ཡོངས་སུ་རྣལ་འབྱོར་ཆེན་པོའི་གསོལ་འདེབས།

ཡོངས་སུ་རྣལ་འབྱོར་ཆེན་པོའི་གསོལ་འདེབས་སྨོན་ལམ་རྡོ་རྗེའི་རྒྱ་ཅན་བཞུགས༔

ཨེ་མ་ཧོ༔ རྣལ་འབྱོར་མ་ཧཱ་ཡོ་གའི་བུམ་དབང་ཐོབ༔ ཕྱག་རྒྱ་སྟོང་ཆེན་སྒྱུ་མ་གཅིག་སྤྲོས་སུ༔ གཡོ་ཐོབ་གོམས་བརྟན་མཐར་ཕྱིན་དམ་རྒྱའི་ཟིན༔ གསང་དབང་ཚོགས་ཆེན་ལམ་ལ་འཇུག་ནུས་ཤོག༔ ཡེ་གནས་རྡོ་རྗེའི་ལུས་ཀྱི་དཀྱིལ་འཁོར་དུ༔ སྤྲུལ་སྐུ་ལམ་དུ་སྣང་བ་རྩའི་གཞལ་ཡས༔ ལོངས་སྐུ་ལམ་དུ་སྣང་བ་དྭངས་མའི་རླུང་༔ ཆོས་སྐུ་ལམ་དུ་སྣང་བ་ཐིག་ལེའི་སྤྲིན༔ གཞི་ལ་རྫོགས་པའི་ཕྱག་རྒྱ་ ༼ རྩ་ཐིག་རླུང་གསུམ་གྱི་རང་བཞིན་སངས་རྒྱས་སྐུ་གསུམ་དུ་སངས་རྒྱས་པ་ནི་ལྷ་སྐུ་ཕྱག་རྒྱ་ཆེན་པོ། །ཆོས་ཉིད་ཀྱི་དགོངས་དོན་རང་ལ་རང་བརྡའ་སྤྲོད་པ་གསུང་ཆོས་རྒྱ། ཆོས་ཀུན་ཡེ་ཤེས་ལྔ་ལས་འདའ་ཉམས་མེད་པ་ཐུགས་དམ་རྒྱ། གཞི་ཉིད་འགགས་མེད་སྣ་ཚོགས་སུ་སྣང་བའི་ཕྲིན་ལས་ལས་རྒྱའོ། །༽རྣམ་པ་བཞིར༔ ལམ་དུ་རྣལ་འབྱོར་ཕྱག་རྒྱ་ ༼ ཀུན་ཏུ་བཟང་པོ་བསྒོམ་པ་དང་རྩ་ཁམས་རིགས་ལྔ་བསྒོམ་པ་སྐུ་ཕྱག་ཆེན། ཡི་གེ་བསྒོམ་པ་དང་རྡོར་བཟླས་བྱེད་པ་གསུང་ཆོས་རྒྱ། སྣ་ཚོགས་རྡོ་རྗེའི་རིམ་པ་བསྒོམ་པ་ཐུགས་དམ་རྒྱ། ཨ་ཧཾ་འབར་འཛག་ལས་འོད་ཟེར་སྤྲོ་བསྡུས་དོན་གཉིས་མཛད་པ་དང་། རྩ་ཁམས་རྒྱལ་བ་མཆོད་པར་བསམ་པ་ལས་རྒྱ་དང་འཁྲུལ་འཁོར་བྱེད་པ་བཅའ་བ་ལས་རྒྱའོ། ། ༽ རྣམ་པ་བཞི༔ འབྲས་བུ་བྲལ་ཐོབ་ཕྱག་རྒྱ་ ༼ འབྲས་ཆོས་སྐུ་ལྔ་མངོན་དུ་གྱུར་པ་རྒྱལ་བ་ཞི་ཁྲོ་སྟོན་འཁོར་ཡོངས་རྫོགས་སྐུ་ཕྱག་རྒྱ། སྐུ་ལྔའི་འཁོར་ལ་གསུང་ལྔའི་ཆོས་བསྟན་པ་གསུང་ཆོས་རྒྱ། སྟོན་འཁོར་གྱི་དགོངས་པ་ཡེ་ཤེས་ལྔ་མངོན་དུ་མཛད་པ་ཐུགས་དམ་རྒྱ། ཆོས་སྐུའི་ངང་ལས་ལོངས་སྤྲུལ་གྱི་འོད་ཟེར་འཕྲོས་ནས་གདུལ་བྱའི་དོན་བྱེད་པ་འཕྲོ་འདུ་ཕྲིན་ལས་ཀྱི་ཕྱག་རྒྱའོ། །༽ རྣམ་པ་བཞི༔ མཚམས་སྦྱོར་ཚོགས་ཆེན་པོ་རུ་ལྷུན་གྲུབ་ཤོག༔ སྲོག་གིས་རྩ་ལམ་བྱང་ནས་སྐྱོན་མདུད་གྲོལ༔ གསལ་བའི་ལྷན་ཅིག་སྐྱེས་པ་དྲུང་དུ་ཁུག༔ རྩོལ་པའི་སྟེང་འགྲོའི་དབབས་ལྡོག་དགྲམ་ལ་བཟླས༔ བདེ་སྟོང་དཔེ་ཡི་ཡེ་ཤེས་མངོན་གྱུར་ཤོག༔ ༼ ཡབ་ཡུམ་ལྷར་མཁའ་གསང་རྡོ་རྗེ་པདྨ་སྦྱོར་ཐབས་ཆོས་སུ། ༽ཁྱད་པར་འདུ་ཤེས་གསུམ་གྱིས་སད་བྱས་པས༔ ཤེས་རབ་དབང་མཆོག་བདེ་ཆེན་ཙནྜ་ལི༔ ཉེ་རེག་དགའ་མའི་སྟོང་བཞིའི་ལེགས་དྲངས་པའི༔ རང་བཞིན་ལྷན་ཅིག་སྐྱེས་པ་མངོན་གྱུར་ཤོག༔ རིམ་ལྔའི་ ༼ ཛ་ལནྡ་ར་སྣ་ཚོགས་རྡོ་རྗེ་ནོར་བུ་དགང་བ་བྱིན་གྱི་བརླབ་པ། བསམ་གྱིས་མི་ཁྱབ་པའི་རིམ་པ་སྟེ། ༽ལམ་གྱི་རིགས་ལྔའི་ ༼ འཁོར་ལོ་རྡོ་རྗེ་རིན་ཆེན་པདྨ་རལ་གྲིའི། ༽ ལམ་འབྲས་བུ༔ གོ་ཕྱེ་གོམས་ ༼ སྤྱིར་རིག་པ་སྤྱི་བླུགས་མཐོང་བ་རྗེས་འཇོག་གཉིས་ལས་དང་པོ། ༽ རྗེས་མཐོང་བ་རྗེས་འཇོག་པ༔ ༼ བརྟན་ཐོབ་རིག་པ་སྤྱི་བླུགས་སུ་བཞག་གོ་འདིར་ནི་མཐོང་ལམ་གྱི་མཐོང་ཟིན་ཡང་ཡང་གོམ་པའོ། ༽ བཞི་པའི་རང་ལམ་ཉི་ཟླ་མིག་འཁྲུལ་འགྲོའི༔ ཡན་ལག་བརྒྱད་ ༼ འཕགས་ལམ་ ༽ ལྡན་མཐའ་རུ་ཕྱིན་པར་ཤོག༔ རྩ་ཡི་དྭངས་མའི་ལྷན་སྐྱེས་ཕྱེད་བཅིང་གིས༔ ཟིན་པའི་མན་ངག་མི་སྲིད་སྲིད་པ་ཅན༔ ཅིག་ཆར་ཐོད་རྒལ་འཆིང་གནས་གཅུད་བཟུང་བས༔ ལམ་བསྟན་རྡོ་རྗེའི་རྦ་རླབས་ཚར་ཕྱིན་ཤོག༔ ལྷ་ཡི་དཔག་བསམ་འབྲས་ཆོས་ཡལ་གའི་དུད༔ གཅུད་པའི་དེམ་གྱིས་བུམ་སྐུ་རྗེན་ལ་ཕྱུང་༔ མཉན་པའི་སྒྲ་ཡི་མངོན་ཤེས་ཚངས་དབྱངས་འདྲེན༔ སྣོམ་པའི་ཐུགས་ཀྱི་གསང་ལ་དྲུང་འཇུག་ཤོག༔ ༼ ཁུང་སེང་ལམ་གཉིས་གབ་ནས་ཡོད་ ༽ འཁོར་འདས་དབྱིངས་གཅིག་ཀུན་ཏུ་བཟང་མོ་ལ༔ ཡེ་ཤེས་འགགས་མེད་བདེ་ཆེན་ཀུན་ཏུ་བཟང་༔ མཉམ་སྦྱོར་རྣལ་མ་འབྲས་བུ་དཀྱིལ་འཁོར་གསུམ༔ ཤེས་རབ་དབང་པོའི་མཐོང་བ་མཐར་ཕྱིན་ཤོག༔ སོ་སོ་རང་རིག་ཡེ་ཤེས་སྤྱོད་ཡུལ་དུ༔ སངས་རྒྱས་རྣམས་ཀྱི་ཐམས་ཅད་མཁྱེན་པ་མཆོག༔ ཇི་བཞིན་པ་ལ་དེ་བཞིན་ལྷུན་གྲུབ་ནས༔ ལམ་གྱི་བསྟི་གནས་གཡང་ལ་མི་ཐོགས་ཤོག༔ འབྲས་བུ་ཟུང་འཇུག་ཡི་གེའི་འཁོར་ལོ་རུ༔ བསྟན་པ་མཐར་ཕྱིན་ངེས་པ་ལྔ་ལྡན་གྱིས༔ མངའ་དབང་རྫོགས་པའི་ཀུན་ཏུ་བཟང་པོ་ཉིད༔ བར་དོ་ལོངས་སྤྱོད་རྫོགས་པར་སངས་རྒྱས་ཤོག༔ མཚམས་སྦྱར་དུས་དང་བསྟུན་པའི་གྲོགས་མཆོག་ལ༔ འཛོལ་བ་མེད་པས་བརྟུལ་ཞུགས་ཆེན་པོ་ཡི༔ བོག་འབྱིན་མཐར་དབྱུང་འཕང་ཀྱང་མི་དམའ་བའི༔ ༼ སྟོང་ཉིད་ཉི་ཤུ་དང་འཁྲུལ་འཁོར་རྩ་བ་ཉི་ཤུའོ། །༽ ཐབས་ཤེས་རྣམ་པ་ཉི་ཤུའི་བྱང་ཆུབ་ཤོག༔ འདའ་ཀ་གསུམ་གྱི་ཐབས་ལ་མཁས་པ་ཡི༔ རྟོག་པའི་ཕྲ་ལ་སྟོང་ཆེན་བཏབས་བྱས་ཏེ༔ ཐ་མར་མི་གནས་དབུགས་ཆེན་འབྱིན་པ་ནི༔ ཡོངས་སུ་རྣལ་འབྱོར་ཆེན་པོ་མཐུའི་གྲུབ་ཤོག༔ མདོར་ན་མ་དག་རྩལ་འཕྲོས་རྩ་ཐིག་རླུང་༔ དག་པ་དོན་གྱི་དྷུ་ཏིར་སྡུད་པ་ཡི༔ འདུན་སེམས་རིགས་འབྱེད་དབུགས་འབྱིན་ལུང་ཐོབ་པ༔ རྩལ་ཆེན་རྫོགས་པས་འགྱུར་བདེའང་མཐར་བྱེད་ཤོག༔ གལ་མདོ་ངེས་པ་ལྷག་དང་བརྟུལ་ཞུགས་ཀྱི༔ སྒྲུབ་པའི་དམ་ཚིག་མ་ཉམས་ཚུལ་བཞིན་པས༔ གསང་སྔགས་འབྲས་བུ་དོན་ཡོད་གྲུབ་ནས་ནི༔ ཡོངས་སུ་རྣལ་འབྱོར་ཆེན་པོ་མཐར་ཕྱིན་ཤོག༔ ཆོས་སྐུ་རྡོ་རྗེ་འཆང་ཆེན་ལ་གསོལ་བ་འདེབས༔ མ་ཧཱ་ཨ་ནུ་ཡོ་ག་སིདྡྷི་ཧཱུྃ༔ ལོངས་སྐུ་རྒྱལ་བ་ཞི་ཁྲོ་ལ་གསོལ་བ་འདེབས༔ མ་ཧཱ་ཨ་ནུ་ཡོ་ག་སིདྡྷི་ཧཱུྃ༔ སྤྲུལ་སྐུ་པདྨ་ཐོད་ཕྲེང་ལ་གསོལ་བ་འདེབས༔ མ་ཧཱ་ཨ་ནུ་ཡོ་ག་སིདྡྷི་ཧཱུྃ༔ རྡོ་རྗེ་བདུད་འཇོམས་གླིང་པ་ལ་གསོལ་བ་འདེབས༔ མ་ཧཱ་ཨ་ནུ་ཡོ་ག་སིདྡྷི་ཧཱུྃ༔ དཀྱིལ་འཁོར་དབང་ཕྱུག་བཟང་མོ་ལ་གསོལ་བ་འདེབས༔ མ་ཧཱ་ཨ་ནུ་ཡོ་ག་སིདྡྷི་ཧཱུྃ༔ རྡོ་རྗེ་རྣལ་འབྱོར་རིགས་ལྔ་ལ་གསོལ་བ་འདེབས༔ མ་ཧཱ་ཨ་ནུ་ཡོ་ག་སིདྡྷི་ཧཱུྃ༔ ཡུམ་ཆེན་དབང་ཕྱུག་རིགས་ལྔ་ལ་གསོལ་བ་འདེབས༔ མ་ཧཱ་ཨ་ནུ་ཡོ་ག་སིདྡྷི་ཧཱུྃ༔ དབྱིངས་ཀྱི་ཡུམ་ཆེན་སྡེ་ལྔ་ལ་གསོལ་བ་འདེབས༔ མ་ཧཱ་ཨ་ནུ་ཡོ་ག་སིདྡྷི་ཧཱུྃ༔ ཤེས་རབ་ཐབས་རྒྱས་ཁྲོ་ཚོགས་ལ་གསོལ་བ་འདེབས༔ མ་ཧཱ་ཨ་ནུ་ཡོ་ག་སིདྡྷི་ཧཱུྃ༔ དཀྱིལ་འཁོར་གསུམ་གྱི་ལྷ་ཚོགས་ལ་གསོལ་བ་འདེབས༔ མ་ཧཱ་ཨ་ནུ་ཡོ་ག་སིདྡྷི་ཧཱུྃ༔ དཔལ་ལྡན་རྩ་བའི་བླ་མ་ལ་གསོལ་བ་འདེབས༔ མ་ཧཱ་ཨ་ནུ་ཡོ་ག་སིདྡྷི་ཧཱུྃ༔ འཁོར་འདས་རྒྱལ་བའི་དཀྱིལ་འཁོར་ལ་གསོལ་བ་འདེབས༔ མ་ཧཱ་ཨ་ནུ་ཡོ་ག་སིདྡྷི་ཧཱུྃ༔ རྩ་དང་ཡི་གེ་ཐིག་ལེ་རླུང་བཞི་ཡེ༔ འགྲོའི་ཐིམ་སྐུ་གསུང་ཐུགས་དང་ཡེ་ཤེས་ལྔ༔ སྐུ་ལྔ་ལྷུན་གྲུབ་རྡོ་རྗེ་འཆང་ཆེན་པོ༔ ད་ལྟ་ཉིད་དུ་ཐོབ་པར་བྱིན་གྱིས་རློབས༔ སྨོན་ལམ་བཏབས་པ་ཐམས་ཅད་འགྲུབ་པ་ཤོག༔ ༼ ལྷག་པའི་དོན་དམ་ ༽ རང་བཞིན་རྣམ་དག་སངས་རྒྱས་བདེན་སྟོབས་དང་༔ རྟེན་འབྲེལ་ ༼ ལྷག་པའི་ཀུན་རྫོབ་ ༽ བསླུ་མེད་སངས་རྒྱས་རྫུ་འཕྲུལ་དང་༔ སྐྱབས་གནས་བསླུ་མེད་བདེན་པས་འགྲུབ་འགྱུར་ཅིག༔ ཅེས་ཀྱང་རྨི་ལམ་དུ་བདུད་འཇོམས་རྡོ་རྗེའི་གནང་བས་ཚིག་རྐང་འགའ་བརྗེད་འགའ་ཞིག་གོང་འོག་བསྣོལ་སོང་ཡང་བཏང་སྙོམས་སུ་གང་དྲན་བྲིས་པ་ཐོ་རངས་ཀྱི་ཐུན་ལ་ངལ་བ་བགྱིས་སོ། །འདི་ཚར་གཅིག་བཏོན་ན་ལུང་ཆེན་ནང་གི་མདོ་བདུན་གྱི་ཚིག་ལ་རྣལ་འབྱོར་དུ་བྱས་པའོ། ། དགེའོ། །