ཀློང་བཤགས་བསྡུས་པ་མཐོང་བ་རང་གྲོལ།

ཡེ་ཤེ་སྒྱུ་འཕྲུལ་དྲྭ་བ་ལས༔ ཞི་ཁྲོའི་ཀློང་བཤགས་བསྡུས་པ་མཐོང་བ་རང་གྲོལ་ཞེས་བྱ་བ་བཞུགས་སོ༔

ཨ་ཨཱཿཧཱུྃ༔ སྣང་སྟོང་མཉམ་ཉིད་རང་བྱུང་ཡེ་ཤེས་ནི༔ ཡིད་དང་ཆོས་སུ་འཛིན་པས་གོལ་བ་ཡི༔ ཀུན་བཟང་ཡབ་ཡུམ་དགོངས་པ་མ་འཚལ་བ༔ དབྱིངས་ཡེ་འདུ་འབྲལ་མེད་པའི་ཀློང་དུ་བཤགས༔ མི་རྟོག་པ་ཡི་རང་བྱུང་ཡེ་ཤེས་ལྔ༔ ཕུང་ལྔ་ཁ་དོག་འཛིན་པས་གོལ་བ་ཡི༔ རིགས་ལྔ་ཡབ་ཡུམ་དགོངས་པ་མ་འཚལ་བ༔ ཐུགས་ལྔ་རྣམ་པར་དག་པའི་ཀློང་དུ་བཤགས༔ དེ་བཞིན་མཚན་མཆོག་དམ་པ་སུམ་ཅུ་གཉིས༔ ཚོགས་ཡུལ་རང་བཞིན་འཛིན་པས་གོལ་བ་ཡི༔ སེམས་དཔའ་ཡབ་ཡུམ་དགོངས་པ་མ་འཚལ་བ༔ རྩལ་སྣང་ཡེ་ཤེས་བཅུ་དྲུག་ངང་དུ་བཤགས༔ གཞི་ལམ་འབྲས་བུའི་ཕྲིན་ལས་ལྷུན་གྲུབ་པ༔ མུ་བཞི་སྐྱེ་བཞིར་འཛིན་པས་གོལ་བ་ཡི༔ སྒོ་བ་ཡབ་ཡུམ་དགོངས་པ་མ་འཚལ་བ༔ རྣམ་ཐར་ཚད་མེད་དག་པའི་ཀློང་དུ་བཤགས༔ ཡེ་ཤེས་དྲུག་གི་ཐུགས་རྗེ་འགགས་པ་མེད༔ ཉོན་མོངས་དྲུག་གི་འཛིན་པས་གོལ་བ་ཡི༔ ཐུབ་པ་དྲུག་གི་དགོངས་པ་མ་འཚལ་བ༔ ཕ་རོལ་ཕྱིན་པ་དྲུག་གི་ངང་དུ་བཤགས༔ ཡེ་ཤེས་རྒྱ་མཚོ་རྣམ་པ་ལྔ་བཅུ་པོ༔ སེམས་བྱུང་ལྔ་བཅུར་འཛིན་པས་གོལ་བ་ཡི༔ ཁྲོ་བོའི་ལྷ་ཚོགས་དགོངས་པ་མ་འཚལ་བ༔ རང་བཞིན་རྣམ་པ་ལྔ་བཅུའི་ཀློང་དུ་བཤགས༔ བདག་ནི་མ་རིག་བག་མེད་དབང་གྱུར་ཏེ༔ རང་གིས་རང་བཅིངས་མཐའ་མེད་འཁོར་བར་འཁྱམས༔ ད་ནི་རང་བཞིན་ལྟ་བ་མཇལ་བའི་ངང་༔ བཤགས་བྱ་བཤགས་བྱེད་གཉིས་མེད་ཀློང་དུ་བཤགས༔ ཨཱ༔ ཡེ་ནས་རང་བཞིན་སྐྱེ་བ་མེད་པ་ལ༔ སྐྱེ་འགགས་གཉིས་སུ་བལྟས་པ་མཐོལ་ལོ་བཤགས༔ སྣང་བའི་དངོས་པོ་དེ་བཞིན་མ་ཡིན་པར༔ གཞན་བཟུང་ལོག་པར་བལྟས་པ་མཐོལ་ལོ་བཤགས༔ བྱིང་ཆད་སྟོང་ཉིད་ཧད་པོར་མ་ཡིན་པར༔ འདུས་མ་བྱས་སུ་གོལ་བ་མཐོལ་ལོ་བཤགས༔ དུག་ལྔའི་དངོས་པོ་ཐུགས་འཕྲད་རང་གྲོལ་ལ༔ དགག་བཞག་གཉེན་པོར་འཚོལ་བ་༴ གཟུང་འཛིན་རྣམ་རྟོག་མཁྱེན་གཉིས་ཡེ་ཤེས་ལ༔ སྤང་ལེན་སྐྱོན་དུ་བལྟས་པ་མཐོལ་ལོ་བཤགས༔ མི་དགེའི་དངོས་པོ་ཕྱག་རྒྱ་ལྷུན་གྲུབ་ལ༔ དམ་ཚིག་དང་དུ་མ་ལོན་མཐོལ་ལོ་༴ མྱ་ངན་འདས་སུ་རེ་བ་ལྟ་བའི་སྐྱོན༔ རྩོལ་སྒྲུབ་ཐོབ་འདོད་གཉེར་བ་མཐོལ་ལོ་བཤགས༔ འཁོར་བ་ཡེ་ནས་ཆོས་སྐུར་གནས་པ་ལ༔ མ་རྟོགས་སྐྱོན་དུ་བལྟས་པ་མཐོལ་ལོ་བཤགས༔ མཐོ་དམན་ཕྱོགས་ལྷུང་མཉམ་ཉིད་ཡེ་ཤེས་ལ༔ སོ་སོར་རང་མ་རིག་པ་མཐོལ་ལོ་བཤགས༔ བསད་ན་སངས་རྒྱས་བསྲུང་ན་ངན་སོང་རྒྱུ༔ མ་རྟོགས་ཐོག་མ་བརྡེག་པ་མཐོལ་ལོ་བཤགས༔ བཤགས་ནས་སྐུ་གསུང་ཐུགས་ཡོན་ཕྲིན་ལས་ཀྱིས༔ དངོས་གྲུབ་དམ་པ་ཚེ་འདིར་སྩལ་དུ་གསོལ༔ ཅེས་ཀྱང་ག་གཱ་ཨ་བྷྱེས་སོ། །