ཆོས་ཐམས་ཅད་ཀྱི་དོན་སྟོན་པ་རྫོགས་ཆེན་ཐིག་ལེ་ཉག་གཅིག
རྒྱ་གར་སྐད་དུ། དྷརྨ་སརྦ་བྷེ་ལ་ཨ་ཏི་ཏི་ལ། བོད་སྐད་དུ།ཆོས་ཐམས་ཅད་ཀྱི་དོན་སྟོན་པ་རྫོགས་ཆེན་ཐིག་ལེ་ཉག་གཅིག །ཡེ་ནས་བྱ་རྩོལ་བྲལ་བ། ཀ་དག་ལྷུན་གྲུབ་མཉམ་ཉིད་ཕྱོགས་བྲལ་བརྡལ་ཁྱབ་ཆེན་པོའི་ཀློང་ལ་ཕྱག་འཚལ་ལོ། །ཏནྟྲ་རྒྱུད་ཐམས་ཅད་ཀྱི་རྒྱལ་པོ། འདུས་པ་ལུང་ཐམས་ཅད་ཀྱི་སྤྱི་འགྲེལ། གསང་བ་མན་ངག་ཐམས་ཅད་ཀྱི་ངེས་དོན། ཐེག་པ་ཐམས་ཅད་ཀྱི་ཡང་རྩེ། བསྟན་པ་ཐམས་ཅད་ཀྱི་འབྱུང་གནས། གསུང་རབ་མ་ལུས་པའི་སྙིང་ཁུ། དགོངས་པ་ཐམས་ཅད་ཀྱི་ཞེ་ཕུགས། ཆོས་ཐམས་ཅད་ཀྱི་མེ་ལོང་། དོན་ཐམས་ཅད་ཀྱི་མཇུག་སྡུད། ངོ་སྤྲོད་ཐམས་ཅད་ཀྱི་མཛོད། ངེས་དོན་ཐམས་ཅད་ཀྱི་རྒྱ་མཚོ། ཐེག་པ་ཐམས་ཅད་ཀྱི་སྤྱི་ཕུད། བལྟ་བ་ཐམས་ཅད་ཀྱི་ཡང་རྩེ། རྒྱལ་བ་ཐམས་ཅད་ཀྱི་ཡབ། རྣལ་འབྱོར་པ་ཐམས་ཅད་ཀྱི་ཡུམ། བསྟན་པ་ཐམས་ཅད་ཀྱི་བུ་གཅིག་པ། ཏནྟྲ་འབུམ་ཕྲག་དྲུག་ཅུ་རྩ་བཞིའི་བཅུད། གསང་བ་བས་ཀྱང་ཡང་གསང་བ། ཀུན་ཏུ་བཟང་པོ་མ་འཁྲུལ་པའི་དགོངས་པ། གཞིའི་འདུག་ཚུལ་འཁོར་བ་དོང་སྤྲུགས་སུ་སྟོན་པ། ཕྱི་ནང་གསང་བ་གསུམ་གྱི་ཡང་ཞུན། བླ་ན་མེད་པའི་ཐིག་ལེའི་དགོངས་པ། ལོག་པར་བལྟ་བ་ཐམས་ཅད་ཀྱི་གཉེན་པོ། མ་རིག་པ་ཐམས་ཅད་ཀྱི་མུན་པ་སེལ་བ། ཡེ་ཤེས་ཀྱི་སྣང་བ་ཐམས་ཅད་སྐྱེད་པ། རྣམ་རྟོག་དྲ་བ་ཐམས་ཅད་གཅོད་པ། ཕྱོགས་གཅིག་ཏུ་རྒྱ་ཆད་པ་མེད་པར་སྟོན་པ། སྣང་བ་མི་འགག་ལ་གཉིས་སུ་མེད་པར་ཤར་གྲོལ་དུ་སྟོན་པ། མ་འདྲེས་ལ་ཡོངས་སུ་རྫོགས་པ། སྣང་ཚུལ་ཅིར་ཡང་སྣང་བ། ཡིན་ཚུལ་ངེས་པ་མེད་པར་སྟོན་པ། ཀུན་དང་བྲལ་ཅིང་ཅི་ཡང་མ་སྤངས་པ། མཐའ་བཞི་མ་འགགས་མུ་བཞི་རང་གྲོལ་བ། ཉམས་མི་ང་བ་བལྟ་བའི་གདེང་དུ་སྟོན་པ། འཛིན་པ་མེད་པ་བསྒོམ་པའི་གདེང་དུ་སྟོན་པ། བླང་དོར་མེད་པ་སྤྱོད་པའི་གདེང་དུ་སྟོན་པ། སྤང་
ཐོབ་མེད་པ་འབྲས་བུའི་གདེང་དུ་སྟོན་པ། དངོས་པོ་ཐམས་ཅད་རང་གྲོལ་དུ་གཏན་ལ་འབེབས་པར་བྱེད་པ་འདི་ཉིད། ཆོས་ཉིད་གྲག་སྟོང་དུ་ཐོས་པའི་དུས་གཅིག་ན། གནས་འོག་མིན་ཆོས་ཀྱི་ཕོ་བྲང་སྐུ་གསུང་ཐུགས་རྡོ་རྗེ་རྣམ་པར་དག་པ་རྒྱ་ཆད་ཕྱོགས་ལྷུང་ཚད་ལས་འདས་པ། རང་བྱུང་འོད་ཀྱི་གཞལ་ཡས་ཁང་། ཆོས་ཉིད་ཀྱི་མཁའ། དབྱིངས་ཉིད་ཀྱི་ཀློང་། སེམས་ཉིད་ཀྱི་གནས་འབྱམས་ཀླས་པ་ན། སྟོན་པ་རིག་སྟོང་ཀུན་ཏུ་བཟང་པོ་ཉིད། མ་བཅོས་སྤྲོས་བྲལ་བྱང་ཆུབ་སྙིང་པོའི་ངང་ལ་རང་ཤར་ཏེ། ཞལ་ཕྱག་གི་རྣམ་པར་བཞེངས་ནས། སྔོན་དུ་བྱུང་བའི་འཁོར་ནི་ཉིད་ཀྱི་ངོ་བོ་ཆོས་ཀྱི་སྐུ་དང་། ཉིད་ཀྱི་རང་བཞིན་ལོངས་སྤྱོད་རྫོགས་པའི་སྐུ་དང་། ཉིད་ཀྱི་ཐུགས་རྗེ་སྤྲུལ་པའི་སྐུ་དང་། ཞི་ཁྲོའི་སངས་རྒྱས་དཔག་ཏུ་མེད་པ་དང་། ཁྱད་པར་སྐུའི་འཁོར་རྡོ་རྗེའི་རིགས་དང་། རིན་ཆེན་རིགས་དང་། པདྨའི་རིགས་དང་། ལས་ཀྱི་རིགས་དང་། བདེ་གཤེགས་རིགས་དང་། སངས་རྒྱས་དང་། ཆོས་དང་། དགེ་འདུན་དང་། བྱང་ཆུབ་སེམས་དཔའ་དང་། ས་ཆུ་མེ་རླུང་ནམ་མཁའ་དང་། འདོད་ཁམས་དང་། གཟུགས་ཁམས་དང་། གཟུགས་མེད་པའི་ཁམས་དང་། ཤིན་ཏུ་རྣལ་འབྱོར་དང་། ཡོངས་སུ་རྣལ་འབྱོར། རྣལ་འབྱོར་ཆེན་པོ་དང་། སེམས་དཔའི་རྣལ་འབྱོར་དང་། འདས་པ་དང་། མ་འོངས་པ་དང་། ད་ལྟར་བ་དང་། དག་པ་དང་། མ་དག་པ་དང་། སྒྲོ་སྐུར་ཅན་དང་། ཕྱི་པའི་འཁོར་ཕྱི་དང་། དབང་ཕྱུག་ཆེན་པོ་དང་། མུ་སྟེགས་དང་། མུར་ཐུག་དང་། རྒྱང་འཕེན་དང་། ལྷ་དང་། ལྷ་མ་ཡིན་དང་། མི་དང་དྲི་ཟ་དང་བཅས་པའོ། །གསུང་གི་འཁོར་ནི། ཉན་ཐོས་དང་། རང་རྒྱལ་དང་། བྱང་ཆུབ་སེམས་དཔའ་དང་། ཀྲྀ་ཡ་དང་། ཨུ་པ་དང་། ཡོ་ག་དང་། མ་ཧཱ་དང་། ཨ་ནུ་དང་། ཨ་ཏི་དང་། ཨ་ཏི་ཆེན་པོ་དང་། རྡུལ་དང་།མུན་པ་དང་། སྙིང་སྟོབས་དང་། ཕྱིའི་རྟག་ཆད་མུ་བཞིའོ། །ཐུགས་ཀྱི་འཁོར་ནི། གསལ་སྟོང་དང་།
སྣང་སྟོང་དང་། བདེ་སྟོང་དང་། གྲག་སྟོང་དང་། རིག་སྟོང་དང་བཅས་ཏེ། ཉིད་ཀྱི་རང་བཞིན་དང་། ངོ་བོ་དང་། ཐུགས་རྗེ་དང་། ཆོས་ཉིད་ཀྱི་རྡོ་རྗེ་འདུས་མ་བྱས་པ་རྣམས་དང་མི་འབྱེད་ཅིང་། འབྱེད་པ་མི་མངའ་བ། མཉམ་རྫོགས་ལྷུན་གྲུབ་ཀློང་ཡངས་ན་ཐབས་གཅིག་ཏུ་གཉིས་སུ་མེད་པར་བཞུགས་སོ། །དེའི་ཚེ་བཅོམ་ལྡན་འདས་རིག་སྟོང་ཀུན་ཏུ་བཟང་པོ་དེ་ཉིད་འཁོར་ཤེས་རིག་སྣ་ཚོགས་པ་རྣམས་བྱིན་གྱིས་རློབ་པའི་ཕྱིར། འཁོར་ཐམས་ཅད་ཀྱི་ཐུགས་ལ་ཐིམ་ཞིང་། རང་བྱུང་གི་ཡེ་ཤེས་གསལ་ལ། མི་སྣང་བ་དང་། མི་མཛད་པ་དང་། མི་འཕྲོ་བ་དང་། མི་འདུ་བ་དང་། མི་འགྱུར་བ་དང་། མི་འོང་བ་དང་། མི་འགྲོ་བ་དང་། མི་གནས་པ་དང་། ལྷང་ངེ་། ལྷན་ནེ། ལྷག་གེ། ལྷམ་མེ། ཐལ་ལེ་བ་དང་། དྲི་མ་མེད་པའི་ཏིང་ངེ་འཛིན་དང་། སེང་གེ་རྣམ་པར་བསྒྱིངས་པ་དང་། དཔའ་བར་འགྲོ་བ་དང་། ཡིད་བཞིན་གྱི་ནོར་བུའི་ཏོག་དང་། རྒྱལ་མཚན་རྩེ་མོ་རྣམ་པར་རོལ་པ་དང་། གློག་གི་ཕྲེང་བ་དང་། འཁོར་ལོ་ཆེན་པོ་དང་། འོད་འབར་བ་དང་། ཕྱག་རྒྱ་ཟིལ་གྱིས་གནོན་པ་དང་། འབར་ཆེན་སྙོམ་པ་དང་། ཆོས་ཉིད་སྣ་ཚོགས་པ་དང་།རྣམ་པར་བཀོད་པ་རྣམ་སྣང་རོལ་པ་ཞེས་བྱ་བའི་ཏིང་ངེ་འཛིན་ལ་ཞུགས་ཏེ། ཐམས་ཅད་ཐིག་ལེ་ཉག་གཅིག་ལ་བཀོད་ནས་བསྟན་པ་རིན་པོ་ཆེ་རྣམས། ཐམས་ཅད་མ་ཕྱེ། མི་འབྱེད། ཡིད་ལ་བདག་ཏུ་མེད་པའི་ཀློང་ནས་ཀློང་ཆེན་རབ་འབྱམས་ཀྱི་རྒྱུད་འདི་ཉིད། བརྗོད་དུ་མེད་པ་དང་། བསྟན་དུ་མེད་པ་དང་།བལྟར་མེད་པ་དང་། ཅུང་ཟད་མེད་པ་དང་། མཉན་དུ་མེད་པ་དང་། རང་བཞིན་མེད་པ་དང་། གྱིན་འདའ་དང་། ཡུལ་ཅན་མ་ཡིན་པ་དང་། དུ་མ་མེད་པ་དང་། སོ་མ་དང་། གཉུག་མ་དང་། ལྷུག་མ་དང་། རྣལ་མ་དང་། མ་བཅོས་པའི་ངང་ནས་འུབ་ཆུབ་ཅིང་རང་གྲག་ངོ་བོའི་ཚིག་ཏུ་རང་ཤར་རོ། །སརྦ་མ་ལ་ཨ་བ་མ་ལ་དྷ་ཐིམ། བྷཻ་ཊ་ཨཱ་ལོ་ཀེ། ཨ་ནན་པ་ནི་ཀི།
སརྦ་མ་ཎྀ་ཊ་ཤ་ཨེ་ཤ་ཨ། ཨྸྸ། དྨཽ། མ་མ། ཨེ་ཀ་པར། ཏྱ་རྐྱ་ཏ་མྃ། ཨེ་མ་ཧོ་ངོ་མཚར་རྨད་ཀྱི་ཆོས། །སུས་ཀྱང་མ་བྱས་ཁང་བཟངས་ན། །མ་མྱོང་སྐྱེ་མེད་རིག་པའི་སྐུ། །སྤང་ཐོབ་མེད་པའི་རང་ལུས་ཀྱི། །གྲུབ་མ་མྱོང་བའི་སྐུ་རུ་གནས། །མི་གྲག་གྲག་སྟོང་ཚུལ་དུ་ནི། །ཐོས་མ་མྱོང་བའི་ཆོས་ཉིད་གཏམ། །ཡེ་ཀློང་ཆེན་པོའི་དོན་རྣམས་ཀུན། །འདི་ཡི་ཡུལ་དུ་ཤར་གྲོལ་ཏེ། །སྤྲོས་མེད་སྤྲོས་པའི་རྒྱུ་མེད་པས། །མཉམ་ཡང་ཆོས་ཀུན་མ་འདྲེས་པར། །ཐིག་ལེ་ཉག་གཅིག་ངས་བཤད་ཉོན། །ཨེ་མ་ཧོ། ལྟ་བ་རང་བྱུང་ཡེ་ཤེས་ལྟོས། །དགེ་སྡིག་ལས་འདས་ངོ་མཚར་ཆེ། །གཞི་ནི་མ་བསྐྱོད་ཁྱབ་གདལ་ཆེ། །ལུས་ངག་ལྟ་སྒོམ་ཕན་གནོད་བྲལ། །དངོས་པོ་གཤིས་ཀྱི་འདུག་ཚུལ་ལྟོས། །སྣང་བ་མ་བསྒྱུར་ངོ་མཚར་ཆེ། །བདེ་སྡུག་དྲན་བསམ་ཅི་ཤར་ཡང་། །དོན་ལ་འགྱུར་མེད་དངོས་པོ་བྲལ། །སྟོང་པ་ཡེ་ཤེས་ཀུན་འབྱུང་ལྟོས། །དྲན་བསམ་སྤྱོད་པ་སྣ་ཚོགས་ཀུན། །རོལ་པའི་རྩལ་ཤར་ངོ་མཚར་ཆེ། །སྐྱེ་འགག་གཉིས་ཀྱི་མཐའ་དང་བྲལ། །ཆོས་ཉིད་ཀུན་ཁྱབ་ཡེ་ཤེས་ལྟོས། །སྐྱེ་མེད་ལྷན་སྐྱེས་ངོ་མཚར་ཆེ། །སྐྱེ་འགྲོ་ཀུན་གྱི་སྲོག་བཅད་ཀྱང་། །དགེ་སྡིག་ཕན་གནོད་གཉིས་དང་བྲལ། །རང་ཤེས་སྟོང་པ་ཀུན་སྣང་ལྟོས། །རང་སྣང་རང་གྲོལ་ངོ་མཚར་ཆེ། །ཆོ་འཕྲུལ་སྣ་ཚོགས་ཅི་ཤར་ཡང་། །ཐོག་མའི་གཞི་ལས་གཡོས་པ་མེད། །རིག་སྟོང་ཀུན་གྲོལ་སྣང་བ་ལྟོས། །རང་གིས་རང་རྙེད་ངོ་མཚར་ཆེ། །ཉོན་མོངས་འགྱུ་དྲན་ཅི་ཤར་ཀྱང་། །རང་ཤར་རང་གྲོལ་བཅོས་སླད་བྲལ། །རིག་སྟོང་གསལ་དག་ངོ་བོར་ལྟོས། །འབད་མེད་འབྲས་ཐོབ་ངོ་མཚར་ཆེ། །གཅིག་པོ་དེ་ཡི་དོན་ཤེས་པས། །འཁོར་འདས་གཉིས་མེད་ཀུན་གྲོལ་དག །སྟོང་པ་ཀུན་བཞག་ཚད་ལ་ལྟོས། །འགྲོ་དྲུག་ཁམས་གསུམ་མ་ལུས་པ། །སྐུ་གསུམ་རང་སྣང་ངོ་མཚར་ཆེ། །འགྲོ་རྣམས་སྒོམ་སྒྲུབ་མ་བྱས་པར། །དུས་
གཅིག་སངས་རྒྱས་འཁོར་དོང་སྤྲུགས། །སྐུ་གསུམ་ཡེ་རྫོགས་འབྲས་བུ་ལྟོས། །དུས་གསུམ་འབྲས་མེད་ངོ་མཚར་ཆེ། །ཕར་ཕྱིན་བསག་སྦྱང་མ་བྱས་པར། །སྒྲིབ་བྱང་ཚོགས་གཉིས་ཡེ་ནས་རྫོགས། །རིག་པ་གཅེར་བཞག་ཀུན་མཉམ་ལྟོས། །ཐམས་ཅད་རྒྱན་ཤར་ངོ་མཚར་ཆེ། །སྤང་དང་ལེན་པའི་ཆོས་རྣམས་ཀུན། །ཉོན་མོངས་གཏན་སྤྲུགས་འཆིང་གྲོལ་མེད། །ཡེ་སྟོང་ཀ་དག་ངང་ལ་ལྟོས། །སངས་རྒྱས་གཡང་ས་ཡང་ས་ཡང་ངོ་མཚར་ཆེ། །བྱ་བྱེད་ཡེ་དཔྱོད་བསྒོམ་པ་ཡིས། །ཡེ་གྲོལ་མ་ཤེས་ལྷུང་བར་འགྱུར། །མི་སྟོང་སྟོང་པ་དངོས་ཅན་ལྟོས། །མེད་པ་བདག་འཛིན་ངོ་མཚར་ཆེ། །སྣང་སྲིད་འཁོར་འདས་ཀུན་སྐྱེས་ཀྱང་། །སྐྱེ་མེད་ངང་དྭངས་ཀ་ནས་དག །ཨེ་མ་ཧོ། བྱུང་གནས་མེད་པའི་རང་རིག་ལ། །འགྲོ་འོང་མེད་པ་ངོ་མཚར་ཆེ། །ཀུན་ཏུ་འཇུག་བྱེད་ཡིད་དྲུག་ལ། །བརྟེན་ས་མེད་དེ་བློ་ལས་འདས། །ཐམས་ཅད་སྡུད་པའི་ཀུན་གཞི་ལ། །བཞག་ས་མེད་དེ་ངོ་མཚར་ཆེ། །འཁོར་འཁྲུལ་ཀུན་གཞི་མ་རིག་པ། །འགྱུར་མེད་ཀ་དག་བྱ་བཙལ་བྲལ། །ཐམས་ཅད་ཡུལ་ཞེན་ཉོན་མོངས་ལ། །གཞི་རྩ་མེད་པ་ངོ་མཚར་ཆེ། །ཕྲ་དང་རགས་པའི་དྲི་མ་ལ། །ཆགས་པ་མེད་པ་ཡེ་དག་ཡིན། །ཨེ་མ་ཧོ། གཞི་རྩ་མེད་པའི་ཆོས་ཉིད་འདི། །མ་བཙལ་ཅོག་བཞག་ངོ་མཚར་ཆེ། །འགྲོ་འོང་མེད་པའི་རིག་པ་ལ། །ཐུག་པ་མེད་པ་ངོ་མཚར་ཆེ། །མ་བཀོད་གསལ་བའི་དག་དབྱིངས་ལ། །ཕྱི་དང་ནང་མེད་ངོ་མཚར་ཆེ། །རང་སྣང་དག་པའི་འོད་ལྔ་ལ། །འཆར་ནུབ་མེད་པ་ངོ་མཚར་ཆེ། །ཤར་བ་མེད་པའི་སྒྲོན་མ་ལ། །ནུབ་པ་མེད་པ་ངོ་མཚར་ཆེ། །ཆ་ཕྲ་སྤྲོས་མེད་ཐིག་ལེ་ལ། །ལྔ་ལྔས་བརྒྱན་པ་ངོ་མཚར་ཆེ། །མི་འགྱུར་རིག་པའི་རང་སྐུ་ལ། །འགྲོ་འོང་མེད་པ་ངོ་མཚར་ཆེ། །སྣང་བ་རང་དག་ཆེན་པོ་ལ། །མཐའ་མེད་རྒྱ་ཆེ་ངོ་མཚར་ཆེ། །དབྱིངས་དང་རིག་པ་རང་འདྲེལ་ལ། །འཕྲོས་པ་མེད་
པ་ངོ་མཚར་ཆེ། །སྟོང་པ་ཆེན་པོའི་འབྱུང་གནས་ལ། །མཐའ་བཞི་འགགས་པ་ངོ་མཚར་ཆེ། །ཐོག་མའི་མགོན་པོ་དྲི་མེད་ལ། །འགྲན་པའི་ཟླ་མེད་ངོ་མཚར་ཆེ། །ཉག་གཅིག་རང་གནས་དགོངས་པ་ལ། །བར་མཚམས་མེད་པ་ངོ་མཚར་ཆེ། །རྩོལ་སྒྲུབ་རང་དག་སྤྱོད་པ་ལ། །དགག་སྒྲུབ་མེད་པ་ངོ་མཚར་ཆེ། །རང་བཞིན་བསམ་གཏན་བར་མེད་ལ། །བྱིང་རྒོད་མེད་པ་ངོ་མཚར་ཆེ། །གཏད་པ་མངོན་སུམ་བལྟ་བ་ལ། །རང་སྣང་ཡེ་རྫོགས་ངོ་མཚར་ཆེ། །ཡེ་ཡོད་འབྲས་བུ་རང་ཐོབ་ལ། །དམིགས་གཏད་མེད་པ་ངོ་མཚར་ཆེ། །མ་བཙལ་ཅོག་བཞག་ཆོས་ཉིད་ལ། །ཐམས་ཅད་ཀུན་གསལ་ངོ་མཚར་ཆེ། །རང་བཞིན་རྟོགས་པའི་སྐུ་གསུམ་ལ། །ཅིག་ཅར་རྫོགས་པ་ངོ་མཚར་ཆེ། །བརྡལ་བ་ཆེན་པོའི་ནང་དབྱིངས་ལ། །མཐའ་ལ་ཐུག་མེད་ངོ་མཚར་ཆེ། །སྟོང་པ་ཆེན་པོའི་ཤེས་རབ་ལ། །གཞལ་དུ་མེད་པ་ངོ་མཚར་ཆེ། །འབྲས་བུ་ཀུན་བཟང་སྟོང་ཉིད་ལ། །དངོས་པོ་ཟད་པ་ངོ་མཚར་ཆེ། །དངོས་མེད་ཡེ་ཤེས་ཟང་ཐལ་ལ། །གཟུང་བ་མེད་པ་ངོ་མཚར་ཆེ། །རང་བཞིན་བབས་ཀྱི་སྣང་བ་ལ། །མཐོང་བ་མེད་པ་ངོ་མཚར་ཆེ། །གསང་མཆོག་ངེས་པའི་ཚིག་དེ་ཀུན། །སྟོན་པ་སུས་ཀྱང་གསུངས་པ་མེད། །རང་བྱུང་ཆེན་པོའི་ནམ་མཁའ་ལ། །རང་རྩལ་རིག་པ་མ་འགགས་པ། །སྤྲོས་མེད་ཆོས་ཉིད་རང་སྒྲར་ནི། །མ་བསྟན་རང་བྱུང་ཐོག་མར་གྲག །རྒྱུན་ཆད་མེད་པར་ཆོས་ཀུན་ཚིག །རང་གི་སྒྲར་ནི་ཡེ་ནས་གྲག །རང་བྱུང་ཡེ་ཤེས་ཚིག་གིས་མཚོན། །རང་ལས་རང་བྱུང་ཤར་གྲོལ་བས། །རང་བྱུང་ཆེན་པོའི་ཚིག་ཏུ་བཟུང་། །དེ་སྐད་དུ་སྟོན་པ་རིག་སྟོང་ཀུན་ཏུ་བཟང་པོ་ཉིད་རང་ལ་རང་ངོ་མཚར་བའི་ཆེ་བ་བརྗོད་དེ་ལྷམ་མེར་བཞུགས་སོ། །དེའི་ཚེ་འཁོར་རྣམས་ཀྱི་ནང་ནས། ལོངས་སྤྱོད་རྫོགས་པའི་སྐུ་སེམས་དཔའ་རྡོ་རྗེ་ཞེས་བྱ་བ་ཉིད་ཀྱི་ཐུགས་ཀྱི་རྩལ་ཟེར་ལས་རང་བྱུང་བ་ཉིད་དང་། འཁོར་རྣམས་ཀྱི་རྡོ་རྗེ་གླུས་འདི་སྐད་དུ་བསྐུལ་ལོ། །
ཨེ་མ་ཧོ། ཀྱེ་ཧོ་སྟོན་པ་ཀུན་ཏུ་བཟང་། །ཆོས་དབྱིངས་སྤྲོས་བྲལ་ཐུགས་ཀློང་ནས། །རང་གསལ་ཡེ་ཤེས་མཁྱེན་པ་ཡིས། །ཞལ་ཕྱག་རྫོགས་ཤིང་འགྲོ་བའི་ཡབ། །སངས་རྒྱས་མེས་པོ་ཡང་རྗེ་བསྟོད། །ཨེ་མ་ཀུན་བཟང་ཀློང་ཆེན་རབ་འབྱམས་གསོན། །དེ་ལྟར་ངོ་མཚར་གད་རྒྱངས་དེ། །ཀུན་གྱིས་ཐོས་ཀྱང་རྟོགས་དཀའ་བས། །ཡང་གསང་ཐིག་ལེ་ཆེན་པོ་འདི། །ཀུན་གྱི་སྤྱི་ཕུད་ཀློང་ཆེན་མཆོག །རྒྱས་པར་གནང་བའི་སྐབས་དབྱེ་ཞུ། །དེ་སྐད་དུ་ནི་ཞུས་པ་ལས། །སྟོན་པ་ཉིད་ཀྱིས་བཀའ་སྩལ་པ། །ཨེ་མ་སེམས་དཔའ་རྡོ་རྗེ་ཉོན། །ཀློང་ཆེན་རབ་འབྱམས་རྒྱུད་འདི་ལ། །གཞི་འཁྲུལ་ཁྱབ་ཚུལ་གང་གནས་པ། །ལམ་སྒོ་ཡུལ་གྱི་སྣང་ཡུལ་དང་། །ཐེག་པའི་དབྱེ་བ་རྫོགས་ཚུལ་དང་། །བླ་མས་སློབ་མར་དབང་བསྐུར་དང་། །གྲོལ་བའི་གདམས་ངག་ལག་ཁྲིད་དང་། །ལྟ་སྒོམ་སྤྱོད་པ་བར་དོ་དང་། །ཉམས་བླངས་རྟགས་ཚད་གྲོལ་ཚུལ་ལོ། །འདི་ནི་རྒྱས་པར་བདག་གིས་སྟོན། །མ་ནོར་ངེས་པར་ཡིད་ལ་ཟུང་། །ཆོས་སྒོ་བསམ་ཡས་ཐམས་ཅད་ཀུན། །འདི་རུ་མ་རྫོགས་གང་ཡང་མེད། །ཐེག་པ་ཀུན་གྱི་སྤྱི་ ཕུད་ཡིན། །སྐལ་ལྡན་འཁོར་རྣམས་སྤྲོ་བར་སོམས། །ཞེས་བཀའ་སྩལ་པ་དང་། འཁོར་རྣམས་ཡིད་མགུ་བ་དང་བཅས་སྤྲོ་བར་གྱུར་ཅིང་ཤིན་ཏུ་ངོ་མཚར་བར་གྱུར་ཏོ། །ཐེག་པ་ཀུན་གྱི་སྤྱི་ཕུད། ཀློང་ཆེན་རབ་འབྱམས་ཀྱི་རྒྱུད་ལས། གནང་བའི་སྐབས་དབྱེ་བ་གླེང་སློང་བའི་ལེའུ་སྟེ་དང་པོའོ།། །།དེ་ནས་སྟོན་པ་ཀུན་བཟང་ལ། །སེམས་དཔའ་རྡོ་རྗེས་འདི་སྐད་ཞུས། །ཀྱེ་ཧོ་སྟོན་པ་ཀུན་ཏུ་བཟང་། །བསྟན་པ་འདི་ཡི་རང་གཞུང་གི། །སངས་རྒྱས་སེམས་ཅན་འཁོར་མྱང་འདས། །མ་གྲུབ་ཐོག་མའི་གོང་དག་ནས། །ཀུན་ཁྱབ་ཡེ་ཤེས་ཇི་ལྟར་གནས། །སྟོན་པས་བདག་ལ་བཤད་དུ་གསོལ། །དེ་
སྐད་ཅེས་ནི་གསོལ་པ་ལ། །སྟོན་པ་གྲག་སྟོང་ཚིག་ཏུ་བྱོན། །ཀྱེ་ཧོ་སེམས་དཔའ་རྡོ་རྗེ་ཉོན། །འཁོར་རྣམས་ཡིད་རབ་ཚིམ་བྱའི་ཕྱིར། །མ་གྲུབ་ཐོག་མའི་གོང་རོལ་དུ། །ཀུན་ཁྱབ་ཡེ་ཤེས་གནས་ཚུལ་དེ། །འཛིན་པ་མེད་པའི་སྟོན་པ་ངས། །སྤྲོས་མེད་རང་དག་གཞལ་ཡས་སུ། །ཉིད་དང་དབྱེར་མེད་སྣང་འཁོར་ལ། །མཚན་མ་རིས་མེད་གསུང་གིས་ནི། །སྤྲོས་པ་མེད་པའི་ཚིག་རྣམས་ཀུན། །མི་སྣང་རང་ཟད་ཐུགས་ལས་བྱུང་། །མ་གསུངས་གསུང་བ་མེད་པར་ནི། །མཉམ་པ་ཆེན་པོའི་ངང་དུ་བསྟན། །རང་གསལ་དག་པའི་སྟོན་པ་ངས། །འོད་ལྔ་རྣམ་དག་གཞལ་ཡས་ནས། །སྤྲོས་མེད་གཏེར་ཆེན་གསུང་གིས་ནི། །སྐུ་ལྔ་རིགས་ཀྱི་འཁོར་རྣམས་ལ། །དངོས་མེད་དག་པའི་ཆོས་རྣམས་ནི། །ཡེ་ཤེས་འདུས་པའི་ཐུགས་ལས་ཕྱུང་། །རྣམ་དག་འོད་ཟེར་ལྗགས་ལ་བཀྲམ། །རང་བྱུང་ཡི་གེ་ཐམས་ཅད་དུ། །མ་གསུངས་རང་བྱུང་ཆེན་པོར་བསྟན། །སྤྲུལ་སྐུ་མངོན་ཞེན་མེད་པ་ཡིས། །ཆོས་འབྱུང་འདུས་བྱས་རང་གནས་ནས། །རིགས་དྲུག་ལས་སད་སྐལ་ལྡན་ལ། །སྤྲོས་བཅས་གསུང་གི་ཚིག་གིས་ནི། །དབང་པོ་གང་མོས་ཆོས་རྣམས་ཀྱང་། །དྲན་པ་རང་གསལ་ཐུགས་ནས་ནི། །དབང་པོ་འདོད་མེད་ལྗགས་ལ་བཀྲམ། །ཐེག་པ་གྲངས་ཀྱི་ཆོས་སུ་བསྟན། །ངས་བསྟན་སྤྲོས་པའི་ཚིག་རྣམས་ལ། །དོན་ཆེ་བཀའ་ལ་གྲངས་མང་སྟེ། །འདི་ཀུན་མཚོན་པར་ཁྱོད་ལ་བསྟན། །འགྱུར་བ་མེད་པའི་སེམས་ཀྱིས་ཟུང་། །ཐོག་མར་ཀ་དག་གསལ་སྟོང་ཁྱབ། །སྤྱིར་ཡང་རྒྱ་ཆད་ཕྱོགས་ལྷུང་བྲལ། །ཀུན་གཞི་ཡེ་ནས་བཅོས་བསླད་མེད། །ངོ་བོ་སྟོང་ལ་རང་བཞིན་གསལ། །ཐུགས་རྗེ་ཀུན་ལ་སྣང་ནུས་པའི། །གཞི་དེ་འོད་ཁྱིམ་ལྟ་བུ་ལ། །འགྱུར་བ་མེད་པས་རྡོ་རྗེ་འདྲ། །འགྱུར་བཞི་དམིགས་པའི་རྐྱེན་མི་གནས། །གཞི་དེ་མ་བཅོས་ལྷུན་གྲུབ་ཡིན། །དེ་ཡང་ཡེ་ཤེས་ཆེན་པོ་ཉིད། །
ཐོག་མའི་ཀ་དག་གསལ་སྟོང་ལ། །རང་བཞིན་ཉིད་ནི་འདི་ལྟ་བུ། །སུས་ཀྱང་མ་བྱས་རང་གསལ་ཉིད། །ཡེ་ཉིད་ནས་ནི་རང་བཞིན་ཁྱབ། །རང་བྱུང་ཡེ་ཤེས་རང་ལ་བྱུང་། །མ་དཔྱད་པ་ཡི་ཡུལ་ཅན་ཉིད། །སྔར་འདས་ཕྱིས་བྱུང་ད་ལྟ་མེད། །ལས་དང་བག་ཆགས་མ་རིག་མེད། །ཡིད་དང་འཁོར་བ་ཤེས་རབ་མེད། །མྱང་འདས་དག་ཀྱང་ཡོད་མ་མྱོང་། །རིག་པ་ཉིད་ཀྱང་ཡོད་མ་ཡིན། །ཡེ་ཤེས་སུ་ཡང་སྣང་བ་མེད། །ཀྱེ་མ་རིག་སྟོང་ཉག་གཅིག་ཉོན། །རང་བྱུང་ཡེ་ཤེས་སྲོག་མེད་པས། །དགེ་སྡིག་གཉིས་ཀྱི་མཐའ་ལས་འདས། །རང་བྱུང་ཡེ་ཤེས་བྱ་བྱེད་བྲལ། །རིག་པ་ཉིད་ཀྱི་ཀུན་ཁྱབ་ལ། །བརྡལ་བ་ཆེན་པོ་ཞེས་ཀྱང་བྱ། །དེ་བཞིན་ཉིད་ལས་མི་འགྱུར་བས། །འགྱུར་མེད་ཡེ་ཤེས་ཞེས་ཀྱང་བྱ། །སྐྱེ་ནས་གྲོལ་བའི་གཞི་ཡིན་པས། །དུས་གསུམ་དགོངས་པ་ཞེས་ཀྱང་བྱ། །ངེས་པ་གཅིག་ཏུ་མི་གནས་པས། །བདག་མེད་ཆེན་པོ་ཞེས་ཀྱང་བྱ། །མཐོང་མེད་རོལ་པ་མི་འགག་པས། །འགག་མེད་ཆེན་པོ་ཞེས་ཀྱང་བྱ། །དོན་ལ་བདག་མེད་སྐད་ཅིག་མ། །བརྒྱད་ཁྲི་བཞི་སྟོང་རྣམ་པ་གཉིས། །སྤྲུལ་པ་འགྱེད་པ་ཡིན་པས་ན། །སྤྲུལ་པ་ཆེན་པོ་ཞེས་ཀྱང་བྱ། །དབྱིངས་རིག་གཉིས་ལས་འདས་པ་ཡི། །རང་བྱུང་ཡེ་ཤེས་མི་གཡོ་བ། །སྣང་བའི་རྟོག་པ་རང་ཆོད་པའོ། །རང་བྱུང་ཡེ་ཤེས་འདུ་འབྲལ་མེད། །སྐུ་དང་ཡེ་ཤེས་མངོན་སྣང་ཉིད། །རང་བྱུང་ཡེ་ཤེས་སྣང་མཐའ་བྲལ། །ཡུལ་དང་ཡུལ་ཅན་ཀུན་ལས་འདས། །རང་བྱུང་ཡེ་ཤེས་རྩིས་མེད་པས། །གཟུང་འཛིན་གཉིས་ལས་འདས་པའོ། །རང་བྱུང་ཡེ་ཤེས་ཕྱི་ནང་མེད། །སྐྱོན་དང་ཡོན་ཏན་ཀུན་ལས་འདས། །རང་བྱུང་ཡེ་ཤེས་འཁྲུལ་པ་མེད། །རང་བྱུང་ཡེ་ཤེས་མཐའ་ལས་འདས། །རང་བྱུང་ཡེ་ཤེས་འགྱུ་བྱེད་བྲལ། །རང་བྱུང་ཆེན་པོའི་ཡེ་ཤེས་ལ། །སྟོན་པའི་
སྣང་བ་མ་སྤངས་རྫོགས། །ངོ་བོ་སྣང་སྟོང་གཉིས་མེད་ལ། །མཉམ་ཉིད་སྐྱེ་འགག་གཉིས་སུ་མེད། །སྣང་བ་རིག་པ་གཉིས་མེད་པ། །གནས་ལུགས་རང་བྱུང་གཉིས་མེད་པ། །གཉིས་ཆོས་ཀུན་བྲལ་ཆེན་པོའོ། །གཉིས་མེད་མཐའ་གྲོལ་ཆེན་པོར་གནས། །གཉིས་མེད་ཐིག་ལེ་ཉག་གཅིག་ལ། །གཤིས་ཉིད་མ་གྲུབ་ངོ་བོས་སྟོང་། །ཆོས་ཉིད་ཀྱི་ནི་ལྷུན་གྲུབ་པོ། །ཆོས་རྣམས་ཐམས་ཅད་རྩལ་མ་འགགས། །ཆོས་ཅན་ལྷུན་གྲུབ་ཉིད་དུ་གནས། །ཆོས་རྣམས་ངོ་བོ་ཅིར་མི་རྟོག །གཉིས་མེད་ལྷུན་གྲུབ་ཆེན་པོར་གནས། །དེ་ཉིད་སུས་ཀྱང་བྱས་པ་མེད། །རང་བྱུང་ལྷུན་གྲུབ་གདོད་གནས་ས། །འཁོར་འདས་ཆོས་རྣམས་ཐམས་ཅད་ཀུན། །ལྷུན་གྲུབ་མ་ཡིན་ཆོས་གཞན་མེད། །ལྷུན་གྲུབ་ཆེན་པོར་ཡེ་ནས་གནས། །ཆོས་རྣམས་འབྱུང་རུང་གྲུབ་པ་མེད། །བདེན་པ་རང་རྒྱུད་ཡེ་མི་གནས། །ལྷུན་གྲུབ་མཐའ་བྲལ་ཆེན་པོའོ། །འཁོར་འདས་རང་རིག་ལྷུན་གྲུབ་པོ། །དབྱིངས་ཆེན་རྣམ་དག་ཡེ་ཤེས་དག །ཐ་སྙད་ཆོས་དག་དངོས་པོ་དག །བདེན་པ་ཀ་དག་ཡོད་མེད་དག །གཉིས་མེད་རྣལ་དག་གཉིས་ཆོས་དག །རང་བཞིན་རྣམ་དག་དངོས་མེད་དག །མཐའ་དབུས་ཀ་དག་རྣམ་དག་ཆེ། །མ་སྤངས་རྣམ་དག་གསལ་སྟོང་གནས། །རང་རིག་བྱང་ཆུབ་གཉིས་ཆོས་སངས། །གཉིས་མེད་ཡེ་ཤེས་ཡེ་རྒྱས་ཉིད། །ཡོད་པ་མ་ཡིན་མེད་རྒྱས་མིན། །གཤིས་ལ་གྲུབ་མེད་ཡེ་ནས་རྒྱས། །རང་བཞིན་ཆོས་སྐུ་གདངས་གསལ་ལོ། །གཉིས་མེད་སྤྲུལ་སྐུ་སྟོང་ཇི་ལྟ། །རང་གསལ་ཇི་སྙེད་གཉིས་དབྱེར་མེད། །གསལ་སྟོང་མཁྱེན་པའི་ཡེ་ཤེས་སོ། །གཤིས་ལ་འཁྲུལ་པ་མ་གྲུབ་སྟོང་། །སྤངས་པ་ཕུན་སུམ་ཚོགས་པའོ། །ངོ་བོ་གཉིས་སུ་མེད་པས་ན། །རྟོགས་པ་ཕུན་སུམ་ཚོགས་པར་གནས། །དེ་ལྟར་ཡེ་སངས་མ་རྒྱས་ན། །བསྒོམས་ཀྱང་སངས་རྒྱས་མི་འབྱུང་ངོ་། །ས་ལེ་སྦྲམ་བུ་གསེར་མིན་ན། །བཏུལ་བས་གསེར་དུ་ག་ལ་འགྱུར། །དེ་ལྟར་ཡེ་
སངས་ཡེ་རྒྱས་དེ། །ངོ་བོ་ཉིད་ཀྱི་སྣང་བ་ལ། །ངོ་བོ་ཉིད་ཀྱི་སྐུ་ཤར་ཏེ། །ཆོས་སྐུ་ཐིག་ལེ་ཉག་གཅིག་གོ། །ངོ་བོ་ཉིད་ཀྱི་སྣང་བ་ནི། །ཡེ་ཤེས་ལྷུན་གྲུབ་ཆེན་པོར་བཞུགས། །དེ་ཡང་གནས་ལུགས་འདི་ལྟར་རོ། །རྒྱ་ཆད་མེད་པའི་ཡེ་ཤེས་དང་། །ལྷུན་གྱིས་གྲུབ་པའི་སངས་རྒྱས་དང་། །སྤྲོས་དང་བྲལ་བའི་ཆོས་ཉིད་དང་། །མཐའ་དང་བྲལ་བའི་རིག་པ་དང་། །དག་པ་ཆེན་པོའི་སྣང་བ་དང་། །ཕྱོགས་ལྷུང་མེད་པའི་ལྟ་བ་དང་། །སྤང་ཐོབ་མེད་པའི་འབྲས་བུ་དང་། །ཡངས་པ་གསལ་བ་མི་འགྱུར་བ། །ཟང་ཐལ་ཡེ་ཤེས་མ་འགགས་པ། །མ་འཁྲུལ་པ་ཡི་ཆོས་ཉིད་དོ། །ཕྱི་ཡི་རྒྱ་ཡང་མ་རལ་ཏེ། །ནང་དུ་འོད་ལྔ་མ་འགགས་པ། །སྐུ་དང་ཡེ་ཤེས་འདུ་འབྲལ་མེད། །ངོ་བོ་སྟོང་པ་ཆོས་ཀྱི་སྐུ། །ཀ་དག་ཆེན་པོའི་ཡེ་ཤེས་ནི། །མ་རིག་ལ་སོགས་རྟོག་པ་འགག །རང་བཞིན་གསལ་བ་ལྷུན་གྲུབ་སྐུ། །རང་བཞིན་ཡེ་གྲུབ་ཡེ་ཤེས་ནི། །གསལ་བྱེད་རང་དྭངས་ཉིད་དུ་གནས། །དགོངས་པ་ཡངས་པ་ཡེ་ཤེས་སྐུ། །ཡེ་ཤེས་མཁྱེན་པའི་རྫོགས་པའི་ཆ། །ཤུགས་ཀྱི་སེམས་ཅན་རྣམས་ལ་འཆར། །ཐུགས་རྗེ་ཀུན་ཁྱབ་སྤྲུལ་པའི་སྐུ། །ཡེ་ཤེས་རོལ་པ་ཆོས་སྐུའི་རྩལ། །འགག་མེད་ཆོ་འཕྲུལ་ཅིར་ཡང་སྣང་། །ངོ་བོ་ཀ་དག་ཡེ་ཤེས་ལ། །མ་རིག་པ་ཞེས་སྲིད་མེད་པས། །གཅིག་དང་གཉིས་ཀྱི་གྲངས་མེད་པས། །གང་དུ་འང་མ་ཕྱེ་ཆོས་ཉིད་ལ། །ཡེ་ཤེས་ཙམ་དུ་གྲུབ་པ་མེད། །རང་བཞིན་ལྷུན་གྲུབ་ཡེ་ཤེས་ཞེས། །རྩལ་དང་ཡོན་ཏན་འགག་མེད་པས། །རོལ་པ་ཙམ་དུ་སྣང་བ་ལས། །སྣ་ཚོགས་རྫོགས་པའི་གཞི་མའོ། །དགོངས་པ་ཡངས་པའི་ཡེ་ཤེས་ལ། །འཁྲུལ་ཞེས་ཙམ་དུ་བརྗོད་དུ་མེད། །དེ་བཞིན་མ་འཁྲུལ་པ་ཡང་ཅི། །དེ་ཕྱིར་འཁྲུལ་པ་གདོད་ནས་དག །མ་རིག་པ་ཉིད་ཡོད་མ་མྱོང་། །རིག་པ་ཙམ་དུ་གྲག་པ་མེད། །རིག་མ་རིག་གི་ཐ་སྙད་
འདས། །འཁྲུལ་མ་འཁྲུལ་ཡང་གྲག་པ་མེད། །ཐུགས་རྗེས་ཀུན་ཁྱབ་ཡེ་ཤེས་ལས། །མི་མཛད་སྣ་ཚོགས་ཤར་བའི་སྒོ། །མཛད་པ་ལྟར་སྣང་ངོ་བོར་རྫོགས། །ཆོས་སྐུ་སྟོང་པའི་རང་བཞིན་ལས། །ཡེ་ཤེས་ཐུགས་རྗེ་མཁྱེན་བརྩེ་ཤར། །ངང་གིས་སེམས་ཅན་རྣམས་ལ་ཤར། །འདི་མེད་འཁོར་འདས་སྡེ་ཆད་པས། །མཁྱེན་པ་རིག་ཅིང་གསལ་བ་དེ། །རྩལ་ལྡན་རྩལ་ཕྱིར་དེ་མི་འདྲེང་། །ང་ཡིན་ང་ལ་བདག་གཟུང་མེད། །ངོ་བོ་ཉིད་ལ་འཁོར་འདས་གསལ། །སྟོབས་དང་ཤུགས་གཉིས་འཆང་བའི་བདག །བཞི་ལྡན་ཆོས་སྐུའི་ཚུལ་དུ་བཞུགས། །དེ་ལྟར་ཆོས་སྐུ་ཀ་དག་ནི། །ནམ་མཁའི་དཀྱིལ་ལྟར་འགྱུར་ཟློག་མེད། །རི་རབ་ལྟ་བུར་གཡོ་འགུལ་མེད། །རྒྱ་མཚོ་ལྟ་བུར་ཁ་གཏིང་མེད། །གསེར་དངུལ་ལྟ་བུར་འགྱུར་བ་མེད། །འདི་ཉིད་ཆོས་སྐུ་ཀ་དག་ཡིན། །དེ་ཡི་སྙིང་པོ་ཡེ་ཤེས་ནི། །འཁོར་དང་འདས་པ་མི་གནས་པའི། །ཆོས་ཉིད་སྟོང་པ་ཀུན་ཁྱབ་པས། །ཡེ་ཤེས་རང་ངོར་གནས་པ་ལ། །གསུམ་དང་བཞི་རུ་དབྱེར་མེད་དོ། །ཀ་དག་ལྷུན་གྲུབ་གཞི་དེ་ལ། །ངོ་བོ་རང་བཞིན་ཐུགས་རྗེ་གསུམ། །ཡེ་ཤེས་སྒྲིབ་གཡོགས་ཡེ་གྲོལ་གནས། །ཐེག་པ་བསམ་ཡས་གནས་ལུགས་ཉིད། །ཡེ་ཤེས་གསུམ་དང་སྐུ་བཞིའི་ཀློང་། །ཡེ་ཤེས་གསུམ་གྱིས་གཞི་ཁྱབ་སྟོན། །སྐུ་ནི་བཞི་ལྡན་དགོངས་པ་ཡང་། །ཡེ་ཤེས་ཟང་ཐལ་ཉིད་དུ་གནས། །ཟང་ཐལ་དེ་ཡི་བཀྲག་མདངས་ཡང་། །རང་བྱུང་ཡེ་ཤེས་འོད་སྐུར་ཤར། །དཔེར་ན་ཉི་མའི་སྙིང་པོ་འདྲ། །དེ་ཡང་ཆོས་སྐུ་ཡེ་ཤེས་ལ། །མདུན་རྒྱབ་མེད་པར་ཟང་ཐལ་ལེ། །ཡེ་ཤེས་ལུས་ཅན་དེ་བཞིན་གཤེགས། །ཡེ་ཤེས་ལུས་དེ་ལུས་ཀྱི་མཆོག །ཡེ་ཤེས་ལུས་ལ་ཤ་ཁྲག་མེད། །སྤྲོས་བྲལ་ཡེ་ཤེས་ཀ་དག་ནི། །ངོ་བོ་རྣམ་དག་སྙིང་པོའི་གཞི། །དེ་ལ་ཚིག་དང་ཡི་གེ་བྲལ། །བརྗོད་པས་གཏན་ལ་དབབ་ཏུ་མེད། །སྒྲོ་འདོགས་ཐ་
སྙད་ཀུན་དང་བྲལ། །གཟུང་འཛིན་འགྱུ་བ་རྣམ་རྟོག་མེད། །སངས་རྒྱས་སེམས་ཅན་ཡེ་མ་གྲུབ། །ཆོས་མེད་ཆོས་ཀྱི་འདུ་ཤེས་མེད། །གང་མེད་ཅི་མེད་ཅི་ཡང་མེད། །རིན་ཆེན་འོད་འབར་སྐུ་རུ་བཞུགས། །ཡེ་ཤེས་སྤྱན་ལ་གསལ་འགྲིབ་མེད། །གསལ་དྭངས་ཟང་ཐལ་ཆེན་པོར་ཁྱབ། །ཡེ་ཤེས་འོད་ལ་ཕྱི་ནང་མེད། །ཡེ་གསལ་ཟང་ཐལ་ཉིད་དུ་བཞུགས། །ཡེ་ཤེས་ཐུགས་ལ་ཡངས་དོག་མེད། །སྟོང་གསལ་མདངས་ལྔ་ཉིད་དུ་བཞུགས། །ཁ་དོག་མ་ཡིན་རང་གསལ་བས། །ཤེས་ཤིང་རིག་པའི་ཆ་རྣམས་ཚང་། །འཛིན་པས་གཟུང་ཡུལ་གང་མེད་ཕྱིར། །རྣམ་པར་རྟོག་པའི་འཛིན་ཆགས་མེད། །འོད་གསལ་འདས་པའི་ཡེ་ཤེས་སུ། །རྣམ་དག་ཕྱག་རྒྱ་ཆེན་པོར་གནས། །རང་བཞིན་སྣང་བའི་ཀློང་ཆེན་ན། །མཚན་མའི་དམིགས་པ་ཡེ་མེད་དོ། །དོན་གྱི་ཆ་ལ་འདི་ལྟར་གནས། །རང་མདངས་སྐྱེད་པ་དཀར་པོའི་ཆ། །གཏིང་གསལ་ཆེན་པོ་ཉིད་དུ་གནས། །གཏིང་གསལ་ངོ་བོའི་བཀྲག་བསྐྱེད་པས། །སྣང་བ་རང་ཟད་སེར་པོའི་ཆ། །མི་མངོན་གཏིང་ནས་རང་ངོ་གསལ། །རང་ངོ་ཆགས་མེད་མདངས་བསྐྱེད་པས། །རང་གི་བཅིངས་པ་བྲལ་བ་ཡིས། །ཆགས་པ་རང་ཟད་དམར་པོའི་ཆ། །གཏིང་གསལ་མ་འདྲེས་ཆེན་པོར་གནས། །མ་འདྲེས་སོ་སོའི་མཚན་འཛིན་པ། །བྱ་བཙལ་བསྐྱོད་པ་བྲལ་བ་ཡིས། །མཛད་པ་མེད་པའི་ལྗང་གུར་ནི། །ཐོག་མ་རྣམས་ཀྱི་ཟེར་དུ་ཡང་། །མི་མངོན་གཏིང་ནས་གསལ་བའི་ཆ། །གཏང་གསལ་ཁྱབ་པའི་འདྲེལ་བྱེད་པའི། །འགྱུར་མེད་རྫོགས་པའི་མཐིང་ག་ནི། །ཡེ་རྫོགས་བྱས་པ་མེད་པར་གནས། །སྐུ་ནི་སྣང་ལ་མཚན་ཉིད་བྲལ། །ཡེ་ནས་རང་དག་ཆེན་པོ་ལ། །རྫོགས་ཆེན་རྣམས་ཀྱི་རྩེ་མོར་གནས། །དེ་ཡང་དངོས་པོར་མ་གྲུབ་པས། །རྟག་པ་ཐེར་ཟུག་ཅན་དུ་མེད། །རྒྱ་ཆད་ཅན་དུ་མ་ཡིན་ཏེ། །རང་བཞིན་འོད་གསལ་ཚུལ་དུ་
བཞུགས། །གདོས་བཅས་མཚན་མ་རང་དག་ཕྱིར། །གཏིང་གསལ་ཆེན་པོའི་གཞི་མར་གནས། །ཁྱབ་དང་ཁྱབ་པ་ཉིད་ཀྱིས་སྟོང་། །ཕྱོགས་སུ་ཆད་པ་མེད་པར་གནས། །སྟོང་གསལ་ཡིན་པས་གཉིས་མཐའ་ཟད། །རྟག་ཆད་གཉིས་ཀྱི་མཐའ་ལས་འདས། །གསལ་བྱེད་སྣང་བའི་ཆ་མ་འགགས། །རིག་གཞན་མེད་ཅིང་རང་སར་དག །རང་བཞིན་གྱི་ནི་ཆ་ལ་བཞུགས། །ངོ་བོ་ཉིད་ཀྱི་སྣང་བ་ནི། །ཡེ་ཤེས་ཁ་དོག་ལྔ་ལྡན་ཏེ། །རང་བཞིན་བཀྲགས་མདངས་མེ་རེ་རེ། །གསལ་འཚེར་ལྷུན་སྡུག་ཙེ་རེ་རེ། །ཉི་མ་ལས་ནི་འོད་བཞིན་དུ། །རང་གིས་བྱས་པ་མ་ཡིན་ཏེ། །རང་གི་རང་བཞིན་དེ་ལྟར་སྣང་། །ངོ་བོ་མི་འགྱུར་སྐུར་བཞུགས་པ། །སྐུ་གསུམ་འདུ་འབྲལ་མེད་པ་ཡི། །ཐམས་ཅད་འཆར་བའི་གཞིར་གནས་ཏེ། །མཚན་མ་རིས་ཀྱི་ཞལ་ཕྱག་མེད། །རང་བཞིན་གསལ་བའི་མདངས་ལྔ་ཡང་། །གཞོན་ནུ་བུམ་སྐུའི་ཚུལ་བཞུགས་ཏེ། །ཁ་དོག་རིས་བཟུང་གྲུབ་པ་མེད། །ཐུགས་རྗེ་རིག་པའི་ཡེ་ཤེས་སུ། །ལྷུན་གྲུབ་བཞུགས་ཅིང་མཁྱེན་མ་འགགས། །སོ་སོར་གསལ་བ་གཉིས་གྱུར་ཀྱང་། །བྱ་བ་བྱེད་དང་བྱེད་དངོས་མེད། །གསུང་ནི་རང་བཞིན་དོན་གྱི་གསུང་། །གྲག་སྟོང་ཆོས་ཀྱི་སྒྲ་རུ་གནས། །རིས་མེད་ཤེས་བྱའི་བབ་ལས་གྲུབ། །འདི་འདྲ་གཅིག་ན་མ་ངེས་པས། །སྣ་ཚོགས་སྣང་བ་གསུང་གི་གཞི། །ཐུགས་ནི་རྟོག་མེད་ངང་ལ་གནས། །ང་དང་བདག་ཏུ་འཛིན་པ་མེད། །དབང་པོ་ལྔ་ལ་རག་མ་ལུས། །མ་རིག་པ་ཡི་དྲི་མ་བྲལ། །ཉོན་མོངས་པ་ཡི་ཡིད་མ་སྐྱེས། །འཁྲུལ་པའི་ཚིག་གིས་གནོད་པ་བྲལ། །ཡིད་ཀྱི་རྣམ་པར་ཤེས་པ་མེད། །ཐམས་ཅད་དབྱིངས་གཅིག་ཐ་དང་བྲལ། །ཡེ་ཤེས་མེད་ཅིང་སྐུ་ཡང་མེད། །འོད་མེད་ཁ་དོག་རྣམས་དང་བྲལ། །རིག་པ་སྒོ་ལྔ་དག་ལ་ཡན། །རྣམ་པར་ཤེས་པའི་ཚོགས་བརྒྱད་བྲལ། །ཉོན་མོངས་མ་སྐྱེས་ཀ་ནས་དག །སྣང་
བ་མ་སྨོས་ཡོད་པ་མེད། །དང་པོ་ནས་དག་ཐོག་མ་དག །གདོད་མ་ནས་དག་དག་ཆེན་པོ། །ཀ་ཞེས་ཐོག་མར་བྱུང་བ་ལ། །དག་པ་དྲི་མའི་གྲངས་མཐའ་ཟད། །ངོ་བོ་ཡེ་དག་ཆེན་པོ་ལ། །རང་བཞིན་རང་དག་ཐུགས་རྗེ་ནི། །ཤུགས་འབྱུང་དག་ཏུ་ཡེ་གནས་སོ། །ངོ་བོ་སྟོང་པ་ཐ་སྙད་བྲལ། །རང་བཞིན་ཡེ་གསལ་རྒྱུ་རྐྱེན་བྲལ། །ཐུགས་རྗེ་ཀུན་ཁྱབ་ཆ་ཤས་བྲལ། །ངོ་བོ་ཀ་དག་བརྗོད་གཞི་བྲལ། །རང་བཞིན་ལྷུན་གྲུབ་ཅིར་སྣང་རྫོགས། །ཐུགས་རྗེ་ཀུན་ཁྱབ་རང་ཤར་རོ། །ངོ་བོ་སྟོང་པས་རྟག་མཐའ་བྲལ། །རང་བཞིན་གསལ་བས་ཆད་འཛིན་བྲལ། །ཐུགས་རྗེ་ཁྱབ་པས་གཉིས་མཐའ་བྲལ། །ངོ་བོ་སྟོང་གསལ་དབྱེར་མེད་ལ། །རང་བཞིན་གསལ་སྟོང་དབྱེར་མེད་དེ། །ཐུགས་རྗེ་རིག་སྟོང་དབྱེར་མེད་དོ། །ངོ་བོ་ཀ་དག་ནམ་མཁའ་འདྲ། །རང་བཞིན་རྒྱ་མཚོ་དྭངས་པ་འདྲ། །ཐུགས་རྗེ་ནོར་བུ་དྲི་མེད་འདྲ། །ངོ་བོ་སྐུ་ལ་རང་བཞིན་འོད། །ཐུགས་རྗེ་རིག་པ་ཡེ་ཤེས་སོ། །སྒྲིབ་མེད་ཡེ་ཤེས་གསུམ་དང་ལྡན། །ངོ་བོ་ཀ་དག་ཡེ་ཤེས་དང་། །རང་བཞིན་ལྷུན་གྲུབ་ཡེ་ཤེས་དང་། །ཐུགས་རྗེ་རང་སྣང་ཡེ་ཤེས་གསུམ། །འབྲལ་མེད་གཅིག་སྟེ་ཕྱོགས་མེད་གནས། །ངོ་བོ་ཀ་དག་ཡེ་ཤེས་ནི། །མ་རིག་རྟོག་པ་ཀུན་དང་བྲལ། །རང་བཞིན་ལྷུན་གྲུབ་ཡེ་ཤེས་ནི། །འཁྲུལ་པའི་ཚིག་གི་ཐ་སྙད་བྲལ། །ཐུགས་རྗེ་རང་སྣང་ཡེ་ཤེས་ནི། །ཐམས་ཅད་དབྱིངས་རིག་གཅིག་ཏུ་གནས། །ཡེ་ཤེས་རང་ལ་རང་གནས་ཕྱིར། །གསུམ་གྱི་ཚུལ་དུ་དབྱེར་མེད་དོ། །རྣམ་གྲངས་ཀུན་གྱི་མཐའ་ལས་འདས། །ཇི་ལྟ་མཁྱེན་པའི་ཡེ་ཤེས་དང་། །ཇི་སྙེད་མཁྱེན་པའི་ཡེ་ཤེས་ཀྱིས། །རང་གི་དངོས་པོའི་གནས་ལུགས་དང་། །གདུལ་བྱ་ཀུན་གྱི་བསམ་པ་མཁྱེན། །རིག་པའི་ངོ་བོ་འཁྲུལ་མ་མྱོང་། །རང་བཞིན་ཉིད་ལ་འཁྲུལ་མི་གནས། །ཐུགས་རྗེ་ཉིད་ནི་འཁྲུལ་མི་སྲིད། །ཁམས་
གསུམ་ཀ་དག་ཆེན་པོར་གནས། །རྣམ་པ་ཐམས་ཅད་མཁྱེན་པ་ཡི། །ཡེ་ཤེས་ཆེན་པོ་གཅིག་ཏུ་བཞུགས། །ཡེ་ཤེས་དེ་ཡི་ཕྲིན་ལས་ནི། །སྐུ་ལྔ་དང་ནི་ཡེ་ཤེས་ལྔ། །འོད་ལྔ་ཞིང་ལྔ་ཕྲིན་ལས་ལྔ། །རིགས་ལྔ་ཡུམ་ལྔ་གཞི་ལྔ་དང་། །ལམ་ལྔ་འབྲས་བུ་རང་མདངས་ལྔ། །དེ་སོགས་ལྔ་ཚན་སོ་ལྔ་ནི། །ཡེ་ཤེས་གཅིག་གི་ངོ་ལ་རྫོགས། །ཆོས་སྐུའི་ཀློང་ནས་ཐོགས་མེད་ཤར། །ལོངས་སྐུའི་ངོས་ནས་མ་འགགས་ཤར། །མི་མཛད་སྣ་ཚོགས་འཆར་བའི་སྒོ། །མཛད་པ་ལྟར་སྣང་ངོ་བོར་རྫོགས། །ཐུགས་རྗེ་སྤྲུལ་སྐུར་གནས་པའོ། །དེ་ཡང་གནས་ལུགས་འདི་ལྟ་སྟེ། །རིག་པའི་ངོ་བོ་སྐུ་ལྔར་བཞུགས། །སྐུ་ནི་སྣང་ལ་མཚན་ཉིད་བྲལ། །སྟོང་གསལ་འདུས་པའི་ཡེ་ཤེས་མདངས། །ངོ་བོ་ཀ་ནས་དག་པའི་ཆ། །སྐུ་གསུམ་གྱི་ནི་གཞི་ཙམ་ལས། །ཞལ་ཕྱག་དུ་ནི་གྲུབ་པ་མེད། །ཁ་མིག་རྣ་བ་ཡོད་པ་ན། །གཟུགས་ཅན་ཡིད་ཙམ་གཉིས་སོང་སྲིད། །གཟུགས་ཅན་འགྲོ་དྲུག་ཕལ་པ་སྟེ། །གཟུགས་མེད་སྐྱེ་མཆེད་མུ་བཞིའོ། །མཚན་མ་བྱུང་ན་ཀ་དག་མིན། །སྟོང་གསལ་ཆེན་པོའི་སྐུ་ལྔའོ། །སྐུ་ལྔའི་སྙིང་པོ་ཡེ་ཤེས་ལྔ། །ཡེ་ཤེས་བཀྲགས་མདངས་འོད་ལྔར་ཤར། །གཞི་ཡི་མཚན་ཉིད་ཡེ་ཤེས་ལྔ། །སྐུ་ལྔ་དབྱེ་ན་འདི་ལྟ་སྟེ། །ཐིག་ལེ་ཉག་གཅིག་སྐུ་དང་གཅིག །འོད་ཟེར་མི་འགྱུར་སྐུ་དང་གཉིས། །རིག་པ་ཀུན་བཟང་སྐུ་དང་གསུམ། །རིག་པ་རྩལ་རྫོགས་སྐུ་དང་བཞི། །རང་བཞིན་ལྷུན་གྲུབ་སྐུ་དང་ལྔའོ། །སྙིང་པོ་ཡེ་ཤེས་རྣམ་ལྔ་ནི། །ཆོས་སྐུའི་ངོ་བོ་རང་སྟོང་པས། །ཆོས་དབྱིངས་འགྱུར་མེད་ཡེ་ཤེས་སོ། །སྟོང་པའི་རང་མདངས་རང་གསལ་བས། །མེ་ལོང་ལྟ་བུའི་ཡེ་ཤེས་སོ། །སྟོང་གསལ་མ་ཕྱེ་གཉིས་མེད་པས། །མཉམ་ཉིད་ཆེན་པོའི་ཡེ་ཤེས་སོ། །ཡོན་ཏན་སོ་སོར་རང་ཤར་བས། །སོ་སོར་རྟོག་པའི་ཡེ་ཤེས་སོ། །དེ་དག་གཞི་ལ་ལྷུན་གྲུབ་པས། །བྱ་བ་གྲུབ་པའི་ཡེ་ཤེས་སོ། །དེ་ཡི་བཀྲགས་
མདངས་འོད་ལྔར་ཤར། །ཆོས་སྐུ་མི་འགྱུར་འོད་ཟེར་མཐིང་། །རིག་པ་དྲི་མེད་འོད་ཟེར་དཀར། །རིག་པ་འོད་ལྡན་འོད་ཟེར་སེར། །རིག་པ་བདེ་གསལ་འོད་ཟེར་དམར། །རིག་པ་འགག་མེད་འོད་ཟེར་ལྗང་། །འོད་ཟེར་དེ་དག་སྣང་ཚུལ་ནི། །འཕྲ་ལ་དྭངས་ཤིང་གསལ་ལ་འཚེར། །རང་བཞིན་བཀྲགས་མདངས་མ་ཉམས་པ། །སོས་ཀའི་སྨིག་སྒྱུ་ལྟ་བུ་རུ། །རྒྱ་མཚོར་གཟའ་སྐར་ཤར་བ་འདྲ། །བལྟས་པས་མི་ངོམས་མཚན་དཔེར་ལྡན། །ཡེ་ཤེས་འོད་དང་ཁ་དོག་ལྔ། །བཅོ་ལྔ་དུས་གཅིག་འདུས་པ་ལ། །ཀ་དག་བབས་ཀྱི་སངས་རྒྱས་ཟེར། །དེ་ཡི་གནས་ཚུལ་ཤེས་པ་ལ། །ཡེ་ནས་ཇི་བཞིན་སངས་རྒྱས་ཟེར། །དེ་ཡི་མཚན་ཉིད་ཤེས་པ་ལ། །རང་བཞིན་ལྷུན་གྲུབ་སངས་རྒྱས་ཟེར། །དེ་ཡི་རྟོགས་ཚུལ་ཤེས་པ་ལ། །རྟོགས་པ་མངོན་གྱུར་སངས་རྒྱས་ཟེར། །ངོ་བོ་ཉིད་ཀྱི་སྣང་བ་ལ། །ངོ་བོ་ཉིད་ཀྱི་སྐུ་ཤར་བས། །ཡེ་ཉིད་ནས་ནི་བུཌྜྷའོ། ། ཐམས་ཅད་གཞི་ལ་ལྷུན་གྲུབ་པས། །སངས་རྒྱས་སྐུ་ལྔའི་བདག་ཉིད་ཅན། །རྟག་ཆད་གཉིས་ཀྱི་མཐའ་ལས་འདས། །རང་གྲོལ་མཐའ་ཡི་དྲི་མ་སངས། །རྒྱུ་མེད་རྐྱེན་ལས་འདས་པའོ། །ལྷུན་གྲུབ་རེ་དང་དོགས་ལས་གྲོལ། །ཀ་དག་ཡིན་ཕྱིར་ཀུན་ལས་གྲོལ། །རང་འཛིན་མེད་པས་ཉོན་མོངས་གྲོལ། །གཟུང་འཛིན་མེད་པས་རྣམ་ཤེས་གྲོལ། །སྐྱེ་འགག་མེད་པས་སྒོ་ལྔ་གྲོལ། །བཅོས་བསླད་མེད་པས་རྟོག་པ་གྲོལ། །དྲི་མ་མེད་པས་འབྱུང་བཞི་གྲོལ། །འོད་གསལ་སྟོང་པ་སྐུ་ལྔར་ལྡན། །དེ་ནི་གཞི་ཡི་བཞུགས་ཚུལ་ཡིན། །ཆོས་སྐུ་ཡེ་ཤེས་ཆེན་པོ་ནི། །མཚན་ཉིད་རྣམ་པ་གསུམ་དང་ལྡན། །ངོ་བོ་རང་བཞིན་ཐུགས་རྗེ་གསུམ། །ཆོས་ཀྱི་སྐུ་ཡི་མཚན་ཉིད་ཡིན། །མི་འཇིག་སྟོང་དང་གསལ་བ་དང་། །བྱ་བ་ཐམས་ཅད་རྫོགས་པ་ནི། །ཆོས་ཀྱི་སྐུ་ཡི་མཚན་ཉིད་ཡིན། །འགྱུར་མེད་འགག་མེད་ཁྱབ་པ་གསུམ། །ཆོས་ཀྱི་སྐུ་ཡི་ངེས་ཚིག་ཡིན། །
གསལ་དང་དྭངས་དང་མ་འདྲེས་གསུམ། །ཆོས་ཀྱི་སྐུ་ཡི་ཡུལ་ཡིན་ནོ། །དཔག་མེད་དམིགས་མེད་འཛིན་པ་མེད། །ཆོས་ཀྱི་སྐུ་ཡི་གནས་ཡིན་ནོ། །འགག་མེད་ཞེན་མེད་ཆགས་པ་མེད། །ཆོས་ཀྱི་སྐུ་ཡི་སྤྱོད་པ་ཡིན། །ལྷན་ནེ་ལྷང་ངེ་ཡེངས་པ་མེད། །ཆོས་ཀྱི་སྐུ་ཡི་བསྒོམ་པ་ཡིན། །བལྟར་མེད་བལྟས་ཟིན་ལྟ་བ་རྫོགས། །ཆོས་ཀྱི་སྐུ་ཡི་ལྟ་བ་ཡིན། །བྱས་མེད་འབྱུང་མེད་བྱུང་ས་མེད། །ཆོས་ཀྱི་སྐུ་ཡི་འབྲས་བུ་ཡིན། །བསྒྲུབ་མེད་བསྒྲུབས་ཟིན་སྒྲུབ་དང་བྲལ། །ཆོས་ཀྱི་སྐུ་ཡི་ཕྲིན་ལས་ཡིན། །གཅིག་བྱུང་གཉིས་བྱུང་ཐམས་ཅད་བྱུང་། །ཆོས་ཀྱི་སྐུ་ཡི་ཡོན་ཏན་ཡིན། །འགག་མེད་གསལ་སྟོང་ངོ་བོས་སྟོང་། །ཆོས་ཀྱི་སྐུ་ཡི་སྣང་བ་ཡིན། །ཕྱི་མེད་ནང་མེད་དབྱིངས་སུ་མེད། །ཆོས་ཀྱི་སྐུ་ཡི་རང་ལུས་ཡིན། །འགྲོ་མེད་འོང་མེད་གནས་པ་མེད། །ཆོས་ཀྱི་སྐུ་ཡི་རང་རྟགས་ཡིན། །ཉི་ཟླ་པདྨ་རྒྱ་མཚོ་ཤེལ། །ཆོས་ཀྱི་སྐུ་ཡི་མཚོན་དཔེ་ཡིན། །ཆོས་སྐུའི་ཡེ་ཤེས་དེ་ལྟར་གནས། །ལོངས་སྐུའི་ཡེ་ཤེས་ལྔ་ལྔ་ནི། །དབྱེ་ན་བསམ་གྱིས་མི་ཁྱབ་དེ། །ཁ་དོག་མ་འདྲེས་སོ་སོར་གསལ། །མཚན་དང་དཔེ་བྱད་འོད་ཟེར་འབར། །ཡབ་ཡུམ་སྐུ་ཡི་ཆ་ལུགས་འཛིན། །ལོངས་སྤྱོད་རྫོགས་སྐུའི་ཆ་ལུགས་ཡིན། །སྐྱེ་མེད་འཆི་མེད་རྡོ་རྗེའི་སྐུ། །འོད་ལྔ་སྐུ་ལྔ་ཡེ་ཤེས་ལྔ། །ཡབ་ལྔ་ཡུམ་ལྔ་ཚོམ་བུ་ལྔ། །ཞིང་ཁམས་རྟོག་པ་ལྔ་དང་ལྡན། །གཞི་ལྔ་ལམ་ལྔ་འབྲས་བུ་ལྔ། །གནས་ལྔ་ཡུལ་ལྔ་ངོ་བོ་ལྔ། །ལོངས་སྤྱོད་རྫོགས་སྐུའི་ངོ་བོ་ཡིན། །ཆོས་ཉིད་ངང་ལ་གནས་པས་ལོངས། །གསལ་ལ་མ་འདྲེས་ཁྱབ་པས་ལོངས། །ཐབས་ཤེས་གཉིས་སུ་མེད་པས་ལོངས། །གྱི་ན་བལྟར་མི་བཟོད་པས་ལོངས། །འཛིན་མེད་རང་སར་སྤྱོད་པས་སྤྱོད། །གསལ་ལེ་སིང་ངེ་མཉམ་པས་སྤྱོད། །གནས་ཤིང་སྤྲུལ་པ་འགྱེད་པས་སྤྱོད། །སྐུ་དོན་མཐར་ཕྱིན་རོལ་པས་སྤྱོད། །རང་བྱུང་རང་ལ་ཐིམ་རོལ་སྤྱོད། །བྱ་བྱེད་ཀུན་ལས་འདས་
པས་རྫོགས། །དམིགས་མེད་དོན་ལ་གནས་པས་རྫོགས། །ཕྱོགས་ལྷུང་འགྲོ་འོང་མེད་པས་རྫོགས། །བྱས་པ་མེད་པས་རང་བྱུང་རྫོགས། །མ་སྤངས་སྐུ་ལྔ་ལྷུན་གྲུབ་རྫོགས། །གསལ་སྟོང་ཡེ་མེད་རྫོགས་པས་པ། །རྒྱན་དང་ཆ་ལུགས་འཛིན་པས་པ། །སྐུ་དང་ཐིག་ལེས་བརྒྱན་པས་པ། །འོད་དང་ཁ་དོག་བཀྲ་བས་པ། །མ་རིག་དུག་ལྔ་དག་པས་པ། །འཛིན་པ་རང་སར་དག་པས་སྐུ། །ཀུན་སྣང་ཐུགས་རྗེ་ཤར་བས་སྐུ། །ཡེ་ཤེས་ཀློང་ན་གསལ་བས་སྐུ། །མ་འགགས་སྐྱེ་བ་མེད་པས་སྐུ། །ཡིན་པ་བདག་འཛིན་མེད་པས་སྐུ། །ལྷུན་གྲུབ་ལོངས་སྐུའི་བཞུགས་ཚུལ་ལོ། །ཐུགས་རྗེ་སྤྲུལ་པའི་བཞུགས་ཚུལ་ནི། །བྱ་བ་རྫོགས་དང་བྱ་བ་བྱེད། །ཕྱི་ནང་བྱ་བ་རྫོགས་པས་ཏེ། །བྱ་བ་རྫོགས་པའི་སྤྲུལ་སྐུའོ། །གང་ལ་གང་འདུལ་ཚུལ་དུ་ནི། །དེ་ལ་དེར་སྟོན་མཐུན་པར་སྣང་། །ཐུགས་རྗེའི་ཉི་ཟེར་ཀུན་ལ་ཁྱབ། །འགྲོ་བ་ཡོངས་ལ་སྣང་ནུས་པ། །སྤྲུལ་པ་སྐུ་ཡི་བཞུགས་ཚུལ་ལོ། །ཡེ་ཤེས་རང་རྩལ་ཕྱོགས་བཅུར་ཁྱབ། །སྐུ་གསུམ་ངོ་བོ་གཅིག་གི་ངང་། །ཡེ་ཤེས་གསུམ་གྱི་རང་བཞིན་ཅན། །རང་གི་ངོ་བོ་གཅིག་ཏུ་གནས། །ངོ་བོ་དུས་གསུམ་འགྱུར་བ་མེད། །རང་བཞིན་རྟག་ཏུ་འགག་པ་མེད། །ཐུགས་རྗེ་ཀུན་ལ་རང་སྣང་ངོ་། །ངོ་བོ་ཉིད་དང་རང་བཞིན་དང་། །ཐུགས་རྗེ་ཡི་ནི་སྣང་བ་ཡང་། །བློ་ཅན་རྣམས་ལ་སྣང་བའོ། །ངོ་བོ་གང་དུའང་མ་གྲུབ་པས། །རང་བཞིན་སྣང་ཆ་གསལ་བར་སྣང་། །ཐུགས་རྗེའི་ཆ་ལ་ཡེ་ཤེས་གཉིས། །བྱ་དང་བྱེད་པ་མེད་པར་ཤར། །རང་བྱུང་རང་ཤར་རང་གྲོལ་ལོ། །རྟོགས་དང་མ་རྟོགས་སྔོན་རོལ་དུ། །སངས་རྒྱས་སེམས་ཅན་གཉིས་མ་ཕྱེ། །དངོས་པོ་གཤིས་ཀྱི་འདུག་ཚུལ་དེ། །གཞི་ཡི་གནས་ཚུལ་དེ་ལྟར་རོ། །གཞི་ལ་མི་མཐུན་མང་དུ་བཤད། །ངོ་བོ་ངེས་ཚིག་དབྱེ་བ་དང་། །མཐུན་དཔེ་དག་དང་བཞི་བཞིས་ཏེ། །ངོ་བོ་ཐིག་ལེ་ཉག་གཅིག་ཡིན། །
ངེས་ཚིག་གཞི་ལ་རྩལ་རྫོགས་པས། །ཀུན་གྱི་ཀུན་གཞི་ཞེས་ཀྱང་བྱ། །དབྱེ་ན་སྐྱོན་ཅན་སྐྱོན་མེད་གཉིས། །སྐྱོན་ཅན་དྲུག་དང་བརྒྱད་ཀྱིས་བསྟན། །བསམ་ལས་གྲུབ་པའི་ཀུན་གཞི་ལ། །སྣ་ཚོགས་ངོས་ནས་ལྷུན་གྲུབ་གཞི། །འགྱུར་མེད་ཆ་ནས་མ་ངེས་གཞི། །མི་འགྱུར་ཆ་ནས་ངེས་ཅན་གཞི། །ཅིར་ཡང་སྒྱུར་བཏུབ་གཞི་མ་དང་། །ཐམས་ཅད་འབྱུང་ཕྱིར་ཁས་ལེན་གཞི། །སྣ་ཚོགས་ཁྲ་བོར་འདོད་པའི་གཞི། །སྣ་ཚོགས་སོགས་པའི་ཀུན་གཞི་དང་། །སྦྱོར་བ་ཀུན་གྱི་ཀུན་གཞིའོ། །དེ་ལྟར་བརྒྱད་ཀྱིས་ཕྱེ་ན་ཡང་། །སྐྱོན་མེད་ཀ་དག་ཉིད་དུ་གནས། །འདི་ནི་ངོ་བོ་གཅིག་ཚུལ་དང་། །བརྗོད་གཞི་བྲལ་བའི་དང་པོ་སྟེ། །ཐམས་ཅད་འདི་ལས་མི་འདའ་འོ། །འོན་ཀྱང་དེ་ཉིད་འདི་ལྟ་སྟེ། །ལྷུན་གྲུབ་ཉིད་དུ་གནས་པ་ལ། །སྣ་ཚོགས་འདུས་པའི་སྙིང་པོར་སྣང་། །རྒྱུ་ལས་འབྲས་བུ་གྲུབ་མ་གྲུབ། །གྲུབ་ན་གོ་ལོག་སྐྱོན་དུ་འགྱུར། །ངེས་པ་མེད་པའི་གཞི་མ་ནི། །འགྱུ་བྱེད་ཡིད་ཙམ་རྣམ་པར་སྣང་། །མིང་དོན་གཉིས་སུ་ངེས་པ་མེད། །མ་ངེས་མེ་ལས་ཆུ་འབྱུང་སྐྱོན། །མ་ངེས་པ་དེ་ངེས་ཅན་འགྱུར། །ངེས་པར་རང་ངོ་ཀུན་གཞི་དེ། །དྲན་བྱེད་ཕྲ་བ་མེད་པར་སྣང་། །འདི་ནི་རྟོགས་དང་མ་རྟོགས་གང་། །རྟག་ཆད་གཉིས་ཀྱི་སྐྱོན་དུ་འགྱུར། །སྒྱུར་དུ་བཏུབ་པའི་ཀུན་གཞི་ནི། །འབད་མེད་བློ་ཡི་རྣམ་པར་སྣང་། །རྟག་དང་མི་རྟག་གང་ནས་འགྱུར། །གནས་ལུགས་སྒྱུར་དུ་བཏུབ་པ་ན། །འདི་ཡང་ངེས་མེད་གཞི་དང་མཚུངས། །འབྲས་བུ་ཉིད་ཀྱང་རྒྱུར་ཟློག་ཕྱིར། །འབད་པ་དོན་མེད་བེམ་པོ་ཡང་། །རིག་པ་ཅན་དུ་ཟློག་པའི་སྐྱོན། །རྟག་པ་མ་ཡིན་ངོ་བོས་སྟོང་། །མི་རྟག་མ་ཡིན་ཤེས་རིག་གསལ། །ཅིར་ཡང་ངོ་བོར་ཁས་ལེན་གཞི། །གང་སྣང་རང་གི་ངོ་བོར་སྣང་། །ཡོད་མེད་མ་ཡིན་ཕྱོགས་ནས་འདས། །མེད་ན་མོ་གཤམ་བུ་སྐྱེའི་སྐྱོན། །ཡོད་མ་ཤེས་བྱ་རྒྱབ་ཀྱིས་ཕྱོགས། །ཐམས་ཅད་ངོ་བོར་གྲུབ་པའི་ཕྱིར། །ཐུག་པ་མེད་པའི་སྐྱོན་དུ་འགྱུར། །སྣ་ཚོགས་
ཁྲ་བོར་འདོད་པའི་གཞི། །ངོ་བོ་ཀུན་ཏུ་ཤར་བའི་ཕྱིར། །སྣ་ཚོགས་སོ་སོའི་ཚུལ་དུ་སྣང་། །སྣང་དང་ཤེས་པ་གང་ལ་འདོད། །སྣང་ལ་འདོད་ན་སེམས་ཐ་དད། །ཤེས་ལ་འདོད་ན་འགྱུ་བྱེད་དེ། །ཀུན་གཞིའི་སྟེང་ནས་འགྱུ་བས་ན། །འཕང་པ་དོན་མེད་འབད་མི་ལང་། །དེ་ལྟ་བུ་ཡི་སྐྱོན་དུ་འགྱུར། །ངོ་བོ་མ་གྲུབ་མཚོན་གཞི་བྲལ། །རང་བཞིན་རང་གྲོལ་སྤང་བླང་བྲལ། །སྣ་ཚོགས་སོགས་དང་སྦྱོར་བའི་གཞི། །གཉིས་དྲུག་སོ་སོའི་དབྱིངས་ན་གསལ། །དེ་རྣམས་ཕྱོགས་ཙམ་བསྟན་པ་སྟེ། །སེམས་ཅན་བློ་ཡི་རིམ་པའོ། །སྐྱོན་མེད་ཀ་དག་གཞི་མ་ཡིན། །ཡེ་དོན་དང་པོའི་སངས་རྒྱས་དེ། །འཁོར་དང་འདས་པ་དེ་མི་གནས། །མཚན་ཉིད་བཞུགས་ཚུལ་དབྱེ་བ་དང་། །སྐུ་གསུམ་ཡེ་ཤེས་གསུམ་དུ་ལྡན། །ཀ་དག་ལྷུན་གྲུབ་ཀུན་ཁྱབ་ཏུ། །སྙིང་པོའི་གཞི་མ་བརྗོད་བྲལ་གནས། །སྒྲོ་འདོགས་ཐ་སྙད་གཟུང་འཛིན་མེད། །སངས་རྒྱས་སེམས་ཅན་ཆོས་སོགས་མེད། །གྲོལ་དང་མ་གྲོལ་རྟོགས་མ་རྟོགས། །ཡེ་ཐོག་མགོན་པོ་མཐའ་བྲལ་གནས། །ཉག་གཅིག་རང་གནས་བཞུགས་ཚུལ་ལོ། །གཞི་གནས་ཆོས་སྐུ་དག་པ་ལ། །རིག་རྩལ་རྫོགས་ལུགས་འདི་ལྟར་རོ། །རླུང་དང་རིག་པ་ནམ་མཁའ་གསུམ། །བྱ་བ་ཀུན་གྲུབ་ཡེ་ཤེས་ནི། །དབྱེར་མེད་གཅིག་གི་ཚུལ་དུ་གནས། །ཡེ་ཤེས་རླུང་གིས་གཡོ་བསྐྱོད་མེད། །རིག་པ་དྲི་མེད་གཅེར་བུ་ལ། །མ་རིག་པ་ཡི་སྲིད་མིང་མེད། །གཅིག་དང་གཉིས་ཀྱི་གྲངས་མཐའ་ཟད། །ཡེ་ཤེས་ཆོས་ཉིད་གདགས་གཞི་བྲལ། །དེ་ལ་རྩལ་ཡོན་འགག་མེད་པས། །ནམ་མཁའ་གསལ་སྟོང་བསྣན་འཕྲི་མེད། །བྱ་གྲུབ་ཡེ་ཤེས་རང་མདངས་ཡིན། །ཡེ་ཤེས་ལྔ་ཡི་དྭངས་བཅུད་དེ། །འོད་ལྗང་ཁྲ་བོ་ལྟེམ་ལྟེམ་པ། །རིག་པའི་ངོ་བོ་རོལ་ཀློང་སྣང་། །གཞི་ལ་གཡོ་འགུལ་མེད་པ་སྟེ། །བྱ་གྲུབ་ཡེ་ཤེས་ཀློང་ན་གསལ། །ཤེས་པ་བཅུད་དུ་འདྲིལ་བ་དེ། །རླུང་རིག་གཉིས་ཀྱིས་
རྩལ་མ་བསྐྱོད། །རྫོགས་ལྡན་ཆེན་པོར་དེ་བཞུགས་སོ། །དེ་ཡིས་གཞི་ཡི་དབྱེ་བ་བཤད། །མཐུན་པའི་དཔེ་ནི་འདི་ལྟར་རོ། །སྟོང་པ་ཡངས་པ་ཁྱབ་པ་སྟེ། །ནམ་མཁའ་ལྟ་བུར་གནས་པའོ། །དྲི་མེད་གསལ་དག་ཟང་ཐལ་ཏེ། །མན་ཤེལ་དྲི་མེད་ལྟ་བུར་གནས། །གདོད་ནས་མ་སྐྱེས་གཞི་རྩ་མེད། །དུས་གསུམ་དུས་མེད་སྟོང་པར་གནས། །བྱུང་ས་མེད་པར་རྒྱུ་ཡིས་སྟོང་། །སྐྱེ་ས་མེད་པ་རྐྱེན་ གྱིས་སྟོང་། །འགག་པ་མེད་པ་ངོ་བོས་སྟོང་། །དབྱིབས་དེས་མེད་པ་དངོས་པོས་སྟོང་། །ཐོག་མཐའ་མེད་དེ་རང་བཞིན་སྟོང་། །དྲན་འགྱུ་མེད་དེ་མཚན་ཉིད་སྟོང་། །ཕྱི་ནང་མེད་པ་གཟུང་འཛིན་སྟོང་། །དངོས་པོ་མེད་པ་རྟག་པས་སྟོང་། །འགག་པ་མེད་པ་ཆད་པས་སྟོང་། །མཐའ་དབུས་ཕྱོགས་མེད་གཉིས་ཀས་སྟོང་། །ཉེས་པའི་དྲི་སྤང་སྐྱོན་གྱིས་སྟོང་། །ཉེས་སྐྱོན་མ་སྤངས་གཉེན་པོས་སྟོང་། །གདོད་ནས་ཀ་དག་བདག་གིས་སྟོང་། །མ་འགགས་རྩལ་རྣམས་ཀློང་ན་གསལ། །རྒྱ་མཚོ་དྭངས་མ་མཁའ་ལྟར་གནས། །སངས་རྒྱས་སེམས་ཅན་སྟོན་བསྟན་པ། །མ་གྲུབ་ཐོག་མའི་གོང་དག་ན། །ཀུན་ཁྱབ་ཡེ་ཤེས་གནས་ཚུལ་དང་། །ཐོག་མ་སྤྱི་གཞིའི་འདུག་ཚུལ་ལོ། །ཞེས་གསུངས་ནས་ཀ་དག་གི་ཀློང་ན་ལྷན་ནེར་བཞུགས་སོ། །ས་མ་ཡ། རྒྱ་རྒྱ་རྒྱ། ཐེག་པ་ཀུན་གྱི་སྤྱི་ཕུད་ཀློང་ཆེན་རབ་འབྱམས་རྒྱུད་ལས། ཡེ་ཐོག་སྤྱི་གཞིའི་འདུག་ཚུལ་བསྟན་པའི་ལེའུ་སྟེ་གཉིས་པའོ།། །།དེ་ནས་སེམས་དཔའ་རྡོ་རྗེ་ཡིས། །ཀུན་བཟང་ཉིད་ལ་འདི་སྐད་ཞུས། །ཐོག་མའི་སྤྱི་གཞིའི་སྔོན་རོལ་དང་། །ཀུན་ཁྱབ་ཡེ་ཤེས་གནས་ལུགས་རྣམས། །ལེགས་ཟབ་རྒྱས་པར་གསུངས་ན་ཡང་། །འཁྲུལ་མེད་སྣང་ཚུལ་ཉིད་ཀྱིས་ནི། །ཁམས་གསུམ་འཁོར་ཚུལ་གསུང་དུ་གསོལ། །དེ་སྐད་ཅེས་ནི་བསྐུལ་བའི་ལན། །སྟོན་པ་ཉིད་ཀྱིས་བཀའ་སྩལ་པ། །ཉོན་ཅིག་སེམས་དཔའ་རྡོ་རྗེ་སོགས། །རང་རྩལ་འགག་མེད་འཁོར་རྣམས་གསོན། །ངས་བསྟན་ཚིག་ལ་ནོར་བ་མེད། །མ་འཁྲུལ་ནོར་མེད་
སེམས་ཀྱིས་ཀྱང་། །ཁྱོད་ཀྱིས་འདི་ཀུན་སེམས་ལ་ཞོག །ཀྱེ་ཧོ། གོང་ལྟར་གཞི་ལ་འཁྲུལ་མེད་ཀྱང་། །འཁོར་འདས་གཉིས་སུ་འཁྲུལ་པ་ནི། །གཞི་ཡི་ཀློང་ནས་འགྱུ་ལུགས་བསྟན། །གཞི་དང་གཞི་ཤེས་ཁྱད་པར་ལས། །འཁོར་འདས་གཉིས་སུ་གྱེས་པ་སྟེ། །དགེ་བ་སྤུ་ཙམ་བྱས་མེད་པར། །དེ་ཉིད་ཡེ་ནས་མངོན་སངས་རྒྱས། །སྡིག་པ་སྤུ་ཙམ་བྱས་མེད་པར། །ཁམས་གསུམ་རིགས་དྲུག་དག་ཏུ་འཁྱམས། །དེ་ཡང་དང་པོ་ཡེ་གནས་ནི། །གཞི་ཡི་ཡེ་ཤེས་རང་རླུང་དང་། །གཞི་ཡི་རིག་པ་གཅེར་བུ་དང་། །གཞི་ཡི་ནམ་མཁའ་གསལ་སྟོང་དང་། །གཞི་ཡི་བྱ་གྲུབ་ཡེ་ཤེས་བཞི། །དབྱེར་མེད་གཅིག་གི་རང་བཞིན་ཏེ། །རྒྱ་ཞོ་ཆགས་པ་ལྟ་བུར་གནས། །དེ་ལ་གཡོ་འགུལ་འདི་ལྟར་བྱུང་། །ཡེ་ཤེས་རླུང་གིས་རིག་པ་བཏེགས། །རིག་པས་སྒོ་མཐོང་ནམ་མཁའ་ཕྱེ། །བྱ་གྲུབ་རིག་རྩལ་མ་འགགས་ཏེ། །གཡོ་འམ་མི་གཡོ་བག་ཙམ་གཡོ། །འགྱུ་འོ་མི་འགྱུ་བག་ཙམ་འགྱུ། །གཞི་ལ་གཡོ་འགུལ་མེད་མོད་ཀྱང་། །རིག་པའི་རྩལ་ལས་གཡོ་འགུལ་བྱུང་། །འགྱུ་བ་དེ་ལ་ཡིད་ཅེས་ཟེར། །དེ་ཡང་ལྷུན་གྲུབ་ཐུགས་རྗེའི་རྩལ། །དང་པོ་གསེར་གྱི་རླངས་པ་འམ། །བྱེའུ་ཆུང་གི་ཁ་རླངས་སམ། །བྱ་ཕོད་རྐྱེན་མེད་འགུལ་བ་འམ། །རྟ་རྔ་བརྒྱར་གཤགས་ཆ་ཙམ་ཅིག །རིག་པ་ཉིད་ཀྱང་ཡིད་དུ་འགྱུས། །ལྷན་ཅིག་སྐྱེས་པའི་མ་རིག་ཟེར། །དངོས་མེད་སྣོད་ཕྱེ་བག་ལ་ཉལ། །ངོ་བོ་ཀུན་གཞི་ལས་འཕགས་ཏེ། །རང་བཞིན་འཁྲུལ་པའི་རྐྱེན་ཕན་ཉིད། །གཞི་ཡི་ངེས་མེད་རང་རྩལ་རྟག །དེ་ཡང་གསུམ་ཡིན་ཀུན་ཏུ་བཏགས། །ལྷན་ཅིག་སྐྱེས་དང་ང་བདག་ཅན། །ཀུན་གྱི་རྒྱུ་ནི་གཅིག་པ་ལ། །ལག་པ་ལྟོ་རྒྱབ་བཟློག་པ་བཞིན། །རིག་པ་དེ་ལས་མཐོང་སྣང་ནི། །ཕྲ་རགས་རྟོག་པ་མང་པོ་ཤར། །འོད་ཁྱིམ་ཁ་དོག་ལྔ་ལྔ་ནི། །ནམ་མཁའ་སྟོང་པའི་ཀློང་དུ་ཤར། །རིག་པ་འགག་
ཏེ་ཡིད་དུ་འགྱུས། །དེ་ཡང་རྣམ་པ་དྲུག་ཏུ་དབྱེ། །ཀུན་ཏུ་ཚོལ་བར་བྱེད་པའི་ཡིད། །གཏན་ལ་འབེབས་པར་བྱེད་པའི་ཡིད། །ངེས་པར་འཇོག་པར་བྱེད་པའི་ཡིད། །འགྱུ་བྱེད་ཐམས་ཅད་འཛིན་པའི་ཡིད། །སྣ་ཚོགས་སྡུད་པར་བྱེད་པའི་ཡིད། །ཉོན་ནི་མོངས་པ་ཅན་གྱི་ཡིད། །དེ་འགྱུས་འོད་ཁྱིམ་རྟག་དཔྱད་བཏང་། །འོད་ཁྱིམ་ཕ་གི་ང་ཡིན་ནི། །ཕ་གི་ང་ལས་བྱུང་ངམ་ཅི། །ང་ཉིད་ཕ་གི་ཡིན་ནམ་ཅི། །གཉིས་འཛིན་རྟོག་པས་ངོ་བོ་བསྒྲད། །ཡེ་ཤེས་ཉིད་ལས་མ་རིག་འཁྲུལ། །རང་སྣང་རང་གིས་མ་རིག་པས། །ལས་ཀྱི་རླུང་ཉིད་ཁ་དོག་གསལ། །ལྷན་སྐྱེས་མ་རིག་ཅེས་སུ་བྱུང་། །སྐྱེས་ཡུལ་ཆོས་སྐུའི་ཀློང་དུ་སྐྱེས། །སུ་ཡིས་སུ་ཉིད་མ་རིག་ན། །དཔེར་ན་མེ་ལོང་དཀྱིལ་འཁོར་ལ། །བདག་པོ་རང་གིས་བལྟས་པ་ཡིས། །རང་གཟུགས་ཡིན་པར་མ་རིག་སྟེ། །འོད་བྱད་ཡུལ་སྣང་སོ་སོར་བཟུང་། །འོད་བྱད་བལྟ་མཁན་རྟོག་དཔྱོད་བཞི། །དུས་ལ་སྔ་ཕྱི་མེད་པའི་དཔེ། །དོན་ནི་ནམ་མཁའ་སྟོང་པ་ལ། །རིག་དང་མ་རིག་འོད་སྣང་དང་། །རིག་པའི་ཡེ་ཤེས་རྩལ་ཉིད་རྣམས། །སྔ་ཕྱི་མེད་དེ་ལྷན་ཅིག་སྐྱེས། །རྒྱུ་བདག་གཅིག་པའི་ལྷན་སྐྱེས་ནི། །གཉིས་མེད་རང་མདངས་མ་ཤེས་པས། །ཕྱི་ནང་སོ་སོར་བཟུང་བས་བཅིངས། །གྲོད་པ་ཕྱི་ནང་ཇི་བཞིན་ནོ། །མ་རིག་ལ་ལྟོས་དེ་བཞིན་ཏེ། །མ་འཁྲུལ་པ་ཡང་དེ་བཞིན་དུ། །རིག་པ་ཉིད་ནི་མ་རིག་གོ། །མ་འཁྲུལ་བུཌྜྷ་མ་ནུར་འཁྲུལ། །དེ་ཡང་ཡུལ་དང་ཡུལ་ཅན་གཉིས། །ཡེ་ཤེས་གསལ་བའི་ཡུལ་དྲུག་ལ། །གཉིས་འཛིན་སེམས་དེ་བྱུང་བའོ། །དུང་ལ་སེར་པོར་མཐོང་བ་དང་། །གསེར་ལ་ནག་པོར་མཐོང་བ་རྣམས། །མིག་འཁྲུལ་མིན་ཏེ་རང་འཁྲུལ་ཡིན། །གཞི་ནི་གང་ཡང་བྱེད་མེད་ཅིང་། །ངེས་མེད་རྩལ་ངོ་མ་ཤེས་པས། །ཤེས་པ་འགྱུ་དང་ཡལ་བ་དང་། །ཆེད་འཛིན་དྲི་མས་རབ་ཏུ་སྦགས། །ཤེས་བྱ་རང་གི་རྒྱུད་བཅིངས་སོ། །དམིགས་འཛིན་འདྲེལ་བ་བཅུ་གཉིས་སུ། །འཁོར་བའི་ཡེ་ཐོག་ཉིད་
དུ་འཁྲུལ། །ཆོས་སྐུ་ཀ་དག་དྲི་མེད་ལ། །ཉོན་མོངས་ཅན་གྱི་ཡིད་ཀྱིས་ནི། །ཁ་ནང་བལྟས་ནས་ང་བདག་བཟུང་། །རྣམ་པ་གཅིག་བརྩད་ང་བདག་འཁྲུལ། །ཡིད་ཀྱི་རྣམ་ཤེས་ཁ་ཕྱིར་བལྟས། །སྒོ་ལྔ་ཡུལ་དྲུག་རྗེས་འབྲངས་ནས། །རྟོག་པས་མེད་པ་ཡོད་པར་བཟུང་། །དཔེར་ན་ཐོ་ཡོར་མིར་བཟུང་ཞིང་། །ཐག་པ་སྦྲུལ་དང་སྨིག་སྒྱུ་ཆུ། །སྒོ་ལྔའི་རྣམ་པར་ཤེས་པ་ཉིད། །ཡིད་ཀྱི་རྣམ་པར་ཤེས་པས་བསླད། །ཀུན་གཞིའི་རྣམ་པར་ཤེས་པ་ལ། །ཉོན་མོངས་ཡིད་ཀྱི་ང་བདག་བསླད། །གཉིས་སྣང་རྟོག་པའི་ཆ་ལས་འཁྲུལ། །ངོ་བོ་རང་བཞིན་ཐུགས་རྗེ་གསུམ། །དངོས་སུ་ཡོད་ཀྱང་མ་རིག་པས། །རྒྱུ་རྐྱེན་འབྲས་བུ་གསུམ་དུ་བྱུང་། །རྒྱུ་ཡི་རྐྱེན་དང་དམིགས་པའི་རྐྱེན། །བདག་པོའི་རྐྱེན་དང་མཚུངས་པའི་རྐྱེན། །རྐྱེན་བཞི་འདུས་པས་འཁྲུལ་པ་ཡིན། །རྒྱུ་ཡི་རྐྱེན་ནི་ཆོས་ཉིད་དང་། །དམིགས་པའི་རྐྱེན་ནི་འོད་སྣང་ཉིད། །བདག་པོའི་རྐྱེན་ནི་རིག་པ་ཉིད། །དེ་གསུམ་དུས་སྙོམ་མཚུངས་པའི་རྐྱེན། །འཁྲུལ་པ་དེ་མ་ཐག་ཅེས་ཟེར། །འཁྲུལ་པའི་དུས་ནི་འདི་ལྟར་རོ། །རིག་དང་མ་རིག་གཉིས་འཛིན་རྣམས། །ཆོས་ཉིད་ཡུལ་ལ་ཤར་དུས་འཁྲུལ། །ཡིད་དྲུག་ཡུལ་ལ་འཇུག་དུས་འཁྲུལ། །རྣམ་རྟོག་བདག་ཏུ་བཟུང་དུས་འཁྲུལ། །སྣང་བ་ལོགས་སུ་དཔྱད་དུས་འཁྲུལ། །སྙེམ་མ་རིས་སུ་ཕྱེ་དུས་འཁྲུལ། །རང་རྩལ་གཞན་དུ་བཟུང་དུས་འཁྲུལ། །ཡིད་ཀྱིས་སྒྲོ་བཏགས་བྱེད་དུས་འཁྲུལ། །རང་གཞན་གཉིས་སུ་རྟོགས་དུས་འཁྲུལ། །ལོག་རྟོག་སྐད་ཅིག་འགྱུ་དུས་འཁྲུལ། །གཟུང་འཛིན་ཐུར་ལ་བལྟས་དུས་འཁྲུལ། །ཡིན་མིན་ཐེ་ཚོམ་དུས་སུ་འཁྲུལ། །རིག་པས་འཚོལ་གྲོ་བྱས་དུས་འཁྲུལ། །མིན་ཆོས་ཡིན་པར་བཟུང་དུས་འཁྲུལ། །འགྱུ་བ་རླུང་གི་རྟ་ཕོ་ལ། །སྒྲིབ་གཡོགས་མ་རིག་པ་དང་གཅིག །ཡུལ་རྐྱེན་འཛིན་བྱེད་གཡོ་བ་དང་། །རེ་དོགས་ཡིད་ཀྱི་འཆར་སྒོ་དང་། །བག་ཆགས་བརྟས་པའི་མཐུ་དག་ནི། །
དུས་གཅིག་ལོག་པར་བལྟས་དུས་འཁྲུལ། །འཁྲུལ་པའི་འབྲས་བུ་སྣོད་བཅུད་ནི། །ཡེ་ཤེས་ཁ་དོག་འབྱུང་བ་ལྔ། །གདོད་ནས་ཡེ་ཤེས་རྩལ་ཉིད་དུ། །འདུ་འབྲལ་མེད་པར་མ་རིག་པས། །འོད་ཁྱིམ་ཁ་དོག་ལྔ་ལྡན་ལ། །བརྟག་དཔྱད་བྱས་པས་འབྱུང་ལྔར་འཁྲུལ། །མཁའ་ལ་རླུང་བརྟེན་དེ་ལ་ཆུ། །འབུམ་ཕྲག་བཅུ་གཅིག་ངག་གིས་ནི། །ཟླུམ་ལ་འདྲིལ་བ་ཉིད་དུའོ། །གཞི་དག་མེ་ལོང་ཡེ་ཤེས་ལ། །རྟོག་དཔྱོད་བཏང་བས་ཆུ་རུ་འཁྲུལ། །གཞི་དག་མཉམ་ཉིད་ཡེ་ཤེས་ལ། །རྟོག་དཔྱོད་བཏང་བས་ས་རྡོར་འཁྲུལ། །གཞི་དག་སོར་རྟོག་ཡེ་ཤེས་ལ། །རྟོག་དཔྱོད་བཏང་བས་མེ་རུ་འཁྲུལ། །གཞི་དག་བྱ་གྲུབ་ཡེ་ཤེས་ལ། །རྟོག་དཔྱོད་བཏང་བས་རླུང་དུ་འཁྲུལ། །གཞི་དག་ཆོས་དབྱིངས་ཡེ་ཤེས་ལ། །རྟོག་དཔྱོད་བཏང་བས་ནམ་མཁར་འཁྲུལ། །རྟོག་དཔྱོད་བྱས་པས་ཡུལ་ལྔར་བཟུང་། །མིང་མེད་མིང་དུ་སོང་བ་ལྟར། །འབྱུང་ལྔ་མེད་བཞིན་རིམ་གྱིས་ཆགས། །ཕྱི་ཡི་ཡུལ་ལྔའི་དབང་ལས་ནི། །ནང་གི་སེམས་ཀྱིས་ང་དང་བདག །གཉིས་སུ་བཟུང་བས་འོད་ལྔ་ནི། །གསལ་བར་མ་ནུས་འབྱུང་བཞིས་བསྒྲིབས། །མ་རིག་པ་དེ་སེམས་ཡིན་ཏེ། །དེ་ལས་བྱུང་བས་འབྱུང་བའོ། །རང་མགོ་རང་གི་རྐང་པས་གནན། །རང་གི་གཉའ་ལག་རང་གིས་བཅིངས། །སེམས་ཀྱི་སྣང་ཚུལ་གསུམ་དུ་ཤར། །འོད་གཟུགས་ཤ་གཟུགས་རིག་གཟུགས་གསུམ། །དེ་ལས་འཁོར་འདས་གཉིས་སུ་གྱེས། །ཡུལ་ཏུ་བརྟགས་པས་སྣང་བར་ཞེན། །མིན་པའི་ཆོས་ལ་ཡིན་བཟུང་ཞིང་། །བརྟག་དཔྱད་བྱས་པས་སྣོད་དུ་འཁྲུལ། །དེ་ཡང་རི་རབ་རྒྱལ་པོ་ནི། །བང་རིམ་བཞི་དང་ལྕོག་ཆེན་བཞི། །རོལ་མཚོ་དང་ནི་རི་རྣམས་བདུན། །གླིང་རྣམས་དང་ནི་འཁོར་ཡུག་ཆགས། །སྟོང་གསུམ་ལ་སོགས་ཁམས་རྣམས་སོ། །དེ་ལ་བརྟེན་ནས་ནང་བཅུད་ཀྱི། །འཁྲུལ་ལུགས་དབྱེ་ན་འདི་ལྟར་རོ། །འཁྲུལ་གཞི་ཡེ་ཤེས་ལྔ་ལས་བྱས། །འཁྲུལ་རྒྱུ་མ་རིག་གཉིས་ཀྱིས་བྱས། །
འཁྲུལ་རྐྱེན་སྐད་ཅིག་ལྔ་ཡིས་བྱས། །འཁྲུལ་པ་འབྲས་བུས་ཡིད་ཀྱིས་བྱས། །ཡེ་ཤེས་མ་རིག་ཡུལ་དུ་བཟུང་། །དེར་འཛིན་རླུང་སེམས་འདུས་པ་ལས། །འབྱུང་བ་ལྔ་པོའི་སྦུབས་སུ་ཚུད། །རླུང་སེམས་ཡིད་དུ་འགྱུས་པ་ལས། །ཤུགས་ལྡན་སྣ་ཚོགས་རྒྱ་མཚོ་རླུང་། །དེ་ལ་ཡེ་ཤེས་དྲོད་རླན་བྱུང་། །རྒྱ་མཚོ་ཆེན་པོ་དེ་ཉིད་ལ། །ཆན་ལ་ཕབས་རྩི་བཏབ་པ་ལྟར། །ས་ཡི་རྣམ་པ་སྙོམས་པར་ཆགས། །དེ་ལ་དུད་རླངས་ལག་ངར་ཙམ། །དེ་ཡི་དྭངས་མ་འོད་སྐོར་ནི། །སྦ་ཕུབ་ཙམ་པ་གསུམ་དུ་བྱུང་། །འོད་གཅིག་སྣང་ལ་རང་བཞིན་མེད། །དེ་ལ་བརྟེན་པའི་འཁྲུལ་འབྲས་ནི། །ཡོད་མིན་ཅི་ཡང་མེད་པ་དང་། །རྣམ་ཤེས་ཅུང་ཟད་མེད་པ་དང་། །གཟུགས་མེད་མུ་བཞི་རབ་ཏུ་ཆགས། །འོད་སྐོར་གཉིས་ལ་མཐོ་རིས་ཀྱི། །གནས་བཅུ་དག་ནི་རིམ་གྱིས་ཆགས། །གནས་གཙང་ལ་སོགས་ལུས་ཅན་ནི། །གོང་ནས་གོང་དུ་ཐེག་པའི་ཚུལ། །འོག་མིན་ལྷ་དང་ལྷ་མིན་འདོད། །མངོན་མཐོ་དེ་མིན་གནས་གསུམ་ནི། །བྱོལ་སོང་ཡི་དྭགས་དམྱལ་བ་དང་། །སེམས་ཅན་དེ་དག་སྐྱེ་བ་བཞི། །དེ་ནས་ཡིད་ཀྱིས་རྟོག་དཔྱོད་བཏང་། །ཡིད་ཀྱི་སྤྱན་གྱིས་གཟིགས་པ་ན། །སྲིད་པ་འོད་ཀྱི་སྒོ་ང་མཐོང་། །དེ་ཉིད་མཛེས་པར་རབ་མཐོང་ནས། །ཡིད་ཀྱིས་སྦྱོར་བ་བྱས་པ་ལས། །མཛེས་པའི་ཆགས་སེམས་སྒོ་ངར་འཐུམས། །ཉི་མ་རབ་སྣང་དྲོས་བྱས་ཏེ། །ནོར་བུ་དྲི་མེད་བརླན་བྱས་སོ། །ཕྱི་ལྟར་ཤེད་བུ་ཤེད་ལ་གྲོགས། །ནང་ལྟར་འདོད་ཆགས་བྱ་སྒོང་དང་། །ཞེ་སྡང་སྦྲུལ་གྱི་སྒོ་ང་ཟེར། །གསང་བ་ལྟར་ན་ཐབས་ཤེས་རབ། །དེ་དུས་ཟ་བའི་ཟས་མེད་པས། །འདོད་པའི་ཡོན་ཏན་ལྔ་ལ་སྤྱོད། །ས་ལ་བརྟེན་ནས་གཟུགས་རྣམས་བྱུང་། །ཆུ་ལ་བརྟེན་ནས་སྒྲ་རྣམས་བྱུང་། །མེ་ལ་བརྟེན་ནས་དྲི་རྣམས་བྱུང་། །རླུང་ལ་བརྟེན་ནས་རོ་རྣམས་བྱུང་། །མཁའ་ལ་བརྟེན་ནས་རེག་རྣམས་བྱུང་། །
རིག་པའི་ཁ་ལོ་ཕྱིར་བལྟས་པས། །འདོད་ཡོན་ལྔ་པོ་ཡུལ་ལྔར་ཞེན། །ནང་དུ་ཤེས་པ་ཁ་ལོག་པས། །ཡུལ་ལྔ་བརྟེན་པའི་སེམས་འཛིན་གྱུར། །ཉོན་མོངས་ལྔ་གསུམ་དུག་ལྔ་ཤར། །ས་ལ་བརྟེན་ནས་གཏི་མུག་བྱུང་། །མ་རིག་པ་ཡི་ལྕགས་ཀྱིས་བསྡམས། །གཏི་མུག་ཞགས་པས་སྐེ་ནས་བཅིངས། །ཆུ་ལ་བརྟེན་ནས་འདོད་ཆགས་བྱུང་། །འདོད་ཆགས་ཚ་བའི་རོ་ལ་ཆགས། །རླུང་ལ་བརྟེན་ནས་ཕྲག་དོག་བྱུང་། །ཕྲག་དོག་ཉིད་ཀྱི་སྒོ་མོ་འཁྲིགས། །ནམ་མཁའ་ལ་བརྟེན་ང་རྒྱལ་བྱུང་། །ང་རྒྱལ་དག་གིས་མགོ་བཏུམས་ཏེ། །མེ་ལ་བརྟེན་ནས་ཞེ་སྡང་བྱུང་། །ཞེ་སྡང་མེ་ཡི་ཚད་པས་གདུང་། །ཁོང་ཁྲོ་ལ་སོགས་དམག་གིས་བསྐོར། །གཟུང་འཛིན་ཞགས་པས་རྐང་ནས་བསྡམས། །སྔ་ཕྱིའི་བག་ཆགས་འདམ་དུ་བྱིང་། །རྣམ་སྨིན་ཉིད་དང་ལག་སྦྲེལ་ལོ། །དྲུག་ལྔའི་རྩལ་ཀུན་རང་རྫོགས་པས། །ལས་ཀྱི་མ་ནུའི་མཚམས་སྦྱར་ཏེ། །འགྲོ་བ་རིགས་དྲུག་དཔག་མེད་སྨིན། །གཅིག་ནས་གཅིག་ཏུ་ཟོ་ཆུ་བཞིན། །བཟང་ངན་རིམ་པར་ལུས་བླངས་ཏེ། །དེ་ལྟར་འཇིག་རྟེན་གསུམ་པོ་དག །ཕུང་པོ་ལྔ་དང་དབང་པོ་ལྔ། །ཡན་ལག་ལྔ་དང་དོན་སྙིང་དང་། །ཡུལ་ལྔ་དང་ནི་ཉོན་མོངས་ལྔ། །སེམས་ལྔ་ཡིད་ལྔ་རྟོག་པ་ལྔ། །གཟུང་འཛིན་འཁོར་བ་ཉིད་དུ་གྲུབ། །ཕུང་པོ་ཁམས་དང་སྐྱེ་མཆེད་ལྔ། །གཟུང་འཛིན་དག་གིས་བཟུང་ནས་ནི། །འཁོར་བ་ཉིད་དུ་ཡུན་རིང་མནར། །ཁམས་གསུམ་པ་ཡི་ཁང་པ་རུ། །ཞེ་སྡང་ཆ་ལས་བསད་བཅད་བྱས། །འབྲས་བུས་ཚ་གྲང་དམྱལ་བ་བྱུང་། །འདོད་ཆགས་ཆ་ལས་སེར་ཕྲག་དོག །འབྲས་བུ་ཡི་དྭགས་བཀྲེས་སྐོམ་བྱུང་། །གཏི་མུག་ཆ་ལས་རབ་བླུན་རྨོངས། །འབྲས་བུས་བྱོལ་སོང་གླེན་ལྐུགས་བྱུང་། །ང་རྒྱལ་ཆ་ལས་ང་བདག་བཟུང་། །འབྲས་བུས་དྲེལ་ཕོངས་མི་རུ་བྱུང་། །ཕྲག་དོག་ཆ་ལས་ཁོང་ཁྲོ་བྱས། །འབྲས་བུ་ལྷ་མ་ཡིན་དུ་སྨིན། །འགྲོ་བ་རིགས་དྲུག་དེ་དག་ལ། །ངར་འཛིན་སོ་
སོར་བྱུང་བ་ཡིས། །སྣང་སྲིད་ལྷ་འདྲེ་ཐམས་ཅད་བྱུང་། །ལྷ་མེད་པ་ལ་ལྷ་རུ་མཆོད། །འདྲེ་མེད་པ་ལ་འདྲེ་རུ་བཀར། །མིང་མེད་པ་ལ་མིང་དུ་བཏགས། །རྣམ་རྟོག་འདྲེ་རུ་བཟུང་ལས་བྱུང་། །དམྱལ་བ་རྣམས་ལ་གཤིན་རྗེ་བྱུང་། །ཡི་དྭགས་རྣམས་ལ་མོ་འདྲེ་བྱུང་། །ཕོ་འདྲེ་ཐམས་ཅད་ཞོར་ལ་བྱུང་། །བྱོལ་སོང་རྣམས་ལ་ཀླུ་གཉན་བྱུང་། །མི་ལ་གནོད་སྦྱིན་ཐམས་ཅད་བྱུང་། །ལྷ་ལ་ཕྱྭ་དང་དབང་ཕྱུག་དང་། །གཟའ་དང་སྐར་མ་ཐམས་ཅད་བྱུང་། །ལྷ་མ་ཡིན་ལ་གཟའ་སྲིན་བྱུང་། །དེ་སོགས་རིགས་དྲུག་གཟུང་འཛིན་བཅིངས། །མ་རིག་ཉིད་དང་སྦགས་པའི་ཕྱིར། །ཤེས་བྱ་ཉིད་ཀྱང་དྲི་མར་སྣང་། །སེམས་ལ་དྲན་བསམ་དཔག་མེད་ཤར། །ངོ་བོ་ཉིད་ནི་རྟོག་པས་སྦགས། །ཡིད་དྲུག་འཛིན་ཆ་མ་འགགས་པས། །ཆོས་སྐུ་ཉིད་ཀྱང་བཟུང་བས་བཅིངས། །ཆ་མེད་རྡུལ་དང་བཅས་པའི་ཕྱིར། །འོད་གསལ་ཉིད་ཀྱི་བག་ལ་ཆགས། །རྐྱེན་བཞིའི་དམིགས་པ་མ་དག་ཕྱིར། །སྣང་བ་ཉིད་ཀྱང་དུ་མར་ཤར། །སྣང་བ་དེ་ཉིད་ཡུལ་སྣང་ཕྱིར། །སོ་སོའི་རིགས་སུ་སྐྱེ་བར་གྱུར། །ཡིད་སྒྲིབ་ངར་འཛིན་ཤེས་པ་རྣམས། །སྐམ་གློག་ལྟ་བུར་ཝལ་ཝལ་ཤར། །ངག་སྒྲིབ་ཡུལ་དུ་དཔྱོད་བྱེད་པ། །སྦྲང་ཆར་གློག་ལྟར་དུས་མཉམ་ཤར། །ལུས་སྒྲིབ་ཆགས་སྡང་འཁྲུག་ཉོན་མོངས། །ཉོན་མོངས་ངར་འཛིན་ཐོག་སེར་ལྟར། །དུས་གསུམ་སྡུག་བསྔལ་རྒྱ་མཚོར་བྱིང་། །ངན་སོང་ལྕགས་ཀྱུས་གཏིང་ནས་བཟུང་། །རང་གིས་རང་བཅིངས་ཉོན་མོངས་དགྲ། །སྲིན་བུ་དག་གི་ཁ་ཆུ་ལྟར། །དམྱལ་བ་ལ་སོགས་མེ་ཆུར་སྣང་། །ཡི་དྭགས་རྣམས་ལ་དྲེད་དང་སྡིགས། །བྱོལ་སོང་རྣམས་ལ་ན་བུན་ལྟར། །མི་རྣམས་ཕུང་པོ་ཁམས་དང་ནི། །སྐྱེ་མཆེད་འབྱུང་བ་ལྔ་རུ་སྣང་། །དེ་ཡང་བདེ་སྡུག་བཏང་སྙོམས་སོ། །ལྷ་མིན་རྣམས་ལ་གོ་མཚོན་ཏེ། །ལྷ་རྣམས་འདོད་པའི་ཡོན་ཏན་ནོ། །དཔེར་ན་མྱུར་འགྲོའི་འཁོར་ལོ་བཞིན། །རྒྱུན་
ཆགས་འཁོར་ལ་ཡུན་རིང་གནས། །དེ་ལྟར་སྣང་བ་སྣ་ཚོགས་རྣམས། །ཐག་པ་ལ་ནི་སྦྲུལ་མཐོང་བཞིན། །དེ་མ་ཡིན་ལ་དེར་བཟུང་སྟེ། །ཕྱི་ནང་སྣོད་བཅུད་གཉིས་སུ་ཆགས། །བཅུད་ཀྱི་འགྲོ་བ་རིགས་དྲུག་ལ། །ཚེ་ཚད་ལུས་ཚད་ལོངས་སྤྱོད་དར། །བདེ་སྡུག་སྐྱེ་བ་བཞི་དག་སྟེ། །གཏི་མུག་དག་གིས་བརྫུས་ཏེ་སྐྱེས། །ང་རྒྱལ་དག་གིས་སྒོ་ང་ལ། །ཞེ་སྡང་དག་གིས་དྲོད་གཤེར་ལ། །འདོད་ཆགས་དག་གིས་མངལ་ལས་སྐྱེ། །ནད་རིགས་བཞི་བརྒྱ་རྩ་བཞི་དང་། །བགེགས་རིགས་སྟོང་ཕྲག་བརྒྱད་ཅུ་དང་། །ཉོན་མོངས་བརྒྱད་ཁྲི་བཞི་སྟོང་རྒྱས། །སངས་རྒྱས་སེམས་ཅན་གཉིས་སུ་ཕྱེས། །འཁྲུལ་པའི་འདྲ་དཔེ་བསྟན་པ་ནི། །ཀུན་གཞིའི་རྣམ་ཤེས་ཁྱིམ་དང་མཚུངས། །གཟུང་འཛིན་ནོར་རྣམས་སོགས་པར་བྱེད། །ཉོན་མོངས་ཡིད་ནི་ཆུང་མ་འདྲ། །བདག་འཛིན་དབྱེ་བ་འཛིན་པར་བྱེད། །ཡིད་ཀྱི་རྣམ་ཤེས་ཁྱོ་དང་འདྲ། །སྒོ་ལ་ཞུགས་ཏེ་ལས་རྣམས་སོགས། །སྒོ་བཞིའི་རྣམ་ཤེས་བུ་དང་འདྲ། །ཀུན་ལ་རིས་དང་བདག་བཟུང་བྱེད། །ལུས་ནི་རྣམ་ཤེས་མནའ་མ་འདྲ། །གཟུང་འཛིན་ཆགས་སྡང་རབ་ཏུ་སྤྱོད། །དེ་ཡིས་རྒྱུད་དྲུག་འཁོར་ལོ་བསྐོར། །སེམས་དཔའ་རྡོ་རྗེ་རབ་ཏུ་ཉོན། །ཡེ་ཤེས་གསུམ་གྱི་གནས་ལུགས་ལ། །ལྷུན་གྲུབ་ཐུགས་རྗེའི་འཁྲུལ་ཚུལ་བཤད། །ཕྱི་རབས་རྣམས་ལ་ཁྱོད་ཀྱིས་སྟོན། །ཅེས་གསུངས་ཏེ་ཡངས་པ་ཆེན་པོའི་ཀློང་དུ་ལྷན་ནེར་བཞུགས་སོ། །ཐེག་པ་ཀུན་གྱི་སྤྱི་ཕུད་ཀློང་ཆེན་རབ་འབྱམས་ཀྱི་རྒྱུད་ལས། ཐོག་མའི་ཀུན་གཞི་སྐྱེ་མེད་ལས་རྩལ་འགག་མེད་དུ་འཁྲུལ་ཚུལ་རྒྱས་པར་བསྟན་པའི་ལེའུ་སྟེ་གསུམ་པའོ།། །།ས་མ་ཡ། རྒྱ་རྒྱ་རྒྱ། རྒྱ་རྒྱ་རྒྱཿ། དེ་ནས་སེམས་དཔའ་རྡོ་རྗེ་ཡིས། །ཀུན་བཟང་ཉིད་ལ་འདི་སྐད་གསོལ། །ཀྱེ་རང་བྱུང་རོལ་པ་ཀུན་ཏུ་བཟང་། །མ་བཅོས་མི་འགྱུར་ཀུན་ཁྱབ་རྗེ། །འཁྲུལ་ཚུལ་ལེགས་པར་གསུངས་ན་ཡང་། །སེམས་ཅན་
རྣམས་ལ་སངས་རྒྱས་གཞི། །ས་བོན་ཁྱབ་ཚུལ་བསྟན་དུ་གསོལ། །དེ་སྐད་གསོལ་པས་ཐུགས་དགོངས་ནས། །སྟོན་པ་འཛུམ་པའི་མདངས་ཕྱུང་སྟེ། །ཀློང་བྲལ་བརྗོད་པ་ཡེ་མེད་པའི། །ཚིག་གི་རྒྱལ་པོ་འདི་དག་ཀུན། །མིག་ནི་མཐོང་བྱེད་མེད་པ་ཡིས། །དམིགས་གཏད་མེད་པའི་ཡུལ་ཟིན་ནས། །ལུས་མེད་བསམ་བྲལ་ཐུགས་ལས་ནི། །མ་གྲུབ་ཡངས་པའི་མགུར་ནས་དྲངས། །སྨྲར་མེད་མི་སྣང་ལྗགས་ལས་ཀྱང་། །སྤྲོས་མེད་མི་མཛད་ཚུལ་དུ་བཀྲམ། །ཡེ་མེད་རང་སྟོང་ཞལ་དག་གིས། །འགྲོ་དང་འོང་མེད་དབུགས་ལས་བྱུང་། །མི་སྒྲིབ་དངོས་མེད་ཚོམས་ལ་བཀྲམ། །བརྗོད་ཅིང་བཤད་པའི་རྟེན་མེད་པར། །མ་གསུངས་ཐོས་པའི་ཚུལ་དུ་ཤར། །ཉོན་ཅིག་སེམས་དཔའ་རྡོ་རྗེ་སོགས། །རིག་མདངས་རིག་པའི་འཁོར་རྣམས་གསོན། །སེམས་ཅན་ཁམས་གསུམ་གནས་པ་ལ། །སངས་རྒྱས་དང་ནི་བྱང་སེམས་ཉིད། །ཀུན་ལ་ཁྱབ་ཚུལ་འདི་ལྟར་རོ། །བདེ་བར་གཤེགས་པའི་སྙིང་པོ་ངས། །སངས་རྒྱས་སེམས་ཅན་ཐམས་ཅད་ལ། །ཏིལ་ལ་མར་གྱིས་ཁྱབ་བཞིན་གནས། །ཐམས་ཅད་ཁྱབ་པའི་རང་བྱུང་ང་། །རྒྱུ་རྐྱེན་མེད་པའི་སྙིང་པོ་སྟེ། །རྩོལ་བ་འདུན་པས་དག་འགྱུར་འགྲོགས། །ཆོས་ཉིད་སྙིང་པོ་ང་ཉིད་ཀྱིས། །འཁོར་དང་འདས་པ་ཀུན་ལ་ཁྱབ། །ཨེ་མ་ཧོ། རང་བྱུང་རྩོལ་བྲལ་ཀློང་ཆེན་ང་། །ཀུན་ལ་ལྷུན་གྲུབ་ཡེ་ཁྱབ་ཅིང་། །སེམས་ཅན་སངས་རྒྱས་འཁོར་མྱང་འདས། །རྒྱུ་གཅིག་ཀློང་ཆེན་ང་ཡིས་ཁྱབ། །ས་ཆུ་མེ་རླུང་ནམ་མཁའ་དང་། །བདག་གཞན་གཉིས་དང་འཇིག་རྟེན་ཐེག །རིགས་དྲུག་མུ་སྟེགས་རྟག་ཆད་དང་། །ལམ་སྐས་ཐེག་པ་རིམ་པ་དགུ། །ཀུན་ཀྱང་ང་ཡི་ཀློང་ན་ཐིམ། །སེམས་གཅིག་ཀུན་གྱིས་ཆོས་དབྱིངས་ཁྱབ། །ཁྱབ་པས་རྩ་བའི་དོན་འདི་གཅིག །གཅིག་པས་སེམས་ཅན་སངས་རྒྱས་གྲོལ། །གྲོལ་བས་ཆོས་ཀུན་དབྱིངས་སུ་གཅིག །དཔེ་འབྲས་དོན་རྣམ་
སྣང་བར་དག །སྤྲོས་མེད་སྒྲོ་སྐུར་ཟློས་པའི་ཀློང་། །ཀུན་གྱི་སྙིང་པོ་བྱང་ཆུབ་སེམས། །དཔེར་ན་ནམ་མཁའ་སྟོང་པ་ཡིས། །ཀློང་ན་ཡོད་པའི་འབྱུང་ཆེན་སོགས། །སྣོད་བཅུད་ཀུན་ཁྱབ་ཇི་བཞིན་ནོ། །ཡང་དག་སངས་རྒྱས་དགོངས་པ་ནི། །སེམས་ཅན་ཀུན་གྱི་རང་རྒྱུད་ལ། །སྐུ་དང་ཡེ་ཤེས་ཚུལ་དུ་གནས། །སྣང་སྟོང་དབྱིངས་ནི་ཡུལ་ཆེ་བས། །ཐམས་ཅད་རིག་པ་དྲི་མེད་ཀྱིས། །སྐུ་གསུམ་ཡེ་ཤེས་ལྔ་ལྡན་ཚུལ། །ཏིལ་འབྲུའམ་ནི་ཉིང་འབྲུ་ལ། །མར་ཉིད་ཡེ་ནས་ལྷུན་གྲུབ་བཞིན། །སེམས་ཅན་ལུས་སེམས་འདི་ཉིད་ལ། །དེ་བཞིན་པ་ཡི་ས་བོན་ནི། །མཐུན་ཅིང་འོད་དང་བཅས་པར་སྣང་། །སངས་རྒྱས་སྐུ་གསུམ་ཉིད་ལ་འཕྲོ། །འདུས་ནི་སེམས་ཅན་ལུས་ལ་འདུས། །གནས་ནི་ལྷུན་གྲུབ་སངས་རྒྱས་གནས། །བསྐྱེད་ནི་རང་བཞིན་ལྷུན་གྲུབ་བསྐྱེད། །བདེ་གཤེགས་སྙིང་པོ་ཀུན་བཟང་ང་། །སྙིང་པོ་མེད་པའི་ཀུན་འབྱུང་ང་། །བསྟན་པ་མེད་པའི་ཡེ་ཁྱབ་ང་། །སྟོན་པ་མེད་པའི་ཡོངས་ཁྱབ་ང་། །འཁོར་འདས་མེད་པའི་རང་གྲོལ་ང་། །ཀུན་ཁྱབ་ང་ལས་ཆོས་རྣམས་འབྱུང་། །འབྱུང་བ་ལྔ་དང་དུག་ལྔ་ཀུན། །ལམ་གྱི་སྣང་བཞི་ཡེ་ཤེས་ལྔ། །སངས་རྒྱས་ཀུན་གྱི་མེས་སུ་ཆེ། །ཆོས་ཉིད་མ་སྐྱེས་ཆོས་ཉིད་དངོས། །གཟུགས་མེད་སྐྱེ་བའི་ཆོ་འཕྲུལ་གཟུགས། །ཐུགས་རྗེ་ལྷུན་གྲུབ་སྟོང་སྣང་ཁྱབ། །འདོད་པའི་ཁམས་གསུམ་དེ་ཙམ་ཆེ། །རང་བྱུང་རྒྱུ་རྐྱེན་མེད་པར་ཁྱབ། །རྩོལ་སྒྲུབ་ལ་འདས་འགག་མེད་ཁྱབ། །ཡེ་ནས་ཐོག་མེད་སེར་བུའི་རླུང་། །ཆོས་སྐུ་ཐིག་ལེ་ཉག་གཅིག་ཁྱབ། །འགྱུ་བྱེད་ལྟར་སྣང་སེམས་འདི་ཉིད། །རིག་པའི་ཡེ་ཤེས་བུཌྜྷས་ཁྱབ། །རིག་པའི་སྙིང་པོ་ཁྱབ་རུང་ཉིད། །ཆུ་ཡིས་ཡོངས་ཁྱབ་ཇི་བཞིན་ནོ། །ཆུ་ཡི་རང་བཞིན་གཅིག་ཉིད་ལ། །རྐྱེན་གྱིས་ཆུ་རིགས་མི་གཅིག་བཞིན། །ཐིག་ལེ་ཆེན་པོའི་ཀུན་ཁྱབ་ལ། །སྣང་ཚུལ་བགྲངས་ལང་མཐོང་ཚུལ་
མང་། །སེམས་ཅན་སངས་རྒྱས་སྙིང་པོ་ཅན། །ཉི་མ་དང་ནི་འོད་ཟེར་བཞིན། །ཐིག་ལེ་ཆེ་ལས་མ་འདས་པར། །སྐྱེ་འགྲོ་ལ་སོགས་ཅིར་ཡང་བྱུང་། །སེམས་སུ་མཉམ་ལ་བཟང་ངན་བྱུང་། །སྐུ་གསུམ་འབྲས་བུ་མ་སྨིན་ཀྱང་། །རྒྱུ་ཡིས་ཀུན་ལ་ཁྱབ་པ་ནི། །གླ་བ་ཕོ་ལ་རྩི་བཞིན་ནོ། །ཆོས་ཉིད་བྱང་ཆུབ་དགོངས་པ་དེ། །དགོངས་ཚོགས་རྣམ་པ་གསུམ་དག་གིས། །ནམ་མཁའ་བཞིན་དུ་ཀུན་ཁྱབ་ནས། །ཀུན་བྱས་ཀུན་བསྐྱེད་ས་བོན་བཞིན། །ང་མེད་པ་ཡི་སྔོན་རོལ་ན། །ཆོས་རྣམས་འབྱུང་བའི་ལྟེ་བ་ཆད། །ང་མེད་པ་ཡི་སྔོན་རོལ་ན། །འཁོར་འདས་འབྱུང་བའི་ལྟེ་བ་ཆད། །ང་མེད་ང་ཡི་སྔོན་རོལ་ན། །ཆོས་ཀུན་བྱེད་པའི་རྒྱལ་པོ་མེད། །ང་ཡིས་མ་ཁྱབ་གཞན་དག་ན། །སྟོན་བསྟན་འཁོར་ཞེས་བྱ་མ་གྲུབ། །ང་ཡིས་མ་ཁྱབ་གཞན་དག་ན། །སྦྱང་གཞི་སྦྱོང་བྱེད་ཡོངས་མ་གྲུབ། །འདི་ལྟར་སྣང་བའི་ཆོས་རྣམས་ཀུན། །ལྔའམ་ཡེ་ཤེས་བཞི་ཡིས་ཁྱབ། །འདོད་པའི་ཁམས་ཀྱང་ཀུན་བཟང་ང་། །གཟུགས་མེད་ཁམས་ཀྱང་ཀུན་ཏུ་བཟང་པོ་ང་། །གཟུགས་ཀྱི་ཁམས་ཀྱང་ཀུན་ཏུ་བཟང་པོ་ང་། །ངས་ཁྱབ་ཐམས་ཅད་བདེ་གཤེགས་སྙིང་པོ་འམ། །ཀུན་གྱི་ཐིག་ལེ་ས་བོན་ཚུལ་དུའོ། །ཁམས་གསུམ་རྒྱུད་དྲུག་སེམས་ཅན་ལ། །རང་བྱུང་ངེས་མེད་ངས་མ་བཤད། །སངས་རྒྱས་སེམས་ཅན་མེས་པོ་ང་། །ང་ནི་རང་བྱུང་ཡེ་ཤེས་ཏེ། །ང་ནི་ཆོས་ཀུན་སྙིང་པོ་ཡིན། །ང་ནི་ཀུན་གནས་རྩ་བ་བཞིན། །སྙིང་པོ་རང་བྱུང་ཡེ་ཤེས་ངས། །སྣང་བ་དང་ནི་སྲིད་པ་དང་། །སྣོད་དང་བཅུད་ཀྱིས་བསྡུས་པ་དང་། །དུས་གསུམ་སངས་རྒྱས་ཐམས་ཅད་དང་། །ཁམས་གསུམ་རྒྱུད་དྲུག་སེམས་ཅན་དང་། །དེ་བཞིན་དུ་ནི་ཐམས་ཅད་ལ། །མ་ལུས་ཁྱབ་དེ་འུབ་ཆུབ་བོ། །དེ་ནི་ཀུན་ཁྱབ་གནས་ལུགས་ཏེ། །རང་རིག་ཡེ་ཤེས་ལུས་ལ་གནས། །ཏིལ་འབྲུ་ལ་ནི་མར་བཞིན་དུ། །ལུས་ཀྱི་
བཀྲགས་དང་གཟི་མདངས་ནི། །ཡེ་ཤེས་རླན་གྱིས་ཁྱབ་པའོ། །འགྲོ་བའི་ལུས་ལ་སྐུ་ལྔ་དང་། །ཡེ་ཤེས་ལྔ་དང་རིགས་ལྔ་དང་། །འོད་ལྔ་རླུང་ལྔ་ཤེས་རབ་ལྔ། །ཡེ་ནས་གནས་པའི་རྟགས་ཉིད་དུ། །མ་དག་རང་ངོ་མ་ཤེས་དུས། །ཕུང་པོ་ལྔ་དང་འབྱུང་བ་ལྔ། །དབང་པོ་ལྔ་དང་འདོད་ཡོན་ལྔ། །ཉོན་མོངས་ཕྱོགས་ལྔ་ལ་སོགས་འཛིན། །ཕུང་པོ་སངས་རྒྱས་སྐུ་ལྔའི་བདག །འགྲོ་བའི་ལུས་འདི་བུཌྜྷའི་སྐུ། །ཕུང་པོ་ཁམས་དང་སྐྱེ་མཆེད་ཀུན། །རིགས་དང་རིགས་ཀྱི་བདག་པོར་གྲོལ། །ཉོན་མོངས་ལྔ་ནི་ཡེ་ཤེས་ལྔ། །ཡུལ་ལྔ་ལ་ནི་འོད་ལྔའི་སྐུ། །ཕུང་པོ་ལྔ་ལ་སངས་རྒྱས་ལྔ། །འབྱུང་བ་ལྔ་ལ་ཡུམ་ལྔར་རྟོགས། །སྲིད་པ་གསུམ་ཉིད་སངས་རྒྱས་ཞིང་། །གཉིས་མེད་བལྟ་བའི་རང་ལུས་ཡིན། །དེ་ལྟར་དཀྱིལ་འཁོར་ཆེན་པོ་རྣམས། །རང་རང་ལུས་ལ་རྫོགས་པ་སྟེ། །གཞལ་ཡས་རྣམ་པར་རང་ལུས་ལ། །ཡེ་རྫོགས་སྒྲུབ་རྟེན་མཆོད་རྫས་དང་། །དུར་ཁྲོད་བརྒྱད་དང་བཅས་པ་སྟེ། །རང་རིག་སེམས་ཀྱི་དཀྱིལ་འཁོར་དུ། །ཡེ་རྫོགས་ཐིག་ལེ་ཉག་གཅིག་དང་། །རྒྱ་ཆད་ཕྱོགས་ལྷུང་ཀུན་དང་བྲལ། །དཀྱིལ་འཁོར་གཞལ་ཡས་ཕུང་པོ་ཡིན། །དེས་ན་སྲིད་གསུམ་དཀྱིལ་འཁོར་ཆེ། །དེས་ནི་རང་ལུས་གདོས་བཅས་ཉིད། །རང་བཞིན་ལྷུན་གྲུབ་སངས་རྒྱས་བསྟན། །སྐུ་དང་ཡེ་ཤེས་རིག་པ་ལ། །ཡེ་ནས་རྫོགས་པའི་རྣམ་དབྱེ་ཡང་། །ཡེ་ཤེས་ལྔ་དང་སྐུ་ལྔ་སྟེ། །རླུང་ལྔ་ཤེས་པའི་རྩལ་ཀྱང་ལྔ། །འོད་ལྔ་ཁ་དོག་རྣམ་པ་ལྔ། །ཤེས་རབ་ལྔ་དང་རིགས་ལྔ་དང་། །སྣང་ཡུལ་དེ་ཉིད་རིག་པར་སྣང་། །སྣང་མཛད་མ་བཙལ་ཡེ་ནས་གནས། །རྟོག་འགགས་རིག་པ་རྡོ་རྗེ་སེམས། །མི་འགྱུར་མི་བསྐྱོད་རྩོལ་མི་དགོས། །རང་རིག་ཡེ་ཤེས་ཉམས་འཕེལ་རྒྱས། །རིན་ཆེན་ཡོན་ཏན་ཡེ་ནས་གནས། །འོད་ཀྱིས་ཞིང་ཁམས་མཐའ་ཡས་སྣང་། །སྣང་མཐའ་མ་བཙལ་ཡེ་ནས་གནས། །རིག་པ་བུཌྜྷའི་ས་བོན་ཚུལ། །ཉམས་བླངས་དོན་གྲུབ་རང་གྲོལ་བས། །དོན་གྲུབ་རང་ལ་
ཡེ་ནས་གནས། །རིག་པ་ཆོས་སྤྱིའི་དོན་རང་གསལ། །མེ་ལོང་ཡེ་ཤེས་ཡེ་ནས་གནས། །རིག་པ་ཡེ་མཉམ་སྒྱུ་མ་མཉམ། །རྐྱེན་ཉིད་གདམས་པས་ཚད་ལ་ཕེབས། །མཉམ་ཉིད་ཡེ་ཤེས་ཡེ་ནས་གནས། །རིག་པ་སོ་སོར་རྟོག་དཔྱོད་བཏང་། །སོར་རྟོགས་ཡེ་ཤེས་ཡེ་ནས་གནས། །རིག་པ་ཡེ་གྲོལ་འབད་རྩོལ་བྲལ། །བྱ་གྲུབ་ཡེ་ཤེས་ཡེ་ནས་གནས། །རིག་པ་དེ་རྣམས་ཐ་མི་དད། །ཆོས་དབྱིངས་ཉག་གཅིག་ཐིག་ལེར་གཅིག །ཆོས་དབྱིངས་ཡེ་ཤེས་ཡེ་ནས་གནས། །རིག་པ་དྲོད་ཕེབས་མེ་དང་མཉམ། །འཁོར་དང་འདས་པའི་སྲོག་འཛིན་པ། །ཡེ་ཤེས་སྒྲོན་མ་དྭངས་སྙིགས་དང་། །དོན་དམ་ཀུན་རྫོབ་དབང་པོའི་ཡུལ། །ཁ་དོག་འབྱེད་པ་དྭངས་སྙིགས་རླུང་། །འཁོར་འདས་ཀུན་ཁྱབ་ཁྱབ་བྱེད་རླུང་། །འཁོར་སྲོག་གཅོད་ཅིང་མྱང་འདས་འཕེན། །སྙིང་རྗེ་མེད་པའི་རླུང་དུ་གནས། །སྔར་འདས་ཤུལ་དུ་རིག་པ་གཤེགས། །དེ་བཞིན་གཤེགས་པ་ཡེ་ནས་གནས། །མཐོ་རིས་ངན་སོང་གང་ལ་ཡང་། །བཟང་ངན་མེད་པ་རྡོ་རྗེའི་རིགས། །དེ་ལ་འཁོར་འདས་ཡོན་ཏན་རྫོགས། །རིན་པོ་ཆེ་ཡི་རིགས་སུ་གནས། །དེ་ལ་འཁོར་བའི་སྐྱོན་མ་གོས། །པདྨའི་རིགས་སུ་ཡེ་ནས་གནས། །དེ་ཉིད་ལས་སྣང་ཀུན་དངོས་པས། །སངས་རྒྱས་དུས་ན་ལས་ཀྱི་རིགས། །རིག་པ་ངོ་བོ་ཀ་དག་ལ། །ལས་དང་ཉོན་མོངས་དྲི་མེད་པས། །ཁ་དོག་དཀར་པོར་ཡེ་ནས་གནས། །ཡོན་ཏན་རང་རྫོགས་སེར་པོ་སྟེ། །དབང་བཞི་ཡེ་རྫོགས་དམར་པོ་ལ། །རྩོལ་བ་ལས་འདས་ལྗང་གུར་གྲུབ། །སྣ་ཚོགས་འགྱུར་མེད་མཐིང་གའོ། །འཁོར་འདས་མ་ལུས་ཀུན་འབྱུང་བས། །འབྱེད་པར་བྱེད་པའི་ཤེས་རབ་སྟེ། །དེ་ཉིད་རིག་ལས་མ་འདས་པས། །སྦུད་པར་བྱེད་པའི་ཤེས་རབ་པོ། །འཁོར་འདས་ཀུན་གྱི་སྲོག་ཀྱང་གཅོད། །སྒྲོལ་བར་བྱེད་པའི་ཤེས་རབ་བོ། །ཐམས་ཅད་ངོ་བོར་དེ་བྱུང་བས། །ཁྱད་པར་བྱེད་པའི་ཤེས་རབ་བོ། །རླུང་གིས་ཡེ་ཤེས་མཁའ་བསྐྱོད་
པས། །བསྐྱོད་པར་བྱེད་པའི་ཤེས་རབ་བོ། །རིག་པ་ཉིད་ལས་མ་འདས་པས། །རང་བྱུང་ཡེ་ཤེས་རང་གནས་སོ། །གསལ་ལ་རྟོག་པ་ཡེ་མེད་དེ། །སྒོ་ལྔའི་རྣམ་ཤེས་ཡིད་མ་བསླད། །མེད་ཅིང་མི་བདེན་ཡེ་ཤེས་སོ། །ཀུན་གཞིའི་རྣམ་ཤེས་ཉོན་མོངས་ཀྱི། །ཡིད་ཀྱིས་བདག་ཏུ་མ་བཟུང་སྟེ། །རང་བཞིན་མཚན་ཉིད་ཆོས་ཀྱི་དབྱིངས། །ཡིད་གཉིས་རྟོག་པ་ཀུན་དང་བྲལ། །ཆོས་སྐུ་ཐིག་ལེ་ཉག་གཅིག་གོ། །ཡེ་ནས་རང་བྱུང་རང་ཁྱབ་པས། །རང་བྱུང་གི་ནི་ཡེ་ཤེས་སོ། །ཡེ་ནས་འགྱུར་མེད་སངས་རྒྱས་པས། །རྡོ་རྗེ་འཆང་ངམ་བུཌྜྷའོ། །སྐུ་དང་འོད་དང་ཡེ་ཤེས་གསུམ། །བརྩེགས་སམ་གཅིག་སྟེ་མ་འདྲེས་གནས། །ངོ་བོ་སྐུ་ལ་རང་བཞིན་ལོངས། །ཐུགས་རྗེ་སྤྲུལ་པའི་སྐུ་རུའོ། །འོད་མདངས་རང་ཤར་ཡེ་ཤེས་རྩལ། །སངས་རྒྱས་ཆོས་དང་དགེ་འདུན་ཀྱང་། །ཡེ་རྫོགས་རང་གི་ལུས་ལ་གནས། །ཆོས་ལོངས་སྤྲུལ་དང་སྡེ་སྣོད་གསུམ། །ཐེག་དགུ་མྱང་འདས་དཀར་ཆོས་རྣམས། །ལུས་དང་སེམས་ལ་ཡེ་ནས་རྫོགས། །གཞན་དུ་བཙལ་བས་རྙེད་མི་འགྱུར། །རྣལ་འབྱོར་ཉིད་ཀྱི་ལུས་ལ་ཚང་། །ས་ནི་ཤ་སྟེ་དངོས་པོ་ཅན། །ཆུ་ནི་ཁྲག་སྟེ་སྡུད་པར་བྱེད། །མེ་ནི་དྲོད་སྟེ་ལུས་ཀུན་སྨིན། །རླུང་ནི་དབུགས་ཏེ་ལུས་གཟུགས་འཛིན། །ནམ་མཁའ་སེམས་ཏེ་ལུས་མདངས་འཛིན། །ཉི་ཟླ་མིག་སྟེ་གསལ་བར་བྱེད། །སེམས་ཉིད་ངོ་ལས་ཆོས་རྣམས་ཀུན། །ཡེ་ནས་ལྷུན་གྲུབ་ཚུལ་དུ་གནས། །ལུས་དང་སེམས་ལ་ཚང་བའི་ཕྱིར། །ཕྱི་རོལ་སྣང་བ་ཉིད་ལས་གྲུབ། །དེ་ཡང་ཐོག་མའི་ཡེ་ཤེས་གསུམ། །ཀ་དག་གཞི་ཡི་སྟེང་ན་ཚང་། །དེ་ལྟར་རྟོགས་པར་གྱུར་པ་ན། །འདི་ལྟར་ཁམས་གསུམ་འཁོར་བ་ཡང་། །སངས་མ་རྒྱས་པ་གཅིག་ཀྱང་མེད། །དོན་དེ་ངེས་པར་རྟོགས་འདོད་ན། །དེས་ནི་ནམ་མཁའ་ལྟ་བུར་བལྟ། །དོན་ནི་ཆོས་ཉིད་སྐྱེ་བ་མེད། །རྟགས་ནི་སེམས་ཉིད་འགག་པ་མེད། །ང་ཡིས་མ་བསྒྲུབས་ཀུན་
ཁྱབ་པས། །གསལ་བའི་ཡེ་ཤེས་གཞལ་ཡས་ཁང་། །རང་བྱུང་ཉིད་ལས་གཞན་མི་བཞུགས། །ཆེན་པོ་ལྔ་དང་ཁམས་གསུམ་རྣམས། །ང་ཡི་སྐུ་གསུང་ཐུགས་བཀོད་ཡིན། །དུས་གསུམ་སངས་རྒྱས་སེམས་ཅན་རྣམས། །ང་ཡིས་ཁྱེད་ལ་བསྟན་པ་ཡིན། །ངེས་པ་གཅིག་ལ་བདེན་པ་གཉིས། །ཤིང་སྡོང་ཡལ་ག་ཇི་བཞིན་ནོ། །རྒྱུ་ནི་ལྷུན་གྲུབ་ཐུགས་རྗེ་ལས། །འབྲས་བུ་ཁམས་གསུམ་སེམས་ཅན་ཏེ། །ཁམས་གསུམ་སེམས་ཅན་རྒྱུ་བྱས་ནས། །འབྲས་བུ་སངས་རྒྱས་མིང་བཏགས་ཏེ། །རྒྱུ་འབྲས་དཔེ་དོན་དེ་རུ་བསྟན། །རྒྱུ་ནི་ཁམས་གསུམ་སེམས་ཅན་ལ། །འབྲས་བུ་སངས་རྒྱས་ལུང་བསྟན་པ། །དེ་ནི་སེམས་ཅན་དྲང་བའི་དོན། །ཡང་དག་སེམས་ཅན་སངས་རྒྱས་མེད། །སྙིང་པོ་སྐྱེ་འཇིག་ཡེ་བྲལ་ལ། །རྡོ་རྗེ་ཞེས་སུ་ང་ཡིས་བཤད། །ལུས་འདི་གང་ཟག་ལྷ་མི་ཡང་། །དགོངས་པའི་ཆོས་ཉིད་སངས་རྒྱས་ཏེ། །ང་ཡི་རང་བྱུང་ཡེ་ཤེས་ཁྱབ། །ཐུགས་རྗེའི་རང་བྱུང་ཡེ་ཤེས་ལྔ། །ཁམས་གསུམ་རྒྱུ་དྲུག་འབྱུང་བ་ཡང་། །དེ་བཞིན་ང་ཡི་ངོ་བོར་བཤད། །ཅེས་གསུངས་ནས་བརྡལ་ཁྱབ་ཆེན་པོའི་ངང་དུ་ལྷན་ནེར་བཞུགས་སོ། །ཐེག་པ་ཀུན་གྱི་སྤྱི་ཕུད་ཀློང་ཆེན་རབ་འབྱམས་ཀྱི་རྒྱུད་ལས། སེམས་ཅན་ལ་སངས་རྒྱས་ཀྱི་རྒྱུའམ་གཞི་ས་བོན་ཇི་ལྟར་ཁྱབ་ཚུལ་བསྟན་པའི་ལེའུ་སྟེ་བཞི་པའོ།། །།ས་མ་ཡ། རྒྱ་རྒྱ་རྒྱ། དེ་ནས་སེམས་དཔའ་རྡོ་རྗེ་ཡིས། །ཀུན་བཟང་ཉིད་ལ་འདི་སྐད་གསོལ། །ཀྱེ་ཡང་དག་དོན་རྟོགས་ཀུན་ཏུ་བཟང་། །བདེ་སྤྱོད་ཀུན་ཁྱབ་ཀློང་ཆེན་འབྱམས། །ཁམས་གསུམ་སེམས་ཅན་ཐམས་ཅད་ལ། །ས་བོན་ཁྱབ་ཚུལ་གསུང་ན་ཡང་། །གནས་པའི་ས་ནི་གང་ན་གནས། །དྭངས་དང་སྙིགས་མ་གང་ལ་གནས། །བརྟེན་པའི་ས་ནི་གང་ལ་བགྱི། །གནས་པའི་ཡེ་
ཤེས་ཇི་ལྟ་བུ། །བདག་ཅག་འཁོར་ལ་བཀའ་སྩོལ་ཅིག །དེ་སྐད་གསོལ་པས་ཐུགས་དགོངས་ནས། །འདུས་པའི་འཁོར་ལ་བཀའ་སྩལ་པ། །ཀྱེ་ཧོ། གཉིས་མེད་གསལ་བའི་གཞལ་ཡས་ན། །དཔག་མེད་དམིགས་མེད་དཀྱིལ་འཁོར་ཤར། །མི་འགྱུར་ཡེ་ཤེས་སྟོན་པ་ངས། །ཐེག་པ་སྤྱི་དང་རང་མིན་པ། །མ་འདྲེས་ཡོངས་རྫོགས་འཁོར་རྣམས་ལ། །སྨྲ་བརྗོད་བྲལ་བའི་བསྟན་པ་བཤད། །ཨེ་མ་ངོ་མཚར་རྨད་ཀྱི་ཆོས། །མ་འཁྲུལ་དག་པའི་བློ་ཡིས་ཟུང་། །ཨ་ཧོ། ཙིཏྟ། རོ་མ། གོ་རོ། བྷུཌྜྷ། ཛྙཱ་ན། རུ་པ། ཧ་ཀ་ལ། བྷ་ཀྵོ། སྣང་སྲིད་ཡེ་ཁྱབ་ཀུན་བཟང་ལ། །རིག་པའི་སྙིང་པོ་རང་ཤར་བྱུང་། །ཀུན་ལ་འཇུག་ཅིང་གསལ་བར་འཆར། །གནས་ནི་ཙིཏྟའི་དཀྱིལ་ན་གནས། །གསལ་ནི་དབང་པོའི་སྒོ་ལ་གསལ། །ཁྱབ་ནི་སྣང་སྲིད་ཀུན་ལ་ཁྱབ། །བྱུང་ནི་ཕྱི་རོལ་རྐྱེན་དུ་བྱུང་། །བསྟན་དུ་མཚན་མའི་དངོས་པོ་མེད། །མཐོང་དུ་དམིགས་ཡུལ་ཡིད་དཔྱོད་བྲལ། །ཤེས་སུ་ཚིག་བརྗོད་ཀུན་ལས་འདས། །མིང་འདོགས་མ་གྲུབ་མངོན་སུམ་མ། །འབྱུང་བའི་དྭངས་སྙིགས་འབྱེད་པ་ལ། །ཕྱི་དང་ནང་དང་བར་དང་གསུམ། །ས་རྡོ་རི་བྲག་སྙིགས་མ་སྟེ། །དྭངས་མ་རྩི་ཤིང་ནགས་ཚལ་དང་། །འབྲུ་སྣ་རྩི་ཐོག་དྭངས་མའོ། །གླིང་བཞི་གླིང་ཕྲན་སྙིགས་མ་ལ། །རི་རྒྱལ་རི་བདུན་དྭངས་མའོ། །ཆུ་ཡི་དྭངས་མ་ཟླ་ཆུ་ཤེལ། །མེ་ཡི་དྭངས་མ་ཉི་མེ་ཤེལ། །རྡོ་ཡི་དྭངས་མ་གཡུ་རིན་ཆེན། །ས་ཡི་དྭངས་མ་གསེར་ལ་སོགས། །རླུང་གི་དྭངས་མ་རང་སྒྲ་སྟེ། །ཀུན་འདུས་དྭངས་མ་འཇའ་གཟའ་སྐར། །ནང་གི་དྭངས་སྙིགས་དབྱེ་བ་ལ། །ཤ་རུས་སྤུ་ལྤགས་སྙིགས་མ་སྟེ། །དེ་ཡི་དྭངས་མ་ག་ཏི་ཀ །ཤེལ་དཀར་སྐུད་པ་སྙིང་ན་གནས། །ཁྲག་དང་ཆུ་སེར་སྙིགས་མ་ཡིན། །དེ་ཡི་དྭངས་མ་ཁྲག་ཐིགས་ནི། །མཐེ་བོང་ཙམ་གཅིག་སྙིང་ན་གནས། །ལུས་དྲོད་འདི་ཉིད་སྙིགས་མ་ཡིན། །དེ་ཡི་དྭངས་མ་རང་དྲོད་ནི། །ཉི་འོད་
ཙམ་གཅིག་སྙིང་དུ་གནས། །འགྱུ་བ་དབུགས་ནི་སྙིགས་མ་ཡིན། །དེ་ཡི་དྭངས་མ་དབུགས་ཉིད་ནི། །རྟ་རྔ་ཙམ་གཅིག་སྙིང་ན་གནས། །བྱང་ཁོག་རྩ་སྦུབས་སྟོང་པ་སྙིགས། །དྭངས་མ་ཐིག་ལེ་ཁྲ་ཡི་མིག །སྟོང་གསལ་སྙིང་གི་དཀྱིལ་ན་གནས། །གསང་བའི་དྭངས་སྙིགས་དབྱེ་བ་ནི། །ཡེ་ཤེས་རྣམ་ལྔ་དྭངས་མ་ལ། །ཕྱིར་ཤར་འོད་ལྔ་སྙིགས་མ་འོ། །དོན་ལྔ་སྐུ་ལྔ་ཡེ་ཤེས་ལྔ། །འོད་ལྔ་ཁ་དོག་ལྔ་དང་ལྡན། །དབྱེར་མེད་སྙིང་གི་དཀྱིལ་དུ་གནས། །དེ་ཡང་རྒྱས་པར་བཤད་པ་ན། །རིན་ཆེན་ཟུར་བརྒྱད་གཞལ་ཡས་དང་། །འགྱུ་བྱེད་རྩ་ཡི་གཞལ་ཡས་དང་། །དུང་ཁང་བྷནྡྷའི་གཞལ་ཡས་དང་། །ལྟ་བྱེད་མིག་གི་གཞལ་ཡས་ཁང་། །གཞལ་ཡས་ཆེན་པོ་དེ་བཞི་ན། །གསང་སྔགས་ཀུན་གྱི་གསང་ཆེན་ཉིད། །ཆོས་སྐུ་ངོ་བོ་བཅུ་དྲུག་ཚུལ། །དབྱེར་མེད་གཅིག་གི་ཚུལ་དུ་བཞུགས། །གཉིས་མེད་ཡེ་རྫོགས་ཆོས་སྐུ་དང་། །ཡེ་ནས་རང་བྱུང་ཆོས་སྐུ་དང་། །དུས་གསུམ་སྒྲིབ་མེད་ཆོས་སྐུ་དང་། །སྤང་ལེན་མི་མངའ་ཆོས་སྐུ་དང་། །རང་བྱུང་འགྱུར་མེད་ཆོས་སྐུ་དང་། །མ་རིག་པ་ཡི་ཆོས་སྐུ་དང་། །སྦྱོར་བ་མེད་པའི་ཆོས་སྐུ་དང་། །གཞོན་ནུ་བུམ་སྐུའི་ཆོས་སྐུ་དང་། །རྒྱ་ཆེ་རབ་འབྱམས་ཆོས་སྐུ་དང་། །མི་རྟག་སྡུག་བསྔལ་ཆོས་སྐུ་དང་། །སྟོང་པ་རིག་ཅན་ཆོས་སྐུ་དང་། །ཐམས་ཅད་མཁྱེན་པའི་ཆོས་སྐུ་དང་། །དོན་དམ་ཀུན་རྫོབ་ཆོས་སྐུ་དང་། །སྦྱང་བགྲོད་མེད་པའི་ཆོས་སྐུ་དང་། །དག་པ་གསུམ་གྲོལ་ཆོས་སྐུ་དང་། །ཐབས་ཤེས་གཟུངས་ཀྱི་ཆོས་སྐུའོ། །ཤ་ནི་སྲ་བྱེད་རྡོ་རྗེ་དབྱིངས། །སྐྱེ་འཇིག་མེད་པར་སངས་རྒྱས་གནས། །ཁྲག་ནི་རིན་ཆེན་གཏེར་གྱི་དབྱིངས། །ཐམས་ཅད་སྡུད་བྱེད་བྷུཌྜྷའི་གནས། །དྲོད་ནི་མེ་དག་སྲེག་པའི་དབྱིངས། །གཟུང་འཛིན་སྲེག་པའི་བྷུཌྜྷའི་གནས། །རླུང་དབུགས་ཡང་ཞིང་གཡོ་བའི་དབྱིངས། །ཀུན་ཏུ་སྐྱོད་བྱེད་བུཌྜྷའི་གནས། །སེམས་ཉིད་རིག་པ་གཅེར་བུའི་དབྱིངས། །མ་བསྒྲིབས་
མངོན་སུམ་བྷུཌྜྷའི་གནས། །ལུས་ཀྱི་ཙིཏྟ་རིན་པོ་ཆེ། །འདུས་པ་ཟུར་བརྒྱད་གཞལ་ཡས་ཁང་། །དོན་ནི་རང་གི་ལུས་དཀྱིལ་ན། །ངོ་བོ་སྐུ་ནི་ཞི་བའི་ཚུལ། །གདངས་ཀྱི་སྐུ་ནི་སོ་དྲུག་བཞུགས། །སོ་སོ་རིགས་ཀྱི་མཚན་ཉིད་འཛིན། །རིག་པ་ཡེ་ཤེས་ཡབ་ཡུམ་སྣང་། །ཡབ་ཀྱི་ཆ་འཛིན་ཐབས་ཀྱི་སྐུ། །ཡུམ་གྱི་ཆ་འཛིན་ཤེས་རབ་སྐུ། །འོད་དང་འོད་ཟེར་ཞི་བའི་མདངས། །གནས་པའི་འོད་ཟེར་ཙིཏྟར་གནས། །རིག་པ་དངོས་མེད་ཆོས་སྐུ་ལ། །ཉོན་མོངས་པ་ཡི་དྲི་མ་མེད། །ཡེ་ཤེས་སྐུ་ལ་མདུན་རྒྱབ་མེད། །ཐུགས་རྗེའི་རྩལ་ལ་བྲི་བཀོལ་མེད། །རིན་ཆེན་གསང་བའི་སྦུབས་ཉིད་ནི། །རང་བཞིན་རྣམ་དག་ང་ཉིད་ལ། །རང་བཞིན་ཤེས་རྟོགས་འཁོར་དང་བཅས། །འདུ་འབྲལ་མེད་དེ་དབྱེར་མི་ཕྱེད། །གཟིགས་སྣང་གསུམ་ནི་མི་འགག་སྟེ། །ཡེ་ཤེས་སྣང་བ་འོད་ལྔར་གསལ། །རང་ལ་ཚུར་བལྟས་ཆོས་སྐུའི་ཡུལ། །རང་གི་བྱང་ཁོག་སྟོད་ན་གནས། །ཡེ་ཤེས་ཡུལ་ནི་རང་གི་བྱང་། །ཕྱིར་བལྟས་རིག་ཡུལ་དབྱིངས་ཉིད་ལ། །སྒྲོན་མའི་ཡུལ་ནི་ནམ་མཁའ་འོ། །ཡེ་ཤེས་ཡུལ་ནི་མེ་ཤེལ་ཡིན། །འོད་ཡུལ་རང་གི་རིག་པ་ལ། །མཚན་མ་འོད་ཀྱི་དཀྱིལ་འཁོར་རོ། །སངས་རྒྱས་ངོ་བོ་ཆོས་ཀྱི་སྐུ། །རང་གི་སྙིང་གི་དཀྱིལ་ན་བཞུགས། །སྐུ་ནི་ནང་གསལ་བུམ་སྐུ་ལ། །འོད་ནི་བུམ་ནང་མར་མེ་བཞིན། །ཡེ་ཤེས་རྨ་བྱའི་སྒོ་ང་འདྲ། །སྐུ་ལྔ་ཡེ་ཤེས་ཆོས་ཀྱི་སྐུ། །རིག་པ་འོད་ལུས་ཡེ་གདོད་ནས། །ཡུལ་དག་སྣང་བ་མ་འགགས་གནས། །སངས་རྒྱས་རང་ཆས་སྐུ་ཡེ་ཤེས། །འོད་དང་རིག་པ་ཟང་ཐལ་དུ། །ཡེ་ནས་རང་ཆས་ཙིཏྟར་གནས། །འོད་དང་འོད་ཁྱིམ་ཚུལ་དུ་སྣང་། །ཆོས་སྐུ་མི་འགྱུར་ཡེ་ཤེས་སྙིང་། །ཡེ་ཤེས་ལྷ་སྐུ་ལྷང་ངེ་བ། །འོད་དུ་བྱུང་ཞིང་ཟེར་དུ་གསལ། །དག་པའི་སྣང་བ་ཕྱོགས་བཅུར་ཤར། །ནུབ་པ་མེད་པར་ཙིཏྟར་གནས། །མཚན་མེད་ཡུལ་མེད་གྲུབ་པ་མེད། །རིག་པའི་ངོ་བོ་འགྱུར་བ་མེད། །ཐུགས་རྗེ་དབྲི་མེད་དྲི་མ་མེད། །འགག་མེད་
མ་འགགས་ཐོགས་མེད་པ། །མ་འགགས་འོད་གསལ་ཡུལ་ལ་ཁྱབ། །མཐའ་མེད་ཡུལ་ཅན་རྒྱ་ཆད་མེད། །ཡེ་ཤེས་སྣང་བ་མ་འགགས་པར། །ཡུལ་ལ་སེམས་འཛིན་མ་ཞུགས་པར། །ཡེ་ཤེས་རྟོག་བྲལ་ཆེན་པོར་བཞུགས། །སྙིང་དཀྱིལ་ཆོས་སྐུ་སྟོང་པ་ལ། །ཡེ་ཤེས་ཞིང་ཁམས་ཁ་དོག་ཕྱེད། །གསལ་བ་འཚེར་ཏེ་འོད་དུ་འཕྲོ། །སྐུ་ནི་མི་གཡོ་ཞལ་ཕྱག་རྫོགས། །ཡབ་ཡུམ་ཚོམ་བུ་ལྔ་ལྡན་དེ། །འགྱུར་མེད་ཡེ་ནས་ཕྱོགས་རིས་མེད། །དག་པ་ཆེན་པོར་དེ་ན་འཁྱིལ། །བརྟེན་པ་བྱང་ཁོག་སྟོད་ན་གསལ། །བཞུགས་ནི་ཙིཏྟའི་དཀྱིལ་ན་བཞུགས། །གསལ་བ་ནམ་མཁའི་ངང་དུ་གསལ། །སངས་རྒྱས་ས་ན་ཟག་པ་བྲལ། །གསང་ཆེན་གསེར་གྱི་མཎྜལ་ལ། །གཡུ་ཡི་མེ་ཏོག་ལེགས་བཀྲམ་སྟེ། །ཉི་ཟླ་གཉིས་ཀྱི་དཀྱིལ་ན་བཞུགས། །མན་ངག་བླ་མའི་གསུང་གིས་ཤེས། །བུཌྜྷ་ས་མ་ཏི། རོ་མ་ཧཱ། ཀ་ལ་བྷིཌྜྷ། ཛྙཱ་ན་ཙིཏྟ། བུཌྜྷ་བཛྲ། མ་ཧཱ་ཙཀྵུ། བྷིཌྜྷ། ཨ་མ་ལ། མ་ཧཱ་པཉྩ་ཀ་ལ། ཀྵ་ཨཾ་ཨ་ཨ་ཨ་མ་མ་ཨ་ཧཱ། ཨེ་མ་རང་གི་སྙིང་དཀྱིལ་ན། །ཐིག་ལེ་ཉག་གཅིག་ཀུན་བཟང་བ། །ལྔ་ལྡན་འོད་ཁྱིམ་ཚུལ་དུ་གནས། །སེམས་ཅན་ཀུན་གྱི་ཙིཏྟའི་དཀྱིལ། །ཆོས་དབྱིངས་ཡེ་ཤེས་མཐིང་གའི་ཕུབ། །ཡེ་ནས་ངོས་བཟུང་བྲལ་བར་གནས། །སེམས་ཅན་ཀུན་གྱི་ཙིཏྟའི་དཀྱིལ། །མེ་ལོང་ཡེ་ཤེས་དཀར་པོའི་ཕུབ། །ཡེ་ནས་ངོས་བཟུང་བྲལ་བར་གནས། །སེམས་ཅན་ཀུན་གྱི་ཙིཏྟའི་དཀྱིལ། །མཉམ་ཉིད་ཡེ་ཤེས་སེར་པོའི་ཕུབ། །ཡེ་ནས་ངོས་བཟུང་བྲལ་བར་གནས། །སེམས་ཅན་ཀུན་གྱི་ཙིཏྟའི་དཀྱིལ། །སོར་རྟོག་ཡེ་ཤེས་དམར་པོའི་ཕུབ། །ཡེ་ནས་ངོས་བཟུང་བྲལ་བར་གནས། །སེམས་ཅན་ཀུན་གྱི་ཙིཏྟའི་དཀྱིལ། །བྱ་གྲུབ་ཡེ་ཤེས་ལྗང་གུའི་ཕུབ། །ཡེ་ནས་ངོས་བཟུང་བྲལ་བར་གནས། །སེམས་ཅན་ཀུན་གྱི་ཙིཏྟའི་དཀྱིལ། །
ཆོས་སྐུའི་ཐིག་ལེ་ཉག་གཅིག་དེ། །འོད་ལྔའི་དཀྱིལ་ན་མེ་རེ་ཡོད། །ཤེས་རིག་མ་འགགས་ཝ་ལེ་བ། །འདི་རྟོགས་ཡོན་ཏན་རྒྱ་མཚོ་འབྱུང་། །ཤར་ཚད་ཡོན་ཏན་རྒྱ་མཚོའི་ངང་། །ཙིཏྟ་རིན་ཆེན་ཀུན་གྱི་མཛོད། །ངོ་བོ་རང་གསལ་གཞལ་ཡས་ན། །བུམ་པའི་ནང་གི་མར་མེ་བཞིན། །འོད་དུ་དེ་ནི་མེ་རེ་ཡོད། །རྒྱལ་བ་རིགས་ལྔའི་ཚོམ་བུ་རུ། །དཀྱིལ་འཁོར་དེ་ནི་ཁྲ་མེར་ཡོད། །ཉུང་འབྲུ་ཙམ་ལ་ཕུལ་ཐག་ཙམ། །སྣ་ཚོགས་གཅེར་གྲོལ་ཉིད་དུ་ཡོད། ཏ་ཐཱ་ག་ཏ། ཀུ་ལ་པཉྩ་པ་ནི་བུཌྜྷ་ཀུ་ལས་ན་ཏ། ཙིཏྟ་པ་ནི། བྷུཌྜྷ་ཀཱ་ཡ། ཧཱ་ཧཱ། ཉི་ཟླ་ཐབས་ཤེས་ཁང་པ་ན། །ཆོས་སྐུ་ཀ་དག་འོད་འབར་ལྔ། །ངོ་ཤེས་བུཌྜྷའི་གདམས་ངག་དེ། །བླ་མ་ཀུན་བཟང་ངག་ལ་དྲིས། །ཨེ་མ་སངས་རྒྱས་སུམ་ཅུ་དྲུག །རང་གི་ཙིཏྟའི་དཀྱིལ་ཉིད་ན། །སངས་རྒྱས་བྱེ་བ་འབུམ་ཁྲི་གྲངས། །ཆ་ཕྲ་གསལ་ལ་ཤིན་ཏུ་དྭངས། །མཛེས་པའི་འོད་ཟེར་ཕྱོགས་བཅུར་འཕྲོ། །བལྟ་བས་མི་སྐྱོ་མདུན་རྒྱབ་མེད། །སྣ་ཚོགས་གཅེར་གྲོལ་ཉིད་དུ་བཞུགས། །བླ་མ་དམ་པའི་ངག་གིས་གསལ། །སྔོན་གསུམ་ཐག་གཅོད་ངོ་སྤྲོད་དོ། །ཀྱེ་སེམས་དཔའ་རྡོ་རྗེ་རྩལ། །དག་པ་དབྱིངས་ཞེས་སྒྲོན་མ་ཉིད། །ངོ་བོ་ངེས་ཚིག་དབྱེ་བ་དང་། །རང་བཞིན་མཚན་སྒོམ་གོམས་དང་ཚད། །གནས་དང་འཆར་སྒོ་གནད་མཐུན་དཔེ། །མན་ངག་རྟགས་དང་བཅས་པ་རྣམས། །རིག་པ་ཕྱིར་འཕྲོས་མཁའ་ལ་གསལ། །རང་ཤེས་ནད་དུ་གསལ་བའི་ཚེ། །ཙིཏྟའི་དཀྱིལ་དུ་གནས་པ་ཡིན། །མཚན་ལྡན་བླ་མ་ང་འདྲ་ཡི། །གསུང་གི་བདུད་རྩིས་སྒོ་ཕྱེ་མཐོང་། །ཞེས་གསུངས་ནས་ཤར་གྲོལ་འགག་མེད་དུ་ལྷན་ནེ་བཞུགས་སོ། །དེ་ནས་ཡང་སེམས་དཔའ་རྡོ་རྗེས་གསོལ་པ། ཀྱེ་སྐུ་གསུམ་ཡོངས་རྫོགས་ཀུན་ཏུ་བཟང་། །དང་པོའི་སངས་རྒྱས་ལྷུན་རྫོགས་དཔལ། །སེམས་ཅན་ཀུན་གྱི་ཙིཏྟ་ལ། །རང་གནས་ཆོས་སྐུ་གསུང་ལགས་ཀྱང་། །དུང་ཁང་བྷནྡྷའི་གཞལ་ཡས་ན། །བཞུགས་པ་གང་བཞུགས་རྟེན་ས་གང་། །
འདུས་པའི་འཁོར་ལ་བཀའ་སྩོལ་ཅིག །ཅེས་པ་སྟོན་པ་ཉིད་ཀྱིས་གསན། །ཉོན་ཅིག་རིག་མདངས་འཁོར་རྣམས་ཀུན། །ཨེ་མ་རིག་པའི་ཡེ་ཤེས་ང་། །སེམས་ཅན་ཀུན་གྱི་ཙིཏྟ་ལ། །གོང་ལྟར་གནས་པའི་རང་རྩལ་ཉིད། །དུང་ཁང་ནང་ན་ཁྲོ་བོའི་སྐུ། །ཡབ་དང་ཡུམ་དུ་རྣམ་པར་མངོན། །ཁྲོ་དང་ཁྲོ་མོའི་ཚུལ་འཆང་ཞིང་། །ཡེ་ཤེས་ལྔ་ལྔ་དག་དང་ལྡན། །གསལ་འཚེར་གཟི་བརྗིད་རབ་ཏུ་འབར། །བུམ་པའི་སྐུ་དང་བུམ་ནང་གི། །མར་མེའི་རྩལ་ཟེར་འཇའ་འོད་གནས། །ལོངས་སྤྱོད་རྫོགས་པ་སྐུ་ཡི་ཡུལ། །རང་གི་མགོ་ཡི་དུང་ཁང་ཡིན། །ཕྱི་ཡུལ་ཚོམ་བུ་དག་དང་བཅས། །གནས་ནི་ལོངས་སྤྱོད་ཁྲོ་བོའི་སྐུ། །ལྔ་བཅུ་རྩ་བརྒྱད་ཀླད་ནང་བཞུགས། །བརྟེན་པ་རང་གི་མགོ་ལ་བརྟེན། །གསལ་བ་དྭངས་མ་ཡེ་ཤེས་ཀྱི། །སྒོ་ཕྱེ་བླ་མའི་ཐུགས་མཛོད་གྱིས། །མེ་ལོང་དཀྱིལ་འཁོར་མངོན་སུམ་འཆར། །དུང་ཁང་ཀླད་རྒྱའི་ནང་དག་ན། །ཁྲོ་བོའི་སྐུ་ནི་ཤིན་ཏུ་རྔམ། །ཐུགས་རྗེ་འཛིན་བྱེད་ལྕགས་ཀྱུར་བཅས། །སྐུ་ནི་ཉུང་འབྲུ་ཕུལ་ཐག་ཙམ། །སྣ་ཚོགས་གཅེར་གྲོལ་དགུ་ཁྲིའི་གྲངས། །ཀླད་ནང་འོད་ལྔས་གང་ནས་ཡོད། །ཆ་ཕྲ་མཛེས་པ་གསལ་འཚེར་བཀྲག །ཉམ་ང་མཛེས་པའི་འོད་ཟེར་འཕྲོ། །ཕྲུམ་ཕྲུམ་འཚེར་ལྟར་རབ་ཏུ་གནས། །རང་གི་ཤེས་རིག་ངོ་བོ་འདི། །ངོས་བཟུང་མ་གྲུབ་སྟོང་སངས་ཉིད། །ཆོས་ཀྱི་དབྱིངས་ཀྱི་ངོ་བོར་གྲུབ། །སྟོང་སྟོང་ཕྱང་དུ་མ་ཆད་པ། །ངོ་བོ་མ་འགགས་གསལ་བ་འདི། །མེ་ལོང་ལྟ་བུའི་ཡེ་ཤེས་གྲུབ། །སྟོང་དང་གསལ་བ་ཐ་མི་དད། །རང་རིག་ཤེས་དྲན་མ་འགགས་པ། །དབྱེར་མེད་མཉམ་ཉིད་ཡེ་ཤེས་གྲུབ། །རང་གི་ཤེས་རབ་སོ་སོར་འཆར། །མ་འགགས་རང་གྲོལ་ཝལ་ཝལ་འདི། །སོ་སོར་རྟོགས་པའི་ཡེ་ཤེས་གྲུབ། །རང་རང་གང་ལའང་འགག་ཐོགས་མེད། །བྱ་བ་གྲུབ་པའི་ཡེ་ཤེས་གྲུབ། །སྟོང་གསལ་འདུས་པ་ཆོས་སྐུའི་མདངས། །ཞལ་ཕྱག་རྫོགས་པ་བུམ་སྐུའི་ཚུལ། །དུང་ཁང་ཀླད་པའི་གཞལ་ཡས་ན། །ལོངས་
སྤྱོད་རྫོགས་པའི་སྐུ་རྣམས་བཞུགས། །དཔེར་ན་བུམ་ནང་མར་མེ་ལྟར། །བྱེ་བ་ཁྲག་ཁྲིག་འབུམ་དང་བཅས། །ཤར་ཕྱོགས་གཅིག་པུ་བགྲངས་མི་ལང་། །འོད་ཟེར་བྱེ་བ་འབུམ་དང་བཅས། །བལྟ་བས་མི་སྐྱོ་གསལ་འཚེར་འཕྲོ། །མཛེས་ཤིང་འོད་ལྔའི་ཕུང་པོ་ལ། །བརྟེན་པ་མགོ་སྟེ་གནས་དུང་ཁང་། །སྙིང་མིག་ཀླད་པར་རྩ་འདྲེལ་ནས། །གསལ་བ་མིག་དང་མེ་ལོང་གསལ། །རྒྱུ་བ་གཞུངས་པའི་ནང་ལ་རྒྱུ། །འབྱུང་བ་གསང་བའི་སྒོ་རུ་འབྱུང་། །རིག་པ་ཡེ་ཤེས་སྦུབས་ཉིད་ན། །སྤྲུལ་པའི་ཧེ་རུ་སྐུ་ལྔ་འབྱུང་། །ཡེ་ཤེས་འཁོར་ནི་ཀཽ་རཱི་བརྒྱད། །ཕྲ་མེན་མ་བརྒྱད་སྒོ་མ་བཞི། །དབང་ཕྱུག་རྩ་བརྒྱད་ལྔ་བཅུ་བརྒྱད། །སྟོང་ཞིང་བདག་མེད་མཛེས་ཟེར་འཕྲོ། །རྟོག་མེད་འོད་ལྔའི་ལུས་ཅན་དུ། །ཡེ་ཤེས་ནང་གི་གཟུགས་བརྙན་ལྟར། །རེག་བྱའི་དྲི་མ་དག་དང་བྲལ། །ཚོམ་བུའི་དཀྱིལ་འཁོར་ཆེན་པོ་ཡོད། །འཕྲུལ་གྱི་བང་མཛོད་སྒོ་ཕྱེས་ལ། །སངས་རྒྱས་བྱེ་བ་ཁྲག་ཁྲིག་འབུམ། །བལྟ་བས་མི་སྐྱོ་མཐོང་བར་འགྱུར། །མ་འགགས་ནམ་མཁའི་ཁམས་ལ་ལྟོས། །རྫོགས་སངས་རྒྱས་པ་ཉག་གཅིག་ཡིན། །རང་རིག་མཐོང་བ་མ་འགགས་གསལ། །ལོངས་སྤྱོད་རྫོགས་སྐུར་དེ་ཡིས་བཤད། །རང་གི་ཤེས་རབ་ཕྱོགས་མེད་ཤར། །ཤེས་རབ་ཉིད་ཀྱི་སྐུ་ཡིན་ནོ། །མ་བྲིས་པ་ཡི་དཀྱིལ་འཁོར་ན། །རང་བཞིན་འོད་གསལ་སྲོག་མེད་སྐུ། །དུང་ཁང་ཀླད་པའི་སྦུབས་དག་ན། །རིག་པ་མ་འགགས་ཟང་ཐལ་བ། །ཡེ་ཤེས་ཁ་མིག་ཅན་གྱི་སྐུ། །གསལ་བ་ཤེས་རབ་ཀུན་ཏུ་ཁྱབ། །ལོངས་སྤྱོད་རྫོགས་པ་མདངས་ཀྱི་སྐུ། །གདུལ་བྱ་ཀུན་སྣང་ཐུགས་རྗེ་བརྡལ། །འོད་ཀྱི་ཁ་མིག་སྤྲུལ་པའི་སྐུ། །ཡང་སྤྲུལ་ཁྲག་ཁྲིག་བྱེ་བ་རྣམས། །ཟེར་གྱི་ཁ་མིག་སྣ་ཚོགས་སྐུ། །ཨེ་མ་རྡོས་བཅས་ཕུང་པོའི་ལུས་ཀྱིས་སྟོང་། །འགྱུ་བྱེད་ཡིད་ཀྱི་ལུས་ཀྱིས་སྟོང་། །དམིགས་བཅས་ཏིང་འཛིན་ལུས་ཀྱིས་སྟོང་། །དཔྱོད་བྱེད་ཤེས་རབ་འོད་ལུས་དག །
འདི་ཡིས་དོན་ཀུན་གོ་བར་གྱིས། བུཌྜྷ། ས་མཱ་ཏི། མ་ལ། མ་ལ། མ་ཧཱ། ཙཀྵུ། རོ་མ་ཧ། ཀ་ལ། བུཌྜྷ། ཀཱ་ཡ། གོ་རོ་ཙ་ན། བུཌྜྷ། ཀཱ་ཡ། ཏྲི་ཛྙཱན། པ ཛྱཱུ ་ཏ། རོ་མ་ཧ། བྷིཌྜྷ། ཀ་ལ། བུཌྜྷ། མ་མྲ་ཏཱ་རྦཱཿ། ཧྲྀ་ད་ཡ། ཛྙཱ་ན་ཀཱ་ཡ། ཨ་མ་ལ། བྷིཌྜྷ། ཛྙཱ་ན། ཨ་བུཌྜྷ། ས་མཱ་ཏི། ཀྲ་ཏྲ་ན། ཀུ་ཧྲྀ་ད་ཡ། དྷརྨ་ཀཱ་ཡ། ཨ་བྷི་ཥིཉྩ། ངོ་སྤྲོད་འབྲུ་ཚོགས་གནད་དུ་དྲིལ། །བྷིཌྜྷ། ཛྙཱ་ན་ཙིཏྟ། གོ་རོ་ཙ་ན། ཀ་ལ་ཧ། བྷུཌྜྷ། རི་རབ་ཆེན་པོའི་རྩེ་ལ། ནོར་བུ་རིན་པོ་ཆེ་འོད་འབར་བའི་མན་ངག །སེམས་དཔའ་རྡོ་རྗེས་གོ་བར་གྱིས། །ཨེ་མ་སྒྲོན་མ་འདི་ལྟར་རོ། །ཤེས་རབ་རང་བྱུང་སྒྲོན་མ་ཞེས། །ངོ་བོ་ངེས་ཚིག་དབྱེ་བ་དང་། །རང་བཞིན་མཚན་ཉིད་གནས་པའི་ས། །འཆར་བའི་སྒོ་དང་ཤར་བའི་ཡུལ། །གོམས་དང་དགོངས་ཚད་མཐུན་དཔེ་རྣམས། །ཕྱིར་ཤར་སྒོ་ནི་དབང་པོ་ལྔ། །ཁྱད་པར་ཁ་དང་སྣ་ལ་འཆར། །སྐྱེད་བྱེད་རྩ་ནས་ཙིཏྟར་འཁོར། །རོ་མ་རྐྱང་མ་ཀུན་འདར་མ། །ཤེལ་སྡུག་ཁོག་པ་སྟོང་པའི་ནང་། །གསལ་བ་རང་ཤེས་ཆེན་པོར་བཞུགས། །ཐམས་ཅད་མཁྱེན་པའི་ངོ་བོར་ནི། །མིང་བཞི་འདུས་པའི་ཡེ་གདངས་སུ། །ཡེ་ནས་ལུས་ཀྱི་ཆ་ལ་གནས། །ཐོས་དང་བསམ་དང་སྒོམ་པ་དང་། །ཀུན་འབྱེད་རང་རིག་ཤེས་རབ་རྣམས། །འདི་ཉིད་ངོ་བོར་ཡེ་ནས་བཞུགས། །གདམས་ལྡན་བླ་མའི་བདུད་རྩི་འཐུང་། །ཞེས་གསུངས་ནས། ཀུན་སྣང་ཆོས་ཉིད་ཀྱི་རོལ་པར་ལྷན་ནེར་བཞུགས་སོ། །སེམས་དཔའ་རྡོ་རྗེས་ཡང་གསོལ་བ། །ཀྱེ་ཧོ་རང་བྱུང་ཀུན་ཏུ་བཟང་། །ཀློང་ཆེན་རྩོལ་བྲལ་ཐུགས་རྗེ་ཅན། །ཀླད་པ་དུང་ཁང་གཞལ་ཡས་ན། །ཀུན་སྣང་ཁྲོ་བོ་དཔག་མེད་རྣམས། །ཡེ་ནས་གནས་པར་གསུངས་ལགས་ཀྱང་། །སྔར་གསུངས་རྣམས་ལ་འདྲེལ་མེད་པའི། །ལྟ་བྱེད་མིག་གི་གཞལ་ཡས་དེ། །བཞུགས་པ་གང་བཞུགས་རྟེན་འདྲེལ་གང་། །འདུས་པའི་འཁོར་ལ་བཀའ་སྩོལ་ཅིག །ཅེས་པ་སྟོན་པ་ཉིད་ཀྱིས་གསན། །ཉོན་ཅིག་རང་
རིག་རང་རྩལ་འཁོར། །སེམས་ཅན་ཀུན་གྱི་མིག་ཉིད་ལ། །ཐུགས་རྗེ་སྒྲོན་མ་འདི་ལྟར་རོ། །ཉི་ཟེར་གྱི་ནི་སྒྲོན་འོད་ལྟར། །སྒྲོན་འོད་གཏིང་ལ་ཐུག་པ་མེད། །རིག་ཡུལ་དབྱིངས་ལ་སྒྲོན་ཡུལ་མཁའ། །སྤྲུལ་སྐུའི་བཞུགས་གནས་སྒལ་ཚིགས་སོ། །ཡེ་ཤེས་ཟང་ཐལ་མིག་གི་དཀྱིལ། །ཐུགས་རྗེ་སྤྲུལ་སྐུ་ཡེ་ནས་བཞུགས། །བརྟེན་ནི་ཆུ་བུར་མིག་ལ་བརྟེན། །བཞུགས་ཀྱང་ཨ་འབྲས་དཀྱིལ་ནའོ། །གསལ་ལ་མཐོང་བ་མ་འགགས་པ། །གསལ་འགྲིབ་མེད་པར་ད་ལྟ་བསྟན། །དཔེའུ་རིས་དག་གིས་ངོ་སྤྲད་དོ། །སྙིང་ནས་མིག་ཏུ་རྩ་དཀར་འདྲེལ། །རང་རིག་མཐོང་བ་མ་འགགས་ཏེ། །ཆོས་སྐུ་སྣང་བའི་བར་དག་ན། །ཡེ་ཤེས་ངོ་བོ་ཟང་ཐལ་འཁྱིལ། །དེ་ངོས་བཟུང་ལ་མཁའ་ལ་གཏད། །རང་རིག་ཡེ་ཤེས་ལྷུག་པར་འཚར། །སངས་རྒྱས་རང་གི་སྙིང་བཞུགས་པ། །ཤ་ཁྲག་ལུས་ཀྱིས་མ་ཐུམས་ཏེ། །ཆུ་བུར་མིག་ཏུ་ཟང་ཐལ་ནས། །མཐོང་བ་འགག་མེད་ཆེན་པོར་བཞུགས། །བརྟེན་པ་དབང་པོ་མིག་ལ་བརྟེན། །བཞུགས་པ་མིག་འབྲས་བྷ་ཤུའི་དཀྱིལ། །སྐྱོན་མེད་མཁའ་ལ་མངོན་སུམ་ལྟོས། བུཌྜྷ། ཛྙཱ་ན། ཀཱ་ཡ་ཙཀྵུ། རང་བྱུང་བྲག་ཕུག་གཉིས་པོ་ན། །ཐོག་མའི་སངས་རྒྱས་འོད་མི་འགྱུར། །མངོན་སུམ་བཞུགས་པ་ང་ལ་དྲིས། །གནས་སྙིང་ལུས་བརྟེན་སྐུར་ཤར་ཏེ། །འོད་ལུས་ཟང་ཐལ་མིག་ལ་སྨིན། །རོ་མ། ཙཀྵུ། ཀ་ལ། པ་ནི། བྷུ་ཏ། རྒྱ་མཚོའི་གཏིང་དུ་ནོར་བུ་སྦས། །རིན་ཆེན་རི་རབ་རྩེ་ལ་ཐོན། །འོད་ཟེར་ཉི་ཟླའི་མཁའ་ལ་འཕྲོ། །སྐད་ཅིག་དང་པོར་བྷུཌྜྷའོ། །ལུང་ལྡན་བླ་མའི་ཐུགས་ལས་ལྟོས། །རི་རབ་ཆེན་པོའི་རྩེ་ཡི་ན། །ཀུན་གསལ་གྲོང་ཁྱེར་མི་རྒོད་ལྔ། །ཛྙཱ་ན་པཉྩ་ཀ་ལ་ཧ་ཙཀྵུ། ལུང་བསྟན་བླ་མའི་ཐུགས་ལ་ཞོག །མཐོང་བ་མ་འགགས་ཟང་ཐལ་སྐུ། །དུས་ཀྱིས་མ་བསྒྲིབས་ཟང་ཐལ་སྐུ། །སྐྱེ་ཤི་མེད་པ་ཟང་ཐལ་སྐུ། །ལུས་ལྔས་མ་བསྒྲིབས་ཟང་ཐལ་སྐུ། །མདུན་
རྒྱབ་མེད་པ་ཟང་ཐལ་སྐུ། །དགེ་སྡིག་མ་བསྒྲིབས་ཟང་ཐལ་སྐུ། །ཕྱི་ནང་མེད་པ་ཟང་ཐལ་སྐུ། །ཡུལ་ཤེས་གཉིས་མེད་ཟང་ཐལ་སྐུ། །རྐྱེན་གྱིས་མ་བསྒྲིབས་ཟང་ཐལ་སྐུ། །ཡེ་ཤེས་སྤྱན་ལྡན་ཟང་ཐལ་སྐུ། །བཅུ་ཡི་ཚུལ་དུ་ཤེས་པར་གྱིས། །ཨེ་མ་ཧོ། རྒྱང་ཞགས་ཆུ་ཡི་སྒྲོན་མ་ཉིད། །སྐྱེ་བྱེད་ས་བོན་ཚུལ་དུ་གནས། །ངོ་བོ་ངེས་ཚིག་དབྱེ་བ་དང་། །མཚན་ཉིད་བཞུགས་ཚུལ་གནས་ས་དང་། །སྐྱེ་བྱེད་འཆར་སྒོ་མཐུན་དཔེ་ཚད། །འདི་རྣམས་ལེགས་པར་ཡིད་ལ་ཟུང་། །ངོ་བོ་སྣང་བ་གཉིས་ཀ་སྡུད། །རྒྱང་ནི་རིག་སྐུ་མཐོང་བ་སྟེ། །གཟུགས་སོགས་འདོད་ཡོན་ལྔ་སོགས་རྣམས། །འདི་ཡིས་འཆིང་བས་ཞགས་པ་ཡིན། །སྣང་བ་རང་སར་བཞག་ནས་ནི། །བདག་འཛིན་བྲལ་བས་ཆུ་ཞེས་བྱ། །སྒྲོན་ནི་རང་གི་སྣང་བར་གསལ། །གོང་ནས་གོང་དུ་འཕེལ་བའོ། །དབྱིངས་རིག་འདྲེས་པས་མ་ཞེས་བྱ། །དབྱེ་ན་རྒྱང་ཞགས་ཆུ་སྒྲོན་དང་། །ཡེ་ཤེས་འདུས་པའི་རྒྱང་ཞགས་དང་། །དབང་པོ་འདུས་པའི་རྒྱང་ཞགས་སོ། །མཚན་ཉིད་འཆར་བྱེད་འགག་མེད་པས། །དབང་པོའི་དྭངས་མ་མིག་ཅེས་བྱ། །འབྱེད་པ་པདྨའི་སྤྱན་དུའོ། །འདི་ཡི་གནས་ནི་མིག་ཡིན་ཏེ། །མཐོང་བྱེད་འགག་པ་མེད་པ་ཡིས། །ཡུལ་རྣམས་འཛིན་པར་བྱེད་པའི། །ཀླད་པ་དུང་ཁང་དཀར་པོ་ནས། །གཡས་སུ་འཁྱིལ་པ་རྩ་གསུམ་པོའི། །བ་མེན་རྭ་འདྲའི་རྩ་ཡི་དབྱིབས། །རྩ་ཡི་ནང་ན་འདི་ཉིད་གནས། །འཆར་བའི་སྒོ་ནི་ཙཀྵུ་ར། །སྐྱེད་བྱེད་མངལ་དུ་རང་ཞུགས་ཚེ། །དུས་ཀུན་གྱི་ནི་ཐོག་མ་རུ། །ལྟེ་བའི་རྩ་མདུད་གྲུ་གསུམ་དུ། །ཕ་མའི་རྒྱུ་རྐྱེན་དྭངས་མ་ཡིས། །མིག་གི་དྭངས་མ་ཉིད་དུ་ཆགས། །ཕ་མའི་རྒྱུ་རྐྱེན་ཆ་གཉིས་ལས། །དཀར་ནག་འདྲེས་པ་དེ་བཞིན་ནོ། །མཐུན་དཔེ་འཛིན་བྱེད་ལྕགས་ཀྱུ་ཡིས། །གང་སྣང་སྣ་ནས་འཛིན་པ་བཞིན། །འཁོར་འདས་སྣ་གཉིས་འདི་ཡིས་འཛིན། །སྒྲོན་མས་ཡུལ་གཟུང་རིག་པར་སྣང་། །ལུ་གུ་རྒྱུད་མཐོང་ཚད་ཡིན་ནོ། །
ཞེས་གསུངས་ནས་དམིགས་མེད་ཀ་དག་གི་ངང་དུ་ལྷན་ནེར་བཞུགས་སོ། །རྒྱ་རྒྱ་རྒྱ། དེ་ནས་སེམས་དཔའ་རྡོ་རྗེ་ཡིས། །འདི་སྐད་རང་སྒྲས་སྟོན་པ་བསྐུལ། །ཀྱེ་ཧོ་བྱ་བཙལ་མེད་པའི་དཔལ། །མིག་གི་གཞལ་ཡས་གསུངས་ལགས་ཀྱང་། །སྔར་གསུངས་ཚིག་ལ་འདྲེལ་མེད་པའི། །འགྱུ་བྱེད་རྩ་ཡི་གཞལ་ཡས་ན། །བཞུགས་པ་གང་བཞུགས་གང་ལ་བརྟེན། །སྟོན་པས་འཁོར་ལ་བཀའ་སྩོལ་ཅིག །ཅེས་པ་གསན་ཏེ་བཀའ་སྩལ་པ། །ཉོན་ཅིག་རིག་མདངས་སྤྲུལ་འཁོར་རྣམས། །འགྱུ་བྱེད་རྩ་ཡི་དྲ་བ་ན། །ཡེ་ཤེས་སྐུ་བཞིའི་སྟོན་པ་ང་། །རང་བཞིན་ཐིག་ལེའི་ཚུལ་བཞུགས་ཏེ། །སེམས་ཅན་ཀུན་གྱི་ལུས་ཟུང་འཛིན། །རང་བཞིན་འོད་ཀྱི་གོང་བུ་བཞིན། །རྩ་རྣམས་ནང་ན་ཐིག་ལེའི་སྐུ། །ཆེ་ཚད་ནམ་མཁའི་མཐའ་དང་མཉམ། །ཆུང་ཚད་རྟ་རྔ་བཅུར་གཤགས་ཙམ། །གསལ་ཚད་ཉི་ཟླ་སྒྲོན་མེ་འདྲ། །གསལ་ལ་འཚེར་ཏེ་གཟི་བརྗིད་འབར། །འགྲོ་དང་འོང་དང་གནས་ས་རུ། །ཡེ་ཤེས་མཁའ་འགྲོ་བྱེ་བ་འབུམ། །ས་ཡ་གྲངས་འདས་བརྗོད་མི་ལང་། །ཉུང་འབྲུའི་ལུས་ལ་སྤྱན་ཕུལ་ཐག །རྒྱུ་དང་འབྲས་བུའི་ཁྱད་པར་ཉིད། །འཕོ་གནས་རླུང་གི་འཕར་རྐྱེན་ནོ། །ཐིག་ལེའི་ཡུལ་ནི་རང་གི་ལས། །ཐིག་ལེའི་ཕོ་བྲང་འཁོར་ལོ་ལྔ། །ཐིག་ལེའི་གཞུང་ལམ་གཞུངས་པ་ཉིད། །ཐིག་ལེའི་གྲོང་ཁྱེར་བྷེ་ཏ་ལཱི། །བརྟེན་པ་སྒལ་པའི་ཚིགས་ལ་བརྟེན། །གསལ་བ་འཕྲུལ་གྱི་བང་མཛོད་ཉིད། །བླ་མས་སྒོ་ཕྱེ་དབྱིངས་ལ་གསལ། །སྤྲུལ་པའི་གྲོང་ཁྱེར་དགུ་ཁྲི་འབུམ། །ཐིག་ལེ་རང་བྱུང་གཟུགས་ལ་བརྟེན། །རྩ་རྣམས་ཀུན་གྱི་ནང་ན་བཞུགས། །ཐོན་པ་གསང་བའི་སྒོ་ལ་ཐོན། །གསལ་བ་རྡོ་རྗེའི་མེ་ཏོག་ཉིད། །པདྨའི་ཟེའུ་འབྲུའི་འོག་བཅུག་པས། །རང་གི་ལུས་ངག་ཡིད་གསུམ་ལ། །མངོན་སུམ་རྟགས་འཆར་གསལ་ཉམས་མྱོང་། །ཧཱུྃཿསྶཿཀྐཿཏྟཿཙཿ། རྒྱུ་ལམ་ངོ་བོ་དབྱིངས་འབྲས་བུ། །བདེ་གསལ་ཉམས་མྱོང་གདམས་པ་རྣམས། །ཚད་ལྡན་བླ་མའི་ཐུགས་
མཛོད་བྲུས། །ཨེ་མ་ཧོ་སེམས་དཔའ་རྡོ་རྗེ་ཉོན། །ཐིག་ལེ་སྟོང་པའི་སྒྲོན་མ་ཞེས། །ཆོས་རྣམས་ཀུན་གྱི་ཡིད་ཆེས་པ། །འདི་ཉིད་དོན་རྣམས་ཡིད་ལ་ཟུང་། །ངོ་བོ་ངེས་ཚིག་དབྱེ་བ་དང་། །མཚན་ཉིད་དགོངས་པ་གནས་པ་དང་། །འཆར་སྒོ་རང་བཞིན་ཡུལ་སྣང་བ། །ཚད་དང་ཡོན་ཏན་ཐབས་མཐུན་དཔེ། །འདི་རྣམས་རྩ་བ་བློ་ལ་ཞོག །ངོ་བོ་ཉག་གཅིག་ཆ་ཕྲ་སྟེ། །སྟོང་པའི་མུ་ཡང་རང་གསལ་བ། །མི་རྟོག་སྤྲོས་བྲལ་ཟླུམ་པོའོ། །ཐིག་ནི་མི་འགྱུར་དྲང་པོ་ལ། །ལེ་ནི་བརྡལ་བ་ཆེན་པོ་ཡིན། །སྟོང་པ་དངོས་ཡུལ་ཞེན་བློ་དགག །སྒྲོན་མས་འོད་ལྔར་རང་སྣང་སྟེ། །རང་རིག་རང་ངོ་གསལ་མདངས་ལྡན། །ངེས་པའི་ཚིག་ཡིན་ཐེ་ཚོམ་སེལ། །དབྱེ་བ་ལྔ་ཡིན་འདི་ལྟར་རོ། །གཞི་གནས་རང་གི་ཐིག་ལེ་དང་། །ཀུན་རྫོབ་རྒྱུ་ཡི་ཐིག་ལེ་དང་། །དོན་དམ་སྤྲོས་མེད་ཐིག་ལེ་དང་། །རང་བྱུང་འབྲས་བུའི་ཐིག་ལེ་དང་། །མི་འགྱུར་ཐིག་ལེ་སྟོང་པའོ། །རང་གནས་དགོངས་པ་གཅིག་ཡིན་ཏེ། །ཐ་སྙད་གྲངས་ཟད་འཛིན་ཞེན་བྲལ། །མཚན་ཉིད་དངོས་པོ་རང་སྟོང་སྟེ། །མ་བསྒོམས་པར་ཡང་མཚམས་མེད་པའི། །ཐིག་ལེ་ཟླ་བྲལ་ཉིད་དུའོ། །ཀ་ཏི་གསེར་གྱི་རྩ་ཆེན་ཏེ། །དར་དཀར་སྣལ་ལྟར་འཕྲ་ལ་འདྲིལ། །ཤེལ་སྦུག་ཅན་བཞིའི་ནང་ན་ནི། །རང་གནས་སུས་ཀྱང་བྱས་མེད་པར། །ཡེ་ནས་མཉམ་པ་ཆེན་པོར་གནས། །རེས་ནི་རླུང་གི་རྟ་ལ་ཞོན། །ལུས་དང་རྩ་ཡི་ནང་དག་ན། །སེམས་ཅན་ཀུན་གྱི་ལུས་རྟེན་དུ། །ཐོག་མ་ཉིད་ནས་གནས་པའོ། །འཆར་བྱེད་མ་བསྒྲིབས་སེམས་ཅན་མིག །ཙཀྵུ་ཞེས་པའི་སྒོ་ནས་ཐོན། །ཉི་མའི་དཀྱིལ་འཁོར་བཞིན་དུ་སྣང་། །ཀུན་གྱི་མིག་ནས་འཆར་བ་ཡིན། །རང་བཞིན་བབས་ཀྱིས་གནས་པ་ལ། །ཡེ་གདངས་རང་བཅས་རང་གསལ་ཏེ། །སུས་ཀྱང་མ་བྱས་རང་བཞིན་ནོ། །འཆར་ཡུལ་བར་སྣང་སྟོང་པ་ལ། །བྱུང་གནས་འགྲོ་གསུམ་བྲལ་བ་ཡི། །བདེ་སྟོང་མི་རྟོག་ཟག་མེད་རང་། །རང་བྱུང་
ཐིག་ལེ་བརྗོད་མེད་སྟོང་། །ནམ་མཁའི་ཁམས་སུ་སྤྲོ་བསྡུ་མེད། །བར་སྣང་མི་འགྱུར་དེ་ཉིད་ན། །ངེས་པར་ཚད་དུ་དེ་འགྱུར་རོ། །རྩོལ་མེད་ཉིད་དུ་རང་གྲོལ་ཏེ། །ཁམས་གསུམ་འཁོར་བར་ཟློག་རེ་ཀན། །དངོས་ནི་ལྷ་ལ་རང་མཐོ་གང་། །ལྷ་མིན་ཆག་གང་མི་མཐེབ་གང་། །འོད་ལྔ་འདུས་པའི་ཟླུམ་པོ་རུ། །ཟད་པ་མེད་པར་སྣང་བ་ཡིན། །ཐབས་ཀྱི་མན་ངག་མཐེབ་མཛུབ་ཀྱིས། །ཙཀྵུའི་ཕུགས་དང་འགྲམ་བཙིར་བས། །མངོན་དུ་སྣང་སྟེ་ཡིད་ཆེས་སོ། །མཐུན་དཔེ་རྨ་བྱའི་མདོངས་འདྲ་སྟེ། །དྲ་མིག་ཉ་མིག་བཞིན་དུ་གནས། །འདི་ལ་རང་བཞིན་དབང་ཐོབ་ནས། །རྩོལ་མེད་ཉིད་དུ་རང་གྲོལ་ལོ། །ཞེས་གསུངས་ནས་ཀུན་བཟང་ཡངས་པ་ལྷུན་འབྱམས་ཆེན་པོར་ལྷན་ནེར་བཞུགས་སོ། །ཐེག་པ་ཀུན་གྱི་སྤྱི་ཕུད་ཀློང་ཆེན་རབ་འབྱམས་ཀྱི་རྒྱུད་ལས། ཐོག་མའི་སངས་རྒྱས་སྐུ་དང་ཐིག་ལེར་གནས་ པའི་ས། ཞིབ་རྒྱས་གསལ་བར་གསུངས་པའི་ལེའུ་སྟེ་ལྔ་པའོ།། །།ས་མ་ཡ། རྒྱ་རྒྱ་རྒྱ། དེ་ནས་སེམས་དཔའ་རྡོ་རྗེ་ཡིས། །སྟོན་པ་ཉིད་ལ་འདི་སྐད་གསོལ། །ཀྱེ་སྤྲུལ་པའི་སྐུ་མཆོག་ཀུན་ཏུ་བཟང་། །སྐྱེ་མེད་ཆོས་ལས་ཀུན་འབྱུང་བ། །སེམས་ཅན་རྣམས་ཀྱི་ཕོ་བྲང་བཞིར། །སྒྲོན་མ་བཞི་དང་སངས་རྒྱས་སྐུ། །གནས་པ་རྒྱས་པར་གསུངས་ན་ཡང་། །ལམ་ནི་གང་ལ་རྒྱུ་བ་ལགས། །སྟོན་པས་འཁོར་ལ་བཀའ་སྩོལ་ཅིག །ཅེས་པ་སྟོན་པས་གསན་ཅིང་དགོངས། །དགེས་པའི་མདངས་ཕྱུང་ཚིག་འདི་གསུངས། །ཀྱེ་ཧོ་སེམས་དཔའ་རྡོ་རྗེ་ཉོན། །རང་བྱུང་རིག་པའི་ངོ་བོ་ཉིད། །ལམ་ནི་རྩ་ལ་རྒྱུ་བ་སྟེ། །རང་ལ་རྩ་ཡི་འཁོར་ལོ་ལྔ། །སྐུ་གསུམ་ཡེ་རྫོགས་རྩ་གསུམ་ནི། །རོ་མ་རྐྱང་མ་ཀུན་འདར་མ། །རྩ་གསུམ་རང་གི་ལུས་ཟུངས་ཡིན། །དབུ་མས་འཁོར་ལོ་བཞི་བརྟེན་ཏེ། །འདི་ཡི་གཡས་གཡོན་དབུས་དག་ནས། །ཀུན་རྫོབ་དོན་དམ་དབྱེ་བ་ནི། །
ལུས་དང་ཡན་ལག་བསྐྱེད་པ་དང་། །སྒྲོན་མ་ཉིད་ཀྱང་འདིར་སྨིན་ཏེ། །ཙིཏྟར་སྐུ་རྣམས་སྨིན་བྱས་ནས། །རྩ་རྣམས་ཐིག་ལེར་སྨིན་པར་བྱེད། །ལུས་ཀྱི་རྒྱ་མདུད་འཁོར་ལོ་བཞི། །དྲ་བ་བཞིན་དུ་འབྲལ་མེད་ཀྱང་། །དྲང་པོར་ལུས་ཀྱི་ཀ་བའི་ཚུལ། །རྩ་གསུམ་སྐུ་གསུམ་སྐྱེད་བྱེད་དེ། །ནུས་པ་སྤྱི་གཙུག་སྟོད་ལ་འཐོན། །དབང་པོའི་དགོངས་པ་སོ་སོར་བྱེད། །རླུང་སེམས་འདྲེས་ནས་རྩ་ལ་བརྟེན། །ཉི་ཁྲི་སྟོང་ཕྲག་དྲུག་བརྒྱ་རྒྱུ། །གྱེན་རྒྱུ་ཐུར་སེལ་ལས་གཉིས་བྱེད། །སྐྱེད་བྱེད་རྩ་ཆེན་བཞི་དག་ནས། །འགྱུ་འགུལ་འཕྲིག་དང་ཡང་ཞིང་བསྐྱོད། །ལས་ཀྱི་རླུང་བྱས་ཤེས་རིག་གསལ། །ཤེས་རབ་རྣམས་ཀྱི་ངོ་བོར་རྒྱུ། །རོ་རྐྱང་ཀུན་འདར་ཤེལ་སྦུག་དང་། །ཁོག་སྟོང་གསལ་ཤེས་ཆེན་པོར་གནས། །གསལ་མི་གསལ་རྣམས་རླུང་གི་རྐྱེན། །རྩ་ནང་གསུམ་ནས་ཐིག་ལེ་བྱུང་། །དོན་དམ་ཐིག་ལེ་གཡོན་ནས་བྱུང་། །ཀུན་རྫོབ་ཐིག་ལེ་གཡས་ནས་བྱུང་། །དབུས་ནས་རང་བཞིན་ཐིག་ལེའོ། །རིག་པ་ཡེ་ཤེས་ཐིག་ལེའི་ཚུལ། །ཀུན་རྫོབ་རྒྱུ་ཡིས་སྤྲུལ་སྐུ་འགྲུབ། །ཕ་མའི་ཁུ་ཁྲག་ཐིགས་པ་དང་། །རྩ་ནས་རྒྱུ་ཞིང་ཕུང་པོ་བརྟེན། །གནས་པས་ལུས་ཀྱི་གཟི་མདངས་བསྐྱེད། །དོན་དམ་འོད་ཀྱི་ཐིག་ལེ་ནི། །ཉུང་འབྲུ་ཙམ་ལ་རང་གསལ་ཟླུམ། །རླུང་གིས་བསྐྱོད་དུས་འགྱུ་བ་སྟེ། །ཟག་མེད་རྟག་ཆད་མཐའ་ལས་འདས། །རང་བཞིན་ངོ་བོ་ཀ་དག་ལ། །གཞི་ནས་ཡེ་ཤེས་གསུམ་ལྟ་བུ། །སྟོང་པ་ཟང་ཐལ་གསལ་བ་དང་། །རིག་པ་ཟང་ཐལ་གསུམ་དུ་གནས། །དབུས་ཀྱི་རྩ་ནས་རྒྱུ་ལམ་བྱེད། །ཅེས་གསུངས་ནས་སྣ་ཚོགས་གཅེར་གྲོལ་ཆེན་པོར་ལྷན་ནེར་བཞུགས་སོ། །ཐེག་པ་ཀུན་གྱི་སྤྱི་ཕུད་ཀློང་ཆེན་རབ་འབྱམས་ཀྱི་རྒྱུད་ལས། ལམ་གང་ནས་རྒྱུ་ཟུར་ཙམ་བསྟན་པའི་ལེའུ་སྟེ་དྲུག་པའོ།། །།ས་མ་ཡ། རྒྱ་རྒྱ་རྒྱ། དེ་ནས་སེམས་དཔའ་རྡོ་རྗེ་
ཡིས། །སྟོན་པ་ཉིད་ལ་ཡང་གསོལ་པ། །ཀྱེ་མ་བཅོས་ཀློང་ཡངས་ཀུན་ཏུ་བཟང་། །ཡེ་ཤེས་སེམས་དཔའ་བདག་མེད་དཔལ། །ལམ་གྱི་རྒྱུ་ཚུལ་གསུངས་ན་ཡང་། །འཁོར་ལོ་རོ་རྐྱང་ལ་སོགས་པའི། །རྩ་རྣམས་དེ་ལྟར་ཡོད་པ་ནི། །རྩ་ཡི་མཚན་ཉིད་གོ་བ་ལ། །ལུས་ཀྱི་མཚན་ཉིད་མ་གོ་ཞིང་། །ལུས་ཀྱི་མཚན་ཉིད་མ་ཤེས་ན། །གནས་པའི་མཚན་ཉིད་ཡོངས་མི་གོ། །གནས་པའི་མཚན་ཉིད་མ་གོ་ན། །འཇིག་པའི་མཚན་ཉིད་ཡོངས་མི་ཤེས། །ཕྱི་རབས་རྣམས་ཀྱིས་མི་གོ་བས། །ཆགས་ཚུལ་འཁོར་ཚུལ་བཀའ་སྩོལ་ཅིག །འདུས་པའི་འཁོར་རྣམས་སྤྲོ་ཉན་འཚལ། །ཞེས་པ་སྟོན་པས་གསན་དགོངས་ཏེ། །འཁོར་ལ་ཐུགས་རྗེས་སྣང་ཞིང་གཟིགས། །གསང་ཆེན་ངེས་པའི་ཚིག་འདི་ཀུན། །གཉིས་མེད་ཡེ་ཤེས་ཐུགས་ཀློང་ནས། །མི་འགྱུར་གསང་བའི་བུམ་པར་དྲིལ། །ཐུན་མོང་མ་ཡིན་ལྗགས་ལ་བཀྲམ། །སྐྱེ་མེད་ཀློང་ནས་འགག་མེད་དུ། །བརྗོད་མེད་ཚིག་འདི་རང་གྲགས་གསུངས། །ཉོན་ཅིག་སེམས་དཔའ་རྡོ་རྗེ་རྩལ། །ལྷུན་གྲུབ་ཡེ་ཤེས་རིག་པ་འདི། །བརྟེན་པ་ལུས་ཀྱི་གནས་ལུགས་ནི། །རང་དབང་ཅན་དུ་འཁོར་བ་དང་། །རང་དབང་མེད་པར་འཁོར་ཚུལ་གཉིས། །རང་དབང་ཅན་གྱི་འཁོར་ཚུལ་ནི། །འོད་ཟེར་མཐིང་ག་ཕྱི་རུ་ཐོན། །ལྗང་གུ་ནང་དུ་ལོག་པ་སྟེ། །ཡེ་ཤེས་ཁོང་གསལ་ཆེན་པོར་གནས། །དེ་ནི་ཆོས་སྐུ་ལྷུན་གྲུབ་ཡིན། །རང་བཞིན་ཐུགས་རྗེ་སྐྱེ་བ་མེད། །ལོངས་སྤྱོད་རྫོགས་སྐུའི་འཁོར་ལུགས་སོ། །རང་བཞིན་འགྲོ་དོན་བྱེད་པས་ན། །སྤྲུལ་པ་སྐུ་ཡི་འཁོར་ལུགས་སོ། །མེ་ཏོག་ལ་སོགས་བརྫུས་སྐྱེས་ཏེ། །དག་པའི་མངལ་དུ་དྲན་བཞིན་འཇུག །དེ་རྣམས་རང་དབང་ཅན་ཡིན་ནོ། །རང་དབང་མེད་པའི་འཁོར་ཚུལ་ནི། །དགེ་བ་ཅན་ནི་ཡར་ལ་འཁོར། །སྡིག་པ་ཅན་ནི་མར་ལ་འཁོར། །སྡིག་པ་ཅན་གྱི་མར་འཁོར་ནི། །རླུང་དང་རྣམ་ཤེས་ཡུལ་སྣང་འདི། །
