དངོས་གྲུབ་བསྐུལ་བ།

དེ་ནས་དངོས་གྲུབ་བསྐུལ་བ་ནི༔

གཞུང་གི་ལྷག་མ་བསྐྱང་ནས་སུ༔ བྱིན་ཆེན་དབབས་ནས་ཐུགས་དམ་བསྐུལ༔ དེ་མཐར་འདི་ལྟར་གསོལ་བ་གདབས༔ ཧཱུྃ༔ རྒྱལ་བ་དགོངས་བརྒྱུད་རིག་འཛིན་བརྡ་བརྒྱུད་དང་༔ གང་ཟག་སྙན་བརྒྱུད་ཤོག་སེར་ཚིག་བརྒྱུད་ཀྱི༔ དཔལ་མགོན་བླ་མ་བརྒྱུད་ལྡན་ཐམས་ཅད་ཀྱིས༔ བདག་ལ་དབང་བསྐུར་བྱིན་གྱིས་བརླབ་ཏུ་གསོལ༔ རྒྱ་གར་རིག་འཛིན་དབང་པོ་མཆོག་བརྒྱད་དང་༔ གྲུབ་ཆེན་བརྒྱད་ཅུ་བོད་ཀྱི་གྲུབ་ཐོབ་རིགས༔ ས་བཀའ་དགེ་རྙིང་ཞི་བྱེད་མཛོད་འཆང་གིས༔ བདག་ལ་དབང་བསྐུར་བྱིན་གྱིས་བརླབ་ཏུ་གསོལ༔ ཉན་རང་བྱང་སེམས་ཀྲི་ཡོག་རྣལ་འབྱོར་དང་༔ བླ་མེད་གཞི་ལམ་འབྲས་བུའི་དཀྱིལ་འཁོར་སྒོ༔ གང་གང་རིག་ངེས་ས་ལམ་བརྟན་ཐོབ་པས༔ བདག་ལ་དབང་བསྐུར་བྱིན་གྱིས་བརླབ་ཏུ་གསོལ༔ གསང་སྔགས་རིགས་སྔགས་གཟུངས་སྔགས་ཕྱི་ནང་གིས༔ དབྱིབས་སྔགས་ཆོས་ཀྱིས་རྣམ་ཐར་སྒོ་གསུམ་ལས༔ འབྲས་བུ་བྱིན་རློབས་དབང་ཆེན་གྲུབ་པའི་ཚོགས༔ བདག་ལ་དབང་བསྐུར་བྱིན་གྱིས་བརླབ་ཏུ་གསོལ༔ ཆེན་པོ་རྣལ་འབྱོར་རྗེས་སུ་རྣལ་འབྱོར་དང་༔ ཤིན་ཏུ་རྣལ་འབྱོར་རྒྱུད་དང་སྒྲུབ་སྡེ་དང་༔ མན་ངག་དོན་གྱི་ལུང་གི་སྒོ་བཞིའི་ལྷས༔ བདག་ལ་དབང་བསྐུར་བྱིན་གྱིས་བརླབ་ཏུ་གསོལ༔ ཁྱད་པར་བསྒྲུབ་བརྟེན་ལས་ཀྱི་འབྲེལ་བ་ཡི༔ ཞི་བའི་ལྷ་ཚོགས་བཞི་བཅུ་རྩ་གཉིས་དང་༔ འབར་བ་ཁྲག་འཐུང་ལྔ་བཅུ་རྩ་བརྒྱད་ཀྱིས༔ བདག་ལ་དབང་བསྐུར་བྱིན་གྱིས་བརླབ་ཏུ་གསོལ༔ གནས་ཡུལ་ཕྱི་ནང་རྡོ་རྗེ་ཕུང་པོའི་གྲོང་༔ ཞིང་སྔགས་ལྷན་སྐྱེས་རིགས་ལྔའི་མཁའ་འགྲོ་མ༔ སྐུ་གསུམ་སྲས་བཅས་རྒྱལ་བ་ཐམས་ཅད་ཀྱིས༔ བདག་ལ་དབང་བསྐུར་བྱིན་གྱིས་བརླབ་ཏུ་གསོལ༔ ཁྱེད་རྣམས་ཐུགས་རྗེ་ཆེན་པོའི་མངའ་བདག་སྟེ༔ རྫུ་འཕྲུལ་མངོན་ཤེས་ཆགས་ཐོགས་བྲལ་བའི་ཕྱིར༔ གནད་བསྐུལ་རེ་ལྟོས་བདག་ལ་མཁྱེན་བརྩེའི་དགོངས༔ བདག་ལ་དབང་བསྐུར་བྱིན་གྱིས་བརླབ་ཏུ་གསོལ༔ རང་སེམས་འོད་གསལ་ལྷ་ཡི་ངོ་བོར་གྲོལ༔ རིགས་ཆེན་འབྱེད་པའི་རྣམ་སྨིན་ཆོས་སྐུ་རུ༔ ལྷག་མར་བཅས་ཀྱང་མྱང་འདས་དངོས་གྲུབ་དེའི༔ བདག་ལ་དབང་བསྐུར་བྱིན་གྱིས་བརླབ་ཏུ་གསོལ༔ རྐྱེན་སྨོན་སྟོབས་སམ་གཞན་བརྟེན་འཛོམ་པ་ཡི༔ རང་ལུས་འོད་གསལ་འཕོ་ཆེན་དྭངས་མ་རུ༔ ཚེ་ལ་དབང་ཐོབ་དབུགས་འབྱིན་དངོས་གྲུབ་དེའི༔ བདག་ལ་དབང་བསྐུར་བྱིན་གྱིས་བརླབ་ཏུ་གསོལ༔ ཕྱག་རྒྱ་ལྔ་ཡི་རྩལ་སྟོབས་ཡོངས་སུ་རྫོགས༔ ཆེ་འབྲིང་ཆུང་ངུའི་སྒོམ་སྤངས་རྣམ་གྲོལ་གྱི༔ རིམ་སྤག་ཕྱེད་སྤྲུལ་ལུང་ཆེན་དངོས་གྲུབ་ཀྱིས༔ བདག་ལ་དབང་བསྐུར་བྱིན་གྱིས་བརླབ་ཏུ་གསོལ༔ སྐུ་ལྔ་རྡོ་རྗེ་འཆང་གི་ཆ་ལུགས་ཀྱིས༔ མི་སློབ་ལམ་གནས་དགོངས་པའི་རྩལ་ཆེན་རྫོགས༔ སངས་རྒྱས་རྣམ་པ་གཉིས་པའི་དངོས་གྲུབ་དེའི༔ བདག་ལ་དབང་བསྐུར་བྱིན་གྱིས་བརླབ་ཏུ་གསོལ༔ དངོས་གྲུབ་དམ་པའི་དབུགས་དབྱུང་སྩལ་ནས་ཀྱང་༔ མགོན་པོ་ཁྱེད་ཀྱི་དགོངས་ཀློང་སྤངས་རྟོགས་ཀྱིས༔ དོན་གཉིས་ལྷུན་གྲུབ་ཡོན་ཏན་དྲུག་བཅུ་བཞི༔ ད་ལྟ་ཉིད་དུ་བདག་ལ་རྫོགས་གྱུར་ཅིག༔ རྩ་སྔགས་མཐར༔ ཀ་ཡ་ཝཀྐ་ཙིཏྟ་སིདྡྷི་ཕ་ལ་ཧོ༔ ཞེས་ཅི་འགྲུབ་ཀྱིས་དངོས་གྲུབ་བསྐུལ་ལོ༔ དེ་ནས་བཀྲ་ཤིས་བརྗོད་ལ་མཆོད་སྒོ་འདན༔ ཆད་བརྟན་ལ་སོགས་སྔ་མུ་བཞིན༔ སང་ཉིན་ཚོགས་བསྟབས་རྗེས་སུ་དངོས་གྲུབ་བླང་བ་ནི༔ གསོལ་འདེབས་ཁྲུས་བྱས་བགེགས་བསྐྲད་བསྲུང་འཁོར་བསྒོམ་བྱིན་ཕབས་མདང་དགུང་བཞིན་ཐུགས་དམ་བསྐུལ་ཏེ་དེའི་རྗེས་སུ༔ ཞེས་བརྗོད་པས་རིགས་ཀྱི་ཡབ་རྣམས་ཀྱིས་དབང་བསྐུར་བའི་དགོངས་པ་མཛད༔ ཡུམ་རྣམས་ཀྱི་ཕྱག་ན་རིན་པོ་ཆེའི་བུམ་པས་དབང་བསྐུར༔ སེམས་དཔའ་རྣམས་ཀྱི་ཤིས་པ་བརྗོད༔ ལྷ་མོ་རྣམས་ཀྱིས་རྡོ་རྗེའི་གླུ་བླང་༔ ཁྲོ་མོ་རྣམས་ཀྱིས་བགེགས་བསྐྲད༔ འཇིག་རྟེན་སྐྱོང་བ་རྣམས་ཀྱིས་མཆོད་ཅིང་བསྟོད་དེ༔ ཀུན་ཀྱང་དབང་དང་དངོས་གྲུབ་སྩོལ་བའི་བྱ་བ་ལ་ཞུགས་པར་མོས་ཏེ༔ སྤྲོས་ན་ཞི་ཁྲོའི་དབང་ཆོག་གང་ཡིན་གྱི་བུམ་དབང་མན་ཆད་འདོན༔ ཡང་བསྡུས་ན་རང་གཞུང་གི་དངོས་གྲུབ་ལེན་ཆོག་གིས་བླང་ངོ་༔ ཡང་༔ ཇི་ལྟར་བལྟམས་པ་༴ དེ་བཞིན་བདག་གིས་དབང་བསྐུར་རོ༔ ཀ་ཡ་ཨ་བྷི་༴ དེ་ནས་ཁྲུས་གཞུང་བསྡུས་པའི་གསང་ཤེར་ཙམ་གྱི་མཐར་རང་གཞུང་གི་དངོས་གྲུབ་ལྟར་དང་༔ ཅེས་དབང་བསྐུར་དེ་ལྷ་ཐམས་ཅད་འོད་དུ་ཞུ་ནས་རང་ལ་ཐིམ་པས་སྐུ་གསུང་ཐུགས་རྡོ་རྗེའི་ཡེ་ཤེས་གློ་བུར་བྲལ་དག་ཆེན་པོ་མངོན་དུ་གྱུར་པར་བསམ་ལ༔ བཀྲ་ཤིས་བརྗོད་དོ༔ དེ་རྗེས་རྫས་རྟགས་བཀྲ་ཤིས་བརྗོད་དེ༔ ཚོགས་ལ་རོལ་བ་མན་ལས་བྱང་ལྟར་བསྐྱང་ངོ་༔ ༼ འདི་མན་ཆད་ཀྱི་མཆོད་བསྟོད་སོགས་བདག་བསྐྱེད་དབང་བཙན་དུ་བྱས་པའོ༔ མདུན་བསྐྱེད་དང་ཡེ་ཤེས་བའི་གཤེགས་གསོལ་ནི་འདིའི་སོང་ངོ་༔ མཆན༔ ༽ འདི་ཡང་ཤེས་རབ་པདྨ་བློ་གྲོས་གཉིས་བཀའ་བཙན་ལྕིད་ལས་ག་གཱས་མར་ཁུ་བསྐྱུག༔ དགེ་བས་རང་གཞན་སེམས་ཅན་ཐམས་ཅད་ཀུན༔ བཅུ་གསུམ་རྡོ་རྗེ་འཛིན་པའི་ས་ཐོབ་ཤོག༔ དགེའོ༔ གཞི་ཡི་བཀྲ་ཤིས་སྐུ་གསུམ་རང་ཆས་ལྡན༔ ལམ་གྱི་བཀྲ་ཤིས་རྩོལ་མེད་ངང་གིས་གྲུབ༔ འབྲས་བུའི་བཀྲ་ཤིས་རང་གྲོལ་མངོན་སངས་རྒྱས༔ འོད་གསལ་ལྷུན་གྲུབ་ཆེན་པོའི་བཀྲ་ཤིས་ཤོག༔ དགེའོ། །