འོད་གསལ་ཐོད་རྒལ་ཆེན་པོའི་སྨོན་ལམ།
འོད་གསལ་ཐོད་རྒལ་ཆེན་པོའི་སྨོན་ལམ་ཟང་ཐལ་རང་གྲོལ་བཞུགས་སོ༔
ཨེ་མ་ཧོ༔ ཐོག་མ་མེད་ནས་བཤེས་ཆེན་མ་འདྲེས་མགོན༔ པདྨའི་སྦྲང་རྩི་ཟང་ཐལ་རང་གྲོལ་བ༔ འཁོར་འདས་མཁར་སྦྲུམ་ཐིག་ལེ་ཉག་གཅིག་ཞལ༔ གསལ་ཁྱབ་རང་བཞིན་གཞི་རྒྱུད་མངོན་གྱུར་ཤོག༔ ལྷུན་གྱིས་གྲུབ་པ་རང་རྫོགས་འབྲས་བུ་ནི༔ དཔེ་དོན་རྟགས་ཀྱི་ངེས་པས་རང་མཚོན་ནས༔ ཅི་བཞིན་སྤྱི་བླུགས་ཚངས་པ་དོན་དམ་པ༔ རབ་ཏུ་སྤྲོས་མེད་དབང་མཆོག་ཐོབ་པར་ཤོག༔ ངོ་བོ་སྟོང་ཉིད་མི་འགྱུར་བདེ་བ་ཆེ༔ རྣམ་ཀུན་མཆོག་ལྡན་སྦས་མས་མཁའ་ལ་རོལ༔ ཞལ་ཕྱག་མཚན་བྲལ་ཁྱབ་བརྡལ་ཡེ་ཡོད་པ༔ རང་བཞིན་གཞི་རྒྱུད་ངོ་བོ་མངོན་གྱུར་ཤོག༔ གསང་བ་སྲོག་བཅས་འདུས་པའི་གཞལ་ཡས་དང་༔ དོན་མཁར་བྷནྡྷ་འབར་བའི་ཕོ་བྲང་དུ༔ ངོ་བོ་གདངས་དང་ཟེར་གྱི་གྲངས་མང་བའི༔ འབྲས་ཆོས་གཞིར་གནས་བཅུད་ཀྱི་དོན་རྟོགས་ཤོག༔ གཞི་ལ་ངེས་པ་ཐོབ་པའི་ལྟ་བའི་གནད༔ རང་བཞག་འཕོ་འགྱུར་མེད་པའི་འཆིང་བ་བཅུ༔ གནད་ཆེན་དྲུག་གི་ཁྱད་པར་ཟིན་པ་ཡི༔ ཅོག་བཞག་རྣལ་འབྱོར་ཆེན་པོ་འབྱོང་བར་ཤོག༔ གཉུག་མའི་སྒོ་གསུམ་སྐུ་གསུམ་གནད་དུ་གཅུན༔ བདེ་ཆེན་ཡེ་ཤེས་གསུམ་ལ་འབྱམས་སུ་ཀླས༔ གཟུང་འཛིན་རང་འགགས་ཡེ་ཤེས་རྗེན་ཆེར་གྱི༔ ཤེས་རབ་མ་ཡིན་དབང་པོའི་མཐོང་བར་ཤོག༔ ཆུ་བུར་རྡོ་རྗེར་བརྒལ་བས་ཁྱད་པར་ཆོས༔ སྣང་བའི་ཡེ་ཤེས་ལམ་གྱི་མུ་ཚོད་དང་༔ བསྐལ་མཉམ་ཡོན་ཏན་ཁྱད་པར་གྱིས་དཔག་པས༔ འདུས་མ་བྱས་པའི་གསང་མཛོད་བརྟོལ་ནུས་ཤོག༔ ཕྱི་རུ་སྣང་བས་འོད་གསལ་སྐུར་སྨིན་རྫོགས༔ ནང་དུ་ཉེར་ཐོབ་མཆེད་པས་སྐར་མདའ་ཅན༔ ཟད་པ་གཉིས་ཀྱི་ཚུལ་གྱི་མཐར་ཐུག་ནས༔ འོད་གསལ་ལྷུན་གྲུབ་རིག་འཛིན་ཉེར་ཐོབ་ཤོག༔ དེ་ཡི་ཤེས་སྒྲིབ་ཕྲ་བའང་ལྷག་མེད་དུ༔ རྡོ་རྗེའི་ཏིང་འཛིན་འབྲས་དབང་མཚམས་སྦྱོར་ནས༔ ཐུན་མོང་མ་ཡིན་གཞོན་ནུ་བུམ་སྐུར་བཟླུམ༔ ཡེ་ཤེས་ཆོས་སྐུར་ཡང་དག་སངས་རྒྱས་ཤོག༔ ངོ་བོ་ཉིད་ཀྱི་དབྱིངས་གྲོལ་སྐུ་གསུམ་ལས༔ འདོད་འཇོའི་རྩོལ་བ་མེད་པའི་རང་བསྲེལ་ ༼ སྤྲུལ་སྐུ་ལོངས་སྐུ། ༽ གཉིས༔ ཐུན་མོང་ཐུན་མིན་མཛད་པས་སྒོ་ཕྱེས་ནས༔ འཁོར་བ་དོང་སྤྲུགས་དཔལ་དུ་འབར་གྱུར་ཅིག༔ དབྱིངས་ཀྱི་ཡེ་ཤེས་ཕྱོགས་སུ་རིས་མེད་པས༔ ཐུགས་ལྔའི་ཇི་ལྟ་ཇི་སྙེད་བྱེ་བྲག་ཅན༔ རྣམ་པ་ཀུན་ཏུ་ལྷུན་གྱིས་གྲུབ་པ་ཡི༔ སངས་རྒྱས་བཅོམ་ལྡན་བསམ་མི་ཁྱབ་ཐོབ་ཤོག༔ གལ་ཏེ་རྣལ་འབྱོར་རྩལ་ཆེན་མ་རྫོགས་ན༔ སྐུ་དང་ཡེ་ཤེས་འཇུག་པའི་འོད་ཐག་གི༔ ཐུགས་རྗེའི་ལྕགས་ཀྱུའི་མ་བསྒོམ་སངས་རྒྱས་ལམ༔ ལྷག་པས་འདའ་ཀའི་ཤེས་རབ་མཐར་རྒྱས་ཤོག༔ རྣམ་ཀུན་གྲོགས་ཀྱི་སྤྱོད་པ་ཉི་ཤུ་དང་༔ སྐུ་གསུང་ཐུགས་དང་ཆེན་བརྒྱད་ཕྲ་མོར་བཅས༔ ཉམས་པ་མེད་པའི་ཡང་དག་མངོན་རྫོགས་པས༔ འཇའ་ལུས་འཕོ་བ་ཆེན་པོ་འགྲུབ་པར་ཤོག༔ རྩ་བརྒྱུད་བླ་མ་རྣམས་ཀྱི་ཐུགས་རྗེ་དང་༔ སྐྱབས་གནས་དོན་གྱི་རིག་སྐུའི་བྱིན་བརླབས་དང་༔ རྒྱུ་འབྲས་དཀོན་མཆོག་སྐུ་གསུམ་ཆོས་ཉིད་དང་༔ ཆོས་ཅན་བསླུ་མེད་མཐུ་ཡི་འགྲུབ་གྱུར་ཅིག༔ གྲུབ་ནས་མཁྱེན་བརྩེ་རྡོ་རྗེ་ལྟ་བུ་ལུས༔ འགྲོ་བའི་དབུལ་བ་མཐའ་དག་མྱུར་བསལ་ཏེ༔ ནང་དབྱིངས་གདོད་མའི་རྒྱལ་པོར་དབུགས་འབྱིན་པ༔ བྱང་ཆུབ་སེམས་ཀྱིབདེན་པས་འགྲུབ་གྱུར་ཅིག༔ དེང་སང་རྫོགས་ཆེན་བསྟན་པའི་ཉི་མ་ཤར༔ ཁོ་བོ་ཕྲན་ཡང་སྐལ་པ་བཟང་གྱུར་པས༔ དམ་ལྡན་གཞན་ལ་ཕན་པའི་བློ་གྲོས་ཀྱིས༔ ཀུན་བཟང་རྩལ་ལས་རྣམ་འཕྲུལ་ཤེས་རབ་དང་༔ རྡོ་རྗེ་བླ་མའི་མིག་ལྡོང་ཕྱེས་པ་ཡི༔ ཐོད་རྒལ་སྨོན་ལམ་ཟང་ཐལ་རང་གྲོལ་བ༔ བྱས་པའི་དགེ་བས་ནམ་མཁའི་མཐའ་ཡས་པའི༔ འགྲོ་རྣམས་ཀུན་ཏུ་བཟང་པོའི་གནས་ཐོབ་ཤོག༔ ཅེས་ཀྱང་འཇིགས་མེད་ནམ་མཁའི་རྡོ་རྗེ་ནས་བྲིས་པའོ། །མངྒ་ལཾ། །