ལས་ཀྱི་དབང་གིས་གཟུགས་སྣང་ཤར། །དབང་པོ་ཀུན་ལྡན་ཕྱོགས་མེད་དུ། །ཟས་དང་གོས་དང་སྐྱབས་གནས་འཚོལ། །བར་མ་དོར་ནི་ཡིད་ཀྱི་གཟུགས། །ཤེས་པ་ཡང་ཡང་ཕྱད་ཕྱོད་ཅན། །སྟོང་གསུམ་སེ་གོལ་གཅིག་ལ་འཁོར། །སྡུག་བསྔལ་ཚོར་བ་མང་པོ་མྱོང་། །དེ་ལ་སྐྱེ་བ་རྣམ་བཞི་སྟེ། །མངལ་སྐྱེས་སྒོང་སྐྱེས་དྲོད་གཤེར་སྐྱེས། །བརྫུན་སྐྱེས་སྐྱེ་དང་བཞི་ཡིན་ནོ། །མ་ཡི་མངལ་དུ་འདི་ལྟ་སྟེ། །བར་དོའི་རྣམ་ཤེས་འཁྱམ་པོ་རྣམས། །སྔོན་གྱི་ལས་ངན་དབང་དག་གིས། །དབྱར་གྱི་ཤ་ལ་སྦྲང་ཕུང་ལྟར། །ལ་ལའི་སྲོག་ཆགས་ལྟར་དུ་སྣང་། །ཕ་མའི་འདོད་སྲེད་རྟེན་འདྲེལ་འཛོམ། །བསོད་ནམས་མཐུན་ཅིང་ལས་འདྲེལ་ལྡན། །རྒྱུ་རྐྱེན་ཕུན་ཚོགས་མངལ་དུ་འཇུག །འཇུག་སྒོ་དག་དང་མ་དག་གཉིས། །ལྔ་འདུས་མཚན་མ་སྦྱོར་བ་ལ། །ཉོན་མོངས་ལྔ་དང་ཡིད་དྲུག་དང་། །ཡེ་ཤེས་ལྔ་ཡི་བདག་ཉིད་དོ། །ཡེ་ཤེས་རང་ངོ་མ་ཤེས་ཏེ། །དེར་འཛིན་དྲི་མས་འབྱུང་བ་འདུས། །དེ་ལས་ལུས་གྲུབ་རྒ་ཤིའི་བར། །འཁོར་བར་འཁྱམས་ཤིང་འབྱུང་བ་འདུས། །ཆོས་ཉིད་བར་དོ་ངོ་མ་ཤེས། །དེར་འཛིན་དུག་ལྔ་དུག་གསུམ་རྒྱས། །ཡུལ་དྲུག་དག་གི་འཛིན་པ་ཡིས། །ཕོ་མོ་སྦྱོར་བ་བྱེད་པ་ལ། །དེར་འཛིན་སྐྱེས་པའི་ཡེ་ཤེས་རྩལ། །རིག་པ་ཡིད་དུ་འགྱུ་བ་དེ། །ཕ་མའི་བདེ་བ་སྲ་སྙམ་དུས། །བར་དོའི་རྣམ་པར་ཤེས་པ་དེ། །བཤང་ལམ་ཞུགས་ནས་མངལ་དུ་ནི། །ཡི་གེ་ཨ་ཡི་ཚུལ་དུ་ཐིམ། །ཆུ་ལ་ཆུ་བཞག་ཚུལ་དུ་སོང་། །མངལ་གྱི་རྒྱས་འཐུམ་བྱུང་ཚོར་འགགས། །བདེ་བ་ཆེན་པོའི་ངང་དུ་གནས། །སེམས་ཡིད་ལྷ་ཁང་ཁྱིམ་ཚུད་བསམ། །རྣམ་ཤེས་རླུང་དང་རྒྱུ་རྐྱེན་བཞི། །ཁྲག་དང་འོ་མ་འདྲེས་ལྟར་སོང་། །ཞག་ནི་བདུན་ཕྲག་དང་པོ་ལ། །སྲུབ་བྱེད་རླུང་གིས་རབ་བསྲུབས་ཏེ། །ཉི་ཟླ་ག་འུའི་ཚུལ་དེ་དག །མེར་མེར་ཞོ་རློན་ལྟ་བུར་གྱུར། །ཉུང་འབྲུ་བརྒྱ་ཡི་ཚད་ཙམ་ཆགས། །འབྱུང་བ་ལྔ་ཡི་བྱེད་ལས་སོ། །བདུན་ཕྲག་གཉིས་
པར་ནུར་ནུར་པོ། །ཞོ་དང་ཁྲག་འདྲེས་ཚུལ་དུ་འགྱུར། །འབྱུང་བ་བཞི་ཡི་ཡི་གེ་དང་། །རང་བཞིན་ཡི་གེ་བཞི་བཅུ་ནི། །རྟ་རྔ་བཅུ་ཆ་ཙམ་དུ་ཆགས། །ཐིག་ལེ་ཉུང་འབྲུའི་ཆ་ཙམ་མོ། །འབྱུང་བ་ས་ཡི་བྱེད་ལས་ཡིན། །བདུན་ཕྲག་གསུམ་ལ་མེ་ཡིས་བསྐྱེད། །གོར་གོར་པོ་ནི་ཞོ་བཞིན་ཆགས། །རང་བཞིན་ཡི་གེ་ཙ་ཡི་ཚུལ། །རྣམ་པ་བརྒྱད་དུ་སྣང་བར་འགྱུར། །ཐིག་ལེ་ཉུང་འབྲུའི་བཅུ་ཆ་ཙམ། །བདུན་ཕྲག་བཞི་ལ་རླུང་གིས་གཏོར། །ཏར་ཏར་དངུལ་ཆུ་ལྟ་བུར་སྣང་། །ཡུངས་འབྲུ་ཕྱེད་ཀྱི་ཚད་དུ་དེས། །རྩ་རྣམས་རགས་པ་རབ་ཏུ་བསྐྱེད། །བདུན་ཕྲག་ལྔ་ལ་ཆུ་ཡིས་བསྡུས། །མཁྲང་འགྱུར་སྟོན་པ་ཉུང་འབྲུ་ཙམ། །དེ་དུས་རྩ་འདབ་བཅུ་དྲུག་ཆགས། །རྩ་ཡི་རྩེ་མོར་ཐིག་ལེ་ནི། །ཉ་ཡི་མིག་ཙམ་གཅིག་ཏུ་ཆགས། །དེ་ལ་བརྟེན་ནས་ལྟེ་བ་ཡི། །སྤྲུལ་པའི་འཁོར་ལོའི་གཞི་མ་ཆགས། །བདུན་ཕྲག་དྲུག་ཏུ་མེ་རླུང་གིས། །སྨིན་བྱས་ཉུང་འབྲུ་གཉིས་ཆ་ཙམ། །ཁྱབ་འཇུག་ཉ་ཡི་ཚུལ་དུ་ཆགས། །རྩ་དཀར་རྩེ་ལ་ཐིག་ལེ་ནི། །ཉ་མིག་ཙམ་པ་ཤར་བའོ། །དེ་ལ་བརྟེན་ཏེ་སྙིང་ག་རུ། །ཆོས་ཀྱི་འཁོར་ལོའི་གཞི་མ་ཆགས། །ཞག་ནི་བདུན་ཕྲག་བདུན་པ་ལ། །འབྱུང་བ་བཞི་ཆར་འདུས་པ་ཡིས། །ཉུང་འབྲུ་གསུམ་གྱི་ཆ་ཙམ་བསྐྱེད། །མེར་མེར་རུས་སྦལ་ལྟ་བུ་སྟེ། །ཆུ་ཡིས་བཤིག་ཅིང་ས་ཡིས་མནན། །མེ་ཡིས་སྡུད་ཅིང་རླུང་གིས་གཏོར། །ཡང་གཅིག་འབྱུང་བཞི་འདུས་པ་ཡིས། །ཉི་ཤུ་རྩ་བཞི་གཅིག་ཡི་གེ་དང་། །ལྟེ་བ་དག་ནས་བསྐྱེད་པ་ཡི། །རོ་མ་རྐྱང་མ་ཀུན་འདར་མ། །རྟ་རྔ་ཙམ་ཡང་ཡར་ཆད་ནས། །སྙིང་གར་འཁྲིལ་ནས་མགྲིན་པ་རུ། །ལོངས་སྤྱོད་འཁོར་ལོའི་ཚུལ་དུ་ཆགས། །དེ་ནས་རྩ་གསུམ་རྩེ་མོ་ལ། །ཐིག་ལེ་ཉ་མིག་ཙམ་དུ་འགྱུར། །བརྟེན་ནས་སྤྱི་བོའི་བདེ་ཆེན་ཆགས། །དེ་ལ་བརྟེན་ནས་མིག་གཉིས་ཆགས། །འབྱུང་བའི་དྭངས་མ་ཡེ་གསལ་བཞི། །སྙིང་གི་དཀྱིལ་དུ་འགྱུར་མེད་བཞུགས། །
ཞག་ནི་བདུན་ཚན་བརྒྱད་པ་ལ། །ཆུས་བསྡུས་སྲན་མ་བཅུ་ཆ་ཙམ། །དེ་དུས་སྙིང་གི་དྭངས་མ་ལྔ། །རྩ་ཆེན་ལྔ་རུ་ཕྱིར་ཤར་ཏེ། །ནང་གི་དོན་སྙིང་རྣམ་ལྔ་ཆགས། །ཐིག་ལེའི་དྭངས་མ་སྙིགས་མ་ཆགས། །སྙིང་རྩ་ཡར་སོང་ལྕེ་ཆགས་སོ། །དེ་ལ་གྱེས་ནས་མགོ་བོ་ཆགས། །རྩ་ཆེན་བཞི་ནི་སྙིང་དུ་འདུས། །མཆེར་བའི་རྩ་ལས་མཆུ་ཆགས་ཏེ། །དེ་ལ་བརྟེན་ནས་ལུས་ཆགས་སོ། །དེ་ནས་ལག་པ་གཡས་པ་ཆགས། །དེ་ནས་མཁལ་རྩ་གཡོན་པ་ཆགས། །མཁལ་རྩ་ཡར་སོང་སྙན་གཉིས་ཆགས། །དེ་ནས་རྐང་པ་གཡས་པ་ཆགས། །དེ་ནས་མཆིན་རྩ་མཆིན་པ་ཆགས། །མཆིན་རྩ་ཡར་སོང་མིག་གཉིས་ཆགས། །དེ་ནས་ལག་པ་གཡོན་པ་ཆགས། །རླུང་གི་མདངས་ལ་གློ་བ་ཆགས། །གློ་རྩ་ཡར་སོང་སྣ་གཉིས་ཆགས། །དེ་ནས་རྐང་པ་གཡོན་པ་ཆགས། །དེ་ནས་སྨད་ཀྱི་ནང་ཁྲོལ་ཆགས། །ལུས་ཀྱང་རུས་སྦལ་མཁྱིད་གང་བའོ། །ཞག་ནི་ལྔ་བཅུ་ང་དྲུག་སྟེ། །བདུན་ཚན་བརྒྱད་དུ་ལུས་རྣམས་བསྐྱེད། །འཁོར་ལོ་བཞི་ཡི་རྩ་འདབ་དང་། །རང་བཞིན་ཡི་གེ་སྤྱན་དང་བཅས། །ལུས་ཀྱི་ཤ་རུས་ཐམས་ཅད་ནི། །ཆ་རྣམས་ཚང་བར་ཆགས་པའོ། །ཞག་ནི་བདུན་ཕྲག་དགུ་པ་ལ། །འཁོར་ལོ་བཞི་ལ་རྩ་ཆེན་བརྒྱད། །རྣམ་ཤེས་རྨི་ལམ་ལྟ་བུར་ཆགས། །འབྱུང་བ་ས་ཡིས་སྲ་བར་བྱས། །ཞག་ནི་བདུན་ཕྲག་བཅུ་པ་ལ། །ལུས་ལ་སྲིན་བུའི་གྲོང་ཁྱེར་དང་། །ཕྱི་རོལ་ཤ་ལྤགས་བར་རྣམས་ཀུན། །རྩ་ཡི་དྲ་བ་དྲ་ཕྱེད་ཀྱིས། །ཐམས་ཅད་འདྲེལ་བའི་རྣམ་པར་ཆགས། །གོང་གི་དེ་དག་ཐམས་ཅད་ཀུན། །རིམ་གྱིས་བསྐྱེད་ཅིང་རིམ་གྱིས་ཆགས། །གལ་ཏེ་ཕ་མ་སྐྱོན་ཅན་ནམ། །དབང་པོ་མ་ཚང་ལུས་སྐྱོན་ཞུགས། །དེ་ལ་ཆགས་ལུགས་འཁྲུག་པའོ། །འཁོར་ལོ་བཞི་ལ་སྤྱན་གཉིས་གཉིས། །ཐབས་ཤེས་ཚུལ་དུ་སྤྱན་བརྒྱད་ཆགས། །ཞག་ནི་བདུན་ཕྲག་བཅུ་གཅིག་ལ། །མ་ལ་མིག་གློའི་ནད་བྱུང་སྟེ། །མགོ་
ན་སྐྱུག་བྲོ་དང་ག་འགག །རྩ་རྣམས་རེ་ཐག་ལྟ་བུར་ཆགས། །གཟུགས་ཀྱང་རུས་སྦལ་ལྟ་བུ་སྟེ། །མཐོ་གང་ཙམ་དུ་རགས་པར་ཆགས། །འབྱུང་བ་བཞི་པོ་འདུས་པ་ཡིས། །རླུང་གིས་ཕྱེ་ཞིང་ཆུ་ཡིས་བསྡུས། །ས་ཡིས་བཟུང་ཞིང་མེ་ཡིས་སྨིན། །རྩ་གསུམ་འཁོར་ལོ་བཞི་ལ་སོགས། །ལུས་ཀྱི་རྟེན་འདྲེལ་ཐམས་ཅད་ཚང་། །ཞག་ནི་བདུན་ཚན་བཅུ་གཉིས་ལ། །ལྟེ་བ་སྤྲུལ་པའི་འཁོར་ལོ་ཡི། །རྩ་མདུད་ཐམས་ཅད་རྫོགས་པར་ཆགས། །ཞག་ནི་བདུན་ཕྲག་བཅུ་གསུམ་ལ། །ལས་ཀྱི་རླུང་ཡང་འཇུག་པར་བྱེད། །ཞག་ནི་བདུན་ཕྲག་བཅུ་བཞི་ལ། །ཕ་ཡི་ས་བོན་རུས་པ་ཆགས། །ཞག་ནི་བདུན་ཕྲག་བཅོ་ལྔ་ལ། །མ་ཡི་ས་བོན་ཤ་རྣམས་བསྐྱེད། །ཞག་ནི་བདུན་ཕྲག་བཅུ་དྲུག་ལ། །ཤ་རུས་དྭངས་མ་རྐང་མར་ཆགས། །ཞག་ནི་བདུན་ཕྲག་བཅུ་བདུན་ལ། །པགས་པ་སྤྲིས་མ་ཐམས་ཅད་ཆགས། །ཞག་ནི་བདུན་ཚན་བཅོ་བརྒྱད་ལ། །ལུས་ཀྱི་ཡན་ལག་གསལ་བར་དོད། །ཞག་ནི་བདུན་ཚན་བཅུ་དགུ་ལ། །ཉ་སུལ་ཐམས་ཅད་སྦྲུལ་ལྟར་འཁྲིལ། །ཞག་ནི་བདུན་ཕྲག་ཉི་ཤུ་ལ། །རྩ་རྣམས་དྲ་བའི་ཚུལ་དུ་གཡོགས། །ཞག་ནི་བདུན་ཕྲག་ཉེར་གཅིག་ལ། །མེ་ཁམས་སྙིང་ནི་བྲ་བོ་ཙམ། །ཞག་ནི་བདུན་ཕྲག་ཉེར་གཉིས་ལ། །ལྕགས་ཁམས་གློ་བ་གངས་རི་ཆགས། །ཞག་ནི་བདུན་ཕྲག་ཉེར་གསུམ་ལ། །ཤིང་ཁམས་མཆིན་པ་ནགས་ལྟར་ཆགས། །ཞག་ནི་བདུན་ཕྲག་ཉེར་བཞི་ལ། །མཆེར་བ་ས་ཁམས་ལྤགས་ལྟར་ཆགས། །ཞག་ནི་བདུན་ཕྲག་ཉེར་ལྔ་ན། །ཀུ་ཡ་དར་གྱི་ཡོལ་ལྟར་ཆགས། །ཞག་ནི་བདུན་ཕྲག་ཉེར་དྲུག་ལ། །ཀླད་པ་ཞོ་ཕོར་ལྟ་བུར་ཆགས། །ཞག་ནི་བདུན་ཕྲག་ཉེར་བདུན་ལ། །རྒྱུ་མ་འདོམ་པ་གསུམ་དུ་ཆགས། །ཞག་ནི་བདུན་ཕྲག་ཉེར་བརྒྱད་ལ། །རྒྱུ་མ་ཁུགས་དང་ཚིལ་བུ་དང་། །ཡན་ལག་རགས་པར་ཆགས་པའོ། །ཞག་ནི་བདུན་ཕྲག་ཉེར་དགུ་ལ། །ཕོ་བ་རང་གི་
སྙིམ་པ་གང་། །ཞག་ནི་བདུན་ཕྲག་སུམ་ཅུ་ལ། །གྲོད་པ་རང་གི་བྱིན་པ་ཙམ། །ཞག་ནི་བདུན་ཕྲག་སོ་གཅིག་ལ། །ལོང་ཁ་རང་གི་ལག་ངར་ཙམ། །ཞག་ནི་བདུན་ཕྲག་སོ་གཉིས་ན། །ལྟེ་བ་སྤྲུལ་པའི་རྩ་ཁ་འབྱེད། །མ་ཡི་ཟས་སྐོམ་བུ་ལ་ཕན། །ཟས་ཀྱི་དྭངས་མ་ཕོ་བར་སོང་། །ལྟེ་བ་སྤྲུལ་པའི་འཁོར་ལོ་ནས། །སྲུབ་བྱེད་རླུང་གིས་དྭངས་སྙིགས་ཕྱེ། །དྭངས་མ་མེ་ཡི་ཁམས་ལས་ནི། །མཁྲིས་པ་རང་གི་ཁྱོར་གང་ཆགས། །སྙིགས་མ་བད་ཀན་ཆུ་ཡི་ཁམས། །ཁྱོར་བ་གང་ནི་ཕོ་བར་ཆགས། །ཞག་ནི་བདུན་ཕྲག་སོ་གསུམ་ལ། །རླུང་མཁྲིས་བད་ཀན་གསུམ་གྱིས་ནི། །ཁམས་ཀྱི་ནུས་པ་སྐྱེད་པར་བྱེད། །བརྟེན་པ་ས་ཡི་ཁམས་ཀྱིས་ནི། །ལུས་ཟུངས་ཐམས་ཅད་གསོ་བར་བྱེད། །ཀླད་པ་ཆུ་ཡིས་ལུས་ཟུངས་སྡུད། །གཡོ་བ་རླུང་གིས་ལུས་ཁོད་སྙོམས། །དྲོ་བ་མེ་ཡིས་ལུས་རྣམས་སྨིན། །ཞག་ནི་བདུན་ཕྲག་སོ་བཞི་ལ། །ཁམས་ཀྱི་དྭངས་མ་འཆར་བ་དེ། །སྙིང་ནི་མེ་ཡི་ཁམས་ཡིན་པས། །དེ་གྱེས་པ་ལས་ལྕེ་ཆགས་ཏེ། །རོ་ཡི་མྱོང་བྱེད་ཚོར་བར་བྱེད། །གློ་བ་ལྕགས་ཀྱི་ཁམས་ཡིན་པས། །དྭངས་མ་རྣ་བ་རྣམ་གཉིས་ཀྱིས། །སྒྲ་ཡི་དོན་ནི་ཚོར་བར་བྱེད། །མཆིན་པ་ཤིང་གི་ཁམས་ཡིན་པས། །དྭངས་མ་མིག་གཉིས་གཟུགས་བརྙན་འཆར། །མཆེར་བ་ས་ཡི་ཁམས་ཡིན་པས། །དྭངས་མ་སྣ་ཡིས་དྲི་རྣམས་ཚོར། །མཁལ་མ་ཆུ་ཡི་ཁམས་ཡིན་པས། །དྭངས་མ་རྡོ་རྗེ་པདྨ་ཡིས། །བདེ་བ་ཐམས་ཅད་མྱོང་བར་བྱེད། །བདུན་ཕྲག་དེ་ནི་སོ་ལྔ་ལ། །རྩ་ཡི་ལམ་རྣམས་དོད་པར་བྱེད། །བདུན་ཕྲག་དེ་ནི་སོ་དྲུག་ལ། །རླུང་དང་རྣམ་ཤེས་འཕྲད་པར་བྱེད། །བདུན་ཕྲག་དེ་ནི་སོ་བདུན་ལ། །བདེ་སྡུག་མྱོང་ཚོར་དྲག་པོ་སྐྱེ། །བདུན་ཕྲག་དེ་ནི་སོ་བརྒྱད་ལ། །ལུས་ཀྱི་སྟོབས་རྣམས་སྐྱེད་པར་བྱེད། །བདུན་ཕྲག་དེ་ནི་སོ་དགུ་ལ། །རྣམ་ཤེས་བྱུང་ཚོར་ཕྱི་ལ་འདྲེང་། །བདུན་ཕྲག་དེ་ནི་བཞི་བཅུ་
ལ། །སྐྱེ་བ་སྔ་ཕྱི་ཐམས་ཅད་དྲན། །དེ་ལྟར་བདུན་ཕྲག་བཞི་བཅུ་ལ། །ཟླ་བ་དགུ་དང་ཞག་པོ་བརྒྱད། །སྤྱིར་ན་ཟླ་དགུ་ངོ་བཅུ་ལ། །མངལ་དུ་བཙོག་པའི་འདུ་ཤེས་ཤར། །འཕུལ་བྱེད་རླུང་གིས་མར་ལ་བདས། །མགོ་མཇུག་ལོག་ནས་ཕྱིར་ལ་འཐོན། །དེ་ལྟར་མངལ་གྱི་རྒྱ་དང་བྲལ། །སྔར་གྱི་བག་ཆགས་སྲབ་ཏུ་སོང་། །ཕྱིས་ཀྱི་ཉེར་ལེན་ངོ་མ་འཕྲོད། །ཤེས་པ་སྔར་བས་མི་གསལ་ཞིང་། །རྩ་རླུང་ཀུན་གྱི་སྟོབས་མ་སྐྱེས། །ཁམས་ཀྱི་དྭངས་སྙིགས་མ་ཕྱེ་བས། །ནད་གདོན་མི་མཐུན་ཕྱོགས་རྣམས་སྡང་། །དེ་ནས་ཁམས་ཀྱི་ཟས་ཟོས་པས། །དྭངས་མས་ཁམས་ཀྱི་ནུས་པ་བསྐྱེད། །སྙིགས་མས་ལུས་ཀྱི་སྟོབས་བསྐྱེད་ནས། །རིམ་གྱིས་ལུས་རྣམས་སྐྱེད་པར་འགྱུར། །དེ་ལྟར་རྫོགས་ལྡན་མི་ལུས་ལ། །རུས་དུམ་སུམ་བརྒྱ་དྲུག་ཅུ་ཡོད། །ཤ་ལ་སྤར་ཚད་ལྔ་བཅུ་ཡོད། །ཁྲག་ནི་རང་གི་སྙིམ་པ་དྲུག །རྩ་ནི་ཉི་ཁྲི་ཆིག་སྟོང་ཡོད། །ཉ་སུལ་ཆེན་པོ་དྲུག་ཡོད་དོ། །ཀླད་པ་རང་གི་སྙིམ་པ་གང་། །རྒྱུ་མ་རང་འདོམ་གསུམ་ཡོད་དེ། །སྐྲ་ནི་བརྒྱད་ཁྲི་བཞི་སྟོང་ཡོད། །བ་སྤུ་བྱེ་བ་གཅིག་ཡོད་དོ། །སོ་ནི་སུམ་ཅུ་སོ་གཉིས་ཡོད། །སྒལ་ཚིགས་ཉི་ཤུ་རྩ་བརྒྱད་ཡོད། །རྩིབ་མ་བཅུ་དྲུག་ལ་སོགས་ཏེ། །འདོམ་གང་གྲུ་བཞི་ལུས་ལ་རྫོགས། །རང་ལུས་རྒྱལ་བའི་དཀྱིལ་འཁོར་འདི། །སྦུབས་ནས་ཐོན་ཏེ་སྤྲུལ་པའི་སྐུ། །འབྱུང་བ་ལྔ་ལས་ལུས་གྲུབ་སྟེ། །ཐབས་ཤེས་གཉིས་ནི་འདུ་འབྲལ་མེད། །བདུན་ཚན་རྣམས་ནི་རྟགས་ཚད་དེ། །ཟླ་བ་དགུ་ནི་ཐེག་དགུ་སྟེ། །ཟླ་ངོ་བཅུ་ནི་ས་རྣམས་བགྲོད། །སྒྱུ་མ་ལུས་ཀྱི་ཆགས་གནས་ལུགས། །འཁྲུལ་མེད་ཁྱོད་ཀྱི་བློ་ལ་ཞོག །ཅེས་གསུངས་ནས་ཅོག་བཞག་ངང་དྭངས་ཀྱི་ངང་ལ་ལྷན་ནེར་བཞུགས་སོ། །ཐེག་པ་ཀུན་གྱི་སྤྱི་ཕུད་ཀློང་ཆེན་རབ་འབྱམས་ཀྱི་རྒྱུད་ལས། ལུས་ཀྱི་གྲུབ་ཚུལ་བསྟན་པའི་ལེའུ་སྟེ་བདུན་པའོ།། །།ས་མ་ཡ། རྒྱ་རྒྱ་རྒྱ། རྒྱ་རྒྱ་རྒྱ།
ཟབ་རྒྱ། དེ་ནས་སེམས་དཔའ་རྡོ་རྗེ་ཡིས། །སྟོན་པ་ཉིད་ལ་ཡང་གསོལ་པ། །ཀྱེ་དང་པོའི་སངས་རྒྱས་ཀུན་ཏུ་བཟང་། །ཡེ་གྲོལ་བརྗོད་པ་བྲལ་བའི་མཆོག །ལུས་ཀྱི་ཆགས་ལུགས་གསུངས་ན་ཡང་། །རྩ་ཡི་གནས་ལུགས་མ་གསུངས་པས། །འདུས་པའི་འཁོར་ལ་བཀའ་སྩོལ་ཅིག །ཞུས་པའི་ལན་དུ་བཀའ་སྩལ་པ། །ཀྱེ་ཧོ་རིག་མདངས་འཁོར་རྣམས་ཉོན། །སྤྱིར་ན་རྩ་ནི་བསམ་མི་ཁྱབ། །ཧྲིལ་གྱིས་བསྟན་ན་འདི་ལྟར་རོ། །མ་རིག་གཉིས་སྣང་འཛིན་པ་ཡིས། །ཡེ་ཤེས་རྩལ་ཡང་འབྱུང་བཞིར་འདུས། །འབྱུང་བཞི་ལས་ཀྱི་ལུས་སུ་གྲུབ། །ལུས་དང་མཉམ་དུ་རྩ་རྣམས་གྲུབ། །རྩ་དང་དུས་མཉམ་ཐིག་ལེར་གྲུབ། །དེ་གྲུབ་སྐུ་དང་ཡེ་ཤེས་གྲུབ། །ཐམས་ཅད་དབྱེར་མེད་ལྷུན་གྲུབ་ཡིན། །དེ་ཡང་ལུས་ཆགས་དུས་མཚུངས་སུ། །འབྱུང་བཞིའི་ལུས་ཀྱི་རྩ་རྣམས་གྲུབ། །སྤྱིར་ནི་བ་སྤུའི་གྲངས་དང་མཉམ། །སྟོང་ཕྲག་བརྒྱད་ཅུ་རྩ་གཉིས་འདུས། །བཞི་བརྒྱ་བདུན་ཅུ་རྩ་གཉིས་སུ། །དེ་ཡང་བསྡུས་པས་འདུས་པའོ། །དེ་བསྡུས་འཁོར་ལོ་བཞི་རུ་འདུས། །ལྟེ་བར་སྐྱེད་བྱེད་དྲུག་ཅུ་བཞི། །སྙིང་གར་དྲན་པ་སུམ་ཅུ་གཉིས། །རོ་འདུས་བརྒྱད་གཉིས་བཅུ་དྲུག་གནས། །རྣམ་བཀོད་སུམ་བརྒྱ་དྲུག་ཅུ་གནས། །སྤྱིར་ན་འཁོར་ལོ་བཞི་པོ་ལ། །རྩ་ཡི་གྲངས་མ་བཤད་པ་ནི། །བཞི་བརྒྱ་བདུན་ཅུ་རྩ་གཉིས་ཏེ། །དེ་ནི་བསྡུས་པའི་གྲངས་ཅན་ནོ། །འཁོར་ལོ་བཞི་པོ་དེ་ཡི་དབུས། །རྩ་གསུམ་དྲང་པོར་ཀ་བར་གནས། །ཤེལ་སྦུག་ཅན་ནི་ཞོར་ལ་སྟེ། །ཨོཾ་ཨཱཿཧཱུྃ་གསུམ་ཡང་རྩ་ནང་གནས། །དག་པ་སྐུ་གསུམ་འཆར་གཞི་བྱེད། །རྩ་གཞན་འབྱུང་ལྔའི་རྟེན་ཡིན་ནོ། །རོ་མ་ཆུ་ཡི་དྭངས་མས་བསྐྱེད། །རྐྱང་མ་ས་ཡི་དྭངས་མས་བསྐྱེད། །ཀུན་འདར་མ་ནི་རླུང་གིས་བསྐྱེད། །རོ་མས་ལྟེ་བའི་གཡོན་ངོས་ནས། །བྱང་སེམས་འབབས་པའི་རྟེན་གཞི་བྱེད། །རྐྱང་མས་སྙིང་གི་རྩེ་གཡོན་ནས། །མགྲིན་པའི་རྩ་ནས་གཉིས་སུ་གྱེས། །རྩེ་ཆུང་གཉིས་
ནས་འཐོན་ནས་ནི། །དར་སྐུད་པ་མེད་རྭ་འདྲ་ཡི། །རྩ་ནི་མིག་གི་འབྲས་ལ་ཟུག །ཡེ་ཤེས་སྣང་བ་འཆར་བའི་ལམ། །ཀུན་འདར་མ་ནི་དབུས་ན་གནས། །རྩེ་མོ་གསུམ་ནི་ཡར་སོང་བས། །གཡས་གཡོན་རྣ་བ་གཉིས་ལ་ཟུག །དབུས་མ་ཚངས་པའི་གནས་སུ་ཟུག །རང་བཞིན་ཡི་གེ་འོད་དང་བཅས། །རླུང་ལྔ་ཡེ་ཤེས་རྣམ་ལྔ་དང་། །ཐིག་ལེ་འོད་འབར་ཚུལ་དུ་གནས། །དེ་ནི་རྩ་སྤྱིའི་རྣམ་བཤད་ཡིན། །དེ་ནི་སོ་སོའི་རྩ་གནས་བཤད། །དང་པོ་སྐྱེད་བྱེད་འཁོར་ལོ་ཡིས། །སྲིད་པ་ཆགས་པའི་གཞི་མ་བྱེད། །བདེ་བ་ཆེན་པོའི་རྣལ་དུ་འཇོག །མི་འགྱུར་ཐེམས་སུ་གསུམ་གྱིས་འཇུག །ལུས་མི་འགྱུར་བ་རྩ་ཡི་ཐེམས། །ངག་མི་འགྱུར་བ་ཡི་གེའི་ཐེམས། །ཡིད་མི་འགྱུར་བ་རླུང་གི་ཐེམས། །རྩ་ཡིད་རླུང་ནི་ལུས་ངག་ཡིད། །དེ་རྣམས་ལྟེ་བ་དག་ནས་བསྐྱེད། །རྩ་འདབ་དྲུག་ཅུ་རྩ་བཞི་ན། །རང་བཞིན་ཡི་གེ་དེ་དང་མཐུན། །འོད་ཀྱི་གོང་བུ་རང་བཞིན་སྐུ། །ཀུན་ཏུ་བཟང་པོ་སོ་གཉིས་དང་། །ཀུན་ཏུ་བཟང་མོ་སོ་གཉིས་རྣམས། །ཐབས་དང་ཤེས་རབ་གཉིས་སུ་མེད། །དེ་ལ་ཐམས་ཅད་སྐྱེད་བྱེད་ཟེར། །སྒྲོན་མའི་སྤྱན་དང་འབྱུང་བཞིའི་སྤྱན། །ས་དང་ཡ་ཡིས་མཚན་ནས་གནས། །ཁྱད་པར་ལུས་རྫོགས་སྨིན་པའི་རྩ། །གྲངས་ཅན་ཉི་ཤུ་རྩ་བརྒྱད་དེ། །ཐིག་ལེའི་སྤྱན་རྩ་བཅུ་དྲུག་ཡོད། །སྒྲོན་མའི་རྩ་ནི་བཅུ་གཉིས་ཡོད། །ཀུན་ལ་ཡི་གེ་རེ་རེ་གནས། །ལྟེ་བར་འབྱུང་བའི་ས་བོན་ནི། །ཡབ་ཡུམ་ས་བོན་ཧྲཱྀཿདང་ནི། །ཡི་གེ་སུ་སེར་ཚུལ་དུ་གནས། །དབུ་མ་རོ་མ་རྐྱང་མ་གསུམ། །དཀྱིལ་དྲང་ཀ་བའི་ཚུལ་དུ་གནས། །ལྟེ་བར་རྩ་འདབ་དྲུག་ཅུ་བཞི། །ལྗོན་ཤིང་ཡལ་ག་གྱེས་འདྲར་གནས། །དྲན་བྱེད་འཁོར་ལོ་ལྟེ་བ་ནས། །སོར་བརྒྱད་ཡར་བཅད་སྙིང་ག་ནས། །རྩ་རྣམས་ཡལ་ག་སུམ་ཅུ་གཉིས། །རང་བཞིན་ཡི་གེ་འོད་ཐིག་མཐིང་ཚུལ། །འཁོར་ལོ་ལྟེ་བར་ཁམས་དཀར་པོ། །ཡབ་ཡུམ་ཡི་གེ་མ་དང་ཧཱུྃ། །འོད་ཀྱི་གོང་བུའི་ཚུལ་དུ་གནས། །
རྩ་ཡིག་འདི་ལྷག་ཨ་རུ་གནས། ཁཿཙཿཏཿཕཿཡཱཿསཿཏཿཀཿགྷཿཛྷཿཏེཿདྷཿརཿ། དེ་རྣམས་ཀུན་བཟང་ཡབ་ཡུམ་ཡིན། །རོ་འདུས་མགྲིན་པའི་རྩ་ཡིག་ནི། །རྩ་འདབ་བཅུ་དྲུག་ཡི་གེ་རེ། །དབུས་སུ་མེ་ཡིག་རཾ་དང་ནི། །ཡབ་ཡུམ་ཡི་གེ་རི་དང་རྩ། །འོད་ཀྱི་གོང་བུའི་ཚུལ་དུ་གནས། །རྩ་ཡིག་རྣམས་ནི་འདི་ལྟར་རོ། །ར་རྭཿལི་ལཱཿཨེ་ཨཱཿཨ་ཨཱཻཿཨ་ཨཾཿཨ་ཨཿཨ་ཨཱཿ། རྩེ་མོ་རྣམས་བཀོད་རྩ་ཡིག་ནི། །རྩ་འདབ་སུམ་བརྒྱ་དྲུག་ཅུ་ཡོད། །དེ་བསྡུས་སུམ་ཅུ་རྩ་གཉིས་ཏེ། །རང་བཞིན་ཡི་གེ་རེ་རེ་སྟེ། །དབུས་སུ་ཡི་གེ་ཡ་ལྗང་དང་། །ཡབ་ཡུམ་ཡི་གེ་ཧ་དང་ར། །འོད་ཀྱི་གོང་བུ་ཚུལ་དུ་གནས། །རྩ་ཡིག་རྣམས་ནི་འདི་ལྟར་རོ། །ཕ་ཕཱཿཕི་ཕཱིཿམི་མཱིཿབ་བཱཿབ་བཱིཿཉ་ཉཱཿཉི་ཉཱིཿཁ་ཁཱཿག་གཱཿཙ་ཙཱཿཚ་ཚཱཿད་དྷཿཐ་ཐཱཿས་སཱཿན་ནཱཿཨ་ཨ་ཨཱཿ། རྩ་འདབ་ཐམས་ཅད་གདུགས་རྩིབས་ལྟར། །རྩ་ཡི་གཙོ་བོ་གསུམ་ལས་གྱེས། །ནུས་པ་སྤྱི་གཙུག་འཇོམ་པ་ཡིས། །དབང་པོ་སྒོ་ལྔ་དག་ལ་དོན། །བྱེད་ལས་སོ་སོར་བྱེད་པ་ཡིན། །འཁོར་ལོ་བཞི་ལ་མི་ཐེ་བའི། །གསང་བས་བདེ་བ་མྱོང་བར་བྱེད། །རྣམ་པར་བཀོད་པའི་འཁོར་ལོ་ནི། །རྩ་འདབ་ཉི་ཤུ་རྩ་བརྒྱད་ཀྱིས། །ལྟེ་བའི་རྩ་མདུད་ཐིག་ལེ་ལ། །འབྱུང་བཞིའི་དྭངས་མ་ཁུ་ཁྲག་ལྗང་། །ཡི་གེ་ཡ་དང་ས་རུ་གནས། །རླུང་གི་དྭངས་མ་ཡཾ་གནས་སོ། །དེ་ལྟར་རང་ལུས་འདི་ཉིད་ལ། །རྩ་དང་ཡི་གེའི་གནས་སུ་རྫོགས། །ཞེས་གསུངས་ནས། བློ་སྒོམ་ཡིད་དཔྱོད་དང་བྲལ་ནས། མངོན་སུམ་གཅེར་གྲོལ་དུ་ལྷན་ནེར་བཞུགས་སོ། །ཐེག་པ་ཀུན་གྱི་སྤྱི་ཕུད་ཀློང་ཆེན་རབ་འབྱམས་ཀྱི་རྒྱུད་ལས། རྩའི་གནས་ཚུལ་བསྟན་པའི་ལེའུ་སྟེ་བརྒྱད་པའོ།། །།རྒྱ་རྒྱ་རྒྱཿ། སེམས་དཔའ་རྡོ་རྗེས་ཡང་གསོལ་པ། །མི་གཡོ་འགྱུར་མེད་ཀུན་ཏུ་བཟང་། །བླང་དོར་བྱ་བྲལ་རྩོལ་མེད་པས། །རྩ་ཡི་གནས་
ལུགས་གསུངས་ན་ཡང་། །གཡོ་བ་རླུང་གི་གནས་ལུགས་རྣམས། །ཕྱི་རབས་རྣམས་ཀྱིས་མི་གོ་བས། །སྟོན་པས་འཁོར་ལ་བཀའ་སྩོལ་ཅིག །མ་འཁྲུལ་དག་པའི་བློ་ཡིས་འཛིན། །ཅེས་པ་སྟོན་པས་གསན་དགོངས་ཏེ། །ཞལ་མདངས་འོད་ཀྱིས་འཛུམ་བསྟན་ནས། །ཞུས་པའི་ལན་དུ་བཀའ་སྩལ་པ། །ཨེ་མ་སེམས་དཔའ་རྡོ་རྗེ་རྩལ། །ཡེ་ཤེས་རླུང་གིས་མ་ཁྱབ་མེད། །དེ་ལ་རྣམ་གྲངས་མང་ན་ཡང་། །ལས་རླུང་ཡེ་ཤེས་རླུང་གཉིས་སོ། །ཡེ་ཤེས་རླུང་ནི་སེམས་དང་འདྲེས། །སེམས་ནི་ལས་རླུང་དག་དང་འདྲེས། །རླུང་སེམས་གཉིས་སུ་མེད་པས་ཏེ། །ཀུན་འདུས་རླུང་གིས་ལས་བྱེད་དོ། །རླུང་ནི་རྩ་གསུམ་ནང་ནས་འགྱུ། །ལྔ་སྟོང་བཞི་བརྒྱ་ས་རླུང་སྟེ། །མེ་ཆུ་གཉིས་ཀྱང་དེ་ཙམ་མོ། །ཉི་ཁྲི་ཆིག་སྟོང་དྲུག་བརྒྱ་འགྱུ། །བྱེད་པའི་ལས་ནི་གཉིས་ཡིན་ཏེ། །གྱེན་རྒྱུ་ཐུར་དུ་གཤང་གཅི་འཕེན། །སྣང་སྲིད་ཐམས་ཅད་རླུང་ལ་བརྟེན། །རླུང་ནི་ཐམས་ཅད་བྱེད་ལས་སོ། །འདེགས་པའི་ནུས་སྟོབས་ལྡན་པས་ན། །ས་ལ་རླུང་གིས་ཁྱབ་པའོ། །ཆུ་ལ་རླུང་གིས་ཁྱབ་པའི་ཕྱིར། །འབབ་པའི་རྩ་ལ་ཤུགས་ལྡན་པའོ། །རླུང་གིས་མེ་ལ་ཁྱབ་པའི་ཕྱིར། །འབར་བའི་ནུས་རྩལ་ལྡན་པའོ། །རླུང་ལ་རླུང་གིས་ཁྱབ་པས་ན། །འགྲོ་བའི་རྩ་ལ་ཤུགས་ལྡན་པའོ། །མཁའ་ལ་རླུང་གིས་ཁྱབ་པའི་ཕྱིར། །བཀྲག་མདངས་ཡོན་ཏན་ཀུན་འབྱུང་འཆར། །སྤྱིར་ན་རྩ་རླུང་རིག་པ་གསུམ། །ཐ་དད་བཤད་ཀྱང་གཅིག་ཏུ་འདུས། །རིག་པ་མེད་ན་སེམས་མི་འབྱུང་། །སེམས་འདི་མེད་ན་རླུང་མི་འབྱུང་། །སེམས་གཅིག་བྱུང་ནས་ཡེ་ཤེས་གྲུབ། །ཡེ་ཤེས་རྩལ་ལས་འགག་མེད་འཆར། །རྩ་རླུང་ཐིག་ལེ་རིག་པ་སེམས། །ཐམས་ཅད་དབྱེར་མེད་རོ་གཅིག་འདུས། །མ་ཤེས་སོ་སོར་བཟུང་བ་ཡིས། །མིང་མེད་མིང་དུ་སོང་བ་བཞིན། །ཡེ་ཤེས་ལྔ་ལས་འབྱུང་བ་ལྔ། །དུག་ལྔ་ཉོན་མོངས་ལ་སོགས་པ། །གཅིག་ལ་སྣ་ཚོགས་བཟུང་བས་འཁྲུལ། །ཡང་དག་དོན་གྱི་ཆར་མ་
ཉེ། །ཐམས་ཅད་རིག་པ་རླུང་གི་རྩལ། །དབྱེར་མེད་རོ་གཅིག་ངོ་ཤེས་ན། །རང་སེམས་རིག་པའི་ངོ་བོར་གྲོལ། །མཁའ་ལ་སྤྲིན་དེངས་ཇི་བཞིན་ནོ། །ཟག་བཅས་ལུས་ཀྱང་མི་སྣང་བར། །ཡེ་ཤེས་ཀློང་དུ་འཚང་རྒྱའོ། །ཡེ་ཤེས་རྩལ་གྱི་ལུས་ཉིད་ལ། །རླུང་གནས་སྤྱི་དང་བྱེ་བྲག་གཉིས། །བསམ་འདས་བཤད་ཀྱང་ལྔ་རུ་འདུས། །འདེགས་བྱེད་རླུང་ནི་འོད་དཀར་ཚུལ། །སྙིང་ནས་མཆེར་རྩའི་ནང་ལ་ཐོན། །ལུས་ཀུན་ཁྱབ་པར་དེ་གནས་སོ། །ལྷུ་ཚིགས་བཞི་ལ་ཁྱབ་པར་གནས། །ཤ་རུས་པགས་པའི་སྟོབས་རྣམས་བསྐྱེད། །བཀྲགས་དང་གཟི་མདངས་སྐྱེད་པའི་རླུང་། །འོད་སེར་ཚུལ་དུ་སྙིང་ནང་ནས། །ཕྱིར་ཐོན་མཁལ་རྩའི་ནང་ནས་ནི། །མགོ་མཇུག་ལུས་ཁྱབ་སྨིན་དབྲག་ནས། །ཁྲག་དང་ཆུ་སེར་བཀྲག་མདངས་སྐྱེད། །མེ་མཉམ་དྲོད་དང་འབེབ་པའི་རླུང་། །སྙིང་ནང་འོད་དམར་ཚུལ་དུ་གནས། །མཆིན་རྩའི་ནང་ནས་ཕར་ཐོན་ནས། །ལུས་ཀྱི་མགོ་མཇུག་ཀུན་ཁྱབ་སྟེ། །ཕོ་བའི་ནང་ན་ལྷག་པར་གནས། །ཟས་རྣམས་འཇུ་ཞིང་ལུས་དྲོད་བསྐྱེད། །དྭངས་སྙིགས་འབྱེད་བྱེད་རླུང་ལྗང་གུ། །འོད་དང་བཅས་པ་སྙིང་ནང་གནས། །གློ་བའི་ནང་སོང་ལུས་ཀུན་ཁྱབ། །ཁྱད་པར་ཁ་སྣ་གཉིས་ལ་གནས། །ཟས་རྣམས་དྭངས་སྙིགས་གཉིས་ཕྱེས་ནས། །དྭངས་མས་ཕུང་ཁམས་སྐྱེད་པར་བྱེད། །སྙིགས་མ་དྲི་ཆེན་དྲི་ཆུར་ཕྱེ། །བཤང་བའི་ལམ་ནས་ཕྱིར་དོར་རོ། །སྙིང་རྗེ་མེད་པ་ལས་རླུང་ནི། །མཐིང་གའི་འོད་ཅན་སྙིང་ནང་གནས། །རིག་པ་དག་དང་གཉིས་མེད་པ། །དེ་ནི་སྲོག་པའི་རྩ་ལ་ཞུགས། །དབྱེར་མེད་གཅིག་ཏུ་གནས་པའོ། །བྱེ་བྲག་འཁོར་ལོ་རླུང་གནས་ནི། །དང་པོ་ལྟེ་བ་སྐྱེད་བྱེད་དུ། །རླུང་གི་དབྱིབས་ནི་འོད་མའི་གཞུ། །ཚད་ཟུང་འོད་ཀྱི་གོང་བུ་ལྟར། །རབ་ཏུ་རྒྱས་ཏེ་ཐིག་ལེས་བརྒྱན། །སྤྱན་གྱི་རྣམ་པ་སྲོག་འཛིན་རླུང་། །སྙིང་རྗེའི་རླུང་ནི་ཆད་ཟུང་འོག །
བྱིའུ་ལེབ་མའི་མིག་ལྟར་གནས། །དེ་ཡི་གཡས་སུ་མེ་མཉམ་རླུང་། །བྱེ་བའི་ཁ་རླང་ལྟ་བུར་གནས། །གཡོན་དུ་ཁྱབ་བྱེད་ལྡུ་བ་འདྲ། །གཞུ་རྒྱུད་དཀྱིལ་ན་དྭངས་སྙིགས་རླུང་། །ལྕགས་ཚགས་སྤྱན་གྱི་རྣམ་པར་གནས། །སྲིད་པ་ལྟེ་བའི་རླུང་དབྱེའོ། །དྲན་པ་འདུས་པའི་རླུང་ལྔ་ནི། །ཙིཏྟ་རིན་ཆེན་ཟུར་བརྒྱད་ཚུལ། །དབུས་སུ་སྲོག་འཛིན་རླུང་ཞེས་པ། །ཐིག་ལེ་སྲན་གོང་ལྟ་བུར་གནས། །དེ་ཡི་འོག་ཏུ་ལས་ཀྱི་རླུང་། །ཆན་གྲུབ་ཚུལ་དུ་གནས་པའོ། །དེ་རྩེར་ཐིག་ལེ་སྐུ་ཡི་ཚུལ། །ཀུན་ལ་ཁྱབ་པར་གནས་པའོ། །དེ་ཡི་གཡས་སུ་དྭངས་སྙིགས་རླུང་། །སྐུ་ཡིས་གང་བའི་ཐིག་ལེ་གནས། །དེ་ཡི་གཡོན་དུ་ཁྱབ་བྱེད་རླུང་། །ཐིག་ལེ་ཡབ་ཡུམ་ཚུལ་དུ་གནས། །མི་མཉམ་རླུང་གི་ཐིག་ལེ་དང་། །ཐིག་ཕྲན་ཚུལ་དུ་གནས་པའོ། །ཤར་རླུང་དཀར་ཏེ་འགྱུ་བར་བྱེད། །ལྷོ་རླུང་སེར་ཏེ་རབ་ཏུ་ཐིམ། །ཡེ་ཤེས་ལྔ་ལྡན་ཁྲ་བོ་སྟེ། །བྱང་རླུང་ལྗང་ལ་རབ་ཏུ་གཡོ། །ནུབ་རླུང་འབར་ཏེ་རབ་ཏུ་དམར། །དྲན་པ་ཙིཏྟའི་གནས་ཚུལ་ལོ། །མགྲིན་པ་རོ་འདུས་རླུང་ལྔ་བཤད། །ཅེ་སྤྱང་ལྕེ་འདྲའི་རླུང་གཟུགས་ཏེ། །ཐིག་ལེ་སྤྱན་མིག་དགུ་བརྩེགས་པ། །སྲོག་འཛིན་པ་ཡི་རླུང་ཞེས་སོ། །དེ་འོག་ལས་རླུང་ཉ་མིག་ལྟར། །ཕྱོགས་བཞི་མཚམས་བཞི་ཐིག་ལེས་བརྒྱན། །སྦྲ་ཆོན་བརྒྱངས་འདྲ་གཡོ་མེད་གནས། །གཡས་སུ་མེ་དང་མཉམ་པའི་རླུང་། །ཐིག་ལེ་ལྔ་བརྩེགས་དར་ཕྱར་འདྲ། །གཡོན་དུ་དྭངས་སྙིགས་འབྱེད་པའི་རླུང་། །ཐིག་ལེ་ཐིག་ཕྲན་སྤུངས་པ་འདྲ། །གོང་དུ་ཀུན་ཏུ་ཁྱབ་བྱེད་རླུང་། །ཐིག་ལེ་དྲ་བ་རིས་སུ་གནས། །རྩེ་མོ་རྣམ་བཀོད་རླུང་ལྔ་ནི། །འཁོར་ལོ་རྩིབས་ལྔ་མུ་ཁྱུད་ལྔ། །ལྟེ་བར་སྲོག་འཛིན་རླུང་ཞེས་པ། །ཐིག་ལེ་ཞལ་གསུམ་ཕྱག་དྲུག་གནས། །ལས་ཀྱི་རླུང་ནི་དེ་ཡི་འོག །ཐིག་ལེ་ཞལ་གསུམ་ཕྱག་དྲུག་པ། །མེ་རླུང་ནང་དུ་བཞུགས་པར་གནས། །ཕྱོགས་མཚམས་བརྒྱད་དུ་ཐིག་ལེ་བརྒྱད། །རེ་ཐག་འཐེན་འདྲར་གནས་པའོ། །འཁོར་ལོའི་
རྩིབས་ནི་གཡས་དག་ལ། །ཐིག་ལེ་རྨ་བྱའི་མདོངས་འདྲ་གནས། །གཡོན་པ་དྭངས་སྙིགས་འབྱེད་པའི་རླུང་། །ཐིག་ལེ་ཉ་མིག་ལྟ་བུར་གནས། །ལྟག་པར་རྩིབས་ནི་གཡས་གཡོན་ལ། །ཀུན་ཏུ་ཁྱབ་པར་བྱེད་པའི་རླུང་། །ཐིག་ལེ་ཟ་འོག་གུར་ཁྱིམ་གནས། །ལྷག་མའི་རླུང་རྣམས་རྩིབས་མཆན་ལ། །སྨིག་རྒྱུ་ལུག་རྒྱུད་ཚུལ་དུ་གནས། །ས་རླུང་སེར་པོ་ལྟེ་བར་གནས། །དྲན་པར་ཆུ་རླུང་དཀར་པོ་གནས། །རོ་འདུས་མེ་རླུང་དམར་པོ་གནས། །རྩེ་མོར་རླུང་གི་རླུང་གནས་སོ། །དེ་ལྟར་སྐྱེད་བྱེད་རྩ་བཞི་ནས། །འགྱུ་དང་འགུལ་དང་འཕྲིག་པ་དང་། །ཡང་གཡོབ་སྐྱོད་པའི་བདག་ཉིད་དུ། །ལྔ་ཞིང་ལུས་ཀྱི་རླུང་དང་བཅས། །གསལ་ཏིག་མདངས་དང་བཅས་པའོ། །ཞེས་གསུངས་ནས་རང་གསལ་སྐྱོན་གྱིས་མ་བསྒྲིབས་པར་གཏིང་གསལ་ཆེན་པོ་ཏིང་འཛིན་ལ་ལྷན་ནེར་བཞུགས་སོ། །ཐེག་པ་ཀུན་གྱི་སྤྱི་ཕུད་ཀློང་ཆེན་རབ་འབྱམས་ཀྱི་རྒྱུད་ལས། གཡོ་བ་རླུང་གི་གནས་ལུགས་བསྟན་པའི་ལེའུ་སྟེ་དགུ་པའོ།། །།རྒྱ་རྒྱ་རྒྱཿ། སེམས་དཔའ་རྡོ་རྗེས་ཡང་གསོལ་པ། །ཀྱེ་བདེ་སྟོང་བདག་ཉིད་ཀུན་ཏུ་བཟང་། །རིག་སྟོང་དབྱེར་མེད་ཡེ་ཤེས་དཔལ། །རླུང་གི་གནས་ལུགས་གསུངས་ན་ཡང་། །ཐིག་ལེའི་གནས་ལུགས་མ་གསུངས་པས། །བཀོད་པ་ཐིག་ལེའི་གནས་ལུགས་དེ། །སྟོན་པ་རྒྱལ་པོས་བཀའ་སྩོལ་ཅིག །ཅེས་པ་སྟོན་པས་གསན་ཅིང་དགོངས། །འདི་སྐད་འཁོར་ལ་བཀའ་སྩལ་པ། ཀྱེ་ཧོ། ཡེ་ཤེས་རང་རྩལ་ལུས་འདི་ཉིད། །རྩ་ཡི་དྲ་བ་ཐིག་ལེས་ཁྱབ། །ཐིག་ལེ་ཡིག་འབྲུ་སྐུ་ཡེ་ཤེས། །རྩ་རེའི་ནང་ན་རླུང་རེ་གནས། །རླུང་ཡང་ཡེ་ཤེས་ཐིག་ལེ་རྣམས། །ཉུང་འབྲུ་ཙམ་གྱིས་ཐམས་ཅད་ཁྱབ། །ཕོ་ལ་ཐིག་ལེ་དངོས་སུ་འབབ། །མོ་ལ་སྙོམས་འཇུག་ཁམས་རྒྱས་དུས། །སྣ་བུག་གཡས་སུ་འབབ་པའོ། །ཀུན་
རྫོབ་ཐིག་ལེ་དེ་དག་ནི། །འབྱུང་བ་ལྔ་ཡི་དྭངས་མ་ཡིན། །ཡུམ་ཆེན་སྡེ་ལྔ་དངོས་ཡིན་ཏེ། །མཁའ་འགྲོ་རྣམས་ཀྱི་སྲོག་ཡིན་ནོ། །དེ་ལ་ཡེ་ཤེས་ཐིག་ལེ་གནས། །དོན་དམ་ཀུན་རྫོབ་ཐིག་ལེ་གཉིས། །དབྱེར་མེད་གཅིག་གི་རང་བཞིན་ནོ། །ཀླད་པ་རྐང་མར་རུས་པ་རྣམས། །རྩ་དང་ཆུ་རྒྱུས་ཞག་ཚིལ་བུ། །ཕ་ཡི་ཐིག་ལེ་དཀར་པོས་བསྐྱེད། །ཤ་ཁྲག་ཆུ་སེར་སྤུ་ལྤགས་རྣམས། །མ་ཡི་ཐིག་ལེ་དམར་པོས་བསྐྱེད། །དེ་ནས་ལུས་ཀྱི་རྩལ་རྫོགས་ཏེ། །ཁ་མིག་རྣ་བ་ཅན་དུ་བྱོན། །བྱེ་བྲག་ཐིག་ལེའི་གནས་ལུགས་ནི། །ཁྱད་པར་འཁོར་ལོ་བཞི་ཡི་དབུས། །ཕ་མའི་ཐིག་ལེ་ཉུང་འབྲུ་ཙམ། །དངུལ་ཆུ་རྒྱ་སྐྱེགས་ཚུལ་དུ་གནས། །ཁ་དོག་ལྔ་ལྡན་ཡེ་ཤེས་གཟུགས། །ཡིག་འབྲུ་སྐུ་ཡི་ཚུལ་དུའོ། །བ་སྤུའི་བུ་ག་ཚུན་ཆད་ཀྱི། །གྲངས་ཅན་གྲངས་མེད་བསམ་འདས་པ། །ཕ་མ་གཉིས་ཀྱི་ཐིག་ལེས་ཁྱབ། །ཐིག་ལེ་ཡེ་ཤེས་རིག་པའི་རྩལ། །འབྱུང་བ་ལྔ་འདུས་དྭངས་མ་ཡིན། །འདས་མ་འདས་ཀྱི་སྲོག་ཡིན་ནོ། །སྐུ་དང་ཐིག་ལེ་གཉིས་སུ་མེད། །རང་ལུས་ཀུན་ལ་ཁྱབ་པར་གནས། །ངོ་སྤྲོད་མ་ཡེངས་འདི་ཡིད་ཞོག །ཕྱི་ལྟར་འབྱུང་བ་ལྔ་ཡིན་ཏེ། །ས་ཆུ་མེ་རླུང་ནམ་མཁའ་འོ། །ནང་ལྟར་ཡུམ་ཆེན་ལྔ་ཡིན་ཏེ། །མཱ་མ་ཀཱི་དང་སངས་རྒྱས་སྤྱན། །གོས་དཀར་ཆོས་དབྱིངས་དམ་ཚིག་སྒྲོལ། །གསང་བ་ལྟར་ན་མཁའ་འགྲོ་ལྔ། །རྡོ་རྗེ་མཁའ་འགྲོ་རིན་ཆེན་དང་། །པདྨ་ལས་དང་ཆོས་དབྱིངས་སོ། །ཡང་གསང་ལྟར་ན་ཡེ་ཤེས་ལྔ། །མེ་ལོང་མཉམ་ཉིད་སོར་རྟོག་དང་། །བྱ་གྲུབ་ཆོས་དབྱིངས་ཡེ་ཤེས་སོ། །ཕྱི་ལྟར་འཁོར་ལོ་ལྔ་ཡིན་ཏེ། །སྤྱི་བོ་མགྲིན་པ་སྙིང་ག་དང་། །ལྟེ་བ་གསང་གནས་བདེ་བྱེད་དོ། །ནང་ལྟར་ཐིག་ལེ་ལྔ་ཡིན་ཏེ། །གཞི་གནས་ཐིག་ལེ་ཀུན་རྫོབ་རྒྱུ། །དོན་དམ་སྤྲོས་མེད་རང་བྱུང་འབྲས། །མི་འགྱུར་ཐིག་ལེ་རང་གསལ་ལོ། །གསང་བ་ལྟར་ན་ཡི་གེ་ལྔ། །མ་དང་ཧ་རི་ནི་སའོ། །ཡང་གསང་
ལྟར་ན་ཁ་དོག་ལྔ། །དཀར་དམར་སེར་ལྗང་མཐིང་གའི་མདོག །སྐུ་ལྔ་ལྟར་ཡང་ལྷུན་གྲུབ་སྟེ། །མངོན་པར་བྱང་ཆུབ་ཆོས་ལོངས་སྤྲུལ། །ངོ་བོ་ཉིད་ཀྱི་སྐུ་ཡིན་ནོ། །ཕྱག་རྒྱ་རྣམ་པ་ལྔ་ཡིན་ཏེ། །རྫོགས་པ་ཆེན་པོའི་ཕྱག་རྒྱ་དང་། །ཆོས་ཉིད་དོན་གྱི་ཕྱག་རྒྱ་དང་། །དམ་ཚིག་འཕྲོ་འདུའི་ཕྱག་རྒྱ་དང་། །གཉིས་མེད་ལས་ཀྱི་ཕྱག་རྒྱ་དང་། །ཕྲིན་ལས་ཀུན་གྲུབ་ཕྱག་རྒྱའོ། །ཕྱི་ལྟར་ཕུང་པོ་ལྔ་ཡིན་ཏེ། །གཟུགས་ཕུང་རྣམ་ཤེས་ཚོར་བ་དང་། །འདུ་ཤེས་འདུ་བྱེད་ཕུང་པོའོ། །ནང་ལྟར་ཉོན་མོངས་དུག་ལྔ་སྟེ། །གཏི་མུག་ཞེ་སྡང་ང་རྒྱལ་འདོད་ཕྲག་དོག །ནང་ལྟར་ཕྲིན་ལས་ལྔ་ཡིན་ཏེ། །ཞི་རྒྱས་དབང་དྲག་ཐམས་ཅད་དག །དེ་ལྟར་ཡིན་པའི་ཡོན་ཏན་གྱིས། །རྒྱུ་ཡི་ཐིག་ལེ་མ་སྤངས་སྒྲུབས། །བདེ་དང་གསལ་དང་མི་རྟོག་དང་། །རྩོལ་བྲལ་ཀུན་ཁྱབ་འདི་ཡི་ཁྱད། །ཐིག་ལེ་རང་བྱུང་རང་གནས་པ། །སངས་རྒྱས་མཁའ་འགྲོའི་ངོ་བོ་ཡིན། །རང་གསལ་རྡོ་རྗེ་མཁའ་འགྲོ་སྟེ། །རང་གྲོལ་རིན་ཆེན་མཁའ་འགྲོ་ཡིན། །གསལ་འཚེར་པདྨ་མཁའ་འགྲོ་སྟེ། །ཟླུམ་པོ་ལས་ཀྱི་མཁའ་འགྲོའོ། །རྒྱུ་ཡི་ཐིག་ལེ་སྤང་གྱུར་ན། །གསང་སྔགས་དམ་ཚིག་ཀུན་ཉམས་ནས། །བསྐལ་པ་འབུམ་ཁྲིར་ན་རག་སྤྱོད། །དེ་ཕྱིར་ཐིག་ལེ་མ་ཉམས་བསྲུང་། །ཐིག་ལེ་སྒྲུབ་པའི་རྫས་ལ་གནག །སྒྱུ་མའི་ཐིག་ལེ་ཉམས་གྱུར་ན། །མཁའ་འགྲོ་འབུམ་སྡེས་ངུ་སྐད་འདོན། །མི་མཐུན་རྐྱེན་དང་བར་ཆད་འབྱུང་། །ཐིག་ལེ་མ་ཉམས་བསྲུང་གྱུར་ན། །འདས་དང་མ་འདས་ཐམས་ཅད་ཀུན། །དབང་དུ་འདུ་བར་ཐེ་ཚོམ་མེད། །འཁོར་འདས་ཀུན་གྱི་སྲོག་ཡིན་ཏེ། །དེ་ཕྱིར་ཐིག་ལེ་མ་ཉམས་པར། །མཚན་ལྡན་མ་ལ་བདེ་བ་བསྐུལ། །རྩ་བཙལ་བྱིན་གྱིས་བརླབ་པ་དང་། །སྦྱོར་དང་ཕབ་བཟློག་འདྲེན་འགྲིམས་དང་། །བཅུ་དྲུག་ཕྱེད་ཕྱེད་ཐིག་ལེ་སྦྱང་། །ཕུང་པོ་ཁམས་དང་སྐྱེ་མཆེད་ཀུན། །རྒྱལ་བའི་དཀྱིལ་འཁོར་ཆེན་པོར་བསྒོམ། །
དབང་པོ་འདོད་ཡོན་ཐམས་ཅད་ཀུན། །ཕྱི་རུ་མི་འབུལ་ནང་དུ་འབུལ། །སྤྲུལ་སྐུ་ཆགས་པའི་ཡུལ་དང་བྲལ། །འཛིན་པ་མེད་པར་སྤྱོད་པའོ། །དེ་ལྟར་མི་ཤེས་བླུན་པོ་རྣམས། །ཡི་དམ་ཕྱི་ནས་སྒོམ་པ་དང་། །ཡེ་ཤེས་ཕྱི་རུ་འཚོལ་བ་དང་། །ཐིག་ལེ་སྤོང་དང་ཤེས་རབ་བྲལ། །ཚོགས་མཆོད་འདོད་ཡོན་ཕྱི་རུ་འབུལ། །བལྟ་བསྒོམ་སྤྱོད་གསུམ་ཕྱི་ནས་འཚོལ། །སངས་རྒྱས་གཞན་ནས་རེ་བ་རྣམས། །བསྐལ་པ་ཞིང་གི་རྡུལ་སྙེད་ཀྱང་། །བྱེ་བ་དགུ་ཁྲིའི་སྲིད་མཐར་ཡང་། །བསོད་ནམས་བསགས་ཀྱང་ག་ལ་གྲོལ། །ཅི་ཕྱིར་ཡེ་ཤེས་རང་གསལ་འདི། །རང་ལ་རང་ཆས་ཡོད་པའི་ཕྱིར། །ཞི་ཁྲོ་རིགས་བརྒྱ་རང་ལས་གྲུབ། །མཁའ་འགྲོ་སྡེ་ལྔ་རང་ལས་གྲུབ། །དཔའ་བོ་སྡེ་ལྔ་རང་ལས་གྲུབ། །རིག་པའི་རྩལ་ཤུགས་མ་འགགས་པས། །ཐབས་ཀྱི་རང་བཞིན་ཕོ་རུ་སྣང་། །ཤེས་རབ་རང་བཞིན་མོ་རུ་སྣང་། །ཐབས་དང་ཤེས་རབ་གཉིས་མེད་པས། །སྣང་སྟོང་གཉིས་མེད་ཆོས་ཀྱི་སྐུ། །ཟུང་འཇུག་སྤྲོས་དང་བྲལ་གྱུར་ཏེ། །རྩ་རླུང་ཐིག་ལེ་བདེ་ཆེན་སྐུ། །ཞི་ཁྲོ་རིགས་བརྒྱ་མཁའ་འགྲོ་གྲུབ། །ཕྱག་རྒྱ་ཆེན་པོའི་ས་ལ་གནས། །ལྟ་བ་ཆོས་ཉིད་སྐྱེ་མེད་ལ། །སྐྱེ་བའི་ཆོ་འཕྲུལ་ཅིར་ཡང་ཤར། །གང་ལྟར་བརྟག་པ་དེ་ལྟར་སྣང་། །སྒོམ་པ་རང་གསལ་འཛིན་མེད་ལ། །མ་བཅོས་བཞག་ན་བདེ་བ་ཆེ། །སྤྱོད་པ་རང་སྣང་ངེས་མེད་ལ། །མ་འགགས་ཐབས་ཀྱི་རོལ་པ་ཤར། །གང་ལྟར་བྱས་པ་དེ་ལྟར་གྲོལ། །ལྟ་སྤྱོད་ཟུང་འདྲེལ་བདེ་སྟོང་ལ། །ས་ལམ་གཅིག་ཆོད་སྟན་གཅིག་སྟེ། །ཡོན་ཏན་ཐམས་ཅད་དེ་ལ་ཚང་། །སྣང་སྲིད་ཐམས་ཅད་ཆོས་སྐུའི་ཞིང་། །ཇི་ལྟར་བྱས་ཀྱང་བདེ་བ་ཆེ། །མ་བཅོས་ཀུན་གྲོལ་མཉམ་པ་ཉིད། །རང་ལུས་རྒྱལ་བའི་ད་ལ་རུ། །སྐུ་དང་ཡེ་ཤེས་ཐིག་ལེ་རླུང་། །སྐུ་གསུམ་རང་ལ་རང་ཆས་གནས། །དེ་ཕྱིར་རང་ལ་རང་ལོངས་སྤྱོད། །མཁའ་འགྲོའི་སྲོག་སྔགས་དམ་པ་རྣམས། །རང་ལ་ཡེ་ནས་མི་གནས་ན། །
བསྒྲུབས་ཀྱང་འགྲུབ་པར་ག་ལ་འགྱུར། །རང་ལ་གནས་པ་རང་གསལ་གདབ། །དེ་ཕྱིར་རྩ་རླུང་བདེ་སྟོང་སྤྱད། །ལྷག་མེད་སངས་རྒྱས་ཐུན་མོང་འགྲུབ། །ཅེས་གསུངས་ནས་ཀ་དག་བྱ་བྲལ་ཆེན་པོའི་ངང་ལ་ལྷན་ནེར་བཞུགས་སོ། །ཐེག་པ་ཀུན་གྱི་སྤྱི་ཕུད་ཀློང་ཆེན་རབ་འབྱམས་ཀྱི་རྒྱུད་ལས། ཐིག་ལེའི་གནས་ལུགས་བསྟན་པའི་ལེའུ་སྟེ་བཅུ་པའོ།། །།རྒྱརྒྱརྒྱཿ། སེམས་དཔའ་རྡོ་རྗེས་ཡང་གསོལ་པ། །ཀྱེ་ཡེ་ཤེས་གསུམ་ལྡན་ཀུན་ཏུ་བཟང་། །ཐུགས་རྗེས་ཀུན་ཁྱབ་རོལ་པའི་རྗེ། །ཐིག་ལེའི་གནས་ལུགས་གསུངས་ན་ཡང་། །རིག་པ་ཡེ་ཤེས་གནས་ལུགས་སམ། །སྐུ་མདོག་ལྷ་གྲངས་ཇི་ལྟ་བུ། །བཞུགས་ཚུལ་མཚན་ཉིད་ཇི་ལྟ་བུ། །སྟོན་པས་རིག་མདངས་འཁོར་ལ་གསུངས། །ཞེས་པ་སྟོན་པས་གསན་དགོངས་ཏེ། །ཉོན་ཅིག་སེམས་དཔའ་རྡོ་རྗེ་རྩལ། །དག་པ་ཡེ་ཤེས་གནས་ལུགས་ནི། །གོང་དུ་རྒྱས་པར་བཤད་ན་ཡང་། །བཞུགས་ཚུལ་ཞལ་ཕྱག་བཤད་ཀྱིས་ཉོན། །ཆོས་སྐུ་ཡེ་ཤེས་ཆེན་པོ་དེ། །ཙིཏྟ་རིན་ཆེན་ཟུར་བརྒྱད་དུ། །ས་བོན་ཡི་གེའི་ཚུལ་མདངས་ཅན། །རྩ་རྣམས་དྭངས་མ་ཀུན་འདུས་པ། །རྒྱ་མཚོ་གསེར་གྱི་ཉི་མ་ཅན། །ཡེ་ཤེས་ཚུལ་དུ་ཆོས་སྐུར་བཞུགས། །མཚན་མའི་ལུས་སམ་ཞལ་ཕྱག་མེད། །རང་གི་སྙིང་གི་དཀྱིལ་དག་ན། །སེང་ཆེན་བསྣོལ་བའི་ཁྲི་སྟེང་ན། །རིག་པ་ཀུན་ཏུ་བཟང་པོ་མཐིང་། །ཡིད་བྱེད་ཀུན་ཏུ་བཟང་མོ་འདི། །དཀར་གསལ་ཚུལ་དུ་ཡེ་ནས་བཞུགས། །དེ་མདངས་སྣང་མཛད་ཡབ་ཡུམ་དཀར། །འཁོར་ལོ་བསྣམས་ཤིང་སེང་སྟེང་འགྱིང་། །ཤར་དུ་རྡོ་རྗེ་མི་བསྐྱོད་མཐིང་། །སངས་རྒྱས་སྤྱན་དང་གཉིས་སུ་མེད། །ས་སྙིང་བྱམས་པ་མཻ་ཏྲི་ལ། །ལཱ་སྱ་མ་དང་མཱ་ལེས་བསྐོར། །ཤར་ཕྱོགས་ཚོམ་བུ་དྲུག་ཏུ་བཞུགས། །རིན་འབྱུང་ཡབ་ཡུམ་རྟ་མཆོག་གདན། །ནམ་སྙིང་ཀུན་ཏུ་བཟང་པོ་དང་། །
གཱིརྟི་ནཱིརྟི་གཉིས་བཞིས་བསྐོར། །རང་གི་སྙིང་གི་ལྷོ་ན་བཞུགས། །སྣང་མཐའ་ཡབ་ཡུམ་པད་གདན་དམར། །སྤྱན་རས་གཟིགས་དང་འཇམ་དཔལ་དང་། །པུཥ྇་དྷཱུ་པེ་བཞིས་བསྐོར་ནས། །ཚོམ་བུའི་སྐུ་དྲུག་ནུབ་ཏུ་བཞུགས། །དོན་གྲུབ་ཡབ་ཡུམ་ལྗང་གུ་ལ། །ཕྱག་རྡོར་སྒྲིབ་པ་རྣམ་པར་སེལ། །ཨཱ་ལོ་ཀེ་དང་གནྡྷེ་མ། །ཚོམ་བུའི་སྐུ་དྲུག་བྱང་དུ་བཞུགས། །ཤར་སྒོར་རྣམ་རྒྱལ་ལྕགས་ཀྱུ་གཉིས། །ལྷོ་སྒོར་གཤིན་རྗེ་ཞགས་པ་མ། །ནུབ་སྒོར་རྟ་མགྲིན་ལྕགས་སྒྲོག་མ། །བྱང་སྒོར་བདུད་རྩི་དྲིལ་བུ་གཉིས། །སྤྱི་བོར་བརྒྱ་བྱིན་སྐུ་མདོག་དཀར། །ལྷག་པར་ལྷ་མིན་ཐགས་ཟང་ལྗང་། །སྲོག་རྩར་ཤཱཀ་ཐུབ་སེར་པོ་དང་། །གསང་བར་བྱོལ་སོང་ཐུབ་པ་མཐིང་། །ལྟེ་བར་ཁ་འབར་དམར་པོ་དང་། །རྐང་མཐིལ་ཨ་བ་ནག་པོ་བཞུགས། །དེ་ལྟར་བཞི་བཅུ་རྩ་གཉིས་རྣམས། །ཆོས་སྐུ་ཡེ་ཤེས་ཟང་ཐལ་ལེ། །ངོ་བོ་རང་བཞིན་ཐུགས་རྗེར་ལྡན། །སྟོང་པ་ཡེ་ཤེས་སྙིང་པོ་ཅན། །གསལ་བ་འོད་ཀྱི་སྙིང་པོ་ཅན། །རང་བྱུང་རིག་པའི་སྙིང་པོ་ཅན། །སྒྲིབ་གཡོགས་མེད་པར་ཟང་ཐལ་ལེ། །ཕྱོགས་མཚམས་མེད་པར་ཁྱབ་གདལ་ལེ། །གསལ་འགྲིབ་མེད་པར་དྭངས་སང་ངེ་། །ངོ་ལྐོག་མེད་པར་རྗེན་ཅེར་རེ། །སྟོང་གསལ་ཁྱབ་པ་ཆེན་པོར་བཞུགས། །དེ་ཡང་ལྔ་ལྡན་ཆེན་པོ་སྟེ། །སྟོང་པ་ཡེ་ཤེས་སྙིང་པོ་ཅན། །ཡང་དག་ས་རུ་དེ་སངས་རྒྱས། །ཐིག་ལེ་ཉག་གཅིག་སྐུ་རུ་བཞུགས། །ཐོག་མའི་སངས་རྒྱས་འོད་མི་འགྱུར། །འོད་ཟེར་སྙིང་པོའི་སྐུ་རུ་བཞུགས། །རང་བྱུང་རིག་པའི་སྙིང་པོ་ཅན། །རིག་སྟོང་ལྷུན་གྲུབ་ཆེན་པོར་བཞུགས། །འགག་འགྲིབ་མེད་དེ་ཟང་ཐལ་ལེ། །ཡེ་ཤེས་ཆེན་པོའི་རང་བཞིན་དུ། །རང་བཞིན་ལྷུན་གྲུབ་སྐུ་རུ་བཞུགས། །ཆོས་སྐུ་རྣམ་དག་ཆོས་དབྱིངས་སུ། །གཟུགས་སྐུའི་ཞིང་ཁམས་ཡོངས་སུ་རྒྱས། །མ་འདྲེས་ཡོངས་སུ་རྫོགས་པ་སྟེ། །རྒྱ་མཚོར་གཟའ་སྐར་ཤར་བ་འདྲ། །སོས་ཀའི་སྨིག་སྒྱུ་ཐང་བཀྲམ་
འདྲ། །སྐུ་དང་ཡེ་ཤེས་འོད་དང་གསུམ། །འདུ་འབྲལ་མེད་པར་བུམ་པའི་སྐུ། །ཐོག་མའི་ཀ་དག་ཡེ་ཤེས་ལྔ། །དབྱེར་མེད་སྐུ་ལ་གསལ་ཡུལ་ལྔ། །རླུང་ལྔས་བསྐྱོད་པས་འབྱུང་བ་ལྔ། །འབྱུང་བ་དེ་ཡི་དྭངས་མ་ལྔ། །དེ་ལ་ཕུང་པོ་དྭངས་སྙིགས་ལྔ། །ཡེ་ཤེས་མཁའ་འགྲོ་ཤེས་རབ་ལྔ། །དེ་ཡང་གཞི་གནས་ཡེ་ཤེས་ལྔ། །ཕྱི་ནང་གསང་བ་གསུམ་དུ་བཤད། །དེ་ཡང་གཞི་ལམ་འབྲས་གསུམ་སྟེ། །གཞི་གནས་ཡེ་ཤེས་ལྔ་ཉིད་ནི། །གཞི་ཡི་རིག་པ་གཅེར་བུ་འདི། །འཁོར་འདས་མ་གྲུབ་དྲི་མེད་ཁྱབ། །སྐྱོན་གྱིས་མ་གོས་དཀར་མདངས་ལྡན། །དེ་ནི་མ་ཕྱེ་ཀུན་ལ་སྙོམས། །མཉམ་པ་ཉིད་ཀྱི་ཡེ་ཤེས་ཡིན། །དེ་ལ་ཡོན་ཏན་རྫོགས་པའི་དབུགས། །འོད་ཟེར་སེར་པོའི་ཚུལ་དུ་གནས། །བློ་ཡི་བྱེ་བྲག་སོ་སོར་ཤར། །དེ་ནི་སོར་རྟོག་ཡེ་ཤེས་ཡིན། །རང་རྩལ་དྲོད་ལྡན་དམར་པོར་ལྡན། །གང་ཤར་བྱ་བཙལ་མེད་པར་གྲུབ། །བྱ་བ་གྲུབ་པའི་ཡེ་ཤེས་སོ། །འགག་པ་མེད་པའི་སྟོང་ལྡན་ནི། །འོད་ཟེར་ལྗང་གུའི་ཚུལ་དུ་གནས། །ཐམས་ཅད་ཆོས་ཀྱི་དབྱིངས་སུ་འདུས། །ཀུན་ཀྱང་ཆོས་ཉིད་སྟོང་པ་ཡིན། །རང་རྩལ་ཉིད་ལས་མ་འདས་ཏེ། །དེ་ནི་ཆོས་དབྱིངས་ཡེ་ཤེས་ཡིན། །མི་འགྱུར་མཐིང་གར་རང་གསལ་ལོ། །ལམ་དང་སྦྱར་ན་འདི་ལྟར་རོ། །རིག་པའི་ཡེ་ཤེས་ཟང་ཐལ་འདི། །དྲི་མེད་མེ་ལོང་གཡའ་དག་ལྟར། །གསལ་ལ་སྒྲིབ་མེད་སང་ངེ་བ། །ཡེངས་པ་མེད་པར་སྒོམ་པ་ནི། །མེ་ལོང་ཡེ་ཤེས་འཇུག་པའི་ལམ། །ཆེ་ཆུང་འཕོ་འགྱུར་མཐོ་དམན་མེད། །བརྗོད་བྱའི་ཚིག་རྣམས་ཀུན་དང་བྲལ། །བླ་མ་ཉིད་ཀྱིས་ངོ་སྤྲད་ནས། །རིག་པ་ཚད་བབས་སྲང་ལ་ཚུད། །ཕྱོགས་ལྷུང་མེད་པར་བསྒོམ་པ་ནི། །མཉམ་ཉིད་ཡེ་ཤེས་འཇུག་པའི་ལམ། །ངོ་བོ་མཉམ་ཉིད་དེ་ཉིད་ལ། །གསལ་བ་མ་འགགས་སོ་སོར་སྣང་། །གང་ཤར་འཛིན་མེད་བསྒོམ་པ་ནི། །སོར་རྟོག་ཡེ་ཤེས་འཇུག་པའི་ལམ། །
ད་ལྟར་འཆར་ཚུལ་ངོ་ཤེས་ལ། །དཀའ་ཐུབ་ཚད་མེད་མི་དགོས་ཏེ། །ཐམས་ཅད་ལྷུན་གྱིས་གྲུབ་པ་སྟེ། །བྱ་གྲུབ་ཡེ་ཤེས་འཇུག་པའི་ལམ། །བསྒོམ་བྱ་སྒོམ་བྱེད་ཉིད་དང་བྲལ། །ཐམས་ཅད་རང་གྲོལ་ལྷུན་གྲུབ་རྩལ། །མ་བསྒོམས་འཁོར་འདས་རང་སྲོག་ཆོད། །ཆོས་དབྱིངས་ཡེ་ཤེས་འཇུག་ལམ་མོ། །དེ་ནི་ལམ་དང་སྦྱར་བའོ། །འབྲས་བུ་ལྟར་དུ་བཤད་པ་ན། །དེ་ལྟར་འབྱུང་ལྔའི་དྭངས་མ་དེ། །ཡེ་ཤེས་རིག་པ་ཞེས་ཀྱང་བྱ། །ཕྱི་ལྟར་འབྱུང་ལྔ་ནང་ཕུང་པོ། །གསང་བ་དྭངས་མ་ལྔ་རུ་སྣང་། །ཡང་གསང་ལྟར་ན་ཡི་གེ་ལྔ། །བླ་མེད་ལྟར་ན་མཁའ་འགྲོ་ལྔ། །དུ་མ་སྣ་ཚོགས་ཕྱེ་གྱུར་ཀྱང་། །རིག་པའི་ཡེ་ཤེས་ཉིད་ལ་རྫོགས། །ཐམས་ཅད་ཡེ་ཤེས་རང་ཡིན་པས། །རང་བྱུང་ཡེ་ཤེས་རིག་པའོ། །ཁམས་གསུམ་སེམས་ཅན་ཐམས་ཅད་ལ། །སྙིང་པོ་ཡེ་ཤེས་གསུམ་ཕྱེ་ན། །རིག་པ་རྟོག་མེད་ཆོས་ཀྱི་སྐུ། །རིག་པ་འགག་མེད་ལོངས་སྐུ་སྟེ། །ཅིར་སྣང་སྤྲུལ་པའི་སྐུ་ཡང་ཡིན། །འཁོར་འདས་ཆོས་རྣམས་ཐམས་ཅད་ཀུན། །ལུས་སེམས་གཉིས་ལ་ཚང་བའོ། །སྐུ་གསུམ་ཡེ་ཤེས་གསུམ་དང་ལྡན། །ཁྱད་པར་རིན་ཆེན་ཟུར་བརྒྱད་ཀྱི། །སྐུ་དང་ཡེ་ཤེས་འོད་དང་གསུམ། །སྐུ་ནི་མི་འགྱུར་མི་གཡོ་བ། །ཞི་བའི་སྐུ་ནི་ཉུང་འབྲུ་ཙམ། །མཚན་དཔེའི་ཚད་ནི་ཕུལ་ཐག་ཙམ། །སྣ་ཚོགས་གཅེར་གྲོལ་ཉིད་དུ་སྟེ། །ཐབས་ཤེས་གཉིས་མེད་ཡབ་ཡུམ་ཚུལ། །ཡབ་ཀྱི་ཆ་འཛིན་སེམས་དཔའ་བརྒྱད། །ཡུམ་གྱི་ཆ་འཛིན་སེམས་མ་བརྒྱད། །སྒོ་བ་ཡབ་ཡུམ་ཐུབ་པ་དྲུག །ཀུན་བཟང་རིགས་ལྔ་ཡབ་ཡུམ་བཅུ། །བཞི་བཅུ་ཞེ་གཉིས་བུམ་སྐུའི་ཚུལ། །ལྔ་ལྡན་ཚོམ་བུའི་དཀྱིལ་འཁོར་རྫོགས། །དེ་རྩལ་ཀླད་པ་ལ་དུང་ཁང་དུ། །ཁྲག་འཐུང་ལྔ་བཅུ་རྩ་བརྒྱད་བཞུགས། །བྷུཌྜྷ་ཧེ་རུ་སྨུག་ནག་པ། །དབུ་གསུམ་ཕྱག་དྲུག་ཡུམ་དང་འཁྲིལ། །རང་གི་ཀླད་པའི་དཀྱིལ་ན་བཞུགས། །བཛྲ་ཧེ་རུ་མཐིང་ནག་པ། །
དབུ་གསུམ་ཕྱག་དྲུག་ཡུམ་དང་འཁྲིལ། །རང་གི་ཀླད་པའི་ཤར་ན་བཞུགས། །རཏྣ་ཧེ་རུ་སེར་ནག་པ། །དབུ་གསུམ་ཕྱག་དྲུག་ཡུམ་དང་འཁྲིལ། །རང་གི་ཀླད་པའི་ལྷོ་ན་བཞུགས། །ནུབ་ན་པདྨ་ཧེ་རུ་ཀ །དམར་ནག་ཞལ་གསུམ་ཕྱག་དྲུག་པ། །ཡུམ་དང་གཉིས་མེད་འཁྲིལ་ནས་བཞུགས། །བྱང་ན་ཀརྨ་ཧེ་རུ་ལྗང་། །ཞལ་གསུམ་ཕྱག་དྲུག་ཡུམ་དང་འཁྲིལ། །ཀུན་ཀྱང་ཕྱག་མཚན་སྣ་ཚོགས་འཛིན། །གསལ་འཚེར་གཅེར་གྲོལ་ཉིད་དུ་བཞུགས། །ཤར་ན་ཀཽ་རཱི་དཀར་མོ་སྟེ། །ལྷོ་ན་ཙཽ་རཱི་སེར་མོ་དང་། །ནུབ་ན་པྲ་མོ་དམར་མོ་དང་། །བྱང་ན་བེ་ཏཱ་ནག་མོ་དང་། །ཤར་ལྷོ་པུཀྐ་དམར་སེར་དང་། །ལྷོ་ནུབ་གྷས་མ་ལྗང་ནག་དང་། །ནུབ་བྱང་ཙནྡྷ་སེར་སྐྱ་དང་། །བྱང་ཤར་སྨེ་ཤ་མཐིང་ནག་པ། །ཁྲག་འཐུང་ཡབ་ཡུམ་བཅུ་ལ་བསྐོར། །ཀླད་ནང་མངོན་སུམ་ཉིད་དུ་བཞུགས། །དེ་ཡི་ཕྱི་རོལ་འཁོར་རྩིབས་ལ། །ཤར་ན་སིངྷ་སྨུག་ནག་དང་། །ལྷོ་ན་བྱཱ་གྷྲ་སྟག་མགོ་དམར། །ནུབ་ན་སྲྀ་ལ་ཝ་མགོ་ནག །བྱང་ན་ཤྭ་ན་སྤྱང་མགོ་མཐིང་། །ཤར་ལྷོར་གྲྀཌྷ་རྒོད་མགོ་དང་། །ལྷོ་ནུབ་ཀང་ཀ་དམར་ནག་པ། །ནུབ་བྱང་ཁ་ཁྭ་བྱ་མགོ་ནག། །བྱང་ཤར་ཧུ་ལུ་འུག་མགོ་མཐིང་། །ཡུལ་གྱི་ཕྲ་མེན་བརྒྱད་པོ་དེས། །ཁྲག་འཐུང་རྣམས་ལ་བསྐོར་ནས་བཞུགས། །ཤར་སྒོར་རྟ་མགོ་ལྕགས་ཀྱུ་དཀར། །ལྷོ་སྒོར་ཕག་མགོ་ཞགས་པ་སེར། །ནུབ་ན་སེང་མགོ་ལྕགས་སྒྲོག་དམར། །བྱང་སྒོར་སྦྲུལ་མགོ་དྲིལ་བུ་ལྗང་། །དེ་ལྟར་ཀླད་པའི་དཀྱིལ་ན་གནས། །དྲག་པོའི་ལྷ་ཚོགས་སུམ་ཅུ་བཞུགས། །ཕྱི་རོལ་དབང་ཕྱུག་ཉེར་བརྒྱད་ནི། །བྱང་ཤར་ནས་བཟུང་འདི་བཞིན་ནོ། །སྲིན་མོ་སྨུག་ནག་གཡག་མགོ་དང་། །ཚངས་པ་སྦྲུལ་མགོ་སེར་མོ་དང་། །ལྷ་ཆེན་དཀར་ལྗང་གཟིག་མགོ་དང་། །རྟོག་འདོད་སྲེ་མགོ་སྔོན་མོ་དང་། །དགའ་བ་སེར་མོ་ཕ་ཝང་མགོ། །གཞོན་ནུ་དྲེད་མགོ་དམར་མོ་དང་། །བརྒྱ་བྱིན་དོམ་མགོ་དཀར་མོ་དང་། །ཞི་བ་
དམར་མོ་ཆུ་སྲིན་མགོ། །བདུད་རྩི་དམར་མོ་སྡིག་པའི་མགོ། །ཟླ་བ་དམར་མོ་ཁྲ་ཡི་མགོ། །བེ་ཅོན་ཝ་མགོ་ལྗང་ནག་དང་། །སྲིན་མོ་སྟག་མགོ་དམར་མོ་དང་། །ཟ་བ་ལྗང་ནག་བྱ་རྒོད་མགོ། །དགའ་བ་དམར་མོ་རྟ་ཡི་མགོ། །སྟོབས་ཆེན་དམར་མོ་ཁྱུང་གི་མགོ། །སྲིན་མོ་ཁྱི་མགོ་སེར་མོ་དང་། །འདོད་པ་དམར་མོ་པུ་ཤུད་མགོ། །ནོར་སྲུང་ལྗང་གུ་ཤ་བའི་མགོ། །རླུང་ལྷ་སྔོན་མོ་སྤྱང་མགོ་དང་། །མི་མོ་དམར་མོ་སྐྱིན་གྱི་མགོ། །ཕག་མོ་ནག་མོ་ཕག་གི་མགོ། །རྡོ་རྗེ་དམར་མོ་ཁྲ་ཡི་མགོ། །སྣ་ཆེན་ལྗང་ནག་གླང་ཆེན་མགོ། །ཆུ་ལྷ་སྔོན་མོ་སྦྲུལ་གྱི་མགོ། །སྒོ་མ་བཞི་ནི་འདི་ལྟ་སྟེ། །རྡོ་རྗེ་དཀར་མོ་ཁུ་བྱུག་ཤར། །རྡོ་རྗེ་སེར་མོ་ར་མགོ་ལྷོ། །རྡོ་རྗེ་དམར་མོ་སེང་མགོ་ནུབ། །རྡོ་རྗེ་ལྗང་ནག་སྦྲུལ་མགོ་བྱང་། །དབང་ཕྱུག་ཉི་ཤུ་རྩ་བརྒྱད་དེ། །ཧེ་རུ་དྲག་པོའི་ལྷ་ཚོགས་ལས། །རང་བྱུང་སྐུ་ཡི་རྩལ་དུ་ཤར། །སྐུ་ནི་ཉུང་འབྲུ་ཙམ་པ་ལ། །མཁྱེན་དཔྱོད་མ་འགགས་ཐུགས་རྗེའི་སྤྱན། །ཕུལ་ཐག་ཙམ་གཟིགས་ཕྱི་ནང་མེད། །ཟང་ཐལ་གཅེར་གྲོལ་ཆེན་པོར་བཞུགས། །རྒྱུ་རྐྱེན་ལས་འདས་ཡེ་ཤེས་ནི། །དྭངས་མ་ལྔ་ཡི་རང་བཞིན་ཏེ། །ཡེ་ཤེས་ངོ་བོར་ཟང་ཐལ་ལེ། །རྟོག་མེད་ཡེ་ཤེས་ཁྱབ་ཆེའོ། །འོད་ཀྱི་མཚན་ཉིད་དངོས་པོ་བྲལ། །འབྱུང་ལྔའི་དྭངས་མ་ཁ་དོག་ལྔ། །མ་འདྲེས་རང་གསལ་ཉིད་དུ་སྟེ། །སྐུ་ལ་ཡེ་ཤེས་འོད་དུ་བྱུང་། །རིག་པའི་སྐུ་ནི་བུམ་སྐུ་འདྲ། །ཡེ་ཤེས་བུམ་ནང་མར་མེ་འདྲ། །འོད་ཟེར་མར་མེའི་འོད་དང་འདྲ། །གནས་ཚུལ་འོད་ཀྱི་གོང་བུར་བཞུགས། །སྐུ་དང་ཡེ་ཤེས་འོད་དང་གསུམ། །གསུམ་བརྩེགས་ཚུལ་དུ་བཞུགས་པའོ། །རང་རིག་ཡེ་ཤེས་ངོ་སྤྲད་ན། །སྣ་ཚོགས་སྣང་བ་རྣམ་སྣང་སྟེ། །རིག་སྐུ་མི་འགྱུར་མི་བསྐྱོད་པ། །དགོས་འདོད་འབྱུང་བས་རིན་ཆེན་འབྱུང་། །ཐུགས་རྗེས་ཀུན་སྣང་སྣང་མཐའ་ཡས། །ཤེས་བྱ་རང་གྲུབ་དོན་ཡོད་གྲུབ། །རིག་པ་གསལ་སྟོང་དེ་བཞིན་བྱ། །མི་འགྱུར་སྟོན་པ་རྡོ་རྗེའི་རིགས། །
ཡོན་ཏན་ཀུན་ཚང་རིན་ཆེན་རིགས། །འཁོར་སྐྱོན་མ་གོས་པདྨའི་རིགས། །རང་རྩལ་ཤུགས་ལྡན་ལས་ཀྱི་རིགས། །སྤྲོས་པའི་མཐའ་བྲལ་དབྱིངས་ཡེ་ཤེས། །སྣང་བ་ཀུན་གསལ་མེ་ལོང་སྟེ། །མ་འདྲེས་ཀུན་མཉམ་མཉམ་པ་ཉིད། །སྣང་སྟོང་ཐབས་ཤེས་སོ་སོར་ཤར། །སོར་རྟོག་ཡེ་ཤེས་རང་ངོ་ཤེས། །ཆོས་རྣམས་འབད་མེད་རྩོལ་བ་བྲལ། །བྱ་བ་གྲུབ་པའི་ཡེ་ཤེས་སོ། །རང་རིག་འོད་ལྔར་ལྷུན་གྲུབ་པོ། །ཡུལ་ལྔ་དག་དང་སྦྱར་བ་ན། །སྣང་བཞི་མ་གྲུབ་གསལ་མ་འགགས། །ཡེ་ཤེས་སྣང་སྟོང་གཟུགས་ཀྱི་ཡུལ། །སྒྲ་རྣམས་མ་འགགས་རྣ་བས་ཐོས། །ཐོས་པའི་མཚན་ཉིད་གྲག་སྟོང་དང་། །སྒྲ་གྲག་རང་སྟོང་རྣ་བའི་ཡུལ། །སྣ་ཡི་ཡུལ་དུ་དྲི་སྣ་ཚོགས། །གང་ལྟར་སྣང་བ་རང་བཞིན་སྟོང་། །དྲིར་འཛིན་སྟོང་པ་སྣ་ཡི་ཡུལ། །ལྕེ་ཡི་ཡུལ་དུ་རོ་སྣ་ཚོགས། །གང་ལྟར་བྲོ་ཡང་བཟུང་ཡུལ་སྟོང་། །རོ་སྣང་སྟོང་པ་ལྕེ་ཡི་ཡུལ། །ལུས་ལ་རེག་བྱ་གང་སྣང་ཡང་། །འཛིན་བྱེད་ཤེས་པ་རང་བཞིན་སྟོང་། །སེམས་ལ་བདེ་སྡུག་གང་ཤར་ཡང་། །རང་ཤར་རང་གྲོལ་ཉིད་དུ་སྟེ། །ཤར་གྲོལ་དུས་མཉམ་ཡིད་ཀྱི་ཡུལ། །བདེ་སྡུག་ཐམས་ཅད་དྲན་སྟོང་ཡུལ། །ཐམས་ཅད་ཕྱི་ནང་གཅེར་གྲོལ་ཡུལ། །འབྱུང་བ་ལྔ་དང་སྦྱང་བ་ན། །ཅིར་ཡང་མ་གྲུབ་ནམ་མཁའ་འདྲ། །གསལ་བ་སེམས་ཀྱི་སྣ་ཚོགས་གཡོ། །རང་རྩལ་རྫོགས་པའི་རླུང་དང་འདྲ། །ཡེ་ཤེས་འཆར་བས་མེ་དང་འདྲ། །ཡོན་ཏན་སྐྱེ་བས་ཆུ་དང་འདྲ། །ངོ་བོ་བརྟན་པས་ས་དང་འདྲ། །རང་རིག་ཡེ་ཤེས་ཟང་ཐལ་འདི། །རླུང་ལྔ་དག་དང་སྦྱར་བ་ན། །དྲོད་དང་ཡེ་ཤེས་གཉིས་མེད་པ། །མེ་དང་མཉམ་པའི་རླུང་ཡང་ཡིན། །འཁོར་འདས་སྲོག་འཛིན་རིག་པ་འདི། །སྲོག་འཛིན་ས་ཡི་རླུང་ཞེས་བྱ། །འབྱུང་བའི་དྭངས་སྙིགས་རིག་པས་འབྱེད། །དྭངས་སྙིགས་འབྱེད་པའི་རླུང་ཡང་ཡིན། །འཁོར་འདས་ཀུན་ལ་རིག་པས་ཁྱབ། །ཀུན་ལ་ཁྱབ་པའི་
རླུང་ཡང་ཡིན། །རིག་པས་འཁོར་བའི་སྲོག་བཅད་ནས། །མྱང་འདས་ས་རུ་སྐྱེལ་བས་ན། །སྙིང་རྗེ་མེད་པའི་ལས་རླུང་ངོ་། །དྭངས་མ་ལྔ་དང་སྦྱར་བ་ན། །སྟོང་གསལ་དང་གནས་ནམ་མཁའི་དྭངས། །རིག་རྩལ་འགྱུ་བ་རླུང་གི་དྭངས། །རང་བཞིན་བག་དྲོ་མེ་ཡི་དྭངས། །ཉོན་མོངས་དྲི་དག་ཆུ་ཡི་དྭངས། །རིག་མདངས་ཁ་དོག་ལྔ་དང་ལྡན། །འབྱུང་བ་ས་ཡི་དྭངས་མ་ཡིན། །གསང་བ་ཐིག་ལེའི་ཡིག་འབྲུ་རྣམས། །མཁའ་འགྲོ་ཡབ་ཡུམ་ངོ་སྤྲད་ན། །ཀླད་པ་དུང་ཁང་གཞལ་ཡས་ཁང་། །རྩེ་མོ་རྣམ་པར་བཀོད་པ་ན། །རྩ་འདབ་སུམ་བརྒྱ་དྲུག་ཅུ་ཡི། །ལྟེ་བ་རྩ་མདུད་དབུས་དག་ན། །འབྱུང་བ་ཆུ་ཡི་དྭངས་མ་མཆོག །ཕ་མའི་རྒྱུ་གྲུབ་ཐིག་ལེ་དཀར། །ཡེ་ཤེས་རང་འོད་ལྔ་དང་ལྡན། །ཡི་གེ་ཧ་དང་ར་རུ་གནས། །དེ་ཡང་ལྷུན་གྲུབ་བུམ་པའི་སྐུ། །དཀར་མོ་ཞལ་གཅིག་ཕྱག་གཉིས་པ། །གཡས་པ་རྡོ་རྗེ་གཡོན་ཐོད་ཁྲག །རྡོ་རྗེ་དཔའ་བོ་ར་ཡི་ཚུལ། །དཀར་གསལ་འཁྲིལ་སྦྱོར་ལྡན་པར་གནས། །རྩ་འདབ་སུམ་བརྒྱ་དྲུག་ཅུ་ལ། །ཐིག་ལེ་ཡིག་འབྲུ་ཧ་ར་ལས། །རྡོ་རྗེ་ཌཱ་ཀི་ཡབ་ཡུམ་ནི། །ཕྱག་མཚན་ཁ་དོག་གཙོ་མོ་འདྲ། །སུམ་བརྒྱ་དྲུག་ཅུ་འོད་སྐུར་གནས། །མགྲིན་པ་རོ་འདུས་འཁོར་ལོ་ན། །རྩ་འདབ་བཅུ་དྲུག་རྩ་བདུན་ན། །འབྱུང་བ་ས་ཡི་དྭངས་མ་མཆོག །ཕ་མའི་ཁུ་ཁྲག་ལས་གྲུབ་པ། །ཐིག་ལེ་ཡི་གེ་རི་དང་ཙ། །ཡེ་ཤེས་ཁ་དོག་ལྔ་ལྡན་དེ། །རང་བཞིན་རཏྣ་ཌཱ་ཀི་དངོས། །ཡབ་ཡུམ་ཕྱག་གཡས་རིན་ཆེན་ལ། །གཡོན་པ་ཐོད་པ་ཞབས་བརྐྱང་བསྐུམ། །སེར་གསལ་རིན་ཆེན་གདན་ལ་བཞུགས། །རྩ་འདབ་བཅུ་དྲུག་རི་དང་ཙ། །གཙོ་བོ་ཡབ་ཡུམ་འདྲ་བར་གནས། །སྙིང་ག་དྲན་པ་རྣམ་བཀོད་ན། །རྩ་འདབ་སུམ་ཅུ་རྩ་གཉིས་ཏེ། །ལྟེ་བའི་རིན་ཆེན་ཟུར་བརྒྱད་ན། །ཕ་མའི་ཐིག་ལེ་ཡེ་ཤེས་མདོག །མཐིང་ག་ཡེ་ཤེས་རང་འོད་ལྔ། །མ་དང་ཧཱུྃ་གི་ཚུལ་དུ་གནས། །རང་བཞིན་བུམ་སྐུ་ཞལ་ཕྱག་ཚུལ། །ཀུན་བཟང་ཡབ་ཡུམ་འཁྲིལ་
སྦྱོར་བཞུགས། །རུས་རྒྱན་ཞབས་གཉིས་བརྐྱང་བསྐུམ་སྟེ། །རྩ་འདབ་སུམ་ཅུ་སོ་གཉིས་ལ། །མ་ཧཱུཾ་ཐིག་ལེ་ཡིག་འབྲུས་བརྒྱན། །གཙོ་མོ་འདྲ་བས་གང་བར་གནས། །ལྟེ་བ་སྐྱེད་བྱེད་དྲུག་ཅུ་བཞི། །རྩ་མདུད་དབུས་ཀྱི་ལྟེ་བ་ལ། །འབྱུང་གཞིའི་དྭངས་མ་ཕ་མའི་རྒྱུ། །ཁ་དོག་ལྔ་ལྡན་ཐིག་ལེ་དམར། །ཡི་གེ་ཧྲི་ནི་འོད་ཀྱི་སྐུ། །པདྨ་ཌཱ་ཀི་འཁྲིལ་སྦྱོར་ཅན། །བརྐྱང་བསྐུམ་པདྨའི་གདན་ལ་བཞུགས། །རྩ་མདུད་དྲུག་ཅུ་རྩ་བཞི་ལ། །ཐིག་ལེ་ཧྲི་ནི་འོད་ཀྱི་སྐུ། །གཙོ་མོ་འདྲ་བས་གང་བར་གནས། །གསང་གནས་བདེ་བ་མྱོང་བྱེད་ན། །རྩ་འདབ་ཉི་ཤུ་རྩ་བརྒྱད་ཀྱི། །ལྟེ་བའི་རྩ་མདུད་དབུས་ཉིད་ན། །ཕ་མའི་ཁུ་ཁྲག་ཐིག་ལེ་ལྗང་། །ཡེ་ཤེས་རང་མདངས་ལྔ་ལྡན་པ། །ས་ཡི་ཡི་གེ་འོད་ཀྱི་སྐུ། །ལས་ཀྱི་ཌཱ་ཀི་ཡབ་ཡུམ་ལྗང་། །རལ་གྲི་ཐོད་པ་གཡས་གཡོན་བསྣམས། །རྒྱ་གྲམ་གདན་ལ་འཁྲིལ་སྦྱོར་བཞུགས། །རྩ་འདབ་ཉེར་བརྒྱད་ཐིག་ལེ་ནི། །ས་ཡི་རྣམ་པ་གཙོ་མོ་འདྲ། །ཐམས་ཅད་གང་བར་གནས་པའོ། །བཞི་བརྒྱ་བདུན་ཅུ་རྩ་གཉིས་ལ། །ཌཱ་ཀི་ཞལ་སྦྱོར་བསམ་མི་ཁྱབ། །གྲངས་ལས་འདས་པའི་རྩ་ནང་ན། །ཐིག་ལེ་ཡི་གེ་བརྒྱད་ཚུལ་ལ། །ཌཱ་ཀི་ཡབ་ཡུམ་བརྗོད་མེད་གནས། །ཀུན་གྱི་ངོ་སྤྲོད་ཞིབ་རྒྱས་རྣམས། །སྟོན་པ་རྡོ་རྗེའི་ཐུགས་ལ་གནས། །སེམས་དཔའ་རྩལ་གྱིས་མ་འོངས་སྟོན། །ཅེས་གསུངས་ནས། རྫོགས་རིམ་ཐིག་ལེ་ཉག་གཅིག་ཀློང་དུ་ལྷན་ནེར་བཞུགས་སོ། །ཐེག་པ་ཀུན་གྱི་ཡང་རྩེ་ཀློང་ཆེན་རབ་འབྱམས་ཀྱི་རྒྱུད་ལས། སྐུ་དང་ཡེ་ཤེས་ཞལ་ཕྱག་རྫོགས་པར་རང་ལུས་དཀྱིལ་འཁོར་ཡེ་རྫོགས་སུ་བཞུགས་ཚུལ་ངོ་སྤྲོད་བསྟན་པའི་ལེའུ་སྟེ་བཅུ་གཅིག་པའོ།། །།ས་མ་ཡ། རྒྱ་རྒྱ་རྒྱ། སེམས་དཔའ་རྡོ་རྗེས་ཡང་གསོལ་པ། །ཀྱེ་ལྷུན་གྲུབ་མ་བཅོས་ཀུན་ཏུ་བཟང་། །ཡེ་གྲོལ་འགག་མེད་
ཐུགས་རྗེའི་བདག །དག་པ་ཡེ་ཤེས་བཞུགས་ཚུལ་རྣམས། །ལེགས་པར་སྟོན་པས་གསུངས་ན་ཡང་། །མ་དག་ཉོན་མོངས་གནས་ཚུལ་རྣམས། །འདུས་པའི་འཁོར་ལ་བཀའ་སྩོལ་ཅིག །དེ་སྐད་བསྐུལ་བ་སྟོན་པས་གསན། །ཀྱེ་ཧོ་སེམས་དཔའི་རྡོ་རྗེ་ཉོན། །མ་དག་ཉོན་མོངས་ཞེས་པ་འདི། །རླུང་ཆེན་གློ་བའི་གྲོང་ཁྱེར་ན། །མ་རིག་པ་དང་སེམས་དང་ཡིད། །རྣམ་པ་གསུམ་དུ་གནས་པ་སྟེ། །མ་རིག་པ་ཞེས་འཐོམ་པ་དེས། །རང་རིག་གཤིས་ལ་སྒྲིབ་པར་བྱེད། །སེམས་ཀྱིས་ཡེ་ཤེས་ཉིད་ལ་སྒྲིབ། །ཡིད་ཀྱིས་རིག་སྣང་ངོ་ལ་སྒྲིབ། །དེ་ལས་ཉོན་མོངས་བག་ཆགས་དང་། །ཀུན་གཞི་ཉིད་དང་འཛིན་རྟོག་བྱུང་། །གཟུང་འཛིན་ལམ་སྒོ་ལྔ་རུ་བྱུང་། །ཉོན་མོངས་སྡུག་བསྔལ་ལྔ་ལ་སྤྱོད། །གཅིག་ལ་མཐོང་སྣང་བརྗོད་འདས་བྱུང་། །གནས་ལུགས་རང་རྟོགས་མ་ཤེས་པས། །གཏི་མུག་མུན་པ་ལྟ་བུར་འཐིབས། །མ་གྲུབ་ཆ་ལ་མེད་བཞིན་དུ། །སེམས་ཅན་རང་ཆས་ཞེ་སྡང་བྱུང་། །རང་གཞན་སྒྲིབ་མེད་ང་རྒྱལ་ཏེ། །བྲག་རི་ལྟ་བུར་ཤིན་ཏུ་མཐོ། །བདེ་བའི་དོན་སྒྲིབ་འདོད་ཆགས་རྒྱས། །རང་ཁ་མེ་ལྕེ་བཞིན་དུ་འབར། །གཞན་ལ་ཕྲག་དོག་འགྲན་སེམས་སྐྱེས། །དེ་ལ་བརྟེན་ནས་ཉོན་མོངས་ནི། །བརྒྱད་ཁྲི་དང་ནི་བཞི་སྟོང་བྱུང་། །བག་ཆགས་འཐུག་པོའི་སྦུབས་སུ་འཐུམས། །སྔར་ཞེན་བག་ཆགས་རྨི་ལམ་འདྲ། །ཕྱིས་འབྱུང་བག་ཆགས་རྒྱུ་འབྲས་འདྲ། །ད་ལྟའི་བག་ཆགས་གར་སྤྱིན་འདྲ། །ལས་རྣམས་ཐམས་ཅད་མཚམས་སྦྱོར་ཞིང་། །འགོ་བ་བླ་སྟེ་འགོག་པར་དཀའ། །ཕུང་ཁམས་འདི་ལ་བརྟེན་བྱས་ནས། །ཉོན་མོངས་དུ་མའི་རྟེན་གནས་བྱེད། །སྒོ་ལྔའི་ལམ་དོད་སྣང་ཡུལ་བཟུང་། །ཁམས་གསུམ་འཁོར་བར་འཁོར་ཞིང་འཁྱམས། །གཟུང་འཛིན་ཐག་པས་དམ་དུ་བསྡམས། །ཐེ་ཚོམ་དབང་གིས་རྒྱུ་འབྲས་ལོག །གངས་དཀར་ནག་པོར་མཐོང་དང་མཚུངས། །ཞེས་གསུངས་ནས། འཁྲུལ་ཡུལ་གཉིས་མེད་རིག་སྟོང་ཆེན་པོར་ལྷན་ནེར་བཞུགས་སོ། །
