ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ཅེས་བྱ་བ།
སཾ་སྐྲི་ཏ་ལྷའི་སྐད་དུ། སརྦ་བྷ་དྲ་ས་མནྟ། བོད་སྐད་དུ། ཀུན་ཏུ་བཟང་མོ་ཀློང་གསལ་འབར་མ་ཉི་མའི་རྒྱུད། ཧ་ཤང་སྐད་དུ། དུ་རན་ཧ་སིང་དྷ་ར། རྒྱ་ནག་སྐད་དུ། ཨ་བྷ་ལ་ས་རྒྱ་ནམ་པ། ཨུ་རྒྱན་གྱི་སྐད་དུ། དྷ་ན་སཾ་གྷ་ལ། བྱ་ཀ་ལནྡྷ་ཀའི་སྐད་དུ། ཨེ་དུ་ར་བྷག་ཤ་ནཾ་བྷ། ཁ་ཆེའི་སྐད་དུ། ས་ཏུ་ར་བྷ་དུ་ལིང་ཀ །མན་སིངྒ་ལའི་སྐད་དུ། སྤོས་ཧ་ར་ན་ཧྲི། རྒྱ་གར་སྐད་དུ། ས་མུན་ཏནྟྲ་ནཱ་མ། བོད་སྐད་དུ། ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ཅེས་བྱ་བ། ཀུན་འདུས་རིག་སྟོང་གི་ཀློང་ལ་ཕྱག་འཚལ་ལོ། །འདི་སྐད་བདག་གིས་ཐོས་པའི་དུས་གཅིག་ན། །འཁོར་འདས་ཀུན་གྱི་ཐོག་མར་ནི། །རང་བྱུང་བྱས་པ་མེད་པ་ལས། །ཀུན་ཏུ་བཟང་མོ་རིག་སྟོང་ཀློང་། །སྟོང་པ་ཉིད་ཀྱི་གཞི་མ་ནི། །ཚད་མེད་གསལ་བའི་དཀྱིལ་འཁོར་ཆེ། །ཀུན་བཟང་བྷ་ག་ཡངས་པའི་ཀློང་། །མི་འབྱེད་འབྱེད་པ་མེད་པའི་ཆོས། །སོ་སོ་མ་ཡིན་ཐ་མི་དད། །སྣང་བ་བཀོད་པ་ཆེན་པོའི་ཡུལ། །ཡེ་ནས་རང་གསལ་རིག་པའི་སྐུ། །སྟོང་གསལ་མདངས་ལྔ་རྫོགས་པའི་ལྷ། །ཀུན་ཏུ་བཟང་མོ་ཞལ་ཕྱག་རྫོགས། །ཐིག་ལེ་སྟོང་པའི་ཀློང་དཀྱིལ་དུ། །ཉག་གཅིག་ཟང་ཐལ་ཆེན་པོའི་སྐུ། །ཀུན་ཏུ་བཟང་པོ་འོད་མི་འགྱུར། །རིག་སྟོང་གསལ་བའི་སྐུ་རུ་ཤར། །མ་འགགས་རང་རྩལ་ཀུན་ཏུ་སྣང་། །འགག་མེད་གསལ་བའི་སྒྲ་ཚིག་ཏུ། །བརྗོད་དུ་མེད་པའི་དོན་འདི་གསུངས། །ཨེ་མ་ཉོན་ཅིག་སྣང་བ་རྣམས། །མཚན་མ་མེད་པའི་ཀློང་ཡངས་སུ། །འདས་ཤིང་བཤད་དུ་མེད་པར་གསལ། །སྤྲོས་པ་གཟུང་འཛིན་བྲལ་བའི་ཀློང་། །ཆོས་རྣམས་སྨྲ་བརྗོད་བྲལ་ལ་གདགས། །ལུང་དང་རྟོགས་པ་བསྟན་དུ་མེད། །མ་བཅོས་པ་ཡི་ཀློང་ཉིད་དུ། །འདུས་ཤིང་རྩོལ་སྒྲུབ་མེད་པར་གསལ། །མན་ངག་ཐམས་ཅད་བཙལ་དུ་མེད། །མ་བསླད་པ་ཡི་ཀློང་ཡངས་སུ། །ལྟ་སྒོམ་སྤྱོད་འབྲས་མེད་པར་གསལ། །སྣང་བ་ཐབས་ཀྱི་རིག་ཀློང་ལ། །གནས་ལུགས་ཟང་ཐལ་སྐུ་རྣམས་ཤར། །དུས་
གསུམ་འཕོ་འགྱུར་མེད་པའི་ཀློང་། །སྐུ་གསུམ་ཡེ་ཤེས་ལྔ་ལྡན་གསལ། །ཀུན་འབྱུང་འགག་པ་མེད་པའི་ཀློང་། །སྣ་ཚོགས་རོལ་པ་མ་འགགས་གསལ། །འབར་བ་ཡེ་ཤེས་ཆེན་པོ་ལ། །ཉི་མ་ལྟ་བུའི་གསང་རྒྱུད་འདི། །སྟོང་པའི་ཀློང་ན་གསལ་བའི་ཆོས། །ཅོ་ག་དགུ་འགྱུར་སྐད་ཀྱི་ཚུལ། །སྒྲ་བཞི་ལྡན་པའི་དོན་ནི་གསུམ། །ཀྲ་ཐ་ནི་ཀྲ་ཐ་ནི། ཅེས་པ་སྒྲའི་དབྱངས་ཉིད་བསྟན་པའོ། །ཏྲ་ཐ་མ་ནི་ཏྲ་ཐ་མ་ནི། དེས་ནི་སྒྲ་ཡི་སྒྲུབ་བྱེད་བསྟན། །མ་ན་ཏྲ་ཐ་མ་ན་ཏྲ་ཐ། དེས་ནི་སྒྲ་ཡི་རང་བཞིན་གསལ། །ཏི་ཏི་ཏི་ཏི་ཏི་དྲི། དེས་ནི་སྒྲ་བཞི་ཕན་སྐྱེད་བསྟན། །སྒྲ་དོན་བཞི་པོ་དེ་དག་ལ། །སྤྱི་དང་རང་གི་མཚན་ཉིད་ཆོས། །སྣང་བ་རྣམས་ཀྱི་ཐུགས་སུ་ཆུད། །ཅེས་ནི་སེམས་མེད་རིག་སྟོང་གི། །དགུ་འགྱུར་ཅོ་གའི་སྐད་ཀྱིས་འདི་གསུངས་སོ། །འདི་སྐད་སྣང་བའི་བདག་པོ་ཉིད་ཀྱིས་ཐོས་པའི་དུས་གཅིག་ན།ཆོས་ཉིད་བདེ་ཆེན་ཀུན་བཟང་ཡུམ། །བྷ་ག་ཆོས་འབྱུང་ཡངས་པ་རུ། །ཐབས་ཀྱི་ཐིག་ལེ་ཉག་གཅིག་སྐུ། །རིག་པ་མ་འགགས་སྣང་སྟོང་གཟུགས། །ནམ་མཁའི་དཀྱིལ་དུ་ནམ་མཁའི་སྐུ། །ཆོས་དབྱིངས་ཡེ་ཤེས་སྙིང་པོ་ཅན། །མེ་ལོང་ཡེ་ཤེས་གསལ་སྟོང་སྐུ། །མཉམ་ཉིད་ཡེ་ཤེས་སྣང་སྟོང་དངོས། །སོར་རྟོགས་ཡེ་ཤེས་མ་འགགས་རྫོགས། །བྱ་གྲུབ་ཡེ་ཤེས་རྩལ་རྫོགས་ལྷུན། །རིན་ཆེན་གསང་བའི་སྦུབས་སུ་གསལ། །སྟོང་པའི་ཡུལ་དུ་གསལ་བའི་མདངས། །སྟོང་གསལ་ལྔ་ལྡན་སྣང་བའི་སྐུ། །ཡུམ་ཆེན་ཀུན་ཏུ་བཟང་མོར་བཞུགས། །དེ་ཚེ་དེ་ཡི་དུས་ཉིད་དུ། །ཆོས་སྐུའི་འཁོར་ནི་འདི་ལྟར་རོ། །མི་སྣང་བ་ཡི་སྣང་བ་ནི། །སྣང་བ་ཆེན་པོ་བཀོད་པའི་འཁོར། །རིག་པ་རྡོ་རྗེ་རྣོན་པོ་དང་། །རིག་པ་རྡོ་རྗེ་ལུག་རྒྱུད་དང་། །རིག་པ་རྡོ་རྗེ་རང་སྣང་དང་། །རིག་པ་རྡོ་རྗེ་ཅོག་བཞག་དང་། །རིག་པ་ཐོགས་པ་མེད་པ་དང་། །རིག་པ་ཅིར་སྣང་སྐུ་གསུང་ཐུགས། །དེ་དག་ཐམས་ཅད་ངོ་བོའི་སྐུ། །རིག་པ་ཉག་གཅིག་ཀུན་བཟང་མོ། །
ངོ་བོའི་འཁོར་ནི་བསམ་ལས་འདས། །གསལ་སྟོང་སྣང་སྟོང་བདེ་སྟོང་དང་། །གྲག་སྟོང་རིག་སྟོང་རྣམ་པ་ལྔ། །དཀར་དམར་སེར་དང་ལྗང་གུ་དང་། །མཐིང་ག་ལྔ་པོ་ཡེ་ཤེས་ལྔ། །འོད་ལྔ་ལ་སོགས་ངོ་བོའི་འཁོར། །ཡེ་ཤེས་གསུམ་ལྡན་ཚུལ་དུ་སྣང་། །ཕྱི་ཡུལ་ཡུལ་སྣང་དག་པའི་འཁོར། །བདེ་གཤེགས་རིགས་དང་རྡོ་རྗེའི་རིགས། །རིན་ཆེན་རིགས་དང་པདྨའི་རིགས། །ལས་ཀྱི་རིགས་དང་རྣམ་པ་ལྔ། །རིགས་གསུམ་མགོན་པོ་ལ་སོགས་པ། །རིག་སྟོང་ཀུན་ཏུ་བཟང་མོ་དང་། །གསལ་སྟོང་ཀུན་ཏུ་བཟང་མོ་དང་། །སྣང་སྟོང་ཀུན་ཏུ་བཟང་མོ་དང་། །བདེ་སྟོང་ཀུན་ཏུ་བཟང་མོ་དང་། །གྲག་སྟོང་ཀུན་ཏུ་བཟང་མོ་དང་། །མཁའ་འགྲོ་སྡེ་ལྔ་ལ་སོགས་དང་། །ཡུལ་སྣང་འདུས་པའི་ཐུབ་དྲུག་དང་། །འགྲོ་འདུལ་ཐུགས་རྗེ་སྤྲུལ་པའི་སྐུ། །མང་ཞིང་དཔག་ཏུ་མེད་པ་དང་། །གཟུང་འཛིན་འཁོར་ནི་འདི་ལྟ་སྟེ། །མ་རིག་པ་དང་སེམས་དང་ནི། །ཡིད་དང་ཉོན་མོངས་འཛིན་པ་དང་། །རྣམ་རྟོག་མི་དགེ་བཅུ་ལ་སོགས། །དེ་དག་སྣང་བའི་འཁོར་རྣམས་ནི། །ཡུལ་ དང་ཤེས་པ་དྲན་པ་དང་། །མཐོང་བྱེད་ཉན་བྱེད་སྣོམ་བྱེད་དང་། །མྱོང་བྱེད་འདུ་བྱེད་ལ་སོགས་དང་། །གཟུགས་སྒྲ་དྲི་རོ་རེག་བྱ་ཆོས། །ལྷ་དང་ལྷ་མིན་དྲི་ཟར་བཅས། །འདུལ་བ་མདོ་སྡེ་མངོན་པ་དང་། །འཇིག་ཚོགས་སུམ་བརྒྱ་དྲུག་ཅུ་དང་། །ཉན་རང་བྱམས་སེམས་ཀྲྀ་ཨུ་ཡོག །མ་ཧཱ་ཨ་ནུ་ཨ་ཏི་དང་། །སྣང་བ་མ་འགགས་པ་ཡི་འཁོར། །རྣམ་པ་སྣ་ཚོགས་ཉིད་དུ་སྣང་། །ཡུལ་དང་ཡུལ་ཅན་ཐམས་ཅད་དང་། །ཐབས་ཅིག་ཏུ་ནི་བཞུགས་པའོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། གླེང་གཞིའི་ལེའུ་སྟེ་དང་པོའོ།། །།དེ་ནས་རིག་སྟོང་ཉག་གཅིག་སྐུ། །ཀུན་བཟང་ཡུམ་ལྔ་འདུས་པ་ལས། །འཁོར་རྣམས་ཀུན་ལས་ལྷག་པ་ཡི། །འོད་ཟེར་གཞོན་ནུ་ཁྲོ་གཉེར་མས། །སྒྲ་བཞི་འདུས་པའི་རང་
སྐད་ཀྱིས། །ཚིག་བརྗོད་རིམ་པ་འདི་གསོལ་ཏོ། །ཀྱེ་ཀྱེ་རིག་སྟོང་ཀུན་བཟང་མོ། །ཆོས་སྐུའི་གནས་ལུགས་གསུང་དུ་གསོལ། །ཞུས་པའི་ལན་དུ་བཀའ་སྩལ་པ། །ཀྱེ་ཧོ་ཡེ་ཤེས་མཁའ་འགྲོ་མ། །ཉི་མའི་སྙིང་པོ་ཁྲོ་གཉེར་མ། །ཆོས་སྐུའི་གནས་ལུགས་ངས་བསྟན་གྱི། །ལེགས་པར་ཡང་དག་ཉིད་དུ་ཟུང་། །ཆོས་སྐུའི་མཚན་ཉིད་འདི་ལྟར་རོ། །ངོ་བོ་རང་བཞིན་ཐུགས་རྗེ་གསུམ། །ཡེ་ཤེས་གསུམ་ལྡན་ཚུལ་དུ་བཞུགས། །ངོ་བོ་ཀ་དག་ཡེ་ཤེས་ནི། །མ་རིག་རྟོག་པ་ཀུན་དང་བྲལ། །ངོ་བོ་མི་འགྱུར་ལྷང་ངེ་བ། །ཁ་དོག་མཚན་མའི་ཡུལ་དང་བྲལ། །རྒྱ་ཆད་ཕྱོགས་ལྷུང་བྲལ་བ་སྟེ། །མཐའ་དབུས་རྒྱ་ཁྱོན་ཀུན་ལས་འདས། །སྐྱེ་མེད་ཡངས་པ་ཆེན་པོའི་ཀློང་། །ནམ་མཁའ་ལྟ་བུར་ཤེས་པར་གྱིས། །རང་བཞིན་ལྷུན་གྲུབ་ཡེ་ཤེས་ནི། །སྟོང་གདངས་རང་གསལ་རྗེན་པར་གནས། །རང་བཞིན་སྙིང་པོ་སང་ངེ་བ། །ཟང་ཐལ་དབྱེར་མེད་ཚུལ་དུ་བཞུགས། །སྟོང་པ་ངོས་བཟུང་བྲལ་བ་ལ། །གསལ་བ་བདག་འཛིན་མེད་པ་རུ། །ཡེ་ཤེས་ལྔ་ཡི་རང་མལ་བཞུགས། །སྟོང་པའི་ཡེ་ཤེས་མཚོན་དུ་མེད། །གསལ་བའི་ཡེ་ཤེས་དགག་སྒྲུབ་བྲལ། །གཉིས་མེད་ཡེ་ཤེས་དབྱེ་བསལ་བྲལ། །སོར་རྟོགས་ཡེ་ཤེས་འོད་ཀྱི་ཁྱིམ། །ཀུན་གྲུབ་ཡེ་ཤེས་གཞི་ལ་རྫོགས། །ཕྱི་རྒྱ་མ་རལ་འོད་ཀྱི་ཁྱིམ། །ནང་དུ་འོད་ལྔ་མ་འགགས་གསལ། །སྟོང་གསལ་ཆོས་སྐུའི་ངང་དུ་གསལ། །ཐུགས་རྗེ་ཀུན་ཁྱབ་ཡེ་ཤེས་ནི། །རིག་རྩལ་ཡེ་ཤེས་འོད་ལྔ་ཤར། །མེ་ལོང་སོར་རྟོགས་མཉམ་པ་ཉིད། །བྱ་གྲུབ་ཆོས་དབྱིངས་ངང་དུ་ཁྱབ། །ཐུགས་རྗེ་ཀུན་ཁྱབ་ལམ་མེ་བ། །སྟོང་དང་གསལ་དང་མ་འགགས་པ། །ཀུན་བཟང་ཡུམ་གྱི་ཀློང་དུ་ཤར། །ཤར་བ་མེད་པའི་ཡེ་ཤེས་ལྔ། །ནུབ་པ་མེད་པའི་དབྱིངས་སུ་གསལ། །གསལ་བ་མེད་པའི་རིག་པ་ནི། །སྒྲིབ་གཡོགས་མེད་པའི་ཀློང་དུ་གསལ། །རྟག་པ་མ་ཡིན་ངོ་བོ་རང་
སར་སྟོང་། །ཆད་པ་མ་ཡིན་ཡེ་ཤེས་ནང་དུ་གསལ། །གཉིས་ཀ་མ་ཡིན་གཉིས་མཐའ་ཟད། །དེས་ནི་ཆོས་སྐུའི་གནས་ལུགས་བཞུགས་ཚུལ་གཏན་ལ་ཕབ་པའི་ལེའུ་སྟེ་གཉིས་པའོ།། །།ཡང་གཅིག་ཀུན་ཏུ་བཟང་མོ་ལ། །ཁྲོ་གཉེར་མ་ཡིས་ཡང་གསོལ་པ། །ཆོས་སྐུའི་གནས་ལུགས་དེ་ལྟར་ན། །ཀུན་གཞི་གཏན་ལ་ཕབ་པ་ལོངས་སྐུའི་གནས་ལུགས་གསུང་དུ་གསོལ། །ཞུས་པའི་ལན་དུ་བཀའ་སྩལ་པ། །ཉོན་ཅིག་སྣང་བ་ཁྲོ་གཉེར་མ། །ཐུགས་རྗེ་ཞི་བའི་ངང་ལས་མ་གཡོས་ཀྱང་། །སྣང་བ་འདུལ་ཕྱིར་ཁྲོ་མོར་ཤར། །ཡེ་ཤེས་ལྔ་ཡི་གཉེར་མས་བརྒྱན། །ཁྱོད་ནི་ང་ཡི་གསལ་སྣང་སྐུ། །ལེགས་པར་ཡང་དག་ཡིད་ལ་ཟུང་། །སྟོང་པའི་ཡུལ་ལ་གསལ་བའི་མདངས། །ཡེ་ཤེས་ལྔ་ཡི་མུ་ཁྱུད་ལྡན། །རང་བཞིན་བབས་ཀྱིས་སྣང་བའི་ཞིང་། །ལྷུན་གྲུབ་གདལ་བ་ཆེན་པོའི་དབྱིངས། །སྣ་ཚོགས་མ་འདྲེས་ཡོངས་རྫོགས་ཤིང་། །འཐུག་པོ་བཀོད་པའི་གནས་ཉིད་དུ། །ཤར་མཐོ་ལྷོ་གཞོལ་ནུབ་འབུར་བ། །བྱང་དམའ་དབུས་སྤུངས་ལྷུན་འཐུག་པ། །དབུས་སུ་བསྡུས་ནས་མཐའ་རུ་ཡལ་བ་ལྟར། །མཐའ་རུ་བསྡུས་ནས་དབུས་སུ་ཡལ། །གདོས་བཅས་མེད་པར་སྤྲིན་འཁྲིགས་ལྟར། །རྒྱ་ཞོ་མནན་ལྟར་རྒྱ་མཚོ་ལྟར། །མེར་མེར་ཁྱོམ་ཁྱོམ་འགུལ་འགུལ་འཕྲིག །ཡོམ་ཡོམ་ལྡེག་ལྡེག་སྤར་སྤར་འཕར། །འཇའ་འོད་སྨིག་རྒྱུ་ཟ་འོག་གུར། །གཉིས་ཀ་མ་ཡིན་གཉིས་འཛིན་བྲལ། །དེ་ནི་ལོངས་སྐུའི་གནས་ ལུགས་སོ། །རྒྱུད་ཆེན་ཀློང་གསལ་འབར་མ་ལས། ལོངས་སྐུ་ལྷུན་གྲུབ་ཆེན་པོའི་གནས་ལུགས་བསྟན་པའི་ལེའུ་སྟེ་གསུམ་པའོ།། །།ཡང་གཅིག་ཀུན་ཏུ་བཟང་མོ་ལ། །ཁྲོ་གཉེར་མ་ཡིས་ཡང་གསོལ་པ། །ལོངས་སྐུའི་གནས་ལུགས་དེ་ལྟར་ན། །སྤྲུལ་སྐུའི་གནས་ལུགས་གསུང་དུ་གསོལ། །ཞུས་
