བསྟན་པ་དེ་ཉིད་འཇིག་རྟེན་དུ་ཇི་ལྟར་བསྐྱངས་པའི་ཚུལ་རགས་པ་ཙམ་བཤད་པའི་སྐབས།
ཨ བ བོ དྷ མ ན ནྟེ བྷི ཿ བི མུ ཙཱི ཧྲྀ ཏྐྲྀ པཱ ྅ མྦྷ སཱ ཨཱ ཌླྀ ཤཱ ཏ པ ར སྨཻ དྷུ ཀྲ བྷ བེ བྷ བེ བ བ རྟ ཏེ
ཕ་མཐའ་མི་མངོན་མངོན་པར་རྟོགས་པ་ཡིས། །རྣམ་པར་གྲོལ་བའི་ཐུགས་ནི་སྙིང་རྗེའི་ཆུས། །རབ་བརླན་གཞན་ལ་བདེ་མཆོག་འཇོ་སླད་དུ། །སྲིད་པའི་གནས་སུ་སྲིད་པ་བཞིན་དུ་འཇུག།
བྱང་ཆུབ་སེམས་ཀྱིས་དྲེས་པའི་བདུད་རྩིའི་སྤྲིན། །ཆོས་དབྱིངས་ས་བླའི་ལམ་ཀུན་འགེངས་པ་ལས། །མི་འཛད་འགྲོ་རྒྱུད་དྲི་མས་ནོག་པ་གང་། །དག་བྱེད་རྒྱུད་དུ་འབབ་པའི་ཕྲིན་ལས་ཅན། །བརྗོད་མེད་ཆོས་འཁོར་ནཱ་ད་རྟག་པའི་སྒྲ། །སྒྲིབ་པ་ཀུན་བྲལ་རྡོ་རྗེའི་སྙན་དབང་གིས། །ཡུལ་དུ་མཛད་པའི་བརྫུ་བག་ལ་བརྟེན་ནས། །སྐལ་བ་ལྡན་ལ་གདམས་པས་རབ་མཚོན་ཏེ། །བཤད་དང་སྒྲུབ་པའི་ལམ་ཆེན་གྱིས་ཕྱེ་བའི། །སྨིན་གྲོལ་འོད་ཟེར་བྱེ་བས་འཇིག་རྟེན་འདིར། །མུན་པའི་བརྟན་པ་འཕྲོག་པའི་ཆོས་མཆོག་ཉི། །འདྲེན་པའི་ཤིང་རྟ་ཆེ་རྣམས་རྨད་དུ་བྱུང་། །རྒྱལ་བའི་ལེགས་གསུངས་རྒྱ་མཚོའི་ཕ་རོལ་དུ། །མངོན་པར་སོན་ནས་དོན་མཆོག་དབྱིག་གི་ཆར། །གང་དུ་སྐལ་བ་ལྡན་ལ་འབེབས་མཛད་པའི། །དེད་དཔོན་དེ་དག་སུ་ཡིས་ཕྱག་འོས་མིན། །གང་གི་རྣམ་ཐར་ཉི་འོད་ཀྱིས་ཕྱེ་བའི། །བློ་གྲོས་ཆུ་སྐྱེས་འཛུམ་བརྒྱ་གྲོལ་བ་ལས། །དད་པའི་ཀེ་སར་ཕང་ཕུང་རྣམ་བཀོད་པས། །རྒྱལ་རྣམས་མཉེས་པའི་ཕྱོགས་སུ་རབ་བསླན་ཏེ། །གཞལ་དཀའི་ཟོང་གིས་ཚེ་རབས་བྱེ་བར་ཡང་། །རྙེད་པར་སླ་མིན་ཐུབ་མཆོག་བསྟན་པའི་ཚུལ། །སྲིད་གསུམ་ཀུན་དགར་བྱེད་པའི་གཏམ་བཟང་པོ། །ཐོས་པའི་རྣ་བ་དེ་ཡང་བདུད་རྩིར་བྱེད།། ད་ནི་རིམ་པ་དེ་དག་གི་ནང་ནས་གསང་སྔགས་རྡོ་རྗེ་ཐེག་པའི་ཆོས་ཀྱི་འཁོར་ལོ་གང་དུ་བསྐོར་བ་དང་། གང་གིས་བསྐོར་བ། བསྟན་པ་དེ་ཉིད་ཇི་ལྟར་བསྐྱངས་ཚུལ་དང་བཅས་པའོ། །དེ་ལ་རང་ལུགས་ཐུན་མོང་མ་ཡིན་པ་འདིར་བསྟན་པའི་བབ་ལུགས་ཆེན་པོ་གསུམ་དུ་གནས་པ་སྟེ། རྒྱལ་བ་དགོངས་པའི་བརྒྱུད་པ། རིག་འཛིན་བརྡའི་བརྒྱུད་པ། གང་ཟག་སྙན་ཁུང་གི་བརྒྱུད་པ་དང་གསུམ་མོ། །དེའང་བཤད་རྒྱུད་རྒྱ་མཚོ་ལས། རྒྱལ་བ་སེམས་དཔའ་རྣལ་འབྱོར་པ། །དགོངས་པ་རིག་པ་རྣ་བར་བརྒྱུད། །ཅེས་སོ། །དེ་ལ་དང་པོ་ནི་འཁོར་འདས་ཡོངས་ཀྱི་སྤྱི་དཔལ་
ཁྱབ་བདག་རིགས་དྲུག་པ་ཀུན་ཏུ་བཟང་པོ་རང་སྣང་དབྱིངས་ཀྱི་ཞིང་ཁམས་ཤིན་ཏུ་དག་པ་རྡོ་རྗེའི་འོག་མིན་ཆེན་པོར་མཚན་རྫོགས་རྡོ་རྗེ་འཆང་གི་རྣམ་པས་རང་བཞིན་གཉིས་སུ་མེད་པའི་འཁོར་རྒྱལ་ཚབ་རིགས་ལྔའི་སྟོན་པ་དང་རང་སྣང་གི་འཁོར་རྒྱལ་བ་ཞི་ཁྲོའི་དཀྱིལ་འཁོར་ཚད་མེད་པའི་རྣམ་པ་དང་བཅས་པར་སྣང་བ་རྣམས་ལ། འོད་གསལ་རྡོ་རྗེའི་སྙིང་པོ་ཆོས་ཉིད་བསམ་གྱིས་མི་ཁྱབ་པའི་གནས་ལུགས་རྫོགས་པ་ཆེན་པོ་ཚིག་དང་སྒྲས་བརྗོད་པ་ཐམས་ཅད་དང་བྲལ་བའི་དེ་ཁོ་ན་ཉིད་ཀྱི་ཡེ་ཤེས་དགོངས་པས་བྱིན་གྱི་བརླབས་ཀྱིས་རྟོགས་པར་མཛད་པ་ལ་ཆོས་སྐུའི་གསུང་དུ་བརྡས་བཏགས་པ་སྟེ། ཐལ་འགྱུར་ལས། དེས་ན་ཆོས་ཉིད་ནམ་མཁའ་ལ། །ཁྱབ་འཇུག་ཆེན་པོའི་གསུང་གིས་ནི། །བྱིན་གྱིས་བརླབས་ཀྱིས་རང་སྒྲར་སྣང་། །ཞེས་པ་དང་། སྙིང་འགྲེལ་ལས།སྟོན་པ་ཆོས་ཀྱི་སྐུས་འཁོར་ཡེ་ཤེས་རྒྱ་མཚོ་ལ་སྐྱེ་མེད་དོན་གྱི་གསུང་གིས་བརྡ་སྤྲོད་པའོ། །ཞེས་དང་། སྒྱུ་འཕྲུལ་ལམ་རིམ་ལས་ཀྱང་། བརྗོད་དང་འདྲ་བར་བརྡའ་སྤྲོད་པ། །ངོ་བོ་ཉིད་ཀྱིས་བཤད་པའི་ཕྱིར། །མ་འོངས་དོན་དུ་གཏན་ཚིགས་ངེས། །ཞེས་གསུངས་སོ། །བྱེ་བྲག་འོད་གསལ་རྡོ་རྗེ་སྙིང་པོའི་གནས་ཟབ་ཅིང་རྒྱ་ཆེ་བའི་ཕྱོགས་རྣམས་ནི་གནས་དང་སྟོན་འཁོར་ཆོས་རྣམས་རང་བྱུང་རིག་པའི་ཡེ་ཤེས་ལྷུན་གྲུབ་རིན་པོ་ཆེའི་སྦུབས་སྐུ་གསུམ་རང་སྣང་བཀོད་པ་ཆེན་པོའི་རང་བཞིན་འབྱམས་ཀླས་པ་ལས་སྤྲུལ་པ་སོགས་སྒྲ་རྟོག་གི་ཡུལ་ལས་བརྒལ་བའི་ཆོས་ཉིད་མཉམ་པ་ཆེན་པོར་རོ་གཅིག་པའི་ཚུལ་གྱིས་ཆོས་ཀྱི་འཁོར་ལོ་བསྐོར་བ་ལ་གཡོ་བ་མེད་པ་སྟེ། རྫོགས་པ་ཆེན་པོའི་རྒྱུད་ཉི་ཟླ་ཁ་སྦྱོར་ལས། གང་གིས་ཀྱང་མ་བྱས་པ་ཡོངས་སུ་བཀོད་པ་ཆེན་པོའི་གནས། རང་བཞིན་གྱིས་རྣམ་པར་དག་པ། ཁ་དོག་དང་གཟུགས་བརྙན་ཐམས་ཅད་དུས་གཅིག་ལ་གསལ་བ། བཀོད་པ་རྒྱ་ཆེ་ལ་དཀྱིལ་ཡངས་པ། ཁ་དོག་མ་འདྲེས་ལ་ཡོངས་སུ་
རྫོགས་པ། ལྡེམ་བཞིན་པ། མེར་བཞིན་པ། འགུལ་བཞིན་པ། འཕྲིག་བཞིན་པ། ཤིན་ཏུ་མཉམ་པ་ཆེན་པོ་ན། བཅོམ་ལྡན་འདས་མངོན་པར་བྱང་ཆུབ་པ་ཆེན་པོ། སངས་རྒྱས་ཐམས་ཅད་ཀྱི་ལྟ་བ་དང་། དགོངས་པ་དང་། མཛད་སྤྱོད་མི་མཛད་པ་རྒྱན་གྱི་འཁོར་ལོ་ཆེན་པོ་ཉིད། རིག་པ་རྡོ་རྗེ་ལུ་གུ་རྒྱུད་དང་། རིག་པ་ཁྱབ་གདལ་ཆེན་པོའི་སྐུ་དང་། རིག་པ་མངོན་སུམ་དུ་སྣང་བྱེད་ཀྱི་སྐུ་དང་། མ་བཀོད་པའི་རང་བཞིན་གྱི་ཡེ་ཤེས་ཆེན་པོ་ལྔ་དང་། ཆོས་ཐམས་ཅད་སྟོང་པ་ཉིད་དང་། མཚན་མ་མེད་པ་དང་། མི་དམིགས་པ་དང་། རང་གི་མཚན་ཉིད་དང་བྲལ་བ་དང་། མི་གནས་པའི་སྟོང་པ་ཆེན་པོ་དང་། མི་འགྱུར་བ་ཆོས་སྐུའི་ཚུལ་འཛིན་པ་དང་། ཀུན་ཏུ་གསལ་བ་ལོངས་སྤྱོད་རྫོགས་པའི་སྐུའི་ཚུལ་འཛིན་པ་དང་། མཛད་པ་མ་ལུས་པ་སྤྲུལ་པ་སྐུའི་ཚུལ་འཛིན་པ་དང་། རྣམ་པར་འཕྲུལ་པ་ཅི་ཡང་མ་ཡིན་པའི་རིགས་ལས། དེ་བཞིན་གཤེགས་པ་རང་གི་མཚན་ཉིད་འཛིན་པའི་རིགས་དང་། རྡོ་རྗེ་རིགས་ཀྱི་མཚན་ཉིད་འཛིན་པའི་ལྷ་དང་ལྷ་མོ་དང་། རིན་པོ་ཆེའི་རིགས་ཀྱི་མཚན་ཉིད་འཛིན་པའི་ལྷ་དང་ལྷ་མོ་དང་། པདྨའི་རིགས་ཀྱི་མཚན་ཉིད་འཛིན་པའི་ལྷ་དང་ལྷ་མོ་དང་། ལས་ཀྱི་རིགས་ཀྱི་མཚན་ཉིད་འཛིན་པའི་ལྷ་དང་ལྷ་མོ་དང་། མི་མཛད་པའི་མཛད་པ་ཆེན་པོ་ལས། རྣམ་པར་སྣང་མཛད་ཆེན་པོའི་སྐུ་ཕྱག་རྒྱ་དང་བཅས་པ། རྡོ་རྗེ་མི་བསྐྱོད་པ་ཆེན་པོ་སྐུ་ཕྱག་རྒྱ་དང་བཅས་པ་དང་། རིན་ཆེན་འབྱུང་ལྡན་ཆེན་པོ་སྐུ་ཕྱག་རྒྱ་དང་བཅས་པ་དང་། སྣང་བ་མཐའ་ཡས་ཆེན་པོ་སྐུ་ཕྱག་རྒྱ་དང་བཅས་པ་དང་། དོན་ཡོད་གྲུབ་པ་ཆེན་པོ་སྐུ་ཕྱག་རྒྱ་དང་བཅས་པ་དང་། སེམས་དཔའ་ཆེན་པོ་རོལ་པའི་ལྟ་སྟངས་རྣམས་དང་། སེམས་མ་ཆེན་མོ་སྒེག་མོའི་ཆ་ལུགས་རྣམས་དང་། རང་བྱུང་གི་ཧེ་རུ་ཀ་ཆེན་པོ་ལྔ་དང་། སྐུའི་ཕུང་པོ་དུ་མ་རྣམས་དང་། འཇིག་རྟེན་ལས་འདས་པའི་ཐེག་པ་ཆེན་པོའི་ཡན་ལག་བསམ་གྱིས་མི་ཁྱབ་པ་རྣམས་དང་། འདུལ་བའི་
སྡེ་དང་། མདོ་སྡེའི་སྡེ་དང་། མངོན་པའི་སྡེ་དང་། རང་བཞིན་རྫོགས་པ་ཆེན་པོའི་རྣམ་གྲངས་རྣམས་ཏེ། གསུང་གི་ཕུང་པོ་བསམ་གྱིས་མི་ཁྱབ་པ་རྣམས་དང་། སེམས་རྣམ་པར་སྦྱང་བ་དང་། རྣམ་པར་གཞིལ་བ་དང་། རྣམ་པར་བཏུལ་བ་དང་། རྣལ་དུ་ཕབ་པ་དང་། མི་གནས་པའི་རིག་པ་ཆེན་པོ་ལ་སོགས་ཏེ། ཐུགས་རྣམས་དང་། ནམ་མཁའ་ལ་དངོས་པོར་དབང་བསྒྱུར་བ་དང་། ཆུ་ལ་སྲེག་བྱེད་དུ་དབང་བསྒྱུར་བ་དང་། མེ་ལ་སྡུད་པར་བྱེད་པར་དབང་བསྒྱུར་བ་དང་། ས་ལ་བསྐྱོད་པར་བྱེད་པར་དབང་བསྒྱུར་བ་དང་། རླུང་ལ་བརྟན་པར་བྱེད་པར་དབང་བསྒྱུར་བ་རྣམས་ཏེ་ཕྲིན་ལས་རྣམས་དང་། མ་བཟླས་པར་རྟག་རྣམས་རང་བྱུང་བ་དང་། མ་བསྒྲུབས་པར་དངོས་གྲུབ་ཆེན་པོ་རང་བྱུང་བ་དང་། མ་བསྐུར་མ་བཙལ་བཞག་པའི་དབང་རྣམས་རང་ཐོབ་པ་དང་། མ་བསླབས་པར་ཆོས་ཐམས་ཅད་ཀྱི་དོན་རང་ཤེས་པ་དང་། མ་བསྒོམས་པར་སངས་རྒྱས་ཉིད་རང་གིས་རང་ཐོབ་པ་ལ་སོགས་ཏེ། ཡོན་ཏན་དཔག་ཏུ་མེད་པ་རྣམས་དང་། མི་འབྱེད་པ་རྒྱུན་གྱི་ཏིང་ངེ་འཛིན་ལ་ཐབས་ཅིག་ཏུ་སྙོམས་པར་ཞུགས་སོ། །དེ་ནས་མི་རྟོག་པའི་ཐུབ་པ་ཆེན་པོ་ཞེས་བྱ་བ། སྟོན་པ་རྡོ་རྗེ་འཆང་ཆེན་པོ་དེ་ལ། མ་ཆགས་པའི་མཆོད་པས་ནི་མཆོད། མ་བསྐུལ་བའི་དབྱངས་ཀྱིས་ནི་གདུང་། མི་གནས་པའི་བསམ་པས་ནི་བཟུང་། མ་བཏིང་བའི་སྟན་ལས་ནི་ལངས། མ་བྱས་པའི་བླ་གོས་ནི་གཟར། མ་བསྒྲགས་པའི་གླུ་ཡིས་ནི་བསྐུལ། མ་གླེང་བའི་ཚིག་ནི་ཞུས། ཞེས་པ་ལ་སོགས་གསུངས་པ་བཞིན་ནོ། །དེ་ལས་མ་གཡོས་བཞིན་དུ་ས་བཅུ་རྒྱུན་མཐའི་འཕགས་ཆེན་རྣམས་ལ་སྣང་བའི་གཞན་སྣང་གིས་བསྡུས་པའི་ལོངས་ཡོངས་སུ་རྫོགས་པར་སྤྱོད་པའི་ཞིང་ཁམས་ཁྱད་པར་ཅན་གྱི་འོག་མིན་དུ་རིགས་དྲུག་པའི་རྣམ་པ་དང་། རིགས་ལྔའི་སྟོན་པའི་རྣམ་པས་རིག་པ་ཁྱད་པར་ཅན་གྱི་འཁོར་བྱང་ཆུབ་སེམས་དཔའ་ཆེན་པོ་ཕྱག་ན་རྡོ་རྗེ་དང་། སྤྱན་རས་གཟིགས་དང་།
འཇམ་དབྱངས་སོགས་དབང་པོ་དང་ཡུལ་སྣང་དག་པའི་འབྲས་བུའི་སེམས་དཔའ་རྣམས་ལ་བརྗོད་དུ་མེད་པའི་རྡོ་རྗེ་ཐེག་པ་རྣལ་འབྱོར་བླ་ན་མེད་པའི་ཆོས་ཀྱི་འཁོར་ལོ་དགོངས་པ་བརྡའི་སྒོ་ནས་རྟག་པ་རྒྱུན་གྱི་འཁོར་ལོར་བསྐོར་བ་ཡིན་ཏེ། སྙིང་པོ་ལས། འོག་མིན་བླ་མེད་གནས་མཆོག་ཏུ། །སྐུ་ཉིད་རྣམ་པར་སྣང་མཛད་ཚུལ། །བྱང་ཆུབ་སེམས་དཔའི་འཁོར་རྣམས་ལ། །དེ་བཞིན་གསུང་མཆོག་མི་སྨྲ་སྟེ། །སྐུ་ཡིས་ཆོས་རྣམས་འཇལ་བར་སྟོན། །ཅེས་གསུངས་ཤིང་། འདི་ནི་གཙང་མའི་གནས་རིས་རྣམས་སྤངས་པའི་གནས་གང་ན་བར་དབང་བསྒྱུར་ཆེན་པོའི་འོག་མིན་དུ་བཤད་པ་ཡང་ཡོད་དེ། སྒྱུ་འཕྲུལ་རྡོ་རྗེ་ལས། གཙང་མའི་རིགས་རྣམས་རྣམ་སྤངས་པས། །འོག་མིན་ཆེན་པོའི་གནས་མཆོག་ཏུ། །རིགས་བདག་ཕྱག་རྒྱ་ལྷུན་གྲུབ་སྐུ། །གཅིག་དང་དུ་མ་རྣམ་སྤངས་པ། །སངས་རྒྱས་ཀུན་གྱི་གཟུགས་སྤྱི་སྟེ། །གདོད་ནས་ཐེག་ཆེན་མཛོད་ཡིན་ཏེ། །སྒྲིབ་པ་མཐའ་སྤངས་གདུལ་བྱ་ལ། །སྐད་ཅིག་གཅིག་གིས་སྣང་བར་མཛད། །ཅེས་གསུངས་པ་དང་། ཐེག་ཆེན་གྱི་མདོ་སྡེ་རྣམས་སུ་ཤཱཀྱ་ཐུབ་པ་འོག་མིན་དུ་ལོངས་སྤྱོད་རྫོགས་སྐུར་སངས་རྒྱས་ཟིན་ནས་སླར་མི་ཡུལ་དུ་མཛད་པ་བཅུ་གཉིས་བསྟན་པར་གསུངས་པ་རྣམས་ཀྱང་ཕྱོགས་རེ་ཙམ་ལ་དགོངས་པ་སྟེ། རྒྱན་སྟུག་ལས། ཡང་དག་སངས་རྒྱས་འོག་མིན་དུ། །སངས་རྒྱས་མ་གྱུར་འདོད་ཁམས་སུ། །སངས་རྒྱས་མཛད་པ་མི་མཛད་དོ། །ཞེས་གསུངས་པ་དང་། ལང་གཤེགས་འགྲེལ་པ་ལས། གཙང་མའི་གནས་ནས་བྱུང་ཞེས་པ་ནི་གཙང་མའི་གནས་ཀྱི་བྱེ་བྲག་འོག་མིན་དུ་ལོངས་སྤྱོད་རྫོགས་པའི་སྐུར་སངས་རྒྱས་པའོ། །ཞེས་བཤད་པ་དང་ཡང་མཐུན་ནོ། །དེ་བཞིན་དུ་བྱང་སེམས་ས་དགུ་པ་ལ་སྣང་བའི་འོག་མིན་ཙམ་པོ་དང་། ས་བརྒྱད་པ་ལ་སྣང་བའི་བཏགས་པའི་འོག་མིན་དང་། རྡོ་རྗེ་
བཙུན་མོའི་བྷ་ག་སྟེ་ཆོས་ཀྱི་དབྱིངས་ཐར་པ་ཆེན་པོའི་ཕོ་བྲང་རྣམས་སུ་དྲག་པོ་དང་འཇིགས་བྱེད་ལ་སོགས་པའི་གདུལ་བྱ་གདུག་པ་ཅན་རྣམས་ཀྱི་དབང་ཤེས་སུ་སྣང་བར་ཆེ་མཆོག་ཧེ་རུ་ཀ་དང་། གཞོན་ནུ་དཔའ་བོ་སྟོབས་ལྡན་དང་། པདྨ་གར་གྱི་དབང་ཕྱུག་སོགས་དང་། གཞན་ཡང་ཧེ་བཛྲ་དང་། ཙཀྲ་སམྦ་ར་དང་། དུས་ཀྱི་འཁོར་ལོ་སོགས་རྡོ་རྗེའི་གནས་གང་སྟོན་པ་དེའི་གཙོ་བོའི་རྣམ་པ་དང་རྣམ་འགྱུར་ལས་འཁོར་གྱི་དཀྱིལ་འཁོར་སྤྲུལ་ཏེ་ནཱ་ད་མི་ཤིགས་པའི་སྒྲའི་ཆོས་ཀྱི་འཁོར་ལོ་བསྐོར་བ་སྟེ། བདེར་འདུས་རྩ་རྒྱུད་ལས། ང་ནི་ཆེ་བའི་རྒྱལ་པོ་སྟེ། །འཆད་དང་ཉན་པའང་ང་ཉིད་ཡིན། །ཅེས་དང་། དགྱེས་རྡོར་ལས། འཆད་པ་པོ་ང་ཆོས་ཀྱང་ང་། །རང་གི་ཚོགས་ལྡན་ཉན་པའང་ང་། །ཞེས་གསུངས་པའི་ཚུལ་གྱིས་སོ། །དེ་དང་མཚུངས་པར་དགའ་ལྡན་དང་། རི་རབ་ཀྱི་རྩེ་དང་། ཨཽ་ཌི་ཡཱ་ན་དང་། ཤམྦྷ་ལ་ལ་སོགས་ཀུན་རྫོབ་ཀྱི་གནས་རྣམས་སུའང་བྱ་བ་དང་། སྤྱོད་པ་དང་། རྣལ་འབྱོར་གྱི་རྒྱུད་རྣམས་ཆགས་བྲལ་གྱི་གཟུགས་ཀྱིས་སམ། འཁོར་ལོས་སྒྱུར་བའི་རྣམ་པས་བསྟན་ཀྱང་རུང་སྟེ། གསང་སྙིང་ལས། དེ་ཚེ་མི་མཐུན་སྣ་ཚོགས་ལ། །སོ་སོར་འདྲ་བར་སྣང་བ་ནི། །དེ་བཞིན་ཉིད་ལས་མ་གཡོས་ཀྱང་། །ལས་ཀྱི་དབང་གིས་སོ་སོར་སྣང་། །ཞེས་བཤད་པ་བཞིན་ནོ། །དེའི་ཕྱིར་འོག་མིན་སོགས་དག་པའི་ཞིང་ཁམས་རྣམས་སུ་རང་བཞིན་གཉིས་སུ་མེད་པ་དང་། རིག་པ་ཁྱད་པར་ཅན་གྱི་འཁོར་ལ་གསང་སྔགས་ཀྱི་ཆོས་འཁོར་བསྐོར་བར་མཛད་པ་དེ་ལས་མ་གཡོས་བཞིན་དུ་འཇིག་རྟེན་དུ་མཆོག་གི་སྤྲུལ་སྐུའི་རྣམ་པས་མཛད་པ་བཅུ་གཉིས་བསྟན་པ་དང་། གདུལ་བྱ་དག་མ་དག་སྣ་ཚོགས་ལ་ཅི་རིགས་པར་ཐེག་པ་གསུམ་གྱི་ཆོས་ཀྱི་འཁོར་ལོ་རིམ་པ་གསུམ་དུ་བསྐོར་བར་སྣང་སྟེ། གསང་
སྙིང་ལས། ཐུགས་རྗེ་ཆེན་པོའི་བྱིན་གྱིས་བརླབས་ཞེས་བྱ་བ་རིག་པའི་སྐྱེས་བུ་ཐུབ་པ་དྲུག་དེ་བཞིན་གཤེགས་པའི་སྐུ་གསུང་ཐུགས་རྡོ་རྗེ་ལས་ཐོན་ཏོ། །ཐོན་ནས་ཀྱང་ལས་ཀྱིས་དབང་གིས་སྣྲེལ་གཞི་དང་ཡས་མན་གྱི་འཇིག་རྟེན་དྲུག་གི་ཕྱོགས་བཅུ་མཐའ་མེད་པའི་སྟོང་གསུམ་གྱི་སྟོང་ཆེན་པོ་རེ་རེར་ཐུབ་པ་ཆེན་པོ་བཅོམ་ལྡན་འདས་རེ་རེས་འདུལ་བ་རྣམ་པ་བཞིས་འགྲོ་བ་ལྔའི་དོན་མཛད་དོ། །ཞེས་དང་། འཇམ་དཔལ་སྒྱུ་དྲའི་བཤད་རྒྱུད་ལས། གླེང་གཞི་རྣམ་པ་གསུམ་ཡིན་ཏེ། །འོག་མིན་གནས་དང་རི་རབ་རྩེ། །འཛམ་བུའི་གླིང་འདིར་གྲགས་པ་ཡིན། །བྱང་ཆུབ་སེམས་དཔའ་ལྷ་རྣམས་དང་། །སྟོན་པ་ཡང་ནི་རྣམ་གསུམ་སྟེ། །སངས་རྒྱས་རྡོ་རྗེ་འཆང་ཆེན་དང་། །སྤྲུལ་སྐུ་འཁོར་ལོས་སྒྱུར་བ་དང་། །ཤཱཀྱ་ཐུབ་པ་ཉིད་ཀྱིས་གསུངས། །དུས་ནི་གདུལ་བྱ་འདུལ་བའི་ཚེ། །འཁོར་རྣམས་འདུས་པའི་དུས་དེར་གསུངས། །ཞེས་གསུངས་པ་དང་། གཞན་ཡང་སློབ་དཔོན་ཉིན་བྱེད་སེང་གེས་འོག་མིན་དུ་ལོངས་སྤྱོད་རྫོགས་པའི་སྐུས་རྡོ་རྗེ་ཐེག་པ་སྟོན་པ་དང་དུས་མཚུངས་པར་མི་ཡུལ་དུ་མཆོག་གི་སྤྲུལ་སྐུས་བྱང་ཆུབ་སྙིང་པོ་རྡོ་རྗེ་གདན་དུ་འཚང་རྒྱ་ཚུལ་མ་བསྟན་པའི་གོང་རོལ་དུ་བཏགས་པའི་ལུས་དཀའ་ཐུབ་ཀྱི་གནས་ནཻ་རཉྫ་ནའི་འགྲམ་དུ་བཞག་ནས་ཡེ་ཤེས་ཀྱི་ལུས་འོག་མིན་དུ་གཤེགས་པ་ལ་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་པས། རྡོ་རྗེ་དབྱིངས་ཆེན་པོར་སངས་རྒྱས་ཏེ་རི་རབ་ཀྱི་རྩེ་དང་རྒྱ་མཚོའི་འགྲམ་དུ་ཡོ་གའི་རྒྱུད་རྣམས་གསུངས། དེ་ནས་ཨཽ་ཌི་ཡཱ་ན་དང་ས་ཧོ་རའི་ཡུལ་རྣམས་སུ་གཤེགས་ནས་ཨིནྡྲ་བྷུ་ཏི་ལ་སོགས་པ་རྣམས་ལ་གསང་སྔགས་བླ་མེད་ཀྱི་རྒྱུད་སྡེ་ཐམས་ཅད་བསྟན་ནས། སླར་བཏགས་པའི་ལུས་ལ་ཞུགས་ཏེ་རྡོ་རྗེ་གདན་དུ་འཚང་རྒྱ་བའི་ཚུལ་བསྟན་པར་བཞེད་ལ། དེ་དང་མཐུན་པར་སློབ་དཔོན་ཡེ་ཤེས་ཞབས་ཀྱིས་ཀྱང་། དེ་དོན་མ་རྟོགས་ནཻ་རཉྫ་ར། །ཅི་ཡང་མ་ཡིན་ཏིང་འཛིན་གནས། །དེ་
ཚེ་བདེ་གཤེགས་ཀུན་གྱིས་ཀྱང་། །ཐལ་བྱུང་བློ་ཅན་དེ་བཟློག་སྟེ། །ནམ་མཁའི་དབྱིངས་ལྟར་རྣམ་དག་པའི། །ཟབ་གསལ་གཉིས་མེད་རབ་བསྟན་ཏེ། །ནམ་ཕྱེད་དུས་སུ་རྒྱལ་བ་ལྟར། །དེ་ཉིད་བསྒོམས་པས་ཐོ་རེངས་སུ། །སྐད་ཅིག་གིས་ནི་ཡང་དག་རྟོགས། །བྱང་ཆུབ་སྙིང་པོར་བཞུགས་བྱས་ནས། །མཐུ་ཆེན་བདུད་རྣམས་རབ་བཅོམ་སྟེ། །སེམས་ཅན་གཟུང་བར་བྱ་བའི་ཕྱིར། །ཆོས་ཀྱི་འཁོར་ལོ་བསྐོར་བའོ། །ཞེས་གསུངས་པ་དང་། སློབ་དཔོན་ཆེན་པོ་སྒེག་པའི་རྡོ་རྗེས། སྟོན་པས་འོག་མིན་དུ་གསང་སྔགས་སྟོན་པ་དང་དུས་གཅིག་ཏུ་མཆོག་གི་སྤྲུལ་སྐུས་འཇིག་རྟེན་ཏུ་ཐུན་མོང་གི་ཐེག་པ་བཤད་པར་བཞེད་དེ། དེས་མཛད་པའི་སྙིང་པོའི་འགྲེལ་པ་སྤར་ཁབ་ཏུ། དྲུག་པའི་སྟོན་པ་ལྷུན་གྱིས་གྲུབ་པའི་ཐབས་དང་། སྨོན་ལམ་གྱིས་གོ་ཕྱེས་ནས། ལེའུ་དང་པོར་རྒྱུ་སྣང་བར་མཛད། གཉིས་པར་རྐྱེན་སྦྱར། གསུམ་པར་ཐུན་མོང་བཅའ་གཞིའི་སྟོན་པ་དྲུག་སྣང་བར་མཛད་དེ་དུས་མཚུངས་པར་ཐ་དད་པའི་རྒྱུད་རྣམས་བྱུང་བའོ། །ཞེས་བཤད་པ་འདིས་མདོ་དང་སྔགས་ཀྱི་སྡེ་སྣོད་ཐམས་ཅད་སྡུད་པར་འགྱུར་ལ་རང་རེ་ཐེག་ཆེན་ངེས་དོན་ལ་མོས་པ་ལམ་དུ་བྱེད་པ་རྣམས་ཀྱིས་སྟོན་པ་གདོད་མའི་མགོན་པོ་གཅིག་ལས་ཐ་དད་དུ་མི་བསམ་ཞིང་། ཆོས་ཀྱི་འཁོར་ལོ་ཇི་སྙེད་ཅིག་དུས་གཅིག་ཏུ་བསྐོར་བ་ཡང་གདུལ་བྱའི་བསམ་པའི་དབང་གིས་ཐ་དད་ལྟར་སྣང་བ་ལས་དུས་སྔ་ཕྱི་སོགས་རྣམ་གཞག་སྒྲིག་ཏུ་མེད་པར་ཤེས་པར་བྱ་བ་ཉིད་ལེགས་སོ།། གཉིས་པ་བཀའ་དེ་རྣམས་བསྡུ་བ་པོ་སོ་སོས་བསྡུས་ཚུལ་ནི། བླ་མེད་ཀྱི་རྒྱུད་རྣམས་ཕལ་ཆེར་སྡུད་པ་པོ་ཐ་དད་ལྟར་བསྟན་ཀྱང་བྱེ་བྲག་རྫོགས་པ་ཆེན་པོ་ངེས་གསང་མན་ངག་གི་སྡེ་རྣམས་དང་། གསང་བ་སྙིང་པོ་སོགས་རྒྱུད་སྡེ་འགའ་ཞིག་སྟོན་འཁོར་དགོངས་པ་ཐ་མི་དད་པའི་ཕྱིར། གསང་སྙིང་ལས། འདི་སྐད་བདག་གིས་བཤད་པ་ཞེས་
འབྱུང་བ་དང་། བདེ་མཆོག་རྩ་རྒྱུད་ལས་ཀྱང་། དེ་ནས་གསང་བ་བཤད་པར་བྱ། ཞེས་འབྱུང་བ་སྟེ་འདི་སྐད་བདག་གིས་བཤད་པའམ་ཐོས་པ་ལ་སོགས་པ་རྒྱུད་དོན་མ་ལུས་པ་མཚོན་པའི་ཚིག་འཕྲད་དེ་རྒྱུད་དབུ་ཞབས་ཀྱི་དོན་ཐམས་ཅད་ཚང་བའི་ཕྱིར་རམ། གླེང་སློང་གི་སྐབས་ལྷན་ཅིག་པའི་འཁོར་རྒྱུན་མཐའི་བྱང་ཆུབ་སེམས་དཔའ་རྣམས་ལ་གཙོ་བོ་ཡབ་ཡུམ་གྱིས་ཡབ་ཀྱི་ཐབས་ཀྱི་ཆ་དང་ཡུམ་གྱིས་ཤེས་རབ་ཀྱི་ཆ་བཟུང་ནས་སྦྱོར་བའི་ལམ་གྱིས་འདོད་ཆགས་ཆེན་པོའི་དབང་བསྐུར་བ་དང་ཐབས་ཤེས་དབྱེར་མེད་ཀྱི་ཆ་བཟུང་ནས་ཟབ་པའི་དབང་གསུམ་བསྐུར་བའི་མཐར་ཁུ་རྡུལ་རླུང་གསུམ་འགྱུར་བདེ་མྱོང་བའི་སེམས་དང་བཅས་པ་བཅོམ་པས་སྟོན་འཁོར་དགོངས་པ་དབྱེར་མེད་དུ་གྱུར་པ་ཐུན་མོང་མ་ཡིན་པའི་གླེང་སློང་དུ་བཤད་པ་སྟེ། དུས་ཀྱི་འཁོར་ལོ་ལས། རྒྱུད་རྣམས་དག་ལས་འདི་སྐད་བདག་གིས་ཐོས་ཞེས་གསུངས་པ་གང་དེ་འདི་ལྟར་བདག་གིས་ཤེས་པ་སྟེ། །རྡོ་རྗེ་ཅན་ནི་ཟླ་བ་ཞུ་ལས་རྡོ་རྗེ་གང་ཞིག་སྤྱི་མགྲིན་སྙིང་གའི་ཆུ་སྐྱེས་ལྟེ་གསང་དང་། །ཐུགས་མེད་རྣམས་ཀྱི་བྷ་གར་དེ་ཡི་ཐིག་ལེ་གྲོལ་བ་གསུམ་གྱིས་མཆོག་གི་པདྨ་ལ་གནས་པ། །དེང་འདིར་སངས་རྒྱས་ཞིང་དུ་རབ་ཏུ་བཞུགས་པ་བཅོམ་ལྡན་འདས་སུ་རྣལ་འབྱོར་རྣམས་ཀྱིས་རིག་པར་བྱ། །ཞེས་གསུངས་ཤིང་། དབང་རྣོན་གྱི་གདུལ་བྱས་འདི་ཉིད་ཁོ་ནས་རྒྱུད་དོན་རྫོགས་པར་རྟོགས་པར་བཤད་པའི་ཕྱིར་སྡུད་པ་པོས་སྦྱར་བའི་ཚིག་ཁོ་ནར་མཐའ་གཅིག་ཏུ་འདོད་པ་མི་ལེགས་ཤིང་འདི་སྐད་བདག་གིས་ཐོས་པ་ཞེས་འཁོར་གྱི་ཚིག་ལྟར་མ་སྨོས་པས་རྒྱུད་མ་ཡིན་པར་ཡང་མི་འགྲུབ་སྟེ། དཔལ་གསང་བ་གྲུབ་པའི་རྒྱུད་ལས། འདི་ཡི་སྡུད་པར་བྱེད་པ་པོ། །གཞན་དག་ཡོད་པ་མ་ཡིན་ཏེ། །བདག་ཉིད་འབའ་ཞིག་སྨྲ་བར་བྱེད། །རྒྱུད་མཛད་པ་ནི་ཐུགས་རྡོ་རྗེ། །ཞེས་དང་། དགྱེས་རྡོར་ལས། འཆད་པ་པོ་ང་ཆོས་ཀྱང་ང་། །ཞེས་པ་ལ་སོགས་གསུངས་པའི་ཕྱིར་སྡུད་
པ་པོ་ཡང་སྟོན་པ་ཉིད་ལས་གཞན་དུ་མ་གྱུར་ཏེ། གསང་བ་གྲུབ་པ་ལས། རྒྱུད་འཆད་པ་དེ་ཐུགས་རྡོ་རྗེ། །འཆད་པ་པོ་དེ་སྡུད་པའང་དེ། །ཞེས་གསུངས་པས་སོ། །གཞན་ཡང་དེ་བཞིན་གཤེགས་པ་རྣམས་ཀྱི་ཐུགས་ཀྱི་གསང་བ་འཛིན་པ་དང་བཀའི་བསྡུ་བ་པོ་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེ་ནི་སྟོན་འཁོར་གང་དུ་བཤད་ཀྱང་མི་འགལ་ཏེ། སངས་རྒྱས་རྣམས་ཀྱི་ཐུགས་རྡོ་རྗེ་ལས་གཞན་དུ་མ་གྱུར་པའི་ཕྱིར་རོ། །དེ་བས་ན་རྫོགས་པ་ཆེན་པོ་སོགས་རྒྱུད་རྣམས་ཕལ་མོ་ཆེ་གསང་བའི་བདག་པོ་དང་། རྡོ་རྗེ་ཆོས་དང་། རྡོ་རྗེ་སྙིང་པོ་དང་། འཇམ་དཔལ་དང་། སྤྱན་རས་གཟིགས་དང་། སྤྲུལ་པའི་སྐུ་དགའ་རབ་རྡོ་རྗེ་ལ་སོགས་པ་རྣམས་དང་། མཁའ་འགྲོ་མ་པཱུརྞ་ཉེ་བར་ཞི་བ་ལ་སོགས། མཁའ་འགྲོ་དང་། མཁའ་འགྲོ་མའི་ཚོགས་དང་། གཞན་ཡང་གདུལ་བྱ་ལྷ་དང་། ཀླུ་དང་། གནོད་སྦྱིན་ལ་སོགས་རིགས་ཅན་མ་ངེས་པའི་ཚོགས་ཀྱིས་བསྡུ་བར་མཛད་ལ། མཐའ་དག་པའི་རྒྱུད་རྣམས་གསང་བའི་བདག་པོ་ཁོ་ནས་བསྡུས་པར་ཡང་རུང་སྟེ་བདེ་བར་གཤེགས་པས་གསང་སྔགས་ཀྱི་བསྟན་པ་གཏད་ཅིང་མ་འོངས་པ་ན་འཇིག་རྟེན་དུ་གསང་སྔགས་སྒྲོགས་པར་དབང་བསྐུར་བ་དང་། སངས་རྒྱས་རྣམས་ཀྱི་རྡོ་རྗེའི་སྙན་གཅིག་ཏུ་བསྡུས་པར་གསུངས་པ་དང་རྒྱུད་སྡེ་རྣམས་གླེགས་བམ་ལ་འགོད་པར་རྗེས་སུ་གནང་བ་སོགས་དྲུག་པའི་རྒྱལ་ཚབ་ཆེན་པོ་ཡིན་པའི་ཕྱིར་ཏེ། གསང་སྙིང་ལས། དེ་བཞིན་གཤེགས་པ་ཐམས་ཅད་ལ། །གསང་བ་འདི་ལས་གཞན་མི་མངའ། །སྒྲོ་དང་སྐུར་པ་ཞི་བའི་ཕྱིར། །གསང་བའི་སྙིང་པོ་དེ་ཁོ་ན། །ཉིད་དེ་ངེས་པའི་དབྱིངས་ནས་ཕྱུང་། །ཞེས་བསྟན་པ་གཏད་པ་དང་། ཡེ་ཤེས་ཐིག་ལེའི་རྒྱུད་ལས། མ་འོངས་པའི་དུས་སུ་གསང་བའི་རྒྱུད་སྐལ་བ་དང་ལྡན་པ་རྣམས་ལ་སུས་འཆད་པར་བྱེད། བཀའ་སྩལ་པ། ཕྱག་ན་རྡོ་རྗེ་མགོན་པོས་བཤད་པར་
བྱེད། ཅེས་པ་དང་། ཨིནྡྲ་བྷུ་ཏིའི་བདེ་མཆོག་རྩ་རྒྱུད་ཀྱི་འགྲེལ་པ་ལས། རྒྱུད་རྣམས་མ་ལུས་སེམས་དཔའ་ཆེན་པོའི་ཚོགས། །བྱེ་བ་ཕྲག་ནི་དགུ་བཅུ་རྩ་དྲུག་སོགས། །འདུས་ཏེ་རྗེ་བཙུན་གསང་བའི་བདག་པོ་ལ། །གསོལ་བ་བཏབ་ཚེ་འདི་སྐད་བདག་ཐོས་ཞེས། །རབ་ཏུ་གསུངས་པ་གསེར་གྱི་གླེགས་བམ་ལ། །བཻ་ཌཱུརྱ་ནི་ཞུན་མས་ཡི་གེར་བཀོད། །ཅེས་གསུངས་པའི་ཕྱིར་རོ། །བྱེ་བྲག་རྒྱུད་རྣམས་ཞུ་བ་པོ་གང་ཡིན་པ་དེ་ཉིད་བསྡུ་བ་པོ་ཡང་ཡིན་ཏེ། དུས་འཁོར་ཟླ་བ་བཟང་པོ། བརྟག་གཉིས་རྡོ་རྗེ་སྙིང་པོ། སྡོམ་འབྱུང་ཕྱག་རྡོར། རྡོ་རྗེ་མཁའ་འགྲོ་ཕག་མོས་བསྡུས་པ་བཞིན་ནོ། །དེ་དང་དུས་མཚུངས་པར་རྒྱུའི་ཐེག་ཆེན་གྱི་མདོ་སྡེ་རྣམས་ཀྱང་བྱང་ཆུབ་སེམས་དཔའ་གཙོ་བོ་གཙོ་བོ་དག་དང་གཞན་ཡང་བྱང་ཆུབ་སེམས་དཔའི་དགེ་འདུན་ལྔ་བརྒྱ་དག་གིས་བསྡུས་པར་བཤད་ཅིང་། འཇིག་རྟེན་དུ་མཆོག་གི་སྤྲུལ་སྐུ་མྱ་ངན་ལས་འདས་པའི་འོག་ཏུ་ཉན་ཐོས་དགྲ་བཅོམ་པ་གཙོ་བོ་རྣམས་དང་སོ་སྐྱེ་ཅི་རིགས་པ་དག་གིས་ཐེག་དམན་གྱི་སྡེ་སྣོད་གསུམ་ཀྱང་ཇི་སྙེད་པ་བསྡུ་བ་བྱས་སོ།། གཉིས་པ་བསྟན་པ་དེ་ཉིད་འཇིག་རྟེན་དུ་ཇི་ལྟར་བྱུང་བའི་ཚུལ་ལ་གཉིས་ཏེ། རིག་འཛིན་བརྡའི་བརྒྱུད་པ་དང་། གང་ཟག་སྙན་ཁུང་གི་བརྒྱུད་པའོ། །དང་པོ་ལའང་གཉིས་ཏེ། རིག་འཛིན་མི་མ་ཡིན་པ་དང་། མི་དང་མི་མ་ཡིན་པ་གཉིས་ཀ་ལས་བྱུང་བའོ།། དང་པོ་ནི། རྒྱལ་སྲས་སེམས་དཔའི་འཁོར་དེ་དག་གི་ནང་ནས་སྟོན་པ་ཉིད་ཀྱིས་སྤྲུལ་པ་རིགས་གསུམ་དུ་སྣང་བར་མཛད་པ་དེས་གདུལ་བྱ་ལྷ་ཀླུ་གནོད་སྦྱིན་གསུམ་ལ་བརྡའི་སྒོ་ནས་བཤད་ཅིང་བསྟན་པ་སྟེ། འཇམ་དཔལ་གྱིས་གཙོ་བོར་ཟབ་མོའི་ཕྱོགས་ཀྱིས་གདུལ་བྱའི་དོན་མཛད་པས་ལྟ་བའི་ཕྱོགས་སྟོན། སྤྱན་རས་གཟིགས་ཀྱིས་སྙིང་རྗེའི་ཕྱོགས་ཀྱིས་གདུལ་བྱའི་དོན་མཛད་པས་སྒྲུབ་པའི་ཕྱོགས་སྟོན། ཕྱག་ན་རྡོ་རྗེས་ཐབས་ལ་མཁས་པས་དྲག་ཤུལ་
ཕྱོགས་ཀྱིས་འགྲོ་བའི་དོན་མཛད་པས་སྤྱོད་པའི་ཕྱོགས་སྟོན། དེ་ཡང་འཇམ་དཔལ་གྱིས་ལྷའི་གནས་སུ་ལྷ་གྲགས་ལྡན་མཆོག་སྐྱོང་ལ་བཤད། དེས་ལྷ་ཚངས་པ་རིན་ཆེན་འོད་འབར་ལ་བཤད། དེས་སྐྱེ་དགུའི་བདག་པོ་ཚངས་པ་དང་། ཚངས་པ་ཀུན་སྒྲོལ་དང་། ཚངས་པ་གཙུག་ཕུད་འཛིན་དང་། དབང་པོ་བརྒྱ་བྱིན་སོགས་ལྷའི་རིག་པ་འཛིན་པ་ཚོམ་བུ་འབུམ་སྡེ་ལ་བཤད། སྤྱན་རས་གཟིགས་ཀྱིས་ཀླུའི་གནས་སུ་ཀླུ་རྒྱལ་མགྲིན་པ་ནག་པོ་ལ་བཤད། དེ་ནས་ཀླུ་མོ་ཁ་འདུལ་མ་དང་། ཀླུ་མོ་འདུལ་ཚང་མ་དང་། ཀླུ་ཡིད་འོང་དགའ་བ་དང་། འཇོག་པོ་སོགས་ཀླུའི་རིག་འཛིན་ཚོམ་བུ་འབུམ་སྡེ་ལ་བཤད། ཕྱག་ན་རྡོ་རྗེས་གནོད་སྦྱིན་གྱི་གནས་སུ་གནོད་སྦྱིན་ཀུན་ཏུ་བཟང་པོ་ལ་བཤད། དེ་ནས་གནོད་སྦྱིན་ལག་ན་རྡོ་རྗེ་དང་། གནོད་སྦྱིན་སྐར་མདའ་གདོང་སོགས་གནོད་སྦྱིན་གྱི་རིག་འཛིན་ཚོམ་བུ་འབུམ་སྡེ་ལ་བཤད་ཅིང་། དེ་དག་རྣམས་ཀྱིས་སོ་སོའི་འཁོར་གྱི་ཚོགས་ལའང་བཤད་པས་ཚོམ་བུ་དང་བཅས་པས་རྡོ་རྗེ་འཆང་གི་ས་བརྙེས་པར་གྱུར་ཏོ། །རྫོགས་པ་ཆེན་པོའི་སྐོར་ནི་སུམ་ཅུ་རྩ་གསུམ་གྱི་ལྷ་དེ་བ་བཟང་སྐྱོང་གི་བུ་ལྷག་སེམས་ཅན་ལ་རྨི་ལྟས་ཁྱད་པར་ཅན་བཞི་བྱུང་བ་དང་མཐུན་པར་ཕྱོགས་བཅུ་དུས་གསུམ་གྱི་སངས་རྒྱས་ཐམས་ཅད་དང་རིགས་ལྔའི་སངས་རྒྱས་ཐམས་ཅད་ཀྱིས་རྡོ་རྗེ་སེམས་དཔའ་བྱིན་གྱིས་བརླབས་པ་ལ་བརྟེན་ནས། རྡོ་རྗེ་སེམས་དཔས་ལྷའི་བུ་ལྷག་སེམས་ཅན་ལ་རྒྱལ་ཐབས་སྤྱི་བླུགས་ཀྱི་དབང་བསྐུར་ཞིང་རྫོགས་པ་ཆེན་པོའི་མན་ངག་རྣམས་གནང་ནས་ལྷ་ཡུལ་དུ་དར་བར་གྱུར་ཏོ། །དེ་ཡང་ཡེ་ཤེས་ཞབས་ཀྱི་གྲོལ་ཐིག་ཏུ། དེ་ནས་བཟུང་སྟེ་དོན་མཆོག་འདི། །སྐལ་བར་ལྡན་པ་འགའ་ཞིག་ལ། །ཞལ་ནས་ཞལ་དང་སྙན་ནས་སྙན། །བརྒྱུད་དེ་ངེས་པའི་དོན་བསྟན་པའོ། །ཞེས་གསུངས་པ་ལྟར་རོ། །གཉིས་པ་ནི། དགོངས་པ་ལུང་སྟོན་པའི་མདོ་ལས། འདྲེན་པའི་ཐེག་པ་གསུམ་པོ་དག །བཅོམ་ལྡན་ངེས་པར་གསུངས་ལགས་ན། །རྒྱུ་འབྲས་ལྷུན་གྲུབ་ཏུ་སྤྱོད་ཅིང་། །སངས་རྒྱས་གཞན་ནས་མི་འཚོལ་བའི། །ངེས་པའི་ཐེག་པ་ཅིས་
མ་གསུངས། །ཞེས་ཞུས་པའི་ལན་དུ། རྒྱུ་ལ་མོས་པར་རྒྱུའི་ཆོས་ཀྱི། །འཁོར་ལོ་རབ་ཏུ་བསྐོར་བྱས་ནས། །རྡོ་རྗེ་ཐེག་པའི་ཉེ་ལམ་ཞིག །མ་འོངས་དུས་ན་འབྱུང་བར་འགྱུར། །ཞེས་གསུངས་པ་བཞིན། སྟོན་པ་མཆོག་གི་སྤྲུལ་སྐུ་མྱ་ངན་ལས་འདས་ནས་ལོ་ཉི་ཤུ་རྩ་བརྒྱད་འདས་པ་ན་ལྷ་གྲགས་ལྡན་མཆོག་སྐྱོང་། ཀླུ་རྒྱལ་འཇོག་པོ། གནོད་སྦྱིན་སྐར་མདའ་གདོང་། སྲིན་པོ་བློ་གྲོས་ཐབས་ལྡན། མིའི་རིག་འཛིན་ལི་ཙ་བི་དྲི་མ་མེད་པར་གྲགས་པ་སྟེ། དམ་པའི་རིགས་ཅན་དྲ་མ་ལྔ་པོས་འཇིག་རྟེན་ན་མགོན་པོ་ཡོངས་སུ་མྱ་ངན་ལས་འདས་པར་རང་གི་མངོན་པར་ཤེས་པས་ཤེས་ནས་ནང་དུ་ཡང་དག་པར་འཇོག་པ་ལས་ལངས་ཏེ་ལངྈའི་ཡུལ་གྱི་རི་མ་ལ་ཡའི་རྩེ་མོར་རྫུ་འཕྲུལ་གྱི་བྱ་བས་འདུས་ཏེ། ཀྱེ་མ་ཧོ། ཀྱེ་མ་འཇིག་རྟེན་བློང་། སྟོན་པ་སྒྲོན་མའི་འོད་ནུབ་ཚེ། །འཇིག་རྟེན་མུན་པ་གང་གིས་བསལ། །ཞེས་པ་ལ་སོགས་པའི་གདུང་ཚིག་ཉི་ཤུ་རྩ་གསུམ་བཏོན་ཅིང་རྨ་ག་ཆད་པར་ངུས་སོ། །གང་གི་ཚེ་བཅོམ་ལྡན་འདས་ཀྱིས་འཇིག་རྟེན་ན་གསང་སྔགས་ཀྱི་སྒྲ་ཡོངས་སུ་གྲགས་པ་ཕྱིས་འབྱུང་བར་ལུང་བསྟན་པ་བཞིན་དུས་ལ་བབ་པ་དེའི་ཚེ་གསང་བའི་བདག་པོ་ལག་ན་རྡོ་རྗེས་སངས་རྒྱས་ཀྱིས་གསང་སྔགས་སྟོན་པར་དབང་བསྐུར་བ་བརྙེས་པའི་ཕྱིར་དེར་མངོན་སུམ་དུ་སྣང་བར་མཛད་ནས་རིགས་ཅན་ལྔ་དང་གཞན་ཡང་རིག་པ་འཛིན་པའི་དགེ་འདུན་ཕལ་མོ་ཆེ་ལ་སྔོན་སྟོན་པས་འོག་མིན་ལ་སོགས་པར་གསང་སྔགས་ཀྱི་ཐེག་པ་བསྟན་པ་རྣམས་སླར་ཡང་བཟླས་ཏེ་སྟོན་པར་མཛད་ལ། དེ་རྣམས་སྲིན་པོ་བློ་གྲོས་ཐབས་ལྡན་གྱིས་གསེར་གྱི་གླེགས་བམ་ལ་བཻ་ཌཱུརྱ་ཞུན་མས་ཡི་གེར་བྲིས་ཏེ་དགོངས་པའི་རྩལ་བདུན་གྱིས་ནམ་མཁའ་ལ་མི་མངོན་པར་རྒྱས་བཏབ་སྟེ་སྦས་སོ། །ཚུལ་འདི་ནི་ཨིནྡྲ་བྷུ་ཏིའི་བདེ་མཆོག་རྩ་རྒྱུད་ཀྱི་འགྲེལ་པའི་ལུང་གོང་དུ་དྲངས་པ་བཞིན་ནོ། །རི་མ་ལ་ཡ་ཡོད་པའི་ལངྈའི་ཡུལ་དེ་ཡང་ཛམྦུའི་གླིང་གི་གླིང་གཡོག་རྔ་ཡབ་ཀྱི་ལངྈ་དེ་ནི་མ་ཡིན་ཏེ་བཅོམ་ལྡན་འདས་ལངྈའི་བདག་པོ་
སྒྲ་སྒྲོགས་ཀྱི་བུ་མགྲིན་བཅུས་སྤྱན་དྲངས་ཏེ་བློ་གྲོས་ཆེན་པོས་ཞུས་པ་ལས་ཤིན་ཏུ་རྒྱས་པ་ཆེན་པོའི་མདོ་ལང་ཀར་གཤེགས་པ་གསུངས་པའི་གནས་ཛམྦུ་གླིང་གི་ཤར་ལྷོ་མཚམས་ཀྱི་རྒྱ་མཚོས་བཅད་པའི་གླིང་ཕྲན་ཞིག་ཡིན་ལ། གླིང་དེ་དང་གཞན་ཡང་། ཟངས་གླིང་དང་། ནས་གླིང་དང་། དྷ་ན་ཤྲཱིའི་གླིང་དང་། པ་ཡི་གུའི་གླིང་སོགས་གླིང་ཕྲན་དེ་དག་རྣམས་སུ་སྔ་ཕྱི་ཅི་རིགས་པར་བསྟན་པ་དར་བར་ཡོད་ཅིང་། བྱེ་བྲག་ལངྈའི་ཡུལ་དེ་སྔོན་སྲིན་པོ་སྒྲ་སྒྲོགས་ཀྱིས་བཟུང་བའི་ཕྱིར་དེ་ལྟར་གྲགས་ལ་ཕྱིས་སྲིན་པོའི་ཡུལ་སྟོངས་ནས་དེད་དཔོན་སེང་གེས་བཟུང་བས་དེང་སང་སིངྒ་ལའི་གླིང་དུ་འབོད་པ་ཡིན་ཅིང་ཡུལ་དེར་སློབ་དཔོན་ཆེན་པོ་ཀ་ཧྣ་པ་བྱོན་ནས་བི་ཤྭ་རཱུ་པཱི་ཞེས་པའི་སྲིན་མོ་ཆེན་མོ་འཁོར་ལྔ་བརྒྱའི་ཚོགས་དང་བཅས་པ་བཏུལ་བ་དང་། སྔགས་ཀྱི་བསྟན་པ་སྤེལ་བ་སོགས་མཛད། ཕྱིས་སུ་ཐེག་ཆེན་གྱི་སློབ་དཔོན་ལངྈ་རྒྱལ་བ་བཟང་པོ་འཁྲུངས་ལ། སློབ་དཔོན་ཙནྡྲ་གོ་མིས་ཀྱང་ཡུལ་དེར་བྱོན། ཤཱནྟི་བ་དང་པཎ་ཆེན་ནགས་ཀྱི་རིན་ཆེན་ཡང་བྱོན་ནས་སྔགས་ཀྱི་བསྟན་པ་སྤེལ་བ་སོགས་མཛད་ཅིང་སྔོན་མིའི་རྒྱལ་པོ་ར་མ་ཎས་མགྲིན་བཅུ་འཇོམས་པའི་དུས་ཛམྦུའི་གླིང་དང་དེ་གཉིས་ཀྱི་བར་རྒྱ་མཚོ་ཆེན་པོ་ལ་རྡོའི་ཟམ་པ་བཙུགས་ནས་ཕྱིན་པས་ད་ལྟ་རྒྱ་མཚོའི་ནང་དུ་རྡོའི་ཕུང་པོ་ཆེན་པོ་མངོན་སུམ་དུ་སྣང་ཞིང་སྐབས་འགར་རྡོའི་ཕུང་པོ་ལ་གཟིངས་ཐོགས་པས་བྱོལ་ནས་འགྲོ་དགོས་པ་དང་དེར་སྲིན་པོ་མགྲིན་བཅུ་བསད་པའི་ཁྲག་གིས་སྦགས་པ་ཡིན་ཟེར་བའི་རྡོ་དམར་པོ་ཁོ་ནས་ས་གཞི་ཁྱབ་པ་ལ་སྔ་དྲོ་ཙམ་འགྲོ་དགོས་པ་ཡོད་ཅིང་དེའི་དབུས་སུ་སུ་མ་ནཿཀུ་ཊ་སྟེ་ཡིད་བཟང་བརྩེགས་པ་ཞེས་པའི་རི་སུལ་གཅིག་ཡན་ཆད་བྲག་རིའི་ཕྲེང་བས་བསྐོར་བས་སྐྱེ་བོ་ཕལ་གྱིས་བགྲོད་པར་མི་ནུས་པ་ཞིག་ཡོད་ལ། དེར་པཎ་ཆེན་དཔོན་སློབ་ཀྱང་བྱོན་ནས་ལོ་དྲུག་བཞུགས་ནས་རྒྱ་གར་དུ་བྱོན་པ་ཡིན་ནོ། །དེར་ཡོད་པའི་རི་བོ་དེ་ཡང་ཐུན་མོང་དུ་མིང་དེ་ལྟར་གྲགས་ཀྱང་དོན་དུ་དྲག་ཤུལ་ཡོད་པའམ་མ་ལ་ཡའི་རི་ཡིན་ཅིང་མཚན་ཉིད་ཐམས་ཅད་ཀྱང་ཚང་བ་སྟེ། ཇི་སྐད་དུ། རྩེ་ན་རྩལ་གྱི་
རྒྱལ་པོ་གནས། །ངོས་ལ་བྲག་དཀར་ཁྱི་ཚུགས་པ། །སེང་གེ་གནམ་དུ་འཕྱོང་འདྲས་བརྒྱན། །རྩི་སྨན་རྩ་བརྒྱད་རྩ་བར་འཁྲུངས། །འདུ་བའི་ནད་ཀྱིས་ཡོངས་མི་ཚུགས། །སྤྱི་བོར་ཀ་ལནྟ་ཀ་ནི། །མི་གཉིས་གཅིག་པུར་གནས་པ་ཡི། །མཛོད་ལྡན་དེ་ཡིས་ཚངས་བཅས་པ། །སྐལ་ལྡན་རྣམས་ཀྱིས་བགྲོད་པར་སླ། །སྐལ་མེད་རྣམས་ཀྱིས་ཡོངས་མི་ཐར། །ཞེས་བཤད་པས་སོ། །གླིང་གཞན་ལས་བསྔགས་པར་འོས་པའི་ཡོན་ཏན་གཞན་གྱིས་ཀྱང་འཕགས་པར་ཡོད་དེ་རི་དེའི་རྩ་བ་དང་ཉེ་བའི་བྱང་ངོས་སུ་གུ་ཎ་ཝེ་ར་ཞེས་པའི་མཆོད་རྟེན་ཆེན་པོ་སོགས་དེ་བཞིན་གཤེགས་པའི་རིང་བསྲེལ་བཞུགས་པའི་མཆོད་རྟེན་མང་པོ་དང་། དེའི་ནུབ་ཕྱོགས་སུ་བུཌྜྷ་ཤ་ར་ཎ་ཞེས་དེ་བཞིན་གཤེགས་པ་ཞག་བདུན་དུ་མཉམ་པར་བཞག་པ་ལ་བཞུགས་པའི་ཤིང་སྡོང་དང་། ཛ་ལཱི་མུཀྟི་ཀ་ཏ་ལཱི་མ་ཎི་ཀ །ར་ཎེ་བ་ནེ་ཀུཉྫ་ར་གྷ་རི་གྷ་རི་པདྨ་ནཱི་ན་རཱི། བྷཱ་ལ་དེ་ཤ་སིངྒ་ལ། ཆུ་རྣམས་མུ་ཏིག་ཁྱིམ་རྣམས་ནོར་བུས་གང་བ། ནགས་རྣམས་གླང་པོ་ཁྱིམ་རྣམས་བུད་མེད་པདྨ་ཅན་གྱིས་གང་བའི་ཡུལ་སིངྒ་ལ། ཞེས་ཆེད་དུ་བརྗོད་པར་གྲགས་པ་དང་། བྱང་ཤར་དུ་ཀཎྜ་ལ་ཞེས་པའི་ཕུག་ནགས་འཐུག་པོ་ཞིག་ན་བྲག་ཕུག་འདུག་པ་དེར་ཤྲཱི་པཱ་དུ་ཀ་སྟེ་སངས་རྒྱས་ཀྱི་ཞབས་རྗེས་ཤིན་ཏུ་ཆེ་བ་ཞིག་ཡོད་ཅིང་དེར་ཞབས་རྗེས་ཀྱི་དུས་སྟོན་བྱེད་པ་ན་དགེ་སློང་སྟོང་ཕྲག་བཅུ་གཉིས་རེ་ཚོགས་པ་སོགས་སྔོན་ནས་ད་ལྟའི་བར་དུ་ཐེག་པ་ཆེ་ཆུང་གི་བསྟན་པ་ཤིན་ཏུ་དར་བ་ཡོད་དོ། །ཞེས་པ་ནི་འཕྲོས་དོན་ནོ།། གཉིས་པ་བསྟན་པ་དེ་མི་ཡུལ་དུ་བབ་པའི་གང་ཟག་སྙན་ཁུང་གི་བརྒྱུད་པར་ཇི་ལྟར་བྱོན་པ་ནི། སྤྱིར་ཐུན་མོང་གི་བཀའི་བསྡུ་བ་གཉིས་པའི་མཇུག་ཙམ་དུ་ཉི་འོག་གི་རྒྱལ་པོ་པདྨ་ཆེན་པོའི་དུས་སུ་ཨོ་ཌི་བི་ཤའི་ཡུལ་གྱི་རྒྱལ་པོ་ཙནྟྲ་རཀྵྀ་ཏའི་ཁྱིམ་དུ་འཕགས་པ་འཇམ་དཔལ་དགེ་སློང་གི་གཟུགས་ཀྱིས་བྱོན་ཏེ་ཐེག་པ་ཆེན་པོ་ཅི་རིགས་པར་བཤད་ཅིང་གླེགས་བམ་ཞིག་ཀྱང་བཞག་གོ། །དེ་འགའ་ཞིག་གིས་འཕགས་པ་བརྒྱད་སྟོང་པ་ཡིན་པར་འདོད་ལ། གསང་སྔགས་པ་རྣམས་ནི་དེ་ཁོ་ན་ཉིད་
བསྡུས་པ་ཡིན་ཞེས་ཟེར། འདི་སྟོན་པ་མྱ་ངན་ལས་འདས་པའི་འོག་ཏུ་ཐེག་པ་ཆེན་པོ་མི་ཡུལ་དུ་བྱུང་བའི་ཐོག་མ་ཡིན། དེ་ཙམ་ཞིག་ནས་སྔགས་ཀྱང་བྱ་བ་དང་སྤྱོད་པའི་རྒྱུད་རྣམས་ཅུང་ཟད་རེ་བྱུང་བར་མངོན་མོད་ཀྱི་ཡོངས་སུ་གྲགས་པར་ནི་མ་ཡིན་ནོ། །དེ་ནས་བཀའ་བསྡུ་གསུམ་པའི་འོག་ཏུ་རྒྱལ་པོ་ཀ་ནིཥྐའི་བུའི་དུས་སུ་ཐེག་ཆེན་སྨྲ་བའི་སློབ་དཔོན་ལྔ་བརྒྱ་བྱོན་ཞིང་ཐམས་ཅད་ཀྱང་གསང་བའི་བདག་པོ་སོགས་ལས་ལུང་ལེན་ཅིང་རྫུ་འཕྲུལ་ཐོབ་པ་ཤ་སྟག་སྟེ་དེ་རྣམས་ནུབ་ཕྱོགས་ཀྱི་རྒྱལ་པོ་ལཀྵ་ཨ་ཤྭས་སྤྱན་དྲངས་ཏེ་ཨ་བྷུ་ཞེས་པའི་རིའི་རྩེ་མོར་གཙུག་ལག་ཁང་བྱས་ཏེ་བཞུགས་སུ་གསོལ། རང་གི་འཁོར་བློ་རྣོ་བ་ལྔ་བརྒྱ་ཡང་རབ་ཏུ་བྱུང་ནས་སློབ་དཔོན་ལྔ་བརྒྱ་པོ་དེ་དག་ལས་ཐེག་ཆེན་གྱི་ཆོས་མཉན་དུ་བཅུག །དེར་རྒྱལ་པོས་སྡེ་སྣོད་རྣམས་ཡི་གེར་འདྲི་བར་བསམས་ཏེ་ཅི་ཙམ་ཞེས་དྲིས་སོ། །སྤྱིར་ཚད་གཟུང་བར་མི་ནུས་ཀྱི། །འདིར་ཡོད་པ་ནི་འབུམ་ཕྲག་བརྒྱའོ། །རྒྱལ་པོས་མང་མོད་ཀྱི་བྲི་བར་བྱའོ། །ཞེས་ཐམས་ཅད་ཡི་གེར་བྲིས་ཏེ་དེ་རྣམས་ཉིད་ལ་ཕུལ་ལོ། །འདི་སྐབས་ནས་བརྩམས་ཐེག་པ་ཆེན་པོ་ཤིན་ཏུ་དར་བར་གྱུར་ལ་བྱ་སྤྱོད་ཀྱི་རྒྱུད་རྣམས་ཀྱང་གསང་ནས་ཉམས་སུ་ལེན་པ་ཆེས་མང་བར་བྱུང་ཞིང་སློབ་དཔོན་དེ་རྣམས་ཀྱིས་ཡུལ་སོ་སོ་ནས་སྔགས་རྒྱུད་དེ་དག་རྣམ་གྲངས་དུ་མ་བླངས་ཤིང་སྤེལ་བར་མཛད། བླ་མེད་ཀྱི་རྒྱུད་སྡེ་ནི་ཕྱིས་ཀྱི་བར་དུ་སྐལ་བ་མཆོག་དང་ལྡན་པ་རེ་གཉིས་ལ་ཐོད་རྒལ་དུ་ལྷག་པའི་ལྷ་སོགས་ཀྱིས་བསྟན་ཞིང་རང་ཉིད་གཅིག་པུས་ཉམས་སུ་བླངས་པས་དངོས་གྲུབ་ཐོབ་པ་ལས་རྗེས་སུ་གདམས་པ་བཞག་པ་དང་། བརྒྱུད་པ་རིམ་ཅན་དུ་འདོམ་པ་སོགས་ཅུང་ཟད་ཀྱང་མེད་པས་མངོན་མཚན་དུ་དར་བ་ལྟ་ཅི། མཚན་ཙམ་ཡང་ཐམས་ཅད་ཀྱིས་མི་ཤེས་སོ། །གང་གི་ཚེ་གསང་བའི་བདག་པོས་རི་མ་ལ་ཡར་རིགས་ཅན་ལྔ་ལ་གསང་སྔགས་ཀྱི་ཆོས་འཁོར་བསྐོར་བ་དེའི་ཚེ་ས་ཧོ་རའི་རྒྱལ་པོ་ཛ་གསང་སྔགས་ཕྱི་རྒྱུད་ཀྱི་སྒྲུབ་པར་བཞུགས་པ་ལ་རྨི་ལྟས་ངོ་མཚར་བ་བདུན་བྱུང་སྟེ། དེ་ཡང་། སྐུ་གསུང་ཐུགས་རྟགས་ཐིམ་པ་དང་། རིན་
ཆེན་གླེགས་བམ་བབ་པ་དང་། ཆོས་ཀྱི་བགྲོ་བ་བྱེད་པ་དང་། ཀུན་གྱིས་དམ་པར་བསྒྲགས་པ་དང་། མཆོད་པ་ཆེན་པོ་བྱས་པ་དང་། རིན་ཆེན་ཆར་དུ་འབབ་པ་དང་། སངས་རྒྱས་ས་ལ་ལུང་བསྟན་པའོ། །ཞེས་སོ། །དེ་ལ་རྒྱལ་པོ་ཛ་ནི་སྟོན་པས་མདོ་རྒྱུད་ཐམས་ཅད་ནས་ལུང་བསྟན་པ་སྟེ། བདེ་མཆོག་སྡོམ་འབྱུང་གི་རྒྱུད་ཕྱི་མ་ལས། ང་ནི་འདི་ནས་མི་སྣང་ནས། །ལོ་གྲངས་བརྒྱ་དང་བཅུ་གཉིས་ན། །ལྷ་གནས་གསུམ་དུ་གྲགས་པ་ཡི། །བསྟན་པའི་སྙིང་པོ་དམ་པ་ཞིག །འཛམ་གླིང་ཤར་གྱི་ཕྱོགས་མཚམས་ཀྱི། །རྒྱལ་པོ་ཛ་ཞེས་བྱ་བ་ལ། །བསོད་ནམས་ཆེན་པོའི་མཐུས་སྣང་བས། །གསང་བའི་བདག་པོས་སྣང་བར་འགྱུར། །ཞེས་པ་དང་། དེ་དང་མཚུངས་པར་སྤྱི་མདོ་དགོངས་འདུས་ལས་ཀྱང་འབྱུང་ངོ་། །དེ་ཡང་རྒྱལ་པོ་ཛ་ཞེས་པ་འགའ་ཞིག་གིས་སྟོན་པ་དངོས་ཀྱི་དབང་བསྐུར་ཐོབ་པའི་ཨིནྡྲ་བྷུ་ཏི་ཆེན་པོ་ལ་བྱེད་པ་དང་། ཁ་ཅིག་གིས་དེ་ཉིད་ཀྱི་སྲས་ཡིན་པར་ཡང་བྱེད། འགའ་ཞིག་གིས་ཨིནྡྲ་བྷུ་ཏི་བར་པ་ལ་འདོད་པ་སོགས་མི་འདྲ་བར་བྱུང་བ་འཕགས་ཆེན་གྱི་རྣམ་འཕྲུལ་སོ་སྐྱེས་བསམ་པར་མི་ནུས་པས་དེ་ལྟར་ཡིན་དུའང་རུང་ལ། འོན་ཀྱང་དུས་དང་བསྟུན་ན་སློབ་དཔོན་ཀུ་ཀུ་རཱ་ཛ་དང་དུས་མཚུངས་སུ་བཤད་པས་དེ་ལྟར་ན། ཨིནྡྲ་བྷཱུ་ཏི་བར་པ་ལ་བྱེད་དགོས་པ་འདྲ་ཞིང་། གྲུབ་ཐོབ་ཆེན་པོ་ལྭ་བ་པའི་ཞབས་དང་རྒྱལ་པོ་འདི་གཉིས་གཅིག་གམ་ཐ་དད་གང་ལྟར་དུས་གཅིག་ཅིང་། རོལ་པའི་རྡོ་རྗེ་དང་། མཚོ་སྐྱེས་དང་། ཛ་ལནྡྷ་རི་པ་རྣམས་དང་ཡང་འོལ་སྤྱི་ཙམ་དུ་དུས་མཚུངས་སོ། །གང་ལྟར་རྒྱལ་པོ་དེ་ཉིད་རྒྱུད་སྡེ་འོག་མའི་རྣལ་འབྱོར་བསྒོམ་ཞིང་བཞུགས་པའི་ཚེ་སྔར་གྱི་རྨི་ལྟས་དང་མཐུན་པར་དངོས་སུ་རྒྱལ་པོའི་ཁང་པར་སངས་རྒྱས་མཉམ་སྦྱོར་ལ་སོགས་པ་གསང་སྔགས་ཀྱི་སྡེ་སྣོད་ཆེན་པོ་རྣམས་ཀྱི་གླེགས་བམ་དང་གསང་བའི་བདག་པོའི་སྐུ་ཁྲུ་གང་བ་ཞིག་བབ་པར་གྱུར་ཏོ། །དེ་ནས་གསོལ་བ་བཏབ་པས་རྡོར་སེམས་ཞལ་མཐོང་གི་ལེའུ་རྟོགས་ནས་དེ་དང་ཕྱག་ན་རྡོ་རྗེའི་སྐུ་ལ་བརྟེན་ནས་ཟླ་བ་བདུན་བསྒྲུབས་པས་རྡོ་རྗེ་སེམས་དཔའི་ཞལ་མཐོང་
ཞིང་ཡེ་ཤེས་ཀྱི་དབང་བསྐུར་བ་ཐོབ་པས་གླེགས་བམ་གྱི་བརྡའ་དང་དོན་མ་ལུས་པ་མཁྱེན་པར་གྱུར་ཏོ། །དེ་དང་དུས་མཉམ་པར་ཨ་ནུ་ཡོ་གའི་སྡེ་སྣོད་རྣམས་ཀྱང་སིངྒ་ལའི་གླིང་དུ་བབ་པར་གྱུར་ཏེ། ཀུན་བཟང་ཡེ་ཤེས་གསལ་བར་སྟོན་པའི་ཐབས་ཀྱི་ལམ་མཆོག་འདུས་པའི་རྒྱུད་ཀྱི་ལེའུ་ལྔ་པར། མ་ཧཱ་ཡོ་གའི་རྒྱུད་རྣམས་ནི་རྒྱལ་པོ་ཛའི་ཁང་སྟེང་དུ་འབབ་པར་འགྱུར་ལ། ཨ་ནུ་ཡོ་གའི་རྒྱུད་རྣམས་ནི་སིངྒ་ལའི་ནགས་ཚལ་དུ་འབྱུང་བར་འགྱུར་རོ། །ཞེས་ལུང་བསྟན་པས་ཀྱང་ངོ་། །དེ་ནས་རྒྱལ་པོས་རྒྱུད་དོན་མ་ལུས་པ་མཁྱེན་པར་གྱུར་ཀྱང་དགེ་བའི་བཤེས་ཀྱི་རྐྱེན་ལ་མ་ལྟོས་པར་གདུལ་བྱ་རྣམས་རྒྱུད་ལ་རང་དགར་འཇུག་པ་དགག་པའི་ཕྱིར་མ་རྟོགས་པ་ལྟར་མཛད་ནས་གླེགས་བམ་རྣམས་ཟ་ཧོར་གྱི་ཡུལ་ཙམ་ན་མཁྱེན་པ་ཆེ་བར་གྲགས་པ་སློབ་དཔོན་ཨུ་པ་རཱ་ཛ་ལ་བསྟན་པས་བརྡ་དང་དོན་མ་མཇལ། དེ་ནས་སློབ་དཔོན་ཀུ་ཀུ་རཱ་ཛ་ལ་བསྟན་པས་དེས་རྡོ་རྗེ་སེམས་དཔའ་སྒྱུ་འཕྲུལ་དྲ་བའི་རྡོར་སེམས་ཞལ་མཐོང་གི་ལེའུ་རྟོགས་ཏེ་བསྒྲུབས་པས་རྡོ་རྗེ་སེམས་དཔས་ཞལ་བསྟན་ནས་ད་སྟེ་རྒྱུད་ཀྱི་དོན་རྣམས་གསང་བདག་གིས་སྟོན་པར་འགྱུར་རོ། །ཞེས་ལུང་བསྟན། ད་དུང་བསྒྲུབས་པས་གསང་བདག་དངོས་སུ་བྱོན་ནས་དོན་གྱི་བསྟན་པ་དང་། ཐེག་པ་ཐམས་ཅད་རྫོགས་པའི་དབང་བསྐུར་ནས་ཚིག་གི་བསྟན་པ་ལི་ཙ་བཱི་དྲི་མ་མེད་པ་ལ་ཞུས་ཤིག་ཅེས་ལུང་བྱིན་པ་ལྟར་སློབ་དཔོན་གྱིས་གསང་བདག་གིས་བཀའ་ལྟར་རྒྱུད་སྡེ་ཆེན་པོ་བཅོ་བརྒྱད་དུ་ཕྱེས་ནས་རྒྱལ་པོ་ཛ་ལ་བསྟན་པར་བཤད་དེ། ཤེས་ཕྱིན་ཚུལ་བརྒྱ་ལྔ་བཅུ་པའི་འགྲེལ་པ་སློབ་དཔོན་ཡེ་ཤེས་བཤེས་གཉེན་གྱིས་མཛད་པ་ལས། སྔོན་སངས་རྒྱས་མི་ཡུལ་ན་ལོ་བརྒྱད་ཅུ་བཞུགས་པའི་ཚེ་ན། སརྦ་བུཌྜྷ་ས་མ་ཡོ་ག་དང་། གུ་ཧྱ་ས་མཱ་ཛ་ལ་སོགས་པས་འདུལ་ཞིང་ཐེག་པ་དེ་དག་གི་སྣོད་དུ་གྱུར་པ་འཛམ་བུའི་གླིང་གི་མི་ཡུལ་ན་མེད་པས་རྒྱལ་ཆེན་བཞི་དང་སུམ་ཅུ་རྩ་གསུམ་དང་། དགའ་ལྡན་ལ་སོགས་པའི་གནས་ན་ལྷ་རྣམས་དང་སྐལ་བ་བཟང་པོའི་བྱང་ཆུབ་སེམས་དཔའ་ལ་སོགས་པ་སྣོད་དུ་གྱུར་ནས་དེའི་ཚེ་མདོ་སྡེ་དེ་ན་བཞུགས་
སོ། །སླད་ཀྱི་སངས་རྒྱས་མྱ་ངན་ལས་འདས་པའི་འོག་ཏུ་ཟ་ཧོར་རྒྱལ་པོ་འཁོར་དང་བཅས་པ་ངོ་མཚར་དུ་ཆོས་ལ་དད་པ་དག་ཅིག་འདུག་པ་ཐེག་པ་དེའི་འདུལ་སྐལ་དུ་གྱུར་ཅིང་སྣོད་དུ་གྱུར་ནས་སརྦ་བུཌྜྷ་ས་མ་ཡོ་ག་ལ་སོགས་པ་སྡེ་སྣོད་ཆེན་པོ་བཅོ་བརྒྱད་ཕྱག་ན་རྡོ་རྗེའི་བྱིན་གྱི་རླབས་ཀྱིས་ཟ་ཧོར་གྱི་ཡུལ་དུ་གཤེགས་པ་དང་། ཟ་ཧོར་གྱི་རྒྱལ་པོ་ཨིནྡྲ་བྷུ་ཏིས་མདོ་སྡེ་དག་བལྟས་ན་བརྡ་མ་འཕྲོད་ནས་སྔོན་གྱི་ལས་ཀྱི་དབང་གིས་ན་མངོན་པར་ཤེས་པ་ཐོབ་པས་བལྟས་ན་ཡུལ་གྱི་དབུས་སུ་ཡུལ་མ་ལ་པ་ན་ཨཱ་ཙརྱ་ཀུ་ཀུ་རཱ་ཛ་ཉིན་ཞིང་ཁྱི་སྟོང་ཙམ་ལ་ཆོས་འཆད། མཚན་ཞིང་ནི་ཁྱི་དེ་དག་ལ་དམ་ཚིག་གི་ལོངས་སྤྱོད་མཛད་པ་ཁྱིའི་སློབ་དཔོན་མཛད་པ་ཞིག་བཞུགས་པ་དེ་ཐེག་པའི་སྣོད་དུ་གྱུར་ལ། བདག་གི་འདུལ་སྐལ་དུ་གྱུར་པ་ཡང་འདྲ་ནས་རྒྱལ་པོས་ཕོ་ཉ་བཏང་སྟེ་སློབ་དཔོན་གཤེགས་སུ་གསོལ་བ་དང་། སློབ་དཔོན་དེ་ཡང་སྔོན་གྱི་ལས་ཀྱི་དབང་གིས་ན་མངོན་པར་ཤེས་པ་ལྔ་དང་ལྡན་ནས། རྒྱལ་པོ་དེ་བདག་གི་འདུལ་སྐལ་དུ་འབབ་བམ་མི་འབབ་མདོ་སྡེ་དེ་དག་གི་སྣོད་དུ་བདག་གྱུར་རམ་མ་གྱུར་བརྟགས་ན། བདག་གི་འདུལ་སྐལ་དུ་ཡང་བབ། བདག་ཀྱང་མདོ་སྡེའི་སྣོད་དུ་ཡང་གྱུར། རྒྱལ་པོའི་ཐེ་ཚོམ་ཡང་སེལ་བར་འགྱུར་མོད་ཀྱི། འོན་ཀྱང་མདོ་སྡེ་དག་སྔར་མ་བལྟས་ན་བརྒྱ་ལ་རྒྱལ་པོའི་ཐེ་ཚོམ་དག་མ་སོལ་བར་གྱུར་ན་ཤིན་ཏུ་མི་ལེགས་པས་ཕོ་ཉ་ལ་སླར་སྤྲིང་བ། མདོ་སྡེ་དག་ཁོ་བོས་སྔར་བལྟས་འཚལ་གྱིས་ཚུར་སྐུར་ཞིག་ཅེས་སྤྲིངས་པ་དང་། དེ་ནས་མདོ་སྡེ་དག་ཕས་གཤེགས་ཏེ་བལྟས་ན་མགོ་མཇུག་གར་བལྟ་བའི་ཆ་མ་མཆིས་ན་དེ་ཉིད་དུ་ལུས་བརྡབས་ཏེ་མགོན་མེད་དོ། །སྐྱབས་མེད་དོ། །ཞེས་བོས་པ་དང་དཔལ་རྡོ་རྗེ་སེམས་དཔའ་མངོན་པར་གཤེགས་ཏེ་ཁྱོད་ཅི་འདོད་ཅེས་དྲིས་པ་དང་། བདག་མདོ་སྡེ་ཟབ་མོ་འདི་བལྟས་པ་ཙམ་གྱིས་ཤེས་པར་འདོད་ཅེས་གསོལ་བ་དང་། དེ་བཞིན་གནང་ངོ་ཞེས་གསུངས་ནས་དེ་ནས་སརྦ་བུཌྜྷ་ས་མ་ཡོ་ག་ལ་སོགས་པའི་གླེགས་བམ་རྣམས་མ་ཕྱེ་བར་དེ་དག་གི་དོན་ཡིད་ལ་མངོན་
སུམ་དུ་གསལ་བར་གྱུར་ཏོ། །དེ་ནས་སློབ་དཔོན་དེ་ཟ་ཧོར་གྱི་ཡུལ་དུ་གཤེགས་ནས་རྒྱལ་པོ་འཁོར་དང་བཅས་པ་རྣམས་ལ་དྷརྨ་དེ་དག་བཤད་དེ། རྡོ་རྗེ་སེམས་དཔས་ལུང་བསྟན་ནས་རྒྱལ་པོ་འཁོར་དང་བཅས་པ་རྣམས་རྡོ་རྗེ་དབྱིངས་ཀྱི་དཀྱིལ་འཁོར་ལྟར་སྒོམ་དུ་སྩལ་ཏེ་དབུས་སུ་རྒྱལ་པོ་ཉིད། བཙུན་མོ་དམ་པ་བཞི་ཡུམ་གྱི་སར་བཀོད། བློན་པོ་བཞི་རིགས་བཞིའི་སར་བཀོད། སྲས་མོ་རྣམས་ནང་གི་ལྷ་མོའི་སར་བཀོད། བཙུན་མོ་ཕལ་པ་རྣམས་ཕྱིའི་ལྷ་མོའི་སར་བཀོད། བློན་པོ་ཕལ་པ་རྣམས་སྒོ་སྲུང་བཞི་དང་། བསྐལ་པ་བཟང་པོའི་བྱང་ཆུབ་སེམས་དཔའ་ལྟར་བཀོད་པ་དང་། རྒྱལ་པོས་བསམས་པ་བདག་ཅག་འཁོར་དང་བཅས་པ་རིག་འཛིན་གྱི་གནས་སུ་གྲུབ་པའི་ཕྱིར་དང་དམ་པའི་ཆོས་འདི་མི་ནུབ་པར་བྱ་བའི་ཕྱིར་སྲས་ཤ་ཀྲ་པུ་ཏི་རྒྱལ་ཚབ་ཏུ་དབང་བསྐུར་ནས། ཨཱ་ཙརྱ་ཀུ་ཀུ་པས་ལུང་དང་མན་ངག་བསྟན་པ་རྒྱལ་བུ་དེ་ལ་བསྟན་ཏེ་བཞག་ནས་བསྒོམས་པ་དང་། རྒྱལ་པོ་འཁོར་དང་བཅས་པ་སྟོངས་ལ་གནས་པའི་བྱང་ཆུབ་སེམས་དཔའི་རིག་འཛིན་དུ་གྲུབ་བོ། །དེའི་སྲས་ཤ་ཀྲ་བུ་ཏིས་ཀྱང་དེ་བཞིན་དུ་བསྒོམས་པ་དང་། འཁོར་སྒོམ་པ་བདུན་བརྒྱ་དང་ཡང་རིག་འཛིན་གྱི་གནས་གྲུབ་བོ། །ཡང་རྒྱལ་བུ་ཤ་ཀྲ་བུ་ཏིས་སྲས་ནི་ཆུང་སྟེ་སྲས་མོ་གོ་བ་དེ་བྱི་ལ་དཔལ་དམ་པའི་ནང་ནས་ཚུལ་བརྒྱ་ལྔ་བཅུ་པ་བཀོད་དེ་བཤམས་ནས་ཨིནྡྲ་བྷཱུ་ཏིའི་ལུང་དེ་སྲས་མོ་ཡུལ་དང་ས་འཛིན་དུ་སྩལ་དེ་ལ་བསྟན་པ་ལས་སྲས་མོ་དེ་ཡང་འཁོར་དང་བཅས་པ་བརྒྱ་དང་ཡང་རིག་འཛིན་གྱི་གནས་གྲུབ་བོ། །དེ་ནས་སྲས་མོ་དེས། རྒྱལ་བུ་ལ་ལུང་མན་ངག་བཞག་པ་ལས་འཕེལ་བ་ནི་དེང་དུ་འདི་ལགས་ཏེ། ཞེས་བཤད་ཅིང་། དེ་དང་མཚུང་བར་མཉམ་སྦྱོར་འགྲེལ་པ་ལས་ཀྱང་། སྤྲུལ་པའི་སྐུ་འདས་ཕྱི་མའི་དུས་ཀྱི་ཚེ། །རྒྱལ་བའི་བཀའ་གསང་འཛམ་གླིང་གནས་སུ་ཤར། །རྒྱལ་པོའི་ཁབ་ཏུ་སྤྱན་དྲངས་མཆོད་བྱས་ཏེ། །དགའ་ཞིང་གུས་བསྟོད་ལེགས་བལྟས་བརྡའ་མ་མཇལ། །ཐུགས་རྗེའི་འདྲེལ་ཤུགས་གསང་སྔགས་འཛིན་
པར་གྲགས། །དམ་པར་བཟུང་སྟེ་གླེགས་བམ་གཟིགས་པར་ཞུས། །སྒྱུ་འཕྲུལ་ཐིག་ལེ་སྟོང་པའི་དཀྱིལ་འཁོར་གཞུང་། །གྲུབ་ཐོབ་ལྷག་པའི་ལྷ་ཡིས་ལུང་བསྟན་མཛད། །རྡོ་རྗེ་ཐེག་པའི་གཞུང་ལུགས་སྣ་ཚོགས་མཐའ། །དམ་པ་རྣམས་ཀྱིས་གདམས་པ་ཇི་བཞིན་པ། །མི་འགལ་ལེགས་པར་བསྡུས་ཤིང་རབ་བཀྲོལ་ཏེ། །འགྲེལ་དང་བསྡུས་དོན་སྒྲུབ་ཐབས་མང་དུ་བསྟན། །ཞེས་གསུངས་པའི་ཕྱིར་ལུགས་དེ་གཉི་ག་འགལ་བ་མེད་ཀྱང་རྒྱལ་པོ་རང་ཉིད་ཀྱིས་རྟོགས་པའི་ཕྱོགས་ལེགས་པར་མངོན་ཏེ་ཉིད་ཀྱི་མཛད་པའི་ལམ་རྣམ་བཀོད་དུ། ཤར་ཕྱོགས་ཨིནྡྲའི་ལུང་བ་ན། །རྒྱ་ལུང་རྡོ་རྗེ་བརྩེགས་པ་རུ། །རིགས་ཅན་ཨིནྡྲ་བྷཱུ་ཏི་ངས། །གསང་བའི་བདག་པོས་མངོན་བསྟན་པས། །སྒྱུ་འཕྲུལ་དྲ་བའི་བསྒྲུབ་པ་ཡང་། །ཚོམ་བུ་ལྔ་བཅུ་སྟོང་དང་བཅས། །ཕྱག་ན་རྡོ་རྗེ་མངོན་གྲུབ་སྟེ། །སྤང་ལེན་བརྟུལ་ཞུགས་སྤྱོད་པའི་དབང་། །དགེ་བར་བསྐུར་ནས་སྡིག་པ་མེད། །དེ་ནས་ས་ལ་རེག་པར་བྱས། །ཞེས་པ་དང་། སངས་རྒྱས་གསང་བའི་ལམ་རིམ་ལས། འགྲེལ་པ་སྣང་བ་མངོན་བརྟགས་པས། །ཐུགས་ཀྱི་སྒྲུབ་པ་མངོན་རྟོགས་ཏེ། །དེ་ཉིད་སྒོ་ནས་དེ་ཉིད་གྲུབ། །བརྟན་པའི་དངོས་གྲུབ་དེ་ནས་ཐོབ། །དོན་དམ་བཅུད་ཀྱིས་དེ་ནས་རྒྱས། །འདོད་པའི་བསམ་པ་དེ་རུ་འགྲུབ། །ལྷག་པའི་ལྷ་དང་དེ་རུ་མཇལ། །ཞེས་པ་ལ་སོགས་པས་རང་ཉིད་ཀྱིས་རྟོགས་པར་བཤད་པའི་ཕྱིར་རོ། །དེ་ལ་སློབ་དཔོན་ཀུ་ཀུ་རཱ་ཛ་ཁྱིའི་རྒྱལ་པོ་ཞེས་པར་གྲགས་ཤིང་ལོ་རྒྱུས་འགའ་ཞིག་ཏུ་ཀུ་ཏ་རཱ་ཛ་ཞེས་ཀྱང་འབྱུང་སྟེ་ཉིན་མོ་ཁྱིའི་རྣམ་པ་ཅན་གྱི་དཔའ་བོ་དང་རྣལ་འབྱོར་མ་སྟོང་ཕྲག་རེ་ལ་ཆོས་སྟོན་ཅིང་མཚན་མོ་དེ་དག་དང་ལྷན་ཅིག་ཏུ་དུར་ཁྲོད་ཀྱི་གནས་རྣམས་སུ་གཤེགས་ནས་ཚོགས་ཀྱི་འཁོར་ལོ་ལ་སོགས་པ་དམ་ཚིག་གི་ཀུན་ཏུ་སྤྱོད་པ་ལ་གནས་ཤིང་དེ་ལྟར་ལོ་བཅུ་གཉིས་སུ་སྤྱད་པས་མཐར་ཕྱག་རྒྱ་ཆེན་པོའི་དངོས་གྲུབ་བརྙེས་པ་ཡིན་ལ། ཡང་ཁ་ཅིག་གིས་སློབ་དཔོན་འདིས་སྤྱོད་
པ་ལ་གནས་པའི་ཚེ། ཨུ་རྒྱན་དུ་བྱོན་ནས་སླར་ཡང་རྒྱུད་སྡེ་ཆེན་པོ་བཅོ་བརྒྱད་ཀྱི་ནང་ནས་སངས་རྒྱས་མཉམ་སྦྱོར་ལ་སོགས་པའི་ནང་རྒྱུད་སྡེ་ལྔ་རྒྱ་ཆེར་བཤད་ཅིང་མཐར་གྱིས་ཟླ་གསང་ཐིག་ལེ་ལ་བརྟེན་ནས་མཆོག་གི་དངོས་གྲུབ་བརྙེས་པ་ཡིན་ནོ་ཞེས་ཀྱང་ཟེར། སློབ་དཔོན་འདིས་མཉམ་སྦྱོར་ལ་རྩལ་དུ་བཏོན་ཅིང་གསང་དོན་རྣམ་པར་དགོད་པ་དྲུག་དང་། དཀྱིལ་འཁོར་ཐམས་ཅད་ཀྱི་རྗེས་སུ་འཇུག་པའི་ཆོ་ག་ལྔ་པ་སོགས་བསྟན་བཅོས་དུ་མ་མཛད་དོ། །དེ་ལྟར་མ་ཧཱ་ཡོ་ག་ལ་རྒྱུད་སྡེ་དང་སྒྲུབ་སྡེ་གཉིས་སུ་ཡོད་པ་ལས་སྔ་མ་ཏནྟྲ་ཆེན་པོ་སྡེ་བཅོ་བརྒྱད་ནི་སྐུ་གསུང་ཐུགས་ཡོན་ཏན་ཕྲིན་ལས་ལྔའི་གཞི་དང་རྩ་བར་གྱུར་པའི་རྒྱུད་སྡེ་ཆེན་པོ་ལྔ་དང་། སྒྲུབ་པའི་ཡན་ལག་ཏུ་འགྲོ་བའི་རྒྱུད་སྡེ་ལྔ་དང་། སྤྱོད་པའི་ཡན་ལག་ཏུ་འགྲོ་བའི་རྒྱུད་སྡེ་ལྔ་དང་། མ་ཚང་བ་ཁ་སྐོང་བའི་ཕྱི་མའི་རྒྱུད་གཉིས་དང་། ཐམས་ཅད་ཀྱི་བསྡུས་དོན་ལྟ་བུའི་རྒྱུད་སྡེ་གཅིག་དང་བཅོ་བརྒྱད་དོ། །དེ་ཐམས་ཅད་རྒྱལ་པོས་ཀུ་ཀུ་རཱ་ཛ་ལ་བཤད། དེས་སྲས་ཤ་ཀྲ་པུ་ཏྲིའམ་ཨིནྡྲ་བྷཱུ་ཏི་ཆུང་བ་ལ་བཤད། དེས་སེང་ཧ་རཱ་ཛ་ལ་བཤད། དེས་ཤ་ཀྲ་པུ་ཏིའམ་ཨུ་པ་རཱ་ཛ་ལ་བཤད། དེས་སྲས་མོ་གོ་མ་དེ་བཱི་ལ་བཤད་ཅིང་སོ་སོའི་ཚོམ་བུ་དང་བཅས་པ་ཚོགས་སྒྲུབ་ཀྱི་ལམ་གྱིས་རྡོ་རྗེ་འཆང་གི་ས་ལ་གཤེགས་སོ། །དེ་ལྟར་ཡང་ལམ་རིམ་ལས། དེ་ནས་རྡོ་རྗེ་གདན་སྟེང་གི། །འཛམ་གླིང་ཤར་གྱི་ཕྱོགས་མཚམས་སུ། །ཕོ་བྲང་དམ་པ་རིན་ཆེན་ནང་། །བཀྲ་ཤིས་དམ་པའི་ཁང་བུ་རུ། །ཀུ་ཀུ་རཱ་ཛེནྡྲ་བྷཱུ་ཏི། །སེངྷ་ཨུ་པ་རཱ་ཛ་དང་། །སྲས་མོ་གོ་མ་དེ་བཱི་སོགས། །སྒྱུ་འཕྲུལ་དྲ་བའི་དབང་ཐོབ་ནས། །ཚོགས་ཀྱི་དཀྱིལ་འཁོར་མངོན་བསྒྲུབས་ཏེ། །རྡོ་རྗེ་འཆང་སར་མངོན་དུ་གཤེགས། །ཞེས་སོ། །རྒྱལ་པོ་འདིས་སྒྱུ་འཕྲུལ་ལམ་རྣམ་བཀོད་དང་། རིམ་པ་གཉིས་པ་ལ་སོགས་པ་མཛད་ཅིང་བླ་མེད་ཀྱི་བསྟན་བཅོས་གཞན་ཡང་བདེ་མཆོག་རྩ་རྒྱུད་ཀྱི་འགྲེལ་པ་དང་།
ཡེ་ཤེས་གྲུབ་པ་དང་། ལྷན་ཅིག་སྐྱེས་གྲུབ་སོགས་མཆོག་ཏུ་གསང་བའི་དོན་སློང་ངེས་པ་མང་པོ་མཛད། འཕགས་ཡུལ་གྱི་གྲུབ་ཆེན་རྣམས་ལ་ཁྱབ་གདལ་དུ་གྱུར་པའི་རྒྱུད་དང་། གདམས་ངག་ཅི་རིགས་པ་ཐམས་ཅད་ལས་ཕལ་མོ་ཆེ་རྒྱལ་པོའི་རིགས་ཀྱི་སློབ་དཔོན་འདི་ཉིད་ལས་བྱུང་བ་ཤས་ཆེ་ཞིང་། བདེ་བ་ཆེན་པོ་དང་འོད་གསལ་གྱི་གདམས་པའི་བཀའ་རྣམས་རྒྱལ་པོ་འདིས་གྲུབ་ཐོབ་བྱིས་པའི་ཞབས་སམ་ཛ་ལནྡྷ་རི་པ་ལ་གནང་། དེས་ནག་པོ་སྤྱོད་པ་སློབ་མའི་ཚོགས་དང་བཅས་པ་ལ་བརྒྱུད་ནས། ཏིལླི་པ་དང་ནཱ་རོ་པ་སློབ་མའི་ཚོགས་དང་བཅས་པ་ཐམས་ཅད་བརྒྱུད་པའི་སྲོལ་ཀ་འདི་ཉིད་ལས་བྱུང་བ་ཡིན་ནོ། །དེ་བཞིན་དུ་ལས་ཀྱི་ཕྱག་རྒྱའི་བཀའ་བབ་སའི་ཁུངས་ཀྱང་དེ་ཉིད་དོ། །སྲས་མོ་གོ་མ་དེ་བཱིས་རྒྱལ་པོ་ཀུ་ཀུ་རཱ་ཛ། དེས་སློབ་དཔོན་སྒེག་པ་རྡོ་རྗེ་དང་། སངས་རྒྱས་གསང་བ་གསུམ་ལ་བཤད་དེ། དེ་ལ་སློབ་དཔོན་སྒེག་པ་རྡོ་རྗེ་ནི་ཡུལ་ཥཾ་ཥ་ར་འཁྲུངས། ཨུ་རྒྱན་གྱི་གནས་སུ་རབ་ཏུ་བྱུང་ཞིང་སྡེ་སྣོད་གསུམ་ལ་སྦྱངས། ཁྱད་པར་ཐོགས་མེད་ལུགས་ཀྱི་གྲུབ་མཐའ་ལ་མཁས་ཤིང་ཐུན་མོང་གི་རིག་པའི་གནས་ཐམས་ཅད་ཀྱང་མཁྱེན། ཨུ་རྒྱན་གྱི་གླིང་ཕྲན་མ་དྷི་མ་ཞེས་བྱ་བར་འཕགས་པ་འཇམ་དཔལ་གྱི་མཚན་ཡང་དག་པར་བརྗོད་པའི་སྒྲུབ་པ་མཛད་པས་གྲུབ་པར་ཉེ་བ་ན་འཇམ་དཔལ་གྱི་བྲིས་སྐུའི་ཞལ་ལས་འོད་ཟེར་བྱུང་སྟེ་གླིང་དེ་ཡུན་རིང་དུ་སྣང་བར་བྱས་པས་ཉི་མ་དང་འདྲ་བ་ཞེས་བྱ་བར་མཚན་གསོལ། དུས་གཞན་ཞིག་ཏུ་ལྟ་བ་ལོག་པའི་སྒྲུབ་པ་པོ་ཞིག་ལ་ནང་པའི་པཎྜི་ཏའི་དབང་པོ་ལྔ་བསྒྲུབ་རྫས་ལ་དགོས་པ་བྱུང་ནས་སློབ་དཔོན་བཀྲོང་དུ་འོངས་པ་ན་གླང་པོ་ཆེ་དང་། རྟ་དང་། ཁྱེའུ་དང་། བུ་མོ་དང་། མ་ཧེ་དང་། རྨ་བྱ་སོགས་སྣ་ཚོགས་པའི་གཟུགས་སུ་སྣང་བར་མཛད་པས་སློབ་དཔོན་གང་ཡིན་མ་ཤེས་པར་ཕྱིར་ལོག་པས་སྣ་ཚོགས་གཟུགས་ཅན་ཞེས་མཚན་དུ་གྲགས་ཤིང་སྐུ་ཚེའི་སྨད་ལ་ཨོ་རྒྱན་གྱི་ཡུལ་དུ་འགྲོ་བའི་དོན་རྒྱ་ཆེར་མཛད། སློབ་དཔོན་ཆེན་པོ་འདི་སྤྱིར་རྒྱུད་སྡེ་ཐམས་ཅད་དང་ཁྱད་པར་སྒྱུ་འཕྲུལ་དྲ་
བ་ལ་མཁས་ཤིང་གྲུབ་པ་བརྙེས་པ་ཡིན། ན་ལནྡར་ཡང་ལོ་བཅུ་བཞུགས་ཤིང་སྔགས་ཀྱི་བསྟན་པ་བསྐྱངས། མཚན་ཡང་དག་པར་བརྗོད་པ་བླ་མེད་རྒྱུད་དུ་བཀྲལ་བའི་ཊཱི་ཀ་མཛད་པ་དང་། དགྱེས་པ་རྡོ་རྗེའི་རྫོགས་རིམ། ཐིག་ལེ་ཆེན་པོའི་རིམ་པ་དང་། འདུས་པ་ལ་རྒྱུད་ཀྱི་བཤད་པ་བླ་མའི་མན་ངག་གི་བཤད་པ་དང་། ལྷན་སྐྱེས་སྒྲུབ་ཐབས་སོགས་རྒྱུད་གཞན་དང་། གསང་བ་སྙིང་པོའི་འགྲེལ་པ་སྤར་ཁབ་དང་། ཐུགས་ཐིག་དང་། རིམ་པ་དྲུག་པ་དང་། དམ་ཚིག་གསལ་བཀྲ་དང་། ཕྲ་རྒྱས་སོགས་སྒྱུ་འཕྲུལ་ཕྱོགས་ལའང་བསྟན་བཅོས་མང་དུ་མཛད་ཅིང་རྒྱ་ཆེར་བཤད། མཐར་གྱིས་རྡོ་རྗེའི་སྐུ་བརྙེས་པ་ཡིན་ནོ། །འདི་རབ་ཏུ་བྱུང་བའི་མཚན་དཔལ་ལྡན་བྱང་ཆུབ་མཆོག་གི་སྐལ་བ་དང་ལྡན་པ་ཞེས་བྱ་བ་དང་། གསང་མཚན་སྒེག་པའི་རྡོ་རྗེ་དང་། བསྟན་བཅོས་རྣམས་སུ་སྒེག་པའི་རྡོ་རྗེ་ཉི་མ་དང་འདྲ་བ་སྣ་ཚོགས་གཟུགས་ཅན་ཞེས་འབྱུང་བ་ཡིན་ནོ། །འདི་ལ་སློབ་དཔོན་ཡེ་ཤེས་ཞབས་ཀྱིས་ཀྱང་། སྒྱུ་འཕྲུལ་དྲ་བ་དང་། མཉམ་སྦྱོར་དང་། གསང་བ་འདུས་པ་དང་། ཟླ་གསང་ཐིག་ལེ་སྟེ་ཏནྟྲ་སྡེ་བཅོ་བརྒྱད་ཀྱི་གཙོ་བོ་ནང་རྒྱུད་སྡེ་ལྔར་གྲགས་པ་རྣམས་གསན་ཅིང་བསྒོམས་པས་ཡེ་ཤེས་ལ་དབང་ཐོབ་པ་ཡིན་ཏེ། ཞལ་གྱི་ལུང་ལས། དེ་ནས་ཡོན་ཏན་ཀུན་འབྱུང་ཨུ་རྒྱན་ཡུལ་དུ་བགྲོད། །འཇོ་སྒེག་རྡོ་རྗེ་ཞེས་བྱར་མཚན་གསོལ་རབ་ཏུ་གྲགས། །དེ་ལས་མང་ཐོས་རྣམ་པར་དཔྱད་ཅིང་དེ་ཉིད་དུ། །ཞེས་པ་ལ་སོགས་པ་གསུངས་པའི་ཕྱིར་རོ། །གང་གི་ཚེ་སྒེག་པའི་ཞབས་ཀྱིས་ཨུ་རྒྱན་དུ་སྔགས་ཀྱི་བསྟན་པ་སྐྱོང་བ་དེའི་ཚེ་གདོལ་བའི་བུ་ཞིག་གིས་ཨཱརྱ་དེ་བ་མཇལ། བྱིན་གྱིས་བརླབས་པས་ཆོས་རྡོལ་ཤེས་སུ་བྱུང་། འཕགས་པ་ཀླུ་སྒྲུབ་ཡབ་སྲས་ཀྱི་སྔགས་གཞུང་རྣམས་ཅི་རིགས་པར་བཤད་པའི་མ་ཏངྒིཔ་དང་། ཀོངྈ་ན་རུ་བསྲུང་བའི་ཞབས་ཀྱིས་ཀྱང་ཟླ་གྲགས་ལས་དངོས་སུ་མཉན་ནས། སྒྲོན་གསལ་གྱི་གླེགས་བམ་ཐོག་མར་རྙེད་ཅིང་། དེ་བཞིན་དུ་པཎྜི་ཏ་སྒྲ་གཅན་
འཛིན་གྱིས་ཀྱང་ཀླུ་བྱང་མཇལ་ཟེར་ཏེ་འདུས་པ་འཕགས་སྐོར་ཐོག་མར་བྱུང་བའི་སྐབས་ཀ་ཡིན། སློབ་དཔོན་སངས་རྒྱས་གསང་བ་ནི་ཡུལ་དབུས་སུ་འཁྲུངས་ཤིང་ན་ལནྡར་རབ་ཏུ་བྱུང་། འདི་དང་སློབ་དཔོན་སངས་རྒྱས་ཞི་བ་གཉིས་ཀ་ཡེ་ཤེས་ཞབས་ཀྱི་སྐུ་ཚེའི་སྟོད་ཀྱི་སློབ་མ་ཡིན། ཝཱ་ར་ཎཱ་སིའི་གནས་ཤིག་ཏུ་འཕགས་པ་འཇམ་དཔལ་བསྒྲུབས་པས་ནམ་ཞིག་ན་བྲིས་སྐུ་བཞད་ཅིང་། དངོས་གྲུབ་ཀྱི་རྫས་བ་དམར་པོའི་མར་ཁུ་ཡང་ཁོལ། མེ་ཏོག་རྙིང་པ་རྣམས་ཀྱང་ཁ་འབུས་པས་དངོས་གྲུབ་ཀྱི་ལྟས་སུ་མཁྱེན་ཀྱང་ཐོག་མར་མེ་ཏོག་འབུལ་ལམ་མར་ཁུ་གསོལ་སྙམ་པའི་ཐེ་ཚོམ་གྱི་ངང་དུ་ཅུང་ཟད་ལུས་པས་གནོད་སྦྱིན་མོ་ཞིག་གིས་གེགས་བྱས་ཏེ་སློབ་དཔོན་གྱི་འགྲམ་པར་ཐལ་ལྕག་བསྣུན་པས་ཅུང་ཟད་བརྒྱལ། དེ་སངས་ཙ་ན་བྲིས་སྐུ་རྡུལ་གྱིས་གོས། མེ་ཏོག་རྙིང་། མར་ཁུ་བོ་བ་ཡང་གཟིགས། འོན་ཀྱང་རྡུལ་ཕྱིས་མེ་ཏོག་དབུ་ལ་ཕུལ། མར་ཁུ་གང་ཡོད་གསོལ་བས་སྐུ་ལུས་ནད་ཐམས་ཅད་དང་བྲལ་ཞིང་ཤིན་ཏུ་སྟོབས་དང་ལྡན་པ་དང་བློ་ཤིན་ཏུ་རྣོ་ཞིང་མངོན་པར་ཤེས་པ་ལ་དབང་སྒྱུར་བ་བྱུང་། དེ་སྐབས་ཤེད་ཨོ་རྒྱན་དུ་བྱོན་ནས་སློབ་དཔོན་སྒེག་པའི་རྡོ་རྗེ་དང་མཇལ་ཞིང་། རྣལ་འབྱོར་རྒྱུད་དང་བླ་མེད་ནང་རྒྱུད་སྡེ་ལྔ་གསན་ཅིང་ཁྱད་པར་སྒྱུ་འཕྲུལ་ལ་མཁས། དུས་གཞན་ཞིག་ཏུ་སངས་རྒྱས་ཞི་བ་དང་མཉམ་དུ་རི་བོ་ཏ་ལར་འཕགས་པ་སྤྱན་རས་གཟིགས་མཇལ་བར་བྱོན་པས་རིའི་རྩ་བར་འཕགས་མ་སྒྲོལ་མ་ཀླུའི་ཚོགས་ལ་ཆོས་སྟོན་པ་དང་། སྐེད་པར་ཁྲོ་གཉེར་ཅན་མས་ལྷ་མ་ཡིན་དང་གནོད་སྦྱིན་གྱི་ཚོགས་ལ་ཆོས་སྟོན་པ་དང་། རྩེ་མོར་འཕགས་པ་མངོན་སུམ་དུ་བཞུགས་པ་ཡང་རང་རང་གི་སྣང་བ་དང་མཐུན་པར་མཇལ། དེར་སངས་རྒྱས་གསང་བས་ཞབས་ས་ལ་མི་རེག་པ་སོགས་དངོས་གྲུབ་ཀྱང་བརྙེས། འཕགས་མ་སྒྲོལ་མས་རི་ཁ་བ་ཅན་གྱི་གངས་ཏི་སེར་སོང་ལ་སྒྲུབ་པ་གྱིས་ཞེས་ལུང་བསྟན། ཚུར་སླེབས་ནས་བཱ་ར་ཎཱ་སཱི་ལ་སོགས་པར་ལོ་མང་པོའི་བར་དུ་ཆོས་བཤད་པས་སླར་ཡང་འཕགས་པ་འཇམ་དཔལ་གྱིས་སྔར་
སྒྲོལ་མས་ལུང་བསྟན་པ་ལྟར་བསྐུལ་བས། རི་ཏི་སེར་བྱོན་ནས་སྒྲུབ་པ་མཛད་པས་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལན་གྲངས་དུ་མར་གཟིགས་ཤིང་འཇམ་དཔལ་དབྱངས་དང་མི་དང་མི་ལབ་པ་བཞིན་དུ་གྱུར། མི་མ་ཡིན་པ་རྣམས་ཀྱང་བྲན་དུ་ཁོལ། སློབ་དཔོན་འདིས་གསང་བ་སྙིང་པོ་ལ་འགྲེལ་པ་རྣམ་དབྱེ་འགྲེལ་དང་། རྡོ་རྗེ་ལས་རིམ་དང་། དཀྱིལ་འཁོར་ཆོས་དོན་དང་། དམ་པ་རྒྱན་དང་། དྲ་ཆེན་དྲ་ཆུང་དང་། ལམ་རིམ་ཆེ་ཆུང་གཉིས་དང་། ཞི་བ་དང་ཁྲོ་བོའི་མངོན་པར་རྟོགས་པའི་རིམ་པ་དང་། རྣལ་འབྱོར་རྒྱུད་ལའང་རྡོ་རྗེ་དབྱིངས་ཀྱི་སྒྲུབ་ཐབས་ཡོ་ག་ལ་འཇུག་པ་དང་། རྣམ་སྣང་མངོན་བྱང་གི་བསྡུས་འགྲེལ་དང་། བསམ་གཏན་ཕྱི་མའི་རྒྱས་འགྲེལ་སོགས་ཤིན་ཏུ་མང་བར་མཛད་ཅིང་བོད་ལའང་བཀའ་དྲིན་ཆེ་བའི་ཚུལ་འོག་ཏུ་འཆད་པར་འགྱུར་ལ། མཐར་སྐུ་ལུས་མི་སྣང་བར་གྱུར་སྐད། ཡང་རྒྱལ་པོ་ཀུ་ཀུ་རཱ་ཛས། རོ་ལངས་བདེ་བའི་དངོས་གྲུབ་དང་། དྲང་སྲོང་བྷཱ་ཥི་ཏ་གཉིས་ལ་བཤད། སྔ་མས་བཛྲ་ཧ་སྱ་ལ་བཤད། སློབ་དཔོན་འདིས་གསང་བ་འདུས་པ་ལའང་འགྲེལ་པ་དགོངས་པ་ཐམས་ཅད་ཉེ་བར་ལེན་པ་དང་། བདེ་བ་ཆེན་པོའི་སྒྲུབ་ཐབས་སོགས་མཛད་ནས་རྩལ་དུ་བཏོན་ཅིང་བཤད་པས་འཕགས་ཡུལ་དུ་འདུས་པ་ལ་བཀའ་སྲོལ་མི་འདྲ་བ་ལུགས་ཉི་ཤུ་རྩ་བཞི་ཡོད་པར་འདོད་པ་ལས་བོད་དུ་དྲུག་བྱུང་བའི་བཞི་པ་འདུས་པ་རྡོ་རྗེ་བཞད་པའི་སྐོར་གྱི་སྲོལ་ཀ་བྱུང་ས་དེ་ཡིན། འདིས་ན་ལནྡའི་ནུབ་སྒོ་སྲུང་བ་ངག་གི་དབང་ཕྱུག་གྲགས་པ་ལ་འཁོར་ལོ་སྡོམ་པའི་དབང་བསྐུར་བ་མཛད་ཅིང་རྒྱུད་ཀྱང་བཤད། གདམས་པ་དང་རྗེས་སུ་གདམས་པ་རྣམས་ཀྱང་བསྩལ། མན་ངག་བསྒོམས་པས་ངག་གི་དབང་ཕྱུག་ཆེན་པོ་སོགས་གྲུབ་པ་ཐོབ་ཅིང་སྐུ་ལུས་དེ་ཉིད་ཀྱིས་ཟུང་འཇུག་གི་སྐུ་ཕྱག་རྒྱ་ཆེན་པོའི་རིག་འཛིན་དུ་གྱུར་པ་ཡིན་ནོ། །སློབ་དཔོན་དེ་དང་དྲང་སྲོང་བྷ་ཥི་ཏ་གཉིས་ཀས་ཟ་ཧོར་རྒྱལ་པོ་པྲ་ཧ་སྡི་ལ་བཤད། འདི་ནི་ནུབ་ཕྱོགས་སུ་རྒྱལ་རིགས་སུ་སྐུ་འཁྲུངས། ཙི་ཏ་བ་
རིའི་ཡུལ་གྱི་སློབ་དཔོན་ཞི་བ་འོད་དང་མ་རུའི་ཡུལ་གྱི་འདུལ་འཛིན་ཆེན་པོ་བསོད་ནམས་གྲགས་པ་ལས་རབ་ཏུ་བྱུང་ཞིང་མཚན་ཤཱཀྱ་འོད་དུ་གྲགས། སྡེ་སྣོད་གསུམ་ཀ་ལ་མཁས་པར་སྦྱངས་ཤིང་སློབ་དཔོན་རྡོ་རྗེ་བཞད་པ་སོགས་སྔགས་ཀྱི་རྡོ་རྗེ་འཛིན་པ་ཡང་ཆེས་མང་བར་བརྟེན་ཅིང་རྒྱུད་སྡེ་ཐམས་ཅད་ཐུགས་སུ་ཆུད་པ་དང་མཆོག་གི་དངོས་གྲུབ་བརྙེས་པ་ཡིན་ཞེས་གྲགས། སྔགས་སུ་ཞུགས་པའི་མཚན་པྲ་བྷཱ་ཧ་སྡི་ཞེས་འབྱུང་། སློབ་དཔོན་འདིའི་སློབ་མ་ཤཱཀྱ་བཤེས་གཉེན་གྱིས་རྣལ་འབྱོར་རྒྱུད་དེ་ཁོ་ན་ཉིད་བསྡུས་པའི་འགྲེལ་པ་ཀོ་ས་ལའི་རྒྱན་ཞེས་བྱ་བའང་བརྩམས། འདི་གཉིས་ཀས་ཁ་ཆེར་བྱོན་ནས་འགྲོ་དོན་རྒྱ་ཆེན་པོ་མཛད་དེ། སྔ་མ་ལས་སློབ་དཔོན་སངས་རྒྱས་གསང་བ་དང་སློབ་དཔོན་ཆེན་པོ་པདྨ་སམྦྷ་བ་གཉིས་ཀྱིས་གསན་ཞིང་སློབ་དཔོན་པདྨས་རྒྱལ་པོ་ཛ་ཉིད་ལའང་གསན་ནོ། །དེ་ཡང་སློབ་དཔོན་ཆེན་པོ་འདི་ནི་འཇམ་དཔལ་སྒྱུ་འཕྲུལ་དྲ་བ་ལས། དཔལ་ལྡན་སངས་རྒྱས་པདྨ་སྐྱེས། །ཀུན་མཁྱེན་ཡེ་ཤེས་མཛོད་འཛིན་པ། །རྒྱལ་པོ་སྒྱུ་འཕྲུལ་སྣ་ཚོགས་འཆང་། །ཆེ་བ་སངས་རྒྱས་རིག་སྔགས་འཆང་། །ཞེས་ལུང་གིས་བསྟན་པ་ཡིན་ལ་དོན་དུ་དེ་བཞིན་གཤེགས་པ་ཐམས་ཅད་ཀྱི་གསུང་རྡོ་རྗེའི་བདག་ཉིད་སངས་རྒྱས་འོད་དཔག་ཏུ་མེད་པའི་སྤྲུལ་པའི་སྐུ་སྟེ་དྷ་ན་ཀོ་སའི་མཚོའི་དབུས་སུ་པདྨའི་སྡོང་པོ་ལས་མངལ་གྱི་དྲི་མས་མ་གོས་པར་བརྫུས་ཏེ་འཁྲུངས་སོ། །དེ་ལ་གཏེར་མའི་ཕྱོགས་ཕལ་ཆེ་བར་རྫུས་སྐྱེས་ཁོ་ན་གྲགས་ཆེ་ལ། བཀའ་མ་ཕུར་པའི་རྣམ་བཤད་སོགས་སུ་མངལ་སྐྱེས་ཀྱི་ཕྱོགས་ཀྱང་གསུངས་ཤིང་། དེ་དང་མཐུན་པར་འཕགས་པའི་ཡུལ་གྱི་གཏམ་དུའང་གྲགས་མོད། རྣམ་འཕྲུལ་བསམ་གྱིས་མི་ཁྱབ་པ་ལ་དབང་འབྱོར་བའི་ཕྱིར་གང་ལྟར་ཡིན་ཀྱང་རུང་ལ། བརྫུས་སྐྱེས་ལྟར་ན་ཧུ་རྨུ་ཛུ་དང་། སི་ཀོ་དྷ་ར་དང་། དྷ་ན་ཀོ་ས་དང་། རུགྨ་སོགས་གླིང་ཕྲན་རེ་ཡིན་ཅིང་ཨོ་ཌི་ཡཱ་ནའི་ཡུལ་དངོས་མ་ཡིན་ཀྱང་དེ་རྣམས་སུ་འགྲོ་དོན་ཅི་རིགས་པར་མཛད་དོ། །ཞེས་འབྱུང་ལ། ཨུ་རྒྱན་གྱི་ཡུལ་ཉིད་དུའང་ཤར་དང་ལྷོ་དང་བྱང་
གསུམ་དུ་རྒྱ་མཚོ་ཆེན་པོ་རེ་ཡོད་པས། དེ་དག་གང་དུ་འཁྲུངས་པའི་ཚུལ་གསལ་ཀ་འཕགས་ཡུལ་བའི་གཏམ་རྒྱུད་དུ་མ་བྱུང་། གང་ལྟར་ཨོ་ཌི་ཡཱ་ནའི་འཕྲལ་སྐད་དུ་སྲ་དོ་ཞེས་པ་རྒྱ་གར་བ་རྣམས་སྲིག་དྷ་ར་མེ་ཏོག་ཕྲེང་བ་འཛིན་ཞེས་པ་ཨོ་རྒྱན་གྱི་རྒྱལ་པོའི་རིགས་སུ་གྱུར་པའི་བློན་པོ་དཀོན་མཆོག་གསུམ་ལ་བླ་མར་བྱེད་པ་ཞིག་གིས་ཐོག་མར་རྙེད་ཅིང་མཇལ། མངལ་སྐྱེས་ཀྱི་ཕྱོགས་སུ་དེའི་སྲས་ཡིན་པར་འདོད། འདིའི་མིང་ཟུར་ཆག་པས་ཀྲྀཥྞ་འཛིན་དུ་གྱུར་པ་དེ་ཡིན། དེ་ནས་རིག་པའི་གནས་ཡན་ལག་དང་བཅས་པར་སོ་སོའི་སློབ་དཔོན་བརྟེན་ནས་སྦྱང་བའི་ཚུལ་གྱིས་ཉམས་འོག་ཏུ་ཆུད་པར་མཛད། ཥཾ་ར་ག་ཥ་ཞེས་བྱ་བར་འདུལ་བ་འཛིན་པ་ཞིག་ལས་སྐྱབས་སུ་འགྲོ་བ་དང་། བསླབ་པའི་གཞི་ལྔ་བླངས། སྡེ་སྣོད་གསུམ་ཀྱང་བསླབས། སྔགས་ཀྱི་སློབ་དཔོན་ཤཱནྟི་རཱུ་པ་ལས་བྱ་སྤྱོད་རྣལ་འབྱོར་རྒྱུད་ཀྱི་དབང་བསྐུར་བ་མང་པོ་ཞུས་པས། མེ་ཏོག་ཐམས་ཅད་པདྨའི་རིགས་ཀྱི་ལྷ་ཁོ་ནར་ཕོག །གཞན་ཡང་གྲུབ་ཐོབ་ཆེན་པོ་སུ་ཁ་དེ་བ་ཞེས་འཕགས་པ་སྤྱན་རས་གཟིགས་དང་གཉིས་སུ་མེད་པ་ཞིག་དང་། ཨུ་རྒྱན་གྱི་ཡུལ་ཉིད་དུ་སྨད་འཚོང་མ་སུ་ཁ་དྷ་རཱི་ཞེས་རྡོ་རྗེ་འཆང་ལས་དངོས་སུ་ཆོས་གསན་པའི་གྲུབ་པ་མོ་ཆེན་མོ་དེ་ལ་གསང་སྔགས་ནང་གི་དབང་དང་གདམས་པ་མང་པོ་ཡང་ཞུས་སོ། །དགེ་སློང་མ་ཀུན་དགའ་མོ་ཞེས་པའང་འདིའི་མཚན་གྱི་རྣམ་གྲངས་སོ། །དེ་ནས་གནས་དབེན་པ་རྣམས་སུ་བསྙེན་པ་དང་། ཉེ་བར་བསྙེན་པ་དང་། སྒྲུབ་པ་དང་། སྒྲུབ་པ་ཆེན་པོ་རྣམས་མཛད་པ་ན་ཐོག་མར་ཆོ་འཕྲུལ་གྱི་རིགས་དུ་མ་བྱུང་ཡང་རྣམ་པར་མི་རྟོག་པའི་ལམ་དུ་བཏང་ནས་བསྒོམས་པས་དེ་བཞིན་གཤེགས་པ་འོད་དཔག་མེད་སོགས་སངས་རྒྱས་དང་བྱང་ཆུབ་སེམས་དཔའ་དུ་མའི་ཞལ་གཟིགས། ཁྲོ་བོའི་རྒྱལ་པོ་ཧ་ཡ་གྲཱི་བ་དངོས་སུ་གཟིགས། མཁའ་འགྲོ་མ་དང་འབྱུང་པོ་རྣམས་བྲན་དུ་ཁོལ་བ་སོགས་བྱུང་། སྐབས་དེར་རྒྱལ་སྲིད་ཀྱི་བྱ་བའང་ཅི་རིགས་པར་མཛད། དུས་གཞན་ཞིག་ཏུ་ཡུལ་དེའི་
བློན་པོའི་ཚོགས་དང་མ་འཚམས་པ་ལྟར་མཛད་ནས་སྲིད་སྤངས་ཏེ་དུར་ཁྲོད་ཆེན་པོ་བསིལ་བའི་ཚལ་དུ་བྱོན། དེར་རིག་སྔགས་བཟླས་ཤིང་སྤྱོད་པ་མཛད་པས་ཁམས་གསུམ་རྣམ་རྒྱལ་དང་གཤིན་རྗེའི་གཤེད་ལ་སོགས་པ་རྡོ་རྗེའི་ཁྲོ་བོ་ཐམས་ཅད་ཀྱི་ཞལ་གཟིགས་ཤིང་གསུང་ཐོས། མ་ཧཱ་ཀཱ་ལ་དང་རེ་མ་ཏི་སོགས་བྲན་བཞིན་བྱེད། ཀླུ་དང་གནོད་སྦྱིན་ཐམས་ཅད་ཀྱང་མངག་གཞུག་ཏུ་ཁོལ། འཇིག་རྟེན་དང་འཇིག་རྟེན་ལས་འདས་པའི་དྲག་སྔགས་འབུམ་ཕྲག་བརྒྱ་ལ་དབང་ཐོབ། འཛམ་བུའི་གླིང་ན་གདོད་ནས་གྲུབ་པའི་དུར་ཁྲོད་ཆེན་པོ་གཞན་རྣམས་སུའང་རྫུ་འཕྲུལ་གྱིས་བྱོན་ཅིང་དེར་གྲུབ་པའི་སློབ་དཔོན་རྣམས་དང་མཇལ་ཞིང་རལ་གྲི་སོགས་ཐུན་མོང་གི་གྲུབ་ཆེན་བརྒྱད་པོའང་ཉམས་འོག་ཏུ་ཆུད་པར་མཛད། དེ་ཙམ་ན་རིག་པ་འཛིན་པའི་ལུས་སུ་གྱུར་ཀྱང་ད་ནི་སྤྱོད་པ་སྤྱད་དེ་ཟུང་འཇུག་གི་གོ་འཕང་འཐོབ་པར་བྱ་སྙམ་དུ་དགོངས་པ་ན་སངས་རྒྱས་སྣང་བ་མཐའ་ཡས་ཀྱིས་དེ་ཁོ་ན་ཉིད་མ་མཐོང་བར་དྲག་ཤུལ་སྤྱོད་པའི་ལས་ཀྱིས་འདོད་པའི་དོན་ལ་བར་དུ་གཅོད་པ་ཡིན་གྱི་ཁྱོད་ཀྱི་འདི་ཙམ་གྱིས་མཆོག་གི་དངོས་གྲུབ་མི་ཐོབ་པས་སྔོན་གྱི་ལས་འདྲེལ་ཡོད་པའི་སློབ་དཔོན་སངས་རྒྱས་ཡེ་ཤེས་ཡིན་པས་དེས་བསྟན་པ་བཞིན་སྒོམས་ཤིག །ཅེས་ལུང་བསྟན་པ་ལྟར་ཡུལ་དབུས་སུ་བྱོན་ཅིང་སློབ་དཔོན་ཤཱཀྱ་འོད་ལས་རྒྱུད་སྡེ་འོག་མ་གསུམ་སོགས་སྔགས་ཕྱི་ནང་ཐམས་ཅད་ལ་སྒྲོ་འདོགས་ཆོད་པར་མཛད། སློབ་དཔོན་ཆེན་པོ་ཡེ་ཤེས་ཞབས་ལས་ཕ་རོལ་ཕྱིན་པའི་སྡེ་སྣོད་རྣམས་དང་། སྒྱུ་འཕྲུལ་དྲ་བ་དང་། ཟླ་གསང་ཐིག་ལེ་དང་། སངས་རྒྱས་མཉམ་སྦྱོར་དང་། གསང་བ་འདུས་པ་དང་། ཀརྨ་མཱ་ལ་སོགས་རྒྱུད་དང་མན་ངག་ཐམས་ཅད་གསན། སངས་རྒྱས་གསང་བ་ལས་ཀྱང་རྣལ་འབྱོར་རྒྱུད་དང་གསང་བ་སྙིང་པོ་ལ་སོགས་རྒྱུད་སྡེ་མང་པོ་གསན་ཅིང་མཐའ་དག་པ་ཐུགས་སུ་ཆུད་པར་མཛད། ཁྱད་པར་སྤྲུལ་པའི་སྐུ་དགའ་རབ་རྡོ་རྗེ་དང་། འཇམ་དཔལ་བཤེས་གཉེན་དང་། ཤྲཱི་སེང་ཧ་གསུམ་ལས་རྫོགས་པ་ཆེན་པོ་དོན་བརྒྱུད་ཀྱི་མན་ངག་རིག་པ་རྒྱལ་ཐབས་སྤྱི་བླུགས་ཀྱི་ཚུལ་དུ་ཐོབ་པས་ཟབ་གསལ་
གཉིས་སུ་མེད་པའི་ཡེ་ཤེས་ནམ་མཁའ་དང་མཉམ་པ་ལ་རང་དབང་བརྙེས་ཤིང་རྡོ་རྗེ་འཆང་དང་མི་གཉིས་པར་གྱུར། སྤྱིར་སློབ་དཔོན་ཆེན་པོ་འདི་ནི་སྤྲུལ་པའི་སྐུ་ཡིན་པས་ཐུན་མོང་རིམ་གྱིས་པ་ལྟར་གསན་བསམ་ལ་མ་ལྟོས་ཀྱང་འདིར་རེ་ཞིག་གདུལ་བྱའི་དབང་གིས་ཐུན་མོང་ལྟར་བཤད་པ་ཡིན་གྱི་ཐུན་མོང་མ་ཡིན་པའི་རྣམ་ཐར་ཀྱང་འཆད་པར་བྱར་ཡོད་མོད་ཀྱི་སྤྲོས་པས་ཆོག་གོ། །དེ་ལ་ཡེ་ཤེས་ཞབས་ཀྱི་སློབ་མ་མཐོང་བའི་ཆོས་སུ་མྱ་ངན་ལས་འདས་པ་བཞིའི་ཡ་གྱལ་བདེ་བ་ཆེན་པོ་པདྨ་ཀ་ར་ཞེས་པ་སློབ་དཔོན་འདི་ཉིད་ཡིན་ཅེས་འཕགས་ཡུལ་དུ་གྲགས་མོད། སློབ་དཔོན་དེ་ཉིད་ཀྱིས་ལུང་བསྟན་པ་ལྟར་གྲོང་ཁྱེར་པཎྜ་བའི་བྱང་ངོས་པཪྴི་བྱ་བའི་ནགས་ཀྱི་མཐོངས་སུ་རི་དེའུ་ཞིག་ཡོད་པ་དེར་ཡིན་ཟེར། དོན་དུ་བྲག་ཕུག་མ་ར་ཏི་ཀར་པདྨ་ཅན་གྱི་ལས་རྒྱ་མནྡཱ་རི་ལ་བརྟེན་ནས་བདེ་བ་ཆེན་པོའི་ལམ་གྱིས་ཟླ་བ་དྲུག་ཏུ་སྒྲུབ་པ་ཆེན་པོ་མཛད་པས་ཕྲ་ཡང་སོགས་ཀྱི་ཡོན་ཏན་དང་ལྡན་པའི་རྡོ་རྗེའི་སྐུར་གྱུར། ཏི་ར་ཧུ་ཏི་སོགས་ཐ་རུའི་རྒྱལ་ཁམས་དང་། ཀ་མ་རུ་དང་བལ་པོ་སོགས་བྱང་ཕྱོགས་ཀྱི་ཡུལ་རྣམས་སུའང་ཆོས་སྟོན་པ་དང་། ཐུན་མོང་གི་གྲུབ་པ་རྣམས་ཀྱིས་ཕན་འདོགས་པར་མཛད། ཙམྤཱརྞའི་ཡུལ་དུ་ཀླུང་ཆེན་པོ་བྷ་ཏཾ་ཞེས་པ་ཉིན་ལམ་གཅིག་ཙམ་སའི་འོག་ཏུ་བཅུག་པ་དང་། ཚ་ལམ་ཙམ་དུ་བཅུག་པ་གཉིས་ཡོད། དེ་སྐབས་ཙམ་དུ་རྒྱ་གར་ལྷོ་ཕྱོགས་ཏྲི་ལིང་ག་དང་ཉེ་བ་ཏྲི་མ་ལའི་ཡུལ་ལ་ཀྵ་མཱན་གྱི་གནས་དང་ཉེ་བ་ན་ཤི་བ་སྠཱ་ན་ཞེས་པར་དབང་ཕྱུག་གི་ལིངྒ་རང་བྱུང་དུ་བྱུང་། དེས་ནང་པའི་སྡེ་རྣམས་དང་ལྷ་ཁང་སོགས་ལ་ཤིན་ཏུ་གནོད་པ་ཞིག་ཡོད་ལ། ཡང་ཤར་ཕྱོགས་བྷང་ག་ལར་ཉེ་བ་བཱ་རེནྡྲའི་ལྷོ་ནུབ་བཱ་གལ་ཞེས་བྱ་བར་མཚོ་ཆུང་ཞིག་གསར་དུ་རྡོལ་ཞིང་དེར་མུ་སྟེགས་ལ་དགའ་བའི་ཀླུ་གདུག་པ་ཅན་ཞིག་ཀྱང་གནས་བཅས། དེའི་མཐུས་ཤར་ཕྱོགས་སུ་མུ་སྟེགས་ཀྱི་སྡེ་གསར་པ་མང་དུ་བྱུང་། སངས་རྒྱས་པ་རྣམས་ལ་ཀླུ་དེ་ཤིན་ཏུ་ཆོ་འཕྲུལ་ཆེ་བས་གནོད་པར་གྱུར། མ་ག་དྷའི་རྒྱལ་པོའི་ཁབ་ན་ཤེལ་གྱི་ཕ་ཝང་
གཅིག་ལ་མུ་སྟེགས་པའི་ལྷ་འབྱུང་པོ་མང་དུ་གནས་པས་བསྒྲུབ་མི་དགོས་པར་མིག་མཐོང་དང་རྣ་སྒྲོགས་དང་མོ་རྩིས་ཀྱི་མངོན་ཤེས་སོགས་སྟོན་པ་ཞིག་བྱུང་། དེ་རྣམས་འདུལ་བར་དགོངས་ཏེ་རྡོ་རྗེ་གདན་དུ་སྒྲུབ་ཁང་མཛད་ནས་འཁོར་ལོས་སྒྱུར་བ་དྲུག་གི་དཀྱིལ་འཁོར་ཞལ་ཕྱེས་ནས་དཔལ་ཡང་དག་ཧེ་རུ་ཀ་བསྒྲུབས་པས་འབར་བ་དང་། ཧ་ཧ་ཧི་ཧི་སོགས་བཞད་པ་བརྒྱད་ཀྱིས་བཞད་པའི་དཔལ་ཧེ་རུ་ཀས་ཞལ་བསྟན། ཕུར་བུ་གསུམ་བྱུང་བ་ལས་ཁྲོ་བོ་ཁམས་གསུམ་རྣམ་རྒྱལ་གྱི་ཕུར་བུ་སློབ་དཔོན་ཉིད་ཀྱིས་བླངས་ཏེ་ཏྲི་མ་ལའི་ལིངྒ་དང་ཉེ་བའི་ཤིང་སྡོང་གཅིག་ལ་བཏབ་པས་དེ་སྐོར་གྱི་ནགས་ཐམས་ཅད་ཚིག །ལིངྒ་ཕྱེད་ལྷག་ཙམ་ཐལ་བར་སོང་། ཕྱིས་ནང་པ་ལ་གནོད་པ་མེད་ཅིང་མཆོད་པ་ཉམས་པ་རྣམས་ཀྱང་གསོས། ཁྲོ་བོ་བདུད་རྩི་འཁྱིལ་པའི་ཕུར་བུ་དཀྱིལ་འཁོར་གྱི་གཟུངས་མ་མན་དཱ་ར་བའམ་ངང་ཚུལ་ཅན་གྱིས་བླངས་ཏེ་བྷཾ་ག་ལའི་མཚོ་དེ་ལ་བཏབ་པས་ཀླུ་འཁོར་བཅས་ཐལ་བར་སོང་། ཞག་བདུན་ནས་མཚོ་ཡང་བསྐམས། མུ་སྟེགས་ཀྱི་སྡེ་དེ་རྣམས་ཞིག །ཕུར་བུ་ཆུང་བ་དེ་སྒྲུབ་གཡོག་ཀ་མ་རུའི་རྣལ་འབྱོར་པ་རཏྣ་ཤཱི་ལས་བླངས་ཏེ་རྒྱལ་པོའི་ཁབ་ཀྱི་ཤེལ་གྱི་ཕ་ཝང་དེ་ལ་བཏབ་པས་སིལ་གྱིས་ཞིག །དེ་གཉིས་ཀྱིས་ཀྱང་སངས་རྒྱས་པའི་སྡེ་རྣམས་ལ་ཕན་པར་བྱུང་། གཉིས་ཀའང་རིག་པ་འཛིན་པའི་ལུས་སུ་གྱུར་ཏེ་མི་སྣང་ལ། འདོད་ན་སྤྲུལ་པའི་ལུས་ཀྱིས་སྣང་བར་བྱེད་དོ། སློབ་དཔོན་གྱིས་ཏྲི་མ་ལ་དང་བི་ཀྲ་མ་ཤཱི་ལར་ཐོགས་རེ་བཞུགས་ཤིང་ལྷ་ཁང་རེའང་བཞེངས། དེ་ནས་སླར་ཡང་ཨོ་རྒྱན་དུ་བྱོན། སྐལ་བ་དང་ལྡན་པ་རྣམས་ལ་གསང་སྔགས་ཕྱི་ནང་གི་ཆོས་མང་དུ་བསྟན་ཅིང་ཐམས་ཅད་ཀྱང་དངོས་གྲུབ་སྣ་རེ་མ་ཐོབ་པ་མེད། ལྷ་ཁང་ཆེན་པོ་གཅིག་ཀྱང་བཞེངས། དེ་སྐབས་ཨོ་རྒྱན་དང་ཉེ་བའི་ཡུལ་ཀཙྪ་ན་སངས་རྒྱས་པའི་སྡེ་བཟང་བ་ཞིག་ཡོད། ཡུལ་མོ་ལ་ཏཱ་ནའི་གྲོང་ཁྱེར་བཱ་ག་དའི་རྒྱལ་པོ་སྟག་གཟིག་ཏུ་རུཥྐ་ཡིན་པ་དེའི་དམག་གིས་ཡུལ་རྣམས་བཅོམ། ཆོས་གྲྭ་འགའ་ཞིག་ནི་
བཤིགས། མང་པོ་འཇོམ་ལ་ཁད་ཀྱི་སྐབས་དམག་མི་རྣམས་ནཱི་ལ་ཞེས་པའི་ཆུ་ཀླུང་ལ་གྲུ་དང་རྐྱལ་གྱིས་བྱུང་བར། ཚུར་ཁ་ནས་སློབ་དཔོན་གྱིས་ལྟ་སྟངས་དང་སྡིགས་མཛུབ་དྲག་ཏུ་མཛད་པས་གྲུ་ཆེ་བ་བདུན་དང་གྲུ་ཆུང་ལྔ་བརྒྱ་ཙམ་དང་། རྐྱལ་ཞིང་འོང་བའི་མི་དང་བཅས་པ་ཐམས་ཅད་ཆུར་བྱིངས་ནས་ཏུ་རུཥྐའི་དཔའ་བོ་ཐམས་ཅད་ཤིའོ། །དེ་ཕྱིན་ཆད་ཕྱོགས་དེར་ཏུ་རུཥྐའི་གནོད་པ་མ་བྱུང་ངོ་། །བལ་ཡུལ་ཕྱོགས་སུ་ཕེབས་ནས་ཡང་ལེ་ཤོད་དུ་དཔལ་ཡང་དག་ཧེ་རུ་ཀའི་སྒྲུབ་པ་ཚོམ་བུ་ལྔ་པའི་ཚོགས་ཀྱི་སྤྱོད་པ་སྤྲོས་བཅས་ཟླ་བ་དྲུག་ཏུ་སྤྱད་པས་ཕྱོགས་བཅུའི་སངས་རྒྱས་ཐམས་ཅད་ཞལ་རྟག་ཏུ་སྟོན་ཅིང་གསུང་གླེང་མཛད་པ་དང་། འོད་གསལ་གྱི་སྐུ་ལས་ཟུང་འཇུག་གི་སྐུར་བཞེངས་ཏེ་ཕྱག་རྒྱ་ཆེན་པོ་མཆོག་གི་དངོས་གྲུབ་མངོན་དུ་མཛད་དོ། །དེ་ནས་རྒྱ་གར་ཤར་ནུབ་ལྷོ་དབུས་རྣམས་སུ་འགྲོ་དོན་ཅི་རིགས་པར་མཛད་ལ། དེ་ནས་ཆུ་བོ་གང་གཱའི་བྱང་ཕྱོགས་ནཻ་པ་ལའི་ཡུལ་ཕན་ཆད་དུ་འགྲོ་བའི་དོན་ཆེར་མཛད། དེ་བས་ཀྱང་འགྲོ་ལྡིང་གི་ཡུལ་དུ་འགྲོ་དོན་ཆེ། དེ་བས་ཀྱང་བོད་ཀྱི་ཡུལ་དུ་འགྲོ་བའི་དོན་རྒྱ་ཆེ། དེ་ལས་ཀྱང་རྔ་ཡབ་གླིང་ཕྲན་སོགས་སུ་མི་མ་ཡིན་གྱི་འགྲོ་དོན་མཛད་པ་ཤིན་ཏུ་རྒྱ་ཆེས་ཆེ་བ་ཡིན་ཏེ། སྔ་མ་རྣམས་ནི་ཡུལ་ཉི་ཚེ་བ་དང་སྐྱེ་བོ་ཉུང་ངུ་ཙམ་དང་། དུས་ཀྱང་ལོ་གྲངས་བརྒྱ་སྟོང་སྙེད་སོགས་ཡུན་ཐུང་ངུ་ཡིན་ལ། ཕྱི་མ་འདི་ལ་ནི་ཡུལ་དུས་སྐྱེ་བོ་སོགས་ཚད་གཞལ་བར་དཀའ་བའི་ཕྱིར་སློབ་དཔོན་འདི་ཉིད་གཙོ་བོར་མི་མ་ཡིན་འདུལ་བའི་ཕྲིན་ལས་ཅན་ནོ། །དེ་ལ་སློབ་དཔོན་འདི་རབ་ཏུ་བྱུང་བའི་མཚན་པདྨ་འབྱུང་གནས་དང་། གསང་བའི་མཚན་པདྨ་སམྦྷ་བ་དང་། མ་ཧཱ་སུ་ཁ་དང་། པདྨ་བཛྲ་ལ་སོགས་མཚན་གྱི་རྣམ་གྲངས་དང་། ཕྱིས་ཨོ་རྒྱན་དྷརྨ་གཉྫི་ནས་དགྱེས་རྡོར་གྱི་རྒྱུད་སྤྱན་འདྲེན་པ་པོ་སློབ་དཔོན་མཚོ་སྐྱེས་སུ་གྲགས་པ་ཨོ་རྒྱན་དུ་རྒྱལ་པོས་གསོན་བསྲེགས་བྱས་པས་སློབ་དཔོན་ཡབ་ཡུམ་ཧེ་རུ་ཀའི་རྣམ་པར་བཞུགས་པ་སོགས་ཆོ་འཕྲུལ་ཁྱད་པར་ཅན་བསྟན་པ་
དེ་ཡང་འདི་ཉིད་ཡིན་ནམ་སེམས་ཤིང་གཞན་ཡང་སློབ་དཔོན་ཆེན་པོ་པདྨ་བཛྲ་ཆེ་ཆུང་དང་། ཌོམྦི་པ་དང་། བཱི་རུ་པ་དང་། ནག་པོ་སྤྱོད་པ་ཆེན་པོ་ལ་སོགས་པ་རྣམས་ཀྱང་སློབ་དཔོན་ཉིད་སྐུའི་རྣམ་པ་གཞན་དང་མཚན་གཞན་གྱིས་ཡུལ་ཅི་རིགས་པར་འགྲོ་དོན་མ་ངེས་པར་མཛད་པར་གྲུབ་ལ། དེ་དག་ཀྱང་རྣམ་པ་འདི་དང་མཚན་འདིས་མཚན་པའི་རྣམ་ཐར་གྱི་དབང་དུ་བྱས་པ་ཡིན་མོད། དངོས་རྒྱུད་ཀྱི་ཁྱད་པར་ཙམ་མ་གཏོགས་སྤྲུལ་པའི་སྐུ་འདི་ཉིད་ཀྱི་གདུལ་བྱའི་ཞིང་དུ་མ་གྱུར་པ་གཅིག་ཀྱང་མེད་པའི་ཕྱིར་ཟུང་འཇུག་གི་གོ་འཕང་ལ་བཞུགས་པ་རྣམས་ཀྱི་རྣམ་པར་ཐར་པའི་མཐའ་ནི་སུས་ཀྱང་བརྗོད་པར་མི་ནུས་སོ། །དེ་བས་ན་གྲུབ་ཐོབ་ཆེན་པོ་རྣམས་གདུལ་བྱ་ཕལ་གྱི་མངོན་སུམ་དུ་མི་སྣང་བས་ཡུན་རིང་པོར་སོང་བ་ན་སླར་ཡང་སྐུ་སྣང་བར་མཛད་ནས་དུས་རིང་པོར་བཞུགས་པ་དང་། སྐབས་རེ་ཡུལ་ལ་ལར་མི་སྣང་བར་ལ་ལར་སྣང་བ་དང་། ཁ་ཅིག་ཏུ་འཕོ་བའི་ཚུལ་མཛད་ནས་ཁ་ཅིག་ཏུ་སྐྱེ་བར་སྟོན་པ་སོགས་རྣམ་འཕྲུལ་མཐའ་ཡས་པའི་ཕྱིར་སྔོན་པཱི་རུ་པ་མི་སྣང་བར་གྱུར་ནས་སླར་ཡང་སྐུ་དངོས་ཀྱིས་ལན་གསུམ་དུ་བྱོན་པ་དང་། ཛ་ལནྡྷ་རི་པ་ལན་ལྔ་བྱོན་པ་དང་། སྤྱོད་པ་བ་ཆེན་པོ་དེ་བཱི་ཀོ་ཊར་གྲོངས་པའི་ཚུལ་མཛད་ནས་སློབ་མ་རྣམས་ཀྱིས་སྐུ་གདུང་བསྲེགས་པ་བཅས་གྲུབ་པ་ན་སླར་ཡང་ཡུལ་གཞན་དུ་སྔ་མའི་སྐུ་དེ་ཉིད་ཀྱིས་འགྲོ་དོན་མཛད་པ་དང་ཡུལ་ལ་ལར་སྐྱེ་བ་གསར་དུ་བཟུང་ནས་མཆོག་གི་དངོས་གྲུབ་བརྙེས་པའི་ཚུལ་མཛད་པར་གྲགས་པ་སོགས་ལ་སོ་སྐྱེའི་སྣང་ཚུལ་དང་བསྟུན་པའི་དུས་སྔ་ཕྱི་དང་གནས་ཡུལ་སོགས་ཁྲིག་ཁྲིག་ཀད་ཀད་སྒྲིག་ཏུ་མི་བཏུབ་ཅིང་ཕལ་པའི་རྣམ་གཞག་རྒྱལ་པོ་ལ་འགྲིགས་པའི་སྐབས་མེད་པ་བཞིན་ནོ། །དེ་ཡང་སེམས་ཅན་རྣམས་ཀྱི་མོས་པ་དང་། བསམ་པའི་དབང་གི་རྗེས་སུ་ཀུན་ཏུ་འགྲོ་བའི་རྫུ་འཕྲུལ་ལས་དབང་ཕྱུག་པ་ཉིད་ཀྱིས་ཏེ། འཕགས་པ་ཆོས་ཐམས་ཅད་ཡང་དག་པར་སྡུད་པའི་མདོ་སྡེ་ལས། འཇིག་པའི་བསྐལ་པ་ཆགས་པའི་བསྐལ་པར་མོས་ན་ཡང་འཇིག་པའི་བསྐལ་པ་ཆགས་པའི་བསྐལ་
པར་འགྱུར་ཏེ། སེམས་ཅན་དེ་དག་གིས་ཀྱང་ཆགས་པའི་བསྐལ་པར་ཤེས་སོ། །ཆགས་པའི་བསྐལ་པ་འཇིག་པའི་བསྐལ་པར་མོས་ན་ཡང་ཆགས་པའི་བསྐལ་པ་འཇིག་པའི་བསྐལ་པར་འགྱུར་ཏེ། སེམས་ཅན་དེ་དག་གིས་ཀྱང་འཇིག་པའི་བསྐལ་པར་ཤེས་སོ། །འཇིག་པ་དང་ཆགས་པ་ཡང་གཞན་དུ་གྱུར་པ་མ་ཡིན་ཏེ་མོས་པ་དེ་ལྟར་དུ་འགྱུར་རོ། །དེ་བཞིན་དུ་བསྐལ་པ་གཅིག་སྔ་དྲོ་ཙམ་དུ་མོས་ན་ཡང་དེ་ན་སེམས་ཅན་དེ་དག་གིས་བསྐལ་པ་གཅིག་སྔ་དྲོ་ཙམ་དུ་ཤེས་སོ། །སྔ་དྲོ་བསྐལ་པ་ཙམ་དུ་མོས་ན་ཡང་དེ་བཞིན་དུ་འགྱུར་ཏེ། དེས་ན་སེམས་ཅན་དེ་དག་གིས་དེ་བཞིན་དུ་ཤེས་ཏེ། འདི་ནི་བྱང་ཆུབ་སེམས་དཔའི་མོས་པ་ལ་བྱུང་བའི་རྫུ་འཕྲུལ་ཞེས་བྱའོ། །ཞེས་པ་ལ་སོགས་པས་གསུངས་པའི་ཕྱིར་རོ། །སློབ་དཔོན་འདི་ཉིད་འགྲོ་ལྡིང་དུ་ཕེབས་པའི་སྔ་ཕྱི་གང་ཡིན་མི་གསལ་ཞིང་འདིར་གྲགས་པ་ལྟར་ན་བོད་ཀྱི་ལྗོངས་འདི་ནས་སྲིན་པོའི་ཡུལ་དུ་བྱོན་པར་འདོད་ལ། འགྲོ་ལྡིང་བ་རྣམས་འགྲོ་ལྡིང་ཉིད་ནས་དེར་བྱོན་པར་འདོད་ལ། སྐུའི་བཀོད་པ་གཉིས་དུས་གཅིག་ཏུ་བསྟན་པར་བྱས་ཀྱང་མི་འགལ་མོད། གང་ལྟར་ཡང་རྒྱ་གར་ལྷོ་ཕྱོགས་ནས་ནུབ་དྲང་ཐད་དུ་གྲུས་བརྒལ་ཏེ་རྒྱ་མཚོ་ལ་ཕྱིན་པ་ན་རྒྱ་མཚོའི་དབུས་ཀྱི་གླིང་ཆུང་ངུ་ཌཱ་མི་ཌོ་དྭི་པ་ཞེས་བྱ་བ་ཡོད་དེ་སྔོན་དུ་སྲིན་པོ་དང་མཁའ་འགྲོ་མ་རྣམས་ནམ་མཁའ་ལ་ལྡིང་ཞིང་འགྲོ་བ་ཁོ་ནས་གང་བའི་ཕྱིར་དེ་སྐད་དུ་གྲགས་ཤིང་འབྱུང་པོ་མིའི་གཟུགས་ཅན་གྱི་སྐྱེས་པ་དང་། བུད་མེད་རྣམས་ནི་རིགས་སྔགས་སྣ་ཚོགས་པས་ངན་ཐབས་བྱེད་པ་གདུག་པའི་མཁའ་འགྲོ་མའམ་སྔགས་འཆང་མ་ཤས་ཆེ། ཡུལ་དེར་སློབ་དཔོན་གྱིས་ཐོག་མར་བྱོན་ཏེ་གླིང་དེ་ཉིད་ཀྱི་བདག་མོ་སྔགས་འཆང་མ་དྲུག་ཅུ་རྩ་བཞི་རྒྱལ་པོའི་བཙུན་མོའི་ཚུལ་གྱིས་ཡོད་པ་ཐམས་ཅད་བཀུག་ནས་སྔགས་དང་ཕྱག་རྒྱས་གཟིར་ཏེ་བཏུལ་ནས་གཙོ་མོ་གཞན་རྣམས་ཀྱང་བསྡུར་བཅུག་ནས་དམ་བཞག་དང་པོ་མཛད། ལན་ཅིག་སློབ་དཔོན་གྲོང་ཁྱེར་དུ་བྱོན་པ་ཞིག་ལ། སྔགས་
འཆང་མ་མང་པོས་འཛམ་བུ་གླིང་གི་མི་མང་པོ་ཟ་བར་གཟིགས་ཏེ། དེ་ཐམས་ཅད་དབང་མེད་དུ་བཀུག་ནས་བསྡིགས་པས་དེ་རྣམས་འབྲོས་པར་བརྩམས་པ་ན་ཡན་ལག་ལ་ཕུར་བུས་བཏབ་ཅིང་ཕྱིན་ཆད་འཛམ་བུ་གླིང་པ་རྣམས་ལ་གནོད་པ་མི་བྱེད་པའི་མནའ་བོར་དུ་བཅུག་ཅིང་སེམས་བསྐྱེད་ཀྱང་ཕོག་སྟེ་དམ་བཞག་གཉིས་པ་མཛད། ཡང་དུས་གཞན་ཞིག་ཏུ་ན་མགྲོན་ཁང་ཞིག་ཏུ་བྱོན་པས་བུད་མེད་མང་པོས་སྣོད་དུ་མར་ཆུ་བསྐོལ་གྱིན་འདུག་པ་ཇི་ཞིག་ན་ཆུ་དེ་རྣམས་ལ་ལ་ཁྲག་ཏུ་འགྲོ། ལ་ལ་ཚིལ་དུ་འགྲོ། དེ་བཞིན་དུ་ལ་ལ་ཐིག་ལེ་དང་། ཤ་དང་། མར་ཁུ་དང་། བུ་རམ་དང་། འབྲས་ཆན་དང་། ཆང་ལ་སོགས་པར་འགྱུར་བ་གཟིགས་ནས་དེ་རྣམས་ལ་དྲིས་པས་སློབ་དཔོན་ཡིན་པ་ངོ་མ་ཤེས་ཏེ་འདི་དག་ནི་འཛམ་བུ་གླིང་པའི་མི་རྣམས་ཀྱི་ལུས་དང་ཟས་ཀྱི་བཅུད་བཀུག་པ་ཡིན་ཟེར། ཁྱོད་རྣམས་ཀྱིས་སློབ་དཔོན་པདྨཱ་ཀ་རའི་དྲུང་དུ་མནའ་བོར་བ་མ་ཡིན་ནམ་བྱས་པས། ངེད་རྣམས་ཀྱི་དཔོན་མོས་མནའ་བོར་ཡང་ཁོ་མོ་ཅག་གིས་མ་བོར་རོ་ཟེར་བས། ཡང་སྔར་གྱི་ཕུག་པ་དེར་སྔགས་འཆང་མ་དཔོན་གཡོག་བསྡུས་པས་འབུམ་ཕྲག་བཅུ་གཉིས་བྱུང་། དེ་ཐམས་ཅད་ཀྱི་སྲོག་སྡིགས་དང་སྒྲུབ་ཐབས་བླངས། དཔོན་མོ་རྣམས་དཀྱིལ་འཁོར་དུ་བཅུག །གཡོག་རྣམས་ལ་སེམས་བསྐྱེད་ཕོག །ཐམས་ཅད་ཀྱང་མནའ་འདོར་དུ་བཅུག་སྟེ་དམ་བཞག་གསུམ་པ་མཛད། གཞན་ཡང་ཡུལ་དེའི་མི་མ་ཡིན་པ་ཐམས་ཅད་བཏུལ། མི་རྣམས་ཀྱང་འདུལ་བར་དགོངས་ཏེ་ཡི་དྭགས་པརྤཱ་རེ་ཞེས་བྱ་བ་ཡུལ་དེའི་རྒྱལ་པོའི་ཕོ་ལྷ་མཐུ་རྩལ་ཆེ་བ་ཞིག་ཡོད་པའང་བཏུལ། རྒྱལ་པོའི་བཙུན་མོ་རྣམས་དཀྱིལ་འཁོར་མཆོད་པའི་གཟུངས་མའི་ཆེད་དུ་བཀུག་པས་རྒྱལ་པོ་ཁྲོས་ཏེ་དམག་གི་ཚོགས་དང་བཅས་ཏེ་བྱུང་བ་ལ་སློབ་དཔོན་གྱིས་ཡུངས་ཀར་གཏོར་བས་གོ་ཆ་དང་མཚོན་ཆ་མ་ལུས་པ་ཚིག །དམག་ཐམས་ཅད་ཀྱང་ལུས་རེངས། ངག་ལྐུགས། སེམས་མྱོས་ཏེ་ཤི་ལ་ཐུག་པར་གྱུར་པ་ན་སྐྱེ་བོ་ཐམས་ཅད་ཀྱིས་གསོལ་བ་བཏབ་པས་སློབ་
དཔོན་གྱིས་བུམ་པའི་ཆུས་བཀྲུས་པས་སྐད་ཅིག་ལ་བདེ་བར་གསོས་སོ། །དེ་ནས་རྒྱལ་པོ་འཁོར་བཅས་ཀྱིས་ཞབས་ལ་ཕྱག་བཙལ་ནས་བཀའ་བཞིན་སྒྲུབ་པར་བྱས་པས། སངས་རྒྱས་ཀྱི་བསྟན་པ་ཚུགས་ཤིག་གསུངས། བི་དྷ། ཨརྔྷ། སུ་དྷཱ་ཞེས་པའི་གཙུག་ལག་ཁང་གསུམ་བཞེངས། རབ་གནས་སློབ་དཔོན་གྱིས་མཛད། མ་ག་དྷ་ནས་སྡེ་སྣོད་གསུམ་གྱི་མཁན་པོ་སྤྱན་དྲངས་ཏེ་བཤད་པ་དང་ལག་ལེན་རྐང་ཚུགས་པ་བཙུགས། སློབ་དཔོན་ཉིད་ཀྱིས་རྒྱལ་པོ་འཁོར་བཅས་ལ་གདམས་པ་མང་དུ་གསུངས། སྐལ་བ་དང་ལྡན་པ་དྲུག་ལ་རྒྱུད་དྲུག་བཤད། དེ་དྲུག་པོ་ཡང་གྲུབ་པ་ཐོབ། ཡུལ་སོ་སོར་ལྷ་ཁང་མང་དུ་བཞེངས། དེ་ལྟར་ཡུལ་དེར་ལོ་བཅུ་གཉིས་སུ་བཞུགས་ནས་མཐར་བླ་གོས་ཀྱིས་གཤོག་པའི་ཚུལ་མཛད་དེ་ནམ་མཁའི་ལམ་ལ་གྱ་གྱུར་གཤེགས་ཏེ། ལྷོ་ནུབ་སྲིན་པོའི་གླིང་དུ་བཞུད་དོ་ཟེར། ཡུལ་དེར་ཕྲ་མེན་མ་རྣམས་དམ་བཞག་དང་པོ་མཛད་དུས་ཀྱི་མེ་ཐབ་བྲག་ལས་བཅོས་པ་ཡོད། གཉིས་པའི་སྐབས་མཁའ་འགྲོ་མ་རྣམས་ལ་ཕུར་བུ་བཏབ་པའི་རྗེས་སྟོང་ཕྲག་ཙམ་དང་། གྲུབ་པའི་ཕུར་བུ་གཞན་རྣམས་ཡལ་ནས་མེད་ཀྱང་། གཅིག་མ་འོངས་པའི་སྤྱོད་ཡུལ་དུ་བཞག་པ་མིའི་ལུས་བོངས་སུམ་འགྱུར་ཙམ་ཡོད་པ་རྡོ་ཤིང་ཟངས་ལྕགས་སོགས་གང་ཡིན་མཚོན་དུ་མེད་པ་ཞིག་ཡོད་སྐད་དོ། །གླིང་དེར་སློབ་དཔོན་ཆེན་པོ་པདྨའི་ལུགས་ཀྱི་སྔགས་གཞུང་རྣམས་དར་བར་ཡོད་ཅིང་། དགྱེས་རྡོར་དང་། ཟླ་གསང་ཐིག་ལེ་དང་། དཔལ་མཆོག་རྣམས་ཤིན་ཏུ་དར། ཕྱིས་སུ་རྒྱ་གར་ལྷོ་ཕྱོགས་པ་བུཌྜྷ་ནཱ་ཐ་གུཔྟས་ཀྱང་དེར་ཕེབས་ཤིང་སློབ་དཔོན་བློ་གྲོས་བཟང་པོ་ལ་སློབ་དཔོན་པདྨ་ལུགས་ཀྱི་དགྱེས་རྡོར་དང་། བདེ་མཆོག་གི་དབང་བསྐུར་བ་དང་། རྒྱུད་ཀྱི་བཤད་པ་མང་པོ་ཞུས་ཤིང་གཞན་ཡང་ཕུར་པ་དང་། ཁྲོ་བཅུའི་རྒྱུད་དང་། རྟ་མགྲིན་དང་། ཡང་དག་དང་། མ་མོའི་སྐོར་སོགས་
རྒྱ་གར་ན་མ་གྲགས་པའི་རྒྱུད་སྡེ་མང་པོ་བཞུགས་ཤིང་མདོར་ན་སློབ་དཔོན་ཆེན་པོའི་བཀའ་སྲོལ་གྱི་རྒྱུད་སྡེ་བཞིའི་ཉན་བཤད་བསྒོམ་གསུམ་ཤིན་ཏུ་དར་ཞིང་རྒྱས་པ་ད་ལྟའི་བར་དུ་ཡོད་དོ། །དེར་མ་ཟད་བསྐྱེད་རིམ་གྱི་བཀའ་རྣམས་ནི་སློབ་དཔོན་ཆེན་པོ་འདི་ཉིད་ལ་ཀ་མ་རུའི་སློབ་དཔོན་རཏྣ་ཤཱི་ལས་ཞུས། དེས་ཀ་ཡསྠ་བྲིཌྜྷ་ལ་གདམས། འདི་ཀྱཻ་རྡོར་འགྲེལ་པ་ཁ་སྦྱོར་དྲི་མེད་མཛད་མཁན་དེ་ཡིན། དེས་དུར་ཧ་རི་ལ་གདམས། དེས་རྡོ་རྗེ་གདན་པ་ཆེ་བ་ལ་གདམས། དེས་རྡོ་རྗེ་གདན་པ་བར་པ་ལ་གདམས། དེ་ནས་སློབ་དཔོན་ཨ་བྷྱཱ་ཀ་ར་སློབ་མའི་ཚོགས་དང་བཅས་པ་ལས་བྱུང་བ་ཡིན་ལ། དེ་བཞིན་དུ་ལས་ཀྱི་ཕྱག་རྒྱའི་བཀའ་ཡང་སློབ་དཔོན་འདིས་ཀུ་ས་ལ་ལ་གནང་། དེ་ལ་ཀུ་ས་ལ་བྷ་དྲ་ཆུང་བས་ཞུས། དེ་ལ་སློབ་དཔོན་ཨ་སི་ཏ་གྷ་ནས་ཞུས། དེ་ལ་ཡེ་ཤེས་བཤེས་གཉེན་གྱིས་ཞུས་ནས་རིམ་བཞིན་བྱུང་བ་ཡིན་ཅིང་བཀའ་བབ་དེ་རྣམས་བཞུགས་པའི་སློབ་དཔོན་རྣམས་སློབ་དཔོན་ཆེན་པོ་འདི་ཉིད་ཀྱི་རྗེས་འབྲངས་སུ་དོན་གྱིས་འགྱུར་བ་ཡིན་ནོ།། །། སྒྲུབ་སྡེའི་ཕྱོགས་སུའང་བཀའ་གཏེར་གཉིས་ཀྱི་བབ་ཚུལ་ལ་དང་པོ་ནི། སློབ་དཔོན་ཧཱུཾ་ཀ་ར་ལ་ཐུགས་མི་བསྐྱོད་པའི་རིགས་ཧེ་རུ་ཀ་གལ་པོ་སོགས་ཡང་དག་ཐུགས་ཀྱི་བཀའ་བབས་ཏེ། སློབ་དཔོན་འདི་ནི་བལ་པོའི་ཡུལ་དུ་བྲམ་ཟེའི་རིགས་སུ་འཁྲུངས་ཤིང་རིག་བྱེད་སོགས་དང་མུ་སྟེགས་ཀྱི་གཞུང་ལུགས་ལའང་ཤིན་ཏུ་མཁས་ཤིང་ནུས་པའང་ཐོབ། ཕྱིས་སངས་རྒྱས་ཀྱི་བསྟན་པ་ལ་མཆོག་ཏུ་དད་པས་ཡུལ་དབུས་སུ་ན་ལནྡར་སློབ་དཔོན་སངས་རྒྱས་ཡེ་ཤེས་དང་པཎྜི་ཏ་སྒྲ་གཅན་འཛིན་བཟང་པོ་ལས་རབ་ཏུ་བྱུང་། ཕ་རོལ་ཕྱིན་པ་ནས་བཟུང་གསང་སྔགས་ཕྱི་ནང་གི་བར་གྱི་ཐོས་པས་རྒྱུད་སྦྱངས། དབང་བསྐུར་བ་ནོད་ཅིང་གདམས་པ་དང་རྗེས་སུ་གདམས་པ་མཐའ་དག་གནང་། ཁྱད་པར་དཔལ་ཧེ་རུ་ཀའི་དཀྱིལ་འཁོར་དུ་དབང་བསྐུར་བའི་ཚེ་མེ་ཏོག་ཁྲོ་བོ་ཧཱུཾ་མཛད་ལ་ཕོག །ཡུན་རིང་དུ་བསྒོམས་པས་རིམ་པ་གཉིས་
ཀྱི་ཏིང་ངེ་འཛིན་ཁྱད་པར་ཅན་སྐྱེས་ཤིང་། ཟླ་བ་དྲུག་ཏུ་སྒྲུབ་པ་བྱས་པས་དངོས་གྲུབ་ཐོབ་པར་དགོངས་ཏེ་ལས་རྒྱ་གདོལ་པའི་བུ་མོ་ཨུཏྤལ་སྔོན་པོའི་ཁ་དོག་ལྟ་བུ་རྡོ་རྗེའི་རིགས་ཀྱི་ཕྱག་རྒྱའི་མཚན་ཉིད་ཚང་བ་ཞིག་དགོས་པས་ཕྱོགས་གཞན་ཞིག་ནས་བཙལ་བ་རྙེད་ནས་ཕ་མ་ལ་བསླངས་པས་དེ་རྣམས་ན་རེ། བྲམ་ཟེའི་སློབ་དཔོན་ཁྱོད་སྨྱོ་བ་ཡིན་ནམ། ངེད་གདོལ་པའི་རིགས་ཡིན་པས་ཁྱོད་ཉིད་དང་ངེད་རྣམས་ལའང་ཆད་པ་མི་འོང་ངམ་ཟེར། ང་ལ་སྒྲུབ་པའི་རྟེན་དུ་དགོས་པས་ཐ་མལ་གྱི་རིགས་ཉམས་པ་སོགས་ཀྱི་ཆད་པ་མི་འོང་བྱས་པས་འོ་ན་བུ་མོའི་ལུས་དང་མཉམ་པའི་གསེར་དངུལ་དགོས་ཟེར། དེར་སློབ་དཔོན་གྱི་སྐད་ཅིག་ལ་ས་འོག་གི་གཏེར་ཕྱུང་སྟེ་དེ་རྣམས་ལ་བྱིན། དེ་ནས་སློབ་དཔོན་ཕྱག་རྒྱར་བཅས་པས་རི་ཕུག་གཅིག་ཏུ་བསྙེན་པ་དང་། ཉེ་བར་བསྙེན་པ་དང་། སྒྲུབ་པ་རྣམས་ཟླ་བ་དྲུག་གི་རིང་བྱས་པས་ཡར་ངོའི་ཚེས་བརྒྱད་ཀྱི་ཐོ་རེངས་ཀྱི་དུས་སུ་ནམ་མཁའ་ལ་ཧཱུཾ་གི་སྒྲ་ཆེན་པོ་གྲག །བཛྲ་ཧེ་རུ་ཀ་སོགས་དཀྱིལ་འཁོར་ཐམས་ཅད་ཀྱང་མངོན་སུམ་དུ་མཐོང་། སྒྲུབ་པ་ཆེན་པོའི་ལམ་གྱིས་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་བོ། །སྒྱུ་འཕྲུལ་ལམ་རིམ་ལས། ཞག་ནི་སུམ་ཅུ་ཕྲག་དྲུག་དང་། །བཅུ་གཉིས་བཅུ་བཞི་བཅུ་དྲུག་གིས། །དབང་སྒྱུར་རིགས་ཀྱི་དམ་པ་འགྲུབ། །ཅེས་བཤད་པའི་སྔ་མའོ། །སློབ་དཔོན་འདིས་བསྐྱེད་རྫོགས་གསུམ་དང་སྔགས་རྒྱུད་གཞན་གྱིས་ཀྱང་འགྲོ་བ་མང་པོའི་དོན་མཛད་ལ། ཡང་དག་རུ་ལུ་གསེར་ཕྲེང་དང་སངས་རྒྱས་མཉམ་སྦྱོར་གྱི་མན་ངག་ཡན་ལག་བཞིའི་དོན་སྣང་བར་བྱེད་པ་དང་། ཁྲག་འཐུང་ཆེན་པོའི་སྒྲུབ་ཐབས་ཡང་དག་པར་གྲུབ་པ་སོགས་རིམ་པ་གཉིས་ཀྱི་བསྟན་བཅོས་ཀྱང་མང་དུ་མཛད་ནས་མཐར་གྱིས་སྐུ་ལུས་དེ་ཉིད་ཀྱིས་སངས་རྒྱས་མི་འཁྲུགས་པའི་ཞིང་དུ་ཁྱུང་གི་རྒྱལ་པོ་འཕུར་བ་ལྟར་བཞུད་དོ། །འདི་ལས་བསྐྱེད་རིམ་གྱི་བཀའ་རྣམས་སློབ་དཔོན་ཨ་བ་དྷཱུ་ཏི་པ་དང་། ཨོ་རྒྱན་གྱི་སློབ་དཔོན་སངས་རྒྱས་དཔལ་ཞི་བས་ཞུས། དེ་
ལས་རྡོ་རྗེ་གདན་པ་ཆེན་པོ་སོ་སོ་རི་པས་ཞུས་ཤིང་དེ་ལས་སློབ་དཔོན་ཆེན་པོ་འཇིགས་མེད་འབྱུང་གནས་སྦས་པ་སློབ་མའི་ཚོགས་དང་བཅས་པ་འཁྲུངས་པ་ཡིན་ནོ།། སློབ་དཔོན་འཇམ་དཔལ་བཤེས་གཉེན་ལ་སྐུ་རྣམ་སྣང་གི་རིགས་འཇམ་དཔལ་ཁྲོས་པ་གསང་རྒྱུད་ལ་སོགས་གཤིན་རྗེ་གཤེད་ཀྱི་བཀའ་རྣམས་བབས་ཏེ། སློབ་དཔོན་འདི་ཡང་རྒྱ་གར་ནུབ་ཕྱོགས་རིམ་པ་གཉིས་པ་ཞེས་བྱ་བའི་གྲོང་ཁྱེར་དུ་ཡབ་སཱ་དྷུ་སཱ་སྟྲྀ་དང་ཡུམ་སྣང་བ་སྒྲོན་མེ་ཞེས་བྱ་བའི་སྲས་སུ་འཁྲུངས། རིག་བྱེད་ཡན་ལག་དང་བཅས་པ་ལ་མཁས་པ་ཞིག་སྟེ་སློབ་དཔོན་ཆེན་པོ་རོ་ལངས་ཐལ་མདོག་ལ་སོགས་པ་ལས་སྔགས་ཕྱི་ནང་གི་དབང་བསྐུར་བ་དང་། གདམས་ངག་ཐུན་མོང་དང་ཐུན་མོང་མ་ཡིན་པ་ཐམས་ཅད་ཀྱང་ཐོབ། སློབ་དཔོན་རོལ་པའི་རྡོ་རྗེ་ལས་དགྲ་གདོང་འཇིགས་གསུམ་སོགས་ཀྱང་གསན་ནོ་ཟེར། གང་ལྟར་ཐུན་མོང་གི་གྲུབ་པ་རྣམས་ཉམས་འོག་ཏུ་ཆུད་ཅིང་ཟུང་འཇུག་གི་གོ་འཕང་ཐོབ་པར་ཉེ་བ་ན་སྤྱོད་པ་ལ་གཤེགས་པས་མུ་སྟེགས་ཀྱི་ཁ་འཛིན་མཆོག་ཏུ་ཆེ་བའི་རྒྱལ་པོ་ཞིག་གླང་པོ་ཆེ་ལ་ཞོན་ནས་འོངས་པ་དང་ཟམ་པ་གཅིག་གི་སྟེང་དུ་འཕྲད་པ་ན་ལམ་བཟུར་རེས་མ་བྱུང་བར་སློབ་དཔོན་གྱིས་སྡིགས་མཛུབ་བསྟན་པས། རྒྱལ་པོ་གླང་པོ་ཆེ་དང་བཅས་པ་ཕྱེད་ཚལ་དུ་བཀས་ཏེ་ཟམ་པའི་གཡས་གཡོན་ནས་ལྷུང་ངོ་། །དེར་རྒྱལ་པོའི་འཁོར་རྣམས་ཀྱིས་བཟོད་པར་གསོལ་ཞིང་གསོལ་བ་བཏབ་པས་སླར་གསོས་ཏེ་ནང་པའི་བསྟན་པ་ལ་བཀོད་དོ། །དེ་ཡང་ཇི་སྐད་དུ། འཇིག་རྟེན་ལྷ་ལ་ཕྱག་མི་འཚལ། །གླང་པོ་བྱུང་ཡང་ལམ་མི་བཟུར། །ཁ་ནས་གསང་སྔགས་རྒྱལ་པོ་ཟློས། །རྐང་པ་བྲག་རིར་ཐོགས་མེད་འགྲོ། །ཞེས་པའོ། །ཇི་ཞིག་ན་འཕགས་པ་འཇམ་དཔལ་དབྱངས་དང་མི་གཉིས་པའི་ཟུང་འཇུག་གི་གོ་འཕང་མཐོན་པོར་གཤེགས་པ་ཡིན་ཅིང་འཇམ་དཔལ་ཡ་མཱནྟ་ཀ་མངོན་སུམ་དུ་སྣང་བས་དབང་བསྐུར་ཞིང་རྒྱུད་དང་མན་ངག་ཐམས་ཅད་བསྟན། སྤྲུལ་པའི་ལས་གཤིན་མང་པོས་བསྐོར་བ་བྱེད་ཅིང་སྲོག་སྙིང་ཕུལ། རི་མ་ལ་ཡ་ནས་ལས་བཞི་ཚང་བའི་གསེར་གྱི་གླེགས་བམ་བཻ་ཌཱུརྱས་
བྲིས་པ་བཏོན། གཟིགས་པའི་མོད་ལ་ཐུགས་སུ་ཆུད་དེ་མུ་སྟེགས་འདུལ་བའི་སྔགས་རྒོད་ལས་ལ་སྦྱར་བས་མུ་སྟེགས་ཀྱི་རྒྱལ་ཁམས་རླག་པར་མཛད། གླེགས་བམ་དངོས་རྡོ་རྗེ་གདན་གྱི་བྱང་དུ་མི་སྣང་བར་རྒྱས་བཏབ་པོ། །འདི་ལ་བྲམ་ཟེ་སྙིང་པོ་གྲུབ་པར་གྲགས་པ་དེ་ལྟར་ན་སློབ་དཔོན་ཆེན་པོ་ཛཻ་ཏ་རིའི་ཡབ་བྲམ་ཟེ་སྙིང་པོའི་ཞབས་ཡིན་པར་མངོན་ཞིང་སློབ་དཔོན་དེ་ཉིད་ཀྱང་འཇམ་དཔལ་གྱི་རིག་སྔགས་གྲུབ་པས་རྒྱལ་པོ་དྷརྨ་པཱ་ལས་བླ་མར་བཀུར་ནས་རང་གི་སྲས་ལ་འཕགས་པ་འཇམ་དཔལ་གྱི་དབང་བསྐུར་བས་གྲུབ་པ་ཐོབ་པའི་ལོ་རྒྱུས་འབྱུང་ངོ་། །སློབ་དཔོན་འདི་ཉིད་ཀྱི་སློབ་མ་དཔལ་དུས་ཀྱི་འཁོར་ལོའི་རྒྱུད་ཕྱི་མ་ནས་ལུང་བསྟན་པའི་བྲམ་ཟེ་ཡེ་ཤེས་རྡོ་རྗེ་དང་བྱང་ཆུབ་རྡོ་རྗེ་གཉིས་ཆར་ལས་རྒྱུད་སྡེ་མང་པོའི་བཤད་བཀའ་བྱུང་ཞིང་། ཁྱད་པར་སློབ་དཔོན་འདི་ལས་དོན་ཡོད་རྡོ་རྗེ་ཆེ་བས་གཤེད་སྐོར་མཐའ་དག་ཞུས་ཤིང་དེ་ལས་དོན་ཡོད་རྡོ་རྗེ་ཆུང་བས་ཞུས་པ་སོགས་བོད་དུ་གྲགས་པའི་སྐྱོ་ལུགས་ཀྱི་གཤེད་སྐོར་གང་དུ་བྱུང་བའི་ཁུངས་འདེད་ས་དེ་ཉིད་ཡིན་ནོ།། སློབ་དཔོན་ཆེན་པོ་འཕགས་པ་ཀླུ་སྒྲུབ་ལ་གསུང་སྣང་མཐའི་རིགས་རྟ་མཆོག་རོལ་པ་སོགས་པདྨ་གསུང་གི་ཏནྟྲ་རྣམས་ཀྱི་བཀའ་བབས་ཤིང་། དེ་ལ་སློབ་དཔོན་འདི་འགའ་ཞིག་གིས་བི་ཀྲ་མ་ཤཱི་ལའི་གཏོར་མའི་སློབ་དཔོན་བ་ལིན་ཨཱ་ཙརྱ་ཡིན། འཕགས་པ་ཀླུ་སྒྲུབ་མིན་ཟེར་ཡང་བ་ལིཾ་ཨཱ་ཙརྱའི་མཚན་ལ་ཀླུ་སྒྲུབ་སྙིང་པོ་ཟེར་བ་སྲིད་ཀྱང་འཕགས་པ་མི་ཟེར། དེའི་ཕྱིར་སློབ་དཔོན་འཕགས་པས་མཛད་པའི་བསྟན་བཅོས་རྣམས་སུ་འཕགས་པ་ཀླུ་སྒྲུབ་སྙིང་པོ་ཞེས་བཀོད་འདུག་པའི་ཕྱིར་གཏོར་མའི་སློབ་དཔོན་དང་འཁྲུལ་པར་མི་བྱའོ། །དེ་ཉིད་ཀྱི་རྣམ་ཐར་གྲགས་ཆེ་བ་ལྟར་ཡིན་ལ། འོན་ཀྱང་སློབ་དཔོན་འདིས་མ་ཧཱ་ཀཱ་ལའི་རྒྱུད་བརྒྱད་དང་། ལྷ་མོ་ནག་མོའི་རྒྱུད་དང་། ཀུ་རུ་ཀུ་ལླེའི་རྟོག་པ་སོགས་རྒྱུད་ཀྱི་རྣམ་གྲངས་གཞན་ཡང་མང་དུ་སྤྱན་དྲངས། ཡེ་ཤེས་ཀྱི་མཁའ་འགྲོ་མ་རྣམས་ལས་ཞལ་གྱི་གདམས་པ་ཐོབ། སྒྲུབ་ཐབས་མི་གཅིག་