ཐེག་པ་ཀུན་གྱི་སྤྱི་ཕུད་ཀློང་ཆེན་རབ་འབྱམས་ཀྱི་རྒྱུད་ལས། མ་དག་ཉོན་མོངས་ཀྱི་གནས་ཚུལ་བཤད་པའི་ལེའུ་སྟེ་བཅུ་གཉིས་ པའོ།། །།ས་མ་ཡ། རྒྱ་རྒྱ་རྒྱ། སེམས་དཔའ་རྡོ་རྗེས་གསོལ་པ། ཀྱེ། ཀུན་ཁྱབ་དགོངས་གསལ་ཀུན་ཏུ་བཟང་། །རང་ཤར་འཛིན་གྲོལ་ལྷུན་གྲུབ་ལ། །གནས་ལུགས་དེ་ལྟར་ཡིན་པ་ན། །ཡེ་ཤེས་གཏིང་གསལ་ཆེན་པོ་དེ། །ལམ་མཆོག་གང་ལ་ཞུགས་པ་ཡིན། །རིག་མདངས་འཁོར་ལ་བཀའ་སྩོལ་ཅིག །སྟོན་པས་གསན་ནས་ལན་གསུངས་པ། །ཨ་ཧོ་སེམས་དཔའ་རྡོ་རྗེ་རྩལ། །སྙིང་ནང་གནས་པའི་ཡེ་ཤེས་དེ། །སྤྱི་ལམ་རྩ་བཞི་ཡིན་པ་སྟེ། །ཁྱད་པར་ཀ་ཏི་ཤེལ་བུག་ཅན། །རྩ་ནི་དར་དཀར་སྐུད་དང་འདྲ། །ཁྲག་དང་ཆུ་སེར་དེ་ལ་མེད། །སྙིང་གི་རྩེ་ནས་ཡར་ཟུག་ནས། །སྒལ་འདབ་གཡས་ནས་ཡར་གྱེས་ཏེ། །རྩེའུ་ཆུང་གཡས་གཡོན་གཉིས་ནས་ཡར། །སྣ་འདབ་གཡས་གཉིས་ནས་ཀླད་པར་ཟུག །ཀླད་རྒྱའི་ནང་ནས་མིག་ལ་འདྲེལ། །རྩ་སྣ་རྒྱལ་མོ་གཉིས་ལ་ཟུག །རྒྱལ་མོ་རྒྱང་ཞགས་ཆུ་སྒྲོན་ནོ། །དར་དཀའ་སྐུད་པ་ལྟ་བུ་སྟེ། །སྙིང་ནང་ཡེ་ཤེས་ལམ་ཞུགས་འཆར། །ཡེ་ཤེས་དེ་ཡི་རང་འོད་ནི། །ཙཀྵུ་ཞེས་པའི་སྒོ་ལ་ཐོན། །གཉིས་ཀྱི་ཆ་འཛིན་སྣང་བ་སྟོན། །ཀུན་ལ་ཡོད་པའི་ཡེ་ཤེས་དེ། །མེ་ལོང་དཀྱིལ་འཁོར་དྭངས་པ་ལ། །གང་བསྟན་རྐྱེན་དེ་འོང་བ་བཞིན། །རྣམ་དག་སྟོང་པའི་ནམ་མཁའ་ལ། །དོན་གྱི་སྙིང་པོ་ཚོམ་བུ་ལྔ། །མ་བསྐྱེད་ཡེ་རྫོགས་གནད་ཀྱང་སྣོད་ཀྱིས་གསལ། །སྣང་བར་ནུས་པ་འགྱུ་བྱེད་རླུང་། །རོ་རྐྱང་གཉིས་པོ་རླུང་གི་ལམ། །ཀུན་འདར་མ་ནི་བྱང་ཆུབ་ལམ། །ཤེལ་བུག་ཅན་གྱི་སྒྲོན་མའི་ལམ། །འོད་དང་ཟེར་དུ་རབ་སྣང་སྟེ། །དཔེར་ན་ཉ་ཡི་མིག་གིས་ནི། །གསེར་གྱི་བྲག་རྒྱུད་ཆ་ཕྲ་བ། །བཟོ་བོ་མཁས་པས་ལེགས་བརྒྱུས་ལྟར། །མུ་ཏིག་འཕྲེང་ལྟར་ཡུལ་ལ་ཐོན། །དེ་ནི་དག་པའི་ཡེ་ཤེས་ལམ། །བདག་གིས་ཡང་དག་བསྟན་པའོ། །མ་དག་འཁོར་བའི་རྩ་ལམ་ནི། །
སྲོག་གིས་བསྡུས་པའི་སེམས་ཅན་ལ། །ཉོན་མོངས་མ་རིག་ཤས་ཆེ་སྟེ། །བརྟེན་ནི་གཟུགས་ཕུང་ལུས་ལ་བརྟེན། །གློ་སྙིང་གཉིས་ཀྱི་བར་ཤེད་ན། །སྲོག་རྩ་དམར་པོ་བྱ་བ་ནི། །སོག་སྦུག་ཙམ་པ་གཅིག་གི་ནང་། །རིག་པ་མ་ཡིན་གཞི་ཡིས་ཁྱབ། །སེམས་ཞེས་བྱ་བ་ཆགས་སྡང་ཅན། །ཡིད་ཅེས་བྱ་བ་རྟོག་པ་ཅན། །གསུམ་དུ་འདུས་པའི་མ་རིག་པ། །དུག་ལྔ་དུག་གསུམ་བཅས་པ་རྒྱུ། །རྩ་དེ་སྒལ་ཚིགས་གཡོན་པ་ནས། །རྩེའུ་ཆུང་གཡས་གཡོན་དག་ནས་རྒྱུ། །དབུགས་ཞེས་རླུང་གི་རྟ་ལ་ཞོན། །སྒོ་ནི་ཁ་དང་སྣ་རུ་རྒྱུ། །དེ་ལས་ཉེས་པ་སྣ་ཚོགས་འཆར། །ཉོན་མོངས་འཁོར་བའི་རྨང་རྡོ་བྱེད། །རྟགས་ནི་མཚན་མོ་གློ་སྦྲིད་དུས། །འོད་ཟེར་དམར་པོ་འཕྲོ་བ་འདྲ། །མ་དག་ལམ་གྱི་འཇུག་སྒོར་བཤད། །ཅེས་གསུངས་ནས། རང་ཤར་རང་གྲོལ་གྱི་ངང་དུ་བཅོས་མེད་ལྷུག་པར་ལྷན་ནེར་བཞུགས་སོ། །ས་མ་ཡ། རྒྱ་རྒྱ་རྒྱ། ཐེག་པ་ཀུན་གྱི་སྤྱི་ཕུད་ཀློང་ཆེན་རབ་འབྱམས་ཀྱི་རྒྱུད་ལས། ལམ་གང་ལ་རྒྱུ་བ་བསྟན་པའི་ལེའུ་སྟེ་བཅུ་གསུམ་པའོ།། །།ས་མ་ཡ། རྒྱ་རྒྱ་རྒྱཿ། ( སེམས་དཔའ་རྡོ་རྗེས་ཡང་གསོལ་པ། །ཀྱེ་དང་པོ་སངས་རྒྱས་ཀུན་ཏུ་བཟང་། །ཡིན་ལུགས་འགག་མེད་ཐུགས་རྗེ་ཅན། །ལམ་གྱི་རྒྱུ་ཚུལ་གསུངས་ན་ཡང་། །ཡེ་ཤེས་འཆར་བའི་སྒོ་གང་ལགས། །སྟོན་པ་ཉིད་ཀྱིས་བཀའ་སྩོལ་ཅིག །ཅེས་པ་སྟོན་པས་གསན་དགོངས་ཏེ། །ཨ་ཧོ་སེམས་དཔའ་རྡོ་རྗེ་ཉོན། །ཡེ་ཤེས་འཆར་བའི་སྒོ་ཉིད་ནི། །ལུས་བཅུད་དྭངས་མ་ཀུན་འདུས་པའི། །ཙཀྵུ་ཞེས་པའི་སྒོ་ལ་གསལ། །འཁོར་དང་མྱང་འདས་སྣང་བ་སྟོན། །དར་སྐུད་པ་མན་རྭ་འདྲ་ཁ། །རྩ་བ་འཕྲ་ལ་ཁ་ཕྱེ་བ། །ཨ་འབྲས་དཀྱིལ་དུ་ཟུག་པ་དེས། །ནམ་མཁའ་དྭངས་པའི་དབྱིངས་སུ་བལྟ། །ཡེ་ཤེས་སྣང་བ་ལྷུག་པར་འཆར། །ཐིག་ལེ་སྟོང་པའི་སྒྲོན་མ་དང་། །དག་པ་དབྱིངས་ཀྱི་སྒྲོན་མ་དང་། །ཤེས་རབ་རང་
བྱུང་སྒྲོན་ཉིད་དང་། །རྒྱང་ཞགས་ཆུ་ཡི་སྒྲོན་མ་རྣམས། །འདིས་ནི་མངོན་སུམ་མཐོང་བ་སྟེ། །ད་ལྟ་གཏན་ལ་དབབ་ཏུ་རུང་། །ཡིད་དཔྱོད་མུན་ཡུགས་ཚིག་དང་བྲལ། །མིག་གཉིས་རྒྱང་ཞགས་ཆུ་སྒྲོན་ཡིན། །གཟུགས་སོགས་ངོ་བོ་ཉིད་དུ་སྡུད། །དོན་རྣམས་སྣང་སྟེ་རིག་པར་བྱེད། །ཤེས་རབ་རང་བྱུང་སྒྲོན་མ་ཉིད། །ཐེག་པ་ཀུན་གྱི་ཐེ་ཚོམ་གཅོད། །རང་སྣང་འཛིན་དེ་ཆོས་རྣམས་སྡུད། །བག་ཆགས་འདྲེལ་རྒྱུན་འདི་ཡིས་གཅོད། །དབྱིངས་ཀྱི་དྭངས་མ་འདི་ཡིས་སྡུད། །ཆོས་ཉིད་མངོན་སུམ་སྣང་བ་མཐོང་། །ཐིག་ལེ་སྟོང་པའི་སྒྲོན་མ་ཉིད། །འཁོར་འདས་བསྲེ་བའི་མཚམས་སྦྱོར་བྱེད། །ཙཀྵུ་ལ་བརྟེན་འཇའ་འོད་འཆར། །རླུང་གིས་བཀྲགས་མདངས་གཟི་མདངས་བསྐྱེད། །བསྒྱུར་ཅིང་ཡེ་ཤེས་སྣང་བ་སྟོན། །འདིས་ནི་ལས་ཀུན་བྱེད་པའོ། །དག་པ་དབྱིངས་ཀྱི་སྒྲོན་མ་ཡིས། །རྣལ་འབྱོར་ཉམས་ཀྱི་ས་བོན་འདེབས། །འོད་སྣང་ཞིང་ཁམས་ཉིད་དུ་འཆར། །སྒྲོན་མའི་མཚན་རྟགས་མེད་བཤད་ཀྱང་། །མངོན་སུམ་མཐོང་བ་འདི་ཉིད་དོ། །སྣང་བ་ཀུན་གྱི་འཆར་བྱེད་སྒོ། །རྐྱེན་གྱིས་མ་བསྒྲིབས་རྒྱལ་མོ་ཆེ། །མིག་གི་དཀྱིལ་འཁོར་སྒོ་དག་ནས། །ཉི་མ་འམ་ནི་ཤེལ་མདངས་ལྟར། །རང་འོད་རང་ཆས་ཉིད་དུ་འཆར། །ཆོས་ཀྱི་མཚན་ཉིད་ཡེ་ཤེས་ལྔ། །ཁ་དོག་མ་འདྲེས་མཚན་ཉིད་ལྡན། །སྐུ་དང་ཡེ་ཤེས་སྣང་བ་ནི། །རང་བཞིན་སྣང་བ་མ་འགགས་ཤར། །རིག་པའི་རང་སྐུ་ལྷ་ཁང་འདྲ། །སྒྲོན་མ་བཞི་ནི་མཐོངས་ཁ་འདྲ། །རང་རིག་ཡེ་ཤེས་མར་མེ་འདྲ། །སྒྲོན་མ་བཞི་ནི་འོད་ཟེར་འདྲ། །བཞི་ཡང་གཉིས་འདུས་གཉིས་ཀྱང་དབྱིངས། །རྒྱང་ཞགས་སྒོ་ཕྱེ་གཟུགས་རྣམས་འཛིན། །ཤེས་རབ་རྩལ་གྱིས་དོན་ཀུན་ཁྲེམས། །ཐིག་ལེས་དབྱིངས་དང་གཉིས་མེད་འདྲེས། །འོད་སྣང་གོམས་པས་རིམ་གྱིས་འཆར། །ཙཀྵུ་ཡེ་ཤེས་འཆར་བའི་སྒོ། །འདི་ལས་གཞན་ཞིག་ཡོད་མ་ཡིན། །ཅེས་གསུངས་ནས། གསལ་ལ་མ་འགགས་རྐྱེན་གྱིས་མ་
བསྒྲིབས་གཏིང་གསལ་དུ་ལྷན་ནེར་བཞུགས་སོ། །ཐེག་པ་ཀུན་གྱི་སྤྱི་ཕུད་ཀློང་ཆེན་རབ་འབྱམས་ཀྱི་རྒྱུད་ལས། ཡེ་ཤེས་འཆར་བའི་སྒོ་བསྟན་པའི་ལེའུ་སྟེ་བཅུ་བཞི་པའོ།། །།ས་མ་ཡ། རྒྱ་རྒྱ་རྒྱ། སེམས་དཔའ་རྡོ་རྗེས་ཡང་ཞུས་པ། ཀྱེ་བྱ་བཙལ་བྲལ་བའི་ཀུན་ཏུ་བཟང་། །བརྡལ་བ་ཆེན་པོ་དབྱིངས་རིག་དཔལ། །སྒོ་ལ་ཤར་བའི་ཡེ་ཤེས་དེ། །ཡུལ་ནི་གང་དུ་སྣང་བ་ལགས། །དེ་སྐད་སྟོན་པས་གསན་དགོངས་ནས། །འཛུམ་པའི་མདངས་ཕྱུང་ལན་འདི་གསུངས། །ཨ་ཧོ་སེམས་དཔའ་རྡོ་རྗེ་རྩལ། །ཡུལ་ནི་ཡེ་ཤེས་སྒྲོན་མ་དེ། །སྟོང་ཉིད་དབྱིངས་ཀྱི་ནམ་མཁའ་ལ། །རིག་མདངས་འོད་ཕུང་ནམ་མཁའི་ཁམས། །ཀུན་ཁྱབ་བག་ཆགས་དབུགས་ལ་བརྟེན། །ཡེ་ཤེས་རིག་པ་དབྱིངས་ལ་སྦྱོར། །བདག་རྐྱེན་གཞན་རྐྱེན་འབྱུང་བའི་རྐྱེན། །གསུམ་བྲལ་དུས་གསུམ་ལྷུག་པར་འཆར། །ཁྱད་པར་ནམ་མཁའ་གསལ་དྭངས་ལ། །དབྱར་མ་སྟོན་དང་དགུན་ཆུང་དཔྱིད། །རླུང་དང་བསེར་བུ་ཁུ་རླངས་མེད། །འཛིན་པ་མེད་པའི་བར་སྣང་ལ། །ཡེ་ཤེས་ལྔ་ཡི་རང་མདངས་འཆར། །ཞེ་འདོད་མེད་པའི་སྒྲོན་མ་ནི། །དག་པ་དབྱིངས་ཀྱི་སྒྲོན་མ་ལ། །ཐིག་ལེ་སྟོང་པའི་སྒྲོན་མ་ཤར། །གཉིས་མེད་གཅིག་གི་རང་མདངས་ལས། །ཐིག་ལེ་སྐུ་དང་ཡེ་ཤེས་ཉིད། །འཁྲུལ་སྣང་དག་པའི་ཞིང་ཁམས་ནི། །ངོ་བོ་རང་བཞིན་གཉིས་མེད་པ། །སྟོང་གསལ་འགག་པ་མེད་པ་རུ། །རྫོགས་ལྡན་ཆོས་སྐུའི་སྣང་བ་མཐོང་། །སྒྲིབ་བྱེད་བྲལ་བའི་མཁར་བལྟས་པས། །དབྱིངས་ཀྱི་ནང་དུ་ལུ་གུ་རྒྱུད། །རྣམ་པར་བཞུགས་ཤིང་མི་འབྲལ་འཆར། །ལྔ་ལྡན་འོད་ཀྱི་མུ་ཁྱུད་མཛེས། །ཡུལ་བྲལ་སྒྱུ་མ་གཟུགས་ཀྱི་སྐུ། །རིག་སྟོང་གསལ་བ་ཆོས་ལོངས་སྤྲུལ། །འཕོ་འགྱུར་མེད་པར་ལྷང་ངེར་འཆར། །རང་རིག་རང་གསལ་ངོ་མཚར་ཆེ། །འདི་ལྟར་སུ་ཡིས་མཐོང་བའི་མི། །ཐོག་མའི་ཀུན་ཏུ་བཟང་པོ་
དང་། །སྐལ་བ་དག་ནི་མཉམ་པའོ། །ལྟ་བ་རང་བྱུང་ཡེ་ཤེས་ལྟོས། །བྱ་བཙལ་བྲལ་བ་ངོ་མཚར་ཆེ། །ལྟ་བའི་མཚན་མ་རང་སར་གྲོལ། །སྒོམ་པ་དབྱིངས་རིག་རང་ངོ་བཟུང་། །རྡོ་རྗེ་ལུག་རྒྱུད་ངོ་མཚར་ཆེ། །སྣང་བ་གསལ་ལ་ངོས་གཟུང་མེད། །སྤྱོད་པ་སྒྲོན་མ་གཉིས་ལྡན་སྤྱོད། །སྤང་བླང་བྲལ་བ་ངོ་མཚར་ཆེ། །གཅེར་བུ་ཟང་ཐལ་དགག་སྒྲུབ་བྲལ། །འབྲས་བུ་སྐུ་གསུམ་རང་ངོར་རྫོགས། །ཡིད་དཔྱོད་ཀ་དག་ངོ་མཚར་ཆེ། །ཆོས་ཟད་དང་པོའི་སངས་རྒྱས་སོ། །ཕྱི་དབྱིངས་ནམ་མཁའ་སྟོང་པ་ལ། །ནང་དབྱིངས་རིག་པ་ཡེ་ཤེས་ཤར། །གཉིས་མེད་སྣང་བའི་གཞི་མ་སྟེ། །སྒྲོན་མ་བཞི་ནི་ལམ་དུ་འདོད། །སྙིང་པོའམ་ནི་འབྲས་བུ་སྟེ། །དངོས་མེད་མཐིང་གི་མཐོང་ལ་ལྟོས། །དབྱིངས་རིག་འདུ་འབྲལ་མེད་པ་ཡི། །རིག་པ་རྡོ་རྗེ་ལུ་གུ་རྒྱུད། །ཙཀྵུ་རྒྱལ་མོའི་སྒོ་ལ་ཐོན། །རིག་སྟོང་མངོན་སུམ་བདེན་པ་དེ། །རྐྱེན་བྲལ་ཀློང་དུ་ལྷུན་གྲུབ་འཆར། །འཁོར་འདས་སུས་ཀྱང་བྱས་མེད་པའི། །གསལ་དག་འགྱུར་མེད་རང་དབྱིངས་ལ། །ཕྱི་ནང་མེད་པ་ངོ་མཚར་ཆེ། །གསལ་སྟོང་རྒྱ་ཆེ་ངོས་གཟུང་མེད། །སྐྱེ་འགག་མེད་པའི་སོ་མ་ཉིད། །རིག་པ་དབྱིངས་ལ་ལྷུག་པར་གདལ། །གཅེར་མཐོང་རང་གསལ་ངོ་མཚར་ཆེ། །ཡེ་སྟོང་ཀུན་གྱི་འབྱུང་གནས་ལ། །རིག་པ་ཀ་དག་འོད་ཟེར་འབར། །ཀུན་ལ་ཡོད་པའི་འོད་པོ་ཆེ། །དཀྱིལ་འཁོར་སཱུརྻ་དྭངས་པ་ལ། །རང་མདངས་འོད་ཟེར་ཤར་བ་ལྟར། །རྣམ་དག་སྟོང་པའི་ནམ་མཁའ་ལ། །དོན་གྱི་སྙིང་པོ་མ་འདྲེས་པ། །གོམས་པའི་སྟོབས་ཀྱིས་རིམ་གྱིས་ནི། །ཚོམ་བུ་ལྔ་ཡི་དཀྱིལ་འཁོར་ཉིད། །མ་སྐྱེས་རྫོགས་པའི་ཚུལ་དུ་གསལ། །འོད་ཕུང་ནམ་མཁའི་མཐའ་དང་མཚུངས། །བག་ཆགས་གཟུགས་ལ་རབ་བརྟེན་ནས། །ཐིག་ལེ་སྟོང་པའི་ཡེ་ཤེས་ནི། །དག་པ་དབྱིངས་ཀྱི་རང་ལ་སྦྱོར། །རང་སྣང་ཡེ་ཤེས་འོད་པོ་ཆེ། །སྒྲོན་མ་སྟོང་པ་ཀུན་གྱི་གཞི། །ཡུལ་སྣང་ཐམས་ཅད་རྣམ་པར་དག །འདི་ནི་ཡིད་
དཔྱོད་མ་ཡིན་པར། །མངོན་སུམ་རང་ཐོག་ཕེབས་པའོ། །ཅི་ཕྱིར་མངོན་སུམ་ཞེས་པ་དེ། །སྒོ་དང་ཡུལ་དང་རིག་པ་གསུམ། །འདུ་འབྲལ་མེད་པར་སྣང་བའོ། །ཆོས་ཉིད་མངོན་སུམ་སྣང་བ་འདི། །མཐོང་བ་ཙམ་གྱིས་ཤེས་པ་དང་། །ཤེས་པ་ཙམ་གྱིས་རྟོགས་པ་དང་། །རྟོགས་པ་ཙམ་གྱིས་གྲོལ་བར་འགྱུར། །གྲོལ་བ་ཙམ་གྱིས་ཕྱིར་མི་ཟློག །ཅེས་གསུངས་ནས། སུས་ཀྱང་མ་བྱས་མངོན་སུམ་གྱི་སྣང་བ་རང་གྲོལ་དུ་ལྷན་ནེར་བཞུགས་སོ། །ཐེག་པ་ཀུན་གྱི་སྤྱི་ཕུད་ཀློང་ཆེན་རབ་འབྱམས་ཀྱི་རྒྱུད་ལས། ཡུལ་འཆར་སྒོ་བསྟན་པའི་ལེའུ་སྟེ་བཅོ་ལྔ་པའོ།། །།ས་མ་ཡ། རྒྱ་རྒྱ་རྒྱ། དེ་ནས་སེམས་དཔའ་རྡོ་རྗེ་ཡིས། །སྟོན་པ་ཉིད་ལ་ཡང་ཞུས་པ། །ཀྱེ་ཧོ།ཀུན་བྱེད་རྒྱལ་པོ་ཀུན་ཏུ་བཟང་། །མ་ནོར་དོན་སྟོན་ཆོས་ཀྱི་དབྱིངས། །འདི་ལྟར་འཁོར་འདས་ཆོས་རྣམས་ལ། །ཐེག་པའི་དབྱེ་བ་དུ་ཙམ་ཡོད། །སྟོན་པས་འཁོར་ལ་བཤད་དུ་གསོལ། །ཅེས་པ་སྟོན་པས་གསན་ནས་ནི། །འདུས་པའི་འཁོར་ལ་བཀའ་སྩལ་པ། །ཀྱེ་ཧོ་རྡོ་རྗེ་སེམས་དཔའ་རྩལ། །ས་ལམ་ཆིག་ཆོད་ཀུན་བཟང་ངས། །ཡེ་ཤེས་རྣམ་གསུམ་བསྟན་པ་དང་། །གདུལ་བྱ་མ་དག་དྲང་བའི་ཕྱིར། །སྟོན་པ་རྣམ་པ་གསུམ་དུ་བྱུང་། །གནས་ཀྱང་རྣམ་པ་གསུམ་ཡིན་ཏེ། །འདུལ་ཞིང་རྣམ་པ་གསུམ་དུ་བཤད། །འཁོར་ཡང་རྣམ་པ་གསུམ་ཡིན་ཏེ། །བསྟན་པ་དག་ཀྱང་རྣམ་པ་གསུམ། །བཅོ་ལྔའི་ཚུལ་དུ་གནས་པ་ཡིན། །ཆོས་སྐུའི་སྟོན་པ་རིག་སྟོང་དང་། །ཆོས་སྐུའི་གནས་ནི་འོག་མིན་ཉིད། །ཆོས་སྐུའི་འདུལ་ཞིང་ནམ་མཁའི་ཁམས། །ཆོས་སྐུའི་འཁོར་ནི་རིག་པའི་མདངས། །ཆོས་སྐུའི་བསྟན་པ་རྣམ་པ་བཞི། །མ་ཧཱ་ཨ་ནུ་ཨ་ཏི་དང་། །ཨ་ཏི་ཆེན་པོ་རྣམ་བཞིའོ། །ལོངས་སྐུའི་སྟོན་པ་གངས་ཆེན་མཚོ། །ལོངས་སྐུའི་གནས་ནི་ཁང་བུ་བརྩེགས། །ལོངས་སྐུའི་འདུལ་ཞིང་སྣང་བ་རྣམས། །འདོད་པའི་ལོངས་སྤྱོད་
ཁྱབ་ཚད་ཡིན། །ལོངས་སྤྱོད་རྫོགས་པའི་འཁོར་ནི་འདི་ལྟ་སྟེ། །མོས་སྤྱོད་བཞི་ཡི་ས་ལས་རྡབ་འདས་ནས། །དང་པོ་རབ་ཏུ་དགའ་བའི་ས་གནོན་ཏེ། །ས་བཅུ་ཆོས་ཀྱི་སྤྲིན་ལ་གནས་རྣམས་ཡིན། །འདུལ་ཞིང་སྣང་བ་གསལ་བས་ཁྱབ་ཚད་དེ། །བསྟན་པ་ཀྲྀ་ཡ་ཨུ་པ་ཡོ་གའོ། །སྤྲུལ་སྐུའི་གནས་ནི་ངེས་མེད་བྱ་རྒོད་རི། །སྟོན་པ་རབས་བདུན་ཤཱཀ་ཐུབ་ལ་སོགས་པ། །འདུལ་ཞིང་བྱེ་བ་ཕྲག་བརྒྱའི་འཛམ་གླིང་སྟེ། །འཁོར་ནི་ལྷ་མི་མུ་སྟེགས་བསྟན་གསོ་རྣམས། །དབང་པོ་སེམས་གྱུར་ཐུགས་རྗེའི་བྱིན་རླབས་ནས། །དགེ་སློང་ཕོ་མོ་དགེ་བསྙེན་ཕོ་མོ་བཞི། །མ་ངེས་སྣ་ཚོགས་སྤྲུལ་སྐུའི་འཁོར་ཡིན་ཏེ། །བསྟན་པ་ཉན་ཐོས་རང་རྒྱལ་བྱང་སེམས་གསུམ། །སྐུ་གསུམ་སྟོན་གནས་འཁོར་བསྟན་བཤད་པ་ཡིན། །མ་རིག་ལུས་ཅན་འཁྲུལ་པའི་སེམས་ཅན་ལ། །ཉོན་མོངས་བརྒྱད་ཁྲི་བཞི་སྟོང་གནས་པ་ཡིན། །གཉེན་པོ་བརྒྱད་ཁྲི་བཞི་སྟོང་ཆོས་ཀྱང་བཤད། །ཆོས་སྒོ་བསམ་འདས་དེ་སྙེད་ཀྱང་། །སྡེ་སྣོད་གསུམ་གྱིས་འདུལ་བ་ཡིན། །འདོད་ཆགས་གཉེན་པོར་འདུལ་བ་དང་། །གཏི་མུག་གཉེན་པོར་མདོ་སྡེ་དང་། །ཞེ་སྡང་གཉེན་པོར་མངོན་པ་རྣམས། །ཀུན་ཀྱང་ཉི་ཁྲི་ཆིག་སྟོང་སྟེ། །དུག་གསུམ་ཆ་སྙོམས་སྡེ་སྣོད་གསུམ། །ཆ་སྙོམས་ཉི་ཁྲི་ཆིག་སྟོང་གསུངས། །འདུལ་བའི་སྣང་ངོ་ཐ་དད་པས། །ཡོད་ནི་གཅིག་ལས་མེད་པ་ལ། །བྱུང་ནི་ཐེག་པ་དགུ་རུ་བྱུང་། །མཐོང་ནི་སྣང་བ་དགུ་རུ་མཐོང་། །དེ་ཡིས་གང་བྱས་ལས་འབྲས་ཀུན། །རྫོགས་ཆེན་ང་ཡི་སོ་ནམ་ཡིན། །ཐེག་བརྒྱད་དམན་པ་སོ་སོ་ཡི། །གྲུབ་མཐས་ཕྱོགས་ཙམ་མ་གཏོགས་པ། །ང་ཉིད་རྫོགས་པར་ག་ལ་མཐོང་། །དཔེར་ན་དམུས་ལོང་གླང་བལྟས་འདྲ། །ཡིན་ནི་ཆོས་ཉིད་ང་ཡིན་ཏེ། །བྱུང་ནི་ཐེག་པ་སོ་སོར་བྱུང་། །འདུས་ནི་སྐྱེ་འགག་མེད་པར་འདུས། །བསྒྲིབས་ནས་སྡོམ་པ་དམ་ཚིག་བསྲུང་། །གནང་བཀག་གཅིག་ལ་མི་ཚེ་ཟད། །དམྱལ་ཁམས་བཅོ་བརྒྱད་དེ་ལ་ཚང་། །
རྫོགས་ཆེན་གང་ཞིག་རྒྱུ་འབྲས་ལྕི། །མུ་སྟེགས་ཆད་པ་ལོགས་ན་མེད། །སྤྲོས་ལ་དགའ་བའི་གང་ཟག་ལ། །སྤྲོས་པ་ཅན་གྱི་ཆོས་ཀྱིས་འདུལ། །ཉན་ཐོས་རང་རྒྱལ་བྱང་སེམས་གསུམ། །གང་ཟག་དབང་པོ་དམན་ལ་བཤད། །ཀྲྀ་ཡ་ཨུ་པ་ཡོ་ག་གསུམ། །གང་ཟག་དབང་པོ་འབྲིང་ལ་བཤད། །མ་ཧཱ་ཨ་ནུ་ཨ་ཏི་གསུམ། །གང་ཟག་དབང་པོ་རབ་ལ་བཤད། །གང་ཟག་ཡང་རབ་ཐོད་རྒལ་ལ། །ཨ་ཏི་ཡང་རབ་ཐོད་རྒལ་བསྟན། །དེ་ཀུན་བློ་ཡི་རིམ་པར་སྦྱར། །ངེས་པར་ཡང་དག་ཆིག་ཆོད་ལ། །ས་ལམ་སྙིང་པོ་རྩོལ་སྒྲུབ་རྣམས། །སྤང་བླང་དབྱེ་བ་མེད་པར་གདལ། །སེམས་ཀྱིས་བྱས་པའི་ཐེག་པ་དགུ། །ཉམས་ལེན་ཡོད་མེད་ཁ་བཟུང་ནས། །ཐེག་དམན་ཀུན་གྱིས་འདི་མི་གོ། །དཔེར་ན་རྒྱ་ཁབ་མིག་དག་ཏུ། །རས་ཡུག་བཙུད་བཞིན་བརྒྱལ་ཞིང་སྔངས། །རྫོགས་ཆེན་དགུ་ཀ་ཉམས་སུ་ལེན། །དམ་ཚིག་བསྲུང་མེད་རྟོགས་གྱུར་ཀྱང་། །ཆོས་སྤྱོད་བཅུ་ཡི་ཆོན་ཐག་འཐེན། །མདོ་རྒྱུད་བཀའ་ཡི་ཕུལ་ཐག་ཁྲོལ། །མན་ངག་ལུང་གི་ལམ་དུ་ཁྱེར། །སློབ་པ་གསུམ་གྱི་སྲོག་ཤིང་འཛུགས། །མ་ཡེངས་མི་ཞེན་རྟོགས་པའི་རྒྱན། །མུ་སྟེགས་པའང་ཁྱད་མི་གསོད། །སངས་རྒྱས་ཀུན་ཀྱང་ཕུད་མི་བཀུར། །རང་བཞིན་སྟོན་པ་གསུམ་གྱི་ཆོས། །རྒྱུད་ལུང་མཐོ་དམན་སྔགས་མཚན་ཉིད། །མི་འགལ་སྡོམ་ཚིག་སྲོག་ཕྱིར་བསྲུང་། །མ་ཞེན་མ་བཅིངས་མ་སྤངས་ཁྱེར། །ཆོས་ཉིད་ཆེན་པོའི་སྐྱ་གྲོགས་ཡིན། །ཐེག་བརྒྱད་རང་རང་ཕྱོགས་ལ་ཞེན། །ཡུན་རིང་བསྐལ་པ་བྱེ་བ་ཁྲིར། །ཀ་དག་ཆོས་ཉིད་ང་མི་མཐོང་། །སླར་ཡང་ལུས་ངག་ཡིད་གུད་ནས། །ངན་འགྲོར་ཉིན་ཡང་ཅུང་ཟད་ཆེ། །ཚོགས་ཐོབ་གནས་སྐབས་བདེ་བ་ཙམ། །ཁ་ལྟ་ཅན་གྱི་ཚིག་སྐམ་རེས། །ཐེག་པ་བརྒྱད་ལ་སྐུར་བཏབ་པས། །ཁྲི་ཕྲག་བསྐལ་པ་བྱེ་བ་རུ། །དམྱལ་བའི་གནས་སུ་སྐྱེས་ནས་ཀྱང་། །དབང་པོ་མི་ཚང་སྡུག་བསྔལ་འབྱུང་། །ལྕེ་ལ་རྨོས་དོར་དགུ་བརྒྱ་བཙུགས། །ལུས་ལ་
མཚོན་གྱི་ཆར་པ་འབེབས། །དེས་ན་ཐེག་པ་ཁྱད་མི་གསོད། །ཁ་ལྟ་སྨད་ལ་དོན་ལྟ་བསྟོད། །ཉན་ཐོས་ཏིང་འཛིན་རྒྱུད་ལ་བསྒོམ། །དེ་ཡིས་གོང་འོག་ཟབ་མི་ཟབ། །ཆོས་ཀྱི་རོ་ཞེས་བོགས་ཡང་ཆེ། །དེ་བཞིན་དགུ་ཀ་རྒྱུད་ལ་འགལ། །མ་སྤངས་ཀློང་ཡངས་ང་ཡི་ངང་། །རིམ་པ་དགུ་དང་བརྒྱ་ཁྲི་སྟོང་། །འབྱེད་པའི་ཕྱོགས་ཅན་ང་མི་རྟོགས། །འཆིང་བའི་ས་ལམ་བགྲོད་འདོད་པ། །ཚེ་གཅིག་སངས་རྒྱས་དེས་མི་ཐོབ། །ཨ་ནུ་མན་ཆོད་ལ་མཆོད་ཀྱང་། །ས་མདོ་རྣམ་པ་གསུམ་སྤྱོད་དེ། །བསྐྱེད་པའི་ས་དང་སྤྱོད་པའི་ས། །སྒྲུབ་པའི་ས་དང་གསུམ་དུ་བསྟན། །སྐྱེད་པའི་ས་རུ་སེམས་བཞི་བསྐྱེད། །སྤྱོད་པའི་ས་རུ་སེམས་སྤྱོད་བཅུ། །སྒྲུབ་པའི་ས་རུ་སྒྲུབ་འདོད་པ། །གཞན་སྣང་ཙམ་དུ་བསྟན་པ་ལས། །རང་སྣང་དག་པ་ངས་མ་བསྟན། །དགེ་བཅུ་སྤྱོད་ཅིང་མི་དགེ་སྤོང་། །རྫོགས་ཆེན་རྒྱུ་འབྲས་ལས་འཇོག་ཙམ། །དོན་ལ་སྤྱོད་སྤོང་བྱས་མ་བྱས། །ཁྱད་པར་ཉི་རྡུལ་ཙམ་ཡང་མེད། །དགེ་ཚུལ་ཉིས་བརྒྱ་ལྔ་བཅུ་དང་། །དགེ་སློང་ལྔ་བརྒྱ་ལྔ་བཅུ་སོགས། །བསྲུང་དུས་གྲངས་དང་དོན་མི་ཤེས། །སྡོམ་པ་མི་ཐུབ་བསྲུང་ཐབས་མེད། །རྟོག་པའི་སྟེང་དུ་ཡང་རྟོགས་བསྣན། །འཁྲུལ་པའི་སྟེང་དུ་ཡང་འཁྲུལ་བསྣན། །ཞགས་ཐག་སྟེང་དུ་འདྲེང་ཞགས་བསྡམ། །རྫོགས་ཆེན་བསྲུང་བྱ་ཀུན་ལས་འདས། །མ་ནོར་ཀློང་ཆེན་བསྲུང་བྱ་བྲལ། །ཚོགས་ཀྱི་ལམ་དང་སྦྱོར་ལམ་དང་། །མཐོང་སྒོམ་ལམ་དང་མཐར་ཕྱིན་ལམ། །ངེས་པར་རྫོགས་ཆེན་ལམ་ལས་གྲོལ། །བསོད་ནམས་འབྲས་བུ་ཐོབ་པ་མེད། །དྲང་བའི་ལྷ་ལ་བརྟེན་པ་ཙམ། །ལམ་ལ་ཐེག་བརྒྱད་མི་འབོར་ཏེ། །རང་ལ་ཆོས་སྐུ་ཚོལ་མི་བྱེད། །རྒྱུ་འབྲས་རང་ནས་རྩོལ་སྒྲུབ་མེད། །འདི་ལྟར་སྟོན་པ་ང་ཉིད་ཀྱིས། །འདུལ་ཞིང་བསྟན་པ་རྣམ་པ་གསུམ། །ཚིག་དང་བརྡ་ཡི་ཆོས་རྣམས་ཀུན། །དབྱེར་མེད་མ་རིག་དག་ཏུ་འཁྲུལ། །ང་ལ་སོ་སོར་བཅོས་པས་འཁྲུལ། །
ང་ཡི་རང་སེམས་ཐེ་ཚོམ་འཁྲུལ། །ཆོས་ཉིད་རེ་བ་ཆེ་བྱེད་དང་། །འཁོར་བར་དོགས་པ་ཆེ་བ་དང་། །སངས་རྒྱས་གཞན་ནས་རེ་ས་འཁྲུལ། །དགུ་རུ་མཐོང་ཞིང་རང་མ་ཤེས། །སྦྲང་མ་ཚང་ཚོལ་ལྟ་བུར་འཁྲུལ། །རྩོལ་བ་བྱ་བྱེད་འཆིང་བ་ཡིས། །གླང་ཆེན་འདམ་བྱིང་ལྟ་བུར་འཁྲུལ། །འབད་པ་རེ་བའི་སྟོབས་ཀྱིས་འཁྲུལ། །ནད་ལ་སྨན་ལོག་སོང་བཞིན་འཁྲུལ། །དེ་མ་ཡིན་ལ་དེར་བཟུང་བས། །སྨིག་སྒྱུ་ཆུ་རུ་མཐོང་བཞིན་འཁྲུལ། །མེད་པར་ཡོད་པའི་བློ་སྐྱེས་པ། །གྲོགས་པོ་ཐག་རིང་ཤི་བཞིན་འཁྲུལ། །རྩོལ་བསྒྲུབས་ལོག་པར་སོང་བ་ནི། །བུ་ཆུང་སྤུ་གྲི་རྩེ་བཞིན་འཁྲུལ། །རང་བྱུང་ཡེ་ཤེས་མཚན་ཉིད་མེད། །བཟང་ངན་ཕྱོགས་ཆར་བལྟ་ན་འཁྲུལ། །བདག་མ་ཡིན་ལ་བདག་ཏུ་འཛིན། །སེམས་འཛིན་ལྟ་སྒོམ་ཡོད་ན་འཁྲུལ། །འོད་ལ་གཞལ་ཡས་ཁང་མཐོང་བ། །ཕྱེ་མ་ལྷེབ་དང་མར་མེ་བཞིན། །དངོས་གྲུབ་རེ་སྟོབས་བསླུས་པ་ཡིས། །སྤྲེའུ་ཁྲོན་པར་ཚུད་པ་བཞིན། །རང་བྱུང་ཡེ་ཤེས་བདག་མེད་ལ། །གང་ཟག་དབང་པོས་བདག་ཏུ་བཟུང་། །སྣང་ངོར་གང་འཐད་དེ་བསྟན་པས། །དེ་ཀུན་ང་ཡི་ཐུགས་རྗེར་འཁྲུལ། །ཀློང་ཆེན་དོན་གྱིས་གོ་བར་གྱིས། །རྒྱས་པ་ཆེན་པོ་བསམ་ཡས་ཀྱང་། །དགུ་རུ་ངེས་པར་དབྱེ་བའོ། །ཞེས་གསུངས་སོ། །ཐེག་པ་སྤྱི་ཕུད་ཀློང་ཆེན་རབ་འབྱམས་ཀྱི་རྒྱུད་ལས། རྣམ་གྲངས་བསྟན་པའི་ལེའུ་སྟེ་བཅུ་དྲུག་པའོ།། །།ས་མ་ཡ། རྒྱ་རྒྱ་རྒྱ། དེ་ནས་སེམས་དཔའ་རྡོ་རྗེ་ཡིས། །སྟོན་པ་ཉིད་ལ་ཡང་ཞུས་པ། །ཨ་ཧོ།ཀུན་རྫོགས་ཆེན་པོ་ཀུན་ཏུ་བཟང་། །ཁྱབ་གདལ་ཆེན་པོ་འུབ་ཆུབ་དཔལ། །དབྱེ་བ་ཟུར་ཙམ་གསུངས་ན་ཡང་། །དང་པོ་ལྷ་མི་ལྟ་ལོག་གི། །གྲུབ་མཐའ་གང་ཡིན་རྫོགས་ཚུལ་གང་། །མ་སྤངས་རྒྱན་ཚུལ་གང་ལྟར་ལགས། །སྟོན་པས་རིག་མདངས་འཁོར་ལ་གསུངས། །དེ་སྐད་གསོལ་པ་སྟོན་པས་གསན། །ཀྱེ་ཧོ་འདུས་པའི་འཁོར་རྣམས་གསོན། །ང་ཡི་ཐེག་པ་རིམ་དགུ་ཡང་། །བཤད་ལུགས་
འཁོར་དང་མྱང་འདས་སོ། །འཁོར་བ་ཉིད་ལ་གྲུབ་མཐའ་ནི། །བློ་ཡིས་བསྒྱུར་དང་མ་བསྒྱུར་རོ། །མ་བསྒྱུར་བ་ལ་རྣམ་པ་གཉིས། །ཕྱལ་པ་ཉིད་དང་རྒྱང་འཕེན་ནོ། །རྒྱུ་འབྲས་ངོ་མ་ཤེས་པ་དེ། །ཕྱལ་པ་ཉིད་དུ་བཞག་པ་ཡིན། །ངོ་ཤེས་ཕྱི་མ་རྒྱང་དུ་བཞག །ཚེ་འདིའི་བཟོ་སྨན་ཕན་པ་སྒྲུབ། །རྒྱང་འཕེན་པ་ཞེས་བཤད་པ་ཡིན། །བློས་བསྒྱུར་ལམ་ལོག་མ་ལོག་ཡིན། །ལོག་པ་མུ་སྟེགས་མུར་ཐུག་གཉིས། །ངོ་བོ་ངེས་ཚིག་དབྱེ་བའོ། །ངོ་བོ་ལོག་པའི་ཤེས་རབ་ཀྱིས། །ཕྱིན་ཅི་ལོག་ལ་ཞེན་པའོ། །ངེས་ཚིག་ལྟ་བ་ངན་ལ་མུ། །སྤྱོད་པ་ངན་ལ་སྟེགས་པའོ། །དབྱེ་བ་སུམ་བརྒྱ་དྲུག་ཅུ་དང་། །འཇིག་ཚོགས་རི་བོ་དྲུག་ཅུ་དང་། །གྲངས་ཅན་དག་དང་ཉེར་ལྔ་དང་། །ཕྱི་ཡི་བདག་འཛིན་ཉི་ཤུ་དང་། །བྱེ་བྲག་བདག་འཛིན་བཅུ་དག་དང་། །ཏིར་ཐི་ཀེ་དྲུག་སྒྱུར་ལྟ་བཞི། །བསྡུ་ན་རྟག་ཆད་གཉིས་སུ་འདུ། །བགྲང་ཚུལ་དུས་གཅིག་ཕུང་བའོ། །གྲུབ་མཐའ་ཆད་པ་འདི་ལྟ་སྟེ། །རྒྱུ་ཆད་འབྲས་ཆད་ནམ་མཁའ་འདྲ། །ཐམས་ཅད་ཕྱལ་པ་ཉིད་དུ་འདོད། །རྟག་པ་སེམས་ཉིད་ཐིག་ལེའི་ཚུལ། །དཀར་དྭངས་སྣུམ་འདྲིལ་སྙིང་ནང་ན། །ཡེ་ནས་མི་འགྱུར་ཡོད་པར་བལྟ། །འབྲས་བུ་དབང་ཕྱུག་འཁོར་དུ་སྐྱེ། །དེ་ལྟ་འདོད་གཞུང་སོ་སོར་ཡོད། །ཨེ་མ་སེམས་དཔའ་རྡོ་རྗེ་ཉོན། །གྲུབ་མཐའ་ཐམས་ཅད་གང་ཟག་བློ། །དངོས་པོའི་གཤིས་ལ་དེ་མ་ཉེ། །སྒྲིབ་པས་གོལ་བས་སྡུག་བཙིར་ཀྱང་། །ཤེས་རབ་མི་ལྡན་ཕུང་བར་ངེས། །མ་རིག་མ་རྟོགས་ལོག་ལམ་མོ། །ཕྱི་ནང་རྟག་ཆད་ཡིན་མིན་རྣམས། །མི་འགལ་དབྱིངས་ཀྱི་ངང་དུ་ལྷུང་། །རྩོལ་སྒྲུབ་འདས་པའི་བདག་ཉིད་གྲུབ། །དེར་ཞེན་རྟོག་པ་མི་མངའ་བས། །སེམས་ཉིད་བླང་དོར་དེར་འཛིན་མེད། །མུ་སྟེགས་ཆད་པ་རྫོགས་ཆེན་རྒྱན། །མ་སྤངས་ཀློང་གྲོལ་ངང་ན་བདེ། །མི་སྐྱེ་འགག་མེད་སྣ་ཚོགས་འཆར། །སུམ་བརྒྱ་དྲུག་ཅུ་རྫོགས་ཆེན་རྒྱན། །ཀློང་ཆེན་མ་སྤངས་རང་གྲོལ་དང་། །
བདག་གཞན་གཉིས་སྣང་འཁོར་བ་དང་། །རིགས་དྲུག་མུ་སྟེགས་རྟག་ཆད་རྣམས། །རྒྱུ་གཅིག་ང་ཡི་ཀློང་ན་འཕྱོ། །ཀུན་གྱི་བདག་ཉིད་རྫོགས་ཆེན་རྒྱན། །མ་སྤངས་ཡེ་གྲོལ་ཕྱམ་བརྡལ་དང་། །ཀློང་ན་གསལ་བས་གདགས་གཞི་མེད། །གཞི་ལ་མི་གནས་རང་ཤེས་བདེ། །མུ་སྟེགས་བདུད་ཆེན་ལྟ་བ་དེ། །གང་ཟག་ཉིད་ཀྱིས་ལོག་པར་བརྟག །དངོས་པོ་གཤིས་ཀྱི་གནས་ལུགས་དང་། །རྟག་ཆད་གཉིས་སུ་ང་མི་གནས། །མཐའ་བཞི་མུ་བཞི་རང་གྲོལ་དང་། །མ་སྤངས་ཡེ་གྲོལ་ཀློང་ན་ཆུབ། །རིག་པ་ཕྱོགས་མེད་ཀུན་འབྱམས་ལ། །རྟག་ཆད་གཉིས་ཞེན་ཕྱོགས་འཛིན་བདུད། །ཨ་ཧོ། ཨ་ཏི་ཆེན་པོ་ངས་བཀྲོལ་ནས། །རྟག་ཆད་རང་ཤར་རང་སར་གྲོལ། །མུ་སྟེགས་མ་སྤངས་མ་བཅིངས་པར། །རྫོགས་ཆེན་མཛེས་པའི་རྒྱན་དུའོ། །གཅིག་མ་རྟོགས་ན་མང་པོ་དཀའ། །རིག་པ་གཡོ་བ་རྒྱུ་རྐྱེན་བྲལ། །མ་སྐྱེས་སྐྱེ་མེད་ཆོས་ཀྱི་དབྱིངས། །ནམ་མཁའི་དབྱིངས་ནས་མ་བཅོས་ཀློང་། །ཁམས་གསུམ་སྐུ་གསུམ་རང་བཞིན་གྲོལ། །མ་ཆད་མ་རྟག་བྱེད་པ་མེད། །མ་ཡལ་མ་ཞི་སྤྲོས་པ་མེད། །རིག་པ་མ་བསྒྲིབས་གསལ་མ་ཡལ། །མཁའ་ལ་རང་བྱུང་སྣང་སྲིད་གང་། །འབྲས་བུ་ལྷུན་གྲུབ་སྐུ་གསུམ་ཀློང་། །རྟག་པ་ཤར་གྲོལ་མ་སྤངས་རྒྱན། །ཆད་པ་མ་སྤངས་ཡེ་སྟོང་རྒྱན། །བསྒྲིམ་ལྷོད་མེད་པའི་རིག་པ་བདེ། །མ་བཅོས་རྣལ་དུ་ཀུན་རྫོགས་བདེ། །སྐྱེ་འཇིག་མཐའ་མེད་བྱ་བྲལ་ཀློང་ཆེན་དང་། །གསེར་གླིང་ལྟ་བུ་དབྱེ་བསལ་མེད་པའི་ཀློང་། །འཇའ་ཚོན་ལྟ་བུ་ཐམས་ཅད་བཀྲ་བའི་ཀློང་། །ཕྱི་ནང་མེད་པ་ནམ་མཁའ་ལྟ་བུའི་ཀློང་། །ཕྱོགས་རིས་མེད་པ་བུ་ཆུང་ལྟ་བུའི་ཀློང་། །རྟག་ཆད་མེད་པ་བར་སྣང་ལྟ་བུའི་ཀློང་། །འཕོ་འགྱུར་མེད་པ་རི་རྒྱལ་ལྟ་བུའི་ཀློང་། །ཁ་གཏིང་མེད་པ་རྒྱ་མཚོ་ལྟ་བུའི་ཀློང་། །རབ་འབྱམས་ང་ཡི་ཀློང་ན་ཀུན་ཀྱང་འཕྱོ། །རིག་པ་ངང་དྭངས་མཐའ་བཞི་མ་སྤངས་ཀྱང་། །འཁོར་འདས་རྒྱུ་འབྲས་ཐ་སྙད་
ང་ཡི་རོལ། །འགྲོ་བ་རིགས་དྲུག་སྐྱེ་གནས་བཞི་པོ་ཡང་། །ཆོས་དབྱིངས་ངང་དུ་སྐྱེ་ཞིང་ངང་དུ་གྲོལ། །སྣང་བ་རྒྱ་ཡན་རིག་པ་རང་དག་བདེ། །མཐའ་ཡི་མུ་མེད་གོལ་ས་ཤུགས་ལ་ཆོད། །གཡང་ས་མེད་པའི་རིག་པ་གཅེར་བུ་ལ། །རྩོལ་བ་མེད་པར་སྐུ་གསུམ་ལྷུན་རྫོགས་པས། །མཚན་ཉིད་མ་འགགས་སྣ་ཚོགས་ཅིར་ཡང་ཤར། །དབང་པོས་ཅེར་མཐོང་མངོན་སུམ་ཆོས་དབྱིངས་གྲོལ། །ཇི་ལྟར་ལྟ་བ་ལོག་ཡང་ང་ཉིད་རང་། །མུ་སྟེགས་རང་གྲོལ་རྫོགས་ཆེན་རྒྱན་དུ་ཆེ། །ཞེས་གསུངས་ཏེ། ཆོས་ཉིད་ཀྱི་ངང་ནས་ཐེག་དགུ་འུབ་ཆུབ་སྟེ་ལྷན་ནེར་བཞུགས་སོ། །མུ་སྟེགས་ལྟ་ལོག་མ་སྤངས་རྫོགས་པའི་ལེའུ་སྟེ་བཅུ་བདུན་པའོ།། །།ས་མ་ཡ། རྒྱ་རྒྱ་རྒྱ། སེམས་དཔའ་རྡོ་རྗེས་ཡང་ཞུས་པ། །ཀྱེ་ཧོ་ཕྱོགས་རིས་མེད་པའི་ཀུན་བཟང་ཀློང་། །སྣང་འགག་བྲལ་བའི་ཡངས་པ་ཅན། །ཉན་ཐོས་དབྱེ་བ་གྲུབ་མཐའ་ཡང་། །མ་སྤངས་རྫོགས་ཚུལ་གང་ལྟར་ལགས། །སྟོན་པས་ལན་དུ་བཀའ་སྩལ་པ། །ཨ་ཧོ་སེམས་དཔའ་རྡོ་རྗེ་རྩལ། །ཉན་ཐོས་ཐེག་པ་འདི་ལྟ་སྟེ། །ངོ་བོ་ངེས་ཚིག་དབྱེ་བསྡུའོ། །ངོ་བོ་ཆོས་ཀྱི་བདག་ལྟ་ཡིས། །རང་གི་ཞི་བདེ་སྒྲུབ་པའོ། །ངེས་ཚིག་རང་དོན་ཉན་ཅིང་ཐོས། །དབྱེ་ན་བཞི་སྟེ་ཉན་ཐོས་པ། །སྤྲུལ་པ་རང་རྒྱུད་ཞི་བཀྲོད་དང་། །གྲུབ་མཐའ་དག་ལ་མཐར་འཛིན་ནོ། །བསྡུ་ན་མདོ་སྡེ་བྱེ་བྲག་གཉིས། །སྤྱི་ཡི་འཇུག་སྒོ་བདེན་པ་བཞི། །མདོ་སྡེ་བ་ཡི་ལྟ་བ་ནི། །ཁ་ཐོན་ཐོས་བསམ་སྒོ་གསུམ་དང་། །ཤེས་རབ་རྣམ་གསུམ་མཐར་ཕྱིན་པས། །ས་བཅུའི་འབྲས་བུ་ཐོབ་པར་འདོད། །བྱེ་བྲག་པ་ཡི་འདོད་གཞུང་ནི། །ཕུང་པོ་ཁམས་དང་སྐྱེ་མཆེད་ལ། །གཡག་རྔ་ནེའུ་སིང་ཚུལ་དུ་འདོད། །རང་གི་བློ་ཡིས་བལྟས་གྱུར་ན། །རྡུལ་དང་རྡུལ་ཕྲན་བཞིན་དུ་འདོད། །དེ་ཡི་རྣམ་པ་ཆ་གཞིགས་ནས། །སྟོང་པ་ཉིད་དུ་བློས་སྒོམ་མོ། །ཉན་ཐོས་སྤྱི་ཡི་སྒོམ་
པ་ནི། །བདེན་པ་བཞི་ཉིད་བསྒོམས་པ་ཡིས། །འབྲས་བུ་བཞི་ཉིད་འདོད་པའོ། །འགོག་པ་ཀུན་འབྱུང་སྤང་བར་འདོད། །བྱམས་པའི་བསྟན་ལ་འབྲས་བུ་ཐོབ། །འགོག་པ་རྒྱུན་དུ་ཞུགས་པ་སྟེ། །རབ་ཏུ་དགའ་ནས་བདུན་ཚུན་ཐོབ། །ཀུན་འབྱུང་བསྒོམས་པའི་འབྲས་བུ་ནི། །ལན་ཅིག་ཕྱིར་མི་ལྡོག་པ་སྟེ། །ས་བརྒྱད་མན་ཆད་ཐོབ་པའོ། །ལམ་བསྒོམས་ས་བཅུ་མཐར་ཕྱིན་ཏེ། །ཉན་ཐོས་གཉིས་ལ་གཙོར་བྱེད་དོ། །ཨ་ཧོ་སེམས་དཔའ་རྡོ་རྗེ་རྩལ། །ཉན་ཐོས་སྤང་དགག་མདོ་སྡེ་ཀུན། །ཕྱོགས་ཆ་བདག་བཟུང་གཅིག་གིས་བཅིངས། །ཡེ་ཀློང་ང་ཡི་དོན་ལ་བསྒྲིབས། །ལྟ་དགོངས་མ་ལོག་ཀློང་འབྱམས་ང་། །དེ་ཡིས་གཏན་ལ་ཕེབས་པ་དཀའ། །ང་ཉིད་བརྟག་དཀའ་བརྗོད་མཐའ་བྲལ། །དཔེ་དང་གཏན་ཚིགས་ཙམ་གྱིས་བརྗོད་མི་ནུས། །བརྗོད་མེད་དོན་ཉིད་ཀློང་བརྡལ་ངང་ན་བརྡལ། །ཉན་ཐོས་སྡེ་གཉིས་མ་སྤངས་ག་ལ་ཡིན། །ང་ཡི་རོལ་པ་ཙམ་དུ་འགག་པ་མེད། །ཕྱོགས་རིས་མེད་པའི་ལྟ་བ་ཡངས་པའི་ཀློང་། །མ་འགགས་ཤར་བའི་རང་བྱུང་ཡེ་ཤེས་ཉིད། །རྒྱུ་དང་རྐྱེན་བྲལ་སྤང་འགག་མེད་པའི་སྐུ། །རྟོགས་པའི་ཀློང་ཆེན་རབ་འབྱམས་དོན་རྟོགས་ན། །སྐད་ཅིག་ཡེ་གྲོལ་ཀ་དག་ང་རང་ཉིད། །ཆོས་ཅན་དཀར་ནག་སྤྲོས་པའི་མཚན་མ་བྲལ། །མ་འདྲེས་ཡོངས་རྫོགས་ནམ་མཁའི་གཟའ་སྐར་བཞིན། །ཉོན་མོངས་མ་སྤངས་ང་ཡི་ཀློང་ན་འཕྱོ། །ཆོས་རྣམས་ཀུན་གྱི་རྩ་བ་ང་ལ་འདུས། །རྒྱུད་དྲུག་སེམས་ཅན་ང་ཡི་རང་བཞིན་ཡིན། །སྣང་བ་ཐམས་ཅད་མ་སྤངས་ང་ཡི་རྒྱན། །འདི་ལྟར་སྣང་བའི་ཆོས་རྣམས་ཐམས་ཅད་ལ། །ཀུན་ཀྱང་སྤོང་འགེག་བདེན་གཉིས་སྤོང་མི་བྱེད། །འཇུག་སྒོ་བདེན་བཞི་མ་སྤངས་ང་ཡི་རྒྱན། །ང་ཡིས་བསྟན་པའི་སྐུ་གསུམ་བསྟན་པ་ལ། །ལ་ལས་སྤོང་བའི་ཡུལ་དུ་མཐོང་། །ལ་ལས་དགག་དང་ལ་ལས་སྒྲུབ། །ལ་ལས་སྦྱང་དང་ལ་ལས་དགག །ལ་ལས་སྟོང་དང་
ལ་ལས་ཆད། །ལ་ལས་བླང་དང་ལ་ལས་དོར། །མཐོང་སྣང་རེ་དང་ལམ་སྟེགས་རེ། །ལམ་སྟེགས་རེ་ལ་གྲུབ་མཐའ་རེ། །གྲུབ་མཐའ་རེ་ལ་ཕྱོགས་ཞེན་རེ། །ཨ་ཏི་ཆེན་པོའི་ཀློང་ཆེན་ང་། །རྩོལ་མེད་བྱ་བྲལ་སྡུག་བསྔལ་བྲལ། །སོ་མ་རང་གྲོལ་མ་བཅོས་པ། །མཐོང་བའི་རྩོལ་བ་ཞེན་སྤངས་ཏེ། །ཐམས་ཅད་ང་ཡི་ལམ་སྟེགས་ཡིན། །དཔེར་ན་ཤིང་སྡོང་རྩེ་མོ་ལ། །རྩ་བ་མ་གྲུབ་རང་སར་རྫོགས། །གཅིག་ལ་མཐོང་ཡུལ་དགུ་རུ་ཞེན། །ཀློང་ཆེན་ང་ལ་ཉན་ཐོས་རྫོགས། །དཔེར་ན་རྒྱལ་ཁང་རྩེ་མོ་ལ། །འོག་ཐོག་མ་གྲུབ་རང་སར་རྫོགས། །ཉན་ཐོས་བདེན་བཞི་བྱེ་བྲག་པ། །མ་སྤངས་རང་གྲོལ་ཨ་ཏིའི་རྒྱན། །དཔེར་ན་ཉི་མའི་དཀྱིལ་འཁོར་ལ། །འོད་ཟེར་མ་བསྒྲུབས་རང་སར་རྫོགས། །མུན་པ་མ་སྤངས་རང་སར་གྲོལ། །ཨ་ཏི་ཀློང་ཆེན་བདེ་ཡན་ལ། །ཉན་ཐོས་མ་བསྒྲུབས་རང་སར་རྫོགས། །སྤོང་འགེགས་མ་སྤངས་རང་སར་གྲོལ། །སྤྱོད་ལམ་བཅོས་སྡོམ་མེད་པའི་ཀློང་། །སྣང་སྲིད་ཆོས་སྐུར་བརྡལ་བའི་ཀློང་། །དམ་ཚིག་བསྲུང་མཚམས་བྲལ་བའི་ཀློང་། །འབྲས་བུ་སྤང་ཐོབ་རེ་མེད་ཀློང་། །དཔེར་ན་ནམ་མཁའི་ཁམས་ཉིད་དུ། །སྣོད་བཅུད་མ་བསྒྲུབས་རང་སར་རྫོགས། །མཐའ་བརྒྱད་མ་སྤངས་རང་སར་གྲོལ། །ཨ་ཏི་བརྡལ་ཁྱབ་ཆེན་པོ་ལ། །ཉན་ཐོས་མ་བསྒྲུབས་རང་བཞིན་ཀློང་། །ས་བཅུ་མ་བསྒྲུབས་ཡེ་ནས་ནོན། །ཕྱིར་མི་འོང་བའི་ཡེ་ཐོབ་ཡིན། །སྤྲུལ་པའི་རྫུ་འཕྲུལ་ཡེ་ཀློང་ཡིན། །རྣམ་རྟོག་སྐྱོན་ཡོན་ག་ལ་ལྟ། །མི་སྤང་ཁོ་རང་གཞི་མེད་ཡིན། །མ་འགགས་ཆུ་རླབས་མཁའ་སྤྲིན་བཞིན། །ལན་ཚ་ཆབ་རོམ་བཏབ་པ་བཞིན། །ང་ལ་རྫོགས་ཤིང་ང་ལ་ཐིམ། །ཀློང་ཆེན་ང་ཡིས་བཀག་པ་མེད། །ཉམས་ལེན་མ་འདྲེས་ཐད་དཀར་གསལ། །གང་བྱས་ཡངས་པར་གྲོལ་བ་ཡིན། །ཇི་ལྟར་ཆོས་སྐུའི་ཞིང་ཁམས་ཀྱང་། །སྐྱེ་མེད་ང་ཡི་
ཀློང་ན་ཡངས། །རང་བཞིན་དག་པའི་ཞིང་ཁམས་ཀྱང་། །རང་གསལ་ང་ཡི་ཀློང་ན་ཡངས། །ཐུགས་རྗེ་སྤྲུལ་སྐུའི་ཞིང་ཁམས་ཀྱང་། །ཀློང་ཁྱབ་འགགས་མེད་ཀློང་ན་ཡངས། །མི་གནས་རིག་པའི་ཀློང་དུ་འདས། །ཇི་ལྟར་ས་ལམ་བརྩིས་པའི་ཆོས། །རྩོལ་བས་སྡུག་བསྔལ་ཆོས་མིན་གྱི། །ཆོས་རྣམས་མི་ཟད་ཡོངས་རྫོགས་པ། །ཨ་ཏི་ང་ཡི་སྦུབས་ན་རྫོགས། །ཉན་ཐོས་སྤོང་འགེག་བསྐལ་པར་སྦྱངས། །སྙིང་པོ་རིག་པ་ཐོབ་དུས་མེད། །ཅེར་མཐོང་རང་གྲོལ་ང་ཉིད་ལ། །བསྐལ་པའི་སྤང་འགེག་འུབ་ཆུབ་བོ། །འབྲས་བུ་སྟོན་ལ་རག་ལུས་པའི། །ཉན་ཐོས་འདུས་བྱས་ལྟ་བ་ནི། །ངན་པས་རང་བཅིངས་མ་ཁྲོལ་བར། །ཡུལ་སེམས་སེ་གོལ་གཅིག་ཙམ་ཀྱང་། །མ་བྲལ་རྟོག་པ་འགགས་པར་འདོད། །ཨ་ཏི་ཀུན་རྫོགས་བརྡལ་ཡངས་ང་། །ཡེ་ནས་ཡུལ་སེམས་གཉིས་མི་འགག །ཡུལ་སེམས་གཉིས་སུ་ང་མི་ཞེན། །ཡུལ་སེམས་གཉིས་སུ་ང་མི་གནས། །བྲལ་བར་གྱུར་ཀྱང་དབྱེར་མི་ཕྱེད། །ཕྱོགས་འཛིན་མདུད་པས་བཅིངས་པའི་ཉན་ཐོས་ནི། །ཨ་ཏི་ཀློང་ཆེན་ང་ཡིས་བཀྲོལ་བས་ན། །ཡོད་མེད་གཉིས་སུ་མཉམ་པའི་མཉམ་ཉིད་ལ། །ཡུལ་སེམས་གཉིས་ཀར་མ་འགགས་རང་ཤར་བས། །ཡུལ་སེམས་གཉིས་ཀར་མ་ཞེན་རང་གྲོལ་ཅིང་། །ཇི་ལྟར་བྱས་ཀྱང་རང་ཤར་རང་གྲོལ་ཀློང་། །ཨ་ཏི་ཆེན་པོ་མ་བསྒྲུབས་ཡེ་གྲུབ་སྟེ། །ཉན་ཐོས་མ་སྤངས་རྫོགས་ཆེན་སྤྱི་ཕུད་རྒྱན། །ཇི་ལྟར་སྦྱར་བགྲོད་བྱས་ཀྱང་རིག་པའི་ཀློང་། །ཇི་ལྟར་སྤོང་འགེག་བཅིངས་ཀྱང་རང་གྲོལ་ཀློང་། །ཉན་ཐོས་རང་གྲོལ་ཡེ་རྫོགས་རྒྱན་དུ་ཧོ། །ཞེས་གསུངས་ནས།ས་བཅུ་ཡེ་བགྲོད་རང་ལུགས་རང་རྣལ་གྱི་ངང་ལ་ལྷན་ནེར་བཞུགས་སོ། །ཐེག་པ་ཀུན་གྱི་སྤྱི་ཕུད་ཀློང་ཆེན་རབ་འབྱམས་ཀྱི་རྒྱུད་ལས། ཉན་ཐོས་རྫོགས་ཚུལ་གྱི་ལེའུ་སྟེ་བཅོ་བརྒྱད་པའོ།། །།
ས་མ་ཡ། རྒྱ་རྒྱ་རྒྱ། སེམས་དཔའ་རྡོ་རྗེས་ཡང་ཞུས་པ། །ཨེ་མ། མཉམ་ཉིད་རོ་གཅིག་ཀུན་ཏུ་བཟང་། །ངོ་མཚར་རྨད་བྱུང་སྤྱི་དཔལ་མེས། །རང་རྒྱལ་ཐེག་པ་གསུང་དུ་གསོལ། །སྟོན་པས་ལན་དུ་བཀའ་སྩལ་པ། །ཀྱེ་ཧོ་གཞོན་ནུ་སེམས་དཔའ་རྩལ། །རང་རྒྱལ་འཇུག་སྒོ་རྟེན་འདྲེལ་ཏེ། །བཅུ་གཉིས་ཉིད་ཀྱི་གྲུབ་མཐའ་ལྟ། །གང་ཟག་བདག་ཏུ་མེད་པ་ལ། །ཆོས་ཀྱི་བདག་ཏུ་ཡོད་པར་བལྟ། །ཚུལ་ཁྲིམས་ཉིས་བརྒྱ་ལྔ་བཅུ་སྲུང་། །སྒོམ་ནི་མི་རྟོག་ཆོས་ཉིད་སྒོམ། །ཕྱི་ནང་རྟེན་འདྲེལ་བཅུ་གཉིས་རྣམས། །གོམས་ནས་མཐའ་རུ་ཕྱིན་པ་དང་། །འབྲས་བུ་མཐར་ཕྱིན་ཚད་དུ་འདོད། །ཨ་ཧོ་སེམས་དཔའ་རྡོ་རྗེ་རྩལ། །ང་ནི་ཀློང་ཆེན་ཡངས་པ་སྟེ། །ཟླ་བ་མཁའ་ལས་མ་འཕགས་པར། །ཆུ་ནང་ཀུན་ཏུ་ཁྱབ་པ་ལྟར། །ཉན་ཐོས་རང་རྒྱལ་ཁས་ལེན་གཉིས། །སྡུག་བསྔལ་ཀུན་འབྱུང་འགོག་པ་ལམ། །རྟེན་འདྲེལ་བཅུ་གཉིས་ལུགས་ཟློག་རྣམས། །རང་ལས་བྱུང་བའི་སྣང་བ་ལ། །སྤོང་འགེགས་སྦྱང་བས་སྡུག་ཅིང་བཙིར། །དེ་ཡིས་ཀློང་ཡངས་གཏན་མི་ཕེབས། །སེམས་དང་ཆོས་ལ་དབྱེར་མེད་པས། །ཐམས་ཅད་རང་གྲོལ་ཨ་ཏི་དང་། །བླང་དོར་མེད་པས་གཏན་ལ་ཕེབས། །ལོ་ཀ་ཆོས་བརྒྱད་དབང་མི་གཏོང་། །ཉན་རང་ཨ་ཏི་ང་ཡི་རྒྱན། །སྡོམ་པ་དམ་ཚིག་བསྲུང་མཚམས་བྲལ། །རྟེན་འདྲེལ་བཅུ་གཉིས་ང་ཡི་རྒྱན། །མི་འགྱུར་འགྱུར་མེད་ཆགས་མེད་ལམ། །ཡེ་ནས་མ་བསླད་རབ་འབྱམས་ཀློང་། །དུས་གསུམ་ཇི་ལྟར་ལྷག་གེ་ལྷག །ཇི་ལྟར་མེ་ཡི་རང་བཞིན་ལ། །ཚ་བ་མ་བསྒྲུབས་རང་སར་རྫོགས། །གྲང་བ་མ་སྤངས་རང་སར་གྲོལ། །བརྡལ་ཁྱབ་ད་ལ་ཆིག་ཆོད་དེ། །ས་བཅུ་མ་བསྒྲུབས་ཡེ་ནས་ནོན། །ཉན་ཐོས་མ་སྤངས་རང་སར་གྲོལ། །འདས་པའི་ཀློང་ལ་རང་བཞིན་མེད། །མ་འོངས་ཀློང་ཆེན་འོད་དུ་གསལ། །ད་ལྟའི་ཀློང་ཆེན་གཞི་མ་
གྲུབ། །བརྗོད་མཐའ་མུ་ཡས་སྤྲོས་དང་བྲལ། །རང་རྒྱལ་གང་སྤྱད་ང་ཡི་རྒྱན། །སངས་རྒྱས་སེམས་ཅན་གཉིས་མེད་མཉམ། །མཉམ་པས་གོང་འོག་རིམ་པ་མེད། །ཡེ་རྫོགས་ཐིག་ལེ་ཆེན་པོ་ཡིན། །སློབ་དཔོན་མེད་པར་རང་རྩལ་གནས། །རང་རྒྱལ་བདུད་ཆེན་ལྟ་བ་ནི། །ལྟ་བ་རང་གིས་རང་ཉིད་བཅིངས། །རང་བཞིན་མེད་པའི་ཡུལ་སྟོང་ལ། །ཤེས་པ་གཏད་ནས་འཛིན་ཆར་འདོད། །བཅུ་གཉིས་དོན་ལ་འཇུག་ཟློག་བྱེད། །ཀློང་ཆེན་ཁྱབ་གདལ་ཨ་ཏི་ང་། །ཡེ་ནས་རྟེན་འདྲེལ་བཅུ་གཉིས་ཏེ། །མ་འགགས་མ་ཞེན་མི་གནས་པས། །མཐའ་མ་སྤང་བར་རང་གྲོལ་ལོ། །ཡོད་པར་འཛིན་ལ་ཕྱོགས་ཆ་འདོད། །ཨ་ཏི་ཡོད་མེད་མཉམ་པ་ལ། །འཇུག་ཟློག་རང་ཤར་རང་གྲོལ་བས། །རང་རྒྱལ་མ་སྤངས་ཨ་ཏི་མ་བསྒྲུབས་པས། །སྤང་བླང་མེད་པ་རྫོགས་ཆེན་རྒྱན་དུའོ། །ཞེས་གསུངས་ནས། བློའི་བཞག་ཐབས་ཇི་བཞིན་པའི་ངང་དུ་ལྷན་ནེར་བཞུགས་སོ། །ས་མ་ཡ། རྒྱ་རྒྱ་རྒྱ། )ཐེག་པ་ཀུན་གྱི་སྤྱི་ཕུད་ཀློང་ཆེན་རབ་འབྱམས་ཀྱི་རྒྱུད་ལས། རང་རྒྱལ་མ་སྤངས་རྫོགས་པའི་ལེའུ་སྟེ་བཅུ་དགུ་པའོ།། །།ཡང་གཅིག་སེམས་དཔའ་རྡོ་རྗེ་ཡིས། །སྟོན་པ་ཉིད་ལ་ཡང་གསོལ་པ། །ཀྱེ་ཀུན་གྱི་སྤྱི་གཟུགས་རྒྱལ་བའི་གཙོ། །ཡེ་ནས་སངས་རྒྱས་བདག་ཉིད་དཔལ། །བྱང་ཆུབ་སེམས་དཔའི་གྲུབ་མཐའ་རྣམས། །རིག་མདངས་འཁོར་ལ་བཀའ་སྩོལ་ཅིག །ཅེས་པ་སྟོན་པས་གསན་དགོངས་ཏེ། །ཨ་ཧོ་སེམས་དཔའ་རྡོ་རྗེ་ཉོན། །བྱང་ཆུབ་སེམས་དཔའི་ཐེག་པ་ནི། །འཇུག་སྒོ་དོན་དམ་ཀུན་རྫོབ་གཉིས། །སྡོམ་པ་བརྒྱད་ཅུ་རྩ་ལྔ་སྲུང་། །སྟོང་པ་ཉིད་ཀྱི་ཡེ་ཤེས་བསྒོམ། །ལམ་ནི་ས་ལམ་སྦྱང་བར་འདོད། །འབྲས་བུ་དྲོད་སྐྱེ་བཟོད་པ་དང་། །རྩེ་མོ་འཇིག་རྟེན་ཆོས་མཆོག་གོ། །ས་བཅུ་རིམ་གྱིས་ཐོབ་འདོད་སྟེ། །དེ་ནི་བྱང་ཆུབ་སེམས་ཐེག་གོ། །ཨ་ཧོ་སེམས་
དཔའ་རྡོ་རྗེ་ཉོན། །བསྐལ་པ་གསུམ་དང་གྲངས་མེད་དུ། །རྩོལ་སྒྲུབ་སྦྱངས་པའི་ཐེག་པ་དེ། །མི་རྩོལ་ལྷུན་གྲུབ་ཨ་ཏིར་རྫོགས། །བྱང་སེམས་འཇུག་སྒོ་གཉིས་ཀྱི་སྡོམ། །ཨ་ཏི་མི་འཇུག་ཀློང་དུ་གྲོལ། །མ་སྤངས་རྒྱ་འབྱམས་ངང་ན་བདེ། །བྱང་སེམས་ཐེག་པ་ཨ་ཏིའི་རྒྱན། །རྒྱུ་འབྲས་དྲང་ལུང་ཐམས་ཅད་རྫོགས། །མ་སྐྱེས་དག་པས་སྒྲིབ་དང་བྲལ། །བགྲོད་པའི་ལམ་བྲལ་གོལ་ས་མེད། །ཡེ་ནས་ལྷུན་གྲུབ་སྦྱང་བགྲོད་བྲལ། །སྡོམ་པ་བརྒྱད་ཅུ་རྩ་ལྔ་རྫོགས། །བྱང་སེམས་བསྲུང་བྱས་དམ་པར་སྡོམ། །ཨ་ཏི་ཡེ་བསྲུངས་ཀློང་དུ་གྲོལ། །ལྟ་སྤྱོད་མ་སྤངས་སྦུབས་ན་བདེ། །མདོ་སྡེའི་ཐེག་པ་ཨ་ཏིའི་རྒྱན། །བྱང་ཆུབ་སེམས་དཔའི་ཐེག་པ་དེ། །དོན་དམ་ཀུན་རྫོབ་གཏན་ཚིགས་ཀྱི། །རང་སྣང་འཆར་སྒོ་ཆོས་ཉིད་ལ། །སྦྱང་བགྲོད་རྩོལ་བས་གོལ་ཞིང་བསྒྲིབས། །གཅིག་ལ་གཉིས་བཟུང་གཏན་མི་ཕེབས། །ཨ་ཏི་ཡེ་ཀློང་ཁྱབ་གདལ་ང་། །སྟོང་ཉིད་སྒོམ་དེ་མ་སྤངས་རྫོགས། །དམིགས་གཏད་སྒོམ་དེས་བསྐལ་པར་བསྡམས། །ཡེ་ཀློང་ཅེར་མཐོང་ངང་དུ་གྲོལ། །མ་ནོར་དབྱེར་མེད་ངང་ན་བདེ། །སྟོང་སྒོམ་མ་སྤངས་རྫོགས་ཆེན་རྒྱན། །ལྟ་བ་བལྟ་རུ་མེད་པ་ལ། །དོན་དམ་ཀུན་རྫོབ་མ་སྤངས་རྒྱན། །སྒོམ་པ་བསྒོམ་དུ་མེད་པ་ལ། །ཕྱོགས་འཛིན་སྒོམ་དེ་མ་སྤངས་རྒྱན། །སྤྱོད་པ་སྤྱད་དུ་མེད་པ་ལ། །བརྒྱད་ཅུ་རྩ་ལྔ་མ་སྤངས་རྒྱན། །འབྲས་བུ་ཐོབ་ཏུ་མེད་པ་ལ། །ཆོས་མཆོག་ལ་སོགས་ཨ་ཏིའི་རྒྱན། །དམ་ཚིག་བསྲུང་དུ་མེད་པ་ལ། །དོན་དམ་ཀུན་རྫོབ་མ་སྤངས་རྒྱན། །ཕྲིན་ལས་བཙལ་དུ་མེད་པ་ལ། །སྦྱང་བགྲོད་གཉིས་པོ་མ་སྤངས་རྒྱན། །ས་ལམ་བགྲོད་དུ་མེད་པ་ལ། །ས་བཅུ་མན་ཆད་མ་སྤངས་རྒྱན། །ཨ་ཏི་ཡིན་ལུགས་རང་ཤེས་ལ། །ཐེག་དམན་ཐམས་ཅད་མ་སྤངས་མཛེས། །ཞེས་གསུངས་ནས། འགྱུར་མེད་
ཆེན་པོའི་ངང་ལ་ལྷན་ནེར་བཞུགས་སོ། །ཐེག་པ་ཀུན་གྱི་ཡང་རྩེ། ཀློང་ཆེན་རབ་འབྱམས་ཀྱི་རྒྱུད་ལས། སྤྲུལ་སྐུའི་བསྟན་པ་གསུམ་མ་སྤངས་རྫོགས་ཚུལ་གྱི་ལེའུ་སྟེ་ཉི་ཤུ་པའོ།། །།ས་མ་ཡ། རྒྱ་རྒྱ་རྒྱ། སེམས་དཔའ་རྡོ་རྗེས་ཡང་གསོལ་པ། །ཀྱེ་འགྱུར་མེད་ཆེན་པོ་ཀུན་ཏུ་བཟང་། །མཚན་མ་ཡོངས་གྲོལ་སོ་མའི་ངང་། །ལོངས་སྐུའི་བསྟན་པ་སྡེ་གསུམ་གྱི། །ཀྲྀ་ཡའི་དབྱེ་བ་བསྟན་དུ་གསོལ། །སྟོན་པས་བཀའ་སྩལ་སེམས་དཔའ་ཉོན། །ཀྲྀ་ཡའི་ཐེག་པ་འདི་ལྟ་སྟེ། །ལྟ་སྒོམ་སྤྱོད་པ་འབྲས་བུའོ། །ལྟ་བ་ཡོད་མིན་མེད་པ་མིན། །གཅིག་མིན་ཐ་མི་དད་པར་འདོད། །སྒོམ་པ་ལྷ་དྲུག་བདག་བསྐྱེད་ནས། །མདུན་བསྐྱེད་རྗེ་ཁོལ་ཚུལ་དུ་སེམས། །སྤྱོད་པ་གཟའ་སྐར་དུས་བཟང་ལ། །ཁྲུས་དང་གཙང་སྦྲ་དཀར་གསུམ་སྤྱོད། །འབྲས་བུ་མི་ཚེ་བདུན་ཉིད་ཀྱིས། །ཡང་དག་རྫོགས་སངས་རྒྱས་པར་འདོད། །སྤང་བ་ཉ་ཤ་སྒོག་བཙོང་དང་། །ཆང་དང་བུད་མེད་སྤངས་བྱས་ནས། །ཏིང་ངེ་འཛིན་ལ་ཞེན་ཆེའོ། །ཨ་ཧོ་སེམས་དཔའ་རྡོ་རྗེ་ཉོན། །ལ་དགུ་ལུང་དགུ་བརྒལ་བྱས་ཀྱང་། །དག་པ་གཙང་སྦྲས་ང་མི་མཐོང་། །རང་གསལ་ཀུན་འབྱུང་ཨ་ཏི་ང་། །གཞན་དུ་ལྟོས་མེད་བརྡལ་ཁྱབ་དང་། །སངས་རྒྱས་ཕ་ཡུལ་ཐེག་པའི་དུར། །ཡོངས་བསྲུངས་དག་པར་ང་ལ་རྫོགས། །མི་སྡུག་མི་སྙན་ང་ཡི་རོལ། །སྤངས་བསྒྱུར་བསྐྱེད་པས་སྦྱངས་ཤིང་བསྡམས། །ཀློང་ཆེན་ང་ཡི་སྦུབས་སུ་གྲོལ། །སྤངས་པ་ཀུན་ཀྱང་ཀློང་ན་བདེ། །ཀྲྀ་ཡ་མ་སྤངས་རྫོགས་ཆེན་རྒྱན། །ཇི་ལྟར་སྐར་ཚོགས་སྤྲིན་རླུང་རྣམས། །མ་སྤངས་རོལ་རྩལ་ནམ་མཁའི་རྒྱན། །ཇི་ལྟར་ཐེག་པའི་གྲངས་མང་ཡང་། །ཤ་ཆང་སྒོག་བཙོང་གཙང་སྦྲ་རྣམས། །ཨ་ཏི་ང་ཡི་རོལ་རྩལ་རྒྱན། །ཆུ་བྲན་རྒྱ་མཚོར་འདུས་ནས་ནི། །ཆུ་སྣ་འདི་ཡིན་དབྱེར་མི་ཕྱེད། །ཨ་ཏི་ཀློང་ཆེན་བརྡལ་བ་ལ། །
ཐེག་པ་འདི་ཡིན་ཕྱོགས་མི་འབྱེད། །བློས་བརྟག་ཐ་སྙད་ང་ལ་ཐིམ། །ཕྱོགས་ཞེན་དམིགས་འཛིན་སྡོམ་པ་ལ། །ཆོས་ཟད་ཀ་དག་ཆེན་པོར་གྲོལ། །འདི་ཡིན་འདི་མིན་མེད་པས་བདེ། །ཀྲི་ཡ་མ་སྤངས་རྫོགས་ཆེན་རྒྱན། །ཀྲི་ཡ་རྡོ་རྗེ་འཛིན་འདོད་ན། །དག་པ་རྣམ་གསུམ་སྒོར་ཞུགས་ཏེ། །གཟུང་འཛིན་བཀྲུས་པས་དག་ཏུ་རེ། །ཨ་ཏི་ཆེན་པོའི་བདག་ཉིད་ནི། །གཟུང་འཛིན་ཡེ་དག་རང་རིག་དཔལ། །གཟུང་འཛིན་འདས་པའི་རྫོགས་ཆེན་ཡིན། །ཇི་ལྟར་ཆུ་ཉིད་ངོ་བོ་ལ། །རླན་པ་མ་གྲུབ་ལྡན་པའི་ཀློང་། །སྐམ་པ་མ་གྲུབ་རང་གྲོལ་ངང་། །དེ་ལྟར་ཨ་ཏི་ཀློང་བརྡལ་ལ། །ཀྲི་ཡ་མ་བསྒྲུབས་རང་བཞིན་ཀློང་། །གཟུང་འཛིན་མ་སྤངས་རང་གྲོལ་རྒྱན། །ཇི་ལྟར་བསྒོམས་ཀྱང་ཀློང་གི་རྩལ། །ངོ་བོ་རང་བཞིན་ཐུགས་རྗེའི་རྩལ། །ཀྲི་ཡ་གདོས་འཛིན་བརྡལ་བའི་རྩལ། །མ་རིག་ཡེ་ཤེས་རིག་པའི་རྩལ། །འཆར་སྒོ་འཁྲུལ་རྟོག་ང་ཡི་རྩལ། །སྣང་རིག་ཡིད་སེམས་ང་ཡི་རྩལ། །འཁྲུལ་ལུགས་ཐམས་ཅད་ཀློང་གི་རྩལ། །གཟུགས་དང་ཡན་ལག་ཀློང་གི་རྩལ། །གྲུབ་མཐའ་ཀུན་དང་ལྟ་སྒོམ་སྤྱོད། །འགྱུ་ཚད་རིག་ཚད་རྟགས་ཚད་དང་། །དགྲ་གཉེན་ཕྱོགས་རིས་ཁ་དོག་དང་། །ཐེག་པ་དགུ་དང་བཅུ་གཅིག་སོགས། །ཀློང་ཡངས་ངང་ནས་རྩལ་དུ་ཤར། །དེ་ལ་ཞེན་ན་མདུད་པས་བཅིངས། །མ་བཅོས་རང་གྲོལ་ཨ་ཏི་ཡང་། །མཁའ་ཀློང་རྣམ་དག་ཆོས་དབྱིངས་སུ། །གཞི་རླུང་རིག་པའི་ངོ་བོར་ཐིམ། །རྩལ་རྣམས་ཟེར་གྱི་ཀློང་དུ་ཐིམ། །སྟོང་གསལ་འོད་འབར་ཀློང་དུ་ཐིམ། །ཞེན་པ་མ་སྤངས་ཀློང་དུ་ཐིམ། །རིག་པ་གང་སྣང་ཤར་གྲོལ་དང་། །རང་བཞིན་ངོ་བོའི་ཀློང་ཡངས་ཡིན། །མ་རིག་འཆར་སྒོ་འཁྲུལ་སྣང་ཚོགས། །གང་ཤར་ཐོག་ཏུ་རང་བཞིན་གྲོལ། །བཟང་ངན་ཐེག་པའི་སྤང་ལེན་ཀུན། །ཀློང་གི་རང་གྲོལ་ཡངས་པའི་དབྱིངས། །སྐྱིད་སྡུག་གསོན་གཤིན་ཡིན་མིན་དང་། །རེ་དང་དོགས་དང་རྟག་ཆད་དང་། །རིག་ཚད་དྲན་ཚད་
འགྱུ་ཆད་དང་། །བསམ་ཚད་སྣང་ཚད་ཤར་ཚད་དང་། །དུག་ལྔ་དུག་གསུམ་བག་ཆགས་སམ། །རྣམ་རྟོག་ཀུན་བརྟགས་གྲུབ་མཐའ་དང་། །མཚོན་བྱེད་བྱ་བཙལ་དགག་སྒྲུབ་རྣམས། །གང་ཤར་སྐྱེས་པའི་ཐོག་ཏུ་གྲོལ། །སྟོང་པ་ཀུན་འབྱུང་སྟོང་པའི་རྒྱན། །ཐོལ་བྱུང་རིག་པ་རིག་པར་གྲོལ། །ཝལ་བྱུང་དྲན་རྟོག་རིག་པར་གྲོལ། །དཔེར་ན་སྦྲུལ་གྱི་མདུད་པ་བཞིན། །འཆིང་མཁན་གྲོལ་མཁན་ག་ལ་ཡོད། །རྔ་མའི་མདུད་པ་རང་གྲོལ་བཞིན། །ཀྲི་ཡ་མ་སྤངས་རང་གྲོལ་རྒྱན། །ཐམས་ཅད་ཀ་དག་ཀློང་དུ་གྲོལ། །སྟོང་དང་སྣང་བ་དབྱེར་མི་ཕྱེད། །མཁའ་ལ་འཇའ་ཚོན་ཐིམ་པ་ལྟར། །སྣང་རིག་སྟོང་གསལ་དབྱེར་མི་ཕྱེད། །ཁ་ཆར་མཚོ་ལ་ཐིམ་པ་འདྲ། །ཉན་ཐོས་ཨ་ཏི་དབྱེར་མི་ཕྱེད། །ཆུ་དང་འོ་མ་འདྲེས་པ་འདྲ། །རང་རྒྱལ་བྱང་སེམས་ཨ་ཏི་གསུམ། །མར་དང་མར་ནི་བསྣོལ་བ་ལྟར། །ངོ་བོ་རང་བཞིན་ཐུགས་རྗེ་དང་། །དུག་གསུམ་སྐུ་གསུམ་དབྱེར་མི་ཕྱེད། །ཁྲག་དང་ཆུ་གཉིས་བསྲེས་པ་ལྟར། །མ་རིག་ཡེ་ཤེས་དབྱེར་མི་ཕྱེད། །འཁྲུལ་དང་མ་འཁྲུལ་ག་ལ་ཡོད། །རྟོགས་དང་མ་རྟོགས་ག་ལ་ཡོད། །སངས་རྒྱས་སེམས་ཅན་ག་ལ་ཡོད། །ཐེ་ཚོམ་ཅན་གྱི་གྲུབ་མཐའ་ཀུན། །ཨ་ཏི་ཆོས་ཟད་ཀ་དག་ཀློང་། །སངས་རྒྱས་གཞན་ནས་མི་རེ་རྫོགས། །འཁྲུལ་རྨོངས་ཐེག་ཆུང་ཚིག་གིས་བསྡམས། །ཨ་ཏི་དོན་གྱི་ཐོག་ཏུ་གྲོལ། །ཐེག་པའི་ཕྱོགས་ཞེན་བློས་བཏགས་ཡིན། །མ་སྤངས་མ་འདྲེས་ངང་ན་བདེ། །བློས་བཏགས་ཐ་སྙད་རོལ་པར་མཛེས། །མཚན་མའི་སྤྱོད་པ་གཟིགས་མོར་ཆེ། །ཀྲི་ཡ་མ་སྤངས་རྫོགས་ཆེན་རྒྱན། །བློ་ཡི་ཡུལ་ལ་ངེས་པ་མེད། །བློ་ཡུལ་མ་ཟད་སངས་མི་རྒྱ། །ཨ་ཏི་མ་རྟོགས་གང་ཟག་ལ། །ཡཱ་ན་བརྒྱད་ཀྱི་ལྟ་སྒོམ་རྣམས། །དྲང་བའི་དོན་དུ་བཤད་པ་ཙམ། །གནས་སྐབས་ཙམ་གྱི་བདེ་འབྲས་ཡིན། །སྤོང་སྒྱུར་སྦྱོངས་ཐབས་བློ་སྣ་ཚོགས། །ཡིད་སྨོན་སངས་རྒྱས་ནམ་ཞིག་བསླུ། །
བསྒྲུབས་པའི་བུཌྜྷ་སངས་མི་རྒྱ། །ཨ་ཏི་ཀློང་ཆེན་ཀུན་ཤོང་ལ། །གནས་ལུགས་རང་སྣང་རྩིས་གདབ་མེད། །འགྲོ་ཡིན་འགྲོ་མིན་རང་གྲོལ་ཀློང་། །སྡོད་ཀྱིན་ལབ་ཀྱིན་རང་གྲོལ་ཀློང་། །ཟ་ཡིན་འཐུང་གིན་རང་གྲོལ་ཀློང་། །གསང་ཆེན་བཀའ་འདི་སུས་གོ་བ། །ཀུན་བཟང་ངང་ལས་གཞན་མི་འདའ། །ཉན་ཐོས་སྡུག་བསྔལ་ཀུན་འབྱུང་ཟེར། །ད་གཏན་འབེབས་པའི་ཆོས་མིན་ནོ། །སྡུག་བསྔལ་བདེ་ཆེན་ཀ་དག་ཏུ། །ཀློང་ཆེན་ང་ཡིས་གཏན་ལ་ཕེབས། །སྤོང་འགེག་རང་གྲོལ་ཕན་ཚད་བཞག །ཀྲི་ཡ་མི་རྟག་སྡུག་བསྔལ་ཟེར། །ད་གཏན་དེ་ཡིས་ཕེབས་པ་ཡིན། །དབྱེར་མེད་ལྷུན་གྲུབ་རོལ་པ་རུ། །ཀློང་ཆེན་ང་ཡིས་ངེས་པར་འབེབས། །སྣང་བ་སྐྱེ་མེད་རང་སར་གྲོལ། །ཨ་ཏི་ཀློང་ཆེན་ནམ་མཁའ་ལ། །ཐེག་དགུ་དེའི་རྩལ་སྣོད་བཅུད་ཙམ། །བླང་དོར་རེ་དོགས་བྲལ་ནས་ནི། །དགུ་ཁ་ཉམས་བླངས་གཏན་ལ་ཕེབས། །བྱ་བ་གཙོར་བྱེད་ཀྲི་ཡ་སྟེ། །དག་པ་མཐའ་བཞིའི་མདུད་པས་བསྡམས། །སྣང་བ་དག་པ་རིགས་གསུམ་ལྷ། །གཟུགས་རྣམས་འཇམ་དཔལ་སྒྲ་སྤྱན་རས། །དྲན་རྟོག་ཕྱག་རྡོར་ཉིད་དུ་བལྟ། །བདག་དང་ཡོན་བདག་རྫས་ཏིང་འཛིན། །དག་པ་གསུམ་གྱི་མདུད་པས་བསྡམས། །རྗེ་ཁོལ་གོང་འོག་ཚུལ་དུ་བལྟ། །ཨ་ཏི་བཟང་ངན་གཉིས་མི་དགག །མི་གནས་མི་ཞེན་རྒྱར་མ་ཆད། །མཉམ་ཉིད་ཕྱམ་བརྡལ་ཡིན་པ་ལ། །བཟང་ངན་ལྟ་བ་ཕྱོགས་འཛིན་བདུད། །ཨ་ཏི་བཟང་ངན་བྲལ་བ་ལ། །གཉིས་ཀ་རང་ཤར་རང་གྲོལ་བས། །ཨ་ཏི་མ་བསྒྲུབས་ཀྲི་ཡ་མ་སྤངས་པར། །དགག་སྒྲུབ་བྲལ་བ་རྫོགས་ཆེན་རྒྱན་དུ་མཛེས། །ཞེས་གསུངས་ནས། ཕྱོགས་འཛིན་ཞེན་མེད་རྗེན་པར་ལྷན་ནེར་བཞུགས་སོ། །ཐེག་པ་ཀུན་གྱི་སྤྱི་ཕུད་ཀློང་ཆེན་རབ་འབྱམས་ཀྱི་རྒྱུད་ལས། ཀྲི་ཡ་མ་སྤངས་རྫོགས་པའི་ལེའུ་སྟེ་རྩ་གཅིག་པའོ།། །།ས་མ་ཡ། རྒྱ་རྒྱ་རྒྱ།
སེམས་དཔའ་རྡོ་རྗེས་ཡང་གསོལ་པ། །ཨུ་པའི་གྲུབ་མཐའ་དབྱེ་བ་རྣམས། །ཨ་ཏིར་རྫོགས་ཚུལ་གསུང་དུ་གསོལ། །སྟོན་པས་ལན་དུ་བཀའ་སྩལ་པ། །འདུས་པའི་འཁོར་ཉོན་ང་ཡིས་བཤད། །ཨུ་པ་ཡ་ལ་བཞི་ཡིན་ཏེ། །ལྟ་བ་ཏིང་འཛིན་སྤྱོད་པ་དང་། །འབྲས་བུ་དག་དང་བཞི་ཉིད་དོ། །ལྟ་བ་ཡོ་ག་དག་དང་མཐུན། །དོན་དམ་སྐྱེ་འགག་མེད་པར་འདོད། །ཏིང་འཛིན་ཡོ་ག་དག་དང་མཐུན། །མངོན་པར་བྱང་ཆུབ་ལྔ་ཉིད་དོ། །སྤྱོད་པ་ཀྲི་ཡ་དག་དང་མཐུན། །བཟའ་དུས་ཁྲུས་གཙང་གཙོ་བོར་བྱེད། །འབྲས་བུ་མི་ཚེ་ལྔ་བདུན་ནས། །རིགས་ལྔ་རྡོ་རྗེ་འཆང་ས་ཐོབ། །ཨུ་པ་རེ་དོགས་ཐེག་པ་ཡིན། །ཨ་ཧོ་ཉོན་ཅིག་སེམས་དཔའ་རྡོ་རྗེ་རྩལ། །རྫོགས་ཆེན་ཡེ་བརྡལ་གཏིང་མཐའ་མེད་པ་ལ། །ས་ལམ་ཆིག་ཆོད་ལྟ་སྤྱོད་བརྩོན་འགྲུས་རྣམས། །མ་སྤངས་མ་བསྒྲུབས་ཡེ་གྲོལ་ངང་དུ་རྫོགས། །ཨུ་པ་ཡ་ནི་ཐེག་པ་སྤོང་སྒྲུབ་བསྡམས། །ཨ་ཏི་རེ་དོགས་སྤང་ཐོབ་རང་སར་གྲོལ། །གཞི་ཤར་རང་གྲོལ་དབྱིངས་ཀྱི་ངང་ན་བདེ། །ཨུ་པ་མ་སྤངས་རྫོགས་པ་ཆེན་པོའི་རྒྱན། །ཨ་ཏི་མ་བསྒྲུབས་དུག་ལྔ་རྒྱན་དུ་མཛེས། །ཡངས་སོ་ཆེའོ་རིག་པ་མཁའ་མཉམ་ཐུགས། །སྤང་ཐོབ་མེད་དོ་ཐིག་ལེ་ཉག་གཅིག་ཀློང་། །རང་སར་གྲོལ་ལོ་རྟོགས་དང་མ་རྟོགས་མེད། །གཉིས་སུ་མེད་པར་གྲོལ་བའི་ཆོས་ཉིད་དེ། །ཐེག་འོག་རྣམས་ལ་མི་སྲིད་སྲིད་པའི་ཆོས། །རྣ་ཕྲུག་བྲག་ལ་འཛེགས་པའི་བདེ་བླག་དེ། །སྲོག་ཆགས་གཞན་ལ་མི་སྲིད་ཁོ་ལ་སྲིད། །རིག་པ་བྱར་མེད་ཀློང་དུ་གྲོལ་བ་དེ། །ཐེག་དམན་རྩོལ་སྒྲུབ་ཅན་ལ་མི་སྲིད་དེ། །རྣལ་འབྱོར་མཁའ་མཉམ་བྱ་བྲལ་ཀློང་ན་བདེ། །ཡེ་སངས་རྒྱས་པའི་རིག་པ་ཡུལ་མེད་དེ། །འཁོར་བར་འཁྱམས་པར་མི་སྲིད་ཡེ་ཀློང་བརྡལ། །ཡུལ་ཅན་རྫས་བློ་འདོད་པའི་ཨུ་པ་དེ། །མཁའ་ལ་རང་གྲོལ་རྟེན་མེད་ཀློང་དུ་རྫོགས། །ཐེག་ལེ་ཉག་གཅིག་གྲྭ་ཟུར་མེད་པ་ལ། །གཉིས་སུ་སྣང་བ་མི་སྲིད་སྲིད་པའི་བབས་ཀྱང་བབས། །གཅིག་དང་ཐ་དད་
འཛིན་པ་འཁྲུལ་པའི་སེམས། །གཅིག་ཏུ་གྲོལ་ལོ་བྱ་བྲལ་ཀློང་དུ་གྲོལ། །རང་བྱུང་ཡེ་ཤེས་རྒྱུ་རྐྱེན་མེད་པ་ལ། །དུག་ལྔ་འཆར་བ་མི་སྲིད་སྲིད་པའི་བབས། །དེ་ལ་སྤོང་འགེག་བྱེད་པའི་ཨུ་པ་དེ། །རང་བྱུང་རང་གྲོལ་ཡེ་ཤེས་སྦུབས་སུ་གྲོལ། །ལྷུན་གྲུབ་ཕྱོགས་མེད་མཐའ་དང་བྲལ་བ་ལ། །ཕྱོགས་ལྷུང་རྒྱ་ཆད་མི་སྲིད་སྲིད་པའི་བབས། །ཕྱོགས་ལྟའི་མཐའ་ལ་ཞེན་པའི་ཨུ་པ་དེ། །ཕྱོགས་མེད་གྲོལ་ལོ་ལྷུན་གྲུབ་ཀློང་དུ་གྲོལ། །མངོན་མཚན་མེད་པའི་རིག་པ་འགག་མེད་ལ། །སྣང་བ་འཆར་བར་མི་སྲིད་སྲིད་པའི་བབས། །སྣང་བ་རྟག་ཆད་ཐེ་ཚོམ་ཨུ་པ་དེ། །རང་སར་གྲོལ་ལོ་ངེས་མེད་ཀློང་དུ་གྲོལ། །གཟུགས་སོགས་སྣང་བ་སྣང་ཐོག་རང་སར་གྲོལ། །དབྱེ་བསལ་མེད་དོ་ལྷུན་གྲུབ་ཀློང་དུ་གྲོལ། །འདུ་འབྲལ་མེད་པ་ཐིག་ལེའི་ཀློང་དུ་གྲོལ། །ཅིར་ཡང་འཆར་རོ་ངེས་མེད་ཀློང་དུ་གྲོལ། །སྒྲ་རུ་གྲག་གོ་ཐོས་པ་རང་སར་གྲོལ། །དྲན་རྟོག་ཐམས་ཅད་དེ་རུ་རང་སར་གྲོལ། །སྣང་གྲག་མཐོང་ཐོས་སྒོ་ལྔ་རང་སར་གྲོལ། །རང་ཞལ་རང་གིས་མཐོང་བས་ཡུལ་གཞན་མེད། །དག་པ་གསུམ་དང་ལྷ་དྲུག་གཙང་སྦྲ་སོགས། །གཉིས་སུ་མེད་དོ་ཡུལ་སེམས་མཉམ་པར་གྲོལ། །བཅུ་གཅིག་རྡོ་རྗེ་འཆང་སོགས་ས་ཐེག་ཀུན། །མ་བསྒྲུབས་ཆིག་ཆོད་ཨ་ཏི་ང་ཡི་རྒྱན། །མཉམ་ཉིད་གཅིག་ལ་ཅིར་ཡང་འབྱུང་བའི་དབྱིངས། །ཡོན་ཏན་ཐམས་ཅད་སྐྱེད་པར་བྱེད་པའི་གཞི། །ཐམས་ཅད་བྱ་བྱེད་མེད་པར་གྲོལ་བའི་ཀློང་། །ཨུ་པ་ཡ་ཞེས་མདུད་ཅན་ལྟ་བ་དེ། །སྤྱོད་པ་ཀྲི་ཡ་ལྟར་འདོད་འོག་རྗེས་འདྲེང་། །ལྟ་བ་ཡོ་གའི་རྗེས་འཇུག་གོང་ལ་སྙེག །གོང་འོག་གཉིས་ལ་ལྟ་བྱེད་ཞགས་པས་བསྡམས། །གོང་འོག་གཅིག་ཏུ་ཤེས་ཀྱང་མཉམ་པའི་རིག་པ་ལ། །གཉིས་འཛིན་ཁ་བྲག་ལྟ་བ་ཕྱོགས་འཛིན་བདུད། །ཨ་ཏི་མཐོ་དམན་མེད་པའི་ཆོས་ཉིད་ལ། །ལྟ་སྤྱོད་གོང་འོག་གཉིས་ཀ་མ་འགགས་ཏེ། །གཉིས་ཀ་
རང་སར་མ་ཞེན་རང་གྲོལ་ཏེ། །ཨུ་པ་མ་སྤངས་རྫོགས་པ་ཆེན་པོའི་རྒྱན། །ཨ་ཏི་མ་བསྒྲུབས་ཀློང་བརྡལ་རོལ་པར་མཛེས། །ཀྲི་ཡོག་སྡེ་གསུམ་ཨུ་པ་ཕྱི་རྒྱུད་ཀྱིས། །མི་ཚེ་བགྲངས་ནས་སངས་རྒྱས་ས་འདོད་དེས། །ལུས་ངག་ཡིད་གསུམ་བྱ་བྱེད་རྩོལ་བས་བཅིངས། །ཡང་དག་དོན་ལ་རྒྱང་རིངས་མཐར་མི་ཕྱིན། །ང་ནི་ཡེ་ཀློང་ཉིད་འདུག་རིང་དུ་ཕྱིན། །མདུན་དུ་བཞག་ནས་རྒྱབ་ཏུ་འཚོལ་བྱེད་ན། །བྱ་བྲལ་ངང་ལས་རིང་ཞིང་དོན་མི་འགྲུབ། །དུས་དང་གྲངས་ལ་ལྟོས་པའི་ཐེག་དམན་རྣམས། །མཁའ་ལ་ཤར་བའི་འཇའ་ཚོན་འཛིན་པ་ལྟར། །ཐུག་པའི་མཐའ་མེད་ཟིན་པའི་དུས་མེད་པས། །ནན་གྱི་རང་སེམས་བྱར་མེད་རྩོལ་བས་བཅིངས། །ཨ་ཏི་ཀུན་སྤང་སྤྱི་ཕུད་ཡང་རྩེ་ང་། །རྩོལ་སྒྲུབ་མེད་པས་ཆོས་ཉིད་བདེ་བརྡལ་བས། །འབད་པས་འགྲུབ་ཏུ་རེ་བ་ལམ་སྟེགས་ཙམ། །བོང་འཐེང་ཞོན་ནས་མཚོ་མཐའ་སྐོར་དང་མཚུངས། །ཀ་དག་ང་ཉིད་མཐོང་བའི་དུས་མེད་པས། །རེ་བ་བྱས་ཀྱང་རང་བློ་ཚི་ཆད་དེ། །སོལ་བའི་མདུང་ཤིང་དཀར་པོར་ག་ལ་འགྱུར། །ཨེ་མ། ཨ་ཏི་ཀློང་ཆེན་རྡོ་རྗེའི་མཁར་རྫོང་དང་། །བྱར་མེད་ནམ་མཁའི་དབྱིངས་ལས་ཅི་ཡང་བྱུང་། །མ་བྱས་མ་བཙལ་ཅིར་ཡང་བྱར་མེད་པས། །ལྟ་བ་ཉམས་མི་ང་ཞིང་ཐེ་མི་ཚོམ། །སྒོམ་པ་འདུས་མེད་འདུས་མ་བྱས་པའི་ཀློང་། །སྤྱོད་པ་རང་བྱུང་བདེ་ཡན་མ་བཀག་ང་། །བློ་བཅོས་རྣམ་རྟོག་མཐོ་དམན་དགྲར་མི་བལྟ། །ཉམས་མྱོང་རིག་པ་གང་ཤར་གང་དགར་མཐོང་། །རྒྱུ་རྐྱེན་མེད་པའི་དུག་ལྔ་མདོག་མ་བསྒྱུར། །བརྟུལ་ཞུགས་དགེ་སྡིག་སྤང་ལེན་ང་ལ་མེད། །འབྲས་བུ་ཡེ་གྲུབ་ཅིར་སྣང་འབྲས་བུར་ཤར། །དམ་ཚིག་གཉེན་པོ་རྒྱུ་རྐྱེན་གཞན་མི་བརྟེན། །ཕྲིན་ལས་ཅི་བྱས་བརྟུལ་ཞུགས་ཀློང་དུ་རྡོལ། །ས་ལམ་ཆོས་དབྱིངས་གྲོལ་ཆོས་ཀྱི་དབྱིངས། །ཨུ་པ་ཡེ་རྫོགས་མ་སྤངས་བློ་བདེར་གནས། །བྱར་མེད་གཅིག་ལ་ལྷུན་རྫོགས་བདེ་འབྱམས་དང་། །འགྲོ་དྲུག་ཐེག་
དགུ་ང་ཡི་ཀློང་ལས་ཤར། །དུས་གསུམ་སངས་རྒྱས་ཨ་ཏི་དབྱིངས་ཀྱི་རྒྱན། །ཅེས་གསུངས་སོ། །རྡོ་རྗེ་མཁར་རྫོང་གི་ནང་དུ་ལྷན་ནེར་བཞུགས་སོ། །ཐེག་པ་ཀུན་གྱི་སྤྱི་ཕུད་ཀློང་ཆེན་རབ་འབྱམས་ཀྱི་རྒྱུད་ལས། ཨུ་པ་མ་སྤངས་རྫོགས་པའི་ལེའུ་སྟེ་རྩ་གཉིས་པའོ།། །།ས་མ་ཡ། རྒྱ་རྒྱ་རྒྱ། སེམས་དཔའ་རྡོ་རྗེས་ཡང་གསོལ་པ། །རྒྱུ་ལ་མ་ལྟོས་ཀུན་ཏུ་བཟང་། །རྐྱེན་དང་ཡེ་བྲལ་ཀློང་བརྡལ་དཔལ། །ཡོ་གའི་གྲུབ་མཐའ་བཤད་དུ་གསོལ། །སྟོན་པས་ལན་དུ་བཀའ་སྩལ་པ། །ཨེ་མ་སེམས་དཔའ་རྡོ་རྗེ་ཉོན། །ཡོ་གའི་གྲུབ་མཐའ་འདི་ལྟ་སྟེ། །ལྟ་སྒོམ་སྤྱོད་པ་འབྲས་བུའོ། །ལྟ་བ་འོད་གསལ་སྟོང་ཉིད་ལས། །རྡོ་རྗེ་དབྱིངས་སུ་སངས་རྒྱས་འདོད། །སྒོམ་པ་མངོན་བྱང་ལྔ་རུ་བསྐྱེད། །ཡེ་ཤེས་སྤྱན་དྲངས་མཆོད་བསྟོད་བཟླས། །སྤུན་གྲོགས་ཚུལ་དུ་བསྒོམ་པའོ། །སྤྱོད་པ་ཡོན་ཏན་ལྔ་ལོངས་སྤྱོད། །འབྲས་བུ་མི་ཚེ་ལྔ་གསུམ་གྱིས། །འཐུག་པོ་བཀོད་པ་ཐོབ་པར་འདོད། །ཡོ་ག་ཉིད་ཀྱི་གྲུབ་མཐའ་འོ། །ཨཱཎརྐཿ །ཨེ་མ་ཧོ་སེམས་དཔའ་རྡོ་རྗེ་རྩལ། །མ་རྟོགས་ཐེག་པ་འོག་མ་བས། །གཞན་དུ་རྟོག་ཅིང་རྩོལ་བས་བསླད། །ཡུལ་སེམས་བདེན་གཉིས་དགག་སྒྲུབ་མཁན། །མི་མཐུན་སྤང་ཞིང་གཅིག་ཕྱིར་འདྲེང་། །ཡོ་ག་ཏིང་འཛིན་གསུམ་རྩོལ་ནས། །བླང་དོར་བྱས་ནས་འབྲས་བུ་རེ། །ཨ་ཏི་ཆེན་པོ་ཀློང་ཆེན་ང་། །ཐམས་ཅད་ཆོས་ཉིད་བརྡལ་བ་ལ། །དམ་བཅའ་སྤོང་ལེན་ལ་སོགས་ཀྱི། །ཏིང་འཛིན་འཕྲོ་འདུ་ག་ལ་ཡོད། །དམ་ཡང་བདལ་བ་ཆེན་པོར་བཅའ། །གཏན་ཚིགས་ཆོས་ཉིད་ཕྱོགས་མེད་ལ། །རིག་པ་མཁའ་ཡན་ལྷུན་གྲུབ་པས། །འདི་ལ་སྤང་རྒྱུ་ཅི་ཡང་མེད། །བླང་བར་བྱ་བ་ཡོད་མ་ཡིན། །སྤང་བླང་མེད་པས་ཡོ་ག་རྫོགས། །གང་མ་སྤངས་པའི་ཀུན་གྲོལ་དབྱིངས། །ས་ལམ་བགྲོད་པའི་ཐབས་ཆེན་པོ། །དབྱིངས་སུ་སྦྱོར་བའི་རྫུ་
