ལ་ཟློ་གསང་བའི་འཁོར་ལོ་ཞེས་བྱ་བའི་རྒྱུད།
ལ་ཟློ་གསང་བའི་འཁོར་ལོ་ཞེས་བྱ་བའི་རྒྱུད། དེ་ནས་སེམས་དཔའ་ཆེན་པོ་ལ། བྱང་ཆུབ་ཀྱི་སེམས་ཀུན་བྱེད་རྒྱལ་
པོས། ཆོས་ཐམས་ཅད་ལ་ངེས་པ་དང་། དམིགས་སུ་མེད་པར་དགོངས་ནས། ལ་ཟློ་གསང་བའི་འཁོར་ལོ་འདི་གསུངས་སོ། །དེ་ཡང་ཇི་ལྟར་གསུངས་པ་ཡིན་ཞེ་ན། སྟོན་པ་དང་ནི་བསྟན་པ་འཁོར་དུས་གནས། །རང་བྱུང་ཆོས་ཀྱི་དབྱིངས་སུ་ལ་བཟླས་པས། །རང་བྱུང་ངོ་བོ་མངོན་དུ་ཕྱུང་བ་ལ། །ཕུན་སུམ་ཚོགས་པ་རྣམ་པ་ལྔ་པོ་ཡང་། །རང་ལ་རྫོགས་ཤིང་རང་ལ་ཚང་བར་སྟོན། །རང་ལ་དམིགས་སུ་མེད་པ་དབྱིངས་སུ་ལ་ཟློ་ཡིན། །སྟོན་པའི་སྟོན་པ་ཀུན་བྱེད་རྒྱལ་པོ་ལགས། །རྣམ་ལྔ་རང་ལ་ཇི་ལྟར་ཚང་བར་སྟོན། །རང་ལ་དམིགས་སུ་མེད་པས་ལ་བཟླ་ཅི་ཡི་ཕྱིར། །ཞེས་ཞུས་སོ། །ཀྱེ་སེམས་དཔའ་ཆེན་པོ་དགོངས་ཤིག །མིག་གི་དབང་པོ་སྟོན་པའི་ངོ་བོར་བྱུང་། །ལྕེ་ཡི་དབང་པོ་བསྟན་པའི་ངོ་བོར་བྱུང་། །རྣ་བའི་དབང་པོ་འཁོར་གྱི་ངོ་བོར་བྱུང་། །སྣ་ཡི་དབང་པོ་དུས་ཀྱི་ངོ་བོར་བྱུང་། །ལུས་ཀྱི་དབང་པོ་གནས་ཀྱི་ངོ་བོར་བྱུང་། །ཇི་ལྟར་བྱུང་བའི་གཏན་ཚིགས་བསྟན་པ་ནི། །མིག་གི་དབང་པོས་གཟུགས་རྣམས་ཅིར་ཡང་སྟོན། །ཀུན་བྱེད་རྒྱལ་པོའི་སྐུ་རུ་བསྟན་པ་ཡིན། །དེ་ལས་གཞན་པའི་སྟོན་པ་དམིགས་སུ་མེད། །དེ་ལས་སྟོན་པ་རང་ལ་ཚང་ཞེས་གསུངས། །ལྕེས་ནི་སྣང་སྲིད་ཚིག་དང་ཡི་གེར་བརྗོད། །སྒྲ་རྣམས་བསྒྲགས་པ་སྟོན་པའི་གསུངས་ཡིན་པས། །བསྟན་པའི་ཆོས་ཞེས་ཀུན་ལ་གྲགས་པ་ཡིན། །རྣ་བས་སྒྲ་རྣམས་ཇི་ལྟར་གནས་པ་ཡང་། །ཀུན་བྱེད་རྒྱལ་པོའི་སྒྲ་བསྒྲགས་གསན་པ་ལས། །དེ་ལས་གཞན་པའི་སྒྲ་ནི་ཐོས་པ་མེད། །དེ་ཐོས་འཁོར་གྱི་དམ་པར་བྱུང་བ་ཡིན། །དྲི་རྣམས་སྣ་ཚོགས་ཇི་ལྟར་བྱུང་བ་ཡང་། །སྣ་ཡི་དབང་པོ་གཅིག་ལས་མ་འདས་པས། །དབྱེར་མེད་དུས་གསུམ་གཅིག་ཏུ་བསྟན་པ་ཡིན། །མིག་དང་རྣ་བ་སྣ་དང་ལྕེ་ལ་སོགས། །ཐམས་ཅད་ལུས་ལ་གནས་པས་གནས་སུ་བསྟན། །ལུས་གནས་པ་ལ་ཀུན་ཀྱང་གནས་པ་ལས། །ལུས་མི་གནས་པ་སུ་ཡང་གནས་པ་མེད། །དེ་བས་ལུས་འདི་གནས་སུ་བསྟན་པ་ཡིན། །ཀྱེ་སེམས་དཔའ་ཆེན་པོ་ད་དགོངས་ཤིག །ཐམས་ཅད་རང་ལ་ཡེ་ནས་བཙལ་བས་ན། །
སྟོན་པ་གཞན་དུ་རྟོག་པར་མ་བྱེད་ཅིག །གདུང་རྒྱུད་བཟང་དང་རིགས་རྒྱུད་བཙུན་པ་ལ། །སེམས་དཔའ་རྡོ་རྗེ་ལྟོས་པ་མ་འཇོག་ཅིག །མིག་གིས་མཐོང་བ་སྟོན་པའི་གཟུགས་མཐོང་ཡིན། །དེ་ལས་ལྷག་པའི་ལུང་ནི་ངས་མ་བསྟན། །དེ་བཞིན་པ་ལ་གཞན་དུ་རྟོག་མ་བྱེད། །དུས་དང་གནས་དང་འཁོར་ལ་སོགས་པ་ཡང་། །གཞན་དུ་མ་རྟོགས་རང་དུ་བསྟན་པར་ཟད། །བདེན་ཚིག་གཞན་ལ་རྟོག་པར་མ་བྱེད་ཅིག །སྒྲ་ནི་ཇི་བཞིན་མ་ཡིན་བརྗོད་མི་ལང་། །འཁོར་ཡང་བཀྲོལ་བས་མི་ཁྲོལ་དགྲོལ་མི་ལང་། །དད་མོས་བཀུར་སྡི་ཅན་ལ་དམིགས་མ་བྱེད། །དུས་ཀྱང་དུས་བཟང་འདི་ཞེས་དམིགས་མ་བྱེད། །ཡེ་ནས་དབྱེར་མེད་དུས་སུ་ཚོགས་པ་ཡིན། །གནས་ཀྱང་བླ་གབ་གཞན་ལ་མ་ལྟོས་ཤིག །ཡེ་ནས་གནས་པས་གཞན་གྱི་རང་བཞིན་ཡིན། །དེ་བས་རང་ལ་རྫོགས་པར་བསྟན་པ་ཡིན། །རང་ལ་དམིགས་སུ་མེད་པར་ལ་བཟླས་ཡིན། །ཀྱེ་སེམས་དཔའ་ཆེན་པོ་ཇི་ལྟར་དགོངས། །སྟོན་པ་ལ་སོགས་ཆོས་ལྔ་སྣང་བ་ཡང་། །སེམས་ལ་བསྒོམ་པར་བྱ་བ་ཡོད་མ་ཡིན། །བསྒོམས་ན་གོང་ལྟར་བསྒོམས་ཀྱང་ལ་མ་ཟློས། །རང་ལ་རང་གིས་དམིགས་པ་མེད་པས་ན། །མི་བསྒོམ་ཞེས་ཀྱང་བཞག་པའི་གནས་མ་ཡིན། །བསྒོམས་ན་གང་བསྒོམས་གང་གིས་ཇི་ལྟར་བསྒོམ། །མི་བསྒོམ་གང་གིས་གང་ལ་ཅི་མི་བསྒོམ། །དེ་བས་བསྒོམ་དང་མི་བསྒོམ་ཐ་སྙད་ནི། །རྩིས་གདབ་ཀུན་ལས་འདས་པས་གཞན་དུ་འོས་མ་ཡིན། །ལྕེས་སྨྲས་རྣ་བས་ཐོས་པས་ཐོས་པའི་ཤེས་རབ་ཡིན། །རྣ་ཐོས་ཡིད་ཀྱིས་བསམས་པས་བསམ་པའི་ཤེས་རབ་ཡིན། །ཡིད་ལ་དམིགས་སུ་མེད་པས་བསྒོམ་པའི་ཤེས་རབ་ཡིན། །ཤེས་རབ་རྣམ་གསུམ་སེམས་ཀྱི་རང་བཞིན་ལ། །སེམས་ལ་འདི་ཞེས་བརྗོད་དུ་ཡོད་མ་ཡིན། །མ་བརྗོད་སྙན་གྱིས་དེ་ལ་གསན་དུ་མེད། །དེ་བཞིན་ཡིད་ཀྱི་བསམ་པ་ཀུན་དང་བྲལ། །ཞེས་ཕུན་སུམ་ཚོགས་པ་ལྔ་རང་དུ་ལ་བཟླ་བའི་ལེའུ་སྟེ་དང་པོའོ།། །།དེ་ནས་ལྟ་བསྒོམ་དམ་ཚིག་ལ་བཟླ་བའི་དགོངས་པ་
