ཀློང་ཆེན་སྙིང་ཐིག་གི་དབང་ཀུན་གྱི་མཐའ་རྟེན་རྒྱལ་ཐབས་ཡོངས་རྫོགས།
ཀློང་ཆེན་སྙིང་ཐིག་གི་དབང་ཀུན་གྱི་མཐའ་རྟེན་དུ་མཆོད་པའི་ཁ་བསྒྱུར་རྒྱལ་ཐབས་ཡོངས་རྫོགས་བཞུགས་སོ། །
དེ་ནས་རྒྱལ་སྲིད་སྣ་བདུན་དབང་། །དམ་པ་འདི་ལྟར་བསྐུར་བ་ནི། །ཁམས་གསུམ་ཆོས་ཀྱི་རྒྱལ་པོའི་སྲིད། །དེ་མ་ཐག་ཏུ་ཐོབ་པར་འགྱུར། །ས་མ་ཡ། འཁོར་ལོ་ནོར་བུ་ལག་པ་གཡས། །བཙུན་མོ་གཞོག་གཡོན་བློན་པོ་གཡས། །དམག་དཔྱོན་རྒྱབ་དང་རྟ་གླང་མདུན། །བསྐུར་གནས་མ་ནོར་གནད་དུ་ཟུང་། །དང་པོ་འཁོར་ལོའི་དབང་བསྐུར་ལ། །ཧཱུྃ། རིན་ཆེན་འཁོར་ལོའི་དབང་བསྐུར་བས། །དད་པའི་དགེ་ཆོས་མ་ལུས་སྡུད། །སྲིད་པའི་འཁོར་ལོ་རྒྱུན་བཅད་ནས། །ཆོས་ཀྱི་འཁོར་ལོ་བསྐོར་བར་ཤོག །ཨོཾ་ཙཀྲ་རཏྣ་ཨ་བྷི་ཥིཉྩ་ཨཱཿཧཱུྃ། གཉིས་པ་ནོར་བུའི་དབང་བསྐུར་ནི། ཧཱུྃ། སྐལ་ལྡན་རིགས་ཀྱི་བུ་ཁྱོད་ལ། །རིན་ཆེན་ནོར་བུའི་དབང་བསྐུར་༴ །བཀྲེས་ཤིང་ཕོངས་པ་རྒྱུན་བཅད་ནས། །སྦྱིན་པའི་བདེ་འབྱོར་ཕུན་ཚོགས་ཤོག །ཨོཾ་མ་ཎི་རཏྣ་ཨ་བྷི་ཥིཉྩ་ཨཱཿཧཱུྃ། གསུམ་པ་བཙུན་མོ་རིན་ཆེན་དབང་། ཧཱུྃ། བཙུན་མོ་རིན་ཆེན་དབང་བསྐུར་བས། མ་རིག་མུན་པ་རྒྱུན་བཅད་དེ། །ཤེས་རབ་དབྱིངས་ཀྱི་དོན་རྟོགས་ནས། །ཐབས་དང་ཤེས་རབ་འབྲེལ་བར་ཤོག །ཨོཾ་ཝ་ཏི་རཏྣ་ཨ་བྷི་ཥིཉྩ་ཨཱཿཧཱུྃ། བཞི་བ་བློན་པོ་རིན་ཆེན་དབང་། ཧཱུྃ། བློན་པོ་རིན་ཆེན་དབང་བསྐུར་བས། ཕྱི་ནང་གསང་གསུམ་ཐེག་གསུམ་ལྡན། །བསམ་ཡས་བསྟན་པ་རབ་འཛིན་ཞིང་། །ཡོན་ཏན་ཚུལ་ཁྲིམས་ཞིང་སྨིན་ཤོག །ཨོཾ་མ་ཧཱ་ཏ་རཏྣ་ཨ་བྷི་ཥིཉྩ་ཨཱཿཧཱུྃ། ལྔ་བ་དམག་དཔོན་རིན་ཆེན་དབང་། ཧཱུྃ། དམག་དཔོན་རིན་ཆེན་དབང་བསྐུར་བས། ལྟ་ངན་རབ་བསལ་ཐོས་མཆོག་གིས། །ཕས་རྒོལ་ཚར་བཅད་སྐྱེ་མེད་བཟོད། །སྙེམས་བྲལ་མཆོག་ནི་ཐོབ་པར་ཤོག །ཨོཾ་ཥཏྒ་རཏྣ་ཨ་བྷི་ཥིཉྩ་ཨཱཿཧཱུྃ། དྲུག་པ་རྟ་མཆོག་རིན་ཆེན་ནི། ཧཱུྃ། རྟ་མཆོག་རིན་ཆེན་དབང་བསྐུར་བས། །རྐང་བཞིའི་དྲངས་པའི་བསམ་གཏན་གྱིས། །ངོ་ཚ་ཤེས་པས་སྲིད་ལས་གྲོལ། །སངས་རྒྱས་ཞིང་དུ་བསྒྲོད་པར་ཤོག །ཨོཾ་ཏུ་རཾ་ག་ཨ་ཤྭ་ཐཱ་རཏྣ་ཨ་བྷི་ཥིཉྩ་ཨཱཿཧཱུྃ། བདུན་པ་གླང་པོ་རིན་ཆེན་ནི། ཧཱུྃ། གླང་པོ་རིན་ཆེན་དབང་བསྐུར་བས། །ཁྲེལ་དང་ལྡན་པའི་བརྩོན་འགྲུས་ཀྱིས། །བླ་མེད་ཐེག་པར་རབ་བཞོན་ནས། །ཉོན་མོངས་དགྲ་ལས་རྒྱལ་གྱུར་ཅིག །ཨོཾ་ཧསྟི་རཏྣ་ཨ་བྷི་ཥིཉྩ་ཨཱཿཧཱུྃ། སྐལ་ལྡན་རིགས་ཀྱི་བུ་ཁྱོད་ལ་རྒྱལ་སྲིད་སྣ་བདུན་གྱི་དབང་བསྐུར་བས། ཕ་རོལ་ཏུ་ཕྱིན་པ་དྲུག་གི་རང་བཞིན། འཕགས་པའི་ནོར་བདུན་གྱི་འབྱོར་པ་དམ་པ་ཁམས་གསུམ་ཆོས་ཀྱི་རྒྱལ་པོའི་རྒྱལ་སྲིད་ལ་དབང་འབྱོར་བར་གྱུར་ཅིག །འདི་ནི་གསང་སྔགས་ནང་བའི་དབང་། །མ་ཧཱ་ཨ་ནུ་གཉིས་ལ་དབང་། །དབང་བཞིའི་གསུམ་པ་མན་ཆད་དོ། །བཀྲ་ཤིས་བདེ་ལེགས་ཕུན་ཚོགས་ཤོག །ག་གཱས་སོ། །མངྒ་ལཾ། །༈ཀློང་ཆེན་སྙིང་ཐིག་གི་དབང་ཀུན་གྱི་མཐའ་རྟེན་དུ་བཀྲ་ཤིས་རྟགས་བརྒྱད་ཀྱི་དབང་ནི་རྫོགས་པ་རང་བྱུང་ལས་བྱུང་བ་འདི་ཉིད་སྦྱར་བར་བྱ་སྟེ། ཧཱུྃ༔ སྐྱོབས་པ་མཐར་ཕྱིན་སྔགས་ལྡན་པའི། །བདེ་གཤེགས་དབུ་ཡི་དབང་བསྐུར་ནི། །བཀྲ་ཤིས་གདུགས་ལ་བརྟེན་བྱས་ནས། །དེང་མཆོག་བུ་ལ་གནས་པར་གྱིས། །ཨོཾ་ཨཱཿཧཱུྃ་སྭཱ་ཧཱ༔ བི་བག་གྷ་ཡ་སི་ཨ་བྷི་ཥིཉྩ་ཨཱ༔ བལྟ་བྱེད་མ་འགགས་དོན་མཚོན་པས། །བདེ་གཤེགས་སྤྱན་གྱི་དབང་བསྐུར་ནི། །བཀྲ་ཤིས་ཉ་ལ་བརྟེན་ནས་ནི། །དེང་མཆོག་བུ་ལ་གནས་པར་གྱིས། །ཨོཾ་ཨཱཿཧཱུྃ་སྭཱ་ཧཱ། པྲ་ནི་པ་ཡ་བ་ཐུ་ག་བ་ཨ་བྷི་ཥིཉྩ་ཨཱ༔ སྨྲ་བྱེད་ཕ་རོལ་སྒྲོལ་ལ་མཁས། །སངས་རྒྱས་ལྗགས་ཀྱི་དབང་བསྐུར་ནི། །བཀྲ་ཤིས་པདྨ་ལ་བརྟེན་ནས། །དེང་མཆོག་བུ་ལ་གནས་པར་གྱིས། །ཨོཾ་ཨཱཿཧཱུྃ་སྭཱ་ཧཱ་ཏི་ཀ་ཏ་སི་ཨ་བྷི་ཥིཉྩ་ཨཱ༔ ཆོས་རྣམས་ལམ་བྱུང་ཆོས་དབྱིངས་ཟླུམ། །སངས་རྒྱས་མགུལ་གྱི་དབང་བསྐུར་ནི། །བཀྲ་ཤིས་བུམ་པ་ལ་བརྟེན་ནས། །དེང་མཆོག་བུ་ལ་གནས་པར་གྱིས། །ཨོཾ་ཨཱཿཧཱུྃ་སྭཱ་ཧཱ་ཏིཥྛ་ཀ་ལ་ཤ་ཨ་བྷི་ཥིཉྩ་ཨཱ༔ མི་ནུབ་རྒྱལ་མཚན་ཆོས་སྐུའི་དོན། །སངས་རྒྱས་རྣམས་ཀྱི་སྐུ་ཡི་དབང་། །བཀྲ་ཤིས་རྒྱལ་མཚན་ལ་བརྟེན་ནས། །དེང་མཆོག་བུ་ལ་གནས་པར་གྱིས། །ཨོཾ་ཨཱཿཧཱུྃ་སྭཱ་ཧཱ་བྷི་ཤུདྡྷེ་ཨ་ཡ་ཨ་བྷི་ཥིཉྩ་ཨཱ༔ སྒྲ་དབྱངས་རྟོག་མེད་དོན་མཚོན་པས། །སངས་རྒྱས་རྣམས་ཀྱི་གསུང་གི་དབང་། །བཀྲ་ཤིས་དུང་ལ་བརྟེན་ནས་ཀྱང་། །དེང་མཆོག་བུ་ལ་གནས་པར་གྱིས། །ཨོཾ་ཨཱཿཧཱུྃ་སྭཱ་ཧཱ་བི་ཀྲ་ཡ་རྒྱ་ ༼ ཏྲ་དཔྱད་ ༽ཨ་བྷི་ཥིཉྩ་ཨཱ༔ གསལ་འོད་ལྡན་པ་དཔལ་བེའུའི་ཐུགས། །སངས་རྒྱས་རྣམས་ཀྱི་ཐུགས་ཀྱི་དབང་། །བཀྲ་ཤིས་དཔལ་བེའུ་ལ་བརྟེན་ནས། །དེང་མཆོག་བུ་ལ་གནས་བར་གྱིས། །ཨོཾ་ཨཱཿཧཱུྃ་སྭཱ་ཧཱ་ཙིཏྟ་ཡ་ཨ་བྷི་ཥིཉྩ་ཨཱ༔ ཐོགས་མེད་མྱུར་མགྱོགས་འཁོར་ལོའི་ཞབས། །སངས་རྒྱས་རྣམས་ཀྱི་ཞབས་ཀྱི་དབང་། །བཀྲ་ཤིས་འཁོར་ལོ་ལ་བརྟེན་ནས། །དེང་མཆོག་བུ་ལ་གནས་པར་གྱིས། །ཨོཾ་ཨཱཿཧཱུྃ་སྭཱ་ཧཱ་ཙཀྲ་སུ་ལ་བྷི་ན་ཀུ་ཨ་བྷི་ཥིཉྩ་ཨཱ༔ ཞེས་གསུངས་སོ། །སྐལ་ལྡན་རིགས་ཀྱི་བུ་ཁྱོད་ལ་བཀྲ་ཤིས་རྟགས་བརྒྱད་ཀྱི་དབང་བསྐུར་བས་འཕགས་པའི་ལམ་ཡན་ལག་བརྒྱད་མཐར་ཕྱིན་ནས། མཚན་དཔེ་ཡོངས་སུ་རྫོགས་པ་སངས་རྒྱས་ལོངས་སྤྱོད་ཆེན་པོའི་མངའ་དབང་ཐོབ་པར་གྱུར་ཅིག །འདི་ནི་ཚིག་གི་དབང་བསྐུར་ལ། ཁྱད་པར་རྫོགས་པ་ཆེན་པོ་ཡི། །སྤྲོས་བཅས་སྤྲོས་མེད་རབ་སྤྲོས་མེད། །ཤིན་ཏུ་སྤྲོས་པ་མེད་པ་ཡི། །ཁྱད་པར་དགོས་ཀྱི་མཐའ་རྟེན་ནོ། །ཅེས་ཀྱང་ག་ག་ཨ་བྷྱེས་རྒྱུད་ལས་ཀལྤ་ལོགས་སུ་ཕྱུང་བའོ། །དགེའོ། །སརྦ་མངྒ་ལཾ། །