བྱིན་རླབས་བླ་མའི་སྒྲུབ་པ།
ཟབ་གསང་ཀློང་གྲོལ་དག་སྣང་ལས༔ བྱིན་རླབས་བླ་མའི་སྒྲུབ་པ་བཞུགས༔
ན་མོ་པདྨ་ཀ་ར་ཡེ༔ རང་རིག་བླ་མའི་སྒྲུབ་པ་ནི༔ མཐའ་བྲལ་མི་རྟོག་རྗེན་པའི་དབྱིངས༔ བརྗོད་མེད་ཤེས་རིག་བླ་མ་སྟེ༔ དེ་བཞིན་རང་ངོར་བསྒྲུབ་པར་བྱ༔ སྨོན་འཇུག་སྐྱབས་སེམས་བསྒོམ་པ་ནི༔ ཨེ་མ་ཧོ༔ མ་བཅོས་རང་མདངས་ཆོས་སྐུའི་དབྱིངས༔ སྣ་ཚོགས་སྣང་བའི་སྐྱེ་འགྲོ་ཀུན༔ རང་བྱུང་ཆེན་པོར་སྐྱབས་སུ་མཆི༔ ཟུང་འཇུག་ཕྱམ་གཅིག་གྲོལ་སེམས་བསྐྱེད༔ ཨོཾ་ཨཱཿཧཱུྃ༔ རང་སྣང་གནས་དག་མཁའ་སྤྱོད་ཡུལ༔ རྔ་ཡབ་གླིང་གི་བཀོད་པའི་ཞིང་༔ རང་ཉིད་ཚངས་པ་ལྷའི་མེ་ཏོག༔ རྒྱལ་པོའི་ཆས་ཅན་གུས་འདུད་ཀྱི༔ སྤྱི་བོར་པདྨ་འདབ་སྟོང་དབུས༔ སངས་རྒྱས་ཀུན་འདུས་བླ་མ་དང་༔ དབྱེར་མེད་རིག་འཛིན་པདྨ་འབྱུང་༔ དཀར་དམར་མདངས་ལྡན་ཞི་མ་ཁྲོ༔ ཕོད་ཁ་ཆོས་གོས་རྣམ་གསུམ་ཀླུབས༔ ཟ་བེར་འདུང་མ་གསོལ་བ་ཡི༔ དབུ་ལ་པདྨ་མཐོང་གྲོལ་གསོལ༔ ཞལ་གཅིག་ཕྱག་གཉིས་རྡོ་རྗེ་དང་༔ བྷནྡྷ་བདུད་རྩིས་གཏམས་པ་བསྣམས༔ གསང་རྟེན་ཁ་ཊྭཱྃ་མཆན་དུ་བརྟེན༔ རྒྱལ་པོ་རོལ་བའི་སྟབས་སུ་འགྱིང་༔ མཐའ་བསྐོར་རྒྱ་བོད་པཎ་གྲུབ་དང་༔ རྗེ་འབངས་གཏེར་སྟོན་རིག་འཛིན་ཚོགས༔ ཉི་རྡུལ་འཁྲིགས་པ་བཞིན་དུ་བསྒོམ༔ དེ་ལྟར་གསལ་བའི་གནས་གསུམ་ལས༔ འོད་ཟེར་རྔ་ཡབ་གླིང་འཕྲོས་པས༔ ཐུགས་བརྒྱུད་བསྐུལ་བཞིན་བརྟན་གཡོ་ཀུན༔ བླ་མའི་རྡོ་རྗེ་གསུམ་ལྡན་ངང་༔ དམ་ཡེ་དབྱེར་མེད་སད་པར་གྱུར༔ ཅེས་པས་མོས་གུས་དྲག་པོ་ཡིས༔ ཧཱུྃ༔ ཨོ་རྒྱན་ཡུལ་གྱི་ནུབ་བྱང་མཚམས༔ པདྨ་གེ་སར་སྡོང་པོ་ལ༔ ཡ་མཚན་མཆོག་གི་དངོས་གྲུབ་བརྙེས༔ པདྨ་འབྱུང་གནས་ཞེས་སུ་གྲགས༔ འཁོར་དུ་མཁའ་འགྲོ་མང་པོས་བསྐོར༔ ཁྱེད་ཀྱིས་རྗེས་སུ་བདག་བསྒྲུབ་ཀྱི༔ བྱིན་གྱིས་རློབས་ཕྱིར་གཤེགས་སུ་གསོལ༔ གུ་རུ་པདྨ་སིདྡྷི་ཧཱུྃ༔ ཚིག་བདུན་བརྒྱ་རྩ་བརྒྱད་ཀྱིས་སྤྱན་འདྲེན་བྱས་ལ༔ ཨོཾ་ཨཱཿཧཱུྃ༔ སྣང་ཞིང་སྲིད་པའི་ཆོས་རྣམས་ཀུན༔ འདོད་ཡོན་མཆོད་པའི་ལྷ་མོར་བསྒྱུར༔ སྨན་རཀ་གཏོར་ཚོགས་ལྟ་སྒོམ་ཉམས༔ རིག་འཛིན་རྒྱ་མཚོའི་ཚོགས་ལ་འབུལ༔ སརྦ་པཱུ་ཙ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཨཱཿཧཱུྃ༔ ཅེས་མཆོད་ནས་མོས་གུས་གདུང་བ་དྲག་པོ་ཡིས༔ ཀྱཻ༔ དུས་གསུམ་རྒྱལ་བ་མ་ལུས་པའི༔ ཕྲིན་ལས་གཅིག་བསྡུས་པདྨ་འབྱུང་༔ བདག་ཅག་སྐྱབས་བྲལ་སེམས་ཅན་ལ༔ རེ་ས་གཞན་ན་མ་མཆིས་པས༔ སྐྱིད་སྡུག་ལེགས་ཉེས་ཁྱེད་རང་མཁྱེན༔ ཚེ་ཆོས་ལས་བཞི་ལྷུན་གྲུབ་ཅིང་༔ སྐྱེ་དང་ཚེ་རབས་དུས་ཀུན་ཏུ༔ ཁྱེད་ཀྱི་ཕྲིན་ལས་ཆེར་བསྒྲུབ་ནས༔ མཁའ་མཉམ་འདྲེན་པའི་དཔལ་ཐོབ་ཤོག༔ ཨོ་རྒྱན་མཁྱེན༔ ཞེས་སྣང་ཚད་སྣོད་བཅུད་ཐམས་ཅད་བླ་མར་བལྟས་ལ་གསོལ་འདེབས་འབུམ་ཕྲག་བྱའོ༔ མཐར༔ བླ་མའི་གནས་གསུམ་ལྟེ་བ་ནས༔ འོད་ཟེར་འཕྲོས་པས་དབང་བཞི་ཐོབ༔ སྒྲིབ་བཞི་སྦྱངས་ནས་སྐུ་བཞི་འགྲུབ༔ རང་རིག་པདྨའི་ཞལ་མཐོང་གྱུར༔ དེ་ནས་རང་གཞན་ཀུན་དམིགས་པ་འདི་ལྟར༔ བདག་དང་འགྲོ་དྲུག་མཁའ་མཉམ་ཀུན༔ སོ་སོར་རང་ཀར་འཛིན་པའི་སེམས༔ ཕྱམ་གཅིག་བླ་མའི་དགོངས་དབྱིངས་སུ༔ གཏད་མེད་ཀློང་དུ་འཛིན་མེད་གྲོལ༔ ཨ་ཕཊ༔ ཨ་ཕཊ༔ ཨ་ཕཊ༔ ཅེས་མཉམ་བཞག་བསྐྱང་ལ་དར་ཅིག་བཞག༔ དེ་མ་ཐག་དུ་རང་རིག་འཆི་མེད་རྡོ་རྗེའི་སྐུར་བཞེངས་ཏེ༔ ཧྲཱི༔ བརྒྱ་རྩ་བཟླས་ལ༔ བླ་མ་འོད་དུ་ཞུ་ནས་ཚེ་དཔག་མེད་ཀྱི་རྣམ་པར་སྙིང་དབུས་སུ་བཞུགས་པར་བསམ༔ དག་སྣང་ཐོལ་བྱུང་ཕབས་པ་ཡོངས་ལ་དགེའོ༔ ནམ་མཁའ་འཇིགས་མེད་རྡོ་རྗེས་སོ། །
ན་མོ་བརྒྱུད་པ་དགུ་ལྡན་བླ་མའི་དཀྱིལ་འཁོར་དང་༔ རྒྱུད་སྡེ་བཞི་དྲུག་ཐེག་དགུར་འབྲེལ་བའི་ལྷ༔ ཕྱི་ནང་གནས་གསུམ་དཔའ་བོ་མཁའ་འགྲོ་དང་༔ བསླུ་མེད་དཀོན་མཆོག་གསུམ་གྱི་ཐུགས་རྗེ་ཡིས༔ ཕྱི་ནང་གསང་བའི་བར་ཆད་དབྱིངས་སུ་བཟློག༔ ཚེ་དང་ཆོས་དང་རྒྱུ་ནོར་ལོངས་སྤྱོད་སོགས༔ མཐུན་རྐྱེན་བསམ་དོན་ཆོས་བཞིན་འགྲུབ་པ་དང་༔ གྲུབ་ཆེན་བརྒྱད་དང་རིག་འཛིན་རྣམ་པ་བཞི༔ འོད་གསལ་སྣང་བཞིའི་སྦུབས་ནས་མྱུར་བསྒྲོད་དེ༔ ཟག་ཕུང་འོད་སྐུར་གྲོལ་བའི་དགེ་མཚན་གྱིས༔ གཞོན་ནུུ་བུམ་སྐུ་འགྲུབ་པར་བྱིན་གྱིས་རློབས༔ རྡོ་རྗེ་རྒྱལ་མཚན་ངོར་ག་གཱས་སོ། །