བརྒྱ་ཕྱག་བསྡུས་པ་ཐོས་པ་རང་གྲོལ།
ཡེ་ཤེས་སྒྱུ་འཕྲུལ་རོལ་བ་ལས༔ ཞི་ཁྲོ་རིགས་བརྒྱའི་བརྒྱ་ཕྱག་བསྡུས་པ་ཐོས་པ་རང་གྲོལ་ཞེས་བྱ་བ་བཞུགས་སོ༔
ཨེ་མ་ཧོ༔ ཡེ་ཤེས་དམིགས་དྲུག་ཐིག་ལེ་དྲུག་གི་ངང་༔ གཙུག་ཏོར་རྨད་བྱུང་རིག་ཆེན་བླ་ན་མེད༔ རིགས་དྲུག་རྣམ་དག་ཡེ་ཤེས་ཆེན་པོའི་སྐུ༔ བཅོམ་ལྡན་རིགས་མཆོག་ལྔ་ལ་ཕྱག་འཚལ་ལོ༔ དགའ་བ་བཅུ་དྲུག་བདེ་ཆེན་ལྷན་ཅིག་སྐྱེས༔ སྟོང་བ་བཅུ་དྲུག་དབྱིངས་དང་འདུ་འབྲལ་མེད༔ ཚོགས་ཡུལ་རྣམ་དག་སྲས་དང་སྤྲུལ་པའི་འཁོར༔ སེམས་དཔའ་ཡབ་ཡུམ་བརྒྱད་ལ་ཕྱག་འཚལ་ལོ༔ གཡང་ས་དྲུག་ལས་འགྲོ་ཀུན་བཟུང་བའི་ཕྱིར༔ ཉོན་མོངས་དྲུག་དག་ཕར་ཕྱིན་དྲུག་གི་སྐུ༔ གང་ལ་གང་འདུལ་ཐུགས་རྗེ་ཡེ་འབྲེལ་མགོན༔ བཅོམ་ལྡན་ཐུབ་པ་དྲུག་ལ་ཕྱག་འཚལ་ལོ༔ མཐོང་བསྒོམ་སྤངས་བྱ་མ་ལུས་གནས་དག་ཅིང་༔ རྣལ་ཐར་ཚད་མེད་ཟིལ་གནོན་ཆེན་པོའི་ངང་༔ ཁྲོ་བོའི་འདུ་འཕྲོད་རྡོ་རྗེ་ཕྲིན་ལས་དཔལ༔ མཐར་བྱེད་ཡབ་ཡུམ་བརྒྱད་ལ་ཕྱག་འཚལ་ལོ༔ ཧཱུྃ༔ རང་བཞིན་ལྷུན་གྲུབ་ཆེན་པོའི་ངོ་བོ་ཉིད༔ ཤེས་རབ་འོད་འབར་དུག་ལྔ་དབྱིངས་སུ་དག༔ རྡོ་རྗེ་ལོངས་སྤྱོད་མཛད་པའི་ཧེ་རུ་ཀ༔ ཁྲག་འཐུང་ཁྲོ་བོའི་ཚོགས་ལ་༴ མཚན་མཆོག་རྒྱན་དུ་ཤར་བའི་ཡེ་ཤེས་སྐུ༔ སྟོང་ཉིད་ཉི་ཤུས་མཚན་མ་སྣ་ཚོགས་འཇོམས༔ ཕྲ་ཕྱག་ཁྲོ་མོའི་ཚུལ་གྱིས་གར་མཛད་པའི་༔ སྲས་མོ་ཉི་ཤུའི་ཚོགས་ལ་༴ རྒྱལ་བྱེད་དཔལ་རྟགས་དབང་མཛད་དོན་དུ་མཚོན༔ ཕྱི་ནང་གསང་བའི་རྟེན་འབྲེལ་ཟུང་འཇུག་པས༔ འཁོར་ལོ་གསུམ་གྱི་གནས་ཡུལ་རྗེ་མོའི་ཚུལ༔ མཁའ་འགྲོ་ཉི་ཤུ་བརྒྱད་ལ་༴ ཕ་རོལ་ཕྱིན་བཅུ་ཁྲོ་བོའི་རང་རྟགས་མཚན༔ བདུད་དཔུང་བཅུ་འཇོམས་དཀྱིལ་འཁོར་ཀུན་གྱི་བདག༔ ཡེ་ཤེས་ཁྲོ་བོ་ཆེན་པོ་རྣམ་པ་བཅུ༔ ཡུམ་སྲས་འཁོར་དང་བཅས་ལ་༴ ཀུན་བཟང་ཐུབ་པ་དྲུག་གི་ཡེ་ཤེས་ལ༔ སྟོང་ཆེན་རྣམ་པ་བརྒྱད་ཀྱི་སྙོམས་འཇུག་པའི༔ གཟུགས་མེད་བསམ་གཏན་གནས་དག་རིགས་དྲུག་སྒྲོལ༔ འབར་མ་ཁྲོ་མོ་བརྒྱད་ལ་༴ དེ་ལྟར་ཞི་དང་ཁྲོ་བོའི་དཀྱིལ་འཁོར་ནི༔ བསམ་ཡས་ལྷུན་གྲུབ་ཆུ་ཟླ་ལྟ་བུའི་ཚུལ༔ ཤར་སྟོང་རང་བཞིན་རྟག་པ་རྒྱུན་གྱི་ངང་༔ རྒྱུན་ཆད་མེད་པས་འདུལ་ལ༴ རྣལ་འབྱོར་ཉམས་ཆགས་རྟོག་སྒྲིབ་ཡོངས་དག་ནས༔ སར་ཆུད་ས་ལ་གནས་དང་སར་སྨིན་པ༔ ས་མཐར་ཕྱིན་པའི་རིག་འཛིན་ཆེན་པོ་ནི༔ སངས་རྒྱས་ས་དྲུག་སྐད་ཅིག་གཅིག་རྫོགས་ཏེ༔ ཡེ་ཤེས་བླ་མ་ཚེ་འདིར་འགྲུབ་པར་ཤོག༔ ཅེས་ཀྱང་ག་ག་ཨ་བྷྱེས་སོ། །