པའི་ལན་དུ་བཀའ་སྩལ་པ། །ཀྱེ་ཧོ་ཁྲོ་གཉེར་མ་ཁྱོད་ཉོན། །ངས་བསྟན་ཡིད་ལ་ལེགས་པར་ཟུང་། །སྤྲུལ་སྐུའི་གནས་ལུགས་འདི་ལྟར་རོ། །སྤྱིར་ན་ཆོས་སྐུའི་སྤྲུལ་པ་ནི། །འགག་མེད་ཡེ་ཤེས་ལོངས་སྐུར་ཤར། །ལོངས་སྐུའི་རིག་རྩལ་མ་འགགས་པས། །སྤྲུལ་པ་གང་ལ་གང་འདུལ་དུ། །ཞི་དང་ཁྲོ་དང་རབ་ཏུ་ཁྲོ། །འོད་ཟེར་སྤྲུལ་པ་བསམ་ལས་འདས། །བྱ་བ་བྱེད་དང་བྱ་བ་རྫོགས། །ཉོན་མོངས་འདུལ་བའི་གཉེན་པོར་ཤར། །ཚད་མེད་བཞི་དང་ཕར་ཕྱིན་དྲུག །དབང་པོ་རབ་འབྲིང་ཐ་མ་གསུམ། །དོན་སྦྱོར་སྐུ་གསུམ་རང་ངོ་སྤྲད། །སྡེ་གསུམ་རིམ་དགུའི་ཆོས་རྣམས་ཀུན། །ཉོན་མོངས་ཟད་པར་བྱ་ཕྱིར་བཤད། །ཀློང་གསལ་འབར་མ་ཉི་མའི་གསང་རྒྱུད་ལས། སྤྲུལ་སྐུ་སྣ་ཚོགས་ཀུན་ཁྱབ་ཀྱི་ལེའུ་སྟེ་བཞི་པའོ།། །།དེ་ནས་ཀུན་ཏུ་བཟང་མོ་ལ། །འོད་ཀྱི་སྙིང་པོ་ཐབས་ཀྱི་ཆ། །སྣང་བའི་ཆོ་འཕྲུལ་རིག་པའི་སྐུ། །མཁའ་འགྲོ་ལྔ་ཡིས་ཡང་ཞུས་པ། །ཀྱེ་ཀྱེ་རིག་སྟོང་ཀུན་བཟང་མོ། །སྐུ་གསུམ་བཞུགས་ཚུལ་དེ་ལྟར་ན། །སྐུ་གསུམ་གཅིག་རྫོགས་གསུང་དུ་གསོལ། །ཞུས་པའི་ལན་དུ་བཀའ་སྩལ་པ། །ཀྱེ་ཧོ་ཡེ་ཤེས་མཁའ་འགྲོ་མ། །མ་ཡེངས་བརྟན་པོར་ཡིད་ལ་ཟུང་། །ཆོས་སྐུའི་ངོ་བོ་སྟོང་པ་ཡིན། །དཔེར་ན་ནམ་མཁའི་དཀྱིལ་དང་འདྲ། །ལོངས་སྐུའི་ངོ་བོ་གསལ་བ་ཡིན། །དཔེར་ན་བར་སྣང་ཁམས་དང་འདྲ། །སྤྲུལ་སྐུའི་ངོ་བོ་ཐུགས་རྗེ་ཡིན། །དཔེར་ན་ཉི་ཟླ་གཟའ་སྐར་འདྲ། །དེ་ལྟར་སྐུ་གསུམ་འདུ་འབྲལ་མེད། །སྙིང་པོ་ཡེ་ཤེས་གསུམ་དང་ལྡན། །ཆོས་སྐུ་ཡེ་ཤེས་བསམ་འདས་བརྗོད་མེད་དང་། །ལོངས་སྐུ་ཡེ་ཤེས་མ་འདྲེས་སོ་སོར་གསལ། །སྤྲུལ་སྐུའི་ཡེ་ཤེས་གང་ཡང་སྒྱུར་དུ་བཏུབ། །དེ་ལྟར་ཡེ་ཤེས་ལྔ་དང་ལྡན། །སྟོང་དང་གསལ་དང་ཁྱབ་པ་གསུམ། །དབྱེར་མེད་ཉག་གཅིག་ངང་དུ་རྫོགས། །དེ་ལྟར་སྐུ་གསུམ་དེ་དག་ལ། །འདས་པའི་སྐུ་གསུམ་ལ་སྣ་གཏད། །མ་འོངས་
སྐུ་གསུམ་ལ་རྒྱབ་བསྟན། །ད་ལྟར་གྱི་སྐུ་གསུམ་ལ་ལོངས་སྤྱོད། །དེ་ལྟར་དུས་གསུམ་སྐུ་གསུམ་ཉིད། །མཉམ་པ་ཉིད་ཀྱི་ཡེ་ཤེས་ཡིན། །ཐོག་མའི་ཀ་དག་གསལ་སྟོང་ཁྱབ། །དེ་ཡི་དོན་ཀྱང་སྐུ་གསུམ་སྟེ། །ཐོག་མ་ཞེས་པ་འཁོར་འདས་མེད། །ཀ་དག་ཅེས་པས་ཆོས་ཀྱི་སྐུ། །གསལ་སྟོང་ཞེས་པས་ལོངས་སྤྱོད་རྫོགས། །ཁྱབ་ཅེས་པ་ནི་སྤྲུལ་པའི་སྐུ། །དབྱེར་མེད་གཅིག་གི་ཚུལ་དུ་གནས། །རྐྱེན་མེད་པ་ཡི་སྣང་བ་གསུམ། །དུ་མ་རོ་གཅིག་ཚུལ་དུ་བཞུགས། །དེ་ལྟར་སྐུ་གསུམ་གཅིག་ཏུ་དྲིལ། །མ་གཡོས་པ་ཡི་ཆོས་སུ་དང་། །མ་འཁྲུལ་པ་ཡི་སངས་རྒྱས་དང་། །མ་འགགས་པ་ཡི་སྤྲུལ་སྐུ་དང་། །རྣམ་པ་གསུམ་གྱི་ངོ་བོ་ནི། །ངོ་བོ་ཉིད་འགྱུར་ལྷང་ངེ་བ། །དང་པོ་རང་ནས་མ་གཡོས་པ། །རིག་པ་ཉིད་ཀྱང་མ་གཡོས་པ། །སྣང་བ་ཐམས་ཅད་དུས་གཅིག་རྫོགས། །སྣང་བའི་ཡུལ་རྣམས་ཁྱབ་པར་གསལ། །རང་བཞིན་ལྷུན་གྲུབ་ཆེན་པོ་ཡིན། །དེ་ཡི་ཀློང་ནས་བཀྲག་ཤར་བ། །ལྔ་ལྡན་ཚོམ་བུའི་དཀྱིལ་འཁོར་རྒྱས། །ཐིག་ལེ་རྣམ་དག་དམིགས་སུ་མེད། །དཔག་མེད་དམིགས་མེད་གྲངས་ལས་འདས། །དེ་ཡི་དཀྱིལ་དུ་རིག་པའི་སྐུ། །ལྔ་ལྔ་ཡབ་དང་ཡུམ་སྦྱོར་དང་། །སྐུ་རྐྱང་ཕྱེད་སྐུ་དབུ་རྒྱན་དང་། །སྨིན་དང་མ་སྨིན་སྨིན་པའི་རྒྱུ། །ཐིག་ལེ་ཐིག་ཕྲན་ལུ་གུ་རྒྱུད། །ལྕགས་ཚགས་འབར་བ་ཉ་མིག་རིས། །རྒྱ་མཚོ་གཟའ་སྐར་ཟ་འོག་གུར། །མཛེས་པའི་རི་མོ་སྣ་ཚོགས་བརྒྱན། །སྤྱིར་ཡང་ལོངས་སྐུའི་ཆ་ལུགས་ནི། །ཡེ་ཤེས་རྣམ་པ་ལྔ་དང་ལྡན། །ཡེ་ཤེས་ལྔ་རྫོགས་གྲུབ་པའི་ལྷ། །གསལ་སྟོང་དག་པ་འཇའ་འོད་སྐུ། །སྣང་ལ་རང་བཞིན་མེད་པས་རྡོས་བཅས་དག །ཡེ་ཤེས་ཞལ་ཕྱག་རྫོགས་པའི་ཞི་ཁྲོར་གསལ། །ཞལ་ནི་ཀུན་ཏུ་ཞལ་ལ་མདུན་རྒྱབ་མེད། །ཡེ་ཤེས་རང་གསལ་མཁྱེན་པའི་མཛད་པ་མཛད། །ལར་ཡང་ལོངས་སྐུའི་
མཚན་ཉིད་ནི། །ཡབ་ལྔ་ཡུམ་ལྔ་ཚོམ་བུ་ལྔ། །ཡི་གེ་ཤེས་རབ་རྟོག་པ་ལྔ། །གཞི་ལྔ་ལམ་ལྔ་འབྲས་བུ་ལྔ། །གནས་ལྔ་ཡུལ་ལྔ་ངོ་བོ་ལྔ། །སྟོང་གསལ་འགག་པ་མེད་པས་ལོངས། །ཡེ་ཤེས་ལྔ་ལ་སྤྱོད་པས་སྤྱོད། །བྱ་རྩལ་ཀུན་ལས་འདས་པས་རྫོགས། །རྟག་པ་མ་ཡིན་རྡོས་བཅོས་བྲལ། །གཟུང་དུ་མེད་ཅིང་བཅང་དུ་མེད། །གཅད་དུ་མེད་ཅིང་གཅད་དུ་མེད། །ཆད་པ་མ་ཡིན་དངོས་སུ་གསལ། །སྐྱེ་བ་མེད་ལས་ཐམས་ཅད་སྐྱེས། །ཡེ་ཤེས་ཐམས་ཅད་སྐད་ཅིག་རྫོགས། །རང་བཞིན་བབ་ཀྱི་སྣང་བ་འདི། །ཡངས་པར་ལྷུང་ལ་ཕྱོགས་ལྷུང་མེད། །དཀར་བར་སྣང་ལ་རིགས་མི་འཛིན། །སེར་བར་སྣང་ལ་ཡོན་ཏན་རྫོགས། །དམར་བར་སྣང་ལ་སྒོ་མ་འགགས། །ལྗང་གུར་སྣང་ལ་མ་བཙལ་གྲུབ། །མཐིང་གར་སྣང་ལ་ཆ་ཆེ་བ། །སྟོང་པར་སྣང་ལ་ཕྱོགས་རིས་མེད། །གསལ་བར་སྣང་ལ་དངོས་པོ་མེད། །ལྔ་རུ་ཡེ་ཤེས་སྣང་ལ་ཁ་དོག་མེད། །ཟླུམ་པོར་སྣང་ལ་གཟུགས་སུ་མེད། །མ་འགགས་པ་ལ་སྐྱོན་མཚང་མེད། །སྐུ་ལྔར་སྣང་ལ་གཟུགས་མེད་པ། །སྟོང་པར་སྣང་ལ་བེམ་པོ་མེད། །འོད་ལྔར་གསལ་ལ་ཁ་དོག་མེད། །སྟོང་པའི་ངང་ལ་བེམ་མ་འགགས། །བེམ་པོའི་ངང་ལ་སྟོང་མ་འགགས། །གསལ་བའི་ངང་ལ་མུན་མ་འགགས། །མུན་པའི་ངང་ལ་གསལ་མ་འགགས། །བག་གི་སྟོང་ལ་ཀུན་ཏུ་འཆར། །མ་འདྲེས་པ་ལ་འདྲེས་སུ་སྣང་། །ཀུན་ལ་ཁྱབ་ཅིང་གཅིག་ཏུ་འདུས། །དག་གསལ་འཁྲུལ་པ་མ་འགགས་པ། །འཁྲུལ་ལ་དག་པ་མ་འགགས་པ། །སྟོང་ལ་སྣང་བ་མ་འགགས་པ། །སྣང་ལ་སྟོང་པ་མ་འགགས་པ། །སྣང་སྟོང་གཉིས་སུ་མེད་ལ་གཅིག་མ་ཡིན། །གཅིག་ཏུ་བསྡུས་ཤིང་གཉིས་སུ་ཤར། །གནས་འགྱུ་ལ་སོགས་དེ་དང་འདྲ། །དེ་ལྟར་སངས་རྒྱས་སེམས་ཅན་གཉིས། །གཅིག་གི་ངོ་ལ་གཅིག་མ་འགགས། །ཐབས་ཤེས་ཐུགས་རྗེ་གོ་མ་འགགས། །གཞི་སྣང་ཆེན་པོའི་གནས་ལུགས་སོ། །ཀུན་
ཏུ་བཟང་པོ་ཀློང་གསལ་འབར་མ་ཉི་མའི་གསང་རྒྱུད་ལས། )གཞི་སྐུ་གསུམ་གཅིག་དྲིལ་གྱི་བཞུགས་ཚུལ་གྱི་ལེའུ་སྟེ་ལྔ་པའོ།། །།ཡང་གཅིག་ཀུན་ཏུ་བཟང་མོ་ལ། །ཡེ་ཤེས་མཁའ་འགྲོས་ཡང་གསོལ་པ། །ཀྱེ་ཀྱེ་རིག་སྟོང་ཀུན་བཟང་མོ། །འཁོར་འདས་གཉིས་སུ་མེད་གང་དུ། །སྐུ་གསུམ་ཡེ་ཤེས་གསུམ་ལྡན་ལ། །ཀ་དག་སྒྲིབ་མེད་ཟང་ཐལ་བཞུགས། །དེ་ལྟར་གསུངས་པ་མ་འཁྲུལ་པ། །སེམས་ཅན་འཁྲུལ་ལུགས་གསུང་དུ་གསོལ། །ཞུས་པའི་ལན་དུ་བཀའ་སྩལ་པ། །ཉོན་ཅིག་ཡེ་ཤེས་མཁའ་འགྲོ་ལྔ། །ཀྱེ་མ་ང་ལ་འཁྲུལ་མེད་ཀྱང་། །ང་ཡི་རྩལ་ལས་འཁྲུལ་པ་ལྟར་དུ་བྱུང་། །དཔེར་ན་ནམ་མཁའ་དྭངས་པ་ལ། །སྤྲིན་དང་ཁུ་རླངས་མེད་མོད་ཀྱང་། །གློ་བུར་སྤྲིན་དང་ཁུ་རླངས་བྱུང་། །གཞི་ལ་མ་རིག་མེད་མོད་ཀྱང་། །ཐུགས་རྗེ་རྩལ་དུ་ཤར་བ་ལས། །མ་རིག་པ་ཞེས་གློ་བུར་བྱུང་། །གཞི་ཡི་ངོ་བོ་རང་རྩལ་ཤར། །ཕྱི་རྒྱ་དུམ་གཅིག་རལ་པ་ལ། །ལྷུན་གྲུབ་ཅེས་བྱའི་གཞི་མ་ཤར། །ཐུགས་རྗེའི་རང་རྩལ་རྫོགས་པ་ལ། །སྣང་བ་ཆེན་པོ་ཞིག་ཏུ་གནས། །དེ་ལྟར་ཤར་ལུགས་ཆེན་པོ་བརྒྱད། །ཐུགས་རྗེ་ལྟར་ཤར་གོ་མ་འགགས། །འོད་ལྟར་ཤར་བས་སྣང་མ་འགགས། །ཡེ་ཤེས་ལྟར་དུ་ཤར་བས་ན། །ལོངས་སྤྱོད་རྫོགས་པའི་ཡུལ་མ་འགགས། །སྐུ་ལྟར་ཤར་བས་དངོས་མ་འགགས། །གཅིག་ཏུ་མ་ཡིན་གཉིས་མཐའ་ཟད། །གཉིས་སུ་མ་ཡིན་གཅིག་མཐའ་ཟད། །གཉིས་མེད་ལྟར་ཤར་ངེས་པ་མེད། །མཐའ་གྲོལ་ལྟར་ཤར་ཐབས་མ་འགགས། །དག་པ་ལྟར་དུ་ཤར་བས་ན། །ཡེ་ཤེས་འཇུག་པའི་སྒོ་མ་འགགས། །མ་དག་པ་ལྟར་ཤར་བ་ཡིན། །ཐུགས་རྗེ་འདོད་ཡོན་སྒོ་མ་འགགས། །དེ་ལྟ་བུ་ཡི་སྣང་བ་སྣ་ཚོགས་པ། །སྐུ་ཡི་འོད་ཟེར་ལ་ཆགས་ཏེ། །ནང་གི་གཞོན་ནུ་བུམ་པའི་སྐུ། །ཤེས་བྱ་རྒྱ་ནི་རལ་པ་སྟེ། །ཕྱི་ལྷུན་
གྲུབ་ཆེན་པོར་གནས་པའོ། །དེ་རྩལ་ལོངས་སྤྱོད་རྫོགས་སྣང་འཆར། །དེ་རྩལ་ཡོན་ཏན་མ་འགགས་པས། །རང་བཞིན་སྤྲུལ་པའི་སྐུ་རྣམས་སྲིད། །དེ་ཡི་ཐུགས་ལ་མ་འགགས་པས། །མ་དག་པ་ཡི་སྣང་ལུགས་བྱུང་། །དེ་ལས་སྣང་བའི་འཁྲུལ་ཚུལ་མང་། །དག་པ་རྣམས་ལ་ལྷུན་གྲུབ་སྟེ། །མ་དག་རྣམས་ལྔ་རིགས་དྲུག་ཤར། །དེ་ལྟར་ལྷུན་གྲུབ་གཅིག་པོ་ལ། །སྣང་ལུགས་རྣམ་པ་བཞི་རུ་སྣང་། །ཡེ་ཤེས་གསལ་བའི་ཡུལ་ལྔ་ལས། །གཉིས་འཛིན་སེམས་ཅན་བྱུང་བའོ། །དེ་ཚེ་རྐྱེན་བཞི་འདུས་པ་ལས། །འཁྲུལ་པའི་གཞི་མ་བཞི་རུ་འབྱུང་། །རྒྱུ་ཡི་རྐྱེན་ནི་ལྷུན་གྲུབ་དང་། །དམིགས་པའི་རྐྱེན་ནི་འོད་སྣང་ཉིད། །བདག་པོའི་རྐྱེན་ནི་ཐུགས་རྗེ་རང་། །དེ་གསུམ་དུས་གཅིག་མཚུངས་པས་ན། །མཚུངས་པ་དེ་མ་ཐག་གི་རྐྱེན། །རྐྱེན་བཞིས་འཁྲུལ་པའི་དུས་ཚོད་ནི། །རིག་དང་མ་རིག་གཉིས་འཛིན་གཉིས། །ལྷུན་གྲུབ་ཡུལ་ལ་ཤར་དུས་འཁྲུལ། །འཁྲུལ་གཞི་རྣམ་པ་མང་བཤད་ཀྱང་། །ལྷུན་གྲུབ་དང་ནི་ཐུགས་རྗེའོ། །དེ་ཡང་འདི་ལྟར་འཁྲུལ་ལུགས་བཤད། །ལྷུན་གྲུབ་ཆེན་པོའི་ནང་དབྱིངས་སུ། །མ་རིག་འགྱུ་བ་རིག་རིག་པོ། །ཐུགས་རྗེ་སྤྲུལ་པའི་རྩལ་དུ་ཤར། །ནང་དུ་འགྱུ་བྱེད་དེ་ཤེས་ནི། །ཕྱི་ཡི་ཡུལ་སྣང་རྣམས་ལ་བརྟགས། །འོད་ཁྱིམ་ཡེ་ཤེས་ལྔ་པོ་ལ། །རེ་རེ་བཞིན་དུ་རྟོག་དཔྱོད་བཏང་། །འོད་ཁྱིམ་ཕ་གི་ང་ཡིན་ནམ། །ཡང་ན་གཞན་མ་ཞིག་ཡིན་ནམ། །ང་ནི་འོད་ལས་བྱུང་བའམ། །ཡང་ན་རང་ལ་འོད་བྱུང་ངམ། །སྣང་བ་ཐམས་ཅད་རང་ཡིན་ནམ། །ཡང་ན་བཞིན་སྣང་ཡིན་ནམ་བསམ། །དེ་ལ་ཡིད་དུ་འགྱུས་པ་ལས། །རྣམ་རྟོག་གཅིག་ལ་གཅིག་མཐུད་ནས། །རྣམ་རྟོག་ལུ་གུ་རྒྱུད་དུ་འདྲེལ། །ལྷུན་གྲུབ་དག་ཀྱང་རྟོག་པས་བསྐུམས། །འབྱུང་བཞིའི་ས་བོན་རྣམ་བཞི་ཆགས། །འབྱུང་བཞི་རེས་འདུས་རེས་བྱེར་པས། །འབྱུང་བ་དེ་རྣམས་ནགས་སུ་སོང་། །ལྷུན་གྲུབ་