པ་ཁོ་ནའང་བརྒྱ་དྲུག་ཅུ་སྤྱན་དྲངས་པར་བཤད། ཐུན་མོང་གི་དངོས་གྲུབ་བརྒྱད་པོ་རེ་རེ་ལའང་མི་འདྲ་བ་དུ་མ་གྲུབ། ཤྲཱི་པ་ར་པ་ཏར་ལོ་ཉིས་བརྒྱར་གནོད་སྦྱིན་མོ་རྣམས་ཀྱི་འཁོར་དང་བཅས་སྔགས་ཀྱི་སྤྱོད་པས་བཞུགས་ཤིང་མཐར་གྱིས་རྡོ་རྗེའི་སྐུ་གྲུབ་བོ།། སློབ་དཔོན་བི་མ་ལ་མི་ཏྲ་ལ་ཡོན་ཏན་རིན་འབྱུང་གི་རིགས་བདུད་རྩི་བམ་བརྒྱད་སོགས་རྡོ་རྗེ་བདུད་རྩིའི་བཀའ་རྣམས་བབས་ཏེ། སློབ་དཔོན་འདི་འཕགས་ཡུལ་ནུབ་ཕྱོགས་གླང་པོའི་ཚལ་ཞེས་བྱ་བར་སྐུ་འཁྲུངས། རིག་པའི་གནས་ཡན་ལག་དང་བཅས་པ་ཐམས་ཅད་ཐུགས་སུ་ཆུད། སྡེ་སྣོད་འཛིན་པ་རྣམས་ལས་ཐེག་པ་ཆེ་ཆུང་གི་མདོ་སྡེ་རྣམས་ཀྱང་གསན་ཅིང་མཁས་པར་མཛད། སློབ་དཔོན་བུཌྜྷ་གུ་ཧྱ་ལ་སོགས་རྡོ་རྗེ་འཛིན་པ་ཆེན་པོ་དུ་མ་ལས་རྒྱུད་སྡེ་མཐའ་དག་གསན་ཅིང་བསྒོམས་པས་ཕྱག་རྒྱ་ཆེན་པོ་མཆོག་གི་དངོས་གྲུབ་ཉམས་འོག་ཏུ་ཆུད། སྒྱུ་འཕྲུལ་ལ་ཁྱད་པར་དུ་མཁས་ཤིང་སྙིང་པོའི་འགེལ་པ་ཁོག་གཞུང་གསལ་སྒྲོན་དང་། བླ་མའི་འགྲེལ་པ་མུན་སེལ་དང་། ལེ་ལག་གི་སྤྱན་འགྲེལ་དང་། བརྒྱད་ཅུ་པའི་བསྡུས་འགྲེལ་དང་། ཤེས་རབ་སྤྱན་འབྱེད་དང་། རིམ་པ་གསུམ་པ་དང་། ཕྱག་རྒྱ་བསམ་བསྟན་དང་། སྦྱིན་སྲེག་དང་། རོ་སྲེག་གི་ལས། ཐིག་གི་རིམ་པ་དང་། འགྲེལ་ཆུང་སོགས་བསྟན་བཅོས་མང་པོ་མཛད་དོ། །དོན་གྲུབ་ཀྱི་རིགས་ཕྲིན་ལས་ཕུར་པའི་རྒྱུད་རྣམས་ཀྱི་བཀའ་སློབ་དཔོན་པྲ་བྷ་ཧ་སྡི་ལ་བབས་ཤིང་། སློབ་དཔོན་ཆེན་པོ་པདྨ་སཾ་བྷ་བས་ཀྱང་ཡང་ལེ་ཤོད་དུ་དཔལ་ཧེ་རུ་ཀའི་དཀྱིལ་འཁོར་ལ་བརྟེན་ནས་ཕྱག་རྒྱ་ཆེན་པོ་མཆོག་གི་རིག་འཛིན་མངོན་དུ་མཛད་པའི་སྐབས་ཀླུ་གྱོང་པོ་དང་། གནོད་སྦྱིན་རྒོད་མ་ཁ་དང་། བར་སྣང་ཁམས་ཀྱི་གློག་མ་སྤྲིན་གསུམ་གྱི་ཡིད་ལ་མི་བཟོད་པའི་ཚོར་བ་སྐྱེས་ཏེ་མཐོ་བརྩམས་པ་འདུལ་བའི་ཆེད་དུ་བི་དྱོཏྟ་མ་འབུམ་སྡེའི་རྒྱུད་ལ་བརྟེན་ནས་སྒྲུབ་པ་མཛད་པས་བཛྲ་ཀུ་མཱ་ར་ཞལ་བསྟན་ཅིང་བར་ཆད་ཀྱི་མཚན་མ་རྣམས་བཅོམ། མ་མོ་བཅུ་གཉིས་དང་ས་བདག་མོ་བཞི་སོགས་དམ་འོག་ཏུ་བཅུག །སླར་
སློབ་དཔོན་པྲ་བྷ་ཧ་སྡི་ལའང་ཀཱི་ལ་ཡའི་རྒྱུད་ཚར་བཅོ་བརྒྱད་གསན་པར་གྲགས་ཤིང་ཕྲིན་ལས་ཕུར་པའི་བཀའ་རྣམས་མ་ལུས་པའི་བདག་ཉིད་དུ་གྱུར། དེ་རྣམས་སློབ་དཔོན་སོ་སོས་རང་གིས་ཉམས་སུ་བླངས་ཤིང་སྐལ་བ་དང་ལྡན་པའི་གདུལ་བྱ་གཞན་ལའང་རྒྱ་ཆེར་བཤད་དོ།། གཉིས་པ་གཏེར་མའི་ཕྱོགས་ནི། བྱང་ཆུབ་སེམས་དཔའ་རྡོ་རྗེ་ཆོས་ཀྱིས་སྒྲུབ་སྡེ་སྤྱི་བྱེ་བྲག་རྣམས་གླེགས་བམ་དུ་བཀོད་པ་རེ་ཞིག་མིའི་འཇིག་རྟེན་དུ་བསྟན་པའི་ཡུལ་མ་གཟིགས་ནས་མཁའ་འགྲོ་ལས་ཀྱི་དབང་མོ་ཆེ་ལ་གཏད། དེས་སྒྲུབ་པ་བཀའ་བརྒྱད་ཀྱི་སྤྱི་རྒྱུད་ལྔ་དང་། དགོས་རྒྱུད་བཅུ་རྣམས་རིན་པོ་ཆེ་སྣ་བརྒྱད་ཀྱི་སྒྲོམ་བུར་བཅུག དགོས་རྒྱུད་རྣམས་ཐ་དད་པའི་སྒྲོམ་བུར་བཅུག་ནས་དུར་ཁྲོད་བསིལ་བའི་ཚལ་གྱི་མཆོད་རྟེན་བདེ་བྱེད་ལེགས་ཚལ་དུ་མི་སྣང་བར་རྒྱས་བཏབ་བོ། དུས་ཕྱིས་གྲུབ་པའི་སློབ་དཔོན་ཆེན་པོ་བརྒྱད་ཀྱིས་མངོན་པར་ཤེས་པས་ཤེས་ཏེ་གནས་དེར་འདུས་ཤིང་དགོངས་པའི་བརྟུལ་ཞུགས་བསྐྱེད་དེ་འཇིག་རྟེན་པའི་མཁའ་འགྲོ་མ་དང་དྲེགས་པའི་ཚོགས་རྣམས་ལ་བདེན་པའི་ཚིག་དང་མཐུན་པའི་རྫས་ཀྱིས་བཀྲོལ། གཞན་དོན་དུ་དགོངས་པའི་ཏིང་ངེ་འཛིན་གྱི་མཐུས་མཁའ་འགྲོ་མ་ལས་ཀྱི་དབང་མོ་ཆེ་མངོན་སུམ་དུ་བྱོན་ནས་སྒྲོམ་བུ་རྣམས་བླངས་ཏེ། ཆེ་མཆོག་གི་བསེ་སྒྲོམ་བི་མ་ལ། ཡང་དག་གི་དངུལ་སྒྲོམ་ཧཱུཾ་ཀཱ་ར། གཤིན་རྗེའི་ལྕགས་སྒྲོམ་འཇམ་དཔལ་བཤེས་གཉེན། རྟ་མགྲིན་གྱི་ཟངས་སྒྲོམ་ནཱ་ག་རྫུ་ན། ཕུར་པའི་གཡུ་སྒྲོམ་པདྨ་འབྱུང་གནས། མ་མོའི་བསེ་སྒྲོམ་དྷ་ན་སཾ་སྐྲི་ཏ། མཆོད་བསྟོད་ཀྱི་མཆོད་སྒྲོམ་རམ་བུ་གུ་ཧྱ། དྲག་སྔགས་ཀྱི་གཟི་སྒྲོམ་ཞི་བའི་སྙིང་པོ་རྣམས་ལ་སོ་སོར་གཏད་དེ་རང་རང་གི་དོན་ལ་མཁས་ཤིང་སྔགས་ཀྱི་དངོས་གྲུབ་བརྙེས་པར་གྱུར་པ་ཡིན་ཏེ། རིན་པོ་ཆེ་སྣ་བརྒྱད་ཀྱི་སྒྲོམ་བུ་ལས་བདེ་གཤེགས་འདུས་པ་ཚོམ་བུ་གཅིག་ཏུ་འདུས་པའི་རྒྱུད་དང་མན་ངག་གི་བཀའ་རྣམས་བྱུང་བ་སློབ་དཔོན་པདྨ་ལ་བབས་པ་ཡིན་ནོ། །
གཉིས་པ་རྫོགས་པ་ཨ་ནུ་ཡོ་གའི་སྐོར་རྣམས་གསང་བའི་བདག་པོས་རྒྱལ་པོ་ཛའམ་ལུང་བསྟན་རྡོ་རྗེ་ལ་དབང་བསྐུར་ཞིང་བསྟན་པ་ཐམས་ཅད་ཀྱི་དོན་ཐུགས་སུ་ཆུད་པ་ཡིན་མོད། འོན་ཀྱང་ཚུར་མཐོང་གི་ངོར་གསང་སྔགས་ལ་རང་དགར་འཇུག་པ་དགག་པའི་ཕྱིར་མིའི་རིག་འཛིན་དགེ་བསྙེན་ལི་ཙ་བཱི་དྲི་མེད་གྲགས་པ་བརྟེན་པའི་ཚུལ་གྱིས་དབང་བསྐུར་བ་དང་ཚིག་གི་བསྟན་པ་ཐམས་ཅད་ཀྱང་ཞུས། སྤྱི་མདོའི་འགྲེལ་པ་སོགས་བསྟན་བཅོས་ཀྱང་མཛད། དེས་སྔར་ལི་ཙ་བཱི་ལ་བརྟེན་པའི་དུས་ཀྱི་གྲོགས་སློབ་དཔོན་ཨུ་པ་རཱ་ཛད་ང་རང་གི་སྲས་ཤཱ་ཀྲ་པུ་ཏྲི་དང་། ནཱ་ག་པུ་ཏྲི་དང་། གུ་ཧྱ་པུ་ཏྲི་གསུམ་ལ་སྤྲུལ་པའི་དཀྱིལ་འཁོར་དུ་དབང་བསྐུར་ཞིང་གདམས་ངག་ཀྱང་བསྟན། ཨུ་པ་རཱ་ཛ་ལ་ཤྲཱི་དྷ་ནའི་གླིང་དུ་དཔལ་ལྡན་འབྲས་སྤུངས་སམ་མཆོད་རྟེན་དཔལ་ཡོན་ཅན་དུ་དབང་བསྐུར་ཞིང་རྒྱུད་གཏད་དོ། །གྲོང་ཁྱེར་སྐྱིད་པའི་འབྱུང་གནས་སུ་རང་གི་སྲས་གསུམ་ལ་དབང་བསྐུར། དེ་ཡང་ཤཱ་ཀྲ་པུ་ཏྲི་ནི་ཨིནྡྲ་བྷཱུ་ཏི་ཆུང་བར་གྲགས་པ་དེ་ཡིན། འདིས་གྲུབ་པ་བརྙེས་པའི་ཚེ་སློབ་དཔོན་ལྭ་བ་པར་གྲགས་པ་ཡིན་ཟེར། ལྷན་ཅིག་སྐྱེས་གྲུབ་ཀྱི་འགྲེལ་པ་ལས་ཀྱང་དེ་ལྟར་བཤད་དེ། གང་ལྟར་འཁོར་ལོ་སྡོམ་པ་སོགས་རྒྱུད་སྡེ་འགའ་ཞིག་ཨིནྡྲ་བྷཱུ་ཏིས་ལམ་སྲོལ་དབྱེ་བར་མཛད་པས་བྲམ་ཟེ་རིན་ཆེན་རྡོ་རྗེ་སོགས་བརྒྱུད་སྲོལ་དེའི་རྗེས་འབྲང་ཡིན་ནོ། །དེ་ཡང་རྒྱ་གར་གྱི་བླ་མ་ཕྱིས་བྱོན་པ་འགའ་ཞིག་གིས་སློབ་དཔོན་ལྭ་བ་པ་དེ་རྒྱལ་པོའི་སྲས་ཞིག་ཡིན། ཡུལ་ཡང་ཨོ་རྒྱན་གྱི་ནང་ཚན་ཞིག་ཡིན་ཅེས་གསུངས་པ་ལྟར་ན་ཨིནྡྲ་བྷཱུ་ཏི་ཆུང་བ་ཡིན་ཀྱང་རུང་སྟེ། དེས་ཐོག་མར་སྔགས་ཀྱི་སློབ་དཔོན་ཆེན་པོ་ཞིག་ལས་དབང་བསྐུར་བ་ནོད་ཅིང་གདམས་པ་བསྒོམས་པས་ཡེ་ཤེས་རྟོགས་པར་གྱུར་པ་ན་དུས་གཞན་ཞིག་ཏུ་ཨོ་རྒྱན་གྱི་དྷུ་མ་སྠོ་ར་མཁའ་འགྲོ་མའི་གྲོང་ཁྱེར་དུ་སོང་བས་མུ་སྟེགས་ཀྱི་མཁའ་འགྲོ་མ་རྣམས་ཀྱིས་མེ་ཏོག་གི་ཕྲེང་བ་ལག་ཏུ་གཏད་པ་དེ་བླངས་པས་སངས་རྒྱས་པའི་མཁའ་འགྲོ་མ་རྣམས་ཀྱིས་བུ་མེ་ཏོག་བླངས་པ་
མ་ལེགས། ད་མུ་སྟེགས་ཀྱི་རྗེས་སུ་འཇུག་དགོས་ན་ཟེར། དེར་སློབ་དཔོན་གྱིས་ཏིང་ངེ་འཛིན་བསྒོམས་ཤིང་བཞུགས་པས་ནམ་ཕྱེད་ཙམ་ན་མུ་སྟེགས་ཀྱི་མཁའ་འགྲོ་མ་རྣམས་ཀྱིས་རྡོ་ཆར་ཕབ་པ་བསྐྱེད་རིམ་གྱི་སྲུང་འཁོར་བསྒོམས་པའི་མཚམས་ཚུན་ལ་མ་གནོད། བསྐྱེད་རིམ་གྱི་ཕན་ཡོན་དེ་འདྲ་ན་རྫོགས་རིམ་གྱི་ནུས་པ་བསྟན་པར་བྱའོ་དགོངས་ནས་མཚན་མ་མེད་པའི་ཏིང་ངེ་འཛིན་ལ་གནས་པས་རྡོ་ཐམས་ཅད་ནམ་མཁའ་ལ་ཆགས་སོ། །དེང་སང་ཡང་ཨོ་རྒྱན་གྱི་ཡུལ་སློབ་དཔོན་འདིའི་སྒྲུབ་ཕུག་གི་སྟེང་གི་ནམ་མཁའ་ལ་ཕ་ཝང་ཆེན་པོ་རྟེན་མེད་དུ་ཡོད་པ་དང་། བྲག་མེ་ལོང་ལྟར་འཇམ་པའི་ངོས་ལའང་ཕ་ཝང་མང་པོ་ཆགས་པ་མངོན་སུམ་གྱི་སྤྱོད་ཡུལ་དུ་གྱུར་པ་ཡོད། ལན་ཅིག་རྒྱལ་པོའི་ཕོ་བྲང་གི་སྒོ་དྲུང་ཁོ་ནར་གཟིམ་ནས་བཞུགས་ཤིང་ཕོ་བྲང་དུ་ཕྱིན་པ་ཐམས་ཅད་སློབ་དཔོན་ལ་ཕྱག་མ་བྱས་ན་བྱིན་པ་རེངས་འགྲོ་བ་ཁོ་ན་བྱུང་བས་ཐམས་ཅད་ཀྱིས་ཕྱག་བྱས་ནས་འགྲོ་དགོས་པ་བྱུང་། གཟིམ་ལོག་པའི་ཡུན་ནི་ལོ་གྲངས་བཅུ་གཉིས་ཡིན་ཏེ་སློབ་དཔོན་གྱི་ནི་འོད་གསལ་ཐུན་གཅིག་གོ། །སྐབས་ཤིག་ཨོ་རྒྱན་གྱི་ཡུལ་གྱི་ཕྲ་མེན་མ་ལྔ་བརྒྱས་སློབ་དཔོན་ལ་བར་ཆད་བརྩམ་པར་འདོད་ནས་བཙལ་བས་སློབ་དཔོན་གྱི་ཤུལ་དུ་ལྭ་བ་གཅིག་ལས་གཞན་མི་འདུག་པས། ཀྱེ་མ་དགེ་སློང་འདིའི་སྒྱུ་མ་ལ་ལྟོས། རང་གི་ལུས་ལྭ་བར་བསྒྱུར་ནས་འདུག་ན་འདི་དུམ་བུ་སོ་སོར་བགོས་ནས་བཟའ་བར་བྱའོ། །ཞེས། ལྭ་བ་དེ་དུམ་བུ་ལྔ་བརྒྱར་བྱས་ནས་ཟོས་སོ། །དེར་སློབ་དཔོན་གྱིས་ལུས་སྣང་བར་བྱས་ཏེ་དེ་རྣམས་ལ་དམོད་པ་བོར་བས་ཕྲ་མེན་མ་ལྔ་བརྒྱ་པོ་རྣམས་ལུག་མ་མོ་ལྔ་བརྒྱར་གྱུར། དེ་རྣམས་རྒྱལ་པོའི་དྲུང་དུ་སོང་ནས་དགེ་སློང་དུར་ཁྲོད་བདག་པོས་བདག་ཅག་རྣམས་འདི་ལྟར་བྱས་པས་ལྷས་དགྲོལ་བའི་ཐབས་འཚལ་ལོ་ཟེར། དེར་རྒྱལ་པོས་སློབ་དཔོན་ལ་ཞུས་པས་སློབ་དཔོན་གཅེར་བུར་བཞེངས་ནས་རྒྱལ་པོ་ཁྱོད་ཀྱི་ཡུལ་གྱི་སྔགས་འཆང་མ་རྣམས་ཀྱིས། དགེ་སློང་ལ་ནོར་ལྭ་བ་གཅིག་ཡོད་པའང་ཟོས་སོ། །དེ་
བས་ན་སྔགས་འཆང་མ་རྣམས་ཁུག་ཅིག་གསུངས། དེར་ཐམས་ཅད་བཀུག་ནས་རེ་རེ་ལ་སྡིགས་མཛུབ་རེ་བསྟན་པས་མགོ་བརྙན་སྣ་ཚོགས་སུ་གྱུར་ནས་ལྭ་བའི་དུམ་བུ་སོ་སོར་སྐྱུགས་སོ། །དེ་དག་ཚེམ་བུ་བྱས་པས་ཅུང་ཟད་མ་འགྲིག །ད་རུང་གསུམ་ཡོད་པ་ཁུག་ཅིག་གསུངས་པས་བཙུན་མོའི་འཁོར་གྱི་ནང་ནའང་གསུམ་ཡོད་པའང་བཀུག་ནས་སྔ་མ་བཞིན་སྐྱུགས་སུ་བཅུག་པས་འགྲིགས་ནས་སྐུ་ལ་གསོལ་པས་རྗེ་བཙུན་ལྭ་བ་པར་གྲགས་ཤིང་། གཞན་ཡང་འདི་དང་རྒྱལ་པོ་ཨིནྡྲ་བྷཱུ་ཏི་གཉིས་ཀྱིས་གྲུབ་པ་ཐོབ་པའི་རྟགས་སྐྱེ་བོ་རྣམས་ལ་བསྟན་པའི་ལོ་རྒྱུས་དང་། སློབ་དཔོན་རོལ་པའི་རྡོ་རྗེ་ཐུན་མོང་གི་དངོས་གྲུབ་ཐོབ་པའི་སྐབས་ཤིག་ཨོ་རྒྱན་གྱི་ཡུལ་དུ་སློབ་དཔོན་འདི་དང་ལྷན་ཅིག་པར་བྱོན་པས་རི་མུ་རུཎྜ་ཀ་ལ་རྫུ་འཕྲུལ་འགྲན་པའི་ལོ་རྒྱུས་སོགས་ཤིན་ཏུ་མང་བར་ཡོད་ཅིང་རོལ་པའི་རྡོ་རྗེས་ཀྱང་སློབ་དཔོན་འདི་ལ་ཕྱག་མཛད་པ་དང་གདམས་པ་ཞུས་པའི་འོག་ཏུ་མཆོག་གི་དངོས་གྲུབ་ཐོབ་པ་ཡིན་ཞེས་གྲགས་ཤིང་། ཕྱག་ཆེན་ཐིག་ལེའི་སྐོར་རྣམས་ཀྱང་འདི་དུས་སུ་ཨོ་རྒྱན་གྱི་ཡུལ་དུ་དར་བ་ཡིན། ཕྱིས་ཨོ་རྒྱན་གྱི་ཡུལ་དེར་རྒྱལ་པོ་དང་སློབ་དཔོན་གཉིས་ཆར་གྱིས་གདམས་པ་བསྟན་པས་ཐམས་ཅད་རིག་པ་འཛིན་པར་གྱུར་ནས་ཨོ་རྒྱན་གྱི་ཡུལ་དེ་ཙམ་དུ་ཆེ་བའང་སྟོངས་སུ་ཉེ་བར་གྱུར་སྐད། འདི་གོང་དུ་སྨོས་པའི་རྒྱལ་པོ་ཛའི་སྲས་ཨིནྡྲ་བྷཱུ་ཏི་ཆུང་བ་འཁོར་ཚོམ་བུ་དང་བཅས་པ་རིག་པ་འཛིན་པར་གྱུར་པར་གསུངས་པ་དང་དོན་གཅིག་གམ་སྙམ་མོ། །དེ་ལྟར་ཨིནྡྲ་བྷཱུ་ཏི་ཆུང་བས་སེང་ཧ་པུ་ཏྲ་དང་ཀུ་ཀུ་རཱ་ཛ་ཕྱི་མ་གཉིས་ལ་རྒྱ་མཚོའི་འགྲམ་དུ་དབང་བསྐུར་ཞིང་རྒྱུད་བཤད། ཕྱི་མས་སློབ་དཔོན་ཆེན་པོ་རོ་ལངས་བདེ་བ་ལ་དབང་བསྐུར་ཞིང་བཤད། འདི་སྤྲུལ་པའི་སྐུ་དགའ་རབ་རྡོ་རྗེའི་མཚན་གྱི་རྣམ་གྲངས་སོ། །འདི་ཡན་ཆད་ཀྱི་བརྒྱུད་པ་དེ་རྣམས་རང་རང་གི་འཁོར་ཚོམ་བུ་ཁྲི་ཕྲག་ལྔ་ནས་གཅིག་གི་བར་གྱི་ཐམས་ཅད་ཀྱང་སྤྲོས་བཅས་ཀྱི་སྤྱོད་པ་ཚོགས་ཀྱི་སྒྲུབ་པས་ཟུང་འཇུག་གི་སྐུ་བརྙེས་ཏེ་མི་སྣང་བར་གྱུར་སྐད། སློབ་དཔོན་དེས་སློབ་དཔོན་རྡོ་རྗེ་བཞད་པ་ལ་ཨུཏྟ་ས་
རའི་ཚལ་དུ་དབང་བསྐུར་ཞིང་རྒྱུད་ཀྱང་བཤད། དེས་ཀྱང་བདེ་བ་ཆེན་པོའི་ལམ་གྱིས་མཆོག་གི་དངོས་གྲུབ་ཐོབ་ཅིང་རྣལ་འབྱོར་རིག་པའི་ཉི་མ་ཞེས་བྱ་བའི་བསྟན་བཅོས་མདོའི་ཟབ་ལམ་གཏན་ལ་དབབ་པ་ཞིག་ཀྱང་མཛད། དེས་སློབ་དཔོན་པྲ་བྷ་ཧ་སྡི་ལ་གྷ་ཛ་ནེའི་ཡུལ་གྱི་ཆུ་ཀླུང་སིནྡྷུའི་འགྲམ་དུ་དབང་བསྐུར་བ་དང་རྒྱུད་བཤད། འདི་སྔར་སྨོས་པ་བཞིན་རབ་ཏུ་བྱུང་བའི་མཚན་ཤཱཀྱ་འོད་ཅེས་གྲགས་ཤིང་། དེས་སློབ་མ་ཤཱཀྱ་འོད་ཆུང་བ་དང་། ཤཱཀྱ་བཤེས་གཉེན་དང་། ཤཱཀྱ་སེང་གེ་གསུམ་ལ་བསྟན། བར་པ་འདི་རྣལ་འབྱོར་རྒྱུད་ལ་ཤིན་ཏུ་མཁས་པས་དེ་ཉིད་འདུས་པའི་འགྲེལ་པ་ཀོ་ས་ལའི་རྒྱན་ཅེས་བྱ་བ་ཡུལ་ཀོ་ས་ལར་བརྩམས་ཤིང་ཁོང་ཉིད་ཀྱིས་བླ་མ་བཅུ་གཅིག་ཙམ་ལ་ཞུས་པར་བཤད་ཅིང་སྐུ་ཚེའི་སྨད་དུ་ཁ་ཆེར་བྱོན་ནས་འགྲོ་དོན་ཆེར་མཛད། ཕྱི་མ་ནི་སློབ་དཔོན་ཆེན་པོ་པདྨ་སམྦྷ་བའི་མཚན་གྱི་རྣམ་གྲངས་ཏེ། དེས་ལྷའི་བཤོས་ཁང་དགུ་ཐོག་ཏུ་སློབ་དཔོན་དྷ་ན་རཀྵྀ་ཏ་ལ་བཤད། འདིས་མདོའི་རྣམ་གྲངས་འཆད་པའི་བསྟན་བཅོས་མཛད། དེས་ཨོ་རྒྱན་གྱི་རྡོ་རྗེའི་ཕུག་ཏུ་སློབ་དཔོན་ཧཱུཾ་མཛད་ལ་བཤད། འདིས་རྩ་རྒྱུད་ལ་རྒྱ་བདུན་འགྲེལ་པ་དང་། རྣལ་འབྱོར་སའི་སྒྲོན་མ་ལ་སོགས་མདོའི་བསྟན་བཅོས་མང་པོ་མཛད། རྒྱ་གར་དང་ཏ་སིག་གི་མཚམས་ཨ་སུ་རའི་བྲག་ཕུག་ཏུ་ཕྱག་རྒྱ་མོ་ག་ག་སིདྡྷི་ལ་བརྟེན་ནས་སྒྲུབ་པ་མཛད་པས་རིག་པ་འཛིན་པའི་སྐུར་གྱུར། དེའང་ལུས་མི་སྣང་བ་ནི་བཅུད་ལེན་དང་། ཐིག་ལེ་དབབ་བཟུང་དང་། སྒྲོན་མ་རླུང་གི་འཁོར་ལོ་སོགས་འཇིག་རྟེན་པའི་ལམ་ལས་ཀྱང་འབྱུང་མོད། འདི་དག་ནི་མཐོང་ལམ་རྣམ་པར་མི་རྟོག་པའི་ཡེ་ཤེས་ཉེ་རྒྱུའི་སྤྱོད་པ་ལ་བརྟེན་ནས་རྣམ་སྨིན་གྱི་ལུས་འོད་གསལ་དུ་གནས་འགྱུར་བ་ཡིན་པས་ཁྱད་པར་ཆེ་བར་ཤེས་པར་བྱའོ། །སློབ་དཔོན་དེས་བདེ་བ་གསལ་མཛད་ལ་གྲོང་ཁྱེར་དཔལ་ཡོན་ཅན་དུ་དབང་བསྐུར་ཞིང་རྒྱུད་གཏད། འདིས་སློབ་དཔོན་ཧཱུཾ་ཀ་ར་ལའང་གསན། རིག་སྔགས་གྲུབ་པས་རིག་པ་འཛིན་པའི་སྐུར་གྱུར། མདོའི་ཡིག་
སྣ་བཅོ་བརྒྱད་དང་རྣལ་འབྱོར་གྱི་རིམ་པ་ཐེག་ཆེན་སྒྲོན་མ་སོགས་མཛད། དེས་སྐལ་བ་མཆོག་དང་ལྡན་པའི་ཐུགས་སྲས་བཞི་ལ་བཤད་དེ། མ་ག་དྷར་མདོའི་མཁན་པོ་དྷརྨ་བོ་དྷི་ལ་བཤད། འདིས་མདོའི་དོན་བསྡུ་བ་དང་། ཤེས་རབ་སྒྲོན་མ་དང་བཀོལ་མདོ་རྣམས་མཛད། ཤྲཱི་ན་ལནྡར་མཁན་པོ་དྷརྨ་རཱ་ཛ་པཱ་ལར་དབང་བསྐུར་ཞིང་རྒྱུད་རྣམས་བཤད། བལ་པོའི་རྒྱལ་པོ་བ་སུ་དྷ་ར་དང་གཙུག་ལག་དཔལ་དགེ་གཉིས་ལ་རྒྱལ་པོའི་ཁབ་ཀྱི་གྲོང་ཁྱེར་དུ་དབང་བསྐུར་ཞིང་རྒྱུད་ཀྱི་བཤད་པ་བསྩལ། ཕྱི་མ་གསུམ་པོས་སློབ་དཔོན་དྷ་ན་རཀྵྀ་ཏ་ལས་ཀྱང་གསན་ཅེས་གྲགས། བཤད་མ་ཐག་པའི་བརྒྱུད་པ་དེ་ཐམས་ཅད་ནི་དབང་བཀའ་དང་། བཤད་བཀའ་དང་། མན་ངག་གི་བཀའ་ཐམས་ཅད་འདུས་པའི་བརྒྱུད་པ་ཡིན་ནོ། །ཡང་སློབ་དཔོན་དེ་གསུམ་ཀས་བྲུ་ཤའི་སློབ་དཔོན་ཆེ་བཙན་སྐྱེས་ལ་ཡུལ་དབུས་སུ་དབང་བསྐུར་ཞིང་རྒྱུད་བཤད། བསྒོམས་པས་གྲུབ་པ་ཐོབ་པ་ལ་ཕྱིས་སློབ་དཔོན་དྷ་ན་རཀྵྀ་ཏ་བྲུ་ཤའི་ཡུལ་དུ་སྤྱན་དྲངས་ཤིང་མདོ་དགོངས་འདུས་ལ་སོགས་པ་བསྒྱུར་བར་བརྩམས་པ་ན་མོས་པ་ཆུང་བས་མ་འགྱུར་ཏེ་བལ་ཡུལ་དུ་བྱོན། བ་སུ་དྷ་ར་དང་དྷརྨ་བོ་དྷི་ལ་བཤད། ཕྱིས་བྲུ་ཤའི་ཡུལ་དུ་དྷརྨ་བོ་དྷི་དང་དྷ་ན་རཀྵྀ་ཏའི་དྲུང་དུ་སློབ་དཔོན་ཆེ་བཙན་སྐྱེས་ཀྱིས་བྲུ་ཤའི་སྐད་དང་ཡི་གེར་བསྒྱུར་རོ།། །།གསུམ་པ་རྫོགས་པ་ཆེན་པོ་ཨ་ཏི་ཡོ་གའི་སྐོར་ནི། གང་གི་ཚེ་བཅོམ་ལྡན་འདས་གསང་བའི་བདག་པོ་ཕྱག་ན་རྡོ་རྗེས་རི་རབ་ཀྱི་བྱང་ཕྱོགས་དུར་ཁྲོད་མེ་རི་འབར་བར་མཁའ་འགྲོ་དང་། མཁའ་འགྲོ་མ་དང་། གྲུབ་པ་དང་། རིག་པ་འཛིན་པའི་ཚོགས་ལ་གསང་བ་སྔགས་ཀྱི་ཆོས་སྟོན་པ་དེའི་ཚེ་འཕགས་ཡུལ་ནུབ་ཕྱོགས་ཨོ་རྒྱན་གྱི་ཡུལ་དྷ་ན་ཀོ་སའི་གླིང་ཞེས་བྱ་བར་ཀོ་ཤ་ཞེས་པའི་སྲོག་ཆགས་ལུས་མི་ལ་གདོང་དྲེད་ཀྱི་རྣམ་པ་སྦར་མོ་ལྕགས་ཀྱིས་གཏམས་པ་ཁོ་ནས་གང་ཞིང་ཙནྡན་ལ་སོགས་ཤིང་ལྗོན་པ་མང་པོས་བསྐོར་བའི་ཕྱིར་དེ་སྐད་དུ་གྲགས་སོ། །ཞེས་ཀྱང་བྱུང་། ཡུལ་དེར་བདེ་བྱེད་བརྩེགས་པ་ཞེས་བྱ་བའི་ལྷ་ཁང་ཆེན་པོ་གཅིག་ལ་ལྷ་ཁང་ཆུང་ངུ་སྟོང་དྲུག་
བརྒྱ་བརྒྱད་ཀྱིས་བསྐོར་བ་དཔལ་དང་འབྱོར་པ་ཕུན་སུམ་ཚོགས་པའི་གནས་སུ་རྒྱལ་པོ་ཨུ་པ་རཱཛ་དང་བཙུན་མོ་སྣང་བ་གསལ་བའི་འོད་ལྡན་མ་ཞེས་བྱ་བ་གཉིས་ལ་སྲས་མོ་སུ་དྷརྨ་བྱ་བ་རབ་ཏུ་བྱུང་ནས་ཡུན་རིང་པོར་མ་ལོན་པར་བསྙེན་པར་རྫོགས་པའི་དགེ་སློང་མ་ཞིག་ཡུལ་དེ་ནས་དཔག་ཚད་ཙམ་འདས་པར་གསེར་གྱི་བྱེ་མ་བདལ་བའི་རྒྱ་མཚོའི་གླིང་ཞིག་ཏུ་རྩྭའི་སྤྱིལ་བུ་ཆུང་ངུ་ཞིག་ལ་གནས་ཏེ་གཡོག་མོ་བདེ་བའི་སྙིང་ལྡན་མ་བྱ་བ་དང་ལྷན་ཅིག་ཏུ་རྣལ་འབྱོར་བསྒོམས་ཤིང་གནས་པའི་ཚེ་ནུབ་གཅིག་དགེ་སློང་མའི་རྨི་ལམ་དུ་མི་དཀར་པོ་དྲི་མ་དང་བྲལ་བ་ཞིག་གིས་ཤེལ་གྱི་བུམ་པ་ཨོཾ་ཨཱཿཧཱུཾ་སྭཱ་ཧཱའི་ཡི་གེས་རྒྱས་བཏབ་པ་གཅིག་སྤྱི་བོར་ལན་གསུམ་བཞག་པས་བུམ་པ་དེ་ལས་འོད་འཕྲོས་པས་ཁམས་གསུམ་པོ་གསལ་བར་མཐོང་བ་ཞིག་རྨིས། དེ་ནས་མི་རིང་བར་དགེ་སློང་མ་ལ་རྫོགས་པ་ཆེན་པོ་ལྷ་ཡུལ་དུ་དར་བར་བྱེད་པ་རྡོ་རྗེ་སེམས་དཔའི་སྤྲུལ་སྐུ་ལྷའི་བུ་སེམས་ལྷག་ཅན་རྒྱལ་བའི་སྲས་སུ་བཙས་སོ། །དེའི་ཚེ་དགེ་སློང་མ་ཉིད་ཤིན་ཏུ་ངོ་ཚ་ནས་མི་རིགས་པ་ཆེན་པོར་མཐོང་སྟེ། ཕ་མེད་བུ་འདི་འཇིག་རྟེན་འདྲེ་བས་གཞན་ན་སུ། །འཇིག་རྟེན་བདུད་དམ་ཚངས་པ་ལ་སོགས་སམ། །རྒྱལ་པོ་བཙན་ནམ་དམུ་ལ་སོགས་པའི་རིགས། །ཁམས་གསུམ་དག་ན་འདོད་ལྡན་སུ་ཞིག་ཡིན། །གལ་ཏེ་ལྷ་དང་ལྷ་མིན་སྣ་ཚོགས་གཟུགས། །འདི་ལྟར་བྱུང་བའི་དཔེ་ནི་སུས་མཐོང་མེད། །རྒྱལ་ཁམས་ཆོས་མེད་འདི་ནི་སུ་ལ་སྲིད། །ཀྱེ་མ། བདག་ནི་ཁྲིམས་གཙང་འགྲོ་ལས་རྒྱལ་འདོད་པས། །འདི་ནི་ལོག་སྲེད་འགྲོ་བས་དཔྱས་འགྱུར་སྡིག་རེ་ཆེ། །ཞེས་པ་ལ་སོགས་སྨྲེ་སྔགས་མང་དུ་བཏོན་ནས་གཡོག་མོ་དེས་འདི་ནི་སངས་རྒྱས་རྣམས་ཀྱི་སྲས་ཡིན་པས་དེ་ལྟར་མི་རིགས་སོ་ཞེས་སྨྲས་ཀྱང་མ་ཉན་པར་ཐལ་དོང་དུ་བསྐྱུར། དེའི་ཚེ་སྒྲ་དང་འོད་ལ་སོགས་པའང་བྱུང་བར་གྱུར་ཏོ། །གང་གི་ཚེ་ཞག་གསུམ་སོང་བ་ན་ཅི་ཡང་མ་ཉེས་པར་འདུག་པ་མཐོང་ནས་སྤྲུལ་པ་ཡིན་པར་ཤེས་ཏེ་བཀུར་སྡི་ཆེན་པོ་དང་བཅས་པས་སྤྱན་དྲངས་པ་ན་བར་སྣང་ནས་ལྷ་རྣམས་ཀྱིས། མགོན་
པོ་སྟོན་པ་བཅོམ་ལྡན་འདས། །རང་བཞིན་སྣང་མཛད་འཇིག་རྟེན་མགོན། །བདག་ཀྱང་རབ་ཏུ་སྐྱབས་པ་དང་། །ནམ་མཁའི་རྡོ་རྗེ་དེང་བདག་གསོལ། །ཞེས་ཆེད་དུ་རྗོད་པར་བྱེད་ཅིང་མཁའ་འགྲོ་དང་། མཁའ་འགྲོ་མ་དང་། ལྷ་དང་། ཀླུ་དང་། གནོད་སྦྱིན་ལ་སོགས་པའི་འཇིག་རྟེན་སྐྱོང་བ་རྣམས་ཀྱིས་ཀྱང་མཆོད་པའི་ཡོ་བྱད་དུ་མས་རྗོད་པར་བྱེད་དོ། །ཞག་བདུན་སོང་བ་ན་སྲས་ཀྱིས་ཡུམ་ལ། ཀྱེ་མ་བདག་གིས་པཎྜི་ཏ་རྣམས་ལ་ཆོས་ཀྱི་གཏམ་སྤོབ་པར་འཚལ་ན་ཡུམ་བདག་ལ་ཅི་བདེར་གནང་བ་སྩོལ་ཅིག །ཞེས་གསུངས་པ་ན་ཡུམ་གྱིས་བུ་ཁྱོད་ནི་ཤིན་ཏུ་གཞོན་གྱིས་པཎྜི་ཏ་རྣམས་མཁས་ཤིང་གཞུང་པས་ཁྱོད་ཀྱིས་ཐུབ་པར་དཀའོ། །ཅིས་ཀྱང་བགྱི་བར་གསོལ་བ་ན། སྔར་སྨོས་པའི་རྒྱལ་པོའི་མཆོད་གནས་སུ་མཁས་པ་ལྔ་བརྒྱ་ཡོད་པ་དེ་དང་ཆོས་ཀྱི་གཏམ་གྱིས་ཤིག །དེ་ནས་སྲས་ཀྱི་ཡུལ་དེ་ཉིད་དུ་བྱོན་ནས་རྒྱལ་པོ་དང་མཇལ་ནས་ལོ་རྒྱུས་སྔ་མ་བཞིན་བསྙད་དོ། །རྒྱལ་པོས་ཀྱང་ཁྱེའུ་འདི་ན་གཞོན་པས་པཎྜི་ཏ་རྣམས་དང་ཆོས་ཀྱི་གཏམ་འོང་བར་དཀའ་མོད་ཀྱི། འོན་ཀྱང་ལུས་ལ་སྐྱེས་བུ་ཆེན་པོའི་མཚན་མང་པོ་འདུག་པས་སྤྲུལ་པ་ཡིན་ཀྱང་སྲིད་སྙམ་ནས་མཆོད་གནས་རྣམས་ལ་ཚུལ་དེ་བཞིན་བསྙད་པས་དེ་རྣམས་གསུང་མ་མཐུན་པ་ལས་མཁྱེན་པ་ཆེ་བ་གཅིག་གིས། ལྟས་ཤིན་ཏུ་བཟང་བ་ཞིག་ཀྱང་བྱུང་། བྱིས་པ་དེ་ཡར་ཐོང་དང་སྤྲུལ་པ་ཡིན་ཏེ་འོང་གསུངས་ནས་མཇལ་བ་ན་པཎྜི་ཏ་རྣམས་ལ་ཕྱག་མཛད་ཅིང་བགྲོ་གླེང་དང་བརྒལ་བརྟག་གི་རིམ་པ་མང་དུ་མཛད་པས་པཎྜི་ཏ་རྣམས་ཀྱི་སྤོབས་པ་བཅོམ་པས་ཞབས་སྤྱི་བོར་བླངས་ཤིང་བཀུར་སྡི་རྒྱ་ཆེན་པོས་མཆོད་ནས་པྲཛྙཱ་བྷ་བ་ཞེས་མཚན་གསོལ། རྒྱལ་པོའང་ཤིན་ཏུ་ངོ་མཚར་ཞིང་དགའ་བས་སློབ་དཔོན་ཆེན་པོ་དགའ་རབ་རྡོ་རྗེ་ཞེས་བྱ་བར་མཚན་བཏགས། སྔར་ཡུམ་གྱིས་ཐལ་དོང་དུ་བསྐྱུར་ཡང་མ་ཉེས་པ་ལ་རོ་མཚར་བས་རོ་ལངས་བདེ་བའམ་རོ་ལངས་ཐལ་མདོག་ཏུ་གསོལ། དེ་ནས་བྱང་ཕྱོགས་རི་བོ་ཉི་མ་རབ་ཏུ་སྣང་བྱེད་ཅེས་བྱ་བར་བྲག་རི་ཤིན་ཏུ་འཇིགས་པ་ཡི་དྭགས་ཀྱི་ཚོགས་མངོན་
སུམ་དུ་རྒྱུ་བ་ཞིག་གི་སྟེང་དུ་རྩྭའི་སྤྱིལ་བུར་ལོ་སུམ་ཅུ་རྩ་གཉིས་ཀྱི་བར་དུ་ཏིང་ངེ་འཛིན་ལ་བཞུགས་པའི་ཚེ། ས་ལན་བདུན་དུ་གཡོས་ཤིང་ནམ་མཁའ་ལས་མུ་སྟེགས་ཀྱི་བསྟན་པ་ཉམས་པར་བྱས་སོ་ཞེས་པའི་སྒྲ་གྲག་པ་ཐོས་པས་མུ་སྟེགས་ཀྱི་རྒྱལ་པོས་གཤེད་མ་བཏང་ནས་སློབ་དཔོན་བཀྲོང་བར་བརྩམས་ན་ནམ་མཁའི་ལམ་ནས་གཤེགས་པ་མཐོང་བས་རྒྱལ་པོ་འཁོར་བཅས་མཆོག་ཏུ་དད་ནས་སངས་རྒྱས་པའི་བསྟན་པ་ལ་ཞུགས་སོ། །དེ་ནས་ཐེག་པ་ཕྱི་ནང་གི་སྡེ་སྣོད་རྣམས་དང་། ཁྱད་པར་རང་བཞིན་རྫོགས་པ་ཆེན་པོ་ཤ་ལོ་ཀ་འབུམ་ཕྲག་དྲུག་ཅུ་རྩ་བཞི་ཐུགས་ལ་བཞུགས་པ་དེ་རྣམས་རྡོ་རྗེ་སེམས་དཔས་མངོན་སུམ་དུ་ཞལ་བསྟན་ནས་རིག་པ་སྤྱི་བླུགས་ཀྱི་དབང་གིས་མི་སློབ་པའི་ཡེ་ཤེས་མངོན་དུ་མཛད་པའི་ཚུལ་བསྟན། ཚིག་གི་རྒྱུད་རྣམས་ཡི་གེར་འགོད་པའི་ལུང་བྱིན་ཏེ་རི་མ་ལ་ཡའི་རིན་ཆེན་སྤུངས་པ་རྒྱས་པའི་རྩེ་མོར་སློབ་དཔོན་ཉིད་དང་། རྡོ་རྗེ་དབྱིངས་ཀྱི་མཁའ་འགྲོ་མ་འཇིག་རྟེན་བདེ་བའི་རོ་དང་ལྡན་པ་དང་། བདེ་བྱེད་སེར་མོ་ཡོན་ཏན་མཐའ་ཡས་པའི་མཁའ་འགྲོ་མ་གསུམ་གྱིས་ལོ་གསུམ་གྱི་བར་དུ་ཚིག་དང་ཡི་གེ་དཀར་ཆག་ཏུ་བཏབ། རང་བྱུང་རང་བབ་ཀྱི་ཡི་གེ་སྤྲུལ་པའི་སྐུ་དང་བཅས་པ་ཕྱིན་ཅི་མ་ལོག་པར་ལེགས་པར་བཀོད་ནས་མཁའ་འགྲོ་མ་མངོན་པར་འབྱུང་བའི་ཕུག་ཏུ་བཞུགས་སུ་གསོལ། དུས་གཞན་ཞིག་ཏུ་རྡོ་རྗེ་གདན་གྱི་བྱང་ཤར་མཚམས་དུར་ཁྲོད་ཆེན་པོ་བསིལ་བའི་ཚལ་ཞེས་བྱ་བ་དབུས་སུ་མཆོད་རྟེན་ཆེན་པོ་ཡོད་ཅིང་གདུག་པའི་མཁའ་འགྲོ་མ་དང་སེམས་ཅན་རབ་ཏུ་གདུག་པ་དུ་མའི་གནས་སུ་གྱུར་པ་ཞིག་ཏུ་བྱོན་ནས་མཁའ་འགྲོ་མ་ཉི་མའི་འོད་ཟེར་ལ་སོགས་དཔག་ཏུ་མེད་པ་ལ་ཆོས་སྟོན་ཅིང་བཞུགས་པ་ན་སློབ་དཔོན་འཇམ་དཔལ་བཤེས་གཉེན་ལ་འཕགས་པ་འཇམ་དཔལ་རྣོན་པོས་ལུང་བསྟན་ཏེ། ཀྱེ་རིགས་ཀྱི་བུ། འབྲས་བུ་ཚེ་གཅིག་ལ་སངས་རྒྱས་པར་འདོད་ན་དུར་ཁྲོད་ཆེན་པོ་བསིལ་བའི་ཚལ་དུ་སོང་ཞིག །ཅེས་གསུངས་པས། འཇམ་དཔལ་བཤེས་གཉེན་གྱིས་དུར་ཁྲོད་བསིལ་བའི་ཚལ་དུ་བྱོན་ནས་སློབ་དཔོན་དགའ་རབ་རྡོ་རྗེ་
མཇལ་ཞིང་ལོ་བདུན་ཅུ་རྩ་ལྔའི་བར་དུ་ཆོས་ཉན་ཅིང་། གདམས་པ་དང་རྗེས་སུ་གདམས་པ་མཐའ་དག་པ་བསྩལ་ནས་ཆུ་བོ་དན་ཏིག་བྱ་བར་སློབ་དཔོན་ཆེན་པོ་ཟག་པ་མེད་པའི་དབྱིངས་སུ་མྱ་ངན་ལས་འདའ་བར་མཛད་དོ། །དེའི་ཚེ་འཇམ་དཔལ་བཤེས་གཉེན་གྱིས། ཀྱེ་མ་ཀྱེ་ཧུད་ཀྱེ་མ་བློང་། །ཞེས་པ་ལ་སོགས་གདུང་ཚིག་ལན་གསུམ་བཏོན་པས་ནམ་མཁར་འོད་ཕུང་གི་དཀྱིལ་ནས་སློབ་དཔོན་གྱིས་སྐུ་མངོན་སུམ་དུ་སྣང་བར་མཛད་ནས་གསེར་གྱི་ཟ་མ་ཏོག་སེན་གང་བ་གཅིག་ཕྱག་ཏུ་བབས་པས་ཚིག་གསུམ་གནད་དུ་བརྡེག་པའི་འདས་རྗེས་ཀྱི་གདམས་པ་བཞག་གོ། །དེ་ནས་སློབ་དཔོན་ཆེན་པོ་འཇམ་དཔལ་བཤེས་གཉེན་གྱིས་འབུམ་ཕྲག་དྲུག་ཅུ་རྩ་བཞིའི་གྲངས་ལས་རྫོགས་པ་ཆེན་པོ་སྡེ་གསུམ་དུ་ཕྱེས་ཏེ། སེམས་གནས་རྣམས་ལ་སེམས་ཀྱི་སྡེ། །བྱ་བྲལ་རྣམས་ལ་ཀློང་གི་སྡེ། །གནད་གཙོ་བ་ལ་མན་ངག་སྡེ་གསུམ་དང་། དེ་ལས་ཀྱང་ཁྱད་པར་དུ་བསྡུས་པ་ཐིག་ལེ་རང་གནད་དུ་དབབ་པ་འདི་ལས་སྙན་བརྒྱུད་དང་བཤད་རྒྱུད་གཉིས་སུ་ཕྱེས་ནས་སྙན་བརྒྱུད་རྣམས་མཆན་དུ་བཏང་། བཤད་རྒྱུད་སྙིང་ཐིག་གི་བཀའ་རྣམས་རེ་ཞིག་གཏད་པའི་སྣོད་མ་རྙེད་ནས་རྡོ་རྗེ་གདན་གྱི་བྱང་ཤར་ཕ་ཝང་རྡོ་རྗེ་རྒྱ་གྲམ་གྱིས་རྒྱས་བཏབ་པའི་འོག་ཏུ་སྦས་ཏེ་མི་སྣང་བར་བྱས། སློབ་དཔོན་ཉིད་རྡོ་རྗེ་གདན་གྱི་ནུབ་ཕྱོགས་དུར་ཁྲོད་ཆེན་པོ་སོ་ས་གླིང་དུ་གཤེགས་ཤིང་དེར་མི་སྡུག་པའི་མཁའ་འགྲོ་མ་རྣམས་དང་སེམས་ཅན་དཔག་ཏུ་མེད་པ་དང་སྤྱོད་པ་ལ་གནས་པའི་སྒྲུབ་པ་པོ་ཡང་མང་དུ་རྒྱུ་བ་རྣམས་ལ་ཆོས་སྟོན་ཅིང་ལོ་བརྒྱ་རྩ་དགུའི་བར་ཏིང་ངེ་འཛིན་ལ་བཞུགས་སོ།། སློབ་དཔོན་འདིའི་སློབ་མ་ནི་དཀྱིལ་འཁོར་ཆེན་པོའི་རྡོ་རྗེ་སློབ་དཔོན་སངས་རྒྱས་ཡེ་ཤེས་ཞབས་ཡིན་ཅིང་ཐོག་མར་སློབ་དཔོན་ཛ་ལནྡྷ་རི་བ་དང་། ཨོ་རྒྱན་གྱི་སློབ་དཔོན་སྒེག་པ་རྡོ་རྗེ་དང་། རྣལ་འབྱོར་མ་གུ་ནེ་རུ་སོགས་བླ་མ་མང་པོ་བསྟེན་ནས་གསང་སྔགས་ཀྱི་ཚུལ་རྣམས་མང་དུ་གསན། ཡོ་བྱད་རྣམས་རྨུགས་འཛིན་དང་ནོར་རྒྱུན་མས་སྦྱོར། ལན་ཅིག་ཀོང་ཀ་ནའི་སློབ་དཔོན་པཱ་ལི་ཏ་པཱ་ད་ལོ་དགུའི་བར་བརྟེན་ཅིང་འདུས་པའི་རྒྱུད་ཚར་བཅོ་བརྒྱད་མཉན་ཀྱང་དེ་ཁོ་ན་
ཉིད་མ་རྟོགས་པར་བླ་མ་ལ་ཞུས་པས་དེ་ནི་ཁོ་བོས་ཀྱང་མ་རྟོགས་སོ་གསུངས། དེ་ནས་རྡོ་རྗེ་གདན་གྱི་རྒྱབ་ཀུ་པའི་ཚལ་ཞེས་བྱ་བར་བསྙེན་སྒྲུབ་ཡན་ལག་བཞི་སྤོག་ཆོ་ག་དང་བཅས་པས་ཟླ་བ་བཅུ་གཉིས། དྲག་ཤུལ་སྤྱོད་པ་ཟླ་བ་དྲུག་སྟེ་བཅོ་བརྒྱད་དུ་བསྒྲུབས་པས་དེ་ཁོ་ན་ཉིད་རྟོགས་པར་འདོད་ན་འཕགས་པ་འཇམ་དཔལ་ལ་དྲིས་ཤིག་ཅེས་ལུང་བསྟན་བྱུང་བས་འོ་ན་འཇམ་དཔལ་རི་བོ་རྩེ་ལྔར་བཞུགས་པས་དེར་འགྲོ་དགོས་དགོངས་ཏེ་དེ་ཕྱོགས་སུ་སོང་སོང་བ་ན་ཉི་མ་ཕྱེད་ཙམ་ན་ཁང་པ་དཀར་ཙག་ཙག་ཞིག་གི་འགྲམ་ན་འཇམ་དཔལ་བཤེས་གཉེན་ཁྱིམ་བཙུན་རྒན་པོ་ཆོས་གོས་ཀྱི་ཐོད་བྱས་པ་བུད་མེད་ངན་ངོན་གཅིག་དང་ལྷན་ཅིག་ཞིང་རྨོ་བར་གཟིགས་པས་ཅུང་ཟད་མ་དད། དེའི་འགྲམ་ཞིག་ཏུ་ཁྱི་མོ་དཀར་པོ་ངན་མ་ཞིག་ཀྱང་ཉལ་ནས་འདུག །དེར་ཟས་ཀྱི་དུས་ལ་བབ་པས་བསོད་སྙོམས་སློང་བ་ཞིག་ལ། ཡུར་བ་ནས་ཉ་ཞིག་བཟུང་སྟེ་ཁྱི་མོ་ལ་བྱིན། དེས་སྐྱུགས་པ་སློབ་དཔོན་ལ་དྲངས་པ་རྣམ་པར་རྟོག་པས་མ་བླངས་པས། ཁྱིམ་བཙུན་ན་རེ། འཛམ་བུ་གླིང་པ་རྣམ་རྟོག་ཆེ། ཟས་བཟང་པོ་དྲོངས་གསུངས་ཏེ་གཞན་ཞིག་ཏུ་སོང་ངོ་། །དེར་བུད་མེད་དེས་འབྲས་ཆན་དང་ཞོ་དྲངས་པ་གསོལ་ནས་འགྲོ་བར་བརྩམས་པས། དེ་རིང་ཉི་མ་ཕྱིས་པས་གྲོང་དུ་ནི་མི་སླེབ། སང་ཉིན་སོང་ཟེར་བ་བཞིན་བཞུགས་ཏེ་གསང་འདུས་ཀྱི་རྒྱུད་བཀླགས་པས་སློབ་དཔོན་རང་ཉིད་ཐེ་ཚོམ་ཟ་བའི་གནས་གར་ཡོད་ཀྱི་ཐད་དེར་བུད་མེད་དེས་ཀྱང་མི་དགའ་བའི་རྣམ་འགྱུར་རེ་བྱས་པས། འདིས་གཞན་སེམས་ཤེས་པར་འདུག་དགོངས་ཏེ་ཐེ་ཚོམ་བསལ་བར་ཞུས་པས་ངས་མི་ཤེས། ད་ཅིའི་ཁྱིམ་བཙུན་དེ་འདུས་པ་ལ་ཤིན་ཏུ་མཁས། ཕྱི་མ་རེད་ན་སླེབ་འོང་བས་དེ་ལ་ཐེ་ཚོམ་ཆོད་ཟེར་བ་ལྟར་ཕྱི་མ་རེད་ན་ཁྱིམ་བཙུན་ཆང་གིས་བཟི་ནས་གོམ་པ་འཁྱོར་བཞིན་དུ་བྱུང་བས་དེར་སྔགས་ཀྱི་སྤྱོད་པ་ཅན་དུ་ཤེས་ཏེ་ཞབས་ལ་ཕྱག་འཚལ་ནས་ཐེ་ཚོམ་གཅོད་པར་ཞུས་པས་དབང་བསྐུར་དགོས་གསུངས། གཞན་ནས་ཐོབ་ཞུས་པས། ངའི་ཆོས་སྟོན་པ་ལ་ང་རང་གིས་
དབང་བསྐུར་དགོས་གསུངས་ནས་ཁང་པ་ཞིག་ཏུ་སོང་། སྲོད་ཀྱི་དུས་སུ་སློབ་དཔོན་ནང་དུ་བོས་པ་ལ། འཇམ་པའི་རྡོ་རྗེ་ལྷ་བཅུ་དགུའི་དཀྱིལ་འཁོར་སྤྲུལ་པའི་དྲུང་ན་ཁྱིམ་བཙུན་བུད་མེད་ཁྱི་མོ་དང་བཅས་པ་སྣང་སྟེ་དབང་སུ་ལ་ལེན་གསུངས་པས། དཀྱིལ་འཁོར་ལ་འཚལ་ལོ་ཞུས་པས་འོ་ན་ལོངས་ཤིག་གསུངས་ཏེ་གསུམ་ཀ་ཁང་པ་གཞན་ཞིག་ཏུ་སོང་དཀྱིལ་འཁོར་ཡང་མི་སྣང་བར་གྱུར། དེར་སློབ་དཔོན་ཐུགས་སྐྱོ་སྟེ། ཁྱོད་ནི་སེམས་ཅན་ཀུན་གྱི་ཡབ་གཅིག་ལ་སོགས་གདུང་བའི་ཡུས་ཀྱིས་གསོལ་བ་བཏབ་པས་སླར་ཡང་སྔར་བཞིན་དཀྱིལ་འཁོར་སྤྲུལ་ཏེ་དབང་བསྐུར། རྫོགས་པ་ཆེན་པོ་སེམས་སྡེའི་མན་ངག་བཤད་པས་རྟོགས་པ་ནམ་མཁའ་དང་མཉམ་པར་གྱུར། འཇམ་དཔལ་ཞལ་ལུང་ཞེས་རིམ་པ་གཉིས་ཀྱི་དེ་ཁོ་ན་ཉིད་བསྒོམ་པ་འདི་ཉིད་སློབ་དཔོན་གྱིས་སྡུད་པ་པོའི་ཚུལ་མཛད་པ་ཡིན། དེས་ཆོས་ཐམས་ཅད་ཀྱི་གཏིང་སླེབ། ཐོག་མར་ཁྱིས་སྐྱུགས་པའི་ཟས་དང་ཁྱིམ་བཙུན་གྱི་སྤྱོད་པ་སོགས་ལ་མ་དད་པའི་རྟེན་འདྲེལ་གྱིས་སྐུ་ལུས་དེ་ཉིད་ཀྱིས་མཆོག་གི་དངོས་གྲུབ་མ་ཐོབ་ཀྱང་བར་དོར་རྡོ་རྗེ་འཆང་གི་གོ་འཕང་མངོན་དུ་མཛད་པ་ཡིན་ཞེས་གྲགས། སླར་བསྲུང་བའི་ཞབས་ཀྱིས་ཀྱང་སློབ་དཔོན་འདི་ལས་གདམས་པ་ཞུས་པས་གྲུབ་པ་ཐོབ་བོ། །བསྟན་བཅོས་ཀྱང་གྲོལ་བའི་ཐིག་ལེ་དང་། སྒྲུབ་ཐབས་ཀུན་བཟང་སོགས་ཤིན་ཏུ་མང་བར་མཛད། སློབ་དཔོན་འདིའི་རྫོགས་རིམ་གྱི་མན་ངག་སྔོན་ཆད་བོད་དུ་འགྱུར་བ་རྣམས་སེམས་སྡེ་ཁོ་ནའི་གྲུབ་མཐའ་གཙང་སིང་ངེ་བར་གནས་ཤིང་རྒྱུ་མཚན་དེས་རྗེས་འབྲངས་སློབ་མའི་ཚོཊ་དང་བཅས་པའང་རྫོཊ་པ་ཆེན་པོའི་དོན་གྱི་བརྒྱུད་པར་འགྲོ་ལ། འགའ་ཞིག་གིས་སློབ་དཔོན་ཤྲཱི་སེངྷ་ཡང་འདི་ཉིད་ཀྱི་མཚན་གྱི་རྣམ་གྲངས་སུ་འདོད་པ་ཐོས་ཤིང་ལོ་རྒྱུས་ཀྱི་བབ་འགར་བརྟག་ན་དེ་ལྟར་ཡིན་དུ་རུང་སྙམ་པའང་འདུག་གོ།། དུས་དེ་ཙམ་ན་རྒྱ་ནག་པོའི་ཡུལ་གྲོང་ཁྱེར་ཤོ་ཁྱམ་ཞེས་བྱ་བར་ཁྱིམ་བདག་དགེ་བའི་ཡིད་ཅན་དང་བུད་མེད་སྣང་བ་གསལ་བ་རབ་ཏུ་མཁྱེན་མ་ཞེས་པ་གཉིས་ཀྱི་སྲས་སློབ་དཔོན་ཤྲཱི་སིཾ་ཧ་ཞེས་བྱ་བ་སྦྱངས་པའི་ཡོན་ཏན་དང་ལྡན་
པ་ཞིག་ལོ་བཅོ་ལྔ་ལོན་པའི་ཚེ་སློབ་དཔོན་ཧ་རི་བྷ་ལ་ལས་སྒྲ་ཚད་སོགས་ཐུན་མོང་གི་རིག་པ་རྣམས་ལོ་གསུམ་དུ་མཉན་ནས་མཁས་པ་ཆེན་པོར་གྱུར་པའི་སྐབས་ཤིག་ནུབ་ཕྱོགས་ཀྱི་གྲོང་ཁྱེར་གསེར་གླིང་བྱ་བར་འགྲོ་བའི་ལམ་བར་དུ་འཕགས་པ་སྤྱན་རས་གཟིགས་ནམ་མཁར་བྱོན་ནས་སྐལ་ལྡན་འབྲས་བུ་ངེས་པར་འདོད་ན་རྒྱ་གར་གྱི་དུར་ཁྲོད་སོ་ས་གླིང་དུ་སོང་ཞིག །ཅེས་ལུང་བསྟན་པས་སློབ་དཔོན་ཉིད་ཡིད་ཚིམ་པར་གྱུར་ཏེ་ད་དུང་འབྲས་བུ་བླ་ན་མེད་པ་དེ་ཉིད་གོ་སླ་བའི་ཕྱིར་གསང་སྔགས་ཀྱི་རྒྱུད་གཞན་ལའང་མཁས་པར་བྱ་སྙམ་དུ་དགོངས་ཏེ་རི་བོ་རྩེ་ལྔར་གདོལ་པའི་རིགས་ཀྱི་སློབ་དཔོན་བྷེ་ལ་ཀི་རྟིར་སྔགས་ཕྱི་ནང་གི་ཆོས་རྣམས་མ་ལུས་པར་གསན་ཅིང་ཉམས་འོག་ཏུ་ཆུད་པར་མཛད། རབ་ཏུ་བྱུང་ནས་དགེ་སློང་སྡེ་སྣོད་འཛིན་པ་མཛད་ཅིང་ལོ་སུམ་ཅུའི་བར་དུ་འདུལ་ཁྲིམས་ཀྱི་བརྟུལ་ཞུགས་སུ་གནས། སླར་ཡང་འཕགས་པའི་ལུང་གིས་སྔོན་བཞིན་བསྐུལ་བས་རྒྱ་གར་དུ་བགྲོད་པའི་ལམ་ལ་དཀའ་བ་མེད་པའི་རྫུ་འཕྲུལ་ཞིག་བསྒྲུབ་པར་བྱ་དགོངས་ཏེ་ལོ་གསུམ་དུ་སྒྲུབ་པ་མཛད་པས་རིག་པ་འཛིན་པའི་སྐུར་གྱུར། དེ་ནས་ཞབས་ས་ལ་ཁྲུ་གང་ཙམ་གྱིས་མ་རེག་པར་དུར་ཁྲོད་སོ་ས་གླིང་དུ་བྱོན་ནས་སློབ་དཔོན་ཆེན་པོ་འཇམ་དཔལ་བཤེས་གཉེན་མཇལ་ཞིང་བླ་མའི་བྱ་བ་རྣམས་བྱས། རྗེས་སུ་གཟུང་བར་གསོལ་བ་བཏབ་པས་བླ་མས་ཀྱང་དགྱེས་བཞིན་དུ་གནང་། ལོ་ཉེར་ལྔའི་བར་ལ་གདམས་པ་དང་རྗེས་སུ་གདམས་པ་རྣམས་བསྩལ་བའི་འོག་ཏུ་སློབ་དཔོན་ཆེན་པོ་ཉིད་སྐུ་འོད་ཕུང་དུ་ཡལ། དེའི་ཚེ་ཤྲཱི་སིཾ་ཧས་སྨྲེ་སྔགས་ཀྱི་གདུང་དབྱངས་བཏོན་པས་ནམ་མཁའ་ནས་སློབ་དཔོན་གྱིས་སྐུ་དངོས་སུ་བསྟན་ཏེ་རིན་པོ་ཆེའི་ཟ་མ་ཏོག་སེན་གང་བ་གཅིག་ཕྱག་ཏུ་གཏད་པར་སྒོམ་ཉམས་དྲུག་པ་ཞེས་བྱ་བའི་འདས་རྗེས་བབ་པས་སློབ་དཔོན་ཉིད་དོན་གྱི་གདེང་དང་ལྡན་པར་གྱུར་ཏོ། །དེའི་འོག་ཏུ་རྒྱ་གར་ནུབ་ཕྱོགས་གསེར་གྱིས་བརྒྱན་པའི་གླིང་དུ་སློབ་དཔོན་འཇམ་དཔལ་བཤེས་གཉེན་བརྫུས་ཏེ་སྐྱེས་པ་ལ་འཇམ་དཔལ་བཤེས་གཉེན་ཕྱི་མར་གྲགས་ཤིང་། དེས་སློབ་དཔོན་པདྨ་འབྱུང་གནས་ལ་སྔགས་ཕྱི་ནང་ཐམས་ཅད་གསུངས་
ཤིང་སློབ་དཔོན་ཨཱརྱ་དེ་བ་ལའང་རྫོགས་པ་ཆེན་པོ་བསྟན་པས་ཟག་བཅས་མི་སྣང་བར་གྱུར་སྐད། དེ་ནས་སློབ་དཔོན་ཤྲཱི་སིཾ་ཧས་རྡོ་རྗེ་གདན་གྱི་འོག་ནས་སྔར་སྦས་པའི་རྒྱུད་རྣམས་བཏོན་ཏེ་རྒྱ་ནག་ཏུ་བྱོན་ཅིང་རྫོགས་པ་ཆེན་པོ་མན་ངག་གི་སྡེ་ལ། ཕྱི་སྐོར། ནང་སྐོར། གསང་སྐོར། གསང་བ་བླ་ན་མེད་པ་བཞིར་ཕྱེས་ནས་སྐོར་སྔ་མ་གསུམ་སྤྲོས་བཅས་ཀྱི་དོན་དུ་བསྡེབས་ནས་བྱང་ཆུབ་ཤིང་གི་ལྷ་ཁང་བྱ་འདབས་སུ་གཏེར་དུ་སྦས། གསང་བ་བླ་ན་མེད་པའི་སྐོར་མཁའ་འགྲོའི་ལུང་བསྟན་པ་ལྟར་བཀྲ་ཤིས་ཁྲི་སྒོའི་ཀ་བར་སྨོན་ལམ་གྱིས་རྒྱས་བཏབ་སྟེ་སྦས། སློབ་དཔོན་ཉིད་བསིལ་བྱིན་ཞེས་པའི་དུར་ཁྲོད་ཆེན་པོར་གདུག་པའི་མི་མ་ཡིན་རྣམས་ཀྱི་བཀུར་སྡི་དང་བཅས་པས་ཏིང་ངེ་འཛིན་ལ་བཞུགས་སོ།། དེའི་ཚེ་འཕགས་ཡུལ་ནུབ་ཕྱོགས་གླང་པོའི་སྒང་ཞེས་བྱ་བར་ཡབ་ཁྱིམ་བདག་བདེ་ལྡན་འཁོར་ལོ་དང་ཡུམ་བདག་ཉིད་གསལ་རིགས་མའི་སྲས་བི་མ་ལ་མི་ཏྲ་ཞེས་པ་དང་། ཤར་ཕྱོགས་ཀ་མ་ཤཱི་ལའི་ཤར་གྱི་གྲོང་ཁྱེར་དུ་ཡབ་གདོལ་པ་ཞི་བའི་ལག་པ་དང་། ཡུམ་དགེ་བའི་སེམས་ཅན་མ་གཉིས་ཀྱི་སྲས་ཡེ་ཤེས་མདོ་ཞེས་བྱ་བ་གཉིས་ཤིག་བཞུགས་པ་ལ་དཔལ་རྡོ་རྗེ་སེམས་དཔའ་མངོན་སུམ་དུ་བྱོན་ནས། ཀྱེ་རིགས་ཀྱི་བུ་གཉིས། ཁྱེད་གཉིས་སྐྱེ་བ་ལྔ་བརྒྱར་པཎྜི་ཏའི་ལུས་བླངས་ཤིང་དམ་པའི་ཆོས་སྤྱད་ཀྱང་འབྲས་བུ་སྔར་ཡང་མ་ཐོབ། ད་ཡང་མི་འཐོབ་པས་ཚེ་འདི་ཉིད་ཀྱིས་ཟག་བཅས་ཀྱི་ཕུང་པོ་མི་སྣང་བར་འཚང་རྒྱ་བར་འདོད་ན་རྒྱ་ནག་པོའི་བྱང་ཆུབ་ཤིང་དྲུང་གི་ལྷ་ཁང་དུ་སོང་ཞིག །ཅེས་ལུང་བསྟན་པས་བི་མ་ལ་མི་ཏྲས་དེ་ཉིད་དུ་ལྷུང་བཟེད་བླངས་ཏེ་བྱོན་པས་སློབ་དཔོན་ཤྲཱི་སིངྷ་མཇལ་ཞིང་ལོ་ཉི་ཤུའི་བར་ལ་སྙན་བརྒྱུད་ཕྱི་ནང་གསང་གསུམ་གྱི་གདམས་པ་མ་ལུས་པར་བསྩལ་མོད་ཀྱི། འོན་ཀྱང་དེ་དག་གི་དཔེ་ནི་མ་གནང་ངོ་། །དེར་བི་མ་ལ་ཐུགས་ཚིམས་ཏེ་སླར་རྒྱ་གར་དུ་བྱོན་ནས་ཛྙཱ་ན་སཱུ་ཏྲ་ལ་ཇི་ལྟར་གྱུར་པ་རྣམས་བསྙད་པས་ཁོང་ཉིད་ཀྱང་འབད་རྩོལ་ཆེན་པོས་རྒྱ་ནག་ཏུ་བྱོན་ནས་མཁའ་འགྲོས་ལུང་བསྟན་པ་བཞིན་དུར་ཁྲོད་ཆེན་པོ་བསིལ་བྱིན་དུ་སློབ་དཔོན་དང་མཇལ། ལོ་གསུམ་གྱི་བར་བླ་མའི་བྱ་བ་ཅི་རིགས་པས་མཉེས་པར་མཛད་ཅིང་མཐར་གསེར་གྱི་
མཎྜལ་ཕུལ་ནས་གདམས་པ་གནང་བར་ཞུས་པས་ལོ་དགུའི་བར་དུ་སྙན་བརྒྱུད་ཀྱི་གདམས་པ་དཔེ་དང་བཅས་པ་གནང་། དེ་ཙམ་གྱིས་ཐུགས་ཚིམས་ཏེ་འབྱོན་པར་བརྩམས་པ་ན་སློབ་དཔོན་གྱིས་རབ་ཏུ་ཚིམ་མམ་གསུངས་པས་ཚིམ་མོ་ཞུས་པ་ན། བླ་མས་གཏད་པ་མེད་དོ། །གསུངས་པས་ཛྙཱ་ན་སུ་ཏྲ་རྟོག་པ་སྐྱེས་ཏེ་ད་དུང་རབ་ཏུ་ཟབ་པའི་གདམས་པ་གནང་བར་ཞུས་པས་འདི་ལ་དབང་བསྐུར་ཐོབ་དགོས་གསུངས་ནས་ཕྱི་སྤྲོས་བཅས་ཀྱི་དབང་རྫོགས་པར་གནང་ནས་གསང་བ་བླ་ན་མེད་པའི་མན་ངག་རྣམས་ཀྱང་ལོ་གསུམ་གྱི་བར་དུ་གནང་། དེ་ནས་ཉམས་སུ་བླང་བར་ཞུས་པས་སྤྲོས་མེད་ཀྱི་དབང་རྫོགས་པར་གནང་ཞིང་རི་བོ་ཀོ་ས་ལའི་རྩེ་མོར་འཁོར་འདས་རུ་ཤན་དབྱེ་བའི་སྤྱོད་པ་མཛད་ཅིང་རབ་ཏུ་སྤྲོས་མེད་ཀྱི་དབང་དང་། རིམ་པས་ཤིན་ཏུ་སྤྲོས་མེད་ཀྱི་དབང་ཡང་རྫོགས་པར་གནང་། དེ་ནས་ལོ་བཅུ་དྲུག་ཏུ་ཉམས་སུ་བླངས་ནས་བསྒོམས། སློབ་དཔོན་ནི་ཁྱད་པར་གྱི་སྤྱོད་པ་སྣ་ཚོགས་པས་གནས་ཤིང་དུས་གཞན་ཞིག་ཏུ་ལི་ཡུལ་གྱི་རྒྱལ་པོས་སྤྱན་དྲངས་ནས་དེར་བཞུད་པའི་ཞག་བདུན་ན་སྒྲ་དང་ལྟས་ཆེན་པོ་བྱུང་བས་ཡེ་ཤེས་མདོས་སྟེང་གི་ནམ་མཁའ་ལ་སློབ་དཔོན་བཞུགས་པ་མཐོང་བས་སྐུ་མྱ་ངན་ལས་འདས་པར་ཤེས་ཏེ་སྨྲེ་སྔགས་ཀྱི་གདུང་ཚིག་བཏོན་པས། གཟེར་བུ་བདུན་པའི་ཞལ་ཆེམས་ཕྱག་ཏུ་བབ་པ་དང་། སྙིང་ཐིག་གསང་བའི་མན་ངག་གི་དཔེ་རྣམས་བཀྲ་ཤིས་ཁྲི་སྒོའི་ཀ་བའི་ནང་ན་ཡོད་པས་དེ་ལོངས་ལ་དུར་ཁྲོད་བྷ་སིང་དུ་སོང་ཞིག །ཅེས་ལུང་བསྟན་པའང་ཐོས། དེར་ཛྙཱ་ན་སཱུ་ཏྲས་གསང་བའི་དཔེ་རྣམས་བཏོན་ནས་རྒྱ་གར་གྱི་དུར་ཁྲོད་བྷ་སིང་དུ་བྱོན་ཅིང་དེར་འཇིག་རྟེན་དང་འཇིག་རྟེན་ལས་འདས་པའི་མཁའ་འགྲོ་དང་མཁའ་འགྲོ་མ་རྣམས་ལ་གསང་བ་སྙིང་ཐིག་གི་ཆོས་ཀྱི་འཁོར་ལོ་བསྐོར་བཞིན་དུ་བཞུགས་པ་ལ་དེའི་ཚེ་བི་མ་ལ་སྤྱོད་པ་ལ་གནས་པར་མཁའ་འགྲོའི་ལུང་གིས། ཀྱེ་སྐལ་ལྡན། སྔར་བས་ཟབ་པའི་སྙིང་ཐིག་གི་གདམས་པ་བཞེད་ན་དུར་ཁྲོད་ཆེན་པོ་བྷ་སིང་གི་ནགས་སུ་སོང་ཞིག །ཅེས་ལུང་བསྟན་པ་བཞིན་དུ་དེ་ཉིད་དུ་བྱོན་པས་ཛྙཱ་ན་སཱུ་ཏྲ་དང་མཇལ་ཞིང་ཆེས་ཟབ་པའི་གདམས་པས་རྗེས་སུ་གཟུང་བར་གསོལ་
པ་བཏབ་པས། སློབ་དཔོན་གྱིས་ཆོ་འཕྲུལ་སྣ་ཚོགས་པ་སྣང་བར་མཛད་ཅིང་སྤྲོས་བཅས་དང་སྤྲོས་མེད་ཀྱི་དབང་རྣམས་བསྐུར། རི་བོ་སྣང་བྱེད་ཀྱི་རྩེ་མོར་འཁོར་འདས་ཤན་འབྱེད་པའི་སྤྱོད་པ་དང་། ཤིན་ཏུ་སྤྲོས་མེད་ཀྱིས་དབང་རྫོགས་པར་མཛད་པས་ཐུན་མོང་མ་ཡིན་པའི་རྟོགས་པ་འཁྲུངས། ཤངས་ཀྱི་རྩེ་མོར་ཡི་གེ་ཨ་དཀར་པོ་ཟག་ལ་ཁད་པ་གཅིག་ཀྱང་བྱུང་། དེ་ནས་རབ་ཏུ་སྤྲོས་མེད་ཀྱི་དབང་རྫོགས་པར་གནང་བས་སེམས་ཀྱི་དེ་ཉིད་རྗེན་པར་མཐོང་། དབང་དེ་དག་གི་རིམ་པ་བཞིན་རྫོགས་པ་ཆེན་པོ་སྐོར་བཞིའི་གདམས་པ་དཔེ་དང་བཅས་པ་མ་ལུས་པར་གནང་། ལོ་བཅུའི་བར་ལ་ཞུན་ཐར་བཅད་ཅིང་དེའི་འོག་ཏུ་ཛྙཱ་ན་སཱུ་ཏྲ་ཉིད་འོད་ཕུང་དུ་ཡལ་བར་བི་མ་ལས་སྨྲེ་སྔགས་དང་གདུང་དབྱངས་བཏོན་པས་སླར་ཡང་སྐུ་མངོན་སུམ་དུ་སྣང་བར་མཛད་ནས་རིན་པོ་ཆེའི་ཟ་མ་ཏོག་རིན་ཆེན་སྣ་ལྔས་རྒྱས་བཏབ་པ་གཅིག་བསྩལ་བ་ཕྱག་ཏུ་བབ་པ་ལས་བཞག་ཐབས་བཞི་པ་ཞེས་པའི་འདས་རྗེས་ཐོབ་པས་ཚིག་ལ་ལྷག་ཆད་མེད་ཅིང་དོན་ལ་འཁྲུལ་པ་མེད་པའི་གདེང་ཐོབ་པར་གྱུར་ཏོ། །དེ་ནས་སློབ་དཔོན་བི་མ་ལ་ཤར་ཕྱོགས་ཀ་མ་རུའི་གྲོང་ཁྱེར་དུ་རྒྱལ་པོ་སེང་གེ་བཟང་པོའི་བླ་མཆོད་དུ་ལོ་ཉི་ཤུར་བཞུགས་ཤིང་། དེ་ནས་ནུབ་ཕྱོགས་སུ་གྲོང་ཁྱེར་བྷིརྻ་ཞེས་པར་རྒྱལ་པོ་དྷརྨ་པཱ་ལའི་མཆོད་གནས་ཀྱང་མཛད། དེའི་འོག་ཏུ་རབ་ཏུ་སྣང་བྱེད་ཅེས་པའི་དུར་ཁྲོད་ཆེན་པོར་ཕྱོགས་ལས་རྣམ་པར་རྒྱལ་བའི་བརྟུལ་ཞུགས་ཀྱི་སྤྱོད་པ་སྤྱད་ཅིང་གདུག་པའི་ཚོགས་ལ་ཆོས་སྟོན་ཅིང་བཞུགས། གསང་བ་མཆོག་གི་དཔེ་རྣམས་ཚར་གསུམ་དུ་བྲིས་ནས། ཚར་གཅིག་ཨོ་རྒྱན་གྱི་ཡུལ་རྒྱ་མཚོ་གསེར་གྱི་བྱེ་མ་བདལ་བའི་གླིང་དུ་སྦས། ཚར་གཅིག་ཁ་ཆེའི་ཡུལ་གསེར་གླིང་ཞེས་པའི་བྲག་སྐྱིབས་སུ་སྦས། ཚར་གཅིག་དུར་ཁྲོད་དེར་མཁའ་འགྲོ་མ་རྣམས་ཀྱི་མཆོད་པའི་རྟེན་ཏུ་བཞུགས་སོ། །སློབ་དཔོན་ཉིད་ཀྱིས་མཐར་འཕོ་བ་ཆེན་པོའི་སྐུ་གྲུབ་པས་འཕགས་ཡུལ་དུ་ཅི་རིགས་པར་བཞུགས་ཤིང་བོད་དུ་བྱོན་པ་ནི་འོག་ཏུ་འཆད་པར་འགྱུར་རོ།། །། སྤྱིར་འཕགས་པའི་ཡུལ་གྱི་གསང་སྔགས་སྤྱོད་པ་རྣམས་གསང་བ་བསྲུང་བ་ལ་བློ་ཤིན་ཏུ་བརྟན་པས་དངོས་གྲུབ་མ་ཐོབ་ཀྱི་བར་གསང་སྔགས་སྤྱོད་པ་གཞན་གྱིས་མི་ཤེས་ཤིང་གང་གི་ཚེ་ཆོ་
འཕྲུལ་ཆེན་པོ་དང་བཅས་མི་སྣང་བར་གྱུར་པའམ་ནུས་པ་ཁྱད་པར་ཅན་བསྟན་པ་ན། ཨ་ལ་ལ་ཧོ། དེ་ནི་སྔགས་ཀྱི་སྤྱོད་པ་ཅན་ནོ། །ཞེས་སླད་ཀྱིས་ཤེས་པར་འགྱུར་བ་འབའ་ཞིག་ཡིན་ལ། རྒྱུ་དེས་སྔགས་ཉམས་སུ་བླངས་པ་ཐམས་ཅད་ལ་ཐ་ན་དངོས་གྲུབ་སྣ་རེ་མ་ཐོབ་པ་མེད་ཅིང་། དེའང་བྱ་སྤྱོད་ཀྱི་རྒྱུད་རྣམས་སྔོན་དུ་དར་ཆེ་བ་ཙམ་ཡིན་ཀྱང་མངོན་མཚན་དུ་སྤྱོད་པ་ནི་མེད། ཕྱིས་སུ་བླ་མེད་རྣམས་དར་བ་ནས་དེ་དག་རིམ་གྱིས་ནུབ་པ་ལྟར་གྱུར་ཅིང་། བླ་མེད་ཀྱི་རྒྱུད་རྣམས་སྔར་ནས་གཏན་མེད་པ་མ་ཡིན་ཀྱང་སྐལ་བ་དང་ལྡན་པ་རེ་གཉིས་ཙམ་གྱིས་ཅུང་ཟད་རེ་ཉམས་སུ་བླངས་པས་དེ་ཐམས་ཅད་ཀྱང་མོད་ལ་མི་སྣང་བར་གྱུར་པ་ཤ་སྟག་བྱུང་བས། བརྒྱུད་ནས་རིམ་པར་འདོམ་པ་དང་རྗེས་སུ་གདམས་པ་བཞག་པ་ནི་མེད་དོ། །དེ་ནས་རྒྱལ་པོ་ཛའམ་ཨིནྡྲ་བྷཱུ་ཏི་བར་པའི་སྐབས་ཙམ་དུ་གྲུབ་པའི་སློབ་དཔོན་ཆེས་ཆེ་བ་རྣམས་ཀྱིས་ཨོ་རྒྱན་གྱི་གནས་དྷཱུ་མ་སྠོ་ར་སོགས་གནས་རྣམས་ནས་ཡེ་ཤེས་ཀྱི་མཁའ་འགྲོ་མ་རྣམས་དང་བཀའ་བགྲོས་ཏེ། རྒྱུད་ལ་ལ་ཚད་མ་དང་། ལ་ལའི་དོན་བསྡུས་པ་དང་། འགའ་ཞིག་ལས་རྟོག་པ་ཁོལ་བཏོན་ཙམ་རེ་སྤྱན་དྲངས་ཤིང་སྣོད་ལྡན་རེ་རེ་ཙམ་ལ་གསང་ནས་བཤད་པས་བླ་མེད་ཀྱི་ལམ་རྣམས་ཆེས་ཆེར་དར་བ་ལྟར་གྱུར་ནས་གྲུབ་པའི་སྐྱེས་བུ་ཕྱོགས་ཐམས་ཅད་ནས་མང་པོ་ཞིག་དུས་སྐབས་དེར་བྱུང་ཡང་། ཐུན་མོང་དུ་སྤྱོད་པ་ནི་ག་ལ་ཡིན། སྔགས་ཀྱི་གླེགས་བམ་དང་བསྟན་བཅོས་རྣམས་ཀྱང་ཐུན་མོང་གི་གཞུང་ལྟར་ཡོངས་ཁྱབ་ཏུ་ཡོད་པ་མ་ཡིན་ཏེ། དཔེར་ན་ཀླུ་སྒྲུབ་ཀྱི་སྔགས་གཞུང་རྣམས་སློབ་དཔོན་ཉིད་སློབ་མའི་ཚོགས་དང་བཅས་པ་འདས་ནས་ཡུན་རིང་པོར་ལོན་པའི་དུས་ཕྱིས་ཤིག་ཀོངྈ་ནའི་བསྲུང་བའི་ཞབས་ཀྱིས་སྒྲོན་གསལ་གྱི་གླེགས་བམ་རྙེད། མ་ཏཾ་གི་པས་འཕགས་པ་ལྷའི་ཡེ་ཤེས་ཀྱི་སྐུ་མཇལ་བ་སོགས་ལས་འཕགས་སྐོར་གྱི་འདུས་པ་དར་བའི་མགོ་བརྩམས་པ་བཞིན་ནོ། །དེ་བཞིན་དུ་ཤིན་ཏུ་གསང་བ་རྫོགས་པ་ཆེན་པོའི་སྐོར་རྣམས་སྤྲུལ་པའི་སྐུ་དགའ་རབ་རྡོ་རྗེས་བསྟན་ནས་བཟུང་སྐལ་བ་མཆོག་
དང་ལྡན་པའི་སློབ་དཔོན་དེ་དག་ལ་ཞལ་ནས་སྙན་དུ་ཆིག་བརྒྱུད་མ་གཏོགས་གླེགས་བམ་བསྟན་པའང་མེད་དེ་སློབ་དཔོན་རེ་རེའི་མཚམས་སུ་དཔེ་རྣམས་མི་སྣང་བར་སྦས་པའི་ཕྱིར་རོ། །ཤིན་ཏུ་ཟབ་པའི་མན་ངག་རྣམས་ནི་འདས་རྗེས་ཞལ་ཆེམས་ཀྱི་ཚུལ་དུ་བཞག་པ་ཁོ་ན་ཡིན་ཏེ་ཐུན་མོང་དུ་ཕྱོགས་ཙམ་ཡང་མ་གྲགས་པས་སྔོན་གྱི་རྒྱུད་སྡེ་སངས་རྒྱས་ཐོད་པ་དང་། འཕགས་སྐོར་རྣམས་དང་། རྫོགས་པ་ཆེན་པོ་ལ་སོགས་པ་རྣམས་བརྒྱུད་ཐག་ཉེ་མོར་འབྱུང་བའི་རྒྱུ་མཚན་ཡང་དེ་ཡིན་ལ། གསང་སྔགས་ཀྱི་རྒྱུད་སྡེ་མཐའ་དག་པ་ནི་རྡོ་རྗེ་འཆང་ཉིད་ཀྱི་སྤྱོད་ཡུལ་ལས་གཞན་དུ་མ་གྱུར་ཞིང་། དེ་ལས་ཆ་ཤས་ཙམ་ཞིག་མི་དང་མི་མ་ཡིན་པའི་གནས་རྣམས་སུ་བྱུང་ལ། དེ་ལས་མི་ཡི་ཡུལ་དུ་བྱུང་བ་ནི་ཉུང་ངུ་ཙམ་ཞིག་ཡིན་པར་མངོན་ཏེ་དེ་དག་ཀྱང་ཕལ་མོ་ཆེ་ཨོ་རྒྱན་ནས་འཕགས་ཡུལ་དུ་ཕེབས་པ་མང་ཞིང་། དེང་སང་ནི་ཡུལ་དེའི་མཐིལ་དྷཱུ་མ་སྠོ་ར་སྟེ་དུ་བའི་གནས་ཞེས་བྱ་བར་གྲོང་ཁྱེར་ཆུང་ངུ་ཞིག་ཡོད་ཅིང་། རྒྱལ་པོ་ཨིནྡྲ་བྷཱུ་ཏིའི་ཕོ་བྲང་སོགས་ནི་ཤུལ་ཙམ་ལས་མེད། ཡུལ་དེ་ཀླ་ཀློས་དབང་བྱེད་པ་ལས་ཕྱི་ནང་གི་གྲུབ་མཐའ་འཛིན་པ་ནི་སུ་ཡང་མེད། བུད་མེད་རྣམས་ནི་སྔོན་གྱི་མཁའ་འགྲོ་མའི་རིགས་སུ་ཡོད་པས་ལྟ་སྟངས་དང་། ཅི་རིགས་པར་རིག་སྔགས་གྲུབ་པས་ལུས་གཞན་དུ་སྒྱུར་བ་དང་། ལས་ཕྲན་ཚེགས་ལ་དབང་བྱེད་པ་ཞིང་གི་མཁའ་འགྲོ་མ་འབའ་ཞིག་ཡིན། གནས་དེར་དྷརྨ་གཉྫི་སྔགས་ཀྱི་རྒྱུད་སྡེ་བཞུགས་པའི་ཕོ་བྲང་དེ་ཡང་མངོན་སུམ་གྱི་སྤྱོད་ཡུལ་དུ་མེད་པས་ལྟར་སྣང་དུ་ཕལ་པའི་གྲོང་དུ་གྱུར་པ་ཡིན་ནམ་སྙམ་ཞིང་། ད་དུང་སྔགས་ཀྱི་རྒྱུད་སྡེ་འཕགས་ཡུལ་དུ་མ་བྱུང་བ་ཡང་ཅི་རིགས་པ་ཡོད་པར་གྲུབ་ལ། དེ་ཡང་ཐུན་མོང་གི་སྤྱོད་ཡུལ་དུ་མ་གྱུར་པར་མཁའ་འགྲོ་མ་རྣམས་ཀྱིས་མི་མངོན་པའི་དབྱིངས་སུ་བཟུང་ནས་གནས་སོ། །དེར་མ་ཟད་རྒྱ་གར་ན་གཏན་མ་གྲགས་པའི་རྒྱུད་མང་པོ་འགྲོ་ལྡིང་གི་གླིང་སོགས་ན་ཡོད་པར་མངོན་སུམ་གྱིས་གྲུབ་པ་ལ་མཚོན་ན་མིའི་ཡུལ་གཞན་དང་གཞན་སྔགས་ཀྱི་གདུལ་བྱར་གྱུར་པ་རྣམས་སུའང་དེ་ལྟར་འབྱུང་བར་ངེས་པའི་ཕྱིར་མཐའ་གཅིག་ཏུ་ཚད་གཟུང་བར་རློམ་པ་ནི་བྱིས་པ་ཉེར་སྤྱོད་ཀྱི་བློ་གྲོས་གྱི་
ན་བ་སྟེ། མདོར་ན་བསམ་བྱ་མ་ཡིན་པར་ཤེས་པར་བྱ་དགོས་པ་ཉིད་དེ། བདེ་མཆོག་སྡོམ་པ་འབྱུང་བའི་རྒྱུད་ལས། རྣལ་འབྱོར་རྒྱུད་རྣམས་ཀྱི་ནི་ཚད། །བྱེ་བ་ཕྲག་ནི་དྲུག་ངེས་ཏེ། །དེ་བཞིན་རྣལ་འབྱོར་མ་རྒྱུད་གྲགས། །བྱེ་བ་ཕྲག་ནི་བཅུ་དྲུག་གྲངས། །ཐེག་ཆེན་ལས་གཞན་མདོ་སྡེ་རྣམས། །དུང་ཕྱུར་ཕྲག་བརྒྱད་གསུངས་པ་ཡིན། །དེ་བཞིན་ཕ་རོལ་ཕྱིན་པའི་ཚུལ། །ས་ཡ་དང་ནི་དུང་ཕྱུར་ལྔ། །འདི་དག་ཐམས་ཅད་ཐུབ་དབང་པོ། །སྐུ་གསུམ་བདག་ཉིད་ཅན་གྱིས་གསུངས། །ཞེས་པ་ལྟ་བུས་མཚོན་པས་སོ། །ཕྱིས་ཡུལ་དབུས་སུ་བསྟན་པ་དངོས་གཞི་ནུབ་པ་ལྟར་གྱུར་ཀྱང་ཤར་ཕྱོགས་སུ་མཐའ་འཁོབ་ཀྱི་ཡུལ་དང་ཡུལ་ཕྲན་མང་པོའི་སྤྱིའི་མིང་ཀོ་ཀིའི་ཡུལ་དུ་གྲགས་པ་དང་། ལྷོ་ཕྱོགས་སུ་ཌཱ་མི་ཌོ་དྭི་བ་དང་། དྷ་ན་ཤྲཱིའི་གླིང་དང་། ཙནྡྲ་དྭི་བ་ལ་སོགས་དང་། བྱང་གི་ཕྱོགས་སུ་གུ་ཛི་རཱ་ཐ་སོགས་ཅི་རིགས་པར་ཐེག་པ་ཆེ་ཆུང་དང་གསང་སྔགས་ཀྱི་བསྟན་པ་སྔོན་ནས་དར་བ་མ་ཉམས་པ་དང་། གསར་དུ་བྱུང་བ་སོགས་ད་ལྟའང་བསྟན་པ་རྣལ་མ་བཞུགས་པ་ལས་གསང་སྔགས་པ་རྣམས་ནི་སློབ་དཔོན་ཆེན་པོ་པདྨ་འབྱུང་གནས་ཞབས་ཀྱི་བཀའ་སྲོལ་འཛིན་པ་ཤས་ཆེ་ཞིང་། ཕལ་ཆེར་ཞིག་ནི་གྲུབ་ཐོབ་ཆེན་པོ་གོ་རཀྵའི་རྗེས་འབྲང་ཛོ་ཀི་སྡེ་ཚན་བཅུ་གཉིས་ཅི་རིགས་པ་དང་། ཁྱད་པར་ན་ཐ་པནྠའི་ནར་ཚན་ན་ཌེ་ཤྭ་རའི་སྡེ་ལས་རྡོ་རྗེ་སློབ་དཔོན་ཆེན་པོ་ཤཱནྟ་གུཔྟ་ཐུགས་སྲས་དང་བཅས་པའི་རྗེས་འབྲང་གི་ཛོ་ཀི་ཁོ་ན་ཤིན་ཏུ་མང་ངོ་། །དུས་ཕྱིས་འཕགས་ཡུལ་ལྷོ་ཕྱོགས་ཀྱི་འབིགས་བྱེད་རི་བོའི་ཁོངས་སུ་བྷཾ་དྭ་ཀྱི་ཡུལ་དུ་རྒྱལ་སྲིད་བྱེད་ཅིང་རིག་སྔགས་གྲུབ་པའི་རྒྱལ་པོ་བ་ལ་བྷ་དྲ་ཞེས་བྱ་བ་ལྷོ་ཕྱོགས་ཀྱི་རྒྱུད་ཕལ་ཆེར་ལ་ལུང་བསྒྱུར་བ་ཞིག་བྱུང་། དེས་ཞི་བ་སྦས་པ་སློབ་མའི་ཚོགས་དང་བཅས་པ་བླ་མར་ཁུར་ཞིང་བདེ་བར་གཤེགས་པའི་བསྟན་པ་རིན་པོ་ཆེ་གསར་དུ་སྤེལ་བར་བྱེད་ལ། མ་འོངས་པ་ན་ལྷོ་ཕྱོགས་ཀྱི་རྒྱུད་རི་བྷིནྡའི་ནང་དུ་དམ་པའི་ཆོས་གསར་དུ་དར་བར་བྱེད་པར་རྒྱལ་བས་ལུང་བསྟན་པ་ཉིད་ཡིན་ནོ། །ཞེས་འཕགས་ཡུལ་བ་རྣམས་སྒྲོག་པར་བྱེད་ལ།
རྒྱུན་དེ་དག་ལས་དེང་སང་གི་བར་དུའང་བསྟན་པ་རིན་པོ་ཆེ་དར་བར་ཡོད་ཅེས་ཐོས་སོ།། དེ་ལས་རི་ཁ་བ་ཅན་གྱི་ཁོངས་སུ་བསྟན་པ་དེ་ཉིད་ཇི་ལྟར་བྱོན་ཅིང་བསྐྱངས་པའི་ཚུལ་ནི། ལྗོངས་འདིར་རྒྱལ་བའི་བསྟན་པ་དར་བའི་རྒྱུ་ནི་སློབ་དཔོན་ཆེན་པོ་པདྨའི་ཞབས་ཀྱི་བཀའ་དྲིན་ཁོ་ན་ལས་ཏེ། ཐོག་མར་ཆོས་བྱར་མ་བཏུབ་པ་ལ་སྒོ་དུ་མ་ནས་དམ་པའི་ཆོས་བྱར་བཏུབ་པའི་སྣོད་དུ་བྱིན་གྱིས་བརླབས་ཤིང་། གདོད་གཙུག་ལག་ཁང་བཞེངས། དེ་ནས་མདོ་དང་སྔགས་ཀྱི་གྲྭ་བཙུགས་ནས་བསྟན་པ་དངོས་གཞི་དར་བར་མཛད་པའི་ཕྱིར་རོ། །དེ་ཡང་འཇམ་དཔལ་རྩ་རྒྱུད་དུ། །ཁྱུ་མཆོག་ཁྱུ་མཆོག་བཟང་པོ་དང་། ས་འོད་དེ་བཞིན་ས་འོད་བཟང་། །དེ་བཞིན་ཕ་རོལ་གནོན་ཉིད་དང་། །རྐང་པའི་འགྲོས་ཤེས་བསྟན་པ་ཡིན། །ཅེས་བོད་ཀྱི་བཙན་པོ་རྣམས་ལུང་བསྟན་པ་ལས་བཞི་པ་ས་འོད་བཟང་སྟེ། བྱང་ཆུབ་སེམས་དཔའ་འཇམ་དཔལ་གྱི་སྤྲུལ་པ་ཁྲི་སྲོང་ལྡེའུ་བཙན་གྱིས་བོད་དུ་ཆོས་དར་བར་བཞེད་ནས། ཨཱ་ཙརྱ་བོ་དྷི་ས་ཏྭ་ཤཱནྟ་རཀྵྀ་ཏ་སྤྱན་དྲངས་ཏེ་ཕོ་བྲང་ཀླུང་ཚུགས་ཞེས་བྱ་བར་བཞུགས་སུ་གསོལ་ནས་ཟླ་བ་མང་པོར་རྒྱུའི་ཐེག་པའི་ཆོས་མང་དུ་བཤད་པས་བོད་ཀྱི་འབྱུང་པོ་རྣམས་ཁྲོས་ནས། ཕོ་བྲང་འཕང་ཐང་ཆུས་ཁྱེར། དམར་པོ་རི་ལ་ཐོག་བརྒྱབ། ཡུལ་ཁམས་སུ་མི་ངས་ཆེན་པོ་བཏང་། སད་དང་སེར་བ་ཆེར་བྱུང་བས་བོད་རྣམས་ཆོས་བྱས་པས་ལན་ཟེར། ཆོས་བྱར་མ་བཏུབ་པས། ཨཱ་ཙརྱའི་ཞལ་ནས་བོད་ཀྱི་འདྲེ་སྲིན་གདུག་པ་ཅན་རྣམས་འདུལ་བ་ལ་ད་ལྟ་སའི་སྟེང་ཙམ་ན་མཐུ་ཆེ་བ་སྔགས་ཀྱི་མཁན་པོ་པདྨ་སཾ་བྷ་བ་ཞེས་བྱ་བ་སྤྱན་འདྲེན་དགོས་གསུངས་ཏེ་ཁོང་ཉིད་རེ་ཞིག་བལ་པོར་བཞུད་དོ། །ཇི་ཞིག་ནས་རྒྱལ་པོས་སྦ་གསལ་སྣང་སློབ་དཔོན་གཉིས་སྤྱན་འདྲེན་པར་བརྫངས་པ། སློབ་དཔོན་ཆེན་པོས་མཁྱེན་ནས་ཉིད་དང་ཨཱ་ཙརྱ་བོ་དྷི་སཏྭ་དང་། བལ་པོའི་རྡོ་བཟོ་མཁས་པ་གཅིག་བཅས་འབྱོན་གྲབས་ཡོད་པ་དང་འཛོམ། དེ་ནས་བོ་དྷི་སཏྭ་སྔོན་ལ་ཕེབས། སློབ་དཔོན་གྱིས་སྐྱིད་གྲོང་ནས་ཚུར་བྱོན་པས་བོད་ཀྱི་ལྷ་འདྲེ་རྣམས་ཀྱིས་ཁ་ཆར་དྲག་པོ་ཕབ་པ་དང་། རི་ཕན་ཚུན་ཁ་
སྦྱར་བས་སློབ་དཔོན་རིའི་ཁོང་སེང་དུ་བཞུད་ནས་ལྷ་འདྲེ་རྣམས་ཏིང་ངེ་འཛིན་གྱིས་བཅིངས་ཤིང་དམ་ལ་བཞག །དེ་ནས་བཟུང་ལམ་གྱི་མི་མ་ཡིན་ཐམས་ཅད་འདུལ་ཞིང་བྱོན། འོ་ཡུག་གི་ཐད་ཀྱི་ཆུ་ཚན་ལ་ཉི་ཚེ་བའི་དམྱལ་བ་ཡོད་པར་སྙིང་རྗེ་བྱའོ་གསུངས་ཏེ་དགོངས་པ་གཏད་པས་ཆུ་ཁོལ་བ་འཇམ་ཉིལ་གྱིས་སོང་། རུ་མཚམས་སུ་ཕེབས། གངས་དཀར་འཇིགས་ནས་ཐག་རིང་དུ་བྲོས། གནམ་དུ་ཕེབས་ནས་དམར་ཐབ་མཛད་པས་ཐང་ལྷ་ཁྲོས་ནས་གངས་ལ་ཐུག་ཆོམ་དང་གློ་བུར་དུ་སྤྲིན་ནག་འཁྲིགས་པ་ལས་ཐོག་དང་སེར་བ་མི་བཟད་པ་བྱུང་བ་ན་སློབ་དཔོན་གྱིས་གངས་ལ་སྡིགས་མཛུབ་བསྟན་པས་གངས་ཆེར་ཞུ། སྙིང་དྲུང་གི་ཀླུ་གདུག་པ་ཅན་ཆོས་ལ་འཚེ་བ་ཞིག་འདུལ་བར་དགོངས་པ་གཏད་པས་ཀླུ་ཕྱིའི་རྒྱ་མཚོར་བྲོས། དེར་ཞག་གསུམ་དགོངས་པ་མཛད་པས་ཀླུ་དང་ཐང་ལྷ་བཅས་དམ་འོག་ཏུ་ཆུག་ཅིང་ཆོས་ལ་བཀོད། གཞན་ཡང་གནམ་མཚོ་དང་ཇོ་མོ་གངས་དཀར་ལ་སོགས་པའི་ལྷ་སྲིན་རྣམས་བཏུལ། དེ་ནས་ལེ་ཤོད་དང་། འཕན་ཡུལ་སོགས་ནས་རིམ་བཞིན་བྱོན་ནས་འབྱུང་པོ་རྣམས་དམ་འོག་ཏུ་བཅུག་པ་དང་། ས་དཔྱད་ཉེས་པ་རྣམས་ཀྱང་བཅོས། ངམ་ཤོད་དུ་ཕེབས་ནས་ཟུང་མཁར་མདར་རྡོའི་མཆོད་རྟེན་ལྔ་བཞེངས། ཕོ་བྲང་དམར་འོམ་བུ་ཚལ་དུ་བོད་རྗེ་དང་མཇལ་འཕྲད་མཛད། ཕྱག་ལ་མ་འཆམས་པར་རྒྱལ་པོའི་ན་བཟའ་ལ་ཕྱག་མཛད་པས་ན་བཟའ་ཚིགས་པས་བཙན་པོས་སློབ་དཔོན་གྱི་ཞབས་ལ་ཕྱག་ཕུལ། བྲག་དམར་མགྲིན་བཟང་གི་ལྷ་ཁང་ལ་རབ་གནས་ཞལ་བསྲོ་མཛད་པར་ལྷ་སྐུ་རྣམས་སྟོན་མོའི་སར་སྤྱན་དྲངས་པས་ནུབ་མོ་ལྷ་ཁང་སྟོངས་པར་སོང་། ནང་པར་ལྷ་ཁང་དུ་ལྷ་རྣམས་བཤོས་གསོལ་ཞིང་གཏམ་མཛད་པ་དངོས་སུ་མཐོང་། དེའི་ཉིན་མོ་མཆོད་པའི་ཡོ་བྱད་ཐམས་ཅད་རང་སྒྲ་སྒྲོགས་ཤིང་འཕེལ་བར་གྱུར། དབང་པོ་གསལ་པའི་བྱིས་པ་འགའ་ལ་པྲ་སེ་ན་ཕབས་པས་སྔར་མཁན་པོ་བྱང་ཆུབ་སེམས་དཔས་ཆོས་བཤད་པ་ལ་འཁྲུག་པའི་བོད་ཀྱི་ལྷ་ཀླུ་མི་སྲུན་པ་ཐམས་ཅད་ཀྱི་མིང་དང་སྤྱོད་ཚུལ་གནས་ལ་སོགས་པ་སྨྲས་པས་དེ་
རྣམས་བསྡིགས་ཤིང་གཟིར་བས་དམ་འོག་ཏུ་བཅུག་ཅིང་ཆོས་ལ་བཀོད། སོ་སོའི་སྲོག་སྔགས་དང་ཆོ་ག་རྣམས་བླངས། དེས་ཀྱང་མ་ཐུལ་བ་རྣམས་སྦྱིན་སྲེག་གིས་བཏུལ་བ་སོགས་མཛད། དེ་འདྲ་བ་ལན་གཉིས་མཛད། མ་དྲོས་གཟི་ཅན་ལ་སོགས་པའི་ཀླུ་རྣམས་བཏུལ། རྒྱལ་པོ་དང་གྲོགས་པོ་བྱས་ནས་ལྷ་ཁང་བཞེངས་པའི་གསེར་ཕྱེ་དྲེའུ་ཁལ་བཅུ་བཞི་ཕུལ། སྐབས་དེར་བེ་ཧར་དང་ཡར་ལྷ་ཤམ་པོའང་བཏུལ། དེ་ཙམ་ན་རྒྱལ་བློན་རྗེ་འབངས་སྐལ་བ་དང་ལྡན་པ་རྣམས་ལ་སྔགས་འོག་མ་དང་བླ་མེད་ཅི་རིགས་པའི་དབང་བསྐུར་བ་དང་། ཕུར་པ་འབུམ་སྡེ་དང་མན་ངག་ལྟ་ཕྲེང་སོགས་གསུངས། དེ་དག་གི་ཚེ་དཀྱིལ་འཁོར་མཆོད་པའི་གཟུངས་མ་མཆིམས་བཟའ་ལྷ་མོ་བཙན་དང་། མཁར་ཆེན་བཟའ་འཚོ་རྒྱལ་གཉིས་ཀྱང་ཏིང་ངེ་འཛིན་གྱིས་མཐུས་བཀུག་སྟེ་དཀྱིལ་འཁོར་གྱི་མཐར་སླེབ། ཁོང་གཉིས་ཉིད་ལའང་ལྷུན་གྱིས་གྲུབ་པའི་རྟོགས་པ་འཁྲུངས་ནས་གྲུབ་པ་མོ་ཆེན་མོར་གྱུར། བསམ་ཡས་གཙུག་ལག་ཁང་གི་ས་ཆོག་མཛད་པ་ན་ཐིག་སྐུད་འཐེན་པར་ལྕོག་རོ་བུ་ཆུང་སྨན་དང་ལྷ་བུ་སྨན་གཉིས་ཏིང་ངེ་འཛིན་གྱིས་བཀུག་སྟེ་ཐིག་སྣ་བ་བྱས། དུས་གཞན་ཞིག་ཏུ་སློབ་དཔོན་གྱིས། བཙན་པོ་ཁྱོད་ཀྱི་ཡུལ་འདི་བཟང་པོར་བྱ། ངམ་ཤོད་ཀྱི་བྱེ་མ་ཚལ་དང་ནེ་སེང་དུ་བྱ། གྲ་དོལ་ཡུལ་གསུམ་སོགས་ཆུ་མེད་པ་རྣམས་སུ་ཆུ་དབྱུང་། གྲམ་པ་ཐམས་ཅད་ཞིང་སར་བྱ། བཻ་ཤྲ་བ་ཎ་ལས་ནོར་བླངས་ཏེ་ནོར་གྱི་འབྱུང་ཁུངས་སུ་བྱ། གཙང་པོ་སྦུབས་སུ་འཇུག །རྒྱ་ཧོར་གྱི་རྒྱལ་པོ་ཐམས་ཅད་བོད་ཀྱི་དབང་དུ་འདུ་བར་བྱའོ། །ཞེས་པ་ལ་སོགས་བཀའ་མཆིད་བསྩལ་བ་ན། དེ་ལྟར་འཚལ་ལོ་ཞུས་པས། སྔ་དྲོ་ཙམ་དགོངས་པར་བཞུགས་པ་ན། བྲག་དམར་གྱི་སྐམ་ས་གཅིག་ཏུ་ཆུ་རྡོལ། བྲག་དམར་མཚོ་མོ་འགུལ་སྔོན་བྱེ་ཐང་ཡིན་པ་ནེ་སིང་དུ་སོང་། བྲག་ཟླ་བའི་གདོང་དུ་ནགས་ཆེན་པོ་སྐད་ཅིག་ལ་བྱུང་། ཟུང་མཁར་ལ་ཕུ་ཆུ་མེད་པར་ཆུ་ཀླུང་ཆེན་པོ་ནར་གྱིས་བྱུང་བ་སོགས་ལྷག་མ་རྣམས་ཀྱང་བཀའ་བཞིན་འབྱུང་ངེས་པ་ལ་སེམས་ཅན་སྤྱི་མཐུན་གྱི་ལས་ཀྱི་རྒྱུ་བྱས། ནག་ཕྱོགས་ཀྱི་བློན་
པོ་རྣམས་ཀྱིས་བར་ཆད་བརྩམས་པས་རྐྱེན་བྱས་ཏེ་ལྷག་མ་རྣམས་མ་གྲུབ་བོ། །འོན་ཀྱང་འདི་སྐབས་ཤིག་ཏུ་དཔལ་བསམ་ཡས་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་ཡང་འབྱོངས་ཏེ་རབ་ཏུ་གནས་པར་མཛད། ཆོ་འཕྲུལ་དང་ངོ་མཚར་བསམ་གྱིས་མི་ཁྱབ་པ་བྱུང་། རྗེ་འབངས་སྐལ་བ་དང་ལྡན་པ་རྣམས་ལ་གསང་སྔགས་ཕྱི་ནང་གི་ཆོས་བསམ་ལས་འདས་པར་གསུངས། འོན་ཀྱང་ལྐོག་ཆོས་ཁོ་ན་ལས་མངོན་མཚན་དུ་བསྟན་པ་ནི་མ་ཡིན་ནོ། །འོན་ཀྱང་སྔོན་དུ་རྒྱལ་བརྒྱུད་མངའ་ཐང་འཕེལ་བའི་སྦྱིན་སྲེག་མཛད་འཕྲོ་ལ་ལུས། ལྷ་ཀླུ་དམ་བཞག་ལན་གསུམ་པའང་མ་གྲུབ་པ་དང་། བོད་ཀྱི་བློན་པོ་སྨོན་ལམ་ལོག་པ་རྣམས་ཀྱི་འབྲས་བུ་ལ་བརྟེན་ནས་བོད་ཀྱི་བདེ་སྐྱིད་ལ་སྐེད་ཉག་འོང་། ཆོས་འཁོར་ཆེན་པོ་གཅིག་ཏུ་འབྱོངས་ཏེ་བར་སྐབས་སུ་འཁྲུག་པ་ཆེན་པོ་འོང་། ཀླུ་དང་རྒྱལ་པོ་འདི་ཕུགས་ཞེ་བརྣག །རྒྱལ་བརྒྱུད་ཀྱང་ཁྲིམས་ལ་མི་གནས་པས་སིལ་བུར་འཐོར་བ་འབྱུང་བར་འདུག་གསུངས་ཏེ་མ་འོངས་པ་མཁྱེན་པས་དྲག་སྔགས་ཀྱང་མང་དུ་གསུངས། ཆོས་དང་དྲག་སྔགས་ཀྱི་དཔེ་མང་པོ་གཏེར་དུ་སྦས་ཤིང་རྫུ་འཕྲུལ་གྱི་བཀོད་པ་ཁོ་ནས་ཆོས་དང་ནོར་གྱི་གཏེར་ཁ་བརྒྱ་རྩ་བརྒྱད་དང་ཕྲ་མོ་གྲངས་ལས་འདས་པ་ཡུལ་ཐ་དད་དུ་སྦས་ནས་ཕྱི་མའི་དུས་སུ་སྐལ་བ་དང་ལྡན་པ་རྣམས་དང་འཕྲད་པའི་སྨོན་ལམ་གྱི་རྒྱས་བཏབ་པར་མཛད་དོ། །སྤྱིར་སློབ་དཔོན་ཆེན་པོ་བོད་ཡུལ་དུ་བཞུགས་ཡུན་སོགས་ལ་འདོད་པ་མི་འདྲ་བ་དུ་མ་འབྱུང་ཡང་གཅིག་ཏུ་ཚད་གཟུང་བར་ནུས་པ་མ་ཡིན་ཏེ། རྣམ་འཕྲུལ་བསམ་གྱིས་མི་ཁྱབ་པའི་ཕྱིར་གང་ལྟར་བྱས་ཀྱང་རུང་མོད། དུས་ཡུན་ཐུང་ངུ་ཙམ་ལའང་ཡུལ་ཐམས་ཅད་དུ་བྱོན་པ་དང་། དེ་དག་ཏུ་དངོས་སུ་ཆོས་སྟོན་པ་དང་། གཏེར་ཁ་མང་པོ་སྦས་པ་དང་། ཡུལ་སོ་སོར་བྱོན་པ་དང་། སྒྲུབ་གནས་སོ་སོར་བཞུགས་པ་དང་གཤེགས་པ་སོགས་མཛད་པ་མཐའ་ཡས་པར་དེ་ལྟ་བུ་སྟོན་པའི་ལོང་མེད་སྙམ་པ་དང་། དུས་ཐུང་ངུ་ལས་མ་བཞུགས་པར་འདོད་པ་དང་། ཡུན་རིང་པོར་བཞུགས་པ་སོགས་འགལ་ལོ་སྙམ་དུ་མི་སེམས་
ཏེ་ཟུང་འཇུག་གྲུབ་པ་ཆེན་པོ་འདི་ལྟ་བུ་རྫུ་འཕྲུལ་མཐའ་ཡས་པ་ལ་མངའ་བརྙེས་པའི་ཕྱིར་རོ། །དུས་སྐབས་དེ་དག་ཏུ་གཞན་ཡང་འཕགས་པའི་ཡུལ་ནས་སློབ་དཔོན་རྒྱལ་བའི་གཤེས་གཉེན་དང་། ཐམས་ཅད་མཁྱེན་པའི་ལྷ་དང་། སྦྱིན་པའི་ངང་ཚུལ་སོགས་སྡོམ་བརྩོན་སྡེ་སྣོད་འཛིན་པ་ཆེན་པོ་རྣམས་དང་། བི་མ་ལ་མི་ཏྲ་དང་། ཤཱནྟིཾ་གརྦྷ་ལ་སོགས་རྡོ་རྗེ་འཛིན་པ་མང་དུ་སྤྱན་དྲངས་ཏེ། མདོ་སྔགས་ཀྱི་བསྟན་པ་དངོས་གཞི་བཙུགས་ཤིང་ཐོག་མར་བོད་ཀྱི་མི་ལ་རབ་བྱུང་བཏུབ་བམ་མི་བཏུབ་ཉམས་སད་པའི་ཕྱིར་རྦ་ཁྲི་གཟིགས་རབ་ཏུ་བྱུང་ཞིང་བསྙེན་པར་རྫོགས། མཚན་དཔལ་དབྱངས་སམ་རྦ་རཏྣར་ཡང་གྲགས། དེ་ནས་རིམ་བཞིན་རྦ་གསལ་སྣང་། བཻ་རོ་ཙ་ན། རྒྱལ་བ་མཆོག་དབྱངས། རྨ་རིན་ཆེན་མཆོག་ལ་སོགས་པ་དྲུག་རབ་ཏུ་བྱུང་ཞིང་བསྙེན་པར་རྫོགས། ཡེ་ཤེས་དབང་པོ་སོགས་སུ་མིང་སྤོས། དེ་ལ་སད་མི་དྲུག་ཏུ་གྲགས་པ་བྱུང་། དེ་ནས་བོད་ལ་རབ་བྱུང་བཏུབ་པར་དགོངས་ཏེ་བློ་གསལ་བ་སུམ་བརྒྱ་ཙམ་རབ་ཏུ་བྱུང་། སྐ་ཅོག་སོགས་ཀྱིས་འདུལ་བ་ལུང་སྡེ་བཞི་བསྒྱུར་ཏེ་གཞི་ཐམས་ཅད་ཡོད་པར་སྨྲ་བའི་ལུགས་ཀྱི་བཤད་པ་དང་། ལག་ལེན་བཙུགས་ཤིང་བསྟན་པའི་གཞི་བཞེངས། རྦ་རཏྣས། སངས་རྒྱས་ཡེ་ཤེས་དང་། སྐ་བ་འོད་མཆོག་དང་དེའི་མཁན་བུ་གཙང་གཡོ་སྨར་གསུམ་རྣམས་ལ་བཤད་ཅིང་། ཕྱི་མ་འདི་གསུམ་གྱིས་གླང་དར་གྱིས་བསྟན་པ་བསྣུབས་པའི་ཚེ་འདུལ་བ་དྲེའུ་ཁལ་གཅིག་བཀལ་ནས་ཁམས་སུ་བྲོས་ཕེབས་པ་རྨ་ལུང་ཨན་ཆུང་གནམ་རྫོང་ངམ། དན་ཏིག་ཤེལ་གྱི་ཡང་དགོན་དུ་བསྒོམས་ཤིང་བཞུགས་པ་ལས། ཕྱིས་བླ་མ་རྨུགས་ལ་འབར་གྱིས་རབ་ཏུ་བྱུང་བར་ཞུས་པས་སྨར་གྱིས་མཁན་པོ་དང་གཡོས་སློབ་དཔོན་མཛད་དེ་རབ་ཏུ་བྱུང་། མཚན་ཤཱཀྱ་དགེ་བ་རབ་གསལ་དུ་བཏགས། དེ་ལས་དབུས་གཙང་གི་མི་བཅུས་ཁམས་སུ་འོངས་ནས་ཚིག་གསུམ་རིམ་ནོད་ཀྱིས་བསྙེན་པར་རྫོགས་པའི་རྒྱུན་ལས་དེང་སང་གི་བར་དུ་
འདུལ་བའི་ལག་ལེན་དང་བཤད་པའི་རྒྱུན་བརྒྱུད་དེ་དར་བ་འདི་ཡིན་ནོ། །མངོན་པ་གོང་འོག་རྣམས་ནི་པཎྜི་ཏ་ཛི་ན་མི་ཏྲ་དང་ལོ་ཙཱ་བ་སྐ་བ་དཔལ་བརྩེགས་སོགས་ཀྱིས་བསྒྱུར་བཤད་མཛད་ཅིང་། དེ་དག་གིས་སློབ་མ་སྣ་ནམ་ཟླ་བའི་རྡོ་རྗེ་དང་། ལྷ་ལུང་དཔལ་གྱི་རྡོ་རྗེ་དང་། དབས་ཡེ་ཤེས་རྒྱལ་བ་གསུམ་ལ་བཤད་ཅིང་། ཕྱི་མས་ཁམས་སུ་བྱོན་ནས་བཤད་པ་སོགས་ལས། ད་ལྟའི་བར་དུ་ཤིན་ཏུ་དར་བར་གྱུར་ཏོ། །མདོ་སྡེའི་ཕྱོགས་འཁོར་ལོ་བར་བ་ཤེར་ཕྱིན་གྱི་སྐོར་རྣམས་རླང་ཁམས་པ་གོ་ཆས་འབུམ་ཐུགས་ལ་བཟུང་བ་སོགས་རྒྱ་གར་དུ་གང་བཞུགས་རྣམས་བསྒྱུར་བཤད་ཉན་གསུམ་གྱིས་དར་བར་མཛད། འཁོར་ལོ་ཐ་མའི་མདོ་ཇི་སྙེད་པ་རྣམས་ཀྱང་སྐ་ཅོག་དང་བཻ་རོ་སོགས་ཀྱིས་བསྒྱུར་ཅིང་བཤད་ཉན་གྱིས་གཏན་ལ་ཕབ་ཅིང་། སྡེ་སྣོད་གསུམ་པོ་དེ་དག་གི་དགོངས་འགྲེལ་བསྟན་བཅོས་ཀྱི་སྐོར་ཡང་ཕལ་ཆེ་བ་དེ་སྐབས་བསྒྱུར་བ་ཡིན་ཏེ། དེ་ལ་བརྟེན་པའི་བཤད་སྒྲུབ་གཉིས་ཀའི་སྲོལ་དེང་སང་གི་བར་དུ་བྱུང་བ་ཡིན་ནོ། །གསང་སྔགས་ལ་བྱ་སྤྱོད་རྣལ་འབྱོར་གྱི་རྒྱུད་རྣམས་ཅི་རིགས་པར་ཉན་བཤད་མཛད་མོད་ཀྱི། འོན་ཀྱང་མཆོག་ཏུ་སྤེལ་བ་ནི་རྣལ་འབྱོར་བླ་མེད་ཀྱི་སྐོར་རྣམས་སོ།། དེའང་བསྐྱེད་རྫོགས་གསུམ་ལ། བསྐྱེད་པ་མ་ཧཱ་ཡོ་ག་ལ་རྒྱུད་སྡེ་དང་སྒྲུབ་སྡེ་གཉིས་ཀྱི་དང་པོ་ཏནྟྲ་ཆེན་པོ་བཅོ་བརྒྱད་དེ་དག་གི་སྤྱིའམ་རྩ་བར་གྱུར་པ་རྡོ་རྗེ་སེམས་དཔའ་སྒྱུ་འཕྲུལ་དྲ་བ་གསང་བ་སྙིང་པོའི་སྐོར་སྒྱུ་འཕྲུལ་སྡེ་བརྒྱད་རྣམས་སློབ་དཔོན་བི་མ་ལས་རྨ་རིན་ཆེན་མཆོག་ལ་བཤད་ཅིང་བསྒྱུར། རྨས་གཙུག་ཏུ་རིན་ཆེན་གཞོན་ནུ་དང་ཀྱེ་རེ་མཆོག་སྐྱོང་གཉིས་ལ་བཤད། དེ་གཉི་གས་ཞང་རྒྱལ་བའི་ཡོན་ཏན་དང་དར་རྗེ་དཔལ་གྱི་གྲགས་པ་གཉིས་ལ་བཤད། དེ་གཉིས་ཀྱི་སྔ་མས་དབུས་གཙང་དུ་ལན་མང་པོ་བཤད་ཅིང་ཁམས་སུའང་བྱོན་ཏེ་བཤད་པ་མཛད། ཞང་གི་བརྒྱུད་པ་རྣམས་ལ་བཀའ་མ་མཆིམས་ཕུ་མའམ་མན་ངག་བརྒྱུད་པར་གྲགས་སོ། །ཡང་སློབ་དཔོན་པདྨས་གཉགས་ཛྙཱ་ན་ཀུ་མཱ་ར་ལ་གསུངས་ཤིང་མན་ངག་ལྟ་བའི་ཕྲེང་བར་གྲགས་པའང་བསྟན། གཉགས་ཀྱིས་སོག་པོ་དཔལ་གྱི་ཡེ་ཤེས་
ལ་བཤད་ཅིང་། དེ་དང་ཞང་གཉི་གས་གནུབས་སངས་རྒྱས་ཡེ་ཤེས་རིན་པོ་ཆེ་ལ་བཤད་དོ། ཡང་སློབ་དཔོན་སངས་རྒྱས་གསང་བས་གངས་ཏེ་སེར་དབས་འཇམ་དཔལ་དང་། བྲན་ཀ་མུཀྟི་སོགས་ལ་སྒྱུ་འཕྲུལ་ལམ་རྣམ་བཀོད་སོགས་གསང་སྙིང་གི་སྐོར་རྣམས་བཤད། དེ་བཞིན་དུ་དཔལ་གསང་བ་འདུས་པ་སློབ་དཔོན་རྡོ་རྗེ་བཞད་པའི་ལུགས་ཀྱི་བཤད་སྲོལ་དང་། བི་ཤྭ་མི་ཏྲའི་འགྲེལ་པ་རྣམས་ལ་བརྟེན་པའི་ཉན་བཤད་དང་སྒྲུབ་པའི་སྲོལ་ཀ་དར། སངས་རྒྱས་མཉམ་སྦྱོར་ཀུ་ཀུ་རཱ་ཛ་དང་ཧཱུཾ་ཀ་རའི་བཀའ་སྲོལ་གྱི་གཞུང་འགྲེལ་རྣམས་དང་ཨོ་རྒྱན་གྱི་རྒྱལ་པོའི་གྲུབ་ཐོབ་བརྒྱ་བྱིན་སྡོང་པོའི་མཉམ་སྦྱོར་འགྲེལ་ཆེན་སོགས་ལ་བརྟེན་པའི་འཆད་ཉན་དང་སྒྲུབ་པའི་སྲོལ་དར་བར་མཛད་ཅིང་ཧེ་རུ་ཀ་དང་རྟ་མཆོག་གི་དཀྱིལ་འཁོར་ལ་བརྟེན་པའི་ཡི་དམ་སྐལ་ལྡན་གཞན་རྣམས་ལ་བསྩལ་བས་བཙན་པོས་རྟ་མགྲིན་གྲུབ་པས་རྟ་སྐད་འཛམ་གླིང་ཁྱབ་པར་ཐོས་པ་སོགས་བྱུང་།། །། གཉིས་པ་སྒྲུབ་སྡེའི་སྐོར་ལ། སྤྱིར་གཤེད་སྐོར་རྣམས་ནི་སློབ་དཔོན་ཤཱནྟིཾ་གརྦྷས་བོད་དུ་དར་བར་མཛད། བདུད་རྩིའི་སྐོར་སློབ་དཔོན་བི་མ་ལས་གཉགས་ཛྙཱ་ན་ཀུ་མཱ་ར་སོགས་ལ་བསྟན་ཅིང་དར་བ་ཡིན་ལ། གཞན་རྣམས་ནི་ཕལ་ཆེར་སློབ་དཔོན་པདྨ་ཁོ་ནས་དར་ཞིང་རྒྱས་པར་མཛད་དོ། །བྱེ་བྲག་ཏུ་བཙན་པོ་ཁྲི་སྲོང་ལྡེའུ་བཙན་གྱིས་གསོལ་བ་བཏབ་པས་དཔལ་གྱི་མཆིམས་ཕུའི་དྲེ་དགུ་དགེ་འུར་སྐལ་བ་མཆོག་དང་ལྡན་པའི་རྗེ་འབངས་བརྒྱད་ལ་སྒྲུབ་སྡེ་ཆེན་པོ་བརྒྱད་ཀྱི་ཕྱི་ནང་གསང་བའི་དཀྱིལ་འཁོར་དུ་དབང་བསྐུར་བའི་རིམ་པ་རྣམས་རྫོགས་པར་མཛད་ཅིང་སོ་སོའི་མེ་ཏོག་ཕོག་པའི་ལྷའི་སྒྲུབ་ཐབས་དང་མན་ངག་གནང་བ་ཉམས་སུ་བླངས་པས་ལྷ་སོ་སོའི་ཞལ་གཟིགས། མངའ་བདག་བཙན་པོས་ཆེ་མཆོག་གྲུབ་པས་ཏིང་ངེ་འཛིན་ཁྱད་པར་ཅན་སྐྱེས་ཤིང་སྒོམ་བྱུང་གི་ཤེས་རབ་ཀློང་རྡོལ་བས་བཀའ་ཡང་དག་པའི་ཚད་མའི་བསྟན་བཅོས་མཛད། ནམ་མཁའི་སྙིང་པོས་ཡང་དག་གྲུབ་ཅིང་ཉི་ཟེར་ལ་བཅིབས། སངས་རྒྱས་ཡེ་ཤེས་ཀྱིས་འཇམ་དཔལ་གྲུབ་ཅིང་བྲག་ལ་ཕུར་པ་ཐེབས། རྒྱལ་བ་མཆོག་དབྱངས་ཀྱིས་དབང་ཆེན་གྲུབ་ཅིང་དབུ་གཙུག་ནས་རྟ་
མགོ་འབྱིན་ཅིང་རྟ་སྐད་སྒྲོགས། མཁར་ཆེན་བཟས་ཕུར་པ་གྲུབ་ཅིང་ཤི་བ་སློང་ནུས། དཔལ་གྱི་ཡེ་ཤེས་ཀྱིས་མ་མོ་གྲུབ་པས་མ་ཚོགས་ལས་ལ་ཁོལ། དཔལ་གྱི་སེང་གེས་མཆོད་བསྟོད་གྲུབ་པས་སྡེ་བརྒྱད་མངག་གཞུག་ཏུ་ཁོལ། བཻ་རོ་ཙཱ་ནས་དྲག་སྔགས་གྲུབ་པས་ཡེ་ཤེས་ཀྱི་སྤྱན་དང་ལྡན་ཅིང་རྫུ་འཕྲུལ་ལ་མངའ་བརྙེས་པར་གྱུར། གཞན་ཡང་སློབ་དཔོན་ཆེན་པོས་དབང་དང་གདམས་ངག་དང་རྗེས་སུ་གདམས་པ་ལས་མཆོག་གི་དངོས་གྲུབ་བརྙེས་པ་གཉགས་ཛྙཱ་ན་ཀུ་མཱ་ར། ཅོག་རོ་ཀླུའི་རྒྱལ་མཚན། སྐ་བ་དཔལ་བརྩེགས། འདྲེ་དཔལ་གྱི་བློ་གྲོས། སྣ་ནམ་རྡོ་རྗེ་བདུད་འཇོམས། འདྲེ་རྒྱལ་བའི་བློ་གྲོས། རླང་ཁམས་པ་གོ་ཆ། གཙུག་རུ་རིན་ཆེན་གཞོན་ནུ། རྨ་རིན་ཆེན་མཆོག །གཉན་དཔལ་དབྱངས། ལྷ་ལུང་དཔལ་གྱི་རྡོ་རྗེ་ལ་སོགས་ནམ་མཁའ་ལ་བྱ་བཞིན་འགྲོ་བ་དང་། ཆུ་ལ་བྱིའུ་ཟུལ་གྱིས་འགྲོ་བ་དང་། རི་བྲག་ལ་མི་ཐོགས་པར་འཛུལ་བ་དང་། ལུས་ལྷའི་དཀྱིལ་འཁོར་དུ་སྐྱེ་བོ་མང་པོ་ལ་སྟོན་ནུས་པ་དང་། ལུས་དེ་ཉིད་ཀྱིས་ཟུང་འཇུག་གི་གོ་འཕང་བརྙེས་པ་ཤ་སྟག་བྱུང་ཞིང་། འཚོ་རྒྱལ་དང་འབྲོག་བཟའ་ལ་སོགས་བུད་མེད་གྲུབ་པ་ཐོབ་པའང་མང་དུ་བྱུང་ངོ་། །སྒྲུབ་སྡེ་ཕྱི་མ་གསུམ་ལ་འཇིག་རྟེན་སྡེ་གསུམ་ཞེས་བོད་དུ་སློབ་དཔོན་ཆེན་པོས་ལྷ་འདྲེ་རྣམས་དམ་ལ་བཏགས་ནས་དཀྱིལ་འཁོར་དུ་བཞག་པ་ཁོ་ན་ཡིན་པར་འདོད་ཀྱང་། མ་མོ་རྦོད་གཏོང་ལ་དབྱིངས་དང་ཡེ་ཤེས་ཀྱི་མཁའ་འགྲོ་ཤས་ཆེ་ཞིང་བཀའ་ཉན་སྲིད་པའི་དམན་མོ་དང་མཁའ་འགྲོའི་རིགས་སུ་གཏོགས་པའང་དུ་མ་ཡོད་པའི་མཁའ་འགྲོ་རྒྱ་མཚོའི་དཀྱིལ་འཁོར་ཡིན་ཅིང་། འདི་ལ་འཇིག་རྟེན་གྱི་དམན་མོ་ལྔ་བཅུ་ལ་སོགས་སྲིད་པའི་མ་མོ་རྣམས་བཀོད་པ་ནི། ཕྱི་སྣོད་འཇིག་རྟེན་དང་། ནང་རྩ་ཐིག་རླུང་གསུམ། གསང་བ་སེམས་ཀྱི་འབྱུང་འཇུག་དང་རྟེན་འདྲེལ་ལས་རྒྱུད་གསུམ་དྲེགས་པའི་མ་མོ་ལྟར་སྣང་བའི་རྣམ་ཤེས་ཀྱིས་བསྡུས་པ་རྣམས་དོན་དུ་མ་སྐྱེས་ཀུན་ཏུ་བཟང་མོའི་དབྱིངས་མཁའ་ཀློང་རྣམ་པར་དག་པའི་དཀྱིལ་འཁོར་ལས་
མི་འདའ་བར་གདོད་ནས་གནས་པའི་ཕྱིར་རྡོ་རྗེ་འཆང་ཐབས་ལ་མཁས་པས་དེ་ལྟར་བསྟན་པ་ཡིན་ཏེ། མཁའ་འགྲོ་རྒྱ་མཚོའི་རྒྱུད་ལས། སྟོང་པ་ཉིད་ནི་མཁས་པ་ཡི། །ཡེ་ཤེས་རྣམ་ཤེས་ངོ་བོའི་ཕྱིར། །དུར་ཁྲོད་བཅོམ་ལྡན་འདས་རང་ཉིད། །སྤྲུལ་པའི་འཁོར་ལོ་འདི་ལ་ནི། །ཞེས་གསུངས་ཤིང་། དེ་དང་མཐུན་པར་སྐུ་གསུང་ཐུགས་ཀྱི་འཁོར་ལོ་རྣམས་སུ་བཀོད་པའི་མ་མོའི་ངེས་པ་ཡང་། དེ་ཉིད་ལས། དབང་པོ་གཤིན་རྗེ་མ་ཆུ་མོ། །གནོད་སྦྱིན་འབྱུང་མོ་དྲང་སྲོང་མ། །སྲིན་མོ་རླུང་གི་ཆུང་མ་སྟེ། །ཞེས་པ་དང་། མ་དང་ཆུང་མ་སྲིང་མོ་དང་། །བུ་མོ་སྲིང་མོའི་བུ་མོ་དང་། །ཕ་ཡི་སྲིང་མོ་དེ་དང་ནི། །ཞང་པོ་ཡི་ནི་ཆུང་མ་དང་། །ཆུང་མའི་སྤུན་ཟླ་མ་དང་ནི། །དེ་ཉིད་ཀྱི་ནི་ཕ་ཡི་མ། །ཆུང་མ་ཡི་ནི་ཕྱི་མོ་དང་། །མ་ཡི་མ་དང་གཉེན་མོ་དང་། །མ་ཡི་སྤུན་ཟླའི་བུ་མོ་དང་། །རང་གི་ཕྱི་མོའི་སྤུན་ཟླ་དང་། །སྤུན་ཟླའི་བུ་མོ་དེའི་བུ་མོ། །ཕ་ཡི་མ་དང་ཕྱི་མོ་དང་། །ཁུ་བོ་ཡི་ནི་ཆུང་མ་དང་། །བུ་མོའི་བུ་ཡི་ཆུང་མ་དང་། །སླར་ཡང་ཆུང་མའི་སྤུན་ཟླ་དང་། །རང་ཕའི་སྲིང་མོའི་བུ་མོ་དང་། །དེ་ཉིད་ཀྱི་ནི་རང་རིག་སྐྱེས། །སྤུན་ཟླའི་ཆུང་མ་བུ་མོ་དང་། །བུ་ཉིད་ཀྱི་ནི་ཆུང་མ་དང་། །བུ་མོའི་ཁྱོ་ཡི་མ་དང་ནི། །བུ་ཉིད་ཀྱི་ནི་སྒྱུག་མོ་དང་། །བུ་མོའི་བུ་མོར་ཡང་དག་བཤད། །ཕོ་ཉ་སུམ་ཅུ་དྲུག་རྣམས་སོ། །ཞེས་དང་། ཡི་དྭགས་དམྱལ་མོ་མནར་མེད་ལ། །ཐིག་ནག་མོ་དང་མེ་མདག་མོ། །ཚ་བ་མོ་དང་རབ་ཚ་མོ། །ངུ་འབོད་མ་དང་ངུ་འབོད་ཆེ། །མར་ནག་ཏུ་འཚིར་རི་གཉིས་འཚིར། །ཞེས་པ་ལ་སོགས་ཐུགས་ཀྱི་འཁོར་ལོར་བཀོད་པས་མཚོན། འཇིག་རྟེན་འཁོར་བའི་ཚུལ་གྱིས་དཀྱིལ་འཁོར་དུ་བཞག་པ་ནི་མཉམ་པ་ཆེན་པོའི་དོན་ལ་སྤྱོད་པའི་སྔགས་ཀྱི་ཐ་ཚིག་སྟེ། དགྱེས་རྡོར་ལས། འདི་ཉིད་འཁོར་བ་ཞེས་བྱ་ལ། །འདི་ཉིད་མྱ་ངན་འདས་པ་ཞེས། །འཁོར་བ་སྤངས་པའི་ཕ་རོལ་ཏུ། །མྱ་ངན་འདས་པ་ཡོད་མ་ཡིན། །ཞེས་གསུངས་པའི་དོན་ལ་བསམ་དགོས་ཤིང་། དེ་བཞིན་དུ་
འཇིག་རྟེན་མཆོད་བསྟོད་དང་དམོད་པ་དྲག་སྔགས་ཀྱང་སྔོན་གྱི་ཚེ་འོག་མིན་དུ་དཔལ་ཆེན་པོས་རཱུ་ཏྲ་སོགས་གདུལ་བྱ་གདུག་པ་ཅན་རྣམས་ལ་སྦྱོར་སྒྲོལ་གྱི་ཕྲིན་ལས་རྨད་དུ་བྱུང་བའི་ཆོས་བསྟན་ཅིང་འཇིག་རྟེན་ཁམས་ཀྱི་གདུག་པ་ཅན་རྣམས་དུས་གཅིག་ཏུ་བཏུལ། རང་རང་གི་སྲོག་གི་སྙིང་པོ་དང་། སྔགས་རྒྱུད་ཀྱི་སྦྱོར་བ་དང་། ལས་ཀྱི་ཚོགས་དང་། ཆོ་གའི་རྟོག་པ་རྣམས་བླངས། དཀྱིལ་འཁོར་དུ་བཅུག །དབང་བསྐུར། རིགས་དང་མཐུན་པའི་མིང་བཏགས། ལུང་བསྟན་ཕོག །ཟས་ཀྱི་ཕ་འབབ་བྱིན། ལས་ཀྱི་གཉེར་གཏད་ནས་འགྲོ་བ་ཐ་དད་པ་དང་། རིགས་དང་། སྐྱེ་གནས་དང་། ཁ་དོག་དང་། དབྱིབས་དང་། སྤྱོད་པ་དང་། བསམ་པ་དང་། བརྟུལ་ཞུགས་དང་། ཚུལ་དང་ངེས་པའི་ཚིག་བརྗོད་པ་དང་། ཚིག་གི་ལམ་ཐ་དད་པ་རྣམས་ཚུལ་བཞིན་དུ་མཁྱེན་ནས་དེ་དང་དེའི་ཡུལ་ལ་འཚམས་པའི་སྔགས་དང་། ཕྱག་རྒྱ་དང་། དཀྱིལ་འཁོར་བསྟན་ནས་ཐུན་མོང་གི་ལས་ཚོགས་དང་དངོས་གྲུབ་རྣམས་སྒྲུབ་པའི་ཕྱིར་འདི་ཙམ་དུ་མ་ཟད་འཇིག་རྟེན་པའི་སྔགས་རྒྱུད་དུ་མ་གསུངས་པ་ཡོད་ཅིང་། དེ་དག་རང་ངོས་ནས་མྱང་འདས་ཀྱི་ལམ་མཚན་ཉིད་པ་མ་ཡིན་ཀྱང་བྱང་ཆུབ་སེམས་ཀྱིས་ཟིན་པས་དེ་ལ་བསྟན་པས་སྒོ་དུ་མས་སེམས་ཅན་རྣམས་རྗེས་སུ་འཛིན་པ་ལ་མ་རྨོངས་པར་གྲུབ་པས་རྣམ་མཁྱེན་གྱི་རྒྱུད་གྲུང་པོར་འགྱུར་བ་ལ་དགོངས་ནས་ཐམས་ཅད་མཁྱེན་པས་བསྟན་པ་ཡིན་ཏེ་གསང་སྔགས་ཐབས་ལ་མ་རྨོངས་པ་འང་འདི་རིགས་སུ་དགོངས་པ་མ་ཡིན་ན་གང་ལ་ངོས་འཛིན། དེ་ལྟར་ཡང་ཕྱག་ན་རྡོ་རྗེ་དབང་བསྐུར་བའི་རྒྱུད་ལས་ཀྱང་། ལག་ན་རྡོ་རྗེ་ཏིང་ངེ་འཛིན་དེ་ལས་ལངས་ཏེ་ཉན་ཐོས་དང་། རང་སངས་རྒྱས་དང་། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པ་ལ་སོགས་སེམས་ཅན་ཐམས་ཅད་ཀྱི་སྲོག་ལ་དབབ་པའི་ཚོགས་ཀྱིས་བྱེ་བ་བསྲེག་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་
སྔགས་ཀྱི་སྒྲ་སྨྲས་པའི་མོད་ལ་ཐམས་ཅད་དང་ལྡན་པའི་འཁོར་དེ་ཆུ་ཤིང་གི་ཚལ་རྩ་བ་བཅད་པ་ལྟ་བུ་དང་། རླུང་ཆེན་པོས་བསྐྱོད་པ་བཞིན་དུ་ཁས་བུབ་ཏུ་འཁོར་ལོ་ཆེན་པོའི་རྡོ་རྗེའི་དཀྱིལ་འཁོར་ཀྱི་སྟེང་དུ་བསྒྱེལ་ཏོ། །དེའི་ཚེ་དེ་དག་རྣམས་ཀྱིས་སངས་རྒྱས་ཀྱི་ཞིང་འདི་ཐམས་ཅད་དང་། སྟོང་གི་འཇིག་རྟེན་གྱི་ཁམས་ཐམས་ཅད་ཀྱང་ཚིག་སྟེ་ཐལ་བར་གྱུར་པ་མཐོང་ངོ་། །དེའི་ཚེ་དེ་བཞིན་གཤེགས་པ་རྣམས་ཀྱིས་ལག་ན་རྡོ་རྗེ་ལ་ལེགས་སོ་ཞེས་བྱ་བ་བརྗོད་དེ་བཀའ་སྩལ་པ། སྔགས་ཀྱི་སྤྱོད་པ་རྒྱ་མཚོ་ཡི། །སྙིང་པོ་སྟོབས་ཆེན་ལྡན་པ་འདི། །བསྟན་པ་འདི་ནི་སྲུང་བྱེད་ཅིང་། །ཐེག་པ་ཆེན་པོའི་གནས་འདི་ལ། །གདུལ་དཀའ་རྟག་ཏུ་འདུལ་བ་སྟེ། །དཔའ་བོ་ཆེན་པོ་ཁྱོད་ཀྱིས་བཤད། །དེ་ནས་འཇམ་དཔལ་གཞོན་ནུར་གྱུར་པས་དེ་དག་བྱིན་གྱིས་བརླབས་ཏེ་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །རིགས་ཀྱི་བུ་འཁོར་འདི་ལ་དམ་ཚིག་ལ་འཇུག་པའི་སྒོ་ཅུང་ཟད་སྩོལ་ཞིག་དང་། དེས་བསྟན་པ་འདི་ལ་སྲོག་གི་རེ་བ་ཐོབ་ཅིང་དད་པ་ཐོབ་ནས་རང་རང་གི་གསང་སྔགས་ཀྱི་སྙིང་པོ་འབུལ་བར་འགྱུར་རོ། །ཞེས་སྨྲས་པ་དང་། ལག་ན་རྡོ་རྗེས་འཇམ་དཔལ་ལ་སྨྲས་པ། ཏིང་ངེ་འཛིན་ལ་དབང་ཐོབ་ཅིང་། །ནམ་མཁའ་ལྟ་བུར་ཆགས་མེད་ལ། །ཀུན་ཏུ་སངས་རྒྱས་ཐམས་ཅད་ཀྱི། །སྨོན་ལམ་རྟག་ཏུ་རྫོགས་བྱེད་པ། །གསང་སྔགས་ཀུན་གྱི་སྤྱོད་པ་དང་། །དེ་བཞིན་གསང་སྔགས་སྒྲུབ་པ་དང་། །བརྟུལ་ཞུགས་དང་ནི་རྟགས་དང་གཟུགས། །དུས་དང་ཡུལ་དང་ཆོ་ག་ཤོད། །དེ་ནས་འཇམ་དཔལ་གྱིས་དེ་རྣམས་ལ་བྱིན་གྱིས་བརླབས་པས་དེ་རྣམས་ལངས་ཏེ། ཀྱེ་མ་ཡེ་ཤེས་ཀྱེ་མ་སྐྱིད། །ཀྱེ་མ་སྔགས་ཤེས་བསམ་མི་ཁྱབ། །དེས་ནི་བདག་ཅག་ཐམས་ཅད་ཀྱང་། །མགོན་དང་བསམ་གཏན་དགའ་དང་ལྡན། །སེམས་ཞི་ཚོགས་ནི་མ་མཆིས་པར། །སངས་རྒྱས་བསྟན་པ་ལྷུར་ལེན་གྱུར། །སངས་རྒྱས་རྣམས་ཀྱི་སྤྱན་སྔར་ནི། །བདག་ཅག་ཐམས་ཅད་མཆིས་ནས་སུ། །ཆོ་གའི་རྒྱལ་པོ་ཚུལ་ཆེན་འདིར། །སྙིང་པོ་དག་ནི་ད་དབུལ་ལོ། །ཞེས་གསོལ་ཏེ། དེ་ནས་འཁོར་གྱི་གནོད་སྦྱིན་དང་། ཤ་ཟ་དང་།
མ་མོ་དང་། མཁའ་འགྲོ་མ་དང་། སྲིན་པོ་དང་། རིག་སྔགས་འཆང་བ་དང་། མིའམ་ཅི་དང་། དྲི་ཟ་དང་། ཀླུ་དང་། འབྱུང་པོ་དང་། སྲིང་མོ་བཞི་ལ་སོགས་པ་རྣམས་ཀྱིས་རང་རང་གི་སྙིང་པོ་རྣམས་ཕུལ་ཏེ། སྤྱི་དང་བྱེ་བྲག་གི་སྒྲུབ་ཐབས་དང་། དཀྱིལ་འཁོར་དང་། སྔགས་དང་། ཕྱག་རྒྱ་དང་། ཆོ་གའི་རྟོག་པ་རྣམས་གསུངས་སོ། །དེ་ལྟ་བུ་གདོད་ནས་གྲུབ་པའི་རྒྱུད་གཞུང་དུ་འབྱུང་བཞིན་འཇིག་རྟེན་པའི་ལྷ་དང་དཀྱིལ་འཁོར་ཡོད་པའི་གཞུང་དེ་བོད་མར་འགྱུར་བའི་རྣམ་རྟོག་འདི་སྔ་ཕྱི་ཀུན་ཏུ་བྱུང་བར་མངོན་ལ། སློབ་དཔོན་ཆེན་པོས་བོད་ཀྱི་ལྗོངས་སུ་ལྷ་འདྲེ་དེ་དག་དམ་ལ་ཡང་སྐྱོར་གྱིས་ཚུལ་གྱིས་བཏགས་ཤིང་གཙོ་བོ་གཙོ་བོ་རྣམས་སྔོན་སྨོས་པའི་ཆོ་ག་དེ་དག་གིས་དཀྱིལ་འཁོར་དུ་བཅུག་པ་ཡོད་སྲིད་ཀྱང་དེ་ཙམ་གྱིས་རྒྱུད་གཞུང་དེ་བོད་ཁོ་ནའི་དབང་དུ་མི་འགྱུར་ཏེ། བྱ་རྒྱུད་ཀྱི་དཀྱིལ་འཁོར་དུ་གནས་གཙང་གི་ལྷ་རྣམས་ཡོད་པས་དེ་ཁོ་ནའི་རྒྱུད་དུ་མི་འགྱུར་བ་བཞིན་ནོ། །རྫོགས་པ་ཨ་ནུ་ཡོ་གའི་སྐོར་རྣམས་ནི། མདོ་མཁན་དྷརྨ་བོ་དྷི་དང་། བ་སུ་དྷ་ར་དང་། བྲུ་ཤའི་སློབ་དཔོན་ཆ་བཙན་སྐྱེས་གསུམ་གར་གྱིས་གནུབས་ཆེན་སངས་རྒྱས་ཡེ་ཤེས་ལ་བཤད་དེ་བོད་དུ་བྱོན་པ་ཡིན་ནོ། །རྫོགས་པ་ཆེན་པོ་ཨ་ཏི་ཡོ་ག་ལ་སྡེ་གསུམ་གྱི་དང་པོ་སེམས་ཀློང་གི་སྡེ་གཉིས་ནི། ཡུལ་སྙེ་མོ་བྱེ་མཁར་དུ་འཁྲུངས་པའི་དངོས་གྲུབ་བརྙེས་པའི་སློབ་དཔོན་ཆེན་པོ་བཻ་རོ་ཙ་ན་བཙན་པོ་ཁྲི་སྲོང་ལྡེའུ་བཙན་གྱིས་བསྐུལ་བ་བཞིན་འཇིགས་པ་ཆེན་པོ་བརྒྱད་སོགས་བཟོད་དུ་མེད་པའི་དཀའ་བ་ལྔ་ཕྲག་བཅུ་ལས་བདུན་གྱིས་ལྷག་པ་ཁྱད་དུ་བསད་ནས་རྒྱ་གར་གྱི་ཡུལ་དུ་བརྟོལ་བར་དྷ་ན་ཀོ་ཤའི་ཙནྡན་བསིལ་བྱེད་ཀྱི་ནགས་སུ་སློབ་དཔོན་ཤྲཱི་སིངྷས་རྫུ་འཕྲུལ་གྱིས་བཀོད་པའི་ཀེའུ་ཚང་ཆེན་པོ་དགུ་བརྩེགས་དང་ཉེ་བར་སླེབ། དེར་ཆུ་ལེན་གྱི་རྣལ་འབྱོར་མ་ལ་ཕྲིན་བརྫངས་ཀྱང་ལན་མ་བྱུང་བར་བཻ་རོས་ལྟ་སྟངས་མཛད་པས་ཆུ་སྣོད་ས་ལ་འབྱར། རྣལ་འབྱོར་མས་རང་གི་བྲང་ཕྱེས་ནས་རྡོ་རྗེ་དབྱིངས་ཀྱི་དཀྱིལ་འཁོར་བསྟན་ཅིང་དེས་གྲོགས་བྱས་ཏེ་སློབ་དཔོན་དཔལ་གྱི་སེང་གེ་དང་མཇལ། གསེར་གྱི་མཎྜལ་ཕུལ་ཏེ་རྩོལ་མེད་ཀྱི་ཐེག་པ་གསུང་བར་ཞུས་པས་བརྟག་པར་བྱ་གསུངས། ནང་པར་གསང་བའི་རྩིས་རྒྱ་བཏབ་ནས་ཟབ་མོའི་གནད་རྣམས་བསྟན་པར་བྱ་མོད་ཀྱི།
འོན་ཀྱང་ཤིན་ཏུ་མ་གསང་ན་རྒྱལ་པོའི་ཆད་པས་སྲོག་གི་ཉེན་དུ་འགྱུར་བས་ཉིན་པར་པཎྜི་ཏ་གཞན་རྣམས་ལས་རྒྱུ་འབྲས་ཀྱི་ཆོས་ཉོན། མཚན་མོ་མན་ངག་གི་ཆོས་བསྟན་པར་བྱའོ་གསུངས་ཏེ་གཞན་གྱིས་མི་རྟོག་པའི་ཐབས་དང་རྟེན་འདྲེལ་རྣམས་མཛད། སློབ་དཔོན་གྱིས་མཚན་མོ་མན་ངག་སེམས་སྡེ་བཅོ་བརྒྱད་རྣམས་དར་དཀར་པོ་ལ་ར་དཀར་མོའི་འོ་མས་བྲིས་ཤིང་བསྟན་སྲུང་རྣམས་ལ་ཆད་ཐོ་བླངས་ཏེ་ཤིན་ཏུ་གསང་བའི་རྒྱས་བཏབ་པོ། །ད་དུང་ཡང་བཻ་རོའི་ཐུགས་མ་ཚིམ་སྟེ་བཞུགས་པས་རྒྱུད་སྡེ་དྲུག་ཅུའི་དབང་དང་མན་ངག་ཐམས་ཅད་དང་། འབྲས་བུ་རང་ཆས་སུ་སྟོན་པ་ཀློང་གི་སྡེ་དཀར་ནག་ཁྲ་གསུམ་རྣམས་བསྟན་པས་ཆོས་ཐམས་ཅད་ཀྱི་གཏིང་མཐར་ཕྱིན། ད་དུང་མ་ཚིམ་པ་ལྟར་མཛད་པས་སློབ་དཔོན་གྱི་ཞལ་ནས། ཆོས་ཀྱི་དབྱིངས་ལ་ཟད་མེད་ཀྱང་། །དེ་བཞིན་ཉིད་ནི་གཅིག་ཤེས་ན། །མ་ལུས་དེ་ལ་ཡོངས་སུ་རྫོགས། །དེ་ལས་ཡོད་ན་སིདྡྷི་ཀན། །ཅེས་གསུངས་ནས། གདམས་པ་བཙའ་ལུགས་གསུམ། སྦྱིན་པའི་གནས་བཞི། མི་སྦྱིན་པའི་གནས་བཞི་རྣམས་གསུངས། དུ་བའི་གནས་ཀྱི་དུར་ཁྲོད་ཆེན་པོར་སློབ་དཔོན་དགའ་རབ་རྡོ་རྗེ་དང་ཡང་མཇལ་ནས་རྫོགས་པ་ཆེན་པོ་འབུམ་ཕྲག་དྲུག་ཅུ་རྩ་བཞིའི་དོན་བརྒྱུད་ཐོབ་ཅིང་དེ་ཉིད་དུ་རྟོགས་གྲོལ་དུས་མཉམ་གྱི་དངོས་གྲུབ་ཆེན་པོ་མངོན་དུ་བརྙེས་སོ། །འདི་སློབ་དཔོན་གྱི་ཡེ་ཤེས་ཀྱི་སྐུ་ཡིན་ཀྱང་རུང་སྟེ་སྐྱེ་འཆི་མེད་པའི་ཟུང་འཇུག་གི་སྐུས་མཁའ་ཁྱབ་ཏུ་བཞུགས་པའི་ཕྱིར་དུས་སྔ་ཕྱི་སོགས་སོ་སྐྱེ་ལྟར་མི་བསམ་སྟེ་མཆོག་གཟིགས་རྣམས་ཀྱི་སྤྱོད་ཡུལ་ཡིན་པས་སོ། །དེ་ནས་བཻ་རོས་རྐང་མགྱོགས་ཀྱི་གྲུབ་པ་ལ་བརྟེན་ནས་བོད་དུ་བྱོན་ནས་བཙན་པོ་ལ་ཉིན་མོ་རྒྱུ་འབྲས་ཐུན་མོང་བ་དང་། མཚན་མོ་རྫོགས་པ་ཆེན་པོ་ལྐོག་ཆོས་ཁོ་ནར་གསུངས། སེམས་སྡེ་སྔ་འགྱུར་ལྔ་བསྒྱུར། དེའི་ཚེ་རྒྱ་གར་བས་གདམས་ངག་བོད་དུ་ཤོར་བ་ལ་ཕྲག་དོག་གིས་བོད་རྣམས་ཐེ་ཚོམ་བསྐྱེད་པའི་ཕྲ་མ་དང་། ཆོས་ལ་གནག་པའི་བཙུན་མོ་དང་བློན་པོ་རྣམས་ཀྱི་དབང་ལས་སློབ་དཔོན་ཚ་བ་རོང་དུ་བྱོན་དགོས་པ་བྱུང་། རྒྱལ་རོང་བྲག་ལ་མགོན་པོའི་དགོན་པར་གཡུ་སྒྲ་སྙིང་པོ་རྗེས་སུ་བཟུང་བ་སོགས་འགྲོ་བ་
རྣམས་སྨིན་གྲོལ་ལ་བཀོད། ཚ་རོང་སྟག་རྩེ་མཁར་དུ་གསང་སྟོན་ཡེ་ཤེས་བླ་མ་ལ་རྫོགས་པ་ཆེན་པོའི་སྐོར་རྣམས་གསུངས། སྟོང་ཁུང་རོང་གི་བྲག་དམར་དགོན་རྫོང་དུ་སྤང་རྒན་སངས་རྒྱས་མགོན་པོ་ལ་གསུངས། དབུས་སུ་གཉགས་ཛྙཱ་ན་ཀུ་མཱ་ར་དང་ལི་བཟའ་ཤེས་རབ་སྒྲོན་མར་གསུངས་པ་སྟེ་རིམ་པ་ལྔར་གྲགས་ཤིང་། ཕྱི་མ་འདིས་བཻ་རོ་ལི་ཡུལ་དུ་སྤྱན་དྲངས་ཏེ། མཐར་བལ་པོ་བྷ་སིང་གི་ནགས་སུ་ཟུང་འཇུག་གི་སྐུར་གྱུར་ཏོ། །གཉགས་གྱིས་སོག་པོ་དཔལ་གྱི་ཡེ་ཤེས། གྲ་དཔལ་གྱི་སྙིང་པོ། ལྷ་ལུང་དཔལ་གྱི་རྡོ་རྗེ། འོ་བྲན་དཔལ་གྱི་གཞོན་ནུ་སོགས་ལས་རིམ་བཞིན་བརྒྱུད་པ་གཅིག་དང་། ཡང་སོག་པོས་གནུབས་ཅེན་ལ་བརྒྱུད་པའི་ལུགས་གཅིག་དང་། ཡང་རྩངས་ཤཱཀ་རྡོར་གྱིས་སྤང་རཀྵྀ་ཏ། ཡ་ཟི་དར་མ་ཤེས་རབ། ཟེར་མོ་དགེ་སློང་། མར་པ་ཤེས་རབ་འོད། དེ་ནས་ཟུར་སྒྲོ་ཕུག་བར་བརྒྱུད་དེ་བྱུང་བ་ཡིན་ནོ།། ཡང་བཻ་རོའི་སློབ་མ་སྤང་སངས་རྒྱས་མགོན་པོའི་སློབ་རྒྱུན་ལས་འཇའ་ལུས་གྲུབ་པ་ཤ་སྟག་བྱུང་བ་ནི། སྤང་རྒན་པོའི་སློབ་མ་ངན་ལམ་བྱང་ཆུབ་རྒྱལ་མཚན་ཡིན། དེ་ནི་ཡུལ་དབུ་རུ་ངན་ལམ་རལ་གསུམ་པ་དགེ་སློང་ལོ་དྲུག་ཅུ་རྩ་བདུན་ལོན་པ་ཞིག་གིས་རྒྱལ་མོ་སྟག་རྩེ་མཁར་དུ་བྱོན། སྤང་མི་ཕམ་མགོན་པོ་ལ་གདམས་པ་ཞུས་པས་གནང་སྟེ་ད་ཡུལ་དུ་མ་འགྲོ། ཝ་སེང་གེ་བྲག་ལ་སྒོམ་གསུངས། སློབ་དཔོན་གྱི་བཀའ་བཞིན་ཉན་ཏེ་དེར་བྱོན་ནས་བསྒོམས་པས་ལོ་བརྒྱ་དང་བདུན་ཅུ་རྩ་གཉིས་ལོན་པའི་ཚེ་ཕུང་པོ་ལྷག་མེད་དུ་གཤེགས། དེ་ལ་སློབ་མ་ཟ་དམ་རིན་ཆེན་དབྱིག་བྱ་བ་མདོ་ཁམས་སྟོད་པ་ཞིག་བྱུང་། དེས་ངན་ལམ་ལ་གདམས་པ་ཞུས། བྲག་དེ་ཉིད་དུ་བླ་མ་དང་འབྲལ་བ་མེད་པར་སྒོམ་བཞིན་བཞུགས་པས། ལོ་བརྒྱ་དང་བཞི་བཅུ་ཞེ་བཞི་ལོན་པའི་ཚེ་ཕུང་པོ་ལྷག་མེད་དུ་གཤེགས། དེ་ལ་ཡར་ཀླུང་འཕྱོས་ནས་ཁུ་འགྱུར་གསལ་བའི་མཆོག་ཅེས་བྱ་བའི་སློབ་མ་རྟེན་དགེ་སློང་ཡིན་པ། ལོ་ལྔ་བཅུ་རྩ་བདུན་ལོན་པ་གཅིག་བྱུང་། ཟ་དམ་རིན་ཆེན་གྱིས་གདམས་ངག་གནང་བས་ཡུལ་དུ་ལོག་པའི་བསམ་པ་སྤངས། ཝ་སེང་གེ་བྲག་ཉིད་དུ་བཞུགས་ནས་བསྒོམས་པས་ཁུ་འགྱུར་གསལ་ལོ་བརྒྱ་དང་བཅུ་བདུན་ལོན་ཚེ། ཕུང་པོ་ལྷག་མེད་དུ་གཤེགས། དེ་
ལྟར་སློབ་དཔོན་གསུམ་ཀ་ཝ་སེང་གེ་བྲག་ཅེས་བྱ་བར་སྦྲུལ་གྱི་ལོ་གཅིག་པར་གཅིག་རྟིང་ལ་གཅིག་སྐུ་ན་བུན་ནམ་འཇའ་ཚོན་ཡལ་བ་བཞིན་དུ་གཤེགས་སོ།། དེ་ལ་སློབ་མ་བྱང་ཆུབ་གྲགས་ཞེས་བྱ་བ། ཡུལ་ཉང་གཡུ་འབྲུག་སྟོད་པ་རྟེན་དགེ་སློང་ལོ་བཞི་བཅུ་རྩ་གཉིས་ལོན་པ་ཞིག་བྱུང་། ཁུ་འགྱུར་གསལ་བ་ལ་གདམས་པ་ཞུས་ནས་ཡར་ལོག །བསམ་ཡས་མཆིམས་ཕུར་སྒོམ་གྱིན་བཞུགས་ཙ་ན། དབུ་རུ་ཞྭའི་ཉང་ཤེས་རབ་འབྱུང་གནས་ཞེས་བྱ་བ་དགེ་སློང་བགྲེས་པོ་གཅིག་བཞུགས་འདུག་པ་དང་མཇལ། ཁོང་ན་རེ། བསྙེན་པར་རྫོགས་ནས་ལོ་ང་རྒན་ཡང་གདམས་པ་ཁྱེད་ཆེ་བར་འདུག །རྗེས་སུ་གཟུང་བར་འཚལ་ཞུས་པས། ཉང་བྱང་ཆུབ་གྲགས་ཀྱིས་ཁོང་ལ་གདམས་པ་རྣམས་བྱིན། ཕུག་པོ་ཆེ་དང་ཡང་རྫོང་དུ་བཞུགས། རང་གི་སློབ་མ་དང་ཡང་སློབ་དག་ལ་འབྱུང་བཞི་ཟད་པར་གྱི་སྤྲུལ་བསྒྱུར་བསྟན། མཐར་རང་ཉིད་གཙང་རྒྱམ་ཉེ་དུ་ཁའི་ཕུང་པོ་རི་བོ་ཆེ་ལ་ད་ལྟ་རང་འདུག་པའི་འཕྲོ་ལ་རི་ཟུར་ན་ཡར་སྐུ་ལུས་སྤྲིན་ཆད་པ་བཞིན་དུ་ཕུང་པོ་ལྷག་མེད་དུ་གཤེགས་སོ། །དེར་ཉང་ཤེས་རབ་འབྱུང་གནས་ཀྱིས་མཆིམས་ཕུ་དཔལ་གྱི་ནགས་ཁྲོད། སྒྲགས་ཀྱི་ཡང་རྫོང་། ཕུག་པོ་ཆེ་རྣམས་སུ་བཞུགས། དེར་རྫོགས་པ་ཆེན་པོ་རང་སྣང་རིས་མེད་ཀྱི་དགོངས་པ་མངོན་དུ་ཤར་ནས། ཕུག་པོ་ཆེ་ལྷ་རིའི་རྩེ་མོ་ལ་ཡོད་པའི་ཤུག་པ་རྐང་གཅིག་པར་ན་བཟའ་དང་། ཕྲེང་བ་དང་། ཀ་པཱ་ལི་རྣམས་གཟར་ནས། སྐུ་ནམ་མཁའ་ལ་འཇའ་ཚོན་དེངས་པ་བཞིན་སོང་ངོ་།། དེ་ལ་སློབ་མ་ཡུལ་ལོ་མོ་པ། རུས་སྦ་ཡིན་པ་གཅིག་བྱུང་བས་སློབ་དཔོན་སྦ་སྒོམ་དུ་གྲགས། དེ་རང་གི་ཡུལ་ན་ཡོད་པའི་ཚེ་འཁྲུག་པ་ཡོད་པས། ཡུམ་ན་རེ། བུ་འདི་སྲིང་མོ་དྲུག་གི་མིང་གཅིག་པོ་ཡིན། སློབ་དཔོན་ཤེས་རབ་འབྱུང་གནས་ལ་འཆོལ། མ་ཤི་བ་རང་གིས་ཆོག་ཟེར་ལོ་བཅུ་དྲུག་པ་གཅིག་ཉང་ལ་བཅོལ་ནས་ཡོད་ཙ་ན། སྔར་གྱི་ཉང་བྱང་ཆུབ་གྲགས་པ་དེ་ཕུག་པོ་ཆེ་དང་། ཡང་རྫོང་དང་། མཆིམས་ཕུ་རྣམས་སུ་ཤ་བ་གཅིག་ཁྲིད་ནས་བྱོན་པས། ཉང་
ཤ་བ་ཅན་ཞེས་ཀྱང་གྲགས། ཕུག་པོ་ཆེར་ཕྱི་མའི་རེས་བྱོན་ཙ་ན། ངས་ཁྱོད་གཉིས་ལ་ལྟས་མོ་གཅིག་བསྟན་གྱི་ལྟོས་ཤིག་གསུངས། དེར་སློབ་དཔོན་ཤེར་འབྱུང་དང་། སྦ་སྒོམ་གཉིས་ཀྱིས་གཡས་གཡོན་ནས་བལྟས་ཙ་ན། སློབ་དཔོན་དབུས་ན་ཡོད་པ་དེ་མི་སྣང་བར་སོང་། དེར་ངོ་མཚར་སྐྱེས་ནས་ཡོད་ཙ་ན། རླུང་འཚུབ་ཁྲུ་གང་པ་གཅིག་ཏུ་གྱུར་ནས་ཕར་བསྐྱིལ་ཚུར་བསྐྱིལ་བྱས། དེ་མེར་སོང་། དེའང་ཆུ་གཏོར་གཏོང་བའི་འཁར་གཞོང་གཅིག་ཏུ་འཕོས་ནས་ཆུར་ལྟེམ་གྱིས་སོང་། དེས་ཚུབ་ཅིག་གི་ངང་ལ་སློབ་དཔོན་རང་དུ་ཀྲོང་གིས་སོང་། དེ་ལྟར་འབྱུང་བཞི་ཟད་པར་གྱི་སྐྱེ་མཆེད་ལ་དབང་བསྒྱུར་ནས་འདི་སྐད་དུ། འབྱུང་བའི་སྙིགས་མ་དྭངས་ནས་དྭངས་མ་མ་ཡལ་བའི་བར་དུ་དེ་ལྟར་འོང་བ་ཡིན། ཤེས་རབ་ཀྱིས་སྒོམ་རྒྱུ་མེད་པའི་དོན་མཐོང་ཡང་། བརྡའ་ལ་ཡེངས་པ་མེད་པར་བསྐྱངས་ན་དེ་ལྟར་དུ་རང་དབང་ཐོབ་པ་ལ་ཚེགས་མེད། མ་ཡེངས་པར་སྐྱོང་བ་གལ་ཆེ་བ་ཡིན་གསུངས། དེ་ནས་རེ་ཞིག་ན་སྦ་སྒོམ་གྱིས་བལ་བུའི་ནགས་ལ་ཤིང་འཐུ་བར་ཕྱིན་པས། ཁོང་རང་གི་འཇག་སྤྱིལ་མེ་དམར་བུན་བུན་འདུག་པ་མཐོང་། སློབ་དཔོན་ནི་མེ་མི་འབུད་མེ་ཤོར་བ་ཡིན་ནམ་སྙམ་བལྟར་ཕྱིན་པས། འཇག་སྤྱིལ་སྔར་བཞིན་ལས་མེ་མི་སྣང་། སློབ་དཔོན་ལ་དེ་ཅི་ཙུག་ཡིན་དྲིས་པས། ངས་མེའི་ཏིང་ངེ་འཛིན་ལ་མཉམ་པར་བཞག་པ་ཡིན། ངའི་བླ་མ་ཉང་བྱང་ཆུབ་གྲགས་པའི་དེ་མི་དྲན་ནམ་གསུངས། ཡང་སྐབས་ཤིག་སློབ་དཔོན་གྱི་བཞུགས་སར་ཆུ་ལྟེམ་མེ་འདུག་པ་མཐོང་། མཐར་སློབ་དཔོན་གྱིས། ང་མི་འདུག་ན་ལྷ་རིའི་རྩེ་མོ་ལ་ལྟོས་ཤིག་གསུངས། རེ་ཞིག་ན་སློབ་དཔོན་མ་བྱུང་ནས་རི་ལ་སྐྱོ་སངས་ལ་བཞུད་པ་ཡིན་གྱི་སང་དགོངས་འབྱོན་དུ་འོང་སྙམ་ཙ་ན་ཡང་མ་བྱོན། བལྟར་ཕྱིན་ཙ་ན། དབུ་ཞྭ་དང་། བོ་དྷི་ཙེའི་ཕྲེང་བ་ལ་སོགས་པ་ཤུག་པ་ལ་གཟར། སློབ་དཔོན་ཕུང་པོ་ལྷག་མེད་དུ་གཤེགས་སོ། །འདི་ནི་རང་བཞིན་རྫོགས་པ་ཆེན་པོ་ལ་ནམ་མཁའ་དང་། མཁའ་འགྲོའི་འཆི་ལུགས། མེ་དཔུང་དང་རིག་འཛིན་གྱི་འཆི་ལུགས་
ཞེས་པའི་ཡ་གྱལ་གཅིག་ཡིན་ནོ། །སྦ་སྒོམ་ལོ་ཉི་ཤུ་རྩ་བཞི་ལོན་ཙ་ན་ཉང་ཤེར་འབྱུང་གིས་གདམས་པ་བཏབ་པ་ཡིན། སྦ་སྒོམ་འདི་རྟེན་དགེ་བསྙེན་དུ་བཞུགས། མཚན་ཡེ་ཤེས་བྱང་ཆུབ་དུ་གྲགས། རྟོགས་པ་ཁྱད་པར་ཅན་མངའ། རྡོ་ལ་འདམ་རྫབ་ལྟར་མཛད། བྲག་ལ་སྐུའི་པར་འདེབས། དགུང་ལོ་དགུ་བཅུ་རྩ་བརྒྱད་ལོན་པའི་ཚེ་སྐུ་སྙུན་པ་མེད་པར་གཤེགས། ཇོ་མོ་གང་མོས་ཕྱི་རོལ་གྱི་མི་རྣམས་ལ་པུར་མཇལ་མ་བཏང་བར་མཆོད་ཁང་དུ་པུར་མེ་ལ་སྦྱངས་པས། འོད་རྫ་མ་ཙམ་ཞིག་ནམ་མཁའ་ལ་འགྲོ་བ་ཕྱི་རོལ་གྱི་མི་ཀུན་གྱིས་མཐོང་། ཤུལ་དུ་གདུང་རུས་གཅིག་ཀྱང་མ་བྱུང་ངོ་།། དེའི་སློབ་མ་ནི་འཛེང་སྟེ། ཡུམ་མཚར་དགུ་སྐྱིད་དེ་ཞེས་བྱ་བ་ཡར་ཀླུང་ཐང་ཆུང་བའི་མ་ཇོ་ཡིན། ཐང་ཆུང་བཙད་པོའི་བུ་ཆེ་བས་ཕབ་ནས་འཛེང་འཁྲུངས། ལོ་བཅུ་དྲུག་ལོན་པའི་དུས། འགྲུལ་ཟླ་ཁ་ཤས་དང་བཅས་དོལ་གྱི་གདོང་སྣར་ཚང་ལ་ཕྱིན་ཙ་ན། དོལ་གྱི་འཚེར་ཆུང་ན་མི་མང་པོ་སྤུངས་འདུག་བལྟར་ཕྱིན་པས་དམ་པ་རྒྱ་གར་དང་མཇལ། ཟླ་བ་བཅུ་བཞིར་དམ་པའི་ཕྱགས་ཕྱིར་འབྲངས། གཙང་གི་གནས་གཞི་བཟངས་ཅན་དུ་སླེབ་ཙ་ན། དམ་པས་སྣམ་བུ་གཅིག་གནང་ནས། ཁོང་དང་ཐུང་འདུག་པས་ཁྱོད་རང་ཡུལ་དུ་ལོག །དྭགས་པོ་ནས་ཁམ་བུ་ཁྱེར་ལ་ཤོག །དོལ་དུ་འགྲོ་བའི་ཟླ་བོར་འདུག་གོ་གསུངས། དེར་འཛེང་གིས་ལམ་དུ་ཞུགས་པ་ན། དམ་པ་ཚུར་དྲེང་གིས་བྱོན། འཛེང་གིས་མདན་པ་གཉིས་ལ་འཇུས་ཏེ། ཅི་ཡང་མ་ཡིན་གནས་གྱུར་པ། །གནས་གྱུར་པ་ལ་གཉིས་འཛིན་མེད། །ཅེས་གསུངས་ནས་མགོ་ཐུག་ལན་གཉིས་བརྒྱབ་པས། སེམས་ཧད་དེ་བ་ལ་ཤེས་པ་བཀྲ་གསལ་བ་ཞིག་བྱུང་། ཁ་ནང་ན་ཆུ་ཁྱིལ་ལེ་སྣང་། དེ་ནི་དམ་པས་བྱིན་གྱིས་
བརླབས། རྡོ་རྗེ་ཟམ་པ་དང་མཇལ་བའི་ལུང་བསྟན་པར་འདུག་སྟེ། དུས་ཕྱིས་ལས་མ་གོ་གསུངས། དམ་པས་རྟེན་འདྲེལ་འགའ་ཙམ་དང་། སྔགས་ཀྱི་གནད་མང་དུ་གནང་། རྒྱང་རུ་ཚལ་མར་ཡི་གེ་དྲུག་པའི་གདམས་ངག་གནང་ནས་བསྒྲུབས་པས་བྱིན་རླབས་ཆེན་པོ་བྱུང་། ཡང་ཆུ་བོ་ཆེན་པོ་འདིའི་ཤར་ཕྱོགས་ན་ཙན་དན་གྱི་ནགས་ཡོད། དེ་ན་ཁྱོད་ཀྱི་བླ་མ་ཡོད་གསུངས་ནས་ལུང་བསྟན། དེ་ནས་དབུས་སུ་བྱོན། ཨ་ཁུ་དཔལ་འབལ་ལ་ཁྲག་འཐུང་དང་བེ་ཧར། གནུབས་ཤངས་པོ་ཆེ་ལ་ཀྲྀ་ཡ་དང་ཁ་འབར་མའི་གཏོར་ཆེན་ཞུས། ཁོང་གིས་གཙང་དུ་བ་རི་བ་ལ་འབུལ་བ་སྐྱེལ་དུ་བཏང་བས། བ་རི་ལའང་འཇམ་དཔལ་དང་ཁྱུང་སྒྲུབ་ཞུས། དགེ་བཤེས་སྤོ་ལ་སྔ་འགྱུར་རིགས་ཞུས། དེ་ནས་སུམ་ཅུ་རྩ་ལྔ་ལོན་པའི་ཚེ་ངམ་ཤོད་རྒྱུད་ལྕང་ཚིགས་སུ་བྱོན། ཕུག་པོ་ཆེའི་ལ་ཁ་ན་དགེ་བཤེས་བཙན་ཁ་བོ་ཆེ་རྒྱ་གར་ནས་བྱོན་མ་ཐག་པ་གཅིག་ཇོ་མོ་བས་སྤྱན་དྲངས་ནས། ཆོས་དང་བཟའ་བ་དང་ལྟས་མོ་ཡོད་ཟེར། ནང་པར་སྔ་བར་བྱོན་ཙ་ན། བུད་མེད་གཅིག་ན་རེ། ཁྲབ་ནས་ལམ་ཟུར་འདི་ནས་ཡར་ཕྱིན་ན། སློབ་དཔོན་སྦ་སྒོམ་བྱ་བ་ལྟོ་སྟེར་བ་ལ་ཡངས་པ་ཞིག་ཡོད་ཟེར། ཕྱིན་པས་རྣལ་འབྱོར་པ་ཚོ་གཅིག་གིས་ཀྱང་སླེབ་ནས་ཚ་བ་དྲངས། ཕྱེ་ཟངས་ཀྱི་ཁྱེམ་བུ་རེ་ཡང་གཏོང་གི་འདུག །དེ་ཚོར་བྱིན་ཟིན་ནས། དེ་ན་གསར་བུ་གཅིག་ཀྱང་འདུག་གསུངས་ནས་ཆུ་བུམ་པ་གང་ལེན་དུ་བཅུག །ཆུ་གཏོར་མཛད་ནས་ཕུག་ཆུང་ཟུ་རར་ཁྲིད། ཚོད་མ་གེ་རུ་ཕོར་པ་གང་བྱིན། དེ་ནུབ་ཀྱང་བཟའ་བྱིན་ནས་བག་རྩ་གཅིག་ཏུ་ཉལ། ནང་པར་འགྲོ་དགོས་སེམས་ཙ་ན། ཡང་ལྟོ་བྱིན་ནས་ངའི་ཉེ་གནས་བཙུན་ཆུང་གཅིག་ཡོད་པ་ཟོ་ཐང་དུ་གསེར་ལེན་དུ་སོང་བ་ཆར་ཆེས་པས་མ་བྱུང་། ཤིང་གཅིག་ཐུས་གསུངས། དེར་
ནགས་ཁྲོད་ནས་ཤིང་ཁུར་ཆེ་བ་གཅིག་བསྐྱལ་བས། སྦ་སྒོམ་མཉེས་ནས་ཕྱག་རྒྱ་ཆེན་པོ་བརྡའི་མན་ངག་དང་། རྫོགས་པ་ཆེན་པོ་སྐོར་བདུན་རང་ཆས་བྱ་བ་བཤད། དེར་ཉེར་གནས་ཀྱང་བྱུང་། ངེད་མ་སླེབ་པས་སློབ་དཔོན་འོ་བརྒྱལ་སེམས་ཙ་ན་ཁྱེད་ཀྱིས་གོ་བཅད་འདུག་པ་ད་དུང་ཞག་འགའ་ཙམ་བཞུགས་ཟེར། ཡང་ཡར་ཀླུང་ལན་ཅིག་བསྐོར་ནས་བྱུང་། དེར་སྦ་སྒོམ་གང་ཟག་ཁྱད་པར་ཅན་དུ་ཤེས་ནས་ཡུལ་དུ་མ་ཕྱིན་པར་འོན་དང་ཟངས་རི་ཡན་ཆད་དུ་བསོད་སྙོམས་བྱས། སྒྱེ་གཅིག་ཉོས། ནས་སྒྱེ་གང་དང་བཅས་པ་སློབ་དཔོན་སྦ་སྒོམ་ལ་ཕུལ་བས། ཁྱོད་ཀྱིས་ངའི་གཡོག་བྱས་པ་ཡིན་པས་དེས་རུང་། འདི་ལ་ཁྱོད་རང་གི་རྒྱགས་ཀྱིས། ང་ལ་མན་ངག་རྡོ་རྗེ་ཟམ་པ་ཞེས་བྱ་བ་སྐད་ཅིག་མའི་དོན་རྟོགས་ནས་ཚེ་གཅིག་ལུས་གཅིག་ལ་ཕུང་པོ་ལྷག་མེད་དུ་སངས་རྒྱ་བའི་བརྒྱུད་པ་དྲེང་མ་ཆད་པ་གཅིག་ཡོད། ད་གོང་ཕན་ཆད་སུ་ལའང་མ་སྨྲས་པ་ཡིན། ད་ཁྱོད་ལ་སྦྱིན་ནོ་གསུངས། ནས་ནན་གྱིས་ཕུལ་ནས་འདི་སློབ་དཔོན་རང་ལ་བསྔོས་པ་ཡིན། གདམས་དག་ཐུགས་ལ་གདགས་པར་ཞུ། རྒྱགས་རྙེད་དེ་འོང་བྱས་པས། ཕྱག་གཡོན་པས་སྤྱི་བོ་ནས་བཟུང་གཡས་པས་ལྟག་ཁུང་ནས་རྟབ་རྟབ་བྱེད་ཅིང་། འོར་ཆེ་དམ་ཚིག་ཅན་དུ་འདུག །གདམས་ངག་གིས་ཕན་ཐོག་པར་གདའ་གསུངས། དེར་ལོ་ཆུང་གི་སྔགས་པ་གཅིག་ལ་གཤིན་རྗེ་དམར་པོའི་སྒྲུབ་ཐབས་ཞིག་བྱིན་པས། སྲན་ནས་ཁལ་བརྒྱད་བྱུང་། ལོ་མོ་དང་འཕྲུན་དུ་བསྲུང་སྐྱོབ་ཞར་རེ་ཙམ་བྱས་པས་ཆོས་རྒྱགས་ལྡང་བ་རྙེད། དེར་རྡོ་རྗེ་ཟམ་པའི་བྱིན་རླབ་ཞུ་བ་ལ་ཚོགས་ཀྱི་ཡོ་བྱད་མ་ཚོགས་པའི་ངང་། སློབ་དཔོན་གྱིས། བྱིན་རླབས་ད་ལྟ་བྱ། ཕྱི་ནས་བར་ཆད་འོང་གསུངས། གངས་པར་དུ་གྲོགས་པོ་གཅིག་ལ་པིར་མོ་གཅིག་བཅོལ་བའི་རིན་སློང་དུ་ཕྱིན་པས། མཇོའི་ཤམ་ཐབས་ཞིག་ཐོབ། དེའི་སྣམ་པ་ཚོ་ཕྲལ་ནས་བཙོངས།
ཆང་ཕུད་དང་། གཏོར་མ་དང་། ནས་དྲེ་ལྔ་ཤ་གཟུགས་གཅིག་རྣམས་ལ་བསྟེན་ནས། མར་མེའི་དོད་ཉིན་པར་བྱའོ་གསུངས་ནས་གྲོལ་ལམ་དབང་བཞི་རྫོགས་པར་བསྐུར། གདམས་ངག་མ་ལུས་པ་གནང་། ཕྱི་ནས་ཀྱང་བྱིན་བརླབས་ལན་བཞི་ཙམ་ཞུས། ནས་དང་གསེར་ལ་སོགས་པའི་འབུལ་བ་ལན་ལྔ་བསྐྱལ། རེ་ཞིག་ན། སྣང་བ་འདི་ཀུན་རྫུན་པའི་ཆོས་ཅན་ཡིན་གསུངས་ནས། ཆུ་རྡོ་གཅིག་ལ་ཕྱག་ཆར་གྱིས་བརྒྱབ་པས་གྲུ་མོ་ཡན་ཆད་ཐིམ་གྱིས་སོང་། ཡང་སྐུ་ལུས་ཕྱིར་ཤིགས་ཀྱི་མཛད་པས་བྲག་ལ་འདལ་གྱིས་ཐལ་ནས་རྗེས་ཝལ་ལེ་བྱུང་། ཕུག་ཆུང་རོང་ནས་ལྟ་སྟངས་ཀྱིས་ཤུག་པའི་གདུང་མང་པོ་བཀུག །ཇོ་མོའི་མཆོད་ཁང་ཕུག་པའི་ཤིང་ཡིན་གསུངས། དེ་ལྟ་བུའི་སློབ་དཔོན་ལས་རྡོ་རྗེ་ཟམ་པའི་སྐོར་མ་ལུས་པ་ཐོབ་ཅིང་གཞན་ཡང་ཇོ་བོ་རྗེའི་ཕ་རོལ་ཏུ་ཕྱིན་པའི་ལམ་བརྐྱང་ཁུག་སོགས་ཀྱང་ཐོབ། དེ་བཞིན་དུ་ཡུ་མོ་ལ་སྦྱོར་དྲུག །ཁམས་པ་ལུང་པ་ལ་ཐུན་བརྒྱད་མ། སྣེའུ་ཟུར་པའི་སློབ་མ་ལ་དམིགས་པ་སྐོར་གསུམ། ཤོད་བུ་ལོ་ཙཱ་བ་ལ་འགྲེལ་ཆུང་། དགེ་བཤེས་དགྲོལ་སྒོམ་ལ་ནཱ་རོའི་ཐབས་ལམ་ཞུས་ཤིང་། རྡོ་རྗེ་ཟམ་པ་ཕར་ལ་བཤད། སོ་སྙུན་གདངས་ལ་སྒྲོན་སྤྲུལ་དང་རྒྱབ་ཤ །རྫ་བོར་བ་ལ་བདུད་རྩི་ཐིགས་གསུམ། རི་ཁྲོད་རླུང་ཆུང་ལ་རྣ་བརྒྱུད་ཚིག་གསུམ། རླུང་ངམ་ཆེན་པོ་ལ་དོ་ཧའི་མན་ངག །ལབ་སྒྲོན་ལ་གཅོད་ཡུལ། རྒྱལ་བ་སྦོ་སྟོན་ལ་སྡེ་སྐོར་བདུན་པ། གནུབས་ཤངས་ཆེན་ལ་བ་རི་བའི་ཀྲྀ་ལའི་ཆོས་བཅོ་ལྔ། དིང་རི་ཀུན་དགའ་ལ་གདམས་པ་སྣ་ཚོགས་སོགས་ཐོས་པ་ཤིན་ཏུ་མང་། དྭགས་པོ་ལྷ་རྗེ་ལ་ཆོས་དྲུག་དང་སྐྱེས་སྦྱོར་ཞུས། རྟོགས་པ་ཉམས་བསྡུར་བས་ཤིན་ཏུ་མཉེས། སྤྱན་སྔ་རྣལ་འབྱོར་གྱི་གྲ་ས་རུ་སྤྱོད་པ་བྱས་པས་བརྟུལ་ཞུགས་ཅན་དུ་གྲགས། གྲོགས་མཆེད་ཀྱང་ཨ་ཙ་ར་སྟག་ཤམ་ཅན་དང་། བླ་མ་དབུ་འདྲེན་པ་དང་། བླ་མ་ཐུད་ཁ་འབར། བླ་མ་དྲོད་འབྱོར། ཞང་འགྲོ་སྨྱོན་ལ་སོགས་དེ་ཙ་ནའི་རྣལ་འབྱོར་གྱི་དབང་པོ་ཤ་སྟག་དང་འགྲོགས། གཙང་དུ་གཅེར་བུ་ལོ་ལྔ་བྱས། གཞན་ཡང་སྣང་