འདི་གསུངས་སོ། །ཀྱེ་སེམས་དཔའ་ཆེན་པོ་དགོངས་ཤིག །སེམས་ཉིད་ངོ་བོ་མངོན་དུ་ཕྱུང་བ་ཡི། །སྣང་སྲིད་ལྟ་བའི་ཆོ་འཕྲུལ་ཤར་བ་ལ། །ཡིད་འཇོག་སེམས་ཀྱིས་སྒོམ་པར་མ་བྱེད་ཅིག །རང་བྱུང་སྒོམ་པ་རྫོགས་པར་མ་བསྒོམས་ན། །བསྒོམས་པས་སྣང་སྲིད་བསྒོམ་གྱིས་མི་ལང་ཞིང་། །བསྒོམས་དང་མ་བསྒོམས་ཡོན་ཏན་མཉམ་པ་ལ། །འོག་མ་པ་བཞིན་དམིགས་པའི་བསྒོམ་པ་ཡིས། །གང་བསྒོམས་རྩོལ་བའི་ནད་ཀྱིས་ཟིན་པ་ལས། །ཆོས་ཉིད་དོན་དུ་འགྱུར་བ་གཅིག་ཀྱང་མེད། །མ་བསྒོམས་ངན་དུ་སོང་བའི་རྒྱུ་མེད་པས། །བསྒོམ་དང་མི་བསྒོམ་དགོངས་པ་མ་ལེན་ཅིང་། །གནས་པ་གཞི་ཆེ་འབྱུང་བ་རྒྱུ་ཕྱུག་པས། །སྣ་ཚོགས་མི་འཆར་གང་ཡང་མེད་པ་ཡིན། །ཅི་བྱུང་རང་ཤར་ཆོས་ཉིད་ངོ་བོར་སྣང་། །གང་ཟག་བློ་ཡིས་དེ་ལ་ཇི་ལྟར་བསྒོམ། །འདི་ཡིན་ངེས་པ་མེད་པས་བསྒོམ་དུ་ཡོད་མ་ཡིན། །བསྒོམ་དུ་མེད་པར་འཇོག་པའི་བདག་པོ་ཡང་། །རྡུལ་ཙམ་ཡོད་པར་ཀུན་བྱེད་ངས་མ་གསུངས། །དེ་བས་རྩིས་མེད་ཕྱོགས་ལས་འདས་པ་ལ། །སེམས་དཔའ་རྡོ་རྗེ་ལྟ་བུ་སྒོམ་ཡུལ་མ་ཚོལ་ཞིག །རྟོགས་དང་མི་རྟོགས་བློ་ཡི་ཡུལ་ལས་འདས། །བསྒོམ་དང་མི་བསྒོམ་དམིགས་པའི་ཆ་དང་བྲལ། །སྣ་ཚོགས་སྣང་ཞིང་བདག་པོ་མ་ངེས་པས། །ནོར་དང་མ་ནོར་སེམས་དཔའ་མ་དགོངས་ཤིག །གང་ལ་དགོངས་པར་བྱ་བའི་སེམས་འདི་ཞེས། །སེམས་དཔའ་རྡོ་རྗེས་གཞན་ལ་ལུང་མ་བསྟན། །དགོངས་པ་འདི་ཞེས་གཞན་ལ་ལུང་བསྟན་ན། །འཁོར་རྣམས་དགོངས་པའི་ཡུལ་ལ་དམིགས་པ་ཡིས། །བློ་ཆོས་འཛིན་པའི་མཐའ་ལས་མི་གྲོལ་བས། །དེ་བས་དགོངས་སུ་མེད་པའི་དགོངས་པ་སྟོན། །ཀྱེ་སེམས་དཔའ་ཆེན་པོ་ད་དགོངས་ཤིག །སྐྱེ་མེད་རང་བཞིན་གཞན་དུ་མ་བསྒོམས་ཤིག །རང་ལ་བལྟ་བའི་ཡུལ་མེད་ལྟ་བའི་ལ་ཡང་ཟློས། །དམ་ཚིག་རང་ཡིན་གཞན་དུ་མ་བསྲུངས་ཤིག །བསྲུངས་པས་རང་བྱུང་ཆོས་ལ་ཕྲག་དོག་བྱས། །རང་བྱུང་ཆོས་རྣམས་ཅི་བྱུང་ཅི་ཤར་ཡང་། །ཕྲག་
དོག་མེད་པར་རང་སར་རང་བཞག་ནས། །བསྲུང་དུ་མེད་པའི་དམ་ཚིག་ཀུན་བསྲུངས་ན། །བདག་མེད་དམ་ཚིག་མེད་པར་ལ་ཡང་བཟླས། །གང་གིས་མཚམས་མེད་ལྔ་ཡི་ལས་སྤྱད་ཀྱང་། །རང་བྱུང་གཉིས་སུ་མེད་པའི་དོན་རྟོགས་ནས། །ཞུམ་པ་མེད་པའི་གདེང་དང་ལྡན་གྱུར་ནས། །ཀུན་བྱེད་ང་ཡི་དམ་ཚིག་ལ་བཟླས་ཡིན། །རྩ་བ་ཡན་ལག་དམ་ཚིག་གཞུང་བསྲུངས་ཀྱང་། །རེ་དོགས་འཇིགས་པའི་སེམས་དང་མ་བྲལ་ན། །དམ་ཚིག་ལ་གནས་དམ་ཚིག་ལ་མི་ཟློས། །བསྲུང་དང་མ་བསྲུངས་དམ་ཚིག་ཡུལ་ལས་འདས། །ཉམས་དང་མ་ཉམས་བློ་ཡིས་བླང་བ་མེད། །མཚམས་མེད་བསྲུང་མཚམས་རྩིས་གདབ་ཀུན་ལས་འདས། །དེ་ལྟར་དགོངས་ཤིང་དགོངས་པའི་ཡུལ་མེད་ན། །དམ་ཚིག་ཀུན་གྱི་ལ་ཡང་ཟློས་པ་ཡིན། །ལྟ་བ་སྒོམ་དུ་མེད་ཅིང་དམ་ཚིག་སྲུང་དུ་མེད་པར་ལ་བཟླ་བའི་ལེའུ་སྟེ་གཉིས་པའོ།། །།དེ་ནས་བྱང་ཆུབ་ཀྱི་སེམས་ཀུན་བྱེད་རྒྱལ་པོས། སྐྱེ་ཤི་ལས་འདས་པའི་དགོངས་པ་འདི་གསུངས་སོ། །ཀྱེ་སེམས་དཔའ་ཆེན་པོ་ད་དགོངས་ཤིག །སྐྱེ་ཤི་མེད་པའི་བྱང་ཆུབ་སེམས་འདི་ནི། །ཀུན་ལ་གནས་ཏེ་ངེས་པར་དགོངས་པར་དཀའ། །ལུས་ནི་འབྱུང་བ་བཞི་ཡི་རང་བཞིན་ཏེ། །ཤ་ནི་ས་ཡི་ངོ་བོ་འཛིན་པ་ཡིན། །མི་འགྱུར་བ་ཡི་རང་བཞིན་བསྟན་པ་ཡིན། །ཁྲག་ནི་ཆུ་ཡི་ངོ་བོ་འཛིན་པ་ཡིན། །རླན་ཞིང་སྡུད་པའི་རང་བཞིན་བསྟན་པ་ཡིན། །དྲོད་ནི་མེ་ཡི་ངོ་བོ་འཛིན་པ་ཡིན། །མི་འབྲུལ་སྨིན་པའི་རང་བཞིན་བསྟན་པ་ཡིན། །དབུགས་ནི་རླུང་གི་ངོ་བོ་འཛིན་པ་ཡིན། །ཡང་ཞིང་གཡོ་བའི་རང་བཞིན་བསྟན་པ་ཡིན། །དེ་ལྟར་ཀུན་འདུས་འབྱུང་བ་བཞི་པོ་ཡང་། །རང་གི་མཚན་ཉིད་རང་གིས་འཛིན་པས་ན། །ལུས་ལ་སྐྱེ་འཇིག་ཡོད་པར་ཡོངས་མ་གསུངས། །སེམས་ནི་ནམ་མཁའི་མཚན་ཉིད་འཛིན་པ་ཡིན། །དེ་ཡང་དམིགས་མེད་རང་བཞིན་བསྟན་པ་ཡིན། །དྲན་པ་ཅི་སྐྱེས་རང་བཞིན་ཉིད་དུ་སྟོན། །སེམས་ལ་སྐྱེ་འཆི་