འཕྲུལ་ཅན། །སྔོན་གྱི་རྒྱལ་བ་གྲངས་མེད་ཀྱང་། །ཀློང་ཆེན་ང་ལས་མངོན་སངས་རྒྱས། །མ་བྱོན་སླད་ཀྱི་སངས་རྒྱས་ཀྱང་། །ཀློང་ཆེན་ང་ལས་མངོན་སངས་རྒྱས། །ད་ལྟའི་རྒྱལ་བ་གྲངས་མང་ཀྱང་། །ཀློང་ཆེན་ང་ཡི་སྦུབས་ན་བརྡལ། །ང་ནི་རྒྱལ་བ་ཀུན་གྱི་མེས། །ང་ནི་ཐེག་པ་ཀུན་གྱི་དུར། །འཁོར་འདས་ཀུན་གྱི་ཡབ་ཆེན་པོ། །མྱ་ངན་འདས་པའི་ལམ་པོ་ཆེ། །འཁོར་བའི་ཆུ་བོ་སྒྲོལ་བའི་གྲུ། །ཉོན་མོངས་རྒྱ་མཚོ་སྐེམ་པའི་མེ། །ཇི་ཙམ་ཐེག་པའི་རྣམ་གྲངས་ཀྱང་། །ང་ཡི་ཀློང་ལས་ཡོངས་མ་འདས། །ཇི་ཙམ་ས་ལམ་གནས་ནས་ཀྱང་། །ང་ཡི་ཀློང་ལས་གར་མ་ཕྱིན། །ཐེག་དགུ་མ་འདྲེས་སོ་སོར་བཀྲ། །ཡོ་ག་མ་སྤངས་ཨ་ཏིའི་རྒྱན། །ཨ་ཏི་མ་བསྒྲུབས་ལྷུན་འབྱམས་བདེ། །བགྲོད་མེད་རྩོལ་བྲལ་རིག་པའི་ཀློང་། །བྱར་མེད་ལྷུན་རྫོགས་སྐྱེ་མེད་སྒོ། །ཨ་ཏི་མཉམ་པའི་ཆོས་ཉིད་དུ། །འཁོར་འདས་མ་སྤངས་ལྷུན་གྲུབ་པས། །སྤྱིར་ཆིབ་ཆེན་པོ་དབྱེར་མེད་པས། །སྤྱིར་ཆིབ་པ་འདི་གཞན་ན་མེད། །རང་སྣང་དབྱེར་མེད་བརྡལ་བ་ཆེ། །གཅིག་ལ་ཀུན་རྫོགས་ཨ་ཏི་ལ། །ནམ་མཁའ་ལྟ་བུའི་རིག་པ་ཤར། །གང་ཡང་གཉིས་མེད་ཀློང་ན་བདེ། །ཨ་ཧོ། ཡེ་གྲོལ་ཆེན་པོ་ལྟ་བ་ཕྱོགས་མེད་ཀློང་། །གསེར་གླིང་ལྟ་བུ་དབྱེ་བསལ་མེད་པའི་ངང་། །ཡེ་ཀློང་ཆེན་པོ་སྒོམ་པ་ཕྱོགས་མེད་ཀློང་། །བྱེ་རླུང་ལྟ་བུར་ཐམས་ཅད་དབྱིངས་སུ་ཐིམས། །གང་ཤར་ཆེན་པོ་སྤྱོད་པ་ཕྱོགས་མེད་ཀློང་། །ཆུ་ཀློང་ལྟ་བུ་དལ་བའི་ཀློང་ན་འབབས། །ཡེ་གྲུབ་ཆེན་པོ་འབྲས་བུ་ཕྱོགས་མེད་ཀློང་། །ཡུལ་ལྗོངས་ལྟ་བུ་མ་འདྲེས་གཅིག་ཏུ་གསལ། །དཔེར་ན་འཛམ་གླིང་བྱེ་བ་ཕྲག་བརྒྱ་ན། །འདོད་ཡོན་རྣམ་སྤྲུལ་བསམ་མི་ཁྱབ་པ་ཉིད། །ཇི་ཙམ་ཆེ་ཡང་གླིང་ལས་གཡོས་པ་མེད། །མ་གཡོས་སླར་ཡང་འཛམ་གླིང་རྒྱན་དུ་ཆེ། །ཐིག་ལེ་ཉག་གཅིག་ཨ་ཏི་ཆེན་པོ་ལ། །ཐེག་དམན་མ་སྤངས་ཡོ་གའི་སྤྱོད་འབྲས་རྣམས། །གསེར་དངུལ་འཕྲ་མེན་བསྲེས་
པའི་རྫས་ལྟ་བུ། །གཅིག་ལས་མ་འདྲེས་ཡོངས་སུ་རྫོགས་པའི་རྒྱན། །ཀུན་ཁྱབ་ཆེན་པོ་ཨ་ཏི་ཀློང་ཆེན་རྫོགས། །བཤིགས་པས་མི་ཤིགས་ཕྱོགས་མེད་རྡོ་རྗེའི་མཁར། །རིག་སྟོང་ངང་ནས་གང་ལྟར་བྱས་ཀྱང་བདེ། །ཞེས་གསུངས་ནས། རང་བྱུང་རང་ཤར་གཏིང་མཐའ་མུ་མེད་ཀྱི་ངང་ལ་བཞུགས་སོ། །ཐེག་པ་ཀུན་གྱི་ཡང་རྩེ་ཀློང་ཆེན་རབ་འབྱམས་ཀྱི་རྒྱུད་ལས། ཡོ་ག་མ་སྤངས་རྫོགས་པའི་ལེའུ་སྟེ་རྩ་གསུམ་པའོ། །ལོངས་སྐུའི་བསྟན་པ་གསུམ་པའོ།། །།ས་མ་ཡ། རྒྱ་རྒྱ་རྒྱ། སེམས་དཔའ་རྡོ་རྗེས་ཡང་གསོལ་པ། །ཀྱེ་ཧོ། ཡོངས་རྫོགས་ལྷག་མེད་ཀུན་བཟང་རྗེ། །ཆོས་སྐུའི་བསྟན་པ་ཆེན་པོའོ། །མ་ཧཱ་གྲུབ་མཐའ་རྫོགས་ཚུལ་ཏེ། །སྟོན་པའི་ཐུགས་ཀྱི་ཀློང་ནས་ཁྲོལ། །ཞེས་ཞུས་སྟོན་པས་བཀའ་སྩལ་པ། །འདུས་པའི་འཁོར་རྣམས་ཀུན་ཉོན་ཅིག །མ་ཧཱའི་ཐེག་པ་འདི་ལྟར་རོ། །ངོ་བོ་ངེས་ཚིག་དབྱེ་བ་དང་། །ལྟ་སྒོམ་སྤྱོད་དང་འབྲས་བུའོ། །ངོ་བོ་སྐྱེད་པའི་གཞི་ཡིན་ནོ། །མ་ནི་ཆོས་ཉིད་ཧ་དག་པ། །ཡོ་ག་ཁྱབ་ཅིང་འདུས་པ་སྟེ། །ངེས་པའི་ཚིག་ཏུ་ཡིད་ལ་ཟུང་། །དབྱེ་ན་སྒྲུབ་པ་གཙོ་ཆེ་དང་། །ས་ལམ་གཙོ་ཆེར་འདོད་པ་དང་། །རྣམ་གྲོལ་གཙོ་ཆེ་མ་ཧཱའོ། །སྒྲུབ་པ་གཙོ་ཆེར་འདོད་པ་ནི། །འཇམ་དཔལ་སྐུ་དང་པདྨ་གསུང་། །ཡང་དག་ཕུར་པ་རྟ་མགྲིན་དང་། །ཡོན་ཏན་བདུད་རྩི་མ་མོ་དང་། །རིག་འཛིན་དམོད་པ་མཆོད་བསྟོད་སོགས། །ཕྲ་མོའི་སྒྲུབ་པ་གྲངས་མེད་དོ། །ས་ལམ་གཙོར་སྟོན་སྒྱུ་འཕྲུལ་ཏེ། །རྣམ་གྲོལ་གཙོར་སྟོན་མདོ་རྟོགས་སོ། །ལྟ་བ་ལྷ་དང་གཞལ་ཡས་དང་། །རིག་པ་སྤྲོས་བྲལ་ཉིད་དུ་བལྟ། །སྒོམ་པ་ཏིང་འཛིན་རྣམ་པ་གསུམ། །སྤྱོད་པ་ཐབས་ཀྱིས་དབྱེ་བ་ན། །སྤྱད་བྱ་ལྔ་དང་མི་སྤང་ལྔ། །དང་བླང་ལྔ་དང་ཤེས་བྱ་ལྔ། །བསྒྲུབ་བྱ་ལྔ་ལ་སྤྱོད་པའོ། །དམ་ཚིག་ལུས་ངག་ཡིད་གསུམ་བསྲུང་། །འབྲས་བུ་འདིའམ་བར་དོ་ལ། །ཡི་གེ་འཁོར་ལོ་ཚོགས་
ཆེན་ས། །ཕྱི་མ་ངེས་པར་ཐོབ་པ་སྟེ། །འདི་རྣམས་སྒྲུབ་པ་གཙོ་ཆེར་འདུས། །མ་ཧཱའི་གྲུབ་མཐའ་དེ་ལྟར་རོ། །ཨ་ཧོ་སེམས་དཔའ་རྡོ་རྗེ་ཉོན། །ཨ་ཏི་ཀློང་ཆེན་རབ་འབྱམས་ང་ཉིད་ལ། །མ་ཧཱ་སྒྲུབ་བརྒྱད་རྫོགས་ཚུལ་འདི་ལྟ་སྟེ། །ཀུན་གཞི་ཡེ་ཤེས་སྙིང་པོ་ཁྱབ་གདལ་ངང་། །མ་བཅོས་སྤྲོས་མེད་ཆོས་ཉིད་ཀ་དག་ལ། །སྐུ་ཡི་ལྷ་རྣམས་མ་བསྒྲུབས་ཡེ་ནས་རྫོགས། །མ་ཧཱ་མ་སྤངས་རྫོགས་པ་ཆེན་པོའི་རྒྱན། །འཁོར་འདས་སྣང་སྟོང་དབྱེར་མེད་ཀློང་དུ་འབྱམས། །རང་སེམས་དྲི་མེད་རྣམ་དག་ས་ལམ་བཅད། །སྣང་སྟོང་གྲག་སྟོང་དྲན་སྟོང་སོ་མའི་ཀློང་། །གསུང་གི་ལྷ་རྣམས་མ་བསྒྲུབས་ཡེ་ནས་རྫོགས། །མ་ཧཱ་མ་སྤངས་རྫོགས་པ་ཆེན་པོའི་རྒྱན། །ཆོས་སྐུ་སེམས་སུ་ཡང་དག་གནས་ལུགས་ཏེ། །རང་བཞིན་སྤྲོས་བྲལ་རྣལ་འབྱོར་སྐུ་གསུམ་རྫོགས། །མ་བཀག་རང་བྱུང་མ་འདྲེས་རང་བཞིན་གྲོལ། །ཐུགས་རྗེ་ལྷ་རྣམས་མ་བསྒྲུབས་ཡེ་ནས་རྫོགས། །མ་ཧཱ་མ་སྤངས་རྫོགས་པ་ཆེན་པོའི་རྒྱན། །མ་རིག་རྣམ་རྟོག་ཉོན་མོངས་དུག་མཚོའི་ནང་། །རང་བྱུང་རིག་པའི་རྩི་བཅུད་ཐིག་ལེས་གཞོམ། །མ་སྤངས་མི་གནས་འདོད་ཡོན་རྣམ་དག་བརྡལ། །བདུད་རྩིའི་ལྷ་རྣམས་མ་བསྒྲུབས་ཡེ་ནས་རྫོགས། །མ་ཧཱ་མ་སྤངས་རྫོགས་པ་ཆེན་པོའི་རྒྱན། །ང་བདག་ཕྱོགས་ཆ་གཟུང་འཛིན་ལིངྒ་ལ། །རང་རིག་ཡེ་ཤེས་ཕུར་པ་ཟང་ཐལ་བཏབ། །རྟོག་པ་ཐལ་བྱུང་གཅེར་བུ་ཅོག་བཞག་སྤངས། །ཕུར་པའི་ལྷ་རྣམས་མ་བསྒྲུབས་ཡེ་ནས་རྫོགས། །མ་ཧཱ་མ་སྤངས་རྫོགས་པ་ཆེན་པོའི་རྒྱན། །མ་གཅིག་ཀུན་གཞི་ཀུན་ཏུ་བཟང་མོའི་དབྱིངས། །སྙིང་པོ་རིག་པའི་ཡེ་ཤེས་ཇི་ལྟ་ཇི་སྙེད་མཁྱེན། །མ་ནོར་མ་བཅོས་ཀུན་ཁྱབ་ཡེ་ཤེས་ཀློང་། །མ་མོའི་ལྷ་རྣམས་མ་བསྒྲུབས་ཡེ་ནས་རྫོགས། །མ་ཧཱ་མ་སྤངས་རྫོགས་པ་ཆེན་པོའི་རྒྱན། །ཐབས་ཤེས་ཀུན་ལྡན་ཡེ་སྟོང་བདག་ཉིད་རིག །མི་སྒོམ་མི་ཡེངས་རིག་པ་དབྱིངས་ན་འཕྱོ། །བརྗོད་མེད་ལུག་རྒྱུད་གཡོ་མེད་རང་གྲོལ་ཀློང་། །རིག་འཛིན་ལྷ་
རྣམས་མ་བསྒྲུབས་ཡེ་ནས་རྫོགས། །མ་ཧཱ་མ་སྤངས་རྫོགས་པ་ཆེན་པོའི་རྒྱན། །འཁོར་འདས་ཆོས་ཀུན་ཡེ་གྲོལ་ཕ་མཐའ་ཡས། །འཛིན་མེད་རང་གྲོལ་གཟའ་གཏད་འཁྲུལ་པ་ཞིག །ལྷ་འདྲེ་རང་སྣང་རང་གྲོལ་ཆིག་ཆོད་ཀློང་། །མཆོད་བསྟོད་ལྷ་རྣམས་མ་བསྒྲུབས་ཡེ་ནས་རྫོགས། །མ་ཧཱ་མ་སྤངས་རྫོགས་པ་ཆེན་པོའི་རྒྱན། །སྲིད་རྩ་ཉེས་རྒྱུ་ཧ་ལ་བདག་རྟོག་དུག །རྩ་བྲལ་སྙིང་པོའི་སྔགས་ཀྱིས་དུག་རང་བསད། །དུག་ལྔ་ཡེ་ཤེས་ལྔ་རུ་རང་གྲོལ་ཀློང་། །དམོད་པའི་ལྷ་རྣམས་མ་བསྒྲུབས་ཡེ་ནས་རྫོགས། །མ་ཧཱ་མ་སྤངས་རྫོགས་པ་ཆེན་པོའི་རྒྱན། །སྒྱུ་འཕྲུལ་ཡོངས་རྫོགས་སེམས་ཉིད་ཆོས་ཀྱི་སྐུ། །སྣང་སྲིད་གཞིར་བཞེངས་འཁོར་འདས་དབྱེར་མེད་རྫོགས། །གསང་བ་བླ་མེད་བྱང་ཆུབ་སྙིང་པོར་བརྡལ། །འཁོར་འདས་ཡོངས་རྫོགས་ཐིག་ལེ་ཉག་གཅིག་ཀློང་། །ས་ལམ་གཙོ་ཆེ་མ་བསྒྲུབས་ཡེ་ནས་རྫོགས། །མ་ཧཱ་མ་སྤངས་རྫོགས་པ་ཆེན་པོའི་རྒྱན། །མ་འགག་རོལ་པ་སྣ་ཚོགས་རྩིས་གདབ་བྲལ། །རང་བཞིན་མེད་གྲོལ་སྐྱེ་མེད་དབྱིངས་སུ་དག །མ་འདྲེས་ཡོངས་རྫོགས་རང་བྱུང་ཡེ་ཤེས་ངང་། །བདེ་གཤེགས་དགོངས་པ་རྩིས་གདབ་བརྗོད་མེད་ཀློང་། །རྣམ་གྲོལ་གཙོར་འདོན་མ་བསྒྲུབས་ཡེ་ནས་རྫོགས། །མ་ཧཱ་མ་སྤངས་རྫོགས་པ་ཆེན་པོའི་རྒྱན། །འཁོར་འདས་ཆོས་རྣམས་རང་རིག་སེམས་ཀྱི་ཀློང་། །གདོད་ནས་རང་བྱུང་བརྡལ་བ་ཆེན་པོའི་སྦུབས། །འདི་ལྟར་ངེས་པའི་ཕྱམ་བརྡལ་ཆེན་པོ་ལ། །ཉི་ཤུ་རྩ་ལྔ་མ་སྤངས་རང་སར་གྲོལ། །མི་བསྲུང་བློ་ཡི་ཨ་ཏི་ང་མི་འདོད། །བསྒྲུབ་བྱའི་འབྲས་བུ་ཨ་ཏི་ང་མི་བསྒྲུབ། །འདིའམ་བར་དོ་ཕྱི་མའི་དུས་རེ་མེད། །འཁོར་ལོ་ཚོགས་ཆེན་ས་ནི་ཡེ་གནོན་ཡིན། །ཅེས་གསུངས་ནས། བརྡལ་ཁྱབ་ཅིར་མི་དགོངས་སུ་ལྷན་ནེར་བཞུགས་སོ། །ཐེག་པ་ཀུན་གྱི་སྤྱི་ཕུད་ཀློང་ཆེན་རབ་འབྱམས་ཀྱི་རྒྱུད་ལས། མ་ཧཱ་མ་སྤངས་རྫོགས་ཚུལ་གྱི་ལེའུ་སྟེ་རྩ་བཞི་པའོ།། །།
ས་མ་ཡ། རྒྱ་རྒྱ་རྒྱ། དེ་ནས་སེམས་དཔའ་རྡོ་རྗེ་ཡིས། །སྟོན་པ་ཉིད་ལ་ཡང་གསོལ་པ། །ཨེ་མ་སྟོན་པ་ཀུན་བཟང་དཔལ། །ཨ་ནུའི་གྲུབ་མཐའ་རྫོགས་ཚུལ་གང་། །སྟོན་པས་རིག་མདངས་འཁོར་ལ་གསུང་། །གསན་ནས་སྟོན་པས་བཀའ་སྩལ་པ། །ཨ་ནུའི་གྲུབ་མཐའ་བཞི་ཡིས་སྟོན། །ལྟ་སྒོམ་སྤྱོད་དང་འབྲས་བུའོ། །ལྟ་བ་སྣང་ཡུལ་ཀུན་ཏུ་བཟང་མོའི་མཁའ། །རིག་པ་རང་ཤར་ཀུན་བཟང་རོལ། །གཉིས་མེད་ཡེ་སངས་རྒྱས་པར་འདོད། །སྒོམ་པ་མ་འགགས་རྩལ་ལས་ལྷ། །མ་བསྐྱེད་དྲན་རྫོགས་ཆུ་ཉའི་ཚུལ། །སྤྱོད་པ་རྒྱུད་ལུང་ཉེར་གཅིག་གིས། །སེམས་ཅན་ཀུན་གྱི་དོན་བྱེད་དེ། །འབྲས་བུ་ཚེ་གཅིག་སངས་རྒྱས་ཐོབ། །དེ་ནི་ཨ་ནུའི་ཐེག་པའོ། །ཨ་ཧོ། སེམས་དཔའ་རྡོ་རྗེ་ཁྱོད་ཉོན་ཅིག །ཐེག་པའི་ཡང་རྩེ་ཨ་ཏི་ཀློང་ཆེན་པོ། །རི་རྒྱལ་ལྟ་བུ་ཀུན་གྱི་རྩེར་གྱུར་པས། །རི་བྲན་ཐམས་ཅད་འོག་ཏུ་ནོན་པ་ལྟར། །ལྟ་སྒོམ་ཐེག་པ་ཀུན་གྱི་རྩེར་གྱུར་པས། །ཨ་ནུ་ཕྱི་ནང་ཀུན་བཟང་མཁའ་རོལ་རྣམས། །ཨ་ཏི་ཆེན་པོ་ཀུན་བཟང་ཡངས་པའི་ཀློང་། །རང་སྐད་སྟོན་པས་ཐེག་དམན་ཀློང་དུ་ཐིམ། །དཔེར་ན་རྩལ་གསུམ་ལྡན་པའི་སེང་གེ་ཡིས། །ཝ་སོགས་གཅན་གཟན་ཟིལ་གྱིས་གནོན་པ་ལྟར། །ཨ་ཏི་རང་རྩལ་རིག་པ་ཡུལ་མེད་ཤར། །མཚན་མ་རང་གྲོལ་ཀློང་ཡངས་ཕྱམ་བརྡལ་བས། །ཨ་ནུ་ལ་སོགས་ཐེག་པ་ཕྱོགས་ཞེན་ཅན། །ཡུལ་དང་ཡུལ་ཅན་འདོད་ཀུན་ཀློང་དུ་གྲོལ། །དེ་བཞིན་རིག་པ་ཏི་ལ་མཐའ་བྲལ་ཀློང་། །བྱ་བྲལ་ལྷུན་གྲུབ་རྫོགས་ཆེན་ཤར་གྲོལ་ལ། །གྲོལ་དང་མ་གྲོལ་གཉིས་མེད་རྒྱན་དུ་ཆེ། །དཔེར་ན་འདབ་ཆགས་རྒྱལ་པོ་ཁྱུང་ཆེན་དེ། །མངལ་ན་གནས་ཀྱང་ཀླུ་རྣམས་ཟིལ་གྱིས་གནོན། །སྒོ་ངའི་ནང་དུ་འདབ་གཤོག་ཚད་དུ་ཕྱིན། །སྒོང་རྒྱ་རལ་ནས་ཕྱི་རྒྱ་རླབས་ཀྱིས་ཆོད། །འདབ་ཆགས་གཞན་ལ་ཅི་སྟེ་ག་ལ་རིགས། །ཁྱུང་ཆེན་རང་ལ་རིགས་ཏེ་མཁའ་ལ་བདེ། །ཨ་
ཏི་ཆེན་པོ་ཀློང་ཆེན་བརྡལ་ཁྱབ་པ། །རང་སྐད་སྟོན་ཀྱང་ཐེག་དགུ་ཟིལ་གྱིས་གནོན། །ཀུན་བཟང་ཀློང་དུ་ས་ལམ་སྦྱང་བགྲོད་གྲོལ། །འཁོར་བའི་ཀློང་ན་ལུས་རྒྱ་མ་བྲལ་ཀྱང་། །གོལ་ས་གཡང་ཆོད་ཀ་དག་ཀློང་ན་ཡན། །ཐེག་དམན་གཞན་ལ་མ་སྤངས་རྒྱན་མི་མཛེས། །ཅི་ཕྱིར་སྤང་ལེན་མདུད་པས་བསྡམས་པའི་ཕྱིར། །ཨ་ཏི་ཀློང་ཆེན་ཏི་ལའི་ཀློང་ན་བདེ། །ཨ་ནུ་མ་སྤངས་རྫོགས་ཆེན་རྒྱན་དུ་མཛེས། །རྟོགས་དང་མ་རྟོགས་མེད་པར་གྲོལ་བ་དང་། །འདི་དང་ཕྱི་མ་མེད་པར་མཉམ་པ་དང་། །ཕུང་པོ་ལྷག་མ་མེད་པར་ཡལ་བ་དང་། །སྐུ་གདུང་རིང་བསྲེལ་མ་བསྒྲུབས་གྲུབ་པ་དང་། །མཉམ་ཉིད་ངང་ལ་རྒྱུན་ཆད་མེད་པ་དང་། །དུག་ལྔ་མ་སྤངས་དབྱིངས་ཀྱི་རྒྱན་ཉིད་དང་། །སྡུག་བསྔལ་བདེ་བ་ཆེན་པོར་ཤར་བ་དང་། །ཐེག་དམན་དགུ་པོ་ཨ་ཏིའི་སོ་ནམ་ཙམ། །ཟླ་བདུན་ཙམ་གྱིས་ཟད་པའི་སར་གནས་རྣམས། །ཐེག་དགུར་བརྒྱུད་ནས་གྲོལ་བར་འདོད་པ་དང་། །ཤིན་ཏུ་སྦྱང་དང་སྤང་དང་བསྒྱུར་འདོད་པ། །ག་ལ་རིགས་ཏེ་ཀློང་ཆེན་ང་ལ་བདེ། །ཅི་བདེ་ཐམས་ཅད་བདེ་ཆེན་ཆོས་སྐུའི་ཀློང་། །ཀློང་ཆེན་འདི་ལ་མ་བརྡལ་གང་ཡང་མེད། །ཆོས་ཉིད་རང་བཞིན་རྡོ་རྗེ་སྙིང་པོའི་སྐུ། །བག་ཆགས་ལས་ལ་སྙིང་པོའི་རྩལ་རྫོགས་པས། །སྐྱེ་ཤིའི་བར་དོ་མེད་པར་རང་ཡལ་ཏེ། །རིག་པ་གཅིག་པོ་ཀུན་དང་དབྱེར་མེད་ཅིང་། །རྒྱུན་ཆད་མེད་པར་སྤྲུལ་པ་འབྱུང་བ་དང་། །ཐོགས་པ་མེད་པར་ཀུན་ལ་འཇུག་པ་དང་། །བྱར་མེད་རླུང་ཞོན་རྣལ་འབྱོར་སྤྱོད་ཡུལ་ནི། །དམན་པའི་ཐེག་པ་ཀུན་ལ་མི་འཚམ་སྟེ། །ཨ་ཏི་ཀློང་ཆེན་ང་ལ་རིགས་པ་ཡིན། །སྐྱེ་མེད་སྐྱེ་བའི་ཆོ་འཕྲུལ་རང་ཤར་ལ། །རྒྱུ་འབྲས་མཚན་མར་འཛིན་པ་འཁྲུལ་པའི་བློ། །ཨ་ཏི་རྒྱུ་རྐྱེན་མེད་པར་བསྟན་པ་ནི། །འོག་མ་རྣམས་ལ་མི་རིགས་སྦུབས་ཆེ་སྟེ། །ཀློང་ཆེན་ཡངས་པ་ང་ལ་རིགས་པ་ཡིན། །སངས་རྒྱས་སེམས་ཅན་དགོངས་སྤྱོད་དབྱེར་མེད་ལ། །འཁོར་འདས་གཉིས་སུ་འཛིན་པ་འཁྲུལ་པའི་བློ། །ཨ་ཏི་གཉིས་སུ་མེད་པར་སྟོན་པ་སྟེ། །གཞན་ལ་མི་རིགས་
ཨ་ཏིའི་རྒྱན་དུ་མཛེས། །རྟོགས་དང་མ་རྟོགས་མེད་པར་གྲོལ་བ་དང་། །རྟོགས་ནས་གྲོལ་བར་འདོད་པ་སྙེམ་པའི་དགྲ། །ཨ་ཏི་མཉམ་ཉིད་གཅིག་ཏུ་བསྟན་པ་དེ། །གཞན་ལ་མི་རིགས་ཨ་ཏིའི་རྒྱན་དུ་མཛེས། །མཚོན་པ་ཐབས་ཀྱི་ཁྱད་པར་མ་སྤངས་པར། །བརྗོད་དུ་མེད་ལ་བདེན་འཛིན་བསླུ་བའི་ཚིག །ཨ་ཏི་དོན་དམ་དབྱེར་མེད་བསྟན་པ་དེ། །འོག་མ་རྣམས་ལ་མི་རིགས་ཨ་ཏིའི་རྒྱན། །རྫོགས་ཆེན་ཡེ་བརྡལ་གཏིང་མཐའ་མེད་པ་ལ། །ཐུག་པ་མེད་ཅེས་ཟེར་བ་མུན་པའི་ཀློང་། །ཨ་ཏི་མུ་མེད་ཆིག་ཆོད་བསྟན་པ་དེ། །གཞན་ལ་མི་རིགས་ཨ་ཏིའི་རྒྱན་དུ་མཛེས། །འབྱུང་ལ་འགྲོ་དྲུག་ཐེག་དགུ་ཐམས་ཅད་ཀྱང་། །དབྱིངས་ལ་དབྱིངས་ཤར་ཆོ་འཕྲུལ་ཡིན་པས་ན། །དེ་ཡི་རྒྱན་ཡིན་བདག་དང་མཐོང་མཛེས་བྲལ། །ཡོ་ག་མདུད་པ་ཅན་གྱི་བལྟ་བ་དེ། །དོན་དམ་སྣང་ལ་རང་བཞིན་མེད་པ་ལ། །ཀུན་རྫོབ་ཙམ་སྣང་ལྷ་དང་ལྷ་མོ་ཡང་། །མཚན་མ་ཡེ་མེད་མཉམ་པའི་ཆོས་ཉིད་ལ། །ལྷ་དང་ལྷ་མོར་འཛིན་པ་མཆོག་འཛིན་བདུད། །གཉིས་ཀར་རང་ཤར་གཉིས་ཀར་རང་གྲོལ་བས། །ཡོ་ག་མ་སྤངས་རྫོགས་པ་ཆེན་པོའི་རྒྱན། །མ་ཧཱ་མདུད་པ་ཅན་གྱི་ལྟ་བ་ནི། །ཐབས་ཀྱི་མཆོག་གྱུར་ལྷག་པའི་ཀུན་རྫོབ་ལ། །ཤེས་རབ་མཆོག་གྱུར་ལྷག་པའི་དོན་དམ་པས། །གཉིས་མེད་མཆོག་གྱུར་བདེན་པ་མཆོག་ཏུ་བལྟ། །དབྱེ་རུ་ཡོད་ཀྱང་མཉམ་ཡང་མཉམ་ཉིད་ལ། །དབྱེར་མེད་སྤྱོད་ཡུལ་བྲལ་བ་ཕྱོགས་འཛིན་བདུད། །ཨ་ཏི་མཉམ་པ་རིས་མེད་ཆོས་ཉིད་ལ། །གཉིས་ཀར་རང་ཤར་གཉིས་ཀར་རང་གྲོལ་བས། །མ་ཧཱ་མ་སྤངས་རྫོགས་པ་ཆེན་པོའི་རྒྱན། །ཨ་ནུ་མདུད་པ་ཅན་གྱི་ལྟ་བ་ནི། །ཕར་སྣང་ཤེས་པ་ཀུན་ཏུ་བཟང་མོའི་ཀློང་། །ཚུར་སྣང་ཡུལ་ནི་ཀུན་ཏུ་བཟང་པོའི་ཡུལ། །གཉིས་སུ་མེད་པའི་བདེ་བ་ཆེན་པོར་བལྟ། །གཉིས་དང་སྡུག་བསྔལ་མཉམ་པའི་ཆོས་ཉིད་ལ། །གཉིས་མེད་བདེ་ཆེན་ཡིད་དཔྱོད་རེ་བའི་བདུད། །ཨ་ཏི་རྒྱ་ཆད་མེད་པའི་ཆོས་ཉིད་ལ། །གཉིས་ཀར་རང་ཤར་གཉིས་ཀར་རང་གྲོལ་བས། །
ཨ་ནུ་མ་སྤངས་རྫོགས་པ་ཆེན་པོའི་རྒྱན། །རྫོགས་ཆེན་ཨ་ཏིའི་རྣལ་འབྱོར་བརྡལ་བ་ན། །འཇུག་སྒོ་གཞན་དུ་མིག་ལྟ་ཐམས་ཅད་རང་གི་ཀློང་། །ཐམས་ཅད་རང་དུ་ཤེས་པས་གོལ་ས་ཤུགས་ཀྱིས་ཆོད། །གོལ་ས་ཆོད་པས་གཡང་ས་ག་ལ་ཡོད། །གཡང་ས་ཉིད་ཀྱང་རིག་པའི་ཀློང་ཆེན་དང་། །སེམས་ཀྱི་མདུད་པ་དེ་ནི་མ་གྲོལ་བར། །འཕགས་པའི་ལམ་ལོགས་འཚོལ་བ་ནི། །སྤྱང་མོ་དོང་ནས་འབྲོས་པ་བཞིན། །ཐར་དུ་རེ་སྟེ་ག་ལ་ཐར། །འདོད་ན་གང་འདོད་མཐའ་ཡིན་ཏེ། །ཡོད་པར་འདོད་ན་རྟག་པའི་མཐའ། །མེད་པར་འདོད་ན་ཆད་པའི་མཐའ། །རྟག་ཆད་གཉིས་ཀྱི་མདུད་པ་དེ། །རྣལ་འབྱོར་འཆིང་བར་བྱེད་པའི་སྒྲོག །དེ་ཡི་མདུད་པ་ངང་གིས་འགྲོལ། །ཨ་ནུ་ལ་སོགས་ལམ་གཞན་གྱིས། །བཀྲོལ་བས་ཁྲོལ་བ་མ་ཡིན་ཏེ། །ཞེན་པའི་ཐག་པས་སླར་ཡང་འཆིང་། །ཨ་ཏི་ཀློང་ཆེན་རབ་འབྱམས་ང་། །མཐའ་ལ་སྐྱོན་དུ་མི་བལྟ་སྟེ། །འཆིང་གྲོལ་གཉིས་སུ་ག་ལ་འབྱེད། །མཐའ་གཉིས་མ་སྤངས་རང་གྲོལ་བས། །གཉིས་མེད་ཙམ་དུ་མི་གནས་ཤིང་། །གཉིས་ཀ་ལྟར་ཡང་རང་ཤར་བས། །མཐའ་བཞི་མ་སྤངས་རྒྱ་ཡན་ཀློང་། །མུ་བཞི་ཀུན་འབྱམས་ཡངས་པའི་རྩལ། །འཆིང་གྲོལ་གཉིས་མེད་རང་སར་བདེ། །གཅིག་བདེ་གཉིས་བདེ་ཀུན་ཀྱང་བདེ། །ཁམས་གསུམ་སེམས་ཅན་ཀུན་ཀྱང་བདེ། །དུས་གསུམ་སངས་རྒྱས་ཀུན་ཀྱང་བདེ། །རང་སྣང་ཆོས་སྐུའི་ཀློང་ན་བདེ། །ཆོས་སྐུ་འཕོ་འགྱུར་མེད་པ་ལ། །འཁོར་འདས་ཆོས་ཀུན་ཅི་བདེར་བཞུགས། །དེ་ལ་ངེས་པ་མེད་པའི་ཕྱིར། །བྱེད་སྤྱོད་ཅིར་ཡང་མ་འགགས་པས། །ང་ཡི་ཀློང་ན་ཅི་བདེར་སྤྱོད། །སྤྱོད་ཡུལ་གང་ཡིན་མ་འགགས་པས། །ཅི་ལ་ཉམ་ང་མེད་པ་དང་། །གང་ལ་ཐོགས་པ་མེད་པའི་ཕྱིར། །གང་ཞིག་གང་ལ་གང་གིས་འཆིང་། །སྤུ་གྲིས་སྤུ་གྲི་ཇི་ལྟར་གཅོད། །ཆུ་ཡིས་ཆུ་གཉིས་ཇི་ལྟར་བརླན། །མཁའ་ལ་མཁའ་ཉིད་ཇི་ལྟར་འཇོག །མེ་ཡིས་མེ་ཉིད་ཇི་ལྟར་བསྲེག །འཆིང་གྲོལ་ཉིད་
ཀྱང་རིག་པའི་ཀློང་། །ས་ལེ་སྦྲམ་བཞིན་འགྱུར་བ་མེད། །གཅིག་ཤེས་ཀུན་གྲོལ་ཏི་ལ་ཉིད། །ཐེག་དགུ་མ་སྤངས་ང་ཡི་རྩལ། །ཨ་ཏི་མ་བསྒྲུབས་ང་ཡི་རོལ། །མཐོ་དམན་བརྗོད་བྲལ་ང་ཡི་རྒྱན། །ཅེས་གསུངས་ནས། ཀུན་རྫོགས་རྒྱལ་པོ་མི་གཡོ་བའི་ངང་ལ་ལྷན་ནེར་བཞུགས་སོ། །ཐེག་པ་ཀུན་གྱི་སྤྱི་ཕུད་ཀློང་ཆེན་རབ་འབྱམས་ཀྱི་རྒྱུད་ལས། ཨ་ནུ་མ་སྤངས་རྫོགས་ཚུལ་གྱི་ལེའུ་སྟེ་ཉེར་ལྔ་པའོ།། །།ས་མ་ཡ། རྒྱ་རྒྱ་རྒྱ། དེ་ནས་སེམས་དཔའ་རྡོ་རྗེ་ཡིས། །སྟོན་པ་ཉིད་ལ་ཡང་གསོལ་པ། །ཨེ་མ་ཧོ། ཉག་གཅིག་ཟང་ཐལ་ཀུན་ཏུ་བཟང་། །མེད་པ་ཕྱལ་པ་ལྷུན་གྲུབ་ཆེ། །ཨ་ཏིའི་གྲུབ་མཐའ་བདག་ལ་སྟོན། །ཅེས་གསོལ་སྟོན་པས་བཀའ་སྩལ་པ། །ཨ་ཧོ་སེམས་དཔའ་རྡོ་རྗེ་ཉོན། །རྫོགས་ཆེན་ཨ་ཏིའི་གྲུབ་མཐའ་ནི། །ལྟ་སྒོམ་སྤྱོད་པ་འབྲས་བུའོ། །ལྟ་བ་སྣང་སྲིད་འཁོར་འདས་ཀྱི། །ཆོས་རྣམས་ཐིག་ལེ་ཉག་གཅིག་སྐུ། །རང་བྱུང་བྱ་བཙལ་མེད་པར་འདོད། །སྒོམ་པ་ཀུན་ཁྱབ་ནམ་མཁའ་ལ། །ཅིར་ཡང་འཆར་བའི་ནོར་བུ་ལྟར། །སྣང་བཞིན་མ་གྲུབ་ངེས་པ་མེད། །བཅོས་སླད་མེད་པ་ས་ལེ་སྦྲམ། །རང་གསལ་ཆེན་པོར་འདོད་པ་ཡིན། །སྤྱོད་པ་སྤྱད་རྒྱུ་མེད་པ་སྟེ། །འབྲས་བུ་ཚེ་གཅིག་ལུས་གཅིག་ལ། །ཀ་དག་ཟད་པའི་སར་གྲོལ་འདོད། །སེམས་སྡེ་ཀློང་སྡེ་མན་ངག་སོགས། །རང་རང་གྲུབ་མཐའ་ཕྱོགས་རེས་བཅིངས། །ཐེག་བརྒྱད་ཐམས་ཅད་ཁྱད་བསད་ནས། །ང་ནི་རྩོལ་བ་བྲལ་ལོ་ཟེར། །ཕྱོགས་ཞེན་དེ་ཡིས་སངས་མི་རྒྱ། །ལྟ་བ་སྒོམ་མེད་བསྟན་པས་ཐོས། །སྒོམ་པ་ཡེ་སྒོམ་བསྟན་པས་ཐོས། །སྤྱོད་པ་སྤང་བླང་མེད་པས་ཐོས། །དམ་ཚིག་བསྲུང་མཚམས་མེད་པས་ཐོས། །ལམ་ལ་རྩོལ་བགྲོད་མེད་པས་ཐོས། །ཆོས་ཉིད་གང་ཡང་ཡིན་པས་ཐོས། །དོན་ལ་དེ་ལྟར་གནས་གྱུར་ཀྱང་། །ཐེག་དམན་ཐམས་ཅད་སྐྲག་ཅིང་བརྒྱལ་བར་བྱེད། །དགེ་སྡིག་གཉིས་
བདེན་རྒྱུ་འབྲས་བྱུང་། །དགེ་བཅུ་རྩོལ་བ་སྤང་མི་དགོས། །ཉན་རང་བྱང་སེམས་ཐེག་དམན་ལ། །ཁྱད་གསོད་དགེ་སྡིག་མེད་དོ་ཟེར། །གཏན་ཚིགས་རིགས་དྲུག་སྡུག་བསྔལ་ལྟོས། །ཡིད་སྨོན་བྱེད་པ་སེམས་ཀྱི་བདུད། །ཐེག་དམན་རྣམས་ལ་ཁ་འཕེན་ཅིང་། །རྒྱུ་འབྲས་ཕྱལ་པར་འཇོག་པ་ན། །ཁམས་གསུམ་སེམས་ཅན་བསད་པ་བས། །ཐེག་པ་སྤང་སྨད་སྡིག་པ་ཆེ། །ཡང་དག་ང་ལ་སྒྲོ་བཏགས་ཡིན། །གང་ལ་གང་འཚམས་སྟོན་བྱེད་པ། །དབང་པོའི་རིམ་པར་སྦྱར་ནས་གསུངས། །མཐོ་དམན་མེད་པར་ངས་མ་གསུངས། །ཐེག་དགུ་སྐས་ཀྱི་གདང་བཞིན་བརྟེན། །སྤོང་འགེག་རྟོག་བསྒྱུར་བདེན་གཉིས་སྤྱོད། །གཙང་སྦྲ་ཏིང་འཛིན་བྱིན་རླབ་བྱེད། །རྩོལ་སྒྲུབ་དམ་ཚིག་ཡེ་ཤེས་བསྐྱེད། །སྒྲུབ་བསྙེན་ཕྲིན་ལས་མཆོད་བསྟོད་བསྐུལ། །ཀུན་ལ་འབྲས་བུ་རེ་རེ་དང་། །བདེན་པ་མཐོང་ཚུལ་ཡོན་ཏན་ཡོད། །རྒྱུ་འབྲས་འདས་པའི་ཁ་ལྟ་སྟེ། །ཆད་པའི་མུ་ལ་ཅུང་ཙམ་རྟོགས། །ཉམས་ལེན་མེད་ཅེས་ཐ་མལ་སྡོད། །ཉམས་ལེན་མ་འདྲེས་དྲོད་ཚད་ཐོབ། །ཨ་ཏི་ཆེན་པོ་ང་ཉིད་ལ། །ཉན་རང་ཐེག་པ་སོ་ཐར་དང་། །ཉམས་ལེན་ཀུན་ཀྱང་མ་སྤངས་ཡང་། །ཆེན་པོ་ང་ལ་བཀག་པ་མེད། །ཀློང་ཡངས་ང་ལ་གནས་པ་མེད། །གང་ཡང་མ་སྤངས་ཡངས་པར་བརྡལ། །མ་བཅོས་མཁའ་འདྲ་ཀུན་ལ་ཤར། །མཐོ་དམན་ཕྱོགས་རིས་ང་ལ་བྱེད། །འདོད་བློའི་ཆོས་ཆེན་མ་ཟད་ན། །ཁ་ལྟ་མཐོ་ཡང་སངས་མི་རྒྱ། །ཆེན་པོ་ང་ཡིས་གཏན་ལ་འབེབས། །འཁོར་བ་རུ་ནས་ང་ཡིས་བཟློག །ཐེག་པ་འོག་མས་གོང་མ་འདེགས། །རྩ་བས་རྩེ་མོ་འདེགས་བཞིན་ནོ། །མར་ལ་མར་བསྣན་དབྱེ་བསལ་མེད། །སངས་རྒྱས་སེམས་ཅན་ལོགས་ན་མེད། །རྫོགས་པ་ཆེན་པོའི་ལྟ་སྒོམ་སྤྱོད། །དམ་ཚིག་ས་ལམ་རྩོལ་སྒྲུབ་མེད། །དེ་ཡིས་ཀ་དག་སྒྲུབ་ལ་ཕེབས། །རྒྱུ་འབྲས་ཞིབ་ཀྱང་འགལ་བ་མེད། །བྱར་མེད་ཀློང་དུ་གང་ཡང་ཤོང་། །རྩོལ་
སྒྲུབ་མི་བདེ་བྱ་མི་དགོས། །རྫོགས་ཆེན་རྒྱུ་འབྲས་མེད་པར་འཁྲུལ། །དེ་ནི་ཆོས་ཉིད་མཁའ་དང་འགལ། །ཇི་བཞིན་ཆོས་ཉིད་དོན་མི་འབྱོར། །ཆོས་ཉིད་ཡེ་གྲོལ་དོན་དང་འགལ། །ཨེ་མ་ཧོ། ཐེག་དགུ་ཡེ་རྫོགས་འདི་ལྟ་སྟེ། །སྡུག་བསྔལ་མི་སྐྱེ་སྤང་མི་དགོས། །ཉན་ཐོས་མ་སྤངས་རྫོགས་པ་ཆེ། །མ་རིག་རྟེན་འདྲེལ་དབང་པོ་འགེགས། །སྟོང་ཉིད་ཆོས་སྐུ་སྐྱེ་འཇིག་བྲལ། །རང་རྒྱལ་མ་སྤངས་རྫོགས་ཆེན་རྒྱན། །རང་བྱུང་རྣམ་དག་ཆོས་ཉིད་སྦྱང་། །སྦྱང་བསྒྱུར་དམིགས་པ་སྐུལ་མི་དགོས། །སེམས་ཙམ་མ་སྤངས་རྫོགས་ཆེན་རྒྱན། །ཀྲི་ཡ་གཙང་སྦྲ་བྱི་དོར་གྲུབ། །ཡེ་ནས་དག་པས་བྱ་བ་བྲལ། །ཀྲི་ཡ་མ་སྤངས་རྫོགས་ཆེན་རྒྱན། །ཨུ་པ་ཡོ་ག་ཆོ་ག་རྩོལ་སྒྲུབ་སྤྱོད། །ཡེ་ནས་ལྷུན་གྲུབ་བྱ་མི་དགོས། །ཨུ་ཡོག་མ་སྤངས་རྫོགས་ཆེན་རྒྱན། །མ་ཧཱ་ཨ་ནུ་ཏིང་འཛིན་གསུམ། །དག་པ་སྒོམ་བསྒྲུབ་ཡེ་གྲུབ་ཡིན། །མ་ཧཱ་ཨ་ནུ་རྫོགས་ཆེན་རྒྱན། །སེམས་སྡེ་ཀློང་སྡེ་མན་ངག་སོགས། །ཀུན་ཀྱང་མཐོ་དམན་མེད་པ་ལ། །ཐེག་འོག་ཁྱད་བསད་རང་ཆེ་བརྗོད། །དེ་ཡིས་འདི་ལ་གཏན་མི་ཕེབས། །རྫོགས་པ་ཆེན་པོའི་ལྟ་སྒོམ་སྤྱོད། །ཆེན་པོ་ང་ཉིད་མཉམ་ཉིད་དང་། །མཐོ་དམན་དབྱེ་བའི་གདགས་གཞི་བྲལ། །རྩོལ་མེད་རྒྱུ་འབྲས་ཞིབ་མོས་འབེབས། །ཀུན་གྱི་ཡང་རྩེ་ཆེན་པོ་ང་། །དགུ་ཀ་མ་སྤངས་ཉམས་སུ་ལེན། །ཕྱོགས་ཞེན་རྒྱ་མདུད་སྡོམ་པ་ལེན། །ལྟ་བའི་ཡང་རྩེ་ཐོད་རྒལ་འགྲོ། །གཤིས་ནི་སྐྱེ་མེད་ཐིག་ལེ་ཡིན། །རྩལ་ནི་འགག་མེད་རོལ་པ་ཡིན། །ངོ་བོ་གཉིས་མེད་རང་གྲོལ་ཡིན། །ཨེ་མ་ཧོ། གཅིག་ལ་ཀུན་རྫོགས་མ་སྤངས་རང་སར་གྲོལ། །སངས་རྒྱས་སྐུ་དང་སེམས་ཅན་ཉོན་མོངས་ལུས། །ཇི་ལྟར་སྣང་བ་ཐམས་ཅད་རིག་པའི་རྒྱན། །ཉོན་མོངས་དུག་ལྔ་ཡེ་ཤེས་བདུད་རྩི་སྟེ། །འཁོར་བའི་གཡང་ས་བྱང་ཆུབ་ལམ་དུ་སྟེ། །དུག་གསུམ་སྐུ་གསུམ་ཀློང་དུ་གཏན་སྤྲུགས་ཏེ། །སྐྱེ་ཤི་རྩད་གཅོད་ཁམས་གསུམ་ཡོངས་སུ་གྲོལ། །གཟུང་འཛིན་གཉིས་དང་
བྱ་བྱེད་ཀུན་སྣང་ཀུན། །ཉིད་ལ་ཉིད་འཛིན་ཉིད་ལ་ཉིད་སྤྱོད་པས། །རྩ་བ་བྱང་ཆུབ་རིག་པའི་ཀློང་དུ་གྲོལ། །རང་བྱུང་རིག་པ་ཡེ་ནས་ཆོས་སྐུ་སྟེ། །དུས་གསུམ་རྒྱལ་བ་རྣམས་ཀྱང་དེ་ཡི་སྐུ། །ཕྱི་ནང་གསང་བ་ཐེག་མཆོག་ཇི་སྙེད་ཀྱང་། །བྱང་ཆུབ་སེམས་ཉིད་དེ་ཡི་ཡོན་ཏན་ཏེ། །རང་རིག་མ་རྟོགས་ཆོས་རྣམས་ལོགས་ན་མེད། །སེམས་ཉིད་ཀློང་དུ་མ་གྲོལ་ཆོས་མེད་པས། །གཉིས་སུ་འཛིན་པའི་མཁའ་ལ་མདུད་པ་བོར། །ཕྱོགས་སུ་བཙལ་བ་སེམས་ཀྱི་མདུད་པ་སྟེ། །ཨ་ཏི་ལྟ་བ་ཕྱོགས་རིས་མེད་པ་ལ། །བལྟས་ཀྱང་སྐྱོན་མེད་རང་བྱུང་རོལ་པ་ཡིན། །མ་བལྟས་སྐྱོན་མེད་མཚན་མ་རང་སར་གྲོལ། །གཉིས་མེད་ལྟ་བ་རང་བྱུང་རོལ་པ་ཡིས། །ལྟ་བ་བཟང་ངན་འབྱེད་པའི་མདུད་པ་བོར། །ང་ཡི་སྒོམ་པ་དམིགས་གཏད་མེད་པ་ལ། །བསྒོམས་ཀྱང་སྐྱོན་མེད་རང་བྱུང་རོལ་པ་ཡིན། །མ་བསྒོམས་སྐྱོན་མེད་མཚན་མ་རང་སར་གྲོལ། །རང་གྲོལ་གཉིས་མེད་རང་བྱུང་སྤྱོད་པ་ཡིས། །སྤྱོད་པ་ཆེད་དུ་བཙལ་པའི་མདུད་པ་བཀྲོལ། །ཀློང་ཆེན་འབྲས་བུ་སྤང་ཐོབ་མེད་པ་ལ། །བསྒྲུབས་ཀྱང་སྐྱོན་མེད་རང་བྱུང་རིག་པ་ཡིན། །མ་བསྒྲུབས་སྐྱོན་མེད་མཚན་མ་རང་སར་གྲོལ། །གཉིས་མེད་རང་གྲོལ་རང་བྱུང་འབྲས་བུ་ཡིན། །འབྲས་བུ་གཞན་འདོད་རེ་བའི་མདུད་པ་བཀྲོལ། །ཀློང་ཆེན་བསྲུང་མཚམས་བྲལ་བའི་དམ་ཚིག་ལ། །བསྲུངས་ཀྱང་སྐྱོན་མེད་རང་བྱུང་རོལ་པ་ཡིན། །མ་བསྲུངས་སྐྱོན་མེད་མཚན་མ་རང་སར་གྲོལ། །རང་གྲོལ་གཉིས་མེད་རང་བྱུང་དམ་ཚིག་གིས། །སྲུང་ཉམས་སྐྱོན་ཡོན་འབྱེད་པའི་མདུད་པ་བཀྲོལ། །ཨ་ཏིའི་ཕྲིན་ལས་བྱ་བཙལ་མེད་པ་ལ། །བཙལ་ཀྱང་སྤྱོད་མེད་རང་བྱུང་རོལ་པ་ཡིན། །མ་བཙལ་སྐྱོན་མེད་མཚན་མ་རང་སར་གྲོལ། །རང་གྲོལ་གཉིས་མེད་རང་བྱུང་ཕྲིན་ལས་ཀྱི། །ཕྱོགས་སུ་འབྱེད་པར་འདོད་པའི་མདུད་པ་བཀྲོལ། །ཨ་ཏི་ས་ལམ་སྦྱང་བགྲོད་མེད་པ་ལ། །སྦྱང་བགྲོད་བྱས་པས་སྐྱོན་མེད་རོལ་པར་
ཤར། །མ་བགྲོད་མ་སྦྱངས་སྐྱོན་མེད་རང་སར་གྲོལ། །གཉིས་མེད་རང་གྲོལ་རང་བྱུང་ས་ལམ་གྱིས། །མཐོ་དམན་གོང་འོག་འཛིན་པའི་མདུད་པ་བཀྲོལ། །ཀློང་ཆེན་མདུད་བཀྲོལ་མཐའ་ཡི་མུན་གསལ་བས། །འགྲོ་བ་རིགས་དྲུག་སངས་རྒྱས་ཉིད་དུ་གསལ། །ཕྱོགས་མཚམས་སྟེང་འོག་ཐམས་ཅད་རྒྱར་མཉམ་པས། །ཡ་ཐ་སངས་རྒྱས་མེད་དེ་རང་དུ་གསལ། །མ་ཐ་དམྱལ་བ་མེད་དེ་རང་དུ་དག །འགྲོ་དྲུག་སྡུག་བསྔལ་མདུད་པ་དེར་བཀྲོལ་ནས། །བྱང་ཆུབ་སེམས་ལ་བདག་གཞན་མཐོ་དམན་མེད། །མཐོ་དམན་མེད་པའི་མཉམ་ཉིད་རིག་པའི་མཁར། །ཀུན་ལ་ཁྱབ་པས་གདལ་བ་ཆེན་པོའི་རྫོང་། །གཉིས་སུ་མེད་པ་མི་འགྱུར་རྡོ་རྗེའི་འོབས། །རྡོ་རྗེའི་མཁར་རྫོང་ཐེག་པའི་སྤྱི་ཕུད་ཡིན། །ཡེ་ནས་དེ་ཡི་ཀློང་དུ་རང་གྲོལ་བས། །འདོད་འབྱུང་ཅིར་ཡང་འཆར་བའི་ཡོན་ཏན་ཡིན། །ཡེ་ཀློང་བརྡལ་བ་དེ་ཡི་ངོ་བོ་ལ། །སྐྱེ་ཤི་འཕོ་འགྱུར་མེད་པས་འབྲས་བུའོ། །རྒྱུད་དང་གདམས་ངག་ཐམས་ཅད་ང་ཡི་ཀློང་། །གཅིག་རྫོགས་ཀུན་རྫོགས་སྐྱོན་ཡོན་མཐའ་དག་རྫོགས། །རྫོགས་པ་ཆེན་པོ་ཨ་ཏི་ཀུན་གྱི་ཕུད། །དབྱིངས་རིག་ཏི་ལར་གང་ལ་དབྱེ་བསལ་མེད། །ས་དང་ལམ་དང་ཐེག་པའི་བྱེ་བྲག་ཀུན། །མ་འདྲེས་ཡོངས་རྫོགས་ཐིག་ལེ་གཅིག་གི་རྒྱན། །ཐིག་ལེ་གཅིག་ལ་དབྱེ་བསལ་ངང་གིས་བྲལ། །མི་འགྱུར་བརྟན་པའི་ཀློང་ན་བདེ་བར་བཞུགས། །བྱ་བྲལ་བདེ་བ་ཁ་ཡན་ཀློང་ན་བདེ། །ཀུན་ཀྱང་རོ་གཅིག་མཉམ་པའི་དབྱིངས་སུ་གྲོལ། །སྐྱེ་མེད་རོལ་པ་འུབ་ཆུབ་ཆེན་པོ་ཨེ། །ཐེག་དགུ་མ་འདྲེས་མ་སྤངས་རྫོགས་པས་ཏེ། །གོང་ན་གཞན་མེད་སྤྱི་དཔལ་ཆེན་པོར་ཐེག །འཁོར་འདས་ཐམས་ཅད་བརྡལ་བ་ཆེན་པོའི་ཀློང་། །ཉིད་ལས་ཉིད་ཤར་རོལ་པ་འབྱམས་པས་ཆེན། །རྩོལ་བ་བྱ་བྲལ་ཏི་ལའི་སྦུབས་ན་རབ། །ཀ་དག་ཟད་པ་ཡིད་དཔྱོད་བྲལ་བས་འབྱམས། །ཐེག་དགུ་ཟིལ་གནོན་ཡངས་དོག་མེད་པའོ། །ཞེས་
གསུངས་ནས། མི་ཟད་ཀ་དག་གི་ཀློང་དུ་ལྷན་ནེར་བཞུགས་སོ། །ཐེག་པ་ཀུན་གྱི་སྤྱི་ཕུད་ཀློང་ཆེན་རབ་འབྱམས་ཀྱི་རྒྱུད་ལས། ཨ་ཏི་རྫོགས་ཚུལ་གྱི་ལེའུ་སྟེ་རྩ་དྲུག་པའོ།། །།ས་མ་ཡ། རྒྱ་རྒྱ་རྒྱ། དེ་ནས་སེམས་དཔའ་རྡོ་རྗེ་ཡིས། །སྟོན་པ་ཉིད་ལ་ཡང་ཞུས་པ། །ཀྱེ་ཧོ།ཉག་གཅིག་ཆ་ཤས་ཏི་ལ་ཆེ། །གཞོན་ནུ་བུམ་སྐུ་ཀུན་བཟང་མཆོག །ཨ་ཏི་ཆེན་པོའི་གྲུབ་མཐའ་གང་། །སྟོན་པས་འཁོར་ལ་བཀའ་སྩོལ་ཅིག །ཞུས་པའི་ལན་དུ་འདི་སྐད་གསུངས། །ཨ་ཏི་ཆེན་པོའི་ཀློང་བརྡལ་ལ། །གཏད་མེད་ཟང་ཐལ་ལྟ་བ་དང་། །དམིགས་གཏད་ཞེན་མེད་སྒོམ་པ་དང་། །བླང་དོར་མེད་པའི་སྤྱོད་པ་དང་། །འབྲས་བུ་རེ་དོགས་མེད་པར་ཟད། །བཞི་ཡིས་བསྡམས་ཏེ་བསྟན་པ་ལ། །ལྟ་བ་གཏད་མེད་ཉིད་ལ་གསུམ། །མཉམ་ཉིད་འཛིན་གྲོལ་ཕྱོགས་མེད་ཟླ། །འཁོར་འདས་ཆོས་ཀུན་ཅིར་སྣང་ཡང་། །སྣང་སྟོང་ཆོས་ཉིད་དབྱེ་བ་མེད། །ཆོས་ཅན་མ་ཡིན་ཆོས་ཉིད་གཅིག །ལོགས་ནས་འབྱུང་བའི་རེ་ཆ་མེད། །ཡོད་མིན་མེད་མིན་འཛིན་པ་གྲོལ། །བདེན་རྫུན་ཐ་དད་གཉིས་ཆོས་དག །ཆོས་རྣམས་རང་བྱུང་རང་ཤར་ཀློང་། །ཆོས་མེད་གཏད་མེད་ཉིད་སྣང་བ། །སྣང་ན་རང་སྣང་རང་སྟོང་ངོ་། །སྣང་དང་སྟོང་པ་ཡེ་ནས་མཉམ། །ཆོས་ཅན་ཆོས་ཉིད་མཉམ་པར་བརྡལ། །ཡོད་མེད་མཐའ་གཉིས་རང་ཆོད་ཀློང་། །རང་དང་གཞན་གྱི་ཕྱོགས་འཛིན་མེད། །རྫུན་དང་བདེན་པར་གདོད་ནས་མཉམ། །ཅི་ཕྱིར་རིག་པ་དྲི་མེད་འདི། །ངོ་བོ་ཕྱོགས་ལྷུང་གང་ཡང་མེད། །དེ་ཕྱིར་གཏད་མེད་ཟང་ཐལ་ཏེ། །དཔེར་ན་ག་པུར་སྨན་དུག་བཞིན། །ཡེ་ནས་མཉམ་ཉིད་རང་ངོའི་སྦུབས། །ཆོས་རྣམས་མཉམ་ཉིད་མཐའ་གྲོལ་བས། །ལྷ་མི་རང་རྒྱུད་བཟུང་བས་འཁྲུལ། །ཆད་དང་སྟོང་པར་བཟུང་བས་ལོག །ཐེག་དམན་སྣང་བ་དགྲར་ལྟས་གོལ། །བྱང་
སེམས་སྒྲིན་པོས་སྦྱོང་བས་བསྒྲིབས། །མཐའ་དབུས་སྟོང་པར་སྒྲོ་འདོགས་འབྱམས། །སྔགས་རྣམས་ཕྱི་ནང་དག་སྣང་དུ། །བསྒྱུར་བས་ཆོས་མིན་གཏིང་མ་རྟོགས། །མདོར་ན་ཕྱོགས་འཛིན་ལྟ་བའི་བདུད། །རྫོགས་ཆེན་ཐེག་དམན་ཁྱད་གསོད་བྲལ། །ཐམས་ཅད་ཕྱམ་བརྡལ་ཕྱོགས་རིས་མེད། །གཏད་མེད་ཟང་ཐལ་ལྟ་བ་ལ། །ཆོས་མིན་རྟོག་པས་ཕྱོགས་འཛིན་གྲོལ། །ཀ་དག་ཀློང་དུ་བརྡལ་བ་ཆེ། །ཕྱོགས་རིས་མེད་པར་ལ་བཟླ་བ། །ཆོས་ཅན་དངོས་པོའི་སྣང་བ་ལ། །རྟོག་པས་འདི་ཡིན་མེད་པར་བརྡལ། །ཡོད་པའི་ཕྱོགས་སུ་མ་ལྷུང་སྟེ། །ཅིར་ཡང་སྣང་བས་མེད་མཐའ་བྲལ། །གཉི་གའི་ཕྱོགས་ནས་རིག་སྣང་སྟོང་། །གཉིས་མེད་ཕྱོགས་སུ་དེ་མ་ལྷུང་། །ཡེ་གྲོལ་ཕྱོགས་སུ་རྒྱ་རིས་བྲལ། །ཡང་དག་དོན་དུ་ལ་བཟླའོ། །དམིགས་གཏད་ཞེན་མེད་སྒོམ་པ་ལ། །བདག་འཛིན་བློ་བྲལ་སྒོ་འཁྲུལ་ཞིག །ཡིན་མིན་བློ་བྲལ་ཀློང་བརྡལ་ལོ། །བདག་འཛིན་བྲལ་བས་ང་བདག་སྒོམ། །ངོ་བོ་སྟོང་པས་རྩ་བ་སྟོར། །རང་བཞིན་གསལ་ཡང་གཞི་རྩ་བྲལ། །མཚན་ཉིད་འགྱུ་དྲན་འཛིན་ཆགས་ཞི། །གང་ཡང་མ་གྲུབ་བསྒོམ་བྱ་སྟོར། །སྤང་དང་བསྒྲུབ་བྱའི་སྣང་བ་ཞིག །དམིགས་གཏད་ཀུན་བྲལ་ཀློང་ཡིན་ནོ། །འཁྲུལ་པ་ང་བདག་གཤིས་མེད་གྲོལ། །སྣང་བ་བྱེད་མཁན་མ་གྲུབ་པས། །སྣང་ཚུལ་བདེན་རྫུན་འཁྲུལ་པ་ཞིག །གཉིས་འཛིན་འཁྲུལ་པ་ཡེ་མེད་དང་། །བསྒྲུབ་བྱ་འདི་ཡིན་བསྒྲུབ་ཏུ་མེད། །ཐམས་ཅད་ཀློང་ཆེན་བརྡལ་བ་ཉིད། །ཕྱོགས་མེད་ཡུལ་མེད་རང་སྣང་གྲོལ། །ཡུལ་མེད་བློ་དང་དེ་བྲལ་ཏེ། །ཐམས་ཅད་ཕྱམ་གཅིག་རིག་སྟོང་གྲོལ། །སྤྱོད་པ་བླང་དོར་མེད་པ་ལ། །གཏད་མེད་ཟང་ཐལ་ལྟ་བ་ཡིས། །ཡིན་དང་མིན་གྱི་ཕྱོགས་ཞེན་གྲོལ། །དམིགས་གཏད་ཞེན་མེད་བསྒོམ་པ་ཡིས། །ཐེག་དགུ་ཆོས་མིན་གྲོགས་སུ་འཆར། །བླང་དོར་མེད་པའི་སྤྱོད་པ་ཡིས། །ཡིན་མིན་དགེ་སྡིག་ཅི་སྤྱད་ཀྱང་། །ཆོས་
ཉིད་ཀློང་ནས་འདས་པ་མེད། །དགེ་བཅུ་ཕ་རོལ་ཕྱིན་པ་དྲུག །ཆོས་སྤྱོད་བཅུ་སོགས་འདི་བླང་བྱ། །མི་དགེ་བཅུ་དང་མཚམས་མེད་ལྔ། །རྣམ་སྨིན་སྡིག་ཆེ་འདི་སྤང་བྱ། །མཚན་མ་ཡེ་མེད་གཞི་དག་པས། །བླང་དོར་གཟུང་འཛིན་མིང་ཡང་མེད། །ཡིན་མིན་གཉིས་ཀྱི་ཆོས་བློ་འདས། །དེ་ལྟར་ལྟ་སྒོམ་ཆོས་ཉིད་ཀྱི། །ཀློང་ལས་འཕྱོ་བ་ཡེ་མེད་པས། །མི་དགེ་བཅུ་དང་མཚམས་མེད་སོགས། །མ་སྤངས་ཆོས་མེད་ལྷུན་གྱིས་གྲུབ། །དགེ་བཅུ་ཆོས་སྤྱོད་ཚོགས་ཆེན་གཉིས། །མ་བཙལ་ཆོས་མིན་ལྷུན་གྱིས་གྲུབ། །སྐུ་དང་ཞིང་ཁམས་ཡེ་ཤེས་སོགས། །མ་གྲུབ་ལྷུན་རྫོགས་ཀློང་ཆེན་པོ། །འཁོར་འདས་ཀྱིས་བསྡུས་ཆོས་ཕྱམ་གཅིག །སྐྱེ་བ་མེད་ལས་ཐམས་ཅད་སྐྱེས། །ཡོད་ནས་སྣང་བ་ག་ལ་ཡིན། །སྐྱེས་ཙམ་ཉིད་ན་སྐྱེ་བ་མེད། །མེད་པ་ཉིད་ཀྱང་རང་སྣང་ཕྱིར། །སྣང་ཤར་དུས་མཉམ་དེ་རུ་མཉམ། །སྟོང་རིག་དུས་ན་དེ་རུ་མཉམ། །གཉིས་ཀའི་དུས་ན་དེ་རུ་མཉམ། །མཉམ་ཉིད་མཐའ་མུ་རང་གྲོལ་ལོ། །འབྲས་བུ་སྣང་བཞི་རིམ་ཤར་ནས། །གདེང་བཞི་དག་གིས་ཆོས་ཟད་པས། །ཟག་བཅས་མི་སྣང་ཟླ་བདུན་གྱིས། །འཇའ་འོད་ལྷག་མེད་འགྲུབ་པའོ། །ཨེ་མ་ཧོ་སེམས་དཔའ་རྡོ་རྗེ་རྩལ། །ལྟ་བ་ཕྱིན་ཅི་མ་ལོག་པར། །ཨ་ཏི་ཆེན་པོའི་ཀློང་ཆེན་ལ། །མ་རིག་མ་སྤངས་རིག་པའི་སྐུ། །དབྱིངས་ཆེན་རྣམ་དག་ཐིག་ལེར་རྫོགས། །གཅིག་རྫོགས་ཏི་ལ་གཉིས་རྫོགས་བརྡལ། །འཁོར་འདས་ཆོས་རྫོགས་ཐམས་ཅད་ཀློང་། །གཅིག་བྱུང་ཀ་དག་གཉིས་བྱུང་རོལ། །སྒྲོན་མ་བཞི་གཞུང་ལུག་རྒྱུད་རྫོགས། །སྐུ་དང་ཞིང་ཁམས་ཐམས་ཅད་བྱུང་། །གཅིག་སྐྱེས་ཏི་ལ་སྟོང་ཉིད་དབྱིངས། །གཉིས་བྱུང་རིག་པ་དབྱིངས་དང་འདྲེས། །ཡིད་ཀྱི་རྣམ་ཤེས་ཐམས་ཅད་སྐྱེས། །གཅིག་མེད་མ་རིག་ཡིད་སེམས་མེད། །མ་དག་ཉོན་མོངས་ཐམས་ཅད་མེད། །ཕྱོགས་རིས་ཞེན་འཛིན་མདུད་པ་མེད། །དེ་བཞིན་ཨ་ཏི་ཆེན་པོ་ལ། །བྱས་བའི་ཆོས་ནི་ཀ་ནས་
དག །བྱ་དང་བྱེད་པ་མེད་པའོ། །ཨ་ཏི་ཀློང་ཆེན་ང་ཉིད་ལ། །དམ་ཚིག་བསྲུང་དུ་མེད་པ་སྟེ། །ཡེ་ནས་བསྲུང་དང་བྲལ་བའོ། །མེད་པ་ཕྱལ་པ་ལྷུན་གྲུབ་ཆེ། །ཉག་གཅིག་ཟང་ཐལ་ཉིད་དུའོ། །གསང་སྔགས་ཀུན་གྱི་དགོངས་པ་ཆེ། །ཨ་ཏི་ཆེན་པོའི་ཀློང་ཆེན་དེ། །ནམ་མཁའ་གཅན་གཟན་སེང་གེ་ཡིས། །འུག་པ་ཝ་ཚོགས་ཟིལ་གནོན་ལྟར། །རང་རིག་གཏན་ཕེབས་དམན་མནན་ནམ། །རི་བོ་མཆོག་གིས་རི་བྲན་ཟིལ་མནན་ནམ། །རྒྱ་མཚོ་ཆེན་པོས་ཆུ་བྲན་ཟིལ་མནན་ནམ། །དཔག་བསམ་ཤིང་གིས་ཤིང་བྲན་ཟིལ་མནན་ནམ། །གླང་ཆེན་རྟ་མཆོག་དུད་འགྲོ་ཟིལ་གནོན་ལྟར། །ཐེག་པའི་སྤྱི་ཕུད་ཀློང་ཆེན་ང་ཉིད་ཀྱིས། །འཁོར་འདས་ཐེག་དགུ་སྦུབས་སུ་ཟིལ་གྱིས་མནན། །རང་བྱུང་རང་ལ་ཐིམ་པའི་སྐུ་གསུམ་རིག་པའི་དོན། །སྐྱེ་མེད་དབྱིངས་ལ་སྒོམ་མེད་ཆེན་པོ་ནི། །བསྒོམ་བྱ་སྒོམ་བྱེད་ཡིན་མིན་གཉིས་དང་བྲལ། །འཛིན་པ་མེད་པར་རང་གྲོལ་ཏེ། །སྦྲུལ་དང་རྔ་མའི་མདུད་པ་བཞིན། །རང་གྲོལ་རང་སངས་ཆེན་པོའོ། །དེ་བཞིན་ཕྱོགས་ཆ་ཡིད་འཛིན་རྣམས། །རང་གྲོལ་རང་སངས་ཆེན་པོའོ། །ཨ་ཏི་ཆེན་པོ་ང་ཉིད་ལ། །རེ་དང་དོགས་པ་ག་ལ་ཡོད། །རེ་དོགས་གཉིས་པོ་ལྟུང་བའི་རྒྱུ། །འཁོར་དང་འདས་པ་ག་ལ་ཡོད། །སངས་རྒྱས་སེམས་ཅན་ག་ལ་ཡོད། །མ་སྤངས་ཀློང་དུ་རང་སར་གྲོལ། །བསྒྲུབ་མེད་སྒྲུབ་དང་བྲལ་བའོ། །བྱས་མེད་བྱུང་བ་མེད་པའོ། །འགག་མེད་ཁྱབ་གདལ་འུབ་ཆུབ་པོ། །འགྱུར་མེད་ཀློང་ཡངས་ཆེན་པོའོ། །ཆོས་མེད་སངས་རྒྱས་འཁྲུལ་མེད་དོ། །གནས་མེད་ཡེ་ཤེས་མེད་པའོ། །མེད་པའི་འཆལ་པ་ག་ལ་ཡིན། །མ་སྤངས་བཀྲ་ཞིང་འཛིན་མེད་ཡིན། །གང་ཤར་རོལ་པ་གང་སྣང་གྲོགས། །དཔེར་ན་ནགས་ཀྱི་མེ་ཆེན་ལ། །རླུང་ཆེན་བྱུང་བ་གྲོགས་བཞིན་ནོ། །ཀློང་ཆེན་རོལ་པར་འཁོར་འདས་རྒྱན། །འདི་ནི་ཨ་ཏིའི་གྲུབ་མཐའ་འོ། །ཞེས་གསུངས་ནས། ཀ་དག་ཡངས་པ་ཆེན་པོའི་ངང་ལ་ལྷན་ནེར་བཞུགས་སོ། །ཐེག་པ་ཀུན་གྱི་སྤྱི་ཕུད་ཀློང་
ཆེན་རབ་འབྱམས་ཀྱི་རྒྱུད་ལས། ཨ་ཏི་ཆེན་པོའི་གྲུབ་མཐའ་སྟེ། རྩ་བདུན་པའོ།། །།ས་མ་ཡ། རྒྱ་རྒྱ་རྒྱ། གཏེར་རྒྱ། སྦས་རྒྱ། ཟབ་རྒྱ། གཏད་རྒྱ། སེམས་དཔའ་རྡོ་རྗེས་ཡང་གསོལ་པ། །ཀྱེ་ཧོ། སྐུ་ལྔའི་བདག་ཉིད་སངས་རྒྱས་མེས། །རེ་དོགས་མཐའ་གྲོལ་ཀུན་ཏུ་བཟང་། །འདི་ལྟ་བུ་ཡི་ཀློང་ཆེན་དེ། །སྟོན་པའི་སློབ་དཔོན་ཇི་ལྟ་བུ། །འདུས་པའི་འཁོར་ལ་བཀའ་སྩོལ་ཅིག །དེ་སྐད་ཞུས་པའི་ལན་ཉིད་དུ། །སྟོན་པས་རང་བྱུང་འདི་སྐད་གསུངས། །ཀྱེ་ཧོ་སེམས་དཔའ་རྡོ་རྗེ་ཉོན། །སྤྱིར་ན་བླ་མའི་མཚན་ཉིད་ནི། །ཕུན་སུམ་ཚོགས་པ་འདི་ལྟར་རོ། །ཀློང་ཆེན་བཀའ་བབས་སྒྲུབ་རྒྱུད་ཟིན། །དབང་རྣམས་ཡོངས་རྫོགས་དམ་ཚིག་གནས། །ལྟ་བ་ཐག་ཆོད་རྒྱུ་འབྲས་ཞིབ། །བསྒོམ་པའི་སྣང་ཤེས་ཉམས་ལེན་བརྩོན། །སྤྱོད་པ་ཚུལ་ཁྲིམས་མན་ངག་ཅན། །གསང་སྔགས་རྡོ་རྗེའི་མཐའ་དྲུག་རྫོགས། །ཐོས་པས་རྒྱུད་གྲོལ་སྙིང་རྗེར་ལྡན། །འགྲོ་འདུལ་ཐབས་མཁས་རྫུ་འཕྲུལ་ལྡན། །དུས་གསུམ་བདེ་གཤེགས་སྲས་བཅས་ཀྱིས། །བྱིན་བརླབས་སྙན་བརྒྱུད་ཚིག་བརྒྱུད་དང་། །ཐུགས་བརྒྱུད་བཀའ་བབས་གཞན་སེལ་མེད། །རྒྱལ་བའི་སྲས་སུ་རྗེས་སུ་གནང་། །སོ་ཐར་འདུལ་ཁྲིམས་ཤེལ་ལྟར་གཙང་། །དེ་ཉིད་བཅུ་མཁྱེན་འདོད་ཆོས་མཁས། །སྐྱོ་དུབ་མེད་ཅིང་སྙིང་རྗེ་འབྱོངས། །ཐེག་ཆེན་འགྲོ་བའི་དོན་ལ་བརྩོན། །གསང་སྔགས་ནང་གི་ཆོ་ག་མཁས། །བསྙེན་སྒྲུབ་མཐར་ཕྱིན་ནུས་རྩལ་རྫོགས། །ཀ་དག་དོན་གྱི་ཕུ་ཐག་འབྲུས། །སྣང་གཞི་ཚད་འཁྱོལ་བདེ་དང་ལྡན། །ཀློང་ཆེན་དོན་ལ་ཤིན་ཏུ་མཁས། །ཚེ་འདི་ཟང་ཟིང་དོན་མི་གཉེར། །སློབ་མ་བརྟག་མཁས་ཐེག་དགུ་སྦྱངས། །ཆགས་ཞེན་ཆུང་ཞིང་འཛིན་པ་མེད། །དེ་རྣམས་ལྡན་པའི་བླ་མ་དེ། །ཡིད་བཞིན་ནོར་བུ་ལྟ་བུ་སྟེ། །བདག་གཞན་དོན་གཉིས་དེ་ཡིས་འགྲུབ། །
གང་གིས་འདྲེལ་ལ་ཡོན་ཏན་འབྱུང་། །དེ་བསྟེན་སྐད་ཅིག་རྫོགས་སངས་རྒྱས། །དེ་ལས་ལོག་པའི་བླ་མ་ནི། །ཆོས་ལ་མཁས་གཡར་ཐ་མལ་སྤོང་། །འདུལ་ཁྲིམས་མེད་པར་ཁྱིམ་པའི་ཚུལ། །ཉེས་བྱས་རྒྱུ་འབྲས་རྣམ་སྨིན་ལྕི། །བྱམས་པ་མ་འབྱོངས་རང་དོན་སྒྲུབ། །གདུལ་བྱའི་འགྲོ་དོན་བསྟན་སྲོལ་སྟོར། །སྔགས་སྒྲུབ་སྒོམ་བཟླས་རྟགས་མ་ཐོན། །རྒྱུད་སྒྲུབ་ཆོ་གའི་གནད་མི་ཤེས། །ཁ་ལྟའི་རྦད་ཁམས་འུར་དུ་འདོན། །ཆགས་སྡང་མ་སྤངས་འཁོར་བར་ལྟུང་། །ཆོས་ཀྱི་རྒྱུས་ཆུང་མཁས་དྲུང་གཞོལ། །བླུན་པོ་ཉ་མ་མགོ་སྐོར་བྱེད། །གདམས་ངག་ཡོད་ཟེར་ལྐོག་ཏུ་སྟོན། །ད་རུང་སྙིང་པོའི་དོན་ལ་ཚོམ། །འགྲོ་དོན་ཉེ་རིང་ཕྱོགས་ཆ་བྱེད། །ཡུལ་དང་བསྟུན་པའི་ཆོས་མི་ཤེས། །དེ་ཡང་བཟང་བཟང་འདྲ་ཡང་ངན་པ་སྟེ། །དེ་འདྲའི་མི་གཙང་བུམ་པ་ལ། །བརྟེན་བྱའི་སློབ་དཔོན་མ་ཡིན་པས། །དམ་པ་ཆོས་ཀྱི་འདྲེལ་ཐག་ཆོད། །ད་ལྟ་ངོ་མཚར་གུས་བརྟེན་ཡང་། །ནམ་ཕུགས་སྐྱོན་གཅིག་ཅིས་ཀྱང་ཡོད། །དམ་ཉམས་གཉིས་ཀ་དམྱལ་བར་འགྲོ། །དེ་བས་སྙིང་པོའི་དོན་འདོད་ན། །བླ་མ་མཚན་ལྡན་བརྩོན་འགྲུས་ཀྱིས། །ཡོན་ཏན་ཚང་བ་བཙལ་ལ་བརྟེན། །དེ་ནི་ལྷག་མེད་གསུངས་པའོ། །དེ་ནི་ཀློང་ཆེན་འདི་ཉིད་ཀྱི། །འཆང་འཛིན་སྟོན་པའི་བླ་མའོ། །ཞེས་གསུངས་ནས། རང་གྲོལ་རྟོག་པའི་གདེང་གི་ངང་ལ་ལྷན་ནེར་བཞུགས་སོ། །ཐེག་པ་ཀུན་གྱི་སྤྱི་ཕུད་ཀློང་ཆེན་རབ་འབྱམས་ཀྱི་རྒྱུད་ལས། བླ་མའི་མཚན་ཉིད་བརྟག་པའི་ལེའུ་སྟེ་རྩ་བརྒྱད་པའོ།། །།ས་མ་ཡ། རྒྱ་རྒྱ་རྒྱ། དེ་ནས་རྡོ་རྗེ་སེམས་དཔའ་ཡིས། །སྟོན་པ་ཉིད་ལ་ཡང་ཞུས་པ། །ཀྱེ། ཀུན་མཁྱེན་བརྡལ་བ་ཆེན་པོའི་དཔལ། །རྒྱུ་རྐྱེན་རྩོལ་བ་མེད་པའི་ཕྱིར། །ཀློང་ཆེན་འདི་ཉིད་བསྟན་བྱའི་ཡུལ། །སློབ་མའི་མཚན་ཉིད་གང་ལྟ་བུ། །རིག་མདངས་འཁོར་ལ་བཀའ་སྩོལ་ཅིག །སྟོན་པས་ལན་དུ་བཀའ་སྩལ་པ། །ཨ་ཧོ་སེམས་དཔའ་
རྡོ་རྗེ་ཉོན། །སློབ་མ་དམ་ཚིག་ལྡན་གྱུར་པ། །ཀློང་ཆེན་སྟོན་ཡུལ་སྣོད་དག་ཡིན། །ཀློང་ཆེན་འདི་ནི་ཐུན་མོང་མིན། །ཐེག་པ་ཀུན་གྱི་ཡང་རྩེ་ཡིན། །ཐེག་པའི་བཅུད་མཆོག་བདུད་རྩི་འདི། །གང་བྱུང་སྣོད་དུ་བླུག་པ་ན། །སྣོད་ཆག་བཅུད་འབོ་དོན་མི་འགྲུབ། །དམྱལ་བར་ལྟུང་བས་སྣོད་བརྟག་གོ། །དང་པོ་སྣོད་ཀྱི་མཚན་ཉིད་ནི། །དད་པ་ཆེ་ཞིང་ཆོས་ལ་མོས། །བརྩོན་འགྲུས་ཆེ་ཞིང་སྒྲུབ་ལ་བརྩོན། །ཤེས་རབ་ཆེ་བས་ཚིག་དོན་གོ། །འཛིན་ཆགས་ཆུང་ཞིང་ཚེ་འདི་སྤོང་། །ཕུ་དུད་ཆེ་ཞིང་བླ་མ་མཆོད། །བློ་ཆེ་གསང་སྔགས་སྤྱོད་པ་ཤོང་། །གཡེང་བ་ཆུང་བས་ཆོས་ལ་གནས། །དམ་ཚིག་དག་སྲུང་ཉེས་སྐྱོན་མེད། །སྒྲུབ་ལ་བརྩོན་ཞིང་སྡུག་སྲན་ཆེ། །དད་དང་སྙིང་རྗེས་འགྲོ་ལ་ཕན། །གཏོང་ཕོད་ཆེ་བས་རྩ་གསུམ་མཉེས། །རྒྱུད་དུལ་ཉོན་མོངས་བགས་ཀྱིས་ཆུང་། །སྡིག་ཆུང་རྣམ་སྨིན་དག་ལ་འཛེམ། །དབང་པོ་རྣོ་ཞིང་གསང་སྒོ་ཐུབ། །འགྱུར་མེད་སྐྱོ་ཤས་བློ་སྣ་ཐུང་། །སྡུག་སྲན་སྙིང་རུས་ཞེ་བཅད་ཆེ། །བླ་མ་ཉིད་དང་འབྲལ་མི་ཕོད། །འདི་ནི་སྤེལ་ཀྱང་ཀློང་ཆེན་སྣོད་མཆོག་ཡིན། །དེ་ལ་ལོ་བཅུའི་ཁོངས་ཉིད་དུ། །བརྟག་ཅིང་གདམས་པ་རིམ་གྱིས་སྦྱིན། །གནས་སྐབས་གདམས་པ་ཆུད་མི་གསོན། །མཐར་ཐུག་བཀའ་བབས་གཞན་དོན་འགྲུབ། །དེ་ལས་ལོག་པའི་སློབ་མ་ནི། །ལྕམ་ཆར་ཕྱིར་ཡང་ཆེ་ཞིང་དད་མེད་མི། །དཔལ་ཞིང་མི་ཐུབ་ངོ་བྲག་ཆ་གྲགས་ཀྱང་། །བརྟག་ལོང་མེད་པར་བཙན་ཐབས་འདོད། །དམ་ཚིག་མི་བསྲུང་རང་ཚིག་རྔམ། །ཆགས་སེམས་སྣོད་སེམས་སྒྲོ་སྐུར་ཅན། །ཁ་ཡང་གཏིང་ཐུང་ངོ་དགའ་ཆེ། །གདམས་པ་མགོ་སྐོར་ཐབས་ཀྱིས་འབྲུ། །མ་བརྟགས་སློབ་མ་ཁ་དྲེད་ཅན། །གདམས་ངག་ཆུད་ཟོས་མཁའ་འགྲོའི་སྙིང་། །རང་རྒྱུད་པ་ལ་ལྟ་གསང་འཆད། །ཉམས་པའི་གང་ཟག་སྣོད་མེད་ལ། །ཀློང་ཆེན་མི་བསྟན་མཆོག་ཏུ་གསང་། །དོན་ལ་བླང་དོར་མི་གནས་ཀྱང་། །མི་མ་ཡིན་ཀྱང་བཀའ་སྲུང་རྣམས། །ཐུགས་ཁྲོས་དུས་མིན་འཆི་བར་འགྱུར། །མཁའ་
འགྲོ་ཆོས་བདག་ཐམས་ཅད་ཀྱིས། །འཕྲལ་ལ་བར་ཆད་མི་རུང་འཇུག །ཚེ་འདིར་ཤིས་དཀོན་ངན་སོང་གནས། །ཀུན་གྱིས་སྨོད་ཅིང་དམའ་སར་འབེབས། །དེ་ཡི་ཁ་རླངས་གྲིབ་མ་ཕོག །མཁའ་འགྲོ་འཁྲུག་ཅིང་ངུ་བར་འགྱུར། །སྣོད་ངན་སྟོབས་ཆེ་ཤིན་ཏུ་བརྟག །མེ་ཐིགས་གཅིག་གིས་ཡུལ་མཁར་ཕུང་། །སྦལ་པ་སྨས་མ་ཇི་བཞིན་ནོ། །བརྟག་པ་སྣ་ཚོགས་སྒོ་ནས་བྱ། །མི་ནོར་སྲོག་སོགས་འབུལ་ནས་བལྟ། །མི་ནོར་རིན་ཆེན་གུས་ལྡན་འབུལ། །ཕོངས་མེད་འབུལ་ལ་དོན་རྒྱུད་བསྟན། །དེ་ཡིས་དོན་གྲུབ་དགོས་པ་ཡོད། །ཅེས་གསུངས་ནས། སྣ་ཚོགས་གཅེར་གྲོལ་གྱི་ངང་ལ་ལྷན་ནེར་བཞུགས་སོ། །ཐེག་པའི་ཡང་རྩེ་ཀློང་ཆེན་རབ་འབྱམས་ཀྱི་རྒྱུད་ལས། སློབ་མ་སྣོད་ལྡན་མི་ལྡན་བརྟག་པའི་ལེའུ་སྟེ་རྩ་དགུ་པའོ།། །།ས་མ་ཡ། རྒྱ་རྒྱ་རྒྱ། སེམས་དཔའ་རྡོ་རྗེས་ཡང་གསོལ་པ། །དེ་ལྟ་བུ་ཡི་ཀློང་ཆེན་དེ། །བསྟེན་ཞིང་རྩོལ་བའི་གནས་མཆོག་གང་། །སྟོན་པས་འཁོར་ལ་བཀའ་སྩོལ་ཅིག །དེ་སྐད་གསན་དགོངས་བཀའ་སྩལ་པ། །ཀྱེ་ཧོ་སེམས་དཔའ་རྡོ་རྗེ་ཉོན། །ཀློང་ཆེན་ཉམས་ལེན་གནས་མཆོག་ནི། །ལུང་སྟོང་མི་སྐད་མེད་པའི་ས། །དགེ་སྦྱོར་འཕེལ་བའི་དགོས་པའོ། །རི་རྩེ་ཤེས་པ་ཤིན་ཏུ་གསལ། །དུར་ཁྲོད་སྐྱོ་ཤས་ཤིན་ཏུ་ཆེ། །ཤིན་ཏུ་དབེན་སར་ཉམས་སྣང་འཕེལ། །དྭངས་ཤིང་མཐོ་བས་དབྱིངས་རིག་གསལ། །བཀྲ་ཤིས་གངས་རྒྱུད་རི་འདབ་བཟང་། །གནམ་ས་བང་འཁོར་ཁ་སྦྱོར་འདྲ། །སྔར་ཡང་གྲུབ་ཐོབ་རྐྱེན་ཐུབ་པ། །མི་རྒོད་མེད་ཅིང་འབྲུ་སོགས་མེད། །རྒྱབ་རི་མཐོ་ལ་བྱང་རི་མདུད། །གཡས་པ་དར་དཀར་ཡོལ་ལྟ་བུ། །གཡོན་པ་ཕྱོགས་ནས་སྐྱོང་བ་འདྲ། །མདུན་ན་རིན་ཆེན་སྤུངས་པ་འདྲ། །མདའ་ནི་ཕྱག་རྒྱ་བསྣོལ་བ་འདྲ། །ཚ་གྲང་སྙོམས་ཤིང་གཞི་བདག་འཇམ། །ཉི་མ་རྟག་ཅིང་སོ་ཐུབ་ས། །ཉེ་རིང་རན་ཅིང་རབ་ཏུ་བཙན། །སྨད་ཁ་ཕྱེ་བ་སྐྱིལ་
ཀྲུང་འདྲ། །ནགས་སམ་རི་བོ་ཚང་ཚིང་དུ། །ཀློང་ཆེན་སྟོན་པའི་ས་གནས་སོ། །ཡོན་ཏན་དགེ་སྦྱོར་ངང་གིས་འཕེལ། །མཐར་ཐུག་དབྱིངས་རིག་བརྟན་པ་ཐོབ། །དེ་ལས་ལོགས་པའི་གནས་ཉིད་ནི། །ཤར་རི་མཐོ་བ་ཚེ་ལ་གནོད། །ནུབ་རི་ཧར་ན་བཀྲ་མི་ཤིས། །མདུན་རི་མདུད་ཚུགས་བར་ཆོད་མང་། །ཚ་གྲང་མ་སྙོམས་ནད་རོ་འཇུག །གཞི་བདག་རྩུབ་པས་བར་ཆོད་འོང་། །མི་རྒོད་རྒྱུ་བས་སེམས་མི་ཕེབས། །འབྲུ་ཚོགས་དཀོན་ན་ཁམས་འདུས་མོད། །གཞན་ཡང་ས་དགྲ་སྣ་ཚོགས་ལ། །རྟེན་འདྲེལ་ཐབས་ཀྱིས་བཅོས་ཤིང་སྤངས། །ཡོན་ཏན་ལྡན་པའི་ས་ཆ་རུ། །སྒྲུབ་ཁང་ཆེ་འབྲིང་ཆུང་བ་གསུམ། །སེམས་ཅན་བློ་དང་སྦྱར་ལ་བརྩིག །ཡང་དག་རྟེན་འདྲེལ་ཀ་དག་ཀྱང་། །གནས་སྐབས་རྟེན་འདྲེལ་ཞིབ་པར་བླང་། །ཟད་པ་མཐོང་བའི་གྲོགས་སུ་འགྱུར། །དེ་རྣམས་འཛོམ་དུས་སློབ་མ་ཡིས། །ཡོན་ནི་གསེར་དངུལ་འབྲུ་སྨན་མི། །གུས་པས་ཕུལ་ལ་སྙན་པ་ཡིས། །ལོ་བདུན་ལྔ་འམ་གསུམ་ཉིད་ནས། །ཀློང་ཆེན་འདི་ཞུའི་ཞུ་བ་ནི། །ལྔ་བདུན་བར་དུ་དབུལ་བར་བྱ། །དེ་ནས་བླ་མས་གནང་བ་སྦྱིན། །སློབ་དཔོན་རྩ་གསུམ་སྒྲུབ་པ་ཡིས། །ཞི་ཁྲོ་ཉིད་ཀྱི་བསྙེན་བསྒྲུབ་བརྩམ། །སློབ་མས་སྦྱོར་བ་ཚང་བར་བསག །དེ་ཡིས་དོན་རྣམས་འགྲུབ་པར་འགྱུར། །ཞེས་གསུངས་སོ། །ཐེག་པ་ཀུན་གྱི་སྤྱི་ཕུད་ཀློང་ཆེན་རབ་འབྱམས་ཀྱི་རྒྱུད་ལས། གནས་དང་ཞུ་འབུལ་གྱི་ལེའུ་སྟེ་སུམ་ཅུ་པའོ།། །།ས་མ་ཡ། རྒྱ་རྒྱ་རྒྱ། སེམས་དཔའ་རྡོ་རྗེས་ཡང་གསོལ་པ། །ཀྱེ་ཧོ་མི་འགྱུར་ལྷུན་གྲུབ་ཀུན་ཏུ་བཟང་། །ཕུན་སུམ་ཚོགས་པའི་ཉེས་སྤངས་པ། །ཡོ་བྱད་གྲོགས་གཉིས་ཇི་ལྟར་བསག །སྟོན་པས་འཁོར་ལ་བཀའ་སྩོལ་ཅིག །སྟོན་པས་ལན་དུ་འདི་སྐད་གསུངས། །ཨ་ཧོ་སེམས་དཔའ་རྡོ་རྗེ་ཉོན། །
ཡོ་བྱད་འབྱོར་གྲོགས་འདི་ལྟ་སྟེ། །ཁམས་ཀྱི་རྟེན་པོ་ཡོ་བྱད་དང་། །འཚོ་བ་ཟས་ཀྱི་ཡོ་བྱད་དང་། །ནད་ཟློག་སྨན་གྱི་ཡོ་བྱད་དང་། །བར་ཆད་དགྲ་ཟློག་ཡོ་བྱད་དང་། །དམ་ཅན་བསྐང་བའི་ཡོ་བྱད་དང་། །སྒྲུབ་པ་རྫས་ཀྱི་ཡོ་བྱད་དང་། །མཐུན་རྫས་ཐམས་ཅད་ཚང་བར་བསགས། །ཟས་ཀྱི་ཡོ་བྱད་འདབ་ཏུ་བཤམ། །དམ་བཅས་སྲིད་ཆོགས་དགོས་པ་ཡོད། །མཆོད་རྫས་མ་རུལ་མ་རྙིང་པ། །མདངས་དང་ལྡན་པས་རྩ་གསུམ་དགྱེས། །བསྐང་རྫས་མ་ནོར་མ་ཁྱག་ཅིང་། །མ་ཉམས་མ་རྙིང་རོ་དང་ལྡན། །དམ་ཅན་ཐུགས་དམ་བསྐངས་པའོ། །བསྒྲུབ་རྫས་མང་ཞིང་ཚན་ཆེ་བས། །བྱིན་བརླབས་ཚན་ཆེ་སྤྲིན་ལྟར་འཐིབས། །གཡོག་འཁོར་ཤ་ཚ་བློ་གསལ་ཞིང་། །མི་བསླུ་གསང་ཐུབ་ང་ལོ་ཡངས། །མཆེད་གྲོགས་དུ་ཡོད་བསགས་པའོ། །རྡོ་རྗེ་རྒྱལ་ཐེབས་རྡོ་རྗེ་བྱ་བ་དང་། །རྡོ་རྗེ་སྤྱན་མ་ཁྲིམས་པ་དང་། །རྡོ་རྗེ་ཀརྨ་ལས་མཁན་དང་། །རྡོ་རྗེ་བྱན་མོ་ཕྱག་བདེ་མོ། །རྡོ་རྗེ་གིང་ཆེན་སྒོ་ར་བ། །རྡུལ་ཕྱགས་སྐྱེས་བུ་ལ་སོགས་བསག །ལས་རྒྱ་མཛེས་སྡུག་ཡིད་འོང་བ། །བློ་ཆེ་ནད་མེད་རིགས་བཟང་ཞིང་། །བཅུ་དྲུག་ལོ་ལོན་གསང་ཐུབ་པ། །མཚན་ལྡན་རེག་ན་བདེ་བ་འཕེལ། །ནད་བཟློག་རེ་སྐོང་འབྲས་བུ་ཐོབ། །ཁྱད་པར་གྲོགས་ཀྱི་མཚན་ཉིད་ཀྱང་། །དམ་ཚིག་གཙང་ཞིང་ཉེས་ལྟུང་མེད། །དག་སྣང་ཆེ་བས་ཀུན་དང་མཐུན། །དུག་ལྔ་ཆུང་བས་ཉོན་མོངས་འགགས། །བློ་བརྟན་ཁོག་ཡངས་སྤོབ་པ་མཐོ། །རྐྱེན་དབང་མི་འགྱུར་དགོས་པ་ཡོད། །ངང་རྒྱུད་རིང་ཞིང་མཆེད་ལ་བརྩེ། །མི་འབྲལ་ཕན་ཐོགས་དགོས་པ་ཡོད། །དེ་ལྟར་གྲོགས་རྣམས་འཛོམ་པ་ན། །གནས་སྐབས་ཡོན་ཏན་རི་ལ་ཆགས། །མཐར་ཐུག་ཡོན་ཏན་ཟད་པ་ཐོབ། །མཚན་ཉིད་མི་ལྡན་དེ་ལས་ཟློག །མ་རུངས་དམ་ལོག་གྲོགས་བརྟེན་ན། །དགེ་སྦྱོར་སེལ་བྱེད་བར་ཆོད་འགྲོ། །རབ་ཏུ་བརྟག་པ་གལ་ཆེའོ། །སྒྲུབ་འགོ་འཛུགས་པའི་ལོ་དག་ནི། །བྱི་བ་འབྲུག་
དང་རྟ་དང་ཕག །ཁྱད་པར་འདི་བཞི་དག་ལ་ཤིས། །དབང་དང་གདམས་པའི་འབྲས་བུ་འགྲུབ། །ཟླ་བ་སྟག་སྤྲེལ་ཕག་སྤྲུལ་བཞི། །དུས་རྫོགས་འབྲས་བུས་འབྱིན་ཕྱིར་འཐུག །ཚེས་གྲངས་ཡར་གྱི་གཅིག་ལ་ཞུགས། །ཡང་ན་གསུམ་བརྒྱད་ཉ་སོགས་བཟང་། །ཟླ་བ་ཟད་དང་ལོ་ཟད་དུས། །སྒྲུབ་དབང་འདོན་པར་ཤིས་པ་ཡིན། །སྡིག་སྒྲིབ་མི་དགེ་བདེ་བའོ། །སྐར་མ་རྒྱལ་དང་ནབ་སོ་དང་། །ཤེ་ས་དྲེ་ནག་མགོ་སོགས་བཟང་། །གཟའ་ནི་ཕུར་སོགས་དར་དུས་བཟང་། །དུས་ནི་ཉི་ཤར་ནམ་ལངས་འཇུག །དབང་ལ་ནམ་གུང་ཉིན་གུང་ངོ་། །བསྟན་པའི་རྩེ་རྒྱལ་འདི་ཉིད་དེ། །གཙོར་སྟོན་ཉམས་སུ་ལེན་པའོ། །མ་ཧཱའི་རྒྱུད་དང་ཨ་ནུའི་ལུང་། །ཨ་ཏིའི་མན་ངག་ལ་སོགས་པ། །མ་སྤངས་ཀུན་ལ་མཁས་པའོ། །ཞེས་གསུངས་ནས། ཁྱབ་གདལ་ཆེན་པོའི་ཏིང་འཛིན་ལ་བཞུགས་སོ། །ཐེག་པ་ཀུན་གྱི་སྤྱི་ཕུད་ཀློང་ཆེན་རབ་འབྱམས་ཀྱི་རྒྱུད་ལས། སྒྲུབ་རྫས་གྲོགས་མཆེད་བརྟག་བཙལ་གྱི་ལེའུ་སྟེ་སོ་གཅིག་པའོ།། །།ས་མ་ཡ། རྒྱ་རྒྱ་རྒྱ། ( དེ་ནས་སེམས་དཔའ་རྡོ་རྗེ་ཡིས། །སྟོན་པ་ཉིད་ལ་ཡང་ཞུས་པ། །ཀྱེ་ཆོས་ཉིད་ཆེན་པོ་ཀུན་བཟང་ཀློང་། །ཀ་དག་ངང་དག་རྡོ་རྗེ་ཆེ། །གང་ཟག་ཕྱི་རབས་བླུན་རྨོངས་ལ། །ཡིད་ཆེས་གདམས་པའི་ལོ་རྒྱུས་རྣམས། །མ་དག་ཡིད་གཉིས་སེལ་བའི་ཕྱིར། །རང་མདངས་འཁོར་ལ་བཀའ་སྩོལ་ཅིག །དེ་ནས་སྟོན་པས་བཀའ་སྩལ་པ། །ཨ་ཧོ་སེམས་དཔའ་རྡོ་རྗེ་ཉོན། །ཨ་ཏི་བཀོད་པ་ཆེན་པོ་ཡི། །ཀློང་ཆེན་ཡང་ཟབ་བཀའ་འདི་ལ། །ལོ་རྒྱུས་དོན་གྱིས་མ་བཤད་ན། །བླུན་རྨོངས་ཚིག་ཕྱིར་འདྲེང་བ་རྣམས། །ཡིད་གཉིས་ཐེ་ཚོམ་སྐྱོན་དུ་འགྱུར། །དེས་ན་ལོ་རྒྱུས་བཀྲོལ་ཏེ་བསྟན། །ཆོས་སྐུ་རང་གི་ངོ་བོ་ཡིས། །རྒྱལ་བས་དགོངས་པ་རྩལ་གྱིས་གསུངས། །ལོངས་སྐུ་རང་གསལ་ཆེན་པོ་
རུ། །བརྡ་ཙམ་བསྟན་པ་ཙམ་གྱིས་གསུངས། །སྤྲུལ་སྐུ་གང་ལ་གང་འདུལ་དུ། །ཚིག་གི་སྡེབ་སྦྱོར་མཁས་པས་གསུངས། །འདུལ་ཞིང་ཕུང་པོ་ལྔ་ཡི་དོན། །གནས་སྟོན་འཁོར་བསྟན་དུས་དག་ནི། །ཕུན་སུམ་ཚོགས་པ་ལྔ་ལྔས་བསྟན། །གསང་བ་ཆེན་པོའི་རྒྱུད་རྣམས་ནི། །ཕུན་སུམ་ཚོགས་པ་ལྔ་ལྡན་ཡིན། །བཤད་ཐབས་བཞི་ཡིས་གང་འཚམས་སྟོན། །ཨ་ཧོ། ཕུན་སུམ་ཚོགས་པའི་གནས་ཉིད་ནི། །ཆོས་དབྱིངས་སྤྲོས་དང་བྲལ་བ་སྟེ། །མཚན་ཉིད་མ་གྲུབ་ཚིག་མཐའ་ཟད། །སྟོན་པ་ཕུན་སུམ་ཚོགས་པ་ནི། །མ་སྤྲོས་མི་སྤྲོས་ཡིད་ཚིག་བྲལ། །ཞལ་ཕྱག་ཉིད་དུ་མ་གྲུབ་པོ། །འཁོར་ནི་ཆོས་ཉིད་རོལ་པར་ཤར། །རང་གྲོལ་རང་བྱུང་གསལ་བའོ། །བསྟན་པ་ཕུན་སུམ་ཚོགས་པ་ནི། །དོན་ལྡན་རང་བྱུང་རང་ཤར་བ། །རྒྱུ་རྐྱེན་གང་གིས་མ་བསླད་པ། །ཀུན་ཁྱབ་ཀློང་ཆེན་ང་ཉིད་དོ། །དུས་ནི་ཐོག་མ་ཐ་མ་མེད། །ལྔ་ལྡན་ཆེན་པོ་བཀྲོལ་ཞིང་བསྟན། །སྤྱི་གཞི་སྐུ་གསུམ་བཤད་པ་ན། །ཆོས་སྐུའི་གནས་ནི་ཆོས་ཀྱི་དབྱིངས། །ཆོས་སྐུའི་སྟོན་པ་ཀུན་བཟང་ང་། །ཆོས་སྐུའི་འཁོར་ནི་རང་རིག་ལ། །ཆོས་སྐུའི་བསྟན་པ་ཨ་ཏི་ང་། །ཆོས་སྐུའི་དུས་ནི་འདས་པའོ། །ལོངས་སྐུའི་གནས་ནི་སྟུག་པོ་བཀོད། །ལོངས་སྐུའི་སྟོན་པ་གངས་ཆེན་མཚོ། །ལོངས་སྐུའི་འཁོར་ནི་ཞི་ཁྲོའི་ཚོགས། །ལོངས་སྐུའི་བསྟན་པ་ཀྲི་ཡོག་གསུམ། །ལོངས་སྐུའི་དུས་ནི་ད་ལྟའོ། །སྤྲུལ་སྐུའི་གནས་ནི་ཀུན་ཁྱབ་ཞིང་། །སྤྲུལ་སྐུའི་སྟོན་པ་སངས་རྒྱས་སྟོང་། །སྤྲུལ་སྐུའི་འཁོར་ནི་ཁམས་གསུམ་མོ། །སྤྲུལ་སྐུའི་བསྟན་པ་དབང་བཞིའོ། །སྤྲུལ་སྐུའི་དུས་ནི་མ་ངེས་པའོ། །ལམ་གྱི་ཕུན་སུམ་ཚོགས་པ་ནི། །གནས་མཆོག་ཕུན་སུམ་ཚོགས་པ་ནི། །རང་ལུས་འདོམ་གང་གྲུ་བཞི་ཡིན། །སྙིང་ནང་རིན་ཆེན་གཞལ་ཡས་ཁང་། །རྩ་རྣམས་འདུས་པའི་འཁོར་ལོ་ནི། །དུས་གསུམ་བདེ་གཤེགས་ཐམས་ཅད་ཀུན། །འདི་ལ་བརྟེན་ནས་འཚང་རྒྱའོ། །
སྟོན་པ་ཕུན་སུམ་ཚོགས་པ་ནི། །རང་ཤེས་རིག་པའི་རྒྱལ་པོ་སྟེ། །འཁོར་འདས་ཆོས་རྣམས་ཐམས་ཅད་ཀུན། །མཁྱེན་པའི་བདག་པོར་བཞུགས་པའོ། །ཞུ་འཁོར་ཕུན་སུམ་ཚོགས་པ་ནི། །རྣམ་པར་ཤེས་པའི་ཚོགས་བརྒྱད་དང་། །སྐུ་ལྔ་ཡེ་ཤེས་འོད་ལྔ་དང་། །ཤེས་རབ་རླུང་སོགས་ལྔ་ཚན་རྣམས། །རྣམ་དག་རོལ་པ་སྣ་ཚོགས་སོ། །བསྟན་པ་ཕུན་སུམ་ཚོགས་པ་ནི། །ཕྱི་ནང་རྟེན་འདྲེལ་ཀུན་ཚང་ཞིང་། །རྩ་རླུང་ཐིག་ལེའི་ཡོན་ཏན་ནོ། །དུས་ཚོད་ཕུན་སུམ་ཚོགས་པ་ནི། །སྤྱིར་ནི་རང་ལུས་ཁྱད་པར་དུ། །དབྱར་མ་སྟོན་དང་དགུན་ཆུང་དང་། །ཉིན་མཚན་དུས་བཞི་ལ་སོགས་པ། །ན་བུན་འཚུབ་མ་བསེར་བུ་མེད། །ནམ་མཁའ་དྭངས་ཤིང་གསལ་བའོ། །དེ་ལྟར་ལྔ་ལྔས་སྟོན་པ་ཡང་། །གང་ཟག་གཅིག་གི་རྒྱུད་ཉིད་ལ། །གཏི་མུག་འདུལ་བའི་གཉེན་པོ་རུ། །དམིགས་གཏད་མེད་པའི་སྒོམ་པ་བསྟན། །ཞེ་སྡང་འདུལ་བའི་གཉེན་པོ་རུ། །གཟའ་གཏད་མེད་པའི་ལྟ་བ་བསྟན། །འདོད་ཆགས་འདུལ་བའི་གཉེན་པོ་རུ། །བླང་དོར་མེད་པའི་སྤྱོད་པ་བསྟན། །ང་རྒྱལ་འདུལ་བའི་གཉེན་པོ་རུ། །གོལ་སྒྲིབ་མེད་པའི་ཀ་དག་བསྟན། །ཕྲག་དོག་འདུལ་བའི་གཉེན་པོ་རུ། །སྤང་ཐོབ་མེད་པའི་འབྲས་བུ་བསྟན། །ཐམས་ཅད་ལྔ་ལྔས་འཆིང་ཞིང་བཤད། །རྒྱུད་འདི་གང་ལ་བབས་པའི་མི། །རིམ་གྱིས་ཡོན་ཏན་བཤད་ཅིང་བསྟན། །མ་དག་སེམས་ཅན་སྤྲོ་བ་བསྐྱེད། །ལུས་ངག་ཡིད་གསུམ་བྱ་རྩོལ་སྤངས། །འཁྲུལ་པའི་ཕྱོགས་སུ་མི་གཏོང་ཞིང་། །ལུས་སློད་ངག་བསྡམས་སེམས་སྤྲོ་ཡང་། །ཡིད་ཆེས་ཐག་ཆོད་ཐེ་ཚོམ་བྲལ། །བྱིན་རླབ་འཇུག་ཅིང་གདམས་པས་གྲོལ། །ཅེས་གསུངས་ནས། གསལ་སྟོང་ལྷུན་གྲུབ་ཏུ་བཞུགས་སོ། །ཐེག་པ་ཆེན་པོའི་སྤྱི་ཕུད་ཀློང་ཆེན་རབ་འབྱམས་ཀྱི་རྒྱུད་ལས། ལོ་རྒྱུས་བསྟན་པའི་ལེའུ་སྟེ་སོ་གཉིས་པའོ།། །།ས་མ་ཡ།
