བཀའ་རབ་འབྱམས་ཀྱི་དབང་གི་བསྐུར་ཚིག

འོ་ནམ་མཁའ་དང་མཉམ་པའི་སེམས་ཅན་ཐམས་ཅད་བླ་ན་མེད་པ་རྫོགས་པའི་སངས་རྒྱས་ཀྱི་གོ་འཕང་ལ་བཀོད་པར་བྱ། དེའི་ཆེད་ཀར་དེང་སྨིན་བྱེད་དབང་བསྐུར་ཟབ་མོ་ཞུ་བར་བགྱིའོ་སྙམ་དུ་སེམས་བསྐྱེད་ལ་གསན་པར་ཞུ། དེ་ལ་རྒྱུད་སྡེ་བཞི་དྲུག་གི་དཀྱིལ་འཁོར་ཇི་སྙེད་ཅིག་གསུངས་པ་ཐམས་ཅད་ཀྱི་དོན་བཅུད་དང་། ལྷ་ཚོགས་མ་ལུས་ངོ་བོ་གཅིག་པར་གང་དུ་འདུ་བའི་འཁོར་ལོའི་བསྒྱུར་བ་དང་། དངོས་གྲུབ་ཐམས་ཅད་ཀྱི་རྩ་བ་ནི་བླ་མ་དམ་པ་ཉིད་ཡིན་པས་ན། གསང་བ་རབ་འབྱམས་ལས། དཀྱིལ་འཁོར་དབང་ཕྱུག་ཧེ་རུ་ཀ །བླ་མ་མཆོག་ཡིན་དངོས་གྲུབ་ཆེ། ཞེས་དང་། དམ་ཚིག་མཆོག་གི་རྒྱུད་ལས། དངོས་གྲུབ་འདོད་པའི་དད་པ་ཅན། །དངོས་གྲུབ་བླ་མ་མཉེས་ལས་བྱུང་། །ཞེས་དང་། དྭོ་ཧ་ལས། དངོས་གྲུབ་ཀུན་གྱི་རྩ་བ་རྡོ་རྗེ་སློབ་དཔོན་ཉིད། ཅེས་སོ། །དེ་བཞིན་དུ་ལྷ་སྐུ་གྲངས་མེད་པའི་བསྐྱེད་རྫོགས་དང་། བཟླས་བརྗོད་བསྐལ་བ་དུ་མའི་བར་དུ་བྱས་པ་དང་། །རྒྱལ་བ་སྲས་བཅས་ལ་མཆོད་པ་བྱས་པ་ལས། །བླ་མ་བསྒྲུབ་མཆོད་ཀྱི་ཕན་པའི་ཡོན་ཏན་ཆེ་བར་ཡང་། ཆུབ་པར་རོལ་པའི་རྒྱུད་ལས། །བསྐྱེད་རིམ་བསྐལ་བར་བསྒོམ་པ་བས། །བསྒྲུབ་པས་བླ་མ་མཉེས་པ་ནི། །བསོད་ནམས་སྐད་ཅིག་ཁྱད་པར་འཕགས། ཞེས་དང་། ཀུན་འདུས་ལས། གང་གིས་བསྐལ་པ་འབུམ་ཕྲག་ཏུ། །ལྷ་སྐུ་འབུམ་ཕྲག་བསྒོམ་པ་བས། །བླ་མ་དྲན་པའི་བསོད་ནམས་མཆོག །བསོད་ནམས་འདི་ནི་ཕ་མཐའ་ཡས། །ཞེས་དང་། བཀོད་པ་ཆེན་པོ་ལས། །བསྙེན་བསྒྲུབ་བཟླས་བརྗོད་ས་ཡ་དུང་ཕྱུར་གྱིས། །བླ་མའི་གསོལ་འདེབས་ལན་གསུམ་བརྗོད་པ་ཡི། །ནུས་པ་འབུམ་ཕྲག་ཆར་ཡང་མི་ཕོད་དོ། །རྫོགས་པའི་རིམ་པ་བསྐལ་བའི་བར་དུ་ཡང་། །གང་གིས་འདུ་འཛི་སྤང་ནས་བསྒོམ་པ་ལས། །བླ་མ་རང་སེམས་དཀྱིལ་དུ་ཤར་བ་ཙམ། །བསོད་ནམས་སྟོང་ཕྲག་ཉི་ཤུས་ཆར་མི་ཕོད། །བླ་མ་བསྒོམ་དང་བསྟོད་པའི་བསམ་པ་ཡིས། །སངས་རྒྱས་འབྲས་བུ་ཅིག་ཆར་འགྲུབ་པར་ངེས། །ཞེས་དང་། ཡེ་ཤེས་གསལ་བའི་སྒྲོན་མའི་རྒྱུད་ལས། །གང་གིས་བསྐལ་བ་བརྒྱ་ཁྲི་བཞི་སྟོང་གི་བར་དུ། སྦྱིན་པ་བཏང་བ། ཚུལ་ཁྲིམས་བསྲུང་། བཟོད་པ་བསྒོམ། བརྩོན་འགྲུས་བརྩམས། བསམ་གཏན་ལ་མཉམ་པར་བཞག ཤེས་རབ་བསྐྱེད་པ་ལས། ལྷའི་སྐུ་མཚན་དང་དཔེ་བྱད་ཀྱིས་བརྒྱན་པ་སྐད་ཅིག་དྲན་པ་བསོད་ནམས་ཆེ། དེ་བསྐལ་བ་བརྒྱད་ཁྲི་བཞིན་སྟོང་བསྒོམ་པ་བས། བླ་མ་སྐད་ཅིག་དྲན་པ་བསོད་ནམས་ཆེའོ། །དེ་ཅིའི་ཕྱིར་ཞེ་ན། ཚེ་འདི་ཉིད་དུ་སངས་རྒྱས་པའི་ཕྱིར་རོ། །ཞེས་དང་། སྡོམ་པ་འབྱུང་བ་ལས། མཆོད་པ་ཐམས་ཅད་ཡོངས་སྤངས་ཏེ། །བླ་མ་མཆོད་པ་ཡང་དག་བརྩམས། །དེ་བརྙེས་པ་ལས་ཀུན་མཁྱེན་གྱི། །ཡེ་ཤེས་མཆོག་དེ་ཐོབ་པར་འགྱུར། །ཞེས་དང་། ཡེ་ཤེས་ཕྲ་རྒྱུད་ལས། ཡོན་ཏན་ཀུན་ལྡན་བླ་མ་ལ། །རྟག་ཏུ་གཡོ་སྒྱུ་མེད་པ་ཡིས། །མཆོད་པ་ཆུང་ངུ་བྱས་གྱུར་ཀྱང་། །ཚེ་འདིར་ཚེ་རིང་ནད་མེད་ཅིང་། །ལོངས་སྤྱོད་ཕུན་ཚོགས་ཡིད་དུ་འོང་། །ཕྱི་མ་ཐར་བའི་བདག་པོར་འགྱུར། །ཞེས་སོ། ། དེ་ལྟ་བུའི་བླ་མ་བསྒྲུབ་མཆོད་ཀྱི་ཐབས་ཟབ་མོའི་གསང་སྔགས་ཀྱང་དབང་ལ་མ་བརྟེན་ན་མི་འགྲུབ་པས་ན། ཁ་སྦྱོར་ཐིག་ལེ་ལས། དབང་མ་ཐོབ་ན་དངོས་གྲུབ་མེད། །བྱེ་མ་བཙིར་བས་མར་མེད་བཞིན། །ཞེས་དང་། སྙིང་གི་མེ་ལོང་ལས། གསང་སྔགས་དབང་ལ་མ་བརྟེན་འགྲུབ་མི་འགྱུར། །དཔེར་ན་མཉན་པ་ལག་སྐྱ་མེད་པ་བཞིན། །ཞེས་པ་ལྟར་རོ། དབང་ཐོབ་ན་བྱིན་རླབས་ཞུགས་ནས་གསང་སྔགས་ཀྱི་སྣོད་དུ་རུང་། ཟབ་མོའི་ཆོས་སྒོ་དབྱེ་བས་སྨིན་གྲོལ་གྱི་ལམ་ལ་དབང་། གསང་སྔགས་ཀྱི་དངོས་གྲུབ་གྲུབ་པས་རང་གཞན་གྱིས་འདོད་དགུ་འབྱུང་བ་དང་། སྙིང་གི་མེ་ལོང་ལས། དབང་རྣམས་རབ་ཏུ་ཐོབ་བྱས་ན། །གསང་སྔགས་ཐམས་ཅད་མ་བསྒྲུབ་འགྲུབ། ཅེས་དང་། ཀློང་གསལ་ལས། །དབང་ཐོབ་རྒྱུད་སྨིན་ཆོས་སྒོ་ཕྱེད། །གསང་སྔགས་དོན་ཀུན་འགྲུབ་པར་འགྱུར། ཞེས་པའི་དོན་ལྟར་དབང་བསྐུར་ཟབ་མོའི་ཆོ་གས་སྨིན་པར་བྱེད་པའི་སྐབས་སུ་བབ་པ་ལ། བདག་རྡོ་རྗེ་སློབ་དཔོན་རིག་འཛིན་རྒྱ་མཚོ་དང་གཉིས་སུ་མེད་པའི་ངོ་བོར་རྫོགས་པ་ལ་མཎྜལ་ཕུལ་མཛོད། མཎྜལ་ཕུལ་ནས་གསོལ་བ་གདབས་པ་འདིའི་རྗེས་ཟློས་མཛོད། ཅེས་ཀྱང་ག་གཱས་སོ། །ཧཱུྃ༔ ཆོས་ཕུང་ཡོངས་རྫོགས་པོ་ཏི་དང་༔ ཕྱག་རྒྱ་བཞི་སྟོན་ཆོས་ཀྱི་དུང་༔ ཐར་ལམ་རྗེས་མཚོན་ཕྱག་ཤིང་རྒྱ༔ འཆད་པའི་དབང་ཐོབ་འཁོར་ལོ་ཡིས༔ སྐལ་ལྡན་བུ་ལ་དབང་བསྐུར་བས༔ ཁམས་གསུམ་ཆོས་ཀྱི་རྒྱལ་པོ་ཡི༔ རྒྱལ་སྲིད་མཆོག་ལ་བཀོད་པ་ཡིན༔ དེང་ནས་མཐའ་ཡས་འགྲོ་དོན་གྱིས༔ རྡོ་རྗེའི་གདུང་འཚོབ་ཁྱོད་ལ་བབས༔ འཆད་རྩོད་རྩོམ་པའི་བཀའ་དབང་གིས༔ ཡང་གསང་སྙིང་པོའི་བསྟན་པ་ཟུངས༔ བརྒྱུད་འཛིན་བུ་སློབ་ཁྱོད་ཀྱིས་སྐྱོངས༔ ཞི་རྒྱས་དབང་དྲག་ལྷུན་གྲུབ་ཀྱི༔ ལས་ལ་དབང་བསྐུར་དབང་ཐོབ་ཤོག༔ ཨ་བཛྲ་ར་ཛ་ཀརྨ་ཨ་བྷི་ཥིཉྩ་ཨ་ཧཱུྃ༔ ཅེས་ཀྱང་ཐེག་མཆོག་རིན་པོ་ཆེའི་བཀའ་ཕེབས་བཞིན། སྙིང་ཐིག་དང་གཏེར་གསར་ཀུན་ལ་སྦྱར་ཆོག་པའི་བཀའ་རབ་འབྱམས་ཀྱི་དབང་གི་བསྐུར་ཚིག་སྨོན་ལམ་དང་བཅས་པ་འདི། དུས་ཞབས་ཀྱི་སྙིང་ཐིག་གི་གཟུགས་བརྙན་ག་གཱ་ཨ་བྷྱེ་ནས་གུས་པས་ཞབས་འདེགས་སུ་དམིགས་ནས་སྤེལ་བའོ། །དགེའོ། །