ཡོད་པར་ངས་མ་གསུངས། །ང་ཡི་ལུས་འདི་མ་ཐོས་གང་ཟག་གིས། །ལུས་ཀྱི་རིགས་བྱེད་དྲན་པས་གཟུང་བྱས་ནས། །འབྱུང་བའི་དར་གུད་སྐྱེ་འཇིག་བྱུང་བ་ལ། །སྐྱེ་ཤི་ཡིན་ཞེས་མྱ་ངན་འབྱུང་བ་ཡིན། །བྱང་ཆུབ་སེམས་ལ་སྐྱེ་ཤི་ཡོད་མ་མྱོང་། །དཔེར་ན་ནམ་མཁའ་སྐྱེ་འཆི་མེད་པ་བཞིན། །དེ་བཞིན་སེམས་ལ་སྐྱེ་འཆི་མེད་པ་ཡིན། །འབྱུང་བ་ས་ཆུ་མེ་རླུང་བཞི་པོ་ཡང་། །སྐྱེ་ཤིའི་ཐ་སྙད་ཡེ་ནས་མེད་པ་བཞིན། །དེ་བཞིན་ལུས་ལ་སྐྱེ་ཤི་ཡོད་མ་ཡིན། །ཀྱེ་སེམས་དཔའ་ཆེན་པོ་ད་དགོངས་ཤིག །འདི་ལས་ལྷག་པའི་ཆོས་ལ་མ་རྟོགས་ཤིག །བརྟགས་ན་སྙིང་པོའི་དོན་ལ་སྒྲིབ་པ་ཡིན། །ལུས་ངག་རྩོལ་བ་དང་དུ་མ་ལེན་ཅིག །བླངས་ན་རྩོལ་བའི་ནད་ཀྱིས་གོལ་བ་ཡིན། །གོལ་ས་སྒྲིབ་པ་རང་ས་མ་འཛིན་ཅིག །གང་གིས་རང་ས་གཟུང་བ་དེ་ཡིས་ནི། །ལྷུན་གྲུབ་སྙིང་པོའི་དོན་ལ་ལ་མི་ཟློས། །ལ་ཟློས་ཆོས་སུ་གསུངས་པ་དེ་ལ་ནི། །བདག་དང་གཞན་དུ་གྲུབ་པ་གཉིས་མེད་པས། །རྩིས་མེད་རྩིས་ལས་འདས་པར་ང་ཡིས་བསྟན། །རང་ལ་ལྷུན་གྱིས་གྲུབ་པས་བསྒྲུབ་མི་དགོས། །དམིགས་པའི་ཡུལ་ལས་འདས་པས་བསྒོམ་མི་དགོས། །མཚོན་པའི་ཚིག་ལས་འདས་པས་ཤེས་མི་དགོས། །ཡིད་ཀྱིས་བྱས་པས་ཀུན་དང་བྲལ་བས་ན། །གཞུངས་པའི་ཡིད་ཀྱིས་དེ་ལ་བསམ་དུ་མེད། །རྒྱུ་མེད་རྐྱེན་ལས་བྱུང་བ་མ་ཡིན་པས། །བསོད་ནམས་ཚོགས་ཀུན་ངེས་པར་བསག་ཏུ་མེད། །ཡེ་ནས་ང་ཡིས་བྱས་པས་ཆོས་ཡིན་པས། །འབྲས་བུ་དུས་ལ་ལྟོས་པའི་རེ་བ་བཅའ་མི་དགོས། །རིག་སྟོང་རྩ་བ་ཡེ་ནས་མེད་པ་ལ། །ཤི་ནས་སྐྱེ་བའི་དགོངས་བསམ་མ་བྱེད་ཅིག །རང་གི་སེམས་འདི་སྐྱེ་བ་མེད་སེམས་ནས། །ཕ་རོལ་མི་འབྱུང་སྙེམས་སེམས་མ་འཆའ་ཞིག །ཐོས་དང་བསམ་དང་དགོངས་པའི་ཆོས་རྣམས་ནི། །བྱིས་ཆོས་རྩེད་མོ་ཙམ་དུ་དགོངས་མཛོད་ལ། །དམིགས་མེད་ཕྱོགས་བྲལ་ཕྱོགས་ལས་འདས་པར་
མཛོད། །ཕྱོགས་ཆ་བྲལ་བའི་གང་ཟག་སུ་ཡང་རུང་། །འཁོར་བར་མི་གནས་མྱ་ངན་འདས་མི་གཡོ། །ལུས་སེམས་གཉིས་མེད་དྲན་པའི་རྒྱུ་འགྲུལ་ནི། །བདག་ཏུ་འཛིན་པའི་ཤེས་རྒྱུད་འཆད་པར་ངེས། །སྐྱེ་འཆི་ལ་བཟླའ་བའི་ལེའུ་སྟེ་གསུམ་པའོ།། །།དེ་ནས་བྱང་ཆུབ་ཀྱི་སེམས་ཀུན་བྱེད་རྒྱལ་པོས། སངས་རྒྱས་ལོགས་ན་མེད་པར་ལ་བཟླའ་བ་འདི་གསུངས་སོ། །ཀྱེ་སེམས་དཔའ་ཆེན་པོ་ད་དགོངས་ཤིག །སངས་རྒྱས་ཞེས་ནི་མིང་དུ་བཏགས་པ་ནི། །སྐུ་གསུམ་སྟོན་པས་དྲང་བའི་ལུང་བསྟན་ཡིན། །མི་ཤེས་བྱིས་པ་ལྟ་བུའི་འབྲི་བསྐོལ་ཡིན། །སེམས་ཉིད་སྐྱེ་མེད་དབྱིངས་ལ་ཆོས་སྐུ་གནས། །བསྒྲུབས་པས་ནམ་ཞིག་ཐོབ་པར་བྲོད་པ་བསྐྱེད། །སེམས་ཀྱི་རང་བཞིན་ཅིར་ཡང་སྣང་བ་ལ། །རྣམ་པར་སྣང་མཛད་ཅེས་བྱ་བསམ་བསྒོམས་པས། །ལོངས་སྤྱོད་རྫོགས་པའི་སྐུ་རུ་བསྟན་པ་ཡང་། །དེ་བཞིན་ཉིད་དུ་ནམ་ཞིག་འགྱུར་རོ་ཞེས། །དེ་བསྟན་དེ་ཡང་དང་བའི་ལུང་བསྟན་ཡིན། །ངེས་པར་འབྱུང་བ་སྨིན་པའི་ཤཱཀ་ཐུབ་ལ། །སྤྲུལ་པའི་སྐུ་ཡིན་ཚོགས་རྫོགས་ལས་བྱུང་ཞེས། །དེ་བཞིན་ཉིད་དུ་ཚེགས་ལ་འགོད་པ་ཡང་། །མ་རྟོགས་བྱིས་པ་ལྟ་བུའི་དྲང་ལུང་ཡིན། །སེམས་དཔའ་དེ་ལྟར་དགོངས་པར་མ་བྱེད་ཅིག །ཆོས་སྐུ་ཐིག་ལེ་སེམས་ལས་འདས་པ་ཡིན། །རེ་ཞིག་ཙམ་དུ་མཚོན་པར་གསུངས་པ་ལ། །བསྒྲུབ་པར་བྱ་བའི་དངོས་པོ་ཡེ་ནས་མེད། །ཀུན་གྱི་གཞི་ཡིན་གྲུབ་པ་རྡུལ་ཙམ་མེད། །མིང་དུ་བཏགས་པ་ཙམ་ཀྱང་ནོར་བ་ལ། །ཞེ་འདོད་དམིགས་པ་བཅུག་ན་ཤིན་ཏུ་ནོར། །ཆོས་སྐུ་གཏི་མུག་ཆེན་པོར་ལ་ཟློས་ཤིག །འཇིག་རྟེན་ཆགས་འཇིག་འབྱུང་བའི་ལོངས་སྤྱོད་རང་བཞིན་ལས། །རྣམ་སྣང་ལྷག་པར་བསྒྲུབས་པས་འགྲུབ་པ་མེད། །ཀུན་ཀྱང་རྣམ་སྣང་རང་བཞིན་ལོངས་སྤྱོད་ཡིན། །སེམས་དཔའ་དེ་ལ་
སྒྲུབ་པར་མ་སེམས་ཅིག །རྣམ་སྣང་མིང་དུ་བཏགས་པའང་ངེས་ནོར་ན། །ངེས་པར་གཞན་དུ་བསྒྲུབས་ན་ཤིན་ཏུ་ནོར། །སྣང་སྲིད་སྤྲུལ་པར་མ་གྱུར་ཡེ་ནས་མེད། །གཞི་མེད་གཅིག་ལས་སྣང་ཞིང་སྲིད་པས་ན། །སྤྲུལ་པ་ཡིན་པར་སེམས་དཔས་རྟོགས་པར་རིགས། །ཀུན་ཀྱང་སྤྲུལ་པའི་རང་བཞིན་མ་ཡིན་ན། །ཤཱཀ་ཐུབ་མི་བཞུགས་འགྲོ་དོན་སུ་ཡིས་བྱེད། །དེ་བས་སྤྲུལ་པར་མ་གྱུར་གཅིག་ཀྱང་མེད། །སྤྲུལ་པ་ཤཱཀ་ཐུབ་ངེས་པར་བརྗོད་པས་ནོར། །ཀྱེ་སེམས་དཔའ་ཆེན་པོ་ད་དགོངས་ཤིག །ཕྱོགས་ཆ་ཞེན་པའི་མཐའ་ལས་མ་གྲོལ་ན། །ཞེ་འདོད་བསྒྲུབ་པ་འཁོར་བའི་གཏིང་རྡོ་ཡིན། །ཕྱོགས་འདོད་ངེས་པ་མེད་པའི་དོན་ལ་དགོངས། །སྣང་བ་མ་ངེས་སྟོན་པའི་དབྱིངས་ན་འབྱམས། །སྟོང་པ་ཕྱོགས་བཟློག་སྣང་བ་རང་ས་འཛིན། །སེམས་དཔའ་རྡོ་རྗེ་དེ་ལ་ཇི་ལྟར་དགོངས། །ཆོས་སྐུའི་མཆོག་ནི་གཏི་མུག་ཆེན་པོས་གསུངས། །དུས་གསུམ་སངས་རྒྱས་ན་རག་གནས་ན་འབྱམས། །དམྱལ་ཁམས་བཅོ་བརྒྱད་སྐྱེ་མེད་བཙན་ས་ཟིན། །ཡི་དྭགས་བཀྲེས་སྐོམ་བདུད་རྩིའི་ཀློང་ན་བྱེད། །ངན་སྐྱུགས་མཐོང་ན་ལྷ་རྣམས་བདུད་རྩི་གསོལ། །མནར་མེད་དམྱལ་བའི་ཚེ་ལ་དཔག་མེད་ཀྱང་། །སེ་གོལ་གཏོགས་པ་ཙམ་གྱི་ཡུན་ལ་རྫོགས། །སྟོང་གསུམ་ཆེན་པོའི་ཀློང་ཡངས་ཁོག་པ་ན། །སེམས་ཅན་ཕྲ་མོ་འགྱུར་ལྡོག་བྱས་པ་མེད། །བསྐལ་པར་བསྒོམས་པའི་བསྒོམ་ཆེན་གནས་ངན་ལེན། །དུག་ལྔ་གྲོགས་སུ་རྙེད་པའི་ཤེས་བྱ་ཡུལ་སྤངས་ནས། །བསྒོམ་ཆེན་རྣམས་ལ་སྙིང་རྗེ་ལྷུག་པར་བསྐྱེད། །རྟག་ཏུ་བྱམས་པ་བསྒོམས་པས་ཐ་མ་བདུད་ཀྱི་འཁོར། །ཞེ་སྡང་ལྷུག་པར་སྐྱེས་པས་མཚན་མ་རང་སར་གྲོལ། །ཨེ་མ་ཧོ་ཁེ་བེ་ལེ་ལྟ་བུའི་དགོངས་པ་འདི། །སེམས་དཔའ་རྡོ་རྗེ་ད་ནི་དགོངས་ལགས་སམ། །སངས་རྒྱས་ལོགས་
ནས་མ་ཚོལ་ཞིག །རང་ལ་ཡོད་པ་བལྟར་མི་ཁོམ། །མ་ཚོལ་མ་ལྟ་སྒོམ་མ་བྱེད། །མ་སྤྱོད་མ་བསྒྲུབས་འཛིན་མེད་ལྷུག་པར་ཞོག །སངས་རྒྱས་ལོགས་ན་མེད་པར་ལ་བཟླའ་བའི་ལེའུ་སྟེ་བཞི་པའོ།། །།དེ་ནས་བྱང་ཆུབ་ཀྱི་སེམས་ཀུན་བྱེད་རྒྱལ་པོས། རྒྱུ་རྐྱེན་མེད་པར་ལ་བཟླའ་བའི་དགོངས་པ་འདི་གསུངས་སོ། །ཀྱེ་སེམས་དཔའ་ཆེན་པོ་ད་དགོངས་ཤིག །བྱང་ཆུབ་སེམས་ལ་རྒྱུ་མ་མཆིས་པས་ན། །དེ་བཞིན་རྐྱེན་ཡང་ཡོད་པ་མ་ཡིན་པས། །རྒྱུ་རྐྱེན་བྱས་པའི་ཆོས་ལ་མ་དགོངས་ཤིག །བྱང་ཆུབ་སེམས་ལ་རྒྱུ་རྐྱེན་མེད་པས་ན། །ས་ཆུ་མེ་རླུང་བྱང་ཆུབ་རང་བཞིན་ཏེ། །ས་ལ་རྒྱུ་རྐྱེན་མེད་པར་རང་བྱུང་བས། །དེ་བཞིན་བྱང་ཆུབ་སེམས་ལ་རྒྱུ་རྐྱེན་མེད། །ཆུ་ལ་མེ་དང་རླུང་ལ་རྒྱུ་མེད་པར། །འབྱུང་བ་མ་འགགས་ཅིར་ཡང་འཆར་བ་ལྟར། །བྱང་ཆུབ་སེམས་ཀྱང་བྱས་པ་མེད་པར་གྲུབ། །ཚོགས་བསགས་ལས་ཀྱི་དོན་ལ་སྦྱར་བ་མེད། །མ་མཐོང་གང་ལ་གང་གིས་ཇི་ལྟར་བསྒོམ། །ཡེ་ནས་དོན་དུ་གཅིག་པས་བར་ཆད་ཡོངས་ཀྱིས་མེད། །ལམ་ལྔ་རྒྱུ་རུ་བྱས་ནས་གང་བསྒོམ་པ། །འབྲས་བུ་སྤྲུལ་སྐུ་ཐོབ་པར་འདོད་པའི་ཆོས། །རྒྱུ་འབྲས་གཉིས་མེད་སེམས་སུ་ལ་ཟློས་ཤིག །ས་ལམ་འོག་མ་རྒྱུ་ཡི་ཆོས་བྱས་ནས། །གོང་མ་གོང་མ་འབྲས་བུར་འདོད་པ་ཡང་། །སེམས་ལ་གོང་འོག་མེད་པས་རྒྱུ་འབྲས་མེད། །དོན་ལ་སྔ་ཕྱི་མེད་པས་རྒྱུ་འབྲས་མེད། །རྒྱུ་འབྲས་གཉིས་སུ་མེད་པར་ལ་ཟློས་ཤིག །ཕྱི་པ་ཐུབ་པའི་རྒྱུད་དུ་གསུངས་པ་ཡི། །ལྷ་ལ་གྲོགས་པོ་ཇོ་བོ་སོགས་མཐོང་ནས། །དངོས་གྲུབ་རབ་བསྒྲུབས་བཞིན་དུ་འདོད་པ་ཡང་། །སྒྲུབ་པ་རྒྱུ་ལས་གྲུབ་པ་འབྲས་བུ་འདོད་པ་ན། །རྒྱུ་འབྲས་གཉིས་མེད་རྟོགས་པའི་ལྟ་བ་མིན། །སྒྲུབ་དང་གྲུབ་པ་དོན་ལ་དབྱེར་མེད་པས། །གཉིས་འཛིན་རྟོག་པ་མེད་པར་ལ་ཟློས་ཤིག །ནང་པ་ཐབས་ལ་མཁས་པའི་རྣལ་འབྱོར་ཀྱང་། །
ཏིང་འཛིན་རྣམ་གསུམ་བསྒོམ་པའི་ཡན་ལག་གིས། །ཐབས་དང་ཤེས་རབ་གཉིས་མེད་དོན་བལྟས་ནས། །རྡོ་རྗེ་འཆང་གི་འབྲས་བུ་སྒྲུབ་པ་ཡང་། །རྒྱུ་འབྲས་གཉིས་སུ་མེད་པའི་ལྟ་བ་མིན། །ཐབས་དང་ཤེས་རབ་ཏིང་འཛིན་རྣམ་གསུམ་ཡང་། །སྐྱེ་མེད་བྱང་ཆུབ་སེམས་ལ་དབྱེར་མེད་པས། །གཉིས་མེད་རྒྱུ་འབྲས་འདས་པར་ལ་ཟློས་ཤིག །བསྐྱེད་པ་ཨ་ནུ་ཡོ་གའི་དགོངས་པ་ནི། །དབྱིངས་ནི་རྒྱུ་ལ་ཡེ་ཤེས་འབྲས་བུར་འདོད། །ཡུལ་སེམས་བསམ་པའི་མཐའ་དང་མ་བྲལ་བས། །རྒྱུ་འབྲས་གཉིས་སུ་མེད་པའི་ལྟ་བ་མིན། །དབྱིངས་དང་ཡེ་ཤེས་ཐིག་ལེར་དབྱེར་མེད་པས། །བདག་མེད་ཐིག་ལེའི་ངང་དུ་ལ་ཟློས་ཤིག །ཨ་ཏིའི་ཆོས་ལ་ཕྱོགས་ཆ་མ་མཆིས་པས། །ཕྱོགས་མེད་གང་ལྟར་སྤྱད་ཀྱང་འགལ་བ་མེད། །འདོད་ཡོན་ལྔ་ལ་སྤྱད་ཀྱང་བྱང་ཆུབ་ལམ། །གལ་མེད་ཡལ་བར་བསྡད་ཀྱང་ཡེངས་པ་མེད། །སངས་རྒྱས་བསྒྲུབ་པ་མེད་ཀྱང་སྐྱེ་མེད་དབྱིངས། །ཀྱེ་སེམས་དཔའ་ཆེན་པོ་ད་དགོངས་ཤིག །གང་ལ་འདྲིས་པར་མ་བྱེད་ཡེངས་པར་བཞུགས། །ཀུན་གྱི་སྒྲུབ་གནས་སྐྱེ་མེད་ཆོས་ལ་ཡང་། །སེམས་དཔའ་རྡོ་རྗེས་འདྲིས་པར་མ་བྱེད་ཅིག །འདྲིས་ན་གང་ལ་འདྲིས་ཀྱང་ལ་མི་ཟློས། །ལ་བཟླའི་ཆོས་ནི་འདྲིས་པ་ཀུན་ལས་འདས། །སྐྱེ་མེད་ཆོས་ལའང་འདྲིས་པར་མི་བྱེད་ན། །དངོས་པོའི་ཆོས་ཀུན་འདྲིས་པར་ལྟ་ཅི་སྨོས། །གང་ལ་འདྲིས་མེད་སྲོག་དང་བྲལ་བས་ཆོག །འདྲིས་མེད་བག་ཆགས་བྲལ་བས་སངས་རྒྱས་ས་ལ་གནས། །རྒྱུ་རྐྱེན་མེད་པར་ལ་བཟླའ་བའི་ལེའུ་སྟེ་ལྔ་པའོ།། །།དེ་ནས་བྱང་ཆུབ་ཀྱི་སེམས་ཀུན་བྱེད་རྒྱལ་པོས། བཅོས་སུ་མེད་པར་ལ་བཟླའ་བའི་དགོངས་པ་འདི་གསུངས་སོ། །ཆོས་ཉིད་དབྱིངས་སུ་རང་བཞིན་སྐྱེད་བྱེད་པས། །འདས་དང་མ་འོངས་ད་ལྟར་སངས་རྒྱས་ཀྱིས། །སྔར་ཡང་མ་བཅོས་ད་ལྟ་འཆོས་པ་མེད། །ཕྱིས་ཀྱང་འཆོས་པར་མི་འགྱུར་བཅོས་མེད་དབྱིངས། །མིག་ལ་གཟུགས་སུ་ཤར་བའི་སྣང་བ་ཡང་། །མིང་ཡང་ཆེད་དུ་གཟུང་བ་མེད་པའི་ངང་། །མ་གཟུང་སྣང་བ་ཅི་ཤར་ཀུན་བྱེད་སྐུ། །
