དཔལ་ནག་པོ་ཆེན་པོ་དྲག་པོའི་བརྟག་པ་དུར་ཁྲོད་ཆེན་པོའི་རྒྱུད་ཅེས་བྱ་བ།
རྒྱ་གར་སྐད་དུ། ཤྲཱི་མ་ཧཱ་ཀཱ་ལ་རཱུ་ཏྲ་མ་ཧཱ་ས་ན་ཏནྟྲ་ནཱ་མ། བོད་སྐད་དུ། དཔལ་ནག་པོ་ཆེན་པོ་དྲག་པོའི་བརྟག་པ་དུར་ཁྲོད་ཆེན་པོའི་རྒྱུད་ཅེས་བྱ་བ། དཔལ་རྡོ་རྗེ་མཁའ་འགྲོ་མ་ལ་ཕྱག་འཚལ་ལོ། །ནམ་མཁའ་དང་མཉམ་འཁོར་ལོའི་བདག །ཐུགས་ཀྱི་རྡོ་རྗེ་བརྒྱད་ཀྱིས་བསྐོར། །དེ་སྤྲུལ་ནག་པོ་ཆར་སྤྲིན་མདོག །ལག་ན་གྲི་གུག་ཐོད་པ་འཛིན། །འཁོར་དང་བཅས་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་སྐུ་གསུང་ཐུགས་རྡོ་རྗེ་ནག་པོར་སྤྲུལ་ནས། འཇིགས་བྱེད་ཆེན་པོའི་སྐུར་མཛད་དེ། ནག་པོ་དྲག་པོ་ཤིན་ཏུ་ཡང་མི་བཟད་པར་མཛད་དེ། དུར་ཁྲོད་ཆེན་པོའི་གནས་མཆོག་ན་བཞུགས་སོ། །དེའི་ཚེ་ཐུགས་རྡོ་རྗེའི་མཁའ་འགྲོ་མ་དང་། དམ་ཚིག་ལས་སྤྲུལ་པའི་མཁའ་འགྲོ་མ་དང་། ལས་ལས་ཡོངས་སུ་གྲུབ་པའི་མཁའ་འགྲོ་མ་དང་། འཇིགས་བྱེད་དང་འཇིགས་བྱེད་ཆེན་མོའི་ཚོགས་ཀྱིས་ཡོངས་སུ་བསྐོར་ཏེ། དེའི་ཚེ་བཅོམ་ལྡན་འདས་གཉིས་སུ་མེད་པར་སྣང་བ་ཞེས་བྱ་བའི་ཏིང་ངེ་འཛིན་ལས་ནག་པོ་ཆེན་པོར་སྤྲུལ་ཏེ། བཅོམ་ལྡན་འདས་ཀྱི་ཐུགས་ཀའི་འོད་ཟེར་གྱིས་ཕྱོགས་དང་མཚམས་ཐམས་ཅད་དུ་ཁྱབ་ནས། གནོད་སྦྱིན་གྱི་གདུག་པ་བསལ་ནས། འོད་ཀྱི་ར་བ་དང་གུར་དང་དྲ་བར་གྱུར་ཏེ་གནས་པའི་ཚེ། མཁའ་འགྲོ་མ་དང་། ནག་པོ་ཆེན་པོའི་ཚོགས་ཀྱིས་ཕྱག་འཚལ་ཏེ། བཅོམ་ལྡན་འདས་ལ་གསོལ་པ། བཅོམ་ལྡན་འདས། ནག་པོ་དྲག་པོར་ཅི་ཞིག་བཤད། བཅོམ་ལྡན་འདས་ཀྱིས་བཀའ་སྩལ་པ། འདི་ནི་ནག་པོ་དྲག་པོའི་རྒྱུད། །དུར་ཁྲོད་ཆེན་པོ་ཞེས་བྱ་བའི། །གང་ན་རྣལ་འབྱོར་རབ་ཏུ་གནས། །རི་རབ་གྲོང་ཁྱེར་སུམ་བརྩེགས་ན། །གནོད་སྦྱིན་ནག་པོ་དྲག་པོ་ཡིས། །རྣལ་འབྱོར་རྒྱུད་ལ་གཟི་བྱིན་བསྐྱེད། །ནག་པོའི་གཟུགས་འཆང་གདུག་པ་ཅན། །ཉ་པའི་གྲི་དང་ཐོད་པ་འཛིན། །དུག་གི་ལ་དུ་རྟག་ཏུ་ཟ། །དུས་གསུམ་གྲོང་ཁྱེར་སུམ་བརྩེགས་དཀྲུག །ཤ་ཆེན་ཁྲག་དང་ཉ་ཤ་ཆང་། །ཉ་པའི་གྲི་ཡིས་ཐོད་པ་རུ། །གཏུབས་ནས་ཤ་ཟ་ཁྲག་འཐུང་བའི། །ཁ་ནས་ཁྲག་འཛག་རྒྱུན་མི་འཆད། །རོ་སྲེག་སྨན་
དང་གསུར་དང་ནི། །དུར་ཁྲོད་ལ་གནས་དྲི་ཡི་མཆོག །དུས་གསུམ་དུ་ནི་སྣོམ་བྱེད་ཅིང་། །གདུག་པའི་སྤྲུལ་པ་སྣ་ཚོགས་འགྱེད། །དེ་ནི་ནག་པོ་དྲག་པོར་བཤད། །ནག་པོ་ཆེན་པོས་ཡང་གསོལ་པ། བཅོམ་ལྡན་འདས། ནག་པོ་དྲག་པོ་ཞེས་བྱ་བ། །འཇིགས་བྱེད་ཆེན་པོའི་སྐུར་སྤྲུལ་ནས། །ཞེས་བྱ་བ་ཇི་ལྟར་ལགས། །བཅོམ་ལྡན་འདས་ཀྱིས་བཀའ་སྩལ་པ། །སྐུ་གསུང་ཐུགས་ཀྱི་རྡོ་རྗེ་ནི། །ལྷ་ཡི་སྐུ་ནི་རྣམ་པར་དག །གཉིས་སུ་མེད་པར་སྣང་བ་ཡི། །ཏིང་ངེ་འཛིན་ལ་སྙོམས་པར་ཞུགས། །དེ་ལས་ནག་པོ་ཆེན་པོ་ཡི། །ཆ་བྱད་མཐུན་པར་སྤྲུལ་མཛད་ནས། །བདག་གི་ཐུགས་ཀའི་འོད་ཟེར་གྱིས། །གནོད་སྦྱིན་ནག་པོ་དྲག་པོ་ཡི། །གདུག་པ་རྣམས་ནི་འཇོམས་མཛད་དེ། །འོད་ནི་གྲི་གུག་དྲ་གུར་གྱུར། །ནགས་ཚལ་བསྡུས་པ་གཉིས་མེད་གྱུར། །བདག་གི་ཐུགས་ཀ་ནས་སྤྲོས་པའི། །གསང་བ་གསུམ་ལས་བྱུང་བ་ཡི། །ཁྱོད་ནི་ནག་པོ་ཆེན་པོ་ཡིན། །རྡོ་རྗེ་གསུམ་གྱི་བདག་ཉིད་ཁྱོད། །དེ་ནི་འཇིགས་བྱེད་ཆེན་པོར་བཤད། །ཁྱོད་ཀྱི་རྒྱུད་ནི་རབ་བཤད་བྱ། །དེ་ནས་དཔལ་ནག་པོ་ཆེན་པོ་འོད་ཀྱི་གོང་བུའི་ནང་དུ་སྐུ་མཐོ་གང་གི་ཚད་དུ་གྱུར་ཏེ། རྡོ་རྗེ་འཛིན་པའི་འོད་ཟེར་གྱིས་བརྒྱལ་ནས་ཏིང་ངེ་འཛིན་ལ་སྙོམས་པར་ཞུགས་ཏེ། དེའི་ཚེ་བཅོམ་ལྡན་འདས་དཔལ་ནག་པོ་ཆེན་པོས་གྲི་གུག་ལྕགས་ཀྱུའི་ཚུལ་དུ་བཟུང་ནས། ཨོཾ་མ་ཧཱ་ཀཱ་ལ་ཡ་ཧཱུཾ་ཧཱུཾ་ཕཊ་སྭཱ་ཧཱ། ལྕགས་ཀྱུའི་འོད་ཟེར་དང་བཅས་ནས་བརྗོད་པས། མདུན་གྱི་ནག་པོ་ཆེན་པོ་ཏིང་ངེ་འཛིན་ལས་སད་པར་གྱུར་ཏོ། །དེ་ནས་ནག་པོ་ཆེན་པོ་དགའ་བར་གྱུར་ཏེ། ཐལ་མོ་སྦྱར་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བདག་ནི་གཙོ་བོའི་འོད་ཟེར་གྱིས། །ཕོག་ནས་ཤིན་ཏུ་བདེ་བར་གྱུར། །གཙོ་བོ་བཅོམ་ལྡན་ནག་པོ་ཆེ། །བདག་ནི་བདེ་བ་ཆེན་པོར་གནས། །ཞེས་གསོལ་ཏོ། །དེ་ནས་བཅོམ་ལྡན་འདས་ཀྱིས་བཀའ་སྩལ་པ། ཁྱོད་ནི་གསང་བ་གསུམ་གྱི་བདག །དུས་གསུམ་སངས་རྒྱས་ཐམས་ཅད་ཀྱི། །བསྟན་པ་བསྲུང་བར་བྱིན་གྱིས་བརླབས། །ཁྱོད་ནི་དཔལ་ལྡན་ནག་པོ་ཆེ། །བསྟན་པ་བསྲུང་
བར་ཁས་བླངས་པ། །ཤཱཀྱ་སེང་གེའི་བསྟན་པ་ལ། །དམ་ཚིག་ཆེན་པོར་གནས་པར་གྱིས། །ཞེས་བཅོམ་ལྡན་འདས་ཀྱིས་བཀའ་སྩལ་པས། དཔལ་ནག་པོ་ཆེན་པོ་དང་། ཐུགས་རྡོ་རྗེ་ལས་སྤྲུལ་པའི་མཁའ་འགྲོ་མ་དང་། དམ་ཚིག་སྤྲུལ་པའི་མཁའ་འགྲོ་མ་དང་། ལས་ལས་ཡོངས་སུ་གྲུབ་པའི་མཁའ་འགྲོ་མ་དང་། འཇིགས་བྱེད་དང་འཇིགས་བྱེད་མ་ལ་སོགས་པ་རྣམས། ཤིན་ཏུ་འདར་བ་དང་། སྐྲག་པ་དང་། ཤིན་ཏུ་མི་ཟད་པར་དྲན་པ་ཉམས་པར་གྱུར་ཏོ། །དེ་ནས་བཅོམ་ལྡན་འདས་ཀྱིས། ཨོཾ་མ་ཧཱ་ཀཱ་ལ་སུམ་མྲ་ཏི་སྭཱ་ཧཱ། ཧཱུཾ་ཞེས་བརྗོད་པས། དེ་ནས་ནག་པོ་ཆེན་པོ་དང་འཁོར་གྱི་ཚོགས་རྣམས་ཀྱིས་དྲན་པ་རྙེད་པར་གྱུར་ཏོ། །བཅོམ་ལྡན་འདས་དཔལ་ནག་པོ་ཆེན་པོ་ལ། དཔལ་ནག་པོ་ཆེན་པོ་དང་མཁའ་འགྲོ་མ་རྣམས་ཀྱིས་རང་གི་སྲོག་གི་སྙིང་པོ་ཕུལ་བ། ཨོཾ་མ་ཧཱ་ཀཱ་ལ་ཡ་མུག་ཤཾ་རག་ཏུ་མ་ཧཱ་ཀཱ་ལ་རག་ཏུ་ཨ་པར་བྱི་ཤ་ཧཱུཾ། ཞེས་གསོལ་ཏོ། །དེ་ནས་བཅོམ་ལྡན་འདས་ཀྱིས་བཀའ་སྩལ་པ། འཁོར་གྱི་དབང་ཕྱུག་ལེགས་སོ་ལེགས། ནག་པོ་ཆེན་པོ་ལེགས་སོ་ལེགས། ཁྱོད་ལ་ནག་པོ་ཆེན་པོའི་རྒྱུད། དུར་ཁྲོད་ཆེན་པོ་ཞེས་བྱ་བ་བཤད་པར་བྱ། ཞེས་བཅོམ་ལྡན་འདས་ཀྱིས་བཀའ་སྩལ་ཏོ། །དེ་ནས་དཔལ་ནག་པོ་ཆེན་པོ་དང་། འཁོར་གྱི་ཚོགས་ཀྱིས་གསོལ་པ། བཅོམ་ལྡན་འདས། ནག་པོ་ཆེན་པོའི་རྒྱུད་ཅེས་བྱ་བ་ཇི་ལྟར་ལགས། བཅོམ་ལྡན་འདས་ཀྱིས་བཀའ་སྩལ་པ། སྲིད་གསུམ་ལོག་པའི་ཕྱོགས་འཛིན་པ། །བདུད་དང་མུ་སྟེགས་སྲིན་པོ་དང་། །ལྷ་མ་ཡིན་དང་གནོད་སྦྱིན་ཚོགས། །ཤཱཀྱ་སེང་གེའི་བསྟན་པ་ལ། །གནོད་ཅིང་འཇིག་པར་བྱེད་པ་རྣམས། །གང་ཞིག་བསྟན་པ་འཇིག་བྱེད་པ། །དེ་དག་འཇོམས་པར་བྱེད་པ་ཡི། །རྒྱུད་ཀྱི་ཆོ་ག་འདི་དག་བཤད། །དང་པོ་རྒྱུད་ཀྱི་གླེང་གཞི་དང་། །གཉིས་པ་སྔགས་ཀྱི་སྦྱོར་བ་དང་། །གསུམ་པ་ལྷ་ཡི་ཆོ་ག་དང་། །བཞི་པའི་དཀྱིལ་འཁོར་རབ་གནས་དང་། །ལྔ་པ་པར་བུའི་ཆོ་ག་དང་། །དྲུག་པ་ལྷ་ཡི་འཁོར་
ལོ་དང་། །བདུན་པ་མནན་པའི་ཆོ་ག་དང་། །བརྒྱད་པ་སྦྱིན་བསྲེག་ཆོ་གར་བཤད། །དགུ་པ་ཡི་གེ་བཏུ་བ་དང་། །བཅུ་པ་དམ་ཚིག་ཆོ་ག་སྟེ། །བཅུ་ཡིས་བདག་ཉིད་ཤེས་པར་གྱིས། །ཞེས་བཅོམ་ལྡན་འདས་ཀྱིས་བཀའ་སྩལ་ཏོ། །དཔལ་ནག་པོ་ཆེན་པོའི་རྒྱུད་དུར་ཁྲོད་ཆེན་པོ་ཞེས་བྱ་བའི་གླེང་གཞིའི་ལེའུ་སྟེ་དང་པོའོ།། །།དེ་ནས་དཔལ་ནག་པོ་ཆེན་པོས། བཅོམ་ལྡན་འདས་ལ་གསོལ་པ། དང་པོའི་རྒྱུད་དོན་ངེས་སྒྲུབ་པ། །ལས་ཀྱི་ཆོ་ག་སྣ་ཚོགས་དང་། །དེས་སྒྲུབ་ཐབས་དང་ལྡན་པར་ནི། །སྒྲུབ་པའི་ཆོ་ག་ཇི་ལྟར་ལགས། །བཅོམ་ལྡན་འདས་འཇིགས་བྱེད་ཆེན་པོར་མཛད་ནས་བཀའ་སྩལ་པ། རྒྱུད་འདི་སྒྲུབ་པར་འདོད་པས་ནི། །སྔགས་དང་ཆོ་གར་གཅེས་པ་ནི། །རྒྱུད་ཀྱི་ཆོ་གར་ངེས་བཤད་པ། །བསམ་ལྡན་དད་ལྡན་དོན་གྱི་མཆོག །སྔགས་ཀྱིས་དངོས་གྲུབ་འགྲུབ་པར་འགྱུར། །དཔལ་ལྡན་ནག་པོ་རྒྱུད་ཀྱི་མཆོག །སྔགས་ཀྱི་རྩ་བ་འདི་དག་བཤད། །ཏདྱ་ཐཱ། ཨོཾ་མ་ཧཱ་ཀཱ་ལ་ཡ་ཤཱ་ས་ན། ཨུ་བ་ཧ་རི་ཎི། ཨེ་ཥ་ཨ་པཤྩི་མ་ཀཱ་ལོ་ཨ་ཡཾ། ཨི་དཾ་རཏྣ་ཏྲ་ཡཱ་ཡ། ཡ་དི་པྲ་ཏཱིཛྙཱ་སྨ་ར་སི་ཏ་དཱ། འདི་ནི་རྩ་བའི་དོན་དང་ལྡན། །ལས་རྣམས་ངེས་པར་འགྲུབ་པ་ནི། །སྔགས་ཀྱི་ཆོ་ག་འདི་དག་བཤད། །ཨི་དཾ་དུཥྚཱན། ཁ་ཁ་ཁཱ་ཧི་ཁཱ་ཧི། མ་ར་མ་ར། གྲྀཧྞ་གྲྀཧྞ། བན་དྷ་བན་དྷ། ཧ་ན་ཧ་ན། ད་ཧ་ད་ཧ། པ་ཙ་པ་ཙ། དི་ན་མེ་ཀེ་ན་ཧཱུཾ་ཕཊ་སྭཱ་ཧཱ། འདི་ནི་ནག་པོ་རྩ་བའི་སྔགས། །ཆོ་གའི་སྔགས་དང་བཅས་པར་བཤད། །དེ་སྐད་ཅེས་བཅོམ་ལྡན་འདས་ཀྱིས་བཀའ་སྩལ་ཏོ། །དེ་ནས་དཔལ་ནག་པོ་ཆེན་པོ་མཁའ་འགྲོ་མའི་འཁོར་དང་བཅས་པ་གཟི་བརྗིད་དང་ལྡན་པར་གྱུར་ནས། བཅོམ་ལྡན་འདས་ལ་གསོལ་པ། སྔགས་ཀྱི་ཆོ་གའི་རིམ་པ་རྣམས། །སྒྲུབ་པའི་དོན་དང་ལྡན་པར་ནི། །དེ་བཞིན་བདག་ལ་བཤད་དུ་གསོལ། །དེ་ནས་བཅོམ་ལྡན་འདས་ཀྱིས་དཔལ་ནག་པོ་ཆེན་པོ་དང་། མཁའ་འགྲོའི་ཚོགས་ལ་གཟིགས་ནས། འདི་སྐད་ཅེས་བཀའ་སྩལ་ཏོ། །གང་ཞིག་དཔལ་ལྡན་ནག་པོ་ཆེན་པོ་སྒྲུབ་པར་འདོད་ན། དུར་
ཁྲོད་ཆེན་པོའི་གནས་འབྱུང་པོ་དང་རོ་ལངས་འདུ་བའི་གནས་སུ་སོང་ལ། བདུད་རྩི་རྣམ་པ་ལྔས་ལུས་བྱུགས་ཏེ། ཨུ་པ་ཀྵའི་མེ་ཏོག་དང་། དུར་ཁྲོད་སྦྱར་བའི་སྤོས་དང་། མར་ནག་ཆེན་པོའི་མར་མེ་དང་། ཤ་ཆེན་གྱི་ལྷ་བཤོས་དང་། ཁྲག་གི་ཨརྒྷཾ་དང་། དེ་དག་བསམ་གཏན་དང་ལྡན་པའི་སྔགས་ཀྱིས་མཆོད་པར་བྱ་སྟེ། གཙོ་བོ་དང་མཁའ་འགྲོ་མའི་སྔགས་བཟླས་ན་དེ་མ་ཐག་ཏུ་བསྙེན་པར་འགྱུར་རོ། །དེ་ནས་ཐོད་པ་དུམ་བུ་དྲུག་པའི་ནང་དུ། ནིམ་པའི་འོ་མ་དང་སྤྲེའུ་ཤིང་གི་ཁུ་བ་དང་། རྒྱ་སྐྱེགས་ཀྱི་ཁུ་བ་དང་། དུར་ཁྲོད་ཀྱི་སྣག་ཚ་དང་སྦྱར་ལ་བདག་ཁ་ལྷོ་ཕྱོགས་སུ་བལྟས་ལ། འུག་པའི་སྒྲོའི་རྨྱུག་གུས་བསྒྲུབ་བྱའི་གཟུགས་བྲིས་ནས། དུར་ཁྲོད་ཀྱི་ཐལ་བ་དང་། ཆུ་འགྲམ་གྱི་སས་ཐོད་པ་བཀང་ལ། སྔགས་འདི་བཟླས་ནས་ཤིང་གཅིག་གི་རྩར་སྦས་ན་དེ་མ་ཐག་ཏུ་ཁྲག་སྐྱུགས་པར་འགྱུར་རོ། །ཨོཾ་མ་ཧཱ་ཀཱ་ལ་ཡ། སརྦ་ཌཱ་ཀི་ནཱི། པུ་ཀ་ལག །དུ་དྷི་རུ་སི་བ་ཧ་ན་ཧ་ཧཱུཾ་ཕཊ་སྭཱ་ཧཱ། གང་ཞིག་ཕྱ་ཚང་ཀུ་བའམ། མ་ཧེའི་རྭ་ལ་བྱས་ཏེ། བདག་ལུས་གུར་གུམ་གྱིས་བྱུག་ལ་ཁ་ནུབ་ཏུ་བལྟས་ཏེ། ར་དཀར་མོ་དང་བ་དམར་མོའི་འོ་མ་བདུད་རྩི་དང་སྦྱར་ནས། དུར་ཁྲོད་ཀྱི་རས་ལ་འུག་པའི་སྒྲོའི་རྨྱུག་གུས་སྦྲུལ་མགོ་གསུམ་པ་བྲིས་ལ། སྙིང་གར་ཕུ་བྲི། དཔྲལ་བར་ཁཾ་བྲི་ལག་པ་གཉིས་ཀྱི་མཐིལ་དུ་ཧཱུཾ་ཕྱིན་ཕྱོགས་སུ་བྲི། བྱི་ལ་ནག་པོའི་པགས་པ་ལ་བསྒྲུབ་བྱའི་གཟུགས་དུག་དང་སྐེ་ཚེ་དང་བྱ་རོག་གི་ཁྲག་དང་དུར་ཁྲོད་སྣག་ཚས་བདག་ཁ་ཤར་ཕྱོགས་སུ་བལྟས་ལ་བྱ་རོག་གི་སྒྲོས་རྨྱུག་གུ་བྱས་ལ་བྲི། བསྒྲུབ་བྱའི་དཔྲལ་བར་རུས། སྙིང་གར་མིང་། རྐང་ཞབས་སུ་ཡཾ་བྲི། ལྟེ་བར་ཛ། ཡན་ལག་བཞི་ལ་ཀླུ་རིགས་བཞི་བྲི། སྙིང་གར་ཀླུ་ནག་པོ་མགོ་བོ་གསུམ་པ་མགོ་བོ་ཕྱེད་ལུས་ལ་ནུབ་པ་བྲི། དེ་ནས་ཟངས་དང་ལྕགས་དང་གསེར་དང་དངུལ་དང་། མཚལ་ལ་སོགས་པ་བར་དུ་བཞག་ལ་ཁ་སྦྱར་དུ་བྱའོ། །དེའི་ཕྱི་རོལ་དུ་དུར་ཁྲོད་ཀྱི་རས་ཀྱི་སྐུད་པས་བཙེམ་པར་བྱས་ཏེ། མདུན་དུ་བཞག་
ལ། ནི་རང་ཤུའི་ཕུར་བུ་ལ་བསྔགས་ཏེ་གདབ་པར་བྱའོ། །དེ་ནས་ཕྱ་ཚང་ཀུ་བའམ་མ་ཧེའི་རྭར་བཅུག་ལ། ཀླུ་གནས་པའི་སར་བཞག་ན་ལུས་པོ་ཨརྫ་ཀའི་འབྲས་བུ་ལྟར་འགས་པར་འགྱུར་རོ། །ཨོཾ་མ་ཧཱ་ཀཱ་ལ་ཡ། བྷ་བི་ནི་ནཱ་ག་རཱ་ཛ་བཱི་ཤམ་ན་ཨ་མུ་ག་དུཥྚཱ་ན་ཙ། མཱ་ར་མཱ་ར། ནི་རི་ནི་རི། བཾ་གུ་ཡ་བཾ་གུ་ཡ། ཛེ་ད་ཡ་ཛེ་ད་ཡ། མ་ཐ་མ་ཐ། དུ་ན་དུ་ན། ནཱ་ག་རཱ་ཛ། བ་ཤ་ཏ་ཡ་ཡ་ཧཱུཾ་ཕཊ་སྭཱ་ཧཱ། ཨོཾ་མ་ཧཱ་ཀཱ་ལ་ཡ་བྷ་བི་སྟུ་ཏི་མ་མན་ག་ཀོ་ཏ་སད་ན་ཡ་ཧཱུཾ། མ་མ་རཀྵ་རཀྵ། ཧཱུཾ་ཧཱུཾ་ཕཊ་སྭཱ་ཧཱ། གུར་གུམ་ལ་བཟླས་ཏེ། དཔྲལ་བར་ཐིག་ལེ་བྱས་ན་ཐམས་ཅད་དུ་བསྲུང་བར་འགྱུར་རོ། །དེ་ནས་གཞན་ཡང་ནག་པོ་ཆེན་པོས་གསོལ་པ། བཅོམ་ལྡན་འདས། གང་ཞིག་ཕྱི་རོལ་པ་རྣམས་ཀྱི། །སྟོབས་ནི་འཇིག་རྟེན་ལྷ་ལས་བྱུང་། །དེའི་སྟོབས་ལོག་པར་ཕྱོགས་པའི་ཕྱིར། །རྒྱལ་བའི་བསྟན་པ་འཇིག་པར་འགྱུར། །ཕྱི་རོལ་སྟོབས་དང་དབྱེ་བ་ཡི། །ཆོ་ག་ཅི་ལགས་བཤད་དུ་གསོལ། །བཅོམ་ལྡན་འདས་ཀྱིས་བཀའ་སྩལ་པ། །ཉོན་ཅིག་ནག་པོ་ཆེན་པོ་ཁྱོད། །ཕྱི་རོལ་སྟོབས་དང་ལྡན་པ་ཡི། །མྱུར་དུ་དབྱེ་བའི་ཆོ་ག་བཤད། །དབྱེ་དང་བསྐྲད་དང་རྨོངས་བྱེད་དང་། །འགུགས་དང་དབང་དུ་བྱེད་པ་དང་། །ཕྱི་རོལ་དམག་གི་དཔུང་རྣམས་དང་། །གཅན་གཟན་ལ་སོགས་འཇིགས་པའི་ཚོགས། །དེ་དག་རེངས་པར་བྱེད་པ་ཡི། །ཆོ་ག་བདག་གིས་བཤད་པར་བྱ། །དང་པོ་དབྱེ་བའི་ཆོ་ག་བཤད། །བསྒྲུབ་བྱའི་རྐང་པ་གཡོན་པའི་ས་དང་། སྐེ་ཚེ་དང་བཙན་དུག་དང་བག་ཟན་དང་། ཡུགས་ས་མོའི་སྐྲ་ཤད་རྣམས་ལ་བསྒྲུབ་བྱའི་གཟུགས་སོར་བརྒྱད་པ་བྱས་ལ། །སྐེ་ལ་མིའི་ལྟག་རྩ་བསྐོར་བ་བསྐོན་ལ། དེ་ལ་དེ་ཉིད་ཀྱི་འདོད་པའི་ལྷའི་གཟུགས་རྡོ་དཀར་དང་མཆད་པའི་ས་དང་སྤྲ་ཚིལ་ལས་སོར་བརྒྱད་པའི་ཚད་བྱས་ཏེ། སྙིང་གར་ལྷ་གང་དང་གང་གི་སྙིང་པོའམ། མིང་གི་ཡི་གེ་གཞུག་པར་བྱས་ཏེ། བསྒྲུབ་བྱའི་གཟུགས་དང་རྒྱབ་སྤྲོད་དུ་བྱས་ལ་བར་དུ། ཨོཾ་མ་ཧཱ་ཀཱ་ལ། ཨུཥྚ་དེ་བ་ཏ། བྷིན་དྷི་ཤ་ཡ་ཧཱུཾ་ཧཱུཾ་ཕཊ་སྭཱ་ཧཱ། ཞེས་བར་སྣང་གི་ཤིང་ལོ་ལ་བྲིས་ལ་གཞུག །དེ་ནས་མིའི་རྒྱུ་མས་དཀྲིས་ཏེ། རྐང་