བ་ལ་ཐོག་རྫིས་ཤིན་ཏུ་ཆེ་བས་དགུན་འཁྱགས་པའི་རུམ། དབྱར་ཆུ་བོའི་གཞུང་། མ་ངེས་པའི་གཡང་རོང་ཟབ་མོར་མཆོང་བ་དང་། མགོ་བརྡེབ་པ་དང་། མཚོན་བརྡེག་པ་ལ་སོགས་ཏེ་སྤྱོད་པ་ཚན་པོ་ཆེ་མ་བྱས་བྱ་བ་མེད་པས་དཔའ་བོ་འཛེང་ཆུང་དུ་གྲགས། སོ་མང་བཙན་ལ་ཕྱག་རྒྱ་ཆེན་པོ་བཏབ་པས་འཁྲུལ་སྣང་ཡེ་ཤེས་སུ་གནས་གྱུར། རི་ཁྲོད་རླུང་ཆུང་བ་དང་། དངུལ་མོ་རྒྱ་ལེ་ལྕམ་ལ་ཡི་གེ་བཞི་པ་དང་རྫོགས་ཆེན་བཏབ་པས་འཁྲུལ་ཞིག་ཆེན་པོར་གྱུར་ཏེ་མཐར་ཕུང་པོ་ལྷག་མེད་དུ་དེངས། དེ་བཞིན་དུ་མ་ཇོ་དད་པ་ཅན་དང་། ཁམས་པ་སྙིང་རུས་ཅན་ཞིག་ལ་རྡོ་རྗེ་ཟམ་པ་བསྟན་པས་མ་ཇོ་མོན་ཁ་ཟེར་མོའི་མཚོ་དང་། ཁམས་པ་ཀོང་པོ་མཚོ་རྫོང་དུ་ནམ་མཁའ་དང་མཁའ་འགྲོའི་འཆི་ལུགས་ཀྱིས་ཕུང་པོ་ལྷག་མེད་དུ་སོང་། རས་པ་སྒོམ་སྟག །ཤོ་རས། རྒྱ་རས། རླུང་རས་སོགས་ལ་གདམས་པ་བཏབ་པ་ཙམ་གྱིས་བདེ་དྲོད་འབར། དེ་བཞིན་དུ་ཆོས་ཉིད་བསྟན་པ་ཙམ་གྱིས་རྟོགས་གྲོལ་དུ་སོང་བ་ཤིན་ཏུ་མང་། འཛེང་དྷརྨཱ་བོ་དྷི་ཉིད་ཀྱིས་གསུངས་ནས་ཀྱང་། ངའི་གམ་དུ་ལོ་ཙཱ་བ་ཡང་བཞི་ཙམ་བྱུང་། རབ་བྱུང་དང་། སྟོན་ཆེན་དང་། སྒོམ་པ་སྒོམ་མ་ཡུས་མོ་ཆེ་རང་མཐོང་ཅན་མང་ཞིག་བྱུང་། ཚུལ་བཞིན་ཉམས་སུ་ལེན་པ་ཨ་ཅང་ཆེ་སྟེ། དྭགས་པོར་ཉམས་ལེན་ཨེན་རེ་བྱེད་པའི་ཉ་མ་བཅུ་གཅིག་ཙམ་དང་པོར་འཆི་དུས་ཐེབས་པ། འཆི་ཁར་གནད་གཅོད་མེད་པ། རོ་ལ་འཇའ་ཟུག་པ་བྱུང་བ་ཡིན། ངའི་གདམས་པ་འདི་ལ་བལ་མ་བལ་ལས་བྱེད་པ་དང་། ཕ་མ་སྲིའུ་གསོ་བ་འདྲ་བའི་ཉམས་ལེན་ལོ་ལྔ་དྲུག་གཅིག་བྱས་ན། ཕུང་པོ་ལྷག་མེད་དུ་སོང་ནས་ཤུལ་དུ་མིའི་ལུས་པོ་མི་ཡོང་ངེས་གསུངས། རྫུ་འཕྲུལ་གྱི་བཀོད་པ་རྒྱ་མཚོ་ལྟ་བུ་ལ་དབང་འབྱོར་བས་རེས་སྐུ་ལུས་འཇའ་རུ་འཁྱིལ། རེས་ཞབས་ས་ལ་མི་རེག་པར་གཤེགས། སྣང་སེམས་རོ་གཅིག་ཏུ་འདྲེས་པས་ཐག་རིང་
པོའི་ས་ཡང་ཡུད་ཙམ་ལ་འཁོར། གཞན་སེམས་ཤེས་པ་ལ་སོགས་པའི་མངོན་པར་ཤེས་པ་ཐོགས་མེད་མངའ་བས་མ་འོངས་པ་ཐམས་ཅད་ལུང་སྟོན། ལྷའི་མིག་དག་པས་ཇོ་སྲས་མ་རྡོ་རྗེ་སྐྱིད་ཀྱི་བུ་ནམ་ཕྱེད་ན་གཉིད་ལོག་པ་རྒྱ་མཐོངས་ནས་མར་རྦབ་ཏུ་འཆོར་ལ་ཁད་པ་གཟིགས། སྣང་བ་ལ་ཉིན་མཚན་མེད་པས་ནུབ་མོ་སྦུར་མའི་ཁྲོད་དུ་རྒྱ་ཁབ་ལྟུང་བ་བདེ་བླག་ཏུ་གཟིགས་པ་སོགས་ཡོད། ཕྱི་རེས་གཙང་དུ་ལོ་བདུན་བཞུགས་ནས་སླར་ཕུག་པོ་ཆེར་བྱོན་པས། སློབ་དཔོན་སྦ་སྒོམ་གྱིས། ནམ་མཁའ་འདི་ཁོང་དུ་ཆུད་པར་གྱིས། དེ་རྟེན་མེད་དུ་རྟོགས་ན་སྒོམ་མེད་ཀྱི་གཟར་ཆེན་ཐེབས་པ་ཡིན་གསུངས་པས་ངེས་ཤེས་གཏིང་ནས་འདྲོངས། དེ་ནས་དྭགས་པོ་ཞུ་རུ་བཞུགས་ཤིང་བླ་མ་ཞལ་གདམས་ལ་གུ་རུ་ཞི་བ་སྡེ་སྐོར་མདུན་པའི་གདམས་པ་ཞུས། དེའི་ལྷ་ཟུར་དགོན་པར་བརྡའ་བཞི་ལོ་གསུམ་བསྐྱངས་པས་ཆོས་ཐམས་ཅད་ལ་བྱན་ཚུད། སྤྲོས་བྲལ་གྱི་དགོངས་པ་ནམ་མཁའ་ལྟ་བུར་སོང་། ལར་དཀའ་ཐུབ་ལ་ཤིན་ཏུ་བཟོད་པས། ཕུག་པོ་ཆེར་རྡོ་རྗེ་ཟམ་པ་ཞུས་ནས་བདུད་རྩིའི་དཀའ་ཐུབ་མཛད། རིམས་ཀྱིས་རྫི་བར་མ་ནུས། གནུབས་ཤོང་པོ་ཆེའི་དྲུང་དུ་བླ་མའི་བྲན་གྱི་དཀའ་ཐུབ་བྱས་པས་གར་ཕྱིན་དུ་བླ་མས་ཐུགས་ལ་འདོགས། དམ་པ་རྒྱ་གར་གྱི་དྲུང་དུ་རྟོག་དཔྱོད་ཀྱི་དཀའ་ཐུབ་བྱས་པས་ཆོས་ཐམས་ཅད་ལ་རང་བྱན་ཚུད། སྐྱིད་ཁུང་དུ་ཕུར་པའི་བཟླས་པ་ལ་དཀའ་ཐུབ་བྱས་པས་འཇིག་རྟེན་གྱི་ལྷ་འདྲེས་ཅི་སྨྲས་ཉན། ཇོ་བོ་བཀའ་གདམས་པའི་ས་རུ་ཞི་དུལ་གྱི་དཀའ་ཐུབ་བྱས་པས་གར་ཕྱིན་དུ་གཞན་གྱིས་བྱམས། ཡི་གེ་བཞི་ལ་མི་སྡོད་པ་གསུམ་གྱི་དཀའ་ཐུབ་བྱས་པས་བདེ་དྲོད་འབར་ནས་གཅེར་བུ་ལོ་ལྔ་བྱས། དེ་ལ་ངེས་ཤེས་སྐྱེས་ནས་ཕག་མོ་མངོན་འབྱུང་ལ་སྒྲུབ་པའི་དཀའ་ཐུབ་བྱས་པས་འགུར་མོའི་ནུབ་ཕྱོགས་སུ་རྗེ་བཙུན་མའི་ཞལ་གཟིགས། བརྡའ་མང་པོ་གནང་། གནུབས་ཡུལ་རོང་དུ་རྨི་ལམ་སྦྱངས་པས་སྣང་བ་ཐམས་ཅད་རྨི་ལམ་དུ་ཤེས། གཞོ་སྟོད་ཏི་
སྒྲོའི་ཤེལ་ཕུག་ཏུ་ཁྲོ་བོ་བདུད་རྩི་འཁྱིལ་པའི་ཞལ་མཐོང་། མི་མ་ཡིན་ཅིག་གིས་བསྙེན་བཀུར་ཆེར་བྱས། བཙུན་གཟུགས་གཅིག་ནམ་མཁའ་ལ་འཕུར་ནས་ཕར་འགྲོ་ཚུར་འགྲོ་བྱེད་པ་མཐོང་། བཙལ་བས་མ་རྙེད་མི་ཡིན་མིན་མ་ཤེས་གསུངས། དྭགས་པོ་ཞུ་རུ་ཨ་ཛི་བསྒྲུབས་པས་ཉི་མ་དྲོ་ཁར་ཞལ་གཟིགས། དམ་བསྲེ་བྱེད་སྙམ་ཙ་ན་ཇོ་མོ་ཕྱ་ལེ་བྱོན་ནས། བུད་མེད་ཅན་ཟེར་ནས་འོད་ཅིག་ཏུ་ཡལ། ལྷ་ཟུར་དུ་བཅུད་ལེན་གྱི་སྒྲུབ་པ་བྱས་པ་ཚེ་དཔག་མེད་ཞལ་མཐོང་། ཆོས་མང་པོའི་རྣམ་གཞག་རྒྱུད་ལ་ཤར། ཨོ་དཀར་བྲག་ཏུ་སྒྲུབ་པ་མཛད་པས་བདེ་མཆོག་ཡབ་ཡུམ་ཞལ་གཟིགས། ལན་ཅིག་འགྲོ་སྙིང་འདོད་པ་ཞིག་བྱུང་ནས། མོན་འགར་གྲོང་མོ་ཆེའི་མདུན་དུ་བྱོན། ཆུའི་རྫིང་མོ་ཞིག་ལ་ཐུབ་ཆོད་བྱས་མཆོངས་པས། འཁྱགས་པ་ཆག་ནས་ཆུར་བྱིང་། སྐྱེངས་པའི་རྣམ་རྟོག་ཅིག་ཤར་ཙ་ན། ཆུ་ལ་རླངས་པ་ནམ་མཁའ་མི་མཐོང་བ་ཙམ་བྱུང་། མི་རྣམས་ངོ་མཚར་སྐྱེས་ནས་དགུན་གྲང་བདོ་བ་ལ་དེ་ཙམ་ཚུགས་པ། ལྕགས་བསྲེགས་ཆུ་ལ་བཙུད་པ་འདྲ་བ་བྱུང་ཟེར། རང་ལ་འཁྱགས་པའི་སྣང་བ་ནི་བྱུང་གསུངས། ཡང་ལན་ཅིག་ཇོ་མོ་དང་གཉིས་ཀྱིས་ཤིང་འཐུར་ཕྱིན་པས་ཤིང་ཁུར་ཆེ་བ་གཅིག་རྙེད། དེ་ཁུར་ནས་མཐའ་ཆེན་པོ་གཅིག་གི་ཁར་སླེབ་པ་དང་། འདི་ནི་རྨི་ལམ་དུ་འདུག་སྙམ་ནས་མཆོངས་པས་བྱ་བབས་པ་བཞིན་དུ་སོང་། ཇོ་མོ་ན་རེ་བླ་མ་ཁྱེད་མིའམ་ཅིག་མི་འདུག །དམ་པ་རྒྱ་གར་དྲན་ཟེར། དེ་ཡན་དུ་གདམས་པ་མང་དུ་མ་འཕེལ། གྲོང་ཆོག་མཛད་ཅིང་གསང་སྤྱོད་བསྐྱངས། དེ་ནས་ཐག་རིང་ནས་སློབ་མ་མང་དུ་བྱུང་ནས་འཕེལ། རེ་ཞིག་ན་བལ་བུ་དོར་ལས་སྤྱན་དྲངས། གདམས་ངག་གསུངས་པས། ཉི་མ་སྔ་དྲོ་དང་པོ་ལ་འཇའི་གདུགས་དང་རེ་མིག་མང་པོ་བྱུང་། ཆོས་ཐོན་ནས་རི་ལོགས་ལ་སྐྱོ་སངས་ལ་བྱོན། འཇའ་དེ་བླ་མ་གྲོངས་པའི་རྟགས་མི་དགའ་བ་མིན་ནམ་ཞུས་པས། ངའི་བླ་མ་སྦ་སྒོམ་གྱིས་འབར་སྟོན་ཤེས་རབ་གྲགས་སྤུན་གཉིས་ལ་གདམས་པ་འདི་གནང་བའི་དུས་ཀྱང་།
ངམས་ཤོད་ལུང་པ་དང་། ཕུག་པོ་ཆེའི་རི་ལོགས་ཁེངས་པ་ཙམ་བྱུང་བ་ཡིན། གདམས་པ་འདི་ལ་རྟགས་འདི་འོང་གསུངས། ཡང་བླ་མ་འདི་འཛི་ན་ན་བཞུགས་པའི་དུས་སུ་སློབ་མ་ཇོ་སྲས་འཛེང་གི་དྲུང་དུ་བྱོན་པས། མཆོད་རྟེན་རྩ་བའི་གད་རྩ་གཅིག་ན་བཞུགས་འདུག །དེ་ནས་དབེན་ཁང་དུ་ཕྱིན་ཙ་ན་བླ་མ་འཛེང་ནི་མ་མཐོང་། འོད་ཕུབ་ཙམ་ཞིག་འདུག །རྩར་ཉེ་ཙ་ན་འོད་དེ་མི་འདུག་ནས་དེ་ཙུག་ལགས་ཞུས་པས། མཉམ་པར་བཞག་པའི་རྟགས་ཡིན་མི་ལ་མ་སྨྲ་གསུངས། ཡང་ཨ་ཇོ་དངོས་གྲུབ་ལ་མཛེ་བྱུང་བས། ངས་བཟླས་གྲོགས་བྱས་པས་མཛེ་ནི་མ་སོས། ངས་ཕྱག་ན་རྡོ་རྗེའི་ཞལ་མཐོང་དགོད་བྲོ་གསུངས། དེ་ལྟར་ཆོས་ཚུལ་གཞན་ལ་གྲགས་པའི་རོ་སྙོམས་དང་། ཆོས་དྲུག་དང་། གཅོད་ཡུལ་དང་། རིམ་པ་ལྔ་ལ་སོགས་པའི་གདམས་པའི་དོན་གྱི་ཐོབ་བྱ་གང་ཡིན་པ་ཉམས་འོག་ཏུ་ཆུད་པའི་འཛེང་སྒོམ་དྷརྨཱ་བོ་དྷི་འདི་དགུང་ལོ་བརྒྱ་དང་གཉིས་ལོན་པའི་དུས་ཞིག་སྙུན་པ་ལྟར་བསྟན་པས། འཁོར་རྣམས་ཀྱིས་བླ་མ་གྲོངས་ཀྱི་དོགས་ཙ་ན། ཞལ་ནས་མདང་རྨི་ལམ་བཟང་། ང་མི་འཆི་རྒྱའི་པོ་རའི་སྟེང་ན་འདུག་པ་ལ་ཉི་ཟླ་གཉིས་ཤར་བྱུང་། རུས་པའི་སྤྱིལ་པོ་མང་པོའི་སྟེང་ན་བུད་མེད་མང་པོ་འདུག་པས། བླ་མ་འཛེང་ཁྱོད་ལོ་བཞིན་ཤོག་ཟེར་བ་གཅིག་རྨིས་གསུངས། ཡང་རེ་ཞིག་ན། ངས་ལོ་མང་པོ་ལོན་ཏེ་ང་ལའང་ཏིག་པ་བཤད་རྒྱུ་མེད་གསུངས། དེ་ནི་རྟོག་དཔྱོད་ལ་འཛིན་པ་དག་པས་ནང་དུ་དགོངས་པ་ཟད་སར་འཁྱོལ་བའི་རྟགས་ཡིན་ནོ། །དེར་འཁོར་རྣམས་ཀྱིས་དགེ་རྩ་གཅིག་མཛད་པར་ཞུས་པས། འདུས་བྱས་ཀྱི་དགེ་རྩ་ལ་ཐུགས་མི་གཏོད། བཅུད་ལེན་ཅིག་མཛད་པར་ཞུས་པས་ཀྱང་། བཅུད་ལེན་བྱས་ན་ལོ་བཅུ་ཙམ་ཚེ་བསྲིང་ནུས་ཏེ། དུས་ངན་གྱི་ཚེ་རིང་བ་ལ་དགོས་པ་མེད་གསུངས། གཞན་ལ་སྐྱོ་བ་ཡང་དག་བསྐུལ་ནས་སྐུ་གཤེགས་སོ། །པུར་སྦྱངས་པས་ནམ་མཁའ་འཇས་གང་། མཆོད་རྟེན་དང་རིང་བསྲེལ་ཡང་མང་དུ་བྱོན་དོན། འདི་ནི་ཚོགས་པ་བསྐྱངས་པས་སྙིགས་མ་
འཇའ་ལུས་སུ་མ་དེངས་ཀྱང་། དོན་གྱི་ཀ་དག་ཆོས་ཟད་ཀྱི་ས་ལ་མྱ་ངན་ལས་འདས་པའི་རྟགས་མཐའ་དག་ཚང་ཞིང་སྙན་བརྒྱུད་རྡོ་རྗེ་ཟམ་པའི་དར་རྒྱས་ཀྱང་འདིའི་རིང་ནས་ཆེ་བར་བྱུང་སྟེ་དངོས་ཀྱི་སློབ་མ་ཡང་། སློབ་དཔོན་ཀུན་བཟང་དང་། འཛེང་ཇོ་སྲས་དང་། བཙན་ཐང་པ་ཉང་དྷརྨ་སིངྷ་དང་། སློབ་དཔོན་གསེར་ལུང་པ་དང་། བླ་མ་ངུ་རྡོ་རྗེ་རྒྱལ་མཚན་དང་། གཟིག་ཡེ་ཤེས་དབང་པོ་དང་། གཡག་སྟོན་ཟླ་བ་འོད་ཟེར་ལ་སོགས་མང་དུ་བྱོན་ནོ། །དགུང་ལོ་ཡང་བརྒྱ་དང་བཅུ་བདུན་ལོན་ཚེ་གཤེགས་པ་ཡིན། འདི་ཇོ་འབྲོམ་དང་། ཕྱ་བ་ཆོས་ཀྱི་སེང་གེ་དང་། རྗེ་བཙུན་མི་ལ་དཔོན་སློབ་དང་སྔ་ཕྱིར་ཐོག་མཉམ་པ་ཙམ་ཡིན་ནོ།། དེ་ལ་འཛེང་ཇོ་སྲས་ནི། སྔགས་པའི་རིགས་ལ་བཙས་པས་ཆུང་ངུ་ནས་ཡིག་རྩིས་ལ་སྦྱངས། འོལ་ཁའི་ལྷ་བྲིས་པ་ལ་སྒྱུ་འཕྲུལ་ལ་སོགས་རྙིང་མ་དང་། དགྱེས་རྡོར་དང་མཚན་བརྗོད་ཞུས། སློབ་དཔོན་ལྷ་རིས་པ་འདའ་ཁར་གཞུང་ཆེན་པོ་འདི་ཙམ་ཞིག་ཤེས་ཀྱང་འཆི་ཁར་ཕན་པ་ཨ་རོ་ཐུན་བདུན་ལས་མ་བྱུང་། ཁྱོད་རང་ཀྱང་གཞུང་མ་བསླབས་པར་གདམས་ངག་ལ་ནན་ཏན་གྱིས། དྭགས་པོ་ན་ཁྱེད་རང་གི་བླ་མ་འཛེང་བྱ་བ་གཅིག་ཡོད་འདུག་པས་དེར་སོང་ཞེས་ལུང་བསྟན། གང་བར་དུ་རྫོགས་ཆེན་ལྷུན་གྲུབ་མཁན་སློབ་དཔོན་ཟེམ་གྱི་སར་དབྱར་དགུན་ཐོག་དྲུག་བསྡད་ཀྱང་ཐུགས་ལ་མ་བཏགས། གདམས་ངག་གི་སྤྲོས་པ་མ་ཆོད་ནས་སློབ་དཔོན་འཛེང་ལ་དཔལ་ལུང་དུ་རྡོ་རྗེ་ཟམ་པ་ཚར་གསུམ་ཞུས། བྱིན་རླབ་མཛད་ནས། ཁྱེད་རང་རེ་ཞིག་གཙང་དུ་སོང་ལ་གཞུང་སློབ། གཙང་ནས་འཁོར་ཙ་ན་ཨ་མིས་དགོན་པ་གཅིག་ཏུ་སྡོད་ཅིག་གསུངས། དེར་གདམས་པ་མི་གནང་བར་དགོངས་ནས། གཞན་སུས་ཤེས་དྲིས་པས། གྲ་ཕྱིའི་ཇོ་སྲས་ཞང་ལ་སྐྱབས་བྱ་བས་ཤེས་གསུངས། དེ་ལ་ཞུ་བར་སེམས་ཙ་ན་ཁོང་གྲོངས། ཡང་དྭགས་པོ་རང་དུ་ལོག་ནས་འཛེང་ལ་ཞུས་པས་ཀྱང་མ་གནང་། སློབ་མ་གཅིག་ལ་ཞུ་བསམས་ནས། ཤོ་སྐྱམ་དུ་སློབ་དཔོན་ངུའི་སྤྱན་སྔར་ཕྱིན་ཙ་ན། རེ་བ་ཙམ་བཅོས་ནས་འདིས་མི་འོང་
ད་དུང་དྭགས་པོར་སོང་ལ་ཞུས་གསུངས། ཡང་དྭགས་པོར་བྱོན་ནས་ཞུས་པས། ཅིས་ཀྱང་འདོད་ན་གདམས་པ་ལ་ནན་ཏན་བྱེད་དགོས་པ་ཡིན་གསུངས་ནས་རྫོགས་པར་གནང་། དབྱར་དགུན་ཐོག་འགའ་སློབ་དཔོན་གྱི་དྲུང་དུ་བསྡད། ལོ་དྲུག་ཙམ་ལོན་ནས་ཕྲན་ཚེགས་རྣམས་ཀྱང་རྫོགས། གཞན་ལ་བྱིན་རླབ་མཛད་པའི་ལས་སློབ་ཀྱང་བྱས། ཐོད་པའི་སློབ་མ་རོག་པོ་དགའ་དང་། མ་ཇོ་བཟློ་བ་ལ་སོགས་པ་ལྔ་བཅུ་ཙམ་གྱིས་རྡོ་རྗེ་ཟམ་པ་ཞུས་པས་ཇོ་སྲས་ཀྱིས་ཤོད། ཁྱེད་ཚོས་ཉོན་གསུངས་ནས་སློབ་དཔོན་གྱི་ཁྲི་ཁ་ནས་གསུངས། དཔོན་སློབ་གཉིས་ལོ་ངོ་བཅོ་བརྒྱད་ཙམ་དུ་འགྲོགས། གདམས་ངག་གི་བཀའ་ཕོག་ནས་བརྒྱུད་འཛིན་དུ་བསྐོས་སོ།། དེ་ལྟར་འཛེང་དྷརྨ་བོ་དྷི་དང་། ཇོ་སྲས་འཛེང་ཆུང་སྨྱོན་པ་གཉི་གའི་སློབ་མ་སློབ་དཔོན་ཀུན་བཟང་ཡིན་ཏེ། དེ་ནི་ཁུ་བོ་ཕ་ཇོ་དབུས་པ་ཕག་མོ་གྲུ་པའི་སློབ་མ་སྒོམ་ཆེན་པོ་ཞིག་ཡིན། མ་ཟི་བཟའ་དེས་ཆོག་བྱ་བ་མ་ཇོ་སྨྱོན་མ་བསམ་འགྲུབ་བྱ་བ་ལ་ཆོས་ཐོས་པ་གཉིས་ཀ་ལ་རྨི་ལམ་གྱི་ལྟས་བཟང་པོ་དང་བཅས་ཏེ་འཁྲུངས། ལོ་བརྒྱད་དགུ་ལ་སློབ་དཔོན་ཀོར་སྟོན་རཱ་ཛ་ལས་སློབ་གཉེར་ཅུང་ཟད་བྱས། བཅོ་ལྔ་ལོན་པའི་ཚེ་ཁོང་གྲོངས་ནས་སློབ་དཔོན་ངུ་བའི་གམ་དུ་ལོ་ལྔ་ཙམ་ཞི་བྱེད་ཞུ་ཞིང་བསྡད་ནས་ཞབས་ཏོག་འགྲུབ་ཚད་བྱས། གསེར་ལུང་དགོན་པར་སློབ་དཔོན་ངུ་དང་འཇལ་བའི་ཚེ། བཅོ་ལྔའི་ཟླ་བའི་རུམ་ན་སྐར་མ་གཉིས་ཐིམ་པ་རྨིས། འཛེང་ཆེན་པོ་ལ་རྡོ་རྗེ་ཟམ་པ་ཚར་གཅིག་ཞུས། དེ་ནས་འཛེང་ཇོ་སྲས་སྤུང་རིང་དུ་སྤྱན་དྲངས་ནས་རྡོ་རྗེ་ཟམ་པ་ཚར་བདུན་ཞུས། དྭགས་པོར་དགུན་ཐོག་བཞི་ཕྱིན། རྡོ་རྗེ་ཟམ་པ་ཚར་ཕྱེད་པ་གཅིག་དང་བཅུ་བཞི་ཐོབ། ཇོ་སྲས་དང་ལོ་བརྒྱད་འགྲོགས་ནས་རྡོ་རྗེ་ཟམ་པ་ཚར་བདུན་ཞུས། ཕྱི་ནས་ཤོ་རུ་ཚར་གཉིས། གསེར་ལུང་དུ་ཚར་གཅིག །གཞན་ལ་གསུང་འཕྲོར་མཇལ་བ་དང་དྲིལ་བས་འཛེང་མེས་དབོན་གཉིས་ལ་རྡོ་རྗེ་ཟམ་པ་ཚར་སུམ་ཅུ་རྩ་ལྔ་ཐོབ། གཉིས་ཀའི་གདམས་པ་
བཀའ་བབས་ནས་གཞུང་བཤད་ཆེ་ཆུང་གཉིས་ཀྱང་མཛད་དོ། །འདི་ལ་སྲས་སྤྲུལ་སྐུ་འོད་འབར་སེང་གེ་བྱ་བ་བྱུང་། དེ་ནི་བློ་རྣོ་བ། ཤེས་རབ་ཕུན་སུམ་ཚོགས་པ་ཞིག་སྟེ། ལོ་བཅུ་བཞི་པ་ལ་རྡོ་རྗེ་ཟམ་པ་གསུངས། དེས་བརྒྱུད་འཛིན་ཇོ་མགོན་ལ་གནང་། དེས་བྱ་མེད་ཚུལ་རིན་ལ་གནང་ངོ་། །ཡང་འཛེང་གིས་ཡར་ཀླུངས་བཙན་ཐང་བ་ཉང་དྷརྨཱ་སིངྷ་ལ་རྡོ་རྗེ་ཟམ་པ་བཤད་པས་བྱིན་རླབ་ཞུགས། རྟོགས་པ་ཐོད་རྒལ་དུ་སྐྱེས། དུར་ཁྲོད་དགོན་པར་བཞུགས་ཏེ་འགྲོ་དོན་རྒྱ་ཆེན་པོ་མཛད། མཐར་དགུང་ལོ་དོན་བདུན་པ་ལ་གཤེགས། འདི་ནས་བརྒྱུད་པའི་གཞུང་བཤད་ཀྱང་ཡོད་དོ། །དེའི་སློབ་མ་བཛྲ་པཱ་ཎྀ། དེའི་སློབ་མ་བླ་མ་ལྷའོ། །ཡང་འཛེང་གིས་གསེར་ལུང་པ་ལ་བཤད། དེས་སློབ་དཔོན་རང་གྲོལ། དེས་སྲས་པོ་ཆོས་རིན་ལ་བཤད་དོ། །ཡང་འཛེང་གིས་ངུ་རྡོ་རྗེ་རྒྱལ་མཚན་ལ་བཤད། དེས་ངུ་སྟོན་དད་པ་བརྩོན་འགྲུས། དེའི་སློབ་མ་ཞིག་གིས་བྱས་པའི་གཞུང་བཤད་ཀྱང་ཡོད། ཡང་འཛེང་གིས་གཟིག་ཡེ་ཤེས་དབང་པོ། དེས་མཁན་པོ་ལ་ཁ་བ། དེས་སློབ་དཔོན་མགོན་སྐྱ་བ། དེས་སློབ་དཔོན་གོ་རི་བ། དེས་སོ་སྟོན་ལ་བཤད་དེ་སོ་སྟོན་གྱི་གཞུང་བཤད་ཀྱང་སྣང་ངོ་། །ཡང་འཛེང་གིས་སྤུང་རིང་པ་གཡག་སྟོན་ཟླ་བ་འོད་ཟེར། དེས་ཀློག་སྟོན་དགེ་འདུན་སྐྱབས། འདི་ནས་བརྒྱུད་པའི་གཞུང་བཤད་ཀྱང་ཡོད། ཡང་སྤུང་རིང་གཡག་སྟོན་གྱིས་ལོ་བརྒྱ་ལ་ཉེ་བ་ཐུབ། དེས་འོན་ནག་སྟོད་པ་གླ་རུ་བན་དེ་ལ་བཤད་ནས་ཀྱང་དར། ཡང་འཛེང་གིས་སྐྱེ་ཚེ་ཡེ་ཤེས་དབང་ཕྱུག་ལ་བཤད། དེས་གཟིག་ཡེ་ཤེས་དབང་པོ། དེས་མཁན་ཆེན་ངུར་པ། དེས་ངུ་སྟོན་བཛྲེ་ཤྭ་ར། དེས་མཁན་ཆེན་བསོད་ནམས་རྒྱལ་མཚན། དེས་མཁན་ཆེན་གཞོན་ནུ་ཤེས་རབ། དེས་སློབ་དཔོན་གཞོན་ནུ་གྲགས་པ། དེས་མཁན་ཆེན་སངས་རྒྱས་བཟང་པོ། དེས་བླ་མ་བརྩོན་འགྲུས་དབང་ཕྱུག །དེས་མཐའ་བཞི་གྲགས་པ་རིན་ཅེན། དེས་སློབ་དཔོན་ཤཱཀྱ་རྒྱལ་པོ། འདི་སྐུ་གཞོན་ནུའི་ཚེ་ཁྲབ་ལ་ཁར་རབ་ཏུ་བྱུང་། ལོ་དུས་ལ་བསྙེན་པར་རྫོགས།
མཛོད་དང་འདུལ་བ་ལ་བྱང་བས་སྐྱོར་ལུང་དུ་གྲྭ་སྐོར་མཛད། ཐུགས་དམ་འཕེལ་བར་བཞུགས་པ་ལ། སྐུ་ན་ཧ་ཅང་མཐོ་བས་སྤྱན་མི་གསལ་ཡང་། གཞན་གྱིས་སྤྱན་ཚབ་བྱས་ཏེ་རྗེས་སུ་བརྗོད་ནས་གསུང་བ་སོགས་ཐུགས་བསྐྱེད་ཤིན་ཏུ་ཆེ། དགུང་ལོ་བརྒྱར་ཉེ་བར་བཞུགས་ནས་གཤེགས་པའི་རྗེས་ཐུགས་ལས་རིང་བསྲེལ་ཟད་པ་མེད་པར་འབྱོན་པ་བྱུང་། འདིས་འགོས་ལོ་གཞོན་ནུ་དཔལ་ལ་གསུངས་པ་ཡིན་ནོ། །རྡོ་རྗེ་ཟམ་པའི་ལོ་རྒྱུས་བཤད་ཟིན་ཏོ།། །། གསུམ་པ་མན་ངག་སྡེའི་མཆོག་ཏུ་ཟབ་པ་སྙིང་ཐིག་གི་སྐོར་རྣམས་སློབ་དཔོན་ཆེན་པོ་བི་མ་ལ་མི་ཏྲ་དགུང་ལོ་ཉིས་བརྒྱར་ཉེ་བ་ན་བོད་དུ་རྒྱལ་པོས་བསྟན་པ་བཙུགས་པའི་སྐབས་སུ་གྱུར་ཅིང་། དེར་ཉང་ཏིང་འཛིན་བཟང་པོ་བྱ་བ་ཏིང་ངེ་འཛིན་ཐུན་གཅིག་གིས་ལོ་བདུན་དུ་མི་གཡོ་ཞིང་ཤའི་སྤྱན་གྱིས་གླིང་བཞི་ཅིག་ཅར་དུ་གཟིགས་པ་ཞིག་བཞུགས་པས་ལུང་བསྟན་ཅིང་བསྐུལ་བས་བཙན་པོས་ལོ་ཙཱ་སྐ་ཅོག་གཉིས་གསེར་གྱི་སྐྱེས་དང་བཅས་པ་སྤྱན་འདྲེན་དུ་བརྫངས་པས་གདུལ་བྱའི་དུས་ལ་བབ་པར་གཟིགས་ཏེ་བྱོན་པར་རྒྱ་གར་བས་ཕྲག་དོག་གིས་དབྱེན་བཅོས་པས་བོད་རྣམས་ཐེ་ཚོམ་པར་ངོ་མཚར་བའི་ཆོ་འཕྲུལ་གྱིས་དད་པར་མཛད། རྒྱུ་འབྲས་ཀྱི་ཆོས་སྤྱི་དང་། བྱེ་བྲག་གཡུ་སྒྲས་ལོ་ཙཱ་བྱས་ཏེ་སེམས་སྡེ་ཕྱི་འགྱུར་བཅུ་གསུམ་བསྒྱུར། ཤིན་ཏུ་ཟབ་པའི་མན་ངག་སྙིང་ཐིག་ནི་བཙན་པོ་དང་ཉང་ཏིང་འཛིན་བཟང་པོ་གཉིས་ལ་ལྐོག་ཏུ་གསུངས་པ་ལས་གཞན་སྣོད་དུ་རུང་བ་མ་གཟིགས་ནས་དཔེ་རྣམས་བོད་ཡིག་མཛད་ནས་མཆིམས་ཕུའི་དགེ་གོང་དུ་སྦས། སློབ་དཔོན་འདི་ལོ་བཅུ་གསུམ་བོད་དུ་བཞུགས་ནས་ཕྱིས་རྒྱ་ནག་རི་བོ་རྩེ་ལྔར་གཤེགས། ཐུབ་པའི་བསྟན་པ་ཇི་སྲིད་གནས་ཀྱི་བར་སྐུ་ལུས་དེ་ཉིད་ཀྱིས་བཞུགས་ཤིང་ལོ་བརྒྱད་བརྒྱ་ན་ལྗོངས་འདིར་སྤྲུལ་པ་རེ་བྱོན་ནས་སྙིང་ཐིག་གི་བསྟན་པ་གསལ་བར་མཛད་པར་ཞལ་གྱིས་བཞེས་སོ། །བི་མ་ལ་རྒྱ་ནག་ཏུ་གཤེགས་ནས་ལོ་ལྔ་བཅུ་རྩ་ལྔ་ནས་ཉང་ཏིང་འཛིན་བཟང་པོ་ཟག་པ་ཟད་པའི་ཕུང་པོར་གྱུར། རྡོ་རྗེ་
ལེགས་པས་ཁམས་སུ་སེར་བ་ཕབ་པའི་ནས་རྔ་མོའི་རྒྱབ་བརྒྱ་ཕུལ་བ་ལ་བརྟེན་ནས་དབུ་རུ་ཞྭའི་ལྷ་ཁང་བཞེངས། གདམས་པའི་དཔེ་རྣམས་དེ་ཉིད་ཀྱི་ཀེའུ་ཚང་རིམ་གསུམ་གྱི་སྒོའི་ཀ་བའི་ཁོང་དུ་སྦས། སྙན་བརྒྱུད་རྣམས་འབྲོ་རིན་ཆེན་འབར་བ་ལ་བཤད། དེ་ལྷ་ས་བྲག་ལྷའི་ཕུག་ཏུ་འཇའ་ལུས་སུ་ཡལ་ལོ། །ཉང་བན་ཆེན་པོ་འོད་དུ་དེངས་ནས་ལོ་བརྒྱད་ལོན་ཅིང་ཉང་མི་དར་མ་དང་དུས་མཚུང་པར་དབུ་རུ་གཞོལ་མ་དགེ་མཆོག་གི་བུ་གནས་བརྟན་ལྡང་མ་བ་ལྷུན་གྲུབ་རྒྱལ་མཚན་ཅེས་བྱ་བ། ངོ་བོ་བི་མ་ལའི་སྤྲུལ་པར་གྲགས་ཀྱང་རྣམ་པར་ཤེས་པ་ལྐོག་ཏུ་གྱུར་པ་རྣམས་ལ་གནས་བརྟན་དཀྱུས་མའི་ངང་ཚུལ་དུ་སྣང་བ་གཅིག་ལ་རྡོ་རྗེ་ལེགས་པས་ལུང་བསྟན་ནས་སྔར་སྦས་པའི་གཏེར་རྣམས་ཕྱུང་། དབས་བློ་གྲོས་ལ་ཚིག་རྒྱུད་ཀྱང་མཉན་ནས་ཆོས་ཉིད་ཡིད་དཔྱོད་དུ་མ་ལུས་པར་ཉམས་སུ་བླངས། མན་ངག་རྙེད་ནས་བཅོ་ལྔ་པ་ལ་བཤད། རྒྱུད་བཞག་པའི་སྣོད་འཚོལ་དུ་བྱོན་པ་ན། ཉང་སྟོད་ནས་ལྕེ་བཙུན་སེང་གེ་དབང་ཕྱུག་ཅེས་བྱ་བ་རྙེད། དེ་ལ་གདམས་པ་རིམ་པ་བདུན་དུ་བཏབ། དེ་དང་ཉེ་བར་ཁ་རག་སྒོམ་ཆུང་ལའང་བཏབ་པས་ཁོང་ཡང་དེས་གྲོལ། ལྕེ་བཙུན་ལ་དཔེ་རྣམས་དག་པར་བྲིས་ལ་ཁྲའི་ཟླ་བ་ལ་སྐྱོལ་ཅིག་གསུངས། ཕྱིས་ཞིག་ལྕེ་བཙུན་གྱིས་འབུལ་བ་ཤིན་ཏུ་མང་པོ་དང་བཅས་བྱོན་པས་སྙེ་ཐང་དུ་མལ་དྲོའི་ཉང་བཀའ་གདམས་པ་བྱ་བ་དང་འཕྲད། དེས་ལྡང་མ་གཤེགས་པའི་གཏམ་བཤད་པས། འབུལ་བ་རྣམས་གནས་གཞི་གཅིག་འདུག་པའི་དགེ་འདུན་རྣམས་ལ་ཕུལ། ཉང་བཀའ་གདམས་པ་ན་རེ། ལྡང་མ་དེ་གནས་བརྟན་ཡིན་པ་ཙམ་ལས་གང་ཟག་བཟང་པོར་སྔར་སུས་ཀྱང་མ་རིག །སྐུ་གཤེགས་པའི་དུས་ནམ་མཁའ་འཇས་ཁེངས། སྐུ་གདུང་དང་རིང་བསྲེལ་དཔག་ཏུ་མེད་པ་བྱོན་པས་ཐམས་ཅད་ངོ་མཚར་ཞིང་འགྱོད་པ་སྐྱེས་གདའ། ཁྱེད་ཀྱང་འབུལ་བ་འདི་ཙམ་འཁྱེར་ལུགས་ཀྱིས་གདམས་ངག་ཁྱད་པར་ཅན་ཡོད་མཆི་བས་བདག་ལ་སྩོལ་ཞིག་
ཞུས་པས་གདམས་པ་བྱིན། དེས་གཞོའི་ཏི་སྒྲོ་བྲག་ལ་ལོ་གཉིས་བསྒོམས་པས་ཕུང་པོ་ལྷག་མེད་དུ་སོང་བ་ཡིན་ནོ།། དེ་ལ་ལྕེ་བཙུན་ཆེན་པོ་ནི། ཡུལ་ཉང་རོ་གཉན་ཚོའི་ལྕེ་ཐུབ་པའི་དབང་པོ་ཞེས་བྱ་བའི་བུ་གཞོན་ནུ་ནས་ཆོས་མང་པོ་ལ་ཐོས་པའི་ཕ་རོལ་ཏུ་སོན་པ་ཞིག་ཡིན། གནས་བརྟན་ལྡང་མ་བ་དང་རི་གཟར་རྒོད་པོ་ལུང་དུ་མཇལ། ཁ་རག་ཏུ་གདམས་པ་གསུང་བའི་དུས་བཏབ་སྟེ་རྫོགས་པར་ཐོབ། སློབ་དཔོན་གཤེགས་ནས་གཏེར་དཔེ་རྙིང་པ་རྣམས་ལང་གྲོ་འཆད་པ་སྟག་འདྲའི་ཆུ་མིག་གི་རྩ་དང་། འུ་ཡུག་དང་། ཇལ་གྱི་ཕུ་སྟེ་གཏེར་ཁ་གསུམ་དུ་སྦས། འུ་ཡུག་ནས་ཤངས་མན་ཆོད་ཀྱི་རི་རྒྱུད་རྣམས་ལ་འཕོ་ཞིང་བསྒོམས་པའི་ཚེ། རྨི་ལམ་ན་ཨ་ཙ་ར་གཅིག་བྱུང་ནས། བདག་ནི་བི་མ་མི་ཏྲ་མཁས་པ་སྟེ། །སྐལ་ལྡན་སྙིང་པོའི་ཡང་བཅུད་དོན་འདོད་ན། །མཆིམས་ཕུ་བྲག་དམར་དགེ་གོང་ཡར་འདེབས་ལ། །གསང་བ་སྙིང་ཏིག་སྙིང་དང་འདྲ་བ་ཡོད། །དེ་དག་ཁྱེར་ལ་འུ་ཡུག་ཕྱི་གོང་དུ། །སུས་ཀྱང་མཐོང་བ་མེད་པ་ལོ་བདུན་སྒོམས། །ཟག་བཅས་ཕུང་པོ་སྣང་བ་མ་ཡིན་ནོ། །ཞེས་གསུང་བ་ཐོས་ནས་མཆིམས་ཕུར་བྱོན། བུད་མེད་དུང་སོ་འཁོར་མ་གཡུའི་སྨིན་མ་ཅན་ཞིག་གིས་དཔེ་རྣམས་བྱིན། སླར་འོ་ཡུག་ཕྱི་གོང་རྫའི་ར་བར་བཞུགས་པས་བི་མ་ལ་དངོས་སུ་བྱོན། ཟླ་བ་ཕྱེད་དུ་དབང་ཁྲིད་གདམས་པ་རྫོགས་པར་གནང་ནས་སློབ་དཔོན་བི་མ་ལ་རྒྱ་ནག་ཏུ་གཤེགས། དེ་ནས་ལྕེ་བཙུན་གྱིས་ལོ་བདུན་བསྒོམས་པས་ཕུང་པོ་ལྷག་མེད་གྲུབ། སྤྲུལ་པའི་སྐུ་ཞང་སྟོན་ལ་གདམས་ངག་རྫོགས་པར་བྱིན་ནས། ལོ་བརྒྱ་དང་ཉི་ཤུ་རྩ་ལྔ་ན་ནམ་མཁའ་ལ་འཇའ་འོད་ཀྱི་ཕུང་པོ་གཅིག་ཏུ་གཤེགས་སོ། །གཏེར་སྦས་པའི་ལོ་སུམ་ཅུ་ན་རོང་སྣར་མདའ་ལྕེ་སྒོམ་ནག་པོས་ཁ་ཤས་བཏོན་ནས་རང་ཉམས་སུ་ལོངས་ཤིག །གཞན་མང་པོ་ལའང་བཤད། དེ་བཞིན་དུ་ལང་གྲོ་འཆད་པ་ལྟག་ནས་ཤངས་པ་རས་པ་ཞེས་བྱ་བས་ཀྱང་བཏོན་ནས་དར་རྒྱས་
བྱུང་ཞེས་གྲགས། དེ་ལ་ཞང་སྟོན་ནི། ཡུལ་ཡར་འབྲོག་དོ་ནང་དུ་འཁྲུངས། མཚན་བཀྲ་ཤིས་རྡོ་རྗེ་ཞེས་བྱ་སྟེ། ལོ་བཅུ་གཅིག་པར་བླ་མ་ལྕེ་སྒོམ་ལ་གདམས་པ་མང་དུ་ཞུས། དེ་ནས་ཉི་ཤུ་རྩ་གཅིག་གི་བར་མཁས་གྲུབ་ཀྱི་བླ་མ་མང་དུ་བསྟེན་ནས། སྡེ་སྣོད་གསུམ་དང་། རྒྱུད་སྡེ་གསར་རྙིང་གི་ཕྱོགས་ཐམས་ཅད་ལ་སྦྱངས་པས་མཁྱེན་རབ་ཀྱི་པདྨོ་རྒྱས། ཉང་སྟོད་ཁུ་ཡུལ་ན་ཡོད་པའི་ཚེ། ནམ་མཁའ་ལས་བླ་མ་དང་། ཐུགས་རྗེ་ཆེན་པོ། སྒྲོལ་མ་ལ་སོགས་པའི་ཞལ་མཐོང་ཞིང་ལུང་བསྟན་ཐོབ། རྡོ་རྗེ་ལེགས་པ་མི་དཀར་ཞྭ་དཀར་ཅན་དུ་བྱས་པས་དངོས་གྲུབ་བྱིན་གྱིས་འདོང་ཟེར་ནས་ཁྲིད། ཉང་སྨད་པ་ཚབ་ཏུ་ལྷ་གསོལ་བ་མང་པོས་བཟའ་བཏུང་བྱིན་པ་དངོས་གྲུབ་དེ་ལ་ཟེར་རམ་སྙམ་ཙ་ན། མི་དཀར་དེས་དངོས་གྲུབ་གཞན་དུ་ཡོད་ཀྱི་འདོང་ཟེར་འོད་ཀྱི་ལམ་སྣ་བྱས་ནས་བྱོན། ཁང་སྟོང་གཅིག་ཏུ་ཉལ་བས་འདིར་མི་རུང་ཟེར། བྲག་ཕུག་ཅིག་ཏུ་བྱོན་ཙ་ན་ཁང་སྟོང་འགྱེལ། ཁོའི་སྤྲུལ་པས་བཟའ་བཏུང་ཡང་བྱིན། འོ་ཡུག་མདའ་ན་འཁྲུག་པ་ཆེན་པོ་ཡོད་པ་ཡང་རྡོ་རྗེ་ལེགས་པས་བསྒྲིབས་ནས་དམག་གིས་མ་མཐོང་། དེར་བྲག་སེང་གེ་འདྲ་བའི་རྩེར་སླེབ་ཙ་ན་ཁོ་སྟོར། ཕྱིར་ལོག་གོ་སྙམ་ན་ཡང་མ་ཐར། ཆ་མ་ཕྱེད་པའི་ངང་ལས་བལྟས་ཙ་ན་བྲག་ཕུག་ཁ་བྱང་བསྟན་གྱི་སྒོ་རྩྭས་འགགས་པ་མཐོང་། དེ་བྲུས་པས་དང་པོར་སྦྲུལ་དང་སྦལ་པ་ཤིག་ཤིག་སྣང་། དེ་ནས་ཁ་བྱང་རྙེད་དུས་མི་དཀར་དེས་སྒྲོན་མེ་བཏེགས་བྱུང་པས། དར་ཅིག་ན་གདངས་དང་སྐད་ཤིན་ཏུ་མི་སྲུན་པ་ཞིག་བྱུང་། ཁོས་བརྡའ་སྦྱར་བས། ངས་ཨ་ཅེ་བོས་ཀྱི་ཟེར་བའི་མོད། ཨེ་ཀ་ཙ་ཊི་སྤྱན་གཅིག་ཁྲག་ཏུ་ཁོལ་བ། མཆེ་བ་གཙིགས་ཤིང་བལྟར་མི་བཟོད་པ་ཙམ་དུ་བྱུང་། ཁོས་འདི་ནི་ལུང་བསྟན་པ་དེའོ་བྱས་པས། ཚོགས་འཁོར་བརྒྱ་རྩ་བརྒྱད་ཐོང་། ལོ་གསུམ་དུ་སུ་ལའང་མ་བཤད་ཟེར། བྲག་ཕུག་གི་སྒོ་རྩ་ནས་གཡུ་གཉིས་རྙེད་པ་ལས་རྒྱུ་བྱས། ཚོགས་འཁོར་བརྒྱ་རྩ་བརྒྱད་བཏང་། ལོ་ཉི་ཤུ་རྩ་ལྔ་ལ་དབུས་སུ་བྱོན། མཆིམས་
ཕུ་ནས་བི་མ་ལའི་ཆོས་གཏེར་ཡང་ཐོན། དངོས་དང་ཞལ་མཇལ་ནས་རྗེས་གནང་ཐོབ། སླར་ཤང་རྟ་ནག་ཏུ་བྱོན་པའི་ཟམ་ཁར་ལྕེ་བཙུན་ཆེན་པོ་དང་མཇལ། གསང་བ་སྙིང་ཐིག་གི་གདམས་པ་རྫོགས་པར་ཐོབ། སྐུ་ན་མཐོན་པོར་སོང་ནས་བརྒྱུད་འཛིན་གྱི་སླད་དུ་སྲས་ཉི་འབུམ་བསྐྲུན། ངས་ཚོགས་པ་མ་བསྐྱངས་ན་ཕུང་པོ་ལྷག་མེད་འོང་བ་ཡིན་གསུངས། ལུས་ཤིན་ཏུ་སྦྱངས་པ་བྱང་ཆུབ་ཀྱི་ཡན་ལག་ལ་དབང་ཐོབ་པས་རེས་འགའ་རྒྱལ་བ་རིགས་ལྔར་གསལ། སྐུ་ལུས་ལ་གྲིབ་མ་གཏན་མི་མངའ། རྫོགས་པ་ཆེན་པོའི་ཆོས་གསུང་དུས་འཇའ་གུར་འཁྱིལ་པ་སོགས་ངོ་མཚར་གྱི་ལྟས་མང་པོ་ཡོང་། དགུང་ལོ་བདུན་ཅུ་དོན་གཅིག་པ་མེ་ཕོ་ཕག་གི་ལོ་ས་ག་ཟླ་བའི་ཉེར་གཉིས་ལ་ཤར་ཕྱོགས་ཀྱི་ནམ་མཁའ་ལས་སྒྲ་ཆེན་པོ་ལན་བདུན་གྲགས་ཤིང་། ས་ཆེན་པོ་འདི་ལན་གསུམ་གཡོས། འཇའ་དང་། འོད་དང་། སིལ་སྙན་གྱི་སྒྲ་དང་། དྲི་ཞིམ་གྱི་ངད་ལ་སོགས་པ་གདོད་མའི་ས་ལ་མངོན་པར་བྱང་ཆུབ་པའི་རྟགས་མ་ལུས་པ་བསྟན་ཏེ་གཤེགས་སོ། །དེའི་ཕྱི་ནུབ་པུར་སྦྱངས་པས་གདུང་ཆེན་ལྔ་དང་། རིང་བསྲེལ་ཁ་དོག་ལྔ་པ་སྐུ་ལྔའི་རྒྱལ་ཚབ་དུ་བཞག །མེ་ཏོག་གི་ཆར་དང་འཇའི་གུར་ལ་སོགས་པས་འགྲོ་བ་མང་པོ་དད་པའི་གནས་ལ་སྦྱར་ཞིང་རང་བཞིན་གྱིས་བསྟན་ལ་གནས་པ་བྱུང་ངོ་།། དེའི་སློབ་མ་སྲས་ཉི་འབུམ་སྟེ། ཡུམ་རྒྱལ་མོ་གཡང་དེའི་ལྷུམས་སུ་ཞུགས་པའི་དུས་ཉི་མ་མང་པོ་དུས་གཅིག་ལ་ཤར་བ་བྱུང་བས་ཡབ་ཀྱིས་སེམས་ཅན་གྱི་མ་རིག་པའི་མུན་པ་བསལ་བར་ལུང་བསྟན་ནས་ཉི་མ་འབུམ་དུ་བཏགས། ལོ་ལྔ་ནས་རིམ་པར་ཡབ་ལས་གསང་བ་སྙིང་ཏིག་གི་དབང་ཁྲིད་གདམས་པ་ཉམས་འོག་ཏུ་ཆུད་པར་མཛད། དགུང་ལོ་བཅུ་པ་ལ་ཆེ་སར་བཏོན་དུས་རྒྱུད་བཅུ་བདུན་ལ་བཤད་པ་མཛད་པས་བུ་སློབ་ཀུན་ངོ་མཚར་སྐྱེ་བ་བྱུང་། ལོ་ཉི་ཤུའི་བར་དུ་བསྒྲུབ་པ་ཁོ་ན་ལ་ནན་ཏན་མཛད། དེ་ནས་རྗེས་ཐོབ་སྒྱུ་མ་ལྟ་བུའི་ཏིང་འཛིན་དང་འགྲོགས་ནས་རྔོག་རྒྱལ་རྩེའི་སར་གསར་མའི་རྒྱུད་མན་ངག་དང་བཅས་པ་ལ་གསན་པ་མཛད། ཉི་ཤུ་རྩ་
གཉིས་པ་ལ་ཇོ་མོ་རྒྱ་གར་དངོས་གྲུབ་ཀྱི་རྟེན་དུ་བཟུང་། ཉི་ཤུ་རྩ་བདུན་ལ་འཁོན་གྲགས་པ་རྒྱལ་མཚན་དང་། བླ་མ་སྟག་སོ་བ་བསྟེན་ནས་རྒྱུད་གསུམ་གདམས་ངག་དང་བཅས་པ་དང་། བདེ་མཆོག་མལ་གྱོ་ལུགས་མཁྱེན་པར་མཛད། ཁ་རག་གི་འབྲུག་སྟོན་གྲགས་པ་ལ་བདེ་མཆོག་དང་། རྗེ་བཙུན་མ་རྭ་ལུགས། ཡེ་ཤེས་མགོན་པོ་སོགས་ཞུས། ཞང་གཡུ་བྲག་པ་དང་གཞུང་གི་རྔོག་རྡོ་རྗེ་སེང་གེ་ལ་སོགས་ཏེ་མཁས་གྲུབ་ཀྱི་བླ་མ་མང་པོ་བསྟེན་ནས་མདོ་རྒྱུད་དུ་མ་ལ་ཐོས་བསམ་ཕྱོགས་མེད་མཛད། ཚིག་དོན་ཆེན་མོ་ཞེས་བྱ་བའི་བསྟན་བཅོས་ཀྱང་མཛད་དེ་དགུང་ལོ་ལྔ་བཅུ་རྩ་དྲུག་ལ་གཤེགས། པུར་སྦྱངས་པས་གདུང་རིགས་ལྔ་བྱོན། འཇའ་ཚོན་གྱི་གུར་ཕུབ། ཆོ་འཕྲུལ་ཟླ་བ་ལ་ཁུག་ཆོས་མེ་ཏོག་སྐྱེས་པ་སོགས་བྱུང་ངོ་། །འདི་སྒྲ་ཐལ་འགྱུར་ནས་ཕྱག་རྡོར་གྱི་སྤྲུལ་པ་བཛྲ་ཕ་ལར་ལུང་བསྟན་པ་ལ་ངོས་འཛིན་པར་གྲགས་སོ།། དེའི་སློབ་མ་གུ་རུ་ཇོ་འབེར་ནི་གཅུང་པོ་ཟླ་བ་འབུམ་གྱི་སྲས་ཡིན། ལོ་བདུན་མན་ཆོད་ལྐུགས་པ་འདྲ་བར་ཡོད་པ་ལ་བརྒྱད་ནས་ཤེས་རབ་མེ་ལྟར་འབར། བཅོ་བརྒྱད་ཀྱི་བར་དུ་ཁུ་བོ་ཉི་འབུམ་དང་འགྲོགས། གསང་བ་བླ་མེད་ཀྱི་དབང་ཁྲིད་གདམས་པ་དང་བཅས་རྫོགས་པར་མཛད་ཅིང་། རྒྱུད་ཀྱི་བཤད་པ་ལ་ཐོས་པས་སྒྲོ་འདོགས་གཅོད་པ་དང་། མན་ངག་གི་དོན་ལ་བསྒོམས་པས་ཉམས་སུ་བླངས་པ་ལ་བརྩོན། བཅུ་དགུ་ནས་ཉི་ཤུའི་བར་ས་སྐྱ་ལོ་ཙཱ་བ་ལ་རྒྱུད་གསུམ་མན་ངག་དང་བཅས་པ་དང་། བདེ་མཆོག་མལ་གྱོ་ལུགས་ཉན། དབུ་ཚད་ལ་སོགས་པའི་རིག་པའང་ཁོང་དུ་ཆུད་པར་བྱས། དེ་བཞིན་དུ་ཁྲོ་ཕུ་ལོ་ཙཱ་བ་ལ་མི་ཏྲ་ཛོ་ཀིའི་གདམས་པ་དང་། ཆུ་མིག་པ་ལ་ཚད་མ་བསྡུས་པ། བལ་པོ་གྲགས་འབུམ་ལ་དོ་ཧ་དང་ཕྱག་ཆེན་ཁ་འཐོར་སོགས་མཁས་གྲུབ་དུ་མ་ལ་སྡེ་སྣོད་དང་རྒྱུད་ལུང་མང་པོ་ལོ་སུམ་ཅུ་རྩ་དྲུག་ཚུན་མཉན་པས་རིག་པ་རྣོ་ཞིང་ཐོས་པ་ཤིན་ཏུ་མང་བར་གྲགས། བསྒྲུབ་པ་མཛད་རེས་ཡི་དམ་གྱི་ལྷ་ཞལ་མཐོང་བ་ཡིན་ཏེ་ཐུགས་སྒམ་པས་མི་གསུང་། ལྷ་སར་ཇོ་བོ་ལ་མཆོད་
པ་ཕུལ་དུས་འོད་ཀྱི་ཐིག་ལེའི་ཁོང་ནས་འཕགས་པ་ལག་ན་པདྨ་དང་། རྡོ་རྗེ་འཛིན་པ་ཞལ་གཟིགས། ཐོ་རེངས་ཞིག་ཚེ་དཔག་མེད་ཀྱི་ཞལ་མཐོང་བས། ངེད་ཅག་ལ་ཚེ་རིང་རྒྱུད་མེད་ཀྱང་ཁོ་བོ་ལེགས་པར་བྱུང་བ་དེའི་བྱིན་བརླབས་ཡིན་གསུངས། དེ་ལྟར་ཚད་མེད་པའི་མཁྱེན་རབ་དང་ཐུགས་རྗེའི་མངའ་བདག་གིས་འགྲོ་བ་འདྲེན་པའི་དེད་དཔོན་དུ་གྱུར་ནས་དྲུག་ཅུ་པ་ལ་གཤེགས། ཞག་བདུན་དུ་འཇའི་དྲ་བས་འདྲེལ། སྐུ་གདུང་ལ་ཨོཾ་ཨཱཿཧཱུཾ་དང་རིང་བསྲེལ་མང་པོ་བྱོན་ཏོ། །དེའི་སློབ་མ་འཁྲུལ་ཞིག་སེང་གེ་རྒྱབ་པ་ཡིན་ཏེ། གཡོ་རུ་གྲའི་ཕུ་སོ་གད་ཕྲེང་གི་གྲོང་དུ་ཉི་མ་རྩེ་ཤར་ལ་འཇའི་གུར་ཕུབ་ཅིང་འཁྲུངས། ལོ་དགུ་ནས་རིགས་སད་དེ་དག་སྣང་དང་མོས་གུས་དཔག་མེད་ཤར། བཅུ་པའི་ཚེ་སྣང་བ་འདི་རྨི་ལམ་ལྟ་བུ་སྒྱུ་མ་ལྟ་བུ་ལ་སྲ་ཞིང་འཐས་འཐས་འདྲ་བ་མི་བདེན་སྙམ་པ་དང་། བཅུ་གཉིས་པ་ལ་འཁོར་བ་ལ་སྐྱོ་བ་ཚད་མེད་པར་སྐྱེས་ནས་ཆོས་འབའ་ཞིག་ལས་གང་གིས་ཀྱང་མི་ཕན་པར་ངེས་ཤེས་རྙེད། བཅུ་གསུམ་གྱི་ཐོ་རངས་ཉི་ཟླ་དུས་གཅིག་ལ་ཤར་བའི་རྨི་ལམ་སད་དུས། འཕགས་པ་ཐུགས་རྗེ་ཆེན་པོའི་ཞལ་མཐོང་། ཚེ་གཅིག་གིས་གྲོལ་པ་སྙིང་ཏིག་གི་དོན་སྒོམས་ཤིག་གསུངས། དེ་ནས་བཟུང་སྙིང་རྗེ་ཕྱོགས་མེད་དུ་རྒྱས། འགྲོ་བ་ཀུན་ལ་བུ་གཅིག་པའི་འདུ་ཤེས་ཤར། རྐྱེན་རེ་ལ་བརྟེན་ནས་གཞན་ལ་མཐོ་འགྲོགས་དང་ཁྱད་གསོད་མི་བྱེད་པའི་དམ་བཅའ་བྱས། ལུས་ཀྱི་སྲིན་བུ་དག་སྙིང་རྗེ་ཆེན་པོས་མི་འདོར་ཞིང་། ལོང་སྤྲང་དང་དམན་པ་ཁོ་ན་ལ་བྱམས་པ་སོགས་ཐེག་པ་ཆེན་པོའི་རིགས་སད་པའི་རྟགས་ཁྱད་པར་ཅན་མངའ། བཅོ་བརྒྱད་ལ་སྣང་བ་བདེན་མེད་དུ་རྟོགས་པས་སྨྱོན་པ་ཁྲོག་ལངས་པ་ལྟ་བུར་སོང་སྟེ། ཕ་མས་ལྷ་གསོལ་བའི་ཡོ་བྱད་བསགས་པ་གཏོར་ཞིང་། ཕོ་གདོན་རྒྱལ་པོ་མཆོད། མོ་གདོན་བསེན་མོ་མཆོད། ཅེས་བྱས་པས། ཁྱོད་འདྲ་བའི་བུ་སྐྱེ་བ་ཟེར་འཐབས། ཉི་ཤུ་ལ་མཁན་པོ་ལྡེའུ་སྒང་པ་དང་། སློབ་དཔོན་བཀྲས་སྒངས་པ་ལས་རབ་ཏུ་བྱུང་། ཉི་ཤུ་རྩ་ལྔ་ལོན་ཚེ་སྲི་ཞལ་གྱི་
སེང་གེ་རྒྱབ་ཏུ་བྱོན། སེང་གེ་རྒྱབ་པ་བར་པ་ལ་ཚལ་པའི་ཆོས་སྐོར། བླ་མ་ཙ་རི་བ་ལས་སེང་གེ་མཇིང་བསྣོལ། རས་པ་དྲི་མེད་འོད། ལྷ་རི་དཔལ། གཞོན་ནུ་འབུམ། སྟོན་འཆར་བྱང་ཡོན། ཇོ་སྲས་སུ་གྲགས་པ་རྣམས་ལ། གསང་སྔགས་གསར་རྙིང་ཞི་བྱེད། གཅོད་ཡུལ། ཕྱག་ཆེན་མང་དུ་ཉན། ཁྱད་པར་ཐུགས་རྗེ་ཆེན་པོས་ལུང་བསྟན་བཞིན་གུ་རུ་ཇོ་འབེར་ལས་རྫོགས་པ་ཆེན་པོ་ཐོས་པས་རྟོགས་པ་ཐོད་རྒལ་དུ་སྐྱེས། ཁྲོ་བོ་མ་ལ་སོགས་པའི་རི་ཁྲོད་དང་ལུང་སྟོང་རྣམས་སུ་ལོ་མང་པོའི་བར་དུ་སྒྲུབ་པ་ཁོ་ན་ལ་གཞོལ་བས་དགོངས་པ་ཀ་དག་གི་སར་གཤེགས། སྐལ་ལྡན་མང་པོ་སྨིན་གྲོལ་ལ་བཀོད་ནས། དྲུག་ཅུ་རྩ་བཞི་པ་ལ་ཐེག་པ་མཆོག་གི་འབྲས་བུ་ཐོབ་པའི་རྟགས་ཁྱད་པར་བ་རྣམས་མངོན་དུ་བསྟན་ནས་གཤེགས་སོ།། དེའི་སློབ་མ་གྲུབ་ཆེན་མེ་ལོང་རྡོ་རྗེ་ནི། སྒྲགས་ཀྱི་ཕུར་རྣལ་འབྱོར་པ་བསམ་ཡས་ཀྱི་སྲས་སུ་བཙས། ལོ་དགུ་ན་གྲུབ་ཐོབ་ཟ་ལུང་པ་དང་། མཁན་པོ་སེ་ལུང་པ་ལས་རབ་ཏུ་བྱུང་། དེ་དུས་གཤིན་པོའི་དགེ་རྩར་ཡུམ་རྒྱས་འབྲིང་བསྡུས་གསུམ་ཁོ་ན་སྒྲོགས་པས་ལོ་བཅུ་དྲུག་གི་དུས་སྒྲགས་ཀྱི་ཕུའི་ཞོགས་སྟེང་བྱ་བར་བརྒྱད་སྟོང་བརྒྱ་རྩ་མཛད་པས་གནས་ལུགས་ཀྱི་དོན་རྟོགས། ཟངས་མཚོར་བསྒོམས་པས་ཉམས་འབར་ཞིང་མངོན་ཤེས་ཕྲ་མོའང་ཤར། དེ་ནས་ཕྱོགས་མེད་དུ་འགྲིམས་ཏེ། མཚུར་ཕུའི་ངོ་བོ་རས་པ་སོགས་བླ་མ་མང་པོ་བསྟེན། ཤ་འུག་ལྟག་སྒོ་དང་། མཁར་ཆུ་ལ་སོགས་པའི་གནས་ཆེན་མང་པོར་བྱོན། ནས་དྲེ་གང་གིས་ཟླ་བ་གཅིག་དང་ཞག་ཉི་ཤུའི་འཚོ་བ་བྱས་པ་སོགས་དཀའ་ཐུབ་ལ་ཤིན་ཏུ་བཟོད་པ་གཅིག་ཡིན། དཀའ་བ་སྤྱད་པའང་བསམ་གྱིས་མི་ཁྱབ། ལོ་བཅོ་བརྒྱད་པའི་ཚེ་སེང་གེ་རྒྱབ་པ་སངས་རྒྱས་དཔོན་པོ་མཇལ་ནས་མན་ངག་སྙིང་ཏིག་ཐོབ། ད་མན་ངག་གིས་འཚེངས་བསམས་པའི་སྤོབ་པ་སྐྱེས་ཏེ་བསྒོམས་པས་སྔོན་འགྲོའི་དུས་རང་ནས་ཞག་དྲུག་ཏུ་རྡོ་རྗེ་སེམས་དཔའི་ཞལ་ཉིན་མཚན་མེད་པར་མཐོང་། དངོས་གཞིའི་དུས་བརྒྱུད་པའི་བླ་མ་རྣམས་རྨི་ལམ་དུ་མཇལ་ནས་བྱིན་གྱིས་བརླབས། ཉི་ཤུ་རྩ་གསུམ་པར་སངས་
རྒྱས་རས་པ་ལ་རྡོ་རྗེ་ཕག་མོ་ལ་སོགས་པའི་གཏེར་ཆོས་དུ་མ་གསན་ནས་བསྒྲུབས་པས། རྡོ་རྗེ་ཕག་མོ་མངོན་སུམ་དུ་མཇལ། བྲག་ལ་གསང་རྡོར་བསྣུན་པས་ཐིམ་གྱིས་སོང་། རྟ་མགྲིན། སྒྲོལ་མ། སྤྱན་རས་གཟིགས། སློབ་དཔོན་ཆེན་པོ། ཀུན་ཏུ་བཟང་པོ། རྡོ་རྗེ་སེམས་དཔའ། བི་མ་ལ། ཟ་ལུང་པ། སངས་རྒྱས་རས་པ། འགྲོ་མགོན་ཕག་གྲུ་རྣམས་ཞལ་གཟིགས། དུང་ལུང་དུ་མཁའ་འགྲོའི་སྒྲ་ཤིན་ཏུ་སྙན་པས་སྐྱེ་རྒྱུན་ཆོད་པའི་ལུང་བསྟན། ཀ་བ་ཅན་དུ་ཕག་མོ་དམར་མོ། གྲུབ་ཐོབ་ཟ་ལུང་པ་ནམ་མཁའི་ཀློང་དུ་མཇལ། ངར་ཆུང་ན་བཞུགས་པའི་ཚེ་རྨི་ལམ་ན་ཕག་མོ་གཙོ་འཁོར་ལྔ་མཐོང་། དེར་མནལ་སད་ཙ་ནས། འོད་ཀྱི་ཕག་མོ་དངོས་སུ་གཟིགས། སྐྱབས་གནས་རྫོང་དུ་རྡོ་རྗེ་སེམས་དཔས་རྨི་ལམ་དུ་རྫོགས་པ་ཆེན་པོའི་དབང་བསྐུར་སྤྱིར་བླ་མ་མང་པོ་བསྟེན་ཅིང་ཁྱད་འཕགས་ཀྱི་བླ་མ་བཅུ་གསུམ་བཞུགས། བཀའ་དྲིན་འགྲན་ཟླ་བྲལ་བ་གྲུབ་ཐོབ་ཟ་ལུང་པ། མཚུར་ཕུའི་ངོ་བོ་རས་པ། འཁྲུལ་ཞིག་སེང་གེ་རྒྱབ་པ་གསུམ་ལས་སྙིང་པོའི་དོན་རྙེད་པ་ཡིན། འདི་བརྟུལ་ཞུགས་ཤིན་ཏུ་ཆེ་བས་ཞིག་པོའི་སྤྱོད་པ་བླང་དོར་མེད་པས་གསང་བ་སྔགས་ཀྱི་དམ་ཚིག་ལ་སྒྲ་ཇི་བཞིན་པར་སྤྱོད་ནུས། རྒོད་ཕྲུག་ནམ་མཁའ་ལ་ལྡིང་བ་མཐོང་བས་རིག་པ་བརྟུལ་ཞུགས་ཀྱི་ངར་ཐོགས་ནས་ནམ་མཁའི་ལམ་ལ་འགྲོ་བ་དང་། བྲག་ལ་འདམ་ལྟར་བྱེད་པ་བྱུང་། མཁན་པ་ལྗོངས་དང་། མཁན་པ་གླིང་དང་། སེང་གེ་རྫོང་དང་། མཁར་ཆུ་རྣམས་སུ་སྒྲུབ་པའི་རྒྱལ་མཚན་བཙུགས་ཤིང་འགྲོ་དོན་མཛད། ཚེ་ཚད་སུམ་ཅུ་རྩ་བདུན་ཡིན་པ་ལ། སློབ་དཔོན་ཀུན་དགའ་ཞེས་པའི་སྐལ་ལྡན་ཞིག་གིས་གསོལ་བ་ཐེབས་པས། དགུང་ལོ་དྲུག་ཅུ་རྩ་གཅིག་པ་ལ་དུར་ཁྲོད་ལ་བར་གཤེགས་པའི་ཚེ་འོད་ཆེན་པོ་སྒྲ་དང་བཅས་པ་ནུབ་ཕྱོགས་སུ་ཡལ་བ་ཀུན་གྱིས་མཐོང་། པུར་གྱི་རྣམ་པ་སྦྱང་དུས། ནམ་མཁའི་ལམ་ནས་པུར་ཁང་ལ་འོད་ལྔའི་སྣམ་བུ་བརྐྱང་བ་སོགས་ངོ་མཚར་བའི་ལྟས་དཔག་ཏུ་མེད་པ་བྱུང་ཞིང་། སྐུ་ལྔ་ཐོབ་པའི་
རྟགས་ཀྱི་གདུང་ཡང་རྒྱུད་ལས་ཇི་སྐད་བཤད་པ་བཞིན་བྱོན་ཏོ། །འདི་གྲུབ་ཐོབ་ཨོ་རྒྱན་པ་དང་དུས་མཚུངས། ཨུ་རྒྱན་པ་བཅུ་ཕྲག་ལྷག་བཅས་ཀྱིས་བགྲེས་ལ་སྐུ་ཚེ་ཡང་རིང་ངོ་།། མེ་ལོང་པའི་སློབ་མ་ནི་རིག་འཛིན་ཀུ་མཱ་རཱ་ཛ་སྟེ། གཡོ་རུ་འོན་པར་གསར་རྫིང་ཁ་ཅེས་བྱ་བའི་གྲོང་རྡལ་དུ་འཁྲུངས། ཐར་པ་རྒྱན་དུ་བཏགས། ཆུང་ངུ་ནས་དད་པ་དང་སྙིང་རྗེ་དང་ཤེས་རབ་ལ་སོགས་ཏེ་འཕགས་པའི་ནོར་གྱི་ཁྱད་ཆོས་མང་པོ་མངའ་བས་ཀློག་ཡིག་མ་བསླབས་པར་མཁྱེན། ལོ་བདུན་པ་ལ་ཀོང་པོ་འོར་ཤོད་མཐོ་སྟེངས་དགོན་པའི་བླ་མ་དགྱེས་རྡོར་བ་ལས། ཀྱཻ་རྡོ་རྗེ་དང་བདེ་མཆོག་གི་དབང་ཞུས། ལོ་དགུ་པའི་ཚེ་མཁན་པོ་གཙང་པ་ལས་ཡོངས་རྫོགས་ཀྱི་དགེ་བསྙེན་བླངས། སྤྱན་རས་གཟིགས་འཁོར་བ་དོང་སྤྲུགས་ཀྱི་ཆོས་སྐོར་ལ་སྦྱངས། བཅུ་གཉིས་པ་ལ་ཕག་མོ་གྲུའི་མཁན་པོ་ཡེར་བ་པ་དང་སློབ་དཔོན་མངའ་རིས་པ་ལས་རབ་ཏུ་བྱུང་། མཚན་གཞོན་ནུ་རྒྱལ་པོར་བཏགས། འདུལ་བ་བསླབས། རིན་པོ་ཆེ་གྲགས་ཡེ་བ་ལ་ལོ་ལྔའི་བར་དུ་ནཱ་རོ་ཆོས་དྲུག་ལ་སོགས་པ་དང་། མཚར་སྟེངས་པ་ལ་བརྟག་གཉིས་ཉན། དཔོན་སངས་ཤེ་ལ་བཟོ་རིག་པ་བསླབས། ཡི་གེ་དྲུག་པ་བཟླས་པས་ཤེལ་གྱི་ཁང་བུ་གཅིག་ན་ཐུགས་རྗེ་ཆེན་པོ་ཞལ་འཛུམ་པ་མཐོང་། ཁྱུང་ནག་ཤག་དར་ལ་རྙིང་མའི་རྒྱུད་ལུང་མན་ངག་མང་དུ་ཞུས། ངང་ཕུག་ཏུ་མེ་ལོང་རྡོ་རྗེ་དང་མཇལ། ཕྱག་རྒྱ་ཆེན་པོའི་ཁྲིད་ཞུས་པས་སེམས་ཅར་མཐོང་དུ་ངོ་འཕྲོད། དེ་ནས་གྲུབ་ཆེན་པ་མོན་གྱི་མཁའ་འགྲོ་གླིང་ལ་གཤེགས་པའི་ཕྱགས་ཕྱིར་བྱོན། རྡོ་རྗེ་ཕག་མོའི་ཆོས་སྐོར་སོགས་ཞུས་ནས་བསྙེན་པ་མཛད་པས། ཚེས་བཅུའི་ནུབ་ཅིག་ཨུ་རྒྱན་པདྨ་དང་མཇལ། ཨེ་མ་རིགས་ཀྱི་བུ། རྟག་ཏུ་ཆོས་གྱིས་ཤིག་གསུངས། དེ་ནས་མཚུར་ཕུར་བྱོན་ནས་གཉན་རས་དང་། དར་མ་མགོན་པོ་ལ་ཀརྨ་པའི་ཆོས་སྐོར་རྣམས་ཞུས། དེ་ནས་ལ་སྟོད་དིང་རི་དང་། སྦུ་ཏྲར་བྱོན་པས། གྲུབ་ཆེན་ཨུ་རྒྱན་པ་དང་། རྗེ་ཀརྨ་པ་རང་བྱུང་རྡོ་རྗེ་དགུང་ལོ་བདུན་པ་རབ་ཏུ་བྱུང་མ་ཐག་པ་དང་
མཇལ། ཨུ་རྒྱན་པ་ལས་གདམས་པ་མང་དུ་ནོད། དེ་ནས་ལོ་འགའ་ན་ཨོ་རྒྱན་པས་གཉན་རས་ལ་སྙིང་ཏིག་ཞུས་པའི་ཟླ་ལ་ཚང་བར་ཐོབ། རྒྱ་སྨན་པ་ནམ་མཁའ་རྡོ་རྗེ་ལས་གསང་སྐོར་གནད་ཀྱི་ངོ་སྤྲོད་དང་། སྐལ་ལྡན་པ་ཆོས་ཀྱི་སེང་གེ་ལས་གསང་བ་གནད་ཀྱི་མེ་ལོང་སོགས་རྫོགས་ཆེན་གསང་བའི་སྐོར་ཞུས། སླར་མཁར་ཆུར་གྲུབ་ཆེན་མེ་ལོང་རྡོ་རྗེར་གསང་བ་སྙིང་ཏིག་དབང་ཁྲིད་གདམས་པ་དང་བཅས་པ་ལེགས་པར་ཐོབ། འབུལ་རྒྱུ་གཞན་མེད་པས་ལུས་ངག་གི་ཞབས་ཏོག་དང་། དབྱར་རིལ་པོ་གཉིས་སུ་རི་མོ་མཛད། ནས་ཁལ་བཞི་བཞི་གནང་བའི་གཉིས་གཉིས་ཀྱིས་ཤོག་བུ་ཉོས། མཚན་མོ་དཔེ་རྣམས་བྲིས། ཕྱེད་པོས་མར་མེ་དང་གསོལ་བ་མཛད་པས། དཀའ་ཐུབ་ཀྱི་མཐུས་ཤིག་ནད་དྲག་པོ་ཞིག་བྱུང་། ཐུགས་དམ་ཡང་ཁྱད་པར་ཅན་འཁྲུངས། བླ་མ་མཉེས་ནས་འགྲོ་དོན་གྱིས་ཤིག་པའི་རྗེས་སུ་གནང་བ་ཐོབ། དབང་གྲལ་དུ་བླ་མའི་དབུའི་བར་སྣང་ལ་མགོན་པོ་ཕྱག་བཞི་པ་དང་། སྒོའི་ཐད་ན་ཨེ་ཀ་ཛ་ཊཱི་མཐིང་མོ་ཞིང་དབྱུག་དང་སྤྱང་མོ་བསྣམས་པ་བོངས་ཉིས་ཐོག་ཙམ་པ། ཕྱི་ངོས་ན་ལས་ཀྱི་མ་མོ་ཁྲག་རལ་ཅན་ལག་པས་ཁྲག་བཅུས་ནས་འཐུང་བ་རྣམས་མཐོང་། ལོ་བརྒྱད་དུ་བླ་མ་འདུ་འབྲལ་མེད་པར་བསྟེན། ཨུ་རྒྱན་གྱི་སྒྲུབ་གནས་སྙུག་ཚལ་སྦུག་ཏུ་དགུན་ཐོག་ཅིག་བཞུགས་པས་རྡོ་རྗེ་ཕག་མོ་ཞལ་གཟིགས། དེ་ནས་ཤེས་རབ་ཕྱོགས་མེད་དུ་རྒྱས། རེ་ཞིག་ཡར་ཀླུངས་མཚར་སྟེངས་ཀྱི་རི་ཁྲོད་བཏབ་ནས་བཞུགས། དེ་ནས་བླ་མ་འདའ་བར་མཁྱེན་ནས་མཁར་ཆུར་བྱོན་ཙ་ན། བླ་མའི་སྲས་གཉིས་ས་སྐྱགས་སུ་འཛོམ། སླར་ལོག་ཉི་ཤུ་ལྔའི་དུས་མཆོད་བཙུགས། ཙ་རི་ལ་བྱོན་པས་ཀྲིག་མོ་ལྷའི་ནེའུ་གསིང་གི་རྡོ་སྐུ་ལ་འཇའ་ཚོན་སྣ་ལྔ་ཟུག་པ་སོགས་བྱུང་། དེ་ནས་མཚུར་ཕུར་ཆོས་རྗེ་རང་བྱུང་རྡོ་རྗེ་གདན་དྲངས་ཏེ་སྙིང་ཏིག་གི་གདམས་པ་རྣམས་ཕུལ། ཤངས་སུ་བྱོན་ནས་ལྕེ་སྒོམ་ནག་པོའི་བརྒྱུད་པ་སློབ་དཔོན་སྒོམ་པ་ལ་གསང་སྐོར་སྙན་བརྒྱུད་རྣམས་དང་། བསམ་གཏན་མིག་གི་སྒྲོན་མེ་ཞུས། དིང་རི་སྣ་དམར་དུ་དཔོན་པོ་
བྱང་སྒྲུབ་ལ་ཡང་དགོན་པའི་རི་ཆོས་རྣམས་ཉན། ཨུ་རྒྱན་པ་རིན་ཆེན་དཔལ་དང་ཡང་མཇལ། མར་ལམ་བླ་མ་བཀྲ་ལུང་པ་ལས་གཤིན་རྗེ་དགྲ་ནག་ལ་སོགས་པ་ཞུས། སློབ་དཔོན་ཡེ་མགོན་ལ་སོགས་པ་བཤེས་གཉེན་མང་དག་ལས་གསང་སྐོར་དང་། རྒོད་ཚང་བའི་ཁྲིད་ཀྱི་སྐོར། ཨ་རོའི་ཁྲིད་མོ་ཆེ་དོན་སྐོར་ལ་སོགས་པ་བོད་ན་གྲགས་པ་ཆེ་བའི་རྫོགས་རིམ་ཕལ་མོ་ཆེ་ཁོང་དུ་ཆུད། ཆོས་ཕྱིར་དཀའ་སྤྱད་བཟོད་པས་ཙ་རི་གསར་མ་བགྲོད་ནས་རྙིང་མའི་གཡུ་མཚོ་འགྲམ་དུ་གཅིག་པུར་ཟླ་བ་བརྒྱད་བཞུགས། ཆོ་འཕྲུལ་ཆེན་པོ་བྱུང་བ་གཤིས་ཐོག་ཏུ་རོ་སྙོམས་པས་གཞི་བདག་དབང་དུ་འདུས་ནས་ཁད་པར་གདན་དྲངས་བསྙེན་བཀུར་བྱས། ཛམ་བྷ་ལས་ནོར་བུ་བྱིན། མཚོ་ནང་དུ་འོད་ལྔའི་ལྦུ་བ་སེལ་པོ་ཙམ་ཞིག་ཐིམ་འགྲོ་བ་གཟིགས། ཐུགས་ངེས་འབྱུང་དང་སྐྱོ་ཤས་ཀྱིས་རྒྱུད་བརླན་པས་དུས་རྟག་ཏུ་ཤམ་པོ་ལ་སོགས་གངས་ཁྲོད་དང་ལུང་སྟོང་འབའ་ཞིག་ཏུ་ལྷགས་སྐྱོབ་ཙམ་ལ་བརྟེན་ནས་བཞུགས་པས་སློབ་མའི་ཚོགས་མང་པོ་འཁོར་བ་མཐའ་ཅན་དུ་མཛད། སྤྲུལ་པའི་སྐུར་གདོན་མི་ཟ་བ་ཀརྨ་པ་རང་བྱུང་རྡོ་རྗེ་དང་། རྒྱལ་བ་ཀློང་ཆེན་པ་གཉིས་རྫོགས་པ་ཆེན་པོའི་སློབ་མའི་གཙོ་བོར་གྱུར་པས་བསྟན་པ་འདི་སྤེལ་བའི་ཕྲིན་ལས་ལ་མུ་དང་མཐར་མ་སོན། དེ་སྐད་དུ་འབྲི་གུང་པ་ཆོས་རྒྱལ་རིན་ཆེན་ཕུན་ཚོགས་ཀྱིས། ཚེས་འདིའི་བསྟན་པའི་བདག་པོ་ཀུན་མཁྱེན་ཀློང་ཆེན་པ་ཡིན། རྒྱལ་བ་རང་བྱུང་རྡོ་རྗེའི་དུས་ཕྲིན་ལས་རྒྱ་ཆེ། ཞེས་གསུངས་པས་མཚོན་ནོ། །བྱང་ཆུབ་སེམས་དཔའི་སྤྱོད་པ་ལ་ཤིན་ཏུ་གོམས་པས་སྙིང་རྗེ་ཆེན་པོའི་དབང་གིས་གྲོང་དང་ཡུལ་འཁོར་མང་པོ་དག་ལའང་ཐབས་ལ་མཁས་པས་ཐར་པའི་ས་བོན་འདེབས་པ་ཁོ་ན་ལྷུར་མཛད་ཅིང་། ཀོང་པོ་ནས་ཨེ་ལ་ཐུག་གི་བར་འཇིགས་པས་ཉེན་པའི་ལམ་ཕྲང་ལ་འགྲོ་བ་དག་གི་དབུགས་འབྱིན་པ་དང་། རི་དྭགས་དང་ཉ་ལ་སོགས་པའི་སེམས་ཅན་ཉམ་ཆུང་བ་དེ་དག་ལ་ཐུགས་ཤིན་ཏུ་བརྩེ་བས་བདོག་པ་ལ་འཕངས་སེམས་མེད་པས་
རི་རྒྱ་དང་། ལམ་རྒྱ་དང་། ཆུ་རྒྱ་ལ་སོགས་པ་མཛད་ནས་བདེ་འཇམ་ལ་བཀོད། གང་དུ་བཞུགས་པའི་ལུང་པ་དང་། ཡུལ་གྲོང་ཐམས་ཅད་ཀྱི་སད་སེར་ཡམས་ནད་ལ་སོགས་པ་ཞི་བར་མཛད་ཅིང་ཕན་པ་འབའ་ཞིག་ལྷུར་ལེན། སྙིང་ཏིག་གི་གདམས་པ་རྫོགས་རིམ་གཞན་དང་མ་འདྲེས་པར་རང་སྐད་ཀྱི་གྲུབ་མཐའ་བསླང་སྟེ་འཆད་ནུས་པ་དང་། ཤངས་ལ་སྨེ་བ་ཨའི་རི་མོ་ཅན་མངའ་བ་སྔགས་བདག་གཟའ་དང་དམ་ཅན་རྣམས་ཀྱིས་བཀའ་ལ་ཉན་ཅིང་མི་དང་མི་ལབ་པ་བཞིན་དུ་ཡོད་པ་དང་། མངོན་པར་ཤེས་པས་གདུལ་བྱའི་བསམ་པ་མཁྱེན་ནས་འདུལ་ལུགས་མཁས་པ་དང་། གཞན་རྒྱུད་བྱིན་གྱིས་རློབས་ནུས་པ་དང་། རྗེས་སུ་བཟུང་བའི་སྐལ་ལྡན་ཀུན་ལ་འདས་དུས་རྟགས་ཁྱད་པར་ཅན་འབྱུང་བ་སོགས་སློབ་དཔོན་བི་མ་ལའི་སྐུའི་བཀོད་པར་གྲགས་ཤིང་། ཐལ་འགྱུར་ལས་དགེ་སློང་དཔལ་ལྡན་ཞེས་ལུང་བསྟན་ཏོ། །དེ་ལྟར་དོན་གྱི་འགྲོ་དོན་བསམ་གྱིས་མི་ཁྱབ་པའི་ངང་ནས་བདུན་ཅུ་རྩ་བརྒྱད་པ་ཆུ་མོ་ལུག་གི་ལོའི་སྟོན་ཟླ་འབྲིང་པོའི་ཉི་ཤུ་ལྔ་ལ་སྒྲ་དང་འོད་དང་། གུར་ཁྱིམ་ལ་སོགས་པའི་རྟགས་ངོ་མཚར་བ་དང་བཅས་སྐུ་གཤེགས་པས། ཉེ་གནས་སྒོམ་དར་ལ་སོགས་པ་དྲུང་ན་ཡོད་པ་རྣམས་ཀྱིས་མོས་གུས་ཆེན་པོས་གདུང་བ་བསྐྱེད་པས་སླར་བཞེངས་ཏེ་སྐྱིལ་མོ་ཀྲུང་བཅས། ཞལ་འཛུམ་པའི་ངང་ནས་ཁྱེད་རྣམས་མྱ་ངན་མ་བྱེད། ང་ཤི་བ་མིན་གསུངས་ནས་གདམས་ངག་ཞལ་ཏ་ཅི་རིགས་པ་བྱོན། ཞག་བཅུ་གསུམ་སྐུ་ཚེ་སླར་ལ་བསྲིངས། དེར་ཚེས་བདུན་གྱི་ཉིན་གཤེགས་པའི་ཕྱི་ན་ཇི་ལྟར་བགྱི། བླ་མ་ཀུན་མཁྱེན་པ་གདན་འདྲེན་ནམ་ཞུས་པས། ཁོང་འོ་བརྒྱལ་དུ་མ་འཇུག །ད་གཟོད་ཆོས་ཀྱི་ཞུན་ཐར་མ་ཆོད་པ་ཡོད་ན་དེར་སོང་། ཁ་ཏ་མང་པོ་སྔར་ནས་བྱས་ཟིན། ཅལ་ཅོལ་མ་སྨྲ་གསུངས། དྲང་སྲོང་ཙོག་པུའི་འདུག་སྟངས་དང་། ཆོས་སྐུའི་གཟིགས་སྟངས་ཀྱི་ངང་ལས་འཛུམ་པར་མཛད་དེ། ཚེས་བརྒྱད་ཀྱི་ཐོ་རངས་ཁ་ན་གདོད་མའི་གྲོང་ཁྱེར་ག་ན་བ་དེར་གཤེགས་
སོ། །ཉི་ཤུ་ལྔ་ལ་པུར་བཞུ་བས་དབུ་ཐོད་རིལ་པོར་བྱོན་པའི་ནང་ན་རིགས་ལྔའི་ཚོམ་དཀྱིལ་དང་། སྙན་གོང་གཡས་ན་རྗེ་བཙུན་མ་མཐིང་ག་ཚོན་གང་པ། གདུང་རིགས་ལྔ་དང་། རིང་བསྲེལ་ལ་སོགས་པ་བྱོན་ཅིང་འཇའི་གུར་གྱིས་ཁོ་ར་ཁོར་ཡུག་ཏུ་དཀྲིགས་སོ།། དེ་ལ་རྒྱལ་བའི་དབང་པོ་ཀརྨ་པ་རང་བྱུང་རྡོ་རྗེ་ནི། འཕགས་པ་སྤྱན་རས་གཟིགས་འཇིག་རྟེན་དུ་དངོས་སུ་བྱོན་པ་སྟེ། ཆོས་ཀྱི་དབྱིངས་ནས་ཡེ་ཤེས་ཀྱི་མཁའ་འགྲོ་མ་རྣམས་ཀྱི་རྡོ་རྗེའི་གླུས་བསྐུལ་ནས་སེམས་ཅན་རྣམས་ལ་ཚད་མེད་པའི་སྙིང་རྗེས་གཟིགས་ཏེ་སྟོད་ལུང་དུ་རྒན་རྒོན་གཉིས་ཀྱི་བུ་ཤི་བའི་རོ་ལ་གྲོང་འཇུག་གི་རྣམ་པས་གཤེགས་ཙ་ན། ཤི་མིག་གསོན་ལ་བལྟ་བ་ལྟས་ངན་ཡིན་ཟེར་ནས་མིག་ཁབ་ཀྱིས་གཙགས། དལ་འབྱོར་གྱི་ཆོས་བཅོ་བརྒྱད་ཚང་བའི་ལུས་ལས་གཞན་དུ་གྱུར་པས་སླར་འཕོས་ཏེ། རྣལ་འབྱོར་ཕོ་མོ་གཉིས་ཀྱི་བུར་སྲིད་པ་བཟུང་། སྔོན་གནས་རྗེས་སུ་དྲན་པ་ལ་སྒྲིབ་བྱེད་སྐྲའི་རྩེ་མོ་ཙམ་ཡང་མེད་པས་མངལ་གྱི་དྲི་མས་གཏན་ནས་མ་གོས་པ་རྒྱ་གར་ན་ཤཱཀྱ་ཐུབ་པ་དང་། བོད་དུ་སྐྱེས་བུ་ཆེན་པོ་འདི་ལས་མེད་པར་གྲགས། རྒྱ་བོད་གཉིས་ཀར་སངས་རྒྱས་ཀྱི་བསྟན་པའི་སྲོག་ཤིང་གཅིག་པུར་བཞུགས། བསམ་ཡས་མཆིམས་ཕུ་དང་གཡའ་མ་ལུང་སོགས་ནས་ཚེ་ཆུའི་གཏེར་བཞེས་ནས་གོང་མ་རྒྱལ་པོའི་ཚེ་བསྲིངས། བི་མ་ལ་མི་ཏྲ་རང་གི་མཛོད་སྤུར་ཐིམ་པ་གཟིགས་པའི་མོད་ལ་སྙིང་ཐིག་གི་དགོངས་པ་ཇི་ལྟ་བ་བཞིན་མངོན་དུ་གྱུར། འོན་ཀྱང་གསང་སྔགས་བླ་མ་ལ་བསྟེན་པའི་མིག་ལྟོས་ཙམ་སྟོན་པའི་སླད་དུ་བཅོམ་བསྐྱུངས་ནས་རིག་འཛིན་ཀུ་མཱ་རཱ་ཛ་ལས་གསང་བ་སྙིང་ཏིག་གི་མན་ངག་ཡོངས་སུ་རྫོགས་པ་གསན། འདི་ནི་སློབ་དཔོན་ཆེན་པོ་པདྨ་ལས་བརྒྱུད་པ་གཅིག་འོང་ཐང་བ་ལ་དགོངས་པའི་ཚེ་སློབ་དཔོན་སངས་རྒྱས་གཉིས་པ་ཞལ་གཟིགས། མན་ངག་སྙིང་ཏིག་དངོས་སུ་ཐོབ་ཀྱང་ཚིག་བརྒྱུད་ལ་ནན་ཏན་དུ་བྱ་བའི་ཕྱིར་ཤོའི་རྒྱལ་སྲས་ལེགས་པ་སྤྱན་དྲངས་ནས་ཙ་རི་དགོན་གསར་དུ་རྫོགས་པར་གསན། སླར་སློབ་མ་རྣམས་ལ་རྩལ་དུ་བཏོན་ནས་
གསུངས། བཀའ་ལས། ཆོས་འདི་ལྟ་བུ་ནུབ་ཏུ་འཕངས་པས་གཡུང་སྟོན་རྡོ་རྗེ་དཔལ་གྱིས་གཙང་། ཡེ་རྒྱལ་བས་ཁམས་ཀོང་། ཡེ་ཤེས་རྒྱལ་མཚན་པས་ཧོར་དང་རྒྱ་ནག །སྤྲུལ་སྐུ་བས་དབུས་སུ་དར་བར་གྱིས་ཞེས་སྨན་ལུང་པ་ཤཱཀྱ་གཞོན་ནུ་སོགས་ལ་རྗེས་སུ་གདམས། ས་ལ་གནས་པའི་བྱང་སེམས་ཀྱིས། །རྒྱ་མཚོའི་བར་དུ་སྤེལ་བར་བྱེད། །ཅེས་པ་དེ་ཡིན་པར་གྲགས། ཀུན་ཏུ་བཟང་པོ་ཐུགས་ཀྱི་ཀློང་ན་རང་གསལ་ཏེ་དགོངས་པའི་གཏེར་མཛོད་ཆེན་པོ་ལ་དབང་བསྒྱུར་ནས་ཀརྨ་སྙིང་ཏིག་ཅེས་གྲགས་པའི་གདམས་པ་ཡང་བྱུང་། འདི་དག་ཀྱང་བསྟན་པའི་ཆུ་མགོ་གཅིག་ཡིན་ནོ།། རྒྱལ་བ་གཉིས་པ་དཔལ་བསམ་ཡས་པ་ཀུན་མཁྱེན་ངག་གི་དབང་པོའམ། ཀློང་ཆེན་རབ་འབྱམས་ནི། གཡོ་རུ་གྲའི་ཆ་སྟོད་གྲོང་དུ་ངན་ལམ་བཙན་པོ་འོད་ཀྱི་དཀྱིལ་འཁོར་ཅན་ཞེས་བྱ་བ་མ་སྨད་པའི་རིགས་ཀྱི་ཡོན་ཏན་ཅན་ནོ། །རུས་ནི་རོག་སྟེ་སད་མི་བདུན་གྱི་ནང་ཚན་ཛྙཱ་ན་ཨིནྡྲ་རཀྵྀ་ཏའམ། བོད་སྐད་དུ་ཡེ་ཤེས་དབང་པོ་བསྲུང་། སློབ་དཔོན་ཆེན་པོའི་དངོས་སློབ་དགེ་སློང་རྒྱལ་བ་མཆོག་དབྱངས་དང་གདུང་གཅིག་པའི་རབས་ཉེར་ལྔ་པ། མེས་པོ་ལྷ་སྲུང་ཞེས་བདུད་རྩིའི་བཅུད་ལེན་གྲུབ་པས་ལོ་བརྒྱ་དང་ལྔར་འཚོ་བ་དེའི་སྲས་སློབ་དཔོན་བསྟན་པ་སྲུང་ཞེས་རིག་གནས་དང་སྔགས་ཀྱི་རྣལ་འབྱོར་ལ་རང་བྱན་ཆུད་པ་ཞིག །འབྲོམ་སྟོན་རིན་པོ་ཆེ་རྒྱལ་བའི་འབྱུང་གནས་ཀྱི་གདུང་ལས་བྱོན་པ་འབྲོམ་བཟའ་མ་བསོད་ནམས་རྒྱན་ཞེས་བྱ་བ་དང་འདུས་པ་ལས་སྐྱེ་བའི་མྱུ་གུ་བཟུང་ངོ་། །དེའི་ཚེ་ཡུམ་ལ་སེང་གེ་ཆེན་པོ་གཅིག་གི་དཔྲལ་བ་ན་ཉི་མའི་འོད་ཟེར་འབར་བས་སྲིད་པ་གསུམ་ལྷག་གེར་གསལ་བ་ཞིག་རང་ཉིད་ལ་ཐིམ་པར་རྨིས་སོ། །དེ་ནས་རབ་བྱུང་ལྔ་པའི་ཕུར་བུས་སྤྲེའུ་སྦོ་ཟླའི་ཚེས་བཅུའི་ཉིན་མངལ་གྱི་ཆུ་འཛིན་ལས་རྣམ་པར་གྲོལ། གཞོན་ནུ་དོན་གྲུབ་ལ་ལྷའི་དབང་པོས་བྱ་བ་བཞིན་དུ་ནམ་གྲུ་རེ་མ་ཏིས་ངས་བསྲུང་བ་ཡིན་ཞེས་ལག་ཏུ་བླངས། སླར་ཡུམ་ལ་གཏད་ནས་མི་སྣང་བར་སོང་། འདི་ལྟར་བྱང་ཆུབ་སེམས་དཔའ་ནི་འཕགས་པའི་ནོར་གྱིས་
གདོད་ནས་ཕྱུག་པས་དད་པ་དང་། སྙིང་རྗེ་ལ་སོགས་པའི་ཡོན་ཏན་བསྒྲིབ་མེད་དུ་གསལ། ལོ་ལྔ་ནས་བྲི་ཀློག་ལེགས་པར་མཁྱེན། ཡབ་ལས་བཀའ་བརྒྱད་བདེར་འདུས། ཕུར་པ། རྟ་མགྲིན་བླ་མའི་ལས་གཞུང་སོགས་སྒྲུབ་ཕྲིན་མང་དུ་གསན། སྨན་རྩིས་ལ་སོགས་པའི་རིག་པའང་ཁོང་དུ་ཆུད། དགུ་པའི་སྟེང་དུ་ཉི་ཁྲི་དང་བརྒྱད་སྟོང་བརྒྱ་ཚར་བཏོན་པས་ལྷག་མེད་དུ་ཐུགས་ལ་འཛུལ། བཅུ་གཉིས་པའི་ཚེ་བསམ་ཡས་པ་མཁན་པོ་བསམ་འགྲུབ་རིན་ཆེན་དང་། སློབ་དཔོན་ཀུན་དགའ་འོད་ཟེར་ལས་རབ་བྱུང་གི་དངོས་པོ་བརྙེས། མཚན་ཚུལ་ཁྲིམས་བློ་གྲོས་སུ་གྲགས། དམ་པའི་ཆོས་འདུལ་བ་ལ་ལེགས་པར་སྦྱངས་པས་ལོ་བཅུ་བཞི་པར་བཤད་པའི་བ་དན་བཟུང་ཆོག་པ་བྱུང་། བཅུ་དྲུག་པར་སློབ་དཔོན་བཀྲ་ཤིས་རིན་ཆེན་ལ་ལམ་འབྲས་དང་། ཆོས་དྲུག་གཉིས། ཕག་མོའི་ཆོས་དྲུག །བདེ་མཆོག་དྲིལ་བུ་པ། ཕྱག་རྡོར་འཁོར་ཆེན་ལ་སོགས་པའི་དབང་ཁྲིད་གདམས་པ་མང་དུ་ཉན། སློབ་དཔོན་དབང་ཡེ། སྟོན་ཚུལ། ཁྲོ་ཕུ་པ་ལ་སོགས་པར། བྱ་སྤྱོད། རྣལ་འབྱོར། རྡོ་རྗེ་གུར། མཁའ་འགྲོ་རྒྱ་མཚོ། སངས་རྒྱས་ཐོད་པ། རྡོ་རྗེ་ཕྲེང་བ། དུས་ཀྱི་འཁོར་ལོ་སོགས་པའི་སྔགས་རྒྱུད་མང་པོ་དང་། རིན་པོ་ཆེ་ཟ་ལུང་པ་སོགས་ལ་ཞང་ཚལ་པའི་གདམས་སྒོར། རྒོད་ཚང་པའི་ལམ་ཁྲིད། གཅོད་ཡུལ། ཞི་བྱེད་སྔ་ཕྱི་བར་གསུམ་ལ་སོགས་པ་མང་དུ་ཉན། བཅུ་དགུ་པར་གངས་རིའི་ཁྲོད་ན་ཚད་མ་སྨྲ་བའི་རིག་གྲ་ཆེན་པོ་རྔོག་ལེགས་པའི་ཤེས་རབ་ཀྱིས་ལེགས་པར་བསྐྲུན་པའི་གནས་གསང་ཕུ་ནེའུ་ཐོག་གི་མ་ལ་ཡའི་ནགས་ཀླུང་ཆེན་པོར་ཞུགས་ནས་གླིང་སྟོད་གདན་རབས་བཅོ་ལྔ་པ་སློབ་དཔོན་བཙན་དགོན་པ་དང་། གདན་རབས་བཅུ་དྲུག་པ་བླ་བྲང་པ་ཆོས་དཔལ་རྒྱལ་མཚན་གཉིས་ལས། བྱམས་པའི་ཆོས་ལྔ། ཚད་མ་སྡེ་བདུན། ཕར་ཕྱིན། དབུ་མ་ལ་སོགས་མཚན་ཉིད་ཐེག་པའི་ལུང་རིགས་ཀྱི་པདྨའི་རྩ་བ་མངར་པོར་གྱུར་པ་དག་ལོ་དྲུག་གི་བར་དུ་ལྷག་མ་མ་ལུས་པར་
ཟོས་པས་བློ་གྲོས་ཆེན་པོའི་ལུས་ཀྱི་སྟོབས་ལྷག་པར་རྒྱས། དཔང་ལོ་བློ་གྲོས་བརྟན་པ་ལ་མདོ་ཏིང་ངེ་འཛིན་རྒྱལ་པོ་ལ་སོགས་པའི་ཟབ་ཆོས་མདོ་ལྔ། ཤེས་རབ་སྙིང་པའི་རྒྱ་ཆེར་འགྲེལ་པས་མཚོན་པའི་ལུང་ཕྲན་མང་པོ་སོགས་ནང་པའི་གཞུང་། སྒྲ་དང་སྙན་དངགས་དང་། སྡེབ་སྦྱོར་དང་། ཟློས་གར་ལ་སོགས་པའི་ཕྱི་རོལ་པ་དང་ཐུན་མོང་དུ་གྱུར་པའི་གནས་ཐམས་ཅད་ལ་ཐོས་བསམ་མཐར་ཕྱིན་པའི་སྣ་ཞགས་རིང་པོར་བརྐྱངས། ཤེས་རབ་ཀྱི་ལྷ་འཇམ་པའི་དབྱངས་། མཚོ་ལྡན་མ། མི་གཡོ་བ། ཕག་དཀར་རྣམས་ལ་སྒྲུབ་པ་མཛད་པས་ཀུན་ཀྱང་ཞལ་གཟིགས། ཁྱད་པར་སྒྲ་དབྱངས་ལྷ་མོས་ཕྱག་མཐིལ་དུ་བཞག་ནས་གླིང་བཞི་རི་རབ་དང་བཅས་པ་ཞག་བདུན་དུ་བསྟན་ཅིང་ལུང་བསྟན་ཐོབ། ལྷག་པའི་ལྷ་དེ་དག་གིས་ཀྱང་ཐོགས་པ་མེད་པའི་བློ་གྲོས་ཀྱི་དངོས་གྲུབ་ཆེན་པོའི་གནས་གང་ཡིན་པའི་དྲ་བ་དང་། དྲ་བ་ཕྱེད་པའི་འཕྱང་འཕྲུལ་དང་། རིན་པོ་ཆེའི་ཏོག་གིས་རྣམ་པར་དཔྱངས་པ། བརྒལ་བ་དང་། བརྟག་པ་དང་། རིགས་པའི་ཐལ་འགྱུར་གྱི་སྒྲ་ཆེན་པོས་ས་འདི་གཡོ་བ་ཙམ་དུ་གྱུར་ནས། རྒོལ་བ་ངན་པའི་ཁྱུ་མཆོག་རྭ་གཅིག་པའི་བརྟུལ་ཞུགས་འཛིན་པ་རྣམས་སྒྲུབ་པ་དང་། སུན་འབྱིན་པའི་རྐང་པ་མཆོག་གིས་རྣམ་པར་བརྫི་བ་དང་། རྣམ་པར་འཐག་པ་དང་། རྣམ་པར་ཉམ་ཉེས་པར་བྱས་ནས་ཅང་མི་སྨྲ་བའི་གནས་ལ་བཀོད་པས་བསམ་ཡས་ལུང་མང་བའམ། ཀློང་ཆེན་རབ་འབྱམས་ཞེས་པའི་མཚན་གྱི་རྔ་བོ་ཆེ་མཁའ་ལ་འགྲོ་བ་དང་། མི་མ་ཡིན་གྱི་གནས་སུའང་གྲགས་པ་གསལ་བ་ཉིད་དོ། །དེ་ལྟར་ལུང་དང་རིགས་པའི་གནས་རྒྱ་ཆེན་པོ་ལ་མི་འཇིགས་པའི་ཉམས་བརྟས་པར་གྱུར་ནའང་། འདི་ལྟར་སྐྱེས་བུ་ཆེན་པོ་ནི་རྣམ་པར་གྲོལ་བའི་ལམ་ལ་གང་ཉེ་བའི་ཕྱོགས་ལ་འཇུག་པར་རྩོམ་སྟེ། ཕྱོགས་བྲལ་གྱི་གནས་སུ་ལྷགས་ནས་བྱང་ཆུབ་སེམས་དཔའ་རྟག་ཏུ་ངུའི་རྣམ་པར་ཐར་པ་ལ་ཡིད་གཞུངས་པས། བླ་མ་དང་དགེ་བའི་བཤེས་གཉེན་དུ་མ་ལ་མདོ་དང་། རྒྱུད་དང་།
མན་ངག་མང་དུ་ཞུས་ནས་ཐོས་པ་དང་བསམ་པའི་བློ་གྲོས་ཆེར་བསྐྱེད། གངས་རིའི་ཁྲོད་ན་གཞུང་ལུགས་དང་མན་ངག་མང་དུ་གནས་པ་ལ་ཕྱོགས་དང་རིས་སུ་བཅད་པ་སྤངས་ཏེ་བུང་བ་གཞོན་ནུས་སྦྲང་རྩིའི་སྙིང་པོ་ལ་བྱ་བ་བཞིན་དུ། དན་ཕག་པ། སློབ་དཔོན་གཞོན་ནུ་དོན་གྲུབ་མྱོས་མཐིང་མ་བ་སངས་རྒྱས་གྲགས་པ་སོགས་བླ་མ་བཞི་ལ་མདོ་སྒྱུ་སེམས་གསུམ། རྙིང་མ་རྒྱུད་འབུམ་གྱི་གཙོས་མང་དག་གསན་པས་སྔ་འགྱུར་རྡོ་རྗེ་ཐེག་པའི་གྲུབ་པའི་མཐའ་ཆེན་པོར་གཅིག་ཏུ་འཇུག་པའི་རྟེན་འདྲེལ་ཤར། ཕྱིས་གསང་བའི་སྙིང་པོ་ལ་སྙིང་ཏིག་དང་མཐུན་པའི་ཊཱི་ཀ་ཕྱོགས་བཅུའི་མུན་པ་ཐམས་ཅད་རྣམ་པར་སེལ་བ་ཉི་ཟླའི་སྤྲིན་གྱི་སྣང་བ་ཞེས་བྱ་བ་དང་། སྤྱིའི་ཁོག་དབུབ་གཉིས་མཛད། གསང་སྙིང་འགྲེལ་པ་སྤར་ཁབ་ཀྱི་ལུགས་ལྟར་འཆད་པ་མི་ལེགས་ཀྱི། རོང་ཟོམ་གྱི་ལུགས་ལྟར་ལེགས་པ་ཡིན་ཞེས་གསུངས། ལར་གཡུང་འགྲེལ་དང་བཅས་འདི་གསུམ་རང་བཤད་སྒྲོམས་ཆེ་བར་སྣང་། སློབ་དཔོན་གཞོན་རྒྱལ་ལ་སོགས་པར་དབུ་མ་ཚིག་འཇུག་ལ་སོགས་འཕགས་སྐོར་རྣམས་ཚང་བ་དང་། གཞོན་རྡོར་ལ་སྤྱོད་འཇུག་དང་བསླབ་བཏུས་ལ་སོགས་པ། ཇོ་བོའི་ཡི་དམ་སྐོར་སྦྱོར་དྲུག་ཆོས་དྲུག །མཁན་པོ་ལ་ཁྲོ་ཕུ་པའི་སྐོར། ཁ་རག་ཆོས་སྐོར། སྒྲུབ་ཐབས་རྒྱ་མཚོ། ཆོས་ཆུང་བརྒྱ་རྩ། འདུལ་བ་ལུང་ལ་སོགས་ཤིན་ཏུ་མང་བ་རྗེ་རང་བྱུང་རྡོ་རྗེ་ལ་སྦྱོར་དྲུག་གེགས་སེལ་དང་བཅས་པ། ནཱ་རོ་ཆོས་དྲུག །སྐུ་གསུམ་ངོ་སྤྲོད། རྒྱལ་བ་རྒྱ་མཚོ། སྤྱན་རས་གཟིགས་རྒྱལ་པོ་ལུགས། གསང་འདུས། སམྦུ་ཊི། མ་ཧཱ་མཱ་ཡཱ། གཤིན་རྗེ་གཤེད་དམར་ནག་སོགས་ཆོས་བཀའ་རྒྱ་ཆེན་པོ། སློབ་དཔོན་དབང་ཚུལ་ལ་སྦྱོར་དྲུག་དང་། བསྙེན་སྒྲུབ། རླུང་སྐོར་ལ་སོགས་པ་མང་པོ། ས་སྐྱ་པ་བླ་མ་དམ་པ་ལས། སེམས་བསྐྱེད་ཆེན་མོ་དང་། ལམ་འབྲས་སོགས་ས་སྐྱ་པའི་ཆོས་ཟབ་དགུ་གསན་ཅིང་། འདི་ལ་གཞི་ལམ་འབྲས་བུ་གསུམ་གྱི་རྣམ་པར་གཞག་པའི་ཞུ་ཡིག་རིན་པོ་ཆེ་གསེར་གྱི་མཆོད་སྡོང་ཞེས་བྱ་བའང་ཕུལ་བར་སྣང་། ཞི་བྱེད་རྒྱུད་པ་རྨ་སོ་
ཀཾ་གསུམ་དུ་གྲགས་པའི་སློབ་བརྒྱུད་ཤུག་གསེབ་རི་པ་གཞོན་རྡོར་ལ་དོ་ཧ་སྐོར་གསུམ་རི་ཆོས་སྐོར་གསུམ། རྟེན་འདྲེལ་བརྒྱ་རྩ་ལ་སོགས་མདོར་ན་གངས་རིའི་ཁྲོད་ན་གྲགས་པའི་གྲུབ་པའི་མཐའ་ཕལ་མོ་ཆེ་ཐུགས་སུ་ཆུད་ཅིང་། འཆད་རྩོད་རྩོམ་གསུམ་ལ་ཐོགས་པ་མེད་པའི་ཐུགས་རབ་སྐྱེས། ཐ་སྙད་ཀྱི་རིག་པ། མདོ་སྔགས་ཀྱི་གཞུང་ལུགས། མན་ངག་གི་སྐོར་སོགས་གང་ལའང་རང་བྱན་ཚུད་པར་མཛད་དོ། །འདི་ལྟར་སྐྱེས་བུ་ཆེན་པོ་རྣམས་ནི། ཐོས་བསམ་གྱི་མཐའ་སྒྲུབ་པས་ཉམས་འོག་ཏུ་བཙུད་ནས་རྣམ་པ་ཐམས་ཅད་མཁྱེན་པའི་ཡེ་ཤེས་ཀྱི་འབབ་སྟེགས་ཉིད་དུ་མཛད་དེ། དེ་ལ་རྣམ་པ་ཀུན་ཏུ་འཁོར་བའི་རང་བཞིན་ལ། ཐུགས་སྐྱོ་ཤས་དང་ངེས་འབྱུང་ཚད་མེད་པས་སྔོན་གྱི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་བསྔགས་པའི་གནས་ནགས་ཁྲོད་དང་། བས་མཐའ་འབའ་ཞིག་དོན་དུ་གཉེར་བའི་དགོངས་པ་གཏོད་པའི་ཚེ། བཅོམ་ལྡན་འདས་ཀྱིས་ངེས་པར་འབྱུང་བའི་རྐྱེན་བཞི་གཟིགས་པ་བཞིན་དུ། གྲ་ས་དེར་ཁམས་པའི་གྲ་པ་དག་གིས་གཟུ་བོར་མི་གནས་པའི་སྤྱོད་པ་ངན་པས་ཐུགས་ངེས་པར་འབྱུང་སྟེ་བྱ་བྲལ་གྱི་ཀུན་ཏུ་སྤྱོད་པས་གཤེགས་པར་ཉེ་བའི་ཚེ། མཁན་སློབ་རྣམས་སྐྱེས་བུ་དམ་པ་འདིའི་རྣམ་དཔྱོད་ལ་དཀོན་པའི་འདུ་ཤེས་བཟོད་པར་དཀའ་བས་ནན་གྱིས་བཤོལ་བཏབ་ནའང་། སེམས་ཅན་གྱི་བསོད་ནམས་ལས་གཞན་དོན་རླབ་པོ་ཆེའི་ཕྲིན་ལས་ཀྱི་འཇུག་པ་དུས་ལས་མ་ཡོལ་བས་བཤོལ་མ་ཐེབས་པར་ཆས་ཙ་ན། རྔོག་ལོ་ཆེན་པོའི་གདུང་རྟེན་རྩར་དགེ་སློང་དཔྱོད་ལྡན་པ་ཞིག་དང་ཕྲད། ཁོང་གིས་ཀྱང་བཤོལ་བཏབ་ཅིང་སྐྱོ་བའི་རྣམ་པ་སྟོན་པ་ལ་གནས་ཚུལ་རྣམས་བཤད་པས། ཁོང་ཡང་ཁམས་པའི་ཚོགས་ལ་འཁུན་པར་བྱེད་ཅིང་། ད་ཅིས་ཀྱང་གཤེགས་ན་རང་རེ་ལ་རྩོམ་པ་ནི་ཐོག་རྡུག་མེད། ཁམས་པ་རྣམས་ལ་ངན་སྨྲས་ཞིག་འཇོག་པར་འཚལ་ཞེས་བསྐུལ་བས། ཀུ་རེའི་ཚུལ་དུ་ཤོག་བུ་དྲེ་ཁ་གཅིག་ལ་ཤོང་ཐང་བྲིས་པ་ཁོང་གིས་ཁྱེར་ནས་ཆོས་རའི་ཁྲི་
ལ་སྦྱར་བ་ཁམས་པ་རྣམས་ཀྱིས་རིག་སྟེ་མཐོང་དུ་མ་སྟེར། ཀ་ལིང་ཡུལ་དུ་སྲིན་པོ་རྒྱུ་བ་བཞིན། །ཅེས་པ་ལ་སོགས་པའི་ཀ་ཁ་སུམ་ཅུ་པ་འདི་རྒྱལ་ཁམས་ཀུན་ཏུ་དར་རོ། །དེ་ནས་ངེས་པ་མེད་པའི་གནས་སུ་འཁྱམས་ཤིང་སྒྲུབ་པ་འབའ་ཞིག་ལྷུར་མཛད་པ་ལས་རྒྱ་མའི་ཅོག་ལ་བྲག་ཕུག་ཏུ་ཟླ་བ་ལྔ་མུན་པའི་རྣལ་འབྱོར་ལ་བཞུགས་པའི་ཚེ། སིལ་སྙན་གྱི་སྒྲ་གླུ་དབྱངས་དང་བཅས་པ་གཅིག་གསན་པས། དེ་ལ་བལྟ་བའི་སྣང་བ་ཤར་ཙ་ན་བུད་མེད་ལོ་བཅུ་དྲུག་པ་ཟ་འོག་གི་འཇོལ་བེར་དང་གསེར་གཡུའི་རྒྱན་གྱིས་སྤྲས་ཤིང་། བསེ་ཁྲབ་དྲིལ་བུས་བརྒྱན་པའི་རྟ་ལ་བཅིབས་པ་གདོང་གསེར་གྱི་དྲ་བས་གཡོགས་པ་གཅིག་དང་མཇལ། དེའི་ཐུ་བ་ནས་འཇུས་ཏེ་འཕགས་མ་རྗེས་སུ་འཛིན་པར་ཞུ་ཞེས་བཏུད་པས། རིན་པོ་ཆེའི་དབུ་རྒྱན་ཅིག་འདུག་པ་ཕུད་ནས་ཀུན་མཁྱེན་པའི་དབུ་ལ་བསྐོན། དེང་ནས་དུས་རྟག་ཏུ་བྱིན་གྱིས་རློབ་ཅིང་དངོས་གྲུབ་སྦྱིན་ནོ་གསུངས། བདེ་གསལ་མི་རྟོག་པའི་ཏིང་འཛིན་ལ་ཡུན་རིང་པོར་འབྱམས། མན་ངག་རྫོགས་པ་ཆེན་པོའི་ཆོས་དང་མཇལ་བའི་རྟེན་འདྲེལ་འགྲིགས། དེ་ནས་ཉི་ཤུ་རྩ་དགུ་བར་བསམ་ཡས་སུ་ཕེབས་པའི་དཔྱིད་སོས་བླ་མ་དམ་པ་ཀུ་མ་རཱ་ཛ་ཡར་སྟོད་སྐྱམ་གྱི་ཕུ་ན་བཞུགས་པ་ལ་གཏད་དེ་བྱོན་པས། ལམ་དུ་གཡག་སྡེ་པཎ་ཆེན་དང་མཇལ་ནས་རྗེ་དྲུང་ཀརྨ་པའི་དྲུང་ན་དེང་ཞེས་བསྐུལ་ནའང་མ་ཉན་པར་ལྷགས། ཡར་སྟོད་སྐྱ་མ་གྱི་ཕུ་ན་རིག་འཛིན་པ་སློབ་མའི་ཚོགས་ཆ་ཐེར་ལྷགས་སྐྱོབ་བདུན་ཅུ་ཙམ་དང་བཅས་བཞུགས་པ་དང་མཇལ། མདང་ལྷའི་བྱ་ཡིན་ཟེར་བའི་བྱ་ཡ་མཚན་ཅན་ཅིག་ལ་བྱ་བྲན་མང་པོའི་ཚོགས་དང་བཅས་བྱུང་ནས་ངའི་དཔེ་ཆ་རྣམས་ཕྱོགས་མཚམས་ཐམས་ཅད་དུ་ཁྱེར་སོང་བར་རྨིས་པས་བརྒྱུད་པ་འཛིན་པ་ཞིག་འོང་གསུངས་ནས་ཤིན་ཏུ་མཉེས། དེར་ཆོས་ཁྲལ་འདེགས་རྒྱུ་མེད་པས་ཐུགས་ལ་སྐྱོ་བ་དཔག་ཏུ་མེད་པ་འཁྲུངས། ཆོས་ཁྲལ་ལ་འཐོགས་ནས་བླ་མའི་དྲུང་ནས་འགྲོ་དགོས་པ་ང་ལས་མེད་པས་ཉིན་པར་འགྲོ་བ་ངོ་ཚ། སང་
ནམ་ལྡང་ཙ་ན་ལུང་པ་འདིའི་མདའ་ལ་སླེབ་པར་འགྲོ་དགོངས་ཙ་ན། བླ་མའི་མངོན་མཁྱེན་གྱིས་དགོངས་ནས་འདིའི་ཆོས་ཁྲལ་ནང་ནས་འདེབས་པ་ཡིན་པས་མ་བརྩེར་ཞེས་གྲ་པ་གཉིས་ཀྱིས་བསྐྱར་བྱུང་བས་དགའ་ཆེས། རིག་འཛིན་པ་དེ་སློབ་མའི་ཚོགས་ལ་སྐྱོ་བ་བསྐུལ་ཕྱིར་གཞི་མི་འཛིན་པས་ལོ་དེའི་དཔྱིད་སོས་ལུང་སྟོངས་གཅིག་ནས་གཅིག་ཏུ་འཕོ་སྐྱས་ལན་དགུ་མཛད་པས། གཞི་རེ་ཟིན་དུས་འཕོ་དགོས་པ་འདྲ། དེས་རང་ལ་ན་བཟའ་དང་བཟའ་བཏུང་གཉིས་ཀ་མེད། ནམ་ཟླ་དང་གངས་རྩ་ཡུལ་ཤིན་ཏུ་གྲང་བས་ལུས་སེམས་ལ་ངལ་དུབ་དཔག་ཏུ་མེད་པ་བྱུང་། ཕྱེ་དྲེ་གསུམ་དང་དངུལ་ཆུ་རིལ་བུ་རིལ་མ་ཙམ་ཉི་ཤུ་རྩ་གཅིག་ལས་མེད་པ་དེས་ཟླ་བ་གཉིས་ཀྱི་འཚོ་བ་བྱས། ཁ་བ་བབ་དུས་འབོག་གི་དོད་སྒྱེ་གཅིག་ཡོད་པ་དེའི་ནང་དུ་ཞུགས་ནས་གོས་སྟན་གཉིས་ཀའི་གོ་བཅད་པ་སོགས་ཆོས་ཕྱིར་དཀའ་བ་སྤྱད་པ་བསམ་གྱིས་མི་ཁྱབ། ལོ་དེར་རྫོགས་པ་ཆེན་པོ་གསང་བ་སྙིང་ཏིག་གི་དབང་ཁྲིད་གདམས་པ་དང་བཅས་པ་ཐོབ་ཅིང་བསྒོམས། ཕྱི་ལོ་དེ་དབང་གོང་མ་དང་། རྫོགས་ཆེན་སྡེ་གསུམ་གྱི་རྒྱུད་ལུང་མན་ངག་བསྟན་བསྲུང་དང་བཅས་པ་བུམ་པ་གང་བྱོ་ནས་གནང་བས་བསྟན་པའི་རྒྱལ་ཚབ་ཏུ་དབུགས་འབྱིན་མཛད། ལོ་དྲུག་གི་བར་དུ་སྒྲུབ་པའི་དམ་བཅའ་ཕུལ། སུམ་ཅུ་རྩ་གཅིག་པ་ལ་སྙིང་ཕུའི་ཤུག་གསེབ་ཏུ་སྙིང་ཐིག་གི་སྒོ་ནས་སྐལ་ལྡན་དུ་མ་ལ་སྨིན་གྲོལ་མཛད། རྣལ་འབྱོར་པ་འོད་ཟེར་གོ་ཆས་དཀའ་སྤྱད་ཆེན་པོས་མཁའ་འགྲོའི་སྙིང་ཏིག་གི་དཔེ་བཙལ་བ་གཟིགས་ཕུལ་བ་དང་མཚུངས་པར། གཟིམས་ལམ་དུ་ཤན་པ་སྲོག་སྒྲུབ་མས་གླེགས་བམ་གཏད། སང་ཕོད་སུམ་ཅུ་རྩ་གཉིས་པར་མཆིམས་ཕུའི་རི་མོ་ཅན་དུ་སྒྲུབ་པ་ལ་བཞུགས་དུས། སྐལ་ལྡན་གྱི་རྣལ་འབྱོར་ཕོ་མོ་བརྒྱད་ལ་སྙིང་ཏིག་གི་གདམས་པ་བཏབ། སྤྲོས་བཅས་ཀྱི་དབང་གི་དུས་བྱིན་ཕབ་པས། རྣལ་འབྱོར་མ་གཅིག་ལ་སྔགས་སྲུང་མ་མངོན་སུམ་དུ་བབ་སྟེ་འཁྲབ་བྱུང་བས། སློབ་མ་རྣམས་ཀྱིས་ཟིལ་མ་བཟོད་པར། བླ་མའི་ཞལ་
ནས་འདི་མཁའ་འགྲོ་བབས་པ་ཡིན་པ་ཨའུ་ཙི། ང་སྣང་སེམས་རོ་གཅིག་ཏུ་རྟོགས་པའི་རྣལ་འབྱོར་པ་ཡིན་བར་ཆད་མི་འོང་གསུངས། དེར་རྣལ་འབྱོར་མས་བླ་མ་ལ་ཕྱག་བྱས། དཀྱིལ་འཁོར་ལ་བལྟས་ནས། རྨ་བྱ་མ་འཛོམ་པ་ག་རེ་ཟེར། ཡིད་ཀྱིས་བསམ་པ་ཡིན་གསུངས་པས། བརྡའི་ཆོས་ལ་ཡིད་ཀྱིས་ག་ན་འོང་ཟེར། ཡང་བུམ་པའི་སྟེགས་ཀྱི་མཉྫི་དོར་ཏེ་བུམ་པ་གསུམ་སྦྲེལ་ནས་བཞག །ཆོ་གའི་རྣམ་གཞག་ཞིབ་མོ་མཛད་དུས། ཐལ་མོ་སྦྱར་ཏེ་ལེགས་སོ་བརྗོད། རིགས་ཀྱི་ཡི་གེའི་ས་མཐའ་ཆད་ནས་རིག་ཏུ་བོས་པ་ལ། མིན་མིན་རིགས་ཟེར་བ་ཡིན་ཅེས་དང་། སྔགས་བཟླས་དུས་ངའི་ལད་མོ་གྱིས་ཟེར་ནས་མཁའ་འགྲོའི་སྐད་དུ་འདྲེལ་ལ་མ་འདྲེལ་བའི་གདངས་སྙན་པོ་བྱས། དངོས་གཞིའི་སྐབས་སུ། བློ་སྒོམ་དང་བྲལ་ནས་དགའ་བ་ལ། །བློ་སྒོམ་དང་བྲལ་ན་ཨ་རེ་སྐྱིད། །ཞེས་དོན་གྱི་ལྟ་སྒོམ་ཡིད་དཔྱོད་དང་བྲལ་བའི་གླུ་བླངས། མཆོད་པ་ངན་པ་ལ་འདིས་མི་ལྟོ་ཟེར། མཆོད་དབྱངས་སྙན་པོ་བྱས། ཚོགས་ཀྱི་དུས་བླ་མ་ལ་བདུད་རྩི་དྲངས་དུས། འདི་མཁའ་འགྲོའི་དམ་རྫས་ཡིན་པས་ཅིས་ཀྱང་བསྟེན་དགོས་ཟེར་ལྷག་མེད་དུ་དྲངས། དེའི་ཚེ་སློབ་མའི་ཚོགས་ཀྱང་ཉམས་འུར་ནས་གླུ་ལེན་བྲོ་བརྡུངས། ཐ་མལ་གྱི་གཉིད་ལས་འདས་པའི་འོད་གསལ་རྩེ་གཅིག་ཏུ་ཤར། དཔའ་བོ་དང་། མཁའ་འགྲོ་དང་། ཆོས་སྐྱོང་སྣ་ཚོགས་པའི་གཟུགས་བརྙན་མངོན་སུམ་དུ་མཐོང་ནས། བུད་མེད་ནག་མོ་གཅིག་གིས་ཕྱེ་ཕུད་ཉམས་ཟེར་བ་དང་། དམ་ཅན་པ་མི་དཀར་པོར་བསྟན་ནས་ངའི་གཏོར་མ་ལ་དམར་རྒྱན་ཆད་ཟེར་བ་དང་། ཇོ་བོ་མདངས་ལྷ་མི་དཀར་རྟ་དཀར་ཅན་དུ་འོངས་ནས་གཏོར་མ་འདོད་པ་ལ་དམར་གཏོར་སྦྱིན་པས་མ་འདོད་པ་དང་། མཁའ་འགྲོའི་ཚོགས་ཀྱིས་བླ་མ་ལ་གདུགས་འབུབས་པ་དང་། བསྐོར་བ་བྱེད་པ་དང་། ཧཱུཾ་དང་ཕཊ་ལ་སོགས་པའི་སྒྲ་དྲག་པོ་དང་། ཐུག་ཆོམ་ཆེན་པོ་སོགས་ཆོ་འཕྲུལ་བསམ་གྱིས་མི་ཁྱབ་པ་བྱུང་བས། རྣལ་འབྱོར་པ་གཅིག་གིས་དོ་ནུབ་གནམ་ས་ངོ་ལོག་པ་འདུག །
ཤ་དུམ་ཁྲག་དུམ་བྱེད་ལས་ཆེ་ཟེར་ནས་སྐྲག་པ་སོགས་བྱུང་། དེ་བཞིན་དུ་འོད་དེ་གུང་རྒྱལ་དང་། གཉན་ཆེན་ཐང་ལྷ་དང་། སྨན་མོ་མཆེད་བདུན་ལ་སོགས་གཏོར་མ་ལེན་དུ་འོངས། རྡོ་རྗེ་ཕག་མོ་སྐུ་མདོག་མཐིང་ག་རིན་པོ་ཆེ་དང་རུས་པས་བརྒྱན་པ་མངོན་སུམ་དུ་བྱོན་ནས་དྲིས་པས། དོ་ནུབ་དུས་གཉན་པས་ལས་ཅན་གྱི་སློབ་མ་ཉུལ་དུ་འོངས། བླ་མ་དམ་པ་སྐུ་ཁམས་བཟང་ཟེར། ད་ལོ་སྐུ་ཆག་བདོ་བས་ཇི་ལྟར་མཆི་དྲིས་པས། མཁའ་འགྲོ་མས། སངས་རྒྱས་ཀྱི་རྣམ་འཕྲུལ་ལ་བར་ཆད་ག་ན་འོང་། གདུལ་བྱ་ལ་དགོངས་པ་ཡིན། བི་མ་ལ་བོད་ཡུལ་དུ་བྱོན་པ་མི་ཤེས་སམ་ཟེར། ད་ཅི་ཙམ་བཞུགས་དྲིས་པས། ལུག་ལོ་ཕྱི་མའི་བར་བཞུགས། དེ་ནས་གདུལ་བྱ་དང་བསྟུན་པའི་ངེས་པ་མེད་ཟེར། འོ་ན་ང་བླ་མ་ཀུ་མ་རཱ་ཛཱས་གཞན་དོན་ལ་བསྐུལ་ལམ་དྲིས། འོ་འོ་དེ་ཀ་ཟེར་དུས། ངས་གཅིག་པོར་བསྒྲུབས་ན་འོད་ལུས་གྲུབ་བམ། གཞན་དོན་བྱས་ན་སེམས་ཅན་ལ་ཕན་ཐོགས་འོང་། ཇི་ཙམ་ཐུབ་དྲིས་པས། འོད་ལུས་འགྲུབ་ཀྱང་སེམས་ཅན་ལ་ཕན་འདོགས་དགོས། གཞན་དོན་འུར་འུར། ད་ལོ་སུམ་ཅུ་ཐུབ་ཟེར། ང་ལ་བཀའ་སྲུང་ཇི་ལྟར་ཡོད་དྲིས་པས། མང་མང་བླ་མའི་ཐམས་ཅད་ཁྱོད་ལ་ཡོད། ཁྱད་པར་རྡོ་རྗེ་གཡུ་སྒྲོན་མ་ཟེར། དེ་བཞིན་དུ་འགྲོ་དོན་ལྷོ་ནུབ་ཕྱོགས་ན་ཡོད། ཚེ་ཕྱི་མ་འདི་བས་ཀྱང་འགྲོ་དོན་ཆེ་ཟེར། འོ་ན་མཁའ་འགྲོ་སྙིང་ཏིག་ནས་བཤད་པ་དེ་ཡིན་ནམ། དབང་ཁྲིད་གདབ་ཏུ་རུང་ངམ་དྲིས་པས། འོ་དེ་ཀ་དེ་ཀ །མ་ནོར་མ་ནོར། ཆོས་ཀྱི་བདག་པོ་ཁྱེད་རང་ཡིན་པ་ལ་ལོས་ལོས་ཟེར། ཡང་མི་རྣམས་ཀྱིས་ཟོག་པོར་འཛིན་དུ་མི་འོང་ངམ་དྲིས་པས། མིའི་ཁ་ལ་གཏད་པ་ཅི་ཡོད། སྐལ་ལྡན་རྣམས་ཁོ་མོས་སྡུད། སྐལ་མེད་སངས་རྒྱས་ལའང་སྐུར་པ་འདེབས་ཟེར། སྙིང་ཏིག་གི་ཆོས་བཀའ་རྡོ་རྗེ་གཡུ་སྒྲོན་མའི་གནས་སུ་འབྱེད་དམ་དྲིས་པས། འདི་ན་མཁའ་འགྲོ་རང་གཞིན་
གྱིས་འདུ་བས་འདིར་འབྱེད་དགོས་ཟེར། བུམ་ཐང་གི་གཏེར་ཁའི་ལུང་ཡང་གསལ་བར་བཤད། སློབ་དཔོན་ཆེན་པོ་དང་མཇལ་ལམ་དྲིས་པས། ལུང་གསུམ་གྱི་ཕུ། རི་གསུམ་གྱི་མདའ། བྲག་ཆུང་ངེ་བ་ཁ་ནུབ་ཏུ་བལྟ་བའི་གཡས་ཟུར་དུ་མཇལ་ཟེར། བི་མ་ལ་དང་ནམ་མཇལ་དྲིས་པས། མཇལ་ཟིན་འདུག་པ་ལ་ཟེར་རོ། །ངས་རྟོགས་པའི་ལྟ་བ་འདི་སྙིང་ཏིག་གི་དགོངས་པའི་མཐར་ཐུག་གམ་དྲིས་པས། མཐར་ཐུག་པ་ལ་ནོར་འཁྲུལ་མེད་ཟེར། སློབ་དཔོན་རིན་རྡོར་གྱིས་སྤང་སྒང་པ་རིན་ཆེན་རྡོ་རྗེ་ག་ན་བཞུགས་དྲིས་པས། བླ་མ་ལ་མཛུབ་མོ་བཙུགས་ནས་འདི་ན་བཞུགས་འདུག་པ་ཟེར། དེར་བླ་མས། ཁོང་སྐྱེ་བ་དེའི་འོག་ཏུ་བུམ་ཐང་དུ་སྐྱེ་བ་ལ་ང་ག་ན་ཡིན་གསུངས་པས། དེ་ཀ་ལྟར་སྐྱེ་བ་མིན། བར་དུ་ལོངས་སྐུའི་ཞིང་ཉུལ་དགོས་པ་དེ་སློབ་དཔོན་རིན་ཆེན་རྡོ་རྗེས་གཏེར་ཐོན་རྗེས་ལོ་འགའ་ཡར་གསང་ནས་བསྒྲུབ་པ་མཛད་ན་རང་དོན་དུ་འོད་གསལ་ལོངས་སྐུའི་རྩལ་སྦྱངས་དང་། གཞན་ལ་ཕན་པ་རྒྱ་ཆེན་པོ་འོངས་པ་ལ། མ་གསང་བས་སྐུ་ཚེ་མཐར་མ་ཕྱིན། ད་ལྟ་ཁྱེད་དུ་སྐྱེས་དུས་འོད་གསལ་གྱི་སྣང་བ་ལམ་དུ་ཁྱེར་བ་འདི་ནི་ལོངས་སྐུའི་ཞིང་ཁམས་དར་ཅིག་ཉུལ་བ་དེ་ཡིན་ཟེར། ངས་ཕུང་པོ་ལྷག་མེད་ཨེ་འགྲུབ་དྲིས་པས། གཅིག་པུར་བསྒོམ་ན་ད་ལྟ་འགྲུབ། གཞན་དོན་མཛད་པས་བར་དོར་གྲོལ། སྤྲུལ་པས་བུམ་ཐང་དུ་སྐྱེ་བ་བླངས་གཞན་དོན་བྱས། དེའང་ནུབ་ཕྱོགས་ཨོ་རྒྱན་གྱི་ཡུལ་དུ་གཤེགས་ནས་སངས་རྒྱ་བའི་ཚུལ་སྟོན་གསུངས། ཡང་ངས་སྙིང་ཐིག་གི་ཕན་ཐོགས་བི་མ་ལ་དང་། མཁའ་འགྲོ་གཉིས་གང་ཆེ་དྲིས་པས། གཉིས་ཀས་ཕན་ཐོགས། བི་མ་ལ་རྒྱ་ཆེ་ལོ་བརྒྱ། མཁའ་འགྲོ་སྙིང་ཏིག་ལོ་ལྔ་བརྒྱར་གནས། ད་ནས་མགོ་རྩོམ་པ་ཡིན་ཟེར། དེར་བླ་མ་ཡང་ཐུགས་ཉམས་འུར་ནས་སྐུ་བཞེངས་ཏེ་རྡོ་རྗེའི་གླུ། ཚེ་འདི་ཡང་བདེ་སྟེ་ཕྱི་མ་སྐྱིད། །བར་དོ་རང་ངོ་ཤེས་པས་བདེ། །ད་ནི་བདེ་བའི་བདེ་བར་འགྲོ། །གླུ་མཆོད་པར་འབུལ་ལོ་
དཀོན་མཆོག་གསུམ། །ཐུགས་དགྱེས་པར་མཛོད་ཅིག་མཁའ་འགྲོའི་ཚོགས། །ཞེས་པའི་མཐའ་ཅན་དེ་གནང་། ད་དུང་མཁའ་འགྲོའི་སྣང་བ་བསམ་གྱིས་མི་ཁྱབ་པ་མཐོང་ཞིང་དེ་ཐམས་ཅད་མཐར་བླ་མ་ལ་ཐིམ། བླ་མ་ཡང་རེས་ལོངས་སྐུར་གནས་འགྱུར་བ་སོགས་མཐོང་། དེར་ཉེར་བརྒྱད་ཀྱི་ཉིན་གཅིག །ལྷོ་ནུབ་མཚམས་ནས་སློབ་དཔོན་ཆེན་པོ་སྐུ་མདོག་དཀར་གསལ་ཟ་འོག་གི་བེར་དང་། ཤེའུའི་མཉེན་ཞུ་ཅན་འཁོར་དཔག་ཏུ་མེད་པས་བསྐོར་ནས་བྱོན་ཏེ་བླ་མ་ལ་ཐིམ་པ་མཐོང་། དེའི་ནུབ་མཁའ་འགྲོ་མ་རུས་པའི་རྒྱན་ནམ་མཁའ་ལ་བུན་བུན་འགྲོ་བས་བླ་མ་ལ་མཆོད་པ་བྱེད་ཅིང་། བུད་མེད་སྨུག་ནག་གསུམ་བྲོ་འཁྲབ་པ་དང་། ངེད་ཡོང་ཡོང་བདེ་ཆེན་གྱི་གནས་ནས་ཡོང་། །ལས་ཅན་གྱི་སློབ་མ་ཉུལ་དུ་འོངས། །དམ་ཚིག་གི་གཙང་སྦྲ་བལྟ་རུ་འོངས། །འགྲོ་དོན་མཛོད་ཅིག་རིགས་ཀྱི་བུ། །ཟེར་བ་དང་། ཡང་ནང་མཆོད་མཛད་པའི་དུས་སློབ་དཔོན་ཆེན་པོའི་གཡས་ན་བི་མ་ལ། གཡོན་ན་རྡོ་རྗེ་ཕག་མོ། མདུན་ན་མཁའ་འགྲོ་མ་མང་པོ་མི་རྐང་འབུད། རྒྱབ་ན་སྔགས་པ་མང་པོ་འཆམས། མཁའ་འགྲོ་མ་གསེར་གྱི་གོ་ཞུབ་ཅན་མང་པོས་གླུ་གར་བྱེད་ཅིང་བསྐོར་བའི་དབུས་ན་བླ་མ་བཞེངས་ནས། དགའ་འོ་སྐྱིད་དོ་རྣལ་འབྱོར་ཀུན། །དུས་དོ་ནུབ་འོག་མིན་དག་པའི་ཞིང་། །རང་ལུས་ཞི་ཁྲོའི་ཕོ་བྲང་ན། །སྟོང་གསལ་རྒྱལ་བའི་དཀྱིལ་འཁོར་རྒྱས། །སངས་རྒྱས་ཕྱི་ན་མེད་དེ་ནང་ན་ཡོད། །ཅེས་དང་། སེམས་གཅིག་པུར་གནས་པའི་བསམ་གཏན་པ། །ཡིད་གཅིག་ལ་མི་འཛིན་གང་བདེར་ཐོང་། །སེམས་འཕྲོ་ཡང་སྟོང་ལ་གནས་ཀྱང་སྟོང་། །གང་ཤར་ཡེ་ཤེས་ཀྱི་རོལ་པ་ཡིན། །ཅེས་པ་ལ་སོགས་རྡོ་རྗེའི་གླུ་བཞེངས། དེ་དུས་རྡོ་རྗེ་གཡུ་སྒྲོན་མ་དཀར་མོ་མཆེད་བདུན་དང་བཅས་པ་བྱོན་ནས་ངའི་གནས་སུ་གཤེགས་པ་ཞུ་ཟེར། བླ་མས་ང་ཁྱེད་ཀྱི་གནས་སུ་རྒྱུན་དུ་སྡོད་དགོས་གསུངས་པས། རྒྱུན་དུ་བཞུགས་ན་དགའ་སྟེ་དགུན་སྟོད་ལས་མི་བཞུགས་པ་འདྲ། ཁྱོད་ང་ལ་ཅིའི་ཕྱིར་འགྲོ་དྲིས་
པས། གུ་རུའི་དམ་འོག་ཏུ་ཆུད་པས་གཏེར་གྱི་ཕྱི་ལ་འབྲངས་ཟེར། དེར་ཆོས་ནི་ཕ་གིར་ཡོད། འདོད་མཁན་ནི་ཤི། འདིར་ཅི་བྱེད་བྱས་པས། ཆོས་ཕ་གི་ན་ཡོད་ཀྱང་དོན་འདི་ན་ཡོད། ཁྱེད་ཚེ་འཕོས་ཀྱང་སྐལ་ལྡན་ཚེ་མ་འཕོས་པས་ཡོང་བ་ཡིན་ཟེར། བཀའ་སྲུང་རྣམས་ལུང་བསྟན་ཅིང་། འདི་ཤིན་ཏུ་གཉན་པས་སྐུ་ཚེ་ལ་བར་ཆད་འོང་ཉེན་ཡོད། ཁྲིད་ཐེབས་ཉུང་ན་དགའ་ཟེར། ང་ཡི་གཏེར་ཤོག་རྣམས་ཨེ་ཡོང་དྲིས་པས། སིབ་སིབ་ངེད་རྣམས་ཀྱི་ཡིད་སྒུལ་བ་ཡིན་མོད་ཟེར། ཡང་ངས་ཁྱེད་ལ་དབུ་རུར་དངོས་གྲུབ་བྱིན་པ་མི་དྲན་ནམ་ཟེར། སྔར་ཅོག་ལའི་བྲག་ཕུག་གི་དེ་དྲན་ནས་རྡོ་རྗེ་གཡུ་སྒྲོན་མ་ཨེ་ཡིན་བྱས་པས། མིན་མིན། རྡོ་རྗེ་ཕག་མོ་ཡིན་ངོ་མ་ཤེས་སམ་ཟེར། འདི་ན་འཇིག་རྟེན་པའི་གཟུགས་ཀྱིས་ཕྲིན་ལས་བྱས་པ་དང་། འདས་པའི་གཟུགས་ཀྱིས་མཆོག་གི་དངོས་གྲུབ་སྟེར་བའི་རྣམ་པ་ཆ་ཕྱེད་དགོས་པའོ། །འདི་ནས་ཐིག་ལེ་གཙོ་བོར་བཤད་ནས་དབང་གསུངས་པ་རྟེན་ཅན་དུ་བསྐུར་བ་ཇི་ལྟར་ལགས་དྲིས་པས། དེ་ཆགས་ཆེན་ལམ་དུ་འཇུག་པ་ལ་དགོས་པ་ཡིན། ཆགས་བྲལ་ལ་ཡིད་རིག་ཙམ་གྱིས་ཆོག་གསུངས། ངོ་སྤྲོད་ཀྱི་སྐབས་སུ་རྟོག་པ་སྐྱེ་མེད་དུ་འཇོག་པ་དང་། བློ་རྩིས་མེད་དུ་འཇོག་པ་གང་ཡིན་དྲིས་པས། རྟོག་པ་ལ་བརྟན་པོས་ཅི་བྱེད། ཡེ་གྲོལ་ཀློང་ཡངས་ཆེན་པོར་ངོ་སྤྲོད་ཅིག་ཟེར། འོ་ན་སྙིང་ཏིག་འདི་བཤད་མི་མང་པོ་ནི་སྣང་ན་ངས་བཤད་ཅི་དགོས། ལུང་བྱེད་པ་ཀརྨ་པ་དང་། རིན་ཆེན་གླིང་པ་སོགས་པའང་འདུག་པས་སོ་བྱས་པས། བཤད་ཚུལ་དེ་དག་ལ་ངེད་མི་མགུ། ལུང་དང་རྫ་ལའང་ཡོང་སྟེ། དེས་གར་ཆོག །བདག་པོ་རེ་ཡོད་པ་དེ་དགོས་པ་ཡིན་མོད་ཟེར་རོ། །རིན་ཆེན་གླིང་པའི་གཏེར་ཁ་དྲིས་པས་ཡིན་པ་མ་ཡིན། དག་རྒྱུ་མེད་ཟེར། ངས་ཁྱེད་མ་བསྒོམས་པར་གྲུབ་པའི་རྒྱུ་དྲིས་པས། ང་ལ་སྒོམ་པའི་ལྷ་འདུག་གམ། བཟླས་པའི་སྔགས་འདུག་གམ། མཆོད་པའི་ཡུལ་འདུག་གམ། རྣལ་འབྱོར་
པ་དམ་ཚིག་དང་རྟོགས་པར་ལྡན་པ་ཀུན་ལ་ང་རྒྱུན་དུ་ཡོད་པ་མི་ཤེས་སམ། ཁྱོད་དང་ཚེ་རབས་ཐམས་ཅད་དུ་འདུ་འབྲལ་མེད་ཟེར། མཆིམས་ཕུར་ལྷ་ལྕམ་གྱི་ནོར་ཡོད་པ་དེ་ཅི་འདྲ་ཞིག་འདུག་དྲིས་པས། བྲག་ལྷ་བཤོས་འདྲ་བ་རྩེ་མོ་མེད་པ་གཅིག་ན་འདུག །ད་དུང་དུས་ལ་མ་བབ་ཟེར། བི་མ་ལའི་གཏེར་ཇི་ཙམ་ན་འདོན་དྲིས་པས་ད་ནས་ལོ་བཅོ་ལྔ་ན་སྔགས་པ་དཀར་པོ་གཅིག་གིས་བཏོན་ནས་དར་བར་བྱེད། ཟབ་པ་པོད་བཞི་ཁྱེད་རང་གི་ལག་ན་འོང་བར་འདུག་ཟེར། དེར་ཟླ་བ་ཚེས་པའི་ཚེས་བཅུ་གཅིག་ལ་རྣལ་འབྱོར་པ་འོད་ཟེར་གོ་ཆ་དཔེ་ལེན་དུ་བཏང་ནས་ལམ་དུ་འོང་དུས། འཇའ་ཚོན་ཅིག་དཔེ་ལ་ཟུག་ཅིང་འཁོར་བ་དང་། ཁྱད་པར་ཟུང་མཁར་མདའི་རྡོའི་མཆོད་རྟེན་གྱི་ཉེ་ལོགས་ཕྱུག་པོ་བྲག་ཅེས་བྱ་བར་སླེབ་པའི་མཚན་མོ་རི་མོ་ཅན་ནས་འདིའི་བར་འཇའ་ཚོན་ཁ་དོག་སྣ་ལྔས་འདྲེལ་བ་རྣལ་འབྱོར་པ་ཕོ་མོ་ཀུན་གྱིས་མཐོང་ངོ་། དེར་ཚོགས་འཁོར་བསྐངས་ལ་སོགས་པ་མཛད་ནས་མན་ངག་མཁའ་འགྲོའི་སྙིང་ཏིག་གི་ཆོས་སྒོ་ཕྱེ། མཚན་མོ་འོད་གསལ་གྱི་སྣང་བ་ལས་ཆོས་སྐུའི་དགོངས་པ་ཀ་དག་གི་དབྱིངས་སུ་འཁྱིལ་ཚུལ། དེའི་རྩལ་སྣང་ལོངས་སྐུའི་འཆར་ལུགས། ཕྱིར་གསལ་ལས་སྤྲུལ་པའི་སྐུ་འགྱེད་ཅིང་། རིགས་དྲུག་གི་འཆར་ཚུལ་སོགས་འོད་གསལ་གྱི་ཆོས་སྐད་སྒྲ་བོ་ཆེ་དང་། རྩིས་པོ་ཆེ་དག་གིས་ཀྱང་ཕྱོགས་མི་མཚོན་པའི་ངོ་བོའི་བཞུགས་ཚུལ་ཆེན་པོ་གང་ཡིན་པ་བླ་མ་ཡི་དམ་མཁའ་འགྲོའི་ཚོགས་ཀྱིས་ཐུགས་རྒྱུད་ལ་མངོན་དུ་གསལ་བར་བྱིན་གྱིས་བརླབས་ཤིང་། མཁའ་འགྲོ་མས་ངོ་སྤྲོད་ཅེར་མཐོང་དུ་མཛད། དེའི་ཚེ་མན་ངག་མཁའ་འགྲོའི་ཡང་ཏིག་གི་ཡིག་ཆ་འཇོག་དུས་སློབ་དཔོན་རིན་པོ་ཆེ་ཐུགས་སྒྲུབ་ཀྱི་ཆ་ལུགས་སུ་བྱོན། གཡས་ན་འཚོ་རྒྱལ་དང་། གཡོན་ན་གཡུ་སྒྲོན་མས་ཚིག་དཔོད་པ་རྣལ་འབྱོར་མ་མཁའ་འགྲོའི་མཚན་རྟགས་ཚང་བ་གཅིག་གིས་ཀྱང་མཐོང་། ཁྱད་པར་དུ་ཡེ་ཤེས་འཚོ་རྒྱལ་ཉིན་ཞག་དྲུག་གི་བར་དུ་དངོས་སུ་
བྱོན་ནས་མཁའ་འགྲོའི་སྙིང་ཏིག་གི་བརྡའ་དོན་དཔེ་གསུམ་ངོ་སྤྲོད་གཏད་རྒྱ་དང་བཅས་མཛད་པས་དམིགས་པ་དང་། ངོ་སྤྲོད་ལུགས་དང་། བརྗོད་པའི་ཚུལ་ངོ་མཚར་ཅན་སྔ་ན་མ་གྲགས་ཤིང་། ཡི་གེ་ན་མི་གསལ་བ་མང་པོ་ཐུགས་ལ་རང་རྡོལ་དུ་བྱོན་པས་གངས་རིའི་ཁྲོད་ན་གཞན་སྙིང་ཏིག་གི་ཡི་གེ་ཟབ་མོར་གྲགས་པ་ཇི་སྙེད་ལའང་། ཀུན་ཏུ་བཟང་པོ་གཉིས་པས་ཆོས་ཀྱི་འཁོར་ལོ་བསྐོར་བའི་དགོངས་གཏེར་རྒྱ་མཚོའི་རྡོ་རྗེའི་གནས་འདི་ན་གསལ་བའི་ཟབ་གནད་ཀྱི་ཆ་ཤས་ཀྱིས་ཀྱང་མ་གོས་པ་ཉིད་དུ་མཐོང་བས། ཡིག་ཆ་འདི་ལ་མ་བརྟེན་པ་གང་ཞིག་རི་མོའི་མར་མེ་དང་མཚུངས་པ་ཉིད་དུ་རིག་པར་བྱས་ནས་བསྟན་པ་འདི་ལ་གཅེས་སྤྲས་སུ་བྱ་བར་འོས་སོ། །འདི་ལྟར་གདམས་པའི་ས་བོན་ཕལ་ཆེར་གནས་འདིར་བྱུང་ཡང་གཏན་ལ་འབེབས་ས་གངས་རི་ཐོད་དཀར་དུ་མཛད་པས་སྦྱར་བྱང་ལ་དེ་ལྟར་ཐེབས་པ་ཡིན་ནོ། །ལར་ཆོས་འདི་མཁའ་འགྲོའི་སྙིང་ཁྲག་ལྟ་བུར་གྱུར་ལ་གནས་འདིའང་བྱིན་རླབས་ཆེ་བས་རྩ་བ་གསུམ་དང་མཁའ་འགྲོའི་འདུ་བ་ཟད་མི་ཤེས་པ་དང་། རྨ་བྱའི་གདུགས་རིན་པོ་ཆེའི་ཏོག་གིས་མཚན་པ་བླ་མའི་དབུ་སྟེང་ན་བཟུང་བ་མཐོང་བ་དང་། དཀྱིལ་འཁོར་གྱི་ཐིག་མཛད་དུས་ཐིག་སྣ་བུད་མེད་དམར་མོས་འཛིན་པ་དང་། རེ་ཁཱ་དགྲམ་པའི་ཚེ་བུད་མེད་གསེར་གཡུའི་ལན་ཚར་ཅན་གྱིས་འབྲི་རོགས་བྱེད་པ་དང་། དབང་གོང་མའི་དུས་སློབ་མ་བདུན་ཙམ་ཚོགས་པ་ལ། ཤངས་ཁྲག་གློ་བུར་དུ་བྱུང་ནས། བླ་མའི་གསུང་གིས་དབང་འདི་ལ་གསུམ་ལས་མི་ཚུད་པ་ལ་གྲངས་ཐལ་བས་ལན། ཁྱེད་བཞི་ཕྱིར་དེངས་གསུངས་པས་དབང་ཁང་ལ་འཇའ་ཚོན་ཟུག་པ་དང་། ནམ་གྲུ་རེ་མ་ཏིས་མངོན་སུམ་དུ་འོངས་ནས་ང་ལ་གཏོར་མ་མི་སྟེར་བ་ཨེ་ཡིན། ངས་དཀའ་ལས་ཡུན་རིང་རབ་བྱས་ཟེར་ནས་རང་ཉིད་གཙོ་འཁོར་རྣམས་ཀྱི་མངོན་རྟོགས་གསལ་བར་བཤད་ཅིང་། གཏེར་གྱི་ལུང་བསྟན་དང་ཆོ་འཕྲུལ་ཆེན་པོ་བསྟན་པས། ད་ནང་འོད་གསལ་གྱི་གཏེར་ཁ་ཕྱེད་པ་ལ། །བྲག་སེར་ཀའི་གཏེར་གྱིས་དགོས་པ་མེད། །གཏེར་ཡོད་ཀྱང་ཆོག་ལ་མེད་
ཀྱང་ཆོག །སྐལ་ལྡན་ཡིན་ཀྱང་ཆོག་ལ་མིན་ཀྱང་ཆོག །ཆོས་ཟད་བློ་ཟད་ཀྱི་རྣལ་འབྱོར་ལ། །ཁྱེད་གཏེར་སྲུང་གིས་ཡུས་ཆེ་འཚོང་མི་དགོས། །ཞེས་གསུངས། རྒྱབ་ཆོས་དང་རིན་པོ་ཆེ་གསང་བའི་ངོ་སྤྲོད་མཛད་པའི་ཚེ། ཡེ་ཤེས་འཚོ་རྒྱལ་གྱིས་བུམ་པ་བསྣམས་ནས་དབང་བསྐུར་བ་མཐོང་བས་ཐམས་ཅད་འུར་ལངས་ཕྱག་ཚོལ་ཟེར་བ་བྱུང་། བར་དོ་དང་འོད་གསལ་སྦུབས་འཇུག་གི་ངོ་སྤྲོད་མཛད་དུས། མཁའ་འགྲོ་མ་རྣམས་མཉེས། ངའི་ཆོས་འདི་ལ་མི་ལས་མི་མ་ཡིན་རྩིས་ཆེ་ཞིང་དོན་གཉེར་དང་འདུན་པ་ཆེ་བར་འདུག་ཁྱེད་རང་ཚོ་སེམས་ལ་ཞོག་གསུངས། འོད་གསལ་ཡེ་ཤེས་ཀྱི་ངོ་སྤྲོད་མཛད་པའི་ཚེ་བར་སྣང་ཐམས་ཅད་མཁའ་འགྲོས་གང་ནས་ཐལ་མོ་སྦྱར། ནུབ་མོ་སྔགས་སྲུང་མ་བབས་ནས་གར་བྱེད་པ་ལ། བླ་མས་ཁོ་བོ་སྙིང་ཏིག་དེ་ལྟར་དུ་སྟོན་པ་ཡིན། ཁྱེད་བཀའ་སྲུང་དང་མཁའ་འགྲོ་རྣམས་ཨེ་དགའ་གསུངས་པས། གུ་རུ་དང་ཡེ་ཤེས་འཚོ་རྒྱལ་དེ་བཞིན་གསུངས། གཞན་དེ་ལྟར་ཤེས་པ་ག་ན་ཡོད་ངོ་མཚར་ཆེ། སྤྱིར་མཁའ་འགྲོ་ཐམས་ཅད་དགའ། ལྷག་པར་ཨུ་རྒྱན་རྫོང་ན་གསོལ་བ་འདེབས་པ་གཅིག་མཉེས་ནས་གདའ་ཟེར། དེ་ནས་སྐྱེས་བུ་ཆེན་པོ་བྱུང་ནས་ཨུ་རྒྱན་རྫོང་དུ་འབྱོན་པར་བསྐུལ། ཁྱེད་ལ་སློབ་མ་འགྲོ་དོན་ནུས་པ་སུམ་ཅུ་འོང་། དེའི་ནང་ནས་ཀྱང་སེམས་ཅན་ལ་ཕན་པ་ཆེ་བ་བཅུ་གཅིག་ཡོང་། ཁྱད་པར་ཅན་དགུ་ཡོང་། ཁྱེད་ཚོ་བླ་མ་འདི་དང་འཕྲད་པ་འཚེངས་པ་ཡིན་ཟེར། ཆོས་སྐྱོང་གི་གཏད་རྒྱ་བྱེད་དུས། ཤན་པ་སྲོག་སྒྲུབ་མས་ངའི་སྒྲུབ་ཐབས་མི་ཀློག་པ་ཞུ་ཟེར་བའང་བྱུང་། དེ་ལྟར་མཁའ་འགྲོ་སྙིང་ཏིག་གི་དབང་ཁྲིད་ཐམས་ཅད་རྫོགས་པའི་ནུབ། ཁ་སང་ནས་མཁའ་འགྲོ་མ་རྣམས་ཀྱིས་དངོས་གྲུབ་བྱིན་པ་ཡིན། དོ་ནུབ་བོས་ཀྱང་ཨེ་ཡོང་བལྟ་ཡི་ཆང་ལ་ཆུ་རྒྱོབ་ཅིག་གསུངས། ཡོད་ཚད་བཙགས་པས་རྫ་ཆུང་གང་བྱུང་། དེས་ཆོག་ལས་ཆེ་ཞུས་པས། དེས་མི་ལྡང་ད་དུང་ཆུ་རྒྱོབ་ལ་ཚོགས་གསུངས། དེ་བཞིན་བྱས་པས་བཙགས་ཚད་
ཆང་དུ་བྱུང་ནས་དེར་ཚོགས་པ་ཐམས་ཅད་བཟི་བ་ཙམ་སོང་བས། དངོས་པོ་སྤྲུལ་བསྒྱུར་བྱ་བ་དེ་ལྟར་ཡིན་གསུངས། དེ་ནས་གཡུ་སྒྲོན་མས་ཀྱང་ངའི་གནས་སུ་གཤེགས་པ་ཞུ་ཞེས་བསྐུལ་ནས་ཞལ་གྱིས་བཞེས་ཙ་ན། ཤིན་ཏུ་དགའ་བའི་ཚུལ་གྱིས་ཁོ་མོ་སྔོན་ལ་འགྲོ་ཟེར། དེར་ནམ་གྲུ་མ་བབས་ནས་བླ་མ་མི་གཤེགས་པར་ཞུ་ཟེར། ཁྱེད་མི་མ་ཡིན་རྣམས་ལ་ངས་ཆོས་དེ་འདྲ་བཤད་ཀྱང་མ་གོ། དགའ་མི་དགའ་བློའི་ཆོ་འཕྲུལ་ཡིན། ང་གང་ཡོད་སར་འོངས་པས་ཆོག་གསུངས་ནས་ཏིང་ངེ་འཛིན་གྱི་དབང་བསྐུར་ཅིག་མཛད་པས་ཐུགས་ལ་བཏགས་ཟེར། ཁ་སང་གར་དེངས་དྲིས་པས། འབྲོག་ཏུ་སྡུད་ཅིག་ལ་ཕྱིན་ཟེར། དེ་དུས་ཕྱུགས་ནད་མང་པོ་བྱུང་བར་གྲགས། དེ་ནས་རྣལ་འབྱོར་ཕོ་མོ་རྣམས་ཀྱིས་ཀྱང་རང་རང་གི་གོས་དང་རིན་པོ་ཆེའི་མཎྜལ་ཕུལ། བསྒྲུབ་པའི་དམ་བཅའ་བྱས་པས། ངའི་ཆོས་འདི་ལ་གཏོང་ཕོད་དང་སྒྲུབ་པའི་དམ་བཅའ་ལ་བརྩོན་པ་མང་པོ་ཡོང་གསུངས། ཡང་འོད་གསལ་སྦུབས་འཇུག་གི་གདམས་པ་གསུངས་ནས། ངའི་མན་ངག་འདི་དག་འཛམ་བུའི་གླིང་ན་དཀོན་པ་ཡིན། སྣོད་ཀྱིས་འཆུན་ན་འོད་ལུས་མྱུར་དུ་འགྲུབ་བོ་གསུངས། བསམ་ཡས་མཆིམས་ཕུ་ནས་ཕྱགས་ཕེབས། ཕྱུག་པོ་བྲག་ཏུ་ཚོགས་འཁོར་མཛད། གཡུ་སྒྲོན་མས་བསུ་བའི་རྣམ་པ་ཡང་བྱས། དེ་ནས་ཤུག་གསེབ་ཏུ་གདན་དྲངས་དུས་རྣལ་འབྱོར་མ་གཅིག་ལ་མཁའ་འགྲོ་བབས་ནས་བླ་མ་ཨུ་རྒྱན་དུ་གཤེགས་པར་ཞུ་ཟེར། དེ་ནས་གངས་རི་ཐོད་དཀར་ཨུ་རྒྱན་རྫོང་འོད་ཟེར་སྤྲིན་གྱི་སྐྱེད་མོས་ཚལ་དུ་ཕེབས། རྣལ་འབྱོར་པ་འོད་ཟེར་གོ་ཆས་གསོལ་བ་བཏབ་ནས་མཁའ་འགྲོ་ཡང་ཏིག་གཏན་ལ་ཕབ། དེའི་ཚེ་ནམ་མཁའ་འཇས་ཁེངས། མཁའ་འགྲོའི་སྣང་བ་དང་ཆོ་འཕྲུལ་ཟད་མི་ཤེས་པ་ཀུན་གྱི་མཐུན་གྲུབ་ཏུ་བྱུང་། དེ་དག་གི་བར་སྐབས་ཅི་རིགས་པར་བླ་མའི་དྲུང་དུའང་གདམས་ངག་གི་ཞུན་ཐར་བཅད། གང་དུ་བཞུགས་སར་སྒྲུབ་པའི་རྒྱལ་མཚན་བཙུགས་ནས་བླ་མ་མཉེས་པར་བྱས། འདི་སྣང་ལ་ཆགས་
ཞེན་མེད་ཅིང་འཁོར་འདས་ལ་རེ་དོགས་སུ་འཛིན་པ་དག་པས་དགོན་གནས་དང་གཞི་འཛིན་པའི་འདུ་འགོད་མ་མཛད། བླ་མའི་དྲུང་དུ་འཁོར་གསུམ་ཡོངས་སུ་དག་པའི་འབུལ་བ་ལན་ལྔ། འབུལ་མོ་ཆེ་གཉིས་དང་། བདུན་རྣམ་དག་གིས་མཆོད། ཟླ་བ་བྱུང་ངོ་ཅོག་གི་ཚེས་བཅུ་རྣམ་གཉིས་དང་། བརྒྱད་མཆོད་བཟུང་ནས་དཔའ་བོ་དང་མཁའ་འགྲོ་རྣམས་ཚོགས་གཏོར་རྒྱ་ཆེན་པོས་མཉེས་པར་མཛད། གནས་འདིར་འོད་གསལ་ཐོད་རྒལ་གྱི་གསེབ་ལམ་ལས་རིག་པ་ཚད་ཕེབས་ཀྱི་གྲོང་ཁྱེར་ག་ན་བ་དེར་བྱོན་ཏེ་རྒྱུན་གྱི་རྣལ་འབྱོར་ལྷུམས་སུ་ཞུགས། ཡི་དམ་གྱི་ལྷ་དཔག་ཏུ་མེད་པ་ཞལ་མཇལ། ཁྱད་པར་སློབ་དཔོན་བི་མ་ལའི་ཞལ་གཟིགས་ནས། ངའི་སྙིང་ཏིག་འདི་དོན་བསྡུས་གོ་སླའི་སྙིང་ཁུ་ཞིག་སྡེབས། ཀུ་མ་རཱ་ཛའི་སྐྱེ་བ་ད་ལྟའི་སློབ་མ་གཞོན་ནུ་སངས་རྒྱས་ལ་སྟོན། དེ་ནས་ཀྱང་སྣ་ལ་ཨ་ཡིག་གིས་མཚན་པའི་གཞོན་ནུའི་མིང་ཅན་བདུན་འབྱུང་བས་ཆོས་འདི་འཛིན་སྤེལ་བྱེད་པར་ལུང་བསྟན་པས་ཡང་ཏིག་ཡིད་བཞིན་ནོར་བུ་ཆོས་སྡེ་སུམ་ཅུ་རྩ་ལྔ་པར་གདམས། དེ་བཞིན་དུ་བི་མ་ལས་དབུ་རུ་ཞྭའི་ཕྱོགས་སུ་སྡིགས་མཛུབ་གཏད་ནས་ཞིག་གསོས་དགོས་པར་ལུང་བསྟན་པ་ལྟར། དེ་ཉིད་དུ་བྱོན་ནས་ཞིག་གསོས་མཛད་པའི་ཚེ། མནན་པའི་ཐོད་པ་མང་པོ་ནམ་མཁའ་ལ་འཕར་བ་ཏིང་ངེ་འཛིན་གྱི་ངང་ལས་སྡིགས་མཛུབ་གཏད་པ་ཙམ་གྱིས་བཀུག དབུ་རྩེའི་རྒྱབ་ནས་ལྷ་ཁང་གསོ་བའི་ཐེབས་གསེར་འགུ་ཙེ་གང་བཅུས། དམ་ཅན་བྱིས་པ་གཡུ་རྣ་ཅན་དུ་སྤྲུལ་ནས་ཉིན་བཞིན་བཟོ་བོའི་གྲོགས་བྱས། རྡོ་རིངས་ཆེན་པོ་གཉིས་འགྱེལ་བ་ཐབས་དང་དཔུང་གང་གིས་ཀྱང་སླང་མ་ནུས་པར། ཆོས་སྐྱོང་ལ་གཏོར་མ་བྱིན། བདེན་ཚིག་བརྗོད། ཐུགས་འུར་བའི་ཚུལ་གྱིས་སྐུ་ཆོས་བརྡབས་པས་མོད་ལ་སློང་ནུས་པ་བྱུང་། ཐོད་པ་སྣ་ཚོགས་ན་དམ་སྲི་མནན་ཡོད་པའི་བཅའ་ག་ཞིག་པ་རྣམས་སོར་བཙུད་དེ་སླར་ཡང་དེ་ཉིད་དུ་རྒྱས་འདེབས་པར་བརྩམས་པ་ན། འཐོར་རླུང་དྲག་པོ་གཡོས། ས་རྡོའི་ཆར་བབས་པས་མི་
རྣམས་ཀྱང་བྲོས། ཐོད་པ་རྣམས་འཕར་ནས་ཕན་ཚུན་བརྡབས། ཆེ་ཤོས་ཤིག་དམ་སྲིའི་འཕྲུལ་གྱིས་ནམ་མཁའ་ལ་ཡར་བ་དྲག་ཤུལ་རབ་ཏུ་འབར་བའི་ཏིང་ངེ་འཛིན་དང་། ལྟ་སྟངས་ཀྱིས་བཀུག་ནས་ཞབས་ཀྱི་འོག་ཏུ་བཙུད་པས། གསལ་བ་གྱད་དུ་གྱུར་པའི་རྟགས་གུ་རུ་དྲག་པོའི་སྐུར་གཞན་གྱིས་དངོས་སུ་མཐོང་། སླར་ཐོད་པ་རྣམས་ཕྲ་མེན་མཆོད་རྟེན་གྱི་ཞབས་སུ་མནན། རབ་གནས་ཀྱི་དུས་སྐུའི་བཀོད་པ་དུ་མ་ངོ་མཚར་བར་བསྟན། ཐུབ་པ་བྱམས་པ། གནས་བསྟན་བཅུ་དྲུག་རྣམས་ཞལ་འཛུམ་ལྷག་ལྷག་སྟོན་པ་དང་། བྱམས་པས་ཕྱག་མཛུབ་གདེངས་ནས། ཁྱོད་ཀྱི་སྐྱེ་བའི་མཐར་པདྨ་བརྩེགས་པའི་ཞིང་དུ་དེ་བཞིན་གཤེགས་པ་རི་རབ་མར་མེའི་རྒྱལ་མཚན་དུ་འཚང་རྒྱའོ་ཞེས་པའི་ལུང་བསྟན་ཐོབ། དབུར་སྟོད་སྐྱིད་ཆུའི་འགྲམ་ཕན་ཚུན་གཉིས་ཀར་ཆོས་ཉན་མང་དུ་འཚོགས་པ་ལ་གསང་བ་བླ་ན་མེད་པའི་ཁྲིད་བཏབ། ཚོགས་པ་རྣམས་ལ་ཚོགས་ཀྱི་འཁོར་ལོ་རྒྱ་ཆེན་པོ་ཡང་ཡང་གནང་། གསང་ཕུའི་ཆོས་གྲ་ལའང་སྔ་ཕྱིར་གནང་བྱིན་བཟང་པོ་མཛད། གང་པོ་རིའི་ཐད་ནས་གདོང་འཇིགས་སུ་རུང་བ་ཞིག་གཟིགས། འཇིག་རྟེན་ལ་མི་དགེ་བ་དང་། ས་ཕག་གི་རྩོད་པ་འོང་བ་མཁྱེན་ནས་མོན་བུམ་ཐང་དུ་ཕེབས། བསྟན་པའི་སྣང་བ་ཉུང་བས་ཤིན་ཏུ་གདུལ་དཀའ་བའི་གནས་དེར་ཡང་གདུལ་ཞིང་རྒྱ་ཆེ། ཚོགས་པ་མང་པོ་འདུ་བའི་དགེ་འདུན་གྱི་སྡེ་བཙུགས་ཏེ་ཐར་པ་གླིང་དུ་བཏགས། སློབ་དཔོན་སངས་རྒྱས་ཀུན་དགའ་བསྐོ་འཇའ་གནང་། སྔ་འགྱུར་སྤྱི་དང་རྫོགས་ཆེན་གྱི་ཕྲིན་ལས་སྤེལ། གསང་སྔགས་རང་དགར་སྤྱོད་པ་དག་ལ་མིག་ལྟོས་བསྟན་པའི་ཆེད་བྱར་ནས་གཏེར་སྟོན་གྱི་དངོས་སློབ་ཤོའི་རྒྱལ་སྲས་ལེགས་པ་ལས། མཁའ་འགྲོ་སྙིང་ཏིག་གི་ཚིག་རྒྱུད་གསན། ལྷ་སར་བྱོན་ནས་ཇོ་བོ་མཇལ་དུས་མཛོད་སྤུ་ནས་འོད་ཟེར་བྱུང་སྟེ་ཉིད་ཀྱི་སྨིན་མཚམས་སུ་ཐིམ་པས་བྱ་རྒོད་ཕུང་པོ་དང་། ལི་ཡུལ་རྣམས་སུ་པཎྜི་ཏར་སྐྱེ་བ་བླངས་པ་དྲན། གནས་འདིར་དགེ་འདུན་མང་པོའི་བསུ་བ་སེར་ཕྲེང་གིས་བསུས། ལྷ་ས་དང་ར་མོ་ཆེའི་བར་དུ་ཆོས་
ཁྲི་བརྩིགས་པའི་སྟེང་ནས་སེམས་བསྐྱེད་ཆེན་མོ་སོགས་ཆོས་འཁོར་རྒྱ་ཆེན་པོ་བསྐོར། ཁེངས་པའི་བློ་ཅན་མང་པོས་དངོས་དང་བརྒྱུད་ནས་ཉམས་སད་བྱེད་པ་མཐའ་དག་ལུང་དང་རིགས་པའི་ཆོས་པོས་རྣམ་པར་བཏགས་ནས་ངེས་ཤེས་སྐྱེ་བའི་དད་པ་ལ་བཀོད་པས་ཀུན་མཁྱེན་ཆོས་རྗེ་ཞེས་པའི་མཚན་གྱི་རྣ་ལུང་དཔྱངས། ཡང་ལན་ཅིག་ཇོ་བོ་མཇལ་དུས་སྐུ་ལས་གསེར་བཙོ་མ་ལྟ་བུ་འོད་འཕྲོ་བ་དང་། དབུའི་སྟེང་ན་སངས་རྒྱས་རབས་བདུན། སྨན་བླ། བདེ་དགྱེས། སྤྱན་རས་གཟིགས་ནམ་མཁའ་རྒྱལ་པོ། རྒྱལ་བ་རྒྱ་མཚོ་དང་། བསྟན་སྲུང་གི་ཚོགས་དུ་མ་གཟིགས། འདིས་མཚོན་པའི་དུས་དང་དུས་མ་ཡིན་པར། སློབ་དཔོན་ཆེན་པོ། གུ་རུ་དྲག་པོ། དམ་པ་རིགས་བརྒྱ། སྒྲུབ་ཆེན་བཀའ་བརྒྱད་ལ་སོགས་པ་སངས་རྒྱས་བྱང་སེམས་ཏིལ་གྱི་གོང་བུ་ལྟར་ཞལ་གཟིགས་ནས་བསྟན་བཅོས་རྩོམ་པར་བསྐུལ་ཞིང་བཀའི་གནང་བ་ཐོབ་པས། དགོངས་པ་ཀུན་ཏུ་བཟང་པོའི་ཀློང་ན་རྣམ་པ་ཐམས་ཅད་མཁྱེན་པའི་ཆོས་ཉིད་ལས་གཡོ་བ་མེད་པའི་ངང་ནས་རྗེས་ལ་ཐོབ་པའི་ཡེ་ཤེས་སངས་རྒྱས་རྣམས་ཀྱི་ཐུགས་རྗེ་དང་འགྲོགས་ནས་རྒྱལ་བ་བདེན་པར་སྨྲ་བའི་བཀའ་དང་ཐ་དད་དུ་མེད་པས་བྱིན་གྱིས་བརླབས་པའི་བཀའ་འམ། འཆོས་སྐྱོབ་གཉིས་ཀྱི་ཡོན་ཏན་རྒྱ་མཚོས་བསྲུངས་པའི་བསྟན་བཅོས་གང་ཞིག་སེམས་ཀྱི་གླང་པོ་སེམས་བྱུང་དང་རྟོག་ཚོགས་མཐའ་ཡས་པའི་ཁུར་གྱིས་དུབ་ནས་འཁོར་བ་རྒྱ་མཚོའི་རུམ་ན་འཇུག་པར་རྩོམ་པ་དག །བདེ་བ་ཆེན་པོ་ཙནྡན་ལྗོན་པའི་གྲིབ་བསིལ་ལ་ངལ་གསོའི་དབུགས་འབྱིན་ཆེན་པོ་སྟེར་བའི་ཆོས་ཚུལ། རྩ་བ་ངལ་གསོ་སྐོར་གསུམ། བསྡུས་དོན་ཕྲེང་བ་རྣམ་གསུམ། རྒྱས་འགྲེལ་ཤིང་རྟ་རྣམ་གསུམ། དོན་ཁྲིད་རྣམ་གསུམ། སྤྱི་དོན་ལེགས་བཤད་རྒྱ་མཚོ། དཀར་ཆག་པདྨ་སྟོང་ལྡན་ཏེ་ཆོས་སྡེ་བཅུ་བཞི། ལོག་པར་སྨྲ་བའི་ཕྱི་རོལ་པ་དག་རང་གི་གཏན་ཚིགས་ལ་མཆོག་ཏུ་ཞེན་པའི་འཇིག་ཚོགས་ལ་བལྟ་བ་སུམ་བརྒྱ་དྲུག་ཅུའི་རི་དྭགས་མི་སྲུན་པ་རྣམས་ཀྱི་མཚངས་གཏིང་ནས་བྲུས་ཏེ། གྲུབ་མཐའ་ངན་པའི་སྤྱི་བོར་བརྒལ་བ་
དང་། བརྟག་པ་དང་། སུན་འབྱིན་པའི་སྡེར་མོ་རྣོན་པོ་བསྣུན་ནས་ཅང་མི་སྨྲ་བ་དང་ཡུལ་ཡུལ་པོའི་གནས་ལ་འགོད་པ་སྔོན་དུ་འགྲོ་བས། སྟོན་པ་འཇིག་རྟེན་གསུམ་གྱི་མིག་གཅིག་པུའི་གྲུབ་པའི་མཐའ་ཐེག་པ་གསུམ་གྱི་ཁང་བཟང་ཆེན་པོར། བླ་ན་མེད་པའི་ཐེག་པའི་ཁྱད་པར་ཡིད་བཞིན་ནོར་བུ་ཏོག་གི་བློ་གྲོས་དེ་བཞིན་གཤེགས་པ་རྣམས་ཀྱི་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོའི་མཛོད་ཁང་དམ་པར་ཟད་མི་ཤེས་པའི་སྐོར་ལ། ཡིད་བཞིན་མཛོད་རྩ་བ་ལེའུ་ཉེར་གཉིས་པ། འགྲེལ་ཆེན་པདྨ་དཀར་པོ། ཁྲིད་ཡིག་རྡོ་རྗེ་སྙིང་པོ་སྟེ་མ་བུ་གསུམ། གནད་ལས་སྙིང་པོར་ཕྱུང་བ་མན་ངག་རིན་པོ་ཆེའི་མཛོད། ཀློང་སྡེ་ཤས་ཆེར་སྟོན་པ་ཆོས་དབྱིངས་རིན་པོ་ཆེའི་མཛོད་རྩ་བ་ལེའུ་བཅུ་གསུམ་པ། འགྲེལ་པ་ཆོས་དབྱིངས་གསལ་བ་སྟེ་སྡེ་ཚན་གཉིས། ཐེག་པ་མཐའ་དག་གི་དོན་གསལ་བ་གྲུབ་མཐའ་རིན་པོ་ཆེའི་མཛོད་ལེའུ་བརྒྱད་པ། ཀུ་མ་རཱ་ཛའི་དགོངས་རྫོགས་སུ་བརྩམས་པར་གྲགས་པ་རྒྱུད་བཅུ་བདུན་དང་། མན་ངག་བརྒྱ་བཅུ་དགུའི་དོན་འགྲེལ་བརྗོད་བྱ་ཤིན་ཏུ་རྒྱ་ཆེ་བ་ཐེག་མཆོག་མཛོད་རིམ་ཁང་ཉི་ཤུ་རྩ་ལྔ་པའི་བདག་ཉིད་ཅན། དེའི་གནད་དོན་བསྡུས་པ་ཚིག་དོན་རིན་པོ་ཆེའི་མཛོད་རྡོ་རྗེའི་གནས་བཅུ་གཅིག་པ། སེམས་ཀློང་མན་ངག་གསུམ་ཀའི་སྙིང་པོའི་མཐར་ཐུག་གནས་ལུགས་རིན་པོ་ཆེའི་མཛོད་རྩ་བ་ལེའུ་ལྔ་པ། ཊཱི་ཀ་དང་བཅས་པ་སྟེ་མཛོད་བདུན་གྱི་བདག་ཉིད་ཅན་ཕལ་མོ་ཆེ་གནས་འདི་ཉིད་དུ་བྱུང་། སྤྱིར་སྔགས་བདག་གཟའ་དང་། དམ་ཅན་གསུམ་ལས་ལ་བྲན་བཞིན་དུ་འཁོལ་ཞིང་བཀའ་ཉན་པས། མཛོད་འདི་དག་རྩོམ་པའི་ཚེ་གངས་རིར་ཁྱབ་འཇུག་ཆེན་པོར་སྣག་ཚ་མཉེར་བཅུག་པ་ཉེ་གནས་པས་མངོན་སུམ་དུ་མཐོང་། དེ་ལྟར་བཤད་པ་དང་དོན་གྱི་སྙིང་པོའི་བསྒྲུབ་པ་ཁོ་ན་ལ་དབེན་པ་འབའ་ཞིག་ཏུ་བཞུགས་པའི་སྒྲུབ་གནས་ཀྱང་། བསམ་ཡས་མཆིམས་ཕུ། ཨུ་རྒྱན་རྫོང་། ལྷ་རིང་བྲག །གྲ་ཕུ། ཤུག་གསེབ། གངས་རི་ཐོད་དཀར། གཞོ་སྟོད་ཏི་སྒྲོ། ཡེར་པ། ཡར་ལྷ་ཤམ་པོ། བུམ་ཐང་། སྐྱམ་ཕུ་དཔལ་གྱི་དགེ་སྡིངས། གོང་