རྣ་བར་སྒྲ་རུ་གྲག་པའི་ཆོས་རྣམས་ཀྱང་། །སྙན་དང་མི་སྙན་བྱུང་ཚོར་ཅི་བྱུང་ཡང་། །མ་བཅོས་མི་བཅོས་བཅོས་པ་མེད་པར་བཞག །རང་ལ་ལྷུན་གྱིས་གནས་པས་བཅོས་མི་དགོས། །བཅོས་ན་བཅོས་པས་འཛིན་པའི་ལ་མི་ཟློས། །དྲི་དང་རོ་དང་རེག་བྱ་ལ་སོགས་པ། །གང་ལ་བཅོས་པར་མི་བྱ་མི་བཅོས་པར་ཡང་མིན། །གང་ལ་གཉེན་པོ་མ་ཞུགས་བཅོས་མེད་མཆོག །བསམ་པ་ཅི་སྐྱེས་རང་བྱུང་ཡེ་ཤེས་ལ། །དེ་ལས་ལྷག་པ་འདོད་ན་རྩོལ་བའི་ནད། །རང་ཤར་འདོད་མེད་ཆོས་ཀྱི་ལ་བཟླས་ན། །འདི་ལ་འདོད་པར་མི་བྱ་དོར་མི་བྱ། །ཕྱི་མར་འདོད་པར་མི་བྱ་དུས་གསུམ་འདོད་དང་བྲལ། །འདོད་དང་བྲལ་ན་བཅོས་མེད་དབྱིངས་ན་གནས། །ཆོས་ཀྱི་དབྱིངས་ལ་སྔ་ཕྱི་འགྱུར་བ་མེད། །གང་ཟག་བློ་ཡིས་དེ་ལ་བཅོས་སུ་མེད། །འཁོར་བས་ལུས་ངག་ཡིད་ནི་བཅོས་པ་ལ། །ལ་བཟླའ་བ་ནི་རང་བྱུང་ཤར་བས་བཟླས། །ལུས་ལ་མ་བཅོས་སྐུ་ཡི་ལ་བཟླའ་ཡིན། །ངག་མ་བཅོས་པ་གསུང་གི་ལ་བཟླའ་ཡིན། །དྲན་པ་མ་བཅོས་ཐུགས་ཀྱི་ལ་བཟླའ་ཡིན། །སངས་རྒྱས་འདོད་བྲལ་སངས་རྒྱས་ལ་བཟླའ་ཡིན། །དངོས་པོ་སྤང་མེད་སྟོང་པའི་ལ་བཟླའ་ཡིན། །སྡུག་བསྔལ་དོར་མེད་བདེ་བའི་ལ་བཟླའ་ཡིན། །ཆོས་ཉིད་ཡུལ་ལས་འདས་པ་ལྟ་བུའི་ལ་བཟླའ་ཡིན། །དམིགས་སུ་རྡུལ་ཙམ་མེད་པས་བསྒོམ་པའི་ལ་བཟླའ་ཡིན། །ལུས་ངག་རྩོལ་བ་མེད་པས་སྤྱོད་པའི་ལ་བཟླའ་ཡིན། །སངས་ལ་རྒྱ་བ་མེད་པས་འབྲས་བུ་ལ་བཟླའ་ཡིན། །གཞན་དུ་བཙལ་དུ་མེད་པས་ལམ་གྱི་ལ་བཟླའ་ཡིན། །བཅོས་སུ་མེད་པར་སེམས་དཔས་དགོངས་པར་གྱིས། །བཅོས་སུ་མེད་པར་ལ་བཟླའ་བའི་ལེའུ་སྟེ་དྲུག་པའོ།། །།དེ་ནས་བྱང་ཆུབ་ཀྱི་སེམས་ཀུན་བྱེད་རྒྱལ་པོས། དགོངས་པ་ནམ་མཁའ་ལྟར་ཀུན་ལ་ཁྱབ་པ་འདི་གསུངས་སོ། །ཀྱེ་སེམས་དཔའ་ཆེན་པོ་ད་དགོངས་ཤིག །ཆོས་ཉིད་བྱང་ཆུབ་སེམས་ནི་ནམ་མཁའ་འདྲ། །ནམ་མཁའ་ཀུན་ཁྱབ་བདག་ཏུ་འཛིན་པ་མེད། །ཆོས་ཉིད་བྱང་
ཆུབ་སེམས་ཀྱང་ཀུན་གྱི་རང་བཞིན་ཏེ། །བདག་དང་བདག་ཏུ་གྲུབ་པ་རྡུལ་ཙམ་མིན། །ནམ་མཁའི་ངང་ན་སྣ་ཚོགས་ཀུན་ཁྱབ་གནས། །འཁོར་དང་མྱང་འདས་ཆོས་ཉིད་དབྱེར་མི་ཕྱེད། །སྣ་ཚོགས་ཇི་ལྟར་ཤར་ཡང་ནམ་མཁའི་ངང་དུ་རྫོགས། །དྲན་རྟོག་བདེ་དང་སྡུག་བསྔལ་ཆོས་རྣམས་ཀྱང་། །སེམས་ཉིད་སྐྱེ་མེད་དབྱིངས་སུ་མ་རྫོགས་མེད། །སངས་རྒྱས་རང་ལ་རྫོགས་པས་སངས་རྒྱས་ས། །སངས་རྒྱས་འདོད་སྒྲུབ་མེད་པས་ལ་བཟླ་རང་དུ་བཟླ། །འཁོར་བ་རང་ལ་རྫོགས་པས་ལྟུང་བའི་གཡང་ས་མེད། །བདེ་སྡུག་སེམས་སུ་རྫོགས་པས་ལ་བཟླ་རང་དུ་བཟླ། །གཉིས་མེད་རང་ལ་རྫོགས་པས་ཐ་དད་འདུ་ཤེས་བྲལ། །ཉག་གཅིག་སེམས་སུ་རྫོགས་པས་ལ་བཟླ་རང་དུ་བཟླ། །ཐེག་པ་རང་དུ་རྫོགས་པས་གྲུབ་མཐའི་ཁ་འཛིན་བྲལ། །ལྟ་སྒོམ་སེམས་སུ་རྫོགས་པས་ལ་བཟླ་རང་དུ་བཟླ། །ཀྱེ་སེམས་དཔའ་ཆེན་པོ་ད་དགོངས་ཤིག །ནམ་མཁའ་མཐའ་དབུས་དམིགས་སུ་མ་མཆིས་པས། །དོན་ལ་དམིགས་སུ་མེད་པར་ལ་ཟློས་ཤིག །ནམ་མཁའ་ཀུན་ལ་གཙང་སྨེ་མ་མཆིས་པས། །གཙང་སྨེ་མེད་པར་སེམས་དཔས་ལ་ཟློས་ཤིག །ནམ་མཁའི་ངང་ལ་ཉིན་མཚན་མ་མཆིས་པས། །ཉིན་མཚན་གསལ་འགྲིབ་མེད་པར་ལ་ཟློས་ཤིག །ནམ་མཁའ་དག་ལ་སྐྱེ་འཆི་མ་མཆིས་པས། །སྐྱེ་ཤིའི་འདུ་ཤེས་མེད་པར་ལ་ཟློས་ཤིག །ནམ་མཁའ་དག་ལ་སངས་རྒྱས་མ་མཆིས་པས། །སངས་རྒྱས་འདུ་ཤེས་མེད་པར་ལ་ཟློས་ཤིག །ནམ་མཁའ་དག་ལ་སེམས་ཅན་མ་མཆིས་པས། །སེམས་ཅན་འདུ་ཤེས་མེད་པར་ལ་ཟློས་ཤིག །ནམ་མཁའ་དག་ལ་རེ་དོགས་མ་མཆིས་པས། །རེ་དོགས་འདུ་ཤེས་མེད་པར་ལ་ཟློས་ཤིག །ནམ་མཁའ་དག་ལ་མཐོ་དམའ་མ་མཆིས་པས། །མཐོ་དམའ་གཉིས་སུ་མེད་པར་ལ་ཟློས་ཤིག །ནམ་མཁའ་དག་ལ་རྩིས་གདབ་མ་མཆིས་པས། །རྩིས་གདབ་འདུ་ཤེས་མེད་པར་ལ་ཟློས་ཤིག །ནམ་མཁའ་དག་ལ་ཤེས་རྟོག་མ་མཆིས་པས། །ཤེས་རྟོག་འདུ་ཤེས་མེད་པར་ལ་ཟློས་ཤིག །
