ན་མོ་གུ་རུ། གཞི་འབྲས་དབྱེར་མེད།

ན་མོ་གུ་རུ། གཞི་འབྲས་དབྱེར་མེད་ཨེ་ཝྃ་ཟུང་འཇུག་སྐུ། །མངོན་གྱུར་ཐབས་ཀྱི་ཨེ་ཝྃ་ཟུང་འཇུག་ལམ། །སྟོན་བྱེད་ཕྱག་རྒྱའི་ཨེ་ཝྃ་ཟུང་འཇུག་ཏུ། །སྣང་མཛད་བདུད་འཇོམས་རྡོ་རྗེའི་ཤིས་པ་སྩོལ། ། དེ་ལ་སྔོན་བྱུང་དུས་སུ་སངས་རྒྱས་སྟོང་གི་འདྲེན་སྟོན་དུ་གྱུར་བ་རྣལ་འབྱོར་དབང་ཕྱུགས་ནུས་ལྡན་རྡོ་རྗེ་ཉིད་ཀྱི། འཇིག་རྟེན་དུ་སྒྲོན་མ་སྟོང་རྣམ་པར་བཀོད་པའི་དུས་སྐབས་རྣམས་སུ་འགྲོ་འདྲེན་གྱི་སྤྲུལ་བ་བརྒྱ་ཕྲག་རེ་སྟོན་ཅིང་། མཐར་ཐུག་སངས་རྒྱས་མོས་པ་སྣང་མཛད་ཆེན་པོར་གྱུར་ནས་འཁོར་བ་སྟོང་པའི་ཕྲིན་ལས་མཛད་པ་ལས། ཁྱད་པར་དུ་དངོས་ཅག་གི་སྟོན་པའི་བསྟན་པ་འདི་ལ། ཤཱ་རིའི་བུ། ཧཱུྃ་ཆེན་ཀཱ་ར། ཁྱེའུ་ཆུང་ལོ་ཙ། དེ་རྗེས་སེ་ཕུང་ཡཱ་མིའི་བཀའ་བསྒོ་ལོག་པའི་ཁ་གནོན་དུ་པདྨའི་དངོས་སློབ་སངས་རྒྱས་ཡེ་ཤེས། ནམ་མཁའི་སྙིང་པོ། གནུབ་ཡོན་ཏན་རྒྱ་མཚོ་སོགས་གྲུབ་པ་ཐོབ་པ་བཅོ་བརྒྱད་དང་། མཁས་ཚུལ་དགུ་དང་གྲུབ་ཚུལ་དྲུག་གི་ཡོན་ཏན་གྱིས་མངོན་པར་མཐོ་བའི་གསེར་ཕྲེང་བར་མ་ཆད་པ། སོ་ཟུར་གནུབས་གསུམ་སྔགས་ཀྱི་བབས་སོ་གསུངས་ལྟར་ལས་འགྲོ་འདུལ་སྤྲུལ་པའི་རྣམ་རོལ་དུ་མ་འབྱོན་པ་གྲུབ་དབང་ཆེན་པོ་རྩོད་པ་མེད་པའི་མཆོག་གར་དབང་བདུད་འཇོམས་གླིང་པ་ཞེས་མཁས་གྲུབ་ཀྱི་རྣམ་པར་ཐར་བ་བསམ་གྱིས་མི་ཁྱབ་ཅིང་། ཆེ་བ་དགུ་ལྡན་གྱི་གཏེར་ཆེན་ཆོས་ཀྱི་རྒྱལ་པོ། འབྲེལ་ཚད་དོན་ལྡན་གྱི་ཕྲིན་ལས། དངོས་ཀྱི་སློབ་མ་འཇལ་ལུས་ཆེན་པོ་བཅུ་གསུམ། འབྲིང་བ་ལྔ་བརྒྱ། ཐ་ན་ཞབས་འདེགས་པ་དང་གསུངས་ཐོས། ཙམ་ལའང་འཆི་ཁ་བླ་མའི་སྣང་བ་ཤར་ནས་དྲོད་རྟགས་མེད་པ་ནི་སྲིད་མཐའ་མ་ཁེག་ཙམ་དུ་ཐེ་ཚོམ་གྱི་གནས་སུ་གྱུར་བ། གང་གི་རིགས་ཀྱི་མྱུ་གུ་འཛིན་པ་ཕྱི་ལྟར་གནས་བརྟན་བཅུ་དུག