ཉིད་ཀྱང་བེམ་པོའི་ནང་དུ་འཐུམས། །བེམ་པོ་དག་ཀྱང་རིགས་དྲུག་རྒྱ་ཡི་འཐུམས། །སྡུག་བསྔལ་རེས་མོས་འཁོར་བའོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། གཞི་ལས་འཁྲུལ་པ་བྱུང་ཚུལ་གྱི་ལེའུ་སྟེ་དྲུག་པའོ།། །།དེ་ནས་ཡང་འབྱུང་ལྔའི་བདག་མོ་རིགས་བཞིའི་མཁའ་འགྲོ་མས་ཞུས་པ། ཀྱེ་ཀྱེ་ཀུན་བཟང་ཉི་མའི་ཀློང་། །གཞི་ལ་འཁྲུལ་ཚུལ་བཤད་ན་ཡང་། །ཕྱི་སྣོད་འཇིག་རྟེན་འཁྲུལ་ཚུལ་དུ། །ཞུས་པའི་ལན་དུ་བཀའ་སྩལ་པ། །ཀྱེ་ཧོ་འབྱུང་བཞིའི་བདག་མོ་ཉོན། །གཞི་ཡི་རླུང་དང་རིག་པའི་རྩལ། །ཤེས་པ་བདག་ཏུ་བཟུང་བའི་སེམས། །ནང་ནས་ཡེ་ཤེས་ལྔ་ལ་བཟུང་། །མེ་ལོང་ཡེ་ཤེས་ཆུ་ཡི་གཞི། །མཉམ་ཉིད་ཡེ་ཤེས་ས་ཡི་གཞི། །སོར་རྟོགས་ཡེ་ཤེས་མེ་ཡི་གཞི། །བྱ་གྲུབ་ཡེ་ཤེས་རླུང་གི་གཞི། །ཆོས་དབྱིངས་ཡེ་ཤེས་ནམ་མཁའ་གཞི། །ཡེ་ཤེས་ལྔ་ལ་བདག་བཟུང་དང་། །ང་མིན་ང་འདྲ་གཉིས་འཛིན་བྱུང་། །གཉིས་འཛིན་རྟོག་པའི་ཆ་ལ་ནི། །ཨེ་རཾ་ཡཾ་ཁཾ་སུ་རུ་གསལ། །འབྱུང་བཞི་གཞི་མ་རྣམ་ལྔ་ནི། །དེར་འཛིན་བདག་ཏུ་སོང་བ་ལས། །འབྱུང་ལྔ་བེམ་པོ་ཅན་དུ་གྲུབ། །ཡེ་ཤེས་ལྔ་པོ་གསལ་མ་ནུས། །འབྱུང་ལྔས་ཧྲིལ་གྱིས་འཐུམས་པའོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། ཕྱི་སྣོད་དུ་འཁྲུལ་པའི་ལེའུ་སྟེ་བདུན་པའོ།། །།ཡང་གཅིག་ཀུན་ཏུ་བཟང་མོ་ལ། །རྟོག་ཚོགས་མཁའ་འགྲོ་ལྔས་གསོལ་པ། །ཡེ་ཤེས་ལྔ་པོ་འབྱུང་ལྔར་འཁྲུལ། །དེ་ཡི་འཁྲུལ་ལུགས་བཤད་ན་ཡང་། །ནང་བཅུད་འཁྲུལ་ལུགས་གསུང་དུ་གསོལ། །ཞུས་པའི་ལན་དུ་བཀའ་སྩལ་པ། །ཀྱེ་ཀྱེ་འབྱུང་ལྔའི་བདག་མོ་ནི། །རྟོག་ཚོགས་གཉིས་འཛིན་མཁའ་འགྲོ་ཉོན། །ཡེ་ཤེས་རྩལ་
གྱི་ཐུགས་རྗེ་ལས། །རླུང་སེམས་ཡིད་དུ་འགྱུས་པ་ལས། །བེམ་སྟོང་ནམ་མཁའ་ཆོས་འབྱུང་བཤད། །ནམ་མཁའི་རྩལ་ཤུགས་རྫོགས་པ་ལས། །ཤུགས་ལྡན་བརྒྱད་ཁྲི་འབྱུང་བཞི་བཟུང་། །དེ་ནི་ལྟེ་བར་དྲོད་རླན་བྱུང་། །རླན་ལ་དྲོད་ཀྱི་ངར་ཡང་བཏགས། །དྲོད་ལ་རླན་གྱི་རྩལ་རྒྱས་པས། །ཟིལ་པ་ཕྲོམ་ཕྲོམ་ལ་སོགས་ཀྱང་། །རེས་བསྡུས་རེས་བཤིགས་བྱས་པ་ལས། །རྒྱ་མཚོ་ཆེན་པོ་ཆགས་པའོ། །རྒྱ་མཚོ་རླུང་གིས་བསྐྱོད་པ་ལས། །བསྲུབས་ཤིང་རླངས་པའི་ལྦུ་བ་ལ། །དབང་ཆེན་གསེར་གྱི་ས་གཞི་བརྡལ། །དྭངས་མ་རྣམས་ལ་རིན་ཆེན་ལྔ། །སྙིགས་མ་རྣམས་ལ་ས་དང་རྡོ། །རིམ་པ་བཞིན་དུ་ཆགས་པའོ། །འབྱུང་བ་ལྔ་ཡི་ནང་ཤེད་ནས། །དྭངས་མ་དུད་རླངས་ལག་ངར་ཙམ། །ཡར་ལ་ཆད་ཅིང་འདྲིལ་བ་ལས། །འོད་སྐོར་རྦ་ཕུབ་ཙམ་པ་གཉིས། །གཅིག་ནི་སྣང་ལ་རང་བཞིན་མེད། །དེ་ལ་སྐྱེ་མཆེད་མུ་བཞི་ཆགས། །འོད་གཉིས་པ་ལ་མཐོ་རིས་གནས་བཅུ་ཆགས། །དེ་ནས་འོད་གསུམ་གྱི་རྩལ། །འགྱུ་བ་སེམས་ཡིད་སྣ་ཚོགས་འགྱུ། །ཡིད་ཀྱི་སྤྱན་གྱིས་ཀུན་ལ་གཟིགས། །གཟིགས་པས་སྲིད་པ་འོད་ཀྱི་གཟུགས། །སྒོ་ང་ཁ་དོག་ལྔ་ལྡན་མཐོང་། །དེ་ཉིད་མཛེས་པར་མཐོང་ནས་སུ། །ཡིད་ཀྱིས་སྦྱོར་བ་བྱས་པ་ལ། །མཛེས་པའི་ཆགས་སེམས་སྒོ་ངར་འཐུམས། །ཉི་མ་རབ་སྣང་མ་ཡི་ཚུལ། །ཟླ་བ་དྲི་མེད་ཕ་ཡི་ཚུལ། །ཕྱི་ལྟར་ཤེད་བུ་ཤེད་ལ་སོགས། །ནང་ལྟར་འདོད་ཆགས་བྱ་སྒོང་དང་། །ཞེ་སྡང་སྦྲུལ་གྱི་སྒོ་ང་དང་། །གསང་བ་ལྟར་ན་ཐབས་ཤེས་གཉིས། །དེ་དུས་ཟ་བའི་ཟས་མེད་པས། །འདོད་པའི་ཡོན་ཏན་ལྔ་ལ་སྤྱད། །ས་ཆུ་མེ་རླུང་བཞི་པོ་ལ། །གཟུགས་སྒྲ་དྲི་རོ་འདོད་ཡོན་བཞི། །ནམ་མཁའ་དག་ལ་རེག་དང་ལྔ། །འདོད་པའི་ཁ་ལོ་ཕྱིར་མ་ལོག །འདོད་ཡོན་ལྔ་ཡང་ཡུལ་ལྔར་འཁྲུལ། །འདོད་པའི་ཁ་ལོ་ནང་དུ་ལོག །ནང་དུ་འཛིན་པའི་སེམས་
སུ་སོང་། །ཕྱི་རུ་བཟུང་བའི་ཡུལ་ལྔ་དང་། །ནང་དུ་བཟུང་བའི་དུག་ལྔ་གཉིས། །གཟུང་འཛིན་གཉིས་ལ་ཉོན་མོངས་བྱུང་། །ཆུ་ལ་བདག་བཟུང་ཞེ་སྡང་བྱུང་། །ས་ལ་བདག་བཟུང་ང་རྒྱལ་བྱུང་། །མེ་ལ་བདག་བཟུང་འདོད་ཆགས་བྱུང་། །རླུང་ལ་བདག་བཟུང་ཕྲག་དོག་བྱུང་། །ནམ་མཁའ་བདག་བཟུང་གཏི་མུག་བྱུང་། །གཟུང་འཛིན་གཉིས་ལ་ཁོང་ཁྲོ་བྱུང་། །དེ་དྲུག་འབྲས་བུ་རིགས་དྲུག་སྨིན། །ཞེ་སྡང་ཆ་ལ་དམྱལ་བ་རྣམས། །ང་རྒྱལ་ཆ་ལ་ལྟ་རྣམས་དང་། །འདོད་ཆགས་ཆ་ལ་ཡི་དྭགས་རྣམས། །ཕྲག་དོག་ཆ་ལ་ལྷ་མ་ཡིན། །ཁོང་ཁྲོའི་ཆ་ལ་ལྷ་མི་གཉིས། །གཏི་མུག་ཆ་ལ་བྱོལ་སོང་ངོ་། །འགྲོ་བ་རིགས་དྲུག་དཔག་ཏུ་མེད། །དམྱལ་བ་རྣམས་ལ་གཤིན་རྗེ་བྱུང་། །ལྷ་ལ་ཕྱ་དང་དབང་ཕྱུག་བྱུང་། །ཡི་དྭགས་རྣམས་ལ་མོ་འདྲེ་བྱུང་། །ཕོ་འདྲེ་རྣམས་ཀྱང་ཞོར་ལ་བྱུང་། །ལྷ་མ་ཡིན་ལ་གཟའ་སྲིན་བྱུང་། །བྱོལ་སོང་རྣམས་ལ་ཀླུ་གཉན་བྱུང་། །འགྲོ་བ་རིགས་དྲུག་དེ་དག་ལ། །ང་དང་བདག་ཏུ་བཟུང་བ་ལ། །ལྷ་ལ་ཕམ་ལྷུང་སྡུག་བསྔལ་དང་། །ལྷ་མ་ཡིན་ལ་འཁྲུག་རྩོད་དང་། །མི་ལ་དྲེལ་ཕོངས་སྡུག་བསྔལ་དང་། །བྱོལ་སོང་རྣམས་ལ་གླེན་ལྐུགས་དང་། །ཡི་དྭགས་རྣམས་ལ་བཀྲེས་སྐོམ་དང་། །དམྱལ་བ་རྣམས་ལ་བཙོ་བསྲེག་དང་། །འཁོར་བ་ཉིད་དུ་འཁོར་བའོ། །སྲིད་པའི་རྩ་བ་གཟུང་འཛིན་གྱིས། །ནང་བཅུད་སེམས་ཅན་བསྡུས་པའོ། །ཀློང་གསལ་འབར་མ་ཉི་མའི་གསང་རྒྱུད་ལས། སྣང་བ་བཅུད་དུ་འཁྲུལ་པའི་ལེའུ་སྟེ་བརྒྱད་པའོ།། །།ཡང་གཅིག་ཀུན་ཏུ་བཟང་མོ་ལ། །འབྱུང་ལྔའི་བདག་མོས་འདི་སྐད་གསོལ། །སྣོད་བཅུད་དེ་ལྟར་འཁྲུལ་པ་ལས། །མ་འཁྲུལ་ཡེ་ཤེས་གནས་ལུགས་སྟོན། །ཞུས་པའི་ལན་དུ་བཀའ་སྩལ་པ། །ཀྱེ་ཧོ་འབྱུང་ལྔའི་བདག་མོ་ཉོན། །ས་རྡོ་རི་བྲག་སྙིགས་མ་
ཡིན། །དེ་ཡི་དྭངས་མ་རྩི་ཐོག་ཡིན། །འབྱུང་བ་ཆུ་འདི་སྙིགས་མ་ཡིན། །དེ་ཡི་དྭངས་མ་ཟླ་ཆུ་ཡིན། །འབྱུང་བ་མེ་འདི་སྙིགས་མ་ཡིན། །དེ་ཡི་དྭངས་མ་ཉི་མ་ཡིན། །འབྱུང་བ་རླུང་འདི་སྙིགས་མ་ཡིན། །དེ་ཡི་དྭངས་མ་རང་རྩལ་ཡིན། །འབྱུང་བ་ནམ་མཁའི་སྙིགས་མ་ཡིན། །དེ་ཡི་དྭངས་མ་འཇའ་ཚོན་ཡིན། །ཕྱི་ལྟར་འབྱུང་བ་རྣམ་པ་ལྔ། །ནང་ལྟར་ཡེ་ཤེས་རྣམ་པ་ལྔ། །གསང་བ་ལྟར་ན་འཇའ་ཚོན་ལྔ། །ཡང་གསང་ལྟར་ན་མཁའ་འགྲོ་ལྔ། །བླ་མེད་ལྟར་ན་སྲོག་ཡིག་ལྔ། །དེ་ལྟར་འབྱུང་ལྔ་ལ་སོགས་ལྔ། །བྱས་པ་མེད་པའི་ནམ་མཁའ་ལ། །བྱུང་བ་མེད་པའི་ཡེ་ཤེས་ཤར། །དོན་གྱི་སྙིང་པོ་མ་འདྲེས་པ། །ལྔ་ལྡན་ཆུ་ཡི་དཀྱིལ་འཁོར་རྒྱས། །གཟུང་འཛིན་བྲལ་བའི་བར་སྣང་ལ། །མ་འདྲེས་ཡོངས་རྫོགས་སྐུ་གསུམ་ཤར། །འཁྲུལ་སྣང་ཐམས་ཅད་ཞིང་ཁམས་ལྔ། །ཆོས་ཉིད་བརྡལ་བ་ཆེན་པོའི་ཞིང་། །དག་དང་མ་དག་གཉིས་འཛིན་བྲལ། །སྟོང་གསལ་མདངས་ལྔ་རྫོགས་པ་རུ། །ལྷུན་གྲུབ་འོད་ཀྱི་གོང་བུར་གསལ། །ཁམས་གསུམ་ཐམས་ཅད་དག་པའི་ཞིང་། །སྲིད་གསུམ་ཐམས་ཅད་དག་པ་ཡི། །སྟོང་གསུམ་ཐམས་ཅད་སྐུ་གསུམ་དང་། །ཞེས་ཀུན་ཏུ་བཟང་མོས་བཀའ་སྩལ་ཏོ། །ཡང་གཅིག་ཕྱི་སྣོད་ཞིང་ཁམས་ལ། །དག་པའི་ཞིང་ཁམས་གནས་ཚུལ་བཤད། །འབྱུང་བཞིའི་བདག་མོ་ཡང་ཉོན་ཅིག །འདི་ནས་ཤར་ཕྱོགས་འཇིག་རྟེན་ཁམས། །ཞིང་ཁམས་མིང་ནི་མངོན་པར་དགའ། །སྤྲུལ་སྐུའི་ཞིང་ཁམས་ཡངས་པ་དེར། །གཞལ་ཡས་ཁང་ནི་འདི་ལྟ་སྟེ། །ཤར་རི་དཀར་པོ་ཤེལ་ལས་གྲུབ། །གྲུ་བཞི་སྒོ་བཞི་རྟ་བབས་ལྡན། །ས་གཞི་ཐམས་ཅད་རིན་པོ་ཆེ། །ཡིད་དུ་འོང་ཞིང་ལྟ་ན་སྡུག །རིན་པོ་ཆེ་ཡི་ཐེམ་སྐས་དང་། །ཕྱོགས་བཞིར་གསེང་སྐར་ཆེན་པོ་བཞི། །གསེང་ཀའི་ནང་དུ་ཉི་མ་ཤར། །རིན་ཆེན་ཤེལ་གྱི་ཁྱིམ་དང་འཐབ། །ནང་དུ་ཡེ་ཤེས་འོད་ལྔར་ལྡན། །གཞལ་ཡས་དེ་ཡི་ཕྱི་
རིམ་དུ། །ཡན་ལག་བརྒྱད་ལྡན་ཆུ་བོ་དང་། །དྲི་ཞིམ་ཁྲུས་ཀྱི་རྫིང་བུ་དང་། །འཚོ་བྱེད་སྨན་གྱི་ལྡུམ་ར་ཡོད། །དེ་ལ་ནད་ཀྱིས་ཉེན་པ་རྣམས། །འཐུངས་བཀྲུས་ཟོས་པས་ནད་རྣམས་བྱང་། །དེ་ཡི་ཕྱི་མ་ལྕགས་རི་ལ། །མཚོ་ལུ་ཆེན་པོ་བརྒྱད་ཡོད་དེ། །དེ་ཡི་ནང་ན་བྱ་ཡི་རིགས། །རྣམ་པ་སྣ་ཚོགས་ཉིད་དུ་སྟེ། །བྱ་ཡི་རྒྱལ་པོ་ངང་པ་དང་། །འཐིང་རིལ་དག་དང་ཀ་ཏི་དང་། །རྨ་བྱ་ནེ་ཙོ་ཤང་ཤང་དང་། །ཁུ་བྱུག་རི་སྐེགས་ལ་སོགས་པ། །བྱ་རིགས་སྟོང་ཕྲག་བརྒྱད་ཅུ་དང་། །ཡིད་འོང་བྱ་ནི་འདི་ལྟ་སྟེ། །ཀང་ཀ་རི་དང་ཟེར་མོ་དང་། །ལྦ་བ་དང་བྱ་སྐད་དྲིའུ་སྐད། །ཀི་ཏིང་གསེར་གྱི་རྡོ་རྗེའི་གཟུགས། །དེ་ལ་སོགས་པ་བྱ་ཡི་རིགས། །གཡུ་ལྟར་སྔོ་ལ་དུང་ལྟར་དཀར། །བྱེ་རུ་ལྟར་དང་ཨིན་དྲ་དང་། །རིགས་ལྡན་བྱ་ལ་ཡིད་དུ་འོང་། །གསུང་སྙན་རྣམ་པ་སྣ་ཚོགས་སྒྲོགས། །དེ་དག་རྣམས་ཀྱི་ཕྱི་རིམ་དུ། །རིན་ཆེན་བདུན་གྱི་ལྕགས་རི་ཡོད། །དེ་དག་རྣམས་ཀྱི་དབུས་སུ་ནི། །རིན་ཆེན་བདུན་གྱི་ཁྲི་རྐང་ཡོད། །ཆོས་འཆད་པ་ཡི་བསྟན་པ་ཡོད། །ཕོ་བྲང་དེ་ཡི་གཙོ་བོ་ནི། །སྤྲུལ་སྐུ་རྡོ་རྗེ་སེམས་དཔའ་ཞེས། །མཚན་དང་དཔེ་བྱད་ལྡན་པ་ལ། །རྡོ་རྗེ་རིགས་ཀྱི་འཁོར་གྱིས་བསྐོར། །སྲོད་ལ་རྒྱུ་ཡི་ཆོས་རྣམས་གསུང་། །ཉིན་ཕྱེད་འབྲས་བུའི་ཆོས་རྣམས་གསུང་། །དེ་ལྟར་དུས་བཞིར་ཐུན་བཞིའོ། །དེ་རུ་གནས་པའི་བྱང་སེམས་རྣམས། །སྐྱེ་བ་གཅིག་གིས་ཐོགས་པའོ། །ལོ་ཡང་ལྔ་བརྒྱ་ལྔ་བཅུ་ཐུབ། །ཞིང་ཁམས་དེ་ནི་ཁྱད་པར་འཕགས། །སྐོམ་རྣམས་བདུད་རྩིའི་ཆུ་འཐུངས་པས། །སྐོམ་པའི་ཚད་པ་མེད་པའོ། །ཏིང་འཛིན་གཙང་མའི་ཟས་ཟ་བས། །ཟས་ཞེས་བྱ་བའི་མིང་ཡང་མེད། །འདོད་ཡོན་ལྔ་ལ་ལོངས་སྤྱོད་པས། །ལྟོགས་འཕྱུགས་བྱ་བའི་མིང་ཡང་མེད། །གཞལ་ཡས་དེ་ཡི་ཟུར་བཞི་ལ། །མུ་ཏིག་ཆེན་པོ་རྣམ་བཞི་ཡོད། །བར་སྣང་ཐམས་ཅད་
གཡེར་ཁས་སྦྲེལ། །སྦྲེལ་ཐག་རླུང་གིས་བསྐྱོད་ཙམ་ལས། །ཡིད་འོང་སྣ་ཚོགས་སྒྲ་དང་ལྡན། །ཕྱོགས་བཞིར་རབ་བརྟན་སྣ་ཚོགས་བཞི། །རླུང་གིས་བསྐྱོད་པའི་དྲི་ཞིམ་འཐིབ། །ཞིང་ཁམས་དེ་ཡི་ཡོན་ཏན་ནི། །དཔག་མེད་བསམ་ལས་འདས་པའོ། །ཞིང་ཁམས་གནས་དང་བཅས་པ་དེ། །འདི་ནས་ཤར་གྱི་ཕྱོགས་རོལ་དུ། །དཔག་ཚད་ལྔ་བརྒྱ་འདས་པའི་སྟེང་། །རིག་པ་རང་སྣང་ཡུལ་ན་བཞུགས། །དེ་རུ་སྐྱེས་པའི་བྱང་སེམས་རྣམས། །སུམ་ཅུ་རྩ་གསུམ་དག་དང་ནི། །ལོངས་སྤྱོད་ཐམས་ཅད་མཉམ་པའོ། །དེ་ནི་ས་ལ་གནས་པ་ཡིས། །ཤར་ཕྱོགས་མངོན་དགའི་ཞིང་འཁོད་དོ། །ཡང་གཅིག་རིགས་བཞིའི་བདག་མོ་དང་། །འབྱུང་ལྔའི་བདག་མོ་ཐམས་ཅད་ཉོན། །འདི་ནས་ལྷོ་ཡི་ཕྱོགས་རོལ་དུ། །དཔལ་དང་ལྡན་པའི་ཞིང་ཁམས་ནི། །རིན་ཆེན་གསེར་ལས་གྲུབ་པ་ལས། །ཡོན་ཏན་ཐམས་ཅད་ཤར་དང་གཅིག །རིགས་ཀྱི་སྤྲུལ་སྐུ་རིན་ཆེན་འབྱུང་། །འཁོར་དུ་རིན་ཆེན་མཁའ་འགྲོས་བསྐོར། །ཁ་དོག་གཙོ་བོ་མ་གཏོགས་པ། །གོང་དང་འདྲ་བས་རིགས་པར་བྱ། །ཡང་གཅིག་འབྱུང་ལྔའི་བདག་མོས་ཉོན། །འདི་ནས་ནུབ་ཕྱོགས་ཕྱོགས་རོལ་ན། །པདྨ་བརྩེགས་པའི་ཞིང་ཁམས་ན། །པདྨ་རཱ་ག་དག་ལས་གྲུབ། །སྟོན་པ་སྣང་བ་མཐའ་ཡས་སོ། །འཁོར་ནི་པདྨའི་རིགས་མཆོག་གོ། །ཡོན་ཏན་གྲུབ་ཚུལ་ཐམས་ཅད་ཀུན། །ཤར་དང་འདྲ་བར་རྫོགས་པའོ། །ཡང་གཅིག་འབྱུང་ལྔའི་བདག་མོ་ཉོན། །འདི་ནས་བྱང་གི་ཕྱོགས་རོལ་ན། །ལས་རབ་བརྩེགས་པའི་ཞིང་ཁམས་ཡོད། །ཨིནྡྲ་ནཱི་ལའི་གཞལ་ཡས་ཁང་། །སྤྲུལ་སྐུ་དོན་ཡོད་གྲུབ་པ་ལ། །ལས་ཀྱི་རིགས་ཀྱི་འཁོར་གྱིས་བསྐོར། །གནས་ཀྱི་ཡོན་ཏན་བརྗོད་ཚུལ་རྣམས། །མངོན་དགའ་དག་དང་མཚུངས་པའོ། །ཡང་གཅིག་འབྱུང་ལྔའི་བདག་མོ་ཉོན། །འདི་ནས་དབུས་ཀྱི་ཕྱོགས་རོལ་ན། །འཐུག་པོ་བཀོད་པའི་ཞིང་ཁམས་ན། །