ནམ་མཁའ་དག་ལ་རློམ་སེམས་མ་མཆིས་པས། །གང་ལའང་རློམ་སེམས་མེད་པར་ལ་བཟླའོ། །ཇི་མི་སྙམ་དུ་དགོངས་པ་དགོངས་སུ་མེད་པ་ནི། །ཀུན་བྱེད་ང་ཡི་དགོངས་པ་བླངས་པ་ཡིན། །དགོངས་གཞི་ཀུན་དང་བྲལ་བའི་དགོངས་པ་ནི། །དུས་གསུམ་སངས་རྒྱས་ཀུན་གྱི་ལྡེམ་དགོངས་ཡིན། །འཁོར་བ་སྤང་དུ་མེད་པའི་དགོངས་པ་ནི། །མྱང་འདས་གཞན་ན་མེད་པའི་ལྡེམ་དགོངས་ཡིན། །བྱང་ཆུབ་བསྒྲུབ་ཏུ་མེད་པའི་དགོངས་པ་ནི། །སྐྱེ་མེད་རང་ལ་གནས་པའི་ལྡེམ་དགོངས་ཡིན། །དྲན་སྣང་དགག་ཏུ་མེད་པའི་དགོངས་པ་ནི། །དེ་ཉིད་རང་གྲོལ་ཡིན་པའི་ལྡེམ་དགོངས་ཡིན། །རྟོག་མེད་བསྒོམ་དུ་མེད་པའི་དགོངས་པ་ནི། །ཆོས་ཉིད་འདུ་འབྲལ་མེད་པའི་ལྡེམ་དགོངས་སོ། །ཚོགས་གཉིས་བསག་ཏུ་མེད་པའི་དགོངས་པ་ནི། །ཆོས་ཉིད་རྒྱུ་རྐྱེན་མེད་པའི་ལྡེམ་དགོངས་སོ། །ཅིར་ཡང་ངེས་པ་མེད་པའི་དགོངས་པ་ནི། །འཛིན་མེད་ཆོས་སྐུ་ཡིན་པའི་ལྡེམ་དགོངས་ཡིན། །ཀྱེ་སེམས་དཔའ་ཆེན་པོ་ད་ཉོན་ཅིག །ངེས་མེད་ཕྱོགས་ལོག་དགོངས་པ་མ་ལོན་ན། །ཇི་ལྟར་བསྒོམས་ཀྱང་འཆིང་ལ་མ་བསྒོམས་ན་ཡང་འཆིང་། །ལྡེམ་དགོངས་བསྟན་ཡང་དགོངས་པ་ཞེ་བཞག་ན། །ལྡེམ་པོ་ཉིད་ཀྱིས་སེམས་དཔའ་འཆིང་བར་འགྱུར། །ཇི་མི་དགོངས་ཀྱི་རྟོགས་པ་མ་ཤར་ན། །འཁོར་བའི་སྒྲོགས་ལས་གྲོལ་བར་མི་འགྱུར་རོ། །དགོངས་པ་ནམ་མཁའ་ལྟར་ལ་བཟླ་བའི་ལེའུ་སྟེ་བདུན་པའོ།། །།བྱང་ཆུབ་སེམས་དཔའ་ཀུན་བྱེད་རྒྱལ་པོས། རྒྱ་མཚོ་ལྟ་བུའི་དགོངས་པ་འདི་གསུངས་སོ། །ཀྱེ་སེམས་དཔའ་ཆེན་པོ་ང་ཉོན་ཅིག །ཆོས་ཉིད་རྒྱ་མཚོ་ལྟ་བུར་གཏིང་དཔག་དཀའ་བའི་ཆོས། །སུས་ཀྱང་འདི་ལ་དགོངས་པ་རྡུལ་ཙམ་མེད་པ་སྟེ། །རྒྱ་མཚོ་ཆེན་པོའི་ཆུ་ལ་ཁ་གཏིང་དབྱེ་རུ་ཡོད་མ་ཡིན། །དེ་བཞིན་ཆོས་ཉིད་བྱང་ཆུབ་སེམས་ལ་སྒོ་ཕུག་མེད། །རྦ་དང་རླབས་དང་ཆུ་བུར་རྒྱ་མཚོ་ཆེན་པོར་གཅིག །དེ་བཞིན་འཁོར་དང་མྱང་འདས་རྟོག་དང་མི་རྟོག་ཡང་། །ཆོས་དབྱིངས་ཀློང་ན་དབྱེར་མེད་གཅིག་ཏུ་རྫོགས་པ་ཡིན། །ཕྱོགས་བཞི་མཚམས་
བརྒྱད་ཆུ་བྲན་ཐམས་ཅད་འབྱུང་བ་ཡང་། །རྒྱ་མཚོ་ཉིད་ལས་བྱུང་ཞིང་རྒྱ་མཚོ་ཉིད་དུ་འདུ་བ་ལྟར། །བརྒྱད་ཁྲི་བཞི་སྟོང་ཆོས་རྣམས་ཐམས་ཅད་འབྱུང་བ་ཡང་། །ཆོས་ཉིད་དབྱིངས་ལས་བྱུང་ཞིང་ཆོས་ཉིད་དབྱིངས་སུ་གཅིག །རྒྱ་མཚོའི་འཇིང་ལ་གཡོ་འགུལ་ཡེ་ནས་མེད་པ་བཞིན། །སྐྱེ་མེད་དོན་ལ་དུས་གསུམ་འཕོ་དང་འགྱུར་བ་མེད། །རྦ་དང་རླབས་ལ་འགག་པ་མེད་པ་བཞིན། །སྐྱོན་དང་ཡོན་ཏན་མི་འགག་ཅིར་ཡང་འཆར་བར་ངེས། །ཤར་ཡང་སྐྱེ་མེད་དབྱིངས་ལས་མ་འདས་དགོངས་མཛོད་ལ། །མ་རྟོགས་སེམས་ཅན་གཞན་ལ་ལེགས་པར་ལུང་སྟོན་ཞིག །ཀྱེ་མ་འཁོར་དང་མྱང་འདས་དབྱེར་མེད་དབྱིངས་སུ་སྟོར། །སྣང་སྟོང་དབྱེར་མེད་རྩ་བྲལ་ཕྱོགས་ལས་འདས་པ་ཡིན། །སྲོག་དང་མ་བྲལ་འབྱུང་བ་རང་རང་རང་ས་འཛིན། །སྐྱེ་མེད་བྱང་ཆུབ་སེམས་ལ་དམིགས་པ་ཉིད་དང་བྲལ། །ཞེ་འདོད་རེ་དོགས་མཐའ་ནི་ངེས་པ་མེད་པར་གྲོལ། །སེམས་ཅན་ཉིད་ནི་ཡེ་ནས་སངས་རྒྱས་དགོངས་པ་འཛིན། །ཆོས་ཉིད་བྱང་ཆུབ་སེམས་ནི་རང་བཞིན་སྐྱེ་མེད་དེ། །འབྱུང་བ་ལྔ་རུ་གྲོལ་བས་བར་དོའི་འདུ་ཤེས་བྲལ། །ཐེག་གཅིག་བྱང་ཆུབ་སེམས་ལ་ཀུན་ཀྱང་གནས་པ་ཡིན། །རང་བྱུང་ཡེ་ཤེས་རྟོགས་ལ་རིང་བ་ནམ་ཡང་མེད། །མ་རིག་འཁྲུལ་པ་རྣམས་ཀྱང་སྐྱེ་མེད་དབྱིངས་ལ་འབྱམས། །ཟུག་རྔུ་བྱུང་བ་ཆོས་ཉིད་རང་མ་ཚོར། །མི་སྲིད་སྲིད་པར་ཤར་བ་སེམས་དཔས་ཇི་ལྟར་དགོངས། །ཆོས་ཉིད་དོན་གྱི་གནས་ལུགས་སྐྱེ་མེད་བདེ་ཆེན་དེ། །ཡོངས་ལ་རྫོགས་པར་ཤེས་ནས་སྨོན་པ་སུ་ལ་འབུལ། །རྒྱ་མཚོའི་ཆུ་ཡིས་ཆུ་ལ་སྨོན་པ་མེད་པ་བཞིན། །བྱང་ཆུབ་སེམས་ཀྱིས་སེམས་ལ་སྨོན་དུ་མེད་པ་ཡིན། །སྨོན་པ་གཞན་དུ་འབུལ་ན་རང་གི་དོན་རྟོགས་མིན། །དེ་བཞིན་དོགས་པ་བྱེད་པའང་དེ་དང་མཚུངས་པ་ཡིན། །ཡུལ་ལ་དམིགས་པ་བཅུག་ན་རེ་དོགས་ནམ་ཡང་འབྱུང་། །སེམས་ཀྱི་རང་བཞིན་སྐྱེ་མེད་ཡིན་པར་དགོངས་ནས་ནི། །རེ་དོགས་དམིགས་པ་རྡུལ་ཙམ་མེད་པར་ཤི་བས་ཆོག །ཀུན་ཏུ་བཟང་པོའི་རང་བཞིན་ཉིད་དུ་དེ་འགྱུར་རོ། །བདག་དང་བཅས་པའི་ཡུལ་ལ་འཇུག་པའི་རྒྱུ་མ་མཆིས། །བདག་
