བླ་མའི་རྣལ་འབྱོར་བསྡུས་པ་དབང་གི་ཆུ་རྒྱུན།
བླ་མའི་རྣལ་འབྱོར་བསྡུས་པ་དབང་གི་ཆུ་རྒྱུན་བཞུགས༔
དུས་གསུམ་སངས་རྒྱས་བསྙེན་པ་ལས༔ བླ་མ་བསྙེན་པ་ལྷག་གསུངས་པས༔ དེ་ཕྱིར་དེ་ཡི་ཟོལ་མ་རུ༔ རྗེས་བརྗོད་བྲག་ཆ་དོན་མེད་འགོད༔ ས་མ་ཡཱ༔ རང་ཉིད་ཐ་མལ་གནས་པ་ཡི༔ སྨིན་མཚམས་ཐད་ཀྱི་ནམ་མཁའ་ལ༔ ཆུ་སྐྱེས་རྟ་ལྗང་ཟུང་གི་སྤོར༔ རྡོ་རྗེ་བླ་མའི་རྣམ་པ་ནི༔ ཐ་མལ་སྐྱེ་བ་སྤྲུལ་པའི་སྐུ༔རང་ངོར་ཇི་ལྟར་སྣང་བ་བཞིན༔ ཕྱག་གཡས་འཁོར་ལོ་གཡོན་དྲིལ་བུ༔ ཞབས་གཉིས་རྡོ་རྗེའི་སྐྱིལ་ཀྲུང་བཞུགས༔སྣང་སྟོང་གཉིས་མེད་རང་བཞིན་ལས༔ ལས་ཀྱི་ཕྱག་རྒྱ་དབྱེར་མེད་རོལ༔ ཐིག་ལེ་སྟོང་པའི་དཀྱིལ་འཁོར་དུ༔ རྣམ་དག་དབྱིངས་ཀྱི་དྲྭ་བ་ན༔ ཤེས་རབ་རང་བྱུང་སྒྲོན་མའི་དངོས༔ རང་བཞིན་སྣང་བའི་གདེངས་སུ་བཞུགས༔ གནས་གསུམ་འབྲུ་གསུམ་འོད་ཟེར་གྱིས༔ ཕྱོགས་བཅུའི་རྒྱལ་བའི་དཀྱིལ་འཁོར་ནས༔ ནུས་ལྡན་རྡོ་རྗེའི་སྐུ་གསུང་ཐུགས༔ ཡོན་ཏན་ཕྲིན་ལས་རང་རྩལ་ཀུན༔ མཚོ་ལ་ཁ་ཆར་བབས་པ་བཞིན༔ སྤྱན་དྲངས་གཉིས་སུ་མེད་པར་བསྟིམ༔ ཧཱུྃ༔ ཨོ་རྒྱན་ཡུལ་གྱི་༴ སོགས། ཆོས་ཟད་བློ་འདས་དཀྱིལ་འཁོར་ནས༔ ཚད་ཕེབས་དོན་གྱི་ཡོན་ཏན་དཔལ༔ སྣང་བའི་ཉམས་སུ་ལྷུན་གྱིས་གྲུབ༔ མངོན་སུམ་འགྲོ་བའི་མགོན་པོ་ལ༔ ཕྱག་འཚལ་མཆོད་འབུལ་ཉེས་ལྟུང་བཤགས༔ དགེ་ལ་ཡི་རང་ཆོས་འཁོར་བསྐུལ༔ མི་འདའ་བཞུགས་གསོལ་སྐྱབས་སུ་མཆི༔ བྱང་ཆུབ་སེམས་ཀྱི་བསླབས་སྡོམ་གཟུང་༔ རིག་འཛིན་སྔགས་ཀྱི་དམ་ཚིག་ཀུན༔ རྡོ་རྗེའི་གདུང་ཀྱང་བདག་གིས་གསོབ༔ འགྲོ་ཀུན་བྱང་ཆུབ་གནས་བཀོད་པའི་ཕྲིན་ལས་བྱེད་པོར་བདག་བྱིན་རློབས༔ དགེ་བས་འགྲོ་ཀུན་སངས་རྒྱས་ཤོག༔ དབང་བཞི་བསྐུར་ཤིང་སྒྲིབ་བཞི་དག༔ སྐུ་བཞི་ཐོབ་པའི་དགའ་བཞིའི་ལམ༔ རྣལ་འབྱོར་བཞི་ཡི་སྨིན་བྱེད་དུ༔ རིགས་སད་ལས་ཀྱི་ཉེ་རྒྱུ་རུ༔ རྟེན་འབྲེལ་བདེན་པའི་སྤྱི་བླུགས་སྩོལ༔ བཛྲ་གུ་རུ་ག་གཱ་ཨ་བྷྱེ་སརྦ་སིདྡྷི་ཕ་ལ་ཧཱུྃ༔ ཨ་བྷི་ཥིཉྩ་ཧཱུྃ༔ ཅེས་ཅི་ནུས་མཐར༔ ཨཱ༔ གྲངས་མང་བསྐྱལ་ལོ༔
དེ་ནས་དབང་གི་རིམ་པ་ནི༔ ཨཱ༔ བླ་མའི་གནས་གསུམ་འབྲུ་གསུམ་ལས༔ འོད་ཟེར་དཀར་དམར་མཐིང་ཀ་གསུམ༔ ཡི་གེ་སྤྲིན་གྱི་རྣམ་པར་འཕྲོས༔ སྒོ་གསུམ་སྒྲིབ་དག་དགའ་གསུམ་སྐྱེ༔ སྐུ་གསུམ་གོ་འཕང་རྒྱུད་ལ་བཞག༔ ལམ་གསུམ་དབང་ཐོབ་སླར་ཡང་ནི༔ ཧཱུྃ་ལས་འོད་ཟེར་མཐིང་ནག་འབར༔ སྤྱི་བོར་ཚངས་བུག་ནས་ཞུགས་ཏེ༔ ཆེར་སྐྱེད་འཁོར་ལོར་ལྔ་བོ་ཡི༔ ཡན་ལག་ཕྲ་བ་ཀུན་ཞུགས་པས༔ ཚིག་གི་དབང་ཐོབ་ལྷན་དགའ་སྐྱེས༔ རྫོགས་ཆེན་བསྒོམ་པའི་སྣོད་དུ་གྱུར༔ རྒྱུ་འབྲས་ས་བཅུ་མངོན་དུ་བྱས༔ དེ་ནས་འོད་ཞུ་བདག་ལ་ཐིམ༔ ཉོན་ཤེས་སྒྲིབ་པ་མཐའ་དག་བྱང་༔ འོད་ཟེར་ཆེན་པོའི་དབང་ཐོབ་སྟེ༔ ཀུན་གཞིའི་ལས་དག་རྡོ་རྗེ་ཡི༔ ཏིང་འཛིན་དབང་ཐོབ་གདོས་བཅས་ཀུན༔ དག་པའི་འོད་སྐུ་བླ་མའི་ངང་༔ གྲགས་སྟོང་གསུང་གི་རྡོ་རྗེར་རོལ༔ དྭངས་མའི་རྩ་དང་ཡེ་ཤེས་ཀྱི༔ ངོ་བོ་རང་བཞིན་ཐུགས་རྗེ་ཡི༔ སྐུ་དང་ཐིག་ལེ་རིག་པར་སྨིན༔ མི་སློབ་ལམ་བརྒལ་ལྷུན་གྱིས་གྲུབ༔ གཞི་ལ་མཐར་ཕྱིན་བྱ་བྱེད་ཀྱིས༔ སྤྲུལ་པ་གཉིས་འབྱིན་ལ་དབང་བསྒྱུར༔ བློ་འདས་ཡེ་གྲོལ་ཨེ་མ་ཧོ༔ ཨ་ཨཱཿཕཊ༔ ཅེས་ཀྱང་པྲཛྙཱ་མ་ཏིའི་ངོར། །ག་གཱ་ཨ་བྷྱེས་ཁྲེལ་མེད་གཏམ། །རྣམ་པར་རིག་པའི་འཕྲུལ་བསྒྱུར་མཁན། །འགྱུར་མེད་རྣམ་པར་རྒྱལ་བའི་དཔལ། །དགེའོ། །དགེའོ། །དགེའོ། ། སརྦ་མངྒ་ལཾ། །