བཻ་ཌཱུརྱ་ལས་གྲུབ་པ་སྟེ། །སྤྲུལ་སྐུ་རྣམ་སྣང་ཆེན་པོ་ལ། །བུཌྜྷ་རིགས་ཀྱི་འཁོར་གྱིས་བསྐོར། །ཡོན་ཏན་ཐམས་ཅད་ཤར་དང་གཅིག །རིགས་ལྔའི་ཞིང་ཁམས་ལྔ་པོ་ནི། །ཤར་དཀར་ལྷོ་སེར་ནུབ་དམར་བྱང་ལྗང་དབུས་མཐིང་། །ཀུན་ཀྱང་མ་འདྲེས་མཚན་ཉིད་འཛིན། །ཞིང་ཁམས་ལྔ་པོ་འདི་དག་ལ། །སེམས་རིགས་རྣམ་པ་གསུམ་མེད་དོ། །འཇིག་རྟེན་པ་ཡི་སེམས་མེད་དོ། །དྲི་མ་དྭངས་པས་སེམས་མེད་དོ། །མཐའ་བཞི་དྲི་མའི་སེམས་མེད་དོ། །རིགས་དྲུག་ཉོན་མོངས་དྲུག་མེད་དོ། །རྐྱེན་བཞི་རྐྱེན་གསུམ་ལ་སོགས་མེད། །ཅེས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། ཕྱི་སྣོད་དུ་འཁྲུལ་པའི་ཡུལ་ལྔ་ལ་མ་འཁྲུལ་པའི་སྤྲུལ་སྐུའི་ཞིང་ཁམས་ལ་གནས་པའི་བྱང་ཆུབ་སེམས་དཔའ་རྣམས་གནས་ཚུལ་བསྟན་པའི་ལེའུ་སྟེ་དགུ་པའོ།། །།ཡང་གཅིག་ཀུན་ཏུ་བཟང་མོ་ལ། །རྩལ་སྣང་མཁའ་འགྲོ་ལྔས་གསོལ་པ། །ཞི་བའི་གནས་ཚུལ་གསུངས་ན་ཡང་། །ཁྲོ་བོའི་གནས་ཚུལ་གསུང་དུ་གསོལ། །ཞུས་པའི་ལན་དུ་བཀའ་སྩལ་པ། །ཉོན་ཅིག་རིགས་མདངས་མཁའ་འགྲོ་ལྔ། །ཞི་བའི་ཞིང་ཁམས་ལྔ་པོ་ཡིས། །རང་རང་མདུན་གྱི་བར་སྣང་དུ། །སྤྲུལ་སྐུ་ཁྲོ་བོའི་ཞིང་ཁམས་ཡོད། །མིང་ནི་དུར་ཁྲོད་མེ་རི་འབར། །དེ་རུ་གཞལ་ཡས་ཁང་ཆེན་པོ། །ཐོད་པའི་ཁང་པ་གྲུ་བཞི་པ། །ཐོད་སྐམ་ཀུན་གྱིས་འགྲམ་བཞི་བྱས། །རྙིང་པ་ཀུན་གྱིས་པར་རྩིགས་བྱས། །ལྕང་ལོ་ཅན་གྱིས་ཁ་བད་བྱས། །རྒྱ་དང་འཕང་དུ་དཔག་ཏུ་མེད། །གནམ་ལྕགས་གཟེར་བཏབ་རཀྟས་བྱུག །ཉི་ཟླའི་ཀ་གདན་འོད་དང་བཅས། །ཆུ་སྲིན་ཀ་ཞུ་ལྷ་བརྒྱད་གདུང་། །གཟའ་བརྒྱད་ཀ་བ་རྒྱུ་སྐར་ཕྱམ། །མཆོག་གི་བྲལ་མ་ཞིང་ཆེན་གཡོགས། །ཉིན་བཞིན་རླུང་འཚུབ་མཚན་མེ་འབར། །གཞལ་ཡས་དེ་ཡི་ཟུར་བཞི་རུ། །ཞིང་ཆེན་གདུགས་དང་ཐོད་པའི་གཡོག །
ལྷ་མོ་ལྷ་ནི་གར་སྟབས་སྒྱུར། །ས་གཞི་ཐམས་ཅད་རཀྟའི་མཚོ། །ཞིང་ཆེན་ཞིང་ཆུང་བརྡལ་བའི་ཀློང་། །གཞལ་ཡས་དེ་ཡི་ནང་ཉིད་དུ། །གཞོན་ནུ་དཔའ་བོ་སྟོབས་དང་ལྡན། །ཐུགས་རྗེ་ཞི་བར་མ་གཡོས་ཀྱང་། །སྐུ་ནི་ཁྲོ་བོའི་ཆ་ལུགས་བསྟན། །མཁའ་འགྲོ་ཁྲོ་བོའི་ཚོགས་ཀྱིས་བསྐོར། །མཁའ་འགྲོ་པཱུརྣ་ཉེར་ཞི་དང་། །ཚངས་པ་ཉིད་ནི་དུང་མགྲིན་ཅན། །དྲང་སྲོང་ཟླ་འོད་གཞོན་ནུ་དང་། །ཨེ་ཀ་ཙ་ཏི་སྤུན་དྲུག་དང་། །དེ་ཡི་བྲན་མོ་བཅུ་བཞི་དང་། །གཡོག་མོ་ལྔ་བཅུ་རྩ་བརྒྱད་དང་། །ཡང་གཡོག་འབུམ་ཁྲི་འབུམ་སྟོང་དང་། །མཁའ་འགྲོ་མ་ཡི་འདུ་ཚོགས་ནི། །བསྐལ་པ་ཞིང་གི་རྡུལ་སྙེད་དུ། །བྱེ་བ་དུང་ཕྱུར་གྲངས་མེད་བསྐོར། །ཁྲོ་བོ་དེ་ཡི་ཐུགས་སྤྲུལ་ནི། །ཕྱག་ན་རྡོ་རྗེ་ལ་སོགས་ཏེ། །ཁྲོ་བོ་དཔག་ཏུ་མེད་པས་བསྐོར། །འཁོར་གྱི་སྡེ་ཚོགས་དག་ལ་ཡང་། །ཡང་གསང་བླ་ན་མེད་པའི་ཆོས། །ཀློང་གསལ་ཉི་མ་འདི་ཉིད་ཀྱིས། །ཞི་བ་སྤྲུལ་པའི་སྐུ་རྣམས་ནི། །གྲོལ་བའི་བྱེད་པ་ཐམས་ཅད་ཀྱང་། །ཁྲོ་བོ་རྣམས་ཀྱི་གཉེར་མ་ནི། །ཡེ་ཤེས་ལྡན་པ་ཤ་སྟག་གོ། །དབང་པོ་ཐ་མ་ཐམས་ཅད་ནི། །འདི་ལ་དྲེད་ཅིང་དངངས་པས་ན། །ཞི་བ་རིགས་ལྔའི་ཞིང་ཁམས་སུ། །སྐྱེ་བ་ལེན་པ་ཤ་སྟག་གོ། །དེ་ནི་དབྱིངས་དང་ཡེ་ཤེས་དང་། །ཐུགས་རྗེའི་དགོངས་སྤྱོད་ བསྟན་པའོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། དབྱིངས་ལ་ཁྲོ་བོ་གནས་པའི་ལེའུ་སྟེ་བཅུ་པའོ།། །།ས་མ་ཡ། ཡང་གཅིག་ཀུན་ཏུ་བཟང་མོ་ལ། །མཁའ་འགྲོ་རིགས་ལྔས་ཡང་ཞུས་པ། །ཀྱེ་ཀྱེ་ཀུན་ཏུ་བཟང་མོ་ཆེ། །ཕྱི་སྣོད་འབྱུང་བ་ལྔ་པོ་ལ། །མ་འཁྲུལ་ཞི་ཁྲོ་གནས་པ་ལ། །ནང་བཅུད་སེམས་ཅན་ཅིར་མི་གྲོལ། །ཞུས་པའི་ལན་དུ་བཀའ་སྩོལ་ཅིག །ཀྱེ་ཧོ་མཁའ་འགྲོ་རིགས་ལྔ་ཉོན། །ནང་བཅུད་རང་གྲོལ་ཉིད་ཡིན་ཏེ། །མ་རིག་པ་ཡི་སྣང་བ་ལས། །ཞིང་ཁམས་དེ་དག་དགྲར་ལངས་ཏེ། །ཞིང་
ཁམས་གཞན་དུ་འདོད་པ་ལས། །གོང་གི་ཞིང་ཁམས་དེ་དག་འོག །དཔག་ཚད་གཅིག་གི་ཆ་རུ་ནི། །ལམ་མ་དག་པའི་ཞིང་ཁམས་ཡོད། །མི་གཙང་བ་ཡི་ཁང་པ་ནི། །རྒྱ་ཁྱོན་དཔག་ཏུ་མེད་པའོ། །རོ་མྱགས་ལམ་ལ་འཁྱིལ་པའི་ནང་། །སེམས་ཅན་གཟུགས་ནི་སྣ་ཚོགས་ཡོད། །དུག་གསུམ་ནད་ཀྱིས་གདུངས་པའོ། །སེམས་ཅན་ལ་ལ་ཕར་ལ་འཕོ། །སེམས་ཅན་སྣ་ཚོགས་ཚུར་ལ་འཇུག །ཟས་ནོར་ལོངས་སྤྱོད་སྡུག་པ་ཡོད། །གཏིང་རུམ་མཚོན་ཆར་རྣག་ཁྲག་འབབ། །དུག་གསུམ་དག་ལས་བྱུང་བ་ཡི། །མ་དག་པ་ཡི་ཁམས་ལྔ་ཆོས། །དེ་ལ་སྐྱེས་པའི་ཉོན་མོངས་ནི། །སྟོང་ཕྲག་བརྒྱད་ཅུ་རང་ཁར་སྤྱོད། །རྩ་བ་མ་རིག་རྒྱུ་ལས་བྱུང་། །དེ་ལྟ་བུ་ཡི་གནས་ཉིད་དུ། །སེམས་ཅན་མ་དག་ལྷུང་བའི་གནས། །དེ་དང་རིག་དང་མ་རིག་གཉིས། །རིག་པ་རྣམས་ལ་སྐུ་དང་ཡེ་ཤེས་དང་། །ཞི་ཁྲོའི་ཞིང་ཁམས་དྲུག་པོ་དང་། །དག་པའི་ཞིང་ཁམས་བསམ་ལས་འདས། །སྣང་བ་ཐམས་ཅད་སངས་རྒྱས་དང་། །བྱང་ཆུབ་སེམས་དཔའ་སེམས་མ་དང་། །ལྷ་དང་ལྷ་མོའི་ཞིང་དུ་གསལ། །མ་རིག་པ་ལ་མ་དག་ཡུལ། །དུག་ལྔ་དུག་གསུམ་ཡུལ་དུ་ཤར། །དེ་ཡང་དཔེར་ན་འདི་ལྟ་སྟེ། །གང་གིས་གང་ཉིད་མ་རིག་ན། །རང་གིས་རང་ཉིད་མ་རིག་གོ། །རིག་ན་སངས་རྒྱས་མ་རིག་འཁོར། །རྟོགས་ན་མྱང་འདས་མ་རྟོགས་སྡུག །སེམས་ཅན་སངས་རྒྱས་གཉིས་བར་དུ། །རྟ་རྔ་བརྒྱར་གཤགས་ཆ་གཅིག་ཙམ། །ས་འོག་གསེར་གྱི་རླངས་པ་འམ། །བྱི་བའི་ཁ་རླངས་ཙམ་པ་འམ། །བྱ་ཕོད་རྐྱེན་མེད་འགུལ་བ་ཙམ། །དེ་ནི་རིག་དང་མ་རིག་དཔེ། །བར་དུ་དེ་ཙམ་གཅིག་ལས་མེད། །ཅེས་ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། དག་པའི་ཞིང་ཁམས་དྲུག་ལ་དངངས་ནས། མ་དག་པའི་ཞིང་ཁམས་སུ་གྱུར་པའི་ལེའུ་སྟེ་བཅུ་གཅིག་པའོ།། །།ཡང་
གཅིག་ཀུན་ཏུ་བཟང་མོ་ལ། །འཁོར་ཚོགས་ཀུན་གྱིས་ཡང་ཞུས་པ། །ཀྱེ་ཀྱེ་བཟང་མོ་ཡངས་པའི་ཀློང་། །དག་དང་མ་དག་གཉིས་བར་དང་། །རིག་དང་མ་རིག་གཉིས་བར་དང་། །རྟོགས་དང་མ་རྟོགས་གཉིས་བར་དུ། །ཁྱད་པར་ཅང་ཡང་མི་འདུག་པས། །བདག་ལ་དེར་རྟོག་དེར་བཟུང་སྟེ། །རང་ལ་རང་སྐྱེས་རང་བྱས་པས། །བདག་རྐྱེན་དེར་རྐྱེན་དེར་འཛིན་གྱིས། །འཛིན་པའི་རྒྱ་དང་བཅས་པའོ། །དཔེར་ན་མེ་སྟག་ངན་པས་ཀྱང་། །རྐྱེན་དང་བསྡོངས་ན་སྟོང་གསུམ་འཚིག །དེ་བཞིན་རང་རིག་མ་རིག་རྐྱེན། །མ་རིག་རིག་ན་རིག་པར་འདུག །རིག་པ་རྐྱེན་དང་བྲལ་གྱུར་ན། །སྣང་སྲིད་ཐམས་ཅད་ཆོས་སྐུའི་ཞིང་། །གཅིག་ཤེས་ཀུན་གྲོལ་རིག་སྣང་ཉིད། །དེ་ལྟར་གཅིག་ཏུ་འདུག་པ་ལ། །བཅུད་ཀྱི་སེམས་ཅན་ཐམས་ཅད་ལ། །སྐུ་དང་ཡེ་ཤེས་གནས་ཚུལ་ཞུ། །དེ་སྐད་ཅེས་ནི་ཞུས་པ་དང་། །ཆོས་ཉིད་ཀུན་ཏུ་བཟང་མོ་ཉིད། །ལྷུན་གྲུབ་གནས་ནས་སྐུ་བཞེངས་ཏེ། །ཞལ་ཕྱག་རྣམ་པར་སྐུ་སྤྲུལ་ཏེ། །སྐུ་ཡི་མཁའ་ལ་གསུང་གི་ཟེར། །ཐུགས་ཀྱི་དབྱིངས་ནས་རང་ཤར་ཏེ། །འདུས་པའི་འཁོར་ལ་འདི་སྐད་དོ། །ཀྱེ་ཧོ་འདུས་པའི་འཁོར་ཚོགས་ཉོན། །སེམས་ཅན་ལུས་ལྟར་གནས་པ་ལ། །བདེ་བར་གཤེགས་པའི་ས་བོན་གནས། །དེ་ཡང་དྭངས་སྙིགས་གཉིས་སུ་དབྱེ། །ཕྱི་འབྱུང་ལྔ་པོ་ནང་དང་སྦྱར། །ཤ་འདི་ས་ཡི་རང་བཞིན་ཏེ། །ཤ་རུས་སྤུ་ལྤགས་སྙིགས་མ་ཡིན། །དེ་ཡི་དྭངས་མ་རྩ་གསུམ་སྟེ། །དབུ་མ་ཆོས་ཉིད་སྤྱི་བོར་གནས། །ཁྲག་འདི་ཆུ་ཡི་རང་བཞིན་ཏེ། །ཁྲག་དང་ཆུ་སེར་སྙིགས་མ་ཡིན། །དེ་ཡི་དྭངས་མ་བཞི་བསྟན་ཁྲག །རང་བཞིན་ཐིག་ལེ་སྙིང་ལ་གནས། །དྲོད་འདི་མེ་ཡི་རང་བཞིན་ཏེ། །རང་དྲོད་འདི་ནི་སྙིགས་མ་ཡིན། །དེ་ཡི་དྭངས་མ་བདེ་བྱེད་མེ། །ར་སྣའི་རྣམ་པར་ལྟེ་བར་གནས། །དབུགས་འདི་རླུང་གི་རང་བཞིན་ཏེ། །འགྱུ་བྱེད་འདི་ཉིད་སྙིགས་མ་ཡིན། །དེ་ཡི་དྭངས་མ་ཀུན་གྱི་རྩལ། །ལུས་རྣམས་
ཀུན་ལ་ཁྱབ་པར་གནས། །སེམས་འདི་ནམ་མཁའི་རང་བཞིན་ཏེ། །སྟོང་པ་ཧད་པོ་སྙིགས་མ་ཡིན། །དེ་ཡི་དྭངས་མ་བཞི་ཡི་རྟེན། །ཐིག་ལེ་སྟོང་གསལ་སྙིང་དཀྱིལ་གནས། །ལར་ནི་ཕྱི་ནང་འབྱུང་བ་ལྔ། །ལྔ་འདུས་མཚན་མ་སྦྱར་བ་ལ། །ཉོན་མོངས་ལྔ་དང་ཡིད་དྲུག་ལ། །ཡེ་ཤེས་ལྔ་ཡི་བདག་ཉིད་དོ། །འབྱུང་བཞིས་བསྡུས་པའི་ལུས་པོ་ལ། །སེམས་ཀྱི་རྒྱུ་བྱས་རླུང་གི་རྟ། །ས་ཡིས་ གཞི་བྱས་ཁྲག་གིས་བསྐྱེད། །མེ་ཡིས་སྨིན་པའི་སྒྱུ་ལུས་འདི། །ཕྱི་འབྱུང་ལྔ་དང་སྦྱར་བ་ལ། །གཉིས་མེད་སྐུ་དང་ཡེ་ཤེས་ལྔ། །མ་འགགས་རང་རྩལ་རྫོགས་པར་འཆར། །ཅེས་སོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། ནང་བཅུད་སེམས་ཅན་གྱི་འབྱུང་བའི་དྭངས་སྙིགས་ཕྱེ་བ་དང་། ཡེ་ཤེས་ངོས་བཟུང་བའི་ལེའུ་སྟེ་བཅུ་གཉིས་པའོ།། །།ཡང་གཅིག་ཀློང་ནས་བཀའ་སྩལ་པ། །ཀྱེ་ཧོ་འདུས་པའི་འཁོར་ཚོགས་ཉོན། །སྲིད་པའི་རྩ་བ་བདག་འཛིན་ཉིད། །ཕྱི་ནང་ཀུན་བརྟགས་ཡེ་སྟོང་གྲོལ། །སྟོང་པ་ཉིད་ཀྱི་སྙིང་པོ་ནི། །ཐིག་ལེ་ཉག་གཅིག་སྐུ་རུ་རྫོགས། །དེ་ཡང་བདག་འཛིན་རྒྱ་ཡིས་འཐུམས། །རྒྱ་འདི་བཀྲོལ་བའི་མན་ངག་ནི། །སྟོང་ཉིད་རྣམ་པ་བཅུ་དྲུག་ཡིན། །ཕར་ཕྱིན་དྲུག་ལ་བཅོ་བརྒྱད་ཡིན། །ཆོས་རྣམས་ཀུན་གྱི་དེ་བཞིན་ཉིད། །ནང་འཛིན་སེམས་ཀྱིས་སྟོང་པས་ན། །ནང་གི་སྟོང་པ་ཉིད་ཡིན་ནོ། །ཕྱི་ཡི་ཡུལ་དུ་འཛིན་པས་སྟོང་པས་ན། །ཕྱི་ཡི་སྟོང་པ་ཉིད་ཡིན་ནོ། །ཕྱི་ནང་བར་གྱི་དབང་པོ་ལྔར། །འཛིན་པ་སྟོང་པས་གཉིས་སུ་མེད། །ཕྱི་ནང་མེད་པའི་སྟོང་པ་ཉིད། །དེ་དག་ཐམས་ཅད་སྤངས་པ་རུ། །འཛིན་པ་དག་ཀྱང་སྟོང་པས་ན། །གཉིས་སུ་མེད་པའི་སྟོང་པ་ཉིད། །འབྱུང་བ་ཆེན་པོ་གླིང་བཞི་དང་། །རི་རབ་དག་ཀྱང་ལྷག་པར་ཡང་། །ཆགས་པ་འཛིན་པས་སྟོང་པས་ན། །ཆེན་པོ་སྟོང་པ་ཉིད་དུའོ། །དེ་ལ་ཀུན་རྫོབ་སྒྲིབ་གཡོགས་ཀྱི། །སྟོང་པས་དོན་དམ་སྟོང་ཉིད་དོ། །