པ་ལ་བཏགས་ནས་མཆོག་ཕུར་བཞི་ལ་བཏགས་ཏེ་བར་སྣང་ལ་གཞག་པར་བྱའོ། །བསྒྲུབ་བྱ་སྟེང་དུ་གནས་པར་བྱའོ། །འདོད་པའི་ལྷ་ནི་འོག་ཏུ་གནས་པར་བྱའོ། །དེའི་འོག་ཏུ་དུག་དང་སྐྱེ་ཚེ་དང་ལྡོང་རོས་དང་གུ་གུལ་ནག་པོ་དང་། དེ་རྣམས་བསྲེགས་ལ་ཆོ་གར་བྱའོ། །དེ་ནས་དེའི་སྟེང་དུ་སྐེ་ཚེ་དང་ཡུངས་དཀར་དང་བཙན་དུག་དང་རྡོ་ནག་པོའི་ཕྱེ་མའམ་ཟངས་དང་ལྕགས་ལ་སོགས་པའི་རིན་པོ་ཆེའི་ཕྱེ་མ་བསྲེས་ལ། དཔལ་ནག་པོ་ཆེན་པོའི་བསམ་གཏན་དང་ལྡན་པར་བྱས་ལ། ཤིན་ཏུ་དྲག་པོའི་སྟོབས་ཀྱིས་སྔགས་བཟླས་ལ་ཕྱེ་མས་བརྡེག་པར་བྱའོ། །ཨོཾ་མ་ཧཱ་ཀཱ་ལ་ཡ། སརྦ་དུཥྚཱན་ཙ། དྷ་ཧ་དྷ་ཧ། ཧཱུཾ་ཨ་མུ་ཀ་བི་དྷི་ཤ་ཡ་མཱ་ར་ཡ་ཧཱུཾ་ཧཱུཾ་ཕཊ་སྭཱ་ཧཱ། དེ་བཞིན་དུ་ཞག་གསུམ་དུ་བསྙེན་པ་བྱ་སྟེ། དེ་ནས་ནག་པོ་ཆེན་པོས་གྲི་གུག་གིས་སོ་སོར་ཕྱེ་ལ། འདོད་པའི་ལྷ་ནི་གནན་པར་བྱ། །བསྒྲུབ་བྱ་ལ་སྦྱིན་བསྲེག་ཏུ་བྱའོ། །དེས་དབྱེ་བའི་སྟོབས་དང་ལྡན་པར་འགྱུར་རོ། །དེ་ནས་གཞན་ཡང་ཐོད་པ་དུམ་བུ་གསུམ་པར་རྟ་ནག་པོའི་ཁྲག་དང་དུ་རའི་ཁུ་བ་དང་། མ་ཏ་ནའི་ལོ་མ་རྣམས་ཟླ་བ་གཟས་ཟིན་པའི་དུས་སུ། དཔལ་ནག་པོ་ཆེན་པོའི་བསམ་གཏན་དང་ལྡན་པས་སྣག་ཚ་བྱས་ཏེ། བུས་པ་ལོ་བཅུ་གཉིས་པའི་རྐང་གི་རྨྱུག་གུས་ཐོད་པ་ལ་འཁོར་ལོ་བྲི་བར་བྱའོ། །རྩིབས་དྲུག་པ་ལ་འཕར་མ་གཉིས་པར་བྱས་ནས་ཤར་ལ་སོགས་པའི་རིམ་པར་ཨོཾ་མ་ཧཱ་ཀཱ་ལ་ཡ། ནང་གི་རིམ་པ་ལའོ། །ཕྱི་རོལ་གྱི་རིམ་པ་ལ་གཡོན་སྐོར་དུ། ཨོཾ་ཨུ་ཙ་ཏ་ན་ཡ། དེ་ནས་ཕྱི་རོལ་གྱི་མུ་ཁྱུད་གཡོན་འཁོར་དུ། ཨོཾ་མ་ཧཱ་ཀཱ་ལ་ཡ། བ་ཏ་ན་ཡ། ཨ་མུ་ཀ་ཨུ་ཙ་ཏ་ན་ཡ། མ་ཧཱ་ཀཱ་ལ་ཡ། ཏ་པའི་ཁ་ན་ལ་ག་ཧཱུཾ་ཧཱུཾ་ཕཊ་ཕཊ་སྭཱ་ཧཱ། དེ་ཡི་ཆོ་ག །བདག་ཉིད་ཀྱི་ལུས་བདུད་རྩིས་བྱུག་ལ། བསྒྲུབ་བྱའི་ཕྱོགས་སུ་ཁ་བལྟས་ཏེ། འཁོར་ལོ་མཎྜལ་གྱི་སྟེང་དུ་ཁ་སྦུབ་ཏུ་བཞག་ལ་མི་ནག་པོ་སྨེ་བ་ཡོད་པའི་སྲེ་ལོང་གི་ཐོ་བ་དང་རྗེ་ངར་གྱི་ཕུར་པས་གདབ་ཅིང་བརྡུང་བར་བྱའོ། །དེ་བཞིན་དུ་དཔལ་ནག་པོ་ཆེན་པོའི་སྦྱོར་བས། དུས་གསུམ་
དུ་བསྒྲུབ་པར་བྱ་བ་ལ། བསྒྲུབ་བྱའི་ས་ཕྱོགས་སམ་ཁྱིམ་གྱི་སྨད་དུ་སྦ་བར་བྱས་ན་གང་ཞིག་བསྒྲུབ་བྱ་དེ་ཁྱབ་འཇུག་ཡིན་ཡང་སྐྲོད་པར་འགྱུར་རོ། །ཙུ་ཚུན་ད་རའི་པགས་པ་ལ་དུར་ཁྲོད་ཀྱི་སྣག་ཚས་འཁོར་ལོ་བྲིས་ལ། བསྒྲུབ་བྱའི་དྲི་མའི་ས་རིགས་ཤོ་མང་གི་ཁུ་བས་སྦྲུས་ལ་བསྒྲུབ་བྱའི་གཟུགས་བྱས་ནས། སྙིང་གར་མིང་གི་ཡི་གེ་དང་ལྡན་པར་བྱས་ལ། འཁོར་ལོའི་ནང་དུ་གཞུག་པར་བྱ་སྟེ། སྤྲེའུའི་རྒྱུས་པས་དཀྲི་བར་བྱའོ། །དེ་ནས་རང་གི་མདུན་དུ་ཁམ་ཕོར་གྱི་ནང་དུ་བཞག་ལ། སྔགས་ཐལ་ཆེན་དང་ཡུངས་ཀར་ལ་བཟླས་ལ་གདབ་པར་བྱ་སྟེ། ཨོཾ་མ་ཧཱ་ཀཱ་ལ་ཡ། སུ་པྲ་ཏི། ཨ་མུ་ཀ་མོ་ཧ་ཡ་མོ་ཧ་ཡ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། དེ་བཞིན་དུ་ཆོ་ག་འདི་དུས་གསུམ་བྱས་ལ། བསྒྲུབ་བྱའི་ཉལ་སར་སྦས་ན་རྨོངས་པར་འགྱུར་བའམ། གཞོགས་ཕྱེད་སྐམ་ནས་འཆི་བར་འགྱུར་རོ། །དེ་ནས་ཡང་ཨུཏྤ་ལའི་མེ་ཏོག་དང་ཙནྡན་དམར་པོ་དང་ཨ་པ་ར་ཛི་ཏའི་ཁུ་བས་སྣག་ཚ་བྱས་ལ་མེ་ཏོག་དམར་པོ་ལ། ཨོཾ་མ་ཧཱ་ཀཱ་ལ་ཡ། ཥྛི་ད་ན་ཨ་མུ་ཀ་ཨཱ་ཀཪྵ་ཡ་ཨཱ་ཀཪྵ་ཡ་ཧཱུཾ་ཧཱུཾ་ཕཊ་སྭཱ་ཧཱ། ཞེས་བྲིས། ཁ་ལྷོ་ནུབ་ཏུ་བལྟས་ལ་དཔལ་ནག་པོ་ཆེན་པོའི་བསམ་གཏན་དང་ལྡན་པར་བྱས་ལ་མེ་ཏོག་ལ་མངོན་པར་བསྔགས་ཏེ། སྐྱེས་པའམ་མོ་བཙུན་གྱི་ལུས་སམ་གྲིབ་མ་ཕོག་པ་ཙམ་གྱིས་དེ་མ་ཐག་ཏུ་འགུགས་པར་འགྱུར་རོ། །དེ་ནས་གཞན་ཡང་ལོ་བཅུ་གཉིས་མའི་ཐོད་པ་ཚེས་བཅོ་ལྔའི་ཉིན་པར་བདུད་རྩི་ལྔས་བྱུགས་ལ། མེ་ཏོག་དམར་པོའི་ཡུ་བ་ལ་རྨྱུག་གུ་བྱས་ཏེ། རྒྱལ་པོའམ་བློན་པོའི་གྲོང་ཁྱེར་དུ་ཁ་བལྟས་ཏེ། ནག་པོ་ཆེན་པོའི་བསམ་གཏན་དང་ལྡན་པར་བྱས་ཏེ། འཁོར་ལོ་རྩིབས་བརྒྱད་པ་བྲི་བར་བྱའོ། །འཁོར་ལོའི་རྩིབས་ལ་ཡི་གེ་ཧྲི་བཀོད་པར་བྱ། དབུས་སུ། ཨོཾ་མ་ཧཱ་ཀཱ་ལ་ཡ། སུ་པྲ་སུ་ཏཥྨ་ད་ནད་ད་རེ། ཨ་མུ་ཀ་བ་ཤི་ཀ་ར་ན། བཱ་ཤི་ཀ་ར་ཧཱུཾ་ཧྲི་ཧྲི་ཧྲི་སྭཱ་ཧཱ། ཞེས་བྲི་བར་བྱའོ། །དེ་ནས་མེ་ཏོག་དམར་པོས་ཐོད་པ་བཀང་ལ་དཔལ་ནག་པོ་ཆེན་པོའི་བསམ་གཏན་གྱིས་མངོན་པར་བསྔགས་ན། ཐོད་པའི་མེ་ཏོག་དྲི་དང་ལྡན་ཏེ་གཡོ་བར་
འགྱུར་རོ། །དེའི་ཚེ་ཐོད་པའི་མེ་ཏོག་དེ་དཔལ་ནག་པོ་ཆེན་པོའི་བསམ་གཏན་གྱིས། རྒྱལ་པོའམ་བློན་པོའི་ལག་ཏུ་བྱིན་པ་ཙམ་གྱིས་དབང་དུ་འགྱུར་རོ། །དེ་ནས་གཞན་ཡང་ལས་ཐམས་ཅད་སྒྲུབ་པའི་ཡུངས་ཀར་གྱི་ཆོ་ག་ལ་བརྩོན་པར་བྱ་སྟེ། དེ་ལ་ཐོད་པ་དུམ་བུ་གསུམ་པར་དུར་ཁྲོད་ནས་ས་བླངས་ལ། དཔལ་ནག་པོ་ཆེན་པོའི་བསམ་གཏན་གྱིས་བགེགས་བསྐྲད་དེ། ལྷོ་ནུབ་མཚམས་སུ་ཁ་བལྟས་ཏེ་ཐོད་པ་ལ་འདི་བྲིས་ལ། ཨོཾ་མ་ཧཱ་ཀཱ་ལ་ཡ། པ་ར་ས་བ་མཱི་བྷ་བཱ་ཡ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། ས་གཏིང་ཁྲུ་གང་ཚད་དུ་སྦ། དེའི་སྟེང་དུ་ཁྲུ་གང་ཆོས་འབྱུང་གཟུགས་སུ་འདུག་པར་བྱ། དེ་ནས་ནག་པོ་ཆེན་པོའི་ཐུགས་ཀའི་ས་བོན་ལས་འོད་ཟེར་ཡུངས་ཀར་ལ་ཐིམ་པར་བསམ་ལ་སྔགས་འདི་ཡུངས་ཀར་ལ་ལན་བདུན་ནམ་བཅུ་བཞིའམ་ཉི་ཤུ་རྩ་གཅིག་གམ་བརྒྱ་རྩ་བརྒྱད་བཟླས་ལ། ཉི་མའི་ཟེར་ལ་གཟུག་པར་བྱའོ། །དེ་ནས་བསྐོར་བ་ལན་ཉི་ཤུ་རྩ་གཅིག་བྱ་ཞིང་སྔགས་བཟླའོ། །གཏོར་མ་དང་མཆོད་པ་ཡང་བྱ། ཞག་བདུན་བདུན་ཞིང་དེ་ལྟར་བྱའོ། །ཨོཾ་མ་ཧཱ་ཀཱ་ལ་ཡ། ཨུད་ག་ཏེ་ཧཱུཾ་ཕཊ། ཅེས་བཟླས་ཤིང་ཡུངས་ཀར་སྨིན་པའི་དུས་སུ། དཔལ་ནག་པོ་ཆེན་པོའི་བསམ་གཏན་དང་ལྡན་པས་ཡུངས་ཀར་བླང་བར་བྱའོ། །དེ་ནས་དུར་ཁྲོད་ཀྱི་གནས་སུ་མཎྜལ་གྲུ་གསུམ་ཁྲུ་གང་གི་ཚད་དུ་སྦ་བྱས་ཏེ། བདུད་རྩི་རྣམ་པ་ལྔས་བྱུགས་ཏེ། དེའི་སྟེང་དུ་ཐོད་པར་ཡུངས་ཀར་བླུགས་ལ་གཞག་པར་བྱ་སྟེ། དེ་ལ་མཆོད་པ་དང་གཏོར་མ་ལ་སོགས་པ་བྱས་ནས་ཞག་གསུམ་དུ་སྔགས་ཀྱིས་བསྙེན་པ་བྱས་ན། དེས་ལས་ཐམས་ཅད་འགྲུབ་པར་འགྱུར་རོ། །དེ་ནས་ནག་པོ་ཆེན་པོས་བཅོམ་ལྡན་འདས་ལ་གསོལ་པ། བཅོམ་ལྡན་འདས་ལས་ཐམས་ཅད་འགྲུབ་པར་འགྱུར་བ་ཅི་ལགས། བཅོམ་ལྡན་འདས་ཀྱིས་འཁོར་གྱི་ཚོགས་རྣམས་ལ་གཟིགས་ནས་བཀའ་སྩལ་པ། ཕ་རོལ་དམག་ཚོགས་གཡུལ་རྣམས་དང་། །གཅན་གཟན་ལ་སོགས་འཇིགས་པའི་ཚོགས། །གང་ཞིག་འབྱུང་པོ་སྟོབས་ཆེན་དང་། །
ལོག་པའི་མཐུ་དང་ལྡན་པ་རྣམས། །དེ་དག་འཇིགས་པར་འགྱུར་བ་ནི། །ཡུངས་ཀར་ཆོ་ག་འདི་ཡིས་སོ། །ཨོཾ་མ་ཧཱ་ཀཱ་ལ་ཡ། པ་ར་ས་བ་བ་ར་ག་ན། བྷ་དྷ་བྷ་དྷ། ཧ་ཏྲ་ཙ་ཀྲ། ཨ་མུ་ཀ་ན། བྷ་དྷ་བྷ་དྷ། སྟྭམ་བྷ་ནི་སྟྭམ་བྷ་ནི་ཧཱུཾ་ཧཱུཾ་ཕཊ་སྭཱ་ཧཱ། དེ་ཡི་ཆོ་ག་ཡུངས་ཀར་ལ་བྱས་ན་དམག་དཔུང་རེངས་པར་འགྱུར་རོ། །ཨོཾ་མ་ཧཱ་ཀཱ་ལ་ཡ། སཾ་ག་ན་དྷ། ཧ་ན་ཧ་ན། ཧཱུཾ་ཧཱུཾ་ཕཊ་ཕཊ་སྭཱ་ཧཱ། དེའི་ཆོ་གས་སེང་གེ་ལ་སོགས་པའི་གཅན་གཟན་གྱི་ཚོགས་འཇིགས་པར་འགྱུར་རོ། །ཨོཾ་མ་ཧཱ་ཀཱ་ལ་ཡ། སརྦ་བུ་དྷ་བི་ཤིམ། པྲེ་ཏ་ཨ་ཏི་ག་ན། སྟྭམ་བྷ་ཡ་སྟྭམ་བྷ་ཡ། ཏྲ་ས་ཏྲ་ས། མཱ་ར་ཡ་མཱ་ར་ཡ། བི་དྷྭྨ་ས་ཡ་བི་དྷྭྨ་ས་ཡ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། དེའི་ཆོ་གས་བགེགས་ཀྱི་ཚོགས་འཇིགས་པར་འགྱུར་རོ། །དེ་ནས་གཞན་ཡང་བྱི་ལ་ནག་མོའི་རིལ་མ་དང་། མིའི་ལྟག་རྩ་བསྐོར་དང་རྡོ་ཕ་བོང་ལོང་བུ་དང་། གུ་གུལ་ནག་པོ་དང་། འཆད་པའི་ས་དང་དེ་རྣམས་བསྲེས་ལ་ནད་པའམ། གདོན་གྱིས་ཟིན་པའི་མདུན་དུ་བསྲེག་ལ་བདག་ལག་ཏུ་གྲི་གུག་ཐོགས་ཏེ་བདག་ཉིད་དཔལ་ནག་པོ་ཆེན་པོའི་ང་རྒྱལ་དུ་བྱས་ལ་ཐུགས་ཀའི་འོད་ཟེར་གྱིས་མདུན་གྱི་དཔལ་ནག་པོ་ཆེན་པོ་བཀུག་ལ། དེ་ཡར་སྤྲོས་པས་བགེགས་བཀུག་ལ་ནད་པ་ལ་བསྡིམས་ལ། ཨོཾ་མ་ཧཱ་ཀཱ་ལ་ཡ། ཨ་མུ་ཀ་པ་ཏ་ཡཱ་པ་ཏ་ཡཱ། སྟྭམ་བྷ་ཡ་སྟྭམ་བྷ་ཡ། སརྦ་བུ་དྷ་མ་ཧཱ་ཀཱ་ལ་ཡ། ཨ་རན་ཛ་ཡ་ཧཱུཾ། དེས་གྲི་གུག་ལ་བཏབ་ལ་ནད་པའི་ཐོག་ཏུ་བཞག་ལ། ཡུངས་ཀར་དང་ལྕགས་ཀྱི་ཕྱེ་མས་ཡང་དང་ཡང་མི་སྨྲ་བའི་བར་དུ་གདབ་བོ། །དེ་ནས་སྨྲ་བར་འགྱུར་ཏེ་རང་གི་འདོད་པ་དྲི་བར་བྱའོ། །དེ་ཡང་དམ་ལ་གདགས་པ་དང་མནའ་བསྒག་པ་དང་གནད་ལ་དབབ་པའི་ཆོ་ག་བྱས་ལ་བསྐྲད་པར་བྱའོ། །ཨོཾ་མ་ཧཱ་ཀཱ་ལ་ཡ། བུས་པ་མི་ཏི་མི་ཏི་ཧཱུཾ། མེ་ཏོག་འགུགས་པའི་སྔགས་སོ། །ཨོཾ་མ་ཧཱ་ཀཱ་ལ་ཡ། ར་པི་ར་བ་ཡཾ་ཀ །ཨ་མྲྀ་ཏི་ཀུ་རུ་ཀུ་རུ་སྭཱ་ཧཱ། བཅུད་ལེན་བྱིན་གྱིས་བརླབ་པའི་སྔགས་སོ། །ཨོཾ་མ་ཧཱ་ཀཱ་ལ་ཡ། དྷུ་བ་པྲ་ཏི་གྲྀཧྞ། ཨུ་པཱ་ཡ་པ་རི་ཀྲ་མ། པ་རི་པུ་ར་ར་ནི་དྷུ་པ་ཨ་
དྷིཥྛ་ན་ཨ་དྷིཥྛི་ཏེ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། དཔལ་ནག་པོ་ཆེན་པོའི་སྤོས་སྦྱོར་གྱི་སྔགས་སོ། །ཨོཾ་མ་ཧཱ་ཀཱ་ལ་ཡ། སུ་ར་རི་རི། མ་ཡཾ་གུ། མི་ལི་མི་ལི་སུ་ར་ཨཱ་ཀར་ཥ་ཡ་ན། ནི་ཏུན་དྷ་ནི་ཧཱུཾ་ཧཱུཾ་ཕཊ་ཕཊ་སྭཱ་ཧཱ། གྲོང་ཁྱེར་གྱི་ཆང་འགུགས་པའི་སྔགས་སོ། །ཨོཾ་མ་ཧཱ་ཀཱ་ལ་ཡ། བྷི་ཤ་ཕ་རང་བྷི་ཤ །ཧ་ར་ནི། ཨུ་པ་པྲ་ཏེ་ཧ་ར་ཧཱུཾ་ཧཱུཾ་ཕཊ་ཕཊ་སྭཱ་ཧཱ། སྦྲུལ་གྱི་དུག་བསལ་བའི་སྔགས་སོ། །དེ་སྐད་ཅེས་བཅོམ་ལྡན་འདས་ཀྱིས་བཀའ་སྩལ་ཏོ། །དཔལ་ནག་པོ་ཆེན་པོའི་རྒྱུད་དུར་ཁྲོད་ཆེན་པོ་ཞེས་བྱ་བ་ལས། སྔགས་ཀྱི་ལེའུ་སྟེ་གཉིས་པའོ།། །།དེ་ནས་དཔལ་ནག་པོ་ཆེན་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །གང་ཞིག་སྔགས་ཀྱི་སྦྱོར་བ་རྣམས། །སྟོབས་དང་ལྡན་པའི་སྦྱོར་བ་ཡི། །དེ་ཡི་ཆོ་ག་བཤད་དུ་གསོལ། །བཅོམ་ལྡན་འདས་ཀྱིས་བཀའ་སྩལ་པ། །དང་པོ་ལྷ་ཡི་རྣལ་འབྱོར་གྱིས། །སྔགས་ཀྱི་སྟོབས་ནི་སྐྱེད་པར་བྱེད། །རྟག་ཏུ་ལྷ་ཡི་རྣལ་འབྱོར་དང་། །ལྡན་པས་སྔགས་ཀྱི་ཆོ་ག་རྣམས། །བརྩམས་པ་ཙམ་གྱིས་འགྲུབ་པར་འགྱུར། །དེ་ཕྱིར་ལྷ་ཡི་རྣལ་འབྱོར་ནི། །རྒྱུད་ཀྱི་དོན་ལྡན་ཡིན་པར་བཤད། །དེ་སྐད་ཅེས་བཅོམ་ལྡན་འདས་ཀྱིས་བཀའ་སྩལ་ཏོ། །དེ་ནས་དཔལ་ནག་པོ་ཆེན་པོས་གསོལ་པ། བཅོམ་ལྡན་འདས། རྒྱུད་ཀྱི་དོན་དང་ལྡན་པ་ཡི། །ལྷ་ཡི་ཆོ་ག་ཇི་ལྟར་ལགས། །བཅོམ་ལྡན་འདས་ཀྱིས་བཀའ་སྩལ་པ། །དང་པོ་ས་གཞི་བསྲུང་བ་དང་། །བདག་དང་རྣལ་འབྱོར་བསྲུང་བར་བྱ། །དེ་ནས་ལྷ་ཡི་ཆོ་ག་ནི། །རིམ་པ་བཞིན་དུ་རྫོགས་པར་བསྐྱེད། །ཅེས་བཅོམ་ལྡན་འདས་ཀྱིས་བཀའ་སྩལ་ཏོ། །དེ་ནས་གཞན་ཡང་དུར་ཁྲོད་ལ་སོགས་པ་འབྱུང་པོ་འདུ་བའི་གནས་སུ་སོང་ལ། ལུས་བདུད་རྩི་ལྔས་བྱུགས་ལ་བདེ་བའི་སྟན་ལ་འདུག་སྟེ། ཨོཾ་མ་ཧཱ་ཀཱ་ལ་ཡ། བཛྲ་ཀ་པ་ཙ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ལན་གསུམ་དུ་བསྲུང་བར་བྱའོ། །དེ་ནས་དེ་མ་ཐག་ཏུ་དཔལ་ནག་པོ་ཆེན་པོའི་བསམ་གཏན་དང་ལྡན་པར་བྱ་སྟེ། དེའི་སྙིང་གར་
