ཞི་ཁྲོའི་མཚམས་སྦྱོར་མཐོང་བ་རང་གྲོལ།

ཞི་ཁྲོའི་མཚམས་སྦྱོར་མཐོང་བ་རང་གྲོལ་ཞེས་བྱ་བ་བཞུགས་སོ༔

ཀུན་བཟང་ཆེ་མཆོག་ཞི་ཁྲོའི་དཀྱིལ་འཁོར་དང་༔ དམ་པ་རིགས་བརྒྱ་འདུས་པའི་ལྷ་ཚོགས་ལ༔ གུས་པས་ཕྱག་འཚལ་བར་དོར་གྲོལ་བའི་སླད༔ གཤིན་གསོན་རྗེས་འཛིན་དབང་གིས་མཚམས་སྦྱོར་སྤྲོ༔ ས་མ་ཡཱ༔ དེ་ལ་གཞུང་གི་དཀྱུས་སུ་ལྷན་ཐབས་ཀྱིས༔ སྦྱོར་མཚམས་མ་ནོར་རེ་བཞིན་འདི་སྐད་དུ༔ དང་པོའི་དགོངས་པ་གནས་པར་གསོལ་བ་གདབས༔ ལས་ཀྱི་རྡོ་རྗེར་དབང་བསྐུར་རམ་ཉེ་འབྲེལ་གྱིས༔ ཧོ༔ མི་གནས་པའི་ཡེ་ཤེས་ཆེན་པོའི་བདག་ཉིད་ཞི་ཁྲོ་གསང་བའི་དཀྱིལ་འཁོར་གྱི་ལྷ་ཚོགས་འཁོར་དང་བཅས་པ་རྣམས་དང་༔ རྩ་བ་དང་རང་བཞིན་གྱི་གལ་མདོ་རྡོ་རྗེ་སློབ་དཔོན་མཆེད་དང་ལྕམ་དྲལ་ཕུན་སུམ་ཚོགས་པ་ལྔ་དང་ལྡན་པའི་བདག་ཉིད་དབང་བསྒྱུར་རིག་པའི་མཆོག་རྣམས་དགོངས་སུ་གསོལ༔ འཇིག་རྟེན་ལྔ་བའི་ལམ་དུ་སོན་པའི་ཚེ་འདས་འདི་ལས་རྐྱེན་ངན་པའི་དབང་དུ་མ་བཏང་བར་ལམ་སྣ་དང་སུན་མ་མཛད་དུ་གསོལ༔ ཞལ་བསྟན་དུ་གསོལ༔ བྱིན་གྱིས་བརླབ་ཏུ་གསོལ༔ མཐུ་བསྟན་དུ་གསོལ༔ སྒྲིབ་པ་སྦྱངས་དུ་གསོལ༔ གནས་སྤར་དུ་གསོལ༔ ཨོཾ་བཛྲ་སརྦ་ཀ་ས་ཛ་ཧཱུྃ༔ རྟེན་བསྐྱེད་འགུགས་གཞུགས་རྒྱས་པའི་མཐར༔ ཅེས་བརྗོད་པས་ཡེ་ཤེས་ཕྱག་རྒྱའི་ཏིང་ངེ་འཛིན་གྱི་རང་གཟུགས་འོད་སྣང་ཁ་དོག་ལྔ་དང་ལྡན་པའི་ཁྱིམ མི་ཤིགས་པ་རྡོ་རྗེའི་ཆོས་བདུན་གྱི་མཚན་ཉིད་ཅན་གྱི་ནང་དུ་བཙུད་པས་དངོས་པོ་ཐོགས་མེད་ཀྱི་རྣམ་ཤེས་དེ་ཉིད་ཀྱང་ཡར་གྱི་ཟང་ཐལ་ལས་གར་ཡང་འཁྱར་དབང་མེད་པའི་རྒྱས་གདབ་པར་གྱུར༔ དེ་ནས་གཤེད་དང་ལྕགས་ཕྲལ་ལ༔ དང་པོའི་དབང་དུ་འདི་སྐད་དོ༔ ཨོཾ་སྭ་བྷ་སོགས༴ སྟོང་པའི་ངང་ལས་བྷྲུཾ་ལས་རིན་པོ་ཆེའི་སྣོད་དུ་ལན་ཆགས་རྐྱེན་གྱི་ཟས་ནོར་འདོད་དགུ་མ་ཚང་བ་མེད་པའི་སྤྲུན་མྱོང་རེག་མཐོང་ཐོས་གྲོལ་བའི་ནུས་ལྡན་དུ་གྱུར༔ རཾ་ཡཾ་ཁཾ༔ ཨོཾ་ཨཱཿཧཱུྃ༔ བདེན་བརྗོད་མཐར༔ ཚེ་རབས་ཐོག་མ་མེད་པ་ནས་ལས་ཀྱི་འབྲེལ་བའི་ལན་ཆགས་བགེགས་རིགས་ཟ་འདྲེ་ཤི་གཤེད་སྲོག་གཅོད་དབུགས་ལེན་མདངས་འཕྲོག་གཤིན་ལྕགས་གསོན་བདུད་ཐམས་ཅད་ཨ་ཀརྴ་ཡ་ཛ་ཛ༔ ཞི་དྲག་གིས་སྦྱངས་ལ༔ ས་དང་ལམ་ལ་༴ དེངས༔ གལ་ཏེ་མི་ཉན་པའི་རིགས་རྣམས་ལ་བདག་ཉིད་ཀྱི་ཐུགས་ཡེ་ཤེས་ལྔ་ཡི་རང་གདངས་ཁྲོ་བོ་དང་ཁྲོ་མོ་མཚོན་ཆ་དུག་ཐུན་མེ་ཆར་ཆེན་པོའི་སྡིགས་བསད་བསྲེགས་གཏུབ་བརླག་པར་འགྱུར་ཏ་རེ༔ དེ་བས་ན་རང་རང་གི་གནས་སུ་བདེ་བར་བཞུད་ཅིག༔ ཧཱུྃ༔ ང་ཉིད་ལྷ་ཡི༴ སོགས་ ཧཱུཾ་བཞི་སོགས་ཀྱིས་བགེགས་བསྐྲད་མཐར༔ ཨོཾ་བཛྲ་རཀྵ་རཀྵ༔ ཅེས་བརྗོད་པས་སྟེང་འོག་ཕྱོགས་མཚམས་ཐམས་ཅད་ཕྱག་རྒྱ་རྣམ་པ་ལྔ་དང་ཁྲོ་བོ་ཁྲོ་མོ་མེ་རི་ཕྱིར་འབར་བས་དཀྲིགས་པས་ཞུན་མཐར་ལས་སུས་ཀྱང་རྒྱུ་བ་དང་གླགས་མེད་པར་གྱུར་པའི་གུར་ཁང་གི་ནང་དུ་ཚེ་འདས་ཀྱི་རྣམ་པར་ཤེས་པ་ལྷ་དང་བླ་མ་དབྱེར་མེད་པའི་བྱིན་རླབས་ཀྱིས་སྐྲག་དངངས་དང་བྲེལ་བ་མེད་ཅིང་བདེ་བ་ཆེན་པོའི་ཁྱབ་པས་བག་ཕེབ་པར་ཆོས་ཉན་པར་བསམ༔ ཞེས་པའི་མཐར་ ཧཱུྃ༔ ཚེ་འདས་ལུས་བརྗེས་༴ དེ་ནས་ཁྲུས་དང་དུག་ཕྱུང་གྲུབ༔ དེ་རྗེས་ཆོས་བཤད་ལོ་རྒྱུས་ནི༔ འོ་ནམ་མཁའ་དང་མཉམ་པའི་སེམས་ཅན་ཐམས་ཅད་ཟུང་འཇུག་གདོད་མའི་མགོན་པོའི་གོ་འཕང་ལ་དཀྲི་བར་བྱ༔ དེའི་ཆེད་དུ་བཅོམ་ལྡམ་འདས་ཞི་ཁྲོ་རབ་འབྱམས་ཀྱི་དཀྱིལ་འཁོར་དུ་འཇུག་པར་བགྱིའོ་སྙམ་དུ་སེམས་བསྐྱེད་འཚལ༔ འདི་ལའང་ཚེ་ཁྲུས་གནས་གསུམ་གྱི་དགོངས་པས་རིགས་དྲུག་གི་གནས་ནས་དྲངས་པས་བསྒྲིབས་པ་གཏོར་བའམ་དྲི་མ་འཁྲུ་བའི་དབང་གི་རིམ་པའི་ལོ་རྒྱུས་དང་༔ སྐུ་གསུང་ཐུགས་རྡོ་རྗེའི་ཡེ་ཤེས་བཞིའམ་སྐུ་བཞིའི་གོ་འཕང་གི་ཆོས་རྒྱུད་ལ་འཇོག་པ་སྟེ་བསྐལ་བ་བླུགས་པའི་དབང་གི་ལོ་རྒྱུས་ལས༔ དང་པོའི་རྣམ་གྲངས་ཀྱི་ནང་ཚན་ལོ་རྒྱུས་ལ༔ སྔོན་བྱུང་གི་དུས་ན་མི་མཇེད་འཇིག་རྟེན་གྱི་ཁམས་འདིར་བྲམ་ཟེ་དུང་གི་ཕྲེང་བ་ཅན་ཞེས་བྱ་བ་བྱང་ཆུབ་སེམས་དཔའི་རིགས་ཅན་ཤེས་བྱའི་གནས་ལ་མཁས་པའི་ཕུལ་བྱུང་ཆེན་པོ་ཞིག་བས་མཐའི་དུར་ཁྲོད་ཀྱི་གནས་ན་བསྒྲུབ་པ་ཉམས་སུ་བླངས་ཤིང་བཞུགས་པ་ལ༔ ཡུལ་ཁམས་དེའི་རྒྱལ་པོའི་བུའི་སློབ་སྦྱོངས་རྫོགས་པར་བྱས་མཐར༔ ད་ནི་བྲམ་ཟེ་འདི་མ་གཏོགས་ངས་གོང་ན་སུ་ཡང་མེད་པས༔ འདིའང་གནོན་པར་སེམས་པའི་བསམ་ངན་གྱིས་གནས་པ་ན༔ དུང་ཕྲེང་ཅན་ལ་མཁའ་འགྲོའི་ལུང་བསྟན་ནས་བྲོས་ཤིག་པ་ལས༔ བསྒྲུབ་པ་གལ་ཆེན་དུ་མཛད་དེ་བཞུགས་པ་ན་རེ་ཞིག་གི་ཚེ་རྒྱལ་བུའི་བྲམ་ཟེ་མགྲོན་དུ་བོས་ནས་མྱོས་ཆང་བླུད་དེ་མིག་ཁབ་ཀྱིས་གཙགས༔ ལྕེ་ལྕགས་ཀྱུའི་དྲངས་ཏེ་སྤུ་གྲིའི་བཅད༔ ལུས་རུས་སྦལ་གྱི་ཁྲག་གིས་བྱུག༔ བུད་མེད་མི་གཙང་བས་ལུས་བརྫི་བཅག་མཉེ་གསུམ་བྱས༔ རྐང་ལག་མཚོན་གྱིས་བཅད་དེ་བཞག་པ་ན༔ བྲམ་ཟེ་དྲན་ཉམས་ལས་སླར་སོས་པས༔ བསམ་མནོར་ ༼ དཔྱད་ ༽ འདི་སྔོན་ལས་སམ་འཕྲལ་རྐྱེན་གང་ཡིན་ཞེས་བརྟབས་བཞིན་སྐྱེས་པ་ན་མཉམ་གཞག་གི་ངོ་ནས་བལྟས་པས༔ རྒྱལ་བུའི་ཕྲག་དོག་ཏུ་རིག་ནས་སེམས་འཁྲུགས་ཏེ༔ ཀྱེ་མ་ཀྱེ་ཧུད་ལོ་ཟླ་མང་པོར་རིག་པའི་གནས་ལ་མཁས་པར་བྱས་པའི་ཕན་ལན་གནོད་འཇལ་བྱེད་པ་ཁྱོད་ཀྱང་སྐྱེ་བ་འདིར་ཚེ་ཐུང་ནད་མང་ལུས་གཟིར་ལ༔ ཤི་མ་ཐག་ཏུ་སེམས་ཅན་ལུས་སྲུལ་པོ༔ དམུས་ལོང་༔ ལྐུགས་པ༔ མཛེ་ལྷོག་གི་ཤ་བཀྲ༔ བས་བལྡགས༔ ཆུ་བུར་དང་༔ རྐང་ལག་ཞ་འཁུམ༔ དབུལ་པོ་ཉམ་ཐག་ལུས་ལ་ཤ་ཟའི་ཚང་བཅས་ཤིང་སྡུག་བསྔལ་བར་སྐྱེས༔ དེ་ནས་ཤི་མ་ཐག་ཏུ་དམྱལ་ཁམས་ཁ་འཁོར་དུ་འགྲིམ་པ་དང་༔ དེ་ལས་ཐར་ནས་ཀྱང་རིགས་དྲུག་རིམ་གྱིས་འགྲིམ་པ་དང་༔ སྐྱེ་བ་ཐམས་ཅད་དུ་འཕགས་པའི་ཞལ་མི་མཐོང་བ་དང་༔ བྱང་ཆུབ་ཀྱི་མྱུ་གུ་སྔོ་སྐམ་དུ་གྱུར་ཅིག་ཞེས་དམོད་པ་བོར་བས་ཤི་ནས་ལུས་སྲུལ་པོ་དང་༔ དེ་མཐར་དམྱལ་བར་སྡུག་བསྔལ་བ་ལས་ཕྱོགས་བཅུའི་རྒྱལ་བ་སྲས་བཅས་ཀྱི་རྐྱེན་དང་འཕྲད་པའི་ཐུགས་རྗེ་སྐྱེས་ནས་ཀུན་བཟང་དང་སྣང་མཛད་ཀྱི་ཐུགས་ལས་རྡོར་སེམས་དང་ཕྱག་རྡོར་གཉིས་སྤྲུལ་ཏེ་འགྱོད་ཚངས་ཀྱིས་བཤགས་པའི་རྒྱལ་པོ་ན་རཀ་དོང་སྤྲུགས་སྒྲོགས་ཤིག༔ དེའི་ཐར་པའི་མྱུ་གུ་སྨིན་པར་འགྱུར་རོ༔ ཞེས་བསྐུལ་ཞིང་མངག་པས༔ དེ་གཉིས་ཀའི་གསང་སྔགས་དྲུག་གི་འོད་ཟེར་གྱིས་དྲན་པ་རྣམ་གསུམ་གཡོས་ནས་འགྱོད་པ་སྐྱེས་པ་ན་སྨྲེ་སྔགས་ཀྱིས་གསོལ་བ་བཏབས་པས༔ རྡོ་རྗེ་སེམས་དཔས་འགྱོད་བཤགས་བསྒྲགས་བཞིན་རིམ་པར་བུམ་སོགས་ལྷ་དབང་བསྐུར་བ་ན་དམྱལ་བ་ནས་དྲངས་ཏེ་ཡི་དྭགས༔ དེ་ལས་གོར་མོ་རྡོའི་འབུ་སོགས་བྱོལ་སོང་རིགས་བཞི་ཀུན་ཏུ་སྐྱེ་བ་དང་༔ དེ་ལས་ཀྱང་ལྷ་མ་ཡིན་སྒྲ་གཅན་ནག་པོ༔ ལྷའི་གནས་སུ་བྲམ་ཟེ་དགེ་བའི་ངང་ཚུལ་ཅན་ལྷ་མོ་བདུན་དང་བརྩེ་བ་ལས༔ མིའི་གནས་སུ་དྲངས་ཏེ་རིག་པའི་བློ་ཅན་དེ་ལ་དབང་བསྐུར་ནས་རིག་འཛིན་གྱི་གྲལ་དུ་འཁོད་པ་ཡིན་ནོ༔ དེ་ལས་གཞན་ཡང་ཐར་བ་ནག་པོའི་སློབ་དཔོན་དང་མཆེད་ཀྱི་དམ་ཚིག་ཉམས༔ གསང་སྔགས་ལོག་པར་སྤྱད་པས་རིགས་དྲུག་འགྲིམ་ནས་མཐར་འབྲས་བུ་ཆེ་བ་མན་ཆད་དབང་དུ་བསྡུས་ཤིང་སྲིད་གསུམ་འཇོམས་པའི་གཤེད་པོར་གྱུར་བའི་ཕུང་ཆེན་གཡོས་པ་ན༔ ཐུགས་རྗེ་སྤྲུལ་པའི་ཁྲོ་བོའི་ཚོགས་ཆེན་པོའི་རྔམ་པའི་བརྟུལ་ཞུགས་ཀྱིས་བརླིང་སྤྱོད་ཟབ་མོའི་འདུལ་ཞིང་༔ དེ་མ་ཐག་ལུང་བསྟན་ཐོབ་པའི་བྱིན་རླབས་ངོ་མཚར་ཕུལ་དུ་བྱུང་བའང་ལྷ་ཚོགས་འདི་དག་གི་རྣམ་རོལ་ལས་གཞན་མིན་པའི་ཕྱིར༔ སྐལ་ལྡན་ཁྱོད་ཀྱང་དེ་ལྟ་བུའི་ངང་ཚུལ་གྱིས་རྗེས་སུ་འཛིན་པའི་ཐབས་ཡངས་པ་རྡོ་རྗེའི་ཐེག་པ་ལ༔ རིང་བརྒྱུད་བཀའ་མ༔ ཉེ་བརྒྱུད་གཏེར་མ༔ བྱིན་རླབས་དག་སྣང་མ་སྟེ་གསུམ་ལས་འདིར་ནི་དཔལ་མཆོག་དང་པོའི་རྒྱུད་ལས༔ རྒྱུད་དང་རྒྱུད་ཀྱི་རྒྱལ་པོ་གང་༔ ཕྱག་ན་རྡོ་རྗེ་ཁྱོད་ཉིད་ཀྱིས༔ གཏེར་ནས་གཏེར་དུ་བྱུང་སྟེ་བསྩལ༔ ཞེས་དང་ཆུ་ཀླུང་རོལ་པའི་རྒྱུད་ལས༔ ང་ཡི་བསྟན་པ་ཐུགས་ཀྱི་གསང་༔ ཐུགས་ནས་ཐུགས་ཀྱི་གཏེར་དུ་སྦ༔ ཡང་ན་ས་ཡི་སྙིང་པོར་སྦ༔ ཅི་ཕྱིར་མུ་སྟེགས་ཅན་མགོ་རྒོད༔ ངེས་དོན་དཀྲུགས་པར་འགྱུར་ཏ་རེ༔ ཞེས་པའི་ལུང་གི་ཚུལ་ལྟ་བ་བཞིན་གྱི་གཏེར་སྟོན་ ༼ ག་གེ་མོའི་ ༽ གཏེར་བྱོན་ཞི་ཁྲོ་༼ མཚན་འདི་ཞེས་ཟེར་བའི་༽གཞན་ཕན་རྗེས་འཛིན་གྱི་ལུང་འདིའི་རྗེས་སུ་འཛིན་པ་ཡིན་པས་གསོལ་བ་འདི་ལྟར་དུ་ཐོབ་ཤིག །ཅེས་བྱའོ༔