རྒྱ་རྒྱ་རྒྱ། སེམས་དཔའ་རྡོ་རྗེས་ཡང་ཞུས་པ། །ཀྱེ་ཧོ། གཞི་རྫོགས་ཆེན་པོ་ཀུན་ཏུ་བཟང་། །སྣང་སྲིད་དབང་སྒྱུར་རྒྱལ་པོ་ཆེ། །དབང་གི་རིམ་པ་མ་ལུས་པར། །རིག་མདངས་འཁོར་ལ་བཀའ་སྩོལ་ཅིག །ཞུས་པའི་ལན་དུ་བཀའ་སྩལ་པ། །ཨེ་ཧོ་སེམས་དཔའ་རྡོ་རྗེ་ཉོན། །དབང་ལ་རྣམ་པ་བདུན་ཡིན་ཏེ། །ངོ་བོ་ངེས་ཚིག་དབྱེ་བ་དང་། །ཐོབ་པའི་ཡོན་ཏན་མ་ཐོབ་སྐྱོན། །དབང་ཉིད་བརྟན་པའི་དམ་ཚིག་གོ། །དང་པོ་དབང་གི་ངོ་བོ་ནི། །རང་བྱུང་རོལ་པ་ཆེན་པོའི་དབྱིངས་རུམས་སུ། །འཁོར་འདས་ཆོས་རྣམས་ཐམས་ཅད་དབང་གི་དཀྱིལ། །རང་རིག་བདག་འཛིན་བྲལ་བའི་གནས་ཉིད་དུ། །དབང་བཞི་བྱང་ཆུབ་སེམས་ཀྱི་ཆུ་རྒྱུན་འབབ། །སྲིད་པའི་རྩ་བ་བདག་འཛིན་སངས་པའི་དབང་། །ཕྱི་ནང་ཀུན་བརྟགས་ཡེ་གྲོལ་ངོ་བོ་ཡིན། །ངེས་ཚིག་ལས་ལྡན་བུ་ལ་དབང་བས་དབང་། །སྣང་སྲིད་སེམས་སུ་ཤེས་པ་དོན་གྱི་དབང་། །སྲིད་བཅུད་ལྷ་རུ་གྲོལ་བ་སེམས་ཀྱི་དབང་། །ཐམས་ཅད་རང་འཛིན་སྤང་བས་ཡང་དག་དབང་། །གཉིས་མེད་ཟང་ཐལ་རྟོགས་པས་ཡེ་ཤེས་དབང་། །དེ་ཉིད་ངང་དུ་མི་གཡོ་རང་གི་དབང་། །ཐམས་ཅད་ཀ་ནས་དག་པ་ངོ་བོའི་དབང་། །ཡུལ་སེམས་ངོ་བོ་རྒྱས་པ་རང་བཞིན་དབང་། །སྣོད་བཅུད་ཡོངས་སུ་གྲོལ་བ་ཐུགས་རྗེའི་དབང་། །གཞི་སྣང་རང་སར་དག་པ་སྐུ་གསུམ་དབང་། །ཅིར་སྣང་རིག་པར་ཤེས་པས་དབང་ཡིན་ནོ། །དབྱེ་བ་ལའང་སྤྱི་དང་བྱེ་བྲག་གཉིས། །སྤྱིར་ན་རྟོགས་པ་ཡེ་ཤེས་དབང་བསྐུར་དང་། །མ་རྟོགས་རྒྱུ་མཚན་དབང་བསྐུར་གཉིས་ཡིན་ནོ། །བྱེ་བྲག་མ་རྟོགས་རྒྱུ་མཚན་དབང་བསྐུར་ནི། །མཚན་མ་རྫས་ལ་བརྟེན་ནས་དབང་བསྐུར་དང་། །རྡུལ་ཚོན་དཀྱིལ་འཁོར་དག་ལ་བརྟེན་པ་དང་། །ཡབ་ཡུམ་བྷ་གའི་དབང་བསྐུར་གསུམ་ཡིན་ནོ། །མཚན་མ་རྫས་ཀྱི་དབང་ཡང་རྣམ་གསུམ་སྟེ། །བཀྲ་ཤིས་རྫས་བརྒྱད་དབང་གི་བསྐུར་ཐབས་དང་། །རིན་ཆེན་བུམ་པའི་དབང་གི་བསྐུར་ཐབས་དང་། །
ཤ་ཁྲག་གཏོར་མའི་དབང་གི་བསྐུར་ཐབས་སོ། །རྡུལ་ཚོན་དབང་ལ་རྣམ་པ་བཞི་ཡིན་ཏེ། །ཐེག་པ་བཅུ་གཅིག་དབང་མཆོག་དང་། །ཕོ་བྲང་གཙོ་བོའི་དབང་གི་བསྐུར་ཐབས་དང་། །འཁོར་གྱི་དཀྱིལ་འཁོར་ལྷ་ཡི་དབང་བསྐུར་དང་། །ཙ་ཀ་ལི་ཡི་དབང་གི་བསྐུར་ཐབས་སོ། །ཡབ་ཡུམ་བྷ་གའི་དབང་ཡང་རྣམ་གསུམ་སྟེ། །ཡབ་ཡུམ་ཕྱག་རྒྱའི་སྒོ་ནས་དབང་བསྐུར་དང་། །ཡབ་ཡུམ་བྷ་ག་རྡོ་རྗེའི་དབང་བསྐུར་དང་། །ཡབ་ཡུམ་བྱང་སེམས་དཀར་དམར་དབང་བསྐུར་རོ། །རྟོགས་པ་ཡེ་ཤེས་དབང་བསྐུར་ཡང་། །དབྱེ་ན་རྣམ་པ་གསུམ་དུ་བསྐུར་བར་བྱ། །སེམས་ཅན་སྣང་བ་ཕྱི་ལྟར་བསྐུར། །བསྒོམ་པ་སེམས་འཛིན་ནང་ལྟར་བསྐུར། །ངོ་སྤྲོད་ཉི་ཤུ་རྩ་གཅིག་གིས། །གསང་བའི་དབང་དུ་བསྐུར་བར་བྱ། །ཕྱི་ལྟར་ཐེག་པ་བཅུ་གཅིག་དབང་། །ནང་ལྟར་ཞི་ཁྲོ་གཉིས་ཀྱི་དབང་། །ངོ་སྤྲོད་ལ་ཡང་རྣམ་གསུམ་སྟེ། །དཔེ་དང་དོན་དང་རྟགས་དང་གསུམ། །མཚོན་པའི་དབང་དུ་བསྐུར་བར་བྱ། །རིག་པ་ཡེ་ཤེས་ངོ་སྤྲོད་ཀྱིས། །གསང་བའི་ཡེ་ཤེས་ངོ་སྤྲད་བྱ། །རིག་པ་རྐྱང་བའི་ངོ་སྤྲོད་ཀྱིས། །གཟུགས་སྐུའི་ཞིང་ཁམས་དབང་བསྐུར་བྱ། །དེ་ལྟར་དབྱེ་ན་བསམ་ཡས་ཀྱང་། །བསྡུ་ན་རྣམ་པ་བཞི་ཡིན་ནོ། །སྣང་སྲིད་སེམས་སུ་ཤེས་པ་ཡིས། །སྤྲོས་བཅས་བུམ་པའི་ཕྱི་དབང་བསྐུར། །སྲིད་བཅུད་ལྷ་རུ་གྲོལ་བ་ཡིས། །སྤྲོས་མེད་ནང་གི་གསང་དབང་བསྐུར། །གཉིས་མེད་ཟང་ཐལ་ཤེས་པ་ཡིས། །ཤིན་ཏུ་སྤྲོས་མེད་ཤེས་རབ་དབང་། །ཐམས་ཅད་ངར་འཛིན་སངས་པ་ཡིས། །རབ་ཏུ་སྤྲོས་མེད་ཚིག་དབང་བསྐུར། །དམིགས་མེད་ཟང་ཐལ་རྟོགས་པ་ཡིས། །རིག་པ་རྩལ་གྱི་དབང་ཐོབ་ནས། །བྱ་བཙལ་ཀུན་ལས་འདས་པའོ། །མ་རྟོགས་ཚིག་རེ་དོན་རེ་བསྟན། །རྟོགས་པ་ཡེ་ཤེས་དབང་མཆོག་གིས། །ཅིར་སྣང་རིག་པར་ཤེས་པའི་དབང་། །རིག་པ་དགག་སྒྲུབ་མེད་པའི་དབང་། །དབང་བཞི་དུས་གཅིག་རྫོགས་པ་
ཡིན། །དེ་ཡང་དོན་ལ་བཀྲོལ་ཏེ་གསུངས། །གཅིག་གྲོལ་གཉིས་གྲོལ་ཐམས་ཅད་གྲོལ། །བཀྲོལ་བས་རང་བྱུང་གཞན་དུ་མེད། །རང་བྱུང་དབང་ཆེན་རང་ལས་བྱུང་། །དོན་གྱི་དབང་མཆོག་དཀྱིལ་འཁོར་ལ། །གཅིག་རྫོགས་གཉིས་རྫོགས་ཐམས་ཅད་རྫོགས། །དོན་དབང་ཡེ་ཤེས་མཚོན་པ་ལ། །གཅིག་མེད་གཉིས་མེད་ཐམས་ཅད་མེད། །དེ་དོན་རྟོགས་པའི་དབང་ཆེན་ལ། །གཅིག་བྱུང་གཉིས་བྱུང་ཐམས་ཅད་བྱུང་། །སྟོང་པ་ཡེ་ཤེས་དབང་ཆེན་ལ། །གཅིག་སྐྱེས་གཉིས་སྐྱེས་ཐམས་ཅད་སྐྱེས། །རྟགས་ན་དབང་མཆོག་དེ་ལྟར་བསྐུར། །འདི་རྣམས་དབང་གི་སྤྱི་ཆིངས་ཡིན། །མ་ནོར་མ་འཁྲུལ་ཉམས་སུ་ལོངས། །ཞེས་གསུངས་ནས། དམིགས་མེད་ཟང་ཐལ་ཆེན་པོའི་རིག་པ་རྩལ་གྱི་ཏིང་ངེ་འཛིན་ལ་བཞུགས་སོ། །ཐེག་པ་ཀུན་གྱི་སྤྱི་ཕུད་ཀློང་ཆེན་རབ་འབྱམས་ཀྱི་རྒྱུད་ལས། དབང་གི་ལེའུ་སྟེ་སོ་གསུམ་པའོ།། །།ས་མ་ཡ། རྒྱ་རྒྱ་རྒྱ། སེམས་དཔའ་རྡོ་རྗེས་ཡང་གསོལ་པ། །ཀྱེ་ཧོ། འགྱུར་མེད་ཆེན་པོ་ཀུན་ཏུ་བཟང་། །དབང་གི་རིམ་པ་གསུངས་ན་ཡང་། །གོང་དུ་གསུངས་ལ་འབྲལ་མེད་པའི། །ཐོབ་པའི་ཡོན་ཏན་མ་ཐོབ་སྐྱོན། །བརྟེན་པའི་དམ་ཚིག་ཇི་ལྟ་བུ། །རིག་མདངས་འཁོར་ལ་བཀའ་སྩོལ་ཅིག །ཞུས་པའི་ལན་དུ་བཀའ་སྩལ་པ། །ཀྱེ་ཧོ། དབང་དོན་འཁོར་རྣམས་ལེགས་པར་ཉོན། །དབང་མཆོག་མ་ཐོབ་སྐྱོན་རྣམས་ནི། །ཇི་ལྟར་རྫ་སོ་མ་བཏང་སྤྱད། །དེ་མ་ཐག་ཏུ་འཇིག་པ་ལྟར། །གསང་སྔགས་ཡོན་ཏན་ལོག་པར་འཆར། །མཉན་པ་སྐྱ་བ་མེད་པ་ལྟར། །སྡུག་བསྔལ་ཆུ་བོ་སྒྲོལ་མི་ནུས། །བྲག་སྐམ་སོ་ནམ་བྱས་པ་བཞིན། །དབང་བཞིའི་འབྲས་བུ་སྨིན་མི་འགྱུར། །སེམས་ལ་ཆོས་ཉིད་གནས་གྱུར་ཀྱང་། །དབང་གིས་སྨིན་པར་མ་བྱས་ན། །རྣལ་འབྱོར་དངོས་གྲུབ་ག་ལ་ཐོབ། །དབང་མཆོག་རིམ་པ་དེ་དག་ཀུན། །ཐོབ་པའི་ཡོན་ཏན་བསམ་མི་ཁྱབ། །ཡེ་ཤེས་སྣང་བ་
ཆེན་པོ་ལ། །ཐོགས་པ་མེད་པར་གྲོལ་བར་འགྱུར། །རང་སྣང་ཞིང་ཁམས་རྒྱས་པ་དང་། །ཐུན་མོང་དངོས་གྲུབ་སྣ་ཚོགས་འཐོབ། །བར་མ་དོ་ལ་རང་ངོ་ཤེས། །ཆོས་ཉིད་རྣམས་ལ་བརྟན་པ་ཐོབ། །ཞག་གྲངས་ཉེར་གཅིག་འདས་པ་དང་། །སྤྲུལ་པ་སྐུ་ཡི་སྟོབས་འགྱེད་ནུས། །མཐར་ཕྱིན་འབྲས་བུ་སྡུག་བསྔལ་གྲོལ། །གསང་སྔགས་དངོས་གྲུབ་དབང་ལས་འབྱུང་། །དབང་བརྟན་པ་ཡི་དམ་ཚིག་བཤད། །གསང་སྔགས་སྤྱི་ཡི་དམ་ཚིག་དང་། །ཁྱད་པར་དབང་བཞིའི་དམ་ཚིག་ནི། །ས་མ་ཡ་ནི་འབུམ་སྡེ་སོགས། །དབྱེ་ན་བརྗོད་ཀྱིས་མི་ལང་ཡང་། །མདོར་བསྡུས་སྐུ་དང་གསུང་དང་ཐུགས། །རྣལ་འབྱོར་ལུས་ངག་ཡིད་ལ་སྦྱར། །དམིགས་པ་བླ་མ་རྡོ་རྗེ་མཆེད། །བསྲུང་བའི་ཡུལ་གྱིས་རྣམ་པར་དབྱེ། །སྡོམ་པ་ལུས་ངག་དབང་དུ་འདུས། །དེ་ཡང་བསྲུང་བྱ་སྲུང་བྱེད་གཉིས། །བསྲུང་བའི་རྒྱུ་དང་གསུམ་ཡིན་ནོ། །བསྲུང་བྱ་རྡོ་རྗེ་སློབ་དཔོན་ཡིན། །སྲུང་བྱེད་བུ་སློབ་སྣོད་ལྡན་ཡིན། །བསྲུང་རྒྱུ་སྐུ་གསུང་ཐུགས་གསུམ་ཡིན། །དེ་ཡང་ལུས་ངག་ཡིད་གསུམ་གྱིས། །མི་དགེའི་ལས་རྣམས་ཀུན་སྤངས་ཏེ། །དཀྱིལ་འཁོར་གསུམ་དང་འབྲལ་མི་བྱ། །རྫོགས་པ་ཆེན་པོའི་དོན་ཉིད་ལ། །བསྲུང་དུ་མེད་པའི་དམ་ཚིག་དང་། །ཡེ་བསྲུངས་ཆེན་པོའི་དམ་ཚིག་དང་། །བསྲུང་མཚམས་བྲལ་བའི་དམ་ཚིག་དང་། །མཉམ་པ་ཉིད་ལ་བྱེ་བྲག་མེད། །མེད་དང་ཕྱལ་པ་ལྷུན་གྲུབ་ཆེ། །ཉག་གཅིག་ཟང་ཐལ་ཉིད་དུའོ། །སྣང་བ་ཡུལ་གྱི་དམ་ཚིག་དང་། །རྟོགས་བྱེད་ལྟ་བའི་དམ་ཚིག་དང་། །སྤྱད་རྒྱུ་ངེས་པའི་དམ་ཚིག་དང་། །བསྲུང་མཚམས་བཅས་པའི་དམ་ཚིག་བཞི། །ལམ་ཞུགས་རྣམས་ཀྱིས་བསྲུང་བར་བྱ། །དམ་ཚིག་དམ་ཚིག་ཅེས་བྱ་བ། །གུད་ན་ཡོད་པ་མ་ཡིན་ཏེ། །རང་རིག་སྣང་བའི་དོན་རྟོགས་ན། །དམ་ཚིག་རྒྱལ་པོ་ཞེས་བྱའོ། །སངས་རྒྱས་ཀུན་ལ་དམ་ཚིག་མེད། །སེམས་ཅན་དུས་ན་སྐྱོན་ཡོན་བྱུང་། །ཡང་དག་རིག་པའི་དོན་རྟོགས་ནས། །ཉམས་
དང་མ་ཉམས་གཉིས་ལས་འདས། །བསྲུང་དང་མ་བསྲུངས་ཕྱོགས་ལས་འདས། །ཡེ་བསྲུངས་ཆེན་པོའི་དོན་ལ་ལྟོས། །བསྲུངས་པའི་ཡོན་ཏན་བརྗོད་ལས་འདས། །མ་བསྲུངས་ན་རཀ་དམྱལ་བར་སྐྱེ། །དེ་ལྟར་མན་དག་སྟོན་པའི་སློབ་དཔོན་ལ། །རང་ལུས་དང་ནི་རིན་ཆེན་རྫས། །ཤིན་ཏུ་དཀོན་པ་དག་གིས་བརྟེན། །ཁུ་བོ་ཕ་དང་མ་དང་མིག །བུ་དང་ཆུང་མ་ནོར་གྱི་མཆོག །སྒོ་གསུམ་ཟོལ་སོགས་མེད་པ་ཡིས། །རབ་ཏུ་གཅེས་དང་ཡིད་འཐད་འབུལ། །དབང་བསྐུར་ཐོག་མ་ཐ་མ་རུ། །དགའ་སྟོན་མ་བྱས་དངོས་གྲུབ་མེད། །སྡིག་པ་མ་སྦྱངས་ལམ་མི་བགྲོད། །དགའ་སྟོན་ཆེན་པོས་མཆོད་པ་ཡིས། །བླ་མ་དང་ནི་དེ་ཡི་འཁོར། །དེ་བཞིན་རང་གི་རྡོ་རྗེའི་སྤུན། །གཅིག་དག་གཉིས་དག་གསུམ་དག་ནས། །བརྒྱ་སྟོང་གྲངས་མེད་དག་ལ་ནི། །ཚོགས་ཀྱི་དགའ་སྟོན་སུས་བྱས་པ། །ལེགས་པ་ཐམས་ཅད་འགྲུབ་པ་དང་། །ཉེས་པ་ཀུན་ལས་གྲོལ་བར་འགྱུར། །བླ་མ་ཡི་དམ་མཁའ་འགྲོ་དང་། །ཆོས་སྐྱོང་རྡོ་རྗེའི་སྤུན་ལ་སོགས། །ཚོགས་མཆོད་ཡོན་གྱིས་མ་མཉེས་ན། །ནད་མང་ཚེ་ཐུང་བར་ཆོད་འབྱུང་། །ཐུན་མོང་དངོས་གྲུབ་མེད་པ་དང་། །མཆོག་ལ་རིང་དུ་སོང་བ་དང་། །ཚེ་འཕོས་ཡི་དྭགས་གནས་སུ་སྐྱེ། །བླ་མ་དང་ནི་དབང་མཆོག་གི། །གསུང་དང་གཞུང་ལས་འགལ་བ་ན། །ན་རཀ་སྡུག་བསྔལ་མྱོང་བར་འགྱུར། །བཀའ་དང་མ་འགལ་ཡོན་ཏན་ནི། །ཆོས་སྐུ་ཀུན་ཏུ་བཟང་པོ་འགྲུབ། །ཕྲིན་ལས་བཞི་པོ་ཐོགས་པ་མེད། །དེ་ཕྱིར་བླ་མའི་བཀའ་བཞིན་སྒྲུབས། །ཞེས་གསུངས་ནས། བསྲུང་ཉམས་མེད་པའི་དམ་ཚིག་ཆེན་པོ་ལ་ལྷན་ནེར་བཞུགས་སོ། །ཐེག་པའི་སྤྱི་ཕུད་ཀློང་ཆེན་རབ་འབྱམས་ཀྱི་རྒྱུད་ལས། དབང་ཐོབ་པའི་ཡོན་ཏན་དང་། མ་ཐོབ་པའི་སྐྱོན་དང་། དམ་ཚིག་བསྟན་པའི་ལེའུ་སྟེ་སོ་བཞི་པའོ།། །།ས་མ་ཡ། རྒྱ་རྒྱ་རྒྱ། སེམས་
དཔའ་རྡོ་རྗེས་ཡང་ཞུས་པ། །ཀྱེ་ཧོ། སྐྱེ་མེད་འགག་མེད་ཀུན་ཏུ་བཟང་། །དབང་གི་རིམ་པ་དེ་ལྟར་ན། །ཉམས་ལེན་སྔོན་དུ་འགྲོ་བ་རྣམས། །རིག་མདངས་འཁོར་ལ་བཀའ་སྩོལ་ཅིག །གསན་དགོངས་སྟོན་པས་བཀའ་སྩལ་པ། །ཨ་ཧོ་སེམས་དཔའ་རྡོ་རྗེ་ཉོན། །མ་ཡེངས་འཁྲུལ་མེད་བློ་ལ་ཟུང་། །སྐལ་བཟང་ཐར་པ་འདོད་པའི་མི། །དབེན་ཞིང་ཉམས་དགའི་གནས་ཉིད་དུ། །ཆོས་དང་མཐུན་པའི་གྲོགས་དང་འགྲོགས། །སེམས་སྦྱང་བདུན་པོ་སྔོན་དུ་གཏད། །དཀོན་མཆོག་སྐྱབས་སོང་སེམས་བསྐྱེད་ལ། །འཁོར་བའི་མཚན་ཉིད་མི་རྟག་བསམ། །འགྲོ་ལ་སྙིང་རྗེ་བྱང་སེམས་བསྒོམ། །བསོད་ནམས་ཚོགས་བསགས་སྡིག་པ་སྦྱང་། །དེ་ལ་དགོས་ཆེད་རྣམ་པ་གཉིས། །གནས་སྐབས་ཚེ་འདིར་བློ་ཟློག་ཅིག །ཅི་བྱས་ཆོས་སུ་འགྲོ་བ་དང་། །མཐར་ཐུག་རང་དང་གཞན་གྱི་དོན། །རྒྱ་ཆེན་འགྲུབ་པའི་དགོས་པ་ཡོད། །དེ་ཡང་ལུས་ངག་ཡིད་གསུམ་ལ། །དང་པོ་ལུས་ཀྱི་སྔོན་འགྲོ་ནི། །རིགས་དྲུག་སྤྱོད་པ་སྣ་ཚོགས་སྤྱད། །རྡོ་རྗེ་སྐྱིལ་ཀྲུང་དང་བཅས་ཏེ། །ལུས་སྦྱངས་སེམས་ལ་ཕན་པའོ། །ལུས་ཀྱི་ཞེན་ལོག་སྡིག་པ་འདག །ངག་གི་སྔོན་འགྲོ་རིགས་དྲུག་གི། །སྒྲ་དང་ཞི་ཁྲོ་འབྱུང་བའི་སྒྲ། །རྣམ་པ་སྣ་ཚོགས་བརྗོད་པར་བྱ། །ངག་གིས་ཧཱུྃ་ཞེས་བརྗོད་པ་ལ། །རྒྱས་གདབ་པ་དང་རྩལ་ཉིད་སྦྱང་། །གཉེན་བཙལ་ལམ་དུ་ཞུགས་པར་བྱ། །དེ་ལྟར་ངག་སྦྱངས་སེམས་ལ་ཕན། །ངག་གི་ཞེན་ལོག་ངག་སྒྲིབ་འདག །སེམས་ཀྱི་སྔོན་དུ་འགྲོ་བ་ནི། །དུས་གསུམ་བློ་རྟོག་སྣ་ཚོགས་དང་། །དུག་ལྔ་དུག་གསུམ་ལྷའི་དཀྱིལ་འཁོར། །རིགས་དྲུག་སྡུག་བསྔལ་བློ་ལ་བླང་། །འདུས་པ་ཐམས་ཅད་མི་རྟག་པར། །ཀུན་ཀྱང་འཇིག་པའི་ཆོ་འཕྲུལ་བསྒོམ། །དེ་རྣམས་བསྒོམ་པའི་མཁན་པོ་ནི། །སེམས་ལ་ཐུག་གམ་མ་ཐུག་བརྟག །སེམས་སུ་ཐུག་ན་དགེ་སྡིག་གང་ཆེ་བརྟག །དེ་ནས་སེམས་འདི་གང་དང་འདྲ། །
འདྲ་དཔེ་མང་དུ་བསྡུར་བར་བྱ། །དེ་ནས་ལུས་ངག་ཡིད་གསུམ་པོ། །གཙོ་བོ་གང་ཡིན་ཐག་ཀྱང་བཅད། །དེ་ནས་སེམས་ཀྱི་བྱུང་ས་བཙལ། །མ་རྙེད་ཆོས་ཀྱི་སྐུ་དང་འཕྲད། །དེ་ནས་སེམས་ཀྱི་གནས་ས་བཙལ། །མ་རྙེད་ལོངས་སྤྱོད་སྐུ་དང་འཕྲད། །དེ་ནས་སེམས་ཀྱི་འགྲོ་ས་བཙལ། །མ་རྙེད་སྤྲུལ་པའི་སྐུ་དང་འཕྲད། །དེ་ལྟར་སེམས་ཀྱིས་འདུས་བྱས་པས། །ཞེན་ལོག་བར་ཆད་ཞི་བ་དང་། །སྒྲིབ་པ་སྐད་ཅིག་གོལ་ས་མེད། །ཆོས་ཀྱི་སྐུར་གྲོལ་གཉིས་མེད་འདའ། །དེ་ནས་རྣལ་དུ་དབབ་པ་ལ། །ལུས་ཀྱི་རྣལ་འབེབས་མི་འགུལ་བས། །ཕུང་ཁམས་རྒྱས་པའི་དགོས་པ་ཡོད། །ངག་གི་རྣལ་འབེབས་མི་སྨྲ་ཞིང་། །བརྗོད་མེད་འཆར་བའི་དགོས་པ་ཡོད། །སེམས་ཀྱི་རྣལ་ཕེབས་འཕྲོ་འདུ་བཅད། །ཞེན་འཛིན་གྲོལ་བའི་དགོས་པ་ཡོད། །མཐར་ཐུག་དགོས་པ་ལུས་དལ་བས། །སྤྲུལ་པའི་སྐུ་ལ་རེག་པ་ཡིན། །ངག་དལ་ལོངས་སྐུར་རེག་པ་ཡིན། །སེམས་དལ་ཆོས་སྐུར་རེག་པ་ཡིན། །ཐུན་མོང་འབྱུང་བ་མི་འཁྲུག་ཅིང་། །མཐར་ཐུག་ལུས་ངག་ཡིད་གསུམ་གྱི། །འཛིན་པ་རང་དག་དགོས་པའོ། །དེ་ནས་སོར་འདུག་བྱ་བ་ནི། །ནང་ཚང་ཅན་གྱི་གདན་སྟེངས་སུ། །རྐང་པ་རྡོ་རྗེའི་སྐྱིལ་ཀྲུང་བཅའ། །ལག་པ་གཉིས་པོ་མཉམ་གཞག་བསྣོལ། །ལུས་པོ་མདའ་སྙུག་བཞིན་དུ་བསྲང་། །དཔུང་པ་རྒོད་གཤོག་བཞིན་དུ་བརྒྱངས། །མཇིང་པ་གཞུ་མོ་བཞིན་དུ་བཀུག །ལུས་ཁོག་ཕྲག་པ་གཟིངས་ལྟར་བསྟོད། །མིག་དང་སྣ་རྩེ་སེམས་རྩེ་བསྟུན། །དེ་ལྟར་སྔོན་འགྲོ་རྫོགས་པར་བྱ། །ཐེག་པ་ཀུན་གྱི་སྤྱི་ཕུད་ཀློང་ཆེན་རབ་འབྱམས་ཀྱི་རྒྱུད་ལས། སྔོན་འགྲོའི་ལེའུ་སྟེ་སོ་ལྔ་པའོ།། །།ས་མ་ཡ། རྒྱ་རྒྱ་རྒྱ། སེམས་དཔའ་རྡོ་རྗེས་ཡང་ཞུས་པ། །ཀྱེ་ཧོ། ཐག་ཆོད་ཆེན་པོ་ཀུན་ཏུ་བཟང་། །སྔོན་འགྲོའི་རིམ་པ་གསུངས་ན་ཡང་། །ཉམས་ལེན་དངོས་གཞི་གསུང་དུ་གསོལ། །ཞུས་པའི་ལན་དུ་བཀའ་སྩལ་པ། །
ཨ་ཧོ་སེམས་དཔའ་རྡོ་རྗེ་རྩལ། །ཉམས་ལེན་དངོས་གཞི་འདི་ལྟ་སྟེ། །གཞི་ནི་ཁྲེགས་ཆོད་ལམ་ཐོད་རྒལ། །འབྲས་བུ་སྐུ་གསུམ་ཡོངས་རྫོགས་སོ། །བློ་ཡི་རིམ་པ་རྣམ་གཉིས་ཀྱིས། །དོན་གྱི་ངོ་བོ་ཉམས་སུ་བླངས། །དམིགས་པ་ཡུལ་ཅན་ལམ་རྣམས་ལ། །སྒོམ་དང་བསྒོམ་བྱའི་ཐབས་རྣམས་བསྟན། །རིག་པ་རང་སྣང་བློ་རྣམས་ལ། །བརྟག་པའི་ཐབས་རྣམས་གཅིག་ཏུ་བསྟན། །དེ་ཀུན་སྡོམ་ཚིག་རྣམ་གཉིས་ཀྱིས། །རིམ་པ་བྱེ་བྲག་གཉིས་ཕྱེ་ནས། །སྐྱེས་བུ་རྣམས་ཀྱི་བློ་ལ་འཇུག །འདི་ཀུན་སྣང་བ་རང་ངེས་སོ། །དམིགས་པ་ཡུལ་ཅན་བློ་རྣམས་ལ། །ཁྲེགས་ཆོད་གདམས་པ་བསྟན་པ་ནི། །རིམ་པ་བྱེ་བྲག་འདི་ལྟ་བུ། །ཁྲེགས་ཆོད་ཉིད་དུ་ཉམས་སུ་བླང་། །ཆོས་ཉིད་འབད་རྩོལ་དང་བྲལ་བའི། །ལུས་སེམས་བྱ་བྲལ་ངང་དུ་བཞག །ཆོས་ཉིད་རང་ཐོག་ངོ་སྤྲད་པས། །རྣམ་རྟོག་ཡེ་ཤེས་ཆེན་པོར་འཆར། །ཆོས་ཉིད་རང་སར་གྲོལ་བ་ཡིས། །སྣང་བ་ཉིད་ལ་དགག་སྒྲུབ་མེད། །ལུས་སེམས་བྱ་བྲལ་ཆོས་ཉིད་ནི། །བྱ་བ་མེད་པས་ཡེ་གྲོལ་ཡིན། །བྱ་བྱེད་སྤངས་པས་བདེ་བ་རྙེད། །གྲོལ་བ་རང་བྱུང་གཞན་ལས་མིན། །བྱ་བ་བྲལ་བ་གཞིར་གཞག་གོ། །འཁོར་འདས་བྱ་བྱེད་ནམ་བྲལ་ཚེ། །རྫོགས་ཆེན་ཉིད་ལས་གཞན་མིན་ནོ། །ཨ་ཧོ།བྱང་ཆུབ་སེམས་ལ་བཙལ་དུ་ཡེ་ནས་མེད། །ཇི་བཞིན་ངང་ལ་མ་བཅོས་གང་དགར་ཐོང་། །བདག་གཞན་ཡུལ་ཅན་ཡེ་ནས་མེད་པས་ན། །མཉམ་པ་རིས་མེད་རིག་པ་གང་དགར་ཐོང་། །རྟག་ཏུ་དེ་དང་འདུ་འབྲལ་མེད་པས་ན། །གཉིས་སུ་ཡུལ་མེད་རིས་མེད་གང་དགར་ཐོང་། །བྱ་བྲལ་ལྷུན་རྫོགས་འདི་ལས་གཞན་མེད་པས། །གཞི་གཞག་བརྡལ་བའི་སྐུ་དེ་ཁ་ཡན་ཐོང་། །མཚན་ཉིད་མ་འགགས་སྣ་ཚོགས་ཅིར་ཡང་འཆར། །དབང་པོ་གཅེར་མཐོང་ཅིར་སྣང་ཆོས་ཉིད་གསལ། །སྣང་བ་རྒྱ་ཡན་རིག་པ་གང་དགར་བདེ། །
མ་བཅོས་རྣལ་འདུག་རིག་པ་ཁོང་ཀློང་བདེ། །ཤེས་པ་བག་ཡངས་བྱར་མེད་སྐྱེས་བུ་བཞིན། །གྲིམ་ལྷོད་མེད་པར་ལུས་སེམས་གང་དགར་བཞག །སུས་ཀྱང་མ་བཅོས་རང་གིས་རང་ཉིད་གསལ། །རྩོལ་སྒྲུབ་མེད་པར་ཆོས་ཉིད་བདེ་གདལ་བས། །ཡེ་ནས་ཡིན་པས་བཅོས་སུ་ག་ལ་ཡོད། །གཅིག་པུར་མ་བཅོས་ཀློང་ན་རང་གྲོལ་བདེ། །གཏད་མེད་ཕྱོགས་བྲལ་ངེས་པར་འཛིན་པ་མེད། །འཛིན་མེད་རང་ཤར་ཀུན་བཟང་རོལ་པ་ཡིན། །ཚོགས་དྲུག་ཟིལ་གནོན་སྣང་བ་རྒྱ་ཡིས་གདབ། །ཕྱི་ནང་འདུ་འཕྲོ་བྱར་མེད་ཆེན་པོའི་ཀློང་། །ཅིར་ཡང་མ་ཡིན་ཅིར་ཡང་ཡིན་པའི་ཕྱིར། །ངོ་མཚར་རྨད་དུ་བྱུང་བ་བྱ་བྲལ་ཆོས། །འཁོར་འདས་ཐེག་པ་ཀུན་ལ་དབང་བསྒྱུར་བས། །བྱར་མེད་ལྷུག་པས་ཐམས་ཅད་ཟིལ་གྱིས་གནོན། །མཐའ་རུ་གྱུར་པའི་ཡུལ་གཞན་ལོགས་ན་མེད། །བྱར་མེད་གཅིག་གིས་ཀློང་ལས་གར་མ་གཡོས། །བྱ་བྲལ་ཀུན་ཏུ་བཟང་པོའི་ས་ཉིད་ལ། །འཁོར་བ་ཀུན་བཟང་མྱ་ངན་འདས་པ་བཟང་། །ཀུན་བཟང་ཀློང་ན་འཁོར་འདས་ཡེ་ནས་མེད། །སྣང་བ་ཀུན་བཟང་སྟོང་པ་ཀུན་ཏུ་བཟང་། །ཀུན་བཟང་ཀློང་ན་སྣང་སྟོང་ཡེ་ནས་མེད། །སྐྱེ་ཤི་ཀུན་བཟང་བདེ་སྡུག་ཀུན་ཏུ་བཟང་། །ཀུན་བཟང་ཀློང་ན་བདེ་སྡུག་སྐྱེ་ཤི་མེད། །བདག་གཞན་ཀུན་བཟང་རྟག་ཆད་ཀུན་ཏུ་བཟང་། །ཀུན་བཟང་ཀློང་ན་བདག་གཞན་རྟག་ཆད་མེད། །འཆིང་གྲོལ་མེད་པས་དགག་སྒྲུབ་ཡེ་ནས་བྲལ། །གཏད་མེད་ཕྱོགས་བྲལ་ཆེན་པོ་འདི་ཡིན་ཏེ། །སྐྱེ་མེད་འགག་མེད་བྱ་བྲལ་ལྷུན་རྫོགས་དང་། །ཐོག་བབས་ཤུགས་བྱུང་གཅར་ཕོག་ཡན་པ་སྟེ། །ཀློང་རྡོལ་རང་ཤར་འགྲོ་དྲུག་གཏན་པ་བཅོམ། །སྣང་བ་སེམས་སུ་ཡེ་ནས་ངོ་སྤྲད་པས། །སྣང་བ་སྣང་བའི་སྟེང་དུ་གྲོལ་བ་ཉིད། །སེམས་ཉིད་སྟོང་པ་དངོས་མེད་ངོ་སྤྲད་པས། །ཤེས་པ་འགྱུ་བ་འགྱུ་དང་ཤར་ཐོག་གྲོལ། །སྟོང་པ་ཆོས་སྐུ་ཀ་དག་ངོ་སྤྲད་པས། །སྣང་ཤེས་གཉིས་མེད་ཆོས་སྐུ་གདལ་བར་གྲོལ། །གཅིག་ཤེས་པས་ནི་ཀུན་གྲོལ་ཆེན་པོའི་ཕྱིར། །གྲོལ་བ་དེ་དང་དེ་ཉིད་སྟེང་དུ་གྲོལ། །
གྲོལ་བ་རང་བྱུང་མ་རྟོགས་གཞན་ན་མིན། །དབང་པོའི་སྒོ་རྣམས་ཐམས་ཅད་མ་བཅོས་པར། །ཅོག་གིས་བཞག་པས་རང་བཞིན་གྲོལ་བའི་གནད། །དེ་ལས་མ་བསྒྱུར་གྱུར་མེད་བཅོས་སུ་མེད། །རྣལ་མ་སོ་མ་ལྷུག་པ་རང་ཡན་ཏེ། །གྱི་འདའ་ཁ་ཡན་ཀློང་དུ་གནས་པ་ཉིད། །མ་ཡེངས་མ་འཛིན་ངང་དུ་རང་སར་ཞོག །དབང་པོའི་སྒོ་རྣམས་དགག་པར་མི་བྱ་ཞིང་། །ལུས་ངག་བྱ་བ་སྤྱད་པར་ག་ལ་བྱ། །གཉིད་སོགས་སྤང་ཞིང་བླང་བྱ་ག་ལ་ཡོད། །དབྱིངས་ལ་དབྱིངས་ཤར་དབྱིངས་ཀྱི་ཀློང་དུ་གྲོལ། །མཁའ་ལ་གྲོལ་ལོ་མཉམ་པ་ཉིད་དུ་གྲོལ། །དབྱིངས་སུ་གྲོལ་ལོ་བཟང་ངན་མེད་པར་གྲོལ། །ཀློང་དུ་གྲོལ་ལོ་མཐོ་དམན་མེད་པར་གྲོལ། །གཅིག་ཏུ་གྲོལ་ལོ་སྐྱེ་ཤི་མེད་པར་གྲོལ། །གཅིག་གི་དབྱིངས་སུ་འབད་མེད་རྩོལ་མེད་གྲོལ། །མི་གནས་རང་དག་མ་སྤངས་རང་སར་གྲོལ། །མི་མཉམ་གྲོལ་ཡང་མཉམ་པའི་དབྱིངས་སུ་གྲོལ། །གྲོལ་བའི་དུས་ན་རང་གྲོལ་རང་ས་ཟིན། །གྲོལ་དང་མ་གྲོལ་དབྱིངས་ན་ཡེ་མེད་པས། །ཇི་ལྟར་གྲོལ་ཡང་རང་སར་ང་ལ་གྲོལ། །ཀུན་ཀྱང་རོ་གཅིག་མཉམ་པའི་དབྱིངས་སུ་གྲོལ། །ལུགས་ཟློག་མེད་པར་དབྱིངས་སུ་གྲོལ་བའོ། །ཆོས་ཉིད་ཀློང་དུ་གྲོལ་ལོ་དབྱེ་བསལ་མེད། །རྩོལ་བ་མེད་པར་གྲོལ་ལོ་སྒྲུབ་ཏུ་མེད། །ངེས་པ་མེད་པར་གྲོལ་ལོ་གཟའ་གཏད་མེད། །ལྷུན་གྱིས་གྲུབ་པར་གྲོལ་ལོ་ཕྱོགས་རིས་མེད། །མཚན་མ་ཐམས་ཅད་རང་སར་གྲོལ་བའི་ཕྱིར། །བྱང་ཆུབ་སེམས་ལ་གྲོལ་དང་མ་གྲོལ་མེད། །ནམ་མཁའི་ཀློང་ན་ཇི་ལྟར་བྱས་ཀྱང་གྲོལ། །ལྷུན་གྲུབ་ཀློང་ལ་གང་ལྟར་བྱས་ཀྱང་གྲོལ། །ཀུན་ཀྱང་འདྲའོ་གཞན་མེད་ཡེ་ནས་གྲོལ། །སྤང་བླང་མེད་དེ་རང་སར་རང་ཤར་གྲོལ། །ཕྱོགས་གཅིག་ཕྱོགས་མེད་འདོད་པ་ཁ་གཏིང་མེད། །མཉམ་དང་མི་མཉམ་ཙམ་གྱི་མཐའ་ལས་གྲོལ། །རྒྱུ་རྐྱེན་གཉིས་ལ་ཡེ་ནས་མི་གནས་ཤིང་། །འབྲས་བུ་རེ་དང་དོགས་པ་མེད་པའི་ཕྱིར། །འཁོར་འདས་གཉིས་ཀྱི་མཐའ་ལས་རང་གྲོལ་ལོ། །
བཟང་ངན་མེད་པར་ལྷུན་རྫོགས་བདེ་བར་གནས། །མཐོ་དམན་མེད་པར་མཉམ་པའི་དབྱིངས་སུ་གྲོལ། །མདོར་ན་ལུས་ངག་ཡིད་གསུམ་རང་སོ་ལ། །ཡིད་བྱེད་རྟོག་པ་ཕྱིར་མ་འཕྲོས། །དབང་པོའི་ཚོགས་དྲུག་ཡུལ་རྣམས་ལ། །ཤེས་ཤིང་དཔྱོད་པའི་ཡུལ་མ་འགྱུས། །རང་སྣང་མི་རྟོག་ཆེན་པོ་ལ། །རང་གསལ་རྟོག་མེད་ཉམས་མྱོང་སྐྱེ། །ཅོག་བཞག་གཅེར་བཞག་རང་སར་བཞག །ཆོས་ཉིད་རང་སར་གྲོལ་བའི་གནད། །དེ་ལྟར་སྣང་ཤེས་ཐམས་ཅད་ཀུན། །ཆོས་ཉིད་ཆེན་པོའི་ཀློང་ཡངས་ལས། །བླང་བར་བྱ་བ་གང་ཡང་མེད། །གཞག་པར་བྱ་བ་ཅུང་ཟད་མེད། །གང་དུ་མེད་པའི་ཆོས་ཉིད་ཀློང་། །ཅིར་སྣང་རང་གི་ཆོས་ཉིད་ལས། །བཅོས་མའི་ཆོས་ཉིད་ག་ལ་ཡོད། །ཇི་ལྟར་བྱས་ཀྱང་མི་རྟོག་སྐྱེ། །སྤང་བླང་མེད་པར་རང་སྣང་ངོ་། །སྤང་མེད་སྤང་བའི་ཆོས་དང་བྲལ། །སྤང་བ་མི་དམིགས་སྤང་བྱ་མེད། །ཤེས་པ་ཡུལ་ལ་སྣང་བའི་ཚེ། །སྣང་བ་དེ་ཉིད་རང་སྣང་སྟེ། །ཤེས་པ་མི་བསྒྲིམ་ཁ་ཡན་དུ། །ཆོས་ཉིད་ཀློང་དུ་ཡན་པར་བཞག །དུག་ལྔའི་རྟོག་པ་ཅི་སྐྱེས་ཀྱང་། །ང་ཡི་རིག་པ་རྟོག་མེད་ཡིན། །རང་རིག་རྟོག་པ་ཀུན་དང་བྲལ། །ཡེ་ནས་གོལ་བས་བསྐྱར་གཞི་མེད། །རང་གིས་གྲོལ་བས་གཉེན་པོ་མེད། །ཡོངས་སུ་གྲོལ་བས་འབད་པ་མེད། །མཐའ་གྲོལ་ཡིན་པས་མུ་གཞི་འགག །གཅིག་གྲོལ་ཡིན་པས་དུ་མ་སྟོངས། །གཅིག་གྲོལ་གཉིས་གྲོལ་ཐམས་ཅད་གྲོལ། །ཆོས་ཉིད་ཀློང་ཡངས་ཨེ་མ་ཧོ། །ཨ་ཧོ་རིག་མདངས་འཁོར་རྣམས་ཉོན། །དང་པོ་ཐོག་མ་ཁྲེགས་ཆོད་ཀྱིས། །ལྟ་བ་གཏན་ལ་དབབ་པར་བྱ། །འཁོར་བའི་ལམ་རྒྱུན་གཅད་འདོད་པས། །བྱ་བྱེད་རྫོགས་པས་རྫོགས་པའོ། །མཐའ་དང་བྲལ་བས་དབུས་མི་གནས། །ཡོངས་སུ་རྫོགས་པས་མཐའ་དབུས་མེད། །ལྷག་མ་མེད་པས་ཆ་ཤས་མིན། །གཅིག་ཏུ་མ་ཡིན་གཉིས་མཐའ་ཟད། །དུ་མར་མི་གནས་གཅིག་མཐའ་ཟད། །མཐའ་ཡང་མི་གནས་རང་སངས་ཉིད། །
བརྗོད་དུ་མེད་པའི་ཚིག་གི་གཞི། །དངོས་བྲལ་སྟོང་པ་སྙིང་པོའི་དོན། །ཕྱོགས་སུ་མ་ལྷུང་ངོ་མཚར་ཆེ། །འདི་ཤེས་འཁོར་བའི་ལམ་རྒྱུན་འགགས། །ལྟ་བ་བལྟ་རུ་མེད་དེ་གཅེར་གྲོལ་དང་། །སྒོམ་པ་བསྒོམ་རྒྱུ་མེད་དེ་རང་བབས་ཀློང་། །སྤྱོད་པ་སྤྱོད་རྒྱུ་མེད་དེ་བདག་འཛིན་གྲོལ། །འབྲས་བུ་ཐོབ་རྒྱུ་མེད་དེ་རྒྱུ་འབྲས་ཟད། །ཆོས་སྐུ་མཚན་མའི་ཡུལ་དང་བྲལ། །ལོངས་སྐུ་གཟུང་འཛིན་ཡུལ་དང་བྲལ། །སྤྲུལ་སྐུ་ཆགས་པའི་ཡུལ་དང་བྲལ། །རྟོག་མེད་རང་སངས་རྙོག་པ་མེད། །འཛིན་མེད་རང་གྲོལ་ཕྱོགས་རིས་མེད། །སྣང་བ་རྟོག་མེད་མཁའ་ལ་རོལ། །སྐྱེ་མེད་ཆོས་ཉིད་མཉམ་པ་ཉིད། །ཡང་དག་ཆོས་ལ་སྒྲོ་བཏགས་མེད། །བསམ་འདས་བརྗོད་མེད་ངོ་བོ་ནི། །རྣམ་རྟོག་ཕྱོགས་སུ་མ་ལྟུང་བ། །མི་རྟོག་སྐུ་ལ་ཡང་དག་བལྟ་བར་བྱ། །བསྒོམ་མེད་སྒོམ་བྲལ་ཉིད་ཀྱི་ངོ་བོ་བཟུང་། །འདའ་མེད་བསྲུང་མཚམས་བྲལ་བའི་དམ་ཚིག་བསྲུང་། །ཆོས་རྣམས་རང་བཞིན་བདག་མེད་པས། །དངོས་པོ་མེད་པའི་འདུ་ཤེས་བསྒོམ། །རང་སྣང་ཡིད་སྤྱོད་དག་པ་ལ། །བློ་འདས་རང་རིག་ངང་ལ་སྤྱོད། །སྤང་ཐོབ་མེད་པའི་འབྲས་བུ་ལ། །རེ་དོགས་མེད་པའི་རྒྱུ་འབྲས་ཡལ། །གཟུགས་སྣང་ཐམས་ཅད་སྟོང་པ་ཉིད། །སྟོང་པ་ཐམས་ཅད་གཟུགས་སྣང་ངོ་། །སྟོང་དང་མཚན་མ་མེད་པར་ཡོངས་ཤེས་ན། །སྤྲོས་མེད་དག་པའི་ཡེ་ཤེས་ཡིན། །བློ་ཤེས་རྟོག་པས་བྱང་ཆུབ་ཚོལ་མི་བྱེད། །གང་ཞིག་དེ་ནི་ཕ་རོལ་ཕྱིན། །ཁྲེགས་ཆོད་ང་ཡི་ལྟ་བ་ལ། །ངོ་བོ་རང་ཐོག་ཕབ་པ་ཡིན། །རིག་པ་ཡེ་ཤེས་སྣང་མེད་ལས། །བེམ་པོའི་སྣང་བས་ངས་མི་སྒྲིབ། །སྟོང་པའི་ཆོས་ཉིད་ཡུལ་མེད་པས། །སྟོང་པ་ཉིད་ལ་ང་མི་གནས། །མཚན་མར་འཛིན་པའི་དངོས་དག་པས། །འཛིན་པའི་ཆོས་ལ་ང་མི་གནས། །ཤེས་རབ་ཆེན་པོ་རང་བྱུང་བས། །སྡེ་སྣོད་ཆོས་ལ་ང་མི་གནས། །ང་ལ་དགེ་དང་སྡིག་མེད་པས། །འཁོར་བའི་ཆོས་ལ་ང་མི་གནས། །ཁྲེགས་
ཆོད་གཞི་ཡི་ལྟ་བ་ལ། །ཐམས་ཅད་ང་ཡི་ངོ་བོར་རྫོགས། །ང་ནི་སྟོང་པའི་ཚིག་དང་བྲལ། །ང་ལ་མུན་པའི་ཆོས་མེད་པས། །ང་ནི་ཡེ་ནས་སྐྱོན་དང་བྲལ། །ང་ལ་འབྱུང་བའི་བདུད་མེད་པས། །ང་ནི་སྣ་ཚོགས་རྐྱེན་དང་བྲལ། །ང་ལ་རྟག་བའི་མཐའ་མེད་པས། །ང་ནི་ཡིད་ཆེས་ཆོས་དང་བྲལ། །ང་ལ་འཛིན་པའི་ཚིག་མེད་པས། །ང་ནི་ཆད་པའི་ཕྱོགས་དང་བྲལ། །ང་ལ་དངོས་པོའི་ཡུལ་མེད་པས། །འཁོར་བའི་སྡུག་བསྔལ་ཆོས་ལས་གྲོལ། །ང་ལ་འཛིན་རྟོག་མེད་པ་ཡིས། །ང་ནི་དགེ་སྡིག་གཉིས་དང་བྲལ། །ང་ལ་ཕྱོགས་ལྷུང་མེད་པ་ཡིས། །ང་ནི་འཁྲུལ་པའི་སེམས་དང་བྲལ། །ང་ལ་བྱས་པའི་ཆོས་མེད་པས། །ང་ནི་རང་བྱུང་ལྷུན་གྱིས་གྲུབ། །རང་བྱུང་ཡེ་ཤེས་ལྟ་བ་ལ། །ང་ལ་དཔྱོད་པའི་ཡུལ་མེད་དོ། །ང་ལ་སྔ་རབས་འདས་པ་མེད། །ང་ལ་ཕྱི་རབས་འབྱུང་བ་མེད། །ང་ལ་ད་ལྟའི་སྣང་བ་མེད། །ང་ལ་ལས་དང་བག་ཆགས་མེད། །ང་ལ་མ་རིག་པ་ཡང་མེད། །ང་ལ་ཡིད་ཀྱང་ཡོད་མ་ཡིན། །ཤེས་རབ་འཁོར་བ་གཉིས་ཀ་མེད། །འཁོར་བ་མྱང་འདས་གཉིས་ཀ་མེད། །རིག་པ་ཉིད་ཀྱང་ཡོད་མ་ཡིན། །ཡེ་ཤེས་སུ་ཡང་སྣང་བ་མེད། །རང་བྱུང་ཡེ་ཤེས་སྲོག་མེད་པས། །དགེ་སྡིག་གཉིས་ལས་འདས་པའོ། །རང་བྱུང་ཡེ་ཤེས་གཞི་མེད་པས། །སྣང་བའི་རྟོག་པ་ཆོད་པའོ། །ང་ལ་འདུ་འབྲལ་གཉིས་མེད་པས། །ཡེ་ཤེས་སྐུ་ཉིད་མངོན་པར་སྣང་། །ང་ལ་གཟུགས་སྣང་མཐའ་དང་བྲལ། །ཡུལ་སྣང་ཀུན་ལས་འདས་པའོ། །ང་རང་བྱུང་ཡེ་ཤེས་རྩིས་མེད་པས། །གཟུང་འཛིན་གཉིས་ལས་འདས་པའོ། །ང་ལ་རང་བྱུང་ཡེ་ཤེས་ཕྱི་ནང་མེད། །སྐྱོན་དང་ཡོན་ཏན་གཉིས་ལས་འདས། །ང་རང་བྱུང་ཡེ་ཤེས་ཀ་ནས་དག །ཡིན་མིན་གཉིས་ཀྱི་མཐའ་ལས་འདས། །ང་ལ་རང་བྱུང་ཡེ་ཤེས་ཆོས་མེད་པས། །མཐའ་གཉིས་ལས་ནི་འདས་པའོ། །ང་ལ་རང་བྱུང་ཡེ་ཤེས་འགྱུ་བྱེད་མེད། །ཤེས་རབ་ཀུན་ལས་འདས་པའོ། །
ང་ལ་སྐྱེ་དང་འཆི་མེད་པས། །འགག་པའི་ཆོས་ནི་ཡོངས་སུ་རྫོགས། །ང་ལ་ཕྱི་དང་ནང་མེད་པས། །གསལ་བའི་ཆོས་ནི་ཡོངས་སུ་རྫོགས། །ང་ལ་སྟོང་དང་དངོས་མེད་པས། །སྣང་བའི་ཆོས་རྣམས་ཡོངས་སུ་རྫོགས། །ང་ལ་དམིགས་པའི་ཡུལ་མེད་པས། །མཐོང་བའི་ཆོས་ནི་ཡོངས་སུ་རྫོགས། །ང་ལ་ལུས་དང་སེམས་མེད་པས། །རང་སྣང་ཆོས་ནི་ཡོངས་སུ་རྫོགས། །ང་ལ་བདག་དང་གཞན་མེད་པས། །རིག་པའི་ཆོས་ལྔ་ཡོངས་སུ་རྫོགས། །ང་ལ་བྱེད་པའི་རྒྱུ་མེད་པས། །བསམ་གཏན་ཆེན་པོ་ཡོངས་སུ་རྫོགས། །ང་ལ་ཕྱི་ཡི་ཡུལ་མེད་པས། །རང་སྣང་ཡུལ་ནི་ཡོངས་སུ་རྫོགས། །ང་ལ་ཕྱོགས་དང་རིས་མེད་པས། །གསང་བའི་ཆོས་ནི་ཡོངས་སུ་རྫོགས། །ང་ལ་སྣང་བ་འགག་མེད་པས། །དབྱིངས་ཀྱི་ཆོས་རྣམས་ཡོངས་སུ་རྫོགས། །ང་ལ་གཅིག་དང་གཉིས་མེད་པས། །ཐིག་ལེའི་ཆོས་རྣམས་ཡོངས་སུ་རྫོགས། །ང་ལ་མུན་པའི་སྣང་མེད་པས། །མངོན་པར་སྣང་བའི་ཆོས་རྣམས་རྫོགས། །ང་ལ་བདག་གཞན་རྟོག་པ་མེད། །སྟོང་པའི་ཆོས་རྣམས་ཡོངས་སུ་རྫོགས། །ང་ལ་དྲི་མ་གཉིས་མེད་པས། །གསལ་བའི་ཆོས་ལྔ་ཡོངས་སུ་རྫོགས། །ང་ལ་སྐུ་ལྔ་རང་སྣང་བས། །ཞིང་ཁམས་ཆོས་རྣམས་ཡོངས་སུ་རྫོགས། །ང་ལ་སྤྲོ་བསྡུ་གཉིས་མེད་པས། །ཡེ་ཤེས་དོན་རྣམས་ཡོངས་སུ་རྫོགས། །ཆོས་སྐུའི་སྣང་བ་འགག་མེད་པས། །ང་ལ་ཡེ་ཤེས་ཡོད་མ་ཡིན། །ང་ལ་སྐྱེ་བ་ཉིད་མེད་པས། །ཡི་གེ་ཨ་ནི་ཡེ་ནས་མེད། །ང་ལ་འགག་པའི་གནས་མེད་པས། །ཡི་གེ་ཨཱོཾ་ནི་ངང་གིས་མེད། །ང་ལ་འདུ་འབྲལ་གཉིས་མེད་པས། །ཡི་གེ་ཧཱུྃ་ནི་ཤིན་ཏུ་ཟད། །སྐུ་ཡི་སྣང་བ་སྣ་ཚོགས་པས། །ཡི་གེའི་མིང་ནི་རང་གིས་སྟོང་། །ངོ་བོ་རང་བཞིན་ཐུགས་རྗེ་གསུམ་ལྡན་པས། །སྟོང་པའི་ཕྱོགས་ཆ་མེད་པའི་ཡེ་ཤེས་ལྟོས། །ཨ་ཏི་ཁྲེགས་ཆོད་ལྟ་བ་ལ། །གསོད་བྱེད་ལས་ཀྱི་བསད་ན་སྣང་བ་ཆེན་པོ་
གསལ། །སེམས་ཅན་ཐམས་ཅད་བསྒྲལ་ན་རང་སྣང་མ་དང་འཕྲད། །རྒྱུ་འབྲས་རྩད་ནས་བཅད་ན་རྒྱུ་འབྲས་རྩ་གསུམ་འབྱོང་། །དགེ་བའི་རྒྱུད་ཐག་བཅད་ན་ལུ་གུ་རྒྱུད་དང་ཉེ། །ཕྱི་ནང་བྱ་བ་བཏང་ན་སྣང་བ་རྒྱ་ཡིས་ཐེབ། །སེམས་འཛིན་ལྟ་སྒོམ་མེད་ན་ཆོས་སྐུའི་དངོས་པོ་ཡིན། །གསལ་ལ་ངོས་གཟུང་མེད་ན་ལོངས་སྐུའི་རང་བཞིན་ཡིན། །བྱ་བྱེད་ཀུན་དང་བྲལ་ན་སྤྲུལ་སྐུའི་རང་བཞིན་ཡིན། །གཅིག་པུར་དལ་བར་བསྡད་ན་རྩ་གསུམ་ལུས་ལ་འབྱུང་། །ཐད་ཀ་གྲོགས་སུ་ཤེས་ན་ཅོག་བཞག་གཅིག་གི་ངང་། །དེ་ལ་རྒྱུན་དུ་གནས་ན་དེ་ལ་ཅི་ཞིག་བྱ། །སྣང་བ་ཆེན་པོ་ཀུན་ལ་ཡང་དག་གནས། །གསང་བ་སྔགས་ཀྱི་ཁྲེགས་ཆོད་དེ་ཉིད་དོ། །ཨ་ཏི་ཁྲེགས་ཆོད་ལྟ་བ་ལ། །སྲོག་མ་བཅད་ན་དགེ་མི་འཕེལ། །ཆོས་མ་སྤངས་ན་སངས་མི་རྒྱ། །བསྟན་ལ་སྣུབས་ན་ཞིང་མི་རྒྱས། །དམྱལ་བ་ཡི་དྭགས་མ་མཆོད་ན། །དངོས་གྲུབ་དག་པ་འབྱུང་མི་ནུས། །སྡུག་བསྔལ་དང་དུ་མ་བླངས་ན། །བདེ་བ་གཏན་ལ་ཕེབས་མི་སྲིད། །ཐམས་ཅད་སྐྱེ་བར་མ་གྱུར་ན། །སྐྱེ་བ་མེད་པའི་དོན་མི་རྟོགས། །ཉོན་མོངས་མེད་ན་ཤེས་རབ་མེད། །འཁོར་བ་སྤེལ་ན་སངས་རྒྱས་ཐོབ། །སྙིང་རྗེ་མེད་ན་ཐུགས་རྗེ་འཆར། །གཏི་མུག་མེད་ན་ཡེ་ཤེས་མེད། །མ་རིག་མེད་ན་རིག་པ་མེད། །རྩ་བ་མེད་ན་རྩེ་མོ་མེད། །སངས་རྒྱས་རྣམས་ཀྱི་སློབ་དཔོན་ནི། །དམྱལ་བ་ཡིན་པར་ཤེས་པར་བྱ། །སྲོག་རྣམས་བཅད་ན་དགེ་བ་འཕེལ། །སངས་རྒྱས་པས་ནི་དམྱལ་བ་བཟང་། །སྦུབས་སུ་ལྷུང་ན་བདེ་སར་སླེབ། །བསྡད་ཅིང་ཕྱིན་ན་འགྲོ་སར་སླེབ། །ཀུན་བཟང་ཉ་གཤེར་གཉིས་སུ་མེད། །གཞི་མེད་རྩ་བྲལ་ནམ་མཁའི་སྙིང་པོ་ལྟོས། །ཁྲེགས་ཆོད་ལྟ་བའི་བརྡ་ཚིག་གོ། །རྫོགས་ཆེན་ཨ་ཏི་ཆེན་པོ་ལ། །འཁྲུལ་པ་ལས་ཟློག་ཁྲེགས་ཆོད་ནི། །རྟོག་པ་མེད་པར་ཆོས་ཀྱི་སྐུ། །མཚན་མ་མེད་པ་རང་སར་གྲོལ། །འགྱུར་མེད་ཨ་ཏིའི་ངོ་བོ་ལ། །བྱ་དང་བྱེད་པའི་ཆོས་མེད་དོ། །ཨ་ཏི་རྩེ་མོ་ཆེན་པོ་ལ། །གཅིག་རྫོགས་གཉིས་རྫོགས་
ཐམས་ཅད་རྫོགས། །རྫོགས་ཆེན་ཨ་ཏིའི་ངོ་བོ་ལ། །ཕྱི་ནང་གསང་བའི་ཆོས་རྣམས་རྫོགས། །དགེ་བ་བྱར་མེད་སྡིག་པ་སྤང་དུ་མེད། །དགེ་སྡིག་གཉིས་དང་བྲལ་བའི་རིག་པ་ཆོས་ཀྱི་སྐུ། །དགེ་བ་མི་བྱ་བྱས་ན་སངས་རྒྱས་མིན། །སྡིག་པ་མི་སྤང་སྤངས་ན་སངས་རྒྱས་འགྲུབ་མི་འགྱུར། །ཁམས་གསུམ་སེམས་ཅན་བསད་ན་མངོན་སངས་རྒྱས་པར་འགྱུར། །ཕ་མ་བསད་ན་ཡེ་ཤེས་མཐོང་བར་འགྱུར། །སྲོག་གཅོད་སྡིག་ཏུ་ག་ལ་འགྱུར། །སྲོག་བཅད་སྡིག་ཏུ་གྱུར་ན་སངས་རྒྱས་མེད་པར་འགྱུར། །སྲོག་གཅོད་སྤངས་ན་སངས་རྒྱས་རྒྱབ་ཀྱིས་ཕྱོགས། །དུས་གསུམ་སངས་རྒྱས་སྲོག་བཅད་གྲོལ་བར་འགྱུར། །སྲོག་མ་བཅད་ན་སངས་རྒྱས་འབྱུང་མི་འགྱུར། །བདག་ཉིད་ལྷ་ཡི་དཀྱིལ་འཁོར་རང་རྫོགས་པས། །ཡི་དམ་ལྷ་ལ་མཆོད་པ་མི་འབུལ་ལོ། །འབུལ་ན་འབུལ་མཁན་བཅིངས་པར་འགྱུར། །མཆོད་པ་ཕྱག་རྒྱ་ལ་སོགས་རྒྱལ་བའི་སྐུ་ལ་སྒྲིབ། །ཕྱག་རྒྱ་བསྒྱུར་ན་རིན་ཆེན་རླག་པར་འགྱུར། །དཀྱིལ་འཁོར་བྲིས་ན་རང་གི་དེ་ཉིད་ཡལ། །སངས་རྒྱས་དགོངས་པ་བྱ་བྱེད་བྲལ་བའོ། །བསམ་གཏན་ཏིང་འཛིན་ལ་སོགས་སངས་རྒྱས་སྐུ་ལ་སྒྲིབ། །བསྒོམ་ཞིང་བསྒྲུབ་པ་བྱས་ན་བསམ་གཏན་མིན། །སངས་རྒྱས་མི་བསྒྲུབ་བསྒྲུབས་ན་རྩོལ་བར་འགྱུར། །འཁོར་བ་མི་སྤང་སྤངས་ན་སངས་མི་རྒྱ། །སངས་རྒྱས་གཞན་ན་མེད་དོ་རིག་པ་ཡིན། །འཁོར་བ་གཞན་ན་མེད་དོ་རང་སེམས་ཡིན། །འདུས་བྱས་དགེ་བ་མི་བྱ་བྱས་ན་འཆིང་བའི་རྒྱུ། །མཆོད་རྟེན་ལྷ་ཁང་ལ་སོགས་འདུས་བྱས་དགེ་རྩ་ཡིན། །ཆོས་ནི་བྱས་པས་མི་ཟིན་བཞག་པས་ཟིན་པར་འགྱུར། །བྱ་བ་བཏང་བས་རྣལ་འབྱོར་མི་ཡོང་བྱ་བ་མི་སྤང་དེ་བཞིན་གཤེགས། །ཡང་དག་སངས་རྒྱས་ལམ་ནི་ཀུན་ལ་དེ་བཞིན་གཤེགས་པར་བྱ། །ཨ་ཧོ་རིག་མདངས་འཁོར་རྣམས་ཉོན། །ང་མེད་པ་ཡི་གོང་རོལ་ན། །སངས་རྒྱས་སེམས་ཅན་གཉིས་མེད་དོ། །ལམ་དང་སྒྲུབ་པ་ག་ལ་ཡོད། །ང་ལས་མ་བྱུང་
གཅིག་ཀྱང་མེད། །ང་ནི་སྟོན་པ་ཆེན་པོའོ། །ང་ལས་འབྱུང་བ་རྣམ་ལྔ་བསྐྱེད། །ང་ནི་འབྱུང་བདག་ཆེན་པོའོ། །ང་ནི་སངས་རྒྱས་ཀུན་གྱི་མེས། །ང་མེད་པ་ཡི་སྔོན་རོལ་ཏུ། །སངས་རྒྱས་བྱ་བའི་མིང་ཡང་མེད། །ང་ནི་ཐབས་ཀྱི་ཕ་རོལ་ཕྱིན། །ང་ལ་མཚན་མའི་ཆོས་མེད་པས། །ང་ཡི་སེམས་ལ་གཡོ་བ་མེད། །ང་ནི་སངས་རྒྱས་ཀུན་གྱི་དུར། །འགྱུར་མེད་དུར་ས་ང་ལ་བཏབ། །ང་ནི་སེམས་ཅན་ཀུན་གྱི་གནས། །བག་ཆགས་ལུས་ལྟར་སྣང་བའོ། །ང་ནི་དབྱེར་མེད་ཤེས་རབ་པོ། །ཤེས་རབ་ཡེ་ཤེས་བདེ་གསལ་ངང་། །འདི་ཤེས་སྐད་ཅིག་སངས་རྒྱས་སོ། །ང་ལ་ཕྱི་ནང་གསང་བ་རྫོགས། །ང་ནི་རྡོ་རྗེའི་སྙིང་པོའི་སྐུ། །ང་ལས་སངས་རྒྱས་བསྐྱེད་པའོ། །ང་ནི་སྐྱེ་མེད་རིག་པའི་དོན། །ང་ནི་དངོས་པོའི་ཆོས་དང་བྲལ། །ང་ལ་མཚན་མ་མེད་པའི་ཕྱིར། །ང་ནི་སེམས་ཅན་དུར་ནས་འདོན། །ང་ལ་ཐུགས་རྗེ་འཆར་བའི་ཕྱིར། །ང་ནི་སྟོང་པའི་ཚིག་ལས་འདས། །ང་ལ་གསལ་བྱེད་འབྱུང་བ་ཡིས། །ང་ནི་མུན་མེར་སྣང་བར་འགྱུར། །སྒྲོན་མ་རྣམ་བཞི་ཡོད་པའི་ཕྱིར། །ང་ནི་ཕྱོགས་སུ་ལྷུང་བ་མེད། །ང་ལ་འཛིན་པ་མེད་པའི་ཕྱིར། །ཁྲེགས་ཆོད་རང་བཞིན་ཆོད་པའོ། །ཁྲེགས་ཆོད་ཨ་ཏིའི་ལྟ་བ་ལ། །སངས་རྒྱས་མེད་པས་སངས་རྒྱས་མིང་ཡང་མེད། །སྟོན་པ་སངས་རྒྱས་མིང་དུ་འདོགས་པ་འཁྲུལ། །ཡང་དག་དོན་ལ་སངས་རྒྱས་སེམས་ཅན་མེད། །རང་རིག་སྟོང་པར་མི་གནས་བདེ་ཆེན་ས་ལ་གནས། །རིག་པ་འཛིན་པ་མེད་པས་སྟོང་། །སངས་རྒྱས་ཀུན་གྱི་རྗེ་བཙན་ནི། །རང་གི་རིག་པར་ཤེས་པར་བྱ། །རང་སྣང་རིག་པའི་རྒྱལ་པོ་འདི། །ཀུན་ལ་ཡོད་དེ་ཀུན་གྱིས་རྟོག་པ་མེད། །རང་སྣང་རིག་པའི་སྒྲོན་མ་འདི། །ཀུན་ལ་སྣང་ཡང་གསལ་བར་དཀའ། །མཚུངས་མེད་རྟོག་པ་མེད་པ་ཡི། །རང་གསལ་ཆིག་ཆོད་དག་པ་འདི། །དགེ་སྡིག་མེད་ལ་དོན་དང་ལྡན། །སངས་རྒྱས་ཀུན་གྱི་ཡང་གསང་སྤྱོད། །དུས་གསུམ་སངས་རྒྱས་ཐམས་ཅད་ལ། །
དགོངས་པ་གཅིག་ལས་མེད་པའོ། །སངས་རྒྱས་ཀུན་གྱི་རིག་པ་ནི། །སེམས་ཅན་ཀུན་གྱི་རང་ཡུལ་ཡིན། །འོད་ལྔའི་མུ་ཁྱུད་ཟླུམ་པོར་གནས། །སེམས་ཅན་ཀུན་གྱི་ངོ་བོ་ནི། །འགྱུར་མེད་སྐུ་ཡི་ངོ་བོ་ཡིན། །སངས་རྒྱས་སེམས་ཅན་ཐམས་ཅད་ལ། །རང་རང་ཐུགས་ལ་དཀྱིལ་འཁོར་ཚང་། །ང་ཉིད་གཅིག་པུ་དཀྱིལ་འཁོར་ལྷ། །རང་ཉིད་རྡོ་རྗེ་རྐྱེན་དང་བྲལ། །ང་ནི་དཔའ་བོ་གཅིག་པུ་ཉིད། །ང་ནི་བྱས་པ་ཐམས་ཅད་བྱེད། །གསང་སྔགས་རྒྱལ་པོ་ཚིག་ལས་འདས། །ཚིག་དང་ཡི་གེར་བསྟན་པའི་གང་ཟག་འཁྲུལ། །གསང་སྔགས་ཀུན་གྱི་གསང་བ་ཡང་བཅུད་འདི། །སྣོད་དང་ལྡན་པའི་སྐྱེས་བུ་རྣམས་ལ་སྣང་། །རྫོགས་ཆེན་ཨ་ཏི་ཡོ་ག་ནི། །དཔེར་ན་གཅན་གཟན་སེང་གེ་བཞིན། །གངས་དཀར་རྩེ་ནས་སྡེར་ཆགས་ཟིལ་གྱིས་གནོན། །དེ་བཞིན་རྫོགས་ཆེན་ཨ་ཏི་ཡོ་ག་ནི། །སྣ་ཚོགས་དོན་ཅན་སྟོན་ཅིང་ཐེག་དམན་ཟིལ་གྱིས་གནོན། །སེང་གེ་ངར་སྐད་འདོན་པས་སྡེར་ཆགས་ཐམས་ཅད་སྐྲག །རྫོགས་ཆེན་ངར་སྐད་སྟོན་པས་ཐེག་དམན་ཐམས་ཅད་བརྒྱལ། །ཀུན་དང་མི་མཉམ་རྫོགས་ཆེན་ཨ་ཏིའི་དོན། །སངས་རྒྱས་ཀུན་གྱི་གསང་བ་ཡང་གསང་ཡིན། །འདི་ལྟར་ཀློང་ཆེན་རབ་འབྱམས་ལས། །ལྟ་བ་གཏན་ལ་ཕབ་ནས་སུ། །ཁྲེགས་ཆོད་སྙིང་པོའི་དོན་ལ་སྦྱར། །དེ་ནས་ཐོད་རྒལ་གཏན་ལ་དབབ། །དེ་ནས་འབྲས་བུ་སངས་རྒྱས་བསྟན། །འཁྲུལ་ན་འཁྲུལ་པ་མ་ལ་ཟློག །རྫོགས་ཆེན་ཁྲེགས་ཆོད་དོན་དེ་སྦྱར། །ཆོས་རྣམས་ཀུན་གྱི་མདུད་པ་ནི། །ཁྲེགས་ཆོད་ཉིད་ལ་ཐུག་པའོ། །ཨ་ཧོ་སེམས་དཔའ་རྡོ་རྗེ་ཉོན། །ནམ་མཁའ་ལྟ་བུའི་སེམས་ཉིད་ལ། །ནམ་མཁའ་ལྟ་བུའི་རིག་པ་ཤར། །གང་ཤར་གཉིས་སུ་མེད་དེ་བདེ། །གཉིས་མེད་བདེ་བརྡལ་རིག་པའི་རྩལ། །འདུ་འབྲལ་མེད་པའི་ཀློང་དཀྱིལ་ན། །འཕོ་འགྱུར་མེད་པའི་དོན་ལ་ཡང་། །སྐྱེ་ཤི་མེད་པར་མངོན་སངས་རྒྱས། །འཁོར་འདས་ཐམས་ཅད་དེ་ཡི་ཀློང་། །གཟུང་འཛིན་
མེད་པར་ཡེ་ནས་སངས། །བྱང་ཆུབ་སེམས་ནི་ཀུན་གྱི་གཞི། །ལྷུན་གྱིས་གྲུབ་པས་སྤང་བླང་མེད། །མུ་མཐའ་མེད་པས་རིས་དང་བྲལ། །དེ་ཡི་ཀློང་ན་ཀུན་ཡངས་པས། །མ་འདྲེས་ཡོངས་རྫོགས་དབྱིངས་ཀྱི་རྒྱན། །དུག་གསུམ་ལམ་ཁྱེར་སྐུ་གསུམ་ཀློང་། །ཉོན་མོངས་གཏན་སྤྲུགས་འཆིང་གྲོལ་མེད། །ཡུལ་མེད་གཅིག་ལ་ཀུན་ཤར་བས། །ཆོས་ཉིད་ཟངས་ཐལ་གཞི་རྩ་མེད། །གཞི་རྩ་མེད་པའི་སེམས་ཉིད་ལ། །རྩོལ་བ་མེད་པའི་ཆོས་ཉིད་ཤར། །རང་ཤར་རང་གྲོལ་རྒྱུ་རྐྱེན་མེད། །རྒྱུ་རྐྱེན་ཡེ་ནས་ཆོས་ཉིད་ཀློང་། །རྐྱེན་མེད་ཡེ་ནས་རོལ་པའི་ཀློང་། །འབྲས་བུ་མེད་དེ་རང་བྱུང་ཀློང་། །རྒྱུ་མེད་རྐྱེན་དང་བྲལ་བས་ཡངས། །ཡེ་ནས་གནས་པའི་ཆོས་ཉིད་ཡངས། །བཙལ་ཞིང་སྒྲུབ་མེད་དེ་ཉིད་ཡངས། །དུས་གསུམ་སངས་རྒྱས་ཐམས་ཅད་ཀྱང་། །ང་ཡི་དོན་ལ་དགོངས་པ་མཛད། །ཁམས་གསུམ་སེམས་ཅན་ཐམས་ཅད་ཀྱང་། །དེ་ཡི་དོན་ལ་ཉིད་ཀྱིས་འཁོལ། །དེ་ལ་འཁོར་འདས་གཉིས་སུ་མེད། །ཐེག་པའི་རྣམ་གྲངས་དུ་མ་ཡང་། །དེ་ཡི་དོན་ལས་གཞན་མེད་དེ། །རིག་པ་ངེས་མེད་ཆོ་འཕྲུལ་ལས། །འཁོར་འདས་ལམ་པའི་ཆོས་རྣམས་ཀུན། །བཙལ་བ་མེད་པར་རང་བྱུང་སྟེ། །དེ་ཡང་ཤེས་བྱ་དབྱིངས་ཀྱི་བབ། །དབྱིངས་ལ་དབྱིངས་ཤར་ངོ་མཚར་ཆེ། །གཞི་ཤར་རང་གྲོལ་དབྱིངས་ཀྱི་ཀློང་། །ཀློང་ཡངས་བརྡལ་ཁྱབ་ངེས་པ་ལ། །འཁོར་འདས་རང་ལུགས་ཐོག་བབས་ཤར། །དེ་ལ་གཉིས་སུ་དབྱེ་བ་ནི། །གཉིས་མེད་རང་གྲོལ་ཆོས་ཀྱི་སྐུ། །དེས་ན་སེམས་ཅན་ཐམས་ཅད་ཀྱང་། །རྒྱུ་རྐྱེན་མེད་པའི་ཆོས་ཉིད་ལ། །གློ་བུར་ཆོས་སུ་སྣང་བས་ན། །གཉེན་པོའི་ཆོས་ཀྱི་གཞི་མི་དགོས། །འཁོར་འདས་མཉམ་པའི་དབྱིངས་སུ་གསལ། །མཉམ་ཉིད་གཅིག་ལ་དེར་སྣང་བས། །ཡུལ་དང་དེར་འཛིན་གཞན་ན་མེད། །མི་མཐུན་གཉེན་པོ་དབྱེར་མེད་པའི། །ཐིག་ལེ་གྲྭ་ཟུར་མེད་པ་ལ། །ཕྱོགས་སུ་འཛིན་པ་རྩོལ་བའི་བདུད། །རིམ་པས་བགྲངས་པས་འདོད་པའི་ཀློང་། །མཉམ་པའི་དོན་ལ་གང་བརྩོན་པ། །དཔག་མེད་ཏིང་
འཛིན་དོན་ལ་གོལ། །བྱ་བྲལ་རྩོལ་ན་ཐིག་ལེ་ལས། །ཆེ་བའི་ཡོན་ཏན་བསམ་ཡས་ཀྱང་། །མ་བསྒྲུབས་བཞིན་དུ་ལྷུན་གྲུབ་པས། །སངས་རྒྱས་ཞེས་སུ་བཏགས་པ་ཡིན། །གཉིས་སྣང་མཚན་མ་གློ་བུར་ཆོས། །ཐིག་ལེ་ཉིད་ལ་རང་ཤར་བས། །སེམས་ཅན་ཞེས་སུ་བཏགས་པ་ཡིན། །ཐིག་ལེའི་ཀློང་དུ་གཅིག་རྫོགས་པས། །མཉམ་ཉིད་སྒྲོ་སྐུར་ཀུན་དང་བྲལ། །བྱང་ཆུབ་སྙིང་པོ་ཞེས་སུ་བཤད། །འཁོར་བའི་འཁོར་ལོ་ཆེན་པོ་འདི། །མྱ་ངན་འདས་པའི་ལམ་པོ་ཆེ། །གཅིག་གྲོལ་ཐིག་ལེ་གཅིག་ཏུ་གྲོལ། །གཉིས་གྲོལ་ཐབས་དང་ཤེས་རབ་གྲོལ། །གསུམ་གྲོལ་སྐུ་གསུམ་ཀློང་དུ་གྲོལ། །གྲོལ་བར་མ་གྱུར་གང་ཡང་མེད། །ཐིག་ལེ་གཅིག་ལ་ཀུན་འཁོར་བས། །འཁོར་བར་མི་གནས་གང་ཡང་མེད། །དེས་ན་འཁོར་བ་ཆེན་པོ་ཡིན། །འགྲོ་དྲུག་སེམས་ཅན་ཐམས་ཅད་ཀྱིས། །རང་སེམས་སྐྱེ་མེད་མ་ཤེས་པར། །རང་ལ་གོལ་ཞིང་རང་ལ་སྒྲིབ། །བྱང་ཆུབ་སེམས་ནི་གོལ་སྒྲིབ་ཡིན། །གོལ་སྒྲིབ་གསལ་ན་བྱང་ཆུབ་མེད། །རྒྱུ་རྐྱེན་རང་སར་དག་པས་ན། །དེ་ལ་གོལ་ས་ག་ལ་ཡོད། །མེད་པའི་དོན་ལ་ཀུན་ཤར་བས། །ཆོས་ཉིད་ཀློང་རྡོལ་ཤེས་བྱའི་བབ། །དེ་ལ་དག་རྒྱུ་ཅི་ཡང་མེད། །བསྒྲུབ་པར་བྱ་བ་ཡོད་མ་ཡིན། །དེ་ཉིད་ཡིན་ནོ་བདེ་བ་ཆེ། །ཡེ་ནས་གནས་སོ་ཆོས་སྐུ་ཆེ། །ཕྱི་ནང་མེད་དོ་ཡེ་ཤེས་ཆེ། །རྒྱ་ཆེ་རབ་ཟབ་ཐེག་པའི་མཆོག །ཉོན་ཅིག་རིག་མདངས་འཁོར་རྣམས་ཉོན། །དེ་ཉིད་བཙལ་བའི་རྒྱུ་མེད་བྱ་བྲལ་ཀློང་། །རང་རྒྱུད་མེད་དོ་དེ་ཉིད་རང་གི་ཀློང་། །ཡུལ་མེད་རྣལ་འབྱོར་གཅིག་པུ་ཀློང་ན་བདེ། །ངེས་མེད་རྣལ་འབྱོར་ཕྱོགས་མེད་ཀློང་ན་བདེ། །ཕྱི་ནང་སྣོད་བཅུད་རང་གྲོལ་ཀློང་ན་བདེ། །འཇུག་ཟློག་མེད་པར་རང་ཤར་རང་གྲོལ་ཀློང་། །ཐམས་ཅད་ཀློང་ཆེན་དེ་རུ་ཀུན་གྲོལ་བདེ། །ཆོས་ཀུན་སེམས་ཉིད་ཀློང་ཆེན་དེར་ཡངས་པས། །འཁྲུལ་པའི་ཆོས་ཉིད་རང་གཞག་མཉམ་པའི་ཀློང་། །མཉམ་པའི་ཀློང་དུ་ཡེ་གྲོལ་བརྡལ་བ་ཡིན། །ཡེ་ནས་མི་འགྱུར་ཀུན་ཏུ་བཟང་པོའི་
ཀློང་། །སྐྱེ་འཇིག་མཐའ་མེད་བྱ་བྲལ་ཀློང་ཆེན་དང་། །གསེར་གླིང་ལྟ་བུར་དབྱེ་བསལ་མེད་པའི་ཀློང་། །འགྲོ་བ་རིགས་དྲུག་སྐྱེ་གནས་བཞི་པོ་ཡང་། །ཆོས་ཀྱི་དབྱིངས་སུ་སྐྱེ་ཞིང་དབྱིངས་སུ་གྲོལ། །སྐུ་གསུམ་ཐུགས་ཕྲད་རང་ཤར་རང་གྲོལ་ཀློང་། །ཀུན་ཏུ་ཟང་ཐལ་ཡེ་ཤེས་རང་ཤར་ཀློང་། །འབྲས་བུ་སྐུ་གསུམ་ལྷུན་གྱིས་གྲུབ་པའི་ཀློང་། །ལྷུན་གྲུབ་ཀློང་ནས་ཐམས་ཅད་འབྱུང་བའི་གཞི། །འཁོར་འདས་གཉིས་ཀྱང་དེ་ཡི་ཀློང་དུ་གཅིག །གཅིག་ལས་དུ་མར་མ་འགགས་ཕྲ་བའི་ཀློང་། །སྐྱེ་གནས་བཞི་ཡང་འགྲོ་བའི་ཀློང་དུ་ཤར། །འགྲོ་བ་རིགས་དྲུག་འཕྲ་བའི་ཀློང་ནས་ཤར། །ཐེག་དགུ་སྐུ་གསུམ་འཕྲ་བའི་ཀློང་ནས་ཤར། །རང་ངོ་མ་ཤེས་རང་སྣང་འཕྲ་བའི་ཀློང་། །ཀློང་གཅིག་ཆོས་སྐུ་སྐྱེ་བ་མེད་པའི་ཀློང་། །ཀློང་གཅིག་ཆོས་ཉིད་འགག་པ་མེད་པའི་ཀློང་། །བྱ་བྲལ་ཀློང་ལ་སྐྱེ་ཤི་ཡེ་ནས་མེད། །འདུ་འབྲལ་མེད་པའི་ཀློང་དུ་ཀུན་གྲོལ་བས། །མི་འགྱུར་བརྟན་པའི་ཀློང་དུ་ཉག་གཅིག་བཞུགས། །བྱར་མེད་ཟང་ཐལ་དངོས་མེད་ཀློང་། །བྱ་བྲལ་ཀློང་དུ་ཅི་བདེར་གནས། །མ་བསྒྲུབས་ལྷུན་གྲུབ་ཐམས་ཅད་འདུས་པའི་ཀློང་། །ཀློང་ཆེན་ང་ལས་མ་ཤར་ཆོས་མེད་པས། །མཉམ་པ་རིས་མེད་ཡེ་སངས་རྒྱས་པའི་ཀློང་། །རྒྱུ་འབྲས་འདས་པའི་ཆོས་ཉིད་ཟང་ཐལ་ཀློང་། །ཐིག་ལེ་བྱ་བྲལ་ཀློང་དུ་ཀུན་འདུས་པས། །བྱ་བྲལ་ལྷུན་རྫོགས་བདེ་བ་ཆེན་པོའི་ཀློང་། །བདག་ཉིད་ཆེན་པོ་ཐོག་མཐའ་མེད་པའི་ཀློང་། །མཉམ་པ་ཉིད་ལ་བཟང་ངན་མེད་པའི་ཀློང་། །མ་ངེས་མི་གནས་མཚན་མ་མེད་པའི་ཀློང་། །མ་སྤྲོས་ཀུན་ལ་ཁྱབ་གདལ་ཆེན་པོའི་ཀློང་། །ཀུན་གྲོལ་ཆེན་པོ་ལྟ་བ་འགྱུར་མེད་ཀློང་། །ཇི་ལྟར་བྱས་ཀྱང་འགག་མེད་སྒོམ་པའི་ཀློང་། །ཐམས་ཅད་གཉིས་མེད་ཀློང་དུ་རྒྱ་ཆད་མེད། །ཡེ་གྲོལ་ཆེན་པོ་ལྟ་བ་ཕྱོགས་མེད་ཀློང་། །ཡེ་ཀློང་ཆེན་པོ་སྒོམ་པ་ཕྱོགས་མེད་ཀློང་། །རང་ཤར་ཆེན་པོ་སྤྱོད་པ་ཕྱོགས་མེད་ཀློང་། །རང་བྱུང་རང་གསལ་དགོངས་པའི་ཀློང་། །འཆིང་
གྲོལ་མེད་པ་རྟོགས་པའི་ཀློང་། །སུས་ཀྱང་མི་ཤིགས་རྡོ་རྗེའི་ཀློང་། །འདུ་འབྲལ་མེད་པ་སྟོབས་ཀྱི་ཀློང་། །ཡུལ་མེད་རིག་པ་ཆོས་ཉིད་ཀློང་ན་བདེ། །དགག་སྒྲུབ་བྲལ་བ་ལྷུན་གྲུབ་ཀློང་ན་བདེ། །འདུ་འབྲལ་མེད་པ་རྟོགས་པའི་ཀློང་ན་བདེ། །བྱ་བྲལ་བདེ་ཆེན་ཆོས་ཉིད་ཀློང་ན་བདེ། །བརྡལ་བ་ཆེན་པོ་ཐིག་ལེའི་ཀློང་ན་བདེ། །ཐམས་ཅད་འདྲེལ་བ་ཐིག་ལེའི་ཀློང་ན་བདེ། །མཐའ་ལས་འདས་པ་མུ་མེད་ཀློང་ན་བདེ། །སྤང་ལེན་མེད་པ་ཀུན་བཟང་ཀློང་ན་བདེ། །སྐུ་གསུམ་ལྷུན་གྲུབ་ཡོན་ཏན་ཀློང་ན་བདེ། །འཁོར་འདས་དབྱེར་མེད་དམ་ཚིག་ཀློང་ན་བདེ། །སྙིང་པོ་རང་ཆས་སྨོན་ལམ་ཀློང་ན་བདེ། །སྐྱེ་འགག་མེད་པ་ལྟ་བའི་ཀློང་ན་བདེ། །ཕྱོགས་རིས་མེད་པ་ཀུན་ཁྱབ་ཀློང་ན་བདེ། །ཐམས་ཅད་ཀློང་ཆེན་གཅིག་ལས་ཤར་བའོ། །སྣང་ཚད་ཐམས་ཅད་ཀློང་ཉིད་ངང་ན་སྣང་། །བརྟགས་ཚད་ཐམས་ཅད་ཀློང་ཉིད་ངང་ན་སྣང་། །ཀློང་ཆེན་བརྟག་གཞི་ཀུན་དང་བྲལ། །དེས་ན་ནམ་མཁའི་ཀློང་དུ་གཅིག །རང་བཞིན་བརྡལ་ཁྱབ་འདུས་མ་བྱས་པའི་ཀློང་། །གཟུང་འཛིན་ཟིལ་གནོན་རང་རིག་བྱང་ཆུབ་ཀློང་། །དངོས་པོ་ཟིལ་གནོན་སྟོང་ཉིད་བྱང་ཆུབ་ཀློང་། །སེམས་ཉིད་ཀློང་ཆེན་ནམ་མཁའི་ངང་། །རོལ་པ་ངེས་མེད་ཐུགས་རྗེའི་ཆོ་འཕྲུལ་ཀློང་། །སྐྱེ་འགག་མེད་པ་ཡེ་ཀློང་བརྡལ་བ་ཆེ། །ཐམས་ཅད་མ་བཅོས་བརྡལ་བ་ཆེན་པོའི་ཀློང་། །རང་སེམས་གཉིས་མེད་ལྷུན་གྲུབ་གཅིག་གི་ངང་། །དེ་ལ་བཙལ་ཞིང་གཞན་ནས་སྒྲུབ་ཏུ་མེད། །རང་བྱུང་མ་སྐྱེས་སྤྲོས་དང་བྲལ་བས་ཡངས། །གཟུང་འཛིན་མེད་ཅིང་སྤྲོས་དང་བྲལ་བས་ཡངས། །ཡེ་ནས་གནས་ཤིང་སྒྲུབ་ཏུ་མེད་པས་ཡངས། །རང་ལ་མ་རྟོགས་གཞན་འཛིན་མེད་པས་ཡངས། །གཅིག་ལས་ཤར་བས་མུ་མཐའ་མེད་དེ་ཡངས། །ཐམས་ཅད་ཐིག་ལེ་གཅིག་ལས་མ་གཡོས་ཡངས། །ཆོས་རྣམས་རང་བཞིན་ལྷུན་གྱིས་གྲུབ་པས་ཡངས། །མ་བཅོས་ཆོས་སྐུ་བདག་གཞན་མེད་པས་ཡངས། །
ངེས་པར་རྟོགས་པས་གཞན་གྱི་ཆོས་མེད་ཡངས། །ཐམས་ཅད་རང་ངོ་གཅིག་ཏུ་ཤེས་པས་ཡངས། །བྱ་བྲལ་ཡེ་ནས་བཙལ་དུ་མེད་པས་ཡངས། །མི་རྩོལ་ལྷུན་གྲུབ་བརྡལ་བ་ཆེན་པོས་ཡངས། །འབྱུང་འཇུག་མེད་པར་ཐོགས་པ་མེད་པས་ཡངས། །མཐོ་དམན་མེད་པས་ཁ་གཏིང་མེད་པས་ཡངས། །ཡངས་དོག་མེད་པས་ཀློང་ཡངས་རྒྱ་ཁྱོན་བྲལ། །རང་སེམས་ཁྱབ་གདལ་ཇི་ལྟར་འདུག་གྱུར་ཀྱང་། །ཀུན་ཏུ་བཟང་པོ་མ་སྐྱེས་ཀློང་ན་ཡངས། །བཟང་མོ་མ་འགགས་རོལ་པར་ཤར་བས་ཡངས། །རང་རིག་ཡིན་ནོ་གཅིག་གི་ངོ་བོར་ཡངས། །རིག་པའི་དབྱིངས་ལ་གཉིས་སུ་མེད་པར་ཡངས། །ཡོད་མཐའ་འཁོར་བའི་ཆོས་སུ་ཤར་བ་དང་། །མེད་མཐའ་མྱ་ངན་འདས་པར་ཤར་བས་ཡངས། །བདེ་ཆེན་བྱང་ཆུབ་སེམས་ཀྱི་ཀློང་དུ་ཡངས། །མཐའ་གཉིས་མ་སྤངས་མཐའ་བཞི་འདུས་མ་བྱས། །སྤང་བླང་མེད་པས་བྱ་བྲལ་ཀློང་དུ་ཡངས། །མ་འདྲེས་ཡོངས་རྫོགས་གཅིག་རྫོགས་ཀུན་ལ་ཡངས། །མཉམ་པར་གྲོལ་བས་རིས་མེད་ཀློང་དུ་ཡངས། །གདོད་ནས་དག་པས་བཅིང་གྲོལ་གཉིས་དང་བྲལ། །ཐོགས་པ་མེད་པས་མཐའ་བྲལ་ཀློང་དུ་ཡངས། །གོས་པ་མེད་པས་གང་གིས་མ་རིག་སྟེ། །མ་བཙལ་ལྷུན་གྱིས་གྲུབ་པའི་ཀློང་དུ་ཡངས། །རང་བཞིན་འོད་གསལ་ཡེ་ནས་འཕོ་འགྱུར་མེད། །མཆོག་ཐུན་ཡོན་ཏན་འཛད་མེད་ཀློང་ན་ཡངས། །ཐིག་ལེ་ཉག་གཅིག་འགྲན་གྱིས་ཟླ་བྲལ་བས། །གཅིག་ལ་ཀུན་འབྱུང་ངོ་མཚར་ཆེའོ་ཡངས། །སྐུ་གསུམ་རྩོལ་བ་མེད་པར་ལྷུན་རྫོགས་པས། །ཡོན་ཏན་འབྲས་བུ་སྐུ་གསུམ་འཆར་བས་ཡངས། །སྐྱེ་མེད་ཆོས་སྐུས་རྟག་པའི་མཐའ་བསལ་ཏེ། །ཆོས་ཉིད་སྐྱེ་མེད་ཀློང་དུ་གྲོལ་བས་ཡངས། །འགག་མེད་གཟུགས་སྐུ་ཆད་པའི་མཐའ་བསལ་ཏེ། །འཛིན་མེད་ངེས་མེད་ཀློང་དུ་གྲོལ་བས་ཡངས། །སྐྱེ་འགག་མེད་པའི་རིག་པ་ཅིག་ཆོད་ལ། །གཉིས་འཛིན་མཐའ་ཡི་མུན་པ་མེད་པས་ཡངས། །ཡེ་ནས་བྱ་བཙལ་མེད་པའི་ཆོས་ཉིད་ལ། །
གཞན་ལ་སྣང་བ་ཅི་ཡང་མེད་དེ་ཡངས། །གང་དུ་སྣང་ཡང་རང་སྣང་ཆོས་ཀྱི་སྐུ། །གང་དུ་ཤར་ཡང་རང་སྣང་བརྡལ་བར་ཡངས། །སེམས་ཉིད་བྱ་བྲལ་ཀློང་དུ་ཀུན་རྫོགས་པས། །མ་རྫོགས་ཆོས་མེད་ཀུན་རྫོབ་ཁྱབ་གདལ་ཡངས། །རང་བྱུང་ཡེ་ཤེས་མཐའ་མེད་ཕྱོགས་མེད་ལ། །གཞན་བྱུང་མ་རིག་བག་ཆགས་མེད་དེ་ཡངས། །གང་དུ་ཤར་ཡང་རང་བྱུང་ཡེ་ཤེས་དེ། །རང་ཤར་རང་གྲོལ་རྩོལ་བའི་ཡུལ་མེད་ཡངས། །ཐམས་ཅད་བྱང་ཆུབ་སེམས་སུ་རང་གསལ་བས། །ཉམས་ལེན་ཡུལ་ཅན་སྒོམ་དུ་མེད་དེ་ཡངས། །ཇི་ལྟར་བྱས་ཀྱང་བྱ་བྲལ་རིག་པའི་ཀློང་། །སེམས་ཉིད་གཟུང་འཛིན་དགག་སྒྲུབ་མེད་དེ་ཡངས། །དེ་ཡི་ངང་ལ་མ་བཅོས་རང་གསལ་བས། །མཉམ་པར་བཞག་དང་མ་བཞག་ཆོས་ཉིད་ཀློང་། །མཉམ་ཉིད་རྒྱུན་ཆད་མེད་པའི་རྣལ་འབྱོར་པ། །མ་བཅོས་མཚན་མ་མེད་པའི་དབྱིངས་ན་ཡངས། །ཇི་ལྟར་ཤར་ཡང་ཆོས་ཉིད་བྱང་ཆུབ་སེམས། །གཡང་ས་ཉིད་ཀྱང་ཡེ་ནས་བྱ་བྲལ་ཀློང་། །ལྷུང་ས་མེད་པས་གོལ་ས་ག་ལ་ཡོད། །བྱང་ཆུབ་སེམས་ལ་ཡ་ཡོ་མེད་པས་ཡངས། །ཁྱབ་ལ་མ་ཞེན་མཉམ་ལ་རིས་མེད་པས། །དུས་རྣམས་ཀུན་དུ་མི་འབྲལ་བདེ་ཆེན་ཀློང་། །ཞེན་འཆིང་མེད་པས་སྤང་བླང་གཉིས་དང་བྲལ། །བཟང་ངན་དགག་སྒྲུབ་རྟོག་པ་མེད་པས་ཡངས། །རྣམ་རྟོག་མ་སྤངས་ཡེ་ཤེས་རང་གྲོལ་བས། །གཉིས་མེད་ཐིག་ལེ་ཆེན་པོ་རྩལ་མེད་ཀློང་། །ཉོན་མོངས་ཡེ་ཤེས་གཉིས་སུ་མེད་པའི་ཕྱིར། །འཁོར་འདས་སྤང་བྱ་སྤོང་བྱེད་མེད་དེ་ཡངས། །འཆིང་གྲོལ་གཉིས་དང་བྲལ་བ་ཆོས་ཀྱི་སྐུ། །སེམས་ལ་རྟོག་པ་ཅི་སྐྱེས་སྐྱེ་མེད་ཀློང་། །སྤང་བས་མི་སྤོང་མ་སྤངས་རང་སར་གྲོལ། །ཉོན་མོངས་རང་གྲོལ་སྐྱེ་མེད་ཀློང་ན་ཡངས། །བདེ་ཆེན་སེམས་ལ་དགག་སྒྲུབ་མེད་པའི་ཕྱིར། །དགག་བྱ་མེད་པས་བསྒྲུབ་བྱ་མེད་པའི་ཀློང་། །བསྒྲུབས་ཀྱང་མི་འགྲུབ་མ་བསྒྲུབས་རང་སར་གྲོལ། །འབྲས་བུ་རང་གནས་ལྷུན་གྲུབ་ཀློང་ན་ཡངས། །ཕྱི་
ནང་སྡེ་སྣོད་ལམ་འབྲས་ཐེག་པའི་གྲངས། །མ་བཙལ་བཞིན་དུ་ཡེ་ནས་ལྷུན་གྲུབ་ཀློང་། །དེ་དག་ཐམས་ཅད་རང་བྱུང་ཡེ་ཤེས་ཏེ། །གཅིག་ཉིད་ཡིན་ནོ་དབྱེ་བསལ་མེད་པར་ཡངས། །མཉམ་ཉིད་སེམས་ལ་བླང་དོར་མེད་པའི་ངང་། །ཕྱི་དང་ནང་དུ་བཙལ་བ་མེད་པའི་ཀློང་། །དགེ་སྡིག་བར་མཚམས་དབྱེ་བར་བྱ་བ་དང་། །རང་བཞིན་གཅིག་པས་དབྱེ་བསལ་མེད་པར་ཡངས། །རྣམ་པར་དག་པའི་ཀློང་དུ་ཀུན་སྤྱོད་པས། །སྤང་བྱ་མེད་པས་དོར་བྱ་མེད་པའི་ཀློང་། །བླང་དོར་གཉིས་སུ་མེད་པར་རང་ཤར་བས། །མཐའ་རྣམས་མ་སྤངས་རང་སར་གྲོལ་བ་ཡིན། །མ་བཅོས་བདེ་ཆེན་བརྡལ་བའི་ཀློང་ཡངས་སུ། །མཐོ་དམན་མེད་པར་གྲོལ་བས་དུར་ས་སྟེ། །བཟང་ངན་མེད་པར་གྲོལ་བས་ཐིམ་ས་ཡིན། །སངས་རྒྱས་སེམས་ཅན་འཁོར་བ་མྱ་ངན་འདས། །ཡེ་ནས་གཅིག་པས་རེ་མེད་དོགས་པ་མེད། །རེ་དོགས་མེད་པའི་ཆོས་ཉིད་སྐྱེ་མེད་ལ། །སྐྱེ་བའི་ཆོ་འཕྲུལ་བྱ་བྲལ་དབྱིངས་ཀྱི་རྒྱན། །འཇུག་ཟློག་མེད་པའི་དབྱིངས་ལས་དབྱིངས་ཉིད་ཤར། །རང་ཤར་རང་གྲོལ་བྱ་བྲལ་ཀློང་དུ་གྲོལ། །སྐྱེ་ཤི་འཕོ་འགྱུར་མེད་དོ་རྩད་ནས་བཅད། །སྔ་ཕྱི་ཐོག་མཐའ་མེད་དོ་བག་ཆགས་དག །མངལ་ཁ་སྟོང་པར་བཞག་གོ་སྐྱེ་སྒོ་བཅད། །འཁོར་འདས་ཆེ་ཆུང་བསྲེས་སོ་དབྱེར་མི་ཕྱེད། །ཅེས་གསུངས་ནས། འཁོར་འདས་གཉིས་མེད་མཉམ་ཡངས་ཆེན་པོའི་ཀློང་དུ་ལྷན་ནེར་ལྷག་གེ་བཞུགས་སོ། །ཐེག་པའི་སྤྱི་ཕུད་ཀློང་ཆེན་རབ་འབྱམས་ཀྱི་རྒྱུད་ལས། གཞི་ཁྲེགས་ཆོད་བསྟན་པའི་ལེའུ་སྟེ་སོ་དྲུག་པའོ།། །།ས་མ་ཡ། རྒྱ་རྒྱ་རྒྱ། སེམས་དཔའ་རྡོ་རྗེས་ཡང་ཞུས་པ། །ཀྱེ་ཧོ་སྟོན་པ་ཀུན་ཏུ་བཟང་། །ཁྲེགས་ཆོད་ལྟ་བ་དེ་ལྟར་ན། །གཞི་ཉིད་དེ་ལ་བརྟེན་བྱས་ནས། །ཐོད་རྒལ་ལམ་ལ་ཇི་ལྟར་འཇུག །སྟོན་པ་ཉིད་ཀྱིས་ཞིབ་རྒྱས་གསུང་། །ཞུས་པའི་ལན་དུ་བཀའ་སྩལ་པ། །ཨ་ཧོ་སེམས་དཔའ་རྡོ་རྗེ་ཉོན། །
ཁྲེགས་ཆོད་ཉིད་ལ་བརྟེན་བྱས་ནས། །ཐོད་རྒལ་ལམ་ལ་དེ་ལྟར་འཇུག །ཡིད་མཐུན་དངོས་མཐོའི་གནས་ཉིད་དུ། །འདི་ལྟར་བྱ་བ་དགུ་སྤྲུགས་བཏང་། །ལུས་ཕྱིའི་བྱ་བ་འགྲོ་འདུག་དང་། །ནང་གི་བྱ་བ་ཕྱག་སྐོར་དང་། །གསང་བའི་བྱ་བ་འཁྲུལ་འཁོར་སྤང་། །དག་ཕྱིའི་བྱ་བ་ལོང་གཏམ་དང་། །ནང་གི་བྱ་བ་ཁ་ཐོན་དང་། །གསང་བའི་བྱ་བ་ལྷ་བསྙེན་སྤང་། །སེམས་ཕྱིའི་བྱ་བ་སྤྲོ་རྟོག་དང་། །ནང་གི་བྱ་བ་ལྷ་བསྒོམ་དང་། །གསང་བའི་བྱ་བ་མི་རྟོག་བསྒོམ། །འདི་ལྟར་གསུམ་གསུམ་དགུ་པོ་བཏང་། །དེ་ཡང་ཉམས་སུ་ལེན་པ་ལ། །ལམ་གྱི་ཕུན་སུམ་ཚོགས་ལྔས་བསྟན། །གནས་ནི་ཕྱི་དང་ནང་གི་དབྱིངས། །སྟོན་པ་རྡོ་རྗེ་ལུ་གུ་རྒྱུད། །འཁོར་ནི་སྐུ་དང་ཐིག་ལེ་སྟེ། །བརྟན་པ་རིག་པ་མི་རྟོག་པ། །དུས་ནི་ལྟ་སྟངས་གཅིག་ལ་འཛོམ། །དེ་ལྟར་ཉམས་སུ་ལེན་པའི་གནད། །སྐུ་གསུམ་བཞུགས་སྟངས་གསུམ་ལ་སློབ། །ནང་ཚང་ཅན་གྱི་གདན་སྟེངས་སུ། །སེང་གེ་ཉལ་བ་ལྟ་བུ་ཡིས། །དྲན་པ་རྣམས་ཀྱི་ཐེག་པ་བཅད། །ཆོས་སྐུའི་བཞུགས་སྟངས་སེང་གེ་ཡིས། །འཁྲུལ་པའི་འཛིན་པ་དང་བྲལ་ནས། །མི་འགྱུར་རྡོ་རྗེའི་མིག་གིས་མཐོང་། །དེ་ཡི་བཞུགས་སྟངས་འདི་ལྟར་རོ། །པུས་མོ་གཉིས་པོ་ས་ལ་བཙུགས། །ཡིད་ཙམ་ཕྱིར་ལ་བསྒྲད་པར་བྱ། །རྟིང་པ་གཉིས་པོ་འཕོངས་ལ་སྦྱར། །ལག་པ་པུས་མོའི་ཕྱི་ལོགས་སུ། །ཅུང་ཟད་བསྒྲད་ལ་ས་ལ་བཙུགས། །སྒལ་ཚིགས་བསྲང་ལ་མཇིང་པ་དགྱེ། །རོ་སྟོད་སེང་གེ་ལྟ་བུར་བྱ། །མིག་གཉིས་སྨིན་དབྲག་མཁའ་ལ་གཏད། །ནང་གི་འབྱུང་བ་རྣམས་ཟད་ནས། །རྣམ་རྟོག་ཟིལ་གནོན་དགོས་པ་ཡོད། །དབྱིངས་དང་རིག་པ་ལྟ་སྟངས་ཀྱིས། །སྒྲིབ་བྱེད་བྲལ་བའི་མཁའ་ལ་བལྟ། །དབྱིངས་ཀྱི་ནང་དུ་ལུ་གུ་རྒྱུད། །རྣམ་པར་ཕྱེས་ཤིང་འབྲལ་མི་བྱ། །རྟ་རྔ་འདྲ་བའི་བར་དག་ཏུ། །ཐིག་ལེས་བརྒྱན་ཅིང་འགྲོ་འོང་ཅན། །དེ་ལྟར་སུ་ཡིས་