མེད་སྐུ་གསུང་ཐུགས་ཀྱི་འགྲོ་དོན་རྫོགས་པར་བྱེད། །རྟག་དང་ཆད་པའི་རྩིས་གདབ་བློ་ཡིས་མ་ལེན་ཅིག །བློས་བླངས་ཐམས་ཅད་རེ་དོགས་མཐར་ལྷུང་འཆིང་བའི་རྒྱུ། །རྟོགས་པའི་སེམས་ལ་བཅིང་བྱ་འཆིང་བྱེད་གཉིས་ལས་གྲོལ། །སྣང་བ་ཙམ་མ་ལམ་མེ་འདི་ཡིས་ལྷག་པ་མེད། །དབང་པོ་འགགས་ན་དེར་འཛིན་སྣང་བ་གྲོལ་བར་འགྱུར། །སེམས་ཉིད་བྱང་ཆུབ་སེམས་ལ་འཕོ་འགྱུར་ཡེ་ནས་མེད། །སེམས་དཔའ་ཆེན་པོས་དེ་ལྟར་དགོངས་པ་ལོང་མཛོད་ཅིག །ཆོས་ཉིད་རྒྱ་མཚོ་ལྟར་ལ་བཟླའ་བའི་ལེའུ་སྟེ་བརྒྱད་པའོ།། །།བྱང་ཆུབ་སེམས་ཀུན་བྱེད་རྒྱལ་པོས། ཁྱུང་ཆེན་རྩལ་རྫོགས་ལྟ་བུའི་དགོངས་པ་འདི་གསུངས་སོ། །ཀྱེ་སེམས་དཔའ་ཆེན་པོ་ད་དགོངས་ཤིག །ཁྱུང་ཆེན་རྩལ་རྫོགས་མཁའ་ལ་ལྡིང་བས་སྤྲོ་བསྡུ་མེད། །སེམས་ཉིད་སྐྱེ་མེད་ཡེ་ནས་རྩལ་རྫོགས་བྱ་བཙལ་བྲལ། །མི་སྤྲོ་མི་བསྡུ་རང་བཞིན་བཞག་པས་ལྷུན་གྱིས་གྲུབ། །མྱ་ངན་འདས་པ་མི་སྤྲོ་འཁོར་བ་ལས་མི་བསྡུ། །ཡོན་ཏན་སེམས་སུ་མཉམ་པས་སྤྲོ་བསྡུ་བྱ་མི་དགོས། །རྣལ་འབྱོར་ཆོས་ལ་མི་སྤྲོ་རྣམ་རྟོག་བསྡུ་མི་བྱ། །ཀྱེ་སེམས་དཔའ་ཆེན་པོ་ད་དགོངས་ཤིག །ཁྱུང་ཕྲུག་སྒོ་ངའི་རྒྱ་ལས་གྲོལ་བས་མ་དང་མཉམ། །རྩལ་དང་གཤོག་རྫོགས་མཁའ་ལ་དབང་སྒྱུར་ལྟར། །བྱང་ཆུབ་སེམས་ཀྱི་རྒྱ་ནི་རྣམ་པ་གསུམ་ཡིན་ཏེ། །སྣང་བ་ཁོ་ནར་འཛིན་པའི་རྒྱ་དང་ལུས་རྒྱ་དང་། །བདག་ཏུ་འཛིན་པའི་རྒྱ་ཡིས་ཡོངས་སུ་ཟིན་པ་གསུམ། །རྣལ་འབྱོར་རྒྱ་རུ་གསུངས་པ་ང་ཡིས་སྨྲས། །སྣང་བ་ངེས་མེད་དབང་པོ་འགགས་པས་སྣང་བ་གྲོལ། །འབྱུང་བཞི་རང་སར་དེངས་པས་རྣལ་འབྱོར་ལུས་རྒྱ་གྲོལ། །ཡུལ་མེད་དྲན་པ་འགགས་པས་བདག་འཛིན་རྒྱ་ལས་གྲོལ། །སྣང་བ་ངེས་མེད་རྟོགས་པས་སྣང་བའི་སྒོང་རྒྱ་ཆག །འབྱུང་བ་རང་ས་ཟིན་པས་ལུས་ཀྱི་སྒོང་རྒྱ་ཆག །དམིགས་པ་རྡུལ་ཙམ་མེད་པས་བདག་འཛིན་སྒོང་རྒྱ་ཆག །སྒོ་ང་རྣམ་གསུམ་ཆག་པས་གནས་ལུགས་མ་བུ་མཇལ། །གནས་ལུགས་གཞི་
ནས་སྣང་སྲིད་ཁ་ལོ་སྒྱུར་བར་བྱེད། །བསྒྱུར་ཡང་བདག་འཛིན་མི་གནས་རྩལ་གྱི་འཆར་ལུགས་ཡིན། །དེ་ནི་ཀུན་བཟང་སྐུ་ཡི་ངོ་བོར་ལ་བཟླ་ཡིན། །མ་བུ་དབྱེར་མེད་ཀུན་ལ་གནས་པ་ཡིན། །དཔེ་ནི་ཉི་ཟླ་ཁ་སྦྱོར་དགོངས་པས་བསྟན་པ་ཡིན། །ཉི་མ་མ་ལ་ཟླ་བ་བུ་ཡི་ཚུལ་དུ་བྱུང་བ་ཡིན། །དེ་བཞིན་སྐྱེ་མེད་མ་ལ་ཡེ་ཤེས་བུ་ཡི་ཚུལ་དུ་བསྟན་པ་ཡིན། །སྐྱེ་མེད་ཉི་མའི་ཀློང་དུ་ཟླ་བ་ལྟ་བུའི་ཡེ་ཤེས་ཟིལ་གྱིས་མནན། །ཉི་མ་ཕྱེ་ན་ཟླ་བ་གསལ་དང་མི་གསལ་རྩིས་གདབ་མེད། །སྐྱེ་མེད་དབྱིངས་ན་གནས་པ་རྟོགས་དང་མ་རྟོགས་མེད། །ཟླ་བ་གསལ་ལ་ཉི་མ་ཉེ་བ་མ་ཡིན་དེ་དགོངས་སམ། །འདུ་ཤེས་གསལ་ལ་སྐྱེ་མེད་ཉེ་བ་མ་ཡིན་རིང་། །སྐྱེ་མེད་ཡེ་ཤེས་ཉིད་ཀྱིས་ཡེ་ཤེས་རྒྱང་དུ་འཕང་། །འདུ་ཤེས་དྲན་པའི་ཆོས་ལ་དགོངས་པ་མ་ལེན་ཞིག །འདུ་བྱེད་ང་ཡི་ཆོས་ལ་འདུ་ཤེས་མ་འཇུག་ཅིག །བྱང་ཆུབ་སེམས་ཀྱི་རོ་ལ་མྱོང་བར་མ་བྱེད་ཅིག །དམིགས་སུ་མེད་པའི་ཆོས་ལ་དམིགས་པ་མ་འཇུག་ཅིག །བླ་དྭགས་ཙམ་གྱི་ཆོས་ལ་རྩོལ་བས་མ་བསྒྲུབས་ཤིག །ཆོས་ཉིད་བྱང་ཆུབ་སེམས་ཀྱི་རང་བཞིན་ཆེན་པོ་ལ། །ངེས་མེད་རྩོལ་བྲལ་སྔོན་ནས་ཀུན་ལ་ཁྱབ་པར་ཤར། །ང་ལུང་ཐོས་པས་ངེས་མེད་དགོངས་པ་ད་ལྟ་ཤར། །ཕུང་པོ་བོར་བས་ཞི་བ་མཆོག་ལ་ཕྱིན་པར་འགྱུར། །ལྟ་བ་ཁྱུང་ཆེན་ལྡིངས་པའི་དགོངས་པ་ལ་བཟླའ་བའི་ལེའུ་སྟེ་དགུ་པའོ།། །།བྱང་ཆུབ་སེམས་ཀུན་བྱེད་རྒྱལ་པོས། ཁམས་གསུམ་ཡོངས་གྲོལ་གྱི་དགོངས་པ་འདི་གསུངས་སོ། །འདོད་ཁམས་གཟུགས་ཁམས་གཟུགས་མེད་ཁམས་སུ་བསྟན་པ་ཡང་། །ཆོས་ཉིད་བྱང་ཆུབ་སེམས་ཀྱི་ངོ་བོར་བྱུང་བ་ཡིན། །གཟུགས་མེད་ཁམས་ལ་གཟུང་དུ་མ་མཆིས་ངོ་བོས་སྟོང་། །འཛིན་མེད་ཆོས་ཀྱི་སྐུ་རུ་ཡེ་ནས་བཞུགས་པ་ཡིན། །འདོད་པའི་ཁམས་ནི་ལོངས་སྤྱོད་སྐུ་རུ་བཞུགས་པ་ཡིན། །ཉིད་ཀྱིས་ཉིད་ལ་ལོངས་སྤྱོད་སེམས་དཔས་དགོངས་ལགས་སམ། །སེམས་ཀྱི་
