བླ་སྤྲུལ་རྣམས་ཀྱི་ཞབས་བརྟན་ལྟ་བུ་སོགས།

བླ་སྤྲུལ་རྣམས་ཀྱིས་ཞབས་བརྟན་ལྟ་བུ་ལ། དེང་འགྲོ་བ་ཡོངས་ཀྱི་འདྲེན་སྟོན་བླ་མ་དམ་པ་ ༼ ཞེས་པའི་མཚན་བཅུག་པའམ། ཡང་ན་ ༽ འདི་ཞེས་བྱ་བའི་སྒྱུ་འཕྲུལ་རྒྱན་གྱི་རོལ་མོ་སྤྲུལ་པའི་སྐུ་ ༼ ཞེས་མཚན་བཅུག་ ༽ཞེས་བྱ་བས་གསང་བ་གསུམ་གྱི་སྤྱོད་ཡུལ་མཁའ་ལྟར་འབྱམས་ཀླས་པའི་བརྟུལ་ཞུགས་ལ། གཟུགས་ཅན། གཟུགས་མེད། དགྲ་བགེགས། དམ་ཉམས། དམ་སྲི། འགབ་འདྲེ། དམ་ལོག ལོག་སྒྲུབ་མཁན་ཐམས་ཅད་ཐལ་བའི་རྡུལ་ཕྲན་བཞིན་ཏུ་བརླག་ནས། སྐུ་ལ་བྲོ་ཚ་བ་དང་། སྐུ་ཚེ་དང་མཛད་འཕྲིན་ལ་བར་ཆད་མི་འབྱུང་བར། དམ་པའི་ཚུལ་དགུའི་རྒྱལ་བསྟན་སྣང་བར་མཛད་པ་དང་། དབང་དང་རྒྱུད་ལུང་མན་ངག་གི་ཆུ་རྒྱུན་གྱིས་འདུལ་བཞིའི་སྐྱེ་དགུར་མཉེས་གཤིམས་བརྩེ་བ་ཆེན་པོའི་གཟིགས་པས་དམ་དུ་འཁྱུད་པའི་ངང་ནས་ཞབས་པད་རྡོ་རྗེ་བཞིའི་ངོ་བོར་འཚོ་ཞིང་བཞེས་པའི་འཕྲིན་ལས་དམ་པ་མཛད་དུ་གསོལ། དགོན་སྡེ་ལ་སྐྱབས་འཇུག་ཞུ་ན། དོ་གལ་བསྟན་པའི་གཞི་མལ་དགོན་གང་ཡིན་གྱི་མཚན་བཅུད་ལ། འདུས་སྡེ་རིན་པོ་ཆེ་འདིས། དམ་ཆོས་བྱང་ཆུབ་བསྒྲུབ་པ་ལ། བར་དུ་གཅོད་པའི་དགྲ་བགེགས་ཀྱི་གནོད་སྦྱོར། འཇིག་རྟེན་ཆོས་བརྒྱད་ཀྱི་བསླུ་བྲིད། མེ་ཏོག་མདའ་ཅན་གྱི་ཕོ་ཉ། བསླབ་པ་གསུམ་ལ་ཉེ་ཞོ་རྩོམ་པ་ཐམས་ཅད་ཞི་བ་དང་། སྦྱངས་པའི་ཡོན་ཏན་བཅུ་གཉིས་དང་འཕགས་པའི་ནོར་བདུན་གྱི་ཕྱུག་ཅིང་། ཆོས་དང་མཐུན་པའི་རྐྱེན་ཐམས་ཅད་འབད་མེད་ལྷུན་གྱིས་གྲུབ་པའི་ཚོགས་གཉིས་ཡོངས་སུ་རྫོགས་ནས། དོན་གཉིས་མཐའ་རུ་ཕྱིན་པའི་ཕྲིན་ལས་དམ་པ་མཛད་དུ་གསོལ། རྒྱལ་བློན་སོགས་ལ། བྱེ་བྲག་དུ་སྐྱབས་གནས་དཀོན་མཆོག་ལ་བཅོལ་ཞིང་། ཡང་དག་པའི་ལྟ་བ་ལ་དད། བློ་ཕུག་ཆོས་ལ་གཏད་ཅིང་། ཡ་རབ་ཀྱི་སྤྱོད་གསུམ་དང་། མི་ཆོས་གཙང་མ་བཅུ་དྲུག་གིས་མངའ་རིས་སྐྱོངས་བའི་རྒྱལ་རིགས་མིང་། བློན་པོ་མིང་གཙོ་བོ་མིང་། གྲོས་དབང་མིང་འདི་ཞེས་བགྱི་བ་ཚེ་བསོད་དཔལ་ཡོན། མངའ་ཐང་། སྟོབས་འབྱོར་ལ་གནོད་ཅིང་འཚེ་བ་ཐམས་ཅད་ཀྱིས་གནོད་སེམས། གདུག་རྩུབ། བསམ་སྦྱོར་ངན་པ་ཐམས་ཅད་ཞི་བར་མཛད་ནས། བདེ་དགའ་རྒྱ་མཚོའི་དཔལ་ཕུན་སུམ་ཚོགས་པའི་ཡུལ་ཁམས་ཆོས་བཞིན་དུ་སྐྱོངས་ཞིང་རྫོགས་ལྡན་དང་པོའི་དགའ་སྟོན་ལ་ལོངས་སྤྱོད་པའི་སྐལ་བ་དང་ལྡན་པའི་ཕྲིན་ལས་དམ་པ་མཛད་དུ་གསོལ། ཡུལ་སྡེ་དང་དུད་ཚང་ལྟ་བུ་ལ། དེང་དཀོན་མཆོག་གསུམ་ལ་བླ་མར་བྱེད་པ། འདུན་ཕུག་ཆོས་ལ་དཀར་བ། དད་གུས་འཕོ་འགྱུར་མེད་པའི་ཡོན་བདག་འདི་ཞེས་པའམ་སྡེ་རིས་འདི་ཞེས། བྱ་བ་ལ་མི་མཐུན་པའི་ཕྱོགས། མི་འདོད་པའི་ཉེ་བར་འཚེ་བ། ནད་དང་གནོད་པ། རྐྱེན་དང་བར་ཆད། དགྲ་ཇག་ཆོམ་རྐུན། རྨང་སྡུག་དབུལ་གསུམ་ཐམས་ཅད་ཞི་ཞིང་བཟློག་པར་མཛད་པ་དང་། ཆོས་སྲིད་ཚེ་བསོད་བདེ་སྐྱིད་ཁ་རྗེ་དབང་ཐང་སྙན་གྲགས་ལོངས་སྤྱོད་བཙན་ཕྱུགས་འཕན་དར་ཕུན་སུམ་ཚོགས་པའི་དབང་དང་སྐལ་བ་ལ་ལོངས་སྤྱོད་པའི་ཕྲིན་ལས་དམ་པ་མཛད་དུ་གསོལ། ཡང་ནད་པ་ལ་ཞུ་ན། མི་ཁྱིམ་འདི་ཚང་གི་ནད་པ་ ༼ ཆཻགེམོ ༽འདི་ལ་མ་རིག་པའི་རྩ་བ་ཅན་རྒྱུ་དུག་གསུམ་ལས་བྱུང་བའི་ཉེས་གསུམ་གྱི་དུ་ཁ། ལྟར་སྣང་འཕྲལ་གྱི་ནད། ཡོངས་གྲུབ་ཚེའི་ནད། ཀུན་བཏགས་གདོན་གྱི་ནད། གཞན་དབང་སྔོན་ལས་ཀྱི་ནད་དེ། ནད་རིགས་བཞི་བརྒྱ་རྩ་བཞི། གདོན་སྟོང་ཕྲག་བརྒྱད་ཅུ། ཡེ་འདྲོག་སུམ་བརྒྱ་དྲུག་བཅུ། གློ་བུར་དགུ་བཅུ་རྩ་གཅིག དུས་མིན་འཆི་བ་རྣམ་བརྒྱད་ལ་སོགས་ཚེའི་བར་ཆད་མི་མཐུན་པའི་ཕྱོགས་ངན་པ། ལུས་ཀྱི་ན་ཚ། སེམས་ཀྱི་སྡུག་བསྔལ་ཐམས་ཅད་ལས་རྒྱལ་ཞིང་བཀྲ་ཤིས་བདེ་སྐྱིད་ཕུན་སུམ་ཚོགས་པའི་དཔལ་ལ་ལོངས་སྤྱོད་པའི་སྐལ་བ ༼ བདུད་འཇོམས་ཞལ་གསུངས་ ༽དམ་པ་དང་ལྡན་པའི་ཕྲིན་ལས་༴ མགྲོན་པོ་ལ། ཁྱད་པར་དུ་བྱེས་སུ་བསྒྲོད་པ་མིང་འདི་དག་གི་ལམ་འཕྲང་གཉན་པོ་འགྲིམ་པའི་འགགས་ལ་འཇིག་པ་ཆེན་པོ་བརྒྱད་དང་བཅུ་དྲུག་ལ་སོགས་པའི་ལམ་དགྲ མི་ཕྱུགས་རྐང་འགྲོ་ལ། ནད་ཡམས། གོད་ཁ། མི་ཆེན་གྱི་ལོག་ཕོག་སོགས་མི་འདོད་པ་སྣ་ཚོགས་མི་འབྱུང་ཞིང་། ཆོས་དང་མི་འགལ་བའི་བསམ་དོན་ཐམས་ཅད་འབད་མེད་ཡིད་བཞིན་དུ་འགྲུབ་ནས་རང་ཡུལ་ལ་འཁོད་དེ་གཉེན་དང་ལྷན་གཅིག་ཏུ་གདའ་བའི་ཕྲིན་ལས་༴ གྱོད་དོན་ལ། ཞུ་སྙིང་བླ་མ་དཀོན་མཆོག་ལ་སྐྱབས་བཅོལ་བ་པོ་མིང་འདི་ཞེས་བགྱི་བས། ཡུལ་གོང་མ་རྒྱལ་བློན་སོགས་ལ་ཞུ་བའི་སྤོབས་པ་ཐོབ། རང་གི་ཚིག་བཙུན། བདེན་པའི་ཤགས་འགྱེད་པའི་རྒྱལ་ཁ་ཐོབ། མ་ཉེས་པའི་ཡ་ག་གླེངས་འདེབས་ལས་དྲང་པོའི་ལམ་དུ་བྱིན་ནས། འཁོན་པ་འདུམ། ཕྱིན་ཆད་ཀྱི་བསམ་སྦྱོར་ངན་པ་རྒྱུན་ཆད་མཛའ་གཅུགས་གི་དངས་མར་གྱུར་ནས་བྱང་ཆུབ་ཀྱི་སེམས་རིན་པོ་ཆེ་རྒྱུད་ལ་འཁྲུངས་པའི་ཕྲིན་ལས་༴ གཤིན་པོ་ལ། ཚེ་ལས་འདས་པ་འདས་མ་ ༼ མིང་ཞེས་ ༽ འདི་ཉིད་ཀྱི་སྐྱབས་དང་སྐྱེལ་མ་མགོན་དང་དཔུང་གཉེན་ཁྱེད་ལ་བཅོལ་བ་ལགས་ན། ཚེ་རབས་ཀྱི་ལས་ཉོན་སྡིག་སྒྲིབ་ཉེས་ལྟུང་ཐམས་ཅད་དག་པར་མཛད་དུ་གསོལ། བར་དོའི་འཁྲུལ་སྣང་འཇིག་སྐྲག་ཐམས་ཅད་ཞི་ནས། ལམ་སྣ་དང་སུན་མ་མཛད་དེ། རབ་ཕྱིར་མི་ལྡོག་པའི་ས་ལ་གཞོལ་བ་དང་། འབྲིང་རྣམ་དག་དབུགས་ཆེན་འབྱིན་པའི་ཞིང་ཁམས་སུ་སྐྱོལ་བའི་མཐུ་དཔུངས་སྟོབས་ཤུགས་ཕྱུང་བ་དང་། ཐ་མ་ནའང་གནས་སྐབས་སུ་དལ་འབྱོར་གྱི་ཡོན་ཏན་སུམ་ཅུ་རྩ་བཞི་དང་ལྡན་པའི་མི་ལུས་ཆོས་དང་ལྡན་པ་ཐོབ་ཅིང་། ཡང་དག་པའི་དགེ་བའི་བཤེས་གཉེན་ཁྱེད་ཀྱི་ཞབས་པད་ཟིན་པ་དང་། ཚེ་གང་ཆོས་ལ་སྤྱོད་པའི་ཆོས་དོན་མངོན་པར་རྟོགས་ནས་སྙིང་པོའི་དོན་བསྒྲུབ་པའི་སྲིད་པའི་རྒྱ་མཚོ་ཆེན་པོ་ལས་བརྒལ་ནས་དོན་གཉིས་ལྷུན་གྱིས་གྲུབ་པའི་རྒྱལ་མཆོག་ཁྱེད་ཀྱི་ཐུགས་ཀློང་དང་དབྱེར་མེད་པར་སངས་རྒྱས་ཐོབ་པའི་ཕྲིན་ལས་དམ་པ་མཛད་དུ་གསོལ། ཅེས་པ་འདིའང་བརྟན་མཁས་བཟང་བཙུན་གྱི་ཡོན་ཏན་ཕུན་སུམ་ཚོགས་པའི་དགེ་བའི་བཤེས་གཉེན་ཆེན་པོ་ཐུབ་བསྟན་འོད་ཟེར་གྱིས་བཀའ་ལ་གདོང་ཟླ་མ་ཕོད་པར། ག་གཱ་ཨ་བྷྱེས་གཅོས་གཏམ་ཆད་ཆོད་དུ་སྨྲས་པ་དགེའོ། མངྒ་ལཾ།