ཉམས་ཆགས་རྟོག་སྒྲིབ་རང་ངོ་སྤྲོད་པ་ཀུན་བཟང་དགོངས་རྒྱན།
ཉམས་ཆགས་རྟོག་སྒྲིབ་རང་ངོ་སྤྲོད་པ་ཀུན་བཟང་དགོངས་རྒྱན་བཞུགས་སོ། །
གསང་སྔགས་ཀྱི་དམ་ཚིག་གི་རྩ་བ་དང་ཡན་ལག་གང་རུང་རང་དང་ཟླས་ཞར་གྱིས་ཉམ༵ས་པ་དང་། སྔགས་གསུམ་ཕྱག་རྒྱ་བཞི་ལྡན་གྱི་ཆོ་ག་རྒྱུན་མི་བཅད་པར་གསུངས་པ་དང་། ཚོགས་དང་གཏོར་མ་པྲ་ཏི་ཧ་ན་དུས་ཀྱི་མཆོད་པ་ཆག༵ས་པ་དང་། ཆོས་ཉིད་སྤྲོས་པ་དང་བྲལ་བའི་གནས་ལུགས་དང་། ཆོས་ཅན་རྣམ་དག་གི་དཀྱིལ་འཁོར་ཆེན་པོ་གཙང་བདེ་བདག་རྟག་གི་རང་བཞིན་ཅན་ལ། མ་རིག་གཉིས་འཛིན་གྱི་རྟོག༵་པ་ཕྱིན་ཅི་ལོག་གི་དབང་གིས། མ་དག་པའི་ཕུང་ཁམས་སྐྱེ་མཆེད་དུ་འཁྲུལ་བའི་སེམས་ཅན་གྱི་རྣམ་པར་སྨིན་པའི་ཆོས་ལ་གཙང་བདེ་བདག་རྟག་ཏུ་འཛིན་པས་སྒྲུབ༵་པ་དང་། ཡང་གྲུབ་མཐའ་ངན་པས་བློ་བཅོས་ནས། དོན་དམ་པའི་སྐུ་དང་ཡེ་ཤེས་དག་པ་ཆེན་པོའི་དཀྱིལ་འཁོར་ལ་མི་གཙང་བ་དང་། མི་རྟག་པ་དང་། ཡེ་ཤེས་ཡོད་ན་བདག་ཏུ་འགྱུར་སྙམ་ནས་བདག་མེད་པ། ཟག་བཅས་སྡུག་བསྔལ་དུ་ལྟ་བའི་རྟོག༵་སྒྲིབ༵་ཀྱིས་བསྒྲིབ་ནས་སྔགས་གི་ལྟ་བ་ལ་སྒྲོ་སྐུར་གྱིས་གཡེངས་བ་དང་། རྣལ་འབྱོར་ཅན་འཁྱེར་སོའི་གདེངས་དང་བྲལ་ནས་ཐ་མལ་དུ་གཡེངས་པའི་རྟོག༵་སྒྲིབ༵་ཀྱིས་དམ་ཚིག་ཉམས་པའོ། །ཡང་ཁམས་གསུམ་གྱི་སེམས་དང་སེམས་བྱུང་གི་རྟོག༵་པས་སྐུ་དང་ཡེ་ཤེས་ལ་བསྒྲུབ་པའང་ཡིན་ནོ། །ལས་ངན་ནི། སེམས་པ་ཡིད་དང་བསམ་པ་ལུས་ངག་གི་སྒོ་ནས། དགེ་མི་དགེ་མི་གཡོ་བའི་ལས༵་གསུམ་སོགས་པ་ནི་ལས་ངན༵་པ་ཡིན་ཏེ། འཁོར་བར་འཆིང་བྱེད་ཀྱི་རྒྱུར་གྱུར་པའི་སྡུག་བསྔལ་གསུམ་གྱི་དམ་ལ་མ་བཏགས་པའི་འཁོར་བ་མེད་པས་སོ། །སྡིག༵་པ་ནི་མི་དགེ་བ་བཅུ་ལ་སོགས་པ་དང་། སྒྲིབ༵་པ་ནི་ཉོན་མོངས་ཤེས་བྱ་སྙོམ་འཇུག་གི་སྒྲིབ་པ་དང་། སད་རྨི་གཉིད་འཐུག་སྙོམས་འཇུག་དང་། བག་ཆགས་ནི་ཀུན་གཞི་ལ་དགེ་སྡིག་དང་མི་གཡོ་བའི་ལས་དང་། གཞན་ཡང་གནས་དོན་ལུས་གསུམ་གྱི་བག་ཆགས་བསྒོས་པས། ཕྱི་ནས་རྣམ་པར་སྨིན་པའི་ས་བོན་དུ་གྱུར་བ་ཡིན་ནོ་སྙམ་མོ། །ད་ངོ་སྤྲད་ན་ཉམས་ཆགས་སྡིག་སྒྲིབ་ལས་ངན་རྣམས་ནི་གཞི་ནས་མ་སྐྱེས་པ་དང་། སངས་རྒྱས་ཀྱི་ཕྲིན་ལས་བྱ་བ་གྲུབ་པའི་ཡེ་ཤེས་ལ་བདག་ཏུ་བཟུང་ནས་འཁྲུལ་བ་ཡིན་པས་ངོ་བོ་དེ་ཡིན་པ་དང་། ཚོགས་བརྒྱད་ཡེ་ཤེས་ལྔར་རང་གྲོལ་བའི་ཚུལ་ཤེས་ནས། དཀྱིལ་འཁོར་གསུམ་གྱི་འཁྱེར་སོ་དང་མི་འབྲལ་བའི་ཉམས་ལེན་གྱིས་འཁོར་བའི་ཆོས་ཁམས་རྣམས་པར་དག་པའི་འབྲས་བུས་མཆོག་མངོན་དུ་གྱུར་བ་ནི་འབྲས་བུ་གཞི་ལ་གྲུབ་པའི་གནད་ཀྱིས་སོ། །ཞེས་ཀྱང་ག་གཱ་ནས་ངག་འཁྱལ་འབྲེལ་མེད་འོལ་ཚོད་ཀྱི་གཏམ་མ་རང་བ་འགའ་ལ་ཉམས་ལྟས་ཀྱི་ཚུལ་དུ་སྨྲས་པའོ། །དགེའོ། །དགེའོ། །དགེའོ། །ཞེས་སོ། །སརྦ་མངྒ་ལཾ། ཡང་ན་བཤགས་པ་བྱ་བ་ནི༔ ཧཱུྃ༔ བཅོམ་ལྡན་སྐུ་གསུམ་ངོ་བོར་བྱང་ཆུབ་པའི༔ སྡེ་སྣོད་བཞི་ལས་གནང་བཀག་ཡང་དག་མཐའ༔ སྤྱི་དང་ཁྱད་པར་ལྷག་པས་བསྡུས་སོ་འཚལ༔ བསླབ་སྡོམ་དམ་ཚིག་ཉམས་པ་མཐོལ་ལོ་བཤགས༔ ༼ འདུས་པའི་ ༽ རིགས་ལྔ་དང་ནི་དགོངས་ཏེ་གསུང་བ་བཞི༔ ཐུན་མིན་བརྒྱད་དང་ ༼ བདེ་མཆོག་ ༽ གཡོན་གྱི་ཀུན་སྤྱོད་བརྒྱད༔ སྒྲུབས་བྱ་བཅུ་ ༼ གུར་ལས་ ༽ བཞི་སྤྱོད་པ་རྣམ་པ་ ༼ མངོན་རྫོགས་བླ་མ་ ༽ དགུ༔ དུས་ཀྱི་འཁོར་ལོའི་བསྲུང་བྱ་བྱ་མིན་དང་༔ གསོད་དང་འཁུ་དང་ཞེན་པ་ལྔ་ལྔ་སྟེ༔ ༼ སམྦུ་ཊིའི་ ༽ དྲོད་ཐོབ་བརྟུལ་ཞུགས་དྲུག་དང་ལུང་ ༼ ཨ་ནུ་ ༽ ཆེན་གྱི༔ བརྟུལ་ཞུགས་ཆེན་པོ་ཉི་ཤུ་རྩ་གསུམ་སྟེ༔ དགུ་བཅུ་རྩ་དྲུག་ཉམས་པ་མཐོལ་ལོ་བཤགས༔ སྡོམ་པ་ཐུན་མོངས་རིགས་དྲུག་ཐུན་མིན་དྲུག༔ དམ་ཚིག་རྩ་ལྟུང་བཅུ་བཞི་སྦོམ་པོ་དགུའི༔ ཚངས་སྤྱོད་ཉེར་ ༼ བདེ་མཆོག་ལས་ ༽ གསུམ་ཕྲིན་ལས་བཅོ་ལྔ་དང་༔ དེ་ཡི་ཡན་ལག་བདུན་དང་ཉེས་པ་དྲུག༔ ཡན་ལག་ལྟུང་བ་བཞིར་བཅས་ཉི་ཤུ་དྲུག༔ དབང་བཞིའི་མཉམ་བཞག་རྗེས་སྤྱོད་བཟའ་དང་བསྲུང་༔ མི་འབྲལ་དམ་ཚིག་ཉམས་པ་མཐོལ་ལོ་བཤགས༔ མདོ་སྒྱུ་སེམས་ཀྱི་དམ་ཚིག་རྩ་བ་དང་༔ ཡན་ལག་ཉེར་ལྔ་མེད་དང་ཕྱལ་བ་དང་༔ གཅིག་པུ་དང་ནི་ལྷུན་གྱིས་གྲུབ་པ་ཡི༔ བསྲུང་དུ་ཡོད་དང་མེད་པ་ཐམས་ཅད་དང་༔ ལྷག་པའི་དམ་ཚིག་ཉི་ཤུ་རྩ་གཉིས་སོགས༔ བསྲུང་སྡོམ་སྤང་བྱའི་བསྡུས་པ་ཐམས་ཅད་གང་༔ འགལ་ཉམས་རལ་འདས་གྱུར་བ་ཇི་སྙེད་པ༔ མི་འཆབ་མི་སྦེད་སྙིང་ནས་མཐོལ་ཞིང་བཤགས༔ མི་བསྒྲིབ་ཚངས་པ་མཆོག་གི་དངོས་གྲུབ་སྩོལ༔ ཡི་གེ་བརྒྱ་པ་ཅི་ནུས་བཟླ། དམ་ཚིག་བཤགས་པའི་ལུང་བྱང་འདི། །སློབ་བུ་ཐུབ་བསྟན་སྨོན་ལམ་གྱིས། །ཡང་དང་ཡང་དུ་བསྐུལ་བ་ལས། །ག་གཱ་ཨ་བྷྱེས་སྨྲས་པའོ། །མངྒ་ལཾ། །