དགེ་རྩའི་བློ་སེམས་རྣམ་པ་སྟོང་། །འདུས་བྱས་སྟོང་པ་ཉིད་དུའོ། །འདུས་མ་བྱས་ཀྱི་དགེ་བ་ཡང་། །རློམ་སེམས་དག་གིས་སྟོང་པས་ན། །འདུས་མ་བྱས་ཀྱི་སྟོང་ཉིད་དོ། །མཐའ་ལས་འདས་ཀྱི་འཛིན་པས་སྟོང་། །མཐའ་ལས་འདས་ཀྱི་སྟོང་པ་ཉིད་དོ། །ཐོག་མ་བར་དང་ཐ་མ་རུ། །སེམས་ཅན་རྣམས་ཀྱི་དོན་བྱེད་པར། །འཛིན་པ་ཐམས་ཅད་སྟོང་པས་ན། །ཐོག་མ་དང་ནི་ཐ་མ་མེད། །སྟོང་པ་ཉིད་དུ་ཤེས་པར་བྱ། །མྱ་ངན་དག་ལས་འདས་པའི་ཚེ། །སེམས་ཅན་ཀུན་གྱི་དོན་མི་འདོར། །དོར་བ་སྟོང་སྟེ་དོར་བ་མེད། །སྟོང་པ་ཉིད་ཅེས་ཡང་དག་གོ། །སྣང་བ་ཐམས་ཅད་རང་བཞིན་གྱིས། །གནས་པའི་རིགས་ནི་སྟོང་པས་ན། །རང་བཞིན་སྟོང་པ་ཉིད་དུའོ། །འཁོར་འདས་ཆོས་རྣམས་ཐམས་ཅད་ཀུན། །ཡོད་པར་འཛིན་པ་སྟོང་པས་ན། །ཆོས་རྣམས་ཐམས་ཅད་སྟོང་པ་ཉིད་དོ། །སངས་རྒྱས་རྣམས་ལ་མཚན་དཔེ་བྱད། །རང་གི་མཚན་ཉིད་ཡོད་པ་རུ། །འཛིན་པ་སྟོང་པས་རང་གི་མཚན་ཉིད་སྟོང་། །ཆོས་རྣམས་མི་དམིགས་པ་རུ་ནི། །སྤུ་ཙམ་འཛིན་པ་སྟོང་པས་ན། །མི་དམིགས་པ་ཡི་སྟོང་པ་ཉིད་དོ། །དངོས་པོ་མེད་པའི་འཛིན་པ་རྣམས། །མཐའ་དེ་སྟོང་པས་དངོས་པོ་མེད། །ངོ་བོ་ཉིད་ཀྱིས་སྟོང་པའོ། །དེ་དག་ཐམས་ཅད་གཅིག་ཏུ་དྲིལ། །ནང་གི་དྭངས་མའི་དྭངས་མ་ཡིན། །ཡང་གཅིག་བཅུད་དུ་དྲིལ་བ་ཡིས། །དེ་ལ་ཐིག་ལེ་ཉག་གཅིག་ཟེར། །དོན་དུ་སྐུ་གསུམ་ངོ་བོ་ཡིན། །ཐིག་ནི་ཆོས་སྐུ་ཀ་དག་གོ། །ལེ་ནི་ལོངས་སྐུ་རང་སྣང་ངོ་། །ཉག་ནི་སྤྲུལ་སྐུ་ཀུན་ཁྱབ་པོ། །གཅིག་ནི་སྐུ་གསུམ་འདུ་འབྲལ་མེད། །སེམས་ཅན་ཀུན་གྱི་རྒྱུད་ལ་གནས། །ཞེས་དོན་དམ་པའི་སྐུ་གསུམ་གཅིག་ཏུ་དྲིལ་བ་གནས་པའི་ལེའུ་སྟེ་བཅུ་གསུམ་པའོ།། །།ཡང་གཅིག་ཀུན་ཏུ་བཟང་མོ་ལ། །འཁོར་ཚོགས་འདུས་པས་ཡང་ཞུས་པ། །ཀྱེ་ཀྱེ་བདེ་སྟོང་ཀུན་བཟང་ཡུམ། །མ་གྲུབ་ཐོག་མའི་གོང་དག་ཏུ། །ཀུན་ཁྱབ་ཡེ་ཤེས་གནས་པ་ལ། །འཁྲུལ་མེད་འཁྲུལ་དང་
གནས་པའི་ཚུལ། །སྤྱི་སྡོམ་རིམ་པ་གསུང་ན་ཡང་། །སེམས་ཅན་ཀུན་གྱིས་མི་གོ་བས། །བྱེ་བྲག་རྒྱས་པར་གསུང་དུ་གསོལ། །ཞུས་པའི་ལན་དུ་བཀའ་སྩལ་པ། །ཀྱེ་ཧོ་འདུས་པའི་འཁོར་ཚོགས་ཉོན། །ཐོག་མའི་ཀ་དག་གསལ་སྟོང་ཁྱབ། །འཁྲུལ་པ་ཀ་ནས་དག་པ་ལ། །ཡེ་ཤེས་ཉིད་ལམ་མ་རིག་འཁྲུལ། །ཡེ་ཤེས་གསལ་བའི་ཡུལ་ལྔ་ལས། །གཉིས་འཛིན་སེམས་ཅན་བྱུང་བའོ། །བདག་རྟོག་དེར་རྟོག་དེར་འཛིན་གྱིས། །ཡེ་ཤེས་ལྔ་ལ་ཡུལ་ལྔར་འཁྲུལ། །ཡུལ་དང་རྐྱེན་བཞི་ཤར་བ་ལས། །འབྱུང་བ་ལྔ་ཡི་ས་བོན་རྒྱས། །ཡེ་ཤེས་ལྔ་ཡང་འབྱུང་བཞིས་འཐུམས། །འབྱུང་བཞིའི་རྩལ་ལས་སྣོད་བཅུད་ཆགས། །སྣོད་བཅུད་ཀུན་གྱི་དྭངས་མ་ལས། །ཉི་མ་དང་ནི་ཟླ་བ་གཉིས། །ཡབ་ཡུམ་ཚ་གྲང་ཉིན་མཚན་འབྱེད། །དེ་ཡང་སྣོད་བཅུད་རྩལ་ཡིན་ཕྱིར། །འཛམ་གླིང་བྱེ་བ་ཕྲག་བརྒྱར་ཁྱབ། །ཉི་མ་མེ་ཡི་དྭངས་མ་ཡིན། །ཟླ་བ་ཆུ་ཡི་དྭངས་མ་ཡིན། །གཟའ་སྐར་ས་ཡི་དྭངས་མ་ཡིན། །རླུངས་དྭངས་ཡིན་པས་རྒྱུ་བའོ། །འབྱུང་བཞི་གཅིག་གྲོགས་གཅིག་ཡིན་པས། །འབྱུང་བཞི་རྒྱས་དུས་ཉི་མ་རིང་། །འབྱུང་བཞི་སྙོམས་དུས་ཉིན་མཚན་མཉམ། །འབྱུང་བཞི་འཁྲུག་དུས་ཉི་མ་ཐུང་། །དྲོད་མདངས་ཐམས་ཅད་ཉམས་པའོ། །འབྱུང་བཞི་བྱེར་དུས་ཉི་ཟླ་འགྲིབ། །ཁ་ཆར་བུ་ཡུག་ཐམས་ཅད་ཀུན། །འབྱུང་བ་བཞི་ཡི་རྩལ་ཡིན་ཕྱིར། །དབྱར་ནི་འབྱུང་བ་རྒྱས་པའི་དུས། །རྩི་ཐོག་ལོ་འབྲས་རྒྱས་པའོ། །སྟོན་ནི་འབྱུང་བཞི་སྙོམས་པའི་དུས། །འབྲས་བུ་ཐམས་ཅད་བཅུད་དུ་སྨིན། །དགུན་ལ་འབྱུང་བཞི་འཁྲུགས་པ་སྟེ། །རྩི་བཅུད་ཐམས་ཅད་ཉམས་པའོ། །དཔྱིད་གསུམ་འབྱུང་བ་བྱེར་པ་སྟེ། །མདངས་སྟོབས་ཐམས་ཅད་ཉམས་པའོ། །དེ་རྣམས་འབྱུང་བཞིའི་དར་གུད་དོ། །བྱེར་ཟུག་རྣམས་ཀྱང་དེ་དང་འདྲ། །བསྐལ་པ་ལོ་ཟླ་ཞག་ཟ་མ། །བྱེར་དང་ཟུག་དང་སྙོམས་པའོ། །འཁྲུགས་པ་དག་ཀྱང་བཞི་རུ་འདུས། །བསྐལ་
པའི་བྱེར་ཟུག་འདི་ལྟ་སྟེ། །བསྐལ་པ་འཇིག་དུས་བྱེར་པ་ཡིན། །བསྐལ་པ་ཆགས་དུས་ཟུག་པ་ཡིན། །བསྐལ་པ་གནས་དུས་སྙོམས་པ་ཡིན། །བསྐལ་པ་སྟོངས་དུས་འཁྲུགས་པའོ། །ལོ་ཡི་བྱེར་ཟུག་འདི་ལྟར་རོ། །བྱ་སྤྲེལ་ཁྱི་ཡི་ལོ་ལ་བྱེར། །སྟག་ཡོས་རྟ་ཡི་ལོ་ལ་ཟུག །བྱི་ཕག་གླང་གི་ལོ་ལ་སྙོམས། །འབྲུག་སྦྲུལ་ལུག་གི་ལོ་ལ་འཁྲུགས། །ཟླ་བའི་བྱེར་ཟུག་འདི་ལྟར་རོ། །དཔྱིད་ཟླ་གསུམ་ལ་འབྱུང་བཞི་བྱེར། །དབྱར་ཟླ་གསུམ་ལ་འབྱུང་བཞི་ཟུག །སྟོན་ཟླ་གསུམ་ལ་འབྱུང་བཞི་སྙོམས། །དགུན་ཟླ་གསུམ་ལ་འབྱུང་བཞི་འཁྲུགས། །ཞག་གི་བྱེར་ཟུག་འདི་ལྟར་རོ། །ནམ་ལངས་ཉི་ཤར་འབྱུང་བཞི་བྱེར། །ཉིན་པར་འབྱུང་བཞི་སྙོམས་པའོ། །དགོང་མོ་འབྱུང་བཞི་འཁྲུགས་པ་དང་། །ནམ་ཕྱེད་འབྱུང་བ་ཟུག་པའོ། །ཞི་རྒྱས་དབང་དྲག་ལས་རྣམས་ཀུན། །འབྱུང་བཞི་དག་གི་བྱེད་ལ་སོགས། །དེས་ན་བྱེར་ཟུག་བརྩི་བར་བྱ། །བྱེར་བའི་དུས་སུ་ཞི་བ་འགྲུབ། །ཟུག་པའི་དུས་སུ་རྒྱས་པ་འགྲུབ། །སྙོམས་པའི་དུས་སུ་དབང་རྣམས་འགྲུབ། །འཁྲུགས་པའི་དུས་སུ་དྲག་པོའོ། །དེ་ལྟར་དུས་རྣམས་སྦྱར་ཤེས་ན། །འབྱུང་བཞི་ཐམས་ཅད་དབང་དུ་སྡུད། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། འབྱུང་བཞི་རྣམས་ཀྱི་བྱེད་ལས་ཀྱིས་དར་གུད། འཕོ་འགྱུར་ཡོང་བའི་རྒྱུ། བྱེར་ཟུག་སྙོམས་འཇུག་རྩི་བའི་ལེའུ་སྟེ་བཅུ་བཞི་པའོ།། །།ཡང་གཅིག་ཀུན་ཏུ་བཟང་མོ་ཡིས། །འཁོར་གྱི་ཚོགས་ལ་ཡང་གསུངས་པ། །ཀྱེ་མ་སྣང་བའི་འཁོར་ཚོགས་ཉོན། །ད་ནི་འབྱུང་བཞི་བཤད་པར་བྱ། །དེ་ཡང་བཤད་ལུགས་འདི་ལྟར་རོ། །འབྱུང་བ་ཕྱི་ནང་བར་གསུམ་ལ། །ཕྱི་དང་ནང་དང་གསང་བ་གསུམ། །དར་གུད་འཕོ་འགྱུར་ཡོང་བའི་རྒྱུ། །བེམ་པོ་དག་ནི་འདོད་གཡོས་པས། །ཤེད་བུ་ཤེད་ལ་རོག་ཅེས་པ། །ཐབས་ཤེས་ཉི་ཟླ་ཁ་སྦྱོར་བར། །འབྱུང་བཞི་དམིགས་པའི་རྐྱེན་གཡོས་ཏེ། །འབྱུང་བ་ལྔ་ལ་སྐྱེ་གནས་བཞི། །རིགས་དྲུག་སེམས་ཅན་དཔག་མེད་སྐྱེད། །
སས་ནི་ལུས་ཀྱི་གཞི་བྱས་ཏེ། །འཕེལ་བས་ཤ་རུས་པགས་པར་སྨིན། །ཆུས་ནི་ལུས་ཀུན་བསྡུས་པ་སྟེ། །འཕེལ་བས་ཁྲག་དང་ཆུ་སེར་སྨིན། །མེས་ནི་ལུས་ཀུན་སྨིན་པའོ། །འཕེལ་བས་དྲོད་ནི་རྒྱས་པར་འདོད། །རླུང་གིས་ལུས་ཀུན་འདེགས་པ་སྟེ། །འཕེལ་བས་སྦུབས་སུ་སྨིན་པར་འདོད། །ནམ་མཁའ་རང་བཞིན་འཕེལ་འགྲིབ་མེད། །དེ་ལྟར་འབྱུང་བཞིའི་བྱེད་ལས་ཀྱིས། །ཁམས་གསུམ་པ་ཡི་ཁང་པ་རུ། །རྒྱུད་དྲུག་སེམས་ཅན་རེ་མོས་འཁོར། །མིང་དང་གཟུགས་ཀྱི་འདམ་ལ་ཆགས། །རང་ངོ་མ་ཤེས་རང་རྒྱུད་འཁྲུལ། །འཁྲུལ་པའི་ལུས་ཀྱི་གྲུབ་ཚུལ་ནི། །མ་རིག་འགྱུ་བ་རིག་རིག་པོ། །དོན་ལ་རིག་པའི་རྩལ་ཡིན་ཀྱང་། །རླུང་ལ་རྟ་བྱས་ཡིད་དུ་འགྱུར། །དེར་འཛིན་རླུང་སེམས་འགྱུས་པ་ལས། །ཉོན་མོངས་ལྔ་དང་ཡིད་དྲུག་དང་། །འདོད་པའི་ཆགས་སེམས་བསྡོངས་ནས་སུ། །གཏི་མུག་དག་གིས་གཞི་བཅས་ནས། །ཞེ་སྡང་དག་གིས་དཔུང་བསྐྱེད་དེ། །ང་རྒྱལ་དག་གིས་ང་བདག་ནས། །འདོད་ཆགས་དག་གིས་རབ་སྦྱར་ཏེ། །ཕྲག་དོག་དག་གིས་རབ་བསྒྲིམས་ནས། །སེམས་ཞེས་བྱ་བ་ཧྲིག་ཧྲིག་པོ། །མེ་དང་འདྲ་བ་ཧུར་ཧུར་པོ། །ས་དང་འདྲ་བ་ཏིག་ཏིག་པོ། །ཆུ་དང་འདྲ་བ་མྱུར་མྱུར་པོ། །ནམ་མཁའ་འདྲ་སྟེ་ཕྱལ་ཕྱལ་པོ། །ལྔ་འདུས་ལུས་སེམས་སྦྱོར་བ་ལ། །འདོད་ཆགས་དག་ནི་རབ་གཡོས་ཏེ། །ཕ་མའི་བདེ་བ་འབར་བའི་དུས། །ཕ་ཡི་ཐིག་ལེ་ཞོ་ལྟར་ལུག །རྒྱུ་ཡི་ཐིག་ལེ་ཡུངས་འབྲུ་ཙམ། །ཟླ་བའི་ཚུལ་དུ་མངལ་ལ་བབས། །མ་ཡི་རཀྟ་དཀར་དམར་གཉིས། །རྒྱུ་ཡི་རཀྟ་སྲན་མ་ཙམ། །དམར་ལ་དྭངས་པ་ཉི་མའི་ཚུལ། །ཟླ་ཉི་གཉིས་ནི་ཐབས་ཤེས་ཏེ། །གའུ་ཁ་སྦྱོར་ཚུལ་དུ་གནས། །དེ་གཉིས་བར་དུ་རླུང་སེམས་གཉིས། །དོན་ལ་ཡེ་ཤེས་རང་རྩལ་ཏེ། །གའུ་ཁ་སྦྱོར་བར་དུ་འཐུམས། །ཡི་གེ་ཨ་ཡི་ཚུལ་དུ་ཚུད། །དྲན་པ་བྱུང་ཚོར་ཐམས་ཅད་འགགས། །ལྷ་ཁང་ནང་དུ་ཚུད་པར་སེམས། །
བདེ་བ་ཆེན་པོའི་ངང་དུ་གནས། །སེམས་ཡིད་ཐོགས་པ་ཅན་དུ་སོང་། །མངལ་རྒྱར་མ་འཐུམས་བར་དུ་ནི། །སྲིད་པའི་བར་དོ་ཞེས་བྱ་སྟེ། །སྔོན་དུ་སྲིད་པའི་ཤ་གཟུགས་ཅན། །དབང་པོ་ཀུན་ཚང་ཡིད་ཀྱི་ལུས། །ཐོགས་མེད་པ་རུ་ཀུན་ཏུ་རྒྱུ། །དེ་ཡང་དག་དང་མ་དག་གཉིས། །མངལ་དང་རྒྱུ་རྐྱེན་གཅིག་པའོ། །དག་པ་ཡེ་ཤེས་འཁོར་ལུགས་དང་། །མ་དག་རིགས་དྲུག་འཁོར་ཚུལ་ལོ། །དེ་ཡང་རང་དབང་ཅན་དང་ནི། །རང་དབང་མེད་པའི་འཇུག་ཚུལ་ལོ། །རང་དབང་ཅན་དུ་འཐུམས་པ་ནི། །དྲན་བཞིན་མངལ་སྒོར་བལྟམས་པ་དང་། །དྲན་བཞིན་འགྲོ་དོན་དགོངས་པ་དང་། །དྲན་བཞིན་སྦུབས་སུ་འཚང་རྒྱ་དང་། །དྲན་བཞིན་ལྷུན་གྲུབ་འཚང་རྒྱ་དང་། །དྲན་བཞིན་མངལ་དུ་འཚང་རྒྱ་དང་། །དྲན་བཞིན་རང་དབང་ཅན་ལ་ངེས་པ་མེད། །རིགས་དྲུག་ལ་སོགས་ངེས་པ་མེད། །སྐྱེ་བ་རྣམ་བཞི་གང་ཡང་རུང་། །དག་པ་ཡེ་ཤེས་འཇུག་སྒོའོ། །རང་དབང་མེད་པའི་འཁོར་ལུགས་ནི། །ལས་ངན་དབང་གིས་ལུས་ངན་ལེན། །མངལ་སྒོ་བསྡམ་པའི་དབང་མེད་པས། །སྲིད་པ་ལས་ཀྱི་འཕེན་ལེན་གྱིས། །མ་རབས་རིགས་ངན་མཛེ་ཡུགས་སམ། །ཁྱི་ཕག་བྱོལ་སོང་གཅན་གཟན་རྣམས། །འབུ་སྦྲང་ལ་སོགས་སྲོག་ཆགས་རྣམས། །མི་གཙང་འདམ་སྐྱག་མ་རུངས་པར། །སྐྱེ་བ་རྣམ་བཞི་གང་ཡང་རུང་། །རང་ངོ་མ་ཤེས་རང་རྒྱུད་འཁྲུལ། །མ་དག་པ་ཡི་མངལ་རྒྱར་འཐུམས། །དེ་ནི་དབང་མེད་འཁོར་ལུགས་སོ། །དེ་ལྟར་རྣམ་པ་ཡར་མར་གཉིས། །ཡར་གྱི་ཀ་དག་ཆོས་སྐུ་ཡིན། །མར་གྱི་ཀ་དག་རྡོ་རྗེ་དམྱལ། །དེ་བཞིན་སྐྱེ་བ་རྣམ་པ་བཞི། །ཡར་དང་མར་གཉིས་ཤེས་པར་བྱ། །ཡར་གྱི་སྒོང་སྐྱེས་རྡོ་རྗེ་སེམས། །མར་གྱི་སྒོང་སྐྱེས་བྱ་དང་སྲིན། །ཡར་གྱི་བརྫུས་སྐྱེས་སྤྲུལ་སྐུ་ལྔ། །མར་གྱི་བརྫུས་སྐྱེས་ཡི་དྭགས་ཚོགས། །ཡར་གྱི་དྲོད་སྐྱེས་མི་ལྷ་ཚོགས། །མར་གྱི་དྲོད་སྐྱེས་འབུ་སྲིན་ཚོགས། །ཡར་གྱི་རླན་སྐྱེས་ཆུ་ཡི་ལྷ། །མར་གྱི་རླན་