པོ་རིའི་གླ་བ་ལུང་། ཀོང་པོ་ཙ་གོང་གི་ཕུ་རྣམས་ལས་ཕལ་ཆེར་གངས་རི་ཉིད་དུ་གཏན་ཆགས། ལྷོ་འབྲོག །དབུ་གཡོར། ལྷོ་མོན་གྱི་ཡུལ་མཐའ་དག་ཏུ་ཁྲིད་ཉན་སྟོང་ཕྲག་ཚོགས་པ་ལན་མང་དུ་བྱུང་ཞིང་། དེ་དག་ལའང་ཐུགས་བསྐྱེད་ཤིན་ཏུ་ཆེ་བས། ཆོས་ཁྲལ་མི་ལེན། དད་རྫས་ཆུད་མི་གསོན། སློབ་མའི་བྱ་བ་འབའ་ཞིག་དོན་དུ་གཉེར་བ་ལ་ལོག་སྒྲུབ་དང་སྐྱོ་ངལ་བཟོད། ཚོགས་ཀྱི་འཁོར་ལོ་རྒྱ་ཆེན་པོས་བསྡི་སྟང་དུ་བྱ་བ་དང་། གཞན་རྒྱུད་ཀྱི་བསམ་པ་མཁྱེན་ནས་ཐབས་ལ་མཁས་པའི་གདུལ་ཚུལ་དཔག་ཏུ་མེད་པ་ལ་སོགས་མདོར་ན་རང་དོན་དུ་སྤངས་རྟོགས་ཕུན་སུམ་ཚོགས་པའི་གོ་འཕང་བརྙེས། འདོད་པ་གཏན་ནས་ཟད་པ་ལ་སོགས་པའི་ཕྲིན་ལས་བསམ་གྱིས་མི་ཁྱབ་པས་གདུལ་བྱ་སྨིན་གྲོལ་ལ་འགོད་པའི་རྣམ་པར་ཐར་པ་གང་ཡིན་པ་ནི་སྐྱེས་བུ་ཆེན་པོ་འདིས་ལག་ལེན་ལ་བཏབ་པ་སྟེ། འབྲི་གུང་སྒོམ་པ་ཀུན་རིན་རང་སྲིད་ཀྱི་དྲེགས་པས་མྱོས་ཏེ་དམག་འཁྲུག་གཡོ་བར་བརྩམས་པ་ལ། སློབ་དཔོན་ཆེན་པོའི་ལུང་བསྟན་དུ། འབྲི་ཞེས་བྱ་བའི་ས་ཕྱོགས་སུ༔ ཀུན་དགའི་མིང་ཅན་འདི་འབྲི་གུང་སྲིད་སྐྱོང་བ་ཞིག་ཡིན་གསུང་། བདུད་ཀྱི་བུ༔ ལུས་ལ་མཚོན་ཆའི་རི་མོ་ཡོད༔ ཤི་ནས་དམྱལ་བར་སྐྱེ་བར་འགྱུར༔ ལྷོ་ཡི་ཕྱོགས་ནས་འཇམ་དབྱངས་ཀྱི༔ སྤྲུལ་པ་གཅིག་གིས་འདུལ་བར་བྱེད༔ ཅེས་པའི་ལུང་བསྟན་དེ་སྒོམ་པ་ཀུན་རིན་གྱི་དཀར་པོ་རྣམ་པར་འཕེལ་བའི་ས་བོན་གྱིས་མཐོང་ནས་རང་གི་ལུས་ལ་བལྟས་པར་རྒྱབ་ངོས་སུ་ཤ་མཚན་རལ་གྲི་འདྲ་བ་གཅིག་བྱུང་། དེ་རང་ཉིད་དུ་གདོན་མི་ཟ་བར་ཤེས་ནས་དབུས་གཙང་འདིར་འཁྲུག་པ་ཆེན་པོ་གཅིག་བྱེད་བསམས་ཀྱང་། དམྱལ་བར་འགྲོ་ན་བྱེད་དོན་ཆུང་བསམས་ནས་བརྣག་པར་དཀའ་བའི་ལས་ལ་བཤོལ་བཏབ། ཕྱོགས་ཀུན་ཏུ་དྲིལ་བསྒྲགས་ནས་འཇམ་དཔལ་གྱི་སྤྲུལ་པ་བཙལ་བས། མཁས་པ་ཀུན་ཞལ་འཆམ་པར་ད་ལྟ་བོད་རུ་བཞི་ན་བསམ་ཡས་པ་ལས་མཁྱེན་རབ་ཆེ་བ་མི་བཞུགས་ཞེས་བསྒྲགས་པས། འཇམ་དཔལ་གྱི་སྤྲུལ་པར་ངེས་ཤེས་རྙེད་དེ་སྤྱན་དྲངས་ནས་གཙུག་གི་ནོར་བུར་བྱས་པས།
འགྲོ་བ་གང་དང་གང་དག་གི་གནས་སྐབས་དང་མཐར་ཐུག་གི་ལས་མི་སྲུན་པའི་རྒྱུ་རྐྱེན་འབྲས་བུ་དང་བཅས་པ་དྲུངས་ནས་འབྱིན་པར་མཛད། དེ་ཙམ་ན་དབུས་གཙང་འདིར་དྲེགས་རློམ་གྱི་སྐྲའི་ཅོད་པན་གཞན་ལ་སྟོན་པར་དཀའ་བ་ཏའི་སི་ཏུ་བྱང་ཆུབ་རྒྱལ་མཚན་གྱིས་འབྲི་གུང་བའི་བླ་མ་ཡིན་ཞེས་མི་མཐུན་པར་བལྟ་བ་ལ། ཚད་མེད་པའི་ཐུགས་རྗེ་ཆེན་པོའི་ཕྲིན་ལས་དང་། མཁས་པ་དང་གྲུབ་པའི་རྣམ་ཐར་བཟང་པོ་བུཌྜྷ་ཤྲཱིས་རྣ་ལུང་དུ་དཔྱངས་པས་མཚམས་སྦྱར་ཏེ་བོད་ཤིང་སྒོ་ཅན་པའི་རྒྱལ་པོ་སེང་གེ་རྐང་པ་བརྒྱད་པའི་སྤྱི་བོར་ཡང་ཞབས་སེན་ལེགས་པར་བཀོད། དེ་བཞིན་དུ་དབུར་སྟོད་ཁྲི་དཔོན་སི་ཏུ་ཤཱཀྱ་བཟང་པོ། ཡར་འབྲོག་ཁྲི་དཔོན་རྡོ་རྗེ་རྒྱལ་མཚན་ལ་སོགས་པའི་མི་ཆེན་དུ་མས་ཀྱང་སྲི་ཞུ་བྱས། དེ་དག་ལ་སོགས་ཏེ་དད་པ་ཅན་གྱིས་བྱིན་པའི་རྫས་ཀྱང་སློབ་དཔོན་ནཱ་གཱ་རྫུ་ནའི་རྣམ་ཐར་བཟུང་ནས་གནས་མིན་དུ་ཅུང་ཟད་ཙམ་ཡང་ཆུད་མི་གཟོན་པར་དཀོན་མཆོག་གསུམ་ལ་བསྡི་སྟང་བླ་ལྷག་ཏུ་མཛད། ཡོ་བྱད་ཆོས་ཕྱོགས་སུ་བསྔོས་ཟིན་པ་རྣམས་རང་གི་རྫས་སུ་འདུ་མི་ཤེས་པས་ཕྱོགས་གཞན་གང་དུའང་འབྱམས་མི་སྲིད། བསྙེན་བཀུར་དཀོན་མཆོག་ལ་དགོས་པ་ཡིན་གྱི་སྡིག་ཅན་ལ་མི་རུང་གསུངས་ནས་མི་ཆེན་ལ་སྟན་དང་བཀུར་སྡི་མི་མཛད། ཚོགས་བསགས་ཡོན་བདག་གི་བྱ་བ་ཡིན་གྱི་མཆོད་ཡོན་གོ་ལོག་པ་མི་བཟང་གསུངས་ནས། འབུལ་བ་ཆེན་པོ་གང་ཕུལ་ཡང་དེ་བསྔོ་བས་རྒྱས་འདེབས་པ་ལས་གདབ་ལན་མི་ཡོང་། འགྲོ་བ་ཉམ་ཆུང་ལ་ཐུགས་ལྷག་པར་བརྩེ་བས་སྙོམས་ཆུང་དང་སྤྲང་པོས་ཅི་དྲངས་ཀྱང་ཞིམ་ཞིམ་ལྟར་གསོལ་ནས། མདོ་འདོན་པ་དང་བསྔོ་བ་ནན་གྱིས་གསུངས། དེ་ལྟ་བུའི་མཛད་པ་དཔག་པར་དཀའ་བས་མཐོང་བའི་ཆོས་ལ་རྗེས་སུ་བཟུང་བ་དག་ལྟ་ཅི་སྨོས་རང་བཞིན་གྱིས་མཐོང་བ་དང་། ཐོས་པ་དང་། རེག་པ་དང་། གནོད་པ་བྱེད་པའང་བདེ་བའི་གནས་སུ་འདྲེལ་ཞིང་། བྱང་གྲོལ་གྱི་ས་བོན་ཐེབས་པར་མཛད་ནས་ལྔ་བཅུ་རྩ་དྲུག་བཞེས་པ་ཆུ་མོ་ཡོས་ཀྱི་ལོར། སྐལ་ལྡན་མང་པོ་ལ་སྨིན་གྲོལ་གྱི་གོ་འཕང་སྟེར་བའི་སྐབས་ཤིག་
རྒྱལ་སྲས་བཟོད་པ་ལ་སྣག་ཤོག་སྔོགས་ཤིག་གསུངས་ནས་ཞལ་ཆེམས་དྲི་མ་མེད་པའི་འོད་དུ། འཁོར་བའི་རང་བཞིན་སྔ་ནས་ཤེས་ཟིན་ཏེ། །འཇིག་རྟེན་ཆོས་ལ་སྙིང་པོ་མེད་པའི་ཕྱིར། །ད་ནི་མི་རྟག་སྒྱུ་མའི་ལུས་འདོར་བས། །གཅིག་ཏུ་ཕན་པའི་གདམས་ངག་བཤད་ཀྱིས་ཉོན། །ཅེས་པ་ལ་སོགས་པས་སྣ་དྲངས་ནས། ཐུགས་རྗེ་མངའ་བའི་མགོན་པོ་པདྨའི་ཞལ། །དབུགས་འབྱིན་མཛད་པ་དེ་ཡིས་དེང་བཟུང་བས། །འགྲོ་བའི་དུས་བབ་འགྲོན་པོ་ལམ་ཞུགས་བཞིན། །འཆི་བས་དགའ་བའི་རྙེད་པ་ལེགས་གྲུབ་པ། །རྒྱ་མཚོར་དོན་ཡོངས་གྲུབ་པའི་ཚོང་པ་དང་། །གཡུལ་ལས་རྣམ་པར་རྒྱལ་བའི་ལྷ་དབང་དང་། །བསམ་གཏན་གྲུབ་པའི་བདེ་བས་ཆེས་ལྷག་གོ། །ད་ནི་མི་སྡོད་པདྨ་ལས་འདྲེལ་རྩལ། །འཆི་མེད་བདེ་ཆེན་བཙན་ས་འཛིན་དུ་འགྲོ། །ཞེས་པ་ལ་སོགས་ཀྱི་ཞལ་ཆེམས་བསྟན་པས་རྒྱལ་སྲས་བཟོད་པ་ན་རེ། དེ་ལྟར་མི་གསུང་བ་ཞུ་ཞེས་མཆི་མ་བླགས་པས། འདུས་བྱས་འཇིག་པ་ལས་བརྩམས་པའི་ཆོས་མང་པོ་གསུངས། སླར་བསམ་ཡས་སུ་གདན་འདྲེན་བྱུང་བས་ཆོས་ཀྱི་འཁོར་ལོ་བསྐོར་བཞིན་དུ་རྒྱ་མ་དང་བསམ་ཡས་བརྒྱུད་མཆིམས་ཕུ་དཔལ་གྱི་ནགས་ཁྲོད་དུ་ཕེབས། དེ་ཡིས་ཆོས་ཀུན་སྒྱུ་མ་ལྟ་བུ་དང་། །སྐྱེ་བ་སྐྱེད་མོས་ཚལ་འགྲོ་ལྟར་རྟོགས་ནས། །ཞེས་པ་དེ་སྐྱེས་བུ་ཆེན་པོ་འདིས་ཉམས་འོག་ཏུ་བཙུད་པས། གནས་འདི་ནི་རྒྱ་གར་གྱི་དུར་ཁྲོད་བསིལ་བའི་ཚལ་དང་མཚུངས་པ་ཡིན། གཞན་དུ་སྐྱེ་བ་ལས་འདིར་འཆི་བ་དགའ། ངའི་སྒྱུ་ལུས་གོག་པོ་འདི་འདིར་འཇོག་པ་ཡིན་གསུངས་ནས་བསྙུང་བའི་ཚུལ་བསྟན་ཀྱང་ད་དུང་ཆོས་མཚམས་རྒྱུན་མ་ཆད། དེར་འོ་བརྒྱལ་དུ་བསམས་ཏེ་རེ་ཞིག་ཆོས་མཚམས་འཇོག་པར་ཞུས་པས་ཆོས་འདི་རྫོགས་པ་ཞིག་བྱེད་བསམ་པ་ཡིན་ཏེ་གསུངས། དེ་ནས་རྒྱལ་ཟླ་བའི་ཚེས་བཅུ་དྲུག་གི་ཉིན་དཔའ་བོ་དང་མཁའ་འགྲོ་རྣམས་མཆོད་གཏོར་རྒྱ་ཆེན་པོས་མཉེས་པར་མཛད་ཅིང་། སློབ་མའི་ཚོགས་ལ་སྤྱིར་ཡང་འདུས་བྱས་ལ་སྙིང་པོ་མེད་པས་ཆོས་འབའ་ཞིག་དོན་དུ་གཉེར། ལྷག་པར་ཁྲེགས་ཆོད་དང་ཐོད་རྒལ་གྱི་ཉམས་ལེན་གནད་དུ་སྣུན།
མ་གོ་བའི་སྐབས་བྱུང་ན་ཡང་ཏིག་ཡིད་བཞིན་ནོར་བུ་འདི་བསམ་འཕེལ་ནོར་བུ་དང་འདྲ་བས་ལྟ་རྟོགས་ཞིབ་མོར་གྱིས་ལ་སྒོམས་དང་། ཆོས་ཉིད་ཟད་སའི་ས་ལ་མྱ་ངན་ལས་འདའ་བར་འགྱུར་རོ་ཞེས་གདམས། དེ་ནས་ཚེས་བཅོ་བརྒྱད་ཀྱི་ཉིན་མཆོད་པ་གཅིག་ཤོམས་ལ་ཁྱོད་རང་རྣམས་དགེ་སྦྱོར་ལ་དེངས་གསུངས། སྐུ་དྲུང་ན་འདུག་པར་ཞུས་པས། འོ་ན་ངའི་སྒྱུ་ལུས་གོག་པོ་འདི་འདོར་བ་ཡིན་པས་ཅ་ཅོ་མ་བྱེད་པར་མཉམ་གཞག་གི་ངང་ལ་སྡོད་གསུངས། སྐུ་གདུང་རིན་པོ་ཆེ་ཆོས་སྐུའི་བཞུགས་སྟངས་ཀྱིས་བཞག་ནས། དགོངས་པ་གདོད་མའི་དབྱིངས་སུ་མནལ་བ་ལ། ས་ཆེན་པོ་འདི་ཡང་ཡིད་ཁོང་དུ་ཆུད་པ་ལྟར་གྱུར་ནས། ལྡེག་རབ་ཏུ་ལྡེག་པ་ལ་སོགས་པའི་ཟོལ་གྱིས་ལུས་བརྡེག་ཅིང་གཡོ་བར་གྱུར་ལ། འུར་རབ་ཏུ་འུར་བ་ལ་སོགས་པའི་ཟོལ་གྱིས་ཆོ་ངེ་འདོན་པ་ལ་ཞུགས་སོ། །གདུང་ཞག་ཉེར་ལྔར་བཞག་པས་བསྟན་ལ་དགའ་བའི་ལྷ་རྣམས་ཀྱིས་འཇའ་འོད་ཀྱི་གུར་ཕུབ་མེ་ཏོག་གི་ཆར་ཕབ། དགོངས་པ་ཆོས་ཉིད་དུ་གྲོལ་བས་འབྱུང་བ་ཆེན་པོ་བཞིའང་དུས་བཞིའི་གཏན་ཚིགས་འཛིན་པའི་བརྟན་པ་བྲལ་ནས། རྒྱལ་དང་ཆོ་འཕྲུལ་གྱི་ཟླ་བ་གཉིས་ཀར་ས་དྲོས། འཁྱགས་པ་ཞུ། སེ་བའི་ལོ་མ་རྒྱས་པ་བྱུང་། གདུང་མཆོད་པའི་ཞིང་དུ་བྱིན་ཟའི་ཁང་པར་སྤྱན་དྲངས་པའི་ཚེའང་ས་གཡོས། སྒྲ་ཆེན་པོ་ལན་བདུན་གྲགས། ཞུགས་ལ་བཞེན་པ་ན་སྐུ་གསུང་ཐུགས་རྡོ་རྗེ་གསུམ་གྱི་ངོ་བོར་བྱང་ཆུབ་པའི་རྟགས་ཐུགས་ལྗགས་སྤྱན་གསུམ་ཀ་སྐལ་ལྡན་གྱི་སློབ་མའི་ཕང་པར་བྱོན། སྐུ་ལྔ་དང་ཡེ་ཤེས་ལྔའི་ཐོབ་བྱ་མ་ལུས་པ་མངོན་དུ་མཛད་པས་གདུང་ཆེན་ལྔ་དང་། རིང་བསྲེལ་ཕྲ་མོ་བགྲངས་ལས་འདས་པར་བྱུང་། རིང་བསྲེལ་གོང་བུ་ཆེ་བ་དག་ནས་བརྒྱ་སྟོང་གྲངས་མེད་དུ་འཕེལ་བ་རྩོད་པ་དང་བྲལ་ཞིང་། སྐུ་གདུང་མ་ཉམས་པ་ཕྲན་བུ་བཟུང་བ་དག་ལའང་ད་ལྟའི་བར་དུ་སྟེང་གདོན་གྱི་གནོད་པས་རྫི་བར་མི་ནུས་པ་སོགས་མངོན་སུམ་ཚད་མའོ། །སྐྱེས་བུ་ཆེན་པོ་འདིའི་གསུང་རབ་ནི་རྒྱལ་བའི་བཀའ་དང་ཁྱད་པར་མེད་པ་ཡིན་པས་ངེས་བརྗོད་རྟོགས་སླ་བའི་ཕྱིར་རྣམ་གྲངས་བཀོད་ན། ཐུན་མོང་ཕྱིའི་བསྟན་བཅོས། ཁྱད་པར་ནང་གི་བསྟན་བཅོས།
ངེས་དོན་གསང་བའི་བསྟན་བཅོས་ཏེ་སྐོར་ཚོ་གསུམ། དེ་དག་ལའང་ནང་གསེས་ཀྱི་དང་པོ་ལ། རིག་གནས་ཀྱི་སྐོར། གཏམ་གྱི་ཚོགས། བསྟོད་པའི་ཚོགས་དང་གསུམ། གཉིས་པ་ལ་རྒྱུ་དང་འབྲས་བུའི་ཐེག་པ་གཉིས། གསུམ་པ་ལ་ཟབ་གསང་རྒྱུད་སྡེའི་དགོངས་འགྲེལ་དང་། ཁྱད་པར་བླ་ན་མེད་པ་འོད་གསལ་རྡོ་རྗེ་སྙིང་པོའི་གདམས་སྐོར་རོ། །དང་པོ་རིག་གནས་ཀྱི་སྐོར་ལ། ཡིག་སྡེབས་ཀྱི་སྦྱོར་བ་དཔག་བསམ་སྙེ་མ་ཆེ་ཆུང་གཉིས། དོན་བསྡུས། སྒྲའི་མཚམས་སྦྱོར་རབ་གསལ་ཟླ་བ། སྡེབ་སྦྱོར་ཉི་མའི་ཤིང་རྟ། ལྕི་ཡང་གི་གནས་རིན་པོ་ཆེའི་ལྡེ་མིག །མངོན་བརྗོད་མེ་ཏོག་འཁྲི་ཤིང་། སྙན་དངགས་ཀྱི་བསྟན་བཅོས་མེ་ཏོག་ཀུན་ཏུ་རྒྱས་པའི་སྐྱེད་མོས་ཚལ། དཔེར་བརྗོད་ཀླུ་ཤིང་གི་མེ་ཏོག །གཉིས་ཀ་སྤེལ་བ་ཚངས་པའི་གསུང་དབྱངས་ཏེ་སྡེ་ཚན་བཅུ། གཉིས་པ་གཏམ་གྱི་ཚོགས་ལ། མིའམ་ཅི་ཀུན་ཏུ་དགའ་བའི་ཟློས་གར། པོ་ཊ་ལ་ཀུན་ཏུ་དགའ་བའི་གཏམ། གཞོན་ནུ་ཞི་བའི་རྟོགས་བརྗོད་མེ་ཏོག་གི་ཆུན་པོ། བློ་གསལ་རི་བོང་གི་རྟོགས་བརྗོད། ནགས་ཚལ་ཀུན་ཏུ་དགའ་བའི་གཏམ། ནགས་ཀྱི་གཏམ་པདྨ་དཀར་པོ། གངས་རིའི་རྒྱན་ཀུན་ཏུ་བཟང་པོ། ཀུ་མུ་ཏའི་འཁྲི་ཤིང་གི་གཏམ་ལྔ། སློབ་དཔོན། རབ་བྱུང་། སྐྱེ་བོ། མཁས་བླུན། བཤེས་གཉེན། ཆོས་དང་ཆོས་མིན་བརྟག་པའི་རབ་བྱེད་དྲུག་སོགས་ཆོས་སྡེ་བཞི་བཅུ་རྩ་ལྔ། གསུམ་པ་བསྟོད་ཚོགས་ལ། རྒྱལ་བ་སྲས་བཅས་ཀྱི་ཚོགས་དང་། འཇིག་རྟེན་པའི་ལྷ་ཆེན་པོ་རྣམས་དང་། རི་དང་། རྒྱ་མཚོ། སྒྲུབ་གནས། བསམ་ཡས་གསང་ཕུའི་ཆོས་གྲྭ་སོགས་གཙུག་ལག་ཁང་དང་ཆོས་སྡེ་རྣམས་ལ་བསྟོད་པའི་ཚོགས་བཞི་བཅུ་རྩ་གསུམ་མོ། །གཉིས་པ་ཁྱད་པར་ནང་གི་བསྟན་བཅོས་ཀྱི་སྐོར་ལས། དང་པོ་རྒྱུ་མཚན་ཉིད་ཀྱི་ཐེག་པའི་སྐོར་ལ། བྱམས་ཆོས་ལྔའི་སྤྱི་དོན་གྱི་འགྲེལ་པ། ས་
ལམ་གྱི་རྣམ་གཞག་རིན་པོ་ཆེའི་ཐེམ་སྐས་རྩ་འགྲེལ་དང་བཅས་པ། མངོན་རྟོགས་རྒྱན་གྱི་ལུས་རྣམ་གཞག་གི་གསལ་བྱེད་རྒྱན་གྱི་སྣང་བ། འདུལ་བ་ཀཱ་རི་ཀའི་གསལ་བྱེད་འོད་ཀྱི་སྙེ་མ། དབུ་མ་ཐལ་འགྱུར་གྱི་གནས་གསལ་བ་རབ་ཏུ་མི་གནས་པའི་དོན་བསྡུས། བསླབ་བྱ་རྒྱལ་སྲས་ལམ་བཟང་སོགས་ལེགས་བཤད་རྒྱ་ཆེ་བའི་ཆོས་སྡེ་ཉི་ཤུ་རྩ་གསུམ། གཉིས་པ་འབྲས་བུ་སྔགས་ཀྱི་སྐོར་ལ། ཆོས་སྤྱོད་ཐམས་ཅད་ཀྱི་མངོན་པར་རྟོགས་པ་རྒྱུད་ཀྱི་བཤད་འགྲེལ་བྱང་ཆུབ་ལྗོན་ཤིང་། རྒྱུད་སྡེ་སྤྱིའི་དོན་བཤད་རྡོ་རྗེ་འབྱུང་བ། དམ་ཚིག་གསུམ་བཀོད་ཀྱི་རྣམ་བཤད་ཉི་མའི་འོད་ཟེར། སྒྲུབ་ཕྲིན་སྐོར་ལའང་གནས་བརྟན་བཅུ་དྲུག་གི་ཆོ་ག་གཞན་ཕན་ནོར་བུ། སྒྲོལ་མ་མཎྜལ་བཞི་པའི་ཆོ་ག་བདེ་ལེགས་ཀུན་འབྱུང་། སྨན་བླའི་ཆོ་ག་ཡོན་ཏན་ཕྲེང་རྫོགས། སྤྱོད་རྒྱུད་སྒྲུབ་ཐབས་ཟླ་བའི་ནོར་བུ། རྣམ་སྣང་སྒྲུབ་ཐབས་ངན་སོང་ཀུན་སྦྱོང་། ཀུན་རིག་རྩ་བའི་དཀྱིལ་འཁོར་དུ་སློབ་མ་འཇུག་ཅིང་དབང་བསྐུར་བའི་ཆོ་ག །མི་འཁྲུགས་པའི་སྒྲུབ་ཐབས་སྡུག་བསྔལ་ཀུན་སྦྱོང་། ཤཱཀ་ཐུབ་སྒྲུབ་ཐབས་འོད་ཟེར་ཀུན་འབྱུང་། བྱམས་པའི་སྒྲུབ་ཐབས་པདྨ་བརྩེགས་པ། གཞན་ཡང་འཇམ་དཔལ། དབྱངས་ཅན་མ། ཕག་མོ། མི་གཡོ་བ། ཛམ་བྷ་ལ། དེ་དག་རྣམས་ལས་དཀར་སེར་དམར་སྔོ་ནག་སོགས་སོ་སོའི་སྒྲུབ་ཐབས། དམར་པོ་སྐོར་གསུམ། འོད་ཟེར་ཅན། ནོར་རྒྱུན་མ། ཨཾ་གུ་ལི། དུག་སེལ་ཅན། རྣམ་རྒྱལ་སོགས་དང་། དབང་ཕྱུག་ཁྱབ་འཇུག་སོགས་འཇིག་རྟེན་པའི་སྡེ། གཞན་བྱ་སྤྱོད་རྣལ་འབྱོར་བླ་མེད་གསར་རྙིང་ཐམས་ཅད་ཀྱི་རྩ་གསུམ་ཆོས་སྲུང་ནོར་ལྷ་བཅས། རྒྱལ་བ་སྲས་བཅས་ཀྱི་སྒྲུབ་ཐབས་སྐོར་ཆོས་སྡེ་བརྒྱད་ཅུ་རྩ་ལྔ། གསུམ་པ་ངེས་དོན་གསང་བའི་བསྟན་བཅོས་ལ། དང་པོ་ཟབ་གསང་རྒྱུད་སྡེའི་དགོངས་བཅུད་རྫོགས་རིམ་སྐོར་ལ། བདེ་མཆོག་རིམ་ལྔའི་ཟབ་དོན་སྙིང་པོའི་ཡང་ཞུན། གསང་འདུས་རིམ་ལྔའི་ཟབ་དོན་འོད་གསལ་འཁོར་ལོ། སྦྱོར་དྲུག་བསྡུས་དོན་དེ་ཉིད་འདུས་པ། ལམ་འབྲས་བསྡུས་དོན་རིམ་
གཉིས་འཁོར་ལོ། ཆོས་དྲུག་སྙིང་པོ་འོད་གསལ་རྣམ་སྦྱང་སོགས་ཆོས་སྡེ་ཉི་ཤུ་ལྷག་ཙམ། གཉིས་པ་འོད་གསལ་རྡོ་རྗེ་སྙིང་པོའི་སྐོར་ལ། ངལ་གསོ་སྐོར་གསུམ་དང་། མཛོད་ཆེན་བདུན་བཅས་པའི་སྡེ་ཚན་སྔར་བཤད་ཟིན་ལ། བི་མ་ལའི་སྙིང་ཏིག་ཟབ་པ་པོད་བཞི་དང་མན་ངག་བརྒྱ་བཅུ་དགུ་བརྗོད་བྱ་རྒྱ་ཆེ་བས་འཐོར་བ་བསྡུས་པ་ལྟ་བུ་བླ་མ་ཡང་ཏིག་གམ། ཡང་ཟབ་ཡིད་བཞིན་ནོར་བུ། སྐྱེ་བ་སྔ་མ་ལ་མཁའ་འགྲོའི་སྙིང་ཏིག་རྗོད་བྱེད་ཚིག་གི་གཏེར་ལ་དབང་བ། ད་རེས་མཆིམས་ཕུར་བརྗོད་བྱའི་དོན་ལ་དབང་བསྒྱུར་ནས། རྒྱས་པར་བཀྲལ་བའི་ཟབ་ཅིང་རྒྱ་ཆེ་བ་ཤོག་སྐྱ། ཡང་ཟབ་རྣམས་ཤོག་འདྲ། ཤིན་ཏུ་ཡང་ཟབ་རྣམས་ཤོག་སེར་ཏེ་སྐོར་གསུམ་དུ་ཕབ་པའི་མཁའ་འགྲོ་ཡང་ཏིག །གཉིས་ཀའི་དོན་རྒྱས་པར་བཀྲལ་བ་ཟབ་མོ་ཡང་ཏིག །སྙན་བརྒྱུད་ཐིག་ལེ་གསང་སྐོར་དང་། སྙིང་ཏིག་རྣམ་པ་གསུམ་དུ་བསྡུས་པའི་ཆོས་ཀྱི་རྣམ་གྲངས་བཅུ་ཕྲག་བཞི་ལྷག་བཅས་ཏེ། ཀུན་དྲིལ་བས་སྡེ་ཚན་བརྒྱ་ཕྲག་གཉིས་དང་དྲུག་ཅུ་རྩ་གསུམ་ཙམ་མོ། །དེ་དག་ཀྱང་མདོ་ཙམ་སྨོས་པ་སྟེ། གཞན་དུ་ཆོས་འབྱུང་རིན་པོ་ཆེའི་གཏེར་མཛོད་ཅེས་བྱ་བ་དང་། ཆོས་སྤྱོད་རབ་ཏུ་གསལ་བ་དང་། ཤི་གསོན་གྱི་བསྔོ་བ་རིན་ཆེན་ཕྲེང་བ་དང་། རྒྱུ་ལ་ཁམས་འདུས་པ་མེ་ཏོག་ཕྲེང་ལྡན་དང་། རྐྱེན་ལ་ཁམས་འདུས་པ་ཀ་ཐ་སུམ་ཅུ། རྒྱུ་རྐྱེན་གཉིས་ཀ་ལ་ཁམས་འདུས་པ་དུས་ལ་མངོན་པར་སྐྱོ་བའི་རབས་ལ་སོགས་པ་ཤིན་ཏུ་མང་ལ། དུས་དེ་དག་ཏུ་བསྡུ་བའི་བརྩོན་འགྲུས་ཉུང་བའམ། མཁས་རྨོངས་ཀྱི་བསྟན་བཅོས་ལ་བྱེ་བྲག་མི་ཕྱེད་པའི་ཤུགས་ཀྱིས་ནུབ་པའང་ཤིན་ཏུ་མང་པ་ཡོད་མཆི་སྟེ་གསུང་རབ་ཀྱི་དཀར་ཆག་རིན་པོ་ཆེའི་མཛོད་ཁང་ཞེས་བྱ་བ་ལ་ཤེས་པར་བྱ་བ་ནི་ཕྱི་མཐའ་འདིའི་གཏན་ཚིགས་ཙམ་མོ། །བབས་ལུགས་ཆེན་མོར་སྒྲ་མཁས་དཔལ་འཛིན་དུ་ལུང་བསྟན་པ་ལ་སྔོན་གྱི་བླ་མ་རྣམས་ཀྱིས་ངོས་འཛིན་པར་འདུག་སྟེ། གོ་རིམ་གྱི་ངེས་པ་ལྟར་ན་བློ་གྲོས་མཆོག་ཏུ་ངོས་བཟུང་ན་འཐད་ལ། ཀུ་མ་རཱ་ཛ་དང་གཉིས་ཀྱི་བར་ལ་ལོ་བརྒྱ་བརྒྱའི་གཏན་ཚིགས་མི་འགྲུབ་སྙམ་
དུའང་དོགས་པར་མི་བྱ་སྟེ། ལོ་བརྒྱ་ནི་སྤྱིར་བསྟན་པ་འདི་ཡིད་དཔྱོད་དང་འདྲེས་པའི་ཚེ་དེའི་གསལ་བྱེད་རེ་འབྱོན་པ་ལ་དགོངས་ཀྱི། གཞན་དུ་ནི་གནས་སྐབས་དེ་དང་དེའི་གདུལ་བྱའི་རྟེན་འདྲེལ་ཁོ་ན་ལ་ལྟོས་ནས་སྤྲུལ་པ་སྒྱུ་མ་ལྟ་བུས་དོན་མཛད་པའི་ཕྱིར་རོ། །དོན་ལ་ཀུན་ཏུ་བཟང་པོ་འཇིག་རྟེན་དུ་བྱོན་ནས་ཆོས་ཀྱི་འཁོར་ལོ་བསྐོར་བ་ཡིན་པས་འདིའི་གསུང་རབ་ཚིག་བཞི་པ་ཡན་ཆད་ལའང་གཅེས་སྤྲས་སུ་བྱ་བ་ཡིན་ནོ། །དེ་ལ་གསུང་གི་བདུད་རྩི་མྱངས་པ་ལས་བྱུང་བའི་སློབ་མའི་གཙོ་བོ་དག་སྨོས་པ་ནི། ཞོག་ཐར་གླིང་པ་མཁས་གྲུབ་བདེ་ལེགས་རྒྱ་མཚོ། མཁས་གྲུབ་ཆོས་ཀྱི་གྲགས་པ། མཁས་གྲུབ་ཁྱབ་གདལ་ལྷུན་གྲུབ་སྟེ་གྲགས་པ་ཐོབ་པའི་མཁས་གྲུབ་གསུམ། མདོ་ཁམས་པ་འདན་སྒོམ་ཆོས་ཀྱི་གྲགས་པ། རྒྱལ་སྲས་བཟོད་པ། བླ་མ་དཔལ་མཆོག་པ། གུ་རུ་ཡེ་ཤེས་རབ་འབྱམས། གཞོན་ནུ་སངས་རྒྱས་ཏེ་ཐུགས་ཀྱི་སྲས་ལྔ། སྤྲུལ་སྐུ་དཔལ་འབྱོར་རྒྱ་མཚོ། སློབ་དཔོན་སངས་རྒྱས་ཀུན་དགའ། སློབ་དཔོན་བློ་གྲོས་བཟང་པོ། སྟག་མགོ་བྱ་བྲལ་ཆོས་རྗེ་སྟེ། བསྟན་པ་སྤེལ་བའི་བཤེས་གཉེན་བཞི། ཕ་རྒོད་རྟོགས་ལྡན་རྒྱལ་པོ། རྣལ་འབྱོར་པ་འོད་ཟེར་གོ་ཆ། རིག་འཛིན་འོད་གསལ་རང་གྲོལ། བྱ་བཏང་བསོད་ནམས་འོད་ཟེར་ཏེ་གྲུབ་པ་ཐོབ་པའི་རྣལ་འབྱོར་པ་བཞི། གཞན་ཡང་སྣེ་གདོང་གོང་མ་དང་མཚམས་སྦྱོར་བའི་སངས་རྒྱས་དཔལ་རིན་དང་། གྲགས་པ་དཔལ། གླུ་མཁན་བསོད་ནམས་སེང་གེ་ལ་སོགས་བསྟན་འཛིན་གྱི་བཤེས་གཉེན་དུ་མ་བྱུང་། ཕྱིས་ཆོས་རྒྱལ་འབྲི་གུང་པ་རིན་ཆེན་ཕུན་ཚོགས་ལ་ཞལ་བསྟན་ཅིང་། རང་གི་སྲས་སྤྲུལ་སྐུ་ཟླ་བ་ཞེས་དབུ་གཙུག་རྟ་མགོས་མཚན་པར་སྟོན་པ་དེའི་སྐྱེ་བ་ཡིན་པར་ལུང་བསྟན། དབུ་ཞྭ་བསྐོན་ཏེ་བྱིན་གྱིས་བརླབས་པ་ལས་དངོས་ཀྱི་སློབ་མར་གྱུར་ཏེ་གསུང་རབ་རྣམས་ལ་འཛིན་སྐྱོང་སྤེལ་བའི་གཅེས་སྤྲས་དཔག་ཏུ་མེད་པ་མཛད། དེ་ལས་པདྨའི་རྒྱལ་ཚབ་ཤཱན་ཏ་པུ་རི་པའམ། གཏེར་ཆེན་ཤེས་རབ་འོད་ཟེར་ལ་བརྒྱུད། དཔལ་རི་ཐེག་པ་མཆོག་གི་གླིང་བསྐྲུན་ནས་བསྟན་པའི་སྦྱིན་བདག་ཞབས་དྲུང་འཕྱོང་རྒྱས་པ་
ལ་སེམས་ཉིད་ངལ་གསོ་རྩ་འགྲེལ་པར་དུ་བརྐོ་བར་བསྐུལ། བསྟན་པ་འདི་ལ་བཤད་སྒྲུབ་བྱེད་དགོས་པར་གདམས་པས་དོན་གྱི་བརྒྱུད་འཛིན་ཡིན་པར་ཡང་ཞལ་གྱིས་བཞེས་སོ། །དུས་ཕྱིས་རིག་པ་འཛིན་པ་མཁྱེན་བརྩེའི་འོད་ཟེར་ལ་ས་མོ་ཡོས་ཀྱི་ལོར་དཔལ་གྱི་མཆིམས་ཕུར་ཡེ་ཤེས་ཀྱི་སྐུ་ལན་གསུམ་བསྟན་ཅིང་ཤིང་རྟ་ཆེན་མོ་སོགས་གབ་པའི་མན་ངག་ཐམས་ཅད་འདིས་གསལ་ཞེས་གླེགས་བམ་ཞིག་ཀྱང་གཏད། གདམས་པ་དང་རྗེས་སུ་གདམས་པ་ཐམས་ཅད་བསྩལ་ནས་ཆོས་ཚུལ་རྒྱ་མཚོ་དང་ཁྱད་པར་ཀུན་མཁྱེན་བླ་མ་ཉིད་ཀྱི་གཞུང་ལུགས་དང་གདམས་པ་མཐའ་དག་ལ་རང་བྱན་ཚུད། ཤིན་ཏུ་ཉེ་བརྒྱུད་ཀྱང་རུང་སྟེ་འཕགས་པ་ལྷས་མ་ཏཾ་གི་པ་རྗེས་སུ་བཟུང་བ་བཞིན་ནོ། །མན་ངག་སྙིང་གི་ཐིག་ལེའི་སྐབས་ཀྱི་གཏམ་བཤད་ཟིན་ཏོ།། །། ད་ནི་མདོ་སྒྱུ་སེམས་གསུམ་གྱི་བསྟན་པ་སྤྱིའི་བབས་ཚུལ་ལ། གངས་རིའི་ཁྲོད་འདིར་སྔ་འགྱུར་རྡོ་རྗེ་ཐེག་པའི་བསྟན་པ་དང་པོར་གཉགས་ལ་བབས། བར་དུ་གནུབས་ལ་བབས། ཐ་མར་ཟུར་ལ་བབས་ཞེས་འཆད་པའི་དང་པོ་སློབ་དཔོན་གཉགས་ཛྙཱ་ན་ཀུ་མཱ་ར་ནི། ཡུལ་ཡར་ཀླུངས་ཤེལ་པའམ་འཕྱོས། རུས་ལས་མིང་དུ་ཆགས་པ་གཉགས་སྟག་སྒྲ་ལྷ་སྣང་དང་། སྲུ་བཟའ་སྒྲོན་སྐྱིད་གཉིས་ཀྱི་སྲས་སུ་བྱུང་། མགྲིན་པ་ན་སྨེ་བ་རྡོ་རྗེ་རྒྱ་གྲམ་ཡོད། མཚན་རྒྱལ་བའི་བློ་གྲོས་སུ་བཏགས། མཁན་པོ་བོ་དྷི་སཏྭ་ལས་རབ་ཏུ་བྱུང་ཞིང་བསྙེན་པར་རྫོགས། མདོ་སྔགས་ཀྱི་ཆོས་མང་པོའི་འགྱུར་བྱེད་སྤོབས་པ་བསམ་གྱིས་མི་ཁྱབ་པ་ཡིན། སློབ་དཔོན་ཆེན་པོ་དང་། བི་མ་ལ་དང་། བཻ་རོ་དང་། གཡུ་སྒྲ་སྙིང་པོ་ཀུན་ལ་བསྟེན་པས་བཀའི་ཆུ་བོ་བཞི་འདུས་པ་ཡིན། དཀྱུས་བཤད་གཞུང་གི་ཆུ་བོ་འགྲེལ་ཊིཀ་སྟོང་ཐུན་དང་བཅས་པ། སྙན་བརྒྱུད་གདམས་ངག་གི་ཆུ་བོ་གནད་ཡིག་དམར་ཁྲིད་དང་བཅས་པ། བྱིན་རླབ་དབང་གི་ཆུ་བོ་སྐུར་ཐབས་ངོ་སྤྲོད་དང་བཅས་པ། ཕྱག་བཞེས་ཕྲིན་སྒྲུབ་ཀྱི་ཆུ་བོ་བསྟན་སྲུང་དྲག་སྔགས་དང་བཅས་པའོ། །དེ་ལ་སློབ་དཔོན་ཆེན་པོས་བདུད་རྩི་
ཡོན་ཏན་གྱི་དཀྱིལ་འཁོར་དུ་སྨིན་པར་མཛད་པས་ཡར་ཀླུངས་ཤེལ་གྱི་བྲག་ཕུག་རྡོ་བ་སྐམ་པོའི་ཁོང་ནས་གྲུབ་ཆུ་བཏོན། འདི་ལས་བརྒྱུད་པའི་སྒྱུ་འཕྲུལ་ཀྱང་ཡོང་དགོས་ཏེ། གཙོ་བོར་ཕུར་པ་ལས་མངོན་རྟགས་བརྙེས་པ་ཡིན། བཙད་པོ་ཁྲི་སྲོང་གཤེགས་པའི་ཕྱི་ཞིག་ན་བཙུན་མོ་ཚེ་སྤོང་བཟའ་བསམ་སྦྱོར་མི་སྲུན་པས་ལོ་པཎ་ཕལ་ཆེར་དབུ་འཕང་སྨད། གཉགས་ཛྙཱ་ན་ཀུ་མཱ་རས་ཡར་འབྲོག་ཏུ་བཞུགས་པ་ལ། རང་གི་ཕ་སྤུན་གཉགས་དགེ་སྟོན་དགྲར་ལངས་ཏེ་འདི་མུ་སྟེགས་ཀྱི་སྔགས་མཁན་ཡིན་ནོ་ཟེར་གཡོ་ཅན་གྱི་ཁ་སྨྲས་བྱས། བསེ་ཞོས་བྱུགས་པའི་བྷནྡྷ་ནང་དམར་པ་ཡོད་པ་དེ་བརྐུས་ནས་སྐྱེ་བོ་བླུན་པོར་གྱུར་པ་དག་ལ་སྟོན་ཅིང་། བྷནྡྷའི་ནང་གྲི་རྩེས་དྲུད་ནས་འདི་ནི་ཟག་ཟོག་གི་ལས་སོ་ཞེས་དབྱེན་བཅོས། སྐྱེ་བོ་རྣམས་ཐེ་ཚོམ་སེལ་བའི་ཆེད་དུ། གང་དུ་བཞུགས་སར་རིན་པོ་ཆེའི་རྙེད་པ་སྤྲུལ་པས་མི་རྣམས་ཀྱིས་རྫུ་འཕྲུལ་དུ་ཤེས་ནས་ཁོའི་ངག་ལ་ཡིད་མི་གཏོད་ཀྱང་། ད་དུང་བྱ་བ་མང་པོ་བསོགས་ནས་སྐུ་ལ་བརྡོ་བའི་ཐབས་སྣ་ཚོགས་བྱེད་པ་མཁྱེན་ནས་གཤེགས། ཀོང་པོ་མཆིམས་ཡུལ་གྱི་ཕུ་ན་ཕེབས་ཙ་ན། ལུང་སྟོང་གཅིག་ན་ར་མ་བདུན་འགྲོ་ཞིང་འདུག །གཡོག་པོ་གླལ་མིག་འོག་བཙན་བྱ་བར་འདི་དེད་ཅིག་གསུངས་པས། ཁོ་ན་རེ། ར་ལ་བདག་པོ་ཡོད་མཆི་འདིས་ཅི་འཚལ་ཞུས་པས། ལུང་སྟོང་གི་ར་ལ་བདག་པོ་ག་ན་འོང་དེད་ཅིག་གསུངས། དེར་བདག་པོ་མཆིམས་བྱ་རོག་གིས་ཤེས་ཏེ་རྐུན་ཁག་ཕབ། ར་ལ་བདུན་འཇལ་དགོས་ཟེར། བདུན་འཇལ་སྤྲད་ཙ་ན། ད་དུང་མ་ཚིམས་པར་དབེན་པ་བཤིགས། ལྕགས་ཀྱི་ཐོ་བ་བཟུང་ནས་འདེད་དུ་བྱུང་། གཉགས་ཀྱིས་བྲོས་ནས་གཙུག་ལག་ཁང་གི་ནང་དུ་ཆུད། སྒོ་བཅད་པས་ཐེམ་པ་ལ་ཐོ་བས་བརྡེག་ཅིང་བཙུན་ཆུང་གི་མགོ་ལ་དེའུ་ཐེབས་ཟེར། དེར་ཡང་བཞུགས་སུ་མ་སྟེར་བས། དབུས་སུ་གཏད་དེ་བྱོན་ཙ་ན། འགྲོ་སྲས་ཆུང་བྱ་བ་ཤ་བ་གཅིག་དེད་ནས་བྱུང་བ་ཕྲད། ཁོའི་རྟ་འདྲོགས། ཤ་བ་ཤོར་བས། ཁོ་ཡང་ཁྲོས་ཏེ་
གསོད་དུ་བྱུང་བ་ལ་འབྲོས་པའི་འདུན་པ་གཅིག་གཏད་པས་ཁོས་མ་མཐོང་ནས་ཐར། དུས་དེ་ཙམ་ན་ལྷ་སྲས་མུ་ནེ་བཙན་པོ་ཡུམ་དམར་རྒྱན་གྱིས་དུག་གིས་བཀྲོངས་པའི་འདད་ཀྱི་ཚོགས་དབུར་སློབ་དཔོན་བི་མ་ལ་རྒྱ་ནག་ནས་རྫུ་འཕྲུལ་གྱིས་གཤེགས་པ་དང་མཇལ། གསེར་ཕྱེ་ལོང་མོ་གང་ཕུལ་བས། ལོ་ཙཱ་བ་དཔོན་གཡོག་སྐྱིད་དམ་གསུངས། ཡར་འབྲོག་སྒང་དུ་སྐྱིད་བགྱི་རུ། །དགེ་ལ་སྟོན་གྱིས་མ་སྟེར་རོ། །མཆིམས་ཡུལ་གཏིང་དུ་སྐྱིད་བགྱི་རུ། །བྱ་རོག་དམྱལ་བས་མ་སྟེར་རོ། །བོད་ཡུལ་དབུས་སུ་སྐྱིད་བགྱི་རུ། །འགྲོ་སྲས་ཆུང་གིས་མ་སྟེར་རོ། །ཞེས་ཞུས་པས། ལོ་ཙཱ་བར་བརྙས་ན་བསྟན་པ་ལ་ཤིན་ཏུ་གནོད་པར་དགོངས་ནས། ཕུར་པ་ཕུན་སུམ་ཚོགས་པ་དང་། གཤམ་སྔོན་གཉིས་ཐུགས་ནས་ཕྱུང་སྟེ་བཤད། ལྷོ་བྲག་གཡར་ཆུ་སྣའི་བྲག་ཕུག་ཏུ་ལོ་པཎ་ལྷན་ཅིག་པས་སེར་ཕུར་ཉི་ཤུ་རྩ་གཅིག་ལ་བསྟེན་ནས་བསྒྲུབས་པས་ཕུར་བུ་ཕན་ཚུན་འཁྲོལ་བ་ཙམ་དུ་གྲུབ། དེར་གཉགས་ཀྱིས་ཏིང་ངེ་འཛིན་གྱི་ངང་ནས་ཕུར་བུ་གདེངས་ཏེ་བྱ་རོག་ལའོ་བྱས་པས། སྟོད་ཁམས་ཀྱི་བྱ་རོག་ཐམས་ཅད་ཚོགས་བྱུང་། སླར་མཆིམས་བྱ་རོག་ལའོ་ཞེས་བསྒྲིལ་བས། མཆིམས་ནས་བྱ་རོག་ཟུང་ཞིག་བྱུང་། གཉགས་ཁྲོས་ནས་བྱ་རོག་གཅིག་ལ་གདེངས་པས་མོད་ལ་ཤིའོ། །དེར་བི་མ་ལས་མངོན་སྤྱོད་ཀྱི་མཐུས་གསད་པ་གྲུབ་ཀྱིས། ད་ཆོས་ཉིད་ཀྱི་མཐུས་གསོ་བ་ཨེ་འགྲུབ་གསོས་ཤིག་གསུངས་པས། སློབ་དཔོན་ཛ་ལནྡྷ་རི་བ་དང་། སློབ་མ་ནག་པོ་སྤྱོད་པ་བཞིན་གཉགས་ཀྱིས་སློང་མ་ནུས། བི་མ་ལས་བྱེ་མ་གཅིག་བཏབ་པའི་མོད་ལ་བྱ་རོག་སོས་ཏེ་དེངས་པར་གྱུར་ཏོ། །རྟོགས་པས་བདག་མ་བསྒྲལ་བར། དྲག་ཤུལ་གྱི་ལས་བརྩམས་པ་གྲུབ་ཀྱང་ཉེས་པ་ཆེའོ་གསུངས་ནས་གནས་ལུང་གི་ཆོ་ག་མཛད། དེར་མཆིམས་ལྷ་གཡག་དཀར་དུ་བརྫུས་ནས་བྱུང་བ་སྔུན་ལ་བསྒྲལ། དེ་ནས་མཆིམས་བྱ་རོག །བླ་སྤྱང་རབ་འབྲིང་ཐ་གསུམ། བྲན་དང་ཁོལ་པོ། འོག་རྟ་སྒོ་ཁྱི་གནག་གི་གཉེན་
མཚམས་དང་བཅས་པ་ཕུར་པ་གདེངས་ཆོག་གི་མཐུས་བསྒྲལ་ནས་རབས་བཅད། དེ་ནས་ཕ་སྤུན་གཉགས་དགེ་སྟོན་ལ་བཏབ་པས་འདི་ལྟར་དྲག་པོ་མཐུའི་ལས་ནི་རྣམ་པ་ཞེ་སྡང་རྡོ་རྗེའི་རྟེན་འདྲེལ་ལ་ལྷག་པར་ལྟོས་པ་ཞིག་ལ། སློབ་དཔོན་བི་མ་ལའི་ཐུགས་རྗེས་གཉགས་ལ་སྙིང་རྗེ་ཆེན་པོའང་སྐྱེས། དགོངས་པ་ཆོས་ཉིད་དུ་གྱུར་པས་ཡེ་མ་ཐེབས། དེར་སློབ་དཔོན་བི་མ་ལའི་ལས་འདིར་གྲོགས་མངོན་སྤྱོད་ཀྱི་མཚན་དང་ལྡན་པ་ཞིག་རྙེད་ན་ཐེབས་གསུངས་པས་འཚོལ་དུ་བྱོན། དུས་དེ་ཙ་ན་མགར་བྱེད་པ་ལ་སོག་པོར་འབོད་པས། སོག་པོ་བེག་ཙེ་ཞེས་བྱ་བ་ཁྲོ་བོའི་དབྱིབས་སུ་ཡོད་པ་གཅིག་རྙེད། དེའི་གཟུགས་མགོ་བོ་རྒྱ་མདུད་དུ་འདྲིལ་ཞིང་། རོ་སྨད་ཟུར་གསུམ་པའི་རྣམ་པར་ཤར་བ་ལ་སོགས་པའི་མཚན་རྟགས་ཐམས་ཅད་ཚང་བར་གཟིགས། གཉགས་ཀྱིས་ཁོ་བོའི་ཕྱིན་མར་བྱོན། ཁོ་མགར་བྱེད་པའི་སྦུད་པ་འབུད་གྲོགས་མཛད་ཀྱིན་རྒྱུ་མཚན་ཉིད་ཀྱི་ཆོས་བཤད་པས་ཁོའི་རྣ་ལམ་དུ་མ་བྱུང་། ཀྲྀ་ཡོག་སྡེ་གསུམ་བཤད་པས་རེས་འགའ་ཙམ་ཉན་ཅིང་གཞན་ཐོ་བ་ཆེམས་ཆེམས་བརྡུང་སྐད། ནང་རྒྱུད་སྡེ་གསུམ་བཤད་ཀྱིན་ལྕགས་ཀྱི་ལྕུག་མ་སྙོད་པ་རྣམས་ཁྱུར་མིད་བྱས་པས། ཁོ་ཡ་མཚན་སྐྱེས་ཏེ་འདི་ལྟ་བུའི་རྫུ་འཕྲུལ་ཅི་ལས་བྱུང་ཟེར། ད་ལྟ་བཤད་པའི་ཆོས་དེ་ཉམས་སུ་བླངས་པ་ལས་བྱུང་སྨྲས་པས། ཁོ་ཤིན་ཏུ་དད་དེ་ལག་ཆ་ཐམས་ཅད་ཕུལ་ནས་སློབ་མར་བྱས། ལྷ་དཔལ་གྱི་ཡེ་ཤེས་སུ་མིང་སྤོས། དེ་བཞིན་དུ་འོ་བྲན་དཔལ་གྱི་གཞོན་ནུ་ཡང་ཕུར་པ་སྒྲུབ་པའི་མཚན་ལྡན་དུ་ཤེས་ནས་དཔོན་སློབ་གསུམ་ཀས་བསྒྲུབས་པས། དེ་དགེ་སྟོན་གྱིས་ཚོར་ཏེ་གསོད་དུ་འགྲོ་བའི་སྟ་གོན་བརྩམས་པ་ན། གཞན་དག་གིས་བནྡིར་བརྙས་པ་མི་རུང་ཟེར་ནས་བཤོལ་བཏབ་ཀྱང་མ་ཉན། ནང་པར་འགྲོ་རྒྱུའི་ནུབ་བུད་མེད་མང་པོས་མཐའ་བསྐོར་ནས་མགོ་བཅད་པ་རྨིས། དེ་ཆུང་མ་ལ་བཤད་པས་ནན་གྱིས་བཤོལ་བཏབ་ཀྱང་མ་ཉན་པར་རྟ་ལ་ཞོན་ནས་སོང་བ་ན། བྱ་ཆེན་པོ་ཞིག་འཕུར་བྱུང་ནས་རྟ་འདྲོགས། ཤ་ཁམ་ཁྲག་ཐིག་ཏུ་གྱུར་ཏེ་སྲུང་མས་དངོས་སུ་བསྒྲལ་བར་གྲགས། དེར་སོག་པོ་དཔལ་
ཡེས་སྙིང་བཏོན་ནས་སློབ་དཔོན་ལ་ཕུལ་བས། སྡིག་པ་ཅི་ཡང་མི་བྱ་ཞིང་། །དགེ་བ་ཕུན་སུམ་ཚོགས་པར་སྤྱད། །རང་གི་སེམས་ནི་ཡོངས་སུ་གདུལ། །སེམས་ཅན་ཐམས་ཅད་བདེ་གྱུར་ཅིག །གསུངས། མདོར་ན་སྐྱོབ་པའི་ལྷ་བྱ་ཁྲར་སྤྲུལ་པ་དང་། བླ་སྤྱང་བྲན་ཁོལ་འོག་རྟ་སྒོ་ཁྱི་གཉེན་མཚམས་ཚུན་ཆད་བསྒྲལ་ཞིང་རབས་བཅད། དེ་བཞིན་དུ་འགྲོ་སྲས་ཆུང་ནེ་ཐང་ལ་རྟ་ཁྱུ་འཚོ་བའི་རྣམ་པར་ཤེས་པའང་བཀུག་སྟེ་གདབ་ལས་ཀྱིས་ཚར་བཅད། འགྲོ་ལྷ་སྤྱང་ཀི་སྔོན་པོར་བྱས་པ་དང་། བླ་སྤྱང་བྲན་ཁོལ་ཐམས་ཅད་སྔར་བཞིན་ཁ་དག་པར་བྱས། དེའང་གཉགས་ལོ་ཙཱ་ཆེན་པོ་འདི་སངས་རྒྱས་དངོས་དང་མཚུངས་པའི་པཎ་གྲུབ་རྣམས་ལ་བསྟེན་པས། སྒྲ་ཚད་མཚན་ཉིད། སྔགས་ཕྱི་ནང་ཀུན་ལ་མཁྱེན་པ་ཤིན་ཏུ་ཆེ་བར་གྲགས། ལོ་ཙཱ་བ་ཆེན་པོར་བསྟན་ནས་དམ་པའི་ཆོས་མང་པོ་བསྒྱུར། མདོ་སྒྱུ་སེམས་གསུམ་ཀའི་བསྟན་པའི་མངའ་བདག་ཏུ་གྱུར་ཅིང་ཉན་བཤད་ཀྱི་སྒོ་ནས་སློབ་མ་ཁྱད་པར་ཅན་མང་དུ་བསྐྲུན་པས་བཀའ་དྲིན་བསམ་གྱིས་མི་ཁྱབ། མཐར་སྙན་བརྒྱུད་རྡོ་རྗེའི་ཟམ་པ་དང་། མན་ངག་སྡེ་ལས་དངོས་གྲུབ་ཆེན་པོ་བརྙེས་ཏེ་སྟོང་གསལ་འོད་ཀྱི་ཕུང་པོར་གཤེགས་སོ། །དེ་ལ་སློབ་མའི་གཙོ་བོ་ནི་ཕུར་པ་མཁན་པོ་དག་དཔལ་བརྒྱད་དུ་འདྲེན་པ་ཡོད་དེ། འདིར་སོག་པོ་དཔལ་གྱི་ཡེ་ཤེས། གྲ་དཔལ་གྱི་སྙིང་པོ། ལྷ་ལུང་དཔལ་གྱི་རྡོ་རྗེ། འོ་བྲན་དཔལ་གྱི་གཞོན་ནུ། གཉན་དཔལ་དབྱངས། མཚུར་ནག་ཡེ་ཤེས་དཔལ། ཨུ་པ་དོ་གསལ། ཐང་དཔལ་གྱི་རྡོ་རྗེ། དགྱེ་འཕགས་པ་ཤེས་རབ། བྷུ་སུ་གུ་མཆོག་རྣམས་ཏེ། དབོན་བརྒྱུད་རྣམས་ལས་ཀྱང་ཕྲིན་ལས་རྒྱ་ཆེར་བྱུང་ངོ་། །སོག་པོ་དཔལ་གྱི་ཡེ་ཤེས་ནི་ཡུལ་ཡར་འབྲོག་པ་ཡིན། སློབ་དཔོན་ཆེན་པོའི་དུས་ནས་དངོས་གྲུབ་བརྙེས་ཚར་བ་གཅིག་ཐུན་མོང་བའི་སྣང་ངོར་མགར་གྱི་ཚུལ་དུ་བཞུགས། གཉགས་ལོ་ཆེན་པོ་དེ་མཁྱེན་པ་ཤིན་ཏུ་ཆེ་བས་སློབ་དཔོན་རྣམས་ལས་ཀྱང་རང་ཉིད་མཁས་སྙམ་པ་ལན་གསུམ་སྐྱེས་པས་སྲོག་ལ་འབབ་པའི་དོ་གལ་ཚར་གསུམ་བྱུང་བར་གྲགས།
དེ་ལ་རྒྱུ་འབྲས་མི་བསླུ་བའི་བདེན་པ་ལས་བདག་གིར་མཛད་པའི་ཚུལ་སྟོན་པ་ལ་བབ་པའི་སྐབས་ཤིག་ན། གཉགས་ལ་སྐུ་དགྲ་ལན་གསུམ་དུ་ལངས་པའི་རེས་གཅིག་ཡུལ་ཉེ་འཁོར་གྱི་གཉགས་དམར་ཕ་སྤུན་གྱིས་མི་ཤ་མཁོན་ཏུ་བྱས་ནས་སློབ་དཔོན་བཙོན་དུ་བཟུང་། སོག་པོ་དཔལ་ཡེ་དེ་དོན་ལ་གྲུབ་པའི་སྤྱོད་པ་འབའ་ཞིག་ཡིན་གྱི་རྣམ་པར་གཅན་ཟན་གྱི་གཉའ་ནས་འཛིན་པ་སོགས་རྟུལ་ཕོད་པར་སྟོན་པས། སྐབས་འདིར་བླ་མའི་ཕྱིར་དུ་ལུས་སྲོག་འདོར་བའི་རྡོ་རྗེའི་དམ་ཚིག་གཉན་པོ་ལ་འཚལ་བས་བཙོན་སྲུང་གཉིས་བཀུམས། སློབ་དཔོན་བཙོན་དོང་ནས་སྤྱན་དྲངས་པ་སོགས་སྐུ་དགྲ་ལན་གསུམ་བཏུལ་ཞིང་ཐུགས་ལན་གསུམ་བཟུང་བས། རྡོ་རྗེ་ཕུར་པའི་དཀྱིལ་འཁོར་མངོན་སུམ་པར་སྤྲུལ་ནས་རྗེས་སུ་བཟུང་བ་འདི་ཙམ་དོན་ལ་གནས་སོ། །དེས་གནུབས་ཆེན་ལ་རྗེས་སུ་གདམས་པའོ།། དེ་ལ་སྔ་འགྱུར་གྱི་བསྟན་པ་བར་ཏུ་གནུབས་ལ་བབས་ཏེ། གནུབས་ཆེན་སངས་རྒྱས་རིན་པོ་ཆེ་འདི། བཙན་པོ་ཁྲི་སྲོང་ལྡེའུ་བཙན་ནས། ཁྲི་བཀྲ་ཤིས་བརྩེགས་པ་དཔལ་གྱི་བར་ཅི་རིགས་པར་བྱུང་བར་འདོད་པ་དང་། ཡང་རལ་པ་ཅན་གྱི་དུས་སུ་བྱུང་ནས། ཁྲི་བཀྲ་ཤིས་བརྩེགས་པའི་བར་བཞུགས་པར་འདོད་པ་དང་། ཡང་སྔ་མ་བཙན་པོ་ཁྲི་སྲོང་ལྡེའུ་བཙན་དང་། ཕྱི་མ་རལ་པ་ཅན་གྱི་དུས་ན་བྱུང་ངོ་ཞེས་གཏན་ཚིགས་ཡོད་དེ། རྒྱ་བོ་ཆེར། རྒྱ་གར་མཁས་པ་བི་མ་མི་ཏྲ་དང་། །ཨུ་རྒྱན་མཁན་པོ་པདྨ་འབྱུང་གནས་དང་། །བལ་པོའི་མཁས་པ་བ་སུ་དྷ་ར་དང་། །བོད་ཀྱི་མཁས་པ་ཛྙཱ་ན་ཀུ་མཱ་རས། །བདག་ལ་གནང་བའི་མན་ངག་འདི་རྣམས་ཡིན། །ཅེས་པས་བཙན་པོ་ཁྲི་སྲོང་གི་དུས་སུ་བྱུང་བར་རྩོད་པ་མེད་ལ། སྐུ་ཚེའི་ཚད་བརྒྱ་དང་བཅུ་གསུམ་ལ་གཏན་ཚིགས་བསྒྲིགས་ནས་བྱོན་པའི་དུས་ཕྱིར་བསྲིང་བ་དང་། དུས་གནུབས་དང་། ཡུལ་སྒྲགས་ལ་གཟུགས་བརྙན་གཉིས་པར་བཅོས་པས་སྔ་ཕྱི་གཉིས་པར་བྱུང་སྟེ་སྙིང་པོ་མེད་དོ། །འདིར་ནི་གནུབས་ཀྱི་བན་ཆུང་སངས་རྒྱས་ངས། །ལོ་ནི་བརྒྱ་དང་སུམ་ཅུར་ལོན། །ཞེས་ཕྱི་མཐའི་ཐ་ཚིག་མིན་པར་སྐབས་ཀྱི་འཕྲོས་དོན་ལའང་
བྱུང་བས་ཚེའི་རིག་པ་འཛིན་པ་བརྙེས། མངའ་བདག་དཔལ་འཁོར་བཙན་གྱི་བར་དུ་བཞུགས་པར་སྣང་ངོ་། །དེ་ལ་ཡབ་གནུབས་རིགས་གསལ་བའི་དབང་ཕྱུག་དང་། ཡུམ་མཆིམས་མོ་བཀྲ་ཤིས་མཚོ་ཞེས་བྱ་བའི་བུར་བཙས། མཚན་རྡོ་རྗེ་ཁྲི་གཙུག་ཏུ་གྲགས། ལོ་བདུན་པར་འོ་བྲན་དཔལ་གྱི་གཞོན་ནུ་ལས་བྲི་ཀློག་སྦྱངས། མཁན་པོ་བོ་དྷི་ས་ཏྭ་ལས་རབ་ཏུ་བྱུང་། སློབ་དཔོན་བ་སུ་དྷ་ར་བསམ་ཡས་སུ་བྱོན་པ་དང་མཇལ་ནས་གསེར་སྲང་གསུམ་གྱི་འབུལ་བ་བྱས་ཏེ་མན་ངག་འགའ་ཞིག་ཐོས། སློབ་དཔོན་འབྱོན་ཁར་སླར་བལ་ཡུལ་དུ་ཤོག་ཅེས་པའི་རྗེས་སུ་གནང་བ་ཐོབ་པས་རྒྱ་བལ་ལ་འགྲོ་བའི་བློ་ཆུང་ངུ་ནས་སྐྱེས། སྤྱིར་རྒྱ་གར་ལ་ལན་བདུན་བྱོན་པའི་སྔ་རེས་དང་པོ་ལོ་བཅུ་གསུམ་པ་ཡིན། ཅེས་ཟེར། སློབ་དཔོན་ཆེན་པོ་པདྨའི་ཞབས་ལས་སྒྲུབ་ཆེན་བཀའ་བརྒྱད་ཀྱི་དཀྱིལ་འཁོར་དུ་དབང་བསྐུར་བ་ཐོབ་ཅིང་དངོས་གྲུབ་བརྙེས། རེ་ཞིག་ན་ཡུལ་གཞིས་བཙོངས་པའི་རིན་གསེར་ཞོ་ལྔ་བཅུ་བྱུང་བ་བསྣམས་ཏེ་རྒྱ་བལ་ལ་གཏད་དེ་བྱོན། སློབ་དཔོན་བ་སུ་དྷ་ར་ལས། རྒྱུད་དང་མན་ངག་མང་དུ་ཐོས། དེས་མདོ་ལུང་གི་མཁན་པོ་ཆོས་རྒྱལ་སྐྱོང་དང་། དྲག་སྔགས་ཀྱི་མངའ་བདག་རམ་བུ་གུ་ཧྱའང་བསྟེན། རྒྱ་གར་དང་། བལ་པོ་དང་། བྲུ་ཤའི་ཡུལ་ན་གནས་པའི་མཁས་པ་མང་ཞིག་བསྟེན། རྒྱ་གར་དུ་མཁན་པོ་ཆོས་རྒྱལ་སྐྱོང་ལས་མདོ་ལུང་འགའ་ཞིག་དང་། ཁྱད་པར་བྲུ་ཤའི་མཁན་པོ་ཆེ་བཙན་སྐྱེས་ལས་མདོ་དགོངས་པ་འདུས་པ་ཡོངས་སུ་རྫོགས་པ་མཁྱེན་པར་མཛད། བསམ་ཡས་སུ་ལོ་ཙཱ་བ་ཆེན་པོའི་གྲར་བཞུགས་ཤིང་དམ་པའི་ཆོས་ཀྱང་བསྒྱུར། དབེན་པ་འབའ་ཞིག་བརྟེན་དགོངས་པ་ལ། སྤྱིར་དུས་འདི་ཙམ་ན་རྒྱལ་ཁྲིམས་ཞིག་ཅིང་། ཕྱོགས་རིས་ཀྱི་འཁྲུག་པ་དར་བའི་སྐབས་སུ་གྱུར་པས་གནུབས་ཆེན་ཡབ་སྲས་ལ་འོ་བརྒྱལ་ཆེན་པོ་བྱུང་། ཁྱད་པར་སྐུ་ཚེ་སྔ་མ་ལ་རྒྱ་གར་དུ་ཤན་པ་མ་རུ་ཙེ་བྱ་བར་འཁྲུངས་ནས་སེམས་ཅན་གྱི་དོན་མཛད་པའི་འདུལ་ཞིང་ལྷག་མ་མ་ལུས་པར་རྫོགས་
པར་མཛད་པ་དང་། བོད་འདིར་དབོན་སྲས་ཀྱི་བསྟན་པ་ཉམས་པར་བྱེད་པས་མཚོན་སྔ་ཕྱིར་བསྟན་པ་ལ་གནོད་བྱེད་མང་དུ་འབྱུང་བ་དེ་དག་དྲག་སྔགས་ཀྱིས་ཚར་བཅད་ནས་བསྟན་པ་སྲུང་བའི་ཕྱིར་རྒྱལ་བའི་ཕྲིན་ལས་ཀྱིས་བསྐུལ་བ་ལས་རྣམ་པའི་རྐྱེན་ཡུལ་པའི་ཁེངས་ལོག་སྔ་ཕྱི་བར་གསུམ་དུ་བྱུང་ནས་རིགས་ཀྱི་སྲས་གཉིས་བཀྲོངས་པས། ཇི་སྐད་དུ། ཉོན་མོངས་བོད་ཡུལ་དབུས་སུ་ལངས། །འཚོ་བའི་ཟས་རྣམས་འབངས་ཀྱིས་ཕྲལ། །ཅེས་དང་། བདག་འདྲ་གནུབས་ཀྱི་བན་ཆུང་ཡང་། །སྙིང་ནས་ཆོས་བཞིན་བྱ་སེམས་སྐྱེས། །ཞེ་སྡང་དགྲ་བོས་བྱེད་མ་སྟེར། །སངས་རྒྱས་བསྟན་པ་སྲུང་བའི་ཕྱིར། །ཞེ་སྡང་དེ་མ་ཐག་ཏུ་བསྐྱེད། །དཀར་པོའི་ཆེ་བ་འདོན་བསམས་ནས། །ངན་སྔགས་ཡིག་སྣ་སྣ་ཚོགས་བསླབས། །ཞེས་པ་ལྟར་རྒྱ་བལ་གྱི་ཡུལ་ནས་གཤེད་སྐོར་རྒྱ་མཚོའི་དྲག་སྔགས་རྣམས་སྤྱན་དྲངས་པ་ཡིན་ཏེ། བླ་མ་བཅུ་གཅིག་ཞབས་ནས་བཏེགས། །འོན་ཀྱང་མཁས་པ་བཞི་ལ་གཏུགས། །སློབ་དཔོན་དཔལ་གྱི་སེང་གེ་དང་། །རྒྱ་གར་ཁྲག་འཐུང་ནག་པོ་དང་། །ཕུང་བྱེད་ཤཱནྟིཾ་གརྦྷ་དང་། །བལ་པོ་བ་སུ་དྷ་ར་བཞི། །མཁས་པ་བཞི་ཡི་ཐུགས་བརྟོལ་ནས། །ཟབ་པའི་མན་ངག་ཐུགས་ལ་བཏགས། །ཞེས་དང་། དེ་དག་ཀྱང་གནད་དུ་བསྡུས་པ་བལ་པོའི་སློབ་དཔོན་ཉིད་ལས་བྱུང་སྟེ། འདི་སྐད། སློབ་དཔོན་བལ་པོའི་རྒྱལ་པོ་ཡིས། །ཡང་ལེ་ཤོད་ཀྱི་བྲག་ཕུག་ཏུ། །གནུབས་ཀྱི་བན་ཆུང་འདིར་ཤོག་གསུངས། །བམ་ཆེན་རོ་ཡི་དབང་བསྐུར་ནས། །ལྷ་རུ་འཇམ་དཔལ་ཚེ་བདག་གཏད། །ཅེས་པས་མཚོན་ནོ། །དེ་ལྟར་སློབ་དཔོན་འདི་རྒྱ་གར་དུ་བྱོན་པའི་རེས་ཞིག་རྡོ་རྗེ་གདན་ལ་ཚོགས་གསོག་མཛད་པས། ནམ་མཁའི་ཀློང་ནས་གསེར་གྱི་རྡོ་རྗེ་རྩེ་དགུ་པ་ཞིག་རང་གི་ཐད་ཁྲུ་གང་གི་སར་བྱུང་སྟེ་ལན་གཉིས་སུ་མ་ཟིན། གསུམ་པའི་ཚེ་ཕྱག་གཡས་པའི་མཐེབ་སྲིན་གྱི་བར་དུ་ཆགས་པའི་མོད་ལ་དེ་ཕྱག་ན་རྡོ་རྗེ་དངོས་ཀྱི་སྐུར་གྱུར། དབང་བསྐུར། བྱིན་གྱིས་བརླབས། སངས་རྒྱས་ཡེ་ཤེས་སུ་མིང་གི་ཅོད་
པན་དཔྱངས། དབང་རྟགས་སུ་རྡོ་རྗེ་རྩེ་དགུ་དང་འབྲལ་མེད་དུ་འཆང་བ་ད་ལྟ་རོང་བྱམས་ཆེན་གྱི་ཐུགས་ཀ་ན་ཡོད་པར་གྲགས། རྒྱ་བལ་གྱི་རུ་མཚམས་རྡོ་རྗེ་རྩེ་ལྔའི་བྲག་ཕུག་ཏུ་སློབ་དཔོན་པདྨ་ལས་ཀྱང་སྡོམ་པ་ནོད་པ་སོགས་རྒྱུད་དང་མན་ངག་མང་པོ་ཐུགས་སུ་ཆུད། དུར་ཁྲོད་དང་། མཚོ་གླིང་དང་། མི་མ་ཡིན་དྲག་པོ་རྒྱུ་བའི་གནས་སུ་སྒྲུབ་པ་མཛད་པས། འཇམ་དཔལ་ཡ་མཱནྟ་ཀ་ལ་སོགས་ཏེ་ཡི་དམ་གྱི་ལྷ་དཔག་ཏུ་མེད་པའི་ཞལ་གཟིགས། ཀླུ་དང་། གནོད་སྦྱིན་དང་། དྲི་ཟ་དང་། ཡི་དྭགས་དྲག་པོ་དག་དང་ཡང་གཏམ་འདྲེ་ཞིང་མཆོད་པར་བྱེད། ནུས་པ་ཤིན་ཏུ་ཆེ་བས་ལྷ་སྲིན་ཀུན་གྱིས་སྟངས་ཕུལ། དུར་ཁྲོད་ཕུ་ལུང་ནག་པོར་ཨེ་ཀ་ཙ་ཊིས་ཞལ་བསྟན། བྲམ་ཟེ་མོའི་ཐོད་པ་དངོས་གྲུབ་ཀྱི་རྫས་སུ་བྱིན། པདྨ་གར་གྱི་དབང་ཕྱུག་གིས་མོན་ནག་ཁ་ཁྲའི་ཐོད་པའང་དམ་ཚིག་གི་རྫས་སུ་སྤྲད། མངོན་ཤེས་དང་རྫུ་འཕྲུལ་ཐོགས་པ་མེད་པར་གྲུབ། བོད་ཡུལ་དབུས་ཀྱི་གནས་སྒྲགས་ཀྱི་ཡང་རྫོང་དུ་སྒྲུབ་གནས་ཀྱི་མཐིལ་མཛད། དེ་བཞིན་དུ་ཉུག་གི་རྡོ་རྗེ་སྒྲོམ་བུར་ཟླ་བ་དགུས་སེམས་ཉིད་བཙན་ས་ཟིན། གཙང་གི་ཕུང་པོ་རི་བོ་ཆེ་དང་། གཡུང་གི་རྫ་ལྷུད་མོ་སོགས་ཞབས་ཀྱིས་བཅགས། དྲུག་ཅུ་རེ་གཅིག་པར་སྒྲགས་སུ་ཁེངས་ལོགས་བྱུང་བས་གཤིན་རྗེའི་གཤེད་ཀྱི་དྲག་སྔགས་རྣོན་པོས་གྲོང་ཁྱེར་མང་པོ་བརླག་པར་མཛད། དེ་སྐད་དུ། བདག་འདྲ་སངས་རྒྱས་ཡེ་ཤེས་ཀྱིས། །སྒྲུབ་ཁང་ཡ་མའི་མཁར་ལ་བྱས། །སྒྲགས་ལ་ནག་པོའི་རྩེ་མོ་རུ། །ཉེ་འབྱེད་རླུང་གི་འཁོར་ལོ་བསྐོར། །སྒྲགས་ཀྱི་གྲོང་ཁྱེར་སུམ་ཅུ་རྩ་བདུན་བརླག །ཅེས་འབྱུང་ངོ་། །སླར་གནུབས་ཡུལ་རོང་དུ་བྲོས། དེར་ཡང་བཞུགས་སུ་མ་སྟེར་བས་སྙེ་མོ་བྱེ་མཁར་བཟུང་། གནས་དེར་ཡང་དམག་གི་ཆོམ་པོས་བསྐོར་ཞིང་སྐུ་སྲོག་ལ་བསྡོ་བར་ཉེན་པ་ན། མཁར་གྱི་རྩེ་ནས་ལྷ་འདྲེ་གཉེན་པོ་དཔང་དུ་གསོལ། ཚིགས་སུ་བཅད་པའི་བདེན་པ་བདར། ཆོས་གོས་བརྡབས་པས་དམ་ཅན་ཆོས་སྐྱོང་
རྣམས་མངོན་སུམ་པར་བྱུང་སྟེ། བདག་ཅག་གི་མཐུ་རྩལ་གྱིས་རི་རབ་ཐལ་བར་བརླག །ཉི་ཟླ་ཆ་ལང་རྡེབ། གནམ་ས་བླ་འོག་བསྒྱུར་ནུས་ཀྱང་། ཚེ་རབས་སྔ་མའི་ལན་ཆགས་བརྡོལ་བས་སྔོན་ཆད་གྲོགས་བྱེད་དུ་མ་སྟེར། ད་ནི་བཀའ་བཞིན་འཚལ་ལོ་ཟེར་བས་ཆོས་གོས་ཀྱི་ཆག་ནས་སེང་ལྡེང་གི་ཕུར་བུ་བཏོན། དམ་ཅན་རྣམས་ཀྱི་སྲོག་སྙིང་དྲངས། དམག་མི་ཡོད་པའི་རི་ལོགས་ལ་དྲིལ་ཞིང་བསྡིགས་པས། རི་ལས་མེ་དཔུང་ཆེན་པོ་བྱུང་སྟེ་དམག་རྣམས་ཐམས་ཅད་བསྲེགས་ཤིང་བརླག་པར་བྱས། སླར་རབ་ཏུ་འགྱོད་ནས་བསམ་གཏན་མིག་གི་སྒྲོན་མ་སྡིག་སྦྱོང་དུ་མཛད་པར་གྲགས། སྐུ་དགྲ་ཐུལ་རྗེས་ལོ་གསུམ་གྱི་བར་ལ་དབུལ་ཞིང་ཕོངས། སོག་པོ་དཔལ་གྱི་ཡེ་ཤེས་ལས་སེམས་ཕྱོགས་དང་སྒྱུ་འཕྲུལ་ལ་སོགས་པ་གསན། སྒྲགས་ཡང་རྫོང་དུ་དེ་ཁོ་ན་ཉིད་ཀྱི་ཏིང་ངེ་འཛིན་ལ་གཞོལ། མངའ་བདག་རལ་པ་ཅན་གྱི་བར་ཡན་ཆོད་དུ་རྒྱ་གར་དང་བོད་ཀྱི་བར་དུ་འབྱོན་བཞུད་ཀྱི་ངང་དུ་ཡོད་པ་ལ། དར་མས་བསྟན་པ་བསྣུབས་པ་ཐུགས་ཀྱིས་མ་བཟོད་ནས་སླར་ཡང་དྲག་སྔགས་སྤུ་གྲི་རེག་ཆོད་མང་པོ་ཚགས་སུ་བཙུད་ནས་མངོན་སྤྱོད་ཀྱི་ཐུགས་རྗེས་མཚམས་སྦྱང་བར་དགོངས་པ་ལ། སྡིག་སྤྱོད་རྒྱལ་པོ་ལྷ་ལུང་དཔལ་གྱི་རྡོ་རྗེས་བསྒྲལ་ཟིན་པས་དྲག་སྔགས་འཆོལ་གྱི་དོགས་ནས་གཏེར་དུ་སྦས། མདོ་སྒྱུ་སེམས་གསུམ་གྱི་བསྟན་པའི་རྒྱུན་སློབ་མའི་ཚོགས་ལ་མི་ནུབ་པར་སྤེལ་ནས་མཐར་རང་བཞིན་རྫོགས་པ་ཆེན་པོའི་ལམ་ནས་ལྷུན་འགྲུབ་འོད་ཀྱི་ཕུང་པོར་མྱ་ངན་ལས་འདས་སོ། །འདི་ལ་རྒྱུད་འཛིན་གྱི་སློབ་བུ་སྲས་ཀྱི་དམ་པ་གཅིག །ཐུགས་ཟིན་གྱི་སྲས་བཞི་དང་ལྔར་བྱུང་བ་ལས། སྲས་ཀྱི་དམ་པ་ཡོན་ཏན་རྒྱ་མཚོ་ནི་སྐྱེ་བ་སྔ་མ་ཡབ་སྲས་སུ་འདྲེལ། འདིར་གནུབས་ཁུ་ལུང་དུ་བཙས། སྐྱེ་བ་སྔ་མའི་ཕུ་བོ་རྒྱ་གར་དྷ་ན་དྷ་ལས་གནོད་སྦྱིན་མོའི་རྐང་མགྱོགས་བསྒྲུབས་ནས་གྲུབ་ཀྱང་གཤོག་པ་བཅག་པས་མ་ནུས། སླར་རྐང་མགྱོགས་ཅིག་ཤོས་བསྒྲུབས་པས་ཁོས་ཐུ་བའི་ནང་དུ་དྷ་ན་དྷ་ལ་ཁུར་ནས་མཚན་གང་གཅིག་ལ་ཁུ་ལུང་ཡོན་ཏན་རྒྱ་མཚོའི་རྩར་བསྐྱལ། དེར་
ཡོན་ཏན་རྒྱ་མཚོའི་སྐྱེ་བ་སྔ་མ་རང་གི་གཅུང་པོར་གྱུར་པ་ལ་རྗེས་སུ་བརྩེ་བས་དབང་བསྐུར། ཡོན་བདག་ལ་ཐུན་མོང་གི་དངོས་གྲུབ་བྱིན་པས་མི་རབས་བདུན་ཚུན་ཆད་དར་བར་གྲགས། ཡོན་ཏན་རྒྱ་མཚོ་ལ་སྒྲུབ་གནས་གྲོང་དུ་མི་རུང་གསུངས་ནས་མཁར་གདོངས་ཡོན་མོའི་གཙུག་རུམ་ལྟ་བུའི་ས་གནད་བསྟན་ཏེ། བསྟན་སྲུང་གཤིན་རྗེ་དམར་ནག་དང་། མ་གཤིན་གྱི་སྐོར་སོགས་བྱིན་ནས་རྒྱ་གར་དུ་གཤེགས། དེར་ཡོན་ཏན་རྒྱ་མཚོ་ལོ་སུམ་ཅུ་ལོན་པའི་ཚེ་ཁྱི་ར་ལ་འཁྱམས་པ་སློབ་དཔོན་སངས་རྒྱས་ཡེ་ཤེས་སྔར་གྱི་ཤུགས་ལ་ནག་པོར་བཞུགས་པ་དང་མཇལ་བས། རུས་གཅིག་པ་དང་། སྐལ་བ་ཅན་དུ་དགོངས་ནས་ཆོས་སྒོར་བཅུག་སྟེ་རྗེས་སུ་བཟུང་། ལྟ་བ་སྒང་དྲིལ་བ། གབ་པ་མངོན་དུ་ཕྱུང་། གསང་བ་ཁོང་ལྟོ་ལྟར་ཕྱུང་། སྟར་ག་གེགས་སེལ་གྱི་ཚུལ་ཏེ་བཞི་ཀ་བཤད་པས་གདམས་ངག་ཐམས་ཅད་རྫོགས་པར་གྲགས། འདི་ལའང་ཁེངས་ལོག་བྱུང་སྟེ་གཤེད་མ་བརྒྱས་བསྐོར་བའི་ཚེ་ཡང་འབར་བ་ལྟ་སྟངས་ཀྱི་རྫུ་འཕྲུལ་མངོན་སུམ་དུ་གྲུབ་པས། སྤྱན་གཡས་པ་ནས་མེ་འབར། གཡོན་པ་ནས་ཆུ་འབྲུབ་པར་སྤྲུལ་པས་གླགས་བལྟ་བའི་སྐབས་མ་རྙེད་པར་རང་རང་གི་ལག་ཆ་འཆོར་བའི་ངང་དུ་འབྲོས་དགོས་པ་བྱུང་། སྤྱིར་ཡི་དམ་མང་པོའི་ཞལ་གཟིགས། དམ་ཅན་བྲན་དུ་ཁོལ། ཆོས་ཉིད་ཀྱི་བདེན་པ་མངོན་དུ་གྱུར་པས་དངོས་གྲུབ་ཆེན་པོ་གཉིས་ཀ་བརྙེས་པ་ཞིག་ཡིན་ཏེ། རྣམ་ཐར་རྒྱས་པ་ཡི་གེའི་ལམ་དུ་འདྲེན་པར་མི་ནུས་པས་སོ་ལུགས་ཀྱི་ཡིག་ཆ་སོགས་ལས་ཤེས་སོ། །ཐུགས་ཟིན་གྱི་སྲས་བཞི་ནི། སོ་ཡེ་ཤེས་དབང་ཕྱུག་ལ་ལྟ་བ་སྒང་དྲིལ་ཏེ་བཤད། པ་གོར་བློ་ཆེན་འཕགས་ལ་གཞུང་འགྲེལ་ཊི་ཀ་དང་སྦྱར་ནས་བཤད། དན་ཡོན་ཏན་མཆོག་ལ་སྟར་ག་གེགས་སེལ་གྱི་ཚུལ་དུ་བཤད། སྲུ་ལེགས་པའི་སྒྲོན་མ་ལ་ཚིག་སྡེབ་སྦྱོར་ལེགས་པར་བཤད། བཞི་ཀ་ཚང་བ་ནི་ཡོན་ཏན་རྒྱ་མཚོ་ཡིན་ནོ། །འདི་ལ་སྲས་ཡེ་ཤེས་
རྒྱ་མཚོ་དང་། པདྨ་དབང་རྒྱལ་གཉིས་བྱུང་། ཡེ་ཤེས་རྒྱ་མཚོའི་སྲས་ལྷ་རྗེ་ཧཱུཾ་ཆུང་། འདིས་རྗེ་བཙུན་མི་ལ་ལ་དྲག་སྔགས་བསྟན་པས་མཐུ་ཆེན་གྱི་གྲགས་པ་ཐོན་པ་དེ་བྱུང་། ཡོན་ཏན་རྒྱ་མཚོ་ཡབ་སྲས་ཀྱི་སློབ་མ་ཉང་ཤེས་རབ་མཆོག །འདི་བསྐྱེད་རྫོགས་གསུམ་ཀ་ལ་མཁས་པར་གྲགས་ཤིང་དོག་ལ་གཤོངས་ཀྱི་གཙུག་ལག་ཁང་ཡང་བཞེངས། ཧའོ་སྒོལ་གྱི་བྲག་ལ་སྒྲུབ་པ་མཛད་པའི་ཚེ། རྡོ་རྗེ་ཕུར་པའི་དཀྱིལ་འཁོར་ཞལ་གཟིགས། བྲག་ལ་རྡོ་རྗེ་བརྒྱབ་པས་འཇིམ་པ་ལ་བྱས་པ་བཞིན་ཐིམ་གྱིས་སོང་བ་སོགས་གྲུབ་པ་བརྙེས་པའི་ལོ་རྒྱུས་མང་དུ་ཡོད། དེའི་སློབ་མ་ཆོས་ལུང་ཉང་ཤེས་རབ་འབྱུང་གནས་ཡིན། བླ་མའི་ཐུགས་ཟིན་ཅིང་། བསྐྱེད་རྫོགས་གསུམ་ཀ་ལ་མཁས་པའི་གྲགས་པ་ཐོབ། དེ་དག་ལས་བརྒྱུད་པ་ཕལ་མོ་ཆེར་རོང་ལུགས་སམ། རུས་ལས་བཏགས་ཏེ་ཉང་ལུགས་ཀྱང་ཟེར་རོ། །ཡང་སོ་ཡེ་ཤེས་དབང་ཕྱུག་གི་སློབ་མ་ངན་ཐུང་བྱང་ཆུབ་རྒྱལ་མཚན། ཀོང་བཙུན་ཤེས་རབ་ཡེ་ཤེས། ར་ཐུང་ཤེས་རབ་ཚུལ་ཁྲིམས་ཏེ་གསུམ་ཀ་ཡིན་གྱི་དྲེང་ཆགས་སུ་མི་འདྲེན་ཞེས་འགོས་གཞོན་ནུ་དཔལ་བ་བཞེད། ཡོན་ཏན་རྒྱ་མཚོ་ཡབ་སྲས་དང་། སོ་ཡེ་དབང་གཉིས་ཀའི་སློབ་མ་ཉང་ཤེས་རབ་མཆོག །དེའི་སློབ་མ་ཡེ་ཤེས་འབྱུང་གནས། དེའི་སློབ་མ་ལྷ་རྗེ་ཟུར་པོ་ཆེ་སྟེ་ཟུར་པོ་ཆེ་ནི་སྟོང་ཚབ་འཕགས་པ་རིན་པོ་ཆེ་ལའང་ཐུག་པས། གནུབས་ཆེན་དང་ཟུར་པོ་ཆེའི་བར་ན་བླ་མ་གཅིག་ཡོད་པ་ཡིན་ནོ།། ད་ནི་ཐ་མ་ཟུར་ལ་བབས་པའི་རྣམ་གཞག་བཤད་པར་བྱ་སྟེ། དེ་ལ་ཟུར་པོ་ཆེ་ཤཱཀྱ་འབྱུང་གནས་ཀྱིས་བསྟན་པ་ཕྱི་དར་ལ་སྔ་འགྱུར་གྱི་བསྟན་པའི་རྩ་བ་བཙུགས། ཟུར་ཆུང་བ་ཤེས་རབ་གྲགས་ཀྱིས་ཡལ་ག་བརྐྱངས། ཟུར་ཤཱཀྱ་སེང་གེས་ལོ་འབྲས་རྒྱས་པར་མཛད་པས་ཟུར་མེས་དབོན་རྣམ་གསུམ་ཞེས་གྲགས་ལ། སྤྱིར་ཟུར་ཅེས་བྱ་བའི་གདུང་འདི་དང་པོ་རྒྱ་གར་ནས་ལྷགས་པ་ཞིག་སྟེ། འཕགས་པའི་ཡུལ་དུ་འོད་གསལ་ལྷ་དབང་གཞོན་ནུ་གཙུག་ཏོར་ཅན། དེའི་སྲས་
མནྡ་ཟངས་ཞུ་ཅན། དེའི་སྲས་མདོ་ཁམས་སུ་བྱུང་བ་ཟུར་རྒྱལ་བ་གསུམ་སྒྲགས། དེའི་སྲས་ཟུར་བཤེས་གཉེན་སྟག་སྒྲ་ཅན། དེའི་སྲས་ཟུར་རིན་ཆེན་རྒྱ་མཚོ། དེའི་སྲས་མཚོ་བཟང་མིག་པོ་ཆེ། དེ་བ་སྔོན་དུ་ལྷ་རྗེ་ཟུར་པོ་ཆེ་འདིའི་སྲས་སུ་འཆད་ཅིང་། གཞན་དུ་ཨ་ཙ་རའི་སྲས་སུ་འདོད་ཀྱང་། འདིར་ཟུར་པའི་རབས་ཉི་ཤུ་རྩ་བདུན་གྱི་ཡི་གེ་ཞིག་མཐོང་བ་དེ་ཉིད་བཙན་པར་བགྱིས་ཏེ་མིག་པོ་ཆེ་ལ་ཟུར་ཨ་ཙ་ར། ཟུར་ཁ་ཅན་ལག་ཅན། ཟུར་བཟང་ཤེས་རབ་འབྱུང་གནས་ཏེ་སྲས་གསུམ་བྱུང་བས་ཐ་ཆུང་ཤེར་འབྱུང་གི་སྲས་ལྷ་རྗེ་ཟུར་པོ་ཆེ། ཟུར་སྟོན་བླ་མ། ཟུར་སྒོམ་རྡོ་རྗེ་འབྱུང་གནས། ཟུར་སྒོམ་ཆུང་དང་བཞིར་བྱུང་ལ། ཆེ་བ་ཨ་ཙ་རས་རྒྱ་གར་ལ་བྱོན་པའི་སྲས་ཉི་མའི་སྙིང་པོ། སླར་བོད་དུ་བྱོན་ནས་ཐག་ལུང་པར་བཞུགས་པའི་སྲས་ཟུར་ཐག་པ་སྒོམ་ཆེན། དེའི་སྲས་ཟུར་ཆུང་ཤེས་རབ་གྲགས་པ་ཡིན་ཞེས་སྨྲའོ། །དེ་ལ་ལྷ་རྗེ་ཟུར་པོ་ཆེ་ནི་དཔལ་ཆེན་པོ་འཇིག་རྟེན་དུ་མངོན་སུམ་བྱོན་པ་ཡིན་ཏེ། ཡུལ་མདོ་ཁམས་ཀྱི་སའི་ཆ་ཡར་རྫོང་ངམ་གཡར་མོ་ཞེས་བྱ་བར་ཡུམ་ཡོན་བདག་མོ་བདེ་བ་ལྕམ་ཞེས་བྱ་བའི་སྲས་སུ་འཁྲུངས། ལྷུམས་སུ་ཞུགས་པའི་ཚེ་ཡབ་ཀྱི་མནལ་ལམ་དུ་གསེར་གྱི་འཁོར་ལོ་རྩིབས་སྟོང་པ་ཕྱག་ཏུ་བྱུང་བ་དང་། འཕགས་པ་སྤྱན་རས་གཟིགས་ཡུམ་ལ་ཐིམ་པ་སོགས་བྱུང་བས་སྤྲུལ་པའི་སྐུར་ཤེས་ནས་མཚན་ཤཱཀྱ་འབྱུང་གནས་སུ་བཏགས། ཡབ་ལས་བྲི་ཀློག་མཁྱེན་པར་མཛད། སྒྱུ་འཕྲུལ་གྱི་སྐོར་དང་མན་ངག་ཕྲན་ཚེགས་ཞུས། བླ་ཆེན་དགོངས་པ་རབ་གསལ་ལས་ཚིག་གསུམ་རིམ་ནོད་ཀྱིས་ལོ་དུས་ལ་བསྙེན་པར་རྫོགས། འདི་སྤྲུལ་པའི་སྐུར་འདུག་པས་མཚན་སྤོ་མི་དགོས་གསུངས། མེས་པོ་རིན་ཆེན་རྒྱ་མཚོའི་དྲུང་ནས་མཚན་ཉིད་སྡེ་གསུམ། ཀྲྀ་ཡ། རྣམ་འཇོམས། རྣམ་སྣང་། སྒྱུ་དྲ། དཔལ་མཆོག་དང་པོ་རྣམས་དང་། གསང་སྔགས་ནང་གི་མན་ངག་ཐབས་ལམ་ལ་སོགས་པའང་མཁས་པར་མཁྱེན། དེ་ཡང་གསུང་ལས། རྩ་
རླུང་རྟ་རུ་ཞོན། གཏུམ་མོ་གོས་སུ་གྱོན། གདམས་ངག་སྐྱོ་གྲོགས་སུ་ཁྲིད། དད་པས་སྣ་དྲངས་ཏེ་མདོ་ཁམས་ཀྱི་ས་ཆ་བརྒལ་ནས་འདམ་གྱི་ཕྱོགས་སུ་ཉེ་བར་སླེབ་ཅེས་གསུངས་པ་ལྟར། ཁམས་ནས་འདམ་དུ་སླེབ་པའི་ཚེ་ལམ་ཆ་མ་འཚལ་བ་ལ་སྤྲིན་གསེབ་ནས་ལྷའི་བུ་གཉིས་ཀྱིས་ལམ་བསྟན་ཏེ་དབུས་ཕྱོགས་སུ་བརྟོལ། ཡར་ཀླུང་ན་མོ་ལུང་དུ་ཀྲྀ་ཡ་ལ་སྒྲུབ་པ་མཛད་པའི་ཚེ། ཐེག་པ་ཆེན་པོ་གསང་བ་བླ་ན་མེད་པའི་རིགས་སད་དེ། སྤང་ལེན་རྩོལ་བྱས་ཀྱི་ལམ་འདི་ནི་འཆིང་བའི་རྒྱུར་འདུག །ཚེགས་ཆུང་ལ་བྱ་སླ་བ་གསང་སྔགས་བླ་མེད་ཀྱི་ལམ་ཞིག་དང་མཇལ་བར་ཤོག་དགོངས་པའི་ནུབ། ནགས་ཚལ་ཅན་གྱི་རི་ལ་སྒོམ་ཟེར་བ་ཞིག་བྱུང་། དེར་གཙང་པོ་ལ་ལམ་རྒྱུས་བཅོལ་ནས་གཙང་ལ་གཏད་དེ་བྱོན། གསང་སྔགས་ཀྱི་ཆོས་ལ་མཁས་གྲུབ་བརྙེས་པ་སུ་ཡོད་དྲིས་པས་ནགས་ཚལ་གསུམ་སྒྲིལ་བྱ་བ་ན་ཡོད་ཟེར། དེར་སྔར་གྱི་རྨི་ལམ་དྲན་ནས་བྱོན། དགེ་གོང་གི་ལྕེ་ཤག་མཆོག་ལ་བདུད་རྩི་སྨན་སྒྲུབ་ལ་སོགས་པ་ཞུས། སྤྱིར་ཟུར་ཆེན་ལ་བླ་མ་མང་དུ་བཞུགས་ཏེ། ཁྱད་པར་དུ་ཆོས་ལུང་གི་ཉང་ཡེ་ཤེས་འབྱུང་གནས་ལས་ཟུར་པའི་མེ་ཏོག་ཕོག་པའི་ཆོས་སྒྱུ་འཕྲུལ་དང་སེམས་ཕྱོགས་རྙེད་པ་ཡིན། ཐོ་གར་ནམ་མཁའ་སྦྲེལ་ལྡེ་ལ་མདོ་དང་པར་ཁབ། རྫོགས་ཆེན་མན་ངག་དང་བཅས་པ། ཡུལ་གསེར་གྱི་གཉན་ནག་དབང་དྲག་དང་། ལྕེ་ཤཱཀྱ་རྒྱལ་མཚན་ལས་གསང་དབང་དང་ཐབས་ལམ། ཉང་སྟོད་ཀྱི་འདྲེ་ཁྲོ་ཆུང་ལ་ཀ་དག་དང་ལྷུན་གྲུབ། སྒྱུ་འཕྲུལ་ལམ་རིམ། མཆིམས་ཕུའི་རོག་ཤཱཀ་འབྱུང་དང་ལྡན་མ་ཤེར་ཚུལ་ལས་ཡང་དག །ཞུ་སྟོན་བསོད་ནམས་ཤཱཀྱ་ལས་མདོ་ཡོངས་རྫོགས། སྟོང་ཚབ་བྱང་ཆུབ། རྒྱ་སྟོན་བློ་གྲོས། བཀའ་སྡོད་ཡེ་ཤེས་སྙིང་པོ་རྣམས་ལའང་མདོ་ལུང་། དབང་སྒྲུབ། རྒྱུད་འགྲེལ་ཕྲིན་ལས་དང་བཅས་པ་གསན་ཞིང་། བླ་མ་དེ་དག་ཀྱང་རྟ་ལ་སོགས་པའི་བདོག་དགུའི་འབུལ་བ་དང་། འཁོར་གསུམ་ཡང་དག་གི་མཆོད་པས་མཉེས་པར་བྱས་པ་འབའ་
ཞིག་གོ། །ཚུལ་དེ་ལྟ་བུ་ལ་མཁས་པ་མང་པོའི་མན་ངག་བླངས། དགོངས་པ་ཉམས་འོག་ཏུ་ཆུད། སྡེ་སྣོད་དང་། རྒྱུད་སྡེའི་གྲུབ་མཐའ་ཀུན་ལ་མཁས་ཤིང་བྱང་ཆུབ་པར་བྱས་ནས། རྩ་རྒྱུད་དང་བཤད་རྒྱུད་སྡེབས། རྩ་བ་དང་འགྲེལ་པ་སྡེབས། རྒྱུད་དང་སྒྲུབ་ཐབས་སུ་སྡེབས། སྒྲུབ་ཐབས་ཆོག་ཡིག་ལ་སོགས་པར་སྡེབས་ནས་ལག་ལེན་དུ་ཐེབས་པར་བྱས། ནགས་ཚལ་ཅན་གྱི་རི་ལ་དཔལ་ཡང་དག་གི་སྒྲུབ་པ་ཁོ་ན་ལ་གཅིག་ཏུ་གཞོལ་བས་བསྐྱེད་རྫོགས་བཟླས་གསུམ་གྱི་གདེང་ཆེན་པོ་སྟོབས་སུ་གྱུར། མགྲིན་པ་ལོངས་སྤྱོད་ཀྱི་འཁོར་ལོའི་རྩ་མདུད་གྲོལ་ནས་ཤེས་རབ་ཕྱོགས་མེད་དུ་རྒྱས། སློབ་མ་མང་དུ་འདུས་པ་ལ་མདོ་དང་སྒྱུ་འཕྲུལ་གྱི་འཆད་ཉན་ཀྱང་མཛད། རྒྱུན་དུ་གཡེང་བའི་ལས་ཐམས་ཅད་རྣམ་པར་སྤངས། ཆེ་ཐབས་དང་འདུ་འཛི་བཤིགས། བྱང་ཆུབ་ཕྱི་དུས་ལ་མི་རེ་བ་ད་ལྟ་ཉིད་ཁོ་ནར་མངོན་དུ་མཛད་པའི་བརྩོན་འགྲུས་དྲག་པོ་རྒྱུད་ལ་བརྟེན་ནས་བསྒྲུབས་པས་རེ་ཞིག་ན་གཏོར་ལེན་ཏུ་རྣལ་འབྱོར་པའི་རྣམ་པ་ཅན་ཞིག་བྱུང་། དེ་ལ་ཅུང་ཟད་བྱིན་པས་ཁོས་རིལ་པོར་ཐོབ། རྩིགས་པའི་དྲུང་ན་བར་འགྲོ་བ་དང་། ཟུར་པོ་ཆེ་འདི་སྙན་པ་དང་ཡོན་ཏན་མངའ་བ་ཞིག་འདུག་སྟེ། རོག་ཤཱཀ་འབྱུང་གི་རྒྱུན་གཏོར་ཙམ་ཡང་མི་འདུག་ཟེར། དེ་ཉེ་གནས་ཀྱིས་ཐོས་ནས་བླ་མ་ལ་ཞུས་པས་བོས་ཤོག་གསུངས་འབོད་དུ་ཕྱིན་པས་ཕུ་གཅིག་ན་ཀ་པཱ་ལ་ནས་ཟན་འབྲུ་ལ་ཟ་ཞིང་སྣང་། འདོང་ངོ་བྱས་ཀྱང་ཡང་མ་ཉན་པར་རོག་ཤཱཀ་འབྱུང་མཆིམས་ཕུ་ན་ཚེ་ལ་དབང་ཐོབ་ནས་ཡོད་པ་ཡིན། ཟུར་པོ་ཆེ་ལ་ཆོས་ལེན་མི་ཐོང་གྱིས་ཤིག་ཟེར། རྐང་པ་ས་ལ་མ་རེག་པར་སོང་། དེར་བཟང་སྒོམ་ཤེས་རབ་རྒྱལ་པོ་དྲེའུའི་ཁལ་དང་བཅས་ཆོས་ལེན་དུ་བཏང་བས། བསམ་ཡས་སུ་སླེབས་ཏེ་དྲིས་ཙ་ན་སུ་ལའང་བཤད་རྒྱུ་མི་གདའ། སླར་རྒན་མོ་ཞིག་གིས་དེ་དང་པོ་ཙ་ན་མཆིམས་ཕུའི་རི་འདི་ལ་ཡོད་པ་ཡིན་ཟེར། རྫིའུ་གཅིག་གིས། རི་འདི་ལ་ཡོད་ཡོད་འདྲ། སྐབས་དེ་ཙ་ན་རྔ་དང་། རུ་ལུའི་སྒྲ་
ངས་ཀྱང་ཐོས་ཟེར། དེར་བཟང་སྒོམ་གྱིས་རྩྭ་ཕང་ཕུང་ཡོད་པ་ཞིག་ཏུ་ཁལ་ཕོག །དད་གུས་ཀྱིས་གསོལ་བ་བཏབ་པས། སྒྲ་ཆེན་པོ་དང་བཅས་བྲག་ཕུག་གི་སྒོ་དེ་མཐོང་། དེར་མོས་གུས་ཆེན་པོ་དང་བཅས་ཕུག་པར་ཐལ་གྱིས་སོང་བས། གསང་བའི་སྒྲོལ་གིང་བཅོ་བརྒྱད་ཀྱིས་འདུ་བར་འོང་བ་འདི་སྒྲོལ་ཞིག་ཟེར། དེར་བླ་མ་རོག་གིས་འདི་ལས་ཅན་ཡིན་པས་མི་རུང་གསུངས། ལོ་རྒྱུས་ཞུས་པས། ང་རོག་ཤཱཀ་འབྱུང་། སློབ་མ་ཟུར་ཤཱཀ་འབྱུང་། མཚམས་སྦྱོར་ཤེས་རབ་རྒྱལ་པོ། རྟེན་འདྲེལ་བཟང་གསུངས། དེར་བཟང་སྒོམ་ལ་སངས་རྒྱས་མཉམ་སྦྱོར། ཡང་དག་གི་བདག་གཞན་དཀྱིལ་འཁོར་བཅུ་གཉིས། ཡང་ཕུར་སྦྲགས་མ་ལ་སོགས་པའི་དཀྱིལ་འཁོར་དྲུག་ཅུ་རྩ་གཉིས་ཀྱི་དབང་བསྐུར། དཔེ་དང་བཀའ་ལུང་རྗེས་སུ་གདམས་པ་ཐམས་ཅད་ཐོབ་སྟེ་བསམ་ཡས་རྒལ་བར་སླེབ་པའི་དུས་སུ། ཁལ་གྱི་སྟེང་ན་ཁྱེའུ་དར་གྱི་བེར་ཐོད་ཅན་ཞིག་མཐོང་བས་སླར་ལོག་སྟེ་དྲིས་པས། ཚངས་པ་དུང་ཐོད་ཅན་འགོ་བ་ཡིན་གསུངས་ནས་གསོལ་ཀའང་གནང་། སླར་གདམས་པ་བླ་མ་ཟུར་ཆེན་ལ་གསང་བའི་ངང་ནས་ཕུལ། སློབ་དཔོན་ཀུན་གྱིས་སྒོམ་སྒྲུབ་ལོ་དུ་མར་མཛད་ཅིང་འཆད་ཉན་བསྐྱངས་པས་འགྲོ་ཕན་ཆེ་བར་བྱུང་ནའང་། ཟུར་ཆེན་པོ་དབེན་པ་འབའ་ཞིག་ལ་ཐུགས་གཏོད་པས། འདི་ཡང་དགེ་སྦྱོར་གྱི་གཡེང་བར་འདུག་པས་བོ་དོང་མངའ་བདག་བྲག་ལ་འགྲོ་གསུངས་ཏེ་དེར་གཅིག་པུར་སྒོམ་སྒྲུབ་ལ་ཞུགས་ཙ་ན། བུ་སློབ་རྣམས་ཀྱང་རྗེས་སུ་འབྲངས་བྱུང་བས། ཁྱོད་རྣམས་ངའི་རྩ་བར་ཡོང་དོན་བྱང་ཆུབ་ཐོབ་པ་རེ་བ་ཡིན་ན་སྒོམ་སྒྲུབ་མིན་པ་གཞན་གང་གིས་ཀྱང་ཕན་མི་ཐོགས། འཇིག་རྟེན་གྱི་གཡེང་བ་རྒྱབ་ཏུ་ཞོག་ལ་སྒྲུབ་པ་ལ་འབུངས། ང་ཡང་སྒྲུབ་པ་ཁོ་ན་བྱེད་གསུངས་ཏེ། དཔོན་སློབ་ཀུན་སོ་སོར་སྒྲུབ་པ་མཛད། དེ་ནས་རེ་ཞིག་ན་མཁའ་འགྲོའི་ལུང་གིས་ས་སྨད་ལ་ཕེབས་ན་འགྲོ་དོན་ཆེ་བར་བསྐུལ་བས། རྟ་ནག་གི་ལུང་པར་བྱོན།
འུག་པའི་ཚང་ཡོད་པའི་བྲག་ཕུག་ཁ་ཤར་བསྟན་གཅིག་ཏུ་ཡང་དག་ལྷ་དགུའི་སྒྲུབ་པ་མཛད་པས། དཔལ་ཆེན་པོ་ཡང་དག་ལྷ་དགུའི་ཞལ་མངོན་སུམ་དུ་མཐོང་། དེ་ལྟར་བཞུགས་གནས་ཀྱི་མིང་ལས་བླ་མ་འུག་པ་ལུང་པ་ཞེས་ཀུན་ཏུ་གྲགས། དེར་བསྒྲུབ་རྒྱགས་ཀྱང་དཀོན་ཤིང་འབྱོན་པའི་ལུང་བསྟན་ཀྱང་བྱུང་ནས་སྨད་ཕྱོགས་སུ་ལྗོངས་བསྒྱུར་བར་ཆས་པས་གཞི་བདག་ཟེ་རེ་ཟེ་བཙན་བྱ་བས་གཟུགས་བསྟན་ཏེ་བཞུགས་པར་ཞུས་པ་ན། ང་ལ་གནས་གཞན་དུ་འགྲོ་བའི་ལུང་བསྟན་ཡང་བྱུང་། རྒྱགས་ཀྱང་མེད་པས་འགྲོ་གསུངས་པས། དཔོན་སློབ་རྣམས་ཀྱི་འཚོ་བ་བདག་གིས་འབུལ། ཅིས་ཀྱང་བཞུགས་པར་ཞུ་ཞུས་པས། རེ་ཞིག་བཞུགས་པར་ཞལ་གྱིས་བཞེས། རྟ་ནག་གི་ཕྱུག་པོ་ཞིག་ལ་ནད་དྲག་པོ་བྱུང་ནས། མོ་ལུང་ལ་ཚོགས་གཏོར་ཐོང་། བླ་མ་འུག་པ་ལུང་པ་ལ་བྱིན་རླབ་ཞུས་ཟེར་བས། ནད་པས་བླ་མའི་དྲུང་དུ་ཕྱིན་པས་ཞལ་མཐོང་བ་ཙམ་གྱིས་བདེར་སོང་། བྱིན་རླབ་ཞུས། ཚོགས་འཁོར་བྱས་མ་ཐག་ཏུ་ནད་ལས་གྲོལ། དེ་བཞིན་དུ་ནད་གདོན་གྱིས་མནར་ཚད་ལ་བྱིན་རླབ་དཔག་ཏུ་མེད་པ་བྱུང་བས་སྐྱེ་བོ་རྣམས་དད་དེ་སྐུ་བསོད་ཆེན་པོ་སྐྱེས། བླ་མའི་དགོངས་པ་ལ། ཐུན་མོང་གི་བསོད་ནམས་འདི་མཆོག་སྒྲུབ་པའི་བར་ཆད་ཆེན་པོ་ཡིན། རི་བོ་དགུ་འདུས་ལ་སྒོམ་དུ་འགྲོ་དགོངས་ནས་གཤེགས་ཙ་ན། གཞི་བདག་དེས་བསྒྲུབ་རྒྱགས་ནི་ཕུལ་ཡོད། ཅིས་ཀྱང་བཞུགས་པར་ཞུ་ཟེར་བས། ཁྱོད་ཀྱི་འཚོ་བ་འདི་གཞི་དག་པོ་ཞིག་ཀྱང་དཀའ། འདུ་འགོད་ཀྱིས་གཡེང་བར་འགྱུར་བས་ད་ལན་འགྲོ་གསུངས་པས། ཁོ་གདོང་མཆི་མས་གང་ནས་ཅིས་ཀྱང་མི་བཞུགས་ན་བདག་ལའང་ཐུགས་རྗེས་དགོངས་འཚལ་ཞུས་ནས་སྲོག་སྙིང་ཕུལ། བླ་མས་དགེ་བསྙེན་གྱི་གདམས་པ་ཕོག་ནས་བསྟན་པ་བསྲུང་བར་བསྒོས། མར་ལམ་ཇོ་མོ་སྣ་དམར་ཀྱང་དམ་ལ་བཞག །དེ་ནས་གཡས་སུ་ཐར་དུ་བྱོན། ཟུར་ཆུང་བ་ལ་ང་ལ་རི་བོ་དགུ་འདུས་སུ་སྒོམ་
ཟེར་བའི་ལུང་བསྟན་བྱུང་བ་དེ་བྲག་རྒྱ་བོ་འདི་ཡིན་པར་འདུག་གསུངས་ནས་དཔོན་སློབ་ཐམས་ཅད་སྒྲུབ་པ་ལ་བཞུགས་སོ། །དེའི་ཚེ་ལྷ་རྗེ་ཟུར་པོ་ཆེ་ལ་སློབ་མ་རྩེ་མོ་བཞི། རྩ་ལྐོག་དང་ལྔ། སྒོམ་ཆེན་བརྒྱ་རྩ་བརྒྱད་ཡོད་པའི་རྩེ་མོ་བཞི་ནི། ལྟ་དགོངས་ཀྱི་རྩེ་མོར་གྱུར་པ་ཟུར་ཆུང་ཤེས་རབ་གྲགས། སྒྱུ་འཕྲུལ་གྱི་བཤད་པའི་རྩེ་མོ་མེ་ཉགས་ཁྱུང་གྲགས། མཁྱེན་རྒྱའི་རྩེ་མོར་གྱུར་པ་ཞང་འགོས་ཆུང་། སྒོམ་སྒྲུབ་ཀྱི་རྩེ་མོར་གྱུར་པ་བཟང་སྒོམ་ཤེས་རབ་རྒྱལ་པོ། རྩེ་ལྐོག་ནི་ཆོས་ཀྱི་སྟེང་དུ་ཕོ་ཟེའི་རྩེ་མོར་གྱུར་པ་རྩགས་བླ་མའོ། །ཡང་རྩེ་ལྐོག་བརྒྱད་དུ་འདྲེན་པའང་ཡོད་དོ། །དེ་བཞིན་དུ་གྲུ་སྒོམ་སྤ་འགྱིང་། ཡུལ་སྒོམ་ནག་མོ། ལྕེ་སྒོམ་ཤཱཀ་རྒྱལ། ཟུར་སྒོམ་རྡོར་འབྱུང་། གཡུ་སྒོམ་ཇོ་འབར། སྦ་སྒོམ་བསོད་ནམས་སྙིང་པོ་ལ་སོགས་ཏེ་སྒོམ་ཆེན་བརྒྱ་རྩ་བརྒྱད་དོ། །དེ་ཐམས་ཅད་ཀྱང་ནམ་མཁའ་ལ་འགྲོ་བ་སོགས་རྫུ་འཕྲུལ་ཐོབ་པ་འབའ་ཞིག་ཏུ་གྲགས། དེ་ནས་རེ་ཞིག་བླ་མའི་དྲུང་དུ་བུད་མེད་གསུམ་བྱུང་ནས། གཡས་རུ་ཤངས་ཀྱི་མདའ་ཤངས་ཆུའི་ཤར་ན་ལུང་པ་དབྱིབས་ཟླ་གམ། ཕུ་ན་བྲག་སྙིང་འདྲ་བ་མདའ་ན་ཐང་མ་ཏྲཾ་བསྒྲལ་བའི་པགས་པ་ལྟ་བུ། རི་དབྱིབས་གླང་པོ་ཆེའི་སྣ་འདྲ་བ་ལ་བྲག་སེང་གེའི་ཡ་ཐོད་ལྟ་བུ། རྫ་གསུམ་ནས་ཆུ་གསུམ་འབབ་པ་སྐུ་གསུམ་གྱི་དོན་རྙེད་པ་ཞིག་ཡོད་ཀྱི་དེར་བསྒོམས་ན་སྐྱེ་བ་འདི་ཉིད་ལ་འཚང་རྒྱ་ཞིང་། འགྲོ་དོན་ཡུན་རིང་བར་འགྱུར་རོ་ཞེས་ལུང་བྱིན་པས། ཟུར་ཆུང་པ་ལ་བྲག་རྒྱ་བོ་སྒྲུབ་གནས་ཀྱི་ཕ་ཕོགས་སུ་མཛད། བླ་མ་འཁོར་དང་བཅས་པ་མར་བྱོན། ས་དམིགས་མཁྱེན་ནས་ཞང་མོ་ཡོན་ཏན་རྒྱན་གྱིས་སྦྱིན་བདག་བྱས། དེས་ཕུལ་བའི་ཕུག་པར་བླ་མ་བཞུགས། ཟུར་ཆུང་པ་སོགས་སྒོམ་ཆེན་བརྒྱ་ལྷག་ཙམ་ཡོད་པ་ལུང་པའི་ཕུ་མདའ་ཐམས་ཅད་དུ་སྤྱིལ་པོ་དང་། བྲག་སྐྱིབས་དང་། ལྷགས་སྐྱོབས་ལ་བརྟེན་ནས་སྒྲུབ་པ་མཛད། ཡུལ་མི་ཚོ་བདུན་གྱིས་ཞབས་ཏོག་བྱས་ཤིང་། ཡོན་བདག་གི་རྩ་བ་སྲམ་པ་བོན་གྲོང་པས་བྱས།
བླ་མ་སངས་རྒྱས་དངོས་སུ་འཛིན་ཏོ། །དེར་ལོ་མང་པོར་སྒྲུབ་པ་མཛད། ཞི་བ་ཞེ་གཉིས་དང་། ཁྲག་འཐུང་ལྔ་བཅུའི་ཞལ་མཐོང་། ཁྱད་པར་དུ་ཡང་དག་གི་ལྷ་ཚོགས་མི་དང་མི་ཕྲད་པ་བཞིན་གཟིགས་ནས་གསུང་གླེང་མཛད། གཽ་རཱི་བརྒྱད་ལ་སོགས་པ་བྲན་དུ་ཁོལ། མི་མ་ཡིན་རྣམས་ཀྱིས་ལས་གང་བཅོལ་ཉན་པ་བྱུང་། དེར་བླ་མའི་ཞལ་ནས། ངས་འུག་པ་ལུང་གི་ས་རྡོ་རི་བྲག་ཐམས་ཅད་ཞི་ཁྲོའི་ལྷ་ཚོགས་སུ་མཐོང་། ཁྱད་པར་དབེན་སེར་མོའི་ལྷོ་རི་འདི་རྒྱལ་བ་རིགས་ལྔར་རྒྱུན་དུ་མཐོང་བས་ཞི་བའི་ལྷ་ཁང་བཞེངས་གསུངས་ཏེ་སྟ་གོན་མཛད། སའི་དཔྱད་གཟིགས་ནས་ས་དགྲ་ངན་པ་དག་བཅོས། ལྷོ་རི་སྡིག་ནག་ཐུར་དུ་རྒྱུག་པ་འདྲ་བའི་རྭ་དབྲག་ཏུ་ཟུར་པོ་ཆེ་དཔལ་ཆེན་པོའི་སྐུར་བཞེངས་ནས་ཞབས་གཡས་པ་བཞག་སར་ཞབས་རྗེས་ཀྱང་བྱུང་། དེར་ཧེ་རུ་ཀའི་སྐུ་འབུམ་ཕྲག་ཡོད་པའི་མཆོད་རྟེན་དང་། ཕྱོགས་བཞི་དབུས་དང་ལྔར་རྩེ་མོ་བཞི་དང་རྩེ་ལྐོག་ལྔས་མཆོད་རྟེན་རེ་རེ་ཡང་བཞེངས། ཀླུ་དུང་སྐྱོང་གནས་པའི་ཆུ་མིག་ལ་ཟངས་བཀབ་ནས་ཁ་བཅད། དེའི་སྟེང་དུ་གཙུག་ལག་ཁང་གི་རྨང་བཏིང་། ཆེ་ཆུང་ཉང་སྟོད་རྩིས་ཀྱི་ལྷ་ཁང་དང་མཉམ་པ་བྱེད་རྒྱུ་ལ། རྡོ་བཟོ་བས་ཅུང་ཟད་བསྐུམ་ཟེར། དེ་བཞིན་དུ་བཟོ་བོ་ཕལ་ཆེར་བསོད་ནམས་མ་ཡིན་ལ་འདུ་བྱེད་པ་ལ་སྤྲོ་བས། ཤིང་ཐམས་ཅད་ཁོད་མི་སྙོམས་ཤིང་། རིང་ཐུང་དུ་གནས་པ་ལ་སོགས་ཕྱག་རྫས་དྲོན་པའི་ཐབས་འབའ་ཞིག་བྱས་ཀྱང་། འདི་ལྟར་བྱང་ཆུབ་སེམས་དཔའ་གཏོང་བ་ལ་གོམས་པའི་སྙིང་སྟོབས་ལ་སེར་སྣ་དང་འཇུར་བུའི་རྣམ་རྟོག་གིས་རྫི་བར་ནུས་པ་མ་ཡིན་པས་ནོར་རྫས་ལ་རྨི་ལམ་དང་སྒྱུ་མ་ལྟ་བུར་གཟིགས། ཀ་ཆེན་ཡ་གཅིག་དྲེགས་ཐལ་ཏེ་མ་སྙོགས་པ། ཞབས་ཀྱིས་བསྒྲིལ་བས་རིང་ཐུང་སྙོམས་པའི་གྲུབ་རྟགས་བསྟན། དེ་ལ་རྡོ་རྗེའི་རྟགས་སྦྱར་ནས་ཡོད། དེ་བཞིན་དུ་ཀ་བ་ཀྱོག་པོར་གྱུར་པ་རྣམས་ཞབས་ཀྱིས་བསྒྲིལ་བས་མདའ་ལྟར་འཁྲོངས་པ་དང་། ལོག་སྒྲུབ་བཟོད་པ་སོགས་ཚད་མེད་པའི་ཐུགས་རྗེ་དང་ནུས་པ་མཐོང་བས། བཟོ་བོ་རྣམས་སླར་འགྱོད་པ་ཆེན་པོ་སྐྱེས། ལྷ་ཁང་ཚར་བའི་ཤིང་ལྷག་
རྣམས་ལ་རྩིགས་པ་མེད་པར་ཀ་བ་བཞིས་བཏེགས་པའི་སྒོ་ཁང་ཁྱད་འཕགས་ཞིག་བྱས་པར་འགྱོད་ཚངས་རྒྱ་ཕུགས་ཞེས་གྲགས་ལ་དེ་སླར་མགོན་ཁང་དུ་མཛད། དེ་ལྟར་གཙུག་ལག་ཁང་དབུ་རྩེ་ཀ་བ་བཞི་པ་རྣམ་སྣང་ཀུན་ཏུ་ཞལ་གྱིས་གཙོ་བྱས་པའི་ཞི་བའི་ལྷ་ཚོགས། ཁྱམས་སྟོད་ཀ་བ་བརྒྱད་ཀྱི་སར་སྒོ་སྲུང་རྟ་བདུན་གཉིས། གློ་འབུར་ལྷོ་བྱང་གཉིས་ན་ཡུམ་ཆེན་མོ་དང་། མར་མེ་མཛད་ལ་མཆོད་ལྷ་བཞི་བཞིས་བསྐོར་བ། མགོན་ཁང་ན་ལེགས་ལྡན། དཔལ་ལྡན་ལྷ་མོ། ཚངས་པ་དང་། བརྒྱ་བྱིན་རྣམས་འབུར་སྐུ་བྱས། ཁྱམས་སྟོད་ཀ་བ་བརྒྱད་ཀྱི་སར་བླ་མ་བརྒྱུད་པའི་གྱང་རིས། སྐོར་ཁང་ལ་པདྨ་བརྒྱ་ལྡན་ལ་སོགས་པའི་དཀྱིལ་འཁོར་ཉི་ཤུ་རྩ་གསུམ། ཁྱམས་སྨད་ཀ་བ་ཉི་ཤུའི་སར་སངས་རྒྱས་སྟོང་རྩ། ཕྱོགས་བཅུའི་སངས་རྒྱས་ཚེ་དཔག་མེད་པ་ཉེ་སྲས་ཀྱིས་བསྐོར་བ། སངས་རྒྱས་རབས་བདུན། མཛད་པ་བཅུ་གཉིས། བྱང་ཆུབ་སེམས་དཔའ་ཆོས་འཕགས། སྒྲོལ་མ་འཇིགས་པ་བརྒྱད་སྐྱོབ། རིགས་གསུམ་མགོན་པོ། མ་ལ་ཡའི་ཞིང་བཀོད། སྲིད་པའི་ཙཀྲ་ལ་སོགས་པ་གྱང་རིས་སུ་མཛད། དེ་ལྟར་སྐྱ་བཟོ་གྲུབ་ནས། ད་ནི་ངའི་ལྷ་ཁང་ཐང་ཀ་ཡན་ཆོད་གསེར་གྱིས་འབྱུག་པ་ཡིན། གསེར་འགྲོང་རི་ཚུགས་པོ་ལ་འདོན་གསུངས་ནས་དགོངས་པ་མཛད་པས། ནམ་ཕྱེད་ན་གཞི་བདག་བཙན་དེ་རྟ་པ་ནག་པོ་གཅིག་ཏུ་བྱས་ནས་བྱུང་། ཟུར་པོ་ཆེ་ལ་ཕྱག་དང་བསྐོར་བ་བྱས་ནས་ལྷ་ཁང་གི་ཐོག་ཁ་ཡན་ཆོད་གསེར་དུ་བྱུགས་ན། ངེད་ཀྱི་གསེར་འཛད་པས། ལྷའི་སྐུ་རྣམས་ཁྱབ་ངེས་ཞིག་འབུལ་ཟེར་བས་དེ་བཞིན་དུ་མཛད། རབ་ཏུ་གནས་པའི་ཚེ་རྒྱལ་བ་ཟུར་ཆེ་ཆུང་གིས་ཀུན་རིག་རྣམ་སྣང་གི་དབུ་གཙུག་ནས་ཞུགས་ཐུགས་ཀར་ཐོན། ཐུགས་ཀ་ནས་ཞུགས་དབུ་གཙུག་ཏུ་ཐོན་པ་ལ་སོགས་རྫུ་འཕྲུལ་གྱི་བཀོད་པ་ཟད་མི་ཤེས་པ་བསྟན་པས་བཟོ་བོ་རྣམས་སྙིང་ཐག་པ་ནས་དད་པར་གྱུར་ཏེ། བླ་མའི་ལྷ་ཁང་རི་རབ་ཙམ་ལ། མཆོད་རྟེན་གྱི་འདེགས་བྱེད་ཟེར། བསམ་ཡས་མཆོད་རྟེན་སྔོན་མོ་ལ་དཔེ་བྱས། བཀྲ་ཤིས་སྒོ་མངས་
ལྷ་ཁང་གི་བྱང་ཕྱོགས་སུ་དད་བཞེངས་ཀྱིས་ཕུལ། བླ་མའི་མཚན་གདན་ས་ལ་ཆགས་པས་དཔལ་འུག་བྱ་ལུང་ཞེས་ཡོངས་སུ་གྲགས། ལྷ་རྗེ་ཟུར་པོ་ཆེའི་རིང་ལ་དབུ་བརྙེས། ཟུར་ཆུང་པས་སྲོལ་བཏོད། ཟུར་ཤཱཀྱ་སེང་གེས་དར་རྒྱས་སུ་མཛད་ཟེར་བ་དེ་གདན་རབས་འདིས་སྔ་འགྱུར་རྡོ་རྗེ་ཐེག་པའི་བསྟན་པ་ལ་བྱ་བ་རླབ་པོ་ཆེ་མཛད་པའི་རྣམ་གཞག་ཡིན་ནོ། །དེ་ནས་འཆད་ཉན་ལ་སོགས་པའི་འགྲོ་དོན་རྒྱ་ཆེན་པོ་མཛད། རེ་ཞིག་ན་དཔོན་སློབ་ཀུན་གྱིས་ཡང་དབེན་སེར་མོའི་ཡང་དག་གི་ལོ་སྒྲུབ་མཛད་པས་མར་ཟད་དེ་མཆོད་མེ་མ་བྱུང་བས། ཆུ་མིག་ཞག་བདུན་དུ་མར་ཁུར་བྱིན་གྱིས་བརླབས་ནས་མར་ཁུ་འཛད་མེད་བླངས་ཆོག་པ་བྱུང་། དེར་ཐོག་མར་འཆད་ཉན་པ་རྣམས་བཤད་པ་ལ་གཙོ་བོར་འདོན་པས་དང་པོ་ཙ་ན་ཕྲིན་ལས་ཤེས་པ་ཉུང་སྟེ། ཁོང་རྣམས་ཆོས་རར་བགྲོ་གླེང་བྱེད་པའི་ཚེ་ཕྲིན་ལས་ཤེས་ཤིང་བགྲོ་གླེང་མེད་པ་དག་མི་ཤེས་པའི་ཕྱོགས་སུ་ཕུལ་བས། རྒྱུན་གཏོར་ལྷན་ཅིག་ཏུ་གཏོང་བའི་ཚེ་ཕྲིན་ལས་ཤེས་པ་ཚོས་གྱེར་དུ་མ་ཉན། དེར་བླ་མའི་ཞལ་ནས། གང་ལ་མཐར་ཕྱིན་པ་གཅིག་གིས་གྲོལ་བ་ཡིན། གཅིག་གིས་གཅིག་ལ་ཁྱད་གསོད་མི་རུང་། ཐེག་པ་དགུའི་གྲུབ་མཐའ་རང་ས་ན་ཡོད་ཀྱི། ཐེག་པའི་ཁ་འཛིན་པ་མ་ཡིན། གསུངས་པས་ཐམས་ཅད་ལ་དོན་གྱི་གོ་བ་ཁྱད་པར་ཅན་སྐྱེས་ནས་ཞི་དུལ་དུ་གནས་པ་བྱུང་། དེའི་དུས་སུ་བླ་མའི་ཞལ་ནས། སློབ་མ་རྩེ་མོ་བཞི་ལ། ལམ་ཉམས་སུ་ལེན་པ་ལ་གང་གལ་ཆེ། ཁྱེད་བཞི་པོ་གོ་བ་རེ་ཞོག་གསུངས་པ་ལ། ཟུར་ཆུང་པས། སྔར་ཞེན་གྱི་བག་ཆགས་ཆེན་པོ་ཆེ་འདི། མ་བསྒོམས་ན་མི་འཛད་པ་གཅིག་འདུག་པས། ཉམས་ལེན་ལ་བློ་ཐགས་ཆོད་པ་གལ་ཆེ། འཕྲལ་གྱི་སྒྲིབ་པ་དྲི་མ་འདྲ་བ་འདི། ད་ལྟ་ནས་དག་དགོས་པ་འདུག་པས། ནང་དང་ནུབ་ཏུ་དགེ་སྦྱོང་བྱེད་པ་གལ་ཆེ། ཇི་སྲིད་གནས་ལུགས་མངོན་དུ་མ་གྱུར་གྱི་བར་དུ་བསོད་ནམས་ཀྱི་ཚོགས་གསོག་དགོས་པ་འདུག་པས།
དགེ་བ་ཕྲ་བ་ལ་བརྩོན་པ་གལ་ཆེ་ཞུས། དེ་བཞིན་དུ་གཞན་གསུམ་པོས་ཀྱང་རང་སའི་གོ་བ་རེ་ཞུས་པས། བླ་མ་མཉེས་པས། དམ་པའི་ལྷ་ཆོས་བྱེད་པ་ལ། །ལམ་ལྟ་སྒོམ་སྤྱོད་པ་གསུམ་དུ་གདའ། །ལྟ་བ་ཞེས་མིང་དུ་བཏགས་པ་དེ། །ལྟ་རྒྱུ་བྱུང་ན་ལྟ་བ་མིན། །ལྟ་རྒྱུ་མེད་པའི་དོན་ལ་བལྟ། །ཆོས་ཉིད་བརྗོད་མེད་ལམ་དུ་འཁྱེར། །ཞེས་པ་ལ་སོགས་པ་ལྟ་སྒོམ་སྤྱོད་པའི་ལམ་ཁྱེར་གྱི་མགུར་གསུངས་པས་སློབ་མ་ཀུན་མོས་པ་མཆོག་ཏུ་འཕེལ། དེ་ནས་བླ་མ་ཟུར་པོ་ཆེས་འུག་པ་ལུང་དུ་ཚོགས་པ་བསྐྱངས་ཤིང་རྒྱུད་ཀྱི་བཤད་གྲྭ་དང་སྒོམ་གྲྭ་ཆེན་པོ་མཛད། ཟུར་ཆུང་པས་ཡང་དབེན་སྔོན་མོར་ཡང་དག་གི་སྒྲུབ་པ་མཛད་ཅིང་བཞུགས་ཙ་ན། ཤངས་ཀྱི་སྒྲུབ་ཁང་གདོང་ལ་རྒྱུའི་ཧེ་རུ་ཀ་ཞལ་གཅིག་ཕྱག་གཉིས་པ་ཀྲོང་ངེར་འདུག་པ་གཟིགས། སྒྲུབ་པ་ཐོན་ནས་བླ་མར་ལོ་རྒྱུས་ཞུས་པས། བླ་མའི་ཞལ་ནས། ཟུར་ཆུང་པ་དཔལ་ཆེན་པོ་ལ་གྲུབ་པ་ཐོབ་པ་ཡིན། ང་ལ་རིག་འཛིན་ནམ་མཁའི་སྙིང་པོས་ཀྱང་ཧེ་རུ་ཀའི་སྐུ་བཞེངས་ནས་བོད་འབངས་ལ་གནོད་པའི་གདོན་མཐུ་བོ་ཆེ་ཐུལ་ཞིང་འགྲོ་དོན་འབྱུང་བའི་ལུང་བསྟན་ཀྱང་ཡོད་པས་དེའི་སླད་དུ་འགྲོ་ཞེས་གསུངས། ཉེ་གནས་ལ་འོ་ཅག་ལྷ་ཁང་བཞེངས་པའི་ཡོ་བྱད་སྡོགས་ཤིག །ངེད་ཚོས་ས་འདུལ་བྱ་ཡི་གསུངས། བྲག་སེང་གེའི་ཡ་ཐོད་ཀྱི་ཁར་བཞུགས། གཏོར་མ་བཤམས། བླ་མ་དཔལ་ཆེན་པོའི་ཏིང་ངེ་འཛིན་ལ་བཞུགས་ནས་སྟངས་སྟབས་མཛད་པའི་ཚེ། སངས་རྒྱས་མཐོང་བའི་སྐལ་བ་དང་ལྡན་པ་རྣམས་ཀྱིས་མངོན་སུམ་པའི་སྐུར་མཐོང་བ་བྱུང་། དེ་ནས་འགྲམ་རྡོ་བསླང་བའི་དུས་སུ་ཟུར་ཆུང་པ་སྐུ་ལུས་སྦེག་ཅིང་ཞལ་རོད་ངན་པ་ལ་བརྙས་ནས། གཞན་ཀུན་གྱིས་འགྲམ་རྡོ་ཆེན་པོ་རེ་བཞག་གིན། ད་ཟུར་ཆུང་པས་གྱད་རྡོ་གཅིག་འཇོག་ཐང་ཞེས་ཟུར་ཟ་བར་བྱས་པས། ཟུར་ཆུང་པ་ན་རེ། དཔོན་སློབ་རྣམས་ཚ་བ་ལ་གཤེགས་ཤིག །ངེད་ཀྱང་ད་ལྟ་འདོང་ངོ་ཟེར་སྟེ་མ་བྱོན། ཁོང་རྣམས་ཀྱིས་ཚ་བ་ཟིན་ནས་ཐོན་པ་དང་། གྱད་ཀྱི་རྡོ་ཐེག་པ་ལྟ་ཅི་སྨོས།
སྒུལ་བའང་མི་ནུས་པའི་ཕ་ཝང་ཆེན་པོ་བརྒྱད་རྨང་གི་ཕྱོགས་བཞི་མཚམས་བརྒྱད་དུ་བཞག་ནས། དེ་ལ་རྡོ་དཀར་གྱིས་ཟུར་ཆུང་པའི་གྱད་རྡོ་ལགས་བྱ་བ་བྲིས་པ་མཐོང་བས། གྲ་བ་རྣམས་སྤོབས་པ་སྨད་ཅིང་གཟུ་བོར་གྱུར་པ་དག་མོས་པར་གྱུར་ཏོ། །དེར་ནག་ཕྱོགས་ཀྱི་ལྷ་འདྲེ་བྱེད་པ་མི་སྲུན་པས་ལྷ་ཁང་བརྩིགས་པའི་འགལ་རྐྱེན་དང་མཐོ་འཚམས་པའང་ཟུར་ཆུང་པས་གྱད་རྡོ་བཞག་པ་ཕྱིན་ཆད་ནས་ཞི་བར་གྲགས། ཤིང་སྒྲིགས་རན་པའི་ཚེ་ཀ་བ་བཞི་ཀྱོག་པོར་བྱུང་བ་བླ་མའི་ཞལ་ནས་འདི་ཟུར་ཆུང་པས་སྲོངས་ཤིག་གསུངས་པས། རླུང་ཁུག་པ་གཅིག་གི་ངང་ལ་དགྱེ་བ་དང་གུག་པའི་རྟེན་འདྲེལ་ཅིག་མཛད་ནས་མདའ་བཞིན་དུ་བསྲངས། ཐོག་ཕུབ་ཟིན་པ་ཙམ་ལ། ངས་ལྷ་བཟོ་བ་བཀུག་པས་ཁུགས་ཡོང་གི་འདུག་གསུངས། ཞག་གཉིས་པ་ལ་ལྷ་བཟོ་ཤེས་པ་འགའ་ཞིག་ཆོས་ཞུ་རུ་བྱུང་། མ་མཁྱེན་པ་ལྟར་མཛད་ནས། ཁྱེད་རྣམས་ཡོན་ཏན་མཁན་གྱི་རིགས་སམ་གསུངས། བདག་ཅག་རྣམས་ནི་ལྷ་བཟོ་མཁན་ཏེ་སྐུ་དྲུང་དུ་ཆོས་ཞུར་བཅར་བ་ལགས་ཞུས་པས། རྟེན་འདྲེལ་བཟང་། ཅི་འདོད་པའི་ཆོས་ཀྱང་འོང་། དུས་ཀྱི་སྙིགས་མ་ལ་འགྲོ་དོན་ཆེན་པོ་འོང་བས་དཔལ་ཆེན་པོའི་སྐུ་བཞེངས་པ་ཡིན། ཁྱོད་རྣམས་ཀྱིས་དེ་བཞིན་དུ་འཚལ་ཞེས་གསུངས་པས། ཁོང་རྣམས་ཀྱང་དང་བ་ཤིན་ཏུ་སྟོན་པར་གྱུར་ནས་དཔལ་ཡང་དག་གི་བུམ་དབང་སྔོན་ལ་བསྐུར། དེ་ནས་དེ་བཞིན་གཤེགས་པའི་གདུང་རིང་བསྲེལ་དང་། བྲམ་ཟེ་སྐྱེ་བ་བདུན་པའི་ཤ །དུར་ཁྲོད་བརྒྱད་ཀྱི་ས་རྡོ་ཆུ་ཤིང་། རིན་པོ་ཆེའི་རིགས། རྒྱ་བོད་རིག་འཛིན་གྱིས་བསྒྲུབས་པའི་ཆོས་སྨན་རྣམས་བསྲེས་པའི་ལྡེ་གུ་སྟ་གོན་བྱས། སྐུ་ཚད་ཇི་ཙམ་བགྱི་ཞུས་པས། ཐོག་དཔངས་དང་བསྟུན་པར་གནང་། དེར་འབྲས་བུའི་ཧེ་རུ་ཀ་ཞལ་གསུམ་ཕྱག་དྲུག་པ་མཚར་བ་དང་། རྔམས་པ་དང་། བཞད་པ་ཅི་ལྟ་བུ་ཞིག་བྱུང་ཡང་། བླ་མས་ཞལ་མཐོང་བ་ལྟར་མ་བྱུང་བས་སྐྱོར་ཅིག་གསུངས། ལན་མང་པོ་བསྐྱར་དགོས་པ་བྱུང་། རེས་
གཅིག་ན། ད་ང་དང་འདྲ་བ་གཅིག་ཤེས་སམ་གསུངས། ཤེས་མཆི་ཞུས་པས། དོ་ནུབ་གསོལ་བ་ཐོབ་ལ། སང་ང་ལ་བལྟ་རུ་ཤོག་གསུངས། སང་ཟུར་ཆུང་པ་དང་བཅས་ལྷ་བཟོ་རྣམས་ཀྱིས་དྲུང་དུ་ཕྱིན་པས། ཉེ་གནས་དོན་ཡོད་རྡོ་རྗེ་ལ་གཏོར་ཚོགས་ཤོམས་གསུངས། ཡང་དག་གི་ལས་གཞུང་བསྲངས། ཚོགས་འཁོར་མཛད་ནས་ད་ལྟོས་ཤིག་གསུངས་ཏེ་ལྟ་སྟངས་མཛད་པའི་མོད་ལ་ཧེ་རུ་ཀ་དངོས་སུ་གྱུར་ནས། དབུ་སྤྲིན་དང་ན་བུན་གྱི་མཚམས་ན་ལྷག་གེ་བ། ཞབས་གཡས་འུག་པ་ལུང་གི་ཧེ་རུ་ཀའི་བྲག་གདོང་དང་། གཡོན་བཙད་པོ་པུར་ཁང་གི་རི་རྩེར་བཞག་པ། ཞལ་གཅིག་ཕྱག་གཉིས། མཆེ་བ་གཙིགས་ཤིང་ལྗགས་འདྲིལ་བ། རྡོ་རྗེའི་གཤོག་པས་བར་སྣང་གང་བ། འཇིགས་ཤིང་རྔམས་པ་གཅིག་མཐོང་བ་དང་། ལྷ་བཟོ་བ་རྣམས་ཟིལ་མ་བཟོད་པར་དྲན་མེད་དུ་བརྒྱལ། བརྒྱལ་སངས་ཙ་ན་དགོངས་པ་གློད་ནས་བླ་མ་ཞལ་འཛུམ་ལྷག་གེ་འདུག ད་ཤེས་སམ་གསུངས། ཞལ་གཅིག་ཕྱག་གཉིས་པའི་སྐུ་ཞིག་གསལ་བར་མཐོང་། དེ་ནས་གང་ཡང་དྲན་པ་མེད་པར་སོང་བས། ད་བཞེངས་རྒྱུ་ཞལ་གསུམ་ཕྱག་དྲུག་པ་གཅིག་བསྟན་པར་ཞུས་པས། དེ་ཡང་ཟབ་སྟེ། གདུལ་བྱའི་དབང་གིས་ཞལ་གཅིག་ཕྱག་གཉིས་འབྱོན། ཞེས་གསུངས་ནས་དེ་ལྟར་བཞེངས་པའི་ཚེ། ལྟེ་བ་མན་ཆད་སྔ་མ་མཐོང་བས་མཚོན་པར་ནུས་ལ། ཡན་ཆད་ད་དུང་སྐྱོར་ཅིག་གསུངས་ནས་ལན་གྲངས་མང་པོར་བསྐྱར་དགོས་པ་བྱུང་བས། ཞལ་ནས་ཁྱེད་ཚོ་སྒྲིབ་པ་མ་དག་པ་ཡིན། འཇིམ་པ་ལེགས་པར་སྦྱོར་ལ་འདིར་ཞོག །ཆུ་མིག་ཕ་གི་ངའི་བདུད་རྩི་ཀ་པཱ་ལ་གང་གཏོར་བ་ལས་བྱུང་བའི་སྒྲུབ་ཆུ་ཡིན་པས་ཁྲུས་ཀྱིས། ལྷ་ཁང་གི་ཕྱི་ལ་སྐོར་བ་ལན་བདུན་སྐོར་ལ་ཤོག །དེ་བར་དུ་ནང་འདིར་སུ་ཡང་མ་འོང་། ངས་དཔལ་ཆེན་པོ་ལ་གསོལ་བ་འདེབས་པ་ཡིན་གསུངས། ཁོང་རྣམས་དེ་ལྟར་བྱེད་པའི་རིང་ལ་ནང་ན་འཕྲོས་དིར་དིར་འདུག་
ཁྲུས་དང་བསྐོར་བ་ཚར་ནས་ནང་དུ་ཕྱིན་ཙ་ན། སྐུ་དྲུང་ན་སུ་ཡང་མེད། བླ་མ་དགོངས་པ་ལ་བཞུགས། འཇིམ་པ་རྣམས་ཟད། དཔལ་ཆེན་པོ་ལྟེ་བ་ཡན་ཆོད་རང་བྱོན་དུ་ཤར་འདུག་པས། བུ་སློབ་དང་ལྷ་བཟོ་པ་ཀུན་ངོ་མཚར་དཔག་ཏུ་མེད་པ་སྐྱེས། ཕྱག་འཚལ་བཞིན་དུ་བླ་མ་རང་གིས་འདི་ལྟར་མཁྱེན་པ་ལ། ཁ་སང་ནས་མི་མཛད་པ། བདག་ཚོར་ཚོད་བགམ་པ་ལགས་མོད་ཞུས་པས། ང་ཉིད་ལྟ་བུའི་གང་ཟག་ལ། །ང་ཉིད་ལྟ་བུའི་རྟེན་ཅིག་འབྱུང་། །སྙིགས་མའི་དུས་སུ་འགྲོ་བ་འདྲེན། །ནད་དང་གདོན་གྱི་གཉེན་པོར་འགྱུར། །སྔར་ཡང་ཧེ་རུ་ཀ་ཉིད་ལ་བརྟེན་ནས་ཧེ་རུ་ཀ་ཉིད་བྱུང་བ་ཡིན་ལ། ད་ཡང་ཧེ་རུ་ཀ་ཉིད་ལ་ཧེ་རུ་ཀ་ཉིད་ཐིམ་པར་འགྱུར་རོ། །ཞེས་མ་འོངས་པའང་བསྟན་ནོ། །སྔོན་དུས་ན་བྱོན་པའི་གྲུབ་པའི་སློབ་དཔོན་ཆེན་པོ་འདི་དག་ནི་གསང་བ་བསྲུང་བ་ལ་ཐུགས་ཤིན་ཏུ་སྒམ་པས། འདི་ལྟར་མིའི་འདུ་ཚོགས་མང་པོ་འོང་སར་གསང་སྒྲུབ་ལྟར་བཞེངས་པ་ཤིན་ཏུ་གཉན་པས་མི་བཏུབ་གསུངས། ཁྲོ་མོ་བརྒྱད་པོ་རྒྱུད་ལུགས་ལྟར་བཞེངས་ཤིག་གསུངས་ནས་བཞེངས། གཡས་ཕྱོགས་ཀྱི་གྱང་རིས་ལ་སྒྱུ་འཕྲུལ་ཞི་བ། གཡོན་ཕྱོགས་ལ་འབར་བ་ཁྲོ་བོའི་ལྷ་ཚོགས། མདུན་དུ་མདོ་ཡོངས་རྫོགས། སྟེང་དུ་དཀྱིལ་འཁོར་གསུམ་དང་། སྒོ་ཁང་ངོས་ལ་དཔལ་མགོན་མ་ཧཱ་ཀཱ་ལ་དྲག་པོ་གཤིན་རྗེ་ལྟར་སྒྲུབ་པ། སྟག་ཞོན་མོན་པ་སྡེ་བརྒྱད་དང་བཅས་པ་བྲིས། དེ་ནས་རབ་ཏུ་གནས་པའི་དུས་ལ་བབ་སྟེ། ཆང་མ་སུ་ལ་འཆོལ། ཤ་གང་ནས་འཚོལ་སོགས་རབ་སྟོན་གྱི་ཉེར་བསྡོགས་བྱ་བ་ན། ཉེ་གནས་ན་རེ། བཟོ་བོ་དང་། ལས་བྱེད། མགྲོན་པོའི་སྐྱོང་དར་མངས་པས་དངོས་པོ་ཕལ་ཆེར་ཟད། ད་འབུལ་བ་སྒུག་པ་དང་ཡོན་བདག་གི་སར་གཡར་སྐྱིའང་བྱེད་དགོས་པས་རབ་གནས་དལ་གྱིས་གནང་བར་གསོལ་བས། ཟུར་ཆུང་པ་ན་རེ། རབ་གནས་དུས་ལ་བྱེད། ཆང་གི་ནས་བཙལ་བས་མི་
ལང་། རྫ་མས་ཀྱང་མི་ཁོམ། དེ་བས་ཆང་མ་ཀླུ་ལ་འཆོལ། ཤ་རྙེད་པའང་དགའ། རྙེད་ཀྱང་རིན་མི་འཁྱོངས། སྲམ་པ་བོན་གྲོང་པའི་གླང་ལ་ཤ་རུ་བྱེད། རྩམ་པ་མི་མ་ཡིན་ལ་འདེགས་བསྐུལ་བས་ཆོག །དེ་ལྟར་བྱས་ན་མི་ལྡང་བ་གང་ཡང་མེད་གསུངས། དེར་བླ་མ་ཟུར་པོ་ཆེས། ནས་ཁལ་སྟོང་གི་ཆང་ལས་མི་འགྲོ། ཁྱོད་རང་ནས་དྲེ་དྲུག་ཚོས། མིའི་མདུན་ན་རབ་གནས་ཀྱི་ཆང་ཚོང་མང་པོ་ཡོད་པ་ལྟར་གྱིས། ཟུར་ཆུང་པས་ཀླུ་མོ་ཁུག་ཅིག་གསུངས། དེ་ནས་ཡ་ཟད་བྲག་གདོང་གི་བྲག་ལ་གནས་པའི་ཀླུ་བདུད་ཀྱི་སྲིང་མོ་དེ་ཟུར་ཆུང་པས་དགོངས་པ་མཛད་དེ་བཀུག་པས་སྦྲུལ་ཕྲ་མོ་གཅིག་བྱུང་། ལྟ་སྟངས་མཛད་པས། བུད་མེད་དཀར་མོ་གཅིག་ཏུ་སོང་། དེར་ཟུར་པོ་ཆེས། ངའི་ལྷ་ཁང་རབ་གནས་ཀྱི་ཆང་མ་བྱེད་དགོས་གསུངས་པས། ངེད་གཙང་མ་ཀླུའི་རིགས་གྲིབ་ལ་སྡར། སྐྱུར་ལ་འཛེམ། བླ་མའི་གཟི་བྱིན་ཡང་མི་བཟོད་པས་ཆང་མགོ་མི་ཐོན། ངའི་མིང་པོ་ལ་འཆོལ་བ་ཞུ། རྐྱེན་གང་དགོས་འབུལ་ཟེར། དེར་བླ་མས་འོ་ན་ཟུར་ཆུང་པ། མིང་པོ་འགུགས་སམ་བྱིན་གྱིས་བརླབ་གསུངས་པས། བདག་གིས་འགུགས་པར་འཚལ་ཟེར་ནས་ལྟ་སྟངས་མཛད་པས། སྡིག་པ་རཱ་ཙ་རྩིད་བུ་ཙམ་ཞིག་བྱུང་། ཏིང་ངེ་འཛིན་གྱིས་གཟིར་བས་གཟུགས་མངོན་སུམ་དུ་བསྟན་བྱུང་། དེར་ཆང་མ་བྱེད་པར་བསྒོས་པས། བདག་ལྷ་འདྲེའི་རིགས་སུ་གཏོགས་པས་བྱ་དགའ་དང་སེམས་འཛིན་དུ་མ་དགོས། ཆང་མ་བྱེད་དུ་མི་ཁོམ་ཡང་། བླ་མའི་བཀའ་གཅོག་པར་མི་ནུས་ཟེར། དེར་ཁོང་གཉིས་ཀྱི་སྲོག་སྙིང་བླངས། དམ་ལ་བཞག །གནང་ཉིན་ཡོང་བས་གྲབས་མཛོད། ངེད་ཀླུའི་རིགས་གྲིབ་ལ་སྡར་བས་གཙང་ཞིང་སྡོད་ས་བཙན་པའི་ཐབས་ཞུ་ཟེར། དེར་བླ་མ་ཟུར་པོ་ཆེས། ངས་བྱིན་གྱིས་བརླབས་ཀྱིས་གསུངས། རྫ་མ་ཐེམ་བུ་གསུམ་པ་སྤོས་ཆུས་བཀྲུས། བདུད་དང་ཀླུ་
བརྟེན་པའི་མཐུན་རྫས་ཀྱང་འདུ་བྱས། ནས་དྲེ་དྲུག་གི་གླུ་མ་རྣམས་བླུགས། ཁ་ནས་དཀར་གཙང་མས་བཀང་། དེར་ཀླུ་བདུད་མིང་སྲིང་གཉིས་བཅུག །ཁ་བླ་མའི་ན་བཟའ་ཕོད་ཀས་བཅད། ཕུ་རུང་ནས་ཆུ་བླུག་ཏུ་རུང་བར་བྱས། རྡོ་རྗེའི་མདུད་རྒྱ་བྱས་པས་ཀླུས་ཕྱོགས་ཕྱོགས་ཀྱི་ཆང་རྣམས་ཀྱི་བཅུད་བསྡུས་ཏེ་ཆང་ལ་འཛད་པ་མ་བྱུང་། དེར་ཉེ་གནས་ཀྱིས་ཆང་གིས་ལྡང་མཆི། རྩམ་པ་ཇི་ལྟར་བྱེད་ཞུས་པས། ཕད་སྣོད་མང་པོ་གཡོར་ཅིག་གསུངས་དེར་བླ་མས་གཏོར་མ་གཅིག་མཛད། ཕད་བུའི་སྣོད་རྣམས་སུ་རྩམ་པ་ཁྱོར་བ་རེ་ཐོབ་ལ་ཞོག་གསུངས། དེ་ལྟར་བྱས་པས་སང་ཉིན་སྣོད་ཐམས་ཅད་རྩམ་པས་ཁེངས། ཡང་བླ་མའི་ཞལ་ནས་གྲྭ་པ་གཅིག་སྲམ་པ་བོན་གྲོང་པའི་སར་དེངས་ལ། ངེད་རབ་གནས་བྱེད་པའི་ཆང་གི་སྦང་མ་མང་པོ་ཤིང་ནགས་ལ་ཕོ་བཏང་བ་འདི་འཕངས། གླང་རྣམས་སྦང་མ་ཟ་བར་ཐོང་གྱིས་གསུངས། དེ་བཞིན་བྱས་པས་གླང་མང་པོ་བསྐུར་བྱུང་། བླ་མའི་གསུང་གི་ཟུར་ཆུང་པས་སྒྲོལ་ལམ། གསོ་གསུངས་པས། བདག་བླ་མའི་བཀའ་བཞིན་སྒྲུབ་པར་ཞུ་ཞུས་པས། ཟུར་པོ་ཆེས་དགོངས་པ་མཛད་དེ་ཐུན་རེ་འཕངས་པས། གླང་ཐམས་ཅད་ཉལ་གྱིས་ཤི། པགས་པ་ཤུས། རུས་པ་མ་བཅགས། ལྷུ་ཚིགས་མ་བྲལ་བར་གྱིས། ནང་གི་དོན་སྣོད་རྣམས་ཀྱང་རང་སོར་ཞོག །ཕྱི་ཤ་རྣམས་དྲེགས་ཤིག་གསུངས་པས། ཉེ་གནས་སྐྲག་སྟེ། འདི་པ་དཔོན་སློབ་སྡིག་རྒྱལ་དུ་འདུག །གླང་ལ་སྦང་མ་སྟེར་གསུངས་ནས་ཐམས་ཅད་བསད། ད་གླང་འདོན་མི་བྱུང་ན་ཇི་ལྟར་བྱེད་སྙམ། བློ་ཤིན་ཏུ་འཚུབ་པའི་ངང་ནས་རབ་གནས་ཀྱི་ཤ་སྟོན་བྱས། སྟོན་མོ་གྲུབ་ནས་གླང་འདོན་མི་བྱུང་། ཉེ་གནས་རྟབ་རྟབ་པོར་གྱུར་པ་དང་། བླ་མའི་གསུང་གིས་ཁོང་ཚོ་ལའང་བཟའ་བ་བྱིན།
ཟུར་ཆུང་པས་གླང་བདག་པོ་ལ་སྤྲོད་ཅིག་གསུངས། དེར་ཟུར་ཆུང་པས་པགས་པའི་ཁུད་དུ་རུས་པ་རྣམས་གྲིལ། ནང་རོལ་རྣམས་ཀྱང་བཙུད། ན་བཟའ་བཀབ། སེ་གོལ་གཅིག་གཏོགས་པའི་མོད་ལ་གླང་རྣམས་འདར་ཕྲི་ལི་ལི་ལངས་བྱུང་། རྒན་མོ་གཅིག་གིས་ཤ་འདྲལ་བའི་ཆེ་རུས་རྩི་ཧྲད་པ་བྱུང་བས། ཕྱིས་གླང་དེ་ལ་རྩིབ་གྱོལ་བྱུང་སྐད། གསད་གསོའི་རྫུ་འཕྲུལ་དེ་ལྟ་བུ་མཛད་པས། དེར་ཚོགས་ཚད་ཐམས་ཅད་ཤིན་ཏུ་དད་པར་གྱུར། བླ་མ་ཟུར་ཆེན་ཡང་མཉེས་པའི་ངང་ནས་དཔལ་ཆེན་པོ་ལ་གཟིགས་ཏེ། འགྲོ་བའི་དོན་ཆེན་པོ་མཛད་འཚལ་གསུངས་པས། སྐུ་གར་དགུའི་རྣམ་པར་རོལ་ཞིང་། ཧེ་ཧེ། སྨོས་ཅི་འཚལ། གསུངས་པས་དང་པོ་རྔམས་ཞལ་དུ་ཡོད་པ་ལ། དེ་ནས་བཞད་ཞལ་དུ་གྱུར་པ་ཡིན་ནོ། །ད་ངེད་རང་རྣམས་ཡང་དག་གི་ལོ་སྒྲུབ་བྱེད་པ་ཡིན་གསུངས་པས། ཉེ་གནས་ན་རེ་ཆ་རྐྱེན་གྱིས་མི་ལྡང་ཟེར། ཟུར་ཆུང་པས། ཆང་མི་ལྡང་ན་ཀླུ་བདུད་སྒོར་བས་ཆོག །ཤ་དང་རྩམ་པ་ཡང་བག་ཙམ་མཆིས། རྣལ་འབྱོར་དམ་ཚིག་མ་ཉམས་ན། འཚོ་བ་སྣང་སྲིད་ལྷ་འདྲེས་སྦྱོར། གཞི་བདག་གི་འབུལ་བའང་འོངས་པས་ལོ་སྒྲུབ་མཛད་པ་དགའ་ཟེར། དེར་རྣལ་འབྱོར་ཕོ་མོ་བརྒྱ་ཙམ་ཚོགས། སྒྲུབ་པ་པོ་རྣམས་ལའང་ཆང་ཀ་པཱ་ལ་རེ་དང་། ཟན་བྱ་ངང་མོའི་སྒོ་ང་ཙམ་རེ། ཤ་དམ་ཚིག་གི་བཟའ་བ་ཙམ་དྲོངས་ཤིག་གསུངས་ཏེ་ལོ་སྒྲུབ་མཛད། དེར་བླ་མའི་ཞལ་ནས་ཁྱེད་རྩེ་མོ་བཞི་དགོངས་པ་འགྲན་པ་ཡིན་གསུངས་པས། ཐམས་ཅད་ཀྱིས་མཉམ་པར་བཞག་པ་ན། གསུམ་པོ་ལ་གཡོ་འགུལ་མེད་པའི་དགོངས་པ་རི་བོ་ལྟ་བུ་རྐྱེན་གྱིས་དབྲོག་མི་ནུས་པ་བྱུང་། ཟུར་ཆུང་པ་རིས་མེད་མཉམ་པ་ཆེན་པོའི་གནས་ལ་བྱོན་པས་ལྟ་བ་མཐོ་བ་མཚོན་ཕྱིར་ཤིང་རྟ་གང་ཙམ་འཕགས་ནས་གདའ་སྐད། ཡང་བླ་མའི་ཞལ་ནས། ད་ཟུར་
ཆུང་བའི་རུ་ལུའི་བཟླས་པ་ལ་ཕྱི་ནས་ཉོན་ཅིག་གསུངས། རྣལ་འབྱོར་མ་གཅིག་གིས་ཕྱི་ནས་ཉན་པས། སྔར་བས་ཆུང་དུ་མ་སོང་། རི་ཟུར་གཅིག་འདས་ནས་ཉན་པས་ཀྱང་ཆུང་དུ་མ་སོང་བས། དེར་བླ་མའི་གསུང་གིས། ཁྱེད་རྣམས་མཆེད་གྲོགས་མཉམ་པོར་ཡིན་ཀྱང་། ཟུར་ཆུང་པའི་གྲིབ་མ་ལའང་འགོམ་དུ་མི་རུང་གསུངས་ནས་གཟེངས་བསྟོད་དོ། །དེ་ནས་སྒྲུབ་པ་ཐོན་པ་དང་། དཔོན་སློབ་རྣམས་གྲོགས་པོའི་སུམ་མདོར་བྱོན། བླ་མ་ཐུགས་ཉམས་འུར་ནས་བྲག་རྡོ་རྗེའི་གཏན་པ་བྱ་བའི་སྟེང་དུ་རུ་ལུའི་བྲོ་བརྡུང་མཛད་པས། ཞབས་ཀྱི་ལོང་བུ་མན་ཆོད་འདམ་ལ་བརྒྱབ་པ་བཞིན་སོང་། ཟུར་ཆུང་པས་ངའི་བླ་མ་སངས་རྒྱས་དངོས་སུ་འདུག་པས་ཞབས་སྤྱི་བོར་ལེན་པ་ཡིན་ཟེར་ཞབས་རྗེས་ལ་དབུ་གཏུགས་པས་ཐོར་ཚུགས་སྙན་ཆ་དང་བཅས་པའི་རྗེས་ལྷམ་མེར་བྱུང་། དེར་བཟང་སྒོམ་ཤེར་རྒྱལ་ན་རེ། བླ་མ་ཁུ་དབོན་གཉིས་ཀྱི་གྲུབ་རྟགས་ཁྱད་དུ་འཕགས། འདི་ལ་མི་ཕྱུགས་ཀྱི་རྡོག་པ་བཞག་ན་བསོད་ནམས་མ་ཡིན་པར་འགྱུར་ཉེ་ཟེར་ནས། ལག་སོར་ལྔ་གྱད་སྟོབས་པོ་ཆེ་ལྔར་སྤྲུལ་ནས་བྲག་རྡོ་རྗེའི་གཏན་པ་གྱེན་དུ་བསླངས་ནས་བཞག །ཡང་ཞང་འགོས་ཆུང་པ་དང་། མི་ཉགས་ཁྱུང་གྲགས་གཉིས་ཀྱིས། འདི་བསྟེན་པ་ངེད་ལ་བབ་ཟེར་ནས། གྱད་སྟོབས་པོ་ཆེ་མང་པོས་བསྒུལ་བར་ཡང་མི་ནུས་པའི་ཕ་ཝང་རེ་བླངས་ནས་གཡས་གཡོན་ནས་བསྟེན་ཏེ། རྩ་བ་བརྟན་པར་བྱས་པ་ད་ལྟ་མངོན་སུམ་ན་ཡོད་དོ། །དེ་ནས་འུག་པ་ལུང་དུ་འབྲས་བུའི་དཔལ་ཆེན་པོ་བཞེངས་པར་བཞེད་ནས། སློབ་མ་ཐམས་ཅད་ཀྱང་ཕར་དེངས་ཤིག་གསུངས་པས། ཟུར་ཆུང་པ་བླ་མའི་ཕྱགས་ཕྱི་སྙོགས་པར་འོང་གི་ཟེར་ནམ་མཁའ་ལ་འཕུར་ནས་བྲག་རྒྱ་བོར་གཤེགས། གྲྭ་པ་རྣམས་ཀོ་བ་བརྒྱུད་ནས་སོང་། ཀླུ་བདུད་མིང་སྲིང་གཉིས་ན་རེ། བདག་ཅག་ཀོ་བ་ལ་མི་གྲིབ་ཅན་དང་འགྲོགས་པར་མི་རུང་བས། རབ་ལ་ཁྲིད་པར་ཞུ་འཚལ་ཞེས་ཞུས་པས། བླ་མས་དེ་བཞིན་རུང་གསུངས། དེར་ཉེ་གནས་ལ་རྫ་མ་བསྐུར་བས་ལྗིད་བྱ་སྒྲོ་ལས་ཡང་བ་
བྱུང་། ཆུ་ཁར་ཕེབས་པ་དང་ཉེ་གནས་ལ་ཁྱོད་རང་ང་ལ་འཇུས། ཐེ་ཚོམ་མེད་པར་ཤོག་གསུངས་པས། ཁོའི་སེམས་ལས་སུ་མ་རུངས་ནས་ཆུ་ལ་སྐྱུར་བ་མིན་ནམ་སེམས། དེ་མཁྱེན་ནས། ད་ཁྱོད་ངའི་ཕྱི་ན་མི་ཐར་བ་འདུག །ཀོ་བ་སྐོར་ལ་ཤོག ངས་སྔོན་ལ་འགྲོ་ཡི་གསུངས་བླ་མ་ཞབས་ཆུ་ལ་མི་རེག་པར་གཤེགས་སོ། །ཉེ་གནས་ཀྱིས་ཀོ་བར་ཕྱིན་པས་ཀོ་བ་ཕ་རིར་ཐལ། དེར་སྒུག་ཡུན་རིང་བ་དང་ཁ་སྐོམས་ནས་ཆང་བཙགས། ཡོག་ཚད་འཐུངས་པས་རྣམ་རྟོག་ལ། ཆང་བཙོས་ནས་ལོ་གཅིག་དང་ཟླ་བ་བཞི་སོང་། འདི་ཙམ་ཡོང་བ་བླ་མས་རྫ་མའི་ནང་དུ་ཅི་བཅུག་པ་ཡིན་སྙམ་ནས་རྫ་མའི་རྒྱ་བཤིག་པས། སྦྲུལ་དཀར་ནག་གཉའ་ཤིང་ཙམ་པ་གཉིས་མདུད་པ་ཤིག་གེ་གྲོལ་ནས་ནམ་མཁའ་ལ་དེངས། ཤུལ་དུ་སྡིག་སྦལ་ལྕོང་མོ་ལ་སོགས་པ་འདུག་པ་དག་ཀྱང་ཚག་སྒྲ་འུར་སྒྲ་དང་བཅས་ནམ་མཁའ་ལ་སོང་མ་ཐག་སྦང་མ་སྔོ་ཧྲུལ་ལེ་སིངས་པོ་སྐྱུར་སིང་ངེ་སོང་། དེར་སྦང་མ་རྣམས་ཕོ། རྫ་མ་ཁུར་ཕྱིན་པས་ཆུ་ཐོན་པ་དང་རྫ་མའང་ཆག །དེར་བླ་མའི་བཀའ་ལས་རྟེན་འདྲེལ་འཆུགས། འོག་གདོང་གི་ཀླུ་བདུད་མིང་སྲིང་གཉིས་ཕྱིར་མ་ཐོན་ན། འུག་པ་ལུང་དུ་དགོན་པ་བོད་ཙམ་ན་ཆེ་བ་ཆགས། སྲམ་པ་སྒྲུབ་ཁང་ཡང་དར་རྒྱས་ཆེ་ལས་མི་གཉན་པ་ཞིག་འོངས་ཏེ། ད་རྫ་མ་ཆུ་ལྷོར་ཐོན་པས་གནས་གཞི་དང་། སྡེ་དགོན་འགའ་ཞིག་ཆགས་པར་འགྱུར་ཞེས་གསུངས། ཀླུ་བདུད་མིང་སྲིང་སྲམ་པ་སྒྲུབ་ཁང་གི་བཀའ་བསྲུང་ལ་བསྐོས། རྟེན་འདྲེལ་དེས་འབྲས་བུའི་དཔལ་ཆེན་པོ་ཡང་མ་གྲུབ་པོ། །དེ་ནས་བཤད་གྲྭ་དང་སྒོམ་གྲྭ་རྒྱ་ཆེན་པོ་བྱུང་། དེའི་ཚེ་ཉ་རི་ན་མ་མ་གཡུང་དྲུང་བཀྲ་ཤིས་བཟའ་མི་གཉིས་བུ་ཚ་མེད་ལ་ནོར་གྱིས་འབྱོར་པ་ཡོད་པ། ཆོས་འཁོར་བྱ་བར་འདོད་ནས་ཡུལ་མི་དང་ཉེ་དུ་ཀུན་བསགས་ཏེ་སློབ་དཔོན་གང་བཟང་དྲིས་པས། ལ་ལ་སྔགས་པ། ལ་ལ་བཙུན་པ། ལ་ལ་བོན་པོ་ཟེར་ཁ་མ་འཆམས་པས་ཁྱེད་རང་གང་མོས་ལ་གྱིས་ཤིག་པའི་གྲོས་བཏབ། མོ་ན་རེ། ངའི་ཡོ་བྱད་ཀྱིས་ལྡང་པས་གསུམ་ཀ་
ལ་བྱེད་ཟེར། དེར་སྔགས་པ་འུག་པ་ལུང་པ། བོན་པོ་ལ་ཀེ་རྩེ་པ། བཙུན་པ་ཆུ་མིག་རིང་མོ་པ་རྣམས་གདན་དྲངས་སོ། །མཆོད་གནས་གསུམ་པོ་འདུས་ནས་ལྷ་ཁང་སྡེབས་སུ་རྩིགས་པའི་གྲོས་བྱས་པས་ལྷའི་གཙོ་བོ་ལ་མ་མཐུན། སྔགས་པས་རྡོ་རྗེ་སེམས་དཔའ་ལ་བྱེད་ཟེར། བཙུན་པས་ཤཱཀྱ་ཐུབ་པ་ལ་བྱེད་ཟེར། བོན་པོས་གཤེན་རབ་མི་བོ་ལ་བྱེད་ཟེར། ལྷ་ཁང་སོ་སོར་རྩིགས་སུ་ཆད། ལྷ་རྗེ་འུག་པ་ལུང་པས་སྒྲོ་ཕུག་པས་དམའ་བ་གཅིག་ཏུ་བོན་པོ་དང་བསྡེབས་ནས་བརྩིགས་པས། བོན་པོ་ན་རེ། ད་གདོད་ལྷ་བཞེངས་པའི་ཚེ་ཡང་། ཁྱེད་ཀྱི་ལྷས་གཙོ་བོ་བྱས་ན་ངའི་ལྷས་འཁོར་བྱེད། ངའི་ལྷས་གཙོ་བོ་བྱས་ན་ཁྱེད་ཀྱི་ལྷས་འཁོར་དུ་བྱེད་དགོས་ཟེར་པས་དེ་གཉིས་གང་ཡང་ལེགས་པ་གཅིག་མི་འོང་བར་འདུག་དགོངས་ནས་ལྷ་ཁང་དེ་བོན་པོ་ལ་བྱིན། སྒྲོ་སྟོན་པས་སྒྲོ་ཕུག་ཅེས་བྱ་བའི་གནས་ཕུལ་ཏེ་དེར་ལྷ་ཁང་བརྩིགས་སོ། །དེའི་ཚེ་ཡོན་བདག་གཉེན་སྡེ་གསུམ་ན་རེ། ལྷ་ཁང་ལ་རྒྱ་ཕིབས་སུས་ཁེལ་པ་ལ་མེ་ཏོག་སྡུད་ཟེར་བ་ལ། སྔགས་པ་དང་བོན་པོས་ཁེལ། བཙུན་པས་མ་ཁེལ་ལོ། །དེར་སྔགས་བོན་གཉིས་ལོ་རེ་མོས་སུ་སྡུད་པས། བཙུན་པ་ན་རེ། བདག་ཅག་ལའང་སློང་རེ་ཞུ་ཟེར། ལོ་གཅིག་བྱིན་པས། དེ་ཕྱིན་ཆད་གསུམ་ཀ་ལོ་རེས་སྡུད་དུ་སོང་། སྒྲོ་ཕུག་གི་གཙུག་ལག་ཁང་དེར་དུས་གསུམ་སངས་རྒྱས་ཀྱིས་གཙོ་བྱས་པའི་ལྷ་ཁང་ཆེ་ཆུང་བརྒྱད། ཁྱམས་སྟོད་ཀ་བ་ཉི་ཤུ་དང་། ཁྱམས་སྨད་ཀ་བ་དྲུག་ཅུའི་ས་ཡོད། གནས་འདིར་ཆོས་གྲྭ་ཆེན་པོ་ཚུགས། དེ་ཡང་ཐག་གི་རྒྱ་བོར་ཡང་དག་གི་སྒྲུབ་པའི་སྐབས་ཡིན་པར་ཡང་གྲགས་ཤིང་རྒྱལ་བ་ཟུར་པོ་ཆེ་ལ་སྐུ་བསོད་ཤིན་ཏུ་རྒྱས་པའི་སྐབས་ཤིག་ན། འབྲོག་མི་ལོ་ཙཱ་བ་པཎྜི་ཏ་རྫོངས་པའི་གསེར་མ་ལྡང་ནས་ཁྱེད་ཀྱིས་གསེར་མང་པོ་ཁྱེར་ཤོག །ངས་གདམས་པ་ཟབ་མོ་སྦྱིན་ནོ་ཟེར། འདི་ལྟར་སྐྱེས་བུ་ཆེན་པོ་རྣམས་ནི་གཞན་ལ་ཕན་འདོགས་པའི་དམ་བཅའི་རྩ་བ་བརྟན་ཅིང་། སྡོང་པོ་བཀོད་པ་ལས། རིགས་ཀྱི་
བུ་ཁྱེད་ཀྱིས་དགེ་བའི་རྩ་བ་གཅིག་ལ་ཆགས་པར་མ་བྱེད་ཅིག །ཆོས་ཀྱི་སྒོ་གཅིག་དང་སྤྱོད་པ་གཅིག་ཡོངས་སུ་རྫོགས་པས་ཆོག་པར་མ་འཛིན་ཅིག །དེ་ཅིའི་ཕྱིར་ཞེ་ན། རིགས་ཀྱི་བུ་བྱང་ཆུབ་སེམས་དཔའ་ནི་དགེ་བའི་རྩ་བ་ཚད་མེད་པ་ཡོངས་སུ་བསྡུ་བར་བྱ་དགོས་སོ། །ཞེས་པས་བྱང་ཆུབ་སེམས་དཔའི་བསྡུ་བའི་དངོས་པོ་བཞིའི་སྤྱོད་པ་མ་ཚང་བ་མེད་པ་རང་གིར་བྱ་བའི་སླད་དུ། ཀརྨ་པཀྵྀས་མཚུར་ཕུའི་གཙུག་ལག་ཁང་གི་རྒྱ་ཕིབས་འདམས་ཅོག་རྩེ་ལ་ནས་མཐོང་བ་ཙམ་གྱིས་སྲིད་དུ་བགམ་པར་མཛད་པ་བཞིན། རྒྱལ་བ་ཟུར་པོ་ཆེས་དགོངས་པ་ཅན་གྱི་སླད་དུ། སྒྲོ་ཕུག་གི་ལྷ་རི་གདོང་དང་། ཐག་གི་ཡང་གདོང་གཉིས་སྦུབས་སུ་བཅུག་པའི་གསེར་འབུམ་རེ་བྱེད། དེ་གཉིས་ཀྱི་བར་ལྕགས་ཐག་གིས་སྦྲེལ་ལོ་གསུངས་པ་དང་། གྲྭ་པ་རྣམས་ན་རེ། འོ་ན་བདག་ཅག་གིས་ཀྱང་མཐུད་དུ་ཟངས་སྡེར་རེ་དང་། དྲིལ་བུ་རེ་དང་། ལྕགས་ཐག་རེ་འབུལ་ལོ་ཞེས་དམ་བཅས། དེའི་གཡེར་ཆེན་པོ་བྱུང་ནས་གཞི་བདག་གཉིས་ཀྱང་བློ་འདྲོགས་པར་གྱུར་ཏེ། གསེར་རའི་མཆིན་པ་ཙམ་ཞིག་ཞུ་རྟེན་དུ་ཕུལ་ནས་གསེར་འབུམ་མི་མཛད་པའི་ཞུ་བ་བྱས། གསེར་གྱི་གཏེར་ཁ་ཕུལ་ནས་སྲོག་ཆགས་ཀྱི་གཟུགས་མ་བྱུང་བར་ལོངས་ཞེས་ཟེར། ཁུང་བུ་གཅིག་ནས་གསེར་ཤིན་ཏུ་མང་པོར་བྱུང་བའི་མཐར་གསེར་སྦལ་བ་འདྲ་བ་ཞིག་བྱུང་བ་དང་འཕྲོ་བཅད། མུ་གུ་ལུང་དུ་ལོ་ཙཱ་བ་ལ་གསེར་སྲང་བརྒྱའི་མཐུད་བྱས། སྟོན་གྱི་དུས་སུ་བེར་ཐོག་ཏུ་ཚེར་མ་ཁུར་བ་སོགས་གུས་པའི་སྤྱོད་ལམ་ཀྱང་མཛད། རྒྱུད་གསུམ་ཆ་ལག་དང་། གུར་ལ་ཤིན་ཏུ་མཁས་པར་བྱང་ཆུབ་མོད་ཀྱི། བླ་མ་ཆེན་པོའི་བཀའ་དྲིན་གྱིས། ཨ་བོའི་སེམས་ཕྱོགས་ནོར་བུ་ཐལ། ཞེས་གསར་འགྱུར་གྱི་ཆོས་ལ་རོ་མྱངས་པས། སླར་ཡང་རང་གི་སེམས་ཕྱོགས་ཡིད་བཞིན་རིན་ཆེན་ལྟ་བུའི་ནོར་དུ་ཐལ་ཞེས་ངེས་ཤེས་ལྷག་པར་སྐྱེས་པའི་གསུང་བྱོན་ཏོ། །ལར་ཕག་མོ་གྲུ་པས་ལམ་འབྲས་གསན་པའི་ཕྱིན་དྭགས་པོ་སྙི་པ་རིན་པོ་ཆེ་ལ་ཐུགས་པ་
ནད་བུར་བྱེད་པ་དང་། གངས་རིའི་ཁྲོད་ཙམ་ན་དཀོན་པའི་དགེ་སློང་རྡོ་རྗེ་འཛིན་པ་གྲུབ་ཐོབ་རྣལ་འབྱོར་གྱི་དབང་པོ་ལྷ་རྗེ་ཟུར་པོ་ཆེ་རང་སྲིད་ཀྱི་ཕྱོགས་ལ་མཐོ་བ་སྙམ་པའི་ཀུན་སློང་གི་གདོན་ཆེན་པོས། བདེ་གཤེགས་རྒྱ་བོ་པ། འབྲོམ་སྟོན་རྒྱལ་བའི་འབྱུང་གནས། བླ་མ་ཞང་རིན་པོ་ཆེ། སྟོན་པ་བྱད་འབར་རྣམས་སྡེ་སྣོད་གསུམ་གྱི་དགྲར་བལྟ་བའི་ཆོ་ངེ་འདོན་པ་ནི་རང་ཉིད་ཀྱི་མགོ་ན་ཆབ་འཚལ་བའི་སྤྱི་བརྟོལ་ཆེན་པོའོ། །དེ་ལྟར་སྒྲོ་ཕུག་གི་གཙང་ཁང་འབྱོངས་ཙམ་པ་དྲུག་ཅུ་རེ་གཅིག་པའི་ཚེ་ལམ་ལྔའི་ཡོན་ཏན་མཐར་ཕྱིན་ནས་ལྷུན་གྲུབ་རིག་འཛིན་གྱི་ས་ལ་གནས་པའི་སྐྱེས་བུ་ཆེན་པོ་སྤྲུལ་པའི་སྐུར་རྩོད་པ་མེད་པ་དེ་ནི་རགས་ལུས་དྭངས་མར་གནས་འགྱུར་བའི་དགོངས་པ་གཏད་དེ། བྲག་རྒྱ་བོ་ནས་ཟུར་ཆུང་པ་བོས་ཤིག་གསུངས། བྱོན་པ་དང་ངའི་གདན་ས་འདི་ཟུར་ཆུང་པ་ལ་གཏོད་པ་ཡིན། སློབ་མའི་ཚོགས་ལ་ཆོས་ཀྱིས་ཕན་འདོགས་དགོས་པས་བློ་དང་འཚམས་པར་སྦྱོར། ངས་སྐྱོང་བ་བཞིན་སྐྱོངས། སློབ་མ་རྣམས་ཀྱིས་ཀྱང་ཟུར་ཆུང་པ་འདི་དཔལ་ཆེན་པོའི་སྐུ་གསུང་ཐུགས་ཀྱི་དངོས་གྲུབ་ཐོབ་པ་ཡིན་པས་ང་བས་འདི་ལྷག །ཅི་མཛད་ལེགས་པར་ལྟོས། གསུང་མ་བཅག །སྐུའི་གྲིབ་མ་དང་ཞབས་རྗེས་ན་བཟའ་ཙམ་ལའང་མ་འགོང་། ངས་སྐྱོང་བ་བཞིན་སྐྱོང་བར་ཡོད་པས་མོས་གུས་ཕུན་སུམ་ཚོགས་པ་གྱིས་ཤིག་གསུངས། དེ་ནས་སྲམ་པ་སྒྲུབ་ཁང་དུ་གཤེགས། ལན་གཅིག་ཉེ་གནས་ལ་ད་ནང་ཚ་བ་སྔ་སེ་གྱིས་གསུངས། དེར་ཉི་མ་ཤར་བ་དང་སྐུ་མདུན་དུ་ཕྱིན་པས། བླ་མ་གཟིམས་མལ་ན་སྐུ་ཚགས་མཛད་ཅིང་འདུག །ད་ལྟ་ནས་སྐུ་ཚགས་མཛད་པ་གར་གཤེགས་པ་ཡིན་ཞུས་པས། ང་ནི་བདེ་ཆེན་ཞིང་དུ་འགྲོ། །དཔལ་ཆེན་ང་དང་དབྱེར་མེད་པས། །ཡི་དམ་ལྷ་ལ་གསོལ་བ་ཐོབ། །ཅེས་གསུངས་ནས་རྡོ་རྗེ་དྲིལ་བུ་འཁྲོལ་ལེའི་ངང་ལ་སྐུ་འོད་ཀྱི་རང་བཞིན་དུ་གྱུར་ཏེ། དཔལ་ཆེན་པོའི་ཐུགས་ཀར་ཐིམ་མོ། དེའི་དུས་སུ་ཁམས་པའི་འབུལ་སྐྱེལ་ཡོང་བ་དང་འགྲིགས་པས། ལམ་དུ་བླ་མ་དང་མཇལ། ཁམས་པའི་སྣང་བ་བྱིན་གྱིས་བརླབས་
