གསོལ་འདེབས་བསམ་པ་ལྷུན་གྲུབ།
གསོལ་འདེབས་བསམ་པ་ལྷུན་གྲུབ་བཞུགས་སོ༔
ན་མོ༔ ཕྱོགས་བཅུ་དུས་བཞིའི་རྒྱལ་བ་སྲས་བཅས་དང་༔ ཁྱད་པར་བསྐལ་བཟང་འདི་ཡི་སངས་རྒྱས་སྟོང་༔ བསྒྲུབ་སྡེ་བཀའ་བརྒྱད་རྒྱུད་སྡེ་བཞི་དྲུག་ལྷ༔ མཁའ་འགྲོ་ཆོས་སྐྱོང་དམ་ཅན་རྒྱ་མཚོའི་དངོས༔ བརྒྱུད་གསུམ་བླ་མ་གྲུབ་ཐོབ་བརྒྱད་ཅུ་དང་༔ རྒྱན་དྲུག་མཆོག་གཉིས་པཎ་ཆེན་ལྔ་བརྒྱ་ཕྲག༔ གུ་རུ་མཚན་བརྒྱད་སྒྲོལ་མ་ཉི་ཤུ་གཅིག༔ རིག་འདུས་བླ་མའི་ལྷ་ཚོགས་ཐུགས་རྗེ་ཅན༔ བདག་སོགས་སྙིགས་མ་ལྔ་བདོའི་སེམས་ཅན་ཀུན༔ སྤྱོད་ངན་དབང་གིས་སྡུག་བསྔལ་རྒྱུན་ཆད་མེད༔ བསོད་ནམས་དམན་པས་མཐུ་ཆེན་སྐལ་པས་དབེན༔ མི་འདོད་ཉེར་ཚེའི་རླུང་དམར་འཚུབས་པའི་ཚེ༔ སྐྱབས་དང་རེ་ས་གཞན་དུ་མ་མཆིས་པས༔ གདུང་བའི་བུ་ཡིས་མ་ལ་འབོད་པ་བཞིན༔ མཁྱེན་བརྩེ་ནུས་པ་ཕུལ་དུ་ཕྱིན་མཆོག་ལ༔ སྐྱབས་དང་སྐྱོབས་པའི་ཡིད་ཆེས་དད་སྟོབས་ཀྱིས༔ གསོལ་བ་འདེབས་སོ་ཐུགས་རྗེས་བརྩེར་དགོངས་ལ༔ འཇིག་རྟེན་ཁམས་སུ་ནད་མུག་མཚོན་འཁྲུགས་སོགས༔ མི་མཐུན་དུས་ཀྱི་རྒུད་པས་བཅིལ་བ་ཀུན༔ ཞི་ཞིང་བདེ་སྐྱིད་རྫོགས་ལྡན་གསར་བའི་གཟིས༔ དགའ་སྟོན་ཐུན་མོང་དངོས་གྲུབ་ཐེམ་སྐས་ལས༔ ཕྱམ་གཅིག་གདོད་མའི་དབྱིངས་སུ་བྱང་ཆུབ་ཤོག༔
དེ་ལྟར་གསོལ་བ་བཏབ་པ་ཡིས༔ བསམ་པའི་དོན་རྣམས་ལྷུན་གྱིས་གྲུབ༔ འགལ་རྐྱེན་བར་ཆད་དབྱིངས་སུ་ཞི༔ ཅེས་སངས་རྒྱས་བསྐུལ་ངོར་ག་གཱས་སོ། །