སྐྱེས་གྲང་དམྱལ་དང་། །ཡར་གྱི་མངལ་སྐྱེས་སྤྲུལ་སྐུ་དྲུག །མར་གྱི་མངལ་སྐྱེས་ཉོན་མོངས་དྲུག །འདྲ་བ་འདྲ་སྟེ་ནོར་ལ་རེ། །དེ་ལྟར་མངལ་དུ་མ་ཞུགས་པར། །རླུང་སེམས་དབྱེར་མེད་ཡེ་ཤེས་ལྔ། །མངོན་པར་ཤེས་པ་དྲུག་དང་ལྡན། །དེ་ཚེ་རྗེས་དྲན་དྲུག་པོ་གཅེས། །རྗེས་དྲན་མངལ་རྒྱར་འཐུམས་པ་ནི། །མི་ལུས་ལེན་པའི་རླུང་སེམས་དང་། །ཕ་མའི་ཐིག་ལེ་དཀར་དམར་དང་། །རྒྱུ་རྐྱེན་བཞི་པོ་འཛོམ་པ་ལ། །འབྱུང་བ་བཞི་ཡི་ལུས་སུ་སོང་། །མཚལ་དང་ཞོ་གཉིས་བསྲེས་པ་ལྟར། །འབྱུང་བཞིས་རེས་བསྡུས་རེས་བཤིགས་པས། །མེར་མེར་པོ་དང་ནུར་ནུར་པོ། །གོར་གོར་པོ་དང་ལྟར་ལྟར་པོ། །མཁྲང་འགྱུར་ཁྱབ་འཇུག་རུས་སྦལ་ལྟར། །རིམ་པ་བཞིན་དུ་ལུས་སེམས་ཆགས། །ཞག་ནི་བདུན་ཚན་བཅུ་བཞིའི་བར། །འབྱུང་བཞི་ལུས་རྣམས་རིམ་བཞིན་བསྐྱེད། །ལུས་ལ་རྩ་ཆགས་རྩ་ལ་ཐིག །དེ་ལ་སྐུ་དང་ཡེ་ཤེས་སོ། །རླུང་ནི་ཀུན་ལ་ཁྱབ་པར་ཆགས། །དེ་ལྟར་ཟླ་དགུ་ངོ་བཅུ་ལ། །མངལ་དེ་བཙོག་པའི་འདུ་ཤེས་ཀྱི། །ལུས་རྫོགས་མངལ་ནས་ཕྱི་ལ་འབྱོན། །འཕུལ་བྱེད་རླུང་གིས་མར་ལ་འཕུལ། །མགོ་མཇུག་ལོག་ནས་ཕྱིར་ལ་འབྱུང་། །དེ་ནས་མངལ་གྱི་རྒྱ་དང་བྲལ། །སྔར་གྱི་བག་ཆགས་སྲབ་ཏུ་སོང་། །ཕྱིས་ཀྱི་ཉེར་ལེན་ངོ་མ་ཕྲད། །ཤེས་པ་སྔར་ལས་མི་གསལ་ཅིང་། །རྩ་རླུང་ཀུན་གྱི་སྟོབས་མ་སྐྱེས། །ཁམས་ཀྱི་དྭངས་སྙིགས་མ་ཕྱེ་བས། །ནད་གདོན་མི་མཐུན་སྣ་ཚོགས་སྡང་། །དེ་ནས་ཁམས་ཀྱི་ཟས་སྐོམ་གསོས། །དྭངས་མས་ཁམས་ཀྱི་ནུས་པ་བསྐྱེད། །སྙིགས་མས་ལུས་ཀྱི་སྟོབས་བསྐྱེད་དེ། །ལུས་སེམས་རིམ་བཞིན་བསྐྱེད་པ་དང་། །དུག་ལྔ་དུག་གསུམ་ཉོན་མོངས་རྣམས། །རིམ་བཞིན་རྫ་དྲེག་ལྟ་བུར་ཆགས། །རིག་རྩལ་ཉིད་ཀྱང་དུག་ལྔས་འཐུམས། །དཔེར་ན་མར་མེ་རྫ་ཕུབ་འདྲ། །ལུས་རྫོགས་མེ་ཡི་ལུས་དེ་ཉིད། །དང་པོ་འབྱུང་བཞིས་སྐྱེད་པར་བྱེད། །བར་དུ་འབྱུང་བཞི་སྙོམས་པར་གནས། །ཐ་མ་འབྱུང་འཁྲུག་བྱེར་པས་འཇོམས། །
ཞེས་ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། ནང་བཅུད་སེམས་ཅན་གྱི་ཆགས་ཚུལ་ནང་འབྱུང་བཞིས་བསྡུས་པའི་ལུས་རང་དབང་ཅན་དང་། རང་དབང་མེད་པའི་འཁྲུལ་ཚུལ་གྱི་ལེའུ་སྟེ་བཅོ་ལྔ་པའོ།། །།ཀུན་ཏུ་བཟང་མོས་ཡང་གསུངས་པ། །ཀྱེ་མ་འདུས་པའི་འཁོར་ཚོགས་ཉོན། །རྟེན་གཞི་ལུས་ཀྱི་འཁྲུལ་ཚུལ་ལས། །དེ་བཞིན་གཤེགས་པའི་ས་བོན་དང་། །སྐུ་དང་ཡེ་ཤེས་གསུམ་བརྩེགས་ནས། །འབྱུང་བཞིས་གར་ཁྱབ་ལུས་ཀྱིས་ཁྱབ། །ལུས་ཀྱིས་གར་ཁྱབ་རྩ་ཡིས་ཁྱབ། །རྩ་ཡིས་གར་ཁྱབ་རླུང་གིས་ཁྱབ། །རླུང་གིས་གར་ཁྱབ་ཐིག་ལེས་ཁྱབ། །ཐིག་ལེས་གར་ཁྱབ་སྐུ་ཡིས་ཁྱབ། །ལུས་ནི་སྐུ་གསུམ་ལུས་ཡིན་ཏེ། །སྐུ་གསུམ་ཡི་གེ་གསུམ་དང་ལྡན། །མི་ལུས་རིན་ཆེན་དེ་དག་ནི། །མངལ་ཞུགས་བྱང་ཆུབ་ལྔ་ལྡན་ནོ། །ཟླ་བ་དགུ་ནི་ཐེག་དགུ་སྟེ། །ངོ་བཅུ་ས་བཅུའི་ཚུལ་དུའོ། །སྐྱེ་གནས་རང་བཞིན་སྤྲུལ་པའི་སྐུ། །ཡེ་ཤེས་ཆེན་པོའི་འབྱུང་གནས་ཡིན། །ལུས་ཅན་ཀུན་ལ་བཟང་ངན་མེད། །བདེ་གཤེགས་སྙིང་པོས་ཀུན་ལ་ཁྱབ། །ངོ་བོ་རང་བཞིན་ཐུགས་རྗེ་གསུམ། །ཏིལ་ལ་མར་གྱིས་ཁྱབ་བཞིན་གནས། །ཡེ་ནས་རང་རིག་ཡེ་ཤེས་ལ། །ད་ལྟ་འཁྲུལ་ཀྱང་ཡེ་ཤེས་རྩལ། །མ་རིག་གྲོལ་ཚེ་འབྱུང་བཞིའི་ལུས། །ལྷ་མེད་ཡེ་ཤེས་ལྔ་རུ་ཟློག །སེམས་ཅན་རང་རྒྱུད་རྟོག་ཚོགས་རྣམས། །སངས་རྒྱས་གྲངས་ལས་འདས་པའོ། །ཕུང་པོ་འབྱུང་བ་ཡབ་ཡུམ་བཅུ། །དུག་ལྔ་སེར་སྣ་ཐུབ་པ་དྲུག །ཚོགས་བརྒྱད་སེམས་དཔའ་ཡབ་ཡུམ་བརྒྱད། །སྒོ་བཞི་སྒོ་བ་ཡབ་ཡུམ་བཞི། །མིག་གཉིས་ཉི་མ་ཟླ་བ་གཉིས། །རང་བྱུང་རིག་པའི་རང་རྩལ་ལ། །སྐུ་ལྔ་དང་ནི་ཡེ་ཤེས་ལྔ། །འོད་ལྔ་ཁ་དོག་རླུང་ལྔ་དང་། །ཡི་གེ་ཤེས་རབ་རྟོག་པ་ལྔ། །གཞི་ལྔ་ལམ་ལྔ་འབྲས་བུ་ལྔ། །རིག་པའི་ཡེ་ཤེས་སྐུ་ལྔ་ཤར། །རྣམ་སྣང་མི་བསྐྱོད་རིན་ཆེན་འབྱུང་། །སྣང་བ་མཐའ་ཡས་དོན་ཡོད་གྲུབ། །ཕུང་པོ་བཞི་དང་སྐྱེ་མཆེད་ཀུན། །རྒྱལ་བའི་དཀྱིལ་འཁོར་
ཆེན་པོར་གནས། །ཞེས་ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། རྟེན་ལུས་ཀྱི་དཀྱིལ་འཁོར་ལ། སྐུ་དང་ཡེ་ཤེས་གནས་ཚུལ་བསྟན་པའི་ལེའུ་སྟེ་བཅུ་དྲུག་པའོ།། །།ཡང་གཅིག་འདུས་པའི་འཁོར་ཚོགས་ལ། །ཀུན་ཏུ་བཟང་མོས་ཡང་གསུངས་པ། །ཀྱེ་ཀྱེ་རིག་པའི་འཁོར་ཚོགས་ཉོན། །ད་ནི་རྩ་ཡི་ངོ་སྤྲོད་བསྟན། །སྤྱིར་ན་རྩ་བཤད་ཐམས་ཅད་ཀུན། །དོན་ལ་ཡོད་པ་མ་ཡིན་ཏེ། །དམིགས་པའི་རྟེན་དུ་བཤད་པར་བྱ། །ལུས་ལ་གནས་པའི་རྩ་རྣམས་ནི། །བྱེ་བ་ཐེར་འབུམ་གནས་པའོ། །དེ་རྣམས་ཚུར་ལ་བསྡུས་པ་ཡིས། །སྟོང་ཕྲག་བརྒྱ་དང་བཅུ་གཉིས་གནས། །དེ་ཡང་ཚུར་ལ་བསྡུས་པ་ཡིས། །ལུས་ཀྱི་དཀྱིལ་འཁོར་ལྔ་རུ་འདུས། །སྤྱི་བོ་བདེ་ཆེན་འཁོར་ལོ་རུ། །རྩ་འདབ་སུམ་བརྒྱ་དྲུག་ཅུ་གནས། །མགྲིན་པ་ལོངས་སྤྱོད་འཁོར་ལོ་རུ། །རྩ་འདབ་བརྒྱད་གཉིས་བཅུ་དྲུག་གནས། །སྙིང་ག་ཆོས་ཀྱི་འཁོར་ལོ་རུ། །རྩ་འདབ་སུམ་ཅུ་སོ་གཉིས་གནས། །ལྟེ་བ་སྤྲུལ་པའི་འཁོར་ལོ་རུ། །རྩ་འདབ་དྲུག་ཅུ་རྩ་བཞི་གནས། །གསང་གནས་བདེ་ཆེན་འཁོར་ལོ་རུ། །རྩ་འདབ་ཉི་ཤུ་རྩ་བརྒྱད་གནས། །འཁོར་ལོ་ལྔ་པོ་དེ་ཡི་དབུས། །རྩ་གསུམ་ཀ་བ་སྲོག་ཤིང་ཚུལ། །རོ་མ་གཡས་ལ་རྐྱང་མ་གཡོན། །ཀུན་འདར་མ་ནི་དབུས་སུ་གནས། །རོ་མ་ཆུ་ལ་རྐྱང་མ་ས། །ཀུན་འདར་མ་ནི་རླུང་གིས་སྐྱེད། །ཤེལ་སྦུབས་ཅན་ནི་ཞོར་ལའོ། །ཕྱི་ལྟར་འཁོར་ལོ་ལྔ་པོ་རུ། །དབུས་སུ་འབྱུང་ཡིག་ལྔ་ལྡན་གནས། །ལཾ། རཾ། ཨེ། བྷྲཱུཾ། སུ། ཁཾ། ནང་ལྟར་ཁམས་གསུམ། ཨོཾ། རཾ། ཡཾ། གསང་བ་ལྟར་ན་མཁའ་འགྲོ་ལྔ། །ཧ་རི་ནི་ས། ཡང་གསང་ལྟར་ན་ཡབ་ཡུམ་གཉིས། ར། ཙ། ཧྲི། ཡ། བླ་མེད་ལྟར་ན་གྲངས་ལས་འདས། །ལར་ནི་རྩ་མདུད་དེ་དག་ལས། །ཡེ་ཤེས་འོད་ཀྱི་གོང་བུ་ནི། །བསམ་ཡུལ་འདས་པ་གནས་པའོ། །དེ་རྣམས་རྩ་ཡི་ཕྱི་ཤར་ཡིན། །ཉུང་ངུ་བསྡུས་ན་སྙིང་ལ་འདུས། །སེམས་ཅན་ཀུན་གྱི་ལུས་ཀྱི་དཀྱིལ། །ཙིཏྟ་རིན་ཆེན་གཞལ་ཡས་སུ། །རྩ་ནི་སྟོང་ཕྲག་གྲངས་མང་ཡང་། །ཁྱད་པར་རྩ་ཆུང་བཞི་རུ་འདུས། །
དེ་ལ་རྐྱང་མ་ཀུན་འདར་མ། །ཀ་རི་ཤེལ་སྦུབས་ཅན་དང་བཞི། །འདི་བཞིའི་ནང་དུ་ཁྱད་པར་དུ། །སྣང་རིག་མངོན་སུམ་ཡེ་ཤེས་ནི། །གནས་ཤིང་རླུང་གི་རྟ་ལ་ཞོན། །འོད་ཟེར་ཉི་ཟེར་ཚུལ་དུ་ནི། །རྩ་ལ་ལམ་བྱས་མིག་ལ་ཞུགས། །ནམ་མཁའི་དབྱིངས་སུ་རྒྱ་རལ་ནས། །སྐུ་གསུམ་ངོ་བོ་རྗེན་པར་སྣང་། །ཞེས་ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། ལུས་ཀྱི་རྩ་གནད་བཤད་པའི་ལེའུ་སྟེ་བཅུ་བདུན་པའོ།། །།ཡང་གཅིག་འདུས་པའི་འཁོར་ཚོགས་ལ། །ཀུན་ཏུ་བཟང་མོས་བཀའ་སྩལ་པ། །ཀྱེ་མ་འདུས་པའི་འཁོར་ཚོགས་ཉོན། །རྩ་ཡི་ནང་དུ་རྒྱུ་བའི་རླུང་། །ཉི་ཁྲི་དང་ནི་སྟོང་ཕྲག་གཅིག །དྲུག་བརྒྱ་དག་ཏུ་འགྱུ་བ་ཡིན། །འགྱུ་བ་ཆེན་པོའི་རླུང་དུ་འདོད། །དེ་ཡི་བྱེད་ལས་རྣམ་པ་གཉིས། །གྱེན་རྒྱུ་ཐུར་སེལ་ལས་རྣམས་བྱེད། །རྩ་ནས་ངེས་པར་འགྱུ་བ་ནི། །འབུམ་ཕྲག་གཅིག་དང་ཁྲི་ཕྲག་གཉིས། །སྟོང་ཕྲག་དྲུག་དང་བརྒྱ་ཕྲག་དྲུག །རྩ་ནས་ངེས་པར་འགྱུ་བ་སྟེ། །འགྱུ་བ་ཆུང་བའི་རླུང་དུ་འདོད། །མཁས་པས་རླུང་གནད་བརྟག་པ་གཅེས། །ཡེ་ཤེས་རླུང་ལ་ཁ་དོག་མེད། །འོན་ཀྱང་འདི་ལྟར་ཤེས་པར་བྱ། །ས་ཆུ་མེ་རླུང་ཆུ་རླུང་དང་། །ནམ་མཁའི་རླུང་དང་རྒྱུ་རླུང་དང་། །རྣམ་པ་ལྔ་ལ་མིང་ལྔ་སྟེ། །སྲོག་འཛིན་རླུང་དང་མེ་རྣམས་རླུང་། །ཁྱབ་བྱེད་རླུང་དང་སྲོག་འཛིན་རླུང་། །དྭངས་སྙིགས་འབྱེད་པའི་རླུང་དང་ལྔ། །རེ་རེ་ལ་ཡང་ལྔ་ལྔ་སྟེ། །འཁོར་ལོ་ལྔ་ལ་རྩ་ལྔ་གནས། །ཡིན་ཀྱང་ཡེ་ཤེས་ལྔ་རུ་འདུས། །ཡེ་ཤེས་ལྔ་ཡང་བྱ་གྲུབ་དང་། །དོན་ལ་རེག་པའི་ངོ་བོར་གནས། །རླུང་ཞེས་རིག་པའི་རང་རྩལ་ཡིན། །ཐམས་ཅད་རླུང་གི་བྱེད་ལས་སོ། །རྩ་དང་རླུང་དང་སེམས་དང་གསུམ། །ཐ་དད་བཤད་ཀྱང་གཅིག་ཏུ་འདུས། །ཁྱབ་པའི་རླུང་ལྔ་སྙིང་ལ་གནས། །ཁྱབ་ནི་ལུས་རྣམས་ཀུན་ལ་ཁྱབ། །རླུང་ནི་སེམས་ཀྱི་རྟ་ཕོ་ཡིན། །འགྱུ་ནི་རྩ་གསུམ་ནང་དུ་འགྱུ། །ཁྱབ་ནི་སྟོང་གསུམ་ཡོངས་ལ་ཁྱབ། །ཅེས་རླུང་གི་གནས་ལུགས་ངོ་སྤྲད་པའི་ལེའུ་སྟེ་བཅོ་བརྒྱད་པའོ།། །།ཡང་གཅིག་འདུས་པའི་འཁོར་ཚོགས་ལ། །ཀུན་ཏུ་བཟང་མོས་བཀའ་སྩལ་པ། །ཀྱེ་ཀྱེ་
འདུས་པའི་སྣང་རིག་ཉོན། །ཡེ་ཤེས་རྩལ་གྱིས་ལུས་གྲུབ་པས། །དེ་ལ་རྩ་གྲུབ་ཐིག་ལེས་ཁྱབ། །རྒྱུ་ཡི་ཐིག་ལེ་ཡི་གེར་གནས། །དེ་ལ་སྐུ་དང་ཡེ་ཤེས་ཀྱི། །ཐིག་ལེ་དག་ནི་གནས་པའོ། །ཁྱད་པར་རྩ་གསུམ་འཁོར་ལོ་ལྔར། །གཞི་ཡི་ཐིག་ལེ་བཟང་པོ་དང་། །ལམ་གྱི་ཐིག་ལེ་བཟང་པོ་དང་། །བཟང་པོ་རྣམས་ཀྱི་རྩེ་མོ་དང་། །བཟང་པོ་རྒྱན་དང་ལྡན་པ་ཡང་། །རྩ་རྣམས་ཀུན་གྱི་ནང་ན་གནས། །སྤྱིར་ན་ཐིག་ལེ་འོད་ལྟར་གནས། །རྩ་རེའི་ནང་ན་རླུང་རེ་གནས། །རླུང་རེའི་རྩ་ལ་ཐིག་ལེ་རེ། །ཐིག་ལེ་སྐུ་དང་ཡེ་ཤེས་སོ། །ཐིག་ལེ་ཆོས་ཉིད་ལྟ་འདོད་ན། །དོན་དམ་དང་ནི་ཀུན་རྫོབ་གཉིས། །དོན་དམ་ཐིག་ལེ་ཆོས་ཀྱི་སྐུ། །ཐིག་ལེ་སྟོང་པའི་སྒྲོན་མའོ། །ཐིག་ནི་ཆོས་སྐུ་འཕོ་འགྱུར་མེད། །ལེ་ནི་ལོངས་སྐུར་གསལ་བ་དང་། །ཉག་ནི་སྤྲུལ་སྐུ་ཀུན་ལ་ཁྱབ། །གཅིག་ནི་སྐུ་གསུམ་གཅིག་ཏུ་འོང་། །ཀུན་རྫོབ་ཐིག་ལེ་འདི་ལྟར་རོ། །ཕོ་ལ་ཐིག་ལེ་དངོས་སུ་འབབ། །མོ་ལ་བདེ་བ་རྒྱས་པའི་དུས། །རྣ་བུག་གཡས་སུ་འབབ་པར་འགྱུར། །ཀུན་རྫོབ་ཐིག་ལེ་དེ་ཉིད་ནི། །འབྱུང་བ་ལྔ་ཡི་དྭངས་མ་ཡིན། །དེ་ལ་ཡི་གེ་ཐིག་ལེ་གནས། །ཀུན་རྫོབ་ཐིག་ལེ་སྦྱངས་པ་ཡིས། །དོན་དམ་ཡི་གེ་ཐིག་ལེ་མཇལ། །འདོད་ཆགས་ཅན་གྱི་རྣལ་འབྱོར་པས། །རིག་མ་མཚན་ཉིད་ལྡན་པ་ལ། །ཀུན་རྫོབ་རྒྱུ་ཡི་ཐིག་ལེ་ནི། །ཕབ་ཅིང་གཟུར་དང་ཟློག་པ་དང་། །རྩ་ལ་བཏབ་ཅིང་རླུང་ལ་བསྲེ། །སྟོང་ཉིད་བརྟེན་བྱ་བློ་བྱ་བློ་རྗེས་བཅད། །ལུས་དང་སེམས་གཉིས་གོ་བཟློག་བྱ། །དེ་ལྟར་བྱས་པའི་ཡོན་ཏན་ནི། །ཆོས་སྐུ་ཐིག་ལེ་ཉག་གཅིག་ཐོབ། །སྐུ་གསུམ་རྡོ་རྗེ་གནས་པར་མཐོང་། །སྤྱིར་ཡང་ཐིག་ལེའི་མཚན་ཉིད་ནི། །གྲངས་ཅན་རྣམ་པ་བཅུ་དྲུག་སྟེ། །གྲངས་མེད་སྤུ་ཡི་གྲངས་དང་མཉམ། །འདས་དང་མ་འདས་གཉིས་ཀྱི་སྲོག །དོན་དམ་ཀུན་རྫོབ་གཉིས་སུ་མེད། །རྒྱུ་ཡི་ཐིག་ལེ་ཡི་གེར་གནས། །རྩ་དང་རླུང་དང་ཐིག་ལེ་གསུམ། །ཕྱི་ལྟར་འབྱུང་བ་རྣམ་ལྔ་ཡིན། །ནང་ལྟར་ཡུམ་ཆེན་རྣམ་ལྔ་ཡིན། །གསང་བ་ལྟར་ན་ཁྲོ་བོ་ཡིན། །ཡང་གསང་ལྟར་ན་ཡེ་ཤེས་ལྔ། །ཡང་