རཾ་ལས་ཉི་མའི་དཀྱིལ་འཁོར་གྱི་སྟེང་དུ་ཧཱུཾ་ནག་པོ་བསམ་པར་བྱའོ། །ཧཱུཾ་གི་འོད་ཟེར་གྱིས་སྲིད་པ་གསུམ་གྱི་གདུག་པ་བསལ་བར་བྱས་ནས། བླ་མ་དང་སངས་རྒྱས་དང་བྱང་ཆུབ་སེམས་དཔའ་རྣམས་དཔལ་ནག་པོ་ཆེན་པོའི་རང་བཞིན་དུ་དམིགས་ལ་རང་གི་མདུན་དུ་བཀུག་སྟེ། མེ་ཏོག་དང་སྤོས་ལ་སོགས་པ་མཆོད་པའི་ཁྱད་པར་གྱིས་མཆོད་ནས། སྡིག་པ་བཤགས་པ་ལ་སོགས་པ་བྱའོ། །དེ་ནས་དཔལ་ནག་པོ་ཆེན་པོའི་སྟོབས་ཀྱིས་བྱམས་པ་ལ་སོགས་པ་ཚད་མེད་པ་བཞི་ལ་དམིགས་པར་བྱ་སྟེ། དངོས་པོ་ཐམས་ཅད་ཀྱི་དེ་ཁོ་ན་ཉིད་རྗེས་སུ་བལྟ་བར་བྱས་ལ་ཇི་ལྟར་བཞིན་གསལ་བའི་ངང་ལ་བཞག་གོ། །ཞེས་བཅོམ་ལྡན་འདས་ཀྱིས་བཀའ་སྩལ་ཏོ། །དེ་ནས་ནག་པོ་ཆེན་པོས་གསོལ་པ། བཅོམ་ལྡན་འདས་དངོས་པོ་ཐམས་ཅད་ཀྱི་དེ་ཁོ་ན་ཉིད་ཇི་ལྟར་ལགས། རང་བཞིན་གསལ་བས་ཅི་ཞིག་བཤད། བཅོམ་ལྡན་འདས་ཀྱིས་བཀའ་སྩལ་པ། ཐོག་མར་མ་སྐྱེས་སྐྱེ་བ་མེད། །དངོས་དང་དངོས་མེད་གཉིས་སྤང་ཞིང་། །མཐའ་ལ་མི་གནས་རྣམ་པར་གྲོལ། །སྟོང་དང་མི་སྟོང་རང་བཞིན་གྱིས། །ངོ་བོ་ཉིད་ཀྱིས་རྣམ་པར་དག །དངོས་པོའི་སྙིང་པོ་བསྡུས་པ་ནི། །སྟོང་པ་ཉིད་དོན་གསལ་བར་བྱེད། །ཅེས་བཅོམ་ལྡན་འདས་ཀྱིས་བཀའ་སྩལ་ཏོ། །ཨོཾ་མ་ཧཱ་ཤུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱདྨ་ཀོ྅ཧཾ། གཉིས་སུ་སྣང་བའི་དངོས་པོ་རྣམས། །གཉིས་མེད་ཡེ་ཤེས་ཆེན་པོ་ཡི། །སྟོང་པ་ཉིད་དུ་བསྒོམ་པར་བྱ། །དེ་ནས་དཔལ་ལྡན་ནག་པོ་བསྐྱེད། །སྟོང་པ་ཉིད་ལས་ཡི་གེ་བཾ། །སྣ་ཚོགས་པདྨ་ཉི་མར་བཅས། །དེ་ཡི་སྟེང་དུ་ཧཱུཾ་གནས་པ། །འོད་དུ་ཞུ་ནས་གྲི་གུག་གྱུར། །ཡུ་བ་ཉི་མ་ཧཱུཾ་གིས་མཚན། །ཧཱུཾ་གི་འོད་ཟེར་ཕྱོགས་རྣམས་སུ། །གྲི་གུག་འོད་དང་བཅས་པར་སྤྲོ། །འོད་ཀྱིས་གདུག་པ་བསལ་བྱས་ནས། །གྲི་གུག་གུར་དང་དྲ་བར་གྱུར། །དེ་ཡི་དབུས་སུ་ཆོས་འབྱུང་བསམ། །ནང་དུ་སྣ་ཚོགས་པད་ཉི་མ། །དེ་སྟེང་རོ་ཡི་གདན་ཉིད་དོ། །སྙིང་གར་ཟླ་བ་ཉི་མ་ནི། །ཨཱ་ལི་ཀཱ་ལིས་རྣམ་པར་བརྒྱན། །ཁ་སྦྱོར་དབུས་སུ་ཧཱུཾ་གནས་པ། །འོད་དུ་ཞུ་ནས་གྲི་གུག་གྱུར། །གྲི་གུག་ཡུ་བ་ཧཱུཾ་གིས་མཚན། །སྤྲོ་དང་བསྡུ་བའི་ཆོ་ག་ཡིས། །དཔལ་ལྡན་ནག་པོ་ཆེན་པོར་བཞེངས། །ཞལ་གཅིག་པ་ལ་
ཕྱག་གཉིས་པ། །གྲི་གུག་ཐོད་པ་ལག་ན་འཛིན། །སྤྱན་གསུམ་མེ་མདག་ཕུང་པོ་འདྲ། །དབུ་སྐྲ་ཁམ་སེར་གྱེན་དུ་འཁྱིལ། །རྔམ་པའི་མཆེ་བ་ཤིན་ཏུ་གཙིགས། །ཁ་ནས་ཁྲག་འཛག་རྒྱུན་མི་འཆད། །སྟག་གི་ཤམ་ཐབས་རབ་ཏུ་མཛེས། །ཀླུ་ཆེན་བརྒྱད་ཀྱིས་ཡན་ལག་བརྒྱན། །བརྒྱ་ཕྱེད་ཐོད་པའི་ཕྲེང་བས་མཛེས། །དེ་ལྟར་རྫོགས་པར་བསྐྱེད་ནས་ནི། །རང་སྙིང་པད་ཉིར་ཧཱུཾ་གནས་པ། །ཧཱུཾ་ལས་གྲི་གུག་ཧཱུཾ་ཉིད་མཚན། །དེ་ཡི་འོད་ཟེར་རབ་སྤྲོས་པས། །བླ་མ་སངས་རྒྱས་ཐམས་ཅད་དང་། །བྱང་ཆུབ་སེམས་དཔའ་ལ་སོགས་པ། །དཔལ་ལྡན་ནག་པོའི་རང་བཞིན་དུ། །བཀུག་ནས་གཉིས་སུ་མེད་པར་བྱ། །ཛཿཧཱུཾ་བཾ་ཧོཿ། འདི་ཡིས་གཅིག་ཏུ་བྱས་ནས་ནི། །ཐུགས་ཀའི་འོད་ཟེར་ལས་བྱུང་བའི། །ཡེ་ཤེས་ཆུ་ཡི་དབང་བསྐུར་བྱ། །ཞེས་བཅོམ་ལྡན་འདས་ཀྱིས་བཀའ་སྩལ་ཏོ། །དེ་ནས་དཔལ་ནག་པོ་ཆེན་པོས་གསོལ་པ། བཅོམ་ལྡན་འདས། ལྷ་ཡི་ཆོ་ག་ལྡན་གྱུར་ནས། །ལས་ཀྱི་སྦྱོར་བ་ཇི་ལྟར་ལགས། །བཅོམ་ལྡན་འདས་ཀྱིས་བཀའ་སྩལ་པ། །འདི་ཡི་ལས་ཀྱི་ཆོ་ག་རྣམས། །ལྷ་ཡི་སྦྱོར་བ་རྫོགས་བྱེད་ཀྱིས། །སྔགས་ཀྱི་མཐུ་དང་ལྡན་གྱུར་ན། །ལས་ཀྱི་ཆོ་ག་ཐམས་ཅད་འགྲུབ། །ཅེས་བཅོམ་ལྡན་འདས་ཀྱིས་བཀའ་སྩལ་ཏོ། །དེ་ནས་ནག་པོ་ཆེན་པོས་གསོལ་པ། བཅོམ་ལྡན་འདས། ལྷ་ཡི་ཆོ་ག་ལྡན་གྱུར་ནས། །ལས་ཀྱི་ཆོ་ག་ཇི་ལྟར་ལགས། །བཅོམ་ལྡན་འདས་ཀྱིས་བཀའ་སྩལ་པ། །ཁྱད་པར་ལས་ཀྱི་ཆོ་ག་ནི། །རྣམ་པ་བཞི་རུ་ཤེས་པར་གྱིས། །གནས་དང་ལིངྒ་བཅའ་བ་དང་། །དུས་དང་གསང་བའི་སྦྱོར་བའོ། །བསམ་གཏན་སྔགས་ཀྱིས་ཤེས་པར་གྱིས། །ཞེས་བཅོམ་ལྡན་འདས་ཀྱིས་བཀའ་སྩལ་ཏོ། །དེ་ནས་གཞན་ཡང་བྱང་ཕྱོགས་ཀྱི་ཆུ་འགྲམ་གྱི་དུར་ཁྲོད་དམ། ཤར་ཕྱོགས་ཀྱི་ཤིང་རྐང་གཅིག་གམ། ལྷོ་ཕྱོགས་སུ་རོ་བསྲེགས་པའི་དུར་ཁྲོད་དམ། ནུབ་ཕྱོགས་སུ་མཁའ་འགྲོ་མའི་ཁང་སྟོང་ངམ། ནུབ་བྱང་
མཚམས་རྒྱ་མཚོའི་གླིང་ངམ། བྱང་ཤར་མཚམས་རིའི་རྩེ་མོའམ། ཤར་ལྷོ་མཚམས་མ་ཧཱ་དེ་བ་གནས་པའི་སའམ། ལྷོ་ནུབ་མཚམས་གསལ་ཤིང་ཡོད་པའི་ནགས་ཚལ་ལམ། གནས་དེ་དག་ཏུ་ནག་པོ་ཆེན་པོ་བསྒྲུབ་པར་བྱའོ། །དེ་ནས་རྣལ་འབྱོར་པ་བསྒྲུབ་བྱའི་ཕྱོགས་སུ་ཁ་བལྟས་ལ་ཚ་བ་གསུམ་དང་བསྒྲུབ་བྱའི་རྐང་པ་གཡོན་པའི་ས་དང་། སྤྲ་ཚིལ་དང་བག་ཟན་ལ་སོགས་པ་རྣམས་ལ། བསྒྲུབ་བྱའི་གཟུགས་སོར་བརྒྱད་པའི་ཚད་དུ་བྱས་ལ། དེ་ནས་དུར་ཁྲོད་ཀྱི་སྣག་ཚ་དང་བྱ་རོག་གི་ཁྲག་གིས་མིང་རུས་ཀྱི་ཡི་གེ་དང་ལྡན་པར་བྱའོ། །དེའི་ཚེ་ལུས་ཀྱི་ཐིག་ལེའི་གནས་སུམ་ཅུ་རྩ་གཉིས་སུ་གསལ་ཤིང་གི་ཚེར་མས་དགང་བར་བྱས་ནས། དེའི་སར་སྐེ་ཚེ་དང་ཉུང་དཀར་དང་བཙན་དུག་གིས་ཀྱང་བསྣུན་པར་བྱ་སྟེ། དཔལ་ནག་པོ་ཆེན་པོའི་བསམ་གཏན་དང་སྔགས་ཀྱིས་གསད་པར་བྱའོ། །དུས་ནི་ཞག་བདུན་ནམ་སུམ་ཅུ་རྩ་གཉིས་ཀྱིས་བསྙེན་པ་དང་ལས་སྦྱོར་ཐུན་མོང་དུ་འགྱུར་རོ། །དེ་ནས་གཞན་ཡང་དཔལ་ནག་པོ་ཆེན་པོའི་སྐད་ཅིག་མའི་བསམ་གཏན་དུ་བྱ་སྟེ། ཨོཾ་མ་ཧཱ་ཀཱ་ལ་ཡ། ཨུ་དུ་ས་རི་ཀྲ་མ། པཱ་བཱ་དྷི་སིདྡྷི་མ་ཧཱ་ཀཱ་ལ་ཡ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཞེས་བྱ་བའི་སྔགས་འདིས་དུག་གི་ལ་དུ་ལ་གཏོར་མ་བྱ་སྟེ། ཞག་གསུམ་དུ་བསྒྲུབ་ན་དཔལ་ནག་པོ་ཆེན་པོའི་སྟོབས་དང་ལྡན་པར་འགྱུར་རོ། །དེ་ནས་གཞན་ཡང་ཁྲག་དང་། དུག་དང་སྒོག་པ་དང་ཡུངས་ཀར་དང་། ཤ་ཆེན་དང་། གུ་གུལ་ཆེན་པོ་དང་ཆ་བསྙམས་ལ་འོད་ཟེར་ཅན་དང་། ལུ་ཏི་དང་དེ་རྣམས་མར་ནག་ཆེན་པོས་བསྲེག་ལ། དཔལ་ནག་པོ་ཆེན་པོའི་མདུན་དུ་བསྲེག་ལ་ཞག་ལྔར་བསྒྲུབ་པ་བྱས་ན་དཔལ་ནག་པོ་ཆེན་པོ་མངོན་སུམ་དུ་འགྲུབ་པར་འགྱུར་རོ། །དེ་ནས་གཞན་ཡང་དུར་ཁྲོད་ཀྱི་མགལ་པ་དང་། དཔལ་ནག་པོ་ཆེན་པོའི་གཟུགས་མཐོ་གང་བའི་ཚད་དུ་བྱས་ཏེ། དུར་ཁྲོད་ཀྱི་ས་ལ་མཎྜལ་གྲུ་གསུམ་པ་བྱས་པའི་སྟེང་དུ་བཞག་གོ། །དེ་ནས་རྣལ་འབྱོར་པའི་ཐུགས་ཀའི་འོད་ཟེར་གྱིས་དཔལ་ནག་པོ་ཆེན་པོ་སྤྱན་དྲངས་ཏེ་བསྡིམ་པར་བྱའོ། །
དེ་ནས་དེ་ལ་མཆོད་པ་དང་སྡིག་པ་བཤགས་པ་ལ་སོགས་པ་བྱས་ནས། མདུན་གྱི་ནག་པོ་ཆེན་པོ་དང་བསམ་གཏན་རྩེ་གཅིག་པར་བྱས་ལ། ཚངས་པའི་གནས་བཞི་བསྒོམ་པར་བྱ་སྟེ། དེ་མ་ཐག་ཏུ་སྟོང་པ་ཉིད་དུ་བསམ་པར་བྱའོ། །སྟོང་པ་ཉིད་ལས་ཆོ་ག་གསུམ་གྱིས་དཔལ་ནག་པོ་ཆེན་པོ་རྫོགས་པར་བསྐྱེད་ལ། དེའི་ཐུགས་ཀའི་འོད་ཟེར་གྱིས་རང་བཞིན་གྱི་གནས་ནས་དཔལ་ནག་པོ་ཆེན་པོ་སྤྱན་དྲངས་ཏེ། གཉིས་སུ་མེད་པར་བསྡིམ་པར་བྱའོ། །དེ་ནས་དུར་ཁྲོད་ཀྱི་བིང་གི་ནག་པོ་ཆེན་པོ་དང་། དཔལ་ནག་པོ་ཆེན་པོ་གཉིས་སུ་མེད་པར་དམིགས་ལ། མཆོད་པ་དང་གཏོར་མ་ལ་སོགས་པ་ཡང་བྱ་སྟེ། བསྲེག་པར་བྱ་བའི་རྫས་ཀྱང་བསྲེག་ལ་དབུལ་བར་བྱའོ། །མདུན་གྱི་ནག་པོ་ཆེན་པོ་ནི་བཀའ་སྡོད་ཀྱི་ནག་པོ་ཆེན་པོར་ཤེས་པར་བྱ་སྟེ། ཐུགས་ཀ་ནས་ཐུགས་ཀྱི་སྔགས་ཀྱི་བཟླས་པ་བྱས་ན། དུས་གསུམ་དུ་མཆོད་པ་དང་གཏོར་མ་ལ་སོགས་པ་རྒྱུན་མི་འཆད་པར་བྱས་ལ། ཞག་ཉི་ཤུ་རྩ་གཅིག་ཏུ་བསྒྲུབ་པ་བྱས་ན་དཔལ་ནག་པོ་ཆེན་པོ་མངོན་སུམ་དུ་འགྱུར་ཏེ། སྦྱོར་བ་དེ་དོན་ཐམས་ཅད་དང་ལྡན་པར་འགྱུར་རོ། །དེ་སྐད་ཅེས་བཅོམ་ལྡན་འདས་ཀྱིས་བཀའ་སྩལ་ཏོ། །དཔལ་ནག་པོ་ཆེན་པོའི་རྒྱུད་དུར་ཁྲོད་ཆེན་པོ་ཞེས་བྱ་བ་ལས། ལྷའི་ལེའུ་སྟེ་གསུམ་པའོ།། །།དེ་ནས་དཔལ་ནག་པོ་ཆེན་པོས། བཅོམ་ལྡན་འདས་ལ་གསོལ་པ། རྒྱུད་དོན་སྒྲུབ་པར་བྱེད་པ་ཡི། །ཁྱད་པར་ཆོ་ག་ཇི་ལྟར་ལགས། །བཅོམ་ལྡན་འདས་ཀྱིས་བཀའ་སྩལ་པ། །རྒྱུད་དོན་ངེས་པར་སྒྲུབ་འདོད་པས། །ནག་པོ་ཆེན་པོའི་དཀྱིལ་འཁོར་བྲི་བ་དང་། །རབ་ཏུ་གནས་པས་འགྲུབ་པར་འགྱུར། །ཞེས་བཅོམ་ལྡན་འདས་ཀྱིས་བཀའ་སྩལ་པ། ནག་པོ་ཆེན་པོས་གསོལ་པ། བཅོམ་ལྡན་འདས། དཀྱིལ་འཁོར་བྲི་བ་ཇི་ལྟར་ལགས། །བཅོམ་ལྡན་འདས་ཀྱིས་བཀའ་སྩལ་པ། །གནས་དང་དཀྱིལ་འཁོར་བྲི་བ་དང་། །སྒྲུབ་པར་བྱེད་དང་དོན་གསུམ་དང་། །ཞེས་བཅོམ་ལྡན་འདས་ཀྱིས་
བཀའ་སྩལ་ཏོ། །དེ་ནས་གཞན་ཡང་བཤད་བྱ་བ། །དུར་ཁྲོད་ཁ་དོག་ནག་པོ་ཡི། །ཁང་སྟོང་ཟུར་གསུམ་དབྱིབས་གནས་པའི། །ནང་དུ་དཀྱིལ་འཁོར་བྲི་བར་བྱ། །དེ་ལ་བུ་མོ་ལོ་བཅུ་གཉིས་མ་རྣལ་འབྱོར་མའི་གཟུགས་སུ་འདུག་པ་ཁྲུས་བྱས་ལ། ལུས་ལ་བདུད་རྩི་ལྔ་ཡི་ཐིག་ལེ་བྱས་ནས། རྣལ་འབྱོར་མ་ཐམས་ཅད་ཀྱིས་སྔགས་ཀྱིས་བྱིན་གྱིས་བརླབས་ཏེ། ཨོཾ་མ་ཧཱ་ཀཱ་ལ་ཡ། སརྦ་ཡོ་གི་ནཱི། ཀཱ་ཡ་བཱ་ག་ཙིཏྟ། ཏིཥྛ་བཛྲ་པྲ་བེ་ཤ་ཡ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། དེ་ནས་ལྷོ་ནུབ་མཚམས་ནས་ཆུ་འགྲམ་མམ་མཆད་པ་ཡང་འཆད་པའི་ས་བླངས་ནས། ཨོཾ་མ་ཧཱ་ཀཱ་ལ་ཡ། ཧཱུཾ་བི་བི་ཤོ་དྷ་ཡ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཞེས་སྔགས་དང་བདུད་རྩིས་བྱིན་གྱིས་བརླབ་པར་བྱའོ། །དེ་ནས་དུར་ཁྲོད་ཀྱི་ཕ་གུ་ལ་སོགས་པ་དུར་ཁྲོད་ཀྱི་ཚོན་གྱིས་དཀྱིལ་འཁོར་བྲི་བར་བྱ་སྟེ། མི་སྐྲའི་སྐུད་པས་ཐིག་གདབ་པར་བྱའོ། །ཐོད་པ་དཀར་པོ་དང་གྲི་གུག་ནག་པོ་དགོད་པར་བྱ་སྟེ། དེ་ནས་གཞན་ཡང་རྣལ་འབྱོར་པ་དཔལ་ནག་པོ་ཆེན་པོའི་བསམ་གཏན་དང་ལྡན་པར་བྱས་ནས་ཆོ་ག་གསུམ་གྱིས་ནག་པོ་ཆེན་པོ་དང་མཁའ་འགྲོ་མའི་ཚོགས་དང་བཅས་པའི་དཀྱིལ་འཁོར་བསྐྱེད་ལ་ནམ་མཁའ་ལས་བྱུང་བའི་དཀྱིལ་འཁོར་བསྡིམ་པར་བྱའོ། །དེ་ནས་མཆོད་པ་དང་གཏོར་མ་ལ་སོགས་པ་ཡང་བྱ་སྟེ། དམ་ཚིག་ལ་སོགས་རྫས་ཀྱིས་ཁྱད་པར་གྱི་མཆོད་པ་ཡང་བྱ་སྟེ། དེ་བཞིན་དུ་དུས་གསུམ་དུ་བསམ་གཏན་དང་ལྡན་པར་བྱས་ནས། ཞག་ཉི་ཤུ་རྩ་གཅིག་གིས་དཔལ་ནག་པོ་ཆེན་པོ་མངོན་སུམ་དུ་མཐོང་བར་འགྱུར་རོ། །དེ་སྐད་ཅེས་བཅོམ་ལྡན་འདས་ཀྱིས་བཀའ་སྩལ་ཏོ། །དེ་ནས་གཞན་ཡང་ནག་པོ་ཆེན་པོས་གསོལ་པ། བཅོམ་ལྡན་འདས། རྒྱུད་ཀྱི་ཆོ་གའི་རིམ་པ་རྣམས། །ཁྱད་པར་སྒྲུབ་པ་ཇི་ལྟར་ལགས། །བཅོམ་ལྡན་འདས་ཀྱིས་བཀའ་སྩལ་པ། །དཔལ་ལྡན་ནག་པོ་ཆེན་པོ་ཡི། །ས་ལ་དཀྱིལ་འཁོར་བྲི་བ་དང་། །དེ་བཞིན་དུར་ཁྲོད་ཆེན་པོའི་རས། །རོ་བསྲེགས་ཤིང་དང་མཆོད་པའི་ས། །དཔའ་བོ་ཀེང་རུས་ལ་སོགས་པ། །དུར་ཁྲོད་གནས་སམ་
བྲག་གི་སྟེང་། །བསམ་གཏན་སྔགས་ཀྱིས་མཚམས་བཅད་ནས། །དཔལ་ལྡན་ནག་པོ་ཆེན་པོ་ཡི། །སྐུ་ཡི་རི་མོ་བྱས་ནས་སུ། །ཆོ་ག་རབ་ཏུ་གནས་པར་བྱ། །དེ་ལྟར་བྱས་ན་དངོས་གྲུབ་ནི། །དེ་དང་དུས་མཚུངས་ལྡན་པར་འགྱུར། །ཞེས་བཅོམ་ལྡན་འདས་ཀྱིས་བཀའ་སྩལ་ཏོ། །དེ་ནས་དཔལ་ནག་པོ་ཆེན་པོས་གསོལ་པ། བཅོམ་ལྡན་འདས། རབ་ཏུ་གནས་པར་འགྱུར་བ་ནི། །ཆོ་གའི་རིམ་པ་ཇི་ལྟར་ལགས། །བཅོམ་ལྡན་འདས་ཀྱིས་བཀའ་སྩལ་པ། །དང་པོར་རྣལ་འབྱོར་དབང་ཕྱུག་གིས། །བསམ་གཏན་སྔགས་དང་ལྡན་གྱུར་ནས། །རབ་ཏུ་གནས་པར་བྱ་བ་ཡིན། །ཆོ་ག་འདི་དང་ལྡན་གྱུར་ན། །དཔལ་ལྡན་ནག་པོ་ཆེན་པོ་དང་། །གཉིས་མེད་སྟོབས་དང་ལྡན་པར་འགྱུར། །ཞེས་བཅོམ་ལྡན་འདས་ཀྱིས་བཀའ་སྩལ་ཏོ། །དེ་ནས་དཔལ་ལྡན་ནག་པོ་ཆེན་པོས་གསོལ་པ། བཅོམ་ལྡན་འདས། རབ་ཏུ་གནས་པར་འགྱུར་བ་ཡི། །རིམ་པའི་ཆོ་ག་ཅི་ཞིག་བཤད། །བཅོམ་ལྡན་འདས་ཀྱིས་བཀའ་སྩལ་པ། ཆོ་གའི་རིམ་པ་རྣམ་པ་བཞི། །རྣལ་འབྱོར་པ་ཡིས་ཤེས་པར་བྱ། །དང་པོ་སྐུ་ཡི་རབ་ཏུ་གནས། །གཉིས་པ་གྲི་གུག་རབ་གནས་དང་། །གསུམ་པ་ཐོད་པའི་རབ་གནས་དང་། །བཞི་པ་ཕུར་བུའི་རབ་ཏུ་གནས། །འདི་ཡི་ཆོ་གའི་རིམ་པ་རྣམས། །བསམ་གཏན་སྔགས་དང་ལྡན་གྱུར་ནས། །རབ་གནས་ཆོ་ག་ཤེས་པར་གྱིས། །ཞེས་བཅོམ་ལྡན་འདས་ཀྱིས་བཀའ་སྩལ་ཏོ། །དེ་ནས་གཞན་ཡང་རྣལ་འབྱོར་པས་དུར་ཁྲོད་དུ་སོང་ལ་དཔལ་ནག་པོ་ཆེན་པོའི་ང་རྒྱལ་དང་ལྡན་པས་ལུས་ལ་བདུད་རྩི་ལྔས་བྱུགས་ནས། གྲི་གུག་དང་ཐོད་པ་ལག་ཏུ་ཐོགས་ལ། དཔའ་བོ་ཁ་དོག་ནག་པོ་ལུས་ལ་ཐིག་ལེ་ནག་པོ་ཡོད་པའི་རས། བསམ་གཏན་དང་སྔགས་ཀྱིས་བླང་བར་བྱ་སྟེ། ཐོད་པའི་ནང་དུ་བཞག་ལ་ཡི་གེ་མུཾ་དང་ཧཱུཾ་གིས་བྱིན་གྱིས་བརླབ་པར་བྱའོ། །དེ་ནས་མཆོད་པ་དང་གཏོར་མ་ལ་སོགས་པ་བྱས་ཏེ། དེ་ལྟར་བསྐྱེད་པའི་རིམ་པ་དང་ལྡན་པས། དཔལ་ནག་
