ཚེ་འདས་ཕན་གདག་གི་ཆོ་ག་གཞན་ཕན་ཐུགས་རྗེའི་ཟླ་བ།

ཡེ་ཤེས་སྒྱུ་འཕྲུལ་དྲྭ་བ་ལས༔ ཚེ་འདས་ཕན་གདག་གི་ཆོ་ག་ཤིན་ཏུ་བསྡུས་པ་གཞན་ཕན་ཐུགས་རྗེའི་ཟླ་བ་ཞེས་བྱ་བ་བཞུགས་སོ༔

སྭ་བྷ་ཝ་སོགས༔ སྟོང་པའི་ངང་ལས་པད་ཟླའི་སྟེང་༔ ནྲཿཡིག་ཡོངས་སུ་གྱུར་པ་ལས༔ ཚེ་འདས་ཕུང་ཁམས་སྐྱེ་མཆེད་ནི༔ གསོན་གྱི་གནས་སྐབས་ཇི་ལྟར་གྱུར༔ ན་མོ༔ དཀོན་མཆོག་གསུམ་གྱི་བདེན་པ་དང་༔ སྐུ་གསུམ་ཞི་ཁྲོའི་ཐུགས་རྗེ་དང་༔ རྒྱུ་འབྲས་བསླུ་མེད་བདེན་སྟོབས་ཀྱིས༔ ཚེ་འདས་རྣམ་པར་ཤེས་པ་ནི༔ རིགས་དྲུག་སྐྱེ་བཞི་འཇིག་རྟེན་བདུན༔ རྒྱུད་ལྔའི་ཁམས་ནི་གར་གནས་ཀྱང་༔ སྐད་ཅིག་ཉིད་ལ་འདིར་ཁུག་ཅིག༔ ནྲཿབཛྲ་ཨཾ་ཀུ་ཤ་ཛ༔ ཛཿཧཱུྃ་བྃ་ཧོ༔ བཛྲ་རཀྵ་རཀྵ༔ ཨ་ར་པ་ཙ་ན་དྷཱི༔ པྲཛྙཱ་ཛྙཱ་ན་ཕཊ༔ ཧཱུྃ༔ ཉོན་ཅིག་ཚེ་འདས་རིགས་ཀྱི་བུ༔ ཁྱོད་ཀྱི་རྣམ་རྟོག་ངས་སྦྱང་གི༔ ང་ལ་གུས་པས་ཕྱག་འཚོལ་ཞིག༔ སྔགས་འཆང་ང་ཡི་ངག་ལ་ཉོན༔ འཁོར་བ་འདི་ལ་གཅོང་རེ་ཆེ༔ བདེ་བའི་གོ་སྐབས་སྤུ་ཙམ་མེད༔ ཅུང་ཟད་བདེ་ཡང་མི་རྟག་འགྱུར༔ སྐྱེ་ཤིའི་སྣང་བ་བསམ་མི་ཁྱབ༔ ཁྱོད་ལ་སྒེར་དུ་བབས་པ་མིན༔ མ་ཆགས་མ་ཞེན་འཇིགས་དངངས་སྤོངས༔ རྒྱལ་ཀུན་གསང་སྔགས་འདི་མཁྱེན་ནས༔ འཁོར་བའི་རྒྱ་མཚོ་སྐེམ་པ་ཡིན༔ རྣལ་འབྱོར་སྔགས་འཆང་དངོས་གྲུབ་ནི༔ ཁྱོད་ལ་གྲོགས་སུ་ད་བསྐྱེད་ཀྱི༔ ད་རིས་འཆི་བས་དོན་ཆེན་འགྲུབ༔ དགའ་ཞིང་གུས་པའི་སེམས་བསྐྱེད་ལ༔ ངེས་འབྱུང་སྐྱོ་ཤེས་བྱང་ཆུབ་སེམས༔ རྗེས་དྲན་རྟོགས་པའི་རྩལ་ཤུགས་བསྐྱེད༔ དེ་ནས་བགེགས་གཏོར་བྱིན་བརླབས་ལ༔ ཧཱུྃ༔ ཉོན་ཅིག་ལྟོས་ཤིག་འབྱུང་པོ་རྣམས༔ ལན་ཆགས་རྐྱེན་གྱིས་ཟས་ནོར་ལོངས༔ ཚེ་འདས་རིགས་ཀྱི་བུ་འདི་དང་༔ ལུས་དང་གྲིབ་མར་མ་འགྲོགས་ཤིག༔ ངན་སོང་གསུམ་གྱི་ལམ་མ་བསྟན༔ གལ་ཏེ་བཀའ་ལས་འདའ་བྱེད་ན༔ ཐལ་བ་རྡུལ་བཞིན་བརླག་པར་འགྱུར༔ དེ་བས་རང་རང་གནས་སུ་སོང་༔ བི་ཤྭ་བཛྲ་གྱིས་བགེགས་བསྐྲད༔ བཛྲ་རཀྵ་རཀྵའི་བསྲུང་འཁོར་བསྒོམ༔ དེ་ནས་ཁྲུས་ཀྱི་ཆོ་ག་ནི༔ ཧཱུྃ༔ ཆུ་བོ་དྲུག་གི་ཁྲུས་བྱས་པས༔ བག་ཆགས་རྣམ་དྲུག་དག་གྱུར་ཅིག༔ དྲི་ཆུ་དྲུག་གི་ཁྲུས་བྱས་པས༔ རྒྱ་ཆེན་ཡོན་ཏན་མཆོག་གྲུབ་ཤོག༔ དྲི་མ་རྣམ་དྲུག་དག་པ་ཡི༔ ཡོན་ཏན་ཐམས་ཅད་དང་ལྡན་པའི༔ སངས་རྒྱས་ཐམས་ཅད་མཆོད་དོན་དུ༔ དད་པས་བདག་ནི་ཁྲུས་བགྱིའོ༔ ཨོཾ་ཨ་བྷྱ་རྒྱ་ཏཾ་ཀེཾ་ཨ་ནྲ་སུ་ཏྲི་པྲེ་དུ་སརྦ་པ་པཾ་ཤིནྟཾ་ཀུ་རུ་སྭཱ་ཧཱ༔ ཧཱུྃ༔ དཀོན་མཆོག་གསུམ་པོ་དུག་མི་མངའ༔ དཀོན་མཆོག་བདེན་པས་དུག་བཅོམ་མོ༔ དུག་གི་རྒྱུ་རྐྱེན་འབྱུང་བ་བཞི༔ འབྲས་བུ་རང་དྭངས་དབྱིངས་སུ་དག༔ ཨོཾ་ཧཱུྃ་ཏྲཱྃ་ཧྲཱིཿཨཱཿཚེ་འདས་ཀྱི་འབྱུང་བཞིའི་དུག་ཐམས་ཅད་འབྱུང་བ་བཞིའི་ནང་དུ་ཤིནྟཾ་ཀུ་རུ་ཡེ་སྭཱ་ཧཱ༔ དེ་ནས་ཚེ་ཁྲུས་གནས་གསུམ་ལས༔ དང་པོ་གསོལ་བ་འདེབས་པ་ནི༔ ཀྱཻ་མ༔ དཔལ་ལྡན་རྡོ་རྗེ་འཛིན་པ་ཆེ༔ སོགས་ཡབ་ཡུམ་སྦྱོར་བའི་༴ གོ་སར་ཧཱུྃ༔ བྱང་ཆུབ་སེམས་ཀྱི་བདུད་རྩི་ནི༔ ཡི་གེའི་འབྲུ་ཚོགས་གསལ་བའི་རྒྱུན༔ སྐལ་ལྡན་བུ་ལ་དབང་བསྐུར་བས༔ ལོངས་སྤྱོད་རྫོགས་སྐུར་སྨིན་གྲོལ་ཤོག༔ ཨོཾ་བོ་དྷི་ས་ཏྭ་ཧཱུྃ་ཧཱུྃ་ཨ་བྷི་ཥིཉྩ༔ དེ་ནས་ཤེས་རབ་ཡེ་ཤེས་དབང་༔ ཧཱུྃ༔ བདེ་བ་ཆེན་པོ་འབྱུང་བ་ཡི༔ རང་བྱུང་རྫས་ཀྱི་བུམ་པ་འདིའི༔ སྐལ་ལྡན་བུ་ལ་དབང་བསྐུར་བས༔ རྒྱལ་ཀུན་ཐུགས་ཀྱི་དབང་ཐོབ་ཤོག༔ ཨོཾ་མ་ཧཱ་མུ་དྲ་པྲཛྙཱ་ཛྙཱ་ན་ཨ་བྷི་ཥིཉྩ་ཧཱུྃ༔ དེ་ནས་ཚིག་གི་དབང་བསྐུར་ནི༔ ཧཱུྃ༔ སེམས་ཀྱི་རང་བཞིན་སྤྲོས་དང་བྲལ༔ རྒྱན་སྣང་སྐུ་དང་ཡེ་ཤེས་ཆེ༔ ཟུང་འཇུག་རིག་སྟོང་བྱང་ཆུབ་སེམས༔ ཡེ་ཤེས་རྡོ་རྗེའི་དབང་ཐོབ་ཤོག༔ ཨ་ཨ་ཨཱཿཨ་བྷི་ཥིཉྩ༔ དེ་ནས་གཏོར་དབང་སོགས་གཞུང་བཞིན་ནོ༔ ལམ་བསྟན་པ༔ ཧཱུྃ༔ སྟོང་པ་ཉིད་ཀྱི་ཀློང་དཀྱིལ་དུ༔ ཕ་རོལ་ཕྱིན་བཅུ་ཤེས་རབ་དབྱིངས༔ ཅང་ཤེས་འཕྲུལ་གྱི་ཏིང་འཛིན་གཞུར༔ ཚེ་འདས་སེམས་ཀྱི་མདའ་བཀང་སྟེ༔ བཅོམ་ལྡན་རིགས་ལྔའི་སྐུ་ལ་བསྟིམ༔ གཉིས་མེད་ས་བོན་ཡི་གེ་ཧཱུྃ༔ རྒྱལ་བའི་སྲས་སུ་བསྐྲུན་ནས་ནི༔ འགྲོ་དོན་ཐོགས་མེད་འབྱུང་གྱུར་ཅིག༔ ཧཱུྃ༔ མུ་ཏིག་དཀར་པོ་དྲི་མེད་དང་༔ ཙནྡན་དམར་པོ་ཆགས་མེད་གཉིས༔ བྱང་ཆུབ་སེམས་ཀྱི་ཐིག་ལེ་གསུམ༔ རྟོགས་པའི་ཀློང་དུ་འདྲེས་པ་ལ༔ རང་རིག་ཡེ་ནས་སངས་རྒྱས་ཡིན༔ སངས་རྒྱས་གཞན་དུ་མ་ཚོལ་ཞིག༔ ཕཊ༔ དེ་ནས་རྣམ་སྨིན་བསྲེགས་སྦྱང་ནི༔ ཧཱུྃ༔ ཉོན་ཅིག་ཚེ་འདས་རིགས་ཀྱི་བུ༔ ཐབས་ཤེས་གཉིས་མེད་མེ་བྱུང་བས༔ ཁྱོད་ཀྱི་རྣམ་སྨིན་སྡུག་བསྔལ་སྦྱོངས༔ རྣམ་རྟོག་ཡེ་ཤེས་ཆེན་པོར་བསླང་༔ སྒྲིབ་དང་ཉོན་མོངས་ཞི་བར་གྱུར༔ ཨགྞེ་ཡེ་སྥ་ར་ཎ་ཧཱུྃ་ཧཱུྃ་ཕཊ་ཕཊ༔ ཨ་ཨ་རཾ་རཾ་སྭཱ་ཧཱ༔ ཅེས་ཀྱང་རང་གཞན་ཐམས་ཅད་ལ། །ཉམས་ལེན་རྒྱུན་ཁྱེར་བདེ་བའི་སླད། །ཕན་གདགས་རྒྱས་པའི་དོན་བསྡུས་ཏེ། །ག་ག་ཨ་བྷྱེ་དེ་ཡིས་སྨྲས། །ཡི་གེ་རྣམ་པར་རྒྱལ་བས་སོ། །དགེའོ། །དགེའོ། །དགེའོ། །སརྦ་མངྒ་ལཾ། །