བསྒྲང་ཕྲེང་བྱིན་རླབས།
ཕྱོགས་བཅུ་ན་བཞུགས་པའི་བཅོམ་ལྡན་འདས་ཞི་ཁྲོ་རབ་འབྱམས་རྒྱལ་བའི་དཀྱིལ་འཁོར་གྱི་ལྷ་ཚོགས་མ་ལུས་མི་ལུས་ལུས་པ་མེད་པ་བདག་ལ་དགོངས་སུ་གསོལ༔ ཇི་སྲིད་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་མི་གནས་པའི་མྱ་ངན་ལས་འདས་པའི་ས་ལ་མ་བཞག་གི་བར་དུ་རྒྱལ་བ་རྣམས་མྱ་ངན་ལས་མི་འདའ་བར་འགྲོ་ལ་ཕན་པའི་གང་འདུལ་གྱི་ཕྲིན་ལས་རྒྱ་ཆེན་པོ་མཛད་པར་ཐུགས་བསྐྱེད་ན༔ བསྒྲང་ཕྲེང་འདི་ཉིད་ལ་བརྟན་པར་བཞུགས་ན་བཟླས་བརྗོད་ཀྱི་སྐྱོན་ཐམས་ཅད་དག་པ་དང་༔ གང་བསྒྲང་བ་ཐམས་ཅད་བརྒྱ་སྟོང་ཁྲི་འབུམ་དུ་སྤེལ་བ་དང་༔ དམ་ཚིག་གི་ཕྱག་རྒྱ་ཆེན་པོའི་ལྷ་རང་དབང་མེད་པར་དགུགས་པ་ལ་སོགས་གསང་སྔགས་ཀྱི་བདེན་པ་མཆོག་དང་ཐུན་མོང་ཐམས་ཅད་འབད་མེད་ཡིད་བཞིན་འགྲུབ་པའི་ཕྲིན་ལས་དམ་པ་མཛད་དུ་གསོལ༔ ཨོཾ་སརྦ་ཏ་ཐ་ག་ཏ་རཏྣ་མ་ལྱ་སུ་པྲ་ཏིཥྛ་བཛྲ་ཡེ་སྭཱ་ཧཱ༔ ཞེས་བརྗོད་ལྷ་ཚོགས་རྟེན་ལ་དབབས། །འདི་ཡང་ཅི་མཛད་གཏོལ་བ་མེད་ཤེས་རབ་བློ་འཕེལ་ལ། །ཟེར་རྒྱུའི་ཐབས་མི་སྡུག་ཕྱིར་ག་གཱས་སྨྲས། །ད་ཕྱིན་རྟ་ཁ་མི་མཐེན་བཀྲ་ཤིས་ཤོག །ཡང་ཁཱ་ཧི་ལོགས་ནས་བཏགས་ན༔ ཨོཾ་ཨཱཿཧཱུྃ༔ རང་བྱུང་གདོད་ནས་རྣམ་པར་དག་པའི་སྨན༔ རྩ་བརྒྱད་ཡན་ལག་སྟོང་དུ་སྦྱར་བའི་བདུད༔ ཁམས་གསུམ་རྒྱུད་དྲུག་སྡུག་བསྔལ་ནད་འཇོམས་རྩི༔ རིགས་ལྔ་ཡེ་ཤེས་ལྔ་ཡི་རང་བཞིན་ཅན༔ རང་བྱུང་ཡེ་ཤེས་ལྔ་རྫོགས་གྲུབ་པའི་རྫས༔ ལྡན་པ་དྲུག་གི་སེམས་ཅན་སྒྲོལ་བའི་ཕྱིར༔ བཅོམ་ལྡན་རྒྱལ་བ་ཞི་ཁྲོའི་ལྷ་ལ་འབུལ༔ ཐུགས་རྗེའི་བརྩེར་དགོངས་དབང་དང་དངོས་གྲུབ་སྩོལ༔ ཨོཾ་ཨཱཿཧཱུྃ༔ མ་ཧཱ་སརྦ་པཉྩ་ཨ་མྲི་ཏ་ལ་ཁཱ་ཧི༔ ཧཱུྃ༔ ཀུན་བཟང་སྣང་མཐའ་པད་འབྱུང་གཏེར་སྟོན་བརྒྱད༔ ཕྲན་གཏེར་ཡང་གཏེར་བརྒྱུད་པའི་བླ་མ་དང་༔ གཞན་ཡང་བཀའ་གཏེར་བརྒྱུད་ལྡན་བླ་མ་ལ༔ སྨན་མཆོད་འབུལ་ལོ་དབང་དང་དངོས་གྲུབ་སྩོལ༔ ཨོཾ་ཨཱཿཧཱུྃ༔ སརྦ་པཉྩ་ཨ་མྲི་ཏ་ལ་ཁཱ་ཧི༔ རིགས་ལྔ་ཡབ་ཡུམ་སྲས་འཁོར་ཞི་དང་ཁྲོ༔ སླས་དང་ཕྱི་མོ་སྔོན་བརྟེན་སྟོབས་འབྲེལ་ལྷ༔ བསྟན་སྲུང་དམ་ཅན་རྒྱ་མཚོར་བཅས་པ་ལ༔ སྨན་མཆོད་འབུལ་ལོ་དབང་དང་དངོས་གྲུབ་སྩོལ༔ ཨོཾ་ཨཱཿཧཱུྃ༔ སརྦ་པཉྩ་ཨ་མྲི་ཏ་ལ་ཁཱ་ཧི༔ རྩ་བའི་བླ་མ་བརྒྱུད་གསུམ་ཆུ་བོ་འདུས༔ རྡོ་རྗེའི་མཆེད་ལྕམ་རང་བཞིན་བྱང་ཆུབ་སེམས༔ དཀྱིལ་འཁོར་རིགས་འདུས་དཀོན་མཆོག་ཀུན་དབང་ཕྱུག༔ སྨན་མཆོད་འབུལ་ལོ་དབང་དང་དངོས་གྲུབ་སྩོལ༔ ཨོཾ་ཨཱཿཧཱུྃ༔ སརྦ་པཉྩ་ཨ་མྲི་ཏ་ལ་ཁཱ་ཧི༔ དེ་ནས་བདུད་རྩི་མྱོང་བ་ནི༔ ཧཱུྃ༔ ཡེ་ནས་རྡོ་རྗེ་བཀོད་པའི་གྲོང་ཁྱེར་ལ༔ མ་རིག་བདུད་ཀྱིས་བསྐལ་བའི་དོན་དུ་བྱས༔ གཉིས་མེད་མཉམ་སྦྱོར་ཕྱག་རྒྱ་ཆེན་པོ་ཡིས༔ ད་ལྟ་ཉིད་དུ་གཞི་རྒྱུད་བྲལ་དག་ཤོག༔ ཨོཾ་མ་ཧཱ་བྷེ་ཥ་ཛེ་ཨ་མྲི་ཏ་ཀ་ཡ་ཝཀྐ་ཙིཏྟ་སརྦ་སིདྡྷི་ཕ་ལ་ཧོ༔ དེ་ནས་རཀྟ་ནི༔ རཾ༔ འཁོར་བའི་ཆགས་རྟོག་དབུ་མར་བསྣུབས་བའི་ཕྱིར༔ གུ་ཧྱ་དམར་ཆེན་ཤེས་རབ་སེང་གྷ་ལ༔ དག་པ་གཉིས་ལྡན་སྤྲིན་ཆེན་ལྡིང་བའི་ཟིལ༔ བཅོམ་ལྡནཞི་ཁྲོའི་ཐུགས་དམ་བསྐང་ཕྱིར་འབུལ༔ ཨོཾ་མ་ཧ་རཀྟ་ཁ་རཾ་ཁཱ་ཧི༔ རྒྱས་པར་སྤྲོ་ན༔ ཧཱུྃ༔ རྩ་བརྒྱུད་བླ་མ་ཡི་དམ་དཀྱིལ་འཁོར་ལྷ༔ ཁྱད་པར་རིགས་མཆོག་ཀུན་བཟང་ཧེ་རུ་ཀ༔ རིགས་ལྔ་བྱང་ཆུབ་ཆེ་དབང་ཞི་དང་ཁྲོ༔ སྒྲོན་དྲུག་གནས་གསུམ་མཁའ་འགྲོའི་ཚོགས་ལ་མཆོད༔ ཨོཾ་མ་ཧཱ་རཀྟ་༴ གཏོར་མ་ལ༔ ཧཱུྃ༔ གཞོང་བ་རྣམ་དག་ཆོས་ཀྱི་དབྱངས༼ དབྱིངས ༽༔ གཏོར་མ་ཡེ་ཤེས་ཕུང་པོར་འབར༔ རང་རྩལ་འཁོར་འདས་གཏོར་རྒྱན་སྤྲས༔ ཞི་ཁྲོའི་དཀྱིལ་འཁོར་ལྷ་ལ་མཆོད༔ ཨོཾ་མ་ཧཱ་བྷ་ལིང་ཏ་བཛྲ་ཁཱ་ཧི་ཁཱ་ཧི༔ ཞེས་བརྗོད་དོ༔ འདི་ཡང་པདྨ་མ་ཏིའི་ངོར། ག་གཱས་སོ། །