པོ་ཆེན་པོ་བྲི་བར་བྱའོ། །དེ་ནས་དཔལ་ནག་པོ་ཆེན་པོའི་རྣལ་འབྱོར་དང་ལྡན་པས་སྔོན་དུ་བསྙེན་པ་བྱ་སྟེ། མཚན་མ་ཐོབ་པའི་རྣལ་འབྱོར་པས། དཔལ་ནག་པོ་ཆེན་པོ་རབ་ཏུ་གནས་པར་བྱའོ། །དང་པོར་གནས་དེ་ཉིད་དུ་བདུད་རྩི་རྣམ་ལྔའི་མཎྜལ་བྱས་ལ་མཆོད་པ་དང་གཏོར་མ་ལ་སོགས་པ་བྱས་ཏེ། དེ་ནས་བསྐྱེད་པའི་རིམ་པ་དང་ལྡན་པར་བྱས་ལ། རང་གི་མདུན་གྱི་ཐད་ལ་བཾ་འོད་དུ་ཞུ་བ་ལས་སྣ་ཚོགས་པདྨ་དེ་སྟེང་དུ་རཾ་ལས་ཉི་མའི་དཀྱིལ་འཁོར་དེ་ལ་ཧཱུཾ་འོད་དུ་ཞུ་གྲི་གུག་གི་ཡུ་བའི་ཉི་མ་ལ་ཧཱུཾ་བསམ་པར་བྱའོ། །དེ་ནས་དེའི་འོད་ཟེར་སྤྲོ་བ་དང་བསྡུ་བས་རྗེ་བཙུན་ནག་པོ་ཆེན་པོར་བཞེངས་ཏེ། ཞལ་གཅིག་པ་ཕྱག་གཉིས་པ། སྐུ་མདོག་ཆར་སྤྲིན་གྱི་མདོག་འདྲ་བ། ཡན་ལག་ཐུང་བ་གཟི་བརྗིད་ཀྱི་གཟུགས་ཤིན་ཏུ་ཐུང་བ། ཡན་ལག་ཐམས་ཅད་གདུག་པ་སྦྲུལ་གྱིས་བརྒྱན་པ། མཆེ་བ་རབ་ཏུ་གཙིགས་ཤིང་ཁ་ནས་ཁྲག་འཛག་པ་རྒྱུན་མི་ཆད་པར་གནས་པ། མིག་མེ་མདག་གི་ཕུང་པོ་འདྲ་བ། ཡེ་ཤེས་ཀྱི་མེ་ཆེན་པོ་རབ་ཏུ་འབར་བ། དེ་ལྟར་ཕྱུང་བར་བསྒོམ་པར་བྱའོ། །དེ་ནས་རང་གི་ཐུགས་ཀའི་ས་བོན་གྱིས་དེ་བཞིན་གཤེགས་པ་བཀུག་ནས་དབང་བསྐུར་བར་དམིགས་ལ། ཨོཾ་ཤྲཱི་མ་ཧཱ་ཀཱ་ལ་ཡ། ཨ་བྷི་ཥེ་ཀ་ས་མ་ཡ་ཤྲཱི་ཡེ་ཧཱུཾ། དེ་ནས་རང་གི་ཐུགས་ཀའི་ས་བོན་གྱི་འོད་ཟེར་གྱིས་དཔལ་ནག་པོ་ཆེན་པོ་སྤྱན་དྲངས་ལ། ཨོཾ་ཤྲཱི་མ་ཧཱ་ཀཱ་ལ་ཡ། སརྦ་བུཌྜྷ་ཨ་དྷིཥྛ་ན་ས་མ་ཡ་ཤྲཱི་ཡེ་ཧཱུཾ། དེ་ལ་མཆོད་པ་དང་གཏོར་མ་ལ་སོགས་པ་བྱས་ཏེ། དེ་ནས་བསྐྱེད་པའི་ནག་པོ་ཆེན་པོར་བསྡིམ་པར་བྱའོ། །ཨོཾ་མ་ཧཱ་ཀཱ་ལ་ཡ། པ་རཱུ་བཾ་ཏིཥྛ་ན་ས་མ་ཡ་ཤྲི་ཡེ་ཧཱུཾ། དེ་ནས་མཆོད་པ་དང་གཏོར་མ་ལ་སོགས་པ་བྱས་ཏེ། ཐུགས་ཀའི་འོད་ཟེར་གྱིས་བཟླས་པ་ཡང་བྱའོ། །དེ་ནས་ཚོགས་ཀྱི་འཁོར་ལོ་ཆེན་པོ་ཡང་བསྐོར་བར་བྱ་སྟེ། སྲིད་པ་རང་བཞིན་རྣམ་དག་པས། །སངས་རྒྱས་བསྟན་པ་ལ་གནས་ཕྱིར། །སྟོབས་ཆེན་ནག་པོ་ཆེན་པོ་ཡིས། །རབ་ཏུ་གནས་པ་མཛད་དུ་གསོལ། །དེ་ནས་ནག་པོ་ཆེན་པོའི་ཐུགས་ཀའི་གྲི་གུག་གི་ཡུ་བ་
ལ་སྔགས་འདིས་བསྐོར་བར་བསམ་ལ། རྣལ་འབྱོར་པའི་ཐུགས་ཀའི་འོད་ཟེར་གྱིས་ནག་པོ་ཆེན་པོ་སྤྱན་དབྱེ་བར་བྱ་སྟེ། ཨོཾ་མ་ཧཱ་ཀཱ་ལ་ཡ། བཛྲ་ནེ་ཏྲ་པྲ་ཏིཥྛ་ན། བཛྲ་སྭ་བྷཱ་བ་ཨཱདྨ་ཀོ྅ཧཾ། སྔགས་འདི་ཡོངས་སུ་བཟླས་པ་བྱའོ། །དེ་ནས་དཔལ་ནག་པོ་ཆེན་པོའི་མདུན་དུ་སྤོས་བསྲེག་པར་བྱ་སྟེ། མཆོད་པ་དང་གཏོར་མ་ཡང་བྱའོ། །དེ་ནས་ཐུགས་ཀ་ནས་ཐུགས་ཀའི་བཟླས་པ་སྟོང་ཕྲག་གཅིག་བྱས་ན་ནམ་མཁའ་ལས་སྒྲ་འབྱུང་བ་དང་། སྐུ་ལས་འོད་འབྱུང་བ་ལ་སོགས་པ་དཔལ་ནག་པོ་ཆེན་པོའི་སྟོབས་རྙེད་པར་འགྱུར་རོ། །དེ་ནས་སྔགས་འདིས་བརྟན་པར་འགྱུར་ཏེ། ཨོཾ་མ་ཧཱ་ཀཱ་ལ་ཡ། ཨུ་ཏི་པྲ་གྲ་མམ། ཀཱ་ཡ་བཱ་ག་ཙིཏྟ། ཏིཥྛ་བཛྲ་མ་ཧཱ་ཀཱ་ཡ། ཏིཥྛ་ན་ས་མ་ཡ་ཧཱུཾ། བརྒྱ་རྩ་བརྒྱད་ཀྱི་བར་དུ་བརྟན་པར་བྱའོ། །དེ་བཞིན་དུ་དུས་གསུམ་བསམ་གཏན་དང་ལྡན་པར་བྱས་ན་རབ་ཏུ་གནས་པར་ཐོབ་པར་འགྱུར་རོ། །ཞེས་བཅོམ་ལྡན་འདས་ཀྱིས་བཀའ་སྩལ་ཏོ། །དེ་ནས་གཞན་ཡང་དཔལ་ནག་པོ་ཆེན་པོས་གསོལ་པ། གྲི་གུག་རབ་ཏུ་གནས་པ་ཡི། །ཆོ་གའི་རིམ་པ་བཤད་དུ་གསོལ། །བཅོམ་ལྡན་འདས་ཀྱིས་བཀའ་སྩལ་པ། །འགུགས་དང་གཅོད་པར་བྱེད་པའི་གྲི། །དཔལ་ལྡན་ནག་པོ་ཆེན་པོ་ཡི། །ཕྱག་རྒྱའི་རབ་གནས་བཤད་པར་བྱ། །དཔའ་བོ་སྟོབས་དང་ལྡན་པའི་ལྕགས་ལ་གྲི་གུག་སོར་བཅུ་གཉིས་པའམ་སོར་བཞི་པའི་ཡུ་བ་ལ་ཧཱུཾ་གིས་མཚན་པའོ། །དེ་ནས་བདུད་རྩི་ལྔ་ཡིས་མཎྜལ་བྱས་ལ་གྲི་གུག་བདུད་རྩི་ལྔས་བྱུགས་ཏེ། མཎྜལ་པདྨ་དང་ཉི་མའི་ཐོག་ཏུ་གྲི་གུག་བཞག་ལ། ཐུགས་ཀའི་འོད་ཟེར་གྱིས་དག་པར་བྱས་ཏེ། ནག་པོ་ཆེན་པོའི་གྲི་གུག་གི་རང་བཞིན་དུ་བྱས་ལ། ཡུ་བའི་ཧཱུཾ་ལ་སྔགས་འདི་བཟླས་པར་བྱའོ། །ཨོཾ་མ་ཧཱ་ཀཱ་ལ་ཡ། ཀརྟ་པྲ་ཏིཥྛ་ན། བཛྲ་སྭ་བྷཱ་བ་ཨཱདྨ་ཀོ྅ཧཾ། དེ་ནས་མཆོད་པ་དང་གཏོར་མ་ལ་སྤོས་བསྲེག་ཅིང་བཟླས་པ་བྱའོ། །དེ་ལྟར་དུས་གསུམ་དུ་རབ་ཏུ་གནས་པར་བྱའོ། །དེ་ནས་གཞན་ཡང་ཨ་ལི་དང་ཀ་ལི་དང་ཉི་མ་དང་ཟླ་བའི་དབུས་སུ་ཨ་ལས་
ཐོད་པ་དུམ་བུ་གཅིག་པ་ཨ་ལི་དང་ཀ་ལིས་བརྒྱན་པར་བསམ་ལ། བདག་ཉིད་ཀྱི་ཐུགས་ཀའི་འོད་ཟེར་གྱིས་ནག་པོ་ཆེན་པོ་སྤྱན་དྲངས་ཏེ། མཆོད་པ་དང་གཏོར་མ་བྱས་ལ་ཐོད་པ་ལ་བསྡིམ་པར་བྱའོ། །ཨོཾ་མ་ཧཱ་ཀཱ་ལ་ཡ། ཀ་པཱ་ལ་པྲ་ཏིཥྛ་ན། བཛྲ་སྭ་བྷཱ་བ་ཨཱདྨ་ཀོ྅ཧཾ། ཨོཾ་མ་ཧཱ་ཀཱ་ལ་ཡ། ཨ་རུ་ཏ་ཨ་བྷི་ཥིཉྩ་ཧཱུཾ། བརྒྱ་རྩ་བརྒྱད་དུ་ཡོངས་སུ་བཟླས་པ་བྱའོ། །དེ་ནས་གཞན་ཡང་ནིར་དཱུ་ཊྟ ་ཡི་ཕུར་བུ་ལ་སྔགས་བྲིས་ལ་ཐོད་པའི་ནང་དུ་བཞག་སྟེ། བདག་ཉིད་ཀྱི་ཐུགས་ཀའི་འོད་ཟེར་གྱིས་དཔལ་ནག་པོ་ཆེན་པོ་སྤྱན་དྲངས་ལ། མཆོད་པ་དང་། གཏོར་མ་ལ་སོགས་པ་བྱས་ཏེ། ཕུར་བུ་ལ་བསྡིམ་པར་བྱའོ། །ཨོཾ་མ་ཧཱ་ཀཱ་ལ་ཡ། བཛྲ་ཀཱི་ལ་ཡ་པྲ་ཏིཥྛ་ན། བཛྲ་སྭ་བྷཱ་བ་ཨཱདྨ་ཀོ྅ཧཾ། སྔགས་འདི་ལན་བརྒྱ་རྩ་བརྒྱད་བཟླས་པར་བྱའོ། །དེ་བཞིན་དུ་དཔལ་ནག་པོ་ཆེན་པོ་དང་། གྲི་གུག་དང་ཐོད་པ་དང་ཕུར་བུ་རྣམས་ལ་རབ་ཏུ་གནས་པར་བྱ་ཞེས། བཅོམ་ལྡན་འདས་ཀྱིས་བཀའ་སྩལ་ཏོ། །དེ་ནས་དཔལ་ནག་པོ་ཆེན་པོས་གསོལ་པ། བཅོམ་ལྡན་འདས། རབ་ཏུ་གནས་པར་བྱེད་པ་ཡི། །དུས་ཀྱི་ཁྱད་པར་ཇི་ལྟར་ལགས། །བཅོམ་ལྡན་འདས་ཀྱིས་བཀའ་སྩལ་པ། །དུས་ནི་རྣམ་པ་གཉིས་ཡིན་ཏེ། །ཞིང་དང་དུར་ཁྲོད་ཆེན་པོ་ཡི། །གནས་ན་དཔའ་བོ་མཁའ་འགྲོ་མས། །ཚོགས་ཀྱི་འཁོར་ལོ་བསྐོར་བའི་དུས། །དེར་ནི་རབ་ཏུ་གནས་བྱས་ན། །དཔའ་བོ་མཁའ་འགྲོ་མ་རྣམས་ཀྱིས། །རྟག་ཏུ་བྱིན་གྱིས་བརླབ་པར་འགྱུར། །ཞེས་བཅོམ་ལྡན་འདས་ཀྱིས་བཀའ་སྩལ་ཏོ། །དེ་ནས་དཔལ་ནག་པོ་ཆེན་པོས་གསོལ་པ། བཅོམ་ལྡན་འདས། ཐུན་མོང་གི་དུས་ཇི་ལྟར་ལགས། བཅོམ་ལྡན་འདས་ཀྱིས་བཀའ་སྩལ་པ། བརྒྱད་དང་བཅུ་བཞི་གནམ་སྟོང་དང་། །ཚེས་གཅིག་བཅུ་བདུན་ཉི་ཤུ་གཉིས། །དུས་དེར་རབ་ཏུ་གནས་བྱས་ན། །ནག་པོའི་སྟོབས་དང་ལྡན་པར་འགྱུར། །ཞེས་བཅོམ་ལྡན་འདས་ཀྱིས་བཀའ་སྩལ་ཏོ། །དཔལ་ནག་པོ་ཆེན་པོས་གསོལ་པ། བཅོམ་ལྡན་འདས་དཔལ་ནག་པོ་ཆེན་པོ། གྲུབ་
པའི་རྒྱུ་ནི་ཇི་ལྟར་ལགས། །བཅོམ་ལྡན་འདས་ཀྱིས་བཀའ་སྩལ་པ། །བླ་མ་ལ་ནི་གུས་པ་དང་། །དཔལ་ལྡན་ནག་པོའི་རྣལ་འབྱོར་བརྩོན། །ཆོ་གའི་ཡན་ལག་ཐམས་ཅད་ལ། །ཐེ་ཚོམ་མེད་པར་སྒྲུབ་པར་བྱེད། །རྟག་ཏུ་དམ་ཚིག་སྲུང་བྱེད་ན། །དངོས་གྲུབ་གཉིས་ཐོབ་ཐེ་ཚོམ་མེད། །ཅེས་བཅོམ་ལྡན་འདས་ཀྱིས་བཀའ་སྩལ་ཏོ། །དེ་ནས་དཔལ་ནག་པོ་ཆེན་པོས། བཅོམ་ལྡན་འདས་ལ་གསོལ་པ། དཔལ་ལྡན་ནག་པོ་ཆེན་པོ་ནི། །སྒྲུབ་པར་འདོད་པའི་རྣལ་འབྱོར་པས། །ཆོ་གའི་ཁང་པ་ཇི་ལྟར་ལགས། །བཅོམ་ལྡན་འདས་ཀྱིས་བཀའ་སྩལ་པ། །དཔལ་ལྡན་ནག་པོ་ཆེན་པོ་ལ། །ཆོ་གར་འདོད་པའི་རྣལ་འབྱོར་ལ། །སྔོན་དུ་གཏོར་མའི་ཆོ་ག་ཡིས། །དངོས་གྲུབ་ངེས་པར་ཐོབ་པར་འགྱུར། །ཞེས་བཅོམ་ལྡན་འདས་ཀྱིས་བཀའ་སྩལ་ཏོ། །དེ་ནས་དཔལ་ནག་པོ་ཆེན་པོས་གསོལ་པ། བཅོམ་ལྡན་འདས། དངོས་གྲུབ་ཉེ་བའི་རྒྱུར་གསུངས་པ། །གཏོར་མའི་ཆོ་ག་ཇི་ལྟར་ལགས། །བཅོམ་ལྡན་འདས་ཀྱིས་བཀའ་སྩལ་པ། །འདི་ནི་གཏོར་མའི་ཆོ་ག་ཡི། །ཁྱད་པར་རྣམ་པ་གསུམ་དུ་བཤད། །རླུང་མར་སྟེང་དུ་ཐོད་པ་ལ། །ཉ་ཤ་དུག་གི་ལ་དུ་དང་། །ཤ་དང་ཁྲག་དང་ལ་ཕུག་དང་། །ཆང་དང་ཆན་དང་འབྲུ་སྣ་ཚོགས། །ཤ་ལྔ་དང་ནི་བདུད་རྩི་ལྔ། །མིང་གི་ཡི་གེ་ལྡན་བར་བསམ། །དེ་ཡི་སྟེང་དུ་ཉི་མ་ལ། །གྲི་གུག་ཡུ་བར་ཧཱུཾ་གནས་པ། །འོད་ཟེར་རྣམ་པ་གཉིས་སུ་འཕྲོས། །སྟེང་དང་འོག་གི་ཕྱོགས་དག་ཏུ། །རླུང་གིས་མེ་སྦར་ཐོད་པ་དྲོས། །གྲི་གུག་གིས་ནི་དཀྲུག་པར་བསམ། །དྲོས་པས་དམ་ཚིག་བདུད་རྩིར་གྱུར། །སྟེང་གི་འོད་ཀྱིས་ཡེ་ཤེས་ཀྱི། །བདུད་རྩི་བཀུག་ནས་བསྡིམ་པར་བྱ། །འདི་ཡིས་བྱིན་གྱིས་བརླབ་པར་བྱ། །ཨོཾ་མ་ཧཱ་ཀཱ་ལ་ཡ། ཛྙཱ་ན་ཨ་མྲྀ་ཏ་ཨོཾ་ཨཱཿཧཱུཾ། མདུན་གྱི་ནག་པོ་ཆེན་པོ་ཡི། །ལྕེ་ལ་ཧཱུཾ་གཏོར་ནས་འབྲས་ཙམ། །རྩ་བའི་སྔགས་ཀྱིས་དབུལ་བར་བྱ། །སྟོབས་ཀྱིས་དུས་མཚུངས་བདུད་རྩི་མྱང་། །དེ་ནས་གཞན་ཡང་
རབ་བཤད་པ། །ལས་ལ་སྦྱོར་བ་བསྒྲུབ་བྱ་ཡི། །སྙིང་ནང་ས་བོན་ལྕགས་ཀྱུ་བསམ། །ཧཱུཾ་ལས་གྲི་གུག་ཧཱུཾ་གིས་མཚན། །དེ་ཡི་སྟོབས་ཀྱིས་ཁྲག་འཕེལ་གྱུར། །ཞུ་ནས་ནག་པོའི་ཐོད་པར་སོང་། །སྔགས་ཀྱི་འོད་ཀྱི་གྲི་གུག་གིས། །ཏིལ་ཙམ་གཏུབས་ནས་འཐུང་བར་བསམ། །སྔགས་བཟླས་དུས་སུ་མིང་ཡིག་གཞུག །མདུན་གྱི་གཏོར་མ་དབུལ་བར་བྱ། །ཡང་ན་ནག་པོའི་ཐོད་པར་ནི། །བསྒྲུབ་བྱ་བཀུག་ནས་ཁྲག་བསྐྱེད་ལ། །ཁྲག་འཐུང་ཁ་ནས་ཁྲག་འཛག་པ། །རྒྱུན་མི་འཆད་པར་བསྒོམ་ པར་བྱ། །འདི་ཡིས་ནག་པོ་ཆེན་པོ་ཡི། །དངོས་གྲུབ་ཉེ་བར་བདག་གིས་བཤད། །ཅེས་བཅོམ་ལྡན་འདས་ཀྱིས་བཀའ་སྩལ་ཏོ། །དཔལ་ནག་པོ་ཆེན་པོའི་རྒྱུད་དུར་ཁྲོད་ཆེན་པོ་ལས། དཀྱིལ་འཁོར་གྱི་ལེའུ་སྟེ་བཞི་པའོ།། །།དེ་ནས་དཔལ་ནག་པོ་ཆེན་པོ་དང་། མཁའ་འགྲོ་མའི་ཚོགས་ཀྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དཔལ་ལྡན་ནག་པོ་ཆེན་པོ་ཡི། །སྟོབས་ཀྱིས་གདུག་པ་འདུལ་བྱེད་ཅིང་། །དུས་གསུམ་སངས་རྒྱས་ཐམས་ཅད་ཀྱི། །བསྟན་པ་སྲུང་བར་བྱེད་པ་ཡི། །ཆོ་གའི་ཁྱད་པར་ཇི་ལྟར་ལགས། །བཅོམ་ལྡན་འདས་ཀྱིས་བཀའ་སྩལ་པ། །དུས་གསུམ་སངས་རྒྱས་ཐམས་ཅད་ཀྱི། །བདུད་ཀྱི་ཚོགས་རྣམས་སེལ་བྱེད་ཅིང་། །སངས་རྒྱས་བསྟན་པ་སྲུང་བྱེད་པ། །ཁྱད་པར་མ་འོངས་འཇིག་པའི་དུས། །དཔལ་ལྡན་མགོན་པོ་ཆེན་པོ་ཡིས། །བསྟན་པ་བསྲུང་བར་ཁས་བླངས་པས། །གསང་བའི་པར་བུ་ཆེན་པོ་ཡི། །ཆོ་ག་བདག་གིས་བཤད་པར་བྱ། །ཞེས་བཅོམ་ལྡན་འདས་ཀྱིས་བཀའ་སྩལ་ཏོ། །དེ་ནས་དཔལ་ནག་པོ་ཆེན་པོས་གསོལ་པ། བཅོམ་ལྡན་དཔལ་ལྡན་ནག་པོ་ཡི། །གསང་བའི་པར་བུ་ཞེས་བྱ་བའི། །དེ་ཡི་ཆོ་ག་ཇི་ལྟར་ལགས། །བཅོམ་ལྡན་འདས་ཀྱིས་བཀའ་སྩལ་པ། །གསང་བའི་པར་བུ་ཆེན་པོ་ཡི། །ཆོ་ག་རྣམ་པ་བཞི་ཡིན་ཏེ། །གནས་དང་པར་བུ་བཅའ་བ་དང་། །ཁྱད་པར་སྒྲུབ་པའི་ཆོ་ག་དང་། །དུས་ཀྱི་
ཆོ་ག་འགྲུབ་པར་བཤད། །ཅེས་བཅོམ་ལྡན་འདས་ཀྱིས་བཀའ་སྩལ་ཏོ། །དེ་ནས་དཔལ་ནག་པོ་ཆེན་པོས་གསོལ་པ། བཅོམ་ལྡན་འདས། སྒྲུབ་པའི་གནས་ནི་ཇི་ལྟར་ལགས། །བཅོམ་ལྡན་འདས་ཀྱིས་བཀའ་སྩལ་པ། །ལྷོ་ནུབ་མཚམས་ཀྱི་རྡོ་རྗེ་བྲག །སྲིན་པོའི་གདོང་འདྲ་འཇིགས་པ་ཡི། །སྟེང་དུ་པར་བུ་སྒྲུབ་པའི་གནས། །བསམ་གཏན་སྔགས་ཀྱིས་བརྩམ་པར་བྱ། །ཞེས་བཅོམ་ལྡན་འདས་ཀྱིས་བཀའ་སྩལ་ཏོ། །དེ་ནས་དཔལ་ལྡན་ནག་པོ་ཆེ། །རྔམ་པའི་ཞལ་གདངས་འཇིགས་པའི་སྐུ། །དྲག་པོའི་སྟོབས་ཀྱིས་འདི་སྐད་གསོལ། །དཔལ་ལྡན་ནག་པོ་ཆེན་པོ་ཡི། །སྒྲུབ་པའི་གནས་ནི་ཅི་ཞིག་བཤད། །བསམ་གཏན་སྔགས་ནི་ཇི་ལྟར་ལགས། །བཅོམ་ལྡན་འདས་ཀྱིས་བཀའ་སྩལ་པ། །དུར་ཁྲོད་ཀྱི་ནི་ཕ་གུ་དང་། །དཔའ་བོ་གྲིར་ཤིའི་ཀེང་རུས་ལ། །སྒྲུབ་པའི་ཁང་པ་ཟུར་གསུམ་བྱ། །ཐོད་པའི་ནང་དུ་འཁོར་ལོ་བྲི། །ཆོ་གས་ཁང་པའི་ཟུར་དུ་གཞུག །སྟེང་དུ་དུར་ཁྲོད་ཤིང་དང་ནི། །མཆོད་པའི་ས་ཡིས་བླ་གབ་བྱ། །སྒོ་ནི་བསྒྲུབ་བྱའི་ཕྱོགས་སུ་བསྟན། །བསམ་གཏན་སྔགས་ཀྱི་སྦྱོར་བ་ཡིས། །དུས་གསུམ་མཆོད་དང་གཏོར་མ་བྱས། །འདི་ཡི་སྔགས་ཀྱི་སྦྱོར་བ་ཡིས། །སྒྲུབ་པའི་གནས་ནི་བྱིན་གྱིས་བརླབ། །ཨོཾ་མ་ཧཱ་ཀཱ་ལ་ཡ། བཛྲ་ཥི་ཁ་རཥྚ་ན་ཨ་དྷིཥྛ་ན། གི་རི་གི་རི། ཧཱུཾ་ཧཱུཾ་ཕཊ་ཕཊ་སྭཱ་ཧཱ། དཔལ་ལྡན་ནག་པོ་ཆེན་པོ་ཡི། །ཆོ་གའི་གནས་དང་ལྡན་གྱུར་ན། །འགྲུབ་འགྱུར་འདི་ལ་ཐེ་ཚོམ་མེད། །དཔལ་ལྡན་ནག་པོ་ཆེན་པོ་ཡི། །སྒྲུབ་པའི་གནས་ནི་དེ་ལྟར་བཤད། །ཅེས་བཅོམ་ལྡན་འདས་ཀྱིས་བཀའ་སྩལ་ཏོ། །དེ་ནས་དཔལ་ལྡན་ནག་པོ་ཆེན་པོས་གསོལ་པ། བཅོམ་ལྡན་འདས། གསང་བའི་པར་བུ་ཆེན་པོ་ཡི། །བཅའ་བའི་རིམ་པ་ཇི་ལྟར་ལགས། །བཅོམ་ལྡན་འདས་ཀྱིས་བཀའ་སྩལ་པ། །དཔལ་ལྡན་ནག་པོ་ཆེན་པོ་ཡི། །པར་བུ་བཅའ་བའི་རིམ་པ་ནི། །རྣམ་པ་གསུམ་དུ་ཤེས་པར་གྱིས། །དཀྱིལ་འཁོར་དང་ནི་