མཐོང་བའི་མི། །ཐོག་མའི་ཀུན་ཏུ་བཟང་པོ་དང་། །སྐལ་བ་ཉིད་ནི་མཉམ་པའོ། །ད་ནི་ལོངས་སྐུའི་བཞུགས་སྟངས་བསྟན། །གླང་ཆེན་ཉལ་བ་ལྟ་བུ་སྟེ། །མཚན་ཉིད་འཛིན་པའི་རིག་པ་མཐོང་། །གདན་གྱི་སྟེང་དུ་ཁ་སྦུབ་འདུག །འཁྲུལ་པའི་དེ་ཉིད་དབང་དུ་སྡུད། །གླང་ཆེན་ཉལ་ལ་དཔེས་བསྟན་པ། །ཆོས་ཉིད་རྣམས་ལ་ལོངས་སྤྱོད་དེ། །པདྨའི་སྤྱན་གྱིས་མཐོང་བར་འགྱུར། །ལུས་གནད་བཞུགས་སྟངས་འདི་ལྟར་རོ། །ཁ་སྦུབ་དྲང་པོར་ཉལ་བྱས་ལ། །གྲུ་མོ་གཉིས་པོ་ས་ལ་བཙུགས། །ལག་མཐིལ་གཉིས་ཀྱིས་ཨོལ་ཁུང་བརྟེན། །པུས་མོ་གཉིས་པོ་བྲང་ལ་སྦྱར། །མཇིང་བ་རྟིང་པ་རྒྱབ་ཏུ་བོར། །མིག་གཉིས་སྨིན་ཕྲག་མཁའ་ལ་གཏད། །ཟུར་གྱིས་གཡས་དང་གཡོན་དུ་ཁྲིད། །གསལ་བྱེད་རླུང་ཟིན་དགོས་པ་ཡོད། །དབྱིངས་རིག་མྱུར་དུ་མཐོང་བའོ། །གཟིགས་སྟངས་གཡོ་མེད་དལ་བར་བརྟེན། །སྐུ་གསུམ་འབྲས་བུ་མངོན་སུམ་བལྟ་འདོད་ན། །བཅུད་ཀྱི་སྙིང་པོ་དཔེ་ཡི་ཡེ་ཤེས་ལྟོས། །ཡེ་ཤེས་རང་སྣང་ལྷུག་པ་ཉིད་དུ་འཆར། །མ་བཅོས་ཅོག་བཞག་རྒྱལ་པོ་རང་གྲོལ་ཉིད། །སྐུ་གསུམ་འདུ་འབྲལ་མེད་པར་ལོངས་སྤྱོད་དོ། །ད་ནི་སྤྲུལ་སྐུའི་བཞུགས་སྟངས་བསྟན། །དྲང་སྲོང་ལྟ་བུའི་ལུས་གནད་ཀྱིས། །རང་གི་སྣང་བ་གཏན་ལ་ཕེབས། །དྲང་སྲོང་ཙོག་པུ་ལ་བརྟེན་ནས། །ཆོས་ཉིད་རྣམ་པར་རང་སྤྲུལ་ནས། །ཆོས་ཉིད་མིག་གིས་མཐོང་བར་འགྱུར། །གཞན་ཡང་རྩ་དང་འཁྲུལ་འཁོར་གྱིས། །རང་བཞིན་གནས་པའི་ཡེ་ཤེས་ལྔ། །ཆུ་བུར་མིག་གིས་མཐོང་བར་འགྱུར། །བཞུགས་སྟངས་ཉིད་ནི་འདི་ལྟར་རོ། །ཙོག་པུ་རྐང་པ་གཉིས་པོ་གཤིབས། །གསུས་པ་སྒལ་ལ་ཡུད་ཙམ་སྦྱར། །པུས་མོ་གཉིས་པོ་བྲང་ལ་སྦྱར། །གྲུ་མོ་གཉིས་པོ་པུས་མོར་བཀབ། །ལག་མཐིལ་གཉིས་ཀྱིས་འགྲམ་ཟུར་བཏེགས། །ཟིམ་བུའི་མིག་གིས་བར་སྣང་བལྟ། །ཉི་མའི་གཡས་དང་གཡོན་ཉིད་
དུ། །ཧར་པོར་ཡང་ཡང་སྐབས་སུ་བལྟ། །བཞུགས་སྟངས་དེ་ཡི་ཡོན་ཏན་གྱིས། །ལུས་ལ་དྲོད་སྐྱེ་རྣམ་རྟོག་འཆད། །ཡིད་ཙམ་ཕབ་ནས་མཁའ་ལ་བལྟ། །སྤྲུལ་སྐུའི་ཞིང་ཁམས་མཐོང་བར་འགྱུར། །དེས་ནི་འཁྲུལ་པའི་སྣང་བ་རྣམས། །ཞིང་ཁམས་དག་པར་འཆར་བའོ། །མངོན་སུམ་སྣང་འདི་ལུས་དག་སེམས། །སོ་སོའི་གནད་ནི་ངེས་པར་བསྟུན། །དེ་ཡང་ལུས་འདི་སྐུ་གསུམ་ལས། །རྒྱུན་དུ་འདའ་བར་མི་བྱའོ། །དཔེར་ན་སྦྲུལ་གྱི་ཡན་ལག་ནི། །ཡོད་ཀྱང་མ་གཅུན་མི་སྣང་ལྟར། །རིག་པ་ལུས་ལ་གནས་གྱུར་ཀྱང་། །ལུས་གནད་མ་གཟིར་མངོན་མི་འགྱུར། །ཕྱི་དབྱིངས་སྟོང་པ་ཡུལ་དང་འདྲ། །ནང་དབྱིངས་རྣམ་དག་ཁྱིམ་དང་འདྲ། །རིག་པ་ལུག་རྒྱུད་བཟུང་བ་ལ། །ལུས་གནད་གསུམ་གཟིར་མཆོག་ཡིན་ནོ། །ཨ་ཧོ་སེམས་དཔའ་རྡོ་རྗེ་རྩལ། །ངག་གི་གནད་ནི་འདི་ལྟ་སྟེ། །ངག་ནི་བསླབ་དང་གནས་པ་དང་། །ལ་བཟླ་བ་རུ་བསྟན་པའོ། །དང་པོ་བསླབ་པར་བྱ་བ་ནི། །དང་པོ་ཡུན་ཐུང་ཉིད་ལ་བསླབ། །འཛབ་སོགས་འདོན་པ་མི་སྤང་ཞིང་། །འཁྲུལ་པའི་གཏམ་རྣམས་ཐམས་ཅད་སྤང་། །ཚིག་ནི་ཞག་རེས་ཉུང་དུ་བཏང་། །དེ་ནས་ཡུན་རིང་ཉིད་ལ་བསླབ། །སྐབས་སུ་བརྗོད་རྒྱུ་མེད་ཀྱང་བརྗོད། །དེ་ནས་གནས་པར་བྱ་བ་ནི། །ཕྱག་སྐོར་མདོ་བཟླས་ཀུན་སྤངས་ལ། །སྔགས་ཀྱི་བརྗོད་པ་བགག་མི་བྱ། །གཞན་དང་ཚིག་ཟུར་ག་ལ་བརྗོད། །ལུས་ཀྱིས་བརྡ་ཉིད་བྱ་བ་སྟེ། །དེ་ནས་བརྟན་ཞིང་ལ་བཟླ་བ། །བརྗོད་པ་མཐའ་དག་བཀག་བྱས་ལ། །ལྐུགས་པ་ལྟ་བུར་གནས་པར་བྱའོ། །ལུས་ཀྱིས་བརྡ་ཡང་མི་བྱ་ཞིང་། །སེམས་ཀྱིས་བརྡ་ཙམ་བྱ་བའོ། །ངག་གི་བྱ་བ་འདི་ཆོད་ན། །རྣལ་འབྱོར་བྱ་བའི་ཆོས་ཕྱེད་ཡིན། །བརྗོད་མེད་དོན་ཉིད་རྒྱུད་ལ་འཆར། །མྱུར་དུ་སངས་རྒྱས་གལ་མདོའོ། །ཨ་ཧོ་སེམས་དཔའ་རྡོ་རྗེ་རྩལ། །སེམས་ཀྱི་གནད་ནི་འདི་ལྟ་སྟེ། །སེམས་ནི་དབྱིངས་ལ་གཏད་པས་འགྲུབ། །གནད་གསུམ་
མན་ངག་འགུལ་མི་བྱ། །ཕྱི་དབྱིངས་ནམ་མཁའ་སྟོང་པ་ལ། །རིག་པ་ཉིད་ནི་མ་བཅོས་འབེན་དུ་གཏད། །མ་ཡེངས་གཏད་པས་ཕྱི་དབྱིངས་སྟོང་པ་ལ། །ནང་དབྱིངས་རྣམ་དག་སྒྲོན་མ་སྟོང་གསལ་འཆར། །མངོན་སུམ་གསལ་ཞིང་ལྷག་མེད་འཚང་རྒྱའོ། །ཨ་ཧོ་སེམས་དཔའ་རྡོ་རྗེ་རྩལ། །མངོན་སུམ་རང་ཐོག་དབབ་པ་ལ། །གནད་ནི་རྣམ་པ་གསུམ་དུ་བསྟེན། །མངོན་སུམ་རང་ཐོག་མ་ཕེབས་ན། །ཡིད་དཔྱོད་འཛིན་པའི་སྐྱོན་ཡོད་པས། །ཟབ་མོའི་རང་སྣང་འདི་ལྟར་རོ། །དེ་ཡང་སྒོ་དང་ཡུལ་ཉིད་དང་། །རླུང་དང་རིག་པའི་གནད་ཉིད་བསྟེན། །སྒོ་ནི་སྐུ་གསུམ་མིག་གིས་བལྟ། །རྒྱང་ཞགས་འགུལ་བ་མེད་པ་ན། །འདི་དུས་ལྟ་སྟངས་གསུམ་པོ་བརྟེན། །མིག་གི་གཟིགས་སྟངས་ཤེས་པ་ཡིས། །ཆོས་ཀྱི་དབྱིངས་ལ་ལོངས་སྤྱོད་དོ། །སེམས་འཆར་སྒོ་ནི་མིག་གཉིས་ཏེ། །མིག་རྩ་བ་མེན་རྭ་འདྲ་ལ། །རྩ་ནང་ཡེ་ཤེས་འཆར་སྒོ་ནི། །དཔེར་ན་ལྷ་ཁང་སྒོ་མེད་ན། །ནང་གི་ལྷ་ཚོགས་མ་སྣང་ལྟར། །ལུས་ནི་ཙིཏྟའི་ནང་ཉིད་ན། །རིག་པ་ཡེ་ཤེས་གནས་པ་དེ། །སྒོ་གནད་མ་ཤེས་མི་མངོན་པས། །ཆོས་རྣམས་ཡིད་དཔྱོད་ལུས་པར་འགྱུར། །ལྷ་ཁང་སྒོའམ་བུམ་ནང་གི། །མེ་འོད་མཁའ་ལ་གསལ་བ་ལྟར། །ཡེ་ཤེས་འཆར་སྒོ་མིག་ཉིད་དོ། །གནད་ནི་གཟིགས་སྟངས་གསུམ་གྱིས་བལྟའོ། །ཡུལ་ནི་སྒྲིབ་བྱེད་བྲལ་བ་ཡི། །ནམ་མཁའ་རྐྱེན་མེད་ཉིད་དུའོ། །མཁའ་ཉིད་སྤྲིན་བྲལ་དྭངས་པ་ལ། །རིག་པ་མ་འཁྲུལ་རང་བྱུང་བ། །མ་འགུལ་བལྟས་པས་ལུག་རྒྱུད་འཆར། །དབྱིངས་ནི་ཕྱི་དང་ནང་དུ་སྟེ། །ཕྱི་ནི་སྤྲིན་བྲལ་མཁའ་ལ་འཛིན། །ནང་ནི་སྒྲོན་མ་ལམ་དུའོ། །རླུང་གནད་ཤིན་ཏུ་དལ་བར་བརླབ། །རླུང་རིག་དལ་བས་ཡེ་ཤེས་འགྲུབ། །ཡིད་ཙམ་ཕྱིར་ལ་ནུར་བར་བྱ། །སོ་གཉིས་བར་དུ་ནས་ཐར་ཙམ། །མིག་གཉིས་སྨིན་ཕྲག་མཁའ་ལ་གཏད། །ཟེར་གཉིས་དུས་སུ་ཁྱད་པར་བལྟ། །ཉིན་པར་སཱུརྻ་བལྟ་བྱ་སྟེ། །ནུབ་མོ་ཙནྡྲ་
བལྟ་བར་བྱ། །སེང་གེ་ལྟ་བུའི་ལྟ་སྟངས་ཀྱིས། །འཁྲུལ་པའི་ཡུལ་རྣམས་གཅིག་ཏུ་བལྟ། །གླང་ཆེན་ལྟ་བུའི་ལྟ་སྟངས་ཀྱིས། །དབྱིངས་རིག་གཉིས་པོ་གཅིག་ཏུ་བལྟ། །དྲང་སྲོང་ཙོག་པུ་ལྟ་བུ་ཡིས། །སྣང་བ་རྣམས་ཀྱི་ཚད་ཀྱང་ཟིན། །ལྟ་སྟངས་རེ་དང་བཞུགས་སྟངས་བསྟུན། །དེ་ལྟར་ལུས་ངག་ཡིད་གསུམ་པོ། །བསླབ་དང་སྦྱང་བའི་རིམ་པ་ནི། །མདུད་པ་ལྟ་བུར་གཅིག་ཏུ་དྲིལ། །ལྕགས་ཀྱུ་ལྟ་བུར་རླུང་སེམས་བཀུགས། །མདུང་ཤིང་ལྟ་བུར་གཅིག་ཏུ་དྲིལ། །གཅུད་ཕུར་ལྟ་བུར་ལུས་སེམས་གཅུན། །རྒྱ་མཚོ་ལྟ་བུར་ལུག་རྒྱུད་འཕྱར། །མེ་ལོང་ལྟ་བུར་རང་ཉིད་ལྟོས། །གཏི་མུག་ལ་སོགས་ཉོན་མོངས་གསུམ། །བཞུགས་སྟངས་གསུམ་དང་ལྡན་པར་བྱ། །ལྟ་སྟངས་གསུམ་གྱིས་རྩད་བཅད་ནས། །དཔེ་དོན་གསུམ་གྱིས་གཏན་ལ་བསླང་། །ཞེས་གསུངས་ནས། ཆོས་ཉིད་མངོན་སུམ་གྱི་སྣང་བ་ལ་ལྷན་ནེར་བཞུགས་སོ། །ཐེག་པ་ཀུན་གྱི་སྤྱི་ཕུད་ཀློང་ཆེན་རབ་འབྱམས་ཀྱི་རྒྱུད་ལས། བཞུགས་སྟངས་གནད་རྣམས་བསྟན་པའི་ལེའུ་སྟེ་སོ་བདུན་པའོ།། །།ས་མ་ཡ། རྒྱ་རྒྱ་རྒྱ། སེམས་དཔའ་རྡོ་རྗེས་ཡང་ཞུས་པ། །ཀྱེ་ཧོ་སྟོན་པ་ཀུན་ཏུ་བཟང་། །རྩ་བ་བཞུགས་སྟངས་གསུམ་ནའང་། །ཆོས་ཉིད་མངོན་སུམ་སྣང་བ་ལས། །སྣང་བཞི་རིམ་གྱིས་འཆར་ཚུལ་རྣམས། །རིག་མདངས་འཁོར་ལ་བཀའ་སྩོལ་ཅིག །སྟོན་པས་ལན་དུ་བཀའ་སྩལ་པ། །ཨ་ཧོ་རིག་མདངས་འཁོར་རྣམས་ཉོན། །སྣང་བཞི་རིམ་གྱིས་འཆར་ཚུལ་རྣམས། །ལེགས་པར་བཤད་ཀྱི་ཡིད་ལ་ཟུང་། །དང་པོར་ཆོས་ཉིད་མངོན་སུམ་བསྟན། །བཞུགས་སྟངས་ལྟ་སྟངས་ཉིད་དང་བསྟུན། །རླུང་ནི་སྤྱི་གནད་དལ་བས་ཏེ། །རྒྱང་རིངས་ཕྱི་རུ་འཕངས་པ་ལས། །ལུས་དང་སེམས་ཀྱི་འདྲེལ་ཆོད་འགྱུར། །རླུང་རིག་དལ་བ་གནད་དུ་ཆེ། །རིག་པ་ལུག་རྒྱུད་མངོན་སུམ་མཐོང་། །གཞི་གནས་
རིག་པ་ཀ་དག་དང་། །ལམ་སྣང་རིག་པ་ལུག་རྒྱུད་དེ། །འདུས་མ་བྱས་པའི་ཆོས་ཉིད་དོ། །ལུག་རྒྱུད་གསེར་གྱི་འཕྲེང་བ་འདྲ། །གསེར་སྐུད་དང་ནི་ཤེལ་ལྟར་འཚེར། །དཔེར་ན་ལྕགས་ཐག་བརྒྱངས་པ་འདྲ། །མངོན་སུམ་འདི་ཉིད་གཅེར་མཐོང་བས། །ཡིད་དཔྱོད་འཛིན་པ་ཉིད་ལས་གྲོལ། །རང་ངོ་རིག་པ་ལུ་གུ་རྒྱུད། །འགྲོ་འོང་བྲལ་ཏེ་མཁའ་ལ་འོང་། །ཡེ་ནས་གཞི་ལ་གནས་མོད་ཀྱང་། །བར་དུ་རྐྱེན་མེད་རྐྱེན་གྱིས་གསལ། །མངོན་སུམ་རང་ཐོག་ཉིད་དུ་ཕེབས། །འདི་ནི་རིག་པའི་ངོ་བོ་སྟེ། །འདས་དང་མ་འོངས་ད་ལྟ་བར། །སུས་ཀྱང་བྱས་པ་མེད་པ་རུ། །ཡེ་ཉིད་ནས་ནི་རང་གསལ་ལོ། །ལུ་གུ་རྒྱུད་ཀྱི་མཚན་ཉིད་ནི། །རྣམ་རྟོག་བག་ཆགས་ཀུན་དག་ནས། །མ་འཁྲུལ་པ་ཡི་སངས་རྒྱས་སོ། །སྐུ་རྟགས་ལུ་གུ་རྒྱུད་ཡིན་ཏེ། །ཡེ་ཤེས་རྟགས་སུ་ཐིག་ལེ་འཆར། །དབྱིངས་ཀྱི་རྟགས་སུ་འོད་ཁྱིམ་མོ། །དེ་ཡང་འཕྲ་སྟེ་འགྱུ་ཞིང་འཁྱུག །གཡོ་འགུལ་དྭངས་ཤིང་བཀྲག་མདངས་ལྡན། །འདི་ནི་ཆོས་ཉིད་སྣང་བ་སྟེ། །འདི་ལ་ཡོན་ཏན་བསམ་མི་ཁྱབ། །ཐིག་ལེ་ཉག་གཅིག་སྣང་བ་ལ། །རྟོག་པའི་ཡིད་ནི་ག་ལ་ཡོད། །དབྱིངས་ཀྱི་སྒྲོན་མ་རྒྱན་བཟང་བས། །ཆོས་ཉིད་ཡུལ་གྱི་སྣང་བ་ལ། །སྣ་ཚོགས་སྣང་བ་བསམ་མི་ཁྱབ། །ཆོས་ཉིད་རྒྱན་བཟང་ཨ་ལ་ལ། །ང་ཡི་ཆོས་ལ་ཚིག་མེད་པས། །སྟོང་པ་ཉིད་ལ་བདག་མེད་བལྟ། །ཆོས་སྐུའི་སྣང་བ་ངོ་མཚར་ཆེ། །རྟོག་པའི་བློ་སྣ་བསམ་ཡས་ཀྱང་། །ཆོས་སྐུའི་སྣང་བ་གཅིག་ལས་མེད། །སྣ་ཚོགས་སྐུ་ནི་བསམ་ཡས་ཏེ། །ཡེ་ཤེས་སྐུ་གཅིག་བསྟན་པ་ཡིན། །ཐམས་ཅད་རང་རིག་གྲོགས་སུ་འགྱུར། །ཡེ་ཤེས་འོད་འབར་སྣང་བ་ཡིས། །སྐུ་ཡི་འོད་ནི་བསམ་ལས་འདས། །མཚན་མའི་ཡུལ་ནི་ཀ་ནས་དག །དྲི་མའི་ཕྱོགས་ཀྱིས་ང་མི་སྒྲིབ། །རང་རིག་ཡེ་ཤེས་འོད་གསལ་བས། །འཁོར་བའི་མུན་པས་ང་མི་སྒྲིབ། །ང་ལ་ལུས་སེམས་གཉིས་
མེད་པས། །སྡིག་པས་ང་ཡི་སྐུ་མི་སྒྲིབ། །ང་ལ་སྐྱེ་དང་འཆི་མེད་པས། །དགེ་བའི་ཚོགས་ཀྱིས་ང་མི་སྐྱོབ། །ང་ལ་ཞེ་སྡང་སེམས་མེད་པས། །ཞི་གནས་ལྷག་མཐོང་ཅི་ཞིག་བྱ། །ང་ལ་འཛིན་པའི་སེམས་མེད་པས། །རྟོག་པའི་བསམ་པས་ང་མི་རྙེད། །ཆོས་མེད་པ་ལ་ཆོས་ཉིད་བྱུང་། །ཡུལ་མེད་པ་ལ་ཡུལ་ལྟར་བྱུང་། །ཐམས་ཅད་ཞིང་ཁམས་རྒྱས་པ་ལ། །དྲན་བྱེད་ཡུལ་དུ་མེད་པའོ། །ཆོས་འདས་ཆོས་སྐུ་མ་ཤེས་ན། །ལུ་གུ་རྒྱུད་ཀྱི་སྐུ་ལ་ལྟོས། །ཡེ་ཤེས་རྣམ་ལྔ་མ་ཤེས་ན། །རིག་པ་ལུག་རྒྱུད་མཁའ་ལ་ལྟོས། །རིག་པའི་སྤྱན་ལྔ་མ་ཤེས་ན། །རིག་པ་རྡོ་རྗེ་ལུག་རྒྱུད་ལྟོས། །ཡེ་ཤེས་སྒྲོན་མ་བཞི་ལྡན་འཆར། །དེ་ཡང་ཤ་ཡི་སྤྱན་གྱིས་མཐོང་། །མཐོང་སྣང་མ་འགགས་ཤར་བ་དེ། །ཕྱི་དང་ནང་གི་དོན་ཤེས་ཤིང་། །དང་པོ་ཐམས་ཅད་རྟོགས་པ་ནི། །ཤེས་རབ་སྤྱན་གྱིས་མཐོང་བའོ། །དེ་ཉིད་ངང་ལས་ཕྱི་ནང་གི། །ཆོས་རྣམས་རྫོགས་ཤིང་ཤར་བ་ནི། །ཆོས་ཀྱི་སྤྱན་གྱིས་མཐོང་བའོ། །དེ་ཡི་དོན་ལ་མ་འགགས་པར། །ཆོས་ཀྱི་མཚན་ཉིད་ཤེས་པ་ནི། །མཁྱེན་པའི་སྤྱན་གྱིས་ཐམས་ཅད་གཟིགས། །དེ་ཡང་མི་གནས་རིག་པའི་སྐུ། །མངོན་སུམ་ངང་ལ་མ་ཡེངས་པ། །རྣམ་པར་གྲོལ་བའི་སྤྱན་གྱིས་གཟིགས། །དེ་ལྟར་སྤྱན་ལྔའི་གཟིགས་སྣང་རྣམས། །རིག་པ་ལུག་རྒྱུད་ཉིད་ལ་ཐུག །ཨ་ཧོ་སེམས་དཔའ་རྡོ་རྗེ་རྩལ། །སྐྱེ་ཤི་མེད་པའི་སྲོག་འཛིན་ནི། །ལུ་གུ་རྒྱུད་ཀྱི་སྐུ་ལ་ལྟོས། །འགག་མེད་རང་སར་གྲོལ་འདོད་ན། །ལུ་གུ་རྒྱུད་ཀྱི་སྣང་བ་ལྟོས། །ཆོས་ཅན་ཟིལ་གྱིས་གནོན་འདོད་ན། །ལུ་གུ་རྒྱུད་ཀྱི་ཡེ་ཤེས་ལྟོས། །དུ་མ་མཐའ་མེད་ལྟ་འདོད་ན། །ལུ་གུ་རྒྱུད་ཀྱི་སྣང་བ་ལྟོས། །དྲན་མེད་ཆོས་སྐུ་ལྟ་འདོད་ན། །ལུ་གུ་རྒྱུད་ཀྱི་དངོས་པོ་ལྟོས། །ཕྱི་ནང་ཆོས་རྣམས་ཤེས་འདོད་ན། །རིག་པ་ལུག་རྒྱུད་འགྱུ་བ་ལྟོས། །གནས་མེད་སྐུ་ལ་ལྟ་འདོད་ན། །རིག་པ་ལུག་རྒྱུད་སྣང་བ་ལྟོས། །མཚན་མའི་ཆོས་
ཉིད་ལྟ་འདོད་ན། །ཆོས་ཉིད་ལུག་རྒྱུད་སྐུ་ལ་ལྟོས། །སངས་རྒྱས་ཐུགས་དགོངས་ལྟ་འདོད་ན། །ལུ་གུ་རྒྱུད་ཀྱི་དངོས་པོ་ལྟོས། །ཕྱི་ནང་ཆོས་རྣམས་ཤེས་འདོད་ན། །ལུག་རྒྱུད་སྐུ་དང་འབྲལ་མི་བྱ། །ལྟ་སྒོམ་སྤྱོད་གསུམ་དྲིལ་འདོད་ན། །ལུ་གུ་རྒྱུད་ལ་རྒྱུན་པར་ལྟོས། །ལྟ་བ་རྒྱུན་གྱི་རྣལ་འབྱོར་པས། །སྡོམ་ཚིག་འདི་ཉིད་ཡིད་ལ་ཟུང་། །གསང་སྔགས་ཀུན་གྱི་གསང་ཆེན་ནི། །རིན་ཆེན་ཟུར་བརྒྱད་གཞལ་ཡས་དང་། །ལྟ་བྱེད་མིག་གི་གཞལ་ཡས་དང་། །མཁའ་མཉམ་ཐིག་ལེའི་གཞལ་ཡས་དང་། །རྣམ་དག་དབྱིངས་ཀྱི་གཞལ་ཡས་སུ། །རང་རིག་སྐུ་ལ་འགྱུར་མེད་གནས། །ལྟ་སྒོམ་ལམ་ལ་རབ་ཞུགས་ནས། །མཁའ་མཉམ་སྟོང་པ་ཉིད་ལ་སྦྱར། །དོན་གྱི་ཡེ་ཤེས་ཅིར་ཡང་སྣང་། །ངང་ལ་རྫོགས་ཤིང་ངང་ལས་བྱུང་། །གནས་ཚུལ་ཆེན་པོ་དེ་ཉིད་ལ། །ལྟ་བའི་དོན་ནི་ལུ་གུ་རྒྱུད། །ཆོས་ཅན་ལྟ་བ་གྲངས་མང་ཡང་། །ཆོས་ཉིད་དོན་ལ་གཅིག་ལས་མེད། །ལྟ་བ་རྒྱུན་གྱི་རྣལ་འབྱོར་པས། །དེ་ཡི་དོན་ལ་འགྱུར་མེད་ལྟ། །དེ་ཡང་ལུ་གུ་རྒྱུད་ཀྱི་སྐུ། །ཕྲ་ཞིང་རྟ་རྔའི་མདུད་པ་འདྲ། །བར་བར་ཐིག་ལེ་ཉུང་འབྲུ་ཙམ། །ཆེ་ཆུང་ཚད་མེད་ཅིར་ཡང་འགྱུར། །འགྲོ་དང་འོང་བའི་བདག་ཉིད་ཅན། །དེ་ཡང་འོད་ལྔའི་ནང་དུ་འཆར། །ཐིག་ལེ་དང་ནི་རྐྱང་པ་དང་། །གཉིས་འདྲེལ་གསུམ་འདྲེལ་སོགས་མཁར་འཆར། །རྣམ་དག་དབྱིངས་ཀྱི་སྒྲོན་མ་ནི། །འོད་ཟེར་ཁ་དོག་མཐིང་ག་ལ། །ཡི་གེ་ན་རོ་ལྟ་བུ་འམ། །འཇའ་ཚོན་སྣ་ལྔའི་མདུད་པ་འདྲ། །དེ་ལ་ཐིག་ལེ་ཉུང་འབྲུ་ཙམ། །ཕྲུམ་ཕྲུམ་ཟལ་ཟིལ་འཁྱག་འཁྱུག་དང་། །སོས་ཀའི་སྨིག་རྒྱུ་ལྟ་བུའམ། །མཚོ་ལ་སྦྲང་ཆར་བབས་འདྲ་དང་། །ལྕགས་ཚགས་ཟ་འོག་པ་ཏྲ་འདྲ། །ཁ་དོག་དཀར་སེར་དམར་ལྗང་མཐིང་། །གསེར་དངུལ་ཤེལ་གྱི་ཁ་དོག་དང་། །མུ་ཏིག་མུ་མེན་ལྟ་བུ་དང་། །རིན་ཆེན་མཐིང་དང་མར་དག་འདྲ། །པདྨ་རཱ་ག་བཻ་ཌཱུར་མདོག །རྨ་བྱ་ནེ་ཙོ་ཟེར་མོའི་སྒྲོ། །སེང་གེའི་དཔྲལ་བ་ཁྲ་ཡི་མིག །
རྒྱ་བྱའི་ལག་པ་ལྟ་བུ་དང་། །འཕྱོང་རྒྱའི་གཤོག་པ་ལྟ་བུ་དང་། །ཐིག་ལེ་དང་ནི་ཐིག་བྲན་དང་། །གྱེན་འགྲེང་དང་ནི་རྩིབས་ཤར་དང་། །མདུང་རྩི་རིས་དང་པདྨ་རིས། །མཆོད་རྟེན་རིས་དང་དྲ་བ་རིས། །རྡོ་རྗེ་རིས་དང་འཁོར་ལོ་རིས། །རལ་གྲི་རིས་དང་མུ་ཏིག་རིས། །དྲ་བ་དྲ་བ་ཕྱེད་པ་དང་། །རིན་ཆེན་མིག་མངས་མིག་ཚགས་རིས། །ཉ་མིག་རིས་དང་མཁར་ཐབས་རིས། །ཟ་འོག་གུར་ཁྱིམ་ལྟ་བུ་དང་། །པདྨ་སྟོང་ལྡན་ལྕགས་ཚགས་དང་། །སྨུག་པ་ལྟར་དང་མདའ་ལྟ་བུ། །རེ་ལྡེ་ཚ་ཚ་རྦ་ཕུབ་རིས། །དེ་ནི་རང་རིག་ངོ་བོ་སྟེ། །ཆོས་སྐུ་ཐིག་ལེ་ཉག་གཅིག་ཡིན། །རིན་ཆེན་གདུགས་བརྩེགས་འབྲུ་ཕུང་རིས། །རྒྱ་མཚོ་རིས་དང་ཀོ་མོག་རིས། །འོད་ལྔའི་རྣམ་པ་རེ་ལྡེ་ཙམ། །ལུག་རྒྱུད་རྟ་རྔ་མདུད་པ་འདྲ། །ཐིག་ལེ་སྲན་མ་ཙམ་གྱིས་བརྒྱན། །ཆུ་ཡི་གཉེར་མ་ལྟ་བུ་དང་། །མཚོ་ནང་རྡོ་བ་བོར་བ་ཡིས། །རི་མོ་ཕུབ་ལྟར་སྣ་ཚོགས་སྣང་། །སྣང་བ་རྣམས་ཡང་དལ་བར་སྣང་། །འོད་ཁྱིམ་ཁ་དོག་རྣམ་ལྔ་མཐོང་། །དེ་ནི་ཆོས་ཉིད་མངོན་སུམ་ཡིན། །ཁ་དོག་མཐིང་ག་མཐོང་བ་ནི། །ཆོས་དབྱིངས་ཡེ་ཤེས་ངོ་བོ་ཡིན། །ཉོན་མོངས་གཏི་མུག་རྣམ་པར་དག །འོད་ཟེར་དཀར་པོ་མཐོང་བ་ཡིས། །མེ་ལོང་ཡེ་ཤེས་ངོ་བོ་ཡིན། །ཉོན་མོངས་ཞེ་སྡང་རྣམ་པར་དག །འོད་ཟེར་སེར་པོ་མཐོང་བ་ནི། །མཉམ་པ་ཉིད་ཀྱི་ཡེ་ཤེས་ཡིན། །ཉོན་མོངས་ང་རྒྱལ་རྣམ་པར་དག །འོད་ཟེར་དམར་པོ་མཐོང་བ་ནི། །སོ་སོར་རྟོག་པའི་ཡེ་ཤེས་ཡིན། །ཉོན་མོངས་འདོད་ཆགས་རྣམ་པར་དག །འོད་ཟེར་ལྗང་གུ་མཐོང་བ་ནི། །བྱ་བ་གྲུབ་པའི་ཡེ་ཤེས་ཡིན། །ཉོན་མོངས་ཕྲག་དོག་རྣམ་པར་དག །འདི་ནི་ཆོས་ཉིད་མངོན་སུམ་ཡིན། །དུས་གསུམ་སངས་རྒྱས་ཐམས་ཅད་དང་། །བདེ་བར་གཤེགས་པ་ཐམས་ཅད་དང་། །རིགས་ལྔའི་སངས་རྒྱས་རིགས་གསུམ་མགོན། །སྐུ་དང་ཡེ་ཤེས་ཞིང་ཁམས་དང་། །ཐམས་ཅད་མངོན་སུམ་མཇལ་བ་ཡིན། །ལས་དང་སྡིག་སྒྲིབ་
ཟད་པ་ཡིན། །མངོན་སུམ་མཐོང་བའི་སྣང་བ་ལ། །ཁམས་གསུམ་འཁོར་བའི་མིང་མེད་པས། །སྲིད་གསུམ་གདར་ཤ་ཆོད་པའོ། །མངོན་སུམ་འདི་དང་མ་བྲལ་ཅིག །ཨ་ཧོ་སེམས་དཔའ་རྡོ་རྗེ་ཉོན། །ད་ནི་ཉམས་སྣང་གོང་འཕེལ་བཤད། །དེ་ཡང་གཉིས་སུ་འདུས་པ་སྟེ། །ཤེས་ཉམས་དང་ནི་སྣང་ཉམས་གཉིས། །སྣང་ཉམས་ཉམས་སུ་བླངས་པ་ཡིས། །དེ་ལ་བརྟེན་ནས་ཤེས་ཉམས་འཆར། །དེ་ཡང་གཉིས་སུ་མེད་པའོ། །མངོན་སུམ་དེ་ལ་སྦྱངས་པ་ཡིས། །འོད་ཀྱང་རང་གི་ཐོ་ཕྱི་ཙམ། །མདུན་རྒྱབ་དག་ཏུ་གསལ་བའོ། །དེ་ཡང་ཉིན་མཚན་མེད་པར་འཆར། །ཐིག་ལེ་མེ་ལོང་འཕང་ལོ་ཙམ། །འོད་ཁྱིམ་ཁ་དོག་ཅིར་ཡང་འཆར། །རྩིབས་ཤར་མདུང་རྩེ་པདྨ་རིས། །མཆོད་རྟེན་དྲ་བ་རྡོ་རྗེ་དང་། །ཙཀྲ་རལ་གྲི་དྲ་ཕྱེད་དང་། །མིག་མངས་མིག་ཚགས་ཟ་འོག་རིས། །མེ་ལོང་རེ་ལྡེ་ཚ་ཚ་རིས། །རིན་ཆེན་འོད་འབར་དཔལ་བེའུ་རིས། །འོད་ཤར་འོད་སྐོར་འོད་ཟེར་འབར། །རྨ་བྱའི་མདོངས་དང་ཕུག་རོན་སྐེ། །པདྨ་སྟོང་ལྡན་དྲ་བ་རིས། །ཐིག་ལེ་ཐིག་ཕྲན་མུ་ཁྱུད་བཅས། །རྣམ་པ་སྣ་ཚོགས་ཉིད་དུ་འཆར། །དེ་ནི་ཉམས་སྣང་འཕེལ་བ་ཡིན། །ཤེས་ཉམས་དགེ་སྡིག་ངོ་ཡང་ཤེས། །ལུས་ལ་འབུ་སྲིན་ཤིག་མི་འབྱུང་། །ད་རུང་ཉམས་སུ་བླངས་པ་ཡིས། །འོད་ཀྱང་ཡུལ་གྲུ་ཙམ་པ་མཐོང་། །ཐིག་ལེ་ཁམ་ཕོར་ཙམ་དུ་འགྲོ། །རིག་པ་ཤ་ར་རྒྱུག་པ་ཙམ། །ཐིག་ལེ་དེ་དག་རེ་རེ་ལ། །འོད་ལྔའི་མུ་ཁྱུད་དག་དང་བཅས། །དེ་ཡི་དཀྱིལ་དུ་ཕོ་རྐྱང་སྐུ། །རྡོ་རྗེ་སེམས་དཔའི་ཕྱེད་སྐུ་དང་། །ཞལ་ཕྱག་དོད་དང་མ་དོད་འཆར། །ད་རུང་ཉམས་སུ་བླངས་པ་ཡིས། །ཐིག་ལེ་བསེ་ཕུབ་ཙམ་དུ་འགྲོ། །ཐིག་ལེའི་ནང་དུ་སྐུ་རྐྱང་འཆར། །རིག་པའི་བར་བར་སྐུ་ཡིས་བརྒྱན། །རིག་པ་འགུལ་འཕྲིག་མེད་པར་སྡོད། །ལུས་ལ་སྐྲ་དཀར་གཉེར་མ་མེད། །ཟས་སྐོམ་ཡིད་ལ་མི་གདུང་ཞིང་། །སྔར་མེད་པ་ཡི་ཆོས་ཀྱང་ཤེས། །ཅི་སྤྲས་ཐམས་ཅད་
ཆོས་སུ་འོང་། །དགྲ་གཉེན་ཡིད་ལ་མི་འབྱུང་ངོ་། །སྣང་ཉམས་ཤེས་ཉམས་གཉི་ག་འཕེལ། །འོད་དང་ཁ་དོག་གཉི་ག་འཕེལ། །འདི་ལྟར་གོང་འཕེལ་སྣང་བ་ཡིས། །འཁྲུལ་པའི་སྣང་བ་ནུབ་བྱེད་དོ། །ཨ་ཧོ་སེམས་དཔའ་རྡོ་རྗེ་རྩལ། །ད་ནི་རིག་པ་ཚད་ཕེབས་ཀྱི། །སྣང་བ་ཉིད་ནི་བསྟན་པར་བྱ། །དེ་ཡི་རྟགས་མཚན་འདི་ལྟར་རོ། །འོད་ཟེར་སྟོང་གསུམ་ཁྱབ་པར་གསལ། །ཐིག་ལེ་ཆེན་པོ་གཅིག་ལ་ནི། །མུ་ཁྱུད་རིམ་པ་ལྔ་ཡིས་བསྐོར། །ཁ་དོག་ལྔ་ལྡན་འོད་ཟེར་འཕྲོ། །དེ་ཡི་ནང་དུ་ཚོམ་བུ་ལྔ། །རེ་རེ་ལའང་བཞི་བཞིས་བསྐོར། །ཐིག་ལེ་དེ་དག་རེ་རེའི་ནང་། །རིགས་ལྔ་ཡབ་ཡུམ་རྫོགས་པར་འཆར། །ལུ་གུ་རྒྱུད་ཀྱི་བར་བར་དུ། །ཞི་ཁྲོའི་ལྷ་ཚོགས་དཔག་མེད་འཆར། །ཉིན་དང་མཚན་མོ་མེད་པ་རུ། །ད་ལྟའི་དཀྱིལ་འཁོར་རྫོགས་པར་འཆར། །ས་རྡོ་རི་བྲག་ལ་སོགས་པ། །རྡོས་བཅས་ཐམས་ཅད་རང་དག་ནས། །ཐམས་ཅད་རྒྱལ་བའི་ཞིང་དུ་འཆར། །རང་ལུས་ཀུན་ཀྱང་འོད་ཀྱི་སྐུ། །ཐིག་ལེ་ཐིག་ཕྲན་ཁྲ་ཤིག་ཤིག །ཕྱོགས་དང་ཕྱོགས་མཚམས་ཐམས་ཅད་དུ། །གང་དུ་བལྟས་ཀྱང་ལོངས་སྐུའི་ཞིང་། །འདི་དང་འབྲལ་བ་མེད་པའི་རྟགས། །གཞན་གྱིས་མཐོང་བའི་སྤྱོད་ཡུལ་དུ། །སྨྱོན་པ་བཞིན་དུ་ཐོགས་མེད་པར། །གང་ལ་ཆགས་པ་མེད་པ་དང་། །རི་བྲག་རྣམས་ལ་ཟང་ཐལ་དང་། །འབྱུང་བ་ལྔ་ལ་རྩལ་སྦྱང་ནུས། །ས་གཏིང་ལ་ཡང་འཛུལ་བ་དང་། །ཆུ་རྣམས་ལ་ཡང་མི་འབྱིང་ཞིང་། །ལུས་ལ་གོས་སོགས་མེད་པ་རུ། །གཅེར་བུར་གང་ལ་ཐོགས་མེད་ཅིང་། །ཟས་ནོར་འདོད་པ་ཀུན་དང་བྲལ། །འདི་ནི་སྣང་བ་འདི་ཉིད་ལ། །འབྱུང་བ་རང་སར་དེངས་ནས་ནི། །ཟག་བཅས་ཕུང་པོ་མི་སྣང་བར། །ལུས་པོ་འོད་གསལ་ཉིད་དུ་འགྲོ། །འདི་དུས་མ་བསྒོམས་པས་ཀྱང་ཆོག །འབྲས་བུ་ཐོབ་ལ་ཐེ་ཚོམ་མེད། །རིག་པ་ཚད་ལ་ཕེབས་པའི་རྟགས། །རང་སྣང་ཅི་ལ་བཅུག་ཀྱང་ཚུད། །བེམ་པོ་ཀུན་ཀྱང་
འགུལ་བར་ནུས། །རླུང་གི་འགྱུ་བའི་ཚད་ཟིན་དང་། །ལུས་ཀྱི་རྡུལ་ཕྲན་མཐོང་བ་དང་། །ཅིར་སྣང་གཟུགས་སྐུ་རྫོགས་པ་དང་། །དེ་ལ་ཡབ་ཡུམ་འཁྲིལ་པ་དང་། །ལྔ་ལྔ་ཡབ་ཡུམ་སྦྱོར་བ་དང་། །ཀུན་ཀྱང་མུ་ཁྱུད་ཟླུམ་པོ་ལ། །རྣལ་འབྱོར་ལུས་ཀུན་འོད་དུ་གསལ། །འགྲོ་དང་འོང་དང་འདུག་པར་སྣང་། །ཐམས་ཅད་རིག་པ་ཚད་ལ་ཕེབས། །ལུས་ནི་ཚད་དུ་ཕེབས་པ་ཡིས། །བར་སྣང་འོད་ཀྱི་སྐར་ཁུང་གསལ། །དེ་ལ་འོད་ཟེར་ལྕགས་ཀྱུའི་དབྱིབས། །འཁྲིལ་ཞིང་འཁྲིལ་བའི་སྣང་བ་འཛིན། །རང་ལུས་དངོས་པོ་རང་དག་ནས། །ཟང་ཐལ་དྲི་མེད་འོད་ཀྱི་ལུས། །དབུས་སུ་ཡི་གེ་ཨ་དང་བཅས། །སྨིན་ཕྲག་འོད་ཟེར་འདོམ་གང་ཚད། །ཐོར་ཚུགས་རླུང་གིས་གང་བར་སྣང་། །རང་གི་ལག་པའི་སོར་མོ་ལ། །འོད་ཟེར་ཕྲེང་བ་རྣམ་པར་འཁྲིགས། །མགོ་བོ་ཐོད་པའི་གཞལ་ཡས་ནས། །ཧེ་རུ་ཀ་རྣམས་བརྗིད་པར་གསལ། །དེ་དུས་རང་ལུས་ཚད་ལ་ཕེབས། །སྐུ་གསུམ་ཟང་ཐལ་ཉིད་དུ་གསལ། །འདི་ལྟར་སུ་ལ་བསྟན་པའི་མིས། །རིག་པ་ཚད་ཕེབས་སྣང་བ་ཡིན། །འདི་ལྟར་ཚད་ལ་སུས་ཐེབས་པ། །སྐུ་གསུམ་རྟོགས་པའི་རང་སྣང་འདས། །ཀྱེ་ཧོ་སེམས་དཔའ་རྡོ་རྗེ་ཉོན། །ཆོས་རྣམས་ཟད་པའི་སྣང་བ་བསྟན། །རིག་པ་ཚད་ལ་ཕེབས་གྱུར་ནས། །བློ་ཡི་ཆོས་རྣམས་ཟད་པ་ཡིན། །ཡིན་ཡང་སྣང་བ་གཏན་ལ་ཕེབས། །སངས་རྒྱས་གྲངས་ལས་འདས་པ་ཡིས། །ལུང་རྣམས་གཅིག་ཏུ་དྲིལ་ནས་བསྟན། །ཚིག་གི་རྒྱལ་པོ་འདི་དག་ཀུན། །རྣལ་འབྱོར་རྣམས་ཀྱིས་ཡིད་ལ་ཞོག །མི་རྟོག་ཡེ་ཤེས་ལས་བྱུང་བའི། །མ་བཙལ་བཞག་པའི་མན་ངག་གིས། །ཡེ་ཡོད་དང་པོའི་སངས་རྒྱས་རྙེད། །ཆོས་ཉིད་ཟད་པའི་སྣང་བ་ཡིས། །ཁམས་གསུམ་འཁོར་བའི་རྒྱུན་ཐག་བཅད། །དེ་ཚེ་ང་ཡི་སྣང་བ་དག །རྟག་པའི་རྟགས་ཚད་ཆོས་རྣམས་ཟད། །ཆོས་རྣམས་ཟད་ནས་འཁོར་བ་སྟོངས། །འཁོར་བ་སྟོངས་པའི་རྟགས་ཚད་ནི། །རིགས་དྲུག་གཟུགས་རྣམས་མི་སྣང་ངོ་། །གཟུགས་འཛིན་མེད་པའི་བལྟ་བ་
ནི། །ཆོས་ཉིད་ཟད་པའི་སྣང་བ་ཡིན། །འདི་ཡི་མཚན་ཉིད་སུས་རིག་པ། །སྟོང་གསུམ་ཀུན་ཀྱང་ཉུང་འབྲུར་ཚུད། །རྒྱ་མཚོ་ཆེན་པོ་ཧུབ་ཀྱིས་ཐེབས། །རི་རབ་ཀུན་ཀྱང་སྲང་ལ་འཇལ། །ཁམས་གསུམ་པོ་ནི་རྟིང་ནས་ཟློག །སྲིད་པ་ཐམས་ཅད་གདར་ཤ་བཅད། །སེམས་ཅན་མ་ལུས་སྲོག་བཅད་ནས། །སངས་རྒྱས་རྣམས་དང་དབྱེར་མི་ཕྱེད། །ཀུན་ཏུ་བཟང་པོའི་བྱང་ཆུབ་སེམས། །མི་སྣང་མི་འགྱུར་ལམ་རིག་གསལ། །བློ་བྲལ་འདི་ལ་འདྲིས་པའི་མིས། །བརྗོད་མེད་རང་དག་རྙེད་པའོ། །འདི་ནི་ཡོན་ཏན་བསམ་ལས་འདས། །དཔག་མེད་སངས་རྒྱས་རྣམས་དང་མཉམ། །ཆོས་དབྱིངས་ཟད་པའི་སྣང་བ་ལ། །ལྟ་བ་བྱ་བ་གཏན་ནས་མེད། །བལྟ་བ་མེད་ཕྱིར་སྣང་བ་ཟད། །ཀུན་བཟང་ཆོས་ཉིད་ཡངས་པ་ཆེ། །དེ་བཞིན་སྒོམ་པ་ཉིད་ཀྱང་མེད། །བསྒོམ་པ་མེད་ཕྱིར་དྲན་པ་འགགས། །སྤྱོད་པ་ཞེས་ནི་བརྗོད་དུ་མེད། །སྤྱོད་པ་མེད་ཕྱིར་ལུས་འབྱུང་ཟད། །ཟད་པ་འདི་ལ་མཐའ་བརྟེན་ནས། །མེད་དེ་མི་སྣང་སྣང་བ་མེད། །ལྟ་དང་སྲིད་པའི་བདག་པོ་ཀུན། །ཆོས་ཉིད་ཟད་པའི་ཡུལ་སྣང་ལ། །འདི་ལ་སྐྲག་ཅིང་སྔངས་པ་ནི། །འཇིག་རྟེན་མཐུན་པའི་གཟུགས་ཕུང་ནས། །འཕགས་པའི་བདེན་པ་ཉིད་དང་བྲལ། །འཁོར་བའི་དཔུང་ལ་མངོན་པར་ཞེན། །དེས་ན་རིག་སྣང་ཡུལ་ལ་ལྟོས། །རིག་སྣང་འདི་ལ་སུ་འདྲིས་པ། །ཐོག་མའི་ཀུན་ཏུ་བཟང་པོ་དང་། །སྐལ་བ་ཉིད་ནི་མཉམ་པའོ། །དེ་ཕྱིར་ཆོས་རྣམས་ཟད་པའོ། །ཆོས་རྣམས་ཟད་པའི་སྣང་བ་ནི། །ཐམས་ཅད་རང་གི་རིག་པར་འདུས། །རིག་པ་དགག་སྒྲུབ་ཉིད་དང་བྲལ། །ཆོས་རྣམས་ཐམས་ཅད་རང་རིག་ཡིན། །རང་རིག་ངོ་བོ་རྗེན་པ་ཡིན། །དཔེ་བྲལ་མཚོན་དུ་མེད་པ་ཡིན། །འདི་ལྟར་ཆོས་ཉིད་བརྗོད་མེད་ལ། །ཐ་སྙད་ཚིག་གི་གཞི་མར་ཤར། །ཚིག་བརྗོད་རིམ་པ་རྣམ་དག་པས། །ད་ལྟ་བརྗོད་མེད་རང་ལ་གནས། །དེ་ཕྱིར་ཚིག་མཐའ་ཟད་པའོ། །ཨ་ཧོ་སེམས་དཔའ་རྡོ་རྗེ་རྩལ། །ཆོས་ཉིད་ཟད་པའི་
སྣང་བ་ལ། །རྟགས་ནི་རང་ལ་འཆར་བ་ཡིན། །ཚད་ནི་གཞན་ལ་གསལ་བ་ཡིན། །ཟད་ཅེས་མིང་ནི་ཐ་སྙད་དོ། །སངས་རྒྱས་ཀུན་གྱི་རྟགས་ཚད་ནི། །དཔེ་ཡི་ཡེ་ཤེས་རྣམས་ལ་གསལ། །རྟགས་ཀྱི་ཡེ་ཤེས་རྟགས་ཚད་ནི། །ཐིག་ལེ་སྟོང་པའི་སྒྲོན་མར་གསལ། །དོན་གྱི་ཡེ་ཤེས་རྟགས་ཚད་ནི། །མངོན་སུམ་གསལ་བའི་སྣང་བར་གསལ། །མི་རྟོག་བསམ་གཏན་རྟགས་ཚད་ནི། །ཡན་ལག་འདུ་བྱེད་རྣམས་ལ་གསལ། །སྒྲ་དོན་ཤེས་པའི་རྟགས་ཚད་ནི། །འབྱུང་བའི་ཆོ་འཕྲུལ་ཉིད་ལ་གསལ། །འཁྲུལ་པ་རྣམས་ཀྱི་རྟགས་ཚད་ནི། །རྨི་ལམ་བྱ་བྱེད་ཉིད་ལ་གསལ། །བག་ཆགས་འཐུག་པོའི་རྟགས་ཚད་ནི། །གང་ཞེན་ཡུལ་གྱི་རྐྱེན་ལ་གསལ། །མ་འཁྲུལ་ཡེ་ཤེས་རྟགས་ཚད་ནི། །སྤྲིན་མེད་ནམ་མཁའི་མདངས་ལ་གསལ། །ཡེ་ཤེས་འོད་ཀྱི་རྟགས་ཚད་ནི། །མན་ཤེལ་སྙིང་པོའི་འོད་ལ་གསལ། །ཐིག་ལེ་རྣམས་ཀྱི་རྟགས་ཚད་ནི། །དྲ་བ་མིག་ཚག་བར་དུ་གསལ། །རྣལ་འབྱོར་གོམས་པའི་རྟགས་ཚད་ནི། །རིག་པ་ཚད་ལ་ཕེབས་དུས་གསལ། །སྤྲོས་མེད་ཡང་དག་རྟགས་ཚད་ནི། །སྣང་སྲིད་ཕྱག་རྒྱའི་ཞིང་དུ་གསལ། །རིག་པ་རྩལ་དབང་རྟགས་ཚད་ནི། །གཞི་བསྐྱེད་ལུས་ངག་བརྡ་ལ་གསལ། །དབང་སྲོག་དམ་ཚིག་རྟགས་ཚད་ནི། །འདི་ལྡན་ཡེ་བསྲུངས་ཉིད་ལ་གསལ། །ཐ་སྙད་གྲུབ་མཐའི་རྟགས་ཚད་ནི། །ཐིག་ལེ་སྤྲོས་བྲལ་ངང་དུ་གསལ། །ཐེག་པ་རང་སྤྱིའི་རྟགས་ཚད་ནི། །རིག་པ་མཁའ་ལྡིང་ཉིད་ལ་གསལ། །དྲན་པ་ཉིད་ཀྱི་རྟགས་ཚད་ནི། །སྒོ་ལྔའི་ཤེས་པ་ཉིད་ལ་གསལ། །བསམ་པ་རྣམས་ཀྱི་རྟགས་ཚད་ནི། །ཡུལ་རྐྱེན་གྲོལ་བའི་དུས་སུ་གསལ། །རྟོག་པ་ཉིད་ཀྱི་རྟགས་ཚད་ནི། །དྲན་པ་ཡེངས་པའི་དུས་སུ་གསལ། །འཛིན་པ་ཀུན་གྱི་རྟགས་ཚད་ནི། །འདོད་པའི་ཡོན་ཏན་ལྔ་ལ་གསལ། །མ་རིག་པ་ཡི་རྟགས་ཚད་ནི། །ཡོད་མེད་གཉིས་ཀྱི་མཚམས་སུ་གསལ། །ཉོན་མོངས་རྣམས་ཀྱི་རྟགས་ཚད་ནི། །གློ་བུར་རྐྱེན་གྱི་དུས་
སུ་གསལ། །འགྱུ་བྱེད་ཡིད་ཀྱི་རྟགས་ཚད་ནི། །གང་བསམས་ཡུལ་གྱི་སྣང་བར་གསལ། །བདག་འཛིན་བློ་ཡི་རྟགས་ཚད་ནི། །འགྱུ་བྱེད་འགྱུ་ལམ་མཚམས་སུ་གསལ། །ཤེས་རབ་ཆེན་པོའི་རྟགས་ཚད་ནི། །ཡུལ་རྐྱེན་ཆོད་པའི་མཚམས་སུ་གསལ། །རྟགས་མེད་རང་གསལ་རྟགས་ཚད་ནི། །ཕྲ་རགས་བྲལ་བའི་མཚམས་སུ་གསལ། །དྭངས་མ་ལྔ་ཡི་རྟགས་ཚད་ནི། །འབྱུང་བ་དག་པའི་མཚམས་སུ་གསལ། །འབྱུང་འཇུག་ལྡོག་དང་གནས་པ་ཡིས། །རྣལ་འབྱོར་མངོན་ཤེས་གྲུབ་པ་ཡིན། །སྐད་དང་བརྡ་ལ་བརྟེན་པ་ཡིས། །འདས་དང་མ་འོངས་ད་ལྟར་ཤེས། །འདི་ནི་སེམས་ཅན་དོན་ཀུན་བྱེད། །འདི་མེད་དོན་མི་ནུས་པ་ཡིན། །དེ་ཕྱིར་སྒྲ་ལ་གོམས་པར་བྱ། །སོ་སོའི་སྐད་ལ་བརྟེན་པ་ནི། །འདི་ཉིད་རང་གིས་དུས་གསུམ་བརྟག །ཡེ་ཤེས་རྣམས་ཀྱི་རྟགས་ཚད་ནི། །རང་སྣང་ཡུལ་སྣང་རྒྱས་དུས་གསལ། །ཆོས་ཀྱི་སྐུ་ཡི་རྟགས་ཚད་ནི། །གནོད་པའི་རྐྱེན་རྣམས་བྲལ་དུས་གསལ། །ལོངས་སྐུ་ཉིད་ཀྱི་རྟགས་ཚད་ནི། །ཆོས་ཉིད་མ་བུ་འཕྲད་དུས་གསལ། །སྤྲུལ་པ་སྐུ་ཡི་རྟགས་ཚད་ནི། །འཁོར་འདས་མི་ཕྱེད་མཚམས་སུ་གསལ། །བླ་མའི་མན་ངག་རྟགས་ཚད་ནི། །འབྱུང་བ་དེངས་པའི་མཚམས་སུ་གསལ། །སྙིང་པོ་དོན་གྱི་རྟགས་ཚད་ནི། །ཐིག་ལེ་འདུས་པའི་དུས་སུ་གསལ། །དབྱིངས་ཀྱི་རྒྱན་ཚོགས་རྟགས་ཚད་ནི། །གནད་ཕེབས་བར་དོ་མང་དུས་གསལ། །འཁྲུལ་སྣང་བྲལ་བའི་རྟགས་ཚད་ནི། །རྣམ་རྟོག་ཡུལ་ཞེན་བྲལ་དུས་གསལ། །འཁོར་འདས་གཉིས་ཀྱི་རྟགས་ཚད་ནི། །དབྱིངས་ལ་ཉིན་མཚན་མེད་ན་གསལ། །དབྱིངས་ན་རིག་པ་ཚུད་པའི་རྟགས། །ཐིག་ལེ་སྲན་འབྲུ་འགྲོ་འོང་གསལ། །ཕུང་པོ་བོར་ནས་སངས་རྒྱས་ཚད། །སྙིང་པོ་བཅུད་དུ་དྲིལ་དུས་གསལ། །ཐིག་ལེ་ཚད་དུ་ཕྱིན་པའི་ཚད། །ཐིག་ལེ་བསེ་ཕུབ་ཙམ་ལ་གསལ། །སྣོད་བཅུད་སྨིན་པའི་རྟགས་ཚད་ནི། །ཐིག་ལེ་མུ་ཁྱུད་བསྐོར་དུས་གསལ། །རིག་པ་སྐུ་རུ་སྨིན་པའི་ཚད། །ཐིག་
ལེ་སྐུ་རུ་སྣང་དུས་གསལ། །བར་དོའི་སྣང་བ་མེད་པའི་ཚད། །ཐིག་ལེ་སྐུར་བཅས་ཤར་དུས་གསལ། །སྐུ་གསུམ་ལམ་དུ་རྫོགས་པའི་ཚད། །ཐིག་ལེ་སྐུ་ལྔས་བརྒྱན་དུས་གསལ། །འབྱུང་བ་རང་དག་སོང་བའི་རྟགས། །ཕུང་པོ་འོད་གསལ་གྲོལ་དུས་གསལ། །ཆོས་ཉིད་ཟད་སར་སླེབ་པའི་རྟགས། །འཕེལ་རྣམས་ཐམས་ཅད་ཟད་དུས་གསལ། །ལུས་ཀྱི་བདེ་དྲོད་རྟགས་ཚད་ནི། །རེས་འཇོག་བྲལ་བའི་དུས་སུ་གསལ། །གསུང་རྣམས་རང་སྒྲའི་རྟགས་ཚད་ནི། །སྲིད་པ་གཞི་བཞེངས་བར་ལ་གསལ། །རང་སྣང་མི་འགྱུར་རྟགས་ཚད་ནི། །འབྱུང་བ་ཟད་པའི་དུས་སུ་གསལ། །ཡེ་ཤེས་ཐུགས་ཀྱི་རྟགས་ཚད་ནི། །སྣང་བ་བཞི་བཞག་དུས་སུ་གསལ། །དགོངས་པ་རྣམས་ཀྱི་རྟགས་ཚད་ནི། །རིག་པ་སྲང་ལ་ཚུད་དུས་གསལ། །ཏིང་ངེ་འཛིན་གྱི་རྟགས་ཚད་ནི། །འདུ་ཤེས་གསུམ་དང་བྲལ་དུས་གསལ། །ཆོས་ཉིད་མི་གཡོའི་རྟགས་ཚད་ནི། །མཉམ་པ་ཉིད་ཀྱི་དུས་སུ་གསལ། །ལྷག་མཐོང་ཉིད་ཀྱི་རྟགས་ཚད་ནི། །བླ་མའི་གདམས་ངག་ཉིད་ལ་གསལ། །འབད་མེད་རང་གྲོལ་རྟགས་ཚད་ནི། །ཁྲེགས་ཆོད་ཐོད་རྒལ་མཚམས་སུ་གསལ། །ལུས་གནད་ཡེ་ཤེས་རྟགས་ཚད་ནི། །འདུས་སྟངས་རྣམས་ཀྱི་དུས་སུ་གསལ། །ལྟ་སྒོམ་རང་གྲོལ་རྟགས་ཚད་ནི། །བློ་འཛིན་དྲི་མ་དག་དུས་གསལ། །ཡིད་ཆེས་གོམས་པའི་རྟགས་ཚད་ནི། །ཉམས་མྱོང་མཐར་ཕྱིན་དུས་སུ་གསལ། །སྐུ་གསུམ་འབྲུ་ཡི་རྟགས་ཚད་ནི། །ཆོས་རྣམས་ཟད་པའི་དུས་ན་གསལ། །ཐུགས་རྗེའི་གཞན་དོན་རྟགས་ཚད་ནི། །ཡེ་ཤེས་མཁྱེན་པའི་དུས་ན་གསལ། །ཁ་དོག་དབྱིབས་ཟད་ཚད་འཛིན་པ། །ཕྱི་ནང་གཉིས་ཀྱི་མཚམས་སུ་བརྟགས། །དེ་ལྟར་རྟགས་རྣམས་རྒྱས་པ་ཡིས། །དོན་རྣམས་ཀུན་ལ་ཡིད་ཆེས་འགྱུར། །རྡོ་རྗེ་འཆང་ཆེན་ང་ཡིས་བཤད། །ཆོས་ཉིད་ཟད་པའི་སྣང་བ་ཡིས། །ཡུལ་སྣང་ཐམས་ཅད་གཅེར་གྲོལ་ཉིད། །སྟོན་པས་སྟོང་པའི་ཚད་ཟིན་ཏེ། །གྲུབ་མཐའི་ཞེན་པ་
དུས་གཅིག་ཆོད། །འཁོར་འདས་གཉིས་སུ་མེད་པའོ། །འབྱུང་བ་ཐམས་ཅད་རང་སར་དག །ཆུ་ཡི་སྣང་བ་དྲི་མ་མེད། །ཀུན་ཁྱབ་ཆེན་པོའི་སྟོང་པ་ཉིད། །མེ་ཡི་སྣང་བ་རང་བྱུང་བས། །རང་གསལ་ཆེན་པོའི་སྟོང་པ་རྙེད། །རླུང་གི་སྣང་བ་རང་སངས་པས། །བསྐྱོད་པ་ཆེན་པོའི་སྟོང་པ་རྙེད། །ནམ་མཁའི་སྣང་བ་ཡེ་སངས་པས། །དག་པ་ཡུལ་གྱི་སྟོང་པ་རྙེད། །དེ་ལྟར་ཆོས་ཉིད་སྟོང་པ་ཉིད། །དྲན་པ་ཆེན་པོ་ངོ་སྤྲད་པས། །སྟོང་གསལ་གཉིས་ཀྱི་མཐའ་ལས་འདས། །ཡེ་ནས་མེད་པའི་སྟོང་ཉིད་ལ། །འབྱུང་བ་ཟད་པའི་འོད་སྣང་གསལ། །བྱ་བྱེད་བྲལ་བའི་སྟོང་ཉིད་ལ། །སྐུ་གསུམ་མཚོན་པའི་འོད་སྣང་གསལ། །འབྱུང་བ་ཟད་པའི་སྟོང་ཉིད་ལ། །རྣལ་འབྱོར་ལྡན་པའི་འོད་སྣང་གསལ། །རྒྱུན་དུ་གསལ་བའི་སྟོང་ཉིད་ལ། །རང་གསལ་གཞག་པའི་འོད་སྣང་གསལ། །མཐའ་མི་གནས་པའི་སྟོང་ཉིད་ལ། །རང་རིག་སྒྲིབ་བྲལ་འོད་སྣང་གསལ། །རྣལ་འབྱོར་འོད་སྣང་གོམས་པ་ཡིས། །འབྱུང་བཞི་ཐམས་ཅད་བག་ལ་ཞ། །ཐམས་ཅད་སྟོང་གསལ་ངང་ལ་རྫོགས། །ཆོས་རྣམས་ཟད་པའི་སྣང་བ་འདི། །སྟོང་གསལ་འགག་པ་མེད་པ་སྟེ། །དྲི་མ་ཀུན་ལས་འདས་པའོ། །འོད་ཟེར་དཀར་པོའི་ཚུལ་དུ་ཤར། །ཡོན་ཏན་ཐམས་ཅད་རྫོགས་པའི་བརྡ། །འོད་ཟེར་སེར་པོའི་ཚུལ་དུ་ཤར། །ཆོས་རྣམས་མ་བཙལ་བཞག་པའི་ཕྱིར། །འོད་ཟེར་དམར་པོའི་ཚུལ་དུ་ཤར། །བྱ་བ་ཐམས་ཅད་རྫོགས་པའི་ཕྱིར། །འོད་ཟེར་ལྗང་གུའི་ཚུལ་དུ་ཤར། །མི་འགྱུར་ཀུན་ལ་ཁྱབ་པའི་ཕྱིར། །ཁ་དོག་མཐིང་གའི་ཚུལ་དུ་ཤར། །དེ་ལྟར་སྐུ་ཡི་གསལ་ཆ་ཡིས། །རིག་པ་དྲི་མ་མེད་པ་མཐོང་། །ཐིག་ལེ་སྟོང་པའི་སྒྲོན་མ་ཡིས། །རིག་པ་ཐིག་ལེ་ཉག་གཅིག་མཐོང་། །ཡེ་ཤེས་ལྔ་ཡི་གསལ་ཆ་ཡིས། །རིག་པ་ཉིད་ཀྱིས་གསལ་ཆ་མཐོང་། །འོད་ཟེར་ལྔ་ཡི་གསལ་ཆ་ཡིས། །རིག་པ་ཉིད་ཀྱི་ཁ་དོག་མཐོང་། །སྣང་བ་བཞི་ཡི་གསལ་ཆ་ཡིས། །རིག་པ་ཉིད་ཀྱི་རང་
བཞིན་མཐོང་། །ཤེས་རབ་ལྔ་ཡི་གསལ་ཆ་ཡིས། །རིག་པ་རང་སྣང་ཚུལ་དུ་མཐོང་། །རིག་པ་ཉིད་ལ་སུ་གོམས་པ་། །འདིས་ནི་རང་ལུས་རང་སར་དེངས། །དེ་ཡི་ཚད་ལ་གང་གོམས་པ། །ཆོས་རྣམས་ཀུན་ཀྱང་ཟད་པའོ། །འདི་དུས་ཉམས་ཀྱི་འཕེལ་ཟད་སྟེ། །སྣང་ཉམས་སྣང་ཡང་འཛིན་པ་མེད། །ཆོས་རྣམས་ཟད་ཅེས་ཐ་སྙད་བཏགས། །ཉམས་ལུས་དབང་པོ་རྟོག་ཚོགས་དང་། །ཚིག་གི་འཁྲུལ་ཞེན་ཐམས་ཅད་ཟད། །ཟག་པའི་ཕུང་པོ་མི་སྣང་བར། །རང་སངས་ཉིད་དུ་སངས་རྒྱའོ། །ཞེས་གསུངས་ནས། ཀ་དག་བརྗོད་བྲལ་གྱི་ངང་ལ་ལྷན་ནེར་བཞུགས་སོ། །ཐེག་པའི་སྤྱི་ཕུད་ཀློང་ཆེན་རབ་འབྱམས་ཀྱི་རྒྱུད་ལས། སྣང་བཞི་རྟགས་ཚད་བསྟན་པའི་ལེའུ་སྟེ་སོ་བརྒྱད་པའོ།། །།ས་མ་ཡ། རྒྱ་རྒྱ་རྒྱ། སེམས་དཔའ་རྡོ་རྗེས་ཡང་ཞུས་པ། །ཀྱེ་ཧོ་སྟོན་པ་ཀུན་ཏུ་བཟང་། །སྣང་བཞིའི་རྟགས་ཚད་དེ་ལྟར་ན། །དེ་ཡི་རྒྱབ་རྟེན་ཇི་ལྟ་བུ། །རིག་མདངས་འཁོར་ལ་བཀའ་སྩོལ་ཅིག །སྟོན་པས་གསན་ཏེ་བཀའ་སྩལ་པ། །ཨ་ཧོ་རིག་མདངས་འཁོར་རྣམས་ཉོན། །དེ་ཡི་རྒྱབ་རྟེན་དགུ་ཡིན་ཏེ། །དང་པོར་མི་འགུལ་གསུམ་དུ་བསྟན། །ལུས་ནི་སྐུ་གསུམ་བཞུགས་སྟངས་ལས། །སྐད་ཅིག་ཙམ་ཡང་མི་འབྲལ་བྱ། །དེ་ལྟར་ལུས་ཉིད་མ་འགུལ་བས། །རྩ་མིག་རླུང་སེམས་མི་འགུལ་ལོ། །གཟིགས་སྟངས་གསུམ་ལས་འགུལ་མི་བྱ། །རྩ་གནད་སྒོ་ཡི་ཁྱད་པར་གྱིས། །རིག་པ་སྒྲོན་མར་འཆར་བའོ། །རྩ་མ་འགུལ་ན་མིག་མི་འགུལ། །སྒྲོན་མ་མི་འགུལ་གནད་དུ་ཆེ། །སེམས་མ་འགུལ་བས་རྟོག་མི་འབྱུང་། །དབྱིངས་རིག་འདུ་འབྲལ་མེད་པ་སྟེ། །མི་འགུལ་གསུམ་ལ་གཞི་བཅས་པས། །རླུང་སེམས་གནད་ལ་ཕེབས་པའོ། །ཀྱེ་ཧོ་སེམས་དཔའ་རྡོ་རྗེ་རྩལ། །གཉིས་པ་སྡོད་པ་གསུམ་དུ་བསྟན། །ཕྱི་ནང་བསྐྱོད་པའི་རླུང་ཟད་པས། །དབྱིངས་རིག་འགྲོ་འོང་མེད་པར་སྡོད། །ཕུང་པོ་བསྐྱོད་པའི་རླུང་
ཟད་པས། །ལུས་ནི་མི་འགུལ་སྡོད་པའོ། །གསང་བ་འགྱུ་བྱེད་རླུང་ཟད་པ། །སེམས་རྟོག་མི་འགྱུ་སྡོད་པའོ། །ཚད་ནི་རྨི་ལམ་བཟུང་བ་སྟེ། །ལུས་ངག་ཡིད་གསུམ་རྟགས་ཚད་བཟུང་། །རབ་ལ་རྨི་ལམ་དབྱིངས་སུ་ཐིམ། །འབྲིང་དུ་རྨི་ལམ་མངོན་ཤེས་འཆར། །ཐ་མ་རྨི་ལམ་ངོ་ཡང་ཤེས། །ཆོས་ཉིད་མངོན་སུམ་སྣང་བའི་དུས། །ལུས་ནི་རུས་སྦལ་སྣོད་བཅུག་འདྲ། །ངག་ནི་ལྐུགས་པ་སྨྲ་མི་འདོད། །སེམས་ནི་མི་འཕྲོ་གར་གཏང་སྡོད། །ཉམས་སྣང་གོང་འཕེལ་དུས་ཉིད་དུ། །ལུས་ལ་རྒྱན་དང་བྱི་དོར་བྲལ། །ངག་ནི་དོན་མེད་ཅལ་ཅོལ་ཏེ། །སེམས་ནི་ཁམས་གསུམ་ཟློག་རེ་སྐན། །རིག་པ་ཚད་ལ་ཕེབས་དུས་སུ། །ལུས་ནི་འབྱུང་ལྔ་ཐོགས་མེད་འགྲོ། །ངག་ལ་ཀུན་ཉན་ཆོས་སུ་འོངས། །སེམས་ནི་ཡིད་ཆེས་གདེང་ལྡན་ནོ། །ཆོས་རྣམས་ཟད་པའི་སྣང་བའི་དུས། །ལུས་ལ་གཤེད་མས་ཡ་ང་མེད། །ངག་ནི་ཟུངས་ཟད་ལད་མོ་བྲག་ཆ་འདྲ། །སེམས་ནི་བག་ཆགས་སྐད་ཅིག་ཡལ། །བར་སྣང་ན་བུན་ཅི་བཞིན་འགྱུར། །ཀྱེ་ཧོ་སེམས་དཔའ་རྡོ་རྗེ་རྩལ། །གསུམ་པ་ཐོབ་པ་གསུམ་གྱིས་ནི། །ཟག་བཅས་ཕུང་པོ་རང་ཡལ་ཏེ། །སྐྱེ་བ་ཉིད་ལ་རང་དབང་ཐོབ། །ཕུང་པོའི་སྣང་བ་རང་འགགས་ཏེ། །རྡོས་བཅས་མི་སྣང་བ་རུ་འགྱུར། །གལ་ཏེ་སེམས་ཅན་དོན་བྱེད་ན། །རང་གི་ལག་སོར་གཏད་པ་ཡིས། །སྣང་བ་རང་ལོག་དོན་རྣམས་འགྲུབ། །རིག་པ་རང་བཅུག་གྲོལ་འགུལ་འགྱུར། །འཇུག་པ་ཉིད་ལ་རང་དབང་ཐོབ། །ལག་སོར་ཉིད་ལ་རིག་པ་གཏད། །སྐད་ཅིག་མི་སྣང་བུཌྜྷའོ། །རླུང་སེམས་ཉིད་ལ་དབང་ཐོབ་པས། །རླུང་གི་ཡོན་ཏན་ཐམས་ཅད་ཐོབ། །སྡིག་ཅན་འཕོ་དུས་རིག་པ་བཅུག །རང་དང་མཉམ་པོར་བུཌྜྷའོ། །བེམས་པོ་ རྣམས་ལ་ཐོགས་པ་མེད། །མངོན་ཤེས་ཕྱོགས་མེད་དུས་གསུམ་ཤེས། །གསུམ་གསུམ་དགུ་ཡིས་རྒྱབ་རྟེན་ནོ། །ཞེས་གསུངས་སོ། །ཐེག་པའི་སྤྱི་ཕུད་ཀློང་ཆེན་རབ་འབྱམས་
ཀྱི་རྒྱུད་ལས། རྒྱབ་རྟེན་བསྟན་པའི་ལེའུ་སྟེ་སོ་དགུ་པའོ།། །།ས་མ་ཡ། རྒྱ་རྒྱ་རྒྱ། སེམས་དཔའ་རྡོ་རྗེས་ཡང་གསོལ་པ། །ཀྱེ་ཧོ་སྟོན་པ་ཀུན་ཏུ་བཟང་། །རྒྱབ་རྟེན་མན་ངག་དེ་ལྟར་ན། །གདེང་ཆེན་ཇི་ལྟ་བུ་རུ་བཟླ། །རིག་མདངས་འཁོར་ལ་བཀའ་སྩོལ་ཅིག །སྟོན་པས་འཁོར་ལ་བཀའ་སྩལ་པ། །སེམས་དཔའ་ལ་སོགས་འཁོར་རྣམས་ཉོན། །གདེང་ནི་ཡར་མར་གཉིས་གཉིས་བཞི། །རྟགས་ཚད་རྣམ་གྲངས་མང་བཤད་པ། །འདི་རུ་མི་འདུ་མེད་པའོ། །དཀོན་མཆོག་ཡོན་ཏན་ལ་སོགས་ལ། །བྲོད་པ་སྐྱེ་རྒྱུ་རྡུལ་ཙམ་མེད། །ཡེ་ནས་རིག་པ་སངས་རྒྱས་པས། །བསྐྱར་ནས་གྲོལ་རྒྱུ་ང་ལ་མེད། །རང་ཉིད་སངས་རྒྱས་ཡིན་པ་ཡིས། །གདེང་ཆེན་དེ་ཉིད་ལོན་པའོ། །དེ་ཉིད་དོན་རྟོགས་གྱུར་པའི་ཕྱིར། །མྱང་འདས་གཞན་ནས་ག་ལ་རེ། །གདེང་ཆེན་དམ་པ་ཆོད་པའོ། །དམྱལ་བ་ལ་སོགས་རིགས་དྲུག་གི། །སྡུག་བསྔལ་མྱོང་ཚུལ་ཐོས་ན་ཡང་། །འཁྲུལ་མེད་སྡུག་བསྔལ་དང་བྲལ་བས། །ཡ་ང་མེད་པའི་གདེང་ཆོས་སོ། །འཁོར་བར་འཁྱམ་མཁན་མེད་པའི་ཕྱིར། །འཁོར་བར་ལྟུང་དོགས་ག་ལ་ཡོད། །ལྟུང་མཁན་མ་གྲུབ་གདེང་ཆོས་སོ། །མི་འགྱུར་ལྟ་བའི་གདེང་ཆེན་བཞིས། །མི་ཟློག་ཡེ་ཤེས་ཚད་ཀྱང་བཟུང་། །ཨ་ཧོ་སེམས་དཔའ་རྡོ་རྗེ་རྩལ། །གདེང་ཆེན་དེ་ལོན་རྣལ་འབྱོར་ནི། །སུས་མ་རྙེད་པའི་ནོར་བུ་རྙེད། །སུས་མ་མཐོང་བའི་སྣང་བ་མཐོང་། །ཆོས་ཅན་ཐམས་ཅད་དུམ་བུར་ཆོད། །ཆོས་ཉིད་རང་རིག་སྦར་གྱིས་ཟིན། །སངས་རྒྱས་བས་ཀྱང་སྔར་སངས་རྒྱས། །ཡང་དག་རྫོགས་པའི་ཡང་སངས་རྒྱས། །སྤྲུལ་པ་རྣམས་ཀྱང་དེར་སངས་རྒྱས། །གདེང་ཆེན་འདི་ལོན་རྣལ་འབྱོར་པ། །རིགས་རྣམས་ཀུན་གྱི་གཙོ་བོར་འགྱུར། །དཔལ་ལྡན་ཚོགས་ཀྱི་བདག་པོ་ཡིན། །ཧེ་རུ་ཀ་ཡི་དབང་རྣམས་རྫོགས། །རྣལ་འབྱོར་འབྱུང་བཞི་རང་དེངས་ནས། །ཕྱིར་མི་ལྡོག་པའི་སངས་རྒྱས་སོ། །སངས་རྒྱས་ཀུན་གྱི་ཡེ་
ཤེས་ནི། །གང་གི་ཕྱོགས་སུ་མི་ལྟུང་ངོ་། །ཞེས་གསུངས་ནས། བརྡལ་བ་ཆེན་པོར་ལྷན་ནེར་བཞུགས་སོ། །ཐེག་པའི་སྤྱི་ཕུད་ཀློང་ཆེན་རབ་འབྱམས་ཀྱི་རྒྱུད་ལས། གདེང་ཆེན་བཞི་བསྟན་པའི་ལེའུ་སྟེ་བཞི་བཅུའོ།། །།ས་མ་ཡ། རྒྱ་རྒྱ་རྒྱ། དེ་ནས་སེམས་དཔའ་རྡོ་རྗེ་ཡིས། །སྟོན་པ་ཉིད་ལ་ཡང་ཞུས་པ། །ཀྱེ་མ་སྟོན་པ་ཀུན་ཏུ་བཟང་། །དེ་ལྟར་ཉམས་སུ་བླང་བ་ལ། །སྣང་བ་བཞི་ནི་གང་ལྟར་རྫོགས། །འབྲས་བུ་ཐོབ་ཚུལ་ཇི་ལྟ་བུ། །རིག་མདངས་འཁོར་ལ་བསྟན་དུ་གསོལ། །སྟོན་པས་གསན་དགོངས་བཀའ་སྩལ་པ། །ཀྱེ་མ་རིག་པའི་འཁོར་རྣམས་ཉོན། །དང་པོར་རྫོགས་ཚུལ་འདི་ལྟར་རོ། །ཆོས་ཉིད་མངོན་སུམ་སྣང་བ་ནི། །རིག་པ་ལུག་རྒྱུད་ངོ་བོར་རྫོགས། །ལུ་གུ་རྒྱུད་དང་མ་བྲལ་ན། །སྒོམ་པ་རྒྱུན་གྱི་རྣལ་འབྱོར་རྫོགས། །རང་སྣང་ཆོས་ཉིད་རོལ་པ་སྟེ། །ལྟ་བ་རྒྱུན་གྱི་རྣལ་འབྱོར་རྫོགས། །ཟང་ཐལ་མངོན་སུམ་མ་བྲལ་ན། །སྤྱོད་པ་རྒྱུན་གྱི་རྣལ་འབྱོར་རྫོགས། །རང་རིག་རྒྱུ་རྐྱེན་མེད་པ་ལ། །འབྲས་བུ་ལྷུན་གྲུབ་ཆེན་པོར་རྫོགས། །བསམ་མེད་ཆོས་སྐུ་སྤྲོས་བྲལ་ལ། །མ་འགགས་ཐེག་དགུ་ཐམས་ཅད་རྫོགས། །ཉམས་སྣང་གོང་འཕེལ་སྣང་བ་ལ། །རིག་སྣང་ཐམས་ཅད་དབྱིངས་སུ་རྫོགས། །སྤྲོས་བྲལ་སྐུ་ལྔའི་རང་མདངས་རྣམས། །བར་སྣང་སྟོང་པའི་ཡུལ་དུ་རྫོགས། །སངས་རྒྱས་ཀུན་གྱི་ལུས་ཉིད་ནི། །རྟོག་པ་མེད་པའི་ངང་དུ་རྫོགས། །འཛིན་མེད་དག་པ་ཆེན་པོ་ལ། །རྡོ་རྗེ་སེམས་སོགས་སྐུ་རྣམས་རྫོགས། །སྒྲ་ལ་གོམས་པའི་རྣལ་འབྱོར་ལ། །ལུས་ཀྱི་རྟགས་རྣམས་མངོན་དུ་རྫོགས། །འོད་ལ་འདྲིས་པའི་རྣལ་འབྱོར་ལ། །ས་རྡོ་རི་བྲག་རང་དག་རྫོགས། །ཐིག་ལེ་གོམས་པའི་རྣལ་འབྱོར་ལ། །ཉག་གཅིག་རྩད་གཅོད་སྐུ་རྣམས་རྫོགས། །སྒྲུབ་དུ་མེད་པའི་ཕྲིན་ལས་ལ། །བྱ་རུ་མེད་པའི་མཆོད་པ་རྫོགས། །ཆོས་ཉིད་མི་འགྱུར་སྣང་བ་ལ། །
ལྷ་དང་བྲལ་བའི་རིག་པ་རྫོགས། །སྟོང་པ་ཉིད་ཀྱི་འོད་སྣང་ལ། །བདེ་བ་ཟག་མེད་ཐིག་ལེ་རྫོགས། །ཡང་དག་དོན་གྱི་ཆོས་སྐུ་ལ། །རྟོག་པ་མེད་པའི་ཡེ་ཤེས་རྫོགས། །འགྱུར་མེད་རང་གསལ་ངོ་བོ་ལ། །རྟོག་མེད་མཉམ་པའི་ཐིག་ལེ་རྫོགས། །རྣམ་དག་ཐིག་ལེ་ལུག་རྒྱུད་ལ། །བརྗོད་མེད་ལམ་གྱི་ཉམས་ལེན་རྫོགས། །གསལ་སྟོང་དག་པའི་ཡེ་ཤེས་ལ། །མཚན་མ་མེད་པའི་ཆོས་རྣམས་རྫོགས། །ཉམས་སྣང་རིམ་གྱིས་འཕེལ་བ་ལ། །མཚན་མ་ཅན་གྱི་ཆོས་རྣམས་རྫོགས། །ཞེ་འདོད་མེད་པའི་སྒོམ་པ་ལ། །བཏང་སྙོམས་མེད་པའི་ཏིང་འཛིན་རྫོགས། །སྤང་ཐོབ་མེད་པའི་ལྟ་བ་ལ། །རྟོག་པ་མེད་པའི་མཐོང་བ་རྫོགས། །བཅོས་སླད་མེད་པའི་སྤྱོད་པ་ལ། །བྱས་པ་མེད་པའི་བྱུང་བ་རྫོགས། །རིག་པ་ཚད་ཕེབས་སྣང་བ་ལ། །ལྷུན་གྲུབ་ཆེན་པོའི་ངང་དུ་རྫོགས། །བསམ་དང་བྲལ་བའི་ཆོས་སྐུ་ལ། །འགག་པ་མེད་པའི་ལོངས་སྐུ་རྫོགས། །མཚན་མ་མེད་པའི་ཆོས་ཉིད་ལ། །ཐམས་ཅད་འདྲེན་པའི་སྤྲུལ་སྐུ་རྫོགས། །ཕྱིར་མི་ལྡོག་པའི་སྐུ་གསུམ་ལ། །གཟུང་འཛིན་བྲལ་བའི་རིག་པ་རྫོགས། །ཡང་དག་སངས་རྒྱས་ལམ་མཆོག་ལ། །སྤྱད་དུ་མེད་པའི་དཀྱིལ་འཁོར་རྫོགས། །སྐྱེ་བ་མེད་པའི་ཡིག་འབྲུ་ལ། །འདུ་འབྲལ་མེད་པའི་ལྷ་ཚོགས་རྫོགས། །ནུབ་པ་མེད་པའི་རྒྱལ་མཚན་ལ། །འགྱུར་བ་མེད་པའི་སྒྲོན་མ་རྫོགས། །རྟོག་པ་མེད་པའི་ཡེ་ཤེས་ལ། །གསལ་འགྲིབ་མེད་པའི་འོད་གསལ་རྫོགས། །ས་ལ་མི་གནས་སྐུ་མཆོག་ལ། །བཏང་སྙོམས་ཡེ་ཤེས་དཀྱིལ་འཁོར་རྫོགས། །བྱ་བཙལ་བྲལ་བའི་ཆོས་ཉིད་ལ། །དཀྱིལ་འཁོར་ལྔ་ཡི་འཕྲོ་འདུ་རྫོགས། །རྟོག་པ་ལམ་གྱི་སངས་རྒྱས་ལ། །བྱ་བ་རྒྱུ་ཡི་སངས་རྒྱས་རྫོགས། །གྲོལ་བ་འབྲས་བུའི་སངས་རྒྱས་ལ། །སྨིན་པ་རྟགས་ཀྱི་སངས་རྒྱས་རྫོགས། །བྱ་བྱེད་བྲལ་བའི་དཀྱིལ་འཁོར་ལ། །འཛིན་མེད་ཞི་ཁྲོའི་ལྷ་ཚོགས་རྫོགས། །ཀུན་ལ་ཁྱབ་པའི་ཡེ་ཤེས་ལ། །རང་གསལ་ཆོས་ཉིད་རྟོག་མེད་རྫོགས། །འཛིན་མེད་ཆོས་ཉིད་རང་གསལ་ལ། །
རྟོག་མེད་ཆོས་རྣམས་མ་འདྲེས་རྫོགས། །མ་བཅོས་ཤར་གྲོལ་གདལ་བ་ལ། །ས་བཅུ་རྟགས་དང་རིམ་པ་རྫོགས། །ཡེ་ཤེས་སྣང་བ་ལམ་མེ་ལ། །མངོན་ཤེས་རྫུ་འཕྲུལ་ཐམས་ཅད་རྫོགས། །ཆོས་ཉིད་ཡེ་ཀློང་ཆེན་པོ་ལ། །ཁྲེགས་ཆོད་ངང་དུ་ཐོད་རྒལ་རྫོགས། །སྐུ་ལ་གོམས་པའི་རྣལ་འབྱོར་ལ། །འགྲོ་དྲུག་གཟུགས་སྣང་ལོངས་སྐུར་རྫོགས། །རིག་པ་ཉིད་ལ་སུ་གོམས་པ། །འདི་ནི་ཆོས་རྣམས་ཟད་པར་རྫོགས། །ཆོས་རྣམས་ཟད་པའི་སྣང་བ་ལ། །སྣང་སྟོང་དབྱེ་བསལ་མེད་པར་རྫོགས། །རང་རིག་ཡིན་ཕྱིར་སྣང་བ་རྫོགས། །རང་བྱུང་ཡིན་ཕྱིར་གཞི་ཡང་རྫོགས། །སྣང་བ་ཡིན་ཕྱིར་ཡུལ་ཡང་རྫོགས། །རང་གྲོལ་ཡིན་ཕྱིར་རང་རིག་རྫོགས། །རང་སྣང་ཡིན་ཕྱིར་ལམ་ཀུན་རྫོགས། །རང་རིག་ཡིན་ཕྱིར་ཤེས་བྱ་རྫོགས། །རང་ཁྱབ་ཡིན་ཕྱིར་འབྲས་བུ་རྫོགས། །རང་སངས་ཡིན་ཕྱིར་རྒྱུ་རྐྱེན་རྫོགས། །རང་རྟོགས་ཡིན་ཕྱིར་ཆོས་ཉིད་རྫོགས། །རང་བྱུང་ཡིན་ཕྱིར་རྒྱུད་ལུང་རྫོགས། །རང་རྫོགས་ཡིན་ཕྱིར་ཕྲིན་ལས་རྫོགས། །རང་ཡེ་ཐོབ་ཕྱིར་དབང་རྣམས་རྫོགས། །རང་དག་ཡིན་ཕྱིར་དམ་ཚིག་རྫོགས། །རང་ཤེས་ཡིན་ཕྱིར་གདམས་ངག་རྫོགས། །རང་བཞིན་ཡིན་ཕྱིར་བསམ་གཏན་རྫོགས། །རང་ཆས་ཡིན་ཕྱིར་དུས་གཅིག་རྫོགས། །ཞེས་གསུངས་ནས་ལྷན་ནེར་བཞུགས་སོ། །ཐེག་པའི་སྤྱི་ཕུད་ཀློང་ཆེན་རབ་འབྱམས་ཀྱི་རྒྱུད་ལས། སྣང་གཞི་རང་སར་རྫོགས་ཚུལ་གྱི་ལེའུ་སྟེ་ཞེ་གཅིག་པའོ།། །།ས་མ་ཡ། རྒྱ་རྒྱ་རྒྱ། སེམས་དཔའ་རྡོ་རྗེས་ཡང་ཞུས་པ། །དེ་ལྟ་བུ་རུ་རྫོགས་ནའང་། །འབྲས་བུ་ཐོབ་མེད་ཐོབ་ཚུལ་རྣམས། །འདུས་པའི་འཁོར་ལ་བཀའ་སྩོལ་ཅིག །སྟོན་པས་གསན་དགོངས་བཀའ་སྩལ་པ། །ཀྱེ་ཧོ་རིག་མདངས་འཁོར་རྣམས་ཉོན། །འབྲས་བུ་ཐོབ་ཚུལ་འདི་ལྟར་རོ། །ཤེས་སུ་མེད་པའི་ཆོས་སྐུ་ཤེས། །བརྗོད་དུ་མེད་པའི་མན་ངག་ལ། །གཟུང་དུ་མེད་པའི་རིག་པ་ཟིན། །བཤད་དུ་མེད་པའི་ཆོས་ཉིད་ལ། །ཐོབ་ཏུ་མེད་པའི་
འབྲས་བུ་ཐོབ། །ཡི་གེ་མེད་པའི་རྒྱུད་ཆེན་ལ། །བཤད་དུ་མེད་དེ་རྩལ་ཡང་རྫོགས། །ཆོས་ཀུན་མ་བསླབས་པ་ལ་ཤེས། །མ་བསྒོམས་ཡེ་ནས་ཏིང་འཛིན་ཐོབ། །ལུང་དང་རིག་པ་དུས་གཅིག་རྫོགས། །སྔགས་དང་ཕྱག་རྒྱ་དཀྱིལ་འཁོར་ལྷ། །མཆོད་དང་དབང་དང་དམ་ཚིག་ནི། །མ་བཙལ་ཅོག་བཞག་ཆེན་པོར་ཐོབ། །འདས་དང་མ་འོངས་ད་ལྟ་རྣམས། །སྐད་ཅིག་ཆ་ལ་དུས་གསུམ་རྫོགས། །ས་དང་ལམ་དང་ཚོགས་རྣམས་ནི། །བགྲོད་སྦྱངས་བསག་མེད་སྐད་ཅིག་ཐོབ། །གཞི་དང་ལམ་དང་འབྲས་བུ་ནི། །ཇི་ལྟར་གནས་པའི་ཚུལ་ན་རྫོགས། །ངོ་བོ་རང་བཞིན་ཐུགས་རྗེ་གསུམ། །སྙོག་མེད་རང་སར་ཉིད་ན་བདེ། །ཆོས་སྐུ་ལོངས་སྐུ་སྤྲུལ་སྐུ་གསུམ། །མ་སྐྱེས་རྫོགས་པའི་ཚུལ་ན་ཐོབ། །ལྟ་བ་སྒོམ་པ་སྤྱོད་པ་གསུམ། །མ་བརྟེན་འཁོར་བའི་ཚུལ་དུ་རྫོགས། །སངས་རྒྱས་ཆོས་དང་དགེ་འདུན་གསུམ། །ཡེ་རྫོགས་ལྷུན་གྲུབ་ཆེན་པོར་གནས། །སྣང་དང་སྟོང་དང་དབྱེར་མེད་ནི། །མ་བྱས་ཡེ་རྫོགས་ཉིད་དུ་གནས། །ས་དང་ཆུ་དང་མེ་དང་རླུང་། །ནམ་མཁའ་ཡེ་རྫོགས་ཚུལ་དུ་ཐོབ། །ཨ་ཧོ་སེམས་དཔའ་རྡོ་རྗེ་རྩལ། །རྒྱ་རུ་མེད་པའི་སངས་རྒྱས་ཐོབ། །འདའ་རུ་མེད་པའི་མྱང་འདས་ཐོབ། །དྲི་མ་མེད་དེ་ཀ་ནས་དག །ཐོག་མར་བྱུང་བས་རྒྱུད་པ་ཟབ། །ལྟ་དང་བྲལ་བས་རྩིས་ལས་འདས། །དུག་གི་རྒྱུ་རྐྱེན་བདེ་བ་ཆེ། །བརྗོད་པའི་རྒྱུ་མེད་སྨྲ་བསམ་འདས། །ཡེ་ནས་རང་རིག་རྣམ་པར་དག །ཟག་པ་ཟད་པས་རྡོས་བཅས་མེད། །གཉིས་ཀྱི་འཕེལ་མེད་ངོ་བོ་ཉིད། །ཆོས་དང་བྲལ་བས་མཐའ་ལས་འདས། །རྟོག་མེད་གསལ་བས་འགྱུ་བ་སངས། །བེམ་རིག་གཉིས་མེད་ཚོགས་གཉིས་རྫོགས། །འགྲན་པའི་ཟླ་མེད་ཅོག་བཞག་ངང་། །ངོ་ལྐོག་མཚན་མ་གདོད་ནས་མེད། །འགྱུར་བ་མ་ཡིན་དྲང་པོར་གནས། །ཡོངས་ལ་ཁྱབ་པས་སེམས་གཅིག་པོ། །གྲུབ་མཐའ་རྫོགས་པའི་སྤྱི་ཕུད་ཡིན། །ཐོག་མ་བར་དང་མཐའ་མ་གྲུབ། །དེ་ལྟར་འབྲས་བུ་འཁྲུལ་མེད་གཞི། །རང་རིག་ཡེ་ནས་འོད་ཟེར་གསལ། །སྐུ་གསུམ་ཡེ་ནས་
མ་བསྐྱེད་རྫོགས། །འབྲས་བུ་རང་གནས་ཆེན་པོའོ། །ཨ་ཧོ་རིག་མདངས་འཁོར་རྣམས་ཉོན། །ཡེ་རྫོགས་ཡེ་ཡིན་སྐུ་གསུམ་ལ། །ཆོས་ཀྱིས་དེ་ལ་བཅོས་སུ་མེད། །གྲུབ་མཐའ་ཡེ་ནས་སྐྱོན་དང་བྲལ། །དུག་ལྔས་ཡེ་ནས་གོས་པ་མེད། །འཁོར་འདས་འདུ་འབྲལ་ག་ལ་ཡོད། །མངོན་སུམ་གསལ་བས་བརྗིད་རེ་ཆེ། །སྣང་བ་སྣ་ཚོགས་ལྷུན་རེ་སྡུག །ཆོས་སྐུ་ངོ་སྤྲོད་དང་རེ་སྤྲོ། །ངོ་བོ་ཟང་ཐལ་ཡངས་པ་ཆེ། །རང་བཞིན་ཀུན་ཁྱབ་གདལ་བ་ཆེ། །ཐུགས་རྗེ་ཀུན་འབྱུང་སྐྱེད་རེ་ཆེ། །ཁྱབ་པ་ཡེ་མདངས་བཀྲག་རེ་བཟང་། །གནས་པ་ཐོགས་མེད་བང་རེ་མགྱོགས། །རིག་པ་རང་སྣང་འོད་རེ་གསལ། །སྟོན་པ་ཀུན་འབྱུང་ངོ་རེ་མཚར། །སྣང་སྲིད་གཞི་བཞེངས་དཔངས་རེ་མཐོ། །འབད་མེད་རང་གསལ་རྒྱ་རེ་ཆེ། །མ་བཀོད་རང་ཤར་བྲིས་རེ་ལེགས། །གཞི་སྣང་ཆེན་པོ་ངོ་མཚར་ཆེ། །འཁོར་འདས་གཉིས་པོ་འདྲེལ་རེ་མཁས། །སྐུ་ལྔ་ཡེ་ཤེས་རྩིག་པ་མཁས། །རང་བཞིན་གནས་པའི་ངོ་བོ་ལ། །སངས་རྒྱས་མེད་ཅིང་སེམས་ཅན་མེད། །མ་རིག་མེད་ཅིང་འཁྲུལ་པ་མེད། །སེམས་མེད་ཡིད་ཀྱང་ཡོད་མ་ཡིན། །དགྲ་དང་བཤེས་མེད་རྒྱུ་རྐྱེན་མེད། །ཕུང་པོ་མེད་ཅིང་ཁམས་ཀྱང་མེད། །ཡུལ་མེད་འཛིན་པར་བྱ་བ་མེད། །དབང་པོ་མེད་ཅིང་ཡུལ་ཡང་མེད། །གཟུང་བར་བྱ་བའི་འཛིན་པ་མེད། །དམིགས་མིང་ཡང་མེད་གཞལ་ཡས་ཁང་ཡང་མེད། །ལྷ་མེད་མཆོད་པའི་ཡུལ་ལས་འདས། །གཞི་ལ་གོམས་པའི་རྣལ་འབྱོར་པས། །རང་གི་གནས་ཀྱང་རྟོགས་པར་འགྱུར། །ལམ་ལ་གོམས་པའི་རྣལ་འབྱོར་པས། །འབྱུང་བ་རགས་པའི་དྲི་མ་ཟད། །འབྲས་བུ་དག་ལ་སུ་གོམས་པ། །ཀ་དག་ས་ལ་འདི་ཡིས་ཕྱིན། །སངས་རྒྱས་འབྲས་བུ་འདི་ཡིས་ཐོབ། །སངས་རྒྱས་ལ་ཡང་གྲངས་མང་སྟེ། །རྣམ་པ་ལྔ་རུ་འདུས་པའོ། །ངོ་བོ་ཀ་དག་སངས་རྒྱས་དང་། །རང་བཞིན་ལྷུན་གྲུབ་སངས་རྒྱས་དང་། །ཐུགས་རྗེ་ཀུན་ཁྱབ་སངས་རྒྱས་དང་། །འབྲས་བུ་རྒྱུ་དག་སངས་རྒྱས་དང་། །མཚན་མ་ཡོངས་གྲོལ་སངས་རྒྱས་སོ། །
དེ་ཡང་རྣམ་པ་གཉིས་སུ་འདུས། །ཡང་དག་རྫོགས་པའི་སངས་རྒྱས་དང་། །མངོན་པར་རྫོགས་པའི་སངས་རྒྱས་གཉིས། །ཡང་དག་རྫོགས་པའི་སངས་རྒྱས་ནི། །ངོ་བོ་སྐུ་རུ་རྒྱས་པ་དང་། །རང་བཞིན་འོད་དུ་རྒྱས་པ་དང་། །ཐུགས་རྗེ་ཟེར་དུ་རྒྱས་པའོ། །མངོན་པར་རྫོགས་པའི་སངས་རྒྱས་ནི། །སྐུ་དང་གསལ་དང་འཇའ་དང་འོད། །མངོན་སུམ་གསལ་ན་རྒྱས་པའོ། །ཐོག་མར་མ་རིག་པ་ཡི་སེམས། །རིག་པས་བསྐྱེད་པའི་ལུས་སེམས་འདི། །ཡེ་ཤེས་ཉིད་ཀྱི་ངོ་བོ་སྟེ། །འབྱུང་ལྔ་ཡེ་ཤེས་ལྔ་ལ་ཐིམ། །ལྷག་མ་མེད་པར་སངས་རྒྱས་སོ། །དེ་ཡི་ཐུགས་རྗེའི་ཆ་ཙམ་ལས། །གཞན་དོན་དཔག་མེད་འབྱུང་བའོ། །ཐེག་པ་ཀུན་གྱི་སྤྱི་ཕུད་ཀློང་ཆེན་རབ་འབྱམས་ཀྱི་རྒྱུད་ལས། འབྲས་བུ་སྐུ་གསུམ་ལྷུན་གྲུབ་ཀྱི་ལེའུ་སྟེ་ཞེ་གཉིས་པའོ།། །།ས་མ་ཡ། རྒྱ་རྒྱ་རྒྱ། དེ་ནས་སེམས་དཔའ་རྡོ་རྗེས་ཡང་ཞུས་པ། ཀྱེ་ཧོ། ལྟ་སྒོམ་སྤྱོད་པའི་བདག་ཉིད་ཀུན་ཏུ་བཟང་། །ཡེ་རྫོགས་ཆེན་པོའི་འབྲས་བུ་བསྟན་གྱུར་ཀྱང་། །ད་རུང་ལྟ་སྒོམ་སྤྱོད་པའི་དོན་མ་བསྟན། །ཀློང་ཆེན་ཡངས་པའི་ཐུགས་ཀྱི་སྒོ་ཕྱེ་ལ། །བལྟ་དང་མི་བལྟ་ཀུན་བཟང་ཡངས་པའི་ཀློང་། །སངས་རྒྱས་ཀུན་གྱི་དགོངས་པ་རབ་གསལ་བ། །འདུས་པའི་ཚོགས་ལ་ཀློང་ནས་དགྲོལ་དུ་གསོལ། །ཞེས་ཞུས་སྟོན་པས་བཀའ་སྩལ་པ། །ཀྱེ་ཧོ་སེམས་དཔའ་རྡོ་རྗེ་རྩལ་སོགས་ཉོན། །བསམ་གྱིས་མི་ཁྱབ་བརྒྱད་ཁྲི་བཞི་སྟོང་དང་། །གསུང་རབ་བཅུ་གཉིས་སྡེ་སྣོད་རྒྱུད་ཀུན་སྩོགས། །ཐེག་པའི་ཁྱད་པར་གྲུབ་པའི་མཐའ་རྣམས་ཀུན། །ཀུན་བཟང་ཆོས་ཀྱི་དབྱིངས་ཆེན་ཀློང་ནས་བཀྲོལ། །ལྟ་བའི་ཀློང་ཆེན་རབ་འབྱམས་ལ་བཟླ་བ། །ཉན་ཐོས་རང་རྒྱལ་ཐེག་ཆེན་མདོ་སྡེ་དང་། །སྤྱི་དང་ཁྱད་པར་ལྟ་བའི་བྱེ་བྲག་རྣམས། །ཡེ་ཀློང་ཆེན་པོའི་དོན་ལ་བསྒྲིབས་འགྱུར་ཅིང་། །སངས་རྒྱས་ལྟ་དགོངས་ཕྱིན་ཅི་མ་ལོག་པ། །དེ་ཡིས་དོན་ལ་དབབ་པར་རབ་ཏུ་དཀའ། །བརྟག་པར་དཀའ་ལ་བརྗོད་པའི་ཐ་སྙད་བྲལ། །དཔེ་དང་གཏན་