ནས་སྤྲུལ་པའི་གཞལ་ཡས་ཁང་དུ་འབུལ་བའང་བཞེས། བསྔོ་བ་མཛད། སླར་ཁམས་པ་གཉིད་ལོག་པ་ལས་སད་པ་བཞིན་དུ་ཅི་ཡང་མི་གདའ་བས། ཐེ་ཚོམ་གྱི་ངང་ནས་ཕྱིན་ཙ་ན་ལམ་དུ་བླ་མ་དཔལ་ཆེན་པོའི་ཐུགས་ཀར་ཐིམ་མོ་ཞེས་ཐོས་སོ། །དེ་ལྟ་བུའི་དཔལ་ཆེན་པོ་འདི་བྱིན་རླབ་ཤིན་ཏུ་ཆེ་བས་སླན་ཆད་ཀྱང་སྐུ་གཉེར་ལ་རྒྱ་སྟོན་ཤཱཀ་ཡེ་ལ་བསུ་བ་གྱིས་ཞེས་གསུང་བྱོན། བསུ་བ་བྱས་ཙ་ན། རྒྱ་སྟོན་དེ་བ་དཀར་མོ་ཞིག་ལ་ཆིབས། སྤྱང་ཞྭ་ཞིག་གསོལ་ནས་བྱུང་། དཔལ་ཆེན་པོའི་སྐུ་མདུན་དུ་འོད་དཀར་པོ་གཅིག་ཏུ་གྱུར་ཏེ། གཡོན་སྐོར་ལན་གསུམ་བྱས་ནས་སྐུ་ལ་དངོས་སུ་ཐིམ་པ་དཀོན་གཉེར་མཇོ་དོན་ལྡན་ཞེས་བྱ་བས་མངོན་སུམ་པར་མཐོང་། དེ་བཞིན་དུ་མཚན་ལྡན་ཟུར་མོ་འོད་འབུམ་བྱ་བའང་སྐུ་ལ་ཐིམ་པར་གྲགས་སོ།། རྩེ་མོ་བཞིའི་ནང་ནས་ཀྱང་གླང་པོའི་ནང་ན་ཁྱུ་མཆོག་ལྟ་བུ་བདེ་གཤེགས་རྒྱ་བོ་པའམ། ཟུར་ཆུང་ཤེས་རབ་གྲགས་པ་ནི། སྔགས་འཆང་འུག་པ་ལུང་པའི་གདུང་གི་ཕྱི་མོ་ཡིན་ཏེ། དེ་ལ་ཡབ་ཐག་པ་སྒོམ་ཆེན་རེས་འགའ་ལྡོམ་བུའི་ཚུལ་དུའང་ཡོད་པའི་བུར་གཡས་རུ་གཙང་གི་སའི་ཆར་མ་ཇོ་ཤེས་རབ་སྐྱིད་ལ་ངོ་མཚར་བའི་ལྟས་ཁྱད་པར་བ་དང་བཅས་པས་བཙས། ལོ་བདུན་པར་འབྲི་ཀློག་དང་། དགུ་ལ་ཞི་ཁྲོའི་ཕྲིན་ལས་གྱེར་ཤེས་པ་བྱུང་། བཅུ་གསུམ་ལོན་པའི་སྐབས་གཅིག་ན་གཟིམས་མལ་ན་ཕྱག་དཔེ་གཟིགས་ཤིང་ཡོད་ཙ་ན། ཇོ་མོ་ཞིག་ཡོད་པ་རྒྱུགས་བྱུང་སྟེ་ཞིང་ལ་ཤྭ་ལོག་ཤོར་འདུག་གོ། །ཁྱོད་ཉལ་བས་ཆོག་གམ་ཟེར་བ་ལ། སྨད་གོས་གསར་པ་ཞིག་ཡོད་པ་གྱོན། རུང་ཆུ་བརྒལ་ནས་ཁྱེམ་གྱིས་ཆུ་བཀག་གྱིན་ཡོད་ཙ་ན། མོ་ན་རེ་ངས་དཀའ་ལས་བྱས་པའི་གོས་བརྫེས་ཀྱང་མི་བྱེད་པར་ཆུད་འཛའ་ཞེས་རྒོལ་དུ་བྱུང་། ཁོ་བོ་མི་འཕངས་པར་གོས་འཕངས་ན་དེ་ན་ཡོད་ཅེས་བསྐྱུར་བས། མོ་ཁྲོས་ཏེ་ང་ལ་བརྙས་པ་ཡིན་ཟེར་ནས་རང་ཡུལ་དུ་བྲོས། ཟུར་ཆུང་པ་འཁོར་བ་ལ་སྐྱོ་བ་སྐྱེ་དྲག་ནས་གདུང་ཁུངས་ནས་ཞུད་ལུད་པ་དེ་ཁྱེར་རྗེས་ལ་སྐད་བཏང་བས། མོ་ཡར་ཤོག་ཅེས་འབོད་དུ་རེ་ནས་ཚོམ་
མར་བསྡད་པ་ལ་ཞུད་གཏད་དེ། ཕོ་ནོར་ཕོ་མོ་ནོར་མོ་བྱ་བ་ཡིན་པས་ཞུད་ཁྱེར་ཅིག་སྨྲས་པས། མོ་ཡི་ཆད་ནས་ཡུལ་དུ་སོང་། དེར་ཟུར་ཆུང་པས་ཕ་ལ་གྲོས་མ་དྲིས། མ་ལ་རྒྱགས་མ་བླངས། གྲོགས་ཀྱི་ངོ་ལ་མ་བལྟས་པར་སྤྱང་སློག་ཞིག་ཡོད་པ་ཁྱེར་ནས་ཟུར་པོ་ཆེ་ལ་གཏད་དེ་བྱོན་པས། ལམ་དུ་རྟ་ནག་གི་འབྲོག་པ་གཡུ་དང་ཟངས་ཁྱེར་བ་གཉིས་དང་། ཤངས་པ་ཁྲབ་ཁྱེར་བ་རྣམས་སྡེབས་སུ་བྱུང་སྟེ་བྱོན། དེར་ཟུར་ཆུང་པར་སྤྱང་སློག་ལས་འབུལ་རྒྱུ་མེད། གཞན་གསུམ་པོས་ཕྱག་རྟེན་ཕུལ་བས། བླ་མའི་ཞལ་ནས། ཁོང་རྣམས་འཁོར་བ་ལ་བློ་ལོག་མ་ལོག་བལྟ་བས་སྦང་ཟན་དང་། ལོ་ཐུག་རེ་དྲོངས་གསུངས་པས། འབྲོག་པ་གཉིས་པོ་ཟར་མ་འདོད། ཤངས་པས་ཅུང་ཟད་ཟོས། ཟུར་ཆུང་པས་ལྷག་མེད་ཟོས་པས། བླ་མའི་ཞལ་ནས་སྤྱང་སློག་དང་ཁྲབ་གཉིས་ཞོག །གཡུ་དང་ཟངས་བདག་པོ་ལ་གཏོད་གསུངས་པས། འབྲོག་པ་མ་དགའ་སྟེ་ཕྱག་རྟེན་སློག་པ་འུ་ཅག་ལ་ཆོས་མི་སློབ་པའི་རྟགས་ཡིན་ཟེར་ནས་སོང་། རྟེན་འདྲེལ་དེ་ལས་ཟུར་པའི་ཆོས་ལ་གཤེ་བ་དེ་བྱུང་། དེར་ཟུར་ཆུང་པ་ལ་ཁྱོད་ཀྱི་རུས་པ་ཅི་ཡིན་གསུངས་པས། བླ་མ་དང་རུས་གཅིག་པར་བརྗོད་ན་འགྲན་པར་སོང་དོགས་ནས། ཟུར་ཆུང་ཆུང་ཞིག་ལགས་བྱས་པས་བླ་དྭགས་སུ་དེ་ལྟར་ཐོགས། དེ་ལས་ཅན་དུ་མཁྱེན་ནས་སློབ་གཉེར་བྱེད་དུ་བཅུག་པས་བློ་གྲོས་ཀྱི་སྤོབས་པ་མཆོག་ཏུ་གྱུར་པ་ཞིག་བྱུང་། དང་པོ་ཤིན་ཏུ་དབུལ་པས་བླ་མས་གཏོར་མ་བཏང་བ་དག་བླངས་ནས་ཟན་ཆང་བྱ་བཞིན་གསོལ་བ་ན། གྲྭ་པ་གཞན་ཚོས། ཁོ་ཆང་གི་ཁ་སྐྱུར་དྲི་ཆིལ་ལེ་སྡོད། ཆང་བླ་མ་ལའང་མི་འདྲེན། མཆེད་གྲོགས་ལའང་མི་སྟེར་ཞུས་པས། བླ་མས། དེ་རིང་ཟུར་ཆུང་པ་ཤིང་ཐུས་ཤོག་གསུངས། ཤུལ་དུ་ཟུར་ཆུང་པའི་སྤྱིལ་བུ་གཡེང་དུ་བཅུག་པས། བེམ་པོ་ཞིག་གི་འོག་ན་ཟན་ཆང་ཀ་པཱ་ལ་གང་ལས་གཞན་ཅི་ཡང་མེད་སྐད། དེར་བླ་མས་ཟུར་ཆུང་པ་འཚོ་བ་ཆད་ན་རང་རེའི་ཐབ་ལ་
ཤོག་གསུངས་པས། ང་བླ་མའི་དཀོར་ལ་འབག་རི་ཟེར་དཀའ་སྤྱད་འབའ་ཞིག་ཁུར་བཟོད་པར་མཛད། ཉིན་གཅིག་བླ་མས་བསེ་ཕོར་ཕུལ་དགུ་ཤོང་བ་ཞིག་བསྣམས་ནས་ཁྱོད་ལ་སྐོམ་སྟེར་རྒྱུ་ཨེ་ཡོད་གསུངས། ཟན་ཆང་ཞུས་པས་སྣོད་དོ་གསོལ། ད་དུང་ཁྱེར་ཤོག་གསུངས་ནས་གསོལ། ད་ཨེ་འདུག་གསུངས་པས་དྲེ་གང་ཙམ་གདའ་ཞུས་པས། ད་མི་ཡོག་པར་འདུག །ཡོག་ན་ཁྱོད་ལ་བསོད་ནམས་བོད་ཙམ་ན་ཆེ་བ་འོང་སྟེ། འོན་ཀྱང་ང་ལ་བསྙེན་བཀུར་གྱི་རྟེན་འདྲེལ་ལས་བསོད་ནམས་ཆེན་པོ་འོང་གསུངས། དེར་ནས་ཁལ་གསུམ་གནང་ནས་འདི་ཟད་པ་དང་ཡོ་བྱད་མི་འཐོགས་པ་ཡོང་གསུངས། དེར་ཟུར་ཆུང་པས་ཐོས་པ་དང་། བསམ་པ་དང་། སྒོམ་པའི་གནས་གང་ཡིན་པ་ལ་ཕྲུགས་གཅིག་ཏུ་ཉིན་དང་མཚན་མེད་པར་བརྩོན་པ་བསྐྱེད་པས། སྤྲུལ་པའི་སྐུ་ཡིན་པས་མཁྱེན་རབ་ཀྱི་ཀློང་རྡོལ། ཉམས་རྟོགས་བསམ་གྱིས་མི་ཁྱབ་པ་འཁྲུངས་ཀྱང་དཔེ་ཆ་ཙམ་འདྲི་བའི་ཡོ་བྱད་ཀྱང་རྔོ་མ་ཐོགས་པར་ཡོད་ཙ་ན། ལྷ་རྗེ་ཟུར་པོ་ཆེ་ལ་ཕན་གྱི་ཁང་སྔོན་བྱ་བ་ན་ཇོ་མོ་གཡུ་མོ་བྱ་བའི་སྒོམ་མ་ཕྱུག་མོ་མ་སྨད་གཉིས་ཡོད་པས། ཁྱོད་རང་འདིའི་སྟེང་དུ་སྡོད་གསུངས། ང་ཁྱིམ་ཐབ་མི་བྱེད་ཞུས་པས། འདུ་ཤེས་མ་ཆུང་། སྟོན་པས་གནང་བ་དང་བཀག་པའི་མཚམས་ངས་ཤེས། ཁོང་གཉིས་ཀྱི་ཡོ་བྱད་ལ་སྤྱད་ནས་དབང་ཞུས། དཔེ་བྲིས། ཆོས་ཐམས་ཅད་ལྷག་མ་མ་ལུས་པར་ཉན་པས་ཆོག་པ་ཡིན། དེས་ཁོང་གཉིས་ཀྱང་ཚོགས་རྫོགས། ཁྱོད་རང་གི་དོན་ཡང་གྲུབ་པ་དེ་དགའ་མོད་གསུངས། དེར་གསུངས་བཞིན་ཉན་པས་འདོད་པ་ཐམས་ཅད་རྫོགས་པ་དང་། ཡང་གསུང་གིས། ད་ཁྱོད་དེར་མ་སྡོད། དཔེ་ཆ་ལ་སོགས་པ་མཆོད་པའི་ཡོ་བྱད་རིམ་གྱིས་སྐྱོལ་ལ་ངའི་འདིར་ཤོག་གསུངས། དེ་ལྟར་བྱས་པས་ཅང་མཆི་འམ། ཁོང་གཉིས་ཀྱང་དྲིན་ཆེ་ཞུས་པས། བློ་མ་ཆུང་། ཁྱོད་ཀྱིས་འགྲོ་བའི་དོན་ནུས་པ་ཞིག་འོང་བར་འདུག །སྙིགས་མའི་དུས་འདིར་
སངས་རྒྱས་ཀྱི་བསྟན་པ་དར་བར་བྱས་ནས་འགྲོ་བ་མང་པོའི་དོན་བྱེད་དགོས་པ་ཡིན། ཁོང་གཉིས་ཀྱི་དྲིན་ལན་དུའང་དེ་ཆེ། འདི་ལ་གབ་པས་རང་དོན་གཞན་དོན་གང་ཡང་མི་འགྲུབ་གསུངས། དེར་ཇི་སྐད་གསུངས་པ་བཞིན་ཉན་པས་བླ་མའི་དགོངས་པ་ཇི་བཞིན་དུ་ལོངས། སྐབས་ཤིག་ན་ལྷ་རྗེ་བཞུགས་པའི་སྒོ་རྩ་ན་མཆོད་རྟེན་གཅིག་ཡོད་པ་ལ་ཟུར་ཆུང་པ་སྐོར་བ་བྱེད་ཀྱིན་འདུག་པ་གཟིགས། ཞབས་ས་ལ་མི་རེག་པར་ཁྲུ་གང་ཙམ་ནས་སྒ་ར་ར་གདའ། བླ་མའི་ཐུགས་ལ་འདི་སྤྲུལ་པའི་སྐུ་གཅིག་ཡིན་ཉན་འདུག་པས་ངོ་མཚར་ཆེ་སྙམ་དུ་དགོངས་ཤིང་དགྱེས་སོ། །དེ་བཞིན་དུ་ཟུར་ཆུང་པ་ཕྱོགས་ག་ཤེད་ན་འབྱོན་བཞུད་ཀྱི་ལུང་སྟོང་བྱེ་མའི་གསེབ་ཏུ་ཚད་པས་ཤིན་ཏུ་གདུངས་པ་ལ་ཞལ་སྐྱེམས་འདྲེན་པར་བྱུང་བ་དང་། རི་སྟོང་གི་རྩེ་མོ་ལ་སྒོམ་དུ་གཤེགས་པས་སྐུ་བཀྲེས་པ་ལ་ཞལ་ཟས་འདྲེན་པ་སོགས་གང་འདོད་པའི་ཐུགས་དགོངས་འབད་མེད་གྲུབ་པ་བྱུང་བས། ད་ནི་ངས་འགྲོ་བའི་དོན་བྱས་ཀྱང་འགྲུབ་དགོངས་པའི་ཚེ། བླ་མའི་ཞལ་ནས་ཀྱང་། ད་ཁྱོད་ཀྱིས་བཤད་པ་གྱིས་གསུངས། དེར་མདོ་དགོངས་འདུས་གསུངས་པས་དུས་གཅིག་ལ་དཔེ་འགྲེམས་སུམ་བརྒྱ་བྱུང་། དེའི་ཚེ་ཟུར་ཆུང་པ་ལ་བླ་མས་བསྔགས་པ་ཆེན་པོ་མཛད་པས། བླ་མས་དཔོན་པོའི་དབུ་འཕང་བསྟོད་ཅེས་ཅུང་ཟད་མི་གུས་པའི་རྣམ་པ་བྱེད་པ་བྱུང་། བླ་མ་ལ་སྐུར་པ་བྱས་ན་བསོད་ནམས་མ་ཡིན་པ་ཆེན་པོར་མཁྱེན་ནས། ནམ་ཞིག་ཨེ་དམར་རྡོ་རྗེ་སྤོ་ཞེས་བྱ་བར་དཔོན་སློབ་ཐམས་ཅད་ཆོས་འཁོར་ལ་བྱོན་ཙ་ན། སྲང་ཁ་གཅིག་ན་ཁྱི་མོ་མ་སྨད་རོ་སྨད་ལ་འབུ་ཞུགས་པ་ཞིག་འདུག །བླ་མ་ཟུར་ཆེན་གྱིས་རེག་པ་ཙམ་མཛད། ཟུར་ཆུང་པས་ཁྱི་མོ་མ་སྨད་བསད། འབུ་ཞལ་དུ་གསོལ་བས། གཞན་རྣམས་ན་རེ། ཟུར་ཆུང་པ་ཟེར་བའི་སྨྱོ་སྤྱོད་མཁན་འདི་འདྲ་འཆད་ཉན་དུ་བསྐོས། འོ་སྐོལ་ལ་སྦྱིན་བདག་རྣམས་ཀྱང་མོས་པ་ལྡོག་གདའ་ཟེར། བླ་མའི་ཞལ་ནས་ཁྱི་རྣམས་ངན་སོང་དུ་འགྲོ་བ་ངས་ཀྱང་ཤེས་
ཏེ་སྒྲོལ་མ་ནུས་པ་ཡིན། ཁོང་གིས་བསྒྲལ་བ་ངོ་མཚར་ཆེ་གསུངས། དེར་ཟུར་ཆུང་པས་ལྟ་སྟངས་གཅིག་མཛད་པས། ཁྱི་རོ་རྣམས་མཆོད་པའི་ལྷ་མོར་གྱུར། འབུ་རྣམས་སྐྱུགས་པས་ནམ་མཁའ་ལ་ཅོ་དིར་དིར་སོང་། དེར་ཟུར་ཆེན་པས། ད་ཁྱེད་རྣམས་ངོ་མཚར་སྐྱེས་སམ་གསུངས་པས། མིག་འཕྲུལ་དུ་གདའ་ཟེར། དེར་ཤངས་ཆུ་རྒྱས་པ་དང་ཐུག་པས་ཟུར་ཆེན་གྱིས་ཆུ་ཕ་རིར་ཀ་པཱ་ལ་རྫུ་འཕྲུལ་གྱིས་བསྐྱུར་ནས། འདི་སུས་ལོན་ལ་ངའི་བཤད་གྲ་འབོག་པ་ཡིན་གསུངས་པས། རྩེ་མོ་གཞན་གསུམ་པོས་ཀྱང་ལེན་མ་ནུས། ཟུར་ཆུང་པས་ཞབས་ཆུ་ལ་མ་རེག་པར་བྱོན་ནས་བླངས་སོ། །ཡང་རླུང་གི་ནུས་པ་འགྲན་པར་བསྐུལ་བས། རྩེ་མོ་བཞི་ལ་སོགས་པའི་སྟོན་སྒོམ་གཞན་རྣམས་ཀྱིས་ཀྱང་ཞབས་ས་ལ་མ་རེག་པར་འགྲོ་ནུས་པར་བྱུང་ཡང་། ཟུར་ཆུང་པས་ཏ་ལ་གང་ཙམ་གྱི་ནམ་མཁའ་ལ་འཕགས་ཏེ་སྲམ་པ་སྒྲུབ་ཁང་དུ་སྔོན་ལ་བརྟོལ་བས་རྩེ་མོ་གཞན་གསུམ་ཡང་ངེས་ཤེས་རྙེད། བླ་མས་ཅི་གསུང་གི་བཀའ་བསྒྲུབས་པས་ཞབས་ཏོག་ཀྱང་མཐར་ཕྱིན་ཏོ། །རེ་ཞིག་ན་ཟུར་ཆུང་པ་ལ་གནས་ཀྱི་ལུང་བསྟན་རིམ་པ་གསུམ་དུ་བྱུང་སྟེ་སྟོང་ཉིད་རྟོགས་པའི་རྣལ་འབྱོར་པ་དེ་ལ་ཆེད་དུ་འཛིན་པ་མ་ཡིན་པས་འཁྲུལ་སྣང་གི་སྡེ་ཚན་དུ་དོར་མོད། མཐར་རུས་པའི་རྒྱན་གྱིས་སྤྲས་པའི་བུ་མོ་ལོ་བཅུ་དྲུག་པ་ཌཱ་མ་རུ་དང་གར་སྟབས་སྒྱུར་བ་ལྔ་བྱུང་ནས་མིང་པོ་ཁྱོད་རི་བོ་དགུ་འདུས་ལ་བསྒོམས་ན་དོན་གཉིས་གྲུབ་བོ་ཟེར་ཞིང་བྲག་རྒྱ་བོ་ལ་མཛུབ་མོ་གཏད་པས། རི་བོ་དགུ་འདུས། ཆུ་མིག་དགུ་འདུས། ནེ་སིང་དགུ་འདུས་པས་ཐེག་པ་རིམ་པ་དགུ་རྫོགས་པའི་རྟགས་སུ་མཁྱེན། བྲག་རྒྱ་བོ་དེ་བཅོམ་ལྡན་འདས་དཔལ་ཆེན་པོ་ལ་གཽ་རཱི་མ་བརྒྱད་ཀྱིས་བསྐོར་བ་འདྲ་བ་ཡིན་པས་འདི་ལ་སྒྲུབ་པ་བྱས་ན་སྒྲུབ་ཐག་ཉེ་ལ་བྱིན་རླབ་ཆེ། ལར་འཁོར་བ་སྡུག་བསྔལ་གྱི་རང་བཞིན་ཡིན་པས་འཇིག་རྟེན་གྱི་འཁྲི་བ་ཆོད་དགོས། ཕྱི་མའི་དོན་སྒྲུབ་པ་ལ་འདུ་འཛི་དང་ཁེ་དྲག་གིས་མི་ཕན། མིའི་ངོ་བསྲུང་པ་འདི་འཕྲལ་དུ་བྱ་དཀའ་ལ་ཕུགས་སྙིང་པོ་མེད་པ་ཡིན་པས་ང་གཅིག་པུར་སྒོམ་པ་ཡིན་གསུངས་ནས་
གྲྭ་པ་རྣམས་གོ་མ་ཆོད་མི་གསུམ་ལ་གཏད་ནས། ཆོས་འཆད་ཉན་གྱི་བསྟན་པ་ཁྱེད་རྣམས་ཀྱིས་སྐྱོངས་ཤིག་ཅེས་བྲག་རྒྱ་བོ་ལ་གཤེགས་སོ། །དེར་བྱོན་ནས་སྒྲུབ་པ་ཁོ་ན་ལ་བཞུགས་པས་གཞི་བདག་གི་ལྷོངས་ཆོ་འཕྲུལ་ཤིན་ཏུ་ཆེ་བ་བྱུང་སྟེ། འདི་ལྟར་གྲུབ་པའི་ཁྱུ་མཆོག་ཆེན་པོ་དག་ནི་རྨི་ལམ་དང་མངོན་སུམ་རྫུན་པའི་ངང་དུ་རོ་གཅིག་པས་ནུབ་གཅིག་མནལ་ལམ་དུ། བྲག་རྒྱ་བོའི་རྩེར་མི་ནག་པོ་གཅིག་བྱུང་ནས་ཞབས་གཉིས་ནས་བསྡུས་ཏེ་ཀླད་ལ་བསྐོར་ཏེ་བསྐྱུར་བྱུང་བས། ཐག་གི་མདོའི་ཐང་ཆེན་པོ་གཅིག་ཏུ་བརྡབས་པ་རྨིས། སད་ཙ་ན་ཐང་དཀྱིལ་ན་དངོས་སུ་འདུག་པས་ཡར་འཛེག་དགོས་པ་བྱུང་སྟེ་ཆོ་འཕྲུལ་ཆེན་པོ་ལ་མ་འཛེམས་པར་བཞུགས། ཡང་སྡིག་པ་རྩིད་བུ་ཙམ་གྱིས་སྒྲུབ་ཁང་ཁེངས་པས་རྒྱུ་འབྲས་ལ་ཟློ་བའི་རྟོགས་པ་མངོན་དུ་གྱུར་ནས། སྡིག་པའི་རྭ་གཉིས་ནས་འཇུས་ཏེ་ཕྱེད་མར་གཤག་པ་དང་ཆབས་གཅིག །སྡིག་པ་མི་དགེ་སོ་སོར་བཤགས། །ཞེས་དོན་ལ་མི་རྟོན་ཚིག་ལ་རྟོན་པའི་ཀུ་རེ་མཛད་དེ་བསྐྱུར་བས་ཐམས་ཅད་རྣམ་པར་སྣང་མཛད་དུ་གྱུར་ནས་ནམ་མཁའ་ལ་དེངས། ཡང་ལན་ཅིག་གྲོག་མོའི་དམག་དྲངས་བྱུང་བས། ཉེ་གནས་ལ་ཙོང་གེ་ཁྱེར་ཤོག་གསུངས་ཙོང་གེས་བརྡུངས་པས། ཉེ་གནས་ན་རེ་སྡིག་པ་ལ་དགོངས་མཛོད་ཅེས་ཞེ་ཁྲེལ་བརྡས་པས། ཁྱོད་དེ་ལ་མི་དད་ན་འདི་ལྟར་བྱ་ཡིས་གསུངས་ནས་གྲོག་མོ་ཞལ་དུ་བཏབ་གིན་ཕུ་མཛད་པས། ཐམས་ཅད་རྡོ་རྗེ་སེམས་དཔར་ཀྲོང་ཀྲོང་གྱུར་ཏེ་ནམ་མཁའ་ལ་སོང་བས་ཉེ་གནས་ཤིན་ཏུ་དད། གསད་གསོའི་རྫུ་འཕྲུལ་བསམ་གྱིས་མི་ཁྱབ་པས་གཞི་བདག་མིང་སྲིང་གསུམ་དམ་ལ་བཏགས་ཏེ་དངོས་སུ་གཟུགས་བསྟན་ནས་ཞབས་སྤྱི་བོར་བླངས། བྲག་ལ་ཕུར་པ་བཏབ་པའི་གྲུ་ཆུ་ད་ལྟའང་ཡོད། དེར་གསང་བ་སྒྱུ་འཕྲུལ་ལས་བྱུང་བའི་ཕྱག་རྒྱ་བསམ་གཏན་གྱི་སྒྲུབ་པ་མཛད་པས། རྡོ་རྗེ་སེམས་དཔའི་ཞལ་གཟིགས། ཐག་གི་ལུང་པ་རྡོ་རྗེ་སེམས་དཔས་ཁེངས་པ་བྱུང་། སྣང་བ་ཟད་སར་གྱི་སྐྱེ་མཆེད་བརྙེས་པས་སྐུ་མེ་དང་།
ཆུ་དང་། རླུང་དང་། ས་ཚུབ་ཏུ་འགྲོ་བ་དང་། ཅིར་སྣང་ཐམས་ཅད་རྡོ་རྗེ་སེམས་དཔའི་རང་བཞིན་དུ་བཀྲ་ལམ་ལམ་གསལ་བ་བྱུང་སྟེ་བཟང་རྟོག་གི་མཐུ་བརྟས་པ་ཡིན། ཡང་དག་པར་གཏད་པ་མེད་སྙམ་དུ་དགོངས། དེར་སྣང་སེམས་ཆོས་ཉིད་གསུམ་རོ་གཅིག་ཏུ་འདྲེས་ནས་དགོངས་པ་ཟད་པའི་ས་ལ་སྐྱོལ་ཏེ་ས་རྡོ་རི་བྲག་ཐམས་ཅད་ལ་ཐོགས་པ་མེད་པ་དང་། ནམ་མཁའ་ལ་བྱ་ལྟ་བུར་འགྲོ་བ་སོགས་འབྱུང་བ་ལྔ་ལ་རང་དབང་ཐོབ་པ་བྱུང་། ད་ཟླ་བ་གཅིག་ན་སློབ་མ་སྣོད་ལྡན་ཞིག་འོང་གསུངས། རེ་ཞིག་ན་མཚན་ཉིད་པའི་དགེ་བཤེས་སྦ་དགེ་མཐོང་བྱ་བ་ཐག་ཏུ་ཆོས་འཁོར་ལ་བྱུང་། ཁོང་གིས་གྲྭ་པ་བློ་རྣོ་བ་གཅིག་ཟུར་ཆུང་ལ་རྩོད་པ་བྱེད་དུ་བཏང་བས། ཁོས་ཀ་བ་ལ་མཛུབ་མོ་གཏད་ནས་ཀ་བ་ཆོས་ཅན། ཁྱོད་འཇིག་རྟེན་རང་རྒྱུད་པའི་འཁྲུལ་ངོར་ཀ་བ་རང་རྒྱུད་དུ་སྣང་ཡང་། ང་རྫོགས་པ་ཆེན་པོ་རང་སྣང་རིས་མེད་ཀྱི་དོན་ལ་ཀ་བ་གྲུབ་པ་མི་གདའ་གསུངས་ནས། ཕྱག་ཡུག་ཡུག་མཛད་པས་ཀ་བ་ལ་ཆགས་ཐོགས་མེད་པར་སོང་། ཁོ་ངོ་མཚར་སྐྱེས་ནས་སྨྲ་མ་ནུས། དད་པ་ལྷག་པར་ཐོབ་ནས་སློབ་མར་བྱས་པ་མ་ཐོག་བྱང་འབར་རོ། །འདི་རྡོའི་ཀ་བ་ཡིན། ཆག་དུམ་ད་ལྟའང་ཡོད་ཟེར་བ་དངོས་པོར་ཞེན་པ་དག་གི་འདོད་པ་མིན་ན་རུང་ངོ་། །དེ་ལ་སློབ་མ་ཀ་བ་བཞི། གདུང་མ་བརྒྱད། ཕྱམ་བཅུ་དྲུག །དྲལ་མ་སུམ་ཅུ་རྩ་གཉིས། སྒོམ་ཆེན་མི་གཉིས། ཡུས་པོ་ཆེ་མི་གཅིག །དཀྱུས་པ་གཉིས། སྟ་གུ་ར་མི་གཉིས། གོ་མ་ཆོད་གསུམ་ལ་སོགས་པ་མང་དུ་བྱོན་ཏེ། ཀ་བ་བཞི་པོ་ནི། དང་པོ་དགེ་བཤེས་ཁྱུང་པོ་གྲགས་སེའི་གྲྭ་པ་མཚན་ཉིད་པ་ཆེན་པོ་བློ་གྲོས་ཤིན་ཏུ་རྣོ་བ་ཡིན། བདེ་གཤེགས་རྒྱ་བོ་པ་དང་། དགེ་བཤེས་ཁྱུང་པོ་གཉིས་ཉང་རུར་ཡོན་བདག་གཅིག་གིས་གདན་དྲངས་ཏེ་འཛོམ་པའི་དུས། ཁྱུང་པོས་ཁོང་བཞི་པོ་བཏང་ནས། ཟུར་ཆུང་པ་བྱ་བའི་ཆོས་ལོག་མཁན་འདི་སུན་དབྱུང་ལ་ཤོག །ཅེས་བསྒོས་པས་བཞི་པོས་ལྷ་རྗེའི་སྤྱན་སྔར་ཕྱིན་ཙ་ན། ཟུར་ཆུང་པ་ཐུལ་པ་ཕྱི་ནང་
ལྡོག་ནས་བཞེས་ཏེ་འདུག །དེར་གཅིག་གིས། པགས་པ་ཕྱི་ནང་སློག་པའི་གོས་འདི་གང་གི་ཆོས་ལུགས་ཡིན་ཟེར། པགས་པ་དང་པོ་ནས་འདི་ལྟར་ཡོད་པས་ཕྱི་ནང་མ་ལྡོག །ཕྱི་ནང་འཛོལ་བ་ཁྱེད་རང་གི་ཆོས་ཡིན་མོད་གསུངས། གཅིག་གིས་འོ་ན་ཆོས་གཏམ་བྱའོ་སྨྲས་པས། ཆོས་ཀྱི་ངོ་བོ་བརྗོད་མེད་མཐའ་བྲལ་ལ་ཆོས་གཏམ་ག་ན་ཡོད་གསུངས། དེར་སྐྱོ་སྟོན་གྱིས་དྲིས་པ། འོ་ན་ཁྱེད་རྫོགས་པ་ཆེན་པོ་པའི་ལུགས་ཀྱིས་སྒོམ་ལ་གཙོ་བོར་བྱེད་པ་ལགས་སམ་བྱས་པས། ང་དམིགས་པ་གང་ལ་གཏད་འདུག་གསུངས། འོ་ན་མི་བསྒོམ་པ་ལགས་སམ་བྱས་པས། ང་གང་ལ་ཡེངས་འདུག་གསུངས་པས་སྤོབས་པ་ལན་མེད་དུ་སོང་། ཡང་གླན་སྟོན་ཤཱཀ་བཟང་གིས་དྲིས་པ། ཁྱོད་གསང་བ་སྒྱུ་འཕྲུལ་པའི་ལུགས་ཀྱིས་སྣང་བ་ཐམས་ཅད་ལྷ་དང་ལྷ་མོར་འདོད་པ་ལགས་སམ་བྱས་པས། ཡུལ་བེམ་པོ་རང་རྒྱུད་དུ་སྣང་བའི་མངོན་སུམ་གྱི་ཚད་མ་སུས་འགེགས་གསུངས། འོ་ན་མི་འདོད་པ་ཨེ་ཡིན་བྱས་པས། སེམས་ཅན་གྱི་མ་དག་པའི་འཁྲུལ་སྣང་རང་རྒྱུད་པ་སྦྱོང་ཕྱིར་མདོ་རྒྱུད་ཀྱི་དགོངས་པ་དང་འགལ་བར་སུས་ནུས་གསུངས་པས། ཁོང་བཞིའི་བརྒལ་བརྟག་གི་རིག་པ་རྣོན་པོའི་ཚིག་གི་ཚོགས། དོན་གྱི་མཐུ་ཆེ་བའི་ལན་སྒྲ་གཅན་གྱི་ལག་པ་ལྟ་བུས་རྣམ་པར་བཀབ་ཅིང་། སྙིང་རྗེ་ཆེན་པོའི་གཞན་དབང་གི་སྡེར་མོས་བརྫིས་པས། འདི་ལྟར་ལས་འཕྲོ་སད་པའི་གང་ཟག་ནི་སློབ་དཔོན་དཔའ་བོ་འཕགས་པ་ལྷའི་གདུལ་ཞིང་དུ་གྱུར་པ་ལྟ་བུ་སྟེ། འདི་སྐད་དུ། ཀྱེ་མ་ཐེག་པ་ཆེན་པོའི་དོན་ཕྱིན་ཅི་མ་ལོག་པར་རྟོགས་པ། རིགས་པ་དང་གྲོལ་བའི་སྤོབས་པ་དང་ལྡན་པ་འདི་ལྟ་བུའི་བཤེས་གཉེན་ནི་རྙེད་པར་དཀའོ། །འོན་ཀྱང་ད་ལྟ་དངོས་སུ་བྱིན་ན་སློབ་དཔོན་མི་དགྱེས་སུ་འོངས་པས། སང་ཕོད་ཐབས་ཀྱིས་རྟོག་གེ་ངན་པའི་སློབ་དཔོན་དང་དབྲལ་བར་བྱས་ལ། རྣལ་འབྱོར་གྱི་དབང་ཕྱུག་སྲིད་པའི་དྲ་བ་
གཅོད་པའི་མཚོན་ཆ་རྣོན་པོའི་དཔལ་དང་འགྲོགས་པར་བགྱི་བ་ལ་གདོན་མི་ཟ་བའི་དམ་བཅའ་ལྷུར་ལེན་ཏོ་ཞེས་མནའ་ཐོས་བཅད་ནས་དེངས་སོ། །དེ་ལྟར་དེངས་པའང་མེ་ཏོག་ཟས་ཅན་པདྨའི་ཚལ་ལ་བྱ་བ་བཞིན་དུ་སང་ཕོད་ལས་འཕྲོ་དང་སྨོན་ལམ་བཟང་པོའི་གཤོག་པ་རྨྱང་སྟེ་བདེ་གཤེགས་རྒྱ་བོ་པའི་ཆོས་གྲྭ་མ་ལ་ཡའི་ནགས་ཀླུང་ཆེན་པོར་ལྷག་པ་ལ་ལས་ཀ་བ་བཞི་བྱུང་བ་ཡིན་ནོ། །དེར་ཁོང་བཞི་པོས་ཁྱུང་པོའི་དྲུང་དུ་ཕྱིན་ཙ་ན། ཁྱེད་ཚོས་ཟུར་ཆུང་པ་སུན་ཕྱུང་ངམ་ཟེར། སུན་ཕྱིན་པ་མི་གདའ་བྱས་པས། ཕྲག་དོག་གི་འཐོར་རླུང་དྲག་པོས་ཡིད་རྣལ་དུ་མི་ཕེབས་པ་ཙམ་དུ་གྱུར་ནས་ཟུར་ཆུང་པ་འདྲ་བའི་ལྟ་བ་ངན་པ་ཅན་སྐྱེ་བོ་ཐམས་ཅད་ལོག་པའི་ལམ་དུ་འཁྲིད་པ་འདི་བསད་ན་སངས་རྒྱ་ངེས་ཟེར་རོ། །དེ་ཟུར་པའི་གྲྭ་པ་དག་གིས་ཐོས་ནས་སྙན་དུ་གསོལ་བས། རྒྱུད་རང་བཞིན་གྱིས་གྲོལ་བའི་བྱང་ཆུབ་སེམས་དཔའ་ལ་ཁོང་ཁྲོ་བའི་རྣམ་པར་རྟོག་པ་མེད་པས་ཅང་མི་གསུངས་པས་ལན་བཏབ། ནང་པར་ཆོས་ཁྲིའི་ཁ་ནས་བཞད་ཀྱིན་འདུག །བླ་མ་ཅི་ལ་དགྱེས་ཞུས་པས། ཆོས་བྱ་བ་ངའི་ཐེག་པ་ཆེན་པོ་གསང་སྔགས་འདི་ཡིན་པར་འདུག །སྒྲོལ་བ་ལ་བརྟེན་ནས་སངས་རྒྱ་བར་འདོད་པ་འདི་གསང་སྔགས་ཀྱི་ལུགས་ཡིན། མཚན་ཉིད་པ་ལ་མེད་སྙམ་ཙ་ན། ཟུར་ཆུང་པ་ལྟ་བུ་བསད་ན་སངས་རྒྱ་གསུངས་ནས་ཁྱུང་པོ་གྲགས་སེ་ལྟ་བུའི་མཚན་ཉིད་པ་ཆེན་པོ་ཡང་བློ་ཕུགས་ངའི་ཆོས་ལ་གཏོད་པར་འདུག་པས་ང་དགའ་བ་གཅིག་བྱུང་གསུངས་སྐད། དེ་ལ་སེམས་ཕྱོགས་ཀྱི་ཀ་བ་གུང་བུའི་སྐྱོ་སྟོན་ཤཱཀ་ཡེ། མདོའི་ཀ་བ་སྐྱོང་ལུང་གི་ཡང་ཁེང་བླ་མ། སྒྱུ་འཕྲུལ་གྱི་ཀ་བ་ཆུ་བར་གྱི་གླན་ཤཱཀྱ་བཟང་པོ། ཕྲིན་སྒྲུབ་ཀྱི་ཀ་བ་ནག་མོ་རིའི་མདའ་ཏིག་ཇོ་ཤཱཀ་གོ། །ཡང་མ་ཐོག་བྱང་འབར་དང་རྒྱུད་པ་ལྔ་ཞེས་ཀྱང་གྲགས། གདུང་བརྒྱད་ནི་མ་ཐོག་པ་སྐྱོ་སྟོན་ཆོས་སེང་། གླན་ཤཱཀྱ་བྱང་ཆུབ། རྩག་ཤཱཀ་རིངས། གནུབས་སྟོན་བག་མ། དབུས་པ་ས་འཐོར། ཤུ་སྟོན་ཟླ་གྲགས། རྩེ་ཕྲོན་བྱང་དཔལ་དང་བརྒྱད་དོ། །
ཡང་ལ་ལ་གཟི་ཆེན། ནལ་རྦ་སྙིང་པོ། རམ་སྟོན་རྒྱལ་བ་གསུམ་དྲངས་པའང་ཡོད། སྒོམ་ཆེན་མི་གཉིས་ནི། འབའ་སྒོམ་དིག་མ་དང་། བོན་སྒོམ་དོ་བའོ། །ཡུས་པོ་ཆེ་ནི་ལ་སྟོད་ཀྱི་ཟི་སྟོན་བསོད་རྒྱལ་ལོ། །སྟ་གུ་ར་མི་གཉིས་ནི། ཞང་སྟོན་སྔགས་སེ་དང་། ཁྱུང་པོ་གྲགས་སེའོ། །ཕྱམ་དྲལ་ལ་སོགས་ཏེ་དཀྱུས་མའི་མིང་སྨོས་མ་འཚལ་ལོ། །གོ་མ་ཆོད་མི་གསུམ་ནི། མགོ་ཕྱ་ཚ། མིག་ཆུང་དབང་སེང་། མགོ་ཆུང་དབང་ངེ་གསུམ་མོ། །དེ་བླ་མ་ཟུར་ཆུང་པ་བྲག་རྒྱ་བོར་ལོ་ཉི་ཤུ་རྩ་བཞི་སྒྲུབ་པ་ཐུན་གཅིག་ལ་བཞུགས་ནས་འཇའ་ལུས་སུ་གཤེགས་པའི་དགོངས་པ་གཏད་ཡོད་པ་ལ་སྐུ་མཚམས་ཐོན་དགོས་པའི་རྐྱེན་གཉིས་བྱུང་བས། ལོ་རིལ་པོ་བཅུ་གསུམ་དང་ངོ་གཅིག་སྟེ་བཅུ་བཞི་བཞུགས། འདིའི་སྐབས་ཤིག་ན་ཉེ་གནས་ཀྱིས་ཀྱང་སྐུ་ལ་བཅར་དུ་མེད་པའི་རྒྱུན་རིང་བར་བཞུགས། རེ་ཞིག་ན་དུད་པ་དང་ལྡབ་ལྡིབ་ཙམ་ཡང་མ་བྱུང་། སྐུ་ལ་སྙུན་པ་མི་མངའ་འམ་སྙམ་ནས་ཉེ་གནས་ཀྱིས་བལྟར་ཕྱིན་ཙ་ན། ཞལ་དང་ཤངས་ལ་སྡོམ་ཐག་དྲེང་ངེ་འདུག །བླ་མ་གྲོངས་སྙམ་ནས་ངུ་ཤོར་བས་དགོངས་པ་གྲོལ། བླ་མའི་ཞལ་ནས་ང་དེ་ཁའི་ངང་ལ་བཞག་ན་མགོ་ལ་ཐོད་པ་མི་འགེལ་བ་གཅིག་ཡོང་བ་ཡིན་ཏེ། ད་སྐྱེ་བ་གཅིག་ལེན་པར་འདུག་གསུངས། དེ་ས་སྐྱ་ལོ་ཆེན་ཡིན་ཟེར། འདི་ནི་ཆོས་ཉིད་ཅིག་ཅར་དུ་ཟད་ནས་ཕུང་པོ་རྡུལ་ཕྲན་དུ་མ་དེངས་ཙམ་པའི་ལམ་རྟགས་སུ་སྣང་། ཡང་ནང་གཅིག །ཚ་བའི་སྟ་གོན་གྱིས་ཤིག །ད་རེས་ལོ་མའི་ཚོད་མ་བྱའོ་གསུངས། ཉེ་གནས་ཀྱིས་ཆུ་མ་ཁོལ་བ་ལ་བླ་མས་ཚོད་མ་བསྣམས་བྱུང་། ངས་འུག་པ་ལུང་འཁོར་ནས་ཁྱོད་ཆུ་མི་ཁོལ་བ་ཅི་ཡིན་གསུངས། ཀུ་རེ་ཡིན་ནམ་ཞུས་པས། ཟུར་པོ་ཆེས་གནང་བའི་གསོལ་རས་ཞིག་ཡོད་པ་ཉེ་གནས་ལ་གནང་བས། ཁོ་ཡིད་ལྷག་པར་ཆེས། ངའི་བླ་མ་རླུང་སེམས་ལ་རང་དབང་ཐོབ་ངེས་ཡིན་སྙམ་པའི་མོས་གུས་སྐྱེས་སོ། །དེ་ལ་དགོན་པ་ནས་
འབྱོན་པའི་རྐྱེན་གཅིག་ནི། གོ་མ་ཆོད་མི་གསུམ་གྱིས་བསྟན་པ་མ་འཁྱོངས་ཏེ། འོག་བྱ་ཚས་ཐབས་ལམ་གྱི་རྒྱབ་ཏུ་མ་རྒྱུད་དགོས་ཟེར་འགོས་ཁུག་པའི་རྩར་སོང་། མིག་ཆུང་དབང་སེང་ན་རེ། དཀྱིལ་འཁོར་ཕྱིར་འདོན་པ་ལ་རྒྱབ་ཏུ་ཡོ་ག་དགོས་ཟེར་ནས་སུམ་པ་ཡེ་འབར་གྱི་རྩར་སོང་། འགོས་ཆུང་དབང་ངེས་བཞི་ལམ་གྱི་གྲུབ་མཐའི་རྒྱབ་ཏུ་ཚད་མ་དགོས་ཟེར་སྤངས་ཀ་དར་ཆུང་བའི་རྩར་སོང་ངོ་། །དེ་དག་ནི་གསང་བ་སྙིང་པོ་ལ་ལམ་ཐབས་གྲོལ་གཉིས་ཀ་ཡོད་དེ་མ་རྒྱུད་ཀྱི་མཚན་ཉིད་མ་ཕྱེད། དཀྱིལ་འཁོར་རང་ས་ནས་ཐོན་པ་ལ་མིག་ལྟག་ཁུང་དུ་འཆུས། ཚད་མ་ཚིག་གི་གྲུབ་མཐའ་ཡིན་ཏེ་གཞི་ལམ་ཐོག་ཏུ་མི་ཕེབས་པ་མ་གོ། རྒྱུད་དེས་གོ་མ་ཆོད་མི་གསུམ་གྱིས་བཤད་གྲ་མ་འཁྱོངས་པས་སྐུ་མཚམས་ལས་ཐོན་དགོས་པ་བྱུང་། རྐྱེན་གཅིག་ནི། སྒྲོ་ཕུག་ལྷ་ཁང་གི་མཇུག་སྐྱོངས་དང་། རབ་གནས་མ་གྲུབ་ཙམ་ལ་རྒྱལ་བ་ཟུར་པོ་ཆེ་སྐྱེ་བ་མ་སྤངས་པར་ཟུང་འཇུག་གི་གྲུབ་མཐའ་སྙོགས་པར་བཞེད་ནས། ངའི་ལག་རྗེས་ཁྱོད་ཀྱིས་སྐྱོངས་ཤིག་ཅེས་བླ་མའི་བཀའ་བྱུང་ནས་བྱོན་པ་ཡིན་ནོ། །དེ་ལྟར་བདེ་གཤེགས་ཟུར་ཆུང་པ་ཕྲིན་ལས་རྒྱས་པའི་དུས་ན། བོད་ཀྱི་སྔགས་པ་ཚོགས་ཚད་ཀྱིས་ཕྱག་མི་བྱེད་པ་དང་། གྲལ་གོང་དུ་འགྲོ་བ་མེད་པས། འགོས་ལོ་ཙཱ་བས་གཞན་རྣམས་ལ་ཕྱག་མི་འཚལ་བ་དང་། གྲལ་ཞབས་སུ་མི་སྒྲིག་པའི་ཁྲིམས་བཅས་མོད། ནམ་ཞིག་ཤངས་སུ་སྟོན་མོ་ཆེན་པོ་གཅིག་ལ་ཐམས་ཅད་ཚོགས་པ་ན། ཟུར་ཆུང་པ་གྲལ་མགོ་ན་བཞུགས་པའི་སྤྱན་སྔར་འགོས་ཀྱིས་སླེབས། དེའི་ཚེ་འདི་ལྟར་ཚིག་ལ་མཁས་ཤིང་ཉོན་མོངས་ལ་གྲིམ་པའི་བཤེས་གཉེན་ཆེན་པོ་དག་གིས་དགོངས་པ་སངས་རྒྱས་དང་མཉམ་པའི་རྣལ་འབྱོར་གྱི་དབང་པོ་དག་གི་ཟིལ་བཟོད་པ་མ་ཡིན་པས། ལྔ་སྡེ་བཟང་པོའི་ནང་ཁྲིམས་བཞིན་རང་དབང་བརྟན་པ་བྲལ་བའི་འདུ་བྱེད་རྟབ་རྟབ་པོར་གྱུར་ནས་ཕྱག་མི་བྱེད་པའི་དམ་བཅའི་རི་མོ་རྗེས་ཤུལ་ཙམ་ཡང་མེད་པར་ཟུབས། ཡན་ལག་ལྔའི་
འཁྲི་ཤིང་ས་ལ་འབྱར་བ་བཞིན་དུ་གྱུར་པས་ཀུན་ཀྱང་ཕྱག་བྱེད་པ་ལ་མངོན་དུ་ཕྱོགས་སོ། །དེ་ལྟར་སྟོན་མོ་གྱེས་ཙ་ན་གཞན་དག་ན་རེ། ཟུར་ཆུང་པ་ལ་ཕྱག་མི་བྱེད་པའི་དམ་བཅའ་རང་རེས་མཛད་པ་ལ་སྔོན་ལ་ཉིད་ཀྱིས་མཛད་པ་ཅི་ཡིན་དྲིས་པས། ཁོའི་དྲུང་དུ་ཕྱིན་ཙ་ན་བཅོམ་ལྡན་འདས་དཔལ་ཆེན་པོའམ་དེ་འདི་ཀ་ཡིན་པར་འདུག་སྙམ་པ་ལས། མི་ཡི་འདུ་ཤེས་མ་སྐྱེས་གསུང་སྐད། ལར་རྫུ་འཕྲུལ་ཤིན་ཏུ་ཆེ་བས་ཉི་ཟེར་ལ་འབྱོན་བཞུད་མཛད་པར་གྲགས་ཏེ། འུག་པ་ལུང་དུ་སྔ་ཆོས། སྒྲོ་ཕུག་ཏུ་གུང་ཆོས། བྲག་རྒྱ་བོར་དགོང་ཆོས་ཏེ་འགྱངས་ཁ་ཤིན་ཏུ་ཆེ་སར་ཉི་མ་རེ་ལ་ཆོས་ཐུན་གསུམ་རེ་འཆད། དེ་བཞིན་དུ་ལྷ་ཟེར་མོར་མཁའ་འགྲོ་མ་རྣམས་བྲོ་བརྡུངས་མཛད་པ་གཟིགས་པས་རྐྱེན་བྱས་མཁའ་འགྲོ་ལས་ལ་བཀོལ་ནས་མཆོད་ཁང་ཀ་བ་བདུན་དང་། ཁྱད་འཕགས་གཉིས་ཏེ་དགུས་བཏེགས་པ་ཞིག་བཞེངས་པས། མཁའ་འགྲོ་ལྷ་ཁང་དུ་གྲགས། སངས་རྒྱས་བཞི་བཅུ་རྩ་གཉིས་དང་། བཀའ་སྲུང་ལེགས་ལྡན་ལྡེ་གུར་བཞེངས། དཀྱིལ་འཁོར་རྒྱས་བསྡུས་གཉིས་ལོགས་ལ་བྲིས། རབ་ཏུ་གནས་པའི་ཚེ་ལེགས་ལྡན་གྱི་སྐུ་ལ་ཕུ་དུང་གི་ལྕགས་བྲབ་ཅིང་སངས་རྒྱས་ཀྱི་བསྟན་པ་ཨེ་སྲུང་གསུངས་པས་དབུ་གུག་གུག་པ་བྱུང་། དཀོན་མཆོག་གི་དབུ་འཕང་ཨེ་བསྟོད་གསུངས་པས་མཆུ་ལྷེབ་ལྷེབ་པ་བྱུང་། དེ་བཞིན་དུ་དཔལ་ཆེན་པོ་ཞལ་གཟིགས་པའི་ཞབས་གཡོན་བཞག་སར་ཡང་དག་གི་ལྷ་ཁང་བཞེངས། མ་ཐོག་བྱང་འབར་གྱིས་ལྷ་ཁང་ལ་ཤིང་གཉན་ཁྲག་ཏུ་འཛག་པ་གཅོད་དུ་བསྩལ་ནས་ལྷ་ཁང་འབྱོངས། ཤིང་ཕུད་བླ་མ་ལ་ཕུལ་བའི་ཚེ། གཞི་བདག་ཕྲེང་བས་སྤེན་མའི་ཀ་བ་གཅིག་ལུས་ནས་གཙང་པོར་དྲངས་པ་རྔ་མོ་ཕྲད་དུ་ཞག་ལྔ་ཆུ་ལ་བྱིངས་ནས་མ་ཐོན། དེར་སློབ་མ་གཉིས་བཏང་ནས་བྲག་ལ་དཀར་གཏོར་འདི་སྤུངས། མཚོ་ལ་དམར་གཏོར་འདི་རྒྱོབ་ལ་བླ་མ་ཟུར་ཆུང་པའི་ཤིང་ད་ལྟ་བསྐྱལ་ན་སྐྱོལ་
ཅིག །ཅེས་སྡིགས་སུ་བཅུག་པས། ཆུ་བདག་སྐྲག་ནས་ཕྲལ་དུ་ཐོན་པ་སོགས་ལྷ་འདྲེས་བཀའ་ལ་ཉན། དེ་ལྟ་བུའི་ཆེ་བའི་ཡོན་ཏན་གྱིས་བརྒྱན་པའི་ལྷ་རྗེ་ཟུར་ཆུང་པ་དེ་སྐུ་མྱ་ངན་ལས་འདའ་བར་ཉེ་བའི་ཚེ། བུ་སློབ་རྣམས་ཀྱིས་རིགས་སྲས་བསྐྲུན་པར་གསོལ་བ་བཏབ་པས་གསང་བདག་ལག་ན་རྡོ་རྗེ་ཡུམ་གྱི་ལྷུམས་སུ་མངོན་བྱང་ལྔའི་ཏིང་ངེ་འཛིན་གྱིས་སྤྱན་དྲངས་པ་ཟུར་ཤཱཀྱ་སེང་གེ་མཚན་དཔེའི་ངོ་མཚར་གསལ་བར་བྱས། ཞལ་གྱི་གདམས་པ་བརྒྱད་ཅུ་པར་གྲགས་པ། རིའི་བུ་གྱིས། ཧྲུལ་པོའི་གོས་གྱོན། མི་ཞིམ་པའི་ཟས་ཟོ། དགྲ་གཉའ་རེངས་སུ་ཐོང་། ཞིང་ཐ་རེངས་སུ་ཞོག །བློ་ཐག་ཆོས་ལ་ཆོད། ཅེས་པ་ལ་སོགས་པ་གསུངས་ནས་དྲུག་ཅུ་རྩ་གཅིག་བཞེས་པའི་ཤིང་ཕོ་སྟག་ལ་བྲག་རྒྱ་བོར་འོད་དང་སྒྲ་དང་ས་གཡོ་བ་དང་བཅས་འོག་མིན་རྡོ་རྗེ་བཀོད་པའི་གྲོང་ཁྱེར་དུ་གཤེགས་སོ།། །། དེ་ལ་བོད་འདིར་དཔལ་གསང་བའི་སྙིང་པོའི་བཤད་པའི་ཆུ་མགོ་ལྟ་བུར་གྱུར་པ་གསང་བདག་སྒྲོ་ཕུག་པ་ཆེན་པོའམ་ཟུར་ཤཱཀྱ་སེང་གེ་ནི། ཇོ་སྲས་མོ་མདའ་མོ་གཙུག་ཏོར་ལྕམ་ཞེས་བྱ་བ་སློབ་མར་གྱུར་པ་ཞིག་ཡོད་པ་དེས་མངལ་དུ་སྤྲུལ་པའི་སྐུ་འཛིན་ནུས་པར་དགོངས་ནས། དེ་ཉིད་ཀྱི་མིང་པོ་ཀ་བ་བཞིའི་གྲས་མདའ་ཏིག་ཆོས་ཤཱཀ་ལ། ཁྱོད་ཀྱི་སྲིང་མོ་འདི་བདག་གིར་རུང་ངམ་ཞེས་གསུངས་པས། མདའ་ཏིག་ན་རེ། བཀའ་བཞིན་འཚལ་ཞེས་དེའི་ལག་པ་ན་རྡོ་རྗེ་དྲིལ་བུ་བཞག་སྟེ། འདི་གཞན་ལ་མ་བརྒྱུད་པར་བླ་མའི་ཕྱག་ཏུ་ཕུལ་ཞིག་པར་བསྒོས་པས་རྟེན་འདྲེལ་ཆེན་པོ་འགྲིགས། དེ་ཁབ་ཏུ་བཞེས་པ་མ་ཡིན་པས་གྲྭ་པའི་ཚོགས་ཀྱང་སྡང་ཞིང་འདོན་པར་བརྩམས་པ་ན། སྐྱོ་སྟོན་ཤཱཀ་ཡེ་ན་རེ། འདིའི་སྲིན་ལག་ལ་བསྟན་པའི་གཙོ་བོ་གཅིག་འདུག་པར་རྨིས་པས། རིགས་སྲས་འདྲ་མཐོང་ན་བསྟན་པར་ཕན་སྲིད་ཀྱི་ཞོག་གསུངས། དེ་བཞིན་དུ་ཀ་བ་གཞན་རྣམས་ལ་འང་སངས་རྒྱས་གྱི་སྐུ་དང་། གསེར་གྱི་རྡོ་རྗེ་སོགས་ཇོ་མོ་ལ་ཐིམ་པར་རྨིས་པས་བཞག་གོ། །དེ་ལ་རྔོག་ལོ་ཆེན་པོའི་བཅུ་དྲུག་པ་ཤིང་ཕོ་
སྟག་ལ་སྒྲོ་ཕུག་པ་སྐུ་བལྟམས། དེར་བླ་མའི་ཞལ་ནས་ངའི་བུ་འདི་ལྷུམས་སུ་འཇུག་པའི་ཚེ་ཕྱག་ན་རྡོ་རྗེ་ཐིམ་པའི་མཚན་མ་ཡོད་པ་ཡིན་པས་འགྲོ་བ་ལ་ཕན་པ་ཞིག་ཡོད་གསུངས་ནས། མཚན་ཤཱཀྱ་སེང་གེར་བཏགས། ཡབ་ཀྱིས་སྤོང་དག་བྱས་ནས་ཅི་ཡང་མེད་པ་དང་ཐུག་པས། ཡུམ་ན་རེ། ཁ་སིང་ནས་བུ་སྐྱེ་བ་ནི་ཐུགས་ལ་མངའ། རྐན་མར་ཙམ་ཡང་མི་འཇོག་པ་ཟེར་བ་ལ། ཁོ་ལ་བསོད་ནམས་ཡོད་ན་ངས་མ་བཞག་ཀྱང་འོང་། དེ་མེད་ན་བཞག་ཀྱང་མི་ཕན་གསུངས་ཁང་ཐོག་ན་བཞུགས་ཙ་ན། བཙུན་མ་ཕྱུག་མོ་ཞིག་གིས་ནས་རྒྱབ་མང་པོ་དང་། མར་ཕོན་ཆེར་ཕུལ། མདོ་ཁམས་ནས་འབུལ་སྐྱེལ་ལྷགས་པས། འདི་ལ་བསོད་ནམས་ཀྱང་འོང་། འགྲོ་བ་ལའང་ཕན་གསུངས། ཟླ་བ་བརྒྱད་ན་ཡབ་གཤེགས་པས། ཡུམ་དང་ཞང་པོས་བསྐྱངས་ནས་མདའ་ཕུར་ལོ་བཅོ་ལྔ་བཞུགས། དེ་ནས་ཆུ་བར་དུ་གླན་ཤཱཀྱ་བཟང་པོའི་དྲུང་དུ་བྱོན་ནས་གསང་བ་སྒྱུ་འཕྲུལ་དང་། སྐེད་ལུང་དུ་ཡང་ཁྱེང་གི་སར་ཡང་བྱོན་ནས་ཆོས་གསན། དགུང་ལོ་བཅུ་དགུ་པ་ལ་ཆེ་འདོན་མཛད་པས་ཕྲིན་ལས་ཤིན་ཏུ་རྒྱས་ཏེ་བསླབ་གཉེར་གཡེལ་བ་བྱུང་། དེར་སྐབས་བཙལ་ནས་གོང་བུར་སྐྱོའི་རྩར་ལོ་གཅིག་བྱོན། དེ་ནས་སླར་ཕྲིན་ལས་ཆེར་རྒྱས་ཏེ་གཞན་དུ་བཞུད་པའི་སྐབས་མ་བྱུང་། བླ་མ་མཁས་གྲུབ་ཀྱི་ཚོགས་ཚུར་སྤྱན་དྲངས་ནས་སློབ་གཉེར་རྫོགས་པར་མཛད། ཁྱད་པར་ཀ་བ་བཞི་ལས་ཡབ་ཆོས་མདོ་སྒྱུ་སེམས་གསུམ་རྒྱུད་མན་ངག་ཕྲིན་སྒྲུབ་ཕྱག་བཞེས་དབང་དང་བཅས་པ་ཡོངས་སུ་རྫོགས་པར་གསན་ཅིང་ཁྱད་པར་དུ་ཞང་པོ་མདའ་ཏིག་ལས་མདོའི་སྐོར་ཞིབ་པར་བརྙེས། གླན་ཤཱཀྱ་བྱང་ཆུབ་ལ་རྫོགས་ཆེན་སྐོར་ལུགས། ལྷ་རྗེ་ཤངས་ནག་ལ་རྫོགས་ཆེན་བརྒྱུད་པ་ཐ་མ་སོགས་མདོར་ན་བླ་མ་མང་པོ་ལ་ཐོས་བསམ་གྱི་སྒྲོ་འདོགས་ཆོད་པར་མཛད། རང་གི་གྲུབ་མཐའ་གསན་པའི་བླ་མ་དེ་དག་ལའང་ཡུམ་རྒྱས་འབྲིང་བསྡུས་གསུམ་གྱིས་སྣ་དྲངས་པའི་འབུལ་
བ་རྒྱ་ཆེན་པོས་ཐུགས་ཟིན་པར་མཛད། ཉ་རི་སྒྲོ་ཕུག་ཏུ་སྒྲུབ་པ་ཡུན་རིང་དུ་མཛད་པས་བསྐྱེད་རྫོགས་ཀྱི་གནས་ལ་མན་ངག་གི་རྒྱུད་ནས་གསུངས་པའི་གཟེར་བཞི་ཐེབས། ཡི་དམ་ལྷའི་སྐུ་གསུང་ཐུགས་དང་ཐ་དད་མེད་པར་འདྲེས་པས་སྐུ་གཞོན་ནུ་ནས་གཟི་བྱིན་ཤིན་ཏུ་ཆེ་སྟེ་ཐམས་ཅད་ཟིལ་གྱིས་གནོན་ནུས། རེ་ཞིག་ན་དམ་པ་སངས་རྒྱས་དིང་རི་ན་བཞུགས་པ་དཔོན་སློབ་ལྔས་མཇལ་དུ་བྱོན། ཕེབས་རྒྱུའི་ཉིན་དམ་པའི་ཞལ་ནས་དེ་རིང་ཕྱག་ན་རྡོ་རྗེའི་སྤྲུལ་པ་འབྱོན་པ་ཡོད་ཀྱི་བསུ་བ་གྱིས་གསུངས། དར་གདུགས་ལ་སོགས་བཤམས་པས། ཉི་མ་རྒས་སུ་ཆས་ཙ་ན་སྔགས་པ་དཔོན་སློབ་ལྔ་བྱུང་། གཞན་སུ་ཡང་མི་གདའ་ཞུས་པས། དེ་ཀ་ལ་བསུ་བ་གྱིས་གསུངས། དེར་ལྷ་རྗེ་སྒྲོ་ཕུག་པས་དམ་པ་ལ་མངོན་མཁྱེན་ཨེ་འདུག་བལྟ་ཡི་གསུངས་ནས་སློབ་མ་ཞིག་ཉིད་དུ་རྫུར་བཅུག་ནས་སྔོན་ལ་བཏང་། ཁོང་རང་ཕྱི་ན་ཞབས་འབྲིང་བ་ལྟར་བྱས་པས། དམ་པས་སྒྲོ་ཕུག་པའི་མགུལ་ན་ལྦ་བ་ཡོད་པ་ལ་གཟིགས་ནས། ཕྱག་སྣ་ལྦ་བ་ཅན་གྱིས་དྲོངས། དཔོན་སློབ་གོ་མ་ལོག་པ་བཟང་གསུངས་པས། མོས་གུས་ཆེན་པོ་ཐོབ། ཆོས་ཀྱི་བདུད་རྩིའང་ནོད། དམ་པའི་ཞལ་ནས་སྒྲོ་ཕུག་པ་ལ་འདི་བསྟན་པའི་སྤྱི་དཔལ་ཆེན་པོར་འགྱུར་ཞེས་དབུགས་འབྱིན་མཛད། ཡང་རེ་ཞིག་ན་ཕྱག་རྡོར་གྱི་བྲིས་སྐུ་བྱེད་པའི་བྲི་བཀོད་ཀྱི་ཚེ། ལྷ་བྲིས་པ་ལ་ཁྱེད་རང་འདི་འདྲ་བ་ཞིག་བྲིས་ཞེས་ཕྱག་ན་རྡོ་རྗེའི་སྐུར་དངོས་སུ་བསྟན་པ་སོགས་རྒྱུ་མཚན་དུ་མའི་སྒོ་ནས་དཔལ་གསང་བའི་བདག་པོ་བྱང་ཕྱོགས་ཀྱི་རྒྱུད་འདིར་གསང་སྔགས་ཀྱི་བསྟན་པ་རྒྱས་པར་མཛད་པ་ལ་བྱོན་ནོ་ཞེས་གྲགས། སྤྱིར་གདུལ་བྱའི་ཚོགས་དཔག་ཏུ་མེད་ལ། ཁྱད་པར་སློབ་མ་དགེ་བའི་བཤེས་གཉེན་ཆེན་པོ་གྲ་ས་འཛིན་ཅིང་བསྟན་པ་སྐྱོང་བ་གདུགས་ཐོགས་པ་སྟོང་ཐོན་པས་རིང་མོའི་མཐར་ཡང་ཕྲིན་ལས་བསམ་གྱིས་མི་ཁྱབ། སྒྲོ་ཕུག་ཏུ་ཆོས་གསུངས་པའི་དུས་གཅིག་ཆོས་ཁྲི་རྒྱབ་ཡོལ་མེད་པ་གཅིག་ལ་བཞུགས་ཏེ་མཐའ་སྐོར་ཐམས་ཅད་གྲྭ་པས་
བསྐོར་ནས་ཡོད་པ་ལ། ཕྱོགས་ཐམས་ཅད་དུ་ཞལ་ཐལ་ལེ་བར་བྱུང་བས་རྡོ་རྗེ་སེམས་དཔའ་སྒྱུ་འཕྲུལ་དྲ་བའི་དཀྱིལ་འཁོར་གྱི་བདག་པོའི་ཞལ་སྐྱིན་མངོན་སུམ་པར་ཡིད་ཆེས་ཤིང་སྤྲུལ་པའི་སྐུར་རྩོད་པ་མེད་པར་གྲགས། དབྱར་ཆོས་དགུན་ཆོས་ཀྱི་དུས་ཕྱོགས་རེ་ན་མར་དཔེ་འགྲིམས་ལྔ་བརྒྱ་ཙམ་རེ་དང་། སྟོན་ཆོས་དང་དཔྱིད་ཆོས་ཀྱི་དུས་སུམ་བརྒྱ་ཙམ་ཡོད་ཅིང་། སྤྱིར་ཁྲི་ཕྲག་ཐལ་བ་བྱུང་བས། ཆོས་རའི་གོ་ས་བདེ་དོག་ལའང་གསེར་ཞོ་རེའི་འཇལ་ལེན་བྱེད་པའི་དར་རྒྱས་བྱུང་། མཁྱེན་བརྩེ་ནུས་གསུམ་གྱི་ཡོན་ཏན་ཕུན་སུམ་ཚོགས་ཤིང་དཔལ་གསང་བའི་སྙིང་པོ་དེ་ཁོ་ན་ཉིད་ངེས་པའི་རྒྱུད་དོན་ལ་རང་བྱན་ཚུད་པ་ཙམ་གྱིས་ཆོས་སྤྱན་ཐོབ་པས་གསང་བདག་སྒྲོ་ཕུག་པའི་བཤད་སྲོལ་ཞེས་དུས་ད་ལྟའི་བར་དུ་ལྡབ་ལྡིབ་བྱེད་པ་འདི་བྱུང་ཞིང་ཉི་ཟླ་ལྟར་གྲགས་པ་ཡིན་ནོ། །དེ་ལ་ཐུགས་ཟིན་གྱི་སློབ་མ་བཅུ་གཉིས་བྱུང་སྟེ། ནག་པོ་བཞི། སྟོན་པ་བཞི། མེས་བཞི་ལས། ནག་པོ་བཞི་ནི། ལྕེ་སྟོན་རྒྱ་ནག །ཟུར་ནག་འཁོར་ལོ། ཉང་ནག་མདོ་བོ། མདའ་ནག་གཙུག་ཏོར་དབང་ཕྱུག་གོ། སྟོན་པ་བཞི་ནི། ཉི་སྟོན་ཆོས་སེང་། བྱབས་སྟོན་རྡོ་རྗེ་མགོན་པོ། །ཞང་སྟོན། རྒྱ་སྟོན་བཞིའོ། །མེས་བཞི་ནི། རྩངས་པ་བྱི་སྟོན། གཡུ་སྟོན་ཧོར་པོ། སྤངས་སྟོན་ལྕགས་ཀྱུ། དབུས་པ་ཆོས་སེང་ངོ་། །འདྲེན་ཚུལ་འདི་ཟུར་སྟོད་ལུགས་སུ་གྲགས་ལ། སྨད་ལུགས་སུ་དེ་ལས་ཐ་དད་པའང་ཡོད། དེ་ལྟར་སྤྲུལ་པའི་སྐུ་གསང་བདག་སྒྲོ་ཕུག་པ་ཆེན་པོ་དེ་ཉིད་ཐ་མའི་མཛད་པ་སྟོན་པར་བབས་པའི་ཚེ། སྟོན་པ་བཞི་ལ་ཁྱེད་ཚོས་ཚོགས་འཁོར་གྱི་ཆ་རྐྱེན་འདྲ་ཁྱེར་ལ་ཤོག །ངས་ཀྱང་སྡིགས་ཀྱི་གསུངས། སྟོན་པ་བཞིས་གསུངས་བཞིན་དུ་བསྒྲུབས་པ་དང་། སྒྲོ་ཕུག་གི་ལྟག་ལྷ་རི་གདོང་གི་རྩེར་བྱོན་ནས་ཚོགས་འཁོར་རྒྱ་ཆེན་པོ་མཛད། གསུང་གི་གསང་བ་མང་པོ་རྗེས་སུ་བསྟན་ནས། ཁྱེད་རྣམས་ང་མེད་པ་ལ་མྱ་ངན་མ་བྱེད་ཅིག །ངས་ད་རེས་ལུས་
མ་སྤངས་པར་ཁྱེར་ནས་རིག་འཛིན་གྱི་ས་ལ་འགྲོ་བ་ཡིན། དེས་ཁྱེད་རྣམས་ལ་ཤུལ་དུའང་བཀྲ་ཤིས། མི་རྒྱུད་དང་བསྟན་པ་འཕེལ་བ་གཅིག་འོང་ངོ་གསུངས་ནས། དཔལ་གྱི་མགུར་ལས་རྡོ་རྗེའི་གླུ་གཅིག་བཞེངས། ནམ་མཁའ་ལ་ཇེ་མཐོ་ཇེ་མཐོར་འཕགས་ཀྱིན་མགུར་རེ་བཞེངས་ནས་མཐར་མི་མངོན་པའི་སར་གཤེགས་པ་དང་། སྟོན་པ་བཞི་སྙིང་ཕྱུང་བ་ལྟ་བུའི་སྡུག་བསྔལ་གྱིས་མནར་ནས་ཆོ་ངེས་བཏབ། འགྲེ་ལྡོག་བྱས། མཚན་ནས་བོས་པས་བྱ་བབས་པ་བཞིན་དུ་བྱོན། ཁྱེད་རྣམས་དེ་ལྟར་མི་བྱེད་པ་ཡིན་ཏེ། ངས་གོང་དུ་ཁ་ཏ་ནི་ལེགས་པར་བཅུག །དེ་ལ་མི་ཉན་པར། ད་ངའི་མི་རྒྱུད་ལ་བཀྲ་ཤིས་པ་བག་མའང་གསུངས། དེ་ནས་ཕྱི་ལོ་དྲུག་ཅུ་རྩ་གཅིག་པ་ཤིང་ཕོ་སྟག་ལ་འོག་མིན་ཚོགས་ཆེན་འདུས་པའི་གྲོང་ཁྱེར་དུ་གཤེགས་སོ། །པུར་སྦྱོང་བའི་ཚེ་སྔགས་པ་གཞོན་མཛེས་གཅིག་གིས་རྟ་ངང་བཟང་གཅིག་ལ་དུང་གི་སྒ་རང་གུག་ངོ་མཚར་ཅན་བསྟད་པ་ཞིག་ཕུལ། དེ་འདི་ནས་བྱུང་དང་འདིར་སོང་སུས་ཀྱང་ངོ་ཤེས་པ་མ་བྱུང་བས་ལྷས་འདེགས་བསྐྱལ་བར་གྲགས། དེ་བཞིན་དུ་བཙན་དང་། མ་མོ་དང་། ཀླུ་རྣམས་ཀྱིས་ཀྱང་འདེགས་བསྐྱལ་ཏེ། མི་ལ་མེད་པའི་ནོར་སྣ་བཞི་བྱུང་བ་ཡིན་ནོ། །འདི་ས་སྐྱ་པ་ཀུན་དགའ་སྙིང་པོ་ལས་ལོ་བཅོ་བརྒྱད་ཀྱིས་བགྲེས་པས་དྭགས་པོ་ལྷ་རྗེ་དང་། ཕག་མོ་གྲུ་པ། བླ་མ་ཞང་། ཇོ་སྲས་འཛེང་སོགས་དང་ཐོག་རགས་པ་ཙམ་མཉམ་མོ། །ཡང་བི་མ་ལིའི་སློབ་མ་རོང་ཚུ་ཚན་གྱི་དགེ་སློང་མ་སྦྲེ་མོ། དེའི་སློབ་མ་ལྷོ་བྲག་བྱ་ཟེའི་མར་པ་ཤེས་རབ་འོད། དེའི་སློབ་མ་ཤངས་ལྷ་བུའི་ལང་སྟོན་དར་མ་བསོད་ནམས། དེའི་སློབ་མ་ལྷ་རྗེ་ཧོར་པོ་སྒྲོ་ཕུག་པ་ཡིན་པས་བི་མ་ལ་དང་གཉིས་ཀྱི་བར་ལ་བླ་མ་གསུམ་ལས་མེད་དོ།། །། དེ་ལ་སྒྲོ་ཕུག་པའི་སློབ་མ་ལྕེ་སྟོན་རྒྱ་ནག་ནི་འཁྲུངས་ས་ཉང་སྟོད་པ་ཡིན། མཚན་ཉིད་ཀྱི་གྲྭ་ས་ན་ཕུ་བོ་གཉིས་སློབ་གཉེར་ལ་ཡོད་པའི་སར་རྒྱགས་སྐྱེལ་དུ་བྱོན། ཞར་ཉན་བྱས་པས་ཁོང་གཉིས་ཀྱིས་ཆེད་
དུ་སྦྱངས་པ་ལས་ལྷག་པ་བྱུང་། དེར་རྒྱ་ནག་ན་རེ། ཁྱེད་གཉིས་ཀྱིས་ལོ་གསུམ་ཉན་ཀྱང་གོ་བ་ཅི་ཡང་མི་འདུག །ངས་ཉན་ན་གོ་བ་འདུག་བྱས་པས། ཕུ་བོ་གཉིས་ན་རེ། ངེད་གཉིས་ལ་དེ་ལས་མ་བྱུང་། ཆོས་སུས་ཤེས་ཀྱང་འདྲ་ཡི་ཁྱོད་གོ་ན་ཁྱོད་རང་ཉོན། ངེད་ཀྱིས་རྒྱགས་སྐྱེལ་བྱེད་ཟེར་བས། དེར་ལྷ་རྗེ་རྒྱ་ནག་གིས་བཞུགས་ནས་ཁྱུང་པོ་གྲགས་སེ་ལ་ཕར་ཕྱིན། འབན་ལ་མངོན་པ། སྟག་པ་ཁ་ཆེ་ལང་བུ་ཚད། འགར་བསོད་ནམས་ཡེ་ཤེས་ལའང་གཏུགས་ཏེ་ལོ་དགུར་ཉན་པས་མཁས་པའི་ཕ་རོལ་ཏུ་སོན། སུམ་ཅུ་པའི་ཚེ་གསང་བདག་སྒྲོ་ཕུག་པ་ལ་སྔགས་གསན་དུ་བྱོན་ནས་ལོ་བཅུ་གཅིག་བཞུགས་ཏེ། ལོ་གསུམ་གྱི་བར་ཇོ་སྲས་ཉང་སྟོད་པ་གསུངས་པ་ཙམ་ལས་སྤྱན་སྔར་གསུང་གླེང་ཞིབ་པ་ཙམ་མ་བྱུང་སྐབས་ཤིག་ན་རྒྱ་བརྩོན་སེང་དཔོན་གཡོག་དང་ལྷ་རྗེ་ཆོས་འཁོར་སྟབས་གཅིག་ཏུ་འཛོམས་པའི་ཚེ། རྒྱ་བརྩོན་དཔོན་གཡོག་གིས་རྩོད་པ་བཙུགས་པས། ལྷ་རྗེ་རྒྱ་ནག་གིས་ཁོང་རྣམས་སུན་ཕྱུང་། ང་རྒྱལ་བཅག་པས་མཉེས་ཏེ་ཐུགས་ལ་འདོགས་པར་བྱུང་བའི་ཁར། སྲས་ཇོ་བཙུན་རྡོ་རྗེ་གྲགས་བློ་ཁ་ཕྱེ་བས་རབ་ཏུ་དགྱེས་ནས། བསྐྱེད་རྫོགས་གསུམ་གྱི་གཞུང་གདམས་ངག་དང་། ཁྱད་པར་གྱི་མན་ངག་ཡིག་ཆུང་དང་བཅས་པ་གནང་བས་ལྷ་རྗེ་ལྷ་ཁང་པ་ཟུར་ཚོ་གཞན་ལས་ཆོས་ཁ་ཚང་ཞིང་མན་ངག་ཟབ་པ་ཡིན། བཞི་བཅུ་ཐམ་པ་ལ་གཤེགས་བཙུན་མཛད། དེའི་ཕྱི་ལོ་སྒྲོ་ཕུག་པ་གཤེགས། ཉང་སྟོད་ཀྱི་རྒྱ་ཙང་སྐོར་ལ་བདུད་རྩི། ཉང་སྨད་སྒྲོ་དར་སེང་ལ་རྣམ་འཇོམས་དང་། ཕུར་པ་རྩ་བ་སོར་བཞག་ལུགས། གཞན་ཡང་སྐྱི་ལུགས་ལ་སོགས་ཕུར་པ་ལུགས་ཐ་དད་པ་དང་། དམ་པ་སྤོར་མང་ལ་རྫོགས་ཆེན་སྤོར་ལུགས། ཇོ་མོ་ཉང་མོ་ལ་རྫོགས་ཆེན་ཁམས་ལུགས་ཨ་རོའི་ཐུགས་བཅུད། དེ་བཞིན་དུ་རྫོགས་ཆེན་བྲམ་ཟེའི་སྐོར་དང་ཀེ་ཚང་མ་ལ་སོགས་ཐོས་པ་ཤིན་ཏུ་མང་བས་སྔགས་དང་། མཚན་ཉིད། རྒྱུད་དང་སྒྲུབ་ཐབས་
ཐམས་ཅད་ཀྱི་བདག་པོར་གྱུར། སྨན་སྒྲུབ་མཛད་པའི་ཚེ་སྨན་གྱི་ཕོ་བྲང་ལས་ལྷ་མོ་མངོན་སུམ་དུ་ཐོན་ནས་དཀྱིལ་འཁོར་ལ་བསྐོར་བ་ལན་གསུམ་བྱས་ཏེ་ཐིམ་པར་ཀུན་གྱིས་མཐོང་། གཞན་དོན་རྒྱ་ཆེན་པོ་མཛད་ནས་ལྔ་བཅུ་རྩ་དྲུག་པ་ལ་གཤེགས་སོ། །འདིའི་དཔོན་པོ་བླ་མ་ཆེན་པོ་ཡོན་ཏན་གཟུངས་ནི། མེ་ཕོ་རྟ་ལ་འཁྲུངས། བཅུ་གཅིག་ནས་སློབ་གཉེར་མཛད། ལོ་བཅུ་གསུམ་ཁུ་བོ་དང་འགྲོགས་ནས་བསྐྱེད་རྫོགས་གསུམ་གྱི་རྒྱུད་ལུང་མན་ངག་ཀུན་ལ་སློབ་གཉེར་རྫོགས། ཉི་ཤུ་རྩ་བཞི་བཞེས་པའི་ཚེ་ཁུ་བོ་རྒྱ་ནག་པ་སྐུ་གཤེགས་ནས་གདན་ས་མཛད། དབུས་པ་སྟོན་ཤཱཀ་དང་། དབུས་པ་ཞིག་པོ་སོགས་ལས་ཐེ་ཚོམ་གྱི་དྲས་ཐག་བཅད་ནས་རང་གཞན་གྱི་དོན་མཛད་པ་ཡིན་ནོ།། །། དབུས་པ་སྟོན་ཤཱཀ་གམ་དམ་པ་སེ་སྤྲག་པ་ནི། གཟད་ཀྱི་གཅེར་པ་ཝ་ཐུང་རྒྱུད་ཡིན། སྒྲོ་ཕུག་པའི་གྲ་སར་ཡི་གེ་འདྲིར་བྱོན་པ་ལ་དད་པ་ཐོབ་ནས་སློབ་གཉེར་བྱས། ལྷ་རྗེ་རྒྱ་ནག་གཤེགས་བཙུན་མཛད་པའི་ཕྱིར་འདྲེང་དུ་གཤེགས་ནས་རྒྱུད་དང་གདམས་ངག་ཐམས་ཅད་རྫོགས། སྒོམ་སྒྲུབ་འབའ་ཞིག་བྱ་བར་བསམས་ཏེ་བྱང་རི་ལ་དགོན་པ་འཚོལ་དུ་བྱོན་པས། ཡོལ་བ་བྲག་ལ་དམ་པ་ཡོལ་ཆུང་བ་བྲག་བརྐོ་བ་དང་མཇལ། འདིར་དགོན་པ་མཛད་པ་ལགས་སམ་བྱས་པ་ཡིན་ཟེར། འདི་མིན་པ་བྱས་མི་གདའ་འམ་བྱས་པས། ཕ་ངོས་ན་སེ་བ་ཁ་བྲག་ཅན་གཅིག་ན་འདུག་སྟེ། དེ་བས་འདི་བཙན་པས་འདིར་བྱེད་ཟེར། དེར་དམ་པ་སྟོན་ཤཱཀ་གིས་བྲག་སེ་བ་ཁ་སྤྲག་སྐྱེས་པ་དེར་བྱོན་ཙ་ན། ཆུ་མིག་འགྲམ་ནས་ཟན་རྡོག་འགའ་ཞིག་རྙེད་པས་བཟང་ལྟས་སུ་བཟུང་། དེར་བཞུགས་ཏེ་སྒོམ་སྒྲུབ་མཛད་པས་རྟོགས་པ་ཁྱད་པར་ཅན་སྐྱེས། ལྷ་འདྲེས་བཀའ་ལ་ཉན་གདུལ་བྱ་མང་པོའི་དོན་ནུས་པ་བྱུང་སྟེ་དམ་པ་སེ་སྤྲག་པ་ཞེས་གྲགས་སོ།། །། དབུས་པ་ཞིག་པོ་ནི། ཡར་ཀླུང་བྱས་པ་ཡིན། རྗེ་སྒྲོ་ཕུག་པའི་གདན་སར་ཡིག་མཁན་ཆོས་ལ་ཚུད་པ་ཞིག་སྟེ། ལྷ་རྗེ་རྒྱ་ནག་གི་ཕྱི་ལ་འབྲངས། བསྐྱེད་རྫོགས་གསུམ་ཀ་ལ་འབྱོངས་པར་བྱས།
ཡུལ་ལ་ཆེ་འདོན་ལ་འགྲོ་སྙམ་ཙ་ན། དེའི་ཆ་རྐྱེན་གདུགས་དང་། དུང་དང་། མཆོད་ཆ་སོགས་དགོས་པར་སེམས་ནས་དེ་དག་འདོན་པའི་ཕྱིར་བལ་ཡུལ་དུ་བྱོན། ལམ་དུ་བསམས་པ་ལ་ངས་ཆོས་དེ་ཙམ་ཤེས་ཀྱང་ཉམས་སུ་བླང་རྒྱུ་ཞིག་མི་འདུག །ད་ལྟ་ཤི་ན་ཅིས་ཀྱང་མི་ཕན། གདམས་ངག་ཁོ་ན་ལ་བློ་གཏོད་དགོས་པར་འདུག་སྙམ་ནས་སླར་ལོག །བླ་མའི་སྤྱན་སྔར་ཕྱིན་ནས་ཞུས་པས། སྙན་བརྒྱུད་རིན་པོ་ཆེའི་གདམས་ངག་གནང་། དེ་ལ་ཉམས་ལེན་མཛད་ཅིང་བྱོན་པས། མང་ཡུལ་གུང་ཐང་དུ་བརྟོལ་ཙ་ན་རྫོགས་པ་ཆེན་པོའི་ཡེ་ཤེས་བརྗོད་དུ་མེད་པ་ཞག་བདུན་དུ་ཤར། དེར་བལ་པོ་ནས་མཆོད་ཆ་བླངས། མང་ཡུལ་གུང་ཐང་དུ་ལྷོགས་ཙམ་ན། ཚད་པ་ཕྱིན་འབྲངས་ནས་བསྙུངས། ད་མི་དགའ་བ་ཨེ་ཡིན་སྙམ་ནས་བློ་ཐག་བཅད། ཀ་ཅ་རྣམས་གྲོང་དུ་བཞག །རི་ལ་བྱོན་ནས་ཉམས་སུ་བླངས་པས་ས་རྡོ་རི་བྲག་ཐམས་ཅད་ལ་ཐོགས་པ་མེད་པ་བྱུང་། སྔར་གྱི་བསམས་པ་དེ་དག་དགོས་མེད་འགའ་ཞིག་ཏུ་ཤེས་ནས་ཆེ་འདོན་གྱི་ཀ་ཅ་ཐམས་ཅད་གང་དགར་བསྐྱུར། མཉྫི་དང་ཏིང་བདུན་ཆ་གཅིག་ཡོད་པ་དེ་མཐོང་བ་དང་བླ་མའི་དྲིན་དྲན་ཏེ། ང་ལ་དགོངས་པ་འདི་འདྲ་འཆར་བ་ཡང་བླ་མའི་ཐུགས་རྗེ་ཡིན་པས་འདི་ཙམ་ཞིག་བླ་མ་ལ་འབུལ་དགོས་སྙམ་ཁྱེར་ཕྱིན་པས། འདོད་པ་ཟད་པས་དེ་ཡང་ལམ་དུ་སྐྱུར་འདོད་པ་བྱུང་སྟེ། ཡང་བླ་མའི་དྲིན་བསམས་ཏེ་བྱོན། ལྷ་ཁང་དུ་སླེབས་ཙ་ན། བླ་མའི་དྲུང་དུ་བསྐྱུར་ནས། ཏིང་ཁྱོད་ཀྱིས་ང་ཇི་ཙམ་ཞིག་བཅིངས་གསུང་སྐད། དེར་རི་འབའ་ཞིག་ལ་བཞུགས་ནས་ཉམས་ལེན་མཛད་པས། ཆོས་ཐམས་ཅད་བློ་ལ་འཆར་བ་དང་། སྣང་བ་བདེན་མེད་དུ་བུན་ལོང་སོང་བས་རྦབ་ཀྱིས་མ་ཚུགས། གཡས་རུའི་བ་གོར་ཕུར་བཞུགས་པའི་ཚེ་གཟིམས་མལ་གྱི་སྟེང་དུ་ཐོག་བྱུང་ཡང་མ་གནོད། གཞན་གྱིས་ཐོག་བྱུང་ངམ་ཞུས་པས། ཐོག་གམ་དེ་བྱུང་གསུངས།
མ་གནོད་དམ་ཞུས་པས། སྒྲ་གྲག་སྟོང་དབྱེར་མེད་ཡིན། ཐོག་ལ་རང་བཞིན་ག་ལ་ཡོད་གསུངས་ཏེ་རྣལ་འབྱོར་གྱི་དབང་ཕྱུག་ཆེན་པོར་བཞུགས། སྒོམ་སྒྲུབ་འབའ་ཞིག་གི་ངང་ནས་མཚམས་འོག་ཏུ་གྲྭ་ས་ལོ་བཅོ་བརྒྱད་བསྐྱངས། དགུང་ལོ་བདུན་ཅུ་པ་ལ་གཤེགས་སོ། །དམ་པའི་སྐྱེས་བུ་འདི་ལ་སློབ་མ། ཞིག་པོ་བདུད་རྩི། སྟོན་པ་བླ་སྐྱབས། དབུས་པ་ཇོ་བསོད། སྙིང་སྟོན་ཉི་མ་རྡོ་རྗེ་ལ་སོགས་པ་གཞུང་ལུགས་ལ་མཁས་པ་མང་དུ་བྱུང་། གཞན་ཡང་ལ་སྟོད་ཀྱི་མེས་སྟོན་མགོན་པོ་དང་། དཔྱལ་ཀུན་དགའ་རྡོ་རྗེ་ལ་སོགས་པས་ཀྱང་ཞབས་ལ་གཏུགས་སོ།། །། ཐུགས་ཀྱི་སྲས་ཞིག་པོ་བདུད་རྩི་ནི། ཡབ་མེས་ཀྱི་རིང་ནས་མཁས་པ་དང་། གྲུབ་པའི་དཔའ་བོ་བརྒྱུད་མར་བྱུང་བ་ལས་འདིའི་ཡབ་སངས་རྒྱས་དྭགས་ཆུང་སྟེ། དྭགས་པོ་རྒྱ་རས་ཀྱི་ཕྱིན་འབྲངས་པས་དྭགས་ཆུང་བར་གྲགས། དེས་ལྷོ་བྲག་ཏུ་བྱོན་ནས། ལྷོ་སྟོད་ཕུར་མོང་སྒང་བྱ་བའི་དགོན་པར་འགྲོ་དོན་མཛད་ཅིང་བཞུགས་པ་ལ། གཟད་པའི་ཡོན་བདག་རྣམས་ཀྱིས་གདན་དྲངས། གཟད་ཀྱི་ལྷ་གདོང་དགོན་པ་དང་། འུག་སྐད་དགོན་པ་ལ་སོགས་པ་ཕུལ་ནས་བཞུགས། བུ་སློབ་མང་དུ་འཕེལ། དེ་ལ་ཇོ་མོ་ཝང་མོ་བྱ་བ་ཞིག་ཡོད་པ་དང་གཉིས་ཀྱི་བུར་གཟད་ཀྱི་ལྷ་གདོང་དགོན་པར་བཙས། ཞིབ་མའི་ནང་དུ་བསྙལ་བ་ལ་འཇའ་ཚོན་ཟུག །དགུང་ལོ་གཉིས་ཙམ་ལོན་པའི་ཚེ་ཡབ་ལ་རྨི་ལམ་ངོ་མཚར་བ་བྱུང་ནས། ད་ང་འཆི་བར་འདུག །ཤི་ནས་ཀྱང་རིག་འཛིན་གྱི་ས་ལ་འགྲོ་བར་འདུག །བུ་འདིས་ཀྱང་གཞན་ལ་ཕན་ཐོགས་པར་འདུག་གསུངས་ཏེ་གཤེགས། ཞིག་པོ་རིན་པོ་ཆེ་འདི་ཆེར་སྐྱེས་པ་དང་སྙིང་རྗེ་ཤིན་ཏུ་ཆེ་བས་གོས་བཅོས་པ་ཐམས་ཅད་མས་བཤོལ་ཀྱང་མ་ཉན་པར་ལམ་ཟན་པ་ཉམ་ཐག་གཅིག་ཡོད་པ་ལ་བྱིན། དེར་མོ་མ་རྣོན་པོ་གཅིག་ན་རེ། ཁྱོད་ཀྱི་བུ་འདི་ཅི་འདྲ་ཞིག་འོང་། འདི་ལ་འཇིག་རྟེན་གྱི་ལྷ་འདྲེ་ཐམས་ཅད་ཚོགས་ནས་བསྐོར་བ་བྱེད་ཅིང་མཆོད་པར་འདུག་ཟེར། སྟོན་ཀ་གཅིག་འོངས་འདོན་ཙ་ན། མོ་ན་རེ།
མི་ཐམས་ཅད་འོངས་འདོན་པ་ལ་གཏོར་མ་གཏོང་གི་འདུག །གླེན་པ་ཁྱོད་ཀྱང་ཆུ་གཏོར་འདྲ་ཐོང་། རང་རེ་ཡང་འོངས་འདོན་པ་ཡིན་བྱས་པས། འོངས་འདོན་སར་བྱིས་པ་དེས་སོང་ནས། གཟད་ལུང་པའི་ལྷ་འདྲེ་ཚོ། ཉང་ནག་འོལ་པོའི་ལྷ་འདྲེ་ཚོ། སྤྲང་པོ་འུ་ལུའི་རྒྱལ་ནག །ད་ནང་སུའི་ཡང་སར་མ་འགྲོ་བར། རྒན་མོ་ཝང་མོའི་འོངས་འདོན་གྱི་ཡོད་པས་འདིའི་འོངས་ལས་ཁྱེར་ཟེར་ནས། ཐོར་ཐོར་བྱས་པས། ཨ་མ་ཁྲོས་ནས་ཕྱར་གྱིན་འདུག །དེར་ཞིང་རེ་བཞི་བྱ་བ་ལོ་ནན་ལྟར་ལེགས་ནའང་བཞི་བཅུ་ལས་མི་ཐོན་པ་ཞིག་ལ། དེའི་ལོ་སྙེ་མ་ཧ་ཅང་མེད་པ་ལ་ཁལ་ལྔ་བཅུ་ཐལ་བ་བྱུང་བས་འདི་སྤྲུལ་པ་གཅིག་ཡིན་ཉེན་འདུག་ཟེར་ནས། ཞང་པོ་དམ་པ་སེ་སྤྲག་པའི་རྩར་སློབ་གཉེར་ལ་བཏང་། ལོ་གསུམ་གྱི་རིང་ལ་རྫོགས་ཆེན་རང་ལུགས། སྒང་དྲིལ། གབ་ཕྱུང་སོགས་ལེགས་པར་ཐོས། བླ་མ་གཤེགས་ཁར་མིག་མཆི་མས་འགགས་ནས་དྲན་པ་ཙམ་མ་བྱུང་གསུངས། བཅུ་དྲུག་པ་ལ་སྐྱིལ་མཁར་ལྷ་ཁང་པ་ཡོན་ཏན་གཟུངས་ཀྱི་ཞབས་ལ་གཏུགས། ལོ་མང་དུ་བཞུགས་ནས་བསྐྱེད་རྫོགས་གསུམ་ཀ་ལ་བློ་གྲོས་བྱང་བར་མཛད། ཉམས་ལེན་གྱི་གཙོ་བོ་དང་འཆད་ཉན་ཐམས་ཅད་སེམས་ཕྱོགས་ལ་མཛད་དེ་ཞལ་གྱིས་ཀྱང་སེམས་ཕྱོགས་ཁོ་ན་བསྒྲུབས་པ་ཡིན་གསུངས། ཀུན་བྱེད་རྒྱལ་པོ་དང་མདོ་བཅུ་ལ་སོགས་པ་སེམས་ཕྱོགས་ཀྱི་རྒྱུད་སྡེ་ཆེན་པོ་ཉི་ཤུ་རྩ་བཞི་གསན། རྩ་བ་སེམས་སྡེའི་སྐོར་ལ། སྐོར་ལུགས་རང་ལུགས། ཁམས་ལུགས་ལ་སོགས་པ་བཤད་སྲོལ་མི་གཅིག་པ་བཅུ་བཞི་གསན། རང་ལུགས་ཀྱི་སྒོམ་ཡིག་ཆེན་པོ་རྣམས་ལས། རྣལ་འབྱོར་རིག་པའི་ཉི་མ། བསམ་གཏན་མིག་གི་སྒྲོན་མ། བསམ་གཏན་སྙིང་གི་ཉི་མ། གདར་ཤ་དང་གཟེར་བུ། ཞུ་ལེན་ཁུང་གདབ། རྡོ་རྗེ་སེམས་དཔའི་ཞུ་ལན་སོགས་སྒོམ་ཡིག་ཕལ་མོ་ཆེ་ཐོས། སྙན་བརྒྱུད་ཀྱི་སྐོར་ལ། སྐོར་རོང་ཁམས་གསུམ་ཀའི་གདམས་པ་དང་། བྲམ་ཟེའི་
སྐོར་གྱི་སྙན་བརྒྱུད། ཀེ་ཚང་དང་། རྫོགས་ཕྲང་སྙན་བརྒྱུད་ཀློང་ལ་སོགས་པ་བསམ་གྱིས་མི་ཁྱབ་པ་ཞིག་གསན་ཏེ། རྫོགས་ཆེན་གྱི་སྐོར་ལ་ཐོས་བསམ་གྱི་སྒྲོ་འདོགས་ལྷག་པར་ཆོད་པ་ཡིན། དགུང་ལོ་བཅུ་དྲུག་ལ་བཤད་པ་མཛད་དེ་སྐོར་ལུགས་ཀྱི་སྟོང་ཐུན་གསུངས་པས་མཁས་པའི་ཐོག་ཆོད། དེར་ལྷ་རྗེ་གནུབས་སྨན་བྱ་བ་ན་རེ། དབུས་པའི་ཇོ་སྲས་ཁྱེད་ངའི་རྟ་ཁྱུང་ཕྲུག་ཁ་ཆེ་དང་འདྲ་བ་འདུག་ཟེར། ནས་ཁལ་བཅུ་གཅིག་གི་ཕོགས་བྱས་སྐད། བླ་མ་ལྷ་ཁང་པའི་དྲུང་དུ་ལོ་བཅུ་བཞི་བཞུགས། བར་སྐབས་ཀུན་ཏུ་ཞང་པོའི་གདན་ས་སེ་སྤྲག་ཏུའང་བཞུགས་ཏེ་སྒོམ་སྒྲུབ་དང་བཤད་པ་བག་རེ་མཛད། སློབ་གཉེར་ཚར་བ་དང་ཡབ་ཀྱི་སློབ་མ་བླ་མ་མདོས་བྱ་བ་གཅིག་གིས་གདན་དྲངས་ཏེ་གཟད་དུ་བྱོན་ནས་འུག་སྐད་དགོན་པ་བཟུང་། གཙང་དུ་སེ་སྤྲག་དང་། དམ་པ་སེ་སྤྲག་པའི་སྒོམ་མ་རྣལ་འབྱོར་མ་ཤཱཀ་གཉེན་ལ་སོགས་པ་བཞིས་ངེད་ཀྱིས་སེ་སྤྲག་ལ་མི་ཐར་པ་འདུག་པས་རི་སྒབ་འདིར་ངལ་གསོ་ས་གཅིག་བྱེད་ཟེར་ནས་བརྩིགས་པའི་ཆོས་སྡིངས་ཀྱང་བཟུང་། ཞང་ཚལ་པའི་སློབ་མ་གཙང་སྒོམ་ཧྲུལ་ལེ་བ་བྱ་བས་ཞིག་པོའི་སྤྱན་སྔར་བླ་མ་ཞང་གི་ལོ་རྒྱུས་བཤད་པས་དད་པར་གྱུར་ནས་གདན་དྲངས། ཆོས་འཁོར་བཙུགས། ཆོས་འདྲེལ་མ་ཞུས་ཀྱང་རྒྱུད་བྱིན་གྱིས་བརླབས་པའི་བླ་མ་ཡིན་གསུངས་ནས་མོས་གུས་དང་ཞབས་ཏོག་ཆེ་བར་མཛད། བླ་མ་ཞང་གིས་ཁྱོད་ཀྱི་དགོན་པ་འདི་ཆུ་ཤིང་འཛོམ་པ་མི་འདུག་སྟེ། འདུ་བ་ཆེ་ཞིང་འགྲོ་བ་ལ་ཕན་པ་ཞིག་འོང་བས་ཆོས་སྡིངས་སུ་ཐོགས་གསུངས། དེར་མི་རྣམས་ན་རེ། ཆོས་ལྷ་ཁང་པ་ལ་ཉན། ཞབས་ཏོག་ཚལ་པ་ལ་བྱེད་ཟེར་བ་ལ། བླ་མ་ལྷ་ཁང་པ་དེ་ཕྲག་དོག་རྩ་བ་ནས་ཞི་བས་ནས་ཁལ་ཉི་ཤུ་ཙམ་དང་ཤ་མར་ཁ་ཡར་བསྐུར་ཏེ། ཁྱོད་བླ་མ་བཟང་པོ་གདན་དྲངས་ནས་ཆོས་འཁོར་འཛུགས་པ་ལས་ངས་ཀྱང་མཐུད་བྱེད་དགོས་པ་ཡིན་ཏེ། དེ་ལས་མ་འབྱོར་གསུངས་པས། རྨོངས་པ་དག་གི་ཁ་སྨྲས་འཕྲོ་ཆད། ང་རང་ཡང་བླ་མ་རྙིང་པ་ལ་
མོས་གུས་གསར་པ་སྐྱེས་གསུངས། ཕྲིན་ལས་དུས་ལ་བབས་པས་གདུལ་བྱ་དཔག་ཏུ་མེད་པ་འདུས། འགྲོ་བའི་དོན་རྒྱ་ཆེན་པོ་མཛད། བླ་མ་ལ་ཤིན་ཏུ་གུས་པས་མཉེས་པ་གསུམ་གྱི་གཞུང་བསྲང་ཞིང་སྐུ་མདུན་ནས་འབྱོན་ཚད་ལ་ཞབས་སྤྱི་བོར་མ་བླངས་པར་འགྲོ་མ་མྱོངས་གསུངས། གསེར་གྱི་རྒྱས་འབྲིང་བསྡུས་གསུམ་ལ་སོགས་ཏེ་མདོ་རྒྱས་ཚར་བཅུ་བདུན་གྱིས་སྣ་དྲངས་པའི་ཆོས་དང་ཟང་ཟིང་གི་ཞབས་ཏོག་བསམ་གྱིས་མི་ཁྱབ་པ་མཛད། བྱིན་རླབས་ཞུགས་པས་དགོངས་པ་ཇི་ལྟ་བ་བཞིན་དུ་ལོངས། རྟོགས་གྲོལ་དུས་མཉམ་དུ་སོང་ནས་ས་རྡོ་རི་བྲག་ཐམས་ཅད་ལ་ཐོགས་མེད་དུ་འགྲོ་ནུས་པ་དང་། མི་མ་ཡིན་གྱིས་སྐོར་བ་བྱེད་པ་བྱུང་། མངོན་པར་ཤེས་པ་མངའ་བའི་ལོ་རྒྱུས་མང་དུ་ཡོད། གཟད་ཕུའི་ད་ལུང་དགོན་པར་བཞུགས་པའི་ཚེ་སྐུ་ཕ་ཝང་ལ་ཐིམ་པ་དང་། སྲིན་པོ་རིར་གྱང་ལ་ཐོགས་མེད་དུ་གཤེགས་པ་ཐོགས་རྫུ་འཕྲུལ་དུ་མ་མངའ། གངས་རིའི་ཁྲོད་འདིའི་ཡུལ་དང་ཕྱོགས་ཐམས་ཅད་དུ་བྱོན་ནས་འགྲོ་བ་མང་པོ་ཐར་པའི་ལམ་ལ་བཀོད། བསྟན་པའི་བྱ་བ་ལ་སྐུ་གསུང་ཐུགས་ཀྱི་རྟེན་བཞེངས་པ་དང་། ཞིག་པ་གསོ་བ་དང་། གཞན་གྱིས་བཞེངས་པ་ལ་ཡོ་བྱད་གཏོང་བ་ལ་སོགས་ཕ་རོལ་ཏུ་ཕྱིན་པ་དྲུག་ཀའི་དོན་ཉམས་སུ་ལེན་ཤེས། རྒྱ་གར་ནས་བྱོན་པའི་ལོ་པཎ་མཁས་པ་ཐམས་ཅད་ཀྱི་ཞབས་ཏོག་མཛད། སྡེ་སྣོད་འཛིན་པའི་བཤེས་གཉེན་ཆེན་པོ་རྣམས་ཀྱི་ཞབས་ནས་འདེགས། རྟག་པར་འཇིག་རྟེན་གྱི་བྱ་བ་ལ་བློ་མི་འཇུག་པར་སྒོམ་སྒྲུབ་ཁོ་ན་མཛད། སེམས་ཅན་དབུལ་ཞིང་ཕོངས་པ་ཀུན་གྱི་སྦྱིན་བདག་མཛད་པས་ཐེག་པ་ཆེན་པོའི་རིགས་ལྷག་པར་སད་པ་ཡིན། རྒྱུ་དེས་རྒྱ་གར་ནག་དང་བལ་པོ་ལ་སོགས་པའི་སྐྱེ་བོ་སྐད་རིགས་མི་གཅིག་པ་ཀུན་ཀྱང་འདུ། མ་ག་དྷ་རྡོ་རྗེ་གདན་ལ་ཞབས་ཏོག་ལན་གསུམ། འཛམ་བུའི་གླིང་གི་རྒྱན་གཅིག་པུ་ཇོ་ཤཱཀ་རྣམ་གཉིས་ལ་སྲི་ཞུ་ལན་བཞི། རྡོ་རགས་ལན་བཞི་མཛད། རྗེས་སུ་ཕྲིན་ལས་སྐྱོང་བའི་དགེ་བའི་བཤེས་གཉེན་ཀྱང་
བགྲངས་ཀྱིས་མི་ལང་བ་བྱུང་སྟེ་གངས་ཁྲོད་འདིར་རྩོད་མེད་དུ་གྲགས་པའི་སྐྱེས་བུ་ཆེན་པོ་ཞིག་ཡིན་ནོ། །དེ་ལྟ་བུའི་མཛད་པ་ཕུན་སུམ་ཚོགས་པས་དངོས་དང་བརྒྱུད་ནས་གཞན་ལ་སྨན་པ་ཤ་སྟག་མཛད་དེ། ལྷ་སའི་རྡོ་རགས་ཕྱི་མ་མཛད་པའི་གཤེགས་སྐྱེམས་ཀྱི་དུས་ལས་འཕྲོ་ངན་པའི་འཁོར་ཁ་ཅིག་གིས་ཆང་འཐབ་བྱས་པས་ཐུགས་སྐྱོ་བའི་གསུང་བྱོན་ཏེ་ལྔ་བཅུ་རྩ་དྲུག་བཞེས་པ་ས་མོ་ལུག་གི་ལོར་གསང་ཕུའི་རྒྱ་ར་གད་ལོགས་ཀྱི་དགོན་པར་སྐུ་གཤེགས། པུར་ཆབ་ལ་བཀལ་ནས་གཟད་འུག་སྐད་དགོན་པར་ཟླ་བ་བཞི་བཞུགས། དེ་ནས་བཙན་པོ་དང་། དཔོན་སྐྱ་སློབ་མའི་ཚོགས་ཀྱིས་གདན་སར་བསམས་ནས་བཞེངས་པའི་གཟད་ཐང་སྐྱའི་གཙུག་ལག་ཁང་དུ་གདན་དྲངས་པའི་ཚེ། ས་རབ་ཏུ་གཡོས་ཤིང་། ཡོན་ཆབ་ལས་པདྨའི་སྡོང་བུ་སྐྱེ་བ་སོགས་ལྟས་ངོ་མཚར་བ་བྱུང་། ནང་པར་པུར་སྦྱངས་པས་སྒྲ་དང་། འོད་དང་། འཇའ་ཚོན་དང་། མཆོད་རྟེན་ཡིག་འབྲུ་ལ་སོགས་པ་དཔག་ཏུ་མེད་པ་བྱོན་ཏོ། གཙུག་ལག་ཁང་དེ་ནི་ད་ལྟ་རྗེས་ཙམ་དུ་སྣང་ངོ་། །ཞིག་པོ་ལ་སློབ་མ་ཡང་ཐུགས་སྲས་སུ་གྱུར་པ་ནི། རྟ་སྟོན་ཇོ་ཡེ། མ་ཧཱ་ལྷུན་པོ། མཁས་པ་ཇོ་ནམ། དབུས་པ་ཇོ་བསོད། བཟང་སྟོན་ཧོར་གྲགས། གཉེར་སྟོན་བླ་མ་དང་དྲུག་ལས། གཙོ་བོར་གྱུར་པ་རྟ་སྔོན་ཇོ་ཡེ་ནི། ཡབ་རྟ་སྟོན་ཇོ་འབུམ། ཞེས་བྱ་བ་གཡོ་རུ་སྟོད་ཀྱི་བདག་པོ་འཁོར་འབངས་དང་ཡུལ་གཞིའི་འཛོམ་པ་ཞིག་ཡོད། དེ་འཁོར་བ་ལ་སྐྱོ་བ་སྐྱེས་ནས་གཡོག་བཞི་ཁྲིད་དེ་བྲོས། ལྷ་རྗེ་གླན་ཉ་ཚལ་པའི་ཐུགས་སྲས་གཉོས་ཆུ་བོ་རི་བའི་སྤྱན་སྔར་བྱོན། དཔོན་གཡོག་ལྔ་ཀས་སྟབས་གཅིག་ཏུ་ཆོས་འཁོར་དུ་ཞུགས། སྔགས་རྙིང་མ་སྤྱི་དང་། ཁྱད་པར་རྫོགས་ཆེན་སྐོར་ལུགས་གཞུང་གདམས་ངག་བཅས་པ་ལ་ཤིན་ཏུ་བྱང་ཆུབ། ཕག་མོ་གྲུ་པའི་སྤྱན་སྔར་ལམ་འབྲས་དང་ཕྱག་ཆེན། དབུར་སྟོན་བླ་མ་མཚར་སྟོན་ལས་ཕྱག་ཆེན་སྒང་ལུགས་ཀྱི་དོ་ཧ། ཟངས་གྲི་འགྲོ་རས་ལས་རས་ཆུང་པའི་ཆོས་སྐོར། ནང་སྟོན་མགོན་པོ་ལས་རྣམ་འཇོམས་དང་ཕུར་པ་སོགས་མདོར་ན་
བླ་མ་མང་པོ་ལས་ཆོས་རིས་མེད་གསན་པ་ཡིན་ཏེ། གཉོས་ཆུ་བོ་རི་བ་དང་། ཕག་མོ་གྲུ་པ་རྩ་བའི་བླ་མར་འཛིན། ཆུ་བོ་རི་ལ་སྒྲུབ་པ་མཛད་པས་གདུལ་བྱ་མང་དུ་འདུས། དེ་ལ་སྲས་རྟ་སྟོན་ཇོ་ཡེ་འདི་ཆུ་མོ་ལུག་ལ་བལྟམས། དེ་ནས་ལོ་བཞི་པ་ལ་གཅུང་པོ་ཇོ་བསོད་བཙས། འདི་ཆུང་ངུ་ནས་ཞིག་པོའི་དྲུང་དུ་བྱོན་ཐུགས་ལ་བཏགས། ཇོ་ཡེས་ཀྱིས་ལོ་བཅུ་གཉིས་པར་བླ་མ་དམར་སྟོན་ལས་བདེ་མཆོག་དང་ཕྱག་རྡོར་བདུད་རྩི་ཐིགས་པའི་སྐོར་ཞུས། གཟུངས་རིང་ལ་བསྙེན་པ་ལོ་གཉིས་མཛད། ཡབ་དང་ལྷན་དུ་བདེ་མཆོག་གི་དབང་བརྒྱ་རྩ་བརྒྱད་ཞུས། ཁ་རག་སྟོན་སྙིང་གི་སར་སྒྱུ་འཕྲུལ་ལོ་གཉིས་ཉན། བླ་མ་རྩགས་དང་སེ་དུར་ལུང་པ་གཉིས་ལས་རྫོགས་ཆེན་སྐོར་ལུགས་གཞུང་གདམས་པ་དང་བཅས་པ་ཞུས། དགུང་ལོ་བཅུ་དྲུག་པར་རྡོ་རྗེ་སེམས་དཔའ་ནམ་མཁའ་ཆེ་ལ་བཤད་པ་མཛད། བཅུ་དྲུག་གི་གཤམ་ན་ངམ་ཤོད་སྨད་དུ་བྱོན། ཡབ་ཀྱི་སློབ་མ་རྗེ་བཙུན་ཞགས་ལས་ཕྱག་རྒྱ་ཆེན་པོ་སྒང་ལུགས་གསན། ཟངས་རི་རྒྱ་རས་ལས་ལོ་རོ་རས་ཆུང་པའི་ཆོས་སྐོར། དགྱེས་རྡོར་མེས་ལུགས། འཇམ་དཔལ་གསང་ལྡན། བདེ་མཆོག་ལཱུ་ཧི་པ་དང་། མཚོ་སྐྱེས་རྡོ་རྗེའི་སྒྲུབ་ཐབས། ལམ་འབྲས་ཞམ་ལུགས། ཞི་བྱེད་ལུགས་གསུམ་ཀ་སོགས་མདོར་ན་གསར་རྙིང་རིས་མེད་ལ་ཐོས་པ་ཤིན་ཏུ་ཆེ་བ་ཡིན། རེ་ཞིག་ན་ནང་སྟོན་ཇོ་འཁྱམས་ལས་ཕུར་པ་གསན་ནས་ཆུ་བོ་རིར་བསྒྲུབ་པ་མཛད། ལོ་ཉེར་ལྔ་པའི་ཚེ་ཞིག་པོའི་དྲུང་ན་བྱོན་པ་ཡིན། དང་པོ་ཆོས་ཞུ་བའི་རྟོག་པ་མེད་དེ། ཆོས་ཀྱང་ང་རང་མཁས། གདམས་ངག་ཀྱང་ང་རང་ཆེ། ཁོང་སྙན་པ་དང་གྲགས་པ་ཆེ་བར་འདུག་པ་དང་། གཅུང་པོའི་བླ་མ་ཡིན་པས་མཇལ་འཕྲད་ཀྱི་རྣམ་པ་ཞིག་བྱ་སྙམ་ནས་བྱོན་པས། ཞིག་པོ་བདུད་རྩི་འུག་སྐད་དགོན་པ་ན་བཞུགས་པ་དང་མཇལ། ཞལ་མཐོང་བ་ཙམ་གྱིས་གུས་པ་དབང་མེད་དུ་སྐྱེས། ནང་པར་ལོག་འགྲོ་ཙ་ན་སྐུ་དྲུང་དུ་འོང་བས་ཐུགས་
ཀྱིས་གཟུང་བར་ཞུ་ཞུས་པས། ཁྱེད་མོས་སམ་གསུངས། ཤིན་ཏུ་མོས་པ་ཐོབ་ཞུས་པས། འོ་ན་ལས་འཕྲོ་ཡོད་པ་ཡིན་ད་ལྟ་ནས་སྡོད། འཁོར་བའི་མཚན་ཉིད་ལ་རྟག་པ་མེད་ན་ཕྱིས་ཇི་ལྟར་འོང་ཆ་མེད་གསུངས། ད་རེས་ཆ་རྐྱེན་མེད་བྱས་པས། འདིར་འོང་བ་ལ་རྒྱགས་ཕྱེ་ཁུར་བ་སུ་ཡང་མེད། ཁྱོད་གཅིག་པུ་ལ་ཆ་རྐྱེན་ཅི་འཚལ་གསུངས། དེར་ལོ་བདུན་གྱི་བར་དུ་ཞག་གཅིག་ཀྱང་མ་བྲལ་བར་བསྟེན། མཉེས་པ་གསུམ་གྱི་སྲི་ཞུ་བྱས། ཀུན་བྱེད་རྒྱལ་པོ་མ་བུ་སུམ་སྐོར། བཤད་རྒྱུད་མདོ་བཅུ། འཁོར་བ་རྩད་གཅོད་ཀྱི་རྒྱུད་ལ་བཤད་རྒྱུད་སྡེ་བཞི། རྩ་འགྲེལ་རྒྱབ་ཆོས་མན་ངག་དང་བཅས་པ། རྩ་བ་བཅོ་བརྒྱད་ཀྱི་བཤད་སྲོལ་ལ་ཟབ་པ་གཞུང་དང་། གབ་པ་མངོན་ཕྱུང་། མན་ངག་སྒོམ་སྡེབས་སུ་བཤད་པ། དེའི་སྒོམ་འགྲེལ་སྙིང་གི་ཉི་མ་དྲུག །ཡང་སྙིང་རིག་པའི་ཉི་མ་དྲུག །སྙན་བརྒྱུད་སྒྲོ་བ་ནག་པོའི་སྐོར། སྒོམ་ཡིག་ཆེན་མོ། རིག་ཉི། མིག་སྒྲོན། གདར་ཤ་གཟེར་བུ་རྣམས་དང་། གདམས་པ་སྙན་བརྒྱུད་སྐོར་དང་། སྐོར་ལུགས་རོང་ལུགས། ཁམས་ལུགས་ཀྱི་གདམས་ངག་ལག་ཁྲིད་དང་བཅས་པ་ནན་ཏན་ཆེ་བར་མཛད། གསུང་གི་ཆུ་རྒྱུན་ལེགས་པར་འཐུངས་པས། བྱིན་རླབ་ཅིག་ཅར་དུ་ཞུགས། རྟོགས་པ་ཐོད་རྒལ་དུ་སྐྱེས་པས་འཇིག་རྟེན་གྱི་སྒྲོ་སྐུར་ལ་ཉམས་མི་ང་། ཚུལ་ཆོས་མེད་པའི་སྤྱོད་པ་སྐྱོང་། བླ་མ་ལ་ཤིན་ཏུ་གུས། ཅི་གསུང་དང་དུ་ལེན་པས་དགོངས་པ་གཅིག་ཏུ་འདྲེས་ཏེ། བླ་མ་ཅི་མཉེས་བྱེད་པ་ཅི་བསམ་འགྲུབ་པར་གྱུར་ཅིག་གསུང་བ་ལན་གསུམ་ཐོས། སྤྱིར་བླ་མ་ཐམས་ཅད་ལ་ཞབས་ཏོག་མ་གྲུབ་པ་མེད། ཁྱད་པར་ཞིག་པོ་ལ་ཡུལ་གཞིས་ཐམས་ཅད་བཙོངས་ནས་སྤོང་དག་བྱས་པའི་ཆོས་འཁོར་ལན་བཞི་བཙུགས། སྔ་ཕྱི་བསྡོམས་པས་རྟ་བཟང་པོ་ཁོ་ན་ལའང་བདུན་ཅུ་རྩ་བཞི་ཕུལ་ཞེས་གྲགས། གདམས་པའི་གསུང་སྒྲོས་ཐམས་ཅད་ཡི་གེར་བཀོད་པས་རྗེས་འབྲང་ལ་དྲིན་ཆེ། ཆོས་ཞུ་བའི་སྤྲོས་པ་ཆོད་ནས་ནགས་ཁྲོད་དམ། རི་སུལ་གཉན་པོ་མི་སྐད་བྱ་སྐད་མི་གྲགས་པ་ཞིག་ཏུ་འདིར་སོང་དང་འདིར་ཡོང་
མེད་པ་གཅིག་བྱ་སྙམ་པའི་སྙིང་སྟོབས་བསམ་གྱིས་མི་ཁྱབ་པས་དཔེ་ཆ་རྣམས་ཀྱང་ཡིག་ཆུང་ཟིན་བྲིས་འབའ་ཞིག་དུ་བྱས་ཏེ། བླ་མ་སློབ་དཔོན་གྱིས་གདན་སའི་བྱ་བ་བཀལ་བས་གསུངས་གཅོག་མ་ཕོད། འོན་ཀྱང་བླ་མའི་ཞབས་ཏོག་འབའ་ཞིག་བྱས་པས་སྒྲིབ་པ་ཚན་པོ་ཆེ་དག་པ་དང་། ཏིང་ངེ་འཛིན་ཀྱང་གོང་འཕེལ་དུ་སོང་བས་རི་ཁྲོད་འགྲིམས་པ་ལས་ཆོད་ཆེ་བ་བྱུང་གསུངས། དེའི་རྒྱུ་མཚན་ཡང་། ཐང་སྐྱའི་ཐུགས་རྗེ་ཆེན་པོ་བཞེངས་པའི་ཚེ་ཟུར་མཁར་དུ་ཟངས་བཞུས་ཀྱི་ལས་ཟླ་བ་བཅོ་བརྒྱད་བྱས་པས་རྟོགས་པ་ཁྱད་པར་ཅན་སྐྱེས། སློབ་དཔོན་སྤྲུལ་སྐུའི་ཆིབས་པ་ཕོ་དྲག་བཙད་པོས་ཁྱེར་བའི་ཚེ། རྡོར་ཐེབས་ཕུའི་སྣང་གསལ་བྲག་ལ་ཆོས་སྐྱོང་བསྒྲུབས་པས་མགོན་པོའི་ཞལ་གཟིགས། སྟོད་ལུངས་སུ་བསོད་སྙོམས་ལ་བྱོན་པའི་ཚེ་རྨི་ལམ་དུ་བླ་མ་དང་མཇལ་ནས་སྡུག་བསྔལ་རང་སངས་ལ་སོང་། དེ་ནས་བཟུང་སྡུག་བསྔལ་རང་རྒྱུད་པ་སྐྱེ་མ་མྱོང་གསུངས། གདན་སའི་བྱ་བ་དང་། ཞིག་པོའི་ཕྲིན་ལས་བསྒྲུབ་པའི་ཕྱིར། རྒྱལ་ཁམས་ཀུན་ཏུ་འགྲོ་དོན་རྒྱ་ཆེན་པོ་དང་། ལྷ་སའི་ཇོ་ཤཱཀ་གཉིས་ལ་ཞབས་ཏོག་ལོ་དྲུག་མཛད་དེ། དྲུག་ཅུ་རྩ་བརྒྱད་པ་ལྕགས་ཕོ་སྟག་གི་ལོ་ཨུ་རྒྱན་པའི་འཁྲུངས་ལོ་ལ་གཤེགས་ཤིང་། སྐུ་གདུང་དང་རིང་བསྲེལ་མང་པོར་བྱོན་ཏོ།། །། འདིའི་གཅུང་པོ་ཇོ་བསོད་ནི། སྐུ་ན་ཆུང་ངུ་ནས་ཞིག་པོའི་དྲུང་དུ་བྱོན། ཐུགས་ལ་བཏགས་ནས་སེམས་ཕྱོགས་རྫོགས་པར་གནང་། ཁྱོད་ཆོས་ལ་ནན་ཏན་བྱེད་པ་ཞིག་འདུག་པས་ངའི་རྩར་སོང་ཞེས་གསུངས་ནས། ལྷ་ཁང་པ་ཆེན་པོ་ལ་གཏད། མདོ་སྒྱུ་སེམས་གསུམ་རྫོགས་པར་ཐོབ་མཁས་པའི་ཕུལ་དུ་ཕྱིན་པ་གཅིག་བྱུང་སྟེ་སུམ་ཅུ་རྩ་གཅིག་པ་ལ་མྱ་ངན་ལས་འདས་པས་ཕྲིན་ལས་ཧ་ཅང་མ་སྨིན་ཏོ།། །། རྟ་སྟོན་གཟི་བརྗིད་ནི། སངས་རྒྱས་དཔོན་སྟོན་གྱི་སློབ་མ་ཡིན། མཁས་པ་ཆེན་པོར་གྱུར་པས་གསང་བའི་སྙིང་པོ་ལ་ཊི་ཀ་རྒྱས་པར་མཛད།
བརྒྱུད་པ་འདིའི་ལོ་རྒྱུས་ཕལ་མོ་ཆེ་ཡང་འདིས་མཛད་སྣང་། འོན་ཀྱང་གཡུང་སྟོན་པའི་ཁོག་དབུབ་དང་ཅུང་མི་གཅིག་པར་ཡོད། འདི་ཡན་ཆོད་དུ་སྒྱུ་འཕྲུལ་དང་སེམས་ཕྱོགས་མཐའ་དག་ལ་མཁས་པར་གྲགས།། །། ཡང་གཡུང་འགྲེལ་དུ་འཕྲོས་དོན་མང་དུ་སྨོས་པའི་འགྲེལ་པ་སྤར་ཁབ་ཀྱི་བཤད་རྒྱུན་མ་ཆད་པར་འདེད་པའི་ཁུངས་འདི་ནས། གཙང་པ་བྱི་སྟོན་དང་། སྒོང་དྲིངས་པ་ཉེ་སྟོན་ཆོས་ཀྱི་སེང་གེ་གཉིས་ཀྱང་གསང་བདག་སྒྲོ་ཕུག་པའི་སློབ་མ་ཡིན། དེ་གཉིས་ཀས་རྩངས་ནག་འོད་འབར་ལ་གསུངས། དེས་མེས་སྟོན་མགོན་པོ། དེས་བླ་མ་སྲོང་། དེས་པཀྴི་ཤཱཀ་འོད་དེ། འདི་ཟུར་པའི་གདུང་ཡིན། སྐྱེ་བ་སྔ་ཕྱི་ཐལ་ལེར་དྲན་པའི་ཟུར་དབང་ཆེན་འོད་པོ་ཞེས་གྲུབ་པའི་དབང་པོ་དེ་ལ་སྲས་མོ་ལྔ་ཡོད་དེ། སྲས་མེད་ནས་གདུང་བ་ཡོད་པའི་ཚེ། པཎ་ཆེན་ཤཱཀྱ་ཤྲཱི་ཤིང་ཕོ་བྱི་བའི་ལོ་ལ་ཁྲོ་ཕུར་གདན་དྲངས་པའི་ཕྱི་ནས་དབང་ཆེན་འོད་པོས་འུག་པ་ལུང་དུའང་སྤྱན་དྲངས། དེར་པཎ་ཆེན་གྱིས་འུག་པ་ལུང་འདི་གསང་སྔགས་ཀྱི་གནས་ཡོན་ཏན་དུ་མས་བརྒྱན་པར་འདུག །བྱང་ངོས་རི་རྒྱལ་བ་རིགས་ལྔའི་རང་བཞིན་དུ་སྣང་། བྱ་རི་དྭགས་ལ་སོགས་པ་འདི་དག་ཀྱང་འཕགས་པའི་སྤྲུལ་པར་འདུག །རབས་རེ་ལ་གསང་སྔགས་ཀྱི་ཆོས་སྒྲ་སྒྲོགས་པ་རེ་འབྱུང་བས་རིང་པོ་མ་ཡིན་པར་ཁྱེད་ལ་སྲས་གཉིས་འབྱུང་བས་དེ་ལ་ངའི་མིང་ལས་གྲས་པ་ཐོགས་ཤིག །བསྟན་པ་དང་འགྲོ་ལ་ཕན་པར་འོང་གསུངས། དེ་ནས་དེ་བཞིན་དུ་བྱུང་བས། སྲས་ཆེ་བ་ལ་ཤཱཀྱ་མགོན་དང་། ཆུང་བ་ལ་ཤཱཀྱ་འོད་ཅེས་བཏགས། གཅེན་འདི་ཡང་ངོ་མཚར་ཅན་བྱུང་། གཅུང་ཤཱཀྱ་འོད་ནི་ཆུང་ངུ་ནས་མངོན་ཤེས་རྡོལ་ཐབས་སུ་སྨྲ་ཞིང་། ཆོས་ཐམས་ཅད་བརྡའི་སྒོ་ནས་སྟོན་ཤེས་པའི་བརྟུལ་ཞུགས་ཅན་ཞིག་བྱུང་། རྒྱ་ཁབ་གོང་པ་བླ་མར་བསྟེན་ནས་ཡབ་ཆོས་མཐའ་དག་གསན། བར་དོ་མངོན་སུམ་དུ་གཟིགས་པས་གཞན་གྱི་གནས་ལུང་བྱེད་པར་བྱོན་ནས། ཁྱེད་ཀྱི་གཤིན་པོ་གཤེད་དང་མ་ཕྲལ། བྱང་ཆུབ་སེམས་ཀྱིས་མ་ཟིན་པའི་
ཆོ་ག་ལ་དོན་མེད་དོ། །གསུངས་ནས་གནས་ལུང་བསྐྱར་དགོས་པ་བྱུང་། ཉིན་གཅིག་ང་ལ་འགྱོད་པ་བྱུང་གསུངས། ཅི་ལགས་ཞུས་པས། ང་རིག་འཛིན་གྱི་ཚོགས་གྲལ་དུ་རྟག་པར་ཚུད་པ་ལ། ཕུ་བོ་ཤཱཀྱ་མགོན་ལ་ཚིག་རྩུབ་ཤོར་བས་དེའི་ནུབ་མོ་ནས་དམ་ཉམས་ཡིན་ཟེར་རིག་འཛིན་གྱི་གྲལ་དུ་མ་ཚུད་གསུངས་ནས་བཤགས་པ་མཛད། མི་ཉག་གྷ་རས་ལ་ཉེ་བ་དགྲ་རུ་ལངས་ནས་བོད་ན་མཐུ་སུ་ཆེ་དྲིས་པས། ཤཱཀྱ་འོད་པོ་ཆེ་ཟེར་བ་ཐོས་ནས་ཆ་རྐྱེན་མང་པོ་བསྐུར་ཏེ། ཟླ་བ་བརྒྱད་ཀྱི་ས་ཆ་ནས་ཀྱང་མཐུ་ཞུ་བར་བཏང་བྱུང་བ་ལ། ང་ལ་མཐུ་མེད། ངའི་འཁར་བ་འདི་དགོས་ན་ཁྱེར་གསུངས་ནས་ཡིག་ལན་ཀྱང་མ་མཛད། བང་ཆེན་གྱིས་ལོ་རྒྱུས་བརྗོད་པས། གྷ་རས་ཁྲོས་ཏེ་ངའི་དངོས་པོ་བཟུང་ནས་གདམས་ངག་མི་སྟེར་བ་ཟེར། ཕྱག་འཁར་བརྡབས་པས། དེའི་ཁོང་ནས་རྡོ་རྗེ་ལེགས་པ་ལྷ་བཞིའི་སྐོར་ཐོན། ཁོ་དགའ་སྟེ་བསྒྲུབས་པས། ཕ་ཚན་མང་པོ་རྩད་ཆད། དེའི་སྡིག་སྦྱོང་དང་དགེ་རྩ་ལ་ལྷ་ཁང་དང་མཆོད་རྟེན་བཞེངས། དྲིན་ལན་དུ་འབུལ་བ་མང་པོ་ཁྱེར་ནས་མི་ཉག་གྷ་ར་ཉིད་ཀྱང་བྱོན། ཟུར་ཤཱཀྱ་འོད་དང་མཇལ། གསང་སྙིང་ལ་སོགས་པའི་ཆོས་མང་པོ་ཉམས་སུ་ལེན་ཅིང་། གཉིས་ཀ་བསྡེབས་ནས་ལྷོ་བྲག་མཁར་ཆུར་བྱོན། ཁོ་མཐིང་ལྷ་ཁང་དང་། སྦ་གྲོ་ལ་སོགས་པའི་གནས་སུ་སྒོམ་ཞིང་བཞུགས་ཙ་ན། མངའ་བདག་ཉང་ཡབ་སྲས་དང་མཇལ། བཀའ་བརྒྱད་བདེ་འདུས་ལ་སོགས་ཏེ་ཉང་ལུགས་ཕལ་ཆེར་ཞུས། རང་གནས་སུ་ཕེབས། སླར་གྷ་རས་ན་རེ། བླ་མ་བཀའ་དྲིན་ཆེ། ངེད་ཧོར་ཡུལ་དུ་འགྲོ་བས་མི་གཅིག་གཏོང་བར་ཞུ། དྲིན་ལན་ཞབས་ཏོག་བྱེད་ཟེར་ནས་གཤེགས། དེའི་ཚེ་ཧོར་ཡུལ་ན་ནུ་བོ་ཨ་རི་བྷོ་གས་རྒྱ་ལས་བཟུང་ནས་རྒྱལ་པོ་སེ་ཆེན་གན་རྒྱལ་སྲིད་མ་ཐོབ་སྟེ་དམག་འཁྲུག་གཡོ་བའི་སྐབས་སུ་ཡོད། མི་ཉག་གྷ་རས་ལ་སེ་ཆེན་གན་གྱིས། བོད་ལ་མཐུ་བྱ་བ་ཡོད་ཟེར་བས་ཁྱེད་ཀྱིས་ཤེས་སམ་དྲིས། གྷ་རས་ན་རེ། ཤེས། གསད་པ་དང་། བསྐྲད་པ་དང་། འགུགས་པ་གསུམ་གང་བྱ་གསུངས།
དེར་སེ་ཆེན་གྱིས་ལས་ཀྱིས་ཤི་བ་དང་འགྲིགས་ན་གསད་པ་ཐེ་ཚོམ་ཆེ། འགྲོ་འདོད་པ་དང་ཐུག་ན་བསྐྲད་པ་ཡིད་གཉིས་ཟ། ངའི་སྒར་འདིར་དགྲ་བོ་ཁུགས་ན་མ་གཏོགས་ཡོང་འདོད་པ་ཁོ་ལ་མེད་ངེས་ཡིན་པས་ཁུག་ཅིག་ཟེར། དེར་བླ་མ་འཕགས་པ་རིན་པོ་ཆེ་དབང་པོར་བཞག་ནས། གྷ་རས་ཀྱིས་རླུང་འཁོར་གྱི་སྦྱོར་བ་བརྩམས་པས། ནུ་བོ་ཨ་རི་བྷོ་ག་བརྟན་པ་བྲལ་ནས་བྱུང་། ད་དུང་ཡི་དམ་ཆེས། མཚོ་འདི་དང་ཐང་འདིའི་དཀྱིལ་དུ་ཐོག་ཕོབ་ཅིག་ཟེར། གྷ་རས་ཀྱིས་དེ་དང་དེར་ཐོག་ཕབ་པས་ཡིད་ཆེས། སྔགས་པ་རྣམས་ལ་སྐྲག་པར་གྱུར་ནས་བྱ་དགའ་ཆེན་པོ་བྱས། འདི་པ་ཚལ་གྱི་སློབ་མ་གཤིན་རྗེ་ལ་ནུས་པ་ཐོབ་པ་གཅིག་ཡིན་ཟེར་ཏེ། དེ་ཡང་ཡིན་མོད། དྲག་སྔགས་ཀྱི་སྦྱོར་བ་མཐར་ཐུག་པ་ཟུར་པ་ལས་རྙེད་པ་ཡིན། དེར་པཀྴི་ཤཱཀ་འོད་ཀྱིས་སྟོན་པ་རཱ་ཧུ་བྱ་བ་གཅིག་མངགས་པས། གྷ་རས་དང་མཇལ། གནང་སྦྱིན་བཟང་པོ་བྱིན། མངའ་བདག་ཉང་གི་གཏེར་ཡིག་ཁ་བྱང་ན་གཙང་གི་སའི་ཆ་བྲག་རྡོ་རྗེ་ཚེ་བརྟན་ན་ཚེ་ཆུའི་གཏེར་ཡོད་པར་བཤད་པ་དེ། སྟོན་པ་རཱ་ཧུ་ལ་བསྐུར་ནས་བླ་མ་ཤཱཀ་འོད་ལ་འབུལ་དུ་བཅུག །དེ་དང་སྟབས་གཅིག་པར་སེ་ཆེན་གན་གྱི་ལུང་། ཤཱཀྱ་འོད་པོ་དང་། ཤཱཀྱ་མགོན་པོ་ལ་ཟློ་བ། རིམ་གྲོ་གང་དགོས་གྱིས་ལ། ཚེ་ཆུ་ཐོན་ལ་ངེད་ལ་སྐུར། དེའི་ཡོན་ཏན་འབྱུང་མོད། ཁྱེད་རྣམས་ཀྱི་སྐྱིད་སྡུག་ངས་ཤེས་པ་ཡིན། གཏོར་ཕྱེའི་བསྲེས་ལ་དངུལ་དྲེ་གཅིག་ཡོད། བྱ་བའི་གསེར་ཡིག་བྱུང་། དེར་རིམ་གྲོ་ཆེན་པོ་བྱས། གོང་མ་ནོན་ཆེས། གསེར་ཡིག་པ་ངང་ཐུང་བས་འོ་བརྒྱལ་བ་ཙམ་བྱུང་། སྒྱུ་འཕྲུལ་གྱི་བརྒྱུད་པ་ལ་སྒྲ་འོད་ཟེར་གསུམ་མའི་གསོལ་འདེབས་མཛད་པའི་ནུབ་མོ་གཏེར་སྒོའི་ལུང་བསྟན་གསལ་པོ་ཐོབ། དེ་ནས་ཟུར་ཤཱཀྱ་འོད། གུ་རུ་ཁྱུང་གྲགས། དཔོན་ཆེན་ཤཱཀ་བཟང་། གསེར་ཡིག་པ་ཨ་ག་ཡན་རྣམས་འཛོམས་ཁྲོམ་གཏེར་དུ་བྱས་པ་ལ། གཏེར་སྒོ་ལ་སྤུ་གྲི་རེག་ཆོད་ཀྱི་འཁོར་ལོ་འཁོར་ནས་འཛུལ་མ་ནུས། དེར་ཟུར་ཤཱཀྱ་འོད་ཀྱིས་གཟུ་དཔང་གསོལ། གཏེར་བདག་མཆོད་པས་སྤུ་གྲི་རང་མལ་དུ་བསྡད་
ནས་ཐམས་ཅད་ངོ་མཚར། གཏེར་ཁུང་ནས་སོལ་བ་གཡེངས་པའི་དཀྱིལ་ན་སྦལ་པ་ཁ་མིག་དེང་དེང་། ལག་པ་གདེངས་པ་མཐོང་བའི་མོད་ལ་རླུང་གི་འཁྲུལ་འཁོར་བྱུང་ནས་ཐམས་ཅད་ཧ་ལས། བླ་མས་རཀྴའི་ཕྲེང་བས་མནན་ནས། བདེན་པ་བདར་བས་རླུང་གི་འཁྲུལ་འཁོར་ཀྱང་ཞི། ཆུ་དར་གྱི་ཁེབས་བསལ་བས་ཟངས་ཀྱི་གའུ་གསུམ་སྦྲགས་ཀྱི་ནང་དུ་ཕོ་ཐོད་མོ་ཐོད་ཁ་སྦྱར་བའི་ནང་དུ་ཐོག་སྔས་པས་རེག་མ་ཐག་ཏུ་རྡུལ་དུ་བུན་ལོང་འགྲོ་བའི་དར་ཟབ་མང་པོས་གྲིལ་པའི་རྟ་ཕག་ཞལ་སྦྱོར། རྡོར་སེམས་ཡབ་ཡུམ། སྒྲུབ་ཐབས་ཀྱི་ཤོག་རིལ་བཅུ་གསུམ་གྱི་དབུས་ན་ཚེ་ཆུའི་སྣོད་མུ་མེན་གྱི་བུམ་པ་སྣག་བུམ་ཆེ་ཤོས་རྩམ་པ་བྱུང་བས་ཐམས་ཅད་ངོ་མཚར་སྐྱེས། ཕུད་བླ་མས་བཞེས་ན་དགུང་ལོ་བརྒྱ་ཐུབ་རྒྱུ་ལ། ལྗགས་ཐོག་ནས་ཐུར་མས་ཕྲི་བས་རྟེན་འདྲེལ་འཕྱུགས། དེ་ཚས་མང་པོར་གྲིལ་ནས་གཉིད་མི་ལོག་པའི་བརྩོན་པས་རྒྱ་ནག་ཏུ་ཁྱེར། རྒྱལ་པོ་སེ་ཆེན་གན་གྱིས་གསོལ་བས་ལོ་བརྒྱ་འཚོས་པར་གྲགས། དེའི་བྱ་དགར་དབུས་གཙང་ན་ཡོད་པའི་སྔགས་པ་ཐམས་ཅད་ཁྲལ་དམག་ལས་ཐར་དུ་བཅུག་པའི་འཇའ་ས་ལོངས། གོང་མའི་བླ་མ་རྣམས་དང་བྱས་པ་མཉམ་པའི་ཕྱིར་པ་ཤིར་བཏགས། ཚེ་ཆུའི་ཡོན་དུ་སྤན་ཧོར་དུད་ཞེ་ལྔའི་ས་ཕུལ། མེས་འགྲིལ་གྱི་རི་ལ་དགོན་པ་ཆེན་པོ་འདེབས་པར་བཞེད་པ་ལ། ཀླུའི་གྲོང་ཁྱེར་ཆེན་པོ་ཡོད་པས་ཀླུས་ཞུ་བ་ཕུལ། རྒྱ་རྒན་གྱི་ཐད་མཚོར་ཡོད་པས་ཚབ་ཏུ་ཕུལ་བ་ཀླུའི་ཆོ་འཕྲུལ་གྱིས་སྐམས་སུ་བཅུག་ནས་དེར་སྔགས་སྡེ་ཆེན་པོ་བཏབ། མཁར་རྡོ་རྗེ་བྲག་གི་ལྟེ་བ་ལ་སྒྲུབ་པ་རྩེ་གཅིག་ཏུ་མཛད་ནས་དྲུག་ཅུ་རྩ་གསུམ་པར་གཤེགས། པུར་ལ་རེག་པས་མཛེ་ནད་སོས་པ་བྱུང་ངོ་།། འདིའི་སློབ་མ་རྟ་ནག་བདུད་འདུལ། དེས་མདའ་ཤཱཀྱ་འཕེལ། དེ་ལས་ཟུར་བྱམས་པ་སེང་གེས་གསན་ཏེ། འདིའི་ཡབ་ལ་ཟུར་ཉི་མ་སེང་གེ་ཞེས་བྱ་སྟེ་མེས་པོ་པ་ཤིའི་སྲས་ཡིན། ཁྲོ་ཕུར་རབ་ཏུ་བྱུང་། ཁྲོ་ལོ་བྱམས་པ་དཔལ་གྱིས་མཚལ་གསོལ། ཡོན་
ཏན་དུ་མ་དང་ལྡན། ཁྱད་པར་བྱང་ཆུབ་སེམས་ཀྱི་རྩ་བ་བརྟན་པས་ཧོར་དམག་གི་དུས་མི་ཆེན་སམ་བྷ་ཏས་གསེར་མང་པོ་ཕུལ་བ་ལ། བདག་གསེར་མི་འདོད། མི་འཇིགས་པའི་སྦྱིན་པ་འཚལ་བར་ཞུ་བྱས་ནས་འགྲོ་བ་མང་པོའི་སྲོག་བསྐྱབས། ཁྲོ་ཕུའི་འབུམ་ཆེན་བརྩིགས་དུས་སུ་ཆུ་ཤིན་ཏུ་དཀོན་པ་ལ་མཐུ་རྩལ་གྱིས་ཆར་རྒྱུན་ཆེན་པོ་ཕབ། སྟོད་ཧོར་གྱིས་ས་སྐྱའི་བསྟན་པ་ལ་ཤིན་ཏུ་འཚེ་བར་བརྩམས་དུས། གོང་མ་མཆོད་ཡོན་གྱི་ལུང་དང་། དཔོན་ཆེན་ཀུན་གཞོན་གྱི་བཅའ་ཧུ་བྱུང་བ་ལྟར། དྲག་པོ་མངོན་སྤྱོད་ཀྱི་ནུས་པས་དམག་ཁྲི་ཚོ་གསུམ་གངས་དབྲག་ཏུ་སྲོག་གི་རྒྱུ་བ་བཅད་པས་ས་བསྟན་ལའང་ཕྱག་རྗེས་ལྷག་པར་ཆེ། བར་དགའ་ལྷ་ཁང་སྐུ་གསུང་ཐུགས་ཀྱི་རྟེན་དང་བརྟེན་པ་བསྐྲུན་པས་མཚོན་བསྟན་འགྲོའི་དོན་ལ་ཕྲིན་ལས་རླབ་ཆེ་བ་དེའི་སྲས་ཡིན།། །། དེ་ལ་ཟུར་བྱམས་པ་སེང་གེ་འདི། ཐེག་པ་ཆེན་པོའི་རིགས་སད་པས་བྱིས་པའི་དུས་ནས་སྙིང་རྗེ་ཆེ་བ་ཞིག་ཡོད། གཞན་གྱིས་སེམས་ཅན་ལ་འཚེ་བ་བྱེད་པ་གཟིགས་ན་ཐུགས་ལ་ཁུར་ཆེན་པོ་བྱུང་། ཁྲོ་ཕུར་རབ་ཏུ་བྱུང་ནས་མཚན་ཡང་དེ་ལྟར་ཐོགས། མཚན་ཉིད་ཀྱི་རིག་པ་དང་ཁྲོ་ཕུའི་ཆོས་ལུགས་མཁས་པར་མཁྱེན་ནས་དགུང་ལོ་བཅུ་བཞི་ལ་བཤད་པ་མཛད་པས་མཁས་པའི་གྲགས་པ་ཐོབ། གཡུང་སྟོན་རྡོ་རྗེ་དཔལ་བས་ཀྱང་ཁོ་བོའི་བླ་མ་ཟུར་ཐམས་ཅད་མཁྱེན་པ་ཞེས་གསུངས། ཁྲོ་ཕུའི་ཆོས་ཁྲི་ལ་བཞུགས་ནས་གྲྭ་པ་རྣམས་ལ་མངོན་པ་གསུངས་པས་ཐོག་ཆོད། དགུང་ལོ་བཅོ་ལྔ་ལ་འུག་བྱ་ལུང་དུ་མདའ་ཤཱཀྱ་འཕེལ་ལས་གསང་སྙིང་གསན་སྦྱོང་མཛད་པས་མཁས་པའི་དབང་པོར་གྱུར། བཅུ་བདུན་ལ་རྒྱུད་ཀྱི་རྣམ་གཞག་མཛད་ནས་ཆོས་གཞི་བཟུང་། བཅུ་དགུ་ལ་ལྕེ་སྟོན་སྒྲུབ་པ་འབུམ་ལ་སྒྱུ་འཕྲུལ་ལམ་རིམ་དང་། རྫོགས་ཆེན་གསན་པས་རྟོགས་པ་ཐོད་རྒལ་དུ་སྐྱེས། ཉི་ཤུ་ལ་ལ་སྟོད་ནས་རྟ་སྟོན་གཟི་བརྗིད་སྤྱན་དྲངས་ནས། སྒྱུ་འཕྲུལ་ཟུར་ལུགས་ཀྱི་ཕན་ནུས་ཟབ་གསུམ་གྱི་དབང་དང་། དགོངས་འདུས་རྩ་ལུང་སྐོར་ཞུས།
ཟུར་ལུང་པ་གྲུབ་ཐོབ་བཤིས་གཉེན་ལས་མདོ་དབང་དང་། སེ་ལུགས་ཀྱི་ཞི་ཁྲོ་རྒྱས་འབྲིང་བསྡུས་གསུམ་གསན། ཐར་ལོ་ཉི་མ་རྒྱལ་མཚན་ལ་སྒྲ་ཚད། ཁྲོ་ཕུའི་སློབ་དཔོན་དཔལ་མཆོག་ལས་རྡོ་རྗེ་ཕྲེང་བས་མཚོན་པའི་གསར་མ་རྒྱ་ཆེན་པོ། བསམ་སྡིངས་གྲུབ་པ་དཔལ་ལས་ལམ་འབྲས། བླ་མ་ཡོན་ཏན་མགོན་ལས་ཕྱག་རྡོར་དང་རྣམ་འཇོམས། དཔོན་དཔལ་ཆེན་མགོན་ལས་བསྟན་སྲུང་དང་། སྨན་རྩིས་གཡུལ་རྒྱལ་གངས་པ་ཤཱཀ་འབུམ་ལས་གཤིན་རྗེ་དམར་ནག་དང་། ཀློང་སྡེའི་སྐོར་ལ་སོགས་ཏེ་མདོར་ན་བླ་མ་མང་པོ་ལས་རིག་གནས་ཕྱི་ནང་། སྡེ་སྣོད། རྒྱུད་སྡེ་མཐའ་ཡས་པ་ཞིག་གསན་ཞིང་། རྩ་བ་ཆོད་པར་སྦྱངས་ནས་གཙོ་བོར་ཐུགས་དམ་འབའ་ཞིག་ལ་བཞུགས། ཡི་དམ་མང་པོས་ཞལ་གཟིགས། སྐུ་མདུན་ན་སུས་སླེབ་པ་ཡིན་ཡང་སྣང་བ་རང་སར་འགྱུར་ནས། ངེས་འབྱུང་དང་དད་པ་དང་། སྙིང་རྗེ་རང་དབང་མེད་པར་སྐྱེ་བ་ཞིག་ཡོད་པར་གྲགས། ལར་སྐྱེས་བུ་དམ་པ་འདི་ལ་བོན་པོ་ཞིག་གིས་ཟས་ངན་སྦྱར་བས་དགུང་ལོ་ཉི་ཤུ་རྩ་བདུན་ལས་མ་བཞུགས་ཏེ་མཁྱེན་བརྩེ་ནུས་གསུམ་གྱི་ཡོན་ཏན་དཔག་པར་དཀའ་བས་སྤྲུལ་པའི་སྐུར་ཡིད་ཆེས་སོ། །དེ་ལ་སློབ་མའི་ཚོགས་བསམ་གྱིས་མི་ཁྱབ་ཅིང་། སྒྱུ་འཕྲུལ་ལམ་རིམ། གསང་བའི་སྙིང་པོ། འགྲེལ་པ་སྤར་ཁབ། མདོ་དང་བཅས་པ་ཚད་དུ་རྫོགས་པའི་བཤེས་གཉེན་གཞན་ཕན་རྒྱ་ཆེར་སྤྱོད་ཅིང་གྲགས་པ་ཐོབ་པ་རང་ཡང་བཅུ་དྲུག་ཙམ་ཡོད་པ་ལས། གཙོ་བོར་གྱུར་པ་ནི་སྔ་ཚར་གྱི་ཐུ་བོ་གཡུང་སྟོན་རྡོ་རྗེ་དཔལ། ཕྱི་ཚར་གྱི་ཐུ་བོ་རྟ་ནག་སྒྲོལ་མ་བ་བསམ་འགྲུབ་རྡོ་རྗེའོ།། །། དེ་ལ་གཡུང་སྟོན་པ་ནི། གདུང་རུས་གླན། ཤིང་ཕོ་སྤྲེའུའི་ལོར་སྐྱེ་བའི་མྱུ་གུ་ཚོང་འདུས་སུ་བཟུང་། སྐུ་གཞོན་ནུ་ནས་མཁྱེན་པ་ཕུན་སུམ་ཚོགས། སྤྱིར་མཚན་ཉིད་ཐམས་ཅད་མཁྱེན་ཅིང་ཁྱད་པར་མངོན་པ་ཀུན་ལས་བཏུས་ལ་མཁས། སྔགས་གསར་རྙིང་ཐམས་ཅད་ལ་བློ་མཐུ་ཤིན་ཏུ་ཆེ། ཁྱད་པར་ཀརྨ་པ་རང་བྱུང་རྡོ་རྗེའི་སྲས་ཀྱི་
དམ་པར་གྱུར་ཅིང་། ཟུར་བྱམས་པ་སེང་གེ་ལས་མདོ་སྒྱུ་སེམས་གསུམ་གྱི་མན་ངག་རྫོགས་པས་ཕྱོགས་འདི་ལའང་སྨྲ་བའི་དབང་ཕྱུག་ཆེན་པོར་གྱུར། གསང་བའི་སྙིང་པོ་ལ་ཊི་ཀ་གསལ་བྱེད་མེ་ལོང་མཛད་དེ་བཤད་རླབས་གཞན་ལས་ཆེ། ཟུར་བྱམས་པ་སེང་གེའི་གངས་པ་ཤཱཀ་འབུམ་ལས་གཤེད་སྐོར་གསན་པའི་ཕྱག་ཕྱིར་འབྲངས་ནས་བསླབ། འཁྲུལ་འཁོར་ལས་སྦྱོར་སོགས་ལ་ཤིན་ཏུ་མཁས་ཤིང་མཐུ་ཆེ་བས། སླར་ཟུར་བྱམས་པ་སེང་གེའི་སྐུ་ཚེ་ལ་བར་དུ་གཅོད་པའི་ལྷ་ཁུ་དབོན་པོ་ལ་གཤིན་རྗེའི་འཁོར་ལོ་བསྐོར་ནས་མི་ནོར་ཞིང་ཁང་དང་བཅས་པ་གཙང་པོ་ལ་སྦྱངས་ཏེ་རྨེག་མེད་དུ་བཏང་དུས། བླ་མའི་སྐུ་དགྲ་ཐུལ་བ་ཁོ་བོ་ཙམ། ཞེས་པའི་ཚིགས་བཅད་ཀྱང་མཛད། སྐུ་གཞོན་དུས་གོང་མའི་ལུང་གིས་རྒྱ་ནག་ཏུ་བྱོན། སྔར་འཇིག་རྟེན་གྱི་ཁམས་ན་མ་གྲགས་པ་ཙམ་གྱིས་མདོས་གཏོར་མཛད། ཡུལ་གྲུ་འགའ་ཞིག་ལ་ཐན་པ་ཆེན་པོ་བྱུང་བས། གོང་མའི་ལུང་གིས་བསྔགས་ཏེ་ཆར་འབེབས་མཛད་པས་ནུས་པ་མངོན་སུམ་དུ་ཐོན། གོང་མ་དགྱེས་ཏེ་བྱ་དགའ་ཆེན་པོ་བྱིན་པའི་ནོམ་པ་དང་བཅས་བོད་དུ་ཕེབས། དངོས་པོ་རྣམས་ངོ་ཤེས་དང་གྲོགས་མཆེད་སུ་ལའང་མ་བྱིན་པར་ཡུམ་གྱི་དོན་དུ་བླ་མ་དང་དགེ་འདུན་ལ་ཕུལ། བུ་སྟོན་རིན་པོ་ཆེའི་ཡང་སློབ་མར་གྱུར་ནས་དུས་ཀྱི་འཁོར་ལོ་ལ་ཤིན་ཏུ་མཁས། རྒོད་སྒྲོས་ཆུའི་གྲོད་པ་དུམ་བུར་བཅད་ཀྱང་ཆུ་མི་འབོ་བ་དང་། ལྕགས་བསྲེགས་ལ་ཤ་རྗེན་གྱིས་རེག་ཀྱང་མི་འཚིག་པ། རྩིགས་པ་ལ་རྡོ་དྲུག་སྦྱོར་གྱི་ཞལ་བ་བྱས་པས་རྩིགས་པ་བྲག་ཆེན་ལ་འགྱུར་བ་ལ་སོགས་པའི་རྟེན་འདྲེལ་མང་པོ་མཁྱེན། གཙོ་བོར་ཀརྨ་པ་རང་བྱུང་རྡོ་རྗེའི་དབུགས་འབྱིན་ཆེན་པོས་མན་ངག་སྤྱི་དང་ཁྱད་པར་རྫོགས་པ་ཆེན་པོ་ལ་ཉམས་བཞེས་མཛད། རྒྱ་ཆེར་རོལ་པ་ལས་བཤད་པའི་གཏེར་ཆེན་པོ་བརྒྱད་ཐོབ་པས། ལེགས་པར་བཤད་པས་སེམས་ཅན་ཐམས་ཅད་ཚིམ་པར་བྱེད་པ་སྤོབས་པའི་གཏེར་ཆེན་པོ་ཡོངས་སུ་གྲོལ་ནས། མདོ་སྔགས་ཀྱི་སངས་རྒྱས་ལ་ཁྱད་པར་ཕྱེ་
བའི་བསྟན་བཅོས་མཛད་པ་གཡག་སྡེ་པཎ་ཆེན་གྱིས་གཟིགས། ཤིན་ཏུ་དད་པས་དཔོན་སློབ་བཅོ་ལྔས་བྱོན་ཏེ་ཞབས་ལ་གཏུགས། སྐུ་ཚེའི་སྨད་ལ་ཚོགས་པ་ཆོས་ལུང་པ་ལས་བསྙེན་པ་རྫོགས། མཚན་རྡོ་རྗེ་འབུམ་ཞེས་པ་རྡོ་རྗེ་དཔལ་དུ་བསྒྱུར། མོན་སྤ་གྲོ་དང་། ཕུང་པོ་རི་བོ་ཆེ། ར་དུམ་བྲག་ལ་སོགས་པར་བཞུགས་ཤིང་བཤད་པས་ཀྱང་གཞན་ལ་ཕན་པ་རྒྱ་ཆེན་པོ་མཛད། བརྒྱད་ཅུ་རྩ་གཉིས་པ་ཤིང་མོ་སྦྲུལ་གྱི་ལོར་ཞི་བར་གཤེགས་སོ།། །། རྟ་ནག་སྒྲོལ་མ་བ་བསམ་འགྲུབ་རྡོ་རྗེ་ནི། སྔགས་རྙིང་མ་ལས་དངོས་གྲུབ་བརྙེས་པ་རིམ་ཅན་གྱི་སྲས་སུ་རྟ་ནག་གནས་གསར་དུ་འཁྲུངས། ཟུར་བྱམས་པ་སེང་གེ་ལས་གསན་པ་རྒྱ་ཆེན་པོ་མཛད་ཅིང་ཁྱད་པར་སྒྱུ་འཕྲུལ་ལ་མཆོག་ཏུ་མཁས། གླན་ཉ་ཚལ་པ་བསོད་ནམས་མགོན་པོ་ལ་སྒྱུ་འཕྲུལ་གྱི་དབང་ནོད། མཁྱེན་པ་དང་ཕྲིན་ལས་དཔག་པར་དཀའ་བ་ཡིན་ཏེ་དབེན་པ་འབའ་ཞིག་ལ་ཐུགས་གཏད་དོ། །བྱེ་མ་སེང་གེར་རྫོགས་པ་ཆེན་པོ་སྙིང་ཐིག་ལ་ཐུགས་དམ་རྩེ་གཅིག་ཏུ་མཛད། རིག་པ་ཚད་ལ་ཕེབས་ཏེ་སངས་རྒྱས་ཀྱི་ཞིང་ཁམས་རྒྱ་མཚོ་དང་མཉམ་པ་ཉིད་དུ་སྤྱོད། ཡང་དབེན་པའི་ཟུར་ཤཱཀྱ་འབྱུང་གནས་དང་། འུག་པ་ལུང་པའི་བླ་མ་སེང་གེ་པ་གཉིས་ཆུང་ཆུང་ནས་སྐུ་དྲུང་དུ་བཞག་ནས་ལེགས་པས་བསྐྱངས་པའི་བླ་མའི་དམ་ཚིག་ལ་གཅིག་ཏུ་གུས་ཤིང་། ཟུར་རྒྱུད་ལ་བཀའ་དྲིན་ཆེ། ཤངས་པ་ཀུན་མཁྱེན་ཞེས་གྲགས་པ་བླ་ན་གསལ་བ་དེའང་བྱིས་པའི་དུས་ན་བླ་མ་འདིས་དབང་མང་པོ་བསྐུར་ཞིང་བྱིན་གྱིས་བརླབས་པས་མཁས་པ་ཆེན་པོར་གྱུར་པ་སོགས་བྱིན་རླབ་བསམ་གྱིས་མི་ཁྱབ། དགུང་ལོ་བརྒྱད་ཅུ་རྩ་གཉིས་པ་མེ་ཕོ་འབྲུག་གི་ལོ་གཤེགས་ཁར་སྲས་ལ། ང་བདེ་བ་ཅན་དུ་འགྲོ། ཁྱེད་ཀྱིས་ཀྱང་ངའི་ལོ་དང་མཉམ་པ་ཐུབ། དེ་ནས་བདེ་བ་ཅན་དུ་ཤོག་ཅེས་གསུངས་ནས་གཤེགས། དེ་ལ་ཟུར་བརྒྱུད་དང་། སྲས་བརྒྱུད་གཉིས་ལས་ཟུར་བརྒྱུད་ནི། ཟུར་ཧམ་ཤཱཀྱ་འབྱུང་གནས་ཏེ། འདིའི་ཡབ་ཟུར་བཟང་པོ་དཔལ་ཞེས་བྱ་བའི་རིང་ལ་གོང་མ་བུ་ཡན་ཐུ་གན་
གྱི་ལུང་དང་གནང་བྱིན་བླངས། སླར་གོང་མའི་ལུང་གིས་རྒྱ་ནག་ཏུ་འབྱོན་དགོས་པ་བྱུང་། དང་པོ་གོང་མ་རྒྱལ་པོའི་རིམ་གྲོ་པར་གྱུར་ལ་མཐུ་རྩལ་དང་ནུས་པ་ཤིན་ཏུ་ཆེ་བས་ལོ་ཉེས་ལས་སྐྱོབས་པ་དང་། མདོས་ཟོར་ཐོག་སེར་ལ་སོགས་པས་ངོ་ལོག་ཆོམས་ནུས། ཁྱད་པར་རྒྱལ་པོའི་ཕོ་བྲང་ཏའི་ཏུའི་སྟེང་གི་ནམ་མཁར་མི་མཐུན་པའི་མཚན་མ་སྤྲིན་ནག་པོ་སྡིག་པའི་གཟུགས་ཅན་བྱུང་བ་སུས་ཀྱང་བཤིག་མ་ནུས་པའི་ཚེ། རྒྱལ་པོའི་ལུང་གིས་སྐབས་དབྱེ་ནས་མ་མོ་འཁང་ཕབ་ཀྱི་མདོས་དར་ཁང་བཅོ་བརྒྱད་ཀྱིས་བཅིངས་པ་བཏང་། གཏོར་འཆམས་མཛད་པས་སྤྲིན་ནག་འཐོར་བ་སོགས་མཐའ་འཁོབ་ཀྱི་ཡུལ་དུ་དམ་པའི་ཆོས་ཀྱི་ཆེ་བ་ལན་མང་དུ་བཏོན་པས་གོང་མ་དད་དེ། ཡང་དག་ལྷ་དགུའི་དབང་དང་ཚེ་དབང་ཞུས། དངུལ་གྱི་ཐམ་ཀ་དང་། དངུལ་དྲེ་བཅུ་གསུམ། ཕོད་ཁ་ཕྱེད་གཉིས་བརྒྱ་འདེངས་པའི་གོས་དར་གྱི་འབུལ་བ་ཕུལ། ཕོ་བྲང་ཏའི་ཏུར་སྔགས་སྡེ་བཙུགས། དེའི་དུས་ཀྱི་ལས་བཞིའི་ཕུར་པ་ཕོ་བྲང་ན་ཡོད་པར་གྲགས། དེ་ལྟར་ཟང་ཟིང་གི་རྫས་འབྱོར་པ་ལས་རྩ་རྒྱུད་གསང་སྙིང་། འགྲེལ་པ་སྤར་ཁབ། གསང་སྔགས་ལམ་རིམ། མན་ངག་དགུ་པ་སོགས་པའི་སྔ་འགྱུར་གྱི་ཆོས་སྡེ་ཉི་ཤུ་རྩ་བརྒྱད་པར་དུ་བསྒྲུབས། སོ་སོ་ནས་སྟོང་ཕྲག་རེ་བཏབ་སྟེ་གྲྭ་པ་ལ་བཀྱེ། རྒྱུད་འབུམ་བཞེངས་པའི་ཆ་རྐྱེན་མང་པོ་བསྐུར་བ་སོགས་བསྟན་པ་ལ་ཕན་པ་རྒྱ་ཆེ། སླར་རྒྱལ་པོ་བུ་ཡན་ཐུ་རླུང་གི་ནད་ལ་ཚད་པའི་བཅོས་བྱས་ནས་གཤེགས། འདི་དུས་ས་སྐྱ་དང་ཟུར་ཚོ་རྣམས་གྲུབ་མཐའི་སྙིང་པོ་གཅིག་པས་འདྲིས་ཤིན་ཏུ་ཟབ་པ་ཡིན། རྒྱུ་དེས་ཟུར་བྱམས་པ་སེང་གེ་གཤེགས་པའི་ལོ་རྒྱུས་ས་སྐྱར་བསྐྱལ་བས། དེ་མ་ལེགས། ད་ཟུར་བཟང་པོ་དཔལ་རྒྱ་ནག་ནས་བོས་ཤིག་གསུངས། གཞན་རྣམས་ཀྱང་བགྲོས་ནས་ཉེ་གནས་འཇམ་དབྱངས་གདན་འདྲེན་དུ་བཏང་། དེས་རྒྱ་ནག་ཏུ་བརྟོལ་བའི་ཚེ་ཚད་པའི་ནད་ཀྱིས་བསྙུན་ནས་འགྲོངས་ལ་ཁད་ཡོད་དེ། མཁའ་འགྲོ་ཆོས་སྐྱོང་གི་བྱིན་གྱིས་བརླབས་ནས་ཅུང་དྲག་པའི་མགོ་བསྟན། དེའི་ཚེ་ཉིད་ཀྱི་གཟིགས་སྣང་ལ་རྒྱལ་
པོ་བུ་ཡན་ཐུ་དང་མཇལ་ནས། ཁྱོད་བོད་དུ་འབྱོན་ནམ་གནང་སྦྱིན་ཇི་ལྟར་བྱིན་ཅེས་གསུངས་པ་ལ་ལན་ཞིབ་ཏུ་ཞུས་པས། ཅི་ཡང་མ་བྱིན་པར་འདུག་གསུངས་ནས་ཡལ། དེའི་ལོ་རྒྱུས་དཔོན་མོ་ཐའུ་ལས་ཐོས་ཏེ་ཁྱོད་མཐོང་བས་གོང་མ་དྲན་ཟེར་ནས་མཆི་མ་ཕྱུང་། སླར་དངུལ་དྲེ་བཅུ་བྱིན། རྡོ་རྗེ་སེམས་དཔའི་སྐུ་རྒྱ་ནག་ལི་མ་དང་། ཆོས་སྐྱོང་ལྕམ་དྲལ་གྱི་འཆམས་སྐུ་བཞེངས་པ་གདན་དྲངས་ནས་བོད་ལ་བྱོན་པའི་ཚེ་མགོན་པོས་བོད་ལ་ཞལ་གཟིགས་ནས་གོམ་པ་བདུན་འཕགས་པས་བསེ་འབག་གོམ་བདུན་མར་གྲགས། བོད་དུ་བྱོན་ནས་བསྟན་པའི་བྱ་བ་ལ་རྒྱུད་འབུམ་བཞེངས། ཆོས་སྐྱོང་བྲན་དུ་འཁོལ། མ་འོངས་པ་མངོན་སུམ་དུ་ལུང་སྟོན། སླར་ཡང་གོང་མའི་ལུང་གིས་རྒྱ་ནག་ཏུ་གཤེགས་དགོས་པ་བྱུང་བའི་ཚེ། འབྱོན་པར་མི་སྤྲོ་བས། རྒྱལ་པོའི་ཕོ་ཉ་ཐེ་མུར་དར་དང་། གྷ་ར་ལ་དངུལ་དྲེ་ལ་སོགས་པ་བྱིན་ཏེ་སློག་ཀྱང་རྒྱལ་པོའི་ཆད་པ་འོང་ཟེར་འགྲོ་མ་འདོད། དེར་རང་དབང་ཐམས་ཅད་བདེ་བ་ཡིན། གཞན་དབང་ཐམས་ཅད་སྡུག་བསྔལ་ཡིན། ཞེས་པ་ལ་སོགས་པའི་ཞལ་གདམས་མཛད་ནས་རྒྱ་ནག་ཏུ་གཤེགས་སྤྱིར་དགུང་ལོ་སུམ་ཅུ་སོ་བརྒྱད་ལས་མ་བཞུགས་པ་དེའི་སྲས་ཡིན། དེ་ལ་ཟུར་ཧམ་ཤཱཀ་འབྱུང་འདིས་ཆུང་ངུ་ནས་ཡབ་མེས་ཀྱི་ཆོས་ལ་སྦྱངས་ཤིང་ལས་སད་པས། རང་ལོ་ལྔ་པར་ཡབ་རྒྱ་ཡུལ་དུ་གཤེགས་པའི་བསུ་བ་མི་ཆེན་དང་བཅས་པའི་དབུས་སུ་རྩ་རྒྱུད་ལ་བཤད་པ་ཐོ་རེ་ལོང་མཛད་པས་ཐམས་ཅད་ཧ་ལས། དགུང་ལོ་བདུན་པ་ནས་བཤད་གྲྭ་བསྐྱངས། བླ་མ་ཀུན་སྤངས་སར་དགེ་ཚུལ་དང་། ཆོས་རྗེ་བསོད་ནམས་གྲགས་པ་ལས་བསྙེན་པར་རྫོགས་པའི་མཚན་ཤཱཀྱ་འབྱུང་གནས་སུ་གྲགས། ཟུར་པ་ཤིའི་སྲས། ཟུར་ཤཱཀྱ་སེང་གེ་ཞེས་བྱ་བ་གོ་ལུག་རྒྱལ་པོའི་ལུང་དང་། གནང་བྱིན་གསེར་དྲེ་ཆེན་སྲང་དྲུག་ཅུ་མ་བཞི། དངུལ་དཀར་དྲེ་ཆེན་ཉི་ཤུ། གོས་ཕྱི་ནང་ཉིས་བརྒྱ་རྣམས་ཐོབ་ཅིང་། དཔོན་མོ་ཐའུ་སོགས་པས་ཀྱང་བདོག་པ་རྒྱ་ཆེར་བྱིན་པས་ཟུར་པའི་བསྟན་སྲིད་ལ་
ཕན་པ་རྒྱ་ཆེར་བཏགས་ལ། ཁྱད་པར་རྒྱལ་བ་ཟུར་པོ་ཆེའི་སྐུ་ཆོས་ཀྱི་དུམ་བུ་བཞུགས་པའི་འཇམ་དབྱངས་ཀྱི་གསེར་སྐུ་ཤིན་ཏུ་མཚར་པ་བཞེངས་ནས་དཔལ་འུག་བྱ་ལུང་གི་རྟེན་གཙོར་མངའ་གསོལ། བཤད་གྲྭ་དང་སྒོམ་གྲྭའི་ཚུགས་ཁ་ཆེན་པོ་ཟིན་པར་བྱས། བདོག་པ་ལ་འཕངས་པ་མེད་པས་བསྟན་པའི་རིམ་གྲོ་ལྷུར་ལེན། མཐོང་ན་མི་མཐུན་པ་མེད་པའི་གཟི་བྱིན་གྱིས་ཧོར་གྱི་མི་ཆེན་ཐེ་མུར་དར་ཀྱང་དད་པར་གྱུར་ནས་ཚེ་དབང་ཞུ་བ་ལ་སོགས་པའི་དང་བ་སྟོན་ནུས་པའི་སེམས་དཔའ་ཆེན་པོའི་ངང་ཚུལ་ལ་གནས་པ་དེ་དང་། ས་བཟང་ལོ་ཆེན། རྒྱལ་བ་གཡུང་། འཇམ་དབྱངས་བསམ་འགྲུབ་རྡོ་རྗེ། ས་སྐྱ་བའི་གདུང་བརྒྱུད། ཟུར་པའི་དབུ་ཆེ་གྲགས་པ་ཆེ་བ་རྣམས་ཀྱིས་མཚོན་བོད་དབུས་གཙང་གི་མཁས་བཙུན་བཟང་གསུམ་ཐམས་ཅད་ལ་གཏུགས་ནས་མཚན་ཉིད་སྡེ་གསུམ། གསང་སྔགས་གསར་རྙིང་ཐམས་ཅད་ཀྱི་གཞུང་དང་མན་ངག་ལ་ལེགས་པར་སྦྱངས། ཁྱད་པར་དུ་མངོན་རྟོགས་རྒྱན། སྤྱོད་འཇུག །དུས་ཀྱི་འཁོར་ལོ། ཀུན་བྱེད་རྒྱལ་པོ། སྒྱུ་འཕྲུལ་ལམ་རིམ། གསང་བ་སྙིང་པོ། འགྲེལ་པ་སྤར་ཁབ་རྣམས་ལ་ནན་ཏན་དུ་སྦྱངས་པས་མཁས་གྲུབ་ཆེན་པོར་གྲགས། དུས་ཕྱིས་མདོ་དབང་ཟུར་ལུགས་ཀྱི་བསྟན་པའི་བདག་པོ་འདི་ཁོ་ན་ཡིན། སྒྲོལ་ཆེན་བསམ་རྡོར་ལས་མདོ་དབང་གསན་པའི་ཚེ། རྒྱ་བོད་ཀྱི་ན་བཟའ། ཐབ་ཆས། ནས་ཁལ་ལྔ་བཅུ་སོགས་ཀྱིས་སྣ་དྲངས་པའི་འབུལ་བ་བྱས་ཏེ་ལུང་ལག་ལེན་ཕྱག་བཞེས་ཐམས་ཅད་མཐའ་ཆོད་པར་མཛད། གཏད་རྒྱ་ཁོ་ནའི་དོན་དུའང་གོས་ཡུག་ཆེན་དང་གསེར་གྱི་འབུལ་བས་མཉེས་པར་མཛད། ཤཱཀྱ་ཐུབ་པ་དང་། ཧེ་རུ་ཀ་རིགས་ལྔ་གཟིགས་སྣང་དུ་ཤིན་ཏུ་གསལ་བ་གཟིགས། འདུས་པ་མདོའི་ལྷ་ཐེམས། གཏད་རྒྱའི་འགྲེལ་པ་སོགས་མང་དུ་མཛད། མདོ་སྒྱུ་སེམས་གསུམ་གྱི་བསྟན་པ་ལ་བྱ་བ་རྒྱ་ཆེན་པོ་མཛད་ཅིང་། སྒྲོལ་མའི་སྲས་སངས་རྒྱས་རིན་ཆེན་དང་། གཉལ་པ་བདེ་ལེགས་པ་ལ་སོགས་ཏེ་བསྟན་པའི་གསལ་བྱེད་དུ་གྱུར་པའི་སློབ་མ་མང་དག་བསྐྲུན་ནས་དགུང་ལོ་སུམ་ཅུ་སོ་
བརྒྱད་ལ་གཤེགས། གཉལ་པ་བདེ་ལེགས་ཀྱི་ཆོག་ཁྲིགས་ཀྱང་ཡོད་དོ།། །།ཡང་སྒྲོལ་ཆེན་པའི་སྲས་བརྒྱུད་ལྟར་བྱས་ན། སྲས་སངས་རྒྱས་རིན་ཆེན་རྒྱལ་མཚན་དཔལ་བཟང་པོ་ཞེས་གྲགས་པ་དེ་ཉིད་ཡབ་ཀྱི་ལྔ་བཅུ་རྩ་དྲུག་པ་ལྕགས་ཕོ་སྟག་ལ་གནས་གསར་དུ་འཁྲུངས། མི་རྣམས་ཀྱིས་ཁྱེད་ཀྱི་སྲས་འདིས་ཕན་ནི་མི་ཐོགས། དེ་ཙམ་གྱི་གཙིགས་ཀྱིས་ཅི་བྱ་ཟེར་བས། འགྲོ་བ་ལ་ཕན་ཐོགས་པ་གཅིག་འོང་གསུངས། དགུང་ལོ་དྲུག་པ་ལ་གསང་བ་སྙིང་པོའི་རྒྱུད་ཐུགས་སུ་ཚུད། ཟུར་ཤཱཀ་འབྱུང་བའི་སྤྱན་སྔར་བྱོན། ངའི་བླ་མའི་སྲས་ཞེས་གཅེས་པར་བསྐྱངས་པས་རྒྱུད་བཟུང་བ་དེ་གཡེངས། ཡང་ལོ་བརྒྱད་ལོན་པ་ན་བསྐྱར་ཏེ་བཟུང་། ཆོག་ཕྲིན་རྣམས་ཡབ་ཀྱིས་བསླབས་པས་ལོ་བཅུ་བཞི་པར་གཞན་ལ་དབང་བསྐུར་བའི་སློབ་དཔོན་ཕེང་བ་བྱུང་། ཡབ་ལས་སྒྱུ་འཕྲུལ་གྱི་ཆོས་སྐོར་རྣམས་ཐུགས་སུ་ཆུད་པར་མཛད། ད་ང་རབ་ཏུ་བྱུང་ནས་མཚན་ཉིད་ཀྱང་སྦྱང་། གསར་མའི་རྒྱུད་སྡེའང་སློབ་པ་ཡིན་ཞུས་པས། རེ་ཞིག་མི་རུང་། གཟོད་རབ་ཏུ་བྱུང་བས་ཆོག་གསུངས། དེར་མ་གཅིག་ཞིག་བདག་གིར་བཟུང་བས་སྲས་ཁ་ཤས་འཁྲུངས། དགེ་བསྙེན་གྱི་རྟེན་ལ་བསླབ་སྦྱང་རྫོགས་པར་མཛད། སླར་ཆོས་འཁོར་སྒང་དུ་ཆིག་རྫོགས་མཛད། སྐུ་ཤིན་ཏུ་བཙུན་པར་བཞུགས། སྒྱུ་འཕྲུལ་ལ་མཁས་པར་གྱུར་པས་དགུང་ལོ་བཞི་བཅུ་སྐོར་ལ་གསང་བ་སྙིང་པོ་ལ་ཊི་ཀ་ཆེ་བ་གཅིག་དང་། ལམ་རྣམ་བཀོད་ལའང་རྣམ་བཤད་ཆེན་པོ་ཞིག་མཛད། དེ་བཞིན་དུ་ཕྲིན་ལས་ཤར་བ་བརྒྱད་ལས། ཁྲོ་བོ་ལ་མངོན་པར་རྟོགས་པ་རྒྱས་པ་ཞིག་མཛད་པ་དང་། གནས་ལུང་ལའང་ཆོ་ག་རྒྱས་པ་ཞིག་མཛད། ཡབ་དང་ཐུགས་སྲས་ཐུབ་པ་རྡོ་རྗེ་སོགས་ལ་མན་ངག་མང་དུ་མཉན་ཅིང་ཉམས་སུ་བསྟར། དགུང་ལོ་བཅུ་བདུན་པ་ལ་འགོས་ལོ་ཡེ་བཟང་རྩེ་བ་རྗེས་སུ་བཟུང་སྟེ། འདི་ལྟར་སྒྱུ་འཕྲུལ་ཞི་ཁྲོའི་དབང་དང་། སྒྱུ་འཕྲུལ་གྱི་ཚེ་དབང་། དོང་སྤྲུགས་ཀྱི་དབང་། ཚེ་བདག་དང་།
ཡང་དག་མེ་གཅིག་གི་དབང་། སྣ་བོ་པའི་ལུགས་ཀྱི་རྟ་མགྲིན་དང་། ཟླ་རྒྱལ་མའི་ལུགས་ཀྱི་རྗེས་གནང་། ཕུར་པ་ས་ལུགས་ཀྱི་དབང་དྲག་པོའི་རྗེས་གནང་དང་བཅས་པ། སེམས་སྡེ་བཅོ་བརྒྱད་ཀྱི་རིག་པའི་རྩལ་དབང་། གསང་སྙིང་རྒྱུད་འགྲེལ་པ་དང་བཅས་པའི་བཤད་པ། ལམ་རྣམ་པར་བཀོད་པའི་ཊི་ཀ་ཉིད་ཀྱིས་མཛད་པའི་ཐོག་ནས་བཤད་པ་རྒྱས་པ། གཞན་སྒྱུ་འཕྲུལ་གྱི་ཁོག་གཞུང་བཞི་བཅུ་ལ་སོགས་པའི་གཞུང་ཆུང་བཞི་བཅུ་ཙམ། མདོ་དགོངས་པ་འདུས་པ་དང་། དེའི་རྩ་བའི་རྒྱུད་ཀུན་འདུས་དང་། གནུབས་ཆེན་གྱི་མདོ་འགྲེལ་མུན་པའི་གོ་ཆ། སྒྱུ་འཕྲུལ་བརྒྱད་ཅུ་པ་དང་། བླ་མ་གཉིས། ཡང་དག་རྩ་བའི་ལུང་རྣམས་ཀྱང་གནང་། སྙིང་ཐིག་སྤྲོས་བཅས་ལ་སོགས་པའི་དབང་བཞི་དང་། མེ་ལོང་བས་མཛད་པའི་ཡི་གེའི་སྟེང་ནས་ཁྲིད་ཡིག །རྫོགས་ཆེན་ཨ་རོའི་མན་ངག་ཀྱང་ཁྲིད་དུ་མཛད། དེ་བཞིན་དུ་བྱང་སེམས་ཡེ་རྒྱལ་བ་ནས་བརྒྱུད་པའི་ཐུགས་རྗེ་ཆེན་པོའི་སྨར་ཁྲིད་ཀྱང་གནང་སྟེ། རྒྱུ་མཚན་དེ་ལ་བརྟེན་ནས་འགོས་ལོ་ཡེ་བཟང་རྩེ་བས། གསང་སྔགས་རྙིང་མ་ཞེས་གྲགས་པའི་ཕྱོགས་ལ་ལྷག་པར་མོས་པ་ཐོབ་ཅིང་། ཆོས་སྤངས་པའི་སྒྲིབ་པས་མ་སྦགས་ཙམ་མོ། །ཞེས་ཐོས་པའི་ཕ་རོལ་ཏུ་སོན་པའི་མཐར་ཐུག་དོན་དང་ལྡན་པར་སོང་བ་ཡིན་ཞེས་ངེས་པ་བརྟེན་པའི་ཐ་ཚིག་གོ། །དེ་ལྟར་ཆོས་རྗེ་སངས་རྒྱས་རིན་ཆེན་པས་བདུན་བཅུ་རྩ་གཉིས་པ་ལྕགས་མོ་གླང་གི་ལོ་ལ་དབུས་སུ་ཕེབས། གངས་པོ་རིའི་བསམ་གཏན་གླིང་དུ་དབང་གྲགས་པ་རྒྱལ་མཚན་གྱིས་ཞབས་ནས་བཏེགས། འདུས་པ་མདོ་ལ་སོགས་པའི་དབང་མང་པོ་དང་། གསང་སྙིང་ལ་སོགས་པའི་བཤད་པ་དང་ལུང་མང་པོ་བྱིན། བརྒྱད་ཅུ་རྩ་གཉིས་པ་ལྕགས་མོ་ཕག་གི་ལོ་ལ་གཙང་དུ་སྐུ་གཤེགས། ཟུར་ཆུང་པ་འཁྲུངས་ནས་དུས་འདི་ཡན་ཆད་ལ་ལོ་བཞི་བརྒྱ་དང་བཅུ་བདུན་སོང་།། །། བདག་ཉིད་ཆེན་པོ་འགོས་གཞོན་ནུ་དཔལ་ནི་ཡབ་འགོས་སྟོན་འབྱུང་གནས་རྡོ་རྗེ་དང་། ཡུམ་སྲིད་ཐར་སྐྱིད་གཉིས་ཀྱི་སྲས་སུ་ཆུ་སྤྲེལ་ལ་འཁྲུངས། སྤྱན་གཡས་
མཁན་ཆེན་ལས་རབ་ཏུ་བྱུང་། ཀརྨ་པ་དེ་བཞིན་གཤེགས་པ་ལས་བྱང་སྡོམ་དང་། ཆོས་དྲུག་གསན། རྔོག་བྱང་ཆུབ་དཔལ་ལས་རྔོག་ཆོས་རྣམས་གསན། ཁྱད་པར་པཎ་ཆེན་བ་ན་རཏྣ་ལས་བླ་མེད་ཀྱི་རྒྱུད་སྡེ་ཕལ་མོ་ཆེའི་དབང་བསྐུར་བ་རྣམས་ཞུས། མཚན་བརྗོད་དང་དཔྱིད་ཐིག །དབང་མདོར་བསྟན། དཔེ་མེད་འཚོའི་སྦྱོར་དྲུག་རྩ་འགྲེལ་རྣམས་ཞུས་ཤིང་བསྒྱུར། རྗེ་འདི་ཉིད་ཀྱིས་སྒྲོལ་ཆེན་སངས་རྒྱས་རིན་ཆེན་དགུང་ལོ་བདུན་ཅུ་པ་ལ་ས་མོ་ཕག་གི་ལོར་སྒྱུ་འཕྲུལ་ཞི་ཁྲོའི་དབང་དང་། སྒྱུ་འཕྲུལ་གྱི་ཚེ་དབང་། ན་རག་དོང་སྤྲུགས་ཚེ་བདག །ཡང་དག་མེ་གཅིག །རྟ་མགྲིན། ལྷ་མོ་དང་ཟླ་རྒྱལ་ལུགས། ཕུར་པ་འཁོན་ལུགས། སེམས་སྡེ་བཅོ་བརྒྱད་ཀྱི་རིག་པའི་རྩལ་དབང་སོགས་སྔ་འགྱུར་རྒྱུད་སྡེའི་དབང་བཀའ་ཐམས་ཅད་མ་ཚང་བ་མེད་པ་གསན། བཤད་པའི་བཀའ་གསང་བ་སྙིང་པོ་རྒྱུད་དང་འགྲེལ་པ་སོ་སོར་བཤད་པ་དང་། ཡ་མ་རྣམ་བཀོད་ཀྱི་ཊི་ཀ་ཁོང་ཉིད་ཀྱིས་མཛད་པ་དང་། གཞན་ཡང་ཁོག་གཞུང་གསལ་སྒྲོན་སོགས་རྒྱ་བོད་ཀྱི་གཞུང་ཆུང་བཞི་བཅུ་སྐོར་གྱི་བཤད་ལུང་རྣམས་དང་། མདོ་དགོངས་འདུས་དང་དེའི་རྩ་བའི་རྒྱུད་ཀུན་འདུས་རིག་པ་དང་། གནུབས་སངས་རྒྱས་ཡེ་ཤེས་ཀྱིས་མཛད་པའི་མདོའི་འགྲེལ་པ་མུན་པའི་གོ་ཆ། སྒྱུ་འཕྲུལ་བརྒྱད་ཅུ་པ་དང་། བཞི་བཅུ་པ་དང་། བླ་མ་གཉིས། ཡང་དག་རྩ་བའི་ལུང་རྣམས་ཀྱང་གསན། སྙིང་ཐིག་ལ་རྩ་བའི་དབང་སྤྲོས་བཅས་སྤྲོས་མེད་བཞིའི་དབང་བསྐུར་བ་དང་། གྲུབ་ཐོབ་མེ་ལོང་རྡོ་རྗེས་མཛད་པའི་ཁྲིད་ཡིག་གི་སྟེང་ནས་ཁྲིད་དང་། ཨ་རོའི་ལུགས་ཀྱི་རྫོགས་ཆེན་མན་ངག་གི་ཁྲིད་ཀྱང་གསན་ཞིང་མདོར་ན་གསང་སྔགས་སྔ་འགྱུར་གྱི་བསྟན་པའི་བདག་པོ་ལྟ་བུར་གྱུར་ཞིང་རྗེ་ཉིད་ཀྱིས་ཀྱང་གསང་སྔགས་རྙིང་མ་ཞེས་གྲགས་པའི་ཕྱོགས་ལ་ལྷག་པར་མོས་པ་ཐོབ་ཅིང་། ཆོས་སྤངས་པའི་སྒྲིབ་པས་མ་སྦགས་ཙམ་མོ། །ཞེས་གསུངས་པའང་བོད་ཀྱི་མཁས་རློམ་ཕྱོགས་ལྷུང་ཅན་འགའ་ཞིག་ལ་དགོངས་པ་ཡིན་ཏེ།