གཅིག་རྒྱུ་ཡི་ཐིག་ལེ་ནི། །ཕྱི་ལྟར་འཁོར་ལོ་ལྔ་ཡིན་ནོ། །ནང་ལྟར་ཐིག་ལེ་ལྔ་ཡིན་ནོ། །གསང་བ་ལྟར་ན་ཡེ་ཤེས་ལྔ། །ཨ་ཧ་རི་ནི་སརྦ་ཅེས་པའོ། །ཡང་གསང་ལྟར་ན་མཁའ་འགྲོ་ལྔ། །ཡང་གཅིག་རྒྱུ་ཡི་ཐིག་ལེ་ནི། །ཕྱི་ལྟར་འབྱུང་བ་ལྔ་ཡིན་ནོ། །ནང་ལྟར་ཉོན་མོངས་དུག་ལྔ་ཡིན། །གསང་བ་ལྟར་ན་སྐུ་ལྔ་སྟེ། །ཡང་གསང་ལྟར་ན་ཡེ་ཤེས་ལྔ། །དེ་ལྟར་རིག་ཐོག་ངོ་ཡང་སྤྲད། །ཅེས་ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། ཐིག་ལེ་ངོ་སྤྲད་པའི་ལེའུ་སྟེ་བཅུ་དགུ་པའོ།། །།ཡང་གཅིག་ཀུན་ཏུ་བཟང་མོ་ཡིས། །རིག་སྣང་འཁོར་ལ་འདི་སྐད་དོ། །ཀྱེ་ཀྱེ་འདུས་པའི་འཁོར་ཚོགས་ཉོན། །ད་ནི་ཡི་གེའི་གནས་ལུགས་བཤད། །རྩ་རླུང་ཐིག་ལེ་གསུམ་གྱི་རྩལ། །ཡེ་ཤེས་འོད་ཀྱི་གོང་བུ་གནས། །ཡི་གེའི་གྲངས་ནི་བསམ་ལས་འདས། །བྱེ་བ་ཐེར་འབུམ་ས་ཡ་སྟེ། །བསྡུས་ན་གྲངས་ཅན་འདི་ལྟར་རོ། །ཨ། ཧ། འ། ས། ཤ །མ། ཨོཾ་ཨཱཿཧཱུཾ། དེ་ལྟར་ཡི་གེ་རྣམ་པ་དགུ། །འགག་མེད་ལམ་ལ་དེ་བཞིན་གཤེགས། །ཡི་གེའི་སྒྲ་ནི་སྟོང་པས་ཚིག་ལས་འདས། །ཨ། ཧ། འ། ས། ཤ །མ། ཨོཾ་ཨཱཿཧཱུཾ། ཆོས་ཐམས་ཅད་སྐྱེ་འགག་གཉིས་སུ་མེད་པའི་ཡི་གེ་རང་ཤར་བའོ། །ཨ། མ། འ། ས། ཤ །ན། དྷ་མ། སརྦ། ཀ་མ། བྷ་ནི། སརྦ། གྷ་ཏ། དྷ་ས་ནི། སརྦ། ཡ་ཤོ། དྷ་ནི། སརྦ། ས། སཾ། འུ། བྷ། བྷ་སུ། དྷ་ན། སརྦ། པན་ཏྲི། པར། སརྦ། ཌ་དུ་ཎ། ཡེ། སརྦ། ཤ །སརྦ། ཨ། ཀ་དུ། གླ། ཨོཾ་སྭ་ར། ཤོ་ཏ་ནི། ཨཱོུཾ། སྐུ་གསུམ་འདུས་མ་བྱས་པའི་ཡེ་ཤེས་ནམ་མཁའ་ནས་རང་ཤར་བའོ། །ཨཱོཾ། ཀོ་ཤོ་མ་ཏི་ཡཱི། ཨ་པྲ་བྷ་ན་སརྦ་ཉ་ན་དུ་ཡ་ཡཱ། དོན་མཚོན་དུ་མེད་པའི་ཡི་གེའོ། །ད་ནི་ཇི་ཙམ་མོ་སྟམ་མ་ནུས་པ། སརྦ་དྷརྨ་ཀཱ་ཡ་མ་ཏི་སཾ་བྷ་ར། སྐུ་ཡོངས་སུ་མྱ་ངན་ལས་འདས་པའི་ཡི་གེ་རང་ཤར་བའོ། །འོ་དེ་དྲེག་མི་ལྷ་ཧ་ཨད་མ་ཀོ་ཤ་ཙཀྲ་ལ་ཀཾ། གསུང་རྣམ་པར་དག་པའི་ཡི་གེས་ངག་ཡོངས་སུ་དག་པ་མྱ་ངན་ལས་འདའ་བའོ། །ཤྲི་བཛྲ་མུ་ཏད་ཏེ་སེ་ཉ། པྲད་ཉ་པ་ར་ས་དུས་སྟན་ཀ་ཏི། ཐུགས་མཉམ་པ་ཉིད་ཀྱི་ཡེ་ཤེས་
རང་ཤར་བའོ། །མཾ་གྷཾ་ཧ་ས་ཧཱུཾ། ཡོན་ཏན་མི་ཟད་པའི་ཡེ་ཤེས་རང་ཤར་བའོ། །སཾ་ཏ་ཀ་ཕུ་མུ་སྐའུ་མ་ཧ་དུ་བྷ་རི་ཀེ་ཏ་ཀེ་ཏ། དྷ་ཐིཾ། ཨ་དྷ་ཐིཾ། ཕྲིན་ལས་ཐོགས་པ་མེད་པའི་ཡི་གེ་རང་ཤར་བའོ། །ཨ། འ། ཧ། ཤ །ས་མ། ཡི་གེ་དྲུག་པ་རྡོ་རྗེའི་སྒྲ། །སངས་རྒྱ་བ་ཡི་ཐབས་བསྟན་པའོ། །ཨ་བག་ཀྱ། ཨེ་མ་ཀི་རི། མ་ཏ་བྷ། སི་ཥ་སི་ཏ་ས་མི་ཏ། སུ་རུ་སུ་རུ་ཀུན་དྷ་ལི། མ་སུ་མ་སུ། ཨི་ཀཱ་ར་ལི་སུ། བྷ་ས་ཏི་ཨི། ཙ་ཀར་བྷུ་ལི་ཡེ། ས་མུན་ཏ། ཙརྱ་སུ་གྷ་ཡཱེ། བྷི་ཏ་ས་ན། འབྱང་བྷུ་ལི་ཡཱེ། ས་ཀ་རི་རུ་ཀ་ན། མ་ཏ་སི་བི་ཏ་ནི། པ་ར་ཁི་ཧི་ས་ཧ། ལ་ས་ཁ་ར་ཏ་ཀ་ལ་ན། ས་བྷུ་ད་ར་ཏ། མེ་གྷེ་ཙར་ས་སྟཾ་ཕུ་རྒྱ་གྷ་ཏ་ར་ཨཱེ། པ་ཤ་སྦྱང་པ་ར་ན། བྷ་ཧི་ཏི། སཾ་མ། སྨིན་ས་གྷུ་ཏི་ཏ་བ་ལ། གུ་ར་གྷ་ཏ། སག་ཁར་ས་ན་ལཾ། ན་ར་ན་ར་ན་ཨཱིཾ་ཐ་ར་བ་ཏི་ལཾ། སིད་དྷ་སིད་དྷ། བྷེ་ས་ཏ་ཡ་ས་ལཾ། བྷུད་དྷ་བྷུད་དྷ། ཚ་ཚ་ཤ་བ་གེ་ལཾ། ས་ས་རི་རཱི། ལི་ལཱི། ཨི་ཨཱིཾ། མ་མར་ར་རྭ། ཀུན་ཏུ་བཟང་མོའི་གཟུངས་ཞེས་བྱ་བ། བཏགས་པས་སངས་རྒྱ་བའི་གདམས་ངག་ཡང་དག་པའོ། །ཨཱོཾ་ཨག་ན་ཡ་མ། ཨི་ཡིན་ན་མོ་ས་ཉི་ཙམ་ས་ཙ་ས་རཾ་ས་ཧཱ། བཏགས་པས་གྲོལ་བའི་ཡི་གེ་རྣམས། །བསྟན་པ་གང་ལ་བབས་པ་ཡིན། །རིན་ཆེན་བཞུ་བའི་ཁུ་བས་བྲི། །སུ་ཡི་ལུས་ལ་བཏགས་པ་རྣམས། །ངེས་པར་གྲོལ་བར་འགྱུར་བའོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། ཡི་གེའི་ངོ་སྤྲོད་ཀྱི་ལེའུ་སྟེ་ཉི་ཤུ་པའོ།། །།ཡང་གཅིག་ཀུན་ཏུ་བཟང་མོ་ཡིས། །སྣང་སྲིད་འཁོར་ལ་འདི་སྐད་དོ། །ཉོན་ཅིག་སྣང་སྲིད་འཁོར་རྣམས་ཉོན། །ཡེ་ཤེས་ལྔ་ལས་འབྱུང་ལྔ་གྲུབ། །འབྱུང་བ་ལྔ་ལས་ལུས་གྲུབ་སྟེ། །ལུས་ལ་རྩ་གྲུབ་རྩ་ནང་རླུང་། །རླུང་ལ་ཐིག་ལེ་ཡི་གེའི་ཚུལ། །དེ་རྣམས་ཀུན་གྱི་རང་རྩལ་ལ། །སྐུ་དང་ཡེ་ཤེས་སྨིན་པའོ། །དེ་ཡང་གནས་ཚུལ་འདི་ལྟར་རོ། །འཇིག་རྟེན་ཁམས་ཀྱི་སེམས་ཅན་ལ། །དེ་བཞིན་གཤེགས་པའི་སྙིང་པོ་ནི། །སྐུ་དང་ཡེ་ཤེས་རྩ་དང་རླུང་། །ཐིག་ལེ་
ཉག་གཅིག་སྐུ་རྣམས་ནི། །རང་ཆས་སུ་ནི་འདི་ལྟར་གནས། །ཏིལ་ལ་མར་གྱིས་ཁྱབ་བཞིན་ནོ། །ལུས་ཅན་རྣམས་ལ་བསྟན་ནས་ནི། །གནས་ནི་སྙིང་གི་དཀྱིལ་དུ་གནས། །ཕྱི་ནི་རྒྱ་ཡང་མ་བདལ་ལ། །ནང་དུ་འོད་ལྔ་མ་འགགས་པ། །ཀུན་བཟང་གའུ་ཁ་སྦྱོར་དུ། །དཔེར་ན་བསེ་ཡི་གའུ་བཞིན། །ཁ་སྦྱོར་ཚུལ་དུ་གནས་པའོ། །གའུ་དེ་ཡི་དཀྱིལ་ཤེད་དུ། །འོད་ལྔའི་དཀྱིལ་དུ་ཞི་བའི་སྐུ། །ཡུངས་འབྲུ་ཙམ་གཅིག་འོད་དུ་གནས། །དེ་ནི་རིགས་པའི་གནས་ལུགས་སོ། །རིག་པའི་སྐུ་ནི་བུམ་སྐུ་འདྲ། །ཡེ་ཤེས་བུམ་ནང་མར་མེ་འདྲ། །ཐུགས་རྗེ་ཉི་མའི་འོད་ཟེར་འདྲ། །དེ་ལས་འབྱུང་བ་ཡེ་ཤེས་ནི། །ཁྲོ་བོ་སྐུ་ནི་ཡུངས་འབྲུ་ཙམ། །མ་འགགས་སྤྱན་ནི་ཕུལ་དག་ཙམ། །འོད་དང་འོད་ཟེར་ཚུལ་དུ་བཞུགས། །གནས་ནི་ཀླད་པའི་ནང་དུ་གནས། །སྐུ་དང་ཡེ་ཤེས་དེ་དག་ནི། །ཐོག་མ་དག་དང་གནས་པའོ། །དེ་ལས་བྱུང་བའི་འོད་ཟེར་ནི། །ཉི་མའི་དཀྱིལ་འཁོར་ལྟ་བུའོ། །མེ་ལོང་དཀྱིལ་འཁོར་དྭངས་པ་ཡིས། །ཉ་ཡི་མིག་བཞིན་གནས་པའོ། །དེ་ཡང་རིག་པ་དག་དང་འདྲེལ། །ཙིཏྟ་སྙིང་གི་རྩེ་མོ་ནས། །རྩ་ནི་དར་དཀར་སྐུད་པ་ཙམ། །སྒལ་ཚིགས་འདབ་ནས་ཡར་ལ་ཡོད། །དེ་ནས་རྩེའུ་ཆུང་གཡས་སུ་ཞུགས། །མགོ་བོ་ཀླད་པའི་རྒྱ་དང་འདྲེལ། །དེ་ཡང་སྣ་འདབ་གཡོན་ནས་གཉིས། །ཚང་ཚིང་ནང་ནས་མིག་དང་འདྲེལ། །དར་སྐུད་བ་མེན་རྭ་འདྲའི་དཀྱིལ། །རྒྱལ་མོའི་དཀྱིལ་དུ་རྩ་དེ་ཟུག །སྣང་བ་ཡི་ནི་འཆར་བྱེད་ལམ། །རྐྱེན་གྱིས་མ་བསྒྲིབས་སེམས་ཅན་མིག །མིང་ནི་རྒྱང་ཞགས་ཆུ་སྒྲོན་ཟེར། །སྙིང་ལ་ཡེ་ཤེས་གནས་པ་དེ། །ལམ་ནི་རྩ་ལ་ཞུགས་ནས་སུ། །ཐོན་ནི་ཡེ་ཤེས་མིག་ལ་ཐོན། །གསལ་ནི་ནམ་མཁའི་དབྱིངས་སུ་གསལ། །དཔེར་ན་མེ་ལོང་དཀྱིལ་འཁོར་དྭངས་པ་ལ། །གང་བསྟན་རྐྱེན་ནི་འཆར་བ་བཞིན། །དེ་བཞིན་རྣམ་དག་སྟོང་པའི་ནམ་མཁའ་ལ། །དོན་ནི་སྙིང་པོ་མ་འདྲེས་ཚོམ་བུ་ལྔ། །མ་སྐྱེས་རྫོགས་པའི་ཚུལ་དུ་གསལ། །འདི་རྣམས་རང་ཆས་ཡིན་པས་གཞན་དུ་མ་ཚོལ་ཞིག །རང་བྱུང་རང་ཤར་ཡེ་ཤེས་འོད། །རྐྱེན་གྱིས་མ་བསྒྲིབས་ཟང་ཐལ་ཉིད། །ཐིག་ལེ་ཐིག་ཕྲན་འོད་ཀྱི་མུ་ཁྱུད་
བཅས། །ཉི་ཟླས་བརྒྱན་པའི་རིན་ཆེན་ཁང་པ་རུ། །འོད་ལྔ་མ་འདྲེས་ཡེ་ཤེས་ཚོམ་བུར་གསལ། །ལྔ་ལྡན་ཚོམ་བུའི་ལྷ་ཚོགས་རྣམས། །དཔག་མེད་དམིགས་མེད་བསམ་ཡུལ་བྲལ། །ཕྱི་ནང་མེད་པར་ཟང་ཐལ་སྣང་། །ཞི་ཁྲོ་སྤྲུལ་པ་ཡང་སྤྲུལ་ཚོགས། །རང་གི་འོད་དང་ཟེར་བཞིན་དུ། །རང་ཆས་རྣམས་སུ་རྣམ་པར་སྣང་། །འཆར་བྱེད་འབྱུང་ཚུལ་མི་འགག་པ། །དབང་པོ་རྣམས་དང་འདྲེལ་བའི་ཚུལ། །སྣང་བའི་ཡུལ་དང་གསལ་བར་སྣང་། །ཀུན་གྱི་སྤྱན་ལ་འཆར་བའོ། །ཆོས་ཉིད་སྟོང་པའི་ནམ་མཁའ་ལ། །རིག་པ་ཡེ་ཤེས་ཟང་མ་གདལ། །ཡེ་ཤེས་འོད་སྣང་ཀུན་ཏུ་གདལ། །རིགས་དྲུག་ལུས་ཀྱང་འོད་ཀྱི་སྐུ། །བེམ་པོ་རྣམས་ཀྱང་ཡེ་ཤེས་ལུས། །ཟང་ཐལ་ཉིད་དུ་གནས་པའོ། །ཀུན་ཏུ་བཟང་མོ་ཀློང་གསལ་འབར་མ་ཉི་མའི་གསང་རྒྱུད་ལས། རྩ་དང་རླུང་གི་ཐིག་ལེ་དང་། སྐུ་དང་ཡེ་ཤེས་གནས་ཚུལ་དང་། ལམ་དང་འཆར་སྒོ་ཡུལ་གང་གསལ་ངེས་པར་གསུངས་པའི་ལེའུ་སྟེ་ཉེར་གཅིག་པའོ།། །།དེ་ནས་འབྱུང་ལྔའི་འཁོར་ཚོགས་དང་། །སྣང་བ་ཆེན་པོའི་འཁོར་ལ་སོགས། །འཁོར་ཚོགས་འདུས་པས་ཡང་གསོལ་པ། །ཀྱེ་ཧོ་ཀྱེ་ཧོ་ཀྱེ་མ་ཀློང་། མ་སྐྱེས་པའི་ནམ་མཁའ། མ་འགགས་པའི་སྣང་བ། ཀུན་ལ་ཆགས་པའི་རིག་པ། སྐུ་གསུམ་གཅིག་ཏུ་རྫོགས་པའི་མཁའ་ཀློང་། དེ་ལྟ་བུའི་སྐུ་དང་ཡེ་ཤེས། སྐུའི་སྐུ་མཆོག །དེ་ལྟ་བུའི་སངས་རྒྱས་རང་ལ་རང་ཆས་སུ་གནས་པ་ལས། མ་རིག་པ་ཡོད་ལགས་སམ་ཞུས་པའི་ལན་དུ་བཀའ་སྩལ་པ། ཀྱེ་ཀྱེ་འབྱུང་བའི་བདག་མོ་ཉོན། །ལེགས་པར་དགོངས་ལ་ཐུགས་སུ་ཆུད། །སྲོག་གིས་བསྡུས་པའི་སེམས་ཅན་ལ། །ཉོན་མོངས་མ་རིག་ཤས་ཆེར་གནས། །རྟེན་ནི་གཟུགས་ཕུང་དག་ལ་བརྟེན། །གནས་ནི་གློ་སྙིང་བར་དུ་གནས། །མ་རིག་པ་དང་སེམས་དང་ཡིད། །རྣམ་པ་གསུམ་དུ་གནས་པའོ། །མ་རིག་རྐྱང་པ་མེད་པ་སྟེ། །སེམས་ཀྱིས་བག་ཆགས་ཐམས་ཅད་སྡུད། །ཡེ་ཤེས་ཉིད་ལ་སྒྲིབ་པར་བྱེད། །
ཡིད་ཀྱིས་ཡུལ་རྟོག་གཉིས་སུ་འཛིན། །རིག་སྣང་ཉིད་ལ་སྒྲིབ་པར་བྱེད། །དེ་གསུམ་གཅིག་ཏུ་འདུས་པ་ལས། །མ་རིག་པ་ཞེས་བྱ་བ་སྟེ། །དེ་ནི་འཁོར་བའི་ངོ་བོ་ཡིན། །དེ་ལ་དུག་ལྔ་ཁོང་ཁྲོ་དྲུག །ཉོན་མོངས་བག་ཆགས་ཐམས་ཅད་ཆགས། །ཀུན་གཞི་དང་ནི་འཛིན་པ་བྱུང་། །ཉོན་མོངས་རྣམ་རྟོག་དེ་རྣམས་ནི། །ལམ་ནི་གང་དུ་བྱུང་བ་ནི། །གློ་སྙིང་གཉིས་སུ་འདྲེལ་བའི་བར། །རྩ་སྲོག་དམར་པོ་ཞེས་བྱ་བ། །སོག་སྦུག་ཙམ་གྱི་ནང་ནས་ཡར། །མ་རིག་རྣམ་རྟོག་ཐམས་ཅད་འགྱུ། །དེ་ནི་སྒལ་ཚིགས་གཡོན་ནས་ཡར། །རྩེའུ་ཆུང་གཡོན་པ་དག་ནས་འདྲེལ། །དེ་ནས་སྣ་འདབ་གཡོན་པ་ནས། །གྱེས་ཏེ་ཁ་སྣ་གཉིས་ལ་ཟུག །རྣམ་པར་རྟོག་པ་ཐམས་ཅད་ནི། །དབུགས་ཀྱི་རྟ་ལ་ཞོན་བྱས་ནས། །ཉོན་མོངས་བརྒྱད་ཁྲི་བཞི་སྟོང་འགྱུ། །དུག་ལྔ་ཁོང་ཁྲོ་རང་གར་སྤྱོད། །ཡུལ་རྐྱེན་རྣམས་ལ་བརྟེན་བྱས་ནས། །གཟུང་བའི་ཡུལ་དང་འཛིན་པའི་སེམས། །ཐམས་ཅད་སོགས་པའི་གཞི་མ་ནི། །རྣམ་པ་གསུམ་དུ་དབྱེ་བ་སྟེ། །ཡེ་ཐོག་དང་པོའི་ཀུན་གཞི་ནི། །རིག་པའི་སྣང་བ་སྡུད་ཅིང་བསོགས། །སྦྱོར་བ་དོན་གྱི་ཀུན་གཞི་ནི། །ཉོན་མོངས་སྣ་ཚོགས་སོགས་པར་བྱེད། །ཉོན་མོངས་སོགས་པའི་ཀུན་གཞི་ནི། །ཕུང་པོ་ཁམས་ལ་བརྟེན་བྱས་ནས། །ཉོན་མོངས་དུ་མའི་རྟེན་གནས་བྱེད། །དཔེར་ན་རིགས་ངན་ཁྱེའུ་བཞིན། །སྒོ་ངའི་ཡུལ་ལ་སེམས་ཀྱིས་བཟུང་། །སྣང་ཡུལ་དུ་མ་ཉིད་དུ་བཟུང་། །དེ་ཕྱིར་ཁམས་གསུམ་ཁང་པ་རུ། །འཁོར་བ་ཉིད་དུ་འཁོར་བའོ། །དེ་རྣམས་དབང་དུ་མ་ཤོར་བས། །རིག་པ་ནམ་མཁར་བརྡལ་བར་བྱ། །བར་སྣང་ཁམས་སུ་ཡེ་ཤེས་ངོས་བཟུང་ངོ་། །ཞེས་མ་དག་པའི་སེམས་ཅན་ཐམས་ཅད་ལ། ཉོན་མོངས་པ་རང་ཁར་ཤས་ཆེ་བས་ན། མ་རིག་པ་དང་སེམས་དང་། ཡིད་གསུམ་གྱི་གནས་ལམ་ཡུལ་བསྟན་པའི་ལེའུ་སྟེ་ཉེར་གཉིས་པའོ།། །།