ཚིགས་ལུང་རིགས་ཀུན་གྱིས་ཀྱང་། །འདི་ཞེས་མཚོན་པར་ཚིག་ཏུ་བརྗོད་དང་བྲལ། །བརྗོད་མེད་དོན་ཉིད་ཀློང་ཆེན་རབ་འབྱམས་དོན། །ཆོས་ཉིད་སྐྱེ་མེད་ཀློང་ཡངས་འཁྱིལ་པའི་སྐུ། །ངང་ངམ་ཤུགས་ཀྱིས་བྱིན་གྱིས་རླབས་ཀྱིས་རྟོགས། །ཀུན་ཏུ་བཟང་པོའི་ཆོས་ཀྱི་དབྱིངས་ཀློང་ནས། །བཀྲོལ་ཞིང་བཤད་པ་ལྟ་བའི་ཀློང་ཆེན་འདི། །ལས་དང་སྐལ་ལྡན་རྣམས་ཀྱིས་རྟོགས་པར་གྱིས། །ཆོས་ཉིད་ཀློང་རྡོལ་ལྟ་བ་ཡེ་ཀློང་ཆེ། །འཁོར་འདས་ཐམས་ཅད་རིག་པའི་བྱང་ཆུབ་སེམས། །ཡུལ་ཉིད་རྣམ་སྤངས་སྒྲོ་སྐུར་བྲལ་བའི་ཀློང་། །སེམས་ཉིད་སྟོང་པ་ངོས་བཟུང་ཀུན་ཏུ་བྲལ། །མེད་པ་མ་ཡིན་རོལ་པ་འགག་པ་མེད། །རང་བཞིན་སྐྱེ་བ་མེད་ཅིང་བརྗོད་དང་བྲལ། །སྐྱེ་མེད་རོལ་པ་གཉིས་མེད་གཉིས་སུ་མེད། །དེ་ཉིད་སྤྲོས་པའི་མཐའ་རྣམས་ཀུན་དང་བྲལ། །ཕྱོགས་རིས་མེད་པ་ལྟ་བ་ཡངས་པའི་ཀློང་། །མ་འགགས་ཤར་བ་རང་བྱུང་ཡེ་ཤེས་ཉིད། །རྒྱུ་དང་རྐྱེན་བྲལ་རྟག་པ་ཆེན་པོའི་སྐུ། །རྟོགས་པའི་ཀློང་ཆེན་རབ་འབྱམས་དོན་རྟོགས་ན། །སྐད་ཅིག་གྲོལ་འགྱུར་ཡང་སངས་རྒྱས་འགྱུར་ཞིང་། །རང་བཞིན་ཀ་དག་སྤྲོས་པའི་མཚན་མ་བྲལ། །མ་འདྲེས་ཡོངས་རྫོགས་ནམ་མཁའི་གཟུགས་བརྙན་བཞིན། །ཐམས་ཅད་མཉམ་ཉིད་ཀློང་དུ་རོ་གཅིག་གོ། །རྣམ་པར་དག་པའི་དེ་ཉིད་ཡེ་ཤེས་དོན། །འདི་ལྟར་སངས་རྒྱས་ཡེ་ནས་རྣམ་པར་དག །ལྷུན་གྱིས་གྲུབ་པའི་སངས་རྒྱས་བདེ་བ་ཆེ། །ཉོན་མོངས་ལྔ་ཉིད་ཡེ་ཤེས་ལྔ་པོ་སྟེ། །དུག་གསུམ་སྐུ་གསུང་ཐུགས་སུ་རབ་རྟོགས་པས། །ངོ་མཚར་རྨད་བྱུང་སྡུག་བསྔལ་ཟུག་རྔུ་ཞི། །ཀློང་ཆེན་རབ་འབྱམས་ཨ་ཏི་ཡོ་གའི་ལུང་། །ཀུན་ཀྱང་རབ་གསལ་ཐེག་པ་ཀུན་གྱི་དོན། །ལྟ་བའི་མཐར་ཐུག་དགོངས་པའི་ཞེ་ཕུགས་འདི། །མཐའ་ཡི་མུན་གསལ་ཀློང་ཆེན་ཡངས་པའོ། །ཐེག་པའི་སྤྱི་ཕུད་ཀློང་ཆེན་རབ་འབྱམས་ཀྱི་རྒྱུད་ལས། ལྟ་བ་རྒྱ་མཚོ་ཀློང་རྡོལ་བའི་ལེའུ་སྟེ་ཞེ་གསུམ་པའོ།། །།ས་མ་ཡ། རྒྱ་རྒྱ་རྒྱ།
དེ་ནས་ཡང་སེམས་དཔའ་རྡོ་རྗེ་རྩལ་གྱིས་གསོལ་པ། ཀུན་ཏུ་བཟང་པོ་རབ་འབྱམས་ཀློང་ཆེན་ཡངས། །ཡེ་ནས་དངོས་པོའི་གཞི་ཉིད་དག་པ་ལ། །སྒོམ་དང་མི་བསྒོམ་ཐ་སྙད་ཀུན་ལས་གྲོལ། །སྒོམ་པའི་དོན་ཉིད་ཀློང་ནས་དགྲོལ་དུ་གསོལ། །ཞུས་པའི་ལན་དུ་སྟོན་པས་བཀའ་སྩལ་པ། །དེ་ཉིད་དོན་རྟོགས་ཀློང་ནས་ཀུན་ཀྱང་གསལ། །སྒོམ་དང་མི་བསྒོམ་ཐ་སྙད་ཀུན་དང་བྲལ། །རང་བཞིན་འོད་གསལ་ངང་གིས་མ་གཡོས་ཀྱང་། །རང་སེམས་དྲི་མེད་འོད་གསལ་སྙིང་པོའི་དོན། །མ་ནོར་མ་བཅོས་སྤྲོས་དང་བྲལ། །བློ་ཡི་བཞག་ཐབས་ཇི་བཞིན་ཉིད་དུ་བདེ། །ཟབ་མོ་ཀློང་ཡངས་འཁྱིལ་པའི་དོན་ཉིད་ལ། །བྱིང་རྨུགས་རྒོད་དང་འཕྲོ་བ་ཀུན་སྤངས་ཤིང་། །སྨྲར་མེད་ཀློང་དུ་བསྡིམ་པའི་རྣལ་འབྱོར་པས། །མཚོན་དང་མ་མཚོན་མེད་པའི་ཐག་ཆོད་དེ། །སྒོམ་དང་བསྒོམ་པར་བྱ་བ་མ་རྙེད་པས། །བྱིང་རྒོད་རྣམ་རྟོག་དགྲ་བོ་གསང་མི་དགོས། །རྟོག་པའི་ཀློང་དུ་འདྲིས་པ་སྒོམ་པའི་མཆོག །སྒོམ་པ་ཀློང་དུ་གྱུར་པ་ཕ་རོལ་ཕྱིན། །རྣམ་པར་མི་རྟོག་རྟོག་པའི་ཡུལ་ལས་འདས། །གཟུང་དང་འཛིན་སྤངས་བྱང་ཆུབ་སེམས་ཉིད་དོན། །ཇི་བཞིན་གཏན་ལ་ཕབ་པ་མཉམ་པར་བཞག །ཡུལ་གྱིས་མི་འཕྲོག་མ་བཅོས་ལྷུག་པ་དེ། །སྒོམ་པའི་ངོ་བོ་ཉམས་སུ་མྱོང་བའི་དཔེ། །ལུས་ངག་སེམས་ཀྱི་སྡུག་བསྔལ་ལས་གྲོལ་ཞིང་། །བྱང་ཆུབ་སེམས་ཀྱི་སྒོམ་པའི་དོན་རྟོགས་ན། །དྲོད་རྟགས་ཆོ་འཕྲུལ་ཀུན་ཀྱང་ཤུགས་ལས་འབྱུང་། །གོལ་སྒྲིབ་མ་སྤངས་རང་སར་དག་འགྱུར་ཞིང་། །ཀློང་ཆེན་རབ་འབྱམས་ཀློང་དུ་གྱུར་པའི་ཚེ། །དེ་ཉིད་རྒྱལ་བ་ཀུན་དང་རབ་མཉམ་ཞིང་། །བདེ་གཤེགས་སྐུ་གསུང་ཐུགས་དང་མཉམ་པར་འགྱུར། །བྱང་སེམས་དྲང་པོར་གནས་དང་བརྟན་ཅིང་གོམས། །དེ་ཉིད་བོགས་དབྱུང་བསྒོམ་པར་བྱ་བ་དང་། །མཁའ་ལ་ཉི་ཤར་ཇི་བཞིན་གསལ་བ་སྟེ། །སྣང་བའི་ཐུག་ཕྲད་གང་གང་དེ་དེ་ཉིད། །གཟུང་འཛིན་མཚན་མ་རང་གྲོལ་ཤེས་པར་བྱ། །སེམས་ཉིད་ཅོག་བཞག་དྲན་མེད་རང་སར་བཞག །རྒྱ་མཚོ་བཞིན་དུ་རབ་ཟབ་གཡོ་འགུལ་མེད། །
ཆུ་བོའི་རྒྱུན་བཞིན་རིག་པ་རྒྱུན་འཆད་མེད། །རྡོ་རྗེ་ལྟ་བུའི་ཏིང་འཛིན་འཕོ་འགྱུར་མེད། །དབང་པོ་རྣོ་རྟུལ་རིམ་དང་ཅིག་ཆར་དུ། །ཉམས་སུ་བླངས་པས་སྒོམ་པའི་བྱེ་བྲག་ཀུན། །ཀུན་བཟང་ཐུགས་ཀྱི་ཀློང་ནས་བཀྲོལ་ཞིང་བསྟན། །སྒོམ་པ་ཀློང་ཡངས་ཁྱབ་གདལ་ཆེན་པོའོ། །ཐེག་པའི་སྤྱི་ཕུད་ཀློང་ཆེན་ཡངས་པའི་རྒྱུད་ཆེན་ལས། སྒོམ་པའི་དོན་ཀློང་ནས་བཀྲོལ་བའི་ལེའུ་སྟེ་ཞེ་བཞི་པའོ།། །།ས་མ་ཡ། རྒྱ་རྒྱ་རྒྱ། དེ་ནས་སེམས་དཔའ་རྡོ་རྗེ་རྩལ་གྱིས་གསོལ། །རྒྱལ་བའི་རྒྱ་མཚོ་ཀུན་ཏུ་བཟང་། །ཆོས་དབྱིངས་དག་པའི་ཡེ་ཀློང་ཆེན་པོ་ལ། །བྱ་དང་མི་བྱ་ལུས་ངག་སྤྱོད་པའི་དོན། །བྱར་མེད་ལྷུག་པའི་དོན་ཉིད་བཤད་དུ་གསོལ། །བཅོམ་ལྡན་འདས་ཀྱིས་བཀའ་སྩལ་པ། །ལྟ་བ་ཡེ་ཀློང་ཆེན་པོའི་དོན་རྟོགས་ནས། །ཇི་བཞིན་བསྒོམ་པའི་ངང་ལ་གནས་གྱུར་པས། །ལུས་ངག་ཡིད་ཀྱི་སྤྱོད་པ་ཀུན་བཟང་ཀློང་། །ཡངས་པ་ཆེན་པོ་བྱ་བཙལ་ཀུན་བྲལ་ཀྱང་། །ལྟ་བའི་རྩིས་ཟིན་སྤྱད་ན་ཀུན་ཀྱང་བཟང་། །དབྱིངས་དང་ཡེ་ཤེས་ངང་ལས་མ་གཡོས་ཀྱང་། །ཐབས་མཁས་ཐུགས་རྗེའི་མཛད་སྤྱོད་བསམ་མི་ཁྱབ། །སྤྱོད་པ་ཇི་སྙེད་བསམ་ཡས་དེ་སྙེད་ཀུན། །ཐབས་ཀྱིས་ཀུན་སྤྱོད་གདེང་གིས་ཟིན་པར་སྤྱད། །ཆེད་དུ་བྱར་མེད་དོན་ལ་བཀག་མེད་ཀྱང་། །བྱ་བ་མེད་པས་གྲོལ་བ་སྒྲོལ་བར་བྱ། །ཀུན་འཁོལ་ཀུན་སྤྱོད་བདག་ཉིད་ཆེན་པོར་སྤྱད། །འདི་ལ་བརྟུལ་ཞུགས་ལ་སོགས་སྔགས་རྣམས་མེད། །བྱ་བ་མེད་པས་ལས་རྣམས་ཀུན་ཀྱང་བྲལ། །ལྷུན་གྲུབ་བླང་དོར་མེད་དེ་རང་བྱུང་ཀློང་། །སྤྱོད་པ་རྒྱ་མཚོ་རྣམ་པར་དག་བྱེད་ཅིང་། །དུས་དང་རྣམ་པ་ཀུན་ཏུ་ཤུགས་ཕྱུང་སྤྱད། །ཡ་ངའི་སྤྱོད་པ་ལ་སོགས་ཀུན་ཀྱང་སྤངས། །ཆེད་དུ་བྱར་མེད་དོན་ལ་མ་བཀག་ཀྱང་། །འགལ་བའི་སྤྱོད་པ་ཀུན་ཀྱང་རྣམ་པར་སྤངས། །སྨྱོན་པ་ལྟ་བུའི་བརྟུལ་ཞུགས་རབ་སྤང་ཞིང་། །ལུས་ངག་ཡིད་ཀྱི་སྤྱོད་པ་རྩོལ་དང་བྲལ། །སྦྱང་བགྲོད་སྤྱོད་པས་འཆིང་འགྱུར་ཅི་བྱར་ཡོད། །འོན་ཀྱང་དགེ་བའི་ཆོས་སྤྱོད་ཀུན་ལ་ཡང་། །མ་ཆགས་
མི་གཡོའི་སྟོབས་ཀྱིས་གྲོལ་བར་འགྱུར། །སྤྱོད་པ་སྤྱད་དུ་ཡོད་པའི་དངོས་གཞི་ལ། །མེད་པའི་ཕྱོགས་འཛིན་མ་སྤངས་པ་ཡིས་སྤྱོད། །སྤྱད་དུ་མེད་པ་ཆེན་པོའི་དངོས་གཞི་ལ། །ཡོད་པའི་ཕྱོགས་འཛིན་མ་སྤངས་པ་ཡིས་སྤྱོད། །སྤྱད་དུ་ཡོད་མེད་གཉིས་ཀའི་དངོས་གཞི་ལ། །གཉིས་མེད་ཕྱོགས་འཛིན་མ་སྤངས་པ་ཡིས་སྤྱོད། །གཉིས་མེད་སྤྱོད་པ་སྤྱད་པའི་དངོས་གཞི་ལ། །གཉིས་ཀའི་ཕྱོགས་འཛིན་མ་སྤངས་པ་ཡིས་སྤྱོད། །མདོར་ན་གང་སྣང་གང་ཤར་དངོས་གཞི་ལ། །ཕྱོགས་འཛིན་མ་སྤངས་ཤུགས་འབྱུང་སྤྱོད་པར་གྲོལ། །ཀློང་ཡངས་འུབ་ཆུབ་བརྡལ་ཁྱབ་ཆེན་པོའི་ངང་། །སྤྱིར་ཆིབ་ཆེན་པོ་ས་བཅུ་འདུས་པའི་ཀློང་། །གཅིག་ཏུ་འདུས་པས་མཐོ་དམན་ཡོངས་ཀྱིས་མེད། །མཐོ་དམན་མེད་པས་ཡངས་དོག་མེད་པ་ཡིན། །མཐའ་དབུས་བྲལ་བས་ཕྱི་ནང་མེད་པར་སྤྱོད། །སྐྱེ་འགག་མེད་པས་དུས་གསུམ་སྤྱོད་པའི་ཀློང་། །དུས་གསུམ་མེད་པས་སྐྱེ་ཤི་མེད་པར་འབྱམས། །ཇི་སྙེད་ཤར་ཀྱང་གཡོ་བ་རྡུལ་ཙམ་མེད། །རྒྱལ་བ་ཀུན་ཏུ་བཟང་པོའི་དགོངས་པའོ། །ཞེས་གསུངས་ནས་རང་ལས་ཐ་དད་མེད་པའི་སྐུ་གསུམ་གྱི་ཀློང་ན་སྐུ་ངོ་བོ་ངེས་མེད་དུ་སངས་རྒྱས། གསུང་ལྷུན་གྲུབ་གྲག་སྟོང་དུ་སངས་རྒྱས། ཐུགས་སྐྱེ་མེད་ཀ་དག་ཏུ་སངས་རྒྱས་སོ། །ཐེག་པའི་སྤྱི་ཕུད་ཀློང་ཆེན་རབ་འབྱམས་ཀྱི་རྒྱུད་ལས། སྤྱོད་པ་རྒྱ་མཚོ་བརྡལ་བ་ཆེན་པོའི་ལེའུ་སྟེ་ཞེ་ལྔ་པའོ།། །།ས་མ་ཡ། རྒྱ་རྒྱ་རྒྱ། དེ་ནས་སེམས་དཔའ་རྡོ་རྗེ་ཡིས། །སྟོན་པ་ཉིད་ལ་ཡང་ཞུས་པ། །ཀྱེ་ཀྱེ་སྟོན་པ་ཀུན་ཏུ་བཟང་། །ལྟ་སྒོམ་སྤྱོད་འབྲས་དེ་ལྟ་ན། །ཨ་ཏི་ཆེན་པོ་འདི་ཉིད་ལ། །སེམས་ཅན་བློ་ཡི་ཁྱད་པར་གྱིས། །གོལ་ས་ཡོད་མེད་སྟོན་པས་གསུང་། །འདུས་པའི་འཁོར་རྣམས་ཉན་སྤྲོའོ། །ཞུས་པས་གསན་དགོངས་བཀའ་སྩལ་པ། །ཨ་ཧོ་སེམས་དཔའ་རྡོ་རྗེ་རྩལ། །ལྟ་སྒོམ་རྣམས་ཀྱི་གོལ་ས་ནི། །སྟོང་པ་ཉིད་ལ་ཨ་འཐས་ན། །གཟུགས་མེད་སྐྱེ་མཆེད་མུ་བཞིར་གོལ། །དངོས་
པོ་ཅན་དུ་འཐས་པ་ན། །གཟུགས་ཁམས་གནས་རིགས་བཅུ་བདུན་དང་། །བེམས་པོ་ལྟ་བུར་གོལ་བར་འགྱུར། །ལུ་གུ་རྒྱུད་ཀྱི་སྣང་བ་ལ། །རྟག་པ་ཅན་དུ་འཛིན་པ་ན། །ཆགས་པ་ཆེན་པོས་བཅིངས་པར་འགྱུར། །འགྲོ་དྲུག་གནས་སུ་དེ་གོལ་ལོ། །སྤྱོད་པ་དག་ལ་གོལ་ས་གསུམ། །འདི་ལྟར་སྣང་བ་ཐམས་ཅད་ཀུན། །སྨྱོན་པ་ཐོ་ཅོ་སྤྱོད་པ་ན། །ནམ་མཁའ་ལྟ་བུར་མཐའ་ཡས་གོལ། །དོན་ལ་མྱང་མེད་ཁ་ཆོས་ཆེ། །མུ་སྟེགས་ལྟ་བུར་གོལ་བར་འགྱུར། །ཆོས་སྤྱོད་རྒྱུ་འབྲས་མི་བརྩི་ན། །ཐ་མལ་སྐྱེ་བོར་གོལ་བའོ། །སྒོམ་པ་དག་ལ་གོལ་ས་གསུམ། །བཏང་སྙོམས་བདག་མེད་བསྒོམ་པ་ན། །སྟོང་སྣང་མུན་སྣང་ཉིད་དུ་གོལ། །ཏིང་འཛིན་ཡིག་འབྲུ་སྒོམ་བྱེད་ན། །ཆགས་བཟུང་འཁོར་བའི་གནས་སུ་གོལ། །མི་རྟོག་སྟོང་པ་བསྒོམ་བྱས་ན། །ཆད་པ་མུ་སྟེགས་ལྟ་བུར་གོལ། །དེ་སོགས་གོལ་རྒྱུ་བསམ་ཡས་ཀྱང་། །གོལ་ས་རྟག་ཆད་གཉིས་སུ་འདུས། །དོན་ལ་གོལ་སྒྲིབ་མེད་ན་ཡང་། །ལམ་པའི་རྣལ་འབྱོར་ཉིད་ལ་ནི། །གནས་ངན་གྲོགས་ངན་ཡུལ་ངན་གསུམ། །གོལ་ས་ཆེ་བ་གསུམ་དུ་བཤད། །ཁ་རན་ཁོང་གྱོང་རང་རྒྱུད་ངན། །དུག་ལྔ་དུག་གསུམ་ལོ་འདབ་རྒྱས། །དེ་རྣམས་རང་རྒྱུད་གོལ་ས་ཡིན། །ཉམས་སུ་ལེན་པར་བྱེད་པ་ལ། །བར་ཆད་བདུད་ཀྱིས་འཁྱེར་བས་ན། །བདུད་ཀྱི་གོལ་ས་ཐམས་ཅད་གཅད། །ཕྱི་ནང་གསང་བའི་བདུད་གསུམ་སྟེ། །ཆོས་པ་རྣམས་ལ་ཆོས་མ་བདུད། །ཆོས་མ་རྣམས་ལ་ཆོས་པ་བདུད། །གཉིས་ཀའི་བདུད་དུ་འདོད་ཆགས་ཆེ། །ཐམས་ཅད་གཟུང་འཛིན་ཚེ་འདི་ཡི། །སྣང་བ་ཉིད་ལ་འཐས་པས་ལན། །རྩ་བ་བདུད་བཞི་ཆོད་པ་ན། །གོལ་ས་ཐམས་ཅད་ཆོད་པའོ། །ཆོས་སྐུ་གཟུང་འཛིན་ཕྱོགས་བྲལ་ལ། །མཚན་མའི་བདུད་དང་གོལ་སྒྲིབ་བྲལ། །ཐེག་པའི་སྤྱི་ཕུད་ཀློང་ཆེན་རབ་འབྱམས་ཀྱི་རྒྱུད་ལས། གོལ་ས་བཅད་པའི་ལེའུ་སྟེ་ཞེ་དྲུག་པའོ།། །།ས་མ་ཡ། རྒྱ་རྒྱ་རྒྱ།
སེམས་དཔའ་རྡོ་རྗེས་ཡང་ཞུས་པ། །ཀྱེ་ཧོ་སྟོན་པ་ཀུན་ཏུ་བཟང་། །གོང་ལྟར་གདམས་པ་བསྟན་ན་ཡང་། །སྣང་བ་བཞི་པོ་མ་རྫོགས་ཤིང་། །གལ་ཏེ་གདམས་པའི་གནད་ཡོད་ཀྱང་། །བྱ་བ་ལེ་ལོས་གཡེངས་པ་རྣམས། །ཉམས་སུ་ལེན་ལོང་མེད་པ་རུ། །བར་ཆད་རྐྱེན་གྱིས་འཆི་བ་ན། །འདི་ལ་འཆི་རྟགས་བསླུ་བའི་ཐབས། །བར་དོའི་གདམས་པ་བསྟན་དུ་གསོལ། །གསན་དགོངས་སྟོན་པས་བཀའ་སྩལ་པ། །ཀྱེ་ཧོ་སེམས་དཔའ་རྡོ་རྗེ་ཉོན། །བར་དོ་ཞེས་བྱ་ཆོས་སྤྱིའི་སྐད། །འདི་རུ་ཆོས་ཀུན་མ་འདུས་མེད། །དེ་ལ་བར་དོའི་དབྱེ་བ་དང་། །ཆོས་ཉིད་ས་མཚམས་སྣང་ལུགས་སོ། །དེ་ལ་དབྱེ་བ་བཞི་ཡིན་ཏེ། །དང་པོ་སྐྱེ་གནས་བར་དོ་དང་། །འཆི་ཁ་སྡུག་བསྔལ་བར་དོ་དང་། །ཆོས་ཉིད་ཞི་ཁྲོའི་བར་དོ་དང་། །སྲིད་པར་འཁྱམས་པའི་བར་དོའོ། །གཉིས་པ་ཆོས་ཉིད་བར་དོ་ནི། །རང་ལུས་འདོམ་གང་གྲུ་བཞི་འདི། །ཁམས་རྣམས་དང་ནི་ཕུང་པོ་དང་། །སྐྱེ་མཆེད་རྣམས་དང་དབང་པོ་དང་། །ཡུལ་དང་ཡུལ་ཅན་ཉོན་མོངས་རྣམས། །ཇི་ལྟར་གནས་པ་གཏན་ལ་དབབ། །འདི་དག་ཤེས་པའི་རྣལ་འབྱོར་པས། །སྣང་བ་ཐམས་ཅད་དབང་སྒྱུར་ནུས། །ཁམས་ལ་རྣམ་པ་གཉིས་ཡིན་ཏེ། །ཡུལ་གྱིས་བསྡུས་པ་ཕྱི་ཡི་ཁམས། །སེམས་ཀྱིས་བསྡུས་པ་ནང་གི་ཁམས། །ཁམས་ཀྱི་རྣམ་པ་དེ་དག་ཀྱང་། །ཡུལ་ཀུན་འཛིན་པ་འཁྲུལ་པའོ། །ཕུང་པོ་རྟོག་པ་དང་བཅས་པ། །དངོས་པོ་ཐམས་ཅད་གཅིག་ཏུ་སྡུད། །རྟོག་པ་མེད་པའི་ཕུང་པོ་འདི། །བསམ་གཏན་གཅིག་འདུས་ཏིང་འཛིན་ནི། །སྐྱེ་མཆེད་གཟུང་འཛིན་གཉིས་ཡིན་ཏེ། །གཟུང་བའི་སྐྱེ་མཆེད་བཅུ་གཉིས་དང་། །འཛིན་པའི་སྐྱེ་མཆེད་བཅུ་གཉིས་སོ། །དབང་པོ་གཟུགས་ཀྱི་ཆ་འཛིན་དང་། །ཤེས་རབ་ཆ་འཛིན་དབང་པོའོ། །ཡུལ་ལ་དངོས་པོའི་ཡུལ་དང་ནི། །དངོས་པོ་མེད་པའི་ཡུལ་གཉིས་སོ། །ཡུལ་ཅན་ཐམས་ཅད་རྣམ་པར་དག །དག་ཅེས་བྱ་བ་ཆོས་ཟད་དོ། །ཉོན་མོངས་པ་ནི་དྲུག་ཡིན་ཏེ། །མ་རིག་གཏི་
མུག་ཞེ་སྡང་དང་། །ང་རྒྱལ་འདོད་ཆགས་ཕྲག་དོག་གོ། །འཆི་ཁ་མ་ཡི་ཆོས་ཉིད་ནི། །འཆི་རྐྱེན་ནད་ཀྱིས་འབྱུང་བ་འཁྲུགས། །ལུས་ངག་ཡིད་གསུམ་སྡུག་བསྔལ་ཏེ། །འཛིན་ཆགས་ཞེན་པའི་མཚོ་རྡོལ་ནས། །ལུས་སེམས་བྲལ་གྱིས་དོགས་པ་ཡིས། །སྡུག་བསྔལ་ཤིན་ཏུ་རགས་པ་སྟེ། །བན་བུན་དང་ནི་ལང་ལོང་དང་། །ཤེས་པ་གཅིག་ཏུ་མི་གནས་པའོ། །ཆོས་ཉིད་བར་དོའི་ཆོས་ཉིད་ནི། །ཕུང་པོ་མེད་ཅིང་ཟག་བཅས་བྲལ། །ཞི་བའི་སྐུ་དང་ཁྲོ་བོའི་སྐུ། །ཡེ་ཤེས་འོད་དང་ཁ་དོག་དང་། །ཐིག་ལེ་མཆེད་དང་འབྱུང་སྣང་དག །སྣང་བ་ཐམས་ཅད་བདེ་ཆེན་ཞིང་། །རང་སྣང་དག་པར་ཀུན་སྣང་སྟེ། །ཅིར་སྣང་ཆོས་ཉིད་གཞལ་ཡས་སོ། །སྲིད་པ་བར་དོའི་ཆོས་ཉིད་ནི། །ཤ་ཁྲག་རང་གི་གཟུགས་བྲལ་ནས། །སྒྱུ་མ་ཡིད་ཀྱི་གཟུགས་ཅན་དེས། །ཆོས་ཉིད་བདེན་པའི་དོན་མ་མཐོང་། །འོད་སྣང་ཀུན་ལ་དྲེད་སྔངས་ནས། །སྟོང་གསུམ་ཀུན་ཏུ་ཡིད་ཀྱིས་རྒྱུ། །བྱ་སྒྲོ་རླུང་གིས་ཁྱེར་བ་བཞིན། །ཕྱད་ཕྱོད་ཡད་ཡུད་སྙོམས་ཤིང་འཇུག །བན་བུན་ལང་ལོང་རྨི་ལམ་འདྲ། །ས་གཅིག་མི་ཚུགས་ཚིག་པ་ཟ། །གར་སླེབ་ལ་སོགས་རིགས་དྲུག་འོད། །སོ་སོའི་དམིགས་པ་སྣང་བའོ། །ས་མཚམས་སྐྱེ་གནས་བར་དོ་ནི། །མ་ལ་སྐྱེས་ནས་འཆི་རྐྱེན་གྱི། །ནད་ཀྱིས་བཏབ་པ་ཚུན་ཆད་དོ། །འཆི་ཁའི་བར་དོ་ནད་ཐེབས་ནས། །ནང་དབུགས་ཆད་པ་ཚུན་ཆད་དོ། །ཆོས་ཉིད་བར་དོ་དབུགས་ཆད་ནས། །ལྷུན་གྲུབ་སྣང་བ་ཤར་བའོ། །སྲིད་པ་བར་དོའི་ས་མཚམས་ནི། །ལྷུན་གྲུབ་སྣང་བ་ཡོངས་ཐིམ་ནས། །མངལ་དུ་ཚུད་པ་ཚུན་ཆད་དོ། །སྣང་ལུགས་གདམས་པའི་གནད་བཞི་བསྟན། །རང་བཞིན་སྐྱེ་གནས་བར་དོ་ལ། །ཤེས་བྱའི་གྲས་ཐག་གཅད་པར་བྱ། །འཆི་ཁ་མ་ཡི་བར་དོ་ལ། །གདམས་པ་རྣམས་ལ་གསལ་ཡང་གདབ། །ཆོས་ཉིད་ཞི་ཁྲོའི་བར་དོ་ལ། །རང་སྣང་ཀུན་ལ་ཡིད་ཆེས་བྱ། །སྲིད་པར་འཁྱམས་པའི་བར་དོ་ལ། །ལས་ཀྱི་འཕྲོ་མཐུད་ཞེན་ཆགས་སྤངས། །
དང་པོ་སྐྱེ་གནས་བར་དོ་ཡི། །ཤེས་བྱའི་གྲས་ཐག་བཅད་པ་ལ། །མཚན་ཉིད་ལྡན་པའི་བླ་མ་བརྟེན། །ཐོས་པས་ཕྱི་ཡི་སྒྲོ་འདོགས་བཅད། །བསྒོམ་པས་ནང་གི་སྒྲོ་འདོགས་བཅད། །ཤེས་བྱས་ཡུལ་གྱི་གྲས་ཐག་བཅད། །འདུས་པས་སེམས་ཀྱི་གྲས་ཐག་བཅད། །སྣང་སེམས་གཉིས་མེད་གྲས་ཐག་བཅད། །གསང་བར་ཁྲེགས་ཆོད་གཏན་ལ་དབབ། །ཡང་གསང་ཐོད་རྒལ་གཏན་ལ་དབབ། །རྟགས་ཚད་གདེང་དང་ལྡན་པར་བྱ། །ཞེས་གསུངས་ནས་ལྷན་ནེར་བཞུགས་སོ། །ཐེག་པའི་སྤྱི་ཕུད་ཀློང་ཆེན་རབ་འབྱམས་ཀྱི་རྒྱུད་ལས། བར་དོ་སྤྱིའི་རྣམ་གཞག་བསྟན་པ་དང་། སྐྱེ་ཤི་བར་དོའི་གདམས་པ་བསྟན་པའི་ལེའུ་སྟེ་ཞེ་བདུན་པའོ།། །།ས་མ་ཡ། རྒྱ་རྒྱ་རྒྱ། ( སེམས་དཔའ་རྡོ་རྗེས་ཡང་ཞུས་པ། །ཀྱེ་ཧོ་སྟོན་པ་ཀུན་ཏུ་བཟང་། །སྐྱེ་གནས་བར་དོ་དེ་ལྟར་ན། །འཆི་ཁའི་བར་དོ་ཇི་ལྟར་འཆར། །སྟོན་པས་ལན་དུ་བཀའ་སྩལ་པ། །ཨ་ཧོ་སེམས་དཔའ་རྡོ་རྗེ་ཉོན། །འཆི་ཁ་མ་ཡི་བར་དོ་ལ། །དང་པོ་འཆི་བ་བརྟག་ཅིང་བསླུ། །མ་ཟློགས་གདམས་པའི་གསལ་ཡང་གདབ། །འཆི་རྟགས་ཕྱི་ནང་གསང་གསུམ་སྟེ། །ཕྱི་ཡི་འཆི་ལྟས་མཚན་མ་ནི། །མི་མཐུན་ཕྱོགས་རྣམས་ཐོག་ཏུ་འབྱུང་། །དབང་པོ་མི་གསལ་ཚིག་པ་ཟ། །ནོར་དང་ལོངས་སྤྱོད་གོད་པ་དང་། །རང་སེམས་ཕྱད་ཕྱོད་རྨི་ལམ་འཁྲུག །དགེ་སྦྱོར་མི་ནུས་འདུག་མི་ཚུགས། །རྨི་ལམ་ངན་ཞིང་དྲེད་སྔངས་འབྱུང་། །གདམས་ངག་མི་གསལ་ལོག་ལྟ་སྐྱེ། །སྔར་སྤྱོད་འགྱུར་ཞིང་ཆགས་སྡང་རགས། །བར་ཆད་ཞུགས་པའི་རྟགས་ཡིན་ནོ། །ནང་དུ་འབྱུང་བའི་པྲ་འགྱུར་བས། །དེ་ཕྱིར་ནང་གི་ཚེ་གཟུགས་བརྟག །སྤྱི་གཙུག་རལ་ནག་མི་གསལ་དང་། །ཁ་དོག་སྣ་ཚོགས་ཡན་ལག་མེད། །དྲག་པོ་དབང་དང་ཞི་བའི་གཟུགས། །ཡན་ལག་འཁུམས་སམ་ཁ་དོག་ལ། །བར་ཆད་བྱུང་ན་ནང་གི་རྟགས། །གསང་བ་སེམས་ལ་འཆར་བ་སྟེ། །བླ་མ་ཡི་དམ་མཁའ་འགྲོ་འམ། །ཆོས་སྐྱོང་གཟུགས་ཀྱིས་ལུང་སྟོན་དང་། །མངོན་ཤེས་རྫུ་འཕྲུལ་ནུས་མཐུ་རྣམས། །
བསྒྲུབ་པ་མ་བྱས་སྟོན་པར་ནུས། །སྙིང་རྗེ་མི་འདུ་གཡེང་བ་སྐྱེ། །བརྒྱུད་དང་འཕྲལ་དངོས་འཇམ་རྩུབ་ཏུ། །རྣལ་འབྱོར་པ་ལ་བར་ཆད་བྱེད། །ང་རྒྱལ་ཕྲག་དོག་རེ་དོགས་དང་། །རློམ་སེམས་ཞེན་པའི་བདུད་ཀྱིས་ཁྱེར། །དེ་ཡིས་ཚེ་དང་མཆོག་ལ་སྒྲིབ། །རྣལ་འབྱོར་དོན་གཉིས་འགྲུབ་མི་འགྱུར། །དེས་ན་ཟབ་མོའི་གདམས་པ་འདི། །གཅེས་པར་གྱིས་ལ་ཡིད་ལ་ཟུང་། །དེ་ལྟར་ཕྱི་ནང་གསང་བ་ཡི། །འཆི་ལྟས་བྱུང་ན་བསླུ་བ་ནི། །ཕྱི་ཡི་འཆི་ལྟས་བྱུང་དུས་སུ། །བར་ཆད་ཡིན་པས་དྲན་པས་བཟུང་། །བསོད་ནམས་ཚོགས་སོགས་གྲུབ་ཚད་བྱ། །བླ་མ་བརྟེན་ཅིང་གསོལ་བ་བཏབ། །མོས་གུས་བསྐྱེད་ལ་དབང་བསྐུར་ཞུ། །ཟློག་པ་བསྐང་གསོ་དག་ལ་འབད། །དགེ་སྦྱོར་གདམས་པའི་གནད་ལ་འབུངས། །དེ་ཡིས་བར་ཆད་ཞི་བར་འགྱུར། །ནང་ལྟར་བྱུང་ན་བསླུ་བ་ནི། །གྲོ་ག་རས་སམ་ཤིང་ཤུན་ལ། །འབྱུང་བ་ལྔ་ཡི་འཁོར་ལོ་ནི། །རྩིབས་བཞི་ལྟེ་བ་མུ་ཁྱུད་བཅས། །ས་ཆུ་མེ་རླུང་ནམ་མཁའ་ཡི། །རང་རང་ས་བོན་རེ་རེ་དགོད། །མུ་ཁྱུད་ཨཱ་ལི་ཀཱ་ལིས་བསྐོར། །དེ་ལྟར་འཁོར་ལོ་ལྔ་བྲིས་ལ། །རང་རང་ས་བོན་ལོ་གྲངས་བཀོད། །འབྱུང་བའི་ལྷ་ལྔ་དགུག་ཅིང་བསྡིམ། །ཤིང་མེ་ས་ཆུ་སྣ་ཚོགས་དང་། །སེམས་ཅན་ཁ་རླངས་བསྒྲེས་པའི་ཟན། །ངར་གླུད་དབང་པོ་དོད་པར་བྱ། །ལོ་གྲངས་གླུད་ཀྱིས་ཟ་མ་བསྐོར། །གཏོར་མ་ཆང་བུ་དེ་ལྟར་རོ། །སྔགས་དང་ཕྱག་རྒྱས་བྱིན་གྱིས་བརླབ། །རྡོ་རྗེའི་ཚིག་བརྗོད་ཆུ་ལ་བསྐུར། །འཆི་བ་ལོ་གསུམ་བར་དུ་བཟློག །ཤིན་ཏུ་ཟབ་པས་ཉམས་སུ་བླང་། །གསང་བའི་འཆི་བ་བསླུ་བ་ནི། །མཐུན་རྐྱེན་བསོད་ནམས་སྐྱེས་པ་ལ། །རབ་ཀྱིས་ཆོས་ཉིད་རོལ་པར་ཁྱེར། །འབྲིང་གིས་ཞེན་ཆགས་སྒྱུ་མར་སྦྱང་། །ཐ་མས་རི་དྭགས་བཞིན་དུ་བྲོས། །མཆོག་ལ་བརྟན་པ་མ་ཐོབ་པར། །ཆོས་ཉིད་ངང་ལས་འགྱུར་མི་བྱ། །ཅིར་སྣང་རང་གི་སེམས་ཡིན་པས། །རང་དུ་ཐག་བཅད་ཡ་ང་སྤངས། །སེམས་ལ་བལྟས་པས་གྲུབ་པ་མེད། །དེ་ཡིས་
འཁྲུལ་པ་ཞིག་པ་ཡིན། །འཁྲུལ་པ་ཞིག་ན་སངས་རྒྱས་ཡིན། །སྐད་ཅིག་དེ་ཡིས་གྲོལ་བར་འགྱུར། །གསང་བའི་འཆི་བ་བསླུ་བ་འདིས། །བདུད་ལས་རྒྱལ་ནས་བུཌྜྷའོ། །དུས་ལ་བབ་སྟེ་མ་བཟློག་ན། །སྐྱེས་བུའི་ལུས་ལ་ནད་བཏབ་ནས། །རྟགས་འདི་སུ་ལ་བྱུང་བ་དེ། །འཆི་བའི་དུས་ནི་ངེས་པ་ཡིན། །ས་ནི་ས་ལ་ཐིམ་པ་ན། །ལུས་ནི་ལྕི་ཞིང་ཟས་མི་ལེན། །ལངས་འདུག་འགྲོ་བའི་སྟོབས་ཀུན་ཟད། །ཆུ་ནི་ཆུ་ལ་ཐིམ་པའི་ཚེ། །ཁ་ཆུ་སྣ་ཆུ་འཛག་པར་བྱེད། །དེ་བཞིན་མེ་ལ་མེ་ཐིམ་པས། །ཁ་སྣ་དག་ནི་རབ་ཏུ་སྐམ། །ལུས་ཀྱི་མཐའ་ཡི་དྲོད་རྣམས་འཆོར། །དེ་བཞིན་རླུང་ལ་རླུང་ཐིམ་པས། །དབུགས་ནི་ངར་ངར་ཡན་ལག་གཡོབ། །མིག་ཀྱང་གྱེན་ལ་བཟློག་པའོ། །རྟགས་འདི་སུ་ལ་བྱུང་བ་དེ། །འདི་ལ་མི་གནས་ཕ་རོལ་ཏུ། །ངེས་པ་རུ་ནི་འགྲོ་བས་ན། །དེ་ཚེ་བླ་མའི་གདམས་ངག་རྣམས། །རང་གི་རྒྱུད་ལ་འདྲིས་པར་བྱ། །དོན་འདི་རྣམས་ཀྱིས་གསལ་ཡང་གདབ། །གལ་ཏེ་དེ་དག་མི་གསལ་ན། །རང་གི་བླ་མ་བཞུགས་ན་རབ། །བླ་མ་མེད་ན་རྡོ་རྗེའི་སྤུན། །ལྟ་སྤྱོད་མཐུན་ཅིང་དམ་གཙང་བས། །ཤེས་པ་གསལ་ཡང་གདབ་པར་བྱ། །གལ་ཏེ་ཕྱི་དབུགས་ཆད་ན་ནི། །རླུང་སྦྱང་འཕོ་བའི་གནད་བྱས་ཏེ། །གདམས་པ་བཏབ་པས་ངེས་པར་ཐེབས། །གདམས་པའི་གནད་ནི་འདི་ལྟར་གདབ། །ཕུང་པོ་སེང་གེའི་ཉལ་ལུགས་བཅོས། །རིག་པ་ཉིད་ནི་མིག་ལ་གཏད། །ཡིད་དང་ཤེས་པ་བར་སྣང་ལ། །དབྱིངས་དང་རིག་པ་མི་འགྱུར་གཏད། །ས་ལེ་ཧྲི་གེ་སང་ངེ་བཞག །སྒྲ་རྣམས་ཐམས་ཅད་རང་གི་སྒྲ། །འོད་ཟེར་ཐམས་ཅད་རང་གི་འོད། །སྣང་བ་ཐམས་ཅད་རང་སྣང་ངོ་། །གསལ་སྟོང་འཛིན་པ་མེད་པའོ། །དབྱིངས་དང་རིག་པ་མ་འགྱུར་ན། །མི་དེ་བར་དོ་མེད་པར་འགྱུར། །གལ་ཏེ་དབྱིངས་ཉིད་མ་གསལ་ན། །བླ་མས་བར་དོའི་འོད་སྣང་རྣམས། །ཡང་ཡང་སྤྱི་བོར་ཁ་གཏད་བཤད། །བཏགས་གྲོལ་རྒྱུད་དང་གདམས་པ་རྣམས། །རྣ་བར་སྦུ་གུ་བཅུག་ལ་བཤད། །དེས་
ནི་བརྟན་པ་ཐོབ་པར་འགྱུར། །ཅེས་གསུངས་སོ། །ཐེག་པའི་སྤྱི་ཕུད་ཀློང་ཆེན་རབ་འབྱམས་ཀྱི་རྒྱུད་ལས། འཆི་བ་བརྟག་པ་བསླུ་བ་དང་། འཆི་ཁ་བར་དོ་བསྟན་པའི་ལེའུ་སྟེ་ཞེ་བརྒྱད་པའོ།། །།ས་མ་ཡ། རྒྱ་རྒྱ་རྒྱ། སེམས་དཔའ་རྡོ་རྗེས་ཡང་ཞུས་པ། །ཀྱེ་ཧོ་འཆི་ཁའི་བར་དོ་དེ་ལྟར་ན། །ཆོས་ཉིད་བར་དོ་ཇི་ལྟར་ལགས། །སྟོན་པས་གསན་ནས་བཀའ་སྩལ་པ། །ཀྱེ་ཧོ་སེམས་དཔའ་རྡོ་རྗེ་ཉོན། །ཆོས་ཉིད་བར་དོ་ཞེས་བྱ་བ། །དེ་དུས་རླུང་གིས་རྣམ་ཤེས་ལ། །ཐིམ་པས་ནང་དབུགས་འཆད་པར་འགྱུར། །རྣམ་ཤེས་ནམ་མཁའ་ལ་ཐིམ་པས། །ལུས་དང་སེམས་ཀྱི་འདྲེལ་བ་ཆད། །དབུགས་ནི་བར་སྣང་ཁམས་སུ་ཡལ། །ལུས་པོ་བེམ་པོར་ལིངས་ཀྱིས་འགྲོ། །རིག་པ་མེ་སྟག་ཡལ་བ་ལྟར། །འོད་གསལ་ཆོས་ཉིད་ས་རུ་སླེབ། །ནམ་མཁའ་འོད་གསལ་ལ་ཐིམ་པས། །ཕྱི་ཡི་ས་རྡོ་རི་བྲག་འགག །ནང་དུ་འོད་གསལ་ཆོས་ཉིད་འཆར། །སྔར་གྱི་ལུས་ཀྱི་བག་ཆགས་ཀྱིས། །རྡོས་བཅས་ལུས་འདི་མི་སྣང་ཀྱང་། །ཡོད་དོ་སྙམ་པའི་ཤེས་པ་འབྱུང་། །སྟེང་འོག་ཕྱོགས་མཚམས་མ་ལུས་ཀུན། །བར་མཚམས་མེད་པ་འོད་ལྔའི་ཞིང་། །ཕྱི་ནས་བལྟས་པས་ནང་ཡང་གསལ། །ནང་ནས་བལྟས་པས་ཕྱི་ཡང་གསལ། །ལྟེམ་ལྟེམ་བཞིན་ནམ་མེར་མེར་བཞིན། །མནན་ན་ནེམ་ནེམ་བྱེད་པ་སྙམ། །བཏེགས་ན་འཕར་བར་སྙམ་པ་དང་། །ཤིན་ཏུ་ཡིད་དུ་འོང་བ་དང་། །ཁ་དོག་ལྔ་རུ་གསལ་བ་དང་། །འཕྲ་བ་འགུལ་བ་འཕྲིག་པ་དང་། །གསལ་འཚེར་ལྷུན་སྡུག་གཟི་བརྗིད་འཕྲོ། །རྒྱ་ཆེ་ཁོག་ཡངས་དཔངས་མཐོ་བ། །རྩེ་མོ་ཡངས་པ་ཞེས་བྱ་སྟེ། །བྱས་པ་མེད་པར་རབ་བྱུང་བཞུགས། །དེ་ཚེ་དུས་གནད་གསུམ་ཡིན་ཏེ། །འཇུག་པ་ཤེས་པའི་གནད་དང་ནི། །གྲོལ་བ་ལུས་ཀྱི་གནད་དག་དང་། །མཐར་ཕྱིན་རང་ངོ་ཤེས་པའི་གནད། །འཇུག་པ་ལ་ཡང་དུས་གཉིས་ཏེ། །རིག་པ་འོད་ལ་འཇུག་པ་དང་། །འོད་ནི་རིག་པར་འཇུག་པའོ། །རིག་པ་འོད་ལ་ཕར་འཇུག་པ། །གང་གི་འོད་སྣང་དེ་དག་ནི། །སྐུ་ཡི་སྣང་བར་འཆར་བ་སྟེ། །དཔག་མེད་གྲངས་ལས་འདས་པ་ལ། །སེམས་དཔའ་དང་ནི་སེམས་མར་བཅས། །
ཡབ་དང་ཡུམ་གྱི་ཆ་འཛིན་ཅིང་། །མུ་ཁྱུད་འོད་ལྔའི་ར་བས་བསྐོར། །སྣང་བ་ཐམས་ཅད་སྐུ་རུ་འཆར། །དེ་ཚེ་རང་གི་སྙིང་ག་ནས། །འོད་ཟེར་ཤིན་ཏུ་འཕྲ་བ་གཅིག །ལྷ་སྐུ་ཀུན་དང་འདྲེལ་བར་སྣང་། །དེ་ལ་རང་གི་ཤེས་པས་ཟིན། །རང་སྣང་ཡིན་པར་ཤེས་གྱུར་ན། །རང་བཞིན་དུ་ནི་མི་རྟོག་པའི། །བསམ་གཏན་དག་ལ་གནས་པ་དང་། །འོད་ཉིད་རིག་པར་ཚུར་འཇུག་པ། །ཡང་ནི་རང་གི་སྙིང་ནང་ནས། །འོད་ཟེར་ཚོན་སྐུད་བསྒྲིལ་བ་གཅིག །ཚོམ་བུའི་ལྷ་ཚོགས་ཐུགས་ཀར་འདྲེལ། །དེ་དུས་ཚོམ་བུའི་ལྷ་ཚོགས་རྣམས། །རང་ལ་ཐིམ་པའི་སྣང་བ་འཆར། །དེ་ནི་འོད་ཟེར་རིག་པ་ལ། །ཚུར་ལ་འཇུག་པ་ཞེས་བྱའོ། །དེ་ནས་གྲོལ་བ་ལུས་ཀྱི་གནད། །འདི་ཡི་དུས་ན་ཕུང་པོ་ལྔ། །བདག་ཏུ་འཛིན་པ་རང་དེངས་པས། །ལུས་ནི་ལོངས་སྤྱོད་རྫོགས་སྐུར་གྲོལ། །འབྱུང་བའི་རྡོས་བཅས་རང་དེངས་པས། །འོད་གསལ་བདེ་ཆེན་ཀློང་དུ་གྲོལ། །ཉོན་མོངས་ཕྲ་རགས་རང་གྲོལ་བས། །འོད་གསལ་རིག་པ་ཆོས་སྐུར་ཤར། །རིག་པ་མ་ལ་བུ་ཐིམ་གྲོལ། །འདི་དུས་ཡེ་ཤེས་བཞི་སྦྱོར་གྱི། །སྣང་བ་རང་གི་སྙིང་ལས་འཆང་། །དཀར་སེར་དམར་དང་མཐིང་གའི་འོད། །སྣམ་བུ་བརྐྱང་བ་ལྟ་བུའི་ཁར། །ཐིག་ལེ་ཟེར་དང་ལྡན་པ་ནི། །མེ་ལོང་ཁ་སྦུབ་བྱས་པ་ལྟར། །ཤིན་ཏུ་གསལ་ལ་འཚེར་བ་ལ། །རང་བཞིན་ཐིག་ལེ་ལྔ་ལྔ་ཡིས། །འོད་སྣང་བཞི་ཀའི་སྟེང་དུ་བརྒྱན། །དེ་ནི་ཡེ་ཤེས་བཞི་སྦྱོར་ཏེ། །རྡོ་རྗེ་སེམས་དཔའ་ཁོང་སེང་ལམ། །རིག་པའི་སྣ་ཐག་ཅེས་བྱའོ། །དེ་ཚེ་འཆར་ལུགས་བརྒྱད་འཆར་ཏེ། །དེ་ཡང་རང་རིག་ཡེ་ཤེས་འདི། །ཐུགས་རྗེ་ལྟར་དུ་ཤར་བས་ན། །འཁོར་འདས་གཉིས་པོ་རྒྱ་མ་ཆད། །རང་རིག་འོད་དུ་ཤར་བས་ན། །སྣང་བ་ཐམས་ཅད་ནང་ན་གསལ། །རང་རིག་སྐུ་ལྟར་ཤར་བས་ན། །ཤེས་པའི་ཁ་ནི་ཕྱིར་མ་ཤོར། །རང་རིག་ཡེ་ཤེས་ལྟར་ཤར་བས། །སྣང་བ་ཐམས་ཅད་ཟང་ཐལ་ཉིད། །རང་རིག་གཉིས་མེད་ལྟར་ཤར་བས། །རང་གི་ཤེས་པ་རྩེ་གཅིག་གནས། །རང་རིག་མཐའ་གྲོལ་ལྟར་ཤར་བས། །མཐའ་ནི་གང་ལ་ཡང་མི་གནས། །མ་དག་འཁོར་བའི་སྒོ་ལྟར་འཆར། །སྲིད་པའི་བྱུང་ཁུངས་མ་འགགས་སོ། །དག་པ་ཡེ་ཤེས་སྒོ་ལྟར་འཆར། །ཆོས་ཉིད་མ་དང་བུ་འབྲལ་ལོ། །ཇི་ལྟར་མཐོང་
བའི་ཡུལ་སྣང་ཀུན། །ཞི་བ་དང་ནི་ཁྲོ་བོའི་སྐུ། །ཆེ་བ་ནམ་མཁའི་མཐའ་དང་མཉམ། །ཆུང་བ་ཉུང་དཀར་འབྲུ་གུ་ཙམ། །འབྲིང་བ་རྣམས་ནི་རི་རབ་ཙམ། །རང་གི་སྙིང་དང་ཀླད་པ་ནས། །ཐོན་ནས་དེ་ལྟར་འཆར་བར་འགྱུར། །མང་ཉུང་དཔག་ཏུ་མེད་པ་སྟེ། །མགོ་བརྙན་མཚོན་ཆ་སྣ་ཚོགས་ཐོགས། །འོད་ནི་ཉི་མ་འབུམ་ཤར་ཙམ། །སྒྲ་ནི་འབྲུག་སྟོང་ལྡིར་བ་ཙམ། །ཟེར་ནི་མཚོན་ཆ་གཟིངས་པ་ཙམ། །སྐུ་ཡིས་སྐྲག་ཅིང་སྒྲ་ཡིས་སྔངས། །ཟེར་གྱིས་སྣང་བ་ཡང་བར་བྱེད། །རང་གི་ཕྱོགས་སུ་རྔུབ་པ་སྙམ། །དེ་ལ་འཇིགས་པར་མ་བྱེད་པར། །རང་སྣང་ཡིན་པར་ཐག་ཆོད་ཅིག །རང་རིག་ཡིན་པར་ཐག་ཆོད་ཅིག །མ་བུ་གཉིས་པོ་མ་འཛོལ་ཅིག །སྤྲོ་རྟོག་མ་བྱེད་ཐག་ཆོད་ཅིག །དེ་ལྟར་ཤར་ལུགས་བརྒྱད་བྱུང་དུས། །སྐད་ཅིག་མ་ནི་དང་པོ་ལ། །མངོན་པར་ཤེས་པ་དྲུག་ཕྲག་དྲུག །ཤིན་ཏུ་གསལ་བར་འཆར་བའོ། །སྐད་ཅིག་མ་ནི་གཉིས་པ་ལ། །རྗེས་སུ་དྲན་པ་དྲུག་འཆར་ཏེ། །ལྷ་དང་བླ་མ་སྐྱེ་གནས་དང་། །གདམས་ངག་ལྟ་བ་རྗེས་སུ་དྲན། །འདི་དུས་མི་བརྗེད་གཟུངས་རྣམས་ཀྱང་། །རང་གི་རྒྱུད་ལ་སྐྱེ་བར་འགྱུར། །སྐད་ཅིག་མ་ནི་གསུམ་པ་ལ། །གྲོལ་བའི་ཐིམ་ལུགས་བརྒྱད་འབྱུང་སྟེ། །ཐུགས་རྗེ་ཐུགས་རྗེ་ལ་ཐིམ་སྟེ། །ཉི་མ་ནུབ་པའི་ཟེར་ཐག་ལྟར། །གཟིགས་སྣང་ཀུན་ལས་འདས་པའོ། །ཡེ་ཤེས་ཡེ་ཤེས་ལ་ཐིམ་པས། །མ་པང་བུ་ཚུད་ལྟ་བུ་སྟེ། །ཆོས་ཉིད་མ་དང་རིག་པ་བུ། །ལྷུན་གྲུབ་སྦུབས་སུ་འཛོམ་པའོ། །འོད་ནི་འོད་ལ་ཐིམ་པ་སྟེ། །འཇའ་ཚོན་ནམ་མཁར་ཡལ་བ་ལྟར། །འོད་སྣང་ལྔ་ཡང་ནམ་མཁའ་འདུས། །སྐུ་ནི་སྐུར་ཐིམ་བུམ་སྐུ་འདྲ། །ཤེས་བྱ་ནང་དུ་གསལ་བས་ན། །མཚན་མ་ཞལ་ཕྱག་ཅན་དུ་མེད། །རང་ངོ་རྣམ་པར་དག་པའོ། །གཉིས་མེད་གཉིས་མེད་ལ་ཐིམ་སྟེ། །ཆུ་ལ་ཆུ་བོ་ཐིམ་པ་ལྟར། །གཏད་པའི་ཡུལ་མེད་རང་སངས་ཉིད། །མཐའ་གྲོལ་མཐའ་གྲོལ་ལ་ཐིམ་པས། །ནམ་མཁའ་ནམ་མཁར་ཐིམ་པ་ལྟར། །གཏད་པའི་ཡུལ་མེད་ཀ་ནས་དག །མ་དག་དག་པར་ཐིམ་པས་ཏེ། །སྦྲ་ཡི་ཆོན་ཐག་བསྡུས་པ་ལྟར། །ཐིག་ལེ་ཉག་གཅིག་ངང་དུ་རྫོགས། །དག་པ་ཡེ་ཤེས་ཆེན་པོ་ནི། །ངོ་བོའི་སྐུ་ལ་ཐིམ་པས་ཏེ། །སེང་གེ་གངས་ལ་ཟིན་པ་ལྟར། །ཡ་ངའི་རྟོག་པ་ཀུན་དང་བྲལ། །
ལྷུན་གྲུབ་ཀ་དག་རང་གྲོལ་ལོ། །དབང་པོ་དག་གི་བྱེ་བྲག་གིས། །རབ་ནི་སྐད་ཅིག་གསུམ་ལ་གྲོལ། །འབྲིང་ནི་སྐད་ཅིག་ཉེར་གཅིག་གམ། །ཞག་པོ་ལྔ་ལ་གྲོལ་བར་འགྱུར། །ཐ་མ་སྤྲུལ་སྐུའི་ཞིང་ཁམས་སུ། །བར་དོ་མེད་པར་སངས་རྒྱའོ། །ཆོས་ཉིད་བར་དོའི་འཆར་ཚུལ་ཡིན། །ཅེས་གསུངས་ནས་ལྷན་ནེར་བཞུགས་སོ། །ཐེག་པའི་སྤྱི་ཕུད་ཀློང་ཆེན་རབ་འབྱམས་ཀྱི་རྒྱུད་ལས། ཆོས་ཉིད་བར་དོའི་ལེའུ་སྟེ་ཞེ་དགུ་པའོ།། །།ས་མ་ཡ། རྒྱ་རྒྱ་རྒྱ། སེམས་དཔའ་རྡོ་རྗེས་ཡང་ཞུས་པ། །ཀྱེ་ཧོ་སྟོན་པ་ཀུན་ཏུ་བཟང་། །ཆོས་ཉིད་བར་དོ་དེ་ལྟར་ན། །སྲིད་པ་བར་དོ་ཇི་ལྟ་བུ། །སྟོན་པས་གསན་ནས་བཀའ་སྩལ་པ། །ཨ་ཧོ་སེམས་དཔའ་རྡོ་རྗེ་ཉོན། །བླ་མེད་ཐེག་མཆོག་འདིར་ཞུགས་ནས། །བརྩོན་འགྲུས་ཐ་མ་གཅིག་ཡིན་ཀྱང་། །སྲིད་པའི་བར་དོར་སྣང་ཙམ་ལས། །རྨི་ལམ་སད་པ་ལྟར་གྱུར་ནས། །འདི་ནས་སྤྲུལ་སྐུའི་ཞིང་ཁམས་སུ། །དབུགས་དབྱུང་སྐྱེ་བ་གཅིག་གིས་ཐོགས། །དེ་ནས་མཐར་ཕྱིན་གྲོལ་བར་འགྱུར། །ཆོས་སྒོ་འདི་ཉིད་མ་མཐོང་བའི། །གང་ཞིག་འགྲོ་བ་ཕལ་པ་རྣམས། །གོང་གི་ཆོས་ཉིད་བར་དོ་ལ། །གདམས་པའི་གནད་མེད་ངོ་མ་ཤེས། །འོད་ལ་འཇིགས་ཤིང་ཟེར་ལ་དངངས། །ཀུན་ལ་རྟོག་པ་ཟོས་པ་ཡིས། །དབང་པོ་མར་ལ་ཁ་འཁྱལ་ནས། །སྲིད་པའི་བར་དོ་ཉིད་དུ་ཚུད། །སྔོན་བྱུང་སྲིད་པའི་ཤ་གཟུགས་ཅན། །དབང་པོ་ཀུན་ཚང་ཐོགས་མེད་རྒྱུ། །རང་ལུས་མེད་ཀྱང་ཡོད་སྙམ་འཆར། །བྱ་སྒྲོ་རླུང་གིས་ཁྱེར་བ་བཞིན། །ཕྱད་ཕྱོད་ཡད་ཡུད་ཀུན་ཏུ་འཇུག །རིགས་དྲུག་གར་སྐྱེ་ལས་ལ་སྤྱོད། །དེ་ལ་ཁྱད་པར་ཉི་ཤུ་སྟེ། གཟུགས་དང་།སྐྱེ་མཆེད་དང་། འོད་དང་། སྐྱེ་གནས། མགོ་དང་། ཚེ་ཚད། མངོན་ཤེས། སྣང་བ། སྤྱོད་ལམ། མིང་དང་། རྫུ་འཕྲུལ། ལས། ཁ་དོག །འཁོར་ཚུལ། ངེས་ཚིག་དང་། དགེ་སྡིག །གར་གཏོགས། ཕྱི་མའི་ལས། ཉོན་མོངས་པ། དཔེ་དང་ཉི་ཤུའོ། །དེ་དུས་ལས་དབང་རྗེས་སུ་འདྲེང་། །ཆོས་ཉིད་མ་མཐོང་མ་རིག་ཅིང་། །རང་སྣང་དགྲ་རུ་ལངས་པ་རྣམས། །འཁོར་བ་མངལ་གྱི་སྒོར་ཚུད་ནས། །ཕ་དང་མ་ཡི་རྒྱུ་རྐྱེན་ལས། །མེར་མེར་ནུར་ནུར་པོར་གྱུར་ནས། །ཟླ་དགུ་ངོ་བཅུ་ལ་སོགས་
ནས། །ལུས་རྫོགས་མ་ཡི་མངལ་ནས་ཐོན། །དེ་ལྟར་གཟུགས་ནི་ཐ་དད་པར། །འཁོར་བ་ཉིད་དུ་འཁོར་བའོ། །དེ་ཡང་འཁོར་ལུགས་འདི་ལྟ་སྟེ། །དགའ་ལྡན་རྩོད་ལྡན་མྱོང་ལྡན་དང་། །སྡུག་བསྔལ་བཀྲེས་ལྡན་སྡུག་བསྔལ་ཆེ། །རྣམ་པ་དྲུག་གམ་ཁམས་གསུམ་དུ། །མ་རིག་འཁྲུལ་པའི་ལས་དབང་གིས། །རེས་འཇོག་དག་ཏུ་འཁོར་བར་འགྱུར། །དེ་དག་རྗེས་སུ་འཛིན་པའི་ཕྱིར། །བཏགས་གྲོལ་གདམས་པ་གཅེས་པར་ཟུང་། །ཞེས་གསུངས་ནས་ལྷན་ནེར་བཞུགས་སོ། །ཐེག་པའི་སྤྱི་ཕུད་ཀློང་ཆེན་རབ་འབྱམས་ཀྱི་རྒྱུད་ལས། སྲིད་པ་བར་དོའི་ལེའུ་སྟེ་ལྔ་བཅུ་པའོ།། །།ས་མ་ཡ། རྒྱ་རྒྱ་རྒྱ། སེམས་དཔའ་རྡོ་རྗེས་ཡང་ཞུས་པ། །ཀྱེ་ཧོ་སྟོན་པ་ཀུན་ཏུ་བཟང་། །བར་དོར་འཁྲུལ་གྱིས་དོགས་པ་ཡི། །སེམས་ཅན་རྗེས་སུ་གཟུང་བའི་ཕྱིར། །བཏགས་གྲོལ་གདམས་པ་གཟུང་ཞེས་པ། །སྔོན་ཆད་མ་གསུངས་གང་ལྟར་ལགས། །ཐུགས་རྗེ་ཅན་གྱིས་བཀའ་སྩོལ་ཅིག །སྟོན་པས་ལན་དུ་བཀའ་སྩལ་པ། །ཀྱེ་ཧོ་རིག་མདངས་འཁོར་རྣམས་ཉོན། །བཏགས་པས་གྲོལ་བའི་གདམས་པ་འདི། །འོན་ལོང་དབང་པོ་མ་ཚང་ཅིང་། །རྒན་གཞོན་ཕོ་མོ་དགེ་སྡིག་མེད། །བག་ཆགས་བཟང་ངན་མེད་པ་རུ། །འདི་ཉིད་བཅངས་པས་སངས་རྒྱའོ། །ཐ་མ་དབུགས་ལ་སླེབ་ཀྱང་གྲོལ། །སངས་རྒྱས་གདུང་འཛིན་སྲས་གཅིག་ཡིན། །ཨེ་མ་འདི་འཛིན་སྐལ་བ་ཆེ། །འདི་ནི་རང་བྱུང་ཆེན་པོའོ། །དེ་ཡི་འདྲི་ཐབས་བསྟན་པ་ནི། །གསེར་གྱི་རྡོ་རྗེ་རྩེ་ལྔ་པ། །ལྟེ་བར་སྐུ་གསུང་ཐུགས་ཡིག་བྲི། །ཨོཾ་ཨཱཿཧཱུྃ། ར་དྲུག་དག་ལ་ཡི་གེ་དྲུག །དེ་རུ་ཡིག་དྲུག་བཀོད་པར་བྱ། །ཨ་འ་ཧ་ཤ་ས་མ། འཁོར་བ་དོང་སྤྲུགས་ཡིག་དྲུག་ཡིན། །ཡི་གེ་དྲུག་གི་དོན་རྟོགས་ན། །གསང་སྔགས་གསང་བའི་རྒྱུད་ཆེན་ཁྲོལ། །ཡིག་དྲུག་དོན་གནས་མྱ་ངན་འདའ། །ཐམས་ཅད་ཡི་གེ་དྲུག་ལ་རྫོགས། །ཡིག་དྲུག་རིགས་དྲུག་དོང་ནས་སྤྲུག །འབྲུ་གསུམ་སྐུ་གསུམ་རང་སར་གྲོལ། །ཆོས་ཉིད་རང་སྒྲ་དག་པའི་ཚིག །བཏགས་གྲོལ་
ཚེག་བར་ཉེར་དྲུག་འདི། །རིགས་དྲུག་ཀློང་གྲོལ་ཞེས་སུ་གྲགས། །ཨེ་མ་ཀེ་རི་ཀེ་རི། མ་སྟ་བྷ་ལི་བྷ་ལི། ས་མི་ཏ་སུ་རུ་སུ་རུ། ཀུན་དྷ་ལི་མ་སུ་མ་སུ། ཨེ་ཀ་ལ་སུ་ལི་བྷ་ས་ཏ་ཡེ། ཙ་ཀྲ་ར་བྷུ་ལི་ཏ་ལྕེ་ཡཱེ། བྷེ་ཏི་ས་ན་བྱ་གྷུ་ལི་ཡཱི། ས་ཀ་རི་འདུ་ཀི་ནི། མ་ཏ་རི་བྷེ་ཏ་ན། པ་རི་ལི་ཧི་ས་ནི། མ་ཁར་ཀེ་ལ་ན། བྷུ་ར་ཏ། མེ་ཀ་ཙ་ར་ཏ་མ་པ། སུ་རྒྱ་གྷ་ཏ་ར། ཨེ་པ་ཤ་ན་ན་ཕ་ར་ན་བྷི་ཏི། ས་གྷུ་ར་ལ་ས། མ་སྨྲིན་ས་གྷུ་ཏེ་ཏ་ཡ་ས། གྷུ་ར་གྷུ་ར་པ་ག་ཁེ་ར་ན་ལཾ་ན་ར་ན་ར་ཨཱིཾ་ཐ་ར་བ་ཏ་ལཾ། སིར་ན་སིར་ན། བྷེ་ས་བྷེ་ས་ར་ས་པ་ལཾ། བྷུཌྜྷ་ཤུཌྜྷ་བྷུད་ཚིག་པ་གྱི་ལཾ། སཱ་ས། རི་རཱི། ལི་ལཱི། ཨི་ཨཱིཾ། མཱ་མཱ། རི་རཱི། སྭཱ་ཧཱ། ཀུན་བཟང་ཡབ་ཀྱི་དགོངས་པའོ། །མཚན་ཉིད་འཛིན་པའི་རིག་པ་ཉིད། །གཞི་མེད་རྩ་བྲལ་ཉིད་དུ་གྲོལ། །ཚེག་བར་ཉེར་བརྒྱད་རྡོ་རྗེའི་སྒྲ། །རང་བྱུང་རང་ཤར་ཉིད་དུ་གྲག །མ་སྟ་བྷ་ལི། ས་མི་ཏ་སུ་རུ་སུ་རུ། ཀུནྡྷ་ལི་ཀུནྡྷ་ལི། ཨཱེ་ཀ་རི་ལ་བྷ་ཏ་ཡེ། ཙ་ཏ་བྷུ། ལི་ཏ་ལྕ་ཡཱེ། ས་མནྟ་ཙ་རྒྱ། སུ་གྷ་ཡེ། བྷི་ས་ན་བྷ་གྷུ་ཡཱེ། ཀེ་རི་དྷ་ཀི་ན། དྷ་ཀ་མ་ཧ་བྷོ་རི། ཏ་ན་བྷ་ར་བ་ལི་ཏི། ས་ནཾ་ཁར་དྷ་ཀེ་ལན། ས་བྷུད་ར་ཏ། ཨཾ་ཙ་རས་ཏཾ། ཏྲ་ས་སུ་རྒྱ། གྷ་ཏ་ར་ཨ། མ་ནས་ར་བྷི་ཧོ། ཏིང་གྷུ་ང་ལ། མ་སྨིན་ས་གྷུ་ཏིལ། ཏ་ཡ་གྷུ་ར་དཱ་པ་ན་ཁ་བ་ར་ན་ལཾ། མ་ར་ན་ར་ལཾ། ཨི་ཐ་པ་ཐ་ལ། སིར་སྣ་སིར་སྣ། བྷེ་ས་རས་ས་ལཾ། བ་ཀེ་ལཾ། ས་ས། རི་རཱི། ལི་ལཱི། ཨི་ཨཱིཾ། མ་མཱ། ར་རཱ། ཀུན་བཟང་ཡུམ་གྱི་དགོངས་པའོ། །འ་ཨ་ཧ་ཤ་ས་མ། ཐིག་ལེ་ཀློང་དྲུག་པའོ། །ཚེག་བར་བརྒྱད་པ་རྡོ་རྗེའི་སྒྲ། ཨ་ཨཱ། ཨི་ཨཱིཾ། ཨུ་ཨཱུ། རྀ་རཱྀ། ལྀ་ལཱྀ། ཨེ་ཨཻ། ཨོ་ཨཽ། ཨཾ་ཨཱ། ཡབ་ཡུམ་གཉིས་མེད་དགོངས་པའོ། །ཚེག་བར་བརྒྱད་པ་རྡོ་རྗེའི་སྒྲ། ཀ་ཁ་ག་གྷ་ང་། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ། ཤ་ཥ་ས་ཧ་ཀྵཿ། སྐྱེ་འགག་གཉིས་མེད་དགོངས་པའོ། །ཚེག་བར་བཅུ་གཉིས་རྡོ་རྗེའི་སྒྲ། །ཨོཾ་ཡེ་དྷརྨཱ་ཧེ་ཏུ་པྲ་བྷ་ཝཱ་ཧེ་ཏུནྟེ་ཥཱནྟ་ཐཱ་ག་ཏོ་ཧྱ་ཝ་དཏ་ཏེ་ཥཱཉྩ་ཡོ་ནི་རོ་དྷ་ཨེ་ཝཾ་པཱ་དཱི་མ་ཧཱ་ཤྲ་མ་ཎ་ཡེ་སྭཱ་ཧཱ། བསྟན་པ་མི་འགྱུར་དགོངས་པའོ། །རིག་སྟོང་གཉིས་མེད་དགོངས་པ་ནི། །ཐིག་ལེ་རྩ་ལྔ་འདི་ཉིད་དོ། །དབང་པོའི་ཞེན་པ་བཟློག་པའི་ཕྱིར། །ཀརྨ་རགྴ་གྷི་ཧཾ་ཏི། ཕུང་པོའི་ཞེན་པ་བཟློག་པའི་ཕྱིར། །བྷེ་ག་ར་ན་
སོ་གད་གླིང་། །ཡུལ་ཀུན་ཞེན་པ་བཟློག་པའི་ཕྱིར། །བྷུ་ག་རི་ལ་བྷ་དྷུ་ཏྲི། །སེམས་ཀྱི་དངོས་པོ་སྤུར་བའི་ཕྱིར། །རམ་པ་ཀ་ལ་ས་མི་ཁྱེ། །བྱུང་ཚོར་གནས་སུ་བཅད་པའི་ཕྱིར། །མ་ཏང་ཕར་ཕོར་རས་མི་ཏེ། །འདུ་ཚོགས་སྣང་བ་ངོས་བཟུང་ཕྱིར། །ཁ་ཊ་ཏེ་ཀྵ་ས་མིག་རླུང་། །རིག་པ་བཙོན་རར་གཞུག་པའི་ཕྱིར། །ཨི་ཀེ་རཏྣ་བྷེ་ཙག་ཤ །འཁྲུལ་པའི་རང་རྒྱུད་ཁུངས་བཅད་ཕྱིར། །ས་ཡང་ཡ་རི་མུ་ཊ་ས་གྷུ་ལི། །རིགས་དྲུག་རིམ་གྱིས་བསྒྲལ་བའི་ཕྱིར། །ཡ་སིང་ར་རླུང་ས་ལ་ཡཱ། །འཁོར་བ་དོང་ནས་འདོན་པའི་ཕྱིར། །མ་མ་ཀོ་ལིཾ་ས་མནྟ། །ཆོས་ཅན་ཐུར་དུ་གཞག་པའི་ཕྱིར། །གྷ་རི་ཡཾ་ས་རེ་མ་ཏི། །རིག་པའི་བྱུང་ཁུངས་སྤུར་བའི་ཕྱིར། །བྷུ་གྷ་སིང་ཧ་པགྷ་ལ། །ཞེན་པའི་འཕྲང་ཐག་བཅད་པའི་ཕྱིར། །ར་མི་པི་པི་ཁེ་ཏ་བ། །ལུག་རྒྱུད་ཨར་ལ་གཏད་པའི་ཕྱིར། །མི་ཙི་ཡང་ཁུ་མ་ལ་པ་ཏཾ་ཀི། །ལྷ་ཡི་ཕྱག་རྒྱ་བལྟ་བའི་ཕྱིར། །ས་མ་ཉི་ཁ་བྷེ་ར་བ། །ལྟ་སྒོམ་ལག་པ་དག་བྱའི་ཕྱིར། །བཛྲ་སཏྭ་ཌྲྀ་ཌྷོ་མེ། །ས་ལམ་དུས་གཅིག་བཅད་པའི་ཕྱིར། །བྷེ་གྷ་སུ་གྷར་རྣ་མ་ཡེ། །ཡིད་དཔྱོད་ལྟ་བ་ཁུངས་བཅད་ཕྱིར། །དྷརྨ་པ་ཏི་ས་གྷུ་ལི། །སྐུ་གསུམ་ལམ་དུ་བླང་བའི་ཕྱིར། །ངས་མི་ས་མ་ཁ་གཙྪེ། །སྣང་བ་མངོན་སུམ་བླང་བའི་ཕྱིར། །རུ་པ་ས་མི་མི་ཏི་ལཾ། །སྦྲ་ཡི་ཞེན་པ་ཐག་བཅད་ཕྱིར། །ང་ཏིག་པ་ལ་ཀ་ལི་ས། །བསམ་གཏན་ཆེན་པོའི་ས་གནོན་ཕྱིར། །གྷ་ཚ་པ་ཡང་ས་ཨི་ཏཾ། །ཕྲིན་ལས་མཐའ་རུ་ཕྱིན་པའི་ཕྱིར། །ཀརྨ་ཨེ་ཀ་ཨ་ནུ་ས། །སངས་རྒྱས་མངོན་ཞེན་ཟློག་པའི་ཕྱིར། །ས་ཏྲི་མ་ཡ་ཀརྨ་ཏ། །རྒྱལ་སྲས་རྣམས་ཀྱི་གནས་བཙལ་ཕྱིར། །ང་ལ་ཁེ་བ་ཀེ་ལི་ས། །རིག་སྟོང་གཉིས་སུ་མེད་པ་ཡིས། །དབྱིངས་ནས་རང་བྱུང་ཚིག་ཏུ་གྲགས། །ཀུན་བཟང་ཡབ་ཡུམ་གཉིས་མེད་ཀྱི། །དགོངས་པ་རང་བྱུང་རང་ཤར་ཉིད། །རེ་རེས་གྲོལ་བར་ནུས་པའོ། །ཆོས་ཉིད་རང་ཤར་རང་གྲོལ་ཏེ། །ཐིག་ལེ་ཉི་ཤུ་རྩ་ལྔ་པ། །བཏགས་གྲོལ་ཐིག་ལེ་ཆེན་པོ་གྲགས། །རྒྱུད་ཀྱི་ཁོང་སྙིང་དམ་པ་སྟེ། །ཡང་གསང་བླ་མེད་སྙིང་པོའི་བཅུད། །ཡོངས་སུ་དྲིལ་བས་ཐིག་ལེ་ཆེ། །གང་ཟག་ལམ་གྱི་རྣལ་འབྱོར་པ། །འཆི་ཁའི་དུས་ལ་བབ་ཙམ་ན། །སྐྱེལ་མ་ལམ་མཁན་འདི་ཉིད་དོ། །རིགས་དྲུག་འབྲོས་ཁུངས་
བཅད་པ་དང་། །འཁོར་བ་དོང་ནས་སྤྲུགས་པ་དང་། །འཁྲུལ་སྣང་གཞི་ལ་བཟློག་པ་དང་། །ཡེ་ཤེས་རང་མདངས་སྟོན་པ་དང་། །རང་རིག་རང་གསལ་གྲོལ་བའི་ཕྱིར། །བསྟན་པ་གང་ལ་བབས་པ་ཡིས། །རིན་ཆེན་བཞུ་བའི་ཁུ་བས་བྲི། །རབ་གནས་མཆོད་བསྟོད་ཚོགས་འཁོར་བསྐོར། །དབང་བསྐུར་རྒྱུད་བཀླག་བུ་ལ་གདགས། །ཆོས་ཉིད་བར་དོར་གྲོལ་བར་ངེས། །གཞན་གྱི་དོན་ཆེན་བྱ་འདོད་ན། །མཚན་མ་བྱུང་བའི་དུས་དག་ཏུ། །ཕྱོགས་མཐུན་ལྕེ་ཡིས་འདི་བཀླགས་ན། །དེས་ཀྱང་རང་གཞན་ཐམས་ཅད་གྲོལ། །དེ་ཉིད་འདས་ཚེ་གདུང་བསྲེགས་ན། །འཇའ་ཟེར་མེ་འོད་དུད་པའི་རྟགས། །ནམ་མཁའ་དྭངས་ཤིང་རླུང་མེད་དམ། །ཡང་ན་འཇའ་འོད་རྣམ་ལྔ་འཁྲིགས། །དེ་ལ་གདུང་རིགས་ལྔའམ་གཅིག །སྐུ་ལ་སོགས་པ་ངེས་པར་འབྱུང་། །སངས་རྒྱས་སྐུ་ལྔ་ཡེ་ཤེས་ལྔ། །རྒྱུད་འདི་བཅངས་ཤིང་བཀླགས་པས་ཐོབ། །གདུང་ཚད་མང་ཉུང་ངེས་པ་མེད། །འཆི་དུས་དབུགས་ལ་སླེབས་ཀྱང་ཆོག །ཁམས་གསུམ་འཁོར་བར་ག་ལ་འཁྱམས། །སེམས་དཔའ་རྡོ་རྗེ་རྩལ་ཁྱོད་ཀྱིས། །མ་འཁྲུལ་གཟུང་ལ་གཞན་ལ་སྟོན། །འཁོར་བ་དོང་སྤྲུགས་ཀློང་གྲོལ་ལོ། །ཞེས་གསུངས་ནས་ལྷན་ནེར་བཞུགས་སོ། །ཐེག་པའི་སྤྱི་ཕུད་ཀློང་ཆེན་རབ་འབྱམས་ཀྱི་རྒྱུད་ལས། བཏགས་གྲོལ་མཐོང་གྲོལ་གྱི་རྒྱུད་ཀྱི་ལེའུ་སྟེ་ང་གཅིག་པའོ།། །།ས་མ་ཡ། རྒྱ་རྒྱ་རྒྱ། དེ་ནས་སེམས་དཔའ་རྡོ་རྗེ་ཡིས། །སྟོན་པ་ཉིད་ལ་འདི་སྐད་གསོལ། །ཀྱེ་ཧོ། ཡོངས་གྲོལ་ཀ་དག་ཀུན་ཏུ་བཟང་། །བཏགས་གྲོལ་གདམས་པ་དེ་ལྟར་ན། །གྲོལ་ས་ཆེན་པོ་གང་ཡིན་པ། །བདག་སོགས་འཁོར་ལ་བཀའ་སྩོལ་ཅིག །དེ་ནས་སྟོན་པས་བཀའ་སྩལ་པ། །ཨ་ཧོ་རིག་མདངས་འཁོར་རྣམས་ཉོན། །གྲོལ་ས་ཆེན་པོ་འདི་ལྟར་རོ། །ཆོས་ཉིད་བར་དོ་ཤར་ཀྱང་རུང་། །སྔོན་ནས་རང་སྣང་ཆོད་ཀྱང་རུང་། །རང་ངོ་ཤེས་པའི་གང་ཟག་ལ། །གྲོལ་ལུགས་འདི་ལས་མི་འདའ་འོ། །ཕྱི་ནང་མེད་པར་ཟང་ཐལ་གྲོལ། །ཕྱི་སྣོད་འབྱུང་བ་ལྔ་པོ་ཡང་། །རང་ཤར་རང་གྲོལ་ཉིད་དུ་གྲོལ། །
འབྱུང་བ་ཉི་ཤུ་རྩ་ལྔ་ཡང་། །ཡེ་ཤེས་ཉི་ཤུ་རྩ་ལྔར་གྲོལ། །ཆོས་ཉིད་སྣང་བ་རང་ལུགས་ལ། །བེམ་པོ་རྣམས་ཀྱང་རང་གྲོལ་ལོ། །འབད་པས་གྲོལ་བ་མ་ཡིན་ཏེ། །ཡེ་ཉིད་ནས་ནི་གྲོལ་བར་གནས། །ལྟ་བས་མ་བལྟས་ཆོས་ཉིད་གྲོལ། །སྒོམ་པས་མ་བཙལ་ཆོས་ཅན་གྲོལ། །སྤྱོད་པས་མ་བསྒྱུར་སྣང་བ་གྲོལ། །འབྲས་བུས་མ་བཅིངས་རང་ལུགས་གྲོལ། །ངོ་བོས་སྐུ་རུ་རྒྱས་ཏེ་གྲོལ། །རང་བཞིན་འོད་དུ་རྒྱས་ཏེ་གྲོལ། །ཐུགས་རྗེ་ཟེར་དུ་རྒྱས་ཏེ་གྲོལ། །སྐུ་གསུམ་འཛིན་པ་རང་སངས་ནས། །ཐོག་མ་ཉིད་ཀྱི་ཀ་དག་ལ། །རང་ས་ཟིན་ནས་ཆོས་ཟད་དོ། །གདོད་མའི་ཀ་དག་དེ་ཉིད་ལ། །འཁྲུལ་མེད་ཙམ་དུ་བརྗོད་པ་མེད། །དེ་བཞིན་མ་འཁྲུལ་པ་ཡང་ཅི། །དེ་ལྟར་འཁྲུལ་པ་གདོད་ནས་དག །གཞི་སྣང་ཆེན་པོ་དེ་ཉིད་ལ། །མ་རིག་པ་ཞེས་མིང་མེད་པས། །འཁྲུལ་པ་གྲུབ་པར་ཡོད་པ་མིན། །ཆོས་ཞེས་མིང་དུ་མ་གྲགས་པས། །བློས་བརྟག་འཁྲུལ་པ་ག་ལ་ཡོད། །ཐམས་ཅད་རང་གྲོལ་ཆེན་པོའོ། །གནད་ཀྱིས་གྲོལ་བས་འབད་རྩོལ་ཟད། །ཡེ་ནས་གྲོལ་བས་བསྐྱར་མི་དགོས། །རང་གྲོལ་ཡིན་པས་སྙིང་པོ་མེད། །གཅེར་གྲོལ་ཡིན་པས་མཐོང་བར་ཡལ། །ཡོངས་སུ་གྲོལ་བས་རང་བཞིན་དག །དུས་ཀྱིས་གྲོལ་བས་བསྒོམ་མི་དགོས། །རང་བཞིན་གྲོལ་བས་མ་བཅོས་གསལ། །གྲོལ་ལོ་ཞེས་པ་ཐ་སྙད་དོ། །རྟོགས་དང་མ་རྟོགས་སུ་ཡི་ཆོས། །དེ་ལ་གྲོལ་ཞེས་སུ་ལ་དམིགས། །ཁམས་གསུམ་འཇུག་པ་ག་ལ་སྲིད། །སྲིད་མཐའ་བྲལ་བའི་ཆོས་ཉིད་དོ། །ཡེ་གྲོལ་ཡིན་པས་ཁྱད་པར་འཕགས། །རང་གྲོལ་ཡིན་པས་ཡུལ་རྐྱེན་ཟད། །གཅེར་གྲོལ་ཡིན་པས་རང་སར་དག །མཐའ་གྲོལ་ཡིན་པས་མུ་བཞི་འགགས། །གཅིག་གྲོལ་ཡིན་པས་དུ་མ་སྟོང་། །ཐམས་ཅད་གྲོལ་བས་གཅིག་ཏུ་འདུས། །རྐྱེན་རྣམས་རྐྱེན་གྱིས་གྲོལ་བས་ན། །དམིགས་པའི་ཆོས་ལ་ང་མི་གནས། །ཡུལ་རྣམས་ཡུལ་གྱིས་གྲོལ་བས་ན། །ཐ་སྙད་ཚིག་ལ་ང་མི་རྟོག །སེམས་ཉིད་སེམས་ཀྱིས་གྲོལ་བ་ལ། །མཚོན་བྱེད་གྲོལ་བར་ང་མི་གནས། །དྲི་མས་དྲི་མ་འཁྲུ་བ་བཞིན། །དེ་བཞིན་དག་པས་དག་པ་འཁྲུ། །འདོད་ཆགས་ཉིད་ལ་
འདོད་ཆགས་རྒྱུན། །རིགས་མི་མཐུན་པས་གྲོལ་མི་འགྱུར། །དེ་ཕྱིར་གཞི་གནས་རིག་པ་ལ། །གཞི་ལམ་འབྲས་བུ་ཐམས་ཅད་རྫོགས། །རང་རིག་ཉིད་ཀྱིས་རང་རིག་གྲོལ། །ཡུལ་སྣང་ཉིད་ཀྱིས་ཡུལ་སྣང་གྲོལ། །སྒྲིབ་པ་ཀུན་ལས་ངེས་པར་གྲོལ། །མཁའ་ལྟར་མཉམ་པ་ཉིད་ལ་གནས། །ཉོན་མོངས་དྲི་མ་ཀུན་ལས་འདས། །དུས་གསུམ་དུས་མེད་རྟོགས་པ་པོ། །སངས་རྒྱས་ཐོག་མ་ཐ་མ་མེད། །དང་པོ་སངས་རྒྱས་རྒྱུ་མེད་པ། །ཡེ་ཤེས་མིག་གཅིག་དྲི་མ་མེད། །ཐམས་ཅད་རིག་པའི་ངང་དུ་རྫོགས། །མངོན་སུམ་ཐབས་ལ་གང་གོམས་པ། །འདི་ནི་སྐྱེས་བུས་མདའ་འཕངས་བཞིན། །ཚུར་ལ་ཟློག་པར་ག་ལ་འགྱུར། །ཡང་དག་རྫོགས་པའི་སངས་རྒྱས་ནི། །ལྷག་མ་མེད་པར་སངས་རྒྱའོ། །མངོན་པར་རྫོགས་པའི་སངས་རྒྱས་ནི། །རྟགས་དང་མཚན་མར་འཚང་རྒྱའོ། །དོན་ལ་ཐམས་ཅད་རིག་པར་རྫོགས། །སྣ་ཚོགས་རིག་པའི་རྩལ་ཡིན་ཕྱིར། །རིག་པ་སྟོང་པ་ཉིད་དུ་གྲོལ། །རིག་སྟོང་ངོ་བོ་ཆོས་ཀྱི་སྐུ། །དེ་ལ་སྣང་བ་མ་འགགས་གསལ། །གསལ་སྟོང་རྗེན་པ་སངས་རྒྱས་ཡིན། །བྱ་བ་མེད་པས་འཁྲུལ་པ་སངས། །འོད་ལྔ་གསལ་བས་ཡེ་ཤེས་རྒྱས། །རྟོག་པ་མེད་པས་ཉོན་མོངས་སངས། །རྟོག་མེད་རིག་པ་མཁའ་ལ་རྒྱས། །འཛིན་པ་མེད་པས་ཞེན་པ་སངས། །དམིགས་གཏད་བྲལ་བས་སྐུ་གསུམ་རྒྱས། །ཞེན་པ་མེད་པས་རྣམ་རྟོག་སངས། །འཛིན་པའི་ཡུལ་མེད་འོད་ལྔ་རྒྱས། །ཆགས་པ་མེད་པས་མ་རིག་སངས། །དོན་ལྡན་རང་སྣང་འབྲས་བུ་རྒྱས། །དེ་ཕྱིར་རང་རིག་སངས་རྒྱས་ཡིན། །སངས་རྒྱས་གཞན་ནས་བཙལ་དུ་མེད། །དཀྱིལ་འཁོར་ལྷ་དང་དམ་ཚིག་དང་། །ཆོ་ག་ཕྲིན་ལས་ལ་སོགས་དང་། །སྐུ་གསུམ་སྐུ་ལྔ་ལ་སོགས་པ། །བསྐལ་པ་ཞིང་གི་རྡུལ་སྙེད་རྣམས། །རིག་པ་ཡེ་ཤེས་ངང་དུ་རྫོགས། །རྫོགས་ཞེས་ཚིག་གི་བླ་དྭགས་ཙམ། །ཨ་ཧོ་སེམས་དཔའ་རྡོ་རྗེ་ཉོན། །དྲི་མེད་རྫོགས་ཆེན་བརྡལ་ཁྱབ་རྗེ། །མཁའ་མཉམ་རྡོ་རྗེའི་སྐུ་ལ་བསྐྱེད། །སྟོང་པ་ཡང་དག་ལུས་སུ་རྫོགས། །སེམས་སོགས་འཛིན་པའི་ཆོས་ལས་གྲོལ། །སྐྱེ་མེད་ཡང་དག་ངོ་བོ་ཉིད། །མ་བསྐྱེད་རིག་པ་མཁའ་ལགས་ལ། །སྐྱེ་མེད་ཀློང་དུ་ཡང་དག་འདུས། །འགག་མེད་ཀློང་དུ་དེ་བཞིན་གཤེགས། །རྣམ་དག་སྤྱན་ལྡན་མངོན་སངས་རྒྱས། །སྟོང་པ་སྟོང་པའི་ཡུལ་ལ་གནས། །
དག་པས་དག་པའི་དཀྱིལ་འཁོར་རྙེད། །ཨེ་མ་རང་སྣང་རིག་མདངས་ཉོན། །ངོ་བོའི་ཆོས་རྣམས་སྟོང་པར་རྫོགས། །རང་བཞིན་ཆོས་རྣམས་གསལ་བར་རྫོགས། །ཐུགས་རྗེའི་ཆོས་རྣམས་མ་འགགས་རྫོགས། །སྐུ་གསུམ་རང་རིག་གཞི་སྣང་ལ། །རང་བྱུང་བརྡལ་བ་ཆེན་པོར་རྫོགས། །སྣང་བ་ཡིན་ཕྱིར་ཡུལ་རྣམས་རྫོགས། །རང་དག་ཡིན་ཕྱིར་ས་ལམ་རྫོགས། །རང་རིག་ཡིན་ཕྱིར་ཤེས་བྱ་རྫོགས། །རང་ཁྱབ་ཡིན་ཕྱིར་འབྲས་བུ་རྫོགས། །རང་སངས་ཡིན་ཕྱིར་རྒྱུ་རྐྱེན་རྫོགས། །རང་རྟོགས་ཡིན་ཕྱིར་ཆོས་ཉིད་རྫོགས། །རང་གནས་ཡིན་ཕྱིར་རྒྱུད་ལུང་རྫོགས། །རང་རྫོགས་ཡིན་ཕྱིར་དུས་གཅིག་རྫོགས། །རྫོགས་པ་ཆེན་པོའི་ངོ་བོ་ལ། །རང་རྫོགས་རང་གྲོལ་རང་སར་བརྡལ། །དོན་རྣམས་སྐྱེ་མེད་དབྱིངས་སུ་རྫོགས། །ཆོས་རྣམས་བརྗོད་པའི་ཚིག་དང་བྲལ། །ཡི་གེ་མེད་པའི་རིགས་པར་རྫོགས། །ལུང་རྣམས་བསྟན་དུ་མེད་པར་རྫོགས། །མན་ངག་བརྗོད་སྒྲ་བྲལ་བར་རྫོགས། །སྒྲུབ་པ་བྱ་བྱེད་མེད་པར་རྫོགས། །སྤྱོད་པ་མ་བཅོས་གནས་ལུགས་རྫོགས། །སྒོམ་པ་རང་གསལ་འཛིན་མེད་རྫོགས། །ལྟ་བ་མ་འགགས་ཟང་ཐལ་རྫོགས། །འབྲས་བུ་ཆིག་ཆོད་ཆེན་པོར་རྫོགས། །ཐམས་ཅད་མི་གནས་ཀློང་དུ་རྫོགས། །གཞི་ནི་ཡེ་ཤེས་གསུམ་དུ་རྫོགས། །ལམ་ནི་སྐུ་ལྔ་ཡེ་ཤེས་རྫོགས། །འབྲས་བུ་ཕྱིར་མི་ལྡོག་པར་རྫོགས། །ཡེ་ཤེས་སྣང་བ་མ་འདྲེས་རྫོགས། །རིག་པ་བདག་འཛིན་བྲལ་བར་རྫོགས། །ཐམས་ཅད་ཀློང་ན་ཡངས་པའོ། །ཞེས་གསུངས་ནས་ལྷན་ནེར་བཞུགས་སོ། །ཐེག་པ་ཀུན་གྱི་སྤྱི་ཕུད་ཀློང་ཆེན་རབ་འབྱམས་ཀྱི་རྒྱུད་ལས། མཐར་ཐུག་འབྲས་བུ་གྲོལ་ས་ཆེན་པོ་བསྟན་པའི་ལེའུ་སྟེ་ང་གཉིས་པའོ།། །།ས་མ་ཡ། རྒྱ་རྒྱ་རྒྱ། སེམས་དཔའ་རྡོ་རྗེས་ཡང་གསོལ་པ། །ཀྱེ་ཧོ་སྟོན་པ་ཀུན་དུ་བཟང་། །རྒྱུད་ཀྱི་ཆེ་བ་གང་ལྟར་ལགས། །དེ་སྐད་ཐུགས་བསྐུལ་བཀའ་སྩལ་པ། །ཨ་ཧོ་སེམས་དཔའ་རྡོ་རྗེས་ཉོན། །རྒྱུད་ཆེན་ལྟ་བ་ཀློང་ཡངས་འདི། །གསང་སྔགས་ཀུན་གྱི་རྒྱུད་ཡིན་པས། །གསང་རྒྱུད་ཆེན་མོ་ཞེས་སུ་གྲགས། །རྫོགས་ཆེན་ཀུན་གྱི་སྲོག་ཡིན་པས། །སྲོག་རྒྱུད་ཆེན་མོ་ཞེས་སུ་གྲགས། །ཨ་ཏི་སྤྱི་ཡི་རྒྱུད་ཡིན་པས། །སྤྱི་རྒྱུད་ཆེན་མོ་ཞེས་སུ་གྲགས། །དགོངས་པ་ཀུན་གྱི་དོན་ཁྲོལ་བས། །དགོངས་དོན་ཆེན་མོའི་རྒྱུད་ཅེས་གྲགས། །བརྡ་ཆོས་ཀུན་གྱི་སྒོ་འབྱེད་པས། །བརྡ་རྒྱུད་ཆེན་མོ་ཞེས་སུ་
གྲགས། །ཚིག་དང་ཡི་གེ་རིས་སུ་གསལ། །སྙན་བརྒྱུད་ཆེན་མོ་ཞེས་སུ་གྲགས། །ཐེག་པ་མ་ལུས་ཀུན་འབྱེད་པས། །གསལ་བར་བྱེད་པའི་མེ་ལོང་ཡིན། །རབ་ཟབ་རྒྱ་ཆེ་ཀློང་ཡངས་མཚན། །བལྟ་བའི་མེ་ལོང་དགོངས་པ་ཡིན། །སྡུག་བསྔལ་རྒྱ་མཚོ་སྐེམས་པས་ཏེ། །སྐལ་ལྡན་འདྲེལ་ཚད་ཆོས་སྐུར་གྲོལ། །ཐེག་པའི་ཡང་སྙིང་ཨ་ཏི་ཟེར། །དགོངས་པ་མ་ལུས་ཁྲོལ་བའི་ཀློང་། །ནམ་མཁའ་ལྟ་བུར་ཡངས་པའི་རྒྱུད། །མངོན་སུམ་རང་གནད་གཅར་ཕོག་ཏུ། །སངས་རྒྱས་སྟོན་པའི་རྒྱུད་ཆེན་པོ། །ཨ་ཧོ་སེམས་དཔའ་རྡོ་རྗེ་རྩལ། །བླ་མེད་རྒྱུད་འདི་མ་ཤེས་པར། །ཉམས་སུ་ལེན་འདོད་ཐེག་པ་རྣམས། །ཁ་བྲག་ལམ་ལ་ཞུགས་པའམ། །མུན་ཁུང་ནང་དུ་མཛུབ་གཡུགས་འདྲ། །རྒྱུད་འདི་ཤིན་ཏུ་དཀོན་པ་སྟེ། །སྔར་འདས་རྒྱལ་བས་འདི་མ་གསུངས། །ད་ལྟའི་རྒྱལ་བས་གསུངས་པ་དེ། །སྐལ་བར་ལྡན་པའི་གང་ཟག་གིས། །རྒྱུད་འདི་མཐོང་བས་བསྙེན་བསྒྲུབ་ཟིན། །ཚིག་འདི་ཐོས་པས་རང་སར་གྲོལ། །ལུང་འདི་སྣང་བས་གཏན་ལ་ཕེབས། །དོན་འདི་བལྟས་པས་འཛིན་ཆགས་བྲལ། །ལྟ་བ་ཀུན་གྱི་མཐར་ཐུག་ཆེ། །དེ་ཡི་ཕྱིར་ན་གསང་རྒྱུད་འདི། །འཛིན་འཆང་སྐྱེས་བུ་སྐལ་བ་ཆེ། །རང་རིག་རྩལ་གྱི་དབང་ཐོབ་སྟེ། །རྒྱུད་འདི་རེག་པ་ཙམ་གྱིས་ནི། །ཀུན་བཟང་ང་དང་སྐལ་བ་མཉམ། །རྒྱུན་དུ་གུས་པར་བྱེད་པ་དང་། །སྤྱི་བོར་ལ་སོགས་འཆང་བ་ན། །ཚེ་འདིར་ཐུན་མོང་དངོས་གྲུབ་ཐོབ། །སྤྲུལ་པའི་སྐུ་རུ་ངེས་པར་འགྱུར། །ཕྱི་མ་བར་དོ་མེད་པར་གྲོལ། །འདི་ཉིད་མཆོད་ཅིང་བསྟོད་པ་ན། །དུས་གསུམ་བདེ་གཤེགས་མཆོད་པ་དང་། །བསོད་ནམས་ཡོན་ཏན་མཚུངས་པའོ། །རྒྱུད་འདི་སུ་ཡིས་བཀླག་པའི་མིས། །ལྟ་བའི་དོན་ཀུན་སེམས་ལ་འཆར། །དངོས་གྲུབ་རྣམ་གཉིས་ཆར་ལྟར་འབབ། །འདི་ཉིད་སུ་ཡིས་བྲིས་པ་དེ། །སངས་རྒྱས་ཀུན་གྱི་གསུང་ལ་རོལ། །ཚེ་འདིར་གདུང་དང་རིང་བསྲེལ་འབྱུང་། །ཕྱི་མ་སྤྲུལ་པའི་སྐུ་རུ་འགྱུར། །རྒྱུད་འདི་གང་ན་གནས་པ་ན། །མཁའ་འགྲོ་ཆོས་སྐྱོང་སྤྲིན་ལྟར་འདུ། །ལྷ་དང་ལྷ་མོས་མཆོད་པར་བྱེད། །དེ་ལྟ་བུ་ཡི་རྒྱུད་ཆེན་འདི། །སེམས་དཔའ་རྡོ་རྗེ་ཁྱོད་ལ་གཏད། །གདུལ་བྱ་ང་ལ་གསུངས་པའི་ཆོས། །ཁྱོད་ཀྱིས་ཀུན་ལ་ཚིམ་པར་སྟོན། །གསང་སྔགས་ནང་ན་ཆེས་གསང་བ། །ཨ་ཏི་ཆེན་པོ་འདི་ཉིད་ནི། །ཐེག་དམན་སྣོད་ལ་བསྟན་མི་བྱ། །སྣོད་དང་བསྟུན་ལ་གཞན་ཕན་ལོང་། །འདས་པའི་ཡོན་ཏན་དགེ་བ་ཀུན། །མ་འོངས་
བསྟན་པའི་འཕེལ་འགྲིབ་བརྗོད། །ད་ལྟ་གདམས་པ་ཆེ་བ་ཡིས། །ང་ཡི་རྒྱལ་ཚབ་ཁྱོད་ཀྱིས་གྱིས། །ཐེག་པ་ཀུན་གྱི་སྤྱི་ཕུད་འདི། །བསྟན་པ་དམ་པ་ཁྱོད་ལ་གཏད། །ཁྱོད་ནི་ང་ཡི་སྙིང་པོར་བྱུང་། །ང་ཡི་རང་བཞིན་འདི་ཟུང་ཞིག །ཁྱོད་ཀྱིས་སྨྲ་བའི་སེང་གེ་གྱིས། །སངས་རྒྱས་སྤྱི་མེས་ཁྱོད་ཀྱིས་གྱིས། །ཁྱོད་ཀྱིས་སེམས་ཅན་ཕ་མ་གྱིས། །བསྟན་པའི་སྙིང་པོ་རྒྱུད་མཆོག་འདི། །ཉན་ཐོས་ལ་སོགས་ཐེག་དམན་ལ། །རླུང་ཕྱོགས་ཙམ་ཡང་མ་བརྗོད་ཅིག །ཚིག་འདི་ཐོས་ནས་དངངས་སྐྲག་བརྒྱལ། །གསང་སྔགས་སྤྱི་ལ་ཡིད་ཕྱུང་ནས། །རྣམ་སྨིན་དམྱལ་བ་མནར་མེད་ལྟུང་། །བསྟན་ཅིང་ཐོས་པའི་གླགས་མེད་དོ། །བལྟ་བའི་རྒྱལ་པོ་དོན་གྱི་སྙིང་། །མན་ངག་ཀུན་གྱི་རྩ་བ་འདི། །སེར་སྣ་ཆེ་ལ་དད་པ་ཆུང་། །རྣ་བས་ཐོས་ན་བཞེད་པ་དཔའ། །ལག་ཏུ་ཐོབ་ན་ཟོང་དུ་ཆེ། །དོན་དུ་མི་བསྒོམ་ཚིག་ཏུ་རེད། །ཁྲེལ་མེད་ཐབས་ཀྱིས་འདོད་པ་ལ། །ཡུལ་ཁམས་སྟེར་ཡང་མི་སྦྱིན་ནོ། །ཐོས་མེད་ཤེས་ཆུང་ཐོ་ཅོ་མཁན། །མན་ངག་གདེང་དུ་མ་གྱུར་པར། །ང་ཆེ་སློབ་དཔོན་ས་འཛིན་པ། །སྒང་ཁ་བྱེ་ཕྲུག་རུམ་པ་འདྲ། །དེ་ལ་རྒྱུད་འདིའི་སྐལ་བ་མེད། །དམ་ཚིག་ཉམས་དང་རྫུན་པོ་ཆེ། །སློབ་དཔོན་བཀའ་བཞིན་གཅིག་མི་བྱེད། །གཞོགས་ངོམ་བྱེད་ཅིང་རང་ཆེ་འབྱིན། །དྷརྨ་རྐུ་ཞིང་ཆོས་རྣམས་བསླུ། །བྱིལ་མ་ནོར་ཆུང་མཚང་རྣམས་རྫོགས། །དད་ཆུང་མན་ངག་སྣ་འཚོགས་བྱེད། །བཞེད་པ་མཐོ་རིས་བྱང་ཆུབ་བཞེད། །གཤེགས་པ་ན་རག་དམྱལ་བར་གཤེགས། །དེ་འདྲའི་སློབ་མ་སྣོད་ངན་ལ། །ཐེག་པའི་བཅུད་འདི་ཤིན་ཏུ་གསང་། །ཉི་ཟླ་ཐང་ལ་ལྷུང་གྱུར་ཡང་། །སྐད་ཅིག་ཙམ་ཡང་མ་བསྟན་ཅིག །དམ་ཉམས་པོ་ལ་བྱང་ཆུབ་མེད། །སྡིག་པོ་ཆེ་ལ་མཐོ་རིས་མེད། །སེར་སྣ་ཅན་ལ་མན་ངག་མེད། །འཛིན་ཆགས་ཅན་ལ་ཐར་ལམ་མེད། །ཤེས་པའི་སྒོ་དོག་ཐོས་པ་ཆུང་། །ང་རྒྱལ་ཁ་འདོར་ཁེངས་པ་དང་། །སྒོམ་སྒྲུབ་འཛའ་གད་དབང་དུ་གཏོང་། །ལྟ་བ་མེད་པའི་རས་ཆོད་མཁན། །དམ་ཚིག་ཉམས་པའི་གཟུ་ལུམས་མཁན། །སྤྱོད་པ་རྩིང་པའི་ཐོ་ཅོ་མཁན། །ཁ་ཡངས་གཏིང་ཐུང་ངོ་དགའ་མཁན། །མན་ངག་མེད་པའི་བཙན་སྦྱོར་མཁན། །སྙིང་རྗེ་མེད་པའི་བཙན་སྒྲོལ་མཁན། །ཐར་ལམ་ནུབ་ཅིང་དམ་གཞུང་ཤོར། །
དེ་ལ་གདམས་རྒྱུད་འདི་བསྟན་ན། །ཀུན་ཏུ་བཟང་པོ་ང་བསླུས་སོ། །གཉིས་ཀ་རྡོ་རྗེ་དམྱལ་བར་ལྟུང་། །དེ་བས་རྒྱུད་འདི་དམ་པར་ཟུང་། །བསྟན་པའི་ཡུལ་ནི་འདི་ལྟར་རོ། །དང་པོ་དད་པ་ཡོན་གྱིས་འདྲེན། །བར་དུ་སློབ་དཔོན་མིག་ལྟར་འཁུར། །སྤྱོད་པའི་མན་ངག་གཞུང་དུ་སྤྱོད། །མཚན་ཉིད་ངང་ཚུལ་བཟང་ལ་ཤིས། །ཡོངས་ལ་འཕྲག་ཡངས་དོག་པ་མེད། །རང་ཤེས་སྐྱོངས་ནས་གཞན་མི་སྨོད། །དལ་ཅིང་སྤྱོད་པ་ལྷོད་ཆགས་པ། །གཡོ་མེད་ཁོག་སྐྱོན་རྣམ་པར་སྤངས། །དམ་ལ་གནས་ཤིང་ཉམས་ལེན་བརྩོན། །བཀའ་བཞིན་བྱེད་ཅིང་དོན་དང་མཐུན། །དེ་ནི་རྒྱུད་མཆོག་འདི་ཡི་སྣོད། །ལྔ་ལྡན་བུ་ལ་འདི་སྟོན་ཅིག །གཅིག་ལས་མ་མངས་ཀུན་ལ་གསང་། །ཞེས་གསུངས་ནས་ཆོས་ཀྱི་དབྱིངས་ཀློང་ཡངས་གདལ་བ་ཆེན་པོའི་ངང་ལ་ལྷན་ནེར་བཞུགས་སོ། །དེ་ནས་རང་ལས་སྤྲུལ་པའི་འཁོར་སེམས་དཔའ་རྡོ་རྗེ་དེ་ཉིད་སྟོན་པའི་ཐུགས་ཀར་ཐིམ་སྟེ། སྟོན་པ་ཉིད་ཀྱང་མི་སྣང་བར་གྱུར་ཏོ། །སྐུ་གསུང་ཐུགས་ཀྱི་འཁོར་རྣམས་ཀྱང་། རང་སྣང་ལ་ཡིད་ཆེས། ཟད་པ་ཆེན་པོའི་སར་འཁྱོལ་ཏེ། ཀ་དག་རང་སར་ཟིན་ནས། ཁམས་གསུམ་ཡོངས་གྲོལ། འཁོར་བ་དོང་ནས་སྤྲུགས་སོ། །ཐེག་པ་ཀུན་གྱི་ཡངས་རྩེ། ཀློང་ཆེན་རབ་འབྱམས་ཀྱི་རྒྱུད་ལས། མཇུག་དོན་ཡོངས་སུ་གཏད་པའི་ལེའུ་སྟེ་ལྔ་བཅུ་གསུམ་པའོ།། །།ས་མ་ཡ། རྒྱ་རྒྱ་རྒྱ། ཐེག་པ་ཀུན་གྱི་སྤྱི་ཕུད་ཀློང་ཆེན་རབ་འབྱམས་ཀྱི་རྒྱུད། འབུམ་ཕྲག་དྲུག་ཅུ་རྩ་བཞི་ལས། ཕུལ་དུ་བྱུང་བ་རྫོགས་སོ།། །།དཔལ་ལྡན་སྔགས་ཀྱི་སྲུང་མ་དང་། གཏེར་བདག་མ་ནིང་ནག་པོས། བཀའ་འདི་སྲུངས་ཤིག །གཏད་རྒྱ། སྦས་རྒྱ། གཏེར་རྒྱ། ཟབ་རྒྱ། བཀའ་རྒྱ། གསང་རྒྱ། གཉན་རྒྱ། ལས་ཅན་གཅིག་དང་འཕྲད་པར་ཤོག །མ་ནིང་ཁྱོད་ཀྱིས་རྒྱ་འདི་ཁྲོལ། །ཨེ་མ་ཧྱོཿ། རྡོ་རྗེ་གླིང་པའི་ཁྱད་ཆོས་ཡིན། །སརྦ་མངྒ་ལཾ། དགེ་ལེགས་འཕེལ། དགེའོ།། །།