དོན་དུའང་རྗེ་འདི་ནི་གྲུབ་མཐའ་ཕྱོགས་སུ་མ་ལྷུང་བའི་བཤེས་གཉེན་གཞན་ལས་ཁྱད་པར་དུ་འཕགས་པ་ཡིན་ཅིང་བསྟན་བཅོས་རྣམས་ཀྱང་ཚད་མར་གྱུར་པའི་ལེགས་བཤད་ཆེ་བ་ཡང་མངོན་སུམ་གྱིས་གྲུབ་བོ། །རྗེ་འདིས་ཀརྨ་པ་ཆོས་གྲགས་རྒྱ་མཚོ་ལ་སེམས་འགྲེལ་སྐོར་གསུམ་སོགས་ཆོས་བཀའ་དབང་ཁྲིད་མང་པོ་ཕུལ། ཞྭ་དམར་ཅོད་པན་འཛིན་པ་བཞི་པ་ཆོས་ཀྱི་གྲགས་པ་ཡེ་ཤེས་དཔལ་བཟང་པོ་བསྙེན་པར་རྫོགས་པའི་མཁན་པོ་དང་སྒྱུ་འཕྲུལ་གཙོ་བོར་གྱུར་པའི་གསར་རྙིང་གི་རྒྱུད་སྡེ་རྒྱ་མཚོའི་དབང་བཀའ། བཤད་བཀའ། མན་ངག་གི་ཁྲིད་སོགས་བསམ་གྱིས་མི་ཁྱབ་པར་གནང་། རྗེ་ཞྭ་དམར་ནས་ཀྱང་བཀའ་དྲིན་ཆེ་བའི་བླ་མ་གཅིག་པུར་མཛད། གཞན་ཡང་བཀའ་གཏེར་གྱི་བསྟན་པ་སྒོ་དུ་མ་ནས་སྤེལ་བཞིན་པར་དགུང་ལོ་དགུ་བཅུ་ཐམ་པ་ལྕགས་གླང་ལོར་སྐུ་གཤེགས་སོ།། །། ཞྭ་དམར་བཞི་པ་སྤྱན་ལྔ་རིན་པོ་ཆེ་ཏྲེ་ཤོད་ཁང་དམར་དུ། ཡབ་ལྡོང་དགོན་པ་སྐྱབས་དང་ཡུམ་དབྲ་བཟའ་བསོད་ནམས་སྒྲོལ་མའི་སྲས་སུ་འཁྲུངས། ཟུར་མང་དགོན་དུ་རྗེ་བདུན་པ་ཆོས་གྲགས་རྒྱ་མཚོ་དང་མཇལ་ཏེ་རབ་ཏུ་བྱུང་། མཚན་ཆོས་ཀྱི་གྲགས་པ་ཡེ་ཤེས་དཔལ་བཟང་པོར་གསོལ། མཁན་པོ་གོ་ཤྲཱི་གྲགས་དཔལ་པ་དང་། བན་སྒར་པ་ལས་ཀྱང་ཆོས་གསན། དགུང་ལོ་ཉེར་བཞི་པ་ལ་འགོས་ལོ་ཆེན་པོ་ཡིད་བཟང་རྩེ་པས་མཁན་པོ་མཛད་དེ་བསྙེན་པར་རྫོགས། དུས་ཀྱི་འཁོར་ལོ། བདེ་དགྱེས། གསང་འཇིགས་སོགས་གསར་མའི་རྒྱུད་སྡེ་རྣམས་དང་། སྒྱུ་འཕྲུལ་གསང་བ་སྙིང་པོའི་དབང་བཀའ་དང་བཤད་པའི་བཀའ་ཐམས་ཅད་སོགས་སྔ་ཕྱིར་གསན་པ་མཐའ་ཡས་པ་མཛད། ངན་ལམ་རྒྱལ་བ་མཆོག་དབྱངས་ཀྱི་གདུང་རིགས་ལོ་ཆེན་བསོད་ནམས་རྒྱ་མཚོ་ལས་ཀྱང་གསར་རྙིང་གི་ཆོས་མང་དུ་གསན། རྗེ་འགོས་ལས་ཕུར་པའི་དབང་གསན་ཚེ་མནལ་ལམ་དུ་སློབ་དཔོན་པདྨ་ཞལ་གཟིགས་ཤིང་གདམས་པའང་བསྩལ། གསར་རྙིང་གི་ཆོས་ཚུལ་མཐའ་དག་གདུལ་བྱ་རྣམས་ལ་སྟོན་བཞིན་པའི་ངང་ནས་དགུང་ལོ་དོན་གསུམ་པ་ལ་གཟུགས་
སྐུ་བརྟུལ། དོན་དམ་ངེས་འབྱེད་དབུ་མ་ཆེན་པོའི་ལྟ་ཁྲིད་རྒྱལ་ཚབ་ཆེན་པོའི་ཆོས་ལྔ་ལ་བརྟེན་ཅིང་། ཆོས་སྐད་མཐར་ཐུག་པ་ཕྱིར་མི་ལྡོག་པའི་གཏམ་གཙོ་བོར་བཞེད་པ་རྗེ་འདི་ཀུན་མཁྱེན་ཆེན་པོ་ཀློང་ཆེན་པ། ཀརྨ་པ་བདུན་པ། ཀུན་མཁྱེན་དོལ་བུ་ཆེན་པོ་སོགས་མཐུན་ནོ།། །། དེ་ཉིད་ཀྱིས་འབྲི་གུང་ཟུར་པ་རིན་ཆེན་ཕུན་ཚོགས་ལ་བསྩལ་བ་སྟེ། འདི་ནི་དབུར་སྟོད་འབྲི་གུང་སྐུ་གཉེར་སྒང་ཞེས་བྱ་བར་སྐྱུ་རའི་རིགས་སུ་སྐུ་བལྟམས། དགུང་ལོ་བརྒྱད་ཀྱི་སྟེང་དུ་སྤྱན་སྔ་རིན་པོ་ཆེ་ཆོས་ཀྱི་གྲགས་པ་ལས་རབ་ཏུ་བྱུང་། བཅུ་གསུམ་པར་རྩིས་ཐང་བསམ་གཏན་གླིང་དུ་དཀར་པོ་པས་ཁྲ་འབྲུག་གི་ཞིག་གསོས་མཛད་པའི་རབ་གནས་ལ་སྤྱན་དྲངས་པའི་ཚེ་ངོ་མཚར་བའི་ཆོ་འཕྲུལ་ཅི་ཡང་བྱུང་། ཡངས་པ་ཅན་དང་། ཀླུང་ཤོད། གཞོ་སྟོད་ཏིལ་གྲོ་སོགས་གནས་ཆེན་རྣམས་སུ་སྒྲུབ་པ་ལ་སྙིང་པོར་མཛད། ཏི་གྲོལ་བཞུགས་པའི་སྐབས་ཤེད་འཕགས་ཡུལ་གྱི་གྲུབ་ཐོབ་རྡོ་རྗེ་མགོན་པོ་བྱོན་ནས་ཛ་བི་རའི་བྷུ་རླུང་གི་མན་ངག་སོགས་གདམས་པ་དང་རྗེས་སུ་གདམས་པ་བསྩལ། མཁའ་འགྲོའི་ལུང་བསྟན་བཞིན་སྐུ་རྟེན་དཀར་ཆག་ཏུ་བསྒྱུར་ཞིང་ཡངས་པ་ཅན་དུ་གཏེར་གྱི་ཁ་བྱང་བབས་པ་བཞིན་གུ་རུ་རིན་པོ་ཆེའི་སྐུ་གསུང་ཐུགས་བཅུད་དམ་ཆོས་དགོངས་པ་ཡང་ཟབ་ཤོག་སེར་རིགས་ལྔ་ཏིལ་གྲོའི་ཌཱ་ཀིའི་ཚོགས་ཁང་ཆེན་མོ་ནས་སྤྱན་དྲངས། དུས་གཞན་ཞིག་ཏུ་ཟངས་མདོག་དཔལ་རིར་བྱོན་ནས་གུ་རུ་རིན་པོ་ཆེ་ཧེ་རུ་ཀའི་རྣམ་པར་མཇལ་ཞིང་ག་ཎ་ཙཀྲའི་འདུ་བར་ལོངས་སྤྱད་ཅིང་། རྩ་བ་གསུམ་གྱི་དཀྱིལ་འཁོར་ལ་བརྟེན་ནས་དབང་བསྐུར་ཞིང་གདམས་པ་དང་རྗེས་སུ་གདམས་པ་ཐམས་ཅད་བསྩལ་ཏེ་ཧེ་རུ་ཀའི་སྐུ་སློབ་དཔོན་པདྨར་གནས་འགྱུར་བས་ཞལ་གྱི་མན་ངག་ཀྱང་མང་དུ་གནང་ནས་སླར་རང་གནས་སུ་ཕེབས། བཀའ་གཏེར་གཉིས་ཀྱི་བདག་པོར་གྱུར། མདོ་སྒྱུ་སེམས་གསུམ་ལ་བཤད་སྲོལ་ཐུན་མོང་མ་ཡིན་པ་དང་། བཀའ་བརྒྱད་ལུགས་དགུ། སྙིང་ཐིག་ཡ་བཞི། གཏེར་ཁ་གོང་འོག་སོགས་ལ་རྩལ་དུ་བཏོན་ཅིང་འཆད་ཉན་གྱི་ཕྲིན་
ལས་ཤིན་ཏུ་རྒྱ་ཆེ་ཞིང་མངའ་རི་པཎ་ཆེན་རིན་པོ་ཆེའི་ཕྱག་སྲོལ་ལྟར་བཀའ་མས་ཁོག་དབུབ། གཏེར་མའི་མན་ངག་གིས་བརྒྱན་པ་ཞིག་ཕྱག་ལེན་དུ་འདེབས་པར་མཛད་དོ། །དེས་རང་གྲོལ་ཉི་ཟླ་སངས་རྒྱས་ལ་སྒྱུ་འཕྲུལ་སྐོར་རྣམས་གསུངས། དེས་འཁོན་རིགས་སློབ་དཔོན་ཚེ་དབང་ནོར་རྒྱས་ལ་བཤད་ཅིང་དེས་ཁོང་ཉིད་ཀྱི་སྲས་འཁོན་སྟོན་དཔལ་འབྱོར་ལྷུན་གྲུབ་ལ་བཤད་དེ། རྗེ་འདི་ཉིད་ཡབ་སློབ་དཔོན་དེ་དང་། ཡུམ་རྒྱལ་མོ་འཛོམ་གྱི་སྲས་སུ་ལྕགས་བྱ་ལོར་འཁྲུངས། ཆུང་ངུ་ནས་དམ་པའི་བག་ཆགས་སད་ཅིང་ངེས་འབྱུང་གི་ཐུགས་ཡང་དག་པ་སྐྱེས། དགུང་ལོ་བཅུ་ལོན་པའི་ཚེ་ཐམས་ཅད་མཁྱེན་པ་བསོད་ནམས་རྒྱ་མཚོ་ལས་རབ་ཏུ་བྱུང་། སྐྱབས་འགྲོ་དང་སེམས་བསྐྱེད། ཐུགས་རྗེ་ཆེན་པོའི་སྒོམ་ལུང་སོགས་གསན། དེ་སོགས་གསར་རྙིང་གི་བླ་མ་འགའ་ལས་ཅི་རིགས་པའི་ཆོས་ཚུལ་རྣམས་ཐམས་ཅད་གསན། སྒྲའི་རི་མོ་དང་སྙན་དངགས། སུམ་རྟགས། གསོ་རིག་སོགས་ལའང་བསླབས་སྦྱངས་དཔྱིས་ཕྱིན་པར་མཛད། ཁྱད་པར་ཡབ་རྡོ་རྗེ་འཛིན་པ་ལས་སྒྱུ་འཕྲུལ་གསང་བ་སྙིང་པོ་དང་། དེའི་འགྲེལ་པ་གཡུང་སྟོན་གྱིས་མཛད་པ་དང་། ཀུན་མཁྱེན་ཀློང་ཆེན་པའི་ཕྱོགས་བཅུ་མུན་སེལ་སོགས་སྒྱུ་འཕྲུལ་སྐོར་གྱི་འགྲེལ་ཊིཀ་རྣམས་ལ་སྦྱངས་པར་མཛད་པ་ན་སྒྲོ་ཕུག་པ་ཆེན་པོའི་བག་ཆགས་སད་པས་ལམ་འདི་ཉིད་ལ་བརྟེན་པའི་མཁས་གྲུབ་འགྲན་ཟླ་མེད་པར་གྱུར། དགུང་ལོ་བཅོ་བརྒྱད་པར་གནུབས་ནམ་མཁའི་སྙིང་པོའི་རྣམ་འཕྲུལ་རིག་འཛིན་ཆེན་པོ་ཉི་ཟླ་སངས་རྒྱས་ཀྱི་དྲུང་དུ་རྫོགས་ཆེན་ཀློང་གསལ་སྙིང་ཐིག་གི་དབང་ཁྲིད་མན་ངག་དང་བཅས་པ་གསན་པས་ཆོས་ཐམས་ཅད་ཀྱི་གནས་ལུགས་རྫོགས་པ་ཆེན་པོ་རང་རིག་ཆོས་ཀྱི་སྐུར་ངོ་འཕྲོད་ཅིང་གཏིང་སླེབ། གཞན་ཡང་བཀའ་གཏེར་གྱི་ཆོས་ཤིན་ཏུ་མང་བ་གསན། ཁྱད་པར་དོན་ཏིག་འགྲོ་བ་ཀུན་གྲོལ་དང་། ཐེག་མཆོག་རིན་པོ་ཆེའི་མཛོད་ལ་བཤད་ལུང་གསན། མདོ་ཕྱོགས་ཀྱི་གཞུང་ལུགས་ཆེན་པོ་ཀུན་ལའང་གསན་བསམ་མཐར་
ཕྱིན་པར་མཛད་ཅིང་ཆོས་གྲྭ་ཆེན་པོ་རྩེས་དང་དུ་གཞུང་ལུགས་རབ་འབྱམས་སྨྲ་བའི་གྲྭ་སྐོར་མཛད། བྲག་དགོན་སྤྱན་སྔ་གཞོན་ནུ་ཆོས་དཔལ་ལས་རྡོ་རྗེ་ཕྲེང་བ་སོགས་གསར་རྙིང་གི་ཆོས་རྒྱ་ཆེ་བ་གསན། དགུང་ལོ་སོ་བཞི་པར་རྒྱལ་ཁང་རྩེ་པ་དཔལ་འབྱོར་རྒྱ་མཚོ་དང་ཆོས་ཀྱི་རྗེ་དགེ་འདུན་རྒྱལ་མཚན་པ་མཁན་སློབ་ལས་བསྙེན་པར་རྫོགས་པའང་མཛད་ནས་མཚན་དཔལ་འབྱོར་ལྷུན་གྲུབ་ཏུ་གསོལ། དགེ་ལུགས་ཕྱོགས་ཀྱི་སྔགས་སྐོར་རྣམས་ཀྱང་གསན། གསང་ཕུ་དང་སེ་ར་བྱེས་ཀྱི་འཆད་ཉན་སློབ་དཔོན་པའང་མཛད། རྒྱུད་གསང་བ་སྙིང་པོ་ལ་སྔར་བཤད་སྲོལ་ཆེས་དར་ཡང་ཕྱིས་ཉག་ཕྲ་བར་གྱུར་པས་རྗེ་འདི་ཉིད་མཁྱེན་པ་ཆེ་བའི་གྲགས་པས། བྲག་སྣ་ཆོས་རྗེ་ཨུ་རྒྱན་བསྟན་འཛིན་ཆེད་གཉེར་གྱིས་བྱོན་ཏེ་གཡུང་འགྲེལ་གྱི་སྟེང་ནས་ཞིབ་པར་གསན་ཅིང་ལེའུ་ལྔ་པ་ཡན་གྱི་ཟིན་བྲིས་ཀྱང་མཛད། ཁྱད་པར་ཟུར་འཁོར་ལོའི་མགོན་པོ་ཆོས་དབྱིངས་རང་གྲོལ་རྗེས་སུ་བཟུང་ཞིང་གསང་བ་སྙིང་པོ་གཡུང་འགྲེལ་ལས་ཉིན་རེ་ཆོས་ཐུན་གཉིས་རེ་དང་། གཞན་ཡང་སྙིང་ཐིག་གི་སྐོར་རྣམས་སོགས་མཐའ་ཡས་པ་གསན། རྗེའི་བསླབ་སྟོན་ལྟར་ཟུར་ཆེན་གྱིས་ཆོས་གྲྭ་ཆེན་པོ་རྩེས་དང་དུ་གྲྭ་སྐོར་གྱི་བསྟན་པའི་རྣམ་གཞག་མཛད་པས་སྔ་འགྱུར་ལ་རྒྱུད་བཤད་མེད་དེ་འོང་སྙམ་པའི་ཕྲག་དོག་ཅན་རྣམས་ཁ་རོག་སྟེ་འདུག་གོ། །འདི་ཙམ་ནས་འདུ་འཛིའི་གཡེང་བ་སྤངས་ཏེ། ཡུལ་དི་ཝཱི་གོ་ཊིའམ་ཕ་ཝང་ཁའི་ནགས་ཁྲོད་དུ་དབེན་པ་བརྟེན་ཅིང་བཞུགས། ཕྱག་ན་པདྨ་ལྔ་པ་ཆེན་པོས་ཀྱང་ཞབས་ལ་གཏུགས་ཏེ། གསར་རྙིང་གི་དབང་ལུང་ཁྲིད་མན་ངག་གི་སྐོར་མཐའ་ཡས་པ་གསན། བླ་ཆེན་འགའ་ཞིག་གིས་ལྟར་གྲུབ་མཐའ་གཙང་གཙང་མོ་ཡིན་རྒྱུ་པའི་མཚན་ཉིད་པ་སྐམ་པོའི་རིགས་ཀྱི་ཤན་མ་ཤོར་བ་དང་དགེ་བའི་བཤེས་གཉེན་མཚན་ཉིད་དང་ལྡན་པས་ཟིན་པའི་རྗེས་དེ་འདྲའི་རིགས་ལ་ཟེར་བ་ཡིན། དེ་ནས་དགུང་གི་གྲངས་དོན་དྲུག་པ་ལ་རྗེ་ལྔ་པ་ཆེན་པོས་ཞབས་བརྟན་གྱི་གསོལ་འདེབས་མཛད་པས་ད་སྟེ་ཡུན་རིང་ཨེ་སྡོད་མི་ཤེས་ཞེས་
ཞལ་གྱིས་མ་བཞེས་ཤིང་རྔ་ཡབ་པདྨ་འོད་ཀྱི་གཞལ་ཡས་སུ་འགྲོ་དགོས་པ་ཞེས་གསུངས་ལ། མེ་གླང་ཟླ་བ་བརྒྱད་པའི་ཚེས་བཅུ་གཅིག་ལ་ངོ་མཚར་པའི་ལྟས་དང་བཅས་གཟུགས་སྐུ་ཆོས་ཀྱི་དབྱིངས་སུ་ཐིམ་པར་གྱུར། རྗེ་འདི་ཉིད་ཀྱིས་མཛད་པའི་བསྟན་བཅོས་ཀྱང་ཕྱག་རྫོགས་དབུ་གསུམ་གྱི་ལྟ་བ་སྤྱི་ཁྱབ་ཏུ་ངོ་སྤྲོད་པའི་ཁྲིད་ཡིག་དང་། དབུ་མའི་ལྟ་ཁྲིད་དང་། ཐ་སྙད་རིག་པའི་སྐོར་ཡང་མང་པོ་ཡོད། རྗེ་དེའི་ཐུགས་ཀྱི་སྲས་སློབ་མ་ནི་ཟུར་ཆེན་ཆོས་དབྱིངས་རང་གྲོལ་ཡིན་ཏེ་འདི་ཉིད་ཟུར་གྱི་རིག་འཛིན་བརྒྱུད་པའི་གདུང་རབས་མ་ཆད་པ་ལས། ཡབ་རིག་འཛིན་ཆེན་པོ་ཀུ་མཱ་རཱ་ཛའི་རྣམ་འཕྲུལ་ཟུར་ཆེན་གཞོན་ནུ་དོན་འགྲུབ་དང་ཡུམ་མཁའ་འགྲོའི་རིགས་ལས་མཚན་ལྡན་ཡིད་འཛིན་གཉིས་ཀྱི་སྲས་སུ་ཤིང་འབྲུག་ལོར་སྐུ་བལྟམས། དྲུང་པ་དཀོན་མཆོག་རིན་ཆེན་པའི་སྐུ་སྐྱེ་པར་ངོས་འཛིན་མཛད། རིམ་གྱིས་ཡི་གེ་འབྲི་ཀློག་དང་འཕགས་ཡུལ་གྱི་ཡིག་རིགས་རྣམས་ཀྱང་དཀའ་ཚེགས་ལ་མ་ལྟོས་པར་ཐུགས་སུ་ཆུད། ཡབ་ལས་ཉེར་མཁོའི་སྒྲུབ་སྐོར་རྣམས་ཀྱང་བསླབ། དགུང་ལོ་དགུ་པར་བྱང་བ་རིག་འཛིན་ངག་གི་དབང་པོ་མཇལ་ཞིང་། ཞལ་ནས་སྐུ་སྐྱེ་བས་སྔ་འགྱུར་གྱི་བསྟན་པ་ལ་ཕན་ཐོགས་ཆེན་པོ་ཞིག་ཡོང་ཞེས་ལུང་བསྟན། ལྷ་རིས་དང་རྩིས་སྐོར་རྣམས་དང་དྲག་སྔགས་ཀྱི་སྐོར་འགའ་ཞིག་ཀྱང་མཁྱེན་པར་མཛད་ཅིང་དགུང་ལོ་བཅུ་གཉིས་ཙམ་ནས་སྣང་གསལ་རིན་པོ་ཆེ་ངག་དབང་ཡེ་ཤེས་གྲུབ་པའི་ཞབས་སུ་བཅར་ཏེ་བཀའ་བརྒྱད་བདེར་འདུས་སྐོར་དང་། མཁའ་འགྲོ་སྙིང་ཐིག་བཀའ་གཏེར་གཉིས། བླ་མ་ནོར་བུ་རྒྱ་མཚོ། ཀར་གླིང་ཞི་ཁྲོ་དགོངས་པ་རང་གྲོལ་སོགས་ཀྱི་དབང་ལུང་དང་། ཉམས་ཁྲིད་མཐར་ཕྱིན་པ་གསན། གཞན་ཡང་ཅི་རིགས་པའི་གཏེར་ཆོས་རྣམས་གསན། ཞི་ཁྲོའི་དབང་བསྐུར་བའི་གསང་མཚན་ཆོས་དབྱིངས་རང་གྲོལ་དུ་ཕོག །ཕྱག་ཆེན་ལྔ་ལྡན་དང་གཅོད་ཁྲིད་སོགས་སྐུ་ཉམས་སུ་བསྟར། ཟིང་པ་སྟག་མགོར་ལོ་གསུམ་ཕྱོགས་གསུམ་མཛད་ཅིང་གཙོ་བོར་རྫོགས་ཆེན་མཁའ་འགྲོ་སྙིང་ཐིག་གི་ཀ་དག་དང་ལྷུན་གྲུབ་གནད་དུ་བསྣུན་པས་ཆོས་ཐམས་ཅད་ཀྱི་རྫུན་
ཕུགས་རྡིབ། རང་རིག་གདོད་མའི་མགོན་པོའི་རང་ཞལ་མངོན་དུ་གྱུར་པའི་རྟོགས་པ་བརྙེས་ཤིང་འོད་གསལ་དུ་ལོངས་སྐུའི་ཞིང་ཁམས་ཉུལ་བའི་རྩལ་འབྱོངས་པར་གྱུར། དགུང་ལོ་བཅུ་བདུན་པ་ལ་རྡོ་རྗེ་འཆང་ཕ་ཝང་ཁ་པ་དཔལ་འབྱོར་མཚན་ཅན་གྱི་དྲུང་དུ་བྱོན་ཏེ་བླ་མ་སྐུ་འདས་ཀྱི་བར་ལ་རིམ་གྲོ་བ་མཛད་ཅིང་མཉེས་པ་གསུམ་གྱིས་བསྟེན། བླ་མས་ཀྱང་ཐུགས་དགྱེས་པས་རྗེས་སུ་བསྐྱངས་ནས་བཀའ་གཏེར་གྱི་ཆོས་ཚུལ་རྒྱ་མཚོ་ལྟ་བུ་བུམ་པ་གང་བྱོའི་ཚུལ་གྱིས་གནང་། གཙོ་བོར་དཔལ་སྙིང་པོའི་རྒྱུད་རྩ་བ་དང་། འགྲེལ་པ་སྤར་ཁབ། བོད་འགྲེལ་གཡུང་ཊིཀ་རྣམས་སྦྱར་བའི་གསུང་བཤད་མཛད་པ་ཉིན་རེ་རྩི་བཞག་ཐུན་གཉིས་རེ་བསྩལ། ཟིན་དཀའ་སེ་བ་ལ་རེ་ཟེག་རྒྱབ་ཨེ་ཆོག་ཞུས་པས། རྒྱང་ཙམ་མ་སོང་བར་ཟིན་བྲིས་བྱས་ན་འཇག་ཆེན་པོ་མི་ཡོང་བས་རེ་ཞིག་ནས་ངེད་ཀྱིས་ཚོད་བྱེད་གསུངས། གཟིམ་ཆུང་ཐོག་ཁར་སྐྱོར་སྦྱང་གནང་ནས་ཤོག་བུ་སུམ་ཅུ་ཙམ་སོང་ནས་རྗེའི་བཀའ་བཞིན་ཟིན་བྲིས་ཀྱང་མཛད་པས་ལེའུ་ལྔ་པ་ཡན་ཆད་སོང་། དེ་མན་ཆད་ཀྱི་ཟིན་བྲིས་འཕྲོ་ཅན་དུ་ལུས། ཆུ་ཁྱི་ལོར་དགུང་ལོ་ཉི་ཤུ་བཞེས་པར་སླར་ཡང་དགེ་བསྙེན་ནས་བཟུང་བསྙེན་རྫོགས་ཀྱི་བར་དུ་བསྒྲུབས་པར་མཛད། སྙིང་འགྲེལ་ཕྱོགས་བཅུ་མུན་སེལ་སོགས་ལ་གཟིགས་རྟོགས་དང་། འདུས་པའི་འགྲེལ་པ་སྒྲོན་གསལ་ལ་བཞི་སྦྲགས་ཀྱི་བཤད་པ། རིམ་ལྔ་གསལ་སྒྲོན། བདེ་མཆོག་སྦས་དོན་ཀུན་གསལ། ནོར་བཟང་གི་དུས་འཁོར་སྤྱི་དོན་སོགས་དང་། གསང་འདུས་བསྐྱེད་རྫོགས་སོགས་ཀྱི་བཤད་པ་ཞུས་ཤིང་ཐུགས་ལ་ངེས་པར་མཛད། ཤིང་བྱི་ལོར་ཆོས་གྲྭ་ཆེན་པོ་དཔལ་གྱི་རྩེས་དང་དུ་དགུན་ཆོས་ཆེན་མོའི་ཐོག་གསང་བ་སྙིང་པོའི་རྒྱུད་ཀྱི་བཤད་པ་མཛད་པས་སྟོན་ཆེན་ཚིག་ལ་རྟོན་པ་རྣམས་ཀྱི་སྤོབས་པ་བཅོམས་ཤིང་སྙིང་པོའི་བསྟན་པ་ལ་བྱ་བ་ཆེར་མཛད་པས་གཟུ་བོར་གནས་པ་རྣམས་བསྔགས་པ་བརྗོད་ཅིང་བྱང་བ་རིག་འཛིན་ཆེན་པོས་ཀྱང་ལེགས་དར་དཔྱངས། རྗེ་ཕ་ཝང་ཁ་པ་ལས་ཀྱང་ཀློང་གསལ་སྙིང་ཐིག་གི་དབང་ལུང་མན་
ངག་གི་ཁྲིད་རྣམས་ཞིབ་པར་གསན་ཞིང་བསྒོམས་པས་ཉམས་རྟོགས་བོགས་སྔར་ལས་ཀྱང་ཆེར་འཁྲུངས། བྷཻ་ར་བའི་འཁྲུལ་འཁོར་སོགས་གསར་མ་ཕྱོགས་ཀྱི་དྲག་སྔགས་ཀྱང་མང་དུ་གསན། དགེ་འབྲི་གཉིས་འགྲས་ཆེ་ཞིང་འབྲི་གུང་ཟུར་པ་རཏྣའི་ཞབས་སོགས་ཀྱིས་རཱ་ཧུ་ལའི་ལས་སྦྱོར་མཛད་པས་དགའ་ལྡན་ཁྲི་པ་མང་པོ་སྟེང་གྲིབ་ཀྱིས་གཤེགས་པ་ལ་རྗེ་དཀོན་མཆོག་ཆོས་འཕེལ་ཁྱབ་འཇུག་གི་འཇིགས་པ་ལས་གྲོལ་བའི་སྲུང་འཁོར་ཀྱང་མཛད། ཀཿཐོག་པ་སྟག་བླ་པདྨ་མ་ཏི་ལྷ་སར་བྱོན་ནས་སྙིང་པོའི་འགྲེལ་པ་ཕྱོགས་བཅུ་མུན་སེལ་སོགས་གསན་ཅིང་ཁོང་གིས་ལྷོ་བྲག་གསུང་སྤྲུལ་ལའང་དེའི་བཤད་ལུང་ཕུལ་བ་སོགས་ཆོས་རྒྱུན་དེ་ཀ་མ་ཆད་པར་བྱུང་བ་འདིའོ། །ཚུར་ཀཿཐོག་པ་ལས་དགོངས་འདུས་པོ་ཏིའི་ལུང་དབང་དང་རྒྱུད་དགུ་བཅངས་ཐབས་བཅས་པ་དང་། ལས་བྱང་མེ་ཏོག་ཕྲེང་མཛེས་སོགས་ཀྱང་གསན། ལྷག་པར་བཀའ་བརྒྱད་བདེ་གཤེགས་འདུས་པའི་དཀྱིལ་འཁོར་ལ་བརྟེན་པའི་ར་ས་ཡ་ཎའི་སྒྲུབ་པ་མཛད། འདི་སྐབས་ཙམ་ནས་རྒྱལ་མཆོག་ལྔ་པ་ཆེན་པོས་བླ་མར་བཀུར་ཞིང་ཟིལ་གནོན་སོགས་ཆོས་བཀའ་རྣམས་གསན་ཞིང་དྲག་སྔགས་ཀྱི་སྐོར་སོགས་ཞི་རྒྱས་དབང་དྲག་གི་ཕྲིན་ལས་རབ་འབྱམས་ཀྱི་ལུང་ཕྱག་ཁྲིད་ཐམས་ཅད་ཕུལ་ཞིང་ཐུགས་ཉམས་སུ་བསྟར། ཀར་གཙང་མཆོད་ཡོན་གྱིས་དགེ་ལུགས་སྤྱི་དང་བྱེ་བྲག་དགེ་ལྡན་ཕོ་བྲང་པ་ལ་སྡང་ཟུག་ཆེ་བས་ཙི་ཀུམ་པར་སྡེ་གསར་གྱི་སྐབས་སུ་ལས་སྦྱོར་མཐའ་ཡས་པ་མཛད་པས། རྒྱལ་དབང་ལྔ་པའི་ཕྲིན་ལས་དུས་བབས་དང་རྗེ་འདི་ཉིད་ཀྱི་བྱིན་རླབ་ལྷག་པར་མྱུར་བས་དགེ་ལྡན་ཕོ་བྲང་གི་ལུང་ལས་བོད་ཁམས་ཡོངས་ལ་ཁྱབ་པ་དེ་བྱུང་། སྣུམ་ཟན་གྲོང་པའི་རྐང་འཐུང་འཁྲིག་པའི་ཀླུང་། །ཁེ་ཉེན་གཤེར་གྱིས་དོན་ཆེན་འགྲུབ་པའི་ཞུགས། །འབར་མིན་ས་བབས་ལས་ཀྱི་རྟ་གདོང་མེས། །སྒར་གཙང་སྲིད་སྡེའི་ཆུ་བོ་སྐེམ་དེ་མཚར། །ཞེས་ལྔ་པ་ཆེན་པོས་དགེ་ཕྱོགས་རྣམས་ཀྱིས་མངོན་སྤྱོད་ཀྱི་ནུས་པ་མངོན་དུ་མ་གྱུར་པར་འོས་མེད་ཀྱི་རྗེ་འདི་པས་བསྟན་པ་སྤྱི་ལ་སྨན་ཡོན་ཆེན་པོར་གྱུར་པའི་ཆེད་དུ་
བརྗོད་པར་མཛད་དོ། །གཞན་ཡང་ཕུར་པ་ལུགས་གསུམ་དང་བཀའ་བརྒྱད་ལུགས་གསུམ། རྫོགས་པ་ཆེན་པོ་ཀློང་གསལ་སྙིང་ཐིག་སོགས་ཀྱི་ཉམས་ཁྲིད་རྣམས་གསན་པ་སྐུ་ཉམས་སུ་བསྟར་བས་རྫོགས་པ་ཆེན་པོའི་ཉམས་མྱོང་མ་འཁྲུལ་པ་ཐུགས་རྒྱུད་ལ་འཁྲུངས་ཤིང་འཁོར་འདས་རེ་དོགས་དང་བྲལ་བའི་གདེང་འཁྲུངས་སོ། །ཞེས་ཞལ་གྱིས་བཞེས། གནས་གསར་པ་མགོན་པོ་བསོད་ནམས་མཆོག་ལྡན་དང་ཡང་ཆོས་ཀྱི་དགའ་སྟོན་སྟོབ་རེས་མཛད། བྱང་པ་རིག་འཛིན་ངག་གི་དབང་པོའི་སྤྲུལ་པའི་སྐུ་སྔ་འགྱུར་བསྟན་པའི་ཉི་མ་རིག་འཛིན་པདྨ་ཕྲིན་ལས་ངོས་འཛིན་པར་མཛད་ཅིང་ཐུབ་བསྟན་རྡོ་རྗེ་བྲག་གི་གདན་སར་བཀོད་ནས། བཀའ་གཏེར་གྱི་ཆོས་མཐའ་དག་བསྩལ་ཞིང་བསྟན་པའི་བདག་པོར་མངའ་གསོལ། སྐུ་ཚེའི་མཐར་འགྲོ་མགོན་སྐྱེ་མེད་ཞང་གི་གདན་ས་གུང་ཐང་དུ་བཞུགས། དར་ལྡིང་རིག་འཛིན་ཆེན་པོ་འཕྲིན་ལས་ལྷུན་གྲུབ་ལ་སྙིང་པོའི་རྒྱུད་ཀྱི་བཤད་པ་གནང་། ཚུར་ཡང་བཀའ་བརྒྱད་སོགས་དབང་ལུང་མང་དུ་གསན་པ་དང་། རྒྱ་བོད་ཧོར་གསུམ་གྱི་བླ་མ་སྐྱེ་སྤྲུལ་སོགས་ཆོས་དོན་གཉེར་རྣམས་ལ་བཀའ་གཏེར་གསར་རྙིང་གིས་རྣམ་པར་གྲོལ་བའི་ལམ་གྱི་དངོས་པོ་ཅི་རིགས་པར་སྦྱོར་བར་མཛད་ནས་ས་བྱ་ལོར་དགུང་གྲངས་རེ་དྲུག་ལོན་པ་ན་ངོ་མཚར་གྱི་ལྟས་དང་བཅས་པདྨ་འོད་ཀྱི་ཞིང་ཁམས་སུ་གཤེགས་སོ། །རྗེ་འདི་ཉིད་ལ་ཐུགས་སྲས་སློབ་མའི་ཚོགས་བགྲང་གིས་མི་སྤྱོད་པར་བཞུགས་ཀྱང་། གཙོ་བོར་གྱུར་པ་ནི་རྒྱལ་མཆོག་ལྔ་པ་ཆེན་པོ་སྟེ་ཞིང་ཁམས་གཞན་དུ་གཤེགས་པའི་ཚེ་ཡང་ཡེ་ཤེས་ཀྱི་སྐུས་རྗེས་སུ་བཟུང་བར་གསུངས་ཤིང་རྣམ་ཐར་རྒྱལ་བ་མཆོག་གི་ཞལ་གསུང་མར། ལེགས་བྱས་འདི་མཐུས་རིག་རྩལ་ཀུན་ཏུ་བཟང་། །མངོན་སུམ་རང་ངོ་འཕྲོད་མིན་དེ་སྲིད་དུ། །སྐྱེ་བར་མགོན་པོ་ཁྱོད་ཀྱིས་དགེ་བའི་བཤེས། །མཛད་ནས་འབྲལ་བ་མེད་པར་རྗེས་འཛིན་ཤོག །ཅེས་གསུངས་པས་ཀྱང་མཚོན་པར་ནུས་སོ། །འདིས་གནུབས་ཆེན་སངས་རྒྱས་ཡེ་ཤེས་ཀྱི་རྣམ་འཕྲུལ་གཉོས་སྟོན་ཆེན་པོ་ཕྲིན་
ལས་ལྷུན་འགྲུབ་ལ་གསང་བ་སྙིང་པོའི་བཤད་རྒྱུན་སྤར་ཁབ་དང་གཡུང་ཊིཀ་གཉིས་ཀའི་སྟེང་ནས་བསྩལ་ཞིང་། དེ་ལས་བཻ་རོ་དང་གཡུ་སྒྲའི་ཐུགས་བསྐྱེད་དུས་སུ་སྨིན་པ་རིག་འཛིན་འགྱུར་མེད་རྡོ་རྗེ་སྐུ་མཆེད་ཀྱི་བཀའ་དྲིན་ལས་དེང་སང་གི་བར་དུ་རྒྱུན་མ་ཆད་པར་བྱུང་བ་ཡིན་ནོ།། །། ཡང་སྒྲོ་ཕུག་པ་ཆེན་པོའི་སློབ་བརྒྱུད་འཕྱོང་རྒྱས་རྒྱ་སྨན་པ་སངས་རྒྱས་གྲགས་ཞེས་བྱ་བ་ནི། རུས་གཉའ་ཡུལ་རྒྱ་སྨན་སྟག་རྩེ་སར་འཁྲུངས། གཞོན་ནུའི་དུས་ཛམྦྷ་ལ་བསྒྲུབས་པས་ཞིང་ཆུང་ཞིག་ཡོད་པ་དེའང་ཆུས་ཁྱེར། བྱ་བྲལ་ལ་བྱོན་པས་སྦུ་གུ་དོར་ཕྱུག་པོ་མཛེས་ཁྱེར་བ་ཞིག་གི་རོ་ཁུར་མི་མ་བྱུང་བར་འདུག །སྙིང་རྗེ་དྲག་པོ་སྐྱེས་ཏེ་རྟོག་མེད་མཛད་ནས་རོ་ལས་བྱས་པས་མལ་འགྲམ་ནས་གསེར་མང་པོ་བྱུང་། དེས་ཛམྦྷ་ལས་དངོས་གྲུབ་བྱིན་པར་འདུག །སླར་ལོག་ཏེ་གྲ་ཕྱི་ཁང་དམར་དུ་ཁྱུང་པོ་ཁྲོ་བོར་ཐུག །ཁོང་ཡང་དག་བསྒྲུབ་པའི་ཕྱག་ཕྱིར་བསྒྲུབ་པ་མཛད་པས། ཡང་དག་མར་མེ་དགུ་པས་ཞལ་གཟིགས། དེ་ནས་གཙང་དུ་བྱོན། གསང་བདག་སྒྲོ་ཕུག་པའི་སློབ་མ་བྱ་ཆེན་པོའི་དབོན་པོ་ཞིག་ལ་མདོ་དང་སྒྱུ་འཕྲུལ་ལ་སོགས་པའི་གསན་པ་མཛད། དེར་ཕྱུག་པོ་ཞིག་གིས་ནས་ཁལ་བརྒྱ་ཐམ་པ་ཕུལ། ཆ་རྐྱེན་གྱིས་མི་འཐོགས་པར་བྱུང་བས་སྒྲོ་ཕུག་པའི་སློབ་མ་ཉང་ནག་མདོ་བོ། དེའི་སློབ་མ་ལྷ་རྗེ་མདའ་སེང་གི་ལས་སྒྱུ་འཕྲུལ་ཉན། མཁས་པ་ཆེན་པོར་གྱུར་ནས། རང་ཡུལ་དུ་རྡོ་ཐོག་ཐེལ་བཏབ། གཉལ་པ་ཞིག་པོའི་སློབ་མ་རྒྱ་འཆིང་རུ་པས་ཀྱང་རྡོ་ཐོག་པའི་ཞབས་ལ་གཏུགས་ཏེ་ཐོས་པ་མང་དུ་མཛད། ཁྱད་པར་དུ་འདི་ལ་སློབ་མ་མཁས་ཤིང་གྲུབ་པའི་དཔའ་བོ་སྐྱི་ཆོས་ཀྱི་སེང་གེ་བྱ་བ་ཞིག་བྱུང་། དེས་གོང་མ་སེ་ཆེན་གྱི་སྤྱན་སྔར་བྱོན་པས། རྒྱལ་པོས་ནུས་པ་བརྟག་པའི་ཕྱིར་ཐུབ་ཆོད་མཛད་དེ་མཆོད་རྟེན་གྱི་ནང་དུ་བཅུག་ནས་སྒོ་བརྩིགས་ཏེ་ལོ་གཅིག་བཞག །ལོ་དུས་ན་ཕྱེ་སྟེ་བལྟས་པས། རྡོ་རྗེ་ཕུར་བུའི་སྐུར་གྱུར་འདུག་པས་ངོ་མཚར་ཆེན་པོ་སྐྱེས། རྡོ་ཐོག་པ་ལ་དར་རིང་ཆེན་མོ་ལ་སོགས་པའི་དངོས་པོ་ཚན་ཆེར་གནང་། འཇའ་སས་བཅད་པའི་དགོན་གཞིས་
ཀྱང་མང་དུ་ཡོད་དེ་དར་རྒྱས་ཤིན་ཏུ་ཆེ་བ་བྱུང་། ད་ལྟ་ནི་མིང་དུ་གྲགས་པའི་རྗེས་ཤུལ་ཙམ་སྟེ་བསྟན་པའི་འཕེལ་འགྲིབ་འདི་ཡང་སྐྱོ་བ་བསྐུལ་བའི་རང་བཞིན་ནོ།། སྐྱི་ཆོས་ཀྱི་སེང་གེའི་སློབ་མ་ནི། སྨན་ལུང་པ་ཤཱཀྱ་འོད་དེ། འདི་ནི་འཕྱོང་པོ་ཁ་རུའི་ཉང་སྟོན་ཆེན་པོར་སྲས་ལྔ་བྱུང་བ་ཡར་ཀླུང་སྤྲུལ་སྐུ་མཆེད་ལྔར་གྲགས་པའི་ཆེ་ཤོས་ཡིན། ཡུལ་ཡར་ཀླུང་དགོན་པ་སྨན་ལུང་ཡིན་པས་དེ་སྐད་དུ་གྲགས། ཚིགས་གཉིས་པ་ཆོས་ལྡན་པའི་གདན་ས་ད་ལྟ་ཆོས་ལྡན་ཞེས་པའི་དགོན་རོལ་འདི་ཀ་ཡིན། མཚན་དངོས་མགོན་པོ་རྡོ་རྗེ་ཞེས་བྱ་སྟེ་གྲུབ་པ་ཤིན་ཏུ་བརྙེས་པས་གྱང་ལ་སྐུ་རྒྱབ་གཏད་པའི་རྗེས་ཐིམ་གྱིས་སོང་བ་ད་ལྟའང་ཡོད། སྔར་འདིར་ཆོས་གྲྭ་ཆེན་པོ་ཆགས་པར་སྣང་སྟེ་རྒྱུད་འབུམ་གྱི་རས་མའང་ཤིན་ཏུ་མང་བར་མཐོང་། སྨན་སྒྲུབ་མཛད་པས་ཡུལ་འདི་སྡིག་པ་དང་གྲོག་སྦུར་ཀྱང་དཀོན་པ་ཡིན་ཞེས་ཐོས། སྲུང་མ་ཤིན་ཏུ་ནུས་པ་ཆེ་བས་ད་ལྟ་དགོན་ཤུལ་ཀྱང་བསྲུང་བར་སྣང་སྟེ། ལྷ་འདྲེ་རྣམས་དམ་ཚིག་ལ་ཤིན་ཏུ་གནས་པ་ཞིག་གོ། །ཚིགས་འོག་མ་གསུམ་ལ་སྐལ་ལྡན་པ། དུར་ཁྲོད་པ། དབང་རྒྱལ་བ་ཞེས་གྲགས། དེ་ལས་འདིར་ཚིགས་དང་པོ་སྨན་ལུང་པ་ཤཱཀྱ་འོད་ཀྱིས་སྐྱི་ཆོས་ཀྱི་སེང་གེ་ལ་མདོ་སྒྱུ་འཕྲུལ་རྣམས་ལེགས་པར་བསླབ། ཕྱིས་གླན་ཤཱཀྱ་འོད་པོའི་སྲས་གླན་མཁས་པ་བསོད་ནམས་རྒྱལ་ལའང་གསན་ནས། གསང་བ་སྙིང་པོའི་ཁོག་དབུབ་དང་། ཊི་ཀ་རྒྱུད་དོན་རྣམ་ངེས་ལ་སོགས་པ་ཡིག་ཆ་མང་དུ་མཛད། འདིའི་སློབ་མ་དྭགས་པོའི་སངས་རྒྱས་གོང་ལ་བ་ཡིན། དེ་ལ་དྭགས་པོ་ཉིད་དུ་སློབ་མ་བླ་མ་གཉེན་ལ་སོགས་པ་མང་དུ་ཐོན་ཞིང་། གཙོ་བོར་གོན་འཇོ་བདག་པོའི་བླ་མར་གྱུར་ནས་ཁམས་སུ་ཤིན་ཏུ་དར་བར་གྱུར་ཏོ། །ཡང་སྨན་ལུང་པ་ལ་དབོན་ཤཱཀྱ་འབུམ་པས་གསང་བ་སྙིང་པོའི་བཤད་པ་མཁས་པར་བསླབ། དེ་ལ་མཁས་གྲུབ་ཆོས་དཔལ་ཡབ་སྲས་གཉིས་ཀྱིས་ཀྱང་གསང་སྙིང་གི་བཤད་པ་ལེགས་པར་ནོད། སྨན་ལུང་པའི་བརྒྱུད་པ་དེ་དག་ནི་གཏེར་ཁ་གོང་འོག་ལའང་གནས་དུས་དེར་ཆོས་ཀྱི་བདག་པོར་གྱུར་པ་ཞིག་གོ།། །། སྐྱི་ཆོས་ཀྱི་སེང་གེའི་གདན་ས་བ་རྒྱ་ཡེ་ཤེས་མགོན་པོས་ཀྱང་སྐྱི་དང་གླན་ཆོས་རྒྱལ་གཉིས་ཀ་ལ་གཏུགས་ནས་མདོ་དང་སྒྱུ་འཕྲུལ་མཁས་
པར་མཁྱེན། དེའི་དབོན་པོ་རྡོ་རྗེ་རྒྱལ་མཚན་ཅེས་བྱ་བ་གཞོན་ནུ་ལ་གསང་ཕུར་བྱོན་ནས་ཚད་མ་རྣམ་ངེས་མཁས་པར་སྦྱངས། དེ་ནས་ཕུ་བོ་རྒྱ་ཡེ་ཤེས་མགོན་པོ་ལས་མདོ་དང་སྒྱུ་འཕྲུལ་ལེགས་པར་བསླབས་ནས། འགྲེལ་པ་སྤར་ཁབ་གཞུང་དུ་བྱས་པའི་ཊི་ཀ་དང་། དབང་གི་ཆོ་ག་ལ་སོགས་པ་མཛད། དེས་རང་གི་དབོན་པོ་བླ་མ་ཚུལ་རྒྱལ་བ་ལ་གསུངས། དེ་ལ་རི་གདོང་པ་ཤེས་རབ་རྒྱལ་མཚན་གྱིས་གསན། འདིས་དྭགས་པོར་སྐུ་རབས་དཔོན་གཡོག་དང་སྔགས་པ་རྣམས་ལ་བཤད་པས་རེ་ཞིག་ན་དྭགས་པོའི་ཕྱོགས་ནའང་དར་བར་ཡོད་ཟེར། ཤེས་རྒྱལ་གྱི་སློབ་མ་ཞང་མཁར་བ་བསོད་ནམས་བཟང་པོ། དེའི་སློབ་མ་སློབ་དཔོན་བཀྲ་ཤིས་རྒྱ་མཚོ། འདི་ལ་རྡོ་རྗེ་རྒྱལ་མཚན་པའི་སྙིང་ཊིཀ་གི་ཐོག་ནས་བཤད་ལུང་དང་། ཕུར་པ་ལྷ་ནག་ལ་སོགས་པ་འགོས་གཞོན་ནུའི་ཞབས་ཀྱིས་གསན་ཏོ།། །། ཡང་ཁམས་ལུགས་སུ་གྲགས་པ་ནི། གསང་བ་སྙིང་པོའི་འགྲེལ་པ་སློབ་དཔོན་ཉི་འོད་སེང་གེས་མཛད་པ་སློབ་དཔོན་བཻ་རོ་ཙ་ནས་ཁམས་འོ་རྡུ་བྱམས་ཆེན་གྱི་གཙུག་ལག་ཁང་དུ་བསྒྱུར་ནས་བཤད་པའང་མཛད། ཁྱད་པར་ཕྱོགས་དེར་སྔ་འགྱུར་གྱི་བསྟན་པ་ཡོངས་སུ་གྲགས་པར་བྱུང་བའི་ཐོག་མ་ལྟ་བུ་ནི་ཀཿཐོག་པ་ཡིན་ཅིང་། དེ་ལ་ཀཿཐོག་པ་དམ་པ་བདེ་བར་གཤེགས་པ་ཞེས་ཀྱང་བྱ། བླ་མ་ཤར་བ་སྤོབས་པ་མཐའ་ཡས་སམ་ཤེས་རབ་སེང་གེ་ཞེས་གྲགས་པའི་བདག་ཉིད་ཆེན་པོ་དེ་ནི་བསྐལ་པ་ཐོག་མ་མེད་པའི་དུས་ནས་བྱང་ཆུབ་མཆོག་གི་གོ་འཕང་མངོན་དུ་བྱས་པ་ཞིག་སྙིང་པོ་མཆོག་གི་བསྟན་པ་དང་གདུལ་བྱ་མང་པོ་ཞིག་གི་དོན་མཛད་པའི་ཕྱིར་ཐབས་ལ་མཁས་པའི་གནད་གསང་གིས་ལྷའི་དབང་པོ་བརྒྱ་བྱིན་གྱི་སྲས་མོ་དང་། འོད་སྲུང་གི་དུས་སུ་རྒྱལ་པོ་ཀྲྀ་ཀའི་སྲས་མོ་བདུན་གྱི་ཆེ་བར་སྐྱེ་བ་བླངས་ཤིང་དེ་བཞིན་གཤེགས་པ་བསྙེན་བཀུར་དུ་མས་མཉེས་པས་བྱས་པའི་འོག་ཏུ་བདག་ཅག་གི་སྟོན་པའི་དྲུང་དུ་གནས་བརྟན་ཆེན་པོ་བྷ་ར་དྷྭ་ཛ་དང་། དེའི་རྗེས་སུ་མུ་སྟེགས་ཀྱི་པཎྜི་ཏ་ཕྱིས་སངས་རྒྱས་པར་གྱུར་པ་ཞིག་དང་། སིངྒ་ལའི་རྒྱལ་པོའི་རིགས་སུ་འཁྲུངས་ནས་ན་ལནྡའི་མཁན་པོ་རྒྱལ་བའི་ལྷ་ལས་རབ་ཏུ་བྱུང་ཞིང་དུས་སྐབས་དེར་མུ་སྟེགས་ཞི་བ་པ་ཞིག་གིས་བསྟན་པ་ལ་གནོད་པ་ཆེར་བྱས་པས་སློབ་དཔོན་གྱིས་ཐོག་མར་
གྲུབ་མཐའ་དེ་ལ་བསླབས་ནས་ཉམས་འོག་ཏུ་ཆུད་པ་དང་གཟོད་རྩོད་པས་བཏུལ་ཏེ་ནང་པར་ཆུག །ཡང་མུ་སྟེགས་ཀྱི་མཁས་པ་འགའ་ཞིག་དང་རྩོད་པའི་ཚེ་འཇམ་དཔལ་དབྱངས་མདུན་གྱི་ནམ་མཁར་བྱོན་པས་རྩོད་པའི་སྤོབས་པ་བཅོམས། བྱང་ཆུབ་སེམས་དཔའི་སྤྱོད་པ་ལ་འཇུག་པ་གསུངས་ནས་ལྷོ་ཕྱོགས་སུ་བྱོན་པ་སོགས་སློབ་དཔོན་ཆེན་པོ་ཞི་བ་ལྷར་གྱུར་པ་དང་། དགའ་རབ་རྡོ་རྗེའི་སློབ་མ་ཏོག་རྩེ་བར་གྱུར་ནས་བསམ་གྱིས་མི་ཁྱབ་པའི་གཞུང་མཛད་པ་དང་། བོད་ཀྱི་ལྗོངས་སུ་སད་མི་བདུན་གྱི་ནང་ནས་རྨ་རིན་ཆེན་མཆོག་ཏུ་གྱུར་ནས་གསང་བ་སྙིང་པོའི་རྒྱུད་ལ་སོགས་པ་བསྒྱུར་ནས་ཉན་བཤད་བྱས་པ་དང་། འཕགས་ཡུལ་ནུབ་ཕྱོགས་བཱ་ར་ཎཱ་སིའི་རྒྱལ་པོར་གྱུར་པའི་ཚེ། བླ་མཆོད་པཎྜི་ཏ་དང་། བར་ལ་ཕྲ་མ་བཅུག་པའི་བློན་པོའི་ལྕེ་བཅད་པས་ད་ལྟ་ལྗགས་ཅུང་ཟད་མི་བདེ་བ་ཡིན་གསུངས་པ་དང་། རི་དྭགས་ཀྲྀཥྞ་སཱ་ར་དང་། དྲང་སྲོང་གངྒཱར་རིའི་དྲུང་དུ་ནེ་ཚོ་ཞིག་ཏུ་གྱུར་པ་ལ་དྲང་སྲོང་གིས་རིག་སྔགས་བསླབས་པས་ཤེས་ཤིང་ནུས་པའང་ཐོབ། དུས་གཞན་ཞིག་ཏུ་རི་དེའི་ཤར་ཕྱོགས་ཀྱི་མཚོ་ཞིག་ལ་གནས་པའི་ཀླུ་སེམས་ཅན་ལ་བྱམས་པ་ཞིག་ཡོད། དེའི་ལྷོ་ཕྱོགས་སུ་ནག་པོའི་ཕྱོགས་ཀྱི་ཀླུ་གདུག་པ་ཅན་ཞིག་ཀྱང་ཡོད་དེ་དེས་སེམས་ཅན་ལ་གནོད་པ་རྩོམ་པའི་སྔ་རོལ་དུ་ཀླུ་དཀར་བོའི་སྟེང་དུ་དམག་དྲངས་ནས་འཇིགས་པའི་ཆོ་འཕྲུལ་དང་བཅས་པས་འོངས་པ་ན་ཀླུ་དཀར་པོས་ནེ་ཙོ་ལ་སྐྱབས་སུ་སོང་བས། དེས་གདུག་པའི་ཀླུའི་ཕྱོགས་སུ་བལྟས་ཏེ་རིག་སྔགས་བཟླས་ཤིང་བཤོག་པ་བརྡབས་པས་གདུག་པའི་ལག་འགྲོ་འཁོར་དང་བཅས་པ་དེ་ཉིད་དུ་བརླག་པར་གྱུར་ཏོ། །དེའི་འོག་ཏུ་འཕགས་ཡུལ་ནུབ་ཕྱོགས་སུ་རྒྱལ་རིགས་ཀྱི་པཎྜི་ཏ་རྟེན་རབ་བྱུང་ལ་སྔགས་ཀྱི་ནུས་པ་ཐོབ་པས་ཌཱ་ཀི་རྣམས་ལ་དབང་བསྒྱུར་པ་རཏྣ་ཤཱི་ལ་ཞེས་པ་དང་། ལྷོ་ཕྱོགས་ཀྱི་རྒྱུད་དུ་རྗེ་རིགས་ཀྱི་པཎྜི་ཏ་གཞོན་ནུ་སེང་གེ་ཞེས་སྔགས་ལ་མཁྱེན་པ་ཆེ་བ་ཞིག་དང་། དེའི་འོག་ཏུ་པཎྜི་ཏ་ཆེན་པོ་སུ་མ་ཏི་ཀཱིརྟིའམ་མཚན་གཞན་བལ་པོ་པེནྟ་པར་གྲགས་པ་དཔལ་
ནཱ་རོ་པའི་དངོས་ཀྱི་སློབ་མར་གྱུར་ཅིང་། བཀའ་བབ་དང་པོ་ཕྱག་རྒྱ་ཆེན་པོའི་ཡེ་ཤེས་ལ་རང་དབང་བརྙེས་ཤིང་རྒྱུད་སྡེ་ཐམས་ཅད་ལ་མཁྱེན་པ་ཆེ། ཁྱད་པར་བདེ་མཆོག་ལ་གྲུབ་པ་ཐོབ། ལྷོ་བྲག་མར་པ་ལོ་ཙྪས་ཀྱང་ནཱ་རོ་པའི་འོག་ཏུ་བཀའ་དྲིན་ཆེ་བའི་བླ་མར་མཛད། སྐུ་ཚེའི་མཐར་མི་ཉག་རྒྱལ་པོས་སྤྱན་དྲངས་ཏེ་རྒྱལ་ཁམས་དེར་ཕེབས་ཏེ་རྒྱལ་པོ་ལ་དབང་བསྐུར་བ་དུ་མ་སོགས་དང་ཕན་པ་རྒྱ་ཆེན་པོ་མཛད། དེ་ནས་ཀྱི་ཏན་གྱི་རྒྱལ་པོས་ཀྱང་སྤྱན་དྲངས་ཏེ་སྔོན་དུ་ཆོས་མ་དར་བས་རྒྱལ་ཁམས་ཐམས་ཅད་ཆོས་ལ་བཅུག་ཅིང་། རྒྱལ་སྲིད་ཆོས་བཞིན་བྱེད་དུ་བཅུག །རྒྱལ་པོའི་གཙོས་དྲ་མ་རྣམས་ལ་བདེ་མཆོག་གི་དབང་བསྐུར་མཛད་ཅིང་ཡི་དམ་དུ་ཕོག་པ་ཐམས་ཅད་ཀྱིས་བསྒོམས་པས་དངོས་གྲུབ་སྣ་རེ་མ་ཐོབ་པ་མེད་པར་གྲགས། དེ་ནས་རྒྱ་མཚོའི་གླིང་ཞིག་ཏུ་བྱོན་པ་ན་སྒྲ་དང་འོད་ལ་སོགས་པའི་ལྟས་ཆེན་པོ་བྱུང་ནས་གཤེགས་པའི་ཚུལ་བསྟན། དེ་ནས་བར་དོ་གཞན་མ་བྱུང་བར་ཡབ་ཀྱི་སྤྱི་བོར་བཞུགས་ནས་ཡུམ་གྱི་ལྷུམས་སུ་ཞུགས་པ་ཡིན་གསུངས་ཏེ། བདག་ཉིད་ཆེན་པོ་འདིར་སྐུ་སྐྱེ་བ་བཞེས་པ་ཡིན་ནོ།། དམ་པ་འདི་མདོ་ཁམས་བུ་འབོར་སྒང་དུ་གཏོགས་པ་འབྲི་ཆུའི་འགྲམ་དུ་རྗེ་ཕག་མོ་གྲུབ་པ་དང་ཡུམ་མཆེད་དུ་གྱུར་པ་སྟེ་རྗེ་ཕག་གྲུ་རྨེ་ཤོད་འབལ་མོར་ད་ལྟ་གསེར་ཁང་དུ་བརྗོད་པ་དེར་འཁྲུངས་པ་ཡིན་པས་རྗེ་འདི་ཡང་དེ་དང་མི་རིང་བ་ཞིག་ཏུ་འཁྲུངས་པ་ཡིན་ཏེ་འོང་། གང་ལྟར་གདུང་རུས་སྒ་ཡབ་གཙང་པ་དཔལ་གྲགས། ཡུམ་གཙང་མོ་རིན་ཆེན་རྒྱན་གཉིས་ཀྱི་སྲས་སུ་ཆུ་ཕོ་སྟག་གི་ལོར་འཁྲུངས། འདི་རྗེ་ཁམས་པ་ཆེན་པོའམ་ཕག་གྲུ་ལོ་བཅུ་གསུམ་པའི་ཆུ་སྟག་དེ་ཡིན། བཅུ་བདུན་ལ་དབུས་སུ་བྱོན། འཕན་ཡུལ་དུ་བླ་མ་བྱང་ཆུབ་སེང་གེ་ལས་རབ་ཏུ་བྱུང་། མཚན་ཤེས་རབ་སེང་གེར་གསོལ། ནགས་ཀྱི་མཁན་ཆེན་ལས་སྨད་འདུལ་གྱི་རྒྱུན་ལས་བསྙེན་པར་རྫོགས་ཤིང་འདུལ་ཕྱོགས་ལ་མཁས་པར་སྦྱངས། ཟུར་སྒྲོ་ཕུག་པ་ཆེན་པོའི་ཐུགས་སྲས་འཛམ་སྟོན་འགྲོ་བའི་མགོན་པོ་བྱ་བ་ལས། སྒྱུ་འཕྲུལ་གསང་
སྙིང་གི་སྐོར་དང་སེམས་ཕྱོགས་སོགས་གསན་པས་དེ་དང་དེ་ལ་མཁས་པའི་ཕ་རོལ་ཏུ་ཕྱིན། རྗེ་སྒྲོ་ཕུག་པ་དང་ཀཿཐོག་པའི་བར་ལ་བླ་མ་གཅིག་བཞུགས་པ་དེ་ཡིན། ལྔ་པ་ཆེན་པོའི་གསན་ཡིག་ཏུ་ཀཿཐོག་པ་རང་གིས་སྒྲོ་ཕུག་པ་ལ་ཐུག་པར་གསུངས། འཛམ་སྟོན་པ་ཞེས་པ་ནི་ཡུལ་གྱི་མིང་ནས་བཏགས་པ་སྟེ། རྗེ་ཀརྨ་པ་དུས་མཁྱེན་གྱི་རྣམ་ཐར་ལ་དཔྱད་ན་ཀམ་པོ་གནས་དང་ཉེ་བ་ཞིག་ཡིན་པར་གྲུབ་ཅིང་། དེར་ཉིད་ཀྱི་སློབ་མ་རྟོགས་ལྡན་ཞིག་གིས་སྐྱེ་བ་ངོས་བཟུང་བ་ལ་འཛམ་སྐྱེ་བ་གསུམ་པ་ཞེས་གྲགས་པ་དང་། གཞན་ཡང་འཛམ་སྟོན་སངས་རྒྱས་བྱ་བ་དང་། འཛམ་གྱི་སྤང་ཕུག་ཏུ་བཞུགས་པའི་བཙུན་པ་ཞིག་གིས་རྗེ་དུས་མཁྱེན། སྤྱན་རས་གཟིགས་སུ་མཐོང་བས་འཛམ་ཡུལ་ཙམ་ན་སྒོམ་བཟང་བར་གྲགས་པ་སོགས་ཀྱི་ལོ་རྒྱུས་བྱུང་བ་དཔའ་བོ་གཙུག་ལག་པས་ཀྱང་དེ་དང་མཐུན་པར་བཀོད་འདུག་ཅིང་། ད་ལྟ་འགའ་ཞིག་གིས་འདམ་སྤང་ཕུག་ཅེས་བརྗོད་པའི་ཡུལ་དེ་ཡིན་ནོ། །རྭ་ལོའི་སློབ་མ་ཀམ་ལོ་ཙཱ་ལས་བདེ་མཆོག་རྒྱུད་ཆེན་བཅུ་སོགས་དང་། ཅོག་རོ་ལོ་ཙཱ་ལས་ཕག་མོ་ཕྱི་མ་དང་སྡོམ་འབྱུང་། ཀམ་ཆོས་ཀྱི་ཡེ་ཤེས་ལས་དགྱེས་པ་རྡོ་རྗེའི་སྐོར། འགོས་ལོ་ཙའི་སློབ་མ་ལྡོང་སྟོན་རྡོ་རྗེ་སྙིང་པོ་དང་བོ་དྷི་ཞང་སྟོན་ལས་འདུས་པ། དེ་གཉིས་ཀའི་སློབ་མ་ལ་སྟོད་དཔལ་གྱི་དབང་ཕྱུག་ལས་སྒྲོན་གསལ་གྱི་བཤད་པ་དང་གཤེད་སྐོར། རྗེ་དུས་མཁྱེན་ལས་འཁོར་ལོ་བདེ་མཆོག་གི་དབང་བསྐུར་གྱི་རིམ་པ་དང་། ཕྱག་རྒྱ་ཆེན་པོ། ནཱ་རོ་ཆོས་དྲུག་གི་མན་ངག་ལ་སོགས་པ་རྣམས་གསན། རྗེ་དབུ་སེའི་ཐུགས་ཀྱི་སྲས་མཆོག་ཏུ་མཛད་ཅིང་སྤྱིར་ཡང་བདག་ཉིད་ཆེན་པོ་འདིའི་སྐྱེ་བ་དུ་མར་འཇམ་པའི་དབྱངས་ཀྱིས་དགེ་བའི་བཤེས་གཉེན་མཛད་པས་ཤེས་བྱ་ཐམས་ཅད་ལ་ཆགས་ཐོགས་སྤངས་པའི་ཐམས་ཅད་མཁྱེན་པར་བཞུགས་ཤིང་མདོ་སྔགས་སྤྱི་དང་ཁྱད་པར་རྡོ་རྗེ་ཐེག་པ་སྔ་ཕྱིར་བོད་ཀྱི་ལྗོངས་སུ་འགྱུར་བ་ཙམ་ལ་གསན་བསམ་མ་མཛད་པ་མེད་པ་ལྟ་བུ་དང་། འཛམ་
སྟོན་རིན་པོ་ཆེས། ཁྱོད་ཀམ་པོའི་གནས་སུ་སོང་ནས་སྒྲུབ་པ་ལ་གཞོལ་ན་ཕུང་པོ་འོད་དུ་དེངས་པ་གཅིག་འོངས། ཀཿཐོག་ཏུ་སོང་ན་བསྟན་པ་མཐར་རྒྱས་པ་གཅིག་འོངས་ཏེ་མཆི་གསུངས་པས་བསྟན་པ་ཁོ་ན་ཐུགས་ལ་བཅངས་ཏེ་ཀཿཐོག་ཅེས་པའི་ས་ཆ་འཚོལ་ནས་བྱོན་པ་ཞིག་ལ་ཐོག་མར་ཀ་ཐིལ་དུ་སླེབ་ཅིང་དེར་ཕྱུགས་འཚོ་བའི་བྱིས་པ་རྣམས་ལ་ཀཿཐོག་གང་དུ་ཡོད་དྲི་བར་མཛད་པས་ཕུ་ཡ་ཀི་ཡིན་ཟེར། དེར་ཕྱུགས་རྣམས་གདུལ་བྱའི་རྟེན་འདྲེལ་དང་། རྫི་བུ་རྣམས་སློབ་མའི་རྟེན་འདྲེལ་དུ་དགོངས། དེ་ནས་ས་ཡུལ་ཡི་གེ་ཀ་འདྲ་བའི་ཐོག་ས་མོ་ཡོས་ཀྱི་ལོར་དགོན་པ་འདེབས་པའི་གཙུག་ལག་ཁང་བཞེངས་པ་ན་བོན་གྱི་ཐ་ཚིག་ལ་གནས་པའི་རྡོ་གཉན་རྨད་བུས་གཟུགས་དངོས་སུ་བསྟན་ནས་སྒོ་སྣ་ཚོགས་ཀྱིས་བར་ཆད་བརྩམས་པ་ལ་རྗེ་དཔོན་སློབ་གསུམ་གྱིས་རྗེས་འདེད་དུ་ཕྱིན་པ་ན་ཕ་ཝང་ཞིག་ལ་ཐིམས། དེ་ཆོས་རྗེ་གཙང་སྟོན་གྱིས་ཆོས་གོས་ཀྱིས་བཅིངས་ནས་ཁྲིད། དམ་པས་ཕྱག་ལྕག་གིས་བྲབ་ནས་དེང་། ལུང་པའི་ཤོད་ཀྱི་ཆུ་ཁར་བསྐྱལ་བ་དེང་སང་མངོན་སུམ་གྱི་ཡུལ་དུ་གྱུར་པ་དང་། བོན་པོ་བརྒྱད་ཀྱིས་ངན་སྔགས་བསྒྲུབས་པ་དཔལ་ལྷ་མོས་བསྒྲུབ་ཁང་གི་བྲག་བརྡིབས་ནས་སླེབ་པ་དེའི་སྟེང་དམ་པའི་ཕྱག་གིས་རྒྱ་གྲམ་བྲིས་པས་ཕ་ཝང་བརྒྱད་སླེབ་བྱ་བ་ཡིན། དེ་ལ་སོགས་པ་གྲུབ་པའི་རྟགས་མཚན་བསམ་གྱིས་མི་ཁྱབ་པ་དང་བཅས་པས་ཆོས་གཞི་བཏབ་ནས་བཞུགས། ཤར་ཨ་མདོའི་ཡུལ་ཚུན་ཆད། ལྷོ་ཚ་བ་རོང་དང་གློ་མོན་ཚུན་གྱི་སློབ་མ་རྣམས་འདུས་པ་ལ་གཙོ་བོར་རྫོགས་པ་ཆེན་པོ་དང་། སྒྱུ་འཕྲུལ་གསང་བ་སྙིང་པོའི་བཤད་པའི་བཀའ་དང་དབང་བཀའ་བསྒྲུབ་པ་སོགས་རྒྱ་བོད་ཀྱི་འགྲེལ་པ་གཞུང་ཆེ་ཆུང་ཐམས་ཅད་ལ་དཔལ་ལྡན་ཟུར་པའི་བཀའ་སྲོལ་གྱི་རྒྱུན་དང་མདོ་དགོངས་པ་འདུས་པ་ལ་སོགས་རྩལ་དུ་བཏོན་ནས་གསུངས། གཞན་ཡང་འཇམ་དཔལ་སྒྱུ་དྲ་སོགས་དང་མདོ་ཕྱོགས་སུའང་རྒྱལ་བ་བྱམས་པའི་གཞུང་ཆེན་པོ་རྣམས་དང་བྱང་ཆུབ་སེམས་དཔའི་སྤྱོད་པ་ལ་འཇུག་པ་སོགས་ཤིན་ཏུ་མང་བར་
བཤད་ཅིང་མདོར་ན་མདོ་ཁམས་ཀྱི་ལྗོངས་སུ་གསང་སྔགས་ཀྱི་བསྟན་པ་གཞི་བཞེངས་སུ་བཏིངས་པ་ཡིན། དགུང་ལོ་དོན་གཅིག་པར་ཆུ་ཕོ་བྱི་བའི་ཐ་སྐར་ཅན་གྱི་ཟླ་བར་གཟུགས་སྐུ་བརྟུལ་བའི་ཚུལ་བཞེས། སྐྱེས་བུ་ཆེན་པོ་འདི་ཉིད་ལ་འཕགས་པ་འཇམ་པའི་དབྱངས་ནི་གཤེགས་བཞུགས་མི་མངའ་བར་དུས་ཐམས་ཅད་དུ་མི་དང་མི་ལབ་པ་བཞིན་བཞུགས་ཤིང་མཛད་པ་ཐམས་ཅད་ལུང་སྟོན་པ་ཞིག་ཡོད་ལ། སངས་རྒྱས་མི་བསྐྱོད་པ་དང་། བདེ་བ་ཅན་དང་། སྨན་གྱི་བླ་མའི་ཞིང་ཁམས་སོགས་ནི་རྟག་པར་གཟིགས། སྒྱུ་འཕྲུལ་ཞི་ཁྲོ་དང་། བདེ་མཆོག་ལྷ་དྲུག་ཅུ་རྩ་གཉིས་དང་། དཔལ་ཧེ་རུ་ཀའི་དཀྱིལ་འཁོར་རྣམས་ཀྱང་ནམ་བཞེད་ལ་གཟིགས་ཤིང་། དེ་བཞིན་གཤེགས་པ་རིགས་ལྔ་སོགས་ལས་ཆོས་གསན་པ་དང་། བྱང་ཆུབ་སེམས་དཔའ་རྣམས་དང་ཆོས་ཀྱི་གཏམ་མཛད་པ་དང་སྐུའི་སྐྱེ་བ་འདི་ཉིད་ཀྱི་འོག་ཏུ་བདེ་བ་ཅན་དུ་བྱང་ཆུབ་སེམས་དཔའ་བློ་གྲོས་སྙིང་པོ་ཞེས་བྱ་བའི་ཚུལ་གྱིས་བཞུགས་ཤིང་ས་བརྒྱད་པའི་མངོན་རྟོགས་བརྙེས་པ་དང་། མ་འོངས་པ་ན་བསྐལ་པ་སྐར་མ་བཀྲམ་པ་ལྟ་བུ་ལ་བདེ་བར་གཤེགས་པ་ཚེ་དཔག་ཏུ་མེད་པར་འགྱུར་བའི་ལུང་བསྟན་བརྙེས་ཤིང་མདོར་ན་སྐྱེས་བུ་འདི་ཉིད་ཀྱི་སྤངས་རྟོགས་ནི་ཐུན་མོང་གི་སྣང་ངོར་སྤྲུལ་པའི་སྐུ་འཇིག་རྟེན་དུ་བཞུགས་པ་ལ་དགོངས་པ་དུས་གསུམ་གྱི་བདེ་བར་གཤེགས་པ་རྣམས་དང་དབྱེར་མེད་པ་སྟེ་སོ་སྐྱེས་བསམ་པར་མི་ནུས་སོ། །དེ་ཉིད་ཀྱི་རྒྱལ་ཚབ་གཙང་སྟོན་པ་ནི་དེ་བཞིན་གཤེགས་པ་ཐམས་ཅད་ཀྱི་ཐུགས་རྡོ་རྗེ་མི་བསྐྱོད་པའི་རྣམ་པར་འཕྲུལ་པ་ལས་འཕགས་པའི་ཡུལ་དུ་མངའ་བདག་མཻ་ཏྲི་པའི་ཐུགས་སྲས་རྒྱ་གར་ཕྱག་ན་ཞེས་བྱ་བར་གྱུར་ཅིང་སློབ་དཔོན་དེ་ལས་དབང་བཞི་རྟེན་ཅན་ཞུས་ནས་བསྒོམས་པས་ཕྱག་རྒྱ་ཆེན་པོའི་བཀའ་བབ་ཅིང་རྟོགས་པ་མངོན་དུ་གྱུར། གླང་ཆེན་སྨྱོན་པ་སྡིགས་མཛུབ་བསྟན་པས་བཟློག་པ་སོགས་ནུས་པ་ཐོབ། མཐར་སྐུ་ལུས་དེ་ཉིད་ཀྱིས་ཕྱག་རྒྱ་ཆེན་པོའི་དངོས་གྲུབ་ཐོབ། དེའི་འོག་ཏུ་ཀཾ་ལོ་ཙཱ་བ་ཡེ་ཤེས་མཆོག་ཅེས་བྱ་བ་སྔགས་རྒྱུད་ཐམས་ཅད་ལ་
མཁས་ཤིང་ཁྱད་པར་ཙཀྲ་སམྦ་ར་ལ་བརྟེན་ནས་གྲུབ་པ་བརྙེས་པ་ཞིག་དང་། དེའི་རྗེས་སུ་གཙང་བའི་ཕྱོགས་སུ་སྡེ་སྣོད་འཛིན་པ་ཆེན་པོ་ཞིག་དང་། དེའི་འོག་ཏུ་ཆོས་ཀྱི་རྗེ་ཉིད་ཡིན་པར་གསུངས་ཤིང་འཁྲུངས་པའི་ཡུལ་ནི་བུ་འབོར་སྒང་གི་བྱེ་བྲག་གཙང་ཞལ་ཞེས་པ་དེ་ཉིད་ཡིན་ནམ་སེམས་ཏེ། ཡུལ་ལས་མཚན་དུ་ཆགས་པར་གཙང་སྟོན་ཞེས་བརྗོད་པའི་ཕྱིར་དང་། རྗེ་ཉིད་ཀྱི་གསུང་ལས། བན་སྡོམ་རྡོ་རྗེ་རྒྱལ་མཚན་ང་། །བུ་འབོར་སྒང་དུ་སྐྱེས་པ་ཡིན། །བླ་མ་དམ་པ་བསྟེན་པ་ཡིན། །གདམས་ངག་བདུད་རྩི་འཐུངས་པ་ཡིན། །སྒྲུབ་ལ་བརྩོན་འགྲུས་ཆུང་བ་ཡིན། །དཀར་པོའི་གྲོགས་ཀྱིས་བཏགས་པ་ཡིན། །མི་ངོ་བསྲུང་ལ་གཡེལ་བ་ཡིན། །སྦས་ཡུལ་མཐིལ་དུ་རྒས་པ་ཡིན། །ཞེས་འབྱུང་བའི་ཕྱིར་རོ། །དགུང་ལོ་བཅུ་བདུན་པར་བླ་མ་བདེ་བར་གཤེགས་པ་མཇལ་ནས་ཆོས་གསན། དཔོན་སློབ་ལྷན་གཅིག་པར་མི་ཉག་ཏུ་བྱོན། དེར་མན་ངག་ཐམས་ཅད་ཀྱང་གནང་། ཉི་ཤུ་རྩ་གཅིག་པར་འབྲི་ཏི་ར་མདོའི་དགོན་དུ་བྱོན་ནས་བཞུགས། ཉེར་གསུམ་ལ་ཀཿཐོག་ཏུ་བྱོན་ནས་བསྒོམས་པས་དུས་གཞན་ཞིག་ཏུ་བླ་མ་བདེ་བར་གཤེགས་པའི་ཉམས་སྣང་དུ། ལུང་མདོ་ཆེན་པོ་ཞིག་ཆུས་གང་བའི་ནང་དུ་འོད་ཆེན་པོ་བལྟར་མི་བཟོད་པ་ཞིག་འདུག་པ་ལ་ཅི་ཡིན་གསུང་བར་སྐྱེས་བུ་ཆེན་པོ་ཁྱོད་ཀྱི་སློབ་མ་བཅུ་གཅིག་ཀུན་ཏུ་འོད་ཀྱི་ས་ལ་གནས་པའི་གདན་ཡིན་ཟེར་བ་བྱུང་། དེ་ཁྱོད་ཡིན་གསུངས། དེ་ཙམ་ན་དཔལ་ཧེ་རུ་ཀ་དང་བཞི་བཅུ་རྩ་གཉིས་ཀྱི་དཀྱིལ་འཁོར་རྣམས་གཟིགས། དཔལ་ལྷ་མོ་དང་ནག་པོ་ཆེན་པོ་ཡང་དུས་རྟག་ཏུ་གཟིགས། དགུང་ལོ་ང་དྲུག་པ་ལ་ཀཿཐོག་གི་གདན་སར་ཕེབས། མདོ་སྒྱུ་སེམས་གསུམ་གྱི་བསྟན་པ་བླ་མའི་བཀའ་སྲོལ་བཞིན་བསྐྱངས། འདི་སྐབས་སུ་སེམས་དཔའ་ཆེན་པོ་སྤོས་བྲག་པས་ཀཿཐོག་གི་རིན་པོ་ཆེ་གཙང་སྟོན་པ་དེ་སྙན་པ་ཤིན་ཏུ་ཆེ་བས་ཅི་འདྲ་ཞིག་ཡིན་ནམ་དགོངས་པ་བཏང་བས་སྤྲིན་མེད་པའི་ནམ་མཁའ་ལྟ་བུའི་འོད་སྔོན་པོའི་གཞལ་ཡས་ཁང་ཆེན་པོ་ཞིག་གི་ནང་ན་ལོངས་སྤྱོད་རྫོགས་པའི་ལྷ་ཚོགས་མང་པོ་བཞུགས་པ་
གསལ་བ་དང་། རིན་པོ་ཆེ་གཙང་སྟོན་པ་བཞུགས་པའི་ཐད་ནས་འཇའ་འོད་ཁ་དོག་སྣ་ཚོགས་པའི་ཕུང་པོ་བསམ་གྱིས་མི་ཁྱབ་པ་གཟིགས་པས་འདི་སངས་རྒྱས་ཡིན་པར་འདུག་དགོངས་ནས་དེ་ནུབ་ཚོགས་མཆོད་ཅིག་མཛད་པར་གསང་སྔགས་རྙིང་མའི་ཧེ་རུ་ཀ་མང་པོ་ཞལ་གཟིགས། མནལ་ལམ་དུ་རིན་པོ་ཆེ་སྣ་ཚོགས་ལས་གྲུབ་པའི་རི་ཆེན་པོ་དཔག་པར་དཀའ་བ་ཞིག་གི་དངོས་སུ་སྨན་སྣ་ཚོགས་སྐྱེས་པ་ལ་མི་མང་པོ་སྨན་ཐུ་ཞིང་འདུག །རི་དེའི་རྩེ་མོ་ན་འོད་སྔོན་པོའི་གཞལ་ཡས་ཁང་ཆེན་པོ་ཞིག་གི་དབུས་སུ་བླ་མ་ཀཿཐོག་པ་འོད་ཀྱི་རང་བཞིན་དུ་བཞུགས་འདུག །དུང་དཀར་པོ་ཆེན་པོ་འབུད་མི་མེད་པར་རང་གྲག་ཏུ་གྲགས་པ་ལས། དུང་དཔག་ཏུ་མེད་པ་འཕྲོས་ཏེ་ཐམས་ཅད་ཀྱང་རང་གྲག་ཏུ་ཕྱོགས་ཐམས་ཅད་ཁྱབ་པར་ཏི་རི་རི་འགྲོ་བ་གཟིགས། ཁོང་གི་སྙན་པ་ཕྱོགས་མེད་དུ་འགྲོ་བར་འདུག་གསུངས། དེའི་ཕྱིས་སུ་ཀཿཐོག་ཏུ་བྱོན་ནས་རིན་པོ་ཆེ་གཙང་སྟོན་ལས་སྒྱུ་འཕྲུལ་གྱི་དབང་བསྐུར་བ་ཞུས་པས་མཁྱེན་པའི་ཡེ་ཤེས་ཕྱོགས་མེད་དུ་སད་པར་གྱུར། ཀཿཐོག་པ་ཐུགས་དམ་རྫོགས་པ་ཆེན་པོ་ལ་མཉམ་པར་བཞག་པའི་ཚེ་ནམ་མཁའ་ལྟར་ཅི་ཡང་མི་སྣང་བ་དང་། ནུབ་གསུམ་ལ་ཞི་ཁྲོའི་ལྷ་ཚོགས་དཔག་ཏུ་མེད་པ་གཟིགས་པ་སོགས་དག་སྣང་བསམ་གྱིས་མི་ཁྱབ་པ་ཤར་གསུངས། དེ་ཡང་རིན་པོ་ཆེ་འདི་ཉིད་ཀྱི་ཐུགས་རྒྱུད་ཀྱི་ཡོན་ཏན་རྣམས་གཙང་སྟོན་རིན་པོ་ཆེའི་བྱིན་རླབ་ཀྱིས་སད་པར་མཛད་ལ། དེ་ཉིད་ཀྱི་ཡོན་ཏན་རྣམས་ཀྱང་སྦོམ་བྲག་པས་གཟིགས་པས་དཔོན་སློབ་དེ་དག་གི་མངོན་རྟོགས་ཅི་འདྲ་ཡིན་སོམས་ཤིག །ལན་གཅིག་མི་བསྐྱོད་པའི་ཞིང་ཁམས་གཟིགས་པ་ཞིག་ལ་འཁོར་གྱི་སེམས་དཔའ་རྣམས་ཀྱིས་ཆོས་ཀྱི་རྗེ་འདི་ལ་བྱང་ཆུབ་སེམས་དཔའ་ནོར་བུའི་སྙིང་པོ་ཞེས་པའི་སྒྲ་ཏི་རི་རི་སྒྲོགས་ཤིང་སྐུ་སྐྱེ་བ་དེའི་འོག་ཏུ་བདེ་བ་ཅན་དུ་དེ་ལྟར་འགྱུར་བ་ཡིན་གསུངས། ཡང་ཞིང་ཁམས་དེ་ཉིད་ལན་གཅིག་གཟིགས་པར་སྟོན་པ་མི་བསྐྱོད་པས་རིགས་ཀྱི་བུ་ནོར་བུའི་སྙིང་པོ་ཁྱོད་མ་འོངས་པའི་དུས་སུ་དེ་བཞིན་གཤེགས་པ་འོད་ཟེར་རབ་ཏུ་འཕྲོ་བ་ཞེས་བྱ་བར་
འགྱུར་རོ་ཞེས་ལུང་བསྟན་པའང་གསན། དགུང་ལོ་དགུ་བཅུ་བཞེས་པ་མེ་ཕོ་བྱི་བའི་ལོར་སྤྲུལ་པ་བསྡུས་སོ།། དེ་ཉིད་ཀྱི་རྒྱལ་ཚབ་བྱམས་པ་འབུམ་ནི། འཕགས་པའི་ཡུལ་དུ་གྲུབ་ཆེན་ཛ་ལནྡྷ་རི་པའི་ཐུགས་སྲས་གྲུབ་པའི་འཁོར་ལོས་སྒྱུར་བ་སྤྱོད་འཆང་དབང་པོ་ཡིན་ཏེ། རྗེ་བཙུན་མི་ཏྲ་ཛོ་ཀིས་སློབ་མ་སོ་མ་ཛོ་ཀི་ལ། ཁྱོད་བོད་དུ་འགྲོ་ན་ལན་གཅིག་ཀཿཐོག་ཏུ་འགྲོ་དགོས་པ་ཡིན་གསུངས། ཅིའི་ཕྱིར་ཞུས་པས། སློབ་དཔོན་ཤཱནྟ་དེ་བ་དང་སློབ་དཔོན་བཛྲ་པཱ་ཎི་བོད་ལ་སྐྱེ་བ་བཞེས་ནས་གདུལ་བྱ་དཔག་ཏུ་མེད་པའི་དོན་མཛད་ལ། དེའི་གདན་སར་ད་ལྟའང་སློབ་དཔོན་ཀཧྞ་པ་ཆེན་པོ་སྐུ་སྐྱེ་བ་དེར་བཞེས་ནས་གདུལ་བྱ་དཔག་ཏུ་མེད་པའི་དོན་མཛད་ནས་ད་ལྟའང་བཞུགས་སོ། །ཞེས་གསུངས་པ་དང་། གཞན་ཡང་། རྒྱ་གར་གྱི་རྒྱལ་པོ་དྷརྨ་པཱ་ལའི་སྲས་མ་ཧཱི་པཱ་ལར་འཁྲུངས་ཤིང་གྲུབ་པའི་སློབ་དཔོན་མང་པོ་བསྙེན་བཀུར་གྱིས་མཉེས་པར་མཛད། བཱ་ར་ཎཱ་སཱིར་བྲམ་ཟེའི་རིགས་ཀྱི་དགེ་སློང་དཱ་ན་ཀཱིརྟི་ཞེས་པ་བྲམ་ཟེ་ཆེན་པོའི་སློབ་མ་ཕག་མོ་ཞལ་གཉིས་མ་ལ་ཐུགས་དམ་མཛད་པ་ཞིག་དང་། མ་ག་དྷར་ཚོགས་དཔོན་གྱི་རིགས་སུ་འཁྲུངས་པ་རྟེན་དགེ་སློང་ཨཱ་ནནྡ་ཤྲཱི་ཞེས་པ་བདེ་མཆོག་ལྷན་སྐྱེས་ལ་བརྟེན་ནས་དངོས་གྲུབ་བརྙེས་ཤིང་རྡོ་རྗེ་གདན་གྱི་མཁན་པོ་མཛད་ནས་བསྟན་པ་ལ་བྱ་བ་མཛད། དེའི་འོག་ཏུ་རྗེ་བྱམས་པ་ཆེན་པོར་སྐུ་སྐྱེ་བ་བཞེས་པ་ཡིན་ནོ། །དམ་པ་རིན་པོ་ཆེ་དང་ཆོས་ཀྱི་རྗེ་གཉིས་ཅར་ལས་མདོ་སྔགས་ཀྱི་ཆོས་ཚུལ་རྒྱ་མཚོ་ཙམ་གསན་བསམ་བསྒོམ་གསུམ་མཛད་དེ་མཐར་ཕྱིན་པ་ནི་ཆོས་ཀྱི་རྗེ་ལས་མཛད་པ་སྟེ། དམ་པ་རིན་པོ་ཆེས། བུ་ཁྱོད་ལས་བྱུང་བའི་བྱམས་པ་འབུམ། །ཞེས་གསུངས་པའི་ཕྱིར་རོ། །ཆོས་ཀྱི་རྗེ་སྐུ་མ་བཞུགས་པའི་འོག་ཏུ་དགུང་ལོ་ཞེ་བརྒྱད་པ་ལ་གདན་སར་བཞུགས་ཤིང་སྒྱུ་འཕྲུལ་དང་རྫོགས་ཆེན་གཙོ་བོར་གྱུར་པའི་མདོ་སྔགས་ཀྱི་ཆོས་ཚུལ་རྒྱ་མཚོ་ལྟ་བུའི་དགའ་སྟོན་སྤེལ། མཆོག་གི་སྤྲུལ་སྐུ་ཀརྨ་པ་ཆེན་པོ་འབྲི་རྒྱལ་དམ་པ་ཆོས་ཕྱུག་ཏུ་སྐུ་འཁྲུངས་ཤིང་བྱང་ཆུབ་སེམས་དཔའ་སྦོམ་བྲག་པ་དང་ཤ་འབམ་དུ་ཐོག་མར་མཇལ་བ་ཞིག་ལ་ཁོང་གི་བཀའ་བཞིན་ཀཿཐོག་ཏུ་ཕེབས་ནས་བྱམས་རིན་པོ་ཆེས་
མཁན་པོ་དང་། སྤྱན་སྔ་མང་ཕུ་བ་བསོད་ནམས་འབུམ་པས་ལས་སློབ་མཛད་དེ་ཀརྨ་པ་བསྙེན་པར་རྫོགས་པ་དགེ་སློང་གི་དངོས་པོར་བསྒྲུབས་ཏེ་ཐུབ་པའི་རྒྱལ་ཚབ་ཏུ་མངའ་གསོལ། མཚན་ཆོས་ཀྱི་བླ་མར་གསོལ་ཞིང་སྒྱུ་འཕྲུལ་དང་རྫོགས་ཆེན་གྱི་དབང་དང་གདམས་པའང་གསན། དགུང་གི་གྲངས་དོན་བཞིའི་བར་བསྟན་པ་དང་འགྲོ་བའི་དོན་མཛད་ནས་ཆུ་བྱི་ལོར་གཟུགས་སྐུའི་བཀོད་པ་བསྡུས་ཤིང་དེའི་འོག་ཏུ་དཔལ་ལྡན་འབྲས་སྤུངས་སུ་བྱང་ཆུབ་སེམས་དཔའ་ཀ་མ་ལ་ཤྲཱི་ཞེས་པར་གྱུར་ནས་གདུལ་བྱའི་དོན་མཛད། དེའི་རྗེས་སུ་བདེ་བ་ཅན་དུ་བྱང་ཆུབ་སེམས་དཔའ་ཟླ་བའི་སྙིང་པོའམ་ཀུན་ཏུ་བཟང་པོ་ཞེས་བྱ་བའི་ཚུལ་གྱིས་ཕྱི་མཐའི་བར་བཞུགས་ཤིང་སེམས་ཅན་མཐའ་ཡས་པའི་དོན་མཛད་དོ། །དེ་ཉིད་ཀྱི་རྒྱལ་ཚབ་སྤྱན་སྔ་བ་ཆེན་པོ་བསོད་ནམས་འབུམ་པ་དགུང་གྲངས་སུམ་ཅུ་བཞེས་པར་གདན་སར་བཞུགས། མདོ་སྒྱུ་འཕྲུལ་རྫོགས་ཆེན་གཙོ་བོར་བཏོན་ཅིང་བསྟན་པ་བསྐྱངས། རེ་གཅིག་པ་ལ་གཤེགས། དེ་ཉིད་ཀྱི་རྒྱལ་ཚབ་དབུ་འོད་ཡེ་ཤེས་འབུམ་ཤིང་ཕོ་སྟག་ལ་སྐུ་འཁྲུངས། ཉེར་དགུ་ལ་གདན་སར་ཕེབས། མདོ་སྒྱུ་སེམས་གསུམ་གཙོ་བོར་གྱུར་པའི་མདོ་སྔགས་ཀྱི་ཆོས་ཀྱི་འཁོར་ལོ་རྒྱ་ཆེན་པོ་བསྐོར་ཞིང་དུས་སྐབས་དེར་ཆོས་ཀྱི་རྗེ་ས་སྐྱ་པཎྜི་ཏ་དང་འཕགས་པ་རིན་པོ་ཆེ་ཁུ་དབོན་ཧོར་རྒྱལ་པོས་གདན་དྲངས་ཏེ་ཕེབས། ལམ་བར་འཛིང་དུ་རྣམ་རྒྱལ་ལྷ་ཁང་བཞེངས། ཀཿཐོག་པའང་དེར་ཕེབས། ས་སྐྱ་པ་བཞུགས་པའི་ཕྱོགས་ཐམས་ཅད་དངུལ་གྱི་ས་གཞི་དང་ས་འཛིན་གྱི་རང་བཞིན་དུ་གྱུར། ཅིག་ཤོས་ཀྱི་ཕྱོགས་སུ་དེ་དག་གིས་དབེན་པར་གྱུར་པ་ན། དེར་ལྷ་ཁང་ལ་གསར་རྙིང་གཉིས་རབ་གནས་དུས་གཅིག་མཛད་རྒྱུར་ཀཿཐོག་པའི་ཞལ་ནས་རབ་གནས་ཀྱི་ཐོག་མའི་བགེགས་སྐྲོད་དེ་ངེད་རྙིང་མ་བས་བྱེད། ཡེ་ཤེས་པ་བཞུགས་པ་སོགས་རབ་གནས་དངོས་གཞི་དེ་ཁྱེད་གསར་མ་པས་མཛད་པར་ཞུ་གསུངས། དེར་ཀཿཐོག་པས་བགེགས་སྐྲོད་པའི་ཏིང་ངེ་འཛིན་ལ་ཞུགས་པས་ལྷ་ཁང་ཕྱི་ནང་བསྒྱུར།
ས་སྐྱ་པས་ཡེ་ཤེས་པ་དབབ་པས་སླར་རྣལ་དུ་གནས་པར་མཛད་པའི་ངོ་མཚར་བསྟན། ཀཿཐོག་པས་འཕགས་པ་རིན་པོ་ཆེ་ལ་སྒྱུ་འཕྲུལ་ཞི་ཁྲོའི་དབང་བསྐུར་བ་མཛད་ཅིང་ཧོར་ཡུལ་དུ་ཐེག །སླར་ཆོས་ཀྱི་རྗེ་ཧོར་ཡུལ་དུ་གཟུགས་སྐུ་བསྡུས། འཕགས་པས་བོད་དུ་ཕྱིར་བྱོན་སྐབས་སྐྱེས་སུ་མཆོད་རྟེན་ལི་མ་ཐོག་ཚད་གསུམ་དང་ཏིང་ཆེན་པོ་བདུན་ཚར་སོགས་ཀཿཐོག་ཏུ་དབུལ་བར་མཛད་པ་ད་ལྟའང་ཡོད། དེ་དག་གི་ཚུལ་ས་སྐྱ་པཎྜིའི་རྟོགས་པ་བརྗོད་པ་སྙན་ངག་གི་བསྟན་བཅོས་ཆེན་པོ་དགེ་དབང་གཉིས་པ་རིན་སྤུངས་ས་སྤྱོད་ངག་དབང་འཇིགས་མེད་གྲགས་པས་མཛད་པ་སྐལ་བཟང་ལེགས་ལམ་དུ། འབྲི་ཆུར་སྒྲས་བོད་བདུད་ཀྱི་རྩི། །བཏུང་བ་ཐམས་ཅད་ལེགས་བྱས་སུ། །འགྲོ་བའི་རྒྱུན་གྱིས་ཉེར་འཚོ་རྣམས། །བདེ་དང་འབྱོར་པས་ཕྱུག་གཟིགས་ནས། །ཀྱེ་མ་མ་ལ་སྲིད་པ་ཡི། །རྣམ་འགྱུར་ཡིད་འོང་རྩོམ་པ་ལས། །རྟེན་འབྱུང་ཚོགས་ནི་རྒྱ་ཆེ་བ། །བརྟག་པར་བྱ་དེ་རྒྱལ་གྱུར་གསུངས། །དེ་ནས་རྫུ་འཕྲུལ་རྐང་པ་བཞི་ཡི་འདེགས་འཇོག་རེ་ལ་ཆོས་འཁོར་མཚན་མ་བརྒྱ། །འགོད་བཞིན་སྤྲོ་བས་རྒྱལ་བའི་གོ་འཕང་ལ་ཞོན་འཛིན་དུ་བྱོན་ལ་དེ་བཞིན་དུ། །གསང་སྔགས་རྙིང་མའི་སྙིང་པོའི་རྣལ་འབྱོར་གྲུབ་པ་ཡོངས་མཛད་ཤར་གྱི་ཀཿཐོག་པ། །དབུ་འོད་ཡེ་ཤེས་འབུམ་སྟེ་གཟི་བྱིན་ཉི་མ་འབུམ་ཕྲག་འགོངས་དང་ལྷན་ཅིག་ཏུ། །བརྟེན་པ་ལྷ་ཡི་སྣང་བརྙན་འགའ། །གསར་དུ་བསྒྲུབས་ལ་ཀཿཐོག་པས། །བགེགས་རྣམས་བསྐྲད་པའི་དྲག་ཤུལ་གྱིས། །ལྷ་སྐུ་རྣམས་ཀྱང་རིང་དུ་སོང་། །དམ་ཚིག་སེམས་དཔའ་དེ་ཡར་བ། །གང་དུ་ས་སྐྱ་པཎ་ཆེན་མཐུས། །སྐད་ཅིག་ལ་བཀུག་ཡེ་ཤེས་ཀྱི། །སེམས་དཔའ་བརྗིད་ལྡན་ལྷག་གནས་བསྩལ། །ཐབས་ཤེས་བདག་གི་ང་ཡིར་མེད། །ཡེ་ཤེས་སྒྱུ་མའི་རང་མཚན་ལས། །མཆོག་ཆོས་གྲུབ་པའི་རོལ་རྩེད་ཀྱིས། །ཕྲེང་བ་མཉམ་ཉིད་བཤམ་མོ་ཆེ། །ཐེག་པ་རིམ་པ་དགུ་ཡི་མགོན། །དེ་ཡིས་འཕགས་པར་སྒྱུ་འཕྲུལ་དབང་། །བསྐུར་བའི་དྲིལ་ཆེན་སྒྲ་བཞིན་དུ། །རྣ་བ་བརྒྱུད་མར་དབྱངས་སུ་ལེན། །དངུལ་གྱི་ས་གཞི་ས་འཛིན་ཅན། །ཡངས་ཤིང་དར་བའི་ཀུ་མུད་དང་། །འཁྲུལ་ལས་ཟླ་བའི་འཇིག་རྟེན་ནི། །དགའ་བ་འཁྱིལ་པའི་ཐད་བརྒྱུད་དོ། །ཞེས་པ་
ལ་སོགས་ཀྱིས་རྗོད་བྱེད་སྙན་ཅིང་མཛེས་པའི་རྒྱན་དང་། བརྗོད་བྱ་དོན་གྱི་ལུས་རྫོགས་པར་གྱུར་པས་སྙན་དངགས་སྨྲ་བ་གཞན་གྱིས་ཆ་ཙམ་ཡང་བསྒྲུན་དུ་མེད་པ་ཉིད་དུ་མཐོང་ངོ་། །རྗེ་དབུ་འོད་པའི་རྒྱལ་ཚབ་བྱང་ཆུབ་དཔལ་བ་དགུང་ལོ་ཞེ་བཞི་པར་གདན་སར་བྱོན། འདིའི་དུས་སུ་བར་ཁྲོད་དང་། སྤང་ཁྲོད། དམ་ཕུག་རྣམས་སུ་ཕུང་པོ་འོད་སྐུར་དེངས་པ་མང་དུ་བྱུང་། ལྷ་ཁང་བཞེངས་སྐབས་སུ་ལས་བྱེད་རྣམས་ཀྱིས་ཕྱུགས་ལུག་མང་པོ་བསད་ནས་ཤ་པགས་པ་སོ་སོར་ཕྲལ་བ་ལ་དྲུང་ནས་སེ་གོལ་ཞིག་གཏོགས་པར་མཛད་པས་ཐམས་ཅད་ཅོ་དིར་གྱིས་མཁའ་སྤྱོད་དུ་སོང་བར་གྲགས། དགུང་ལོ་རེ་བཞི་པ་ལ་གཞན་དོན་དུ་གཤེགས། དེའི་རྒྱལ་ཚབ་བསོད་ནམས་བཟང་པོ་དགུང་ལོ་ང་གསུམ་པ་ལ་གདན་སར་ཕེབས། གཞི་སྒྱུ་འཕྲུལ་དང་རྫོགས་ཆེན་གྱིས་བཟུང་ཞིང་འདི་སྐབས་ཙམ་ནས་ཉང་དང་ཆོས་དབང་སོགས་གཏེར་ཆོས་སྔོན་མ་སྔོན་མ་རྣམས་ཅུང་ཟད་རེ་དར་བབ་བྱུང་། རེ་གསུམ་པ་ལ་གཞན་དོན་དུ་གཤེགས། རྒྱལ་ཚབ་ཀུན་དགའ་འབུམ་པས་ཀྱང་སྔོན་བཞིན་དུ་བསྟན་པ་བསྐྱངས། དེ་ནས་དབང་ཕྱུག་དཔལ་བ་དགུང་གྲངས་སོ་བརྒྱད་པར་གདན་ས་མཛད་ཅིང་འདི་སྐབས་བཤད་པ་བག་ཙམ་རེ་ལས་སྒྲུབ་པ་ཁོ་ན་གཙོ་བོར་མཛད་ཅིང་ཐུགས་དམ་ལ་རྩེ་གཅིག་ཏུ་བཞུགས་པ་ལ། དུས་གཞན་ཞིག་ཏུ་འཇང་རྒྱལ་པོས་དམག་དཔུང་ཆེན་པོ་བྱུང་བར་ཉེ་གནས་ཀྱིས་དམག་བྱུང་བས་ཅི་ཙུག་དྲག་ཞུས་པར་ཁོང་ཉིད་ཀྱི་ཐོག་ཏུ་རྩམ་པ་མང་པོ་ལུགས་ཤིག་གསུངས། དེ་བཞིན་དུ་བྱས་པས་ཁ་བ་ཆེན་པོ་བབས་ནས་དམག་རྣམས་ཕྱིར་ལོག །སླར་ཞབས་སུ་བཏུད་དེ་གསེར་གྱི་ཐུབ་པའི་སྐུ་དང་། བ་སོ་ལས་བཅོས་པའི་གནྡྷོ་ལའི་བཀོད་པ། ད་ལྟའི་གཙུག་ལག་ཁང་གི་རྩེའི་གཉྫི་ར་ཆེ་བ་འདི་རྣམས་ཕུལ། དེ་ཉིད་དགུང་གྲངས་ང་གསུམ་པ་ལ་གཟུགས་སྐུ་བསྡུས། རྒྱལ་ཚབ་བློ་གྲོས་འབུམ་པ་ཞེ་གསུམ་པ་ལ་གདན་ས་མཛད། འདིའི་སློབ་མ་ཆུ་གསོར་ནམ་མཁའ་འབུམ་སོགས་གྲུབ་བརྙེས་མང་པོ་བྱུང་། ཟུར་འུག་པ་ལུང་དང་གསང་སྔགས་གླིང་རྣམས་སུ་བར་སྐབས་སུ་བསྟན་པ་ཉག་ཕྲ་བར་གྱུར་པ་ལ་མདོ་སྒྱུ་འཕྲུལ་སོགས་དར་བར་
མཛད་ཅིང་དབུས་གཙང་ཁམས་གསུམ་དུ་བསྟན་པ་ལ་ཕྱག་རྗེས་ཆེ། རེ་ལྔ་པར་གཞན་དོན་དུ་གཤེགས། རྒྱལ་ཚབ་བློ་གྲོས་སེང་གེ་དགུང་ལོ་སོ་དྲུག་པར་གདན་ས་མཛད། བཀའ་མ་སྔ་དར་རྣམས་ཀྱིས་གཞི་བཟུང་ནས་གཏེར་མའི་སྐོར་ཡང་འདི་སྐབས་ཀ་དར་རྒྱས་སུ་མཛད་པ་ཡིན། དྲུག་ཅུ་པ་ལ་གཤེགས། རྒྱལ་ཚབ་བྱང་ཆུབ་བློ་གྲོས་ཀྱིས་ཀྱང་སྔོན་གྱི་རྒྱུན་དེ་ཀ་དང་ཁྱད་པར་སྒྱུ་འཕྲུལ་སྡེ་བཞི་དང་ལམ་རྣམ་བཀོད་ལའང་བཤད་པ་མཛད། རི་རྩིབས་དང་བར་ཁྲོད་སོགས་སུ་སྤང་བ་བསམ་གཏན་གྱི་སྡེའང་ཤིན་ཏུ་རྒྱས། དེ་ཉིད་ཀྱི་རྒྱལ་ཚབ་བྱང་ཆུབ་སེང་གེ་དང་བྱང་ཆུབ་རྒྱལ་མཚན་གཉིས་ཀྱིས་ཀྱང་བཀའ་གཏེར་གྱི་འཆད་ཉན་སྒོམ་གསུམ་ཤིན་ཏུ་རྒྱས་པར་མཛད། བྱང་ཆུབ་རྒྱལ་མཚན་གྱི་སློབ་མ་བུ་འབོར་མཁས་གྲུབ་ཛྙཱ་ན་ཀེ་ཏུ་ནི་གཉགས་ཡེ་ཤེས་གཞོན་ནུའི་རྣམ་འཕྲུལ་དུ་ལུང་གིས་བསྟན་ཅིང་མདོ་སྔགས་སྤྱིའི་ལམ་རིམ་ཐམས་ཅད་ལ་མཁས། ཁྱད་པར་མཁས་གྲུབ་ཆེན་པོ་བྲའོ་ཆོས་འབུམ་ལས་འདུས་པ་མདོ་དང་སྒྱུ་འཕྲུལ་ཞི་ཁྲོའི་དབང་དང་བཤད་པ་སྒྲུབ་ཐབས་སོགས་མ་ལུས་པར་གསན། བླ་མ་དེ་ལས་རྨོག་སྟོན་རྡོ་རྗེ་དཔལ་བཟང་གིས་འདུས་པ་མདོ་ཞུས་ཤིང་། དེ་ལས་སེམས་དཔའ་ཆེན་པོ་དར་ལུང་པ་རྡོ་རྗེ་རྣམ་རྒྱལ་གྱིས་ཞུས། རྒྱུན་དེ་ལས་འདུས་པ་མདོ་ཁམས་ལུགས་སུ་གྲགས་པ་དབུས་སུ་བབ་པ་ཡིན་ཏེ་སླར་འཆད་དོ། །མཁས་གྲུབ་ཡེ་ཤེས་རྒྱལ་མཚན་གྱིས་གསང་བ་སྙིང་པོ་རྩ་འགྲེལ་རྣམས་དང་། མདོ་དགོངས་འདུས། རྫོགས་ཆེན་སེམས་ཀློང་མན་ངག་གི་སྡེ་གསུམ་སོ་སོའི་བཀའ་སྲོལ་གྱི་རྩ་བ་རྣམས་སླར་ཡང་ཉི་མ་ལྟར་གསལ་བར་མཛད་ཅིང་བཤད་སྒྲུབ་ཀྱིས་བསྟན་པ་ཁྱབ་གདལ་དུ་སྤེལ། ཞི་ཁྲོ་དང་ཕུར་པ་བཀའ་མའི་འགྲེལ་པ། གསང་བ་སྙིང་པོ་ལ་འགྲེལ་པ། ས་བཅད། བསྡུས་དོན། ལམ་རྣམ་བཀོད་ལ་ཊི་ཀ་དང་མཆན་བུ། སྤར་ཁབ་དང་ཐུགས་ཐིག་ལ་མཆན་འགྲེལ། དམ་ཚིག་གསལ་བཀྲ་ལ་འགྲེལ་པ་གསལ་བའི་མེ་ལོང་། ཞི་ཁྲོའི་ཕྱག་རྒྱ་བཅིང་ཐབས་ཀྱི་ཡི་གེ། དམ་པ་རིན་པོ་ཆེའི་ཐེག་པ་སྤྱི་བཅིང་གི་འགྲེལ་པ། ཚོགས་ཀྱི་འཁོར་ལོའི་རྣམ་བཤད་སོགས་བསྟན་བཅོས་ཤིན་ཏུ་མང་བར་མཛད།
རྗེ་དེ་ཉིད་ཀྱི་སློབ་མ་ཁ་བ་དཀར་པོ་བ་ནམ་མཁའ་རྒྱ་མཚོ། ཀུན་དགའ་ཟླ་བ། ཕྱོགས་མེད་བྱང་སེམས། ལབ་སྟོན་ནམ་མཁའ་རིན་ཆེན་སོགས་མཁས་ཤིང་དངོས་གྲུབ་བརྙེས་པ་ཁོ་ནའང་མང་དུ་བྱོན་པ་ལས་ཁ་བ་དཀར་པོ་བས་གསང་སྙིང་སྤྱི་དོན་དང་། ས་བཅད། བསྡུས་དོན། ལམ་རྣམ་བཀོད་ལ་ཊི་ཀ་སོགས་མཛད། མཁས་གྲུབ་ཆེན་པོ་ཉིད་སྐུ་ཚེའི་མཐར་འཕགས་མཚོ་རི་ཁྲོད་དུ་སྒྲུབ་པ་ཁོ་ན་ལ་གཞོལ་ཞིང་བཞུགས་ནས་བུ་འབོར་དང་ཁ་བ་དཀར་པོ། འཇང་ཡན་ཆད་ཀྱི་གདུལ་བྱ་དཔག་ཏུ་མེད་པའི་དོན་མཛད་ནས་མཁའ་འགྲོ་མ་ལས་ཀྱི་དབང་མོ་ཆེས་ཁྱོད་དྲུག་ཅུ་རེ་བཞིའི་དུས་འདི་ནས་ཚེ་འཕོས་ནས་བྱང་གི་ཕྱོགས་སུ་འགྲོ་དོན་རྒྱ་ཆེར་མཛད། དེ་ནས་བདེ་བ་ཅན་དུ་བྱང་ཆུབ་སེམས་དཔའ་བདེ་བའི་མྱུ་གུས་སངས་རྒྱས་ཀྱི་ཞིང་སྦྱངས་ཤིང་དག་པའི་བསྐལ་པ་ཡོན་ཏན་བཀོད་པར་བདེ་བའི་སྙིང་པོ་ཞེས་བྱ་བར་འཚང་རྒྱ་བར་འགྱུར་རོ། །ཞེས་ལུང་བསྟན་པའང་ཐོབ། སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་ཞལ་གཟིགས་ཤིང་ཐུན་མོང་གི་སྤྱོད་ཡུལ་དུའང་བླ་གོས་ཉི་ཟེར་ལ་བཀལ་བ་སོགས་མཁས་པ་དང་གྲུབ་པའི་རྣམ་ཐར་ལ་བསམ་གྱིས་མི་ཁྱབ་པོ། །འདི་ཡན་ཆད་ཀཿཐོག་བླ་རབས་བཅུ་གསུམ་ཞེས་རིགས་གསུམ་མགོན་པོའི་རྣམ་འཕྲུལ་ཟམ་མི་འཆད་དུ་བྱོན་ཅིང་། སྔ་འགྱུར་གྱི་བསྟན་པ་བཤད་སྒྲུབ་གཉིས་ལྡན་ཀྱིས་བསྐྱངས་པ་ཡིན་ནོ།། ཡང་དམ་པ་བདེར་གཤེགས་ཀྱི་སློབ་མ་རོང་པོ་ཐོས་ཆོག་རྣམ་གསུམ་ཞེས། ཤེས་རབ་རྒྱལ་མཚན་དང་། ཤེས་རབ་དཔལ་བ། ཤེས་རབ་རྡོ་རྗེ་གསུམ་སྟེ་དབང་རྣོན་ཅིག་ཅར་གྱི་གདུལ་བྱ་ཇི་བཞིན་པར་ངེས་ཤིང་དམ་པ་རིན་པོ་ཆེའི་ཆོས་གསུངས་པའི་སྒྲ་ཐོས་པ་ཙམ་གྱིས་ཆོས་ཐམས་ཅད་ཀྱི་གཏིང་སླེབ་པའི་གྲུབ་པའི་དབང་ཕྱུག་ཆེན་པོར་གྱུར། ཁོང་གསུམ་ཉིད་ཀྱིས་ཤར་རྒྱལ་མོ་རོང་དུ་བསྟན་པ་སྤེལ་བ་ལས་ད་ལྟའི་བར་བསྟན་པ་རིན་པོ་ཆེ་མ་ཉམས་ཤིང་དར་བ་འདི་ཀ་བྱུང་བ་ཡིན་ནོ། །ཡང་ཀ་དམ་པའི་སློབ་མའི་མཆོག་
ལུང་བསྟན་བུ་བཞིར་གྲགས་པ་ལས། འབྲུ་ཚ་སྒང་པས་བུམ་རོང་བཞག་གསུམ་ཁ་བ་དཀར་པོ་ཡན་ཆད་དུ་དགོན་གནས་བརྒྱ་རྩ་བརྒྱད་བཏབ་པར་གྲགས་ཤིང་བསྟན་པ་ཁྱབ་གདལ་དུ་སྤེལ་བའི་ཕྱག་རྗེས་ཆེ། ཙ་སྡེ་སྤྱན་སྔ་ནམ་མཁའ་རྡོ་རྗེས་གོ་འཇོ་ཙ་སྡེ་དགོན་པ་འདེབས་པར་མཛད། ཁོང་གི་སློབ་མ་དྲུང་ཐུགས་རྗེ་ཡེ་ཤེས། སྟོན་པ་དབང་འབྱོར་སོགས་ལས་སྒྱུ་འཕྲུལ་དང་རྫོགས་ཆེན་གྱི་སྐོར་རྣམས་དབུས་སུ་བབས་པས་ཁམས་ལུགས་ཞེས་པ་དེ་བྱུང་། རྨོག་སྟོན་འཇམ་དཔལ་སེང་གེས་འབྲི་རྒྱུད་དུ་དགོན་པ་མཛད་ཅིང་བསྟན་པ་དང་སེམས་ཅན་གྱི་དོན་རླབ་པོ་ཆེ་བསྒྲུབས། ཁོང་ལས་གྲུབ་ཐོབ་རྨོག་རབས་བཅུ་གསུམ་དུ་གྲགས་པའི་རྒྱུན་རྣམས་བྱུང་། གྲུབ་ཐོབ་མ་ཎི་རིན་ཆེན་གུ་རུ་ཆོས་ཀྱི་དབང་ཕྱུག་གི་ཐུགས་རྗེ་ཆེན་པོ་ཡང་སྙིང་འདུས་པའི་རྩ་བའི་ཆོས་ཀྱི་བདག་པོར་ངོས་བཟུང་ཞིང་ཁོང་ཉིད་ཀྱི་སྲས་མོ་ཀུན་གྲོལ་འབུམ་དང་ལྷན་ཅིག་ཀཿཐོག་ཏུ་སྔགས་ཀྱི་ལུང་བསྟན་མཛད་ཀྱང་མ་ཎི་རིན་ཆེན་རབ་བྱུང་གི་བརྟུལ་ཞུགས་ལས་མ་འདས་པས་རྟེན་འདྲེལ་ཅུང་ཟད་འཕྱུགས། འོན་ཀྱང་གོང་མ་རྣམ་གསུམ་གྱི་གདུང་འབུམ་སོགས་ཀྱི་ཞབས་ཏོག་མཛད་པའི་ལས་ཟིན་མ་ཐག་དེ་ཉིད་དུ་བླ་གོས་ཀྱིས་གཤོག་པ་ལྟར་མཛད་ནས་ནམ་མཁའ་ལ་བྱ་བཞིན་འཕུར་ནས་ཕར་ཀའི་རི་རྩེར་བབ། དེར་ཞབས་རྗེས་ཀྱང་ཡོད། དེ་ནས་རག་ཅོག་ཏུ་བཞུགས་ཤིང་རིང་པོར་མ་ཐོགས་པར་སྐུ་འོད་ཕུང་དུ་ཡལ་ལོ། །བླ་རབས་བཅུ་གསུམ་གྱི་རྗེས་སུ་དྲུང་རབས་བཅུ་གསུམ་བྱོན་ནས་རིམ་གྱིས་བཀའ་གཏེར་གྱི་བསྟན་པ་བསྐྱངས་མོད། འོན་ཀྱང་བཀའ་མ་རྣམས་ཕྱིས་རིམ་གྱིས་ཉག་ཕྲ་བ་བཞིན་གྱུར། སྨོས་མ་ཐག་པའི་བླ་རབས་རྣམས་ཀྱི་དུས་དགེ་འདུན་ཁྲི་ཕྲག་བཅོ་བརྒྱད་དུ་ལོངས་པའི་བསྟན་པ་དར་རྒྱས་བྱུང་ཞིང་རྒྱུ་མཚན་ཉིད་ཀྱི་བཤད་གྲྭ་དང་འཆད་ཉན་ཀྱང་ཡོད་པར་འདུག་ཅིང་། སློབ་གྲྭ་དང་བསྒོམ་གྲྭ་སོགས་སོ་སོར་བྱུང་། མདོར་ན་ཤར་རྒྱལ་མོ་རོང་། ལྷོ་ཚ་བ་རོང་དང་མོན། ནུབ་ཀོང་པོ་སོགས་དང་དབུས་གཙང་མན་ཆད་དུ་སྔ་འགྱུར་གྱི་
བསྟན་པ་བཤད་སྒྲུབ་གཉིས་ཀའི་ཕྱོགས་ནས་ཁྱབ་ཆེ་བས་དབུས་གཙང་དུ་བར་སྐབས་སུ་མདོ་དང་སྒྱུ་འཕྲུལ་སེམས་ཕྱོགས་སོགས་ཀྱི་བསྟན་པ་ཉག་ཕྲ་བར་གྱུར་པའང་འདི་གའི་རྒྱུན་གྱིས་གསོས་ཤིང་དེང་སང་གི་བར་དུ་དབང་གི་ཆུ་བོ་དང་། བཤད་པའི་སྲོལ། མན་ངག་གི་རྒྱུན། ལུང་གི་བརྒྱུད་པ་རྣམས་མ་ཆད་པར་ཡོད་པ་འདི་ཀ་ཡིན་ནོ། །དེའང་འདུས་པ་མདོ་དང་སྒྱུ་འཕྲུལ་གཉིས་ཀྱི་དབང་ལུང་མན་ངག་བརྒྱུད་པའི་ཆུ་བོ་བབ་ལུགས་ཕྱོགས་གཅིག་ནི། དམ་གཙང་བྱམས་གསུམ་ནས། ཙ་སྡེ་སྤྱན་སྔ་བ་ནམ་མཁའ་རྡོ་རྗེ། དྲུང་ཐུགས་རྗེ་ཡེ་ཤེས། སྟོན་པ་དབང་འབྱོར། རྗེ་བཙུན་དཔལ་འབར་བ་ནམ་མཁའ་རྡོ་རྗེ། སྟོན་པ་མགོན་རྒྱལ། ཡང་ཁྲོད་ཚུལ་ཁྲིམས་རྒྱལ་མཚན། བྲའོ་ཆོས་ཀྱི་འབུམ་པ། བུ་འབོར་བ་མཁས་གྲུབ་ཡེ་ཤེས་རྒྱལ་མཚན། བཞག་བླ་མཁས་གྲུབ་ཡེ་ཤེས་འབུམ་པ། དེ་ལས་མོན་ཀཿཐོག་པ་བསོད་ནམས་རྒྱལ་མཚན། ཀཿཐོག་པ་རྣམ་གྲོལ་བ་བཟང་པོ། ཀཿཐོག་པ་ཆོས་ཀྱི་སེང་གེ། ལྷ་བྲོ་བ་ཆོས་ཀྱི་དབང་པོ་ནས་རིམ་པར། རྗེ་སྨན་ལུང་པ་བློ་མཆོག་རྡོ་རྗེ་ནས་དེང་སང་གི་བར་དུ་རྒྱུན་མ་ཆད་པར་བྱུང་བ་ཡིན་ནོ། །ཡང་མདོ་དབང་ཁམས་ལུགས་ཞེས་པ་ནི། བར་སྐབས་དེར། སྒྲོལ་ཆེན་བསམ་འགྲུབ་རྡོ་རྗེས། ཟུར་ཡང་དབེན་པ་ཤཱཀྱ་འབྱུང་གནས་ལྕམ་སྲིང་གཉིས་ལ་གནང་བ་ལས། ཟུར་མོ་དགེ་འདུན་འབུམ་ལས་བརྒྱུད་པ་སྟེ། ཟུར་མོ་འདི་དོན་ལ་རང་བཞིན་གྱི་རྣལ་འབྱོར་མ་ཡིན་མོད། རྣམ་པ་གཞོན་དུས་ནས་འཁོར་བའི་སྐྱོན་དང་བྲལ་བས་སྐུ་བཙུན། བསྐྱེད་རྫོགས་གསུམ་ཀ་ལ་སྦྱངས་པས་མཐར་སོན། གནས་ལུགས་རྟོགས་ཤིང་ཏིང་འཛིན་གྱི་སྒོ་དུ་མ་ལས་དབང་འབྱོར་པས་མཁས་ཤིང་གྲུབ་པ་མོ་ཆེན་མོར་གྱུར་ཏེ་ཉང་སྨད་རྩེ་རྒྱལ་གྱི་སྒོམ་ཁང་དུ་བཞུགས་ནས་འགྲོ་བའི་དོན་མཛད། དེས་ཡང་དབེན་གསང་སྔགས་གླིང་པ་ཟུར་སྟོན་ཤཱཀྱ་བཤེས་གཉེན་ལ་དབང་བསྐུར། དེས་ཀཿཐོག་གི་མཁས་གྲུབ་བྲའོ་ཆོས་འབུམ་ལ། དེས་བཤེས་གཉེན་དཀོན་མཆོག་
བཟང་པོ་དེས་ཀཿཐོག་པ་རྨོག་སྟོན་རྡོ་རྗེ་དཔལ་བཟང་པོ་ལ་དབང་བསྐུར། འདིས་གླན་ལུགས་ཀྱི་དབང་ཆོག་དུམ་དུམ་ཁྲིག་ཉིད་གཞིར་བྱས་པ་ལ་འགོས་རྩི་ལུང་པའི་ཕྱག་བཞེས་གྲོ་སྟོན་དཔལ་ལྡན་གྲགས་ཀྱི་ཆོག་ཁྲིགས་ཀྱིས་ཀྱང་བརྒྱན། སྒྱུ་འཕྲུལ་ཞི་ཁྲོ་དང་སེམས་སྡེ་ཨ་དོན་བཅོ་བརྒྱད་ཀྱི་སྒོས་བཀའ་ཡང་སྦྱར་ཏེ་དབང་ཆོག་སྦྲང་རྩིའི་ཆུ་རྒྱུན་མཛད། མཛད་པ་པོ་འཆི་མེད་ཀྱིས་བརྙེས་པའི་རིག་འཛིན་གྲུབ་པར་གྲགས་ཤིང་སྐྱེས་མཆོག་དམ་པ་ཡིན་ངེས་སུ་མ་ཟད། སྐུལ་བ་པོའང་བཤེས་གཉེན་འགྲན་ཟླ་དང་བྲལ་བ་མང་པོས་མཛད་པས་འགངས་ཆེ་ཞིང་། སྒྲུབ་རྫས་ཐུན་མོང་བཅོ་ལྔའི་དབང་གཉལ་པའི་ཆོག་ཁྲིགས་སུ་ཆད་པ་འདིར་འབྱུང་བ་དང་། སྒྱུ་འཕྲུལ་ཞི་བའི་ཟབ་དབང་གསུམ་གྱི་བཀའ་དབུས་གཙང་དུ་བར་སྐབས་སུ་ཆད་པ་ཀཿཐོག་ལུགས་འདིར་བཞུགས་པས་སོས་ཤིང་། སེམས་སྡེ་ཨ་དོན་བཅོ་བརྒྱད་ཀྱི་དབང་རྒྱུན་འདིས་བཟུང་བས་བསྟན་རྒྱུན་ལ་ཕན་པ་ཆེན་པོའི་སྒོར་གྱུར་པ་ཡིན་ནོ། །རྨོག་སྟོན་གྱིས་བྱང་ཆུབ་སེམས་དཔའ་ཆེན་པོ་དར་ལུང་པ་རྡོ་རྗེ་རྣམ་རྒྱལ། དེས་ཁྱུང་ཚང་པ་འཁྲུལ་ཞིག་བློ་གྲོས་དཔལ་ལྡན་ལ། དེས་དབང་སྟོན་ཀརྨ་གུ་རུ་ལ། དེས་སྔགས་འཆང་ཀུན་བཟང་དཔལ་འབྱོར་ལ། དེས་གསང་བདག་ཕྲིན་ལས་ལྷུན་གྲུབ་ལ། དེས་དྭགས་སྟོན་ཆོས་རྒྱལ་བསྟན་འཛིན་ལ་དབང་བསྐུར་ཞིང་། དེས་གཏེར་ཆེན་ཆོས་ཀྱི་རྒྱལ་པོ་འགྱུར་མེད་རྡོ་རྗེ་ལ་ཁམས་ལུགས་བརྒྱུད་པའི་ཆུ་བོ་བབ་པ་ཡིན་ནོ། །ཡང་རོག་ཤེས་རབ་འོད་ལས་ཀྱང་མདོ་སྒྱུའི་བཤད་བཀའ་ཤིན་ཏུ་དར་བ་བྱུང་སྟེ། ཤེས་རབ་འོད་འདིས་དང་པོར་རོག་སྟོན་བཙན་པོ་ལ་སོ་ལུགས་ཀྱི་མདོ་དང་སྒྱུ་འཕྲུལ་དང་སེམས་ཕྱོགས་གསན། ལྷབ་དྲེས་མ་གོང་པ་ལ་མདོ་དང་སྒྱུ་འཕྲུལ་སྐྱོ་ལུགས། ལྷབ་ཀྱི་ཟུར་ཆོས་པ་སློབ་དཔོན་ཡམ་ཆོས་དངོས་གྲུབ་ལ་མདོ་དང་། སྒྱུ་འཕྲུལ་ཟུར་ལུགས། ཡང་སྒྲོ་ཕུག་པའི་སློབ་མ་གནུབས་སྟོན། དེས་ཁ་རག་སྙིང་པོ། དེས་ཡམ་ཤུད། ཡང་ཁ་རག་སྙིང་པོས་སྲས་པདྨ་འབར། དེས་རོག་ཤེས་རབ། ཡང་།
སོ་དར་མ་སེང་གེ་ལ་སྒྱུ་འཕྲུལ་མཆན་མང་ཞེས་སྔར་མཆན་བུས་ཊི་ཀ་འཆད་པའི་སྲོལ་ཡོད་པ་དེ་གསན། ཡང་ཆུ་བར་གྱི་གླན་ཤཱཀྱ་བཟང་པོ་ལས་བརྒྱུད་པ་དང་། ལྷ་རྗེ་ཉ་རི་བའི་སློབ་མ་ཉང་ནག་མདོ་བོ་ལས་བརྒྱུད་པ་སྟེ། མདོར་ན་བླ་མ་འདིས་ལུགས་ཐ་དད་པ་མང་པོ་གསན་ཅིང་། སྒྱུ་འཕྲུལ་གཞི་ལམ་འབྲས་གསུམ་གྱི་སྟོང་ཐུན་དང་། ལམ་རྣམ་བཀོད་ཀྱི་ཊི་ཀ་བརྩམས། དེས་སྙེ་མདོ་ཐམས་ཅད་གཟིགས་པ་ཞེས་གྲགས་པར་བཤད་ཅིང་། དེས་ཀྱང་སྙིང་ཊི་ཀ་དང་། ལམ་རྣམ་བཀོད་ལ་མཆན་བུ་ཞིབ་པར་མཛད། རོག་གི་གདུང་བརྒྱུད་རྣམས་ལའང་དབང་དང་རྒྱུད་ཀྱི་བཤད་པ་ཤིན་ཏུ་དར་བ་བྱུང་ངོ་། །དེ་བཞིན་དུ་གཙང་སྟོད་མང་དཀར་དུ་ཡང་སྟོད་ཟུར་པ་ཞེས་གྲགས་པ་རིམ་པར་བྱུང་ནས་བཤད་སྒྲུབ་ལེགས་པར་མཛད། དེས་ལ་སྟོད་ལྷོ་བྱང་ཐམས་ཅད་དུའང་མེ་མཆེད་པ་བཞིན་གྱུར་པས། བྱང་དུ་མེ་སྟོན་འབྱུང་གནས་འོད་ཅེས་པ་དང་། སྣར་སྟོན་སེང་གེ་འོད་ཅེས་པ་དང་། བྱང་ཏར་ལ་མོ་པ་ཡོན་ཏན་དབང་ཕྱུག་ཅེས་བྱ་བ་ལ་སོགས་པའི་བཤད་པ་ཡང་ཐོ་རེ་ཡོང་ཡོད་ལ། གཞན་ཡང་ངན་ཕག་ཏུ་སྒྱུ་འཕྲུལ་གྱི་བཤད་པ་རིམ་པར་བྱུང་བས་རྒྱལ་བ་ཀློང་ཆེན་པས་དེར་གསན་པར་མཛད་དོ།། ད་ནི་གངས་རིའི་ཁྲོད་འདི་ཙམ་ན་ཕུལ་དུ་བྱུང་བའི་པཎྜི་ཏ་ཆེན་པོར་གྲགས་པ་རོང་བ་ཆོས་ཀྱི་བཟང་པོའི་གཏམ་བརྗོད་པ་ལ་དྲན་པ་ཉེ་བར་གཞག་པར་བྱ་སྟེ། དེ་ལ་རོང་བན་དཔལ་གྱི་རིན་པོ་ཆེའི་སྲས། རོང་བན་རིན་ཆེན་ཚུལ་ཁྲིམས་ཞེས་བྱ་བ་དེས་རྒྱུའི་དུས་ཀྱི་མངོན་བྱང་ལྔའི་ཆོ་ག་བྱས་པ་ལས། ཕྱོགས་ཀྱི་གླང་པོའི་ཤེས་རབ། དབྱིག་གཉེན་ཞབས་ཀྱི་ཐོས་པ། ཙནྡྲ་གོ་མིའི་བརྗོད་པ། ཆོས་ཀྱི་གྲགས་པའི་བརྒལ་བརྟག །སློབ་དཔོན་དཔའ་བོའི་རྩོམ་པ་སྟེ། ཕུན་སུམ་ཚོགས་པ་ལྔའི་ངོ་བོར་བྱང་ཆུབ་པའི་སྐྱེ་བའི་མྱུ་གུ་གཙང་སྨད་རུ་ལག་གི་སའི་ཆ་སྣར་ལུང་རོང་དུ་བཟུང་ངོ་། །དེ་ནི་བསྟན་པ་སྔ་དར་གྱི་ཞབས་སུ་སློབ་དཔོན་སྨྲྀ་ཏི་ཛྙཱ་ན་ཀཱིརྟི་ཞེས་བྱ་བའི་པཎྜི་ཏ་གཅིག་
བྱོན་ནས་མདོ་ཁམས་ཀྱི་སའི་ཆར་རྒྱུད་འགའ་ཞིག་གི་འགྱུར་ཡང་བཅོས། ཐ་ག་ནའི་མཚན་བརྗོད་ཀྱི་འགྲེལ་པ་ལ་སོགས་པ་གསང་སྔགས་ཀྱི་འགྲེལ་པ་དང་། འཇམ་དཔལ་གསང་ལྡན་ལ་སོགས་པའི་སྒྲུབ་ཐབས་མང་པོར་བསྒྱུར། སྒྲའི་བསྟན་བཅོས་འགའ་ཞིག་ཀྱང་མཛད་ནས་མྱ་ངན་ལས་འདས་པ་གང་གི་དེ་མ་ཐག་པའི་སྐུའི་སྐྱེ་བ་ཡིན་པར་གྲགས། བཀའ་འགྱུར་མདོ་མངས་ཀྱི་ལུང་རྒྱུན་ལ་སྨྲྀ་ཏི་དང་དྲེང་ཆགས་སུ་འདྲེན་པ་ནི་དཔྱད་གཞིར་འདུག །ཡང་ཨ་ཙ་ར་ཕྲ་ལ་རིང་མོ་ཞེས་བྱ་བའི་པཎྜི་ཏ་གཅིག་ཁམས་སུ་བྱོན། གསང་བ་འདུས་པའི་རྒྱ་ཆེར་འགྲེལ་པ་ལ་སོགས་བསྒྱུར་བཤད་མཛད་ནས་འདས་པ་དེ་ཉིད་ཀྱི་སྐྱེ་བ་ཡིན་པར་ཡང་གྲགས། སྐུ་གཞོན་ནུ་ནས་ལྷུན་གྱིས་གྲུབ་པའི་ཤེས་རབ་ཆེན་པོ་མངའ་བས་ཉང་སྨད་དུ་འགར་སྟོན་ཚུལ་ཁྲིམས་བཟང་པོ་ལ་གསན་པ་མཛད། ཡབ་ཀྱིས་རྒྱགས་སྐྱེལ་དུ་བྱོན་པས། མཆེད་གྲོགས་དག་ན་རེ། ཁྱེད་ཀྱི་བུ་འདི་བློ་དྲེད། ཐོ་ཅོ་ཆེ་བས་ངེད་ཅག་ཀྱང་སུན་པར་བྱེད་ན་ད་རེས་འཁྲིད་པར་འཐད་ཅེས་ཟེར། ཡབ་ཀྱིས་སློབ་དཔོན་ལ་ཁོང་རྣམས་དེ་སྐད་མཆིད་ན་འཁྲིད་པར་བྱའམ་ཞུས་པས། འགར་སྟོན་ཆེན་པོས། དེ་སྐད་མ་ཟེར། ཆོས་ཐམས་ཅད་ཁོས་གོ་ནས་ཡོད་པ་ཡིན་གསུང་སྐད། ལོ་བཅུ་གཅིག་པ་ལ་མཚན་ཉིད་གསན། ཆོས་དབར་ལ་བྱིས་པའི་རྩེ་སར་ཡང་སློབ་དཔོན་གྱི་གསུང་ཚད་ཤར་རེ་འོང་བས། ཆོས་ཐམས་ཅད་ཚར་རེ་གསན་པ་ཁོ་ནས་ཚིག་གཅིག་ཀྱང་མ་ནོར་བར་ཐུགས་སུ་ཆུད་པས་འཇམ་དཔལ་གྱི་སྤྲུལ་པར་གྲགས། བཅུ་གསུམ་ལོན་པའི་ཚེ་གསན་པ་རྫོགས་པ་དང་འདྲ་བར་བྱུང་ཞིང་། ཤེས་བྱ་ཐམས་ཅད་ལ་མ་རྨོངས་པ་བྱུང་། ཉིད་ཀྱི་ཞལ་ནས་ཀྱང་། བདག་ཐོས་པ་ཆུང་བ་ཡང་མ་ཡིན་ཏེ། ཆོས་ཐམས་ཅད་མ་ཐོས་པ་མེད་དོ། །ཐོས་པ་ཆེ་བ་ཡང་མ་ཡིན་ཏེ་ཆོས་ཐམས་ཅད་ཚར་རེ་ལས་མ་དགོས་སོ་གསུང་སྐད། སྐྱེས་བུ་ཆེན་པོ་འདི་ནི་ཤེས་རབ་མྱུར་ལ་ཟབ་པ། རྒྱ་ཆེ་ལ་
དྲི་མ་དང་བྲལ་བའི་སྤོབས་པ་མཆོག་ཏུ་དགེ་བས་མདོ་རྒྱུད་དམ་བསྟན་བཅོས་ལ་སོགས་པའི་རྒྱ་གཞུང་བརླིང་པོ་སྔར་མ་གཟིགས་པ་མཐའ་དག་ཚར་རེ་རེའམ། གཉིས་ཚུན་ཆད་གཟིགས་པས་ཚིག་དང་དོན་གྱི་ཆ་མ་ལུས་པ་ཐམས་ཅད་ཐུགས་ལ་ཟིན་ཅིང་མི་བརྗེད་པའི་གཟུངས་ཐོབ་པར་གྲགས་པས། ཐོག་མ་ཉིད་ནས་ཧ་ཅང་མ་འབད་པར་སཾ་སྐྲི་ཏ་དང་། སྐད་རིགས་ཀྱི་བྱེ་བྲག་གཞན་མང་པོ་ལའང་མ་རྨོངས་ཤིང་། ཕྱི་ནང་གི་རིག་པའི་གནས་དང་། གཙུག་ལག་ཐམས་ཅད་ལ་ཐོགས་པ་མེད་པའི་བློ་གྲོས་གྱི་ཚེར་མ་རྣོ་བས། བོད་ཀྱི་སྐད་ཉིད་ལའང་འདི་ནི་དོན་འདི་ཙམ་ལ་འཇུག་གོ་ཞེས་སྟོན་པའི་ཁྱད་པར་ཕྲ་མོའང་གཞན་ལས་ཆེས་ལྷག །ཚད་མའི་བསྟན་བཅོས་དང་། རིག་བྱེད་ཀྱི་བསྟན་བཅོས་དང་། དོན་དུ་འགྱུར་བའི་ཚིགས་བཅད་དང་། སྙན་དངགས་ལ་སོགས་པའང་དབྱུག་པ་ཅན་གྱི་གཞུང་ཁོ་ན་ལ་མ་ལྟོས་པར་རིག་པ་དེ་སྟོན་པའི་གཞུང་ལུགས་རྒྱ་ཆེན་པོ་མང་པོའི་དོན་མཁྱེན་པ་ཡིན། བྱིས་པའི་དུས་ཨ་ཙ་ར་འདུག་ཚད་ལ་དགྱེས་ཤིང་དེ་དག་དང་བརྡའ་འཕྲོད་པས་བི་བརྟའི་པུ་ཏི་ལ་བརྟགས་པ་ཙམ་གྱིས་མཁྱེན་པ་ལ་ཚེགས་མ་བྱུང་། ཐ་ན་དུད་འགྲོའི་བརྡའ་དང་སྐད་ཀྱི་རིམ་པའང་མཁྱེན་པར་གྲགས། སྨྲ་སྒོ་ལ་སོགས་པའི་འགྲེལ་པ་དང་བསྟན་བཅོས་ཀྱང་མང་དུ་མཛད། བློ་གྲོས་ཀྱི་མཐུ་བསམ་གྱིས་མི་ཁྱབ་པས་སྤྱིར་ཆོས་ལ་མོས་པའི་མི་རྣམས་དང་། ཆོས་ཀྱི་གང་ཟག་དང་། ཁྱད་པར་དུ་རྡོ་རྗེ་ཐེག་པ་ལ་ཞུགས་ཤིང་། གསང་སྔགས་ཀྱི་ལས་དང་དངོས་གྲུབ་སྒྲུབ་པར་འདོད་པ་དག་ལ་ཕན་གདགས་པའི་དགོངས་པ་ཟབ་མོ་མངའ་བས། ཕྱིན་ཅི་མ་ལོག་པའི་གདམས་པས་ནན་ཏན་དུ་འདོམས་ཤིང་ཕན་ཐོགས་པར་མཛད། མངོན་པར་ཤེས་པའི་ཆ་དང་ལྡན་ཞིང་སེམས་ཅན་འདུལ་བའི་དུས་དང་གནས་སྐབས་མཁྱེན་པས། འགྲོ་བ་ཕལ་པ་བློ་བསྒྱུར་ཤིང་། ཆོས་ལ་གནས་པ་རྣམས་དེའི་འགལ་ཟླར་གྱུར་པ་ལས་ལྡོག་པའི་ཕྱིར། འབྱར་ཞིང་འགྲིག་
པའི་བསྟན་བཅོས་ཞལ་སྒོའི་ཆུ་སྐྱེས་ལས་ཕྱུང་སྟེ་ཕན་འདོགས་པ་ལ་རྟག་ཏུ་སྐྱོ་བ་མི་མངའ། ཆོས་ཀྱིས་བློ་མ་བསྒྱུར་བའི་ཐ་མལ་བ་དག་ལ་སེར་སྣ་སྤངས་ནས་བདོག་པ་གཏོང་བ་དང་། ལོག་སྒྲུབ་བཟོད་པས་སྙིང་རྗེའི་ཡུལ་དུ་མཛད་ནས་ཞི་བདེ་ལ་འགོད། སྡོམ་པའི་གནས་དང་ཐུགས་དམ་ལ་ནོར་བུ་རིན་པོ་ཆེ་དང་སྲོག་གི་དབང་པོ་ལྟར་གཅེས་སྤྲས་མཛད་ཅིང་གཞན་ཡང་དེ་ལ་འགོད། དམ་པའི་ཆོས་རྩོམ་པ་ན་གླེགས་བམ་བསྡུ་ཞིང་གཟིགས་པ་ལ་སོགས་པའི་རྟོག་དཔྱོད་ཀྱི་སྒྲོ་འདོགས་མི་དགོས་པར། ཆོས་ཀྱི་ཚིག་དོན་ལ་ཐོགས་རྡུག་མེད་པར་འཇུག་པའི་སྤོབས་པའི་གཏེར་ཆེན་པོ་བརྒྱད་གྲོལ་ཞིང་བསྟན་བཅོས་རྣམས་ཀྱང་དོན་བཟང་པོ། ཚིག་འབྲུ་བཟང་པོ། བརྗོད་པ་མ་འདྲེས་པ་ཤ་སྟག་འབྱུང་བས། སྟོན་པ་དྲང་སྲོང་ཆེན་པོའི་གསུང་གི་གསང་བ་དང་རྗེས་སུ་མཐུན་པའི་ཕྱིར་གཞན་མཁས་པར་གྲགས་པ་གང་གིས་ཀྱང་རྩོད་མི་ནུས་ཤིང་། དེས་མཛད་པའི་གསང་སྔགས་ཀྱི་མན་ངག་རྣམས་ལ་སློབ་པའི་རྒྱུད་དུ་བྱུང་བའི་གང་ཟག །ལུང་མ་ཐོབ་ཀྱང་ཡི་གེ་ལས་བྱུང་བ་བཞིན་སྦྱར་བ་ལས་བྱིན་རླབ་མ་བྱུང་བ་མེད་ཅེས་གྲགས་པས་བདེ་བར་གཤེགས་པའི་སྤྲུལ་པའི་སྐུ་ཉིད་དུའང་གླེང་། གནས་ལྔ་རིག་པའི་པཎྜི་ཏ་མངོན་པར་ཤེས་པ་ལྔ་དང་ལྡན་པ་ཇོ་བོ་ཨ་ཏི་ཤ་དང་བདག་ཉིད་ཆེན་པོ་འདི་མཇལ་བའི་ཚེ། ཇོ་བོའི་ཞལ་ནས། རྒྱ་གར་གྱི་ཨཱ་ཙརྱ་ནག་པོ་སྤྱོད་པ་དེ་ཉིད་ཚེ་འཕོས་པ་ཇོ་བོ་འདི་ཁོ་ན་ཡིན་ཏེ། ཁོ་བོས་འདི་དང་ཆོས་གཏམ་བྱ་བ་ག་ལ་ཐུབ་ཅེས་རྩོད་མེད་དུ་གྲགས་པར་གསུངས། སྤྱིར་གཏམ་དུའང་། འདུལ་བ་མཚུར་སྟོན་དབྱིག་གེ་མཁས། །ཆོག་སྒྲིགས་བཟངས་ཀྱི་ཡེ་གྲགས་མཁས། །སྒྲ་དང་ཚད་མ་རོང་པ་མཁས། །ཐམས་ཅད་འཛོམ་པ་ཨ་ཕོ་རང་། །ཆོས་གྲགས་རང་ཟེར་སྐད། སྤྱིར་བླ་མ་མང་པོ་ལས་མདོ་སྔགས་སོ་སོའི་བརྒྱུད་པའི་དྲེང་ཆགས་མཐུད་པ་ཙམ་ཡོད་མོད་ཀྱི། ཁྱད་པར་དུ་སྔ་འགྱུར་རྡོ་རྗེ་ཐེག་པའི་ཆོས་སྐོར་ལས། སློབ་དཔོན་ཆེན་པོ་པདྨའི་གདམས་པ་རྣམས་ནི་སྣ་ནམ་རྡོ་རྗེ་བདུད་འཇོམས། མཁར་
ཆེན་དཔལ་གྱི་དབང་ཕྱུག །དོམ་ཨ་ཙ་ར་དཔལ་མེ་ཏོག །སྒྲོ་རྡོ་རྗེ་གཞོན་ནུ། ཞང་ཞུང་ཡོན་ཏན་གྲགས། རོང་བན་ཡོན་ཏན། རོང་བན་ཚུལ་ཁྲིམས་རིན་པོ་ཆེ་ལས་ཉིད་ཀྱིས་གསན་ཏོ། །བཻ་རོ་ཙ་ནའི་མན་ངག་རྣམས། བཻ་རོས་གཡུ་སྒྲ། དེས་བླ་ཆེན་དགོངས་པ་གསལ། དེས་གྲུམ་ཤིང་གླག་ཅན། དེས་གནུབས་དཔའ་བརྟན། དེས་ཡ་ཟི་བོན་སྟོན། དེས་ཀུན་མཁྱེན་རོང་ཟོམ་ལ་བཤད་དེ་སེམས་སྡེའི་བརྒྱུད་པ་གཅིག་གོ། །ཡང་ཀློང་ཐང་སྒྲོལ་མར་ཨ་རོ་ཡེ་ཤེས་འབྱུང་གནས་ཞེས་བྱ་བའི་གྲུབ་པའི་སྐྱེས་བུ་ཞིག་བྱུང་སྟེ། དེ་ལ་རྒྱ་གར་བདུན་བརྒྱུད་དང་། རྒྱའི་སློབ་དཔོན་བདུན་བརྒྱུད་ཀྱི་གདམས་པ་མངའ་ཞིང་། དེས་ཅོག་རོ་ཟངས་དཀར་མཛོད་ཁུར་དང་། ཡ་ཟི་བོན་སྟོན། དེས་ཉིད་ལའོ། །འདི་ལ་རྫོགས་ཆེན་ཁམས་ལུགས་ཤེས་ཟེར། ཡང་བི་མ་ལས་ཉང་ཏིང་འཛིན་བཟང་པོ་ལ་གསུངས་པ་དང་། བི་མ་ལས་རྨ་རིན་ཆེན་མཆོག་དང་། གཉགས་ཛྙཱ་ན་ཀུ་མཱ་ར་ལ་གསུངས་པའི་མན་ངག་ཀྱང་། གཉིས་ཀས་ཁུ་བྱང་ཆུབ་འོད། ཁྱུང་པོ་དབྱིག་འོད་ལ་བརྒྱུད་ནས་རིམ་གྱིས་རོང་ཟོམ་ལ་མངའ་བས་གསང་སྔགས་སྔ་འགྱུར་གྱི་བསྟན་པའི་བདག་པོ་འགྲན་ཟླ་སྤངས་པ་ཞིག་སྟེ་འདི་ཉིད་ལའང་བསྟན་པའི་ཆུ་མགོ་གཅིག་གནས་སོ། །གསང་སྙིང་འགྲེལ་པ་རོང་ལུགས་ཀྱི་མགོར། དཀོན་མཆོག་གསུམ་གྱི་རང་བཞིན་བྱང་ཆུབ་སེམས། ཞེས་ཡོད་པས་དཀོན་ཅོག་འགྲེལ་ཞེས་མིང་དུ་ཐོགས་ལ། ཀུན་མཁྱེན་ཆེན་པོའི་འགྲེལ་པ་ཕྱོགས་བཅུ་མུན་སེལ་ཐེག་རྒྱལ་གྱི་ལུགས་སུ་བཀྲལ་ཞིང་ཞལ་གསལ། ཀུན་མཁྱེན་རོང་པའི་འགྲེལ་པ་འདི་དབྱིངས་ཆེ་བར་བཀྲལ་བས་སྒྲོམ་ཆེ་ཞིང་ཁ་དམ་པར་སྣང་སྟེ། བོད་འགྲེལ་གྱི་གཙོ་བོ་འདི་གཉིས་ཡིན་པར་ཤེས་ན་བློ་གྲོས་ལ་ནུས་པ་ཆེན་པོ་སྟེར་བ་ཡིན་ནོ། །དེའང་སྐུ་གཞོན་ནུའི་ཚེ་མདོ་སྟོན་སེང་གེ་བྱ་བ་ལ་སྔ་འགྱུར་གསན་པའི་ཚེ། རེ་ཞིག་ན་མནལ་ལམ་དུ། གསང་བ་སྙིང་པོས་ཟན་བྱས། སངས་
རྒྱས་མཉམ་སྦྱོར་གྱི་ཚོད་མ་བྱས་ནས་གསོལ་གྱིན་འདུག་པ་རྨིས། དེ་སློབ་དཔོན་ལ་བརྗོད་པས། ཤིན་ཏུ་ངོ་མཚར་ཆེ། ཆོས་དེ་ཁོང་དུ་ཆུད་པའི་རྟགས་ཡིན། ཁྱོད་ཀྱིས་འགྲེལ་པ་རེ་གྱིས་གསུང་སྐད། དེར་བླ་མའི་དགོངས་པ་རྫོགས་པར་བྱ་བའི་ཕྱིར། བསླབ་པ་རིན་པོ་ཆེ་གསུམ་ལ་བརྟེན་པའི་མན་ངག་གསུམ་མཛད་དེ། ལྷག་པ་ཚུལ་ཁྲིམས་ཀྱི་བསླབ་པའི་དོན་གྱི་ངེས་བརྗོད་དམ་ཚིག་མདོ་རྒྱས། ལྷག་པ་ཏིང་ངེ་འཛིན་གྱི་བསླབ་པ་སྟོན་པ་འགྲེལ་པ་ཚུལ་བཞི་ཡན་ལག་བཅོ་ལྔ་པ། ལྷག་པ་ཤེས་རབ་གྱི་བསླབ་པ་སྟོན་པ་རྫོགས་པ་ཆེན་པོའི་ལྟ་སྒོམ་མན་ངག །མཉམ་སྦྱོར་གྱི་འགྲེལ་པ། དེ་བཞིན་དུ་ངན་སོང་སྦྱོང་རྒྱུད། འཇིགས་བྱེད་ལ་སོགས་པའི་འགྲེལ་པ་དང་མན་ངག་མང་པོ། དེ་དག་གི་ནང་ནས་ཀྱང་ཐེག་པ་ཆེན་པོའི་ཚུལ་ལ་འཇུག་པའི་བསྟན་བཅོས་ལ་སོགས་པ་གཞུང་གཏིང་ཟབ་ལ་གོ་དོན་སློངས་ཆེ་བ་བརྗོད་ཀྱིས་མི་ལང་བ་དང་། མདོར་ན་མདོ་སྡེ་དང་། རྒྱུད་སྡེ་དང་། བསྟན་བཅོས་ཀྱི་བྱེ་བྲག་ལ་ཐུགས་སུ་མི་ཆུད་པ་བྱ་བ་ཤེས་བྱ་ལ་སྲིད་པར་མ་གྱུར་པས་ཐམས་ཅད་མཁྱེན་པའི་གནས་ལ་རང་གིར་མཛད་དེ་ཐ་ན་འཇིག་རྟེན་པའི་ཞིང་ལས་དང་། ཕྱུགས་སྐྱོང་བ་དང་། དཀར་ཤེ་ཇི་ལྟར་བསྒྱུར་པ་ཚུན་ཆད་ཀྱི་བསྟན་བཅོས་ཀྱང་མཛད་པས། དུས་དེའི་ཚེ་བོད་རུ་བཞིའི་མཁས་པ་ཐམས་ཅད་ཀྱི་དང་པོར་བརྩད་པའི་བྱ་བ་ལ་ལྷགས་པའང་། སླར་སློབ་དཔོན་ཆོས་ཀྱི་གྲགས་པའི་བརྟུལ་ཞུགས་ཀྱིས་གང་དང་གང་གི་སྤོབས་པའི་འཁྲི་ཤིང་ཉམ་ཉེས་པར་བྱས་ནས་ང་རྒྱལ་གྱི་གདེངས་ཀ་ལ་བརྐྱང་ནུལ་བྱ་བའི་སྐབས་བྱུང་བ་ཡིན་ཏེ། འདི་ལྟར་ཤབ་ཀྱི་ཡང་ཁྱེད་བླ་མ། མར་པ་དོ་པ། འུ་ཡུག་པ་མདའ་སྟོན། མདོའི་ཁྱུང་པོ་ཧཱུཾ་སྙིང་། སེ་ཁྲོམ་རྒྱ་མཚོ་འབར། མཚམས་སྟོན་གོ་ཆ། སྤང་ཀ་དར་ཆུང་། འགོས་ལྷས་བཙས། རྒྱ་རྒྱལ་ཚུལ་ལ་སོགས་པའི་མཁས་པ་ཐམས་ཅད་ཀྱིས་བོད་དུ་སྐྱེས་པའི་གང་ཟག་གིས་བསྟན་བཅོས་འདི་ཙམ་རྩོམ་པ་ཞེས་དཔྱས་
གདགས། སུན་འབྱིན་པའི་རིག་པ་བསམས་ཏེ། ཁྱུ་མཆོག་རྭ་བརྡར་བ་ལ་ཕྱོགས་པ་བཞིན་དུ་སྐྱེས་བུ་ཆེན་པོ་དེའི་གམ་དུ་སོང་བ་ན། ལུང་གི་འཐད་པ་དང་། རིག་པས་དཔྱད་བཟོད་པ་དང་། གཏན་ཚིགས་དང་བླ་མས་ཉེ་བར་བསྟན་པ་དང་མི་འགལ་ཞིང་སྒྲ་སྐྱོན་དང་། དོན་སྐྱོན་ལ་སོགས་ཀྱི་འགལ་ཟླའི་ཕྱོགས་ཐམས་ཅད་རྣམ་པར་སྤངས་བའི་མཁྱེན་རབ་ཀྱི་སྤོབས་པས་ཚར་བཅད། བསྟན་བཅོས་རེ་མཐོང་ཞིང་། དེའི་དོན་ལ་རོ་མྱངས་པས་ཐམས་ཅད་ངོ་མཚར་སྐྱེས་ནས་བསྡི་སྟང་དུ་མཛད་རི་མོར་མཛད། བླ་མར་མཛད་པ་ཤ་སྟག་ཡིན་ཞེས་གྲགས། དེ་སྐད་དུ་གོ་རུབ་ལོ་ཙཱ་བ་དགེ་སློང་ཆོས་ཀྱི་ཤེས་རབ་ཅེས་བྱ་བ་ཐོས་པ་མང་པོའི་གཟུངས་འཛིན་པ་དེ་ཉིད་ཀྱིས་ཀྱང་དང་པོར་དཔྱས་གདགས། བར་དུ་བླ་མ་རོང་པས་མཛད་པའི་ཐེག་པ་ཆེན་པོའི་ཚུལ་ལ་འཇུག་པའི་པོ་ཏི་གཟིགས་པས་གུས་པ་ཆེན་པོ་སྐྱེས། ཐ་མར་ཟང་ཟིང་མང་པོས་བསྙེན་བཀུར་ཏེ་མི་འཆབ་པར་བྱས་ནས། རྗེས་སུ་གཟུང་བར་གསོལ་བ་བཏབ། འཇམ་དཔལ་གསང་བའི་རྒྱུད་ལ་སོགས་པའི་ཆོས་མང་དུ་གསན། གསང་རྒྱུད་ཀྱི་སྐབས་ན་མར་པཎྜི་ཏ་ཆེན་པོའི་ཞལ་ནས། འོ་སྐོལ་ལ་ད་ལྟ་རྒྱ་དཔེ་ཡོད་པར་གྱུར་ན་འདི་ལྟར་འགྲོ་བ་ཡིན་ཏེ། རྒྱ་དཔེ་མེད་པས་ད་ལྟ་བཅོས་སུ་མེད་གསུངས་པ་ལ། གོ་རུབ་ལོ་ཙཱ་བས་དེ་བློ་ལ་བཟུང་སྟེ་ཕྱིས་ཇོ་བོ་ཀྲྀཥྞ་ཞེས་བྱ་བའི་པཎྜི་ཏ་ལས་རྒྱ་དཔེ་བྱུང་ནས་དེ་ལ་མཉན་པས། རོང་པ་པཎྜི་ཏའི་གསུང་བཞིན་བྱུང་ནས་ཤིན་ཏུ་མོས་པ་ཐོབ་པར་གྱུར་ཏེ། ཀྲྀཥྞ་པ་ལས་བྱུང་བའི་རྒྱ་དཔེ་གཅིག་རོང་པ་ཉིད་ལ་ཕུལ་ནས། སླར་ཡང་གསན་སྐད། དེ་བཞིན་དུ་མར་པ་ཆོས་ཀྱི་དབང་ཕྱུག་ལ་སོགས་པའི་ལོ་ཙཱ་བ་དང་། མཁས་པར་གྲགས་པའི་བློ་རྩལ་ཅན་མང་པོས་ཀྱང་ཞབས་ལ་བཏུད། རྒྱ་གར་གྱི་མཁན་པོ་མཉྫུ་ཤྲཱི་ཝརྨ་དང་། མཉྫུ་ཤྲཱི་ཛྙཱ་ན་དང་། ཨུ་པཱ་ཡ་ཤྲཱི་མི་ཏྲ་དང་། བུཌྜྷ་ཨཱ་ཀ་ར་བྷ་དྲ་དང་། དེ་བཱ་ཀ་ར་ཙནྡྲ་དང་། པ་ར་མེ་ཤྭ་དང་། ཨ་མོ་གྷ་བཛྲ་ལ་སོགས་པ་པཎྜི་ཏ་མང་པོ་བསྟེན་ནས།
དེ་དག་གི་ལོ་ཙཱ་བ་མཛད་དེ། རྡོ་རྗེ་འཇིགས་བྱེད་དང་། གཤིན་རྗེ་དགྲ་ནག་གི་རྒྱུད་དང་། འཇམ་དཔལ་གསང་ལྡན་དང་། བདེ་མཆོག་རྩ་རྒྱུད་ལ་སོགས་པ་མང་དུ་བསྒྱུར། འགྱུར་ཤིན་ཏུ་བཟང་བས་གསར་འགྱུར་གྱི་དཔེར་འོས། རྒྱ་གར་གྱི་པཎྜི་ཏ་ཀུན་ན་རེ། དྷརྨ་བྷ་དྲ་ཁྱོད་ཆོས་མང་པོ་རྩོམས་ལ་འགྲོ་བ་རྣམས་སྐྱོབས་ཤིག །ཁྱོད་ཀྱི་ཡོན་ཏན་གཞན་ལྟ་ཞོག །སྒྲ་ཚད་ཀྱི་ལུགས་འདིའི་གསུམ་ཆ་ཙམ་ལས་མི་ཤེས་པས་ཀྱང་རྒྱ་གར་ན་ཆོས་རྩོམ་པ་ཡིན་ན། ཁྱོད་ཅིའི་ཕྱིར་མི་བརྩམ་ཞེས་གསུང་སྐད། དེ་ལྟ་བུའི་ཡོན་ཏན་ཕུན་སུམ་ཚོགས་པ་དང་ལྡན་ཡང་། གཅོམ་བསྐྱུངས་པ་དང་། ཁེངས་པ་སྙོལ་བ་ལྷུར་མཛད་པས། རྒྱལ་བ་ཀློང་ཆེན་པས་རྒྱ་འགྲེལ་ལས་མངོན་པར་འཕགས་པར་བརྗོད་པའི་རང་ཉིད་ཀྱི་འགྲེལ་པ་བཟང་པོ་དཀོན་མཆོག་འགྲེལ་ལྟ་བུའི་གཤམ་དུའང་། མཁས་དང་འཕགས་ཆེན་རྣམས་ཀྱིས་མཛད་པའི་གཞུང་ལའང་། །སྒྲོ་སྐུར་དཔྱ་བར་བྱེད་ན་བདག་གཞུང་ཅིས་མི་སྨོས། །ཞེས་འཕགས་ཆེན་ལག་ན་རྡོ་རྗེས་བསྡུས་པའི་རྒྱུད་ལའང་མུན་པས་སྤྲུལ་པའི་ཤེས་རབ་ཀྱིས་གཞུར་བརྟག་བྱེད་པ་ཡོད་ན། བདག་གི་འགྲེལ་པ་སྨོས་ཅི་འཚལ་ཞེས་སློབ་དཔོན་ཞི་བ་ལྷའི་རྣམ་པར་ཐར་པ་བསྐྱངས་ནས་ངང་གིས་དགེ་བ་བྱང་ཆུབ་སེམས་དཔའི་སྤྱོད་པ་ཅན་དུ་སྟོན། གྲུབ་པའི་རྣམ་ཐར་ལ་གཞལ་ན། བྲག་ཆེན་གཟར་པོ་མེ་ལོང་ལྟ་བུའི་ངོས་ལའང་རྫུ་འཕྲུལ་གྱི་སྤྱོད་པས་གཤེགས་པ་དང་། བྲག་ལ་ཕུར་པ་འདེབས་པ་དང་། ནམ་མཁའ་ལ་འཕུར་བ་དང་། བོད་ཀྱི་ལྷ་འདྲེ་ཕལ་མོ་ཆེའི་གནས་དང་སྤྱོད་པ་ཐུགས་སུ་ཆུད་པའི་མངོན་པར་མཁྱེན་པ་མངའ་བ་སོགས་མང་དུ་ཡོད་མོད་ཀྱི། འདི་ལྟ་བུའི་ལྟ་བ་མཆོག་ཏུ་གྱུར་ཅིང་། སོ་སོ་ཡང་དག་རིག་བཞིའི་ས་ཐོབ་པ་དག་ལ་སྐྱེ་བོ་ཕལ་པ་ཡིད་བརྟན་པར་བྱེད་པའི་མངོན་རྟགས་གྱི་ན་པ་ཡི་གེའི་ལམ་དུ་འདྲེན་པ་ངོ་མཚར་བ་མ་ཡིན་ནོ། །དེ་ལྟར་སྤྲུལ་པའི་སྐུར་རྩོད་པ་མེད་པའི་པཎྜི་ཏ་ཆེན་པོ་དེ་ལ་གནས་སྐབས་དེ་ཙམ་བྱོན་པའི་མཁས་པ་ཐམས་ཅད་ཀྱིས་མངོན་པར་བསྟོད་ཅིང་སྤྱི་
བོས་བཏུད་པར་གྱུར་ལ། དགུང་ལོ་བརྒྱ་དང་བཅུ་དགུ་བཞུགས་ཏེ་སྐུ་ལ་སྙུན་པ་མེད་པའི་ངང་ནས་གཤེགས་པར་གྲགས། བོད་གངས་ཅན་གྱི་རྒྱུད་འདིར་འདི་དང་མཉམ་པའི་མཁས་པ་ནི་སུ་ཡང་མ་བྱུང་ཞེས་འགོས་ལོ་ཆེན་པོས་ཀྱང་བསྔགས་ཤིང་ཡོངས་སུ་གྲགས་པའོ། །རྗེས་སུ་སློབ་པ་ལ་སྲས་བརྒྱུད་དང་སློབ་བརྒྱུད་གཉིས་ལས། དང་པོ་ནི། སྲས་གཟི་བརྗིད་འབར། འབུམ་འབར་གཉིས་ལས་སྲས་བརྒྱུད་ཡུན་རིང་པོའི་བར་བྱུང་བ་ཀུན་ཀྱང་རྡོ་རྗེ་ཕུར་པ་ལས་དངོས་གྲུབ་བརྙེས་པ་ཤ་སྟག་ཡིན། སློབ་བརྒྱུད་ནི། གོ་རུབ་ལོ་ཙཱ་བ་དང་། མར་པ་དོ་པ། འགོས་ལ་སོགས་པའི་ལོ་ཙཱ་བ་ཆེན་པོ་བཅུ་བདུན། གཡག་རྡོ་རྗེ་འཛིན་པ་ལ་སོགས་ཏེ་གྲུབ་ཐོབ་ཆེན་པོ་སུམ་ཅུ་རྩ་ལྔ། མ་གཅིག་ཞ་མའི་མིང་པོ་རྗེ་འཁུན་བུ་པ་ལ་སོགས་པ་སྒོམ་ཆེན་རྣལ་འབྱོར་གྱི་དབང་པོ་བརྒྱ་བརྒྱད་ཅུ། ཡོལ་ལུགས་དགེ་བསྙེན་རྡོ་རྗེ་དབང་ཕྱུག་དང་། ཡང་ཁྱེད་བླ་མ་ལ་སོགས་པ་གདུགས་ཐོགས་པ་ལྔ་བརྒྱ་ལ་སོགས་པའོ།། །། དེ་ལྟར་སྔོན་རབས་པ་རྣམས་ཀྱི་ཡི་དམ་གྱི་གཙོ་བོ་ཡང་ཕུར་ཁོ་ནས་བཟུང་བ་ཡིན་པས་ཡང་དག་གི་སྐོར་དེས་ཤེས་ལ། རྡོ་རྗེ་ཕུར་པ་ཇི་ལྟར་དར་བའི་གཏམ་ཅུང་ཟད་བརྗོད་དེ། དེ་ལ་རིག་འཛིན་གྱི་སློབ་དཔོན་ཨུ་རྒྱན་གྱི་མཁན་པོ་པདྨ་སམྦྷ་ཝའི་ཞབས་ལ་བརྒྱུད་དེ། ཕུར་པ་རྒྱལ་པོ་ལུགས་སུ་གྲགས་པ་དང་། ཇོ་མོ་ལུགས་དང་། ལྕམ་ལུགས་དང་། ཡང་སྣ་ནམ་མམ་རོང་ལུགས་དང་། ལྷ་ནག་དང་། ལྷ་ཁྲ་སྟེ་སྐུ་མདོག་ལས་གྲགས་པ་སོགས་རྣམ་གྲངས་ཐ་དད་མོད། དེ་དག་ཀྱང་ངོ་བོ་གཅིག་ལ་མན་ངག་གི་ལྡོག་ཆ་དང་། བཀའ་བབས་ཀྱི་ཁྱད་པར་ལས་དེ་དང་དེར་གྲགས་པའོ། །དེ་ལ་དང་པོ་ནི་བསམ་ཡས་འབྱོངས་ནས་སློབ་དཔོན་ཆེན་པོས་བཙད་པོ་ཁྲི་སྲོང་ལྡེའུ་བཙན་དང་ཇོ་མོ་མཁར་ཆེན་བཟའ་དང་། སྤྱན་འདྲེན་པ་མི་གསུམ་ལ་གནང་བས་དེ་སྐད་དུ་གྲགས།། །། ཇོ་མོ་ལུགས་ནི། སློབ་དཔོན་གཤེགས་ཁར་ཉུང་ལ་འདུས་པ་ཕུར་པ་རྩ་བའི་དུམ་བུ་སྟོད་ལས་བྱང་ཆུབ་སྒྲུབ་པ་དང་། སྨད་ལས་དམོད་པ་ལམ་ཁྱེར་བཅུད་དུ་དྲིལ་བ་འདི་ཇོ་མོ་
མཁར་ཆེན་བཟའ་ལ་གསུངས། དེས་ལྷོ་ཕྱོགས་མོན་ཁ་སྣ་རིངས་སེང་གེ་རྫོང་གི་བྲག་ཕུག་ཏུ་མཚན་མ་རྫས་ཀྱི་དཀྱིལ་འཁོར་ཞལ་ཕྱེ་ནས་བསྒྲུབས་པས་ཞག་ཉེར་གཅིག་ན་ཕུར་བུ་ཐམས་ཅད་བཤད་ཅིང་། འོད་འཕྲོ་བ་དང་། འཕར་གཡོ་བྱེད་པ་དང་། དེར་ཇོ་མོའི་དགོངས་པ་ལ། ཕུར་པ་གྲུབ་ན་གདབ་ལས་བྱ། ཟེར་བ་ཡིན་ཏེ་དངོས་ལ་གདབ་པའི་ཡུལ་དུ་གྱུར་པ་ནི་མེད་འོན་ཀྱང་ཕ་མེས་ཀྱི་ཟ་འདྲེ་ལ་གདབ་བོ་སྙམ་དུ་དགོངས་ནས་བསྙེན་ཕུར་དྲིལ་བས། ཕུར་པ་ནམ་མཁའ་ལ་དེད་དེ་སོང་། ཕ་ཡུལ་གྱི་ཁང་ལྟག་ན་ཕ་མེས་ཀྱི་ཟ་འདྲེར་གྱུར་པ་ཞིག་གནས་པའི་རྟེན་སྐྱེར་པའི་ཕུང་པོའི་སྟེང་དུ་བབས་ནས། སྐྱེར་ཕུང་ཚིགས། ཟ་འདྲེ་མཉམ་པ་ཉིད་ཀྱི་ཀློང་དུ་བསྒྲལ། སླར་ཕུར་པ་དེ་ཇོ་མོའི་དཔོན་བརྒྱུད་རྣམས་ཀྱིས་བཅངས། གདེངས་པ་ཙམ་གྱིས་ཆོག་པ་བྱུང་བས། མཁར་ཆེན་བཟའ་འདྲེ་འདུལ་གྱི་བརྒྱུད་པར་གྲགས། ཇོ་མོས་རང་གི་མིང་པོ་མཁར་ཆེན་དཔལ་གྱི་དབང་ཕྱུག་ལ་བཤད་ནས་རིམ་པར་དར་རོ།། །། ལྕམ་ལུགས་སུ་གྲགས་པ་ནི། ཅོག་རོ་བཟས་སློབ་དཔོན་དངོས་ལ་ཐུག་ཀྱང་། དབང་བླ་མ་ལ་མ་ཞུས་ཡི་དམ་ལ་ཞུས་པས་ཡི་དམ་སློབ་དཔོན་གྱི་ཐུགས་ཀར་བསྡུས་ཏེ་དབང་སྐལ་ཆད། སླར་ཇོ་མོ་འཚོ་རྒྱལ་ལ་རྗེས་སུ་གནང་ནས་ཇོ་མོས་ཅོག་རོ་བཟའ་ལ་གདམས་པ་ལས་བརྒྱུད་པའོ།། །། ཡང་། སྣ་ནམ་ལུགས་སུ་གྲགས་པ་ནི་རོང་ཟོམ་ཆེན་པོ་ལས་བརྒྱུད་པའི་ལུགས་ཁོ་ན་སྟེ་བརྒྱུད་པ་སྔར་བཤད་མ་ཐག་པས་ཤེས་ལ། འདིར་ཁ་ཅིག་ཏུ། རོང་ཟོམ་ཆེན་པོའི་མེས་པོ་རོང་བན་ཡོན་ཏན་རིན་ཆེན་ནམ། དཔལ་གྱི་རིན་ཆེན་དེས་སློབ་དཔོན་ཆེན་པོ་དངོས་ལ་ཐུག །དགུང་ལོ་སུམ་བརྒྱ་འཚོ་ཞེས་ཟེར། དེའི་སྲས་རོང་པ་པཎྜི་ཏའི་ཡབ་རིན་ཆེན་ཚུལ་ཁྲིམས་ཀྱིས་ཀྱང་ལོ་ཕྱེད་ཉིས་བརྒྱར་བཞུགས་པ་ལས་བརྒྱུད་པས་རོང་ལུགས་ཞེས་བཤད་པ་ཡིན་པར་ཤེས་སོ།། །། ཕུར་པ་ལྷ་ནག་ཏུ་གྲགས་པ་ནི། ཨུ་རྒྱན་ཡབ་ཡུམ་ནས་འདྲེ་ཨ་ཙ་ར་ས་ལེ། ལང་ལབ་བྱང་ཆུབ་རྡོ་རྗེ་ནས་རིམ་པར། ཡར་འབྲོག་པ་
གུ་རུབ་ཡང་དག་ཅེས་བྱ་བས་ཕུར་པ་མྱ་ངན་ལས་འདས་པའི་རྒྱུད་ལ་བརྟེན་ནས་ལྷ་ཐམས་ཅད་ནག་པོར་མཛད་པས་དེ་ལྟར་གྲགས་ལ། འདི་ལ་འདྲེ་ཨ་ཙ་ར་ས་ལེ་བྱས་ན་ལང་ལབ་ཀྱི་བར་དང་དེ་གཉིས་ཕྱི་ཐག་རིང་བས་བརྒྱུད་པ་ལྟག་མི་འཕྲོད་འདྲེ་ཨ་ཙ་ར་ནུ་རུ་ཞེས་བྱ་བས་ཚེའི་གྲུབ་པ་ཐོབ་པ་ཡིན་ཅེས་ཟེར་བའང་འདུག་སྟེ། མིང་གི་ཁྱད་པར་དུ་བྱས་ཀྱང་འགལ་བ་ནི་ཆུང་མོད། འོན་ཀྱང་བླ་མ་འཕགས་པ་རིན་པོ་ཆེ་ལ་སྨད་ལས་སྒྲོལ་དབང་གི་རྒྱུན་མ་རྙེད་ནས། སྤྲང་པོ་ལ་འདུག་ཀྱང་ཞུའོ་ཞེས་བཙལ་བས། འཚོ་རྒྱལ་གྱི་དངོས་སློབ་ཨ་ཙ་ར་ནུ་རུ་བྱ་བ་ཚེའི་རིག་འཛིན་ཐོབ་པ་ཞིག་བསིལ་བ་ཚལ་ལ་སོགས་པའི་གནས་ངེས་མེད་དུ་རྒྱུ་བ་ལ་ཡོད་ཟེར་བ་ཐོས། དེར་གློ་བོ་ལོ་ཙཱ་བ་ལ་གསེར་མང་པོ་བསྐུར་ནས་སྒྲོལ་དབང་གི་རྒྱུན་ཐོབ་པ་ཡིན་ཅེས་ཟེར་རོ།། །། ཕུར་པ་ས་ལུགས་སུ་གྲགས་པ་ནི། སློབ་དཔོན་ཆེན་པོ་པདྨའི་ཞབས་ཀྱི་སློབ་མ་འཁོན་ཀླུའི་དབང་པོ་ལས་རིམ་པར་བརྒྱུད་དེ། ཆོས་དང་རིགས་བརྒྱུད་གཉིས་ཀ་ཟམ་མ་ཆད་པ་ས་སྐྱ་པ་རྣམས་ལ་གྲགས་པས་དེ་སྐད་དུ་གྲགས་པའོ།། །། ཡང་ཕུར་པ་གསང་བའི་རྒྱུད་ལ་བརྟེན་པ་ཕུར་པ་ཕུན་སུམ་ཚོགས་པ་དང་། གསང་བའི་རྒྱུད་དྲུག་དང་། ཀི་ལཱ་ཡ་ཏནྟྲ་བཅུ་གཉིས་ནས་བསྡུས་པ་གཤམ་སྔོན་ཅན་གྱི་སྐོར་གཉགས་ལས་བརྒྱུད་ཚུལ་སྔར་བཤད་ཟིན་ཏོ། །དེ་ལྟ་བུའི་ཡི་དམ་ལས་མངོན་རྟགས་བརྙེས་པ་ནི་བསམ་གྱིས་མི་ཁྱབ་པ་ཞིག་བྱུང་བས་ཐམས་ཅད་བསྙད་པར་མི་ནུས་ལ། ཁྱད་པར་དུ་གྱུར་པ་ལ་ལང་ལབ་བྱང་ཆུབ་རྡོ་རྗེ་ཞེས་བྱ་བ་དེ་གཞོན་ནུ་ནས་ཕ་མ་དང་བྲལ། ཕ་ཚན་རྣམས་ཀྱིས་རྗེ་བཙུན་མི་ལ་ལ་ཇི་ལྟར་བྱས་པ་བཞིན་དུ་ཤིན་ཏུ་ཉམ་ཐག་པར་གྱུར་པས། འདྲེ་ཨ་ཙ་རས་ཐུགས་ཀྱིས་མ་བཟོད་ནས་ཕུར་པའི་མན་ངག་ལས་གནད་དུ་ཟབ་པའི་སྐོར་བྱིན་ཏེ་སྒྲུབ་པ་བྱས་ནས་ཕ་སྤུན་རྣམས་རྩད་བཅད། དེ་ལ་གྲགས་པ་ཆེན་པོ་འཕེལ་ནའང་སྔོན་གྱི་སྦྱིན་འབྲས་དབུལ་བས་འཁོར་རེའི་ལུག་རྫི་བྱེད་ཅིང་ཡོད་ཙ་ན། དགེ་བཤེས་
རྭ་ལོ་ཙཱ་བ་དེ་མངའ་ཐང་དང་འབྱོར་པ་ཤིན་ཏུ་རྒྱས། བོད་ཀྱི་བླ་དཔོན་ཆེ་དགུས་དབང་མེད་དུ་འདུད་དགོས་པ་ཡིན། དེ་ལྟར་མ་བགྱིས་ན་ཁོང་གིས་གཤིན་རྗེའི་དྲག་སྔགས་ཀྱིས་སྒྲོལ་བར་གྲགས། དེ་ལ་དུམ་པ་རྒྱ་ཞང་ཁྲོམ་གྱི་གཤིན་རྗེའི་སྐོར་རྫའི་ཟོམ་གང་གཏེར་ནས་ཕྱུང་སྟེ། ཚེ་བདག་སྡིག་པ་སྙིང་འཛིངས་ལ་སོགས་པ་ཕྱེད་ཙམ་ལས་མ་བཤུས་པ་རྣམས། རྭ་ལོའི་སྔུན་དུ་སོན་པས། རང་ཉིད་ཀྱི་གཤེད་སྐོར་ལ་ལྷན་ཐབས་སུ་བྱས། དེ་ལ་རྒྱ་གར་གྱི་ཁུངས་དང་འགྱུར་བཅོས། དེ་བཞིན་དུ་བུམ་ཐང་གི་གཏེར་ཁ་མང་པོའི་ཁྲོད་ནས་ཀྱང་མཐུ་གཏད་སེར་གསུམ། རྣམ་སྲས། ཛམ་བྷ་ལ། ཚོགས་བདག་ལ་སོགས་པ་མན་ངག་ཟབ་དགུ་བྱུང་བས་གསར་འགྱུར་གྱི་གཤིན་རྗེ་ལས་མཐའ་མང་ལ་མྱུར་བར་སོང་། མར་པའི་སྲས་དར་མ་མདོ་སྡེ་ལ་སོགས་པ་བྱང་ཆུབ་སེམས་དཔའ་བཅུ་གསུམ་དང་། གཉན་ལོ་ཙཱ་བ་སོགས་རང་མཉམ་གྱི་ལོ་ཙཱ་བ་བཅུ་གསུམ་བསྒྲལ་བའི་སྔགས་མཁན་དེ། འཁོར་རེའི་སར་ཆོས་འཁོར་ལ་བྱོན་པས་ལང་ལབ་ཀྱིས་ཕྱག་མ་བཙལ། མི་བླུན་པོ་གཅིག་ཡིན་པར་འདུག་དགོངས་པ་ལ། སླར་ལང་ལབ་ཀྱི་མཚན་ཉིད་ཐོས་ནས། འོ་ན་ཁོ་ལ་དོ་ནུབ་ཀྱི་ཚེ་ལས་མེད་ཀྱི་སྒུར་ཟེར། དྲག་ཤུལ་གྱི་ལས་བརྩམས་པས། དགུག་འདྲེན་གྱི་བདེན་བདར་དང་པོའི་ཚེ་ཁོང་དཔོན་སློབ་ལ་རྩང་ཕུར་གྱི་ཆར་བབས་ནས། ཐོ་ཕྱིའི་གྲྭ་པ་རྣམས་སྨས། བར་པ་ལ་ཕྱོགས་བཅུ་ཁྲོ་བོའི་དཀྱིལ་འཁོར་ཟ་གསོད་དང་བཅས་པའི་ལྕགས་ཕུར་གྱི་ཆར་བབས། ཐ་མའི་ཚེ་མེ་དཔུང་དང་འུར་སྒྲས་གང་སྟེ་ནམ་མཁའ་ལ་བལྟས་པས། ལྕགས་བསྲེགས་ལྟ་བུའི་རྡོ་རྗེ་གཞོན་ནུ་རི་དོ་ཆད་ཙམ་པ་རྭ་ལོའི་ཐོག་ཏུ་རྔམས་རྔམས་འཆའ་འཆའ་ལྟར་འདུག་པས་སྐྲག་པར་གྱུར་ཏེ། བཟོད་གསོལ་བྱས། ཕྱག་དང་འབུལ་བས་བསྙེན་བཀུར། གཤིན་རྗེ་མཁན་པོ་ཕུར་པ་ལ་རྡུགས་ཟེར་བ་དེ་ནས་བྱུང་། ཕུར་པའི་སྟོད་ལས་ལ་དངོས་གྲུབ་བརྙེས་པ་མང་དུ་བྱུང་སྟེ། སྨད་ལས་ལ་རྩལ་ཤུགས་འདི་ལས་ཐོན་པ་མ་བྱུང་བར་གྲགས།
དེ་ལ་སློབ་མའི་གཙོ་བོར་གྱུར་པ་སྣ་ནམ་ཤེས་རབ་ཚུལ་ཁྲིམས། མོང་དགུའི་སྐྱི་གྱང་སྒྱེལ། རོང་གི་སྐྲང་ཕུར་བུ་མགོ། འུ་ཡུག་རོལ་པོའི་ཉང་ནག་གོ། །དེ་ལ་སྐྱི་གྱང་སྒྱེལ། སྐྱི་བན་བྱང་ཆུབ་རིན་ཆེན་བྱ་བའི་ཁང་ཞིང་དང་ནོར་རྣམས་ཕ་སྤུན་གྱིས་འཕྲོགས། སྐྱོ་བ་ཤིན་ཏུ་འཕེལ་ཏེ་ལང་ལབ་ལ་ཕུར་པ་ཞུས་པས་ཟླ་བ་དགུར་ལྷ་བསྙེན་གྱིས། དེ་ནས་བསེ་ལྕགས་ཤེལ་གསུམ་ལ་ཟླ་བ་གཉིས་སྒྲུབས་ཤིག །དོན་འགྲུབ་པོ་གསུངས། དེ་ལྟར་བྱས་པས་ནུས་པ་ཚད་དུ་ཕྱིན། གྱང་གི་དྲུང་ན་མི་མང་པོ་ཉི་མ་འདེ་ཞིང་འདུག་པ་ལ་བལྟས་པས། ཐམས་ཅད་དགྲ་རུ་མ་གྱུར་པ་མི་འདུག་ནས། ཕུར་པ་གྱང་ལ་བསྡིགས་པས་གྱང་འགྱེལ། ཐམས་ཅད་ཕྱི་མའི་ལམ་དུ་བཀོད་པས་སྐྱི་གྱང་སྐྱེལ་དུ་གྲགས་པས་མཚོན་ནུས་པ་ཅན་ཤ་སྟག་བྱུང་སྟེ་ཡི་གེར་བྲིར་མི་ལང་། ལར་ཕུར་པ་འདི་ནུས་པ་མཆོག་ཏུ་ཆེ་བར་གྲགས་པས། སློབ་དཔོན་ཆེན་པོས་ཙནྡན་གྱི་ནགས་ལ་མེ་ཤོར་བ་ལ་གདེངས་པས་ནགས་སོར་ཆུད། བི་མ་ལས་གངྒཱ་གྱེན་དུ་འཕྱུར་བ་ལ་གདེངས་པས་གངྒཱ་ཡན་མན་དུ་ཆད། བལ་པོ་ཤཱི་ལ་མཉྫུས་བྲག་མཁར་གོང་ཅན་ལ་གདེངས་པས་བྲག་རི་དུམ་བུར་ཉིལ། ཇོ་མོ་མཁར་ཆེན་བཟས་སྤྱང་ཀིའི་རྗེས་ས་ལ་བཏབ་པས་སྤྱང་ཀི་རྦབ་ལ་འདྲིལ། མེ་ནུ་རྒྱལ་བའི་སྙིང་པོས་བྱ་རོག་གིས་ཕྲེང་བ་ཁྱེར་བ་ལ་བསྡིགས་པས་བྱ་རོག་ཐང་ལ་ལྷུང་། ལོ་དཔལ་གྱི་བློ་གྲོས་ཀྱིས་དམག་གི་སྦྲ་ཁྱིམ་ལ་ཐེབས་པས་མོན་དམག་ཆམ་ལ་ཕེབས། དེ་ལ་སོགས་ཏེ་དགྲ་བགེགས་གཉིས་ལ་ཐེབས་པས་ཆོ་འཕྲུལ་སྟོབས་པོ་ཆེ་གང་གིས་ཀྱང་རྫི་བར་མ་ནུས། ནང་དུ་ཉོན་མོངས་དུག་ལྔ་ལ་ཐེབས་པས་མཆོག་གི་དངོས་གྲུབ་ཐོབ་པ་དཔག་ཏུ་མེད་པ་བྱུང་ངོ་།། །། ཡང་གཏེར་མའི་ཕྱོགས་རང་བཟོས་མ་བསླད་པའང་ཤིན་ཏུ་མང་མོད་དེ། མངོན་རྟགས་གསལ་བ་སློབ་དཔོན་ཆེན་པོས་བཙན་པོ་ལ་དབང་རྒྱུད་གདམས་པ་དང་བཅས་གནང་ནས། རྟ་མགྲིན་ཡང་གསང་གི་ཆོས་སྐོར་དང་ལྷན་ཅིག་ཡེར་པ་སེ་བ་ལུང་གི་བྲག་ལ་གཏིང་དུ་གཏམས་