པར་བུའི་རྒྱུ། །དཔལ་ལྡན་ནག་པོ་ཆེན་པོའི་སྐུ། །ཞེས་བཅོམ་ལྡན་འདས་ཀྱིས་བཀའ་སྩལ་ཏོ། །དེ་ནས་དཔལ་ནག་པོ་ཆེན་པོས་གསོལ་པ། དཀྱིལ་འཁོར་དང་ནི་པར་བུའི་རྒྱུ། །ནག་པོའི་སྐུ་ནི་ཇི་ལྟར་ལགས། །བཅོམ་ལྡན་འདས་ཀྱིས་བཀའ་སྩལ་པ། །ཆུ་འགྲམ་ས་དང་དུར་ཁྲོད་ས། །རི་ཡི་རྩེ་མོ་གསུམ་གྱི་ས། །བདུད་རྩི་ལྔ་ཡིས་བསྲེས་ནས་སུ། །དཀྱིལ་འཁོར་ཟུར་གསུམ་ཁྲུ་དོའི་ཚད། །དབུས་སུ་ཁྲུ་གང་བརྐོ་བར་བྱ། །སྐེ་ཚེ་ཡུངས་ཀར་བཙན་དུག་དང་། །ཁྱི་ཡི་ཁྲག་དང་དུར་ཁྲོད་ཀྱི། །སོལ་བ་ལ་སོགས་སྣག་ཚ་བྱ། །དཀྱིལ་འཁོར་སྣག་ཚས་ནག་པོར་བྱ། །དེ་ཡི་དབུས་སུ་གྲི་གུག་དང་། །ཐོད་པ་འབུར་དུ་བཏོད་པར་བྱ། །སྟེང་དུ་ཞིང་གི་བླ་རེ་དགོད། །ཁང་པའི་ཕྱི་ནང་བདུད་རྩིས་བྱུགས། །དཀྱིལ་འཁོར་ཟུར་ལ་མཆོག་ཕུར་གསུམ། །བཙུགས་ལ་མི་སྐྲའི་སྐུད་པས་བསྐོར། །ལྷོ་ནུབ་མཚམས་ཀྱི་དཀྱིལ་འཁོར་ཟུར། །དཔལ་ལྡན་ནག་པོ་ཆེན་པོའི་སྐུ། །ཞིང་གི་གདན་ལ་བཞུགས་པར་བྱ། །ཤར་གྱི་དཀྱིལ་འཁོར་ཟུར་ལ་ནི། །ཐོད་པ་དུམ་བུ་གཅིག་པ་རུ། །ཤ་ཆེན་ཁྲག་དང་ཉ་ཤ་ཆང་། །དུག་གི་ལ་དུ་ལ་སོགས་པ། །མཐུན་པའི་དམ་རྫས་གཞག་པར་བྱ། །ནུབ་བྱང་དཀྱིལ་འཁོར་ཟུར་ལ་ནི། །གྲི་དང་ཐོད་པ་སྲེག་རྫས་དང་། །ནི་རང་སུ་ཡི་ཕུར་བུ་བཞག །དཀྱིལ་འཁོར་ཟུར་གསུམ་འགྲམ་ལོགས་སུ། །ཐོད་པ་ཁྲག་གིས་བཀང་བ་བཞག །དཔལ་ལྡན་ནག་པོ་ཆེན་པོ་ཡི། །པར་བུའི་དཀྱིལ་འཁོར་དེ་ལྟར་བཤད། །ཞེས་བཅོམ་ལྡན་འདས་ཀྱིས་བཀའ་སྩལ་ཏོ། །དེ་ནས་གཞན་ཡང་། མཆད་པའི་ས་དང་དུར་ཁྲོད་ས། །རོ་བསྲེགས་ཐལ་བ་འགགས་པའི་སྐྲ། །དུག་ཆུས་བསྲེས་ལ་པར་བུ་བྱ། །ཚ་ཤིང་ཁང་པའི་མེ་ཡིས་བསྲེགས། །མི་ཡི་ཁྲག་དང་དྷ་དུ་ར། །ཚ་བ་གསུམ་ལ་སོགས་པ་ཡིས། །ཕྱི་རོལ་བྱུགས་ལ་པར་བུའི་ནང་། །འཁོར་ལོ་བྲིས་ལ་ཡི་གེ་དགོད། །ཐོད་པ་དུམ་བུ་བཞི་པ་གཉིས། །བདུད་རྩི་ལྔས་བྱུག་འཁོར་ལོ་བྲི། །དཔལ་ལྡན་ནག་པོ་ཆེན་པོ་ཡི། །སྟོབས་ཀྱི་པར་བུ་རབ་བཤད་པ། །ལྕགས་ཀྱི་གྲུ་གསུམ་ཁ་སྦྱོར་བྱ། །དེ་ཡི་
ནང་དུ་བསྒྲུབ་བྱ་ཡི། །ལིངྒ་ཆོ་གས་གཞག་པར་བྱ། །ཚ་བ་གསུམ་དང་བསྒྲུབ་བྱ་ཡི། །རྫས་ཀྱི་ས་དང་ཕྱེ་མ་གསུམ། །བག་ཕྱེ་དུག་གི་ཕྱེ་མར་བསྲེ། །ལིངྒ་སོར་བཞིའི་ཚད་དུ་བྱ། །བདག་ཉིད་ལྷོ་ནུབ་ཁ་བལྟས་ལ། །ལིངྒ་མིང་གི་ཡི་གེ་རྣམས། །དཔལ་ལྡན་ནག་པོའི་བསམ་གཏན་གྱིས། །མི་སྨྲ་བར་ནི་བྲི་བར་བྱ། །ལྷོ་ནུབ་ཚུགས་མའི་ཤིང་ལོ་ལ། །ཉི་ཤུ་རྩ་གཅིག་གྲངས་ཀྱི་ཚད། །འཁོར་ལོའི་རྫས་ཀྱི་མིང་ཡིག་གཞུག །ལིངྒ་ཡི་གེ་གཅིག་ཏུ་བྱ། །དེ་ཉིད་མི་ཡི་རྒྱུས་པས་དཀྲིས། །དཔལ་ལྡན་སྟོབས་ཀྱི་པར་བུར་གཞུག །མི་སྐྲའི་སྐུད་པས་བཅིང་བར་བྱ། །དེ་ནས་ཐོད་པའི་པར་བུར་གཞུག །ཐོད་པ་ཁ་སྦྱོར་བྱས་ནས་སུ། །དུག་དང་ཏིལ་ཕྱེ་ཚ་བ་གསུམ། །བསྲེགས་ལ་མཚམས་རྣམས་དགག་པར་བྱ། །ཐོད་པ་པར་བུའི་ནང་དུ་གཞུག །པར་བུ་དཀྱིལ་འཁོར་དབུས་སུ་བཞག །དཔལ་ལྡན་ནག་པོའི་བསམ་གཏན་གྱིས། །མཆོད་རྟེན་ནག་པོ་ཟུར་གསུམ་བརྩེགས། །བུམ་པ་འཁོར་ལོ་གཞུག་པར་བྱ། །དུར་ཁྲོད་སོལ་བ་སྐེ་ཚེ་དུག །མཆོད་རྟེན་ཕྱི་རོལ་བྱུག་པར་བྱ། །དཔལ་ལྡན་ནག་པོ་ཆེན་པོ་ཡི། ། པར་བུ་བཅའ་བ་དེ་ལྟར་བཤད། །ཞེས་བཅོམ་ལྡན་འདས་ཀྱིས་བཀའ་སྩལ་ཏོ། །དེ་ནས་གཞན་ཡང་རབ་བཤད་པ། །ལྷོ་ནུབ་དུར་ཁྲོད་རོ་བསྲེག་ཤིང་། །ཁ་དོག་ནག་པོའི་ཚོགས་སྤྲོ་བ། །དཔལ་ལྡན་ནག་པོ་ཆེན་པོ་ཡི། །བསམ་གཏན་སྔགས་དང་ལྡན་གྱུར་ནས། །ཁྲུ་གང་ཚད་དམ་ཁྱད་པར་དུ། །མཐོ་གང་ནག་པོའི་སྐུ་གཟུགས་བྱ། །རྣལ་འབྱོར་སྟོབས་དང་ལྡན་པ་ཡིས། །སྔོན་དུ་བསྙེན་པ་བྱས་ནས་ནི། །དེ་ལ་རབ་ཏུ་གནས་པར་བྱ། །མཆོད་པ་གཏོར་མ་ལ་སོགས་བྱ། །ཁྱད་པར་ཆོ་ག་ཀུན་ཀྱང་བྱ། །དཀྱིལ་འཁོར་ལྷོ་ནུབ་ཟུར་ལ་ནི། །ཞིང་གི་སྟེང་དུ་བཞུགས་སུ་གསོལ། །མཐུན་པའི་དམ་རྫས་ལ་སོགས་པ། །མཆོད་པའི་ཁྱད་པར་ཀུན་གྱིས་མཆོད། །དཔལ་ལྡན་ནག་པོ་ཆེན་པོ་ཡི། །སྐུ་ཡི་ཆོ་ག་ཤེས་པར་གྱིས། །ཞེས་བཅོམ་ལྡན་འདས་ཀྱིས་བཀའ་སྩལ་ཏོ། །དེ་ནས་དཔལ་ནག་པོ་ཆེན་པོས་གསོལ་པ། བཅོམ་ལྡན་
འདས། དཔལ་ལྡན་ནག་པོ་ཆེན་པོ་ཡི། །གསང་བའི་པར་བུའི་ཆོ་ག་མཆོག །སྒྲུབ་པའི་རིམ་པ་ཇི་ལྟར་ལགས། །བཅོམ་ལྡན་འདས་ཀྱིས་བཀའ་སྩལ་པ། །པར་བུ་སྒྲུབ་པའི་རྣལ་འབྱོར་པས། །ཡན་ལག་བདུད་རྩི་ལྔས་བྱུག་ལ། །སྐྲ་བརྫེས་གྲི་གུག་ཐོད་པ་འཛིན། །ཁ་དོག་ནག་པོ་དུར་ཁྲོད་གོས། །རྣལ་འབྱོར་པ་ཡིས་གོན་པར་བྱ། །དེ་ནས་རྣལ་འབྱོར་དབང་ཕྱུག་གིས། །ལྷོ་ནུབ་མཚམས་སམ་བསྒྲུབ་བྱའི་ཕྱོགས། །ཁ་བལྟས་ཞིང་གི་གདན་ལ་འདུག །དེ་ནས་དཔལ་ལྡན་ནག་པོ་ཡི། །བསམ་གཏན་སྔགས་ཀྱིས་མཚམས་བཅད་ལ། །མཆོད་པ་གཏོར་མ་ལ་སོགས་པ། །མཆོད་པའི་ཁྱད་པར་ཀུན་ཀྱང་བཤད། །དཔལ་ལྡན་ནག་པོ་ཆེན་པོ་ཡི། །ཏིང་ངེ་འཛིན་གྱི་རིམ་པ་རྣམས། །ཐོག་མར་བདག་ཉིད་ལྡན་པར་བྱ། །མདུན་གྱི་དཀྱིལ་འཁོར་ལྷོ་ནུབ་ཀྱི། །ཟུར་ལ་དཔལ་ལྡན་ནག་པོའི་སྐུ། །གང་དུ་གནས་པར་བྱ་བ་ལ། །རྣལ་འབྱོར་སྟོབས་དང་ལྡན་པ་ཡིས། །ནག་པོ་ཆེན་པོ་བསྐྱེད་པར་བྱ། །དེ་ནས་ཐུགས་ཀའི་འོད་ཟེར་གྱིས། །བླ་མ་སངས་རྒྱས་ཐམས་ཅད་དང་། །དཔལ་ལྡན་ནག་པོ་ཆེན་པོ་དགུག །ཆོ་ག་བཞི་ཡིས་གཉིས་མེད་བྱ། །མཆོད་པ་གཏོར་མ་ལ་སོགས་པ། །རྣལ་འབྱོར་པ་ཡིས་བརྩོན་པར་བྱ། །དཔལ་ལྡན་ནག་པོ་ཆེན་པོ་དང་། །རྣལ་འབྱོར་པ་ཡི་ཐུགས་ཀ་ནས། །སྔགས་ཀྱི་ཕྲེང་བས་བསྐོར་བར་བསམ། །ཤིན་ཏུ་དྲག་པོའི་སྟོབས་ཀྱིས་ནི། །བསམ་གཏན་སྔགས་ཀྱི་བཟླས་པ་བྱ། །དེ་ནས་ཉིན་མཚན་དུས་གསུམ་དུ། །དཔལ་ལྡན་ནག་པོ་ཆེན་པོ་ལ། །མཐུན་པའི་དམ་རྫས་དབུལ་བྱས་ན། །དེས་ནི་ནག་པོ་ཆེན་པོ་ཡི། །མཚན་མ་རྙེད་པར་རབ་ཏུ་བཤད། །རྣལ་འབྱོར་མཚན་མ་ཐོབ་པ་ཡིས། །པར་བུའི་ཆོ་ག་བརྩམ་པར་བྱ། །ཞེས་བཅོམ་ལྡན་འདས་ཀྱིས་བཀའ་སྩལ་ཏོ། །དེ་ནས་དཔལ་ལྡན་ནག་པོ་ཆེན་པོས་གསོལ་པ། བཅོམ་ལྡན་འདས། པར་བུའི་ཆོ་ག་ཇི་ལྟར་ལགས། །བཅོམ་ལྡན་འདས་ཀྱིས་བཀའ་སྩལ་པ། །པར་བུ་ནག་པོ་ཆེན་པོར་བསྐྱེད། །དེ་ཡི་ལྟོ་བར་
གནས་པ་ནི། །པར་བུ་ཁ་སྦྱོར་རིམ་པ་གསུམ། །དེ་ཡི་དབུས་སུ་བསམ་པ་ནི། །པདྨའི་སྟེང་དུ་ཉི་མ་ཧཱུཾ། །ཧཱུཾ་ལས་གྲི་གུག་ཐོད་པར་གྱུར། །ཆོ་ག་གསུམ་གྱིས་ནག་པོར་བསྐྱེད། །དེ་ཡི་ཐུགས་ཀའི་གྲི་གུག་གི། །ཡུ་བའི་ཧཱུཾ་ལས་གྲི་གུག་སྤྲོས། །ཕྱི་རོལ་བསྒྲུབ་བྱ་འགུགས་པར་བསམ། །དབུས་ཀྱི་ནག་པོ་ཆེན་པོ་ཡིས། །ལྟོ་བར་བསྒྲུབ་བྱ་གནས་པར་བྱ། །དེ་ནས་རྣལ་འབྱོར་དབང་ཕྱུག་གིས། །པར་བུ་ནག་པོ་ཆེན་པོ་ལ། །མཆོད་པ་གཏོར་མ་ལ་སོགས་པ། །མཐུན་པའི་དམ་རྫས་དབུལ་བར་བྱ། །རྣལ་འབྱོར་ནག་པོའི་བསམ་གཏན་ལ། །ཞུགས་ནས་དྲག་པོའི་བསམ་གཏན་གྱིས། །སྔགས་ཀྱི་འོད་ཟེར་སྤྲོ་བར་བྱ། །ཞགས་པ་ལྕགས་ཀྱུའི་གཟུགས་ཀྱིས་ནི། །བཀུག་ལ་པར་བུའི་ནང་དུ་བསྡིམ། །དེ་ནས་འདི་དག་བརྗོད་པར་བྱ། །བླ་མ་རྡོ་རྗེ་འཛིན་པ་དང་། །འཁོར་ལོའི་བདག་པོ་ལ་སོགས་པ། །དཔལ་ལྡན་ནག་པོ་ཆེན་པོ་ཡི། །འཁོར་གྱི་ཚོགས་དང་བཅས་པ་རྣམས། །དེ་བཞིན་བདག་ལ་དགོངས་སུ་གསོལ། །ཐམས་ཅད་བདག་ལ་དགོངས་སུ་གསོལ། །འདི་ནི་སངས་རྒྱས་ཐམས་ཅད་ཀྱི། །བསྟན་པ་འཇིག་པར་བྱེད་པ་རྣམས། །དུས་གསུམ་རྣལ་འབྱོར་པ་རྣམས་ཀྱི། །སྐུ་ལ་བསྡོ་བར་བྱེད་པ་ཡིན། །དཀོན་མཆོག་རིན་ཆེན་རྣམ་པ་གསུམ། །དེ་ཡི་དབུ་འཕང་སྨོད་བྱེད་པ། །བསྒྲུབ་བྱ་འདི་ཞེས་བྱ་བ་ནི། །དཔལ་ལྡན་ནག་པོ་ཆེན་པོ་དང་། །ཆོས་སྐྱོང་མཁའ་འགྲོ་མ་ཡི་ཚོགས། །པར་བུའི་བསྲུངས་མར་བཞུགས་པ་རྣམས། །འདི་ལ་བསད་པའི་ལས་མཛོད་ཅིག །ཅེས་བརྗོད། ཉེས་པ་བརྗོད་ཅིང་དཔང་གཟུ་དང་། །དེ་ནས་དཔལ་ལྡན་ནག་པོ་ཡི། །དྲག་པོའི་བསམ་གཏན་ལྡན་གྱུར་ནས། །གྲི་གུག་ཐོད་པ་ཐོགས་ནས་ནི། །ཕྱིན་ཕྱོགས་འཁོར་ཞིང་བསད་པ་ཡི། །བསམ་གཏན་སྔགས་ཀྱི་སྦྱོར་བ་དང་། །དུས་གསུམ་མཐུན་པའི་དམ་རྫས་ནི། །མཆོད་པ་རྒྱུན་མི་འཆད་པར་བྱ། །དེ་ལྟར་ཞག་གསུམ་བྱས་གྱུར་ན། །
འགྲུབ་འགྱུར་འདི་ལ་ཐེ་ཚོམ་མེད། །ཞེས་བཅོམ་ལྡན་འདས་ཀྱིས་བཀའ་སྩལ་ཏོ། །དེ་ནས་དཔལ་ནག་པོ་ཆེན་པོས་གསོལ་པ། བཅོམ་ལྡན་འདས། མཆོད་པའི་ཁྱད་པར་ཇི་ལྟར་ལགས། །བཅོམ་ལྡན་འདས་ཀྱིས་བཀའ་སྩལ་པ། །མཆོད་པའི་ཁྱད་པར་རྫས་རྣམས་ནི། །མཐུན་པའི་དམ་རྫས་ཐམས་ཅད་ལ། །བསྒྲུབ་བྱ་ཉིད་དུ་དམིགས་ལ་དབུལ། །དེ་ཡི་སྔགས་ནི་རབ་བཤད་པ། །ཨོཾ་མ་ཧཱ་ཀཱ་ལ་ཡ། གུ་ཎ་ཧྲྀ་ད་ཡ་ཧཱུཾ། ཨི་དཾ་དྷཱུ་པ་པུཥ྇་དཱི་པ་གྷན་དྷ། བྷ་ག་དྷ་དྷི། ཨི་དཾ་བ་ལིཾ། གྲྀཧྞ་ཧཱུཾ་ས་མ་ཡ། ཨ་ཏི་ཀྲ་མ་ཡ། མ་ཧཱ་ཀཱ་ལཱ་ཡ། པཱུ་ཛ་ས་མ་ཡ། སྭ་ཧཱུཾ་ཧཱུཾ། མཚན་མོའི་དུས་སུ་བརྗོད་པར་ནི། །མཐུན་པའི་དམ་རྫས་གཏོར་མ་བཅའ། །དེ་ཡི་སྔགས་ནི་རབ་བཤད་པ། །ཨོཾ་མ་ཧཱ་ཀཱ་ལ་ཡ། མ་མ་སརྦ་ཤ་ཏྲུཾ་མཱཾ་ས་རཀྟ་ཀེཾ་ནི་རུ་མེ་དཱ་མེ་ཛྫ། བ་སུ་ཏ། ཨ་མུ་ཀ་ཙིཏྟ་ཁ་ཁ་ཁཱ་ཧི་ཁཱ་ཧི། མ་ཧཱ་ཀཱ་ལ་ཡ། ཨ་མུ་ཀ་མཱ་ར་ཡ་ཕཊ། ཅེས་བཅོམ་ལྡན་འདས་ཀྱིས་བཀའ་སྩལ་པ། དེ་ནས་དཔལ་ནག་པོ་ཆེན་པོས་གསོལ་པ། བཅོམ་ལྡན་འདས། གསང་བའི་པར་བུ་ཆེན་པོ་ཡི། །དེ་ཡི་སྔགས་ནི་ཇི་ལྟར་ལགས། །བཅོམ་ལྡན་འདས་ཀྱིས་བཀའ་སྩལ་པ། །ཨོཾ་མ་ཧཱ་ཀཱ་ལ་ཡ། སྨྲི་ཏུ་ཀཱ་ལ་ཡ། མ་ཧཱ་ཡཀྵ་ཤཱ་ས་ན་ཀཱ་ལོ་ཨ་ཡཾ། ཨ་མུ་ཀ་བྷ་ཤི་ར། མཱ་ར་ཡ་མཱ་ར་ཡ་ཨ་མ་ཀ་ཙྪེ་ཙིཏྟ་ཡ། ཙྪ་ཏ་ཀ་ཙྪ་ཏ་ཀ་མཱ་ར་ཡ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། འདི་ནི་པར་བུ་ཆེན་པོ་ལ། །འཁོར་ལོ་ཡི་གེ་དགོད་པར་བྱ། །ཞེས་བཅོམ་ལྡན་འདས་ཀྱིས་བཀའ་སྩལ་ཏོ། །དེ་ནས་དཔལ་ནག་པོ་ཆེན་པོས་གསོལ་པ། །གསང་བའི་པར་བུ་ཆེན་པོ་ཡི། །ཁྱད་པར་སྔགས་ནི་ཇི་ལྟར་ལགས། །བཅོམ་ལྡན་འདས་ཀྱིས་བཀའ་སྩལ་པ། །སྲོག་གི་སྙིང་པོ་བསད་པ་དང་། །རྩ་བའི་སྔགས་ལ་སོགས་པ་ཡི། །ཤམ་བུ་འདི་ནི་གདགས་པར་བྱ། །ཨོཾ་མ་ཧཱ་ཀཱ་ལ་ཡ། ཨ་བྷ་ཙིཏྟ་ཡ། ཨ་མུ་ཀ་ཧསྟ་ཙ་ར་ཡ། མ་མ་ཤ་ཏྲུཾ་རཀྟ་ཙ་ར་ཡ་ཙིཏྟ། ཙྪིནྡ་ཙྪིནྡ། བྷིན་དྷ་བྷིན་དྷ། པ་ཙ་པ་ཙ། ཨ་མུ་ཀ་མཱ་ར་ཡ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཞེས་
བཅོམ་ལྡན་འདས་ཀྱིས་བཀའ་སྩལ་ཏོ། །དེ་ནས་ནག་པོ་ཆེན་པོས་གསོལ་པ། བཅོམ་ལྡན་འདས། གསང་བའི་པར་བུ་ཆེན་པོ་ཡི། །སྒྲུབ་པའི་གནས་ནི་ཇི་ལྟར་ལགས། །བཅོམ་ལྡན་འདས་ཀྱིས་བཀའ་སྩལ་པ། །མར་ངོའི་ཚེས་གཅིག་ནག་པོའི་དུས། །དང་པོ་པར་བུ་བཅའ་བར་བྱ། །གཉིས་པ་ལྷ་ལ་བསྙེན་པར་འགྱུར། །གསུམ་པ་བསྒྲུབ་བྱ་དགུག་པར་བྱ། །བཞི་པ་བསྒྲུབ་བྱ་མྱོས་པར་བྱེད། །ལྔ་པ་བསྒྲུབ་བྱ་གསོད་པར་བྱེད། །དྲུག་པ་ལྡོག་པ་མེད་པར་བྱེད། །བསམ་གཏན་སྔགས་ཀྱི་སྦྱོར་བ་ཡིས། །ཕུང་པོ་རྣམ་ཤེས་ཕྲལ་བྱས་ཏེ། །བདུན་པས་དགའ་ལྡན་གནས་སུ་བསྐྱལ། །དེ་རྗེས་ཚོགས་ཀྱི་འཁོར་ལོ་དང་། །འབྲས་བུ་ ཆེན་པོ་ཉིད་ལ་སྦྱར། །དེ་ལྟར་ཞག་བདུན་བྱས་གྱུར་ན། །དབང་ཕྱུག་ཆེན་པོ་ལ་སོགས་པའི། །ལྷ་ཆེན་ཀུན་ཀྱང་བསད་པར་ནུས། །གཞན་ལྟ་སྨོས་ཀྱང་ཅི་ཞིག་དགོས། །ཞེས་བཅོམ་ལྡན་འདས་ཀྱིས་བཀའ་སྩལ་ཏོ། །དཔལ་ནག་པོ་ཆེན་པོའི་རྒྱུད་དུར་ཁྲོད་ཆེན་པོ་ཞེས་བྱ་བ་ལས། གསང་བའི་པར་བུ་ཆེན་པོའི་ལེའུ་ཞེས་བྱ་བ་སྟེ་ལྔ་པའོ།། །།དེ་ནས་དཔལ་ནག་པོ་ཆེན་པོས་གསོལ་པ། བཅོམ་ལྡན་འདས། དཔལ་ལྡན་ནག་པོ་ཆེན་པོ་ཡི། །གསང་བའི་པར་བུ་ཞེས་བྱ་བ། །འཁོར་ལོ་ཉིད་དུ་ཅིས་མི་སྨོས། །དེ་ཕྱིར་འཁོར་ལོས་བསད་པ་ཡི། །ཆོ་ག་བདག་ལ་བཤད་དུ་གསོལ། །དེ་ནས་བཅོམ་ལྡན་འདས་ཀྱིས་བཀའ་སྩལ་པ། སངས་རྒྱས་བསྟན་པ་འཇིག་བྱེད་པ། །གང་ཞིག་འབྱུང་པོ་མཐུ་ཆེན་དང་། །ལོག་པའི་སྟོབས་དང་ལྡན་པ་རྣམས། །དེ་དག་གསད་པར་བྱ་བ་ཡི། །འཁོར་ལོའི་ཆོ་ག་འདི་དག་བཤད། །ཅེས་བཅོམ་ལྡན་འདས་ཀྱིས་བཀའ་སྩལ་ཏོ། །དེ་ནས་དཔལ་ལྡན་ནག་པོ་ཆེན་པོས་གསོལ་པ། བཅོམ་ལྡན་འདས། འཁོར་ལོས་བསད་པའི་རིམ་པ་ཡི། །དེ་ཡི་ཆོ་ག་ཇི་ལྟར་ལགས། །བཅོམ་ལྡན་འདས་ཀྱིས་བཀའ་སྩལ་པ། །དང་པོ་འཁོར་ལོ་བཅའ་བ་དང་། །གཉིས་པ་ལིངྒ་བཅའ་བ་དང་། །གསུམ་པ་གསང་