ལོངས་སྦྱོད་མིན་པ་ཡེ་ནས་ཡོད་མི་སྲིད། །སྔ་མའི་རྒྱགས་ཟད་ཕྱི་མའི་རྒྱགས་ལ་ལོངས་སྤྱོད་བཞིན། །སྔ་མ་གྲོལ་ཞིང་ཕྱི་མའི་འདོད་ཡོན་ལོངས་སྤྱོད་ཡིན། །དེས་ན་འདོད་ཁམས་ལོངས་སྤྱོད་སྐུ་རུ་བསྟན་པ་ཡིན། །སྣང་སྲིད་གཟུགས་སུ་ཤར་བ་བྱང་ཆུབ་སེམས་ཀྱི་གཟུགས། །གཟུགས་ལ་ངེས་པ་མེད་པ་སྣ་ཚོགས་སྤྲུལ་པའི་སྐུ། །སེམས་ཉིད་སྐྱེ་མེད་གཅིག་ལས་སྣ་ཚོགས་འབྱུང་བས་ན། །མེད་བཞིན་སྣ་ཚོགས་འབྱུང་བས་སྤྲུལ་སྐུ་ཡིན་པར་གསུངས། །སྤྲུལ་སྐུ་ཡིན་མིན་དྲན་པ་བརྟག་པར་རིགས་སོ་ཨང་། །འཁོར་དང་མྱང་འདས་གཉིས་ཀ་སྤྲུལ་པ་འདྲ་བ་ལ། །འོག་མ་རྣམས་ནི་མྱང་འདས་སྤྲུལ་པས་གསུངས་པ་ཡིན། །སྐྱེ་མེད་རྟོགས་ན་སྤྲུལ་པ་ཡོན་ཏན་མཉམ་པར་གསུངས། །དེ་བས་ཁམས་གསུམ་སྐུ་གསུམ་དབྱིངས་སུ་གྲོལ་བ་ཡིན། །གཅིག་ལ་མ་ཡིན་ཀུན་ལ་གྲོལ་བས་ཡོངས་གྲོལ་ཡིན། །ཡོངས་ན་ནམ་མཁའི་ཁམས་སུ་སྤྲིན་དང་ན་བུན་གྲོལ་བ་བཞིན། །སྐྱེ་མེད་དབྱིངས་སུ་ཁམས་གསུམ་ངང་གིས་གྲོལ་བ་ཡིན། །ཕ་ཤི་བུ་སྐྱེ་ཕ་ལ་བུ་ཡིས་རྩིས་མེད་བཞིན། །སྔ་གྲོལ་ཕྱིས་སྲིད་སྔ་མས་ཕྱི་མའི་གཉེར་སུས་བྱེད། །དེ་བས་སྲིད་གསུམ་རྣམ་དག་མཚན་མ་རང་སར་དག །སྔ་ཕྱི་རེ་དོགས་མི་བྱེད་ཀུན་བྱེད་བཀའ་ལ་གནས། །འདོད་ཆགས་ཞེ་སྡང་གཏི་མུག་གཏན་ནས་བརླག །ཡུལ་ལ་འདས་པར་གོ་ན་ཡུལ་སྣང་རང་དུ་རྫོགས། །དགོངས་པའི་མཐར་ཐུག་དགོངས་པ་ཀུན་ལས་འདས་པ་ཡིན། །ཡོངས་གྲོལ་དུ་ལ་བཟླའ་བའི་ལེའུ་སྟེ་བཅུ་པའོ།། །།བྱང་ཆུབ་ཀྱི་སེམས་ཀུན་བྱེད་རྒྱལ་པོས། བློ་ཐག་བཅད་ཅིང་བསྟན་པ་གཏད་པ་འདི་གསུངས་སོ། །ཀྱེ་སེམས་དཔའ་ཆེན་པོ་ད་ཉོན་ཅིག །ཆོས་ཉིད་བྱང་ཆུབ་སེམས་ཀྱི་རང་བཞིན་སྤྲོས་པ་བཅད་པ་ནི། །བྱང་ཆུབ་སེམས་ནི་བློ་ཡིས་བསམ་པ་མིན། །བསམས་ཤིང་བརྟགས་པའི་ཆོས་ནི་རིག་བྱེད་ཡེ་ཤེས་ཡིན། །རང་བྱུང་ཡེ་ཤེས་རང་ཤར་དེ་ལ་མེད་པ་ན། །བློ་ཡིས་
བསམས་ཤིང་བསྒོམས་པའི་ཆོས་ལ་རེ་མ་འཇོག །ཆོས་རྣམས་ཀུན་གྱི་ཐག་ནི་བྱང་ཆུབ་སེམས་སུ་བཅད། །མ་བལྟས་མ་བསྒོམས་བསམ་པ་མེད་པས་ཐག་ཆོད་ན། །དེ་ལ་རང་བྱུང་ཡེ་ཤེས་ཤར་བས་ཐག་དེར་བཅད། །ཆོས་སྐུ་དམིགས་སུ་མེད་པར་སེམས་དཔས་བློ་ཐག་ཆོད། །འདོད་ཡོན་ལོངས་སྐུ་ཡིན་པར་སེམས་དཔས་བློ་ཐག་ཆོད། །ཕན་སེམས་སྤྲུལ་སྐུ་ཡིན་པར་སེམས་དཔས་བློ་ཐག་ཆོད། །སྣང་བ་རང་སེམས་ཡིན་པར་སེམས་དཔས་བློ་ཐག་ཆོད། །སེམས་ལ་གཉིས་སུ་མེད་པར་བག་ཆགས་སྦྱང་དུ་མེད། །ཡུལ་མེད་རང་གསལ་ཡིན་པར་སེམས་དཔས་བློ་ཐག་ཆོད། །ཐིག་ལེ་ཉག་གཅིག་སེམས་ཀྱི་རང་བཞིན་ཡིན་མོད་ཀྱང་། །ཉག་གཅིག་ཅིར་ཡང་འབྱུང་བས་སྤང་དང་བསྒྲུབ་མ་བྱེད། །ཀུན་ཀྱང་ཡོན་ཏན་མཉམ་པར་སེམས་དཔས་བློ་ཐག་ཆོད། །ད་ལྟར་སྣང་བའི་སྒྱུ་ལུས་འདི་ཀུན་སེམས་དཔས་ཇི་ལྟར་དགོངས། །འབྱུང་བའི་ཆོ་འཕྲུལ་ཙམ་དུ་སེམས་དཔས་དགོངས་མཛོད་ལ། །སེམས་ནི་བླ་མེད་ནམ་མཁའ་ལྟ་བུར་བློ་ཐག་ཆོད། །ཀྱེ་སེམས་དཔའ་ཆེན་པོ་ད་དགོངས་ཤིག །རྩ་རྒྱུད་ལེའུ་ལྔ་བཅུ་རྩ་བདུན་གསུངས་པ་ཡང་། །རང་བྱུང་ཡེ་ཤེས་ཚིག་ཏུ་བསྟན་པའི་མདོ་ལུང་ཡིན། །སེམས་ལས་རང་བྱུང་ཡེ་ཤེས་གཅིག་ཏུ་ལ་ཟློས་ཤིག །ཕྱི་མ་ལེའུ་བཅུ་དང་གཉིས་སུ་གསུངས་པ་ཡང་། །རང་བྱུང་ཡེ་ཤེས་བསམ་པས་བརྟགས་པ་ཡིན། །དེ་ཡང་རང་བྱུང་གཅིག་ཏུ་སེམས་དཔས་ལ་ཟློས་ཤིག །ཕྱི་མའི་ཕྱི་མ་ལེའུ་བཅུ་དང་ལྔ་རུ་གསུངས་པ་ཡང་། །རང་བྱུང་ཡེ་ཤེས་རྣལ་དུ་འཇོག་པར་དགོངས་པ་ཡིན། །སེམས་དཔའ་རང་བྱུང་ཡེ་ཤེས་གཅིག་ཏུ་ལ་ཟློས་ཤིག །ཐོས་པས་སྟོན་པའི་ལྡེ་མིག་དང་། །བསམས་པས་གྲོལ་བའི་ལྡེ་མིག་དང་། །བསྒོམས་པས་འབྱིན་པའི་ལྡེ་མིག་གིས། །ངེས་པར་གཏན་ལ་ཕབ་པས་ན། །སེམས་དཔས་ལེགས་པར་ཐག་ཆོད་ཅིག །
ཀྱེ་སེམས་དཔའ་ཆེན་པོ་ད་དགོངས་ཤིག །ལ་ཟློ་གསང་བའི་འཁོར་ལོ་འཁོར་བའི་སྲོག་གཅོད་འདི། །སེམས་དཔའ་རྡོ་རྗེ་ཁྱོད་ལ་འདི་གཏད་དོ། །བློ་ལྡན་སྐལ་བ་ཅན་ལ་འདི་གསུངས་ཤིག །དམ་མེད་གསང་སྡོམ་ཆུར་སྐྱུར་གདུངས་པ་དང་། །སྲིན་པོ་རཀ་ཤ་འདྲེ་བརྡུང་མཐུ་ངོམ་དང་། །རྟག་ཏུ་གྲོང་ཁ་ཡུགས་སའི་གླང་རྒན་ལ། །རྫོགས་ལྡན་འདི་འདྲའི་དགོངས་པ་མི་བསྟན་ནོ། །རྒྱུད་ཆེན་ལ་ཟློ་གསང་བའི་འཁོར་ལོ་ཞེས་བྱ་བ། དགོངས་པ་ཀློང་ནས་ཤར་བའི་མུན་སེལ་རྫོགས་སོ།། །།འདི་ཐོས་སངས་རྒྱས་དགོངས་པ་ཡིན། །འདི་བསྒོམས་སངས་རྒྱས་དགོངས་པ་ཐོབ། །འདི་བསྒོམས་སངས་རྒྱས་དགོངས་ལ་གནས། །ཨེ་མ་ཧོ། བསམ་དགོངས་མེད་པར་ལ་བཟླ་བའོ།། ཨྠྀཨི།།