པ། གྲུབ་པའི་དབང་ཕྱུག་འདར་ཕྱ་རུ་བས་ཇོ་མོ་ནག་རྒྱལ་གྱི་ཕུག་པ་གོང་མར་བསྒྲུབ་པ་མཛད་པས་སློབ་དཔོན་ཆེན་པོ་དང་དངོས་སུ་མཇལ། ཡེར་པ་ཟླ་བ་ཕུག་ཏུ་སྒྲུབས་ཤིག་གསུངས་པས་དེ་བཞིན་དུ་མཛད། དེར་ནང་རེ་བཞིན་སློབ་དཔོན་ཆེན་པོ་ཉི་ཟེར་ལ་ཆིབས་ནས་ཕེབས་ཏེ་ཆོས་གསུངས། ནུབ་རེ་བཞིན་སྲིན་པོ་འདུལ་དུ་འགྲོ་ཞེས་ཉི་ཟེར་ལ་བཅིབས་ཏེ་བཞུད། དེའི་ཚེ་ཡེར་པའི་སེབ་ལུང་ནས་མཚན་མ་རྫས་ཀྱི་ཕུར་པ་གཏེར་ནས་ཕྱུང་། ལྷ་སའི་ཚོང་དུས་སུ་ཕེབས་པ་ན། རླུང་འཚུབ་ཆེན་པོས་ཁྲོམ་འཐོར་བ་བྱུང་། དེ་ནས་གཙང་དུ་བྱོན་ཙ་ན། ས་པཎ་སྐྱིད་གྲོང་དུ་འབྱོན་པ་དང་གནས་ཁང་གཅིག་ཏུ་འཛོམ། འདར་ཕྱར་ཞལ་འཆོས་པས་ཨཱོཾ་བཛྲ་ཀྱི་ལི་ཀྱི་ལ་ཡ་ཞེས་བགྲངས་པས་ས་པཎ་གྱིས། དེ་མ་དག །བཛྲ་ཀཱི་ལི་ཀཱི་ལ་ཡ་ཟེར་བ་ཡིན་གསུངས། དེར་འདར་ཕྱར་ཐུགས་ཡུས་ནས། སྔགས་མ་དག་ཀྱང་འདི་བཞིན་བྱེད་པ་ཡིན་གསུངས་ནས་བྲག་ལ་ཕུར་པ་ཐམ་ཐམ་བརྒྱབ་པས་འཇིམ་པ་ལ་བྱས་པ་བཞིན་སོང་། སླར་ཕུར་པ་ཚུར་ལ་གཅུས་གྱིན་ཐེན་པས་དབལ་ནས་ཅུང་ཟད་གས། དེར་ས་པཎ་གྱིས་གྲུབ་ཐོབ་ཏུ་ཤེས་ནས། ང་མུ་སྟེགས་པ་དང་རྩོད་དུ་འགྲོ་བས་དེའི་རིམ་གྲོར་འབྱོན་དགོས་གསུངས། རུང་གསུངས་ནས་ལྷན་ཅིག་ཏུ་བྱོན། སྐྱིད་གྲོང་དུ་ཕེབས་པ་ན། རྒྱ་གར་གྱི་ལུགས་བཞིན་བསྟན་པ་གང་རྒྱལ་བའི་རུ་མཚོན་དུ་བཙུགས། ས་པཎ་དང་འཕྲོག་བྱེད་དགའ་བོ་གཉིས་ཉི་མ་བཅུ་གསུམ་གྱི་བར་རྩོད་པའི་གཡུལ་ངོ་ལ་ཞུགས་པས། མཐར་ས་པཎ་རྩོད་པ་ལས་རྒྱལ་ཡང་། གྲུབ་རྟགས་འགྲན་ཟེར་འཕྲོག་བྱེད་དགའ་བོ་ནང་པའི་བསྟན་པ་ལ་འཇུག་ཏུ་མ་ཉན། དེས་མུ་སྟེགས་དེས་རལ་པ་རྒྱབ་ཏུ་བསྐྱུར། ལག་པ་གཤོག་པ་ལྟར་བྱས་ཏེ་ནམ་མཁའ་ལ་འཕུར་བས། ས་པཎ་གྱིས་རིག་སྔགས་ཀྱི་མཐུ་ལས་གཞན་གྱིས་མི་ཐུལ་བར་གཟིགས་ཏེ་བཛྲ་ཀྱི་ལི་ཀྱི་ལ་རྒྱུགས་ཤོག་ཅེས་འདར་ཕྱར་བོས། དེར་རྣལ་འབྱོར་གྱི་དབང་ཕྱུག་ཆེན་པོས་མུ་སྟེགས་ཀྱི་གྲིབ་མའི་སྙིང་གར། ཨོཾ་བཛྲ་
ཀྱི་ལི་ཀྱི་ལཱ་ཡ་ཧཱུཾ་ཕཊ། ཅེས་ཕུར་པ་བཏབ་པས། མུ་སྟེགས་པ་བྱ་ལ་རྡོ་བཏགས་པ་བཞིན་དུ་ས་ལ་ལྷུངས། དེ་ནས་ས་པཎ་གྱིས་རྩོད་པ་ལས་རྒྱལ་བའི་དཔའ་རྟགས་སུ་འཕྲོག་བྱེད་དགའ་བོ་རབ་ཏུ་མ་བྱུང་བར་ཁྲིད་བྱོན་པ་ན། སློབ་དཔོན་ཆེན་པོས་བོད་ལ་མུ་སྟེགས་བསྲུང་བར་བཀའ་བསྒོས་པས་བརྟན་མ་བཅུ་གཉིས་ཀྱི་ཆད་པས་བཅད་དེ་སྐྱིད་གྲོང་དང་བོད་ཀྱི་སོ་མཚམས་སུ་མུ་སྟེགས་དེ་ཁ་ནས་ཁྲག་སྐྱུགས་ནས་ལྔ་པའི་ལམ་དུ་བཏང་། ལར་ཕྱི་རོལ་པའི་གྲུབ་མཐའ་འཛིན་པ་ཙམ་བོད་ལ་བལྟར་མི་མངོན་པར་ལྷགས་སྲིད་ཀྱི། སངས་རྒྱས་ཀྱི་བསྟན་པ་ལ་དངོས་ཀྱི་རྒོལ་བ་བྱེད་ནུས་པའི་བློ་སྟོབས་ཅན་མི་འོངས་པ་ཡིན། འདིས་མུས་སྲད་དུ་བྱོན་ནས་གཙུག་ལག་ཁང་གི་རྟེན་གཙོར་ཕུར་པ་འདི་བཞག །སླར་རིམ་གྱིས་གྱར་ནས་ད་ལྟ་སེ་ར་ཕུར་མཇལ་ཞེས་ཟེར་བའི་རྒྱུན་ཅན་འདི་བྱུང་ངོ་།། །། ད་ནི་གཏེར་ཁ་གོང་འོག་གི་གཏམ་བཤད་པར་བྱ་སྟེ། རྒྱ་ཆེར་རོལ་པ་ལས། བརྗེད་པ་མེད་པ་དྲན་པའི་གཏེར་དང་། བློ་གྲོས་རབ་ཏུ་འབྱེད་པས་བློ་གྲོས་ཀྱི་གཏེར་དང་། མདོ་སྡེ་ཐམས་ཅད་ཀྱི་རྣམ་པ་ཁོང་དུ་ཆུད་པས་རྟོགས་པའི་གཏེར་དང་། ཐོས་པ་ཐམས་ཅད་ཀུན་ཏུ་འཛིན་པས་གཟུངས་ཀྱི་གཏེར་དང་། ལེགས་པར་བཤད་པས་སེམས་ཅན་ཐམས་ཅད་ཚིམ་པར་བྱེད་པས་སྤོབས་པའི་གཏེར་དང་། དམ་པའི་ཆོས་ཡོངས་སུ་བསྲུང་བས་ཆོས་ཀྱི་གཏེར་དང་། དཀོན་མཆོག་གསུམ་གྱི་རིགས་རྒྱུན་མི་གཅོད་པས་བྱང་ཆུབ་ཀྱི་སེམས་དང་། མི་སྐྱེ་བའི་ཆོས་ལ་གྲུབ་པ་ཐོབ་པས་སྒྲུབ་པའི་གཏེར་ཏེ། གཏེར་ཆེན་པོ་བརྒྱད་ཐོབ་པར་འགྱུར་རོ། །ཞེས་བཤད་པའི་གནས་གང་ཡིན་པ་དེ་གདོད་ནས་སྤྲུལ་པའི་སྐུར་བྱང་ཆུབ་པའི་ཡེ་ཤེས་དམ་པའི་སྤྱོད་ཡུལ་དུ་གྱུར་ལ། རྣམ་པ་ཙམ་དུ་ཡང་རང་དོན་དུ་མཆོག་གི་དངོས་གྲུབ་ཆེན་པོའི་གོ་འཕང་ལ་འཛེགས་ཏེ། གསད་གསོད་དང་། རྫུ་འཕྲུལ་གྱི་ཡན་ལག་རྒྱ་མཚོ་ལྟ་བུ་ལ་དབང་འབྱོར་པས་རྣལ་འབྱོར་གྱི་དབང་ཕྱུག་ཆེན་པོའི་ས་ལ་བཞུགས་
ཤིང་། གཞན་དོན་དུ་བསྟན་པའི་བྱ་བ་བླ་ན་མ་མཆིས་པ་དང་། སེམས་ཅན་གྱི་ཁམས་རྒྱ་མཚོ་ལྟ་བུ་འདུལ་བའི་ཐབས་ལ་མཁས་པར་སྟོན་པ་ནི་སྤྲུལ་པའི་སྐུ་ཆེན་པོ་འདི་དག་ཏུ་ཡིད་ཆེས་སོ། །དེ་ལ་ཁ་ཅིག་གིས་གཏེར་ཟེར་བའི་ཕྱོགས་ཐམས་ཅད་ལ་སྒྲོ་སྐུར་བྱེད་པ་ནི་ལྕེ་ལ་ཐོང་གཤོལ་ལྔ་བརྒྱས་རྨོད་པའི་ལས་ཡིན་ནོ། །གཏེར་དུ་བཏགས་པ་རྣམ་པ་ཐམས་ཅད་པའི་ཆ་ལ་ནི་ཁོ་བོ་ཅག་གིས་ཀྱང་དགག་སྒྲུབ་གཉིས་ཀ་བྱ་བ་མ་ཡིན་ཏེ། རྒྱན་ལས། མི་རིགས་པ་ཡི་གཟུགས་ལའང་མི་རིགས་ན། །ཐེ་ཚོམ་ཟ་བའི་ཆོས་ལ་སྨོས་ཅི་འཚལ། །ཞེས་དང་། རང་ས་ན། དགེ་བ་ཡིན་ན་བཟང་པོ་སྟེ། །སྡིག་པ་བྱེད་པའང་སྡིག་བལྟའོ། །ཞེས་དེ་དང་དེའི་འབྲས་བུ་མི་འཆོལ་བའི་ཕྱིར་རོ། །འོན་ཏེ་རྣམ་པ་ཐམས་ཅད་ནས་རྫས་འགལ་བ་མཐོང་བའི་ཆོས་སུ་གཏན་ལ་ཕེབས་པ་བྱུང་ཡང་དེས་རྙིང་མའི་བསྟན་པ་ཐམས་ཅད་ཉམ་ཉེས་པར་མི་བལྟ་སྟེ། དཔེར་ན་དགེ་སློང་ལྷ་ཆེན་པོ་དང་། སྡེ་སྣོད་འཛིན་པ་གཞོན་ནུ་སྡེ་བདུད་ཀྱིས་ཁེབས་ནས་དེ་བཞིན་གཤེགས་པའི་གསུང་རབ་ཆུད་གསན་པ་ལྟ་བུའོ། །དེས་ན་ཆོས་མ་ཡིན་པ་ཆོས་སུ་བརྫུས་པའམ། གཏེར་མ་ཡིན་པ་གཏེར་མར་བརྫུས་པ་དེ་ཀ་སྡེ་ཚན་གཅིག་ཏུ་འཇོག་པར་འོས་ཀྱི། གསང་སྔགས་ཀྱི་རྒྱུད་སྡེ་ཆེན་པོའི་བརྗོད་བྱ་དང་བརྗོད་དོན་མ་ནོར་ཤིང་། འབྲས་བུ་གྲུབ་པ་ལ་བསླུ་བ་མེད་པ་འདི་དག་ལ་ས་ཆོས་དང་རྡོ་ཆོས་ཞེས་སྐུར་པ་བྱེད་པ་ནི་བདུད་ཀྱི་ལས་སུ་འགྱུར་ཏེ་བཅོམ་ལྡན་འདས་ཀྱིས། བདག་བསྟོད་གཞན་ལ་སྨོད་པའི་བྱང་ཆུབ་སེམས་དཔའ་ནི། །བདུད་ཀྱིས་ཡོངས་སུ་བསླུས་ཤིང་བློ་ཆུང་རིག་པར་བྱ། །ཞེས་གསུངས་པའི་ཕྱིར་རོ།། དེ་ལ་ལྷ་བཙད་པོ་ཁྲི་སྲོང་ལྡེ་བཙན་སླར་ཡང་རང་གི་མན་ངག་སྤེལ་བའི་སླད་དུ་བྱོན་པ་མངའ་བདག་ཉང་ཉི་མ་འོད་ཟེར་ནི། ཡུལ་ལྷོ་བྲག་བལྟམ་ཤུལ་ཅེས་བྱ་བར། ཡབ་ཉང་སྟོད་ཆོས་འཁོར་དང་། ཡུམ་པདྨ་བདེ་རྩལ་གྱི་སྲས་སུ་ཤིང་འབྲུག་གི་ལོ་ལ་བལྟམས། སྐུ་གཞོན་ནུ་ནས་ངོ་མཚར་བསམ་གྱིས་མི་ཁྱབ་ཅིང་། མཁའ་འགྲོ་མ་རིགས་བཞི། རྗེ་བཙུན་སྒྲོལ་མ། ཐུགས་
རྗེ་ཆེན་པོ། སློབ་དཔོན་པདྨ་ལ་སོགས་པའི་ཞལ་གཟིགས་ཤིང་ཆོས་ལ་བསྐུལ། རང་གི་ཡབ་ལས་གསན་པ་མང་པོ་མཛད། དགུང་ལོ་བཅུ་གསུམ་པ་ལ་ཐུགས་རྗེ་ཆེན་པོ་དང་ཕུར་པ་གྲུབ་སྟེ་འཇོད་ཕུའི་བྲག་ལ་ཕྱག་ཞབས་ཀྱི་རྗེས་དང་། ཟངས་ཀྱི་ཕུར་པས་རྟ་སྐད་མངོན་སུམ་དུ་འཚེར་བ་བྱུང་། ཡེ་ཤེས་ཀྱི་མཁའ་འགྲོ་མས་བྲག་རྡོ་རྗེ་རྩེ་ལྔ་འདྲ་བར་སོང་ཞིག་ཅེས་སྨྲ་བོའི་རི་ལུང་བསྟན། འཇལ་འཛིན་རྒྱལ་སྲས། ཁམ་བུ་ཡང་ལེ། གུ་རུ་ཁྲོ་བོ་སོགས་ལས་གསར་རྙིང་གི་ཆོས་མང་པོ་དང་། ཁྱད་པར་གྲུབ་ཐོབ་དངོས་གྲུབ་ལས་སྤྱན་རས་གཟིགས་དང་། བཀའ་བརྒྱད་བཀའ་མའི་དབང་ལུང་ཡོངས་སུ་རྫོགས། སྨྲ་བོའི་རི་ལ་སྒྲུབ་པ་མཛད་ཀྱིན་ཡོད་ཙ་ན། བུ་ལྟོས་ཤིག་བྱ་བའི་སྒྲ་ཞིག་བྱུང། བལྟས་ཙ་ན་རྣལ་འབྱོར་རུས་པའི་རྒྱན་ཅན་ཞིག་འདུག །ནང་དུ་བོས་ནས་ཚ་བ་དྲངས་པས་དེ་ན་རེ། ང་ནི་ནམ་མཁའི་རྣལ་འབྱོར་པ། །དབང་ཕྱུག་རྡོ་རྗེ་བྱ་བ་ཡིན། །བུ་ཁྱོད་ལས་དང་སྐལ་བར་ལྡན། །པདྨས་དབང་དང་ལུང་གིས་སྐྱོབ། །གསང་སྔགས་ཟབ་མོའི་ཆོས་རྣམས་ཀུན། །ད་ལྟ་མཁའ་འགྲོའི་ལག་ན་ཡོད། །གསོལ་བ་ཐོབ་ལ་མྱུར་དུ་ལོངས། །ཞེས་ཁ་བྱང་ཡང་གནད་ཡིག་གསུམ་གཏད་དེ་འཇའ་ལྟར་ཡལ་གྲྭ་པ་མངོན་ཤེས་དང་ར་ཤག་གཏེར་སྟོན་གྱིས་ཀྱང་ཁ་བྱང་སྤྲད། ཁྱད་པར་མཁའ་འགྲོ་ཡེ་ཤེས་འཚོ་རྒྱལ་ཀྱི་སྤྲུལ་པས་སྟག་སྒྲོ་ཆོས་གཏེར་གྱིས་གང་བ་གཏད་པས་མཁའ་འགྲོའི་སྒྲུབ་སྐོར་སོགས་མན་ངག་མང་པོ་བྱུང་། མཁོ་མཐིང་གི་གནས་ཡིག་ལྷའི་ཕྱག་མཛུབ་ཆད་པ་ཚོང་པས་ཁྱེར་ཏེ་ཕུལ་བ་ལས་སྒྲོམ་སྐྱ་སྒྲོམ་སྨུག་གཉིས་ནས་བདེ་གཤེགས་འདུས་པ་རྒྱལ་པོའི་བླ་དཔེ་དང་། རྟ་མགྲིན། བཀའ་སྲུང་སྐོར་གྱི་མཚོན་ཏེ་ཆོས་གཏེར་དང་བྱིན་རླབ་ཀྱི་རྟེན་དཔག་ཏུ་མེད་པ་བྱོན། བདེ་གཤེགས་འདུས་པའི་སྨན་བསྒྲུབ་མཛད་པས་སྨན་གྱི་ལྷ་མོས་ཨ་རུ་ར་རློན་པ་ཕུལ། ཡེ་ཤེས་འཚོ་རྒྱལ་དང་དངོས་སུ་མཇལ་ནས་དངོས་གྲུབ་
ཅི་འདོད་གསུངས་པ་ལ། ཆོས་འདོད་ཞུས་པས་མཁའ་འགྲོ་ལུང་བསྟན་གྱི་སྐོར་དང་ཞུ་ལན་བརྒྱ་རྩའི་དཔེ་གཏད། དུར་ཁྲོད་བསིལ་བའི་ཚལ་དུ་མངོན་སུམ་པར་ཁྲིད་ནས། དེར་སློབ་དཔོན་ཆེན་པོ་དང་མཇལ། བུ་ཚངས་པ་ལྷའི་མེ་ཏོག་སླེབ་བམ་གསུངས་ནས་ཀེང་རུས་ཀྱི་ཁྲི་ལ་བཞག །སྒྲུབ་ཆེན་དགུའི་བཀའ་སྤྱི་དང་བྱེ་བྲག་གི་དབང་ཐམས་ཅད་རྫོགས་པར་གནང་། ཡི་དམ་གྱི་ལྷ་དང་གཉིས་སུ་མེད་པར་གྱུར་ནས་ཆོས་སྐྱོང་བྲན་དུ་འཁོལ། ཕྲིན་ལས་ནམ་མཁའི་མཐའ་དང་མཉམ་པར་སོང་ནས་དུས་དེ་ཙ་ན་གསང་སྔགས་འཆང་བའི་གཟུགས་སུ་གནས་པ་གཉིས་ལམ་དུ་འདྲི་སྨེད་པ་ལའང་ཁྱོད་ཅག་གཏེར་ཁ་གོང་འོག་གང་གི་ལུགས་ཡིན་ཞེས་འདྲི་བ་བྱུང་། བསྟན་པའི་བྱ་བ་དང་རྫུ་འཕྲུལ་གྱི་ནུས་པ་བསམ་གྱིས་མི་ཁྱབ་སྟེ་རྣམ་ཐར་གྲགས་ཆེ་བས་འདི་ཙམ་གྱིས་མཚོན་པར་ནུས། སློབ་མ་ནི། གཉོས་གྲགས་རྒྱལ། ཞིག་པོ་བདུད་རྩི། སྲས་མི་བསྐྱོད་རྡོ་རྗེ། སྨན་འོན་པ། སེ་སྟོན་ཁྲི་མཆོག་སྟེ་བཀའ་བབས་ཀྱི་བུ་ལྔ། སྲས་ཆུང་བ་མངའ་བདག་འགྲོ་མགོན་ནམ་མཁའ་དཔལ་ནི་སྨིན་གྲོལ་ཡོངས་རྫོགས་ཀྱི་བཀའ་བབས་གཏད་པའི་བསྟན་པའི་བདག་པོ་ཡིན། དགུང་ལོ་རེ་དགུ་པ་ཤིང་ཕོ་བྱི་བའི་ལོ་ལ་རྫུ་འཕྲུལ་གྱི་བཀོད་པ་རྒྱ་ཆེན་པོ་དང་། ཁྱད་པར་ཐུགས་ཀ་ནས་ཧྲཱྀཿཡིག་དཀར་པོ་ཞིག་བདེ་བ་ཅན་དུ་གཤེགས་པར་བསྟན་ཏེ་སྐུའི་བཀོད་པ་བསྡུས། སླར་སྐུའི་སྤྲུལ་པ་རྒྱ་གར་ཤར་ཕྱོགས་སུ་བཀོད་པ་སྣ་ཚོགས་སྟོན་པའི་རྣལ་འབྱོར་པ་གཅིག །གསུང་གི་སྤྲུལ་པ་གུ་རུ་ཆོས་ཀྱི་དབང་ཕྱུག །ཐུགས་ཀྱི་སྤྲུལ་པ་ཡུལ་ཉེར་བཞི་ལ་སྤྱོད་པའི་རྣལ་འབྱོར་པ་གཅིག་སྟེ་གསུམ་ཅིག་ཅར་དུ་འབྱུང་བར་ལུང་བསྟན། ལོ་ཙཱ་བ་ཆག་གིས་གདུང་བཞུ་བས་མེ་སྦར་བར་མ་ནུས། སླར་སྟོན་པ་མཆོག་གི་སྐུ་གདུང་བཞིན་མེ་རང་བྱུང་དུ་འབར། དེ་ལས་འཇའ་ཚོན་བྱུང་བ་ནུབ་ཕྱོགས་སུ་ཟུགས། གདུང་ཁང་ན་ཁྱེའུ་གཞོན་ནུ་རུས་པ་དང་རིན་པོ་ཆེའི་རྒྱན་ཅན་ཧ་རི་ནི་ས་སྒྲོག་པ་མཁའ་འགྲོ་མ་མང་པོའི་
འཁོར་དང་བཅས་པ་ཀུན་གྱིས་མཐོང་། ལྷ་སའི་བཅུ་གཅིག་ཞལ་གྱི་ཐུགས་ཀ་དང་གདུང་ཁང་གཉིས་འཇའ་དཀར་པོས་ཏལ་མར་འདྲེལ་བ་བྱུང་། དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོའི་ཡོན་ཏན་གྲུབ་པའི་རྟགས་སུ། ཐུགས་ལྗགས་དང་དབུ་སྐྲ་ལ་ཞུགས་ཀྱིས་ཟ་བར་མ་ནུས་ཞིང་། རྟེན་དང་རིང་བསྲེལ་མཐའ་ཡས་པ་བྱོན་ཏོ། །དེ་ནས་སྲས་འགྲོ་མགོན་ཡབ་ཀྱི་དགོངས་པ་རྫོགས་པའི་བྱ་བ་ལ་ཞུགས་ཏེ། སྐུའི་རྟེན་རིགས་གསུམ་སེམས་དཔའ་མི་ཚད་དང་མཉམ་པ་ནཻ་པ་ལའི་ཡུལ་དུ་བསྐྲུན་ནས་སྤྱན་དྲངས། གསུང་གི་རྟེན་དུ་མདོ་མངས་དང་རྒྱུད་འབུམ་གསེར་བྲིས་མ། ཐུགས་ཀྱི་རྟེན་དུ་སྐུ་འབུམ་མཐོང་གྲོལ་ཆེན་མོ་བཞེངས། རབ་ཏུ་གནས་པ་ལ་ཁ་ཆེའི་བསོད་སྙོམས་པ་ཆེན་པོ་མ་ཧཱ་པཎྜི་ཏ་ཤཱཀྱ་ཤྲཱི་སྤྱན་དྲངས་ནས་ཆོས་འཁོར་ཡང་བཙུགས། སྲས་འགྲོ་བའི་མགོན་པོ་ཉིད་ཀྱི་གཙུག་ཕུད་ཕུལ། འོན་ཡང་ཕྲིན་ལས་འདི་ཀ་ཆེ་གསུངས་ནས་རབ་ཏུ་འབྱུང་བར་མ་གནང་། གསེར་ཀ་ཊོ་རང་བླུགས་པའི་འབུལ་བ་དང་ཞབས་ཏོག་གྱ་ནོམ་པས་བསྡི་སྟང་དུ་བྱས། སླར་པཎྜི་ཏ་གཤེགས་ནས་ཀྱང་ལྷོ་བྲག་དང་མོན་ཡུལ་གྱི་འདུ་བ་མང་པོས་གསེར་གྱི་འབུལ་བ་རྒྱ་ཆེན་པོ་བྱུང་བ་རྣམས་ཁྲོ་ཕུར་འབུལ་དུ་བྱོན་པས། པཎྜི་ཏ་ན་རེ། མཆོད་གནས་རང་གནས་སུ་ལྡོག་ནས་ཀྱང་འབུལ་བ་སླར་སྐྱེལ་བ་ཇོ་སྲས་མི་བཟང་གསུངས་ནས་མཉེས་ཚོར་ཆེན་པོ་མཛད་སྐད། སྲས་འགྲོ་མགོན་ཉིད་སྤྱན་རས་གཟིགས་ཀྱི་སྤྲུལ་པར་ལུང་བསྟན། རྫུ་འཕྲུལ་ཤིན་ཏུ་ཆེ་བས་དགོངས་རྫོགས་སུ་དམིགས་ནས་ཤམ་པོའི་མདུན་གྱི་རྡོ་རྣམས་ནམ་མཁའ་ལ་ལུག་ཁྱུ་བཞིན་དུ་དེད། གཞན་གྱི་སྣང་ངོར་གང་ནས་བྱུང་ཆ་མེད་པར་སྐྱིད་ཆུའི་འགྲམ་དུ་རྡོ་སྐྱ་ཆག་གེ་ཆགས་པ་ལ་ཇོ་བོའི་ཆུ་རགས་མཛད། སྔར་རྡོ་རྣམས་རིགས་མ་ནོར་བར་ཡོད་ཟེར། བལ་རིས་ཀྱི་ཐང་ཀ་ཐོག་ཚད་མ་བརྒྱ་དང་བརྒྱད་ཀྱང་བཞེངས། མཐུ་རྩལ་དང་ནུས་པ་ཤིན་ཏུ་ཆེ་ཞིང་ཆོས་སྐྱོང་བྲན་དུ་འཁོལ་བས་
ཐོག་སེར་ལ་སོགས་པས་སྐུ་དགྲར་གྱུར་པ་དག་ཟླ་དུས་ལ་མི་ལྟོས་པར་ཉི་མའི་སྔ་ཕྱི་ལས་བཙན་ཐབས་སུ་བརླགས་པར་མཛད་པ་སོགས་ཀྱི་ལོ་རྒྱུས་དུ་མ་ཡོད། ཐུགས་རྗེ་བསམ་གྱིས་མི་ཁྱབ་པས་གུ་རུ་ཆོས་དབང་སོགས་སྤྲུལ་པའི་སྐུའི་སློབ་མ་ཡང་མང་དུ་བྱུང་། འདིའི་སྲས་མངའ་བདག་བློ་ལྡན་འཇམ་དཔལ་གྱི་སྤྲུལ་པ་དང་། དེའི་སྲས་མངའ་བདག་བདུད་འདུལ་ཕྱག་རྡོར་གྱི་སྤྲུལ་པ་སྟེ། ཉང་རིན་པོ་ཆེའི་གདུང་བརྒྱུད་ལ་རིགས་གསུམ་མགོན་པོའི་སྤྲུལ་པ་འབྱུང་བར་ལུང་བསྟན་པ་ཡིན་ནོ། །ཆོས་ཀྱི་བརྒྱུད་པ་ལའང་སྲས་བརྒྱུད་དང་སློབ་བརྒྱུད་གཉིས་ཀའི་ལུགས་ཡོད་དོ།། །། གཏེར་ཁ་འོག་མར་གྲགས་པའི་བདག་ཉིད་ཆེན་པོ་གུ་རུ་ཆོས་ཀྱི་དབང་ཕྱུག་གི་གདུང་ནི། བསྟན་པ་སྔ་དར་གྱི་ཚེ་བོན་གཉའ་རིངས་བྱ་བས་བཙན་པོ་ཁྲི་སྲོང་ལ་ཐོག་ཕབ་སྟེ་བཀྲོང་བར་ཁས་བླངས་པ་ན། སློབ་དཔོན་པདྨ་དང་། བི་མ་ལ། བཻ་རོ་གསུམ་ཀའི་སློབ་མར་གྱུར་པ་སྤང་རྗེ་བཙན་ཁྲམ་བྱ་བའི་སྔགས་པ་ནུས་པ་ཅན་ཞིག་གིས། བོན་པོས་ཐོག་མདའ་ལྔ་དུས་གཅིག་ཕབ་པ་སྡིགས་མཛུབ་ཀྱིས་བླངས་ཏེ་བོན་པོའི་གྲོང་ལ་རང་གཤེད་དུ་བཏང་ནས་བརླགས་པར་བྱས། བཙན་པོས་དེ་ལ་བྱ་དགའ་ཆེན་པོ་མཛད། དེ་ལ་སྲས་སྤང་རིག་འཛིན་སྙིང་པོ་ཞེས་བྱ་བ་ཞིག་བྱུང་སྟེ། དེས་ཡང་འདུལ་གྱི་ལྷ་ཁང་བཞིའི་མཆོད་གཉེར་མཛད། ལོ་སྐོར་རེ་ལ་མཆོད་པ་ལ་འབྱོན་པ་ལས་ཁོ་མཐིང་དུ་བྱོན་པའི་ཚེ་ལ་ཡག་རྫ་བར་གྱི་དཔོན་ཆེན་སྤྲད་པས་ནོར་གཞིས་མང་དུ་ཕུལ། ཚེ་སྔ་མའི་ཡུལ་ཡིན་གསུངས་ནས་བདག་གིར་མཛད། དེའི་སྲས་ཀུན་མཁྱེན་ཤེས་རབ་རྒྱལ་པོ་ནས་མཁྱེན་ལྡན་ནུས་པ་ཅན་བར་མ་ཆད་དུ་བྱུང་བའི་སྤང་སྟོན་གྲུབ་པའི་སྙིང་པོ་ཞེས་བྱ་བ་དེས་བླ་མ་སངས་རྒྱས་སྙི་སྒོམ་ལ་བདག་ཚངས་པར་སྤྱོད་པར་ཞུས་པས། དགེ་སློང་གི་སྡེ་བརྒྱད་ལས་བྱང་ཆུབ་སེམས་དཔའ་གཅིག་འགྲོ་དོན་ཆེ་བས་བྱང་ཆུབ་སེམས་དཔའི་གདུང་མ་བཅད་གསུངས། དེའི་ཁྱིམ་ན་བཞུགས་པའི་ཚེ་མཁའ་འགྲོ་གར་གྱི་དབང་མོ་ལ་ཇོ་མོ་གྱིས་ཤིག་ཟེར་བའི་ལུང་
བསྟན་བྱུང་། སླར་ནམ་མཁའ་ལ་གྱ་གྱུར་འགྲོ་བའི་གྲུབ་ཐོབ་ཀྱི་བརྒྱུད་པ་དཀར་བཟའ་མགོན་སྐྱིད་ཡིན་པར་ཤེས་ནས་བདག་གིར་བཟུང་བ་ལས། ལྷུམས་སུ་ཞུགས་པའི་ཚེ་ཉི་ཟླ་ཁ་སྦྱོར་སྤྱི་བོར་ཐིམ་པ་དང་། ལྷུམས་ནས་སྐྱེ་མེད་ཀྱི་ཡི་གེའི་སྒྲ་ཡང་ཡང་སྒྲོག་པ་དང་། མདའ་དར་གཏད་དེ་ཚིགས་སུ་བཅད་པ་སོགས་རྟགས་ཁྱད་པར་ཅན་བྱུང་། སྤྲེའུ་ལོ་དཔྱིད་རའི་བཅོ་ལྔའི་ཉི་ཤར་ལ་བལྟམས། མཚན་བརྗོད་གསེར་མ་ཞིག་བྲི་ཞིང་ཡོད་པའི་ཚིག་མཚམས་ལ་རྟེན་འདྲེལ་བརྟགས་པས། ཆོས་ཀྱི་དབང་ཕྱུག་ཆོས་ཀྱི་རྒྱལ། བྱ་བ་དང་ཐུག་ནས་མཚན་དེར་བཏགས། མིག་མཐོང་མཁན་དག་གིས་ཀྱང་ལྷ་འདྲེས་མཆོད་པར་འདུག་ཅེས་ཟེར། ཡབ་ཀྱིས་འབྲི་གུང་འཇིག་རྟེན་མགོན་པོ་ལ་ཕུར་པ་རྩ་རྒྱུད་ཉན་པའི་ཚེ། ཁྱོད་ཀྱི་བུ་ཐ་ཆུང་གཅིག་ལ་ཆོས་སློབས་ཤིག །དེས་ཕྲིན་ལས་འབྱུང་ངོ་ཞེས་ཀྱང་གསུངས། དེ་བཞིན་དུ་མལ་ཀ་བ་ཅན་པ་ན་རེ། དགེ་བཤེས་ལྷོ་པ་ཁོ་དེ་མདའ་ལྔ་དང་། གཞུ་གཅིག་ཚགས་གྱིས་དང་། དགྲ་བོའི་སྙིང་ལ་ཕོག་པའི་མདའ་གཅིག་འོང་ཞེས་གསུངས། ཞང་རིན་པོ་ཆེས་ཀྱང་དགེ་བཤེས་ལྷོ་ཆུང་པ་ཁྱོད་ཀྱི་བུ་ངས་བྱའམ། ཀུ་རེ་ཡིན་ཁྱོད་ལ་ང་འདྲ་བའི་བུ་གཅིག་འོང་གསུངས་པ་ལ་སོགས་ལུང་བསྟན་མང་པོ་ཐོབ། ལོ་བཞི་ནས་ཡབ་ལ་བྲིས་ཀློག་བསླབས། སྨྲ་སྒོ་མཚོན་ཆ། རིག་ཀླག་སྡེ་ལྔ། བི་བརྟ་ཆེན་མོ་སོགས་སྒྲའི་བསྟན་བཅོས་བཅུ་གསུམ། སྐྱེ་བོ་གསོ་ཐིག་སོགས་ལུགས་ཀྱི་བསྟན་བཅོས་བཅུ། ནག་རྩིས་དང་། སྨན་དཔྱད་བཀའ་གཏེར། རྒྱལ་རབས་སྡེ་བདུན། ལྡེ་རྒྱུད་ཆེན་པོའི་སྒྲུང་འབུམ་སོགས་གླུ་གར་ཀྱི་བསྟན་བཅོས་བརྒྱ་དང་བཞི། བོན་གྱི་གཞུང་ཆེན་བདུན་ཅུ་དོན་ལྔ། མདོས་གཞུང་ཆེན་པོ་བརྒྱ་ཕྲག གསང་སྔགས་ཕྱི་ནང་གི་ཐིག་རྩ་མང་པོ། ཕུར་པའི་སྐོར་པོད་ཆེན་བཞི་ལ་སོགས་པ་ཐོས་པ་མང་པོ་མཛད། བཅུ་ལ་གསར་མའི་ཕྱག་རྡོར་ལུགས་དྲུག་གསན་ཏེ་བསྒྲུབས་པས་
བུམ་ཆུ་ཁོལ། གཤིན་རྗེའི་གཤེད་དང་ཕུར་པ་ལ་བསྙེན་པ་ཚད་དུ་བསྐྱལ། བཅུ་གཅིག་པ་ལ་སྒྱུ་འཕྲུལ་གྱི་དབང་རྒྱུད་མན་ངག་ཐམས་ཅད་རྫོགས། བཅུ་གཉིས་ལ་ཀ་ཀ་ནི་གྲྭ་ལྔ། སྒྲུབ་ཐབས་བརྒྱ་རྩ་སོགས་མཁྱེན་པར་མཛད་ཅིང་ཡིག་བརྒྱའི་བསྒྲུབ་པ་མཛད། བཅུ་གསུམ་ལ་ཡང་དག་དང་མ་གཤིན། ཐུགས་རྗེ་ཆེན་པོ་ལུགས་གཉིས་དང་རྟ་མགྲིན་ལ་སོགས་གསར་རྙིང་མང་པོ་གསན་ཞིང་བསྒྲུབས། བཅུ་གསུམ་པའི་དུས་ཉམས་སྣང་ལ་ཇོ་མོ་སྒྲོལ་མས་ཤེལ་མཁར་ཅིག་གི་རྩེར་ཁྲིད་པས་རྡོ་རྗེ་སེམས་དཔའ་དང་མཇལ། དེ་ན་མཁའ་འགྲོ་མ་གདོང་པ་བཞི་པ་གཅིག་འདུག་པའི་མདུན་ཞལ་དཀར་པོ་ནས། སངས་རྒྱས་བསྟན་པ་ཁྱོད་ཀྱིས་ཟུང་། གཡས་ཞལ་སེར་པོ་ནས། དམ་ཆོས་དར་བ་ཁྱོད་ཀྱིས་གྱིས། རྒྱབ་ཞལ་དམར་པོ་ནས། དགེ་འདུན་དབུ་འཕང་ཁྱོད་ཀྱིས་སྟོད། གཡོན་ཞལ་སྔོན་པོ་ནས། དུས་ངན་གདུལ་དཀའ་ཁྱོད་ཀྱིས་ཐུལ། །ཟེར་ནས་མདའ་དཀར་པོ་སྒྲོ་ལྔ་པ་གཅིག་གཏང་། དགུང་ལོ་བཅུ་བཞི་པར་ཏི་སེ་གྲོ་གྱང་གསར་པར། ཚད་མ་དང་། མངོན་པ་ཀུན་ལས་བཏུས། སྤྱོད་འཇུག །དགྱེས་རྡོར་ལ་སོགས་པའི་གཞུང་ཆེན་པོ་དང་། ཕྱག་རྫོགས་ཞི་བྱེད་ཆོས་དྲུག་ལ་སོགས་པའི་མན་ངག་ཉན། མཐའ་སྐོར་བ་ལ་དབུ་མ་བདེན་ཆུང་། མཚུར་སྟོན་ཡབ་སྲས་ལ་ཨ་ཏིའི་སྐོར་སོགས་མདོ་སྔགས་གསར་རྙིང་གི་བཤད་སྒྲུབ། ཡབ་ལས་ཞི་བྱེད་ཕྱག་རྫོགས་གཅོད་ཡུལ། གདམས་ངག་ངོ་སྤྲོད། བསྟན་སྲུང་དྲག་སྔགས་མཐའ་དག་ཉན་ཅིང་ཉམས་འོག་ཏུ་ཚུད་པར་མཛད། བཅུ་བདུན་པ་ལ་མངའ་བདག་འགྲོ་མགོན་དང་མཇལ་ཏེ་ཉང་རིན་པོ་ཆེ་ཉི་མ་འོད་ཟེར་གྱི་གཏེར་ཆོས་མཐའ་ཡས་པའི་བདག་པོར་གྱུར། བཅོ་བརྒྱད་པའི་ཚེ་ས་པཎ་ལ་གནས་གཞི་སྒང་པོར་སེམས་བསྐྱེད་པ་དང་། གྱང་གསར་དུ་ཆོས་འདྲེལ། ལྷ་ལུང་གི་མཆོད་རྟེན་རྩར་རབ་གནས་ཐོབ། དེ་ནུབ་མནལ་ལམ་དུ་རྒྱ་ནག་རི་བོ་རྩེ་ལྔར་
མེ་ཏོག་ཨུ་དུམ་ཝ་ར་འཚོལ་དུ་ཕྱིན་པས། ཨུཏྤལ་སྔོན་པོའི་སྟེང་ནས་འཕགས་པ་འཇམ་དཔལ་གྱིས། ཛྙཱ་ན་ཀཱ་ཡ་དྷརྨ་བྷཱ་ཏུ། ཆོས་ཀྱི་དབང་ཕྱུག་ང་ཡིན་ནོ། །ང་ནི་ཁྱོད་ཀྱི་སེམས་རྟོག་གོ། །སེམས་རྟོག་ནི་ཆོས་ཀྱི་སྒོ་མོ་བསམ་གྱིས་མི་ཁྱབ་པའོ། །ཆོས་ཀྱི་སྒོ་བསམ་གྱིས་མི་ཁྱབ་པའི་དོན་ནི་རང་བྱུང་གི་ཡེ་ཤེས་ཐིག་ལེ་ཉག་གཅིག་གོ། །ཆོས་སྒོ་བརྒྱད་ཁྲི་བཞི་སྟོང་གི་དོན་ཁྱོད་ལ་བཤད་ཟིན་གྱི་དེའི་དོན་ལ་དཔྱོད་ཅིག །ཅེས་གསུངས་པའི་མོད་ལ་མནལ་སད་པས་ཆོས་ཐམས་ཅད་ཐོབ་པའི་ངེས་ཤེས་རྙེད། ཡུལ་གྲ་རུ་མངོན་པ་ལ་མཆོག་ཏུ་མཁས་པས་གྲྭ་བ་མངོན་ཤེས་སུ་གྲགས་པའི་སྡེ་སྣོད་འཛིན་པ་ཆེན་པོ་གཏེར་སྟོན་རྣལ་འབྱོར་གྱི་དབང་པོ་དེས་བསམ་ཡས་ནས་བཏོན་པའི་ཁ་བྱང་རིམ་པར་བརྒྱུད་པ་དགུང་ལོ་བཅུ་གསུམ་པའི་ཚེ་ཕྱག་ཏུ་བྱུང་། བར་དེར་ཁ་བྱང་དེ་ལ་བརྟེན་ནས་བླུན་པོ་གཟུ་ལུམས་ཅན་མང་པོས་འདོན་པར་བརྩམས་པས་ལ་ལ་ཤི། ལ་ལ་ཐོག་སེར་གྱིས་བྱེར་དགོས་པ་བྱུང་། ཁ་བྱང་དེ་ནང་དུ་བཞག་ན་ཆོ་འཕྲུལ་གྱིས་མི་ཚུགས། ལམ་ཕྲང་དང་། བཞི་མདོ་དང་། ཆུའི་དཀྱིལ་དང་། ས་འོག་ལ་སོགས་པར་བསྐྱུར་ཀྱང་། འབྱུང་བའི་གནོད་པས་མི་ཤིགས། བཟུང་དུའང་མ་བཏུབ་པས་བརླག་ཤོག་སེར་པོ་ཞེས་མིང་ཐོགས། ཡབ་ན་རེ། ཐམས་ཅད་བརླག་པའི་བརླག་ཤོག་སེར་པོ་དེས་ཅི་ཞིག་བྱ། ཁྱོད་འཆི་བ་ཉོ་བ་ཨེ་ཡིན་གསུངས་ནས་ཕྲོགས་ཏེ་ཕྱོགས་གཞན་དུ་སྦས། དེ་སླར་དགུང་ལོ་ཉེར་གཉིས་པ་འདིར་བརྐུས་ནས་རྟོགས་ལྡན་གཅོད་ཡུལ་བ་ཞིག་དང་འགྲོགས། དེ་ལ་བརྟེན་ནས་གནམ་སྐས་ཅན་ནས་ཡང་བྱང་བླངས། རིམ་པར་བླ་རྫོགས་ཐུགས་གསུམ་གྱིས་མཚོན་པའི་གཏེར་ཁ་ཆེན་པོ་བཅོ་བརྒྱད་ལ་དབང་བསྒྱུར། དེ་དག་ཀྱང་སྐལ་ལྡན་གྱི་སྐྱེ་བོའི་སྔུན་ན་ངོ་མཚར་ཆེན་པོའི་སྣང་བ་དང་འགྲོགས་ནས་བླངས་པ་དང་། ཕལ་ཆེར་གཏེར་བདག་ལ་ཐ་ཚིག་བསྒྲགས། གཞན་ལས་དང་སྐལ་བར་ལྡན་པ་མངག་གཞུག་ཏུ་བྱས་
ནས་རྩོད་པ་མེད་པར་བྱུང་བ་འབའ་ཞིག་གོ། །དེ་ཡབ་ཀྱིས་ཚོར་ནས་ཁྱོད་ཀྱིས་གཏེར་ཐོན་ཟེར་བ། ཐོན་པ་རང་ཅི་ཞིག་ཐོན་ཁྱེར་ཤོག་གསུངས། ཟངས་སྒྲོམ་གཏད་པ་ན་དཀར་ཆག་ཀློག་པར་གསུངས། བཀླགས་པས། སངས་རྒྱས་མཉམ་སྦྱོར་གྱི་རྒྱུད་གཅིག་ཤེས་ཀུན་གྲོལ་འམ་དེ་ཀློག་དང་གསུངས། རྒྱུད་ཀྱི་མགོ་ནས་བཀླགས་པས། ད་གོ་གོ་དེས་ཆོག །ཁྱོད་ལ་སྔར་གྲོས་སྣ་མ་ཐུང་བ་བཏབ་པ་ཡིན། ཕྱིས་གྱོད་ཁ་བསྣན་ཀྱང་ཚིག་རོ་ལས་མི་ཡོང་། ད་གཏེར་དེས་འཕུང་འཚེངས་གང་ཡིན་ཀྱང་ཟིན། དུས་གསུམ་མཁྱེན་པ་ཨུ་རྒྱན་ཆེན་པོའི་བཀའ་རྩོད་མེད་དུ་འདུག །ཟབ་ཀྱང་གཏེར་གྱི་ཆོས་ལ་ད་ང་རེ་མ་དགོས། ངའི་མདུན་མ་ལོ་བཞི་བཅུའི་བར་དུ་རུ་བཞིའི་བླ་མ་མཁས་གྲུབ་ཐམས་ཅད་ཀྱི་དགོངས་པ་བླངས། སྤྲོས་པ་ཆོད། འཁོར་འདས་ཀྱི་གཞི་རྩ་སེམས་ཉིད་གཅིག་པུ་འདིའི་སྟེང་དུ་ལ་བཟླས་ཟིན། ད་ཁྱོད་ངའི་ཁ་ལ་ཉན་པར་སོང་ན་བླ་རྫོགས་ཐུགས་གསུམ་འདིའི་མགོ་ཅི་ཐོན་གྱིས། དེ་མིན་པའི་མཐུ་ངན་སྔགས། སྒྱོགས་དང་། དཔག་ཆེན། ཐན་དང་ཆོ་འཕྲུལ། བཟོ་སྣ་ཀྱག་ཀྱོག་རྣམས་ཆོས་འདི་མགོ་མ་ཐོན་པར་ཁའི་ཟུར་ལའང་མ་འདོན། ཤེས་ཤེས་མང་ལ་མཐར་ཐོན་མེད་པ་འདི་མཐར་སྤྲང་པོར་འགྲོ་བ་ཡིན། སྤྱིར་གཏེར་ཆོས་ལ་ང་གནག་པ་ག་ལ་ཡིན། སངས་རྒྱས་ཀྱི་མདོ་རྒྱུད་ཀུན་ནས་གཏེར་ལུང་གསུངས། རིག་འཛིན་གོང་མའི་ཕྱག་ལེན་ཡིན་ཏེ། སྔར་ཡང་གཏེར་སྟོན་བློ་ཆུང་རེས་ཆོས་ལ་དག་མ་ཐོན་པར། གཞོགས་ཁྱེར་དང་ངོ་སོ་བྱས་ནས་འགྲོ་དོན་རླབ་པོ་ཆེ་མ་གྲུབ། རྒྱ་ཞང་ཁྲོམ་གྱིས་ངན་སྔགས་སྔོན་ལ་སྤེལ་བས་འགྲོ་དོན་གྱ་རྡུགས། སྐུ་ཚ་སྨན་པས་སྨན་དཔྱད་བྱས་པས་ཆོས་ཀྱི་འགྲོ་དོན་གཡེལ། ར་ཤག་གཏེར་སྟོན་གྱིས་མདོས་ཆོག་བྱས་པས་ཕྱིས་མདོས་མཁན་དུ་སོང་། བོན་པོ་དྲག་རྩལ་གྱིས་སྔོན་ལ་པེ་ཧར་བསྒྲུབས་པས་མཐུ་མཁན་ལས་མ་བྱུང་། དེ་འདྲ་ལ་ཟད་པ་མེད། རྒྱལ་བ་གོང་མས་གཞན་དོན་
ལ་དམིགས་ཀྱང་གཏེར་སྟོན་ཚོས་རྩ་བའི་ཆོས་ཀྱི་གཞུང་མ་བསྲངས་པར་ཕྲིན་ལས་ཁ་ཁྱེར་དུ་བཏང་བས་གོ་མ་ཆོད་དུ་སོང་། ཆོས་བྱས་ན་ཆོས་སྐྱོང་ཞོར་ལ་ཡོང་། མཐུ་ཡང་མ་བསྒྲུབས་པར་འོང་བ་ཡིན། དེ་ཆོས་སྐྱོང་རང་དམ་བཅའ་ཡིན་པས་སོ། །བློ་རྩབ་རྩུབ་མ་མང་བར་བླ་རྫོགས་ཐུགས་གསུམ་གྱི་ཉམས་ལེན་ལ་འབུངས་ཤིག །མངའ་བདག་ཉང་ཡབ་སྲས་མིས་འཁུར་བ་འདི་ཁོས་ཐུགས་རྗེ་ཆེན་པོ་བསྒྲུབས་པས་བྱུང་བ་ཡིན། གཏེར་སྟོན་གྱ་མ་རྡུགས་ཙམ་དེ་ཁོ་ཡིན། ངས་ལོ་དྲུག་གོང་ནས་འགྲོ་བྱས་པའི་དུས་ཚོད་དེ་ང་ཟླ་བ་གཉིས་ཙམ་ནས་སླེབ་ཡོང་། མི་ཚོས་གཏེར་རྫུན་ཡིན་ཟེར་ཡོང་སྟེ་རྟོག་པ་དེ་མི་དགོས། ང་ཡན་ཆོད་ཀྱི་སྤང་མི་རབས་བཅུ་གསུམ་སོང་སྟེ་ནང་གི་གྲུབ་རྟགས་མ་བྱུང་བ་མེད། ང་ཡང་ཞན་ཤོས་མིན་ཙམ་འོང་གསུང་སྐད། དེར་མངའ་བདག་འགྲོ་མགོན་གྱིས་གཏེར་གྱི་ཉམས་ང་ཆེ་གསུངས་ནས་གཟིགས་པས་མཆོག་ཏུ་མཉེས། ལུང་བསྟན་ལས་ཧོར་དམག་འབྱུང་ཚུལ་ཡོད་པ་སློབ་དཔོན་མཐའ་སྐོར་བས་མཐོང་ནས། ཧོར་ད་ལྟ་ཡུལ་ན་མེད་པ་ལ་ཟེར་སྐུར་པ་བཏབ་པས། ཐུགས་ཆད་ནས་གདམས་པ་སླར་སྦ་བར་སེམས་པ་ན། བུ་མོ་གཉིས་ཀྱིས་རྟ་དཀར་གཤོག་པ་ཅན་ལ་བསྐྱོན་ནས་རྔ་ཡབ་དཔལ་རིར་ཁྲིད། ཨུ་རྒྱན་ཆེན་པོས་གསང་བ་ཡོངས་རྫོགས་ཀྱི་དབང་རྫོགས་པར་བསྐུར་ནས། ལམ་གྱི་ལམ་མཆོག་གཞན་དོན་ཡིན། །འདི་ལ་སྒྱིད་ལུགས་སུ་སྐྱེས་པ། །དེ་ཡིས་བྱང་ཆུབ་རྒྱང་ཐག་རིང་། །ཞེས་སོགས་ཞལ་གདམས་བསླབ་བྱས་དབུགས་ཕྱུང་། གནས་འདིར་མ་ཞེན་ཅིག །ཞེན་ན་སྐྱེ་བ་འཕོ་བའི་ཉེན་ཡོད་གསུངས་པའི་མོད་ལ་འོད་ཕུབ་ལྟ་བུས་བཏགས་ཏེ་སྐད་ཅིག་ལ་སླེབས། ཤིང་ཕོ་བྱི་བའི་ལོ་ཧོར་དོར་རྟོག་གི་དམག་གིས་སླེབ་པས་མ་འོངས་པ་མངོན་སུམ་དུ་གཏན་ལ་ཕེབས། བཙན་པོ་ཁྲི་སྲོང་ལྡེའུ་བཙན་གྱི་ཕྱི་མ་ལྷའི་བུ་འོད་མཐའ་ཡས་སུ་སྐྱེས་པས་ན་རིམ་པར་མངའ་
བདག་ཉང་གི་བར་སྐྱེ་བ་བཅུ་གསུམ་ཐལ་ལེར་དྲན། སློབ་མའི་དམ་པ་བལ་ཡུལ་ཡམ་བུ་བ་བྷ་རོ་གཙུག་འཛིན་ཞེས་བྱ་བ་ཞིག་ཡོད་དེ། དེ་ཉིད་བོད་དུ་གསེར་འཚོལ་བའི་ཕྱིར་འོངས་པ་ལ་མཁའ་འགྲོས་ལུང་བསྟན་ཏེ་གུ་རུ་ཉིད་དང་མཇལ། ཞག་བདུན་གྱི་བར་དུ་ཨུ་རྒྱན་དངོས་སུ་མཐོང་། གསུང་ཐོས་པ་ཙམ་གྱིས་རྟོགས་པ་ཤར། ནུབ་གཅིག་དབང་མཛད་པའི་ཚེ་ཁྱོད་ཀྱིས་ང་ཅིར་མཐོང་གསུངས། ཡི་དམ་དངོས་སུ་མཐོང་ཞུས་པས། འོ་ན་ཚོགས་གཏོར་གཞན་ན་འབུལ་ས་མེད་གསུངས་ནས་གནང་བའི་ཤ་བུབས་ཕྱེད་ལ་སོགས་པའི་ཚོགས་རྫས་རྣམས་སྐད་ཅིག་གིས་བཞེས། ཡང་ང་ཅིར་མཐོང་གསུངས། སངས་རྒྱས་དངོས་སུ་གདའ་ལགས་ཞུས་པས། འོ་ན་དབང་བསྐུར་བྱའོ་གསུངས་ནས་མཆོད་རྫས་བསྡུས། དཀྱིལ་འཁོར་བཤིགས། ཤུལ་དུ་བྲོ་བརྡུངས། བླང་དོར་མེད་པའི་སྤྱོད་པ་དང་། རྡོ་རྗེའི་དམ་ཚིག་ཆེན་པོའི་གནས་ལ་སྐྲག་པར་མི་འགྱུར་བའི་ལས་ཅན་གྱི་སློབ་མའི་ཁམས་དང་བསམ་པ་མཁྱེན་ནས་རྡོ་རྗེ་ལུས་ཀྱི་དཀྱིལ་འཁོར་ཆེན་པོ་ནས་རྣམ་པར་སྣང་མཛད་དྲི་ཆེན་ལྷ་སྣམས་ཀྱི་སྒོ་ནས་ཕྱུང་སྟེ་དབང་བསྐུར་བས། བྷ་རོ་ལ་ལུས་སྦྲུལ་ཤུན་དོར་བ་ལྟ་བུའི་ཉམས་ཤར། དེ་བཞིན་དུ་རྡོ་རྗེ་གསང་བའི་མྱུར་ལམ་ནས་དྲི་ཆུ་དོན་ཡོད་གྲུབ་པ་ལྕེ་ཐོག་ཏུ་བླུད་པས་ཟག་མེད་བདེ་བ་ཆེན་པོའི་ཡེ་ཤེས་ཐོད་རྒལ་དུ་འབར། སྙིང་གར་ཕྱག་མཛུབ་བཙུགས་ནས། ང་བྱ་བ་འདི་ངོས་ཟུང་ཞིག་གསུངས་པས་ཡུལ་གྱི་འཛིན་པ་བུན་ལོང་ངེར་ཞིག །ང་མཐོང་དོན་ལ་མ་ཡེངས་ཤིག །དེ་ལ་སྒོམ་རྒྱུ་སྤུ་ཙམ་མེད། །གསུངས་པས་རྫོགས་ཆེན་བྱ་བྲལ་རིས་མེད་ཀྱི་རྟོགས་པ་ལྷག་གེར་ཤར། ངེས་ཤེས་ཁྱད་པར་ཅན་སྐྱེས་ནས་ད་ནི་དུས་གསུམ་སངས་རྒྱས་བྱོན་ཀྱང་དབང་ཞུ་སྙམ་པ་མི་གདའ། རྒྱ་གར་དུ་འགྲོ་བའི་སྤྲོས་པ་ཡང་ཆོད་ཞུས་པས། འཁོར་བར་མི་འཁྱམ་པའི་སངས་རྒྱས་བྱུང་ན་མུ་སྟེགས་པ་ཡིན། ཁྱོད་རྒྱ་གར་དུ་སོང་ལ་བླ་མ་རྙེད་ན་བླ་མ་ཚོལ། སློབ་མ་རྙེད་ན་སློབ་མ་ཚོལ་ཞེས་
གསུངས། ཞལ་ཏ་འདི་དོན་ཤིན་ཏུ་བཟང་པོར་སྣང་། ལར་བལ་པོ་བྷ་རོ་འདི་ལས་སད་པའི་གང་ཟག་དད་པ་ཤིན་ཏུ་ཆེ་བས་གུ་རུའི་སྟ་ཟུར་ལ་ཁྲོ་བོའི་སྤྱན་མངའ་བ་དང་། མཁའ་འགྲོ་དང་ཆོས་བགྲོ་བ་སོགས་སྣང་བ་དག་པ་འབའ་ཞིག་ཏུ་མཐོང་། ལན་ཅིག་མངོན་སྤྱོད་འདི་དག་ལ་རྟགས་ཐོན་པ་མཆིས་སམ་ཞུས་པས། ལག་ལེན་དོན་ཐོག་ཏུ་ཕེབས་ཏེ་མ་ཎི་འདྲེན་ནས་དེ་སྒྲུབ་མ་ཁོམ་གསུངས། དེར་བལ་པོས་སྒྲོལ་བའི་ནུས་པ་སྟོན་པར་ཞུས་པས། རི་བོང་ཞིག་ཉེ་བའི་སར་འགྲོ་བ་ལ། ས་ལ་རི་བོང་གི་གཟུགས་གཅིག་བྲིས། ཁབ་ལ་སྔགས་ལན་བདུན་བགྲངས་ཏེ་གཟུགས་བརྙན་ལ་བཏབ་པས་རི་བོང་ཐུར་ལ་རིལ་ལི་ལི་འདྲིལ། ང་སྒྲིབ་པ་སྦྱང་དགོས་ལོངས་ཤོག་གསུངས་ནས་བཏགས་གྲོལ་བཏགས་ཏེ་ཚོགས་གཏོར་དང་བསྔོ་བས་རྗེས་སུ་བཟུང་། དེ་འདྲ་བ་མི་ལ་བྱུང་ན་འཇིགས་ཞུས་པས། མི་དང་འཕྱི་བ་འདྲ་གསུངས་ནས་འཕྱི་བའི་གཟུགས་བརྙན་ལ་སྔར་བཞིན་མཛད་པས་འཕྱི་ཁུང་ནས་རོ་བྱུང་། བྱས་ན་འདི་འདྲ་བ་འོང་སྟེ་སེམས་ཅན་ལ་གནོད་པས་སུ་ལའང་མི་སྟེར། དགྲ་ལའང་འཚང་རྒྱ་བའི་མཐུ་ལས་གཞན་མི་བྱེད། འདི་པ་དུད་འགྲོར་སོང་བས་གནས་སྤར་བ་ཡིན། གཞན་མི་ལུས་ཐོབ་པ་ནི་ཤིན་ཏུ་དཀའ། སྲོག་བཅད་པའི་སྡིག་པ་ནི་མཐའ་ཡས། གཅིག་ཤི་བས་མི་ཆོག་དེའི་ཉེ་འཁོར་ཐམས་ཅད་སྡུག་བསྔལ་བ་ཡིན། དགྲ་ལའང་མཐུ་མི་བྱེད་ཀྱི་སྟེང་དུ་སླར་ལ་སྙིང་རྗེ་བསྐྱེད་དགོས་པ་ཡིན་གསུངས་ནས་བྱང་ཆུབ་སེམས་དཔའི་སྤྱོད་ཕྱོགས་ལྷག་པར་དང་དུ་བཞེས། རང་དོན་དུ་མཐུ་དང་མངོན་སྤྱོད་མི་མཛད་པའི་དམ་བཅའ་ཤིན་ཏུ་བརྟན་པ་ཡིན་ཏེ། ཐུགས་རྗེ་ཡུལ་ལ་འཇུག་པའི་ཆ་ནས་ངན་སོང་གསུམ་ཡང་ཐུགས་རྗེས་བསྒྲལ། ཞེས་པ་སྟེ་གུ་རུ་ཆེན་པོ་འདིས་མངོན་དུ་མཛད་དེ། ལས་ཀྱི་ལུས་དུག་ལྔའི་ཕུང་པོ་ཅན་དེ་བསད། རྣམ་པར་ཤེས་པ་ཆོས་ཉིད་ཀྱི་ཀློང་དུ་གསོས་ནས་འཁོར་བ་མཐའ་ཅན་དུ་མཛད་པས་
གསད་གསོའི་ནང་ནས་ཀྱང་ངོ་མཚར་ཆེ་བ་གཅིག་ཡིན། བལ་པོ་བྷ་རོ་ལྡོག་ཁར་གསེར་ཞོ་དྲུག་ཅུ་ཐམ་པ་ཕུལ་ནས་རྒྱ་བལ་དུ་ལྡོག་པ་ལ་བར་ཆད་མེད་པའང་ཞུ་བྱས་པས། གསེར་ཕྱེ་དང་བསྲེས་ནས་སྦྱིན་བསྲེག་མཛད། སེར་སྣའི་མདུད་པ་རྩ་བ་ནས་གྲོལ། ལམ་འདི་དཀོན་མཆོག་ཡོད་པར་ཡིད་ཆེས་པར་སྟོན་པའི་མཛད་པ་ངོ་མཚར་ཅན་ཡིན་ཏེ། གཏོང་བ་ལ་གོམས་པ་རྣམས་ཀྱིས་ཀྱང་དཀོན་མཆོག་ལ་དམིགས་ནས་རྫས་དངོས་མེད་དུ་གཏོང་བ་ལ་རྣམ་པའི་ཆ་ནས་ཡིད་གཉིས་ཡོད་པ་ལྟར་མི་སྟོན་ཡང་། དོན་དངོས་པོར་སྣང་བའི་དགེ་བའི་ཕྱོགས་ལ་དགའ་བར་བྱེད་པ་འདི་ཀ་ཅུང་ཟད་བློ་ལ་འཕྲིགས་ཆགས་པ་ཡིན་ནོ། །དེར་བྷ་རོ་ལ་སྦྱིན་སྲེག་གི་ཐལ་བ་འཕངས་སེམས་མ་བྱེད་པར་ཆུ་ལ་སྦྱོང་། ལམ་དུ་ཟས་སྟེར་བ་ཅིག་འོངས། དེ་བདག་གིར་གྱིས་ཤིག་གསུངས་པ་ལྟར་བྱས་པས་བུ་མོ་གཅིག་གིས་ཉུང་མ་ཞིག་བྱིན། དེ་གུ་རུ་ལ་ཕུལ་བས་རས་ཁོབ་ལ་ཚོས་ཤིག་གསུངས། སླར་བྷ་རོ་རྒྱ་གར་དུ་འགྲོ་བ་ལ་སྐྱེལ་ཐུང་མཛད་པས་ཡང་གསེར་ཞོ་གསུམ་ཕུལ། དེར་གུ་རུའི་ཞལ་ནས།མེ་ལ་བསྲེགས་པས་མཁའ་འགྲོ་མཉེས་ན། ཆུ་ལ་གཏོར་ན་དེ་བས་ཀྱང་དགྱེས་མཆི་གསུངས་ནས་གསེར་དེ་ཆུ་ལ་གཏོར། སྲས་ཀྱི་དམ་པར་གྱུར་པ་པདྨ་དབང་ཆེན་དང་། གཉལ་དུ་འཁྲུངས་པའི་ཉི་མ་འོད་ཟེར་སོགས་སྲས་བརྒྱུད་དང་། སྣོད་ལྡན་གྱི་བུ་དགུ་ལ་སོགས་པ་སྨིན་གྲོལ་དུ་མཛད། ཆུ་ཞལ་མགུར་གསུམ་ལ་སོགས་པའི་བླ་ཆེན་དང་མི་ཆེན་མང་པོས་ཞབས་ལ་གཏུགས། གཙོ་བོར་མ་ཎི་འབའ་ཞིག་གིས་ཕྲིན་ལས་མཛད་དེ་བོད་ཡུལ་ཐམས་ཅད་ལ་ཐར་པའི་ས་བོན་རྒྱ་ཆེན་པོ་བཏབ། ཁྱད་པར་ཀཿཐོག་པ་གྲུབ་ཐོབ་མ་ཎི་རིན་ཆེན་ཅེས་བྱ་བ་ལས་ཁམས་སུ་ཐུགས་རྗེ་ཆེན་པོའི་ཕྲིན་ལས་རྒྱ་ཆེར་འཕེལ། བརྒྱ་བྱིན་དང་ཉི་ཟླའི་ལྷའི་བུས་ཀྱང་མཆོད་བསྟོད་བྱས། བོད་ཀྱི་ལྷ་འདྲེ་ཐམས་ཅད་ཀྱིས་བླ་མར་བཀུར་ཞིང་སྙན་གྲགས་ཀྱིས་འཇིག་རྟེན་གཡོགས། འགྲོ་བའི་
བསོད་ནམས་བསོགས་པའི་ཞིང་དུ། ཚོང་འདུས་འགུར་མོའི་ལྷ་ཁང་དང་། བསམ་འགྲུབ་བདེ་བ་ཆེན་པོའི་ལྷ་ཁང་གཉིས་ཀྱང་མཛད། ལ་ཡག་གུ་རུ་ལྷ་ཁང་དུ་གཙོ་བོར་གདན་ས་མཛད། ལྷ་སའི་ཇོ་ཤཱཀ་དང་མཚུངས་པ་ཙམ་གྱི་བྱིན་རླབ་ཅན་དུ་གྲགས་པའི་བསྟན་གཙོའི་སྣང་བརྙན་དང་པོར་འཕགས་པ་ཀླུ་སྒྲུབ་ཀྱིས་རི་བཏང་བཟུང་ནས་སྤྱན་དྲངས། བར་དུ་སློབ་དཔོན་ཆེན་པོས་སྣབ་སྟོད་ས་ཟམ་ཡང་དབེན་ནས་ཕྱུང་སྟེ། ཧ་བོའི་གངས་ལ་རྒྱས་བཏབ་པ་འདི་དགུང་ལོ་ང་བདུན་པ་ས་ཕོ་འབྲུག་གི་ལོར་སྤྱན་དྲངས་ཏེ་འགྲོ་བའི་དོན་དུ་བཞུགས་སུ་གསོལ། མ་འོངས་པ་ན་ཀླུ་ཡུལ་དུ་སྤྱན་འདྲེན་པར་བཤད། དེ་ལྟ་བུའི་ཐུགས་རྗེ་དང་ཕྲིན་ལས་བསམ་གྱིས་མི་ཁྱབ་པས་འགྲོ་བའི་དོན་མཛད་ནས་མཛད་པ་བརྟུལ་བར་ཉེ་བའི་ཚེ། ཁོ་བོ་ཆོས་ཀྱི་དབང་ཕྱུག་ལ། །སེམས་ཅན་རྣམ་རྟོག་ཐ་དད་ཀྱིས། །ལ་ལ་ཆོས་དབང་བདེ་ན་དགའ། །ལ་ལ་ཆོས་དབང་བདེ་ཡིས་དོགས། །ཞེས་དང་། ཆོས་དབང་སེམས་ཉིད་རེ་དོགས་བྲལ། །ཆོས་དབང་སེམས་ལ་ཟུག་རྔུ་མེད། །བདེ་ན་དགའ་ཚོ་དགྱེས་པར་མཛོད། །ཆོས་དབང་ཟུག་རྔུ་སྤང་བ་མེད། །སྡུག་ན་དགའ་ཚོ་དགྱེས་པར་མཛོད། །ཆོས་དབང་སེམས་ལ་སྐྱེ་ཤི་མེད། །ཤི་ཡིས་དོགས་ཚོ་དགྱེས་པར་མཛོད། །ཆོས་དབང་སེམས་ཉིད་ཆོས་དབྱིངས་ཤི། །མ་ཤི་དོགས་ཚོ་དགྱེས་པར་མཛོད། །ཆོས་དབང་སེམས་ཉིད་འཕོ་འགྱུར་མེད། །རྟག་ཏུ་རེ་ཚོ་དགྱེས་པར་མཛོད། །ཆོས་དབང་སེམས་ལ་རང་བཞིན་མེད། །རྟག་གིས་དོགས་ཚོ་དགྱེས་པར་མཛོད། །ཅེས་རེ་དོགས་རྩ་བ་ནས་ཟད་པའི་རྣལ་འབྱོར་གྱི་དབང་པོ་ཆེན་པོར་བཞུགས། རང་གིས་བཞེངས་པའི་ལྷ་ཁང་འབད་པ་དོན་ལྡན་དུ་འགྱུར་བའི་ཕྱིར། ཞབས་ཏོག་དགོས་པར་གདམས་ཤིང་། གཙུག་ལག་ཉམས་རྐྱེན་བུ་ཡིས་བྱས་ཀྱང་ཐོན། །ལྷ་ཁང་ཞབས་ཏོག་སྤྲང་པོས་བྱས་ཀྱང་ཁུར། །ཞེས་དང་། ཀུན་བཟང་བདེ་ཆེན་ཆོས་དབྱིངས་
གཞལ་ཡས་སུ། །སྒྱུ་མའི་སྐྱེས་བུ་ཆོས་དབང་ད་ནི་སྡུད། །ཅི་ཕྱིར་ལུས་འདིའི་གདུལ་བྱ་རྫོགས་རྫོགས་འདྲ། །ལས་ངན་ཟད་པའི་རྟགས་ཀྱང་ལུས་ལ་སྨིན། །རྨི་ལམ་མི་གཟུགས་ཆོས་དབང་ཡལ་ནས་འགྲོ། །དཔོན་སློབ་ཀུན་འདུས་ནོར་བུའི་ཚོགས་མོན་རྨིས། །ང་དང་འདྲེལ་ཚད་བདེ་ཆེན་ཐོབ་པའི་རྟགས། །ཞེས་དང་། བདག་གི་ཤ་རུས་སྲན་ཚད་ཡུངས་འབྲུ་རེ། །ལྟོར་སོང་ཐམས་ཅད་ལམ་འགྲོ་བདེ་ཆེན་བགྲོད། །ཅེས་པ་ལ་སོགས་པའི་ཞལ་གྱི་གདམས་པས་དབུགས་དབྱུངས་ནས་དགུང་ལོ་ང་དགུ་པ་ལ་པདྨ་འོད་ཀྱི་ཕོ་བྲང་ཆེན་པོར་གཤེགས་སོ།། །། ད་ནི་བཀའ་གཏེར་གྱི་བསྟན་པ་ལ་དངོས་སམ་བརྒྱུད་ནས་བཀའ་དྲིན་བསམ་གྱིས་མི་ཁྱབ་ཅིང་། སྤངས་པ་དང་རྟོགས་པའི་ཡོན་ཏན་ཟད་མི་ཤེས་པ་མངའ་རིས་པཎ་ཆེན་རིན་པོ་ཆེ་རྗེས་འབྲང་དང་བཅས་པའི་གཏམ་བརྗོད་པར་བྱ་སྟེ། སྐྱེས་བུ་དམ་པ་འདི་ནི་ཡུལ་མངའ་རིས་གློ་བོ་མ་ཐང་གི་སའི་ཆར། ཡབ་མར་པ་ལོ་ཙཱའི་སྐྱེ་བ་ལྷ་རིགས་གྲུབ་པའི་དབང་པོ་འཇམ་དབྱངས་རིན་ཆེན་རྒྱལ་མཚན་ཅེས་གྲུབ་པའི་དབང་ཕྱུག་ཐང་སྟོང་རྒྱལ་པོ་ལ་སོགས་ཏེ་མཁས་གྲུབ་གྱི་བླ་མ་མང་པོའི་ཞབས་ལ་ཐུག་ཅིང་། བཀའ་གཏེར་གྱི་བསྟན་པ་རྒྱ་མཚོའི་མངའ་བདག་ཏུ་གྱུར་པ་དེ་དང་། ཡུམ་འགྲོ་ལྕམ་ཁྲོམ་པ་རྒྱན་གྱི་སྲས་སུ་མེ་མོ་ལུག་གི་ལོ་ལ་སྐུ་བལྟམས། མཚན་པདྨ་དབང་རྒྱལ་དུ་བཏགས། དགུང་ལོ་བརྒྱད་པ་ལ་རྟེན་དགེ་བསྙེན་དུ་མཛད། ཡབ་ལས་བྱང་ཆུབ་ཏུ་སེམས་བསྐྱེད་པའི་སྡོམ་པས་རྒྱུད་སྦྱངས་ནས། འཇམ་དཔལ་མཚན་བརྗོད། སྒྱུ་འཕྲུལ་ཞི་ཁྲོ། ཡང་དག་མེ་དགུ། སེམས་ཕྱོགས་ལ་སོགས་གསན་པ་རྒྱ་ཆེན་པོ་མཛད། བཅུ་གཅིག་པར་རྩ་རྒྱུད་གསང་སྙིང་། སློབ་དཔོན་སྒེག་པའི་རྡོ་རྗེའི་འགྲེལ་པ། གཡུང་ཊིཀ་ཁ་དམར་ཅན། སུམ་སྟོན་གྱི་ཊི་ཀ་ལ་སོགས་པ་ཕལ་ཆེར་ཞིག་ཟླ་བ་བདུན་གྱིས་ཁོང་དུ་ཆུད། དགོངས་འདུས་ལ་སོགས་པའི་མདོའི་གནས་ཀྱང་བྱང་བར་བྱས། བཅུ་གཉིས་
པའི་ཚེ་མཁས་པ་མང་པོའི་དབུས་སུ་གཞུང་བསྐྱུར་གྱི་བཤད་པ་མཛད། བླ་མ་གསང་འདུས་དང་། སྒྱུ་འཕྲུལ་ཞི་ཁྲོ། རྟ་མགྲིན་ལ་སོགས་པར་བསྙེན་བསྒྲུབ་མཐར་ཕྱིན། ལྷ་མོ་དུད་སོལ་མས་ཞལ་ཡང་ཡང་བསྟན། གྲུབ་མཚན་གྱི་ཐོག་མར་ཤྭ་ལོག་ཆེན་པོ་ཞིག་བྱུང་བ་ལ་ཕུར་པ་གདེངས་པ་ཙམ་གྱིས་ནམ་མཁའ་ལ་ཐོག་སོ་བདུན་ཙམ་འཁྱིལ་ཞིང་བཟློག །དེ་བཞིན་དུ་གཏོར་ཆེན་འཕངས་པའི་ཆོས་སྟེངས་ནས་གྲུ་གང་ཙམ་འཕགས་པ་ཡང་བྱུང་། དམེ་བརྩེགས་ཀྱི་སྒོམ་བཟླས་མཛད་པས་ཨ་ཛི་གྱི་སྒྲ་སྒྲོགས་བཞིན་པར་མཐོང་། དགུང་ལོ་བཅུ་བཞི་ནས་བཀའ་བརྒྱད་དང་མ་གཤིན་ལ་སོགས་པའི་སྒྲུབ་ཕྲིན་མང་དུ་བསླབས་ཤིང་བཟླས་སྒོམ་གྱི་ལ་ཟློས། དེ་ནས་ལོ་བདུན་གྱི་བར་དུ་གཅོད་ཡུལ་དང་རོ་སྙོམས་མཛད། བྱེ་མ་དང་། ཆུ་རྡེལ་མེ་ཏོག་ལ་སོགས་པའི་བཅུད་ལེན་ཁོ་ནས་དཀའ་སྤྱད་ཀྱི་ཕྲང་ལ་བཤར། ཐེམ་སྤངས་ཀྱི་དམ་བཅའ་ལོ་གསུམ། ངག་བཅད་ཀྱི་དམ་བཅའ་ལོ་གསུམ། ཤ་ཁྲག་གི་ཟས་ལ་ཤིན་ཏུ་སྡར་ཞིང་། རྨྱུང་གནས་དང་། གསོ་སྦྱོང་ལ་སོགས་མང་དུ་མཛད་པས་སྤྱན་རས་གཟིགས་ལན་བདུན་དུ་གཟིགས། ལོ་གཅིག་ཏུ་བླ་མ་གསང་འདུས་ཀྱི་གདམས་ངག་ལ་ནན་ཏན་མཛད། སྤྱིར་བླ་མ་མཁས་གྲུབ་མང་པོ་ལས་མདོ་སྔགས་ཆོས་ཀྱི་བདུད་རྩི་ངོམས་པ་མེད་པར་འཐུངས་ཤིང་། ཁྱད་པར་དུ་ཡབ་ལས་མདོ་དབང་དང་། ཕུར་པ། སྒྲུབ་ཆེན་བཀའ་བརྒྱད་ལ་ནན་ཆགས་ཆེན་པོ་མཛད། གྲུབ་པ་བརྙེས་པའི་རྣམ་ཐར་ཡང་། གསུང་ལས། བྲག་དམར་གྱི་མཚོ་ལ་རོ་སྙོམས་བྱས། །སྨིན་ནགས་ཀྱི་ཆུ་ལ་རྡོག་པས་བརྫིས། །ལྷ་ལུང་གི་བྲག་ལ་མཁའ་ལྟར་ལྡིངས། །བ་གམ་ཅན་བྲག་ལ་བྱི་ལྟར་འཛུལ། །མགོ་བོ་ཅན་བྲག་གི་ལོགས་ལ་རྒྱུགས། །གྲོགས་ཤེར་སེང་དང་ཤེར་དཔལ་རྒྱལ་བཟང་གསུམ། །བྱང་རྒྱལ་དང་བླ་མ་རིན་སེང་བ། །སྐྱེས་ཕོ་མོ་འགའ་གྲུབ་ཐོབ་
གྲུབ་ཐོབ་ཟེར། །དེང་གྲུབ་ཐོབ་ཀྱི་གོ་བ་ང་མི་ལེན། །ཆོས་ཉམས་བླངས་ཀྱི་ཉམས་སྣང་ཐོབ་ཙམ་ཡིན། །དོན་འཕོ་འགྱུར་བྲལ་བ་མ་རྟོགས་ན། །ལུས་སྒྱུ་མའི་ཆོ་འཕྲུལ་བྱ་བྱིས་སྟོན། །ཞེས་གྲུབ་རྟགས་ཀྱི་མཐར་ཐུག་རྟོགས་པ་ལ་ངོས་འཛིན། བཅུ་བདུན་གྱི་ལོ་ལ་དམ་བཅའ་བརྒྱད་མཛད་དེ། དགེ་འདུན་ལ་མཐོང་ཕྱག་བྱེད་པ་དང་། ཕ་ཡུལ་དུ་ཞག་བདུན་ལས་མི་བཞུགས་པ་དང་། དབེན་པ་འབའ་ཞིག་ལ་བློ་གཏོད་པ་དང་། རྒྱལ་པོའི་སྒོ་ཁང་ལན་གསུམ་ལས་མི་འགྲིམ་པ་དང་། ཚོང་ཁེ་དང་གྲལ་མགོ་མི་འཛིན་པ་དང་། རོ་ཆོག་དང་དབུ་གཙོ་མི་བྱེད་པ་དང་། འཚོ་བ་བསོད་སྙོམས་ལ་བསྟེན་པ་དང་། བསྒྲུབ་པ་དང་ཐོས་བསམ་འབའ་ཞིག་བྱེད་པ་རྣམས་སོ། །སློབ་དཔོན་ནོར་བསྟན་བཟང་པོ་ལས་ཡང་ཡང་དུ་བསྙེན་ནས་འདུལ་བ་དང་མདོ་སྡེའི་སྐོར་དང་། ཇོ་བོ་བཀའ་གདམས། ནཱ་རོ་མཁས་སྤྱོད་མ་སྙན་བརྒྱུད་བསམ་མི་ཁྱབ་དང་བཅས་པ་ཞུས། སྐྱིད་གྲོང་དུ་འཕགས་པ་ཝ་ཏི་མཇལ་བས་གསུང་བྱོན། སྐུ་ཚེ་སྔ་མའི་སྔོན་གནས་མང་པོ་རྗེས་སུ་དྲན། དགུང་ལོ་བཅུ་དགུ་པར་ཕ་ཡུལ་དུ་ཡིག་དྲུག་གིས་འགྲོ་དོན་མཛད། ཉི་ཤུ་ལ་བྱམས་ཆོས་ལྔ། ཕར་ཕྱིན། ཚད་མ། དབུ་མ་རྩ་ཤེ། བཞི་བརྒྱ་པ་དང་། བསླབ་བཏུས། སྤྱོད་འཇུག་དངོས་བརྒྱད་དོན་བདུན་ཅུ་སོགས་གཞུང་ལུགས་ཆེན་པོ་བརྒྱ་ཕྲག་གཅིག་ཁོང་དུ་ཆུད། ཉེར་གཅིག་པ་ལ་འཇམ་དབྱངས་ཆོས་སྐྱོང་དང་། སྡོམ་བརྩོན་ཚུལ་ཁྲིམས་དཔལ་ལ་སོགས་པར་གཤེད་དམར་ལ་སོགས་པའི་དབང་སྒྲུབ་གདམས་པ་གསན་ཞིང་བསྒྲུབས་པས་ཞག་བདུན་ན་གཤེད་དམར་དངོས་སུ་མཐོང་། ཉི་ཤུ་རྩ་གཉིས་པར་ཡབ་ཀྱི་དྲུང་དུ་སྔ་འགྱུར་བཀའ་གཏེར་ལ་ཞུན་ཐར་ལེགས་པར་བཅད། བཀའ་བརྒྱད་ཀྱི་སྒྲུབ་པ་མཛད་པས་བདུད་རྩི་ཁོལ། མར་མེ་ཆུང་ངུ་ཞིག་གིས་ཞག་གསུམ་ཐུབ། དེའི་ཚེ་ཡབ་ཀྱི་གཟིགས་སྣང་ཉིད་ཀྱི་ཚིགས་སུ་བཅད་པ། བུ་ཁྱོད་ཚེ་ལ་བར་ཆད་མ་བྱུང་ན། །
འཇིག་རྟེན་འདིར་ནི་ཆོས་ཀྱི་འཁོར་ལོས་སྒྱུར། །མདང་སུམ་དཀྱིལ་འཁོར་མཐའ་ལ་ཀུན་བསྐོར་ནས། །བླ་མ་ཟུར་ཆེན་རྔོག་སྟོན་ཆེན་པོ་དང་། །རྗེ་བཙུན་གྲགས་པ་འཕགས་པ་རིན་པོ་ཆེ། །ནམ་མཁའི་སྙིང་པོ་བསོད་ནམས་བླ་མ་དང་། །འགྲོ་མགོན་ཉང་རལ་རས་ཆུང་རྡོར་གྲགས་དང་། །རྒྱལ་སྲས་དབང་ཆེན་གློ་བོ་ཡབ་སྲས་དང་། །ཆག་ལོ་ཆོས་དཔལ་ཁྲོ་ཕུ་ལོ་ཙཱ་དང་། །ནག་ཚོ་ལོ་ཙཱ་ཀུན་མཁྱེན་མུས་སྲད་པ། །མཁས་གྲུབ་བསོད་བཟང་གྲུབ་ཆེན་དམར་ཞབས་དང་། །དམ་པ་སངས་རྒྱས་བཻ་རོ་བི་མ་ལ། །ཨུ་རྒྱན་ཡབ་ཡུམ་རྒྱལ་པོ་ཁྲི་སྲོང་དང་། །མ་གཅིག་ལབ་སྒྲོན་ཞང་ལོ་རས་ཆེན་པ། །ཁམས་པ་སྒ་མོ་རྒྱ་གར་པཎ་ཆེན་རྣམས། །གཅིག་ལ་གཅིག་བལྟ་འཛུམ་ཞིང་བཞད་པ་ལ། །ཀུན་ཀྱང་ང་ནི་པདྨ་དབང་རྒྱལ་ཡིན། །སྨྲ་ཞིང་ཐམས་ཅད་ཁྱོད་ལ་ཐིམ་ནས་སོང་། །ཞེས་པ་ལྟར་ཡིན། ཉེར་གསུམ་པ་ལ་གློ་བོ་ལོ་ཙཱ་བར་ལམ་འབྲས་ཚོགས་བཤད་དང་། སློབ་བཤད་གཉིས། ཉེར་བཞི་པའི་ཚེ་ཡང་ཚར་གཅིག་བསྐྱར། ཉེར་ལྔ་པའི་ཚེ། བསམ་གྲུབ་གླིང་དུ་གློ་བོ་མཁན་ཆེན་བསོད་ནམས་ལྷུན་གྲུབ་ཀྱིས་མཁན་པོ། ཆོས་རྗེ་དཀོན་མཆོག་སྐྱབས་ཀྱིས་སློབ་དཔོན། དེ་བཞིན་དུ་གསང་སྟོན་པ། གྲིབ་ཚོད་པ། གྲོགས་དན་པ། དད་པའི་དགེ་སློང་ཉི་ཤུ་རྩ་ལྔ་དང་བཅས་པའི་དབུས་སུ། བུ་ལུགས་ཀྱི་ལས་ཆོག་གཞིར་བཞག་ལ། ནམ་བསོད་དང་། འཕགས་པ་རིན་པོ་ཆེའི་ལས་ཆོག་གི་བཤད་སྦྱར་དང་བཅས་ཚིག་གསུམ་གྱིས་བསྙེན་པར་རྫོགས་པའི་དངོས་པོར་བསྒྲུབས། མཁན་སློབ་དེ་རྣམས་ལས་ཆོས་ཀྱང་མང་དུ་ཉན། ཉེར་དྲུག་པ་ལ་ཤེལ་གྱི་རི་བོ་འབྲུག་སྒྲ་ལ་སོགས་པའི་དབེན་པར། ཆོས་གོས་གསུམ་དང་། གླེགས་བམ། མཁར་གསིལ། ལྷུང་བཟེད་ལས་གཞན་པའི་ཡོ་བྱད་ཐམས་ཅད་སྤངས་ཏེ་སྒོ་གཅིག་པའི་བརྟུལ་ཞུགས་བཟུང་། སྟོན་པས་བཅས་པའི་གནང་བཀག་
དང་། སྦྱངས་པའི་ཡོན་ཏན་བཅུ་གཉིས་ལ་སྒྲ་ཇི་བཞིན་པར་གནས་པ་ནི་སྐྱེས་བུ་ཆེན་པོ་འདི་དང་ཀོང་པོ་རྒོད་ཚང་པ་སྣ་ཚོགས་རང་གྲོལ་གྱི་རྣམ་པར་ཐར་པ་མཐོང་བའི་ཆོས་ལ་གནས་ངེས་པར་ཤེས། གཞན་དུ་ཡི་ལ་རས་པ་ལ་སོགས་ཏེ་རྟགས་དང་ཆོ་ག་མ་བྱས་པའང་ཇི་སྙེད་ཅིག་ཡོད་སྲིད་ཀྱི་དེ་དག་ལ་བསྟན་པ་ལ་དགའ་བའི་ལྷ་རྣམས་དང་ལྷན་ཅིག་རྗེས་སུ་ཡི་རང་བར་བྱས་སོ། །སླར་ལྗོངས་རྒྱུ་བའི་བརྟུལ་ཞུགས་ཀྱིས་མངའ་རིས་ཀྱི་གནས་རྟེན་རྣམས་ཀྱང་མཇལ། ཐེག་པ་ཆེན་པོའི་བསླབ་པར་བྱ་བའི་གནས་ལས་འདའ་བ་མ་ཡིན་པས་ཆོས་ཀྱི་སྦྱིན་པའང་ཅི་རིགས་སུ་བསྩལ། གློ་བོ་མཁན་ཆེན་ལས། དགྲ་གདོང་། འཇིགས་བྱེད། གཤེད་དམར། གསང་བ་འདུས་པ་ལ་སོགས་པ་མང་དུ་གསན། མཁན་པོ་དེ་དང་། གུ་གེ་པཎ་ཆེན་རྣམ་རྒྱལ་དཔལ་བཟང་། འཇམ་དབྱངས་བློ་གྲོས་དཔལ་མགོན་རྣམས་ལ་སྒྲ་དང་། ཚད་མ། བརྟག་གཉིས་ཀྱི་བཤད་པ། གསང་སྔགས་ཀྱི་དབང་དང་མན་ངག་ཀྱང་མང་དུ་ཉན། སྤུ་ཧྲང་དང་། ཏི་སེ་དང་། ཁོ་ཆར་ལ་སོགས་པའི་གནས་རྟེན་འཁོར་ནས་སླར་གློ་བོར་བྱོན། དྲང་སོ་གཏེར་སྟོན་ཤཱཀྱ་བཟང་པོ་ལས་བྱང་གཏེར་མང་དུ་གསན། མདོར་ན་བདེ་ཀྱེ་གསང་གསུམ། མ་གཤིན་ཕུར་པ། བཀའ་བརྒྱད་གསར་རྙིང་། ཡང་ཕུར་རྟ་གསུམ། རྡོ་རྗེ་གུར། གསང་འདུས་ཡེ་ཤེས་ཞབས་ལུགས། བདེ་མཆོག་ལྷན་སྐྱེས། ལཱུ་ནག་དྲིལ་གསུམ། བོང་ཞལ་ཅན། དཔལ་མགོན་ཞལ་བྲམ། དུས་འཁོར་འགྲེལ་ཆེན། ཕྱག་རྡོར་བརྒྱད་བསྐོར། ཨུ་ཙ་ཡ། རས་ཆུང་སྙན་བརྒྱུད། ཕྱག་ཆེན་སྦྱོར་དྲུག །ཨུ་རྒྱན་བསྙེན་བསྒྲུབ། ཡང་དགོན་པའི་རི་ཆོས། ཉང་གཏེར་ཡོངས་རྫོགས། རྡོ་རྗེ་ཕྲེང་བ་ལ་སོགས་ཏེ་གསར་རྙིང་བཀའ་གཏེར་བསྟན་བཅོས། མན་ངག་གི་ཡི་གེ་རྣམ་པ་ཐམས་ཅད་ལ་དཱ་རི་དྲའི་བརྟུལ་ཞུགས་ཁོ་ནས་ཆོས་སྒུགས་སོགས་ཀྱི་ངལ་བ་དང་དུ་བླངས་
ཏེ། སྐྱེས་རབས་ལས། མེ་ཚོགས་སྤུ་གྲིའི་སོ་ཡང་བརྒལ་ནས་ནི། །འཆི་མཐར་ཐུག་གི་བར་དུ་དམ་ཆོས་བཙལ། །ཞེས་པ་ནི་སྐྱེས་བུ་དམ་པ་འདིས་ཕྱག་ལེན་ལ་བཏབ་པ་ཡིན། གསར་རྙིང་གི་རྒྱུད་སྡེ་ཆེན་པོ་དེ་དག་ལའང་བསྙེན་པ་མ་སོང་བ་མེད་པས། དེང་སྔ་འགྱུར་བ་ཆོས་བཀའ་བརྒྱད་དང་། གསར་མ་པ་རྡོ་རྗེ་ཕྲེང་བ་ཙམ་གྱིས་བསྙེན་པ་རྫོགས་པའང་དཀོན་པའི་དངོས་པོར་གྱུར་ན། འདི་ལྟ་བུ་ཨ་ལ་ལ། དམ་པའི་ཆོས་འཚོལ་ཞིང་བྱ་བཏང་སྒོ་གཅིག་པའི་བརྟུལ་ཞུགས་ཀྱིས་བལ་ཡུལ་ཤིང་ཀུན། བྱ་རུང་ཁ་ཤོར། བལ་པོ་ཕམ་མཐིང་། ཡམ་བུའི་ཚལ། ཡང་ལེ་ཤོད་ལ་སོགས་པ་ཐམས་ཅད་དུ་གཤེགས་ཤིང་དེ་དག་ཏུ་བལ་བོད་ཀྱི་བླ་མ་མང་པོ་བསྙེན། གནས་འདྲེལ་དང་ཐུགས་དམ་འབའ་ཞིག་མཛད། དག་པའི་སྣང་བ་མཐའ་ཀླས་པར་ཤར། ཡི་དམ་དང་ཆོས་སྐྱོང་མང་པོའི་ཞལ་གཟིགས། མཁའ་འགྲོ་མས་སློབ་དཔོན་ཨ་བྷྱཱ་ཀ་རའི་སྐྱེ་བར་ལུང་བསྟན། ལོ་ཆེན་དཀོན་མཆོག་སྐྱབས་ཀྱིས་རྡོ་རྗེ་ཕྲེང་བའི་དབང་ལ་དོགས་ཆ་མཛད་པས། མཚན་ལམ་ན་འཁོར་ལོ་སྡོམ་པའི་དཀྱིལ་འཁོར་གྱི་གཙོ་བོ་པཎ་ཆེན་པདྨ་དབང་རྒྱལ་གྱིས་མཛད་ཅིང་འདུག་པའི་སྒོ་དྲུང་ནས་མཁའ་འགྲོ་མས་ཁོང་བཀག་ནས་མ་བཏང་བས་སླར་འགྱོད་དེ་གནང་། ཞར་ལ་ལམ་འབྲས་གསར་མའང་ཐོབ། སོ་བརྒྱད་པ་ནས་གསར་རྙིང་རིས་མེད་པའི་ཆོས་ཀྱི་འཁོར་ལོ་རྒྱ་ཆེན་པོ་བསྐོར། དེ་ནས་དབུས་གཙང་གི་ཕྱོགས་ལ་གསར་རྙིང་གི་ཆོས་རྒྱུན་ཉམས་པ་དག་གསོ་བའི་ཐུགས་བསྐྱེད་བླ་ན་མེད་པས། ཡབ་དང་གློ་བོའི་སྡེ་བདག་ཀུན་ལ་གནང་བ་ཞུས། རིམ་བཞིན་ཟང་ཟང་བྲག །བཀྲ་བཟང་། བྱང་ངམ་རིང་རྣམས་བརྒྱུད་དེ་བྱོན། བདེ་གྲོལ་དུ་མེས་སྟོན་ནམ་མཁའ་རྒྱལ་མཚན་དང་། སྔགས་འཆང་ཤཱཀྱ་བཟང་པོ་གཉིས་མཇལ། དེ་ནས་གཅུང་ལེགས་ལྡན་ཀྱང་ལྷན་ཅིག་པས་དབུས་ལ་བྱོན། ཆོས་ཚིགས་སྤྲུལ་པའི་རྡོ་རྗེ་གདན་ལྷ་སའི་གཙུག་
ལག་ཁང་ཇོ་ཤཱཀ་རྣམས་ཀྱིས་གཙོས་པའི་རྟེན་བརྟེན་པ་རྣམས་མཇལ། རྔོག་ཆོས་དང་ཞི་བྱེད་ལ་ཐུགས་འདུན་དྲག་པོ་ཡོད་པས་རྗེ་བཙུན་མ་དང་། དཔལ་ལྷའི་སྤྲུལ་པས་བསྐོར་ལམ་དུ་འགྲོགས་ནས་ལུང་བསྟན། གུང་ཐང་དུ་ཕྱག་མཆོད་མཛད། གཞུང་སྤྲེ་ཞིང་དུ་རྔོག་བསོད་ནམས་བསྟན་འཛིན་ལས་རྔོག་དཀྱིལ་རྣམས་ལེགས་པར་ནོད། གྲོ་ཐང་དུ་ཞ་ལུ་ལོ་ཆེན་ཆོས་སྐྱོང་བཟང་པོ་ལས་གཤེད་དམར་སྐོར་སོགས་གསན། བསམ་ཡས་སུ་བྱོན་པས་སྔོན་བཙན་པོ་ཁྲི་སྲོང་ལྡེའུ་བཙན་དུ་གྱུར་པའི་བག་ཆགས་དུ་མ་སད། བར་ཁང་དུ་བདེ་གཤེགས་འདུས་པའི་དཀྱིལ་འཁོར་བཞེངས་ནས་སྒྲུབ་མཆོད་དང་སྨོན་ལམ་མཛད། ལྷོ་བྲག་གུ་རུ་བ་སོགས་ལ་ཆོས་ཀྱི་བདུད་རྩི་མང་དུ་བཀྱེ། ཀཿཐོག་པ་ཆོས་རྗེ་བསོད་ནམས་རྒྱལ་མཚན་སོགས་བཤེས་གཉེན་མང་དག་དང་ཆོས་སྐྱེས་འབུལ་རེས་མཛད། ཕྲེང་པོ་ཨུ་རྒྱན་ཆོས་རྫོང་དུ་ཀོང་ཆེན་ནམ་མཁའ་དཔལ་ལྡན་ལས་བླ་མ་དགོངས་འདུས་གསན། ཡང་རྫོང་དང་མཆིམས་ཕུར་ཐུགས་དམ་མཛད་པས་རྩ་བ་གསུམ་གྱི་ལྷ་ཚོགས་མང་པོའི་ཞལ་གཟིགས། ཆོས་དབང་གི་གདུང་རབས་བརྒྱད་པས་ལྷོ་བྲག་ཏུ་སྤྱན་དྲངས་ནས། མཁར་ཆུ། བསམ་འགྲུབ་བདེ་ཆེན། ལྷ་བྲོ་དང་། སྨྲ་བོ་ཅོག །གྲོ་བོ་ལུང་ལ་སོགས་པར་བྱོན། མངའ་བདག་ཉང་ལ་ཨུ་རྒྱན་ཆེན་པོས་ལུང་བསྟན་པ་བཞིན། པཎ་ཆེན་འདིས་ཆོས་བརྒྱུད་ཉམས་པ་གསོ་བར་གསུངས་པའི་བདེན་པའི་རྔ་བོ་ཆེ་སྒྲོག་པའི་དུས་ལ་བབས་ཏེ། ཉང་གི་གདུང་སྒར་ཟུར་པ་རང་ལུགས་ཀྱི་བཤད་ཉན་རྒྱ་ཆེན་པོ་མཛད། སྡིག་ཅན་འགའ་ཞིག་ལ་གནས་སྤོར་མཛད་པས་འཇའ་འོད་ཀྱིས་བར་སྣང་བཀང་། ཞ་སྟོད་དང་བཙན་ཁྲོ་སོགས་སུ་བསྒྲུབ་ཆེན་བདེ་གཤེགས་འདུས་པའི་སྨན་བསྒྲུབ་དང་སྐྱེ་བདུན་གྱིས་འགྲོ་དོན་མཛད། སྤྱིར་སྐྱེས་བུ་ཆེན་པོ་འདི་ཆོས་ལ་གནས་འཇོག་ཤིན་ཏུ་ཆེ་ཞིང་ཁྱད་པར་སྔོན་གྱི་སྨོན་ལམ་ལས་བདེ་གཤེགས་འདུས་པ་ལ་དོན་གཉེར་ཆེན་པོ་དང་
ལྡན་པས་རང་གི་ཡབ་རྗེ་ལ་སོགས་པར་བཀའ་བརྒྱད་བདེ་འདུས་ཚར་ཉི་ཤུ་རྩ་ལྔ་གསན་པའི་ཕྱི་མ་ཁུངས་བཙུན་ཞིང་ཡིད་རྟོན་པར་ནུས་པ་དེ་ལྷོ་བྲག་དགོན་དཀར་ཞེས་པ་འདིར་རི་བྲག་ལ་ཐོགས་པ་མེད་པའི་རྗེ་རིགས་ནམ་མཁའི་རྣལ་འབྱོར་ལས་རྙེད་པས་གསན་ཡིག་ཏུའང་བསྔགས་པ་ཆེན་པོ་མཛད་ཅིང་། དགོངས་པ་མཐར་ཐུག་པ་རྫོགས་པའི་ཐ་ཚིག་ཀྱང་གསལ། སླར་ཞེ་དྲུག་པར་བསམ་ཡས་སུ་བྱོན་ནས་བཀའ་འདུས་ཕྱི་མ་རིག་འཛིན་ཡོངས་འདུས་ཀྱི་ཆོས་སྐོར་རྣམས་རྣམ་སྣང་གསང་སྒྲོམ་ནས་སྤྱན་དྲངས། སྙེ་མོར་དགོངས་འདུས་ཀྱི་སྒྲུབ་ཆེན་བཙུགས། ཕུང་པོ་རི་བོ་ཆེར་བདེ་འདུས་ལ་འཆད་ཉན་མཛད། ངོར་དང་གསེར་མདོག་ཅན་དུ་དགེ་ཚུལ་སློང་གི་ལས་ཆོག་མང་དུ་མཛད། གཞན་ཡང་ཆོས་འཆད་ཉན་ལ་སོགས་པའི་འགྲོ་ཕན་རྒྱ་ཆེན་པོ་མཛད་དེ་ཆུ་བོ་རི་བརྒྱུད་བྲག་རྡོ་རྗེ་ཞེས་པ་འདིར་ཞག་གཅིག་གདན་ཆགས་པས་སྐུ་ཚེའི་རྟེན་འདྲེལ་འགྲིགས། བྲག་ཆེན་ཕུར་པ་ཞེས་པའི་དཔྱད་ལས་བསྐྱེད་རྫོགས་ཀྱི་བསྟན་པ་ཟིན་པའི་བརྡའ་དོན་དགོངས་པ་བཞིན། སླར་ཕྲེང་པོ་པ་དར་ཞིང་རྒྱས་པའི་ཚེ་ཀུན་གཟིགས་ཕྲེང་པོ་གཏེར་ཆེན་ཤེས་རབ་འོད་ཟེར་ཏི་ཤྲཱིར་བཀུར་ནས་གནས་འདིར་ཡུན་རིང་པོར་དགོན་པ་བཅས་ནས་གཏན་ཆགས། གསུང་རབ་མང་པོའི་སྦྱར་བྱང་དུའང་ཐུབ་བསྟན་རྡོ་རྗེ་བྲག་ཏུ་སྦྱར་བའོ་ཞེས་མིང་གི་མངའ་གསོལ། དེ་ནས་པཎ་ཆེན་རིན་པོ་ཆེ་ཉིད་ཕལ་ཆེར་བསམ་ཡས་བུ་ཚལ་དུ་གཏན་ཆགས། བྱམས་པ་གླིང ་དུ་ཐུ་བཙུན་བསོད་ནམས་རྣམ་རྒྱལ་ལས་སངས་རྒྱས་མཉམ་སྦྱོར་གསན་ཅིང་། ཕར་ཟབ་ཆོས་མཁའ་འགྲོ་སྙིང་ཏིག་གི་དབང་ཁྲིད་མ་ལུས་པ་ཕུལ་ནས་ཐུགས་ཡིད་གཅིག་ཏུ་འདྲེས། འོན་སྨོན་ཐང་དུའང་སྐུ་མཆེད་ལྷན་ཅིག་པས་ཡུན་རིང་བར་བཞུགས། གཅུང་རིག་འཛིན་ལེགས་ལྡན་པ་དེ་ལུགས་གཉིས་ཀའི་ཕོ་སྒོ་ཡངས་པས་འབྲི་གུང་པ་རིན་ཆེན་ཕུན་ཚོགས་བསམ་ཡས་སུ་གདན་དྲངས་ནས་དཔོན་སློབ་གསུམ་ཀ་
བསམ་ཡས་ཀྱི་རབ་གནས་བསྐྱར་ཏེ་བོད་ཁམས་ཡུན་དུ་བདེ་བའི་རྟེན་འདྲེལ་བསྒྲིགས། འདི་ནས་བཟུང་ཆོས་རྒྱལ་རིན་ཆེན་ཕུན་ཚོགས་ཀྱང་སྲས་ཀྱི་དམ་པར་གྱུར་པས་རྒྱལ་དབང་པདྨའི་རིང་ལུགས་ལ་རྟེན་འདྲེལ་ཆེན་པོར་གྱུར། སྤྱིར་སྐྱེས་བུ་འདི་ཉིད་ནི་གནས་ལྔ་རིག་པའི་པཎྜི་ཏ་ཆེན་པོ། མདོ་སྔགས་གསར་རྙིང་རིས་མེད་པའི་བསྟན་པ་ཡོངས་རྫོགས་ཀྱི་དགེ་བའི་གཤེས་གཉེན་ཆེན་པོ། བཞོན་པ་དང་འཇོལ་བེར་ལ་སོགས་པའི་ཆོས་བརྒྱད་ཡོངས་སུ་སྤངས་པས་ཤཱཀྱ་ཐུབ་པའི་རྗེས་ཞུགས་བསོད་སྙོམས་པ་ཆེན་པོ། ཞེན་ལོག་དང་དཀའ་སྤྱད་ཁུར་དུ་བཟོད་པས་བྱ་བཏང་རྣལ་འབྱོར་གྱི་དབང་པོ་ཆེན་པོ། རིག་པ་དང་གྲོལ་བའི་སྤོབས་པ་བསམ་གྱིས་མི་ཁྱབ་པས་བྱང་ཆུབ་སེམས་དཔའི་དགེ་འདུན་ཆེན་པོ་དེས་དངོས་ཀྱི་ལམ་ནས་བསྟན་པ་དང་སེམས་ཅན་གྱི་དོན་བླ་ན་མེད་པ་མཛད། སྔ་འགྱུར་རྒྱུད་འབུམ་རིན་པོ་ཆེའི་སྐོར་ཚོ་འབྱེད་པའང་རྣམ་དཔྱོད་འདི་ཁོ་ན་ཆེ་ཞིང་། ལུང་གི་རྒྱུན་ལའང་བཀའ་དྲིན་བསམ་གྱིས་མི་ཁྱབ། ཚིག་ཉུང་ལ་དོན་ཤིན་ཏུ་མང་བ་སྡོམ་པ་གསུམ་གྱི་རྣམ་པར་ངེས་པའི་བསྟན་བཅོས་ལ་སོགས་ཏེ། རྣམ་གྲངས་མཐའ་ཡས་དག་གིས་བརྒྱུད་ནས་བསྟན་འགྲོའི་དོན་བླ་ན་མཐོ་བའི་ཆོ་ག་མཛད་དེ་འོན་སྨོན་ཐང་ནས་ཟངས་མདོག་དཔལ་གྱི་རི་བོར་གཤེགས་སོ།། །། ད་ནི་སློབ་དཔོན་བཻ་རོ་ཙ་ན་སླར་ཡང་རིགས་གྲོལ་གྱི་སྤྲུལ་པའི་སྒྱུ་འཕྲུལ་ལ་ཆགས་པ་ཀུན་མཁྱེན་ཤེས་རབ་འོད་ཟེར་གྱི་གཏམ་བཤད་པར་བྱ་སྟེ། བདག་ཉིད་ཆེན་པོ་འདི་ནི་བྱང་ངམ་ཆེན་གྱི་སའི་ཆར་ཁྲི་བསམ་གཉིས་ཀྱི་ཆོ་འབྲང་ལས་ས་ཕོ་སྟག་ལོ་ཆུ་སྟོད་ཟླ་བའི་ཚེས་བཅུར་མངལ་གྱི་པདྨོ་ལས་གྲོལ། ལྷུམས་སུ་ཞུགས་པའི་ཚེ་སྐྱེས་བུ་ཤེལ་གྱི་ཁ་དོག་ཅན་རིན་པོ་ཆེའི་དོ་ཤལ་དང་ལྡན་པ་ཞིག་གིས་ཤེལ་བུམ་བདུད་རྩིས་གང་བ་ཡུམ་གྱི་སྤྱི་བོ་ནས་བསྡིམས་པ་རྨིས། ཚེས་བཅུ་བྱུང་རེས་སྦྲ་ཁྱིམ་ལ་འཇའ་ཟུག་པ་དང་། དྲི་ཞིམ་པོའི་ངད་པ་རྒྱུན་དུ་བྱུང་། གཞོན་ནུ་རོལ་རྩེད་ཀྱི་ཚེ་ནའང་། བཅོས་
མིན་གྱི་ངེས་འབྱུང་དང་། དད་པའི་སྣང་བ་རྒྱ་ཆེན་པོ། མྱུར་ལ་ཟབ་བའི་ཤེས་རབ་ལ་སོགས་ཏེ་བྱང་ཆུབ་སེམས་དཔའི་ངང་ཚུལ་གྱིས་ལྷག་པར་ཕྱུག་པ་ཞིག་སྟེ། འཇམ་པའི་དབྱངས་དང་། གཤེད་དམར་དང་། གཉན་མགོན་རྣམས་ཀྱིས་ཞལ་བསྟན་པ་བྱུང་བ་འབྲི་གུང་པས་གཡག་སྡེ་པཎ་ཆེན་གྱི་བག་ཆགས་སུ་ངོས་འཛིན་མཛད། ཁྱད་པར་དུ་རིན་ཆེན་ཕུན་ཚོགས་ཆོས་ཀྱི་རྒྱལ་པོ་ཇི་ལྟ་བ་ཞིག་གི་ཞལ་ནས། ཁྱོད་ཀྱི་སྙིང་ག་ན་ཨ་ཞིག་ཡོད་པ་ད་ལྟ་སྟོན་མ་རན་ཞེས་ཕྱག་མཛུབ་བཙུགས་པས་བརྗོད་མི་ཤེས་པའི་ཉམས་ཤར། རྗེས་སུ་སྐུའི་བཀོད་པ་དེ་ཁོ་ནར་སྣང་ཞེས་གསུང་། རུ་སྐོར་དེ་ལ་ཧོར་གྱིས་བརྒྱབ་དུས་བུ་ཆུང་འཕྲོག་པར་བརྩམས་ཏེ་ཞགས་པས་བཏབ་པ་ན་ལྷག་པའི་ལྷས་སྒྲིབ་པར་གཟིགས་ཏེ་བྲོས་པས་ཐར། དེ་ནས་གྲོག་གི་ཕུར་བཞུགས། བྱིས་པའི་དབུས་ན་ཆོས་གསུང་བ་དང་། མདོ་རྒྱུད་ཀྱི་ཚིག་ཚོན་པོ་ཅལ་ཅོལ་དུ་འདོན་པ་དང་། ལྷག་པར་གཞོན་ནུ་ཤེད་མ་བྱེ་བ་དེས་ཆུ་བན་གང་རྒྱ་ཅན་ཁ་ཁྱེར་ནས་བཟུང་སྟེ་ཇ་ཁང་དུ་བསྐྱལ་བ་དང་། རྒན་པ་དག་གིས་སྒོ་བཅད་ནས་ཕྱིར་ཐོན་པ་ན། སྒོ་མ་ཕྱེ་བར་ཐལ་བྱུང་དུ་ཕྱིར་ཐོན་པ་སོགས་བྱུང་། ཁྱད་པར་ཐེག་པ་ཆེན་པོའི་རིགས་སད་པས་སེམས་ཅན་ཉམ་ཆུང་བ་དག་ལ་བཟོད་དུ་མེད་པའི་སྙིང་རྗེ་དང་། ཞང་པོས་འཐོབ་པའི་གལ་ལ་ཅི་མི་སྙམ་པས་ཀ་ཅ་སྟེར་བ་སོགས་ཕལ་བའི་ཀུན་ཏུ་སྤྱོད་པ་ལས་རྒྱང་རིང་། དགུང་ལོ་བརྒྱད་པའི་ཚེ་ཨེ་ཝཾ་གླིང་སྨད་དང་ཉིན་སྡིངས་གཉིས་ཀའི་སློབ་དཔོན་བརྟན་མཁས་ཀྱི་ཡོན་ཏན་རྫོགས་པ་ཚུལ་ཁྲིམས་འོད་ཟེར་བ་ལས་དགེ་བསྙེན་དུ་མཛད། མཆོད་གྲལ་གྱི་ལྷ་ཕལ་ཆེར་ངོས་འཛིན་མཛད་པས་འདི་ཤེས་རབ་ཐོད་རྒལ་བ་ཞིག་བྱུང་ཞེས་མཚན་ཤེས་རབ་འོད་ཟེར་དུ་བཏགས། གསེར་མདོག་ཅན་པའི་སློབ་མའི་མཆོག་པཎ་ཆེན་རྡོར་རྒྱལ་བ་ལས་རབ་ཏུ་བྱུང་། དེ་ནས་ཀློག་པ་ཐོས་བསམ་གྱི་གྲར་ཞུགས་ནས། དགའ་
ལྡན་ཁྲི་པ་ཞལ་སྔ་ནས་བསྟན་དར་ལ་ཟབ་མོ་ལྟ་བ་དང་། རྒྱ་ཆེན་སྤྱོད་པའི་སེམས་བསྐྱེད་ལུགས་སྲོལ་གཉིས་བསླབ་བཏུས། སྤྱོད་འཇུག །མདོ་སྡེ་ཀུན་ལས་བཏུས། བྱང་ས། སྡོམ་པ་ཉི་ཤུ་པ། ཀླུ་སྒྲུབ་ལུགས་ཀྱི་དོན་དམ་སེམས་བསྐྱེད་སོགས་ཉན་ཞིང་ཀླུ་སྒྲུབ་ཀྱི་གཞུང་ལ་ནན་ཏན་ངོས། མཚན་ཉིད་ཀྱི་གཞུང་ལ་ལོ་དྲུག་གི་བར་དུ་ཉིན་མཚན་མེད་པར་སྦྱངས། སློབ་དཔོན་གཉིས་པོ་ལས། བྱམས་ཆོས་ལྔ། ས་སྡེ་ལྔ་སྡོམ་རྣམ་གཉིས། དབུ་མ་རིག་ཚོགས། གཏམ་ཚོགས་བསྟོད་ཚོགས། བྱང་ཆུབ་སེམས་འགྲེལ། རིམ་ལྔ་རྣམས་དང་། དགེ་ལྡན་པའི་མདོའི་ལམ་རིམ་གཉིས། སྔགས་རིམ་ཆེན་མོ་ལ་སོགས་ཏེ་རྒྱ་བོད་ཀྱི་གཞུང་འགྲེལ་མང་དུ་ཉན། ལམ་གྱི་འགྲོས་ལ་གོ་དོན་ཕུན་སུམ་ཚོགས་པ་སྐྱེས་ཀྱང་འཁོར་བའི་ས་བོན་དྲུངས་ནས་འབྱིན་པ་ལྟ་བ་རྣམ་པར་དག་པ་ཁོ་ན་ཡིན། དེ་ལ་དགག་བཞག་གི་འདོད་པ་མང་པོས་ངོ་བོ་མ་འཁྲུལ་པ་གང་ཡིན་ཤེས་དཀའ། སངས་རྒྱས་ཀྱི་ལྟ་བ་ཟབ་མོ་སྟོན་པ་ལ་ཀླུ་སྒྲུབ་ལུང་བསྟན། དེའི་དགོངས་འགྲེལ་ཚད་མ་ཟླ་བ་གྲགས་པ་ཡིན། དེས་ཀྱང་སངས་རྒྱས་བསྐྱངས་ལ་བརྟེན་ནས་རྟོགས་པ་ཡིན་པས་འགྲེལ་པ་བུཌྜྷ་པཱ་ལི་ཏ་ལ་བསླབ་གཉེར་གཏིང་ཐུག་པ་ཞིག་བྱས་པས། དེང་སང་ལྟ་བའི་གནས་ཚུལ་གླེང་བ་རྣམས་ལ་ཁོ་བོ་མགུ་པོ་རང་མི་འོང་ཞེས་གསུངས། ས་དགེ་གཉིས་ཅར་ལ་མཁས་པའི་སློབ་དཔོན་གཅིག་ཡོད་པ་ལས་ལུགས་གཉིས་ཀའི་སྦྱངས་པ་མཐར་སོན། ཁྱད་པར་གསང་བ་འདུས་པ་ལ་བཙོང་ཁ་པ་ཆེན་པོའི་ཡིག་ཆའི་སྟེང་ནས་དགོངས་པ་ཇི་བཞིན་དུ་ལོངས། རྡོར་རྒྱལ་བ་ལ་དགྱེས་རྡོར་ལྷ་དགུ། ལམ་འབྲས་ལུགས་ལྔ། རྣམ་འགྲེལ་བཅུ་གཅིག་དང་བཅས་པ། གུར་བརྟག་སམ་གསུམ་ལུང་ཊི་ཀ་བཤད་པ་དང་བཅས་པ། དུས་འཁོར་ཡོངས་རྫོགས། ལམ་རིམ་པ་གཉིས་ཀྱི་ཁྲིད། བླ་མ་དམ་པའི་ཊི་ཀའི་སྟེང་ནས་གཟབས་
བཤད་རྣམས་དོགས་པའི་མཐའ་དཔྱད་ནས་ཉན་པས། སློབ་དཔོན་དེས། དགེ་བཤེས་ཤེས་རབ་འོད་ཟེར་འདིས་ཆོས་ཀྱི་གནད་ལ་བཀར་ནས་དྲི་ཤེས་པར་འདུག་ཅེས་འཆད་པ་ལ་བསྙེངས་པ་བྲལ་བ་དག་བློ་གྲོས་ལ་གྲིམ་ཆ་སྟེར་དགོས་པ་བྱུང་། རིན་པོ་ཆེ་རྡོར་རྒྱལ་བ་དེ་ལས་སྤྱིར་མདོ་སྔགས་ཀྱི་གཞུང་འགྲེལ་ད་ལྟ་འཆད་ཉན་ཡོད་པ་མཐའ་དག །དེ་བཞིན་དུ་གསེར་མདོག་ཅན་པ་དང་། ས་སྐྱ་བཀའ་འབུམ་ཡོངས་རྫོགས་མཉན་ནས། ཟིན་ཐུན་བསྐྱར་བའང་མཛད། ལྷག་པར་གསེར་མདོག་ཅན་པའི་ཡིག་ཆ་ལ་མཆོག་ཏུ་འདྲིས་ཤིང་གྲུབ་མཐའ་ང་འཛིན། སྐྱེས་བུ་དམ་པ་འདི་གཡག་སྡེ་པཎ་ཆེན་གྱི་དེ་མ་ཐག་པའི་སྐྱེ་བ་ཡིན་པས་སྐུ་གཞོན་ནུ་ནས་གསལ་སྣང་ཤིན་ཏུ་ཆེ་ཞིང་ཁྱད་པར་པཎ་ཆེན་དེ་ལ་སློབ་དཔོན་ཆེན་པོས་སེང་གདོང་མའི་གདམས་པ་པུ་ཏིར་ལོངས་པ་ཞིག་བསྩལ་བ་རང་ཉམས་སུ་བསྟར། གཞན་བློར་མ་འཆུན་དོགས་ནས་མྱ་ངན་ལས་འདའ་ཁར་ཨེ་ཝཾ་རྡོ་སྤྱིལ་དུ་རྒྱས་བཏབ་པ་དུས་འདིར་ཕྱག་ཏུ་སོན་མོད། འབྲུག་པ་རིན་པོ་ཆེ་པདྨ་དཀར་པོའང་གསལ་སྣང་ཞིག་ལ་ཐེ་ཚོམ་སྐྱེས་པས། ཕྱིས་ཆད། དེ་ནི་ཨ་ཁུ་མཚན་ཉིད་པའི་ཁྲོད་དུ་ཕྱིན་པས་ལན་པར་འདུག་ཅེས་གསུངས་པ་བཞིན་རྟེན་འདྲེལ་གཞན་དབང་དུ་སོང་། གྲྭ་ས་དེ་དང་ཐལ་འགྱུར་གྱི་མགྲིན་རྔ་ལྡིར་བའི་རིགས་གྲྭ་གང་དང་གང་དུ་རྩོད་པའི་གཡུལ་ངོ་ལ་ལྷགས་པས་བློ་གྲོས་བསམ་གྱིས་མི་ཁྱབ་པར་སོང་སྟེ། བོད་འགྲེལ་རྣམས་ཀྱང་རྒྱ་ཡན་དུ་བཞག །རྒྱན་དྲུག་མཆོག་གཉིས་ཀྱི་གཞུང་འགྲེལ་ཁོ་ན་ལ་བརྟེན་ནས། བརྒལ་བ་དང་། བརྟག་པ་དང་། རིགས་པ་གསུམ་གྱི་ལྷའི་རྔ་ཆེན་པོ་ཀུན་ནས་ཀུན་ཏུ་ཡོངས་སུ་བརྡུངས་པས། གླིང་སྨད་སློབ་དཔོན་ན་རེ། ཁྱེད་སློབ་གསར་བ་ལྟ་བུ་ཡིན་ཀྱང་འདི་ལྟ་བུའི་རྣལ་དཔྱོད་ཁམ་ཆེ། ཀུན་མཁྱེན་རོང་པོ་ལ་བོ་དོང་པའི་དགེ་བཤེས་གཅིག་གིས། ཅི་མཁྱེན་ཞུས་པས། ཁོ་
བོས་ཕར་ཕྱིན་ཤེས་གསུངས། འོ་ན་འདུལ་བ་ལ་ཨེ་གནང་ཞུས་པས། དེ་ལོས་ཤེས་ཕར་ཕྱིན་གྱི་སྤྱོད་པ་ཡིན་གསུངས། ཡང་དབུ་ཚད་ལ་དྲིས་པས། དེ་བཞིན་དུ་དབུ་མ་ལ་ལྟ་བ་དང་། ཚད་མ་ལ་རིག་ལམ་ཡིན་གསུངས་པ་ལྟར། ཁྱེད་ཀྱིས་དབུ་ཕར་ལ་བརྟེན་ནས་བསྟན་པའི་སྒྲོམ་འཚོལ་ལུགས། དེ་ལས་རིག་ལམ་གྱི་གྲུབ་མཐའ་འཆའ་ལུགས་ལ་དཔགས་ན། དགེ་བཤེས་ཟེར་ན་འདི་ལ་ཟེར་ཞེས་ཚོགས་པའི་ཁྲོད་རང་དུ་བསྔགས་པ་བརྗོད་པས་དེ་ཕྱིན་ནས་དགེ་བཤེས་ཤེས་རབ་འོད་ཟེར་ཞེས་གྲགས། རྟོག་གེའི་རིག་པ་ལ་ཚེར་མ་ལྟ་བུའི་བློ་གྲོས་མངའ་ཡང་། འདི་ལྟར་སྐྱེས་བུ་མཆོག་ཏུ་གྱུར་པ་རྣམས་ནི་དེ་ཙམ་ལ་བརྟེན་ནས་གྲགས་པ་དང་། རྙེད་པ་བསྒྲུབ་པའི་སྟ་གོན་རྩོམ་པ་མ་ཡིན་པས། སྐྱོ་ཤས་དང་ངེས་འབྱུང་དྲག་པོས་རྒྱུད་བརླན་ནས་སྒྲུབ་པ་ནན་ཏན་གྱི་འཁོར་ལོ་ཡིད་ལ་སེམས་ཤིང་། དེའི་ངང་ཚུལ་སློབ་དཔོན་ཞི་བ་ལྷ་དང་ཇོ་བོ་རྗེའི་རྣམ་ཐར་ལ་སྙིང་ཐག་པ་ནས་སྨོན་ཅིང་དད་པའི་སྐབས་ཤིག་ན། འབྲི་གུང་པ་རིན་ཆེན་ཕུན་ཚོགས་ལྷོ་རྒྱུད་ལ་ཐེགས་པའི་ཨེ་ཝཾ་དང་ཧ་ཅང་མི་རིང་པའི་ས་ཐད་སྐྱར་སྒར་ཕབ་པ་གཟིགས་སུ་བྱོན་པས། སླར་གྲྭ་ཚང་སུམ་བརྒྱ་ཙམ་ལ་སྤྱི་ཆོས་སུ་སྤྱོད་འཇུག་གསུང་བ་དང་ཐུག །ཤེར་ལེའི། དོན་དམ་བློ་ཡིས་སྤྱོད་ཡུལ་མིན། །ཞེས་པ་ནས་ཤ་ལོ་ཀ་གསུམ་ལ་ཇོ་འགྲེལ་གཙོ་བོར་བཏོན། འགྲེལ་པ་གྲགས་ཆེ་བ་ཁ་ཡར་ན་ཡམས་སུ་བྱས། རིག་ལམ་གྱི་སྦྱོར་བས་ཀྱང་བརྒྱན། བཀའ་རྒྱུད་པའི་ཉམས་ལེན་དང་ཡང་བསྟུན་ཀྱིན་བཤད་པ་ཡམ་པ་གཅིག་གསུང་བ་མཐོང་བས། རྗེ་བཙུན་དམ་པ་འདིའི་ཐུགས་རྗེའི་ཆོམ་རྐུན་གྱིས་སྙིང་ལ་བཏབ། ཟང་ཟིང་གི་ཉེ་བར་དཔྱད་པ་སླེ་མོའི་ཁུད་ན་ཤོང་བ་ཙམ་ཞིག་ཡོད་པ་ཁང་ཐོག་ནས་བསྐྱུར། ཆས་པར་བརྩམས་པ་ན། གྲོགས་མཆེད་སྨན་དཔྱད་ཤེས་པ་ཞིག་ཡོད་པས་རེ་ཞིག་བཀག །འདི་དུས་དགུང་ལོ་བཅོ་བརྒྱད་པ་ཡིན།
ལར་སྐྱེས་བུ་དམ་པའི་སྙིང་སྟོབས་དང་སྨོན་ལམ་གྱི་མཐུ་ནི་གཞན་དབང་གིས་རྫི་བར་ནུས་པ་མ་ཡིན་པས་སྲབ་མེད་པའི་སེང་གེ་ནམ་མཁའ་ལ་འཕྱོ་བ་བཞིན་དུ། གྲྭ་ས་བསྐྱུར། གྲོགས་མཆེད་སྤངས། དཀོར་ལ་བརྐམ་ཆགས་བྱེད་པ་བཏང་ནས། ངེས་དོན་སྟོན་པའི་བླ་མ་དང་། དབེན་པ་འབའ་ཞིག་ཡིད་ལ་བསམས་ནས་རི་དྭགས་རྒྱ་ནང་ནས་ཤོར་བ་བཞིན་དུ་བྲོས། འཕན་ཡུལ་དུ་ཕེབས་པ་དང་འབྲི་གུང་ཡང་རི་བའི་རྟོགས་ལྡན་ག་ལ་བ་སོགས་དགེ་འདུན་བཞི་བཅུ་ཙམ་བསོད་སྙོམས་ལ་བྱོན་པ་དང་འགྲོགས། དུས་དེ་ཙམ་ན་འབྲི་གུང་པ་ལུགས་གཉིས་ཀ་ནས་རྣམ་དཔྱོད་ཆེ་ཞིང་། ཐེལ་གྱི་ཁྲི་ཐོག་ཏུ་བཞུགས་ནས་སྤྱན་སྔ་ཆོས་ཀྱི་གྲགས་པའི་སྤྱན་ལྟོས་སྒྲིགས་སྲོལ་ལེགས་པ་དང་། བླ་དཔོན་གྱི་འཁོར་རྒྱ་མཚོའི་དབུས་ན་ལྷ་སྲས་འབྲི་གུང་པ་རིན་ཆེན་ཕུན་ཚོགས་མཐོང་ན་མི་མཐུན་པ་མེད་པའི་ཞལ་སྐྱིན་ཅན་དེའི་ཕྱག་འབུལ་ལ་ལྷགས་པས། མཚན་ཉིད་པའི་ཧམ་ཐུལ་ཡུལ་བུད། མི་ཕྱེད་པའི་དད་པ་གཏིང་ནས་གཡོས། སྤྱན་ཆབ་ལྷུག་པར་ཤོར། མཚན་ཉིད་པའི་རིག་ལམ་དགག་སྒྲུབ་ཁོ་ནའི་ཨ་འཐས་སྦྲུལ་གྱི་ཤུན་པ་བཞིན་དུ་དོར། ཚེ་འདི་ཕྱི་ཀུན་གྱི་བློ་གཏད་ཞུ་སྙམ་བྱུང་གསུངས། རེ་ཞིག་ན་ཐོས་བསམ་གྱི་དྲི་མོ་ལ་ཞིབ་ཏུ་གནང་། ལར་བཀའ་རྒྱུད་པ་འདི་ལ་འཇིག་རྟེན་གྱི་དཔལ་འབྱོར་ཡོད་ཀྱང་ཆོས་ཀྱི་འཇུག་སྒོ་འགག་དམ་ཞིང་མིག་ལྟོས་ལེགས་པས། སློབ་གསར་པ་རྣམས་ཅོག་གྲའི་སྒྲིགས་སྲོལ་དམ་པོར་འཇུག་པ་ལ། རྗེའི་ཞལ་ནས་ཆོས་ཁྲིམས་པར། ཨེ་ཝཾ་པའི་དགེ་བཤེས་འདི་ཡོན་ཏན་ཅན་ཞིག་འདུག །སྒྲིགས་ལ་མ་འཇུར་ཕེབས་ཀྱང་། རང་གི་བསག་སྦྱང་ཡིན་དགོངས་ནས་ཟླ་བ་གསུམ་གྱི་བར་དུ་ནན་ཏན་མཛད། འཁོར་ལོ་སྡོམ་པ་དྲིལ་བུ་ལྷ་ལྔའི་དབང་། ཕྱག་ཆེན་ལྷན་ཅིག་སྐྱེས་སྦྱོར་གྱི་ཁྲིད། བཀའ་རྒྱུད་གསེར་ཕྲེང་། དགོངས་གཅིག་ལྔ་ལྡན་གྱི་ཁྲིད་རྣམས་གསན།
ད་མ་གཅིག་གི་གཅོད་ཡུལ་ལ་འདྲིས་པར་བྱས། ཚེ་བློས་བཏང་གི་བྱ་བཏང་ཕྱོགས་བྲལ་བ་ཞིག་བྱེད་དགོངས་ནས་སྙན་དུ་གསོལ་བ་ན། ཁྱེད་གང་དུའང་མ་འབྱོན་པར་འདི་ཁར་བཞུགས། གཅོད་ལའང་ངེད་འདྲིས་ཆེ་བ་ཡིན་གསུངས་ནས་ཐུགས་ཀྱི་རེ་བ་བསྐང་། དཔོན་སློབ་གཉིས་ལན་མང་པོར་མདོ་སྔགས་དང་ཁྱད་པར་གསང་སྔགས་གསར་རྙིང་གི་ལུགས་སོ་སོའི་དགོངས་པ་འགྲེལ་ཚུལ་དོན་ལ་རྟོན་མི་རྟོན་གྱི་འབེལ་གཏམ་དྲི་སྨེད་མང་པོ་མཛད། གཅིག་ལ་གཅིག་ཐུགས་ཆེས། དགེ་བཤེས་ཀྱི་མིང་མ་ནོར་ཞེས་རྣམ་པ་ཀུན་ཏུ་བསྔགས་ཤིང་། བཀུར་མཐོང་ཆེན་པོས་གཟེངས་བསྟོད་ཀྱང་སྙེམས་ཆུང་ཁོ་ན་ལྷུར་ལེན། དེར་འབྲི་གུང་པའི་དགོངས་པར། འདི་འདྲ་བའི་གང་ཟག་མཁྱེན་པ་རླབས་ཆེ་ཤིང་། བྱ་བ་བཏང་བ། ཕྲལ་ཚུགས་ཁ་བཟང་བ་སོགས་གང་ལ་དཔགས་ཀྱང་ངོ་མཚར་ཆེ་སྙམ་དུ་དགོངས་པའི་ཚེ། སློབ་དཔོན་ཆེན་པོའི་ལུང་བསྟན་བྱུང་བས། ལན་ཅིག་ཁྱེད་མདོ་སྔགས་གང་ལ་བརྡའ་བསྟན་པ་ཙམ་གྱིས་ཁོང་དུ་ཆུད་པ་དང་བཅས་ཁོ་བོའི་འཁྲུལ་སྣང་ལ་ལོ་ཆེན་བཻ་རོ་ཙ་ནས་བྱིན་གྱིས་བརླབས་པའི་གང་ཟག་གསང་སྔགས་སྔ་འགྱུར་གྱི་ཆོས་ལ་བག་ཆགས་ཆེ་བ་ཞིག་ཏུ་སེམས་པས། ཁྱོད་སློབ་དཔོན་པདྨ་ལ་ཨེ་དད་གསུངས། སློབ་དཔོན་པདྨ་ལ་སངས་རྒྱས་དངོས་ཀྱི་འདུ་ཤེས་བྱིས་པའི་དུས་ནས་ཡོད། གང་ཟག་ཕལ་ལ་རྟོག་པ་ཆུང་ཞིང་དེའི་སྟོབས་ཀྱིས་ཆོས་ལའང་འདྲིས་ཆུང་ཞུས་པས། འོ་ན་གསོལ་བ་ཐོབ་མཛོད། སྐུའི་སྣང་བ་དང་ལུང་སྟོན་པ་ཐག་ཆོད་གསུངས། ཡང་རི་སྒང་པའི་ཆོས་ཁྲིམས་མཛད་དུས་བསྟན་པ་ལ་ཕྱག་བཞེས་ཤིན་ཏུ་ཆེ་བས། ལེགས་པར་གསུངས་པའི་དམ་པའི་ཆོས་འདུལ་བའི་བཅའ་ཁྲིམས་ལ་སུས་ཀྱང་འདའ་བར་མི་ནུས། ལན་ཅིག་རྗེ་འབྲི་གུང་པའི་གསུང་གིས། དགེ་བཤེས་ཀྱིས་སང་ཚོགས་ཁྲོད་དུ་དགོངས་གཅིག་ལ་བཤད་པ་བྱེད་དགོས་གསུངས།
སྔར་དེ་འདྲ་བའི་བཤད་སྲོལ་མི་འདུག་ཀྱང་། དགོས་པའི་སླད་ཡིན། བླ་མའི་བཀའ་ལྡོག་ཏུ་མི་རུང་བ་སྙམ་ནས་སང་ཚོགས་དབུས་སུ་ཞབས་དྲུང་ཚོགས་དབུ་ལ་བྱོན། ཐེལ་གྱི་མཁན་སློབ་ཆོས་སྒོ་བ་དང་། རྡོར་འཛིན་སློབ་ཆུང་། ཡང་རི་སྒང་པ་དང་བཅས་པའི་ཚོགས་པ་རྒྱ་མཚོའི་དབུས་སུ། ལྔ་ལྡན་ལ་རྩ་བར་བྱས། རྡོ་རྗེའི་གསུང་བརྒྱ་ལྔ་བཅུ་པ་ཆོས་ཚོམས་སུ་བཅད། དགོངས་གཅིག་ལུགས་གསུམ་གྱི་གྲུབ་མཐའི་རྐང་བཟུང་། མདོ་སྔགས་ཀྱི་ཆོས་འཁོར་བསྟན་པ་ཡོངས་རྫོགས་ཀྱི་ཚུལ་དུ་བཤད། སྐབས་དོན་ཚོར་ས་པཎ་གྱིས་བཀག་པ་རྣམས་རང་སྟོབས་ཀྱི་སྒྲུབ་བྱེད་རྣམ་པར་དག་པ་དང་བཅས་བཤད་པས་ཐམས་ཅད་སྔ་ན་མེད་པའི་ངོ་མཚར་སྐྱེས། སང་སྐུ་དྲུང་ན་བཅར་བས་དབུ་ལ་ཕྱག་གིས་ཕྱིལ་ཞིང་། ངས་སྤྱན་སྔ་ཆོས་ཀྱི་གྲགས་པ་དང་། མངའ་རིས་པཎ་ཆེན་གྱི་ལེགས་བཤད་སློབ་མ་ཀུན་ལ་བཤད་པ་ཡིན་ཡང་། ཕལ་ཆེ་བས་དགོངས་གཅིག་འབྲི་གུང་པ་ཁོ་ནའི་ཆོས་སྐད་རང་མཚན་པར་གླེང་བ་སྐད་བྱེད། དེ་འདྲ་བྱས་ན་དོན་གྱིས་སྟོན་པའི་བཀའ་དང་མི་མཐུན་པར་འགྲོ། ཁྱོད་ཀྱི་བཤད་པ་དེས་ལྔ་ལྡན་མདོ་སྔགས་གཉིས་ཀའི་ཉམས་ལེན་གྱི་རྩ་བར་སོང་། དགོངས་གཅིག་དེའི་རྒྱབ་ཆོས་ཡིན་པ་ལ་ས་ལུགས་པའི་ཕྱོགས་སྔ་སྤངས་པའི་དགག་སྒྲུབ་གནད་ཐོག་ཏུ་འགྲོ་བ་བྱུང་བས་སྙིང་ཚིམ། དེ་བཞིན་དེ་ནས་ཀྱང་བྱས་པ་ཡིན། རེ་བ་ལས་ལྷག་གསུངས། འདི་ལ་ཡིག་ཆ་ཞིག་ཀྱང་མཛད་སྣང་སྟེ་ཁམས་པའི་གྲྭ་པ་ཞིག་གིས་ཟིན་བྲིས་ཁྱེར་བས་རྒྱུན་ཆད། དེར་བཀའ་བརྒྱད་ལུགས་སྲོལ་ཆེན་པོ་དགུ། བདུད་རྩི་སྨན་བསྒྲུབ་ཀྱི་ཕྱག་བཞེས། རྙིང་མ་བཀའ་གཏེར་གྱི་གཤིན་རྗེ་རིགས་ལྔ། དགོངས་པ་ཡང་ཟབ། མཁའ་འགྲོའི་སྙིང་ཏིག་བརྒྱུད་པ་གཞན་ལས་ཆེས་འཕགས་པ། བྱང་གཏེར་མཛོད་ལྔ། པད་གླིང་ཆོས་སྐོར་རྣམས་དང་། འབྲི་གུང་ཕྱོགས་ཀྱི་བཀའ་བརྒྱུད་བཀའ་
འབུམ་ལ་སོགས་པའི་དབང་ཁྲིད་ལུང་གི་བཤད་སྦྱར་མང་པོ་གསན། ཁྱད་པར་སྔ་འགྱུར་གྱི་གྲུབ་མཐའི་གཞུང་སྲོང་ཚུལ། ཁོ་བོའི་རྡོ་རྗེའི་སློབ་དཔོན་མངའ་རིས་པཎ་ཆེན་རིན་པོ་ཆེ་དེའི་མཁྱེན་རབ་ལ་མཐའ་མེད། དེའི་བཀའ་ལས། རྙིང་མ་ལུགས་མཐུན་ཞིག་བྱེད་ན་གསང་སྔགས་སྔ་འགྱུར་རང་གི་བསྟན་པའི་བབ་ལ། བཀའ་གཏེར་ཟུང་གཅིག་ཡིན་པས། བཀའ་མ་ནི། མདོ་སྒྱུ་སེམས་གསུམ་ལ་སྔ་འགྱུར་བཀའ་བབས་ཀྱི་ཆུ་བོ་བཞིའི་སྒོ་ནས་བཤད་རྒྱུད་རྣམ་པར་དག་པ་བཞིན་བཤད་པ་ལག་ལེན་དང་བཅས་པ་བཀའ་མ་ལྟར་བྱེད་དགོས། ཆོས་ཀྱི་ཟབ་གནད་རྣམས་བརྒྱུད་པ་དང་ཆོས་ལ་སེལ་མེད་ཅིང་མཁའ་འགྲོའི་ཁ་རླངས་ཆིལ་ལེ་བ་དེ་གཏེར་མ་ཡིན་པས་གཏེར་ཆོས་ཚད་ལྡན་ལྟར་བྱེད་དགོས། དེ་ལྟར་བྱས་ན་རྙིང་མ་ལུགས་དང་མཐུན་པ་གཅིག་ཡོང་ཕེབས་བྱུང་བས། ཁྱེད་རང་ཡང་ཉན་འདོད་ན་ཁོ་བོས་དེ་རྣམས་ཐོས་པས་བཤད་ཆོག །བརྗེད་གསོ་ཙམ་དུའང་འགྲོ་གསུངས་ནས། བསྐྱེད་པ་མ་ཧཱ་ཡོ་ག་ཏནྟྲ་སྡེ་བཅོ་བརྒྱད་ཀྱི་རྩ་བ་སྒྱུ་འཕྲུལ་གསང་བ་སྙིང་པོ་ལ་འགྲེལ་པ་ཕྱོགས་བཅུ་མུན་སེལ་གྱི་ལུགས་གཙོ་བོར་བཏོན། ལུང་ཨ་ནུ་ཡོ་ག་མདོ་དགོངས་པ་འདུས་པ་མདོ་འགྲེལ་ཆེན་མོའི་དགོངས་པ་དང་། རྫོགས་པ་ཆེན་པོའི་ཨ་ཏི་ཡོ་ག་ཀུན་བྱེད་རྒྱལ་པོ་ལ་སོགས་པའི་མན་ངག་དངོས་སྟོབས་ཀྱི་འགྲེལ་པས་བཀྲལ་ནས་བཤད། དེ་བཞིན་དུ་གསར་རྙིང་གཉིས་ཀའི་རྒྱུད་འབུམ། རྒྱལ་བ་ཀློང་ཆེན་པའི་ངལ་གསོ་སྐོར་གསུམ། མཛོད་བདུན། སྙིང་ཏིག་ཡ་བཞི། ཟབ་མོ་ཡང་ཏིག །རྒྱུད་བཅུ་བདུན་བི་མ་ལའི་ཊི་ཀ་དང་བཅས་པ། མན་ངག་བརྒྱ་བཅུ་དགུ་རྣམས་གསན། ཁྱད་པར་དཔེ་ཁང་དུ་ཆེད་ཀྱིས་བཞུགས་ནས་སོ་སོའི་ཡིག་ཆ་ལ་བསམ་བྱུང་གི་ཤེས་རབ་རྣམ་པར་དག་པས་དཔྱད་པ་ན། ཆོས་ཀྱི་ཟབ་གནད་རྣམས་རྙིང་མ་ཁོ་ན་ལ་སྣང་ཞིང་། ཁྱད་པར་སྙིང་ཏིག་ལ་ཡོད་པར་ངེས་ཤེས་གཏིང་ནས་འདྲོངས། དཔོན་སློབ་
གཉིས་ཀ་བསྟན་པ་ཡོངས་རྫོགས་ཀྱི་བཤེས་གཉེན་ཆེན་པོར་གྱུར་པས་མདོ་ཕྱོགས་དང་གསར་མའི་མཁས་པ་རྣམས་ཀྱི་ཡིག་ཆ་གང་ལེགས་ཀྱི་དཔྱད་པ་ལ་ཞུགས་པ་ན། སངས་རྒྱས་ཀྱི་བསྟན་པའི་སྙིང་པོ་རྡོ་རྗེའི་ཐེག་པ་དང་མཐུན་པའི་ཆོས་འཁོར་ནི་འཁོར་ལོ་གསུམ་པ་ཡིན། དེར་རྒྱུའི་རྒྱུད་བདེ་བར་གཤེགས་པའི་སྙིང་པོར་གྲགས་པ་དེ་གསལ་པོར་བསྟན། དགོངས་པ་དེ་འགྲེལ་པ་ལ། རྗེ་རང་བྱུང་རྡོ་རྗེ། ཀརྨ་པ་ཆོས་གྲགས་རྒྱ་མཚོ། སྤྱན་སྔ་ཆོས་ཀྱི་གྲགས་པ། ཀུན་མཁྱེན་ཀློང་ཆེན་པ་རྣམས་ཤིན་ཏུ་མཁས་ཤིང་མཐུན་པས་དེ་ཁོ་ནའི་གྲུབ་མཐའ་ལ་ཡིད་བརྟན་པར་གྱིས་ཤིག་གསུངས། ཀུན་མཁྱེན་བླ་མ་འདི་ཉིད་པཎ་ཆེན་གསེར་མདོག་ཅན་པའི་གྲུབ་མཐའ་ལ་མཆོག་ཏུ་འདྲིས་ཤིང་ངེས་པའི་ཤེས་པ་བརྟན་པས་སྐབས་འདིར་དཔྱད་པ་ཞུགས་པ་ན། ཀུན་མཁྱེན་ངག་གི་དབང་པོ་དང་ཤཱཀ་མཆོག་པ་གཉིས་གྲུབ་མཐའི་ངོས་འཛིན་སྙིང་པོ་གཅིག་ཏུ་མཐུན་པ་ལ་ངེས་པ་གཏིང་ནས་འདྲོངས་པ་ཡིན་ཞེས་གསུངས། དོན་གྱིའང་དེ་ལྟར་ཡིན་པའི་འཐད་པ་ནི། ཀུན་མཁྱེན་ཆེན་པོས་རྫོགས་པ་ཆེན་པོའི་ལྟ་བའི་མཐར་ཐུག་དབུ་མ་ཐལ་འགྱུར་བ་དང་མཚུངས་པར་ཞལ་གྱིས་འཆེས་པ་ཡིན། སེམས་ཕྱོགས་ཀྱི་ལྟ་བ་ཁས་ལེན་དང་བྲལ་བ་ལ་སོགས་པའི་ཆོས་བཞི་པོ་འདི་གསེར་མདོག་ཅན་པས་ཇི་བཞིན་པར་ཁས་ལེན་ཏེ། ཇི་སྐད་དུ། དེང་སང་གངས་ཅན་ན་ལུགས་དེ་ཐོས་ན་སྙིང་འགས་ནས་སྲོག་འདོར་བྱེད་པ་དག་མང་ན། དེ་དག་དང་དགག་སྒྲུབ་ཀྱི་བགྱི་བ་གཟེངས་བསྟོད་ནས་ལྷུར་ལེན་པར་མཛོད་ཅིག །ཁོ་བོ་ཅག་ནི་ཆོས་བཞི་པོ་དེ་ལྟར་དུ་ཁས་ལེན་པ་ལ་སྔོན་ཉིད་ནས་སྤོབས་པར་གྱུར་ཏོ། །དེ་ཡང་ལྟ་སྒོམ་སྤྱོད་འབྲས་གསུམ་པོ་དེ་ནི་ཀླུ་སྒྲུབ་དང་ཐོགས་མེད་གཉིས་ཀའི་ཤིང་རྟའི་སྲོལ་མཐར་ཐུག་ཏུ་མཐུན། ཞེས་དང་། དེ་བཞིན་དུ་ཚིག་གི་བརྗོད་པ་ཙམ་དུ་རང་གི་གྲུབ་པའི་མཐའ་ལ་ལྟ་བ་མཆོག་འཛིན་གྱི་མངོན་རློམ་སྒོམ་པ་ཙམ་ལས། དོན་དུ་
དེ་དག་གང་ཡང་མིན་པའི་འདོད་ཁའི་ལྟ་བ་ཡ་མ་ཟུང་གསར་བྱུང་བ་གཡངས་སུ་སྨྲ་བ་དག་གི་འདོད་པའི་གཏིང་དཔྱིས་ཕྱིན་པ་དགོངས་ནས་འདི་སྐད་དུ། དེང་སང་གངས་ཅན་གྱི་ཀློག་པ་པ་དག་ནི། གསར་མ་ལས་ཀྱང་ཆེས་གསར་མར་གྱུར་པའི་གྲུབ་པའི་མཐའ་དག་གློ་བ་ལ་ཞེན་ཅིང་བྱང་བར་བྱས་ནས། ཚིག་གི་བརྗོད་པ་ལ་ཁོ་བོ་ཅག་ནི་རྫོགས་པ་ཆེན་པོའམ། ཕྱག་རྒྱ་པའམ། བཀའ་གདམས་པའམ། ས་སྐྱ་པ་ཡིན་ནོ་ཞེས་སྨྲ་བ་དག་མང་བའི་ཕྱིར་རོ། །ཞེས་གསུངས་པས་སོ། །དེ་ནས་སྐྱེས་བུ་དམ་པ་འདི་ཁ་ཆེའི་པཎྜི་ཏ་ཤཱཀྱ་ཤྲཱིས། བོད་བཙུན་རྣམས་ཀྱིས་འདུལ་བ་ནས་བཤད་པའི་རབ་ཏུ་བྱུང་བ་དེ་མི་འོང་བ་འདུག །རྗེ་བཙུན་མི་ལ་དེས་རྟགས་དང་ཆོ་ག་བྱས་ན་རབ་ཏུ་བྱུང་བ་མཚན་ཉིད་པ་ཞིག་འོང་བ་འདུག་གསུངས་པ་དེས་ཐུགས་དྲངས། གྲུབ་པའི་མཚན་མ་ཞིག་མ་བརྙེས་བར་ལ། འཇིག་རྟེན་ཆོས་བརྒྱད་ལ་དོར། གང་དབེན་གྱི་གཉན་ཁྲོད་དུ་སྦྱངས་པའི་ཡོན་ཏན་བཅུ་གཉིས་ལ་གནས་བཞིན་པས་མཆོག་གི་དངོས་གྲུབ་སྒྲུབ་པར་དགོངས། ཆོས་གོས་གསུམ་དང་། ལྷུང་བཟེད། ཞལ་སྐྱོགས་ཙམ་ལས་ཡོ་བྱད་ཅི་ཡང་མ་བཟུང་། འཚོ་བ་བསོད་སྙོམས་ཀྱང་གཡེང་བའི་རྒྱུར་དགོངས་ནས། སྲན་མ་ཁལ་བཞི་ལ་བཟའ་བ་དང་། དེ་བཙོས་པའི་ཁུ་བ་ལས་བཏུང་བར་བྱས་ནས་གྲོགས་རི་རིན་ཆེན་སྤུངས་པའི་མགུལ་སློབ་དཔོན་ཆེན་པོའི་སྒྲུབ་ཕུག་ཏུ་རི་མི་འབབ་པའི་དམ་བཅའ་སྔོན་དུ་འགྲོ་བས་མན་ངག་མཁའ་འགྲོ་སྙིང་ཐིག་གི་བསྐྱེད་རྫོགས། རྩ་རླུང་གི་ལམ་འབྲས་བུ་དང་བཅས་པ་ལག་ཁྲིད་དུ་འདེབས་པའི་གདམས་པ་འབྲི་གུང་པས་བླ་མ་ལྔ་ཙམ་ལས་གསན་པས་མན་ངག་ཡོངས་སུ་རྫོགས་པའི་ཆིག་བརྒྱུད་དམ་པ་འདི་ལ་གདམས་པ་གང་གིས་མནོག་ཆོས་སུ་མཛད་ནས་ལོ་གསུམ་འདིའི་རིང་སྟན་ཐོག་གཅིག་ཏུ་བསྒྲུབས་པས། མངོན་རྟགས་བསམ་གྱིས་མི་ཁྱབ་པ་ཤར། ཏིང་ངེ་འཛིན་གྱི་སྒོ་མཐའ་ཡས་པ་བརྙེས། དེ་ནས་དགོན་གནས་ཀྱི་བཀའ་
བཀོད་ཇི་ལྟ་བུ་ཕེབས་ཀྱང་། རྣམ་གཡེང་གི་དབང་དུ་གྱུར་དོགས་ནས་རང་ས་རང་སར་དགོངས་པ་བསངས་ནས་གནས་གང་དབེན་དང་། དབེན་པ་འབའ་ཞིག་ཏུ་ལོ་བརྒྱད་བཞུགས། དེའི་ཚེ་འདི་ལྟ་བུའི་གང་ཟག་ས་མཐོན་པོ་ལ་ཞུགས་པ་དག་ནི་ཆོས་ཀྱི་གཏེར་ལ་ལོངས་སྤྱོད་པ་མདོ་སྡེ་ཟབ་མོའི་དགོངས་པ་ཡིན་པས་དགུང་ལོ་སུམ་ཅུ་པའི་ཚེ། མཁའ་འགྲོ་མ་མོན་མོའི་ཆ་ལུགས་ཅན་ཞིག་གིས། ཁྱོད་ཀྱི་བསླབ་པས་བཅིངས་པའི་བྱ་བཏང་འདི་ཉམས་རེ་དགའ། འདི་འཐུང་དང་ཟེར་ནས་ཆང་བསེ་ཕོར་གང་བྱིན། རྟེན་འདྲེལ་དེ་ལས་མེ་མོ་ལུག་གི་ལོའི་ཆོ་འཕྲུལ་ཟླ་བའི་ཚེས་བཅུའི་ཉིན་འོད་དཀར་པོ་ཞིག་གི་རྐྱེན་ལས་ཐིག་ལེ་ཆེན་པོའི་དབུས་སུ་སློབ་དཔོན་ཆེན་པོ་པདྨ་རྒྱལ་པོའི་ཆ་ལུགས་སུ་ཞལ་གཟིགས། རྗེས་སུ་གདམས་པའི་གསུང་གིས་དབུགས་དབྱུང་བས་གྲོགས་རི་རིན་ཆེན་སྤུངས་པ་ནས་པདྨའི་ཞལ་གདམས་གྲོལ་ཏིག་དགོངས་པ་རང་གྲོལ་གྱི་གཏེར་ཤོག་འཛམ་བུའི་ཆུ་བོའི་ཤིང་ཤུན་ཁ་དོག་ལྗང་སྐྱ་མཚོན་གྱིས་མི་ཤིགས་པ་ཁ་ཤས་དང་། སྐུ་གསུང་ཐུགས་རྟེན་གྱིས་མཚོན་པའི་ཟབ་གཏེར་རྒྱ་མཚོ་ལ་མངའ་དབང་བསྒྱུར། ཁྱད་པར་ལྷ་སའི་གཏེར་འབྱིན་པ་ལ་དགོངས་པ་ཞུས་པས། འབྲི་གུང་པའི་སློབ་མ་བླ་མ་གཙང་ནས་དང་བཅས་གྲོགས་སུ་རྫོང་ད་གནང་། ལྷ་སའི་སྐུ་གཉེར་གྱིས་རྙིང་མ་བས་གཏེར་བཏོན་ཡོང་ཞེས་ཟོན་བག་བྱས་ཀྱང་ཐུགས་དམ་གསོལ་འདེབས་ཚུགས་པའི་མོད་ལ་སྐུ་གཉེར་རྣམས་ར་རོ་ཐ་མའི་གནས་སུ་སོང་། ནོར་བུ་སྟག་ཤ་དྷི་བ། བསམ་ཡས་ཀྱི་མེའི་གནོད་པ་བསྲུང་བའི་དུག་ཤོག་གསུམ། དེ་བཞིན་གཤེགས་པའི་རིང་བསྲེལ། མཚོ་རྒྱལ་གྱི་ཚེམས། ལོ་རྒྱུས་ཤོག་སེར། མྱང་གྲོལ་ཨ་རྒྱ་ཅན། སྣོད་པདྨ་རཱ་གའི་དཔྱད་པ་རྣམས་དང་། ཁྱད་པར་བདུད་རྩི་འཁྱིལ་པའི་ཁུག་ནས་ཆོས་རྒྱལ་གྱི་སྐུ་འདོན་པར་བརྩམས་པ་ན་གཏེར་བདག་མིང་པོ་ཀླུ་རྗེ་ཆུ་སྲིན་གྱི་མགོ་ཅན་ས་འོག་ནས་མངོན་
སུམ་དུ་ཐོན། གཉེན་པོའི་རྡོ་རྗེ་ཡོད་པ་མགོ་ཐོག་ཏུ་བཞག་ནས། སློབ་དཔོན་གྱི་དམ་ཚིག་རྗེས་སུ་དྲན་པར་གྱིས་ཤིག་གསུངས་པས་རང་སར་ཐིམ། དེའི་འཇིགས་ཟིལ་གྱིས་གཉིད་དུ་གཡུར་བ་རྣམས་སྐད་ཤོར། བླ་མ་གཙང་གནས་ཀྱིས་དངོས་གནས་སུ་མཐོང། བསྟན་སྐྱོང་མ་ཤིན་ཏུ་འགོ་བས་ལམ་དུ་དྲེའུའི་སྐད་དང་ཐུག་ཆོམ་ཡང་ཡང་བྱུང་། དེར་འབྲི་གུང་རིན་པོ་ཆེ་ཡང་དབུ་སྐྲ་བསིལ་ཏེ་སྤྱན་འདྲེན་ལ་ཕེབས། ན་བཟའ་ཕྱག་བྲིས་མ་འདོད་གསོལ་ཅན་དེ་ཕུལ། ཤོག་སེར་རྣམས་དཔོན་སློབ་ལྷན་ཅིག་པས་ཕབ་པ་སོགས་འདི་ལྟ་བུའི་གཏེར་གྱི་རྣམ་གྲངས་དང་ངེས་ཤེས་འདྲོངས་པ་གཞན་དུ་མ་གྱུར་པ་ལྟ་བུ་ཡིན་ཏེ་གཏེར་བྱུང་ལོ་རྒྱུས་ཀྱིས་ཤེས་སོ། །དེ་ནས་ཟིང་བ་སྟག་མགོར་གཏེར་སྒྲུབ་ལ་བཞུགས་པའི་ཚེ། ནུབ་གཅིག་སྣང་བ་ཐམས་ཅད་སྐྱ་ཏལ་ལེ་བའི་དང་། བུད་མེད་གཅིག་ན་རེ། དོ་ནུབ་སློབ་དཔོན་ཆེན་པོས་ཚེས་བཅུ་གནང་གི་ཡོད། ཁྱོད་རང་ཆང་འདི་འཐུང་། ཤ་འདི་ནལ་བྱིའི་དུར་ཁྲོད་ན་བྲམ་ཟེ་སྐྱེ་བ་བདུན་པའི་ཤ་འདུག་པས་ཚོགས་ཤར་བླངས་པ་ཡིན་གསོལ་དང་ནུས་པ་ཚད་མེད། ནམ་མཁའ་ལ་འཕུར་ཡང་ཐུབ་ཟེར། ཆང་དེ་འཐུངས། ཤ་དེ་དམར་ཙར་རེ་འདུག་པས་ཡིད་འཕྲིགས་སེ་བ་གཅིག་གིས་ངང་ནས་ཟོས་པས། དེ་ན་རེ། ཁྱེད་རྣལ་འབྱོར་པ་འདྲ་པོ་མིན། ད་སྟེ་སློབ་དཔོན་མཇལ་དུ་འདོང་ཟེར་བའི་མོད་ལ་ཤའི་ནུས་པས་ནམ་མཁའི་ལམ་ལ་གྱ་གྱུར་ཁྲིད་ནས་ཟངས་མདོག་དཔལ་རིའི་བཀོད་པ་སྲིན་པོའི་ཡུལ་གླིང་དང་བཅས་པ་ངོ་མཚར་ཅན་གཟིགས། སློབ་དཔོན་ཡབ་ཡུམ་གུ་རུ་བདེ་བ་ཆེན་པོའི་རྣམ་པས་དབང་བསྐུར། རྗེས་སུ་གདམས། ཞལ་གདམས་དང་བསླབ་བྱ་མཛད། ཟླ་བ་གཅིག་གི་ཡུན་དུ་བཞུགས་པའི་སྣང་བ་བྱུང་། ད་སྟེ་སྔོན་གྱི་སྨོན་ལམ་གྱི་དབང་ལས་བོད་ཡུལ་གྱི་གདུལ་བྱ་རྣམས་དྲན་པར་གྱིས་ཞེས་མཁའ་འགྲོ་མ་རྣམས་ཀྱིས་བསྐུལ་བས། རྨི་ལམ་སད་པ་བཞིན་སོང་། སྔར་ཐོས་བསམ་གྱིས་དཔྱད་
གཞི་བྱས་པའི་གོ་མྱོང་རྟོགས་པའི་ཐོག་ཏུ་འབྱོར་པས་བསྟོད་པ་སྙན་པའི་སྒྲ་དབྱངས་ལྷ་ཡི་རོལ་མོར་གྲགས་པ་འདི་མཛད། དེ་ནས་བྱ་བ་ལས་ཀྱི་འཁོར་ལོ་ལ་ཞུགས་ཏེ། རྗེ་འདི་པ་སྙིང་པོའི་སྒྲུབ་པ་འབའ་ཞིག་ཐུགས་ལ་གཏོད་ནའང་ཀུན་མཁྱེན་ཆེན་པོའི་རིང་ལུགས་ལ་ཟིང་པ་སྟག་མགོའི་བླ་མར་དམ་ཚིག་ལ་བཀར་ནས་བསྐོ་བཞག་གནང་བས། དེར་ཆོས་ཀྱི་ཆར་ཕབ། རེ་ཞིག་ན་སྒར་མངས་བསམ་ཡས་སུ་ཕྱགས་ཕེབས་པ་ལས་ཕྲེང་པོར་དགོངས་འདུས་ཀྱི་ཆོས་བདག་ཉི་མ་རྒྱལ་མཚན་ལས་དཔོན་སློབ་གཉིས་ཀས་དགོངས་འདུས་དང་། གཏེར་ཕྲན་པོད་བཅུ་གཉིས་ཙམ་གསན། ཕྲེང་པོ་བས་ནན་གྱིས་ཞུས་པའི་ངོར། བསམ་ཡས་དང་ཕྲེང་པོ་གཉིས་ཀར་རྒྱལ་ཚབ་ཏུ་མངའ་གསོལ། བར་སྐབས་ནས་ཁྲ་འབྲུག་གི་ཇོ་མོ་སྒྲོལ་མ་ལ་བུད་མེད་ཀྱི་རྒྱན་གསོལ་བས་རབ་གནས་ཉམས། སླར་བསྐྱར་བར་པྲཛྙཱའི་ཞབས་ཆེད་དུ་བསྩལ་ཡང་སྡེ་སྲིད་ཀྱིས་བཀག །དེས་རྟེན་འདྲེལ་ལོག་སྟེ་དཔོན་བློན་ནང་བཤགས་པའི་ཆིངས་ལ་འབྲི་གུང་པས་གཤེགས་དུས་འཕྱོང་རྒྱས་ཞབས་དྲུང་ཧོར་བསོད་པའང་དད་པ་ཤིན་ཏུ་ཐོབ། རྗེ་འབྲི་གུང་པས་དམ་པ་འདིའི་བསྔགས་པ་བརྗོད་དེ་མཆོད་ཡོན་གྱི་ལུང་བསྟན། དཔག་པར་དཀའ་བའི་ཡོན་ཏན་གྱིས་བློ་ཕྲོགས་ནས་དཀར་པོ་པ་བསྟན་འཛིན་ནོར་བུའང་སློབ་མར་གྱུར། དེ་ཉིད་རིང་པོར་མ་ལོན་པར་གཤེགས་སྐབས། བསམ་ཡས་གཙུག་ལག་ཁང་སྡེ་དང་བཅས་པ་རྗེ་བཙུན་འདི་ལ་གཉེར་དུ་གཏད་པས། ལོ་གསུམ་གྱི་བར་གཙུག་ལག་ཁང་གི་ཞབས་ཏོག །བར་སྐོར་ཞིག་གསོས། འབྲས་པའི་གྲུ་ཤན་གསོ་བ་དང་། དཀར་མེའི་འདུ་འགོད་ལས་སོགས་པའང་བདག་གིར་བཞེས། ཆོས་རྗེ་མངའ་བདག་པ་སྐུ་མཆེད་སོགས་འདུས་པ་ཕྱེད་ཉིས་བརྒྱ་ཙམ་ལ་ལྷན་ཅིག་སྐྱེས་སྦྱོར་གྱི་ཁྲིད་དང་། རྒྱབ་ཆོས་སུ་མདོ་མཛངས་བླུན། དགོངས་པ་ངེས་འགྲེལ་སོགས་བསྩལ། མཆོག་ལྡན་མགོན་
པོའི་སྲས་རྒྱལ་སྲས་བསྟན་པའི་འབྱུང་གནས། མེ་ལོང་རྡོ་རྗེའི་གདུང་བརྒྱུད། མདོ་སྔགས་གླིང་པ། ཁྱད་པར་དུ་གསང་ཕུའི་ཆོས་རྗེ་སྟོན་ཚག་པ་ཞེས་དུས་དེ་ཙ་ན་དགེ་བའི་བཤེས་གཉེན་རིག་པ་ཆེ་བར་གྲགས་པ་དེ་རྣམས་ལ་གྲོལ་ཐིག་གི་ཆོས་འཁོར་བསྐོར་བས། དམ་པ་འདིས་སྔོན་འགྲོའི་སྐབས་སུ་མདོའི་བཤད་པ། དངོས་གཞིའི་སྐབས་སུ་རྒྱུད་སྡེའི་བཤད་པ། ཁྱད་པར་གཏེར་ཆོས་འདི་བའི་རང་སྐད་རྒྱུད་སྡེ་ཆེན་པོའི་མཐའ་ལ་གནས་པ་དེའི་གོ་དོན་སློངས་ནས་བཤད་པས། སྟོན་ཚག་པ་ཆེན་པོ་ན་རེ། ད་ལྟ་མདོ་སྔགས་ལ་ཁོ་བོ་ལས་སྦྱངས་སྟོབས་ཆེ་བ་མེད་སྙམ་པ་ཡིན་ཏེ། སྐྱེ་བ་བརྒྱུད་ནས་སྦྱངས་པ་དང་མི་འདྲ་བ་འདུག །རྗེ་བཙུན་དམ་པ་པྲཛྙཱ་ར་སྨི་རང་ཁམ་ཆེ་གསུངས། དེ་ཕྱིན་ནས་ཏིང་ངེ་འཛིན་ཁོ་ན་ལ་དྲིལ། དེའི་སྙན་པས་ས་སྐྱ་བདག་པོ་མ་ཆེན་པས་ཀྱང་འཆི་མེད་སྐུ་གསུམ་འདུས་པའི་སྐོར་གསན་ཞིང་ཐུགས་ཡིད་འདྲེས། དེ་བཞིན་དུ་བྱ་རྒོད་གཤོངས་སུ་སྡེ་འཁྲུགས་ཆེན་པོ་སུས་ཀྱང་མི་འདུམས་པ་བྱུང་བའང་བླང་དོར་སྟོན་པའི་ལུང་བསྟན་གྱིས་ཞི་བས་པཎ་ཆེན་འབུམ་ཕྲག་གསུམ་པའི་སྤྲུལ་སྐུར་ཡིད་ཆེས། རྩེ་གདོང་པ་སྐུ་མཆེད་རྣམས་ཀྱིས་ཀྱང་དབང་ཆོས་མང་དུ་གསན། དེ་ནས་རྗེ་འབྲི་གུང་པ་ཟས་ངན་གྱི་སྦྱོར་བས་བསྙུན་པ་ན། དམ་པ་འདི་ལ་ཐུགས་ཤིན་ཏུ་བརྩེ་བས་ཞལ་གདམས་མང་དུ་གནང་སྟེ་སྐུ་ལ་མཉེས་ཐབས་ཀྱི་ངང་ནས་ཁམས་འཕོས། ཕྱིས་འབྲི་གུང་ཕྱོགས་ཀྱི་གདུང་བརྒྱུད་རིན་པོ་ཆེས་གཙོས་བུ་ཆེན་ཐམས་ཅད་འདིར་འདུས། དགོངས་པ་ཡང་ཟབ་མིང་ཙམ་དུ་འགྲོ་ཉེའི་སྲོག་མཐུད། ཐུབ་བསྟན་རྡོ་རྗེ་བྲག་ཏུ་ལོ་གསུམ་གྱི་བཅད་རྒྱར་བཞུགས་དུས། སློབ་དཔོན་ཆེན་པོ་པདྨ་རྒྱལ་པོའི་ཆ་ལུགས་སེང་གེ་ལ་བཅིབས་པ་ཞིག་ཞལ་གཟིགས། དེང་སང་འདི་ན་ལྟ་བ་མ་འཁྲུལ་པའི་ཁྱད་པར་འབྱེད་ཤེས་པ་ཁྱོད་ལས་མེད་པས་དེའི་གནས་གསལ་བར་སྟོན་ཅིག་གསུངས་
པས་བདེན་གཉིས་གསལ་སྒྲོན་ཞེས་ཚིག་ཉུང་ལ་དོན་ཆེ་བ་དེ་མཛད། འབྲི་གུང་པའི་དགོངས་རྫོགས་སུ་མདོ་སྔགས་ཀྱི་སྨོན་ལམ་ཞེས་བསྟན་པ་ཐམས་ཅད་མ་འདྲེས་ཡོངས་སུ་རྫོགས་པའི་གསུང་རབ་ཚིག་དོན་བཟང་པོ་དེའང་མཛད། སླར་ཞབས་དྲུང་ཧོར་བསོད་ནམས་དར་རྒྱས་ཀྱིས་འཕྱོང་རྒྱས་སུ་སྤྱན་དྲངས། ཕ་དང་བུ་ཕྲད་པ་ལྟ་བུའི་དགྱེས་པ་ཆེན་པོས་ཏི་ཤྲིར་བཀུར། གྲོལ་ཏིག་ལ་སོགས་ཟབ་མོའི་གདམས་པས་རྗེས་སུ་བཟུང་། མི་འགྱུར་ཀུན་དགའ་དཔལ་བཟང་དང་། སྤྲུལ་སྐུ་ཟླ་བ། ཞིག་པོ་གར་གྱི་ཕྱུག་སོགས་དང་ཡང་ཐུགས་ཡིད་གཅིག་ཏུ་འདྲེས་ཤིང་ཆོས་ཀྱི་སྐྱེས་རྒྱ་ཆེན་པོས་ཕན་ཚུན་ངོམས་རེས་མཛད། བྱང་བདག་པོ་བཀྲ་ཤིས་སྟོབས་རྒྱལ་དང་ཡང་མཇལ་བས་ཐུགས་ཤིན་ཏུ་ཆེས། རེ་ཞིག་ན་ཕྲེང་པོར་སྐུ་སྙུན་པ་ཞིག་བྱུང་བས་རྐྱེན་བྱས། ཤཱནྟ་པུ་རིའི་ཞིང་ཁམས་ཕྱི་མཆོད་རྟེན་ལ་ནང་གཞལ་མེད་ཁང་། མཁའ་འགྲོའི་གྲོང་ཁྱེར་འབུམ་ཚོ་གསུམ་གྱིས་བསྐོར་བ། གཞལ་ཡས་ཁང་གི་ཁྲི་འཕང་མཐོན་པོ་ལ་དཔའ་བོ་ཆེན་པོ་ཐོད་པའི་དུམ་བུ་རྩལ་ན་ཚོད་བཅོ་ལྔ་པ། སྐུ་མདོག་སྔོ་བསངས་ཤངས་ཞུར་དཀར་པོ། དར་དང་རིན་པོ་ཆེས་བརྒྱན་པ། དཔའ་བོ་དང་། མཁའ་འགྲོ་དང་། རབ་བྱུང་དང་། བྱང་ཆུབ་སེམས་དཔའི་ཚོགས་དཔག་ཏུ་མེད་པའི་འཁོར་ལ་ཐེག་པ་སྣ་ཚོགས་ཀྱི་ཆོས་འཁོར་བསྐོར་བ་གཅིག་གཟིགས་ཤིང་། མ་འོངས་པ་ན་དམ་པ་ཉིད་དེའི་ཐུགས་ཀར་སྤྲུལ་པ་བསྡུ་བར་ལུང་བསྟན་ཐོབ། དེས་སྐྱེ་བའི་མཐའ་ཡང་ཆོད། སྐྱེ་བ་སྔ་ཕྱིའི་གདུལ་བྱའི་གོ་མཐུད་ཆོག་པ་བྱུང་གསུངས། ཀརྨ་པ་དབང་ཕྱུག་རྡོ་རྗེ་ཕྲེང་པོར་ཕེབས་པ་དང་མཇལ། དག་སྣང་མཐའ་ཡས་པ་གཟིགས། འབེལ་གཏམ་མཛད་པས་ཐུགས་ལྷག་པར་ཆེས། དགེ་བཤེས་རིན་པོ་ཆེ་དེ་མཁྱེན་རབ་བསམ་གྱིས་མི་ཁྱབ་ཟེར་བ་དེ་བདེན་པར་འདུག་ཅེས་འཕྲོས་དོན་ལའང་བསྔགས་པ་མཛད། སྤྲུལ་
པའི་སྐུ་དཀོན་མཆོག་ཡན་ལག་དང་མཇལ་དུས། དྲུང་རམ་རྫ་མོན་པས་གསར་རྙིང་གི་རྒྱུད་ལ་དོགས་སློང་མང་པོ་མཛད་པ་ལ། ལན་གབ་ལ་བྱིངས་ཆེ་བ་འབའ་ཞིག་གི་རྒྱས་བཏབ་པས། ཇ་གྲལ་གྲོལ་ནས་ཞབས་དྲུང་སྤྲུལ་པའི་སྐུའི་གསུངས་ནས་དྲུང་རམ་པར། གང་ཟག་ཁྱད་པར་ཅན་དེ་ལ་སོ་སོ་སྐྱེ་བོས་རྒོལ་བ་བྱས་ན་ལྡང་མི་ནུས་པ་དེ་འདྲ་འོང་ཞེས་གསུང་སྐད། འབྲུག་པ་རིན་པོ་ཆེ་ཆོས་ཀྱི་སྤྱན་ལྡན་པདྨ་དཀར་པོ་དང་སྔ་ཕྱིར་མཇལ། ས་པཎ་གྱི་དགོངས་གཏད་དབུ་མ་རང་རྒྱུད་པར་འདུག་པ་དང་། དགེ་ལྡན་པའི་སྒྱུ་ལུས་ཕྱི་ལྡང་ནང་ལྡང་སོགས་ཀྱི་འབེལ་གཏམ་ཞིབ་རྒྱས་སུ་གནང་། ཐུགས་ཡིད་གཅིག་ཏུ་འདྲེས། ལན་གཅིག་སྤྲུལ་པའི་སྐུ་ཁྱེད་ལྟ་བུ་རྟོག་གེའི་ཆོས་ལ་དགྱེས་པ་མི་འགབ། ད་སྟེ་སྙིང་པོའི་ཆོས་ཀྱི་འཕེལ་རྒྱས་ཁོ་ན་ལ་དགོངས་པ་གཏོད་དགོས་ཚུལ་ཞུས་པས་ཐུགས་ལ་ཤིན་ཏུ་ཞུགས། གྲོལ་ཏིག་གི་ཆོས་ཀྱི་བདག་པོར་གྱུར་ཞིང་ཆོས་སྐོར་ཕལ་ཆེར་གསན་པ་ཡིན། འབྲུག་པ་རིན་པོ་ཆེ་ཉིད་ཀྱི་རྣམ་ཐར་དུའང་། ཕྲེང་པོ་ནས་གཏེར་སྟོན་དགེ་བཤེས་རིན་པོ་ཆེ་དང་མཇལ། ཐུགས་ཀ་ཤིན་ཏུ་ཉེ་བར་བྱུང་ཞེས་སྣང་། ཕྱི་རེས་ཞིག་གང་གི་སློབ་མ་རིན་པོ་ཆེ་ལྷ་རྩེ་བ་ལ་ལྔ་ལྡན་གྱི་ཁྲིད་བསྩལ། ཚེ་རིང་ཕོ་བྲང་དང་སྡིག་སྟེངས་རྣམས་སུ། འཕྱོང་རྒྱས་ཞབས་དྲུང་། བདེ་ཆེན་གླིང་པ། སྤྲུལ་སྐུ་མདོ་སྔགས་རྒྱལ་སྲས་རིན་པོ་ཆེ་རྣམས་ལ་གྲོལ་ཐིག་དང་། མཁའ་འགྲོ་སྙིང་ཏིག །དགོངས་པ་ཡང་ཟབ་རྣམས་ཀྱི་བཤད་སྒྲུབ་མཛད། གྲོལ་དབང་ལ་མི་སྟོང་ཕྲག་བདུན་བདུན་ཚོགས་པ་ཤ་སྟག་དང་། མེ་ཏོག་གི་ཆར་འཇའ་འོད་ལ་སོགས་པའང་བྱུང་། མདོ་མཁར་དུ་སྡེ་པ་སྐྱ་རྒྱལ་བས་འདད་ཀྱི་གྲར་དབུར་གདན་དྲངས། རཏྣའི་གདུང་བརྒྱུད་ཆོས་རྗེ་ནོར་བུ་པ་ཞལ་ངོ་། ལས་འཕྲོ་གླིང་པའི་སྐུ་སྐྱེ། ལྷོ་མོན་གྱི་མི་ཁྲི་ཚོ་གསུམ་ཙམ་ལ་ཆོས་དང་དམ་རྫས་ཀྱི་འདྲེལ་བ་དང་། སངས་རྒྱས་ཀྱི་མཚན་སྒྲོག་པ་སོགས་ཀྱི་འགྲོ་དོན་མཛད།
གནས་དེར་དགོན་པ་འདེབས་པར་ཞུས་པ་ཞལ་གྱིས་མ་བཞེས། འཕྱོང་རྒྱས་སུ་དབུས་དྭགས་ཀྱི་དམག་ཚན་པོ་ཆེས་རྒོལ་བར་ལྷགས་པ། གཤིན་རྗེ་ནག་པོ་སུམ་སྒྲིལ་གྱི་དམག་བཟློག་དང་། བསམ་ཡས་དཔོན་བློན་བྲན་དུ་བཀོལ་ནས་བཟློག་པར་མཛད། སྡེ་པ་ཡར་རྒྱབ་ནས་སྐུ་འབྲིང་བ་ཉིད་ལོ་ཆེན་བཻ་རོའི་དུས་ཀྱི་ཚ་རོང་རྒྱལ་མོའི་སྐྱེ་བ་ཡིན་པས་མཆོད་ཡོན་དུ་འདྲེལ་ཞིང་། དབང་ཁྲིད་གདམས་པས་རྗེས་སུ་བཟུང་། མི་ཆེན་གྱི་སྦྱིན་བདག་གཅིག་ལ་ཐུགས་ནང་གཙང་། སྦང་ཆུང་དགོན་གསར་མ་ལག་དང་བཅས་པའང་ཕུལ། འདི་དུས་སྒྲོམ་གྲུབ་ཀྱིས་ཕྱོགས་ཕུལ་ནས་དར་རྒྱས་ཆོས་སྡིངས་པ་ལ་བཀའ་བཀྱོན་ཕོག །དགོན་གནས་དམ་པ་འདི་ལ་ཐ་ཚིག་ཏུ་བཀར་ནས་ཕུལ་ནའང་གཞན་ལ་གནོད་པ་རྨི་ལམ་ཙམ་དུའང་ཐུགས་ལ་མི་དགོངས་ཤིང་། རང་དབང་དཔལ་གྱིས་ཆོག་ཤེས་ལ་མཉེས་པས། སྤྲུལ་སྐུ་གསུང་སྤྲུལ་རང་ལ་འཇགས་པ་དགོས་ཞེས་ནན་ཞུ་མཛད་པས་དེ་དག་ཀྱང་དྲིན་དུ་གཟོ་ཞིང་དད་པས་ཡར་བྱོན་ལྷ་ཁང་དུ་འབུལ་བ་དང་བཅས་མཇལ་དུ་བྱོན། བཀའ་དྲིན་ཟླ་མེད་པར་བརྩི། སྣེའུ་གདོང་གོང་མ། མཁར་ཐོག །གྲུབ་རྒྱལ་གླིང་། ཁྲོ་བོ་མཁར། བཀྲ་ཤིས་རྩེ། དཔལ་གྲོང་སོགས་སུའང་གདན་དྲངས་ཤིང་བསྙེན་བཀུར། ཆོས་རྗེ་སྣང་གསལ་སྒང་པ་དང་། མདོ་ཁམས། གོ་འཇོ། ཀཿཐོག །ཉག་རེ། ཅོང་ཞི། རྒྱལ་མོ་རོང་སོགས་ནས་བྱོན་པའི་བླ་མ་རྣམས་སོ་སོར་སྨིན་གྲོལ་གྱི་གདམས་པས་ཚིམ་པར་མཛད། ལར་སྐྱེས་བུ་ཆེན་པོ་འདི་དབེན་པ་འབའ་ཞིག་ལ་མཉེས་པས་གང་དུ་ཡུན་རིང་བ་ཙམ་གཏན་ཆགས་པ་དེ་དང་དེར་ཡང་སྐུ་མཚམས་གཙོ་བོར་འདོན། རྣམ་པ་ཀུན་ཏུ་སྔ་དགོངས་ཀྱི་ཐུགས་དམ་ལ་ཆེ་གཉན་དང་ཐུགས་དྲེལ་ཅི་ལྟ་བུས་ཀྱང་གཡེང་མི་ནུས། ཉིན་གུང་གི་ཆ་ལའང་བསྟན་འགྲོར་སྨན་པའི་བྱ་བ་ལས་ཀྱི་འཁོར་ལོ་དེ་དང་དེ་སྟབས་གཅིག་ཏུ་མཛད་དེ་ཐུགས་དམ་ཁོ་ནའི་ངང་དུ་བཞུགས་པ་ལས་གདུལ་བྱའི་སྣང་བ་