ལེའུ་ཉེར་གསུམ་པ་འདི་ཉིད་ལ། རྒྱུད་ཐམས་ཅད་ཀྱི་མཐའ་བསྡུས་པ་སྟེ། །ཀློང་གསལ་གསུམ་དང་ཟླ་ཤེལ་དང་། །ཁྱད་པར་ཀུན་ཏུ་བཟང་མོའི་རྒྱུད། །ཀློང་གསལ་འབར་མའི་རྒྱུད་དག་ལས། །མ་གྲུབ་ཐོག་མའི་གོང་དག་ཏུ། །ཀུན་ཁྱབ་ཡེ་ཤེས་གནས་པ་ལས། །འཁྲུལ་མེད་འཁྲུལ་དང་གནས་པའི་ཚུལ། །ལམ་དང་འཆར་སྒོ་ཡུལ་གང་གསལ། །རྐྱེན་གྱི་བར་ཆད་ཇི་ལྟ་བུ། །ཞེས་པའི་ཚིག་རྐང་དགུ་པོ་ལ། །ད་ནི་རྐྱེན་གྱི་བར་ཆད་བསྟན། །གལ་ཏེ་རྣལ་འབྱོར་གང་ཞིག་རྣམས། །རང་ངོ་མ་ཤེས་རང་རྒྱུད་འཁྲུལ། །སྣང་བ་རྟོག་པའི་ཡུལ་ལ་ཤོར། །སྟོང་པ་དངོས་པོ་མཚན་མར་ཤོར། །བདག་འཛིན་གཉིས་ཀྱི་བར་ཆད་ནས། །བག་ཆགས་རིམ་པ་བསལ་དཀའ་བས། །དེ་ལ་ཉམས་ལེན་འདི་ལྟར་གཅེས། །ཉམས་ལེན་གོང་འཕེལ་གྲོལ་བའི་རྟགས། །བར་ཆད་བྱུང་ན་རྒྱུད་འདི་ཉིད། །རིམ་པ་ལྟར་དུ་ངོ་ཡང་སྤྲད། །ལེགས་པར་ངོ་ནི་མ་འཕྲོད་ན། །བག་ཆགས་གར་སྤྱིན་འབྱར་སླ་བས། །འགོགས་པར་དཀའ་བ་ཉིད་དུ་འགྱུར། །སེམས་ལ་སངས་རྒྱས་གནས་གྱུར་ཀྱང་། །མ་བསྒོམས་བར་དུ་བྷུ་ནི་ཐ། །རང་རིག་ཡེ་ཤེས་ཡིན་གྱུར་ཀྱང་། །མ་བལྟས་བར་དུ་གསལ་མི་འགྱུར། །དཔེར་ན་ཏིལ་འབྲུ་ཡུངས་འབྲུ་ལ། །མར་ནི་ཡེ་ནས་གནས་གྱུར་ཀྱང་། །མ་བཙིར་བར་དུ་མར་མི་འབྱུང་། །འོ་མ་མར་གྱི་རང་བཞིན་ཏེ། །མ་བསྲུབས་བར་དུ་མར་མི་འབྱུང་། །ས་ལ་དྲོད་རླན་ལྡན་གྱུར་ཀྱང་། །སོ་ནམ་མ་བྱས་འབྲུ་མི་འཁྲུངས། །ལུས་པོ་སངས་རྒྱས་ཞིང་ཁམས་ཀྱང་། །མ་སྦྱངས་བར་དུ་ལས་མི་དག །ངག་རྣམས་ཆོས་ཀྱི་རང་སྒྲ་སྟེ། །མ་གསལ་བར་དུ་དོན་མི་རྟོགས། །ཡིད་ནི་ཀུན་ཏུ་བཟང་མོ་སྟེ། །མ་རྟོགས་བར་དུ་བརྡ་མི་འཇལ། །དེ་ལྟར་དོན་ནི་བསྒོམ་པར་བྱ། །ཞེས་སོ། །ཀུན་ཏུ་བཟང་མོ་ཉི་མའི་གསང་རྒྱུད་ལས། ཞལ་གདམས་གནད་དུ་བསླབ་པའི་ལེའུ་སྟེ་ཉེར་གསུམ་པའོ།། །།དེ་ནས་སྟོན་པ་ཀུན་ཏུ་བཟང་མོ། ཡུམ་གྱི་མཁའ་ནས་ཀློང་རྡོལ་ཏེ། །སྐུ་ཡི་དབྱིངས་ནས་གསུང་གི་ཟེར། །
ཐུགས་ཀྱི་ཀློང་ནས་རིག་པའི་ལྗགས། །དགུ་འགྱུར་ལྕོག་ཆུང་གྲོ་མོའི་སྐད། །སྣང་བའི་ཡུལ་ན་ཆོས་ཀྱི་སྒྲ། །རང་སྐད་དུ་ནི་འདི་སྐད་དོ། །ཀྱེ་མ་འབྱུང་ལྔའི་བདག་མོ་ཉོན། །སྣང་བ་གཟུགས་ཀྱི་སྐུ་ཤར་བས། །ངོ་བོ་ཉིད་ཀྱི་འཁོར་ཚོགས་དགོངས། །དུས་གསུམ་སངས་རྒྱས་ཐུགས་ཀྱི་བཅུད། །གསང་བ་ཡང་གསང་བླ་ན་མེད། །ཀུན་ཏུ་བཟང་མོ་སྙིང་གི་ཐིག །མཐར་ཐུག་ཨ་ཏིའི་དགོངས་པ་འདི། །ཚིག་དང་ཡི་གེར་མི་འོས་ཀྱང་། །སྙིགས་མའི་སེམས་ཅན་འཇུག་པའི་ཕྱིར། །མ་བཅོས་ལྷུག་པར་མཐོང་ཞེས་པས། །པད་འབྱུང་བདག་གིས་གསལ་བར་བཀོད། །ལྷ་ལྕམ་པད་གསལ་ཡི་དམ་མཛོད། །རྡོ་རྗེ་སྤྲེ་ཆུང་ཐུགས་ལ་འཆང་། །རྒྱལ་པོ་ཡབ་ཡུམ་གསང་མཛོད་ཅིག །ནམ་ཞིག་རྐྱེན་གྱིས་བར་ཆོད་ན། །རྒྱུད་འདི་འགྲོ་བ་ཡོངས་ཀྱི་དཔལ། །ཁྱད་པར་གླང་ལུག་ཁྱི་འབྲུག་བཞི། །སྟག་སྤྲེལ་བྱ་ཡི་ལོ་པ་དང་། །རིགས་ལྔ་ཕ་རོལ་ཕྱིན་དྲུག་མིང་། །རྣམ་པ་བཅུ་གཅིག་དཔལ་དུ་ཤོག །སྨོན་ལམ་རེ་རེ་བཅུགས་པ་དབྱིངས་ལ་གསོལ། །དེ་ནས་ཡུམ་གྱིས་གསུངས་པའི་ཆོས་རྣམས་ནི། །སྙིང་པོ་གཅིག་ཏུ་བསྡུས་པའོ། །ཟབ་མོ་གནད་ཀྱི་གདམས་པ་འདི། །དུས་གསུམ་སངས་རྒྱས་དགོངས་པ་ཡིན། །མཁའ་འགྲོ་རྣམས་ཀྱི་སྙིང་ཁྲག་ཡིན། །ཡུམ་ཆེན་བཞི་ཡི་སྙིང་བཅུད་དོ། །མཁའ་འགྲོ་སྡེ་ལྔའི་ཐུགས་ལ་སྦོས། །རྡོ་རྗེ་འཆང་གིས་དོན་འདི་ཤོད། །ལོངས་སྐུ་རིགས་ལྔས་རྒྱ་འདི་ཁྲོལ། །དགའ་རབ་རྡོ་རྗེས་རྒྱུད་འདི་ཟུང་། །སིང་ཧ་ཉིད་ཀྱིས་ཆོག་དོན་ཤོད། །པདྨའི་མཚན་གྱིས་ཡི་གེར་ཐོབ། །སྙིགས་མའི་དུས་སུ་ཆོས་འདི་དར། །ཀུ་སུ་ལུ་ཡི་དོན་ཆེད་དུ། །ང་ཡིས་དོན་འདི་བཤད་པར་བྱ། །སྣང་བ་ཡེ་ཤེས་བལྟ་བའི་ཕྱིར། །ཉམས་ལེན་རིམ་པ་འདི་ལྟར་རོ། །མ་རིག་སེམས་ཡིད་རྣམ་པ་གསུམ། །ནམ་མཁའ་གར་ཁྱབ་གསུམ་གྱིས་ཁྱབ། །གསུམ་པོ་གར་ཁྱབ་ཉོན་མོངས་ཁྱབ། །སེམས་ཅན་ཉོན་མོངས་གསུམ་སྡོང་ཡིན། །དེ་དག་ཐམས་ཅད་བསྡུ་བ་ན། །ཉོན་མོངས་བརྒྱད་ཁྲི་བཞི་སྟོང་ཡིན། །དེ་ཡང་བསྡུས་ན་དུག་ལྔར་འདུས། །དེ་ཡང་བསྡུས་ན་དུག་གསུམ་ཡིན། །
དེ་ཡང་བསྡུས་ན་གཟུང་འཛིན་གཉིས། །དེ་ཡང་རྣམ་རྟོག་གཅིག་ཏུ་འདུས། །རྣམ་རྟོག་ཉིད་ཀྱང་མ་རིག་པ། །མ་རིག་པ་ལ་རྟེན་བྱས་ནས། །གཟུང་འཛིན་ཐག་པ་དམ་དུ་བསྡམས། །ངན་སོང་གསུམ་གྱི་སྒྲོག་ཏུ་བཅུག །འཁོར་བ་ཉིད་དུ་འཁོར་བའོ། །འཁོར་བ་དེ་ལ་སྐྱོབ་པའི་ཐབས། །དཀོན་མཆོག་གསུམ་པོ་མ་གཏོགས་པ། །གཞན་མ་སྐྱོབ་གཞན་མི་འདུག་པས། །ཉོན་མོངས་རྣམ་རྟོག་སྡུག་བསྔལ་གྱིས། །གང་དུ་ཁྱབ་པ་ཐམས་ཅད་ཀུན། །འཕགས་པའི་ཐུགས་རྗེས་ཁྱབ་པའོ། །ཐུགས་རྗེས་གར་ཁྱབ་སྐུ་ཡིས་ཁྱབ། །སྐུ་ཡིས་གར་ཁྱབ་ཟེར་གྱིས་ཁྱབ། །དེ་རྣམས་བསྡུས་པར་གྱུར་པ་ན། །གསང་སྔགས་ཀུན་གྱི་གནད་འདུས་པས། །གསང་སྔགས་གནད་རྒྱུད་ཅེས་སུ་གྲགས། །འདི་ནི་ནོར་བུ་རིན་པོ་ཆེ། །འདི་ནི་མུན་པའི་སྒྲོན་མེའོ། །མངོན་སུམ་རང་གནད་བཅར་ཕོག་ཏུ། །སྟོན་པར་བྱེད་པའི་རྒྱུད་འདི་ལ། །ཐུགས་ནས་ཐུགས་སུ་བརྒྱུད་པའི་ཕྱིར། །རྒྱལ་བ་དགོངས་པའི་བརྒྱུད་པ་ཚང་། །བརྡའ་ནས་བརྡ་རུ་བརྒྱུད་པས་ན། །བརྡའ་ཡི་བརྒྱུད་པ་ཟམ་མ་ཆད། །སྙན་ནས་སྙན་དུ་བརྒྱུད་པས་ན། །སྙན་ཁུང་བརྒྱུད་པ་ཟམ་མ་ཆད། །གཏེར་ནས་གཏེར་དུ་བརྒྱུད་པའི་ཕྱིར། །གཏེར་གྱི་བརྒྱུད་པ་ཟམ་མ་ཆད། །འདི་མེད་དབང་གཞི་བསྐུར་བ་ཀུན། །ལག་རྡུམ་གསེར་གླིང་ཕྱིན་པ་འདྲ། །ཁ་བྲག་ལམ་ལ་ཞུགས་པ་འམ། །བྲག་སྐམ་སོ་ནམ་བྱས་པ་འདྲ། །རྒྱུད་འདི་རིན་ཆེན་གསེར་གྱིས་བྲིས། །རྟག་ཏུ་མི་འབྲལ་ལུས་ལ་བཅང་། །རྒྱུན་དུ་མ་ཡེངས་དོན་རྣམས་བསྒོམ། །རྒྱུད་འདི་རེག་པ་ཙམ་གྱིས་ཀྱང་། །ཡུམ་ཆེན་ང་དང་འདུ་འབྲལ་མེད། །འཛིན་ཆགས་སྐྱེས་བུ་བུཌྜྷའོ། །རྒྱུན་དུ་གུས་པའི་མཆོད་པ་ཡིས། །ཁྱིམ་མམ་ཡུལ་གནས་ས་ཕྱོགས་དེར། །མཐུན་རྐྱེན་ཡོན་ཏན་དཔག་མེད་འབྱུང་། །ཕྱི་མ་བར་དོ་མེད་པར་གྲོལ། །རྒྱུད་འདི་སུ་ཡིས་ཀློག་པ་དེ། །ལྟ་བའི་དོན་ནི་ཁོང་དུ་ཆུད། །རྒྱུད་འདི་སུ་ཡིས་བྲིས་པའི་མི། །ཕྱི་མ་སྤྲུལ་པའི་སྐུ་ཐོབ་འགྱུར། །རྒྱུད་འདི་གང་ན་གནས་པ་ན། །མཁའ་འགྲོ་
ཆོས་སྐྱོང་སྤྲིན་ལྟར་འཁྲིགས། །ལྷ་དང་ལྷ་མོས་མཆོད་པ་བྱེད། །དེ་ལྟ་བུ་ཡི་རྒྱུད་ཆེན་འདི། །བླ་མ་མི་འཁུར་རང་ཆེ་འཛིན། །དམ་ཚིག་ཉམས་དང་རྫུན་པོ་ཆེ། །བྲིལ་མོ་ནོར་ཆུང་ཚང་རྫིང་སོ། །སྒོམ་སྒྲུབ་མི་ནུས་ཆང་ནག་སྲིད། །ཤེས་རབ་ཆེ་ཡང་ཉམས་ལེན་དོར། །འབུལ་པ་མི་ནུས་སྟོང་ཞུས་བྱེད། །དད་གུས་མེད་ཅིང་གཡོ་ཁྲམ་སྒྱུར། །བློ་མི་བརྟན་ཅིང་སྙིང་རུས་མེད། །དེ་ལྟ་བུ་ལ་བཀའ་འདི་གསང་། །བློ་ཆུང་བརྐམ་དྲེད་ཅན་ལ་གསང་། །སྐལ་མེད་རང་འདོད་ཅན་ལ་གསང་། །དམ་ཉམས་ལག་ཏུ་ཤོར་བ་ན། །གསང་སྔགས་ཐམས་ཅད་བཀའ་འཆོལ་ནས། །མཁའ་འགྲོ་འཁྲུགས་ཏེ་མི་དགེ་འབྱུང་། །བཀའ་སྲུང་འཁྲུག་ཅིང་སྲིད་མི་སྲེག །དེ་བས་རབ་གསང་ནན་ཆགས་བྱ། །གཏད་པར་བྱ་བའི་སྣོད་ལྡན་ནི། །མཁའ་འགྲོ་སྡེ་ལྔ་རྣམས་ལ་གཏད། །རིག་རྩལ་མཁའ་འགྲོ་ཁྱེད་རྣམས་ཀྱིས། །སྤྱན་རས་གཟིགས་ཀྱི་སྤྲུལ་པ་མཆོག །པདྨ་ཐོད་ཕྲེང་རྩལ་ལ་གཏོད། །དེས་ཀྱང་རིན་ཆེན་གཏེར་དུ་གདམས། །ནམ་ཞིག་དུས་ཀྱི་ཐ་མ་ལ། །སེམས་ཅན་ཉོན་མོངས་རང་གར་སྤྱོད། །ཆོས་ཞུགས་མང་ཡང་ཆོས་བརྒྱད་སྒྲུབ། །སྒོམ་ཆེན་སྒོམ་སྒྲུབ་ཡལ་བར་དོར། །དགེ་བཤེས་ཐམས་ཅད་བཟང་རྫུས་འདེབས། །གསང་སྔགས་ཁྲོམ་བཤད་རང་གར་སྤྱོད། །མཚན་ཉིད་སྡེ་གསུམ་ཆོས་ལ་ཡང་། །དགེ་བཅུ་ཕ་རོལ་ཕྱིན་དྲུག་དང་། །ལམ་ལྔ་ས་བཅུ་སྤྱོད་མཁན་མེད། །བདག་འཛིན་རྟོག་པས་ཁེངས་པའི་ཚེ། །འདུས་བྱས་སྐྱེས་བུ་ལས་འཕྲོ་ཅན། །རྒྱུ་འབྲས་ཆོས་མཁྱེན་རིག་གནས་མཁས། །བློ་ཆེ་བློ་ལྡན་བློ་གསལ་བ། །འཇམ་དཔལ་ཉིད་ཀྱི་སྤྲུལ་པ་མཆོག །ཐེག་ཆེན་ཨ་ཏིའི་དོན་སྤྱོད་པ། །བླ་མེད་ཏི་ལའི་བདག་པོ་ལ། །བཀའ་འདི་གཏོད་ཅིག་ས་མ་ཡ། །དེས་ཀྱང་དོན་བཅུད་ལྔ་ལྡན་པའི། །བུ་མཆོག་རྣམས་ལ་རིམ་གྱིས་གཏོད། །ཅེས་གསུངས་སོ། །དེ་ནས་ཡུམ་ཆེན་ཉིད་ཆོས་སྐུ་སྐྱེ་མེད་ཀྱི་མཁའ་ཀློང་དུ་དམིགས་མེད་དུ་ཡལ་ཏེ། ཡེ་ཤེས་ཀྱི་མཁའ་འགྲོ་མ་རིགས་ལྔ་ཡང་ཡི་རངས་ཏེ། འཁོར་རྣམས་ཀྱིས་ཀྱང་མངོན་པར་བསྟོད་དེ། དབང་བཞི་ཐོབ་སྟེ་འཁོར་བཅས་
ཀྱིས་ཡོན་ཏན་ཐམས་ཅད་རྫོགས་ནས། སླར་ཡང་འཁོར་བ་དོང་ནས་སྤྲུག་པ་ལ་འཇུག་ཅིང་། སེམས་ཅན་རྣམས་སྨིན་གྲོལ་ལ་བཀོད་དོ། །ཐེག་པ་ཀུན་གྱི་མཐར་ཐུག །རྨད་བྱུང་སྙིང་པོའི་བསྟན་པ། མཁའ་འགྲོ་གསང་ཐིག་ཀློང་གསལ་འབར་མ་ཉི་མའི་གསང་རྒྱུད་ལས། ལེའུ་བརྒྱ་དྲུག་ཅུ་རྩ་དྲུག་པ་ལས། དབང་བཞིའི་ལེའུ་གསང་སྔགས་གནད་རྒྱུད་ཅེས་བྱ་བའི་མཇུག་ཡོངས་སུ་གཏད་པའི་ལེའུ་སྟེ་ཉི་ཤུ་རྩ་བཞི་པའོ།། །།ས་མ་ཡ། རྒྱ་རྒྱ་རྒྱ། གཏེར་རྒྱ། སྦས་རྒྱ། ཟབ་རྒྱ། དམ་རྒྱ། སྔགས་སྲུང་ཤན་པ་ནག་པོ་དང་། གཟའ་བདུད་དུག་གི་སྤུ་གྲི་འབར་བ། དམ་ཅན་རྡོ་རྗེ་ལེགས་པ་གསུམ་གྱིས་བཀའ་འདི་ཡི་སྲུང་མ་གྱིས་ཤིག །ཐུབ་པས་སྲུངས་ཤིག། །།