གཏེར་ཆེན་མཆོག་གིས་སྨིན་གྲོལ་ཟབ་མོའི་ཆོས་འཁོར་བསྐོར་སྐབས་ངོ་མཚར་གྱི་བཀོད་པ་སྣ་ཚོགས་སྣང་ཚུལ།
གཏེར་ཆེན་མཆོག་གིས་སྨིན་གྲོལ་ཟབ་མོའི་ཆོས་འཁོར་བསྐོར་སྐབས་ངོ་མཚར་གྱི་བཀོད་པ་སྣ་ཚོགས་སྣང་ཚུལ་ནི། རྣམ་ཐར་གསོལ་འདེབས་ལས། ཟབ་མོའི་ཆོས་ཀྱི་འཁོར་ལོའི་ཐོག་མ་རུ། །མཁའ་འགྲོ་འབར་བའི་ལུང་བསྟན་དབུགས་དབྱུང་གིས། །རྗེས་བརྗོད་མེ་ཏོག་ཆར་བ་ཐོ་ཕྱིར་འཁྲོལ། །བཀའ་བབས་གྲུབ་ཐོབ་ཆེན་པོར་གསོལ་བ་འདེབས། །ཞེས་གསུངས་བ་ལྟར། ཟབ་གཏེར་སྨིན་གྲོལ་གྱི་ཐོག་མ་སྐལ་ལྡན་འགའ་ལ་གསུང་སྐབས་མ་དང་མཁའ་འགྲོ་འདུ་བའི་བརྡ་རྟགས་སུ་རྒོད་ཀྱི་ཐུལ་ཕྲན་བབས་པ་དང་། ནམ་མཁའ་ལ་འཇའ་སྤྲིན་སྣ་ཚོགས་འཆར་བར་མཛད་པའི་རྣམ་ཐར་ངོ་མཚར་བ་ཡོད་པ་དང་། ཡང་རྣམ་ཐར་གསོལ་འདེབས་ལས། མཁའ་འགྲོའི་ལུང་བསྟན་ཡི་དམ་དངོས་གྲུབ་ཐོབ། །བཀའ་དྲིན་ཅན་གྱི་བླ་མས་རྗེས་གནང་བས། །འཆད་དང་རྩོམ་པའི་བར་ཆད་དབྱིངས་སུ་ཞི། །ཕྲིན་ལས་རང་དབང་ཐོབ་ལ་གསོལ་བ་འདེབས། །ཞེས་གསུངས་པ་ལྟར་ཐེངས་གཅིག་དམ་པ་མཆོག་གིས་རྫོགས་རིམ་བར་དོ་དྲུག་གི་ཁྲིད་ཨ་རིག་རྫའི་མ་ཆུའི་རྡོ་མཁར་རྩར་གསུང་སྐབས། དགུན་ཟླ་འབྲིང་བོའི་ཟད་མཚམས་ཡིན་ཀྱང་། ཉིན་བཞིན་འཇའ་འོད་ཀྱི་གུར་ཕུབ་པ་དང་། ལྔ་ཚོམ་གྱི་ཐིག་ལེ་སོགས་ཀུན་ལ་མངོན་པར་སྣང་བ་དང་། གཏེར་ཆེན་གྱི་གསུང་སྒྲ་དེ་ཐག་རིང་བའི་ཤག་མདོ་སོགས་ནས་གསལ་བོར་ཐོས་པ་དང་། གནས་དེར་རུ་ཤན་མཛད་སྐབས་མི་ཡིས་མ་བཀྲོལ་བའི་རོལ་མོ་མང་པོ་དང་། སྙན་འཇེབས་ཀྱི་སྒྲ་སྣ་ཚོགས་གྲགས་པ་དང་། འཇའ་འོད་ཀྱི་བཀོད་པ་སོགས་ངོ་མཚར་རྨད་དུ་བྱུང་བ་སྣང་བར་མ་ཟད། དེ་ཡི་ཕྱི་ལོ་སྔར་གྱི་ཆོས་གསུང་བའི་ཟླ་ཚེས་དེ་ཤར་སྐབས་འཇའ་འོད་དང་སྒྲ་དབྱངས་སྣ་ཚོགས་གནས་དེར་སྣང་འདུག་ཅེས་ཀུན་གྱིས་གླེང་། སྐབས་ཤིག་གཏེར་ཆེན་ཉིད་ཀྱི་གསུང་ཡེ་ཤེས་སྒྱུ་འཕྲུལ་དྲྭ་བའི་ཞི་ཁྲོའི་དབང་ཞིག་བསྐུར་བའི་དུས་སུ་དེར་འཁོད་ཀྱི་སློབ་མ་མང་པོའི་སེམས་ལ་གང་ཤར་བ་དག་སྒྲིབ་མེད་གསལ་གཟིགས་ཀྱིས་གསུང་བས་འགའ་ཞིག་ངོ་མཚར་བ་དང་ཁ་སྐྱེངས་བ་ཡང་བྱུང་། ཡང་ཐེངས་གཅིག་དག་ཅིང་སྒྲོས་ལེགས་པ་འབྲི་མྱུར་མཁས་པ་ཆོས་བདག་རིག་འཛིན་འགྱུར་མེད་རྣམ་རྒྱལ་སོགས་ཡི་གེ་པ་གསུམ་གྱིས་ཆོས་ཚན་ཐ་དད་པ་གསུམ་དུས་ཐོག་གཅིག་ལ་ཕབ་པར་མཛད་ཚེ་གཏེར་ཆེན་རིན་པོ་ཆེས་ཡིག་མཁན་སོ་སོ་ལ་ཆགས་ཐོགས་མེད་པར་གསུངས་བར་མཛད་པ་དང་། ཟབ་གཏེར་འབྲི་བྱེད་ཀྱི་སྣག་བུམ་ཡང་དགུན་གྱི་གྲང་ངར་ཤིན་ཏུ་བདོ་བའི་དུས་སུ་གང་དུ་བཞག་ཀྱང་ནམ་འབྲི་ན་འབྲི་ཐུབ་པ་ཡོད་པར་གྲགས། སྐབས་ཤིག་སྟག་ཐོག་ནང་དུ་བྱོན་པས་ཧོར་བླ་ཐེག་མཆོག་ཟེར་བས་ཕྲག་དོག་བྱས། ཡུལ་འདིར་ནག་ཕྱོགས་ཁ་དར་བས་ཆོས་བཤད་བྱས་དུས་དབྱར་ཐོག་སེར། དགུན་གངས་ཞོད་བྱུང་ནས་མི་བདེ་ཟེར། གཏེར་ཆེན་ཁོང་གིས་དམ་པ་ཆོས་ཀྱི་འཁོར་ལོ་བསྐོར་ནས་བཞུགས་ཚེ། ཐོག་སེར་གྱི་གུར་ཁང་ཕུབ་པས་དེར་འཁོད་ཀྱི་སྐྱེ་བོ་ཀུན་ཟིང་ཟིང་དུ་གྱུར་ནས་འཁུ་འཕྲིགས་རྣམ་རྟོག་ཟ་བའི་དུས། གཏེར་ཆེན་མཆོག་གིས། དཔལ་གསང་བའི་བདག་པོའི་སྦྲུལ་ཞགས་དེས་ཀླུ་རྒྱལ་རྗེ་དམངས་བཞི་བཅིངས། ཤིང་བུ་འབྲུག་ལ་བསྒོམ། གྲི་ལྕགས་ཀྱིས་ས་ཐེལ་མནན་ཏེ། ལྟ་སྟངས་དང་སྡིག་མཛུབ་ནམ་མཁའི་དབྱིངས་སུ་བསྟན་ཚེ་འབྲུག་དཀར་སེར་དམར་ལྗང་བཞི་ས་ལ་ལྷུང་ནས་གྲགས་རྒྱུ་མེད་པར་གནས། སེར་བ་གློ་བུར་དུ་ཆད། ནམ་མཁའི་སྤྲིན་དེངས་ནས་ཉི་མའི་འོད་སྣང་བཀྲ་བ་བྱུང་། སླར་ཏིང་ངེ་འཛིན་གྱི་ཕྱག་རྒྱ་བཀྲོལ་བས། འབྲུག་རྣམས་ཐག་པ་ལྟ་བུར་རྗེན་ལ་བུད་ནས་ནམ་མཁར་འཕུར་སོང་བ་སྐྱེ་བོ་མང་པོའི་ལྟད་མོར་མངོན། ཡང་སྐབས་ཤིག་ན་དགུན་འབྲིང་གི་ཚེས་བཅོ་ལྔ་ལ་དཔལ་དགེའི་རྡོ་འབུམ་ཆེན་མོའི་རྩར་བདེ་ཆེན་ཞིང་སྒྲུབ་ཅིག་གསུངས་ནས། སྒྲོན་མེ་མང་པོ་ཐང་ནས་མངོན་པར་བསྟར་བས། རླུང་གིས་བསྐྱོད་པ་ཙམ་ཡང་མ་བྱས་པའི་སྟེང་། ནམ་མཁའ་ལ་འཇའ་འོད་ཀྱི་ཐིག་ལེ་བཀྲ་བ་སོགས་འབྱོར་ལྡན་སྦྱིན་བདག་གི་ཚོགས་ཀུན་དད་གསུམ་གྱི་ལྷ་ཕྱག་འཚལ་བའི་གནས་ལ་བཀོད།