ལྷ་དབང་འབྲིང་པོ་བཻཌཱུརྱའི་དོ་ཤལ།
ཡེ་ཤེས་སྒྱུ་འཕྲུལ་དྲྭ་བ་ལས༔ ཞི་ཁྲོའི་ལྷ་དབང་འབྲིང་པོ་བཻཌཱུརྱའི་དོ་ཤལ་བཞུགས་སོ༔
བརྡ་ཡིག །ན་མོ་གུ་རུ་པདྨ་ཀ་ར་ཡེ༔ ཕྱག་རྒྱ་སྐུ་ཡི་དབང་བསྐུར་ནི༔ ཐུན་མོང་རིག་པའི་དབང་ལྔ་ལ༔ ཤུ་ནྱ་ཏ་སོགས་ཡེ་ཤེས་ལྔའི༔ སྔགས་བྱང་བཏགས་ལ་གཞུང་བཞིན་བསྐུར༔ དེ་ནས་དངོས་ལ་འཇུག་པ་ནི༔ རྒྱས་འབྲིང་གཉིས་ལས་ཕྱི་མའོ༔ ས་མ་ཡཱ༔ དང་པོ་ཞི་བའི་དབང་བསྐུར་ནི༔ ཧཱུྃ༔ སངས་རྒྱས་ཀུན་གྱི་ཡེ་ཤེས་སྐུ༔ ཀུན་བཟང་ཡབ་ཡུམ་དབང་བསྐུར་བས༔ ཉོན་ཤེས་སྒྲིབ་པ་རྣམ་པར་དག༔ ནང་གསལ་ཡེ་ཤེས་མངོན་གྱུར་ཤོག༔ ཧཱུྃ་ཨོཾ་དྷརྨཱ་ཀཱ་ཡ་ཛྙཱ་ན་ཨ་བྷི་ཥིཉྩ་ཧཱུྃ༔ ཧཱུྃ༔ སངས་རྒྱས་ཀུན་གྱི་ལོངས་སྤྱོད་རྫོགས༔ རིགས་ལྔ་ཡབ་ཡུམ་དབང་བསྐུར་བས༔ ཕུང་ལྔ་ཁམས་ལྔ་རྣམ་པར་དག༔ ཡེ་ཤེས་ལྔ་པོ་མངོན་གྱུར་ཤོག༔ ཨོཾ་ཧཱུྃ་ཏྲྃ་ཧྲཱིཿཨཿམཱུྃ་ལྃ་མྃ་པྃ་ཏྃ་ཛྙཱ་ན་པཉྩ་ཀཱ་ཡ་ཨ་བྷི་ཥིཉྩ་ཧཱུྃ༔ ཧཱུྃ༔ སངས་རྒྱས་ཀུན་གྱི་ཡེ་ཤེས་རྩལ༔ སེམས་དཔའ་སེམས་མའི་དབང་བསྐུར་བས༔ ཁམས་དང་སྐྱེ་མཆེད་རྣམ་པར་དག༔ དབང་ཤེས་ཡོན་ཏན་མངོན་གྱུར་ཤོག༔ ཨོཾ་བོ་དྷི་ཨ་ཧཾ་ཛྙཱ་ན་པཉྩ་ཀཱ་ཡ་ཨ་བྷི་ཥིཉྩ་ཧཱུྃ༔ ཧཱུྃ༔ སངས་རྒྱས་ཀུན་གྱི་ཐུགས་རྗེའི་དཔྱིད༔ ཐུབ་པ་དྲུག་གི་དབང་བསྐུར་བས༔ རྒྱུད་དྲུག་འཁྲུལ་བ་རྣམ་པར་དག༔ ཡུལ་ཁྱབ་ཡེ་ཤེས་མངོན་གྱུར་ཤོག༔ ཨོཾ་ནིརྨ་ཀ་མ་ཧཱ་མུ་ནེ་ཨ་བྷི་ཥིཉྩ་ཧཱུྃ༔ ཧཱུྃ༔ སངས་རྒྱས་ཀུན་གྱི་རྣམ་ཐར་བརྒྱད༔ སྒོ་བསྲུང་ཡབ་ཡུམ་དབང་བསྐུར་བས༔ མུ་བཞི་སྐྱེ་བཞི་རྣམ་པར་དག༔ ཚད་མེད་ཕྲིན་ལས་མངོན་གྱུར་ཤོག༔ ཨོཾཿརཀྵ་ཀྲོ་ཏ་པྲཛྙཱ་ཛྙཱ་ན་ཙ་ཏུ་ཨ་བྷི་ཥིཉྩ་ཧཱུྃ༔ ཧཱུྃ༔ སངས་རྒྱས་ཀུན་གྱི་སྤྱི་དཔལ་མཆོག༔ ཆེ་མཆོག་ཡབ་ཡུམ་དབང་བསྐུར་བས༔ མ་རིག་གཉིས་འཛིན་བདུད་དཔུང་བཅོམས༔ བདག་མེད་རྣམ་གཉིས་རྩལ་རྫོགས་ཤོག༔ ཨོཾ་པྲཛྙཱ་མ་ཧཱ་ཀ་ཡ་ཨ་བྷི་ཥིཉྩ་ཧཱུྃ༔ ཧཱུྃ༔ སངས་རྒྱས་ཀུན་གྱི་རྡོ་རྗེའི་སྐུ༔ ཁྲག་འཐུང་ཡབ་ཡུམ་དབང་བསྐུར་བས༔ ཉོན་མོངས་རླུང་ལྔ་རྣམ་པར་འཇོམས༔ ཤེས་རབ་སྐུ་ལྔའི་རྩལ་རྫོགས་ཤོག༔ ཨོཾཿབཛྲ་ཧེ་རུ་ཀ་པཉྩ་ཨ་བྷི་ཥིཉྩ་ཧཱུྃ༔ ཧཱུྃ༔ སངས་རྒྱས་ཀུན་གྱི་སྲས་མོའི་ཚུལ༔ ཁྲོ་མོ་འབུམ་གྱི་དབང་བསྐུར་བས༔ ཉོན་མོངས་ཚོགས་བརྒྱད་རྣམ་པར་བཅོམས༔ ཟད་པར་ཡོན་ཏན་རྩལ་རྫོགས་ཤོག༔ ཧ་བཛྲ་ཀྲོ་ཏི་ཤྭ་རི་ཨ་བྷི་ཥིཉྩ་ཧཱུྃ༔ ཧཱུྃ༔ སངས་རྒྱས་ཀུན་གྱི་ཕྲ་མེན་ཚུལ༔ སེང་ཧ་འབུམ་གྱི་དབང་བསྐུར་བས༔ ཡུལ་བརྒྱད་འཁྲུལ་བའི་བདུད་བཅོམས་ནས༔ ཟིལ་གནོན་ཡོན་ཏན་རྩལ་རྫོགས་ཤོག༔ ཧེ་དེ་ཛཿབཛྲ་ར་ཏི་ཨ་བྷི་ཥིཉྩ་ཧཱུྃ༔ ཧཱུྃ༔ སངས་རྒྱས་ཀུན་གྱི་ཕྲིན་ལས་ཚུལ༔ སྒོ་མ་བཞི་ཡི་དབང་བསྐུར་བས༔ ཆུ་བཞི་བདུད་བཞི་རྣམ་པར་བཅོམས༔ དྲན་པ་ཉེར་བཞག་རྩལ་རྫོགས་ཤོག༔ ཛཿཧཱུྃ་བྃ་ཧོ་ཨ་བྷི་ཥིཉྩ་ཧཱུྃ༔ ཧཱུྃ༔ སངས་རྒྱས་ཀུན་གྱི་སྤོར་བྱེད་ཚུལ༔ བཀྲ་ཤིས་ལྷ་མོའི་དབང་བསྐུར་བས༔ ཁམས་དྲུག་མ་དག་བདུད་བཅོམས་ནས༔ ཕ་རོལ་ཕྱིན་པའི་རྩལ་རྫོགས་ཤོག༔ ཨོཾ་བཛྲ་དུཿཁ་ཚེ་ད་ཨ་བྷི་ཥིཉྩ་ཧཱུྃ༔ ཧཱུྃ༔ སངས་རྒྱས་ཀུན་གྱི་གནས་ཡུལ་བདག༔ དབང་ཕྱུག་ཉེར་བཞིའི་དབང་བསྐུར་བས༔ རླུང་ཁམས་སྟོང་ཕྲག་ཉེར་བཞི་བཅོམས༔ ཡེ་ཤེས་རྒྱ་མཚོའི་རྩལ་རྫོགས་ཤོག༔ ཨོཾ་ཀྲོ་ཏི་ཤྭ་རི་ཨ་བྷི་ཥིཉྩ་ཧཱུྃ༔ ཧཱུྃ༔ སངས་རྒྱས་ཀུན་གྱི་རྡོ་རྗེ་བཞི༔ རིགས་བཞིའི་ཁྲོ་མོའི་དབང་བསྐུར་བས༔ སྒྲིབ་བཞིའི་བདུད་ཀྱི་སྡེ་དཔུང་བཅོམས༔ མི་འཇིགས་བཞི་ལྡན་དབང་ཐོབ་ཤོག༔ བཛྲ་ཨ་བྷི་ཥིཉྩ་ཧཱུྃ༔ ཧཱུྃ༔ སངས་རྒྱས་ཀུན་གྱི་སྟོབས་བཅུའི་དངོས༔ ཁྲོ་བཅུ་ཡབ་ཡུམ་དབང་བསྐུར་བས༔ ས་དང་མི་དགེའི་བདུད་དཔུང་བཅོམས༔ རྡོ་རྗེའི་ཏིང་འཛིན་རྩལ་རྫོགས་ཤོག༔ ཨོཾ་པ་ར་མི་ཏཱ་ཀྲོ་ཏ་ཨ་བྷི་ཥིཉྩ་ཧཱུྃ༔ ཞེས་མཐར༔ ཧཱུྃ༔ དུས་གསུམ་སངས་རྒྱས་ཐམས་ཅད་ཀྱི༔ གང་ལ་གང་འདུལ་རྣམ་པར་རོལ༔ སངས་རྒྱས་སྟོང་གི་དབང་བསྐུར་བས༔ སྟོང་ཕྲག་བརྒྱད་ཅུའི་ཉོན་མོངས་དག༔ གཞན་དོན་ལྷུན་གྲུབ་དབང་ཐོབ་ཤོག༔ ཨོཾ་བུདྡྷ་ལཀྵཾ་ས་ཏྭ་སརྦ་ཨ་བྷི་ཥིཉྩ་ཧཱུྃ༔ ཞེས་པ་ལ༔ རྒྱས་པར་ནི་སངས་རྒྱས་སྟོང་དབང་གཏེར་ཁ་གོང་མ་ལས་བྱུང་བའམ༔ རང་གཞུང་ནས་ལྷན་ཐབས་སུ་བྱའོ༔ དེ་མཐར་གསང་ཤེར་ཚིག་གསུམ་གྱི་རྒྱས་པར་བྱས་ཤིང་༔ བཀྲ་ཤིས་རྫས་རྟགས་སོགས་ཀྱིས་རྒྱལ་ཐབས་སྤྱི་བླུགས་གི་དབང་བསྐུར་རོ༔ ས་མ་ཡ༔ འདི་འདྲའི་དབང་བསྐུར་ཟབ་མོ་ནི༔ དབང་རྣམས་ཀུན་གྱི་གཞི་མ་སྟེ༔ བསྐྱེད་རིམ་ལམ་གྱི་སྣོད་རུང་བྱེད༔ མཐར་ཐུག་སྤྲུལ་སྐུའི་གོ་འཕང་ཐོབ༔ རྒྱ་རྒྱ་རྒྱ༔ ཅེས་ཀྱང་པདྨ་མ་ཏིའི་ངོར་ག་གཱ་བས་མཁའ་འགྲོའི་ཀློང་མཛོད་ཡངས་བ་ནས་སོ། །མངྒ་ལཾ། རྣམ་དཀར་འདུ་བྱེད་པདྨ་དྲྭ་ཡས་སོ། །