ནང་ལྟར་སེམས་དཔའ་ཡབ་ཡུམ་བཅུ་དྲུག གསང་བ་ལྟར་སྒྲུབ་སྡེ་ཡབ་ཡུམ། ཡང་གསང་ལྟར་སྙིང་རྗེ་དང་དགའ་ཆེན་བཅུ་དྲུག མཆོག་གསང་ལྟར་སྟོང་ཉིད་བཅུ་དྲུག་གི་ཕྱག་རྒྱའི་རིགས་ཆུང་ལྕམ་དྲལ་བཅུ་དྲུག་ཏུ་སྤྲུལ་པའི་ནང་ཚན། ལྷ་ལྕམ་པདྨ་གསལ་ཞེས་སྤྲུལ་གཞིའི་མཚན་གྱིས་སྤྲུལ་བ་བརྒྱན་པའི་མཁའ་འགྲོ་པདྨ་ཅན་གྱི་ལྷུམས་གྱི་གེ་སར་བཞད་པར། ཀཿཐོག་དམ་གཙང་བྱམས་གསུམ་གྱི་སློབ་བརྒྱུད། རིག་འཛིན་འཇམ་དཔལ་རྡོ་རྗེ་ཞེས་སྐུ་དགེ་འདུན་སྟོང་ལྷག་གི་གྲྭལ་ལས་མ་བསྐྱོད་པར། ཐུགས་མཉམ་པར་བཞག་པའི་དབང་འབྱོར་གྱི་སྟོབས་ལས་པདྨ་འོད་ནས་ཨོ་རྒྱན་གྱི་དབུ་ཞྭ་དང་། སྐྱུ་རུ་ར་རློན་པའི་ལོ་སྡོང་མེ་འབྲས་མ་ཉམས་པ་བསྣམས་ནས་བསྟན་པ་ཀུན་ཡིད་ཆེས་ཀྱིས་དབུགས་དབྱུང་སྦྱིན་པར་མཛད་པ་དེའི་གདུང་བརྒྱུད་གཉིས་པ། དབོན་སྤྲུལ་བསྟན་པའི་རྒྱལ་མཚན་གྱིས་ཨེ་ཝྃ་རོལ་བའི་དབང་འབྱོར་གྱིས་སྲས་སུ་བཀྲུན་པ་སྟེ་ཡབ་མེས་ཞང་ཉེ་གང་ཐད་ནས་མ་སྨད་པའི་མདོ་ཁམས་ཀུན་ན་རྩོད་མེད་མངོན་གསལ་གྱི་དམ་པ་འདི་ཡང་། སུས་ཀྱང་འགྲན་ཟླར་མི་བཟོད་པའི་ནུས་མཐུ་དང་ལྡན་པ། གསང་བདག་ཆེན་པོའི་རྣམ་སྤྲུལ་དུ་གཏེར་ཆེན་ཉིད་ཀྱི་མཚན་དོན་དུ་ཞུགས་པ་ནུས་ལྡན་རྡོ་རྗེར་བསྔགས་པའོ། །ལར་ཐོབ་ཡོད་མེད་སྨོས་ན། ངེད་རྒྱ་ལྕགས་བླ་རྒྱལ་པོའི་དབུ་མཆོད་ཀྱི་གསེར་ཁྲལ་འབུལ་ས། རེ་སྐོང་ཕུར་ཐོག་ཕར་ཚུར་ཉིས་སྟོང་གི་གཙུག་རྒྱན། ཟི་ལིང་ཆུ་འདུ་ཕུག སྟོད་རྒྱ་གར་གངས་སྒོ་ཚུན་ཆད་དུ་ཕྲིན་ལས་མཚན་སྙན་གྱི་དབྱར་རྔའི་ཕྱོགས་ཀྱི་འཁོར་ཡུག་ཁྱབ་པ་དང་། ཚ་བོ་དངོས་ཀྱི་ཐད་ནས་ཀྱང་། རག་ཁྲོམ་གྲྭ་དང་། གཞི་དགོན་གྲྭ་སུམ་བརྒྱ་ལྷག