བར་བྱ་བའོ། །ཞེས་བཅོམ་ལྡན་འདས་ཀྱིས་བཀའ་སྩལ་ཏོ། །དེ་ནས་དཔལ་ནག་པོ་ཆེན་པོས་གསོལ་པ། བཅོམ་ལྡན་འདས། འཁོར་ལོ་ལིངྒ་བཅའ་བ་དང་། །བསད་པའི་རིམ་པ་ཇི་ལྟར་ལགས། །བཅོམ་ལྡན་འདས་ཀྱིས་བཀའ་སྩལ་པ། །དང་པོར་རྣལ་འབྱོར་དབང་ཕྱུག་གིས། །ནག་པོའི་བསམ་གཏན་ལྡན་བྱས་ནས། །དུར་ཁྲོད་གནས་སུ་མཚམས་བཅད་ལ། །དེར་ནི་འཁོར་ལོ་བྲི་བར་བྱ། །དུར་ཁྲོད་རས་ལ་བྱ་རོག་གི། །ཁྲག་དང་དུར་ཁྲོད་སོལ་བ་དང་། །ཚ་བ་གསུམ་དང་བསྲེས་ལ་ནི། །ཆོ་གས་ནག་པོའི་སྣག་ཚ་བྱ། །ལྷོ་ནུབ་མཚམས་སུ་ཁ་བལྟས་ལ། །མི་མཐུན་སྒྲོ་ཡི་རྨྱུག་གུས་ནི། །འཁོར་ལོ་བཞི་རིམ་བསྐོར་བར་བྱ། །དཔལ་ལྡན་ནག་པོ་ཆེན་པོ་ཡི། །འཁོར་ལོ་སྐུ་དང་བཅས་པ་བྲི། །འཁོར་ལོའི་དབུས་སུ་སྙིང་པོ་ནི། །ཕྱོགས་གཉིས་སུ་ནི་རྣམ་པར་དགོད། །དབུས་སུ་བསྒྲུབ་བྱའི་མིང་ཡིག་གཞུག །དེ་ཡི་ཕྱི་རོལ་ལེའུ་ཚེ་བརྒྱད། །དཔལ་ལྡན་ནག་པོའི་སྙིང་པོ་དགོད། །དེ་ཡི་ཕྱི་རོལ་ལེའུ་ཚེ་བརྒྱད། །རྩ་བའི་སྔགས་ནི་དགོད་པར་བྱ། །དེ་ནས་དེ་ཡི་ཕྱི་རོལ་དུ། །ལས་ཀྱི་སྔགས་ནི་དགོད་པར་བྱ། །བར་དུ་བསྒྲུབ་བྱའི་མིང་ཡིག་གཞུག །དབུས་སུ་མཉམ་པའི་རྨྱུག་གུ་གཞུག །འོག་མ་གཡས་སུ་འཁོར་བར་བྱ། །སྟེང་གི་འཁོར་ལོ་གཡོན་དུ་བསྐོར། །བཅའ་སྟེ་རིམ་པས་དགོད་པར་བྱ། །འཁོར་ལོ་ནག་པོ་ཆེན་པོ་ནི། །ཞལ་གཅིག་པ་ལ་ཕྱག་གཉིས་པ། །གྲི་གུག་ཐོད་པ་ལག་ན་འཛིན། །ཞལ་གདངས་མཆེ་བ་གཙིགས་པར་བྲི། །ཞག་བདུན་བསྒྲུབ་བྱའི་མིང་ཡིག་དགོད། །དེ་ལྟར་འཁོར་ལོའི་རིམ་པ་བཤད། །དེ་ནས་གཞན་ཡང་རབ་བཤད་པ། །ཚ་བ་གསུམ་དང་བསྒྲུབ་བྱ་ཡི། །རྐང་གཡོན་ས་དང་བག་ཟན་ལ། །བསྒྲུབ་བྱའི་གཟུགས་ནི་སོར་གསུམ་པ། །བྱས་ལ་སྙིང་གར་སྔགས་འདི་གཞུག །ཨོཾ་མ་ཧཱ་ཀཱ་ལ་ཡ། ཨ་པ་ར་བྷི་ཤ་ཨ་མུ་ཀ་མཱ་ར་ཡ་ཧཱུཾ་ཧཱུཾ་ཕཊ། གྲོ་ག་ལ་ནི་བྲིས་ལ་གཞུག །ལིངྒ་འཁོར་ལོའི་བར་དུ་གཞུག །དེ་ནས་མཉམ་པར་དྲིལ་བར་བྱ། །མི་སྐྲའི་སྐུད་པས་འཁོར་ལོ་
བཅིངས། །དོམ་མམ་ཁྱི་ནི་ནག་པོ་ཡི། །ཐོད་པར་འཁོར་ལོ་གཞུག་པར་བྱ། །དམར་ནག་སྐུད་པས་ཕྱི་རོལ་བཅིང་། །ཁ་དོག་ནག་གམ་སྨེ་བ་ཡོད། །དེ་ལྟའི་ཐོད་པ་གཉིས་ལ་ནི། །དུར་ཁྲོད་སོལ་བ་ཁྱི་ནག་པོའི། །སྙིང་ཁྲག་དུར་ཁྲོད་སོལ་བ་གསུམ། །བསྲེས་ལ་ཐོད་པའི་འཁོར་ལོ་ཡི། །ཕྱི་རོལ་ཚ་བ་གསུམ་གྱིས་བྱུགས། །ཐོད་པའི་ནང་དུ་འཁོར་ལོ་ནི། །ཁྱི་འམ་དོམ་གྱི་ཐོད་པར་གཞུག །ནི་ར ཊྟ ་ཡི་ཕུར་བུ་བརྒྱད། །སོར་ནི་བཞི་ཚད་རབ་གནས་བྱ། །ཨོཾ་མ་ཧཱ་ཀཱ་ལ་ཡ། ཨ་ར་བི་ཤ་བཛྲ་ཀཱི་ལ་ཡ། ཨ་མུ་ཀ་ཧ་ན་ཧ་ན་ཧཱུཾ་ཧཱུཾ་ཕཊ། ཕུར་བུ་བརྒྱད་ལ་བྲི་བར་བྱ། །འཁོར་ལོ་མཎྜལ་སྟེང་བཞག་ནས། །དཔལ་ལྡན་ནག་པོ་ཆེན་པོ་ཡི། །བསྐྱེད་པའི་རིམ་པ་ཚུལ་བཞིན་བསྒོམ། །མཆོད་དང་གཏོར་མ་ལ་སོགས་པ། །བསམ་གཏན་སྔགས་ཀྱིས་བརྩོན་པར་བྱ། །དེ་ནས་ཐུགས་ཀའི་འོད་ཟེར་ནི། །ལྕགས་ཀྱུའི་ཚུལ་དུ་རབ་སྤྲོས་པའི། །བསྒྲུབ་བྱ་གསལ་བར་འདུག་ནས་ནི། །འོད་ཀྱི་ཞགས་པས་བཅིང་བར་བྱ། །དེ་ནས་རྣལ་འབྱོར་པའི་མདུན་དུ་ནི། །བསྒྲུབ་བྱ་གཅེར་བུ་མགོ་མཇུག་བཟློག །དཔལ་ལྡན་ནག་པོའི་ཁ་སྦྱོར་གྱི། །བར་དུ་བསྒྲུབ་བྱ་གཞུག་པར་བྱ། །བསྒྲུབ་བྱ་གསལ་བའི་སྙིང་གི་དཀྱིལ། །གྲི་གུག་འོད་དང་བཅས་པར་བསྒོམ། །སྲོག་བཅད་ནང་ཁྲོལ་གཉོགས་ནས་ནི། །བསྒྲུབ་བྱའི་ན་ས་གཡས་གཡོན་ནས། །དཔལ་ལྡན་ནག་པོ་ཆེན་པོ་ཡིས། །སྙིང་གི་ཁྲག་ནི་འཐུང་བར་བསམ། །དེ་ནས་ཐུགས་ཀའི་འོད་ཟེར་གྱིས། །བསྒྲུབ་བྱ་ལན་བདུན་དགུག་པར་བྱ། །ལྕགས་ཀྱུའི་ཕྱག་རྒྱ་བཅས་ནས་ནི། །ཨོཾ་མ་ཧཱ་ཀཱ་ལ་ཡ། ཨ་མུ་ཀ་ཨཱ་ཀར་ཤ་ཡ་ཛ་ཛ་ཧཱུཾ་ཧཱུཾ་ཕཊ། བསམ་གཏན་སྔགས་དང་ལྡན་གྱུར་ནས། །བསྒྲུབ་བྱ་རྟག་ཏུ་དགུག་བྱ་སྟེ། །སྔོན་དུ་རབ་གནས་བྱས་པ་ཡི། །ཕུར་བུ་དང་ནི་ཡུངས་ཀར་གྱིས། །གསད་པའི་སྔགས་ཀྱིས་བརྡེག་པར་བྱ། །ཨོཾ་མ་ཧཱ་ཀཱ་ལ་ཡ། ཛ་ཡི་ཛ་ལན་ཏ་ཧ། ཨཥྚ་ག་ཏྲ། དྷ་ཧན་དྷ་ཧན། ཕོ་ཨོཾ་ཡང་རན་མ་ཧཱ་
ཀཱ་ལ་ཡ། བྷ་ར་བྷ་ག་ར། ཕུ་ཏ་ན་པ། ཨ་མུ་ཀ་པ་ཧ་ར་ན། པ་ཧ་རི་པཾ། ག་ར་བ་ཕཊ། ཧཱུཾ་སུ་དྷ། ཨ་ན་ལ་ཨ་ན་ལ། བཱ་རི་ཡ་བཱ་རི་ཡ། འབྲས་སྨ་མ་རི། བྷི་སྣུ་ནི་ཝ་རཾ། ཨ་མུ་ཀ་ནི་ཡཾ། བཛྲ་མུ་ཧ་བི་རཾ། དྷ་ལ་འུ་དྷ་ལ་འུ། ཨ་མུ་ཀ་ཙྪཏ་ཀ་ནི། མཱ་ར་ཡ། ཧཱུཾ་ཧཱུཾ་ཕཊ་སྭཱ་ཧཱ། དེ་ནས་ལས་ཀྱི་ཐིག་ལེའི་གནས། །སུམ་ཅུ་རྩ་གཉིས་དམིགས་ནས་སུ། །ཕུར་བུ་ཡུངས་ཀར་གདབ་པར་བྱ། །ཐོད་པའི་འཁོར་ལོ་ཁ་སྦྱར་ལ། །དཔའ་བོ་སྐྲ་ཡི་སྐུད་པ་ཡིས། །དཔལ་ལྡན་ནག་པོ་ཆེན་པོ་ཡི། །བསམ་གཏན་སྔགས་དང་ལྡན་གྱུར་ནས། །ཐོད་པ་རྒྱ་གྲམ་བཅིང་བར་བྱ། །ཨོཾ་མ་ཧཱ་ཀཱ་ལ་ཡ། ཨ་མུ་ཀ །བྷན་དྷ་བྷན་དྷ། ཧཱུཾ་ཧཱུཾ་ཕཊ། དེ་དག་བཟླས་ལ་འཁོར་ལོ་བཅིང་། །འཁོར་ལོ་མཆོད་རྟེན་ནག་པོ་ཡི། །ནང་དུ་བཅུག་ནས་དུར་ཁྲོད་ཀྱི། །མེ་ཐབ་ཏུ་ནི་གནན་བྱས་ན། །ཚ་བའི་ནད་ཀྱིས་འཆི་བར་འགྱུར། །ཡང་ན་ཆུ་དོང་རྙིང་པ་ཡི། །ནང་དུ་གནན་པར་བྱས་གྱུར་ན། །བསྒྲུབ་བྱ་རྒྱུན་ནི་འགག་ནས་འཆི། །ཡང་ན་དུར་ཁྲོད་ཁང་སྟོང་དུ། །སྦས་ན་མཁའ་འགྲོ་མ་རྣམས་ཀྱིས། །ཚོགས་ཀྱི་འཁོར་ལོ་བསྐོར་བྱས་ཏེ། །བསྒྲུབ་བྱ་ཁྲག་ནི་སྐྱུག་པར་འགྱུར། །ཡང་ན་མཆོད་རྟེན་ལྷ་ཁང་གི། །ཐེམ་པའི་འོག་ཏུ་གནན་བྱས་ནས། །ཁ་ལྐུགས་མིག་ནི་ལོང་བ་དང་། །གཞོགས་ཕྱེད་སྐམ་ནས་འཆི་བར་འགྱུར། །ཡང་ན་འཁོར་ལོ་བསྒྲུབ་པར་བྱ། །རང་གི་ལུས་ལ་བརྟེན་བྱས་ལ། །བསམ་གཏན་སྔགས་དང་ལྡན་གྱུར་ནས། །གང་ཞིག་བསྒྲུབ་བྱ་དམིགས་ལ་དེ། །ཞག་བདུན་གྱིས་ནི་གསོད་པར་བྱེད། །འདིས་ནི་ལས་རྣམས་ཐམས་ཅད་ཀྱི། །བསད་པའི་སྦྱོར་བ་ཤེས་པར་བྱ། །ཨོཾ་མ་ཧཱ་ཀཱ་ལ་ཡ། རབ་ཏུ་རྨྱུག་ཤ་མ་རག་ཏུ། མ་ཧཱ་ཀཱ་ལ་ཡ་ཨ་མུ་ཀ་མཱ་ར་ཡ་ཨ་པ་རི་བྷི་ཤ་ཧཱུཾ། ཞེས་བཅོམ་ལྡན་འདས་ཀྱིས་བཀའ་སྩལ་ཏོ། །དེ་ནས་དཔལ་ནག་པོ་ཆེན་པོས་གསོལ་པ། བཅོམ་ལྡན་འདས། གཞན་ཡང་འཁོར་ལོ་ཅི་ཞིག་བཤད། །བཅོམ་ལྡན་འདས་ཀྱིས་བཀའ་སྩལ་པ། །
དུར་ཁྲོད་ཀྱི་ནི་གཡམ་པ་ལ། །གུར་གུམ་གོ་རོ་ཙ་ན་དང་། །བནྡྷུའི་མེ་ཏོག་ལ་སོགས་པས། །པདྨ་འདབ་བརྒྱད་བྲི་བར་བྱ། །དེ་ལ་སྦྲུལ་བརྒྱད་དགོད་པར་བྱ། །མེ་ཏོག་ལུ་དའི་ཁུ་བ་དང་། །དུར་ཁྲོད་སྣག་ཚས་སྦྱར་ནས་སུ། །དབུས་སུ་གྲི་གུག་ཐོད་པ་བྲི། །རྣལ་འབྱོར་ནུབ་ཏུ་ཁ་བལྟས་ལ། །བསམ་གཏན་སྔགས་དང་ལྡན་གྱུར་ནས། །ནག་པོ་སྦྲུལ་དང་བཅས་པར་བསྐྱེད། །དེ་ལ་མཆོད་པར་བྱས་ནས་ནི། །བསམ་གཏན་སྔགས་ཀྱི་བཟླས་པ་བྱ། །ཨོཾ་མ་ཧཱ་ཀཱ་ལ་ཡ། ཨ་ར་ནཱ་ག་གུ་རུ་ནི་ཤིག་ནི་རི་ནི་རི། མ་ཐ་ནི་ཤིག །མཥྚི་དྷ་རི་ནཱ་ག་རཱ་ཛ། དེ་བ་བྷ་རི་ཤ་ཡ་ཧཱུཾ་ཧཱུཾ་ཕཊ་སྭཱ་ཧཱ། དུས་གསུམ་དུ་ནི་བསྙེན་པ་བྱ། །འཁོར་ལོ་འདི་ཡི་ཆོ་ག་ནི། །ཆུ་མིག་ཤིང་ངམ་རི་ཡི་རྩེ། །གང་ཞིག་ཀླུ་ནི་གནས་པའི་ས། །དེར་ནི་ཆོ་ག་འདི་བརྩམས་ན། །ཀླུ་ཡི་རྒྱལ་པོ་ནོར་བུ་ཅན། །ཆོ་ག་འདི་དང་དུས་མཚུངས་སུ། །ཆར་གྱི་རྒྱུན་ནི་འབེབས་པར་བྱེད། །གལ་ཏེ་དེས་ཀྱང་མ་ཕེབས་ན། །ནག་པོའི་སྤོས་དང་གུ་གུལ་གྱིས། །འཁོར་ལོ་བདུག་པར་བྱས་གྱུར་ན། །ཆར་ནི་ཤིན་ཏུ་འབབ་པར་འགྱུར། །འཁོར་ལོ་བཟློག་པ་བྲིས་ནས་ནི། །དེ་ཡི་སྟེང་དུ་སྦྱིན་བསྲེག་བྱ། །སྔགས་ནི་བཟློག་ནས་རབ་བཟླས་ན། །བསྒྲུབ་བྱ་ཤིན་ཏུ་མི་བསྲུན་པས། །རྡོ་ཡི་སེར་བ་འབེབས་པར་འགྱུར། །ཡང་ན་ཀླུ་རྣམས་ཐམས་ཅད་ནི། །ཨརྫ་ཀ་ཡི་འབྲས་བུ་ལྟར། །མགོ་བོ་ལུས་པོ་འགས་པར་འགྱུར། །ཞེས་བཅོམ་ལྡན་འདས་ཀྱིས་བཀའ་སྩལ་ཏོ། །དེ་ནས་གཞན་ཡང་རབ་བཤད་པ། །ཐོད་པ་དུམ་བུ་གཅིག་པ་ལ། །ཁ་ཏི་ཁ་ཡི་འཁོར་ལོ་བྲི། །དེ་ཡི་ཕྱི་ནི་བདུད་རྩིས་བྱུགས། །ཐོད་པའི་ནང་དུ་ཡུངས་ཀར་དང་། །སྦྱིན་བསྲེགས་ཐལ་བ་བསྔགས་ནས་ནི། །ཐོད་པ་རབ་ཏུ་གནས་པར་བྱ། །རྩ་བའི་སྔགས་ནི་བཟླས་པ་ཡི། །འདི་ནི་ཤམ་བུར་གདགས་པར་བྱ། །ཨོཾ་མ་ཧཱ་ཀཱ་ལ་ཡ། ཤ་ར་ཛ་རཾ་པད་ཐ་ར། བྷི་དྷ་ར་ཚིནྡྷ་ཚིནྡྷ་ཚིནྡྷ་ཧཱུཾ་ཧཱུཾ་ཕཊ། འདི་ཡི་བསྙེན་པ་བྱས་
ནས་ནི། །གང་ཞིག་ཡུལ་སྲུང་བྱེད་པ་ཡི། །དེ་ཡི་ཕྱོགས་བཞིར་གཞག་པར་བྱ། །དཔལ་ལྡན་ནག་པོ་ཆེན་པོ་ཡི། །བསམ་གཏན་སྔགས་དང་ལྡན་གྱུར་ནས། །མཆོད་དང་གཏོར་མ་ལ་སོགས་བྱ། །ཀླུ་དང་གནོད་སྦྱིན་ལ་སོགས་པ། །གདུག་པའི་སེར་བ་སྲུང་བར་འགྱུར། །དེ་ནས་གཞན་ཡང་རབ་བཤད་པ། །བདུད་རྩི་བ་ཡི་རྣམ་ལྔ་ལ། །ཆོ་གས་མཎྜལ་བྱས་ནས་ནི། །པདྨ་འདབ་མ་བརྒྱད་པ་བྲི། །དེར་ནི་དཔལ་ལྡན་ནག་པོ་དང་། །ཛམ་བྷ་ལ་ནི་གསལ་བསྐྱེད་དེ། །རྒྱུ་སྐར་རྒྱལ་ནས་དབུ་བཙུགས་ལ། །ཞག་གྲངས་ཉི་ཤུ་རྩ་གཅིག་ཏུ། །མེ་ཏོག་ཆུ་དང་དྲི་ཞིམ་སྤོས། །གཡོན་པའི་ཁྱོར་བས་དབུལ་བར་བྱ། །བསམ་གཏན་སྔགས་དང་ལྡན་གྱུར་ནས། །ཉིན་རེ་ཞིང་ནི་དུས་གསུམ་དུ། །གཙང་མའི་ཆུ་ཡིས་མཆོད་པར་བྱ། །ཨོཾ་མ་ཧཱ་ཀཱ་ལ་ཡ། སིདྡྷི་དྷ་ན་མེ་དྷི། ཧཱུཾ་ཛམ་བྷ་ལ་ཛ་ལན་དྲཱ་ཡ་སྭཱ་ཧཱ། ཆོ་ག་འདི་ཡི་སྟོབས་ཀྱིས་ནི། །འཇིག་རྟེན་གནོད་སྦྱིན་ཐམས་ཅད་ཀྱིས། །ནོར་དང་རིན་པོ་ཆེ་ཡི་གཏེར། །རྟག་ཏུ་དེ་ལ་སྦྱིན་པར་བྱེད། །ཅེས་བཅོམ་ལྡན་འདས་ཀྱིས་བཀའ་ སྩལ་ཏོ། །དཔལ་ནག་པོ་ཆེན་པོའི་རྒྱུད་དུར་ཁྲོད་ཆེན་པོ་ཞེས་བྱ་བ་ལས། འཁོར་ལོའི་ལེའུ་སྟེ་དྲུག་པའོ།། །།དེ་ནས་དཔལ་ནག་པོ་ཆེན་པོས་གསོལ་པ། བཅོམ་ལྡན་འདས། དཔལ་ལྡན་ནག་པོ་ཆེན་པོ་ཡི། །འཁོར་ལོའི་ཆོ་ག་རབ་བཤད་པ། །གནན་པས་གསད་པར་གསུངས་པ་ཡི། །དེ་ཡི་ཆོ་ག་ཇི་ལྟར་ལགས། །བཅོམ་ལྡན་འདས་ཀྱིས་བཀའ་སྩལ་པ། །གནོད་སྦྱིན་སྟོབས་དང་ལྡན་པ་དང་། །གང་ཞིག་འབྱུང་པོ་མཐུ་ཆེན་དང་། །འཇིག་རྟེན་ལྷ་ཆེན་ལ་སོགས་པའི། །ལོག་པའི་མཐུ་དང་ལྡན་པ་རྣམས། །གནན་པར་བྱ་བའི་ཆོ་ག་འདིས། །ཁྱད་པར་དུ་ཡང་གསད་པ་ཡི། །ཆོ་གའི་རིམ་པ་འདི་དག་བཤད། །ཅེས་བཅོམ་ལྡན་འདས་ཀྱིས་བཀའ་སྩལ་ཏོ། །དེ་ནས་དཔལ་ནག་པོ་ཆེན་པོས་གསོལ་པ། བཅོམ་ལྡན་འདས། སངས་རྒྱས་བསྟན་པ་འཇིག་པ་དང་། །ནག་པོའི་ཕྱོགས་ནི་འཛིན་
པ་རྣམས། །གནན་པས་གསད་པའི་སྦྱོར་བ་ཡི། །དེ་ཡི་ཆོ་ག་ཇི་ལྟར་ལགས། །བཅོམ་ལྡན་འདས་ཀྱིས་བཀའ་སྩལ་པ། །དུར་ཁྲོད་དབེན་པའི་ས་ཕྱོགས་སུ། །དཔལ་ལྡན་ནག་པོ་ཆེན་པོ་ཡི། །ཏིང་ངེ་འཛིན་དང་ལྡན་གྱུར་ནས། །བསམ་གཏན་སྔགས་ཀྱིས་མཚམས་བཅད་ལ། །ཐོད་པ་དུམ་བུ་དྲུག་པ་གཉིས། །བདུད་རྩིས་ཕྱི་ནང་བཀྲུ་བར་བྱ། །སྐེ་ཚེ་ཉུང་དཀར་བཙན་དུག་དང་། །ནིམ་པའི་ཁུ་བ་ཁྭ་ཡི་ཁྲག །དུར་ཁྲོད་སྣག་ཚས་སྦྱར་ནས་སུ། །ཐོད་པའི་ནང་དུ་འཁོར་ལོ་བྲི། །དཔའ་བོ་གྲིར་ཤིའི་རོ་རས་ལ། །དུར་ཁྲོད་སྣག་ཚས་བསྒྲུབ་བྱ་ཡི། །མིང་དང་ཡི་གེ་ལྡན་པར་བྲི། །བྲི་དུས་གནམ་སྟོང་ཉིན་ནམ་ཕྱེད། །འཁོར་ལོའི་ནང་དུ་གཞུག་པར་བྱ། །ཕྱི་རོལ་དུར་ཁྲོད་རས་ཀྱིས་གཏུམ། །མཆད་པའི་ས་དང་མཚོ་འགྲམ་ས། །རི་ཡི་རྩེ་མོ་གསུམ་གྱི་ས། །བསྲེས་ལ་ནག་པོའི་སྐུ་གཟུགས་བྱ། །མི་ཡི་རུས་པ་སྐྲ་ཤད་ཀྱིས། །ནག་པོའི་གཟུགས་སྐུའི་རུ་ཤིང་བྱ། །ཞལ་གཅིག་ཕྱག་གཉིས་ཁྲུ་གང་ཚད། །ལྟོ་བར་འཁོར་ལོ་གཞུག་པར་བྱ། །ལུས་ནི་དུར་ཁྲོད་སྣག་ཚ་ཡིས། །ཁ་དོག་ཤིན་ཏུ་གནག་པར་བྱ། །མདུན་གྱི་ནག་པོའི་གཟུགས་སྐུ་ལ། །དཔལ་ལྡན་ནག་པོ་ཆེན་པོ་ཡི། །བསྐྱེད་པའི་རིམ་པ་ཚུལ་བཞིན་བསྒོམ། །བདག་ཉིད་ཐུགས་ཀའི་འོད་ཟེར་གྱིས། །བླ་མ་སངས་རྒྱས་ཐམས་ཅད་དང་། །བྱང་ཆུབ་སེམས་དཔའ་ལ་སོགས་པ། །ནག་པོ་ཆེན་པོའི་རང་བཞིན་དུ། །བཀུག་ལ་ནག་པོའི་གཟུགས་ལ་བསྡིམ། །ནག་པོ་ཉིད་ཀྱང་བཀུག་ལ་བསྡིམ། །དེ་ནས་བདག་ཉིད་རྣལ་འབྱོར་པ། །ནག་པོའི་བསམ་གཏན་ལྡན་གྱུར་ནས། །མཐུན་པའི་དམ་རྫས་ལ་སོགས་པའི། །མཆོད་པའི་གཏོར་མ་དབུལ་བར་བྱ། །དེ་ནས་ཐུགས་ཀའི་འོད་ཟེར་གྱིས། །བསམ་གཏན་སྔགས་ཀྱི་བཟླས་པ་བྱ། །བཟླས་པ་རྫོགས་དང་ཐུགས་ཀ་ཡི། །འོད་ཟེར་ལྕགས་ཀྱུའི་ཚུལ་དུ་སྤྲོ། །བསྒྲུབ་བྱ་གསལ་བར་བཀུག་ནས་ནི། །ནག་པོའི་ལྟོ་བར་གཞུག་པར་བྱ། །ལྕགས་
