་མོ་ནི། །སྔོ་ནག་སྤུ་གྲི་གཤེགས་སུ་གསོལ། །བྱང་ཕྱོགས་རྒྱལ་པོ་བདུད་འཇོམས་ནི། །ལྗང་ནག་ཐོད་པ་གཤེགས་སུ་གསོལ། །བྱང་ཤར་ཆོས་ཀྱི་རྒྱལ་པོ་ནི། །དཀར་སིང་ཁྲམ་ཤིང་གཤེགས་སུ་གསོལ། །འོག་གི་ཁྲོ་བོ་དམར་པོ་ནི། །དཀར་སེར་རྩིས་བྱང་གཤེགས་སུ་གསོལ། །མགོ་དགུ་རྐང་བརྒྱད་དྲེད་ཤམ་ཅན། །ཁམ་རྒྱ་མཐུ་ཆེན་དམར་པོ་ཆེ། །ཤེལ་གྱི་ཁམ་རྒྱ་ཕག་མོ་དང་། །ཐོད་མཐོང་མ་དང་སྔོ་ནག་མོ། །སྨུག་ནག་གྲུ་རྩ་མུ་ན་ཏྲི། །དུས་ལ་རུབ་ཅིང་དམ་ལ་གནས། །མ་ལུས་ལས་ལ་གཤེགས་སུ་གསོལ། །མཆོད་པ་ཧྲི་སྔགས་ཁྲི་འབུམ་བཟླས། །དེ་ནས་ལས་ཀྱི་དཀྱིལ་འཁོར་བསྐོར། །ཕྱི་ནང་གསང་བའི་འཁོར་ལོ་གསུམ། །བཞི་པ་ཟླ་ཡི་དཀྱིལ་འཁོར་ལ། །རྒྱས་པ་གླང་པོ་ཧེ་དུ་རྟེན། །དབང་ནི་ཆུང་མའི་སྙིང་གར་ཏེ། །བསད་པ་གཤིན་རྗེའི་ལྟོ་བ་རུ། །རྒྱུག་པ་དྲེད་དང་རྔ་མོ་གཉིས། །དབྱེ་བ་རྟ་དང་སེང་གེ་གཉིས། །སྨྱོ་
འབོག་ཤ་བའི་རྒྱབ་ཏུ་བྱ། །ལྐུགས་པ་ལུག་གི་ལྟོ་བར་བྱ། །གནན་པ་རི་རབ་འོག་ཏུ་བྱ། །རྡོ་རྗེ་མཁའ་འགྲོའི་རྒྱུད་ལས། གཤིན་རྗེའི་ཕོ་བྲང་གི་ལེའུ་སྟེ་ཉི་ཤུ་པའོ།། །།ཟར་རི་རྙོག་པ་ཁ་བད་ཅན། །སྟེང་དུ་དྲི་ཡིས་ཆག་ཆག་གདབ། །ཟླ་གམ་གཅིག་ལ་རྩིབས་བཞིས་བརྒྱན། །རྩ་བའི་སྔགས་ཀྱིས་ཡབ་ཡུམ་བསྐྱེད། །ཨོཾ་མ་རུ་ཙེ་མཉྫུ་ཤྲཱིཿཀུ་མཱ་ར་ཡ་མཱནྟ་ཀ་མ་བ་ཏོ་མེ་ཧཱུཾ། རྩ་བ་རྩམ་རི་ཤིག །སྙིང་རྩ་མ་ལ་བྷྱོ། ཛཿཧཱུཾ་བཾ་ཧོཿ། ས་མ་ཡ་ཛ་ཛཿ། ཨོཾ་ཨ་ཀྲོ་ཏེ་ཀ་ཡ་མཱནྟ་ཀ་ཛྭ་ལ་ཛྭ་ལ་ཧཱུཾ་ཕཊ། འབུམ་བཟླས། ཨོཾ་ཨ་ཀྲོ་ཏེ་ཀ་ཡ་མཱནྟ་ཀ་བག་ཤ་ཡ་ཧ་ན་ཧ་ན་ཧཱུཾ་ཕཊ། ཨོཾ་ཨ་ཀྲོ་ཏེ་ཀ་ཡ་མཱནྟ་ཀ་ཙིཏྟ་ས་ན་ཙིཏྟ་ཧཱུཾ་ཕཊ། རེ་རེ་ཡང་འབུམ་འབུམ་མོ། །དེ་ནས་ལས་ལ་སྦྱར་ཏེ། དེ་ནས་དྲག་པོ་ཨེ་དཀྱིལ་དུ། །གངས་ལ་གཡའ་ཡིས་བསྟན་ལ་བྲག །བཀུག་ལ་རྟེན་ལ་བསྡིམས་པ་བསྒྲལ། །ཨོཾ་ཧྲི་ལིང་ཤང་ཁ་རུ་དྲི་ཛ་ཡགྴ་རྦད། བུ་ཆེ་མ་ག་འདའ་རུ་རུ་ཕྲ་ཐུམ་ཐུམ། ཤེལ་ཤེལ་ཁྱུང་ཁྱུང་ཤོག་ཤོག་རྦད་ལིང་མྲ་ནི་ཛ། རྣམ་སྨིན་ལུས་བཤིག་གོ། །རྡོ་རྗེ་མཁའ་འགྲོའི་རྒྱུད་ལས། བཤན་པ་དམར་པོའི་ལེའུ་སྟེ་ཉེར་གཅིག་པའོ།། །།མོན་པ་ཁྲོས་པའི་མདོར་རིས་ལ། །ཨེ་ཡིག་དབུས་སུ་དགོད་པ་ནི། །སེང་གེ་དཀར་མོའི་ལྟོ་བ་རུ། །ཤར་དུ་ཤེས་ལྔ་བསྟུམ་ནས་ནི། །ཕག་པའི་ཐོད་པ་བཀའ་ནས་ནི། །ཡུགས་ས་མོ་ཡི་ཞབས་མས་དཀྲི། །དཔལ་གྱི་ཐུགས་ལས་བཀྲག་མེད་སྤྲུལ། །གཡས་པ་རལ་གྲི་ཁྲམ་ཤིང་ཚུལ། །གཡོན་པ་ཡུངས་ཀར་ཤོ་རྡེལ་བརྡེག །ཨོཾ་ཨ་ལྡིང་ལྡང་བྷ་ལྡིང་། ཁྱད་ལྡིང་། ཡང་ཏོ་ལྡིང་། ན་ཏི་མ་རུ་ཡ་རྦད། ཏི་ཏི་མ་རུ་ཡ་རྦད། ཏི་ཏི་ནག་པོ་རི་ཏ་ཕཊ། རྡོ་རྗེ་མཁའ་འགྲོའི་རྒྱུད་ལས། བདུད་ནག་པོ་ལ་གཏད་པའི་ལེའུ་སྟེ་ཉེར་གཉིས་པའོ།། །།ཡུལ་
དང་དྭངས་མ་རྩ་རྣམས་ནི། །ཡུལ་ནི་སེམས་ཀྱི་རང་བཞིན་ཏེ། ། དྭངས་མ་ཐིག་ལེའི་རང་བཞིན་ཏེ། །རྩ་ནི་སྙིགས་མའི་དོན་དུ་ཤར། །ཐིག་ལེ་འཁྲུགས་པས་ཡུལ་འཁྲུགས་ཏེ། །ད་ནི་སྙིགས་མ་ཞིག་པར་འགྱུར། །ལས་རླུང་ལོག་པས་ཁྱབ་བྱེད་འཁྲུགས། །རྒྱུ་བྱེད་ལོག་བྱེད་ལོག་པས་ཆོས་ཉིད་འཁྲུགས། །ལས་རླུང་ལོག་པས་སྲིན་འཁྲུག་འགྱུར། །ཁྱབ་བྱེད་ལོག་ན་གུང་མོ་ཉམས། །ཆོས་ལོག་པས་མཛུབ་འཁྲུགས་ཏེ། །དང་པོ་བད་ཀན་སྐྱེ་བྱེད་ཅིང་། །གཉིས་པ་མཁྲིས་པ་སྐྱེད་བྱེད་ཅིང་། །གསུམ་པ་རླུང་ནི་སྐྱེ་བར་བྱེད། །རྒྱུ་བའི་རླུང་ནི་གསུམ་ཀར་ཁྱབ། །རུས་པའི་ནད་ནི་སྐྱེད་པར་བྱེད། །རྣལ་འབྱོར་ནད་ཀྱིས་ཟིན་པ་ལ། །བསྐང་གསོའི་ཆོ་ག་རྒྱས་པར་བྱེད། །རྡོ་རྗེ་མཁའ་འགྲོའི་རྒྱུད་ལས། ནད་གསོ་བའི་ལེའུ་སྟེ་ཉེར་གསུམ་པའོ།། །།ཉོན་ཅིག་ཡབ་ཀྱིས་བཀའ་སྩལ་པ། །ང་ཡི་གསང་རྒྱུད་ཆེན་པོ་འདི། །ཕྲ་མེན་རྒྱ་མཚོ་ཉིད་ལ་གཏད། །མ་འོངས་སེམས་ཅན་ཐམས་ཅད་ཀུན། །འདི་ལ་མོས་པ་ཕྲད་པར་འགྱུར། །མ་མོས་སེམས་ཅན་ཕྲད་མི་འགྱུར། །ཕྲད་ན་ལོག་ན་དངོས་གྲུབ་ཡལ། །རྡོ་རྗེ་དམྱལ་བ་ལྟུང་ཞེས་བཤད། །དམོད་བཙུགས་པའི་ལེའུ་སྟེ་ཉེར་བཞི་པའོ།། །།རྒྱུད་ཀྱི་རྒྱལ་པོ་རྡོ་རྗེ་མཁའ་འགྲོའི་རྒྱུད་ལས་སྲིད་པ་ཕྲ་མེན་རྒྱ་མཚོས་བསྡུས་པ་རྫོགས་སོ།། །།