སྟག་རྩེ་གྲྭ་ཕྱེད་དང་ཉིས་བརྒྱའི་དབུར་བཞུགས་རྒྱུ་དང་འདིའི་ནུ་བོ་གཞི་དབོན་སྲས་ཉི་ཟླ་ཡབ་སྲས་ཡིན་པས་ན། དེ་ལྟར་ན་དེའི་ཕུ་བོ་འདིའང་གྲྭ་དེ་ལ་དབང་རྒྱུ་ཡིན་ཀྱང་། གྲུབ་ཐོབ་ཀྱི་མཛད་ཕྲིན་ལ། ཚུར་མཐོང་གི་རྣམ་བཞག་གིས་དཔོག་ཏུ་མ་ངེས་པའི། ས་མཐར་ལྷ་ལྡནདུ་ཕྱག་འཚལ་ནས་ཕེབས་མཐར། བླ་མའི་དངོས་སློབ་ཉག་སྤྲུལ་རིན་པོ་ཆེ་ཀུན་དགའ་སངས་རྒྱས་ཀྱི་རྒྱལ་ཚབ་ཏུ་དབང་བསྐུར་མཛད་པ་ལ། འཁུ་གཤོང་འཕྱས་འདོགས་སོགས་འགལ་གཞི་བཙུགས་ན། ངེད་རྒྱ་བོད་དགོན་སྡེ་ཀུན་ནས་རྩད་གཅོད་ཡོད་རྒྱུ་ཡིན་པ་དང་། གུས་བཀུར་དེང་ལེན་བྱེད་མི་ཀུན་ཀྱང་མི་བསླུ་ངེས་ཅན་ཞིག་གི་བླ་མ་ཡང་དག་ཡིན་ཚུལ་དེ་ལྟར་རོ། །ཆེད་བསྐུལ་དབང་བྱས་གཅམ་བུའི་ངོས་འཛིན་མིན། །དྲང་བོའི་གཏམ་འདི་མེ་ཏོག་པདྨ་བཞིན། །ཀུན་ཏུ་མཛེས་པའི་ལང་ཚོའི་སྒེགས་པར་འགྱུར། །བསྲེགས་བཅད་བརྡར་ཀྱང་རྣམ་དག་གསེར་སྦྱངས་བཞིན། །དེང་དུས་ཕྲ་མ་བསྔ་བཙན་བརྡོ་བ་དང་། །གཞན་འབྱོར་མི་བཟོད་འབྱུང་བོའི་བྱ་ཚོགས་ཀྱིས། །ཉིན་བྱེད་འོད་སྟོང་མིག་གིས་མི་བཟོད་པ། །བསམ་ཞིང་ལས་ངན་བྱིས་པའི་ངང་ཚུལ་ལགས། །བདག་ཀྱང་དེང་ཚེ་རབས་ཐམས་ཅད་དུ། །བྱང་ཆུབ་སེམས་ཀྱི་ལྗོན་ཤིང་རྒྱས་པ་ལ། །སྡང་ཞུགས་ངན་པའི་སྟ་རེའི་མ་སྨས་པར། །དོན་གཉིས་ལྷུན་གྲུབ་འབྲས་བཟང་གཡུར་ཟ་ཤོག །ཅེས་སྔ་སོར་ཨོ་རྒྱན་སྦས་ལུང་བསྒྲོད་དུས། རི་བོ་ཆེའི་འཕགས་ཞབས་ཀུན་དང་། མཁན་ཆུང་། བླ་མ་ལྷ་རྒྱས། ཀརྨ་བསམ་འཕེལ་རྣམ་རྒྱས་རྡོ་རྗེ་སོགས་ལ་ཆོས་ཀྱི་བདུད་རྩི་སྟོབས་ཅིང་། མགྲོན་གཉེར་ཨོ་རྒྱན་མགོན་པོ། ས་བྱམས་ཨོ་རྒྱན་སོགས་ལྕགས་ལས་རྣམས་དང་མཛའ་བཤེས་སུ་གྱུར་བ། ཕུ་བོ་དྲི་མེད་ཀྱི་ནུ་བོ། དཔལ་སྤྲུལ་ནམ་མཁའ་འཇིགས་མེད་རྡོ་རྗེ་ཞེས་པས། རྣམ་འདྲེན་བཞི་པ་ཆེན་པོ་ལྷུམས་ཞུག་གི་མཛད་པ་ལས་བྱུང་བ་སྟོབས་ཆེན་གཉིས་འཐུང་དབང་པོ་སུ་ཝརྞའི་ཁྲི་ལ་འཁོད་པའི་ཟླ༨ཚེས་༡༠ལ་སྤེལ་བའོ། །