དག་པ་རྒྱུ་མཚན་དུ་མཛད་པའི་བག་ཡངས་སུ་ལར་མི་བཞུགས། སློབ་མའི་བྱ་བ་ལ་ཐུགས་བསྐྱེད་ཤིན་ཏུ་ཆེ་བས་འོ་བརྒྱལ་ཇི་ལྟ་བུ་བྱུང་ཡང་དེ་དང་དེའི་རེ་བ་ཕྲལ་ཕྲལ་དུ་སྐོང་བ་ལས། ཞུ་སྣམ་འཕྲོད་པ་དང་ཆོས་སྒུགས་ཀྱི་ངང་ལ་གྲ་ཚོགས་གསོག་པ་རྒྱལ་པོའི་རྣམ་ཐར་མི་སྐྱོང་། ཆེ་གཉན་སུ་འདྲའི་ཐད་དུའང་རྟེན་འདྲེལ་སྒྲིག་ཕྱོགས་དང་ལུང་བསྟན་སོགས་ལ་བསྙད་པའི་ངོ་དགའ་དང་ཕྱེ་འཐོར་མཛད་པ་མི་སྲིད། མཁས་པ་དང་གྲུབ་པའི་ངོ་ནས་དཔྱོད་ལྡན་ཐམས་ཅད་ཀྱིས་རྗེས་སུ་ཡི་རང་བར་མངོན་པར་བསྟོད་ཅིང་། བླ་དཔོན་ཆེ་གཉན་མང་པོའི་ཏི་ཤྲིར་གྱུར་ཀྱང་ཁེངས་པ་དང་དྲེགས་པའི་གཟི་བྱིན་ངོམ་པར་མི་མཛད། ཕྲལ་སྐུ་ལ་བཅར་ཏེ་ཡུན་རིང་དུ་བསྡད་ཀྱང་ཐུགས་ཀྱི་གཏིང་མི་ལོན་ཞིང་གནང་སྤྱོད་ལོག་པའི་ཐེ་ཚོམ་ཙམ་ཡང་མི་མངའ། རྣམ་ཐར་གསོལ་འདེབས་ལས། གྲོལ་བྱེད་རླུང་སེམས་རྩ་དང་ཐིག་ལེའི་གནད། །ཞུགས་གནས་ཐིམ་གསུམ་དབུ་མའི་ལམ་དག་པས། །རོ་རྐྱང་མདུད་གྲོལ་ས་བཅུ་རིམ་གྱིས་བགྲོད། །ཐ་མས་གཙུག་ཏོར་མཆོག་གྲུབ་གསོལ་བ་འདེབས། །ཞེས་རྡོ་རྗེའི་གནས་ཆེན་པོའི་ཉེ་རྒྱུའི་ལམ་གནད་དུ་སོང་བས་སྐུ་ན་མཐོན་པོར་སོང་ནས་ཀྱང་། སྐུ་ལ་གཉེར་བག་དང་སྐྲ་དཀར་མེད་ཅིང་གཞོན་ཤ་ཆགས། ནང་གི་རྩ་མདུད་གྲོལ་བས་ཆོས་ཀྱི་ཚིག་དོན་ཟབ་ཅིང་གཏིང་དཔག་དཀའ་བའི་གནས་འགྲེལ་པ་ལ་བསྙེངས་པ་མེད། གཞན་རྒྱུད་ཀྱི་བསམ་པ་མཁྱེན་པས་མ་འོངས་པ་མངོན་སུམ་དུ་ལུང་སྟོན་པ་དང་། འགའ་དང་འགས་ཉམས་སད་པའི་སླད་དུ་བརྟག་པ་ཞུས་པའང་མངོན་སུམ་དུ་གཏན་ལ་ཕེབས་པ་དང་། ཚོགས་པ་འཛོམ་ཆེ་སར། ཁྱེད་རང་རྣམས་ཀྱི་སྐུ་ཚེའི་སྨད་ལ་གློ་བུར་གྱི་རྒྱལ་པོ་སྟོབས་ཅན་ཞིག་གིས་དབུས་གཙང་ཐམས་ཅད་ལ་དབང་བསྒྱུར་བ་འོང་། དེ་ནས་རིམ་པས་སེམས་ཅན་གྱི་བདེ་སྐྱིད་དམན་པ་ཡིན། ཞེས་སྡེ་སྲིད་གཙང་བའི་ལས་དོན་རྒྱུག་པ་དང་། དེ་བཞིན་དུ་སྡེ་པ་འཕྱོང་རྒྱས་པ་ཉིད་ཀྱི་སྲིད་ལ་ཐལ་བ་འབྱུག་པ་དང་། སོག་པོ་གུ་ཤྲཱིའི་དམག་གིས་
དབུས་གཙང་ཁམས་གསུམ་བཅུ་པ་ལ་སོགས་མི་རབས་མང་པོའི་རྗེས་ཀྱི་གཏེར་ལུང་ཐིག་ཁེགས་པ་ལྔ་པ་ཆེན་པོས་ཀྱང་རྣམ་ཐར་ལ་འདྲེན་པར་མཛད། དེ་བཞིན་དུ་དྲག་པོ་མངོན་སྤྱོད་ཀྱི་ལས་གདེང་དུ་གྱུར་པས་འཕྱོང་རྒྱས་པའི་གདུང་ལ་དམ་སྲི་རྒྱལ་བུར་རྫུས་པ་གདོང་ཕྱེད་ལ་ཤ་ལྤགས་བྲལ་བ་ཞིག་བྱུང་བ་རང་གཏེར་གཤིན་རྗེའི་སྒྲུབ་པ་མཛད་པས་བདུན་ཕྲག་གཉིས་ནས་རྣམ་ཤེས་དེངས་སུ་བཅུག་པ་སོགས་བརྗོད་ཀྱིས་ག་ན་ལྡང་། ལར་འཕྱོང་རྒྱས་ཞབས་དྲུང་ཧོར་བསོད་པ་དེ་ལྷ་སྲས་དཔལ་གྱི་འབྱུང་གནས་ཀྱི་སྐྱེ་བར་ལུང་གིས་ཟིན་ཅིང་དད་སྟོབས་བསམ་གྱིས་མི་ཁྱབ་པས་གསང་སྔགས་རྙིང་མའི་དགེ་འདུན་གྱི་སྡེ་ཞིག་འཛུགས་པར་ནན་གྱིས་བསྐུལ་ཡང་། ལྔ་བརྒྱའི་ཐ་མར་གྱུར་པས་གྲྭ་ས་གྲྭ་ཚང་གི་གནས་དག་ཀྱང་སྦྱོར་བ་ལྷོད་པོར་གྱུར་པའི་ཉེས་དམིགས་གཟིགས་ནས་ཞལ་གྱིས་མ་བཞེས་པའི་ཐོག་ཏུ་གཤེགས། དེའི་སྲས་ཧོར་བསོད་ནམས་སྟོབས་རྒྱས་ཀྱིས་ཡབ་ཀྱི་དགོངས་པ་རྫོགས་སླད་དང་། རང་གི་བཞེད་པ་སྟབས་གཅིག་པས་ནན་ཏན་གསོལ་བ་བཏབ་པ་ལ་བརྟེན་ནས་འཕྱོང་རྒྱས་དཔལ་རི་ཐེག་པ་ཆེན་པོའི་གླིང་འདི་གསར་དུ་བཏབ། སྤྱི་རྫས་དང་མཆོད་གཞིས་གཙུག་ལག་ཁང་གི་འདུ་འགོད་ཐམས་ཅད་ཞབས་དྲུང་འཕྱོང་རྒྱས་པ་རང་གི་བླ་ནས་སྦྱར། སྡིག་སྟེངས་རིན་པོ་ཆེ་ངག་དབང་འོད་ཟེར་མཁན་པོར་བསྐོས་ནས་དམ་པའི་ཆོས་འདུལ་བ་ལ་ལེགས་པར་གནས་པའི་བཅའ་ཁྲིམས་དང་། གཞི་གསུམ་གྱི་ཆོ་གའི་ཕྱག་ལེན་ལ་གནས་པས་ཕྱི་རུ་འདུལ་བའི་ཀུན་ཏུ་སྤྱོད་པ་ཉམས་སུ་བསྟར་ཞིང་། ནང་དུ་གསང་སྔགས་རྡོ་རྗེ་ཐེག་པའི་སྨིན་གྲོལ་རབ་འབྱམས་ལས་གྲུབ་མཐའི་གཞུང་རྒྱལ་བ་ཀློང་ཆེན་པའི་ཤིང་རྟ་ཆེན་མོ་རྩ་འགྲེལ་གྱིས་སློང་ཞིང་། ཉམས་ལེན་གཏེར་ཁ་གོང་འོག་དང་། ཡབ་སྲས་གཉིས་ཀྱི་གཏེར་ཆོས། སྙིང་ཏིག་ཡ་བཞི། བླ་མ་དགོངས་འདུས་ལ་སོགས་པས་གཞུང་སྲོང་བར་བསྟན་ནས་རིམ་གྱིས་སྔ་འགྱུར་བཀའ་མའི་རྒྱུད་སྡེའི་ལམ་སྲོལ་ཆེན་པོའང་སྟོན་པར་
བཞེད་ཀྱང་། སྡེ་དཔོན་ཕན་ཚུན་མི་མཛའ་བའི་ཀུན་སློང་གིས་གསོལ་བའི་སྙུན་གཞིས་ལོ་གཅིག་གི་ཁོང་དུ་ཞི་བར་མནལ་བས་བསྟན་པ་མཐའ་རྒྱས་ཀྱི་རྟེན་འདྲེལ་ལ་ཅུང་ཟད་གཞར། དེ་ལྟ་ནའང་དོན་གྱིས་ཐེག་པ་རིམ་དགུའི་གྲུབ་མཐའི་རྣམ་གཞག་དཔྱིས་ཕྱིན་པ་རྒྱལ་བ་ཀློང་ཆེན་པའི་གཞུང་གིས་སློང་ཞིང་། རྣལ་འབྱོར་དུ་བྱ་བའི་གནས་ལ་ཡོ་ག་གསུམ་ཀའི་ཟབ་ཅིང་རྒྱ་ཆེ་བའི་ངོ་བོ་མ་འཁྲུལ་ཞིང་མི་བསླུ་བ་གཏེར་ཁ་གོང་འོག །བླ་མ་དགོངས་འདུས། གྲོལ་བའི་ཐིག་ལེ་ལ་སོགས་པ་དང་། རིག་པ་རང་ཤར་གྱི་རྒྱུད་དོན་ལ་བྱེ་བྲག་ཏུ་འཇུག་པ་དགོངས་པ་ཡང་ཟབ་རྣམས་མདོ་སྒྱུ་སེམས་གསུམ་ཀའི་རྒྱུད་སྡེ་ལ་དོན་གྱིས་རྟོན་པ་སངས་རྒྱས་པདྨའི་རིང་ལུགས་མ་ནོར་བ་ཞེས་བྱའོ།། ཞབས་དྲུང་འཕྱོང་རྒྱས་པས་སེམས་ཉིད་ངལ་གསོ་རྩ་འགྲེལ་པར་གྱི་སྒོ་འཕར་ཕྱེ་བའི་གཏམ་ལའང་། འགྲོ་བ་ལྷ་དང་བཅས་པའི་སྟོན་པ་དཔལ་ཀུན་ཏུ་བཟང་པོ་དེ་ཉིད་ཀྱིས་རང་གིས་བདུད་རྩི་བརྙེས་པའི་གོ་འཕང་ལ་གདུལ་བྱ་རྣམས་དངོས་སམ་བརྒྱུད་པས་བཀྲི་བར་བཞེད་ནས། རྒྱུ་དང་འབྲས་བུའི་ཐེག་པ་ཇི་སྙེད་ཅིག་གསུངས་པ་དེ་ཐམས་ཅད་ཀྱི་དོན་སྙིང་པོར་དྲིལ་བ་ནི་མདོ་སྔགས་ཐམས་ཅད་གང་ཟག་གཅིག་འཚང་རྒྱ་བའི་ལམ་གྱི་ལུས་ཡོངས་སུ་རྫོགས་པར་སྟོན་པའི་བསྟན་བཅོས་འདི་ཉིད་ཀུན་མཁྱེན་ངག་གི་དབང་པོས་ཆེད་དུ་སྤེལ་བར་མཛད་པས། སྤྱིར་རྒྱལ་བའི་བསྟན་པ་ལ་ཞུགས་སོ་ཅོག་དང་། ཁྱད་པར་སྔ་འགྱུར་བར་ཁས་འཆེ་བ་རྣམས་ཀྱིས་བསྐྱེད་རིམ་ཚིག་རྐྱང་ཙམ་དང་། རྫོགས་རིམ་སྣ་རེའི་ཉམས་མྱོང་ཅུང་ཟད་ཀྱིས་ཡིད་ཚིམ་པར་བྱས་ན། དེ་དག་ལམ་ལྟར་སྣང་དང་ཡང་དག་པ་ཡིན་མིན་ཀྱང་མི་ཤེས་ཤིང་། བརྒྱ་ལ་རང་གི་རྒྱུད་ལ་མྱོང་བ་རྣལ་མ་ཞིག་སྐྱེས་ནའང་ལྷུགས་པའི་རྨི་ལམ་ལྟར་གཞན་ལ་འདོམས་པའི་མཐུ་མེད་པ་དག་གིས་གསར་རྙིང་གི་བསྟན་པ་མཐའ་དག་ཉམས་དམས་པ་ལ། མཁས་ཤིང་གྲུབ་པ་རྣམས་ཀྱིས་འཁུ་ཞིང་གཤུང་བ་དང་། གལ་ཏེ་མདོ་སྔགས་ཀྱི་གཞུང་ལུགས་རྒྱ་ཆེན་པོ་ལ་སློབ་པ་ནི་
སྙིགས་མ་ལྔ་བདོ་བའི་དུས་འདིར་གཤིས་ཀྱིས་དཀའ་བ་ལ་དགོངས་ནས་འདི་ནི་མདོ་རྒྱུད་དང་རྒྱ་གཞུང་རྩོད་པ་དང་བྲལ་བ་རྣམས་ཀྱི་ལུང་ཇི་ལྟ་བར་བཀྲལ་བས། བློ་གྲོས་དང་ལྡན་པ་དག་གིས་རྐང་ཚུགས་པའི་རྟོག་དཔྱོད་ཀྱི་མིག་ཞིབ་མོས་གོ་བའི་གཏིང་ཕྱིན་པར་བལྟས་ཚེ། དཔྱད་པ་ཡོངས་སུ་རྫོགས་པ་ན་ལམ་གྱི་རིམ་པ་འདི་ཉིད་ལ་ངེས་པ་གཏིང་ནས་འདྲོངས་ཤིང་། དེའི་ཚུལ་ལ་གནད་དུ་བསྣུན་ནས་ཉམས་སུ་བླངས་ན་རྒྱལ་བ་སྲས་དང་བཅས་པ་དགྱེས་པའི་འཕྱུག་མེད་ཀྱི་མྱུར་ལམ་ངོ་མཚར་རྨད་དུ་བྱུང་བ་ཡིན་ཞེས། རྗེ་བཙུན་དམ་པ་པྲཛྙཱ་ར་སྨིའི་གསུང་གི་གསང་བས་ལན་ཅིག་མ་ཡིན་པར་བསྙད་པ་ལ་བརྟེན་ནས། ཆོས་བཞིན་དུ་ས་སྐྱོང་བ་མིའི་དབང་པོ་བསོད་ནམས་སྟོབས་ཀྱི་རྒྱལ་པོས། ཉིད་ཀྱི་ཡབ་རྗེའི་དགོངས་པ་བསྐང་བ་དང་། སྔ་འགྱུར་གྱི་བསྟན་པ་རིན་པོ་ཆེ་འཕེལ་རྒྱས་ཀྱི་ཕྱིར། འཁོར་ལོ་གསུམ་ལ་ལྷུར་བྱེད་པའི་དགེ་འདུན་གྱི་སྡེ་བཙུགས་ཤིང་། དེ་དག་གི་འཚོ་བ་བླ་ནས་སྦྱོར་བ་དང་། སྨིན་གྲོལ་ལམ་གྱི་ཆ་ལག་ཚེས་བཅུ་ཆེན་མོའི་ཕྱག་བཞེས་ཀྱི་སྲོལ། དེ་དག་གི་ཆས་སོགས་གཞན་གྱི་བློས་དཔག་པར་དཀའ་བའི་རྒྱུན་དང་། བསྟན་བཅོས་འདི་ཉིད་ཀྱི་གླེགས་བམ་གྲངས་མེད་དུ་འཆར་བའི་ཕྱིར་པར་དུ་བཞེངས་ཏེ་བསྟན་པའི་བཙས་སུ་བཞག་པ་ཡིན་ལ། ཞེས་སོ། །རྒྱུ་དེས་སེམས་ཉིད་ངལ་གསོ་རྩ་འགྲེལ་དང་། གསང་བའི་སྙིང་པོ། འགྲེལ་པ་ཕྱོགས་བཅུ་མུན་སེལ་སོགས་བློ་ལ་འདོམས་པར་བྱེད་པའི་རྒྱུན་ད་ལྟའི་བར་དུའང་གནས་པ་ཙམ་མོ། །དེ་ལྟར་དགོན་གནས་བསྐྲུན་ནས་ཡུན་རིང་མ་སོང་བ་ལ། དེ་བཞིན་གཤེགས་པ་ལ་བདུད་སྡིག་ཏོ་ཅན་གྱིས་བསྐུལ་བ་བཞིན་དུ་སྐུ་མྱ་ངན་ལས་འདའ་བར་བཞེད་ནས་རྗེས་འཇུག་རྣམས་ལ་ཞལ་ཐེམས་སུ། ངེད་ཀྱི་ཕུང་པོ་འདི་ས་འབུམ་གཅིག་ཏུ་བཞག་ན་མཐར་ནོར་བུ་དབྱིག་ཏུ་འགྱུར་ཞིང་། བོད་འབངས་ལ་དགེ་བ་དང་། མཐའ་དམག་བཟློག་པའི་
རྟེན་འདྲེལ་ཡོད་དེ་དུས་དབང་གིས་ཅིར་འགྱུར་ཆ་མེད། དེ་བས་དུམ་བུར་བྱས་ཏེ་ཡར་རྒྱབ་གཙང་པོའི་ཆུ་ལ་སྦྱངས་ན་ཀོང་པོ་རྒྱ་ལ་ཡན་ཆོད་ཀྱི་སེམས་ཅན་ལ་ཕན་ཏེ་མི་ནུས། དུས་ཀྱི་དབང་ལས་བསྟན་པ་འཕེལ་རྒྱས་ཡོང་བ་གཤིས་ཀྱིས་དཀའ། དགེ་འདུན་རྣམས་རང་རང་གི་བསྟན་པ་སྒོ་དྲུང་ནས་མ་ནུབ་པར་གྱིས་ལ་སྒྱེ་བེམ་རེ་གྱོན། གཙོ་བོར་ཐོས་བསམ་སྒོམ་པ་ལ་འབད་འབུངས་ཐོན། ཕྲལ་བྱ་བ་གང་ཐོངས་རང་གྱིས། དཀའ་ཐུབ་འདིས་དལ་རྟེན་ཆུད་འཛའ་བས་འཚོ་བ་གྱི་ན་ཙམ་རེ་བསྟེན། སྡོམ་པ་གསུམ་ལ་ཉེས་ལྟུང་གི་དྲི་མས་མ་གོས་པར་བརྩོན་འགྲུས་དྲག་པོས་འབོད། གཉེན་པོས་རྐྱེན་ཐུབ་པ་དང་། དད་པས་ཁམས་གསོས་པ་དང་། འགྲོ་རྣམས་ཕ་མར་ཤེས་པའི་ཉམས་ལེན་ལ་འབུངས། ང་དང་ཕྲད་པར་འདོད་པ་རྣམས་གྲོལ་ཏིག་དགོངས་པ་རང་གྲོལ་དང་། བེ་བུམ་གྱི་མན་ངག་རྣམས་ལ་ཉམས་ལེན་མཛོད། ཅེས་གདམས། དག་པའི་གསལ་སྣང་དཔག་ཏུ་མེད་པ་གཟིགས། ཁྱད་པར་ཉིན་གཅིག་དུས་ཀྱི་འཁོར་ལོའི་མངོན་དཀྱིལ་རྫོགས་པར་གནང་ནས་དབང་མཛད་པས། དགེ་སློང་འབྲི་གུང་པ་ན་རེ། ལོ་དུས་གནང་བ་ཨེ་ཡིན་ཞུས་པས་དེ་འདྲ་བྱེད་པ་མེད། ཆོ་ག་གཟུང་ཡང་མ་མྱོང་། དེ་རིང་བྱང་ཤམྦྷ་ལའི་སྣང་བ་མུ་མཐའ་མེད་པར་ཤར་ནས་སྐྱེ་བོའི་ཚོགས་མང་པོས་གསོལ་བ་འདེབས་པ་ལ་དེ་ལྟར་བྱས་པ་ཡིན། ལར་ཞིང་ཁམས་མང་པོར་དབང་དང་བྱིན་རླབ་བགྲང་ལས་འདས་པ་བྱས་པའི་སྣང་བ་དང་། གསལ་སྣང་འབའ་ཞིག་ལས་སྣང་བ་རང་མཚན་པར་འཆར་གྱི་མི་འདུག །ད་རེས་ཀྱི་ནད་འདིས་སྡིག་སྒྲིབ་དག་པ་འདྲ་གསུངས། ཡང་ཀུན་གྱི་མཐོང་སར་བྱིས་པ་གཅིག་བྱུང་། ཅི་ལགས་ཞུས་པས། ཆུ་བར་ནས་ང་ཕྲད་པ་ལ་བྱོན་པ་ཡིན། འབྲི་གུང་ཨ་ཕྱི་དང་། བསྟན་སྐྱོང་མ་སོགས་བོད་ཀྱི་ལྷ་འདྲེ་ཆེ་དགུ་ངོས་ཕྲད་ལ་བྱོན་གྱི་འདུག །ལྷ་འདྲེ་རྣམས་ཕྱི་ཐག་རིང་བས་སྡུག་བསྔལ་ཆེན་པོ་འདུག་གསུངས།
དེ་ནས་ཆུ་སྤྲེལ་ཧོར་ཟླ་དྲུག་པའི་ཚེས་བཅུའི་ཉིན་དགོངས་པ་འཕོ་བར་བཞེད་པ་ལ། གཉགས་ཛྙཱ་ན་ཀུ་མཱ་རའི་སྤྲུལ་པར་ལུང་གིས་ཟིན་པ་རྒྱལ་སྲས་ཀརྨ་ཀུན་བཟང་ཡུམ་སྲས་སོགས་ཀྱིས་མྱ་ངན་ལས་མི་འདའ་བར་གསོལ་བ་བཏབ་པས། སངས་རྒྱས་ཀྱི་སྐུ་ཚེའི་འདུ་བྱེད་ནི་བཏང་། འཚོ་བའི་འདུ་བྱེད་ནི་བསྲིངས་པ་བཞིན་དུ་འོ་ན་ཞག་གསུམ་བསྡད་དོ་གསུངས་ནས་ཚེས་བཅུ་གསུམ་གྱི་སྔ་ཞོགས་ཀུན་གྱིས་མཐོང་བར་ནམ་མཁའི་དབྱིངས་ནས་འཇའ་ཚོན་ཆེན་པོ་སྣ་ལྔའི་དྲ་བས་སྦྲེལ། ས་ཆེན་པོ་འདི་ཡང་མྱ་ངན་གྱིས་གདུངས་པའི་ཆོ་ངེའི་སྒྲ་འུར་གྱིས་འདོན། སྐྱེས་བུ་ཆེན་པོ་འཇིག་རྟེན་དུ་མི་བཞུགས་པ་ལ་ཡིད་རབ་ཏུ་སྐྱོ་བས། འདར་ཞིང་གཡོ་བའི་སྒྲ་ཆེན་པོ་དང་བཅས། དཔལ་རི་པདྨ་འོད་ཀྱི་ནུབ་ཕྱོགས། བདེ་བ་ཆེན་པོ་ཤཱནྟ་པུ་རིའི་གྲོང་ཁྱེར་ག་ན་བ་དེར་དཔའ་བོ་ཆེན་པོ་ཐོད་པའི་དུམ་བུ་རྩལ་གྱི་ཐུགས་ཀར་ཐིམ་པར་གྱུར་ཏོ།། །། ཡང་བསྐྱེད་རྫོགས་གསུམ་གའི་བསྟན་པ་ལ་བྱ་བ་བླ་ལྷག་ཏུ་མཛད་པའི་དམ་པ་འགའ་ཞིག་མདོ་དབང་ཆེན་མོའི་བརྒྱུད་རིམ་གྱི་ལམ་དུ་བཞུགས་པ་ནི། སྒྲོལ་ཆེན་བསམ་འགྲུབ་རྡོ་རྗེ་ནས་ཟུར་ཧཾ་ལྕམ་སྲིང་གཉིས་ལས་སོ་སོར་བརྒྱུད་པ་དང་། སྲས་ཀྱི་རྒྱུན་ལས་བརྒྱུད་པ་སྟེ་གསུམ་བྱུང་བ་ལས་དང་པོ་ཟུར་ཧཾ་ལས་བརྒྱུད་པ་ནི་ཟུར་ཧཾ་དེ་ཉིད་ལ་གདན་ས་ཡང་དབེན་དུ་རི་སྦུག་པ་ལང་གྲོ་ཚེ་དབང་རྒྱལ་པོས་གསན་ཏེ། དེ་ལས་ཆུ་བར་ཉི་སྦུག་པ་བརྒྱུད་འཛིན་ལེགས་པ་དཔལ་བཟང་གིས་གསན། དེ་ལས་མངའ་རིས་དབུ་རྩེ་བ་འཇམ་དབྱངས་ཞི་ཆེན་རྒྱལ་མཚན་གྱིས་གསན། དེས་ཡོས་ཀྱི་ལོ་ལ་མངའ་རིས་གློ་བོ་མ་ཐང་དུ་སྲས་པཎ་ཆེན་སྐུ་མཆེད་ལ་དབང་བསྐུར་ཏེ། གཉིས་ཀ་མཁས་ཤིང་གྲུབ་པའི་དབང་ཕྱུག་ཏུ་གྱུར་ཅིང་། ཁྱད་པར་གཅུང་རིག་འཛིན་ལེགས་ལྡན་རྗེས་མདོ་དབང་གསན་དུས་དགུང་ལོ་བརྒྱད་པ་ཡིན། སྤྱིར་བརྒྱ་དང་བཅུ་གསུམ་བཞུགས་ནས་བཤད་སྒྲུབ་ཀྱི་ཕྲིན་ལས་རླབས་པོ་ཆེས་བསྟན་འགྲོའི་དོན་མཛད།
དེ་ལ་འཇམ་དབྱངས་མཁྱེན་བརྩེ་ཁུ་དབོན་གྱིས་གསོལ་བ་བཏབ་པ་ལ་བརྟེན་ནས་ཉུག་གི་རྒྱལ་ཁང་དུ་འདུས་པ་མདོའི་ཆུ་བོ་བཞི་རྫོགས་ཀྱི་དབང་གཏད་རྒྱ་དང་བཅས་གནང་བའི་དུས་སྐྱི་སྟོན་ཚེ་རིང་དབང་པོས་ཀྱང་གསན་ཅིང་། དེས་གཙང་བསམ་འགྲུབ་རྩེའི་སྤེལ་དཀར་དུ་མདོ་དབང་གཏད་རྒྱ་དང་བཅས་གནང་བའི་ཚེ་བླ་ཆེན་དྲེས་གཤོངས་པ་གཉགས་སྟོན་ཆོས་རྒྱལ་རྡོ་རྗེ་ཆུང་ངུ་ཞིག་ཡབ་མང་ར་བ་པདྨ་བདུད་འདུལ་གྱིས་ཁྲིད་དེ་རྫོགས་པར་གསན། ཕྱིས་གོང་ར་ལྷུན་གྲུབ་སྡིངས་སུ་ལོ་ཆེན་གཞན་ཕན་རྡོ་རྗེ་དང་། གཙང་ཐེག་མཆོག་གླིང་འདུས་པ་དང་ལྷན་ཅིག་རྫོགས་ཆེན་པ་ནམ་མཁའ་འབྲུག་སྒྲ་བཟང་པོ་ལའང་གསན་ཅིང་། འདི་ནི་མངའ་རིས་འོད་གསལ་མཆོག །གོང་ར་ལོ་ཆེན། ལྷ་བཙུན་ནམ་མཁའི་འཇིགས་མེད་གསུམ་རྩ་བའི་བླ་མར་འཁུར་ཞིང་། དེ་སོགས་བླ་མ་དམ་པ་མང་པོ་བསྟེན་ནས་གསན་པ་རྒྱ་ཆེ། རྟེན་ཚངས་སྤྱོད་གྲུབ་པའི་དབང་ཕྱུག་ཆེན་པོའོ། །དེས་རོང་སྨུའི་ཤམ་བྷར་དུ་སྐུ་མཚམས་དམ་པོར་བཅད་དེ་ཡང་ཏི་ནག་པོའི་ཁྲིད་མཛད་པའི་ཟོལ་གྱིས་གསང་ཁོག་ཏུ་སྨན་ལུང་པ་ཆེན་པོ་ཉང་སྟོན་བློ་མཆོག་རྡོ་རྗེ་ཉིད་ལ་ཆིག་བརྒྱུད་ཆོས་དབང་གི་གཏེར་ཆོས་ལ་མཁས། རྒྱལ་མཆོག་ལྔ་པ་ཆེན་པོས་ཏི་ཤྲིར་བཀུར་བ་སོགས་མཁས་གྲུབ་མང་པོའི་གཙུག་རྒྱན་ནོ། །དེས་སྔ་འགྱུར་བསྟན་པའི་མངའ་བདག་རྡོ་རྗེ་བྲག་རིག་འཛིན་མཆོག་གི་སྤྲུལ་པའི་སྐུར་མདོ་དབང་གཏད་རྒྱ་མན་ངག་ཕྱག་བཞེས་དང་བཅས་པ་མཐའ་རྒྱས་སུ་བསྩལ་ཞིང་། དམ་པ་འདི་ནི་སྣ་ནམ་རྡོ་རྗེ་བདུད་འཇོམས་ཀྱི་ཡང་སྲིད་རིག་འཛིན་རྗེའི་སྐྱེ་བ་སྤྲུལ་པའི་སྐུ་སྟེ། མོན་མཁར་རྣམ་སྲས་གླིང་དུ་བྱ་ནག་གི་རིགས་ལས་སྡེ་པ་ཀརྨ་ཕུན་ཚོགས་དབང་པོའི་སྲས་སུ་ལྕགས་མོ་སྦྲུལ་
གྱི་ལོ་ལ་འཁྲུངས། བྱང་པ་རིག་འཛིན་ངག་གི་དབང་པོའི་སྔོན་རབས་གསལ་བར་སད་པས་དགུང་ལོ་དྲུག་པ་ལ་གོང་མའི་གདན་སར་སྤྱན་དྲངས། བྲི་ཀློག་དང་འཕྲིན་སྒྲུབ་ནས་བཟུང་། གཞུང་ལུགས་ཀྱི་ཐུགས་སྦྱོང་བར་ཚེགས་མེད་པར་མཁྱེན། ཀུན་མཁྱེན་རྒྱལ་མཆོག་ལྔ་པ་ཆེན་པོར་གཙུག་ཕུད་ཕུལ་ཏེ། མཚན་ཀུན་བཟང་པདྨ་ཕྲིན་ལས་སུ་བསྩལ། ཕྱིས་དེ་ཉིད་ཀྱི་ཞབས་དྲུང་དུ་བསྙེན་པར་རྫོགས་ཤིང་ཟབ་ཆོས་མང་དུ་གསན། གཞན་ཡང་ཟུར་ཆེན་ཆོས་དབྱིངས་རང་གྲོལ། མགོན་པོ་བསོད་ནམས་མཆོག་ལྡན་སོགས་མཁས་གྲུབ་ཀྱི་བླ་མ་མང་དུ་བསྟེན་ནས། གསར་རྙིང་གི་དབང་ཁྲིད་བཤད་ལུང་མན་ངག་སོགས་ཆོས་བཀའ་མཐའ་ཡས་པ་ཞིག་ངོམ་པ་མེད་པར་གསན་ཅིང་། བསམ་བྱུང་གིས་གཏན་ལ་ཕབ་པས་ཐོགས་པ་མེད་པའི་མཁྱེན་རབ་རྒྱས། སྒྲགས་མང་རྫོང་། ཆུ་བོ་རི། གདན་ས་ལ་སོགས་པར་སྒོམ་པའི་ཤེས་རབ་ཀྱིས་ཉམས་སུ་བཞེས་པས་བསྐྱེད་རིམ་ལ་བརྟན་པ་ཐོབ། རྫོགས་རིམ་གྱི་ཡེ་ཤེས་ལ་དབང་འབྱོར་པས་མཁས་གྲུབ་ཆེན་པོར་གྱུར་ཏེ། མཁྱེན་བརྩེ་ནུས་པའི་ཕྲིན་ལས་བཤད་སྒྲུབ་ལས་གསུམ་གྱི་འཁོར་ལོ་ལས་ནམ་ཡང་མི་གཡེལ་བ་དང་། ཁྱད་པར་ཀུན་མཁྱེན་རྒྱལ་བ་ལྔ་པ་མཆོག་གི་ལུང་གིས་བསྐུལ་ཏེ་འདུས་པ་མདོའི་དབང་ཆོག་དཀྱིལ་འཁོར་རྒྱ་མཚོའི་འཇུག་ངོགས་ཞེས་བྱ་བའི་བཀའ་རྩོམ་དང་། མདོ་དབང་ཀྱང་ཚར་མང་དུ་མཛད་པ་སོགས་ཀྱིས་མདོའི་བསྟན་པ་ལ་ཕན་པ་ཆེན་པོ་འགྱུར་ཅིང་། དགུང་གྲངས་བདུན་ཅུ་དོན་བདུན་གྱི་བར་དེ་སྙེད་དུ་བསྟན་འགྲོའི་དོན་རྒྱ་ཆེན་པོ་མཛད་ཅིང་བཀའ་རྩོམ་ཀྱང་བཀའ་གཏེར་གཉི་གའི་ཕྱོགས་སུ་བསྟན་པའི་སྨན་ཡོན་ཆེན་པོར་འགྱུར་བ་པོད་གསུམ་ཙམ་བཞུགས་སོ། །གཉིས་པ་ཟུར་མོའི་བརྒྱུད་པ་ནི་ཁམས་ལུགས་ཏེ་ཀཿཐོག་གི་སྐབས་བཤད་ཟིན། གསུམ་པ་སྲས་བརྒྱུད་ནི། སྒྲོལ་ཆེན་གྱི་སྲས་སངས་རྒྱས་རིན་ཆེན་གྱིས། ཞང་སྟོན་ནམ་མཁའ་རྡོ་རྗེ་ལ་བརྒྱུད་དེ། འདི་
ནི་སྒྲོལ་མ་ཡབ་སྲས་གཉིས་ཀའི་བསླབ་རྫོགས་ཀྱི་སློབ་མ་མཁས་པ་ཞིག་སྟེ། འཇམ་དབྱངས་བསམ་གྲུབ་རྡོ་རྗེ་གཤེགས་པའི་མཆོད་འབུལ་ལ་བུ་ཆེན་གྱི་མཆོག་ཏུ་གྱུར་པའི་བླ་མ་རྣམས་ཀྱིས་དབུ་མཛད་པའི་ཆོག་གྲ་བཅུ་བཞི་ཙམ་བསྒྲུབས་པའི་བུ་ཆེན་འདྲེན་དུས་བླ་མ་ཟུར་ཆེན་པ་དང་། བླ་མ་གནམ་སྡིངས་པ་དང་། ཞེས་རྣམ་ཐར་དུ་འགྲངས་པ་དེ་ཡིན། ཁྱད་པར་མདོ་དབང་གཏད་རྒྱ་བཤད་པ་གདམས་ངག་དང་བཅས་པ་སྲས་སངས་རྒྱས་རིན་ཆེན་ལ་བདེ་ཆེན་སྒྲོལ་མར་གསན། རྒྱུད་ལུང་མན་ངག་སྒྲུབ་སྡེ་དང་བཅས་པ་ཐམས་ཅད་ལ་མཁས། རྟ་ནག་གནམ་སྡིངས་ཀྱི་སྒྲུབ་ཁང་དུ་ཉམས་ལེན་ལ་གཙོ་བོར་བསྒྲིལ་བས་རླུང་སེམས་ལ་བརྟན་པ་ཐོབ། བསྐྱེད་རྫོགས་ཀྱི་དགོངས་པ་མངོན་དུ་གྱུར། ཕྲིན་ལས་བཞི་ལ་དབང་འབྱོར་བས་གདུལ་བྱའི་དོན་མཛད་དོ། དེས་མཁས་གྲུབ་ཤ་མི་རྡོ་རྗེ་རྒྱལ་མཚན་ལ་གནམ་སྡིངས་དཔལ་གྱི་སྒྲུབ་ཁང་དུ་དབང་བསྐུར་ཞིང་བཤད་པ་གདམས་ངག་དང་བཅས་པ་གནང་། དབེན་གནས་བདེ་ཆེན་དུ་སྒྲུབ་པ་ལ་བཞུགས་པས་བསྐྱེད་རིམ་ལ་བརྟན་པ་ཐོབ་སྟེ་ལས་བཞི་ཐོགས་མེད་དུ་འགྲུབ། རྫོགས་རིམ་གྱི་ཉམས་རྟོགས་མཐར་ཕྱིན། བཤད་སྒྲུབ་གཉིས་ཀའི་ཕྱོགས་ནས་བསྟན་པའི་དོན་མཛད་དོ། །དེས་རིག་འཛིན་གཡུ་འབྲུག་རྡོ་རྗེ་ལ་བདེ་ཆེན་གྱི་སྒྲུབ་གནས་སུ་འདུས་པ་མདོའི་དབང་གཏད་རྒྱ་དང་བཅས་པ་རྫོགས་པར་བསྐུར་ཞིང་། བཤད་པ་དང་གདམས་ངག་ཀྱང་བསྩལ། འོན་དང་རྡོ་སོགས་དབུས་རིའི་དབེན་གནས་རྣམས་དང་གཙོ་བོར་གཡས་རུ་རྟ་ནག་གི་ལ་རྒུ་རྡོས་དགོན་དུ་ཉམས་ལེན་ལ་ཆིག་སྒྲིལ་གྱིས་བཞུགས་པས་བླ་མ་སྒྲུབ་ཆེན་པ་ཞེས་ཀྱང་མཚན་དུ་གྲགས། ཉམས་རྟོགས་མཐར་ཕྱིན་པ་བརྙེས། བྱིན་བརླབས་མཛད་པ་ཙམ་གྱིས་ནད་གདོན་ལས་གྲོལ་བ་སོགས་མཐུ་སྟོབས་ནུས་པའི་རྩལ་ཐོན། དགུང་ལོ་ཡང་ཤིན་ཏུ་སྨིན་པར་བཞུགས་ཏེ་དབེན་པར་ཉམས་ལེན་དང་སྦྲགས་ནས་ཐར་འདོད་ཀྱི་གདུལ་བྱ་སྐལ་ལྡན་རྣམས་སྨིན་གྲོལ་ལ་འགོད་པར་མཛད་དོ།། དེས་གཉགས་ཛྙཱ་ན་ཀུ་མཱ་རའི་སྤྲུལ་
པ་མཁས་གྲུབ་བློ་གྲོས་རྒྱལ་མཚན་དཔལ་བཟང་པོ་ལ་འདུས་པ་མདོའི་ཆུ་བོ་བཞི་རྫོགས་ཀྱི་དབང་གཏད་རྒྱ་བཤད་པ་གདམས་ངག་ཕྱག་བཞེས་དང་བཅས་པ་བསྩལ། འདི་ནི་གཙང་གཡས་རུའི་ཐག་གདོང་ཁར་དུ་ལྡོང་གི་རིགས་སུ་འཁྲུངས། ཆུང་ངུ་ནས་ཐ་སྙད་ཀྱི་རིག་པ་རྣམས་ཚེགས་མེད་པར་མཁྱེན་ཅིང་། ཁྱད་པར་གསོ་རིག་ལ་མཁས། གཞོན་ནུའི་དུས་སྡེ་པ་གདོང་ཁར་བའི་ཞབས་ཕྱིར་བཞུགས་པས་མཚན་གདོང་ཁར་འཚོ་བྱེད་དུ་གྲགས། དར་ལ་བབ་པ་ན་རིགས་སད་དེ་རབ་ཏུ་བྱུང་ནས། བླ་ཆེན་རྡོ་རྗེ་འཆང་གྲགས་པ་རིན་ཆེན། ཡོངས་འཛིན་ངག་དབང་གྲགས་པ། པད་གླིང་ཐུགས་སྲས་ཟླ་བ་རྒྱལ་མཚན། གཏེར་སྟོན་ཞིག་པོ་གླིང་བ། སྐུ་ལུས་མ་སྤངས་པར་མཁའ་སྤྱོད་དུ་གཤེགས་པ་རྡོ་རྗེ་སེང་གེ་སོགས་མཁས་གྲུབ་ཀྱི་བླ་མ་དམ་པ་དུ་མའི་ཞབས་ལ་གཏུགས་ཏེ། ཆོས་ཀྱི་སྒོ་མཐའ་ཡས་པ་ཞིག་ངོམ་པ་མེད་པར་གསན། དེ་ཡང་གསན་ལོ་ཙམ་དུ་མ་བཞག་པར་སྒྲོ་འདོགས་ཆོད་པར་མཛད་ནས། འདུ་འཛི་དང་གཡེང་བས་མི་འཕྲོགས་པར་ཉམས་བཞེས་ལ་འབད་པས་ཐོས་བསམ་སྒོམ་གསུམ་ཅིག་ཅར་དུ་གྲུབ། དེའི་མཐུས་ཉམས་རྟོགས་དང་མཁྱེན་རབ་ཀྱི་ཀློང་ནང་ནས་བརྡོལ་ཏེ། མདོ་སྔགས་ཀྱི་གཞུང་ལུགས་སྤྱི་དང་ཁྱད་པར་སྔ་འགྱུར་བཀའ་གཏེར་གྱི་ཆོས་གང་ལའང་ཐོགས་པ་མེད་པའི་མཁྱེན་རབ་རྒྱས། རྫོགས་པ་ཆེན་པོ་རང་སྣང་རིས་མེད་ཀྱི་དགོངས་པ་ཤར། རྩ་རླུང་ཐིག་ལེའི་འགྲོས་དབུ་མར་ཐིམ། རྨི་ལམ་སྤྱོད་སྤེལ་སྤྲུལ་སྒྱུར་ལ་དབང་འབྱོར་པས་དག་པའི་ཞིང་བགྲོད་ནས་སངས་རྒྱས་དང་བྱང་སེམས་མང་པོའི་ཞལ་མཇལ་ཞིང་ལུང་བསྟན་ཐོབ། ནུས་པས་བོད་འཕུང་བྱེད་ཀྱི་འབྱུང་པོ་དང་མཐའ་དམག་གདུག་པ་ཅན་རྣམས་ཚར་གཅོད་པ་དང་། བསྲུང་ཞིང་བཟློག་པའི་རྟགས་ཕྲལ་ཏུ་ཐོན་པས་སྙན་གྲགས་ཀྱིས་ཀུན་ཏུ་ཁྱབ། སྐུ་ཚེའི་སྨད་ལ་ཉང་སྨད་སྐྱིད་སྦུག་ཏུ་བཞུགས་ནས་འོད་གསལ་རྡོ་རྗེ་སྙིང་པོའི་དགོངས་པ་ལས་མ་གཡོས་
བཞིན་དུ་དབང་བཤད་ལུང་ཟབ་སྲིད་སོགས་གདུལ་བྱའི་དབང་པོ་དང་འཚམས་པའི་ཆོས་འཆད་སྤེལ་རྒྱུན་ཆགས་སུ་མཛད་པས་སོ་སོའི་རེ་བ་སྐོང་ཞིང་རྣམ་བཤད་སྒྲུབ་ཡིག་ཆོག་འཕྲིན་ཕྱག་བཞེས་ཆོས་འབྱུང་རྩོད་ལན་སོགས་ཀྱི་རྩོམ་པ་དང་། གསེར་པོད་ཀྱི་རྒྱུད་བཅུ་བདུན། བི་མ་སྙིང་ཐིག །བདེ་འདུས་སོགས་ཀྱིས་མཚོན་བཀའ་གཏེར་གྱི་གླེགས་བམ་དུ་མ་བཞེངས་པ་ལ་སོགས་ཏེ་བཤད་སྒྲུབ་ལས་གསུམ་གྱི་ཕྲིན་ལས་རླབས་པོ་ཆེས་སྔ་འགྱུར་གྱི་བསྟན་པ་གསལ་ཞིང་རྒྱས་པར་མཛད། འདིས་འཆི་བ་བརྟགས་པ་སླུའི་ཡི་གེ་དེ་དགུང་ལོ་བདུན་ཅུ་དོན་གསུམ་པ་ལ་མཛད་པར་གསལ་བས་སྐུ་ཚེ་ཡང་རིང་པོར་བཞུགས་པར་མངོན་ནོ།། དེས་གོང་ར་ལོ་ཆེན་གཞན་ཕན་རྡོ་རྗེ་ལ་འདུས་པ་མདོའི་ཆུ་བོ་བཞི་རྫོགས་ཀྱི་དབང་གཏད་རྒྱ་བཤད་པ་གདམས་ངག་ཕྱག་བཞེས་དང་བཅས་པ་གནང་ཞིང་། དམ་པ་འདི་ནི་གནུབས་ཁྲོ་ཕུ་བའི་གདུང་རིགས་རྟོགས་ལྡན་ཆོས་ཉིད་རང་གྲོལ་གྱི་ཡང་ཚ་ལོ་ཆེན་ངག་གི་དབང་པོའི་གཅུང་དབོན་ཆེན་ཞེས་པའི་སྲས་སུ་ཤིང་ཕོ་རྟའི་ལོ་ལ་འབྲས་ཡུལ་བཀྲ་ཤིས་གླིང་དུ་འཁྲུངས། བྱིས་པའི་དུས་ཐུགས་རྒོད་ཅིང་བརྟུལ་ཞུགས་ཆེ་བས་སུ་ལའང་མི་འཇིགས་པའི་སྤོབས་པ་མཐོ། ཆུང་ངུ་ནས་ཆགས་བྲལ་གྱི་རྟེན་ལ་འདུན་པ་ལྟར་ཞྭ་དམར་ཆོས་ཀྱི་དབང་ཕྱུག་གི་དྲུང་དུ་དགུང་ལོ་བཅུ་གཉིས་པ་ལ་དགེ་ཚུལ་དང་། ཉེར་གཅིག་པ་ལ་བསྙེན་རྫོགས་བཞེས་ནས་སྐུ་བཙུན་པའི་མཆོག་ཏུ་གྱུར། རང་གི་ཁུ་བོ་ཞྭ་དམར་པའི་རིག་གནས་ཀྱི་སློབ་དཔོན་དུ་སྤྱན་དྲངས་པའི་ཕྱགས་ཕྱིར་འབྲངས་ཏེ། སྒྲ་ཀ་ལཱ་པ། སྙན་ངག་མེ་ལོང་། སྡེབ་སྦྱོར། སྐར་རྩིས། རྒྱ་བོད་ཀྱི་ཡིག་སྣ་སོགས་བརྡ་སྤྲོད་ཡན་ལག་དང་བཅས་པ་ལ་མཁས་པར་སྦྱངས། ཆོས་རྗེ་ཉིད་དང་རིན་པོ་ཆེ་སྨྲ་སེང་སོགས་ལས་མཚན་ཉིད་ཀྱི་གཞུང་ཅི་རིགས་པའང་སློབ་པར་མཛད་ཅིང་ཆོས་གསུངས་པ་རྣམས་ཀྱང་ཞར་ཆོས་སུ་གསན། ཁྱད་པར་རང་གི་ཁུ་བོ་ལོ་ཆེན་ངག་གི་དབང་པོ། མཁས་གྲུབ་བློ་གྲོས་རྒྱལ་མཚན། གསུང་སྤྲུལ་ཚུལ་ཁྲིམས་རྡོ་རྗེ། སྙི་ཕུ་བ་རིག་འཛིན་སྙིང་པོ། རྩེ་ལེ་པདྨ་ལེགས་གྲུབ། ཀཿཐོག་པ་པདྨ་བློ་གྲོས།
ཡོན་དོ་པ་བཀྲ་ཤིས་ལྷུན་གྲུབ་སོགས་སྐྱེས་ཆེན་མང་པོ་བསྟེན་ནས། སྔ་འགྱུར་བཀའ་གཏེར་གྱི་ཆོས་དཔག་ཏུ་མེད་པ་གསན་ཅིང་སྒྲོ་འདོགས་ཆོད་པར་སྤྱངས། བསྐྱེད་རྫོགས་ཀྱི་སྒོམ་སྒྲུབ་ལ་བརྩོན་པར་མཛད་པས་ཉམས་རྟོགས་མཐར་ཕྱིན། འཇིག་རྟེན་ཆོས་བརྒྱད་ཀྱི་འདུ་འཛིས་མ་གོས་པས་རྗེས་སུ་འབྲང་བ་ཐམས་ཅད་ཀྱང་དམ་པའི་ཆོས་ལ་ངང་གིས་སྦྱོར། རྙིང་མ་རྒྱུད་འབུམ་ཚར་གསུམ་བཞེངས་པའི་དང་པོ་གཉིས་བསྟན་རྒྱུན་ལ་དགོངས་ནས་ཁམས་དང་ཀོང་ཡུལ་དུ་སྐྱེལ་བར་མཛད་པས་མཚོན་འགྲོ་དོན་ནུས་པ་ལ་ཕྱག་དཔེ་སོགས་ཕྱག་ན་གང་ཡོད་སྩོལ་ཞིང་མེད་ནའང་སྒྲུབ་པའི་རྒྱུའི་དངོས་པོ་ལྷུག་པར་གཏོང་། རྙིང་རྒྱུད་ཀྱི་ལུང་རྒྱུན་ཀྱང་རྗེ་འདི་ལས་ཁམས་དབུས་སུ་ཁྱབ་པས་བསྟན་པ་ལ་སྐུ་དྲིན་ཆེ། མདོ་སྔགས་རིག་གནས་དང་བཅས་པའི་འཆད་འཕྲིན་རྒྱུན་མི་འཆད་པས་གདུལ་བྱའི་རེ་བ་རྫོགས་པར་མཛད་ཅིང་། ཆོས་ཉན་པ་རྣམས་ལ་འཚོ་བས་ཀྱང་རྟག་ཏུ་སྐྱོང་། མདོར་ན་མཁས་བཙུན་བཟང་གསུམ་གྱི་ཡོན་ཏན་གྱིས་མཐོ་ཞིང་། བཤད་སྒྲུབ་ལས་གསུམ་གྱི་ཕྲིན་ལས་ནམ་མཁའ་དང་མཉམ་པའི་ངང་ནས། དགུང་ལོ་རེ་གཅིག་བཞེས་པ་དགུང་ཀེག་གི་ཐོག་ཏུ་ཞི་བའི་དབྱིངས་སུ་གཤེགས་སོ།། དེས་གནུབས་ཆེན་སངས་རྒྱས་ཡེ་ཤེས་ཀྱི་ཡང་སྲིད་གསང་བདག་ཕྲིན་ལས་ལྷུན་གྲུབ་ལ་བརྒྱུད་དེ། འདི་ནི་ཡབ་སྨྱོས་སྟོན་མཁས་གྲུབ་ཆེན་པོ་མདོ་སྔགས་བསྟན་འཛིན་གྱི་སྲས་སུ་ལྕགས་མོ་ཕག་གི་ལོ་ལ་ཆག་བྱང་ཆུབ་གླིང་དུ་འཁྲུངས། དགུང་ལོ་ལྔ་ནས་བྲི་ཀློག་གཉིས་ཀ་བྱང་བར་མཁྱེན། བརྒྱད་ལ་ཡབ་རྗེའི་དྲུང་དུ་དགེ་བསྙེན་གྱི་སྡོམ་པ་གསན། མཚན་ཨོཌྱཱན་ཚེ་འཕེལ་དུ་གསོལ། དེ་ནས་བརྩམས་ཏེ་ཕྲིན་སྒྲུབ་ཕྱག་ལེན་གྱི་སྐོར་མཁྱེན་ནས་ཀུན་མཁྱེན་ཆེན་པོའི་གསུང་རབ་རྣམས་དང་། སྒྲ་རྩིས་སོགས་ཐ་སྙད་ལའང་སྦྱངས་པས་བློ་གྲོས་ཀྱི་མཐུ་ཐོབ། ཁྱད་པར་ཡབ་རྗེ་ལས་བླ་རྫོགས་ཐུགས་གསུམ་སྒྲུབ་སྡེ་བརྒྱད་སོགས་བཀའ་གཏེར་གྱི་དབང་ཁྲིད་བཤད་ལུང་དུ་མ་གསན་ཅིང་བསམ་སྒོམ་གྱིས་གཏན་ལ་ཕབ། སྐྱེས་ཆེན་གཙུག་ལག་རྒྱ་མཚོ་ལས་རབ་ཏུ་བྱུང་ཞིང་མཚན་ཕྲིན་ལས་ལྷུན་གྲུབ་དཔལ་བཟང་པོར་བསྩལ། གསུང་ཆོས་ཀྱང་ཅི་རིགས་པ་
གསན། གཞན་ཡང་གསུང་སྤྲུལ་ཚུལ་ཁྲིམས་རྡོ་རྗེ། ལོ་ཆེན་གཞན་ཕན་རྡོ་རྗེ། ལྷ་བཙུན་ཀུན་བཟང་རྣམ་རྒྱལ། རྫོགས་ཆེན་པ་འབྲུག་སྒྲ་བཟང་པོ། བོན་ལུང་པ་ཚུལ་ཁྲིམས་རྒྱལ་མཚན། ཟུར་ཆོས་དབྱིངས་རང་གྲོལ། འཁྲུལ་ཞིག་ནོར་བུ་ཆོས་བརྟན་སོགས་རྙིང་ལུགས་དང་། རྒྱལ་ཚབ་གྲགས་པ་མཆོག་དབྱངས། མགོན་པོ་བསོད་ནམས་མཆོག་ལྡན་སོགས་གསར་མ་སྟེ། གསར་རྙིང་གི་བླ་མ་དམ་པ་སུམ་ཅུ་ལྷག་ཙམ་བསྟེན་ནས་མདོ་སྔགས་ཀྱི་ཆོས་མཐའ་ཡས་པ་ངོམ་པ་མེད་པར་གསན་ཅིང་། བྱེ་བྲག་འདུས་པ་མདོའི་དབང་ནི། དགུང་ལོ་བརྒྱད་པ་ལ་སྔགས་འཆང་ཀུན་བཟང་དཔལ་འབྱོར་བྱང་ཆུབ་གླིང་དུ་སྤྱན་དྲངས་ཏེ་ཡབ་རྗེ་དང་ལྷན་དུ་ཟུར་ལུགས་དང་ཁམས་ལུགས་གཉིས་གསན། ཉེར་གཅིག་པ་ལ་ལྷ་བཙུན་ཀུན་བཟང་རྣམ་རྒྱལ་ལ་ཁམས་ལུགས་ཀྱི་ཡི་གེའི་སྟེང་ནས་གསན། ཉི་ཤུ་རྩ་དགུ་པ་ས་ཡོས་ཧོར་ཟླ་བཞི་པ་ལ་གོང་ར་ལྷུན་གྲུབ་སྡིངས་སུ་མ་ཧཱ་ལོ་ཙཱ་བ་གཞན་ཕན་རྡོ་རྗེའི་དྲུང་དུ་འདུས་པ་མདོའི་རྩ་བ་དང་ཡན་ལག་གི་དཀྱིལ་འཁོར་ཐམས་ཅད་རྡུལ་ཚོན་གྱིས་བཞེངས་པར། གཉལ་པ་བདེ་ལེགས་པའི་ཡི་གེའི་སྟེང་ནས་ཆུ་བོ་བཞིའི་དབང་གཏད་རྒྱ་སྒོམ་རིམ་མན་ངག་དང་བཅས་པ་སྒྲུབ་ཆེན་གྱི་ལས་རིམ་དང་འདྲེལ་བར་ཞག་བཅུ་བདུན་གྱི་ཁོངས་སུ་རྫོགས་པར་གསན། གོང་ལོ་དེ་ཉིད་སྐལ་ལྡན་ལ་ཆོས་སྦྱིན་ལྷག་པར་བསྩལ་བ་ལས། འ་མ་བུ་ཆོས་མི་འཚོང་གསུངས་ནས་སུའི་ཡང་ཆོས་ཡོན་མི་བཞེས་པར་ཕྱིར་སློག་པར་མཛད་ནའང་། རྗེ་འདིའི་དབང་བུམ་གྲྭ་ཚར་དགུ་ཕུལ་བ་མཉེས་མཉེས་ཀྱིས་བདག་གིར་མཛད་ཅེས་གྲགས་ཏེ། དབང་གི་ཆུ་བོའི་སྣོད་དུ་གཟིགས་ཤིང་བསྟན་པ་སྤེལ་བའི་རྟེན་འདྲེལ་སྒྲིག་བྱེད་ཀྱི་བརྡའ་ཐབས་བསྟན་པར་མངོན། དེ་ལྟར་ཐོས་བསམ་གྱི་སྒྲོ་འདོགས་ཡིན་ལུགས་སུ་བཅད་ནས། དབེན་པའི་གནས་དུ་མར་སྙིང་པོའི་ལམ་སྲོལ་ཇི་བཞིན་པ་ཐུགས་ཉམས་སུ་བཞེས་པས། མ་དག་པའི་སྣང་བ་འགོག་ནུས་པའི་བསྐྱེད་རིམ་གྱི་གསལ་སྣང་ལ་རེག་མཐོང་གི་མཚན་མ་ཐོབ་སྟེ། ཕྲིན་ལས་གང་བརྩམས་ཐོགས་མེད་དུ་འགྲུབ། རྫོགས་རིམ་ཀ་དག་གཞི་རྫོགས་འཕོ་འགྱུར་མེད་པའི་གནས་
ལུགས་ཇི་ལྟ་བ་ཉིད་རྟོགས་པས། འཁོར་འདས་བདེན་འཛིན་གྱི་འཁྲི་བ་ཆད། སྣང་སྲིད་ལྷུན་གྲུབ་འོད་གསལ་གྱི་ཀློང་དུ་དྭངས་པས་ཡི་དམ་གྱི་ལྷ་དུ་མའི་གཟིགས་སྣང་ཤར་ཞིང་ལུང་བསྟན་ཐོབ། རང་དོན་ཡིད་བྱེད་ཀྱི་འཛིན་པ་ཞིག་པས་གཞན་ཕན་མཁའ་ཁྱབ་ཀྱི་ཐུགས་རྗེ་རྩོལ་མེད་ཤུགས་འབྱུང་གི་སྒོ་ནས། ཐར་པ་དོན་གཉེར་གྱི་སྐལ་ལྡན་མཆོག་དམན་མང་པོར་བཤད་སྒྲུབ་ཀྱི་ཆོས་འཁོར་རྒྱུན་ཆགས་སུ་བསྐོར་བས་བསྟན་འགྲོའི་ཕན་བདེ་རྒྱས་པར་མཛད་ཅིང་། ཁྱད་པར་སྐུ་གསུང་ཐུགས་ཀྱི་སྲས་མཆོག་གཏེར་ཆེན་ཆོས་ཀྱི་རྗེ་ལ་ཟབ་རྒྱས་ཀྱི་ཆོས་ཐམས་ཅད་ཚང་སྤྲུགས་སུ་བསྩལ་ཏེ་རྒྱལ་ཚབ་ཏུ་མངའ་བསྐུར་ནས། དགུང་ལོ་ང་གཉིས་པ་ཆུ་སྟག་དབོ་ཟླའི་ཉེར་གཉིས་ལ་དབུ་གཙུག་ཕྱུར་བུར་འཕར་བ་ལས་ཟླ་བའི་ཟིལ་བ་སྐྱ་ཆིལ་ལི་བ་དང་སྤོས་དུད་ལྟ་བུའི་རླངས་པ་འཕྲོ་བཞིན་དུ་གཟུགས་སྐུའི་བཀོད་པ་ཆོས་ཀྱི་དབྱིངས་སུ་བསྡུས་སོ།། དེས་ལོ་ཆེན་ཆོས་རྒྱལ་བསྟན་འཛིན་རྗེས་སུ་བཟུང་སྟེ། འདི་ནི་ཨེ་འདམ་སྔོན་པོ་གྲོང་སྨད་དུ་ལྕགས་ལུག་ལ་འཁྲུངས། སྐུ་ཚེ་སྔ་མའི་བག་ཆགས་གསལ་བས་གྲྭ་རིགས་རྣམས་ཀྱིས་བདག་སྤྲད་དེ་དྭགས་སྟོད་གླིང་སོགས་གོང་མའི་དགོན་པ་རྣམས་སུ་སྤྱན་དྲངས། བྲི་ཀློག་དང་ཆོག་ཕྲིན་རྣམས་ཚེགས་མེད་པར་ཐུགས་སུ་ཆུད་ནས། འཕྱོང་རྒྱས་དཔལ་རི་གྲྭ་ཚང་དུ་ཐུགས་གཉེར་ལ་འབྱོན། གདན་ས་བ་བསོད་ནམས་རིན་ཆེན་ལས་རབ་ཏུ་བྱུང་ཞིང་། མཚན་ཆོས་རྒྱལ་བསྟན་འཛིན་དུ་གསོལ། དབང་ལུང་ཡང་ཅི་རིགས་པ་གསན། དགོངས་འདུས་ལ་སོགས་པའི་ཆོ་གའི་ཚིག་འཛིན་དང་། དེ་དག་བྲི་ཐིག་བཅས་དབྱངས་སོགས་ནས་བརྩམས་ཏེ། ཀུན་མཁྱེན་ཆེན་པོའི་བསྟན་བཅོས་སེམས་ཉིད་ངལ་གསོ་རྩ་འགྲེལ་རྣམས་ལ་སྦྱངས། དེར་གནུབས་སྟོན་གྲགས་པ་དབང་པོ་ལ་ཡང་བཟློག་དང་ལོ་ཀྟྲི་སོགས་དྲག་སྔགས་ཀྱི་ལག་ལེན་དང་རྩིས་དཀར་ནག་ཀྱང་བསླབས། དགུང་ལོ་བཅོ་བརྒྱད་པ་ས་ཕོ་བྱི་བའི་ལོར་གྲྭ་སའི་དགེ་བསྐོས་མཛད་པས་ནོན་ཆེ་བའི་དཔེར་འཇོག་པ་བྱུང་ཞིང་། ལོ་དེའི་ནང་དུ་རིག་འཛིན་ཕྲིན་ལས་ལྷུན་གྲུབ་འཕྱོང་རྒྱས་དཔལ་རིར་སྤྱན་དྲངས་ཏེ། སྤྲུལ་པའི་སྐུ་
མཆོག་ཕྲིན་ལས་རྣམ་རྒྱལ་གྱིས་དབུས་གྲྭ་གཙང་ཡོངས་རྫོགས་ལ་འདུས་པ་མདོའི་དབང་བསྐུར་གདམས་ངག་གཏད་རྒྱ་དང་བཅས་པ་རྡུལ་ཚོན་གྱི་དཀྱིལ་འཁོར་དུ་སྒྲུབ་ཆེན་དང་འདྲེལ་བར་ཟུར་ལུགས་དང་། ཞར་བྱུང་དཔོན་སློབ་ཉུང་འདུས་ལ་རས་བྲིས་ཀྱི་སྟེང་ནས་ཁམས་ལུགས་གཉིས་སྩལ་བའི་ཚེ་ལྷན་ཅིག་ཏུ་གསན་ཅིང་། ཕྱིས་སུའང་གནས་དུས་ཅི་རིགས་པར་བཀའ་བརྒྱད་བདེ་འདུས། དགོངས་འདུས། བི་མ་སྙིང་ཐིག །ཞིག་གླིང་གི་གཏེར་ཆོས་སོགས་མང་དུ་གསན། གཞན་ཡང་ལྷ་བཙུན་ནམ་མཁའ་འཇིགས་མེད། གསུང་སྤྲུལ་ཚུལ་ཁྲིམས་རྡོ་རྗེ་སོགས་མཁས་གྲུབ་ཀྱི་བླ་མ་དམ་པ་མང་པོ་བསྟེན་ནས་བཀའ་གཏེར་གྱི་དབང་ལུང་ཁྲིད་བཀའ་དུ་མ་དང་། རྒྱ་རི་དཔོན་པོའི་ལུང་གིས་བསྐུལ་བས་གོང་རར་ཐེགས་ཏེ། ཉང་སྟོན་བློ་མཆོག་རྡོ་རྗེ་ལ། སྒྲ་ཀ་ལཱ་པ་དང་།སྙན་ངག །སྡེབ་སྦྱོར་སོགས་བརྡ་སྤྲོད་ཡན་ལག་དང་བཅས་པ་གསན་ཏེ་མཁྱེན་པར་མཛད། དེ་ལྟར་གསན་པ་རྫོགས་རྗེས་ཨེ་མཐོང་སྨོན་དང་མཚོ་མེར་སྟེང་དུའང་ཅི་རིགས་བཞུགས་ཤིང་། གཙོ་བོར་དྭགས་སྟོད་གླིང་གི་དགོན་པར་སྟན་འཇགས་ཏེ་སྦས་ཚུལ་གྱིས་བསྙེན་སྒྲུབ་ལ་བརྩོན་པར་མཛད་པས་ཉམས་རྟོགས་བཟང་པོ་འཁྲུངས། སྲུང་མ་ལས་ལ་ཁོལ་བའི་མཐུ་རྟགས་ནར་མར་འོང་བས་ཡུལ་དེ་དག་གི་གྲོང་པ་རྣམས་ཀྱང་བླ་མ་གླིང་པའི་བཀའ་དང་འགལ་ན་ཆོས་སྐྱོང་གི་བཀའ་ཆད་འོང་ཞེས་འཇིགས་པར་བྱེད། ཁྱད་པར་དགུང་ལོ་སོ་གཉིས་ཆུ་སྟག་ལོར་དར་གླིང་དུ་ཕེབས་ཏེ་རྗེ་འགྱུར་མེད་རྡོ་རྗེ་ལས་པད་གླིང་གི་ཆོས་བཀའ་འགའ་ཞིག་གསན། དེ་དུས་ཡབ་རྗེ་ནས་གསན་པའི་མདོའི་དབང་རྒྱུན་ཕྱག་བཞེས་དང་བཅས་པ་རྣམ་པར་དག་པ་འདུག་པར་མཁྱེན་ཏེ། ཕྱིས་གདན་སར་སྤྱན་འདྲེན་གནང་བ་ལྟར་བྱོན་ནས་རྗེ་གཏེར་ཆེན་བླ་མ་ལ་མདོ་དབང་འབུལ་བར་མཛད་པས། སྔ་འགྱུར་གྱི་བསྟན་པ་ལ་ཕན་པ་བླ་ན་མེད་པར་གྱུར། དགུང་ལོ་དོན་བརྒྱད་པ་ས་བྱི་ཧོར་ཟླ་བཞི་པ་ལ་དྭགས་སྟོད་གླིང་གི་དགོན་པར་སྐུ་གཤེགས་སོ། །
དེའང་བཀའ་མའི་ཕྱོགས་སུ་ཟུར་མེས་དབོན་གསུམ་ལས་སློབ་མའི་རྣམ་གྲངས་ཇི་ལྟར་མཆེད་པ་བཤར་གྱིས་བཏབ་པ་དང་། དེ་དག་ལས་མཆེད་པའང་གྲངས་མེད་པས་གང་གི་རིང་ལ་དར་རྒྱས་སུ་མཛད་པ་གསང་བདག་སྒྲོ་ཕུག་པ་ཆེན་པོ་དེ་གངས་རིའི་ཁྲོད་ན་གསང་བའི་བདག་པོ་སྔགས་ཀྱི་བསྟན་པ་སྤེལ་བའི་སླད་དུ་བྱོན་ཏོ་ཞེས་པ་དེའང་གྲགས་པ་དོན་དང་ལྡན་ནོ།། དུས་ཕྱིས་ནི་གདུལ་བྱ་རྫོགས་པ་ལྟར་གྱུར་ནས་སྙིགས་མའི་རྒུད་པ་སྟོབས་སུ་གྱུར་པས་སྔ་འགྱུར་གྱི་བསྟན་པ་བགས་ཀྱིས་ཉག་ཕྲ་བའི་སྟོན་གྱི་ཆུ་བྲན་བཞིན་བལྟར་མི་མངོན་པའི་གནས་སྐབས་སུ་གངས་ཅན་པ་རྣམས་ཀྱི་གཙུག་རྒྱན་སློབ་དཔོན་ཆེན་པོ་བཻ་རོ་ཙ་ན་དང་གཡུ་སྒྲ་སྙིང་པོའི་ཤུགས་བསྐྱེད་ཕྲག་པར་ཁྱེར་བས་ཕྱོགས་མཐའ་དག་ནས་གདམས་པའི་ཆུ་རྒྱུན་ཕྲ་མོ་ཐམས་ཅད་བསྡུས་ཏེ་བསྟན་པའི་ཆུ་གཏེར་ཆེན་པོ་མི་འཛད་པར་བསྐྱིལ་པས་མདོ་སྒྱུ་སེམས་གསུམ་གྱི་རིང་ལུགས་མི་ནུབ་པའི་རྒྱལ་མཚན་ཆེན་པོ་གསར་དུ་སློང་བར་བྱེད་པ་ནི་གཏེར་ཆེན་ཆོས་ཀྱི་རྒྱལ་པོ་འགྱུར་མེད་རྡོ་རྗེ་དང་ལོ་ཆེན་ཐམས་ཅད་མཁྱེན་ངག་དབང་ཆོས་དཔལ་ཡབ་སྲས་སློབ་མའི་ཚོགས་དང་བཅས་པ་སྟེ། དེ་ལ་རྗེ་བཙུན་གཏེར་ཆེན་དམ་བཅའ་འདི་ནི། རང་གཏེར་གབ་རྒྱ་ཅན་གྱི་ལུང་བསྟན་ལས༔ བཻ་རོ་ཁྱོད་ནི་སྐྱེ་མཐའི་བྱང་སེམས་ཏེ༔ ཁྱོད་ཀྱི་འདི་གོང་སྐྱེ་བ་འདས་པ་ནི༔ སྨྲ་བསམ་བརྗོད་འདས་ཡེ་ཤེས་སྙིང་པོའི་དོན༔ སེམས་ཅན་སངས་རྒྱས་མཉམ་ཉིད་ཁྱབ་གདལ་ཡང་༔ ཁམས་གསུམ་འགྲོ་བའི་འདྲེན་པར་རྡོ་རྗེ་ཆོས༔ ཤཱཀ་ཐུབ་ཉེ་གནས་ཨཱ་ནནྡ་ཞེས་དང་༔ རྒྱལ་པོ་ཛ་དང་ཤཱནྟིཾ་གརྦྷ་དང་༔ བོད་འདིར་སམྦྷོ་ཊ་སོགས་དག་པ་ཡི༔ སྐྱེ་བ་དེ་ཙམ་སྣང་གི་མ་དག་པའི༔ སྐྱེ་ཚུལ་བརྗོད་དུ་ལོང་བའི་གནས་མ་ཡིན༔ དེ་ལྟར་དག་པའི་སྐྱེ་བ་དེ་དག་གིས༔ འགྲོ་ལ་སྙིང་རྗེ་ཆེན་པོའི་ཐུགས་བསྐྱེད་པའང་༔ བཻ་རོ་ཁྱོད་དུ་སྐྱེ་བ་བླངས་པ་ཡིན༔ ཁྱོད་ཀྱང་ཤྲཱི་སིངྷ་ཡེ་ཤེས་མདོ༔ པདྨ་བདག་སོགས་གཙུག་གི་བླ་མར་བརྟེན༔གདམས་པའི་གནད་རྣམས་ཕུ་ཐག་བཅད་བྱས་ནས༔ ཆོས་སྐུའི་རང་ཞལ་མངོན་སུམ་རྟོགས་གྱུར་པས༔
ལས་འཕྲོ་མ་དག་སྐྱེ་བ་ལེན་མི་སྲིད༔ འོན་ཀྱང་སེམས་བསྐྱེད་སྨོན་ལམ་བཟང་པོ་ཡིས༔ མཚམས་སྦྱོར་མཐའ་ཡས་འགྲོ་བའི་དཔལ་ཉིད་དུ༔ དབང་ཕྱུག་འབར་དང་ར་ཤག་རྡོ་རྗེ་གླིང་༔ ཀུན་སྐྱོང་གླིང་དང་མདོ་སྔགས་གླིང་པ་སོགས༔ པདྨ་བདག་གི་ཟབ་གཏེར་བདག་པོ་དང་༔གཞན་ཡང་ཐེག་པ་ཆེ་ཆུང་སྣ་ཚོགས་ལ༔ དེ་དང་མཐུན་པའི་ངོ་མཚར་སྐྱེ་བའི་གྲངས༔ བཅུ་ཕྲག་གཅིག་དང་གསུམ་ཙམ་འདས་པའི་མཐར༔ ཞེས་གསུངས་པ་ལྟར། གསང་བའི་བདག་པོ་རྡོ་རྗེ་ཆོས་ཉིད་གསང་སྔགས་ཀྱི་བསྟན་པ་སྤེལ་བའི་ཕྱིར། སྐལ་ལྡན་རྒྱལ་པོ་ཛ་དང་། ལོ་ཙཱ་བ་ཆེན་པོ་བཻ་རོ་ཙ་ན་དང་། ཟུར་པོ་ཆེ་ཤཱཀྱ་འབྱུང་གནས་ལ་སོགས་པ་གང་ལ་གང་འདུལ་གྱི་སྐུའི་བཀོད་པ་མཐའ་ཡས་པར་བསྟན་ནས་དོན་མཛད་པ་སྟེ། དེ་ཡང་སྙིགས་མ་ལྔ་བདོའི་དུས་འདིར་བསྟན་འགྲོའི་དཔུང་གཉེན་དུ་སྐྱེ་སྲིད་བཟུང་བའི་ཚུལ་ནི། སྐུ་ཚེ་སྔ་མའི་སྐུ་རྟེན་འཆི་སྲིད་འོད་གསལ་གྱི་དབྱིངས་སུ་བསྡུས་པ་ལས། རིག་གདངས་མཁའ་འགྲོའི་གླུས་གཞན་དོན་དུ་བསྐུལ་བའི་རྐྱེན་གྱིས། ཡེ་ཤེས་ཀྱི་སྐུ་ཧེ་རུ་ཀའི་རྣམ་པར་བཞེངས་ནས་ལྷུམས་སུ་ཞུགས་ཏེ། ཡབ་གཉོས་སྟོན་གསང་བདག་ཆེན་པོ་ཕྲིན་ལས་ལྷུན་གྲུབ་དང་། ཡུམ་རྗེ་རིགས་ལྷ་འཛིན་དབྱངས་ཅན་སྒྲོལ་མའི་སྲས་སུ་མེ་ཁྱིའི་ལོ་དབོ་ཟླའི་ཚེས་བཅུ་ལས་གཡོ་ཞིང་འཇའ་འོད་འཁྲིགས་པ་སོགས་ངོ་མཚར་བའི་ལྟས་དང་བཅས་ཏེ། གྲྭ་ནང་དར་རྒྱས་ཆོས་གླིང་དུ་སྐུ་བལྟམས། བཙས་མ་ཐག་ཡབ་རྗེས་བློ་རྣོ་བའི་རྟེན་འདྲེལ་དང་། བར་ཆད་བསྲུང་བའི་དབང་བསྐུར་བྱིན་བརླབས་དུ་མ་མཛད། དེ་དུས་ཀྱི་ཡུལ་དང་བྱ་སྤྱོད་ཀྱི་རྣམ་པ་དང་། དེ་ནས་བཟུང་སྟེ་ལོ་གསུམ་གྱི་བར་ཛོ་ཀི་སྔོ་སངས་ཐོར་ཚུགས་ཅན་ཞིག་དང་། བུད་མེད་མཛེས་མ་གཉིས་ཀྱིས་རྒྱུན་དུ་སྲི་ཞུ་བྱས་པའི་དངོས་གནས་རྣམས་ཕྱིས་ཀྱང་ཐུགས་ལ་གསལ་བའི་དྲན་ཤེས་ཁྱད་པར་ཅན་མངའ། པང་དུ་འཚོ་བའི་དུས་ཉིད་ནས་ཏིང་ངེ་འཛིན་ལ་དབང་འབྱོར་པའི་རྣམ་འགྱུར་དང་གཞོན་ནུ་རོལ་རྩེད་ཀྱི་ཚེ་ཡང་རྒྱལ་བའི་རིགས་སད་པའི་ངང་ཚུལ་དགེ་བས་བློ་ལྡན་རྣམས་དང་བར་མཛད། དགུང་ལོ་བཞིའི་
ཐོག་ཡབ་རྗེ་ལ་བཀའ་བརྒྱད་གསང་རྫོགས་ཀྱི་དབང་གསན་པའི་ཚེ་ཡུལ་སྣང་ཐམས་ཅད་ལ་དཀྱིལ་འཁོར་གྱི་འཁོར་ལོས་རྒྱས་ཐེབས་པའི་གཙོ་བོ་དང་བླ་མ་དབྱེར་མེད་དུ་གཟིགས་ཤིང་དབང་བཞིའི་ས་བོན་ཐུགས་རྒྱུད་ལ་ཐེབས་པ་ཉིད། བཅུ་པ་ཤིང་ལུག་གི་སྟོན་བདེ་འདུས་ཀྱི་དབང་གསན་དུས་འོད་གསལ་གྱི་སྣང་བར་སློབ་དཔོན་ཆེན་པོ་པདྨས་དབང་བསྐུར་ཞིང་བྱིན་གྱིས་བརླབས་པའི་ནུས་པས་འཕེལ་ཏེ་བུམ་དབང་གི་ཉམས་མྱོང་ཡུལ་སྣང་སྒྱུ་མ་ལྟ་བུར་གཏན་ལ་ཕེབས། དེ་ཡན་ཆད་དུ་བྲི་ཀློག་དང་། རང་ལུགས་ཀྱི་སྒྲུབ་དཀྱིལ་དབང་རྗེས་གནང་རབ་གནས་ལུང་སོགས་ཆོག་ཕྲིན་རྣམས་ཀྱི་ཚིག་འཛིན་དང་། ཕྱག་བཞེས་ཐམས་ཅད་ཚེགས་མེད་དུ་ཆུབ་སྟེ། དེ་ནས་བརྩམས་ཏེ་ཡབ་རྗེའི་སྐུ་ཚབ་མཛད་ནས་ཕྲིན་ལས་ཀྱང་ཅི་རིགས་པ་སྐྱོང་བར་མཛད། དགུང་ལོ་བཅུ་གཅིག་པ་ལ་དཔལ་ལྡན་འབྲས་སྤུངས་སུ་ཁམས་གསུམ་པའི་གཙུག་གི་ནོར་བུ་ཀུན་གཟིགས་རྒྱལ་བ་ལྔ་པའི་དྲུང་དུ་གཙུག་ཕུད་ཕུལ་ཏེ། མཚན་ངག་དབང་པདྨ་བསྟན་འཛིན་དུ་བསྩལ། སྐྱིད་གྲོང་གི་རང་བྱུང་འཕགས་པ་ཐོག་མར་ཕེབས་པ་དང་དུས་འགྲིགས་པས་གོང་ནས་རྟེན་འདྲེལ་བཟང་ཞེས་དགྱེས་པས་དབུགས་དབྱུང་ཞིང་། དེ་དུས་འཕགས་པའི་ཞལ་ཞི་འཛུམ་ཆགས་པའི་ཉམས་གསལ་བའི་ཐུགས་ཀ་ནས་འོད་ཟེར་ཉིད་ཀྱི་སྐུ་ལ་ཐིམ་པ་དང་། བཅུ་བདུན་པ་ལ་བསམ་ཡས་སུ་རྗེ་རྒྱལ་བའི་དབང་པོ་མཇལ་བའི་ཚེ་སྤྱན་རས་གཟིགས་ཀྱི་རྣམ་པར་གཟིགས། རིམ་པར་ཀུན་མཁྱེན་རྒྱལ་བའི་དབང་པོ་ལྔ་པ་ཆེན་པོ་དང་། ཡབ་རྗེ་གསང་བདག་ཕྲིན་ལས་ལྷུན་གྲུབ་གཉིས་ནི། སྐུ་དངོས་ཀྱིས་རྗེས་སུ་བཟུང་བའི་བཀའ་དྲིན་ཕུལ་དུ་བྱུང་བར་མ་ཟད། ཕྱིས་ཡེ་ཤེས་ཀྱི་སྐུས་ཀྱང་བྱིན་གྱིས་བརླབས་པའི་གནད་ཀྱིས་བཀའ་དྲིན་མཚུངས་པ་མེད་པའི་རྩ་བའི་བླ་མ་རྣམ་པ་གཉིས་དང་། གཞན་ཡང་སྨིན་གྲོལ་ཟབ་ལམ་གསན་པའི་བསྟན་འཛིན་ཆེན་པོ་བཅུ་དྲུག །ཟབ་ཆོས་སྣ་ཚོགས་གསན་པའི་ཡོངས་འཛིན་སུམ་ཅུ་རྩ་ལྔ་རྣམས་བསྟེན་ཏེ། ཡུལ་དུས་ཅི་རིགས་པར་ཡོངས་རྫོགས་དགེ་བསྙེན། བྱང་སྡོམ་བཀའ་སྲོལ་གསུམ། སྔར་སྨོས་པ་ལྟར་བཀའ་བརྒྱད་
ཡོངས་རྫོགས་ཀྱི་དབང་བརྡ་དོན་འཕྲོད་པ་ཐོག་མའི་སྨིན་བྱེད་དུ་གསན་པས་སྡོམ་པ་གསུམ་གྱི་གཞི་བཟུང་སྟེ། མདོ། སྒྱུ་འཕྲུལ། སེམས་སྡེ་ལུགས་གསུམ། མཉམ་སྦྱོར། ཡང་དག །ཕུར་པ། གཤེད་སྐོར་སོགས་སྔ་འགྱུར་བཀའ་མ་དེང་སང་རྒྱུན་ཡོད་དོ་ཅོག་དང་། གཏེར་མ་བླ་རྫོགས་ཐུགས་གསུམ་སྒྲུབ་སྡེ་སྤྱི་དང་བྱེ་བྲག་གི་བཀའ་རིགས་མི་འདྲ་བ་དུ་མས་མཚོན་ཡོངས་གྲགས་ཕལ་མོ་ཆེ། གསར་མའི་རྡོར་ཕྲེང་། སྒྲུབ་ཐབས་བརྒྱ་རྒྱམ་སོགས་སྤྱི་བཀའ་དང་། བདེ་མཆོག །དགྱེས་རྡོར། དུས་འཁོར། གསང་འདུས། གཤེད་སྐོར་ཀྲྀ་ཡོག་སོགས་ཀྱི་ཟུར་བཀའ། མདོ་ཕྱོགས་མང་པོ་དང་བཅས་པའི་དབང་ཁྲིད་བཤད་ལུང་། དེ་ཐམས་ཅད་ཀྱི་རྩ་བར་གྱུར་པ་བཀའ་འགྱུར་རོ་ཅོག་གི་ལུང་སོགས་ཆོས་བཀའ་གསན་པ་ནི་མཐའ་ཡས་ཏེ་མིང་ཙམ་འཛིན་པའང་དཀའ་བའི་གནས་སོ། །དགུང་ལོ་བཅུ་གསུམ་པ་ཙམ་ནས་བཟུང་། རྩ་རྒྱུད་གསང་བ་སྙིང་པོ། རྒྱུད་བླ་མ། སེམས་ཉིད་ངལ་གསོ། ཡིད་བཞིན་མཛོད་རྩ་འགྲེལ་རྣམས་ཐུགས་ལ་བཟུང་ནས་ཡབ་རྗེ་ལས་གསུང་བཤད་རིམ་པར་གསན་ཅིང་། ཕྱིས་གནུབས་ཟུར་རོང་ཟོམ་རྣམས་ཀྱི་གསུང་རབ་དང་། ས་སྐྱ་པཎྜི་ཏའི་རབ་དབྱེ། བཅོམ་ལྡན་རལ་གྲིའི་སྤྱི་རྣམ། རང་བྱུང་ཞབས་ཀྱི་ནང་དོན་རྣམས་ཀྱང་ཐུགས་ལ་བཙུད་ཅིང་། ཁྱད་པར་ཀུན་མཁྱེན་ཆེན་པོའི་གསུང་རབ་རྣམས་ལ་གཟིགས་རྟོགས་ནན་ཏན་མཛད་པས་བློ་གྲོས་ཀྱིས་རྣམ་པར་དཔྱོད་པའི་མཐུ་ཐོགས་པ་མེད་པ་བརྙེས་ཏེ། ཇི་སྙེད་པའི་ཆོས་ཐམས་ཅད་ལ་སྒྲོ་འདོགས་ཆོད། དྭགས་སྟོན་ཆོས་རྒྱལ་བསྟན་འཛིན་ལ་འདུས་པ་མདོའི་དབང་མཆོག་རིན་ཆེན་ཕྲེང་བའི་སྟེང་ནས་དཀྱིལ་འཁོར་བཞི་བཅུ་རྩ་ལྔར་ཕྱེ་བ་ལས་ཆུ་བོ་བཞི་ཡོངས་རྫོགས་གཏད་རྒྱ་མཐའ་བརྟེན་ཚེ་དབང་དང་བཅས་པའི་དབང་གདམས་ངག་བཤད་ལུང་དང་བཅས་པ་དང་། དབང་ཆོག་སྦྲང་རྩིའི་ཆུ་རྒྱུན་གྱི་སྟེང་ནས་དཀྱིལ་འཁོར་ཉི་ཤུ་རྩ་གཅིག་རས་བྲིས་ལ་བརྟེན་པར་དབང་ལུང་གདམས་ངག་དང་བཅས་པ་རྣམས་གསན། ཡང་རྡོ་རྗེ་བྲག་རིག་འཛིན་མཆོག་གི་སྤྲུལ་པའི་སྐུར་དཀྱིལ་འཁོར་ཉི་ཤུ་རྩ་བདུན་དུ་བསྡུས་པའི་རྩ་དཀྱིལ་རས་བྲིས་དང་དེ་ཕྱིན་ཚོམ་བུ་ལ་བརྟེན་ཏེ་དབང་ཆོག་རིན་ཆེན་ཕྲེང་བའི་ཐོག་
ནས་དབང་གདམས་ངག་བཤད་ལུང་དང་བཅས་པ་མཐའ་རྒྱས་སུ་གསན་ཅིང་། གསང་མཚན་གཉིས་ཀས་འགྱུར་མེད་རྡོ་རྗེ་རྩལ་དུ་གསོལ། སྨོན་ལམ་གྱི་འདྲེལ་བ་སད་པས་ཟབ་གཏེར་གྱི་བཀའ་བབ་ཚུལ་ཀྱང་། དགུང་ལོ་བཅོ་བརྒྱད་པ་ཆུ་ཡོས་ཟླ་བ་ལྔ་པའི་ཚེས་བཅུ་ལ་གཡའ་མ་ལུང་ནས་རིག་འཛིན་ཐུགས་ཐིག །ཉེར་གཉིས་པ་མེ་ལུག་ཁྲུམས་ཟླའི་ཚེས་བརྒྱད་ལ་རྫུ་འཕྲུལ་གྱི་བཀོད་པས་ཤེལ་བྲག་ནས་གཤིན་རྗེ་གཤེད་དྲེགས་འཇོམས། སོ་གཅིག་པ་མེ་འབྲུག་སྟག་ཟླའི་ཉ་ལ་ཨོ་དཀར་བྲག་ནས་གུར་དྲག་དང་རྡོར་སེམས་ཨ་ཏིའི་སྐོར། སོ་ལྔ་པ་ལྕགས་སྤྲེལ་ཆུ་སྟོད་ཟླ་བའི་ཉེར་དགུ་ལ་ཤ་འུག་ལྟག་སྒོ་ནས་ཐུགས་རྗེ་ཆེན་པོ་བདེ་གཤེགས་ཀུན་འདུས་ཀྱི་ཆོས་སྐོར་ཁྲོམ་གཏེར་དུ་སྤྱན་འདྲེན་པར་མཛད་ཅིང་། དེ་དག་གི་སྔ་ཕྱི་ཅི་རིགས་པར་བྲག་དམར་མཆིམས་ཕུ། གཡའ་མ་ལུང་སོགས་གྲུབ་པའི་གནས་ཆེན་ངོ་མཚར་ཅན་རྣམས་དང་། གདན་ས་གསར་རྙིང་གི་གཟིམ་ཆུང་། གཟིམ་སྤྱི་ལ་འོད་གསལ་རྩེ་དང་བསམ་གཏན་རྩེ་སོགས་དབེན་པ་རྣམས་སུ་སྐུ་མཚམས་ལོ་སྦྲེལ་མ་དང་། ཟླ་དྲུག་མ། ཟླ་གསུམ། ཟླ་གཅིག་གིས་མཐའ་བརྟེན་པ་ཡན་གྱིས། བླ་མ་ཞི་དྲག་རྡོར་སེམས། བཀའ་བརྒྱད། ཐུགས་རྗེ་ཆེན་པོ། ཡང་ཕུར། གཤིན་རྗེ་གཤེད། རྟ་མགྲིན། མཁའ་སྤྱོད་མ་སོགས་ཡི་དམ་གྱི་ལྷ་སུམ་ཅུ་རྩ་ལྔ་ཙམ་གྱི་བསྙེན་སྒྲུབ་དང་། རྫོགས་པ་ཆེན་པོ་ཁྲེགས་ཆོད་ཀྱི་ཉམས་བཞེས་ལ་སྙིང་པོར་དྲིལ་ནས། ཐོད་རྒལ་དང་རླུང་སྦྱོར་སོགས་ཀྱང་དུས་གནད་དང་བསྟུན་ཏེ་ཐུགས་ཉམས་སུ་བཞེས་པས། མ་དག་པའི་སྣང་བ་འགོག་པའི་བསྐྱེད་རིམ་ལ་བརྟན་པ་ཐོབ་སྟེ། ལས་བཞི་གང་ཡང་ཐོགས་མེད་དུ་གྲུབ། རྫོགས་རིམ་རྩ་རླུང་ཐིག་ལེའི་འགྲོས་དྷཱུ་ཏཱིར་དག་པས་ཞུ་བ་དེའི་ཡེ་ཤེས་ཕྱོགས་བརྒྱར་འབར། རྫོགས་པ་ཆེན་པོ་རང་སྣང་རིས་མེད་ཀྱི་དགོངས་པ་འཁྲུངས་པས་གཟུང་འཛིན་གྱི་མཚན་མ་རང་སར་གྲོལ། འཁོར་འདས་ཐམས་ཅད་གཞི་མེད་རྩ་བྲལ་མཉམ་ཡངས་ཁྱབ་གདལ་ཆེན་པོར་བྱང་ཆུབ། མཉམ་རྗེས་རིས་མེད་འོད་གསལ་ཁོར་ཡུག་གི་ཏིང་ངེ་
འཛིན་ལ་དབང་འབྱོར། སྣང་སྤྱོད་ཐམས་ཅད་ཡེ་ཤེས་ཀྱི་རོལ་པར་ཤར་བས། སློབ་དཔོན་ཆེན་པོ་པདྨ་དང་། བི་མ་ལ། ཧཱུཾ་མཛད། སངས་རྒྱས་གསང་བ། བཻ་རོ་ཙ་ན། འཚོ་རྒྱལ། ཉང་རལ། ཀུན་མཁྱེན་ཆོས་རྗེ་སོགས་རྒྱ་བོད་ཀྱི་པཎ་གྲུབ་དུ་མའི་ཡེ་ཤེས་ཀྱི་སྐུ་མངོན་དུ་སྣང་བས་སྤྲུལ་པའི་དཀྱིལ་འཁོར་སྤྲོས་ཏེ། རང་གཏེར་གྱིས་མཚོན་པའི་བཀའ་གཏེར་དུ་མའི་དབང་བསྐུར་ཞིང་ཟབ་ལམ་གྱི་གདམས་པའི་གནད་ཐམས་ཅད་ལྷུག་པར་བཀྲལ་ནས་སྟོན་པ་དང་། རྡོ་རྗེ་གཞོན་ནུ། རྡོར་སེམས། ཡང་དག །ཐུགས་རྗེ་ཆེན་པོ། ཞི་ཁྲོ། རྣལ་འབྱོར་མ་སོགས་ཡི་དམ་གྱི་ལྷ་དུ་མས་ཀྱང་ཞལ་བསྟན་ཏེ་དབང་བསྐུར། བྱིན་གྱིས་བརླབས་པ་དང་། བདེ་བ་ཅན་དང་རྔ་ཡབ་དཔལ་རི་སོགས་དག་པའི་ཞིང་ཁམས་མང་པོར་བགྲོད་པས་ཞིང་ཡོངས་སུ་འབྱངས་པའི་ཏིང་ངེ་འཛིན་ལ་དབང་འབྱོར་པ་དང་། མཁའ་འགྲོ་ཆོས་སྐྱོང་རྣམས་ཀྱིས་ལས་ཐོགས་མེད་དུ་སྒྲུབ་ཅིང་ལུང་སྟོན་པ་སོགས་ངོ་མཚར་བའི་གཟིགས་སྣང་མཐའ་ཡས། ཆགས་ཐོགས་མེད་པའི་མངོན་ཤེས་མངའ་བས་དུས་ཀྱི་འགྱུར་ལྡོག་སོགས་ཀྱི་ལུང་བསྟན་པ་རྣམས་ཀྱང་ཕྱིས་ཐོག་ཏུ་བབ་པའི་ཡིད་ཆེས་ཀྱི་གཏན་ཚིགས་མང་དུ་སྣང་སྟེ་མ་སྤྲོས་སོ། །དེ་ཡང་དགུང་ལོ་སོ་གཅིག་པ་ཡན་ཆོད་དུ་སྔར་ཐུགས་རྒྱུད་ལ་སྨིན་བྱེད་ཀྱི་ས་བོན་ཐེབས་པ་ཉིད་རིམ་གྱིས་འཕེལ་བས་བུམ་དབང་གི་ཉམས་མྱོང་ཡུལ་སྣང་ཐམས་ཅད་གསལ་སྟོང་སྒྱུ་མ་ལྟ་བུར་གཏན་ལ་ཕེབས་པས། ཤས་ཆེར་སྐུའི་འགྲོ་དོན་སྤྱོད་པའི་དུས་ཡིན་པའི་ཕྱིར། ཤོད་ཆེན་སྐྱི་ལུང་སོགས་ལྷོ་བྱང་གི་ཡུལ་ཐ་དད་པ་དུ་མར་ཆིབས་བསྐྱོད་ནས་སྐུའི་དཀྱིལ་འཁོར་མཐོང་བ་ཙམ་གྱིས་རིས་མེད་ཀྱི་གདུལ་བྱ་བསམ་གྱིས་མི་ཁྱབ་པའི་རྒྱུད་ལ་རྣམ་གྲོལ་གྱི་ས་བོན་བཞག་སྟེ་འཁོར་བ་མཐའ་ཅན་དུ་མཛད་པ་དང་། སོ་གཉིས་བཞེས་པ་མེ་སྦྲུལ་དབོ་ཟླ་ནས་བཟུང་གསང་དབང་གི་ཉམས་མྱོང་རང་རིག་གསལ་སྟོང་དུ་ཤར་ཏེ་གཟུང་འཛིན་དབྱིངས་སུ་གྲོལ་བས། གསུང་གི་འགྲོ་དོན་ལ་གཙོ་བོར་སྤྱོད་པའི་དུས་ཡིན་པའི་ཕྱིར། མཆོག་དམན་བར་པའི་སྐལ་ལྡན་ཚོགས་ལ་ཟབ་རྒྱས་ཀྱི་ཆོས་འཁོར་
བར་མེད་དུ་བསྐོར་བར་མཛད་པ་དང་། སོ་བརྒྱད་བཞེས་པ་ཆུ་ཕག་ཁྲུམས་ཟླ་ནས་ཕོ་ཉའི་ལམ་གྱིས་ཞུ་བདེའི་དཔེས་མཚོན་པའི་དོན་གྱི་ཡེ་ཤེས་རིག་སྟོང་བདེ་བ་ཆེན་པོ་ལྷན་སྐྱེས་མི་འགྱུར་བའི་དགའ་བཞི་ཐུགས་རྒྱུད་ལ་འཁྲུངས་པའི་ཉམས་མྱོང་རིམ་གྱིས་འཕེལ་བས་ཐུགས་ཀྱི་འགྲོ་དོན་ལ་ཤས་ཆེར་སྤྱོད་པའི་དུས་ཡིན་པའི་ཕྱིར། དེ་ཕྱིན་ཆད་སྤྱིར་ཆོས་བཀའ་རིས་མེད་དུ་གསུང་བ་ཡིན་ནའང་། ཁྱད་པར་ཟབ་ཁྲིད་ཀྱི་གདམས་པ་ཉིད་རྒྱུད་ཐོག་ཏུ་ཅི་སྨིན་འདེབས་པར་མཛད་པས་སྐལ་ལྡན་རྣམས་རང་བྱུང་གི་ཡེ་ཤེས་ཞལ་བལྟ་བ་ལ་བཙན་ཐབས་སུ་བཀྲི་བའི་མཛད་པ་ཁོ་ན་གཙོ་བོར་བདག་གིར་གཞེས་པ་དང་། དེ་ལྟར་སངས་རྒྱས་ཐམས་ཅད་ཀྱི་རྡོ་རྗེ་གསུམ་དང་རོ་མཉམ་པའི་བདག་ཉིད་དུ་གྱུར་པས་ཕྲིན་ལས་ཀྱི་འགྲོ་དོན་མཉམ་ཡངས་ཁྱབ་གདལ་དུ་སྤྱོད་པའི་དུས་ཡིན་པའི་ཕྱིར། མཛད་སྤྱོད་ཐམས་ཅད་རང་དོན་ཡིད་བྱེད་ཀྱི་འཁྲི་བ་ལས་རྣམ་པར་གྲོལ་ནས། བསྟན་འགྲོའི་ཕན་བདེ་འབའ་ཞིག་ཐུགས་སུ་གཅགས་པའི་སྙིང་སྟོབས་ཆེན་པོས་བཤད་སྒྲུབ་ལས་གསུམ་གྱི་ཕྲིན་ལས་རྣམ་པར་དཀར་བས་དུས་འདའ་བ་སྟེ། དེ་ལ་འཆད་པའི་ཕྲིན་ལས་ནི། གཙོ་བོར་ཀུན་མཁྱེན་རྒྱལ་མཆོག་ལྔ་པ་ཆེན་པོས་སྔ་འགྱུར་རྒྱུད་འབུམ་རིན་པོ་ཆེས་མཚོན་ཟབ་རྒྱས་ཀྱི་ཆོས་སྐོར་ཇི་སྙེད་པ་ཞིག་གསན་ནས་ཏི་ཤྲིར་བཀུར་ཞིང་། དེས་མཚོན་ཏེ་ས་ཕག་འབྲི་སྟག་སོགས་ཆེན་པོའི་གོ་སར་བཞུགས་པའི་སྐྱེས་མཆོག་དུ་མ་དང་། དཔོན་ཆེན་དཔོན་སྐྱ་སོགས་མི་ཆེན། བསྟན་པ་གསལ་བར་མཛད་པའི་བཤེས་གཉེན་སྐུའི་སྲས་མཆེད་རྣམས་དང་། གསུང་གི་སྲས་དམ་པ་མང་པོས་མཚོན་དབུས་གཙང་ཁམས་ཀོང་ལྷོ་མོན་མངའ་རིས་སོགས་ནས་དད་འདུས་ཀྱི་སྐལ་ལྡན་མཆོག་དམན་མཐའ་ཡས་པ་རྣམས་སོ་སོའི་བློ་དང་འཚམས་པའི་སྔ་འགྱུར་བཀའ་གཏེར་དང་སྔགས་གསར་མ་མདོ་ཕྱོགས་སྐོར་སོགས་ཀྱི་དབང་ཁྲིད་བཤད་ལུང་གི་ཆོས་སྒོ་དུ་མ་ཞིག་རྒྱུན་ཆགས་སུ་སྩོལ་བའི་འཆད་ཕྲིན་འགྲན་ཟླ་མེད་པས་བསྟན་པ་གསལ་ཞིང་རྒྱས་པར་མཛད་པ་དང་། བསྟན་པ་ཡུན་རིང་དུ་གནས་པའི་ཕྱིར་སྒྱུ་འཕྲུལ་དྲ་བ་ཞི་བའི་སྒྲུབ་
ཐབས་ཡེ་ཤེས་ཆར་འབེབས། དཀྱིལ་ཆོག་རིན་ཆེན་ཕྲེང་བ། ཁྲོ་བོའི་སྒྲུབ་ཐབས་བདེ་ཆེན་ཆར་འབེབས། དཀྱིལ་ཆོག་རྡོ་རྗེའི་ཕྲེང་བ། འདུས་པ་མདོའི་སྒྲུབ་ཐབས་དངོས་གྲུབ་ཆར་འབེབས། དཀྱིལ་ཆོག་དྲི་མེད་འོད་ཕྲེང་། སངས་རྒྱས་མཉམ་སྦྱོར་རིགས་བསྡུས་ཀྱི་སྒྲུབ་ཐབས་བདེ་ཆེན་འདོད་འཇོ། དཀྱིལ་ཆོག་ཀུན་ཏུ་བཟང་པོའི་ཞལ་ལུང་། དབང་ཆོག་བྱིན་རླབས་ཆར་འབེབས། དཔལ་ཧེ་རུ་ཀ་ཟླ་གམ་དགུ་པའི་སྒྲུབ་ཐབས་བདེ་ཆེན་ཐིག་ལེ། དཀྱིལ་ཆོག་བདུད་རྩིའི་ཉིང་ཁུ། དབང་ཆོག་བདེ་ཆེན་འཇུག་ངོགས། ཚེ་དཔག་མེད་ལུང་ལུགས་ཀྱི་སྒྲུབ་ཐབས། ན་རག་དོང་སྤྲུགས་ཀྱི་ཆོ་ག་འཁོར་བ་ཀུན་སྒྲོལ། དོང་སྤྲུགས་པདྨ་བརྒྱ་ལྡན་གྱི་ཆོ་ག་བདེ་ཆེན་ལམ་བཟང་སོགས་དང་། བཀའ་བརྒྱད་བདེ་གཤེགས་འདུས་པའི་ལས་བྱང་བདེ་བ་ཆེན་པོའི་རྣམ་རོལ་སོགས་བཀའ་གཏེར་གྱི་སྒྲུབ་དཀྱིལ་ཁྲིད་ཡིག་རྣམ་བཤད་ཞལ་གདམས་སོགས་ལེགས་བཤད་ཀྱི་བཀའ་རྩོམས་ཀྱང་པོད་ཆེན་བདུན་དུ་ལོངས་པ་མཛད། སྒྲུབ་པའི་ཕྲིན་ལས་ནི། རྗེ་ཉིད་མཉམ་རྗེས་འཁོར་ཡུག་གི་ཏིང་ངེ་འཛིན་ལས་མ་གཡོས་བཞིན་དུ་སྒོམ་ཁྲིད་འབོགས་པ་རྣམས་གོ་ཡུལ་ཙམ་དུ་མ་ལུས་པར་མངོན་སུམ་རིག་ཐོག་ཏུ་ངོ་སྤྲོད་ཅིང་། དབང་དུས་སུ་ཡེ་ཤེས་ཀྱི་བྱིན་སློབ་མའི་རྒྱུད་ལ་དངོས་སུ་ཕེབས་པ་དང་། བསྙེན་སྒྲུབ་ཀྱི་ལས་རབ་འབྱམས་ཐམས་ཅད་ཀྱང་བཤད་པ་ཙམ་དུ་མ་ལུས་པར་ཕྱག་བཞེས་སུ་ཐེབས་པར་མཛད་པ་ཡིན་ནོ། །བྱ་བ་ལས་ཀྱི་འཁོར་ལོའི་ཕྲིན་ལས་ནི། གོང་ཞབས་ཡས་ཕྱིན་སོགས་ཀྱིས་བླ་ནས་བསྩལ་བ་དང་། དད་ལྡན་རྣམས་ཀྱིས་ཕུལ་བའི་དངོས་པོ་རྣམས་མཛོད་ཕུགས་མའི་སྒོ་ལྕགས་མི་བསྡོམ་པར། སྡོམ་པ་གསུམ་གྱིས་རྒྱུད་བསྡོམས་ཤིང་བཤད་སྒྲུབ་ཀྱི་བྱ་བས་དུས་འདའ་བའི་འདུས་སྡེ་ཨོ་རྒྱན་སྨིན་གྲོལ་གླིང་པ་དགེ་འདུན་སུམ་བརྒྱར་ཉེ་བ་ཙམ་གསར་དུ་བསྡུ་བར་མཛད་པ་ལ་རུང་བའི་རྙེད་བཀུར་གྱིས་མི་དྲེལ་བར་རྒྱུན་ཆགས་པ་དང་། དེ་དག་གི་གནས་མལ་དང་རྟེན་གསུམ་མཆོད་ཆ། དུས་བཞིའི་སྒྲུབ་མཆོད་ཀྱི་ཡོ་བྱད་དང་རྙེད་པ། གཞན་ཡང་བྲིས་འབུར་གྱི་སྐུ་བརྙན་མང་པོ་དང་། གསེར་དངུལ་གྱི་བཀའ་འགྱུར་གྱིས་མཚོན་པའི་གླེགས་བམ་
ལྔ་བརྒྱ་བརྒལ་བ་དང་། སྔ་འགྱུར་གྱི་འདྲེལ་བཤད་ཆོག་ཕྲིན་ལ་སོགས་པའི་པར་མང་པོ། སྐུ་འབུམ་མཐོང་གྲོལ་ཆེན་མོས་ཐོག་དྲངས་པའི་ཐུགས་རྟེན་དུ་མ་རྣམས་བཞེངས་པར་མཛད་ཅིང་། གཏོང་བ་ཕུན་སུམ་ཚོགས་པས་རིས་མེད་པའི་མཆོད་སྦྱིན་གྱི་ཡུལ་རྣམས་ལ་ཚོགས་གཉིས་ཀྱི་རྒྱུར་ལྷུག་པར་གཏོང་བ་སོགས་བསྟན་འགྲོའི་ཕན་བདེ་རྒྱས་པའི་མཛད་པ་རླབས་ཆེན་ཁོ་ན་བདག་གིར་གཞེས་པ་ནི་ངོ་མཚར་རྨད་དུ་བྱུང་བའི་རྣམ་ཐར་རོ། །དེ་ལྟར་དགུང་ལོ་བཅུ་དྲུག་ནས་དྲུག་ཅུ་རེ་དགུའི་བར་ཆོས་ཀྱི་ཕྲིན་ལས་བསྐྱངས་པའི་མཐར་ཤིང་རྟ་ཧོར་ཟླ་དང་པོ་ནས་ཅུང་ཟད་བསྙུན་པའི་ཚུལ་བསྟན་ནས། ཁྱད་པར་ཚེས་ཉེར་ལྔ་ནས་ཁུ་དབོན་རྣམས་ལ་ཞལ་གདམས་ཕྱི་མཐའི་བསླབ་བྱ་བསྩལ། དེ་ནས་བཟུང་ཞབས་རིམ་དུ་གནས་པ་རྣམས་ཀྱི་སྣང་ངོར་ནུབ་ཀྱི་ཕྱིའི་རྩིགས་ངོས་ན་ཡོད་འདྲ་བའི་རྒྱ་གླིང་ལྟ་བུའི་སྒྲ་ཤིན་ཏུ་སྙན་པ་རྒྱུན་ཆགས་སུ་བྱུང་ཞིང་དེ་མཚུངས་ག་བུར་ལྟ་བུའི་དྲི་ངད་ཀྱིས་གཟིམས་ཆུང་ཕྱི་ནང་ཐམས་ཅད་ཁྱབ་པའང་བྱུང་། ཤར་ཕྱོགས་སུ་གོམ་པ་བདུན་འགྲོ་དགོས་ཡོད་གསུངས་བཞེངས་ཏེ་ཞབས་གོམ་བདུན་སྤོས་ནས་སྐྱིལ་ཀྲུང་གིས་བཞུགས་ཏེ། སྣང་གྲག་རིགས་གསུམ་ལྷ་སྔགས་ཆོས་སྐུའི་ངང་། །སྐུ་དང་ཡེ་ཤེས་རོལ་པར་འབྱམས་ཀླས་པ། །ཟབ་གསང་རྣལ་འབྱོར་ཆེན་པོའི་ཉམས་ལེན་ལ། །དབྱེར་མེད་ཐུགས་ཀྱི་ཐིག་ལེར་རོ་གཅིག་ཤོག །ཅེས་འདའ་ཀ་ཞལ་ཆེམས་ཀྱི་ཚུལ་དུ་གསུངས་ཏེ། ཤིང་རྟ་ཧོར་ཟླ་གཉིས་པའི་ཚེས་གཉིས་ཀྱི་ཉི་དྲོས་ལ་ད་སྟེ་མཁའ་འགྲོའི་བསུ་བ་ཡང་བྱུང་ངོ་གསུང་སྟེ། ཕྱག་གཉིས་ཌཱ་དྲིལ་འཁྲོལ་བའི་བརྡ་དང་སྤྱན་ལྟ་སྟངས་དང་བཅས་སྐད་ཅིག་ལ་མཁའ་སྤྱོད་དུ་གཤེགས་སོ། །ཐུགས་ཀྱི་སྲས་དང་གསུང་གི་སྲས་ཀྱིས་མཚོན་པའི་བུ་སློབ་གཏེར་ལུང་ནས་བཤད་པ་ནི། དམ་ལྡན་ཆོས་བདག་སློབ་བུ་ནི༔ ད་ལྟའི་མངའ་བདག་ཡབ་སྲས་སོགས༔ ས་ཐོབ་རྗེ་འབངས་སྐྱེ་བའི་མཐའ༔ འགྲོ་དོན་ནུས་པ་སུམ་ཅུ་ལྔ༔ རང་དོན་ཐུབ་པ་བརྒྱ་རྩ་བརྒྱད༔ ཆོས་ཀྱིས་འདྲེལ་པ་སྟོང་ཚོ་གཉིས༔ སྨོན་ལམ་འདྲེལ་པ་ཁྲི་ཕྲག་ལྔ༔ ལས་ཀྱིས་འདྲེལ་པ་དྲུག་ཅུ་
བདུན༔ གདུགས་ཐོགས་བདུན་གྱིས་ཞབས་ནས་འདེགས༔ མི་ཆེན་གསུམ་གྱིས་མངའ་ཐང་སྤེལ༔ ཞེས་པ་ལྟར། གསུང་གི་བདུད་རྩི་བཞེས་པའི་ཞལ་སློབ་ཀྱི་གཙོ་བོ་ནི་ཁམས་གསུམ་པ་ཐམས་ཅད་ཀྱི་གཙུག་གི་ནོར་བུ་ཕྱག་ན་པདྨ་རྒྱལ་དབང་ཐམས་ཅད་མཁྱེན་པའི་སྐུ་ཞབས་དང་། འཇམ་དཔལ་མི་སྐྱོང་ཆེན་པོའི་རྣམ་རོལ་སྡེ་སྲིད་རིན་པོ་ཆེ་སངས་རྒྱས་རྒྱ་མཚོ་མཆོད་ཡོན་ཉི་ཟླ་ཟུང་གཅིག་དང་། སྐུ་མཆེད་ཐུན་མོང་གི་སློབ་མ་ཆེ་ལོངས་ཙམ་ཞིག་འོག་ཏུ་གསལ་ལོ།། གཡུ་སྒྲའི་རྣམ་འཕྲུལ་བསྟན་པའི་ཉི་མ་ཀུན་མཁྱེན་དྷརྨ་ཤྲཱི་ནི། གཏེར་གཞུང་ལས། གཡུ་སྒྲའི་རྣམ་འཕྲུལ་བློ་ལྡན་དྷརྨའི་མིང་༔ བྱང་སེམས་དད་བརྩོན་སྙིང་སྟོབས་ལྡན་པ་འབྱུང་༔ ཞེས་ལུང་གིས་བསྟན་པ་ལྟར་གཏེར་ཆེན་རིན་པོ་ཆེའི་གཅུང་དུ་ཤིང་ཕོ་རྟའི་ལོ་ལ་སྐུ་འཁྲུངས། རྗེ་གཏེར་ཆེན་བླ་མའི་དྲུང་ནས་སྐྱབས་གསུམ་འཛིན་པའི་དགེ་བསྙེན་གྱི་སྡོམ་པ་ནོད་ཅིང་མཚན་བསྟན་འཛིན་འཇམ་དབྱངས་དབང་པོར་གསོལ། དགུང་གྲངས་བཅོ་ལྔ་པ་ལ་རྗེ་ཐམས་ཅད་མཁྱེན་པ་ལྔ་པ་ཆེན་པོ་ལས་རབ་ཏུ་བྱུང་སྟེ། མཚན་ངག་དབང་ཆོས་དཔལ་ཞེས་བསྩལ་ཞིང་དགེ་ཚུལ་གྱི་སྡོམ་པ་དང་། དགུང་གྲངས་ཉི་ཤུ་པར་སླར་ཡང་མཁན་པོ་དེ་ཉིད་ལས་བསྙེན་པར་རྫོགས། ཕྱིས་ཀྱང་གོང་མའི་ལུང་གིས་བསྐུལ་བ་བཞིན་ཁ་རབ་ཞལ་སྔ་ནས་དཀོན་མཆོག་བསྟན་འཛིན་ལས་སྔ་འགྱུར་སྨད་འདུལ་གྱི་སྡོམ་རྒྱུན་རྣམ་དག་བཞེས། རྗེ་གཏེར་ཆེན་བླ་མ་ལས་བཀའ་སྲོལ་གསུམ་གྱི་བྱང་སྡོམ་ཐུགས་བསྐྱེད་དང་སྔར་དགུང་གྲངས་བཅུ་གཉིས་པར་རྡུལ་ཚོན་གྱི་དཀྱིལ་འཁོར་དུ་རིག་འཛིན་ཐུགས་ཐིག་གི་དབང་གསན་པས་ཐུགས་རྒྱུད་སྨིན་པར་མཛད་ཅིང་རྗེས་སུ་ཐོབ་པའི་སོ་བྱང་གི་སྡོམ་པ་གཉིས་པོ་དེ་ཡང་སྔ་མའི་སྔགས་ཀྱི་ཚུལ་ཁྲིམས་ལས་ཕྱེ་བའི་དེ་དང་དེའི་སྡོམ་པའི་ངོ་བོར་སྐྱེས་པས་ཐུགས་རྒྱུད་ལེགས་པར་བསྡམས། ཡི་གེ་འབྲི་ཀློག་དང་ཆོག་ཕྲིན་རྣམས་བྱང་ཆུབ་པར་མཛད། དགུང་གྲངས་བཅུ་དྲུག་པར་གུང་ཐང་པཎ་ཆེན་བཤེས་གཉེན་རྣམ་རྒྱལ་ལས་སྒྲ་ཀ་ལཱ་པ་དང་སྡེབ་སྦྱོར་ཡོངས་རྫོགས་ཀྱི་བཤད་པ།
ལཱཉྪ་དང་ཝརྟུ་ལ་སོགས་ཡིག་རིགས་རྣམས་དང་སུམ་རྟགས་ཀྱི་བཤད་པའང་གསན་ཏེ། བརྡ་སྤྲོད་ཡན་ལག་དང་བཅས་པ་ལ་མཁས་པར་སྦྱངས། ལྡུམ་པོ་དོན་འགྲུབ་དབང་རྒྱལ་གྱི་དྲུང་ནས་རྩིས་དཀར་ནག་དབྱངས་འཆར་རྣམས་མཐར་ཕྱིན་པར་མཛད། སྟག་ལུང་སྒྲ་པ་ལས་ས་ར་སྭ་ཏཱིའི་རི་མོ་དང་། ཙནྟྲ་པའི་ཡི་གེ་བསྡུ་བ་དང་ཏིང་མཐའ་སོགས་ཀྱི་བཤད་པ་དང་སྡེབ་སྦྱོར་ཡང་བའི་བྱ་བ་རྣམས་གསན། གཏེར་ཆེན་བླ་མའི་དྲུང་ནས་སྙན་ངག་མེ་ལོང་གི་བཤད་པ་གསན། སྔ་འགྱུར་རང་ལུགས་ཀྱི་གར་ཐིག་དབྱངས་གསུམ་རྣམས་ཀྱང་དཔྱིས་ཕྱིན་པར་མཛད། གཅེན་རྒྱལ་སྲས་བསྟན་པའི་ཉི་མ་ལས་འདུལ་བའི་ལག་ལེན་དང་བརྡ་ཆད་ལ་མཁས་པར་མཛད། སེམས་ཉིད་ངལ་གསོ་དང་འདུལ་བ་ལུང་རིག་གཏེར་མཛོད་ལ་སོགས་གཞུང་ཕལ་ཆེར་བཟུང་བ་ཙམ་གྱིས་གོ་དོན་ཐོགས་མེད་དུ་ཤར། གཏེར་ཆེན་ཆོས་ཀྱི་རྒྱལ་པོའི་དྲུང་དུ་སྙིང་པོའི་འགྲེལ་པ་སྤར་ཁབ་དང་གཡུང་ཊིཀ་སྦྱར་བའི་གསུང་བཤད་གསན་པས་རྒྱུད་དངོས་སྦས་ཀྱི་དོན་ཐམས་ཅད་གཏིང་སླེབས། དགེ་བའི་བཤེས་གཉེན་སངས་རྒྱས་ཆོས་དར་ལས་འདུལ་མངོན་ཕར་ཕྱིན་རྣམས་ཀྱི་བཤད་པ་ཞིབ་ཏུ་གསན། གུང་ཐང་པཎ་ཆེན་ལས་དབུ་མའི་སྟོང་ཐུན་དང་འདུལ་བ་སུམ་བརྒྱ་པའི་བཤད་པ། མཁས་གྲུབ་ཆོས་སྐྱོང་རྒྱལ་མཚན་ལས་ཟབ་མོ་ནང་དོན་གྱི་བཤད་པ་རྣམས་དང་། རྗེ་བླ་མའི་དྲུང་ནས་ཆོས་རྗེ་ཀུན་མཁྱེན་ཆེན་པོ་དང་། ཟུར་པ་ཡབ་སྲས། རོང་ཟོམ་ཆེན་པོ་རྣམས་ཀྱི་གསུང་རབ་རྣམས་མང་དུ་ཐོས་པས་རྒྱུད་གྲོལ་ཏེ་ཐོས་བསམ་གང་བྱས་ཁ་ཕྱིར་བལྟས་སུ་མ་སོང་བར་རྒྱུད་ཐོག་ཏུ་དྲིལ་ཐུབ་པའི་བཀའ་དྲིན་ཐོབ་པ་ཡིན་ནོ། །ཞེས་གསུངས། ཁྱད་པར་གཏེར་ཆེན་བླ་མ་ལས་སྔ་འགྱུར་མདོ་སྒྱུ་སེམས་གསུམ་སོགས་རྒྱུད་སྡེ་དང་སྒྲུབ་སྡེའི་དབང་བཀའ་བཤད་ལུང་མན་ངག་གི་བཀའ་བཞུགས་སོ་ཅོག་དང་། གཏེར་མའི་སྐོར་ལ་གཏེར་ཁ་གོང་འོག་གིས་གཙོས་གཏེར་སྟོན་གྲགས་ཆེ་བ་ཕལ་མོ་ཆེའི་གཏེར་ཆོས་ཀྱི་དབང་ལུང་མན་ངག་ཇི་སྙེད་པ་དང་། དེ་དག་གི་རྩ་བར་གྱུར་པ་རྙིང་མ་རྒྱུད་འབུམ་གྱི་ལུང་ཡོངས་རྫོགས་
དང་། དགྱེས་རྡོར་ནཱ་རོ་མཁའ་སྤྱོད་སོགས་གསར་མའི་རྒྱུད་སྡེ་མང་པོའི་དབང་ལུང་དང་། རིག་འཛིན་པདྨ་ཕྲིན་ལས་ལས་དུས་འཁོར་ཡོངས་རྫོགས་ཀྱི་དབང་དང་སྒྱུ་འཕྲུལ་ཞི་ཁྲོའི་དབང་གིས་མཚོན་པ་གསར་རྙིང་རིས་བྲལ་གྱི་ཡོངས་འཛིན་བཅུ་ཕྲག་གཉིས་ལས་སོ་སོའི་བཀའ་སྲོལ་ཐ་དད་པའི་ཆོས་ཚུལ་རྒྱ་མཚོ་ཙམ་ལ་གསན་བསམ་བསྒོམ་པ་མཛད་པའི་ཚུལ་སྨོས་ཀྱིས་མི་ལང་ཞིང་། བསྟན་པ་ལ་དགོངས་པའི་བསྙེན་རྫོགས་ཀྱི་སྡོམ་པ་གནང་བའི་དགེ་སློང་བཞི་བརྒྱ་དང་ཞེ་བདུན། དགེ་ཚུལ་ཆིག་སྟོང་ཉིས་བརྒྱ་གོ་བརྒྱད། དགུང་གྲངས་ཞེ་བརྒྱད་ནས་བཟུང་དྲུག་ཅུ་རེ་བཞིའི་བར་དབྱར་དགུན་གཉིས་སུ་སྐལ་བ་མཆོག་དང་ལྡན་པའི་བློ་གསལ་རིག་པ་འཛིན་པའི་དགེ་འདུན་དྲུག་ཅུ་སྐོར་རེ་ལ་གསང་བ་སྙིང་པོའི་རྒྱུད་ཀྱི་ཆོས་འཁོར་ཆགས་མེད་དུ་བསྐོར། སྡོམ་གསུམ་རྣམ་ངེས། ཕར་ཕྱིན། འདུལ་བ་སོགས་གཞུང་ཆེན་མང་པོར་ཡང་བཤད་པ་མཛད། སྒྱུ་འཕྲུལ་ཞི་ཁྲོའི་དབང་ཁོ་ནའང་ཚར་བརྒྱད། མདོ་དབང་ཚར་གསུམ། དོང་སྤྲུགས་ཚར་ལྔ་ལ་སོགས་པས་མཚོན་པའི་བཀའ་གཏེར་གསར་རྙིང་གི་དབང་ལུང་སྨིན་ཁྲིད་གང་གསན་ཐམས་ཅད་ལན་གྲངས་གསུམ་བཞིར་མ་འཆད་པར་མེད་པ་ལྟ་བུ་དང་། ཁྱད་པར་དཔལ་ལྡན་ས་སྐྱ་པ་བདག་ཆེན་ངག་དབང་ཀུན་དགའ་བཀྲ་ཤིས་ལ་གཏེར་གསར་གྱི་དབང་ལུང་ཡོངས་རྫོགས་དང་། ཐུགས་རྗེ་ཆེན་པོའི་སྨིན་ཁྲིད། ཕུར་པ་སྤུ་གྲིའི་དབང་སོགས་ཆོས་བཀའ་ཤིན་ཏུ་མང་བ་གནང་། དགུང་གྲངས་ང་དགུ་པ་ཆུ་འབྲུག་ལོར་མདོ་ཁམས་ཆབ་མདོར་སྤྱན་དྲངས་པ་བཞིན་ཕེབས་ཏེ་འཕགས་པ་ལྷ་རྒྱལ་བ་རྒྱ་མཚོ་དང་། ཞི་བ་བཟང་པོ་དང་། ངག་དབང་སྤྲུལ་སྐུ་བཅས་ལ་གཏེར་གསར་སྐོར་གྱི་དབང་ལུང་ཁྲིད་དང་བཅས་པ། བླ་མ་གསང་འདུས། ཉང་གཏེར་དྲག་དམར། ཕུར་པ་སྤུ་གྲི། ན་རག་དོང་སྤྲུགས། ཐུགས་རྗེ་ཆེན་པོ་རྒྱལ་པོ་ལུགས་ཀྱི་དབང་ཁྲིད་སོགས་གསར་རྙིང་རིས་མེད་ཀྱི་དབང་ལུང་མན་ངག་གི་བདུད་རྩི་མང་པོས་ཐུགས་རྒྱུད་སྨིན་ཅིང་གྲོལ་བར་མཛད། སྒྲ་སྙན་སྡེབ་སྦྱོར་སོགས་ཐ་སྙད་རིག་པ་རྣམས་ཀྱང་དོན་གཉེར་སོ་སོའི་བློ་དང་འཚམས་པར་ཚར་ལྔ་དྲུག་རེ་མ་འཆད་
པ་མེད་པ་སོགས་མདོར་ན་དམ་པ་འདི་ཉིད་ཀྱི་སྐུ་ཚེ་རིལ་བོར་མཁས་ཚུལ་གསུམ་གྱིས་བསྟན་པའི་བྱ་བ་རྒྱ་ཆེན་པོ་མཛད་པའི་ངང་ནས་རྫོགས་པ་ཆེན་པོ་རང་སྣང་རིས་མེད་ཀྱི་དགོངས་པ་མངོན་དུ་གྱུར་པའི་འཕགས་པའི་ས་ཆེན་པོ་ལ་གནས་པར་ནི་རྩོད་པ་མེད་ལ། བསྟན་པ་ཡུན་རིང་དུ་གནས་པའི་ཕྱིར་མདོ་དང་སྒྱུ་འཕྲུལ་གྱི་དགོངས་དོན་འགྲེལ་པའི་ཤིང་རྟ་ཆེན་པོ་སྔོན་མེད་པའི་བསྟན་བཅོས། སྒྱུ་འཕྲུལ་རྩ་རྒྱུད་གསང་སྙིང་ལ་ཊི་ཀ་གསང་བདག་དགོངས་རྒྱན། སྤྱི་དོན་གསང་བདག་ཞལ་ལུང་། དཀྱིལ་འཁོར་བློས་བསླངས་ཀྱི་རྣམ་གཞག་གསལ་སྒྲོན་རྩ་འགྲེལ། མདོ་དབང་རྣམ་བཤད་ལུང་རིག་མན་ངག་གི་གནད་གསལ་བྱེད་སྒྲོན་མེ། ཡན་ལག་དཀྱིལ་འཁོར་རྣམས་ཀྱི་སྒྲུབ་དཀྱིལ་དངོས་གྲུབ་འདོད་འཇོ། རྒྱུད་དང་མན་ངག་གི་ལུགས་གཅིག་ཏུ་དྲིལ་བའི་དབང་ཆོག་རྡོ་རྗེའི་ཐེམ་སྐས། སྒྲུབ་ཁོག་རིན་ཆེན་འོད་ཀྱི་སྣང་བ། ཟུར་འདེབས་དཔག་བསམ་སྙེ་མ། ཐུགས་རྗེ་ཆེན་པོ་བདེ་གཤེགས་ཀུན་འདུས་ཀྱི་རྣམ་བཤད་དེ་ཁོ་ན་ཉིད་སྣང་བའི་འོད། སྡོམ་གསུམ་རྣམ་ངེས་ཀྱི་འགྲེལ་པ་ལེགས་བཤད་ངོ་མཚར་དཔག་བསམ་སྙེ་མ་སོགས་དང་། གཞན་ཡང་སྔགས་ཕྱི་ནང་གི་སྒྲུབ་ཐབས། རྗེས་གནང་། དབང་། བསྙེན་ཡིག །ཁྲིད་ཡིག །ཐ་སྙད་རིག་ལམ་གྱི་བསྟན་བཅོས་སོགས་ལེགས་བཤད་ཕུན་སུམ་ཚོགས་པའི་གཏེར་ཆེན་པོར་མངོན་སུམ་དུ་གྱུར་པའི་པུསྟ་ཀ་དྲུག་ཏུ་ལོངས་པ་བཞུགས། སྐུ་མཆེད་ལྷན་ཅིག་པའི་གསུང་གི་བདུད་རྩི་མྱངས་པའི་སློབ་མའི་ཚོགས་ཀྱང་། ས་སྐྱ་བདག་ཆེན་ཀུན་དགའ་བཀྲ་ཤིས། འཕགས་པ་ལྷ་རྒྱལ་བ་རྒྱ་མཚོ་སྟོན་འཁོར། གསུང་སྤྲུལ་ངག་དབང་ཀུན་བཟང་རྡོ་རྗེ། ཐུགས་སྲས་སྤྲུལ་སྐུ། རྒྱལ་བའི་སྲས་མཆོག་པདྨ་འགྱུར་མེད་རྒྱ་མཚོ། ཡིད་བཞིན་ལེགས་གྲུབ། རིན་ཆེན་རྣམ་རྒྱལ། འོད་མཆོག་སྤྲུལ་སྐུ། ཐང་འབྲོག་སྤྲུལ་སྐུ། བོན་ལུང་སྤྲུལ་སྐུ། ཡོན་དོ་སྤྲུལ་སྐུ། ཁམས་པ་སྤྲུལ་སྐུ་ཀུན་དགའ་བསྟན་འཛིན། དྲེས་པ་སྤྲུལ་སྐུ། དཔལ་རི་སྤྲུལ་སྐུ། ཟངས་ལ་མཁར་སྤྲུལ་སྐུ། ད་ལའི་ཧུ་ཐོག་ཐུ་ངག་
དབང་བཤད་སྒྲུབ་རྒྱ་མཚོ། རོང་པ་རྫོགས་ཆེན་པ། ཁམས་པ་རྫོགས་ཆེན་སྤྲུལ་སྐུ། ཀཿཐོག་རྒྱལ་སྲས། ཀོང་པོ་རྦ་ག་སྐུ་སྐྱེ། སྣ་བོ་གདུང་བརྒྱུད། མེ་རག་བླ་མ་སོགས་དང་། གཞན་ཡང་ལུང་རིག་སྨྲ་བའི་མཁས་པ་དང་། ཉམས་མྱོང་ལྡན་པའི་གྲུབ་པ་ཅན་བགྲངས་ཀྱིས་མི་ལང་བས་ཞབས་ལ་གཏུགས་ཤིང་བཀའ་སྲོལ་གྱི་བརྒྱུད་པ་འཛིན་ནུས་པའི་བཤེས་གཉེན་ཁོ་ནའང་ཤིན་ཏུ་མང་པོ་བྱུང་བས་དེང་སང་གི་དུས་སུ་སྔ་འགྱུར་བཀའ་མའི་ཕྱོགས་ལ་བཤད་སྒྲུབ་ཀྱི་སྒོ་མ་ནུབ་ཙམ་དང་ལུང་གི་མཐའ་བརྟེན་པ་མ་ཆད་ཙམ་དུ་ཐོས་བསམ་བྱར་ཡོད་པ་འདི་ནི། དམ་པ་འདི་དག་གི་བཀའ་དྲིན་ཁོ་ན་ལས་བྱུང་བ་ཡིན་པར་སྔ་འགྱུར་རྗེས་ཞུགས་ད་ལྟ་དང་། སླད་ཀྱིས་འབྱོན་པར་འགྱུར་བ་ཐམས་ཅད་ཀྱིས་ཤེས་པར་བྱ་དགོས་ཤིང་སྐུ་མཆེད་འདི་དག་གིས་མཛད་པའི་བསྟན་བཅོས་རྣམས་ཀྱང་ངོ་བོའི་སྒོ་ནས་འཕགས་ཡུལ་ནས་བསྒྱུར་བའི་སྔོན་གྱི་སློབ་དཔོན་ཆེན་པོ་རྣམས་ཀྱི་བསྟན་བཅོས་དང་ཁྱད་པར་དམིགས་སུ་མེད་པའི་ལེགས་བཤད་ཆེ་བའང་མངོན་སུམ་གྱིས་གྲུབ་ཅིང་རང་ལུགས་བསྟན་པ་མུན་པ་ལྟར་མི་གསལ་བའི་སྐབས་སུ་སྣང་བྱེད་ཀྱི་སྒྲོན་མེ་སྦར་བས་འཆི་ཀ་མའི་བདུད་རྩི་ལྟ་བུར་གྱུར་པའི་ཕྱིར་ཀུན་བཟང་རྡོ་རྗེ་འཆང་དང་རྡོ་རྗེ་ཆོས་སོགས་རྒྱལ་དང་རྒྱལ་བའི་སྲས་ཀྱི་གསུང་དང་དབྱེར་མེད་པའི་རིམ་གྲོ་བསྐྱེད་པར་འོས་པའི་ཕྱིར། ད་ལམ་འདིར་ཡང་སྙིང་པོའི་འགྲེལ་པ་དགོངས་རྒྱན་དང་། སྤྱི་དོན་ཞལ་གྱི་ལུང་རྣམ་པ་གཉིས་པོ་སྒྱུ་འཕྲུལ་གསང་སྙིང་གི་སྐོར་དང་རྩ་འགྲེལ་སྟབས་གཅིག་ཏུ་བཀོད་པའི་རྒྱུ་མཚན་ཀྱང་དེ་ཡིན་ནོ།། ཡང་རྗེ་བཙུན་གཏེར་ཆེན་དེ་ཉིད་ཀྱིས་འོ་བྲན་དཔལ་གྱི་དབང་ཕྱུག་གི་ཟློས་གར་དུ་གཏེར་ལུང་གིས་ཟིན་པ་ལྟར་ཆོས་བདག་ཏུ་ངོས་འཛིན་གནང་བ་ད་ལའི་ཧུ་ཐོག་ཐུ་ངག་དབང་བཤད་སྒྲུབ་རྒྱ་མཚོ་ཞེས་རིག་པ་དང་གྲོལ་བའི་སྤོབས་པ་ཅན་ཡང་དག་པའི་ལམ་གྱི་དགེ་བའི་བཤེས་གཉེན་ཆེན་པོར་གྱུར་པས་ཁོང་ཉིད་ཀྱང་དབང་རྣོན་ཆོས་ཀྱི་རྗེས་སུ་འབྲངས་པས་གཏེར་ཁ་གོང་འོག་གིས་མཚོན་པའི་གཏེར་ཆོས་རྣམས་ཀྱི་དབང་ལུང་མན་ངག་ཡོངས་སུ་རྫོགས་པར་གཏེར་སྟོན་རིན་པོ་ཆེ་དང་། མཁན་ཆེན་ལོ་ཙཱ་
བ་དང་། རྒྱལ་བའི་སྲས་མཆོག་སྐུ་མཆེད་རྣམས་ཀྱི་ཞབས་ལ་གཏུགས་ཤིང་བུམ་པ་གང་བྱོའི་ཚུལ་གྱིས་གསན་བསམ་རྒྱ་ཆེན་པོ་མཛད། བསྒོམས་པས་དྲོད་ཚད་བརྙེས་ཤིང་མངོན་ཤེས་དང་ལས་བཞི་ལ་རང་དབང་འབྱོར་པའི་གྲུབ་པའི་གོ་འཕང་མཐོན་པོར་གཤེགས། བྱང་ཕྱོགས་ཀྱི་སྐྱེ་བོ་ཐམས་ཅད་སྔ་འགྱུར་རྙིང་མ་བཀའ་གཏེར་གྱི་གདུལ་བྱའི་ཞིང་དུ་མཛད་པས་དེང་སང་གི་བར་དུ་ཕྱོགས་དེར་རྒྱལ་བའི་ཕྲིན་ལས་ངེས་དོན་མཆོག་གི་འབབ་སྟེགས་ཅུང་ཟད་མཆིས་པ་ནི་རྗེ་དེ་ཉིད་ཀྱི་བཀའ་དྲིན་ཁོ་ན་ལས་བྱུང་བ་ཡིན་ཅིང་རྙིང་རྒྱུད་ཚད་མ་སྐྱ་ཆོས་སུ་བཞེངས་པ་དང་། གཏེར་ཆོས་གང་གསན་ཐམས་ཅད་ཀྱི་གླེགས་བམ་བཞེངས་པ་རྣམས་ཀྱང་བསྟན་འགྲོའི་མཆོད་སྡོང་ཆེན་པོ་འབའ་ཞིག་ཏུ་གྱུར་ཏོ། །ཡང་། ཀ༔ཐོག་ཏུ་བར་སྐབས་སུ་བུ་འབོར་བ་བཀྲ་ཤིས་རྒྱ་མཚོས་ཞིག་པོ་གླིང་པའི་དྲུང་དུ་བླ་མ་ཞིག་གཏོང་བར་ཞུས་པས་གཙང་པ་པདྨ་རྒྱལ་མཚན་མངགས་ཤིང་ཀཿཐོག་ཏུ་བཞུགས། དེའི་སློབ་མ་སྟག་བུ་རེ་ཁེ་འབྲི་རྒྱུད་དུ་འཁྲུངས་པ་པདྨ་བློ་གྲོས་ཞེས་གྲགས་པ་ཞིག་མཁས་གྲུབ་ཆེན་པོར་གྱུར་ནས་དབུས་སུ་གོང་ར་ལོ་ཙཱ་བ་དང་། གཡུང་སྤྲུལ་ཚུལ་ཁྲིམས་རྡོ་རྗེ། ཟུར་ཆེན་ཆོས་དབྱིངས་རང་གྲོལ་སོགས་སྐྱེས་ཆེན་མང་པོ་དང་ཟབ་ཆོས་ཀྱི་བདུད་རྩི་སྟོབ་རེས་མཛད་ཅིང་། དབུས་ཕྱོགས་སུ་རྒྱུན་དཀོན་པའི་ཆོས་བཀའ་དུ་མ་ཉམས་པའང་གསོས། ཁམས་ཕྱོགས་འདིར་སྙིང་ཐིག་ཡ་བཞི་དང་། དུང་མཚོ་རས་པའི་ཡང་ཏིག་ནག་པོ་སོགས་ཆོས་རྩ་བ་ཆེན་པོ་དུ་མ་སྤེལ་བ་སོགས་རྙིང་མའི་བསྟན་པ་ལ་སྐུ་དྲིན་མཆོག་ཏུ་ཆེ་ཞིང་སྐུ་ཚེ་སྒྲུབ་པ་ཁོ་ནར་དྲིལ་བའི་བྱ་བྲལ་འབའ་ཞིག་པའི་ཚུལ་གྱིས་བཞུགས་པ་སོགས་མཁས་བཙུན་བཟང་པོའི་ཕ་རོལ་ཏུ་བྱོན་པས་ཀུན་མཁྱེན་ཀློང་ཆེན་པའི་སྤྲུལ་པར་གྲགས། བསྟན་བཅོས་ཀྱང་ཡང་ཏིག་གི་རྒྱབ་ཆོས་དོན་གསལ་མེ་ལོང་སོགས་པོད་ཆེན་གསུམ་དུ་ལོངས་པ་མཛད། དེ་ཉིད་ཀྱི་དབོན་བརྒྱུད་སྟག་བླའི་རབས་ཀྱི་ཕྲེང་བ་མང་དུ་བྱོན་པ་ཐམས་ཅད་ཀྱང་མཁས་ཤིང་དངོས་གྲུབ་བརྙེས་པ་ཤ་སྟག་བྱོན། ཁྱད་པར་ས་བླ་སངས་རྒྱས་རྡོ་རྗེས་
གོང་ར་ལོ་ཆེན་པ་ར་ཧི་ཏའི་དྲུང་ནས་རྙིང་རྒྱུད་ཕལ་ཆེ་བའི་དཔེ་ལུང་གཉི་གའི་རྒྱུན་བླངས་ཏེ་ཕྱོགས་འདིར་སྤེལ། དེར་མ་ཚང་བ་རྣམས་ཕྱིས་ཀུན་བཟང་ཁྱབ་གདལ་ལྷུན་གྲུབ་ཀྱི་རིགས་དཔོན་ཀུན་བཟང་རྣམ་རྒྱལ་དང་། ཀུན་བཟང་བློ་གྲོས་སྐུ་མཆེད་ཀྱིས་སྨིན་གླིང་དུ་གཏེར་སྟོན་རིན་པོ་ཆེའི་ཞབས་ལ་གཏུགས་ཏེ་དཔེ་རྣམས་ཚང་བ་དང་། བཀའ་ལུང་རྣམས་ཀྱང་རྒྱལ་བའི་སྲས་མཆོག་ཡིད་བཞིན་ལེགས་གྲུབ་ལས་ཞུས་ཤིང་དཔེ་ལུང་གཉིས་ཀའི་རྒྱུན་ཕྱོགས་འདིར་ཚང་བར་མཛད་པས་བསྟན་པ་ལ་ཕྱག་རྗེས་ཤིན་ཏུ་ཆེ། རྒྱུན་དེ་ཉིད་ལས་རྫོགས་ཆེན་སྤྲུལ་པའི་སྐུ་རིན་པོ་ཆེ་འགྱུར་མེད་ཐེག་མཆོག་བསྟན་འཛིན་གྱིས་བཀའ་ལུང་དང་གླེགས་བམ་བཅས་ཐུགས་རྩོལ་ཆེན་པོས་སྒྲུབ་པར་མཛད་ཅིང་། བདག་ཅག་གི་འདྲེན་མཆོག་མཚུངས་པ་མེད་པ་དེ་ཉིད་ཀྱིས་ཀྱང་སྨིན་གླིང་རྒྱལ་བའི་སྲས་མཆོག་རིན་པོ་ཆེ་རྣམ་རྒྱལ་གྱི་དངོས་ཀྱི་ཞལ་སློབ་སྟག་བུ་སྤྲུལ་སྐུ་མདོ་རྒྱུད་རྒྱ་མཚོའི་སྡེ་ཞེས་བསྟན་པ་ཡོངས་རྫོགས་ཀྱི་དགེ་བའི་བཤེས་གཉེན་ཆེན་པོ་དེ་ཉིད་ལས། སྒྱུ་འཕྲུལ་ཞི་ཁྲོ། ན་རག་དོང་སྤྲུགས། ཡང་དག་ཟླ་གམ་དགུ་པ། སངས་རྒྱས་མཉམ་སྦྱོར། འདུས་པ་ཆེན་པོ་མདོའི་དབང་རྣམས་གཏེར་ཆེན་སྐུ་མཆེད་ཡབ་སྲས་རྣམས་ཀྱི་ཆོས་ཁྲིགས་ཀྱི་ཡི་གེ་ལེགས་བཤད་རྨད་དུ་བྱུང་བའི་སྟེང་ནས་གསན་པ་དང་། གསང་བ་སྙིང་པོའི་འགྲེལ་པ་དགོངས་རྒྱན་དང་ཞལ་ལུང་གཉིས་སྦྱར་གྱི་བཤད་པ་གོ་དོན་རྣམས་ཀྱང་ལེགས་བར་དཔྱིས་ཕྱིན་པར་མཛད། རྒྱུད་འབུམ་སྤྱིའི་ལུང་ཡང་ཚང་མ་གསན་ཅིང་གཞན་ལ་ལན་གསུམ་བཞིར་འཆད་སྤེལ་མཛད་པ་སོགས་ཀྱིས་ཕྱོགས་འདིར་གསང་བ་སྔགས་ཀྱི་བསྟན་པ་ཉིན་མོ་ལྟར་སླར་ཡང་གསལ་བར་མཛད་པ་ཡིན་ནོ།། ཁྱད་པར་སྙིགས་མ་ལས་ཀྱང་ཆེས་སྙིགས་མར་གྱུར་པའི་དུས་ཀྱི་མཐའ་མ་འདིར་བཀའ་གཏེར་གྱི་བསྟན་པ་སྤྱི་དང་ཁྱད་པར་མཆོག་ཏུ་ཟབ་པ་རྫོགས་པ་ཆེན་པོ་སྙིང་ཐིག་འོད་གསལ་རྡོ་རྗེ་སྙིང་པོའི་བསྟན་པ་དུས་ཀྱི་རྒུད་པའི་འོག་ཏུ་བལྟར་མི་མངོན་པ་ལྟར་གྱུར་པ་སླར་ཡང་གཞི་བཞེངས་ལྟ་བུར་སློང་བར་མཛད་པ་པོ་ནི། བླ་མ་དགོངས་པ་འདུས་པའི་ལུང་བསྟན་བཀའ་རྒྱ་མ་ལས།
མ་འོངས་པའི་ཚེ་ལུང་ཟིན་ཐམས་ཅད་ལ་མི་འགྱུར་བའི་བརྡ་རྟགས་གསུམ་གྱི་གཟེར་ཡོད་པ་དེ་ཉིད་ལས། གང་ཡང་མི་འགྱུར་བརྡ་རྟགས་གསུམ་དང་ལྡན༔ ལུས་ལ་ལྟེ་སྨེ་སྙིང་གར་ཤ་མཚན་རེ༔ ངག་ནི་སྙན་འགྱུར་སྔགས་ཚིག་རྩོལ་བ་ཅན༔ པདྨ་ལས་བྱུང་པདྨའི་མིང་ཅན་གཉིས༔ ཡིད་ནི་རྩེ་གཅིག་གདུང་ཤུགས་ང་ཉིད་དྲན༔ ཕུར་ཚུག་འདི་མིན་ཡིད་ལ་མི་བྱེད་གསུང་༔ དེ་གསུམ་གསུམ་འཛོམ་མཆོག་ཡིན་གཉིས་འཛོམ་འབྲིང་༔ གཅིག་འཛོམ་ཐ་མ་གང་ཡང་ལས་ཅན་དེ༔ ཞེས་བསྟན་པ་དང་མཚུངས་པའི་སྐུའི་རྟགས་མཚན་རྣམས་ཀྱང་ལྡན་ཅིང་། གཞན་ཡང་ཆོས་རྗེ་གླིང་པའི་བླ་མ་དྲག་པོའི་ལུང་བསྟན་ལས། དབུ་གཡོར་གཞུང་དུ་བྱང་སེམས་པདྨའི་མིང་༔ བཀའ་རྙིང་བསྟན་སྐྱོང་ཐབས་མཁས་འགྲོ་བ་འདུལ༔ ཞེས་བཀའ་རྙིང་མའི་བསྟན་པ་བཤད་སྒྲུབ་ཀྱིས་འཛིན་པར་ཆེད་དུ་བསྔགས་པ་བཞིན། སློབ་དཔོན་ཆེན་པོ་དགའ་རབ་རྡོ་རྗེ་དང་། སྤྲུལ་པའི་དགེ་སློང་ཨ་དཀར་མ་ཏི། ཆོས་རྒྱལ་ཁྲི་སྲོང་ལྡེའུ་བཙན། རྒྱལ་སྲས་ལྷ་རྗེ། ཡར་རྗེ་ཨོ་རྒྱན་གླིང་པ། ཀུན་མཁྱེན་དྲི་མེད་འོད་ཟེར། མངའ་རིའི་པཎ་ཆེན། བྱང་པ་བདག་པོ་སོགས་ཀྱི་ཐུགས་བསྐྱེད་གཅིག་ཏུ་སྨིན་པའི་མཁྱེན་བརྩེ་ནུས་གསུམ་གྱིས་སྙིང་པོའི་རིང་ལུགས་གསལ་བར་མཛད་པ་ལ་དོན་དུ་ལྔ་བརྒྱ་པ་རྣམས་ཀྱི་གཙུག་གི་ནོར་བུ་སློབ་དཔོན་དྲི་མེད་བཤེས་གཉེན་ཟག་པ་དང་བྲལ་བའི་སྐུ་དེ་ཉིད་ཀྱིས་འཁོར་བ་མ་སྟོངས་པར་འཕགས་པ་འཇམ་དཔལ་བུས་པ་གཞོན་ནུའི་ཚུལ་གྱིས་ཆོས་སྟོན་པའི་གནས་རི་བོ་ཆེན་པོ་འུ་ཐའི་ཤན་དུ་བཞུགས་པ་ལས། ལོ་བརྒྱད་བརྒྱ་རེ་ན་བོད་ཀྱི་ལྗོངས་སུ་ཉིད་ཀྱི་སྤྲུལ་པ་རེས་སྙིང་ཐིག་གི་བསྟན་པ་ལ་ཉམས་པ་རྣམས་གསོ་བ་དང་། འཁྲུལ་པའི་དྲི་མ་རྣམས་དག་པར་མཛད་པར་ཞལ་གྱིས་བཞེས་པ་བཞིན་ཡུལ་དབུས་འགྱུར་ལྷོ་ཕྱོགས་ཀྱི་རྒྱུད་དུ་རང་བྱུང་རྡོ་རྗེ་འཇིགས་མེད་གླིང་པ་ཞེས་མཚན་གྱི་ཡི་གེ་རྣམ་པར་གསལ་བ་ཞིག་བྱུང་བར་གྱུར་ཏོ། །དེའང་ཐོག་མར་ཀུན་མཁྱེན་ཤེས་རབ་འོད་ཟེར་གྱི་འཁོར་ལོ་གསུམ་གྱི་ཕྱག་རྗེས་རྨ་མེད་པའི་གནས་དཔལ་གྱི་རི་བོའི་ཆོས་སྡེའི་ས་ཁྲོད་དུ་དཀྱུས་
མའི་ཚུལ་གྱིས་བསྟན་པའི་སྒོར་ཞུགས་པར་མཛད་ནས། སྡོམ་པ་གསུམ་གྱི་བདུད་རྩིས་ཐུགས་རྒྱུད་ལེགས་པར་གཏམས་ཤིང་བཀའ་གཏེར་གྱི་ཆོས་ཚུལ་སྤྱི་དང་བྱེ་བྲག་ལ་གསན་བསམ་རྒྱ་ཆེན་པོ་མཛད་པ་ན་རྒྱལ་བའི་སྲས་མཆོག་རྣམས་ཀྱི་ཚད་མེད་པའི་སྙིང་རྗེ་ཆེན་པོས་གཞན་དོན་ཁོ་ནར་དགོངས་པའི་སྤྱོད་པ་རླབ་པོ་ཆེ་སྐྱེས་པའི་རབས་ཐམས་ཅད་དུ་བསྐྱངས་པའི་རྟེན་ཅིང་འདྲེལ་པར་འབྱུང་བའི་སྨོན་ལམ་དང་། རིགས་ཀྱི་ས་བོན་དུས་སུ་སད་པ་ལས་སྲིད་པའི་ངང་ཚུལ་ལྟར་སྣང་ཇི་ལྟར་ལེགས་ཀྱང་སྡུག་བསྔལ་གྱི་ཡོ་ལང་འབའ་ཞིག་ཏུ་གཟིགས་པའི་སྐྱོ་ཤས་དང་ངེས་འབྱུང་ཚད་མེད་པས་དྲངས་པའི་ཐུགས་ཀྱིས་ཆོས་སྡེ་དེ་གར་ལོ་གསུམ་དུ་སྙིང་པོའི་སྒྲུབ་པ་ལ་རྩེ་གཅིག་ཏུ་གནས་པའི་བཅད་རྒྱ་མཛད་པའི་ཚེ། སློབ་དཔོན་ཆེན་པོ་པདྨ་འབྱུང་གནས་དང་འཇམ་དཔལ་བཤེས་གཉེན་འོད་གསལ་གྱི་ངང་དུ་མཇལ་ཏེ། བརྡ་དོན་སྤྲོས་པ་མེད་པའི་དབང་མང་པོ་བསྐུར་བའི་མཐར་རང་ཉིད་ལ་ཐིམ་པར་གྱུར་པའི་ཉམས་སྣང་བྱུང་བས་དེ་ཙམ་ནས་རྟོགས་པ་བྱུང་རྒྱལ་ཏུ་སྐྱེས། ཉམས་ཀྱི་འཛིན་སྟངས་བུད། ལས་རླུང་དབང་དུ་འདུས། སྣང་བའི་རྫུན་ཕུགས་རྡིབ། རིག་པ་བརྟུལ་ཞུགས་ཀྱི་གདེང་དང་ལྡན་པར་གྱུར་ནས་སྔོན་གྱི་སྐྱེ་བ་དྲན་པ་སོགས་དག་པའི་སྣང་བ་ཁོ་ནར་འབྱམས་ཀླས། དགེ་བའི་བཤེས་གཉེན་བརྟེན་ནས་ཐ་སྙད་དང་གཞུང་ལུགས་རྣམས་ལ་སྦྱང་བརྩོན་གྱི་ངལ་དུབ་བརྟེན་མ་དགོས་པར་སྔོན་སྦྱངས་ཀྱི་རང་སྟོབས་སྟོན་པའི་རྩལ་རྫོགས་པའི་རིག་པ་ཕྱོགས་མེད་དུ་གྲོལ་ཞིང་ལོངས་སྤྱོད་འཁོར་ལོའི་མདུད་པ་དབྱིངས་སུ་ཞིག་པས། རྩ་རླུང་གི་རྒྱུ་བ་རྣམས་ཡི་གེའི་སྤྲིན་དུ་སྤྲོ་བས་གྲག་པ་ཐམས་ཅད་ཆོས་ཚིག་གི་སྒྲ་དབྱངས་སུ་རང་རྡོལ་དུ་གྱུར་པས་སྣང་བ་ཐམས་ཅད་དཔེ་ཆར་ཤར་ཞིང་བྱས་ཚད་མན་ངག་ཏུ་གོ་བས་བླ་མ་དགོངས་པ་འདུས་པའི་ཆོ་གའི་རྣམ་བཤད་མཁྱེན་བརྩེའི་མེ་ལོང་ཞེས་བྱ་བ་མཛད། དགུང་ལོ་ཉེར་དགུ་པ་མེ་གླང་ལོའི་སྨིན་དྲུག་ཟླ་བའི་ཡར་ངོའི་ཚེས་བཅུར་སློབ་དཔོན་ཆེན་པོ་པདྨའི་ཞབས་ལ་མོས་གུས་དང་སྐྱོ་ཤས་ཀྱིས་དྲངས་པའི་འོད་གསལ་གྱི་སྣང་བར་རྗེ་ཉིད་སེང་གེ་ལ་བཅིབས་ནས་ནམ་མཁའི་ལམ་ནས་བྱོན་པ་
ཞིག་ལ་ཆོས་སྐུ་ཡེ་ཤེས་ཀྱི་ཌཱ་ཀི་ནཱི་མངོན་སུམ་དུ་མཇལ་ཞིང་ཤིང་གི་ཟ་མ་ཏོག་གཅིག་ཕྱག་ཏུ་གཏད་དེ། དག་པའི་འཁོར་གྱི་སྣང་བ་ལཿ ཁྱོད་ནི་ཁྲི་སྲོང་ལྡེའུ་བཙན་ཡིནཿ མ་དག་གདུལ་བྱའི་སྣང་ངོ་རུ༔ ཁྱོད་ནི་སེ་གེའི་རས་པ་ཡིན༔ ཀུན་ཏུ་བཟང་པོའི་ཐུགས་ཉིད་གཏེར༔ རིག་འཛིན་པདྨའི་ཀློང་ཆེན་བརྡ༔ མཁའ་འགྲོའི་གསང་མཛོད་ཆེན་མོ་ཡིན༔ དྷ་ཐིམ༔ ཞེས་གསུངས་པའི་མོད་ལ་ཡལ། དེར་ཐུགས་ལ་སྤྲོ་བ་ཚད་མེད་པ་སྐྱེས་ཏེ། ཟ་མ་ཏོག་དེ་ཁ་ཕྱེ་བས་ཤོག་སེར་ཧྲིལ་མོ་ལྔ་དང་། ཤེལ་དཀར་སྲན་འཕོས་ཙམ་པ་བདུན་བཅས་བྱུང་བ་མཁའ་འགྲོའི་ལུང་བཞིན་ཐམས་ཅད་ཞལ་དུ་གསོལ་བས་ཚིག་དང་དོན་གྱི་གནས་ཐམས་ཅད་པར་གྱིས་བཏབ་པ་བཞིན་ཐུགས་ལ་བཀྲ་ལམ་མེར་གསལ་བའི་ངོ་མཚར་ཚད་མེད་པར་གྱུར་ཅིང་། དེ་ཚུལ་གྱི་ལོ་རྒྱུས་རྣམས་དཔལ་རི་སྤྲུལ་པའི་སྐུའི་སྙན་དུ་གསོལ་ནས་དངོས་གཏེར་རམ་དག་སྣང་དགོངས་གཏེར་གྱི་ཚུལ་གང་རུང་འབྱུང་བར་སོམ་ཉི་བྲལ་མོད་ཀྱི། འོན་ཀྱང་རེ་ཞིག་གསང་བ་གལ་ཆེ་ཚུལ་གསུངས་བཞིན་ཐུགས་ལས་ཆུང་ངུའི་ངང་ནས་ལོ་བདུན་གྱི་བར་དུ་རླུང་ཕྱོགས་ཙམ་དུའང་མ་བསྒྲགས་པར་རྟོག་མེད་ཁོ་ནར་མཛད་དོ། །དེ་ནས་དགུང་ལོ་སོ་གཅིག་པ་ས་ཡོས་ལོར་དཔལ་གྱི་མཆིམས་ཕུ་དྲེ་གུ་དགེའུ་འོག་ལྷུན་གྲུབ་རང་བྱུང་གི་ཕུག་པར་ལོ་གསུམ་དུ་སྙིང་པོའི་སྒྲུབ་པར་རྩེ་གཅིག་བཞུགས་པའི་ཚེ། མ་བྱོན་བདེ་གཤེགས་སྙིང་པོ་རི་རབ་མར་མེའི་རྒྱལ་མཚན་ཀུན་མཁྱེན་བསམ་ཡས་པ་ངག་གི་དབང་པོའི་ཡེ་ཤེས་ཀྱི་སྐུ་ལན་གསུམ་དུ་མཇལ་བ་སྟེ། དེ་དག་ཀྱང་ལན་དང་པོས་བརྗོད་བྱ་དོན་གྱི་རྒྱུད་དང་། རྗོད་བྱེད་ཚིག་གི་བརྒྱུད་པ་ཡོངས་སུ་རྫོགས་པའི་དོན་རྒྱུད་ཀྱི་དགོངས་པ་འཕོ་བར་མཛད་པ་སྐུའི་བྱིན་རླབས་དང་། གཉིས་པས་མཛོད་ཆེན་བདུན་དང་ཤིང་རྟ་གསུམ་སོགས་ཀྱི་བསྟན་པ་གཏད་ནས་ངེས་དོན་མཐར་ཐུག་གིས་གྲུབ་མཐའ་བཟང་པོ་འདི་ཉིད་འཛིན་ཅིང་། གཞན་ལའང་རྒྱ་ཆེར་སྟོན་པའི་སྒོ་མི་ནུབ་པའི་ཕྱིར་འཆད་པ་དང་རྩོམ་པ་རྒྱ་ཆེན་པོས་གཞན་དོན་ཕྲིན་ལས་ལ་དབང་བརྙེས་པའི་ཀུན་མཁྱེན་ཆོས་ཀྱི་
རྒྱལ་པོ་ཉིད་ཀྱི་དོན་གྱི་རྒྱལ་ཚབ་ཏུ་དབང་བསྐུར་ཞིང་རྗེས་སུ་གནང་བའི་གསུང་གི་བྱིན་གྱིས་བརླབ་པ་དང་། གསུམ་པས་བརྗོད་དུ་མེད་པའི་དེ་ཁོ་ན་ཉིད་རིག་པ་རྩལ་གྱི་བྱིན་རླབས་འཕོ་བའི་དབང་བསྐུར་ནས་དོན་རྒྱུད་རྟོགས་པའི་བདག་པོར་རྗེས་སུ་གནང་ཞིང་ཐུགས་ཀྱིས་བྱིན་གྱིས་བརླབ་པའོ། །དེའི་ཚེ་བསྟོད་པ་དཔྱིད་ཀྱི་རྒྱལ་མོའི་རྒྱང་གླུ་བྱ་བ་མཛད། ཀུན་མཁྱེན་ཆེན་པོའི་གདམས་པ་རྣམས་ཀྱི་དོན་ཐུགས་ལ་ཤར་བ་བཞིན་མན་ངག་གི་ཡི་གེ་ཀུན་མཁྱེན་ཞལ་ལུང་སོགས་ཐན་ཐུན་མཛད། གུ་རུ་ཆོས་ཀྱི་དབང་ཕྱུག་གི་གཏེར་བྱོན་དགེ་བསྙེན་མཁའ་རིའི་ཞུས་ལན་དུ། བང་སོ་དམར་པོའི་ཤར་རམ་ལྷོ་ཡི་ཕྱོགས༔ ལྷ་བབ་མཆོད་རྟེན་དགོན་སྡེ་འཆའ་ཡང་སྲིད༔ ཞེས་རྡོ་རྗེའི་ལུང་གིས་གསལ་བར་བསྟན་པ་བཞིན་དགུང་གྲངས་སོ་བཞི་པ་ཆུ་རྟ་ལོར་གཡོ་རུ་ཁྲ་འབྲུག་གི་གཙུག་ལག་ཁང་དང་མི་རིང་བ་བཀྲ་ཤིས་སྲོང་བཙན་བང་སོའི་ཤར་གྱི་ཕྱོགས་བསྐུངས་ཀྱི་རི་སུལ་བྱང་ཆུབ་ཤིང་གི་ནགས་ཁྲོད་ཚེ་རིང་ལྗོངས་ཞེས་བྱ་བའི་དབེན་གནས་ཆེན་པོར་སྦྱིན་བདག་སྡེ་པ་པུ་ཤུད་པས་ཞབས་འདེགས་བསྒྲུབས་ཏེ་པདྨ་འོད་གླིང་ཐར་པ་ཆེན་པོའི་གྲོང་ཁྱེར་རྟེན་བརྟེན་པ་དང་བཅས་པ་བསྐྲུན་པར་མཛད་ཅིང་རིས་སུ་མ་ཆད་པའི་སྐྱེ་བོ་སྐལ་བ་བཟང་པོ་ཆོས་ཀྱི་འདུ་བར་ལྷགས་པ་རྣམས་ལ་རིག་པ་འཛིན་པ་བྱང་ཆུབ་སེམས་དཔའི་སྡེ་སྣོད་གཙོ་བོར་གྱུར་པའི་བཤད་སྒྲུབ་ཀྱི་སྒྲ་དབྱངས་རྒྱུན་མི་འཆད་དུ་སྒྲོག་པར་མཛད་དོ། །སྔར་བབས་པའི་ཐུགས་གཏེར་ཀློང་ཆེན་སྙིང་ཐིག་གི་ཆོས་སྐོར་ཡང་རིགས་ལྔ་ཌཱ་ཀིའི་གཙོ་མོས་བརྡ་འགྲོལ་གྱི་སྐབས་དབྱེ་བ་ནས་རིམ་པར་ཤོག་ཐོག་ཏུ་འབེབས་པར་མཛད་པའི་དུས་ཀྱང་གནད་བྱང་ཐུགས་ཀྱི་སྒྲོམ་བུར་གསལ་བ་དགུང་གྲངས་སོ་དྲུག་པ་ཤིང་སྤྲེལ་ལོར་ངེས་པ་བཞིན་སྤྲེལ་ཟླའི་ཚེས་བཅུ་མཆོད་པའི་ཆོ་ག་མཛད་པ་ན་ཨུ་རྒྱན་ཆེན་པོ་ཉིད་འཁོར་མཁའ་འགྲོའི་ཚོགས་དང་བཅས་པ་མཇལ། ལྷོ་བྲག་གསུང་སྤྲུལ་རིན་པོ་ཆེ་སོགས་སྤྲུལ་སྐུ་རྣམ་གསུམ་གྱིས་ཐུགས་གཏེར་འབེབས་པར་ལེགས་པོའི་བསྐུལ་མའང་བྱུང་བས་རྟེན་འདྲེལ་གྱི་སྒོ་འགྲིགས་ཤིང་། ཀོང་སྨྱོན་སྦས་པའི་རྣལ་འབྱོར་གྱིས་ཀྱང་སྔོན་ཆད་མཐོང་ཐོས་མེད་པར་མངོན་ཤེས་ལྟ་བུས་བསྐུལ་མ་མཛད་
པས་སྨོན་ལམ་དུས་བབ་ཀྱི་རྟེན་འདྲེལ་ལ་དགོངས་པས་འདུས་པ་དང་པོའི་འཁོར་བཅོ་ལྔ་ལ་སྨིན་གྲོལ་གྱི་སྒོ་དབྱེ་བར་མཛད་པ་ནས་བཟུང་རིམ་གྱིས་སྤེལ་བར་མཛད་དོ། །སྨིན་གླིང་གཏེར་ཆེན་སྐུ་མཆེད་ཀྱི་དངོས་སློབ་ཀོང་པོ་ཐང་འབྲོག་སྤྲུལ་སྐུ་རིན་པོ་ཆེ་པདྨ་རིག་འཛིན་དབང་པོ་ལས་མདོ་དབང་ཆེན་མོ། གྲུབ་དབང་དཔལ་མགོན་ལས་གསང་བ་སྙིང་པོའི་བཤད་ལུང་། ལྕགས་ཟམ་རིན་པོ་ཆེ་བསྟན་འཛིན་ཡེ་ཤེས་ལྷུན་གྲུབ་ལས་རྙིང་རྒྱུད་ཡོངས་རྫོགས་ཀྱི་ལུང་རྣམས་གསན། གཞན་ཡང་སྒྱུ་འཕྲུལ་ཞི་ཁྲོ། སངས་རྒྱས་མཉམ་སྦྱོར། དོང་སྤྲུགས། ཡང་དག་སོགས་ཀྱི་དབང་སྨིན་གླིང་གི་རྒྱུན་ལས་གསན་ཅིང་། ཕྱག་རྒྱ་བཅིང་ཐབས་དང་། ཆོ་གའི་ཁྲིགས་དང་། དཀྱིལ་འཁོར་བྲི་ཐིག །གདངས་དབྱངས་རོལ་མོ་རྣམས་ཀྱང་བསྟན་རྒྱུན་ལ་དགོངས་ཏེ་གསན། མཛོད་ཆེན་གསུམ་དང་ཤིང་རྟ་གསུམ་གྱི་དོན་བསྡུས་པས་བསྟན་པ་ཡོངས་སུ་རྫོགས་པའི་བསྟན་བཅོས་ཆེན་པོར་འགྱུར་ཞིང་གཞན་རྣམས་ལམ་སྟེགས་ཙམ་དང་། ངེས་དོན་རྫོགས་པ་ཆེན་པོ་གྲུབ་མཐའ་ཀུན་གྱི་རྩེ་མོར་གནས་པ་གཏན་ལ་དབབ་པ་ཡོན་ཏན་མཛོད་རྩ་བ་དང་། དེ་ཉིད་ཀྱི་རྒྱུའི་ཐེག་པའི་དགོངས་འགྲེལ་བདེན་གཉིས་ཤིང་རྟ་དང་། འབྲས་བུའི་ཐེག་པའི་དགོངས་འགྲེལ་རྣམ་མཁྱེན་ཤིང་རྟ་ཞེས་གྲགས་པའི་གཞུང་ཆེན་པོ་དག་མཛད་དེ་ལུང་དང་རིག་པའི་སྐྱ་བར་ནས་འོད་གསལ་སྙིང་པོའི་རིང་ལུགས་སློང་བར་མཛད་པས། བོད་ཡུལ་གྱི་ལྗོངས་སུ་སྔོན་ཆད་ཀློག་པ་ཁོ་ནར་གློ་བ་ཞེན་པའི་སྟོན་ཆེན་རང་རྒྱུད་གནམ་རུ་ལྟར་གྱོང་བ་རྣམས་ཀྱང་བསྔགས་པའི་མེ་ཏོག་ཆལ་ཆིལ་དུ་བསྙིལ་ཞིང་གུས་འདུད་ལྷུར་ལེན་པ་ལ་སྤྲོ་བར་གྱུར་ཏོ། །ཕྱོགས་གང་དུའང་སྔ་འགྱུར་གྱི་བསྟན་པ་རིན་པོ་ཆེ་ཉག་ཕྲ་བར་གྱུར་པས་སྤྲུལ་པའི་ཆོས་རྒྱལ་ཆེན་པོ་དང་ལོ་པཎ་མཆོག་རྣམས་ཀྱི་ཐུགས་བསྐྱེད་རྒྱ་ཆེན་པོའི་ཕྲག་པར་ཁྱེར་བའི་གསང་མཆོག་ངེས་པ་དོན་གྱི་བསྟན་པའི་ཕྲིན་ལས་རྒྱ་ཆེན་པོ་ཆུད་འཛའ་བ་དང་འཕགས་པ་མཆོག་དེ་རྣམས་ཀྱི་ཕྱག་རྗེས་རྨ་མེད་པ་ཟུབ་ཏུ་ཉེ་བ་ཐུགས་ཀྱིས་མ་བཟོད་དེ་རྙིང་རྒྱུད་རིན་པོ་ཆེ་སྨིན་གླིང་གི་དཔེ་གང་བཞུགས་ཚང་མ་དབུ་ཤོག་ལྔ་རིན་པོ་ཆེ་སྣ་ལྔས་
བྲིས་ཤིང་དེ་ཕྱིན་སྐྱ་ཆོས་པུ་སྡི་ཉེར་ལྔ་སྐོར་ཡོ་བྱད་དང་རྒྱུ་དངོས་ཕུན་སུམ་ཚོགས་པ་བསྒྲུབས་པར་མཛད། སྔོན་ཆད་ཕྱོགས་འདིར་དཀར་ཆག་ཏུ་འདེབས་པ་དང་གཏན་ཚིགས་ཀྱིས་བསྒྲུབས་པའི་དེབ་ཐེར་རྒྱས་པར་འགོད་པ་མ་བྱུང་མོད། རྗེ་བཙུན་ཆོས་ཀྱི་རྒྱལ་པོ་འདི་ཉིད་ཀྱིས་གཏན་ཚིགས་གསུམ་དང་འདྲེལ་བའི་སྤོབས་པ་ཟབ་ལ་རྒྱ་ཆེ་བས་སྔ་འགྱུར་རྒྱུད་འབུམ་རིན་པོ་ཆེའི་རྟོགས་པ་བརྗོད་པ་འཛམ་གླིང་ཐ་གྲུར་ཁྱབ་པའི་རྒྱན་ཅེས་བྱ་བ་མཛད་དེ་ལུང་དང་རིག་པའི་སྣང་བ་བཟང་པོས་ལོག་པར་རྟོགས་པ་དང་ཐེ་ཚོམ་གྱི་མུན་པས་ཕྱོགས་བསླད་པ་ཐམས་ཅད་དྲུངས་ནས་འབྱིན་པར་མཛད་དོ། །རླངས་དཔལ་གྱི་སེང་གེའི་ཡེ་ཤེས་ཀྱི་སྐུས་བཛྲ་ཀཱི་ལ་ཡའི་དཀྱིལ་འཁོར་དུ་དབང་བསྐུར་བ་རྫོགས་པར་མཛད་པས་བྱིན་རླབས་ཀྱི་མཚན་མ་ཐོབ་པ་ལ་བརྟེན་ཀཱི་ལ་ཡའི་ཏནྟྲ་ཤིན་ཏུ་མང་བ་གངས་རིའི་ཁྲོད་དུ་བྱོན་པ་ལས་དངོས་གྲུབ་བརྙེས་པའི་བརྒྱུད་པ་བར་མ་ཆད་པའི་བཀའ་སྲོལ་རྒྱལ་པོ་ལུགས་དང་། ཇོ་མོ་ལུགས་དང་། ལྕམ་ལུགས་གཙོ་བོར་གྱུར་པའི་བཀའ་བབ་ཐ་དད་ཀྱི་བརྒྱུད་པ་མང་དུ་བཞུགས་པ་རྣམས་དོན་དུ་རྒྱུད་ཀྱི་དགོངས་པར་གཅིག་པའི་ཕྱིར་བཀའ་བབ་ཐམས་ཅད་འདུ་བའི་རྟེན་འདྲེལ་གྱི་ངེས་པས། རྡོ་རྗེ་བཀོད་པ་རྣལ་འབྱོར་ཆེན་པོ་དང་། ཡེ་ཤེས་རྩེ་མོ་དང་། རྩ་རྒྱུད་རྣལ་འབྱོར་ཆེན་པོ་གཙོ་བོར་གྱུར་པའི་རྒྱུད་སྒྲུབ་ཐབས་སུ་བསྡེབས་པ་སྔོན་མེད་པའི་བཀའི་བསྡུ་བ་མཛད། དེ་སྐབས་ཙམ་དུ་དཔལ་མགོན་ཞལ་གྱི་ལུང་གིས་བསྐུལ་བའི་རྟེན་འདྲེལ་ལས་དཔལ་ས་སྐྱའི་བདག་ཆེན་སྔགས་འཆང་ཆེན་པོ་ངག་དབང་དཔལ་ལྡན་ཆོས་སྐྱོང་དང་། ངག་དབང་ཀུན་དགའ་ཕན་བདེ་རྒྱ་མཚོ་མཆེད་ཀྱིས་སྤྱན་དྲངས་པ་ལྟར་དཔལ་ལྡན་ས་སྐྱའི་གྲོམ་པ་རྒྱང་གི་གཙུག་ལག་ཁང་དུ་ཕེབས། ས་སྐྱ་པ་ཆེན་པོ་སྐུ་མཆེད་ལ་བྱང་སྡོམ་དང་རྒྱུད་ནས་བཏུས་པའི་ཕུར་པའི་དབང་ཆེན། ཀློང་ཆེན་སྙིང་གི་ཐིག་ལེའི་དབང་ལུང་དང་མན་ངག་གི་ཁྲིད་བཀའ་སོགས་སྨིན་གྲོལ་གྱི་བདུད་རྩིས་ཐུགས་རྒྱུད་ལེགས་པར་གཏམས་པར་མཛད། ཕུར་པའི་དབང་མ་མཛད་གོང་ས་སྐྱ་བདག་པོའི་མནལ་ལམ་དུ། ད་རེས་ཕུར་ཁང་དུ་བླ་མ་རྫོགས་ཆེན་པ་ལ་ཡང་དག་གི་དབང་ཞུས་ཤིག །ཅེས་བྱུང་བས་ཡང་དག་པའི་ཆོས་
ཚུལ་དུ་ངེས་པ་རྙེད་ནས་ཆོས་སྒོ་ཐོག་མར་ཕྱེ་བར་མཛད་པ་ཡིན་ནོ། །གཞན་ཡང་ཡང་དག་སོགས་ཡབ་ཆོས་སྔོན་རྙིང་པ་རྣམས་ཀྱང་ཉམས་པ་གསོས་པ་སོགས་ཕྱོགས་དེར་བསྟན་འགྲོའི་དོན་རྒྱ་ཆེ་བ་དུ་མ་སྒྲུབ་པར་མཛད། གཞན་ཡང་ལྷོ་མོན་དུ་མཚོ་སྣ་དགོན་རྩེ་སྤྲུལ་སྐུས་སྤྱན་དྲངས་ཤིང་ཕྱོགས་དེའི་སྐྱེ་བོ་རྣམས་ཀྱང་མཐོང་ཐོས་དོན་ལྡན་དུ་མཛད། གནས་ཆེན་རྣམས་སུ་མཆོད་པ་དང་། བདུད་རྩི་སྨན་གྱི་སྒྲུབ་པ་ཁྱད་པར་ཅན་དུ་མ་མཛད། སྐལ་བ་དང་ལྡན་པའི་སློབ་མ་རྣམས་ལ་གདམས་ངག་གི་ཁྲིད་དང་། དབང་ལུང་དུ་མས་སྨིན་པར་མཛད། བསམ་ཡས་རི་མཐིལ། ཁྲ་འབྲུག །ཤེལ་བྲག །སྲོང་བཙན་བང་སོ་རྣམས་སུ་བདུད་རྩི་བསྒྲུབ་པ་དང་། ཞི་རྒྱས་དབང་དྲག་གི་སྦྱིན་བསྲེག །ཚོགས་མཆོད། གཏོར་བཟློག་སོགས་བསྟན་འགྲོའི་བདེ་ཐབས་དུ་མ་དང་། གནས་ཆེན་གསུམ་གཙོ་བོར་གྱུར་པའི་ཆོས་རྒྱལ་མེས་དབོན་གྱིས་བཞེངས་པའི་གཙུག་ལག་ཁང་རྣམས་སུ་མཆོད་པ་སྣ་ལྔ། བརྒྱ། སྟོང་། ཁྲིའི་བར་ལན་གྲངས་ཤིན་ཏུ་མང་པོ་དང་། སྲོག་བསླུ་ཁོ་ནའང་བགྲངས་ཀྱིས་མི་ལང་བ། རིན་པོ་ཆེའི་རྒྱུ་ཚོགས་ལས་བསྒྲུབ་པའི་སྐུ་གསུང་ཐུགས་ཀྱི་རྟེན་ཁྱད་པར་དུ་འཕགས་པ་དུ་མ་དང་། མཆོད་པའི་ཡོ་བྱད་རྒྱུ་དངོས་ཕུན་སུམ་ཚོགས་པ་ཁོ་ན་ལས་བསྒྲུབས་པར་མཛད་ནས་འབུལ་སྦྱོར་མཛད་པ་སོགས་འཁོར་ལོ་གསུམ་གྱི་ཕྲིན་ལས་ཀྱིས་དུས་འདའ་བར་གྱུར་ཅིང་། དབུས་གཙང་། ཁམས་ཀོང་། ལྷོ་མོན་ཚུན་གྱི་ཆེ་དགུ་མཐའ་དག་དང་། ཐོས་བསམ་པར་རློམ་པའི་མཁས་པ་དང་། སྒོམ་པ་ལ་དྲིལ་བའི་སྒྲུབ་པ་པོ་ཕོ་མོ། རང་བཞིན་གྱི་བསྟན་པ་ལ་ཞུགས་པའི་བཙུན་གཟུགས་ཡན་ཆད་ཀྱང་རྗེ་འདི་ཉིད་ཀྱི་ཞལ་མཇལ་ཁོ་ན་དོན་དུ་གཉེར་ཞིང་དེ་དག་རྣམས་ལ་གང་ལ་གང་འཚམས་ཀྱི་འཇུག་པའི་ཆོས་བཀའ་དབང་ལུང་། སྨིན་ཁྲིད། དགེ་སྡིག་འཇུག་ལྡོག་གི་བསླབ་བྱ་དང་བཅས་པ་སྒོ་ཇི་སྙེད་པས་མངོན་མཐོ་དང་ངེས་ལེགས་ཀྱི་གནས་སུ་བཀྲི་བར་མཛད་པའི་ཚུལ་མཐའ་དག་པ་ནི་སྨོས་ཀྱིས་མི་ལང་ལ།
སྒྱུ་འཕྲུལ་ཞི་ཁྲོ་དང་ཚོགས་ཆེན་འདུས་པ་རྣམས་ཀྱི་ཆོག་ཁྲིགས་ཀྱང་གསར་དུ་མཛད་ནས། བྱང་ཐེག་མཆོག་གླིང་དུ་སྒྱུ་འཕྲུལ་ཞི་ཁྲོའི་སྒྲུབ་མཆོད་རྟེན་ཇི་སྲིད་བར་སྦྱོར་འཇགས་དང་། དཔལ་གྱི་རི་བོར་འདུས་མདོའི་སྒྲུབ་མཆོད་སོགས་བཀའ་མ་རྣམས་འཕེལ་རྒྱས་ཀྱི་ཐབས་རྒྱ་ཆེ་བ་མཛད། བསྟན་བཅོས་ཀྱང་ཚད་མ་གསུམ་དང་འདྲེལ་པའི་བརྗོད་བྱ་དང་རྗོད་བྱེད་ཕུན་སུམ་ཚོགས་ཤིང་ལུང་རིག་མན་ངག་གི་གནས་རྒྱ་ཆེར་འགྲེལ་པ་སྨོས་མ་ཐག་པ་རྣམས་གཙོ་བོར་གྱུར་པའི་བུ་སྟ་ཀ་བཅུ་གཅིག་ཏུ་ལོངས་པ་ཙམ་བཞུགས་ཤིང་། ད་ལྟའི་དུས་སུའང་རྡོ་རྗེ་ཐེག་པའི་བསྟན་པ་འཛིན་སྐྱོང་སྤེལ་བའི་ཆོས་ཀྱི་འཁོར་ལོ་རྒྱ་ཆེན་པོ་བསྐོར་བཞིན་པ་དང་། ད་དུང་ཡང་བསྐལ་པ་ལས་བསྐལ་པ་ལྷག་པར་བསྟན་འགྲོའི་དཔུང་གཉེན་དང་རྩ་ལག་གཅིག་པུར་འཇིག་པ་མེད་པ་རྡོ་རྗེ་ལྟ་བུའི་གཟུགས་ཀྱི་སྐུས་བཞུགས་ཤིང་ཟབ་པ་དང་རྒྱ་ཆེ་བའི་ཆོས་ཀྱི་འཁོར་ལོ་རྒྱུན་མི་འཆད་པར་སྐོར་བར་གསོལ་བ་འདེབས་སོ།། འདིར་སྨྲས་པ། ཇི་སྙེད་རྒྱལ་བའི་ཆོས་མཛོད་བཟུང་བས་སྲིད་པ་འདིར་ནི་འབྱུང་དཀའ་བའི། །བསྟན་པ་རིན་ཆེན་སྣང་མཛད་ཨུ་དུམ་ཝ་ར་ཇི་བཞིན་རྨད་བྱུང་བའི། །ཡོན་ཏན་བགྲངས་ཡས་འཁྲི་ཤིང་གིས་འཁྱུད་སྨིན་གྲོལ་བྱེ་བའི་འབྲས་རྫོགས་པའི། །དམ་པའི་དཔག་བསམ་དགའ་ཚལ་ཐོབ་པའི་ཨེ་མ་སྲིད་གསུམ་སྐལ་བ་སྦོམ། །ཐོས་པ་རྒྱ་མཚོའི་ཕ་རོལ་ཏུ་བྱོན་ཅིང་། །བསམས་པས་དོན་གྱི་ནོར་བུ་ལག་མཐིལ་ལོན། །བསྒོམས་པས་གྲུབ་གཉིས་འདོད་དགུར་འཇོ་བའི་ཆར། །ཅིར་ཡང་གཡོ་བའི་དེད་དཔོན་མཁའ་རྣམས་ཀྱིས། །སྤྲོས་པའི་མཐའ་ཀུན་སྤངས་པའི་ཆོས་ཉིད་ཀྱི། །རང་བཞིན་གནས་ལ་རབ་ཏུ་སྤོབས་གྱུར་པས། །རྣམ་པའི་ཆོས་ཀུན་ཆུ་ཟླ་ཇི་བཞིན་དུ། །གཟིགས་པའི་སྤྱན་རས་རབ་རིབ་དང་བྲལ་བས། །མི་ཟད་ཀུན་རྟོག་རྗེས་སོན་ཤེས་བྱའི་ཁམས། །སྤྲོས་པའི་ཚུལ་གྱིས་ཇི་སྙེད་མཁྱེན་གྱུར་པས། །རྣམ་འགྱུར་མ་ངེས་སྤྲོས་ཚོགས་རབ་མང་གཟུགས། །ཅིག་ཆར་འཆར་བའི་མེ་ལོང་བཞིན་དུ་གྱུར། །སྲིད་ཉོན་དུག་ཅན་དྲུག་ཁྲིའི་དག་བྱེད་ཕུལ། །མ་སྨད་རྒྱུད་དུ་འབབ་པ་དབང་རྣོན་གྱི། །འཇུག་ངོགས་རིག་
འཛིན་སྡེ་སྣོད་མཐོ་རིས་ཀླུང་། །དགོངས་བརྡ་བརྒྱུད་པའི་རལ་པར་བསྒྱིངས་པ་ལ། །འཕགས་ཡུལ་མཁས་དང་གྲུབ་པའི་རྣ་བ་ལ། །ཉེ་བར་བབས་ཤིང་ཐུགས་ཀྱི་བུམ་པ་རུ། །ལེགས་པར་འཁྱིལ་པའི་བདུད་རྩི་གངས་ཅན་འདིར། །དྲང་སྲོང་དུ་མའི་མགྲིན་པའི་རྒྱན་གྱུར་པ། །རྣམ་དག་གྲུབ་མཐའ་ཤིང་རྟའི་སྲོལ་བརྒྱ་ཡིས། །ཕྱེས་པའི་ལམ་བཟང་སྣང་བྱེད་འཇིག་རྟེན་ན། །ཉི་མ་ལྟ་བུའི་ཁྱུ་མཆོག་བཤེས་རྣམས་ཀྱི། །ངང་ཚུལ་འདི་ལ་མི་བསྔགས་ཤེས་ལྡན་སུ། །གང་གི་རྣམ་ཐར་བསིལ་ཟེར་གྱིས་རེག་པས། །འདིར་སྣང་དགའ་བའི་ཆུ་སྐྱེས་ཉམས་བྱེད་ཅིང་། །ངེས་འབྱུང་ཆུ་ཡིས་རབ་བརླན་སྟེང་འཐུང་དཀར། །ཞི་བའི་ཕྱོགས་སུ་གྲོལ་བའི་འཛུམ་དཀར་སྟོན། །མུན་པས་བྱུགས་པའི་གླིང་འདིར་དམ་ཆོས་ཀྱི། །བསྟན་མཆོག་ཟླ་རིས་སྣང་བྱས་བཀའ་དྲིན་མཐའ། །འཆི་མེད་གནས་ལས་ངེས་པར་བརྒལ་བ་ཡི། །མཐའ་ཡས་ཡོན་ཏན་བརྗོད་པས་ཅི་ཞིག་ལོངས། །འོན་ཀྱང་ཆུ་ཐིགས་གཅིག་གིས་ཆུ་གཏེར་བཞིན། །རབ་ཏུ་དང་བའི་བློ་ཡིས་ཕྱོགས་ཙམ་ཞིག །བསྙད་པ་དེས་ཀྱང་དཔག་དཀའི་རྣམ་ཐར་གྱི། །གནས་སུ་བལྟ་བའི་སྤོབས་པ་ཐོབ་པར་འགྱུར། །དཀར་མིན་ལས་ཀྱིས་འཁོར་བར་དམ་བཅིངས་པའི། །བརྣག་དཀའི་སྡུག་བསྔལ་གྱིས་གཙེས་བདག་འདྲ་ཡང་། །དམ་པའི་རྣམ་ཐར་འདི་ལྟའི་རྗེས་བསླབ་སྟེ། །འདྲེན་མཆོག་རྣམས་དང་མཛད་པ་མཚུངས་སྤྱད་ཤོག །བདེ་བར་གཤེགས་པའི་བསྟན་པ་ཐམས་ཅད་ཀྱི་སྙིང་པོ་རིག་པ་འཛིན་པའི་སྡེ་སྣོད་རྡོ་རྗེ་ཐེག་པ་སྔ་འགྱུར་རྒྱུད་སྡེ་རིན་པོ་ཆེའི་རྟོགས་པ་བརྗོད་པ་ལྷའི་རྔ་བོ་ཆེ་ལྟ་བུའི་གཏམ་ལས་བསྟན་པ་དེ་ཉིད་འཇིག་རྟེན་དུ་ཇི་ལྟར་བསྐྱངས་པའི་ཚུལ་རགས་པ་ཙམ་བཤད་པའི་སྐབས་ཏེ་གཉིས་པའོ།། །།