ཀྱུའི་ཕྱག་རྒྱ་སྔགས་དང་བཅས། །ཐུན་རེར་བརྒྱ་ནི་རྩ་བརྒྱད་དུ། །བཀུག་ལ་ནག་པོའི་ལྟོ་བར་གཞུག །གྲི་གུག་ཐོད་པ་ཐོགས་ནས་ནི། །ཐུན་མཚམས་ཕྱིན་ཕྱོགས་བསྐོར་བར་བྱ། །ཉིན་མོ་མཚན་མོ་དུས་དྲུག་ཏུ། །དཔལ་ལྡན་ནག་པོ་ཆེན་པོ་ཡི། །རྣལ་འབྱོར་ཉིད་ལ་བརྩོན་པར་བྱ། །དེ་ནས་དུར་ཁྲོད་དབུས་སུ་ནི། །ཁྲུ་དོ་ཚད་དུ་བརྐོ་བར་བྱ། །ནང་དུ་ནག་པོའི་སྐུ་གཟུགས་བཞག །དེ་ཡི་སྟེང་དུ་འཁོར་ལོ་ནི། །དུར་ཁྲོད་ཀྱི་ནི་ཕ་གུ་ལ། །ཨུ་ཙིན་ཏི་ཡི་ཁུ་བས་བྲིས། །སྔགས་ནི་དུར་ཁྲོད་སྣག་ཚས་དགོད། །ཨོཾ་མ་ཧཱ་ཀཱ་ལ་ཡ། བཛྲ་ཙཀྲ་བར་ར་ཏི། ཨ་མུ་ཀ་སྟཾ་བྷ་ནི་སྟཾ་བྷ་ནི། མོ་ཧ་ནི་མོ་ཧ་ནི། ཁེ་ཙ་རཱི་བྷན་དྷཾ། བྷཱུ་ཙ་རཱི་བྷན་དྷཾ། པཱ་ཏཱ་ལ་བྷ་ས་ནི་བྷན་དྷཾ། ཧཱུཾ་ཧཱུཾ་ཕཊ་ཕཊ་སྭཱ་ཧཱ། འདི་ནི་འཁོར་ལོར་དགོད་པར་བྱ། །དེ་སྟེང་སྦྱིན་སྲེག་ཐལ་བས་དགང་། །དེ་ལྟར་ཞག་བདུན་བྱས་གྱུར་ན། །གནན་པས་གསད་པའི་སྦྱོར་བ་རྫོགས། །ཁྱབ་འཇུག་མ་ཧཱ་དེ་བ་དང་། །ཚོགས་ཀྱི་བདག་པོ་ལ་སོགས་པའི། །འདོད་པའི་ལྷ་རྣམས་མནན་ནུས་ན། །གཞན་དག་སྨོས་ཀྱང་ཅི་ཞིག་དགོས། །དེ་སྐད་ཅེས་བཅོམ་ལྡན་འདས་ཀྱིས་བཀའ་སྩལ་ཏོ། །དཔལ་ནག་པོ་ཆེན་པོའི་རྒྱུད་དུར་ཁྲོད་ཆེན་པོ་ཞེས་བྱ་བ་ལས། མནན་པའི་ལེའུ་སྟེ་བདུན་པའོ།། །།དེ་ནས་ནག་པོ་ཆེན་པོས་གསོལ་པ། བཅོམ་ལྡན་འདས། མཚམས་མེད་ལ་སོགས་བྱེད་པ་དང་། །གདུག་པ་ཐམས་ཅད་བསྒྲལ་བ་ཡི། །ཆོ་གའི་ཁྱད་པར་ཇི་ལྟར་ལགས། །བཅོམ་ལྡན་འདས་ཀྱིས་བཀའ་སྩལ་པ། །སྦྱིན་སྲེག་ལས་རྣམས་ཀུན་གྱི་མཆོག །ཁྱད་པར་དུ་ནི་གསད་པ་ཡི། །སྦྱིན་སྲེག་འདི་ནི་ཤེས་པར་གྱིས། །ཞེས་བཅོམ་ལྡན་འདས་ཀྱིས་བཀའ་སྩལ་ཏོ། །དེ་ནས་དཔལ་ནག་པོ་ཆེན་པོས་གསོལ་པ། བཅོམ་ལྡན་འདས། གསད་པར་བྱ་བའི་སྦྱོར་བ་ཡི། །སྦྱིན་སྲེག་ཆོ་ག་ཇི་ལྟར་ལགས། །བཅོམ་ལྡན་འདས་ཀྱིས་བཀའ་སྩལ་པ། །སྦྱིན་སྲེག་ཆོ་གའི་རིམ་པ་ནི། །ཁྱད་པར་བདུན་དུ་ཤེས་པར་གྱིས། །བདག་དང་གནས་དང་མཆོད་གཏོར་དང་། །
ཐབ་དང་ལྷ་དང་རྫས་དང་དུས། །རྣམ་པ་བདུན་དུ་རབ་ཏུ་བཤད། །ཅེས་བཅོམ་ལྡན་འདས་ཀྱིས་བཀའ་སྩལ་ཏོ། །དེ་ནས་དཔལ་ནག་པོ་ཆེན་པོས་གསོལ་པ། བཅོམ་ལྡན་འདས། ཆོ་ག་འདི་ཡི་རིམ་པ་ཡིས། །བསྒྲུབ་པར་བྱ་བ་ཇི་ལྟར་ལགས། །བཅོམ་ལྡན་འདས་ཀྱིས་བཀའ་སྩལ་པ། །དང་པོ་བདག་ཉིད་རྣལ་འབྱོར་ནི། །བསྲུང་བའི་འཁོར་ལོ་བསྒོམ་པར་བྱ། །ཆོས་འབྱུང་ནང་དུ་རྡོ་རྗེ་བྲག །པད་ཉིའི་སྟེང་ན་རོ་ཡི་གདན། །དེ་སྟེང་ཧཱུཾ་ལས་གྲི་གུག་གྱུར། །དེ་ལས་ནག་པོ་ཆེན་པོ་བསྐྱེད། །མཐིང་ནག་ཞལ་གཅིག་ཕྱག་གཉིས་པ། །དབུ་སྐྲ་ཁམ་སེར་གྱེན་དུ་བརྫེས། །སྤྱན་གསུམ་སྡང་མིག་མེ་ཡི་འོད། །གཡས་ན་གྲི་གུག་གཡོན་ཐོད་པ། །དོ་ཤལ་ཐོད་པའི་ཕྲེང་བས་བརྒྱན། །བརྐྱང་བསྐུམ་རོ་ཡི་གདན་ལ་འགྱིང་། །མེ་དཔུང་དབུས་ན་དམ་ཚིག་བསྐྱེད། །ཡེ་ཤེས་སྤྱན་དྲང་གཉིས་མེད་བྱ། །དབང་བསྐུར་མི་བསྐྱོད་དབུ་ལ་བརྒྱན། །མདུན་གྱི་ནག་པོ་ཆེན་པོ་ཡང་། །དེ་ལྟར་དུས་མཚུངས་རྫོགས་པར་བསྐྱེད། །མཆོད་དང་གཏོར་མ་བྱས་ནས་སུ། །གཉིས་མེད་ཐུགས་ཀའི་བཟླས་པ་བྱ། །དེས་ནི་ནག་པོའི་མཚན་མ་རྙེད། །དེ་ནས་སྦྱིན་བསྲེག་བརྩམ་བྱ་ཞེས། །བཅོམ་ལྡན་འདས་ཀྱིས་བཀའ་སྩལ་ཏོ། །དེ་ནས་གཞན་ཡང་རབ་བཤད་པ། །གནས་ནི་དུར་ཁྲོད་ཆེན་པོ་ཡི། །རོ་སྲེག་མེ་ཐབ་ཁང་སྟོང་ངམ། །རྡོ་རྗེའི་བྲག་ལ་སོགས་པ་ཡི། །འཇིགས་པའི་གནས་སུ་སྦྱིན་བསྲེག་བྱ། །མཆོད་པ་གཏོར་མ་སྲེག་པའི་རྫས། །དེ་དག་ཚོགས་པར་བྱས་ནས་ནི། །མེ་ཏོག་སྤོས་དང་མར་མེ་དྲི། །ཤ་ཆེན་ལྷ་བཤོས་སྲེག་པའི་རྫས། །ཁྱད་པར་གྱི་ནི་མཆོད་པར་བྱ། །ཆན་དང་དུག་གི་ལ་དུ་དང་། །སྦྲང་རྩི་རྒུན་འབྲུམ་སེ་འབྲུའི་ཆང་། །ཤ་ཆེན་ཉ་ཤ་བདུད་རྩི་ཁྲག །འདི་ནི་དཔལ་ལྡན་ནག་པོ་ཡི། །ཁྱད་པར་གཏོར་མ་ཡིན་པར་བཤད། །དེ་ནས་གཞན་ཡང་རབ་བཤད་པ། །དུར་ཁྲོད་ས་དང་ཆུ་འགྲམ་ས། །མེ་ཐབ་ས་ལ་ཐབ་
ཁུང་བྱ། །ཐབ་ནི་མཐིང་ནག་ཨེ་ཡི་དབྱིབས། །རྒྱ་ལ་ཁྲུ་གང་ཟབས་སུ་ཕྱེད། །སུམ་རིམ་དཔངས་ལ་སོར་གསུམ་སྟེ། །མེ་འོད་གྲི་གུག་ཐོད་པས་བརྒྱན། །དབུས་སུ་གྲི་གུག་ནག་པོ་བྲི། །ཐབ་ཀྱི་རིམ་པས་དེ་ལྟར་བཤད། །དེ་ནས་གཞན་ཡང་རབ་བཤད་པ། །དཔལ་ལྡན་ནག་པོ་ཆེན་པོ་ཡི། །བསམ་གཏན་སྔགས་དང་ལྡན་གྱུར་ནས། །ཐབ་ཀྱི་ནང་དུ་པད་ཉི་ཧཱུཾ། །རཾ་ལས་མེ་ལྷ་བསྐྱེད་པར་བྱ། །ཞལ་གཅིག་པ་ལ་ཕྱག་གཉིས་པ། །ཕྱག་གཉིས་མེ་ཏོག་བགྲང་ཕྲེང་འཛིན། །མདོག་དམར་སྤྱན་བགྲད་ཞལ་གདངས་པ། །ཁྲོ་གཉེར་མཆེ་བ་གཙིགས་པའོ། །རང་བཞིན་མེ་དང་ཡེ་ཤེས་མེ། །ཕྱག་རྒྱ་བཞི་ཡི་སྦྱོར་བས་བསྡིམ། །གཉིས་མེད་གྱུར་པའི་ལྕེ་ལ་ཧཱུཾ། །བསམ་ནས་ལིངྒ་བསྲེག་རྫས་རྣམས། །ལན་བདུན་རབ་ཏུ་ཁྲོས་པས་དབུལ། །ཨོཾ་མ་ཧཱ་ཀཱ་ལ་ཡ། བཛྲ་ཀྲོ་དྷ་ཨ་ག་ན་ཡེ། ཧཱུཾ་མ་མ་སརྦ་ཤ་ཏྲུཾ་ཨ་མུ་ཀཾ། ད་ཧ་ད་ཧ། པ་ཙ་པ་ཙ། ཨ་མུ་ཀ་མཱ་ར་ཡ་ཕཊ། དེ་ནས་འབར་བའི་ངོ་བོར་བརྟག །མེ་ཡི་གཞལ་ཡས་ཁང་དུ་བསམ། །དེ་ནས་དཔལ་ལྡན་ནག་པོ་ནི། །ཆོ་ག་ལྔ་འམ་གསུམ་གྱིས་བསྐྱེད། །བདག་དང་དམ་ཚིག་ཐུགས་ཀ་ཡི། །འོད་ཟེར་ཕྱག་རྒྱ་བཞི་དང་ལྡན། །དཔལ་ལྡན་ནག་པོ་ཆེན་པོ་ཡི། །དེ་ཡི་ཆོ་གས་བཀུག་ལ་བསྡིམ། །ཛཿཧཱུཾ་བཾ་ཧོཿ། ཧཱུཾ་སྲིད་གསུམ་འཇིགས་པར་བྱེད་པ་ཡི། །དཔལ་ལྡན་ནག་པོ་ཆེན་པོ་ཡིས། །དུས་གསུམ་རྒྱལ་བ་ཐམས་ཅད་ཀྱི། །བསྟན་པ་བསྲུང་བར་ཁས་བླངས་པའི། །དམ་ཚིག་ཆེན་པོའི་སྟོབས་ཀྱིས་ནི། །འབར་བ་ཆེན་པོའི་དཀྱིལ་འཁོར་དུ། །དྲག་པོའི་སྟོབས་ཀྱིས་གཤེགས་སུ་གསོལ། །མེ་ཡི་དཀྱིལ་འཁོར་འདིར་བཞུགས་ལ། །གདུག་པའི་དགྲ་བགེགས་བསྒྲལ་དུ་གསོལ། །དེ་ནས་བདུད་རྩི་རཀྟ་ཡིས། །དཔལ་ལྡན་ནག་པོའི་ཞལ་དུ་དབུལ། །མཆོད་དང་གཏོར་མའི་རིམ་པ་རྣམས། །དབུལ་བའི་དམ་རྫས་ལ་སོགས་པའི། །མཆོད་པའི་ཁྱད་པར་ཀུན་ཀྱང་དབུལ། །དེ་ནས་ལིངྒ་བསྲེག་རྫས་རྣམས། །རྩ་བའི་
སྙིང་པོ་སྔགས་ལ་ནི། །བསད་པའི་ཡི་གེ་གཞུག་པར་བྱ། །བསམ་གཏན་སྔགས་དང་ལྡན་གྱུར་ནས། །སྦྱིན་སྲེག་ནག་པོའི་ཞལ་དུ་དབུལ། །ལྷ་ཡི་ཆོ་ག་དེ་ལྟར་བཤད། །ཅེས་བཅོམ་ལྡན་འདས་ཀྱིས་བཀའ་སྩལ་ཏོ། །དེ་ནས་གཞན་ཡང་རབ་བཤད་པ། །ལིངྒ་རྫས་ཀྱི་རིམ་པ་ནི། །རྐང་རྗེས་ས་དང་སྐྲ་ཤད་དང་། །རོ་བསྲེགས་ཐལ་བ་དྲི་ཆེན་ཁྲག །བདུད་རྩི་ལྔ་དང་ཆུས་སྦྲུས་ལ། །བསྒྲུབ་བྱའི་གཟུགས་ནི་སོར་བརྒྱད་ལ། །སྙིང་གར་མིང་ཡིག་གཞུག་པར་བྱ། །མགོ་ལུས་ཚ་བའི་རྫས་ཀྱིས་བྱུགས། །བསམ་གཏན་སྔགས་དང་ལྡན་གྱུར་ནས། །བསྒྲུབ་བྱ་བཀུག་ནས་དེ་ལ་བསྡིམ། །སྔགས་ཀྱིས་དབྱེ་བའི་ཆོ་ག་བྱ། །མགོ་ནས་རྐང་པའི་མཐིལ་གྱི་བར། །བསད་སྔགས་ཚེར་མས་འབུམ་ཕྲག་བརྡེག །དེ་ནས་ནག་པོ་ཆེན་པོ་ཡི། །གྲི་གུག་རབ་གནས་བྱས་པ་ཡི། །མགོ་ནས་ཞབས་སུ་ཏིལ་གྱི་ཚད། །གཏུབ་ནས་ནག་པོའི་སྦྱིན་བསྲེག་བྱ། །རྫས་ནི་མི་རྐང་ལས་བྱུང་བའི། །ཆོ་གས་དགང་གཟར་བླུག་གཟར་བྱ། །དུར་ཁྲོད་ལས་བྱུང་ཚ་ཤིང་ཁ། །ཚེར་མ་སྣ་ཚོགས་དྲི་ང་བའི། །ཡམ་ཤིང་སོར་ནི་བཅུ་གཉིས་ཚད། །ཡང་ན་སོར་དྲུག་ཤེས་པར་བྱ། །ཡུངས་ཀར་ལ་དུ་ནག་པོ་དང་། །ཤ་ལྔ་ཉ་ཤ་ཆང་དང་ནི། །ཡུངས་ནག་ལ་ཕུག་ལྕགས་ཕྱེ་དང་། །ཁྲག་དང་བདུད་རྩི་དབུལ་བར་བྱ། །རིགས་ངན་ཤན་པ་ལས་བྱུང་བ། །སྦྱིན་སྲེག་མེ་ནི་ཡིན་པར་བཤད། །རྫས་ནི་འདི་དག་ལྡན་གྱུར་ན། །སྦྱིན་སྲེག་ཆོ་ག་ཉེས་པ་མེད། །ཅེས་བཅོམ་ལྡན་འདས་ཀྱིས་བཀའ་སྩལ་ཏོ། །དེ་ནས་གཞན་ཡང་རབ་བཤད་པ། །དུས་ཀྱི་ཆོ་གས་འགྲུབ་པར་འགྱུར། །མར་ངོའི་ཚེས་གཅིག་ལ་སོགས་པ། །ནག་པོའི་ཕྱོགས་ནི་ཐམས་ཅད་ལ། །སྦྱིན་སྲེག་ཆོ་ག་བརྩམ་པར་བྱ། །ཉི་མ་ཕྱེད་དང་ནམ་གྱི་གུང་། །བསད་པའི་དུས་ནི་ཡིན་པར་བཤད། །ཅེས་བཅོམ་ལྡན་འདས་ཀྱིས་བཀའ་སྩལ་ཏོ། །དེ་ནས་དཔལ་ནག་པོ་ཆེན་པོས་གསོལ་པ། མྱུར་བར་བསད་པའི་རིམ་པ་ཡི། །ཆོ་གའི་ཁྱད་པར་ཇི་
ལྟར་ལགས། །བཅོམ་ལྡན་འདས་ཀྱིས་བཀའ་སྩལ་པ། །མྱུར་བར་བསད་པའི་རིམ་པ་ནི། །དཔལ་ལྡན་ནག་པོ་ཆེན་པོ་ཡི། །གསང་བའི་སྦྱིན་སྲེག་ཡིན་པར་བཤད། །ཅེས་བཅོམ་ལྡན་འདས་ཀྱིས་བཀའ་སྩལ་ཏོ། །དེ་ནས་དཔལ་ནག་པོ་ཆེན་པོས་གསོལ་པ། བཅོམ་ལྡན་འདས། གསང་བའི་སྦྱིན་སྲེག་ཇི་ལྟར་ལགས། །བཅོམ་ལྡན་འདས་ཀྱིས་བཀའ་སྩལ་པ། །དང་པོ་མེ་ཐབ་ས་བླངས་ལ། །ཐབ་ནི་མཐོ་གང་ཚད་དུ་བྱ། །ཏིལ་མར་གྱི་ནི་མེ་ཡིས་བསྲེག །ཟུར་གསུམ་སེང་ལྡེང་གསལ་ཤིང་ལ། །སོར་ནི་བཅུ་གཉིས་བརྒྱ་རྩ་བརྒྱད། །དཔལ་ལྡན་ནག་པོའི་ཡམ་ཤིང་བཤད། །དེ་ནས་ཐོད་པ་དུམ་བུ་དྲུག །ནང་དུ་དུག་གི་ལ་དུ་བྱ། །ལིངྒ་ཚེར་མའི་མེ་ཡིས་བསྲོས། །རྣལ་འབྱོར་ཐུགས་ཀའི་འོད་ཟེར་གྱིས། །བསྒྲུབ་བྱ་བཀུག་ལ་ལིངྒར་བསྡིམ། །ཨོཾ་མ་ཧཱ་ཀཱ་ལ་ཡ། ཨ་མུ་ཀ་ཏ་བ་ཏ་བ་ཧཱུཾ། དཔལ་ལྡན་ནག་པོ་ཆེན་པོ་ཡི། །གྲི་གུག་རབ་གནས་ལྡན་པ་ཡི། །བསྒྲུབ་བྱའི་མགོ་ནས་རྐང་མཐིལ་བར། །ཏིལ་གྱི་ཚད་དུ་གཏུབ་པར་བྱ། །དེར་ནི་རཾ་ལས་མེ་ཐབ་བམ། །དཔལ་ལྡན་ནག་པོ་ཆེན་པོ་ནི། །མེ་ཐབ་ནང་དུ་བསྐྱེད་པར་བྱ། །སྣ་ཚོགས་པདྨ་ཉི་མར་བཅས། །རོ་ཡི་གདན་ལ་གནས་པ་ནི། །དཔལ་ལྡན་ནག་པོ་ཆེན་པོར་བསམ། །ཞལ་ནས་སྣ་ཚོགས་མེ་ཡི་འོད། །དྲག་པོའི་དབྱིབས་སུ་འབར་བར་བསམ། །བདག་གི་ཐུགས་ཀའི་ས་བོན་ལས། །འོད་ཟེར་ནག་པོའི་གཟུགས་སུ་སྤྲོ། །དེ་ཡིས་བསྒྲུབ་བྱ་དགུག་བྱས་ནས། །རྐང་པ་གཉིས་ནས་བཟུང་ནས་ནི། །དུག་གཏོར་དུ་ནི་སྤྲུགས་བྱས་ཏེ། །གཞན་ཡང་ནག་པོའི་ཞལ་དུ་སྤྲུགས། །དེ་ལ་བདག་ཉིད་རྣལ་འབྱོར་པས། །རོ་ཡི་གདན་ལ་འདུག་ནས་ནི། །མིག་ནི་ཟུར་གསུམ་མི་བཟད་པར། །བྱས་ནས་སོས་ནི་སོ་འཆང་ཞིང་། །བདག་ཉིད་ཐུགས་ཀའི་འོད་ཟེར་གྱི། །རྣོ་བའི་གཟུགས་ཀྱིས་བསྒྲུབ་བྱ་བཀུག །མེ་ཐབ་ནང་དུ་གནས་པ་ཡི། །དཔལ་ལྡན་ནག་པོ་ཆེན་པོ་ལ། །སྙིང་པོའི་
སྔགས་ཀྱིས་དབུལ་བར་བྱ། །དེ་ལྟར་བརྒྱ་ནི་རྩ་བརྒྱད་བར། །མདུན་དུ་བྱས་ན་བསྒྲུབ་བྱ་ནི། །དེ་མ་ཐག་ཏུ་གསོད་པར་ནུས། །འགྲུབ་འགྱུར་འདི་ལ་ཐེ་ཚོམ་མེད། །ཅེས་བཅོམ་ལྡན་འདས་ཀྱིས་བཀའ་སྩལ་ཏོ། །དཔལ་ནག་པོ་ཆེན་པོའི་རྒྱུད་དུར་ཁྲོད་ཆེན་པོ་ཞེས་བྱ་བ་ལས། སྦྱིན་སྲེག་གི་ལེའུ་སྟེ་བརྒྱད་པའོ།། །།དེ་ནས་དཔལ་ནག་པོ་ཆེན་པོས་གསོལ་པ། བཅོམ་ལྡན་འདས། རྒྱུད་འདི་ངེས་པར་གསལ་བའི་ཕྱིར། །སྔགས་ཀྱི་དོན་དང་ལྡན་པ་ཡི། །ཡི་གེའི་དབྱེ་བ་ཇི་ལྟར་ལགས། །བཅོམ་ལྡན་འདས་ཀྱིས་བཀའ་སྩལ་པ། །སྐུ་གསུང་ཐུགས་ཀྱི་རྡོ་རྗེ་ནི། །ཡི་གེ་རྣམས་ཀྱི་མཆོག་ཏུ་འགྱུར། །རྩ་བ་སྙིང་པོར་ངེས་བཤད་པ། །སྔགས་དང་རྒྱུད་ཀྱི་དོན་གྱི་ཕྱིར། །ཡི་གེ་བཏུ་བ་བཤད་པར་བྱ། །ཞེས་བཅོམ་ལྡན་འདས་ཀྱིས་བཀའ་སྩལ་ཏོ། །དེ་ནས་དཔལ་ནག་པོ་ཆེན་པོས་གསོལ་པ། བཅོམ་ལྡན་འདས། ཡི་གེ་བཏུ་བ་ཇི་ལྟར་ལགས། །བཅོམ་ལྡན་འདས་ཀྱིས་བཀའ་སྩལ་པ། །དང་པོར་རིག་བྱེད་རྒྱལ་པོ་ལ། །དང་པོར་ལྔ་པ་ཡན་ལག་རིང་། །གཉིས་པའི་ལྔ་པས་སྣ་ལྡན་མཆོད། །དང་པོ་ཐིག་ལེ་བཅས་པ་བཞག །གཉིས་པའི་ལྔ་པའི་ལྔ་པ་ནི། །སྣ་ལྡན་རིང་དང་བཅས་པར་གནས། །དེར་ནི་བརྒྱད་མཐར་གཞག་པར་བྱ། །གཉིས་པའི་དང་པོ་མིང་དང་ལྡན། །གཉིས་པའི་དྲུག་པའི་གསུམ་པ་ལ། །གཉིས་པའི་དྲུག་པའི་དང་པོ་བཞག །བརྒྱད་མཐའ་གཉིས་ནི་སྒྲ་ལྡན་མཆོག །དང་པོའི་གསུམ་པ་གདགས་པར་བྱ། །གཉིས་པའི་དང་པོའི་མཐའ་ཅན་ནི། །དང་པོ་གཉིས་དང་བཅས་པར་བཞག །གཉིས་ནི་རིང་ཐུང་སྒྲ་ཡིས་བརྗོད། །བསད་ན་ཚེག་དྲག་ལྡན་པར་བྱ། །གཉིས་པའི་ལྔ་པའི་གཉིས་པ་ལ། །གཉིས་པའི་གསུམ་པའི་དང་པོར་བཅས། །དྲག་པོའི་སྒྲ་དང་བཅས་པར་བཤད། །བརྒྱད་པ་ཡི་ནི་གསུམ་པ་ལ། །གཉིས་པའི་ལྔ་པའི་གསུམ་པ་གདགས། །དེར་ནི་བརྒྱད་པའི་མཐའ་ཅན་ནི། །རིང་བའི་སྒྲ་དང་
ལྡན་པར་བཞག །ཅེས་བཅོམ་ལྡན་འདས་ཀྱིས་བཀའ་སྩལ་ཏོ། །དེ་ནས་དཔལ་ནག་པོ་ཆེན་པོས་གསོལ་པ། བཅོམ་ལྡན་འདས། དཔལ་ནག་པོ་ཆེན་པོ་དང་། མཁའ་འགྲོ་མ་དང་བཅས་པ་ཡི། །རང་གི་དོན་དང་ལྡན་པའི་སྔགས། །དེ་ཡི་ཡི་གེ་རྣམས་ཀྱི་མཆོག །བཏུ་བའི་རིམ་པ་ཇི་ལྟར་ལགས། །བཅོམ་ལྡན་འདས་ཀྱིས་བཀའ་སྩལ་པ། །དང་པོ་དོན་གྱི་ཡི་གེ་ལ། །དང་པོ་ལྔ་པས་ཡན་ལག་བརྒྱན། །གཉིས་པའི་ལྔ་པའི་ཐིག་ལེ་དང་། །དང་པོ་ཐུང་ངུ་གཞག་པར་བྱ། །གཉིས་པའི་ལྔ་པ་མཐར་ལྡན་པ། །རིང་བའི་སྒྲ་དང་བཅས་པར་གནས། །བརྒྱད་པའི་མཐའ་ཅན་ཡི་གེ་ནི། །ཅུང་ཟད་རིང་དང་བཅས་པར་བརྗོད། །གཉིས་པའི་དང་པོ་མིང་དང་ལྡན། །གཉིས་པའི་དྲུག་པའི་གསུམ་པ་ལ། །གཉིས་པའི་དྲུག་པའི་དང་པོ་གདགས། །རིག་བྱེད་སྒྲ་དང་ལྡན་པར་ནི། །ཅུང་ཟད་འཐུག་དང་བཅས་པར་བརྗོད། །ལྔ་པའི་ལྔ་པ་སྣ་ལྡན་མཆོག །བརྒྱད་པའི་མཐའ་ཅན་གདགས་པར་བྱ། །དང་པོ་གསུམ་པས་རབ་ཏུ་བརྒྱན། །ཚེག་དྲག་འཐུག་དང་བཅས་པར་བརྗོད། །གཉིས་པའི་བདུན་པའི་གཉིས་པ་ནི། །རིག་བྱེད་མདའ་དང་ལྡན་པར་བརྗོད། །གཉིས་པའི་ལྔ་པའི་མཐར་ལྡན་པ། །ཟླ་བ་མིག་དང་བཅས་པར་བཞག །གཉིས་ཀའི་འདྲེལ་བར་གནས་པ་ཡི། །ཆགས་པའི་ཡི་གེ་བདག་ཉིད་ཅན། །གཉིས་པའི་གསུམ་པ་གཞག་པར་བྱ། །གཉིས་པའི་བཞི་པ་དང་པོ་ལ། །དང་པོ་གསུམ་པ་གདགས་པར་བྱ། །གཉིས་པའི་ལྔ་པའི་མཐར་ལྡན་པ། །རིང་བའི་སྒྲ་དང་བཅས་པར་གནས། །སྡེ་ཚན་བརྒྱད་པའི་མཐར་གནས་པ། །ཅུང་ཟད་རིང་བའི་སྒྲ་དང་ལྡན། །གཉིས་པའི་དང་པོ་མིང་དང་ལྡན། །གཉིས་པའི་དྲུག་པའི་གསུམ་པ་ལ། །འཐུག་པའི་སྒྲ་དང་ལྡན་པར་བྱ། །གཉིས་པའི་དྲུག་པའི་དང་པོ་ནི། །གཡོ་བྱེད་སྒྲ་དང་བཅས་པར་གནས། །སྡེ་ཚན་གཉིས་པའི་དབུ་མ་ནི། །ཆགས་པའི་ཡི་གེ་རབ་ལྡན་པ། །གཉིས་པའི་གསུམ་པ་འཐུག་པོར་ལྡན། །གཉིས་པའི་བཞི་པའི་དང་པོ་ནི། །དང་པོའི་
གསུམ་པས་ཡན་ལག་བརྒྱན། །དང་པོའི་དང་པོ་ཡན་ལག་རིང་། །གཉིས་པའི་ལྔ་ཡི་དང་པོ་ནི། །ཅུང་ཟད་འཐུག་པ་དག་དང་ལྡན། །གཉིས་ཀའི་འདྲེལ་བ་ཆགས་པར་གནས། །གཉིས་པའི་ལྔ་པའི་གསུམ་པ་ལྔ། །དང་པོ་གཉིས་པས་གནན་པར་བྱ། །ཅུང་ཟད་རིང་དང་བཅས་པར་གནས། །མཐའ་ཡི་བརྒྱད་པའི་གཉིས་པ་ནི། །ཅུང་ཟད་ལོག་པའི་ཤུགས་དང་ལྡན། །སྡེ་ཚན་བརྒྱད་པའི་མཐར་ལྡན་པ། །ཐིག་ལེ་ཟླ་བ་མིག་དང་བཅས། །དང་པོ་ཡི་ནི་གསུམ་པ་ནི། །རིང་བའི་སྒྲ་ཡི་སྟོབས་དང་ལྡན། །ཞེས་བཅོམ་ལྡན་འདས་ཀྱིས་བཀའ་སྩལ་ཏོ། །དེ་ནས་དཔལ་ནག་པོ་ཆེན་པོས་གསོལ་པ། བཅོམ་ལྡན་འདས། རྒྱུད་ཀྱི་རྩི་བར་བཀོད་པ་ཡི། །དེ་ཡི་སྔགས་ཀྱི་ཁྱད་པར་ནི། །ཡི་གེ་བཏུ་བ་ཇི་ལྟར་ལགས། །བཅོམ་ལྡན་འདས་ཀྱིས་བཀའ་སྩལ་པ། །སྔགས་ཀྱི་དོན་རྣམས་གསལ་བྱེད་པ། །དེ་ཡི་མཚན་ཉིད་དང་པོར་བཤད། །གཉིས་པའི་བཞི་པ་དང་པོ་ལ། །གཉིས་པའི་བཞི་པའི་གསུམ་པ་བཞག །གཉིས་པའི་དྲུག་པའི་དང་པོར་གནས། །གཉིས་པའི་བཞི་པའི་གཉིས་པ་ནི། །དེ་ཉིད་དྲག་པོའི་ཚིག་དང་ལྡན། །དང་པོ་ཡིག་འབྲུ་རྣམས་ཀྱི་མཆོག །དང་པོ་ལྔ་པས་ཡན་ལག་དགོད། །གཉིས་པའི་ལྔ་པས་སྣ་ལྡན་མཆོག །རིག་བྱེད་ཐུང་ངུ་ཐིག་ལེར་བཅས། །གཉིས་པའི་ལྔ་པ་ལྔ་པར་ནི། །སྣ་དང་རིང་དང་བཅས་པར་གནས། །དེར་ནི་བརྒྱད་མཐའ་གཞག་པར་བྱ། །གཉིས་པའི་དང་པོ་མིང་དང་ལྡན། །གཉིས་པའི་དྲུག་པའི་གསུམ་པ་བརྗོད། །གཉིས་པའི་དྲུག་པའི་དང་པོ་ནི། །ཤིན་ཏུ་རིང་བའི་སྒྲ་དང་ལྡན། །བརྒྱད་མཐའི་གཉིས་པའི་གཉིས་ཀྱི་སྒྲ། །ཅུང་ཟད་འཐུག་དང་རིང་པོར་བརྗོད། །གཉིས་པའི་བཞི་པའི་མཐར་གནས་དང་། །གཉིས་པའི་དྲུག་པའི་དང་པོར་བཤད། །དང་པོའི་དང་པོ་ཐུང་ངུའི་སྒྲ། །གཉིས་པའི་ལྔ་པའི་དང་པོར་གནས། །གཉིས་པའི་དང་པོ་གཞག་པར་བྱ། །གཉིས་ཀ་འདྲེལ་བ་མ་ནི་ཞེས། །ཆགས་པའི་སྒྲ་ཡི་ཡི་གེར་བརྗོད། །དང་པོ་གཉིས་པས་གནན་པར་བྱ། །
གཉིས་པའི་གསུམ་པའི་ལྔ་པ་ཐིག་ལེར་བཅས། །ཅུང་ཟད་རིང་བའི་སྒྲ་དང་ལྡན། །དང་པོ་བཞི་པ་རིང་པོར་གནས། །བརྒྱད་པའི་མཐའ་ཅན་དང་པོ་ལ། །གཉིས་པའི་ལྔ་པ་ཐིག་ལེར་བཞག །ཚེག་དྲག་དྲག་པོའི་སྒྲ་དང་ལྡན། །དང་པོའི་དང་པོ་གཞག་པར་བྱ། །གཉིས་པའི་ལྔ་པའི་དང་པོ་ནི། །བརྒྱད་པའི་གསུམ་པའི་འདྲེལ་པར་བཞག །ཅུང་ཟད་འཐུག་པའི་སྒྲ་དང་ལྡན། །གཉིས་པའི་གཉིས་པ་དང་པོ་ལ། །དང་པོར་རིག་བྱེད་གཉིས་པར་མནན། །གཉིས་པའི་ལྔ་པའི་ལྔ་པ་ལ། །དང་པོ་ལྔ་པས་ཡན་ལག་བརྒྱན། །གཉིས་པའི་དང་པོ་རབ་ཏུ་བཞག །གཉིས་པའི་དྲུག་པའི་གསུམ་པ་ནི། །དང་པོའི་ལྔ་པས་ཡན་ལག་བཀོད། །གཉིས་པའི་དྲུག་པའི་དང་པོ་ལ། །གཉིས་པའི་ལྔ་པ་ཐིག་ལེར་བཞག །གཉིས་པའི་གསུམ་པའི་དང་པོ་ལ། །ཆགས་པའི་ཡི་གེ་ཡན་ལག་ལྡན། །དང་པོའི་གཉིས་པས་གནན་པར་བྱ། །མ་ནིང་ཆགས་པའི་སྒྲ་ལ་ནི། །གཉིས་པའི་བཞི་པའི་གསུམ་པ་བཞག །གཉིས་པའི་བཞི་པའི་མཐར་ལྡན་དགོད། །གཉིས་པའི་བཞི་པའི་དང་པོ་ལ། །ཡན་ལག་ཆགས་པའི་སྒྲ་དང་ལྡན། །ཅུང་ཟད་རིང་བའི་ཡི་གེ་བརྗོད། །གཉིས་པའི་དྲུག་པའི་དང་པོར་ནི། །བྱེ་བྲག་གཉིས་ཀྱི་སྒྲ་དང་ལྡན། །ཐུང་དང་རིང་དུ་རྣམ་པར་བཤད། །གཉིས་པའི་དྲུག་པའི་དང་པོ་ལ། །ཚེག་དྲག་གིས་ནི་བཀོད་པར་བྱ། །གཉིས་པའི་བཞི་པའི་དང་པོ་ལ། །དང་པོ་གཉིས་པས་གནན་པར་བྱ། །གཉིས་པའི་ལྔ་པའི་དང་པོ་ལ། །ཆགས་པའི་ཡི་གེ་གདགས་པར་བྱ། །གཉིས་པའི་བཞི་པའི་དང་པོ་ལ། །དང་པོའི་གཉིས་པས་གནན་པར་བྱ། །གཉིས་པའི་གཉིས་པའི་བཞི་པ་ལ། །གཉིས་པའི་ལྔ་པ་ཐིག་ལེར་བཞག །ཤུགས་ཀྱི་རིང་བའི་སྒྲ་དང་ལྡན། །བརྒྱད་པའི་མཐར་ལྡན་གསུམ་པ་བཞག །གཉིས་པ་ཡི་ནི་ལྔ་པ་ནི། །ཅུང་ཟད་རིང་བ་ཤེས་པར་བྱ། །དེར་ནི་ཆགས་པའི་ཡི་གེ་དགོད། །བརྒྱད་པའི་མཐའ་ཅན་གསུམ་པ་ལ། །དང་པོ་གཉིས་པས་གནན་པར་བྱ། །གཉིས་པའི་བཞི་པའི་གསུམ་པའི་གཉིས། །མཐུག་དང་ཤིན་
ཏུ་མཐུག་པར་བརྗོད། །འདིར་ནི་དང་པོའི་བཞི་པ་བཞག །གཉིས་པའི་བཞི་པའི་གསུམ་པ་ལ། །གཉིས་པའི་ལྔ་པ་ཐིག་ལེར་བཞག །གཉིས་པའི་བཞི་པའི་གསུམ་པ་ལ། །དང་པོ་གསུམ་པའི་ཡན་ལག་གདགས། །བརྒྱད་པའི་མཐའ་ཅན་གཉིས་པ་ལ། །གཉིས་པའི་གསུམ་པའི་དང་པོ་གདགས། །གཉིས་པའི་གཉིས་པ་དྲག་པོའི་སྒྲ། །ཚེག་དྲག་གིས་ནི་ཤེས་པར་བྱ། །སྡེ་ཚན་བརྒྱད་པོ་མཐའ་ལྡན་པ། །དང་པོའི་གཉིས་པས་གནན་པར་བྱ། །སྟོབས་པར་བྱེད་པའི་སྒྲ་གཉིས་ལྡན། །རིང་དང་ཤིན་ཏུ་རིང་བར་བརྗོད། །གཉིས་པའི་ལྔ་པའི་ལྔ་པ་གཉིས། །བར་དུ་ཆགས་པའི་ཡི་གེ་ནི། །ཤིན་ཏུ་དྲག་པ་གཉིས་སུ་བཤད། །གཉིས་པ་ཡི་ནི་བཞི་པ་ལ། །ཆགས་པའི་ཡི་གེས་ཡན་ལག་དགོད། །དང་པོ་གཉིས་པས་གནན་པར་བྱ། །ཤིན་ཏུ་དྲག་པོ་སྒྲ་གཉིས་ལྡན། །བརྒྱད་མཐའ་ཡི་ནི་གཉིས་པ་ལ། །གཉིས་པའི་གསུམ་པའི་ལྔ་པ་གདགས། །ཚེག་དྲག་བཀོད་པའི་སྒྲ་གཉིས་ནི། །ཤིན་ཏུ་དྲག་པོ་གཉིས་སུ་བཤད། །གཉིས་པའི་ལྔ་པའི་བཞི་པ་ལ། །གཉིས་པའི་བཞི་པའི་ལྔ་པ་བཞག །གཉིས་པའི་སྒྲ་དང་ལྡན་པར་བརྗོད། །གཉིས་པའི་བཞི་པའི་བཞི་པ་ནི། །ཤིན་ཏུ་རིང་བ་གཉིས་སུ་བཤད། །བརྒྱད་པའི་མཐའ་ཅན་གཉིས་པོ་ནི། །ཚེག་དྲག་ལྡན་པ་གཉིས་སུ་བཤད། །གཉིས་པའི་གསུམ་པའི་ལྔ་པ་ནི། །འཐུག་པའི་སྒྲ་ལྡན་གཉིས་སུ་བཤད། །གཉིས་པའི་བཞི་པའི་གསུམ་པ་གཉིས། །ཤིན་ཏུ་རིང་བའི་སྒྲ་ལྡན་གཉིས། །བརྒྱད་པའི་མཐའ་ལྡན་སྒྲ་གཉིས་ནི། །ཤིན་ཏུ་དྲག་པའི་སྒྲ་དང་ལྡན། །གཉིས་པའི་ལྔ་པའི་དང་པོ་གཉིས། །ཐུང་བའི་སྒྲ་དང་ལྡན་པར་བཤད། །གཉིས་པའི་དང་པོ་དང་པོ་གཉིས། །ཅུང་ཟད་དྲག་པོའི་སྒྲ་དང་ལྡན། །འདི་ནི་འཁོར་ལོར་རབ་བཤད་པ། །དེ་ཡི་ཡི་གེ་བཏུ་བར་བྱ། །གཉིས་པ་བཞི་པའི་གསུམ་པ་ལ། །དང་པོ་གཉིས་པ་གནན་པར་བྱ། །གཉིས་པའི་བཞི་པའི་ལྔ་པ་བཞག །གཉིས་པའི་ལྔ་པའི་ལྔ་པ་ལ། །དང་
པོའི་བཞི་པས་ཡན་ལག་དགོད། །གཉིས་པ་ཡི་ནི་གསུམ་པ་ལ། །དང་པོའི་བཞི་པ་དགོད་པར་བྱ། །གཉིས་པའི་བཞི་པའི་ལྔ་པ་བཞག །བརྒྱད་པ་ཡི་ནི་མཐར་ལྡན་པ། །དང་པོའི་གསུམ་པས་ཡན་ལག་བརྒྱན། །དང་པོ་ཐུང་ངུ་ཟླ་བའི་མིག །གཉིས་པའི་ལྔ་པས་ཐིག་ལེར་བཞག །ཅུང་ཟད་རིང་བའི་སྒྲ་དང་ལྡན། །གཉིས་པའི་ལྔ་པའི་གཉིས་པ་ལ། །གཉིས་པའི་གསུམ་པའི་དང་པོ་བཞག །ཤིན་ཏུ་དྲག་པོའི་སྒྲ་དང་ལྡན། །བརྒྱད་པའི་མཐའ་ཅན་གསུམ་པ་ལ། །གཉིས་པའི་ལྔ་པའི་གསུམ་པ་གདང་། །སྡེ་ཚན་བརྒྱད་པའི་མཐའ་ལྡན་པ། །ཅུང་ཟད་རིང་བའི་སྒྲ་དང་ལྡན། །ཞེས་བཅོམ་ལྡན་འདས་ཀྱིས་བཀའ་སྩལ་ཏོ། །དཔལ་ནག་པོ་ཆེན་པོའི་རྒྱུད་དུར་ཁྲོད་ཆེན་པོ་ཞེས་བྱ་བ་ལས། ཡི་གེ་བཏུ་བའི་ལེའུ་སྟེ་དགུ་པའོ།། །།དེ་ནས་དཔལ་ནག་པོ་ཆེན་པོས་གསོལ་པ། བཅོམ་ལྡན་འདས། སྐུ་གསུང་ཐུགས་ཀྱི་རང་བཞིན་གྱིས། །དཔལ་ལྡན་ནག་པོ་ཆེན་པོ་ཡི། །དངོས་གྲུབ་ངེས་པར་འགྲུབ་པ་དང་། །ཆོ་གའི་ལས་རྣམས་རྫོགས་པ་ཡི། །འགྲུབ་པའི་རྒྱུ་ནི་ཇི་ལྟར་ལགས། །བཅོམ་ལྡན་འདས་ཀྱིས་བཀའ་སྩལ་པ། སྐུ་གསུང་ཐུགས་ཀྱི་རྡོ་རྗེ་དང་། །དཔལ་ལྡན་ནག་པོ་ཆེན་པོ་ཡི། །དངོས་གྲུབ་ཉེ་བར་འགྲུབ་པའི་རྒྱུ། །དམ་ཚིག་ཆོ་ག་འདི་དག་ལ། །གནས་པར་བྱེད་པའི་རྣལ་འབྱོར་པས། །དང་པོ་བསམ་གཏན་ཐོབ་པར་འགྱུར། །ཞེས་བཅོམ་ལྡན་འདས་ཀྱིས་བཀའ་སྩལ་ཏོ། །དེ་ནས་དཔལ་ནག་པོ་ཆེན་པོས་གསོལ་པ། བཅོམ་ལྡན་འདས། དམ་ཚིག་ཇི་ལྟར་ལགས། བཅོམ་ལྡན་འདས་ཀྱིས་བཀའ་སྩལ་པ། །བླ་མ་སངས་རྒྱས་ཐམས་ཅད་དང་། །དཔལ་ལྡན་ནག་པོ་ཆེན་པོ་ནི། །རྟག་ཏུ་ཡིད་ལ་གནག་པར་བྱ། །དཔལ་ལྡན་ནག་པོ་ཆེན་པོ་ཡི། །སྔགས་དང་ཕྱག་རྒྱ་བསམ་གཏན་ལ། །ཡིད་ཀྱིས་སོམ་ཉི་མེད་པར་བྱ། །ཡོངས་སུ་མ་སྨིན་སེམས་ཅན་དང་། །བླ་མ་རྡོ་རྗེ་འཛིན་སྤོང་བ། །དམ་ཚིག་འདྲལ་བར་བྱེད་པ་དང་། །རྒྱལ་བའི་བསྟན་པ་འཇིག་བྱེད་
པ། །དཔལ་ལྡན་ནག་པོ་ཆེན་པོ་ཡི། །བསམ་གཏན་སྔགས་དང་ལྡན་གྱུར་ནས། །སྙིང་རྗེས་བསྒྲལ་བར་མ་བྱས་ན། །རྣལ་འབྱོར་ངེས་པར་ལྟུང་བར་བཤད། །དཔལ་ལྡན་ནག་པོ་སྒྲུབ་པ་དེས། །སྐུ་དང་གྲི་གུག་ཐོད་པ་དང་། །མཐུན་པའི་དམ་རྫས་ལ་སོགས་པ། །དེ་དག་རྟག་ཏུ་སྦ་བར་བྱ། །སྔགས་དང་རྒྱུད་ཀྱི་དོན་རྣམས་དང་། །ནག་པོའི་བསམ་གཏན་ཆོ་གར་བཅས། །ཀུན་ལ་བསྟན་པར་མི་བྱ་སྟེ། །བདུད་རྩི་ལྔ་དང་བསྲེག་རྫས་དང་། །ཤ་ཆེན་ཉ་ཤ་ཆང་དང་ནི། །དུག་གི་ལ་དུ་ལ་སོགས་པ། །མཐུན་པའི་དམ་རྫས་ཐམས་ཅད་ནི། །རྟག་ཏུ་རྣལ་འབྱོར་པ་ཡིས་བསྟེན། །དཔལ་ལྡན་ནག་པོ་ཆེན་པོ་ཡི། །སྐུ་དང་གྲི་གུག་ཐོད་པ་དང་། །ནི་རང་སུ་ལ་སོགས་པ་ནི། །བླ་མས་རབ་ཏུ་གནས་བྱས་ཏེ། །དུས་གསུམ་མཐུན་པའི་རྫས་ཀྱིས་མཆོད། །རྟག་ཏུ་ཚོགས་ཀྱི་འཁོར་ལོས་མཆོད། །དཔལ་ལྡན་ནག་པོ་སྒྲུབ་འདོད་པས། །བླ་མས་རྗེས་སུ་གནང་བར་བྱ། །དེས་ནི་དཔལ་ལྡན་ནག་པོ་འགྲུབ། །འདི་ནི་སངས་རྒྱས་ཐམས་ཅད་ཀྱི། །བསྟན་པ་གནས་པར་བྱེད་པ་ནི། །དམ་ཚིག་ཆེན་པོར་རབ་ཏུ་བཤད། །ཀུན་ལ་བསྟན་པར་མི་བྱ་སྟེ། །གལ་ཏེ་རྨོངས་པར་བསྟན་གྱུར་ན། །ཨརྫ་ཀ་ཡི་འབྲས་བུ་ལྟར། །མགོ་དང་ལུས་པོ་འགས་འགྱུར་ཏེ། །དམྱལ་བར་ངེས་པར་ལྟུང་བར་འགྱུར། །ཞེས་བཅོམ་ལྡན་འདས་ཀྱིས་བཀའ་སྩལ་ཏོ། །དཔལ་ནག་པོ་ཆེན་པོའི་རྒྱུད་དུར་ཁྲོད་ཆེན་པོ་ཞེས་བྱ་བ་ལས། དམ་ཚིག་གི་ལེའུ་སྟེ་བཅུ་པའོ།། །།དཔལ་ནག་པོ་ཆེན་པོའི་རྒྱུད་དྲག་པོ་བརྟག་པ་དུར་ཁྲོད་ཆེན་པོ་ཞེས་བྱ་བ་རྫོགས་སོ། །སྣ་ནམ་རྡོ་རྗེ་བླ་མས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། །།